ལྔ་པ། དགེ་བ་བཅུའི་ལས་ཀྱི་ལམ་ཞེས་བྱ་བའི་ལེའུ།
དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་གསུངས་པ་ན་འཁོར་གྱི་དཀྱིལ་འཁོར་དེའི་ནང་ན་སེམས་ཅན་ཚད་མེད་པ་བརྒྱ་སྟོང་སྙེད་སྔོན་ཆོས་ཐོས་པ་ལས་ཡིད་གོལ་ཏེ་སྟོང་པ་ཡིན་པར་གོ་ནས་རྒྱུ་དང་འབྲས་བུ་མེད་པར་ལྟ་ཞིང་དགེ་བའི་རྩ་བ་ཡོངས་སུ་བཅད་ནས་ངན་སོང་དུ་ལྟུང་བར་འགྱུར་བ་དག་མདོ་སྡེ་འདི་བཤད་པ་ཐོས་ནས་ཕྱིར་ཡང་ཡང་དག་པའི་ལྟ་བ་དང་ལྡན་པར་གྱུར་ཏོ། །དེ་ནས་དེ་དག་འདུག་པ་ལས་ལངས་ཏེ། བཅོམ་ལྡན་འདས་ཀྱི་སྤྱན་སྔར་ཤིན་ཏུ་འཛེམ་པ་བསྐྱེད་དེ། སོ་སོར་བཤགས་པ་བྱ་བའི་ཕྱིར་ཐལ་མོ་སྦྱར་བ་བཏུད་དེ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་སྔོན་ཉན་ཐོས་ཀྱི་ཐེག་པའི་རིགས་སུ་དགེ་བའི་རྩ་བ་བསྐྱེད་པ་ལས་ཉན་ཐོས་ཀྱི་ཐེག་པ་དེ་ཡང་ཡོངས་སུ་མ་སྨིན་པར་རང་སངས་རྒྱས་ཀྱི་ཐེག་པའི་ཆོས་ཐོས་སོ། །དེ་ལའང་རྨོངས་ཤིང་མངོན་དུ་མ་གྱུར་པས་སྟོང་པར་ལྟ་ཞིང་རྒྱུ་དང་འབྲས་བུ་ཡང་མེད་པར་འཛིན་ཏོ། །དེའི་རྒྱུ་དེའི་རྐྱེན་གྱིས་ལུས་དང་། ངག་དང་། ཡིད་ཀྱི་སྒོ་ནས་སྡིག་པ་མི་དགེ་བའི་ལས་ཚད་མེད་པ་བགྱིས་པས་ངན་སོང་དག་ཏུ་ལྟུང་བར་འགྱུར་བ་ལས་དེང་བཅོམ་ལྡན་འདས་ཀྱི་སྤྱན་སྔར་མདོ་སྡེ་འདི་བཤད་པ་ཐོས་ནས་སླར་ཡང་ཡང་དག་པའི་ལྟ་བ་རྙེད་དེ་ཤིན་ཏུ་འཛེམ་པ་དང་། ངོ་ཚ་བའི་སེམས་ཀྱིས་སོ་སོར་བཤགས་ཏེ་མ་བཅབས་པས་དེ་དག་ཡོངས་སུ་བྱང་བར་གྱུར་ཅིག །དེང་སླན་ཆད་ཇི་སྙེད་སྒྲིབ་
པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བདག་ཅག་གི་སྡིག་པ་དེ་དག་ཡོངས་སུ་སྦྱང་བ་དང་། སླན་ཆད་མི་བགྱིད་པར་བཅོམ་ལྡན་འདས་ཐུགས་བརྩེ་བས་རྗེས་སུ་གཟུང་དུ་གསོལ། བདག་ཅག་མ་འོངས་པ་ན་ངན་སོང་གི་སྡུག་བསྔལ་མྱོང་བར་འགྱུར་བ་ལས་ཐུགས་བརྩེ་བས་བསྐྱབ་ཏུ་གསོལ། བདག་ཅག་སླར་ཡང་སྔོན་སྤྱད་པའི་ཉན་ཐོས་ཀྱི་ཐེག་པ་ལ་སྤྱོད་ཅིང་ནན་ཏན་བགྱིད་ཀྱིས། བཅོམ་ལྡན་འདས་ཐུགས་བརྩེ་བའི་སླད་དུ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཁྱེད་འདི་ལྟར་འཛེམ་པ་དང་། ངོ་ཚ་བས་སོ་སོར་བཤགས་པ་ལེགས་སོ། །ངའི་བསྟན་པ་ལ་མ་ཉམས་པའི་སྐྱེས་བུ་དམ་པ་གཉིས་ཡོད་དེ། གཅིག་ནི་རང་བཞིན་གྱིས་ཡོངས་སུ་དག་ཅིང་ཐོག་མ་ནས་ཉེས་པ་མི་བྱེད་པའོ། །གཅིག་ནི་ཉེས་པ་བྱས་སུ་ཟིན་ཀྱང་འཛེམ་པ་དང་། ངོ་ཚ་བས་སོ་སོར་འཆགས་པ་སྟེ། སྐྱེས་བུ་དམ་པ་འདི་གཉིས་ནི་ངའི་ཆོས་ལ་ཤིན་ཏུ་འདུན་པ་རྣམ་པར་དག་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེ་དག་གི་མོས་པ་བཞིན་དུ་འཕགས་པའི་བདེན་པ་བཞིའི་ཆོས་བསྟན་ཏེ། འཁོར་དེའི་ནང་ན་ལ་ལས་ནི་བཟོད་པ་ཐ་མ་ཐོབ། ལ་ལས་ནི་བཟོད་པ་བར་མ་ཐོབ། ལ་ལས་ནི་བཟོད་པ་མཆོག་ཐོབ། ལ་ལས་ནི་འཇིག་རྟེན་གྱི་མཆོག་གི་ཆོས་ཐོབ། ལ་ལས་ནི་རྒྱུན་དུ་ཞུགས་པའི་འབྲས་བུ་ཐོབ། ལ་ལས་ནི་ལན་ཅིག་ཕྱིར་འོང་བའི་འབྲས་བུ་ཐོབ། ལ་ལས་ནི་ཕྱིར་མི་འོང་བའི་འབྲས་བུ་ཐོབ་བོ། །གཞན་ཡང་དགེ་སློང་བརྒྱད་ཁྲི་བཞི་སྟོང་ཟག་པ་ཐམས་ཅད་ཟད་པ། སེམས་རྣམ་པར་གྲོལ་བ། བློ་ཤིན་ཏུ་རྣམ་པར་དག་པའི་དགྲ་བཅོམ་པར་གྱུར་ནས་དགའ་བཞིན་དུ་སངས་རྒྱས་ལ་ཕྱག་འཚལ་ཏེ། ཕྱིར་ཡང་སོ་སོར་སྟན་ལ་འཁོད་དོ། །ཡང་འཁོར་གྱི་དཀྱིལ་འཁོར་དེའི་ནང་ན་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་རྩ་བདུན་གྱིས་སྔོན་ཐོས་པའི་ཆོས་སྟོང་པ་ཡིན་པར་འཁྲུལ་ནས་རྒྱུ་དང་འབྲས་བུ་མེད་པར་ལྟ་ཞིང་། དགེ་བའི་རྩ་བ་ཡོངས་སུ་བཅད་ནས་ངན་སོང་དུ་ལྟུང་བར་འགྱུར་བ་ནས་མདོ་སྡེ་འདི་བཤད་པ་ཐོས་ནས་ཕྱིར་ཡང་ཡང་དག་པའི་ལྟ་བ་རྙེད་དེ་འདུག་པ་
ལས་ལངས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ། བཅོམ་ལྡན་འདས་ཀྱི་སྤྱན་སྔར་ཤིན་ཏུ་འཛེམ་པ་དང་ངོ་ཚ་བ་དང་བཅས་པས་སོ་སོར་བཤགས་ཏེ་ཐལ་མོ་སྦྱར་བ་བཏུད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་སྔོན་རང་སངས་རྒྱས་ཀྱི་ཐེག་པའི་རིགས་སུ་དགེ་བའི་རྩ་བ་བསྐྱེད་པ་ལས་རང་སངས་རྒྱས་ཀྱི་ཐེག་པའི་སྣོད་དུ་ཡང་ཡོངས་སུ་མ་སྨིན་པར་ཐེག་པ་ཆེན་པོའི་ཆོས་ཐོས་ནས་དད་པ་དང་མོས་པ་སྐྱེས་ཀྱང་མ་རིག་པས་ལྡོངས་ཤིང་རྟོགས་པར་མ་གྱུར་ཏེ་སྟོང་པར་ལྟ་ཞིང་རྒྱུ་དང་འབྲས་བུ་མེད་པར་བཟུང་ངོ་། །དེའི་རྒྱུ་དེའི་རྐྱེན་གྱིས་ལུས་དང་། ངག་དང་། ཡིད་ཀྱིས་སྡིག་པ་མི་དགེ་བའི་ལས་ཚད་མེད་པ་དག་བགྱིས་པས་བསྐལ་པ་ཚད་མེད་པའི་བར་དུ་ཤིན་ཏུ་མི་བཟད་པའི་སྡུག་བསྔལ་རྣམ་པ་སྣ་ཚོགས་མྱོང་ཞིང་ངན་སོང་དུ་ལྟུང་བར་འགྱུར་བ་ལས་དེང་བཅོམ་ལྡན་འདས་ཀྱི་སྤྱན་སྔར་མདོ་སྡེ་བཤད་པ་ཐོས་ནས། སླར་ཡང་དག་པའི་ལྟ་བ་རྙེད་དེ། ཤིན་ཏུ་འཛེམ་པ་དང་ངོ་ཚ་བར་ལྡན་པ་མི་འཆབ་པའི་སེམས་ཀྱིས་སོ་སོར་འཆགས་ཏེ། དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བཅོམ་ལྡན་འདས་ཐུགས་བརྩེ་བ་ཅན་གྱིས་བདག་ཅག་གི་སྡིག་པ་དེ་དག་ཡོངས་སུ་བྱང་བ་དང་། སླན་ཆད་མི་བགྱིད་པར་རྗེས་སུ་གཟུང་དུ་གསོལ། བདག་ཅག་མ་འོངས་པ་ན་ངན་སོང་གི་སྡུག་བསྔལ་མྱོང་བར་འགྱུར་བ་ལས་བཅོམ་ལྡན་འདས་ཀྱི་ཐུགས་རྗེས་བསྐྱབ་ཏུ་གསོལ། བདག་ཅག་སླར་ཡང་སྔོན་སྤྱད་པའི་རང་སངས་རྒྱས་ཀྱི་ཐེག་པ་ལ་སྤྱོད་ཅིང་ནན་ཏན་བགྱིད་ཀྱིས་བཅོམ་ལྡན་འདས་ཐུགས་བརྩེ་བ་ཅན་གྱིས་བསྟན་དུ་གསོལ། བཅོམ་ལྡན་འདས་ཀྱིས་ལེགས་སོ་ཞེས་བཀའ་སྩལ་ཏེ་ལེགས་སོ་ལེགས་སོ། །ཁྱེད་འདི་ལྟར་འཛེམ་པ་དང་། ངོ་ཚ་བས་སོ་སོར་བཤགས་པ་ལེགས་སོ། །ངའི་བསྟན་པ་ལ་མ་ཉམས་པའི་སྐྱེས་བུ་གཉིས་ཡོད་དེ། གཅིག་ནི་རང་བཞིན་གྱིས་ཡོངས་སུ་དག་ཅིང་ཐོག་མ་ནས་ཉེས་པ་མི་བྱེད་པའོ། །གཅིག་ནི་ཉེས་པ་བྱས་སུ་ཟིན་ཀྱང་འཛེམ་པ་དང་ངོ་ཚ་བས་སོ་སོར་འཆགས་པ་སྟེ། སྐྱེས་བུ་དམ་པ་འདི་གཉིས་ནི་ངའི་ཆོས་ལ་ཤིན་ཏུ་འདུན་པ་རྣམ་པར་དག་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེ་དག་གི་མོས་
པ་བཞིན་དུ་རྟེན་ཅིང་འབྲེལ་ཏེ་འབྱུང་བའི་ཆོས་བསྟན་ནས་དེ་དག་ཐམས་ཅད་རང་སངས་རྒྱས་ཀྱི་ཐེག་པ་ལ་ནན་ཏན་བྱས་ཏེ། ཐམས་ཅད་མཐར་གྱིས་རྒྱལ་མཚན་ལ་དམིགས་པ་ཞེས་བྱ་བའི་ཏིང་ངེ་འཛིན་ཡོངས་སུ་རྫོགས་ནས་རང་སངས་རྒྱས་ཀྱི་ཐེག་པ་ལས་ཕྱིར་མི་ལྡོག་ཅིང་དགའ་བཞིན་དུ། བཅོམ་ལྡན་འདས་ལ་ཕྱག་འཚལ་ནས་ཕྱིར་ཡང་སོ་སོའི་སྟན་ལ་འཁོད་དོ། །ཡང་འཁོར་གྱི་དཀྱིལ་འཁོར་དེའི་ནང་ན་སེམས་ཅན་བྱེ་བ་བརྒྱ་སྟོང་ཕྲག་བརྒྱད་ཅུ་སྙེད་སྔོན་འདས་པའི་སངས་རྒྱས་ཀྱི་ཆོས་ལ་སྐུར་བ་ནས་ཆུང་ངུ་ན་སངས་རྒྱས་ཀྱི་བསྟན་པ་ཚིགས་སུ་བཅད་པ་གཅིག་ཙམ་ལ་སྨད་པ་དེའི་རྒྱུ་དེའི་རྐྱེན་གྱིས་ངན་སོང་དག་ཏུ་ལྟུང་ཞིང་སྡུག་བསྔལ་མང་པོ་མྱོང་སྟེ། སླར་མིའི་ལུས་ཐོབ་ན་ཡང་ཐོག་མ་ནས་ལྐུགས་པ་དིག་པ་ལྕེ་ལྡིབ་ཅིང་སྨྲ་མི་ཤེས་པ་དག་མདོ་སྡེ་འདི་བཤད་པ་ཐོས་ནས་ཡང་དག་པའི་ལྟ་བ་རྙེད་དེ། དེ་དག་འདུག་པ་ལས་ལངས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་ཤིན་ཏུ་འཛེམ་པ་དང་། ངོ་ཚ་བས་སྔོན་གྱི་སྡིག་པའི་ལས་སོ་སོར་བཤགས་ནས་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་མིག་མི་འཛུམས་པར་ལྟའོ། །བཅོམ་ལྡན་འདས་ཀྱིས་དེ་དག་ཐམས་ཅད་སྨྲ་ནུས་པར་བྱིན་གྱིས་བརླབས་ཏེ། དེའི་ཚེ་བཅོམ་ལྡན་འདས་ཀྱིས་མཁྱེན་བཞིན་དུ་དེ་དག་ལ་བཀའ་སྩལ་པ། ཁྱེད་རྣམས་སྔོན་མི་དགེ་བའི་ལས་ཅི་ཞིག་བྱས་ན་འཁོར་གྱི་དཀྱིལ་འཁོར་འདིའི་ནང་ན་སྨྲ་མི་ཤེས་པར་གྱུར། དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཁ་ཅིག་གིས་ནི་སྔོན་རྣམ་པར་གཟིགས་དེ་བཞིན་གཤེགས་པའི་བསྟན་པའི་ཆོས་ལ་ཁ་ཅིག་གིས་ནི་ཐེག་པ་ཆེན་པོའི་ཆོས་ལ་སྐུར་ཏོ། །ལ་ལ་ནི་རང་སངས་རྒྱས་ཀྱི་ཐེག་པའི་ཆོས་ལ་སྐུར་ཏོ། །ཁ་ཅིག་གིས་ནི་ཉན་ཐོས་ཀྱི་ཐེག་པའི་ཆོས་ལ་སྐུར་ཏོ། །དེ་ལ་ཆུང་ངུ་ན་ཚིགས་སུ་བཅད་པ་གཅིག་ཙམ་ལ་སྐུར་པས་བདག་ཅག་མི་དགེ་བའི་ལས་དེ་དག་གི་དབང་གིས་བསྐལ་པ་དགུ་བཅུ་རྩ་གཅིག་གི་བར་དུ་འཁོར་བར་འཁོར་ཞིང་རྟག་ཏུ་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་ཀྱི་འཇིག་རྟེན་དུ་སྐྱེས་ཏེ། ལྐུགས་པ་དང་། དིག་པ་དང་། ལྕེ་མེད་པ་དང་། སྨྲ་མི་ནུས་པ་དང་། ཤིན་ཏུ་མི་བཟད་པའི་སྡུག་བསྔལ་ཆེན་པོ་མྱོང་སྟེ། གདོད་ཚེ་འདི་ལ་མི་ལུས་ཐོབ་ཀྱིས་ཀྱང་
ལྐུགས་པ་དང་། དིག་པ་དང་། རྟག་ཏུ་ལྕེ་ནད་ཅན་དུ་གྱུར་པ་ལས་བཅོམ་ལྡན་འདས་ཀྱི་བྱིན་གྱི་རླབས་ཀྱིས་སྨྲ་ནུས་པ་དང་། སྔོན་འདས་པའི་དུས་ན་མི་དགེ་བའི་ལས་ཀྱི་སྒྲིབ་པ་ཅི་དང་ཅི་བགྱིས་པ་ཐམས་ཅད་དང་དྲན་པར་གྱུར་ཏོ། །དེའི་ནང་ན་ཡང་ཁ་ཅིག་ནི། འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་བཅོམ་ལྡན་འདས་གཙུག་ཏོར་ཅན་གྱི་བསྟན་པའི་ཆོས་ལ་ཁ་ཅིག་གིས་ནི་ཐེག་པ་ཆེན་པོ་ལ་སྐུར་ཏོ། །ཁ་ཅིག་གིས་ནི་རང་སངས་རྒྱས་ཀྱི་ཐེག་པ་ལ་སྐུར་པ་ནས་སྔོན་གྱི་དམིགས་པ་ཇི་ལྟ་བ་བཞིན་དུ་སྟོན་པ་ཡང་ཇི་ལྟར་རྒྱས་པར་བཤད་པ་བཞིན་ནོ། །དེའི་ནང་ན་ཁ་ཅིག་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་ཐམས་ཅད་སྐྱོབ་དེ་བཞིན་གཤེགས་པའི་བསྟན་པ་ལ་ཁ་ཅིག་གིས་ནི་ཐེག་པ་ཆེན་པོ་ཡང་དག་པའི་ཆོས་ལ་སྐུར་པ་ནས་དམིགས་པ་ཇི་ལྟ་བ་བཞིན་དུ་སྟོན་པ་ཡང་ཇི་ལྟར་གོང་དུ་རྒྱས་པར་བཤད་པ་ཡིན་ནོ། །དེ་ལ་ཁ་ཅིག་གིས་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་ལོག་པར་དད་སེལ་དེ་བཞིན་གཤེགས་པའི་བསྟན་པ་ལ་ཁ་ཅིག་ནི་ཐེག་པ་ཆེན་པོ་ཡང་དག་པའི་ཆོས་ལ་སྐུར་བ་ནས་དམིགས་པ་ཇི་ལྟ་བ་བཞིན་དུ་སྟོན་པ་ཡང་ཇི་ལྟར་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་གིས་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་གསེར་ཐུབ་དེ་བཞིན་གཤེགས་པའི་བསྟན་པ་ལ་ཁ་ཅིག་གིས་ནི་ཐེག་པ་ཆེན་པོ་དམ་པའི་ཆོས་ལ་སྐུར་པ་ནས་དམིགས་པ་ཇི་ལྟ་བ་བཞིན་དུ་སྟོན་པ་ཡང་ཇི་ལྟར་གོང་དུ་རྒྱས་པར་བཤད་པ་ཡིན་ནོ། །དེ་ལ་ཁ་ཅིག་གིས་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་འོད་སྲུང་དེ་བཞིན་གཤེགས་པའི་བསྟན་པ་ལ་ཁ་ཅིག་གིས་ནི་ཐེག་པ་ཆེན་པོའི་དམ་པའི་ཆོས་ལ་སྐུར་ཏོ། །ཁ་ཅིག་གིས་ནི་རང་སངས་རྒྱས་ཀྱི་ཐེག་པའི་ཆོས་ལ་སྐུར་ཏོ། །ཁ་ཅིག་གིས་ནི་ཉན་ཐོས་ཀྱི་ཐེག་པ་པའི་ཆོས་ལ་སྐུར་བ་ནས་ཆུང་ངུ་ན་ཚིགས་སུ་བཅད་པ་གཅིག་ཙམ་ལ་སྐུར་པས་མི་དགེ་བའི་ལས་ཀྱི་དབང་གིས་དེ་ཚུན་ཆད་འཁོར་བར་འཁོར་ཏེ། རྟག་ཏུ་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེས་ཤིང་ལྐུགས་པ་དང་། དིག་པ་དང་། ལྕེ་མེད་པ་དང་། བརྡ་
མི་ཕྲད་པ་དང་། ཤིན་ཏུ་མི་བཟད་པའི་སྡུག་བསྔལ་ཆེན་པོ་མྱོང་ནས་གདོད་ཚེ་འདི་ལ་མིའི་ལུས་ཐོབ་ཀྱིས་ཀྱང་ལྐུགས་པ་དང་། དིག་པ་དང་། ལྕེ་ནད་ཅན་དུ་གྱུར་པ་དང་། བརྡ་མི་འཕྲོད་པ་ལས་བཅོམ་ལྡན་འདས་ཀྱི་བྱིན་གྱི་རླབས་ཀྱིས་གདོད་སྨྲ་ནུས་པ་དང་། སྔོན་འདས་པའི་དུས་ན་མི་དགེ་བའི་ལས་ཀྱི་སྒྲིབ་པ་ཅི་བགྱིས་པ་ཐམས་ཅད་དྲན་པར་གྱུར་ཅིང་། བདག་ཅག་བཅོམ་ལྡན་འདས་ཀྱི་སྤྱན་སྔར་མདོ་སྡེ་བཤད་པ་འདི་ཐོས་ནས་སླར་ཡང་ཡང་དག་པའི་ལྟ་བ་རྙེད་དེ་ཤིན་ཏུ་ངོ་ཚ་བ་དང་། འཛེམ་པ་དང་། མི་འཆབ་པའི་སེམས་ཀྱིས་སོ་སོར་འཆགས་སོ། །དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བཅོམ་ལྡན་འདས་ཐུགས་བརྩེ་བ་ཅན་གྱིས་བདག་ཅག་གི་སྡིག་པ་དེ་དག་ཡོངས་སུ་བྱང་བ་དང་། སླན་ཆད་མི་བགྱིད་པར་རྗེས་སུ་གཟུང་དུ་གསོལ། མ་འོངས་པ་ན་ཡང་ངན་སོང་གི་སྡུག་བསྔལ་ཡོངས་སུ་མྱོང་བར་འགྱུར་བ་ལས་བཅོམ་ལྡན་འདས་ཀྱི་ཐུགས་རྗེས་བསྐྱབ་པ་དང་། དམ་པའི་ཆོས་བསྟན་དུ་གསོལ། བཅོམ་ལྡན་འདས་ཀྱིས་ལེགས་སོ་ཞེས་བཀའ་སྩལ་ཏེ། ལེགས་སོ་ལེགས་སོ། །ཁྱེད་འདི་ལྟར་འཛེམ་པ་དང་། ངོ་ཚ་བས་སོ་སོར་བཤགས་པ་ལེགས་སོ། །ངའི་བསྟན་པ་ལ་སྐྱེས་བུ་དམ་པ་མ་ཉམས་པ་ཞེས་བྱ་བ་གཉིས་ཡོད་དེ། གཅིག་ནི་རང་བཞིན་གྱིས་ཡོངས་སུ་དག་ཅིང་ཐོག་མ་ནས་ཉེས་པ་མི་བྱེད་པའོ། །གཅིག་ནི་ཉེས་པ་བྱས་སུ་ཟིན་ཀྱང་འཛེམ་པ་དང་། ངོ་ཚ་བས་སོ་སོར་འཆགས་པ་སྟེ། སྐྱེས་བུ་དམ་པ་འདི་གཉིས་ནི་ངའི་བསྟན་པའི་ཆོས་ལ་ཤིན་ཏུ་འདུན་པ་རྣམ་པར་དག་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེ་དག་མོས་པ་ཇི་ལྟ་བ་བཞིན་དུ་དམ་པའི་ཆོས་རྣམ་པ་སྣ་ཚོགས་བསྟན་ཅིང་བཤད་དེ་སོ་སོར་ཅི་དགའ་བའི་བདེ་བ་ཐོབ་པར་བྱས་སོ། །དེ་དག་དགའ་བཞིན་དུ་བཅོམ་ལྡན་འདས་ལ་ཕྱག་འཚལ་ནས་སོ་སོའི་སྟན་ལ་འཁོད་དོ། །དེའི་ཚེ་འཁོར་གྱི་དཀྱིལ་འཁོར་དེའི་ནང་ན་ཉན་ཐོས་ཚད་མེད་པ་བརྒྱ་སྟོང་སྙེད་དང་། བྱང་ཆུབ་སེམས་དཔའ་ཚད་མེད་པ་བྱེ་བ་བརྒྱ་སྟོང་སྙེད་ཀྱིས་མདོ་སྡེ་འདི་བཤད་པ་ཐོས་ནས་མི་དགེ་བའི་ལས་ཀྱི་སྒྲིབ་པ་སྔོན་ཅི་བྱས་པ་དྲན་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་
ལྡན་འདས་ཀྱི་སྤྱན་སྔར་ཤིན་ཏུ་འཛེམ་པ་དང་། ངོ་ཚ་བའི་སེམས་ཀྱིས་སོ་སོར་བཤགས་ཤིང་ཐལ་མོ་སྦྱར་ཏེ་བསྟི་སྟང་དང་བཅས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་སྔོན་སངས་རྒྱས་ཚད་མེད་པ་དག་གི་དམ་པའི་ཆོས་ལ་ལ་ལ་ནི་འདི་སྐད་དུ་བདག་ཅག་སངས་རྒྱས་དེའི་ཉེ་གནས་ཆོས་ཀྱི་སྣོད་དུ་གྱུར་པའམ། ཆོས་ཀྱི་སྣོད་དུ་མ་གྱུར་པ་ལ་ཁྲོ་བ་དང་། ཞེ་སྡང་བ་དང་། གཤེ་ཞིང་སྤྱོ་བ་དང་། སྨོད་པ་དང་། བརྙས་པ་དང་། རྣམ་པ་སྣ་ཚོགས་ཀྱིས་འཕྱ་ཞིང་སྐུར་ཏེ། གནོད་པར་གླགས་ལྟ་བ་དང་། ཡོན་ཏན་བཅབས་ནས་ཉེས་པ་བསྒྲགས་ཏེ། བདག་ཅག་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་ཞིང་ཤིན་ཏུ་མི་བཟད་པའི་སྡུག་བསྔལ་ཆེན་པོ་མྱོང་ངོ་། །ཕྱིས་སངས་རྒྱས་ཚད་མེད་པ་དག་ལ་བསྙེན་བཀུར་དང་། མཆོད་པ་བགྱིས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་པ་སྙེད་ལ་བསྙེན་བཀུར་དང་། མཆོད་པ་དང་། གཡོག་བགྱིས་ནས་སངས་རྒྱས་དེ་རེ་རེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རེ་རེ་ལ་ཤིན་ཏུ་འཛེམ་པ་དང་ངོ་ཚ་བས་སྡིག་པའི་ལས་ཀྱི་སྒྲིབ་པ་དག་སོ་སོར་བཤགས་སོ། །སངས་རྒྱས་དེ་རེ་རེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རེ་རེ་ལ་ཡང་ཆོས་ཀྱི་རྣམ་གྲངས་ཚད་མེད་པ་སྙེད་མཉན་ཏེ། ཐོས་ནས་ཤིན་ཏུ་ནན་ཏན་བགྱིས་པ་དང་། ཤིན་ཏུ་སྤྱད་དཀའ་བ་ཚད་མེད་པ་དག་སྤྱད་ཀྱང་ལས་ཀྱི་སྒྲིབ་པའི་ལྷག་མ་ལུས་པས་བདག་ཅག་ཤིན་ཏུ་བདེ་བའི་མྱ་ངན་ལས་འདའ་བ་མ་ཐོབ་བོ། །བདག་ཅག་ཏིང་ངེ་འཛིན་གྱི་སྒོའི་ཁྱད་པར་དང་། ཡོན་ཏན་ཡང་མ་ཐོབ་བོ། །བདག་ཅག་དེང་བཅོམ་ལྡན་འདས་ཀྱི་སྤྱན་སྔར་མདོ་སྡེ་བཤད་པ་འདི་ཐོས་ནས་ལྷག་པར་ཤིན་ཏུ་འཛེམ་པ་དང་། ངོ་ཚ་བའི་སེམས་དང་། མི་འཆབ་པའི་སེམས་ཀྱིས་སོ་སོར་འཆགས་སོ། །ཡོངས་སུ་བྱང་བར་ཤོགས་ཤིག །དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བཅོམ་ལྡན་འདས་ཐུགས་བརྩེ་བ་ཅན་གྱིས་བདག་ཅག་གི་སྡིག་པ་དེ་དག་ཡོངས་སུ་བྱང་བ་དང་། སླན་ཆད་མི་བགྱིད་པར་རྗེས་སུ་གཟུང་དུ་གསོལ། བདག་ཅག་མ་འོངས་
པ་ན་ངན་སོང་གི་སྡུག་བསྔལ་མྱོང་བར་འགྱུར་བ་ལས་བཅོམ་ལྡན་འདས་ཀྱི་ཐུགས་རྗེས་བསྐྱབ་ཏུ་གསོལ། བདག་ཅག་བཅོམ་ལྡན་འདས་ཀྱི་བྱིན་གྱི་བརླབས་ཀྱི་མཐུས་མོས་པ་ཇི་ལྟ་བ་བཞིན་དུ་མྱ་ངན་ལས་འདའ་བའི་བདེ་བ་མྱུར་དུ་ཐོབ་པ་དང་། ཏིང་ངེ་འཛིན་གྱི་སྒོའི་ཡོན་ཏན་གྱི་ཁྱད་པར་ཐོབ་པར་མཛད་དུ་གསོལ། དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང་། ཆོས་ཀྱི་སྣོད་མ་ཡིན་པ་ལ་ཚིག་རྩུབ་པོ་ཞེ་གཅོད་པ་རྣམ་པ་སྣ་ཚོགས་ཀྱིས་འཚེ་ཞིང་གནོད་པ་བགྱིས་པས་བདག་ཅག་སྡིག་པ་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བར་གྱུར་པ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །ལ་ལ་ནི་བདག་ཅག་འདི་སྐད་དུ་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང་། ཆོས་ཀྱི་སྣོད་མ་ཡིན་པ་ལ་གཞུ་བ་དང་། འཚོག་པས་འཚེ་བ་དང་། གནོད་པ་བགྱིས་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བར་གྱུར་པ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི། འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང་། ཆོས་ཀྱི་སྣོད་མ་ཡིན་པའི་ཆོས་གོས་དང་། ལྷུང་བཟེད་ཕྲོགས་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བར་གྱུར་པ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང་། ཆོས་ཀྱི་སྣོད་མ་ཡིན་པའི་འཚོ་བའི་ཡོ་བྱད་རྣམ་པ་སྣ་ཚོགས་ཕྲོགས་ཏེ་བཟའ་བ་དང་། བཏུང་བ་ཕྲོགས་ཤིང་བར་ཆད་བྱས་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང་། ཆོས་ཀྱི་སྣོད་མ་ཡིན་པ་དག་གི་ཆོས་གོས་ཕྲོགས་ནས་ཁྱིམ་པར་ཕབ་སྟེ། ལས་རྣམ་པ་སྣ་ཚོགས་བྱེད་དུ་བཅུག་པས་མི་དགེ་བའི་ལས་དེའི་དབང་གིས་བསྐལ་པ་ཚད་
མེད་པའི་བར་དུ་ངན་སོང་དུ་ལྟུང་བ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་རབ་ཏུ་བྱུང་བ་ཆོས་ཀྱི་སྣོད་དང་། ཆོས་ཀྱི་སྣོད་མ་ཡིན་པ་དག་ཉེས་པ་བྱས་པ་དང་། ཉེས་པ་མ་བྱས་པ་ལ་ལྕགས་དང་། ཁོང་སྒྲིལ་དང་། ཤིང་སྒྲོག་ཏུ་བཅུག་སྟེ་གཙེས་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་བདག་ཅག་ངན་སོང་དུ་ལྷུང་བ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་རབ་ཏུ་བྱུང་བ་ཆོས་ཀྱི་སྣོད་དང་། ཆོས་ཀྱི་སྣོད་མ་ཡིན་པ་དག་ལ་དབང་ཟ་བའི་སེམས་ཀྱིས་འཚེ་བ་དང་། གནོད་པ་རྣམ་པ་སྣ་ཚོགས་ཀྱིས་མི་བདེ་བར་བགྱིས་པས་བདག་ཅག་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ཤིན་ཏུ་མི་བཟད་པའི་སྡུག་བསྔལ་ཆེན་པོ་མྱོང་བར་གྱུར་ཏོ། །ཕྱིས་སངས་རྒྱས་ཚད་མེད་པ་དག་ལ་བསྙེན་བཀུར་དང་། མཆོད་པ་དང་། མཉེས་པ་བགྱིས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་པ་སྙེད་དེ་དག་ལ་ཡང་བསྙེན་བཀུར་བ་དང་། མཆོད་པ་དང་། མཉེས་པ་བགྱིས་ཏེ། སངས་རྒྱས་དེ་རེ་རེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རེ་རེ་ལ་ཡང་ཤིན་ཏུ་འཛེམ་པ་དང་བཅས་པས་མི་དགེ་བའི་ལས་དེ་དག་སོ་སོར་འཆགས་སོ། །སངས་རྒྱས་དེ་རེ་རེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རེ་རེ་ལས་ཀྱང་ཚད་མེད་པའི་ཆོས་ཀྱི་རྣམ་གྲངས་མཉན་ཏེ་ཐོས་ནས། ཤིན་ཏུ་འབད་པའི་བརྩོན་འགྲུས་ཀྱིས་ནན་ཏན་བགྱིས་ཏེ། ཤིན་ཏུ་སྤྱད་དཀའ་བ་སྤྱད་ཀྱང་ལས་ཀྱི་སྒྲིབ་པའི་ལྷག་མ་ལུས་པས་བདག་ཅག་ད་དུང་དུ་ཤིན་ཏུ་བདེ་བའི་མྱ་ངན་ལས་འདས་པའི་བདེ་བ་མ་ཐོབ་བོ། །ཏིང་ངེ་འཛིན་གྱི་ཡོན་ཏན་གྱི་སྒོའི་ཁྱད་པར་མ་ཐོབ་བོ། །བདག་ཅག་དེང་བཅོམ་ལྡན་འདས་ཀྱི་སྤྱན་སྔར་མདོ་སྡེ་འདི་ཐོས་ནས་ལྷག་པར་ཤིན་ཏུ་འཛེམ་པ་དང་། མི་འཆབ་པས་སོ་སོར་བཤགས་ཏེ་ཡོངས་སུ་བྱང་བར་གྱུར་ཏོ། །དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བཅོམ་ལྡན་འདས་ཐུགས་བརྩེ་བ་ཅན་གྱིས་བདག་ཅག་གི་སྡིག་པ་དེ་དག་
ཡོངས་སུ་བྱང་བ་དང་། སླན་ཆད་མི་བགྱིད་པར་རྗེས་སུ་གཟུང་དུ་གསོལ། བདག་ཅག་མ་འོངས་པ་ན་ངན་སོང་གི་སྡུག་བསྔལ་མྱོང་བར་འགྱུར་བ་ལས་བཅོམ་ལྡན་འདས་ཀྱི་ཐུགས་རྗེས་བསྐྱབ་ཏུ་གསོལ། བདག་ཅག་བཅོམ་ལྡན་འདས་ཀྱི་བྱིན་གྱི་རླབས་ཀྱི་མཐུས་མྱ་ངན་ལས་འདའ་བའི་བདེ་བ་མྱུར་དུ་ཐོབ་པ་དང་། གཞན་ཡང་ཏིང་ངེ་འཛིན་གྱི་སྒོའི་ཡོན་ཏན་གྱི་ཁྱད་པར་ཐོབ་པར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཉན་ཐོས་དང་བྱང་ཆུབ་སེམས་དཔའི་འཁོར་དེ་དག་ལ་བཀའ་སྩལ་པ། ལེགས་སོ་ལེགས་སོ། །ཁྱེད་འདི་ལྟར་ཤིན་ཏུ་འཛེམ་པ་དང་བཅས་པས་སོ་སོར་བཤགས་པ་ལེགས་སོ། །ཡོངས་སུ་མ་ཉམས་པའི་སྐྱེས་བུ་དམ་པ་གཉིས་ཡོད་དེ། གཅིག་ནི་རང་བཞིན་གྱིས་རྣམ་པར་དག་ཅིང་། ཐོག་མ་ནས་ཉེས་པ་མི་བྱེད་པའོ། །གཅིག་ནི་ཉེས་པ་བྱས་སུ་ཟིན་ཀྱང་འཛེམ་པ་དང་བཅས་པས་སོ་སོར་འཆགས་པ་སྟེ། སྐྱེས་བུ་འདི་གཉིས་ནི་ངའི་བསྟན་པ་ལ་ཤིན་ཏུ་འདུན་པ་རྣམ་པར་དག་པ་ཞེས་བྱའོ། །རིགས་ཀྱི་བུ་འདི་ལྟར་སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་ཉེ་གནས་ལ་གནོད་པ་བྱས་པའི་སྡིག་པའི་གནན་གོང་དུ་བཤད་པའི་མཚམས་མེད་པ་དང་། ཉེ་བའི་སྡིག་པ་ནི་མིང་ཙམ་དུ་ཟད་དེ། སྡིག་པ་ཞེས་ཀྱང་མི་བྱའོ། །སངས་རྒྱས་ཀྱི་ཉེ་གནས་རབ་ཏུ་བྱུང་བ་ལ་གནོད་པ་བྱས་ན་དེའི་སྡིག་པ་ནི་གོང་དུ་བཤད་པའི་མཚམས་མེད་པ་ལྔའི་སྡིག་པ་ལས་ཚད་མེད་གྲངས་མེད་པས་ལྷག་པར་ཆེའོ། །དེ་ཅིའི་ཕྱིར་ཞེ་ན། དགེ་སློང་གང་ཚུལ་ཁྲིམས་ཉམས་ཏེ་སྡིག་པ་བྱེད་ཀྱང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་ལ་མྱ་ངན་ལས་འདའ་བ་ཕྱིན་ཅི་མ་ལོག་པའི་ལམ་སྟོན་ནུས་སོ། །སེམས་ཅན་མང་པོ་ལ་ཡོན་ཏན་ཆེན་པོའི་རིན་པོ་ཆེའི་གཏེར་དུ་འགྱུར་བ་ནས་དེ་བཞིན་དུ་ཇི་ལྟར་རྒྱས་པར་བཤད་པ་བཞིན་ནོ། །ཚུལ་ཁྲིམས་སྲུང་ཞིང་དགེ་བའི་ཆོས་སྤྱོད་པ་ལྟ་ཅི་སྨོས། དེ་བས་ན་གང་གིས་སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་སློབ་མ་ལ་འཚེ་བ་དང་། གནོད་པ་བྱས་ན་དེ་ནི་དཀོན་མཆོག་གསུམ་གྱི་གདུང་གཅོད་པ་ཡིན་པར་ཤེས་པར་བྱའོ། །དེ་ནི་སེམས་ཅན་ཐམས་ཅད་ཀྱི་ཆོས་ཀྱི་མིག་བཅར་བ་ཡིན་ནོ། །དེ་ནི་ངས་སྔོན་ཤིན་ཏུ་དཀའ་བ་སྤྱད་ནས་རྙེད་པའི་དམ་པའི་ཆོས་
མ་རུང་བར་བྱས་པ་ཡིན་ནོ། །དེ་ནི་སེམས་ཅན་ཐམས་ཅད་ལ་ཤིན་ཏུ་གནོད་པ་ཆེན་པོ་བྱས་པ་ཡིན་ནོ། །དེ་བས་ན་སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་ལ་གནོད་པ་བྱས་ན་དེའི་སྡིག་པ་ནི་སྔར་བཤད་པའི་མཚམས་མེད་པ་ལྔའི་སྡིག་པ་བས་ཚད་མེད་གྲངས་མེད་པས་ལྷག་པར་ཆེའོ། །དེ་བས་ན་ཁྱེད་ཀྱིས་དེང་ངའི་མདུན་དུ་ཤིན་ཏུ་བསམ་པ་དག་ཅིང་ལྷག་པའི་འཛེམ་པ་དང་། འབད་པར་བཅས་པས་སྔོན་མི་དགེ་བའི་ལས་ཀྱི་སྒྲིབ་པ་ཐམས་ཅད་སོ་སོར་བཤགས་པའི་ཕྱིར་ཁྱེད་ལ་ཐུགས་རྗེ་ཆེན་པོས་རྗེས་སུ་བཟུང་བས་ཁྱེད་ཀྱི་སྡིག་པའི་ལས་ཀྱི་སྒྲིབ་པ་ཐམས་ཅད་ཁད་ཀྱིས་བྱང་བར་གྱུར་ཏེ་སངས་རྒྱས་ཀྱི་ཞིང་འདིར་བསྐལ་པ་བཟང་པོའི་སངས་རྒྱས་སྟོང་འབྱུང་བ་ཐམས་ཅད་ལ་ཡང་ཁྱེད་ཀྱིས་འདི་བཞིན་དུ་དེ་བཞིན་གཤེགས་པ་དེ་དག་གི་སྤྱན་སྔར་ཡང་སྡིག་པའི་ལས་ཀྱི་སྒྲིབ་པ་ཐམས་ཅད་ཤིན་ཏུ་སོ་སོར་ཤོགས་ཤིག །མ་འོངས་པའི་ཉེས་པ་ཡང་ཤིན་ཏུ་བསྲུང་བར་གྱིས་ཤིག །བསྐལ་པ་བཟང་པོའི་སངས་རྒྱས་སྟོང་གི་ཐ་མ་སྣང་མཛད་ཅེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ་སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་དེའི་སྤྱན་སྔར་ཡང་སྡིག་པའི་ལས་ཀྱི་སྒྲིབ་པ་ཐམས་ཅད་ཤིན་ཏུ་སོ་སོར་ཤོགས་ཤིག་དང་། ལྷག་མ་མ་ལུས་པར་ཡོངས་སུ་བྱང་བར་འགྱུར་རོ། །དེའི་ཚེ་ཉན་ཐོས་དེ་དག་དང་། བྱང་ཆུབ་སེམས་དཔའ་དེ་དག་གིས་གསོལ་པ་དེ་དེ་བཞིན་ནོ། །བཅོམ་ལྡན་འདས་བདག་ཅག་གལ་ཏེ་འདི་ལྟར་སངས་རྒྱས་སྟོང་གི་ཐ་མ་སྣང་མཛད་ཀྱི་ཚེ། ཡང་དག་པའི་ལྟ་བ་ཐོབ་ཅིང་ལོག་པར་ལྟ་བ་རྣམ་པར་སྤངས་ཏེ། སྡིག་པའི་ལས་ཀྱི་སྒྲིབ་པ་ཐམས་ཅད་ལྷག་མ་མ་ལུས་པར་འབྱང་ཞིང་སྡུག་བསྔལ་ཐམས་ཅད་ལས་རྣམ་པར་གྲོལ་བར་འགྱུར་ན། བདག་ཅག་བསྐལ་པ་བཟང་པོ་འདི་ལ་མཚམས་མེད་པའི་སེམས་ཅན་དམྱལ་བར་སྐྱེས་ཏེ། སྡུག་བསྔལ་རྣམ་པ་སྣ་ཚོགས་མྱོང་ན་ཡང་བཟོད་དོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཁྱེད་ཀྱིས་འདི་ལྟར་རྟུལ་ཕོད་པ་དང་། ཤིན་ཏུ་འབད་པའི་བརྩོན་
འགྲུས་བརྟན་པ་དང་། སྨོན་ལམ་གྱི་མཐུས་གདོན་མི་ཟ་བར་སངས་རྒྱས་སྣང་མཛད་ཀྱི་ཚེ་སྔོན་གྱི་ལས་ཀྱི་སྒྲིབ་པ་ཐམས་ཅད་བྱང་བ་དང་། ལྷག་པའི་བསམ་པས་བསྟི་སྟང་དང་བཅས་ཏེ་བསྙེན་བཀུར་དང་། མཆོད་པ་གདོན་མི་ཟ་བར་བྱེད་པར་འགྱུར་རོ། །དེ་བཞིན་གཤེགས་པ་སྣང་མཛད་ཀྱིས་ཀྱང་གདོན་མི་ཟ་བར་ཉོན་མོངས་པ་ཐམས་ཅད་ཡོངས་སུ་གཅད་པའི་དགྲ་བཅོམ་པར་འགྱུར་བར་མཛད་དོ། །གདོན་མི་ཟ་བར་ཏིང་ངེ་འཛིན་གྱི་སྒོའི་ཡོན་ཏན་གྱི་ཁྱད་པར་ཐོབ་པར་མཛད་དོ། །དེ་ནས་ཉན་ཐོས་དེ་དག་དང་། བྱང་ཆུབ་སེམས་དཔའ་དེ་དག་དགའ་བཞིན་དུ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་ཕྱིར་ཡང་སོ་སོའི་སྟན་ལ་འཁོད་དོ། །དེའི་ཚེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་བཀའ་སྩལ་པ། རིགས་ཀྱི་བུ་ངས་སངས་རྒྱས་ཀྱི་སྤྱན་གྱིས་འཇིག་རྟེན་ཐམས་ཅད་ལ་བརྟགས་ན། མ་འོངས་པའི་དུས་ན་སངས་རྒྱས་ཀྱི་ཞིང་འདིར་ཚད་མེད་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱི་རྒྱལ་རིགས་གདོལ་པ་ཅན་དང་། བྲམ་ཟེ་གདོལ་པ་ཅན་དང་། བློན་པོ་གདོལ་པ་ཅན་དང་། ཁྱིམ་བདག་གདོལ་པ་ཅན་དང་། ཚོང་དཔོན་གདོལ་པ་ཅན་དང་། དགེ་སྦྱོང་གདོལ་པ་ཅན་དང་། རྗེའུ་རིགས་དང་། དམངས་རིགས་དང་གདོལ་པ་ཅན་གྱི་སྐྱེས་པའམ། བུད་མེད་ལ་སོགས་པ་དེ་དག་དགེ་བའི་རྩ་བ་ཆུང་ངུ་བསྐྱེད་པས་མིའི་ལུས་ཐོབ་ཏུ་ཟིན་ཀྱང་མི་དགེ་བའི་བཤེས་གཉེན་དང་སྟེན་ཅིང་ལོག་པའི་ལྟ་བ་བསྐྱེད་པས་སྡིག་པ་མི་དགེ་བའི་ལས་ཀྱིས་ངའི་བླ་ན་མེད་པའི་དམ་པའི་ཆོས་ཤིན་ཏུ་ཟབ་མོ་འཇིག་པར་བྱེད་དོ། །ངའི་བསྟན་པ་རྒྱས་པར་མི་བྱེད། རྒྱས་པ་རྣམས་མེད་པར་བྱེད་ཅིང་མོས་པ་མི་སྐྱེད། ངས་བསྟན་པའི་ཉན་ཐོས་ཀྱི་ཐེག་པ་ཅན་གྱི་དམ་པའི་ཆོས་ལ་འཕྱ་ཞིང་སྐུར་ཏེ། བགེགས་དང་བར་ཆད་བྱེད་ཅིང་རྒྱས་པར་མི་བྱེད་པ་དང་། བར་བར་ནི་ངས་བསྟན་པའི་རང་སངས་རྒྱས་ཀྱི་ཐེག་པ་ཅན་གྱི་དམ་པའི་ཆོས་ལ་འཕྱ་ཞིང་སྐུར་པ་དང་། བགེགས་དང་བར་ཆད་བྱེད་ཅིང་རྒྱས་པར་མི་
བྱེད་པ་དང་། བར་བར་ནི་ངས་བསྟན་པའི་བླ་ན་མེད་པའི་ཐེག་པ་ཅན་གྱི་དམ་པའི་ཆོས་ལ་འཕྱ་ཞིང་སྐུར་པ་དང་། བགེགས་དང་བར་ཆད་བྱེད་ཅིང་རྒྱས་པར་མི་བྱེད་པ་དང་། བར་བར་ནི་ངས་བསྟན་པ་ལ་རབ་ཏུ་བྱུང་བ་ཆོས་ཀྱི་སྣོད་དང་། ཆོས་ཀྱི་སྣོད་མ་ཡིན་པ་ལ་ཞེ་སྡང་སྐྱེད་ཅིང་གཤེ་བ་དང་། སྤྱོ་བ་དང་། སྨོད་པ་དང་། ཚིག་རྣམ་པ་སྣ་ཚོགས་ཀྱིས་གནོད་པར་གླགས་ལྟ་སྟེ། འཕྱ་ཞིང་སྐུར་བ་དང་། ཡོན་ཏན་བཅས་ནས་ཉེས་པ་བསྒྲགས་ཏེ། དེ་བཞིན་དུ་སྨོད་པའི་སེམས་ཀྱིས་འཚེ་བ་དང་། གནོད་པ་རྣམ་པ་སྣ་ཚོགས་བྱེད་དོ། །དེ་ལྟར་གང་ཟག་འཕགས་པའི་ཆོས་ཀྱི་སྣོད་དུ་མ་གྱུར་པ་དེ་ཡང་ཡང་དག་པར་གླེན་ཞིང་གཏི་མུག་གི་རང་བཞིན་ཅན་ཡིན་ཏེ། ཆུང་ཟད་ཙམ་གྱིས་ཤེས་པ་སྙེམས་པའི་ང་རྒྱལ་ཅན་དེ་འདི་ནས་ཚེ་འཕོས་མ་ཐག་ཏུ་ངན་སོང་གསུམ་དུ་ལྷུང་སྟེ། ཚད་མེད་པ་སྙེད་ཀྱིས་ཤིན་ཏུ་མི་བཟད་པའི་སྡུག་བསྔལ་ཆེན་པོ་མྱོང་བར་འགྱུར་རོ། །བསྐལ་པ་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་མིའི་ལུས་ཐོབ་པར་དཀའ་བ་ནས་དེ་བཞིན་དུ་རྒྱས་པར་གོང་དུ་བཤད་པ་བཞིན་ནོ། །རིགས་ཀྱི་བུ་སེམས་ཅན་དེ་མཚམས་མེད་པའི་སེམས་ཅན་དམྱལ་བ་ཆེན་པོ་ན་འདུག་སྟེ། སྡུག་བསྔལ་ཆེན་པོ་མྱོང་ཡང་སླའི་དེ་ལྟ་བུའི་ལུས་སྡིག་པ་ཅན་ང་རྒྱལ་གྱིས་མངོན་པར་ཟིན་པ། སྡིག་པའི་བཤེས་གཉེན་གྱི་རྗེས་སུ་འབྲང་ཞིང་། མི་དགེ་བའི་ལས་བྱེད་པ་ལས་འཁོར་བར་འཁོར་ཏེ། ཤིན་ཏུ་བསྒྲལ་དཀའ་བ་རྟག་ཏུ་འཁོར་བར་སྡུག་བསྔལ་གྱིས་གདུངས་པར་གྱུར་པ་ནི་མ་ཡིན་ནོ། །དེའི་ཚེ་འཁོར་གྱི་དཀྱིལ་འཁོར་དེའི་ནང་ན་བློ་གྲོས་ཆེན་པོ་ཅན་གྱི་སེམས་ཅན་ཚད་མེད་གྲངས་མེད་པ་སྙེད་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ཏེ་མཆི་མ་བླགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟར་འཇིག་རྟེན་གྱི་སེམས་ཅན་འདི་དག་མིའི་ལུས་ཤིན་ཏུ་ཐོབ་པར་དཀའ་བ་རྙེད་ཀྱང་དད་པ་ཡོངས་སུ་སྤོང་ངོ་། །ཡང་དག་པའི་སྨོན་ལམ་ཡོངས་སུ་སྤོང་ངོ་། །ཡང་དག་པའི་མོས་པ་དང་། ཡང་དག་པའི་ལྟ་བ་ཡོངས་སུ་སྤོང་ངོ་། །དགེ་བའི་བཤེས་གཉེན་ཡོངས་སུ་སྤོང་ངོ་། །དུས་བཟང་པོ་དང་། གནས་བཟང་པོ་དང་། ཚུལ་ཁྲིམས་
དག་པ་ཡོངས་སུ་སྤོང་ངོ་། །ཡང་དག་པའི་ཏིང་ངེ་འཛིན་དང་། ཡང་དག་པའི་ཤེས་རབ་ཡོངས་སུ་སྤོང་ངོ་། །སེམས་ཅན་འདི་དག་ཤིན་ཏུ་ཐོབ་པར་དཀའ་བའི་མིའི་ལུས་ཐོབ་མོད་ཀྱི། གླེན་པ་མི་ཤེས་པ་དང་། ང་རྒྱལ་གྱི་དབང་གིས་ཇི་ལྟར་གོང་དུ་བཤད་པའི་སྡིག་ལྕི་བ་རྣམས་ཀུན་བགྱིད་དེ། བཅོམ་ལྡན་འདས་ཀྱི་དམ་པའི་ཆོས་ལ་འཕྱ་ཞིང་སྐུར་བ་དང་། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་བའི་ཉེ་གནས་ལ་འཚེ་བ་དང་། གནོད་པ་བགྱིད་དོ། །བདག་ཅག་དེང་བཅོམ་ལྡན་འདས་ཀྱི་སྤྱན་སྔར་སེམས་རྩེ་གཅིག་པས་ཡང་དག་པའི་ཡི་དམ་བཅའོ། །བདག་ཅག་དེང་སླན་ཆད་འཁོར་བར་འཁོར་བ་འདི་ཕན་ཆད་ནས་ནམ་རྣམ་པར་གྲོལ་བ་མ་ཐོབ་ཀྱི་བར་དུ་དེ་ལྟ་བུའི་སྡིག་པའི་གྲོགས་པོ་དང་མི་མཇལ་བ་དང་། དེ་ལྟ་བུའི་སྡིག་པའི་ལས་མི་བགྱིད་པ་དང་། སངས་རྒྱས་ཀྱི་དམ་པའི་ཆོས་ལ་མི་སྐུར་བ་དང་། རབ་ཏུ་བྱུང་བའི་གང་ཟག་ལ་གནོད་པ་མི་བགྱིད་པ་དང་། སེམས་ཅན་གྱི་ཆོས་ཀྱི་མིག་མི་འབྱིན་པ་དང་། དཀོན་མཆོག་གསུམ་གྱི་གདུང་རྒྱུན་མི་འཆད་པར་དམ་བཅས་པ་དང་། བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་དམ་བཅས་པ་དེ་དག་རྗེས་སུ་གཟུང་དུ་གསོལ། དེའི་ཚེ་འཁོར་གྱི་དཀྱིལ་འཁོར་དེའི་ནང་ན་སེམས་ཅན་བློ་དང་ལྡན་པ་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་སྙེད་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་དེང་བཅོམ་ལྡན་འདས་ཀྱི་སྤྱན་སྔར་བསམ་པ་ངེས་པར་དམ་བཅའ་བར་འཚལ་ཏེ། འཁོར་བར་འཁོར་བ་འདི་ཕན་ཆད་ནས་ནམ་ཆོས་ཀྱི་བཟོད་པ་མ་ཐོབ་ཀྱི་བར་དུ་རྒྱལ་པོར་མ་གྱུར་ཅིག །བློན་པོར་མ་གྱུར་ཅིག །ཡུལ་གྱི་སྟོན་པར་མ་གྱུར་ཅིག །གྲོང་རྡལ་དང་། གྲོང་ཁྱེར་དང་། གྲོང་འདབ་ཀྱི་བདག་པོར་མ་གྱུར་ཅིག །དམག་ལ་དབང་བའི་བདག་པོར་མ་གྱུར་ཅིག །ཚོང་དཔོན་དུ་མ་གྱུར་ཅིག །མཆོད་པ་དང་། གཙུག་ལག་ཁང་ལ་དབང་བའི་བདག་པོར་མ་གྱུར་ཅིག །ཚོང་དཔོན་དང་། ཁྱིམ་བདག་དང་།
དགེ་སྦྱོང་གི་བདག་པོར་མ་གྱུར་ཅིག །སློབ་དཔོན་དང་བླ་མར་མ་གྱུར་ཅིག །ཁྱིམ་པའི་ལུས་སུ་མ་གྱུར་ཅིག །ཞལ་ཆེ་གཅོད་པའི་དབང་པོར་མ་གྱུར་ཅིག །ཕྱུག་པ་དང་བཙན་པའི་བདག་པོར་མ་གྱུར་ཅིག །བདག་ཅག་ཆོས་ཀྱི་བཟོད་པ་མ་ཐོབ་པར་དེ་ལྟ་བུའི་གནས་སུ་སྐྱེས་ན་དེ་ཉིད་སངས་རྒྱས་ཀྱི་བསྟན་པ་ལ་མི་དགེ་བའི་རྒྱུར་འགྱུར་བ་ཞེས་བྱ་སྟེ། ཁ་ན་མ་ཐོ་བའི་སྡིག་པ་ཆེན་པོ་བྱེད་པས། བཅོམ་ལྡན་འདས་ཀྱིས་གསུངས་པའི་དམ་པའི་ཆོས་ལ་འཕྱ་ཞིང་སྐུར་བ་ཞེས་བགྱིའོ། །སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་ལ་འཚེ་ཞིང་གནོད་པ་བགྱིད་པའོ། །སེམས་ཅན་མང་པོའི་ཆོས་ཀྱི་མིག་འབྱིན་པའོ། །དཀོན་མཆོག་གསུམ་གྱི་གདུང་རྒྱུན་གཅོད་པའོ། །སེམས་ཅན་ཚད་མེད་པ་ལ་གནོད་པ་དང་འཚེ་བ་བགྱིད་པའོ། །དེའི་དབང་གིས་གདོན་མི་འཚལ་བར་མཚམས་མེད་པའི་སེམས་ཅན་དམྱལ་བར་ལྟུང་སྟེ། ངན་སོང་དུ་འཁོར་བ་ལས་ཐར་པའི་དུས་མ་མཆིས་སོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་སྨོན་ལམ་འདི་དག་བྱིན་གྱིས་བརླབ་པར་གསོལ། དེའི་ཚེ་འཁོར་གྱི་དཀྱིལ་འཁོར་དེར་འདུས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མི་དང་། མི་མ་ཡིན་ལ་སོགས་པ་ཐམས་ཅད་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་མཆི་མ་བླགས་ཏེ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཐོག་མ་མ་མཆིས་པ་ནས་འཁོར་བར་འཁོར་ཞིང་གླེན་པ་དང་། མི་ཤེས་པ་དང་། ང་རྒྱལ་གྱི་དབང་གིས་མི་དགེ་བའི་ལས་ཐམས་ཅད་བསྐྱེད་དེ། ལུས་ཀྱི་ལས་མི་དགེ་བ་དང་། ངག་གི་ལས་མི་དགེ་བ་དང་། ཡིད་ཀྱི་ལས་མི་དགེ་བ་བདག་གིས་བགྱིས་པ་དང་། གཞན་བགྱིད་དུ་སྩལ་བ་དང་། མཐོང་བ་དང་ཐོས་པ་ལ་རྗེས་སུ་ཡི་རང་བའི་སྡིག་པ་དེ་དག་ཐམས་ཅད་དེང་བཅོམ་ལྡན་འདས་ཀྱི་སྤྱན་སྔར་ཤིན་ཏུ་འཛེམ་པ་དང་། མི་འཆབ་པའི་སེམས་ཀྱིས་སོ་སོར་བཤགས་པས་སླན་ཆད་མི་བགྱིད་པར་ཡོངས་སུ་བསྲུང་བ་དང་། མ་མཆིས་པའི་དུས་ཀྱི་སྒྲིབ་པར་འགྱུར་བའི་སྡིག་པ་བྱང་བར་གྱུར་ཅིག །དེ་བཞིན་དུ་ལན་ཅིག །ལན་གཉིས། ལན་གསུམ་གྱི་བར་
དུ་བརྗོད་དོ། །དེང་སླན་ཆད་འཁོར་བའི་མཐས་གཏུགས་པའི་བར་དུ་རྟག་ཏུ་སྡིག་པའི་གྲོགས་པོ་དང་མི་ཕྲད་པ་དང་། མི་དགེ་བའི་དབང་དུ་མ་གྱུར་ཅིག །གལ་ཏེ་ཕྲད་ན་ཡང་དེའི་རྗེས་སུ་མི་འཇུག་པར་བསམ་པ་ངེས་པས་དམ་བཅའ་བར་འཚལ་ལོ། །སྡིག་པའི་ལས་དེ་དག་ཐམས་ཅད་བགྱིད་པར་མ་གྱུར་ཅིག །བདག་ཅག་ཡུན་རིང་པོར་སྡུག་བསྔལ་མྱོང་བར་མ་གྱུར་ཅིག །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་སྨོན་ལམ་འདི་དག་རྗེས་སུ་གཟུང་བར་གསོལ། དེ་ནས་བཅོམ་ལྡན་འདས་ཀྱིས་འདུས་པའི་འཁོར་དེ་དག་ཐམས་ཅད་ལ་བཀའ་སྩལ་པ། ལེགས་སོ་ལེགས་སོ། །ཁྱེད་མ་འོངས་པའི་སྡུག་བསྔལ་གྱིས་འཇིགས་པ་དང་། འཛེམ་པས་སོ་སོར་བཤགས་པ་ལེགས་སོ། །ཁྱེད་ཀྱིས་འཁོར་བའི་ཆུ་བོ་ཆེན་པོ་ལས་བསྒྲལ་བ་དང་། འཇིགས་པ་མེད་པའི་མྱ་ངན་ལས་འདས་པའི་གྲོང་ཁྱེར་དུ་འཇུག་པའི་ཕྱིར་འདི་ལྟ་བུའི་སྨོན་ལམ་བཏབ་པ་ལེགས་སོ། །རིགས་ཀྱི་བུ་ཆོས་རྣམ་པ་འདི་བཅུ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་ཐོབ་པར་འགྱུར་རོ། །བཅུ་གང་ཞེ་ན་འདི་ལྟ་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་ལུས་ལ་མི་གནས། ཕྱི་རོལ་གྱི་ལུས་ལ་མི་གནས། ཕྱི་ནང་གི་ལུས་ལ་མི་གནས། འདས་པའི་ལུས་ལ་མི་གནས། མ་འོངས་པའི་ལུས་ལ་མི་གནས། ད་ལྟར་གྱི་ལུས་ལ་མི་གནས་པ་སྟེ། ཆོས་དང་པོ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་ཚོར་བ་ལ་མི་གནས། ཕྱི་རོལ་གྱི་ཚོར་བ་ལ་མི་གནས། ཕྱི་ནང་གཉི་གའི་ཚོར་བ་ལ་མི་གནས། འདས་པའི་ཚོར་བ་ལ་མི་གནས། མ་འོངས་པའི་ཚོར་བ་ལ་མི་གནས། ད་ལྟར་གྱི་ཚོར་བ་ལ་མི་གནས་པ་སྟེ། ཆོས་གཉིས་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་
ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་འདུ་ཤེས་ལ་མི་གནས། ཕྱི་རོལ་གྱི་འདུ་ཤེས་ལ་མི་གནས། ཕྱི་ནང་གཉི་གའི་འདུ་ཤེས་ལ་མི་གནས། འདས་པའི་འདུ་ཤེས་ལ་མི་གནས། མ་འོངས་པའི་འདུ་ཤེས་ལ་མི་གནས། ད་ལྟར་གྱི་འདུ་ཤེས་ལ་མི་གནས་པ་སྟེ། ཆོས་གསུམ་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་འདུ་བྱེད་ལ་མི་གནས། ཕྱི་རོལ་གྱི་འདུ་བྱེད་ལ་མི་གནས། ཕྱི་ནང་གཉི་གའི་འདུ་བྱེད་ལ་མི་གནས། འདས་པའི་འདུ་བྱེད་ལ་མི་གནས། མ་འོངས་པའི་འདུ་བྱེད་ལ་མི་གནས། ད་ལྟར་གྱི་འདུ་བྱེད་ལ་མི་གནས་པ་སྟེ། ཆོས་བཞི་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་རྣམ་པར་ཤེས་པ་ལ་མི་གནས། ཕྱི་རོལ་གྱི་རྣམ་པར་ཤེས་པ་ལ་མི་གནས། ཕྱི་ནང་གཉི་གའི་རྣམ་པར་ཤེས་པ་ལ་མི་གནས། འདས་པའི་རྣམ་པར་ཤེས་པ་ལ་མི་གནས། མ་འོངས་པའི་རྣམ་པར་ཤེས་པ་ལ་མི་གནས། ད་ལྟར་གྱི་རྣམ་པར་ཤེས་པ་ལ་མི་གནས་པ་སྟེ། ཆོས་ལྔ་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་འཇིག་རྟེན་འདི་ལ་མི་གནས་པ་སྟེ། ཆོས་དྲུག་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་འཇིག་རྟེན་ཕ་རོལ་ལ་མི་གནས་པ་སྟེ། ཆོས་བདུན་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་
རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་འདོད་པའི་ཁམས་ལ་མི་གནས་པ་སྟེ། ཆོས་བརྒྱད་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཟུགས་ཡོད་པའི་ཁམས་ལ་མི་གནས་པ་སྟེ། ཆོས་དགུ་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཟུགས་མེད་པའི་ཁམས་ལ་མི་གནས་པ་སྟེ། ཆོས་བཅུ་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པའི་ཚེ་འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་བརྒྱ་སྟོང་བདུན་ཅུ་རྩ་གཉིས་སྙེད་ཀྱིས་མི་སྐྱེ་བའི་ཆོས་ཀྱི་བཟོད་པ་འཐོབ་བོ། །བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་སྙེད་ཀྱིས་ཆོས་ཀྱི་རྗེས་སུ་འཐུན་པའི་བཟོད་པ་འཐོབ་བོ། །ཉན་ཐོས་ཚད་མེད་པ་བརྒྱ་སྟོང་སྙེད་ཀྱིས་ཉོན་མོངས་པ་ཐམས་ཅད་ཡོངས་སུ་བཅད་པ་ནས་དགྲ་བཅོམ་པའི་བར་དུ་ཐོབ་པར་གྱུར་ཏོ། །སེམས་ཅན་ཁྲག་ཁྲིག་བརྒྱ་སྟོང་སྙེད་ཀྱིས་སྔོན་མ་བསྐྱེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་དེ་བཞིན་གཤེགས་པའི་ཡེ་ཤེས་ལ་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །སེམས་ཅན་གྲངས་མེད་ཚད་མེད་པ་སྙེད་ཀྱིས་སྔོན་རང་སངས་རྒྱས་ཀྱི་སེམས་མ་བསྐྱེད་པ་དེ་སེམས་བསྐྱེད་པར་གྱུར་ཏོ། །གཞན་ཡང་སེམས་ཅན་གྲངས་མེད་ཚད་མེད་པ་སྙེད་ཀྱིས་སྔོན་ཉན་ཐོས་ཀྱི་སེམས་མ་བསྐྱེད་པ་དེ་བསྐྱེད་པར་གྱུར་ཏོ། །ཡང་དེའི་ཚེ་བཅོམ་ལྡན་འདས་ཀྱིས་འཁོར་མང་པོ་ལ་བཀའ་སྩལ་པ། སེམས་ཅན་གང་ཆོས་ཀྱི་བཟོད་པ་ཐོབ་པས་ནི་རྒྱལ་རིགས་རྒྱལ་
ཐབས་སྤྱི་བོ་ནས་དབང་བསྐུར་བའི་གནས་སུ་གནས་པར་བྱས་ཏེ། ནོར་རིན་པོ་ཆེ་རྣམ་པ་སྣ་ཚོགས་ལ་ལོངས་སྤྱོད་ཅིང་བདག་ཉིད་ཆེན་པོའི་གནས་སུ་ལོངས་སྤྱོད་པར་ངས་གནང་གི་སེམས་ཅན་གཞན་ནི་མ་ཡིན་ནོ། །བྱང་ཆུབ་སེམས་དཔའ་རྡོ་རྗེའི་སྙིང་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་གང་ཆོས་ཀྱི་བཟོད་པ་མ་ཐོབ་པར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་གནས་སུ་གནས་ཏེ། ནོར་རིན་པོ་ཆེ་རྣམ་པ་སྣ་ཚོགས་ལ་སྤྱོད་པ་དང་། བདག་ཉིད་ཆེ་བའི་གནས་སུ་གནས་པར་ངེས་པར་མ་གནང་ངམ། འོན་ཏེ་གནང་བའི་སྐབས་ཀྱང་མཆིས། བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་གང་ཆོས་ཀྱི་བཟོད་པ་མ་ཐོབ་ཀྱང་དགེ་བ་བཅུའི་ལས་ཀྱི་ལམ་སྤྱོད་ལ། སེམས་ཅན་གཞན་ཡང་སློབ་དུ་བཅུག་ན། དེ་ཡང་ངས་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་གནས་སུ་ནོར་རིན་པོ་ཆེ་རྣམ་པ་སྣ་ཚོགས་དང་། གཞན་ཡང་བདག་ཉིད་ཆེ་བའི་གནས་སུ་འདུག་ཅིང་ལོངས་སྤྱོད་དུ་གནང་ངོ་། །སེམས་ཅན་གང་ཆོས་ཀྱི་བཟོད་པ་ཡང་མ་ཐོབ་ལ། དགེ་བ་བཅུའི་ལས་ཀྱི་ལམ་ཡང་མི་སྤྱོད་དེ། སེམས་ཅན་གཞན་ཡང་སློབ་པ་ལ་མི་འཛུད་ལ་དབང་ཆེན་པོ་དང་ནན་ཏན་གྱིས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་བྱེད་དེ། ནོར་རིན་པོ་ཆེ་རྣམ་པ་སྣ་ཚོགས་དང་། བདག་ཉིད་ཆེན་པོའི་གནས་སུ་ལོངས་སྤྱོད་པ་དག་ནི་རྒྱལ་རིགས་གདོལ་པ་ཅན་དང་། གཞན་ཡང་བདག་ཉིད་ཆེ་བའི་གནས་སུ་ལོངས་སྤྱོད་པའི་གདོལ་པ་ཅན་གྱི་བདག་པོ་ཞེས་བྱ་སྟེ། གླེན་པ་གཏི་མུག་ཅན་ང་རྒྱལ་གྱིས་མངོན་པར་ཟིན་པ། ངའི་དམ་པའི་ཆོས་ཤིན་ཏུ་ཟབ་མོ་འཇིག་པར་བྱེད་པ། དཀོན་མཆོག་གསུམ་གྱི་གདུང་གཅོད་ཅིང་དམ་པའི་ཆོས་ཀྱི་སྒྲོན་མ་མེད་པར་བྱེད་པ། ངའི་བསྟན་པ་ལ་རབ་ཏུ་བྱུང་བ་དག་ལ་གནོད་པ་དང་། འཚེ་བ་རྣམ་པ་སྣ་ཚོགས་བྱེད་པ། འཚོག་པ་དང་། གཞུ་བ་དང་། ཆད་པས་གཅོད་པ་དང་། ཆོས་གོས་དང་། ལྷུང་བཟེད་དང་། འཚོ་བའི་ཡོ་བྱད་འཕྲོག་པ་དང་། ཆོས་གོས་ཕྲོགས་ཏེ་ཁྱིམ་པར་ཕབ་ནས་ལས་རྣམ་པ་
སྣ་ཚོགས་བྱེད་དུ་བཅུག་པ་དང་། བཅིངས་པ་དང་། བཙོན་དུ་བཟུང་བ་ནས་འཚོ་བའི་དབང་པོ་དང་ཕྲལ་བ་དང་ངའི་བསྟན་པ་དམ་པའི་ཆོས་ལ་འཕྱ་ཞིང་སྐུར་པ་དང་། བར་དུ་གཅོད་ཅིང་བགེགས་བྱེད་ཅིང་ཡོངས་སུ་རྒྱས་པར་མི་བྱེད་པ་དང་། མཆོད་རྟེན་དང་། དགེ་འདུན་གྱི་ནོར་འཕྲོག་པར་བྱེད་པའི་གང་ཟག་དེ་ནི་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་སྟེ། སྡུག་བསྔལ་ཆེན་པོ་མྱོང་ཞིང་ངན་སོང་གི་གནས་སུ་འཁོར་ཞིང་ཐར་པའི་དུས་མེད་དོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་ཡང་གསོལ་པ། བཅོམ་ལྡན་འདས་སེམས་ཅན་གང་ཆོས་ཀྱི་བཟོད་པ་ཡང་མ་ཐོབ། དགེ་བ་བཅུའི་ལས་ཀྱི་ལམ་ཡང་མི་སྤྱོད། སེམས་ཅན་གཞན་ཡང་སྤྱོད་པ་ལ་མི་སྐུར་བར་དབང་ཆེན་པོ་དང་ནན་གྱིས་རྒྱལ་ཐབས་སྤྱི་བོ་ནས་དབང་བསྐུར་བའི་གནས་སུ་རྒྱལ་པོ་བགྱིད་ཅིང་ནོར་རིན་པོ་ཆེ་རྣམ་པ་སྣ་ཚོགས་དང་། གཞན་ཡང་བདག་ཉིད་ཆེ་བའི་གནས་སུ་གནས་པ་ལ་རྒྱུ་གཞན་དང་ཐབས་གཞན་གྱིས་མཚམས་མེད་པའི་སེམས་ཅན་དམྱལ་བ་ལས་གདོན་ཅིང་ངན་སོང་གཞན་གྱི་སྡུག་བསྔལ་ལས་ཀྱང་ཐར་བར་བགྱི་བ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱུ་གཞན་དང་ཐབས་གཞན་གྱིས་གདོན་དུ་རུང་བ་ཡོད་དོ། །སེམས་ཅན་གང་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོར་ཞུགས་ལ་ལོངས་སྤྱོད་རྣམ་པ་སྣ་ཚོགས་ལ་སྤྱོད་པ་ཆོས་ཀྱི་བཟོད་པ་ཡང་མ་ཐོབ། དགེ་བ་བཅུའི་ལས་ཀྱི་ལམ་དང་ཡང་མི་ལྡན། ཡང་དད་པའི་མཐུ་དང་ལྡན་ཏེ། དཀོན་མཆོག་གསུམ་ལ་རིམ་གྲོ་དང་། བསྟི་སྟང་བྱེད་ཅིང་སངས་རྒྱས་ཀྱི་བསྟན་པའི་ཐེག་པ་གསུམ་དང་ལྡན་པའི་དམ་པའི་ཆོས་ལ་ཆུང་ངུ་ན་ཚིགས་སུ་བཅད་པ་གཅིག་ཙམ་ལ་ཡང་འཕྱ་ཞིང་སྐུར་བའམ། བར་དུ་གཅོད་པའམ། བགེགས་མི་བྱེད་ལ། སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་ཉེ་གནས་ཚུལ་ཁྲིམས་ཅན་ནམ། ཚུལ་ཁྲིམས་ཉམས་པའམ། ཚུལ་ཁྲིམས་མེད་ཀྱང་རུང་། སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་གྱོན་པ་ཐམས་ཅད་ལ་འཚེ་
བ་དང་། གནོད་པ་དང་། གཞུ་བ་དང་། འཚོག་པ་དང་། ཆད་པས་གཅོད་པ་དང་། ཆོས་གོས་དང་། ལྷུང་བཟེད་དང་། འཚོ་བའི་ཡོ་བྱད་ཕྲོགས་པ་དང་། ཆོས་གོས་ཕྲོགས་ཏེ་ཁྱིམ་པར་ཕབ་ནས་ལས་བྱེད་དུ་བཅུག་པ་དང་། བཙོན་རར་བཅུག་པ་ནས་འཚོ་བའི་དབང་པོ་དང་ཕྲལ་བའི་བར་དུ་མི་བྱེད་ལ། མཆོག་རྟེན་དང་། དགེ་འདུན་གྱི་ནོར་མི་འཕྲོག་པ་དང་། ངན་པ་སྡིག་པ་ཅན་དག་རབ་ཏུ་བྱུང་བ་ལ་འཚེ་བ་དང་། གནོད་པ་བྱེད་དུ་མི་འཛུད་པ་དང་། དཀོན་མཆོག་གསུམ་གྱི་ནོར་ལ་འཕྲོག་ཅིང་སྤྱོད་དུ་མི་འཛུད་པ་དང་། སངས་རྒྱས་ཀྱི་བསྟན་པ་ཐེག་པ་གསུམ་དང་ལྡན་པའི་དམ་པའི་ཆོས་ལ་བསྟི་སྟང་དང་བཅས་པས་མཉན་ཅིང་གཟུངས་སུ་འཛིན་པ་དང་། མཉན་ཏེ་གཟུངས་སུ་བཟུང་ནས་ཀྱང་ཇི་ལྟར་བཤད་པ་བཞིན་དུ་ཆོས་ཀྱི་རྗེས་སུ་བརྩོན་འགྲུས་དང་། ནན་ཏན་བྱེད་པ་དང་། ངས་བསྟན་པའི་ཐེག་པ་གསུམ་གྱིས་འཕགས་པའི་ཉེ་གནས་དག་ལ་མཆོད་པ་དང་། བསྙེན་བཀུར་དང་། བསྟི་སྟང་དང་བཅས་པས་གཡོག་བྱེད་པ་དང་། ཐེག་པ་ཆེན་པོ་ལ་ཤིན་ཏུ་བརྟན་པའི་ཡི་དམ་བཅས་ཏེ་ཐེ་ཙོམ་དང་ཕྱིར་ལྡོག་པའི་སེམས་མི་སྐྱེད་པ་དང་། གཞན་ཡང་སེམས་ཅན་དག་ཐེག་པ་ཆེན་པོ་ལ་དད་ཅིང་ཡིད་ཆེས་པ་དང་། གཟུངས་སུ་འཛིན་པ་དང་། སློབ་པ་ལ་ནན་ཏན་བྱེད་དུ་འཇུག་ན། རྒྱལ་རིགས་གདོལ་པ་ཅན་འདི་དང་། གཞན་ཡང་བདག་ཉིད་ཆེ་བའི་གདོལ་པ་ཅན་དག་ནི་སྔ་མ་འདས་པའི་སངས་རྒྱས་ཀྱིས་ཀྱང་རྒྱལ་ཐབས་ཀྱི་དབང་བསྐུར་ཞིང་ལོངས་སྤྱོད་རྣམ་པ་སྣ་ཚོགས་ལ་སྤྱོད་དུ་གནང་ངོ་། །གཞན་ཡང་གྲོང་དང་། གྲོང་ཁྱེར་དང་། ནོར་དབྱིག་ཐམས་ཅད་ལ་སྤྱོད་ཀྱང་མཚམས་མེད་པའི་སེམས་ཅན་དམྱལ་བར་མི་ལྟུང་བ་ནས། ངན་སོང་གཞན་གྱི་བར་དུ་ཡང་ལྟུང་བར་མི་འགྱུར་རོ། །དེ་ནི་ངས་རྒྱལ་ཐབས་ཀྱི་དབང་བསྐུར་ཞིང་ལོངས་སྤྱོད་རྣམ་པ་སྣ་ཚོགས་ལ་སྤྱོད་དུ་གནང་ངོ་། །དེ་ལྟར་ན་དེ་དག་ནི་གྲོང་དང་གྲོང་ཁྱེར་ན་སྤྱོད་ཀྱང་མཚམས་མེད་པའི་སེམས་ཅན་དམྱལ་བར་མི་ལྟུང་བ་ནས་ངན་སོང་གཞན་དུ་ཡང་མི་ལྟུང་ངོ་། །སེམས་ཅན་གང་སྡིག་པའི་ལས་ཀྱི་སྒྲིབ་པ་
ཐམས་ཅད་ལྷག་མ་མ་ལུས་པར་བྱང་བར་འདོད་ན་ངས་བསྟན་པའི་དམ་པའི་ཆོས་ཀྱི་རྣམ་གྲངས་འདི་ལ་ནན་ཏན་དུ་བསླབ་ཅིང་གཟུངས་སུ་གཟུང་བར་བྱའོ། །གང་གིས་དེ་ལྟར་དགེ་འདུན་གྱི་མངོན་སུམ་དུ་གྱུར་པ་ལ་ཤིན་ཏུ་འཛེམ་པ་དང་། ངོ་ཚ་བའི་སེམས་ཀྱིས་སྡིག་པའི་ལས་སོ་སོར་བཤགས་ན་སྔོན་གྱི་དུས་ན་བྱས་པའི་སྡིག་པའི་ལས་ཐམས་ཅད་ལྷག་མ་མ་ལུས་པར་ཡོངས་སུ་བྱང་བར་འགྱུར་རོ།། །།བམ་པོ་བརྒྱད་པ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་ན་ཉན་ཐོས་ཀྱི་ཐེག་པ་ལ་འཁྲུལ་པ་མ་མཆིས་པ་ལགས། ཇི་ལྟར་ན་ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མ་མཆིས་པ་ལགས། ཇི་ལྟར་ན་རང་སངས་རྒྱས་ཀྱི་ཐེག་པ་ལ་འཁྲུལ་པ་མ་མཆིས་པ་ལགས། ཇི་ལྟར་ན་རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མ་མཆིས་པ་ལགས། ཇི་ལྟར་ན་ཐེག་པ་ཆེན་པོ་ལ་འཁྲུལ་པ་མ་མཆིས་པ་ལགས། ཇི་ལྟར་ན་ཐེག་པ་ཆེན་པོའི་གང་ཟག་ལ་འཁྲུལ་པ་མ་མཆིས་པ་ལགས། ཇི་ལྟར་ན་དཀོན་མཆོག་གསུམ་གྱི་གདུང་རྟག་པར་ཡོངས་སུ་འཕེལ་བར་བགྱིད་པ་ལགས། ཇི་ལྟར་ན་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་ཆོས་ཀྱི་སྣོད་དམ། ཆོས་ཀྱི་སྣོད་མ་ལགས་པ་ཡང་རུང་། ཆུང་ངུ་ན་ཆོས་གོས་ཀྱི་ཚལ་བུ་འཚལ་ཞིང་སྐྲ་དང་ཁ་སྤུ་བྲེགས་པ་ཐམས་ཅད་ལ་འཁྲུལ་པ་མ་མཆིས་པ་ལགས། ཇི་ལྟར་ན་ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པར་འགྱུར་བ་ལགས། ཇི་ལྟར་ན་རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བར་འགྱུར་བ་ལགས། ཇི་ལྟར་ན་ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ལ་དབང་དུ་འགྱུར་ཞིང་ཕྱིར་མི་ལྡོག་པར་འགྱུར་བ་ལགས། ཇི་ལྟར་ན་རྟག་ཏུ་དགེ་བའི་བཤེས་གཉེན་དང་མཇལ་ཞིང་རྗེས་སུ་འཐུན་པར་འགྱུར་བ་ལགས། ཇི་ལྟར་ན་རྟག་ཏུ་སངས་རྒྱས་ཐམས་ཅད་མཐོང་བ་
དང་མི་འབྲལ་ཞིང་བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་། བསྙེན་བཀུར་བགྱིད་པ་དང་མི་འབྲལ་བར་འགྱུར་བ་ལགས། ཇི་ལྟར་ན་དགེ་བའི་རྩ་བ་ཐམས་ཅད་ལ་རབ་ཏུ་བརྩོན་པས་སེམས་མི་ངོམས་པ་ལགས། ཇི་ལྟར་ན་བྱང་ཆུབ་ཀྱི་སྤྱོད་པ་རྣམ་པ་སྣ་ཚོགས་ལ་སེམས་མི་ངོམས་པ་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་འདི་སྐད་ཅེས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ལོ་རྣམ་པ་བཅུ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་བཅུ་པོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར་རོ། །ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་རྟག་པར་ཡོངས་སུ་འཕེལ་བར་འགྱུར་རོ། །དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཞིང་སྐྲ་དང་ཁ་སྤུ་བྲེགས་པ་ཐམས་ཅད་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་ཐམས་ཅད་དང་། གཟུངས་དང་། བཟོད་པ་དང་། ས་རྣམས་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་། རང་སངས་རྒྱས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་
མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པ་དང་། སྔོན་སྡིག་པ་མི་དགེ་བའི་ལས་ཅི་བྱས་པ་ཐམས་ཅད་འཕགས་པའི་ཆོས་ཀྱི་ཡེ་ཤེས་རྡོ་རྗེ་ལྟར་སྲ་ལ་རྣོ་བས་ལྷག་མ་མ་ལུས་པར་བཅོམ་སྟེ་རྣམ་པར་སྨིན་པའི་འབྲས་བུ་མི་མྱོང་བ་དང་། གསར་དུ་སྡིག་པ་མི་དགེ་བའི་ལས་ཐམས་ཅད་མི་བྱེད་པ་དང་། སྐྱོ་བ་དང་སྒྱིད་ལུག་པ་མེད་པའི་སེམས་ཀྱིས་བླ་ན་མེད་པའི་ཆོས་ཀྱི་འཁོར་ལོ་བསྐོར་བ་དང་། བྱང་ཆུབ་ཀྱི་ཡན་ལག་རིན་པོ་ཆེ་སྣ་བདུན་ནན་ཏན་བྱེད་པ་ལ་སྐྱོ་ཞིང་སྒྱིད་ལུག་པ་མེད་པའི་སེམས་དང་། སེམས་ཅན་ཐམས་ཅད་ཀྱི་ཉོན་མོངས་པའི་ནད་རྣམས་འཇིལ་བ་ལ་སྐྱོ་ཞིང་སྒྱིད་ལུག་པ་མེད་པའི་སེམས་ཀྱིས་སེམས་ཅན་ཐམས་ཅད་ཀྱི་རྟེན་དང་། གནས་སུ་འགྱུར་ཞིང་ཉེ་བར་འཚོ་བ་ཡིན་ནོ། །རིགས་ཀྱི་བུ་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ནི་གར་འགྲོ་ཡང་རིན་པོ་ཆེའི་འཁོར་ལོ་ཐོག་མར་འགྲོ་སྟེ། རིན་པོ་ཆེ་གཞན་དེའི་ཕྱི་བཞིན་འབྲང་ངོ་། །གླིང་བཞི་ཀུན་ཏུ་རྒྱུ་ཞིང་སེམས་ཅན་ཐམས་ཅད་ཀྱི་ལུས་དང་སེམས་ཀྱི་རྙོག་པ་ཐམས་ཅད་ཀྱང་བསལ་ཏེ། སེམས་ཅན་ཐམས་ཅད་ཀྱི་ལུས་དང་སེམས་ཀྱི་བདེ་བ་ཡང་སྐྱེ་ཞིང་འཕེལ་བར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་བཞིན་དུ་འཁོར་ལོ་བཅུ་པོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པ་ནས། སེམས་ཅན་ཐམས་ཅད་ཀྱི་རྟེན་དང་གནས་སུ་འགྱུར་ཞིང་ཉེ་བར་འཚོ་བའི་བར་དུ་འཐོབ་པར་འགྱུར་རོ། །རིགས་ཀྱི་བུ་འདི་ལྟ་སྟེ། ཤིང་རྟ་ཆེན་པོ་ནི་འཁོར་ལོ་བཞི་དང་ལྡན་ཏེ། མི་མང་པོ་དེའི་ནང་དུ་འདུག་ནས་ལམ་ཆེན་པོར་འགྲོའོ། །ལམ་དེ་ནི་བོང་བའམ། གྱོ་མོའམ། གསེག་མའམ། རྩྭ་འམ། ཤིང་ངམ། ལོ་མའམ། ཡལ་གའམ། མེ་ཏོག་གམ། འབྲས་བུ་ཇི་སྙེད་ཡོད་པ་ཐམས་ཅད་ཤིང་རྟའི་འཁོར་ལོ་དེའི་འོག་ཏུ་སོང་ནས་ཐམས་ཅད་ཆག་ཅིང་གྲུགས་ཏེ་ནོར་དུ་མི་རུང་བར་བྱེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་
དཔའ་ཆེན་པོ་ཡང་འཁོར་ལོ་རྣམ་པ་བཅུ་དང་ལྡན་ན་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་ཐམས་ཅད་ཡོངས་སུ་བཅོམ་སྟེ། རྣམ་པར་སྨིན་པ་མི་ལེན་པར་བྱེད་དོ། །རིགས་ཀྱི་བུ་འདི་ལྟ་སྟེ། འཁོར་ལོ་རྣོན་པོ་ནི་ཐང་ཅིག་འཕངས་པས་ཕས་རྒོལ་བའི་དགྲའི་མགོ་དང་། ཡན་ལག་བཅད་དེ། དེ་སྤྱོད་པའི་མཐུ་མེད་པར་བྱེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་བཅུ་པོ་འདི་དང་ལྡན་ན་རྒྱུད་ལྔར་འཁོར་བའི་སྡུག་བསྔལ་ཆེན་པོ་ཐམས་ཅད་འཇོམས་པ་དང་། ཉོན་མོངས་པ་དང་སྡིག་པའི་ལས་ཐམས་ཅད་ཡོངས་སུ་གཅད་དེ། རྣམ་པར་སྨིན་པ་ལེན་པར་མི་བྱེད་དོ། །རིགས་ཀྱི་བུ་འདི་ལྟ་སྟེ། མེའི་བསྐལ་པ་བྱུང་བའི་ཚེ་ཉི་མ་ལྔ་ཅིག་ཅར་ཤར་ནས་གླིང་བཞིའི་ཀླུང་དང་། མཚོ་དང་། ཆུ་བོ་དང་། ཆུའི་ཁམས་སུ་གཏོགས་པ་གཤེར་བ་ཐམས་ཅད་གང་ཡང་མི་སྐེམས་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་བཅུ་པོ་འདི་དང་ལྡན་ན་རྒྱུ་བ་བཞི་དང་། ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། སྡུག་བསྔལ་གྱི་རྩ་བར་སྨིན་པ་ཐམས་ཅད་ཡོངས་སུ་སྐེམས་པར་བྱེད་དོ། །རིགས་ཀྱི་བུ་འདི་ལྟ་སྟེ། རླུང་གི་བསྐལ་པ་བྱུང་བའི་ཚེ་ཕྱོགས་བཞི་ནས་རླུང་ཆེན་པོ་དུས་གཅིག་ཏུ་ལངས་པས་འཇིག་རྟེན་གྱི་ཁམས་ཐམས་ཅད་ནི་རི་བོ་ཆེ་ཆུང་དང་། ས་ཆེན་པོ་རྣམས་ཐམས་ཅད་འཇིག་ཅིང་འཐོར་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ན་འཇིག་རྟེན་གྱི་ཕྱིན་ཅི་ལོག་བཞི་དང་། ང་རྒྱལ་གྱི་རི་བོ་ཐམས་ཅད་མི་ཤིགས་པ་གང་ཡང་མེད་པ་དང་། སེམས་ཅན་ཐམས་ཅད་ཀྱི་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། སྡུག་བསྔལ་གྱི་རྣམ་པར་སྨིན་པའི་རྩ་བ་ཐམས་ཅད་ཀྱང་འཇིག་ཅིང་འཐོར་བར་འགྱུར་རོ། །རིགས་ཀྱི་བུ་འདི་ལྟ་སྟེ། སེང་གེའི་རྒྱལ་པོ་རལ་པ་ཅན་གྱི་སྐད་ཐང་ཅིག་ཕྱུང་བས་གཅན་གཟན་ཐམས་ཅད་འཕུར་བ་དང་། འགྲོ་བ་ཐམས་ཅད་སྐྲག་ཅིང་འགུལ་
མི་ནུས་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་པའི་ཆོས་ཀྱི་སྒྲ་ཐང་ཅིག་བསྒྲགས་པས་མུ་སྟེགས་ཅན་དང་། ལོག་པར་སྟོན་པའི་སྡིག་པའི་གྲོགས་སུ་གྱུར་པ་ཐམས་ཅད་འཇིགས་སྐྲག་ནས་སྨྲ་བའི་ཚིག་འཁྲུལ་ཞིང་འདྲི་བ་དང་རྒོལ་མི་ནུས་པར་འགྱུར་རོ། །རིགས་ཀྱི་བུ་འདི་ལྟ་སྟེ། བརྒྱ་བྱིན་ལྷའི་དབང་པོ་ལྷ་མ་ཡིན་དང་འཐབ་པའི་ཚེ་ལྷའི་དམག་གིས་བསྐོར་ཅིང་ལག་ན་རྡོ་རྗེ་ཐོགས་ཏེ་གཡུལ་དུ་ཞུགས་ན་ལྷ་མ་ཡིན་ཐམས་ཅད་སྐྲག་པས་ལྡོག་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ན་ལོག་པར་ལྟ་བའི་མུ་སྟེགས་ཅན་ཐམས་ཅད་དང་། ལོག་པར་སྟོན་པའི་སྡིག་པའི་གྲོགས་པོ་ཐམས་ཅད་སྐྲག་ནས་འབྲོས་པར་འགྱུར་རོ། །རིགས་ཀྱི་བུ་འདི་ལྟ་སྟེ། ཡིད་བཞིན་གྱི་ནོར་བུ་རིན་པོ་ཆེ་རྒྱལ་མཚན་གྱི་རྩེ་མོ་ལ་བཏགས་ན་རིན་པོ་ཆེ་རྣམ་པ་སྣ་ཚོགས་ཆར་བཞིན་དུ་འབབ་སྟེ། དབུལ་ཕོངས་པའི་སེམས་ཅན་ཐམས་ཅད་ལ་སྦྱིན་པ་བྱེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ཏེ། རྣམ་པར་དག་པའི་ཚུལ་ཁྲིམས་ཀྱི་རྒྱལ་མཚན་ལ་གནས་ན་ཆོས་ཆེན་པོའི་ཆར་རབ་ཏུ་འབེབས་པས་སེམས་ཅན་ཚད་མེད་པ་སྙེད་ཐམས་ཅད་ལ་སྦྱིན་པ་བྱེད་པར་འགྱུར་རོ། །རིགས་ཀྱི་བུ་འདི་ལྟ་སྟེ། མཚན་མོའི་དུས་སུ་འཇིག་རྟེན་ཀུན་མུན་པར་གྱུར་ནས་འཐོམས་ཤིང་འབྲོག་བསླད་པ་ན་ཟླ་བ་ཉ་བ་ཤར་བས་མུན་པ་ཐམས་ཅད་བསལ་ཏེ། འབྲོག་བསླད་པ་རྣམས་ཀྱི་ལམ་མཚོན་པར་འགྱུར་བ་དེ་བཞིན་དུ། བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ན་སེམས་ཅན་གང་མ་རིག་པའི་མུན་པས་ལྡོངས་ཏེ་འཕགས་པའི་ལམ་ཡན་ལག་བརྒྱད་སྟོར་བ་རྣམས་ལ་བྱང་ཆུབ་སེམས་དཔའ་དམ་པའི་ཆོས་བཤད་དེ། མ་རིག་པའི་མུན་པ་ཐམས་ཅད་བསལ་ནས། ཆོས་ཀྱི་སྣང་བ་སྐྱེས་པའི་ཕྱིར་འཕགས་པའི་ལམ་ཡན་ལག་བརྒྱད་པ་མངོན་དུ་གྱུར་ཏེ། ཟག་པ་ཐམས་ཅད་བཅད་ནས་སྡུག་
བསྔལ་གྱི་མཐའ་ཟད་པར་བྱེད་དོ། །རིགས་ཀྱི་བུ་འདི་ལྟ་སྟེ། ཉི་མའི་དཀྱིལ་འཁོར་ཆེན་པོ་འཇིག་རྟེན་དུ་ཤར་བ་ན་ལོ་ཏོག་ཐམས་ཅད་སྐྱེ་ཞིང་འཕེལ་ཏེ། མེ་ཏོག་དང་། ལོ་ཐོག་དང་། ལོ་མ་ཐམས་ཅད་རྒྱས་པ་དང་། མནམ་ཤིང་བཙོག་པ་ཐམས་ཅད་སེལ་བ་དང་། ལོ་ཐོག་གི་འབྲུ་དང་། སྨན་གྱི་འབྲས་བུ་ཐམས་ཅད་སྨིན་པ་དང་། གངས་ཀྱི་རི་བོ་ཀུན་ཞུ་བས་འབབ་ཆུ་ཀུན་བྲུག་སྟེ། རིམ་གྱིས་རྒྱ་མཚོ་ཆེན་པོར་འབབ་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ཏེ། ལྷག་པའི་སྦྱིན་པ་ལ་གནས་ཤིང་། དུལ་བའི་ཚུལ་ཁྲིམས་དང་། བདེ་བའི་བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། བྱམས་པ་དང་། སྙིང་རྗེ་དང་། སྤོབས་པའི་ཡོན་ཏན་ཤིན་ཏུ་རྒྱས་ཤིང་སེམས་ཅན་ཐམས་ཅད་ལ་དམ་པའི་ཆོས་སྟོན་ཏོ། །ཆོས་དེའི་འོད་ཀྱི་གཟི་བརྗིད་ཀྱིས་སེམས་ཅན་ཐམས་ཅད་ཀྱི་དགེ་བའི་རྩ་བ་ལྷག་པའི་ལོ་ཏོག་རྣམ་པ་སྣ་ཚོགས་སྐྱེ་ཞིང་འཕེལ་བ་དང་། ལྷག་པའི་སྤྱོད་པ་དམ་པའི་མེ་ཏོག་དང་། ལོ་མ་རྣམ་པ་སྣ་ཚོགས་ཤིན་ཏུ་རྒྱས་པ་དང་། ཉོན་མོངས་པའི་ལས་ངན་པ་ཐམས་ཅད་ཡོངས་སུ་སེལ་བ་དང་། མཐོ་རིས་དང་། མྱ་ངན་ལས་འདའ་བའི་འབྲས་བུ་ཡོངས་སུ་སྨིན་པར་འགྱུར་བ་དང་། ལོག་པར་ལྟ་བ་དང་། ང་རྒྱལ་གྱི་རི་བོ་ཐམས་ཅད་ཞུ་ཞིང་འབབ་པས་ཡང་དག་པའི་དང་བ་དང་། ཚུལ་ཁྲིམས་དང་། ཐོས་པ་དང་། གཏོང་བ་དང་། ཤེས་རབ་དང་། ཏིང་ངེ་འཛིན་གྱི་ཆུ་རིམ་གྱིས་འབབ་ཅིང་མྱ་ངན་ལས་འདའ་བའི་རྒྱ་མཚོ་འགེངས་པ་དང་། སེམས་ཅན་ཐམས་ཅད་ཡིད་བཞིན་དུ་འཇིགས་པ་མེད་པ་མྱ་ངན་ལས་འདའ་བའི་གྲོང་ཁྱེར་དུ་འཇུག་པར་འགྱུར་རོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ལོ་བཅུ་པོ་གང་ཞེ་ན། རིགས་ཀྱི་བུ་འཁོར་ལོ་བཅུ་ཞེས་བྱ་བ་ནི་ཆོས་གཞན་ལ་མི་གདགས་ཀྱི། དགེ་བ་བཅུའི་ལས་ཀྱི་ལམ་ཉིད་ཡིན་པར་ཤེས་པར་བྱའོ། །འཁོར་ལོ་
རྣམ་པ་བཅུ་པོ་འདི་དག་དང་ལྡན་པས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་སྟེ། སྡིག་པ་ཐམས་ཅད་ལས་རྣམ་པར་གྲོལ་བ་དང་། དགེ་བའི་ཆོས་ཐམས་ཅད་ཡིད་བཞིན་དུ་རྫོགས་པ་དང་། མྱུར་དུ་མྱ་ངན་ལས་འདའ་བ་ཆེན་པོའི་རྒྱ་མཚོ་ཡོངས་སུ་འགེངས་པ་དང་། ཐབས་མཁས་པ་ཆེན་པོའི་ཡེ་ཤེས་ཀྱི་འོད་ཀྱིས་སྐྱེ་བོ་ཐམས་ཅད་ཡོངས་སུ་སྨིན་པར་བྱེད་ཅིང་ཐམས་ཅད་ལ་ཕན་པ་དང་། བདེ་བ་ཡོངས་སུ་ཐོབ་པར་བྱེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་སྔ་མ་འདས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་མི་དགེ་བ་བཅུའི་ལས་ཀྱི་ལམ་ཡོངས་སུ་སྤངས་ཏེ། དགེ་བ་བཅུའི་ལས་ཀྱི་ལམ་འདི་ལ་ཡོངས་སུ་བསྔགས་པས་འབྲས་བུ་ཐོབ་པར་གྱུར་ཏོ། །དེ་བས་ན་གང་གིས་དགེ་བ་བཅུའི་ལས་ཀྱི་ལམ་བཤད་པ་འདི་དག་ལས། འགའ་ཞིག་ནམ་འཚོའི་བར་དུ་མ་ཉམས་པར་སྲུང་ན་འབྲས་བུ་ཁྱད་པར་ཅན་མཆོག་ཏུ་འགྱུར་བ་ཐམས་ཅད་ཐོབ་པ་ནི་ཇི་ལྟར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་སྲོག་གཅོད་པ་ཡོངས་སུ་སྤངས་ན་དེ་ཉིད་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་ཡིན་ཏེ། སེམས་ཅན་དག་ལ་འཇིགས་ཤིང་བག་ཚ་བར་མི་བྱེད་པས་དེའི་འཇིགས་པའི་སྡུག་བསྔལ་མི་སྐྱེད་པའི་དབང་གིས་དགེ་བའི་རྩ་བ་ཐམས་ཅད་མྱུར་དུ་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བའི་རྒྱ་མཚོར་བྱིང་བ། སྲོག་གཅོད་པའི་དབང་གིས་ལུས་དང་། ངག་དང་། ཡིད་ཀྱིས་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཇུག་ཅིང་མཐོང་བ་དང་། ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། ཚེའི་སྒྲིབ་པས་བསྒྲིབས་པར་གྱུར་ཏོ། །འདི་ལྟར་སྲོག་གཅོད་པ་ཡོངས་སུ་སྤངས་པའི་འཁོར་ལོས་དེ་དག་ལྷག་མ་མ་ལུས་པར་ཡོངས་སུ་བཅོམ་ཞིང་བརྙིལ་བས་རྣམ་པར་སྨིན་པའི་འབྲས་བུ་མི་མྱོང་བར་བྱེད་དོ། །ལུས་འདི་ཉིད་ལ་
ཡང་ལྷ་དང་། མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང་། དོགས་པ་མི་སྐྱེ་བ་དང་། ལུས་དང་སེམས་རབ་ཏུ་བདེ་ཞིང་ཡུན་རིང་དུ་འཚོ་བར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང་། ཆུང་མ་དང་། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་ཀྱི་ཤིན་ཏུ་འཇིགས་པ་གཤིན་རྗེའི་ཕོ་ཉ་མཐོང་བར་མི་འགྱུར་རོ། །གཞན་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང་། དེ་ལ་བཀུར་སྟི་དང་བཅས་པས་ཤིན་ཏུ་དད་པ་སྐྱེ་བར་འགྱུར་རོ། །ཡང་ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་སྟེ། དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང་། གང་ནས་གང་དུ་སྐྱེས་པར་ནད་མེད་པ་དང་། ཚེ་རིང་བ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། གཞན་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང་། སྲོག་གཅོད་པ་ཡོངས་སུ་སྤོང་བ་དང་། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྦྱོར་བ་ཐམས་ཅད་ལ་རིམ་གྱིས་གཞོལ་ཞིང་ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་ཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་མཚོན་ཆ་མེད་པ་དང་། དགྲ་དང་འཚེ་བའི་མིང་མི་གྲག་པ་དང་། འཇིགས་པ་ཐམས་ཅད་དང་བྲལ་ཏེ་རབ་ཏུ་བདེ་སྐྱིད་པ་དང་། ནད་མེད་པ་དང་། ཚེ་རིང་བའི་ཞིང་དུ་སེམས་ཅན་དག་སྐྱེ་བར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ་སེམས་ཅན་དག་ཅིས་འདུལ་བའི་བཞིན་
དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་པ་ཡོངས་སུ་སྤངས་པའི་འཁོར་ལོ་སྟེ་དང་པོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་དེ་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་། ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་རྗེས་སུ་འགྲོ་བ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་ཐོབ་པ་ཡང་ཇི་ལྟར་རྒྱས་པར་བཤད་པ་
བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་མ་བྱིན་པར་ལེན་པ་ཡོངས་སུ་སྤངས་ན་དེ་ཉིད་སེམས་ཅན་ཐམས་ཅད་ལ་མི་འཇིགས་པའི་སྦྱིན་པ་ཡིན་ཏེ། ཡོངས་སུ་གདུང་བ་མེད་པ་དང་། འཚེ་བ་མེད་པ་དང་། བདག་ཉིད་ཚུལ་བཞིན་དུ་རྙེད་པའི་ནོར་གྱིས་ཆོག་ཤེས་པར་གནས་ཀྱིས། ཆོས་མ་ཡིན་པའི་ནོར་དང་ཁེ་ལ་རེ་བ་མེད་པ་དེའི་དབང་གིས་དགེ་བའི་རྩ་བ་ཐམས་ཅད་ཀྱང་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་ཞིང་འཁོར་བའི་རྒྱ་མཚོར་བྱིང་བར་འགྱུར་བ་ཡང་མ་བྱིན་པར་ལེན་པའི་དབང་གིས་ལུས་དང་། ངག་དང་། ཡིད་མི་དགེ་བའི་ལམ་རྣམས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། རིན་པོ་ཆེ་དང་ནོར་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་མ་བྱིན་པར་ལེན་པ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་མི་མྱོང་སྟེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བས་དོགས་པ་མི་སྐྱེ་བ་དང་། ལུས་དང་སེམས་རབ་ཏུ་བདེ་བ་དང་། ནོར་རིན་པོ་ཆེ་ཐམས་ཅད་དང་ལྡན་པར་འགྱུར་རོ། །ནམ་འཆི་འཕོ་བའི་དུས་བྱེད་པ་ན་ཡང་ལུས་དང་སེམས་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང་། ཆུང་མ་དང་། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་ཀྱི་ཤིན་ཏུ་འཇིགས་པ་གཤིན་རྗེའི་ཕོ་ཉ་མཐོང་བར་མི་འགྱུར་རོ། །གཞན་ཡང་ཡིད་དུ་འོང་བའི་དགེ་བའི་བཤེས་གཉེན་གྱི་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང་དེ་ལ་བཀུར་སྟི་དང་བཅས་པས་དང་བ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་སྟེ། དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང་། གང་ནས་གང་དུ་སྐྱེས་པར་ལོངས་སྤྱོད་ཆེན་པོ་དང་ལྡན་ཞིང་
བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། འཇིགས་པ་ལྔ་དང་ནོར་ཐུན་མོང་དུ་མི་འགྱུར་རོ། །ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་དང་ཡོན་ཏན་དང་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་ཅིང་མ་བྱིན་པར་ལེན་པ་ཡོངས་སུ་སྤོང་བ་དང་། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་བ་དང་། ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་ཀྱི་བར་དུ་འཐོབ་པར་འགྱུར་རོ། །ཡང་སངས་རྒྱས་ཀྱི་ཞིང་རིན་པོ་ཆེ་རྣམ་པ་སྣ་ཚོགས་ཀྱིས་བརྒྱན་པ་དང་། རིན་པོ་ཆེའི་ཤིང་དང་། རིན་པོ་ཆེའི་རྫིང་དང་། རིན་པོ་ཆེའི་གཞལ་མེད་ཁང་ལ་སོགས་པས་ཡོངས་སུ་གང་བ་དང་། བདག་དང་བདག་གིར་འཛིན་པ་དང་བྲལ་བ་རྒྱན་ཐམས་ཅད་ཀྱིས་བཀོད་པ་དང་ལྡན་པའི་ཞིང་དེར་སེམས་ཅན་དག་སྐྱེ་བར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ་སེམས་ཅན་དག་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོས་མ་བྱིན་པར་ལེན་པ་ཡོངས་སུ་སྤངས་པའི་འཁོར་ལོ་གཉིས་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར་རོ། །ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་
འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་ཐོབ་པ་དག་ཀྱང་ཇི་ལྟར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་འདོད་པས་ལོག་པར་གཡེམ་པ་ཡོངས་སུ་སྤངས་ན། དེ་ཉིད་སེམས་ཅན་ཐམས་ཅད་འདོད་པའི་རླུང་གིས་གཡེངས་པ་ལས་འཇིགས་པ་མེད་པ། ཕྲག་དོག་མེད་པ། འཚེ་བ་མེད་པ། ཡོངས་སུ་གདུང་བ་མེད་པ། འཁྲུག་པ་མེད་པའི་སྦྱིན་པ་ཡིན་ཏེ། བདག་གི་ཆུང་མས་ཆོག་ཤེས་ཤིང་གཞན་གྱི་ཆུང་མ་ལ་རེ་བ་མེད་པས་དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་འདོད་པས་ལོག་པར་གཡེམ་པའི་དབང་གིས་ལུས་དང་ངག་དང་། ཡིད་མི་དགེ་བའི་ལས་བདག་ཀྱང་བྱེད་
ལ། གཞན་ཡང་བྱེད་དུ་འཇུག་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། ཆུང་མའི་སྒྲིབ་པས་བསྒྲིབས་པར་གྱུར་ཏོ། །འདི་ལྟར་འདོད་པས་ལོག་པར་གཡེམ་པ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་བཅོམ་པས་རྣམ་པར་སྨིན་པའི་འབྲས་བུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བས་དོགས་པ་མི་སྐྱེ་བ་དང་། ལུས་དང་སེམས་རབ་ཏུ་བདེ་བ་དང་། ཆུང་མ་ལྷོད་པ་དང་བཅས་པ་མ་ཡིན་པར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུངས་ཤིང་ཡིད་དུ་འོང་བའི་བུ་དང་། ཆུང་མ་དང་། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་ཏུ་འཇིགས་པའི་གཤིན་རྗེའི་ཕོ་ཉ་ནི་མཐོང་བར་མི་འགྱུར་རོ། །གཞན་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང་། དེ་ལ་བཀུར་སྟི་དང་བཅས་པས་དེ་ལ་ཤིན་ཏུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེས་ཏེ། དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང་། གང་ནས་གང་དུ་སྐྱེས་པར་འཁོར་ཕུན་སུམ་ཚོགས་པ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། ཕྱིར་ཡང་ཤིན་ཏུ་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་ཅིང་འདོད་པས་ལོག་པར་གཡེམ་པ་ཡོངས་སུ་སྤོང་བ་དང་། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་སྤོང་བ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་
གཞོལ་ཞིང་ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་བུད་མེད་མེད་པ་དང་། འདོད་ཆགས་དང་གཡེམ་པ་མེད་པ། ཚངས་པར་སྤྱོད་པ་མཆོག་དང་ལྡན་པའི་སེམས་ཅན་དག་ཞིང་དེར་སྐྱེ་སྟེ། དེ་དག་ཐམས་ཅད་ཀྱང་རྫུས་ཏེ་སྐྱེའི་མི་གཙང་བའི་མངལ་ནས་སྐྱེ་བ་ནི་མ་ཡིན་ནོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ལ་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་། སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འདོད་པས་ལོག་པར་གཡེམ་པ་ཡོངས་སུ་སྤངས་པའི་འཁོར་ལོ་གསུམ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཞིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་རྗེས་སུ་འཐུན་པར་འགྱུར་བ་དང་། རྟག་ཏུ་སངས་རྒྱས་མཐོང་བ་དང་མི་
འབྲལ་ཞིང་བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པ་དང་། འབྲས་བུ་གཞན་དག་ཐོབ་པ་ཡང་ཇི་ལྟར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་བརྫུན་དུ་སྨྲ་བ་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་རྟག་ཏུ་བཀུར་བ་དང་། ཚིག་བཙུགས་པ་ཚད་མར་འགྱུར་བ་དང་། ཚིག་ཀུན་ཉན་ཅིང་གུས་པ་དང་དོགས་པ་མི་སྐྱེ་བར་འགྱུར་ཏེ། དེའི་དབང་གིས་དགེ་བའི་རྩ་བ་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་བརྫུན་དུ་སྨྲ་བའི་དབང་གིས་ལུས་དང་། ངག་དང་། ཡིད་ཀྱིས་སྡིག་པ་མི་དགེ་བའི་ལས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། ཚིག་བཙུགས་པ་ལས་སྒྲིབ་པས་བསྒྲིབས་པར་འགྱུར་རོ། །འདི་ལྟར་བརྫུན་དུ་སྨྲ་བ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་མི་ལེན་པར་འགྱུར་རོ། །ལུས་འདི་ཉིད་ལ་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང་། དོགས་པ་མི་སྐྱེ་བ་དང་། ལུས་དང་སེམས་རབ་ཏུ་བདེ་བ་དང་། ཚིག་ཏུ་སྨྲ་བ་ཐམས་ཅད་ལ་གཞན་ཡིད་ཆེས་ཤིང་ཉན་པར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང་། ཆུང་མ་དང་། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་ཀྱི་ཤིན་ཏུ་འཇིགས་པའི་གཤིན་རྗེའི་ཕོ་ཉ་ནི་མཐོང་བར་མི་འགྱུར་རོ། །གཞན་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་
ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང་། དེ་ལ་བཀུར་སྟི་དང་བཅས་པས་ཤིན་ཏུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ལུས་སུ་སྐྱེ་ཞིང་དབང་པོ་ཡོངས་སུ་རྫོགས་པ་ཡན་ལག་དང་ལྡན་པ་དང་། གོང་ནས་གང་དུ་སྐྱེས་པར་ཚིག་བཙུགས་པ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང་། བརྫུན་དུ་སྨྲ་བ་ཡོངས་སུ་སྤངས་པ་དང་། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ། དགེ་བའི་ཆོས་ཁྱད་པར་ཅན་ཐམས་ཅད་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་བ་དང་། ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་ཐམས་ཅད་བདེན་པར་སྨྲ་བ། སྒྱུ་དང་བྲལ་བ། ལྷའི་གསུང་གིས་ཡོངས་སུ་བརྒྱན་པ་དང་། སླུ་བ་མེད་ཅིང་སེམས་ཀྱི་སྤྱོད་པ་དྲང་བ་དང་། ཡང་དག་པའི་སྤྱད་པ་རྣམ་པར་དཀར་བའི་ཆོས་འབའ་ཞིག་ལ་སྤྱོད་པ། ལྷའི་གོས་བསུང་ཅན་གྱོན་པ། རིན་པོ་ཆེའི་རྒྱན་གྱིས་བཀོད་པའི་སེམས་ཅན་དག་ཞིང་དེར་སྐྱེ་བར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་བརྫུན་དུ་སྨྲ་བ་ཡོངས་སུ་སྤངས་པའི་འཁོར་ལོ་བཞི་པའོ། །བྱང་ཆུབ་སེམས་དཔའ་སེམས་དཔའ་ཆེན་པོས་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་
ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བར་བྱེད་པ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པར་འགྱུར་བ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་འཕེལ་ཞིང་སྐྱེ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང་། རྟག་ཏུ་སངས་རྒྱས་མཐོང་བ་དང་མི་འབྲལ་བ་དང་། བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་ཞིང་དགེ་བའི་རྩ་བ་ཐམས་ཅད་ཤིན་ཏུ་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་འཐོབ་པ་ཡང་ཇི་ལྟར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ཕྲ་མ་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་རྟག་ཏུ་བཀུར་ཞིང་བླ་མར་བྱེད་པ་དང་། ཚིག་ཏུ་སྨྲ་བ་ཐམས་ཅད་གཞན་གྱིས་མཉན་པ་དང་། འདུམ་པ་དང་། དོགས་པ་མི་སྐྱེ་བར་འགྱུར་ཏེ། དེའི་དབང་གིས་དགེ་བའི་རྩ་བ་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ཕྲ་མ་བྱས་པའི་དབང་གིས་ལུས་དང་། ངག་དང་། ཡིད་ཀྱིས་མི་དགེ་བའི་ལས་
བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། འདུམ་པ་ལ་སྒྲིབ་པས་བསྒྲིབས་པར་འགྱུར་རོ། །འདི་ལྟར་ཕྲ་མའི་ཚིག་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་མི་ལེན་པར་བྱེད་དོ། །ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང་། དོགས་པ་མི་སྐྱེ་བ་དང་། ལུས་དང་སེམས་རབ་ཏུ་བདེ་བ་དང་། ཚིག་ཏུ་སྨྲ་བ་ཐམས་ཅད་ལ་ཉན་ཅིང་འདུམ་པར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང་། ཆུང་མ་དང་། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་ཏུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང་བཀུར་སྟི་དང་བཅས་པས་ཤིན་ཏུ་དད་པ་སྐྱེ་བར་འགྱུར། ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་སྟེ། དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང་། གང་ནས་གང་དུ་སྐྱེས་པར་སྨྲ་བའི་ཚིག་འཇམ་ཞིང་འདུམ་པ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང་། ཕྲ་མའི་ཚིག་དང་ཡོངས་སུ་བྲལ་བས་སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་ཞིང་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་
ཆུབ་ཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་ཤིན་ཏུ་བརྟན་པ་སྲ་བ་མི་ཤིགས་པ་དང་། ལྷ་རྫས་བཟང་པོས་ཡོངས་སུ་བརྒྱན་པར་འགྱུར་བ་དང་། འཐུན་པ་དང་། མི་རྩོད་པ་ཤིན་ཏུ་དུལ་ཞིང་འདུམ་པ་དགེ་བའི་ཆོས་ཚོལ་བའི་སེམས་ཅན་དག་ཞིང་དེར་སྐྱེ་བར་འགྱུར་རོ། །རྟག་ཏུ་འདུམ་ཞིང་གུས་པས་དམ་པའི་ཆོས་ཉན་པ་དང་། དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅི་དང་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཕྲ་མ་ཡོངས་སུ་སྤངས་པའི་འཁོར་ལོ་ལྔ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་། ཆུང་ངུ་ན་ཆོས་གོས་ཀྱི་ཚལ་བུ་གྱོན་ཞིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང་། རྟག་ཏུ་སངས་རྒྱས་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་ཉན་ཐོས་ཀྱི་ཉེ་གནས་མཐོང་བ་དང་མི་
འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་། སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་འཐོབ་པ་ཡང་ཇི་སྐད་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ཞེ་གཅོད་པའི་ཚིག་ཐམས་ཅད་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་བཀུར་ཞིང་བླ་མར་བྱེད་པ་དང་། ཚིག་ཏུ་སྨྲ་བ་ཀུན་ལ་ཕ་རོལ་པོ་ཀུན་དགའ་ཞིང་ཉན་པས་དོགས་པ་མེད་པར་འགྱུར་ཏེ། དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ཞེ་གཅོད་པའི་ཚིག་གི་དབང་གིས་ལུས་དང་། ངག་དང་། ཡིད་མི་དགེ་བའི་ལས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། ཤིན་ཏུ་དུལ་བ་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་ཞེ་གཅོད་པའི་ཚིག་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པའི་དབང་གིས་རྣམ་པར་སྨིན་པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་བས་དོགས་པ་མི་སྐྱེ་བ་དང་། ལུས་དང་སེམས་རབ་ཏུ་བདེ་བ་དང་། ཚིག་ཏུ་སྨྲ་བ་ཐམས་ཅད་ཕ་རོལ་གྱི་ཡིད་དུ་འོང་བ་དང་སྙན་པར་འགྱུར་རོ། །ནམ་འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཉོན་མི་མོངས་པ་དང་། ཡིད་དུ་འོང་བའི་བུ་དང་ཆུང་མ་དང་འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི་ཤིན་ཏུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་
པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང་། དེ་ལ་བཀུར་སྟི་དང་བཅས་པས་ཤིན་ཏུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེས་ན་ཡང་དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང་། གང་ནས་གང་དུ་སྐྱེས་པར་ཚིག་འཇམ་པོར་སྨྲ་བ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་། ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་དེའི་རྗེས་སུ་སློབ་པ་དང་། ཞེ་གཅོད་པའི་ཚིག་ཡོངས་སུ་སྤོང་བ་དང་། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་རིམ་གྱིས་གཞོལ་ཞིང་ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་ཀྱི་བར་དུ་འཐོབ་པ་དང་། སངས་རྒྱས་ཀྱི་ཞིང་ན་ཡིད་དུ་མི་འོང་བའི་སྒྲ་ཐམས་ཅད་དང་བྲལ་ཏེ། ཡིད་དུ་འོང་བའི་སྒྲ་དབྱངས་སྙན་པ་རྣམ་པ་སྣ་ཚོགས་དང་། ཆོས་ཀྱི་སྒྲས་ཞིང་དེ་ཡོངས་སུ་གང་བ་དང་། དྲན་པ་དང་བློ་གྲོས་སུ་ལྡན་པ། ཚངས་པའི་དབྱངས་ཅན། ཤིན་ཏུ་དུལ་བའི་སེམས་ཅན་དག་ཞིང་དེར་སྐྱེ་བ་དང་། རྟག་ཏུ་ཚིག་འཇམ་པོས་གཅིག་ལ་གཅིག་སྐུལ་བར་བྱེད་དོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་ཆོས་སྟོན་པ་དང་། ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཞིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེ་གཅོད་པའི་ཚིག་ཡོངས་སུ་སྤངས་པའི་འཁོར་ལོ་དྲུག་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་པས་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་
གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་རྗེས་སུ་འགྲོ་བར་འགྱུར་བ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་། བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་དག་ཐོབ་པ་ཡང་ཇི་སྐད་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ཚིག་ཀྱལ་པ་ཡོངས་སུ་སྤངས་པས་སེམས་ཅན་ཐམས་ཅད་ཀྱིས་བཀུར་ཞིང་བླ་མར་བྱེད་པ་དང་། ཚིག་ཏུ་སྨྲ་བ་ཐམས་ཅད་དོན་དུ་འགྱུར་ཞིང་ཚིག་ཐོས་པ་རྣམས་ཉན་ཅིང་གུས་པས་དོགས་པ་མེད་པར་འགྱུར་རོ། །དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་བྱིང་བ་ཡང་ཚིག་ཀྱལ་པ་སྨྲ་བའི་དབང་གིས་
ལུས་དང་། ངག་དང་། ཡིད་མི་དགེ་བའི་ལས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། དོན་དུ་སྨྲ་བ་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་ཚིག་ཀྱལ་པ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་མི་ལེན་པར་བྱེད་དོ། །ལུས་འདི་ཉིད་ལ་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བས་དོགས་པ་མེད་པར་འགྱུར་བ་དང་། ལུས་དང་སེམས་རབ་ཏུ་བདེ་བ་དང་། ཚིག་ཏུ་སྨྲ་བ་ཐམས་ཅད་དོན་དུ་འགྱུར་བ་དང་། འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང་། ཆུང་མ་དང་། འཁོར་གྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི་ཤིན་ཏུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང་། དེ་ལ་བཀུར་སྟི་དང་བཅས་ཤིང་ཤིན་ཏུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་ཞིང་དབང་པོ་ཡོངས་སུ་རྫོགས་པ་ཡན་ལག་དང་ལྡན་པ་དང་། གང་ནས་གང་དུ་སྐྱེས་པར་ཕན་པ་དང་། དོན་དུ་འགྱུར་བའི་ཚིག་སྨྲ་བ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང་། ཚིག་ཀྱལ་པར་སྨྲ་བ་ཡོངས་སུ་སྤོང་བ་དང་། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་
ཐམས་ཅད་ལ་རིམ་གྱིས་གཞོལ་ཞིང་ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་དོན་མེད་པའི་ཚིག་ཐམས་ཅད་དང་བྲལ་ཏེ། བྱང་ཆུབ་སེམས་དཔའི་སྡེ་སྣོད་དུ་གཏོགས་པའི་ཆོས་ཆེན་པོའི་སྒྲ་མཆོག་དམ་པ་རྣམ་པ་མང་པོས་ཞིང་དེ་ཡོངས་སུ་ཁྱབ་པ་དང་། དཔག་ཏུ་མེད་པའི་སྨོན་ལམ་དང་། ཡེ་ཤེས་དམ་པ་ཕུན་སུམ་ཚོགས་པས་ཆོས་ཀྱི་དོན་རྣམ་པ་སྣ་ཚོགས་འཆད་པ་ལ་མཁས་པའི་སེམས་ཅན་དེ་ལྟ་བུ་དག་ཞིང་དེར་སྐྱེ་བར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་ཀྱལ་པ་ཡོངས་སུ་སྤངས་པའི་འཁོར་ལོ་བདུན་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་པས་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་།
རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་ཐོབ་པ་ཡང་ཇི་སྐད་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ཆགས་སེམས་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་བཀུར་ཞིང་བཙུན་པར་བྱེད་པ་དང་། སེམས་རྣམ་པར་དག་ཅིང་རྙོག་པ་དང་བྲལ་ཏེ། དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ཆགས་སེམས་ཀྱི་དབང་གིས་ལུས་དང་། ངག་དང་། ཡིད་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། འདོད་སེམས་མེད་པ་ལ་སྒྲིབ་པས་བསྒྲིབས་པར་འགྱུར་རོ། །འདོད་སེམས་ཡོངས་སུ་སྤོང་བའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང་། དོགས་པ་མེད་པར་འགྱུར་བ་དང་། ལུས་དང་སེམས་རབ་ཏུ་བདེ་བ་དང་། སེམས་རྣམ་པར་དག་ཅིང་རྙོག་པ་དང་བྲལ་བར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་བ་དང་། ཡིད་དུ་འོང་བའི་བུ་དང་། ཆུང་མ་དང་། འཁོར་གྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་ཏུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་
བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང་། དེ་ལ་བཀུར་སྟི་དང་བཅས་པས་ཤིན་ཏུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་ཞིང་དབང་པོ་ཡོངས་སུ་རྫོགས་པ། ཡན་ལག་དང་ལྡན་པ། གང་ནས་གང་དུ་སྐྱེས་པར་སེམས་རྣམ་པར་དག་ཅིང་རྙོག་པ་མེད་པ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང་། ཆགས་སེམས་ཡོངས་སུ་སྤོང་བ་དང་། མི་དགེ་བའི་ཆོས་ཡོངས་སུ་གཅད་པ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་ཞིང་ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་ལག་མཐིལ་བཞིན་དུ་མཉམ་ལ་རིན་པོ་ཆེ་རྣམ་པ་མང་པོས་ཡོངས་སུ་གང་བ་དང་། རིན་པོ་ཆེའི་ཤིང་རྣམ་པ་སྣ་ཚོགས་དཀྲིགས་པ་དང་། རིན་པོ་ཆེའི་གོས་དང་། རིན་པོ་ཆེའི་རྒྱན་གྱི་ཡོ་བྱད་དང་། རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། གསེར་དང་། དངུལ་དང་། མུ་ཏིག་གི་དྲ་བ་དང་། ཤིང་ལ་སོགས་པས་ཡོངས་སུ་གང་བ་དང་། ཤིན་ཏུ་ཡིད་དུ་འོང་ཞིང་བལྟ་ན་སྡུག་པ། ང་རྒྱལ་ཡོངས་སུ་སྤངས་པ། བྱད་གཟུགས་ཤིན་ཏུ་མཛེས་པ་དང་། དབང་པོ་མ་ཉམས་པ། སེམས་མཉམ་པའི་སེམས་ཅན་དག་ཞིང་དེར་སྐྱེ་བར་འགྱུར་ཏེ། ཆགས་སེམས་མེད་པའི་ཡོན་ཏན་ཕུན་སུམ་ཚོགས་པས་བརྒྱན་པར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་
གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཆགས་སེམས་ཡོངས་སུ་སྤངས་པའི་འཁོར་ལོ་བརྒྱད་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འཐུན་པར་འགྱུར་བ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་། བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་། བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་མི་ངོམས་པ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་དག་ཐོབ་པ་ཡང་ཇི་སྐད་བཤད་པ་བཞིན་ནོ།། །།བམ་པོ་དགུ་པ། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་
དུ་གནོད་སེམས་ཡོངས་སུ་སྤངས་ན། སེམས་ཅན་ཐམས་ཅད་ཀྱིས་བཀུར་ཞིང་བླ་མར་བྱེད་པ་དང་། སེམས་རྣམ་པར་དག་པ་དང་། དྲི་མ་དང་བྲལ་བར་འགྱུར་ཏེ། དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་གནོད་སེམས་ཀྱི་དབང་གིས་ལུས་དང་། ངག་དང་། ཡིད་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། གནོད་སེམས་བྱེད་པ་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་གནོད་སེམས་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང་། དོགས་པར་མི་འགྱུར་བ་དང་། སེམས་རྣམ་པར་དག་པ་དང་། དྲི་མ་དང་བྲལ་བར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང་། ཆུང་མ་དང་། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་ཏུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང་། དེ་ལ་བཀུར་སྟི་དང་བཅས་པས་ཤིན་ཏུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་ཞིང་དབང་པོ་ཡོངས་སུ་རྫོགས་པ་དང་། ཡན་ལག་དང་ལྡན་པ་དང་། གང་ནས་གང་དུ་སྐྱེས་པར་སེམས་རྣམ་པར་དག་ཅིང་དྲི་མ་དང་བྲལ་བ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་
ནམས་ཀྱི་ཞིང་ཡང་དག་པ་དང་ཕྲད་དེ་དེའི་རྗེས་སུ་འཐུན་པར་སློབ་པ་དང་། གནོད་སེམས་ཡོངས་སུ་སྤོང་བ་དང་། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་རིམ་གྱིས་གཞོལ་ཞིང་ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་རྙོག་པ་དང་། སྨེ་བ་དང་། སྤྲིན་དང་། ཁུག་རླངས་དང་། རྡུལ་དང་། དྲི་མ་དང་། མི་སྡུག་པ་དང་། མི་མཛེས་པ་ཐམས་ཅད་དང་བྲལ་ཏེ། རིན་པོ་ཆེ་མང་པོས་ཤིན་ཏུ་བརྒྱན་པ་ཡིད་དུ་འོང་བ་དང་། ང་རྒྱལ་དང་བྲལ་བ། གཟུགས་མཛེས་ཤིང་སྡུག་པ། དབང་པོ་མ་ཉམས་པ། སེམས་རྟག་ཏུ་ཞི་བའི་སེམས་ཅན་དག་ཞིང་དེར་སྐྱེ་སྟེ། བྱམས་པ་དང་། སྙིང་རྗེ་དང་། ཡོན་ཏན་ཕུན་སུམ་ཚོགས་པས་བརྒྱན་པར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཞིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་གནོད་སེམས་ཡོངས་སུ་སྤངས་པའི་འཁོར་ལོ་དགུ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་
གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་སློབ་པ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་། བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་། བསྙེན་བཀུར་བྱེད་པ་དང་མི་འབྲལ་བ་དང་། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་། སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་དག་ཐོབ་པ་ཡང་ཇི་སྐད་བསྟན་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ལོག་པར་ལྟ་བ་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་བཀུར་ཞིང་བླ་མར་བྱེད་པ་དང་། སེམས་རྣམ་པར་དག་ཅིང་ལོག་པར་རྟོག་པ་དང་བྲལ་བར་འགྱུར་ཏེ། དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ལོག་པར་ལྟ་བའི་དབང་གིས་ལུས་དང་། ངག་དང་། ཡིད་ཀྱི་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང་། སེམས་ཅན་གྱི་སྒྲིབ་པ་དང་། ཆོས་ཀྱི་སྒྲིབ་པ་དང་། ཡང་དག་པར་ལྟ་བ་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་ལོག་པར་ལྟ་བ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་བཅོམ་པས་རྣམ་པར་སྨིན་པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང་། དོགས་པ་མེད་པར་འགྱུར་བ་དང་། ལུས་དང་སེམས་རབ་ཏུ་བདེ་བ་དང་། སེམས་རྣམ་པར་དག་ཅིང་
ལོག་པར་ལྟ་བ་དང་བྲལ་བར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང་། ཆུང་མ་དང་། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་ཏུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང་། བཀུར་སྟི་དང་བཅས་པས་ཤིན་ཏུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་ཞིང་དབང་པོ་ཡོངས་སུ་རྫོགས་པ་ཡན་ལག་དང་ལྡན་པ་དང་། གང་ནས་གང་དུ་སྐྱེས་པར་སེམས་རྣམ་པར་དག་ཅིང་ལོག་པར་ལྟ་བ་དང་བྲལ་བ་དང་། བྱད་གཟུགས་བཟང་བ་དང་། ཡིད་གཞུངས་པ་དང་། རབ་ཏུ་བདེ་ཞིང་སྐྱིད་པ་དང་། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་དེའི་རྗེས་སུ་འཐུན་པར་སློབ་པ་དང་། ལོག་པར་ལྟ་བའི་ཆོས་ཡོངས་སུ་སྤོང་བ་དང་། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང་། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང་། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་རིམ་གྱིས་གཞོལ་ཞིང་ཤིན་ཏུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་ཉན་ཐོས་དང་། རང་སངས་རྒྱས་ཀྱི་ཐེག་པ་དང་བྲལ་བ་དང་། ལྷའི་བདུད་ཀྱི་འཁོར་ཐམས་ཅད་དང་བྲལ་བ་དང་། མུ་སྟེགས་ཅན་གྱི་འཁོར་ཐམས་ཅད་དང་བྲལ་བ་དང་། རིན་པོ་ཆེ་རྣམ་པ་སྣ་ཚོགས་ཀྱིས་བརྒྱན་ཅིང་ཤིན་ཏུ་མཛེས་པ་དང་། ཡང་དག་པར་ལྟ་བ་དང་ལྡན་ཞིང་ངོ་མཚར་དང་། བཀྲ་ཤིས་དང་། ཚུལ་ངན་པའི་ལྟ་བ་སྣ་ཚོགས་དང་། རྟག་པར་ལྟ་བ་དང་། ཆད་པར་ལྟ་བ་དང་། བདག་དང་བདག་གིར་ལྟ་བ་ཐམས་ཅད་ཡོངས་སུ་སྤངས་པའི་སེམས་ཅན་དག་ཞིང་དེར་སྐྱེ་
སྟེ། ཤིན་ཏུ་ཚེ་རིང་བ་དང་། ཐེག་པ་ཆེན་པོའི་རོ་གཅིག་ལ་ལོངས་སྤྱོད་པར་འགྱུར་བ་དང་། དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་ཆོས་སྟོན་པ་དང་། ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་། སེམས་ཅན་ཚད་མེད་པ་ལ་ཕན་པ་དང་། བདེ་བའི་དོན་དུ་རོ་གཅིག་པའི་ཆོས་བསྟན་པ་ལ་རྩོད་པ་མེད་པས་ཡོངས་སུ་རྒྱས་པར་བྱེད་ཅིང་བགེགས་དང་བར་ཆད་མེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ལོག་པར་ལྟ་བ་ཡོངས་སུ་སྤངས་པའི་འཁོར་ལོ་བཅུ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་རྣམ་པ་བཅུ་པོ་འདི་དང་ལྡན་པས་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ལ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར་བ་དང་། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང་། རྣོ་བའི་ཤེས་རབ་དང་། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་དང་། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང་། རྟག་ཏུ་དགེ་བའི་བཤེས་གཉེན་དང་ཕྲད་ཅིང་རྗེས་སུ་སློབ་པ་དང་། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་། བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་། བསྙེན་བཀུར་བྱེད་པ་དང་མི་འབྲལ་བ་དང་།
དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང་། བྱང་ཆུབ་ཀྱི་སྤྱོད་པ་དང་། སྨོན་ལམ་དང་། ཕ་རོལ་ཏུ་ཕྱིན་པ་དྲུག་ལ་སེམས་མི་ངོམས་པར་འགྱུར་ཏེ། འབྲས་བུ་གཞན་འཐོབ་པ་ཡང་ཇི་སྐད་བཤད་པ་བཞིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་རྣམ་པ་བཅུ་པོ་དེ་དག་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ཅིའི་ཕྱིར་ཞེ་ན། སྔ་མ་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱང་མི་དགེ་བ་བཅུའི་ལས་ཡོངས་སུ་སྤངས་ནས་ཐམས་ཅད་ཀྱིས་དགེ་བ་བཅུའི་ལས་ཀྱི་ལམ་གྱི་འབྲས་བུ་བསྔགས་ཤིང་བསྟོད་དེ། སེམས་ཅན་ཐམས་ཅད་ལ་བདེ་བ་དང་ཕན་པའི་དོན་དང་། བྱང་ཆུབ་ཀྱི་ལམ་སྐྱེ་ཞིང་འཕེལ་བར་བྱ་བ་དང་། སེམས་ཅན་ཐམས་ཅད་ཀྱི་ལས་དང་ཉོན་མོངས་པའི་སྡུག་བསྔལ་ལྷག་མ་མ་ལུས་པར་བསལ་བར་བྱ་བ་དང་། ངན་སོང་གསུམ་བསྐམ་པར་བྱ་བ་དང་། དཀོན་མཆོག་གསུམ་གྱི་གདུང་བསབ་པར་བྱ་བ་དང་། ཁམས་གསུམ་གྱི་སྲིད་པ་ཡོངས་སུ་གཅད་པར་བྱ་བ་དང་། ཕུང་པོ་དང་། ཁམས་དང་། སྐྱེ་མཆེད་གཅད་པར་བྱ་བ་དང་། ཐམས་ཅད་མྱུར་དུ་འཇིགས་པ་མེད་པའི་མྱ་ངན་ལས་འདའ་བའི་གྲོང་ཁྱེར་དུ་གཟུད་པའི་ཕྱིར་ཇི་སྐད་བཤད་པ་བཞིན་དུ་མི་དགེ་བ་བཅུའི་ལས་ཀྱི་འབྲས་བུ་ཡོངས་སུ་སྤོང་ངོ་། །དེ་བས་ན་རིགས་ཀྱི་བུ་གལ་ཏེ་ཡང་དག་པ་ཇི་ལྟ་བ་བཞིན་དུ་དགེ་བ་བཅུའི་ལས་ཀྱི་ལམ་འདི་མ་བསྒྲུབས་པར་མངོན་པར་འཚང་རྒྱ་བའམ། ཆུང་ངུ་ན་ཡང་དག་པ་ཇི་ལྟ་བ་བཞིན་དུ་དགེ་བ་བཅུའི་ལས་ཀྱི་ལམ་འགའ་ཙམ་ཡང་མི་སྲུང་བར་ང་ནི་ཐེག་པ་ཆེན་པོ་ཡང་དག་པར་སྤྱོད་པའོ་ཞེའམ། ང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པའོ་ཞེས་ཟེར་ན། གང་ཟག་དེ་ནི་ཤིན་ཏུ་བརྫུན་པར་སྨྲ་བ་སྟེ། ཕྱོགས་བཅུའི་སངས་རྒྱས་བཅོམ་ལྡན་འདས་ཀྱི་སྤྱན་སྔར་འཇིག་རྟེན་སླུ་བ་དང་། འཛེམ་པ་དང་། ངོ་ཚ་བ་མེད་པ་ཡང་སྟོང་པར་སྨྲ་ཞིང་ཆད་པར་ལྟ་བ། གླེན་པ་མི་ཤེས་པ་སླུ་བ་ཅན་ཡིན་ཏེ། དེ་ཚེ་འཕོས་
ནས་ངན་སོང་དུ་ལྟུང་བར་ཤེས་པར་བྱའོ། །རིགས་ཀྱི་བུ་གང་ཚིག་ཏུ་བརྗོད་པ་ཙམ་འམ་མཉན་པ་ཙམ་གྱིས་ཆོག་སྟེ། དགེ་བ་བཅུའི་ལས་ཀྱི་ལམ་བསྒོམས་པའམ། ནན་ཏན་བྱ་མི་དགོས་པར་བྱང་ཆུབ་དང་། མྱ་ངན་ལས་འདས་པར་ཐོབ་ཏུ་ཟིན་ན་ནི་བསྐལ་པ་གཅིག་ལ་ཡུད་ཙམ་ཐང་ཅིག་གིས་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ཀྱི་སའི་ཁམས་ཀྱི་རྡུལ་ཕྲ་མོ་སྙེད་ཀྱི་སེམས་ཅན་ཐམས་ཅད་བྱང་ཆུབ་མངོན་པར་འཚང་རྒྱ་སྟེ། མྱ་ངན་ལས་འདའ་བར་འགྱུར་བ་ཞིག་ན་དེ་ནི་དེ་ལྟ་བུའི་གནས་མེད་དོ། །དེ་ཅིའི་ཕྱིར་ཞེ་ན། དགེ་བ་བཅུའི་ལས་ཀྱི་ལམ་ནི་ཐེག་པ་ཆེན་པོའི་རྩ་བ་ཡིན་ཏེ། བྱང་ཆུབ་ཀྱི་རྒྱུ་དང་མྱ་ངན་ལས་འདའ་བའི་ཐེམ་སྐས་ལྟ་བུའོ། །རིགས་ཀྱི་བུ་གལ་ཏེ་སེམས་བསྐྱེད་པ་ཙམ་འམ་སྨོན་ལམ་བཏབ་པ་ཙམ་གྱིས་ཆོག་སྟེ། དགེ་བ་བཅུའི་ལས་ཀྱི་ལམ་གོམས་པར་ནན་ཏན་བྱ་མི་དགོས་པར་བྱང་ཆུབ་དང་། ཡོངས་སུ་མྱ་ངན་ལས་འདའ་བ་འཐོབ་ཏུ་ཟིན་ན་ནི་བསྐལ་པ་གཅིག་ལ་ཡུད་ཙམ་ཐང་ཅིག་གིས་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་སའི་ཁམས་ཀྱི་རྡུལ་ཕྲ་མོ་སྙེད་ཀྱི་སེམས་ཅན་དག་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་ཞིང་མྱ་ངན་ལས་འདའ་བར་འགྱུར་བ་ཞིག་ན་དེ་ནི་དེ་ལྟ་བུའི་གནས་མེད་དོ། །དེ་ཅིའི་ཕྱིར་ཞེ་ན། དགེ་བ་བཅུའི་ལས་ཀྱི་ལམ་ནི་འཇིག་རྟེན་དང་འཇིག་རྟེན་ལས་འདའ་བའི་འབྲས་བུའི་ཁྱད་པར་དང་ཡོན་ཏན་གྱི་རྒྱུར་འགྱུར་རོ། །རིགས་ཀྱི་བུ་གལ་ཏེ་དགེ་བ་བཅུའི་ལས་ཀྱི་ལམ་ལ་ནན་ཏན་དུ་མ་བྱས་ན་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཕྲ་མོ་སྙེད་ཀྱི་བསྐལ་པར་བདག་ནི་ཐེག་པ་ཆེན་པོ་པའོ་ཞེས་ཟེར་ཏེ། འཆད་དམ། ཉན་ཏམ། སེམས་བསྐྱེད་དམ། སྨོན་ལམ་བཏབ་ཀྱང་བྱང་ཆུབ་དང་། མྱ་ངན་ལས་འདའ་བ་འཐོབ་པར་མི་འགྱུར་ལ་གཞན་ཡང་འཁོར་བའི་སྡུག་བསྔལ་ལས་འདོན་མི་ནུས་སོ། །རིགས་ཀྱི་བུ་དགེ་བ་བཅུའི་ལས་ཀྱི་ལམ་ལ་ནན་ཏན་བྱས་པས་འཇིག་རྟེན་ན་རྒྱལ་རིགས་དང་། བྲམ་ཟེ་ལ་སོགས་པ་རིགས་ཆེན་པོ་དང་། རྒྱལ་ཆེན་རིས་བཞིའི་ལྷ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་བར་དུ་ཡོད་པ་དང་། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཡང་ཡོད་པར་འགྱུར་ཏེ། དེ་དག་ཀུན་ཀྱང་དགེ་བ་བཅུའི་ལས་ཀྱི་ལམ་ལ་ཤིན་ཏུ་ནན་ཏན་བྱེད་པའི་ཁྱད་པར་དང་བྱེ་བྲག་ལས་གྱུར་ཏོ། །དེ་བས་ན་རིགས་ཀྱི་བུ་གང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་ན་དགེ་བ་བཅུའི་ལས་ཀྱི་ལམ་ལ་ནན་ཏན་གྱི་རྒྱན་གྱིས་བརྒྱན་ཏེ། མི་དགེ་བ་བཅུའི་སྡོམ་པ་ལ་མི་གནས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །གང་མྱུར་དུ་ཐེག་པ་ཆེན་པོའི་སྤྱོད་ཡུལ་དུ་ཆུད་པར་འདོད་དམ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་དམ། མྱུར་དུ་དགེ་བའི་ཆོས་ཐམས་ཅད་ཡོངས་སུ་རྫོགས་པར་འདོད་ན་སྔར་དགེ་བ་བཅུའི་ལས་ཀྱི་ལམ་ཤིན་ཏུ་བསྲུང་བར་བྱའོ། །དེ་ཅིའི་ཕྱིར་ཞེ་ན། དགེ་བ་བཅུའི་ལས་ཀྱི་ལམ་གྱིས་ནི་དགེ་བའི་ཆོས་ཐམས་ཅད་དང་། ཡོན་ཏན་རྣམ་པར་གཞག་པའི་གཞི་དང་། འཇིག་རྟེན་དང་། འཇིག་རྟེན་ལས་འདའ་བའི་འབྲས་བུའི་མཆོག་ཐོབ་པར་བྱེད་པའི་རྒྱུ་ཡིན་ནོ། །དེ་བས་ན་དགེ་བ་བཅུའི་ལས་ཀྱི་ལམ་ལ་ཤིན་ཏུ་ནན་ཏན་བྱའོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་གསུངས་པ། སྲིད་པའི་སྡུག་བསྔལ་ཀུན་གཅོད་ཅིང་། །བྱང་ཆུབ་ཆེན་པོ་འཐོབ་འདོད་པ། །དགེ་བཅུའི་འཁོར་ལོའི་ནན་ཏན་ལ། །ལེ་ལོ་མ་བྱེད་བརྩོན་པར་གྱིས། །ཐེག་པ་གསུམ་གྱི་དམ་ཆོས་དང་། །ཐེག་པ་རྣམ་གསུམ་གང་ཟག་དང་། །རབ་ཏུ་བྱུང་བ་ཐམས་ཅད་ལ། །འཁྲུལ་པ་མེད་པར་འཐོབ་པར་འགྱུར། །ཐེག་ཆེན་སྤྱོད་ལ་དད་མོས་ཤིང་། །ཐམས་ཅད་འཁོར་གྱི་དབུགས་འབྱིན་པའི། །ཆོས་མཆོག་རྟོགས་ནས་ཞིང་དག་དེར། །བྱང་ཆུབ་ཆེན་པོ་མྱུར་དུ་འཐོབ། །གལ་ཏེ་སྲོག་གཅོད་ཡོངས་སྤངས་ན། །ཀུན་གྱིས་བཀུར་ཞིང་བླ་མར་བྱེད། །རྟག་ཏུ་ནད་མེད་ཚེ་ཡང་རིང་། །བདེ་ཞིང་སྐྱིད་ལ་གནོད་པ་མེད། །སྐྱེ་བའི་གནས་ནི་ཐམས་ཅད་དུ། །སངས་རྒྱས་སྤྱོད་ཡུལ་ལམ་ལ་མོས། །སངས་རྒྱས་ཆོས་དང་དགེ་འདུན་མཐོང་། །མྱུར་དུ་བླ་མེད་བྱང་ཆུབ་འཐོབ། །མ་བྱིན་ལེན་པ་ཡོངས་སྤངས་ན། །མཁས་
པས་བཀུར་ཞིང་བླ་མར་བྱེད། །འདོད་ཆགས་སྐྱེ་བའི་ལམ་ཀུན་ཞི། །འདོད་ཆགས་མེད་པ་སྐྱེ་བར་འགྱུར། །སྐྱེ་བ་ཀུན་ཏུ་ལོངས་སྤྱོད་ལྡན། །སྦྱིན་བདག་ཆེན་པོར་དེ་འགྱུར་ཏེ། །རིན་ཆེན་མང་པོས་བརྒྱན་པ་དང་། །ཡིད་འོང་སངས་རྒྱས་ཞིང་ཡང་འཐོབ། །འདོད་པས་ལོག་གཡེམ་ཡོངས་སྤངས་ན། །ཉོན་མོངས་དྲི་མ་ཞི་བར་འགྱུར། །འདོད་ཆགས་སྲིད་པའི་མཚོ་ཡང་སྐེམས། །རྣམ་དག་སངས་རྒྱས་ཞིང་མྱུར་འཐོབ། །སེམས་ཅན་རྣམ་པ་མང་པོ་ཡང་། །འདོད་པའི་འདམ་ལས་འབྱིན་པར་འགྱུར། །ཐེག་ཆེན་ལ་ནི་རབ་བཀོད་ནས། །ཚངས་པའི་སྤྱད་པ་སྤྱོད་དུ་བཙུད། །བརྫུན་དུ་སྨྲ་བ་ཡོངས་སྤངས་ན། །འཕགས་པའི་དབང་དང་ཡེ་ཤེས་འཐོབ། །རྟག་ཏུ་བདེན་ལ་སྨྲ་བར་དགའ། །བརྫུན་དུ་འགྱུར་བའི་སྡུག་བསྔལ་འཇིལ། །ཚིག་གཅིག་ཚད་མར་བཙུགས་པས་ན། །སངས་རྒྱས་ཆོས་དང་དགེ་འདུན་མཐོང་། །བརྫུན་མི་སྨྲ་བ་བསྒོམས་པས་ན། །བྱང་ཆུབ་ཆེན་པོ་མྱུར་དུ་འཐོབ། །ཕྲ་མའི་ཚིག་སྨྲ་ཡོངས་སྤངས་ན། །དགེ་བའི་ཆོས་ཀྱི་སྣོད་དུ་འགྱུར། །སངས་རྒྱས་ཆོས་དང་དགེ་འདུན་མཐོང་། །ཆད་པར་ལྟ་བར་ཡོང་མི་འགྱུར། །འཕགས་པའི་ཆགས་མེད་དགའ་བ་དང་། །རིན་ཆེན་གཏེར་གྱི་གཟུངས་འཐོབ་ཅིང་། །ཟབ་མོ་ཆོས་ཀྱི་རྒྱ་མཚོར་རིག །མྱུར་དུ་བླ་མེད་བྱང་ཆུབ་འཐོབ། །གལ་ཏེ་ཞེ་གཅོད་ཚིག་སྤངས་ཏེ། །འཇམ་ཞིང་མཉེན་པའི་ཚིག་སྨྲས་ན། །སེམས་ཅན་ཀུན་གྱིས་བཀུར་བར་འགྱུར། །སྔ་མའི་མི་དགེ་ལས་ཀྱང་ཞི། །འཁོར་རྣམས་རྟག་ཏུ་དགའ་བ་དང་། །བྱང་ཆུབ་སེམས་དཔའི་སྟོན་པར་འགྱུར། །སངས་རྒྱས་མང་པོའི་སྤྱོད་ཡུལ་ཤེས། །ས་བཅུ་ལས་ཀྱང་འདའ་བར་འགྱུར། །ཀྱལ་པར་སྨྲ་བ་ཡོངས་སྤངས་ན། །མཁས་པས་བཀུར་ཞིང་བླ་མར་བྱེད། །གཞན་ལ་ཚིག་ཏུ་སྨྲ་བ་ཀུན། །ཡོན་ཏན་རྣམ་ལྔ་འཐོབ་པར་འགྱུར། །རྟག་ཏུ་འཕགས་པའི་ཚིག་ཉན་ཅིང་། །འཕགས་པའི་ལམ་ཚོལ་སྤྲོ་བར་འགྱུར། །སངས་རྒྱས་རྒྱ་མཚོ་ཡོངས་རྫོགས་ཤིང་། །ཐམས་ཅད་མཁྱེན་པ་མྱུར་དུ་འཐོབ། །གལ་ཏེ་ཆགས་སེམས་ཡོངས་སྤངས་ཏེ། །འཕགས་པ་རྣམས་
ལ་མི་སྨོད་ཅིང་། །ངུར་སྨྲིག་གྱོན་ལ་མཆོད་པར་བྱེད། །ཐེག་པ་གསུམ་གྱི་བྱང་ཆུབ་སྒྲུབ། །རྟག་ཏུ་རྣམ་དག་ཞིང་དུ་སྐྱེ། །སྟོན་པའི་གནས་སུ་གནས་པར་འགྱུར། །བླ་མེད་ཐེག་པ་ལ་ཞོན་ཏེ། །རྒྱལ་བའི་ཡེ་ཤེས་མྱུར་དུ་འཐོབ། །གལ་ཏེ་གནོད་སེམས་ཡོངས་སྤངས་ཏེ། །གཅིག་ཏུ་བྱམས་པའི་སེམས་བསྒོམས་ན། །མཉམ་པར་གཞག་པའང་མྱུར་དུ་འཐོབ། །འཕགས་པའི་སྤྱོད་ཡུལ་མོས་པར་འགྱུར། །རྣམ་དག་སངས་རྒྱས་ཞིང་དུ་སྐྱེ། །ཉེས་པའི་སྐྱོན་རྣམས་ཀུན་དང་བྲལ། །དེ་ལ་གནས་ན་བྱང་ཆུབ་འཐོབ། །གནོད་སེམས་ཐམས་ཅད་སྤང་བར་བྱ། །ངན་པར་ལྟ་བ་ཡོངས་སྤངས་ཏེ། །རྣམ་དག་དད་པའི་སེམས་བསྒོམས་ན། །ཐེག་གསུམ་སྟོན་ལ་མོས་བྱེད་ཅིང་། །སངས་རྒྱས་ཀུན་ལ་མཆོད་པ་བྱེད། །ངན་སོང་གསུམ་ལས་ཡོངས་ཐར་ཏེ། །འཕགས་པའི་དགེ་འདུན་རྣམས་དང་ཕྲད། །བྱང་ཆུབ་སེམས་དཔའི་ཡོན་ཏན་ལྡན། །ཡེ་ཤེས་མཆོག་ཀྱང་འཐོབ་པར་འགྱུར། །དགེ་བ་བཅུ་ཡི་ལས་ལམ་གྱིས། །བྱང་ཆུབ་མཆོག་ཐོབ་འགྱུར་ཞེས་གསུངས། །སྙོམས་པར་འཇུག་དང་གཟུངས་རྣམས་དང་། །ས་དང་བཟོད་པ་སྐྱེ་བར་འགྱུར། །བདག་ཉིད་ཆེ་བའི་འཁོར་ལོ་འདིས། །ངན་སོང་ཐམས་ཅད་རབ་བཅོམ་ནས། །སྡིག་པའི་སྒྲིབ་པ་ཀུན་ཀྱང་ཆོམས། །མྱུར་དུ་བྱང་ཆུབ་ཆེན་པོ་ཐོབ། །འཕགས་པ་ཤིན་ཏུ་རྒྱས་པ་ཆེན་པོ་སའི་སྙིང་པོ་འཁོར་ལོ་བཅུ་པ་ཞེས་བྱ་བ་ལས་དགེ་བ་བཅུའི་ལས་ཀྱི་ལམ་ཞེས་བྱ་བའི་ལེའུ་སྟེ་ལྔ་པའོ།། །།