ཉི་ཤུ་པ། དབང་པོའི་ཏོག་གི་རྒྱལ་མཚན་གྱི་རྒྱལ་པོའི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་འདོད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་དགེ་བའི་རྩ་བ་དང་བསླབས་པ་དང་ཡོན་ཏན་གྱི་ཚོགས་ཐམས་ཅད་གདོན་མི་ཟ་ཞིང་ཚུལ་ཁྲིམས་ཤིན་ཏུ་ཡོངས་སུ་དག་པར་བྱའོ། །འདུ་འཛི་མེད་པ་མང་ཞིང་སྡིག་པའི་གྲོགས་པོ་ཡོངས་སུ་སྤོང་བ་དང་དགེ་བའི་བཤེས་གཉེན་ལ་རྟེན་པ་དང་ཡོངས་སུ་འདྲི་བའི་རང་བཞིན་ཅན་དང་ཆོས་ཚོལ་བ་ལ་བརྩོན་པ་དང་ཆོས་ལ་དོན་དུ་གཉེར་བ་དང་ཆོས་འདོད་པ་དང་ཆོས་ལ་དགའ་བ་དང་ཆོས་ཡོངས་སུ་འཛིན་པ་དང་ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་གཞོན་ནུ་སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །གཞན་ཡང་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་འདོད་པ་དང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བརྩོན་འགྲུས་བརྩམས་ཤིང་ལུས་དང་སྲོག་ལ་མི་ལྟ་བར་བྱ་སྟེ། གང་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་སྟོན་པའི་དགེ་བའི་བཤེས་གཉེན་དེ་དག་རྒྱུན་མི་ཆད་པར་ཡོངས་སུ་བཙལ་བར་བྱ། གཡོ་མེད་པས་བསྙེན་པར་བྱ། བསྟེན་པར་བྱ། རིམ་གྲོར་བྱ་སྟེ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་བའི་བཤེས་གཉེན་དག་ལྷག་པའི་བསམ་པས་ཡོངས་སུ་བཙལ་ནས་ཀྱང་དེ་དག་ལས་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་མཉན་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། ཀླག་པར་བྱ། རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། ཉོན་མོངས་པ་
མེད་པར་བསྒོམ་པས་བསྒོམ་པར་བྱ། མང་དུ་བྱ་གཞན་དག་ལ་ཡང་རྒྱ་ཆེར་རབ་ཏུ་བསྟན་པར་བྱའོ། །གང་ལས་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་ཐོས་པ་དེ་ལ་དགའ་བ་དང་གུས་པས་སྟོན་པར་འདུ་ཤེས་བསྐྱེད་པར་བྱའོ། །གཞོན་ནུ་ནམ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་བཤེས་གཉེན་ཡོངས་སུ་ཚོལ་བ་དང་སྲི་ཞུ་བྱ་བ་དང་གཡོག་བྱ་བ་ལ་ཡིད་མི་སྐྱོ་བར་གྱུར་པ་དེའི་ཚེ་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བདེ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བདེ་བར་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་འཐོབ་བོ། །གཞོན་ནུ་དེ་ལྟ་བས་ན་མགོ་དང་གོས་ལ་མེ་འབར་བ་བཞིན་དུ་བྱས་ཏེ་རྟག་པར་དགེ་བའི་བཤེས་གཉེན་ཡོངས་སུ་བཙལ་བར་བྱ། གཡོ་མེད་པས་བསྟེན་པར་བྱ། བསྙེན་པར་བྱ། རིམ་གྲོར་བྱའོ། །དེ་ཅིའི་ཕྱིར་ཞེ་ན། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་དགེ་བའི་བཤེས་གཉེན་གྱི་ཁར་ལས་ན། སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་ལྟ་ཅི་སྨོས། གཞོན་ནུ་དེ་ལྟ་བས་ན་ཁྱོད་ཀྱིས་དགེ་བའི་བཤེས་གཉེན་ཡོངས་སུ་བཙལ་བ་དང་སྲི་ཞུ་བྱ་བ་དང་གཡོག་བྱ་བ་ལ་ཡིད་ཡོངས་སུ་མི་སྐྱོ་བར་བྱའོ་ཞེས་གཞོན་ནུ་ཁྱོད་ཀྱིས་རྟག་ཏུ་དེ་ལྟར་བསླབ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་ཉིད་ཤིན་ཏུ་བརྗོད་པའི་ཕྱིར་ཟླ་འོད་གཞོན་ནུར་གྱུར་པ་ལ་སྔོན་བྱུང་བ་བསྟན་པ་ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །འདས་པའི་བསྐལ་པ་བྱེ་བ་མང་པོ་སྟེ། །དཔག་ཏུ་མེད་ཅིང་གཞལ་མེད་བསམ་མི་ཁྱབ། །དེ་ཚེ་དབང་ཏོག་རྒྱལ་མཚན་རྒྱལ་པོ་ཞེས། །འདྲེན་པ་རྐང་གཉིས་གཙོ་བོ་བྱུང་བར་གྱུར། །དེས་ནི་ཏིང་འཛིན་ཞི་བ་འདི་བཤད་དེ། །དེ་ལ་མི་དང་སྲོག་དང་གང་ཟག་མེད། །སྒྱུ་མ་ཆུ་བུར་སྨིག་རྒྱུ་གློག་འདྲ་ཞིང་། །ཆོས་རྣམས་ཐམས་ཅད་ཆུ་ཡི་ཟླ་བ་བཞིན། །ཤི་ནས་འཇིག་རྟེན་ཕ་རོལ་འགྲོ་བ་ཡི། །སེམས་ཅན་ཤེད་ལས་སྐྱེས་པ་མི་
དམིགས་ཀྱང་། །ལས་རྣམས་བྱས་པ་མེད་པར་མི་འགྱུར་ཏེ། །དཀར་གནག་ཇི་བཞིན་འབྲས་བུ་སྨིན་པར་བྱེད། །རིགས་པའི་ཚུལ་གྱི་སྒོ་འདི་བཟང་པོ་སྟེ། །ཕྲ་ཞིང་མཐོང་དཀའ་རྒྱལ་བའི་སྤྱོད་ཡུལ་ཡིན། །གང་ལ་ཡི་གེའི་ཚིག་ཀྱང་མི་དམིགས་པ། །སངས་རྒྱས་བྱང་ཆུབ་ཉིད་ནི་བཅོམ་ལྡན་མཁྱེན། །ཡངས་པའི་གཟུངས་དང་ཡེ་ཤེས་བསགས་པ་སྟེ། །མདོ་སྡེ་བྱེ་བ་ཁྲག་ཁྲིག་རྣམས་ཀྱང་འབྱུང་། །སངས་རྒྱས་བྱེ་བ་ཁྲག་ཁྲིག་སྤྱོད་ཡུལ་ཏེ། །ཏིང་འཛིན་འདི་ནི་བཅོམ་ལྡན་རབ་ཏུ་འཆད། །འདི་ནི་ན་བ་ནད་ལས་ཐར་བྱེད་པ། །བྱང་ཆུབ་སེམས་དཔས་བསྒྲུབས་པའི་ནོར་ཡིན་ཏེ། །སངས་རྒྱས་ཀུན་གྱིས་བསྟོད་ཅིང་རབ་ཏུ་བསྔགས། །བྱེ་བ་ཁྲག་ཁྲིག་ལྷ་ཡིས་རབ་ཏུ་མཆོད། །སྐྱེ་བོ་བྱིས་པ་ཀུན་ལ་ཡང་དག་སྟོན། །མུ་སྟེགས་ཅན་གྱིས་རྟག་པར་ཡོངས་སུ་སྤངས། །ཚུལ་ཁྲིམས་ནོར་ནི་མཆོག་ཏུ་སངས་རྒྱས་གསུངས། །ནམ་མཁའ་ལ་ནི་གློག་བཞིན་ཆགས་མི་འགྱུར། །གང་གིས་རྒྱལ་བ་བྱེ་བ་རབ་མཆོད་ཅིང་། །སྦྱིན་དང་ཚུལ་ཁྲིམས་སྤྱད་པ་མཁས་པ་དང་། །སྔན་ཆད་སྡིག་པའི་གྲོགས་པོ་སྤངས་པ་དག །དེ་དག་གི་ནི་བླ་མེད་ཕ་རོལ་ནོར། །དེ་ན་དགེ་སློང་ཆོས་སྨྲ་འདུག་པ་དག །ཚངས་པར་སྤྱོད་པ་བདེ་གཤེགས་ཐུགས་ཀྱི་སྲས། །རྗེས་སུ་འཐུན་པའི་ཆོས་འདི་ཐོས་ནས་ནི། །འཇིག་རྟེན་འདྲེན་པར་སེམས་ཀྱང་བསྐྱེད་པར་གྱུར། །འདྲེན་པ་དབང་ཏོག་རྒྱལ་མཚན་རྒྱལ་པོ་ཡིས། །ཆོས་སྨྲ་དེ་ལ་ཡང་ནི་ཚིག་གསུངས་པ། །དགེ་སློང་དངོས་པོ་མཆོག་ཏུ་བྱ་དཀའ་ཡིས། །བྱང་ཆུབ་དམ་པ་མཆོག་ལ་སེམས་སྐྱེད་ཅིག །ནོར་བུ་རིན་ཆེན་འདྲ་བར་ཚུལ་ཁྲིམས་སྲུངས། །རྗེས་སུ་འཐུན་པའི་གྲོགས་ལ་རྟག་པར་སྟེན། །སྡིག་པའི་གྲོགས་ལ་ནམ་ཡང་མ་བསྟེན་དང་། །སངས་རྒྱས་ཡེ་ཤེས་རིང་པོར་མི་ཐོགས་འཐོབ། །དབང་པོ་ཏོག་གི་རྒྱལ་མཚན་རྒྱལ་བའི་དྲུང་། །གང་གིས་བྱང་ཆུབ་སེམས་མཆོག་བསྐྱེད་པ་ནི། །དེ་དག་ཐམས་ཅད་ཆོས་སྨྲར་རབ་འགྱུར་ཏེ། །ཚངས་པར་སྤྱོད་པ་བདེ་གཤེགས་ཐུགས་ཀྱི་སྲས། །དབང་པོའི་ཏོག་གི་རྒྱལ་མཚན་གྱི་རྒྱལ་པོའི་ལེའུ་སྟེ་ཉི་ཤུ་པའོ།། །།