ལུས་དང་ངག་དང་ཡིད་ཀྱི་སྡོམ་པ་དང་ཚིག་སུམ་བརྒྱ་པོ་རྒྱས་པར་བསྟན་པ་སོགས་བཤད་པ།
འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བཅུ་བཞི་པ། དེ་ནས་ཡང་བཅོམ་ལྡན་འདས་ཀྱིས་
ཟླ་འོད་གཞོན་ནུར་གྱུར་པ་ལ་བཀའ་སྩལ་པ། དེ་ལྟ་བས་ན་གཞོན་ནུ་ལུས་ཀྱི་སྡོམ་པས་བསྡམ་པར་བྱའོ་ཞེས་གཞོན་ནུ་དེ་ལྟར་བསླབ་པར་བྱའོ། །གཞོན་ནུ་དེ་ལ་ལུས་ཀྱི་སྡོམ་པ་གང་ཞེ་ན། ལུས་ཀྱི་སྡོམ་པ་གང་དང་ལྡན་པས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ལ་ཆགས་པ་མེད་པར་འགྱུར་བ་དེ་ནི་ལུས་ཀྱི་སྡོམ་པ་ཞེས་བྱའོ། །གཞོན་ནུ་ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཐོབ་པར་འགྱུར་བ་དེ་ནི་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཔེ་བྱད་བཟང་པོ་བརྒྱད་ཅུ་འཐོབ་པར་འགྱུར་བ་དེ་ནི་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་བཅུ་འཐོབ་པ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འཐོབ་པར་འགྱུར་བ་འདི་ནི། གཞོན་ནུ་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་སྒོ་གསུམ་འཐོབ་སྟེ། གསུམ་གང་ཞེ་ན་འདི་ལྟ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རྣམ་པར་ཐར་པའི་སྒོ་འདི་གསུམ་འཐོབ་པར་འགྱུར་བ་འདི་ནི་གཞོན་ནུ་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་གནས་པ་ཆེན་པོ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། ཚངས་པའི་གནས་པ་ཆེན་པོ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་
རིག་པ་དང་། སོ་སོ་ཡང་དག་པར་རིག་པ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་འཐོབ་སྟེ། སུམ་ཅུ་རྩ་བདུན་གང་ཞེ་ན། འདི་ལྟ་སྟེ། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་འཐོབ་པར་འགྱུར་བ་དེ་ནི་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་གནས་པ་ཐོབ་པ་དང་། བཏང་སྙོམས་ཆེན་པོ་ལ་གནས་པ་འཐོབ་པ་དང་། བདེ་བའི་རྣམ་པར་རྟོག་པ་འཐོབ་པ་དང་། རབ་ཏུ་དབེན་པའི་ཆོས་རྣམས་འཐོབ་པར་འགྱུར་བ་དེ་ནི་གཞོན་ནུ་ལུས་ཀྱི་སྡོམ་པ་ཞེས་བྱའོ། །གཞན་ཡང་གཞོན་ནུ་ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་པ་སྤོང་བར་འགྱུར་བ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མའི་ཚིག་དང་། ཚིག་རྩུབ་པོ་དང་། ཁྱལ་པར་སྨྲ་བ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་དང་། སྲང་ལ་གཡོ་བྱེད་པ་དང་། ཚད་ལ་གཡོ་བྱེད་པ་དང་། ནོར་ལ་གཡོ་བྱེད་པ་དང་། གཟུང་བ་དང་། བཅིང་བ་དང་། གཙེ་བ་དང་། བརྡེག་པ་དང་། བསྡིགས་པ་དང་། གཅད་པ་དང་། དབུག་པ་དང་། ཞེ་ལ་གནོན་པ་དང་། ཆགས་པ་དང་། སེར་སྣ་མ་སྤངས་པར་འགྱུར་བ་དང་། ལག་པ་རྒོད་པ་དང་། རྐང་པ་རྒོད་པ་དང་། རྐང་ལག་མ་བསྡམས་པ་དང་། དེའི་ལུས་དང་ངག་དང་ཡིད་ཀྱི་གནས་ངན་ལེན་སྤངས་ཤིང་ཏ་ལའི་མགོ་བཅད་པ་བཞིན་དུ་མ་འོངས་པའི་དུས་ན་མི་སྐྱེ་བའི་ཆོས་ཅན་དུ་འགྱུར་བ་དེ་ནི་གཞོན་ནུ་དེའི་ལུས་ཀྱི་སྡོམ་པ་ཞེས་བྱའོ། །གཞོན་ནུ་དེ་ལྟ་བས་ན་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། གཞོན་ནུ་སྔོན་བྱུང་བ་འདས་པའི་དུས་ན་
བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། ཡངས་པ། ཚད་མེད་པ། བསམ་གྱིས་མི་ཁྱབ་པ་དེའི་ཚེ་དེའི་དུས་ན་ཡེ་ཤེས་སྣང་བ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། གཞོན་ནུ་དེའི་ཚེ་དེའི་དུས་ན་བཅོམ་ལྡན་འདས་ཡེ་ཤེས་སྣང་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་ཚེའི་ཚད་ནི་ལོ་བྱེ་བ་ཕྲག་དྲུག་ཅུར་གྱུར་ཏོ། །དགྲ་བཅོམ་པ་བྱེ་བ་ཕྲག་དྲུག་ཅུའི་ཉན་ཐོས་ཀྱི་དགེ་འདུན་བྱུང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་དམ་པའི་ཆོས་ཡོངས་སུ་འཛིན་པ་ཡང་དཔག་ཏུ་མེད་པ་བྱུང་ངོ་། །གཞོན་ནུ་དེའི་ཚེ་དེའི་དུས་ན་རྒྱལ་པོ་ཁྱད་པར་སེམས་ཞེས་བྱ་བ་ཞིག་བྱུང་སྟེ། རྒྱལ་པོ་ཁྱད་པར་སེམས་དེ་སྲོག་ཆགས་བྱེ་བ་ཕྲག་བརྒྱད་ཅུ་དང་ལྷན་ཅིག་ཏུ་དེ་བཞིན་གཤེགས་པའི་དྲུང་དུ་འོངས་སོ། །འོངས་ནས་དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ །རྒྱལ་པོ་ཁྱད་པར་སེམས་ཕྱོགས་གཅིག་ཏུ་འདུག་ནས་དེ་བཞིན་གཤེགས་པ་ལ་བསྙེན་བཀུར་བྱེད་དོ། །དེ་ནས་ཡེ་ཤེས་སྣང་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་རྒྱལ་པོ་ཁྱད་པར་སེམས་འཁོར་དང་བཅས་པའི་ལྷག་པའི་བསམ་པ་མཁྱེན་ནས་ཆོས་ཀྱི་རྣམ་གྲངས་འདི་ལས་ལུས་ཀྱི་སྡོམ་པའི་ཏིང་ངེ་འཛིན་གྱི་སྒོར་འཇུག་པའི་ཚིགས་སུ་བཅད་པའི་དབྱངས་ཀྱིས་ཡང་དག་པར་རབ་ཏུ་བསྟན་ཏོ། །ཇི་ལྟར་བར་སྣང་ནམ་མཁའ་རྣམ་དག་སྟེ། །ཤིན་ཏུ་དག་ཅིང་རང་བཞིན་འོད་གསལ་བ། །དེ་བཞིན་ལུས་ཀྱི་སྡོམ་པ་དག་པ་ཡང་། །དབྱངས་ཀྱིས་བསྟན་པར་ནམ་ཡང་ནུས་མི་འགྱུར། །ལུས་ཀྱི་སྡོམ་པ་འདི་ནི་དབེན་ཞིང་སྟོང་། །འདི་འདྲ་གཉིས་པོ་ལུས་ཀྱི་མཚན་ཉིད་དེ། །དེ་དག་མཚན་ཉིད་མེད་པ་བར་སྣང་བཞིན། །ལུས་ཀྱི་སྡོམ་པ་དེ་ཡི་མཚན་ཉིད་བཤད། །སྡོམ་པའི་
མཚན་ཉིད་དེ་འདྲར་སུས་ཤེས་པ། །དེ་ལ་སྡོམ་པ་ནམ་ཡང་མེད་མི་འགྱུར། །མི་འཇུག་དེ་ཡི་སྤྱོད་ཡུལ་ག་ལ་ཡིན། །ཟག་པ་མེད་པ་ལ་ནི་སྐྱེ་བ་མེད། །གཟུགས་དང་ལོངས་སྤྱོད་ལ་ནི་སྲིད་བསྐྱེད་ནས། །འདོད་པ་དག་ལ་སྟེན་པས་མི་ནུས་ཏེ། །སྲིད་པ་དག་གི་ཉེས་པ་མི་ཤེས་པས། །ལུས་ཀྱི་སྡོམ་པ་འདི་ནི་ཤེས་མི་ནུས། །ཟག་མེད་སྡོམ་པ་གང་གིས་རབ་ཤེས་པ། །དེ་ལ་སྐྱེ་བ་ནམ་ཡང་ཡོད་མི་འགྱུར། །དགྲ་བཅོམ་པ་ཡི་ཆོས་ནི་དེ་འདྲ་སྟེ། །མུ་སྟེགས་ཅན་གྱིས་ཤེས་པར་སླ་མ་ཡིན། །གང་དག་ཁམས་གསུམ་ཀུན་ལ་ཡིད་སྐྲག་ཅིང་། །འདོད་པའི་ལོངས་སྤྱོད་ལ་ཡང་འདོད་མི་སྐྱེད། །རྒྱལ་པོའི་སྲིད་དང་ལོངས་སྤྱོད་ཡོང་མི་འདོད། །དེ་དག་ལུས་ཀྱི་སྡོམ་པ་འདི་འདྲ་ཤེས། །ལུས་ཀྱི་སྡོམ་པ་འདི་ནི་དོན་ཅེས་བྱ། །དོན་ནི་སྒྲ་ཡིས་བསྟན་པར་མི་ནུས་ཏེ། །འདི་འདྲའི་ཆོས་ཀྱི་ཚུལ་ནི་གང་ཤེས་པ། །དེ་ནི་སྡོམ་པ་འདི་ལ་གནས་པ་ཡིན། །དོན་ལ་ཞུགས་ལ་ངས་ནི་དོན་བསྟན་ཏེ། །མཁས་པ་སུ་དག་དོན་གྱི་ཚུལ་ལ་མོས། །དོན་མེད་རྣམ་སྤངས་དོན་ལ་གནས་པ་རྣམས། །དེ་དག་སྡོམ་ལ་རྟག་ཏུ་གནས་པ་ཡིན། །རྒྱལ་བའི་བསྟན་ལ་དོན་དུ་གང་བརྗོད་དང་། །ཇི་ལྟ་བུར་ནི་དོན་ཡིན་རྣམ་རིག་སྟེ། །དོན་ཚུལ་རང་བཞིན་གང་གིས་ཤེས་པ་ནི། །ལུས་ཀྱི་སྡོམ་པ་ལ་ཡང་གནས་ཞེས་བྱ། །གང་གིས་བདག་མེད་གསོག་དང་སྟོང་ཉིད་དང་། །མཚན་མ་མེད་པར་རྣམ་པར་རིག་གྱུར་པ། །དེ་ལ་ནམ་ཡང་སྡོམ་པ་མེད་མི་འགྱུར། །འདི་ལྟར་དེས་ནི་ཡང་དག་ངེས་ལ་བསླབས། །དངོས་པོ་དག་ནི་དངོས་མེད་གང་རིག་པ། །དེ་ནི་དངོས་པོ་དག་ལ་ཡོང་མི་ཆགས། །དངོས་པོ་ཀུན་ལ་ནམ་ཡང་མི་ཆགས་པ། །དེ་ནི་མཚན་མེད་ཏིང་འཛིན་རེག་པར་འགྱུར། །ངོ་བོ་ཉིད་སྟོང་རང་བཞིན་འོད་གསལ་བ། །བདག་མེད་ཆོས་རྣམས་དེ་ཡིས་རྣམ་རིག་ན། །དེ་ལ་ནམ་ཡང་སྡོམ་པ་མེད་མི་འགྱུར། །འདི་ལྟར་དེས་ནི་ཡང་དག་ངེས་པར་རྟོགས། །གང་གིས་ཕུང་པོ་ལྔ་རྣམས་སྟོང་པར་ཤེས། །རང་བཞིན་སྟོང་ཞིང་བདག་མེད་རིག་ན་ནི། །ལུས་ཀྱིས་ལས་གང་ཡང་དག་སྤྱོད་བྱེད་པ། །དེ་ལ་ནམ་ཡང་སྡོམ་པ་མེད་མི་འགྱུར། །མཚན་མ་དག་ལ་འཛིན་ཅིང་མ་བསྡམས་ཏེ། །ཁོར་མོར་བདག་ཏུ་འདུ་ཤེས་རབ་གནས་པ། །
གཟུགས་ལ་ཆགས་པར་གྱུར་པའི་སྐྱེ་བོ་དག །མ་བསྡམས་པ་ཡི་འདོད་ཆགས་རབ་ཏུ་ལྡང་། །གང་རྣམས་ཡང་དག་མཐའ་ལ་བསླབས་གྱུར་ཅིང་། །སྟོང་པ་རྟོགས་པར་རིག་པ་དེས་པ་དག །སྡོམ་མེད་གང་གིས་ངན་འགྲོར་འགྲོ་བ་ཡིས། །འདོད་ཆགས་དེ་ལ་ནམ་ཡང་ལྡང་བ་མེད། །ཇི་ལྟར་རི་རབ་དག་ནི་ཆེན་པོ་ལ། །གྲོག་མ་ཀུན་གྱིས་གཡོས་ཤིང་འགུལ་མི་ནུས། །དེ་བཞིན་མཁས་པ་ཡང་དག་ཚུལ་བསླབས་པས། །ལྷ་ཡི་གཟུགས་ཀྱིས་ཀྱང་ནི་དེ་མི་གཡོས། །ནམ་མཁའ་ལ་ནི་རི་མོར་བྲི་ནུས་ཤིང་། །ལག་པས་ནམ་མཁའ་གཟུང་དུ་རུང་གྱུར་ཀྱང་། །འདོད་ཆགས་ཞེ་སྡང་བདུད་རྣམས་བྱེ་བ་ཡིས། །དེ་ལ་རྣམ་པར་བསྐྱོད་པར་ཡོང་མི་ནུས། །ལ་ལས་བྲག་ཅ་དག་ནི་གཟུང་ནུས་ཤིང་། །ཆུ་ཡི་སྟེང་ན་རྡོ་ཡང་འཕྱོ་གྱུར་ཀྱང་། །ལུས་ཀྱི་སྡོམ་པ་འདི་འདྲ་སུས་བསླབས་པ། །དེ་ཡི་བསམ་པ་དག་ཀྱང་བལྟར་མི་ནུས། །འཇིག་རྟེན་ཀུན་ན་སྒྲ་མང་ཇི་སྙེད་པ། །གཟུང་སྟེ་སྒྲོམ་དུ་གཞུག་པར་ནུས་གྱུར་ཀྱང་། །ལུས་ཀྱི་སྡོམ་པའི་གནས་དང་མི་གནས་པ། །སུས་ཀྱང་རྣམ་པར་རིག་པར་བྱེད་མི་ནུས། །སྤྲིན་ལས་སྒྲ་བསྒྲགས་གློག་རྣམས་རྒྱུ་བ་དང་། །ཉི་མའི་འཁོར་ལོས་འོད་ཟེར་གཟུང་ནུས་ཀྱང་། །ལུས་ཀྱི་སྡོམ་པ་འདི་ལ་སུས་བསླབས་པ། །དེ་ཡི་རང་བཞིན་ཤེས་པར་ནུས་མི་འགྱུར། །རླུང་གི་དཀྱིལ་འཁོར་ཕྱོགས་བཞིར་ལྡང་བ་ནི། །རྒྱ་དང་སྙི་ཡིས་གཟུང་བར་ནུས་གྱུར་ཀྱང་། །ལུས་ཀྱི་སྡོམ་པ་འདི་ལ་གང་གནས་པ། །དེ་ཡི་ལུས་ནི་ནམས་ཀྱང་ཤེས་མི་ནུས། །སྲོག་ཆགས་ཀུན་གྱི་སྤྱོད་ཡུལ་དེ་མ་ཡིན། །སེམས་སྡོམ་གང་ལ་མཁས་པ་དེ་གནས་ཤིང་། །སྤྱོད་ཡུལ་གང་གནས་ལུས་ཀྱི་སྡོམ་པ་ནི། །འཇིག་རྟེན་ཆོས་ཀྱིས་མི་གོས་ནམ་མཁའ་བཞིན། །ཕྱོགས་བཞིར་ནམ་མཁའ་ལ་ནི་རྒྱུ་བ་ཡིས། །སྲོག་ཆགས་ཀུན་རྗེས་སོ་སོར་བལྟ་ནུས་ཀྱང་། །དེ་ཡི་ལུས་དང་སེམས་ཀྱི་སྤྱོད་ཡུལ་ལ། །ཚད་གཟུང་བར་ནི་སུ་ཡང་ནུས་པ་མེད། །ལུས་ཀྱི་སྡོམ་པ་འདི་ལ་གང་གནས་པའི། །ཉོན་མོངས་རྣམ་མང་ཐམས་ཅད་མེད་པར་འགྱུར། །དེ་ཡི་ཉོན་མོངས་ཉེ་བ་རབ་ཏུ་སྤངས། །འདི་ལྟར་དེས་ནི་ལུས་ཀྱི་སྡོམ་པ་བསླབས། །དེ་ལ་མཚོན་ཆ་དང་ནི་
མེས་མི་ཚུགས། །དེ་ལྟར་དེ་ཡི་ལུས་ནི་གཟུང་དུ་མེད། །དེ་ནི་ཞི་བ་རབ་ཞི་ཏིང་འཛིན་གནས། །འདི་ལྟར་དེས་ནི་ལུས་ཀྱི་སྡོམ་པ་བསླབས། །དེ་ལྟར་གནས་པ་འཇིགས་མེད་སྐྲག་པ་མེད། །དེ་ལ་འཁྲུག་སེམས་མི་སྐྱེ་ཕྲག་དོག་མེད། །ལུས་ཀྱི་སྡོམ་པ་འདི་འདྲ་སུས་བསླབས་པ། །དེ་ནི་གཙེ་བ་ཀུན་ལས་ཐར་བ་ཡིན། །དུག་དང་མཚོན་གྱིས་ནམ་ཡང་མི་འཇིགས་ཤིང་། །མེ་དང་ཆུ་ཡི་ནང་ནའང་འཇིགས་པ་མེད། །ལུས་ཀྱི་སྡོམ་པ་འདི་འདྲ་སུས་བསླབས་པ། །དེ་ནི་གཙེ་བ་ཀུན་ལས་ཐར་བ་ཡིན། །ཆོམ་རྐུན་གཡོན་ཅན་སྡིག་པ་བྱེད་པ་དང་། །སྦྲུལ་གདུག་ནང་དུ་སོང་ཡང་འཇིགས་མེད་དེ། །འདི་ལྟར་དེ་ནི་བདག་ཏུ་འདུ་ཤེས་མེད། །འདུ་ཤེས་རྣམ་པར་གྲོལ་ལ་འཇིགས་མི་འབྱུང་། །འཇིགས་ལས་རྣམ་པར་གྲོལ་བ་སྐྲག་མི་སྐྱེ། །སྐྲག་པ་མེད་ལ་གཡོ་བ་མི་འབྱུང་སྟེ། །མི་གཡོ་བ་ལ་སྐྲག་པ་ག་ལ་ཡོད། །དེ་ནི་བདུད་རྣམས་བྱེ་བས་བསྐྱོད་མི་ནུས། །བྱང་ཆུབ་སེམས་དཔའ་རྣམས་ལ་ཕན་པའི་ཕྱིར། །སྡོམ་པ་གང་སྤྱོད་བཤད་ཅིང་རབ་བསྟན་པ། །འདི་འདྲའི་ལུས་ཀྱི་སྡོམ་པ་སུས་བསླབས་པ། །དེ་ནི་བདུད་རྣམས་བྱེ་བས་བསྐྱོད་མི་ནུས། །ཆོས་རྣམས་ཀུན་ལ་ཡེ་ཤེས་ཐོགས་པ་མེད། །དཔེ་བྱད་བཟང་པོ་བརྒྱད་ཅུ་ཡོངས་སུ་ཚང་། །སུམ་ཅུ་རྩ་གཉིས་མཚན་གྱི་རི་མོ་དག །སྡོམ་པར་གནས་ལ་རྙེད་པར་དཀའ་མི་འགྱུར། །སངས་རྒྱས་ཆོས་རྣམས་བསམ་གྱིས་མི་ཁྱབ་ཅིང་། །ཚད་ཀྱང་མེད་པར་རྟོགས་པར་སུ་འདོད་པ། །འདི་འདྲའི་ལུས་ཀྱི་སྡོམ་པ་དེས་སློབས་ཤིག །འཇིག་རྟེན་ཐམས་ཅད་ཀྱི་ཡང་མཆོད་རྟེན་འགྱུར། །སངས་རྒྱས་སྟོབས་བཅུ་མངའ་བ་བསམ་མི་ཁྱབ། །དྲང་སྲོང་ཆེན་པོའི་ཆོས་འདི་གང་འདོད་པ། །དེས་ནི་ལུས་ཀྱི་སྡོམ་པ་འདི་འདྲ་སློབས། །གང་སློབ་དེ་ལ་སྟོབས་རྣམས་རྙེད་མི་དཀའ། །འདི་འདྲའི་ལུས་ཀྱི་སྡོམ་ལ་གང་སློབ་པ། །སངས་རྒྱས་ཆོས་ནི་མ་འདྲེས་བཅྭ་བརྒྱད་པོ། །རྒྱལ་བ་གང་ལ་རབ་ཏུ་གནས་པ་ཡང་། །དེ་དག་དེ་ལ་རྙེད་པར་དཀའ་མི་འགྱུར། །འདི་འདྲའི་ལུས་ཀྱི་སྡོམ་པ་གང་སློབ་པ། །དྲང་སྲོང་ཆེན་པོའི་བྱང་ཆུབ་ཡན་ལག་བདུན། །སོ་སོ་ཡང་དག་རིག་དང་རྫུ་འཕྲུལ་རྐང་། །དེ་ལ་དེ་
དག་རྙེད་པར་དཀའ་མི་འགྱུར། །ཚངས་པའི་གནས་བཞི་དང་ནི་བསམ་གཏན་དང་། །རྣམ་པར་ཐར་པའི་སྒོ་རྣམས་གང་བཤད་དང་། །བདེ་བའི་རྣམ་རྟོག་རབ་ཏུ་དབེན་པ་ཡང་། །སྡོམ་པར་གནས་པ་ལ་ནི་རྙེད་མི་དཀའ། །ལུས་ཀྱི་སྡོམ་པ་ལ་ནི་གང་གནས་པ། །སྙིང་རྗེའི་གནས་དང་བཏང་སྙོམས་ཐོབ་པར་འགྱུར། །དེ་བཞིན་སྤྱོད་པ་འཇུག་པ་བྱམས་པའི་མཆོག །འགྲོ་བ་ཀུན་ལའང་ཕན་པའི་སེམས་སུ་འགྱུར། །དྲན་པ་ཉེར་གཞག་ཡང་དག་སྤོང་བ་དང་། །དྲང་སྲོང་ཆེན་པོའི་དབང་ལྔ་སྟོབས་ལྔ་དང་། །འཕགས་པའི་ལམ་མཆོག་ཡན་ལག་བརྒྱད་པོ་ཡང་། །ལུས་ཀྱི་སྡོམ་པར་གནས་ལ་རྙེད་མི་དཀའ། །གཞན་ཡང་དམ་པ་སངས་རྒྱས་ཆོས་རྣམས་ནི། །བསམ་གྱིས་མི་ཁྱབ་གང་ལ་ཚད་མེད་པ། །ལུས་ཀྱི་སྡོམ་པ་འདི་འདྲ་སུས་བསླབས་པ། །དེ་ལ་ཐམས་ཅད་རྙེད་པར་དཀའ་མི་འགྱུར། །འདི་འདྲའི་ལུས་ཀྱི་སྡོམ་པ་ཐོས་ནས་ནི། །རྒྱལ་པོ་གླང་མཆོག་ཁྱད་པར་ཐོབ་གྱུར་ཏེ། །དགའ་བ་མཚུངས་མེད་རངས་ཤིང་མགུ་བ་སྐྱེས། །རྒྱལ་བ་དེ་ཡི་བསྟན་ལ་རབ་ཏུ་བྱུང་། །རབ་ཏུ་དེ་བྱུང་ལོ་ཡང་བྱེ་ཕྲག་བཅུར། །ཚངས་པར་སྤྱོད་མཆོག་གཙང་མ་སྤྱད་པར་གྱུར། །ལྷ་དང་བཅས་པའི་འཇིག་རྟེན་ཕན་པའི་ཕྱིར། །ཚངས་པའི་གནས་བཞི་ལ་ཡང་བསྒོམ་པ་བྱས། །ཚངས་པའི་གནས་ལ་ཤིན་ཏུ་བསྒོམ་བྱས་པས། །སངས་རྒྱས་བྱེ་བ་བརྒྱད་ཅུ་མཐོང་བར་གྱུར། །དེ་ལས་ལྷག་པར་གང་གཱའི་བྱེ་མ་སྙེད། །དེས་ནི་ཚངས་སྤྱོད་མཆོག་འདི་རབ་ཏུ་སྤྱད། །ཐམས་ཅད་ཀྱི་ཡང་བསྟན་པར་རབ་བྱུང་སྟེ། །ཚངས་པར་སྤྱོད་པ་བཟང་ཞིང་དག་པར་སྤྱད། །མང་དུ་ཐོས་ཤིང་སྤོབས་པར་ལྡན་པ་ཡི། །དགེ་སློང་ཆོས་སྨྲ་བ་ཡང་མཆོག་ཏུ་གྱུར། །ལུས་ཀྱི་སྡོམ་པ་འདི་ནི་རབ་ཤེས་ན། །ཚུལ་ཁྲིམས་མ་དྲལ་ཚུལ་ཁྲིམས་སྐྱོན་མེད་འགྱུར། །ཚུལ་ཁྲིམས་རྣམ་དག་ཚུལ་ཁྲིམས་འདྲེས་པ་མེད། །འཕགས་པའི་ཚུལ་ཁྲིམས་ཟག་པ་མེད་ལ་གནས། །དེ་ཚེ་རྒྱལ་པོ་གླང་མཆོག་ཁྱད་པར་སེམས། །གཞོན་ནུ་གཞན་ཞིག་ཡིན་པར་སེམས་གྱུར་ན། །དེ་ནི་གཞན་ཞིག་ཡིན་པར་མི་བལྟ་སྟེ། །ང་ནི་སྤྱད་པ་སྤྱོད་
ཚེ་དེར་གྱུར་ཏོ། །དེ་ཕྱིར་གཞོན་ནུ་ང་ཡི་རྗེས་སློབས་ལ། །ལུས་ཀྱི་སྡོམ་པ་འདི་ལ་གནས་པར་གྱིས། །སྲོག་ཆགས་བྱེ་བ་གཞན་ལའང་རབ་སྟོན་དང་། །རིང་པོར་མི་ཐོགས་ཇི་བཞིན་ང་འདྲར་འགྱུར། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ལུས་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་དེ་ལྟར་ཁྱོད་ཀྱིས་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་དམྱལ་བ་དག་ལ་མི་འཇིགས། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ངན་སོང་དག་གིས་འཇིགས་པར་མི་འགྱུར་རོ། །ཆུས་མི་འཇིགས། མེས་མི་འཇིགས། དུག་དང་། མཚོན་དང་། སེང་གེ་དང་། སྟག་དང་དྲེད་དང་བལ་གླང་དང་གླང་ཁྱུ་བ་དང་། མི་དང་མི་མ་ཡིན་པ་དག་གིས་འཇིགས་པར་མི་འགྱུར་རོ། །གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལག་མཐིལ་དུ་བཞག་སྟེ། ཏ་ལ་གཅིག་ཙམའམ། ཏ་ལ་གཉིས་ཙམའམ། ཏ་ལ་གསུམ་ཙམའམ། ཏ་ལ་བཞི་ཙམའམ། ཏ་ལ་ལྔ་ཙམའམ། ཏ་ལ་དྲུག་ཙམའམ། ཏ་ལ་བདུན་ཙམ་དུ་སྟེང་དུ་འཕེན་ཏོ། །ཇི་ཙམ་དུ་འདོད་པ་དེ་ཙམ་དུའང་འཕེན་ཏོ། །གཞན་ཡང་གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རྫུ་འཕྲུལ་གྱི་ཆོ་འཕྲུལ་མཆོག་གི་ཕ་རོལ་ཏུ་ཕྱིན་པ་ཡིན་ཏེ། དེ་རྫུ་འཕྲུལ་གྱི་རྐང་པའི་རྣམ་པར་སྨིན་པ་རྣམ་པར་དག་པའི་བསོད་ནམས་ཡོངས་སུ་གཟུང་ཞིང་དབེན་པར་གྱུར་ཏེ། ཐམས་ཅད་དུ་རྗེས་སུ་སོང་ཞིང་། དེ་ལྟ་བུའི་ཏིང་ངེ་འཛིན་ཐོབ་པས་ཟག་པ་མེད་པའི་བསོད་ནམས་ཡོངས་སུ་རྫོགས་པ། འཇིག་རྟེན་གྱི་ཁམས་ཐམས་ཅད་ལ་ཐོགས་པ་མེད་པའི་མིག་ཏུ་གྱུར་པས་དེ་ལྟ་བུའི་རྫུ་འཕྲུལ་གྱི་ཆོ་འཕྲུལ་དང་ལྡན་པར་འགྱུར་རོ། །དེ་ལ་རྫུ་འཕྲུལ་གང་ཞེ་ན། གང་འགྲུབ་པ་དང་། སྨོན་པ་དང་། འབྱོར་པ་དང་། ཡོངས་སུ་རྫོགས་པ་འདི་ནི་རྫུ་འཕྲུལ་ཞེས་བྱའོ། །དེ་ལ་རྫུ་འཕྲུལ་གྱི་ཆོ་འཕྲུལ་གང་
ཞེ་ན། རྫུ་འཕྲུལ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྫུ་འཕྲུལ་གྱི་ཡུལ་རྣམ་པ་མང་པོ་མྱོང་བར་བྱེད་པ་ཡིན་ཏེ། གཅིག་ཏུ་གྱུར་ནས་མང་པོར་འགྱུར། མང་པོར་གྱུར་ནས་གཅིག་ཏུ་འགྱུར། སྣང་བར་གྱུར་ཅིང་མི་སྣང་བར་ཡང་འགྱུར། རྩིག་པ་ལ་ཡང་ཐད་ཀར་འགྲོ། ར་བ་ལ་ཡང་ཐད་ཀར་འགྲོ། རི་ལ་ཡང་མི་ཐོགས་པར་འགྲོ། ནམ་མཁའ་ལ་ཡང་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ས་ལ་ཡང་སྟེང་དུ་འབྱུང་བ་དང་། བྱིའུ་ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་མི་ནུབ་པར་འགྲོ་སྟེ། དཔེར་ན་སའི་ཕུང་པོ་ཆེན་པོ་ལ་བྱ་བ་བཞིན་ནོ། །དུ་བ་འཐུལ་བར་ཡང་བྱེད་འབར་བར་ཡང་བྱེད་དེ། དཔེར་ན་མེའི་ཕུང་པོ་ཆེན་པོ་བཞིན་ནོ། །བདག་གི་ལུས་ལས་ཆུའི་རྒྱུན་ཆེན་པོ་ཁྲག་ཁྲིག་བརྒྱ་སྟོང་དུ་མ་འབྱིན་ཏེ། དཔེར་ན་སྤྲིན་ཆེན་པོ་བཞིན་ནོ། །ཆུའི་རྒྱུན་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བསྲེགས་ཤིང་རབ་ཏུ་ཚིག་སྟེ། མེས་རབ་ཏུ་འབར་ཞིང་འབར་བ་གཅིག་ཏུ་གྱུར་པ་ཞི་བར་བྱེད་དོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། འདི་ལྟར་གཟི་བརྗིད་ཆེ་བ་ཡང་ལག་པས་འཛིན་ཅིང་ཀུན་ཏུ་ཉུག་པར་བྱེད་དོ། །ཚངས་པའི་འཇིག་རྟེན་གྱི་བར་དུ་སེམས་ཅན་རྣམས་ལ་ལུས་ཀྱིས་དབང་སྒྱུར་རོ། །དེ་ནས་ཡང་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ས་ལ་བྱིའུ་ཟུལ་བྱེད་ཅིང་སྟེང་བྱུང་བྱེད། །ཆུ་དག་ལ་ཡང་ཐོགས་པ་མེད་པར་འགྲོ། །བྱ་བཞིན་ནམ་མཁའི་ངོས་ལ་འགྲོ་བར་བྱེད། །རྫུ་འཕྲུལ་གྱིས་ནི་དུད་འཐུལ་འབར་བར་བྱེད། །ཇི་ལྟར་བར་སྣང་ལ་ནི་རླུང་མི་ཐོགས། །སྤྲིན་གྱི་ཕུང་པོ་མང་པོ་འགྲོ་བ་ལྟར། །དེ་བཞིན་རྣལ་འབྱོར་པ་ཡང་ནམ་མཁའ་ལ། །རླུང་དང་སྤྲིན་བཞིན་དུ་ནི་ཐོགས་མེད་འགྲོ། །ཞིང་རྣམས་མེ་ཡིས་ཚིག་ཅིང་འབར་བ་དག །བྱང་ཆུབ་སེམས་དཔའ་མཁས་པས་དེ་མཐོང་ནས། །དེས་ནི་རང་གི་ལུས་ལས་ཆུ་ཕྱུང་སྟེ། །བྱེ་བ་སྙེད་ཀྱི་ཞིང་དེ་ཞི་བར་བྱེད། །བྱང་ཆུབ་སེམས་དཔའ་མཁས་པ་འདུག་བཞིན་དུ། །ཉི་ཟླ་ལ་ནི་ལག་པས་ཡོངས་སུ་འཛིན། །དེས་ནི་ཚངས་པའི་འཇིག་རྟེན་ཉེར་རིག་ནས། །ཚངས་པ་བྱེ་བ་དག་ལ་ཆོས་སྟོན་བྱེད། །
གང་ཚེ་དེ་ནི་ཆོས་སྟོན་འདོད་གྱུར་ན། །སྟོང་གསུམ་ཆེན་པོ་དེས་ནི་གོ་བར་བྱེད། ། འདོད་ན་དེ་ནི་ཞིང་མང་བྱེ་བར་ཡང་། །སྲོག་ཆགས་བྱེ་བ་མང་ལ་ཆོས་རྣམས་སྟོན། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ལུས་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལྷའི་རྣ་བའི་ཁམས་ཀྱིས་སྒྲ་རྣམས་ལྷའི་དང་། མིའི་དང་། སེམས་ཅན་དམྱལ་བ་པ་རྣམས་ཀྱི་དང་། དུད་འགྲོའི་སྐྱེ་གནས་སུ་སོང་བ་རྣམས་ཀྱི་དང་། གཤིན་རྗེའི་འཇིག་རྟེན་པ་རྣམས་ཀྱི་སྒྲ་ཉེ་བའམ་རྒྱང་རིང་པོ་ཡང་ཐོས་སོ། །གཞན་ཡང་གཞོན་ནུ་ལུས་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྟན་ལ་འདུག་བཞིན་དུ་ལྷའི་སྣའི་དབང་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལྷའི་ཡིད་དུ་འོང་བའི་ཆོས་ཀྱི་དྲི་ཇི་སྙེད་ཡོད་པ་ཉེའང་རུང་། རྒྱང་རིང་པོའང་རུང་སྟེ་དེ་དག་ཐམས་ཅད་ཚོར་རོ། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ལུས་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཕ་རོལ་དང་གང་ཟག་ཕ་རོལ་གྱི་སེམས་ཀྱི་རྣམ་པར་རྟོག་པ་དང་། སྤྱོད་པ་སེམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ཀྱང་འདོད་ཆགས་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས། འདོད་ཆགས་དང་བྲལ་བའི་སེམས་ཀྱང་འདོད་ཆགས་དང་བྲལ་བའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གོང་མ་བཞིན་དུ་སྦྱར་ཏེ། ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་དང་། སྲེད་པ་དང་བཅས་པ་དང་། སྲེད་པ་དང་བྲལ་བ་དང་།
ལེན་པ་དང་བཅས་པ་དང་། ལེན་པ་དང་བྲལ་བ་དང་། བསྡུས་པ་དང་། གཡེངས་པ་དང་། ལོག་པ་དང་། མ་ལོག་པ་དང་། ཆེན་པོར་གྱུར་པ་དང་། ཆེན་པོར་གྱུར་པ་མ་ཡིན་པ་དང་། འོད་གསལ་བ་དང་། འོད་གསལ་བ་མ་ཡིན་པ་དང་། ཚད་དང་བཅས་པ་དང་། ཚད་མེད་པ་དང་། བླ་ན་ཡོད་པ་དང་། བླ་ན་མེད་པ་དང་། མཉམ་པར་བཞག་པ་དང་། མཉམ་པར་བཞག་པ་མ་ཡིན་པ་དང་། རྣམ་པར་གྲོལ་བ་དང་། རྣམ་པར་གྲོལ་བ་མ་ཡིན་པ་དང་། ཉོན་མོངས་པ་དང་བཅས་པའི་སེམས་ཀྱང་ཉོན་མོངས་པ་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཉོན་མོངས་པ་མེད་པའི་སེམས་ཀྱང་ཉོན་མོངས་པ་མེད་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། སྐྱེ་བ་གཅིག་ཀྱང་རྗེས་སུ་དྲན། གཉིས་དང་། གསུམ་དང་། བཞི་དང་། ལྔ་དང་། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། སྐྱེ་བ་བརྒྱ་ཡང་རྗེས་སུ་དྲན་ནོ། །སྐྱེ་བ་སྟོང་དང་། སྐྱེ་བ་བརྒྱ་སྟོང་དང་། སྐྱེ་བ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་དུ་ཡང་རྗེས་སུ་དྲན་ནོ། །སྡུད་པའི་བསྐལ་པ་དང་། འབྱུང་བའི་བསྐལ་པ་ཡང་རྗེས་སུ་དྲན་ནོ། །སྡུད་པ་དང་། འབྱུང་བའི་བསྐལ་པ་དུ་མའི་བར་དུ་ཡང་རྗེས་སུ་དྲན་ནོ། །བསྐལ་པ་ཡང་རྗེས་སུ་དྲན་ནོ། །བསྐལ་པ་བརྒྱ་དང་། བསྐལ་པ་སྟོང་དང་། བསྐལ་པ་བརྒྱ་སྟོང་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་དུ་ཡང་རྗེས་སུ་དྲན་ནོ། །སྔོན་གྱི་མཐའ་བྱེ་བའི་བར་དུ་ཡང་རྗེས་སུ་དྲན་ནོ། །བདག་སྔོན་ཆེ་གེ་མོ་ཞིག་ཏུ་སྐྱེས་ཏེ། མིང་ནི་འདི་ཞེས་བྱ། རུས་ནི་འདི་ཞེས་བྱ། རིགས་ནི་འདི་ཞེས་བྱ། ཁ་དོག་ནི་འདི་འདྲ། ཟས་ནི་འདི་ལྟ་བུ་ཞིག་ཟ་ཟ། འཚོ་བ་ནི་འདི་འདྲ། ཚེ་ནི་འདི་ཙམ་ཞིག་ཏུ་ཐུབ། ཡུན་ནི་འདི་སྲིད་ཅིག་ཏུ་གནས་གནས། བདེ་བ་དང་སྡུག་བསྔལ་ནི་འདི་ལྟ་བུ་ཞིག་མྱོང་། དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་ཏེ། དེ་ནས་ཀྱང་ཤི་འཕོས་ནས་འདིར་སྐྱེས་སོ། །ཞེས་རྣམ་པ་དང་བཅས་པ་དང་། ཡུལ་ཕྱོགས་དང་བཅས་པ་དང་། གཞི་ཅི་ལས་གྱུར་པ་དང་བཅས་པར་སྔོན་གྱི་གནས་རྣམ་པ་དུ་མ་ཡང་དག་པར་རྗེས་སུ་དྲན་ནོ། །གཞོན་ནུ་ལུས་
ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལྷའི་མིག་རྣམ་པར་དག་པ་མིའི་ལས་འདས་པས་སེམས་ཅན་རྣམས་འཆི་འཕོ་བ་དང་། སྐྱེ་བ་དང་། ཁ་དོག་བཟང་བ་དང་། ཁ་དོག་ངན་པ་དང་། བདེ་འགྲོར་སོང་བ་དང་། ངན་འགྲོར་སོང་བ་དང་། ངན་པ་དང་། བཟང་པོ་དང་། བཟང་འགྲོར་འགྲོ་བ་དང་། ངན་འགྲོར་འགྲོ་བའི་སེམས་ཅན་ལས་བཞིན་དུ་ཉེ་བར་འགྲོ་བ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །སེམས་ཅན་འདི་རྣམས་ནི་ལུས་ཀྱིས་ཉེས་པར་སྤྱོད་པ་དང་ལྡན། ངག་གིས་ཉེས་པར་སྤྱོད་པ་དང་ལྡན། ཡིད་ཀྱིས་ཉེས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་སྐུར་པ་ལོག་པར་ལྟ་བ་དག་ལོག་པར་ལྟ་བ་ཡང་དག་པར་འཛིན་པའི་རྒྱུས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་སེམས་ཅན་དམྱལ་བ་རྣམས་སུ་སྐྱེས་སོ། །སེམས་ཅན་འདི་རྣམས་ནི་ལུས་ཀྱིས་ལེགས་པར་སྤྱོད་པ་དང་ལྡན། ངག་གིས་ལེགས་པར་སྤྱོད་པ་དང་ལྡན། ཡིད་ཀྱིས་ལེགས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་མི་སྐུར་པ་ཡང་དག་པར་ལྟ་བ་དག །ཡང་དག་པར་ལྟ་བ་ཡང་དག་པར་བཟུང་བའི་རྒྱུས་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེས་སོ་ཞེས་དེ་ལྟར་ལྷའི་མིག་རྣམ་པར་དག་པ་མིའི་ལས་འདས་པས་སེམས་ཅན་རྣམས་འཆི་འཕོ་བ་དང་། སྐྱེ་བ་དང་། ཁ་དོག་བཟང་བ་དང་། ཁ་དོག་ངན་པ་དང་། བདེ་འགྲོར་སོང་བ་དང་། ངན་འགྲོར་སོང་བ་དང་། ངན་པ་དང་། བཟང་པོ་དང་། བཟང་འགྲོར་འགྲོ་བ་དང་། ངན་འགྲོར་འགྲོ་བའི་སེམས་ཅན་ལས་བཞིན་དུ་ཉེ་བར་འགྲོ་བ་དག་ཀྱང་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་གང་ཅུང་ཟད་ཤེས་པར་བྱ་བ་དང་། བལྟ་བར་བྱ་བ་དང་། མཉན་པར་བྱ་བ་དང་། མངོན་པར་རྫོགས་པར་འཚང་རྒྱ་བར་བྱ་བ་དང་། རྣམ་པར་འཕྲུལ་བར་བྱ་བ་དེ་ཐམས་ཅད་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཐོས་སོ། །མཐོང་ངོ་། །རྟོགས་སོ། །དེ་ནས་ཡང་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་སྐྱོབ་པ་ཡི། །མངོན་པར་
ཤེས་པའི་རིམ་པ་བསྟན། །ཏིང་ངེ་འཛིན་ལ་གནས་པས་ན། །བྱང་ཆུབ་སེམས་དཔའ་ཞེས་ཀྱང་བྱ། །དེ་དག་རྣ་བ་རྣམ་སྦྱོང་སྟེ། །ལྷ་ཡི་རྣ་བ་བསམ་མི་ཁྱབ། །སངས་རྒྱས་ཀུན་གྱིས་བཤད་པ་ཡི། །ཆོས་རྣམས་དེ་ཡིས་ཐོས་པར་འགྱུར། །སྟོང་གསུམ་ཆེན་པོའི་འཇིག་རྟེན་ཁམས་དག་ན། །ལྷ་ཡི་དྲི་རྣམས་ཇི་སྙེད་ཡོད་པ་ཀུན། །ལྷ་ཡི་སྣ་ཡིས་ཇི་ལྟར་འདུག་བཞིན་དུ། །བྱང་ཆུབ་སེམས་དཔའ་མཁས་པ་དེ་སྣོམ་བྱེད། །འདོད་ཆགས་བཅས་དང་འདོད་ཆགས་མེད་པ་དང་། །ཞེ་སྡང་བཅས་དང་ཞེ་སྡང་བྲལ་བ་དང་། །གཏི་མུག་བཅས་དང་གཏི་མུག་བྲལ་བ་ཡི། །སེམས་རྣམས་སྲོག་ཆགས་ཀུན་གྱི་རབ་ཏུ་ཤེས། །བསྐལ་པ་བྱེ་བ་སྟོང་དུ་ནི། །གང་དུ་དེ་དག་སྔོན་གནས་པ། །སྔོན་གྱི་གནས་རྣམས་རབ་ཏུ་ཤེས། །དེ་དག་ལ་ནི་ཐོགས་པ་མེད། །དེ་དག་མིག་ཀྱང་རྣམ་སྦྱོང་སྟེ། །བླ་ན་མེད་པའི་ལྷ་ཡི་མིག །དེས་ནི་སེམས་ཅན་སྐྱེ་བ་དང་། །འཆི་འཕོ་དེ་དག་རབ་ཏུ་མཐོང་། །སྐད་ཅིག་གཅིག་དང་ལྡན་པ་ཡི། །ཤེས་རབ་ཀྱིས་ནི་ཚེ་རབས་ཀུན། །ཆོས་རྣམས་ལ་ནི་ཤེས་བྱ་བ། །ཅི་ཡོད་པ་ཡང་ཡང་དག་ཤེས། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ངག་གི་སྡོམ་པས་བསྡམ་པར་བྱའོ་ཞེས་ཁྱོད་ཀྱིས་དེ་ལྟར་བསླབ་པར་བྱའོ། །གཞོན་ནུ་དེ་ལ་ངག་གི་སྡོམ་པ་གང་ཞེ་ན། ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་དྲུག་ཅུ་དང་ལྡན་པའི་སངས་རྒྱས་ཀྱི་གསུང་དབྱངས་ཐོགས་པ་མེད་པ། བསམ་གྱིས་མི་ཁྱབ་པ་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་བཙུན་པ་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཔེ་བྱད་བཟང་པོ་བརྒྱད་ཅུ་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་
པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྟོབས་བཅུ་འཐོབ་པ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་སྒོ་གསུམ་འཐོབ་སྟེ། གསུམ་གང་ཞེ་ན། འདི་ལྟ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རྣམ་པར་ཐར་པའི་སྒོ་འདི་གསུམ་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་གནས་པ་ཆེན་པོ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། ཚངས་པའི་གནས་པ་ཆེན་པོ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པ་དང་སོ་སོ་ཡང་དག་པར་རིག་པ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་འཐོབ་སྟེ། སུམ་ཅུ་རྩ་བདུན་གང་ཞེ་ན། འདི་ལྟ་སྟེ། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་གནས་པ་འཐོབ་པ་དང་།
བཏང་སྙོམས་ཆེན་པོ་ལ་གནས་པ་འཐོབ་པ་དང་། བདེ་བའི་རྣམ་པར་རྟོག་པ་འཐོབ་པ་དང་། རབ་ཏུ་དབེན་པའི་ཆོས་རྣམས་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །གཞན་ཡང་གཞོན་ནུ་ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་པ་སྤོང་བར་འགྱུར་བ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མའི་ཚིག་དང་། ཚིག་རྩུབ་པོ་དང་། ཁྱལ་པར་སྨྲ་བ་སྤངས་པར་འགྱུར་བ་དང་། ཕ་མ་དང་སློབ་དཔོན་དག་ལ་མི་བདེན་པའི་ཚིག་མི་འབྱིན་པ་དང་། སངས་རྒྱས་དང་ཆོས་དང་དགེ་འདུན་ལ་མི་སྨོད་པ་དང་། ཚིག་གཞན་ལ་ཡང་གང་ཉེས་པ་དང་ལྡན་པའི་ཚིག་དེ་དག་བྱང་ཆུབ་སེམས་དཔས་སྤངས་པ་ཡིན་ཏེ། ཚིག་དེ་དག་ཀྱང་བྲག་ཅ་ལྟ་བུར་ཤེས་སོ། །སྤྲུལ་པ་ལྟ་བུ་དང་། སྨིག་རྒྱུ་ལྟ་བུ་དང་། མིག་ཡོར་ལྟ་བུ་དང་། སྒྱུ་མ་ལྟ་བུར་འཇུག་པར་བྱེད་དོ། །དེ་ལྟ་བུར་གྱུར་པས་ཚིག་དེ་ལ་མི་དམིགས། མི་རྟོག །རློམ་སེམས་སུ་མི་བྱེད། མི་ལྟ། མངོན་པར་ཆགས་པར་མི་བྱེད་དེ། གཞོན་ནུ་དེ་ནི་ངག་གི་སྡོམ་པ་ཞེས་བྱའོ། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ངག་གི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་དེ་ལྟར་ཁྱོད་ཀྱིས་བསླབ་པར་བྱའོ། །གཞོན་ནུ་ངག་གི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ངན་སོང་ཐམས་ཅད་ཀྱིས་མི་འཇིགས་ཤིང་སངས་རྒྱས་ཀྱི་ཆོས་ཐམས་ཅད་འཐོབ་པར་འགྱུར་རོ། །སངས་རྒྱས་ཀྱི་རྫུ་འཕྲུལ་ཐམས་ཅད་དང་། མངོན་པར་ཤེས་པ་ཐམས་ཅད་ཀྱང་ཐོབ་པར་གྱུར་ཏེ། གཞོན་ནུ་དེ་ནི་ངག་གི་སྡོམ་པ་ཞེས་བྱའོ། །དེ་ལ་འདི་སྐད་ཅེས་བྱ་སྟེ། ངག་གི་སྡོམ་པ་གང་དང་ལྡན་པ་ཡིས། །བྱང་ཆུབ་སེམས་དཔའ་དེ་ཡང་ཆོས་ཀུན་ལ། །ཐོགས་པ་མེད་པར་གདོན་མི་ཟ་བར་འགྱུར། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །དེ་ནི་ཡན་ལག་དྲུག་ཅུ་མཚུངས་ལྡན་པ། །ཐོགས་མེད་བསམ་ཡས་སངས་རྒྱས་དབྱངས་ཐོབ་པ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་
སྡོམ་པ་གང་གིས་བློ་ལྡན་རྣམས། །སྟོབས་བཅུ་དང་ནི་མ་འདྲེས་སངས་རྒྱས་ཆོས། །སུམ་ཅུ་རྩ་གཉིས་མཚན་རྣམས་ཐོབ་འགྱུར་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །གང་སྔར་འདི་ལས་ངས་ནི་བརྗོད་པ་ཡི། །སངས་རྒྱས་ཆོས་ཀྱང་ཐམས་ཅད་ཐོབ་འགྱུར་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །གནས་པ་དང་ནི་སོ་སོ་ཡང་དག་རིག །ཤིན་ཏུ་རྨད་བྱུང་ཆོས་ནི་བསམ་ཡས་འཐོབ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །དྲན་པ་ཉེར་གཞག་ཡང་དག་སྤོང་བ་དང་། །དེ་བཞིན་རྫུ་འཕྲུལ་རྐང་དང་དབང་སྟོབས་འཐོབ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །བཏང་སྙོམས་ཆེན་པོ་འཇིགས་པ་མེད་པ་དང་། །སྙིང་རྗེ་ཆེན་པོ་དག་པའི་གནས་པ་འཐོབ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །བདེ་བའི་རྣམ་རྟོག་རྣམ་པར་དག་པ་དང་། །དེ་བཞིན་རྣམ་རྟོག་རབ་དབེན་ཞི་བ་འཐོབ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །བརྫུན་དག་དང་ནི་ཕྲ་མའི་ཚིག་མི་སྨྲ། །ཁྱལ་པའི་ཚིག་དང་ཚིག་རྩུབ་མི་སྨྲ་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །ནམ་ཡང་དམ་པའི་ཆོས་ལ་སྤོང་མི་བྱེད། །སངས་རྒྱས་དགེ་འདུན་དག་ཀྱང་མི་སྤོང་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །ཕ་དང་མ་དང་སློབ་དཔོན་དག་གི་ཡང་། །མདུན་དུ་མི་བདེན་ཚིག་རྣམས་མི་སྨྲ་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །ཚིག་གཞན་གང་དག་སྐྱོན་དང་ལྡན་པ་རྣམས། །དེ་དག་མ་ལུས་པར་ཡང་སྤོང་བར་འགྱུར། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །ཚིག་རྣམས་ཀྱང་ནི་བྲག་ཅ་འདྲ་བ་དང་། །རྨི་ལམ་ལྟ་བུར་འཇིགས་པ་མེད་པར་འཇུག །དེ་ནི་ངག་གི་སྡོམ་པ་དེ་ཞེས་བྱ། །བདག་མེད་སྲོག་མེད་གཡོ་བ་མེད་པ་དང་། །
རྐྱེན་ལས་སྐྱེས་པ་རྨི་ལམ་སླུ་བ་བཞིན། །ཚིག་ལ་བྱང་ཆུབ་སེམས་དཔའ་གང་འཇུག་པ། །དེ་ནི་ངག་གི་སྡོམ་པ་དེ་ཞེས་བྱ། །འགོག་པ་རྟག་ཏུ་རྨི་ལམ་ཇི་བཞིན་ཏེ། །མྱ་ངན་འདས་པའང་རྨི་ལམ་ཇི་བཞིན་དུ། །ཚིག་ལ་བྱང་ཆུབ་སེམས་དཔའ་གང་འཇུག་པ། །དེ་ནི་ངག་གི་སྡོམ་པ་དེ་ཞེས་བྱ། །ཚིག་ནི་གང་ཡང་རྙེད་པར་མི་འགྱུར་ཏེ། །རྟོག་པར་མི་བྱེད་རློམ་སེམས་དེ་མི་བྱེད། །ནམ་ཡང་མི་ལྟ་ཆགས་པར་མི་བྱེད་དེ། །དེ་ནི་ངག་གི་སྡོམ་པ་དེ་ཞེས་བྱ། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ཡིད་ཀྱི་སྡོམ་པས་བསྡམ་པར་བྱའོ་ཞེས་ཁྱོད་ཀྱིས་དེ་ལྟར་བསླབ་པར་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་འཇིགས་པ་མེད་པ་རྣམས་དང་། མི་འཁྲུགས་པའི་སེམས་རྣམ་པར་གྲོལ་བ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ལྟ་བུའི་ཏིང་ངེ་འཛིན་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་འབར་བའི་བྱེ་བྲག་དང་འདྲ་བ་ཞེས་བྱ་བའི་འོད་ཟེར་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཡན་ལག་དྲུག་ཅུ་དང་ལྡན་པའི་སངས་རྒྱས་ཀྱི་གསུང་དབྱངས་ཕུན་སུམ་ཚོགས་པ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་བཙུན་པ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཔེ་བྱད་བཟང་པོ་བརྒྱད་ཅུ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །
ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྟོབས་བཅུ་འཐོབ་པ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་སྒོ་གསུམ་འཐོབ་སྟེ། གསུམ་གང་ཞེ་ན། འདི་ལྟ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རྣམ་པར་ཐར་པའི་སྒོ་འདི་གསུམ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་གནས་པ་ཆེན་པོ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། ཚངས་པའི་གནས་པ་ཆེན་པོ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པ་དང་། སོ་སོ་ཡང་དག་པར་རིག་པ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དྲན་པ་ཉེ་བར་གཞག་པ་བཞི་འཐོབ་པ་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་གནས་པ་འཐོབ་པ་དང་། བཏང་སྙོམས་ཆེན་པོ་ལ་གནས་པ་འཐོབ་པ་དང་། བདེ་བའི་རྣམ་
པར་རྟོག་པ་འཐོབ་པ་དང་། རབ་ཏུ་དབེན་པའི་ཆོས་རྣམས་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཕན་པར་འདོད་པ་དང་། སྤྱོད་པ་དང་། འཇུག་པ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །གཞན་ཡང་གཞོན་ནུ་ཡིད་ཀྱི་སྡོམ་པ་ཞེས་བྱ་བ་དེ་ནི། ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ལོག་པར་ལྟ་བ་སྤངས་པའི་ཕྱིར་ལོག་པར་ལྟ་བ་དང་འགྲོགས་པར་མི་བྱེད། བརྣབ་སེམས་སྤངས་པའི་ཕྱིར་བརྣབ་སེམས་དང་འགྲོགས་པར་མི་བྱེད། གནོད་སེམས་སྤངས་པའི་ཕྱིར་གནོད་སེམས་དང་འགྲོགས་པར་མི་བྱེད། ལེ་ལོ་སྤངས་པའི་ཕྱིར་ལེ་ལོའི་སེམས་དང་འགྲོགས་པར་མི་བྱེད། བླ་མ་རྣམས་དང་། ཕ་མ་དང་སློབ་དཔོན་དག་ལ་གཡོའི་སེམས་མི་སྐྱེད། འདོད་ཆགས་དང་ཞེ་སྡང་དང་གཏི་མུག་གི་སེམས་མི་སྐྱེད་ཅིང་དེ་དག་དང་འགྲོགས་པར་མི་བྱེད། བྱང་ཆུབ་ཀྱི་སེམས་ཀྱང་མི་གཏོང་། ལྷག་པའི་སེམས་ཀྱང་འཁྲུགས་པར་མི་བྱེད་ཅིང་གཞན་ཡང་ཉེས་པ་དང་ལྡན་པའི་ཡིད་ཀྱི་རྟོགས་པ་དེ་དག་ཐམས་ཅད་བྱང་ཆུབ་སེམས་དཔའ་རབ་ཏུ་སྤོང་ཞིང་དེ་དག་དང་མི་འགྲོགས་ཏེ། དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་དེ་ཡང་སྒྱུ་མ་ལྟ་བུའོ་ཞེས་བྱ་བ་ལ་འཇུག་གོ །རྨི་ལམ་ལྟ་བུའོ་ཞེས་བྱ་བ་དང་། སྨིག་རྒྱུ་ལྟ་བུའོ་ཞེས་བྱ་བ་དང་། སྤྲུལ་པ་ལྟ་བུའོ་ཞེས་བྱ་བ་དང་། མིག་ཡོར་ལྟ་བུའོ་ཞེས་བྱ་བ་ལ་འཇུག་སྟེ། གང་ནས་ཀྱང་མ་འོངས་པ་དང་གང་དུ་ཡང་མི་འགྲོ་བར་འཇུག་གོ །བདེ་བ་ལ་རྨི་ལམ་ལྟ་བུར་འཇུག་གོ །རྨི་ལམ་ལྟ་བུར་མི་རྟག་པར་འཇུག་གོ །རྨི་ལམ་ལྟ་བུར་བདག་མེད་པར་འཇུག་གོ །རྨི་ལམ་ལྟ་བུར་སྲོག་མེད་པར་འཇུག་གོ །རྨི་ལམ་ལྟ་བུར་སྟོང་པར་འཇུག་སྟེ། ཡིད་དེ་ཡང་མི་དམིགས། མི་རྟོག །རློམ་སེམས་སུ་མི་བྱེད། མི་ལྟ། མངོན་པར་མི་ཆགས་ཏེ། གཞོན་ནུ་དེ་ནི་ཡིད་ཀྱི་སྡོམ་པ་ཞེས་བྱའོ། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ཡིད་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། ། དེ་ཅིའི་
ཕྱིར་ཞེ་ན། གཞོན་ནུ་ཡིད་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་མི་ཁོམ་པ་ཐམས་ཅད་རྣམ་པར་སྤོང་ཞིང་། སངས་རྒྱས་ཀྱི་ཆོས་བསམ་གྱིས་མི་ཁྱབ་པའང་ཐོབ་པར་འགྱུར་རོ། །སངས་རྒྱས་ཐམས་ཅད་ལས་ཀྱང་སངས་རྒྱས་ཀྱི་མངོན་པར་ཤེས་པ་ཐམས་ཅད་དང་། མི་འཁྲུགས་པའི་སེམས་རྣམ་པར་གྲོལ་བ་ཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཡིད་ཀྱི་སྡོམ་པ་དག་ནི་ངས་བཤད་ཀྱིས། །གཡེང་བ་མེད་པའི་ཡིད་ཀྱིས་ཐམས་ཅད་ཉོན། །ཇི་སྟེ་མྱུར་དུ་འཚང་རྒྱ་འདོད་ན་ཡང་། །ང་ལས་ཐོས་ནས་དེ་ལ་ནན་ཏན་བྱོས། །ཡིད་ཀྱི་སྡོམ་པ་གང་གིས་མཁས་པ་དག །མཆོག་ཏུ་རབ་ཞི་རྒྱ་ཆེ་མི་གཡོ་བ། །རྒྱལ་ཆོས་བསམ་ཡས་རྨད་དུ་བྱུང་བ་འཐོབ། །འདི་ནི་ཡིད་ཀྱི་སྡོམ་པ་དག་པར་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །སེམས་ཀྱང་རྣམ་གྲོལ་རྟག་ཏུ་མི་གཡོ་འཐོབ། །དེ་བཞིན་རྡོ་རྗེ་ལྟ་བུའི་ཏིང་འཛིན་མཆོག །འདི་ནི་ཡིད་ཀྱི་སྡོམ་པ་དག་པར་བརྗོད། །མཁས་པ་གང་གིས་ཉེ་བར་སྤྱོད་པ་ཡི། །འོད་ཟེར་དོན་ཆེན་བྱེད་པ་སྒྲུབ་པར་བྱེད། །གང་གིས་ཡན་ལག་དྲུག་ཅུའི་དབྱངས་ཐོབ་པ། །དེ་ནི་ཡིད་ཀྱི་སྡོམ་པ་རྣམ་དག་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །སུམ་ཅུ་རྩ་གཉིས་མཚན་རྣམས་མྱུར་ཐོབ་འགྱུར། །སྟོབས་བཅུ་སངས་རྒྱས་ཡོན་ཏན་མ་ལུས་འཐོབ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །སོ་སོ་ཡང་དག་རིག་དང་མི་འཇིགས་དང་། །ཡོན་ཏན་མཆོག་ཏུ་རྨད་བྱུང་བསམ་ཡས་འཐོབ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །དྲན་པ་ཉེ་བར་གཞག་དང་རྫུ་འཕྲུལ་རྐང་། །ཡང་དག་སྤོང་དང་དབང་སྟོབས་ལྔ་འཐོབ་པ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །ཚངས་པའི་གནས་བཞི་མ་ལུས་དེ་བཞིན་ཏེ། །སྟོང་ཉིད་མཚན་མེད་སྨོན་མེད་སྒོ་འཐོབ་པ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། ། ཡིད་ཀྱི་སྡོམ་པ་དག་དང་གང་
ལྡན་པ། །སྙིང་རྗེ་གནས་དང་བཏང་སྙོམས་ཆེན་པོ་དང་། །སྤྱོད་འཇུག་བྱམས་པ་ཆེན་པོ་ཞི་བ་འཐོབ། །སྲིད་པ་ཀུན་ལ་དེ་ནི་ཕན་སེམས་འགྱུར། །ཡིད་ཀྱི་སྡོམ་པ་གང་གིས་མཁས་པ་དག །བྱང་ཆུབ་ཡན་ལག་བདུན་ཡང་མྱུར་འཐོབ་ཅིང་། །ལམ་མཆོག་ཡན་ལག་བརྒྱད་པ་དེ་བཞིན་ཏེ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །བཏང་སྙོམས་ཆེ་ལ་གནས་པ་དམ་པ་དང་། །སྙིང་རྗེ་གནས་མཆོག་དྲི་མ་མེད་པ་འཐོབ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་གིས་མཁས་པ་དག །བདེ་བའི་རྣམ་རྟོག་ཞི་བ་དག་པའི་ཡིད། །ཡོན་ཏན་ཕྱུག་པས་རབ་ཏུ་དབེན་ཐོབ་པ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །ལོག་པའི་ལྟ་བ་ཕན་དང་མི་འགྲོགས་ཤིང་། །གནོད་སེམས་བརྣབ་སེམས་སྐྱེད་པར་མི་བྱེད་པ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །སྐད་ཅིག་ཙམ་ཡང་ཚུལ་འཆོས་མི་བྱེད་ཅིང་། །བླ་མ་ལ་ཡང་གཡོ་སྒྱུ་མི་བྱེད་དེ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །འདོད་ཆགས་ཞེ་སྡང་ཡིད་ནི་སྐྱེད་མི་བྱེད། །དེ་བཞིན་གང་དུའང་གཏི་མུག་མི་སྐྱེད་དེ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །བྱང་ཆུབ་ལས་ནི་སེམས་ཀྱང་མི་གཏོང་ཞིང་། །ལྷག་པའི་བསམ་པ་དག་ཀྱང་འཁྲུག་མི་བྱེད། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ཀྱི་སྡོམ་པ་གང་ལྡན་མཁས་པ་དག །ཡིད་ཀྱི་ཉེས་པ་མང་པོ་ཇི་སྙེད་གཞན། །ཀུན་དང་ལྷན་ཅིག་གནས་པར་མི་བྱེད་པ། །དེ་ནི་ཡིད་ཀྱི་སྡོམ་པ་མཆོག་ཏུ་བརྗོད། །ཡིད་ལ་སྒྱུ་མ་ལྟ་བུར་འཇུག་བྱེད་དེ། །རྨི་ལམ་འདྲ་ཞིང་དེ་བཞིན་སྨིག་རྒྱུ་འདྲ། །རྟག་ཏུ་མིག་ཡོར་གྱི་ནི་མཚན་ཉིད་དེ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །བདེ་བ་རྨི་ལམ་ལྟ་བུར་འཇུག་བྱེད་དེ། །དེ་བཞིན་མི་རྟག་སྟོང་པ་ཐེར་ཟུག་མུན། །ཡིད་ལ་དེ་ལྟར་མཁས་པ་འཇུག་པར་བྱེད། ། དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་ལ་སྲོག་དང་སེམས་ཅན་མེད་པར་
འཇུག །རྐྱེན་ལས་བྱུང་བ་མགལ་མེ་བསྐོར་བ་བཞིན། །ག་ལས་མ་འོངས་གང་དུ་མི་འགྲོ་སྟེ། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །ཡིད་དེ་གང་ནའང་ཉེ་བར་མི་དམིགས་ཤིང་། །རྟོག་པ་མེད་པར་རློམ་སེམས་མི་བྱེད་དེ། །དེ་ཡང་མི་ལྟ་མངོན་པར་ཞེན་མི་བྱེད། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད། །དོན་དམ་བདེན་པ་རྨི་ལམ་འདྲ་བ་དང་། །མྱ་ངན་འདས་པ་རྨི་ལམ་མཚུངས་པར་འཇུག །གང་གིས་མཁས་པ་དེ་ལྟར་འཇུག་པ་ཡང་། །དེ་ནི་ཡིད་ཀྱི་སྡོམ་པའི་མཆོག་ཏུ་བརྗོད།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བཅྭ་ལྔ་པ་སྟེ་ཐ་མ། གཞོན་ནུ་དེ་ལ་ལས་ཡོངས་སུ་དག་པ་ནི་འདི་ལྟ་སྟེ། སྲིད་པ་གསུམ་རྨི་ལམ་ལྟ་བུར་མཐོང་ནས་དེ་ལ་འདོད་ཆགས་དང་བྲལ་བ་སྐྱེད་དེ། གཞོན་ནུ་འདི་ནི་ལས་ཡོངས་སུ་དག་པ་ཞེས་བྱའོ། །གཞོན་ནུ་དེ་ལ་དམིགས་པ་ལས་ཡང་དག་པར་འདའ་བ་གང་ཞེ་ན། འདི་ལྟ་སྟེ། ཕུང་པོ་དང་ཁམས་དང་སྐྱེ་མཆེད་རྣམས་སྒྱུ་མ་ལྟ་བུར་རིག་ནས་དེ་དག་འདོར་བ་སྟེ། འདི་ནི་དམིགས་པ་ལས་ཡང་དག་པར་འདའ་བ་ཞེས་བྱའོ། །དེ་ལ་ཕུང་པོ་ཡོངས་སུ་ཤེས་པ་གང་ཞེ་ན། འདི་ལྟ་སྟེ། ཕུང་པོ་རྣམས་ལ་སྨིག་རྒྱུ་ལྟ་བུར་འཇུག་པའོ། །དེ་ལ་ཁམས་མཉམ་པ་ཉིད་གང་ཞེ་ན། འདི་ལྟ་སྟེ། ཁམས་རྣམས་སྤྲུལ་པ་ལྟ་བུར་ངེས་པར་སྤོང་བའོ། །དེ་ལ་སྐྱེ་མཆེད་སེལ་བ་གང་ཞེ་ན། འདི་ལྟ་སྟེ། སྐྱེ་མཆེད་མིག་ཡོར་ལྟ་བུར་ངེས་པར་སྤོང་བའོ། །དེ་ལ་སྲེད་པ་སྤོང་བ་གང་ཞེ་ན། འདི་ལྟ་སྟེ། ཆོས་ཐམས་ཅད་ལ་མི་ལྟ་བའོ། །དེ་ལ་སྐྱེ་བ་མེད་པ་མངོན་སུམ་དུ་བྱེད་པ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་དམིགས་པའོ། །དེ་ལ་བྱ་བ་ལ་འཇུག་པ་གང་ཞེ་ན། འདི་ལྟ་སྟེ། བརྩོན་འགྲུས་ལས་བྱུང་བའི་སྡུག་བསྔལ་ཆུད་མི་ཟ་བའོ། །དེ་ལ་རྒྱུ་བསྟན་པ་གང་ཞེ་ན། འདི་ལྟ་སྟེ། ཕུང་པོ་བྲག་ཅ་ལྟ་བུར་མངོན་པར་སྒྲུབ་པའོ། །དེ་ལ་འབྲས་བུ་ཆུད་མི་ཟ་བ་གང་ཞེ་ན། འདི་ལྟ་སྟེ། ལས་ཀྱི་འབྲས་བུ་རྨི་ལམ་ལྟ་བུར་ཆུད་མི་ཟ་བའོ། །དེ་ལ་ཆོས་མཐོང་བ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་མཐོང་བའོ། །དེ་ལ་ལམ་བསྒོམ་པ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་དམིགས་པར་སྒོམ་པའོ། །དེ་ལ་དེ་བཞིན་གཤེགས་པ་དང་ཕྲད་པ་གང་ཞེ་ན། འདི་ལྟ་སྟེ། སངས་རྒྱས་ཐམས་ཅད་ཀྱི་བསླབ་པ་སྒྲུབ་པའོ། །དེ་ལ་ཤེས་རབ་རྣོ་བ་གང་ཞེ་ན། འདི་ལྟ་སྟེ། ཆོས་
ཐམས་ཅད་སྐྱེ་བ་མེད་པར་བཟོད་པའོ། །དེ་ལ་སེམས་ཅན་གྱི་རྗེས་སུ་འཇུག་པ་ཤེས་པ་གང་ཞེ་ན། འདི་ལྟ་སྟེ། དབང་པོ་མཆོག་དང་མཆོག་མ་ཡིན་པ་ཤེས་པའི་ཡེ་ཤེས་སོ། །དེ་ལ་ཆོས་ཤེས་པ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་དམིགས་པའོ། །དེ་ལ་སོ་སོ་ཡང་དག་པར་རིག་པ་ལ་འཇུག་པ་ཤེས་པ་གང་ཞེ་ན། འདི་ལྟ་སྟེ། ཆོས་ཀྱི་ཚུལ་ཡང་དག་པ་ཇི་ལྟ་བ་བཞིན་དུ་རྟོག་པའོ། །དེ་ལ་ཡི་གེ་རབ་ཏུ་དབྱེ་བ་ཤེས་པ་གང་ཞེ་ན། འདི་ལྟ་སྟེ། གསང་སྔགས་གསུམ་སྦྱོར་བར་ཤེས་པ་དང་། རྣམ་པ་དང་རྣམ་པ་མ་ཡིན་པ་ཤེས་པའོ། །དེ་ལ་དངོས་པོ་ལས་ཡང་དག་པར་འདའ་བ་ཤེས་པ་གང་ཞེ་ན། འདི་ལྟ་སྟེ། དངོས་པོ་མེད་པར་རྟོགས་པའོ། །དེ་ལ་དབྱངས་ཤེས་པ་གང་ཞེ་ན། འདི་ལྟ་སྟེ། བྲག་ཅ་ལྟ་བུར་ཤེས་པའོ། །དེ་ལ་མཆོག་ཏུ་དགའ་བ་འཐོབ་པ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་དམིགས་ཤིང་། འབྱུང་བ་དང་སྡུག་བསྔལ་སྤངས་པ་དང་། ཁུར་བོར་བའོ། །དེ་ལ་ཆོས་ཀྱི་དགའ་བ་མྱོང་བ་གང་ཞེ་ན། འདི་ལྟ་སྟེ། གདམས་པར་བྱ་བ་དང་། མགུ་བར་བྱ་བ་མི་གཏོང་བ་དང་། རང་གི་ཐེག་པའི་ལེགས་པ་མཐོང་བའོ། །དེ་ལ་གནས་པ་པོ་གང་ཞེ་ན། འདི་ལྟ་སྟེ། འཕགས་པའི་བདེན་པ་རྟོགས་པའོ། །དེ་ལ་དྲང་པོ་གང་ཞེ་ན། འདི་ལྟ་སྟེ། སྤྱོད་ལམ་བཅོས་པ་མེད་པའོ། །དེ་ལ་བཞིན་ཁྲོ་གཉེར་མེད་པ་གང་ཞེ་ན། འདི་ལྟ་སྟེ། ཞེ་སྡང་མེད་པའོ། །དེ་ལ་དགེ་བ་གང་ཞེ་ན། འདི་ལྟ་སྟེ། འགྲོགས་ན་བདེ་བའོ། །དེ་ལ་མཉེན་པ་གང་ཞེ་ན། འདི་ལྟ་སྟེ། ཕ་རོལ་ལ་ཕན་པའི་དངོས་པོའོ། །དེ་ལ་གསོང་པོར་སྨྲ་བ་གང་ཞེ་ན། འདི་ལྟ་སྟེ། ཚུར་ཤོག་ལེགས་པར་འོངས་སོ། །ཞེས་བྱས་པ་དང་མྱུར་དུ་ལྡང་བའོ། །དེ་ལ་བླ་མ་ལ་གུས་པ་གང་ཞེ་ན། འདི་ལྟ་སྟེ། བླ་མ་ལ་འཇིགས་ཤིང་དགེ་བའི་བཤེས་གཉེན་དུ་འདུ་ཤེས་པའོ། །དེ་ལ་བླ་མ་ལ་སྲི་ཞུ་བྱེད་པ་གང་ཞེ་ན། འདི་ལྟ་སྟེ། བླ་མ་ལ་རིམ་གྲོ་དང་གཡོག་བྱ་བའོ། །དེ་ལ་སྐྱེ་བས་ཆོག་ཤེས་
པ་གང་ཞེ་ན། འདི་ལྟ་སྟེ། སྐྱེ་བ་ཐམས་ཅད་ལ་ཆགས་པ་མེད་པའོ། །དེ་ལ་དཀར་པོའི་ཆོས་ཀྱིས་མི་ངོམས་པ་གང་ཞེ་ན། འདི་ལྟ་སྟེ། དཀར་པོའི་ཆོས་ཐམས་ཅད་ཡོངས་སུ་ཚོལ་ཞིང་དགེ་བ་གང་ཡིན་ཞེས་ཚོལ་བའོ། །དེ་ལ་འཚོ་བ་ཡོངས་སུ་དག་པ་གང་ཞེ་ན། འདི་ལྟ་སྟེ། ངན་ངོན་གྱིས་ཆོག་ཤེས་པ་དང་། ཚུལ་འཆོས་པ་མེད་པ་དང་། ཁ་གསག་མེད་པ་དང་། ཐོབ་ཀྱིས་འཇལ་བ་མེད་པ་དང་། རྙེད་པས་རྙེད་པ་ལ་འདོད་པ་མེད་པའོ། །དེ་ལ་དགོན་པར་གནས་པ་མི་གཏོང་བ་གང་ཞེ་ན། འདི་ལྟ་སྟེ། དགེ་བའི་ཆོས་རྣམས་ལ་བརྩོན་པ་མི་འདོར་ཞིང་བས་མཐའི་གནས་མལ་ལ་མངོན་པར་དགའ་བ་དང་། ནགས་སྟུག་པོ་དང་། གཅོང་རོང་དང་། ཕུག་དང་སྨན་ཤོང་དུ་མངོན་པར་དགའ་བ་དང་། ཆོས་ཀྱི་དགའ་བ་མྱོང་བར་བྱེད་པ་དང་། ཁྱིམ་པ་དང་རབ་ཏུ་བྱུང་བ་རྣམས་དང་མི་འདྲི་བ་དང་། རྙེད་པ་དང་། བཀུར་སྟི་དང་། ཚིགས་སུ་བཅད་པ་ལ་མ་ཆགས་པ་དང་། སྲེད་པ་སྤོང་བ་དང་། བསམ་གཏན་གྱི་དགའ་བ་མྱོང་བ་སྟེ། འདི་ནི་དགོན་པ་ལ་གནས་པ་མི་གཏོང་བ་ཞེས་བྱའོ། །དེ་ལ་ས་ལ་གནས་པ་ཤེས་པ་གང་ཞེ་ན། འདི་ལྟ་སྟེ། ཉན་ཐོས་ཀྱི་འབྲས་བུ་རྣམ་པར་གཞག་པ་ཤེས་པ་དང་། རང་སངས་རྒྱས་ཀྱི་ས་རྣམ་པར་གཞག་པ་ཤེས་པ་དང་། བྱང་ཆུབ་སེམས་དཔའི་ས་རྣམ་པར་གཞག་པ་ཤེས་པའོ། །དེ་ལ་དྲན་པ་མི་ཉམས་པ་གང་ཞེ་ན། འདི་ལྟ་སྟེ། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡིད་ལ་བྱེད་པའོ། །དེ་ལ་ཕུང་པོ་ལ་མཁས་པའི་ཤེས་པ་གང་ཞེ་ན། འདི་ལྟ་སྟེ། ཕུང་པོ་དང་ཁམས་དང་སྐྱེ་མཆེད་རབ་ཏུ་དབྱེ་བ་ཡང་ཤེས་ཤིང་དེ་ལ་མི་དམིགས་པའོ། །དེ་ལ་མངོན་པར་ཤེས་པ་མངོན་སུམ་དུ་བྱེད་པ་གང་ཞེ་ན། འདི་ལྟ་སྟེ། རྫུ་འཕྲུལ་གྱི་རྐང་པ་བཞི་ཐོབ་པ་དང་། རྫུ་འཕྲུལ་རྣམ་པར་འཕྲུལ་པའོ། །དེ་ལ་ཉོན་མོངས་པ་སེལ་བ་གང་ཞེ་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་སྤོང་བའོ། །དེ་ལ་བག་ཆགས་ཀྱི་མཚམས་སྦྱོར་བ་ལེགས་པར་འཇོམས་པ་ཤེས་པ་གང་ཞེ་ན། འདི་ལྟ་སྟེ། སྔོན་གྱི་བྱིས་པའི་སྤྱོད་པ་ལ་སྨད་པ་དང་། ཉན་ཐོས་དང་རང་སངས་རྒྱས་ཀྱི་ས་མི་འདོད་པའོ། །དེ་ལ་ཁྱད་པར་དུ་འགྲོ་བ་གང་ཞེ་ན། འདི་ལྟ་སྟེ། སངས་རྒྱས་ཀྱི་
སྟོབས་དང་། མི་འཇིགས་པ་དང་། སོ་སོ་ཡང་དག་པར་རིག་པ་སྒྲུབ་པའོ། །དེ་ལ་སྒོམ་པའི་རྒྱུ་འཐུན་པ་གང་ཞེ་ན། འདི་ལྟ་སྟེ། རྗེས་སུ་ཆགས་པ་དང་། ཁོང་ཁྲོ་བ་སྤངས་པའོ། །དེ་ལ་ལྟུང་བ་ལས་འབྱིན་པ་ལ་མཁས་པ་གང་ཞེ་ན། འདི་ལྟ་སྟེ། སོ་སོར་ཐར་པ་དང་། འདུལ་བ་སྡོམ་པའོ། །དེ་ལ་ཡོངས་སུ་དཀྲིས་པ་གནོན་པ་གང་ཞེ་ན། འདི་ལྟ་སྟེ། ཉེས་པ་བཤགས་པ་དང་། ཕྱིས་སྡོམ་པའི་ལས་དགེ་བའོ། །དེ་ལ་རྗེས་སུ་ཆགས་པ་སྤོང་བ་གང་ཞེ་ན། འདི་ལྟ་སྟེ། ཁམས་གསུམ་གྱི་སྲེད་པའི་འཁྲི་ཤིང་ཐམས་ཅད་ཡང་དག་པར་འཇོམས་པ་དང་། དགེ་བའི་ཆོས་མ་སྐྱེས་པ་རྣམས་བསྐྱེད་པ་དང་། དགེ་བའི་ཆོས་སྐྱེས་པ་རྣམས་ཆུད་མི་ཟ་བར་བྱའོ། །དེ་ལ་སྲིད་པ་ལས་ཡང་དག་པར་འདའ་བ་གང་ཞེ་ན། འདི་ལྟ་སྟེ། ཁམས་གསུམ་ལ་མི་དམིགས་ཤིང་ཡིད་ལ་མི་བྱེད་པའོ། །དེ་ལ་སྐྱེ་བ་དྲན་པ་གང་ཞེ་ན། འདི་ལྟ་སྟེ། སྔོན་གྱི་གནས་ཤེས་པའོ། །དེ་ལ་ལས་ཀྱི་རྣམ་པར་སྨིན་པ་ལ་ནེམ་ནུར་མེད་པ་གང་ཞེ་ན། འདི་ལྟ་སྟེ། ཆད་པ་དང་རྟག་པ་རྣམ་པར་སྤོང་བའོ། །དེ་ལ་ཆོས་སེམས་པ་གང་ཞེ་ན། འདི་ལྟ་སྟེ། ཡང་དག་པ་ཇི་ལྟ་བ་བཞིན་དུ་སེམས་པའོ། །དེ་ལ་ཐོས་པ་ཡོངས་སུ་ཚོལ་བ་གང་ཞེ་ན། འདི་ལྟ་སྟེ། ཉན་ཐོས་ཀྱི་སྡེ་སྣོད་དང་། རང་སངས་རྒྱས་ཀྱི་སྡེ་སྣོད་དང་། བྱང་ཆུབ་སེམས་དཔའི་སྡེ་སྣོད་ཀུན་འཛིན་ཅིང་སྒོམ་པའོ། །དེ་ལ་ཡེ་ཤེས་རྣོ་བ་གང་ཞེ་ན། འདི་ལྟ་སྟེ། རྨི་ལམ་ལྟ་བུར་མ་སྐྱེས་པ་ཤེས་པའོ། །དེ་ལ་ཡེ་ཤེས་ལ་སྲེད་པ་གང་ཞེ་ན། འདི་ལྟ་སྟེ། ཡེ་ཤེས་ཡོངས་སུ་ཚོལ་བའོ། །དེ་ལ་ཡེ་ཤེས་ཁོང་དུ་ཆུད་པ་གང་ཞེ་ན། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སྒྲུབ་པའོ། །དེ་ལ་ཅང་ཤེས་ཀྱི་ས་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའི་བསླབ་པའི་གནས་སོ། །དེ་ལ་རི་ལྟ་བུའི་སེམས་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་གཏོང་བའོ། །དེ་ལ་མི་གཡོ་བ་གང་ཞེ་ན། འདི་ལྟ་སྟེ། ཉོན་མོངས་པ་དག་གིས་མི་འཕྲོགས་པའོ། །དེ་ལ་མི་སྒུལ་བ་གང་ཞེ་ན། འདི་ལྟ་སྟེ། མཚན་མ་ཐམས་ཅད་ཡིད་ལ་མི་བྱེད་པའོ། །དེ་ལ་ཕྱིར་མི་ལྡོག་པ་གང་ཞེ་ན། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་མི་འཇིག་པ་དང་། འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་རྣམས་རྒྱུན་མི་
འཆད་པར་མཐོང་བའོ། །དེ་ལ་དགེ་བའི་ཆོས་ཕུན་སུམ་ཚོགས་པ་གང་ཞེ་ན། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་གྱུར་པའོ། །དེ་ལ་སྡིག་པའི་ལས་ལ་སྨོད་པ་གང་ཞེ་ན། འདི་ལྟ་སྟེ། སྡོམ་པ་དང་སྡིག་པ་རྣམས་གཟོད་མ་ནས་མ་སྐྱེས་པའོ། །དེ་ལ་ཉོན་མོངས་པ་མི་འབྱུང་བ་གང་ཞེ་ན། འདི་ལྟ་སྟེ། མ་རིག་པ་དང་། སྲིད་པའི་སྲེད་པ་དང་། ཁྲོ་བ་མི་སྐྱེད་པའོ། །དེ་ལ་བསླབ་པ་ཡོངས་སུ་མི་གཏོང་བ་གང་ཞེ་ན། འདི་ལྟ་སྟེ། ལས་ཀྱི་རྣམ་པར་སྨིན་པ་ལ་ཡིད་ཆེས་པ་དང་། སངས་རྒྱས་ལ་རི་མོར་བྱེད་པའོ། །དེ་ལ་ཏིང་ངེ་འཛིན་རྣམ་པར་གཞག་པ་གང་ཞེ་ན། འདི་ལྟ་སྟེ། སེམས་དང་སེམས་ལས་བྱུང་བའི་ཆོས་རྣམས་སྐྱེ་བ་དང་། འཇིག་པ་མེད་པ་ལ་མཁས་པ་དང་། སེམས་རྩེ་གཅིག་པའོ། །དེ་ལ་སེམས་ཅན་གྱི་བསམ་པ་ཤེས་པ་གང་ཞེ་ན། འདི་ལྟ་སྟེ། དབང་པོ་མཆོག་དང་མཆོག་མ་ཡིན་པ་ཤེས་པའི་ཡེ་ཤེས་སོ། །དེ་ལ་སྐྱེ་བའི་ཁྱད་པར་ཤེས་པ་གང་ཞེ་ན། འདི་ལྟ་སྟེ། འགྲོ་བ་ལྔ་རྣམ་པར་གཞག་པ་ཤེས་པའོ། །དེ་ལ་ཡེ་ཤེས་མཐའ་ཡས་པ་གང་ཞེ་ན། འདི་ལྟ་སྟེ། འཇིག་རྟེན་གྱི་དང་འཇིག་རྟེན་ལས་འདས་པའི་བཟོ་ལྷུན་གྱིས་གྲུབ་པ་ཤེས་པའོ། །དེ་ལ་ཚིག་གི་མཚམས་སྦྱར་བ་ཤེས་པ་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་ལྡེམ་པོ་ངག་ཤེས་པའོ། །དེ་ལ་ཁྱིམ་གྱི་གནས་ཡོངས་སུ་སྤངས་པ་གང་ཞེ་ན། འདི་ལྟ་སྟེ། ལུས་དང་སེམས་དབེན་ཞིང་མངོན་པར་བྱུང་བའོ། །དེ་ལ་ཁམས་གསུམ་ལ་མངོན་པར་མི་དགའ་བ་གང་ཞེ་ན། འདི་ལྟ་སྟེ། ཁམས་གསུམ་ཡང་དག་པ་ཇི་ལྟ་བ་བཞིན་དུ་མཐོང་བའོ། །དེ་ལ་སེམས་མ་གོད་པ་གང་ཞེ་ན། འདི་ལྟ་སྟེ། སེམས་ཡོངས་སུ་མི་གཏོང་བ་དང་། མཉམ་པར་བཞག་པ་ཡོངས་སུ་མི་གཏོང་བའོ། །དེ་ལ་ཆོས་རྣམས་ལ་མངོན་པར་མ་ཆགས་པ་གང་ཞེ་ན། འདི་ལྟ་སྟེ། སྡུག་པ་ཐམས་ཅད་སྤོང་བའོ། །དེ་ལ་དམ་པའི་ཆོས་ཡོངས་སུ་འཛིན་པ་གང་ཞེ་ན། འདི་ལྟ་སྟེ། སངས་རྒྱས་ཀྱི་བྱང་ཆུབ་ཡོངས་སུ་སྲུང་བ་དང་། མདོ་སྡེ་འདི་ལྟ་བུ་འཛིན་པའོ། །དེ་ལ་ཆོས་སྲུང་བ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་ལ་སྨོད་པ་རྣམས་ཆོས་དང་འཐུན་པས་ཚར་གཅོད་པའོ། །དེ་ལ་ལས་ཀྱི་རྣམ་པར་སྨིན་པ་ལ་ཡིད་ཆེས་པ་གང་ཞེ་ན། འདི་ལྟ་སྟེ། ཁྲེལ་ཡོད་པས་
སྡིག་པའི་ལས་རྣམས་སྤོང་བ་དང་། དགེ་བའི་ཆོས་རྣམས་ཡོངས་སུ་བཙལ་བ་ལ་མངོན་པར་བརྩོན་པའོ། །དེ་ལ་འདུལ་བ་ལ་མཁས་པ་གང་ཞེ་ན། འདི་ལྟ་སྟེ། རང་བཞིན་གྱིས་ལྟུང་བ་དང་། ལྟུང་བ་མ་ཡིན་པ་ཤེས་པ་དང་། བཅས་པའི་ལྟུང་བ་དང་། ལྟུང་བ་མ་ཡིན་པ་ཤེས་པའོ། །དེ་ལ་རྩོད་པ་རྣམ་པར་ཞི་བ་གང་ཞེ་ན། འདི་ལྟ་སྟེ། འདུས་པ་རྣམ་པར་སྤངས་པའོ། །དེ་ལ་འཐབ་པ་མེད་པ་དང་། རྩོད་པ་མེད་པ་གང་ཞེ་ན། འདི་ལྟ་སྟེ། འཇིག་རྟེན་པའི་གཏམ་མི་འདོད་པའོ། །དེ་ལ་བཟོད་པའི་ས་གང་ཞེ་ན། འདི་ལྟ་སྟེ། ལུས་དང་སེམས་ལ་གནོད་པ་བཟོད་པར་བྱེད་པའོ། །དེ་ལ་བཟོད་པ་ཡང་དག་པར་འཛིན་པ་གང་ཞེ་ན། འདི་ལྟ་སྟེ། ཕ་རོལ་གྱིས་ངན་དུ་སྨྲས་པ་དང་། ངན་དུ་བརྗོད་པའི་ཚིག་གི་ལམ་རྣམས་བཏང་སྙོམས་སུ་འཇོག་ཅིང་བཟོད་པ་མི་འདྲལ་བའོ། །དེ་ལ་ཆོས་རབ་ཏུ་འབྱེད་པ་གང་ཞེ་ན། འདི་ལྟ་སྟེ། ཕུང་པོ་དང་ཁམས་དང་སྐྱེ་མཆེད་རྣམས་རབ་ཏུ་དབྱེ་བ་དང་། ཀུན་ནས་ཉོན་མོངས་པ་དང་། རྣམ་པར་བྱང་བའི་ཕྱོགས་རབ་ཏུ་དབྱེ་བ་དང་། དེ་དག་མི་དམིགས་པའོ། །དེ་ལ་རྣམ་པར་གཏན་ལ་དབབ་པ་ལ་མཁས་པ་གང་ཞེ་ན། འདི་ལྟ་སྟེ། ཆོས་ཐམས་ཅད་བརྗོད་དུ་མེད་པའོ། །དེ་ལ་རབ་ཏུ་དབྱེ་བ་ཤེས་པ་གང་ཞེ་ན། འདི་ལྟ་སྟེ། ཆོས་ཐམས་ཅད་རྣམ་པར་གཞག་པ་གང་ལ་ངེས་པར་རྟོག་པའོ། །དེ་ལ་ཆོས་ཀྱི་ཚིག་བསྒྲུབ་པ་ལ་མཁས་པའི་ཤེས་པ་གང་ཞེ་ན། འདི་ལྟ་སྟེ། ཆོས་རྣམས་ཡང་དག་པ་ཇི་ལྟ་བ་བཞིན་དུ་སྟོན་པའོ། །དེ་ལ་དོན་དང་དོན་མ་ཡིན་པ་འདྲེས་པ་བསྒྲུབ་པ་ལ་མཁས་པ་ཤེས་པ་གང་ཞེ་ན། འདི་ལྟ་སྟེ། ཆོས་རྣམས་རང་བཞིན་གྱིས་བླང་བ་དང་། གཞག་པ་མེད་པའོ། །དེ་ལ་སྔོན་གྱི་མཐའ་ཤེས་པ་གང་ཞེ་ན། འདི་ལྟ་སྟེ། རྒྱུ་ཤེས་པའོ། །དེ་ལ་ཕྱི་མའི་མཐའ་ཤེས་པ་གང་ཞེ་ན། འདི་ལྟ་སྟེ། རྐྱེན་ཤེས་པའོ། །དེ་ལ་དུས་གསུམ་མཉམ་པ་ཉིད་གང་ཞེ་ན། འདི་ལྟ་སྟེ། ཆོས་ཐམས་ཅད་ལ་ཐ་དད་དུ་བྱ་བ་མེད་པའི་དངོས་པོའི་ལུགས་ཀྱི་ཆོས་ཉིད་དོ། །དེ་ལ་འཁོར་གསུམ་ཡོངས་སུ་དག་པའི་ཤེས་པ་གང་ཞེ་ན། འདི་ལྟ་སྟེ། འདས་པ་དང་མ་འོངས་པ་དང་ད་ལྟར་བྱུང་བའི་ཆོས་རྣམས་མི་དམིགས་ཤིང་ཡིད་ལ་མི་བྱེད་པའོ། །དེ་ལ་སེམས་གནས་པ་གང་ཞེ་ན། འདི་ལྟ་སྟེ། སེམས་མི་དམིགས་པའོ། །དེ་ལ་ལུས་རྣམ་པར་གཞག་པ་གང་ཞེ་ན། འདི་ལྟ་སྟེ། ལུས་ལ་ཞུགས་པའི་རྗེས་སུ་
དྲན་པའོ། །དེ་ལ་སྤྱོད་ལམ་སྲུང་བ་གང་ཞེ་ན། འདི་ལྟ་སྟེ། གང་འདི་བསླད་པ་མེད་པའོ། །དེ་ལ་སྤྱོད་ལམ་མི་འཁྲུགས་པ་གང་ཞེ་ན། འདི་ལྟ་སྟེ། དགེ་བ་མི་སྤྱོམས་པའོ། །དེ་ལ་སྤྱོད་ལམ་རྣམ་པར་མི་རྟོག་པ་གང་ཞེ་ན། འདི་ལྟ་སྟེ། སྡིག་པ་འདོད་པ་དང་བྲལ་བའོ། །དེ་ལ་དབང་པོ་དང་བ་གང་ཞེ་ན། འདི་ལྟ་སྟེ། ཆོས་ལ་ཞུགས་པའི་ཡིད་ལ་བྱེད་པ་དང་། རིགས་པར་སྨྲ་བ་དང་། དུས་ཤེས་པ་དང་། ཡང་དག་པ་ཇི་ལྟ་བའི་ཆོས་རྣམས་ཡང་དག་པར་རབ་ཏུ་སྟོན་པའོ། །དེ་ལ་འཇིག་རྟེན་ཤེས་པ་གང་ཞེ་ན། འདི་ལྟ་སྟེ། ཕར་འགྲོ་བ་དང་། ཕྱིར་འོང་བ་རབ་ཏུ་ཤེས་པའོ། །དེ་ལ་ལྷུག་པར་གཏོང་བ་གང་ཞེ་ན། འདི་ལྟ་སྟེ། དངོས་པོ་རྣམས་མི་སྦེད་པ་དང་། སེར་སྣ་མེད་པའོ། །དེ་ལ་ལག་བརྐྱང་བ་གང་ཞེ་ན། འདི་ལྟ་སྟེ། འགེད་པའི་ངང་ཚུལ་ཅན་ནོ། །དེ་ལ་སེམས་འཛིན་པ་མེད་པ་གང་ཞེ་ན། འདི་ལྟ་སྟེ། དད་པ་རྙོག་པ་མེད་པའོ། །དེ་ལ་ཁྲེལ་ཡོད་པ་གང་ཞེ་ན། འདི་ལྟ་སྟེ། མུ་ཅོར་མི་སྨྲ་བའོ། །དེ་ལ་ངོ་ཚ་ཤེས་པ་གང་ཞེ་ན། འདི་ལྟ་སྟེ། མངོན་དུ་གྱུར་པའོ། །དེ་ལ་མི་དགེ་བའི་སེམས་སྨད་པ་གང་ཞེ་ན། འདི་ལྟ་སྟེ། བྱིས་པའི་ཆོས་རྟོགས་པ་དང་། དེ་དག་དང་མི་འགྲོགས་པའོ། །དེ་ལ་སྦྱངས་པ་མི་གཏོང་བ་གང་ཞེ་ན། འདི་ལྟ་སྟེ། ཡི་དམ་ལ་བརྟན་པའོ། །དེ་ལ་སྤྱོད་པ་ཡང་དག་པར་འཛིན་པ་གང་ཞེ་ན། འདི་ལྟ་སྟེ། སྤྱོད་པ་ལ་བརྟུལ་བ་བསྐྱེད་པའོ། །དེ་ལ་དགའ་བ་ཡང་དག་པར་སྤྱོད་པ་གང་ཞེ་ན། འདི་ལྟ་སྟེ། དགེ་བའི་ལས་ཀྱི་ཕན་ཡོན་ལ་སེམས་པའོ། །དེ་ལ་བླ་མ་དག་གི་སྟན་འདིང་ཞིང་ལྡང་བ་གང་ཞེ་ན། འདི་ལྟ་སྟེ། ང་རྒྱལ་བཅོམ་ཞིང་སྙོམ་ལས་མེད་པའོ། །དེ་ལ་ང་རྒྱལ་ཚར་གཅོད་པ་གང་ཞེ་ན། འདི་ལྟ་སྟེ། བདག་ཉིད་རྗེས་སུ་མི་དམིགས་ཤིང་རྩོམ་པ་མེད་པའོ། དེ་ལ་སེམས་རབ་ཏུ་གཟུང་བ་གང་ཞེ་ན། འདི་ལྟ་སྟེ། དཀར་པོའི་ཆོས་ཆུད་མི་ཟ་བར་ཤེས་པའོ། །དེ་ལ་སེམས་སྤྲོ་བར་བྱ་བ་གང་ཞེ་ན། འདི་ལྟ་སྟེ། བརྩོན་འགྲུས་ཆུད་མི་ཟ་བར་ཤེས་པའོ། །དེ་ལ་དོན་སོ་སོ་ཡང་དག་པར་རིག་པའི་ཤེས་པ་གང་ཞེ་ན། འདི་ལྟ་སྟེ། བདེན་པ་ཡང་དག་པ་ཇི་ལྟ་བ་བཞིན་དུ་རྟོགས་པའི་ཡེ་ཤེས་སོ། །དེ་ལ་ཡེ་ཤེས་ཁོང་དུ་ཆུད་པ་གང་ཞེ་ན། འདི་ལྟ་སྟེ། འཇིག་རྟེན་དང་འཇིག་རྟེན་ལས་འདས་པའི་ཆོས་རྣམས་ཁོང་དུ་ཆུད་པའོ། །དེ་ལ་མི་ཤེས་པ་དང་བྲལ་བ་གང་ཞེ་ན། འདི་ལྟ་སྟེ། ཆོས་ཡང་དག་པ་ཇི་ལྟ་བ་བཞིན་ལ་སྒྲོ་འདོགས་པ་དང་བྲལ་བའོ། །དེ་ལ་སེམས་ཀྱི་འཇུག་པ་ཤེས་པ་གང་ཞེ་ན།
འདི་ལྟ་སྟེ། སྐྱེ་བ་དང་འཇིག་པ་མེད་པ་ཤེས་པའོ། །དེ་ལ་ཟས་སྒྲུབ་པ་ལ་མཁས་པ་གང་ཞེ་ན། འདི་ལྟ་སྟེ། ཤེས་རབ་རྣོ་བའོ། །དེ་ལ་སྒྲ་བརྗོད་པ་ཤེས་པ་གང་ཞེ་ན། འདི་ལྟ་སྟེ། ཆོས་ཡང་དག་པ་ཇི་ལྟ་བ་བཞིན་དུ་རབ་ཏུ་བསྟན་པའོ། །དེ་ལ་རྣམ་པར་གཞག་པ་ཤེས་པ་གང་ཞེ་ན། འདི་ལྟ་སྟེ། ཡང་དག་པ་ཇི་ལྟ་བ་བཞིན་དུ་འཇུག་པ་ཤེས་པའོ། །དེ་ལ་དོན་རྣམ་པར་གཏན་ལ་དབབ་པ་གང་ཞེ་ན། འདི་ལྟ་སྟེ། འདུ་བྱེད་ཀྱི་ཕུང་པོ་ཆད་པའོ། །དེ་ལ་གནོད་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། སྲིད་པ་ལས་ཡང་དག་པར་འདའ་བ་དང་། གཞན་དག་ཀྱང་སྲིད་པ་ལས་ཡང་དག་པར་འདའ་བ་ལ་འཛུད་པའོ། །དེ་ལ་སྐྱེས་བུ་དམ་པ་ལ་སྟེན་པ་གང་ཞེ་ན། འདི་ལྟ་སྟེ། སངས་རྒྱས་དང་མི་འབྲལ་བའོ། །དེ་ལ་སྐྱེས་བུ་དམ་པ་དང་འགྲོགས་པ་གང་ཞེ་ན། འདི་ལྟ་སྟེ། སངས་རྒྱས་དང་བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་ལ་སྟེན་པའོ། །དེ་ལ་སྐྱེས་བུ་དམ་པ་མ་ཡིན་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། དམིགས་པ་ཅན་དང་། ལེ་ལོ་ཅན་རྣམས་རྣམ་པར་སྤོང་བའོ། །དེ་ལ་བསམ་གཏན་མི་འདོར་བ་གང་ཞེ་ན། འདི་ལྟ་སྟེ། འདོད་པའི་ཚེར་མ་རྣམ་པར་སྤོང་བ་དང་། བསམ་གཏན་མི་གཏོང་ཞིང་དགའ་བ་མི་འདོར་བའོ། །དེ་ལ་བསམ་གཏན་ལ་མ་ཆགས་པ་གང་ཞེ་ན། འདི་ལྟ་སྟེ། ཁམས་གསུམ་ལས་ཡང་དག་པར་འདའ་བར་མོས་པ་དང་། སེམས་ཅན་ཡོངས་སུ་སྨིན་པར་བྱ་བ་ལ་མོས་པ་དང་། གོང་དུ་ཤེས་རབ་ཀྱི་སྣང་བ་ལ་མོས་པའོ། །དེ་ལ་མངོན་པར་ཤེས་པས་རྣམ་པར་འཕྲུལ་པ་གང་ཞེ་ན། འདི་ལྟ་སྟེ། མངོན་པར་ཤེས་པ་ལྔ་ལ་གནས་ནས་སངས་རྒྱས་ཀྱི་ཆོས་ཤེས་པར་དཀའ་བ་རྣམས་གཞན་ལ་ཡང་དག་པར་རབ་ཏུ་སྟོན་པའོ། །དེ་ལ་མིང་གི་བརྡ་གང་ཞེ་ན། འདི་ལྟ་སྟེ། ཡོངས་སུ་མ་གྲུབ་པ་རྣམས་མིང་གིས་ཁོང་དུ་ཆུད་པའོ། །དེ་ལ་བརྟགས་པའི་ཐ་སྙད་གང་ཞེ་ན། འདི་ལྟ་སྟེ། འཇིག་རྟེན་གྱི་ཐ་སྙད་དོ། །དེ་ལ་བཏགས་པ་འཇོམས་པ་གང་ཞེ་ན། འདི་ལྟ་སྟེ། བརྗོད་པར་ཤེས་པའོ། །དེ་ལ་འཁོར་བ་ལས་ལྡོག་པ་གང་ཞེ་ན། འདི་ལྟ་སྟེ། འཁོར་བའི་ཉེས་པ་ལ་སོ་སོར་རྟོག་པའོ། །དེ་ལ་རྙེད་པ་མི་འདོད་པ་གང་ཞེ་ན། འདི་ལྟ་སྟེ། ཡང་དག་པར་འདོད་པ་ཉུང་བའོ། །དེ་ལ་རྙེད་པ་དང་བཀུར་སྟི་མི་ལེན་པ་གང་ཞེ་ན། འདི་ལྟ་སྟེ། གདུང་བ་མེད་པ་དང་། སྡིག་པ་འདོད་པ་དང་བྲལ་བའོ། །དེ་ལ་
བསྔགས་པ་མ་ཡིན་པས་ཞུམ་པར་མི་འགྱུར་བ་གང་ཞེ་ན། འདི་ལྟ་སྟེ། ཕུང་པོ་དང་། ཁམས་ལ་ཡོངས་སུ་རྟོག་པ་ཤེས་པའོ། །དེ་ལ་ཡང་དག་པར་བསྔགས་པ་མི་ལེན་པ་གང་ཞེ་ན། འདི་ལྟ་སྟེ། དགེ་བ་མི་སྤྱོམས་པ་དང་། རྙེད་པ་དང་བཀུར་སྟི་ལ་བར་ཆད་དུ་རིག་པའོ། །དེ་ལ་བཀུར་སྟི་ལ་བཏང་སྙོམས་སུ་བྱེད་པ་གང་ཞེ་ན། འདི་ལྟ་སྟེ། ལས་ཀྱི་རྣམ་པར་སྨིན་པ་རྟོགས་པའོ། །དེ་ལ་བསྟི་སྟང་མེད་པ་ལ་ཞུམ་པར་མི་འགྱུར་བ་གང་ཞེ་ན། འདི་ལྟ་སྟེ། རྣལ་འབྱོར་མི་གཏོང་བའོ། །དེ་ལ་སྨད་པས་མི་འཁྲུགས་པ་གང་ཞེ་ན། འདི་ལྟ་སྟེ། འཇིག་རྟེན་གྱི་ཆོས་ལ་སོ་སོར་རྟོག་པའོ། །དེ་ལ་སྟོད་པ་ལ་བཏང་སྙོམས་སུ་བྱེད་པ་གང་ཞེ་ན། འདི་ལྟ་སྟེ། དགེ་བའི་ཆོས་ཚོལ་ཞིང་འབྱུང་བའོ། །དེ་ལ་རྙེད་པ་མེད་ཀྱང་སེམས་འགོང་བ་མེད་པ་གང་ཞེ་ན། འདི་ལྟ་སྟེ། བདག་གིས་བྱས་པའི་ཆོས་རྣམས་ལ་སོ་སོར་རྟོག་པའོ། །དེ་ལ་ཁྱིམ་པ་དང་མི་སྟེན་པ་གང་ཞེ་ན། འདི་ལྟ་སྟེ། ཟང་ཟིང་ཅི་ཡང་རྣམ་པར་སྤོང་བའོ། །དེ་ལ་རབ་ཏུ་བྱུང་བ་དང་མི་སྟེན་པ་གང་ཞེ་ན། འདི་ལྟ་སྟེ། མི་རིགས་པ་ཡོངས་སུ་སྤོང་བ་དང་། རིགས་པ་ཡོངས་སུ་ཚོལ་བའོ། །དེ་ལ་སྤྱོད་ཡུལ་མ་ཡིན་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། སྒྲིབ་པ་ལྔ་རྣམ་པར་སྤོང་བའོ། །དེ་ལ་སྤྱོད་ཡུལ་ལ་རབ་ཏུ་སྤྱོད་པ་གང་ཞེ་ན། འདི་ལྟ་སྟེ། དྲན་པ་ཉེ་བར་གཞག་པ་བཞི་སྒོམ་པའོ། །དེ་ལ་ཆོ་ག་ཕུན་སུམ་ཚོགས་པ་གང་ཞེ་ན། འདི་ལྟ་སྟེ། ཕ་རོལ་རྗེས་སུ་སྲུང་བའོ། །དེ་ལ་ཆོ་ག་མ་ཡིན་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། བདག་གི་དགེ་བའི་ཆོས་རྗེས་སུ་སྲུང་བའོ། །དེ་ལ་རིགས་སུན་པར་མི་བྱེད་པ་གང་ཞེ་ན། འདི་ལྟ་སྟེ། ཤེས་ཀྱི་ཁེ་རྣམ་པར་སྤང་བའོ། །དེ་ལ་བསྟན་པ་སྲུང་བ་གང་ཞེ་ན། འདི་ལྟ་སྟེ། ཆོས་ཡོངས་སུ་བཙལ་བ་སྒྲུབ་པ་དང་། ཆོས་ཀྱི་རྗེས་སུ་འཐུན་པའི་ཆོས་ཀྱི་ནན་ཏན་ནོ། །དེ་ལ་སྨྲ་བ་ཉུང་བ་གང་ཞེ་ན། འདི་ལྟ་སྟེ། ཞི་གནས་ཐོབ་པའོ། །དེ་ལ་མཉེན་པ་གང་ཞེ་ན། འདི་ལྟ་སྟེ། ལྷག་མཐོང་ཐོབ་པའོ། །དེ་ལ་ཚིག་གི་ལན་ལ་མཁས་པ་གང་ཞེ་ན། འདི་ལྟ་སྟེ། ལན་དང་། ཡང་ལན་ཤེས་པའོ། །དེ་ལ་ཕས་ཀྱི་རྒོལ་བ་ཚར་གཅོད་པ་གང་ཞེ་ན། འདི་ལྟ་སྟེ། ཆོས་རྣམས་ཡང་དག་པ་ཇི་ལྟ་བ་བཞིན་དུ་སྟོན་པ་དང་། རྣམ་པར་གཞག་པར་བྱེད་པ་དང་། ཀླན་ཀ་ཚོལ་བ་ཚར་གཅོད་པའོ། །དེ་ལ་དུས་སུ་འགྲོ་བ་གང་ཞེ་ན། འདི་ལྟ་སྟེ། དུས་ཤེས་པའོ། །
དེ་ལ་སོ་སོའི་སྐྱེ་བོ་ལ་ཡིད་མི་རྟོན་པ་གང་ཞེ་ན། འདི་ལྟ་སྟེ། བྱིས་པའི་ཆོས་ལ་སྐྱོན་དུ་ལྟ་བའོ། །དེ་ལ་སྡུག་བསྔལ་བ་རྣམས་ལ་བརྙས་པ་མེད་པ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་སེམས་མཉམ་པའོ། །དེ་ལ་སྡུག་བསྔལ་བ་རྣམས་ལ་ནོར་རབ་ཏུ་སྦྱིན་པ་གང་ཞེ་ན། འདི་ལྟ་སྟེ། འཇིག་རྟེན་གྱི་ཟང་ཟིང་གི་སྦྱིན་པའོ། །དེ་ལ་དབུལ་པོ་རྣམས་ལ་མི་སྨོད་པ་གང་ཞེ་ན། འདི་ལྟ་སྟེ། ཕ་རོལ་ལ་སྙིང་བརྩེ་བའི་བློའོ། །དེ་ལ་ཚུལ་ཁྲིམས་འཆལ་པ་རྣམས་ལ་སྙིང་བརྩེ་བ་གང་ཞེ་ན། འདི་ལྟ་སྟེ། ཕ་རོལ་ལྟུང་བ་ལས་བྱུང་ཞིང་ཚུལ་ཁྲིམས་ལ་རབ་ཏུ་འགོད་པའོ། །དེ་ལ་ཕན་པའི་དངོས་པོ་གང་ཞེ་ན། འདི་ལྟ་སྟེ། གཞན་ལ་ཕན་པར་བྱེད་པའོ། །དེ་ལ་སྙིང་རྗེ་བའི་བློ་གང་ཞེ་ན། འདི་ལྟ་སྟེ། སེམས་ཅན་གྱི་མ་འོངས་པའི་སྡུག་བསྔལ་ལ་ལྟ་བའོ། །དེ་ལ་ཆོས་ཀྱིས་ཕན་གདགས་པ་གང་ཞེ་ན། འདི་ལྟ་སྟེ། གཞན་དག་ཡང་དག་པ་ཇི་ལྟ་བ་བཞིན་དུ་ཆོས་ལ་གཟུད་པའོ། །དེ་ལ་ཟང་ཟིང་ཡོངས་སུ་གཏོང་བ་གང་ཞེ་ན། འདི་ལྟ་སྟེ། ཕུང་པོ་ཡོངས་སུ་གཏོང་བ་དང་། གཞན་ལ་ཟང་ཟིང་གིས་ཕན་འདོགས་པའོ། །དེ་ལ་སོགས་པའི་གནས་མེད་པ་གང་ཞེ་ན། འདི་ལྟ་སྟེ། ཟང་ཟིང་ལ་སྨོད་པ་དང་། སྲུང་བའི་ཉེས་པ་མཐོང་བའོ། །དེ་ལ་ཚུལ་ཁྲིམས་བསྔགས་པ་གང་ཞེ་ན། འདི་ལྟ་སྟེ། ཚུལ་ཁྲིམས་ཡོངས་སུ་རིག་པའོ། །དེ་ལ་འཆལ་པའི་ཚུལ་ཁྲིམས་ལ་སྨད་པ་གང་ཞེ་ན། འདི་ལྟ་སྟེ། འཆལ་པའི་ཚུལ་ཁྲིམས་ཀྱི་ཉེས་པ་ཁོང་དུ་ཆུད་པའོ། །དེ་ལ་ཚུལ་ཁྲིམས་ཕུན་སུམ་ཚོགས་པ་དག་ལ་གཡོ་མེད་པར་སྟེན་པ་གང་ཞེ་ན། འདི་ལྟ་སྟེ། ཚུལ་ཁྲིམས་དང་ལྡན་པ་ལ་རྙེད་པར་དཀའ་བའི་འདུ་ཤེས་སུ་ཤེས་པའོ། །དེ་ལ་ཡོད་པ་ཐམས་ཅད་གཏོང་བ་གང་ཞེ་ན། འདི་ལྟ་སྟེ། བསམ་པ་དགེ་བའོ། །དེ་ལ་ལྷག་པའི་བསམ་པས་མགྲོན་དུ་གཉེར་བ་གང་ཞེ་ན། འདི་ལྟ་སྟེ། ཕ་རོལ་ལ་བདེ་བ་འདོད་པའོ། །དེ་ལ་སྨྲས་པ་བཞིན་བྱེད་པ་གང་ཞེ་ན། འདི་ལྟ་སྟེ། བསམ་པ་དགེ་བ་ཕུན་སུམ་ཚོགས་པའོ། །དེ་ལ་རྒྱུན་མི་ཆད་པར་བསྙེན་བཀུར་བྱེད་པ་གང་ཞེ་ན། འདི་ལྟ་སྟེ། དགེ་བ་གང་ཡིན་ཞེས་ཚོལ་ཞིང་འདྲི་བའོ། །དེ་ལ་དགའ་བ་མྱོང་བ་གང་ཞེ་ན། འདི་ལྟ་སྟེ། ཁོང་དུ་ཆུད་པའི་ཤེས་པ་དང་ལུང་གི་ཤེས་པའོ། །དེ་ལ་དཔེ་ཤེས་པ་གང་ཞེ་ན། འདི་ལྟ་སྟེ། འདྲ་བ་ཤེས་པ་དང་། གདམས་པ་ཤེས་པའོ། །དེ་ལ་སྔོན་བྱུང་བ་ལ་མཁས་པ་གང་ཞེ་ན། འདི་ལྟ་སྟེ། སྐྱེ་བ་
དྲན་པ་དང་། ཐོས་པ་མང་བའོ། །དེ་ལ་དགེ་བའི་རྩ་བ་སྔོན་དུ་འགྲོ་བ་གང་ཞེ་ན། འདི་ལྟ་སྟེ། བྱང་ཆུབ་ལ་ཤིན་ཏུ་འདུན་པ་དང་། གཞན་དག་ཀྱང་སྤྲོ་བར་བྱེད་པའོ། །དེ་ལ་ཐབས་མཁས་པ་གང་ཞེ་ན། འདི་ལྟ་སྟེ། སོ་སོར་འཆགས་པ་དང་། རྗེས་སུ་ཡི་རང་བ་དང་། གསོལ་བ་འདེབས་པ་དང་། དགེ་བའི་རྩ་བ་ཡོངས་སུ་བསྔོ་བ་ལ་མཁས་པའོ། །དེ་ལ་མཚན་མ་སྤོང་བ་གང་ཞེ་ན། འདི་ལྟ་སྟེ། ཆོས་རྣམས་རྨི་ལམ་ལྟ་བུར་རྟོགས་ནས་དངོས་པོ་རྣམ་པར་འཇིག་པའོ། །དེ་ལ་འདུ་ཤེས་ཟློག་པ་གང་ཞེ་ན། འདི་ལྟ་སྟེ། ཕྱིན་ཅི་ལོག་འདོར་བའོ། །དེ་ལ་དངོས་པོའི་མཚན་ཉིད་འདོར་བ་གང་ཞེ་ན། འདི་ལྟ་སྟེ། མཚན་ཉིད་མེད་པར་ཤེས་པའོ། །དེ་ལ་མདོ་སྡེ་མངོན་པར་སྒྲུབ་པ་ལ་མཁས་པ་གང་ཞེ་ན། འདི་ལྟ་སྟེ། དགེ་བ་དང་མི་དགེ་བའི་ཆོས་ཡང་དག་པ་ཇི་ལྟ་བ་རྣམས་དཔེ་དང་རྟོགས་པ་བརྗོད་པས་ཡང་དག་པར་རབ་ཏུ་སྟོན་པའོ། །དེ་ལ་བདེན་པ་རྣམ་པར་གཏན་ལ་དབབ་པ་གང་ཞེ་ན། འདི་ལྟ་སྟེ། རྣམ་པར་ཤེས་པ་འགོག་པ་དང་། མིང་དང་གཟུགས་མི་སྐྱེ་བའོ། །དེ་ལ་རྣམ་པར་གྲོལ་བ་མངོན་སུམ་དུ་བྱེད་པ་གང་ཞེ་ན། འདི་ལྟ་སྟེ། རྡོ་རྗེ་ལྟ་བུའི་ཏིང་ངེ་འཛིན་ལས་མི་གཡོ་བ་དང་། མི་འཁྲུག་པའོ། །དེ་ལ་གཅིག་ཏུ་བརྗོད་པ་གང་ཞེ་ན། འདི་ལྟ་སྟེ། མུ་སྟེགས་ཅན་གྱི་གནས་སྨད་པ་དང་། མི་སྐྱེ་བར་ཤེས་པའོ། །དེ་ལ་མི་འཇིགས་པ་ཐོབ་པ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་རྣམས་རྟོགས་ཤིང་སྟོབས་བསྐྱེད་པའོ། །དེ་ལ་ཚུལ་ཁྲིམས་ཀྱི་གནས་གང་ཞེ་ན། འདི་ལྟ་སྟེ། ལུས་ཀྱི་སྡོམ་པ་དང་སོ་སོར་ཐར་པའི་སྡོམ་པའོ། །དེ་ལ་སྙོམས་པར་འཇུག་པ་ལ་འཇུག་པ་གང་ཞེ་ན། འདི་ལྟ་སྟེ། ཁམས་གསུམ་ལ་འདོད་ཆགས་དང་བྲལ་བའོ། །དེ་ལ་ཤེས་རབ་ཐོབ་པ་གང་ཞེ་ན། འདི་ལྟ་སྟེ། ནུས་པ་ཤེས་པ་དང་། མི་དམིགས་པའོ། །དེ་ལ་གཅིག་པུར་དགའ་བ་གང་ཞེ་ན། འདི་ལྟ་སྟེ། འདུ་འཛིའི་ཉེས་པ་རྣམ་པར་སྤོང་བ་དང་། ཆོས་དཀར་པོ་མི་གཏོང་བའོ། །དེ་ལ་ཤེས་ཀྱི་ཁེ་ཆུང་ངུས་ཆོག་ཤེས་པ་གང་ཞེ་ན། འདི་ལྟ་སྟེ། ངན་ངོན་གྱིས་མགུ་བའོ། །དེ་ལ་སེམས་ལ་རྙོག་པ་མེད་པ་གང་ཞེ་ན། འདི་ལྟ་སྟེ། སྒྲིབ་པ་རྣམས་རྣམ་པར་གནོན་པའོ། །དེ་ལ་བལྟ་བར་བྱས་པ་རྣམ་པར་སྤོང་བ་གང་ཞེ་ན། འདི་ལྟ་སྟེ། དམིགས་པའི་ལྟ་བ་རྣམ་པར་སྤོང་བའོ། །དེ་ལ་གཟུངས་ཐོབ་པ་གང་ཞེ་ན། འདི་ལྟ་སྟེ། ཆོས་ཇི་ལྟར་མཐོང་བ་རྣམས་
ཡང་དག་པ་ཇི་ལྟ་བ་བཞིན་དུ་ཆགས་པ་མེད་པར་རབ་ཏུ་སྟོན་པའོ། །དེ་ལ་ཡེ་ཤེས་སྣང་བ་གང་ཞེ་ན། འདི་ལྟ་སྟེ། རང་བཞིན་ལ་འཇུག་པའོ། །དེ་ལ་གནས་གང་ཞེ་ན། འདི་ལྟ་སྟེ། ཚུལ་ཁྲིམས་ཀྱི་གནས་སོ། །དེ་ལ་གཞི་གང་ཞེ་ན། འདི་ལྟ་སྟེ། སེམས་ཀྱི་གཞིའོ། །དེ་ལ་རྟེན་གང་ཞེ་ན། འདི་ལྟ་སྟེ། དད་པ་ལ་རྟེན་པའོ། །དེ་ལ་ནན་ཏན་གང་ཞེ་ན། འདི་ལྟ་སྟེ། ལམ་གྱི་ནན་ཏན་ནོ། །དེ་ལ་རྒྱུ་གང་ཞེ་ན། འདི་ལྟ་སྟེ། མ་རིག་པ་འཁོར་བའི་རྒྱུའོ། །དེ་ལ་རིགས་པ་གང་ཞེ་ན། འདི་ལྟ་སྟེ། རིགས་པ་ནི་ཐར་པའི་རིགས་པའོ། །དེ་ལ་ཚུལ་གང་ཞེ་ན། འདི་ལྟ་སྟེ། སྲེད་པ་རབ་ཏུ་སྤངས་པའོ། །དེ་ལ་སྒོ་གང་ཞེ་ན། འདི་ལྟ་སྟེ། ཉེས་པ་སྤངས་པའོ། །དེ་ལ་ལམ་གང་ཞེ་ན། འདི་ལྟ་སྟེ། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཤེས་པའོ། །དེ་ལ་ས་གང་ཞེ་ན། འདི་ལྟ་སྟེ། སྨོན་པ་མེད་པའི་ས་བཅུའོ། །དེ་ལ་སྐྱེ་བ་དང་བྲལ་བ་གང་ཞེ་ན། འདི་ལྟ་སྟེ། སྐྱེ་བ་བཅད་པའོ། །དེ་ལ་ཡེ་ཤེས་ཀྱི་ས་གང་ཞེ་ན། འདི་ལྟ་སྟེ། རྨོངས་པ་མེད་པའོ། །དེ་ལ་མི་ཤེས་པ་སྤངས་པ་གང་ཞེ་ན། འདི་ལྟ་སྟེ། གཏི་མུག་སྤངས་པའོ། །དེ་ལ་ཡེ་ཤེས་གནས་པ་གང་ཞེ་ན། འདི་ལྟ་སྟེ། མི་གནས་པའོ། །དེ་ལ་རྣལ་འབྱོར་སྤྱོད་པའི་ས་གང་ཞེ་ན། འདི་ལྟ་སྟེ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཆོས་རྣམས་སྒོམ་པའོ། །དེ་ལ་བྱང་ཆུབ་སེམས་དཔའི་སྤྱོད་ཡུལ་གང་ཞེ་ན། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་གོ །དེ་ལ་སྐྱེས་བུ་དམ་པ་སྟེན་པ་གང་ཞེ་ན། འདི་ལྟ་སྟེ། སངས་རྒྱས་ལ་སྟེན་པའོ། །དེ་ལ་སྐྱེས་བུ་དམ་པ་མ་ཡིན་པ་སྤངས་པ་གང་ཞེ་ན། འདི་ལྟ་སྟེ། མུ་སྟེགས་ཅན་དམིགས་པར་ལྟ་བ་རྣམས་རྣམ་པར་སྤོང་བའོ། །དེ་ལ་དེ་བཞིན་གཤེགས་པས་གསུངས་པ་གང་ཞེ་ན། འདི་ལྟ་སྟེ། སངས་རྒྱས་ཀྱི་སྟོབས་ལ་གནས་པ་ནས་རང་བཞིན་ཤེས་པས་ཐར་པའོ། །དེ་ལ་སངས་རྒྱས་ཀྱི་ས་གང་ཞེ་ན། འདི་ལྟ་སྟེ། དགེ་བའི་ཆོས་ཐམས་ཅད་ཐོབ་པའོ། །དེ་ལ་མཁས་པས་རྗེས་སུ་ཡི་རང་བ་གང་ཞེ་ན། འདི་ལྟ་སྟེ། འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་ཉན་ཐོས་དག་གིས་རྗེས་སུ་ཡི་རང་བའོ། །དེ་ལ་བྱིས་པ་དག་གིས་སྤངས་པ་གང་ཞེ་ན། འདི་ལྟ་སྟེ། བྱིས་པ་ཐམས་ཅད་ཀྱིས་རིག་པར་དཀའ་བའོ། །དེ་ལ་ཉན་ཐོས་དང་རང་སངས་རྒྱས་
ཀྱིས་ཤེས་པར་དཀའ་བ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་བསམ་གྱིས་མི་ཁྱབ་པའོ། །དེ་ལ་མུ་སྟེགས་ཅན་གྱིས་མ་ཡིན་པ་གང་ཞེ་ན། འདི་ལྟ་སྟེ། རྣལ་འབྱོར་པ་དག་གི་ལོག་པའི་ང་རྒྱལ་ལོ། །དེ་ལ་བྱང་ཆུབ་སེམས་དཔའ་དག་གིས་ཡོངས་སུ་གཟུང་བ་གང་ཞེ་ན། འདི་ལྟ་སྟེ། རྙེད་པར་དཀའ་བ་དང་རྩི་ཆེན་པོར་གྱུར་པའོ། །དེ་ལ་སྟོབས་བཅུ་དག་གིས་ཁོང་དུ་ཆུད་པ་གང་ཞེ་ན། འདི་ལྟ་སྟེ། དཀའ་བའི་ཚུལ་གྱིས་སོ། །དེ་ལ་ལྷ་རྣམས་ཀྱིས་མཆོད་པར་བྱ་བ་གང་ཞེ་ན། འདི་ལྟ་སྟེ། བདེ་བ་ཐམས་ཅད་ཐོབ་པར་བྱེད་པའི་ཕྱིར་རོ། །དེ་ལ་ཚངས་པ་དག་གིས་ཕྱག་བྱ་བ་གང་ཞེ་ན། འདི་ལྟ་སྟེ། ཐར་པ་ཐམས་ཅད་ཐོབ་པར་བྱེད་པའི་ཚུལ་གྱིས་སོ། །དེ་ལ་ཀླུ་རྣམས་ཀྱིས་ཕྱག་བྱ་བ་གང་ཞེ་ན། འདི་ལྟ་སྟེ། བག་ཆགས་ཐམས་ཅད་གཅོད་པའི་ཕྱིར་རོ། །དེ་ལ་གནོད་སྦྱིན་དག་གིས་རྗེས་སུ་ཡི་རང་བར་བྱ་བ་གང་ཞེ་ན། འདི་ལྟ་སྟེ། ངན་འགྲོ་ཐམས་ཅད་ཀྱི་ལམ་གཅོད་པའི་ཕྱིར་རོ། །དེ་ལ་མིའམ་ཅི་དག་གིས་ཕྱག་བྱ་བ་གང་ཞེ་ན། འདི་ལྟ་སྟེ། ཐར་པའི་རབ་ཏུ་བདེ་བ་ཐམས་ཅད་ཐོབ་པར་བྱ་བའི་ཕྱིར་རོ། །དེ་ལ་ལྟོ་འཕྱེ་ཆེན་པོ་དག་གིས་རབ་ཏུ་བསྔགས་པ་གང་ཞེ་ན། འདི་ལྟ་སྟེ། འཁོར་བ་གཅོད་པའི་ཕྱིར་རོ། །དེ་ལ་བྱང་ཆུབ་སེམས་དཔའ་དག་གིས་བསྒོམ་པར་བྱ་བ་གང་ཞེ་ན། འདི་ལྟ་སྟེ། ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད་པའི་ཕྱིར་རོ། །དེ་ལ་མཁས་པ་དག་གིས་ཀུན་ཆུབ་པར་བྱ་བ་གང་ཞེ་ན། འདི་ལྟ་སྟེ། ཕྱིར་མི་ལྡོག་པའི་ས་ཐོབ་པར་བྱེད་པའི་ཕྱིར་རོ། །དེ་ལ་ནོར་བླ་ན་མེད་པ་གང་ཞེ་ན། འདི་ལྟ་སྟེ། ལྷ་དང་མིའི་སྐྱེ་དགུ་ཕུན་སུམ་ཚོགས་པ་ཐོབ་པར་བྱེད་པ་དང་། ཐར་པ་ཐོབ་པར་བྱེད་པའི་ཕྱིར་རོ། །དེ་ལ་སྦྱིན་པ་ཟང་ཟིང་མེད་པ་གང་ཞེ་ན། འདི་ལྟ་སྟེ། ཉོན་མོངས་པ་ཐམས་ཅད་གཅོད་པའི་ཕྱིར་རོ། །དེ་ལ་ན་བ་རྣམས་ཀྱི་རྩི་གང་ཞེ་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་རབ་ཏུ་ཞི་བར་བྱེད་པའི་ཕྱིར་རོ། །དེ་ལ་མཛོད་ཤེས་པ་གང་ཞེ་ན། འདི་ལྟ་སྟེ། བསྒོམ་པའི་ཕྱིར་རོ། །དེ་ལ་སྤོབས་པ་མི་ཟད་པ་གང་ཞེ་ན། འདི་ལྟ་སྟེ། ཡང་དག་པ་ཇི་ལྟ་བ་བཞིན་དུ་ཤེས་པ་དང་མཐོང་བའི་ཕྱིར་རོ། །དེ་ལ་མྱ་ངན་དང་བྲལ་བ་གང་ཞེ་ན། འདི་ལྟ་སྟེ། གནོད་པ་དང་། སྡུག་བསྔལ་དོན་མེད་པར་རྟོགས་ཤིང་འབྱུང་བ་དང་།
སྡུག་བསྔལ་བདག་མེད་པར་ཤེས་པའི་ཕྱིར་རོ། །དེ་ལ་ཁམས་གསུམ་ཡོངས་སུ་ཤེས་པ་གང་ཞེ་ན། འདི་ལྟ་སྟེ། སྒྱུ་མ་དང་རྨི་ལམ་ལྟ་བུར་རྟོགས་པའོ། །དེ་ལ་ཕ་རོལ་ཏུ་འགྲོ་བ་དག་གི་གཟིངས་གང་ཞེ་ན། འདི་ལྟ་སྟེ། ལྷག་པའི་བསམ་པས་ཡོངས་སུ་མྱ་ངན་ལས་འདའ་བར་འདོད་པ་དག་མི་རྟག་པ་དང་། སྡུག་བསྔལ་བ་དང་། སྟོང་པ་ཉིད་དུ་སྒོམ་པའི་ཕྱིར་རོ། །དེ་ལ་ཆུ་བོའི་ནང་དུ་སོང་བ་དག་གི་གྲུ་གང་ཞེ་ན། འདི་ལྟ་སྟེ། མྱ་ངན་ལས་འདའ་བ་ཐོབ་པར་བྱེད་པའི་ཕྱིར་རོ། །དེ་ལ་སྙན་པ་འདོད་པ་དག་གི་གྲགས་པ་གང་ཞེ་ན། འདི་ལྟ་སྟེ། ཆོས་རྒྱ་ཆེན་པོ་ཐོབ་པར་བྱེད་པའི་ཕྱིར་རོ། །དེ་ལ་སངས་རྒྱས་རྣམས་ཀྱི་བསྔགས་པ་གང་ཞེ་ན། འདི་ལྟ་སྟེ། ཡོན་ཏན་མཐའ་ཡས་པའི་རྩིའི་སྦྱིན་བདག་ཏུ་གྱུར་པའི་ཕྱིར་རོ། །དེ་ལ་དེ་བཞིན་གཤེགས་པ་རྣམས་ཀྱི་སྙན་པ་གང་ཞེ་ན། འདི་ལྟ་སྟེ། ཡོན་ཏན་དང་བདེ་བ་ཐམས་ཅད་དང་ཐར་པའི་སྦྱིན་བདག་ཏུ་གྱུར་པའི་ཕྱིར་རོ། །དེ་ལ་སྟོབས་བཅུ་དག་གིས་བསྟོད་པ་གང་ཞེ་ན། འདི་ལྟ་སྟེ། ཆོས་རིན་པོ་ཆེ་རྙེད་པར་དཀའ་བའི་སྦྱིན་བདག་ཏུ་གྱུར་པའི་ཕྱིར་རོ། །དེ་ལ་བྱང་ཆུབ་སེམས་དཔའ་རྣམས་ཀྱི་ཡོན་ཏན་གང་ཞེ་ན། འདི་ལྟ་སྟེ། ཆོས་འདི་ལ་བསླབས་པའི་ཕྱིར་རོ། །དེ་ལ་སྙིང་རྗེ་ཅན་དག་གི་བཏང་སྙོམས་གང་ཞེ་ན། འདི་ལྟ་སྟེ། སངས་རྒྱས་ཀྱི་བྱ་བ་བྱས་པའི་ཕྱིར་རོ། །དེ་ལ་བྱམས་པས་ཞེ་སྡང་ཞི་བ་གང་ཞེ་ན། འདི་ལྟ་སྟེ། གཉེན་པོར་གྱུར་པའི་ཕྱིར་རོ། །དེ་ལ་ཐེག་པ་ཆེན་པོ་པ་རྣམས་དབུགས་འབྱིན་པ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་ལ་བསམ་པ་ཐམས་ཅད་ཡོངས་སུ་རྫོགས་པའི་ཕྱིར་རོ། །དེ་ལ་སེང་གེའི་སྒྲ་སྒྲོག་པ་དག་གི་ནན་ཏན་གང་ཞེ་ན། འདི་ལྟ་སྟེ། ཆོས་ཀྱི་མཆོག་དང་ཆོས་ཀྱི་དམ་པ་ཐོབ་པར་བྱེད་པའི་ཕྱིར་རོ། །དེ་ལ་སངས་རྒྱས་ཀྱི་ཡེ་ཤེས་ཀྱི་ལམ་གང་ཞེ་ན། འདི་ལྟ་སྟེ། དགེ་བའི་ཆོས་ཐམས་ཅད་ཐོབ་པར་བྱེད་པའི་ཕྱིར་རོ། །དེ་ལ་ཆོས་ཐམས་ཅད་ཀྱི་ཕྱག་རྒྱ་གང་ཞེ་ན། འདི་ལྟ་སྟེ། ཕ་རོལ་ནས་ཚུ་རོལ་རྟོགས་པའི་ཕྱིར་རོ། །དེ་ལ་ཐམས་ཅད་མཁྱེན་པའི་ཡེ་ཤེས་མི་འཕྲོགས་པ་གང་ཞེ་ན། འདི་ལྟ་སྟེ། མི་དགེ་བའི་ཆོས་ཐམས་ཅད་སྤོང་བར་འགྱུར་བ་དང་། དགེ་བའི་ཆོས་ཐམས་ཅད་སྒྲུབ་པ་དང་། ཐར་
པ་ཐམས་ཅད་སྒྲུབ་པར་འགྱུར་བའོ། །དེ་ལ་བྱང་ཆུབ་སེམས་དཔའ་རྣམས་ཀྱི་སྐྱེད་མོས་ཚལ་གང་ཞེ་ན། འདི་ལྟ་སྟེ། བདག་གི་བདེ་བ་དང་དགའ་བ་དང་། མགུ་བ་ཐམས་ཅད་ཀྱིས་སེམས་ཅན་ཐམས་ཅད་ཀྱི་བདེ་བ་སྒྲུབ་པའི་ཕྱིར་རོ། །དེ་ལ་བདུད་ཀྱི་སྡེ་རྣམས་འཇིག་པར་བྱེད་པ་གང་ཞེ་ན། འདི་ལྟ་སྟེ། སྟོབས་ཐམས་ཅད་ཡོངས་སུ་སྒྲུབ་པ་དང་། ཉོན་མོངས་པ་ཐམས་ཅད་ཞི་བར་བྱེད་པའི་ཕྱིར་རོ། །དེ་ལ་བདེ་བར་འགྲོ་བའི་རིག་པ་གང་ཞེ་ན། འདི་ལྟ་སྟེ། གཙེ་བ་ཐམས་ཅད་ཟད་པར་འགྱུར་བའོ། །དེ་ལ་དོན་གྲུབ་པ་རྣམས་ཀྱི་དོན་གང་ཞེ་ན། འདི་ལྟ་སྟེ། ཕུན་སུམ་ཚོགས་པ་ཐམས་ཅད་ཡོངས་སུ་སྒྲུབ་པའི་ཕྱིར་རོ། །དེ་ལ་དགྲའི་ནང་དུ་སོང་བའི་སྐྱབས་གང་ཞེ་ན། འདི་ལྟ་སྟེ། དམིགས་པ་ཅན་ཐམས་ཅད་དང་ལོག་པར་ལྟ་བ་རྣམས་ཕམ་པར་བྱེད་པར་འགྱུར་བའི་ཕྱིར་རོ། །དེ་ལ་ཆོས་དང་ལྡན་པས་མུ་སྟེགས་ཅན་རྣམས་ཚར་གཅོད་པ་གང་ཞེ་ན། འདི་ལྟ་སྟེ། ཆོས་དང་ལྡན་པས་མུ་སྟེགས་ཅན་ཚར་གཅོད་པའོ། །དེ་ལ་མི་འཇིགས་པའི་བདེན་པའི་རྣམ་པ་གང་ཞེ་ན། འདི་ལྟ་སྟེ། ཆོས་ཐམས་ཅད་ཡོངས་སུ་བརྟག་པ་དང་། ཕྱིར་བརྟག་པ་བཟོད་པའི་ཕྱིར་རོ། །དེ་ལ་སྟོབས་རྣམས་ཡང་དག་པར་བཙལ་བ་གང་ཞེ་ན། འདི་ལྟ་སྟེ། མ་ལོག་པའི་ཚུལ་གྱིས་སོ། །དེ་ལ་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་སྔ་ལྟས་གང་ཞེ་ན། འདི་ལྟ་སྟེ། དཀར་པོའི་ཆོས་ཐམས་ཅད་ཐོབ་པར་བྱེད་པའི་ཕྱིར་རོ། །དེ་ལ་རྒྱན་གང་ཞེ་ན། འདི་ལྟ་སྟེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཐོབ་པར་བྱེད་པའི་ཕྱིར་རོ། །དེ་ལ་ཐར་པ་འདོད་པ་དག་གི་དགའ་བ་གང་ཞེ་ན། འདི་ལྟ་སྟེ། ཐོག་མ་དང་དབུས་དང་ཐ་མར་དགེ་བའི་ཕྱིར་རོ། །དེ་ལ་བུའི་ཐུ་བོ་དག་གི་དགའ་བ་གང་ཞེ་ན། འདི་ལྟ་སྟེ། ཕའི་ནོར་སངས་རྒྱས་ཀྱི་ནོར་མྱོང་བ་ཐོབ་པར་བྱེད་པའི་ཕྱིར་རོ། །དེ་ལ་སངས་རྒྱས་ཀྱི་ཡེ་ཤེས་རྫོགས་པ་གང་ཞེ་ན། འདི་ལྟ་སྟེ། དཀར་པོའི་ཆོས་ཐམས་ཅད་རྗེས་སུ་སྲུང་བ་དང་། དཀར་པོའི་ཆོས་ཐམས་ཅད་གཞན་མ་ཡིན་པར་གསོ་བ་ཐོབ་པར་བྱེད་པའི་ཕྱིར་རོ། །དེ་ལ་ཉན་ཐོས་དང་རང་སངས་རྒྱས་ཐམས་ཅད་ཀྱི་ས་མ་ཡིན་པ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་དཔག་ཏུ་མེད་པ་རྒྱ་ཆེན་པོ་ཡོངས་སུ་སྒྲུབ་པའི་ཕྱིར་རོ། །དེ་ལ་སེམས་རྣམ་པར་དག་པ་གང་ཞེ་ན། འདི་ལྟ་སྟེ། དྲི་མ་ཐམས་ཅད་སྤོང་
བར་འགྱུར་བའོ། །དེ་ལ་ལུས་ཡོངས་སུ་དག་པ་གང་ཞེ་ན། འདི་ལྟ་སྟེ། ནད་ཐམས་ཅད་རབ་ཏུ་ཞི་བའི་ཕྱིར་རོ། །དེ་ལ་རྣམ་པར་ཐར་པ་འདོད་པ་རྣམས་ཀྱི་ཡོངས་སུ་རྫོགས་པ་གང་ཞེ་ན། འདི་ལྟ་སྟེ། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དང་། ཞི་བར་སོ་སོར་རྟོག་པ་ཡོངས་སུ་སྒྲུབ་པའི་ཕྱིར་རོ། །དེ་ལ་འདོད་ཆགས་ཀྱིས་ཀུན་ནས་ཉོན་མོངས་པ་མེད་པ་གང་ཞེ་ན། འདི་ལྟ་སྟེ། མི་འཆི་བའི་གནས་ཡོངས་སུ་སྒྲུབ་པའི་ཕྱིར་རོ། །དེ་ལ་ཞེ་སྡང་དང་བྲལ་བ་གང་ཞེ་ན། འདི་ལྟ་སྟེ། བྱམས་པ་ཆེན་པོ་ཡོངས་སུ་སྒྲུབ་པའི་ཕྱིར་རོ། །དེ་ལ་གཏི་མུག་གིས་མ་ཡིན་པ་གང་ཞེ་ན། འདི་ལྟ་སྟེ། ཆོས་ཡང་དག་པ་ཉིད་ཡོངས་སུ་སྒྲུབ་པའི་ཕྱིར་རོ། །དེ་ལ་ཡེ་ཤེས་འབྱུང་བ་གང་ཞེ་ན། འདི་ལྟ་སྟེ། འཇིག་རྟེན་པ་དང་འཇིག་རྟེན་ལས་འདས་པའི་དགོས་པ་ཤེས་པ་ཐམས་ཅད་སྐྱེ་བའི་ཕྱིར་རོ། །དེ་ལ་རིག་པ་སྐྱེ་བ་གང་ཞེ་ན། འདི་ལྟ་སྟེ། ཚུལ་བཞིན་ཡིད་ལ་བྱེད་པ་ཐམས་ཅད་ཡོངས་སུ་སྒྲུབ་པའི་ཕྱིར་རོ། །དེ་ལ་མ་རིག་པ་སྤོང་བ་གང་ཞེ་ན། འདི་ལྟ་སྟེ། ཚུལ་བཞིན་མ་ཡིན་པ་ཡིད་ལ་བྱེད་པ་དང་བྲལ་བར་འགྱུར་བའི་ཕྱིར་རོ། །དེ་ལ་རྣམ་པར་གྲོལ་བའི་སྙིང་པོས་ངོམས་པ་གང་ཞེ་ན། འདི་ལྟ་སྟེ། འཕགས་པའི་ཆེ་བ་ཉིད་ཡོངས་སུ་སྒྲུབ་པའི་ཕྱིར་རོ། །དེ་ལ་ཏིང་ངེ་འཛིན་གྱི་སྙིང་པོར་བྱེད་པ་དག་གི་མགུ་བ་གང་ཞེ་ན། འདི་ལྟ་སྟེ། བདེ་བ་དང་དགའ་བའི་བདེ་བ་ཐམས་ཅད་དང་། སེམས་རྩེ་གཅིག་པ་ཡོངས་སུ་སྒྲུབ་པའི་ཕྱིར་རོ། །དེ་ལ་མཐོང་བར་འདོད་པ་རྣམས་ཀྱི་མིག་གང་ཞེ་ན། འདི་ལྟ་སྟེ། བདག་ཉིད་ལྟ་བའི་ཕྱིར་རོ། །དེ་ལ་རྣམ་པར་འཕྲུལ་པར་འདོད་པ་རྣམས་ཀྱི་མངོན་པར་ཤེས་པ་གང་ཞེ་ན། འདི་ལྟ་སྟེ། སྒྲིབ་པ་མེད་པ་དང་། འདོད་པར་འགྱུར་བའི་ཆོས་ཉིད་ཀྱི་ཕྱིར་རོ། །དེ་ལ་མངོན་པར་སྒྲུབ་པར་འདོད་པ་རྣམས་ཀྱི་རྫུ་འཕྲུལ་གང་ཞེ་ན། འདི་ལྟ་སྟེ། ཆོས་ཐམས་ཅད་ལ་མི་རྟོག་པའི་ཤེས་པ་སྒྲིབ་པ་མེད་པའི་ཕྱིར་རོ། །དེ་ལ་ཐོས་པར་འདོད་པ་རྣམས་ཀྱི་གཟུངས་གང་ཞེ་ན། འདི་ལྟ་སྟེ། ཆོས་ཐམས་ཅད་མྱ་ངན་ལས་འདས་པ་དང་མཉམ་པའི་ཕྱིར་རོ། །དེ་ལ་དྲན་པ་མི་ཉམས་པ་གང་ཞེ་ན། འདི་ལྟ་སྟེ། མྱ་ངན་ལས་འདས་པར་དམིགས་པ་རང་བཞིན་གྱིས་རྣམ་པར་ཞི་བའི་ཕྱིར་རོ། །དེ་ལ་སངས་རྒྱས་རྣམས་ཀྱི་བྱིན་གྱི་རླབས་གང་ཞེ་ན། འདི་ལྟ་སྟེ། མཐའ་ཡས་པ་ཡོངས་སུ་སྒྲུབ་པའི་ཕྱིར་རོ། །དེ་ལ་
མགོན་པོ་རྣམས་ཀྱི་ཐབས་མཁས་པ་གང་ཞེ་ན། འདི་ལྟ་སྟེ། ཐམས་ཅད་བདེ་བ་དང་ལེགས་པར་འགྲོ་བའི་ཕྱིར་རོ། །དེ་ལ་ཕྲ་མོ་གང་ཞེ་ན། འདི་ལྟ་སྟེ། མྱ་ངན་ལས་འདས་པ་ལ་དམིགས་པ་རྣམ་པར་ཞི་བའི་ཕྱིར་རོ། །དེ་ལ་ཤེས་པར་དཀའ་བ་གང་ཞེ་ན། འདི་ལྟ་སྟེ། སོ་སོར་རིག་པར་དཀའ་བའི་ཕྱིར་རོ། །དེ་ལ་མི་བརྩོན་པ་རྣམས་ཀྱིས་རིག་པར་དཀའ་བ་གང་ཞེ་ན། འདི་ལྟ་སྟེ། སྔོན་མ་ཐོས་པའི་ཕྱིར་རོ། །དེ་ལ་ཡི་གེ་རྣམས་ལྡོག་པ་གང་ཞེ་ན། འདི་ལྟ་སྟེ། ཚིག་གི་ལམ་ཐམས་ཅད་མི་དམིགས་པའི་ཕྱིར་རོ། །དེ་ལ་སྒྲས་ཤེས་པར་དཀའ་བ་གང་ཞེ་ན། འདི་ལྟ་སྟེ། ཆོས་ཐམས་ཅད་བསམ་གྱིས་མི་ཁྱབ་པའི་ཕྱིར་རོ། །དེ་ལ་མཁས་པ་དག་གིས་ཡོངས་སུ་ཤེས་པ་གང་ཞེ་ན། འདི་ལྟ་སྟེ། རིན་པོ་ཆེ་དོན་ཆེ་བའི་ཕྱིར་རོ། །དེ་ལ་ངེས་པ་དག་གིས་ཤེས་པ་གང་ཞེ་ན། འདི་ལྟ་སྟེ། བཀུར་སྟི་ཀུན་ཤེས་པའི་ཕྱིར་རོ། །དེ་ལ་འདོད་པ་ཉུང་བས་རྟོགས་པ་གང་ཞེ་ན། འདི་ལྟ་སྟེ། བཀུར་སྟི་མི་སྐྱེད་པའི་ཕྱིར་རོ། །དེ་ལ་བརྩོན་འགྲུས་བརྩམས་པ་རྣམས་ཀྱིས་གཟུང་བ་གང་ཞེ་ན། འདི་ལྟ་སྟེ། བརྩོན་པ་མི་འདོར་བའི་ཕྱིར་རོ། །དེ་ལ་དྲན་པ་ཅན་གྱིས་བཅངས་པ་གང་ཞེ་ན། འདི་ལྟ་སྟེ། བྱས་པ་ཆུད་མི་ཟ་བའི་ཕྱིར་རོ། །དེ་ལ་སྡུག་བསྔལ་ཟད་པ་གང་ཞེ་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་སྤོང་བར་འགྱུར་བའི་ཕྱིར་རོ། །དེ་ལ་ཆོས་མི་སྐྱེ་བ་གང་ཞེ་ན། འདི་ལྟ་སྟེ། རྣམ་པར་ཤེས་པ་ཐམས་ཅད་འགོག་པར་འགྱུར་བའི་ཕྱིར་རོ། །དེ་ལ་བསྟན་པ་གཅིག་གང་ཞེ་ན། འདི་ལྟ་སྟེ། སྲིད་པའི་འགྲོ་བ་དང་། འཆི་འཕོ་དང་། སྐྱེ་བའི་གནས་ཐམས་ཅད་ཀྱི་ཆོས་ཐམས་ཅད་རྨི་ལམ་ལྟ་བུའོ་ཞེས་ཆོས་ཐམས་ཅད་མི་སྐྱེད་པའི་ཕྱིར་རོ། །འདི་ནི་ཚིག་སུམ་བརྒྱ་པོ་འདི་རྣམས་རྒྱས་པར་བསྟན་པར་རིག་པར་བྱ་སྟེ། གཞོན་ནུ་འདི་ནི་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སངས་རྒྱས་ཆོས་ནི་རྒྱ་ཆེ་སྟེ། །ཚུལ་ཡང་རྒྱ་ཆེར་བསྟན་པ་ཡིན། །ཆོས་རྣམས་རྒྱ་ཆེར་བསྟན་པས་ན། །ཡོན་ཏན་རྒྱ་ཆེན་ཐོབ་པར་འགྱུར། ། ཇི་ལྟར་ནམ་མཁའ་རྒྱ་ཆེ་བ། །ཆོས་ཀྱི་མཚན་ཉིད་དེ་བཞིན་ཏེ། །རིན་ཆེན་འོད་ཟེར་རྒྱ་ཆེན་གང་། །དེ་ཕྱིར་ཤིན་ཏུ་རྒྱས་ཞེས་བྱ། །
སེམས་ཅན་སྤྱོད་པ་རྒྱ་ཆེ་སྟེ། །དེ་དག་བསྟན་པའང་རྒྱ་ཆེའོ། །ལུང་གི་དོན་ཡང་རྒྱ་ཆེ་བས། །དེ་ཕྱིར་ཤིན་ཏུ་རྒྱས་ཞེས་བྱ། །ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ངེས་པར་བསྟན་པའི་ཆོས་ཀྱི་རྣམ་གྲངས་འདི་བཅོམ་ལྡན་འདས་ཀྱིས་བཤད་པ་ན་སེམས་ཅན་དཔག་ཏུ་མེད་པ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སེམས་ཅན་དཔག་ཏུ་མེད་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །སེམས་ཅན་དཔག་ཏུ་མེད་པ་དག་རང་བྱང་ཆུབ་ཏུ་སེམས་སྐྱེས་སོ། །སེམས་ཅན་དཔག་ཏུ་མེད་པ་དག་དགྲ་བཅོམ་པའི་འབྲས་བུ་མངོན་དུ་བྱ་བ་ལ་སེམས་སྐྱེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་རབ་ཏུ་གཡོས། ཀུན་ཏུ་རབ་ཏུ་གཡོས། འགུལ་རབ་ཏུ་འགུལ། ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག །འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ། འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར། ཤར་ཕྱོགས་དམའ་ན་ནུབ་ཕྱོགས་མཐོ། ནུབ་ཕྱོགས་དམའ་ན་ཤར་ཕྱོགས་མཐོ། བྱང་ཕྱོགས་དམའ་ན་ལྷོ་ཕྱོགས་མཐོ། ལྷོ་ཕྱོགས་དམའ་ན་བྱང་ཕྱོགས་མཐོ། མཐའ་དམའ་ན་དབུས་མཐོ། དབུས་དམའ་ན་མཐའ་མཐོ་སྟེ། འཇིག་རྟེན་ཀུན་ཏུ་སྣང་བ་དཔག་ཏུ་མེད་པ་དག་བྱུང་བར་གྱུར་ཏོ། །ལྷའི་སྤོས་ཀྱི་ཆར་ཆེན་པོ་ཡང་མངོན་པར་བབ་པོ། །ལྷ་དག་ཀྱང་མེ་ཏོག་གི་ཆར་ཆེན་པོ་འབེབས་སོ། །ལྷའི་སིལ་སྙན་བརྒྱ་སྟོང་དག་ཀྱང་སྟེང་གི་བར་སྣང་ལ་རྡུང་ངོ་། །ལྷའི་ན་བཟའ་དག་ཀྱང་སྟེང་གི་ནམ་མཁའ་ལ་གཡོགས་ཤིང་ཚིག་འདི་སྐད་ཅེས་ཟེར་རོ། །གང་གིས་སྙིང་རྗེ་ཆེན་པོ་ལ་འཇུག་པའི་ཆོས་ཀྱི་རྣམ་གྲངས་འདི་ཐོས་པར་འགྱུར་བའི་སེམས་ཅན་དེ་དག་ནི་རྙེད་པ་ལེགས་པར་རྙེད་པ་ཡིན་ཏེ། སེམས་ཅན་དེ་དག་སངས་རྒྱས་མང་པོ་ལ་བསྙེན་བཀུར་བྱས་པར་འགྱུར་རོ། །གང་གིས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་
རྣམ་པར་སྤྲོས་པའི་ཏིང་ངེ་འཛིན་འདི་ཐོས་པར་འགྱུར་ཞིང་ཐོས་ནས་ཀྱང་ཡི་གེར་འདྲི་བ་དང་། འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། ཉོན་མོངས་པ་མེད་པར་སྒོམ་པས་བསྒོམ་པ་དང་། མང་དུ་བྱེད་པ་དང་། གཞན་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་ནི་སེམས་ཅན་ཐམས་ཅད་ཀྱི་སྦྱིན་གནས་སུ་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ཁྱོད་ཀྱིས་ཟུང་ཤིག །ལྷོགས་ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་མདོ་སྡེ་འདི་སྙིང་རྗེ་ཆེན་པོ་ལ་འཇུག་པ་ཞེས་བྱ་བར་ཟུང་ཤིག །ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ཞེས་བྱ་བར་ཡང་ཟུང་ཤིག །ཀུན་དགའ་བོས་གསོལ་པ། བཅོམ་ལྡན་འདས་ཆོས་ཀྱི་རྣམ་གྲངས་འདི་བདག་གིས་བཟུང་ལགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཟླ་འོད་གཞོན་ནུར་གྱུར་པ་དང་། ཚེ་དང་ལྡན་པ་ཀུན་དགའ་བོ་དང་། འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་དང་། གནས་གཙང་མའི་རིས་ཀྱི་ལྷའི་བུ་དུ་མ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ཇི་སྙེད་པ་རྫོགས་སྷོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང་། ཞུ་ཆེན་གྱི་ལོཙྪ་བ་བན་དེ་དྷརྨ་ཏཱ་ཤཱི་ལས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།