འདུས་པ་ཆེན་པོ་ལས་སའི་སྙིང་པོའི་འཁོར་ལོ་བཅུ་པའི་མདོ་ལས། དང་པོ། གླེང་གཞིའི་ལེའུ།
རྒྱ་གར་སྐད་དུ། ད་ཤ་ཙཀྲ་ཀཱི་ཏི་གྲ་བྷ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འདུས་པ་ཆེན་པོ་ལས་སའི་སྙིང་པོའི་འཁོར་ལོ་བཅུ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་ཁ་ལ་དེ་ཡ་ཞེས་བྱ་བ་དྲང་སྲོང་ཐུབ་པ་མང་པོའི་སྤྱོད་ཡུལ་གྱི་གནས་ན། དགེ་སློང་གི་དགེ་འདུན་ཆེན་པོ་ཚད་མེད་གྲངས་མེད་པ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་ཉན་ཐོས་ཀྱི་དགེ་འདུན་ཆེན་པོ་ཤ་སྟག་གོ །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་གྲངས་མེད་པ་དང་ཐབས་ཅིག་པ་ཐམས་ཅད་ཀྱང་བྱང་ཆུབ་སེམས་དཔའི་དགེ་འདུན་ཆེན་པོ་ཤ་སྟག་སྟེ། ཟླ་བའི་སྙིང་པོ་ཞེས་བྱ་བ་བཤད་མ་ཐག་ཏུ། དེའི་ཚེ་ལྷོ་ཕྱོགས་ནས་བསུང་གི་སྤྲིན་ཆེན་པོ་འདུས་པ་ལས་བསུང་གི་ཆར་ཆེན་པོ་རབ་ཏུ་འབབ་བོ། །མེ་ཏོག་གི་སྤྲིན་ཆེན་པོ་འདུས་པ་ལས་མེ་ཏོག་གི་ཆར་ཆེན་པོ་རབ་ཏུ་འབབ་བོ། །རིན་པོ་ཆེའི་ལྷ་རྫས་ཀྱི་རྒྱན་གྱི་སྤྲིན་ཆེན་པོ་འདུས་པ་ལས། རིན་པོ་ཆེའི་ལྷ་རྫས་ཀྱི་རྒྱན་གྱི་ཆར་ཆེན་པོ་རབ་ཏུ་འབབ་བོ། །ལྷ་རྫས་ཀྱི་གོས་ཀྱི་སྤྲིན་ཆེན་པོ་འདུས་པ་ལས་ལྷ་རྫས་ཀྱི་གོས་ཀྱི་ཆར་ཆེན་པོ་རབ་ཏུ་འབབ་བོ། །དེ་ལྟ་བུའི་སྤྲིན་དང་ཆར་ཆེན་པོས་དྲང་སྲོང་ཐུབ་པ་མང་པོའི་སྤྱོད་ཡུལ་གྱི་གནས་ཀྱི་རི་དེ་ལ་ཁྱབ་པར་གྱུར་ཏོ། །བསུང་དང་། མེ་ཏོག་དང་། རིན་པོ་ཆེའི་རྒྱན་དང་། གོས་དེ་དག་ལས་ཆོས་ཆེན་པོའི་སྒྲ་དབྱངས་རྣམ་པ་སྣ་ཚོགས་བརྒྱ་སྟོང་སྙེད་གྲགས་པར་གྱུར་པ་ནི་འདི་ལྟ་སྟེ། དཀོན་མཆོག་ལ་སྐྱབས་སུ་འགྲོ་བའི་སྒྲ་དང་། བསླབ་པའི་གནས་འཛིན་པའི་སྒྲ་དང་། ངང་དེས་ཤིང་བཟོད་པ་ཅན་གྱི་སྒྲ་དང་། བརྩོན་འགྲུས་རྩོམ་པའི་སྒྲ་དང་། བདུད་བཞི་བཏུལ་བའི་སྒྲ་དང་། ཤེས་རབ་ལ་གཞོལ་ཞིང་འཇུག་པའི་སྒྲ་དང་། གྲགས་པ་ཆེན་པོས་འཇིག་རྟེན་གསུམ་དུ་རྒྱ་ཆེར་གྲགས་པའི་སྒྲ་དང་། དྲན་པ་དང་། ཏིང་ངེ་འཛིན་དང་། གཟུངས་ཀྱི་ཁྱད་པར་ལ་ནན་ཏན་བྱ་བའི་སྒྲ་དང་། སྟོང་
པ་ཉིད་དང་། མཚན་མ་མེད་པ་དང་། སྨོན་པ་མེད་པའི་སྒྲ་དང་། འདོད་ཆགས་ཀྱིས་ཡོངས་སུ་སྐྱོ་བའི་སྒྲ་དང་། གཟུགས་ནི་ཆུའི་ལྦུ་བ་ལྟ་བུའོ་ཞེས་པའི་སྒྲ་དང་། ཚོར་བ་ནི་ཆུའི་ཆུ་བུར་ལྟ་བུའོ་ཞེས་པའི་སྒྲ་དང་། འདུ་ཤེས་ནི་སྨིག་རྒྱུ་ལྟ་བུའོ་ཞེས་པའི་སྒྲ་དང་། འདུ་བྱེད་ནི་ཆུ་ཤིང་ལྟ་བུའོ་ཞེས་པའི་སྒྲ་དང་། རྣམ་པར་ཤེས་པ་ནི་སྒྱུ་མ་ལྟ་བུའོ་ཞེས་པའི་སྒྲ་དང་། མི་རྟག་པའི་སྒྲ་དང་། སྡུག་བསྔལ་བའི་སྒྲ་དང་། བདག་མེད་པའི་སྒྲ་དང་། སྟོང་པའི་སྒྲ་དང་། འཛེམ་པ་དང་། ངོ་ཚ་བར་ལྡན་པའི་སྒྲ་དང་། ཀུན་སྤོང་བའི་སྒྲ་དང་། དྲན་པ་ཉེ་བར་གཞག་པའི་སྒྲ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་སྒྲ་དང་། ཆོས་ཀུན་ཆུབ་པའི་སྒྲ་དང་། མཐོ་རིས་སུ་སྐྱེ་བ་དང་། མྱ་ངན་ལས་འདའ་བའི་སྒྲ་དང་། ཐེག་པ་གསུམ་ལ་འབབ་པའི་སྒྲ་དང་། ཆོས་ཆེན་པོའི་འཁོར་ལོ་བསྐོར་བའི་སྒྲ་དང་། ཆོས་ཆེན་པོའི་ཆར་རབ་ཏུ་འབེབས་པའི་སྒྲ་དང་། སེམས་ཅན་ཡོངས་སུ་སྨིན་པར་བྱ་བའི་སྒྲ་དང་། ངན་སོང་གསུམ་ལས་ཡོངས་སུ་སྒྲོལ་བའི་སྒྲ་དང་། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་ནན་ཏན་བྱ་བའི་སྒྲ་དང་། ཐབས་མཁས་པའི་སྒྲ་དང་། ས་བཅུ་ལ་འབབ་པའི་སྒྲ་དང་། མངོན་པར་ཤེས་པས་རྣམ་པར་རོལ་པའི་སྒྲ་དང་། བླ་ན་མེད་པའི་ཐེག་པ་ཆེན་པོ་རྣམ་པར་དག་པ་ལ་རྣམ་པར་རོལ་པའི་སྒྲ་དང་། ས་ལས་ཕྱིར་མི་ལྡོག་པའི་སྒྲ་དང་། མི་སྐྱེ་བའི་ཆོས་ཀྱི་བཟོད་པའི་སྒྲ་དང་། སྤྱི་བོ་ནས་དབང་བསྐུར་བའི་སྒྲ་དང་། སངས་རྒྱས་ཐམས་ཅད་ཀྱི་རྒྱ་མཚོ་ཆེན་པོ་ལ་འཇུག་པའི་སྒྲའི་ང་རོ་གྲགས་པར་གྱུར་ཏོ། །དེའི་ཚེ་འཁོར་གྱི་དཀྱིལ་འཁོར་མང་པོ་དེ་དག་ཐམས་ཅད་ཀྱིས་དེ་ལྟ་བུའི་སྤྲིན་དང་ཆར་རྣམ་པ་སྣ་ཚོགས་མཐོང་ཞིང་དེ་ལྟར་ཆོས་ཀྱི་སྒྲའི་ང་རོ་ཡང་ཐོས་པར་གྱུར་ནས་དེ་དག་གི་སོ་སོའི་ཡིད་ཅི་ལ་མོས་པ་བཞིན་དུ་སོ་སོའི་ལུས་ལ་རྣམ་པ་སྣ་ཚོགས་ཀྱི་བསུང་དང་། མེ་ཏོག་དང་། རིན་པོ་ཆེའི་རྒྱན་དང་། ལྷ་རྫས་ཀྱི་གོས་དམ་པས་ཡོངས་སུ་བརྒྱན་པར་མཐོང་ངོ་། །ཡང་སོ་སོའི་ལག་མཐིལ་གཉིས་ན་ཡིད་བཞིན་གྱི་ནོར་བུ་རིན་པོ་ཆེ་ཐོགས་ཤིང་ཡིད་བཞིན་གྱི་ནོར་
བུ་རིན་པོ་ཆེ་དེ་དག་རེ་རེ་ལས་ཀྱང་རིན་པོ་ཆེ་རྣམ་པ་སྣ་ཚོགས་ཆར་བཞིན་དུ་འབབ་པར་མཐོང་ངོ་། །གཞན་ཡང་ནོར་བུ་རིན་པོ་ཆེ་དེ་དག་ལས་འོད་ཟེར་རྣམ་པ་སྣ་ཚོགས་སུ་བྱུང་སྟེ། འོད་ཟེར་དེ་དག་གི་དབང་གིས་སེམས་ཅན་དེ་དག་སོ་སོ་ནས་ཕྱོགས་བཅུའི་ཆུ་ཀླུང་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་ཡང་མཐོང་ངོ་། །ཡང་འོད་ཟེར་དེ་དག་གི་དབང་གིས་སངས་རྒྱས་ཀྱི་ཞིང་དེ་དག་ན་དེ་བཞིན་གཤེགས་པ་དེ་རེ་རེ་ལ་ཡང་འཁོར་མང་པོ་ཚད་མེད་པས་བསྟི་སྟང་དང་བཅས་ཏེ་ཡོངས་སུ་བསྐོར་བར་མཐོང་ངོ་། །གཞན་ཡང་འོད་ཟེར་དེའི་དབང་གིས་སངས་རྒྱས་ཀྱི་ཞིང་དེ་དག་ན་སེམས་ཅན་གང་ནད་ཀྱིས་གཟིར་བ་ཐམས་ཅད་ཀྱང་འོད་ཟེར་དེ་དག་གིས་རེག་མ་ཐག་ཏུ་ནད་ཀྱི་སྡུག་བསྔལ་དང་བྲལ་བར་གྱུར་ཏོ། །གང་བསད་པ་ལ་ཐུག་པ་དང་། བཙོན་དུ་བཟུང་ཞིང་བཅིངས་པ་དག་ཀྱང་འོད་ཟེར་དེ་དག་གིས་རེག་མ་ཐག་ཏུ་དེ་དག་ལས་ཡོངས་སུ་ཐར་བར་གྱུར་ཏོ། །གང་ལུས་དང་ངག་དང་ཡིད་མི་བདེ་བར་སྤྱོད་པའི་གནས་ངན་ལེན་ལྕི་བ་དག་ཀྱང་འོད་དེའི་དབང་གིས་ཤིན་ཏུ་ཡང་ཞིང་རྣམ་པར་དག་པར་གྱུར་ཏོ། །གང་བཀྲེས་ཤིང་སྐོམ་པ་དག་ཀྱང་འགྲངས་ཤིང་ངོམས་པར་གྱུར་ཏོ། །གང་བསད་པ་དང་། ཆད་པ་རྣམ་པ་སྣ་ཚོགས་ཀྱིས་ཉོན་མོངས་པར་གྱུར་པ་དག་ཀྱང་འོད་ཟེར་དེ་དག་གིས་རེག་མ་ཐག་ཏུ་སྡུག་བསྔལ་བ་དང་བྲལ་བར་གྱུར་ཏོ། །གང་བགོ་བ་དང་། རིན་པོ་ཆེའི་རྒྱན་དང་། དབྱིག་དང་། ནོར་རྫས་ཀྱིས་བྲེལ་ཅིང་ཕོངས་པ་དག་ཀྱང་བསམས་པ་བཞིན་དུ་འབྱོར་ཅིང་ལྡན་པར་གྱུར་ཏོ། །སེམས་ཅན་གང་སྲོག་གཅོད་པ་ལ་དགའ་ཞིང་མོས་པ་ནས་ལོག་པར་ལྟ་བའི་བར་དུ་དགའ་ཞིང་མོས་པ་དག་ཀྱང་འོད་ཟེར་དེས་རེག་མ་ཐག་ཏུ་སྲོག་གཅོད་པ་ཡོངས་སུ་སྤོང་བ་ལ་དགའ་ཞིང་མོས་པ་ནས་ལོག་པར་ལྟ་བའི་བར་དུ་ཡོངས་སུ་སྤོང་བ་ལ་དགའ་ཞིང་མོས་པར་གྱུར་ཏོ། །སེམས་ཅན་གང་འདོད་པ་མི་རྙེད་པ་རྣམ་པ་སྣ་ཚོགས་ཀྱིས་སྡུག་བསྔལ་བར་གྱུར་པ་དག་ཀྱང་འོད་ཟེར་དེས་རེག་མ་ཐག་ཏུ་ཇི་ལྟར་རེ་བ་བཞིན་དུ་རྙེད་པར་གྱུར་ཏོ། །གཞན་ཡང་འོད་
ཟེར་དེའི་དབང་གིས་སངས་རྒྱས་ཀྱི་ཞིང་ཐམས་ཅད་ཀྱི་སེམས་ཅན་གང་སྡུག་བསྔལ་གྱིས་གདུངས་པ་དག་ཐམས་ཅད་ཞི་ནས་རབ་ཏུ་བདེ་བ་དང་ལྡན་པར་མཐོང་ངོ་། །གཞན་ཡང་སངས་རྒྱས་ཀྱི་ཞིང་དེ་དག་ཐམས་ཅད་དུ་འོད་ཀྱིས་སྣང་བར་བྱས་པས་སྤྲིན་དང་། རྡུལ་དང་། ན་བུན་དང་། རླུང་དང་། རྫི་ཆར་དང་། བཀྲ་མི་ཤིས་པའི་སྒྲ་དང་། དྲི་མི་ཞིམ་པ་དང་། ཁ་བ་དང་ཚ་བ་ལ་སོགས་པའི་རོ་ངན་པ་དང་། ཡིད་དུ་མི་འོང་བའི་རེག་བྱ་དང་། འཇིགས་སྐྲག་པ་དང་། གནོད་པ་མང་པོ་རྣམས་མེད་པར་གྱུར་ཏོ། །གཞན་ཡང་ལས་ངན་པ་དང་། ལོག་པའི་ངག་དང་། ལོག་པའི་བསམ་པ་དང་། ལོག་པར་ཕྱོགས་པ་དང་ཡོངས་སུ་བྲལ་ཏེ་ལྷག་པར་མི་གྲང་བ་དང་། ལྷག་པར་མི་ཚ་བ་དང་། རབ་ཏུ་ཞི་ཞིང་བདེ་བ་དང་། ས་གཞི་ལག་མཐིལ་ལྟར་མཉམ་པ་དང་། བདེ་བའི་ཡོ་བྱད་དམ་པ་ཐམས་ཅད་ཀྱིས་ཡོངས་སུ་གང་བར་གྱུར་ཏོ། །དེའི་ཚེ་ན་འཁོར་མང་པོ་རྣམས་ཀྱི་སོ་སོའི་ལུས་ཀྱི་སའི་ཁམས་ལྷག་པར་ལྕི་ཞིང་མི་ཐེག་པ་ཙམ་དུ་གྱུར་ཏོ། །ལྟས་འདི་ལྟ་བུར་གྱུར་པ་མཐོང་ནས་ཐམས་ཅད་ཀྱང་དངངས་ཏེ། དེ་ཅིའི་རྒྱུ་ཅིའི་རྐྱེན་གྱིས་ལྟས་འདི་ལྟ་བུར་གྱུར་སྙམ་དུ་རྟོག་པ་སྐྱེས་སོ། །དེའི་ཚེ་འཁོར་གྱི་དཀྱིལ་འཁོར་དེའི་ནང་ན་བརྒྱ་བྱིན་ལྷའི་དབང་པོ་དྲི་མ་མེད་པར་སྐྱེས་ཞེས་བྱ་བ་བཅོམ་ལྡན་འདས་དང་ཧ་ཅང་ཡང་མི་རིང་བ་ཞིག་ན་འདུག་པ་ལས་ལངས་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ནས་ཚིགས་སུ་བཅད་པ་འདི་སྐད་ཅེས་གསོལ་ཏོ། །བདེན་པར་གསུང་ཞིང་བདེན་གཟིགས་པ། །བདེན་ལ་རབ་གནས་ཐུབ་པ་ཁྱོད། །འདུས་པའི་འཁོར་མང་ཐམས་ཅད་ལ། །མཐར་ཕྱིན་བདེན་པའི་ཆོས་གསུངས་ཤིག །སོ་སོའི་སྐྱེ་བོ་མང་པོ་དག །སྡུག་བསྔལ་རྒྱུ་དང་སྡུག་བསྔལ་སེལ། །ཅི་ཡི་སླད་དུ་འཁོར་འདིར་ནི། །སྤྲིན་དང་ཆར་རྣམས་གདའ་བར་གྱུར། །འཁོར་རྣམས་རབ་ཏུ་དགའ་རངས་ནས། །ཤིན་ཏུ་དད་པའི་བསམ་པ་སྐྱེས། །ཐེག་པ་ཆེན་པོར་ཐམས་ཅད་གཞོལ། །ཡང་དག་ལྟ་སྐྱེ་སོམ་ཉི་རྒལ། །འཁོར་མང་
ལྷ་དང་མི་ཡི་ལུས། །ལྷག་པར་ས་ཡི་ཁམས་ལྕི་བས། །རང་གིས་མི་ཐེག་གྱུར་པ་འདི། །ཅི་ཡི་རྐྱེན་གྱིས་ལྟས་འདི་བྱུང་། །ལག་མཐིལ་གཉིས་ན་ནོར་བུའི་ལས། །རིན་ཆེན་ཆར་འབབ་འོད་ཀྱང་འགྱེད། །ཕྱོགས་བཅུར་སྣང་བྱས་སྡིག་པ་བསལ། །སྡུག་བསྔལ་ཞི་ནས་བདེ་བ་ཐོབ། །འདྲེན་པས་གསུངས་ཤིག་ཅི་ཡི་རྐྱེན། །འཁོར་གྱི་དཀྱིལ་འཁོར་ཐམས་ཅད་ལ། །སྤོས་དང་ཕྲེང་བ་སྣ་ཚོགས་ཀྱིས། །སོ་སོའི་ལུས་ལ་བརྒྱན་པ་གདའ། །ལྷ་དང་མི་ཀུན་ཐེ་ཙོམ་སྐྱེས། །ཅི་ཡི་རྒྱུ་དང་ཅི་ཡི་རྐྱེན། །སུ་ཞིག་གང་ནས་འདིར་མཆི་ན། །རྫུ་འཕྲུལ་མཐུ་འདི་སྟོན་པར་གྱུར། །སངས་རྒྱས་བྱང་ཆུབ་སེམས་དཔའ་འམ། །འོན་ཏེ་ཚངས་པའམ་བདུད་ལགས་སམ། །བརྒྱ་བྱིན་ལགས་སམ་སུ་མཆི་བ། །འདྲེན་པ་ཆེན་པོས་བཤད་དུ་གསོལ། །དེའི་ཚེ་བཅོམ་ལྡན་འདས་ཀྱིས་བརྒྱ་བྱིན་དྲི་མ་མེད་པར་སྐྱེས་པ་ལ་འདི་སྐད་ཅེས་བཀའ་སྩལ་ཏོ། །ཁྱེད་ཀྱིས་འདི་ལྟར་ཤེས་པར་བྱོས་ཤིག །བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ཞེས་བྱ་བ་ཡོད་དེ། སྔོན་བསྐལ་པ་ཆེན་པོ་ཚད་མེད་གྲངས་མེད་པའི་བར་དུ་རྙོག་པ་ལྔའི་ཚེ། སངས་རྒྱས་མི་བཞུགས་པའི་འཇིག་རྟེན་གྱི་ཁམས་སུ་སེམས་ཅན་ཡོངས་སུ་སྨིན་པར་བྱེད་པ་དེ། ད་ལྟར་འཁོར་བྱང་ཆུབ་སེམས་དཔའ་བྱེ་བ་ཁྲག་ཁྲིག་སྟོང་ཕྲག་བརྒྱད་ཅུ་དང་བཅས་ཏེ་འཇིག་རྟེན་གྱི་ཁམས་འདིར་ང་ལ་ཕྱག་འཚལ་བ་དང་། བསྙེན་བཀུར་དང་མཆོད་པ་བྱ་བ་དང་། གཞན་ཡང་འཁོར་གྱི་དཀྱིལ་འཁོར་རྣམས་ལ་བལྟ་བ་དང་། རྗེས་སུ་ཡི་རང་བ་བསྐྱེད་པའི་ཕྱིར་འཁོར་དང་བཅས་ཏེ་དགེ་སྦྱོང་གི་གཟུགས་ཀྱིས་འདིར་འོང་བས་མངོན་པར་ཤེས་པའི་མཐུས་ཆོ་འཕྲུལ་འདི་དག་བསྟན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ཞེས་བྱ་བ་དེ་ཚད་མེད་གྲངས་མེད་བསམ་གྱིས་མི་ཁྱབ་པའི་ཡོན་ཏན་གྱི་ཁྱད་པར་གྱིས་ཡོངས་སུ་བརྒྱན་པས་ཉན་ཐོས་དང་། རང་སངས་རྒྱས་དང་། འཇིག་རྟེན་དུ་བཅས་པ་ཐམས་ཅད་ཀྱིས་དཔོག་ནུས་པ་མེད་དོ། །བྱང་ཆུབ་སེམས་དཔའ་
དེ་ནི་ཡོན་ཏན་ཕུལ་དུ་གྱུར་པ་ཐམས་ཅད་ཀྱི་གཏེར་དུ་གྱུར་པའོ། །རྣམ་པར་གྲོལ་བའི་རིན་པོ་ཆེའི་འབྱུང་གནས་ཡིན་ནོ། །བྱང་ཆུབ་སེམས་དཔའ་རྣམས་ཀྱི་མིག་ཡོངས་སུ་དག་པར་བྱེད་པའོ། །མྱ་ངན་ལས་འདའ་བར་འགྲོ་བའི་དེད་དཔོན་དུ་གྱུར་པའོ། །ཡིད་བཞིན་གྱི་ནོར་བུ་རིན་པོ་ཆེ་ལྟར་རིན་པོ་ཆེ་ཐམས་ཅད་ཆར་བཞིན་དུ་འབབ་པས་ཇི་ལྟར་རེ་ཞིང་འདོད་པ་ཐམས་ཅད་ཡོངས་སུ་ཚིམ་པར་བྱེད་པའོ། །ཚོང་པ་མང་པོའི་རིན་པོ་ཆེའི་གླིང་ལྟ་བུའོ། །དགེ་བའི་རྩ་བ་འཕེལ་ཞིང་སྐྱེ་བའི་ཕྱིར་ཞིང་གཤིན་པ་ལྟ་བུའོ། །རྣམ་པར་གྲོལ་བའི་བདེ་བ་ལ་འཇོག་པའི་ཕྱིར་སྣོད་ལྟ་བུའོ། །རིན་པོ་ཆེ་དམ་པའི་འབྱུང་གནས་སུ་གྱུར་པའི་ཕྱིར་ཡོན་ཏན་གྱི་བུམ་པ་བཟང་པོ་ལྟ་བུའོ། །དགེ་བའི་ནན་ཏན་ཅན་ལ་སྣང་བར་བྱེད་པའི་ཕྱིར་ཉི་མ་གསལ་བ་ལྟ་བུའོ། །ལམ་སྟོར་བ་རྣམས་ལ་སྣང་བར་བྱེད་པའི་ཕྱིར་སྒྲོན་མ་ལྟ་བུའོ། །ཉོན་མོངས་པའི་གདུང་བ་སེལ་བའི་ཕྱིར་ཟླ་བ་ལྟར་སིམ་པ་ལྟ་བུའོ། །རྐང་མེད་པ་ལ་ཐེག་པར་གྱུར་པ་ལྟ་བུའོ། །ལམ་རིང་པོར་འགྲོ་བ་ལ་ཚོགས་ཀྱི་སྟེགས་བུ་ལྟ་བུའོ། །འབྲོག་བསླད་པ་ལ་ལམ་སྟོན་པ་ལྟ་བུའོ། །སྨྱོས་ཤིང་འཁྲུགས་པ་ལ་སྨན་དམ་པ་ལྟ་བུའོ། །ནད་ཀྱིས་གཟིར་བ་ལ་སྨན་པ་མཁས་པ་དང་ཕྲད་པ་ལྟ་བུའོ། །རྒས་ཤིང་འཁོགས་པ་ལ་རྟེན་དང་ཁར་བ་ལྟ་བུའོ། །ངལ་བ་དང་དུབ་པ་ལ་ཁྲི་དང་སྟན་ལྟ་བུའོ། །ཆུ་བོ་བཞི་རྒལ་བ་ལ་ཟམ་པ་ལྟ་བུའོ། །ཕ་རོལ་དུ་འགྲོ་བ་ལ་གྲུ་དང་གཟིངས་ལྟ་བུའོ། །དགེ་བའི་རྩ་བ་རྣམ་གསུམ་གྱི་འབྲས་བུ་ཁྱད་པར་ཅན་སྨིན་པར་བྱེད་པའོ། །དགེ་བ་རྣམ་གསུམ་གྱི་གཞི་འདྲེན་ཅིང་རྒྱུན་དུ་འབེབས་པའོ། །སྦྱིན་པ་གཏོང་བའི་རྒྱུན་མི་འཆད་པ་འཁོར་ལོ་ལྟར་འཇུག་པའོ། །ཚུལ་ཁྲིམས་སྲུང་བ་བརྟན་པས་རི་རབ་ལྷུན་པོ་ལྟ་བུའོ། །བརྩོན་འགྲུས་གཞིག་པར་དཀའ་བ་ནི་རྡོ་རྗེ་རིན་པོ་ཆེ་ལྟ་བུའོ། །བཟོད་པ་མི་གཡོ་བ་ནི་ས་ཆེན་པོ་ལྟ་བུའོ། །བསམ་གཏན་ཟབ་པ་ནི་གཏེར་གསང་བ་ལྟ་བུའོ། །མཉམ་པར་འཇོག་པས་མཛེས་པ་ནི་མེ་ཏོག་གི་ཕྲེང་བ་དམ་པ་ལྟ་བུའོ། །ཤེས་རབ་ཟབ་ཅིང་ཡངས་པ་ནི་རྒྱ་མཚོ་ཆེན་པོ་ལྟ་བུའོ། །ཅིས་ཀྱང་
མི་ཆགས་པ་ནི་ནམ་མཁའ་ལྟ་བུའོ། །འབྲས་བུ་དམ་པའི་རྒྱུ་དང་ཉེ་བ་ནི་མེ་ཏོག་རྒྱས་པ་ལྟ་བུའོ། །མུ་སྟེགས་ཅན་འདུལ་བ་ལ་སེང་གེའི་རྒྱལ་པོ་ལྟ་བུའོ། །ལྷའི་བདུད་ཡོངས་སུ་འཇོམས་པ་ནི་ཀླུའམ་གླང་པོ་ཆེ་ལྟ་བུའོ། །ཉོན་མོངས་པའི་དགྲ་ཐམས་ཅད་གཅོད་པ་ནི་ལྷའི་རལ་གྲི་ལྟ་བུའོ། །འདུ་འཛི་མང་པོས་སྐྱོ་བ་ནི་རང་སངས་རྒྱས་ཀྱི་ཐེག་པ་པ་ལྟ་བུའོ། །ཉོན་མོངས་པའི་དྲི་མ་འཁྲུ་བ་ནི་ཆུ་དང་བ་ལྟ་བུའོ། །མི་གཙང་བའི་ཉལ་ཉིལ་སེལ་བ་ནི་རླུང་དྲག་པོ་ལྟ་བུའོ། །ཀུན་ནས་ཉོན་མོངས་པས་གླགས་པ་གཅོད་པ་ནི་མཚོན་རྣོན་པོ་ལྟ་བུའོ། །འཇིགས་པ་དང་བག་ཚ་བ་ཀུན་ལས་སྲུང་བ་ནི་གཉེན་ནམ་མཛའ་བོ་ལྟ་བུའོ། །ཕས་ཀྱི་རྒོལ་བའི་དགྲ་ལས་སྐྱོབ་པ་ནི་འོབས་སམ་མཁར་ལྟ་བུའོ། །ཉམ་ང་བ་ཐམས་ཅད་ལས་གྲོལ་བར་བྱེད་པས་ཕ་མ་ལྟ་བུའོ། །ཞན་ཅིང་ཉམ་ཆུང་བ་རྣམས་སྦེད་པ་ནི་ནགས་སྟུག་པོ་ལྟ་བུའོ། །དབྱར་ལམ་རིང་པོར་འགྲོ་བ་ལ་བསིལ་གྲིབ་ཀྱི་ཤིང་ཆེན་པོ་ལྟ་བུའོ། །ཚ་བ་དང་སྐོམ་གྱིས་གདུངས་པ་རྣམས་ལ་ཆུ་གྲང་ལྟ་བུའོ། །བཀྲེས་པ་རྣམས་ལ་འབྲས་བུ་ཞིམ་པོ་ལྟ་བུའོ། །གཅེར་བུ་རྣམས་ལ་བགོ་བའི་གོས་བྱེད་པའོ། །ཚ་བས་ཉེན་པ་རྣམས་ལ་སྤྲིན་སྟུག་པོར་གྱུར་པའོ། །དབུལ་ཕོངས་པ་ལ་ཡིད་བཞིན་གྱི་ནོར་བུ་རིན་པོ་ཆེར་གྱུར་པའོ། །འཇིགས་སྐྲག་པ་དག་ལ་སྐྱབས་དང་གནས་སུ་གྱུར་པའོ། །ལོ་ཏོག་རྣམས་ལ་ཆར་པར་གྱུར་པའོ། །ཆུ་རྙོག་མ་ཅན་རྣམས་ལ་ནོར་བུ་ཆུ་འདང་དུ་གྱུར་པའོ། །སེམས་ཅན་མང་པོའི་དགེ་བའི་རྩ་བ་མི་འགོང་བར་བྱེད་པས་སྤྱོད་ཡུལ་དམ་པ་སྟོན་ཅིང་འཁོར་སྤྲོ་བ་དང་ཚིམ་པར་བྱེད་པའོ། །སེམས་ཅན་རྣམས་ལྷག་པའི་འཛེམ་པ་དང་ངོ་ཚ་བ་ལ་སྐུལ་ཞིང་འཛུད་པའོ། །བསོད་ནམས་དང་ཡེ་ཤེས་ཀྱི་ཚོགས་སོགས་པ་ལ་དེའི་རྒྱན་དང་ལྡན་པར་བྱེད་པའོ། །ཉོན་མོངས་པ་ཡོངས་སུ་སེལ་བ་ལ་སྐྱུག་པ་དང་འཁྲུ་བའི་སྨན་ལྟ་བུར་གྱུར་པའོ། །སེམས་འཁྲུགས་པ་སྡུད་པ་ནི་མཉམ་པར་འཇོག་པའི་སྤྱོད་ཡུལ་ལྟ་བུར་གྱུར་པའོ། །སྤོབས་པ་ཐོགས་པ་མེད་པ་ནི་ཟོ་ཆུན་རྒྱུད་
པའི་འཁོར་ལོ་ལྟ་བུའོ། །དམིགས་པ་ལ་སེམས་སྡུད་པ་ནི་གཟུགས་བཟང་པོ་ལ་རྟོག་པ་ལྟ་བུའོ། །བཟོད་པ་བརྟན་པ་ནི་རི་རབ་ལྷུན་པོ་ལྟ་བུའོ། །གཟུགས་ཟབ་ཅིང་རྒྱ་ཆེ་བ་ནི་རྒྱ་མཚོ་ཆེན་པོ་ལྟ་བུའོ། །རྫུ་འཕྲུལ་གྱི་རྐང་པ་ཐོགས་པ་མེད་པ་ནི་ནམ་མཁའ་ལྟ་བུའོ། །སྒྲིབ་པའི་བག་ཆགས་ཐམས་ཅད་ཡོངས་སུ་སེལ་བ་ནི་ཇི་ལྟར་ཉི་མ་ཚ་བས་འཁྱག་པ་ཆམ་ཆོམ་བཞུ་བ་ལྟ་བུའོ། །རྟག་ཏུ་བསམ་གཏན་དང་། གཟུགས་མེད་པ་དང་། ཡང་དག་པའི་ལམ་ལ་རོལ་ཅིང་ཐམས་ཅད་མཁྱེན་པའི་ཡེ་ཤེས་ཀྱི་རིན་པོ་ཆེ་དམ་པའི་གླིང་ལྟ་བུར་གྱུར་པས་ཆེད་དུ་མ་བརྩམས་ཀྱང་ཆོས་ཆེན་པོའི་འཁོར་ལོ་རབ་ཏུ་བསྐོར་རོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་དེ་ནི་དེ་ལྟ་བུའི་ཡོན་ཏན་གྱི་ཁྱད་པར་ཚད་མེད་གྲངས་མེད་པ་བསམ་གྱིས་མི་ཁྱབ་པ་དང་ལྡན་པ་དེ་འཁོར་དང་བཅས་ཏེ་གནས་འདིར་ཕྱིན་དུ་ཉེ་བས་འོད་ལས་འདི་ལྟ་བུའི་ཆོ་འཕྲུལ་དང་ལྟས་སྔར་བསྟན་པ་ཡིན་ནོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སའི་སྙིང་པོའི་ཡོན་ཏན་མང་པོ་བཤད་མ་ཐག་ཏུ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་འཁོར་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་དང་བཅས་ཏེ། རྫུ་འཕྲུལ་གྱི་མཐུས་དགེ་སྦྱོང་གི་གཟུགས་སུ་སྟོན་ཅིང་ལྷོ་ཕྱོགས་ནས་བཅོམ་ལྡན་འདས་ཀྱི་སྤྱན་སྔར་ལྷགས་ཏེ། འཁོར་མང་པོ་དང་བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་གཏུགས་ཏེ་ཕྱག་འཚལ་ནས་ལན་གསུམ་བསྐོར་བ་བྱས་ཏེ། དེ་བཞིན་གཤེགས་པའི་སྤྱན་སྔར་ཐལ་མོ་སྦྱར་ནས། འགྲེང་བཞིན་དུ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །རྣམ་པར་འདྲེན་པ་རྐང་གཉིས་མཆོག །བྱམས་པའི་ཐུགས་ཀྱིས་ཀུན་ལ་སྐྱོབ། །ས་ཆེན་ལྟར་ནི་ཤིན་ཏུ་བཟོད། །ཞེ་སྡང་ཁྲོ་བའི་སེམས་ཀུན་བསལ། །མཚན་དང་དཔེ་བྱད་མཆོག་ལྡན་པས། །སངས་རྒྱས་ཀུན་གྱི་ཞིང་རབ་བརྒྱན། །བདེན་པའི་བྱམས་དང་སྙིང་རྗེ་ཡིས། །རྒྱལ་བའི་ཞིང་ཀུན་རབ་ཏུ་འགེངས། །སྲེད་པའི་དྲ་བ་ཀུན་བཅད་ནས། །ཡང་དག་ཅི་བཞིན་བདེ་བར་གནས། །ཡོངས་
སུ་དག་པའི་ཞིང་སྤངས་ནས། །རྙོག་པ་ཅན་གྱི་སེམས་ཅན་དགྲོལ། །རྙོག་པའི་ཞིང་འདིར་དམ་བཅས་ཏེ། །ངན་འགྲོ་སེམས་ཅན་སྨིན་པར་མཛད། །ཡང་དག་བརྟན་པའི་རྩོལ་བ་ཡིས། །རིང་མོ་ཞིག་ནས་དཀའ་ཐུབ་སྤྱད། །ཡུན་རིངས་དཀའ་ཐུབ་སྤྱད་པ་དག །ཐོས་ནས་འཇིགས་པའི་སེམས་ཀྱང་སྐྱེ། །སྦྱིན་པ་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་ཤེས་རབ་བསྐྱེད། །སངས་རྒྱས་བྱང་ཆུབ་སེམས་དཔའ་དང་། །ཚད་མེད་ཉན་ཐོས་བསྙེན་བཀུར་མཆོག །གཞན་ཡང་སྐྱེ་བོ་མང་པོ་དག །བཀྲེས་སྐོམ་ན་འཆི་ཀུན་ལས་བསྒྲལ། །སོ་སོའི་སྐྱེ་བོ་གཞན་གྱི་ཕྱིར། །ལུས་སྲོག་མ་ཆགས་མང་དུ་བཏང་། །ཡང་དག་དམ་པའི་ཆོས་ཚོལ་ཕྱིར། །ཤ་དང་རུས་པའང་མང་དུ་བཏང་། །བདག་གི་བདེ་བ་ཀུན་བཏང་ནས། །སྐྱེ་བོ་རྣམས་ལ་ཐུགས་བརྩེར་དགོངས། །སོ་སོའི་སྐྱེ་བོ་མང་པོའི་ཕྱིར། །ཐེ་ཙོམ་དྲ་བ་གཅོད་ལ་བརྩོན། །དབང་པོ་དྲུག་རྣམས་རབ་བསྡམས་ནས། །འདོད་པ་ཐམས་ཅད་རིང་དུ་སྤངས། །འདུས་བྱས་མི་རྟག་སྡུག་བསྔལ་ཏེ། །བདག་མེད་སྟོང་པ་ཉིད་དུ་རྟོགས། །སྡུག་བསྔལ་ལས་ཀུན་སྐྱེ་བ་ཡི། །རྒྱུ་ནི་འདོད་ཆགས་སྲེད་པའོ། །དེ་ཕྱིར་དབང་པོ་དྲུག་པས་སྔར། །འདོད་ཆགས་ཡོངས་སུ་གཅད་པར་བྱ། །སེམས་ཅན་གནས་པའི་ཁམས་ཀུན་དུ། །རྟག་པར་ཐུགས་རྗེ་ཆེན་པོས་གནས། །བྱང་ཆུབ་མཆོག་ཏུ་སངས་རྒྱས་ཀྱང་། །སྔོན་གྱི་སྨོན་ལམ་ཀུན་མི་གཏོང་། །སེམས་ཅན་གང་ཞིག་སྡུག་བསྔལ་གྱིས། །རྣམ་པར་གཟིར་བ་དག་གཟིགས་ནས། །ཤིན་ཏུ་འབབ་པའི་བརྩོན་འགྲུས་ཀྱིས། །དེ་ལས་སྒྲོལ་ཕྱིར་རབ་ཏུ་བརྩོན། །སྦྱིན་པ་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཀུན་བསྒོམས་ནས། །ཇི་ལྟར་མ་ནི་བུ་གཅིག་ལ། །བྱམས་པའི་སེམས་ཀྱིས་གསོ་བཞིན་དུ། །སྔོན་ཡང་སེམས་ཅན་རིས་ཀུན་ལ། །རྟག་ཏུ་བྱམས་པའི་ཐུགས་བསྐྱེད་པས། །དེ་ཕྱིར་མྱུར་དུ་སངས་རྒྱས་ནས། །ཚད་མེད་པ་ཡི་འཁོར་རྣམས་སྒྲོལ། །ཇི་ཙམ་བྱང་ཆུབ་སྤྱོད་བསྒོམས་པ། །སེམས་ཅན་དོན་དུ་
མ་བསྔོས་མེད། །དེ་བས་སེམས་ཅན་ཐམས་ཅད་ལ། །ཕ་རོལ་ཕྱིན་པ་དྲུག་མི་གཏོང་། །རྟག་ཏུ་དུས་ངན་ཐ་མའི་ཚེ། །བླ་མེད་བྱང་ཆུབ་བསྒྲུབས་པས་ན། །ད་ཡང་དུས་ངན་ཐ་མའི་ཚེ། །བླ་མེད་བྱང་ཆུབ་མངོན་སངས་རྒྱས། །ངན་པར་ལྟ་བའི་ལྷ་ཀླུ་མི། །གནོད་སྦྱིན་དག་ནི་ཀུན་བཏུལ་ཏེ། །ཐེ་ཙོམ་གཅོད་ཅིང་བདེར་བཀོད་པ། །རྡོ་རྗེ་ལྟ་བུའི་ལམ་ལའོ། །ཚད་མེད་པ་ཡི་སྐྱེ་བོ་དག །བྱང་ཆུབ་མཆོག་ཏུ་ལུང་ཡང་སྟོན། །མཆོད་འོས་འདྲེན་པའི་གཙོར་གྱུར་ཏེ། །མཆོག་གི་བསོད་ནམས་ཞིང་དུ་གྱུར། །དཔེ་ཟླ་མེད་པའི་བཅོམ་ལྡན་འདས། །བྱམས་པས་འགྲོ་བ་ཀུན་ལ་སྐྱོབ། །ཚད་མེད་གྲགས་པ་ཆེན་པོ་ཡིས། །ཕྱོགས་བཅུའི་འཇིག་རྟེན་ཡོངས་སུ་ཁྱབ། །དེ་བས་བྱང་ཆུབ་སེམས་དཔའ་རྣམས། །བདག་གི་དོན་དུ་བསྒྲུབ་པའི་ཕྱིར། །ཀུན་ནས་ལྷན་ཅིག་འདིར་འདུས་ནས། །ཐུབ་པ་ཆེན་པོ་སྤྱན་སྔར་ལྷགས། །དམ་པའི་ཆོས་རྣམས་ཐོས་ནས་ནི། །རབ་ཏུ་དགའ་བའི་སེམས་སྐྱེས་ཏེ། །ལྷག་པར་ཡང་དག་བརྩོན་བསྐྱེད་ནས། །བྱང་ཆུབ་སྤྱོད་ལ་ནན་ཏན་བགྱིད། །རྣམ་པར་འདྲེན་པའི་ཆོས་ཀྱི་མཐུས། །ཐམས་ཅད་མངོན་པར་འཚང་རྒྱ་བས། །དེ་བས་དེང་འདིར་འདྲེན་ཁྱོད་ཀྱིས། །བསྡུས་པའི་འཁོར་ནི་སྔོན་མ་བྱུང་། །གནོད་སྦྱིན་ཁྲི་ཕྲག་བཅུ་གསུམ་སྙེད། །རྟག་ཏུ་ཤ་ཟ་ཁྲག་འཐུང་བ། །ཐམས་ཅད་སྡིག་པའི་ལས་བཏང་ནས། །བྱང་ཆུབ་ཆེན་པོར་འབབ་ཅིང་གཞོལ། །ཁ་ཅིག་ཁྱད་པར་གཟུགས་མཆོག་དང་། །བཟོད་པ་ཏིང་ངེ་འཛིན་ཡང་ཐོབ། །ཁ་ཅིག་ཟག་པ་ཀུན་ཟད་ནས། །འཇིག་རྟེན་མཆོག་གི་དགྲ་བཅོམ་གྱུར། །ཁ་ཅིག་ཚད་མེད་བཞི་བསྒོམས་ཤིང་། །ཁ་ཅིག་བསྡུ་བ་བཞི་ལ་གནས། །ཁ་ཅིག་ཡང་དག་རིག་བཞི་ཐོབ། །ཁ་ཅིག་འཐུན་པའི་བཟོད་ལ་གནས། །ཁ་ཅིག་དཔའ་འགྲོའི་ཏིང་འཛིན་ཐོབ། །ཁ་ཅིག་ཤེས་རབ་མིག་དང་ལྡན། །ཁ་ཅིག་མི་སྐྱེ་བཟོད་ལ་གནས། །དེ་ཀུན་འདྲེན་པས་བྱིན་གྱིས་བརླབས། །བཅོམ་ལྡན་གཟི་བརྗིད་ཆེན་པོའི་མཐུས། །བདུད་ཀྱི་འཁོར་རྣམས་བཅོམ་ནས་སུ། །རྣམ་པ་དགུ་བཅུ་རྩ་ལྔ་ཡི། །མུ་སྟེགས་
ཅན་གྱི་རིས་ཀུན་བཏུལ། །སེམས་ཅན་དམྱལ་བ་བྱོལ་སོང་དང་། །ཡི་དགས་ལྷ་མིན་རྒྱུད་ཀུན་བཅོམ། །བདེ་བས་སེམས་ཅན་བདེན་པ་རྣམས། །ཐམས་ཅད་རྒྱལ་བའི་སྤྱན་སྔར་ལྷགས། །ནད་དང་མཚོན་གྱིས་འཇིགས་པ་དང་། །མུ་གེས་འཇིགས་པའང་དེང་འདིར་བཅིལ། །སེམས་ཅན་མདོངས་ཤིང་འཐོམ་པ་དང་། །ཡང་དག་ལམ་ནི་སྟོར་བ་བསྒྲལ། །ཉོན་མོངས་མྱོས་ཤིང་འཁྲུགས་པ་དག །ཐམས་ཅད་ཞི་བའི་ལམ་ལ་བཀོད། །བདག་གིས་བྱ་བ་ཀུན་སྤངས་ཏེ། །ལྷགས་ནས་བཅོམ་ལྡན་ཞབས་ལ་ཐུག །དཔག་ཏུ་མེད་པའི་ཞིང་རྣམས་ན། །བཅོམ་ལྡན་ད་ལྟར་བཞུགས་པའི་རྣམས། །ཐམས་ཅད་ཁྱོད་ལ་ཀུན་བསྔགས་པས། །ཐོས་ནས་ཐམས་ཅད་འདི་རུ་ལྷགས། །ཐམས་ཅད་མཁྱེན་པ་རྒྱ་མཚོ་ཡི། །ཡང་དག་ཡོན་ཏན་ཚད་མ་མཆིས། །སེམས་ཅན་མང་པོའི་དོན་མཛད་པ། །མོས་པའི་སེམས་ཀྱིས་ཕྱག་འཚལ་ལོ། །ཚད་མེད་བསོད་ནམས་རྫོགས་བགྱིས་པས། །བཅོམ་ལྡན་ཞབས་ལ་ཕྱག་འཚལ་གྱུར། །ཚད་མེད་བསྐལ་པའི་བར་དུ་ཡང་། །མཆོད་པ་མང་པོས་མཆོད་པར་ཤོག །བདག་ཀྱང་བཅོམ་ལྡན་ཇི་བཞིན་དུ། །དེ་ལྟ་བུ་ཡི་ཡི་དམ་བཅས། །རྙོག་པ་ཅན་གྱི་འཇིག་རྟེན་འདིར། །བླ་མེད་བྱང་ཆུབ་ཐོབ་པར་ཤོག །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་ཚིགས་སུ་བཅད་པ་དམ་པ་འདི་དག་གིས། བཅོམ་ལྡན་འདས་ལ་མངོན་པར་བསྟོད་ནས་འཁོར་དང་བཅས་ཏེ་གཞན་ཡང་ལྷ་རྫས་ཀྱི་བསུང་དང་མེ་ཏོག་རྣམ་པ་སྣ་ཚོགས་ཀྱི་རིན་པོ་ཆེའི་རྒྱན་ཚད་མེད་པ་སྙེད་ཀྱིས། བཅོམ་ལྡན་འདས་ལ་མངོན་པར་གཏོར་ནས་སྟེང་གི་བར་སྣང་ལ་རིན་པོ་ཆེའི་གདུགས་སུ་གྱུར་ཏེ། དམ་པའི་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་ཅི་ཡང་མི་སྨྲ་བར་འདུག་གོ །དེའི་ཚེ་འཁོར་གྱི་དཀྱིལ་འཁོར་དེར་འདུས་པའི་འཁོར་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་མཐོང་ནས་ངོ་མཚར་རྨད་དུ་གྱུར་ཏེ། སོ་སོ་ནས་རྣམ་པ་སྣ་ཚོགས་ཀྱི་ལྷ་རྫས་ཀྱི་སྤོས་དང་། མེ་ཏོག་རིན་པོ་ཆེའི་རྒྱན་དང་། ན་བཟའ་དང་། རྒྱལ་མཚན་དང་། བ་དན་
དང་། གདུགས་ལ་སོགས་པ་ཕུལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་མཆོད་པ་བྱས་ནས་འདི་སྐད་ཅེས་སྨྲས་སོ། །བདག་ཅག་གིས་རྙེད་པ་རབ་ཏུ་རྙེད་དོ། །བཅོམ་ལྡན་འདས་ཀྱི་བྱིན་གྱི་རླབས་ཀྱིས་མངོན་སུམ་དུ་སྐྱེས་བུ་ཆེན་པོ་ཁྱོད་མཐོང་ནས་བསྟི་སྟང་དང་བཅས་ཏེ་མཆོད་པ་བྱས་པར་གྱུར་ཏོ་ཞེས་སྨྲའོ། །དེ་ནས་འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་རིགས་པར་ཐེ་ཙོམ་འདྲི་ཞེས་བྱ་བ་ཞིག་འདུག་པ་སྟན་ལས་ལངས་ནས་གོས་ཚགས་བཅོས་ཏེ་ཕྲག་པ་གཡས་པ་ཕྱུང་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འདི་གང་ནས་མཆིས། གནས་པའི་སངས་རྒྱས་ཀྱི་ཞིང་འདི་ནས་ཇི་སྲིད་ཅིག་ན་མཆིས། ཡོན་ཏན་དང་དགེ་བའི་རྩ་བ་ཇི་ཙམ་ཞིག་དང་ལྡན་ན་བཅོམ་ལྡན་འདས་ཀྱིས་བསྟོད་པ་རྣམ་པ་སྣ་ཚོགས་ཀྱིས་བསྔགས་ལ་ཕྱིར་ཡང་བཅོམ་ལྡན་འདས་ཀྱི་ཡོན་ཏན་གྱི་རྒྱ་མཚོ་བསམ་གྱིས་མི་ཁྱབ་པ་ལ་མངོན་པར་བསྟོད་པར་གྱུར། བདག་ཅག་གིས་སྔོན་མ་མཐོང་བས་ངོ་མཚར་དུ་གྱུར་ན་བཅོམ་ལྡན་འདས་ཀྱིས་བདག་ཅག་ལ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཐོང་ཤིག །སྐྱེས་བུ་ཆེན་པོ་འདིའི་ཡོན་ཏན་དང་དགེ་བའི་རྩ་བ་ཇི་ཙམ་པ་དེ་འཇིག་རྟེན་དུ་བཅས་པ་ལྷ་དང་མིའི་འཁོར་ཐམས་ཅད་ཀྱིས་རྟོགས་པར་ནུས་པ་མ་ཡིན་ནོ། །གལ་ཏེ་དེ་བཞིན་གཤེགས་པས་སྐྱེས་བུ་ཆེན་པོ་དེའི་ཡོན་ཏན་དང་དགེ་བའི་རྩ་བ་རྒྱས་པར་བཤད་ན་འཇིག་རྟེན་དུ་བཅས་པ་ལྷ་དང་མི་ཐམས་ཅད་ཀྱི་མགོ་རྨོངས་ཏེ་ཡིད་མི་ཆེས་པར་འགྱུར་རོ། །དེ་ནས་བྱང་ཆུབ་སེམས་དཔའ་རིགས་པར་ཐེ་ཙོམ་འདྲི་བས་ཡང་གསོལ་པ། བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཤིན་ཏུ་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་ཕྱོགས་ཙམ་
ཞིག་བཤད་པར་བྱའོ། །ཇི་ལྟར་སྐྱེས་བུ་ཆེན་པོ་དེའི་ཡོན་ཏན་གྱི་ཁྱད་པར་ཚད་མེད་བསམ་གྱིས་མི་ཁྱབ་པ་དང་ལྡན་ནོ། །འདི་ལྟ་སྟེ། དཔའ་བར་འགྲོ་བའི་ཏིང་ངེ་འཛིན་གྱི་ཁྱད་པར་ལ་བདེ་བར་གནས་པའོ། །དེ་བཞིན་གཤེགས་པའི་སྤྱོད་ཡུལ་ཡང་ཤིན་ཏུ་རྟོགས་པར་འཇུག་པའོ། །མི་སྐྱེ་བའི་ཆོས་ཀྱི་བཟོད་པའི་ཁྱད་པར་ཡང་ཐོབ་པའོ། །སངས་རྒྱས་ཀྱི་ཆོས་ཐམས་ཅད་ལ་དབང་དུ་གྱུར་པའོ། །ཐམས་ཅད་མཁྱེན་པའི་ཡེ་ཤེས་ཀྱི་ས་ལ་བཟོད་པ་ཐོབ་པའོ། །ཐམས་ཅད་མཁྱེན་པའི་ཡེ་ཤེས་ཀྱི་རྒྱ་མཚོའི་ཕ་རོལ་ཏུ་ཕྱིན་པའོ། །སེང་གེ་རབ་ཏུ་བསྒྱིངས་པའི་རྒྱལ་མཚན་གྱི་ཏིང་ངེ་འཛིན་ལ་ཡང་ཤིན་ཏུ་གནས་པའོ། །ཐམས་ཅད་མཁྱེན་པའི་ཡེ་ཤེས་ཀྱི་རི་ལ་ཡང་རབ་ཏུ་འཛེགས་པའོ། །མུ་སྟེགས་ཅན་དང་ཕས་ཀྱི་རྒོལ་བ་ཐམས་ཅད་ཤིན་ཏུ་ཆོམས་པ་སྟེ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་སངས་རྒྱས་ཀྱི་ཞིང་ཇི་སྙེད་པ་ཐམས་ཅད་དུ་དེ་གནས་པར་བྱེད་དོ། །སྐྱེས་བུ་ཆེན་པོ་དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་གནས་ཏེ། གང་ཏིང་ངེ་འཛིན་རྣམས་ཀྱིས་ཚད་མེད་པའི་ཡོན་ཏན་གྱི་ཁྱད་པར་སྐྱེད་པར་གྱུར་པས་གདུལ་བའི་སེམས་ཅན་ཚད་མེད་པ་དག་ཡོངས་སུ་སྨིན་པར་བྱེད་དོ། །སྐྱེས་བུ་ཆེན་པོ་དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཡེ་ཤེས་མངོན་པར་སྐྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་སེམས་ཅན་ཐམས་ཅད་འཐུན་པར་ཏིང་ངེ་འཛིན་རྣམས་ཀྱི་སྤྱོད་ཡུལ་ཀུན་མཐོང་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་དཔག་ཏུ་མེད་པའི་ཡེ་ཤེས་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཅི་ནུས་པ་བཞིན་དུ་ཚད་མེད་པའི་མཆོད་པའི་ཡོ་བྱད་དམ་པས་སངས་རྒྱས་བཅོམ་ལྡན་འདས་དེ་ལ་བསྟི་སྟང་དང་བཅས་པས་མཆོད་པར་འགྱུར་རོ། །དེ་ཇི་ལྟར་གནས་པ་བཞིན་དུ་
སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་རྣམ་པར་དག་པའི་ཡེ་ཤེས་ཕུན་སུམ་ཚོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཀྱིས་འཐུན་པར་འདོད་པའི་སྤྱོད་ཡུལ་གྱི་ཉེས་པའི་སྐྱོན་ཚད་མེད་པ་མཐོང་ནས་སེམས་རྣམ་པར་དག་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཁྲེལ་བ་དང་ངོ་ཚ་བ་དང་ལྡན་པའི་ཡེ་ཤེས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ལྷག་པའི་འཛེམ་པ་དང་ངོ་ཚ་བ་དང་ལྡན་ཞིང་སྡིག་པ་མི་དགེ་བའི་ཆོས་དང་ཡོངས་སུ་བྲལ་ནས་བསམ་པ་མི་ཉམས་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཐེག་པ་ཐམས་ཅད་དང་ལྡན་པ་གསལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཐབས་མཁས་པའི་རྫུ་འཕྲུལ་གྱི་མིག་གི་མངོན་པར་ཤེས་པ་དང་། སྔོན་གྱི་གནས་དྲན་པའི་མངོན་པར་ཤེས་པ་དང་། འཆི་འཕོ་དང་སྐྱེ་བ་མངོན་པར་ཤེས་པ་དང་། འཇིག་རྟེན་འདི་དང་འཇིག་རྟེན་ཕ་རོལ་གྱི་རྒྱུ་དང་འབྲས་བུ་མངོན་པར་རྟོགས་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མྱ་ངན་མེད་པའི་མངོན་པར་ཤེས་པས་རིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་མྱ་ངན་དང་། ཡི་མུག་པ་དང་། རྨུགས་པ་ཐམས་ཅད་དང་བྲལ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མངོན་པར་ཤེས་པའི་ཁྱད་པར་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན། སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཐབས་མཁས་པའི་མངོན་པར་ཤེས་པ་དང་ལྡན་པར་འགྱུར་རོ། །དེ་ཇི་
ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་འཇིག་རྟེན་ཀུན་དུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་མུན་པ་དང་བྲལ་ཏེ། སངས་རྒྱས་ཀྱི་ཞིང་དེ་ན་གནས་པ་ཐམས་ཅད་ཀྱང་ཕྱོགས་བཅུའི་སངས་རྒྱས་ཀྱི་ཞིང་ཀུན་མངོན་སུམ་དུ་མཐོང་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་སངས་རྒྱས་ཀྱི་སྒྲོན་མ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ལོག་པར་ལྟ་བ་ཡོངས་སུ་སྤངས་ནས། དཀོན་མཆོག་གསུམ་ལ་སྐྱབས་སུ་འགྲོ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་གྱུར་ཏེ། གལ་ཏེ་རྡོ་རྗེའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་གི་རི་ཁོར་ཡུག་དང་། ཁོར་ཡུག་ཆེན་པོ་དང་། རི་རབ་ལྷུན་པོ་དང་། དེ་མ་ཡིན་པའི་རི་གཞན་དང་། ལུང་བ་དང་། ལུང་ཕྲན་དང་། གཅོང་རོང་དང་། གསེག་མ་དང་། གྱོ་མོ་དང་། ཚེར་མ་དང་། རྩྭ་དང་། ཤིང་ངན་པ་ཐམས་ཅད་མི་སྣང་ངོ་། །སངས་རྒྱས་ཀྱི་ཞིང་དེ་ན་ཇི་ཙམ་དུ་ངན་པར་གདགས་པ་དུག་དང་། བྱད་སྟེམས་དང་། གཅན་གཟན་མ་རུངས་པ་དང་། ཡེ་འདྲོག་དང་། གློ་བུར་དང་། རིམས་ནད་དང་། ཡུལ་ངན་དང་། ནམ་རྨུས་པ་དང་། རྡུལ་དང་། དྲི་མ་དང་། མི་གཙང་བའི་ཉལ་ཉིལ་ཐམས་ཅད་ཀྱང་ཞི་ཞིང་མེད་པར་འགྱུར་རོ། །སངས་རྒྱས་ཀྱི་ཞིང་དེའི་ས་གཞི་ཡང་ལག་མཐིལ་བཞིན་དུ་མཉམ་ཞིང་བཀྲ་ཤིས་པ་རྣམ་པ་སྣ་ཚོགས་རང་འབྱུང་བ་དང་། རྣམ་པར་དག་པར་འགྱུར་བ་དང་། ཕུལ་དུ་འགྱུར་བ་དང་། དམ་པར་འགྱུར་བ་དང་། མཚན་མ་བཟང་པོ་དུ་མས་ཡོངས་སུ་བརྒྱན་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཡེ་ཤེས་ཀྱི་སྟོབས་གདུལ་དཀའ་བ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་བདུད་ཀྱི་རྒྱལ་པོ་འཁོར་དང་བཅས་ཏེ་ཐམས་ཅད་འཇིགས་སྐྲག་ནས། དཀོན་མཆོག་གསུམ་ལ་སྐྱབས་སུ་འགྲོ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་གློག་གི་འོད་ཟེར་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་འཇིག་རྟེན་ཕ་རོལ་གྱི་འཇིགས་པ་དང་བྲལ་ཞིང་ཆོས་ཀྱིས་སྤྲོ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མཆོག་དམ་པའི་རོ་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་སེམས་ཅན་ཐམས་ཅད་བསམས་པ་བཞིན་དུ་ཟས་དང་སྐོམ་གྱིས་ཚིམ་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མཆོག་གི་མདངས་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་གང་ཡང་ལྷག་པའི་མཐུ་སྟོབས་དང་མི་ལྡན་པ་མེད་དེ་ནད་ཀྱི་སྡུག་བསྔལ་ཐམས་ཅད་དང་བྲལ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མཆོག་དམ་པའི་ཡོ་བྱད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན། ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཅི་ལ་མོས་པ་བཞིན་དུ་ཁྲི་སྟན་དང་། གདིང་བ་དང་། གོས་དང་། རིན་པོ་ཆེའི་རྒྱན་དང་། ཅི་ཙམ་དུ་འཚོ་བའི་ཡོ་བྱད་དུ་གཏོགས་པ་དེ་དག་ཐམས་ཅད་ཀྱིས་བྲེལ་ཞིང་ཕོངས་པ་མེད་དེ་རབ་ཏུ་མཛེས་པ་ཤིན་ཏུ་ཡིད་དུ་འོང་བ་དང་ལྡན་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་རྩོད་པ་མེད་པའི་ཡེ་ཤེས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་
དེ་དག་ན་གནས་པའི་སེམས་ཅན་ཐམས་ཅད་ལུས་དང་། སེམས་ཟོ་མདོག་བདེ་ཞིང་ཡང་བ་དང་། དགྲ་སྡང་བ་དང་། འཆིང་བ་ཐམས་ཅད་དང་བྲལ་བ་དང་། འདུམ་ཞིང་དགའ་བ་དང་། སྤྲོ་བ་དང་། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་རྩོམ་པ་དང་། སེམས་མི་འཁྲུག་པ་དང་། ཤེས་རབ་ཡོངས་སུ་རྫོགས་པ་ལ་དགའ་ཞིང་མོས་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཕུལ་དུ་གྱུར་པའི་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཁྱད་པར་ཅན་གྱི་རབ་ཏུ་དགའ་བ་ཚད་མེད་པ་དང་ལྡན་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་འཇིག་རྟེན་པའི་ལམ་གྱི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་སེམས་ཅན་ཐམས་ཅད་ཐོགས་པ་མེད་པའི་ཡེ་ཤེས་ཐོབ་ཅིང་རྣམ་པར་དག་པའི་ལས་རྣམ་པ་སྣ་ཚོགས་སྦྱོང་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་རྒྱལ་བའི་རྡོ་རྗེ་ལ་ཤིན་ཏུ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་སེམས་ཅན་ཐམས་ཅད་དབང་པོ་ཀུན་དང་ལྡན་ཞིང་དབང་པོ་མི་ཉམས་པ་དང་། རྟག་ཏུ་ཡང་དག་པར་འབྱུང་བའི་ལམ་ལ་མོས་ཤིང་སེམས་རབ་ཏུ་ཞི་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ལྷག་པའི་རྒྱལ་མཚན་རྟོག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་བདག་སྡིག་པ་མི་དགེ་བའི་ཆོས་ལ་ཤིན་ཏུ་སྐྱོ་ཞིང་མི་འདོད་པ་དང་། ཐམས་ཅད་ཀྱང་དགེ་བ་སྲུང་བ་དང་། དགེ་བ་བཅུའི་ལས་ཀྱི་ལམ་གྱིས་མཐོ་རིས་ཀྱི་ལྷར་སྐྱེ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་
དུ་འགྱུར་ཏེ། གལ་ཏེ་བྱམས་པ་དང་། སྙིང་རྗེར་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་བྱམས་པའི་སེམས་དང་། སྙིང་རྗེའི་སེམས་དང་། གནོད་པའམ། འཚེ་བ་མེད་པའི་སེམས་དང་། ཀུན་ལ་སྙོམས་པའི་སེམས་དང་། གཅིག་ལ་གཅིག་ཕན་པ་དང་བདེ་བར་བྱེད་པའི་སེམས་སྐྱེ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་བསོད་ནམས་ཐམས་ཅད་ཤིན་ཏུ་སྡུད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་འཐབ་པ་དང་། རྩོད་པ་དང་། ནད་དང་། མུ་གེ་དང་ཡོངས་སུ་བྲལ་ཏེ། དུས་མ་ཡིན་པའི་རླུང་དང་། ཆར་པ་དང་། ཁ་བ་དང་། རྩུབ་པ་དང་། ཚ་བ་དང་། སྡུག་བསྔལ་བ་ལ་སོགས་པའི་རེག་བྱའི་ཡུལ་ཡིད་དུ་མི་འོང་བ་ཐམས་ཅད་ཡོངས་སུ་ཞི་བར་འགྱུར་རོ། །དེ་ལྟར་སྐྱེས་བུ་ཆེན་པོ་དེ་གལ་ཏེ་རྒྱ་མཚོ་གློག་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་གི་ས་ཆེན་པོ་ཐམས་ཅད་རིན་པོ་ཆེ་རྣམ་པ་སྣ་ཚོགས་ལས་བྱས་པར་འགྱུར་ཞིང་ཉེས་པའི་སྐྱོན་ཐམས་ཅད་དང་ཡོངས་སུ་བྲལ་ཏེ་རྣམ་པ་སྣ་ཚོགས་ཀྱི་རིན་པོ་ཆེའི་ཤིང་དང་། གོས་ཀྱི་ཤིང་དང་། སྣོད་ཀྱི་ཤིང་དང་། རྒྱན་གྱི་ཤིང་དང་། མེ་ཏོག་གི་ཤིང་དང་། འབྲས་བུའི་ཤིང་དང་། རོལ་མོ་སྣ་ཚོགས་ཀྱི་ཤིང་ལ་སོགས་པ་འཚོ་བའི་ཡོ་བྱད་དམ་པ་ཚད་མེད་པ་སྙེད་ཀྱིས་ཡོངས་སུ་བརྒྱན་པར་གྱུར་ཏོ། །དེ་བཞིན་དུ་མདོར་ན་རིགས་ཀྱི་བུ་དེ་ནི་སེམས་ཅན་མང་པོ་ཡོངས་སུ་སྨིན་པར་བྱ་བའི་ཕྱིར་ཉིན་རེ་ཞིང་སྔ་དྲོའི་དུས་སུ་ཏིང་ངེ་འཛིན་གང་གཱའི་ཀླུང་གི་བྱེ་མ་སྙེད་དག་གི་ཏིང་ངེ་འཛིན་ལ་སྙོམས་པར་འཇུག་སྟེ། ཏིང་ངེ་འཛིན་དེ་ལས་ལངས་ནས་ཕྱོགས་བཅུའི་སངས་རྒྱས་ཀྱི་ཞིང་ཀུན་ན་གདུལ་བའི་སེམས་ཅན་ཐམས་ཅད་ལ་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་དེ་དང་དེ་དག་གིས་ཡོངས་སུ་སྨིན་པར་བྱེད་དོ། །རིགས་ཀྱི་བུ་འདི་ནི་སྔོན་བསྐལ་པ་ཆེན་པོ་
ཚད་མེད་དཔག་ཏུ་མེད་པའི་བར་དུ་རྙོག་པ་ལྔའི་ཚེ་དེ་བཞིན་གཤེགས་པ་མི་བཞུགས་པའི་འཇིག་རྟེན་གྱི་ཁམས་སུ་སེམས་ཅན་ཡོངས་སུ་སྨིན་པར་བྱེད་དོ། །ཕྱི་མ་མ་འོངས་པའི་དུས་སུ་འཇིག་རྟེན་གྱི་ཁམས་ལ་ལར་གལ་ཏེ་མཚོན་གྱིས་འཇིགས་པ་བྱུང་སྟེ། སེམས་ཅན་དག་ཡོངས་སུ་གདུངས་པར་གྱུར་པ་ན། རིགས་ཀྱི་བུ་འདི་དེ་ལྟ་བུ་དག་མཐོང་ནས་སྔ་དྲོའི་དུས་ཀྱི་ཚེ་ཏིང་ངེ་འཛིན་རྣམས་ཀྱི་མཐུས་མཚོན་གྱིས་འཇིགས་པ་དེ་དག་ཡོངས་སུ་བཅིལ་ནས་སེམས་ཅན་རྣམས་གཅིག་ལ་གཅིག་བྱམས་པའི་སེམས་ཀྱིས་སྙིང་བརྩེ་བར་བྱེད་དོ། །འཇིག་རྟེན་གྱི་ཁམས་ལ་ལར་ནད་ཀྱིས་འཇིགས་པ་བྱུང་སྟེ། སེམས་ཅན་ཁ་བཏག་པ་ན་རིགས་ཀྱི་བུ་འདིས་དེ་ལྟ་བུ་དག་མཐོང་ནས་སྔ་དྲོའི་དུས་ཀྱི་ཚེ་ཏིང་ངེ་འཛིན་རྣམས་ཀྱི་མཐུས་ནད་ཀྱིས་འཇིགས་པ་ཡོངས་སུ་བཅིལ་ནས་སེམས་ཅན་རྣམས་རབ་ཏུ་བདེ་བ་ཐོབ་པར་བྱེད་དོ། །འཇིག་རྟེན་གྱི་ཁམས་ལ་ལར་གལ་ཏེ་མུ་གེས་འཇིགས་པ་བྱུང་སྟེ་སེམས་ཅན་ཁ་བཏག་པ་ན། རིགས་ཀྱི་བུ་འདིས་དེ་ལྟ་བུ་དག་མཐོང་ནས་སྔ་དྲོའི་དུས་ཀྱི་ཚེ་ཏིང་ངེ་འཛིན་གྱི་མཐུས་མུ་གེས་འཇིགས་པ་ཡོངས་སུ་བཅིལ་ཏེ། སེམས་ཅན་རྣམས་ཁ་ཟས་ཀྱིས་ཡོངས་སུ་ཚིམ་པར་བྱེད་དོ། །རིགས་ཀྱི་བུ་འདིས་དེ་ལྟར་ཏིང་ངེ་འཛིན་མང་པོའི་ཤུགས་ཀྱིས་དེ་ལྟ་བུ་ལ་སོགས་པ་ཚད་མེད་དཔག་ཏུ་མེད། བསམ་གྱིས་མི་ཁྱབ་པའི་ཕན་པ་དང་བདེ་བའི་དོན་གྱིས་སེམས་ཅན་གྱི་དབུགས་འབྱིན་ཏོ། །རིགས་ཀྱི་བུ་འདི་དེ་ལྟར་ནན་ཏན་གྱི་ཁྱད་པར་ཚད་མེད་གྲངས་མེད་པ། བསམ་གྱིས་མི་ཁྱབ་པ་དང་ལྡན་པས་སེམས་ཅན་ཐམས་ཅད་ལ་ཕན་པ་དང་། བདེ་བར་བྱེད་པའི་དོན་ལ་རབ་ཏུ་བརྩོན་པའོ། །སྔོན་འདས་པའི་དུས་ན་སྐྱེ་བོ་མང་པོ་ལ་ཕན་པ་དང་བདེ་བ་དང་ཡོངས་སུ་སྨིན་པར་བྱ་བའི་ཕྱིར་སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་གང་གཱའི་ཀླུང་གི་བྱེ་མ་སྙེད་ལས་ཟད་མི་ཤེས་པའི་ཡི་དམ་ཆེན་པོ་བཅས་ཏེ། སྙིང་རྗེ་ཆེན་པོ་དང་མི་འཕྲོགས་པའི་བརྩོན་འགྲུས་ཆེན་པོ་རབ་ཏུ་བསྐྱེད་དོ། །དེ་ལྟར་སྙིང་རྗེ་ཆེན་པོ་དང་མི་འཕྲོགས་པའི་བརྩོན་འགྲུས་བསྐྱེད་དེ་ཟད་མི་ཤེས་པའི་ཡི་དམ་བཅས་པས་གོང་ནས་གོང་དུ་
འཕགས་པའི་ཤུགས་ཀྱིས་ཉིན་ཞག་གཅིག་གམ། སྐད་ཅིག་ཐང་ཅིག་ཙམ་གྱིས་ཀྱང་སོ་སོའི་སྐྱེ་བོ་ཚད་མེད་པ་བྱེ་བ་ཁྲག་ཁྲིག་བཏུལ་ཏེ། སྡུག་བསྔལ་རྣམ་པ་སྣ་ཚོགས་ལས་བསྒྲལ་ནས་ཐམས་ཅད་ཅི་དང་ཅི་འདོད་པ་དེ་དང་དེ་དག་གིས་རེ་བ་ཡོངས་སུ་རྫོགས་པར་བྱེད་དོ། །གནས་གང་དག་ན་སེམས་ཅན་གང་འདོད་པ་རྣམ་པ་སྣ་ཚོགས་ཀྱིས་སྡུག་བསྔལ་ཏེ། འདོད་པས་ཡོངས་སུ་གདུངས་པར་གྱུར་པ་དག་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་། དམིགས་པས་བསྟི་སྟང་དང་བཅས་པས་མཆོད་པ་བྱས་ན་ཅི་དང་ཅི་འདོད་པ་ཐམས་ཅད་འཐོབ་ཅིང་སྡུག་བསྔལ་དང་བྲལ་ཏེ། སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་བཟའ་བ་དང་། བཏུང་བས་ཕོངས་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན་ཅི་དང་ཅི་འདོད་པ་ཐམས་ཅད་འཐོབ་ཅིང་བཟའ་བ་དང་བཏུང་བ་དང་ལྡན་ཏེ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་བགོ་བའམ། རིན་པོ་ཆེའི་རྒྱན་ནམ། ནད་ཀྱི་རྐྱེན་སྨན་ནམ། གདིང་བའམ། ཁྲི་སྟན་ནམ། འཚོ་བའི་ཡོ་བྱད་ཀྱིས་བྲེལ་ཅིང་ཕོངས་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན་ཅི་དང་ཅི་འདོད་པ་རྙེད་ཅིང་བགོ་བ་དང་། རིན་པོ་ཆེའི་རྒྱན་དང་། ནད་ཀྱི་རྐྱེན་སྨན་དང་། གདིང་བ་དང་། ཁྲི་དང་། འཚོ་བའི་ཡོ་བྱད་ཐམས་ཅད་འབྱོར་ཅིང་སྐལ་བ་ཇི་ལྟ་བ་བཞིན་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་བྱམས་སྡུག་པ་དང་བྲལ་ཏེ། དགྲ་སྡང་བར་གྱུར་པ་དང་ཕྲད་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་
དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། བྱམས་སྡུག་པ་དང་ཕྲད་ཅིང་དགྲ་སྡང་བ་དང་བྲལ་ཏེ། སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་ལུས་དང་སེམས་ནད་དང་སྡུག་བསྔལ་མང་པོས་གཟིར་བར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན་དེ་ཀུན་ལུས་དང་སེམས་བདེ་ཞིང་ནད་ཐམས་ཅད་དང་བྲལ་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་འཐབ་ཅིང་རྩོད་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན་དེ་ཀུན་ལུས་སེམས་བདེ་ཞིང་ནད་ཐམས་དང་བྲལ་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་འཐབ་ཅིང་རྩོད་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན་ཞེ་འགྲས་པའི་སེམས་དང་བྲལ་ཏེ་གཅིག་ལ་གཅིག་དགའ་བ་དང་། བཟོད་པ་དང་། གཅིག་ལ་གཅིག་བྱམས་པའི་སེམས་ཀྱིས་འགྱོད་ཅིང་ཆགས་པར་འགྱུར་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་བཙོན་དུ་བཟུང་སྟེ། བཙོན་རར་བཅུག་གམ། ལྕགས་དང་། ཁོང་སྒྲིལ་དང་། ཤིང་གི་གདོས་ཀྱིས་བཅིངས་སམ། ཡན་ལག་བཅིངས་ཏེ་སྡུག་བསྔལ་བར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་
མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་བཙོན་ར་དང་། ལྕགས་དང་། ཁོང་སྒྲིལ་དང་། ལྕགས་སྒྲོག་ལས་ཐར་ཏེ་བག་ཡངས་སུ་གྱུར་ནས་དགའ་བ་དང་། སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་བཙོན་དུ་བཟུང་ནས་གཞུ་བའམ། འཚོག་པའམ། ནན་ལ་བོར་བ་དང་། གསོད་པ་ལ་ཐུག་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་བཙོན་དུ་བཟུང་བ་དང་། གཞུ་འཚོག་པ་དང་། ནན་ལ་བོར་བ་ལས་ཐམས་ཅད་ཐར་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་ལུས་དང་སེམས་དུབ་པ་དང་། མཐུ་སྟོབས་དང་མི་ལྡན་ཅིང་། ཉམ་ཆུང་བ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན་དེ་ཀུན་ལུས་དང་སེམས་ཡང་ཞིང་བདེ་བ་དང་མཐུ་སྟོབས་བསྐྱེད་དེ་ཅིས་འདུལ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་དབང་པོ་ཉམས་པ་དང་མ་ཚང་བར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་དབང་པོ་མ་ཚང་བ་མེད་ཅིང་དབང་པོ་དང་ལྡན་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་སྨྱོས་ཤིང་སེམས་འཁྲུགས་སམ། འབྱུང་པོའི་གདོན་གྱིས་བརླམས་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། དེ་ཀུན་སྨྱོས་ཤིང་སེམས་འཁྲུགས་པ་དང་བྲལ་ཏེ་རབ་ཏུ་བདེ་བ་དང་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་འདོད་ཆགས་དང་། ཞེ་སྡང་དང་། གཏི་མུག་དང་། ཁོང་ཁྲོ་བ་དང་། ཕྲག་དོག་དང་། ང་རྒྱལ་དང་། ངན་པར་ལྟ་བ་དང་། གཉིད་དང་། བག་མེད་པ་དང་། ཐེ་ཙོམ་ལ་སོགས་པས་ལུས་དང་སེམས་གདུངས་ཏེ་མི་འཕོ་བར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་
མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། དེ་ཀུན་འདོད་ཆགས་ལ་སོགས་པ་དང་བྲལ་ཏེ་ལུས་དང་སེམས་རབ་ཏུ་བདེ་བ་དང་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་མེས་ཚིག་པར་གྱུར་པའམ། ཆུས་ཁྱེར་བའམ། རླུང་གིས་ཁྱེར་བའམ། རྦབ་ཏུ་ལྷུང་བའམ། ཤིང་ཀའམ། ཁང་ཐོག་ནས་ལྷུང་སྟེ་སེམས་དངངས་ཤིང་འཁུམས་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་མི་བདེ་བའི་བགེགས་དང་། གཡང་ས་དེ་དག་ཐམས་ཅད་ལས་ཐར་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་སྦྲུལ་གདུག་པའམ། གཅན་གཟན་གདུག་པས་ཟིན་ཏམ། དུག་རྣམ་པ་སྣ་ཚོགས་ཀྱིས་ཕོག་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་འཚེ་ཞིང་གནོད་པ་ཐམས་ཅད་དང་བྲལ་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་འབྱུང་པོའི་གདོན་གྱིས་བཏབ་སྟེ། རྟག་པའི་རིམས་དང་། ཞག་གཅིག་པ་དང་། ཞག་གཉིས་པ་དང་། ཞག་གསུམ་པ་དང་། ཞག་བཞི་པ་དང་། སྨྱོས་ནས་ལུས་དང་སེམས་འདར་ཞིང་འཁྲུགས་ཏེ། དྲན་པ་ཉམས་ཤིང་ཤེས་པ་མེད་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་འཇིགས་པ་ལས་རྣམ་པར་གྲོལ་ཏེ་ལུས་དང་སེམས་རབ་ཏུ་བདེ་བ་དང་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་
གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། སྲུལ་པོ་དང་། ལུས་སྲུལ་པོ་དང་། གྲུལ་བུམ་དང་། མདངས་ཟ་བ་དང་། དེ་མ་ཡིན་པ་གཞན་ཡང་སེང་གེ་དང་། སྟག་དང་། སྤྱང་ཀི་ལ་སོགས་པ་གཅན་གཟན་གདུག་པས་ཉེན་པ་དང་། སྔགས་དང་། བྱད་དང་། གཡུལ་ངོར་ལྷགས་པ་དང་། གཞན་ཡང་འཇིགས་པར་གྱུར་པ་རྣམ་པ་སྣ་ཚོགས་ཀྱིས་དཀྲིས་ཤིང་གླགས་ཏེ། ལུས་དང་སེམས་རབ་ཏུ་དངངས་པར་གྱུར་ནས་ཤི་བས་འཇིགས་ཤིང་འཚོ་བར་འདོད་པ་དང་། བདེ་བ་ཚོལ་ཞིང་སྡུག་བསྔལ་མི་འདོད་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་འཇིགས་པ་ཐམས་ཅད་དང་བྲལ་ཏེ་ལུས་དང་སྲོག་ལ་མི་དམའ་བ་དང་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་མང་དུ་ཐོས་པར་འདོད་པའམ། མོས་པ་དག་པར་འདོད་པའམ། ཚུལ་ཁྲིམས་དག་པར་འདོད་པའམ། བསམ་གཏན་བསྒྲུབ་པར་འདོད་པའམ། མངོན་པར་ཤེས་པ་འདོད་པའམ། ཤེས་རབ་འདོད་པའམ། རྣམ་པར་གྲོལ་བ་འདོད་པའམ། གཟུགས་དམ་པ་འདོད་པའམ། སྒྲ་སྙན་པ་འདོད་པའམ། དྲི་ཞིམ་པོ་འདོད་པའམ། རོ་ཞིམ་པོ་འདོད་པའམ། རེག་བྱ་མཆོག་འདོད་པའམ། ཁེ་དང་རྙེད་པ་འདོད་པའམ། གྲགས་པ་འདོད་པའམ། བསོད་ནམས་འདོད་པའམ། བཟོས་འཚོ་བར་འདོད་པའམ། མེ་ཏོག་དང་འབྲས་བུ་འདོད་པའམ། སྐྱེད་མོས་ཚལ་འདོད་པའམ། ཁྲི་སྟན་འདོད་པའམ། གདིང་བ་འདོད་པའམ། ཡུལ་རྒྱུ་བར་འདོད་པའམ། ནོར་དང་འབྲུ་འདོད་པའམ། ནད་ཀྱི་རྐྱེན་སྨན་འདོད་པའམ། ཁང་ཁྱིམ་འདོད་པའམ། བྲན་ཁོལ་འདོད་པའམ། ཚོན་རྩི་འདོད་པའམ། ཆར་པ་འདོད་པའམ། ཆུ་འདོད་པའམ། ལོ་ཐོག་འདོད་པའམ། བསིལ་ཡབ་འདོད་པའམ། རླུང་བསིལ་བ་འདོད་པའམ། མེ་འདོད་པའམ། ཐེག་པ་འདོད་པའམ། བུ་ཕོ་དང་བུ་མོ་འདོད་པའམ། ཐབས་
མཁས་པར་འདོད་པའམ། བསོད་ནམས་བྱ་བར་འདོད་པའམ། དྲོ་བར་འདོད་པའམ། བསིལ་བར་འདོད་པའམ། ཡིད་གཞུངས་པར་འདོད་པའམ། དེ་མ་ཡིན་པ་འཇིག་རྟེན་དང་འཇིག་རྟེན་ལས་འདས་པའི་དོན་གྱི་དངོས་པོ་རྣམ་པ་སྣ་ཚོགས་འདོད་པའི་ཕྱིར་ཉོན་མོངས་ཤིང་སྡུག་བསྔལ་གྱིས་གདུངས་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། རིགས་ཀྱི་བུ་དེའི་ཏིང་ངེ་འཛིན་དམ་པའི་ཡོན་ཏན་དང་། མཐུ་དང་གཟི་བརྗིད་ཀྱི་ཤུགས་ཀྱིས་དེ་དག་ཐམས་ཅད་སྡུག་བསྔལ་གྱིས་གདུངས་པ་དང་བྲལ་ཏེ། རེ་བ་ཐམས་ཅད་ཡོངས་སུ་རྫོགས་ནས་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་ཞིང་གཤིན་པའམ། ཞིང་མི་གཤིན་པ་ལ་ས་བོན་བཏབ་ནས། གལ་ཏེ་ནན་ཏན་བྱས་ཀྱང་རུང་། ནན་ཏན་མ་བྱས་ཀྱང་རུང་སྟེ། སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། རིགས་ཀྱི་བུ་དེའི་ཏིང་ངེ་འཛིན་དམ་པའི་ཡོན་ཏན་དང་། མཐུ་དང་། གཟི་བརྗིད་ཀྱི་ཤུགས་ཀྱིས་དེ་དག་གི་ལོ་ཐོག་ཐམས་ཅད་ལེགས་ཤིང་འབྲས་བུ་སྨིན་ཅིང་ལེགས་པར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་འདི་ནི་སྔོན་བསྐལ་པ་ཆེན་པོ་ཚད་མེད་གྲངས་མེད་པའི་བར་དུ་སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་དག་ལ་བརྩོན་འགྲུས་ཆེན་པོའི་སྦྱོར་བ་དང་། བརྟན་པའི་ཡི་དམ་བཅས་པའི་སྨོན་ལམ་གྱི་དབང་གིས་སེམས་ཅན་ཡོངས་སུ་སྨིན་པར་བྱ་བའི་ཕྱིར་རྟག་ཏུ་ས་ཆེན་པོ་ཐམས་ཅད་ཡོངས་སུ་འཛིན་པ་དང་། རྟག་ཏུ་ས་བོན་གྱི་ཚོགས་ཐམས་ཅད་ཡོངས་སུ་འཛིན་ཅིང་རྟག་ཏུ་སེམས་ཅན་ཐམས་ཅད་ཀྱིས་ཡིད་བཞིན་དུ་སྤྱོད་པར་བྱེད་དོ། །རིགས་ཀྱི་བུ་དེའི་རྫུ་འཕྲུལ་གྱི་མཐུས་ས་ཆེན་པོ་འདི་ལས་སྐྱེ་བའི་རྩྭ་དང་། ཤིང་གི་རྩ་བ་དང་། ཡལ་ག་དང་། མྱུ་གུ་དང་། ལོ་མ་དང་། སྡོང་པོ་དང་། འདབ་མ་དང་། མེ་ཏོག་དང་། འབྲས་
བུ་ལ་སོགས་པ་ཐམས་ཅད་རྒྱས་པར་སྐྱེ་ཞིང་། རྩི་ཤིང་དང་། ལོ་ཏོག་ལ་སོགས་པའི་མེ་ཏོག་དང་། འབྲས་བུ་ཡང་སྨིན་ཅིང་གྲུང་བ་དང་། མངར་བ་དང་། སྣུམ་པ་དང་། དྲི་ཞིམ་པར་བྱེད་དོ། །གནས་གང་དག་ན་སེམས་ཅན་གང་དག་འདོད་ཆགས་དང་། ཞེ་སྡང་དང་། གཏི་མུག་ལ་སོགས་པ་དྲག་ལ་རྣོ་བས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ངག་རྩུབ་པོར་སྨྲ་བ་དང་། ཕྲ་མ་བྱེད་པ་དང་། ཚིག་ཀྱལ་པར་སྨྲ་བ་དང་། འདོད་ཆགས་ཅན་དང་། ཞེ་སྡང་ཅན་དང་། ལོག་པར་ལྟ་བ་དང་། མི་དགེ་བ་བཅུའི་ལས་ཀྱི་ལམ་མངོན་དུ་སྤྱོད་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན་ཉོན་མོངས་པ་ཐམས་ཅད་ཞི་ཞིང་མི་དགེ་བ་བཅུ་དང་ཡོངས་སུ་བྲལ་ཏེ་དགེ་བ་བཅུའི་ལས་ཀྱི་ལམ་དང་ལྡན་ཞིང་སེམས་ཅན་ཐམས་ཅད་ལ་བྱམས་པ་དང་། སྙིང་རྗེ་བ་དང་། ཕན་པ་དང་། བདེ་བའི་སེམས་སྐྱེ་བར་འགྱུར་རོ། །དེ་ལྟར་རིགས་ཀྱི་བུ་འདི་ནི་དེ་ལྟ་བུའི་ཡོན་ཏན་དམ་པ་དང་། ཏིང་ངེ་འཛིན་དང་། མཐུ་དང་། གཟི་བརྗིད་ཀྱི་ཤུགས་དང་། ཤིན་ཏུ་བརྩོན་པའི་ཏིང་ངེ་འཛིན་གྱིས་སྐད་ཅིག་ཐང་ཅིག་ཏུ་སངས་རྒྱས་ཀྱི་ཞིང་ཚད་མེད་གྲངས་མེད་པར་ཕྱིན་ཅིང་། སངས་རྒྱས་ཀྱི་ཞིང་དེ་རེ་རེར་ཡང་སྐད་ཅིག་ཐང་ཅིག་གིས་སེམས་ཅན་སྣོད་དུ་གྱུར་པ། ཚད་མེད་གྲངས་མེད་པ་གང་གཱའི་ཀླུང་གི་བྱེ་མ་སྙེད་སྡུག་བསྔལ་ལས་བསྒྲལ་ནས་བདེ་བ་ཐོབ་པར་བྱས་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །དེ་ལྟར་རིགས་ཀྱི་བུ་དེ་ནི་དེ་ལྟ་བུའི་ཡོན་ཏན་དང་། སྨོན་ལམ་བརྟན་པ་དང་། ཤིན་ཏུ་འབད་པའི་བརྩོན་འགྲུས་བསམ་གྱིས་མི་ཁྱབ་པ་དང་ལྡན་ཏེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་སུ་ཁ་ཅིག་ལ་ནི་ཚངས་པ་ཆེན་པོའི་རྒྱལ་པོའི་ལུས་སུ་སྟོན་ཏེ། སེམས་ཅན་རྣམས་ཅིས་འདུལ་བའི་ཆོས་སྟོན་ཏོ། །ཁ་ཅིག་ལ་ནི་དབང་ཕྱུག་ཆེན་པོའི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་འདོད་
པའི་ཁམས་ཀྱི་གཞན་འཕྲུལ་དབང་བྱེད་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་འཕྲུལ་དགའ་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་དགའ་ལྡན་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་རབ་མཚེ་མ་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་སུམ་ཅུ་རྩ་གསུམ་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་རྒྱལ་ཆེན་བཞིའི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་སངས་རྒྱས་ཀྱི་སྐུར་སྟོན་ཏོ། །ཁ་ཅིག་ལ་ནི་བྱང་ཆུབ་སེམས་དཔའི་ལུས་སུ་སྟོན་ཏོ། །ཁ་ཅིག་ལ་ནི་རང་སངས་རྒྱས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་ཉན་ཐོས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་འཁོར་ལོས་སྒྱུར་བའི་རྒྱལ་པོའི་ལུས་སུ་སྟོན་ཏོ། །ཁ་ཅིག་ལ་ནི་རྒྱལ་རིགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་བྲམ་ཟེའི་ལུས་སུ་སྟོན་ཏོ། །ཁ་ཅིག་ལ་ནི་དམངས་རིགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་རྗེའུ་རིགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་སྐྱེས་པའི་ལུས་སུ་སྟོན་ཏོ། །ཁ་ཅིག་ལ་ནི་བུད་མེད་ཀྱི་ལུས་སུ་སྟོན་ཏོ། །ཁ་ཅིག་ལ་ནི་གཞོན་ནུའི་ལུས་སུ་སྟོན་ཏོ། །ཁ་ཅིག་ལ་ནི་བུ་མོའི་ལུས་སུ་སྟོན་ཏོ། །ཁ་ཅིག་ལ་ནི་དྲི་ཟའི་ལུས་སུ་སྟོན་ཏོ། །ཁ་ཅིག་ལ་ནི་ལྷ་མ་ཡིན་གྱི་ལུས་སུ་སྟོན་ཏོ། །ཁ་ཅིག་ལ་ནི་མིའམ་ཅིའི་ལུས་སུ་སྟོན་ཏོ། །ཁ་ཅིག་ལ་ནི་ལྟོ་འཕྱེ་ཆེན་པོའི་ལུས་སུ་སྟོན་ཏོ། །ཁ་ཅིག་ལ་ནི་ཀླུའི་ལུས་སུ་སྟོན་ཏོ། །ཁ་ཅིག་ལ་ནི་གནོད་སྦྱིན་གྱི་ལུས་སུ་སྟོན་ཏོ། །ཁ་ཅིག་ལ་ནི་སྲིན་པོའི་ལུས་སུ་སྟོན་ཏོ། །ཁ་ཅིག་ལ་ནི་གྲུལ་བུམ་གྱི་ལུས་སུ་སྟོན་ཏོ། །ཁ་ཅིག་ལ་ནི་ཤ་ཟའི་ལུས་སུ་སྟོན་ཏོ། །ཁ་ཅིག་ལ་ནི་ཡི་དགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་སྲུལ་པོའི་ལུས་སུ་སྟོན་ཏོ། །ཁ་ཅིག་ལ་ནི་ལུས་སྲུལ་པོའི་ལུས་སུ་སྟོན་ཏོ། །ཁ་ཅིག་ལ་ནི་གནོན་པོའི་ལུས་སུ་སྟོན་ཏོ། །ཁ་ཅིག་ལ་ནི་སེང་གེའི་ལུས་སུ་སྟོན་ཏོ། །ཁ་ཅིག་ལ་ནི་སྤོས་ཀྱི་བ་ལང་གི་ལུས་སུ་སྟོན་ཏོ། །ཁ་ཅིག་ལ་ནི་རྟའི་ལུས་སུ་སྟོན་ཏོ། །ཁ་ཅིག་ལ་ནི་ཁྱུ་མཆོག་གི་ལུས་སུ་སྟོན་ཏོ། །ཁ་ཅིག་ལ་ནི་གཅན་གཟན་སྣ་ཚོགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་གཤིན་རྗེའི་ལུས་སུ་སྟོན་ཏོ། །ཁ་ཅིག་ལ་ནི་སེམས་ཅན་དམྱལ་བའི་སྲུང་མའི་ལུས་སུ་སྟོན་ཏོ། །ཁ་
ཅིག་ལ་ནི་སེམས་ཅན་དམྱལ་བ་བའི་སེམས་ཅན་གྱི་ལུས་སུ་སྟོན་ཏོ། །དེ་དག་ལ་སོགས་པ་ཚད་མེད་གྲངས་མེད་པའི་རྣམ་པ་སྣ་ཚོགས་ཀྱི་ལུས་སྟོན་ཅིང་སྐྱེ་བོ་མང་པོ་ལ་སྐལ་བ་ཇི་ལྟ་བ་བཞིན་དུ་ཆོས་སྟོན་པས་ཐེག་པ་གསུམ་ལས་ཕྱིར་མི་ལྡོག་པའི་ས་ལ་འཛུད་དོ། །རིགས་ཀྱི་བུ་སྐྱེས་བུ་ཆེན་པོ་དེ་ནི་དེ་ལྟར་དེ་ལྟ་བུའི་བསམ་གྱིས་མི་ཁྱབ་པའི་ཡོན་ཏན་གྱི་ཁྱད་པར་དང་ལྡན་ཏེ། དེ་ནི་ཡོན་ཏན་མཆོག་ཏུ་གྱུར་པ་ཕུལ་དུ་གྱུར་པའི་གཏེར་ཡིན་ནོ། །རྣམ་པར་གྲོལ་བ་རིན་པོ་ཆེ་ཐམས་ཅད་འབྱུང་བའི་འབྱུང་གནས་ཡིན་ནོ། །བྱང་ཆུབ་སེམས་དཔའ་མང་པོའི་མིག་ཡོངས་སུ་དག་པ་ཡིན་ནོ། །མྱ་ངན་ལས་འདའ་བའི་གྲོང་ཁྱེར་ཆེན་པོར་འགྲོ་བའི་དེད་དཔོན་ཡིན་ནོ། །དེ་ལྟར་ཆེད་དུ་མ་བྱས་པར་གོང་དུ་རྒྱས་པར་བཤད་པའི་ཡོན་ཏན་ཆེན་པོས་ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བ་ཡིན་ནོ། །འདི་ལྟ་སྟེ། རིགས་ཀྱི་བུ་གལ་ཏེ་འགའ་ཞིག་གིས་བྱམས་པའམ། འཇམ་དཔལ་ལམ། ཀུན་དུ་སྤྱན་རས་གཟིགས་སམ། ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་ལ་བསྐལ་པ་བརྒྱའི་བར་དུ་སེམས་རྩེ་གཅིག་ཏུ་སྐྱབས་སུ་སོང་ནས་དེ་དག་གི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་ཅིང་ཕྱག་འཚལ་བ་དང་། འདོད་པའི་རེ་བའི་ཕྱིར་སྨོན་ལམ་བཏབ་པ་བས་འགའ་ཞིག་གིས་སྐད་ཅིག་ཐང་ཅིག་ཡུད་ཙམ་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་དང་ཕྱག་བྱས་ན་རེ་བའི་སྨོན་ལམ་ཐམས་ཅད་མྱུར་དུ་འགྲུབ་ཅིང་རྫོགས་པར་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་འདི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར། སེམས་ཅན་རྣམས་ཀྱི་སྨོན་ལམ་ཡོངས་སུ་རྫོགས་པར་བྱེད་ན་དཔེར་ན་ཡིད་བཞིན་གྱི་ནོར་བུ་རིན་པོ་ཆེའི་གཏེར་དང་འདྲའོ། །དེ་ལྟར་སྐྱེས་བུ་ཆེན་པོ་འདི་ནི་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡུན་རིང་པོ་ནས་སྨོན་ལམ་ཆེན་པོ་ཤིན་ཏུ་བརྟན་པ་དང་། སྙིང་རྗེ་ཆེན་པོ་དང་ཤིན་ཏུ་འབད་པའི་བརྩོན་འགྲུས་བསྒོམས་པའི་ཕྱིར་བྱང་
ཆུབ་སེམས་དཔའ་ཀུན་བས་ཁྱད་པར་དུ་འཕགས་པ་ཡིན་པས་ཁྱེད་ཀྱིས་བསྟི་སྟང་དང་བཅས་པས་མཆོད་པར་བྱའོ། །དེ་ནས་ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དང་། ཉན་ཐོས་དང་། ལྷ་དང་། མི་དང་། གནོད་སྦྱིན་དང་། དྲི་ཟ་ལ་སོགས་པ་འཁོར་གྱི་དཀྱིལ་འཁོར་ཐམས་ཅད་འདུག་པ་ལས་ལངས་ནས་ཅི་ནུས་སུ་སོ་སོ་ནས་གསེར་དང་། དངུལ་དང་། རིན་པོ་ཆེ་རྣམ་པ་སྣ་ཚོགས་ཀྱི་མེ་ཏོག་དང་། སྤོས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་མཆོད་པའི་ཕྱིར་མངོན་པར་གཏོར་ཏོ། །དེ་མ་ཡིན་པ་གཞན་ཡང་ལྷ་རྫས་ཀྱི་ན་བཟའ་དང་། ནོར་བུ་དང་། ནོར་བུ་རིན་པོ་ཆེ་དང་། མུ་ཏིག་གི་ཕྲེང་བ་དང་། མུ་ཏིག་གི་སེ་མོ་དོ་དང་། གསེར་དང་། དངུལ་དང་། རིན་པོ་ཆེའི་ཕྲེང་བ་དང་། རྒྱལ་མཚན་དང་། བ་དན་དང་། གདུགས་ལ་སོགས་པས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་མཆོད་པའི་ཕྱིར་ཕུལ་ལོ། །གཞན་ཡང་ཚད་མེད་པའི་ལྷ་རྫས་ཀྱི་རོལ་མོ་སྙན་པ་དང་། ཚིགས་སུ་བཅད་པའི་བསྟོད་པ་རྣམ་པ་སྣ་ཚོགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་བསྟི་སྟང་དང་བཅས་པས་མཆོད་པ་བྱས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་རྣམ་པ་སྣ་ཚོགས་ཀྱི་ལྷ་རྫས་ཀྱི་མཆོད་པའི་ཡོ་བྱད་དེ་དག་སླར་བཅོམ་ལྡན་འདས་ལ་ཕུལ་ནས་ཚིགས་སུ་བཅད་པ་འདི་དག་སྨྲས་སོ། །ལྷ་དང་ཀླུ་དང་གནོད་སྦྱིན་མི་རྣམས་དང་། །ཕྱོགས་བཅུའི་བྱང་ཆུབ་སེམས་དཔའི་མཆོད་པ་རྣམས། །ཡོན་ཏན་ཆེན་པོ་འཇིག་རྟེན་གཙོ་ལ་དབུལ། །མཆོག་གི་མཆོད་པ་འདི་དག་བཞེས་སུ་གསོལ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་ཚིགས་སུ་བཅད་པ་དེ་སྨྲས་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་བ་དང་། དེ་ལ་བཅོམ་ལྡན་འདས་ཀྱིས་ཚིགས་སུ་བཅད་པས་འདི་སྐད་ཅེས་བཀའ་སྩལ་ཏོ། །བརྟན་པའི་བློ་དང་རྣམ་དག་སེམས་བསྐྱེད་ནས། །སེམས་ཅན་ཚད་མེད་པ་ཡི་སྡུག་བསྔལ་བཅིལ། །རིན་ཆེན་དག་ལྟར་བདེ་བ་འབྱུང་བར་མཐོང་། །རྡོ་རྗེ་བཞིན་དུ་ཐེ་ཙོམ་དྲ་བ་གཅོད། །སྙིང་རྗེ་ཆེན་པོའི་བློ་ཅན་
བརྩོན་འགྲུས་ཀྱིས། །མཆོད་པ་དམ་པ་བཅོམ་ལྡན་འདས་ལ་དབུལ། །རྒྱ་མཚོ་ཡེ་ཤེས་སེམས་ཅན་སྡུག་བསྔལ་སྒྲོལ། །འཇིགས་པ་མེད་པས་སྲིད་པའི་ཕ་རོལ་ཕྱིན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་འདུག་པ་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཆུ་བོ་བཞི་ལས་སྒྲོལ་བའི་བཅོམ་ལྡན་འདས་ཀྱི་ཉེ་གནས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པ་དྲན་པ་འཕེལ་བ་དང་། བསྲུང་བའི་དྲན་པ་འཕེལ་བ་དང་། འཚོ་བ་འཕེལ་བ་དང་། ལུས་བདེ་བ་འཕེལ་བ་དང་། ནད་མ་མཆིས་པ་འཕེལ་བ་དང་། གཟུགས་དང་སྟོབས་འཕེལ་བ་དང་། གྲགས་པ་འཕེལ་བ་དང་། འཚོ་བའི་ཡོ་བྱད་འཕེལ་བ་དང་། གཉེན་བཤེས་འཕེལ་བ་དང་། སློབ་མ་འཕེལ་བ་དང་། ཚུལ་ཁྲིམས་འཕེལ་བ་དང་། མང་དུ་ཐོས་པ་འཕེལ་བ་དང་། སྦྱིན་པ་འཕེལ་བ་དང་། ཏིང་ངེ་འཛིན་འཕེལ་བ་དང་། བཟོད་པ་འཕེལ་བ་དང་། ཐབས་མཁས་པ་འཕེལ་བ་དང་། བྱང་ཆུབ་ཀྱི་ཡན་ལག་དག་དང་། འཕགས་པའི་བདེན་པ་འཕེལ་བ་དང་། ཐེག་པ་ཆེན་པོའི་ཡང་དག་པའི་ལམ་ལ་གཞོལ་བའི་འཕེལ་བ་དང་། ཆོས་ཀྱི་སྒྲོན་མ་འཕེལ་བ་དང་། སེམས་ཅན་ཡོངས་སུ་སྨིན་པར་བགྱི་བ་འཕེལ་བ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་འཕེལ་བ་དང་། རྣམ་པར་དཀར་བའི་ཆོས་འཕེལ་བ་དང་། ཁམས་གསུམ་དུ་གྲགས་པ་འཕེལ་བ་དང་། ཁམས་གསུམ་དུ་ཆོས་ཀྱི་ཆར་འཕེལ་བ་དང་། ས་ཆེན་པོ་ཐམས་ཅད་ཀྱི་རོ་བྲོ་བ་འཕེལ་བ་དང་། སེམས་ཅན་ཐམས་ཅད་ཀྱི་མདངས་དང་དགེ་བའི་ལས་འཕེལ་བ་དང་། ཆོས་ཀྱི་དགའ་བ་དང་དགེ་བ་སྤྱོད་པ་འཕེལ་བ་དང་། ཤེས་རབ་ཀྱི་འོད་འཕེལ་བ་དང་། ཕ་རོལ་ཏུ་ཕྱིན་པ་དྲུག་འཕེལ་བ་དང་། སྤྱན་ལྔ་འཕེལ་བ་དང་། དབང་བསྐུར་བ་འཐོབ་པ་དང་། ལྷར་སྐྱེ་བ་དང་། མྱ་ངན་ལས་འདའ་བ་འཕེལ་བ་ལ་སོགས་པ་ཐོབ་པར་བྱེད་པ་ནས། འདི་ལྟ་སྟེ། མེ་དང་ཆུར་ལྡན་པ་དང་། བཀྲ་ཤིས་ཀྱི་འོད་སྣང་བ་དང་། ཐོས་པ་འཛིན་པའི་རིག་སྔགས་ཆེན་པོ་དང་། གཟུངས་ཀྱི་ཚིག་འདི་བདག་གིས་འདས་པའི་སངས་རྒྱས་བཅོམ་ལྡན་འདས་
ཆུ་ཀླུང་གང་གཱའི་བྱེ་མ་སྙེད་ལ་བསྙེན་བཀུར་བགྱིས་ནས་གཟུངས་འདི་ཐོས་ཏེ། གཟུངས་འདིས་ནི་རྣམ་པར་དཀར་བའི་ཆོས་ཐམས་ཅད་འཕེལ་ཞིང་སྐྱེ་བ་དང་། ས་བོན་གྱི་ཚོགས་དང་། རྩ་བ་དང་། མྱུ་གུ་དང་། ཡལ་ག་དང་། སྡོང་པོ་དང་། ལོ་མ་དང་། འདབ་མ་དང་། མེ་ཏོག་དང་། འབྲས་བུ་དང་། རྩི་ཤིང་དང་། ལོ་ཐོག་གི་བྲོ་བ་དང་། བསུང་འཕེལ་ཞིང་སྐྱེ་བ་དང་། ཆར་ཆུ་དང་ལྡན་པ་དང་། ཕན་པར་འགྱུར་བའི་ས་དང་། ཆུ་དང་། མེ་དང་། རླུང་འཕེལ་ཞིང་སྐྱེ་བ་དང་། དགའ་བ་དང་། བདེ་བ་འཕེལ་ཞིང་སྐྱེ་བ་དང་། རིན་པོ་ཆེ་དང་ནོར་རྫས་འཕེལ་ཞིང་སྐྱེ་བ་དང་། མཐུ་སྟོབས་འཕེལ་ཞིང་སྐྱེ་བ་དང་། འཚོ་བའི་ཡོ་བྱད་ཐམས་ཅད་འཕེལ་ཞིང་སྐྱེ་བར་འགྱུར་རོ། །ཡང་གཟུངས་འདིས་ནི་ཤེས་རབ་སྐྱེ་བས་ཉོན་མོངས་པའི་དགྲ་ཡང་ཡོངས་སུ་བཅོམ་པར་འགྱུར་བའི་སྔགས་ལ་འདི་ལྟ་སྟེ། ཚིམ་བྷོ་ཚིམ་བྷོ། ཙིམ་ཚིམ་བྷོ། ཨཱ་ཀཱ་ཥ་ཚིམ་བྷོ། བ་ཀ་ར་ཚིམ་བྷོ། ཨ་མ་བར་ཚིམ་བྷོ། བར་ཚིམ་བྷོ། བ་ཙིར་ཚིམ་བྷོ། ཨ་རོ་ག་ཚིམ་བྷོ། དྷརྨ་ཚིམ་བྷོ། ས་ཏེ་བ་ཚིམ་བྷོ། ས་ཏེ་ནི་ཧ་ལ་ཚིམ་བྷོ། བི་བ་རོ་ཀ་ཤ་བ་ཚིམ་བྷོ། ཨུ་པ་ཤ་མ་ཚིམ་བྷོ། ནཱ་ཡན་ཚིམ་བྷོ། པྲཛྙཱ་ས་མ་མོ་ནེ་རཏྣར་རཱ་ཚིམ་བྷོ། ཀྵ་ཎ་ཚིམ་བྷོ། བི་ཥེ་མ་བ་རི་ཡཱ་ཚིམ་བྷོ། ཤཱ་སཱི་ཏ་ལ་མ་བ་ཚིམ་བྷོ། བི་ཨ་དྲ་སོ་ཏ་མ་ཧེ་ལེ། དམ་བེ་ཡ་མ་བེ། ཙཀྲ་སེ། ཙཀྲ་བ་སི་ལེ། ཀྵི་ལེ་ཕི་ལེ་པ་ལ་ཀ་ར་བྷ། བཱ་རག བ་ར་བ་རི་ཏེ། ཧ་སེ པ་རེ་པྲ་རཱ་བེ། པ་རེ་ཙ་རཱ་བྷན་དཱ་ནེ། ཨ་ར་དཱ་ནེ། ཕཱན་ར། ཙ་ཙ་ཙ་ཙ། ཧི་ལེ་མི་ལེ། ཨ་ཁ་ཏ་ཏཱ་གེ་ཁེ། ཐ་ག་ཁཱི་ལོ། རེ་རེ། མི་ལེ་མ་དྷེ། ནན་ཏེ་ཀུ་ལེ་མི་ལེ། ཨང་ཀུ་ཙི་ཏ་བྷེ། ཨཱ་རཻ། གྱི་རེ། བ་ར་གྱི་རེ། ཀུ་ཏ་ཤ་མ་མ་ལེ། ཏོན་གྱེ་ཏོན་གྱེ། ཏོན་གཱུ་ལེ། ཧུ་རཱུ་ཧཱུ་རཱུ་ཧུ་རཱུ། ཀུ་ལོ་སྟོ་མི་ལེ། མེ་རི་ཏོ། མེ་རི་ཏེ། བྷན་དྷ་ཏ། ཧ་ར་ཁ་མ་རེ་མ། ཧུ་རུ་ཧུ་རུ། སྲིད་པའི་དྲི་མ་སྦྱོང་བ་དགེ་བར་གསུངས། །འཐབ་རྩོད་བསྐལ་པ་ཞི་བའང་དགེ་བར་གསུངས། །མི་དགེ་བསམ་པ་སྦྱོང་བ་དགེ་བར་གསུངས། །འབྱུང་བ་ཆེན་པོ་སྦྱོང་བའང་དགེ་བར་གསུངས། །ངན་པར་འགྲོ་བ་སྦྱོང་བ་དགེ་བར་གསུངས། །སྡིག་པའི་བག་ཆགས་སྦྱོང་བའང་དགེ་བར་གསུངས། །རེ་བ་རྫོགས་པར་བྱེད་པ་དགེ་བར་གསུངས། །ལོ་
ཐོག་སྨིན་པར་བྱེད་པའང་དགེ་བར་གསུངས། །སངས་རྒྱས་ཀུན་གྱིས་དགེ་བར་གསུངས་པ་འདི། །དེ་བཞིན་གཤེགས་པ་ཀུན་གྱིས་བྱིན་བརླབས་པ། །དགེ་བར་གསུངས་འདིས་བྱང་ཆུབ་སེམས་དཔའི་རྣམས། །བྱིན་གྱིས་རློབ་མཛད་རྗེས་སུ་ཡི་རང་ངོ་། །བཅོམ་ལྡན་འདས་དེ་ལྟར་མེ་དང་ཆུ་དང་ལྡན་པ་དང་། བཀྲ་ཤིས་ཀྱི་འོད་སྣང་བ་དང་། ཐོས་པ་འཛིན་པའི་རིག་སྔགས་ཆེན་པོ་གཟུངས་ཀྱི་ཚིག་འདི་ནི་བདག་གིས་འདས་པའི་སངས་རྒྱས་བཅོམ་ལྡན་འདས་ཆུ་ཀླུང་གང་གཱའི་བྱེ་མ་སྙེད་ལ་བསྙེན་བཀུར་བགྱིས་པས་ཐོས་སོ། །གཟུངས་འདི་ནི་རྣམ་པར་དཀར་བའི་ཆོས་ཐམས་ཅད་འཕེལ་ཞིང་སྐྱེ་བར་བགྱིད་པ་ནས་དེ་བཞིན་དུ་རྒྱས་པའི་ལོངས་སྤྱོད་པའི་ཡོ་བྱད་ཐམས་ཅད་ཀྱི་བར་དུ་འཕེལ་ཞིང་སྐྱེ་བར་བགྱིད་དོ། །བཙུན་པ་བཅོམ་ལྡན་འདས་གཟུངས་འདིས་ནི་ཆུ་བོ་བཞི་ལས་སྒྲོལ་བར་བྱེད་དོ། །བཅོམ་ལྡན་འདས་ཀྱི་ཉེ་གནས་སུ་གྱུར་པ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པའི་དམིགས་པ་འཕེལ་བར་བགྱིད་པ་ནས། དེ་བཞིན་དུ་རྒྱས་པར་འཚོ་བའི་ཡོ་བྱད་ཐམས་ཅད་ཀྱི་བར་དུ་འཕེལ་ཞིང་སྐྱེ་བར་བགྱིད་དོ། །གཟུངས་འདི་ནི་བཅོམ་ལྡན་འདས་ཀྱིས་འཕགས་པའི་གསུང་རབ་བདུད་རྩི་ལྟ་བུ་ཡོངས་སུ་རྒྱས་པ་དང་། ཡུན་དུ་གནས་ཤིང་ཁམས་གསུམ་གྱི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་ཐོས་པ་འཛིན་པའི་རིགས་སྔགས་ཆེན་པོ་དང་། གཟུངས་ཀྱི་ཚིག་འདི་སྨྲས་པ་ན། རི་ཁ་ལ་ཏེ་ཡ་རབ་ཏུ་གཡོས་ནས་ལྷའི་རོལ་མོ་བྱེ་བ་ཁྲག་ཁྲིག་ཀྱང་མ་དཀྲོལ་བར་རང་འཁྲོལ་ཏེ། ལྷའི་སྤོས་དང་། མེ་ཏོག་དང་། རིན་པོ་ཆེ་ཚད་མེད་པ་རྣམ་པ་སྣ་ཚོགས་ཆར་བཞིན་དུ་བབས་ནས་དེའི་ཚེ་འཁོར་མང་པོ་དེ་དག་ཐམས་ཅད་ཀྱང་ངོ་མཚར་རྨད་དུ་གྱུར་ཏོ། །དེའི་ཚེ་ན་འཁོར་གྱི་དཀྱིལ་འཁོར་དེ་ན་ལྷ་མོ་བཀྲ་ཤིས་ཆེན་མོ་དང་། དཔལ་ལྡན་ལྷ་མོ་ཆེན་མོ་དང་། མཆོད་དབྱངས་ལྷ་མོ་ཆེན་མོ་དང་། བརྟན་པ་ལྷ་མོ་ཆེན་མོ་དང་། ཆུ་ཅན་ལྷ་མོ་ཆེན་མོ་དང་། འོད་ཆེན་ལྷ་མོ་ཆེན་མོ་ལ་སོགས་པ་ལྷ་མོ་འབྱུང་བ་ཆེན་པོ་བཞི་ལ་དབང་དུ་གྱུར་པ་སྟོང་ཕྲག་བཅྭ་བརྒྱད་འདུག་པ་ལས་ལངས་ནས།
བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཐལ་མོ་སྦྱར་ནས་བསྟི་སྟང་དང་བཅས་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ངོ་མཚར་ཆེའོ། །བཅོམ་ལྡན་འདས་ངོ་མཚར་ཆེའོ། །བདེ་བར་གཤེགས་པ་བདག་གིས་འབྱུང་བ་ཆེན་པོ་བཞི་དག་ལ་དབང་སྒྱུར་མོད་ཀྱི་འབྱུང་བ་ཆེན་པོ་བཞིའི་ཐོག་མ་དང་། བར་མ་དང་། ཐ་མའི་སྐྱེ་བ་དང་། འགག་པ་དང་། འཐུན་པ་དང་། མི་འཐུན་པའི་ཕྱོགས་མི་འཚལ་ཏེ། སྐྱེས་བུ་ཆེན་པོ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཕྲ་བ་ཤིན་ཏུ་ཟབ་མོ་ཐོབ་ནས་འབྱུང་བ་ཆེན་པོ་བཞིའི་ཐོག་མ་དང་། བར་མ་དང་། ཐ་མའི་མཚན་ཉིད་དང་། སྐྱེ་བ་དང་། འགག་པ་དང་། འཐུན་པ་དང་། མི་འཐུན་པའི་ཕྱོགས་ལ་ཤིན་ཏུ་མཁས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། རིགས་ཀྱི་བུ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཕྲ་བ་ཤིན་ཏུ་ཟབ་མོ་ཐོབ་པས་འབྱུང་བ་ཆེན་པོ་བཞིའི་ཐོག་མ་དང་། བར་མ་དང་། ཐ་མའི་མཚན་ཉིད་སྐྱེ་བ་དང་། འགག་པ་དང་། འཐུན་པ་དང་། མི་འཐུན་པའི་ཕྱོགས་ལ་ཤིན་ཏུ་མཁས་སོ། །ལྷ་མོ་འདི་ལྟར་ཤེས་པར་བྱའོ། །འདི་ལྟ་སྟེ། ཡིད་བཞིན་གྱི་ནོར་བུ་རིན་པོ་ཆེ་ནི་ཡོན་ཏན་མང་པོ་དང་ལྡན་པས་རིན་པོ་ཆེ་རྣམ་པ་སྣ་ཚོགས་ཆར་བཞིན་དུ་འབབ་སྟེ། སེམས་ཅན་མང་པོ་ལ་སྦྱིན་པ་བྱེད་དོ། །རིགས་ཀྱི་བུ་འདི་ཡང་དེ་བཞིན་དུ་བྱང་ཆུབ་ཀྱི་ཡན་ལག་གི་རིན་པོ་ཆེ་རྣམ་པ་སྣ་ཚོགས་ཆར་བཞིན་དུ་འབེབས་ཏེ་སེམས་ཅན་ལ་སྦྱིན་པ་བྱེད་དོ། །འདི་ལྟ་སྟེ། རིན་པོ་ཆེའི་གླིང་ལྟར་རིན་པོ་ཆེ་རྣམ་པ་སྣ་ཚོགས་ཀྱིས་ཡོངས་སུ་གང་བ་བཞིན་དུ་རིགས་ཀྱི་བུ་འདི་ཡང་བྱང་ཆུབ་ཀྱི་ཡན་ལག་གི་རིན་པོ་ཆེ་རྣམ་པ་སྣ་ཚོགས་དང་ལྡན་ནོ། །འདི་ལྟ་སྟེ། ལྷ་རྫས་ཀྱི་ཤིང་པ་རི་ཙི་ཏྲ་ལ་བསུང་དང་མེ་ཏོག་གིས་མཛེས་པ་བཞིན་དུ་རིགས་ཀྱི་བུ་འདི་ཡང་སངས་རྒྱས་ཀྱི་ཆོས་རིན་པོ་ཆེ་རྣམ་པ་སྣ་ཚོགས་ཀྱིས་རབ་ཏུ་མཛེས་སོ། །འདི་ལྟ་སྟེ། སེང་གེའི་རྒྱལ་པོ་ནི་རི་དགས་ཐམས་ཅད་ཀྱི་ཟིལ་གྱིས་མི་ནོན་ཅིང་མི་སྐྲག་པ་བཞིན་དུ་རིགས་ཀྱི་བུ་འདི་ཡང་སེམས་ཅན་ཐམས་ཅད་ཀྱིས་བག་ཚ་བའམ་ཟིལ་གྱིས་ནོན་པ་མེད་དོ། །འདི་ལྟ་སྟེ། ཇི་ལྟར་ཉི་མ་གསལ་བས་འཇིག་རྟེན་གྱི་མུན་པ་ཐམས་ཅད་ཡོངས་སུ་སེལ་བ་
བཞིན་དུ་རིགས་ཀྱི་བུ་འདི་ཡང་སེམས་ཅན་ཐམས་ཅད་ཀྱི་ངན་པར་ལྟ་བའི་མ་རིག་པའི་མུན་པ་ཐམས་ཅད་སེལ་བའོ། །འདི་ལྟ་སྟེ། ནམ་ཐང་བའི་ཟླ་བ་ནི་མཚན་མོའི་དུས་སུ་ལམ་སྟོར་བའི་སེམས་ཅན་ཐམས་ཅད་ལ་བདེ་བའི་ལམ་སྟོན་ཏེ། གར་འགྲོ་བར་དགའ་བ་བཞིན་དུ་ཕྱིན་པར་འགྱུར་བ་ལྟར། རིགས་ཀྱི་བུ་འདི་ཡང་མ་རིག་པའི་མཚན་མོར་ཐེག་པ་གསུམ་ལས་འབྲོག་བསླད་དེ་འཁོར་བའི་འབྲོག་དགོན་པར་འཁྱམ་པའི་སེམས་ཅན་ཐམས་ཅད་ལ་ཐེག་པ་གསུམ་གྱིས་ཡང་དག་པའི་ལམ་སྟོན་ཅིང་སྐལ་བ་ཇི་ལྟ་བ་བཞིན་དུ་ཐབས་ཀྱིས་ཡང་དག་པར་འབྱུང་བའི་ལམ་ལ་འགོད་པར་བྱེད་དོ། །འདི་ལྟ་སྟེ། ས་ཆེན་པོ་ལ་ནི་ས་བོན་གྱི་ཚོགས་ཐམས་ཅད་དང་། རྩི་ཤིང་དང་། ལོ་ཐོག་དང་། སའི་ཁམས་སུ་གཏོགས་པའི་སེམས་ཅན་ཐམས་ཅད་ཀྱི་རྟེན་དུ་འགྱུར་བ་ལྟར། རིགས་ཀྱི་བུ་འདི་ལ་ཡང་བྱང་ཆུབ་ཀྱི་ཡན་ལག་ཁྱད་པར་ཅན་གྱི་ཆོས་ཐམས་ཅད་སྟོན་པའི་གནས་སོ། །འདི་ལྟ་སྟེ། རིན་པོ་ཆེ་ཆེན་པོའི་རི་རབ་རིའི་རྒྱལ་པོ་ནི་ཤིན་ཏུ་བརྟན་ཞིང་མ་གོད་མ་ཉམས་པ་བཞིན་དུ་རིགས་ཀྱི་བུ་འདི་ཡང་སངས་རྒྱས་ཀྱི་མ་འདྲེས་པའི་ཆོས་ཐམས་ཅད་ལ་ཤིན་ཏུ་གནས་ཤིང་སེམས་ཅན་ཐམས་ཅད་མི་གཏོང་བའི་ཕྱིར་མི་ཉམས་པ་དང་། དགེ་བའི་རྩ་བ་ཐམས་ཅད་ལ་གཏོང་བའི་ཕྱིར་མ་གོད་པའོ། །འདི་ལྟ་སྟེ། ནམ་མཁའ་ལ་སེམས་ཅན་ཐམས་ཅད་སྤྱོད་པ་བཞིན་དུ། རིགས་ཀྱི་བུ་འདི་ཡང་སེམས་ཅན་ཐམས་ཅད་དེ་ལ་ལོངས་སྤྱོད་དོ། །རིགས་ཀྱི་བུ་འདི་ནི་དེ་ལྟར་ཡོན་ཏན་ཚད་མེད་དཔག་ཏུ་མེད་པ་དང་ལྡན་ནོ། །དེའི་ཚེ་འཁོར་མང་པོ་རྣམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་ཡོན་ཏན་ཚད་མེད་པ་དང་ལྡན་པ་བསྟོད་པ་ཐོས་ནས་ངོ་མཚར་རྨད་དུ་གྱུར་ཏེ། བཀུར་སྟི་དང་རིམ་གྲོ་བྱས་ནས་རབ་ཏུ་དགའ་བས་སེམས་རྩེ་གཅིག་ཏུ་བྱང་ཆུབ་སེམས་དཔའ་སའི་སྙིང་པོ་ལ་མིག་མི་འཛུམས་པར་ལྟའོ། །དེ་ནས་བཅོམ་ལྡན་འདས་ཀྱིས་དོན་དེ་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། སྐྱེས་བུ་ཡང་དག་ས་ཡི་སྙིང་པོ་ནི། །ཡོན་ཏན་མང་པོ་ཕུན་སུམ་ཚོགས་པར་ལྡན། །དགེ་སྦྱོང་ཆ་ལུགས་འཛིན་ཅིང་སྟོན་བྱེད་པ། །སྟོན་པ་ཆེན་
པོ་ལ་ནི་ཕྱག་འཚལ་ལྷགས། །སེམས་ཅན་ཀུན་ལ་བདེ་བ་རབ་ཏུ་བྱིན། །སྲིད་པ་གསུམ་གྱི་སྡུག་བསྔལ་ཀུན་ལ་སྒྲོལ། །ཚད་མེད་རྣམ་པ་སྣ་ཚོགས་ཆར་ཕབ་ནས། །སྟོན་པ་ཆེན་པོ་ལ་ནི་མཆོད་པ་བྱེད། །བརྒྱ་བྱིན་དྲི་མ་མེད་པར་སྐྱེས་པ་དེས། །ཕྱོགས་བཞི་ཀུན་དུ་བལྟས་ཤིང་བརྟགས་ནས་སུ། །ཐལ་མོ་སྦྱར་ནས་བསྟི་སྟང་རབ་བཅས་ཏེ། །སྟོན་པ་ཆེན་པོ་ལ་ནི་བསྔགས་ཤིང་བསྟོད། །བདག་གིས་བཅོམ་ལྡན་འདས་ཀྱི་འཁོར་མཐོང་བ། །ནོར་བུ་རིན་པོ་ཆེ་ཡི་འོད་ཟེར་ལྟར། །སངས་རྒྱས་མང་པོའི་ཞིང་ཀུན་སྣང་བྱས་ཏེ། །ཐམས་ཅད་གསལ་བར་མ་གྱུར་གང་ཡང་མེད། །མངོན་ཤེས་དྲུག་གིས་འཇིག་རྟེན་སྣང་བར་བྱེད། །དེང་འདིར་འདུས་ཤིང་ལྷགས་པར་འགྱུར་བ་ནི། །ཤིན་ཏུ་དཔའ་བ་ས་ཡི་སྙིང་པོ་སྟེ། །རབ་ཏུ་བྱུང་བའི་སྤྱོད་ལམ་མངོན་པར་སྟོན། །འཕགས་པའི་ནོར་བདུན་འབྱུང་བའི་གཏེར་ཡིན་ཏེ། །འཇིགས་པ་མེད་པའི་སངས་རྒྱས་ང་རོ་དབྱངས། །བྱང་ཆུབ་སེམས་དཔའ་མང་པོའི་རྒྱལ་མཚན་ཏེ། །སེམས་ཅན་མང་པོ་འདྲེན་པའི་གཙོ་བོའོ། །རྣམ་པར་གྲོལ་བའི་རིན་ཆེན་འབྱུང་ཁུང་སྟེ། །བརྩོན་འགྲུས་བརྟན་པའི་བསོད་ནམས་རྒྱ་མཚོ་ཡིན། །བྱམས་པའི་བློ་གྲོས་སྙིང་རྗེ་བརྩེ་ལ་མོས། །སྡུག་བསྔལ་བ་ཡི་སེམས་ཅན་མང་པོ་སྒྲོལ། །འཇིགས་པ་སྲུང་བའི་འོབས་དང་མཁར་ཡིན་ཏེ། །ནམ་མཁའ་དང་བའི་ཟླ་བཞིན་ལམ་ཡང་སྟོན། །ས་ལྟར་དགེ་བའི་རྩ་བ་ཐམས་ཅད་སྐྱེད། །རྡོ་རྗེ་ལྟར་ནི་ཐེ་ཙོམ་ཡོངས་སུ་གཅོད། །རྣམ་པར་གྲོལ་བའི་རིན་ཆེན་ཀུན་ལ་གཏོར། །ཆུ་ལྟར་སྒྲིབ་པ་ཐམས་ཅད་འདག་པར་བྱེད། །ཉོན་མོངས་ཚ་བས་གདུངས་པའི་གདུགས་སུ་འགྱུར། །སྨན་པ་ལྟར་ནི་ནད་ཀུན་འཚོ་བར་བྱེད། །ཞག་གཅིག་ས་ཡི་སྙིང་པོའི་མིང་བརྗོད་པའི། །གྲགས་པ་ཆེན་པོའི་བསོད་ནམས་ཐོབ་པ་ནི། །བསྐལ་པ་བྱེ་བ་ཁྲག་ཁྲིག་བར་དུ་ཡང་། །བློ་ཅན་གཞན་གྱི་མིང་ནས་བརྗོད་པས་ལྷག །སོ་སོའི་སྐྱེ་བོ་གྲོལ་བར་བྱེད་པ་ནི། །ཉོན་མོངས་ཐམས་ཅད་རྣམ་པར་འཆིང་བྱེད་པའོ། །དཔའ་བར་འགྲོ་བའི་ཏིང་འཛིན་མཐར་ཕྱིན་ཅིང་། །ཏིང་འཛིན་གཞན་དག་གི་ཡང་ཕ་རོལ་ཕྱིན། །རྐྱེན་མང་བཅུ་གསུམ་པོ་ཡང་རྣམ་དག་པས། །
མང་པོ་ཀུན་ལ་ཡེ་ཤེས་ནམ་མཁའ་བཞིན། །དཔག་ཏུ་མེད་པའི་སངས་རྒྱས་ཞིང་རྣམས་ཀྱི། །སྐྱེ་བོ་མང་པོའི་མུན་པའི་ཚོགས་ཀྱང་བཅོམ། །ཞིང་རྣམས་ཇི་བཞིན་ཏིང་འཛིན་དེར་འཇུག་ཅིང་། །བསམ་གཏན་བཞི་པོ་ལ་ཡང་རྒྱུན་དུ་འཇུག །ཏིང་ངེ་འཛིན་དུ་ཞུགས་ནས་སེམས་ཅན་གྱི། །ཉོན་མོངས་པ་ཡི་གདུང་བ་རབ་ཏུ་སེལ། །སོ་སོའི་སྐྱེ་བོ་སྔོན་གྱི་སྡིག་པའི་ལས། །མཚོན་དང་ནད་དང་མུ་གེས་འཇིགས་པ་དང་། །རྣམ་པ་མང་པོས་འཚེ་ཞིང་གསོད་གྱུར་པ། །དེ་དག་ཀུན་ནས་རྣམ་པར་གྲོལ་བར་བྱེད། །སེམས་ཅན་ཉེ་བར་ལེན་པའི་ཕུང་པོ་ལྔ། །སྡུག་བསྔལ་མང་པོས་འཚེ་ཞིང་གདུངས་གྱུར་པ། །ས་ཡི་སྙིང་པོ་དེ་ལ་སྐྱབས་གསོལ་ན། །སྲིད་པའི་སྡུག་བསྔལ་ཐམས་ཅད་ཞི་བར་འགྱུར། །སེམས་ཅན་སྡུག་བསྔལ་འཁོར་ལོ་རབ་བསྐོར་ཏེ། །གཅིག་གིས་གཅིག་ལ་འཚེ་ཞིང་གནོད་གྱུར་པ། །ས་ཡི་སྙིང་པོ་དེ་ལ་སྐྱབས་གསོལ་ན། །བཟོད་ཅིང་བྱམས་པའི་སེམས་ལ་གནས་པར་འགྱུར། །བཅུ་གསུམ་རྐྱེན་གྱིས་རབ་འཇིགས་སྐྲག་བྱེད་ཅིང་། །ཚོལ་བ་མི་རྙེད་རྐྱེན་གྱིས་སྡུག་པ་དག །ས་ཡི་སྙིང་པོ་དེ་ལ་སྐྱབས་གསོལ་ན། །འཇིགས་པ་མེད་ལ་བདེ་བར་གནས་པར་འགྱུར། །བསོད་ནམས་བྱེད་ལ་མོས་ཤིང་དྲན་པ་དང་། །ཚུལ་ཁྲིམས་མང་ཐོས་ཤེས་རབ་འདོད་པ་དག །ས་ཡི་སྙིང་པོ་དེ་ལ་སྐྱབས་གསོལ་ན། །རེ་བ་བཞིན་དུ་ཐམས་ཅད་རྫོགས་པར་འགྱུར། །ཡོན་ཏན་སོ་སོར་སྨོས་པའི་བཟོད་རྩལ་དང་། །སྨན་དང་ས་བོན་ཚོགས་ལ་མོས་པ་དག །ས་ཡི་སྙིང་པོ་དེ་ལ་སྐྱབས་གསོལ་ན། །རེ་བ་ཀུན་དང་ལྡན་ཞིང་རྫོགས་པར་འགྱུར། །ལོ་ཐོག་རྩི་ཤིང་ལེགས་པར་འདོད་པ་དང་། །ཁྱེའུ་དང་བུ་མོ་གོས་དང་བྲན་ཁོལ་ཕྱིར། །ས་ཡི་སྙིང་པོ་དེ་ལ་སྐྱབས་གསོལ་ན། །རེ་བ་བཞིན་དུ་ཐམས་ཅད་རྫོགས་པར་འགྱུར། །ཡོན་ཏན་མང་པོ་ཀུན་དང་ལྡན་པས་ན། །ས་ཆེན་འདི་ཡང་མི་གཏོང་རབ་ཏུ་འཛིན། །དེ་ཡི་རྐྱེན་གྱིས་སྨན་དང་ལོ་ཐོག་རྣམས། །སྣུམ་ཞིང་འཇམ་ལ་རོ་དང་ལྡན་པར་འགྱུར། །ཉོན་མོངས་མང་པོས་བསྒྲིབས་པར་གྱུར་ནས་སུ། །མི་དགེ་བཅུ་ཡི་ལས་ལ་མོས་པ་དག །ས་ཡི་སྙིང་པོ་དེ་ལ་སྐྱབས་གསོལ་ན། །མི་དགེ་ཉོན་མོངས་ཐམས་ཅད་
ཞི་བར་འགྱུར། །རྣམ་པ་སྣ་ཚོགས་ཀུན་གྱི་ལུས་སྟོན་ཅིང་། །སྐྱེ་བོ་མང་པོ་དག་ལ་ཆོས་ཀྱང་སྟོན། །སྦྱིན་པའི་ཡོན་ཏན་ཐམས་ཅད་རྫོགས་པས་ནི། །སེམས་ཅན་ཀུན་ལ་སྙིང་བརྩེ་བདེ་བར་གྱུར། །གལ་ཏེ་བསྐལ་པ་མང་པོ་བརྒྱ་ཡི་བར། །དེ་ཡི་ཡོན་ཏན་བསྔགས་ཤིང་རབ་བསྟོད་དེ། །མཐར་ཕྱིན་རྫོགས་པར་འགྱུར་བ་ཤིན་ཏུ་དཀའ། །དེ་བས་ཀུན་གྱིས་བསྟི་སྟང་བཅས་པས་མཆོད། །འདུས་པ་ཆེན་པོ་ལས་བྱང་ཆུབ་སེམས་དཔའ་སའི་སྙིང་པོའི་འཁོར་ལོ་བཅུ་པ་ཞེས་བྱ་བ་ལས་གླེང་གཞིའི་ལེའུ་སྟེ་དང་པོའོ།། །།