བཅུ་གཉིས་པ། ཏིང་ངེ་འཛིན་ལ་རྗེས་སུ་སློབ་པའི་ལེའུ།
གཞོན་ནུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ཀྱི་ངོ་བོ་ཉིད་ཤེས་པ་དེའི་ཡོན་ཏན་དང་ཕན་ཡོན་དེ་ལྟ་བུར་འགྱུར་རོ། །དེ་བཞིན་གཤེགས་པའི་ཡོན་ཏན་དང་བསྔགས་པ་ཡང་དག་པར་སྨྲའོ། །དེ་བཞིན་གཤེགས་པ་ལ་ཡང་དག་པ་མ་ཡིན་པ་དང་མེད་པས་མི་སྐུར་ཏོ། །དེ་ཅིའི་ཕྱིར་ཞེ་ན། ཆོས་གང་གིས་དེ་བཞིན་གཤེགས་པར་རབ་ཏུ་དབྱེ་བའི་ཆོས་ཉིད་དེ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཤིང་། སངས་རྒྱས་ཀྱི་ཡོན་ཏན་མཐའ་ཡས་པར་རབ་ཏུ་ཤེས་སོ། །དེ་ཅིའི་ཕྱིར་ཞེ་ན། གཞོན་ནུ་སངས་རྒྱས་ཀྱི་ཡོན་ཏན་ནི་མཐའ་ཡས་ཏེ། བསམ་གྱིས་མི་ཁྱབ་ཅིང་བསམ་པ་དང་བྲལ་བས་ན། དེ་དག་བསམ་པའམ་དཔག་པར་མི་ནུས་སོ། །དེ་ཅིའི་ཕྱིར་ཞེ་ན། གཞོན་ནུ་སེམས་ཀྱི་ངོ་བོ་ཉིད་ནི་གཟུགས་མེད་པ་བསྟན་དུ་མེད་པ་སྟེ། གཞོན་ནུ་དེ་ལྟར་སེམས་ཀྱི་ངོ་བོ་ཉིད་གང་ཡིན་པ་སངས་རྒྱས་ཀྱི་ཡོན་ཏན་གྱི་ངོ་བོ་ཉིད་ཀྱང་དེ་ཡིན་ནོ། །སངས་རྒྱས་ཀྱི་ཡོན་ཏན་གྱི་ངོ་བོ་ཉིད་གང་ཡིན་པ་དེ་བཞིན་གཤེགས་པའི་ངོ་བོ་ཉིད་ཀྱང་དེ་ཡིན་ནོ། །དེ་བཞིན་གཤེགས་པའི་ངོ་བོ་ཉིད་གང་ཡིན་པ་ཆོས་ཐམས་ཅད་ཀྱི་ངོ་བོ་ཉིད་ཀྱང་དེ་ཡིན་ཏེ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་ལྟར་ཡོན་ཏན་ཐམས་ཅད་ཀྱི་ངོ་བོ་ཉིད་དོན་གཅིག་ཏུ་བསྟན་པ། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་དེ་ནི་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡིད་ཀྱིས་ངེས་པར་བརྟགས་པ་ཞེས་བྱ་སྟེ། འབྱུང་བ་ལ་མཁས་ཤིང་ཁམས་གསུམ་ལས་འབྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཇི་ལྟ་བ་བཞིན་དུ་ལྟ་ཞིང་ལོག་པར་མི་སྨྲ། རྣམ་པ་གཞན་དུ་མི་
སྨྲ། ཇི་སྐད་སྨྲ་བ་དེ་བཞིན་བྱེད། ཁམས་གསུམ་ལ་མ་ཆགས་ཤིང་ཁམས་གསུམ་ལས་ཡང་དག་པར་འདས་ཏེ། འདོད་པའི་ས་དང་གཟུགས་ཀྱི་ས་དང་གཟུགས་མེད་པའི་ས་དང་ཉོན་མོངས་པའི་ས་དང་མིང་གི་ས་དང་སྒྲའི་ས་ལས་འདས་ཤིང་ཡི་གེ་དང་ཆོས་ཀྱི་ཚུལ་ལ་མཁས་པ། ཡེ་ཤེས་མི་ཟད་པར་བསྒོམས་པ། བརྗོད་དུ་མེད་པའི་ཆོས་རྟོགས་པ། ཡི་གེ་ཤེས་པ། ཡི་གེ་ལ་མཁས་པ། ཡི་གེ་དང་ཚིག་རབ་ཏུ་དབྱེ་བ་ཤེས་པ་ལ་མཁས་པ། ཡི་གེ་དང་ཚིག་རབ་ཏུ་དབྱེ་བ་རྒྱས་པ་ཤེས་པ་ལ་མཁས་པ། ཆོས་ཐམས་ཅད་རབ་ཏུ་དབྱེ་བ་ཤེས་པ་ལ་མཁས་པ། ཆོས་ཐམས་ཅད་རབ་ཏུ་དབྱེ་བ་རྒྱས་པ་ཤེས་པ་ལ་མཁས་པ། ཆོས་ཐམས་ཅད་རྣམ་པར་དགོད་པ་ལ་མཁས་པ་ཡིན་ཏེ། གཏན་ལ་དབབ་པའི་བློ་དང་ལྡན་ཞིང་། བདུད་སྡིག་ཅན་དང་བདུད་ཀྱི་རིས་ཀྱི་ལྷ་རྣམས་ཀྱིས་ཟིལ་གྱིས་མི་ནོན་ཏོ། །ཆོས་ཀྱི་རྣམ་གྲངས་འདི་བཤད་པའི་ཚེ་ལྷ་དང་མིའི་སྐྱེ་དགུ་སྔོན་ཡོངས་སུ་སྦྱང་བ་བྱས་པ་ཁྲག་ཁྲིག་ཕྲག་དགུ་བཅུ་རྩ་བརྒྱད་ཀྱིས་བྱེ་བ་བརྒྱ་སྟོང་འཁྱིལ་པའི་གཟུངས་དང་སྒྲིབ་པ་མེད་པའི་མཐའ་དང་ཆོས་རྣམ་པར་མཐོང་བའི་བཟོད་པ་སོ་སོར་ཐོབ་ནས་བཅོམ་ལྡན་འདས་ཀྱིས་དེ་དག་ཐམས་ཅད་ལ་བསྐལ་པ་གྲངས་མེད་པ་བརྒྱ་སྟོང་ཕྲག་བཞི་བཅུ་རྩ་བརྒྱད་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ་ཐམས་ཅད་ཀྱང་མིང་ནི་ཐ་དད། ཚེའི་ཚད་ནི་གཅིག་པར་སངས་རྒྱས་ཀྱི་ཞིང་སོ་སོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ་ཞེས་ལུང་བསྟན་ཏོ། །དེ་ལ་འདི་སྐད་ཅེས་བྱ་སྟེ། བྱང་ཆུབ་སེམས་དཔའ་བློ་དང་ལྡན་པ་གང་། །བླ་ན་མེད་པའི་བྱང་ཆུབ་རབ་ཚོལ་ཞིང་། །ཆོས་དང་དེ་བཞིན་དོན་ལ་མཁས་པ་དེ། །ཆོས་ཀྱི་ངོ་བོ་ཉིད་ལ་སྤྱོད་པ་ཡིན། །ཡང་དག་མ་ཡིན་པ་ཡི་ཚིག་མི་སྨྲ། །སངས་རྒྱས་ཡོན་ཏན་བྱེ་བྲག་ཅི་འདྲ་བ། །རྒྱལ་བ་རྣམས་ཀྱི་ཆོས་ནི་དེ་ཡིན་ཏེ། །དཔའ་བོ་ཐེ་ཙོམ་བྲལ་བས་ཤིན་ཏུ་རིག །ཆོས་ཀུན་དོན་གཅིག་པར་ནི་རབ་ཤེས་ཏེ། །མགོ་གཅིག་ཏུ་ནི་སྟོང་པ་ཉིད་ཡིན་པས། །དེ་དག་ལ་ནི་ཐ་དད་གྱུར་པ་མེད། །དོན་གཅིག་ལ་ནི་ཤིན་ཏུ་བསླབས་པ་ཡིན། །རྟོག་པ་མེད་ཅིང་རྣམ་རྟོག་མེད་པ་དང་། །
དམིགས་པ་མེད་པར་བློ་གྲོས་ལྡན་པས་ཤེས། ། ཟད་པ་དང་ནི་མི་ཟད་འདུ་ཤེས་ཀྱང་། །མ་ལུས་པར་ནི་ཐམས་ཅད་རབ་ཏུ་སྤངས། །དེ་ནི་ཆོས་སྐུ་མི་ཡི་སེང་གེ་ལ། །སྟོབས་བཅུ་ལྡན་པ་གཟུགས་སུ་མི་ལྟ་ཞིང་། །དེ་ནི་ཕྱིན་ཅི་ལོག་ཀུན་རབ་སྤངས་པས། །མཚན་རྣམས་སུ་ཡང་ལྟ་བར་ཡོང་མི་འགྱུར། །ཆོས་རྣམས་འདི་དག་བསམ་མི་ཁྱབ། །བསམ་དང་བྲལ་ཞིང་རང་བཞིན་ཞི། །དེ་ལྟ་བུར་ནི་རབ་ཤེས་ནས། །རྐང་གཉིས་གཙོ་བོ་སངས་རྒྱས་མཐོང་། །ཇི་ལྟར་བདག་གི་འདུ་ཤེས་རིག །དེ་བཞིན་ཀུན་ཏུ་བློ་ཡང་གཏོང་། །ཆོས་ཀུན་དེ་ཡི་རང་བཞིན་ཏེ། །རྣམ་པར་དག་པ་ནམ་མཁའ་བཞིན། །ཡིད་ལ་ནམས་ཀྱང་འབྱུང་བ་མེད། །ཆོས་རྣམས་ཐམས་ཅད་ཤེས་པས་ན། །ཁམས་གསུམ་ལས་ནི་རྣམ་པར་གྲོལ། །དེ་ལ་སྨོན་ལམ་འདེབས་པ་མེད། །ཡང་དག་ཇི་བཞིན་དུ་ནི་མཐོང་གྱུར་ཅིང་། །མ་ལོག་ཚིག་སྨྲ་རྣམ་པ་གཞན་མི་སྨྲ། །དེ་ཡི་ཚིག་དང་བརྗོད་པ་ཐམས་ཅད་ཀྱང་། །རྒྱལ་བ་དག་གི་མཐུ་ཡིས་འབྱུང་བར་འགྱུར། །འདོད་པའི་ས་དང་ཉོན་མོངས་ས་རྣམས་དང་། །གཟུགས་དང་གཟུགས་མེད་ལས་ཀྱང་ཤིན་ཏུ་འདའ། །ཆོས་རྣམས་ལ་ནི་ཡིད་ཀྱང་མ་ཆགས་ཤིང་། །རབ་ཏུ་དགའ་བས་འགྲོ་ལ་ཕན་པར་སྤྱོད། །མིང་གི་ས་ལས་འདས་ཤིང་སྒྲ་ཡང་ཤེས། །ངོ་བོ་ཉིད་ཀྱིས་གསོག་ཏུ་གྱུར་པ་སྟེ། །ཇི་སྲིད་ཙམ་དུ་ཡུན་རིང་བརྗོད་ན་ཡང་། །དེ་ལ་གནས་པར་བྱེད་པ་ཡོད་མ་ཡིན། །འདུ་ཤེས་རབ་ཏུ་རྒྱུ་བ་མེད། །ལྟ་བ་ལོག་པ་ཀུན་ནས་ཟད། །བློ་ཡང་ཤིན་ཏུ་གཏན་ལ་ཕབ། །བརྟན་པ་ནམ་མཁའ་འདྲ་བར་སྤྱོད། །གལ་ཏེ་བདུད་བྱེ་ཁྲག་ཁྲིག་རྣམས། །དེ་ཡི་སེམས་དཀྲུགས་ཕྱིར་འོངས་ཀྱང་། །བདུད་རྣམས་ཐམས་ཅད་ཟིལ་མནན་ཏེ། །དེ་ཡི་དབང་དུ་འགྲོ་མི་འགྱུར། །བདུད་ཀྱི་རྒྱ་མོ་རྣམས་སྤངས་ཏེ། །ཚུལ་ཁྲིམས་ཡོངས་དག་གདུང་བ་མེད། །བསམ་གཏན་དག་གི་བདེ་ལ་མོས། །འཇིག་རྟེན་སྟོང་པར་རབ་ཏུ་ཤེས། །འཇིག་རྟེན་ཕུང་པོར་སྨྲས་པ་ཡང་། །དེ་དག་སྟོང་པར་རབ་ཏུ་རིག །སྐྱེ་བ་མེད་ཅིང་འགག་མེད་པས། །ཆོས་རྣམས་ཐམས་ཅད་ནམ་མཁའ་བཞིན། །དེ་དག་བདག་ཉིད་གཏོང་བྱེད་ཀྱི། །སྟོབས་བཅུའི་ཚུལ་ཁྲིམས་ཐོས་
མི་གཏོང་། །དེ་ནི་ཚུལ་ཁྲིམས་ཕ་རོལ་ཕྱིན། ། གར་སྨོན་པར་ཡང་སྐྱེ་བར་འགྱུར། །སངས་རྒྱས་ཞིང་དུ་རྣམ་པར་འགྲོ། །སངས་རྒྱས་ཁྲག་ཁྲིག་མང་པོ་མཐོང་། །མཐོ་རིས་དག་ནི་མི་འདོད་དེ། །སྨོན་ལམ་རྣམས་ནི་ཡོངས་མི་གཏོང་། །ཆོས་ཉིད་དག་ནི་དེ་སྤྱོད་ཚེ། །སྐད་ཅིག་བརྩོན་འགྲུས་ཉམས་མི་བྱེད། །ཕྱོགས་བཅུ་ཡི་ནི་སངས་རྒྱས་ཀྱིས། །དེ་ནི་ཤིན་ཏུ་བསྟོད་པ་ཡིན། །དེ་ཕྱིར་གཞོན་ནུ་ཏིང་འཛིན་ལས། །ཆོས་འདི་དག་ནི་རབ་ཐོབ་ནས། །ཤེས་ཀྱི་ཁེ་ནི་རྣམ་སྤོངས་ལ། །སྐྱེ་བོ་མང་ལ་ཆོས་རབ་སྟོན། །སངས་རྒྱས་ཡོན་ཏན་མང་ལྡན་པ། །རང་འབྱུང་འགྱུར་བར་གང་འདོད་པས། །དགེ་བ་འདི་ལ་རབ་བསླབས་ན། །སྟོབས་བཅུ་འཆང་བ་སངས་རྒྱས་འགྱུར། །ཏིང་ངེ་འཛིན་ལ་རྗེས་སུ་སློབ་པའི་ལེའུ་སྟེ་བཅུ་གཉིས་པའོ།། །།