འཕགས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལས། ལེའུ་བཞི་པ།
རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་གང་ཞེ་ན། རིགས་ཀྱི་བུ་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་བར་འགའ་ཇི་ཞིག་ཏུ་སྐྱེས་པ་ན་སེམས་ཅན་མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་རྣམས་ལ་སྐུར་པ་འདེབས་པ་དང་། མི་དགེ་བའི་རྩ་བ་དང་ལྷན་ཅིག་འགྲོགས་པ་རྣམས་ཡོངས་སུ་སྨིན་པར་བྱེད། དགེ་བའི་ཆོས་ཐམས་ཅད་ལ་སྦྱོར་བར་བྱེད། ཉོན་མོངས་པ་དང་། ལྟ་བའི་བག་ཆགས་ཐམས་ཅད་ལས་སེམས་ཅན་ཡོངས་སུ་སྨིན་པར་བྱེད་ཅིང་། སེམས་ཅན་རེ་རེའི་དོན་གྱི་ཕྱིར་བསྐལ་པའི་སྡུག་བསྔལ་མང་པོ་བཟོད་པ་ནས། སེམས་ཅན་དེ་འཁོར་བའི་འདམ་ལས་སྒྲོལ་བ་དང་། སངས་རྒྱས་གཅིག་གི་ཐད་དུ་ཕུལ་བ་ནས། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་གི་ཐད་ཀྱི་བར་དུ་ཕུལ་ལོ། །གང་གི་ཚེ་སེམས་ཅན་དགེ་བའི་རྩ་བ་ལ་བརྟེན་པར་འགྱུར་བ་དེ་སངས་རྒྱས་བཅོམ་ལྡན་འདས་ལ་བྱ་བ་བྱས་པ་དང་། རྣམ་པར་རོལ་པ་མངོན་པར་
ཤེས་པ་ཏིང་ངེ་འཛིན་གྱི་སྟོབས་ཀྱི་ཕ་རོལ་ཏུ་ཕྱིན་པ་ཐོབ་པས་ཕྱོགས་བཅུའི་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་དུ་རྫུ་འཕྲུལ་གྱི་སྟོབས་ཀྱིས་ཉེ་བར་འགྲོ་བར་ནུས་པར་འགྱུར་རོ། །དེ་ན་སངས་རྒྱས་བཅོམ་ལྡན་འདས་ལ་བསྙེན་བཀུར་ཏོ། །དེ་ན་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཉེ་བར་རྟོགས་སོ། །དེ་ན་ཡོངས་སུ་དག་པའི་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཆེན་པོ་ཡང་ཅི་འདྲ་བ་ཡང་དག་པར་རྗེས་སུ་མཐོང་ངོ་། །དེ་ན་ཡང་རིགས་ཀྱི་བུ་དེའི་ཤིན་ཏུ་སྲེད་པ་དང་ལྡན་པ་སྐྱེ་བར་འགྱུར་རོ། །རིགས་ཀྱི་བུ་དེས་ཡང་དེ་བཞིན་གཤེགས་པ་དེ་དག་ལ་ཡོངས་སུ་ཞུས་པ། ལས་ཅིས་ན་བྱང་ཆུབ་སེམས་དཔའ་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར། སངས་རྒྱས་ལ་བལྟ་བ་དང་། ཆོས་མཉན་པ་དང་། དགེ་འདུན་ལ་བསྙེན་བཀུར་བས་བྲལ་བ་མེད་པར་འགྱུར་རོ། །ཉན་ཐོས་དང་། རང་སངས་རྒྱས་ཀྱི་ཐེག་པ་པས་འདྲེས་པ་མེད་པའོ། །ཉོན་མོངས་པ་ཐམས་ཅད་ཀྱིས་འདྲེས་པ་མེད་པའོ། །ཏིང་ངེ་འཛིན་དང་གཟུངས་ཐམས་ཅད་ཀྱིས་འབྲལ་བ་མེད་པར་འགྱུར་རོ། །ཡང་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་མི་སྐྱེ་བ་ཅི་ཙམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་མི་རྒྱའོ། །བྱང་ཆུབ་ཐོབ་པའི་སངས་རྒྱས་ཀྱི་ཞིང་དེ་རྒྱ་ཆེ་ཞིང་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཀྱིས་རྒྱས་པར་འགྱུར་རོ། །བྱང་ཆུབ་སེམས་དཔའ་ཐེག་པ་ཆེན་པོ་དག་ལ་ཡང་དག་པར་ཞུགས་པས་སངས་རྒྱས་ཀྱི་ཞིང་དེ་ཁྱབ་པར་འགྱུར་རོ། །ཉན་ཐོས་དང་རང་སངས་རྒྱས་ཀྱི་ཐེག་པ་པའི་སེམས་ཅན་གྱིས་སངས་རྒྱས་ཀྱི་ཞིང་བྲལ་བར་འགྱུར་རོ། །སངས་རྒྱས་བཅོམ་ལྡན་འདས་དེ་དག་གིས་རིགས་ཀྱི་བུ་དེ་ལ་ཇི་ལྟ་བ་བཞིན་དུ་གསུངས་པ། ལས་གང་དང་གང་སྤྱོད་པ་དང་། ནན་ཏན་གང་གིས་ཡོན་ཏན་དེ་དག་ཐོབ་པར་འགྱུར་བ་དེ་ཡང་རིགས་ཀྱི་བུ། ཚེ་རབས་སུ་ཡོན་ཏན་དང་སྤྱོད་པའི་ནན་ཏན་ལ་བརྩོན་པར་འགྱུར་བ་ནས། དེར་སྐྱེ་བར་འགྱུར་བའི་བར་དུའོ། །ཡོན་ཏན་ཇི་ཙམ་པ་ཐམས་ཅད་ཡོངས་སུ་རྫོགས་ཤིང་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་རྒྱ་ཆེན་པོ་ཐམས་ཅད་ཀྱིས་སངས་རྒྱས་ཀྱི་ཞིང་དུ་ཁྱབ་པར་འགྱུར་རོ། །གང་ན་རིགས་
ཀྱི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དེ་ཉན་ཐོས་དང་རང་སངས་རྒྱས་ཀྱི་ཐེག་པ་རྣམ་པར་སྤངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དག་པ་རྣམས་ལ་ཐེག་པ་ཆེན་པོ་དག་པའི་གཏམ་སྨྲ་བར་བྱེད་ཀྱི་ཉན་ཐོས་དང་། རང་སངས་རྒྱས་ཀྱི་གཏམ་ནི་མ་ཡིན་ནོ། །སེམས་ཅན་དགེ་བའི་རྩ་བ་སྐྱེད་པ་དང་། ཡོངས་སུ་སྦྱང་བ་བྱས་པ་དང་། བྱང་ཆུབ་སེམས་དཔའི་ཡོན་ཏན་མང་པོ་དང་ལྡན་པ་དང་། སངས་རྒྱས་ཀྱི་ཡོན་ཏན་ཚད་མེད་པ་ལ་འཇུག་པའི་ཡེ་ཤེས་ལ་མཁས་པ་རྣམས་ལ་ཆོས་སྟོན་པར་བྱེད་དོ། །གང་དག་ལ་ཆོས་སྟོན་པ་དེ་དག་ཐམས་ཅད་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་བྱ་བའི་ཕྱིར་སྟོན་གྱི་ཡོངས་སུ་མ་དག་པར་མ་ཡིན་ནོ། །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱ་བའི་ཕྱིར་སངས་རྒྱས་ཀྱི་ཞིང་ཡོངས་སུ་དག་པར་བྱང་ཆུབ་ཀྱི་སྤྱོད་པ་བསྔགས་པར་བྱེད་ཀྱི་ཡོངས་སུ་མ་དག་པར་ནི་བསྔགས་པར་མི་བྱེད་དོ། །སེམས་ཅན་གྱི་བསམ་པ་ཡོངས་སུ་དག་པས་དགེ་བའི་བཤེས་གཉེན་དེ་དག་དང་འགྲོགས་ཤིང་སྟེན་པ་དང་། སྡོམ་པ་ལ་དགོད་པ་དང་། ཡོན་སྦྱོང་བ་བསྔགས་པར་བྱེད་ཀྱི་ཡོངས་སུ་མ་དག་པ་ནི་མ་ཡིན་ནོ། །རིགས་ཀྱི་བུ་གང་སངས་རྒྱས་ཀྱི་ཞིང་ཡོངས་སུ་དག་པར་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཐམས་ཅད་ཀྱིས་སྔོན་རྙོག་པ་ལྔའི་སངས་རྒྱས་ཀྱི་ཞིང་ཡོངས་སུ་མ་དག་པར་ཐོག་མར་ས་བོན་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །གང་ཡང་ཕྱོགས་བཅུའི་སངས་རྒྱས་ཀྱི་ཞིང་ཡོངས་སུ་དག་པ་ཚད་མེད་གྲངས་མེད་པར་ད་ལྟར་གྱི་སངས་རྒྱས་བཅོམ་ལྡན་འདས་བཞུགས་ཤིང་འཚོ་སྐྱོང་བ་བྱང་ཆུབ་སེམས་དཔའ་ཐེག་པ་ཆེན་པོ་དག་ལ་ཡང་དག་པར་ཞུགས་པ་རྣམས་ལ་ཐེག་པ་ཆེན་པོ་དག་པའི་གཏམ་སྨྲ་བའི་དེ་བཞིན་གཤེགས་པ་དེ་དག་ཐམས་ཅད་ཀྱིས་སྔོན་ཉོན་མོངས་པ་དང་རྙོག་པ་ལྔའི་སངས་རྒྱས་ཀྱི་ཞིང་འདིར་ཐོག་མར་ས་བོན་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འདིར་ཡང་སྔོན་དགེ་བའི་རྩ་བ་ལ་བརྟེན་པར་གྱུར་ཏོ། །མངོན་པར་ཤེས་པ་གང་གིས་སངས་རྒྱས་ཀྱི་ཞིང་ཡོངས་
སུ་དག་པ་ནས་སངས་རྒྱས་ཀྱི་ཞིང་གཞན་དུ་འགྲོ་བའི་མངོན་པར་ཤེས་པ་ཐོབ་པར་གྱུར་ཏོ། །གང་ན་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཚད་བཟུང་བ་དང་བརྟགས་པ་དེར་ཕྱིན་ཆད་ཀྱང་སྐྱེ་བར་སྨོན་ལམ་བྱས་པས། དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་མངོན་པར་འཚང་རྒྱའོ། །ཡང་ཕྱོགས་བཅུའི་སངས་རྒྱས་ཀྱི་ཞིང་ཡོངས་སུ་དག་པར་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དེ་དག་ཐམས་ཅད་ཀྱིས་རྙོག་པ་ལྔའི་སངས་རྒྱས་ཀྱི་ཞིང་ཡོངས་སུ་མ་དག་པར་ཐམས་ཅད་ཀྱི་ཐོག་མར་དགེ་བའི་རྩ་བའི་ས་བོན་བསྐྱེད་ནས་བླ་ན་མེད་པ་ཡང་དག་པར་རྫོགས་པར་བྱང་ཆུབ་བོ། །གང་གི་ཚེ་སེམས་བསྐྱེད་པས་མངོན་པར་ཤེས་པ་ཐོབ་པ་ནི་ས་རབ་ནས། སངས་རྒྱས་ཀྱི་ཞིང་ཡོངས་སུ་དག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བའི་བར་དུའོ། །གང་ཡང་ཕྱོགས་བཅུའི་སངས་རྒྱས་ཀྱི་ཞིང་ཡོངས་སུ་དག་པར་བྱང་ཆུབ་སེམས་དཔའ་དག་ད་ལྟར་ཆོས་ཀྱི་སྒྲ་སྣ་ཚོགས་ཀྱིས་ཉོན་མོངས་པ་སྣ་ཚོགས་དང་བྲལ་ཞིང་ཆོས་ཟབ་མོའི་ཚུལ་ལ་འཇུག་པའི་ཡེ་ཤེས་ལ་མཁས་པ་དང་། ཕྱིར་མི་ལྡོག་པ་དང་། གང་ཡང་ཆོས་ཟབ་མོའི་བཟོད་པ་ཐོབ་པས་དགའ་བ་དང་བདེ་བ་མྱོང་བར་འགྱུར་རོ། །གང་ཡང་ད་ལྟར་ཁྱེད་ཅག་སངས་རྒྱས་ཀྱི་ཞིང་ཡོངས་སུ་དག་པ་ནས་དེ་བཞིན་གཤེགས་པ་ཤཱཀྱ་ཐུབ་པའི་སངས་རྒྱས་ཀྱི་ཞིང་མི་མཇེད་ཀྱི་རྙོག་པ་ལྔའི་སངས་རྒྱས་ཀྱི་ཞིང་འདིར་མངོན་པར་ལྷགས་པ་ཁྱེད་ཅག་ཐམས་ཅད་ཀྱི་སྔོན་ཐམས་ཅད་ཀྱི་ཐོག་མར་ཉོན་མོངས་པ་དང་རྙོག་པ་ལྔའི་སངས་རྒྱས་ཀྱི་ཞིང་དུ་དགེ་བའི་རྩ་བའི་ས་བོན་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཐམས་ཅད་ཀྱི་ཐོག་མར་ཕ་རོལ་ཏུ་ཕྱིན་པ་དྲུག་ལ་བརྩོན་པར་བྱས་པ་དེ་ལ་ཡང་མངོན་པར་ཤེས་པ་གང་གིས་ཕྱིས་ཕྱོགས་བཅུའི་སངས་རྒྱས་ཀྱི་ཞིང་ཡོངས་སུ་དག་པ་གཞན་དུ་འགྲོ་བའི་མངོན་པར་ཤེས་པ་ཐོབ་པར་གྱུར་ཏོ། །གང་ན་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཀུན་ཏུ་ཤེས་ཤིང་རྟོགས་པ་དེར་ཕྱིས་སྐྱེ་བ་མངོན་པར་ཤེས་པའི་སྨོན་ལམ་བྱས་པས་དེ་དག་དེ་ཉིད་ཀྱི་ནན་ཏན་གྱིས་ཞུགས་པས་
བསམ་པ་ཇི་སྙེད་པ་ཡོངས་སུ་རྫོགས་སོ། །སངས་རྒྱས་ཀྱི་ཞིང་ཡོངས་སུ་དག་པ་དེར་སྐྱེས་པ་རྣམས་སངས་རྒྱས་གཞན་འཕེལ་བའི་ཕྱིར་ཡང་རྙོག་པ་ལྔའི་སངས་རྒྱས་ཀྱི་ཞིང་ཡོངས་སུ་མ་དག་པ་འདི་ནི་མི་འདོད་དོ། །ཉོན་མོངས་པས་བསྒྲིབས་པ་དང་། །ལྟ་བ་དོག་པར་ཐོབ་པ་འདི་དག་དམོད་ཅིང་འདི་ལ་སྙིང་རྗེ་ཆེན་པོ་མི་སྐྱེད་པ་དེ་དག་བྱང་ཆུབ་སེམས་དཔའ་ཞེས་བྱའི། སེམས་དཔའ་ཆེན་པོ་ཞེས་མི་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་གཏར་མཁན་མཁས་པ་ལ་ལ་མཆོག་ཏུ་དྲི་མི་ཞིམ་པ་དང་ལྡན་པའི་སྨན་གྱི་ཡོ་བྱད་ཀྱིས་མི་ཞར་བ་དང་ལོང་བ་རྣམས་ཀྱི་མིག་གི་ནད་ཅུང་ཟད་ཙམ་རབ་ཏུ་ཞི་བར་བྱེད་དོ། །ཞི་བར་ཤེས་ནས་དེ་དག་གཅིག་ལ་གཅིག་སྨྲས་པ། བདག་ཅག་གིས་གཟུགས་ཀྱི་སྣང་བ་ལ་ལྟ་བར་བརྩམས་ཏེ། བདག་ཅག་སྒྲོན་མར་གྱུར་པའི་སྨན་པའི་ཁྱིམ་འདི་ནས་བྱུང་ལ་འགྲོ་བར་བྱའོ་སྙམ་ནས་ཕྱིར་འོང་བ་ཡང་མེད་པ་མང་པོ་དེ་དག་ཀྱང་གང་སྨན་པའི་ཁྱིམ་དེ་ལས་འབྱུང་བར་འགྱུར་རོ། །ཇི་ལྟ་བུར་ནད་འདི་རབ་ཏུ་ཞི་བ་མེད་པ་དེ་དག་མིག་གི་ནད་ཡུན་རིང་པོར་གནས་པ་བལྟས་ནས་ཡང་འོང་ངོ་། །དེ་དག་ཀྱང་སྨན་པའི་ཁྱིམ་དེར་གནས་པར་འགྱུར་རོ། །དེ་དག་ཡུན་མི་རིང་བས་ཀྱང་ནད་ཐམས་ཅད་གྲོལ་བར་འགྱུར་རོ། །རིགས་ཀྱི་བུ་དེ་བཞིན་དུ་གང་བྱང་ཆུབ་སེམས་དཔའ་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་གང་ལ་འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། རྒྱགས་པ་དང་། ལྟ་བ་ངན་པས་རྟག་ཏུ་གཙེ་བའི་སེམས་ཅན་རྣམས་དེ་ལ་ལ་ལ་དགེ་བའི་བཤེས་གཉེན་གྱིས་ཡོངས་སུ་བཟུང་བར་འགྱུར་བ་དེ་དག་ཀྱང་ཇི་ལྟར་ཡོན་ཏན་ཁོང་དུ་ཆུད་པ་དེ་ལྟར་རྙོག་པ་ལྔའི་སངས་རྒྱས་ཀྱི་ཞིང་དེ་ལས་འབྱོལ་བར་འདོད་དོ། །གང་ཡང་དེ་ལས་འདས་ཤིང་སངས་རྒྱས་ཀྱི་ཞིང་ཡོངས་སུ་དག་པར་རྣམ་པར་སྤྱོད་པ་དེ་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་གདོན་མི་ཟ་བར་འགྲོ་བར་འདོད་དོ། །དེ་དག་ཀྱང་སངས་རྒྱས་ཀྱི་ཞིང་དཔག་ཏུ་མེད་པ་གྲངས་མེད་པ་རྡུལ་ཤིན་ཏུ་ཕྲ་བ་སྙེད་ལས་ཤིན་ཏུ་འདས་པས་ཡུན་རིང་པོར་སྡུག་བསྔལ་འདོད་པར་འགྱུར་རོ། །གང་གི་ཚེ་དེ་དག་སངས་རྒྱས་ཀྱི་ཞིང་ཡོངས་སུ་དག་པ་དེར་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་མངོན་པར་འཚང་མི་རྒྱ་བ་འདི་ཡང་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཡོངས་སུ་དག་པའོ། །རིགས་ཀྱི་བུ་དེ་ཅིའི་ཕྱིར་ཞེ་ན། ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་སྔ་དྲོའི་དུས་གཅིག་གིས་ཀྱང་ཚུལ་ཁྲིམས་བསྲུངས་སོ། །ཚུལ་ཁྲིམས་བསྒོམས་སོ་སྦྱིན་པ་བྱིན་ནོ། །བསམ་གཏན་ལ་བསམ་གཏན་དུ་བྱེད་དོ། །བརྩོན་འགྲུས་བརྩམས་སོ། །བཟོད་པ་བསྒོམས་སོ། །ཤེས་རབ་ཀྱི་ཡོན་ཏན་བརྩམས་སོ། །སངས་རྒྱས་ཀྱི་ཞིང་ཡོངས་སུ་དག་པར་བསྐལ་པ་བརྒྱ་སྟོང་དུའང་ཕ་རོལ་ཏུ་ཕྱིན་པ་དྲུག་ལ་བརྩོན་པས་སྤྱད་པ་སྤྱོད་པ་ཡང་མ་ཡིན་ནོ། །རིགས་ཀྱི་བུ་དེ་ཅིའི་ཕྱིར་ཞེ་ན། གང་ཡང་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་ཐམས་ཅད་ཀྱི་ཐོག་མར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ས་བོན་བསྐྱེད་དོ། །ཡང་རྙོག་པ་ལྔའི་སངས་རྒྱས་ཀྱི་ཞིང་དེར་འགྲོ་ཞིང་འདིར་དེ་ཙམ་གྱི་བརྩོན་འགྲུས་བརྩམས་པའི་བརྩོན་འགྲུས་ཀྱིས་དགེ་བའི་ཆོས་ཡོངས་སུ་ཚོལ་བ་ལ་མངོན་པར་བརྩོན་པར་གནས་སོ། །གང་དེ་ལྟ་བུའི་ཡེ་ཤེས་སྣང་བ་ཐོབ་པ་དེ་ཐམས་ཅད་ཡུལ་སྨྲ་བ་རྣམ་པར་དཔྱོད་པའི་ཡེ་ཤེས་གཡོ་བ་མེད་པར་འགྱུར་རོ། །འཇིག་རྟེན་གྱི་ཆོས་རྣམས་ལས་འཕགས་པར་འགྱུར་རོ། །སངས་རྒྱས་ཐམས་ཅད་ཀྱི་ཞིང་ལྟ་བ་སྣང་བར་འགྱུར་རོ། །སེམས་ཅན་གྱི་སྤྱོད་པ་བརྗོད་དུ་མེད་པ་མངོན་པར་ཤེས་པའི་ཡེ་ཤེས་ལ་མཁས་པར་འགྱུར་རོ། །སེམས་ཅན་ལུས་མ་རུངས་པ་དང་། མི་དགེ་བའི་རྩ་བ་རྣམས་དང་ལྷན་ཅིག་ཏུ་འགྲོགས་པ་རྣམས་ལ་ཡོངས་སུ་གཏོང་བ་ཡང་མེད། སེམས་ཅན་ལུས་ཉོན་མོངས་པས་དཀྲུགས་པ་རྣམས་ཅི་འདྲ་བར་མཐོང་བ་ལ་སེམས་ཀྱི་ནད་ཅི་ཕན་དུ་རབ་ཏུ་ཞི་བར་བྱ་བའི་ཕྱིར་དེ་འདྲ་བའི་སེམས་ཀྱི་སྨན་གྱི་ཡོ་བྱད་རབ་ཏུ་སྟོན་པར་བྱེད་དོ། །གང་གི་ཉོན་མོངས་པས་སེམས་ཅན་ངན་དུ་སྤྱོད་པ་དང་ལྡན་པར་མཐོང་བའི་ཉོན་མོངས་པ་དེ་དག་བདག་གིས་སྤངས་ཏེ། སེམས་ཅན་དེ་ལ་སྙིང་རྗེ་ཆེན་པོ་སྐྱེད་དོ། །ཉོན་མོངས་པ་དེ་དག་སྤངས་པའི་ཕྱིར་བརྩོན་པས་སེམས་ཅན་རྣམས་འདུལ་བར་བྱེད་དོ། །ཇི་ལྟར་ཉོན་མོངས་པ་ལས་ཡོངས་སུ་ཐར་བར་བྱ་ཞེས་
འདོད་ཆགས་སྤྱོད་པ་རྣམས་མི་མཛེས་པ་ལ་རབ་ཏུ་སྦྱོར་བས་རབ་ཏུ་ཞི་བར་བྱེད་དོ། །ཞེ་སྡང་སྤྱོད་པ་རྣམས་བྱམས་པར་རབ་ཏུ་སྦྱོར་བ་དང་། གཏི་མུག་སྤྱོད་པ་རྣམས་རྟེན་ཅིང་འབྲེལ་པར་སྦྱོར་བ་དང་། སྐལ་བ་དང་བཅས་པར་སྤྱོད་པ་རྣམས་དབུགས་ཕྱི་ནང་དུ་རྒྱུ་བ་དྲན་པར་རབ་ཏུ་སྦྱོར་བ་དང་། འདོད་ཆགས་སྣྲེལ་ཞིར་སྤྱོད་པ་རྣམས་བྱམས་པ་དང་། མི་དགའ་བར་རབ་ཏུ་སྦྱོར་བ་དང་། ཞེ་སྡང་སྣྲེལ་ཞིར་སྤྱོད་པ་རྣམས་མི་མཛེས་པ་དང་། བྱམས་པར་རབ་ཏུ་སྦྱོར་བ་དང་། གཏི་མུག་སྣྲེལ་ཞིར་སྤྱོད་པ་རྣམས་མི་མཛེས་པ་དང་། རྟེན་ཅིང་འབྲེལ་བར་རབ་ཏུ་སྦྱོར་བ་དང་། ལྟ་བ་ངན་པ་ཐོབ་པ་རྣམས་སྟོང་པ་ཉིད་རབ་ཏུ་ཐོབ་པ་དང་། རྐྱེན་སྟོབས་ཅན་རྣམས་ལ་རྗེས་སུ་སྲུང་བ་དང་ལྡན་པ་རབ་ཏུ་སྦྱོར་བ་དང་། རབ་ཏུ་གཟུང་དུ་མེད་ཅིང་དངོས་པོ་མེད་པ་དང་། སྒྲོག་པ་མེད་པར་ཤེས་པ་རྣམས་ཟབ་མོ་རྣམ་པར་ཞི་བར་རབ་ཏུ་སྦྱོར་བ་དང་། སྤྲོས་པར་ཤེས་པ་རྣམས་ལྷག་མཐོང་སྤྲོས་པའི་གཏམ་རབ་ཏུ་སྦྱོར་བས་ཞི་བར་བྱེད་དོ། །ངེས་པར་འདོད་པ་རྣམས་རིམ་གྱིས་སྨྲ་བ་དང་།ཚིག་ཟད་པ་རྣམས་བསྡུ་བ་རབ་ཏུ་སྦྱོར་ཞིང་ཞི་གནས་དང་ལྷག་མཐོང་དུ་རབ་ཏུ་སྦྱོར་བ་དང་། ལྷག་མཐོང་ལ་གུས་པ་ཅན་རྣམས་ནམ་མཁའ་མཐའ་ཡས་སྐྱེ་མཆེད་ལ་རབ་ཏུ་སྦྱོར་བ་དང་ནམ་མཁའ་མཐའ་ཡས་སྐྱེ་མཆེད་ལ་གུས་པ་ཅན་རྣམས་རྣམ་ཤེས་མཐའ་ཡས་སྐྱེ་མཆེད་ལ་རབ་ཏུ་སྦྱོར་བ་དང་། རྣམ་ཤེས་མཐའ་ཡས་སྐྱེ་མཆེད་ལ་གུས་པ་ཅན་རྣམས་ཅུང་ཟད་མེད་པའི་སྐྱེ་མཆེད་ལ་རབ་ཏུ་སྦྱོར་བ་དང་། ཅུང་ཟད་མེད་པའི་སྐྱེ་མཆེད་ལ་གུས་པ་ཅན་རྣམས་མཚན་མ་མེད་པར་རབ་ཏུ་སྦྱོར་བ་དང་། སྨོན་ལམ་ལ་གུས་པ་ཅན་རྣམས་སྨོན་པ་མེད་པར་སྨྲ་བ་རབ་ཏུ་སྦྱོར་བ་དང་། ཚུལ་ཁྲིམས་ལ་གུས་པ་ཅན་རྣམས་ངན་སོང་གསུམ་ལས་ཡོངས་སུ་ཐར་བར་རབ་ཏུ་སྦྱོར་བ་དང་། ཐོས་པ་ལ་ང་རྒྱལ་ཅན་རྣམས་སྲེད་པ་ཐམས་ཅད་འབྱུང་བ་མེད་པར་རབ་ཏུ་སྦྱོར་བ་དང་། དགོན་པ་པ་ལ་ང་རྒྱལ་མངོན་པར་བརྩོན་པ་རྣམས་དང་། སྦྱངས་པའི་ཡོན་ཏན་ཅན་ལ་ང་རྒྱལ་མངོན་པར་བརྩོན་པ་རྣམས་ཚད་མེད་པར་རབ་ཏུ་སྦྱོར་བ་དང་། ཕུང་པོ་ལ་རྟག་པར་འདུ་ཤེས་པ་རྣམས་འབྱུང་བ་དང་ཟད་པར་རབ་ཏུ་སྦྱོར་བ་དང་། ཁམས་
ལ་བདག་གིར་བྱ་བ་ཡོངས་སུ་སྤངས་པ་རྣམས་སྨིག་རྒྱུ་བར་རབ་ཏུ་སྦྱོར་བ་དང་། སྐྱེ་མཆེད་ཡོངས་སུ་སྤངས་པ་རྣམས་ལྦུ་བའི་ཕུང་པོར་རབ་ཏུ་སྦྱོར་བ་དང་། འདོད་པའི་ཁམས་ཡོངས་སུ་སྤངས་པ་རྣམས་ཆུ་ཤིང་གི་སྙིང་པོ་མེད་པར་རབ་ཏུ་སྦྱོར་བ་དང་། གཟུགས་ཀྱི་ཁམས་ཡོངས་སུ་སྤངས་པ་རྣམས་འདུ་བྱེད་མི་རྟག་པར་རབ་ཏུ་སྦྱོར་བ་དང་། གཟུགས་མེད་པའི་ཁམས་ཡོངས་སུ་སྤངས་པ་རྣམས་འདུ་བྱེད་ཐམས་ཅད་སྡུག་བསྔལ་བར་རབ་ཏུ་སྦྱོར་བ་དང་། བསམ་གཏན་ལ་དགའ་བ་དང་བདེ་བ་ཡོངས་སུ་སྤངས་པ་རྣམས་ཆོས་ཐམས་ཅད་ལ་བདག་མེད་པར་རབ་ཏུ་སྦྱོར་བ་དང་། འཁོར་བའི་སྡུག་བསྔལ་འདོད་པ་རྣམས་མྱ་ངན་ལས་འདའ་བ་ཞི་བར་རབ་ཏུ་སྦྱོར་བ་དང་། གཞན་ཡང་ལམ་ངན་པ་ཡོངས་སུ་སྤངས་པ་རྣམས་དགེ་བ་བཅུའི་ལས་ཀྱི་ལམ་ལ་རབ་ཏུ་སྦྱོར་བས་ལྟ་བ་དེ་དག་རབ་ཏུ་ཞི་བར་བྱེད་དོ། །ཡིད་དུ་འོང་བའི་སྐྱེ་བོ་ཡོངས་སུ་སྤངས་པ་རྣམས་མི་མཛེས་པར་རབ་ཏུ་སྦྱོར་བ་དང་། གཟུགས་ལ་ཆགས་པ་ཡོངས་སུ་སྤངས་པ་རྣམས་རོ་སྔོན་པོར་རབ་ཏུ་སྦྱོར་བ་དང་། སྒྲ་ལ་ཆགས་པ་ཡོངས་སུ་སྤངས་པ་རྣམས་བྲག་ཅ་འབྱུང་བ་དང་ཟད་པར་རབ་ཏུ་སྦྱོར་བ་དང་། དྲི་ལ་ཆགས་པ་ཡོངས་སུ་སྤངས་པ་རྣམས་རླུང་དུ་རྟོག་པར་རབ་ཏུ་སྦྱོར་བ་དང་། རོ་ལ་ཆགས་པ་ཡོངས་སུ་སྤངས་པ་རྣམས་མི་མཛེས་པ་སྣ་ཚོགས་རབ་ཏུ་སྦྱོར་བ་དང་། རེག་པ་ལ་ཆགས་པ་ཡོངས་སུ་སྤངས་པ་རྣམས་མི་གཙང་བའི་ཡན་ལག་སུམ་ཅུ་རྩ་དྲུག་རབ་ཏུ་སྦྱོར་བ་དང་། སྙིང་རྗེ་མེད་པ་རྣམས་བྱམས་པར་རབ་ཏུ་སྦྱོར་བ་དང་། གཏོང་བ་མེད་པ་རྣམས་སྦྱིན་པ་ཆེན་པོ་ལྔ་རབ་ཏུ་སྦྱོར་བ་དང་། གཏི་མུག་གིས་བསྒྲིབས་པ་རྣམས་ཁ་ཏོན་དུ་རབ་ཏུ་སྦྱོར་བ་དང་། འདུལ་བ་རྣམས་འཕགས་པའི་རིགས་ལ་དགའ་བར་རབ་ཏུ་སྦྱོར་བ་དང་། སྡུག་བསྔལ་འདུལ་བ་རྣམས་རིམ་གྱིས་སེམས་རྩེ་གཅིག་ཏུ་འདུས་པར་རབ་ཏུ་སྦྱོར་བ་དང་། འདུ་བྱེད་ཐམས་ཅད་ཀྱིས་མངོན་པར་སྤྲོས་པ་རྣམས་སྒྱུ་མ་ལྟ་བུར་རབ་ཏུ་སྦྱོར་བས་ཉོན་མོངས་པ་དེ་དག་ཞི་བར་འགྱུར་རོ།། །།བམ་པོ་ལྔ་པ། གཞན་ཡང་སེམས་ཅན་ལྷ་དང་མིར་སྐྱེ་བར་བསམ་པ་རྣམས་ལ་དགེ་བ་བཅུའི་ལས་
ཡོངས་སུ་དག་པར་སྦྱོར་བར་བྱེད་དོ། །ཉན་ཐོས་ཀྱི་ཐེག་པར་བསམ་པ་རྣམས་ལ་འཕགས་པའི་བདེན་པ་བཞི་དང་ལྡན་པར་ཡིད་ལ་བྱེད་པ་སྦྱོར་བར་བྱེད་དོ། །རང་སངས་རྒྱས་ཀྱི་ཐེག་པར་བསམ་པ་རྣམས་ལ་རྟེན་ཅིང་འབྲེལ་པར་སྨྲ་བ་ཡིད་ལ་བྱེད་པ་སྦྱོར་བར་བྱེད་དོ། །སེམས་ཅན་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་ཕ་རོལ་ཏུ་ཕྱིན་པ་དྲུག་སྦྱོར་བར་བྱེད་དོ། །ཐོག་མར་སེམས་བསྐྱེད་པ་རྣམས་ལ་ལྷག་པའི་བསམ་པ་ཕྱིར་མི་ལྡོག་པའི་སེམས་སྦྱོར་བར་བྱེད་དོ། །སེམས་ཅན་ཕ་རོལ་ཏུ་ཕྱིན་པ་དྲུག་སྤྱོད་པ་ལ་ཡང་དག་པར་ཞུགས་པ་རྣམས་སྙིང་རྗེ་ཆེན་པོ་ལ་ཡོངས་སུ་མི་སྐྱོ་བས་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་སྦྱོར་བར་བྱེད་དོ། །བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ལ་དེའི་འོག་ཏུ་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཡོངས་སུ་དག་པར་སྦྱོར་བར་བྱེད་དོ། །ཇི་ལྟ་བུར་སངས་རྒྱས་ཀྱི་ཞིང་ཡོངས་སུ་དག་པ་གཞན་དུ་རྣམ་པར་སྤྱོད་ཅིང་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཡོངས་སུ་དག་པར་སྦྱོར་བར་བྱེད་པ་དེ་དག་དེའི་འོག་ཏུ་མངོན་པར་ཤེས་པས་རྣམ་པར་རྩེའོ། །ཇི་ལྟ་བུར་སངས་རྒྱས་ཀྱི་ཞིང་ཡོངས་སུ་དག་པ་གཞན་དུ་རྣམ་པར་སྤྱོད་ཅིང་སངས་རྒྱས་ཀྱི་ཞིང་གི་ཚོགས་མངོན་པར་འདོད་པ་དེ་དག་དེའི་འོག་ཏུ་མངོན་པར་ཤེས་པ་རྣམ་པར་རྩེ་བ་དེ་ལ་སྐྱེ་བར་འདོད་པ་ཇི་སྙེད་པ་དེར་སྐྱེའོ། །ཡང་སངས་རྒྱས་ཀྱི་ཞིང་ཉོན་མོངས་པར་རྣམ་པར་མི་སྤྱོད་ཅིང་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ཡོངས་སུ་དག་པ་འདོད་པ་ཡང་མེད་པ་དེར་སྐྱེ་བར་འདོད་པ་དེ་ཅི་ཙམ་པ་དེར་སྐྱེའོ། །ཡང་ཉོན་མོངས་པའི་སངས་རྒྱས་ཀྱི་ཞིང་དུ་འགྲོ་བར་མི་འདོད་པ་དེ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བའི་བར་དུའོ། །རྙོག་པ་ལྔའི་སངས་རྒྱས་ཀྱི་ཞིང་དུ་སེམས་ཅན་ལྟ་བ་དོག་པ་རྙེད་པ་དང་། མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། མི་དགེ་བའི་རྩ་བ་དང་ལྷན་ཅིག་ཏུ་འགྲོགས་པ་རྣམས་རྒྱུན་གཅོད་དོ། །སངས་རྒྱས་ཀྱི་ཞིང་ཡོངས་སུ་དག་པར་སེམས་ཅན་བསམ་པ་ཡོངས་སུ་དག་པ་རྣམས་ལ་སངས་རྒྱས་ཀྱི་བྱ་བ་བྱེད་ཅིང་། བྱང་ཆུབ་སེམས་དཔའ་སངས་རྒྱས་ཀྱི་ཆོས་ཚད་མེད་གྲངས་མེད་པ་རྣམས་
ལ་འཇུག་པའི་ཡེ་ཤེས་ལ་མཁས་པ་རྣམས་ལ་ཆོས་སྟོན་པར་བྱེད་དོ། །ཡང་བྱང་ཆུབ་སེམས་དཔའ་རྙོག་པ་ལྔའི་སངས་རྒྱས་ཀྱི་ཞིང་འདིར་རྣམ་པ་དེ་ལྟ་བུའི་རྩལ་བྱེད་ཀྱང་གང་བྱང་ཆུབ་སེམས་དཔའ་ལ་ལ་སངས་རྒྱས་ཀྱི་ཞིང་ཡོངས་སུ་དག་པར་རྣམ་པ་དེ་ལྟ་བུའི་རྩལ་བྱེད་མི་ནུས་སོ། །ཡང་རྙོག་པ་ལྔའི་སངས་རྒྱས་ཀྱི་ཞིང་འདིར་གལ་ཏེ་བྱང་ཆུབ་སེམས་དཔའ་སེམས་ཅན་གཅིག་གི་འདོད་ཆགས་ཀྱི་སྤྱོད་པ་སྟོང་ཕྲག་ཉི་ཤུ་རྩ་གཅིག་རབ་ཏུ་ཤེས་པ་དེ་ལྟར་ཐབས་རབ་ཏུ་སྦྱོར་བ་སྟོང་ཕྲག་ཉི་ཤུ་རྩ་གཅིག་གིས་འདོད་ཆགས་རབ་ཏུ་ཞི་བར་བྱེད་པ་དང་། གལ་ཏེ་སེམས་ཅན་གཅིག་གི་ཞེ་སྡང་སྤྱོད་པ་སྟོང་ཕྲག་ཉི་ཤུ་རྩ་གཅིག་རབ་ཏུ་ཤེས་པ་དེ་ལྟར་ཐབས་ལ་མཁས་པ་སྟོང་ཕྲག་ཉི་ཤུ་རྩ་གཅིག་གིས་ཞེ་སྡང་ཞི་བར་བྱེད་པ་དང་། གལ་ཏེ་བྱང་ཆུབ་སེམས་དཔའ་སེམས་ཅན་གཅིག་གི་སྐལ་བ་དང་བཅས་པར་སྤྱོད་པ་སྟོང་ཕྲག་ཉི་ཤུ་རྩ་གཅིག་རབ་ཏུ་ཤེས་པ་དེ་བཞིན་དུ་ཐབས་ལ་མཁས་པ་སྟོང་ཕྲག་ཉི་ཤུ་རྩ་གཅིག་གིས་ཞི་བར་བྱེད་པ་དང་། བྱང་ཆུབ་སེམས་དཔའ་གང་གིས་སེམས་ཅན་གཅིག་གི་སྐལ་བ་དང་བཅས་པར་སྤྱོད་པ་ཉོན་མོངས་པ་ཀུན་ནས་ལྡང་བ་རབ་ཏུ་ཞི་བར་ནུས་པ་དེ་ལྟར་བྱང་ཆུབ་སེམས་དཔའ་རྩལ་ཆེན་པོ་བྱེད་དོ། །གང་སེམས་ཅན་གཅིག་གི་ཉོན་མོངས་པའི་རྒྱུ་སྤྱོད་པ་སྟོང་ཕྲག་བརྒྱད་ཅུ་རྩ་བཞི་རབ་ཏུ་ཤེས་པའི་བྱང་ཆུབ་སེམས་དཔའ་དེ་ཡང་སེམས་ཅན་གཅིག་གི་དགོས་པས་བརྩོན་འགྲུས་བརྟན་པ་ལ་མོས་ཤིང་ཕ་རོལ་གནོན་པ་ན་ཐབས་ལ་མཁས་པ་སྟོང་ཕྲག་བརྒྱད་ཅུ་རྩ་བཞི་རབ་ཏུ་སྦྱོར་བ་དང་། ཕ་རོལ་གནོན་པས་གཟིར་བ་རྣམས་བྱང་ཆུབ་སེམས་དཔའི་རྩལ་ཆེན་པོ་འདི་ལ་ལྟོས་ཤིག །ཇི་ལྟར་སེམས་ཅན་གཅིག་གི་ཉོན་མོངས་པ་རབ་ཏུ་ཞི་བར་ནུས་པ་དེ་ལྟར་གཉིས་དང་། གསུམ་དང་། བཞི་ནས་གླིང་གཅིག་གི་སེམས་ཅན་ཡོངས་སུ་ཚང་བ་རེ་རེའི་དགོས་པས་ཉོན་མོངས་པ་སྤྱོད་པའི་མཚན་ཉིད་སྟོང་ཕྲག་བརྒྱད་ཅུ་རྩ་བཞི་རབ་ཏུ་ཞི་བར་བྱེད་ཅིང་གླིང་གཉིས་པ་དང་གླིང་བཞི་པ་ནས་ཕྱོགས་བཅུའི་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་དུ་སེམས་ཅན་ཐམས་ཅད་ཉོན་མོངས་པ་ཐམས་ཅད་ལས་ཡོངས་སུ་ཐར་བར་བྱེད་པ་དེ་ལྟར་བྱང་ཆུབ་སེམས་དཔའ་རྙོག་པ་ལྔའི་སངས་
རྒྱས་ཀྱི་ཞིང་དུ་བཟོད་པ་ཐོབ་པ་ཞེས་བྱའོ། །ཇི་ལྟར་ཡང་བྱང་ཆུབ་སེམས་དཔའ་སེམས་ཅན་རེ་རེའི་ཉོན་མོངས་པའི་དབང་པོ་སྤྱོད་པ་སྟོང་ཕྲག་བརྒྱད་ཅུ་རྩ་བཞིས་འཇུག་པ་དེ་ལྟར་སེམས་ཅན་གཅིག་གི་མོས་པ་སྟོང་ཕྲག་བརྒྱད་ཅུ་རྩ་བཞི་རབ་ཏུ་ཤེས་ཤིང་བྲི་བའི་མཚན་ཉིད་རབ་ཏུ་ཤེས་པ་དང་། འཕེལ་བའི་མཚན་ཉིད་རབ་ཏུ་ཤེས་པ་དང་། གནས་པའི་མཚན་ཉིད་རབ་ཏུ་ཤེས་པ་དང་། རྟོགས་པའི་མཚན་ཉིད་རབ་ཏུ་ཤེས་པ་དང་། མི་རྟག་པའི་མཚན་ཉིད་རབ་ཏུ་ཤེས་པ་དང་། སྡུག་བསྔལ་གྱི་མཚན་ཉིད་རབ་ཏུ་ཤེས་པ་དང་། བདག་མེད་པའི་མཚན་ཉིད་རབ་ཏུ་ཤེས་པ་དང་། སེམས་ཅན་གྱི་མཚན་ཉིད་རབ་ཏུ་ཤེས་པ་དང་། སྟོང་པའི་མཚན་ཉིད་རབ་ཏུ་ཤེས་པ་དང་། དབེན་པའི་མཚན་ཉིད་རབ་ཏུ་ཤེས་པ་ནས་དེ་བཞིན་དུ་མཚན་ཉིད་མེད་པའི་བར་དུ་རབ་ཏུ་ཤེས་པ་དང་། མྱ་ངན་ལས་འདའ་བའི་མཚན་ཉིད་རབ་ཏུ་ཤེས་པ་དང་། སེམས་ཅན་རེ་རེའི་ཆགས་པའི་མཚན་ཉིད་སྣ་ཚོགས་བརྒྱད་ཅུ་རྩ་བཞི་རབ་ཏུ་ཤེས་པས་དེ་ལྟར་བྱང་ཆུབ་སེམས་དཔའ་སེམས་ཅན་གྱི་སྤྱོད་པའི་མཚན་ཉིད་མངོན་པར་ཤེས་པར་འགྱུར་རོ། །བསམ་པའི་ཚུལ་ཤེས་པས་སེམས་ཅན་ཉོན་མོངས་པ་དམ་པོས་བཅིངས་པ་ལས་ཡོངས་སུ་ཐར་བར་ནུས་སོ། །དེ་བཞིན་དུ་བྱང་ཆུབ་སེམས་དཔའ་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་སེམས་ཅན་ཡོངས་སུ་སྨིན་པར་བྱེད་དོ། །བྱང་ཆུབ་སེམས་དཔའ་སེམས་ཅན་མི་དགེ་བའི་རྩ་བ་དང་། ལྷན་ཅིག་ཏུ་འགྲོགས་པ་རྣམས་ལ་སྙིང་རྗེ་ཆེན་པོ་རྒྱུན་མི་གཅོད་ཅིང་ཡོངས་སུ་སྨིན་པར་བྱ་བའི་ཕྱིར་འདུག་པ་འདི་ཡང་བྱང་ཆུབ་སེམས་དཔའི་རྩལ་ཆེན་པོའོ། །ཡང་བྱང་ཆུབ་སེམས་དཔའ་དགྲ་རྣམ་པར་འགྲེལ་པས་འདི་བསྟན་པ་སྟོན་པ་ན། ཕྱོགས་བཅུའི་སངས་རྒྱས་ཀྱི་ཞིང་ཚད་མེད་པར་བྱང་ཆུབ་སེམས་དཔའ་ཡང་དག་པར་ལྷགས་པ་དང་། བྱང་ཆུབ་སེམས་དཔའ་ཆུ་བོ་གང་གཱ་སུམ་ཅུའི་བྱེ་མ་སྙེད་མི་སྐྱེ་བའི་ཆོས་ཀྱི་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཆུ་བོ་གང་གཱའི་བྱེ་མ་སྙེད་ཀྱིས་དགའ་བ་བྱེད་པ་ཞེས་བྱ་བའི་ཏིང་ངེ་འཛིན་ཐོབ་པ་དེ་དག་དེ་བཞིན་གཤེགས་པ་ཤཱཀྱ་ཐུབ་པ་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་མགྲིན་གཅིག་ཏུ་འདི་ཆེད་དུ་རྗོད་པ་ཆེད་དུ་བརྗོད་དོ། །ཆུ་བོ་
གང་རྣམས་བལྟ་དཀའ་ཆུ་བོས་ཁྱེར། །ང་རྒྱལ་མངོན་པའི་ང་རྒྱལ་ཡུལ་ལས་ཤེས། །ཉོན་མོངས་རྒྱ་མཚོ་ལས་ནི་མཐར་ཕྱིན་མེད། །ལམ་གྱིས་བདག་ཅག་ཀྱང་ནི་རྣམ་པར་གནས། །སེམས་ཅན་གང་རྣམས་ཉོན་མོངས་གཏུམ་པས་གདུངས། །ཉོན་མོངས་སངས་རྒྱས་ཞིང་དུ་རྟག་རྣམ་མྱོས། །ངན་སོང་འགྲོ་བར་རྟག་ཏུ་སྡུག་བསྔལ་བསགས། །འཆད་མཁན་དམ་པའི་དོན་གྱི་ཐེག་པ་སྟོན། །བདག་ཅག་ཉོན་མོངས་སེམས་ཅན་རྣམས་དགོས་པས། །སངས་རྒྱས་ཞིང་དེར་སྨོན་ལམ་བྱེད་འགྱུར་བ། །ཉོན་མོངས་ཞིང་དུ་བདག་ཅག་སྤྱད་པ་སྤྱོད། །སེམས་ཅན་ཉོན་མོངས་དམ་བཅིངས་གྲོལ་བར་བྱེད། །གང་དག་འདོད་ཆགས་ཞེ་སྡང་ང་རྒྱལ་དྲེགས། །གཏི་མུག་ལམ་སྟོར་སྡིག་པ་རབ་བྱེད་པ། །སྡིག་པ་ཐམས་ཅད་ལས་ནི་བདག་ཅག་ཟློག །འཁོར་བའི་དགོན་པ་འཇིགས་ལས་རབ་ཏུ་སྒྲོལ། །གང་དམྱལ་བྱོལ་སོང་ཡི་དགས་འཇིག་རྟེན་དུ། རྟག་ཏུ་འདོད་མེད་སྡུག་བསྔལ་མྱོང་བ་དག །བདག་ཅག་སྡུག་བསྔལ་ཐམས་ཅད་ལས་གྲོལ་བྱེད། །ཉོན་མོངས་སངས་རྒྱས་ཞིང་དུ་བྱང་ཆུབ་སྤྱོད། །ཡང་སངས་རྒྱས་ཀྱི་ཞིང་མ་ལུས་པར་ཁྱབ་པའི་འཁོར་ཐམས་ཅད་དང་ལྡན་པ་དེས་ཀྱང་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ལེགས་པར་སྤོབས་ཤིང་མཆོག་ཏུ་རྒྱ་ཆེ་བའི་བརྩོན་འགྲུས་བརྟན་པ་ལ་བརྩོན་པ་ཕ་རོལ་གནོན་པ་སེམས་ཅན་ཡོངས་སུ་སྨིན་པའི་ཆོས་ཀྱི་སྒོ་བསྟན་པ་ལེགས་སོ་ལེགས་སོ། །གང་ཆུ་བོ་གང་གཱའི་བྱེ་མ་སྙེད་ཀྱི་སྐྱེས་བུ་དམ་པ་འདིས་སངས་རྒྱས་ཀྱི་ཞིང་ཡོངས་སུ་དག་པར་བྱང་ཆུབ་ཀྱི་སྤྱོད་པ་བོར་ཏེ་རྙོག་པ་ལྔའི་སངས་རྒྱས་ཀྱི་ཞིང་དུ་སྤྱོད་པ་ལ་བརྩོན་ནོ། །སེམས་ཅན་མཚམས་མེད་པར་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། ལུས་ཚིག་པ་དང་། མི་དགེ་བའི་རྩ་བ་དང་ལྷན་ཅིག་ཏུ་འགྲོགས་པ་རྣམས་ཡོངས་སུ་སྨིན་པར་བྱ་བའི་ཕྱིར་སྙིང་རྗེ་ཆེན་པོ་བསྐྱེད་དོ། །ཉོན་མོངས་པའི་སངས་རྒྱས་ཀྱི་ཞིང་བླ་ན་མེད་པའི་སངས་རྒྱས་ཀྱི་ཞིང་དུ་སྟོན་ཏོ། །ལུས་མེད་པ་ཕུང་པོ་སྤོང་བའི་མཐའ་སྟོན་ཏོ། །ཚིག་ཙམ་གྱིས་སྐྱེས་བུ་དེ་དག་བརྩོན་པར་འགྱུར་བ་དེ་དག་ལ་གང་ལྷ་དང་འཇིག་རྟེན་དུ་བཅས་པས་མཆོད་པ་མཆོག་ཏུ་རྒྱ་
ཆེན་པོ་བྱེད་ན་དེ་དག་གི་བརྟན་པའི་བརྩོན་འགྲུས་ཕ་རོལ་གནོན་པ་འདི་ལ་བརྩོན་པ་ལྟ་ཅི་སྨོས་ཏེ། ཇི་ལྟར་ཚིག་གིས་དམ་བཅས་པ་དེ་ལྟར་དགོས་པ་ཐམས་ཅད་ཡོངས་སུ་རྫོགས་པར་འགྱུར་རོ། །དེ་ནས་དེ་ཉིད་ཀྱི་ཚེ་ན་དེ་བཞིན་གཤེགས་པ་ཤཱཀྱ་ཐུབ་པས་ལེགས་སོ་ཞེས་བྱ་བ་བྱིན་ཏེ་སྐྱེས་བུ་དམ་པ་ལེགས་སོ་ལེགས་སོ། །རིགས་ཀྱི་བུ་ཇི་ལྟར་སྨྲ་བའི་ཚིག་ཙམ་གྱིས་རྩོམ་པར་འགྱུར་བ་དེ་དེ་བཞིན་ཏེ། དེ་དག་ལ་གང་ལྷ་དང་འཇིག་རྟེན་དུ་བཅས་པས་མཆོད་པ་མཆོག་ཏུ་རྒྱ་ཆེན་པོ་བྱེད་ན་དེའི་ཤེས་པས་ཉོན་མོངས་པ་དང་རྙོག་པ་ལྔའི་སངས་རྒྱས་ཀྱི་ཞིང་དུ་རྣམ་པ་དེ་ལྟ་བུའི་དེ་དག་གི་རྩལ་ཆེན་པོ་བྱ་བར་འགྱུར་བ་ལྟ་ཅི་སྨོས་ཏེ། མཚམས་མེད་པར་བྱེད་པ་ནས་མི་དགེ་བའི་རྩ་བ་དང་ལྷན་ཅིག་ཏུ་འགྲོགས་པའི་བར་དུ་རྣམ་པ་དེ་ལྟ་བུའི་བརྟན་པའི་བརྩོན་འགྲུས་ཕ་རོལ་གནོན་པའི་ཐབས་ལ་མཁས་པས་ཡོངས་སུ་སྨིན་པར་འགྱུར་རོ། །ཇི་ལྟར་བྱང་ཆུབ་སེམས་དཔའ་དགྲ་རྣམ་པར་འགྲེལ་པས་དེ་ལྟར་སེམས་ཅན་ཡོངས་སུ་སྨིན་པ་ཤེས་རབ་ཀྱི་ཐབས་ལ་མཁས་པའི་ཆོས་ཀྱི་སྒོ་བསྟན་ནས། བཅོམ་ལྡན་འདས་ཀྱིས་ཚིག་འདི་བརྗོད་མ་ཐག་ཏུ་དེ་ནས་དེ་ཉིད་ཀྱི་ཚེ་ན་སྟོང་གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་གི་ས་ཆེན་པོ་འདི་ལན་དྲུག་ཏུ་གཡོས་སོ། །ལྷ་རྫས་ཀྱི་མེ་ཏོག་གི་ཆར་ཡང་རབ་ཏུ་ཕབ་བོ། །ལྷ་རྫས་ཀྱི་རོལ་མོ་ཡང་རབ་ཏུ་དཀྲོལ་ཏོ། །ལྷ་དང་། དྲི་ཟ་དང་། མིའི་འཁོར་ཐམས་ཅད་དང་ལྡན་པ་དེ་དག་ཀྱང་བྱང་ཆུབ་སེམས་དཔའ་དགྲ་རྣམ་པར་འགྲེལ་པ་དང་། བྱང་ཆུབ་སེམས་དཔའ་ཆུ་བོ་གང་གཱའི་བྱེ་མ་སྙེད་པོ་དེ་དག་ལ་མཆོག་ཏུ་རྒྱ་ཆེ་བའི་མཆོད་པའི་ལས་ཀྱི་ཕྱིར་བརྩོན་ནོ། །ཇི་སྙེད་ཡེ་ཤེས་མཛོད་འདི་བསྟན་དུ་གསོལ། །ཡེ་ཤེས་ཕྱིར་ཡང་སྟོན་པ་འདི་ཉིད་སྟོན། །མཁྱེན་པ་ཁྱེད་ཀྱི་གང་གི་སློབ་སྟོན་པ། །ཐུབ་པ་ཤེས་པའི་སྨྲ་བ་འདི་ལ་འཇུག །མཁྱེན་པ་ཅན་གྱི་ཞིང་མང་བྱེ་བ་ལ། །ཐོབ་པའི་ཡེ་ཤེས་སྟོན་པ་འདི་ལ་འཇུག །བདག་ནི་ཡེ་ཤེས་འབྲོག་ས་མྱུར་གནས་ཤིང་། །ཚུལ་འདི་ལ་ཡང་ཡེ་ཤེས་ལམ་རབ་སྟོན། །ཇི་ལྟར་བྱང་ཆུབ་སྤྱོད་ཕྱིར་ཤེས་འགྱུར་བ། །རྒྱལ་བ་ཡེ་ཤེས་རྒྱལ་མཚན་འདི་ལ་འཇུག །ཇི་ལྟར་ནམ་མཁའ་
དྲི་མེད་སྟོང་པའི་ཆོས། །བདག་དང་འཐུན་པའི་གཏམ་དག་བསྟན་དུ་གསོལ། །སྟོན་མཁན་མི་ཡི་གཙོ་བོ་འདི་ལ་མཆོག །མཆོག་ཏུ་ཡིད་དུ་འོང་ཞིང་མཛེས་པ་སྟོན། །སྟོང་པ་ཉིད་ཀྱིས་ཉོན་མོངས་དགྲ་ཟིལ་གནོན། །རྟག་པ་དང་ནི་ཆད་པ་ཐལ་བར་བྱས། །དཔའ་དང་རྟུལ་ཕོད་གང་ཟག་དམ་པ་མཆོག །སྲིད་པ་ཞི་བ་གང་ཟག་དམ་པ་མཆོག །སྲེད་པ་ཞི་ཞིང་ཞི་གནས་རབ་ཏུ་སྟོན། །རྒྱལ་བ་རབ་ཏུ་ཞི་བ་འདི་ལ་འཇུག །རྒྱལ་བ་སྟོང་པ་ཉིད་ཞི་རབ་བསྟན་གསོལ། །རྒྱལ་བ་སྟོང་པ་ཉིད་འདི་ལ་ཡང་འཇུག །ཁ་དོག་དུང་དང་ཁ་བ་འདྲ་བ་ཡི། །ཞི་བ་མཛེས་པའི་སྟོང་པ་ཉིད་བསྟན་གསོལ། །ཉན་ཐོས་ཀྱི་ནི་འདི་ལ་ཚོགས་རྣམས་སྤངས། །སྟོན་གྱི་ཉི་མ་ཟླ་བའི་དཀྱིལ་འཁོར་ལྟར། །གཙོ་བོ་དག་གིས་ཤིན་ཏུ་གསལ་ཤིང་མཛེས། །འདིར་ནི་ལམ་ཞི་སྟོང་པ་ཉིད་བསྟན་གསོལ། །བརྒྱ་བྱིན་ཚངས་པའི་སྐད་ལྟར་སྒྲ་དབྱངས་སྙན། །སེམས་ཅན་དམའ་ལ་ཐུགས་བརྩེ་ཆེན་པོ་ཡིས། །ཐུབ་པ་འདི་ནི་སྟོང་པ་ཉིད་ལ་འཇུག །མྱ་ངན་དང་བྲལ་འགྲོ་བ་འདི་ལ་ཚིམ། །དམའ་བ་སྤྱོད་པ་རྟག་ཏུ་བྱིན་བརླབས་པས། །ཤེས་རབ་མང་གཟིགས་སྟོང་པ་ཉིད་ཞི་གསུངས། །སྡིག་པ་བཅོམ་ཞིང་ཉེས་ཚོགས་དྲི་མ་མེད། འདི་ནི་འགྲོ་ལ་ཐེག་པ་ངན་པ་སྤངས། །དགེ་བའི་མཚན་ཉིད་སྤྱོད་ཡུལ་རབ་ཉམས་པས། །ཀྱེ་མའོ་ད་ལྟར་སྟོང་པ་ཉིད་ཞི་གསུངས། །རྨ་བྱ་ངང་པ་ནེ་ཚོ་སྐེ་ཀ་དབྱངས། །ཉམས་པའི་ཕྱོགས་ཆ་ཅན་གྱི་སྒྲ་རྣམས་འཇིག །ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ལྷ་རྫས་ཀྱི་མེ་ཏོག་ཨུད་པ་ལ་དང་། པད་མོ་དང་། ཀུ་མུ་ད་དང་། པུན་ད་རཱི་ཀས་མངོན་པར་གཏོར་ཏོ། །འཕགས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལེའུ་བཞི་པའོ།། །།