ཉི་ཤུ་རྩ་དྲུག་པ། རྗེས་སུ་ཡི་རང་བའི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཐབས་མཁས་པར་བྱའོ། །གཞོན་
ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་མཁས་པ་ཡིན་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ལ་ཉེ་དུའི་སེམས་ཉེ་བར་བཞག་སྟེ། སེམས་ཅན་ཐམས་ཅད་ཀྱི་དགེ་བའི་རྩ་བ་དང་། བསོད་ནམས་ཀྱི་ཕུང་པོ་ཅི་ཡོད་པ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་རྗེས་སུ་ཡི་རང་བར་བྱས་ཏེ། ཉིན་ལན་གསུམ་མཚན་ལན་གསུམ་སེམས་ཅན་ཐམས་ཅད་ཀྱི་དགེ་བའི་རྩ་བ་དང་། བསོད་ནམས་ཀྱི་ཕུང་པོ་ལ་རྗེས་སུ་ཡི་རངས་ནས། ཐམས་ཅད་མཁྱེན་པ་ཉིད་ལ་དམིགས་པའི་སེམས་བསྐྱེད་པས་དགེ་བའི་རྩ་བ་དང་། བསོད་ནམས་ཀྱི་ཕུང་པོ་དེ་སེམས་ཅན་ཐམས་ཅད་ལ་གཏང་བར་བྱའོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐབས་མཁས་པ་ལས་བྱུང་བའི་བསོད་ནམས་ཀྱི་ཕུང་པོ་དང་ལྡན་པས་མྱུར་དུ་ཏིང་ངེ་འཛིན་འདི་འཐོབ་ཅིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སེམས་ཅན་འདི་དག་ཐམས་ཅད་བདག་གི་གཉེན། །འདི་ཡི་བསོད་ནམས་མང་པོ་ཅི་ཡོད་པ། །ཉིན་ཡང་ལན་གསུམ་མཚན་ཡང་ལན་གསུམ་དུ། །བྱང་ཆུབ་སེམས་བསྐྱེད་རྗེས་སུ་ཡི་རང་ངོ་། །སུ་དག་སྲོག་གི་ཕྱིར་ཡང་སྡིག་མི་བྱེད། །ཚུལ་ཁྲིམས་རྣམ་པར་དག་ལ་ཡི་རང་ངོ་། །བྱང་ཆུབ་སེམས་དཔའ་མོས་པ་ཕུན་སུམ་ཚོགས། །དེ་དག་བསོད་ནམས་ཅི་ཡོད་ཡི་རང་ངོ་། །གང་དག་སངས་རྒྱས་དད་ཅིང་དེ་བཞིན་དུ། །ཆོས་དང་དགེ་འདུན་དད་ལ་ཡི་རང་ངོ་། །བྱང་ཆུབ་ཉིད་ནི་རབ་ཏུ་འདོད་པའི་ཕྱིར། །བདེ་གཤེགས་མཆོད་པ་བྱེད་ལ་ཡི་རང་ངོ་། །རྫོགས་པའི་བྱང་ཆུབ་གདུང་ནི་གནས་བྱའི་ཕྱིར། །སེམས་ཅན་དོན་དུ་བློ་གྲོས་ཆེན་པོ་ཡིས། །བླ་མེད་བྱང་ཆུབ་དམ་པ་མཆོག་ཏུ་ནི། །གང་གིས་སེམས་བསྐྱེད་དེ་ལ་ཡི་རང་ངོ་། །བྱང་ཆུབ་སེམས་དཔའ་སྙིང་རྗེས་ནོན་པ་ཡིས། །ནོར་དང་འབྲུ་དང་རིན་ཆེན་བཙུན་མོ་དང་། །སྲས་དང་སྲས་མོ་རྒྱལ་སྲིད་རྒྱས་པ་དང་། །བདག་གི་ཤ་ཡང་གཏོང་ལ་ཡི་རང་ངོ་། །ཤེས་རབ་
ཡོངས་སུ་བསྒོམས་པས་ལུས་དུལ་ཞིང་། །ཐབས་ལ་མཁས་པའི་བསླབ་པ་རབ་བསླབས་པས། །སེམས་ཅན་དོན་དུ་རབ་ཏུ་དགའ་སེམས་ཀྱིས། །བདག་གི་ལུས་ཀྱང་གཏོང་ལ་ཡི་རང་ངོ་། །གཅིག་པུ་གཉིས་སུ་མེད་པར་ནགས་གནས་ཤིང་། །རྟག་ཏུ་བསེ་རུ་ལྟར་གྱུར་འཚོ་བ་གཙང་། །ཁོར་མོར་བྱ་བ་ཉུང་ཞིང་སུ་དག་ནི། །ཁེ་ཕྱིར་ཚུལ་འཆོས་མེད་ལ་ཡི་རང་ངོ་། །སུ་དག་སྟེན་པར་མི་བྱེད་ཕྲག་དོག་མེད། །ཁྱིམ་ལ་སྲེད་པར་མི་བྱེད་རྟག་པར་ཡང་། །ཁམས་གསུམ་དག་ལ་རབ་ཏུ་འཇིགས་སྐྲག་སྟེ། །འཇིག་རྟེན་མ་ཆགས་སྤྱོད་ལ་ཡི་རང་ངོ་། །སྲིད་པར་སྐྱེ་བ་ཀུན་ལ་རབ་སྐྱོ་ཞིང་། །སུ་དག་སྤྲོས་པ་མེད་ལ་ཡི་རང་ངོ་། །རྩོད་པ་མེད་ཅིང་ཉེ་བར་ཞི་བའི་སེམས། །དེ་ལ་ཏིང་འཛིན་འདི་ནི་རྙེད་མི་དཀའ། །གང་གིས་འདུ་འཛི་ཉེས་པ་མཐོང་ནས་ནི། །རྩོད་པ་ཐམས་ཅད་ཡོངས་སྤངས་དགོན་པར་གནས། །ཤིང་དྲུང་གནས་ཤིང་རྣམ་གྲོལ་ལྷུར་བྱེད་པ། །བདེ་གཤེགས་སྲས་ལ་རྗེས་སུ་ཡི་རང་ངོ་། །བདག་ལ་མི་སྟོད་གཞན་ལ་མི་སྨོད་ཅིང་། །དགོན་པར་གནས་པ་དག་ལ་ཡི་རང་ངོ་། །སུ་དག་བསྟན་པ་འདི་ལ་བག་ཡོད་ཅིང་། །བག་མེད་སྤངས་པ་དེ་ལ་ཡི་རང་ངོ་། །བྱང་ཆུབ་ཕྱོགས་ཀྱི་ཆོས་རྣམས་ཇི་སྙེད་པ། །ཀུན་གྱི་རྩ་བ་བག་ཡོད་འདི་ཡིན་ཏེ། །སངས་རྒྱས་སྲས་གང་རྟག་ཏུ་བག་ཡོད་པ། །དེ་དག་ཏིང་འཛིན་འདི་ནི་རྙེད་མི་དཀའ། །བདེ་བར་གཤེགས་པའི་བསྟན་པ་གཏེར་རྙེད་ཡིན། །རབ་ཏུ་བྱུང་བ་གཏེར་ནི་གཉིས་པ་སྟེ། །དད་པ་རྙེད་པ་གཏེར་ནི་གསུམ་པ་ཡིན། །ཏིང་འཛིན་འདི་ནི་གཏེར་རྙེད་བཞི་པའོ། །སངས་རྒྱས་སྤྱོད་ཡུལ་སྟོང་པ་འདི་ཐོས་ནས། །འདི་ལ་མི་སྤོང་བ་ཡང་གཏེར་རྙེད་ཡིན། །སྤོབས་པ་མཐའ་ཡས་པ་ཡང་གཏེར་རྙེད་པ། །གཟུངས་རྣམས་གང་ཡིན་དེ་དག་གཏེར་གྱི་མཆོག །དགེ་བའི་ཆོས་རྣམས་ཇི་སྙེད་རྗོད་པ་དག །ཚུལ་ཁྲིམས་ཐོས་གཏོང་བཟོད་པ་དེ་བཞིན་ཏེ། །ཐམས་ཅད་ཀྱི་ཡང་རྩ་བ་བག་ཡོད་འདི། །གཏེར་རྙེད་ཡིན་པར་བདེ་བར་གཤེགས་པས་གསུངས། །སངས་རྒྱས་བསྟན་པ་འདི་ལ་བག་ཡོད་ཅིང་། །སུ་དག་ལ་ནི་ཡང་དག་སྨོན་ལམ་ཡོད། །
དེ་དག་ཏིང་འཛིན་འདི་ནི་རྙེད་མི་དཀའ། །སངས་རྒྱས་བསྟན་པ་འདི་ལ་ཉེ་བར་གྱུར། །རྗེས་སུ་ཡི་རང་བའི་ལེའུ་སྟེ་ཉི་ཤུ་དྲུག་པའོ།། །།