བཅུ་བདུན་པ། སངས་རྒྱས་མང་པོའི་ཏིང་ངེ་འཛིན་གྱི་སྒོའི་ལེའུ།
དེ་ནས་གཏམ་འདི་མཐར་ཕྱིན་པར་གྱུར་པ་དང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དེ་ལྟར་འདུག་བཞིན་དུ་བཅོམ་ལྡན་འདས་ལ་ཡིད་ཀྱིས་ཚིགས་སུ་བཅད་པས་ཞུས་པ། རི་ཡི་རྒྱལ་པོ་བྱ་རྒོད་ཕུང་པོ་སྟེ། །རྟག་ཏུ་སངས་རྒྱས་གནས་པར་བདེ་གཤེགས་བཞུད། །འཇིག་རྟེན་སྒྲོན་མ་དེར་ཡང་གཤེགས་ནས་ནི། །ཁྱོད་ལ་བསམ་གྱིས་མི་ཁྱབ་མཆོད་པ་བགྱི། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱི་རྟོག་པ་ཐུགས་ཀྱིས་མཁྱེན་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་ཡིད་ཀྱིས་ཚིགས་སུ་བཅད་པས་བཏང་བ། རི་ཡི་རྒྱལ་པོར་རྒྱལ་བ་མངོན་གནས་པར། །མ་ཕམ་བདུད་རྣམས་ཕམ་བྱས་ཁྱོད་སོང་ཤིག །དེར་ནི་འགྲོ་བ་ཀུན་གྱི་དོན་ཆེན་ཡང་། །བླ་ན་མེད་པ་མྱུར་དུ་གྲུབ་པར་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་བཅོམ་ལྡན་འདས་ཀྱིས་ཡིད་ཀྱིས་ཚིགས་སུ་བཅད་པས་བཏང་བ་དང་། བཅོམ་ལྡན་འདས་ལ་ཡིད་ཀྱིས་ཕྱག་འཚལ། བཅོམ་ལྡན་འདས་ལ་ཡིད་ཀྱིས་ལན་གསུམ་བསྐོར་བ་བྱས་ནས་འཁོར་དེ་ནས་བྱུང་སྟེ་སངས་རྒྱས་མུ་མེད་པ་རྒྱ་མཚོའི་བྱེ་མ་སྙེད་ཀྱི་གནས་རིའི་རྒྱལ་པོ་བྱ་རྒོད་ཀྱི་ཕུང་པོ་མཆོད་རྟེན་ཆེན་པོ་གང་ན་ཡོད་པ་དེར་སོང་སྟེ་ཕྱིན་ནས་འདི་ལྟ་སྟེ། བཅོམ་ལྡན་འདས་ཀྱིས་ཡོངས་སུ་ལོངས་སྤྱད་པའི་ཕྱིར་དེའི་མོད་ལ་རིའི་རྒྱལ་པོ་བྱ་རྒོད་ཀྱི་ཕུང་པོ་མཉམ་ཞིང་ཡངས་པ་རྒྱ་ཆེ་བ། སྡོང་དུམ་དང་ཚེར་མ་དང་རྡོ་དང་གསེག་མ་དང་གྱོ་མོ་མེད་ཅིང་ཁོ་ར་ཁོར་ཡུག་ཀུན་རིན་པོ་ཆེ་སྣ་བདུན་དུ་བྱིན་གྱིས་བརླབས་ཏེ། ས་གཞི་རིན་པོ་ཆེ་ཨན་ད་རྙིལ་འབར་བ་བསམ་གྱིས་མི་ཁྱབ་ལ་དཔེ་མེད་པའི་ལྷའི་རྒྱན་ཐམས་ཅད་དང་རིན་པོ་ཆེས་བརྒྱན་པ། རིན་པོ་ཆེ་རྣམ་པ་སྣ་ཚོགས་གྲངས་མེད་པ་དུ་མའི་བཀོད་པས་རབ་ཏུ་སྤྲས་པ། དགའ་ལྡན་རིས་ཀྱི་ལྷའི་ན་བཟས་ཁྱིམ་གྱི་ཉེ་འཁོར་བརྒྱན་ཅིང་སྤུད་དེ། བདུག་སྤོས་
ཀྱི་སྣོད་སྣ་ཚོགས་ནས་ནི་བདུག་པ་འཐུལ་བར་བྱས། ཕྲེང་བ་དང་ལྡ་ལྡིས་ནི་བརྒྱན། མེ་ཏོག་སྣ་ཚོགས་ནི་བཀྲམ། ལྷའི་རོལ་མོའི་སྒྲ་དབྱངས་ནི་བསྒྲགས། རྒྱལ་མཚན་དང་བ་དན་དང་ལྷབ་ལྷུབ་བསྒྲེང་བས་ནི་གང་། ཁྱམས་ཀྱི་དཀྱིལ་འཁོར་དུ་ནི་བླ་རེ་བྲེས། འཁོར་གྱི་ཁྱམས་ཀྱི་དབུས་སུ་ནི་རིན་པོ་ཆེ་སྣ་བདུན་ལས་བྱས་པའི་ལྷའི་སེང་གེའི་ཁྲི་མངོན་པར་སྤྲུལ་ཏེ་རྒྱུ་སྤུན་ལས་མ་བྱས་པའི་གོས་ནི་བཏིང་། ཀ་ཙ་ལིན་དི་ལྟར་འཇམ་ཞིང་རེག་ན་བདེ་བ་དགའ་ལྡན་རིས་ཀྱི་ལྷའི་ན་བཟས་ནི་གཡོགས། སྟེང་དུ་སྙིང་པོ་ཕེག་ཚེར་ནི་བཏིང་། སྣམ་རྟེན་མཐའ་གཉིས་དམར་པོ་ནི་བཤམས། ཆུ་ཞེང་དང་འཕང་དུ་དཔག་ཚད་ཙམ་ཡོད་པ་བཙུགས་ཏེ། ཞབས་རྟེན་ནི་ལྷ་དང་མིའི་ལས་འདས་པ། འཛམ་བུའི་ཆུ་བོའི་གསེར་ལས་བྱས་པ། མུ་ཏིག་གི་དྲ་བས་གཡོགས་པ། རས་རིན་པོ་ཆེ་བཅོས་བུས་གཡོགས་པ། སེང་གེའི་ཁྲི་ལ་བཏགས་པའི་ལྷའི་རིན་པོ་ཆེའི་དྲིལ་བུ་ལས་ནི་སྒྲ་འཇམ་ཞིང་ཡིད་དུ་འོང་བ་གསལ་བར་འབྱུང་། ཕྱོགས་ཀུན་དུ་ནི་ནོར་བུ་རིན་པོ་ཆེ་ཆེན་པོས་སྣང་བར་གྱུར། །རིན་པོ་ཆེའི་གདུགས་ཆེན་པོ་རྩ་བ་ནི་བཻ་དཱུཪྱ་དྲི་མ་མེད་པའི་རིན་པོ་ཆེ་ཆེན་པོ་ལས་བྱས་པར་མངོན་པར་སྤྲུལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་རིའི་རྒྱལ་པོ་བྱ་རྒོད་ཀྱི་ཕུང་པོ་ཁོ་ར་ཁོར་ཡུག་དང་བཅས་པ་ཐམས་ཅད་རིན་པོ་ཆེ་སྣ་ཚོགས་དུ་མའི་བཀོད་པའི་རྒྱན་བསམ་གྱིས་མི་ཁྱབ་པས་བརྒྱན་པ་མངོན་པར་སྤྲུལ་ནས་སྐད་ཅིག་དེ་ཉིད་ལ་ཟླ་འོད་གཞོན་ནུར་གྱུར་པའི་ཁྱིམ་དུ་ཞུགས་པར་གྱུར་ཏོ། །ཞུགས་ནས་བཅོམ་ལྡན་འདས་ལ་ཡིད་ཀྱིས་ཕྱག་བྱས་ཏེ། བཅོམ་ལྡན་འདས་ལ་ཡིད་ཀྱིས་ལན་གསུམ་བསྐོར་བ་བྱས་ནས་སྟན་ལ་འདུག་གོ །དེ་ལ་འདི་སྐད་ཅེས་བྱ་སྟེ། རི་ཡང་ལྷ་རྫས་ཡངས་ཤིང་རྒྱ་ཆེ་བ། །རིན་ཆེན་རྡོ་སྟེངས་བཟང་ཞིང་དགའ་བ་དང་། །བསམ་གྱིས་མི་ཁྱབ་ལྷ་རྫས་ཡིད་ཀྱི་ཁྱམས། །དབུས་སུ་རིན་ཆེན་སེང་གེའི་ཁྲི་ཡང་བཙུགས། །ལྷ་རྫས་གདུགས་ལས་ཡིད་འོང་སྒྲ་འབྱུང་ཞིང་། །ཕྱོགས་སུ་ནོར་བུ་རིན་ཆེན་འོད་ཆེར་འབྱུང་། །རྩ་བ་ཡིད་དུ་འཐད་པའི་བཻ་དཱུཪྱ། །མ་ཕམ་རྒྱལ་བའི་སྲས་པོས་དེ་ལྟར་སྤྲུལ། །རི་ཡང་རིན་ཆེན་སྣ་ཚོགས་རྣམ་པར་བཀྲ། །རིན་ཆེན་གདན་མཆོག་རྒྱང་གྲགས་ཚད་ཙམ་དུ། །བྱམས་པ་དཔའ་
བོས་དེ་དག་རབ་སྤྲུལ་ནས། །སྐད་ཅིག་དེ་ཉིད་ལ་ནི་ཁྱིམ་དུ་ཞུགས། །དེ་ནས་བཅོམ་ལྡན་འདས་འཁོར་ཆེན་པོ་རྒྱ་མཚོ་ལྟ་བུ་ལ་ཆོས་ཀྱི་གཏམ་ཡང་དག་པར་བསྟན་ཏེ། ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས། ཡང་དག་པར་བཙུད་དེ་གདན་ལས་བཞེངས་ནས་གཤེགས་སོ། །དེ་ལྟ་བུའི་སངས་རྒྱས་ཀྱི་རྫུ་འཕྲུལ་གྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་ཆུ་དྲོན་གྱི་སྒོར་བྱུང་ནས་རིའི་རྒྱལ་པོ་བྱ་རྒོད་ཀྱི་ཕུང་པོ་གང་ན་ཡོད་པ་དེར་གཤེགས་ཏེ་བྱོན་པ་དང་བྱམས་པས་སྤྲུལ་པའི་ཁྱམས་གང་ན་ཡོད་པ་དེར་གཤེགས་ཏེ་བྱོན་ནས་བྱམས་པས་མངོན་པར་སྤྲུལ་པའི་སེང་གེའི་ཁྲི་ཆེན་པོ་ལ་བཞུགས་ཏེ། དགེ་སློང་གི་དགེ་འདུན་གྱིས་ནི་ཡོངས་སུ་བསྐོར་ཅིང་། བྱང་ཆུབ་སེམས་དཔའི་དགེ་འདུན་གྱིས་ནི་མདུན་གྱིས་བལྟས། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་དྲང་སྲོང་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པས་ནི་ཕྱག་བྱས་ཏེ་འཁོར་རྒྱ་མཚོ་ལྟ་བུའི་ནང་ན་ཆོས་སྟོན་ཏོ། །དེ་ནས་ཟླ་འོད་གཞོན་ནུར་གྱུར་པ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཐམས་ཅད་ལྷགས་པར་གྱུར་པ་རྣམས་དང་། འཇིག་རྟེན་གྱི་ཁམས་གཞན་དག་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཁྲག་ཁྲིག་མང་པོ་དང་ལྷན་ཅིག་ཏུ་མེ་ཏོག་དང་བདུག་སྤོས་དང་ཕྲེང་བ་དང་བྱུག་པ་ཐོགས་ནས་རོལ་མོ་ནི་བྱེད། ཕེག་ནི་རྡོབ། གདུགས་དང་རྒྱལ་མཚན་དང་ལྷའི་བ་དན་ནི་སྒྲེང་། ཕྲེང་བ་ཆེན་པོ་དབུལ་བ་ནི་ཐོགས་ནས་བཅོམ་ལྡན་འདས་ལ་མཆོད་པ་བྱ་བའི་ཕྱིར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ཞི་བའི་སྒོ་ནས་བྱུང་སྟེ། བྱ་རྒོད་ཀྱི་ཕུང་པོའི་རི་གང་ན་ཡོད་པ་དང་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་ན་བཟའ་དང་གདུགས་དང་རྒྱལ་མཚན་དང་བ་དན་དང་སིལ་སྙན་དང་ཕེག་རྡོབ་པས་མཆོད་པ་ཆེན་པོ་བྱས་ཏེ་ཕྱོགས་གཅིག་ཏུ་འཁོད་དོ། །གུས་པ་དང་ལྡན་རི་མོ་དང་ལྡན་པར་ཆོས་དྲི་བའི་ཕྱིར་ཕྱོགས་གཅིག་ཏུ་འདུག་པ་དང་ཟླ་འོད་གཞོན་ནུར་གྱུར་པ་པུས་མོ་གཡས་པའི་ལྷ་ང་ས་ལ་
བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ལ་སྐབས་ཕྱེ་ན་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་དེ་བཞིན་གཤེགས་པས་རྟག་ཏུ་ཁྱོད་ལ་སྐབས་ཕྱེའི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག །དེ་སྐད་ཅེས་བཀའ་སྩལ་ཏེ། གོ་སྐབས་ཕྱེ་ནས་བཅོམ་ལྡན་འདས་ལ་ཟླ་འོད་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་དང་ལྡན་ན་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་ཐོབ་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་འཐོབ་པར་འགྱུར་རོ། །བཞི་གང་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཤིང་འགྲོགས་ན་བདེ་བ་ཡིན། དུལ་ཞིང་དུལ་བའི་ས་ཐོབ་པ་ཡིན་ཏེ། དེ་ཕ་རོལ་གྱིས་གཤེས་སམ། སྤྱོས་པའི་ཚིག་ཉེས་པར་སྨྲ་ཞིང་། ཉེས་པར་རྗོད་པའི་ཚིག་གི་ལམ་བཟོད་ཅིང་མི་མཇེད་པའི་རང་བཞིན་ཅན་ཡིན། ལས་ལ་ལྟ་ཞིང་ང་རྒྱལ་བཅོམ་པ་དང་ཆོས་འདོད་པ་ཡིན་ཏེ། གཞོན་ནུ་ཆོས་དང་པོ་འདི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་ཐོབ་པར་འགྱུར་རོ། །གཞན་ཡང་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་དང་ལྡན་པ་ཡིན། ཚུལ་ཁྲིམས་ཡོངས་སུ་དག་ཅིང་ཚུལ་ཁྲིམས་མ་ཞིག་པ་དང་ཚུལ་ཁྲིམས་ལ་སྐྱོན་མེད་པ་དང་ཚུལ་ཁྲིམས་འདྲེན་མ་མ་ཡིན་པ་དང་ཚུལ་ཁྲིམས་སྲ་སྲེར་མ་གྱུར་པ་དང་ཚུལ་ཁྲིམས་མ་ཉམས་པ་དང་ཚུལ་ཁྲིམས་མི་གནས་
པ་དང་ཚུལ་ཁྲིམས་མ་འབགས་པ་དང་ཚུལ་ཁྲིམས་མི་དམིགས་པ་དང་འཕགས་པས་བསྟོད་པའི་ཚུལ་ཁྲིམས་དང་མཁས་པས་བསྟོད་པའི་ཚུལ་ཁྲིམས་པ་ཡིན་ཏེ། གཞོན་ནུ་ཆོས་གཉིས་པོ་འདི་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་ཐོབ་པར་འགྱུར་རོ། །གཞན་ཡང་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཁམས་གསུམ་ལ་སེམས་སྐྲག་པ་དང་སེམས་དངངས་པ་དང་སེམས་སྐྱོ་བ་དང་དོན་དུ་མི་གཉེར་ཅིང་མངོན་པར་མི་དགའ་བ་དང་མ་ཆགས་མ་ཞེན་པ་དང་ཁམས་གསུམ་ལ་ཡིད་སྐྱོ་བས་ཁམས་གསུམ་ལས་གཞན་དུ་སེམས་ཅན་སྡུག་བསྔལ་བ་རྣམས་ཐར་བར་བྱའོ་ཞེས་བརྩོན་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་སྒྲུབ་པ་ཡིན་ཏེ། གཞོན་ནུ་ཆོས་གསུམ་པོ་འདི་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་ཐོབ་པར་འགྱུར་རོ། །གཞན་ཡང་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དད་ཅིང་ཆོས་ཡོངས་སུ་ཚོལ་བས་མི་ངོམས་པ་ཡིན། མང་དུ་ཐོས་ཤིང་འཇིགས་པ་མེད་པ་ཡིན། ཆོས་འདོད་ཅིང་ཆོས་ལྷུར་བྱེད་པ་ཡིན་ཏེ། རྙེད་པ་དང་བཀུར་སྟི་ལྷུར་བྱེད་པ་མ་ཡིན། ཤེས་ཀྱི་ཁེ་ལྷུར་བྱེད་པ་མ་ཡིན། ཕན་པའི་དངོས་པོ་སྔོན་དུ་འགྲོ་བའི་སེམས་ཀྱིས་ཆོས་ཇི་སྐད་དུ་ཐོས་པ་དང་། ཇི་ལྟར་ཁོང་དུ་ཆུད་པ་གཞན་ལ་རྒྱ་ཆེར་འཆད་ཅིང་རབ་ཏུ་སྟོན་པ་ཡིན་ཏེ། ཤེས་ཀྱི་ཁེ་འདོད་པས་ནི་མ་ཡིན་གྱི་ཅི་ནས་སེམས་ཅན་འདི་རྣམས་ཆོས་འདི་དག་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་སྙམ་པ་སྟེ། གཞོན་ནུ་ཆོས་བཞི་པོ་འདི་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་ཐོབ་པར་འགྱུར་རོ། །གཞོན་ནུ་ཆོས་བཞི་པོ་འདི་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་ཐོབ་པར་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །གཞོན་ནུ་རྣམ་གྲངས་འདིས་ཏིང་ངེ་འཛིན་འདི་འདི་ལྟར་སངས་རྒྱས་མང་པོས་བཤད་པ་སངས་རྒྱས་མང་པོས་བསྔགས་
པ་སངས་རྒྱས་མང་པོས་ཡང་དག་པར་རབ་ཏུ་བསྟན་པ། སངས་རྒྱས་མང་པོས་རབ་ཏུ་བསྟོད་པ་ཡིན་ཏེ། གཞོན་ནུ་སངས་རྒྱས་བཅོམ་ལྡན་འདས་མང་པོའི་དྲུང་དུ་ང་རབ་ཏུ་བྱུང་ནས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་རྒྱ་ཆེར་མཉན་ཏེ་བཟུང་ངོ་། །དྲིས་ཤིང་བཅངས་སོ། །བཀླགས་སོ། །བཏོན་ཏོ། །ཉོན་མོངས་པ་མེད་པའི་བསྒོམ་པས་བསྒོམས་ཤིང་མང་དུ་བྱས་སོ། །གཞན་ལ་རྒྱ་ཆེར་ཡང་དག་པར་རབ་ཏུ་བསྟན་ཏོ། ། དེ་ནས་བཅོམ་ལྡན་འདས་ཀྱིས་སངས་རྒྱས་མང་པོ་ངེས་པར་བརྗོད་པའི་ཏིང་ངེ་འཛིན་གྱི་སྒོ་སྔོན་བྱུང་བའི་གཏམ་བསྟན་པ་འདི་དེའི་ཚེ་ཟླ་འོད་གཞོན་ནུར་གྱུར་པ་ལ་ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་པ། དྲན་པ་བསྐལ་པ་གཞལ་མེད་དཔག་ཡས་ན། །རྒྱལ་བ་དབྱངས་ཀྱི་ཡན་ལག་སྒྲ་བྱུང་སྟེ། །བདེ་གཤེགས་དབྱངས་ཀྱི་ཡན་ལག་སྒྲ་དེ་ཡི། །ཚེ་ཚད་ལོ་ཡང་བརྒྱ་ཕྲག་དྲུག་ཅུར་གྱུར། །དེ་ཡི་ཕ་རོལ་སངས་རྒྱས་གཞན་བྱུང་བ། །མི་མཆོག་མཚན་ནི་ཡེ་ཤེས་དབང་ཕྱུག་སྟེ། །རྐང་གཉིས་གཙོ་བོ་ཡེ་ཤེས་དབང་ཕྱུག་གི། །ཚེ་ཚད་ལོ་གྲངས་སྟོང་ཕྲག་བཅུ་གཉིས་སོ། །ཡེ་ཤེས་དབང་ཕྱུག་ཕ་རོལ་སངས་རྒྱས་ནི། །གཟི་བརྗིད་དབང་ཕྱུག་ཅེས་བྱ་རྒྱལ་བ་བྱུང་། །རྐང་གཉིས་གཙོ་བོ་གཟི་བརྗིད་དབང་ཕྱུག་གི། །ཚེ་ཚད་ལོ་ནི་སྟོང་ཕྲག་དྲུག་ཅུ་བདུན། །གཟི་བརྗིད་དབང་ཕྱུག་ཕ་རོལ་སངས་རྒྱས་ནི། །བློ་གྲོས་དབང་ཕྱུག་ཅེས་བྱ་རྒྱལ་བ་བྱུང་། །རྐང་གཉིས་གཙོ་བོ་བློ་གྲོས་དབང་ཕྱུག་གི། །ཚེ་ཡི་ཚད་ནི་ལོ་གྲངས་བྱེ་བར་ཚང་། །བློ་གྲོས་དབང་ཕྱུག་ཕ་རོལ་སངས་རྒྱས་ནི། །ཚངས་པའི་དབང་ཕྱུག་ཅེས་བྱ་རྒྱལ་བ་བྱུང་། །རྐང་གཉིས་གཙོ་བོ་ཚངས་པའི་དབང་ཕྱུག་གི། །ཚེ་ཡི་ཚད་ནི་ལོ་ཁྲི་བཞི་སྟོང་གྱུར། །ཚངས་པའི་དབང་ཕྱུག་ཕ་རོལ་སངས་རྒྱས་ནི། །མི་ཡི་དབང་ཕྱུག་ཅེས་བྱ་རྒྱལ་བ་བྱུང་། །རྐང་གཉིས་གཙོ་བོ་མི་ཡི་དབང་ཕྱུག་གི། །ཚེ་ཚད་ལོ་གྲངས་བདུན་ཁྲི་དྲུག་སྟོང་གྱུར། །མི་ཡི་དབང་ཕྱུག་ཕ་རོལ་སངས་རྒྱས་ནི། །ཚངས་པའི་ཞལ་ཞེས་བྱ་བ་རྒྱལ་བ་བྱུང་། །རྐང་གཉིས་གཙོ་བོ་ཚངས་པའི་ཞལ་དེ་ཡི། །ཚེ་ཡི་ཚད་ནི་ཉིན་ཞག་བདུན་དུ་གྱུར། །ཚངས་པའི་ཞལ་གྱི་ཕ་རོལ་སངས་རྒྱས་ནི། །
ཚོགས་ཀྱི་དབང་ཕྱུག་ཅེས་བྱ་རྒྱལ་བ་བྱུང་། །རྐང་གཉིས་གཙོ་བོ་ཚོགས་ཀྱི་དབང་ཕྱུག་གི། །ཚེ་ཡི་ཚད་ནི་ལོ་གྲངས་བྱེ་བར་ཚང་། །ཚོགས་ཀྱི་དབང་ཕྱུག་ཕ་རོལ་སངས་རྒྱས་ནི། །དབྱངས་ཀྱི་དབང་ཕྱུག་ཅེས་བྱ་རྒྱལ་བ་བྱུང་། །རྐང་གཉིས་གཙོ་བོ་དབྱངས་ཀྱི་དབང་ཕྱུག་གི། །ཚེ་ཚད་ལོ་གྲངས་བྱེ་བ་ཕྲག་དགུར་ཚང་། །དབྱངས་ཀྱི་དབང་ཕྱུག་ཕ་རོལ་སངས་རྒྱས་ནི། །དབྱངས་ཀྱི་ཞལ་ཞེས་བྱ་བ་རྒྱལ་བ་བྱུང་། །རྐང་གཉིས་གཙོ་བོ་དབྱངས་ཀྱི་ཞལ་གྱི་ཡང་། །ཚེ་ཚད་ལོ་གྲངས་བྱེ་བ་ཕྲག་བཅུར་ཚང་། །དབྱངས་ཀྱི་ཞལ་གྱི་ཕ་རོལ་སངས་རྒྱས་ནི། །ཟླ་བའི་ཞལ་ཞེས་བྱ་བ་རྒྱལ་བ་བྱུང་། །རྐང་གཉིས་གཙོ་བོ་ཟླ་བའི་ཞལ་གྱི་ནི། །ཚེ་ཡི་ཚད་ཀྱང་ཉིན་ཞག་གཅིག་ཏུ་གྱུར། །ཟླ་བའི་ཞལ་གྱི་ཕ་རོལ་སངས་རྒྱས་ནི། །ཉི་མའི་ཞལ་ཞེས་བྱ་བ་རྒྱལ་བ་བྱུང་། །རྐང་གཉིས་གཙོ་བོ་ཉི་མའི་ཞལ་གྱི་ཡང་། །ཚེ་ཚད་ལོ་ནི་སྟོང་ཕྲག་བཅྭ་བརྒྱད་དོ། །ཉི་མའི་ཞལ་གྱི་ཕ་རོལ་སངས་རྒྱས་ནི། །ཚངས་པའི་ཞལ་ཞེས་བྱ་བའི་རྒྱལ་བ་བྱུང་། །རྐང་གཉིས་གཙོ་བོ་ཚངས་པའི་ཞལ་གྱི་ཡང་། །ཚེ་ཚད་ལོ་ནི་སྟོང་ཕྲག་ཉི་ཤུའོ། །ཚངས་པའི་ཞལ་གྱི་ཕ་རོལ་སངས་རྒྱས་ནི། །ཚངས་པའི་སྙན་པ་ཞེས་བྱ་རྒྱལ་བ་བྱུང་། །རྐང་གཉིས་གཙོ་བོ་ཚངས་པའི་སྙན་པ་ཡི། །ཚེ་ཚད་ལོ་གྲངས་སྟོང་ཕྲག་བཅྭ་བརྒྱད་གྱུར། །བསྐལ་པ་གཅིག་ལ་སངས་རྒྱས་འདི་དག་དང་། །འཇིག་རྟེན་རྣམ་པར་འདྲེན་པ་ཉིས་བརྒྱ་བྱུང་། །ཟིལ་གྱིས་མ་ནོན་དེ་བཞིན་གཤེགས་པ་ཡི། །མཚན་རྣམས་འདིར་ཡང་བརྗོད་ཀྱིས་མཉན་པར་གྱིས། །མཐའ་ཡས་དབྱངས་དང་རྣམ་པར་གྲགས་པའི་དབྱངས། །རྣམ་པར་བསྒྲགས་པའི་གཟི་བརྗིད་རྣམ་གྲགས་སྒྲ། །སྒྲ་སྐད་རྣམ་གྲགས་སྒྲ་དབྱངས་མཆོད་པ་དང་། །དབྱངས་ཀྱི་ཡན་ལག་དཔའ་དང་དབྱངས་དག་དང་། །ཡེ་ཤེས་སྟོབས་དང་ཡེ་ཤེས་བྱེ་བྲག་འགྲོ། །ཟིལ་གྱིས་མ་ནོན་ཡེ་ཤེས་ཡང་དག་འཕགས། །ཡེ་ཤེས་འོད་འཕྲོ་ཡེ་ཤེས་མངོན་པར་འཕགས། །ཡེ་ཤེས་རྣམ་གྲགས་དེ་བཞིན་ཡེ་ཤེས་དཔའ། །ཚངས་པའི་སྟོབས་དང་ཚངས་ནོར་ཚངས་པའི་མཆོག །ཚངས་པའི་ལྷར་བཅས་དེ་བཞིན་ཚངས་པའི་དབྱངས། །ཚངས་པའི་དབང་ཕྱུག་ཚངས་
པའི་མི་དབང་སྤྱན། །ཚངས་པའི་སྒྲ་དབྱངས་ཡན་ལག་ཚངས་པས་བྱིན། །གཟི་བརྗིད་སྟོབས་དང་གཟི་ལྡན་གཟི་བརྗིད་མཆོག །གཟི་བརྗིད་དབང་ཕྱུག་གཟི་བརྗིད་མངོན་པར་འཕགས། །གཟི་བརྗིད་ཁྱབ་དང་གཟི་བརྗིད་ཤིན་ཏུ་ངེས། །གཟི་བརྗིད་སྒྲ་དབྱངས་ཤིན་ཏུ་རྣམ་གྲགས་གཟི། །འཇིགས་བཙན་སྟོབས་དང་འཇིགས་བཙན་བློ་གྲོས་དང་། །ཤིན་ཏུ་འཇིགས་བཙན་འཇིགས་ཞལ་འཇིགས་བཙན་འཕགས། །འཇིགས་བཙན་འོད་འཕྲོ་འཇིགས་མཆོག་འཇིགས་པའི་དབྱངས། །འཇིག་རྟེན་རྣམ་འདྲེན་རྒྱལ་བ་འདི་དག་བྱུང་། །སྒྲ་དབྱངས་ཟབ་མོ་དང་ནི་དཔལ་འཛིན་དང་། །རྣམ་དག་སྒྲ་ཡི་དབང་ཕྱུག་ཚངས་པའི་དབྱངས། །མཐའ་ཡས་དབྱངས་དང་ཤིན་ཏུ་རྣམ་གྲོལ་དབྱངས། །བདུད་ཀྱི་སྟོབས་དང་བདུད་རྣམས་སྐྲག་བྱེད་དང་། །སྤྱན་བཟངས་དང་ནི་ཞལ་གཙང་སྤྱན་དག་དང་། །རྣམ་པར་དག་པའི་སྤྱན་དང་མཐའ་ཡས་སྤྱན། །ཀུན་ནས་སྤྱན་དང་རྣམ་པར་གྲགས་པའི་སྤྱན། །སྤྱན་གྱིས་ཟིལ་གྱིས་གནོན་དང་མ་སྨད་སྤྱན། །དུལ་མཆོག་དུལ་དང་ཤིན་ཏུ་དུལ་བའི་སེམས། །དུལ་རབ་ཞི་བའི་དབང་པོ་ཞི་བའི་ཡིད། །ཞི་བའི་བླ་མ་ཞི་དཔལ་རབ་ཏུ་ཞི། །ཞི་བའི་ཕ་རོལ་ཕྱིན་དང་ཞི་བར་དཔའ། །བླ་མར་གནས་པ་ཞི་བ་དུལ་བར་སེམས། །ཤིན་ཏུ་དུལ་དང་ཞི་དབང་ཞི་བའི་ཡིད། །ཞི་བའི་བླ་མ་ཞི་བའི་དཔལ་འབར་བ། །ཞི་བ་རབ་ཞི་དབང་ཕྱུག་ཞི་བར་དཔའ། །ཚོགས་དབང་ཚོགས་གཙོ་ཚོགས་ཀྱི་དབང་ཕྱུག་དང་། །ཚོགས་རྣམས་ཟིལ་གནོན་ཚོགས་བཟང་ཡེ་ཤེས་གཙང་། །ཚོགས་ཀྱི་དབང་ཆེན་ཚོགས་དབང་དཔའ་བོ་དང་། །གཞན་ཡང་ཚོགས་བཟང་རབ་ཏུ་རྣམ་པར་འབྱེད། །ཆོས་ཀྱི་རྒྱལ་མཚན་དེ་བཞིན་ཆོས་ཀྱི་ཏོག །ཆོས་ཀྱི་བླ་མ་ཆོས་ཀྱི་རང་བཞིན་འཕགས། །ཆོས་ཀྱི་སྟོབས་ལྡན་ཆོས་བཟང་དཔའ་བོ་དང་། །རང་བཞིན་ཆོས་ཀྱི་བླ་མ་ངེས་པ་བྱུང་། །རང་བཞིན་ཆོས་ཀྱི་བླ་མ་ངེས་པར་ནི། །མཚན་གཅིག་པ་ཡང་བྱེ་ཕྲག་བརྒྱད་ཅུ་སྟེ། །བསྐལ་པ་གཉིས་ལ་འདྲེན་པ་འདི་དག་བྱུང་། །བྱང་ཆུབ་ཕྱིར་ནི་འདི་དག་ངས་མཆོད་དེ། །རང་བཞིན་ཆོས་ཀྱི་བླ་མ་ངེས་པ་ཡི། །རྒྱལ་བའི་མཚན་རྣམས་གང་དག་ཉན་བྱེད་ཅིང་། །ཐོས་ནས་རྣམ་པར་གྲགས་པའི་མཚན་
འཛིན་ན། །དེ་དག་མྱུར་དུ་ཏིང་འཛིན་འདི་ཐོབ་འགྱུར།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་དྲུག་པ། དེ་ནས་བཅོམ་ལྡན་འདས་ཀྱིས་སངས་རྒྱས་མང་པོའི་ཏིང་ངེ་འཛིན་གྱི་སྒོ་སྔོན་བྱུང་བའི་ལེའུ་འདི་ཟླ་འོད་གཞོན་ནུར་གྱུར་པ་ལ་རྒྱ་ཆེར་རྒྱས་པར་རབ་ཏུ་བསྟན་ཏོ། །སངས་རྒྱས་འདི་དག་གི་ཡང་ཕ་རོལ་ན། །བསྐལ་པ་བསམ་ཡས་དཔག་ཏུ་མེད་པའི་ཚེ། །ལྷ་མིས་མཆོད་པ་སངས་རྒྱས་གཞན་ཞིག་བྱུང་། །དེ་ཡི་མཚན་ནི་མི་དབང་དབྱངས་ཞེས་བྱ། །དེ་བཞིན་གཤེགས་པ་མི་དབང་དབྱངས་ཀྱི་ནི། །ཚེ་ཚད་ལོ་གྲངས་བདུན་ཁྲི་དྲུག་སྟོང་སྟེ། །ཉན་ཐོས་དག་ནི་བྱེ་བ་བརྒྱ་ཕྲག་གསུམ། །དེ་ཡི་འདུས་པ་དང་པོར་གྱུར་པ་ཡིན། །མངོན་ཤེས་དྲུག་ལྡན་གསུམ་རིག་དབང་པོ་ཐུལ། །མཐུ་ཡང་ཆེ་ཞིང་རྫུ་འཕྲུལ་ཆེན་པོ་སྟེ། །ཟག་པ་ཟད་པ་ཐ་མའི་ལུས་འཛིན་པ། །འོད་མཛད་ཀྱི་ནི་དགེ་འདུན་དེ་ཚེ་བྱུང་། །བྱེ་བ་ཁྲག་ཁྲིག་སྟོང་ཕྲག་བརྒྱད་ཅུ་ཡི། །བྱང་ཆུབ་སེམས་དཔའ་རྣམས་ཀྱི་ཚོགས་བྱུང་སྟེ། །བློ་གྲོས་ཟབ་ཅིང་གྲགས་པ་ཤིན་ཏུ་ཆེ། །མཐུ་ཡང་ཆེ་ཞིང་རྫུ་འཕྲུལ་ཆེ་བར་གྱུར། །མངོན་པར་ཤེས་པ་ཐོབ་ཅིང་སྤོབས་པར་ལྡན། །སྟོང་པ་ཐམས་ཅད་རྟོགས་པར་ཁོང་དུ་ཆུད། །ཞིང་ནི་བྱེ་བར་དེ་ལས་ལྷག་པར་ཡང་། །གང་གཱའི་བྱེ་མ་སྙེད་དུ་འཕྲུལ་གྱིས་འགྲོ། །རྐང་གཉིས་གཙོ་ལ་དྲི་བ་དྲིས་ནས་ནི། །ཕྱིར་ཡང་རྒྱལ་བ་དེ་ཡི་དྲུང་དུ་འོང་། །མདོ་སྡེ་སྒྲུབ་པའི་ངེས་པའི་ཚིག་ལ་མཁས། །སྣང་བར་གྱུར་པ་ས་ཡི་སྟེང་ན་རྒྱུ། །སེམས་ཅན་དོན་ཕྱིར་སྤྱད་པ་རྣམ་སྤྱོད་དེ། །བདེ་བར་གཤེགས་པའི་སྲས་པོ་མཐུ་ཆེན་ནི། །འདོད་པའི་རྐྱེན་གྱིས་སྡིག་པ་མི་བྱེད་དེ། །དེ་དག་ལ་ནི་ལྷ་ཡང་སྨོན་པ་སྐྱེད། །སྲིད་པའི་འགྲོ་བར་མི་གནས་དོན་མི་གཉེར། །མཉམ་གཞག་བསམ་གཏན་གནས་པའི་སྤྱོད་ཡུལ་ཅན། །རྣམ་པར་ངེས་པའི་དོན་ལྡན་འཇིགས་མེད་པ། །དྲི་མ་མེད་པར་རྟག་ཏུ་ཚངས་པར་སྤྱོད། །ཚིག་ཀྱང་རྒྱུན་མི་འཆད་ཅིང་སྤོབས་པར་ལྡན། །ངེས་ཚིག་བསྟན་པའི་ཚིག་གི་དོན་ལ་མཁས། །སངས་རྒྱས་སྲས་པོ་ཀུན་ཏུ་ཡང་དག་སྟོན། །དགེ་བའི་ལས་རྣམས་ཀྱིས་ཀྱང་ཡོངས་སུ་བཟུང་། །བསྐལ་པ་མཐའ་ཡས་པར་
ནི་སྤྱོད་པས་འཕགས། །འདྲེན་པ་དག་གིས་རྟག་ཏུ་བསྟོད་ཅིང་བསྔགས། །རྣམ་པར་ཐར་དང་དོན་ཚིག་ཡང་དག་སྟོན། །ཚུལ་ཁྲིམས་ཤིན་ཏུ་དག་ཅིང་ཉོན་མོངས་མེད། །ཆུ་ཡིས་པད་མ་བཞིན་དུ་མི་ཆགས་ཏེ། །ཁམས་གསུམ་ལས་ནི་རྣམ་གྲོལ་བག་ཡོད་པ། །འཇིག་རྟེན་ཆོས་བརྒྱད་དག་གིས་མི་གོས་ཤིང་། །ལུས་ཀྱང་རྣམ་དག་ལས་ཀྱང་ཡོངས་སུ་དག །འདོད་པ་ཉུང་ཞིང་ཆོག་ཤེས་མཐུ་ཡང་ཆེ། །ཆགས་པ་མེད་ཅིང་སངས་རྒྱས་ཡོན་ཏན་གནས། །སེམས་ཅན་ཀུན་གྱི་རྟེན་དང་དཔུང་གཉེན་ཏེ། །ཚིག་ཙམ་མ་ཡིན་ནན་ཏན་སྙིང་པོར་བྱེད། །གང་ལ་གནས་པ་དེ་ཉིད་གཞན་ལ་སྟོན། །སངས་རྒྱས་ཐམས་ཅད་ཀྱིས་ཀྱང་ཡོངས་སུ་བཟུང་། །རྒྱལ་བ་རྣམས་ཀྱི་མཛོད་འཛིན་ཐུགས་བརྟན་པ། །ཁམས་གསུམ་ཐམས་ཅད་ལ་ཡང་སྐྲག་པའི་ཡིད། །རབ་ཏུ་སེམས་ཞི་རྟག་ཏུ་དགོན་པར་སྤྱད། །འཇིག་རྟེན་འདྲེན་པ་རྣམས་ཀྱིས་བྱིན་བརླབས་པས། །མདོ་སྡེ་བྱེ་བ་ཕྲག་སྟོང་འཆད་པར་བྱེད། །འཆད་པ་དེ་ཡང་སངས་རྒྱས་རྣམས་ཀྱིས་བསྔགས། །འཇིག་རྟེན་དག་གི་ཚིག་ཀུན་རྣམ་སྤངས་ཏེ། །སྟོང་པ་ཉིད་ལ་མོས་ཤིང་དོན་དམ་སྟོན། །བསྔགས་པ་མཐའ་ཡས་ཡོན་ཏན་རྒྱ་མཚོ་བཞིན། །མང་དུ་ཐོས་ཤིང་མཁས་པ་ཤེས་རབ་ལྡན། །གཞོན་ནུ་བསྐལ་པ་བྱེ་བ་མང་པོར་ནི། །རྒྱུན་ཆད་མེད་པར་བསྔགས་པ་རབ་བརྗོད་ཀྱང་། །དེ་ནི་ཅུང་ཟད་ཙམ་ཞིག་བརྗོད་པར་འགྱུར། །རྒྱ་མཚོ་ལས་ནི་ཆུ་ཐིགས་གཅིག་པོ་བཞིན། །དེ་ཚེ་མི་ཡི་དབང་པོའི་དབྱངས་དེ་ནི། །ཏིང་འཛིན་ཞི་བ་མཐོང་དཀའ་འདི་སྟོན་ཏེ། །སྟོང་གསུམ་ཆེན་པོའི་འཇིག་རྟེན་ཁམས་འདི་ཡང་། །ལྷ་དང་ཀླུ་རྣམས་ཀྱིས་ནི་གང་བར་གྱུར། །དེ་ཡིས་ཏིང་འཛིན་ཞི་བ་འདི་བཤད་ཚེ། །ས་ཡང་རྣམ་པ་དྲུག་ཏུ་རབ་ཏུ་གཡོས། །ལྷ་དང་མི་རྣམས་གང་གཱའི་བྱེ་མ་སྙེད། །སངས་རྒྱས་ཡེ་ཤེས་ལ་ནི་མི་ལྡོག་གནས། །དེར་ཡང་མི་དབང་རྒྱལ་པོ་བྱུང་བ་ནི། །དཔལ་གྱི་སྟོབས་ཞེས་བྱ་བ་མཐུ་ཆེ་བ། །དེ་ལ་བུ་ཡང་བརྒྱ་ཕྲག་ལྔ་ཡོད་དེ། །བྱད་བཞིན་བཟང་ཞིང་མཛེས་ལ་བལྟ་ན་སྡུག། རྒྱལ་པོ་དེ་ཡི་བཙུན་མོའི་འཁོར་ཀྱང་ནི། །བུད་མེད་བྱེ་བ་བརྒྱ་ཕྲག་བརྒྱད་ཅུ་ཡོད། །ས་བདག་རྒྱལ་པོ་དེ་ཡི་བུ་མོ་ཡང་། །
བྱེ་བ་སྟོང་ཕྲག་བཅུ་བཞིར་ཚང་བ་བྱུང་། །དེ་ཡང་སྟོན་ཟླ་ཐ་ཆུངས་ཉ་བ་ལ། །ཡན་ལག་བརྒྱད་ལྡན་གསོ་སྦྱོང་བཟུང་ནས་ནི། །བྱེ་བ་ཁྲག་ཁྲིག་བརྒྱད་ཅུ་ལྷན་ཅིག་ཏུ། །འཇིག་རྟེན་གཙོ་བོའི་དྲུང་དུ་ཉེ་བར་འོངས། །རྐང་གཉིས་གཙོ་བོའི་ཞབས་ལ་ཕྱག་འཚལ་ཏེ། །རྒྱལ་བ་དེ་ཡི་སྤྱན་སྔར་རྒྱལ་པོ་འདུག །རྒྱལ་པོ་དེ་ཡི་ལྷག་པའི་བསམ་མཁྱེན་ནས། །ཏིང་འཛིན་འདི་ནི་རྐང་གཉིས་དབང་པོས་བཤད། །ཏིང་འཛིན་འདི་ནི་རྒྱལ་པོ་དེས་ཐོས་ནས། །རྒྱལ་སྲིད་མཆིལ་མ་བཞིན་དུ་ཀུན་སྤངས་ཏེ། །གཉེན་དང་རྩ་ལག་སྡུག་པ་ཡོངས་བཏང་ནས། །རྒྱལ་བ་དེ་ཡི་དྲུང་དུ་རབ་ཏུ་བྱུང་། །བུ་ཡང་བརྒྱ་ཕྲག་ལྔ་དག་རབ་བྱུང་སྟེ། །དེ་བཞིན་བཙུན་མོའི་འཁོར་དང་སྲས་མོ་དང་། །གཉེན་བཤེས་རྩ་ལག་མང་པོ་གཞན་དག་ཀྱང་། །བྱེ་བ་ཁྲག་ཁྲིག་བདུན་ཅུ་རྩ་དྲུག་བྱུང་། །བུ་དང་ཆུང་མར་བཅས་པ་རབ་བྱུང་ནས། །ཁ་ཟས་སྒྲུབ་པའི་ས་ཡང་བོར་ནས་ནི། །རྒྱུན་མ་ཆད་པར་ལོ་བརྒྱད་བར་དུ་བཅགས། །འཆག་ཅིང་འགྲེང་བཞིན་འཆི་བའི་དུས་ཀྱང་བྱས། །རྒྱལ་པོའི་གླང་པོ་ཏིང་འཛིན་སེམས་དཔའ་དེ། །རྟག་པར་རབ་ཏུ་མཉམ་གཞག་དུས་བྱས་པས། །དེ་ཡང་རྒྱལ་པོའི་ཕོ་བྲང་དེར་སྐྱེས་ཏེ། །མངལ་གྱི་དྲི་མས་མ་གོས་བརྫུས་ཏེ་བྱུང་། །དེ་ཡི་ཕ་ནི་བརྟན་པའི་སྟོབས་ཞེས་བྱ། །བློ་གྲོས་ཆེ་ཞེས་བྱ་བ་མར་གྱུར་ཏེ། །གཞོན་ནུ་བཙས་མ་ཐག་ཏུ་ཚིག་སྨྲ་བ། །འཇིག་རྟེན་མགོན་པོ་དེ་ཉིད་བཞུགས་སམ་གེ། །འཇིག་རྟེན་མགོན་པོས་བདག་གི་སེམས་མཁྱེན་ནས། །དེ་ཕྱིར་བདག་ལ་ཞི་བའི་ཏིང་འཛིན་བཤད། །རྐྱེན་རྣམས་མེད་ཅིང་རྐྱེན་དང་བྲལ་བ་ཡང་། །སྲིད་པའི་འགྲོ་བ་རྣམས་ནི་གཅིག་ཏུ་བསྟན། །ཆོས་རྣམས་ཀུན་གྱི་རང་བཞིན་ཕྱག་རྒྱ་གང་། །མདོ་སྡེ་བྱེ་བ་ཁྲག་ཁྲིག་བྱུང་བ་དག །བྱང་ཆུབ་སེམས་དཔའི་ནོར་ནི་བླ་མེད་པ། །ཏིང་འཛིན་འདི་ནི་རྒྱལ་བས་བཤད་མཛད་དམ། །ལུས་ཀྱང་གཙང་ཞིང་དེ་བཞིན་ངག་གཙང་བ། །སེམས་གཙང་དེ་བཞིན་ལྟ་བ་གཙང་མ་དང་། །དམིགས་པ་རྣམས་ལས་ཡང་དག་འདའ་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ཆུད་མི་ཟ་བའི་འབྲས་བུ་ཆོས་བསྟན་པ། །ལམ་མཆོག་ཡན་ལག་བརྒྱད་ལྡན་སྒོམ་པ་སྟེ། །དེ་བཞིན་
གཤེགས་དང་ཕྲད་ཅིང་ཤེས་རབ་རྣོ། ། བདེན་ལ་འཇུག་དང་རྟག་ཏུ་ཆོས་ཤེས་པ། །ཕུང་པོ་ཡོངས་ཤེས་ཁམས་རྣམས་མཉམ་པ་ཉིད། །སྐྱེ་མཆེད་རྣམ་པ་ཀུན་ཏུ་བསལ་བ་སྟེ། །སྐྱེ་བ་མེད་པ་མངོན་སུམ་འཇུག་པ་དག །ཏིང་འཛིན་དེ་ནི་རྒྱལ་བས་བཤད་མཛད་དམ། །སོ་སོ་ཡང་དག་རིག་པ་བཞི་ལ་འཇུག །ཡི་གེ་ཐམས་ཅད་དབྱེ་བའི་ཡེ་ཤེས་དང་། །དངོས་པོར་འཇུག་པ་ལས་ནི་འདའ་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །དབྱངས་རྣམས་ཡོངས་སུ་ཤེས་ཤིང་དགའ་བ་ཐོབ། །བདེ་གཤེགས་བསྔགས་པ་ལ་ཡང་དགར་གྱུར་ཅིང་། །འཕགས་པ་དག་གི་ཚུལ་འཇམ་དྲང་པོ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །དེས་པ་ནམ་ཡང་ཁྲོ་གཉེར་མི་བྱེད་ཅིང་། །མཉེན་ཞིང་འཇམ་པ་བཞིན་ཡང་འཛུམ་པ་སྟེ། །སེམས་ཅན་མཐོང་ནས་སྔོན་དུ་སྨྲ་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ལེ་ལོ་མེད་ཅིང་བླ་མའི་རི་མོ་བྱེད། །སྲི་ཞུ་ཆེ་བས་ཕྱག་འཚལ་སྡུག་པར་ལྟ། །སྐྱེ་བ་དག་གིས་ཆོག་ཤེས་དཀར་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །འཚོ་བ་དག་ཅིང་དེ་བཞིན་དགོན་གནས་དང་། །སྦྱངས་པ་དག་ལ་གནས་ཤིང་དྲན་མི་ཉམས། །ཕུང་པོ་དང་ནི་ཁམས་ལ་མཁས་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །སྐྱེ་མཆེད་མཁས་ཤིང་མངོན་ཤེས་ཡེ་ཤེས་དང་། །ཉོན་མོངས་བསལ་བ་དུལ་བའི་ས་རྣམས་དང་། །གསང་སྔགས་མང་པོ་ཐམས་ཅད་འཆད་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །སྲིད་པའི་འགྲོ་བ་ཀུན་ལས་འདའ་བ་དང་། །སྐྱེ་བ་དྲན་ཞིང་ཆོས་ལ་ནེམ་ནུར་མེད། །ཆོས་ལ་སེམས་ཤིང་ཐོས་པ་ཚོལ་བ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ཁྱད་པར་འགྲོ་ཞིང་རྟག་ཏུ་སྒོམ་ལ་འཇུག །ལྟུང་བ་དག་ལ་མཁས་ཤིང་འབྱུང་བར་གནས། །དེ་ལ་གནས་པས་བག་ལ་ཉལ་བ་སེལ། །ཏིང་འཛིན་དེ་ནི་རྒྱལ་བས་བཤད་མཛད་དམ། །གང་ལས་ཡེ་ཤེས་རྣོ་བའི་མཆོག་འབྱུང་བ། །མི་གཡོ་རི་བོ་བཞིན་དུ་མི་སྒུལ་བ། །ཕྱིར་མི་ལྡོག་པའི་མཚན་དང་གཟུངས་ཀྱི་སྒོ། །ཏིང་འཛིན་དེ་ནི་རྒྱལ་བས་བཤད་མཛད་དམ། །རྟག་ཏུ་དཀར་པོའི་ཆོས་རྣམས་
ཡོངས་ཚོལ་ཞིང་། །སྡིག་པའི་ཆོས་རྣམས་ཁོར་མོར་རྣམ་པར་སྤོང་། །རྟག་ཏུ་ཉོན་མོངས་ཕྱོགས་རྣམས་རྒྱུ་བ་མེད། །ཏིང་འཛིན་དེ་ནི་རྒྱལ་བས་བཤད་མཛད་དམ། །བསླབ་པ་ཀུན་ལ་རྟོགས་པར་ཁོང་དུ་ཆུད། །མཁས་པ་ཏིང་འཛིན་གནས་པ་རྟོགས་པར་རིག །སེམས་ཅན་དག་གི་བསམ་པ་ཤེས་པས་སྐུལ། །སངས་རྒྱས་བྱང་ཆུབ་མཆོག་ཏུ་ཆོས་ཀྱང་སྟོན། །ཁྱད་པར་ཤེས་པ་སྐྱེ་བ་ཤེས་པ་དང་། །མཐའ་ཡས་ཤེས་པ་ཤིན་ཏུ་རྫོགས་པར་ཤེས། །འགྲོ་བ་ཀུན་ཏུ་མཚམས་སྦྱོར་ཤེས་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ཁྱིམ་གྱི་གནས་སྤངས་རབ་ཏུ་འབྱུང་བའི་སེམས། །ཁམས་གསུམ་ལ་ཡང་མི་དགའ་མི་འཛིན་ཅིང་། །སེམས་རྣམས་རབ་ཏུ་འཛིན་ཅིང་དགའ་བྱེད་པ། །ཆོས་རྣམས་རྐང་གཉིས་གཙོ་བོ་སྟོན་མཛད་པ། །སྐྱོབ་པ་ཆོས་རྣམས་ལ་ཡང་མ་ཆགས་ཤིང་། །རྟག་ཏུ་ཆོས་ཀྱི་མཆོག་ཀྱང་ཡོངས་སུ་འཛིན། །ལས་ཀྱི་རྣམ་པར་སྨིན་ལ་བརྟན་མོས་པ། །ཆོས་རྣམས་རྐང་གཉིས་གཙོ་བོ་སྟོན་པ་མཛད། །འདུལ་བ་ལ་ཡང་མཁས་ཤིང་རྣམ་སྨིན་ཤེས། །དེ་བཞིན་འཐབ་ཅིང་རྩོད་པ་ཉེ་བར་ཞི། །འཐབ་པ་མེད་ཅིང་རྩོད་པ་མེད་པའི་ས། །ཆོས་རྣམས་རྐང་གཉིས་གཙོ་བོ་སྟོན་པ་མཛད། །བཟོད་པ་ཡང་དག་འཛིན་ཅིང་ཁྲོ་མེད་གནས། །ཆོས་ལ་རྣམ་པར་ངེས་ཤིང་རྟག་ཏུ་མཁས། །ཚིག་རྣམས་རབ་ཏུ་འབྱེད་ལ་ཡེ་ཤེས་མཐོང་། །ཐུགས་རྗེ་བསྐྱེད་ནས་ཆོས་རྣམས་སྟོན་པ་མཛད། །སྔོན་གྱི་མཐའ་ཤེས་ཕྱི་མའི་མཐའ་ཤེས་ཏེ། །བདེ་གཤེགས་བསྟན་ལས་དུས་གསུམ་མཉམ་པ་ཉིད། །འཁོར་གསུམ་དག་ནི་ཡོངས་སུ་ཆད་པར་གསུངས། །རྒྱལ་བ་ཆོས་ཀྱི་བདག་པོ་དེ་སྐད་སྟོན། །སེམས་ཀྱང་རབ་ཏུ་གནས་ཤིང་རྩེ་གཅིག་དང་། །ལུས་ཀྱང་རྣམ་པར་གནས་དང་འཕགས་པའི་ས། །སྤྱོད་ལམ་དག་ཀྱང་རྟག་ཏུ་བསྲུང་བ་ཡི། །ཆོས་ནི་སྐྱེས་བུ་ཁྱུ་མཆོག་ཐུབ་པ་སྟོན། །ཁྲེལ་ཡོད་ངོ་ཚ་ཤེས་ཤིང་མཛེས་པ་དང་། །འཇིག་རྟེན་ཤེས་པ་རིགས་པའི་ཚིག་རྣམས་གསུང་། །ཆོས་རྣམས་འབྱུང་བ་སྲོག་ཆགས་རང་བཞིན་དང་། །བྱང་ཆུབ་དམ་པ་མཆོག་གི་ཆོས་ཀྱང་སྟོན། །རྗེས་སུ་ཕན་གདགས་པ་དང་ཁྲེལ་ཡོད་དང་། །མི་དགེ་བ་ཡི་སེམས་
ལ་སྨོད་པ་དང་། །སྦྱངས་པ་རྗེས་སུ་མི་གཏོང་བསོད་སྙོམས་སྦྱོང་། །ཆོས་རྣམས་རྐང་གཉིས་གཙོ་བོ་སྟོན་པ་མཛད། །ཁྲེལ་ཡོད་ངོ་ཚ་ཤེས་པ་རྟག་ཏུ་སྤྱོད། །བླ་མ་ལ་ཡང་གུས་སྨྲ་ལྡང་བ་དང་། །ཐོག་མ་ཉིད་ནས་ང་རྒྱལ་ཚར་བཅད་པར། །ཆོས་རྣམས་རྒྱལ་བ་ཆོས་རྗེ་དེ་ལྟར་སྟོན། །སེམས་ནི་ལྡང་བ་ནས་ཀྱང་སེམས་དགེ་སྟེ། །ཡེ་ཤེས་ཁོང་དུ་ཆུད་ཅིང་རྟོགས་པར་བྱེད། །མི་ཤེས་ཕྱོགས་རྣམས་རྟག་ཏུ་རྣམ་པར་སྤོང་། །བྱང་ཆུབ་མཆོག་གི་ཆོས་རྣམས་སྟོན་པ་མཛད། །སེམས་ལ་འཇུག་པ་དང་ནི་སྒྲ་ཤེས་པ། །ངེས་པའི་ཚིག་ལ་འཇུག་ཅིང་དོན་རྟོགས་དང་། །གནོད་པ་ཐམས་ཅད་རྟག་ཏུ་རྣམ་སྤང་པར། །རྒྱལ་བ་ཆོས་ཀྱི་བདག་པོ་དེ་ལྟར་སྟོན། །སྐྱེས་བུ་དམ་པ་རྟག་ཏུ་ཡང་དག་བསྟེན། །སྐྱེས་བུ་ངན་པ་དག་ནི་རྣམ་པར་སྤང་། །རྒྱལ་བ་ལ་ཡང་རྟག་ཏུ་དད་ཅིང་དགའ། །ཆོས་མཆོག་རྒྱལ་བ་དེ་ལྟར་སྟོན་པ་མཛད། །བཏགས་པ་དང་ནི་བརྡ་དང་ཐ་སྙད་དང་། །འཁོར་བའི་སྡུག་བསྔལ་རྣམས་ནི་རྟག་པར་སྤང་། །རྙེད་དང་མ་རྙེད་པ་ལ་ཞུམ་པ་མེད། །ཆོས་ཀྱི་དམ་པ་རྒྱལ་བས་དེ་ལྟར་བསྟན། །བཀུར་སྟི་རྙེད་ཀྱང་མཚར་དུ་མི་བཟུང་ཞིང་། །བཀུར་སྟི་མ་བྱས་ན་ཡང་བཏང་སྙོམས་བཞག །ཡང་དག་བསྔགས་པས་ནམ་ཡང་རློམ་སེམས་མེད། །འཇིག་རྟེན་ཕན་པའི་བསྟན་པ་འདི་འདྲའོ། །གཤེ་ཞིང་སྨོད་པ་ཐམས་ཅད་བཟོད་པར་བྱ། །ཁྱིམ་པ་ཀུན་དང་ལྷན་ཅིག་མི་བསྟེན་ཅིང་། །རབ་ཏུ་བྱུང་བ་དང་ཡང་འགྲོགས་མི་བྱ། །རྒྱལ་བ་ཆོས་ཀྱི་བདག་པོ་དེ་སྐད་སྟོན། །སྤྱོད་ཡུལ་མ་ཡིན་ཐམས་ཅད་རྣམ་སྤངས་ནས། །སངས་རྒྱས་སྤྱོད་ཡུལ་ལ་ནི་རབ་ཏུ་གནས། །སྤྱོད་པ་ཕུན་སུམ་ཚོགས་ཤིང་དུལ་བའི་སེམས། །ཆོས་ཀྱི་ཚུལ་འདི་བདེ་བར་གཤེགས་པས་བཤད། །བྱིས་པའི་ཆོས་རྣམས་རྟག་ཏུ་རྣམ་པར་སྤང་། །རིགས་སུན་པ་ཡང་ཐམས་ཅད་སྤང་བར་བྱ། །སངས་རྒྱས་བསྟན་པ་རྟག་པར་ཡོངས་སུ་བསྲུང་། །ཆོས་ཀྱི་བདག་པོ་རྒྱལ་བ་དེ་སྐད་སྟོན། །སྨྲ་བ་ཉུང་ཞིང་རབ་ཏུ་འབྲེལ་ལ་སྙན། །གཞན་དག་ལ་ཡང་ཚིག་འཇམ་དགེ་བར་སྨྲ། །ཕས་ཀྱི་རྒོལ་བ་ཆོས་དང་ལྡན་པས་འདུལ། །རྒྱལ་བའི་རྗེས་སུ་བསྟན་པ་འདི་འདྲའོ། །དུས་སུ་འགྲོ་སྟེ་དུས་ལ་མ་བབ་མིན། །
སོ་སོའི་སྐྱེ་བོ་ཀུན་ལ་ཡིད་མི་བརྟན། །སྡུག་བསྔལ་རེག་ཀྱང་ཡི་མུག་མེད་པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །དབུལ་པོ་མཐོང་ན་ནོར་དང་ལྡན་པར་བྱ། །ཚུལ་ཁྲིམས་འཆལ་པ་མཐོང་ན་བརྩེ་བ་བསྐྱེད། །ཕན་པའི་དངོས་ལ་རྟག་ཏུ་གདམས་པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །ཆོས་ཀྱིས་སེམས་ཅན་རྣམས་ལ་ཕན་གདགས་ཤིང་། །འཇིག་རྟེན་ཟང་ཟིང་རྟག་ཏུ་གཏང་བར་བྱ། །བསགས་པར་མི་བྱ་སྤུང་བར་མི་བྱ་སྟེ། །རྒྱལ་བའི་རྗེས་སུ་བསྟན་པ་འདི་འདྲའོ། །ཚུལ་ཁྲིམས་བསྔགས་ཤིང་ཚུལ་ཁྲིམས་འཆལ་པ་སྨད། །གཡོ་སྒྱུ་མེད་ཅིང་ཚུལ་ཁྲིམས་ལྡན་ལ་སྟེན། །ནོར་ལ་མི་གནས་བདོག་པ་ཐམས་ཅད་གཏོང་། །རྒྱལ་བའི་རྗེས་སུ་བསྟན་པ་འདི་འདྲའོ། །ལྷག་པའི་བསམ་པས་བླ་མ་གཉེར་བ་དང་། །ཇི་སྐད་སྨྲས་པ་དེ་བཞིན་ཐམས་ཅད་བྱ། །ཆོས་སྨྲ་བ་ཡང་མི་འཆད་བསྟེན་པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །རི་མོར་བཅས་ཤིང་རྟག་ཏུ་ཡིད་དགར་བྱ། །ཞི་བའི་ལྟ་བས་ཁོར་མོར་གནས་པར་བྱ། །སྔོན་སྤྱོད་རྣམས་ལ་རྟག་པར་ཤིན་ཏུ་ངེས། །རྒྱལ་བའི་རྗེས་སུ་བསྟན་པ་འདི་འདྲའོ། །དགེ་བའི་སྤྱོད་པར་རྟག་ཏུ་སྔོན་དུ་འགྲོ། །འདུ་ཤེས་བཟློག་དང་དངོས་པོའི་མཚན་ཉིད་དང་། །མཚན་མ་སྤང་བ་ལ་ཡང་ཐབས་མཁས་པ། །རྒྱལ་བའི་རྗེས་སུ་བསྟན་པ་འདི་འདྲའོ། །མདོ་སྡེ་སྒྲུབ་པའི་ཚིག་ལ་མཁས་པ་དང་། །བདེན་པ་བསྟན་པའི་ཚིག་ལ་གདོན་མི་ཟ། །རྣམ་པར་གྲོལ་བའི་ཡེ་ཤེས་མངོན་དུ་བྱེད། །རྒྱལ་བའི་རྗེས་སུ་བསྟན་པ་འདི་འདྲའོ། །མགོ་གཅིག་ཏུ་ནི་ཚིག་རྣམས་བརྗོད་པར་བྱ། །ཇི་ལྟ་བཞིན་དུ་མཐོང་ཞེས་རྟོགས་པར་མཁས། །རྟག་ཏུ་ཚིག་ལ་ཐེ་ཚོམ་མེད་པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །སྟོང་པ་ཉིད་ཀྱི་ཆོས་ཀྱང་རྟག་ཏུ་བསྟེན། །འཇིགས་པ་མེད་ཅིང་ཚུལ་ཁྲིམས་སྟོབས་ལ་གནས། ། ཏིང་འཛིན་གནས་ཀྱིས་མཉམ་པར་འཇུག་པར་བྱ། །རྒྱལ་བའི་རྗེས་སུ་བསྟན་པ་འདི་འདྲའོ། །ཤེས་ཀྱི་ཁེ་འདོད་ཕྱིར་ནི་ཡོང་མི་བསྟན། །སེམས་ཀྱང་གྱ་གྱུ་ཅན་དུ་མི་བྱ་སྟེ། །བལྟ་བར་བྱས་པ་ཐམས་ཅད་རྣམ་པར་སྤང་། །རྒྱལ་བའི་
རྗེས་སུ་བསྟན་པ་འདི་འདྲའོ། །སྤོབས་པ་མཆོག་དང་གཟུངས་ཀྱང་དམ་པ་སྟེ། །ཡེ་ཤེས་སྣང་བ་ཕ་རོལ་མཐའ་མ་མེད། །གསང་སྔགས་བྱིན་བརླབས་རིགས་པར་སྤོབས་པ་ནི། །རྒྱལ་བའི་རྗེས་སུ་བསྟན་པ་འདི་འདྲའོ། །ལམ་འདི་སྒོམ་པ་དག་ནི་ཚུལ་གྱི་སྒོ། །བསྟན་པ་འདི་ལ་སྤྱད་ནས་ནན་ཏན་དང་། །ཚུལ་དང་གདམས་པ་རྗེས་སུ་བསྟན་པ་བཟང་། །རྒྱལ་བའི་རྗེས་སུ་བསྟན་པ་འདི་འདྲའོ། །རྗེས་སུ་འཐུན་པའི་བཟོད་པ་སངས་རྒྱས་བསྔགས། །བཟོད་ལ་གནས་པས་ཉེས་པ་རྣམ་པར་སྤང་། །ཡེ་ཤེས་ལ་ཡང་གནས་ནས་མི་ཤེས་སྤང་། །རྒྱལ་བའི་རྗེས་སུ་བསྟན་པ་འདི་འདྲའོ། །ཡེ་ཤེས་རྟེན་ཡིན་དེ་བཞིན་རྣལ་འབྱོར་ས། །བྱང་ཆུབ་ཞུགས་པའི་རྣལ་འབྱོར་དབང་ཕྱུག་སྟེ། །སྐྱེས་བུ་དམ་པ་རྟག་པར་བསྟེན་པ་ནི། །རྒྱལ་བའི་རྗེས་སུ་བསྟན་པ་འདི་འདྲའོ། །མི་རིགས་བརྩོན་པ་ཁོར་མོར་རྣམ་པར་སྤང་། །སངས་རྒྱས་ས་ནི་དེ་བཞིན་གཤེགས་པས་བཤད། །མཁས་པ་ཀུན་གྱིས་རྗེས་སུ་ཡི་རང་བ། །རྒྱལ་བའི་རྗེས་སུ་བསྟན་པ་འདི་འདྲའོ། །བྱིས་པ་མི་ཤེས་པས་ནི་སྤངས་པ་སྟེ། །འདི་ནི་ཉན་ཐོས་མང་པོའི་ས་མ་ཡིན། །བྱང་ཆུབ་སེམས་དཔའ་དག་གིས་རྟག་ཏུ་བཟུང་། །རྒྱལ་བའི་རྗེས་སུ་བསྟན་པ་འདི་འདྲའོ། །འདི་ནི་དེ་བཞིན་གཤེགས་པའི་རྗེས་སུ་འབྲང་། །ལྷ་རྣམས་ཀྱིས་ཀྱང་མཆོད་ཅིང་རི་མོར་བྱས། །ཚངས་པ་བྱེ་བ་ཕྲག་སྟོང་ཡི་རང་བ། །ཏིང་འཛིན་དེ་ནི་རྒྱལ་བ་སྟོན་མཛད་དམ། །ནམ་མཁའ་ལྡིང་དང་གནོད་སྦྱིན་མི་འམ་ཅི། །ཀླུ་ཡང་སྟོང་གིས་རྟག་ཏུ་ཕྱག་བྱས་པ། །བྱང་ཆུབ་དམ་པ་རྒྱལ་བས་གསུངས་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །ཤིན་ཏུ་མཁས་པས་རྟག་ཏུ་ཡོངས་ཐོབ་སྟེ། །ནོར་མཆོག་དམ་པ་ཡང་ནི་ལེགས་པར་རྙེད། །ཟང་ཟིང་མེད་པའི་ཡེ་ཤེས་གསོ་བ་མཆོག །ཏིང་འཛིན་དེ་ནི་རྒྱལ་བས་བཤད་མཛད་དམ། །ཡེ་ཤེས་མཛོད་ཡིན་སྤོབས་པ་མི་ཟད་པ། ། འདི་ནི་མདོ་སྡེ་བྱེ་བར་འཇུག་པ་སྟེ། །ཁམས་གསུམ་ཡོངས་ཤེས་ཡང་དག་ཤེས་པ་ཡི། །ཏིང་འཛིན་དེ་ནི་རྒྱལ་བས་བཤད་མཛད་དམ། །གང་ལ་ཏིང་འཛིན་ཞི་བ་འདི་བཤད་པ། །འདི་ནི་ཕ་རོལ་འགྲོ་བའི་གཟིངས་སུ་བསྟན། །འདི་ནི་ཆུ་བོ་རྒལ་བའི་
གྲུ་ཡིན་ཏེ། །འདི་ནི་སྙན་གྲགས་བསྔགས་ཕྲེང་འཕེལ་བར་བྱེད། །གང་གིས་ཏིང་འཛིན་ཞི་བ་འདི་བཤད་པ། །དེ་བཞིན་གཤེགས་པ་རྣམས་ལ་བསྟོད་པ་ཡིན། །སྐྱེས་བུ་ཁྱུ་མཆོག་ལ་ཡང་བསྔགས་པ་སྟེ། །བྱང་ཆུབ་སེམས་དཔའི་མི་ཟད་ཡོན་ཏན་ཚུལ། །གང་དག་ལ་ནི་ཏིང་འཛིན་འདི་བཤད་པ། །འདི་ནི་ཞེ་སྡང་ཞི་བར་བྱམས་པ་བསྟན། །འདི་ནི་སྙིང་རྗེ་ཅན་གྱི་བཏང་སྙོམས་ས། །འདི་ནི་གྲགས་པ་ཆེན་པོའི་དབུགས་འབྱིན་པ། །སེང་གེའི་སྒྲ་སྒྲོགས་རྣམས་ཀྱི་ནན་ཏན་ཏེ། །འདི་ལས་སངས་རྒྱས་ཡེ་ཤེས་མཆོག་ཀྱང་འབྱུང་། །ཆོས་རྣམས་ཀུན་གྱི་རང་བཞིན་ཕྱག་རྒྱ་སྟེ། །ཏིང་འཛིན་འདི་ནི་འདྲེན་པ་དག་གིས་བཤད། །ཏིང་འཛིན་ཞི་བ་རྒྱལ་བས་བཤད་པ་འདི། །ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད། །འདི་ནི་བྱང་ཆུབ་རབ་ཞུགས་སྤྱོད་པ་སྟེ། །བདུད་ཀྱི་སྡེ་རྣམས་ཤིན་ཏུ་སྐྲག་པར་བྱེད། །རྒྱལ་བས་ཏིང་འཛིན་ཞི་བ་འདི་བཤད་པ། །སྐྱོབ་པ་ཆོས་ལ་གནས་པའི་རིག་སྔགས་འདི། །དགྲ་ཡི་ནང་དུ་སྲུང་བ་དམ་པ་སྟེ། །ཕས་ཀྱི་རྒོལ་བ་ཆོས་ཀྱིས་ཚར་གཅོད་པ། །ཏིང་འཛིན་ཞི་བ་འདི་ལ་བསྟེན་བྱས་ན། །འདི་ནི་སྤོབས་པའི་སར་ཡང་རབ་ཏུ་བསྟན། །སྟོབས་དང་རྣམ་ཐར་དེ་བཞིན་དབང་པོ་དང་། །སངས་རྒྱས་ཆོས་རྣམས་བཅྭ་བརྒྱད་བྱེ་བྲག་འཕགས། །སྟོབས་བཅུ་རྣམས་ཀྱང་ཡོངས་སུ་ཚོལ་བ་སྟེ། །སངས་རྒྱས་ཡེ་ཤེས་ཀྱི་ཡང་སྔ་ལྟས་སོ། །སྐྱེས་མཆོག་འཇིག་རྟེན་ཕན་ཞིང་ཐུགས་བརྩེ་བས། །སངས་རྒྱས་ཆོས་རྣམས་རབ་ཏུ་བསྟན་པའང་ཡིན། །སངས་རྒྱས་དག་གི་སྲས་ཀྱིས་འདི་བཟུང་སྟེ། །འདི་ནི་རྣམ་ཐར་འདོད་པའི་ལམ་དུ་བསྟན། །ཏིང་འཛིན་ཞི་བ་མཐོང་དཀའ་འདི་ཐོས་ནས། །དེ་ལ་བདེ་གཤེགས་སྲས་པོ་དགའ་བར་འགྱུར། །སངས་རྒྱས་ཡེ་ཤེས་ཡོངས་སུ་རྫོགས་པ་དང་། །བྱང་ཆུབ་སེམས་དཔའ་མཁས་པ་ཚོལ་བ་འདི། ། རྣམ་དག་སེམས་གཙང་ཉོན་མོངས་མེད་པ་ཡིས། །ཏིང་འཛིན་ཞི་བ་འདི་ལ་བསྟེན་པར་གྱིས། །རྒྱལ་བ་བཞིན་དུ་དེ་ཡི་ལུས་དག་སྟེ། །རྣམ་པར་ཐར་དང་ཡེ་ཤེས་རྣམ་གྲོལ་མཐོང་། །འདོད་ཆགས་འཆིང་བས་རྟག་ཏུ་ཉོན་མི་མོངས། །ཏིང་འཛིན་བཟང་པོ་འདི་
ལ་བསྟེན་པར་གྱིས། །ཞེ་སྡང་ས་མིན་གཏི་མུག་བྲལ་བ་སྟེ། །བདེ་བ་འདོད་པའི་ཡེ་ཤེས་འབྱུང་བ་ཡིན། །རིག་པ་སྐྱེ་ཞིང་མ་རིག་འཇིག་པ་སྟེ། །ཏིང་འཛིན་ཞི་བ་འདི་ལ་བསྟེན་པར་གྱིས། །རྣམ་གྲོལ་སྙིང་པོར་བྱེད་པ་ངོམས་པར་བཤད། །བསམ་གཏན་པ་ལ་ཏིང་འཛིན་ཞི་འདི་བསྟན། །སངས་རྒྱས་མ་སྨད་པ་ཡི་སྤྱན་ཡིན་ཏེ། །ཏིང་འཛིན་ཞི་བ་འདི་ལ་བསྟེན་པར་གྱིས། །འདི་ནི་ཞིང་མང་སྟོན་པའི་མངོན་པར་ཤེས། །སངས་རྒྱས་མཐའ་ཡས་སྟོན་པའི་རྫུ་འཕྲུལ་ཏེ། །ཏིང་འཛིན་འདི་ཉིད་སྒོམ་པར་བྱེད་པ་ལ། །གཟུངས་དེ་རྣམས་ཀྱང་རྙེད་པར་དཀའ་མི་འགྱུར། །བྱང་ཆུབ་ཕྱིར་ནི་དབང་པོ་ཞི་བའི་གནས། །འདི་ནི་བྱིན་རླབས་མཐའ་ཡས་སྟོན་པ་སྟེ། །ཏིང་འཛིན་འདི་ནི་བསྙེན་པར་བྱེད་པ་ཡི། །ཡེ་ཤེས་ཕྲ་ཞིང་ཡངས་པ་རྣམ་པར་དག །གང་གིས་ཏིང་འཛིན་ཞི་བ་འདི་མ་ཐོས། །མི་རིགས་བརྩོན་པས་འདི་ནི་རྟོགས་མི་འགྱུར། །ཡི་གེ་ཐམས་ཅད་རྣམ་པར་བཟློག་པ་སྟེ། །དབྱངས་ཀྱིས་རྣམ་པར་གོ་བར་ནུས་མ་ཡིན། །བྱང་ཆུབ་སེམས་དཔའ་རིག་པས་འདི་ཤེས་ཏེ། །ཆོས་ཀྱི་བདག་པོས་ཇི་ལྟར་གང་བཤད་པ། །ཏིང་འཛིན་འདི་ལ་སྟེན་པར་བྱེད་པ་ཡི། །ཞི་བ་དག་དང་སྨད་པ་མེད་པས་རྟོགས། །བརྩོན་འགྲུས་བརྩམས་པས་རབ་ཏུ་འདི་བཟུང་སྟེ། །བསྙེན་བཀུར་བྱས་ཤིང་རྟག་ཏུ་ལེགས་པར་བཅངས། །ཏིང་འཛིན་འདི་ལ་བསྙེན་པར་བྱེད་པ་ནི། །སྡུག་བསྔལ་ཟད་ཅིང་སྐྱེ་བ་འགོག་པ་ཤེས། །ཆོས་རྣམས་ཀུན་གྱི་སྐྱེ་བ་མེད་པ་བསྟན། །དེ་ལྟར་སྲེད་པའི་འགྲོ་བ་ཐམས་ཅད་ན། །སངས་རྒྱས་གྲགས་ཆེན་དག་གི་ཡེ་ཤེས་མཆོག །ཏིང་འཛིན་དེ་ནི་རྒྱལ་བས་བཤད་མཛད་དམ། །གཞོན་ནུ་དེ་ཡིས་ཚིགས་བཅད་འདི་ཐོས་ནས། །ཁྲག་ཁྲིག་སྟོང་ཕྲག་བརྒྱད་ཅུ་རྩ་བརྒྱད་རྣམས། །དབྱངས་ཀྱི་རྗེས་འགྲོ་བཟོད་པ་དེར་ཐོབ་སྟེ། །སངས་རྒྱས་ཡེ་ཤེས་ལས་ནི་མི་ལྡོག་གནས། །བརྟན་པའི་སྟོབས་ཀྱིས་གཞོན་ནུ་དེ་ལ་སྨྲས། །ད་དུང་འཇིག་རྟེན་མགོན་པོ་དེ་བཞུགས་སོ། །ཁྱེའུ་ཁྱོད་ལ་ནི་དོན་འདི་དྲི་བར་བྱ། །ཏིང་འཛིན་འདི་ནི་ཁྱོད་ཀྱིས་སུ་ལས་ཐོས། །གཞོན་ནུས་སྨྲས་པ་རྒྱལ་པོ་གསན་དུ་གསོལ། །བདག་གིས་
བསྐལ་པ་གཅིག་ལ་སངས་རྒྱས་ནི། །བྱེ་བ་ཁྲག་ཁྲིག་མཐོང་སྟེ་རི་མོར་བགྱིས། །ཏིང་འཛིན་ཞི་བ་འདི་ཡང་བདག་གིས་དྲིས། །གཞན་ཡང་བསྐལ་པ་དགུ་བཅུ་རྩ་དགུ་དང་། །བསྐལ་པ་བྱེ་བ་ཁྲག་ཁྲིག་ཕྲག་སྟོང་དུ། །དེ་དང་དེར་བདག་སྐྱེ་བ་དྲན་པར་གྱུར། །ནམ་ཡང་མངལ་དུ་སྐྱེས་པར་མ་གྱུར་ཏོ། །དེ་ནས་བདག་གིས་ཏིང་འཛིན་འདི་བསྒོམས་ཏེ། །རྒྱལ་བ་དེ་དག་འཆད་པ་དག་པར་ཐོས། །ཐོས་ནས་བཤད་པ་ལ་ཡང་མོས་བསྐྱེད་དེ། །ནེམ་ནུར་མེད་པས་བྱང་ཆུབ་རེག་པར་བགྱི། །དགེ་སློང་སུ་དག་བདག་ལ་ཀུན་འདྲི་ཞིང་། །ཏིང་འཛིན་འདི་ལ་ཡོངས་སུ་ཆུད་བགྱིད་པ། །དེ་ལ་བདག་ནི་གུས་པར་རི་མོར་བགྱིད། །འཇིག་རྟེན་དོན་མཛད་དག་ལ་བགྱི་བ་བཞིན། །སུ་ལས་བདག་གིས་ཚིགས་བཅད་གཅིག་ཙམ་ཡང་། །ལུང་མནོས་རྗེས་འཐུན་སྤྱད་པ་སྤྱོད་པའི་ཚེ། །དེ་དག་ལ་ཡང་བདག་ནི་སྟོན་པ་སྙམ། །སངས་རྒྱས་བཞིན་དུ་གུས་པས་རི་མོ་བགྱིད། །ཏིང་འཛིན་ཡོངས་སུ་ཆུབ་པར་བགྱིད་པ་འདི། །སུ་དག་ལ་ལ་བདག་ལ་འདྲི་བ་ཡང་། །འཇིག་རྟེན་འདྲེན་པ་རྒྱལ་བར་མི་འགྱུར་བར། །རྨི་ལམ་ན་ཡང་བདག་ལ་ཐེ་ཚོམ་མེད། །དགེ་སློང་རྒན་རབས་བར་མ་གཞོན་ནུ་ལ། །བདག་ནི་རི་མོ་གུས་དང་ལྡན་པར་བགྱིད། །རི་མོར་ལྡན་པས་བདག་གི་སྙན་པ་དང་། །དེ་བཞིན་བསོད་ནམས་གྲགས་པ་ཡོན་ཏན་འཕེལ། །འཐབ་ཅིང་རྩོད་པ་དག་ལ་བརྩོན་མི་བགྱིད། །དེ་ཚེ་བདག་ནི་བརྩོན་པ་ཆུང་བར་འགྱུར། །སྡིག་པ་བགྱིས་པས་འགྲོ་བ་གཞན་དུ་འགྱུར། །དགེ་བ་བགྱིས་པས་འགྲོ་བ་གཞན་དུ་འགྱུར། །མི་རིགས་བརྩོན་པར་སྦྱོར་ཞིང་མ་བསྡམས་པ། །དེ་དག་གི་ནི་མི་སྙན་ཚིག་ཐོས་ནས། །དེ་ཚེ་བདག་གིར་བགྱི་བ་ལས་སུ་འཛིན། །ལས་རྣམས་བགྱིས་པ་རྣམ་པར་ཆུད་མི་ཟ། །དེ་ལ་ཁྲོ་བའི་དབང་དུ་མི་འགྱུར་ཏེ། །སངས་རྒྱས་བསྔགས་པའི་བཟོད་པའི་སྟོབས་འཛིན་ཏེ། །འདྲེན་པ་དག་གིས་རྟག་ཏུ་བཟོད་པ་བསྔགས། །བཟོད་པ་བསྒོམས་ན་བྱང་ཆུབ་རྙེད་མི་དཀའ། །བདག་ཀྱང་རྟག་ཏུ་ཚུལ་ཁྲིམས་ལྡན་པར་འགྱུར། །ཚུལ་ཁྲིམས་ལ་ཡང་གཞན་དག་རབ་ཏུ་འགོད། །ཚུལ་ཁྲིམས་བསྔགས་པ་རྟག་ཏུ་བདག་
བརྗོད་དེ། །དེ་ན་བདག་གི་ཚིག་ཀྱང་བཙུན་པར་གྱུར། །དགོན་པའི་བསྔགས་པ་དག་ཀྱང་རྟག་ཏུ་བརྗོད། །ཚུལ་ཁྲིམས་ལ་ནི་རྟག་པར་རབ་གནས་ཏེ། །རྟག་ཏུ་གསོ་སྦྱོང་དག་ཀྱང་འཛིན་དུ་སྩལ། །དེ་དག་བྱང་ཆུབ་ལ་ཡང་ཡང་དག་བཙུད། །དེ་དག་ཚངས་པའི་སྤྱོད་པ་ཡང་དག་བསྟབས། །ཆོས་དང་དོན་རྣམས་ལ་ཡང་རབ་ཏུ་གནས། །གང་ལ་མཐའ་དང་ཆགས་པ་འདི་མེད་པ། །བྱང་ཆུབ་ལམ་ལ་དེ་དག་སད་པར་བགྱིས། །བདག་དྲན་བསྐལ་པ་འདས་པའི་དུས་ཤིག་ན། །རྒྱལ་བ་སྒྲ་ཡི་ཡན་ལག་དབྱངས་བྱུང་སྟེ། །དེ་ཡི་སྤྱན་སྔར་བདག་གིས་དམ་བཅས་པ། །བདག་ནི་རྟག་ཏུ་བཟོད་པའི་སྟོབས་ལྡན་བགྱི། །ཡི་དམ་བཅས་པ་དེ་ལ་གནས་ནས་ནི། །ལོ་གྲངས་བྱེ་བ་བརྒྱད་ཅུ་ཕྲག་བཞིར་ཡང་། །བདག་ལ་བདུད་ཀྱིས་ཤིན་ཏུ་སྨད་ཅིང་སྤྱོས། །འོན་ཀྱང་བདག་གི་སེམས་ནི་ཡོང་མ་འཁྲུགས། །དེར་ནི་བདུད་ཀྱིས་བགམས་ཤིང་སད་ན་ཡང་། །བདག་གི་བྱམས་བཟོད་བརྟན་པ་འཚལ་ནས་ནི། །སེམས་དང་བདག་གི་རྐང་ལ་ཕྱག་འཚལ་ཏེ། །ལྔ་བརྒྱ་བྱང་ཆུབ་མཆོག་ལ་རབ་ཏུ་ཞུགས། །བདག་ནི་རྟག་ཏུ་སེར་སྣ་མེད་པར་གྱུར། །གཏོང་བའི་བསྔགས་པ་དག་ཀྱང་ཁོར་མོར་འཆད། །ཕྱུག་ཅིང་ནོར་ལྡན་བདག་ཉིད་ཆེན་པོར་གྱུར། །མུ་གེའི་ཚེ་ཡང་བདག་ཉིད་སྦྱིན་བདག་གྱུར། །དགེ་སློང་སུ་དག་ཏིང་འཛིན་འདི་འཛིན་ཅིང་། །སུ་དག་ཀློག་ཅིང་སུ་དག་ལུང་ནོད་པ། །དེ་དག་ལ་ནི་བདག་ཀྱང་བསྙེན་བཀུར་བགྱིད། །དེ་དག་ཐམས་ཅད་མི་ཡི་མཆོག་ཏུ་འགྱུར། །བདག་ནི་བླ་ན་མེད་པའི་ལས་དེ་ཡིས། །སངས་རྒྱས་འཇིག་རྟེན་མགོན་པོ་མང་པོ་མཐོང་། །རྒྱལ་བའི་བསྟན་པ་ལ་ཡང་རབ་བྱུང་སྟེ། །རྟག་ཏུ་ཆོས་སྨྲ་བ་ནི་མཁས་པར་གྱུར། །སྦྱངས་པ་ལ་ཡང་རྟག་ཏུ་བདག་བརྩོན་ཏེ། །བས་མཐའ་དགོན་པ་ལ་ཡང་ཁོར་མོར་གནས། །ཁ་ཟས་ཕྱིར་ནི་ཚུལ་འཆོས་མི་བགྱིད་དེ། །ངན་ངོན་ཙམ་དག་གིས་ཀྱང་ཆོག་ཤེས་གྱུར། །བདག་ནི་རྟག་ཏུ་ཕྲག་དོག་མ་མཆིས་ཏེ། །བདག་ནི་ཁྱིམ་ལའང་ཆགས་པར་མི་འགྱུར་རོ། །ཁྱིམ་ལ་ཆགས་པ་དག་ནི་ཕྲག་དོག་སྐྱེ། །ཕྲག་དོག་མ་མཆིས་ནགས་དགོན་དགའ་བར་བགྱིད། །བདག་
ནི་རྟག་ཏུ་བྱམས་ལ་གནས་པར་གྱུར། །གཤེ་ཞིང་སྡིགས་ཀྱང་ཁྲོ་བ་མི་སྐྱེད་དེ། །བྱམས་པ་ལ་ཡང་གནས་པ་དེས་པ་ཡི། །སྙན་པའི་ཕྲེང་བ་ཕྱོགས་བཞིར་རབ་ཏུ་མཆེད། །རྟག་ཏུ་ཆོག་ཤེས་འདོད་པ་ཉུང་བར་གྱུར། །དགོན་པར་གནས་ཤིང་སྦྱངས་པའི་ཡོན་ཏན་བརྩོན། །བསོད་སྙོམས་ལེན་པ་དག་ཀྱང་མི་གཏོང་སྟེ། །སྦྱངས་པ་ལ་ཡང་ཡི་དམ་བརྟན་པར་གྱུར། །རྟག་ཏུ་དང་བར་བཅས་ཤིང་དད་པར་གྱུར། །ཁོར་མོར་སངས་རྒྱས་བསྟན་ལ་དད་པ་མང་། །དད་པ་མང་བའི་ཕན་ཡོན་འདི་ལགས་ཏེ། །བྱད་བཞིན་བཟང་ཞིང་དབང་པོ་མ་ཉམས་གྱུར། །གང་དག་འཆད་པ་དེ་ལ་བདག་གནས་ཏེ། །བདག་ནི་རྟག་ཏུ་ནན་ཏན་སྙིང་པོར་བགྱིད། །ནན་ཏན་སྙིང་པོར་བགྱིད་ལ་ལྷ་ཀླུ་ཡང་། །རབ་ཏུ་དང་བའི་སེམས་ཀྱིས་རི་མོར་བགྱིད། །ཡོན་ཏན་ཇི་སྙེད་བརྗོད་པ་འདི་དག་དང་། །གཞན་ཡང་རྣམ་པ་དུ་མ་མང་པོ་ཡོད། །སངས་རྒྱས་བྱང་ཆུབ་རྟོགས་པར་སུ་འདོད་པ། །མཁས་པ་འདི་དག་རྟག་ཏུ་བསླབ་པར་བགྱི། །འདི་བས་ཆེས་མང་དཀའ་བ་སྤྱད་པ་ནི། །སྔོན་གྱི་བསྐལ་པ་དུ་མར་མང་སྤྱད་དྲན། །ད་ལྟར་དེ་དག་བརྗོད་པར་མི་ནུས་ཀྱིས། །བདེ་བར་གཤེགས་པའི་དྲུང་དུ་ད་མཆིའོ། །བྱང་ཆུབ་སེམས་དཔའ་ཤེས་རབ་རྣོ་མཁས་དེས། །དེ་ཡི་མོད་ལ་མངོན་ཤེས་ལྔ་ཐོབ་ནས། །དེ་ཡང་སྲོག་ཆགས་བྱེ་བ་བརྒྱད་ཅུ་དང་། །རྫུ་འཕྲུལ་གྱིས་ནི་རྒྱལ་བའི་དྲུང་དུ་སོང་། །བརྟན་པའི་སྟོབས་ཀྱང་མཆོག་ཏུ་དགའ་རངས་ནས། །དེ་ཚེ་བྱེ་བ་བརྒྱ་ཕྲག་དྲུག་ཅུ་དང་། །དེ་བཞིན་གཤེགས་པའི་དྲུང་དུ་ཉེར་ལྷགས་ཏེ། །ཞབས་ལ་ཕྱག་འཚལ་ནས་ནི་སྤྱན་སྔར་འདུག །རྒྱལ་པོ་དེ་ཡི་ལྷག་པའི་བསམ་མཁྱེན་ནས། །རྐང་གཉིས་དབང་པོས་ཏིང་འཛིན་འདི་བཤད་དེ། །རྒྱལ་པོ་དེས་ཀྱང་ཏིང་འཛིན་འདི་ཐོས་ནས། །རྒྱལ་སྲིད་བཏང་སྟེ་མ་ཆགས་རབ་ཏུ་བྱུང་། །རབ་ཏུ་བྱུང་ནས་ཏིང་འཛིན་འདི་ལ་སྒོམ། །ཀློག་ཅིང་འཆད་དེ་རབ་ཏུ་སྟོན་པར་བྱེད། །བསྐལ་པ་དྲུག་ཅུ་འདས་པའི་འོག་ཏུ་དེ། །པད་མ་བླ་མ་ཞེས་བྱ་རྒྱལ་བར་གྱུར། །རྒྱལ་པོ་ལྷན་ཅིག་རྒྱལ་བའི་དྲུང་འོངས་པ། །བྱེ་བ་བརྒྱ་ཕྲག་དྲུག་ཅུ་མི་ཉུང་བ། །དེ་དག་ཀྱང་ནི་ཏིང་འཛིན་འདི་ཐོས་ནས། །དེ་ཚེ་
དགའ་ཞིང་མགུ་བས་རབ་ཏུ་བྱུང་། །དེ་དག་རབ་ཏུ་བྱུང་ནས་ཏིང་འཛིན་འདི། །བཟུང་ཞིང་བཀླགས་ཏེ་རབ་ཏུ་སྟོན་པར་བྱེད། །བསྐལ་པ་ཁྲག་ཁྲིག་དྲུག་ཅུ་འདས་ནས་ནི། །བསྐལ་པ་གཅིག་ལ་བྱང་ཆུབ་མཆོག་རེག་སྟེ། །མཚན་ནི་ཡེ་ཤེས་བླ་མ་མཐའ་ཡས་པ། །ལྷ་མིས་མཆོད་པའི་སངས་རྒྱས་རྣམས་སུ་གྱུར། །དེ་ལ་རྐང་གཉིས་གཙོ་བོ་རེ་རེས་ཀྱང་། །སེམས་ཅན་གང་གཱའི་བྱེ་སྙེད་གྲོལ་བར་བྱས། །བྱང་ཆུབ་སྤྱོད་པ་མཆོག་འདི་སྤྱོད་པ་ན། །ང་ནི་རྒྱལ་པོ་དཔལ་གྱི་སྟོབས་སུ་གྱུར། །ང་ཡི་བུ་དག་ལྔ་བརྒྱ་ཡོད་པ་ཡང་། །རྗེས་སུ་ཆོས་རྣམས་སྐྱོང་བ་འདི་དག་ཡིན། །དེ་ཚེ་གང་སུ་ང་ཡི་མར་གྱུར་པ། །དེ་ནི་ལྷ་མོ་སྒྱུ་འཕྲུལ་ཉིད་ཡིན་ཏེ། །བྱེ་བ་སྟོང་ཕྲག་བཅུ་བཞིར་ཚང་བ་ཡི། །ང་ཡི་བུ་མོ་དེ་ཀུན་མྱ་ངན་འདས། །སྟོབས་བརྟན་ཞེས་བྱ་རྒྱལ་པོ་གང་བྱུང་བ། །རབ་ཏུ་མཛོད་མང་འཁོར་ལོས་སྒྱུར་བའི་མཆོག །དེ་ཚེ་རྒྱལ་པོ་ཟས་གཙང་དེ་ཡིན་ཏེ། །དེ་དང་དེར་ཡང་ང་ཡི་ཡབ་ཏུ་གྱུར། །དེ་ལྟར་ངས་ནི་བསྐལ་པ་བྱེ་སྟོང་དུ། །ལེ་ལོ་མེད་ཅིང་བརྩོན་འགྲུས་བརྩམས་པ་ཡིས། །བྱང་ཆུབ་མཆོག་འདི་ཡང་དག་སྒྲུབ་པ་ན། །ཏིང་འཛིན་ཡོངས་སུ་ཚོལ་བ་རྣམ་པར་དག །གཞོན་ནུ་དེ་ཕྱིར་བྱང་ཆུབ་སེམས་དཔའ་གང་། །ཏིང་འཛིན་འདི་ལ་སྒོམ་པར་འདོད་པ་དག །བརྩོན་འགྲུས་བརྩམས་ཤིང་སྲོག་ལ་མི་ལྟ་བར། །གཞོན་ནུ་རྟག་པར་ང་ཡི་རྗེས་སུ་སློབས། །སངས་རྒྱས་མང་པོའི་ཏིང་ངེ་འཛིན་གྱི་སྒོའི་ལེའུ་ཞེས་བྱ་བ་སྟེ་བཅུ་བདུན་པའོ།། །།