ཉི་ཤུ་རྩ་གཉིས་པ། ལུང་ངེས་པར་བསྟན་པའི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ལུས་དང་སྲོག་ལ་མ་ཆགས་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་དང་སྲོག་ལ་ཆགས་པའི་ཕྱིར་སེམས་ཅན་རྣམས་མི་དགེ་བའི་ལས་མངོན་པར་འདུ་བྱེད་པར་འགྱུར་རོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་དང་སྲོག་ལ་མ་ཆགས་པ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་རྙེད་པར་མི་དཀའ་ན་ཏིང་ངེ་འཛིན་འདི་ལྟ་ཅི་སྨོས། གཞོན་ནུ་དེ་ལྟ་བས་ན་ལུས་དང་སྲོག་ལ་ཡང་མ་ཆགས་པར་བྱའོ། །ཞེས་དེ་ལྟར་ཁྱོད་ཀྱིས་བསླབ་པར་བྱའོ། །དེ་ལ་འདི་སྐད་ཅེས་བྱ་སྟེ། རྟག་ཏུ་ཁོར་མོར་རྣག་གི་ལུས་འདི་ལ། །བྱིས་པ་རྣམས་ནི་རབ་ཏུ་ཆགས་བྱེད་དེ། །སྲོག་ལ་འཇུ་ཞིང་བདེ་བ་འདོད་པའི་ཕྱིར། །མི་མཁས་པ་དག་རྟག་ཏུ་སྡིག་པ་བྱེད། །སུ་དག་སྙིང་པོ་མེད་པའི་ལུས་སྲོག་ལ། །ལྷག་པར་ཆགས་པ་ཡོད་པ་མ་ཡིན་པ། །དེ་དག་གིས་ནི་བདུད་ཀྱི་སྡེ་བཅོམ་སྟེ། །བྱང་ཆུབ་ཤིང་དྲུང་བྱང་ཆུབ་རབ་ཏུ་རྟོགས། །སུ་དག་བདག་མེད་སྟོང་པའི་ལུས་རྣམས་དང་། །སྲོག་ཀྱང་རྨི་ལམ་གཡོ་བ་ཟིལ་པ་འདྲ། །འདི་གཉིས་ལ་ནི་ཆགས་པར་བྱེད་འགྱུར་བ། །དེ་དག་ཤི་འཕོས་སེམས་ཅན་དམྱལ་བར་འགྲོ། །ལུས་ངེས་པར་བསྟན་པའི་ལེའུ་སྟེ་ཉི་ཤུ་གཉིས་པའོ།། །།