ཉི་ཤུ་རྩ་དགུ་པ། ཕན་ཡོན་བཅུའི་ལེའུ།
གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་ལ་གནས་ཤིང་བྱམས་པ་ལ་སྤྱོད་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། མེས་མི་ཚིག །མཚོན་གྱིས་མི་སོད། དུག་གིས་མི་ཚུགས། ཆུས་མི་འཆི། ལྷ་རྣམས་དེ་ལ་སྲུང་བར་བྱེད། ལུས་མཚན་གྱིས་བརྒྱན་པ་ཐོབ་པར་འགྱུར། དེའི་ངན་འགྲོའི་སྒོ་ཐམས་ཅད་བཅད་པར་འགྱུར། དེ་ཚངས་པའི་འཇིག་རྟེན་དུ་སྐྱེ་བ་རྙེད་པ་མི་དཀའ་བར་འགྱུར། དེ་བདེ་བར་ཉིན་མཚན་འདའ་བར་འགྱུར། དེའི་ལུས་ལ་དགའ་བ་དང་བདེ་བ་མི་འདོར་བར་འགྱུར་ཏེ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་ལ་གནས་པ། བྱམས་པ་ལ་སྤྱོད་པའི་
ཕན་ཡོན་ནི་འདི་བཅུའོ། །དེ་ལ་འདི་སྐད་ཅེས་བྱ་སྟེ། དེ་ནི་མེས་ཀྱང་མི་ཚིག་སྟེ། །མཚོན་གྱིས་ཀྱང་ནི་སོད་མི་འགྱུར། །ལུས་ལ་དུག་གིས་མི་ཚུགས་ཏེ། །ཆུས་ཀྱང་འཆི་བར་མི་འགྱུར་རོ། །དེ་ལ་ལྷ་རྣམས་སྲུང་བྱེད་དེ། །སུམ་ཅུ་རྩ་གཉིས་མཚན་ཀྱང་འབྱུང་། །དེ་ཡི་ངན་འགྲོ་ཀུན་བཀག་སྟེ། །བཟོད་ལ་གནས་པའི་ཕན་ཡོན་འདི། །ཚངས་པ་དང་ནི་བརྒྱ་བྱིན་ཡང་། །དེ་ལ་རྙེད་པར་དཀའ་མི་འགྱུར། །རྟག་ཏུ་བདེ་བར་གནས་བྱེད་ཅིང་། །དགའ་བ་དག་ཀྱང་བསམ་ཡས་འགྱུར། །དེ་ནི་མེ་དང་མཚོན་གྱིས་ཡོང་མི་སོད། །བྱེ་བྲག་ཏུ་ནི་ཆུ་ནང་མི་འཆི་སྟེ། །ལྷ་དང་དེ་བཞིན་ཀླུ་དང་གནོད་སྦྱིན་སྲུང་། །བྱམས་ལ་གནས་པའི་ཕན་ཡོན་འདི་དག་གོ །དེ་ཡི་ལུས་ལ་སུམ་ཅུ་གཉིས་མཚན་འབྱུང་། །དེ་ནི་ཕྱིར་ཡང་ལོག་ལྟུང་འགྲོ་མི་འགྱུར། །ཤི་འཕོས་ནས་ནི་ཚངས་པའི་གནས་སུ་སྐྱེ། །བཟོད་ལ་གནས་པའི་ཕན་ཡོན་འདི་དག་གོ །དེ་ནི་ཉིན་མཚན་དག་ཀྱང་བདེ་བར་འདའ། །ལུས་ནི་དགའ་བས་རྟག་ཏུ་ཁྱབ་པར་འགྱུར། །བཟོད་ཅིང་དེས་པའི་སྟོབས་ལ་དེ་གནས་པས། །མཁས་པ་རྟག་ཏུ་དང་བའི་སེམས་སུ་འགྱུར། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། བསྙེན་དཀའ་བར་འགྱུར་བ་དང་། སངས་རྒྱས་ཀྱིས་ཡོངས་སུ་བཟུང་བ་འཐོབ་པ་དང་ལྷས་ཡོངས་སུ་གཟུང་བར་འགྱུར་བ་དང་། དེས་ཐོས་པའི་ཆོས་ཡོངས་སུ་མི་ཉམས་པ་དང་སྔོན་མ་ཐོས་པའི་ཆོས་རྣམས་འཐོབ་པ་དང་། ཏིང་ངེ་འཛིན་གྱི་རིགས་འཐོབ་པ་དང་ནད་ཉུང་བར་འགྱུར་བ་དང་དེའི་ཟས་རྣམས་ཀྱང་ཡང་དག་པར་བདེ་བར་འཇུ་བར་འགྱུར་བ་དང་། པད་མ་ལྟ་བུར་འགྱུར་ཞིང་མདའ་སྟེའུ་ཁམ་ལྟར་མི་འགྱུར་བ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། བསྙེན་དཀའ་བར་ཡང་རྟག་ཏུ་འགྱུར། །དེ་ལ་ལེ་ལོ་ཡོད་མིན་ཏེ། །ལྷ་རྣམས་ཀྱང་ནི་སྲུང་བར་བྱེད། །སངས་རྒྱས་དག་ནི་མྱུར་དུ་མཐོང་། །སྨོན་ལམ་ཡོངས་སུ་རྫོགས་བྱེད་དེ། །ཏིང་འཛིན་རིགས་ནི་རྙེད་པར་འགྱུར། །དེ་ལ་ནད་ཀྱང་མི་
འབྱུང་སྟེ། །བརྩོན་འགྲུས་ལྡན་པའི་ཡོན་ཏན་འདི། །དེ་ཡི་ཟས་དང་སྐོམ་དག་ཀྱང་། །བདེ་བར་འཇུ་སྟེ་རྨྱ་བ་མེད། །ཆུ་ཡི་ནང་ན་ཨུད་པལ་དག །རིམ་གྱིས་སྐྱེ་བར་འགྱུར་བ་ལྟར། །དེ་བཞིན་བྱང་ཆུབ་སེམས་དཔའ་ཡང་། །དཀར་པོའི་ཆོས་ཀྱིས་རྣམ་པར་འཕེལ། །དེ་ཡི་ཉིན་དང་མཚན་མོ་ཡང་། །འབྲས་བུ་ཡོད་པར་འདའ་བར་འགྱུར། །བརྩོན་འགྲུས་བརྩམ་པ་དེ་བཞིན་གཤེགས། །བསྐལ་པ་དུ་མར་བསྒྲུབས་པ་ཡིས། །བྱང་ཆུབ་སེམས་དཔའ་བརྩོན་འགྲུས་ལྡན། །དེ་ཡི་ཕན་ཡོན་འདི་དག་བཤད། །དེས་པ་བརྩོན་འགྲུས་བརྩམས་འགྱུར་ཏེ། །རྒྱལ་བ་དག་གིས་ཡོངས་སུ་བཟུང་། །ལྷ་ཡང་དེ་ལ་སྨོན་པ་སྐྱེད། །སངས་རྒྱས་བྱང་ཆུབ་མྱུར་འཚང་རྒྱ། །དེ་ཡི་ཐོས་པ་ཡང་མི་འབྲི། །ཆོས་གཞན་མང་པོ་སྨྲ་བར་བྱེད། །དེ་ཡི་སྤོབས་པ་རྒྱ་ཆེར་འཕེལ། །བརྩོན་འགྲུས་བརྩམས་པའི་ཕན་ཡོན་འདི། །ཏིང་འཛིན་རིགས་ཀྱང་མྱུར་དུ་འཐོབ། །དེ་ལ་ནམ་ཡང་ནད་མི་འབྱུང་། །དེས་ནི་ཁ་ཟས་ཅི་ཟོས་པ། །བདེ་བར་ཡོངས་སུ་འཇུ་བར་འགྱུར། །མི་གཡེལ་བརྩོན་འགྲུས་བརྩམས་པ་ཡི། །དཀར་པོའི་ཕྱོགས་ནི་ཉིན་མཚན་འཕེལ། །དེ་ལྟར་བརྩོན་འགྲུས་སྟོབས་ལྡན་པས། །རིང་པོར་མི་ཐོགས་བྱང་ཆུབ་འགྱུར། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་ལ་མོས་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། སྤྱོད་པ་ལ་གནས་པ་དང་སྤྱོད་ཡུལ་ལ་སྤྱོད་པ་དང་ཡོངས་སུ་གདུང་བ་མེད་པར་གནས་པ་དང་དབང་པོ་སྦས་པར་འགྱུར་བ་དང་། དགའ་བ་མྱོང་བ་དང་འདོད་པ་ལས་དབེན་པ་དང་བསམ་གཏན་གསོག་གིས་ཚིམ་པ་མེད་པ་མ་ཡིན་པ་དང་བདུད་ཀྱི་ཡུལ་ལས་ཐར་བ་དང་སངས་རྒྱས་ཀྱི་ཡུལ་ལ་རབ་ཏུ་གནས་པ་དང་། རྣམ་པར་གྲོལ་བ་རབ་ཏུ་སྨིན་པར་བྱེད་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་ལ་མོས་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། སྤྱོད་པ་དག་ལ་དེ་གནས་པས། །དེ་ནི་སྤྱོད་པ་མེད་མི་འགྱུར། །རྣལ་འབྱོར་པ་ནི་སྤྱོད་ཡུལ་སྤྱོད། །སྤྱོད་ཡུལ་མ་ཡིན་རྣམ་པར་སྤོང་། །གདུང་བ་མེད་པར་དེ་གནས་ཏེ། །དབང་པོ་བསྡམས་ཤིང་སྦས་པ་ཡིན། །དེ་ནི་དགའ་
བ་མྱོང་བྱེད་དེ། །བསམ་གཏན་སྒོམ་པའི་སྤྱོད་ཡུལ་ལོ། །འདོད་པའི་སྲེད་ལ་འདོད་ཆགས་བྲལ། །བསམ་གཏན་བདེ་ལ་སྟེན་བྱེད་དེ། །བདུད་ཀྱི་ཡུལ་ལས་དེ་ཐར་ཅིང་། །སངས་རྒྱས་ཡུལ་ལ་དེ་གནས་སོ། །རྣལ་འབྱོར་བྱེ་བྲག་འདི་ཡིན་ཏེ། །གཅིག་པུ་ནགས་ཁྲོད་མོས་བྱེད་ཅིང་། །རྣམ་པར་གྲོལ་བ་ཡོངས་སུ་སྐོང་། །དེ་ནི་བཅུ་པའི་གནས་ཡིན་ནོ། །བྱང་ཆུབ་སེམས་དཔའ་དེ་ནི་སྤྱོད་ལ་གནས། །སྤྱོད་པ་མ་ཡིན་ཐམས་ཅད་རྣམ་པར་སྤང་། །སྤྱོད་ཡུལ་མ་ཡིན་སྤངས་ནས་སྤྱོད་ཡུལ་གནས། །ཏིང་འཛིན་བརྩོན་པའི་ཕན་ཡོན་འདི་དག་གོ །དེ་ལ་གདུང་བ་ནམ་ཡང་གདུང་མི་འགྱུར། །འཕགས་པའི་བདེ་བར་གནས་པ་རེག་ནས་སུ། །ལུས་དང་སེམས་རྣམས་ཀྱང་ནི་བདེ་བར་འགྱུར། །བསམ་གཏན་བརྩོན་པའི་ཕན་ཡོན་འདི་དག་གོ །དགོན་པའི་གནས་དག་ཏུ་ཡང་བསྲུངས་ཤིང་གནས། །དེ་ལ་གཡེང་བ་ནམ་ཡང་འབྱུང་མི་འགྱུར། །དེ་ལྟར་ལུས་ནི་དབེན་པར་གྱུར་པས་ན། །ཟང་ཟིང་མེད་པའི་དགའ་བ་དེར་འཐོབ་བོ། །འདོད་པ་དག་གིས་མི་གོས་ཉོན་མོངས་མེད། །དེ་ལྟར་བདུད་ཀྱི་ཡུལ་ལས་ཐར་བས་ན། །དེ་བཞིན་གཤེགས་པའི་ཡུལ་ལ་རབ་གནས་ཏེ། །དེ་ཡི་རྣམ་གྲོལ་ཡོངས་སུ་སྨིན་པར་འགྱུར། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་སྤྱོད་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། བདོག་པ་ཐམས་ཅད་ཡོངས་སུ་གཏོང་ལ་སྦྱིན་པས་དག་པར་རློམ་སེམས་མི་བྱེད་པ་ཡིན། ཚུལ་ཁྲིམས་མ་དྲལ་ཅིང་ཚུལ་ཁྲིམས་ལ་མི་གནས་པ་ཡིན། བཟོད་པའི་སྟོབས་ལ་གནས་ལ་སེམས་ཅན་དུ་འདུ་ཤེས་པ་ལ་མི་གནས་པ་ཡིན། བརྩོན་འགྲུས་བརྩམས་ལ་ལུས་དང་སེམས་དབེན་པ་ཡིན། བསམ་གཏན་ལ་བསམ་གཏན་དུ་བྱེད་ཅིང་མི་གནས་པའི་བསམ་གཏན་པ་ཡིན། བདུད་རྣམས་ཀྱིས་ཐུབ་པར་དཀའ་བ་ཡིན། ཕ་རོལ་རྒོལ་བ་ཐམས་ཅད་ཀྱིས་རབ་ཏུ་མི་སྒུལ་བ་ཡིན། འདུ་བྱེད་འཇུག་པ་ཐམས་ཅད་ལ་སྣང་བ་ཐོབ་པ་ཡིན། སེམས་ཅན་ཐམས་ཅད་ལ་སྙིང་རྗེ་ཆེན་པོ་རྒྱ་ཆེར་འཇུག་སྟེ། ཉན་ཐོས་དང་རང་སངས་རྒྱས་ཀྱི་ས་ལ་རེ་བ་མེད་པ་ཡིན། སངས་
རྒྱས་ཀྱི་བསམ་གཏན་དང་ཏིང་ངེ་འཛིན་དང་སྙོམས་པར་འཇུག་པ་ལ་རབ་ཏུ་འཇུག་པ་ཡིན་ཏེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་སྤྱོད་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། དཔའ་བོ་བདོག་པ་ཐམས་ཅད་གཏོང་། །དེས་ནི་དག་པར་རློམ་སེམས་མེད། །ཚུལ་ཁྲིམས་མ་དྲལ་སྲུང་མོད་ཀྱི། །དེ་ལ་གནས་པར་བྱེད་པ་མེད། །ཤེས་རབ་ཅན་དེ་བཟོད་སྒོམ་ཡང་། །སེམས་ཅན་འདུ་ཤེས་རྣམ་པར་ཟློག །བརྩོན་འགྲུས་བརྩམས་པ་ཡིན་མོད་ཀྱི། །ལུས་དང་སེམས་ནི་རྣམ་པར་དབེན། །བསམ་གཏན་ལ་ཡང་སྒོམ་མོད་ཀྱི། །གནས་པ་མེད་ཅིང་རྟེན་པ་མེད། །བདུད་ཀྱིས་ཐུབ་པར་དཀའ་བར་འགྱུར། །ཤེས་རབ་ལྡན་པའི་ཡོན་ཏན་འདི། །ཕ་རོལ་རྒོལ་བ་ཐམས་ཅད་ཀྱིས། །དེ་ནི་བསྐྱོད་པར་མི་ནུས་འགྱུར། །འཁོར་བ་ན་ཡང་སྣང་བ་འཐོབ། །ཤེས་རབ་ཡོན་ཏན་འདི་འདྲའོ། །སེམས་ཅན་དག་ནི་ཐམས་ཅད་ལ། །དེ་ནི་སྙིང་རྗེ་ཆེ་བར་འགྱུར། །ཉན་ཐོས་རང་རྒྱལ་ཡེ་ཤེས་ལ། །ནམ་ཡང་རེ་བ་སྐྱེད་མི་འགྱུར། །བདོག་པ་ཐམས་ཅད་གཏོང་ཡང་རློམ་སེམས་མེད། །ཚུལ་ཁྲིམས་མ་དྲལ་ཚུལ་ཁྲིམས་མི་གནས་ཏེ། །བཟོད་པ་སྒོམ་ཡང་སེམས་ཅན་འདུ་ཤེས་མེད། །ཤེས་རབ་མོས་པའི་ཕན་ཡོན་འདི་དག་གོ །བརྩོན་འགྲུས་བརྩམས་ཀྱང་རྣམ་པར་དབེན་པ་ཡིན། །མི་གནས་བསམ་གཏན་བྱེད་ཅིང་རྟེན་པ་མེད། །མཁས་པ་དེ་ནི་བདུད་ཀྱིས་ཐུབ་པར་དཀའ། །ཤེས་རབ་མོས་པའི་ཕན་ཡོན་འདི་དག་གོ །ཕ་རོལ་རྒོལ་བས་བསྐྱོད་པར་མི་འགྱུར་ཞིང་། །དེས་ནི་འདུས་བྱས་འདི་ཡི་གཏིང་རྙེད་པས། །སེམས་ཅན་དག་ལ་སྙིང་རྗེ་རྒྱ་ཆེར་སྐྱེད། །ཤེས་རབ་མོས་པའི་ཕན་ཡོན་འདི་དག་གོ །དེ་ལྟར་སངས་རྒྱས་ཡོན་ཏན་དེ་གནས་པས། །རང་རྒྱལ་རྣམས་དང་ཉན་ཐོས་རྣམས་ལ་ནི། །དེ་དག་ནམ་ཡང་སྨོན་པ་མི་སྐྱེད་དེ། །ཤེས་རབ་མོས་པའི་ཕན་ཡོན་འདི་དག་གོ །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་མང་དུ་ཐོས་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། ཀུན་ནས་ཉོན་མོངས་པར་མི་བྱེད་པ་དང་གནོད་སེམས་མི་སྐྱེད་
པ་དང་ཐེ་ཚོམ་རྣམ་པར་འབྱེད་པ་དང་ལྟ་བ་དྲང་པོར་བྱེད་པ་དང་ལམ་ལོག་པ་སྤོང་བ་དང་ལམ་ལ་གནས་པ་དང་མི་འཆི་བའི་སྒོར་གནས་པ་དང་བྱང་ཆུབ་ཏུ་བསྙེན་པ་དང་སེམས་ཅན་ཐམས་ཅད་ལ་སྣང་བར་གྱུར་པ་དང་ངན་འགྲོ་ཐམས་ཅད་ཀྱིས་མི་འཇིགས་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་མང་དུ་ཐོས་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། ཡང་དག་ཇི་བཞིན་མཁྱེན་པ་ཡི། །སངས་རྒྱས་དེ་བཞིན་གཤེགས་པ་ཡིས། །མང་དུ་ཐོས་པའི་ཕན་ཡོན་ནི། །བཅུ་པོ་འདི་དག་རབ་ཏུ་བཤད། །ཉོན་མོངས་རྣམ་པར་བྱང་བ་ཡི། །ཕྱོགས་གཉིས་པོ་ནི་དེས་ཤེས་ཏེ། །ཀུན་ནས་ཉོན་མོངས་ཡོངས་སྤངས་ནས། །རྣམ་པར་བྱང་བའི་ལམ་ལ་སྟོན། །ནེམ་ནུར་རྣམ་འབྱེད་ཡེ་ཤེས་ལྡན། །ལྟ་བ་དྲང་པོར་རབ་སྲོང་ཞིང་། །ལོག་པའི་ལམ་ཡང་རྣམ་སྤངས་ཏེ། །དྲང་པོའི་ལམ་ལ་གནས་པར་བྱེད། །མི་འཆི་སྒོ་ལ་དེ་གནས་ཤིང་། །བྱང་ཆུབ་ཏུ་ཡང་ཉེ་བར་འགྱུར། །སེམས་ཅན་ལ་ཡང་སྣང་འགྱུར་ཏེ། །ངན་སོང་དག་ལ་འཇིགས་པ་མེད། ། ཀུན་ནས་ཉོན་མོངས་ཆོས་མང་རབ་ཤེས་ཤིང་། །རྣམ་པར་བྱང་བའི་ཕྱོགས་ཀྱང་དེ་བཞིན་ཤེས། །ཀུན་ནས་ཉོན་མོངས་ཡོངས་སུ་སྤངས་ནས་ནི། །རྣམ་པར་བྱང་བའི་ཆོས་ཀྱི་མཆོག་ལ་སློབ། །སྲོག་ཆགས་ཀུན་གྱི་ནེམ་ནུར་རྣམ་འབྱེད་ཅིང་། །དེ་ཡི་ལྟ་བ་རྟག་ཏུ་དྲང་པོར་འགྱུར། །དེ་ནི་ལོག་པའི་ལམ་ཡང་རྣམ་སྤངས་ཏེ། །ཞི་བ་དྲང་པོའི་ལམ་ལ་རྟག་ཏུ་གནས། །མི་འཆི་ལམ་ལ་ཁོར་མོར་གནས་འགྱུར་ཞིང་། །དྲི་མེད་བྱང་ཆུབ་ལ་ཡང་ཉེ་བར་འགྱུར། །སྲོག་ཆགས་མང་པོ་ཀུན་ལའང་སྣང་བར་འགྱུར། །དེ་ནི་ངན་འགྲོ་དག་ལའང་འཇིགས་པ་མེད། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་སྦྱིན་པ་ལྷུར་བྱེད་པ། གཞན་ལ་ཆོས་ཀྱི་སྦྱིན་པ་སྦྱིན་པར་བྱེད་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། བྱ་བ་མ་ཡིན་པ་རྣམ་པར་སྤོང་བ་དང་། བྱ་བ་ལ་འཇུག་པ་དང་། སྐྱེས་བུ་དམ་པའི་ཆོས་ལ་གནས་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བ་དང་བྱང་ཆུབ་ཀྱི་སྙིང་པོ་ཐོབ་པར་བྱེད་པ་དང་། དངོས་པོ་ཡོངས་སུ་གཏོང་བ་དང་ཉོན་མོངས་པ་ཚར་
གཅོད་པ་དང་སེམས་ཅན་ཐམས་ཅད་ལ་སྐལ་བའི་ཤས་སྦྱིན་པ་དང་དེ་ལ་དམིགས་པའི་བྱམས་པ་སྒོམ་པ་དང་ཚེ་འདི་ལ་བདེ་བ་འཐོབ་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་ལྷུར་བྱེད་པ། ཆོས་ཀྱི་སྦྱིན་པ་སྦྱིན་པར་བྱེད་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། སུ་དག་སེར་སྣ་མེད་པར་ནི། །ཆོས་ཀྱི་སྦྱིན་པ་མཆོག་སྦྱིན་བྱེད། །དེ་ཡི་ལེགས་པ་རྣམ་བཅུར་ནི། །འཇིག་རྟེན་མགོན་པོས་རབ་ཏུ་བཤད། །བྱ་བ་མ་ཡིན་ཐམས་ཅད་སྤོང་། །མཁས་པ་བྱ་བ་རྣམས་ལ་འཇུག །སྐྱེས་བུ་དམ་པའི་ཆོས་ལ་དད། །གཏོང་བའི་སེམས་ལ་སྟེན་པར་བྱེད། །སངས་རྒྱས་ཞིང་ཡང་རྣམ་སྦྱོང་སྟེ། །དེ་ཡི་ཞིང་ནི་བསམ་མི་ཁྱབ། །བྱང་ཆུབ་སྙིང་པོར་རྟག་ཏུ་འདུག །ཆོས་ཀྱི་སྦྱིན་པའི་འབྲས་བུ་འདི། །དངོས་པོ་ཐམས་ཅད་གཏོང་བྱེད་ཅིང་། །ཆོས་ཀྱི་རྒྱལ་པོའི་རྗེས་སུ་སློབ། །ཉོན་མོངས་པ་ཡང་ཚར་བཅད་པ། །དེ་ལ་བྱང་ཆུབ་རྙེད་མི་དཀའ། །སེམས་ཅན་ཀུན་ན་སྐལ་བའི་ཤས། །བྱམས་པའི་སེམས་ཀྱིས་རབ་ཏུ་སྦྱིན། །དེ་ནི་ཕྲག་དོག་མེད་འགྱུར་ཏེ། །མི་མ་ཡིན་པའི་སྐྱིད་པ་འཐོབ། །མཁས་པས་བྱ་བ་མ་ཡིན་རྣམ་སྤངས་ཏེ། །རྟོགས་པར་བྱ་བ་དག་ལ་གནས་པར་བྱེད། །མཁས་པ་སུ་དག་ཆོས་ཀྱི་སྦྱིན་པ་གཏོང་། །བདག་ཉིད་ཆེན་པོའི་ཆོས་ལ་རྟག་ཏུ་གནས། །དེ་ཡི་ཞིང་ཡང་རྣམ་པར་དག་པར་འགྱུར། །བྱང་ཆུབ་ཕྱོགས་ཀྱི་ཆོས་རྣམས་རྣམ་པར་འཕེལ། །བྱང་ཆུབ་སྙིང་པོར་རྟག་ཏུ་ཉེ་བར་འགྱུར། །ཆོས་རྣམས་བྱིན་པའི་ཕན་ཡོན་འདི་དག་གོ །ཉོན་མོངས་མེད་ཅིང་དངོས་པོ་ཡོངས་སུ་བཏང་། །དངོས་པོའི་རང་གི་མཚན་ཉིད་རབ་ཏུ་ཤེས། །ཡོངས་སུ་འཛིན་པ་ཀུན་ལས་རྣམ་པར་གྲོལ། །དེ་ལ་ཆགས་པ་ནམ་ཡང་ཡོང་མི་འགྱུར། །མཁས་པའི་སེམས་ནི་ཤིན་ཏུ་ཉེར་གཞག་པ། །སེམས་ཅན་ཐམས་ཅད་བདེ་བར་གྱུར་ཅིག་ཅེས། །དེ་ནི་བྱམས་སེམས་འགྱུར་ཞིང་ཕྲག་དོག་མེད། །ཚེ་འདི་དག་ལའང་བདེ་བ་མི་ཉུང་འགྱུར། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་པ་ཉིད་ལ་གནས་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། སས་རྒྱས་ཀྱི་སྤྱོད་པ་ལ་གནས་པ་དང་མི་གནས་པར་
བསམ་གཏན་བྱེད་པ་དང་། སྐྱེ་བ་ལ་མི་སྨོན་པ་དང་ཚུལ་ཁྲིམས་ལ་མཆོག་ཏུ་མི་འཛིན་པ་དང་འཕགས་པ་ལ་མི་སྐུར་བ་དང་མི་འགལ་བར་གནས་པ་དང་དངོས་པོ་མི་དམིགས་པ་དང་དབེན་པར་གྱུར་པ་དང་། སངས་རྒྱས་ལ་སྐུར་པ་མི་འདེབས་པ་དང་། དམ་པའི་ཆོས་འཛིན་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་པ་ཉིད་ལ་གནས་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། མི་དབང་གནས་པ་གང་ཡིན་པ། །སངས་རྒྱས་ཀུན་གྱི་སྤྱོད་ཡུལ་ཏེ། །དེས་ནི་རྣལ་འབྱོར་གནས་པར་བྱེད། །དེ་ལ་སྲོག་རྣམས་དམིགས་པ་མེད། །འཇིག་རྟེན་ཀུན་ལ་མི་གནས་ཤིང་། །འཕགས་པའི་བསམ་གཏན་མི་གཏོང་སྟེ། །ཆོས་ཀྱི་རང་བཞིན་མཐོང་ནས་ནི། ། སྐྱེ་བ་ལ་ཡང་སྨོན་མི་བྱེད། །ཚུལ་ཁྲིམས་མཆོག་ཏུ་མི་འཛིན་ཅིང་། །ཚུལ་ཁྲིམས་ལ་ཡང་གནས་མི་བྱེད། །ཟག་པ་མེད་པའི་ལམ་གཞན་ལ། །ཅུང་ཟད་སྐུར་པར་དེ་མི་བྱེད། །འགལ་བ་མེད་པར་དེ་གནས་ཤིང་། །རྩོད་པ་དག་ཀྱང་ཡོང་མེད་དེ། །རྣལ་འབྱོར་དངོས་པོ་མི་དམིགས་ཤིང་། །རྟག་ཏུ་དབེན་པར་གནས་པར་བྱེད། །དེ་ནི་སྲོག་གི་དོན་ཕྱིར་ཡང་། །སངས་རྒྱས་སྐུར་པ་མི་འདེབས་ཏེ། །སྟོང་པ་ཉིད་ལ་དེས་གྱུར་ཅིང་། །ལུས་ཀྱི་མངོན་སུམ་འཇིགས་པ་མེད། །འཇིག་རྟེན་མགོན་པོ་ཐམས་ཅད་ཀྱི། །སངས་རྒྱས་བྱང་ཆུབ་བསམ་མི་ཁྱབ། །གུས་པར་བྱས་ནས་ཆོས་འཛིན་ཏེ། །སངས་རྒྱས་ཆོས་ལ་ནེམ་ནུར་མེད། །གང་དག་མུ་སྟེགས་མང་པོའི་ས་མ་ཡིན། །སྐྱེས་བུ་ཁྱུ་མཆོག་གི་ནི་གནས་པ་དེ། །གང་ལ་སྲོག་མེད་གང་ཟག་སེམས་ཅན་མེད། །དེ་ལ་བྱང་ཆུབ་སེམས་དཔའ་གནས་པར་བྱེད། །དེ་ལ་གནས་པ་ནམ་ཡང་ཡོད་མ་ཡིན། །མི་གནས་པར་ནི་བསམ་གཏན་བདེ་བ་སྟེན། །ཆོས་ལ་སེམས་ཅན་བདག་མེད་རྣམ་རིག་པས། །སྐྱེ་བར་ཡང་ནི་འདུ་ཤེས་ཡོང་མི་འབྱུང་། །ཆོས་རྣམས་ཀྱི་ནི་རང་བཞིན་རྣམ་པར་རིག །ཚུལ་ཁྲིམས་ལ་ཡང་ཅུང་ཟད་གནས་པ་མེད། །ཚུལ་ཁྲིམས་ཀྱིས་ནི་དག་པར་ཡེངས་མི་སེམས། །སངས་རྒྱས་དག་ལ་རྟག་ཏུ་དད་པར་བྱེད། །ཐམས་ཅད་རང་བཞིན་སྟོང་པར་རྣམ་བསྒོམས་པས། །དེ་ལ་
འགལ་བ་ནམ་ཡང་འབྱུང་མི་འགྱུར། །དེ་བཞིན་གཤེགས་པའི་དམ་ཆོས་བཟུང་ནས་ནི། །འདྲེན་པ་དག་ལ་ནམ་ཡང་མི་སྐུར་ཏོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ནང་དུ་ཡང་དག་པར་འཇོག་ལ་མངོན་པར་བརྩོན་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་རྙོག་པ་མེད་པ་དང་། བག་ཡོད་པར་གནས་པ་དང་། སངས་རྒྱས་རྗེས་སུ་དྲན་པ་དང་། སྤྱོད་པ་ལ་དད་པ་དང་ཡེ་ཤེས་ལ་ནེམ་ནུར་མེད་པ་དང་སངས་རྒྱས་ལ་བྱས་པ་གཟོ་བ་དང་ཆོས་མི་སྤོང་བ་དང་ཤིན་ཏུ་བསྡམས་པར་གནས་པ་དང་དུལ་བའི་ས་རྗེས་སུ་ཐོབ་པ་དང་སོ་སོ་ཡང་དག་པར་རིག་པ་བཞི་མངོན་སུམ་དུ་བྱེད་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ནང་དུ་ཡང་དག་པར་འཇོག་ལ་མངོན་པར་བརྩོན་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། དེ་ཡི་སེམས་ནི་རྙོག་པ་མེད། །བག་མེད་ཐམས་ཅད་རྣམ་སྤངས་ཏེ། །བག་ཡོད་ལ་ཡང་གནས་བྱེད་ཅིང་། །ཡང་དག་འཇོག་ལ་སྤྱོད་ཡུལ་བ། །འཇིག་རྟེན་མགོན་གྱི་སྤྱོད་ཐོས་ནས། །སངས་རྒྱས་ལ་ནི་དད་པར་བྱེད། །སངས་རྒྱས་ཡེ་ཤེས་བསམ་མི་ཁྱབ། །ཡེ་ཤེས་རྣལ་འབྱོར་ཐེ་ཚོམ་མེད། །སངས་རྒྱས་རྣམས་ལ་བྱས་པ་གཟོ། །སངས་རྒྱས་ཆོས་ལ་ཐེ་ཚོམ་མེད། །ཤིན་ཏུ་བསྡམས་ཤིང་གནས་བྱེད་དེ། །དུལ་བའི་ས་ལ་རབ་ཏུ་གནས། །ཡང་དག་རིག་པ་དེས་ཐོབ་སྟེ། །རྙེད་དང་བཀུར་སྟི་སྤངས་ནས་སུ། །གཅིག་པུ་ནགས་ཁྲོད་མོས་པར་བྱེད། །ཡང་དག་འཇོག་ལ་སྤྱོད་ཡུལ་བ། །དེ་ཡི་སེམས་ནི་རྙོག་པ་མེད་པར་འགྱུར། །བག་མེད་པ་ཡང་ཐམས་ཅད་ཡོངས་སྤངས་ཏེ། །བདག་ཉིད་ཆེན་པོ་རྟག་ཏུ་བག་ཡོད་འགྱུར། །ཏིང་འཛིན་བརྩོན་པའི་ཕན་ཡོན་འདི་དག་གོ །རྐང་གཉིས་གཙོ་བོ་སངས་རྒྱས་དྲན་ནས་ནི། །དེ་ཡི་སྤྱོད་པ་བླ་ན་མེད་ལ་དད། །དེ་བཞིན་གཤེགས་པའི་མཁྱེན་ལ་ཐེ་ཚོམ་མེད། །བསམ་གཏན་བརྩོན་པའི་ཕན་ཡོན་འདི་དག་གོ །སངས་རྒྱས་དག་ལ་རྟག་ཏུ་བྱས་པ་གཟོ། །དེ་ནི་སྲོག་གི་ཕྱིར་ཡང་ཆོས་མི་སྤོང་། །ཐམས་ཅད་དུས་སུ་ཤིན་ཏུ་བསྡམས་པར་གནས། །ཏིང་འཛིན་བརྩོན་པའི་ཕན་ཡོན་འདི་དག་གོ །ཤིན་ཏུ་དུལ་བའི་ས་ནི་རྗེས་ཐོབ་ཅིང་། །
ཡང་དག་རིག་པ་མྱུར་དུ་མངོན་སུམ་བྱེད། །ཚིག་གི་རྒྱུན་མི་འཆད་ཅིང་སྤོབས་པར་ལྡན། །མདོ་སྡེ་བྱེ་བ་ཁྲག་ཁྲིག་སྟོན་པར་བྱེད། །སངས་རྒྱས་བྱང་ཆུབ་མྱུར་དུ་དེ་འཛིན་ཏེ། །འདྲེན་པ་དག་གིས་བསྟན་པ་ཡོངས་སུ་སྲུང་། །དེས་ནི་ཕ་རོལ་རྒོལ་བ་ཀུན་བཅོམ་སྟེ། །སངས་རྒྱས་ཀྱི་ཡང་བྱང་ཆུབ་རྒྱས་པར་བྱེད། །བྱང་ཆུབ་སེམས་དཔའ་དེ་ནི་ཤི་འཕོས་ནས། །བདེ་བ་ཅན་གྱི་འཇིག་རྟེན་ཁམས་སུ་འགྲོ། །ཚེ་དཔག་མེད་ལས་ཆོས་བཟང་མཆོག་ཐོས་ནས། །སྐྱེ་བ་མེད་པའི་ཆོས་ལ་བཟོད་པ་འཐོབ།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་དགུ་པ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དགོན་པར་གནས་པ་ལྷུར་བྱེད་པ་དག་གི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། བྱ་བ་ཉུང་བར་གནས་པ་དང་འདུ་འཛི་རིང་བ་ནས་ཀྱང་རིང་དུ་སྤོང་བ་དང་དེ་ལ་རྩོད་པ་མེད་པར་འགྱུར་བ་དང་། གནོད་པ་མེད་པར་གནས་པ་དང་ཟག་པ་འཕེལ་བར་མི་བྱེད་པ་དང་རྩོད་པའི་གཞིར་མི་བྱེད་པ་དང་ཤིན་ཏུ་ཞི་བར་སྤྱོད་པ་དང་ཤིན་ཏུ་བསྡམས་པར་གནས་པ་དང་ཐར་པ་དང་འཐུན་པའི་སེམས་ཀྱི་རྒྱུད་དུ་འགྱུར་བ་དང་། མྱུར་དུ་རྣམ་པར་གྲོལ་བ་མངོན་སུམ་དུ་བྱེད་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དགོན་པར་གནས་པ་ལྷུར་བྱེད་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། རྟག་ཏུ་བྱ་བ་ཉུང་བར་འགྱུར། །འདུ་འཛི་དག་ཀྱང་རིང་དུ་སྤོང་། །ནགས་ཁྲོད་གཅིག་པུ་གནས་པ་ནི། །རྩོད་པ་དག་ཀྱང་དེ་ལ་མེད། །གནོད་པ་མེད་པའི་སེམས་ཀྱིས་ནི། །ཟག་པ་རྣམ་པར་འཕེལ་མི་བྱེད། །དེ་ལ་རྩོད་གཞི་མི་འབྱུང་སྟེ། །དགོན་པར་གནས་པའི་ཡོན་ཏན་འདི། །ལུས་དང་ངག་ཡིད་རབ་བསྡམས་ཏེ། །དེ་ནི་ཉེ་བར་ཞི་བར་སྤྱོད། །ཐར་པ་དང་ནི་འཐུན་གྱུར་ཅིང་། །རྣམ་པར་གྲོལ་བ་མྱུར་དུ་རིག །རྣལ་འབྱོར་པ་ནི་རྟག་ཏུ་བྱ་བ་ཉུང་། །འདུ་འཛི་མང་པོའི་ཉེས་པ་ཀུན་སྤངས་ཏེ། །རྣལ་འབྱོར་པ་དག་ནམ་ཡང་རྩོད་མི་བྱེད། །དགོན་པར་གནས་པའི་ཕན་ཡོན་འདི་དག་གོ །ནམ་ཞིག་དེ་ནི་འདུས་བྱས་སྐྱོ་གྱུར་ཅིང་། །འཇིག་རྟེན་དུ་ནི་གང་ལའང་འདོད་པ་མེད། །ཟག་པ་དག་ཀྱང་འཕེལ་བར་མི་བྱེད་པ། །ནགས་ཁྲོད་གནས་པ་དེ་ཡི་ཕན་ཡོན་ཡིན། །དེ་ལ་རྩོད་གཞི་ནམ་ཡང་མི་
འབྱུང་སྟེ། །རྟག་ཏུ་ཞི་ལ་དགའ་ཞིང་དབེན་པར་སྤྱོད། །ལུས་དང་ངག་དང་ཡིད་ཀྱང་བསྡམས་པ་སྟེ། །དགོན་པར་གནས་པ་དེ་ལ་ཡོན་ཏན་མང་། །དེ་ནི་ཐར་པ་དང་ཡང་འཐུན་གྱུར་ཏེ། །ནགས་ཁྲོད་གནས་ཤིང་རྣམ་གྲོལ་དེ་སྟེན་པས། །རྣམ་གྲོལ་ཞི་བ་མྱུར་དུ་དེས་རྟོགས་འགྱུར། །འདི་ཀུན་དགོན་པར་གནས་པའི་ཡོན་ཏན་ཡིན། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བསོད་སྙོམས་སྤྱོད་པ་སྦྱངས་པའི་ཡོན་ཏན་ཡོ་བྱད་བསྙུངས་པ་ལ་གནས་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། དེ་ཤེས་ཀྱི་ཁེ་འདོད་པ་མ་ཡིན་པ་དང་། དེ་སྙན་པ་འདོད་པ་མ་ཡིན་པ་དང་། དེ་རྙེད་པ་དང་བཀུར་སྟི་འདོད་པ་མ་ཡིན་པ་དང་། དེ་འཕགས་པའི་རིགས་བཞི་ལ་གནས་པ་དང་། དེ་ཚུལ་འཆོས་པ་དང་ཁ་གསག་མེད་པར་འགྱུར་བ་དང་། དེ་བདག་ལ་མི་སྟོད་གཞན་ལ་མི་སྨོད་པ་དང་། དེ་རྗེས་སུ་ཆགས་པ་དང་ཁོང་ཁྲོ་བ་སྤངས་པས་གཞན་གྱི་ཁྱིམ་དུ་སྤྱོད་པ་དང་། ཟང་ཟིང་མེད་པར་ཆོས་ཀྱི་སྦྱིན་པ་སྦྱིན་པར་བྱེད་པ་དང་དེ་སྦྱངས་པའི་ཡོན་ཏན་ཡོ་བྱད་བསྙུངས་པ་ལ་གནས་ཤིང་ཆོས་བསྟན་པ་གཟུང་བར་འགྱུར་བ་ཡིན་ཏེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བསོད་སྙོམས་སྤྱོད་པ་སྦྱངས་པའི་ཡོན་ཏན་ཡོ་བྱད་བསྙུངས་པ་ལ་གནས་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། སྦྱངས་པ་དག་ལ་གང་གནས་པ། །ཤེས་ཀྱི་ཁེ་ཡང་མི་འདོད་ཅིང་། །སྙན་པ་ལ་ཡང་མི་སྨོན་ཏེ། །རྙེད་དང་མ་རྙེད་མཚུངས་པའི་ཡིད། །སྦྱངས་པ་དག་ལ་གང་གནས་པ། །འཕགས་པའི་རིགས་ནི་མི་གཏོང་ཞིང་། །ཚུལ་འཆོས་པ་དང་ཁ་གསག་རྣམས། །ཐམས་ཅད་རིང་དུ་རྣམ་པར་སྤོང་། །བདག་ཉིད་ལ་ནི་མི་སྟོད་ཅིང་། །གཞན་དག་ལ་ཡང་སྨོད་མི་བྱེད། །ཁོང་ཁྲོ་རྗེས་སུ་ཆགས་མེད་ཅིང་། །ཟང་ཟིང་མེད་པར་ཆོས་སྟོན་ཏེ། །དེ་ཡི་ཚིག་ཀྱང་གཟུང་བར་འགྱུར། །བསོད་སྙོམས་ཡོན་ཏན་འདི་དག་གོ །ཤེས་ཀྱི་ཁེ་དང་སྙན་དང་རྙེད་མི་ཚོལ། །འཕགས་པའི་རིགས་བཞི་ལ་ནི་གནས་འགྱུར་ཏེ། །མཁས་པ་ཚུལ་འཆོས་ཁ་གསག་མེད་པ་ཡིན། །སྦྱངས་ལ་བརྩོན་པའི་ཡོན་ཏན་འདི་འདྲའོ། །བདག་ལ་མི་སྟོད་གཞན་ལ་མི་སྨོད་ཅིང་། །རྩུབ་པོར་སྨྲས་ཀྱང་འཁྲུག་པར་ཡོང་མི་འགྱུར། །བསྔགས་པ་ཐོས་ཀྱང་དགའ་
བ་མི་སྐྱེད་དེ། །དེ་ནི་བསོད་སྙོམས་དག་གིས་མགུ་བར་འགྱུར། །ཆོས་ཀྱི་སྦྱིན་པ་ཟང་ཟིང་མེད་པར་སྦྱིན། །དེ་ནི་རྙེད་དང་བཀུར་སྟི་མི་ཚོལ་ཏེ། །དེ་ཡིས་བཤད་པ་དག་ཀྱང་གཟུང་བར་འགྱུར། །སྦྱངས་པར་བརྩོན་པའི་ཕན་ཡོན་འདི་དག་ཡིན། །གཞོན་ནུ་དེ་ལྟ་བུའི་ཆོས་ཀྱི་ཡོན་ཏན་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དགོན་པ་ལ་གནས་པ་ནི་སངས་རྒྱས་ཀྱི་གཏེར་རྙེད་པར་འགྱུར། ཆོས་ཀྱི་གཏེར་རྙེད་པར་འགྱུར། ཡེ་ཤེས་ཀྱི་གཏེར་རྙེད་པར་འགྱུར། སྔོན་གྱི་མཐའ་དང་ཕྱི་མའི་མཐའ་དང་ད་ལྟར་བྱུང་བ་ཤེས་པའི་གཏེར་རྙེད་པར་འགྱུར་རོ། །གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་གཏེར་རྙེད་པར་འགྱུར་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དབེན་པ་ན་སྤྱོད་ཅིང་དགོན་པར་གནས་ནས་མངོན་པར་ཤེས་པ་ལྔ་འཐོབ་སྟེ། ལྔ་གང་ཞེ་ན། འདི་ལྟ་སྟེ། ལྷའི་མིག་དང་ལྷའི་རྣ་བ་དང་ཕ་རོལ་གྱི་སེམས་ཤེས་པ་དང་སྔོན་གྱི་གནས་རྗེས་སུ་དྲན་པ་དང་རྫུ་འཕྲུལ་གྱི་ཡུལ་ཏེ། གཞོན་ནུ་མངོན་པར་ཤེས་པ་འདི་ལྔ་ཐོབ་པར་འགྱུར་རོ། །དེ་མིའི་ལས་འདས་པའི་ལྷའི་མིག་གིས་ཤར་ཕྱོགས་ཀྱི་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་རྣམས་མཐོང་ངོ་། །དེ་བཞིན་དུ་ལྷོ་དང་ནུབ་དང་བྱང་ཕྱོགས་ཀྱི་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་རྣམས་མཐོང་སྟེ། དེ་སངས་རྒྱས་མཐོང་བ་དང་མི་འབྲལ་བར་འགྱུར་རོ། །གཞོན་ནུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་གཏེར་རྙེད་པ་ཡིན་ནོ། །གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་གཏེར་རྙེད་པ་ཡིན་ཞེ་ན། སངས་རྒྱས་བཅོམ་ལྡན་འདས་དེ་དག་ཕྱོགས་བཅུ་ན་ཆོས་ཅི་སྟོན་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ལྷའི་རྣ་བའི་ཁམས་ཀྱིས་ཐོས་ཏེ། དེ་ཆོས་ཉན་པ་དང་མི་འབྲལ་བར་འགྱུར་རོ། །གཞོན་ནུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་གཏེར་རྙེད་པ་ཡིན་ནོ། །གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཀྱི་གཏེར་རྙེད་པ་ཡིན་ཞེ་ན། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དེ་དང་ལྡན་པས་ཆོས་ཐམས་ཅད་འཛིན་ཏེ། ཀུན་བཟུང་ནས་མི་བརྗེད་ཅིང་
སེམས་ཅན་རྣམས་ལ་ཆོས་སྟོན་ཏེ། གང་གི་དོན་གང་ཡིན་པ་དེ་ཡང་རབ་ཏུ་ཤེས་སོ། །གཞོན་ནུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཀྱི་གཏེར་རྙེད་པ་ཡིན་ནོ། །གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་གྱི་མཐའ་དང་ཕྱི་མའི་མཐའ་དང་། ད་ལྟར་བྱུང་བ་ཤེས་པའི་གཏེར་རྙེད་པ་ཡིན་ཞེ་ན། དེ་མངོན་པར་ཤེས་པས་འདས་པ་དང་མ་འོངས་པ་དང་ད་ལྟར་བྱུང་བའི་སེམས་ཅན་ཐམས་ཅད་ཀྱི་སེམས་དང་། སྤྱོད་པ་ཤེས་པ་ལ་འཇུག་སྟེ། གཞོན་ནུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་གྱི་མཐའ་དང་། ཕྱི་མའི་མཐའ་དང་ད་ལྟར་བྱུང་བ་ཤེས་པའི་གཏེར་རྙེད་པ་ཡིན་ནོ། །གཞོན་ནུ་མདོར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟ་བུའི་ཆོས་ལ་གནས་པ་ནི་སངས་རྒྱས་ཀྱི་ཆོས་ཐམས་ཅད་ཐོབ་པར་འགྱུར་ཏེ། དེ་ཉན་ཐོས་དང་རང་སངས་རྒྱས་ཐམས་ཅད་ཀྱི་ས་ཡང་མ་ཡིན་ན་ཕ་རོལ་རྒོལ་བ་ཐམས་ཅད་ལྟ་ཅི་སྨོས། དེ་ལ་འདི་སྐད་ཅེས་བྱ་སྟེ། མཁས་པ་རྟག་ཏུ་དགོན་གནས་ཏེ། །སངས་རྒྱས་གཏེར་དང་ཆོས་ཀྱི་གཏེར། །ཡེ་ཤེས་གཏེར་དང་སྔོན་མཐའི་གཏེར། །མངོན་ཤེས་ལྔ་ཡང་མྱུར་དུ་འཐོབ། །ཕན་ཡོན་བཅུའི་ལེའུ་སྟེ་ཉི་ཤུ་དགུ་པའོ།། །།