བཅུ་གསུམ་པ། ཏིང་ངེ་འཛིན་ངེས་པར་བསྟན་པའི་ལེའུ།
དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། དེ་ལྟ་བས་ན་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཏིང་ངེ་འཛིན་ངེས་པར་བསྟན་པ་ལ་མཁས་པར་བྱའོ། །གཞོན་ནུ་དེ་ལ་ཏིང་ངེ་འཛིན་ངེས་པར་བསྟན་པ་གང་ཞེ་ན། གང་ཆོས་ཐམས་ཅད་ཀྱི་ཇི་ལྟ་བ་བཞིན་ཉིད་དང་མཉམ་པ་ཉིད་མི་མཉམ་པ་མེད་པ་དང་མི་རྟོག་པ། རྣམ་པར་མི་རྟོག་པ། རྣམ་པར་མ་བསྒྲུབས་པ། ཀུན་ནས་སློང་བ་མེད་པ། སྐྱེ་བ་མེད་པ། འགག་པ་མེད་པ། རྟོག་པ་དང་རྣམ་པར་རྟོག་པ་དང་ཀུན་ནས་རྟོག་པ་ཡོངས་སུ་ཆད་པ། སེམས་ཀྱི་དམིགས་པ་མེད་པ། ཡིད་ལ་བྱེད་པ་མེད་པ། རྣམ་པར་རིག་པ་ཡོངས་སུ་ཆད་པ། འདོད་ཆགས་དང་ཞེ་སྡང་དང་གཏི་མུག་ཡོངས་སུ་ཆད་པ། མཐའ་མེད་པ། མཐར་ཡིད་ལ་བྱེད་པ་དང་བྲལ་བ། ཡིད་ལ་བྱེད་པ་ཡོངས་སུ་ཆད་པ། ཕུང་པོ་དང་ཁམས་དང་སྐྱེ་མཆེད་ཀྱི་ངོ་བོ་ཉིད་ཤེས་པ། དྲན་པ་དང་བློ་གྲོས་དང་རྟོགས་པ་དང་ཁྲེལ་ཡོད་པ་དང་བརྟན་པ་དང་ཆོ་ག་དང་སྤྱོད་ཡུལ་དང་ནན་ཏན་གྱི་གནས་སུ་གྱུར་པ། ཉོན་མོངས་པ་མེད་པའི་ས། ཞི་བའི་ས་སྤྲོས་པ་ཐམས་ཅད་ཡོངས་སུ་ཆད་པ། བྱང་ཆུབ་སེམས་དཔའ་ཐམས་ཅད་ཀྱི་བསླབ་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་
ཡུལ། ཡོན་ཏན་ཐམས་ཅད་ཡོངས་སུ་རྫོགས་པ་འདི་ནི་གཞོན་ནུ་ཏིང་ངེ་འཛིན་ངེས་པར་བསྟན་པ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ངེས་པར་བསྟན་པ་འདི་ལ་གནས་པ་ནི་ཏིང་ངེ་འཛིན་དང་མ་བྲལ་བ་ཡིན། སེམས་འཁྲུལ་པ་མེད་པ་ཡིན། སྙིང་རྗེ་ཆེན་པོ་དང་ལྡན་ཞིང་སེམས་ཅན་དཔག་ཏུ་མེད་པའི་དོན་བྱེད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཏིང་འཛིན་མཉམ་པ་མེད་པའི་ས། །ཤིན་ཏུ་མཐོང་དཀའ་ཕྲ་ཞིང་ཞི། །འདུ་ཤེས་ཐམས་ཅད་བཅོམ་པ་སྟེ། །དེ་ཕྱིར་ཏིང་ངེ་འཛིན་ཅེས་བྱ། །རྟོག་པ་མེད་ཅིང་རྣམ་རྟོག་མེད། །གཟུང་བ་མེད་ཅིང་བསྟན་དུ་མེད། །སེམས་ཀྱང་དམིགས་པ་མེད་པ་སྟེ། །དེ་ཕྱིར་ཏིང་ངེ་འཛིན་ཅེས་བྱ། །ནམ་ཞིག་མཉམ་པར་གཞག་གྱུར་ཏེ། །ཆོས་ཀུན་ལ་ནི་རློམ་སེམས་མེད། །རློམ་སེམས་མེད་པ་ཇི་བཞིན་པ། །དེ་ནི་ཏིང་ངེ་འཛིན་ཅེས་བསྒྲགས། །ཆོས་ནི་རྡུལ་ཙམ་ཡོང་མེད་དེ། །རྡུལ་ཅེས་བྱ་བའང་ཡོད་མ་ཡིན། །ཆོས་རྣམས་དམིགས་སུ་མེད་པ་སྟེ། །དེ་ཕྱིར་ཏིང་ངེ་འཛིན་ཅེས་བྱ། །སེམས་ཀྱི་དམིགས་པ་མེད་པ་ཡང་། །དེ་ནི་རྣམ་པར་རྟོག་ཅེས་བྱ། །ཆོས་དེ་རྣམ་པར་མ་བརྟགས་པ། །དེ་ལྟར་ཏིང་འཛིན་ཤེས་པར་གྱིས། །སྒྲ་ཡིས་དོན་རྣམས་རབ་བསྟན་ཏེ། །སྒྲ་དེ་ཉིད་ཀྱང་དངོས་པོ་མེད། །སྒྲ་ནི་བྲག་ཅ་ལྟ་བུ་སྟེ། །བར་སྣང་དག་གི་ནམ་མཁའ་བཞིན། །ཆོས་འདི་རྣམས་ནི་མི་གནས་ཏེ། །འདི་དག་ལ་ནི་གནས་མི་དམིགས། །མི་གནས་པ་ནི་གནས་ཀྱི་སྒྲར། །ངོ་བོ་ཉིད་ཀྱིས་མི་རྙེད་དོ། །འགྲོ་ཞིང་འཆི་འཕོར་བརྗོད་པ་ཡི། །དེ་ལྟ་བུ་ཡི་འགྲོ་བ་མེད། །འགྲོ་བ་མེད་པ་འགྲོ་བའི་སྒྲས། །ཏིང་ངེ་འཛིན་དུ་དེ་ཕྱིར་གསུངས། །མཉམ་གཞག་མ་ཡིན་དེ་ནི་རློམ་སེམས་བརྗོད། །མཉམ་གཞག་འདི་ཡང་རློམ་སེམས་གཉིས་པ་སྟེ། །རློམ་སེམས་མེད་པར་བྱང་ཆུབ་རིམ་པར་སྤྱོད། །དྲན་པ་རློམ་སེམས་མེད་པ་བྱང་ཆུབ་མཆོག །མཉམ་དང་མི་མཉམ་ཞི་བ་སངས་རྒྱས་ས། །ཞི་གནས་ལྷག་མཐོང་མཚན་མེད་འདི་ཡིན་ཏེ། །ཞི་བ་སངས་རྒྱས་ས་འདི་བསྟེན་བྱས་ན། །ཏིང་འཛིན་ཞི་བ་འདི་ལ་དེ་བརྩོན་ཡིན། །དོན་གྱི་རྣམ་པར་རིག་པ་འཇུག་པ་ལ། །ཡི་གེ་དག་གིས་འཇུག་
པར་མི་ནུས་ཏེ། །སྒྲ་དབྱངས་ཐམས་ཅད་རྣམ་པར་སྤངས་ནས་ནི། །མཉམ་པར་བཞག་འགྱུར་དེ་ལ་རློམ་སེམས་མེད། །བྱང་ཆུབ་སེམས་དཔའ་གང་དག་ཏིང་འཛིན་འདི། །ཇི་ལྟར་བཤད་བཞིན་གནས་ཤིང་བརྩོན་བྱེད་ན། །གལ་ཏེ་ཞིང་འདི་བསྐལ་པས་ཚིག་གྱུར་ཀྱང་། །རི་མཆོག་དབུས་སུ་ཞུགས་པས་མེས་མི་ཚིག །བསྐལ་པ་བརྒྱ་ཕྲག་མང་པོར་རབ་བསྲེགས་ཀྱང་། །ནམ་མཁའ་སྔོན་ཆད་ནམ་ཡང་མི་འཚིག་བཞིན། །ཆོས་རྣམས་ནམ་མཁའ་མཚུངས་པར་རྣམ་རིག་པས། །དེ་ནི་མེ་ཡི་ནང་དུ་ཡོང་མི་འཚིག །གལ་ཏེ་སངས་རྒྱས་ཞིང་རྣམས་འབར་གྱུར་ལ། །འབར་བ་འདི་དག་མ་ལུས་ཞི་ཤིག་ཅེས། །ཏིང་འཛིན་གནས་ནས་སྨོན་ལམ་འདི་བཏབ་ན། །ས་རྣམས་ཞིག་ཀྱང་དེ་ལ་འགྱུར་བ་མེད། །དེ་ནི་རྫུ་འཕྲུལ་སྟོབས་ཀྱང་མཐའ་ཡས་འགྱུར། །ནམ་མཁའ་ལ་ཡང་ཐོགས་པ་མེད་པར་འགྲོ། །རྗེས་སུ་བསྟན་བཞིན་ཏིང་འཛིན་གནས་པ་ནི། །བྱང་ཆུབ་སེམས་དཔའི་ཡོན་ཏན་འདི་དག་མྱོང་། །སྐྱེ་ཞིང་འཆི་འཕོར་དེ་འགྱུར་ཡང་། །སྐྱེ་བ་མེད་ཅིང་འཆི་འཕོ་མེད། །གང་གིས་དེ་ལྟར་རྣམ་རིག་པ། །དེ་ལ་ཏིང་འཛིན་རྙེད་མི་དཀའ། །འཆི་འཕོ་སྐྱེ་བ་མེད་པར་ནི། །འཇིག་རྟེན་མགོན་པོས་རབ་ཏུ་བཤད། །དེ་ལྟར་འཇིག་རྟེན་མགོན་རིག་ནས། །དེ་ཕྱིར་ཏིང་ངེ་འཛིན་ཀྱང་རིག །འཇིག་རྟེན་གྱིས་ནི་མ་གོས་ཤིང་། །འཇིག་རྟེན་ཆོས་ལ་མི་ཆགས་ཏེ། །ལུས་ནི་ཐོགས་པ་མེད་པར་ནི། །སངས་རྒྱས་ཞིང་དུ་འགྲོ་བར་བྱེད། །ཞིང་དག་ན་ནི་འཇིག་རྟེན་འདྲེན། །རྫོགས་པའི་སངས་རྒྱས་རྟག་ཏུ་མཐོང་། །སངས་རྒྱས་དག་གིས་ཞིང་བཤད་པ། །ཆོས་རྣམས་དེ་དག་དེར་ཡང་ཉན། །དེ་ལ་མི་ཤེས་ཡོང་མེད་དེ། །ཆོས་ཀྱི་དབྱིངས་ཀྱང་རབ་ཏུ་འཆད། །ཆོས་ཀྱི་རྣམ་པ་རྟག་ཏུ་རིག །དེ་ནི་ཆོས་ཀྱི་དབྱིངས་ཀྱི་ཚུལ། །བསྐལ་པ་བྱེ་བར་འཆད་སྟོན་ཀྱང་། །དེ་ཡི་སྤོབས་པ་ཟད་མི་འགྱུར། །བྱང་ཆུབ་སེམས་དཔའ་གཞན་མང་པོ། །མཁས་པ་དག་ཀྱང་སྤྲུལ་པར་བྱེད། །བྱང་ཆུབ་སེམས་དཔའ་སྤྲུལ་པ་ནི། །པད་མ་འདབ་མ་སྟོང་དག་ལ། །སྐྱིལ་མོ་ཀྲུང་བཅས་འདུག་པ་དག །ཞིང་ནས་ཞིང་དུ་འགྲོ་བར་བྱེད། །ཏིང་འཛིན་ཞི་བ་བསྒོམས་ནས་ནི། །གཟུངས་དང་མདོ་སྡེ་བཟང་པོ་
དང་། །མདོ་སྡེ་གཞན་ཡང་བྱེ་བ་དང་། །སངས་རྒྱས་བྱང་ཆུབ་རབ་ཏུ་སྟོན། །སེམས་ཅན་མང་པོ་བསམ་མི་ཁྱབ། །ཕྱིར་མི་ལྡོག་ལ་འགོད་པར་བྱེད། །སངས་རྒྱས་བྱང་ཆུབ་རབ་སྟོན་ཀྱང་། །སྤོབས་པ་དག་ནི་ཟད་མི་འགྱུར། །རིན་ཆེན་རྣམ་པར་བརྒྱན་པ་ཡི། །ཁང་པ་བརྩེགས་ཞུགས་དེ་འགྲོ་སྟེ། །དྲི་དང་ལྡན་པའི་མེ་ཏོག་གིས། །འདྲེན་པ་ལ་ཡང་མངོན་པར་འཐོར། །དྲི་དང་ལྡན་པའི་ཕྱེ་མས་ཀྱང་། །འདྲེན་པ་ལ་ནི་རབ་ཏུ་འཐོར། །དེ་དག་ཐམས་ཅད་བྱང་ཆུབ་ཕྱིར། །རྒྱ་ཆེ་བ་ཡི་མཆོད་པ་བྱེད། །བྱང་ཆུབ་སེམས་དཔའ་སྐྱོབ་པ་ཡི། །ཡོན་ཏན་དཔག་མེད་དེ་དག་ནི། །ནམ་ཞིག་ཉོན་མོངས་མེད་གྱུར་པ། །དེ་ཚེ་རྫུ་འཕྲུལ་དེ་དག་འཐོབ། །ཉོན་མོངས་དག་ནི་མི་སྐྱེ་ཞིང་། །དག་པ་དང་བ་འོད་གསལ་བ། །མི་འཁྲུགས་འདུས་མ་བྱས་པ་ནི། །བྱང་ཆུབ་སེམས་དཔའི་སྤྱོད་ཡུལ་ལོ། །རབ་ཏུ་ཞི་ཞིང་ཉེ་བར་ཞི། །ཉོན་མོངས་མེད་ཅིང་མྱ་ངན་བྲལ། །སྤྲོས་མེད་རྣམ་པར་མ་སྤྲོས་པ། །སྤྲོས་པ་དག་ལས་ཤིན་ཏུ་འདས། །ཡི་གེའི་སྤྱོད་པ་མེད་པ་ནི། །ཆོས་རྣམས་ཀུན་གྱི་མཚན་ཉིད་དེ། །དབྱངས་ཀྱིས་རིག་པར་དགའ་བས་ན། །དེ་ཕྱིར་ཏིང་ངེ་འཛིན་ཅེས་བྱ། །ཟད་མི་ཤེས་ཤིང་ཉེ་བར་ཞི། །ལྷུན་གྱིས་འགྲུབ་ཅིང་བསྟན་མེད་པ། །རྙོག་མེད་ཡང་དག་ཉིད་ཀྱི་མཐའ། །སངས་རྒྱས་ཀུན་གྱི་སྤྱོད་ཡུལ་ལོ། །འོང་དང་འགྲོ་བ་མེད་པ་དང་། །སྤྲོས་མེད་ལྷུན་གྱིས་གྲུབ་པ་ཡི། །ཆོས་རྣམས་ཀུན་གྱི་རང་བཞིན་ནི། །སངས་རྒྱས་ཀུན་གྱི་བསླབ་པ་སྟེ། །རྫོགས་པའི་སངས་རྒྱས་འདི་བསླབས་ནས། །ཡོན་ཏན་དག་གི་ཕ་རོལ་ཕྱིན། །ཚུ་རོལ་དང་ནི་ཕ་རོལ་མེད། །སྔོན་མཐའ་རྣམ་པར་མ་བརྟགས་ཏེ། །དེ་ཕྱིར་སངས་རྒྱས་དེ་དག་ཀུན། །ཡོན་ཏན་དག་གི་ཕ་རོལ་ཕྱིན། །འོང་དང་འགྲོ་བ་མེད་པ་དང་། །སྤྲོས་མེད་ལྷུན་གྱིས་གྲུབ་པ་ཡི། །ཆོས་ཀྱི་རང་བཞིན་མཁྱེན་ནས་ནི། །དེ་དག་དེ་ལས་ཕ་རོལ་ཕྱིན། །ཏིང་ངེ་འཛིན་ངེས་པར་བསྟན་པའི་ལེའུ་སྟེ་བཅུ་གསུམ་པའོ།། །།