ཉི་ཤུ་རྩ་ལྔ་པ། སོ་སོ་ཡང་དག་པར་རིག་པ་ལ་འཇུག་པའི་ལེའུ།
འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བརྒྱད་པ། གཞོན་ནུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་ཆོས་སོ་སོ་ཡང་དག་པར་རིག་པ་ལ་སྤྱོད་ན་ཆོས་ལ་ཆོས་ཀྱི་རྗེས་སུ་ལྟ་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་སྒྲུབ་པར་འགྱུར་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་རྣམས་ལ་ཆོས་ཀྱི་རྗེས་སུ་ལྟ་བས་གཟུགས་ལས་གཞན་དུ་བྱང་ཆུབ་ཡང་དག་པར་རྗེས་སུ་མི་མཐོང་། གཟུགས་ལས་གཞན་དུ་ཡང་བྱང་ཆུབ་ལ་མི་སྤྱོད། གཟུགས་ལས་གཞན་དུ་ཡང་བྱང་ཆུབ་ཡོངས་སུ་མི་ཚོལ། གཟུགས་ལས་གཞན་དུ་ཡང་བྱང་ཆུབ་ཡང་དག་པར་མི་སྒྲུབ། གཟུགས་ལས་གཞན་དུ་ཡང་སེམས་ཅན་རྣམས་བྱང་ཆུབ་ལ་ཡང་དག་པར་མི་འཛུད། གཟུགས་ལས་གཞན་དུ་ཡང་དེ་བཞིན་གཤེགས་པ་མི་མཐོང་སྟེ། གཟུགས་ཀྱི་མི་འཇིགས་པའི་ངོ་བོ་ཉིད་དེ་བཞིན་གཤེགས་པའོ་ཞེས་དེ་བཞིན་གཤེགས་པར་ལྟའོ། །གཟུགས་ཀྱང་གཞན་གཟུགས་ཀྱི་ངོ་བོ་ཉིད་ཀྱང་གཞན་ནོ་ཞེས་དེ་ལྟར་མི་ལྟའོ། །གཟུགས་ཀྱི་ངོ་བོ་ཉིད་ཀྱང་གཞན་དེ་བཞིན་གཤེགས་པ་ཡང་གཞན་ནོ་ཞེས་དེ་ལྟར་ཡང་མི་ལྟའོ། །གཟུགས་ཀྱིས་ངོ་བོ་ཉིད་གང་ཡིན་པ་དང་དེ་བཞིན་གཤེགས་པ་གང་ཡིན་པ་དེ་ནི་གཉིས་སུ་མེད་པའི་ཆོས་ཉིད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ལྟ་ན་ཆོས་སོ་སོ་ཡང་དག་པར་རིག་པ་ལ་སྤྱོད་དོ། །དེ་བཞིན་དུ་
ཚོར་བ་ལས་གཞན་དུ་མ་ཡིན། འདུ་ཤེས་ལས་གཞན་དུ་མ་ཡིན། འདུ་བྱེད་རྣམས་ལས་གཞན་དུ་མ་ཡིན་ཏེ། རྣམ་པར་ཤེས་པ་ལས་གཞན་དུ་བྱང་ཆུབ་མི་མཐོང་། རྣམ་པར་ཤེས་པ་ལས་གཞན་དུ་ཡང་བྱང་ཆུབ་ལ་མི་སྤྱོད། རྣམ་པར་ཤེས་པ་ལས་གཞན་དུ་ཡང་བྱང་ཆུབ་ཡོངས་སུ་མི་ཚོལ། རྣམ་པར་ཤེས་པ་ལས་གཞན་དུ་ཡང་བྱང་ཆུབ་ཡང་དག་པར་མི་སྒྲུབ། རྣམ་པར་ཤེས་པ་ལས་གཞན་དུ་ཡང་སེམས་ཅན་རྣམས་བྱང་ཆུབ་ལ་ཡང་དག་པར་མི་འཛུད། རྣམ་པར་ཤེས་པ་ལས་གཞན་དུ་ཡང་དེ་བཞིན་གཤེགས་པ་མི་མཐོང་སྟེ། རྣམ་པར་ཤེས་པའི་མི་འཇིགས་པའི་ངོ་བོ་ཉིད་དེ་བཞིན་གཤེགས་པའོ་ཞེས་དེ་བཞིན་གཤེགས་པར་བལྟའོ། །རྣམ་པར་ཤེས་པ་ཡང་གཞན། རྣམ་པར་ཤེས་པའི་ངོ་བོ་ཉིད་ཀྱང་གཞན་ནོ་ཞེས་དེ་ལྟར་མི་ལྟའོ། །རྣམ་པར་ཤེས་པའི་ངོ་བོ་ཉིད་ཀྱང་གཞན་དེ་བཞིན་གཤེགས་པ་ཡང་གཞན་ནོ་ཞེས་དེ་ལྟར་ཡང་མི་ལྟའོ། །རྣམ་པར་ཤེས་པའི་ངོ་བོ་ཉིད་གང་ཡིན་པ་དང་། དེ་བཞིན་གཤེགས་པ་གང་ཡིན་པ་དེ་གཉིས་སུ་མེད་པའི་ཆོས་ཉིད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ལྟ་ན་ཆོས་སོ་སོ་ཡང་དག་པར་རིག་པ་ལ་སྤྱོད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །གཟུགས་ཀྱིས་ཀྱང་ནི་བྱང་ཆུབ་བསྟན། །བྱང་ཆུབ་ཀྱིས་ཀྱང་གཟུགས་བསྟན་ཏེ། །མི་མཚུངས་པ་ཡི་སྒྲ་རྣམས་ཀྱིས། །ཆོས་ཀྱི་བླ་མ་རབ་ཏུ་བསྟན། །སྒྲ་ཡིས་གཟུགས་ཀྱི་བླ་མ་སྟེ། །ངོ་བོ་ཉིད་ཀྱིས་ཟབ་པ་དག །གཟུགས་དང་བྱང་ཆུབ་མཉམ་པ་སྟེ། །ཐ་དད་བྱ་བ་དེ་མི་རྙེད། །མྱ་ངན་འདས་པ་ཟབ་པར་ཡང་། །སྒྲ་ཡིས་རབ་ཏུ་བསྟན་པ་ལྟར། །མྱ་ངན་འདས་པ་མི་རྙེད་དེ། །དེ་ཡི་སྒྲ་ཡང་མི་རྙེད་དོ། །སྒྲ་དང་མྱ་ངན་འདས་པ་ནི། །གཉི་ག་རྙེད་པར་མི་འགྱུར་ཏེ། །དེ་བཞིན་སྟོང་པའི་ཆོས་རྣམས་ལ། །མྱ་ངན་འདས་པ་རབ་ཏུ་བསྟན། །མྱ་ངན་འདས་དང་འདའ་བར་ནི། །མྱ་ངན་འདས་པ་མི་རྙེད་དེ། །འདི་ནི་ཆོས་རྣམས་འཇུག་མེད་པ། །ཕྱིས་ནི་ཅི་འདྲ་དེ་བཞིན་སྔོན། །ཆོས་རྣམས་ཐམས་ཅད་རང་བཞིན་གྱིས། །མྱ་ངན་འདས་དང་མཚུངས་མཉམ་
པར། །སངས་རྒྱས་བསྟན་ལ་བརྩོན་པ་ཡི། །འབྱུང་བ་ལྷུར་བྱེད་རྣམས་ཀྱིས་རིག །སངས་རྒྱས་ཀྱི་ནི་སྐུ་མཐོང་ནས། །འདྲེན་པ་མཐོང་ཞེས་སྨྲ་མོད་ཀྱི། །ང་ནི་གཟུགས་ཀྱི་སྐུ་ལུས་སུ། །སུས་ཀྱང་བལྟ་བར་མི་ནུས་སོ། །གཟུགས་ཀྱི་མཚན་ཉིད་ཅི་འདྲ་བར། །གཟུགས་ཀྱི་ངོ་བོ་ཉིད་ཤེས་ཏེ། །གཟུགས་ཀྱི་ངོ་བོ་ཉིད་ཤེས་ན། །ང་ཡི་སྐུ་ཡང་ངེས་པར་བསྟན། །དེ་བཞིན་ཕུང་པོ་ལྔ་རྣམས་ཀྱི། །ཆོས་ཀྱི་མཚན་ཉིད་ངས་ཤེས་ཏེ། །ཆོས་ཀྱི་རང་བཞིན་ཤེས་ནས་ནི། །ཆོས་ཀྱི་སྐུ་ལ་རབ་ཏུ་གནས། །ཆོས་ཀྱི་སྐུ་ལ་རབ་གནས་ནས། །སེམས་ཅན་རྣམས་ལ་ཆོས་སྟོན་ཏོ། །ཆོས་ཀྱི་སྐུ་ལ་མི་རྟེན་པར། །སེམས་ཅན་རྣམས་ལ་ཆོས་སྟོན་ཏོ། །སངས་རྒྱས་དག་གི་ཆོས་རྣམས་ནི། །ཚིག་གིས་བཤད་པར་མི་ནུས་ཏེ། །འདི་འདྲའི་ཚུལ་རྣམས་མི་ཤེས་པས། །སངས་རྒྱས་ཀྱི་ནི་སྒྲ་ཐོས་ནས། །ཚིག་ཙམ་གྱིས་ནི་འདི་སྐད་སྨྲ། །ངས་ནི་འདྲེན་པ་མཐོང་ཞེས་ཏེ། །འདུ་ཤེས་ཐམས་ཅད་སྤངས་པ་ལ། །སྲིད་པར་འདུ་ཤེས་མེད་པར་འགྱུར། །སྒྲར་ནི་འདུ་ཤེས་འཛིན་པ་ལ། །ནམས་ཀྱང་སྟོན་པ་མཐོང་བ་མེད། །འདི་ལྟ་བུ་ཡི་གཟུགས་ཀྱི་མཚན། །སྟོང་པ་ཉིད་ནི་སུས་ཤེས་པ། །གཟུགས་ཀྱི་རང་བཞིན་གཞན་ཡིན་ལ། །སྟོང་ཉིད་གཞན་དུ་མ་གསུངས་ཏེ། །གང་གིས་གཟུགས་རྣམས་རབ་ཤེས་པ། །དེས་ནི་སྟོང་ཉིད་རབ་ཏུ་ཤེས། །གཟུགས་ཀྱི་མཚན་ཉིད་འདི་འདྲ་བར། །སྟོང་པ་གང་གིས་རབ་ཤེས་པ། །དེས་ནི་བདུད་རྣམས་བྱེ་བ་སྙེད། །ཟིལ་གྱིས་མནན་ཏེ་ཕམ་བྱེད་ནུས། །གང་གིས་གཟུགས་རྣམས་རབ་ཤེས་པ། །དེས་ནི་སྟོང་པ་ཉིད་ཀྱང་ཤེས། །གང་གིས་སྟོང་ཉིད་རབ་ཤེས་པ། །དེས་ནི་མྱ་ངན་འདས་པ་ཤེས། །རྣམ་པ་འདི་ནི་མི་ཤེས་པས། །དམིགས་པ་ཅན་རྣམས་རབ་ཏུ་བརླག །དངོས་པོ་མེད་ལ་དངོས་འཛིན་ཅིང་། །དངོས་མེད་ལ་ཡང་དངོས་སུ་འཛིན། །ཤེས་ཀྱི་ཁེ་ཡིས་བསླུས་པ་དག །ང་ཡི་བསྟན་ལས་ཤིན་ཏུ་འཁྱམས། །འབྲས་བུར་འདུ་ཤེས་གནས་པ་ལ། །དགེ་སྦྱོང་ནོར་ནི་གསོག་ཏུ་གྱུར། །བརྩོན་འགྲུས་ཉམས་པ་ལེ་ལོ་ཅན། །ཚུལ་ཁྲིམས་ཕུང་པོར་མི་གནས་པ། །ཀུན་
ནས་ལངས་པས་སྨྲ་བ་ནི། །འདི་ནི་སངས་རྒྱས་བཤད་མ་ཡིན། །ལ་ལ་དག་ནི་འདི་སྐད་དུ། །བདག་ཅག་བྱང་ཆུབ་ཞུགས་ཞེས་ཟེར། །མ་དུལ་ཞིང་ནི་མ་བྱང་བ། །གཅིག་ལ་གཅིག་ཀྱང་རི་མོ་མེད། །ཆོས་དག་ལ་ཡང་མི་གནས་ཤིང་། །སྒྲ་འདོད་པ་དག་འབྱུང་བར་འགྱུར། །དེ་ལྟ་བུ་ནི་དེ་མོས་ཏེ། །ཤེས་ཀྱི་ཁེ་ནི་ཚོལ་བའི་ཕྱིར། །འདུས་པ་དག་ལ་སེམས་བྱེད་ཅིང་། །རྙེད་པ་འདོད་པ་འབྱུང་བར་འགྱུར། །རྒྱགས་དང་བག་མེད་ཟིལ་ནོན་པས། །རྙེད་དང་བཀུར་སྟི་དོན་དུ་གཉེར། །བཀུར་སྟི་རྙེད་ལ་བརྟེན་ནས་ནི། །ཤེས་ཀྱི་ཁེ་རྣམས་ཚོལ་བ་དག །གཙུག་ལག་ཁང་དང་མཆོད་རྟེན་བྱེད། །ཁྱིམ་མི་མོ་ལ་ཆགས་ཤིང་མོས། །དམིགས་པ་དག་ལ་རྟེན་བྱེད་ཅིང་། །འདོད་པའི་སྲེད་ལ་ཤིན་ཏུ་གནས། །བདུད་ཀྱི་ཡུལ་དུ་གནས་ནས་ནི། །ཁྱིམ་པ་དག་གི་ལས་བྱེད་འགྱུར། །འདོད་པ་མེ་ལྕེ་འདྲ་བ་ནི། །ཁྱིམ་པ་དག་ལ་སྟོན་པར་འགྱུར། །དེ་དག་གི་ཡང་ཁྱིམ་ཞུགས་ནས། །དེ་ཡི་རིགས་ཀྱང་སུན་བྱེད་འགྱུར། །དེ་དག་ལ་ནི་ཁྱིམ་པ་རྣམས། །སྟོན་པ་ཉིད་དུ་འདུ་ཤེས་འགྱུར། །རབ་ཏུ་གནས་བཅས་དེ་དག་གི། །བུ་དང་ཆུང་མ་སུན་པར་བྱེད། །སུ་དག་དེ་ལ་ཟས་སྐོམ་གྱིས། །ཕན་འདོགས་པ་ནི་བྱེད་པར་འགྱུར། །དེ་ཡི་བུ་མོ་བུད་མེད་ལ། །ཆུང་མ་ཉིད་དུ་འདུ་ཤེས་འགྱུར། །དེ་དག་འདིར་ནི་རབ་བྱུང་ནས། །ཇི་ལྟར་གཞན་གྱི་བུད་མེད་ཆགས། །ཁྱིམ་པ་བདག་གི་ཆུང་མ་ལ། །དེ་ལྟར་མོས་ཤིང་ཆགས་མི་འགྱུར། །ཁྱིམ་པ་སྐྱ་བོའི་གོས་གྱོན་ལ། །ངས་ནི་བསླབ་པ་གང་བཤད་པ། །དེ་ཚེ་དགེ་སློང་དེ་དག་ལ། །བསླབ་པ་དེ་ཡང་མེད་པར་འགྱུར། །དེ་དག་རྔ་དུང་རྫ་རྔ་ཡིས། །ང་ལ་མཆོད་པ་བྱེད་འགྱུར་ཏེ། །མཆོད་པའི་དམ་པ་གང་ཡིན་པ། །ནན་ཏན་འདི་ནི་མེད་པར་འགྱུར། །དེ་དག་བདག་ཉིད་ཚུལ་ཁྲིམས་འཆལ། །ཚུལ་ཁྲིམས་གནས་པ་མཐོང་ནས་ནི། །ཕན་ཚུན་དུ་ཡང་འདི་སྐད་དུ། ། འདི་དག་ངེད་དང་འདྲ་ཞེས་སྨྲ། །སྡིག་པའི་སྤྱོད་ཡུལ་ཚུལ་ཁྲིམས་འཆལ། །དེ་དག་ཚུལ་ཁྲིམས་བསྔགས་ཐོས་ནས། །ཀུན་ནས་ལངས་པ་འདི་སྐད་དུ། །སངས་རྒྱས་
མཁྱེན་པ་འདི་མིན་སྨྲ། །དེ་དག་ལ་ནི་ངོ་ཚ་མེད། །དགེ་སྦྱོང་གི་ནི་ནོར་སྟོར་ཏེ། །མི་བདེན་ཚིག་གིས་རྩོད་བྱེད་ཅིང་། །སངས་རྒྱས་བྱང་ཆུབ་རབ་ཏུ་སྤོང་། །ངན་སེམས་ལྡན་པ་དེ་དག་ནི། །སངས་རྒྱས་བསྟན་པ་འདི་བོར་ཏེ། །ཆོས་རྣམས་རབ་ཏུ་སྤངས་ནས་ནི། །མནར་མེད་པར་ཡང་གནས་པར་འགྱུར། །གང་དག་སྤྱོད་པ་དེ་འདྲ་བ། །ངས་ནི་མ་ཐོས་མ་མཐོང་སྟེ། །བྱིས་པའི་ཆོས་ལ་གནས་པ་རྣམས། །སངས་རྒྱས་ཡེ་ཤེས་ཐོབ་མི་འགྱུར། །དེ་དག་གི་ཡང་ཚུལ་འཆོས་དང་། །དེ་ལ་གཡོ་ཡང་ཅི་ཡོད་པ། །ཐམས་ཅད་དེ་བཞིན་ངས་ཤེས་ཏེ། །དེ་ལ་ང་ཡི་ཡེ་ཤེས་འཇུག །དེ་ཡི་འཁྲུལ་པ་མང་པོ་ནི། །གལ་ཏེ་བསྐལ་པར་རབ་བཤད་ཀྱང་། །བྱང་ཆུབ་སེམས་དཔར་ཁས་འཆེ་ཡི། །ཅུང་ཟད་ཙམ་ཞིག་བརྗོད་པར་འགྱུར། །གཞོན་ནུར་གྱུར་པ་དེ་དག་ནི། །སྡིག་པ་མི་བྱེད་ཡོང་མེད་དེ། །ཕྱི་མའི་དུས་ལ་དེ་དག་དང་། །ཁྱོད་ནི་སྟོན་པར་མ་བྱེད་ཅིག །སྨྲ་བ་དང་ནི་གཏམ་གྱིས་ལ། །དེ་དག་ལ་ནི་རི་མོར་གྱིས། །བྱང་ཆུབ་དམ་པའི་དོན་གྱི་ཕྱིར། །ཞུམ་པ་མེད་པར་བཀུར་སྟི་གྱིས། །ལོ་གྲངས་དུ་ལོན་ཀུན་དྲིས་ལ། །དེ་དག་རྒན་པར་གྱུར་ན་ཡང་། །དེ་ལ་རི་མོ་ལེགས་གྱིས་ལ། །རྐང་པ་ལ་ཡང་མགོས་ཕྱག་འཚོལ། །བྱང་ཆུབ་སྙིང་པོ་རྣམས་མཐོང་ན། །དེ་དག་འཁྲུལ་པ་མི་བལྟའོ། །དེ་ལ་ཁོང་ཁྲོ་མི་བསྐྱེད་ཅིང་། །རྟག་ཏུ་བྱམས་པའི་སེམས་སུ་བྱ། །གང་གི་འཁྲུལ་པ་ཅི་མཐོང་ཡང་། །དེ་དག་གི་ནི་ཉེས་མི་བརྗོད། །ཅི་འདྲ་བ་ཡི་ལས་བྱས་པ། །འབྲས་བུ་དེ་འདྲ་ཐོབ་པར་འགྱུར། །བཞིན་གྱི་ཟླ་བ་འཛུམ་བཞིན་དུ། །རྒན་རབས་དང་ནི་གསར་བུ་ལ། །རྟག་ཏུ་གསོང་པོར་སྨྲ་བ་དང་། །དེས་ཤིང་ང་རྒྱལ་བཅོམ་པར་བྱ། །ཆོས་གོས་དང་ནི་བསོད་སྙོམས་ཀྱིས། །དེ་དག་ལ་ནི་ཕན་གདགས་ཤིང་། །འདི་དག་ཐམས་ཅད་འདྲེན་འགྱུར་ཞེས། །དེ་ལྟར་ཁྱོད་ཀྱི་སེམས་ཞོག་ཤིག །གལ་ཏེ་ཆོས་ཀྱི་སྦྱིན་པའི་ཕྱིར། །དེ་དག་ཁྱོད་ལ་གསོལ་འདེབས་ན། །དང་པོར་ཚིག་ནི་འདི་སྐད་སྨྲོས། །ཁོ་བོས་མཚུངས་མེད་མ་བསླབས་སོ། །འདི་སྐད་དུ་ནི་ཚིག་བརྗོད་དེ། །
ཚེ་དང་ལྡན་པ་མཁས་ཤིང་རིག། བདག་ཉིད་ཆེན་པོའི་མདུན་དུ་ནི། །བདག་གིས་ག་ལ་བཤད་ནུས་སྨྲོས། །གྱ་ཚོམ་དུ་ནི་མ་སྨྲ་བར། །དེ་དག་གི་ནི་སྣོད་རྟོགས་ལ། །སྣོད་དུ་རུང་བར་རིག་ན་ནི། །མ་གསོལ་བར་ཡང་བཤད་པར་གྱིས། །ཚུལ་ཁྲིམས་འཆལ་པ་འཁོར་ནང་ན། །མང་དུ་གནས་པར་མཐོང་ན་ཁྱོད། །ཡོ་བྱད་བསྙུངས་པ་མ་ཆད་པར། །སྦྱིན་པ་ཡི་ནི་བསྔགས་པ་བརྗོད། །ཚུལ་ཁྲིམས་གཙང་ལ་རབ་གནས་ཤིང་། །ཇི་སྟེ་འདོད་པ་ཉུང་ཡོད་ན། །བྱམས་པའི་སེམས་ནི་བསྐྱེད་ནས་སུ། །ཡོ་བྱད་བསྙུངས་པའི་གཏམ་གྱིས་ཤིག །གལ་ཏེ་སྡིག་པ་འདོད་ཉུང་ཞིང་། །ཚུལ་ཁྲིམས་ལྡན་པ་མང་ཡོད་ན། །དེ་ཚེ་ཕྱོགས་རྙེད་གྱུར་པའི་ཕྱིར། །ཚུལ་ཁྲིམས་ཀྱི་ཡང་བསྔགས་པ་བརྗོད། །ཐོག་མར་འཁོར་རྣམས་ཤེས་བྱ་སྟེ། །གལ་ཏེ་གཙང་ཡོད་དེ་ཡི་ཚེ། །དགེ་བའི་ཆོས་རྣམས་ཇི་སྙེད་པ། །ཐམས་ཅད་དེར་ནི་རབ་ཏུ་བསྟན། །སྦྱིན་དང་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་ཐོས་པ་དང་། །དེ་བཞིན་འདོད་ཉུང་ཡོ་བྱད་བསྙུངས། །རྟག་ཏུ་བསྔགས་ཤིང་བརྗོད་པར་བྱ། །དགོན་གནས་བསམ་གཏན་བསྟེན་པ་དང་། །འདུ་འཛིར་གནས་པ་སྤངས་པ་ནི། །དེ་དག་གཟུངས་ཀྱི་སྒོ་ཡིན་ཏེ། །འདི་ཡི་བསྔགས་པ་བརྗོད་པར་བྱ། །དགོན་པར་གནས་པ་མི་སྤོང་ཞིང་། །ཚུལ་ཁྲིམས་ལ་ཡང་ལྷུར་མི་གཟུང་། །ནང་དུ་འཇོག་ལ་བསྟེན་བྱ་ཞིང་། །སྦྱིན་པ་ལ་ནི་ལྷུར་མི་བྱ། །ཚུལ་ཁྲིམས་ཕུང་པོར་གནས་ནས་ནི། །མང་དུ་ཐོས་པ་བསྒྲུབ་པར་བྱ། །ཏིང་འཛིན་འདི་ནི་ཡོངས་བཙལ་ཞིང་། །སྟོན་པའི་རིང་བསྲེལ་མཆོད་པར་བྱ། །ཏིང་འཛིན་ཞི་བ་བཙལ་བའི་ཕྱིར། །གདུགས་དང་རྒྱལ་མཚན་བ་དན་དང་། །སྤོས་དང་ཕྲེང་བ་བྱུག་པ་ཡིས། །སངས་རྒྱས་ལ་ནི་མཆོད་པ་བྱ། །དགའ་བར་འགྱུར་བའི་སིལ་སྙན་དང་། །གླུ་དབྱངས་སྦྱར་ཅིང་བླངས་ནས་སུ། །ཞུམ་པ་མེད་ཅིང་མི་གཡེལ་བར། །སངས་རྒྱས་ཀྱི་ནི་རིང་བསྲེལ་མཆོད། །བྱང་ཆུབ་མཆོག་གི་དོན་གྱི་ཕྱིར། །སྤོས་དང་ཕྲེང་བ་བདུག་པ་དང་། །གོས་དང་ཕྱེ་མ་ཇི་སྙེད་པ། །དེ་དག་ཀུན་གྱིས་མགོན་མཆོད་ཀྱིས། །ཏིང་འཛིན་
ཞི་བ་འདི་ཚོལ་ཕྱིར། །མཆོད་པ་ཇི་སྙེད་ཅི་ཡོད་པ། །དཔག་མེད་བསམ་གྱིས་མི་ཁྱབ་པས། །སངས་རྒྱས་ཀུན་ལ་མཆོད་པར་གྱིས། །བླ་མེད་སངས་རྒྱས་ཡེ་ཤེས་ཏེ། །ཆགས་མེད་ཡེ་ཤེས་རབ་ཚོལ་བས། །སེམས་ཅན་ཀུན་ལ་སྐལ་བའི་ཤས། །མི་གནས་པར་ནི་མཉམ་པར་སྦྱིན། །མི་གནས་པར་ནི་གྱུར་ནས་སུ། །ཏིང་འཛིན་ཞི་བ་ཚོལ་བའི་ཕྱིར། །སངས་རྒྱས་རྣམས་ལ་ངས་ཀྱང་སྔོན། །མཆོད་པ་བསམ་གྱིས་མི་ཁྱབ་བྱས། །སངས་རྒྱས་སྐྱེ་བ་རྙེད་པར་དཀའ། །མིར་སྐྱེ་བ་ཡང་རྙེད་པར་དཀའ། །བསྟན་པ་ལ་ཡང་དད་པ་དང་། །རབ་བྱུང་བསྙེན་རྫོགས་རྙེད་པར་དཀའ། །གང་གིས་བྱང་ཆུབ་སེམས་བསྔོས་པ། །དེ་དག་སྟོན་པ་མཉེས་པར་བྱས། །དམ་བཅས་པ་ལས་མ་གཡོ་བར། །ཁྱོད་ནི་ནན་ཏན་གནས་པར་གྱིས། །ཟད་པའི་དུས་སུ་ཉེར་གནས་ཚེ། །གང་གིས་མདོ་སྡེ་འདི་བཟུང་སྟེ། །རབ་ཏུ་བརྗོད་པ་གཟུང་བྱས་ན། །མྱུར་དུ་སྤོབས་པ་ཐོབ་པར་འགྱུར། །ཚིགས་བཅད་གཅིག་ཙམ་བཟུང་བ་ཡང་། །བསོད་ནམས་ཕུང་པོ་བསམ་ཡས་ན། །ཉན་པར་འདོད་པས་མདོ་སྡེ་ཡང་། །ཐམས་ཅད་གཟུང་བ་ཅི་ཞིག་སྨོས། །སེམས་ཅན་ཐམས་ཅད་བྱང་ཆུབ་ཐོབ། །དེ་དག་མི་གཡེལ་མཆོད་བྱས་ཏེ། །བསྐལ་པ་སེམས་ཅན་སྙེད་དུ་ཡང་། །རྟག་ཏུ་གུས་པར་མཆོད་པ་བས། །ཏིང་འཛིན་དམ་པ་འདི་ལས་ནི། །གང་གིས་ཚིགས་བཅད་གཅིག་བཟུང་བ། །བསོད་ནམས་སྔ་མ་ཐམས་ཅད་ནི། །བཅུ་དྲུག་ཆར་ཡང་མི་ཕོད་དོ། །ཏིང་འཛིན་འདི་ནི་ཐོས་ནས་སུ། །སུ་དག་ནེམ་ནུར་མི་བྱེད་པ། །ཕན་ཡོན་བསམ་གྱིས་མི་ཁྱབ་སྟེ། །སངས་རྒྱས་ཀྱི་ནི་མཁྱེན་པས་རིག །སོ་སོ་ཡང་དག་པར་རིག་པ་ལ་འཇུག་པའི་ལེའུ་སྟེ་ཉི་ཤུ་ལྔ་པའོ།། །།