ཉི་ཤུ་རྩ་བདུན་པ། སྦྱིན་པའི་ཕན་ཡོན་གྱི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བག་ཡོད་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་བག་ཡོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་རྙེད་པར་མི་དཀའ་ན་ཏིང་ངེ་འཛིན་འདི་ལྟ་ཅི་སྨོས། གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བག་ཡོད་པ་ཡིན་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པ་ཡིན་ནོ། །གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པ་ཡིན་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པ་ནི་ཐམས་ཅད་མཁྱེན་པའི་སེམས་དང་མ་བྲལ་བས་ཕ་རོལ་ཏུ་ཕྱིན་པ་དྲུག་ལ་སྤྱོད་པ་ཡིན་ཏེ། དེའི་ཕན་ཡོན་འདི་དག་ཉོན་ཅིག་དང་ངས་ཁྱོད་ལ་བཤད་དོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་ལ་མོས་པའི་ཕན་ཡོན་ནི་བཅུ་སྟེ། བཅུ་གང་ཞེ་ན། འདི་ལྟ་སྟེ། དེའི་སེར་སྣའི་ཉོན་མོངས་པ་ཚར་བཅད་པ་ཡིན། དེའི་སེམས་རྟག་ཏུ་གཏོང་བའི་རྗེས་སུ་སྤེལ་བ་ཡིན། སྐྱེ་བོ་མང་པོ་དང་ཐུན་མོང་པའི་ལོངས་སྤྱོད་ལས་སྙིང་པོ་ལེན་པ་ཡིན། ལོངས་སྤྱོད་ཆེན་པོའི་རིགས་སུ་སྐྱེ་ཞིང་སྐྱེས་མ་ཐག་ཏུ་དེ་གཏོང་བའི་སེམས་མངོན་དུ་འགྱུར་བ་ཡིན། འཁོར་བཞི་རྣམས་ལ་ཕངས་ཤིང་སྡུག་པ་ཡིན། འཇིགས་པ་མེད་ཅིང་ཞུམ་པ་མེད་པར་འཁོར་གྱི་ནང་དུ་འགྲོ། ཕྱོགས་དང་ཕྱོགས་མཚམས་སུ་དེའི་རྒྱ་ཆེར་བརྗོད་པའི་སྒྲ་ཚིགས་སུ་བཅད་པ་མངོན་པར་འབྱུང་། རྐང་ལག་འཇམ་ཞིང་གཞོན་པ་ཡིན། རྐང་མཐིལ་མཉམ་ཞིང་རབ་ཏུ་གནས་པ་ཡིན། བྱང་ཆུབ་ཀྱི་སྙིང་པོ་ལ་འདུག་གི་བར་དུ་དགེ་བའི་བཤེས་གཉེན་དང་མི་འབྲལ་བ་ཡིན་ཏེ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་
པ་ལ་མོས་པའི་ལེགས་པ་ནི་འདི་བཅུའོ། །དེ་ལ་འདི་སྐད་ཅེས་བྱ་སྟེ། དེས་ནི་སེར་སྣ་ཚར་བཅད་ཅིང་། །གཏོང་བའི་སེམས་ཀྱང་རྣམ་པར་སྤེལ། །སྙིང་པོ་དག་ནི་བླངས་པར་འགྱུར། །ཤིན་ཏུ་འབྱོར་པའི་རིགས་སུ་སྐྱེ། །སྐྱེས་མ་ཐག་ཏུ་དེ་ཡི་སེམས། །གཏོང་བ་དག་ལ་ཤིན་ཏུ་འཇུག །རབ་ཏུ་བྱུང་དང་ཁྱིམ་པ་ཡི། །སེམས་ཅན་རྣམས་ལ་ཕངས་པར་འགྱུར། །འཇིགས་པ་མེད་ཅིང་འཁོར་དུ་ཡང་། །མ་ཞུམ་པར་ནི་ཉེ་བར་འགྲོ། །གྲོང་དང་གྲོང་ཁྱེར་རྣམས་སུ་ཡང་། །དེ་ཡི་སྒྲ་ནི་རྒྱ་ཆེར་འགྱུར། །རྐང་ལག་དག་ནི་འཇམ་པ་ཡང་། །རྙེད་དཀའ་བར་ནི་ཡོང་མི་འགྱུར། །སངས་རྒྱས་དང་ནི་ཉན་ཐོས་དང་། །དགེ་བའི་བཤེས་གཉེན་ཐོབ་པར་འགྱུར། །སེར་སྣའི་སེམས་ནི་ནམ་ཡང་མི་འབྱུང་སྟེ། །དེ་ཡི་སེམས་ནི་རྟག་ཏུ་གཏོང་ལ་དགའ། །སེམས་ཅན་བྱེ་བ་མང་ལ་ཕངས་པར་འགྱུར། །སེར་སྣ་མེད་པའི་ཕན་ཡོན་འདི་དག་ཡིན། །དེ་ནི་ནོར་མང་རིགས་སུ་སྐྱེ་བར་འགྱུར། །སྐྱེས་ནས་དེ་ཡི་ཡིད་ནི་གཏོང་ལ་དགའ། །སྙིང་པོ་བླངས་ནས་འཆི་བའི་དུས་བྱེད་འགྱུར། །སེར་སྣ་མེད་པའི་ཕན་ཡོན་འདི་དག་ཡིན། །འཇིགས་པ་མེད་པར་འཁོར་གྱི་ནང་དུ་འགྲོ། །ཕྱོགས་སུ་རྒྱ་ཆེར་དེ་ཡི་སྒྲ་ཡང་གྲགས། །དེ་ཡི་རྐང་ལག་རྟག་ཏུ་འཇམ་པར་འགྱུར། །སེར་སྣ་མེད་པའི་ཕན་ཡོན་འདི་དག་ཡིན། །དགེ་བའི་བཤེས་གཉེན་རྙེད་པར་མི་དཀའ་སྟེ། །དེས་ནི་སངས་རྒྱས་རྣམས་དང་ཉན་ཐོས་མཐོང་། །མཐོང་ནས་དེ་དག་དད་པས་མཆོད་པ་བྱེད། །སེར་སྣ་མེད་པའི་ཕན་ཡོན་འདི་དག་ཡིན། །སྦྱིན་པའི་ཕན་ཡོན་གྱི་ལེའུ་སྟེ་ཉི་ཤུ་བདུན་པའོ།། །།