དྲུག་པ། བསོད་ནམས་ཀྱི་ཞིང་གི་མཚན་ཉིད་ཀྱི་ལེའུ།
རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཟང་ཟིང་གི་སྦྱིན་པའི་གོ་ཆ་ཆེན་པོའི་འཁོར་ལོ་རྣམ་པ་བཅུ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་རང་སངས་རྒྱས་ཐམས་ཅད་ལས་ཤིན་ཏུ་འདས་ནས་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྲུང་བ་དང་། བསྙེན་བཀུར་
བྱེད་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། རྣམ་པ་སྣ་ཚོགས་ཀྱི་ཟས་དང་། སྐོམ་དང་། གོས་དང་། རིན་པོ་ཆེའི་རྒྱན་དང་། བལ་གླང་དང་། རྟ་དང་། ཤིང་རྟ་དང་། ལུས་ཀྱི་ཡན་ལག་དང་། རྐང་པ་དང་། ལག་པ་དང་། རྣ་བ་དང་། སྣ་དང་། མགོ་དང་། མིག་དང་། རྐང་དང་། ཀླད་པ་དང་། པགས་པ་དང་། རུས་པ་དང་། ཤ་དང་། ཁྲག་དང་། ཡུལ་དང་། སྲིད་དང་། བུ་དང་། ཆུང་མ་དང་། བྲན་ཕོ་དང་། བྲན་མོ་དང་། ཁང་ཁྱིམ་དང་། ཞིང་འབྲོག་ལ་སོགས་པ་དེ་དག་ཐམས་ཅད་སྦྱིན་པ་དེ་རེ་རེ་བྱེད་པ་ན་ལུས་དང་སྲོག་ལ་མི་ལྟ་ཞིང་བདག་གཅིག་པུ་འཇིག་རྟེན་དང་འཇིག་རྟེན་ལས་འདས་པའི་བདེ་བ་འདོད་པའི་ཕྱིར་སེམས་བསྐྱེད་དེ་སྦྱིན་པ་བྱེད་པ་མ་ཡིན་གྱི། སེམས་ཅན་ཐམས་ཅད་ལ་བྱམས་པ་ཆེན་པོ་དང་། སྙིང་རྗེ་ཆེན་པོའི་མྱུ་གུ་བསྐྱེད་པའི་ཕྱིར་སྦྱིན་པ་སྦྱིན་པའི་སེམས་བསྐྱེད་དོ། །ཐབས་མཁས་པ་དང་ཤེས་རབ་མཆོག་བསྐྱེད་པའི་ཕྱིར་སྦྱིན་པ་སྦྱིན་པའི་སེམས་བསྐྱེད་དོ། །སེམས་ཅན་ཐམས་ཅད་ལ་བྱམས་པ་ཆེན་པོ་ཕན་པ་དང་། བདེ་བའི་དོན་གྱི་ཕྱིར་སྦྱིན་པ་སྦྱིན་པའི་སེམས་བསྐྱེད་དོ། །སེམས་ཅན་ཐམས་ཅད་ཀྱི་སྡུག་བསྔལ་བསལ་བའི་ཕྱིར་སྦྱིན་པ་སྦྱིན་པའི་སེམས་བསྐྱེད་དོ། །གཞན་ལས་སྤག་གོ་སྙམ་པ་མེད་པའི་སེམས་དང་། བརླང་བ་མེད་པའི་སེམས་དང་། ཕྲག་དོག་མེད་པའི་སེམས་དང་། སེར་སྣ་དང་ཞུམ་པ་མེད་པའི་སེམས་ཀྱིས་སྦྱིན་པ་སྦྱིན་ནོ། །གང་སྦྱིན་པའི་དངོས་པོ་ཆེ་ཡང་རུང་། ཆུང་ཡང་རུང་། ཆུང་ངུ་ན་ཟན་ཆངས་གཅིག་ཙམ་གྱི་སྦྱིན་པ་བྱས་ན་ཡང་རྣམ་པར་སྨིན་པའི་འབྲས་བུ་ལ་མི་རེ་བར་སྦྱིན་པ་སྦྱིན་པའི་སེམས་བསྐྱེད་དོ། །ཉན་ཐོས་ཀྱི་ཐེག་པའི་འབྲས་བུ་ལ་མི་རེ་བར་སྦྱིན་པ་སྦྱིན་པའི་སེམས་བསྐྱེད་དོ། །རང་སངས་རྒྱས་ཀྱི་ཐེག་པའི་འབྲས་བུ་ལ་མི་རེ་བར་སྦྱིན་པ་སྦྱིན་པའི་སེམས་བསྐྱེད་དོ། །གང་སྦྱིན་པའི་དངོས་པོ་དེ་ཆེ་ཡང་རུང་། ཆུང་ཡང་རུང་། ཆུང་ངུ་ན་ཟན་ཆངས་གཅིག་ཙམ་གྱི་སྦྱིན་པ་བྱས་ན་ཡང་རྣམ་པ་ཐམས་ཅད་མཁྱེན་པའི་ཡེ་ཤེས་སུ་བསྔོ་ཞིང་སྦྱིན་པ་སྦྱིན་པའི་སེམས་བསྐྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཟང་ཟིང་གི་སྦྱིན་པའི་གོ་ཆ་ཆེན་པོའི་འཁོར་ལོ་རྣམ་པ་བཅུ་པོ་དེ་
དང་ལྡན་ན། ཐོག་མ་སེམས་བསྐྱེད་པ་ན་འདོད་པ་རྣམ་པ་ལྔ་ཡོངས་སུ་བསལ་བའི་ཕྱིར་ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཆེན་པོའི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་ཅིང་བསྙེན་བཀུར་བྱ་བ་དང་། ཡོངས་སུ་བསྲུང་བར་འགྱུར་རོ། །དེ་ཅིའི་ཕྱིར་ཞེ་ན། ཉན་ཐོས་དང་། རང་སངས་རྒྱས་ཀྱིས་སྦྱིན་པ་སྦྱིན་པའི་སེམས་བསྐྱེད་པ་ནི་བྱམས་པ་དང་། སྙིང་རྗེ་ཆེན་པོའི་སེམས་མེད་ཀྱི་བདག་གི་དབུལ་བ་དེ་སྤོང་བ་དང་། བདག་སྡུག་བསྔལ་ལས་ཐར་པ་དང་། བདག་བདེ་བ་ཐོབ་པར་བྱ་བ་དང་། བདག་མྱ་ངན་ལས་འདའ་བར་བྱ་བའི་ཕྱིར་སྦྱིན་པ་སྦྱིན་པ་བྱེད་དེ། སེམས་ཅན་ཐམས་ཅད་ཀྱི་ཕྱིར་སྦྱིན་པ་བྱེད་པ་ནི་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་སྦྱིན་ན་ནི་བྱམས་པ་དང་། སྙིང་རྗེ་ཆེན་པོའི་སེམས་ཀྱིས་སེམས་ཅན་ཐམས་ཅད་ཀྱི་དབུལ་ཕོངས་པ་སྤོང་བ་དང་། སེམས་ཅན་ཐམས་ཅད་སྡུག་བསྔལ་ལས་གདོན་པ་དང་། སེམས་ཅན་ཐམས་ཅད་བདེ་བ་ཐོབ་པར་བྱེད་པ་དང་། སེམས་ཅན་ཐམས་ཅད་མྱ་ངན་ལས་བཟླ་བའི་ཕྱིར་སྦྱིན་པ་བྱེད་ཀྱི། བདག་འབའ་ཞིག་གི་ཕྱིར་སྦྱིན་པ་སྤྱོད་པ་མ་ཡིན་ནོ། །དེ་ལྟ་བས་ན་ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྙེན་བཀུར་བྱེད་ཅིང་ཡོངས་སུ་བསྲུང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་ཟང་ཟིང་གི་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་ན་འདོད་པ་རྣམ་ལྔའི་མཆོག་ལ་སེམས་མི་ཆགས་ཏེ། བདག་ཉིད་དབང་བ་བདེ་བའི་ཡོ་བྱད་ཐམས་ཅད་སེམས་ཅན་ཀུན་ལ་སྦྱིན་པ་བྱེད་དེ། སེམས་ཅན་ཐམས་ཅད་ཡོངས་སུ་སྡུད་པའི་སེམས་དང་། བདག་གི་སྡུག་བསྔལ་ཐམས་ཅད་ལ་ཇི་མི་སྙམ་པའི་བཟོད་པའི་སེམས་དང་། སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱ་བའི་སེམས་དང་། སེམས་ཅན་ཐམས་ཅད་ལ་
བདེ་བ་སྦྱིན་པའི་སེམས་དང་། སེམས་ཅན་ཐམས་ཅད་མྱ་ངན་ལས་བཟླ་བའི་སེམས་ལ་གནས་ཏེ་སྦྱིན་པ་བྱེད་དོ། །དེ་བས་ན་ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ། ཉན་ཐོས་དང་རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྙེན་བཀུར་དང་། སྲུང་བ་བྱེད་པར་འགྱུར་རོ། །རིགས་ཀྱི་བུ་གལ་ཏེ་འདོད་པ་ལྔ་ལ་སེམས་མི་ཆགས་ཤིང་བྱམས་པ་དང་། སྙིང་རྗེ་ཆེན་པོས་སྦྱིན་པ་བྱེད་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་ཞེས་བྱའོ། །གལ་ཏེ་འཇིག་རྟེན་གྱི་འདོད་པ་རྣམ་ལྔ་ཡང་མ་སྤངས་ལ་བྱམས་པ་དང་། སྙིང་རྗེ་ཆེན་པོ་ཡང་མེད་པར་སྦྱིན་པ་བྱེད་ན་སྦྱིན་པའི་དངོས་པོ་ཚད་མེད་གྲངས་མེད་དཔག་ཏུ་མེད་པ་བཏང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་མི་བྱ་སྟེ། ཉན་ཐོས་དང་། རང་སངས་རྒྱས་ཀྱི་བསོད་ནམས་ཀྱི་ཞིང་ཡང་དག་པ་ཡང་མ་ཡིན་པས་སྦྱིན་པ་འདི་ནི་འཕགས་པ་རྣམས་ཀྱི་ཕྱག་རྒྱས་བཏབ་པ་མ་ཡིན་ནོ། །དེ་བས་ན་འཇིག་རྟེན་གྱི་འདོད་པ་ལྔ་སྤངས་ཏེ། བྱམས་པ་དང་། སྙིང་རྗེ་ཆེན་པོ་དང་ལྡན་པས་སྦྱིན་པ་བྱའོ། །གལ་ཏེ་འཇིག་རྟེན་གྱི་འདོད་པ་ལྔ་ཡང་མ་སྤངས་ལ་བྱམས་པ་དང་། སྙིང་རྗེ་ཆེན་པོ་ཡང་མེད་པར་སྦྱིན་པ་བྱེད་ན་བྱང་ཆུབ་སེམས་དཔའ་ཞེས་ཀྱང་མི་བྱ་ལ་བསོད་ནམས་ཀྱི་ཞིང་ཡང་དག་པ་ཡང་མ་ཡིན་ནོ། །རིགས་ཀྱི་བུ་འདོད་པ་རྣམ་པ་ལྔ་ལ་ཆགས་པས་སྦྱིན་པ་བྱེད་ན་བདག་ཉིད་ཀྱི་ལུས་ཀྱི་སྡུག་བསྔལ་གྱི་ཆ་ཆུང་ཟད་ཀྱང་ཞི་བར་མི་འགྱུར་ན་སེམས་ཅན་ཐམས་ཅད་ཀྱི་སྡུག་བསྔལ་ཚད་མེད་པ་བསལ་བ་ལྟ་ཅི་སྨོས། དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཟང་ཟིང་སྦྱིན་པའི་འཁོར་ལོ་ལྡན་པ། །མཁས་པ་བསམ་པ་དག་པའི་མོས་པས། །འདོད་པ་རྣམ་ལྔ་དག་ནི་སྤངས་ཏེ། །སེམས་ཅན་ཀུན་ལ་ཕན་དང་བདེ་བྱེད། །སེམས་ཅན་ཀུན་ལ་བདེ་བའི་ཕྱིར་གྱི། །རྣམ་སྨིན་འབྲས་བུ་རེ་ཕྱིར་མ་ཡིན། །སྦྱིན་པའི་དངོས་པོ་བྱིན་པ་ཆུང་ཡང་། །ཡང་དག་བསོད་ནམས་
ཞིང་དུ་དེ་འགྱུར། །སྦྱིན་པའི་དངོས་པོ་མང་དུ་བྱས་ཀྱང་། །འདོད་པ་རྣམ་ལྔ་དག་ལ་གནས་ན། །འཕགས་པ་དག་གི་ཕྱག་རྒྱས་མ་བཏབ། །མ་ངེས་པ་ཡི་ཚོགས་ལ་གནས་འགྱུར། །སྦྱིན་པའི་དངོས་པོ་བྱིན་པ་ཆུང་ཡང་། །འདོད་པ་ལྔ་ལ་མི་གནས་པ་ནི། །ཉན་ཐོས་དག་དང་རང་རྒྱལ་བ་ཡི། །ཡང་དག་བསོད་ནམས་ཞིང་དུ་དེ་འགྱུར། །དེ་བས་འདོད་པ་རྣམ་ལྔ་སྤངས་ལ། །རྟག་ཏུ་རྣམ་དག་སྦྱིན་པ་བྱེད་ཅིང་། །སེམས་ཅན་ཀུན་ལ་བདེ་བ་བྱས་ན། །ཡང་དག་བསོད་ནམས་ཞིང་དུ་དེ་འགྱུར། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཀྱི་སྦྱིན་པའི་གོ་ཆ་ཆེན་པོའི་འཁོར་ལོ་རྣམ་པ་བཅུ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་ལྔ་ཡོངས་སུ་བསལ་བའི་ཕྱིར་མྱུར་དུ་ཉི་མའི་སྒྲོན་མའི་འོད་ཅེས་བྱ་བའི་ཏིང་ངེ་འཛིན་ཐོབ་ཅིང་ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཆེན་པོའི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྲུང་བ་དང་། བསྙེན་བཀུར་བྱ་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱིས་བསྟན་པ་དམ་པའི་ཆོས་ཉན་ཐོས་ཀྱི་ཐེག་པ་དང་ལྡན་པའི་དམ་པའི་ཆོས་དང་། རང་སངས་རྒྱས་ཀྱི་ཐེག་པ་དང་ལྡན་པའི་དམ་པའི་ཆོས་དང་། ཐེག་པ་ཆེན་པོ་དང་ལྡན་པའི་དམ་པའི་ཆོས་དང་། འཇིག་རྟེན་གྱི་ཆོས་དང་། འཇིག་རྟེན་ལས་འདས་པའི་ཆོས་དང་། ཟག་པ་དང་བཅས་པའི་ཆོས་དང་། ཟག་པ་ཟད་པའི་ཆོས་དང་། འདུས་བྱས་ཀྱི་ཆོས་དང་། འདུས་མ་བྱས་ཀྱི་ཆོས་དང་། གཉིས་སུ་མེད་པའི་ཆོས་རྣམས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་རྣམ་པ་བཅུ་པོ་འདི་ལ་དད་ཅིང་གུས་པར་བྱེད་པ་དང་། ཇི་སྐད་ཐོས་པ་རྣམས་ཅི་ནུས་སུ་གཟུངས་སུ་འཛིན་ཅིང་ཡིད་ལ་བྱེད་དོ། །རབ་ཏུ་རྟོག་གོ །མཐར་ཁོང་དུ་ཆུད་པར་བྱེད་ཅིང་གཞན་དག་ལ་ཡང་ཅི་རིགས་པར་སྟོན་པར་བྱེད་དོ། །ནམ་ཆོས་སྟོན་པའི་ཚེ་ན་ཕྲག་དོག་མེད་པའི་སེམས་
དང་། སེར་སྣ་མེད་པའི་སེམས་དང་། ང་རྒྱལ་མེད་པའི་སེམས་དང་། རྙེད་པར་མི་རེ་བའི་སེམས་དང་། གཞན་མི་སྨོད་པའི་སེམས་དང་། བདག་མི་སྟོད་པའི་སེམས་དང་། བསྟི་སྟང་དང་བཅས་པའི་སེམས་དང་། ཕན་པའི་སེམས་དང་། བྱམས་པ་ཆེན་པོའི་སེམས་དང་། སྙིང་རྗེ་ཆེན་པོའི་སེམས་སུ་བྱའོ། །ཉན་ཐོས་ཀྱི་ཐེག་པ་ཅན་གྱི་གང་ཟག་ལ་ནི་ཉན་ཐོས་ཀྱི་ཆོས་སྟོན་ཅིང་འཆད་ཀྱི། དེ་ལ་རང་སངས་རྒྱས་ཀྱི་ཆོས་སམ། ཐེག་པ་ཆེན་པོའི་ཆོས་ཀྱིས་མ་ཡིན་པ་དང་། རང་སངས་རྒྱས་ཀྱི་ཐེག་པ་ཅན་གྱི་གང་ཟག་ལ་ནི་རང་སངས་རྒྱས་ཀྱི་ཐེག་པའི་ཆོས་སྟོན་གྱི། ཉན་ཐོས་ཀྱི་ཐེག་པའི་ཆོས་སམ། ཐེག་པ་ཆེན་པོའི་ཆོས་ཀྱིས་མ་ཡིན་པ་དང་། ཐེག་པ་ཆེན་པོའི་གང་ཟག་ལ་ནི་ཐེག་པ་ཆེན་པོའི་ཆོས་སྟོན་གྱི། ཉན་ཐོས་དང་། རང་སངས་རྒྱས་ཀྱི་ཐེག་པ་པའི་ཆོས་ཀྱིས་མ་ཡིན་པ་དང་། སེམས་ཅན་གྱི་དབང་པོ་དང་། སྣོད་ཇི་ལྟ་བ་བཞིན་དུ་དམ་པའི་ཆོས་སྟོན་གྱི། དབང་པོ་དང་སྣོད་དུ་མ་གྱུར་པ་ལ་ཆོས་མི་སྟོན་ཏོ། །གང་ཐེག་པ་ཆེན་པོའི་སེམས་ཅན་ལ་རང་སངས་རྒྱས་ཀྱི་ཐེག་པ་སྤྱོད་ཅིག་པར་རམ། ཉན་ཐོས་ཀྱི་ཐེག་པ་སྤྱོད་ཅིག་པར་མི་སྐུལ་ལོ། །རང་སངས་རྒྱས་ཀྱི་ཐེག་པ་ཅན་གྱི་སེམས་ཅན་ལ་སྐབས་ཁ་ཅིག་ཏུ་ཐེག་པ་ཆེན་པོའི་སྤྱོད་པ་ལ་ནན་ཏན་བྱོས་ཤིག་ཅེས་སྐུལ་བའི་སྐབས་ནི་ཡོད་དེ། ཉན་ཐོས་ཀྱི་ཐེག་པ་ཅན་གྱི་སེམས་ཅན་ལ་སྐབས་ཁ་ཅིག་ཏུ་རང་སངས་རྒྱས་ཀྱི་ཐེག་པའི་སྤྱོད་པ་དང་། ཐེག་པ་ཆེན་པོའི་སྤྱོད་པ་ལ་ནན་ཏན་གྱིས་ཤིག་ཅེས་སྐུལ་བའི་སྐབས་ཀྱང་ཡོད་དེ། དེ་བཞིན་གཤེགས་པའི་བསྟན་པའི་དམ་པའི་ཆོས་ཆུང་ངུ་ན་ཚིགས་སུ་བཅད་པ་གཅིག་གམ་ཚིགས་སུ་བཅད་པ་ཕྱེད་ཙམ་ལ་ཡང་ཤིན་ཏུ་དད་ཅིང་བཀུར་སྟི་བྱེད་ཀྱི། དེ་ལ་འཕྱ་བའམ་སྐུར་པ་འམ། བགེགས་སམ། བར་ཆད་མི་བྱེད་དེ། ཆོས་སྟོན་པ་ལ་སངས་རྒྱས་དང་འདྲ་བར་འདུ་ཤེས་པ་དང་། ཆོས་ཉན་པའི་འཁོར་རྣམས་ལ་ནད་པ་དང་འདྲ་བར་འདུ་ཤེས་པ་དང་། གང་འཆད་པའི་ཆོས་ལ་སྨན་བཟང་པོ་དང་འདྲ་བར་འདུ་ཤེས་ཤིང་འདོད་པ་རྣམ་པ་ལྔ་ཡོངས་སུ་བཅད་དེ་རེ་བ་མེད་པས་དམ་པའི་ཆོས་སྟོན་ཏོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་ཀྱི་
སྦྱིན་པའི་གོ་ཆ་ཆེན་པོའི་འཁོར་ལོ་རྣམ་པ་བཅུ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་འདོད་པ་ལྔ་ཡོངས་སུ་བསལ་ཏེ། མྱུར་དུ་ཉི་མའི་སྒྲོན་མའི་འོད་ཅེས་བྱ་བའི་ཏིང་ངེ་འཛིན་ཐོབ་ཅིང་ཉན་ཐོས་དང་རང་སངས་རྒྱས་ཐམས་ཅད་ལས་ཤིན་ཏུ་འདས་པ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། མཁས་པ་ཆོས་ཀྱི་སྦྱིན་པ་སྤྱོད་པ་དག །སྣོད་བཞིན་ཐེག་པ་གསུམ་གྱི་ཆོས་སྟོན་ཏོ། །ཐེག་པ་གཞན་དག་དེ་ལ་སྟོན་མི་བྱེད། །ཐོས་ནས་དེ་ལ་འཕྱ་ཞིང་སྐུར་མི་འགྱུར། །དབང་པོ་སྣོད་བཞིན་དམ་པའི་ཆོས་སྟོན་གྱི། །དབང་པོ་སྣོད་མིན་དག་ལ་མ་ཡིན་ནོ། །སོ་སོར་ཇི་ལྟར་ཅི་ལ་མོས་པ་བཞིན། །དེ་དང་དེ་ཡི་ཆོས་སྟོན་མགུ་བར་བྱེད། །ཐེག་པ་ཆེན་པོ་སྤྱོད་པའི་གང་ཟག་ལ། །ཐེག་པ་རྣམ་པ་གཉིས་ཀྱི་ཆོས་མི་བསྟན། །བར་རབ་ཐེག་པ་གཉིས་ཀྱི་གང་ཟག་ལ། །ཐེག་པ་འབྲིང་དང་རབ་ཀྱི་ཆོས་སྟོན་ཏོ། །ཤིན་ཏུ་དད་ཅིང་གུས་པས་ཆོས་མཉན་གྱི། །དེ་ལ་འཕྱ་ཞིང་སྐུར་བར་མི་བྱའོ། །ཆོས་སྨྲ་བ་ལ་མཆོད་པ་བྱེད་པ་ནི། །སངས་རྒྱས་འདྲ་བར་དེ་ལ་འདུ་ཤེས་བསྐྱེད། །ཀུན་ནས་ཉོན་མོངས་པ་ཡི་ནད་བསལ་ཕྱིར། །དམ་པའི་ཆོས་ཀྱི་སྨན་དག་ཉན་པར་བསྐུལ། །ཁེ་དང་གྲགས་པ་ཤིན་ཏུ་རིང་སྤངས་ཏེ། །དམ་པའི་ཆོས་དག་བསྟན་ཅིང་བཤད་པར་བྱ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་རྣམ་པར་དག་པའི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན། ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་
འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྲུང་བ་དང་། བསྙེན་བཀུར་བྱ་བར་འགྱུར་རོ། །དེ་ལ་ཇི་ལྟར་ན་ཚུལ་ཁྲིམས་རྣམ་པར་དག་པ་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པ་རྣམ་པ་གཉིས་ཏེ། ཐུན་མོང་བ་དང་། ཐུན་མོང་བ་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པའི་འཁོར་ལོ་ཐུན་མོང་བ་ཞེ་ན། གང་ཁྱིམ་ན་གནས་པ་དགེ་བསྙེན་ཕ་དང་། དགེ་བསྙེན་མའི་ཚུལ་ཁྲིམས་ཀྱི་སྡོམ་པ་བླངས་པའམ། ཡང་ན་རབ་ཏུ་བྱུང་བ་སོ་སོར་ཐར་པའི་ཚུལ་ཁྲིམས་ཀྱིས་བསྙེན་པར་རྫོགས་པ་སྟེ། སྡོམ་པ་འདི་དང་སོ་སོར་ཐར་པའི་ཚུལ་ཁྲིམས་འདི་ནི་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པའི་འཁོར་ལོ་ཐུན་མོང་བ་སྟེ། ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་ཡིན་ནོ། །བྱང་ཆུབ་སེམས་དཔའ་ཚུལ་ཁྲིམས་ཀྱི་འཁོར་ལོ་རྣམ་པར་དག་པ་འདིའི་དབང་གིས་སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་ཆོད་པར་རམ། ལོག་པར་ལྟ་བ་སེལ་བར་རམ། ལས་ཀྱི་སྒྲིབ་པ་དང་། འཁོར་བ་ལས་གྲོལ་བར་མི་འགྱུར་ཏེ། གོ་ཆ་ཆེན་པོའི་འཁོར་ལོ་ཞེས་ཀྱང་མི་བྱ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །དེ་ལ་ཇི་ལྟར་ན། བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པ་གོ་ཆ་ཆེན་པོའི་འཁོར་ལོ་ཐུན་མོང་མ་ཡིན་པ་ཞེ་ན། གང་བྱང་ཆུབ་སེམས་དཔའ་རྣམས་ཕྱོགས་བཅུའི་སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་དང་། གནོད་པ་མེད་པའི་སེམས་དང་། ཁོན་དུ་འཛིན་པ་མེད་པའི་སེམས་ཀྱིས་རྣམ་པར་དག་པའི་ཚུལ་ཁྲིམས་སྲུང་ངོ་། །ཚུལ་ཁྲིམས་དང་། ཚུལ་ཁྲིམས་ངན་པ་ཅན་དང་། སྦྱིན་པ་དང་། སེར་སྣ་དང་། བྱམས་པ་དང་། ཞེ་སྡང་དང་། བརྩོན་འགྲུས་དང་། ལེ་ལོ་ཅན་རབ་འབྲིང་ཐ་མ་ཀུན་ལ་བྱེ་བྲག་མི་འབྱེད་པའི་སེམས་དང་། ཁྱད་པར་མེད་པའི་འདུ་ཤེས་ཀྱིས་ཚུལ་ཁྲིམས་ཡོངས་སུ་སྲུང་ངོ་། །ཁམས་གསུམ་གྱི་
སེམས་ཅན་ཐམས་ཅད་ལ་ཞེ་སྡང་མེད་པ་དང་། ཁོང་ཁྲོ་བ་མེད་པ་དང་། ངན་པར་སྤྱོད་པ་མེད་པས་ཚུལ་ཁྲིམས་ཡོངས་སུ་སྲུང་ངོ་། །སྲིད་པ་གསུམ་གྱི་ཕུང་པོ་དང་། ཁམས་དང་། སྐྱེ་མཆེད་ལ་རྣམ་པར་རྟོག་པ་མེད་པས་ཚུལ་ཁྲིམས་ཡོངས་སུ་སྲུང་ངོ་། །འདོད་པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ་། །གཟུགས་ཡོད་པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ་། །གཟུགས་མེད་པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ་། །སྲིད་པའི་རྣམ་པར་སྨིན་པའི་འབྲས་བུ་ཐམས་ཅད་ལ་མི་གནས་པར་ཚུལ་ཁྲིམས་སྲུང་ངོ་། །རྙེད་པ་དང་མི་རྙེད་པ་ལ་མི་གནས་པར་ཚུལ་ཁྲིམས་སྲུང་ངོ་། །འདུ་བྱེད་རྣམས་ལ་མི་གནས་པར་ཚུལ་ཁྲིམས་སྲུང་སྟེ། འདི་དག་ནི་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པ་གོ་ཆ་ཆེན་པོའི་འཁོར་ལོ་ཐུན་མོང་མ་ཡིན་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཚུལ་ཁྲིམས་རྣམ་པར་དག་པའི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཁྱིམ་ན་གནས་ཤིང་སྡོམ་པ་ལེན་པ། །རབ་བྱུང་སོ་སོར་ཐར་པའི་ཚུལ་ཁྲིམས། །ཐེག་པ་གཉིས་དང་ཐུན་མོང་ཡིན་ཏེ། །བྱང་ཆུབ་ཆེན་པོ་ཞེས་ནི་མི་བྱ། །མཁས་པ་སྟོང་པ་ཉིད་ཆོས་སྒོམ་པ། །འཇིག་རྟེན་ཀུན་ལ་མི་རྟེན་མི་གནས། །སྲིད་པ་ཀུན་ལ་གནས་མ་ཡིན་པར། །རྣམ་པར་དག་པའི་ཚུལ་ཁྲིམས་སྲུང་ངོ་། །མཚན་མ་སྤོང་བའི་ཚུལ་ཁྲིམས་དག་ནི། །ཆགས་པ་མེད་དེ་ཟག་པ་ཀུན་མེད། །ཚུལ་ཁྲིམས་འདི་ལྟ་སྲུང་བ་དག་ནི། །ཡང་དག་བསོད་ནམས་
ཞིང་ཞེས་དེ་བྱ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་བཟོད་པའི་གོ་ཆ་ཆེན་པོའི་འཁོར་ལོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་བཟོད་པའི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ། བྱང་ཆུབ་སེམས་དཔའི་བཟོད་པ་ལ་མཚན་ཉིད་རྣམ་པ་གཉིས་ཏེ། གང་ཞེ་ན་འཇིག་རྟེན་པ་དང་། འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་གྱི་བཟོད་པ་ཞེ་ན། དེ་ནི་ཟག་པ་དང་བཅས་པའི་བཟོད་པ་སྟེ། སེམས་ཅན་ལ་དམིགས་པ། ལེན་པ་དང་བཅས་པ། མཚན་མ་དང་བཅས་པ། རྣམ་པར་སྨིན་པའི་འབྲས་བུ་ལ་རྟེན་པ། བསོད་ནམས་ཀྱི་ལས་ལ་བརྟེན་ཏེ་བཟོད་པར་བྱེད་པའོ། །གཞན་ཡང་བདག་གི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལ་བརྟེན་ནས་བཟོད་པར་བྱེད་པའོ། །འཇུག་པ་དང་བཅས་པའི་བཟོད་པ་ཇི་མི་སྙམ་པ་མེད་པའི་བཟོད་པ་དང་། མཐུ་ཞན་པའི་བཟོད་པའི་སེམས་ཅན་གཏོང་བའི་བཟོད་པ་དང་། གཡོ་དང་སྒྱུར་བཅས་པའི་བཟོད་པ་དང་། ཕ་རོལ་ལ་འདྲིད་པའི་བཟོད་པ་དང་། སེམས་ཅན་ལ་ཕན་པ་དང་བདེ་བའི་དོན་མི་བྱེད་པའི་བཟོད་པ་སྟེ། འདི་དག་ནི་བྱང་ཆུབ་སེམས་དཔའི་འཇིག་རྟེན་གྱི་བཟོད་པ་ཞེས་བྱ་སྟེ། བཟོད་པ་འདི་ནི་ཉན་ཐོས་དང་རང་སངས་རྒྱས་ལ་སོགས་པ་དང་ཐུན་མོང་མ་ཡིན་གྱི་གོ་ཆ་ཆེན་པོའི་འཁོར་ལོ་ཞེས་མི་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་མ་ཡིན་ཏེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་ཞེས་ཀྱང་མི་བྱའོ། །དེ་ལ་ཇི་ལྟར་ན་བྱང་ཆུབ་
སེམས་དཔའི་འཇིག་རྟེན་ལས་འདས་པའི་བཟོད་པ་གོ་ཆ་ཆེན་པོའི་འཁོར་ལོ་ཞེ་ན། ཟག་པ་མེད་པའི་བཟོད་པ་སྟེ། འཕགས་པ་ཐམས་ཅད་ཀྱི་ཆོས་ཆེན་པོའི་འོད་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་ཆགས་པ་མེད་པའི་བཟོད་པ་དང་། བྱ་བའི་དངོས་པོ་ཐམས་ཅད་དང་། ཚིག་ཏུ་སྨྲ་བ་དང་། རྒྱུ་དང་། མཚན་མ་དང་། ཡི་གེ་དང་། སྒྲ་སྐད་ཐམས་ཅད་ཡོངས་སུ་བཅད་པའི་སྐྱེ་མཆེད་ལ་བརྟེན་པའི་བཟོད་པ་སྤྱོད་དོ། །བཟོད་པ་འདི་བསྒོམས་པས་ཀུན་ནས་ཉོན་མོངས་པ་གསུམ་དང་། བསྐལ་པ་རྣམ་གསུམ་དང་། མཚན་ཉིད་གསུམ་དང་། དུས་གསུམ་དང་། སྲིད་པ་གསུམ་དང་། འདུ་བྱེད་རྣམ་གསུམ་དང་། མི་དགེ་བའི་རྩ་བ་གསུམ་དང་། ཆུ་བོ་བཞི་དང་། མདུད་པ་རྣམ་བཞི་དང་། ཉེ་བར་ལེན་པ་བཞི་དང་། ལུས་ཀྱི་མདུད་པ་རྣམ་བཞི་ལ་སོགས་པ་ཡོངས་སུ་བཅད་པས་བཟོད་པ་འདི་སྒོམ་པའི་ཚེ་སེམས་དང་ཡིད་རབ་ཏུ་ཞི་བས་འདི་ནི་བྱང་ཆུབ་སེམས་དཔའི་འཇིག་རྟེན་ལས་འདས་པའི་གོ་ཆ་ཆེན་པོའི་འཁོར་ལོའི་བཟོད་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོའི་འཁོར་ལོའི་བཟོད་པ་དེ་དང་ལྡན་པས་ཐོག་མ་སེམས་བསྐྱེད་པ་ནས་འདོད་པ་ལྔ་རྣམས་ཡོངས་སུ་བསལ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། བཟོད་པ་ལ་ནི་རྣམ་པ་གཉིས་ཏེ། །མཚན་མར་བཅས་དང་མཚན་མ་མེད་པ། །མཚན་མར་བཅས་པའི་བཟོད་པ་ཆགས་ཡོད། །མཁས་པ་དག་ནི་དེ་ལ་མི་སྟོད། །འདུ་བྱེད་རྣམ་གསུམ་ཕུང་པོ་ཁམས་དང་། །སྐྱེ་མཆེད་ལ་རྟེན་བཟོད་པ་སྒོམ་པ། །དེ་ནི་ཟག་བཅས་བཟོད་པ་ཡིན་ཏེ། །བྱང་ཆུབ་སེམས་དཔའ་ཆེན་པོ་
མ་ཡིན། །ཕྱིན་ཅི་ལོག་ནི་རྣམ་བཞི་བསལ་ནས། །ཆགས་པ་མེད་པའི་བཟོད་པ་སྒོམ་ཞིང་། །འདུ་བྱེད་རྣམ་པ་གསུམ་དག་ཞི་ན། །བཟོད་པ་འདི་ལ་ཐམས་ཅད་བསྟོད་འགྱུར། །འདུ་བྱེད་ཐམས་ཅད་རབ་ཏུ་ཞི་ཞིང་། །རྟོག་པ་ཐམས་ཅད་ཡོངས་སུ་སྤངས་ཏེ། །སེམས་ནི་ནམ་མཁའ་འདྲ་བར་མཉམ་པ། །བཟོད་པ་འདི་ལ་ཐམས་ཅད་བསྟོད་འགྱུར། །ཐམས་ཅད་ཆོས་ལ་རོ་གཅིག་འཐུན་པར། །སྟོང་པ་མཚན་མ་མེད་པ་ཞི་བ། །སེམས་ནི་ཅི་ལའང་མི་གནས་མི་ཆགས། །བཟོད་པ་འདི་ནི་ཕན་དོན་ཆེར་འགྱུར། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་བརྩོན་འགྲུས་ལ་རྣམ་པ་གཉིས་ཏེ། འཇིག་རྟེན་པ་དང་། འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་པའི་བརྩོན་འགྲུས་ཞེ་ན། བྱང་ཆུབ་སེམས་དཔའ་རྣམས་ཤིན་ཏུ་འབད་པའི་བརྩོན་འགྲུས་ཀྱིས་འཇིག་རྟེན་གྱི་བསོད་ནམས་ཀྱི་ལས་ཀྱི་དངོས་པོ་རྣམ་པ་གསུམ་ལ་ནན་ཏན་བྱེད་དོ། །བསོད་ནམས་གང་ཞེ་ན། འདི་ལྟ་སྟེ། སྦྱིན་པ་བྱེད་པའི་བསོད་ནམས་ཀྱི་ལས་དང་། ཚུལ་ཁྲིམས་སྲུང་བའི་བསོད་ནམས་བྱེད་པའི་ལས་དང་། བསྒོམ་པའི་བསོད་ནམས་བྱེད་པའི་ལས་སོ། །ལས་འདི་དག་བྱེད་པ་ནི་བརྩོན་འགྲུས་རྣམ་པ་གསུམ་ཞེས་བྱ་སྟེ། བརྩོན་འགྲུས་རྣམ་པ་གསུམ་པོ་འདི་དག་ནི་སེམས་ཅན་ལ་དམིགས་པ་ཟག་པ་དང་བཅས་པ། ཉེ་བར་ལེན་པ་དང་བཅས་པ། རྣམ་པར་སྨིན་པའི་འབྲས་བུ་ལ་བརྟེན་པ་བསོད་
ནམས་ཀྱི་ལས་ལ་བརྟེན་པ་སྟེ། དེ་ནི་བྱང་ཆུབ་སེམས་དཔའི་འཇིག་རྟེན་གྱི་བརྩོན་འགྲུས་ཞེས་བྱའོ། །བརྩོན་འགྲུས་འདི་ནི་ཉན་ཐོས་དང་། རང་སངས་རྒྱས་ཀྱི་ཐེག་པ་ལ་སོགས་པ་དང་ཐུན་མོང་ཡིན་ཏེ། གོ་ཆ་ཆེན་པོའི་འཁོར་ལོ་ཞེས་མི་བྱ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་ཡང་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་ལས་འདས་པའི་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་ཞེ་ན། བྱང་ཆུབ་སེམས་དཔའ་དག་ཤིན་ཏུ་འབད་པའི་བརྩོན་འགྲུས་ཀྱིས་སེམས་ཅན་ཐམས་ཅད་ལ་མཉམ་པའི་སེམས་ཀྱིས་ཉོན་མོངས་པའི་ལས་དང་སྡུག་བསྔལ་ཐམས་ཅད་སེལ་བ་སྟེ། བརྩོན་འགྲུས་འདི་ནི་འཕགས་པ་ཐམས་ཅད་ཀྱིས་བསྔགས་པ། ཟག་པ་མེད་པ། ཉེ་བར་ལེན་པ་མེད་པ། རྟེན་དང་གནས་མེད་དེ། བརྩོན་འགྲུས་དང་། ལེ་ལོ་དང་། སྦྱིན་པ་དང་། སེར་སྣ་དང་། ཚུལ་ཁྲིམས་དང་། ངན་པའི་ཚུལ་ཁྲིམས་ཅན་དང་། བྱམས་པ་དང་། ཞེ་སྡང་དང་། སེམས་ཅན་རབ་དང་། འབྲིང་དང་། ཐ་མ་ཀུན་ལ་མི་འབྱེད་པའི་སེམས་དང་། བྱེ་བྲག་མེད་པའི་འདུ་ཤེས་ཀྱིས་ཤིན་ཏུ་འབད་པའི་བརྩོན་འགྲུས་རྩོམ་མོ། །ཁམས་གསུམ་གྱི་སེམས་ཅན་ཐམས་ཅད་ལ་མཉམ་པ་ཉིད་དང་། དམིགས་པ་མེད་པས་བྱ་བའི་ལས་བྱེད་དེ་སྨྲ་བ་དང་། རྟོག་པ་དང་། དཔྱོད་པའི་གནས་ཐམས་ཅད་ལ་མི་གནས་པའི་སེམས་ཀྱིས་ཤིན་ཏུ་འབད་པའི་བརྩོན་འགྲུས་རྩོམ་མོ། །སྲིད་པ་གསུམ་གྱི་ཕུང་པོ་དང་། ཁམས་དང་། སྐྱེ་མཆེད་ལ་རྣམ་པར་རྟོག་པ་མེད་པས་ཤིན་ཏུ་འབད་པའི་བརྩོན་འགྲུས་རྩོམ་སྟེ། འདོད་པའི་ཁམས་ལ་མི་གནས་པའི་འབད་པའི་བརྩོན་འགྲུས་དང་། གཟུགས་ཡོད་པའི་ཁམས་ལ་མི་གནས་པའི་འབད་པའི་བརྩོན་འགྲུས་དང་། གཟུགས་མེད་པའི་ཁམས་ལ་མི་གནས་པའི་འབད་པའི་བརྩོན་འགྲུས་དང་། སྲིད་པའི་རྣམ་པར་སྨིན་པའི་འབྲས་བུ་ཐམས་ཅད་ལ་མི་རྟོག་པའི་འབད་པའི་བརྩོན་འགྲུས་དང་། རྙེད་པ་དང་མ་རྙེད་པ་ཀུན་ལ་མི་གནས་པའི་འབད་པའི་བརྩོན་འགྲུས་དང་། འདུ་བྱེད་རྣམས་ལ་མི་གནས་
པའི་འབད་པའི་བརྩོན་འགྲུས་དང་། འཇིག་རྟེན་གྱི་བསོད་ནམས་ཀྱི་ལས་ཀྱི་དངོས་པོ་གསུམ་ལ་མི་གནས་པའི་འབད་པའི་བརྩོན་འགྲུས་དང་། འཇིག་རྟེན་ལས་འདས་པ་དང་ལྡན་པའི་བསོད་ནམས་ཀྱི་ལས་ཀྱི་དངོས་པོ་རྣམ་པ་གསུམ་ལ་ཤིན་ཏུ་བརྩོན་འགྲུས་རྩོམ་པ་སྟེ། འདི་ནི་བྱང་ཆུབ་སེམས་དཔའི་འཇིག་རྟེན་ལས་འདས་པའི་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་གང་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་རྣམ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཏེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། དབང་པོ་དྲུག་ལ་ཤིན་ཏུ་ཆགས་པའི། །བུས་པ་ཆུ་བོ་ལྔས་ནི་ཁྱེར་བ། །ཤིན་ཏུ་འབད་པའི་བརྩོན་འགྲུས་རྩོམ་ཡང་། །མཁས་པ་རྣམས་ཀྱིས་དེ་ལ་སྨོད་འགྱུར། །སེམས་ཅན་དམིགས་ཤིང་ཟག་དང་བཅས་ལ། །ལེན་པར་བཅས་ཤིང་བརྩོན་འགྲུས་རྩོམ་ན། །ཡང་དག་བསོད་ནམས་ཞིང་མ་ཡིན་ཏེ། །བྱང་ཆུབ་སེམས་དཔའ་ཆེན་པོ་མ་ཡིན། །མཁས་པ་བརྩོན་འགྲུས་རྩོམ་པ་དག་ནི། །ཆགས་པ་ཐམས་ཅད་རིང་དུ་སྤངས་ཏེ། །སེམས་ནི་ཅི་ལའང་མི་གནས་མི་ཆགས། །ཡང་དག་བསོད་ནམས་ཞིང་ཞེས་དེ་བྱ། །མིང་དང་གཟུགས་ལ་ཆགས་པ་མེད་ཅིང་། །ཕུང་པོ་ཁམས་དང་སྐྱེ་མཆེད་སྤངས་ཏེ། །ཐམས་ཅད་འཁོར་གྱི་རྟེན་དུ་འགྱུར་བ། །དེ་ནི་བྱང་ཆུབ་སེམས་དཔའ་ཆེན་པོ། །འཇིག་རྟེན་སྤྱོད་ཀྱང་ཆུ་ཟླ་བཞིན་ཏེ། །འབད་པའི་བརྩོན་འགྲུས་རྩོམ་པའི་མཐར་ཕྱིན། །འཁོར་ལོ་འདི་ཡིས་ཡོངས་སུ་བཅོམ་པ། །སྐྱེ་བོ་ཀུན་ནས་ཉོན་མོངས་བཅིངས་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་
ཆེན་པོའི་བསམ་གཏན་གྱི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ནས་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་བསམ་གཏན་གྱི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་བསམ་གཏན་ལ་རྣམ་པ་གཉིས་ཏེ། འཇིག་རྟེན་དང་། འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་གྱི་བསམ་གཏན་ཞེ་ན། བྱང་ཆུབ་སེམས་དཔའ་རྣམས་ཕུང་པོ་ལ་གནས་ནས་བསམ་གཏན་སྒོམ་པ་དང་། ཁམས་ལ་གནས་ནས་བསམ་གཏན་སྒོམ་པ་དང་། སྐྱེ་མཆེད་ལ་གནས་ནས་བསམ་གཏན་སྒོམ་པ་དང་། འདོད་པའི་ཁམས་ལ་གནས་ནས་བསམ་གཏན་སྒོམ་པ་དང་། གཟུགས་ཡོད་པའི་ཁམས་ལ་གནས་ནས་བསམ་གཏན་སྒོམ་པ་དང་། གཟུགས་མེད་པའི་ཁམས་ལ་གནས་ནས་བསམ་གཏན་སྒོམ་པ་དང་། སྡོམ་པ་གསུམ་ལ་གནས་ནས་བསམ་གཏན་སྒོམ་པ་དང་། རྣམ་པར་གྲོལ་བ་གསུམ་ལ་གནས་ནས་བསམ་གཏན་སྒོམ་པ་དང་། དྲན་པ་ཉེ་བར་གཞག་པ་བཞི་ལ་གནས་ནས་བསམ་གཏན་སྒོམ་པ་དང་། ཡང་དག་པར་སྤོང་བ་བཞི་ལ་གནས་ནས་བསམ་གཏན་སྒོམ་པ་དང་། རྫུ་འཕྲུལ་གྱི་རྐང་པ་བཞི་ལ་གནས་ནས་བསམ་གཏན་སྒོམ་པ་དང་། དབང་པོ་ལྔ་ལ་གནས་ནས་བསམ་གཏན་སྒོམ་པ་དང་། སྟོབས་ལྔ་ལ་གནས་ནས་བསམ་གཏན་སྒོམ་པ་དང་། བྱང་ཆུབ་ཀྱི་ཡན་ལག་བདུན་ལ་གནས་ནས་བསམ་གཏན་སྒོམ་པ་དང་། འཕགས་པའི་ལམ་ཡན་ལག་བརྒྱད་པ་ལ་གནས་ནས་བསམ་གཏན་སྒོམ་པ་དང་། སའི་ཁམས་ལ་གནས་ནས་བསམ་གཏན་སྒོམ་པ་དང་། ཆུའི་ཁམས་ལ་གནས་ནས་བསམ་གཏན་སྒོམ་པ་དང་། མེའི་ཁམས་ལ་གནས་ནས་བསམ་གཏན་སྒོམ་པ་དང་། རླུང་གི་ཁམས་
ལ་གནས་ནས་བསམ་གཏན་སྒོམ་པ་དང་། ནམ་མཁའི་ཁམས་ལ་གནས་ནས་བསམ་གཏན་སྒོམ་པ་དང་། རྣམ་པར་ཤེས་པའི་ཁམས་ལ་གནས་ནས་བསམ་གཏན་སྒོམ་པ་དང་། བདེ་བའི་ཚོར་བ་ལ་གནས་ནས་བསམ་གཏན་སྒོམ་པ་དང་། སྡུག་བསྔལ་བའི་ཚོར་བ་ལ་གནས་ནས་བསམ་གཏན་སྒོམ་པ་དང་། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བ་ལ་གནས་ནས་བསམ་གཏན་སྒོམ་པ་དང་། ནམ་མཁའ་མཐའ་ཡས་སྐྱེ་མཆེད་ལ་གནས་ནས་བསམ་གཏན་སྒོམ་པ་དང་། རྣམ་ཤེས་མཐའ་ཡས་སྐྱེ་མཆེད་ལ་གནས་ནས་བསམ་གཏན་སྒོམ་པ་དང་། ཅུང་ཟད་མེད་པའི་སྐྱེ་མཆེད་ལ་གནས་ནས་བསམ་གཏན་སྒོམ་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་གནས་ནས་བསམ་གཏན་སྒོམ་པ་དང་། འཇིག་རྟེན་འདི་ལ་གནས་ནས་བསམ་གཏན་སྒོམ་པ་དང་། འཇིག་རྟེན་ཕ་རོལ་ལ་གནས་ནས་བསམ་གཏན་སྒོམ་པ་དང་། འདུ་ཤེས་ཆུང་ངུ་ལ་གནས་ནས་བསམ་གཏན་སྒོམ་པ་དང་། འདུ་ཤེས་ཆེན་པོ་ལ་གནས་ནས་བསམ་གཏན་སྒོམ་པ་དང་། འདུ་ཤེས་ཚད་མེད་པ་ལ་གནས་ནས་བསམ་གཏན་སྒོམ་པ་སྟེ། བསམ་གཏན་དེ་དག་ནི་ཟག་པ་དང་བཅས་པ། ཉེ་བར་ལེན་པ་དང་བཅས་པ། ཆགས་པ་དང་བཅས་པ་སྟེ། འདི་ནི་བྱང་ཆུབ་སེམས་དཔའི་འཇིག་རྟེན་དང་བཅས་པའི་བསམ་གཏན་ཞེས་བྱའོ། །བསམ་གཏན་འདི་ནི་ཉན་ཐོས་དང་། རང་སངས་རྒྱས་ཀྱི་ཐེག་པ་དང་ཐུན་མོང་བ་ཞེས་བྱ་སྟེ། གོ་ཆ་ཆེན་པོའི་འཁོར་ལོ་མ་ཡིན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་མི་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་ཡང་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་ལས་འདས་པའི་བསམ་གཏན་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་ཕུང་པོ་དང་བྲལ་བར་བསམ་གཏན་སྒོམ་པ་དང་། ཁམས་དང་བྲལ་བར་བསམ་གཏན་སྒོམ་པ་དང་། སྐྱེ་མཆེད་དང་བྲལ་བར་བསམ་གཏན་སྒོམ་པ་དང་། འདོད་པའི་ཁམས་དང་བྲལ་བར་བསམ་གཏན་སྒོམ་པ་དང་། གཟུགས་ཀྱི་ཁམས་དང་བྲལ་བར་བསམ་གཏན་སྒོམ་པ་དང་། གཟུགས་མེད་པའི་ཁམས་དང་བྲལ་བར་བསམ་གཏན་སྒོམ་པ་
དང་། སྡོམ་པ་གསུམ་དང་བྲལ་བར་བསམ་གཏན་སྒོམ་པ་དང་། རྣམ་པར་ཐར་པ་གསུམ་དང་བྲལ་བར་བསམ་གཏན་སྒོམ་པ་དང་། དྲན་པ་ཉེ་བར་གཞག་པ་བཞི་དང་བྲལ་བར་བསམ་གཏན་སྒོམ་པ་དང་། ཡང་དག་པར་སྤོང་བ་བཞི་དང་བྲལ་བར་བསམ་གཏན་སྒོམ་པ་དང་། རྫུ་འཕྲུལ་གྱི་རྐང་པ་བཞི་དང་བྲལ་བར་བསམ་གཏན་སྒོམ་པ་དང་། དབང་པོ་ལྔ་དང་བྲལ་བར་བསམ་གཏན་སྒོམ་པ་དང་། སྟོབས་ལྔ་དང་བྲལ་བར་བསམ་གཏན་སྒོམ་པ་དང་། བྱང་ཆུབ་ཀྱི་ཡན་ལག་བདུན་དང་བྲལ་བར་བསམ་གཏན་སྒོམ་པ་དང་། འཕགས་པའི་ལམ་ཡན་ལག་བརྒྱད་པ་དང་བྲལ་བར་བསམ་གཏན་སྒོམ་པ་དང་། སའི་ཁམས་དང་བྲལ་བར་བསམ་གཏན་སྒོམ་པ་དང་། ཆུའི་ཁམས་དང་བྲལ་བར་བསམ་གཏན་སྒོམ་པ་དང་། མེའི་ཁམས་དང་བྲལ་བར་བསམ་གཏན་སྒོམ་པ་དང་། རླུང་གི་ཁམས་དང་བྲལ་བར་བསམ་གཏན་སྒོམ་པ་དང་། ནམ་མཁའི་ཁམས་དང་བྲལ་བར་བསམ་གཏན་སྒོམ་པ་དང་། རྣམ་པར་ཤེས་པའི་ཁམས་དང་བྲལ་བར་བསམ་གཏན་སྒོམ་པ་དང་། བདེ་བར་ཚོར་བ་དང་བྲལ་བར་བསམ་གཏན་སྒོམ་པ་དང་། སྡུག་བསྔལ་དུ་ཚོར་བ་དང་བྲལ་བར་བསམ་གཏན་སྒོམ་པ་དང་། སྡུག་བསྔལ་བ་ཡང་མ་ཡིན་བདེ་བ་ཡང་མ་ཡིན་པར་ཚོར་བ་དང་བྲལ་བར་བསམ་གཏན་སྒོམ་པ་དང་། ནམ་མཁའ་མཐའ་ཡས་སྐྱེ་མཆེད་དང་བྲལ་བར་བསམ་གཏན་སྒོམ་པ་དང་། རྣམ་ཤེས་མཐའ་ཡས་སྐྱེ་མཆེད་དང་བྲལ་བར་བསམ་གཏན་སྒོམ་པ་དང་། ཆུང་ཟད་མེད་པའི་སྐྱེ་མཆེད་དང་བྲལ་བར་བསམ་གཏན་སྒོམ་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་བྲལ་བར་བསམ་གཏན་སྒོམ་པ་དང་། འཇིག་རྟེན་འདི་དང་བྲལ་བར་བསམ་གཏན་སྒོམ་པ་དང་། འཇིག་རྟེན་ཕ་རོལ་དང་བྲལ་བར་བསམ་གཏན་སྒོམ་པ་དང་། འདུ་ཤེས་ཆུང་ངུ་དང་བྲལ་བར་བསམ་གཏན་སྒོམ་པ་དང་། འདུ་ཤེས་ཆེན་པོ་དང་བྲལ་བར་བསམ་གཏན་སྒོམ་པ་དང་། འདུ་ཤེས་ཚད་མེད་པ་དང་བྲལ་བར་བསམ་གཏན་སྒོམ་པ་སྟེ། བསམ་གཏན་འདི་ནི་འཕགས་པའི་འོད་ཟེར་ཆེན་པོ་བསྐྱེད་པ། ཟག་པ་མེད་པ། ཉེ་བར་ལེན་པ་མེད་པ། ཆགས་པ་མེད་པ་སྟེ། འདི་ནི་
བྱང་ཆུབ་སེམས་དཔའི་འཇིག་རྟེན་ལས་འདས་པའི་བསམ་གཏན་གྱི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་བསམ་གཏན་གྱི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། བདག་གི་ཁུར་ལྕི་སྤོང་བའི་ཕྱིར་ནི། །དམིགས་དང་བཅས་པའི་ཏིང་འཛིན་བསྒོམས་ཏེ། །བདག་གི་ཀུན་ནས་ཉོན་མོངས་གཅོད་འདོད། །ཡང་དག་མཁས་པའི་མཚན་ཉིད་མ་ཡིན། །སྣོད་ལ་རྟེན་ཅིང་རྟོག་དང་བཅས་པ། །རྣམ་པར་གྲོལ་འདོད་ཏིང་འཛིན་སྒོམ་ཡང་། །ཚུ་རོལ་ཕ་རོལ་མུ་ལ་གནས་ན། །སེམས་ཅན་དག་ལ་ཕན་དོན་བྱེད་མིན། །སེམས་ཅན་ཀུན་ལ་ཕན་དང་བདེ་ཕྱིར། །ཏིང་འཛིན་སྒོམ་ཞིང་ཁུར་ལྕི་སྤངས་ཏེ། །ཀུན་ནས་ཉོན་མོངས་ཐམས་ཅད་སེལ་བ། །དེ་ནི་ཡང་དག་མཁས་པའི་མཚན་ཉིད། །སེམས་ཅན་ཐམས་ཅད་སིམ་པར་བྱེད་ཕྱིར། །མི་གནས་པ་ཡི་ཏིང་འཛིན་སྒོམ་སྟེ། །འདོད་པའི་སྲིད་པ་ཐམས་ཅད་ཆོད་པ། །དེ་ནི་བློ་གྲོས་ཆེན་པོ་ཞེས་བྱ། །སྲིད་པས་བཅིངས་པ་ཐམས་ཅད་བཀྲོལ་ཏེ། །འཇིགས་པ་མེད་པའི་གྲོང་དུ་བཟུང་ཕྱིར། །རབ་ཏུ་ཞི་བའི་ཏིང་འཛིན་སྒོམ་པ། །དེ་ནི་བྱང་ཆུབ་སེམས་དཔའ་ཆེན་པོའོ།། །།བམ་པོ་བཅུ་པ་སྟེ་ཐ་མ། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་གོ་ཆ་ཆེན་པོའི་འཁོར་ལོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་
ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་ཤེས་རབ་ཀྱི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་ཤེས་རབ་ལ་ནི་རྣམ་པ་གཉིས་ཏེ། འཇིག་རྟེན་གྱི་དང་འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་པའི་ཤེས་རབ་ཅེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་ཐེག་པ་གསུམ་གྱི་དམ་པའི་ཆོས་ཀློག་པ་དང་། འདོན་པ་དང་། གླེགས་བམ་དུ་འདྲི་བ་དང་། ཉན་པ་དང་། ཕ་རོལ་ལ་སྟོན་ཅིང་འཆད་པ་འབའ་ཞིག་ལ་རྟེན་ཏེ། སེམས་ཅན་ཐམས་ཅད་ཀྱི་མ་རིག་པའི་མུན་པ་སེལ་བར་འདོད་པ་དང་། སེམས་ཅན་ཐམས་ཅད་ཀྱི་ཤེས་རབ་ཀྱི་སྒྲོན་མ་འབྱུང་བའི་ཕྱིར་དེ་བཞིན་གཤེགས་པས་བསྟན་པའི་ཉན་ཐོས་ཀྱི་ཐེག་པ་དང་ལྡན་པའི་ཆོས་ལ་ཤིན་ཏུ་འབད་པའི་བརྩོན་འགྲུས་ཀྱིས་ཀློག་པ་དང་། འདོན་པ་དང་། ཉན་པ་དང་། གླེགས་བམ་དུ་འདྲི་བ་དང་། གཞན་དག་ལ་རྒྱས་པར་སྟོན་ཅིང་འཆད་པ་དང་། ཡང་དག་པའི་བརྩོན་འགྲུས་ཀྱིས་ནན་ཏན་བྱེད་པ་དང་། དེ་བཞིན་གཤེགས་པས་བསྟན་པའི་རང་སངས་རྒྱས་ཀྱི་ཐེག་པ་དང་ལྡན་པའི་ཆོས་ལ་ཀློག་པ་དང་། འདོན་པ་དང་། ཉན་པ་དང་། གླེགས་བམ་དུ་འདྲི་བ་དང་། གཞན་དག་ལ་རྒྱས་པར་སྟོན་ཅིང་འཆད་པ་དང་། ཡང་དག་པའི་བརྩོན་འགྲུས་ཀྱིས་ནན་ཏན་དུ་སྤྱོད་དོ། །དེ་བཞིན་གཤེགས་པས་བསྟན་པའི་ཐེག་པ་ཆེན་པོ་དང་ལྡན་པའི་ཆོས་ལ་བརྩོན་འགྲུས་སུ་ཀློག་པ་དང་། འདོན་པ་དང་། ཉན་པ་དང་། གླེགས་བམ་དུ་འདྲི་བ་དང་། གཞན་ལ་ཡང་རྒྱས་པར་སྟོན་ཅིང་འཆད་པ་དང་། ཡང་དག་པའི་བརྩོན་འགྲུས་ཀྱིས་ནན་ཏན་བྱེད་པ་སྟེ། འཕགས་པའི་ཟག་པ་མེད་པའི་ལམ་གྱི་ཡན་ལག་ཚོལ་བ་མ་ཡིན། འཕགས་པའི་ལམ་ཚོལ་བ་མ་ཡིན། འཕགས་པའི་ལམ་དུ་གཏོགས་པའི་རྣམ་པར་གྲོལ་བ་ཚོལ་བ་མ་ཡིན། རབ་ཏུ་ཞི་བ་ཡང་དག་པའི་ཤེས་རབ་ལ་ནན་ཏན་བྱེད་པ་མ་ཡིན་ཏེ། རྟག་ཏུ་ལྟ་
བ་དང་བཅས་པ། ཤེས་རབ་དང་བཅས་པའི་ཤེས་རབ་ལ་ནན་ཏན་བྱེད་དོ། །དེ་ལྟར་ལེན་པ་དང་བཅས་པ། ཆགས་པ་དང་བཅས་པའི་ཤེས་རབ་ནི་བྱང་ཆུབ་སེམས་དཔའི་འཇིག་རྟེན་གྱི་ཤེས་རབ་ཅེས་བྱའོ། །ཤེས་རབ་དེ་ནི་ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་ཡིན་ཏེ། གོ་ཆ་ཆེན་པོའི་འཁོར་ལོ་ཞེས་མི་བྱ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་ལས་འདས་པའི་ཤེས་རབ་ཅེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་བྱང་ཆུབ་ཀྱི་ལམ་ལ་བརྩོན་འགྲུས་སུ་ནན་ཏན་བྱེད་པ་ནི་ཅི་ནུས་སུ་ཐེག་པ་གསུམ་གྱི་ཡང་དག་པའི་ཆོས་ལ་ཀློག་པ་དང་། འདོན་པ་དང་། ཉན་པ་དང་། གླེགས་བམ་དུ་འདྲི་བ་དང་། གཞན་དག་ལ་རྒྱས་པར་སྟོན་ཅིང་འཆད་ཀྱང་དེ་ལ་དམིགས་སུ་མེད་པའི་སྦྱོར་བ་ལ་གནས་ཏེ། མི་གཡོ་བ་དང་། མི་རྟོག་པ་དང་། ངོ་བོ་ཉིད་མེད་པ་དང་། ནམ་མཁའ་ལྟ་བུའི་སེམས་དང་། རབ་ཏུ་ཞི་བའི་སེམས་དང་། འཕེལ་བ་དང་། འགྲིབ་པ་མེད་པའི་ཤེས་རབ་དང་། ཆགས་པ་མེད་པའི་སེམས་དང་། སྐྱེ་བ་དང་འགོག་པ་མེད་པའི་སེམས་དང་། ཕྱིར་མི་ལྡོག་པའི་སེམས་དང་། ཆོས་མཉམ་པ་ཉིད་ཀྱི་སེམས་དང་། དེ་བཞིན་ཉིད་ཀྱི་སེམས་དང་། ཡང་དག་པའི་མཐའི་སེམས་དང་། ཆོས་ཀྱི་དབྱིངས་ཀྱི་སེམས་དང་། བདག་མེད་པའི་སེམས་དང་། རྣམ་པར་མི་རྟོག་པའི་སེམས་དང་། རབ་ཏུ་ཞི་བ་དང་། བཟོད་པ་དང་། རྟོག་པ་དང་བྲལ་བའི་སེམས་ཀྱིས་གྲུབ་པ་དང་། འཇིགས་པ་མེད་པའི་ས་ལ་ཤིན་ཏུ་ཐབས་མཁས་པས་བདེ་བར་གནས་པ་དང་། མི་གནས་པ་མི་ཆགས་པའི་མཆོག་དམ་པའི་བློ་གྲོས་ཀྱི་ས་ལ་ཐབས་མཁས་པས་བདེ་བར་གནས་པ་སྟེ། ཤེས་རབ་འདི་ནི་ལེན་པ་མེད་པ་ཆགས་པ་མེད་པས་བྱང་ཆུབ་སེམས་དཔའི་འཇིག་རྟེན་ལས་འདས་པའི་ཤེས་རབ་ཀྱི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་
སེམས་བསྐྱེད་ནས་འདོད་པ་ལྔ་ཡོངས་སུ་བསལ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཀྱི་ས་ལས་ཤིན་ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་མཆོད་པ་དང་། བསྲུང་བ་དང་། བསྙེན་བཀུར་བྱ་བའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་མཁས་པའི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ནས་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན། ཐབས་མཁས་པའི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་ཐབས་མཁས་པ་ལ་རྣམ་པ་གཉིས་ཏེ། འཇིག་རྟེན་པ་དང་། འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་པའི་ཐབས་མཁས་པ་ཡིན་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་བདག་གི་དོན་ནམ་གཞན་གྱི་དོན་ནམ། གཉི་གའི་དོན་ལ་བདག་དང་གཞན་དུ་རྟོག་ཅིང་བཟོ་དང་སྒྱུ་རྩལ་རྣམ་པ་སྣ་ཚོགས་ཀྱིས་བདག་དང་གཞན་གྱི་དོན་ཡོངས་སུ་བསྒྲུབ་པའི་ཕྱིར་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་ལ་མཆོད་པ་དང་། བསྙེན་བཀུར་བྱེད་པ་དང་། ཕ་དང་། མ་དང་། ནད་པ་དང་། ཉམ་ཐག་པ་དང་། མགོན་དང་རྟེན་མེད་པ་དང་། གནོད་པ་མང་པོས་སྡུག་བསྔལ་བར་གྱུར་པ་མཐོང་ན་ཤིན་ཏུ་ཐབས་མཁས་པས་སྒྲོལ་ཞིང་བསྡུ་བའི་དངོས་པོ་རྣམས་ཞེས་སེམས་ཅན་ཡོངས་སུ་སྨིན་པར་བྱེད་དོ། །བྱང་ཆུབ་སེམས་དཔའ་དེ་བདག་ཐེག་པ་ཆེན་པོ་ལ་གནས་པས་ཉན་ཐོས་ཀྱི་ཐེག་པ་པ་དང་། རང་སངས་རྒྱས་ཀྱི་ཐེག་པ་
པ་དང་། ཐེག་པ་ཆེན་པོའི་སྣོད་མ་ཡིན་པ་ཉན་ཐོས་དང་། རང་སངས་རྒྱས་ཀྱི་དབང་པོ་ཡོངས་སུ་མ་སྨིན་པ་ལ་ཤིན་ཏུ་ཕྲ་ལ་ཟབ་པ་དམ་པའི་ཆོས་སྟོན་ཏེ། སློབ་ཏུ་གཞུག་པ་དང་། འཕགས་པའི་བསམ་གཏན་ལ་ནན་ཏན་དུ་བྱེད་དུ་གཞུག་གོ །གཞན་ཡང་དོན་དམ་པའི་བདེན་པ་བསྟན་ཏེ་ནན་ཏན་བྱེད་དུ་གཞུག་པ་དང་། ཕྱིན་ཅི་ལོག་བཞི་ལས་བཟླ་ཞིང་མི་ལྟུང་བའི་ཆོས་ཀྱི་མཚན་ཉིད་རིག་པར་བྱ་བ་དང་། སོ་སོ་ཡང་དག་པར་རིག་པ་བཞི་ལ་གཞོལ་བར་བྱ་བ་ནས། གཞན་ཡང་དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་། ལྷག་མ་དང་བཅས་པ་དང་། ལྷག་མ་མ་ལུས་པའི་ལམ་དང་ལམ་གྱི་འབྲས་བུའི་བར་དུ་འཇུག་པར་བྱ་བ་ལ་མཁས་པའི་ཡེ་ཤེས་ཀྱིས་ཡོངས་སུ་སྨིན་པར་བྱེད་དོ། །སེམས་ཅན་གང་ཁེ་དང་། གྲགས་པ་དང་། ལོངས་སྤྱོད་ལ་ཆགས་ཏེ་དབང་པོ་རྒོད་པ། དགེ་བའི་རྩ་བ་ཡོངས་སུ་མ་སྨིན་པ་ལ་ནི་མདོ་སྡེ་དང་། འདུལ་བ་དང་། མ་མོ་ཀློག་པ་དང་། འདོན་པ་བྱེད་དུ་གཞུག་པ་དང་། སངས་རྒྱས་གཞན་གྱིས་བཤད་པ་ལས་གཞན་པ་རྣམ་པར་གྲོལ་བ་དང་། འཐུན་པའི་གཙུག་ལག་ཀློག་ཅིང་འདོན་དུ་བཅུག་སྟེ་ཡོངས་སུ་སྨིན་པར་བྱེད་དོ། །སེམས་ཅན་གང་སྦྱིན་པ་བྱེད་པ་ལ་མི་མོས་པ་ལ་ནི་ནོར་རིན་པོ་ཆེ་དང་། ནོར་དབྱིག་རྣམ་པ་སྣ་ཚོགས་གཏོང་བར་བསྐུལ་བས་ཡོངས་སུ་སྨིན་པར་བྱེད་དོ། །སེམས་ཅན་གང་གཏུམ་པ་མི་ངེས་པའི་རང་བཞིན་ཅན་ལ་ཚངས་པའི་གནས་བཞི་སློབ་ཏུ་སྐུལ་བ་དང་། སེམས་ཅན་གང་ཞེ་སྡང་ཅན་ལ་བཟོད་པ་སློབ་པར་སྐུལ་བ་དང་། སེམས་ཅན་གང་ལེ་ལོ་ཅན་ལ་ནི་བརྩོན་འགྲུས་སློབ་ཏུ་སྐུལ་བ་དང་། སེམས་ཅན་གང་སེམས་གཡེངས་པ་ལ་ནི་བསམ་གཏན་སྒོམ་པར་སྐུལ་བ་དང་། སེམས་ཅན་གང་འཆལ་བའི་ཤེས་རབ་ཅན་ལ་ནི་ཡང་དག་པའི་ཆོས་སྟོན་པས་བཀའ་ལུང་བརྡ་སྤྲོད་ཅིང་ལུང་འབོགས་པ་ལ་ཐབས་མཁས་པས་ཡོངས་སུ་སྨིན་པར་བྱེད་དོ། །སེམས་ཅན་གང་དཀོན་མཆོག་གསུམ་ལ་མངོན་པར་མ་དད་ཅིང་མི་གནས་པ་དང་།
མི་སྤྱོད་པ་ཅན་ལ་ནི་དཀོན་མཆོག་གསུམ་ལ་སྐྱབས་སུ་འགྲོ་བ་དང་། དཀོན་མཆོག་གསུམ་ལ་དད་པ་དང་། དགེ་བསྙེན་པའི་སྡོམ་པ་ལ་བསླབ་པ་དང་། བསྙེན་གནས་པའི་སྡོམ་པ་བསླབས་པས་ཡོངས་སུ་སྨིན་པར་བྱེད་དོ། །གཞན་ཡང་བཟོ་དང་སྒྱུ་རྩལ་རྣམ་པ་སྣ་ཚོགས་ཀྱི་གནས་ལ་སློབ་ཅིང་སྤྱོད་དུ་བཙུད་པས་ཡོངས་སུ་སྨིན་པར་བྱེད་དོ། །དེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་པའི་ཤིན་ཏུ་ཐབས་མཁས་པའི་ཡེ་ཤེས་ཀྱི་རྣམ་པ་ནི་ཆུ་ཀླུང་གང་གཱའི་བྱེ་མ་སྙེད་པས་མང་ངོ་། །དེ་ལྟར་ཡི་གེ་དང་། གཙུག་ལག་དང་། བཟོ་དང་། སྒྱུ་རྩལ་གྱི་ལས་ཀྱི་གནས་ཐམས་ཅད་ལ་ལྷག་པའི་སྤྱོད་པ་དང་། བརྩོན་འགྲུས་དང་། ཐབས་མཁས་པའི་ཡེ་ཤེས་ཀྱིས་མུ་སྟེགས་ཅན་དང་། སྟོན་པ་གཞན་ལ་ཞུགས་པ་ཐམས་ཅད་བཏུལ་བ་དེ་ནི་བྱང་ཆུབ་སེམས་དཔའི་འཇིག་རྟེན་པའི་ཐབས་མཁས་པའོ། །ཐབས་མཁས་པ་འདི་ནི་ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་ཡིན་ཏེ། སངས་རྒྱས་ཀྱི་ཆོས་ཐམས་ཅད་གནས་པའི་རྒྱུར་གྱུར་པ། ཐབས་མཁས་པ་སྤྱོད་པའི་གནས་སུ་གྱུར་པ་ཤིན་ཏུ་ཐབས་མཁས་པ་ལྷུན་གྱིས་གྲུབ་པས་རྟོག་པ་མེད་པའི་ཕྱིར་ལྡོག་པ་མེད་པའི་ཆོས་སུ་གྱུར་པའོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་གང་སྟོན་པ་མཁས་པ་ལའང་མི་རྟེན། དགེ་བའི་བཤེས་གཉེན་ལའང་མི་ལྟོས་པར་འཇིག་རྟེན་གྱི་ཐབས་མཁས་པ་ལ་ནན་ཏན་བྱེད་ན། བྱང་ཆུབ་སེམས་དཔའ་དེ་ནི་འཇིག་རྟེན་གྱི་ཐབས་མཁས་པས་རྨོངས་པ་ཡིན་ཏེ། ངན་སོང་དུ་ལྟུང་བར་འགྱུར་རོ། །དེ་ནི་འཇིག་རྟེན་ལས་འདས་པའི་ཤིན་ཏུ་ཐབས་མཁས་པའི་ཡེ་ཤེས་ལ་གཞོལ་ཞིང་གནས་པར་ཡང་མི་ནུས་ལ། ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །ཤིན་ཏུ་ཐབས་མི་མཁས་པས་སེམས་ཅན་གྱི་དབང་པོ་དང་། སྤྱོད་པའི་ཁྱད་པར་ཡང་མི་ཤེས་ལ། ཤིན་ཏུ་ཐབས་མཁས་པ་ལའང་རྨོངས་པར་གྱུར་པས་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོའི་སྣོད་མ་ཡིན་པ་དང་། ཐེག་པ་ཆེན་པོའི་དབང་པོར་མ་སྨིན་པ་དག་ལ་ཐེག་པ་ཆེན་པོ་སྟོན་པ་དང་། སློབ་ཅིང་ནན་ཏན་བྱེད་དུ་བཅུག་གོ །
གང་ཐེག་པ་ཆེན་པོའི་ཆོས་ཀྱི་སྣོད་དུ་གྱུར་པའི་སེམས་ཅན་ལ་ནི་ཉན་ཐོས་དང་། རང་སངས་རྒྱས་ཀྱི་ཐེག་པའི་ཆོས་སྟོན་ཅིང་། ཉན་ཐོས་དང་། རང་སངས་རྒྱས་ཀྱི་ཐེག་པ་ལ་སློབ་ཅིང་ནན་ཏན་བྱེད་དུ་བཅུག་གོ །གང་སངས་རྒྱས་ཀྱི་ཐེག་པའི་ཆོས་ཀྱི་སྣོད་དུ་གྱུར་པའི་སེམས་ཅན་ལ་ནི་ཉན་ཐོས་ཀྱི་ཐེག་པའི་ཆོས་སྟོན་ཅིང་། ཉན་ཐོས་ཀྱི་ཐེག་པ་ལ་སློབ་ཅིང་ནན་ཏན་བྱེད་དུ་བཅུག་གོ །གང་ཉན་ཐོས་ཀྱི་ཐེག་པའི་ཆོས་ཀྱི་སྣོད་དུ་གྱུར་པའི་སེམས་ཅན་ལ་ནི་འཁོར་བའི་ཆོས་ལ་བདེ་བ་དང་དགའ་བར་སྟོན་ཏེ། འཁོར་བའི་ཆོས་ལ་སྐྱོ་བ་སྐྱེད་པར་མི་སྟོན་ཏོ། །གཞན་ཡང་ཤིན་ཏུ་ཐབས་མཁས་པ་ལ་རྨོངས་པས་སེམས་ཅན་གང་སྲོག་གཅོད་པ་ལ་དགའ་བ་ནས་དེ་བཞིན་དུ་ལོག་པར་ལྟ་བའི་བར་དུ་མོས་པ་དག་ལ་ནི་ཤིན་ཏུ་ཟབ་པ་ཐེག་པ་ཆེན་པོའི་ཆོས་སྟོན་ཏེ། དེ་ལ་འཁོར་བ་འདི་ནས་ཤི་འཕོས་ནས་ཕ་རོལ་ཏུ་སྐྱེ་ཞིང་སྡུག་བསྔལ་གྱི་འབྲས་བུ་རྣམ་པར་སྨིན་པ་མྱོང་བ་ལ་སྐྱོ་ཞིང་འཇིགས་པ་དང་། སྡིག་པ་མི་དགེ་བའི་ཆོས་སྤོང་བ་མི་སྟོན་ཏོ། །གཞན་ཡང་ཤིན་ཏུ་ཐབས་མཁས་པ་ལ་རྨོངས་པས་སེམས་ཅན་གང་ཚུལ་ཁྲིམས་སྲུང་བར་མོས་པ་ལ་ནི་སྦྱིན་པ་སྤྱོད་དུ་འཇུག་གོ །སེམས་ཅན་གང་བཟོད་པ་སྒོམ་པར་མོས་པ་ལ་ནི་བཟོད་པ་སྤོང་བ་སྟོན་ཅིང་ཚུལ་ཁྲིམས་སྲུང་དུ་འཇུག་གོ །སེམས་ཅན་གང་བརྩོན་འགྲུས་སྒོམ་པར་མོས་པ་ལ་ནི་བརྩོན་འགྲུས་སྤོང་བ་སྟོན་ཅིང་བཟོད་པ་སྤྱོད་དུ་འཇུག་གོ །སེམས་ཅན་གང་བསམ་གཏན་སྒོམ་པར་མོས་པ་ལ་ནི་བསམ་གཏན་སྤོང་བ་སྟོན་ཅིང་བརྩོན་འགྲུས་ལ་ནན་ཏན་བྱེད་དུ་བཅུག་གོ །སེམས་ཅན་གང་ཤེས་རབ་སྒོམ་པར་མོས་པ་ལ་ནི་ཤེས་རབ་སྤོང་བ་སྟོན་ཅིང་བསམ་གཏན་སྒོམ་དུ་འཇུག་གོ །དེ་ལྟར་བྱང་ཆུབ་སེམས་དཔའ་འཇིག་རྟེན་གྱི་ཐབས་མཁས་པ་ལ་རྨོངས་པས་ཡང་དག་པ་ཇི་ལྟ་བ་བཞིན་དུ་སེམས་ཅན་ལ་ཕན་པ་དང་བདེ་བའི་དོན་བྱེད་མི་ནུས་ཏེ། སེམས་ཅན་ཐམས་ཅད་ཀྱི་སྡིག་པའི་གྲོགས་པོར་གྱུར་ཏོ། །ཐབས་མཁས་པ་འདི་ནི་དམིགས་པ་དང་བཅས་པ་ཆགས་པ་དང་བཅས་པ་སྟེ། འདི་ནི་བྱང་ཆུབ་སེམས་དཔའི་འཇིག་རྟེན་གྱི་ཐབས་མཁས་པ་ཞེས་བྱའོ། །དེ་ལྟར་འཇིག་རྟེན་གྱི་ཐབས་མཁས་པ་འདི་ནི་ཉན་ཐོས་དང་། རང་སངས་རྒྱས་ཀྱི་
ཐེག་པ་དང་ཐུན་མོང་པ་ཡིན་ཏེ། གོ་ཆ་ཆེན་པོའི་འཁོར་ལོ་མ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའ་འཇིག་རྟེན་ལས་འདས་པའི་ཤིན་ཏུ་ཐབས་མཁས་པ་ཡིན་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་བདག་གི་དོན་བཏང་སྟེ། གཞན་གྱི་དོན་ལྷུར་བྱེད་པས་བཟོ་དང་སྒྱུ་རྩལ་རྣམ་པ་སྣ་ཚོགས་མངོན་པར་སྟོན་པས་ཡོངས་སུ་སྨིན་པར་བྱ་བའི་ཕྱིར་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་དང་། ཕ་དང་མ་ལ་བསྙེན་བཀུར་དང་། མཆོད་པ་བྱེད་པ་དང་། ནད་པ་དང་། ཕོངས་པ་དང་། ཉམ་ཐག་པ་དང་། མགོན་དང་སྐྱབས་མེད་པ་དང་། ཤིན་ཏུ་སྡུག་བསྔལ་རྣམ་པ་མང་པོས་གཟིར་བ་ལ་ཐབས་ཀྱིས་སྒྲོལ་བ་དང་། བསྡུ་བའི་དངོས་པོ་རྣམ་པ་བཞིས་སེམས་ཅན་ཡོངས་སུ་སྨིན་པར་བྱེད་དོ། །ཅི་ལ་མོས་པ་དང་། དབང་པོ་དང་། སྣོད་ཇི་ལྟ་བ་བཞིན་དུ་སེམས་ཅན་ལ་དམ་པའི་ཆོས་སྟོན་ཏོ། །གཞན་ཡང་རིམ་གྱིས་ཉན་ཐོས་ཀྱི་ཐེག་པ་པ་ནི་རང་སངས་རྒྱས་ཀྱི་ཐེག་པ་ལ་སློབ་ཅིང་ནན་ཏན་བྱེད་པར་སྐུལ་བ་དང་། རང་སངས་རྒྱས་ཀྱི་ཐེག་པ་པ་ནི་ཐེག་པ་ཆེན་པོ་སློབ་ཅིང་ནན་ཏན་བྱེད་པར་སྐུལ་བ་དང་། གལ་ཏེ་ཉན་ཐོས་དང་། རང་སངས་རྒྱས་ཀྱི་ཐེག་པར་དབང་པོ་མ་སྨིན་པ་ནི་འཁོར་བའི་སྡུག་བསྔལ་གྱི་ཆོས་ཀྱིས་སྐྱོ་བ་སྟོན་ཅིང་འཁོར་བས་སྐྱོ་བ་དང་། མྱ་ངན་ལས་འདའ་བ་ཚོལ་བར་སྐུལ་ལོ། །སེམས་ཅན་གང་སྲོག་གཅོད་པ་ལ་མོས་པ་ནས་ལོག་པར་ལྟ་བའི་བར་དུ་ཆགས་པ་ལ་ནི་དབང་པོ་དང་། རང་བཞིན་ཇི་ལྟ་བ་བཞིན་དུ་འཁོར་བར་འཁོར་བའི་ཆོས་སྟོན་པ་དང་། འཇིག་རྟེན་འདི་ནས་ཕ་རོལ་དུ་སྐྱེ་བ་དང་། ཕ་རོལ་གྱི་སྡུག་བསྔལ་གྱི་འབྲས་བུ་མྱོང་བར་སྟོན་ཏེ། སྡིག་པ་མི་དགེ་བའི་ཆོས་ཀྱིས་འཇིགས་པ་དང་སྐྱོ་བ་སྟོན་ཏོ། །ཁ་ཅིག་ལ་ནི་ཉན་ཐོས་ཀྱི་ཐེག་པ་དང་ལྡན་པའི་ཆོས་སྟོན་ཏོ། །ཁ་ཅིག་ལ་ནི་རང་སངས་རྒྱས་ཀྱི་ཐེག་པ་དང་ལྡན་པའི་ཆོས་སྟོན་ཏོ། །ཁ་ཅིག་ལ་ནི་བླ་ན་མེད་པའི་ཐེག་པའི་ཆོས་
ཡང་དག་པར་བསྟན་ཏེ་ཁད་ཀྱིས་སློབ་ཏུ་འཇུག་གོ །སེམས་ཅན་གང་སྦྱིན་པ་ལ་མོས་པར་གྱུར་པ་རྣམས་ལ་ནི་ཚུལ་ཁྲིམས་རྣམ་པར་དག་པའི་མཆོག་སྲུང་བར་བསྟན་པ་དེ་བཞིན་དུ་རྒྱས་པར་སེམས་ཅན་གང་བསམ་གཏན་ལ་མོས་པར་གྱུར་པ་ལ་ནི་ཟག་པ་མེད་པ་འཕགས་པའི་ལམ་གྱི་མཆོག་གིས་བསྡུས་པ་དང་། ཤེས་རབ་བླ་ན་མེད་པ་སྟོན་ཅིང་ནན་ཏན་བྱེད་དུ་བཅུག་སྟེ། ཤིན་ཏུ་ཐབས་མཁས་པ་འདི་ནི་དམིགས་པ་མེད་པ་དང་། ཆགས་པ་མེད་པ་སྟེ། འདི་ནི་བྱང་ཆུབ་སེམས་དཔའི་འཇིག་རྟེན་ལས་འདས་པའི་ཐབས་མཁས་པའི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤིན་ཏུ་ཐབས་མཁས་པའི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་པ་ལྔ་ཡོངས་སུ་བསལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། བསྲུང་བ་དང་། བསྙེན་བཀུར་བྱ་བའོ། །དེ་ནས་བཅོམ་ལྡན་འདས་ཀྱིས་དོན་དེ་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཤེས་རབ་ནན་ཏན་རྣམ་གཉིས་ཏེ། །འཇིག་རྟེན་བཅས་དང་འཇིག་རྟེན་འདས། །ཆགས་པ་དེ་ནི་འཇིག་རྟེན་བཅས། །ཆགས་མེད་པ་ནི་འཇིག་རྟེན་འདས། །ཤིན་ཏུ་ཐབས་མཁས་ནན་ཏན་ནི། །ཁྱད་པར་རྣམ་པ་གཉིས་ལ་གནས། །དམིགས་པ་ཡོད་པ་འཇིག་རྟེན་བཅས། །དམིགས་མེད་དེ་ནི་འཇིག་རྟེན་འདས། །གང་ཞིག་ཐེག་པ་གཅིག་སྟོན་པ། །དེ་ནི་ལེགས་པར་ཆོས་སྟོན་མིན། །བདག་ཀྱང་ཡོངས་སུ་མི་སྨིན་ན། །གཞན་གྱི་དོན་དུ་ག་ལ་འགྱུར། །གཅིག་ཏུ་མི་དགེ་སེམས་ཅན་ལ། །ཐེག་པ་གསུམ་གྱི་ཆོས་སྟོན་ན། །དེ་ནི་གཏི་མུག་རྨོངས་པ་སྟེ། །བྱང་ཆུབ་ཆེན་པོ་དེའི་མ་ཡིན། །ཐེག་པ་གསུམ་ལ་འཇུག་སྤྲོ་ཞིང་། །ཡང་དག་པ་ཡི་ཆོས་འདོད་ལ། །འཁོར་བས་སྤྲོ་བའི་ཆོས་སྟོན་ན། །མཁས་པའི་རང་བཞིན་དེ་མ་ཡིན། །རྩེ་གཅིག་
བློ་ཡིས་རབ་བརྟགས་ཏེ། །འདོད་དང་མོས་པ་བཞིན་དུ་སྟོན། །འདི་ནི་ཤིན་ཏུ་ཐབས་མཁས་པས། །མཁས་པ་རྣམས་ཀྱིས་དེ་ལ་བསྔགས། །སེམས་ཅན་སྡིག་པ་དག་སྤྱོད་ཅིང་། །ཐེག་པ་གསུམ་གྱི་སྣོད་འགྱུར་ན། །དབང་པོའི་སྣོད་བཞིན་ཆོས་བསྟན་ཏེ། །སྡིག་པ་ཀུན་ལས་གྲོལ་བར་བྱེད། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་ཡོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པས་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱ་བར་འགྱུར་རོ། །དེ་ལ་ཇི་ལྟར་ན་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་བྱམས་པ་ལ་རྣམ་པ་གཉིས་ཏེ། ཆོས་ལ་དམིགས་པའི་བྱམས་པ་དང་། སེམས་ཅན་ལ་དམིགས་པའི་བྱམས་པའོ། །ཆོས་ལ་དམིགས་པའི་བྱམས་པ་ནི་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་ཞེས་བྱའོ། །སེམས་ཅན་ལ་དམིགས་པའི་བྱམས་པ་ནི་བྱམས་པ་ཆེན་པོའི་གོ་ཆ་ཞེས་མི་བྱའོ། །དེ་ཅིའི་ཕྱིར་ཞེ་ན། སེམས་ཅན་ལ་དམིགས་པའི་བྱམས་པ་ནི་ཉན་ཐོས་དང་། རང་སངས་རྒྱས་ཀྱི་ཐེག་པ་དང་ཐུན་མོང་དུ་གྱུར་པ་སྟེ། ཉན་ཐོས་དང་། རང་སངས་རྒྱས་ནི་བདག་ལ་ཕན་པ་དང་བདེ་བའི་དོན་གྱི་ཕྱིར་སེམས་ཅན་ལ་དམིགས་པའི་བཟོད་པ་ལ་ནན་ཏན་བྱེད་དོ། །ཉན་ཐོས་དང་། རང་སངས་རྒྱས་ནི་བདག་ཞི་བ་དང་། བདག་མྱ་ངན་ལས་འདའ་བ་དང་། བདག་གི་སྒྲིབ་པ་བསལ་བ་དང་། བདག་གི་ཀུན་ནས་ཉོན་མོངས་པ་གཅད་པའི་ཕྱིར་ཡིན་གྱི་སེམས་ཅན་ཐམས་ཅད་ཀྱི་ཕྱིར་སེམས་ཅན་ལ་དམིགས་པའི་བྱམས་པས་བརྩོན་འགྲུས་ལ་ནན་ཏན་བྱེད་པ་ནི་མ་ཡིན་ནོ། །དེ་བས་ན་བྱམས་པ་འདི་ནི་བྱམས་པ་ཆེན་པོ་ཞེས་མི་བྱ་སྟེ། གོ་ཆ་ཆེན་པོ་མ་ཡིན་ནོ། །ཆོས་ལ་དམིགས་པའི་བྱམས་པ་ནི་ཉན་ཐོས་དང་། རང་སངས་རྒྱས་ཀྱི་ཐེག་པ་པ་དང་ཐུན་མོང་བ་མ་ཡིན་གྱི། བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་འབའ་ཞིག་གིས་ནན་ཏན་བྱེད་ནུས་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ། བརྩོན་འགྲུས་ཀྱི་སྦྱོར་བས་ཆོས་ལ་དམིགས་པའི་བྱམས་པ་འདི་ལ་ནན་ཏན་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བ་དང་། ཀུན་ནས་ཉོན་མོངས་པ་ཡོངས་སུ་གཅད་པའི་ཕྱིར་ཤིན་ཏུ་འབད་པའི་བརྩོན་འགྲུས་ཀྱིས་ཆོས་ལ་དམིགས་པའི་བྱམས་པ་ལ་ནན་ཏན་བྱེད་དོ། །དེ་བས་ན་བྱམས་པ་འདི་ནི་བྱམས་པ་ཆེན་པོའི་གོ་ཆ་ཆེན་པོ་ཞེས་བྱའོ། །གཞན་ཡང་བྱང་ཆུབ་སེམས་དཔའ་ཆོས་ལ་དམིགས་པའི་བྱམས་པ་ལ་ནན་ཏན་བྱེད་པ་ནི་ཕུང་པོ་ལ་མི་གནས། སྐྱེ་མཆེད་ལ་མི་གནས། ཁམས་ལ་མི་གནས། དྲན་པ་ཉེ་བར་གཞག་པ་རྣམས་ལ་མི་གནས་པ་ནས་བྱང་ཆུབ་ཀྱི་ལམ་གྱི་ཡན་ལག་གི་བར་དུ་མི་གནས་སོ། །འདོད་པའི་ཁམས་ལ་མི་གནས། གཟུགས་ཀྱི་ཁམས་ལ་མི་གནས། གཟུགས་མེད་པའི་ཁམས་ལ་མི་གནས། འཇིག་རྟེན་འདི་ལ་མི་གནས། འཇིག་རྟེན་ཕ་རོལ་ལ་མི་གནས། ཚུ་རོལ་གྱི་མུ་ལ་མི་གནས། ཕ་རོལ་གྱི་མུ་ལ་མི་གནས། དམིགས་པ་ལ་མི་གནས། མི་དམིགས་པ་ལ་མི་གནས་ཏེ། དེ་ལྟར་བྱང་ཆུབ་སེམས་དཔའ་ཆོས་ལ་དམིགས་པའི་བྱམས་པ་ལ་ནན་ཏན་བྱེད་པས་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཐེག་པའི་ས་ལས་ཤིན་ཏུ་འདས་ཏེ། དེ་ནི་བྱང་ཆུབ་སེམས་དཔའི་ཆོས་ལ་དམིགས་པའི་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་
དེ་བཀའ་སྩལ་པ། ཉན་ཐོས་དང་ནི་རང་རྒྱལ་བ། །སེམས་ཅན་དམིགས་པའི་བྱམས་སྒོམ་པ། །སེམས་ལ་བཅུ་གསུམ་སྐྱོན་འཆང་ཞིང་། །བདག་ལ་ཕན་པའི་དོན་ཕྱིར་རྩོལ། །བྱང་ཆུབ་སེམས་དཔའ་གྲགས་ཆེན་ནི། །སེམས་ཅན་ཐམས་ཅད་ཀུན་གྱི་ཕྱིར། །ཐུན་མོང་མ་ཡིན་བྱམས་ཆེན་བསྒོམས། །བཅུ་གསུམ་སེམས་ཀྱི་སྐྱོན་རྣམས་སྤངས། །དྲི་མ་བཅུ་གསུམ་རབ་སྤངས་ནས། །བྱང་ཆུབ་ཆེན་པོར་གཞོལ་བར་བྱེད། །ཆོས་ལ་དམིགས་པའི་བྱམས་བསྒོམས་ན། །བསོད་ནམས་ཞིང་གྲུབ་རིང་བ་མིན། །བཅུ་གསུམ་སྟོབས་ལ་བདེར་གནས་ན། །སེམས་ཅན་ཀུན་ལས་ཤིན་ཏུ་འཕགས། །ཇི་ལྟར་སེང་གེའི་རྒྱལ་པོ་དེ། །རི་དགས་ཀུན་ལས་འཕགས་པ་བཞིན། །བཅུ་གསུམ་དགྲ་རྣམས་ཤིན་ཏུ་བཏུལ། །རྟག་དང་ཆད་པའི་མཐར་འཛིན་སྤངས། །སེམས་ལ་ཅིས་ཀྱང་མི་གོས་ན། །མྱུར་དུ་བྱང་ཆུབ་ཆེན་པོ་འཐོབ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་ཡོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་པ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པས་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་ཞིང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱ་བར་འགྱུར་རོ། །དེ་ཇི་ལྟར་ཞེ་ན། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ནི་བདག་ལ་ཕན་པ་དང་བདེ་བའི་དོན་གྱི་ཕྱིར་སྙིང་རྗེ་ལ་སྤྱོད་ཀྱི། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་སྙིང་རྗེ་ཆེན་པོ་སྐྱེད་པ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདག་འབའ་ཞིག་ལ་ཕན་པ་དང་བདེ་བའི་དོན་གྱི་ཕྱིར་སྙིང་རྗེ་ཆེན་པོ་སྐྱེད་པ་མ་ཡིན་གྱི། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་སྙིང་རྗེ་ཆེན་པོ་སྐྱེད་དོ། །དེ་བས་ན་བྱང་ཆུབ་སེམས་དཔའ་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་དང་ལྡན་པས་ཉན་ཐོས་དང་། རང་སངས་རྒྱས་
ཐམས་ཅད་ལས་ཤིན་ཏུ་འདས་པ་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་བསྡུ་བའི་དངོས་པོ་རྣམ་པ་བཞིས་སེམས་ཅན་ཡོངས་སུ་སྨིན་པར་བྱེད་དོ། །སྙིང་རྗེ་ཆེན་པོས་སེམས་ཅན་ཐམས་ཅད་ལ་བདེ་བའི་དོན་གྱི་ཕྱིར་སྦྱིན་པས་ཡོངས་སུ་སྡུད་པ་ནི་འདི་ལྟ་སྟེ། རིན་པོ་ཆེ་དང་། ནོར་དང་། དབྱིག་དང་། ཐེག་པ་དང་། བྲན་དང་། ལས་བྱེད་པའི་མི་དང་། ཡུལ་དང་། སྲིད་དང་། བུ་དང་། ཆུང་མ་ དང་། ལུས་དང་། སྲོག་གི་བར་དུ་ཡོངས་སུ་གཏོང་བ་ལ་སེར་སྣ་མེད་དེ། མི་དམིགས་པའི་སྤྱོད་པ་ལ་སྦྱོར་བས་འདུལ་བའི་སེམས་ཅན་ཡོད་པར་མི་མཐོང་། སྦྱིན་པ་བྱེད་པར་མི་མཐོང་། ལེན་པར་མི་མཐོང་། ནོར་གྱི་དངོས་པོར་མི་མཐོང་། སྦྱིན་པ་སྤྱོད་པར་མི་མཐོང་། སྦྱིན་པ་བྱས་པའི་འབྲས་བུར་མི་མཐོང་བ་ནས་མི་དམིགས་པའི་བར་དུ་ཡང་མི་མཐོང་སྟེ། དེ་ལྟ་བུའི་སྙིང་རྗེ་ཆེན་པོ་སྐྱེད་དོ། །སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་ངག་སྙན་པ་དང་། དོན་སྒྲུབ་པ་དང་། དོན་འཐུན་པས་ཅི་དང་ཅིས་འདུལ་བ་བཞིན་དུ་མི་དམིགས་པ་ཡང་མི་མཐོང་བའི་བར་དུ་དེ་དང་དེས་རྒྱས་པར་སྟོན་ཅིང་འཆད་དོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྟག་ཏུ་མཆོག་དམ་པའི་དུལ་བའི་སེམས་དང་། རབ་ཏུ་ཞི་བའི་སེམས་དང་། ཚད་མེད་པའི་སེམས་དང་། ཕུང་པོ་དང་། ཁམས་དང་། སྐྱེ་མཆེད་ཐམས་ཅད་ལ་མངོན་པར་འདུ་མི་བྱེད་པའི་སེམས་ཀྱིས་གང་ནས་གང་དུ་སྐྱེས་ཀྱང་གཡོ་བ་མེད་པ་དང་། མི་གནས་པའི་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་འདིས་སྣོད་དུ་གྱུར་པའི་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་ལ་སྐྱོ་བ་མེད་དོ། །དེ་ལྟར་ན་བྱང་ཆུབ་སེམས་དཔའ་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་ཞེས་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་སྙིང་རྗེ་ཆེན་པོའི་
གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཤིན་ཏུ་ཟབ་མོ་དམ་པའི་ཆོས་དག །སྙིང་རྗེ་ཆེན་པོའི་གཞི་རུ་དེ་འགྱུར། །ཤིན་ཏུ་དཔག་དཀའ་ནམ་མཁའ་འདྲ་སྟེ། །གནས་པ་མེད་དེ་གཟུགས་ཀྱང་མེད་དོ། །བྱང་ཆུབ་སེམས་དཔའི་བརྩོན་འགྲུས་ཆེན་པོ། །ཡོན་ཏན་ཆེན་པོ་དང་ནི་ལྡན་ཏེ། །རྒྱལ་བའི་ཡེ་ཤེས་སྙིང་རྗེ་ཆེན་པོས། །དཔའ་བོ་འཇིག་རྟེན་འདའ་བར་དེས་འགྱུར། །མགོན་དང་སྐྱབས་མེད་སེམས་ཅན་དག་ནི། །འཁོར་བའི་སྡུག་བསྔལ་རྙོག་པས་བཅིངས་པ། །སྙིང་རྗེ་ཆེན་པོའི་ཆུ་ཡིས་བཀྲུས་ཏེ། །སེམས་ཅན་རྣམ་པར་གྲོལ་བར་བྱེད་དོ། །བྱང་ཆུབ་སེམས་དཔའི་སྙིང་རྗེ་བསྐྱེད་པས། །འཁོར་བའི་རྒྱ་མཚོ་སྐེམས་པར་བྱེད་དེ། །ཉན་ཐོས་ཐེག་པའི་འཁོར་རྣམས་དང་ནི། །རང་རྒྱལ་ཐེག་པ་སྤྱོད་པས་མ་ཡིན། །འདོད་ཆགས་ཞེ་སྡང་གཏི་མུག་སེམས་ཅན། །ངན་སོང་དག་ཏུ་ལྟུང་བར་འགྱུར་བ། །སྙིང་རྗེ་ཆེན་པོའི་ཆུ་ཡིས་བཀྲུས་ཏེ། །སྡུག་བསྔལ་ཀུན་ལས་གྲོལ་བར་བྱེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་སོ་སོ་ཡང་དག་པར་རིག་པ། ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཤིན་ཏུ་རྒྱ་ཆེན་པོ་དང་ལྡན་པ་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང་། གཟུངས་རྣམས་དང་། ཤིན་ཏུ་བརྟན་པའི་བཟོད་པ་ཆེན་པོའི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་པ་ལྔ་ཡོངས་
སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་པ་ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ་ཚད་མེད་པ་མཐའ་ཡས་པ། ཤིན་ཏུ་རྒྱ་ཆེ་བ་དང་ལྡན་པ་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང་། གཟུངས་རྣམས་དང་། ཤིན་ཏུ་བརྟན་པ་ཆེན་པོའི་གོ་ཆ་ཆེན་པོའི་འཁོར་ལོ་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་ཆོས་ཐམས་ཅད་ལ་ཤིན་ཏུ་རྟོག་པ་ནི་ཇི་ལྟར་ཟླ་བའི་དཀྱིལ་འཁོར་གྱི་འོད་ཀྱིས་ནམ་མཁའ་ཀུན་ཏུ་ཁྱབ་པ་བཞིན་དུ། སེམས་མཉམ་པ་ཉིད་དུ་གྱུར་པ། མཚན་མ་མེད་པ་རྟེན་པ་མེད་པ་མི་གནས་པ། གོས་པ་མེད་པའི་ཏིང་ངེ་འཛིན་ཐམས་ཅད་ཀྱི་སྒོ་དང་། གཟུངས་ཀྱི་སྒོ་ཐམས་ཅད་ལ་སེམས་ཀྱི་སྤྱོད་པ་མེད་པ། མིག་དང་། གཟུགས་དང་། མིག་གི་རྣམ་པར་ཤེས་པ་དང་། མིག་གི་འདུས་ཏེ་རེག་པ་ལ་ཡིད་ཀྱིས་རྣམ་པར་ཞེན་པ་དང་བྲལ་བ། སེམས་ཀྱི་སྤྱོད་པ་མེད་པ་ལས་མིག་གི་འདུས་ཏེ་རེག་པའི་རྐྱེན་གྱིས་ནང་གི་ཚོར་བ་རྣམ་གསུམ་སྐྱེས་ཏེ། བདེ་བ་དང་། སྡུག་བསྔལ་དང་། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པར་ཚོར་བ་ལ་སེམས་རབ་ཏུ་ཞི་ཞིང་ཆགས་པ་མེད་དོ། །དེ་བཞིན་དུ་རྣ་བ་དང་། སྒྲ་དང་། རྣ་བའི་རྣམ་པར་ཤེས་པ་དང་། རྣ་བའི་འདུས་ཏེ་རེག་པ་དང་། སྣ་དང་། དྲི་དང་། སྣའི་རྣམ་པར་ཤེས་པ་དང་། སྣའི་འདུས་ཏེ་རེག་པ་དང་། ལྕེ་དང་། རོ་དང་། ལྕེའི་རྣམ་པར་ཤེས་པ་དང་། ལྕེའི་འདུས་ཏེ་རེག་པ་དང་། ལུས་དང་། རེག་བྱ་དང་། ལུས་ཀྱི་རྣམ་པར་ཤེས་པ་དང་། ལུས་ཀྱི་འདུས་ཏེ་རེག་པ་དང་། ཡིད་དང་། ཆོས་དང་། ཡིད་ཀྱི་རྣམ་པར་ཤེས་པ་དང་། ཡིད་ཀྱི་འདུས་ཏེ་རེག་པའི་བར་དུ་གཞུང་དེ་བཞིན་དུ་རྒྱས་པར་སེམས་དང་། ཡིད་དང་། རྣམ་པར་ཤེས་པ་ཐམས་ཅད་རྟག་ཏུ་ཞི་ཞིང་ཆགས་པ་མེད་དོ། །སེམས་དང་། ཡིད་དང་། རྣམ་པར་ཤེས་པ་ལས་སྐྱེས་པའི་ཚོར་བ་རྣམ་གསུམ་སྟེ། བདེ་བ་དང་། སྡུག་བསྔལ་དང་། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པར་ཚོར་བ་ལ་སེམས་རྟག་ཏུ་ཞི་ཞིང་ཆགས་པ་མེད་དོ། །
དུས་གསུམ་གྱི་ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་རྣམ་པ་ཐམས་ཅད་ལ་ལེན་པ་མེད་པ། སེམས་ཀྱི་སྤྱོད་པ་མེད་པའོ། །གང་ཇི་སྙེད་ཁམས་གསུམ་དང་། འདུ་བྱེད་གསུམ་དང་། རེག་བྱ་གསུམ་དང་། ཚོར་བ་གསུམ་དང་། དབང་པོ་གསུམ་དང་། ཐེག་པ་གསུམ་དང་། སྡོམ་པ་གསུམ་དང་། རྣམ་པར་གྲོལ་བ་གསུམ་དང་། རྣམ་པ་དེ་དག་ཐམས་ཅད་ལ་སེམས་རབ་ཏུ་ཞི་བ། གནས་མེད་པ། མཚན་མ་མེད་པ། ལེན་པ་མེད་པས་མཉམ་པ་ཉིད་དུ་གནས་སོ། །གང་ཇི་སྙེད་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཕ་རོལ་ཏུ་ཕྱིན་པ་ཐམས་ཅད་ལ་སེམས་ཀྱི་སྤྱོད་པ་མེད་པ་རབ་ཏུ་ཞི་བར་གནས་སོ། །དེ་བཞིན་དུ་དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་ལ་ཡང་སེམས་ཀྱི་སྤྱོད་པ་མེད་པ་རབ་ཏུ་ཞི་བར་གནས་སོ། །གང་ཇི་སྙེད་དགུ་མཐར་གྱིས་གནས་པའི་སྙོམས་པར་འཇུག་པ་ལ་ཡང་སེམས་ཀྱིས་སྤྱོད་པ་མེད་པར་རབ་ཏུ་ཞི་བར་གནས་སོ། །གཞན་ཡང་མངོན་པར་འདུ་བྱེད་པ་གསུམ་དང་། ཆོས་ལ་སྒྲིབ་པ་མེད་པའི་ཡེ་ཤེས་དང་། ལམ་གྱི་ཡན་ལག་དང་། ལམ་གྱི་རང་བཞིན་འདྲེན་པར་བྱེད་པ་དག་ལ་ཡང་ལེན་པ་མེད་པ། སེམས་ཀྱི་སྤྱོད་པ་མེད་པ། ཀུན་གཞི་རྣམ་པར་ཤེས་པ་དང་། ཀུན་གཞི་རྣམ་པར་ཤེས་པ་མ་ཡིན་པ་དང་། ཉེ་བར་ལེན་པ་དང་བཅས་པ་དང་། ཉེ་བར་ལེན་པ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་དང་། ཚུ་རོལ་གྱི་མུ་དང་། ཕ་རོལ་གྱི་མུ་དང་། ཆུང་ངུ་དང་། ཆེན་པོ་དང་། ཚད་མེད་པ་དང་། བྱེད་པ་དང་། མི་བྱེད་པ་དང་། དགེ་བ་དང་། མི་དགེ་བ་དང་།
ལུང་དུ་མི་སྟོན་པ་ཐམས་ཅད་ཀྱི་རྣམ་པ་ལ་ལེན་པ་མེད་པ་དང་། སེམས་ཀྱི་སྤྱོད་པ་མེད་པར་རབ་ཏུ་ཞི་བར་གནས་སོ། །གང་ཇི་སྙེད་བྱམས་པ་ཆེན་པོ་དང་། སྙིང་རྗེ་ཆེན་པོ་དང་། ཐབས་མཁས་པས་སེམས་ཅན་ཡོངས་སུ་སྨིན་པར་བྱེད་པ་ནས་བསྲུང་བར་བྱ་བ་མེད་པ་གསུམ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དུ་ཆོས་ཐམས་ཅད་ཀྱི་རྣམ་པ་ལ་ལེན་པ་མེད་པ། སེམས་ཀྱི་སྤྱོད་པ་མེད་པར་རབ་ཏུ་ཞི་བར་གནས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དག་འཁོར་ལོ་འདིའི་དབང་གིས་ཚོར་བ་རྣམ་གསུམ་གྱི་ཉེས་པ་ཡོངས་སུ་བསལ་བ་དང་། རྣམ་པར་རྟོག་པ་ཐམས་ཅད་ཡོངས་སུ་ཞི་བ་དང་། མཚན་མའི་ཆོས་ཐམས་ཅད་ཡོངས་སུ་སྤོང་བར་འགྱུར་རོ། །གཞན་ཡང་ཇི་སྙེད་ནམ་མཁའི་མིག་དང་། སྤྱི་བོའི་ཏིང་ངེ་འཛིན་རྣམས་དང་། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ཡང་འདྲེན་པར་འགྱུར་ཏེ། བྱང་ཆུབ་སེམས་དཔའི་འཁོར་ལོ་དེ་ལ་གནས་པས་གང་འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང་། གཞན་ཡང་སྲིད་པ་དང་། འགྲོ་བ་རྣམས་སུ་འཁོར་བའི་ལས་ཐམས་ཅད་ལྷག་མ་མ་ལུས་པར་ཡོངས་སུ་བསལ་ཏེ། རྣམ་པར་སྨིན་པའི་འབྲས་བུ་མི་མྱོང་བར་བྱེད་དོ། །གཞན་ཡང་རིགས་ཀྱི་བུ། འདི་ལྟ་སྟེ། མུན་པ་ནག་པོས་ནམ་མཁའ་ཐམས་ཅད་ཡོག་པ་ན་ཉི་མ་ཤར་བའི་ཚེ་མུན་པ་ཐམས་ཅད་སེལ་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེན་པོ་དང་ལྡན་པས་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང་། གཟུངས་རྣམས་དང་། ཤིན་ཏུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་ཡང་གྲུབ་ཅིང་འདྲེན་པར་འགྱུར་རོ། །གཞན་ཡང་ནམ་མཁའི་མིག་དང་། སྤྱི་བོའི་ཏིང་ངེ་འཛིན་རྣམས་དང་། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ལ་གནས་པ་དཔག་ཏུ་མེད་པ་ནམ་མཁའ་ལྟ་
བུའི་ཡེ་ཤེས་ཀྱི་ཉི་མས་ཕྱིན་ཅི་ལོག་བཞིའི་མུན་པ་ཡོངས་སུ་བསལ་ཏེ། འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང་། གཞན་ཡང་སྲིད་པ་དང་འགྲོ་བ་རྣམས་སུ་འཁོར་བར་འཁོར་བའི་ལས་ཐམས་ཅད་ལྷག་མ་མ་ལུས་པར་ཡོངས་སུ་སེལ་ཏེ། རྣམ་པར་སྨིན་པའི་འབྲས་བུ་མྱོང་བར་མི་བྱེད་དོ། །གཞན་ཡང་དེའི་དབང་གིས་སངས་རྒྱས་ཀྱི་ཆོས་རྣམས་ལ་དབང་ཐོབ་པ་དང་། ཕྱིར་མི་ལྡོག་པར་འགྱུར་ཏེ། སྡིག་པའི་གྲོགས་པོའི་དབང་དུ་མི་འགྲོ་ཞིང་རྗེས་སུ་མི་སྤྱོད་པ་དང་། རྟག་ཏུ་སངས་རྒྱས་མཐོང་བ་དང་མི་འབྲལ་བ་དང་། བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང་། ཡོན་ཏན་ཐམས་ཅད་ལ་སེམས་མི་ངོམས་པ་ནས་བྱང་ཆུབ་ཀྱི་བར་དུ་རྒྱུན་མི་འཆད་དེ། རྟག་ཏུ་སངས་རྒྱས་རྗེས་སུ་དྲན་པ་དང་མི་འབྲལ་བ་ནི་ཆུང་ངུ་ན་རྨི་ལམ་དུ་ཡང་བར་ཆད་མེད་པར་འགྱུར་རོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་སོ་སོ་ཡང་དག་པར་རིག་པས་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེ་བ་དང་ལྡན་པས་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང་། གཟུངས་རྣམས་དང་། ཤིན་ཏུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་འདྲེན་པར་འགྱུར་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་བསམ་གཏན་དང་པོ་ནས་བསམ་གཏན་བཞི་པའི་བར་དུ་སྙོམས་པར་འཇུག་པ་དང་། ནམ་མཁའ་མཐའ་ཡས་སྐྱེ་མཆེད་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་དུ་སྙོམས་པར་འཇུག་པ་དང་། འདུ་ཤེས་དང་ཚོར་བ་འགོག་པའི་ཏིང་ངེ་འཛིན་ལ་སྙོམས་པར་འཇུག་པའི་ཏིང་ངེ་འཛིན་འདི་ལ་གནས་ན་ཚོར་བ་རྣམ་གསུམ་དང་། འདུ་བྱེད་གསུམ་པོ་ཡོངས་སུ་བཅད་དེ། མངོན་པར་འདུ་བྱེད་པ་དང་། གཡོ་བའི་སེམས་ཀྱི་སྤྱོད་པ་མེད་པ། ཚོར་བ་དང་། འདུ་ཤེས་དང་། སེམས་པ་དང་། རིག་པ་དང་། ཡིད་ལ་བྱེད་པ་ལ་སོགས་པ་ཀུན་
གཅོད་པར་འགྱུར་རོ། །ཏིང་ངེ་འཛིན་འདི་ལ་གནས་ན་ཞག་གཅིག་གམ། ཞག་བདུན་གྱི་བར་དུ་བསམ་གཏན་གྱི་ཟས་ཟ་བར་འགྱུར་རོ། །ཏིང་ངེ་འཛིན་དེ་ལས་ལངས་ན་ཡང་སེམས་རབ་ཏུ་ཞི་བ་ལེན་པ་མེད་ཅིང་། ལྷན་ནེར་གནས་པར་འགྱུར་རོ། །གཞན་ཡང་དོན་དམ་པའི་མཐས་གཏུགས་པའི་སྟོང་པ་ཉིད་ཀྱི་ཏིང་ངེ་འཛིན་ལ་མཉམ་པར་འཇོག་གོ །ཏིང་ངེ་འཛིན་དེ་ལ་གནས་ན་སེམས་རབ་ཏུ་མཉམ་པས་ནམ་མཁའ་ལྟར་ཆགས་པ་མེད་པ་དང་། ལུས་ཀྱི་བ་སྤུའི་བུ་ག་ཀུན་ནས་ཟིལ་དངར་གྱི་ཐིགས་པ་སྐར་མ་ལྟ་བུ། མངོན་པར་བྱུང་བས་ཀུན་ནས་ཉོན་མོངས་པས་བཅིངས་པའི་ཡོངས་སུ་གདུང་བ་ཐམས་ཅད་སེལ་བར་འགྱུར་རོ། །ཏིང་ངེ་འཛིན་དེ་ལས་ལངས་ནས་ཡང་དག་པའི་དྲན་པ་ཐོབ་སྟེ། དགའ་བ་ཁྱད་པར་ཅན་གྱིས་ལུས་ལ་ཁྱབ་པར་གྱུར་པ་ནི་ཇི་ལྟར་ལྷའི་སྲས་པོ་དང་། དབང་ཕྱུག་ཆེན་པོ་དང་། བདེ་བའི་ཏིང་ངེ་འཛིན་ཐམས་ཅད་ལ་འཇུག་པ་ནས་ལུས་ཀྱི་བ་སྤུའི་ཁུང་བུ་ཀུན་ནས་རབ་ཏུ་བདེ་བ་མྱོང་བ་བཞིན་དེ་ལྟར་བྱང་ཆུབ་སེམས་དཔའ་དེ་ལུས་ལ་བདེ་བས་རེག་པས་སངས་རྒྱས་རྗེས་སུ་དྲན་པར་འགྱུར་རོ། །སངས་རྒྱས་རྗེས་སུ་དྲན་པས་སངས་རྒྱས་མཐོང་བ་ལས་མཚན་མ་གཞན་མཐོང་བ་མེད་དོ། །བྱང་ཆུབ་སེམས་དཔའ་དེའི་ཚེ་སངས་རྒྱས་གཅིག་ཡིད་ལ་བྱས་ན་སངས་རྒྱས་གཅིག་མཐོང་ངོ་། །གལ་ཏེ་སངས་རྒྱས་མང་པོ་ཡིད་ལ་བྱས་ན་སངས་རྒྱས་མང་པོ་མཐོང་ངོ་། །གལ་ཏེ་སངས་རྒྱས་ཀྱི་སྐུ་ཆུང་བར་ཡིད་ལ་བྱས་ན་སངས་རྒྱས་ཀྱི་སྐུ་ཆུང་ངུར་མཐོང་ངོ་། །གལ་ཏེ་སངས་རྒྱས་ཀྱི་སྐུ་ཆེན་པོར་ཡིད་ལ་བྱས་ན་སངས་རྒྱས་ཀྱི་སྐུ་ཆེན་པོར་མཐོང་ངོ་། །གལ་ཏེ་སངས་རྒྱས་ཀྱི་སྐུ་ཚད་མེད་པར་ཡིད་ལ་བྱས་ན་སངས་རྒྱས་ཀྱི་སྐུ་ཚད་མེད་པར་མཐོང་ངོ་། །གལ་ཏེ་བདག་གི་ལུས་སངས་རྒྱས་ཀྱི་སྐུའི་མཚན་དང་ལྡན་པར་ཡིད་ལ་བྱས་ན་བདག་གི་ལུས་དེ་སངས་རྒྱས་ཀྱི་སྐུ་དང་འདྲ་བར་མཚན་ཕུན་སུམ་ཚོགས་པར་མཐོང་ངོ་། །གལ་ཏེ་གཞན་གྱི་ལུས་སངས་རྒྱས་ཀྱི་སྐུར་ཡིད་ལ་བྱས་ན་གཞན་གྱི་ལུས་སངས་རྒྱས་ཀྱི་སྐུ་དང་འདྲ་བར་མཚན་ཕུན་སུམ་ཚོགས་པར་མཐོང་ངོ་། །གལ་ཏེ་སེམས་ཅན་དང་སེམས་ཅན་མ་ཡིན་པ་དང་། ཇི་སྙེད་གཟུགས་སུ་གཏོགས་པ་ཐམས་ཅད་སངས་རྒྱས་ཀྱི་སྐུ་མཚན་དང་ལྡན་པར་ཡིད་ལ་བྱས་ན་སེམས་ཅན་དང་། སེམས་ཅན་མ་ཡིན་པ་དང་། ཇི་སྙེད་གཟུགས་སུ་གཏོགས་པ་ཐམས་ཅད་སངས་རྒྱས་ཀྱི་སྐུ་
དང་འདྲ་བར་མཚན་ཕུན་སུམ་ཚོགས་པར་མཐོང་གི་གཟུགས་གཞན་དུ་མི་མཐོང་ངོ་། །བྱང་ཆུབ་སེམས་དཔའ་དེའི་ཚེ་ཡང་འདི་སྙམ་དུ་ཆོས་ཐམས་ཅད་དང་། གཟུགས་ཐམས་ཅད་ནི་སྒྱུ་མ་དང་འདྲ་སྟེ། ཡང་དག་པ་མ་ཡིན་པས་བདག་གིས་ཚོར་བ་རྣམ་གསུམ་དང་། འདུ་བྱེད་གསུམ་ལ་སོགས་པ་ཆོས་ཐམས་ཅད་ལྷག་མ་མ་ལུས་པར་ཡོངས་སུ་གཅད་དོ་སྙམ་ནས་འགོག་པའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེ་ལ་གནས་ནས་བློ་སྔོན་དུ་བཏང་བ་བཞིན་དུ་ཐམས་ཅད་ཡོངས་སུ་བཅད་དེ་ཏིང་ངེ་འཛིན་གྱི་རོའི་ཟས་ཀྱིས་འཚོའོ། །གལ་ཏེ་ན་ཞག་བདུན་ནམ། ཞག་བདུན་གཉིས་སམ། བདུན་གསུམ་མམ། བཞིའམ། ལྔའམ། དྲུག་གམ། བདུན་ནམ། བརྒྱད་དམ། གལ་ཏེ་ན་བསྐལ་པ་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་ཅི་ནུས་སུ་གནས་ཏེ། ཏིང་ངེ་འཛིན་གྱི་ཟས་ཟའོ། །ཏིང་ངེ་འཛིན་དེ་ལས་ལངས་ནས་སེམས་རབ་ཏུ་ཞི་བས་ཅི་ལ་ཡང་མི་ཆགས་ཏེ་བདེ་བར་གནས་སོ། །གལ་ཏེ་དོན་དམ་པའི་མཐས་གཏུགས་པའི་ཏིང་ངེ་འཛིན་ལ་ཞུགས་ན་ཡང་སྔར་ཇི་སྐད་བཤད་པ་བཞིན་དུ་སངས་རྒྱས་ཀྱི་སྐུ་མཚན་དང་ལྡན་པ་ཡིད་ལ་བྱ་བ་ནས་ཆོས་ཐམས་ཅད་དང་། གཟུགས་ཐམས་ཅད་སྒྱུ་མ་དང་འདྲ་སྟེ་ཡང་དག་པ་མ་ཡིན་པའི་བར་དུ་ཆུད་པར་བྱེད་དོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེ་བ་དང་ལྡན་པ་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་ཐམས་ཅད་དང་། གཟུངས་ཐམས་ཅད་དང་། ཤིན་ཏུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དག་འཁོར་ལོ་འདི་དང་ལྡན་ན་ནམ་མཁའི་མིག་དང་། སྤྱི་བོའི་ཏིང་ངེ་འཛིན་རྣམས་དང་། གཟུངས་རྣམས་ལས་ཤིན་ཏུ་ཐབས་མཁས་པ་ཐམས་ཅད་ལྷག་མ་མ་ལུས་པར་སྤངས་ཏེ་རྣམ་པར་སྨིན་པའི་འབྲས་བུ་
ལེན་པར་མི་བྱེད་དོ། །གཞན་ཡང་རིགས་ཀྱི་བུ་འདི་ལྟ་སྟེ། འཇིག་རྟེན་གྱི་ཁམས་སུ་མེས་འཇིག་པ་འབྱུང་དུ་ཉེ་བ་ནི་ཉི་མ་ལྔ་ཅིག་ཅར་ཤར་ཏེ། འཇིག་རྟེན་གྱི་ཁམས་ན་རྫིང་བུ་དང་། རྫིང་བུ་ཆེན་པོ་དང་། འབབ་ཆུ་དང་། འབབ་ཆུ་ཆེན་པོ་དང་། མཚོ་དང་། མཚོ་ཆེན་པོའི་ཆུ་རྣམས་ལྷག་མ་མ་ལུས་པར་ཐམས་ཅད་སྐེམས་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེ་བ་དང་ལྡན་པས་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང་། གཟུངས་རྣམས་དང་། ཤིན་ཏུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་ཡང་མངོན་པར་འདྲེན་ཏོ། །གཞན་ཡང་ནམ་མཁའི་མིག་དང་། སྤྱི་བོའི་ཏིང་ངེ་འཛིན་རྣམས་དང་། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ལ་ཡང་གནས་ཤིང་འདྲེན་པར་འགྱུར་རོ། །གང་འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ། ངན་འགྲོ་མནར་མེད་པ་དང་། གཞན་ཡང་སྲིད་པ་དང་། འགྲོ་བ་རྣམས་སུ་འཁོར་བར་འཁོར་བའི་ལས་ཐམས་ཅད་ལྷག་མ་མ་ལུས་པར་ཡོངས་སུ་བསྐམས་ཏེ། རྣམ་པར་སྨིན་པའི་འབྲས་བུ་མི་ལེན་པར་བྱེད་དོ། །གཞན་ཡང་རིགས་ཀྱི་བུ་འདི་ལྟ་སྟེ། འཇིག་རྟེན་དུ་ཆུའི་འཇིག་པ་བྱུང་བ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཆུ་འདིའི་ཁམས་ཆུང་ངུའི་གླིང་ཆེན་པོ་བཞི་དང་། གླིང་ཕྲན་བརྒྱད་དང་། རི་རབ་རིའི་རྒྱལ་པོ་དང་། རི་ཕྲན་ཐམས་ཅད་ཆུ་ཡིས་བཀྲུས་ཏེ་ཞིག་ནས་ལྷག་མ་མ་ལུས་པར་ཟད་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེ་བ་དང་ལྡན་པས་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང་། གཟུངས་རྣམས་དང་། ཤིན་ཏུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་ཡང་འགྲུབ་ཅིང་འདྲེན་པར་འགྱུར་རོ། །ནམ་མཁའི་མིག་དང་། སྤྱི་བོའི་ཏིང་ངེ་འཛིན་རྣམས་དང་། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ལ་གནས་ཤིང་འདྲེན་པར་
འགྱུར་བས་འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང་། གཞན་ཡང་སྲིད་པ་དང་། འགྲོ་བ་རྣམས་སུ་འཁོར་བ་འཁོར་བའི་ལས་ལ་མཁས་པའི་གོ་ཆ་ཆེན་པོའི་འཁོར་ལོ་ལ་ཡང་གནས་པར་འགྱུར་རོ། །འཁོར་ལོ་འདི་ལ་གནས་པས་དཔག་ཏུ་མེད་པ་ནམ་མཁའ་ལྟ་བུའི་ཡེ་ཤེས་ཀྱི་ཉི་མ་བྱུང་བས་རང་གི་ལུས་ལ་ཕྱིན་ཅི་ལོག་བཞི་དང་། མ་རིག་པའི་མུན་པ་ཐམས་ཅད་ཡོངས་སུ་སེལ་བར་འགྱུར་རོ། །འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང་། གཞན་ཡང་སྲིད་པ་དང་། འགྲོ་བ་རྣམས་སུ་འཁོར་བར་འཁོར་བའི་ལས་ཐམས་ཅད་ཀྱང་ལྷག་མ་མ་ལུས་པར་ཡོངས་སུ་སེལ་ཏེ། རྣམ་པར་སྨིན་པའི་འབྲས་བུ་ཡང་མྱོང་བར་མི་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་རྣམ་ལྔ་ཡོངས་སུ་བསལ་ཏེ། ཉན་ཐོས་དང་། རང་སངས་རྒྱས་ཐམས་ཅད་ལས་ཤིན་ཏུ་འདས་ཤིང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང་། སྲུང་བ་དང་། བསྙེན་བཀུར་བྱེད་པར་འགྱུར་རོ། །འཁོར་ལོ་འདིའི་དབང་གིས་སངས་རྒྱས་ཀྱི་ཆོས་ཐམས་ཅད་ལ་དབང་དུ་འགྱུར་བ་དང་། ཕྱིར་མི་ལྡོག་པ་དང་། སྡིག་པའི་གྲོགས་པོའི་དབང་དུ་མི་འགྲོ་བ་དང་། སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང་། ཆོས་ཐོས་པ་དང་མི་འབྲལ་བ་དང་། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང་། ཡོན་ཏན་ཐམས་ཅད་ལ་སེམས་མི་ངོམས་པ་སྟེ། མངོན་པར་བྱང་ཆུབ་ཀྱི་བར་དུ་རྒྱུན་མི་འཆད་པ་དང་རྟག་ཏུ་སངས་རྒྱས་རྗེས་སུ་དྲན་པ་དང་མི་འབྲལ་བ་ནི་ཆུང་ངུ་ན་རྨི་ལམ་ན་ཡང་འབྲལ་བར་མི་བྱེད་དོ། །དེ་ལྟར་བྱང་ཆུབ་སེམས་དཔའ་དེ་བསོད་ནམས་དང་ཡེ་ཤེས་ཀྱི་ཚོགས་ཀྱང་མྱུར་དུ་རྫོགས་པ་དང་། རིང་པོ་མི་ཐོགས་པར་རྣམ་པར་དག་པའི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་
པར་སངས་རྒྱས་ནས་སངས་རྒྱས་ཀྱི་ཞིང་དེ་ན་སེམས་ཅན་ཐམས་ཅད་ཀྱང་རྫུས་ཏེ་སྐྱེ་བ་དང་། མཚན་དང་གཟུགས་སངས་རྒྱས་བཅོམ་ལྡན་འདས་དང་འདྲ་བ། ཉོན་མོངས་པ་སྲབ་ཅིང་ཆུང་བ། ཐེག་པ་ཆེན་པོ་ལ་བདེ་བར་གནས་པ་ཤ་སྟག་གོ །དེ་ནས་བཅོམ་ལྡན་འདས་ཀྱིས་དོན་དེ་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཆོས་ཀྱི་སྣོད་དུ་འགྱུར་བར་འདོད་པ་དག །ཉོན་མོངས་ཐམས་ཅད་ཡོངས་སུ་གཅད་པར་བྱ། །ཡང་དག་སྟོང་པ་ཉིད་ལ་སྙོམས་ཞུགས་ན། །དངོས་པོ་གང་ཡང་བྱ་བར་དཀའ་བ་མིན། །སྲིད་པའི་བཅིངས་པ་ཐམས་ཅད་གཅད་པའི་ཕྱིར། །སྙོམས་པར་འཇུག་ལ་ནན་ཏན་བརྩོན་པར་བྱ། །ཏིང་འཛིན་ཡོན་ཏན་དག་དང་ལྡན་པས་ན། །གདོན་མི་ཟ་བར་དཔག་དཀའི་ཤེས་རབ་ཐོབ། །གཟུགས་མེད་པ་ཡི་བསམ་གཏན་རབ་བསྒོམ་ཞིང་། །འགོག་པའི་ཏིང་འཛིན་སྟོང་པ་ཉིད་བརྟགས་ན། །སངས་རྒྱས་དྲན་པའི་བློ་མཆོག་རབ་སྐྱེས་ཏེ། །སྡིག་པ་ཐམས་ཅད་ཡོངས་སུ་ཟད་འགྱུར་རོ། །ཡོད་དང་མེད་པའི་ཆོས་རྣམས་ཐམས་ཅད་ནི། །ཡང་དག་སྟོང་པ་ཉིད་དུ་བརྟགས་པས་བཅོམ། །ངན་པར་འགྲོ་བའི་རྒྱུད་རྣམས་ཡོངས་བསལ་ནས། །རྟག་ཏུ་སངས་རྒྱས་མང་པོ་མཐོང་བར་འགྱུར། །ཡང་དག་སྟོང་པ་ཉིད་ལ་རབ་བསྒོམས་པས། །དགེ་བའི་ཆོས་གཞན་ཀུན་ལ་བརྩོན་བྱ་སྟེ། །སངས་རྒྱས་ཐམས་ཅད་ཀུན་ལ་རབ་མཆོད་ན། །མྱུར་དུ་སངས་རྒྱས་འབྲས་བུ་ཐོབ་པར་འགྱུར། །སེམས་ཅན་ཀུན་གྱི་དགེ་བའི་གྲོགས་བྱས་ཏེ། །ཀུན་ནས་ཉོན་མོངས་པ་ཡི་ནད་བསལ་ན། །རྣམ་དག་སངས་རྒྱས་ཞིང་དུ་མྱུར་དུ་སྐྱེ། །མངོན་པར་འཚང་རྒྱ་བྱང་ཆུབ་ཆེན་པོ་འཐོབ། །སངས་རྒྱས་མཚན་དང་ལྡན་པའི་སེམས་ཅན་དག །སངས་རྒྱས་ཞིང་དེར་ཡོངས་སུ་གང་བར་འགྱུར། །ཐམས་ཅད་སངས་རྒྱས་ཐེག་ལ་འདུན་པ་སྟེ། །ཉན་ཐོས་རང་རྒྱལ་ཐེག་པ་ཡོངས་སུ་སྤོང་། །འཕགས་པ་ཤིན་ཏུ་རྒྱས་པ་ཆེན་པོ་སའི་སྙིང་པོའི་འཁོར་ལོ་བཅུ་པ་བྱ་བ་ལས་བསོད་ནམས་ཀྱི་ཞིང་གི་མཚན་ཉིད་ཀྱི་ལེའུ་ཞེས་བྱ་སྟེ་དྲུ་པའོ།། །།