བཞི་པ། གནས་པ་དང་སྤྱད་པའི་ལེའུ།
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་ཞེས་བྱ་བ་འཁོར་གྱི་དཀྱིལ་འཁོར་དེའི་ནང་ན་འདུག་པ་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ནས་བླ་གོས་ཕྱོགས་གཅིག་ཏུ་བྱས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་ཐལ་མོ་སྦྱར་བ་བཏུད་དེ་ཚིགས་སུ་བཅད་པས་གསོལ་པ། ཚུལ་ཁྲིམས་ཉམས་པས་རྣམ་དག་ཡོན་ཏན་སྟོར་བ་དག །འཕགས་པའི་སྣོད་མིན་པ་ཡིས་སྲས་མ་ཡིན་ཞེས་གསུངས། །དགེ་སྦྱོང་ཆོས་ཉིད་སྤངས་ཤིང་ཐལ་བ་འདྲ་བ་དག །ང་ཡི་རྣམ་དག་འཁོར་འདིར་གནས་པ་མཛེས་པ་མིན། །དྲི་མ་གསུམ་གྱིས་བསྒོས་ཤིང་འགོག་དང་ལམ་སྟོར་བའི། །ཁྱད་པར་ཅན་གྱི་མཆོད་པ་གང་ཡང་དེས་མི་ཞུ། །ཕྱོགས་བཞིའི་དགེ་འདུན་དབང་བར་བསྔོས་པའི་ནོར་དག་ལ། །ཆ་ཤས་ཅུང་ཟད་ཙམ་ཡང་སྤྱོད་དུ་ངས་མ་གནང་། །ཚུལ་ཁྲིམས་རྩ་བ་བཞི་ལས་གཅིག་ཙམ་ཉམས་པ་དག །དགེ་འདུན་འཁོར་དུ་མི་ཆུད་རྒྱ་མཚོའི་
རོ་དང་མཚུངས། །ཅི་ཡི་སླད་དུ་དེང་འདིར་དགེ་སློང་སྡིག་ཅན་ལ། །སྙིང་རྗེས་དང་དུ་བླངས་ཏེ་ཆད་པས་མི་གཅོད་པར། །ཕྱིར་ཡང་ང་ལ་མཆོད་པ་བྱོས་ཞེས་སྐུལ་མཛད་ཅིང་། །བརྩེ་ལ་སྙིང་རྗེ་ཅན་གྱིས་ངན་སེམས་ཡོངས་སྤོངས་ལ། །དེ་ལ་བསྟི་སྟང་བཅས་ཏེ་བསྟན་པའི་ཆོས་མཉན་ན། །བསོད་ནམས་ཡེ་ཤེས་ཚོགས་ཐོབ་སྙིང་རྗེ་ཆེན་པོ་ཅན། །མངོན་ཤེས་འཇིག་རྟེན་སྐྱོང་བས་མདོ་སྡེ་གཞན་དག་ལ། །ཕྲ་ལ་ཟབ་པར་གྱུར་པའི་ཡང་དག་བྱང་ཆུབ་ལམ། །ཐེག་པ་ཆེན་པོ་དེ་ལ་ཁྱེད་ཀྱིས་དད་བྱས་ཤིང་། །ཐེག་པ་གཉིས་ཀྱིས་གྲོལ་བའི་ལམ་དེ་སྤོངས་ཞེས་གསུངས། །ཅི་ཡི་སླད་དུ་དེང་འདིར་ཐེག་པ་གསུམ་བཤད་དེ། །ཀུན་གྱིས་དེ་ལ་ཉན་ཅིང་མཆོད་པ་བགྱི་བར་སྐུལ། །དབང་པོ་སྟོབས་དང་བྱང་ཆུབ་དགེ་སྦྱོང་འབྲས་བུ་ཡང་། །མདོ་སྡེ་འདི་ལས་འབྱུང་གི་གཞན་དུ་གསུངས་པ་མེད། །དཔེ་མེད་འཕགས་པའི་ལམ་ནི་ཡན་ལག་བརྒྱད་པ་འདིར། །ཐེག་པ་རྣམ་གསུམ་ཀུན་ཀྱང་ལམ་དེར་འཇུག་བྱེད་དེ། །རྣམ་པར་གྲོལ་བར་འདོད་པས་བརྩོན་འགྲུས་རབ་བསྐྱེད་ན། །སོ་སོར་རེ་བ་བཞིན་དུ་བྱང་ཆུབ་འཐོབ་པར་འགྱུར། །འགྲོ་བ་ཀུན་གྱི་གཙོ་བོས་འདི་དག་རྣམ་དབྱེ་བ། །སྔ་ཕྱིར་བསྟན་པ་འདི་དག་མི་འགལ་བསྟན་པ་ན། །ལྷ་དང་མི་དང་བྱང་ཆུབ་སེམས་དཔའི་འཁོར་ཐམས་ཅད། །ཡང་དག་བདེན་པ་རྟོགས་ཤིང་རྣམ་གྲོལ་དགའ་བ་བསྐྱེད། །ཐེག་པ་ཆེན་པོ་བཤད་པས་གང་ལ་ཕན་འགྱུར་དང་། །ཐེག་པ་ཆེན་པོ་བཤད་པས་གང་ལ་གནོད་པར་འགྱུར། །ཉན་ཐོས་ཐེག་པས་རྣམ་པར་གྲོལ་བ་བཅུ་པོ་ཡིས། །བཤད་པ་ཐོས་ནས་གང་ལ་གནོད་དང་གང་ལ་ཕན་པར་འགྱུར། །གང་ཞིག་ཆོས་འདི་ཐོས་པས་གོང་ནས་གོང་དུ་འཕར། །གང་གིས་ཆོས་འདི་ཐོས་པས་ཕྱིར་ཞིང་ལྟུང་བར་འགྱུར། །ཇི་ལྟར་འདུས་བྱས་ཀུན་གྱི་སྐྱོན་གྱིས་སྐྱོ་བས་ན། །རྒ་དང་འཆི་བའི་རྒྱ་མཚོ་མྱུར་དུ་སྐེམས་པར་འགྱུར། །ཉིན་མཚན་དགེ་བ་རྣམས་ལ་ཤིན་ཏུ་བརྩོན་པ་དག །དོན་མཆོག་གང་ལ་གནས་ཤིང་ཐེག་པ་གང་བགྲོད་པས། །ཤིན་ཏུ་ཡངས་ཤིང་ཟབ་པའི་ཆུ་བོ་བཞི་ལས་སྒྲོལ། །འཇིག་རྟེན་སྐྱོང་བས་རྣམ་པར་ཕྱེ་སྟེ་ཀུན་སྲུངས་ཤིག །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་
དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ལེགས་སོ། །ལེགས་སོ། །རིགས་ཀྱི་བུ་ཁྱོད་སྐྱེ་བོ་ཚད་མེད་པ་ལ་ཕན་པ་དང་། བདེ་བའི་དོན་གྱི་ཕྱིར་ལྷ་དང་། མི་དང་། ལྷ་མ་ཡིན་ལ་སོགས་པའི་དོན་ཆེན་པོའི་ཕྱིར་དེ་བཞིན་གཤེགས་པ་ལ། ཤིན་ཏུ་ཟབ་མོའི་དོན་འདི་དག་ཞུས་པ་ལེགས་སོ། །ཤིན་ཏུ་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་། ངས་ཁྱོད་ལ་རྣམ་པར་ཕྱེ་སྟེ་བཤད་དོ་ཞེས་བཀའ་སྩལ་ནས། བྱང་ཆུབ་སེམས་དཔའ་རྡོ་རྗེའི་སྙིང་པོ་བཅོམ་ལྡན་འདས་ལ་སླར་ཉན་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་ཟག་རྣམ་པ་བཅུ་པོ་འདི་དག་ནི་འཁོར་བར་འཁོར་ཞིང་མི་ལུས་ཤིན་ཏུ་རྙེད་པར་དཀའོ། །གང་ཟག་རྣམ་པ་བཅུ་པོ་གང་ཞེ་ན། འདི་ལྟ་སྟེ། དགེ་བའི་རྩ་བ་མི་སྐྱེད་པ་དང་། བསོད་ནམས་ཀྱི་ལས་མི་བྱེད་པ་དང་། ཀུན་ནས་ཉོན་མོངས་པའི་ཉིང་མཚམས་སྦྱོར་བ་དང་། གྲོགས་པོ་སྡིག་པའི་རྗེས་སུ་སྤྱོད་པ་དང་། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བ་དང་། འདོད་ཆགས་བདོ་བར་འགྱུར་བ་དང་། ཞེ་སྡང་བདོ་བར་འགྱུར་བ་དང་། གཏི་མུག་བདོ་བར་འགྱུར་བ་དང་། སེམས་མྱོས་ཤིང་འཁྲུག་པ་དང་། ལོག་པར་ལྟ་བའི་སྡིག་པ་ཅན་དུ་འཛིན་པ་སྟེ། གནས་ཤིང་སྤྱད་པར་མི་བྱ་བ་རྣམ་པ་བཅུ་པོ་འདིའི་རྒྱུས་སེམས་ཅན་དག་ཚུལ་ཁྲིམས་ཀྱི་རྩ་བ་འཇིག་ཅིང་ཚུལ་ཁྲིམས་ཉམས་པར་བྱེད་པས་ངན་སོང་དུ་ལྟུང་བར་འགྱུར་རོ། །གནས་ཤིང་སྤྱད་པར་མི་བྱ་བ་རྣམ་པ་བཅུ་པོ་གང་ཞེ་ན། འདི་ལྟ་སྟེ། ངའི་བསྟན་པ་ལ་རབ་ཏུ་བྱུང་བ་དག་ལ་ལ་ནི་ལྷག་པའི་སྤྱོད་པ་ཉམས་ལ་མོས་པ་མ་ཉམས་པ་ཡང་ཡོད། ལ་ལ་ནི་མོས་པ་ཉམས་ལ་ལྷག་པའི་སྤྱོད་པ་མ་ཉམས་པ་ཡང་ཡོད། ལ་ལ་ནི་ལྷག་པའི་སྤྱོད་པ་དང་། མོས་པ་གཉི་ག་ཉམས་པ་ཡང་ཡོད། ལ་ལ་ནི་ཚུལ་ཁྲིམས་ཉམས་ལ་ལྟ་བ་མ་ཉམས་པ་ཡང་ཡོད། ལ་ལ་ནི་ལྟ་བ་ཉམས་ལ་ཚུལ་ཁྲིམས་མ་ཉམས་པ་ཡང་ཡོད། ལ་ལ་ནི་ཚུལ་ཁྲིམས་དང་ལྟ་བ་གཉི་ག་ཉམས་པ་ཡང་ཡོད་དོ། །ལ་ལ་ནི་ལྷག་པའི་སྤྱོད་པ་དང་། མོས་པ་དང་། ཚུལ་ཁྲིམས་དང་། ལྟ་བ་མ་ཉམས་ཀྱང་སྡིག་པའི་གྲོགས་པོའི་དབང་དུ་གྱུར་ཏེ་གནས་ཤིང་སྤྱད་པར་མི་བྱ་བ་དག་བྱེད་པ་ཡང་
ཡོད། ལ་ལ་ནི་དགེ་བའི་བཤེས་གཉེན་ལ་རྟེན་པའི་དབང་དུ་གྱུར་ཀྱང་གླེན་པའི་རང་བཞིན་ཅན་ལུག་བཞིན་དུ་ལྐུགས་པ་ལས་ཀྱི་དངོས་པོའི་བྱེ་བྲག་ཀྱང་མི་ཕྱེད་ལ། དགེ་བའི་བཤེས་གཉེན་གྱིས་དགེ་བ་དང་མི་དགེ་བའི་ཆོས་བསྟན་པ་ཐོས་ཀྱང་མི་གོ་མི་འཛིན་མི་ཤེས་ཏེ། དེའི་རྒྱུ་དེའི་རྐྱེན་གྱིས་གནས་ཤིང་སྤྱད་པར་མི་བྱ་བ་དག་བྱེད་དེ། ནོར་དང་། རིན་པོ་ཆེ་དང་། འཚོ་བའི་ཡོ་བྱད་རྣམ་པ་སྣ་ཚོགས་ཀྱིས་མི་སྐྱོ་བར་ཀུན་ཏུ་ཚོལ་བའི་རྒྱུས་སེམས་འཁྲུགས་པས་གནས་ཤིང་སྤྱད་པར་མི་བྱ་བ་དག་བྱེད་པའི་འདུས་བྱས་ཀྱི་ནད་མང་པོས་གཟིར་ཅིང་གདུངས་པའི་འཇིག་རྟེན་པའི་ལྷ་རྗེད་པ་དང་། སྔགས་ལ་སོགས་པ་བྱེད་པ་དེའི་རྒྱུ་དེའི་རྐྱེན་གྱིས་གནས་པ་དང་སྤྱད་པར་མི་བྱ་བ་དག་བྱེད་དོ། །འདི་ལྟར་གནས་པ་དང་སྤྱད་པར་མི་བྱ་བ་རྣམ་པ་བཅུ་པོའི་རྒྱུས་སེམས་ཅན་དག་ཚུལ་ཁྲིམས་ཀྱི་རྩ་བ་ཉམས་ཤིང་མཐོང་བའི་ཆོས་ལ་འཕགས་པའི་སྣོད་དུ་མ་གྱུར་པ། ཚུལ་ཁྲིམས་ཉམས་པའི་ཕྱིར་ངན་སོང་དུ་ལྟུང་བར་འགྱུར་རོ། །རིགས་ཀྱི་བུ་གང་ཟག་གང་ལྷག་པའི་སྤྱོད་པ་ཉམས་ཀྱང་མོས་པ་མ་ཉམས་པ་དག་གནས་པ་དང་། སྤྱད་པར་མི་བྱ་བ་གང་ཡང་རུང་བ་རྣམ་པ་གཅིག་གི་རྒྱུས་རྩ་བའི་སྡིག་གཅིག་ཉམས་པ་ལས་དེ་ཤིན་ཏུ་འཇིགས་སྐྲག་སྟེ་འཛེམ་པ་དང་། ངོ་ཚ་བས་ཕྱིན་ཆད་ཀྱང་གང་ཡང་མི་བྱེད་པར་སྡིག་པ་སྤངས་ན་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་ལམ་སུན་འབྱིན་པའི་དགེ་སྦྱོང་ཞེས་གསུངས་སོ། །དེ་ཅིའི་ཕྱིར་ཞེ་ན། དེ་ལྟ་བུའི་སྡིག་པ་ཆེན་པོའི་ལས་བྱས་ཀྱང་འཕྲལ་དུ་མི་འཆབ་པར་འཐོལ་ཏེ། འཛེམ་པ་དང་ངོ་ཚ་བས་འགྱོད་ཚངས་བྱས་ན། དེས་དེ་ལྟར་འཛེམ་པ་དང་ངོ་ཚ་བས་སོ་སོར་བཤགས་པས་སྡིག་པ་བྱང་བའི་ཕྱིར་ཕྱིན་ཅད་བྱེད་པའི་རྒྱུན་གཅོད་པར་འགྱུར་རོ། །དེས་དགེ་སྦྱོང་གི་ལས་དང་ཆོ་གར་བྱ་བ་ཐམས་ཅད་ཀྱི་ནང་དུ་མི་ཆུད་ལ། བསྐྲད་པར་བྱ་ཞིང་དགེ་སྦྱོང་གི་འཚོ་བའི་ཡོ་བྱད་ཐམས་ཅད་ལ་ཡང་སྤྱོད་དུ་མི་དབང་མོད་ཀྱི། གང་ཟག་དེ་ནི་ཐེག་པ་གསུམ་གྱི་ཆོས་ཀྱི་སྣོད་དུ་འགྱུར་བས། དེ་བཞིན་གཤེགས་པས་ཐུགས་བརྩེ་བའི་ཕྱིར་དེ་ལ་བར་བར་ནི་ཉན་ཐོས་ཀྱི་ཐེག་པའི་ཆོས་ཀྱང་འཆད་དོ། །བར་བར་ནི་རང་སངས་རྒྱས་ཀྱི་ཐེག་པའི་ཆོས་ཀྱང་འཆད་དོ། །བར་བར་ནི་དེ་ལ་བླ་ན་མེད་པའི་
ཐེག་པའི་ཆོས་ཀྱང་བཤད་པས་སྐྱེ་བ་གཉིས་སམ་གསུམ་ན་སྨོན་ལམ་གྱི་མཐུ་དང་། དགེ་བའི་བཤེས་གཉེན་གྱི་མཐུས་སྡིག་པའི་ལས་བྱས་པ་སྡིག་པར་གྱུར་པ་ཐམས་ཅད་བྱང་སྟེ། ལ་ལ་ནི་ཉན་ཐོས་ཀྱི་ཐེག་པའི་འབྲས་བུ་ཐོབ་བོ། །ལ་ལ་ནི་རང་སངས་རྒྱས་ཀྱི་ཐེག་པས་མྱ་ངན་ལས་འདའོ། །ལ་ལ་ནི་ཤིན་ཏུ་རྒྱ་ཆེ་བ་བླ་ན་མེད་པའི་ཐེག་པའི་དོན་རྟོགས་པར་འགྱུར་བའང་སྲིད་དོ། །གཞུང་དེ་བཞིན་དུ་ཚུལ་ཁྲིམས་ཉམས་ལ་ལྟ་བ་མ་ཉམས་པ་ཡང་ཤེས་པར་བྱའོ། །གང་ཟག་གང་མོས་པ་ཉམས་ལ་ལྷག་པའི་སྤྱོད་པ་མ་ཉམས་ན་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་ཚངས་པའི་གནས་བཞི་བསྒྲུབ་པའི་ཆོས་སྟོན་ཏེ། འདི་ནི་ཉན་ཐོས་ཀྱི་ཐེག་པའི་སྣོད་དོ། །འདི་ནི་རང་སངས་རྒྱས་ཀྱི་ཐེག་པའི་སྣོད་དང་ལྡན་པའོ། །གང་ཟག་གང་ལྷག་པའི་སྤྱོད་པ་དང་མོས་པ་གཉི་ག་ཉམས་ན་དེ་ཐེག་པ་གང་གི་ཆོས་ཀྱི་སྣོད་དུ་ཡང་མི་འགྱུར་མོད་ཀྱི། དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་སྦྱིན་པའི་བསྔགས་པ་འཆད་དོ། །གང་ཟག་གང་ལྟ་བ་ཉམས་ལ་ཚུལ་ཁྲིམས་མ་ཉམས་ན་དེ་ཐེག་པ་གང་གི་ཆོས་ཀྱི་སྣོད་དུ་ཡང་མི་འགྱུར་མོད་ཀྱི། དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་དེ་ལ་རྟེན་ཅིང་འབྲེལ་པར་འབྱུང་བའི་ཆོས་བཤད་དེ་ངན་པར་ལྟ་བའི་ངན་པ་སྤངས་ཏེ་ལུས་འདི་ཉིད་ཀྱིས་ཉན་ཐོས་སམ། རང་སངས་རྒྱས་ཀྱི་ཆོས་རྟོགས་པར་མཛད་དོ། །ཡང་ན་སྐྱེ་བ་གཞན་གྱི་དུས་ན་ཆུད་ཅིང་རྟོགས་པར་མཛད་དོ། །གང་ཟག་གང་ཚུལ་ཁྲིམས་དང་ལྟ་བ་གཉི་ག་ཉམས་ན་དེ་ནི་འཕགས་པའི་ཆོས་ཀྱི་སྣོད་མ་ཡིན་ནམ་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་སྦྱིན་པའི་བསྔགས་པ་འཆད་དོ། །གང་ཟག་གང་ལྷག་པའི་སྤྱོད་པ་དང་། མོས་པ་དང་། ཚུལ་ཁྲིམས་དང་། ལྟ་བ་ཀུན་མ་ཉམས་ཀྱང་སྡིག་པའི་བཤེས་གཉེན་གྱི་དབང་དུ་གྱུར་ཏེ། རྟེན་ཅིང་གནས་ན་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་དགེ་བ་བཅུའི་ལས་ཀྱི་ལམ་བསྔགས་ཤིང་འཆད་དོ། །གང་ཟག་གང་ཞིག་དགེ་བའི་བཤེས་གཉེན་ལ་རྟེན་དུ་ཟིན་ཀྱང་ངན་ཅིང་གླེན་པའི་རང་བཞིན་ཅན་ལུག་བཞིན་དུ་ལྐུགས་ཤིང་དགེ་བ་དང་མི་དགེ་བ་གང་ཡང་བརྡ་མི་ཕྲད་པ་དེ་ལ་དེ་བཞིན་གཤེགས་པས་ཕན་གདགས་པའི་ཕྱིར་ཁ་ཏོན་གོམས་པར་
བྱ་བའི་ཕྱིར་བསྔགས་པ་འཆད་དོ། །གང་ཟག་གང་འདོད་ཆགས་ཀྱི་ནད་རྣམ་པ་སྣ་ཚོགས་ཀྱིས་ཡོངས་སུ་གཟིར་ཏེ། འདུས་བྱས་རྣམ་པ་སྣ་ཚོགས་ཀྱི་ལྟ་བས་མྱོས་པ་རྣམས་ལ་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་རྣམ་པར་གྲོལ་བ། ཚོལ་བ་ལ་ནི་འཁོར་བ་ལས་བྱུང་བར་བྱེད་པ་ཉན་ཐོས་ཀྱི་ཐེག་པ་འཕགས་པའི་བདེན་པ་བཞི་འཆད་དོ། །ཆད་པར་ལྟ་བ་ལ་ནི་རྟེན་ཅིང་འབྲེལ་པར་འབྱུང་བའི་ཆོས་ཀྱི་བསྔགས་པ་འཆད་དོ། །རྟག་པར་ལྟ་བ་ལ་ནི་ཁམས་གསུམ་གྱི་སྲིད་པའི་རྒྱུན་འདི་དག་ནས་ཤི་འཕོས་ནས་གཞན་དུ་སྐྱེ་སྟེ། རྫ་མཁན་གྱི་འཁོར་ལོ་ལྟར་རྒྱུན་མི་འཆད་པར་འཁོར་བ་དང་། མི་རྟག་པ་ལ་སོགས་པའི་ཆོས་འཆད་དོ། །རིགས་ཀྱི་བུ་དེ་བཞིན་གཤེགས་པས་ཇི་སྐད་དུ་མིང་དང་། བརྡ་དང་། ཡི་གེ་དང་། ཚིག་དང་། སྒྲ་སྐད་ཀྱིས་བསྟན་པ་ཐམས་ཅད་འབྲས་བུ་མེད་ཅིང་དོན་མེད་པ་མ་ཡིན་ཏེ། ཀུན་ཀྱང་སེམས་ཅན་ཡོངས་སུ་སྨིན་པར་བྱ་བའི་དོན་དུ་མ་བསྟན་པ་མེད་དོ། །དེ་བས་ན་དེ་བཞིན་གཤེགས་པས་གསུངས་པའི་ཆོས་ལ་འཕྱ་ཞིང་སྐུར་ན་སེམས་ཅན་རྣམས་ཀྱི་ཡང་དག་པའི་ཆོས་ཀྱི་མིག་བཅར་བའི་སྡིག་པ་ཡིན་པས་མཚམས་མེད་པ་ལས་འདས་པའམ། མཚམས་མེད་པ་དང་འདྲ་བའི་ཁ་ན་མ་ཐོ་བའི་སྡིག་པ་ཚད་མེད་པ་ཐོབ་པར་འགྱུར་རོ། །གང་གིས་ངས་སེམས་ཅན་ལ་ཕན་པ་དང་བདེ་བའི་ཕྱིར་གསུངས་པའི་དམ་པའི་ཆོས་ཉན་ཐོས་ཀྱི་ཐེག་པ་ལ་བརྟེན་ཏེ་གསུངས་སམ། རང་སངས་རྒྱས་ཀྱི་ཐེག་པ་ལ་བརྟེན་ཏེ་གསུངས་སམ། ཐེག་པ་ཆེན་པོ་ལ་བརྟེན་ཏེ་གསུངས་པ་གང་ལ་ཡང་རུང་། འཕྱ་ཞིང་སྐུར་པའམ། བར་ཆད་དང་བགེགས་བྱས་སམ། ཆུང་ངུ་ན་ཚིགས་སུ་བཅད་པ་གཅིག་ཙམ་འཆབ་པའི་ལས་བྱས་ན་དེ་ནི་དམ་པའི་ཆོས་ལ་སྐུར་པ་ཡིན་པར་རིག་པར་བྱ་སྟེ། འཕགས་པའི་ལམ་གྱི་ཡན་ལག་བརྒྱད་མེད་པར་བྱེད་པ། སེམས་ཅན་ཐམས་ཅད་ཀྱི་དམ་པའི་ཆོས་ཀྱི་མིག་ཉམས་པར་བྱེད་པ་ཡིན་པས་གང་ཟག་དེ་ནི་དེ་ལྟར་བདག་ཀྱང་དོན་མེད་པ་ཆེན་པོ་སྤྱོད་ལ། ཕ་རོལ་པོ་གཞན་དོན་མེད་པ་ཆེན་པོ་སྤྱོད་དུ་འཇུག་པའོ། །ཡང་གང་ཟག་དེ་ནི་ཁྲེལ་བ་དང་། ངོ་ཚ་བ་མེད་པའི་དགེ་འདུན་ལ་བརྟེན་ཅིང་དེ་བཞིན་གཤེགས་པའི་དམ་པའི་ཆོས་ལ་འཕྱ་ཞིང་སྐུར་པ་འདེབས་པའོ་ཞེས་བྱའོ། །རིགས་ཀྱི་
བུ་གཞན་ཡང་དགེ་སློང་རྣམ་པ་བཞི་ཡོད་དོ། །བཞི་གང་ཞེ་ན། དོན་དམ་པའི་དགེ་སློང་དང་། ཀུན་རྫོབ་ཀྱི་དགེ་སློང་དང་། ལུག་ལྐུགས་པ་ལྟ་བུའི་དགེ་སློང་དང་། ཁྲེལ་བ་དང་ངོ་ཚ་བ་མེད་པའི་དགེ་སློང་ངོ་། །དེ་ལ་ཇི་ལྟར་ན་དོན་དམ་པའི་དགེ་སློང་གང་ཞེ་ན། འདི་ལྟ་སྟེ། སངས་རྒྱས་བཅོམ་ལྡན་འདས་སམ། བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་སློང་ཡོན་ཏན་ཆེན་པོ་དང་ལྡན་པ་ཆོས་ཐམས་ཅད་ལ་དབང་དུ་གྱུར་པའམ། རང་སངས་རྒྱས་ཀྱི་བྱང་ཆུབ་བམ། དགྲ་བཅོམ་པའམ། ཕྱིར་མི་འོང་བའམ། ལན་ཅིག་ཕྱིར་འོང་བའམ། རྒྱུན་ཏུ་ཞུགས་པ་སྟེ། གང་ཟག་རྣམ་པ་བདུན་པོ་འདི་དག་ནི་དོན་དམ་པའི་དགེ་སློང་དུ་བསྡུ་བ་དང་། སྐྱེ་བོ་གང་ཁྱིམ་ན་གནས་ཤིང་སྐྲ་དང་ཁ་སྤུ་ཡང་མ་བྲེགས། ཆོས་གོས་ཀྱང་མི་གྱོན། རབ་ཏུ་བྱུང་བ་སོ་སོར་ཐར་པའི་ཚུལ་ཁྲིམས་ཐམས་ཅད་ཀྱང་མ་མནོས་གསོལ་བ་དང་། ཞུ་བའི་ལས་དང་། གསོ་སྦྱིན་དང་། ཚུལ་གྱི་ལས་ཐམས་ཅད་ཀྱི་ནང་དུ་མི་ཆུད་མོད་ཀྱི། འཕགས་པའི་ཆོས་དང་ལྡན་ལ་འཕགས་པའི་འབྲས་བུ་ཐོབ་པས་ན་དེ་ཡང་དོན་དམ་པའི་དགེ་སློང་དུ་བསྡུས་ཏེ། དེ་དག་ནི་དོན་དམ་པའི་དགེ་སློང་ཞེས་བྱའོ། །དེ་ལ་ཇི་ལྟར་ན་ཀུན་རྫོབ་ཀྱི་དགེ་སློང་ཞེ་ན། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་ཅིང་རབ་ཏུ་བྱུང་ལ་སོ་སོར་ཐར་པའི་ཚུལ་ཁྲིམས་དང་ལྡན་ན་དེ་ནི་ཀུན་རྫོབ་ཀྱི་དགེ་སློང་ཞེས་བྱའོ། །དེ་ལ་ཇི་ལྟར་ན་ལུག་ལྐུགས་པ་ལྟ་བུའི་དགེ་སློང་ཞེ་ན། རྩ་བའི་སྡིག་ལ་སོགས་པ་ཉམས་སམ་མ་ཉམས་པ་ཡང་མི་ཤེས། ལྕི་བའམ་ཡང་བ་ཡང་མི་ཤེས་ཉེས་པ་ཕྲ་མོ་རྣམ་པ་སྣ་ཚོགས་བྱས་ཀྱང་འགྱོད་ཅིང་འཐོལ་མི་ཤེས། ཉེས་པ་བྱས་པ་ལ་སླ་གྱད་བྱེད་ཅིང་སྡིག་པ་ཕྲ་མོ་ལ་མི་ལྟ། མི་འཇིགས། མཁས་པའི་སྐྱེས་བུ་ལ་ནི་མི་སྟེན། སྐབས་སྐབས་སུ་མང་དུ་ཐོས་པ་ཤེས་རབ་དང་ལྡན་པ་ལ་བསྙེན་བཀུར་དང་། གཡོག་ཀྱང་མི་བྱེད། བསྟི་སྟང་དང་བཅས་ཏེ་ཞུ་ཞིང་འདྲི་བ་ཡང་མི་ཤེས། དགེ་བ་ནི་གང་། མི་དགེ་བ་ནི་གང་། སྡིག་པ་ནི་གང་། སྡིག་པ་མེད་པ་ནི་གང་། གང་བྱས་ན་ལེགས། གང་བྱས་ན་མ་ལེགས་པ་ཡང་ཞུ་བ་དང་འདྲི་བ་མི་བྱེད་པའི་གང་ཟག་དེ་དག་ནི་ལུག་ལྐུགས་པ་ལྟ་བུའི་དགེ་སློང་དུ་བསྡུས་ཏེ། ལུག་ལྐུགས་པ་ལྟ་བུའི་དགེ་སློང་ཞེས་བྱའོ། །དེ་ལ་ཇི་ལྟར་ན་ཁྲེལ་བ་དང་། ངོ་ཚ་བ་མེད་པའི་དགེ་སློང་གང་ཞེ་
ན་སེམས་ཅན་གང་འཚོ་བ་ཙམ་གྱི་ཕྱིར་ངའི་བསྟན་པ་ལ་ཕྱོགས་ཏེ་རབ་ཏུ་བྱུང་ངོ་། །རབ་ཏུ་བྱུང་ནས་སོ་སོར་ཐར་པའི་ཚུལ་ཁྲིམས་སྲུང་བ་ཐམས་ཅད་ཉམས་ཏེ་ཁྲེལ་བ་དང་ངོ་ཚ་བ་མེད་ལ་འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་མི་ལྟ། མི་འཇིགས། ཁོང་རུལ་ཅིང་བཙོག་པས་གང་བའི་སྲིན་ཀྭ་ལྭ་འདྲ་བ། དུང་གི་སྒྲ་ལ་ཁྱིའི་སྤྱོད་པ་དང་ལྡན་པ། རྟག་ཏུ་བརྫུན་སྨྲ་ཞིང་བདེན་པའི་ཚིག་མེད་པ། སེར་སྣ་དང་ཕྲག་དོག་དང་། གཏི་མུག་དང་ང་རྒྱལ་གྱིས་མངོན་པར་ཟིན་ཏེ། ལས་ཀྱི་མཆོག་དམ་པ་གསུམ་ལས་རིང་དུ་གྱུར་པ་ཁེ་དང་། བཀུར་སྟི་དང་གྲགས་པ་ལ་ཆགས་ཏེ་ཡུལ་དྲུག་ལ་མོས་པ། འདོད་ཆགས་ཀྱིས་གཡེངས་པ། གཟུགས་དང་། སྒྲ་དང་། དྲི་དང་། རོ་དང་། རེག་བྱའི་ཡུལ་ལ་ཆགས་པའི་གང་ཟག་དེ་དག་ནི་ཁྲེལ་བ་དང་། ངོ་ཚ་བ་མེད་པ་དམ་པའི་ཆོས་ལ་འཕྱ་ཞིང་སྐུར་པའི་ནང་དུ་བསྡུས་ཏེ། དེ་ནི་ཁྲེལ་བ་དང་ངོ་ཚ་བ་མེད་པའི་དགེ་སློང་ཞེས་བྱའོ། །རིགས་ཀྱི་བུ་དོན་དམ་པའི་དགེ་སློང་ཞེས་བྱ་བ་ནི་ལ་ལ་འཕགས་པའི་ལམ་ལས་རྒྱལ་བའི་དགེ་སྦྱོང་གི་ནང་དུ་བསྡུ་བ་ཡང་ཡོད་དེ། ལམ་ལས་རྒྱལ་བ་ཞེས་བྱ་བ་ནི་གང་འཕགས་པའི་ལམ་གྱི་ཡན་ལག་བརྒྱད་ལ་གནས་ཤིང་བདག་ཀྱང་ཉོན་མོངས་པའི་ཆུ་བོ་ལས་སྒྲོལ་ལ་ཕ་རོལ་པོ་གཞན་དག་ཀྱང་སྒྲོལ་བའོ། །དེ་ཡང་ཇི་ལྟ་ཞེ་ན། སངས་རྒྱས་བཅོམ་ལྡན་འདས་དང་། རང་རྒྱལ་བ་དང་། དགྲ་བཅོམ་པ་སྟེ། གང་ཟག་རྣམ་པ་གསུམ་པོ་འདི་དག་ནི་སྲིད་པའི་ཡན་ལག་གི་འཁོར་ཐམས་ཅད་དང་རིང་དུ་གྱུར་པའི་ཕྱིར་འཕགས་པའི་ལམ་ལས་རྒྱལ་བ་ཞེས་བྱའོ། །གཞན་ཡང་བྱང་ཆུབ་སེམས་དཔའི་དགེ་འདུན་གཞན་གྱི་དྲིང་ལ་མི་འཇོག་པར་ཆོས་ཐམས་ཅད་ལ་ཡེ་ཤེས་ཀྱིས་ཐོགས་པ་མེད་པར་གཟིགས་ཤིང་སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་གྱིས་སྡུད་པ་ཡང་ལམ་ལས་རྒྱལ་བའི་དགེ་སྦྱོང་གི་ནང་དུ་བསྡུའོ། །དོན་དམ་པའི་དགེ་སློང་དང་། ཀུན་རྫོབ་ཀྱི་དགེ་སློང་ཁ་ཅིག་ནི་ལམ་སྟོན་པའི་དགེ་སློང་གི་ནང་དུ་བསྡུའོ། །གང་སོ་སོར་ཐར་པའི་ཚུལ་ཁྲིམས་དང་ལྡན་ཞིང་། ཡང་དག་པའི་དགེ་བའི་སྐྱེ་བོ་ནས་འཇིག་རྟེན་གྱི་ཡང་དག་པར་ལྟ་བ་དང་ལྡན་པའི་བར་དུ་ཤེས་པ་བརྡ་སྤྲོད་པ་ལ་བརྟེན་ཏེ། ཆོ་འཕྲུལ་གྱི་མཐུས་གཞན་ལ་འཕགས་པའི་ལམ་གྱི་ཆོས་རྣམ་པར་ཕྱེ་སྟེ་སྟོན་ཅིང་འཆད་པའི་གང་
ཟག་དེ་ནི་ལམ་སྟོན་པའི་དགེ་སྦྱོང་ཐ་མ་སྟེ། ལམ་སྟོན་པའི་དགེ་སྦྱོང་ཞེས་བྱའོ། །རྒྱུན་དུ་ཞུགས་པའི་འབྲས་བུ་ཐོབ་པའི་གང་ཟག་ནི་གཉིས་པ་ཞེས་བྱའོ། །ལན་ཅིག་ཕྱིར་འོང་བའི་འབྲས་བུ་ཐོབ་པའི་གང་ཟག་ནི་གསུམ་པ་ཞེས་བྱའོ། །ཕྱིར་མི་འོང་བའི་འབྲས་བུ་ཐོབ་པའི་གང་ཟག་དེ་ནི་བཞི་པ་ཞེས་བྱའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་འདུན་ནི་ལྔ་པ་ཞེས་བྱའོ། །ས་དང་པོ་ལ་གནས་པ་ནས་ས་བཅུ་དང་སྲིད་པ་ཐ་མའི་ལུས་ལ་གནས་པ་དེ་ཡང་ལམ་སྟོན་པའི་དགེ་སྦྱོང་གི་ནང་དུ་བསྡུའོ། །གང་སོ་སོར་ཐར་པའི་ཚུལ་ཁྲིམས་དང་ལྡན་ཞིང་སྤྱོད་ལམ་རྣམ་པར་དག་པ་དང་ལྡན་པ་དག་ནི་ལམ་གྱིས་འཚོ་བའི་དགེ་སྦྱོང་གི་ནང་དུ་བསྡུས་ཏེ། ལམ་གྱིས་སྲོག་འཛིན་པའི་ཕྱིར་ལམ་གྱིས་འཚོ་བའི་དགེ་སྦྱོང་ཞེས་བྱའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་སྡུད་ཅིང་ཕ་རོལ་དུ་ཕྱིན་པ་དྲུག་ལ་ནན་ཏན་བྱེད་པ་དང་ལྡན་པ་དེ་ཡང་ལམ་གྱིས་འཚོ་བ་ཞེས་བྱའོ། །དེ་ལྟར་ལམ་ལས་རྒྱལ་བ་དང་། ལམ་སྟོན་པ་དང་། ལམ་གྱིས་འཚོ་བའི་དགེ་སྦྱོང་རྣམ་པ་གསུམ་པོ་འདི་ནི་འཇིག་རྟེན་པའི་བསོད་ནམས་ཀྱི་ཞིང་ཡང་དག་པ་ཞེས་བྱའོ། །དེ་ལས་གཞན་པའི་དགེ་སྦྱོང་དག་ནི་ལམ་སུན་འབྱིན་པ་ཞེས་བྱ་བ་སྟེ། ཡང་དག་པ་མ་ཡིན་མོད་ཀྱི་དེ་ཡང་བསོད་ནམས་ཀྱི་ཞིང་གི་གྲངས་སུ་འགྲོའོ། །གང་འཛེམ་པ་དང་ངོ་ཚ་བ་མེད་པའི་དགེ་འདུན་ལ་གནས་ཤིང་བརྟེན་པའི་གང་ཟག་དེ་ནི་ངས་ཡང་དག་པར་བསྟན་པའི་འདུལ་བའི་ཆོས་ལས་མི་རོ་ལྟ་བུའོ་ཞེས་གསུངས་སོ། །ཡོངས་སུ་དག་པའི་དགེ་འདུན་གྱི་རྒྱ་མཚོ་ལས་དབྱུང་བར་བྱ་བ་ཆོས་ཀྱི་སྣོད་མ་ཡིན་པས་ན་གང་ཟག་དེ་ལ་ང་ནི་སྟོན་པ་ཡིན་ནོ་ཞེས་མི་གསུངས་ལ། གང་ཟག་དེ་ཡང་ངའི་ཉན་ཐོས་མ་ཡིན་ནོ། །ངོ་ཚ་མེད་པའི་དགེ་སློང་ཆོས་ཀྱི་སྣོད་དུ་མ་གྱུར་པ་དག་ང་ལ་སྟོན་པར་འཛིན་ཅིང་། ངའི་རིང་བསྲེལ་དང་། ངའི་སྐུ་གཟུགས་བརྙན་ལ་ཤིན་ཏུ་དད་པ་དང་། ངའི་ཆོས་དང་དགེ་འདུན་དང་། འཕགས་པའི་ཚུལ་ཁྲིམས་ལ་ཡང་ཤིན་ཏུ་དད་པས་བདག་ཀྱང་ལྟ་བ་ངན་པར་མི་འཛིན་ལ་ཕ་རོལ་པོ་གཞན་ཡང་ལྟ་བ་ངན་པ་ལ་ཆགས་པར་མི་བྱེད་པ་དང་། ངས་བསྟན་པའི་ཆོས་རྒྱས་པར་སྟོན་ཏེ། ཤིན་ཏུ་བསྔགས་ཤིང་སྟོད་པ་བྱེད་ཀྱི། དེ་ལ་འཕྱ་བའམ། སྐུར་པ་མི་འདེབས་
པ་དང་། རྟག་ཏུ་ཡང་དག་པའི་སྨོན་ལམ་འདེབས་པ་དང་། སྡིག་པ་བྱས་མ་ཐག་ཏུ་ཡང་དང་ཡང་མཐོལ་ཅིང་འགྱོད་དེ་སྤོང་ན་ལས་ཀྱི་སྒྲིབ་པ་མང་པོ་ཞི་བར་འགྱུར་ཏེ། དེ་ལྟར་གང་ཟག་དེ་དཀོན་མཆོག་གསུམ་དང་། འཕགས་པའི་ཚུལ་ཁྲིམས་ལ་དད་པའི་ཤུགས་ཀྱིས་མུ་སྟེགས་ཅན་དགུ་བཅུ་རྩ་ལྔ་བས་བརྒྱ་སྟོང་སྙེད་ཀྱིས་ལྷག་གོ །མྱུར་དུ་མྱ་ངན་ལས་འདའ་བའི་གྲོང་ཁྱེར་དུ་ཕྱིན་པ་ནི་མ་ཡིན་མོད་ཀྱི། འཁོར་ལོས་སྒྱུར་བའི་རྒྱལ་པོས་ཀྱང་མི་སྐུར་ན། དེ་མ་ཡིན་པ་སྐྱེ་བོ་གཞན་ལྟ་སྨོས་ཀྱང་ཅི་དགོས་དེ་བས་ན་དེ་བཞིན་གཤེགས་པས་སེམས་ཅན་ཐམས་ཅད་ཀྱི་ལས་དང་མྱོང་བའི་ཆོས་ཀྱི་མཚན་ཉིད་རྣམ་པ་ཐ་དད་པར་མཁྱེན་ཅིང་གཟིགས་པའི་ཕྱིར་གང་འདི་སྐད་དུ་ངའི་བསྟན་པའི་ཆོས་ལ་དད་ནས་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་གྱོན་པ་ལ་རྒྱལ་རིགས་ལ་སོགས་པ་གཤེ་ཞིང་སྤྱོ་བ་དང་། ཆད་པས་གཅད་དུ་མི་དབང་ངོ་ཞེས་གསུངས་ཏེ། གང་གིས་བརྙས་སྨད་དམ། རབ་ཏུ་བྱུང་བ་ཐམས་ཅད་ལ་གཤེ་ཞིང་སྤྱོས་སམ། ཆད་པས་བཅད་ན་ཁ་ན་མ་ཐོ་བའི་འབྲས་བུ་སྨིན་པ་ནི་ཇི་ལྟར་རྒྱས་པར་བཤད་པ་བཞིན་ནོ། །གཞན་ཡང་ངའི་བསྟན་པ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་ན། དེ་ལ་ནི་འདས་པ་དང་། མ་བྱོན་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཐུགས་རྗེས་རྗེས་སུ་འཛིན་ཏོ། །སྤྱོད་ལམ་དང་། ཆ་ལུགས་དང་། ཆོས་གོས་གྱོན་པ་ལ་ཡང་འདས་པ་དང་། མ་བྱོན་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་ཐུགས་རྗེས་རྗེས་སུ་འཛིན་ཏོ། །དེ་བས་ན་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པའི་རབ་ཏུ་བྱུང་བ་ལ་བརྙས་སྨད་ན། དེ་ནི་འདས་པ་དང་། མ་བྱོན་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ལ་བརྙས་སྨོད་པ་ཡིན་ནོ། །དེའི་རྒྱུ་དེའི་རྐྱེན་གྱིས་མཁས་པས་བློ་ཅན་སྡུག་བསྔལ་གྱིས་སྐྱོ་ཞིང་འཇིགས་པ། ལྷ་དང་། མི་དང་། མྱ་ངན་ལས་འདའ་བའི་བདེ་བ་འདོད་པ་དག་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་པ་ལ་བརྙས་པ་དང་། སྨོད་པ་མི་བྱའོ། །གང་ངོ་ཚ་བ་མེད་པའི་དགེ་སྦྱོང་ཚུལ་ཁྲིམས་ཉམས་པ་ཐེག་པ་གསུམ་གྱི་འཕགས་པའི་ཆོས་ཀྱི་སྣོད་དུ་མ་གྱུར་པ་བདག་ཉིད་ལྟ་བ་ངན་པའི་སྡིག་པ་
ལ་མངོན་པར་ཞེན་ཏེ། གཞན་ཡང་ལྟ་བ་ངན་པའི་སྡིག་པ་ལ་ཆགས་པར་བྱེད་པ་དེ་ལ་རྒྱལ་རིགས་དགེ་བ་དང་། དགེ་སྦྱོང་དང་། བྲམ་ཟེ་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། རྗེའུ་རིགས་དང་། དམངས་རིགས་དང་། སྐྱེས་པ་དང་། བུད་མེད་དག་མེད་དོ་ཞེས་སྨྲ་བ་དང་། གཞན་ཡང་འཇིག་རྟེན་ན་ཕ་ཡང་མེད། མ་ཡང་མེད་པ་ནས། དགེ་བ་དང་། མི་དགེ་བ་དང་། རྣམ་པར་སྨིན་པའི་འབྲས་བུ་ཡང་མེད། འཕགས་པའི་ལམ་གྱི་འབྲས་བུ་ཐོབ་པ་ཡང་མེད་དོ་ཞེས་སྨྲ་བ་དང་། ཆོས་ཐམས་ཅད་རྒྱུ་ལས་སྐྱེས་པ་མ་ཡིན་ནོ། །ཞེས་སྨྲ་བ་དང་། གཞན་ཡང་གཟུགས་ཡོད་པའི་ཁམས་ནི་རྟག་པ་ཡིན་གྱི་འཇིག་པའི་ཆོས་མ་ཡིན་པར་འཛིན་པ་དང་། གང་གཟུགས་མེད་པའི་ཁམས་ནི་རྟག་པ་ཡིན་གྱི། འཇིག་པའི་ཆོས་མ་ཡིན་པར་འཛིན་པ་དང་། ལ་ལ་ནི་མུ་སྟེགས་ཅན་གྱི་བརྟུལ་ཞུགས་ཀྱིས་མཐར་ཕྱིན་པའི་རྣམ་པར་དག་པ་ཐོབ་པར་འཛིན་ཏོ། །ལ་ལ་ནི་ཉན་ཐོས་ཀྱི་ཐེག་པ་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོས་མ་ཡིན་པར་འཛིན་ཏེ། ཉན་ཐོས་ཀྱི་ཐེག་པ་ལ་དད་ཅིང་ཡིད་ཆེས་ནས་བསྔགས་ཤིང་བསྟོད་པ་དང་། འབྱེད་ཅིང་སྟོན་གྱི། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོ་ལ་འཕྱ་ཞིང་སྐུར་པ་འདེབས་པ་དང་། སྨོད་ཅིང་བར་ཆད་བྱེད་པ་བགེགས་བྱེད་དེ་སྟོན་དུ་མི་སྟེར་བ་ཡང་ཡོད་དོ། །ལ་ལ་ནི་རང་སངས་རྒྱས་ཀྱི་ཐེག་པ་འབའ་ཞིག་གིས་མཐར་ཕྱིན་པའི་རྣམ་པར་དག་པ་འཐོབ་ཀྱི། ཉན་ཐོས་ཀྱི་ཐེག་པ་དང་། ཐེག་པ་ཆེན་པོས་མ་ཡིན་པར་འཛིན་ཏེ། རང་སངས་རྒྱས་ཀྱི་ཐེག་པ་ལ་དད་ཅིང་ཡིད་ཆེས་ཏེ། བསྟོད་ཅིང་བསྔགས་པ་དང་། འབྱེད་ཅིང་སྟོན་གྱི། ཉན་ཐོས་ཀྱི་ཐེག་པ་དང་། ཐེག་པ་ཆེན་པོ་ལ་འཕྱ་ཞིང་སྐུར་པ་འདེབས་པ་དང་། སྨོད་ཅིང་བར་ཆད་བྱེད་པ་ལ་བགེགས་བྱེད་དེ་སྟོན་དུ་མི་སྟེར་བ་ཡང་ཡོད་དོ། །ལ་ལ་ནི་ཐེག་པ་ཆེན་པོ་འབའ་ཞིག་གིས་མཐར་ཕྱིན་པའི་རྣམ་པར་དག་པ་འཐོབ་ཀྱི། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པས་མ་ཡིན་པར་འཛིན་ཏེ། ཐེག་པ་ཆེན་པོ་ལ་བདག་དད་ཅིང་ཡིད་ཆེས་པས་ཕ་རོལ་གཞན་ཡང་དད་ཅིང་ཡིད་ཆེས་པར་བྱེད། བདག་རིམ་གྲོ་དང་། བཀུར་སྟི་བྱེད་པས་ཕ་རོལ་པོ་གཞན་ཡང་རིམ་གྲོ་དང་། བཀུར་
སྟི་བྱེད་དུ་འཛུད། བདག་དེ་ལ་བསྟོད་ཅིང་བསྔགས་པས་ཕ་རོལ་པོ་གཞན་ཡང་བསྟོད་ཅིང་བསྔགས་སུ་བཅུག་བདག་གླེགས་བམ་དུ་བྲིས་པས་ཕ་རོལ་པོ་གཞན་ཡང་གླེགས་བམ་དུ་འདྲིར་བཅུག་བདག་ཀློག་ཅིང་འདོན་པས་ཕ་རོལ་པོ་གཞན་ཡང་ཀློག་ཅིང་འདོན་དུ་འཇུག་བདག་ཉན་ཅིང་འཛིན་པས་ཕ་རོལ་པོ་གཞན་དག་ཀྱང་ཉན་ཅིང་འཛིན་དུ་བཅུག །བདག་སེམས་ཤིང་ཡིད་ལ་བྱེད་པས་ཕ་རོལ་པོ་གཞན་ཡང་སེམས་ཤིང་ཡིད་ལ་བྱེད་དུ་བཅུག་སྟེ། སྐྱེ་བོ་ཆོས་ཀྱི་སྣོད་དུ་གྱུར་པའམ། སྣོད་དུ་མ་གྱུར་པ་ཡང་རུང་ཐམས་ཅད་ལ་ཐེག་པ་ཆེན་པོ་དོན་དམ་པ་ཤིན་ཏུ་ཟབ་པ་ཕྲ་བ་རྣམ་པར་འབྱེད་ཅིང་སྟོན་ཏེ། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་ལ་འཕྱ་ཞིང་སྐུར་པ་འདེབས་པ་དང་། སྨོད་ཅིང་བགེགས་དང་བར་ཆད་བྱེད་དེ་སྟོན་དུ་མི་སྟེར་བ་དང་། བདག་མ་དད་པས་གཞན་དད་པ་སྐྱེ་བའི་བགེགས་བྱེད་པ་དང་། བདག་རིམ་གྲོ་མི་བྱེད་པས་གཞན་རིམ་གྲོ་བྱེད་པའི་བགེགས་བྱེད་པ་དང་། བདག་མི་སྟོད་པས་གཞན་སྟོད་པའི་བགེགས་བྱེད་པ་དང་། བདག་གླེགས་བམ་དུ་མི་འདྲི་བས་གཞན་གླེགས་བམ་དུ་འདྲི་བའི་བགེགས་བྱེད་པ་དང་། བདག་ཀློག་པ་དང་། འདོན་པ་དང་། ཉན་པ་དང་། འཛིན་པ་དང་། ཤེས་པ་དང་། ཡིད་ལ་མི་བྱེད་པས་གཞན་ཀློག་པ་དང་། འདོན་པ་དང་། ཉན་པ་དང་། འཛིན་པ་དང་། སེམས་པ་དང་། ཡིད་ལ་བྱེད་པའི་བགེགས་བྱེད་དེ། ཐེག་པ་གཉིས་ཀྱི་ཆོས་མི་སྟོན་པ་ཡང་ཡོད་དོ། །ལ་ལ་ནི་སྦྱིན་པ་འབའ་ཞིག་བྱས་པས་མཐར་ཕྱིན་པའི་རྣམ་པར་དག་པ་འཐོབ་ཀྱི། ཚུལ་ཁྲིམས་ཀྱིས་མ་ཡིན། བཟོད་པས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་ཚུལ་ཁྲིམས་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི། སྦྱིན་པ་དང་། བཟོད་པས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་བཟོད་པ་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི། སྦྱིན་པ་དང་། ཚུལ་ཁྲིམས་ཀྱིས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་བརྩོན་འགྲུས་འབའ་
ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི་སྦྱིན་པ་དང་། ཚུལ་ཁྲིམས་ཀྱིས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་བསམ་གཏན་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི་སྦྱིན་པ་དང་། ཚུལ་ཁྲིམས་ཀྱིས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་ཤེས་རབ་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི། སྦྱིན་པ་དང་། ཚུལ་ཁྲིམས་ཀྱིས་མ་ཡིན་པ་ནས་བསམ་གཏན་གྱི་བར་དུ་མ་ཡིན་པར་འཛིན་ཏོ། །ལ་ལ་ནི་འཇིག་རྟེན་གྱི་བཟོ་རྩལ་རྣམ་པ་སྣ་ཚོགས་སྦྱངས་ཤིང་ཤེས་པས་མཐར་ཕྱིན་པའི་རྣམ་པར་དག་པ་ཐོབ་པར་འཛིན་ཏོ། །ལ་ལ་ནི་བྲག་ལས་མཆོང་བ་དང་། མེ་མ་མུར་དུ་མཆོང་བ་དང་། སྨྱུང་བ་ལ་སོགས་པའི་བརྟུལ་ཞུགས་ཀྱི་རྣམ་པ་མང་པོས་མཐར་ཕྱིན་པའི་རྣམ་པར་དག་པ་ཐོབ་པར་འཛིན་ཏེ་སྟོན་ཏོ། །རིགས་ཀྱི་བུ་དེ་ལྟར་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་ཆོས་ཀྱི་སྣོད་མ་ཡིན་པ་དེས་བརྫུན་རྣམ་པ་སྣ་ཚོགས་ཀྱིས་ཡང་དག་པའི་ཆོས་ཀྱི་སྣོད་ཀུན་བསླུས་ཏེ་སྐྱེ་བོ་མང་པོ་ལྟ་བ་ངན་པ་ལ་བལྟར་བཙུད་དོ། །དེ་ལྟར་དེ་དག་ཕྱིན་ཅི་ལོག་ཏུ་ངན་པར་ལྟ་བའི་དབང་གིས་རྒྱལ་རིགས་དགེ་བ་ནས་རྗེའུ་རིགས་དང་། དམངས་རིགས་དང་། སྐྱེས་པ་དང་། བུད་མེད་ལ་སོགས་པ་དད་པ་ཡོངས་སུ་དག་པ་དག་མ་རུང་བར་བྱས་ནས་ཚུལ་ཁྲིམས་དང་། ཐོས་པ་དང་། སྦྱིན་པ་དང་། ཤེས་རབ་ཀྱང་ཉམས་པར་བྱས་ཏེ། རྒྱལ་རིགས་གདོལ་པ་ཅན་ནས་རྗེའུ་རིགས་གདོལ་པ་ཅན་གྱི་བར་དུ་ཐམས་ཅད་གདོལ་པ་ཅན་དུ་བསྒྱུར་བས་དེ་དག་ནི་ཆོས་ཀྱི་སྣོད་མ་ཡིན་ཏེ། ཚུལ་ཁྲིམས་ཉམས་པའི་དགེ་སློང་དང་། རྒྱལ་རིགས་གདོལ་པ་ཅན་ལ་སོགས་པ་སྟོན་པ་དང་སློབ་མར་བཅས་ཏེ། དགེ་བའི་རྩ་བ་བཅད་པས་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་རོ། །རིགས་ཀྱི་བུ་ཇི་ལྟར་མི་རོ་བམ་ནས་རུལ་ཅིང་ཞིག་པ་ལས་འགྲོ་བ་ཐམས་ཅད་ཀྱི་ཡིད་དུ་མི་འོང་ཞིང་སྣར་མནམ་པ་རེག་མ་
ཐག་ཏུ་འཇིག་པ་དང་ཉེའམ། འབགས་ན་མནམ་པ་བཞིན་དུ་རྒྱལ་རིགས་དགེ་བ་ནས་དམངས་རིགས་དགེ་བའི་བར་དུ་ཚུལ་ཁྲིམས་ཉམས་པ། སྡིག་པ་སྤྱོད་པ། ཆོས་ཀྱི་སྣོད་མ་ཡིན་པ་དེ་ལ་བསྙེན་ཏམ་འགྲོགས་སམ། ལྷན་ཅིག་གནས་སམ། ལས་ལྷན་ཅིག་བྱེད་ན་དེ་མ་ཐག་ཏུ་ངན་པར་ལྟ་བ་བཙོག་ཅིང་མནམ་པ་གོས་པར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་རྒྱལ་རིགས་དགེ་བ་ནས་དམངས་རིགས་དགེ་བའི་བར་དུ་དད་པ་དང་། ཚུལ་ཁྲིམས་དང་། ཐོས་པ་དང་། སྦྱིན་པ་དང་། ཤེས་རབ་ཀུན་ཉམས་ཏེ། གདོལ་པ་ཅན་དུ་གྱུར་པས་དེ་ནི་སྟོན་པ་དང་སློབ་མར་བཅས་ཏེ་དགེ་བའི་རྩ་བ་བཅད་པས་ན་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་རོ།། །།བམ་པོ་དྲུག་པ། རིགས་ཀྱི་བུ་དེ་ལྟར་རྒྱལ་རིགས་ལ་སོགས་པ་སྐྱེ་བོ་ཚད་མེད་པ་ཚུལ་ཁྲིམས་ཉམས་པ་སྡིག་པ་སྤྱོད་པ། ཆོས་ཀྱི་སྣོད་མ་ཡིན་པའི་དགེ་སློང་བསྟེན་པས་དགེ་བའི་ཆོས་ཐམས་ཅད་ཉམས་པ་ནས་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་བ་ལ་ལྟོས། དེ་བས་ན་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བདེ་བའི་བར་དུ་འདོད་པ་དག་ལམ་ལས་རྒྱལ་བའི་དགེ་སྦྱོང་ལ་བསྙེན་བཀུར་དང་། མཆོད་པ་དང་། བཀུར་སྟི་བྱས་ཏེ་ཐེག་པ་གསུམ་གྱི་ཆོས་ཀྱི་མདོ་མཉན་པར་གསོལ་བ་གདབ་བོ། །གཞན་ཡང་ལམ་སྟོན་པ་དང་། ལམ་གྱིས་འཚོ་བའི་དགེ་སྦྱོང་བཙལ་བར་བྱའོ། །ལམ་དེ་གསུམ་ལ་གནས་པའི་དགེ་སྦྱོང་མེད་ན་ཡང་ལམ་སུན་འབྱིན་པའི་དགེ་སྦྱོང་བཙལ་བར་བྱའོ། །ཚུལ་ཁྲིམས་ཉམས་མོད་ཀྱི། ཡང་དག་པར་ལྟ་བ་དང་། མོས་པ་དང་། ལྷག་པའི་སྤྱོད་པ་དང་། ལྡན་པས་དེ་ལ་ནི་བསྙེན་བཀུར་དང་། མཆོད་པ་དག་བྱོས་ལ་ཐེག་པ་གསུམ་གྱི་དོན་དྲི་བར་བྱའི་ལྷག་པའི་སྤྱོད་པ་དང་། མོས་པ་དང་ལྟ་བ་ཀུན་ཉམས་པ་ལ་ནི་བསྙེན་བཀུར་དང་། མཆོད་པ་བྱ་བ་མ་ཡིན་ནོ། །ཚུལ་ཁྲིམས་ཉམས་པ་དག་ཚུལ་ཁྲིམས་ཉམས་
མོད་ཀྱི་ལོག་པར་མི་ལྟ་ལ། མོས་པ་དང་། ལྷག་པའི་སྤྱོད་པ་དང་ལྟ་བར་ལྡན་པས་ན་དེ་དང་དེ་གང་ན་བར་སོང་སྟེ་ཉན་ཐོས་ཀྱི་ཐེག་པའི་ཆོས་དང་། རང་སངས་རྒྱས་ཀྱི་ཐེག་པའི་ཆོས་དང་། ཐེག་པ་ཆེན་པོའི་ཆོས་ཞུ་ཞིང་མ་ཉན་པར་བྱའི་བརྙས་ཤིང་སྨད་པར་མི་བྱའོ། །ཐེག་པ་གསུམ་ལས་གང་ཡང་རུང་བ་ཅིག་ལ་དད་དེ་སྨོན་ལམ་འདེབས་ཤིང་བརྩོན་འགྲུས་རྩོམ་ཞིང་རྗེས་སུ་སློབ་ཀྱང་ཐེག་པ་གཞན་ལ་ཡང་བརྙས་པ་དང་སྨད་པར་མི་བྱའོ། །གང་གིས་ཐེག་པ་གསུམ་ལས་ཐེག་པ་གང་ཡང་རུང་སྟེ། གཅིག་གི་ཚིགས་སུ་བཅད་པ་གཅིག་ཙམ་ལ་བརྙས་སྨོད་ན། དེ་ལ་ནི་བསྙེན་བཀུར་མི་བྱ་མི་བསྙེན་མི་འགྲོགས་ལྷན་ཅིག་ཏུ་མི་གནས་ལས་འཐུན་པར་མི་བྱའོ། །གང་གིས་དེ་ལ་བསྙེན་བཀུར་བྱེད་ཅིང་བསྟེན་ཏམ་འགྲོགས་སམ་ལྷན་ཅིག་ཏུ་གནས་སམ། ལས་ལྷན་ཅིག་བྱེད་ན་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །རིགས་ཀྱི་བུ་དེ་བས་ན་ཐེག་པ་གསུམ་ལས་གང་ཡང་རུང་བ་གཅིག་ལ་གནས་ཏེ། འཁོར་བ་ལས་འདའ་ཞིང་རབ་ཏུ་བདེ་བ་ལ་མོས་ཏེ། སྡུག་བསྔལ་གྱི་སྐྱོ་བ་དག་དེ་བཞིན་གཤེགས་པས་གསུངས་པའི་དམ་པའི་ཆོས་ཉན་ཐོས་ཀྱི་ཐེག་པ་ལ་བརྟེན་ཏེ་གསུངས་པ་དང་། རང་སངས་རྒྱས་ཀྱི་ཐེག་པ་ལ་བརྟེན་ཏེ་གསུངས་པ་དང་། ཐེག་པ་ཆེན་པོ་ལ་བརྟེན་ཏེ་གསུངས་པ་ཀུན་ལ་དད་ཅིང་ཤིན་ཏུ་བཀུར་སྟི་བྱའི། དེ་ལ་འཕྱ་ཞིང་སྐུར་པ་འདེབས་པ་དང་། བར་ཆད་དང་། བགེགས་དང་ཆུང་ངུ་ན་ཚིགས་སུ་བཅད་པ་གཅིག་ཙམ་གྱི་བགེགས་ཀྱང་མ་བྱེད་ཅིག །རྟག་ཏུ་བསྟི་སྟང་དང་བཅས་ཏེ་ཀློག་པ་དང་འདོན་པ་དང་ཉན་པ་ལ་ཤིན་ཏུ་བརྟེན་པའི་ཡི་དམ་བཅས་ཏེ་རྟོགས་པར་བྱའོ། །ཐེག་པ་གསུམ་ལས་གང་ཡང་རུང་བའི་ཆོས་གཅིག་ལ་འཕྱ་ཞིང་སྐུར་ན་དེ་དང་ལྷན་ཅིག་ཏུ་མི་གནས་ཆུང་ངུ་ན་ཞག་གཅིག་ཙམ་ཡང་བསྙེན་བཀུར་དང་ཆོས་མཉན་པར་མི་བྱའོ། །སེམས་ཅན་གང་ཞིག་ཐེག་པ་གསུམ་ལས་ཐེག་པ་གཅིག་ཙམ་ལ་འཕྱ་ཞིང་སྐུར་ཏམ། ཐེག་པ་
གསུམ་ལ་འཕྱ་ཞིང་སྐུར་པའི་གང་ཟག་ལ་བརྟེན་ཏེ་འདྲི་བ་དང་ཉན་པ་བྱས་ན། དེའི་རྒྱུ་དེའི་རྐྱེན་གྱིས་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ཞིང་སྡུག་བསྔལ་ཆེན་པོ་མྱོང་བར་འགྱུར་ཏེ་རབ་ཏུ་ཐར་བར་དཀའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ང་སྔོན་འདས་པའི་དུས་ན་བྱང་ཆུབ་སེམས་དཔའི་སྤྱད་པ་སྤྱོད་ཅིང་བླ་ན་མེད་པའི་ཡེ་ཤེས་ཚོལ་བ་ལ་བརྩོན་པས་ནན་ཏན་བྱེད་པ་ན་བར་བར་ནི་ཉན་ཐོས་ཀྱི་ཐེག་པ་དང་ལྡན་པའི་དམ་པའི་ཆོས་འདོད་པའི་ཕྱིར་ཆུང་ངུ་ན་ཚིགས་སུ་བཅད་པ་གཅིག་ཙམ་གྱི་ཕྱིར་ཡང་ལུས་ཀྱི་ཡན་ལག་ལག་པ་དང་། རྐང་པ་དང་། ཤ་དང་། ཁྲག་དང་། པགས་པ་དང་། རུས་པ་དང་། མགོ་དང་། མིག་དང་། རྐང་དང་། ཀླད་པའི་བར་དུ་ཡོངས་སུ་གཏོང་ངོ་། །བར་བར་ནི་རང་སངས་རྒྱས་ཀྱི་ཐེག་པ་ལ་བརྟེན་ཏེ་གསུངས་པའི་དམ་པའི་ཆོས་འདོད་པའི་ཕྱིར་ཆུང་ངུ་ན་ཚིགས་སུ་བཅད་པ་གཅིག་ཙམ་གྱི་ཕྱིར་ཡང་ལུས་ཀྱི་ཡན་ལག་ལག་པ་དང་། རྐང་པ་དང་། ཤ་དང་། ཁྲག་དང་། པགས་པ་དང་། རུས་པ་དང་། མགོ་དང་། མིག་དང་། རྐང་དང་། ཀླད་པའི་བར་དུ་ཡོངས་སུ་གཏོང་ངོ་། །བར་བར་ནི་ཐེག་པ་ཆེན་པོ་ལ་བརྟེན་ཏེ་གསུངས་པའི་དམ་པའི་ཆོས་འདོད་པའི་ཕྱིར་ཆུང་ངུ་ན་ཚིགས་སུ་བཅད་པ་གཅིག་ཙམ་གྱི་ཕྱིར་ཡང་ལུས་ཀྱི་ཡན་ལག་ལག་པ་དང་། རྐང་པ་དང་། ཤ་དང་། ཁྲག་དང་། པགས་པ་དང་། རུས་པ་དང་། མགོ་དང་། མིག་དང་། རྐང་དང་། ཀླད་པའི་བར་དུ་ཡོངས་སུ་གཏོང་ངོ་། །དེ་ལྟར་དཀའ་བ་སྤྱད་པས་ཐེག་པ་གསུམ་ལ་ཆུང་ངུ་ན་ཚིགས་སུ་བཅད་པ་གཅིག་ཙམ་རྙེད་ན་ཤིན་ཏུ་དགའ་རངས་ཏེ་བསྟི་སྟང་དང་བཅས་པས་འཆང་ཞིང་གཟུངས་སུ་འཛིན་ལ་ཇི་སྐད་གསུངས་པ་བཞིན་དུ་སྤྱོད་དེ། ཅུང་ཟད་ཀྱང་མི་གཏོང་བས་བསྐལ་པ་ཚད་མེད་པའི་བར་དུ་ཤིན་ཏུ་སྤྱད་དཀའ་བ་ཐམས་ཅད་སྤྱད་པས་གདོད་མཐའི་ལས་བྱས་པས་བླ་ན་མེད་པའི་ཡེ་ཤེས་ཀྱི་འབྲས་བུ་ཐོབ་པར་གྱུར་ཏོ། །གཞན་ཡང་སེམས་ཅན་
ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་ཐེག་པ་གསུམ་གྱི་དམ་པའི་ཆོས་ལས་རྣམ་པར་ཕྱེ་སྟེ་བཤད་དོ། །དེ་ལྟ་བས་ན་དེ་ལ་འཕྱ་ཞིང་སྐུར་པ་དང་། བར་ཆད་དང་། བགེགས་དང་། ཆུང་ངུ་ན་ཚིགས་སུ་བཅད་པ་གཅིག་ཙམ་ཡང་འཆབ་པར་མི་བྱའོ། །དེ་ལ་རྟག་ཏུ་བཀུར་སྟི་དང་བཅས་པས་ཀློག་པ་དང་། འདོན་པ་དང་ཉན་པར་ཤིན་ཏུ་བརྟན་པའི་ཡི་དམ་བཅའོ། །རིགས་ཀྱི་བུ་འདི་ལྟར་ཐེག་པ་གསུམ་པོའི་དམ་པའི་ཆོས་འདི་ནི་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཀླུང་གང་གཱའི་བྱེ་མ་དང་མཉམ་པ་ཐམས་ཅད་ཀྱིས་འཐུན་པར་གསུངས་ཏེ། བྱིན་གྱི་རླབས་ཀྱིས་ཐམས་ཅད་བྱིན་གྱིས་རློབ་བོ། །སེམས་ཅན་ཐམས་ཅད་འཁོར་བའི་སྡུག་བསྔལ་ཆེན་པོ་ལས་གདོན་ཅིང་བསྒྲལ་བ་དང་། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱ་བའི་ཕྱིར་ཡོངས་སུ་གཟུང་བ་ཡིན་ནོ། །དེ་བས་ན་ཐེག་པ་གསུམ་གྱི་དམ་པའི་ཆོས་ལ་ཐམས་ཅད་ཀྱིས་དད་ཅིང་བཀུར་སྟི་བྱའི། དེ་ལ་འཕྱ་ཞིང་སྐུར་པ་འདེབས་པ་དང་། བར་ཆད་དང་། བགེགས་མི་བྱ་སྟེ། ཐེག་པ་གསུམ་གྱི་དམ་པའི་ཆོས་ལས་ཚིགས་སུ་བཅད་པ་གཅིག་ཙམ་མེད་པར་བྱས་ན་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང་། བྲམ་ཟེ་གདོལ་པ་ཅན་དང་། བློན་པོ་གདོལ་པ་ཅན་དང་། ཁྱིམ་བདག་གདོལ་པ་ཅན་དང་། དགེ་སྦྱོང་གདོལ་པ་ཅན་དང་། ཚོང་དཔོན་གདོལ་པ་ཅན་དང་། རྗེའུ་རིགས་དང་དམངས་རིགས་གདོལ་པ་ཅན་གྱི་སྐྱེས་པའམ། བུད་མེད་དེ་དག་གཡོ་དང་སྒྱུས་འཚོ་ཞིང་གླེན་པ་གཏི་མུག་ཅན་ཅུང་ཟད་ཙམ་གྱི་ཤེས་པ་སྙེམས་པ། རང་བཞིན་གྱིས་གཏུམ་པ་ཁྲོ་བ། སྤྲོ་ཐུང་བ་བརླང་བ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བ། སྲོག་གཅོད་པ་ལ་དགའ་བ་ནས་ལོག་པར་ལྟ་བ་དང་། སེར་སྣ་དང་། ཕྲག་དོག་དང་། འཇུངས་
པ་དང་། འདོད་ཆགས་ཀྱི་བར་དུ་དགའ་ཞིང་དགེ་བའི་བཤེས་གཉེན་ལ་རྒྱབ་ཀྱིས་ཕྱོགས་ནས་སྡིག་པའི་བཤེས་གཉེན་ལ་བསྟེན་པ་ཐེག་པ་གསུམ་གྱི་འཕགས་པའི་ཆོས་ཀྱི་སྣོད་མ་ཡིན་པ་དག་ཉན་ཐོས་ཀྱི་ཐེག་པའི་ཆོས་ཅུང་ཟད་ཐོས་པས་སངས་རྒྱས་ཀུན་གྱིས་ཡོངས་སུ་བཟུང་བའི་རང་སངས་རྒྱས་ཀྱི་ཐེག་པའི་ཆོས་དང་། བླ་ན་མེད་པའི་ཐེག་པ་ཆེན་པོའི་ཆོས་ལ་འཕྱ་ཞིང་སྐུར་པ་འདེབས་པ་དང་། སྨོད་པ་དང་། བར་ཆད་དང་། བགེགས་བྱེད་དེ་ཡོངས་སུ་རྒྱས་པར་མི་བྱེད་དོ། །ལ་ལ་ནི་རང་སངས་རྒྱས་ཀྱི་ཐེག་པའི་ཆོས་ཅུང་ཟད་ཐོས་ནས། སངས་རྒྱས་ཀུན་གྱིས་ཡོངས་སུ་བཟུང་བའི་ཉན་ཐོས་ཀྱི་ཐེག་པའི་ཆོས་དང་། བླ་ན་མེད་པའི་ཐེག་པའི་ཆོས་ལ་འཕྱ་བ་དང་། སྐུར་པ་འདེབས་པ་དང་། སྨོད་པ་དང་། བར་ཆད་དང་། བགེགས་བྱེད་དེ་ཡོངས་སུ་རྒྱས་པར་མི་བྱེད་དོ། །ལ་ལ་ནི་བླ་ན་མེད་པའི་ཐེག་པ་ཆེན་པོའི་ཆོས་ཅུང་ཟད་ཐོས་ནས་སངས་རྒྱས་ཀུན་གྱིས་ཡོངས་སུ་གཟུང་བའི་ཉན་ཐོས་ཀྱི་ཐེག་པའི་ཆོས་དང་། རང་སངས་རྒྱས་ཀྱི་ཐེག་པའི་ཆོས་ལ་འཕྱ་བ་དང་། སྐུར་པ་འདེབས་པ་དང་། སྨོད་པ་དང་། བར་ཆད་དང་། བགེགས་བྱེད་དེ་ཡོངས་སུ་རྒྱས་པར་མི་བྱེད་ལ། ཁེ་དང་གྲགས་པའི་ཕྱིར་འདི་སྐད་དུ་བདག་ནི་ཐེག་པ་ཆེན་པོ་པ་ཡིན་ཏེ། ཐེག་པ་ཆེན་པོའི་གྲོགས་སུ་གྱུར་པ་ཐེག་པ་ཆེན་པོ་འབའ་ཞིག་ཉན་པ་དང་། འཆང་བ་དང་། གཟུངས་སུ་འཛིན་པར་དགའི། ཉན་ཐོས་དང་། རང་སངས་རྒྱས་ཀྱི་ཐེག་པ་པའི་ཆོས་ལ་མི་དགའ། ཐེག་པ་གཉིས་པོ་ལ་སྟེན་པར་མི་འདོད་དོ་ཞེས་ཟེར་རོ། །དེ་ལྟར་ཐེག་པ་ཆེན་པོ་པ་ཡིན་ནོ་ཞེས་བརྫུན་ཟེར་བ་དེ་བདག་གཏི་མུག་གིས་མངོན་པར་ཟིན་ཏེ། ང་རྒྱལ་གྱི་དབང་དུ་གྱུར་པས་དེ་ལྟར་ཐེག་པ་གསུམ་གྱི་ཡང་དག་པའི་ཆོས་ལ་འཕྱ་ཞིང་སྐུར་པ་འདེབས་པ་དང་། བར་ཆད་དང་། བགེགས་བྱེད་དེ་ཡོངས་སུ་རྒྱས་པར་ཡང་མི་བྱེད་དོ། །ཐེག་པ་གསུམ་པོ་སློབ་པའི་གང་ཟག་ལ་ཡང་འཕྱ་ཞིང་སྐུར་ནས་སྨོད་དེ་མཐུ་མེད་པར་
བྱེད་དོ། །རིགས་ཀྱི་བུ་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་གྱི་ཕྱིར་ཐུགས་རྗེ་ཆེན་པོའི་ཤུགས་ཀྱིས་དངོས་པོ་རྣམ་པ་འདི་གཉིས་ཡོངས་སུ་བཟུང་ངོ་། །གང་ཞེ་ན། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་པ་དང་། ཐེག་པ་གསུམ་ལས་བྱུང་བ་འཕགས་པའི་བདེན་པ་བཞི་ལ་སོགས་པ་དམ་པའི་ཆོས་དང་ལྡན་པའོ། །དངོས་པོ་རྣམ་པ་གཉིས་པོ་འདི་ནི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་གིས་ཡོངས་སུ་བཟུང་བ་མཛད་ཀྱིས་ཉན་ཐོས་དང་། རང་སངས་རྒྱས་ལ་སོགས་པས་ནི་མ་ཡིན་ནོ། །གཞན་ཡང་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱི་ཚངས་པ་ཆེན་པོ་དང་། བརྒྱ་བྱིན་ལྷའི་དབང་པོ་དང་། གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོ་ལ་སོགས་པས་ཡོངས་སུ་བཟུང་བ་མ་ཡིན་ནོ། །མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དག་ངའི་བསྟན་པ་ལ་རབ་ཏུ་བྱུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་པ་ལ་ཐབས་ཀྱིས་ཉེ་བའི་སྐྱོན་དང་ཀླན་ཀ་ཚོལ་ཏེ། རྐྱེན་རྣམ་པ་མང་པོས་གཤེ་ཞིང་སྤྱོ་བ་དང་། སྨོད་ཅིང་སྨ་ཕབ་པ་དང་། གཞུ་བ་དང་། འཚོག་པ་དང་། བཙོན་རར་གཞུག་པ་དང་། འཚོ་བའི་ཡོ་བྱད་འཕྲོག་པ་དང་། ཆོས་གོས་འཕྲོག་པ་ནས་ཁྱིམ་པར་ཕབ་སྟེ། ཁྱིམ་པའི་ལས་རྣམ་པ་སྣ་ཚོགས་བྱེད་དུ་བཅུག་པ་དང་། ནན་གྱིས་འཁོལ་ཞིང་ཆད་པས་གཅོད་པ་དང་། སྐྲོད་པ་དང་། བཟའ་བ་དང་། བཏུང་བ་གཅོད་པ་དང་། འཚོ་བའི་དབང་པོ་དང་བྲལ་བའི་བར་དུ་བྱེད་དོ། །རྒྱལ་པོ་རྒྱལ་རིགས་གདོལ་པ་ཅན་དེ་དེ་ལྟར་གླེན་ཞིང་གཏི་མུག་གི་རང་བཞིན་ཅན་དུ་གྱུར་པས་ང་རྒྱལ་གྱི་དབང་གིས་མངོན་པར་ཟིན་པ་དེ་སངས་
རྒྱས་དང་། བྱང་ཆུབ་སེམས་དཔའི་ཐུགས་རྗེའི་མཐུས་ཡོངས་སུ་བཟུང་བའི་སློབ་མ་རྣམས་ལ་སྨོད་པ་དང་། སྨ་འབེབས་པ་དང་། ནན་གྱིས་ཆད་པས་གཅོད་པ་ལ་སོགས་པ་བྱེད་པའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཐུགས་རྗེ་ཆེན་པོའི་ཤུགས་ཀྱིས་ཡོངས་སུ་བཟུང་བའི་ཆོས་ཤིན་ཏུ་ཟབ་མོ་ལ་ཡང་འཕྱ་ཞིང་སྐུར་ཏེ་མ་རུང་བར་བྱེད་དོ། །དུས་གསུམ་གྱི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་ཐམས་ཅད་ཀྱིས་ཡོངས་སུ་བཟུང་བའི་ཐེག་པ་རྣམ་པ་གསུམ་གྱི་དམ་པའི་ཆོས་ཀྱི་བར་ཆད་དང་བགེགས་བྱེད་དེ་ཡོངས་སུ་རྒྱས་པར་མི་བྱེད་དོ། །དེ་ལྟར་རྒྱལ་རིགས་གདོལ་པ་ཅན་ནས་རྗེའུ་རིགས་དང་། དམངས་རིགས་གདོལ་པ་ཅན་གྱི་བར་དུ་གླེན་ཞིང་གཏི་མུག་གི་རང་བཞིན་ཅན་དང་། ང་རྒྱལ་གྱིས་མངོན་པར་ཟིན་པ་དེ་ནི་ཐེག་པ་ཆེན་པོ་པའོ་ཞེས་ཁས་འཆེ་བ་དེ་དག་ཉན་ཐོས་དང་། རང་སངས་རྒྱས་ཀྱི་ཐེག་པའི་སྣོད་དུ་ཡང་མ་གྱུར་ན་བླ་ན་མེད་པ་ཐེག་པ་ཆེན་པོའི་ཆོས་ཀྱི་སྣོད་དུ་གྱུར་པ་ལྟ་ཅི་སྨོས་ཏེ། ཁེ་དང་གྲགས་པ་དང་། བཀུར་སྟི་དང་། མཆོད་པ་འདོད་པའི་ཕྱིར་འཇིག་རྟེན་པ་གླེན་ཞིང་གཏི་མུག་ཅན་ཐམས་ཅད་བསླུས་ནས་བདག་ནི་ཐེག་པ་ཆེན་པོ་པའོ་ཞེས་ཟེར་ཏེ། དེ་བཞིན་གཤེགས་པའི་ཐེག་པ་གཉིས་ཀྱི་དམ་པའི་ཆོས་ལ་འཕྱ་ཞིང་སྐུར་པ་འདེབས་སོ། །དེ་ལྟར་གང་ཟག་གླེན་ཞིང་གཏི་མུག་ཅན་གཡོ་དང་སྒྱུས་འཚོ་ཞིང་ང་རྒྱལ་གྱིས་མངོན་པར་ཟིན་པ་སེར་སྣ་དང་། ཕྲག་དོག་དང་། འདོད་ཆགས་ཀྱིས་ཀུན་ནས་བསླངས་པས་དེའི་རྒྱུ་དེའི་རྐྱེན་གྱིས་ངའི་ཆོས་ཀྱི་མིག་མ་རུང་བ་དང་མྱུར་དུ་མེད་པར་བྱས་སོ། །དེས་ནི་དུས་གསུམ་གྱི་སངས་རྒྱས་བཅོམ་ལྡན་འདས་ཐམས་ཅད་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོ་བྱེད་པ་ཡིན་ནོ། །དུས་གསུམ་གྱི་བྱང་ཆུབ་སེམས་དཔའ་ཐམས་ཅད་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོ་བྱས་པ་ཡིན་ནོ། །དུས་གསུམ་གྱི་ཉན་ཐོས་ཐམས་ཅད་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་
པོའི་སྡིག་བྱེད་པ་ཡིན་ཏེ། རིང་པོ་མི་ཐོགས་པར་ལུས་ཀྱི་ཡན་ལག་ཀུན་ཞིག་པ་དང་། ནད་མ་རུངས་པ་ཆེན་པོ་རྣམ་པ་མང་པོས་བཏབ་པར་འགྱུར་རོ། །རྒྱལ་རིགས་གདོལ་པ་ཅན་ནས་རྗེའུ་རིགས་དང་། དམངས་རིགས་དང་། གདོལ་པ་ཅན་གྱི་སྐྱེས་པའམ། བུད་མེད་འདི་དག་ཐམས་ཅད་སྡིག་པའི་ལས་བྱེད་ཅིང་ཕྱིན་ཅི་ལོག་ཏུ་ལྟ་བའི་དབང་གིས་དགེ་བའི་རྩ་བ་ཐམས་ཅད་བཅད་པས། གལ་ཏེ་དུས་གཞན་དུ་སྦྱིན་པའི་བསོད་ནམས་མང་དུ་བྱས་སུ་ཟིན་ཀྱང་མ་འོངས་པའི་དུས་ན་ཡི་དགས་སམ་བྱོལ་སོང་གི་ཁམས་སུ་སྐྱེ་སྟེ་ཕྱུག་པོའི་བདེ་བ་མྱོང་བར་མི་འགྱུར་རོ། །ལུས་དེ་ཉིད་ཀྱིས་གཟུགས་དང་གཟུགས་མེད་པའི་ཁམས་སུ་སྐྱེ་བའི་དགེ་བའི་རྩ་བ་ཆུང་ངུ་ཡང་བསྐྱེད་མི་ནུས་ན་ཉན་ཐོས་སམ། རང་སངས་རྒྱས་སམ། བླ་ན་མེད་པའི་ཐེག་པ་ཆེན་པོ་ལྷུན་གྱིས་གྲུབ་པ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་དགེ་བའི་རྩ་བའི་ས་བོན་སྐྱེད་པ་ལྟ་ཅི་སྨོས། གཞན་ཡང་དེའི་ལྕེ་ལ་རྟག་ཏུ་ནད་ཀྱིས་གནོད་པར་འགྱུར་ཞིང་། ཉིན་ཞག་དུ་མར་ལྕེ་ལྐུགས་ཤིང་སྨྲ་མི་ནུས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང་། འཆི་འཕོས་ནས་ཀྱང་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །དེ་བས་ན་དེ་བཞིན་གཤེགས་པས་རྒྱལ་རིགས་དགེ་བ་ནས་རྗེའུ་རིགས་དང་། དམངས་རིགས་ལ་སོགས་པའི་སྐྱེས་པའམ། བུད་མེད་དེ་དག་ལ་ཡུན་རིང་པོར་ཕན་པ་དང་བདེ་བའི་དོན་གྱི་ཕྱིར་ཡང་དང་ཡང་འདི་སྐད་གསུངས་ཏེ། ཁྱེད་ཀྱིས་ངའི་བསྟན་པ་ལ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གི་ཚལ་བུ་གྱོན་ཅིང་རབ་ཏུ་བྱུང་བ་ལ་གནོད་པ་དང་། གཤེ་ཤིང་སྤྱོ་བ་ལ་སོགས་པ་མ་བྱེད་ཅིག །ངས་བསྟན་པའི་ཐེག་པ་གསུམ་གྱི་དམ་པའི་ཆོས་ལ་འཕྱ་ཞིང་སྐུར་པ་འདེབས་པ་དང་། སྨོད་པ་དང་། བར་ཆད་དང་། བགེགས་མ་བྱེད་ཅིག་ཅེས་གསུངས་སོ། །ངས་བསྟན་པ་ལས་ཆེད་དུ་འགལ་བར་བྱས་ན་སྡིག་པའི་རྣམ་པར་སྨིན་པ་ནི་ཇི་ལྟར་རྒྱས་པར་བཤད་པ་བཞིན་ནོ། །དེ་ཅིའི་ཕྱིར་ཞེ་ན། ངའི་བསྟན་པ་ལ་སྐྱབས་སུ་
སོང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་ཅིང་རབ་ཏུ་བྱུང་བའི་ཆ་ལུགས་ཅན་དེ་ལ་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་ཐམས་ཅད་ཀྱིས་ཐུགས་རྗེ་ཆེན་པོའི་བྱིན་གྱི་བརླབས་ཀྱིས་ཡོངས་སུ་བཟུང་བའོ། །སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་ཅིང་རབ་ཏུ་བྱུང་བའི་སྤྱོད་ལམ་ཅན་དེ་ནི་འཕགས་པ་རྣམས་ཀྱི་རྣམ་པར་གྲོལ་བའི་རྒྱལ་མཚན་ཡིན་ནོ། །ཉན་ཐོས་ཐམས་ཅད་ཀྱིས་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་རྒྱལ་མཚན་ཡིན་ནོ། །རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་རྒྱལ་མཚན་ཡིན་ནོ། །ཐེག་པ་ཆེན་པོ་པ་ཐམས་ཅད་ཀྱིས་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་རྒྱལ་མཚན་ཡིན་ནོ། །དེ་བཞིན་གཤེགས་པས་གསུངས་པའི་ཐེག་པ་གསུམ་གྱི་དམ་པའི་ཆོས་ཡིན་ནོ། །དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་ཆེན་པོའི་བྱིན་གྱི་རླབས་ཀྱིས་ཡོངས་སུ་བཟུང་བ་ཡིན་ནོ། །འཕགས་པ་རྣམས་ཀྱི་རྣམ་པར་གྲོལ་བའི་གནས་ཡིན་ནོ། །ཉན་ཐོས་ཀྱི་ཐེག་པ་པ་ཐམས་ཅད་ཀྱི་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་གནས་ཡིན་ནོ། །རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་གནས་ཡིན་ནོ། །ཐེག་པ་ཆེན་པོ་པ་ཐམས་ཅད་ཀྱི་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་གནས་ཡིན་ནོ། །རིགས་ཀྱི་བུ་དེ་ལྟ་བས་ན་རྣམ་པར་གྲོལ་བ་ཚོལ་བ་དག་ངའི་བསྟན་པ་ལ་སྐྱབས་སུ་སོང་བ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པ་རབ་ཏུ་བྱུང་བའི་གང་ཟག་ལ་བསྙེན་བཀུར་དང་། མཆོད་པ་དང་། བསྟི་སྟང་བྱའོ། །བདག་གིས་སྔར་ཉན་ཐོས་ཀྱི་ཐེག་པའི་ཆོས་ལ་དད་དེ། བདག་ཉན་ཅིང་གཟུངས་སུ་འཛིན་ན་གཞན་ཡང་ཉན་ཅིང་འཛིན་དུ་གཞུག་གོ །བདག་ཀློག་ཅིང་ཁ་ཏོན་བྱེད་ན་གཞན་ཡང་ཀློག་ཅིང་འདོན་དུ་གཞུག་གོ །བདག་གླེགས་
བམ་དུ་འདྲི་ན་གཞན་ཡང་གླེགས་བམ་དུ་འདྲིར་གཞུག་གོ །བདག་སྦྱིན་པ་བྱེད་ན་གཞན་ཡང་སྦྱིན་པ་བྱེད་དུ་གཞུག་གོ །བདག་སྟོན་ཅིང་འཆད་ན་གཞན་ཡང་སྟོན་ཅིང་འཆད་པ་དང་། ཡིད་ལ་བྱ་བ་དང་། ནན་ཏན་བྱ་བ་དང་། རྒྱ་ཆེར་སྤེལ་དུ་གཞུག་གོ །ཇི་ལྟར་རང་སངས་རྒྱས་ཀྱི་ཐེག་པའི་ཆོས་ལ་དད་ཅིང་ཡིད་ཆེས་ཏེ། བདག་ཉན་ཅིང་གཟུངས་སུ་འཛིན་ན་གཞན་ཡང་ཉན་ཅིང་འཛིན་དུ་གཞུག་གོ །བདག་ཀློག་ཅིང་ཁ་ཏོན་དུ་བྱེད་ན་གཞན་ཡང་ཀློག་ཅིང་འདོན་དུ་གཞུག་གོ །བདག་གླེགས་བམ་དུ་འདྲི་ན་གཞན་ཡང་གླེགས་བམ་དུ་འདྲིར་གཞུག་གོ །བདག་སྦྱིན་པ་བྱེད་ན་གཞན་ཡང་སྦྱིན་པ་བྱེད་དུ་གཞུག་གོ །བདག་སྟོན་ཅིང་འཆད་ན་གཞན་ཡང་སྟོན་ཅིང་འཆད་པ་དང་། ཡིད་ལ་བྱ་བ་དང་། ནན་ཏན་བྱ་བ་དང་། རྒྱ་ཆེར་སྤེལ་དུ་གཞུག་གོ །འདི་ལྟར་ཐེག་པ་ཆེན་པོ་ལ་དད་ཅིང་ཡིད་ཆེས་ཏེ། བདག་ཉན་ཅིང་གཟུངས་སུ་འཛིན་ན་གཞན་ཡང་ཉན་ཅིང་འཛིན་དུ་གཞུག་གོ །བདག་ཀློག་ཅིང་ཁ་ཏོན་བྱེད་ན་གཞན་ཡང་ཀློག་ཅིང་འདོན་དུ་གཞུག་གོ །བདག་གླེགས་བམ་དུ་འདྲི་ན་གཞན་ཡང་གླེགས་བམ་དུ་འདྲིར་གཞུག་གོ །བདག་སྦྱིན་པ་བྱེད་ན་གཞན་ཡང་སྦྱིན་པ་བྱེད་དུ་གཞུག་གོ །བདག་སྟོན་ཅིང་འཆད་ན་གཞན་ཡང་སྟོན་ཅིང་འཆད་པ་དང་། ཡིད་ལ་བྱ་བ་དང་། ནན་ཏན་བྱ་བ་དང་། རྒྱ་ཆེར་སྤེལ་དུ་གཞུག་གོ །གལ་ཏེ་སྣོད་དུ་མ་གྱུར་ན་བདག་ཀྱང་མི་ཉན་གཞན་ཡང་ཉན་དུ་མི་གཞུག་པ་ནས་གཞུང་དེ་བཞིན་དུ་རྒྱས་པར་བཤད་པ་བཞིན་ནོ། །སྡིག་པའི་ཆོས་ཐམས་ཅད་རིང་དུ་སྤང་བ་དང་། སྡིག་པའི་གྲོགས་པོ་སྤང་བ་དང་། དགེ་བའི་བཤེས་གཉེན་ལ་བསྟེན་པ་དང་། ཕ་རོལ་ཏུ་ཕྱིན་པ་དྲུག་ལ་བརྩོན་ཞིང་སུ་ནན་ཏན་བྱེད་པ་དང་། མི་དགེ་བའི་ལས་ཐམས་ཅད་ཡང་དང་ཡང་འགྱོད་ཅིང་མཐོལ་བ་དང་། ཅི་ལ་མོས་པ་བཞིན་དུ་ཡང་དག་པའི་སྨོན་ལམ་གདབ་པར་བྱའོ། །གང་དེ་ལྟར་བྱེད་པ་ནི་ལུས་འདི་ཉིད་ཀྱིས་ཉན་ཐོས་ཀྱི་ཐེག་པའི་སྣོད་དུ་ཡང་འགྱུར་ལ། རང་སངས་རྒྱས་ཀྱི་རིགས་ལས་ཀྱང་ཕྱིར་མི་ལྡོག །
ཐེག་པ་ཆེན་པོའི་རིགས་ལས་ཀྱང་ཕྱིར་མི་ལྡོག་པའི་གནས་ཡོད་དོ། །དེ་བས་ན་ཐེག་པ་གསུམ་ཆར་ལ་ཡང་བསླབ་ཅིང་ནན་ཏན་བྱའི། ང་རྒྱལ་གྱིས་ཐེག་པ་ཆེན་པོ་པའོ་ཞེས་ཁས་འཆེ་ཞིང་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པའི་ཆོས་ལ་འཕྱ་ཞིང་སྐུར་པར་མི་བྱའོ། །ངས་སྔོན་ཐེག་པ་ཆེན་པོའི་ཆོས་ཀྱི་སྣོད་དུ་གྱུར་པ་བརྟན་པར་སྤྱོད་པ་འབའ་ཞིག་ལ་དེ་སྐད་དུ་ཐེག་པ་ཆེན་པོ་སྒོམ་པ་འབའ་ཞིག་གིས་མཐའི་གནས་བྱེད་པར་འགྱུར་རོ། །ཞེས་བཤད་པ་དང་འདིར་འགལ་བ་མེད་དོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་པ་འདི་གསུངས་སོ། །འཁོར་གྱི་དཀྱིལ་འཁོར་ཆེན་པོའི་མངོན་སུམ། །རྡོ་རྗེའི་སྙིང་པོས་ང་ལ་ཞུས་པ། །ཚུལ་ཁྲིམས་ཉམས་པའི་དགེ་སློང་དག་ལ། །ཅི་ཕྱིར་མཆོད་པ་གྱིས་ཤིག་ཅེས་སྐུལ། །སྦྱངས་པའི་ཡོན་ཏན་ཀུན་ཀྱང་ཉམས་ནས། །གླེན་ཞིང་ངན་པར་ལྟ་བ་འཛིན་པ། །ཆོས་ཀྱི་སྣོད་མིན་ལམ་སུན་འབྱིན་ལ། །སྤྱོ་འམ་ཆད་པས་གཅད་དུ་མི་གནང་། །དེ་ལས་ཐེག་པ་གསུམ་གྱི་དམ་ཆོས། །ཡང་དག་པ་ཡི་རྣམ་པར་སྒྲོལ་བ། །སྨན་བཟང་ལྟ་བུ་བཤད་པ་ཐོས་ན། །ཞི་བའི་མྱ་ངན་འདས་འགྱུར་ཞེས་གསུངས། །ཅི་ཡི་ཕྱིར་ན་མདོ་སྡེ་གཞན་ལས། །ཐེག་པ་ཆེན་པོ་གཅིག་གིས་གྲོལ་འགྱུར། །ཐེག་པ་གཉིས་ཀྱི་ཆོས་ལ་སློབ་སྤངས། །ཡང་འདིར་ཐེག་པ་གསུམ་བཤད་ཅི་ཕྱིར། །སེམས་ཅན་ཀུན་ལ་ཐུགས་བརྩེ་ཅན་གྱིས། །ངན་པར་ལྟ་བའི་ལས་ཀུན་སྤངས་ཏེ། །ཕན་པ་དང་ནི་བདེ་བའི་དོན་ཕྱིར། །རྣམ་པར་གྲོལ་ཞིང་ཐེ་ཙོམ་གཅོད་གསོལ། །རྒྱལ་རིགས་རྒྱལ་པོ་དག་ལ་ཕན་པ། །རྗེའུ་རིགས་དམངས་རིགས་བར་དུ་བདེ་ཕྱིར། །དགེ་སློང་དག་ལ་གནོད་བྱེད་མི་གནང་། །ཁ་ན་མ་ཐོ་ཆེན་པོའི་སྡིག་འགྱུར། །ཁ་སྤུ་བྲེགས་ཤིང་ངུར་སྨྲིག་གོས་གྱོན། །སངས་རྒྱས་རྣམས་ཀྱི་ཆོས་ཀྱི་རྒྱལ་མཚན། །རྣམ་པར་གྲོལ་བའི་ལམ་གྱི་མིག་ཡིན། །སངས་རྒྱས་ཀུན་གྱིས་
བྱིན་གྱིས་བརླབས་པ། །སྤྱོད་ལམ་མང་པོ་ཡོངས་སུ་ཉམས་ཀྱང་། །རྣམ་པར་གྲོལ་བ་ཡོངས་སུ་སྤངས་མིན། །ངན་པར་ལྟ་བའི་སྡིག་པ་སྤངས་པས། །མྱུར་དུ་མྱ་ངན་འདས་པ་འཐོབ་འགྱུར། །ཇི་ལྟར་སྨན་རབ་འཁུས་པར་གྱུར་ཀྱང་། །ནད་རྣམས་ཀུན་ལ་ཤིན་ཏུ་ཕན་འགྱུར། །དེ་བཞིན་སྤྱོད་ལམ་ཉམས་པ་དེ་ཡང་། །ཕ་རོལ་སྡུག་བསྔལ་ཞི་བར་བྱེད་འགྱུར། །ཞུ་བའི་ལས་དང་གསོ་སྦྱིན་དག་ཏུ། །དགེ་སྦྱོང་དེ་ནི་དེར་འདུག་མ་གནང་། །གཞན་ལ་དམ་པའི་ཆོས་སྟོན་དབང་སྟེ། །གཉི་གས་བསོད་ནམས་ཆེན་པོ་ཐོབ་འགྱུར། །དཀོན་མཆོག་གསུམ་ལ་དད་ཅིང་ཕྱོགས་ཏེ། །ང་ལ་སྟོན་པ་ཆེན་པོར་འཛིན་པ། །མི་དགེ་སྡིག་པ་མང་པོ་སྤོང་འགྱུར། །མུ་སྟེགས་མང་པོ་གང་བས་དེ་མཆོག །ཇི་ལྟར་སྲིན་མོའི་གླིང་དུ་འཁྱམས་པའི། །འཇིགས་ཤིང་སྐྲག་པའི་ཚོང་པ་དེ་དག །ཀུན་གྱིས་རྟ་སྤུ་ཉག་རེ་བཟུང་བས། །རྒྱ་མཚོ་ལས་རྒལ་བགེགས་དང་བྲལ་བ། །དེ་ལྟར་ཚུལ་ཁྲིམས་ཉམས་པ་དེ་ནི། །མི་དགེ་ངན་པར་ལྟ་བ་སྤངས་ཏེ། །དད་པ་གཅིག་གི་རྒྱུ་ཡི་མཐུས་ན། །ཉོན་མོངས་པ་ཡི་སྲིན་ལས་ཐར་འགྱུར། །རྣམ་པར་གྲོལ་བའི་རྒྱལ་མཚན་བསྲུངས་ཏེ། །སངས་རྒྱས་མང་པོས་བྱིན་གྱིས་བརླབས་པའི། །ཚུལ་ཁྲིམས་ཉམས་ལ་གནོད་མི་བྱེད་ན། །ཁ་ན་མ་ཐོའི་སྡིག་ལྕི་སྤོང་འགྱུར། །བསོད་ནམས་ཆེན་པོ་ལ་ནི་མོས་ཤིང་། །ཡང་དག་རྣམ་པར་གྲོལ་ལ་དགའ་བ། །སྣོད་དང་སྣོད་མིན་ཀུན་ལ་མཉམ་སྲུང་། །དེས་ནི་རྣམ་གྲོལ་ཐོབ་པར་མི་དཀའ། །གླེན་པ་ང་རྒྱལ་ཐེག་པ་ཆེན་པོར། །ཁས་འཆེ་དེ་ནི་ཤེས་པའི་མཐུ་མེད། །ཐེག་པ་གཉིས་ཀྱི་ཆོས་ལ་རྨོངས་ན། །ཐེག་པ་ཆེན་པོར་རིག་འགྱུར་ཅི་སྨོས། །དཔེར་ན་མིག་གི་འབྲས་བུ་ཉམས་ན། །ཁ་དོག་རྣམ་པ་མཐོང་བར་མི་འགྱུར། །དེ་བཞིན་དད་པ་ཉམས་ཤིང་མེད་ན། །ཐེག་པ་ཆེན་པོ་ཤེས་པར་མི་ནུས། །ཆུ་བྲན་བཏུང་བའི་མཐུ་ཡང་མེད་ན། །རྒྱ་མཚོ་ཆེན་པོ་ག་ལ་རྔུབ་ནུས། །ཐེག་པ་གཉིས་ཀྱང་གོམས་
མི་ནུས་ན། །ཐེག་པ་ཆེན་པོ་ག་ལ་སློབ་ནུས། །ཐེག་པ་གཉིས་ཀྱི་ཆོས་ལ་དད་ནས། །ཐེག་པ་ཆེན་པོ་ལ་ནི་དད་འགྱུར། །ཐེག་ཆེན་ཆོས་ལ་དད་པ་མེད་པར། །ཚིག་ཏུ་སྨྲ་བས་དོན་དུ་མི་འགྱུར། །ནང་ནི་ཡང་དག་ཆད་པར་ལྟ་ཞིང་། །ཐེག་པ་ཆེན་པོ་ཅན་ཞེས་ཁས་འཆེ། །མི་དགེ་གསུམ་གྱི་ལས་ནི་མི་སྲུང་། །ང་ཡི་དམ་ཆོས་མ་རུང་འཇིག་བྱེད། །གང་ཟག་དེ་ནི་ཚེ་འཕོས་གྱུར་ནས། །མཚམས་མེད་སེམས་ཅན་དམྱལ་བར་ལྟུང་ངེས། །དེ་བས་དབང་པོ་བརྟན་ཅིང་བཤད་བྱའི། །སྣོད་དུ་མ་གྱུར་པ་ལ་མ་ཡིན། །བྱམས་པའི་སེམས་མེད་ང་རྒྱལ་དྲེགས་ཤིང་། །གཏུམ་ཞིང་བརླང་བ་དབང་པོ་ཞན་པ། །དེ་ནི་ཆད་པར་ལྟ་བ་ཡིན་པར། །མཁས་པ་རྣམས་ཀྱིས་དེ་དག་ཤེས་བྱ། །ཉན་ཐོས་དང་ནི་རང་རྒྱལ་བ་དང་། །ཐེག་པ་ཆེན་པོའི་སྣོད་མ་ཡིན་ནོ། །སངས་རྒྱས་ཀུན་ལ་སྨད་ཅིང་སྐུར་པས། །ངེས་པར་མཚམས་མེད་དམྱལ་བར་ལྟུང་འགྱུར། །འདུ་འཛི་ལ་དགའ་ཚུལ་ཁྲིམས་སྲུང་ཞིང་། །སློབ་དཔོན་འཆབ་ཅིང་སྡུག་བསྔལ་འཇིགས་པ། །མཁས་པ་དག་གིས་ཤེས་པར་གྱིས་ཤིག །དེ་ནི་ཉན་ཐོས་ཐེག་པ་ཡིན་ནོ། །སྦྱིན་ལ་དགའ་ཞིང་སྐྱེ་འགོག་རྟོག་པ། །བས་མཐའི་གནས་ལ་དགའ་བ་དག་ནི། །རང་རྒྱལ་པ་ཡི་ཐེག་པ་ཡིན་པར། །མཁས་པ་དག་གིས་ཤེས་པར་གྱིས་ཤིག །དགེ་བའི་རྩ་བ་ཀུན་དང་ལྡན་ཞིང་། །བྱམས་པ་དང་ནི་སྙིང་རྗེའི་སེམས་ཀྱིས། །རྟག་ཏུ་ཕན་པའི་དོན་ལ་དགའ་བ། །དེ་ནི་ཐེག་པ་ཆེན་པོ་ཡིན་ནོ། །ཚུལ་ཁྲིམས་བསྲུང་ཕྱིར་ལུས་སྲོག་སྤོང་ཞིང་། །སེམས་ཅན་དག་ལ་མི་འཚེ་མི་གནོད། །སྟོང་པ་ཉིད་ཀྱི་ཆོས་ལ་བརྩོན་པ། །ཐེག་པ་ཆེན་པོ་ཡིན་པར་ཤེས་བྱ། །ཐམས་ཅད་ཆོས་ལ་སེམས་ཀྱིས་བཟོད་ཅིང་། །སྨྲ་བའི་ཚིག་འཇམ་འཇུངས་པ་མེད་པ། །ཆོས་ལ་རྟག་ཏུ་དགའ་ཞིང་སྤྲོ་བ། །དེ་ཡང་ཐེག་པ་ཆེན་པོ་ཡིན་ནོ། །ཆོས་ཀྱི་སྣོད་དང་སྣོད་མིན་ཀུན་ལ། །བསམ་པ་མཉམ་པས་ཕན་པའི་དོན་
བྱེད། །འཇིག་རྟེན་ཆོས་ཀྱིས་མི་གོས་པ་དག །དེ་ཡང་ཐེག་ཆེན་ཡིན་པར་ཤེས་བྱ། །དེ་བས་མཁས་པ་བློ་ཅན་དག་ནི། །ཐེག་པ་གསུམ་ལ་ཤིན་ཏུ་དང་བསྐྱེད། །དགེ་འདུན་དག་ལ་གནོད་མི་བྱེད་ན། །མྱུར་དུ་བླ་མེད་བྱང་ཆུབ་གྲུབ་འགྱུར། །རིགས་ཀྱི་བུ་གཞན་ཡང་རྒྱལ་རིགས་དགེ་བ་དང་། བྲམ་ཟེ་དགེ་བ་དང་། བློན་པོ་དགེ་བ་དང་། ཁྱིམ་བདག་དགེ་བ་དང་། ཚོང་དཔོན་དགེ་བ་དང་། དགེ་སྦྱོང་དགེ་བ་དང་། རྗེའུ་རིགས་དང་། དམངས་རིགས་ལ་སོགས་པའི་སྐྱེས་པའམ། བུད་མེད་དེ་དག་གནས་པ་དང་སྤྱད་པར་བྱ་བའི་འཁོར་ལོ་རྣམ་པ་བཅུ་དང་ལྡན་ན་ལུས་འདི་ཉིད་ཀྱིས་ཉན་ཐོས་ཀྱི་ཐེག་པའི་རིགས་ལས་ལྡོག་ཅིང་ཉམས་པར་མི་འགྱུར་བ་དང་། ཚེ་འདི་ཉིད་ལ་ཉན་ཐོས་ཀྱི་ཐེག་པའི་འཕགས་པའི་ཆོས་ཀྱི་སྣོད་དུ་འགྱུར་ཏེ། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོའི་སྣོད་དུ་ནི་མ་ཡིན་ནོ། །བཅུ་གང་ཞེ་ན་འདི་ལྟ་སྟེ། བསམ་པ་ཡོངས་སུ་དག་པའི་དད་པས་དགེ་བ་དང་མི་དགེ་བའི་ལས་ཀྱི་འབྲས་བུ་ཡོད་པར་ཡིད་ཆེས་པ་དང་། ཁྲེལ་བ་དང་། ངོ་ཚ་བ་དང་ལྡན་པས་མི་དགེ་བའི་གྲོགས་དང་། ངན་པར་ལྟ་བ་ཐམས་ཅད་ཡོངས་སུ་སྤོང་བ་དང་། སྡོམ་པ་ལ་ཤིན་ཏུ་གནས་ཏེ། སྲོག་གཅོད་པ་ཡོངས་སུ་སྤོང་བ་ནས་བག་མེད་པར་འགྱུར་བའི་ཁུ་བ་འཐུང་བའི་བར་དུ་ཡོངས་སུ་སྤོང་བ་དང་། བྱམས་པའི་སེམས་ལ་གནས་ཏེ་ཞེ་སྡང་དང་། ཁོང་ཁྲོ་བ་ཐམས་ཅད་ཡོངས་སུ་སྤོང་བ་དང་། སྙིང་རྗེའི་སེམས་ལ་གནས་ཏེ་སེམས་ཅན་ཉམ་ཐག་པ་ཐམས་ཅད་སྒྲོལ་བ་དང་། དགའ་བའི་སེམས་ལ་བདེ་བར་གནས་ཏེ། ངག་གི་ལས་མི་དགེ་བ་བཞི་ཡོངས་སུ་སྤོང་བ་དང་། བཏང་སྙོམས་ཀྱི་སེམས་ལ་གནས་ཏེ། འདོད་ཆགས་དང་། སེར་སྣ་དང་། ཕྲག་དོག་ཐམས་ཅད་ཡོངས་སུ་སྤོང་བ་དང་། ཡང་དག་པ་ལ་ཕྱོགས་ཏེ་སླུ་བའི་ལྟས་བཟང་ངན་ཀུན་ཡོངས་སུ་སྤོང་ཞིང་ལོག་པ་མུ་སྟེགས་ཅན་ལ་མི་སྟེན་པ་དང་། ཤིན་ཏུ་འབད་པའི་
བརྩོན་འགྲུས་དང་ལྡན་ཏེ་དགེ་བའི་ཆོས་ཀུན་ལ་ནན་ཏན་བྱེད་པ་དང་། རྟག་ཏུ་དགོན་པ་ལ་དགའ་ཞིང་ཆོས་ཀྱི་དོན་ཚོལ་བ་ལ་མི་སྐྱོ་བར་སྤྲོ་བའོ། །རིགས་ཀྱི་བུ་རྒྱལ་རིགས་དགེ་བ་ནས་རྗེའུ་རིགས་དང་། དམངས་རིགས་ལ་སོགས་པའི་སྐྱེས་པ་དང་། བུད་མེད་དེ་དག་གནས་པ་དང་སྤྱད་པར་བྱ་བའི་འཁོར་ལོ་བཅུ་པོ་འདི་དག་དང་ལྡན་ན་ཚེ་འདི་ཉིད་ལ་ཉན་ཐོས་ཀྱི་ཐེག་པ་པའི་རིགས་ལས་ལྡོག་ཅིང་ཉམས་པར་མི་འགྱུར་བ་དང་། ཚེ་འདི་ཉིད་ལ་ཉན་ཐོས་ཀྱི་ཐེག་པའི་འཕགས་པའི་ཆོས་མངོན་དུ་གྱུར་པ་དང་ཉན་ཐོས་ཀྱི་འཕགས་པའི་ཆོས་ཀྱི་སྣོད་དུ་གྱུར་ཏེ། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོའི་འཕགས་པའི་ཆོས་མངོན་དུ་གྱུར་པ་དང་། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོའི་སྣོད་དུ་འགྱུར་བ་ནི་མ་ཡིན་ནོ། །གཞུང་དེས་རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོ་ཡང་ཤེས་པར་བྱའོ། །རིགས་ཀྱི་བུ་དེ་ལྟར་གནས་པ་དང་སྤྱད་པར་ལྡན་པའི་འཁོར་ལོ་བཅུ་པོ་དེ་དག་ནི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་བཅོམ་ལྡན་འདས་ཐམས་ཅད་ཀྱི་ཐུན་མོང་དུ་ཡོད་པའོ། །རིགས་ཀྱི་བུ་གཞན་ཡང་གནས་པ་དང་སྤྱད་པར་བྱ་བའི་འཁོར་ལོ་རྣམ་པ་བཅུ་ཉན་ཐོས་དང་ཐུན་མོང་མ་ཡིན་པ། རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་བཅོམ་ལྡན་འདས་དང་ཐུན་མོང་བ་ཡོད་དོ། །གང་རྒྱལ་རིགས་དགེ་བ་ནས་རྗེའུ་རིགས་དང་། དམངས་རིགས་ལ་སོགས་པའི་སྐྱེས་པ་དང་། བུད་མེད་དེ་དག་གནས་པ་དང་སྤྱད་པར་བྱ་བའི་འཁོར་ལོ་བཅུ་པོ་འདི་དག་དང་ལྡན་ན་ཚེ་འདི་ཉིད་ཀྱིས་རང་སངས་རྒྱས་ཀྱི་ཐེག་པའི་རིགས་ལས་ཀྱང་ཉམས་པར་མི་འགྱུར་བ་དང་། མི་ལྡོག་པ་དང་། ལུས་འདི་ཉིད་ལ་རང་སངས་རྒྱས་ཀྱི་ཐེག་པའི་འཕགས་པའི་ཆོས་རིག་པ་དང་། རང་སངས་རྒྱས་ཀྱི་འཕགས་པའི་ཆོས་ཀྱི་སྣོད་དུ་འགྱུར་རོ། །བཅུ་གང་ཞེ་ན་འདི་ལྟ་སྟེ། ལུས་དང་། ངག་དང་།
ཡིད་ཀྱི་ལས་རྣམ་པར་དག་པར་སྦྱོང་བ་དང་། ཁྲེལ་བ་དང་། ངོ་ཚ་བ་དང་ལྡན་ཏེ། བདག་གི་ལུས་ཀྱིས་སྐྱོ་བ་དང་ཉེ་བར་ལེན་པའི་ཕུང་པོ་ལྔ་ལ་ཤིན་ཏུ་འཇིགས་པ་སྐྱེད་པ་དང་། འཁོར་བའི་འདོད་པ་ལས་ཤིན་ཏུ་རྒལ་དཀའ་བར་ལྟ་བ་དང་། རྟག་ཏུ་དབེན་པའི་གནས་ལ་དགའ་ཞིང་འདུ་འཛི་ཡོངས་སུ་སྤོང་བ་དང་། བས་མཐའ་དགོན་པ་ལ་དགའ་ཞིང་། གཞན་གྱི་སྐྱོན་མི་གླེང་བ་དང་། དབང་པོ་རྣམས་སྡོམ་ཞིང་སེམས་རྟག་ཏུ་ཞི་བས་ཏིང་ངེ་འཛིན་དུ་བྱེད་པ་དང་། རྟེན་ཅིང་འབྲེལ་ཏེ་འབྱུང་བ་ལ་མཁས་པས་རྒྱུ་དང་འབྲས་བུ་ལ་ཤིན་ཏུ་རྟོག་པ་དང་། རྟག་ཏུ་བསམ་གཏན་ལ་མཉམ་པར་འཇོག་པར་དགའ་བ་དང་། ཀུན་ནས་ལྡང་བའི་ཆོས་ཡོངས་སུ་འགོག་པ་ལ་མཁས་པའོ། །རིགས་ཀྱི་བུ་རྒྱལ་རིགས་དགེ་བ་ནས་རྗེའུ་རིགས་དང་། དམངས་རིགས་ལ་སོགས་པའི་སྐྱེས་པ་དང་བུད་མེད་དེ་དག་གནས་པ་དང་སྤྱད་པར་བྱ་བའི་འཁོར་ལོ་བཅུ་པོ་འདི་དག་དང་ལྡན་པས་ཚེ་འདི་ཉིད་ཀྱིས་རང་སངས་རྒྱས་ཀྱི་ཐེག་པའི་རིགས་ལས་ཕྱིར་ལྡོག་ཅིང་ཉམས་པ་ཡོད་པར་མི་འགྱུར་བ་དང་། ཚེ་འདི་ཉིད་ཀྱིས་རང་སངས་རྒྱས་ཀྱི་ཐེག་པའི་འཕགས་པའི་ཆོས་མངོན་དུ་འགྱུར་བ་དང་། རང་སངས་རྒྱས་ཀྱི་ཐེག་པའི་འཕགས་པའི་ཆོས་ཀྱི་སྣོད་དུ་འགྱུར་བའོ། །རིགས་ཀྱི་བུ་འདི་དག་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་གནས་པ་དང་སྤྱད་པར་བྱ་བའི་འཁོར་ལོ་ཞེས་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་འཁོར་ལོ་འདི་ལ་གནས་ན་མྱུར་དུ་སྲིད་པ་གསུམ་གྱི་རྒྱ་མཚོ་ལས་རྒལ་ཏེ་མྱ་ངན་ལས་འདས་པའི་གྲོང་ཁྱེར་ཆེན་པོར་ཕྱིན་པར་འགྱུར་རོ། །རིགས་ཀྱི་བུ་གནས་པ་དང་སྤྱད་པར་བྱ་བའི་འཁོར་ལོ་ཞེས་བྱ་བའི་ཚིག་གི་དོན་གང་ལགས་དེ་ལ་གནས་པ་ཞེས་བྱ་བ་ནི་འཛིན་པ་དང་བཅས་པ། བདག་གི་བའི་གནས་སུ་བཅས་པ། སྡུད་པར་བྱེད་པ་དང་བཅས་པ། འབྲེལ་བར་བྱེད་པ་དང་བཅས་པའོ། །དེ་ལ་སྤྱད་པ་ཞེས་བྱ་བ་ནི་ཕུང་པོ་སྤྱོད་པ་
དང་། ཁམས་སྤྱོད་པ་དང་། སྐྱེ་མཆེད་སྤྱོད་པ་དང་། འབྲེལ་པ་དང་བཅས་པའི་སྤྱོད་པའོ། །འཁོར་ལོ་ཞེས་བྱ་བ་ནི་བསླབ་པ་དང་། དམ་ཚིག་གི་འཁོར་ལོ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་ནི་ཤིང་རྟའི་འཁོར་ལོའམ་འཁོར་ལོ་དེ་གཙོ་བོར་སྤྱོད་དོ། །དེ་བཞིན་དུ་ཉན་ཐོས་དང་། རང་སངས་རྒྱས་ཐམས་ཅད་འཁོར་ལོ་འདི་ལ་བརྟེན་ནས་མྱ་ངན་ལས་འདའ་བའི་ལམ་ཚོལ་ཏེ། དེ་བས་ན་རྣམ་པ་འདི་གཉིས་ནི་ཐེག་པ་ཆེན་པོའི་སྣོད་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི་སྤྱོད་པ་དམའ་ཞིང་ཞན་པ་ལ་བརྟེན་པས་ཐེག་པ་ཆེན་པོའི་སྣོད་མ་ཡིན་ནོ། །བདག་ཕུང་པོ་རྣམས་སྤྱོད་པ་ལ་འཛིན་པར་བྱེད་པ་དང་བཅས་པ་ལ་སྐྱོ་ཞིང་འཇིགས་ཏེ། བདག་འབའ་ཞིག་སྡུག་བསྔལ་ཐམས་ཅད་ལས་རྣམ་པར་གྲོལ་བ་ཚོལ་གྱི་སེམས་ཅན་ཐམས་ཅད་རྣམ་པར་དགྲོལ་བའི་ཕྱིར་ནན་ཏན་བྱེད་པ་མ་ཡིན་པས་ཐེག་པ་ཆེན་པོའི་སྣོད་མ་ཡིན་ནོ། །བདག་ཁམས་རྣམས་སྤྱོད་པ་ལ་གནས་སུ་བཅས་པས་སྐྱོ་ཞིང་འཇིགས་ཏེ། བདག་སྡུག་བསྔལ་ཐམས་ཅད་ལས་རྣམ་པར་གྲོལ་བ་ཚོལ་གྱི་སེམས་ཅན་ཐམས་ཅད་རྣམ་པར་དགྲོལ་བའི་ཕྱིར་ནན་ཏན་བྱེད་པ་མ་ཡིན་པས་ན་ཐེག་པ་ཆེན་པོའི་སྣོད་མ་ཡིན་ནོ། །བདག་སྐྱེ་མཆེད་མངོན་པར་འདུ་བ་རྣམས་སྤྱོད་པ་ལ་སྡུད་པར་བྱེད་པ་དང་བཅས་པས་སྐྱོ་ཞིང་འཇིགས་ཏེ། བདག་སྡུག་བསྔལ་ཐམས་ཅད་ལས་རྣམ་པར་གྲོལ་བ་ཚོལ་གྱི་སེམས་ཅན་ཐམས་ཅད་རྣམ་པར་དགྲོལ་བའི་ཕྱིར་ནན་ཏན་བྱེད་པ་མ་ཡིན་པས་ན་ཐེག་པ་ཆེན་པོའི་སྣོད་མ་ཡིན་ནོ། །དེ་དག་འབྲེལ་པ་དང་བཅས་པའི་སྤྱོད་པ་ལ་འབྲེལ་པའི་དབང་གིས་གནས་ཤིང་བརྟེན་ནས་གནས་ཤིང་བརྟེན་པ་མངོན་པར་འདུ་བྱེད་དེ་སེམས་ཅན་ཐམས་ཅད་སྡུད་པ་ལ་མི་དགའ་ཞིང་བྱམས་པ་དང་། སྙིང་རྗེ་མེད་དེ་འབྲེལ་པ་དང་བཅས་པའི་ཕྱིར་ཐེག་པ་ཆེན་པོའི་སྣོད་མ་ཡིན་ནོ། །གཞན་དག་སྡུག་བསྔལ་མང་པོ་མྱོང་བར་མཐོང་ཡང་ཡལ་བར་བཏང་སྟེ་མི་སྐྱོ་བ་ལ་བདག་འབའ་ཞིག་རྣམ་པར་གྲོལ་བ་
ཚོལ་བའི་ཕྱིར་ཐེག་པ་ཆེན་པོའི་སྣོད་མ་ཡིན་ནོ། །དེ་དག་བདག་གི་ཀུན་ནས་ཉོན་མོངས་པའི་མགོ་བཅད་པས་སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པའི་མགོ་གཅོད་པ་ལ་མི་སྤྲོ་བས་ཐེག་པ་ཆེན་པོའི་སྣོད་མ་ཡིན་ནོ། །དེ་དག་ཐེག་པ་ཆེན་པོའི་འཁོར་ལོས་བྱང་ཆུབ་ལ་འབབ་པ་མ་ཡིན་པས་ན་ཐེག་པ་ཆེན་པོའི་སྣོད་མ་ཡིན་ནོ། །དེ་དག་འོད་ཆེན་པོའི་འཁོར་ལོས་བྱང་ཆུབ་ལ་འབབ་པ་མ་ཡིན་པས་ན་ཐེག་པ་ཆེན་པོའི་སྣོད་མ་ཡིན་ནོ། །དེ་དག་གཅིག་པུ་ཟླ་མེད་པར་མྱ་ངན་ལས་འདས་པའི་གྲོང་ཁྱེར་དུ་འགྲོ་བ་ལ་དགའ་ཞིང་ནན་ཏན་བྱེད་པས་ན་ཐེག་པ་ཆེན་པོའི་སྣོད་མ་ཡིན་ནོ། །རིགས་ཀྱི་བུ་སེམས་ཅན་གང་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པའི་ཆོས་ལ་ནན་ཏན་མ་བྱས་པ་བརྩོན་འགྲུས་མ་བརྩམས་པ་དག་ནི་དབང་པོ་ཡོངས་སུ་མ་སྨིན་ཏེ། དབང་པོ་ཞན་པ། བརྩོན་འགྲུས་ཆུང་བ་དག་ལ་གལ་ཏེ་ཤིན་ཏུ་ཟབ་མོ་ཐེག་པ་ཆེན་པོའི་དམ་པའི་ཆོས་བསྟན་ན་བཤད་པ་དང་ཉན་པ་གཉི་ག་ཁ་ན་མ་ཐོ་བ་ཆེན་པོའི་སྡིག་ཐོབ་པར་འགྱུར་ཏེ་དེ་ནི་སངས་རྒྱས་ཐམས་ཅད་ལ་འཁུས་པ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་གང་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པའི་ཆོས་ལ་ནན་ཏན་མ་བྱས་ཤིང་བརྩོན་འགྲུས་མ་བརྩམས་ཏེ། དབང་པོ་ཞན་པ། བརྩོན་འགྲུས་ཆུང་བ་དག་ཤིན་ཏུ་ཟབ་པ་ཐེག་པ་ཆེན་པོའི་དམ་པའི་ཆོས་མཉན་ན་སེམས་ཅན་དེ་ནི་ཡང་དག་པར་གླེན་པ། གཏི་མུག་པ་ཡིན་ཏེ་དེ་ནི་བདག་ཤེས་པར་ཁས་འཆེ་ཡང་ཆད་པའི་མཐའ་དང་། ལོག་པའི་འདུ་ཤེས་སུ་འགྱུར་བ་དང་རྒྱུ་མེད་པར་སྨྲ་ཞིང་ལས་ཀྱི་འབྲས་བུ་རྣམས་ལ་མེད་པར་འཛིན་པས་དགེ་བ་བྱས་པ་དང་། སྡིག་པ་བྱས་པ་ཐམས་ཅད་ལ་མེད་པར་འཛིན་པ་དང་། ཐེག་པ་ཆེན་པོ་ལ་བརྫུན་དུ་སྨྲ་ཞིང་ངའི་དམ་པའི་ཆོས་མ་རུང་བར་བྱེད་པ་ཆོས་མ་ཡིན་པ་ལ་ནི་ཆོས་ཡིན་པར་འཆད་པ་ཆོས་ལ་ནི་ཆོས་མ་ཡིན་པར་འཆད་པ། དགེ་སྦྱོང་མ་ཡིན་པ་ལ་དགེ་སྦྱོང་ཡིན་པར་འཆད་པ། དགེ་སྦྱོང་ཡང་
དག་པ་ལ་ནི་དགེ་སྦྱོང་མ་ཡིན་པར་འཆད་པ་འདུལ་བ་མ་ཡིན་པ་ལ་ནི་འདུལ་བར་འཆད་པ་འདུལ་བ་ཡང་དག་པ་ལ་ནི་འདུལ་བ་མ་ཡིན་པར་འཆད་དེ། གླེན་པ་གཏི་མུག་གི་རང་བཞིན་ཅན་ང་རྒྱལ་གྱིས་མངོན་པར་ཟིན་པ། ཕྲག་དོག་དང་སེར་སྣས་ཡོངས་སུ་བསྟེན་པ་ཐེག་པ་ཆེན་པོའི་ཆོས་ལ་བསྟོད་ཅིང་སྲུང་བ་དང་ཀུན་ཏུ་རྒྱས་པར་བྱེད་ཀྱང་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པའི་ཆོས་ལ་འཕྱ་ཞིང་སྐུར་ནས་རྒྱས་པར་མི་བྱེད་དོ། །དེ་ནི་ཉན་ཐོས་ཀྱི་ཐེག་པ་དང་རང་སངས་རྒྱས་ཀྱི་ཐེག་པ་དང་། བླ་ན་མེད་པ་ཡང་དག་པའི་ཐེག་པ་ལ་བརྟེན་ཏེ། ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་ནས་བསྙེན་པར་རྫོགས་ཀྱང་དགེ་སློང་ཉིད་དུ་འགྱུར་བར་ཡང་དག་པ་ཇི་ལྟ་བ་བཞིན་དུ་མི་ཤེས་པ་དང་། དགེ་བའི་ཆོས་ཐམས་ཅད་མངོན་པར་སྡུད་པའི་རྒྱུ་ཡང་དག་པ་ཇི་ལྟ་བ་བཞིན་དུ་མི་ཤེས་པས་ངའི་སློབ་མ་ཆོས་ཀྱི་སྣོད་དུ་གྱུར་པ་དང་། ཆོས་ཀྱི་སྣོད་དུ་མ་གྱུར་པ་དང་། སློབ་པ་དང་། མི་སློབ་པ་ལ་ནན་ཏན་བྱེད་པ་དང་། མཐའི་གནས་བྱས་པའི་འབྲས་བུ་ཐོབ་པ་དང་། དགེ་བའི་སྐྱེ་བོ་ཚུལ་ཁྲིམས་སྲུང་བ་དང་། ཚུལ་ཁྲིམས་ཉམས་པ་དང་། ཚུལ་ཁྲིམས་མེད་པ་དག་ལ་རྣམ་པ་སྣ་ཚོགས་ཀྱིས་སྤྱོ་ཞིང་གཤེ་བ་དང་། གནོད་པ་བྱེད་པ་དང་། ཆོས་གོས་དང་། ལྷུང་བཟེད་འཕྲོག་པ་དང་། འཚོ་བའི་ཡོ་བྱད་ལ་སྤྱོད་དུ་མི་སྟེར་བ་དང་། བཟུང་ཞིང་བཅིང་བ་ཡང་བྱེད་དོ། །དེ་ལྟར་རྒྱུ་དང་འབྲས་བུ་ཐམས་ཅད་མེད་པར་ལྟ་ཞིང་ཆད་པར་སྨྲ་བ་དག་ནི་མིའི་ནང་ན་གནས་ཀྱང་དེ་ནི་ཡང་དག་པར་སྲིན་པོ་ཞེས་བྱ་སྟེ། མ་འོངས་པའི་དུས་ན་བསྐལ་པ་ཆེན་པོ་གྲངས་མེད་པའི་བར་དུ་ཡང་མིའི་ལུས་ཐོབ་པར་དཀའོ། །སེམས་ཅན་དམྱལ་བར་ཚད་མེད་པའི་སྡུག་བསྔལ་མྱོང་བར་ཡང་སླའི། མིའི་ནང་ན་ཆད་པར་ལྟ་བ་ནི་མ་ཡིན་ནོ། །དེ་ལྟར་གང་ཟག་གླེན་པ་དེ་ནི་རིང་པོ་མི་ཐོགས་པར་ལུས་ཀྱི་ཡན་ལག་དུམ་བུར་ཆད་ཅིང་ཉིན་ཞག་དུ་མར་ལྕེ་ལྐུགས་ཤིང་སྨྲ་མི་ནུས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་
སྡུག་བསྔལ་ཆེན་པོ་མྱོང་བ་དང་། ཚེ་འཕོས་ནས་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་ཞིང་ངན་སོང་ཀུན་ཏུ་འཁོར་ལོ་བཞིན་དུ་འཁོར་ལ་སྡུག་བསྔལ་མང་པོ་ལེན་ཏེ་ཐར་བའི་དུས་མེད་དོ། །བསྐལ་པ་བརྒྱ་སྟོང་གི་བར་དུ་ཡང་མིའི་ལུས་ཐོབ་པར་དཀའོ། །གལ་ཏེ་བསྐལ་པ་ཚད་མེད་གྲངས་མེད་པ་འདས་ནས་མིའི་ལུས་ཐོབ་ན་ཡང་སངས་རྒྱས་མི་བཞུགས་པ་རྙོག་པ་ལྔའི་འཇིག་རྟེན་གྱི་ཁམས་སུ་སྐྱེ་སྟེ་དམུས་ལོང་དུ་འགྱུར་བ་དང་། འོན་པ་དང་། ལྐུགས་པ་དང་། ལྕེ་མེད་པ་དང་། ནད་རྣམ་པ་སྣ་ཚོགས་ཀྱིས་གཟིར་བ་དང་། ལུས་ཐུང་ཞིང་མི་སྡུག་པས་ཀུན་གྱི་ཡིད་དུ་མི་འོང་བ་དང་། སྨྲ་མི་མཁས་ཤིང་ཚིག་རྣར་མི་འོང་བ་དང་། སེམས་རྟག་ཏུ་མྱོས་ཤིང་ཅི་ཡང་མི་ཤེས་པ་དང་། དབུལ་ཕོངས་པའི་རིགས་སུ་སྐྱེས་ནས་ཅི་ཡང་མི་རྙེད་པ་དང་། དགེ་བའི་བཤེས་གཉེན་དང་མི་ཕྲད་པ་དང་། སྡིག་པའི་བཤེས་གཉེན་གྱི་རྗེས་སུ་སྡིག་པའི་ལས་བྱེད་པ་ལ་དགའ་བ་དང་། ངན་པར་ལྟ་བ་ལ་ཆགས་ཤིང་། མཚམས་མེད་པའི་སྡིག་པ་བྱེད་པ་ལ་དགའ་བས་ཕྱིར་ཡང་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་ཏེ། ངན་སོང་ལས་ཤིན་ཏུ་ཐར་བར་དཀའོ། །དེ་ལྟར་གླེན་པ་གཏི་མུག་ཅན་ཆད་པ་དང་། འགོག་པར་སྨྲ་བ་དེས་ངའི་དམ་པའི་ཆོས་མ་རུང་བར་བྱས་ནས་ངའི་སློབ་མ་ཚུལ་ཁྲིམས་སྲུང་བ་དང་། ཚུལ་ཁྲིམས་ཉམས་པ་དང་། ཚུལ་ཁྲིམས་མེད་པ་ལ་ནན་ཏན་གྱིས་ཆད་པས་གཅོད་ཅིང་དགེ་བའི་ཕྱོགས་ལ་བདེ་བར་སྤྱོད་དུ་མི་སྟེར་ཏེ། དེའི་རྒྱུ་དེའི་རྐྱེན་གྱིས་བསྐལ་པ་བརྒྱ་སྟོང་གི་བར་དུ་ངན་སོང་དུ་ལྷུང་ནས་མུན་པ་ནས་མུན་པར་རྒྱུ་སྟེ། ཐར་བའི་དུས་མེད་དོ། །དེ་ལྟར་སེམས་ཅན་དེའི་སྡིག་པ་རྣམ་པར་སྨིན་པ་ནི་ཉན་ཐོས་དང་རང་སངས་རྒྱས་ཀྱི་ཐེག་པའི་ཆོས་མཉན་པ་ལ་ནན་ཏན་མ་བྱས་པར་ཤིན་ཏུ་ཟབ་པ་ཐེག་པ་ཆེན་པོའི་དམ་པའི་ཆོས་ལ་ཉན་ཅིང་ནན་ཏན་བྱེད་པ་ལ་རྩོལ་བའི་ཕྱིར་རོ། །དེ་ལྟར་གླེན་པ་གཏི་མུག་ཅན་ཆད་པར་ལྟ་བར་སྨྲ་བ་དེ་མི་མ་རབས་ཐ་མའི་
ལུས་ཀྱང་ཐོབ་པར་དཀའ་ན་འཕགས་པའི་ཆོས་ཀྱི་སྣོད་དུ་འགྱུར་བ་ལྟ་ཅི་སྨོས། ཉན་ཐོས་དང་། རང་སངས་རྒྱས་ཀྱི་མྱ་ངན་ལས་འདའ་བ་ཡང་མི་ཐོབ་ན་ཤིན་ཏུ་ཟབ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་ལྟ་ཅི་སྨོས་ཏེ། སེམས་ཅན་དེའི་ཉེས་པ་ནི་ཉན་ཐོས་ཀྱི་ཐེག་པའི་ཆོས་དང་། རང་སངས་རྒྱས་ཀྱི་ཐེག་པའི་ཆོས་མ་བསླབས་པར་ཐེག་པ་ཆེན་པོའི་ཆོས་ལ་ཞུགས་པར་གྱུར་པའི་ཕྱིར་རོ། །རིགས་ཀྱི་བུ་འདི་ལྟ་སྟེ། རྫ་སོ་མ་བཏང་བའི་ནང་དུ་མར་དང་འོ་མ་བླུགས་ན་ཐམས་ཅད་འཐུངས་ནས་སྣོད་དང་བཅུད་གཉི་ག་མ་རུང་བར་བྱེད་དོ། །དེ་ཅིའི་ཕྱིར་ཞེ་ན། སྣོད་ལ་སྐྱོན་ཡོད་པའི་ཕྱིར་རོ། །དེ་བཞིན་དུ་སེམས་ཅན་དག་ཀྱང་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པའི་ཆོས་ལ་ཤིན་ཏུ་ནན་ཏན་མ་བྱས་པ་ཡང་དག་པའི་བརྩོན་འགྲུས་མ་བརྩམས་པ་དབང་པོ་ཡོངས་སུ་མ་སྨིན་པ་དབང་པོ་ཞན་པ། བརྩོན་འགྲུས་ཆུང་བ་དག་ལ་གང་གིས་ཤིན་ཏུ་ཟབ་པ་ཐེག་པ་ཆེན་པོའི་དམ་པའི་ཆོས་བཤད་ན་བཤད་པ་དང་ཉན་པ་གཉི་ག་ཁ་ན་མ་ཐོ་བ་ཆེན་པོའི་སྡིག་ཐོབ་པར་འགྱུར་ཏེ་སངས་རྒྱས་ཐམས་ཅད་ལ་འཁུས་པའི་སྐྱོན་དུ་འགྱུར་བ་ནི་གོང་དུ་རྒྱས་པར་བཤད་པ་བཞིན་ནོ། །ཡང་འདི་ལྟ་སྟེ་འཇིག་རྟེན་པའི་བང་མཛོད་ཟག་པ་ཞིག་རལ་ཅན་གྱི་ནང་དུ་ནོར་རིན་པོ་ཆེ་བཅུག་ན་ཆུད་ཟོས་ཤིང་སྟོར་བར་འགྱུར་རོ། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་འཕྱ་ཞིང་སྐུར་ཏེ་མ་དད་པ་ནན་ཏན་དུ་མི་སློབ་པ་དག་ལ་ཐེག་པ་ཆེན་པོ་བཤད་ན་ཡང་དག་པ་ཇི་ལྟ་བ་བཞིན་དུ་མི་ཤེས་ཏེ། དེའི་དབང་གིས་སྡིག་བྱེད་ཅིང་འཁོར་བའི་མཐའ་ཟད་མི་ཤེས་པར་འགྱུར་རོ། །འདི་ལྟ་སྟེ་གྲུ་ཟག་པ་བུག་རྡོལ་ཅན་སྐྱེད་པ་དང་འདེག་པ་མི་ནུས་པ་ལ་ཞོན་ཏེ། རྒྱ་མཚོའི་ནང་དུ་འཇུག་པ་དེ་བཞིན་དུ་སེམས་ཅན་གང་སེར་སྣ་དང་ཕྲག་དོག་གི་དབང་དུ་གྱུར་པ་ཐེག་པ་གཉིས་ཀྱི་ཆོས་ལ་ནན་ཏན་མ་བྱས་པར་བདག་ནི་ཐེག་པ་ཆེན་པོ་པ་ཡིན་ནོ་ཞེས་ཁས་འཆེ་བ་དེ་ནི་ཆད་པར་ལྟ་བ། ང་རྒྱལ་ཅན་གཡོ་དང་སྒྱུས་ཟག་པ་ཅན་དུ་གྱུར་པའི་ལུས་ཀྱིས་
ཐམས་ཅད་མཁྱེན་པའི་རྒྱ་མཚོར་འཇུག་མི་ནུས་སོ། །འདི་ལྟ་སྟེ་གང་ཟག་དམུས་ལོང་དུ་གྱུར་པ་ནི་རིན་པོ་ཆེ་རྣམ་པ་སྣ་ཚོགས་བསྟན་པའི་གནས་སུ་མི་འགྱུར་རོ། །དེ་བཞིན་དུ་ང་རྒྱལ་གྱི་དབང་དུ་གྱུར་པ་བག་མེད་པ་སྟོང་པར་ལྟ་བ་ལ་ཆགས་ཤིང་ཐེག་པ་གཉིས་མི་སློབ་པའི་ཤེས་རབ་ཀྱི་མིག་མེད་པས་དམུས་ལོང་དུ་གྱུར་པ་ལ་ནི་བླ་ན་མེད་པའི་ཐེག་པ་ཆེན་པོའི་ཡོན་ཏན་རིན་པོ་ཆེ་བསྟན་པའི་གནས་སུ་མི་འགྱུར་རོ། །འདི་ལྟ་སྟེ་ལུས་ཤིན་ཏུ་མནམ་ཞིང་རུལ་བར་གྱུར་པ་ལ་བྱུག་པ་དྲི་ཞིམ་པ་རྣམ་པ་སྣ་ཚོགས་ཀྱིས་བྱུགས་ཀྱང་དྲི་ཞིམ་པར་མི་འགྱུར་རོ། །དེ་བཞིན་དུ་སེམས་ཅན་གླེན་པ་གཏི་མུག་ཅན་ང་རྒྱལ་གྱིས་མངོན་པར་ཟིན་པ། ཐེག་པ་གཉིས་ཀྱི་ཆོས་ལ་བརྩོན་པར་མ་དད་ཅིང་སྲོག་གཅོད་པ་མ་སྤངས་པ་ནས་ལོག་པར་ལྟ་བའི་བར་དུ་མ་སྤངས་པ་དེ་དག་ནི་བླ་ན་མེད་པའི་ཐེག་པ་ཆེན་པོ་ལ་ནན་ཏན་བྱེད་ཀྱང་ཤིན་ཏུ་ཟབ་མོའི་ཆོས་ཤེས་པར་མི་ནུས་སོ། །འདི་ལྟ་སྟེ་གྲམ་ཁྲོད་དུ་ས་བོན་བཟང་པོ་བཏབ་སྟེ་ཤིན་ཏུ་ལས་ཆེར་བྱས་ཀྱང་འབྲས་བུ་དང་ལོ་ཏོག་རྙེད་པར་མི་འགྱུར་རོ། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ང་རྒྱལ་དང་། ལེ་ལོ་བྱེད་དེ་ནན་ཏན་མི་བྱེད་པ་དང་། འདོད་པ་ལྔ་ལ་ཆགས་ཏེ་མི་སྐྱོ་བ་དག་ལུས་དེ་ཉིད་ལ་ཐེག་པ་ཆེན་པོའི་རིགས་སུ་ཤིན་ཏུ་སྤྱད་དཀའ་བའི་བརྩོན་འགྲུས་བྱས་ཀྱང་ཅིར་ཡང་འགྲུབ་པའི་དོན་མེད་དོ། །འདི་ལྟ་སྟེ་རྫ་མ་སྔར་དུག་གི་སྣོད་བྱས་པའི་ནང་དུ་ཕྱིས་ཤ་ཁ་ར་ཆུང་ཟད་ཙམ་བཏབ་པས་སྤྱད་དུ་མི་རུང་ངོ་། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ནན་ཏན་མི་བྱེད་པ་རྒྱུ་མེད་པར་སྨྲ་བ་ལ་ཐེག་པ་ཆེན་པོ་བསྟན་ཀྱང་བདག་དང་གཞན་ལ་ཕན་པའི་དོན་དུ་མི་འགྱུར་རོ། །འདི་ལྟ་སྟེ་སྔར་ཤ་ཁ་རའི་སྣོད་བྱས་པའི་རྫ་མའི་ནང་དུ་ཕྱིས་དུག་ཅུང་ཟད་བཏབ་ན་ཡང་སྤྱད་དུ་མི་རུང་ངོ་། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ནན་ཏན་མ་བྱས་པར་ཐེག་པ་ཆེན་པོ་སྟོན་ན་གཉི་ག་ཉམས་ཤིང་འཁྱམས་པར་འགྱུར་རོ། །འདི་ལྟ་སྟེ་དཔེར་ན་སྨྱོས་ཤིང་སེམས་འཁྲུགས་པའི་མདུན་
དུ་རོལ་མོ་སྣ་ཚོགས་བྱས་ཀྱང་བྱེ་བྲག་མི་ཕྱེད་པ་དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ཤིན་ཏུ་ནན་ཏན་མ་བྱས་པ་འདོད་ཆགས་དང་། ཞེ་སྡང་དང་། གཏི་མུག་ལ་སོགས་པའི་ཉོན་མོངས་པ་དྲག་པོས་སེམས་བསླད་པས་རྒྱུ་མེད་པར་འཛིན་པ། ཆད་པ་དང་མེད་པར་སྨྲ་བ། དབང་པོ་མ་སྨིན་པ་དག་ལ་ཐེག་པ་ཆེན་པོ་ཡུན་རིང་མོ་ཞིག་ཏུ་བཤད་ཀྱང་ཤེས་པར་རམ་རྟོགས་པར་མི་ནུས་སོ། །འདི་ལྟ་སྟེ། གང་ཞིག་གོ་ཆ་མེད་དེ་མཚོན་ཆ་མི་ཐོགས་པར་གཡུལ་ངོར་སོང་ན་གདོན་མི་ཟ་བར་རྨས་ཤིང་སྡུག་བསྔལ་མྱོང་བར་འགྱུར་རོ། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ནན་ཏན་མ་བྱས་པ་ཤེས་རབ་ཞན་པ། དབང་པོ་དང་སྣོད་དུ་མ་གྱུར་པ་དག་ལ་ཐེག་པ་ཆེན་པོ་བཤད་ན་གདོན་མི་ཟ་བར་ལོག་པར་འཛིན་པའི་ཕྱིར་སྡིག་པའི་ལས་ཀུན་བྱེད་པ་ལ་ཟད་པའི་མཐའ་མེད་དོ། །དེ་ལྟར་གླེན་པ་གཏི་མུག་ཅན་དེ་རིང་པོ་མི་ཐོགས་པར་ལུས་ཀྱི་ཡན་ལག་དུམ་བུར་ཆད་པ་ཉིན་ཞག་དུ་མར་ལྕེ་ལྐུགས་ཤིང་སྨྲ་མི་ནུས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང་འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་སྐྱེ་སྟེ་ངན་སོང་རྣམས་སུ་འཁོར་ཞིང་འཇུག་པ་ནི་ཇི་ལྟར་སྔར་རྒྱས་པར་བཤད་པ་བཞིན་ནོ། །རིགས་ཀྱི་བུ་དེ་བས་ན་མཁས་པ་དག་ནི་སྔར་ཕ་རོལ་པོའི་སེམས་བརྟགས་ཏེ་གདོད་ཆོས་བསྟན་པར་བྱའོ། །སྔར་བྱམས་པའི་སེམས་དང་། སྙིང་རྗེའི་སེམས་དང་། དགའ་བའི་སེམས་དང་། ཕན་པའི་སེམས་དང་། ལེ་ལོ་མེད་པའི་སེམས་དང་། ཤིན་ཏུ་བཟོད་པའི་སེམས་དང་། ང་རྒྱལ་མེད་པའི་སེམས་དང་། ཕྲག་དོག་མེད་པའི་སེམས་དང་། འཇུངས་པ་མེད་པའི་སེམས་དང་། མཉམ་པར་གཞག་པའི་ཏིང་ངེ་འཛིན་གྱི་སེམས་བསྐྱེད་ནས་གདོད་ཕ་རོལ་པོ་ལ་དམ་པའི་ཆོས་བསྟན་པར་བྱའི། སེམས་ཅན་ཕ་རོལ་པོས་ཆོས་ཐོས་ནས་འཁོར་བར་འཁོར་བའི་གཡང་ས་ཆེན་པོར་ལྷུང་བར་མི་བྱའོ། །དེ་བས་ན་དེ་བཞིན་
གཤེགས་པ་ནི་སེམས་ཅན་ཐམས་ཅད་ཀྱི་སེམས་ཀྱི་མཚན་ཉིད་ཐུགས་སུ་ཆུད་ནས་དྲི་མ་མེད་པ་མི་ལེན་པར་སྤྱོད་པའི་འཁོར་ལོས་དམ་པའི་ཆོས་སྟོན་ཏེ། གོ་ཆ་ཆེན་པོ་བགོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཞན་ལ་ཆོས་སྟོན་པ་ཡང་དེ་བཞིན་ཏེ། བྱམས་ཤིང་བརྩེ་བའི་ཕྱིར་ཉོན་མོངས་པ་ཐམས་ཅད་ཡོངས་སུ་གཅད་པ་དང་། སྲིད་པ་གསུམ་གྱི་རྒྱ་མཚོ་ལས་བསྒྲལ་བ་དང་། སེམས་ཅན་དག་ཐེག་པ་གསུམ་གང་ལ་དད་པའི་ཐེག་པ་གཅིག་ལ་འཛུད་ཅིང་མྱུར་དུ་རྫོགས་པར་བྱ་བའི་ཕྱིར་དམ་པའི་ཆོས་སྟོན་གྱི། འཁོར་བར་འཁོར་བའི་གཡང་ས་ཆེན་པོར་ལྟུང་བར་ནི་ནམས་ཀྱང་མི་བྱེད་དོ། །དེ་ལ་ཇི་ལྟར་ན་དྲི་མ་མེད་པར་སྤྱོད་པའི་འཁོར་ལོ་ཞེས་བྱ་ཞེ་ན། དེ་ལ་དྲི་མ་མེད་པ་ཞེས་བྱ་བ་ནི་ཆོས་སྟོན་པའི་ཚེ་ན་ཕུང་པོ་ཡོད་པའི་ཕྱིར་མ་ཡིན། སྐྱེ་མཆེད་ཡོད་པའི་ཕྱིར་མ་ཡིན། ཁམས་ཡོད་པའི་ཕྱིར་མ་ཡིན། འདོད་པའི་ཁམས་ཡོད་པའི་ཕྱིར་མ་ཡིན། གཟུགས་ཡོད་པའི་ཁམས་ཡོད་པའི་ཕྱིར་མ་ཡིན། གཟུགས་མེད་པའི་ཁམས་ཡོད་པའི་ཕྱིར་མ་ཡིན། འཇིག་རྟེན་འདི་ཡོད་པའི་ཕྱིར་མ་ཡིན། འཇིག་རྟེན་ཕ་རོལ་པོ་ཡོད་པའི་ཕྱིར་མ་ཡིན། འདུ་བྱེད་ཡོད་པའི་ཕྱིར་མ་ཡིན། ཚོར་བ་ཡོད་པའི་ཕྱིར་མ་ཡིན། འདུ་ཤེས་ཡོད་པའི་ཕྱིར་མ་ཡིན། རྟོག་པ་ཡོད་པའི་ཕྱིར་མ་ཡིན། རིག་པ་ཡོད་པའི་ཕྱིར་མ་ཡིན། ཡིད་ལ་བྱ་བ་ཡོད་པའི་ཕྱིར་མ་ཡིན། མ་རིག་པ་ཡོད་པའི་ཕྱིར་མ་ཡིན་པ་ནས་རྒ་ཤིའི་བར་དུ་ཡོད་པའི་ཕྱིར་མ་ཡིན། འགྲོ་བ་ཡོད་པ་དང་། འགྲོ་བ་མེད་པའི་ཕྱིར་སེམས་ཅན་ལ་དམ་པའི་ཆོས་སྟོན་པ་མ་ཡིན་ནོ། །འདི་ལྟ་སྟེ། ཕུང་པོ་དང་། ཁམས་དང་། སྐྱེ་མཆེད་ནས་འགྲོ་བ་དང་། འགྲོ་བ་མེད་པའི་བར་དུ་རྒྱས་པར་བཤད་པ་ཀུན་ཀྱང་རབ་ཏུ་ཞི་བས་སེམས་ཅན་ལ་དམ་པའི་ཆོས་སྟོན་ཏོ། །དེ་ལྟ་བས་ན་དྲི་མ་མེད་པ་ཞེས་བྱའོ། །སྤྱོད་པ་ཞེས་བྱ་བ་ནི་འདི་ལྟ་སྟེ། འདི་ནས་འཆི་འཕོ་བ་དང་ཕ་རོལ་དུ་སྐྱེ་བ་ཡོངས་སུ་གཅད་པའི་ཕྱིར་སེམས་ཅན་དག་ལ་
ཆོས་སྟོན་ཏོ། །ཕུང་པོ་དང་། ཁམས་དང་། སྐྱེ་མཆེད་ཡོངས་སུ་གཅད་པ་ནས་དེ་བཞིན་དུ་འགྲོ་བ་དང་མི་འགྲོ་བའི་བར་དུ་རྒྱས་པར་ཡོངས་སུ་གཅོད་པའི་ཕྱིར་སེམས་ཅན་རྣམས་ལ་ཆོས་སྟོན་པ་ནི་སྤྱོད་པ་ཞེས་བྱའོ། །འཁོར་ལོ་ཞེས་བྱ་བ་ནི་འདི་ལྟ་སྟེ། ཟླ་བ་ཉ་བའི་འོད་ཤིན་ཏུ་སིམ་ཞིང་གསལ་བ་ཐོགས་པ་མེད་པར་ནམ་མཁའ་ལ་སྣང་བས་ཐམས་ཅད་དུ་ཐོགས་པ་མེད་པའི་སྤྱོད་ཡུལ་དུ་འགྱུར་བ་དེ་བཞིན་དུ་དེ་བཞིན་གཤེགས་པ་དང་། བྱང་ཆུབ་སེམས་དཔའ་རྣམས་ཀྱི་ཇི་སྙེད་རྫུ་འཕྲུལ་དང་། མངོན་པར་ཤེས་པ་དང་། ཤེས་པ་བརྡ་སྤྲོད་པ་དང་། བསླབ་པར་བྱ་བ་དང་། རྣམ་པར་རྒྱལ་བའི་འཁོར་ལོ་གསུམ་པོས་མཛད་པ་ཐོགས་པ་མེད་པར་འཇིག་རྟེན་གྱི་ཁམས་ཀུན་ཏུ་སྣོད་དུ་གྱུར་པའི་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་སེམས་ཅན་དག་གཞན་ལ་སྐྱབས་སུ་འགྲོ་བ་དང་། འཇིག་རྟེན་རྒྱང་པན་པ་ཐམས་ཅད་དང་མ་འདྲེས་པ་དང་། ཉན་ཐོས་དང་། རང་སངས་རྒྱས་ཐམས་ཅད་དང་མ་འདྲེས་པར་སེམས་ཅན་དག་འཁོར་བའི་སྡུག་བསྔལ་ཐམས་ཅད་བཅད་དེ། ཤིན་ཏུ་བདེ་བའི་བྱང་ཆུབ་ཀྱི་མྱ་ངན་ལས་འདའ་བ་ཐོབ་པར་བྱེད་པ་ནི་འཁོར་ལོ་ཞེས་བྱའོ། །དེ་ལྟར་ན་དེ་དག་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དྲི་མ་མེད་པར་སྤྱོད་པའི་འཁོར་ལོ་ཞེས་བྱའོ། །དེ་ལ་ཇི་ལྟར་ན་མི་ལེན་པར་སྤྱོད་པའི་འཁོར་ལོ་ཞེ་ན། ཆོས་ཐམས་ཅད་ལ་ཐོགས་པ་མེད་པར་ཇི་ལྟར་ཉི་མའི་དཀྱིལ་འཁོར་ཀུན་ཏུ་སྣང་བ་བཞིན་དུ་ཐེག་པ་གསུམ་གྱི་དབང་པོ་དང་སྣོད་ཇི་ལྟ་བ་བཞིན་དུ་ཆགས་པ་མེད་པར་དམ་པའི་ཆོས་སྟོན་ཏོ། །དེ་བཞིན་གཤེགས་པ་སེམས་ཅན་རྣམས་ལ་ཆོས་སྟོན་པ་ནི་ཇི་ལྟར་ནམ་མཁའ་ཐ་དད་པའི་མཚན་ཉིད་མེད་པ་ལྟར་ཚད་མེད་པའི་ཏིང་ངེ་འཛིན་དང་། རྣམ་པར་གྲོལ་བའི་དབང་དང་། བཀོད་པས་ཡོངས་སུ་ཟིན་པར་སེམས་ཅན་དག་ལ་ཆགས་པ་མེད་པར་དམ་པའི་ཆོས་སྟོན་ཏོ། །གོ་ཆ་ཆེན་པོ་བགོས་པའི་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཕ་རོལ་ལ་ཆོས་སྟོན་པ་ཡང་དེ་དང་འདྲ་སྟེ། ཆོས་སྟོན་པ་ནི་ཡོད་པ་ཡང་མ་ཡིན། མེད་པ་ཡང་མ་ཡིན། གཟུགས་ཉིད་སྟོང་པ་མ་ཡིན། གཟུགས་ལས་གཞན་པ་སྟོང་པ་མ་ཡིན་པ་ནས་རྣམ་པར་ཤེས་པ་ཉིད་ཀྱི་བར་དུ་སྟོང་པ་མ་ཡིན། རྣམ་པར་ཤེས་པ་ལས་གཞན་པ་སྟོང་པ་མ་ཡིན་ནོ། །མིག་ཉིད་སྟོང་པ་མ་ཡིན། མིག་ལས་གཞན་པ་སྟོང་པ་མ་ཡིན་པ་ནས་ཡིད་ཉིད་ཀྱི་བར་དུ་སྟོང་པ་མ་ཡིན། ཡིད་ལས་གཞན་པ་སྟོང་པ་མ་ཡིན་ནོ། །གཟུགས་ཉིད་སྟོང་པ་མ་ཡིན། གཟུགས་ལས་གཞན་པ་སྟོང་པ་མ་ཡིན་པ་ནས་ཆོས་ཉིད་ཀྱི་བར་དུ་སྟོང་པ་མ་ཡིན། ཆོས་ལས་གཞན་པ་སྟོང་པ་མ་ཡིན་ནོ། །མིག་གི་རྣམ་པར་ཤེས་པ་ཉིད་སྟོང་པ་མ་ཡིན། མིག་གི་རྣམ་པར་ཤེས་པ་ལས་གཞན་པ་སྟོང་པ་མ་ཡིན་པ་ནས་ཡིད་ཀྱི་རྣམ་པར་ཤེས་པ་ཉིད་ཀྱི་བར་དུ་སྟོང་པ་མ་ཡིན་ནོ། །ཡིད་ཀྱི་རྣམ་པར་ཤེས་པ་ལས་གཞན་པ་སྟོང་པ་མ་ཡིན་ནོ། །འདོད་པའི་ཁམས་ཉིད་སྟོང་པ་མ་ཡིན། འདོད་པའི་ཁམས་ལས་གཞན་པ་སྟོང་པ་མ་ཡིན་པ་ནས་ནམ་མཁའ་མཐའ་ཡས་སྐྱེ་མཆེད་སྟེངས་ཉིད་སྟོང་པ་མ་ཡིན། ནམ་མཁའ་མཐའ་ཡས་སྐྱེ་མཆེད་སྟེངས་ལས་གཞན་པ་སྟོང་པ་མ་ཡིན་ནོ། །རྣམ་ཤེས་མཐའ་ཡས་སྐྱེ་མཆེད་སྟེངས་ཉིད་སྟོང་པ་མ་ཡིན། རྣམ་ཤེས་མཐའ་ཡས་སྐྱེ་མཆེད་སྟེངས་ལས་གཞན་པ་སྟོང་པ་མ་ཡིན། ཅུང་ཟད་མེད་པའི་སྐྱེ་མཆེད་སྟེངས་ཉིད་སྟོང་པ་མ་ཡིན། ཅུང་ཟད་མེད་པའི་སྐྱེ་མཆེད་སྟེངས་ལས་གཞན་པ་སྟོང་པ་མ་ཡིན་ནོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཉིད་སྟོང་པ་མ་ཡིན། འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལས་གཞན་པ་སྟོང་པ་མ་ཡིན་ནོ། །དྲན་པ་ཉེ་བར་གཞག་པ་བཞི་ཉིད་སྟོང་པ་མ་ཡིན། དྲན་པ་ཉེ་བར་གཞག་པ་བཞི་ལས་གཞན་པ་སྟོང་པ་མ་ཡིན་པ་ནས་འཕགས་པའི་ལམ་ཡན་ལག་བརྒྱད་པ་ཉིད་ཀྱི་བར་དུ་སྟོང་པ་མ་ཡིན། འཕགས་པའི་ལམ་ཡན་ལག་བརྒྱད་པ་ལས་གཞན་པ་སྟོང་པ་མ་ཡིན་ནོ། །
རྟེན་ཅིང་འབྲེལ་ཏེ་འབྱུང་བ་ཉིད་སྟོང་པ་མ་ཡིན། རྟེན་ཅིང་འབྲེལ་ཏེ་འབྱུང་བའི་ཆོས་ལས་གཞན་པ་སྟོང་པ་མ་ཡིན་ནོ། །བསྲུང་བར་བྱ་བ་གསུམ་པོ་ཉིད་སྟོང་པ་མ་ཡིན། བསྲུང་བར་བྱ་བ་གསུམ་པོ་ལས་གཞན་པ་སྟོང་པ་མ་ཡིན་ནོ། །འཇིགས་པ་མེད་པ་བཞི་ཉིད་སྟོང་པ་མ་ཡིན། །འཇིགས་པ་མེད་པ་བཞི་ལས་གཞན་པ་སྟོང་པ་མ་ཡིན་ནོ། །སྟོབས་བཅུ་ཉིད་སྟོང་པ་མ་ཡིན། སྟོབས་བཅུ་ལས་གཞན་པ་སྟོང་པ་མ་ཡིན་ནོ། །མ་འདྲེས་པའི་ཆོས་བཅྭ་བརྒྱད་ཉིད་སྟོང་པ་མ་ཡིན། མ་འདྲེས་པའི་ཆོས་བཅྭ་བརྒྱད་ལས་གཞན་པ་སྟོང་པ་མ་ཡིན་ནོ། །བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ཉིད་སྟོང་པ་མ་ཡིན། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ལས་གཞན་པ་སྟོང་པ་མ་ཡིན་ནོ། །མྱ་ངན་ལས་འདའ་བ་ཉིད་སྟོང་པ་མ་ཡིན། མྱ་ངན་ལས་འདས་པ་ལས་གཞན་པ་སྟོང་པ་མ་ཡིན་ནོ། །དེ་དག་ནི་དེ་བཞིན་གཤེགས་པ་དང་། བྱང་ཆུབ་སེམས་དཔའ་རྣམས་ཀྱི་སེམས་ཅན་རྣམས་ལ་དམ་པའི་ཆོས་སྟོན་པ་ལ་དབུ་མའི་ནན་ཏན་ཞེས་བྱའོ། །རིགས་ཀྱི་བུ་དེ་ལྟར་ན་དེ་བཞིན་གཤེགས་པས་སེམས་ཅན་དག་ལ་དྲི་མ་མེད་པར་སྤྱོད་པའི་འཁོར་ལོས་ཆོས་སྟོན་ཏེ། ཇི་ལྟར་ཟླ་བ་ཉ་བའི་འོད་ཤིན་ཏུ་གསལ་ཞིང་སིམ་པ་དང་། ཐོགས་པ་མེད་པར་ནམ་མཁའ་ཀུན་ཏུ་ཁྱབ་པ་དང་། སྤྱོད་ཡུལ་ཐམས་ཅད་དུ་ཐོགས་པ་མེད་པར་སྣང་བ་ནས་གཞུང་དེ་བཞིན་དུ་རྒྱས་པར་སྟོན་ཏོ། །དང་དུ་མི་ལེན་པར་སྤྱོད་པའི་འཁོར་ལོས་ཀྱང་དམ་པའི་ཆོས་སྟོན་ཅིང་ཆོས་ཐམས་ཅད་ལ་ཐོགས་པ་མེད་པ་ནི་ཇི་ལྟར་ཉི་མའི་འོད་ཀུན་ཏུ་གསལ་བ་ལྟར་ཐེག་པ་གསུམ་གྱི་སྣོད་དང་། དབང་པོ་ཇི་ལྟ་བ་བཞིན་དུ་དམ་པའི་ཆོས་ཆགས་པ་མེད་པར་སྟོན་ཏོ། །དེ་བཞིན་གཤེགས་པས་སེམས་ཅན་དག་ལ་ཆོས་སྟོན་པ་ནི། ཇི་ལྟར་ནམ་མཁའ་ལ་མཚན་ཉིད་ཐ་དད་པ་མེད་པ་ལྟར་ཏིང་ངེ་འཛིན་
ཚད་མེད་པས་རྣམ་པར་རོལ་པའི་དབང་དང་། བཀོད་པས་ཡོངས་སུ་བཟུང་བས། སེམས་ཅན་དག་ལ་ཆགས་པ་མེད་པར་དམ་པའི་ཆོས་སྟོན་ཏེ། ཐེག་པ་གསུམ་ལས་གང་དང་འཐུན་པ་བཞིན་དུ་འཛུད་དོ། །གོ་ཆ་ཆེན་པོ་བགོས་པའི་བྱང་ཆུབ་སེམས་དཔའ་སེམས་དཔའ་ཆེན་པོས། གཞན་ལ་ཆོས་སྟོན་པ་ཡང་དེ་བཞིན་ཏེ། སེམས་ཅན་རྣམས་ལ་མཆོག་དམ་པ་ཤིན་ཏུ་ཟབ་པའི་ཆོས་འདི་ཐོས་པར་བྱས་ཏེ། ཐེག་པ་གསུམ་ལས་གང་ལ་མོས་པ་དེ་གཅིག་ལ་འཛུད་ཅིང་། དགེ་བའི་རྩ་བ་ཡོངས་སུ་སྨིན་པར་བྱ་བ་དང་། ཐེག་པ་གཅིག་ལ་བདེ་བར་དགོད་པ་དང་། གང་འཁོར་བའི་གནས་སུ་སྡིག་པ་མི་དགེ་བའི་ལས་རྣམ་པ་ཐམས་ཅད་འཕེལ་བར་མི་བྱེད་ཅིང་། ཐམས་ཅད་མྱ་ངན་ལས་འདའ་བ་ཤིན་ཏུ་བརྟན་པ་དང་། ཕྱིར་མི་ལྡོག་པར་ཡང་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི་སེམས་ཅན་གྲངས་མེད་ཚད་མེད་པའི་འཁོར་བ་ཡོངས་སུ་གཅད་པའི་ཕྱིར་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། བདག་གི་འཁོར་བ་འབའ་ཞིག་གཅད་པའི་ཕྱིར་ཕ་རོལ་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཚད་མེད་གྲངས་མེད་པ་དག །ཆུ་བོ་བཞི་ལས་བསྒྲལ་བའི་ཕྱིར་གཞན་ལ་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། བདག་ཆུ་བོ་བཞི་ལས་བསྒྲལ་བའི་ཕྱིར་གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཚད་མེད་གྲངས་མེད་པའི་ཉོན་མོངས་པའི་ནད་བསལ་བའི་ཕྱིར། གཞན་ལ་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། བདག་ཉིད་ཀྱི་ཉོན་མོངས་པའི་ནད་བསལ་བའི་ཕྱིར། གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཐམས་ཅད་ཀྱི་ཕུང་པོའི་ཉོན་མོངས་པའི་བག་ཆགས་ཀྱི་རྒྱུན་ལྷག་མ་མ་ལུས་པར་གཅད་པའི་ཕྱིར། གཞན་ལ་ཆོས་སྟོན་ཏོ། །ཉན་
ཐོས་དང་། རང་སངས་རྒྱས་ནི། བདག་འབའ་ཞིག་གི་ཕུང་པོའི་ཉོན་མོངས་པའི་བག་ཆགས་ཀྱི་རྒྱུན་ལྷག་མ་མ་ལུས་པར་གཅད་པའི་ཕྱིར། གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི། སྙིང་རྗེ་ཆེན་པོའི་འབྲས་བུ་བསྒྲུབ་པའི་ཕྱིར། སྙིང་རྗེ་ཆེན་པོས་རྒྱུ་བྱས་ཏེ། གཞན་ལ་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། སྙིང་རྗེ་ཆེན་པོའི་འབྲས་བུའི་ཕྱིར་སྙིང་རྗེ་ཆེན་པོས་རྒྱུ་བྱས་ཏེ། གཞན་ལ་ཆོས་སྟོན་པ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཐམས་ཅད་ལ་དམིགས་ཏེ། གཞན་ལ་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། སེམས་ཅན་རྣམས་ལ་དམིགས་པ་མེད་པར་གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱ་བའི་ཕྱིར། གཞན་ལ་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། བདག་འབའ་ཞིག་གི་སྡུག་བསྔལ་ཞི་བར་བྱ་བའི་ཕྱིར། གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཐམས་ཅད་ལ་ཆོས་ཀྱི་རོས་ཁྱབ་པར་བྱ་བའི་ཕྱིར། གཞན་ལ་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། བདག་འབའ་ཞིག་ལ་ཆོས་ཀྱི་རོས་ཁྱབ་པར་བྱ་བའི་ཕྱིར། གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཐམས་ཅད་རྒྱལ་བའི་ཆོས་ཀྱི་འོད་ཐོབ་པར་བྱ་བའི་ཕྱིར། གཞན་ལ་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། བདག་འབའ་ཞིག་རྒྱལ་བའི་ཆོས་ཀྱི་འོད་ཐོབ་པར་བྱ་བའི་ཕྱིར། གཞན་ལ་ཆོས་སྟོན་ཏོ། །རིགས་ཀྱི་བུ་མདོར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནི། སྡོམ་པ་ཚད་མེད་པས། སེམས་ཅན་ཐམས་ཅད་ཀྱི་མ་རིག་པའི་མུན་པ་ཆེན་པོ་ཡོངས་སུ་
བསལ་བ་དང་། འཇིགས་པའི་དངོས་པོ་ཆེན་པོ་དང་། གནོད་པར་འགྱུར་བ་ཐམས་ཅད་ཡོངས་སུ་བསལ་ཏེ། འོད་ཀྱི་སྣང་བ་ཆེན་པོ་འཐོབ་པ་དང་། གྲགས་པ་ཆེན་པོ་འཐོབ་པ་དང་། ཡང་དག་པ་ཇི་ལྟ་བ་བཞིན་དུ་ཐམས་ཅད་མཁྱེན་པའི་ཡེ་ཤེས་རྟོགས་པར་བྱ་བའི་ཕྱིར། གཞན་ལ་ཆོས་སྟོན་ཏོ། །ཉན་ཐོས་དང་། རང་སངས་རྒྱས་ནི། སྡོམ་པ་ཅུང་ཟད་ཀྱིས་བདག་གི་མ་རིག་པའི་མུན་པ་བསལ་བ་དང་། འོད་སྣང་བ་ཅུང་ཟད་འཐོབ་པ་དང་། གྲགས་པ་ཅུང་ཟད་འཐོབ་པ་དང་། ཡང་དག་པ་ཇི་ལྟ་བ་བཞིན་དུ། ཆོས་ཆུད་པའི་ཡེ་ཤེས་ཅུང་ཟད་རྟོགས་པར་བྱ་བའི་ཕྱིར། གཞན་ལ་ཆོས་སྟོན་ཏོ། །རིགས་ཀྱི་བུ་ཉན་ཐོས་དང་། རང་སངས་རྒྱས་ནི། གཞན་ལ་ཡང་དག་པར་དམིགས་པ་མེད་དོ། །གཞན་ལ་ཡང་དག་པར་སྙིང་རྗེ་བ་མེད་དོ། །གཞན་ལ་ཡང་དག་པར་མི་བརྙས་པའི་སེམས་མེད་དོ། །གཞན་ལ་ཡང་དག་པར་ཕན་པ་དང་བདེ་བར་བྱ་བའི་སེམས་མེད་དོ། །གཞན་ལ་ཡང་དག་པར་དཀྲོལ་ཞིང་སྒྲོལ་བའི་སེམས་མེད་དོ། །གཞན་ལ་ཡང་དག་པར་འདེག་པའི་སེམས་མེད་དོ། །གཞན་ལ་ཡང་དག་པར་བསྔགས་ཤིང་བསྟོད་པའི་སེམས་མེད་དོ། །ཕ་རོལ་ལ་ཡང་དག་པར་གཡོ་དང་སྒྱུ་མེད་པར་བསྟོད་པ་མ་ཡིན་ནོ། །གཞན་ལ་ཡང་དག་པར་བདག་གི་ལུས་ལ་མི་ལྟ་ཞིང་། གཞན་གྱི་ཕན་པ་དང་བདེ་བ་སྒྲུབ་པ་མ་ཡིན་ནོ། །གཞན་ལ་ཡང་དག་པར་ལུས་དང་། ངག་དང་། ཡིད་ཀྱི་ལས་མི་ཉམས་པ་མ་ཡིན་ནོ། །རིགས་ཀྱི་བུ་ཐེག་པ་ཆེན་པོ་ལ་གནས་པ་ནི། ཅི་ཡང་བདག་གིར་དམིགས་པ་གང་ཡང་ཡང་དག་པར་མེད་པ་ནས། དེ་བཞིན་དུ་རྒྱས་པར་ཕ་རོལ་ལ་ལུས་དང་། ངག་དང་། ཡིད་ཀྱི་ལས་གཞན་ལ་གནོད་པ་སྐྱེད་པ་གང་ཡང་མེད་དོ།། །།བམ་པོ་བདུན་པ། རིགས་ཀྱི་བུ་གཞན་ཡང་། སེམས་ཅན་གང་རང་བཞིན་གྱིས་གདུག་པ། ཚིག་བརླང་
ཞིང་རྩུབ་པ། ཡང་དག་པར་གླེན་པ། གཏི་མུག་གི་རང་བཞིན་ཅན། ཤེས་པ་སྙེམས་པ། སྲོག་གཅོད་པ་མ་སྤངས་པ་ནས་ངན་པར་ལྟ་བའི་བར་དུ་མ་སྤངས་པ། གཞན་དག་གི་ཁེ་དང་། བཀུར་སྟི་དང་། མཆོད་པ་དང་། གྲགས་པ་རྙེད་པ་མཐོང་ན་ཕྲག་དོག་སྐྱེད་པ། བདག་རྟག་ཏུ་ཁེ་དང་། བཀུར་སྟི་དང་། མཆོད་པ་དང་། གྲགས་པ་ཚོལ་བས་མི་ངོམས་པ། བདག་སྟོད་ཅིང་གཞན་ལ་སྨོད་པ། བདག་གི་ལུས་དང་། ངག་དང་། ཡིད་ཀྱི་ལས་མི་སྡོམ་པ། སྡིག་པ་ཐམས་ཅད་སྤྱོད་པ་ལ་རྟག་ཏུ་དགའ་བ། རང་གི་སེམས་གདུག་པ། སྙིང་རྗེའི་སེམས་མེད་པ། འཛེམ་པ་མེད་པ། ངོ་ཚ་བ་མེད་པ། གཞན་ལ་འཚེ་བ་ལ་དགའ་བ། བསོད་ནམས་ཀྱི་ཞིང་ལ་བཟང་ངན་དུ་རྣམ་པར་འབྱེད་པ། ངའི་བསྟན་པ་ལ་ཞུགས་པ་རབ་ཏུ་བྱུང་བ་ལ་སྐྱོན་ཚོལ་ཞིང་གནོད་པར་གླགས་ལྟ་བ་ལ་དགའ་བ། སྐྱོན་ཅུང་ཟད་ཙམ་བྱུང་ན་བདེན་ནམ་བརྫུན་མ་བརྟགས་པར་འཕྱ་ཞིང་སྐུར་ཏེ་གཤེ་ཞིང་སྤྱོ་བ། སེམས་མ་དུལ་བ། རྒོད་པ་གཡེང་བ། རབ་ཏུ་བྱུང་བ་ལ་འཚེ་བར་དགའ་བ། བདག་གི་སྐྱོན་ལ་མི་སེམས་ཤིང་གཞན་ལ་འཕྱ་བ། ཐེག་པ་ཆེན་པོའི་ཡོན་ཏན་དང་། བསྔགས་པ་བརྗོད་པ་ཐོས་ན་ཚོལ་ཞིང་འཇུག་པའི་སེམས་སྐྱེ་མོད་ཀྱི། ཁ་ན་མ་ཐོ་བའི་སྡིག་ལྕི་བ་སྤྱོད་པ་ལ་དགའ་བ། རབ་ཏུ་མ་ཞི་བ། གཞན་ལ་བསླུ་བའི་ཕྱིར་ཐེག་པ་ཆེན་པོའི་ཆོས་ལ་བདག་ཉན་ཅིང་། གཞན་ཡང་ཉན་དུ་གཞུག་པའི་ཚུལ་སྟོན་པ་དང་། བདག་ཀློག་པ་དང་། ཁ་ཏོན་བྱེད་ཅིང་གཞན་ཡང་ཀློག་ཅིང་ཁ་ཏོན་བྱེད་དུ་འཇུག་པའི་ཚུལ་སྟོན་པ་དང་། བདག་བསྟོད་པའི་ཕྱིར་གཞན་ལ་སྨོད་པ་དེ་ཐེག་པ་ཆེན་པོའི་ཆོས་ལ་བསྟི་སྟང་དང་བཅས་པས་བསྟོད་ཀྱང་ཐེག་པ་ཆེན་པོའི་སྤྱོད་ཡུལ་ལ་ནན་ཏན་དུ་མ་བསླབས་པས་དོན་ཁོང་དུ་ཆུད་པ་མེད་པར་བདག་ནི་ཐེག་པ་ཆེན་པོ་པའོ་ཞེས་ཁས་འཆེ་ཞིང་ཁེ་དང་། གྲགས་པ་དང་། བདག་གི་འཚོ་བ་བཙལ་བའི་ཕྱིར་གཞན་བདག་ལ་གནས་འཆའ་ཞིང་སློབ་ཏུ་འཇུག་གོ །དཔེར་ན་ཚུལ་ཁྲིམས་ཉམས་པ་སྡིག་པ་སྤྱོད་པའི་འདུལ་བ་འཛིན་པ་ལྟ་བུ་བདག་ཚུལ་ཁྲིམས་ཉམས་ལ་སྡིག་པ་སྤྱོད་ཀྱང་
ཁེ་དང་། གྲགས་པའི་ཕྱིར་གཞན་དག་འདུལ་བའི་སྡེ་སྣོད་སློབ་པར་གཞེན་འདེབས་པ་དེ་ལྟར་གཡོ་དང་གྱ་གྱུར་ལྡན་ལ་སླུ་བའི་ངང་ཅན་གྱི་སེམས་ཅན་དེ་དག་ནི་མིའི་ལུས་ཐ་མ་ཡང་ཐོབ་པར་དཀའ་ཞིང་མཐོ་རིས་ཀྱི་ལྷ་དང་། ཐེག་པ་གཉིས་ཀྱི་མྱ་ངན་ལས་འདའ་བ་ཡང་ཉམས་ཏེ་མི་ཐོབ་ན་ཐེག་པ་ཆེན་པོ་ཐོབ་པ་ལྟ་ཅི་སྨོས་ཏེ་དེ་ནི་གནས་མེད་དོ། །དེ་འཆི་འཕོས་ནས་ཀྱང་སེམས་ཅན་དམྱལ་བར་ལྟུང་སྟེ། ཐར་པའི་དུས་མེད་པས་མཁས་པ་དག་གིས་དེ་ལ་བསྟེན་པར་མི་བྱའོ། །ཁྲེལ་བ་དང་། ངོ་ཚ་བ་མེད་པ། འཁོར་མང་པོའི་ནང་དུ་ཁེ་དང་། བཀུར་སྟིའི་ཕྱིར་ང་ནི་ཐེག་པ་ཆེན་པོ་པའོ་ཞེས་སེང་གེའི་སྒྲ་སྒྲོགས་པས་གླེན་པ་གཏི་མུག་ཅན་དག་དང་བསྙེན་ཅིང་གྲོགས་སུ་བྱེད་དོ། །དེ་ནི་དཔེར་ན་བོང་བུས་སེང་གེའི་པགས་པ་གྱོན་ཏེ་བདག་ནི་སེང་གེའོ་ཞེས་ཁས་འཆེ་བས་མི་ཞིག་གིས་རྒྱང་ནས་མཐོང་ན། དེ་སེང་གེ་ཉིད་ཡིན་པར་འཛིན་ཏོ། །དེ་ནས་དེས་སྒྲ་ཕྱུང་བ་དང་། ཐམས་ཅད་ཀྱིས་བོང་བུ་ཡིན་པར་ཤེས་ནས་ཀུན་གྱིས་མཆིལ་མས་བཏབ་སྟེ། སོ་སོ་ནས་སྨྲས་པ། འདི་ཀོ་མི་གཙང་བ་ཟ་བའི་སྡིག་ཏོ་བོང་བུ་ལྟ་ན་ཞེས་ཚིག་ངན་པ་སྣ་ཚོགས་ཀྱིས་སྨད་དེ་དོང་ངོ་། །དེ་ལྟར་ན་དེ་བཞིན་དུ་ངས་བཤད་པའི་གང་ཟག་མི་དགེ་བ་བཅུའི་ལས་ཀྱི་ལམ་སྤྱོད་པ་ལ་སྤྲོ་བ། ལྷ་དང་མི་ཐམས་ཅད་ཀྱི་ས་བོན་བསྲེགས་པ་ཡིན་ཏེ། ཉན་ཐོས་དང་། རང་སངས་རྒྱས་ཀྱི་ཐེག་པའི་ཆོས་ལས་ཀྱང་ཕྱིར་ལྡོག་པ་ཡིན་ན་ཐེག་པ་ཆེན་པོའི་སྣོད་དུ་འགྱུར་བ་ལྟ་ཅི་སྨོས། དེ་ལྟར་གླེན་པ་གཏི་མུག་ཅན་ང་རྒྱལ་གྱིས་མངོན་པར་ཟིན་ཏེ་བདག་ཐེག་པ་ཆེན་པོ་པའོ་ཞེས་ཕ་རོལ་ལ་སྒྱུས་བརྗོད་ཅིང་ཁེ་དང་། བཀུར་སྟི་སྡུད་པ་དེ་ནི་དཔེར་ན་རྐང་ལག་མེད་པའི་མི་གླེན་པ་ཞིག་དགྲ་ལ་བརྒལ་བའི་ཕྱིར་གཡུལ་དུ་ཞུགས་ཀྱང་བདག་ཉོན་མོངས་པ་ལས་དོན་དུ་འགྲུབ་པ་མེད་དོ། །དེ་ལྟར་དེ་བཞིན་དུ་ཐེག་པ་ཆེན་པོ་པར་སྒྱུས་ཁས་འཆེ་བ་དེ་ཡང་འདི་ལྟར་དད་པའི་ལག་པ་དང་། ཚུལ་ཁྲིམས་ཀྱི་རྐང་པ་མ་ཚང་བར་རང་གི་ལས་དང་སྤྱོད་པ་ལ་མི་དཔོག་ཅིང་ཉོན་མོངས་པའི་གཡུལ་ཆེན་པོ་ལ་རྒོལ་བར་ཆགས་པ་ནི་བདག་ཉོན་མོངས་པ་ཙམ་ལས་དོན་དུ་མི་འགྱུར་རོ། །གང་ཟག་དེ་སྒོ་གསུམ་མི་སྡོམ་པར་སྡིག་པ་འབའ་ཞིག་སྤྱོད་ཅིང་བདག་ནི་ཐེག་པ་ཆེན་པོ་པའོ་ཞེས་ཁས་འཆེ་ཡང་ཐེག་
པ་གསུམ་གྱི་ཆོས་ཀྱི་སྣོད་མ་ཡིན་པས་སེམས་ཅན་ཐམས་ཅད་ཀྱི་ཉོན་མོངས་པའི་དགྲ་ཤིན་ཏུ་གནས་པ་ཆོམས་པར་རམ། སེམས་ཅན་ཐམས་ཅད་ལ་འཕགས་པའི་ལམ་གྱི་ཡན་ལག་བརྒྱད་སྟོན་པར་རམ། འཇིགས་པ་མེད་པའི་མྱ་ངན་ལས་འདའ་བའི་གྲོང་ཁྱེར་དུ་དགོད་པའི་གནས་མེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཐེག་པ་ཆེན་པོ་ཞེས་བྱ་བ་ནི་ཕུལ་དུ་གྱུར་པའི་ཚུལ་ཁྲིམས་རྣམ་པར་དག་པར་སྲུང་བ། ཕུལ་དུ་གྱུར་པའི་དགེ་བའི་མཆོག་སྤྱོད་པར་ལྡན་པ། ཕུལ་དུ་གྱུར་པའི་ཁྲེལ་བ་དང་། ངོ་ཚ་བར་བརྟེན་པའོ། །འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་ཤིན་ཏུ་ལྟ་ཞིང་འཇིགས་པའོ། །མི་དགེ་བའི་ཆོས་ཐམས་ཅད་ཡོངས་སུ་སྤོང་ཞིང་དགེ་བའི་ཆོས་ཐམས་ཅད་ལ་ནན་ཏན་བྱེད་པ་ལ་སྤྲོ་བའོ། །བྱམས་པ་དང་། སྙིང་རྗེས་སེམས་ཅན་ཐམས་ཅད་ལ་ཁྱབ་པའོ། །སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་བྱ་བའི་ཕྱིར་རྩོལ་བའོ། །སེམས་ཅན་ཐམས་ཅད་འཁོར་བའི་སྡུག་བསྔལ་ལས་སྒྲོལ་ཞིང་འདོན་པའོ། །བདག་གིས་ལུས་ཀྱི་བདེ་བ་ལ་མི་ལྟ་བར་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་སྟོབས་པ་སྟེ། དེ་དག་ནི་ཐེག་པ་ཆེན་པོ་ལ་གནས་པ་ཞེས་བྱའོ། །རིགས་ཀྱི་བུ་མཚན་ཉིད་གང་དག་དང་ལྡན་ན་ཉན་ཐོས་ཀྱི་ཐེག་པ་ཞེས་བྱ་ཞེ་ན། གང་དག་ཡང་དག་པའི་དྲན་པ་ལ་བདེ་བར་གནས་ཤིང་ཏིང་ངེ་འཛིན་ལ་མཉམ་པར་འཇོག་པར་མོས་པས་རྟག་ཏུ་བརྩོན་པ་དང་། གཡོ་དང་སྒྱུ་སྤངས་ཤིང་ལས་ཀྱི་འབྲས་བུ་ལ་ཡིད་ཆེས་པ་དང་། འདོད་པ་ལྔ་ལ་མི་ཆགས་ཤིང་འཇིག་རྟེན་གྱི་ཆོས་བརྒྱད་ཀྱིས་མི་གོས་པ་དང་། མགོའི་ཐོད་ལ་མེ་འབར་བ་བཞིན་དུ་དགེ་བ་ལ་ཤིན་ཏུ་བརྩོན་པ་དང་། ཕུང་པོ་དང་། ཁམས་དང་། སྐྱེ་མཆེད་ལ་ཤིན་ཏུ་རྟོག་པ་དང་། འཕགས་པའི་རིགས་ལ་བདེ་བར་གནས་པར་རྟག་ཏུ་མོས་པ་སྟེ། མཚན་ཉིད་འདི་དག་དང་ལྡན་པ་ནི་ཉན་ཐོས་ཀྱི་ཐེག་པ་ཞེས་བྱ་སྟེ། གང་ཟག་འདི་རང་སངས་རྒྱས་ཀྱི་ཐེག་པའི་སྣོད་དུ་ཡང་མི་འགྱུར་ན་ཐེག་པ་ཆེན་པོའི་སྣོད་དུ་འགྱུར་བ་ལྟ་ཅི་སྨོས། རིགས་ཀྱི་བུ་མཚན་ཉིད་གང་དག་དང་ལྡན་པས་རང་སངས་རྒྱས་ཀྱི་ཐེག་པ་ཞེས་བྱ་ཞེ་ན། སེམས་ཅན་གང་དག་ཉན་ཐོས་ཀྱི་ཡོན་ཏན་དེ་དག་
ཐམས་ཅད་དང་ལྡན་ལ་གཞན་ཡང་ཉེ་བར་ལེན་པའི་ཕུང་པོ་ལྔ་ལ་ཡང་དང་ཡང་དུ་མི་རྟག་པར་རྗེས་སུ་རྟོག་པ་ལ་གནས་པ་དང་། སྐྱེ་ཞིང་འགོག་པ་ལ་ཡང་དང་ཡང་དུ་རྗེས་སུ་རྟོག་པ་ལ་གནས་པ་དང་། རྟེན་ཅིང་འབྲེལ་ཏེ་འབྱུང་བའི་ཆོས་རྣམས་ནི་འགོག་པའི་ཆོས་ཅན་དུ་ཤིན་ཏུ་རྟོག་པ་སྟེ། མཚན་ཉིད་འདི་དག་དང་ལྡན་ན་རང་སངས་རྒྱས་ཀྱི་ཐེག་པ་ཞེས་བྱ་སྟེ། སེམས་ཅན་དེ་ཐེག་པ་ཆེན་པོའི་ཆོས་ཀྱི་སྣོད་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་དག་བཟླས་པའི་ཕྱིར་ཚིགས་སུ་བཅད་དེ་གསུངས་པ། གལ་ཏེ་དགེ་བའི་རྒྱལ་རིགས་རྒྱལ་པོ་དང་། །རྗེའུ་རིགས་དམངས་རིགས་ཤིན་ཏུ་དགེ་བའི་བར། །དད་ལ་སོགས་པའི་འཁོར་ལོ་བཅུ་བསྒོམས་ན། །ཉན་ཐོས་ཐེག་པའི་སྣོད་དུ་དེ་འགྱུར་རོ། །རང་རྒྱལ་ཐེག་པའི་སྒོ་གསུམ་རྣམ་པར་དག །ཁྲེལ་དང་འཛེམ་པར་ལྡན་ཞིང་ཕུང་པོས་འཇིགས། །ཉེས་པའི་སྐྱོན་ཤེས་པས་མཐའི་གནས་ལ་དགའ། །དྲན་པས་དབང་པོ་སྲུང་ཞིང་སེམས་ཀྱང་ཞི། །རྟེན་ཅིང་འབྲེལ་བ་རྟོགས་པས་བསམ་གཏན་སྒོམ། །ཕུང་པོ་ཁམས་དང་སྐྱེ་མཆེད་རྟོགས་ལ་མཁས། །གནས་དང་སྤྱོད་ལམ་འཁོར་ལོ་འདི་བཅུས་ན། །ཐེག་པ་མཆོག་གི་སྣོད་འགྱུར་སྲིད་མཚོ་རྒལ། །ཐེག་པ་གསུམ་མིན་གཉིས་ཀྱི་འཁོར་ལོ་ཡིས། །བདག་ཉིད་ཉོན་མོངས་རྣམ་པར་གྲོལ་རྩོལ་ཞིང་། །བག་ཆགས་མི་གཏོང་སེམས་ཅན་མི་སྒྲོལ་བའི། །གང་ཟག་དེ་ནི་ཐེག་ཆེན་སྣོད་མ་ཡིན། །བྱིས་པ་དབང་པོ་ཞན་པའི་ལེ་ལོ་ཅན། །ཐེག་པ་གཉིས་ལ་ནན་ཏན་མི་བྱེད་པ། །ཐེག་པ་ཆེན་པོའི་འཁོར་ལོ་ལྡན་མི་འགྱུར། །དེ་ནི་རྒྱ་ཆེན་ཐེག་ཆེན་སྣོད་མ་ཡིན། །བྱིས་པ་གཅིག་པུ་རྣམ་པར་གྲོལ་ཚོལ་བ། །བློ་དང་སྤྱོད་པར་ཞན་ཅིང་བྱམས་སེམས་མེད། །ཆད་པར་ལྟ་ལ་ཆགས་པ་ངན་སོང་གཞོལ། །ཡང་དག་ཆོས་སྤོང་ཆོས་མ་ཡིན་པ་སྟོན། །ཐེག་པ་གཉིས་ལ་སྐུར་ཞིང་སྡོམ་པ་སྤོང་། །བསྙེན་པར་རྫོགས་ཤིང་ཐེག་ཆེན་ཁས་འཆེ་བ། །ང་ཡི་ཆོས་འཇིག་སེམས་ཅན་ཀུན་ལ་སླུ། །དེ་ཡི་དབང་གིས་མི་ལུས་ཐོབ་པར་དཀའ། །ང་ཡི་བསྟན་ལ་ཞུགས་པའི་འཕགས་པ་དང་། །ངུར་སྨྲིག་གྱོན་ལ་འཚེ་འམ་གནོད་བྱེད་དམ། །གཤེ་འམ་སྤྱོས་སམ་ལྷུང་
བཟེད་གོས་ཕྲོགས་ན། །ལྷ་དང་མི་ཡི་བདེ་བ་ཡུན་དུ་སྟོར། །དེ་བས་གང་ཞིག་མི་ལུས་ཐོབ་འདོད་ཅིང་། །འཆི་བའི་དུས་ན་ལྐུགས་པའི་སྐྱོན་སྤངས་ཤིང་། །རྟག་ཏུ་སངས་རྒྱས་ཀུན་དང་ཕྲད་འདོད་པ། །ཐེག་གསུམ་ཆོས་རྣམས་ཀུན་དུ་བསྲུང་བར་བྱོས། །ཐེག་པ་གསུམ་ལས་ཐེག་པ་མཆོག་འདོད་པ། །ཐེག་པ་གསུམ་ཆོས་རྟོག་ལ་མཁས་པ་སྟེ། །དགའ་ཞིང་སྤྲོ་བས་གཞན་ལ་རྒྱས་སྟོན་ན། །ངེས་པར་སངས་རྒྱས་འགྱུར་ལ་ཐེ་ཙོམ་སྤོངས། །ཚུལ་ཁྲིམས་ཉམས་ཤིང་འཇུངས་པ་ང་རྒྱལ་ཅན། །བདག་བསྟོད་གཞན་སྨོད་ཐེག་ཆེན་ཁས་འཆེ་བ། །དེ་དག་སྤངས་ཏེ་མཁས་ལ་བསྟེན་པར་བྱ། །ངེས་པར་འཚང་རྒྱ་ཁམས་གསུམ་འདའ་བར་འགྱུར། །ཐེག་པ་གསུམ་ལས་གང་དང་འཐུན་པ་བཞིན། །བྱམས་དང་སྙིང་རྗེས་ཐེག་པ་གསུམ་ཆོས་སྟོན། །མི་རེ་བཞིན་དུ་ཡོངས་སུ་རྫོགས་བྱས་ན། །ངེས་པར་འཚང་རྒྱར་འགྱུར་ལ་ཐེ་ཙོམ་སྤོངས། །ཕུང་པོ་ཁམས་དང་སྐྱེ་མཆེད་ཞི་བར་ཤེས། །ནམ་མཁའ་བཞིན་དུ་ཅི་ལའང་མི་གནས་ཏེ། །ཆོས་བསྟན་སེམས་ཅན་མང་པོ་ཀུན་ཡང་སྡུད། །དཔག་མེད་ཡེ་ཤེས་བློ་གྲོས་དམ་པ་ཐོབ། །ཚུལ་ཁྲིམས་ཉམས་པར་དགའ་ལ་སྡིག་པ་ཅན། །ཐེག་པ་ཆེན་པོའི་ཡོན་ཏན་མཆོག་ཐོས་ནས། །ཁེ་དང་གྲགས་ཕྱིར་ཐེག་ཆེན་ཁས་འཆེ་བ། །བོང་བུ་སེང་གེའི་པགས་པ་གྱོན་པ་བཞིན། །དེང་འདིར་ཐམས་ཅད་འཁོར་ལ་བཀའ་སྩལ་པ། །གང་ཞིག་མྱུར་དུ་བྱང་ཆུབ་མཆོག་འདོད་ན། །དགེ་བཅུའི་ལས་ཀྱི་ལམ་ལ་ནན་ཏན་བྱོས། །ང་ཡི་ཆོས་ལ་མི་སྨད་ཤིན་ཏུ་བསྲུང་། །ངས་སྔོན་མདོ་སྡེ་གཞན་དག་ལས་གསུངས་ལ། །བྱང་ཆུབ་ཆེན་པོ་འདོད་པས་ཐེག་ཆེན་སྤྱད། །ཉན་ཐོས་རང་རྒྱལ་ཐེག་པ་སྤོངས་ཤིག་པ། །དེ་ནི་རྣམ་དག་འཁོར་ལ་བསྟན་པའི་ཆོས། །སངས་རྒྱས་ཚད་མེད་བྱེ་བ་མཆོད་བྱས་པས། །སྡིག་པ་སྤངས་ནས་རྣམ་དག་སེམས་སྦྱོང་བ། །ཤིན་ཏུ་བརྩོན་པའི་སྐྱེ་བོ་དེ་དག་ལ། །གཉིས་སུ་མེད་དེ་ཐེག་པ་གཅིག་པུ་བཤད། །ད་ལྟའི་འཁོར་འདི་ཐེག་པ་གསུམ་སྣོད་ཅན། །ལ་ལ་ཉན་ཐོས་ཐེག་པའི་ཆོས་དང་ལྡན། །ལས་ཀྱི་དངོས་པོ་མང་པོས་འཇིགས་པ་དག །དེ་ནི་བྱང་ཆུབ་མཆོག་གི་སྣོད་མ་ཡིན། །ལ་ལ་དབེན་པར་དགའ་ཞིང་
རང་བྱང་ཆུབ། །དེ་ཡང་བྱང་ཆུབ་མཆོག་གི་སྣོད་མ་ཡིན། །ལ་ལ་ཡེ་ཤེས་མཆོག་ལ་བཀོད་འོས་པ། །དེ་བས་མོས་པ་བཞིན་དུ་ཐེག་གསུམ་ཤོད། །སྦྱངས་པའི་ཡོན་ཏན་ཙམ་གྱིས་གྲོལ་འདོད་པ། །ཐེག་ཆེན་བཤད་པ་ཐོས་ན་ངན་སོང་ལྟུང་། །བད་ཀན་ནད་ལ་འོ་མ་འཐུང་བཅུག་བཞིན། །དེ་ཕྱིར་དུག་ཏུ་འགྱུར་གྱི་ནད་མི་སེལ། །དེ་བཞིན་སྣོད་མིན་ཉན་ཐོས་ཐེག་པ་དག །ཐེག་ཆེན་བཤད་པ་ཐོས་ན་རྨོངས་འགྱུར་ཞིང་། །ཆད་པར་སྨྲ་ལ་ངན་སོང་ལྟུང་འགྱུར་བས། །དེ་བས་དབང་པོ་བརྟགས་ཏེ་ཆོས་བསྟན་ཏོ། །ཤིན་ཏུ་རྒྱས་པ་ཆེན་པོའི་མདོ་སའི་སྙིང་པོའི་འཁོར་ལོ་བཅུ་པ་ཞེས་བྱ་བ་ལས་གནས་པ་དང་སྤྱད་པའི་ལེའུ་སྟེ་བཞི་པའོ།། །།