འཕགས་པ་དམ་པའི་ཆོས་དྲན་པ་ཉེ་བར་གཞག་པ།
རྒྱ་གར་སྐད་དུ། ཨཱཪྱ་སད་དྷརྨ་ཏྱུ་པ་སྠཱ་ན། བོད་སྐད་དུ། འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་དང་པོ། སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ཉན་ཐོས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ། ན་ལ་ཏིའི་གྲོང་གི་བྲམ་ཟེའི་གྲོང་ན་བཞུགས་སོ། །དེའི་ཚེ་ན་ཚེ་དང་ལྡན་པ་ཤ་ར་དྭ་ཏིའི་བུ། དགེ་སློང་རབ་ཏུ་མང་པོ་དག་དང་ལྷན་ཅིག་ཏུ་སྔ་དྲོའི་དུས་ཀྱི་ཚེ་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་དོང་ངོ་། །དེའི་ཚེ་དགེ་སློང་རབ་ཏུ་མང་པོ་དག་བསོད་སྙོམས་ཀྱི་ཕྱིར་རྒྱུ་བ་ན། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དག་ག་ལ་བ་དེར་དོང་སྟེ། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དག་དང་ལྷན་ཅིག་ཏུ་ཡང་དག་པར་དགའ་བར་འགྱུར་བ་དང་། ཡང་དག་པར་མགུ་བར་འགྱུར་བའི་ཆོས་ཀྱི་གཏམ་བྱས་ནས་གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དག་གིས་དྲིས་པ། ཀྱེ་ཤཱཀྱ་པ་དག་ཁྱེད་ཅག་གི་དགེ་སྦྱོང་གཽ་ཏ་མ་ལུས་ཀྱི་ཆད་པ་མི་དགེ་བ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད་པ་བདེན་ནམ། ངེད་ཅག་ཀྱང་ལུས་ཀྱི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད་དོ། །ཀྱེ་ཁྱེད་ཅག་གི་དགེ་སྦྱོང་གཽ་ཏ་མ་ངག་གི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད། ངེད་ཅག་ཀྱང་ངག་གི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད་དོ། །ཁྱེད་ཅག་གི་དགེ་སྦྱོང་གཽ་ཏ་མ་ཡིད་ཀྱི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད། ངེད་ཀྱང་ཡིད་ཀྱི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད་ན། ཁྱེད་ཀྱི་དགེ་སྦྱོང་གཽ་ཏ་མའི་ཆོས་
འདུལ་བ་དང་ངེད་ཀྱི་ཐ་དད་དུ་བྱ་བ་ཅི་ཡོད། བསམ་པ་ནི་ཅི་ཡོད། ཁྱད་པར་ནི་ཅི་ཡོད། གང་གིས་ན་དགེ་སྦྱོང་གཽ་ཏ་མའི་ཆོས་འདུལ་བ་ནི་ངེད་ཀྱི་ལས་ཁྱད་པར་དུ་འཕགས། དགེ་སྦྱོང་གཽ་ཏ་མ་དེ་ནི་ཐམས་ཅད་མཁྱེན་པ་ཡིན་ནོ་ཞེས་བདག་ཉིད་སྒྲོགས། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དག་གིས་དེ་སྐད་དྲིས་པ་དང་། དགེ་སློང་གསར་དུ་རབ་ཏུ་བྱུང་བ་དག་ཚེ་དང་ལྡན་པ་ཤ་ར་དྭ་ཏིའི་བུ་དང་བྲལ་བས་རྗེས་སུ་ཡི་རང་བར་ཡང་མི་བྱེད་ལན་ཡང་མ་བཏབ་བོ། །དེ་ནས་དགེ་སློང་རབ་ཏུ་མང་པོ་ཚེ་དང་ལྡན་པ་ཤ་ར་དྭ་ཏིའི་བུ་དང་བྲལ་བ་དག་བསོད་སྙོམས་ཀྱི་བྱ་བ་བྱས་ནས་ན་ལ་ཏིའི་གྲོང་ག་ལ་བ་དེར་དོང་སྟེ་ཕྱིན་ནས། དགེ་སློང་རབ་ཏུ་མང་པོ་དག་ཟས་ཀྱི་བྱ་བ་བྱས་ནས་འཁོད་དོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུ་ཕྱི་ཞིག་ན་བསོད་སྙོམས་བླངས་ཏེ། ན་ལ་ཏིའི་གྲོང་ག་ལ་བ་དེར་སོང་ངོ་། །དེ་ནས་དགེ་སློང་རབ་ཏུ་མང་པོ་ཚེ་དང་ལྡན་པ་ཤ་ར་དྭ་ཏིའི་བུ་ག་ལ་བ་དེར་དོང་སྟེ་ཕྱིན་ནས། དགེ་སློང་རབ་ཏུ་མང་པོ་དག་གིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བསྙད་དོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་དགེ་སློང་རབ་ཏུ་མང་པོ་དག་ལ་འདི་སྐད་ཅེས་སྨྲས་སོ། །གལ་ཏེ་བདག་ཚེ་དང་ལྡན་པ་ཁྱེད་དང་ལྷན་ཅིག་རྒྱལ་པོའི་ཁབ་ཀྱི་ལམ་སྲང་དང་། བཞི་མདོ་དང་། སུམ་མདོ་གཅིག་ཏུ་རིམ་གྱིས་དོང་བ་ལས། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་རྣམས་དང་ཕྲད་པར་གྱུར་ན་ནི་དེས་ན་བདག་གིས་གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དེ་དག་ཆོས་དང་འཐུན་པས་ཚར་བཅད་ཟིན་པ་ཞིག་ན། ཀྱེ་མ་བདག་ཀྱང་ལམ་སྲང་དང། བཞི་མདོ་དང་། སུམ་མདོ་གཞན་ནས་བསོད་སྙོམས་ལ་རྒྱུ་རྒྱུ་ནས་འདིར་ཕྱིན་ཏེ། གང་ཚེ་དང་ལྡན་པ་དག་གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་རྣམས་དང་ལྷན་ཅིག་གཏམ་བྱས་པའི་འདྲི་བའི་ཚུལ་དེ་ནི་བདག་གིས་ཚོར་ཡང་མ་ཚོར་རོ། །ཚེ་དང་ལྡན་པ་དག་བཅོམ་ལྡན་འདས་ཀུན་ཏུ་སྤྱན་མངའ་བ་ཐམས་ཅད་མངོན་སུམ་པ། ལས་དང་འབྲས་བུ་དང་རྣམ་པར་སྨིན་པ་མཁྱེན་པ་དེ་ཧ་ཅང་མི་རིང་
བ་ཞིག་ན་མུ་སྟེགས་ཀྱི་ལྟ་བ་ཅན་ཐམས་ཅད་ཟིལ་གྱིས་མནན་ནས། ཉན་ཐོས་དང་། དགེ་བསྙེན་དང་། ལྷ་དང་མི་རྣམས་ལ་ལས་དང་འབྲས་བུ་རྣམ་པར་སྨིན་པའི་ཆོས་སྟོན་གྱིས། ཁྱེད་དེ་ལ་ཞུས་ཤིག་དང་། དེ་ཡང་ལས་དང་རྣམ་པར་སྨིན་པ་ཐམས་ཅད་སྟོན་པར་མཛད་དེ། གང་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དག་གིས་མ་མཐོང་བ་དེ་ཁྱེད་ལ་སྟོན་པར་མཛད་ཅིང་། གང་བདག་ཅག་གི་མངོན་སུམ་དུ་མ་གྱུར་པ་དེ་ཡང་ཁྱོད་ལ་བཅོམ་ལྡན་འདས་ཤིན་ཏུ་མངོན་སུམ་དུ་གྱུར་པ། ལས་དང་འབྲས་བུ་རྣམ་པར་སྨིན་པ་མཁྱེན་པ་སྟོན་པར་མཛད་དོ། །དེ་ནས་དགེ་སློང་རབ་ཏུ་མང་པོ་དག་བཅོམ་ལྡན་འདས་ག་ལ་བ་དེར་དོང་ངོ་། །དེ་ནས་དགེ་སློང་དེ་དག་གིས་བཅོམ་ལྡན་འདས་ཉིན་མོའི་གནས་པས་བཞུགས་པ། རི་རབ་ལྟར་རང་གི་འོད་ཀྱི་དྲ་བས་མངོན་པར་འབར་བ། ཉིན་མོའི་ཉི་མ་ལྟར་སྣང་བས་རབ་ཏུ་གསལ་བ། མཚན་མོའི་ཟླ་བ་ལྟར་ཞི་བས་རབ་ཏུ་སིམ་པར་མཛད་པ། མཚོ་ལྟར་ཤིན་ཏུ་གསལ་བ། རྒྱ་མཚོ་ལྟར་ཟབ་པ། རི་རབ་ལྟར་མི་གཡོ་བ། སེང་གེ་ལྟར་དཔའ་བ། ཕ་མ་ལྟར་འབྱུང་པོ་ཐམས་ཅད་ཀྱི་སྐྱབས་སུ་གྱུར་པ། ཐུགས་རྗེ་ཆེན་པོས་བརླན་པའི་ཐུགས་སེམས་ཅན་ཐམས་ཅད་ཀྱི་གཉེན་གཅིག་པར་གྱུར་པ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་རྟེན་དུ་གྱུར་པ། བྱང་ཆུབ་ཀྱི་ཕྱོགས་ཀྱི་ཆོས་ཆེན་པོ་སུམ་ཅུ་རྩ་བདུན་གྱིས་སྐུ་བརྒྱན་པ། རབ་ཏུ་དང་བས་ལུས་ཅན་ཐམས་ཅད་ཀྱི་མིག་མགུ་བར་མཛད་པ། ཟླ་བ་དང་ཉི་མའི་འོད་ཟིལ་གྱིས་གནོན་པ། ཤཱཀྱའི་རྒྱལ་པོའི་སྲས་ཀུན་ཏུ་སྤྱན་མངའ་བ། སྤྱན་དྲི་མ་གསུམ་དང་བྲལ་བ། བདེན་པ་གཉིས་གསུང་བ། སྡུག་བསྔལ་གཉིས་མཁྱེན་པ། བསྒོམ་པ་གཉིས་བསྒོམས་ཤིང་མངོན་སུམ་དུ་མཛད་པ། ལམ་གྱི་འབྲས་བུ་མངོན་དུ་མཛད་པ། འགོག་པའི་དེ་ཉིད་མཁྱེན་པ། ཁམས་གསུམ་མངོན་སུམ་དུ་མཛད་པའི་སྤྱན་མངའ་བ། ཁམས་གསུམ་གཞན་
ཡང་དག་པར་སྟོན་པ། ཁམས་བཅྭ་བརྒྱད་ཀྱི་དེ་ཉིད་མཁྱེན་པ། མོས་པ་ཡིད་ལ་བྱེད་པའི་དེ་ཉིད་མཁྱེན་པ། ཡོན་ཏན་གྱི་ཀླུང་རང་གི་ཡོན་ཏན་བཅྭ་བརྒྱད་དག་དང་ལྡན་པ། སྲིད་པའི་འཆིང་བ་ལས་རྣམ་པར་གྲོལ་བ། སྟོབས་བཅུ་དང་ལྡན་པ། བསྙེངས་པ་མི་མངའ་བ་བཞིས་མི་བསྙེངས་པ། ཐུགས་རྗེ་ཆེན་པོ་དང་ལྡན་པ། དྲན་པ་ཉེ་བར་གཞག་པ་གསུམ་དང་རྟག་ཏུ་ལྡན་པ་དེ་མཐོང་ངོ་། །དེ་ནས་དགེ་སློང་རབ་ཏུ་མང་པོ་དག་ཆོས་གོས་ཕྲག་པ་གཅིག་ལ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། དུལ་བས་མགོ་བཏུད་དེ་ཕྱོགས་གཅིག་ཏུ་འཁོད་དོ། །དེ་ནས་དགེ་སློང་རབ་ཏུ་མང་པོ་དག་གིས་དགེ་སློང་གཅིག་ཅིག་བསྒོ་བ་དང་བཅོམ་ལྡན་འདས་ག་ལ་བ་དེར་ཤིན་ཏུ་ཉེ་བར་ཕྱིན་ནས། ཡང་དེ་བཞིན་དུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདིར་བདག་སྔ་དྲོའི་དུས་སུ་ལྷུང་བཟེད་དང་ཆོས་གོས་འཚལ་ནས། རྒྱལ་པོའི་ཁབ་ཏུ་བསོད་སྙོམས་ལ་མཆི་མཆི་ན་ཞེས་བྱ་བ་སྔ་མ་བཞིན་ཏེ། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་རྣམས་དང་ལྷན་ཅིག་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པ་སྔོན་དུ་འགྲོ་བའི་གཏམ་འདྲི་བའི་བར་སྔ་མ་བཞིན་ཏེ། དེ་དག་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་དགེ་སློང་དེ་དག་དང་ན་ལ་ཏིའི་གྲོང་གི་བྲམ་ཟེ་ལ་སོགས་པ་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་ཅག་ལ་ཆོས་བཤད་པར་བྱ་བ་འདི་ལྟ་སྟེ། དམ་པའི་ཆོས་དྲན་པ་ཉེ་བར་གཞག་པ་ཞེས་བྱ་བའི་ཆོས་ཀྱི་རྣམ་གྲངས་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཚངས་པར་སྤྱོད་པ། ཡང་དག་པར་རབ་ཏུ་བསྟན་པར་བྱས། དེ་ལེགས་པར་རབ་ཏུ་ཉོན་ལ་
ཡིད་ལ་ཟུང་ཤིག་དང་བཤད་པར་བྱའོ། །བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ཏེ། དགེ་སློང་དེ་དག་བཅོམ་ལྡན་འདས་ལ་ཉན་པ་དང་། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་དམ་པའི་ཆོས་དྲན་པ་ཉེ་བར་གཞག་པ་ཞེས་བྱ་བའི་ཆོས་ཀྱི་རྣམ་གྲངས་དེ་གང་ཡིན་ཞེ་ན། འདི་ལྟ་སྟེ། ཆོས་ལ་ཡང་ཆོས་ཉིད་དུ། ཆོས་མ་ཡིན་པ་ལ་ཡང་ཆོས་མ་ཡིན་པ་ཉིད་དུ་མཐོང་བ་དེ་དྲན་པ་རྟག་ཏུ་ཉེ་བར་གནས་པར་འགྱུར་ཞིང་འདི་ལ་ཐེ་ཚོམ་ཡང་མི་སྐྱེ། ཆོས་ཉན་པ་ལ་མངོན་པར་དགའ་བར་ཡང་འགྱུར། རྒན་རབས་ལ་ཡང་རིམ་གྲོ་བྱེད་དོ། །དེ་ནི་ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་གསུམ་གྱི་ལས་ཀྱི་འབྲས་བུ་དང་། འཆི་བ་དང་། སྐྱེ་བའི་རྣམ་པར་སྨིན་པ་ཤེས་པར་འགྱུར་ཏེ། ལྟ་བ་མ་ལོག་པ་ཡིན་ཞིང་གཞན་གྱིས་ཁ་མི་ཕྱིན་པར་འགྱུར་རོ། །དགེ་སློང་དག་དེ་ལ་ལུས་ཀྱི་ཆད་པ་རྣམ་པ་གསུམ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པའོ། །དེ་ལ་སྲོག་གཅོད་པ་ཇི་ལྟ་བུ་ཡིན་ཞེ་ན། སེམས་ཅན་ཕ་རོལ་ལ་སེམས་ཅན་དུ་འདུ་ཤེས་ཤིང་བསམས་བཞིན་དུ་སྲོག་ཆགས་བསད་དེ་སྲོག་དང་བྲལ་བར་བྱས་པ་ཡིན་ནོ། །དེ་ཡང་རྣམ་པ་གསུམ་སྟེ། ཆེན་པོ་དང་། འབྲིང་དང་། ཐ་མའོ། །དེ་ལ་ཆེན་པོ་ནི་དགྲ་བཅོམ་པ་ལ་སོགས་པ་བསད་པ་སྟེ་མནར་མེད་པར་འགྲོ་བའོ། །འབྲིང་ནི་ལམ་ལ་གནས་པ་བསད་པའོ། །ཐ་མ་ནི་དུད་འགྲོ་དང་ཚུལ་ཁྲིམས་འཆལ་པ་སྤྱད་པ་བསད་པའོ། །ཡང་རྣམ་པ་གསུམ་སྟེ། འདས་པ་དང་། མ་འོངས་པ་དང་། ད་ལྟར་བྱུང་བའིའོ། །ཡང་རྣམ་པ་གསུམ་སྟེ། འདོད་ཆགས་ཀྱིས་བྱས་པ་དང་། ཞེ་སྡང་གིས་བྱས་པ་དང་། གཏི་མུག་གིས་བྱས་པའོ། །དེ་ལ་འདོད་ཆགས་ཀྱིས་བྱས་པ་ནི་རི་དགས་ལ་སོགས་པ་ལའོ། །ཞེ་སྡང་གིས་བྱས་པ་ནི་སྦྲུལ་དང་ནེའུ་ལེ་ལ་སོགས་པ་ལའོ། །གཏི་མུག་གིས་བྱས་པ་ནི་མཆོད་སྦྱིན་ལ་སོགས་པ་ལའོ། །ཡང་རྣམ་པ་
གསུམ་སྟེ། རང་གིས་བྱས་པ་དང་། གཞན་གྱིས་བཅོལ་བ་དང་། གཉི་གས་བྱས་པའོ། །རྒྱུ་ལྔས་སྲོག་གཅོད་པ་བྱས་ཀྱང་ཁ་ན་མ་ཐོ་བས་གོས་པར་མི་འགྱུར་ཏེ། འདི་ལྟ་སྟེ། ལམ་དུ་འགྲོ་བར་ཞུགས་པ་མི་ཤེས་པས་སྲོག་ཆགས་ཕྲ་མོ་དང་། གྲོག་སྦུར་ལ་སོགས་པ་སྲོག་དང་བྲལ་བར་བྱེད་པ་དང་། གཞན་ལ་མཚོན་ཆ་གཟས་པ་ལས་བསམ་པ་དང་མི་ལྡན་པར་གཞན་ལ་ཕོག་སྟེ། དེ་སྲོག་དང་བྲལ་བ་དང་། ནད་པ་ལ་སྨན་པ་ཕན་པར་འདོད་པས་ཉེས་པར་མ་མཐོང་སྟེ། སྨན་བྱིན་པ་ལས་དེ་ཤི་བ་དང་། དེ་བཞིན་དུ་མས་བུ་གདུལ་བར་བྱ་བའི་ཕྱིར་བརྡེག་པ་ལས་དེ་སྲོག་དང་བྲལ་བ་དང་། མེ་འབར་བའི་ནང་དུ་སྲོག་ཆགས་མི་འདོད་བཞིན་དུ་ལྷུང་བ་སྟེ། རྒྱུ་རྣམ་པ་དེ་ལྔས་སྲོག་བཅད་པར་གྱུར་ཀྱང་གོས་པར་མི་འགྱུར་རོ། །ཡང་སྲོག་གཅོད་པ་རྣམ་པ་གསུམ་སྟེ། གཞན་ལ་བསྒོ་བ་དང་། བདག་ཉིད་བྱེད་པ་དང་། གཉི་གས་བྱེད་པའོ། །གཞན་ཡང་མ་བྱིན་པར་ལེན་པ་རྫོགས་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཕ་རོལ་གྱིས་ཡོངས་སུ་བཟུང་བ་ལ་བདག་གིར་བྱ་བའི་བསམ་པས་རྐུ་བར་བྱེད་པ་འདི་ནི་མ་བྱིན་པར་ལེན་པ་རྫོགས་པ་ཡིན་ནོ། །འབྲས་བུ་ཆུང་བ་ཇི་ལྟ་བུ་ཡིན་ཞེ་ན། འདི་ལྟ་སྟེ། རྒྱལ་པོའི་ཆད་པས་ཉེན་པ་དང་། བླ་མའི་དོན་དང་། ཕ་མ་ནད་པ་དང་། རང་སངས་རྒྱས་དང་། དགྲ་བཅོམ་པ་དང་། ཕྱིར་མི་འོང་བ་དང་། རྒྱུན་དུ་ཞུགས་པ་ལ་སོགས་པ་དང་། ནད་པ་དང་། ལྟོགས་པ་དེ་དག་གི་དོན་དུ་མ་བྱིན་པར་བླངས་པ་འདི་ནི་འབྲས་བུ་ཆུང་བ་ཡིན་ནོ། །མ་བྱིན་པར་ལེན་པའི་སྡོམ་པ་མ་བླངས་པས་མ་བྱིན་པར་ལེན་པ་འདི་ནི་རྣམ་པར་སྨིན་པ་ཆུང་བ་ཡིན་ནོ། །གཞན་ཡང་འབྲས་བུ་ཆུང་བར་འགྱུར་བ་ནི་མ་བྱིན་པར་ལེན་པ་བྱས་ནས། སེམས་ཀྱིས་འཆགས་པར་བྱེད། འགྱོད་ལ་ཕྱིར་ཞིང་མི་བྱེད། ཕ་རོལ་ཡང་མ་བྱིན་པར་ལེན་པ་ལས་ཕྱིར་ཟློག་པར་བྱེད། སྡོམ་པའི་ལུང་ཡང་
འབོགས་པར་བྱེད། ལམ་ལ་ཡང་འཇོག་པར་བྱེད། མ་བྱིན་པར་ལེན་པ་སྤོང་བ་དག་ལ་འཇོག་པར་བྱེད་ཅིང་། ལས་ཀྱི་ཉེར་བསྡོགས་དང་། ལས་ཀྱི་མཇུག་མི་བྱེད་པའོ། །མ་བྱིན་པར་ལེན་པའི་ལས་ཀྱི་ཉེར་བསྡོགས་ཇི་ལྟ་བུ་ཡིན་ཞེ་ན། འདི་ལ་མ་བྱིན་པར་ལེན་པ་པོས་ཕ་རོལ་ལ་གཡོ་སྒྱུ་བྱེད་ཅིང་གསང་ཐབས་སུ་སྨྲ་བ་དང་། འཇལ་ལུགས་ལ་གཡོ་བྱེད་པ་དང་། མི་རིགས་པའི་ལས་ལྷག་པར་སྤྱོད་པ་རྣམ་པ་འདི་དག་ནི་ལས་ཀྱི་ཉེར་བསྡོགས་ཡིན་ནོ། །ལས་ཇི་ལྟ་བུ་ཡིན་ཞེ་ན། གང་གི་ཚེ་ཕ་རོལ་གྱིས་ཡོངས་སུ་བཟུང་བའི་རྫས་ཀྱི་རྣམ་པ་མ་བྱིན་པར་ལེན་པ་འདི་ནི་ལས་ཡིན་ནོ། །ལས་ཀྱི་མཇུག་ཇི་ལྟ་བུ་ཡིན་ཞེ་ན། འདི་ལ་བྱས་ནས་རྗེས་སུ་ཡི་རང་བར་བྱེད་ཅིང་གོམས་པར་བྱེད་ལ་མང་དུ་བྱས་ཏེ། རྗེས་སུ་ཡི་རང་བ་ཀུན་ཏུ་འཆབ་པར་བྱེད། ཚུལ་ཁྲིམས་དང་ལྡན་པ་གཞན་མ་བྱིན་པར་ལེན་པ་ལ་རབ་ཏུ་འཇོག་པར་བྱེད་པ་འདི་ནི་ལས་ཀྱི་མཇུག་ཡིན་ནོ། །རྣམ་པ་འདི་གསུམ་གྱིས་མ་བྱིན་པར་ལེན་པའི་ལས་ཀྱི་ཉེར་བསྡོགས་དང་། མཇུག་དང་བྲལ་བ་མ་བྱིན་པ་ལེན་པའི་ཆད་པའི་འབྲས་བུ་ཆུང་བར་འགྱུར་ཏེ། མྱོང་བར་འགྱུར་བར་ངེས་པ་མ་ཡིན་ནོ། །གཞན་ཡང་འདོད་པས་ལོག་པར་གཡེམ་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་ལ་ཆོས་ཀྱི་རྗེས་སུ་ལྟ་བས་མཐོང་སྟེ། འདི་ལ་འདོད་པས་ལོག་པར་གཡེམ་པ་ཀུན་ཏུ་སྤྱོད་པ་ན་རང་གི་ཆུང་མའམ་གཞན་གྱི་ཆུང་མ་དག་གི་སྐྱེ་གནས་མ་ཡིན་པར་འཇུག་པར་བྱེད། གཞན་བྱེད་པ་ལ་ཡང་རྗེས་སུ་ཡི་རང་བར་བྱེད། མི་བྱེད་པ་ཡང་ཐབས་ཀྱིས་བྱེད་དུ་འཇུག་པ་འདི་ནི་འདོད་པས་ལོག་པར་གཡེམ་པ་ཞེས་བྱའོ། །འདོད་པས་ལོག་པར་གཡེམ་པའི་འབྲས་བུ་ཆུང་བར་འགྱུར་བ་ཇི་ལྟ་བུ་ཡིན་ཞེ་ན། འདི་ལ་བྱས་ནས་འགྱོད་ཅིང་འཆགས་ཏེ། རྗེས་སུ་ཡི་རང་བར་མི་བྱེད། གཞན་འདོད་པས་ལོག་པར་གཡེམ་པ་ཡང་ཕྱིར་ཟློག་པར་བྱེད། ལམ་ལ་འཇོག་པར་བྱེད། ལས་ཀྱི་ཉེར་བསྡོགས་དང་། ལས་ཀྱི་མཇུག་དང་བྲལ་བའི་སེམས་ཡིན་ཞིང་ཚུལ་ཁྲིམས་དང་
ལྡན་པ་ཡིན་ཏེ། འདི་ནི་འདོད་པས་ལོག་པར་གཡེམ་པའི་འབྲས་བུ་ཆུང་བར་འགྱུར་ཞིང་མྱོང་བར་འགྱུར་བར་མ་ངེས་པ་ཡིན་ནོ། །ལུས་ཀྱི་ཆད་པ་རྣམ་པ་གསུམ་པོ་དེ་དག་ནི་འབྲས་བུ་ཆུང་བ་དང་འབྲས་བུ་ཞན་པར་འགྱུར་རོ། །དེ་དག་ནི་ངའི་ཉན་ཐོས་སམ་ང་ལས་ཐོས་ནས་ལས་དང་འབྲས་བུ་རྣམ་པར་སྨིན་པ་ཤེས་ཤིང་གཞན་གྱིས་ཁ་དྲང་དུ་མི་རུང་བ་གཞན་ལ་རག་མ་ལས་པ་མ་གཏོགས་པ། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་རྣམས་སམ། ལྷ་དང་བཅས་པའི་འཇིག་རྟེན་ནམ། བདུད་དང་བཅས་པའམ། ཚངས་པ་དང་བཅས་པའམ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའམ། ལྷ་དང་། མི་དང་། ལྷ་མ་ཡིན་དུ་བཅས་པས་རྟོགས་པའི་ཡུལ་མ་ཡིན་ནོ། །གཞན་ཡང་ངག་གི་ཆད་པ་ལྕི་བ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་དང་ལས་དང་རྣམ་པར་སྨིན་པ་ཤེས་པ་ཡིན་ཏེ། ངག་གི་ཆད་པ་རྣམ་པ་བཞི་ལ་འདི་ལྟ་སྟེ། བརྫུན་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་བཞིའོ། །དེ་ལ་བརྫུན་གང་ཞེ་ན། བདག་ཉིད་ལ་བདག་ཉིད་སླུ་ཞིང་གཞན་ཡང་སླུ་བ་ཡིན་ཏེ། སྨྲས་པའི་ཚེ། རྒྱལ་པོའམ། བློན་པོའི་མངོན་སུམ་དུ་གཞན་དག་ལ་གནོད་པའམ། འཕྲོག་པར་བྱེད་པ་ལོག་པས་བསྐྱེད་པའི་བརྫུན་གྱི་སྐྱོན་རབ་ཏུ་འཇུག་པ་འདི་ནི་བརྫུན་དུ་སྨྲ་བ་ངག་གི་ཆད་པ་རྫོགས་པ་ཡིན་ཏེ། སེམས་ཅན་དམྱལ་བ་མྱོང་བར་འགྱུར་བ་ཡིན་ནོ། །གཞན་ཡང་ངག་གི་ཆད་པ་ཕྲ་མ་ཞེས་བྱ་བ་ནི་དོན་གཅིག་ལ་འཐུན་པར་ཞུགས་པ་རྣམས་ལ་དབྱེན་བྱ་བའི་བསམ་པས་ཚིག་རྗོད་པར་བྱེད་པ་འདི་ནི་ཕྲ་མའི་ངག་གི་ཆད་པ་ཡིན་ནོ། །ཕྲ་མའི་འབྲས་བུ་ཆུང་བ་ཇི་ལྟ་བུ་ཡིན་ཞེ་ན། བདག་གཏི་མུག་གིས་ངན་པ་བྱས་སོ་ཞེས་འཆགས་པར་བྱེད། གཞན་ཕྲ་མ་ལ་མངོན་པར་དགའ་བ་ཟློག་པར་བྱེད། ལམ་ལ་ཡང་དག་པར་འཇོག་པར་བྱེད་ལ་ལས་ཀྱི་ཉེར་བསྡོགས་དང་ལས་ཀྱི་མཇུག་མི་བྱེད་པ་ཡིན་ནོ། །ལས་ཀྱི་ཉེར་བསྡོགས་ཇི་ལྟ་བུ་ཡིན་ཞེ་ན། འདི་ལ་ཕྲ་མ་ལ་མངོན་པར་དགའ་བ་ཉོན་མོངས་པ་རྒྱགས་པ་ལ་
མངོན་པར་ཞུགས་པའི་ཚིག་གཞན་དུ་བཏགས་ནས་གཞན་ལ་སྨྲ་བ་འདི་ནི་ལས་ཀྱི་ཉེར་བསྡོགས་ཡིན་ནོ། །ཕྲ་མའི་ལས་ཀྱི་ལམ་དང་ཡང་དག་པར་རབ་ཏུ་ལྡན་པ་ཇི་ལྟ་བུ་ཡིན་ཞེ་ན། འདི་ལ་སྡང་བའི་སེམས་ཀྱིས་ཡང་དང་ཡང་དུ་གཞན་འབྱེད་ལ་རྗེས་སུ་ཡི་རང་ཞིང་ཀུན་དགའ་བར་བྱེད་པ་འདི་ནི་ཕྲ་མའི་ལས་ཀྱི་ལམ་དང་ཡང་དག་པར་ལྡན་པ་ཡིན་ནོ། །ལས་ཀྱི་མཇུག་དང་བཅས་པ་ཇི་ལྟ་བུ་ཡིན་ཞེ་ན། འདི་ལ་ཕྲ་མ་བྱས་ནས་རྗེས་སུ་ཡི་རང་བར་བྱེད། ཕྱིར་ཞིང་བྱེད་བྱེད་པ་ལ་རྗེས་སུ་ཡི་རང་བར་བྱེད། ཡིད་ཀྱིས་ཀུན་ཏུ་རྟོག་པར་བྱེད། དེ་ཉིད་ལ་མངོན་པར་དགའ་བར་བྱེད། ངང་ཚུལ་གཞན་དུ་མི་བྱེད་པ་ཡིན། སྡང་བའི་སེམས་ཡིན། གཞན་དག་གིས་བཙལ་ཅིང་ཡིད་ཆེས་པའི་གནས་སུ་མི་འགྱུར་བ་ཡིན། སྨོད་པ་ཡིན། ངོ་ཚ་བར་མི་བྱེད་ཅིང་ཁྲེལ་མེད་ལ་བདག་ཉིད་ལ་སྨོད་པར་མི་བྱེད་པ་འདི་ནི་ཕྲ་མའི་ཆད་པ་ཡིན་ནོ། །གཞན་ཡང་ཚིག་རྩུབ་པོའི་ཆད་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་དང་། ལས་དང་ཀུན་འབྱུང་བ་མཐོང་བ་དེས་ཐོས་པ་ལས་བྱུང་བའི་ཤེས་པས་མཐོང་སྟེ། འདི་ནི་ཚིག་རྩུབ་པོས་བདག་གདུང་བར་བྱེད་ཅིང་ཡིད་དུ་མི་འོང་བ་རྣ་བར་ཐོས་ལ་གླགས་སྐྱེད་པར་བྱེད། དེ་གཞན་ལ་གནས་ཏེ། མཁྱུད་པ་དང་། འཆགས་པ་དང་། དགོད་པ་དང་། ཁྲོ་བའི་བསམ་པས་རྣམ་པར་སྨིན་པ་དུ་མ་རྣམ་པ་དུ་མའོ། །དེ་ལ་ཚིག་རྩུབ་པོ་ཆེན་པོས་ནི་སེམས་ཅན་དམྱལ་བའི་ཚོར་བ་མྱོང་བར་འགྱུར། ཚིག་རྩུབ་པོ་འཆགས་པས་ནི་མྱོང་བར་འགྱུར་བར་མ་ངེས་པ་ཡིན་ཏེ། འདི་དག་ནི་ངག་གི་ཆད་པ་གསུམ་པ་ཡིན་ནོ། །ལས་ཀྱི་ཉེར་བསྡོགས་དང་། ལས་ཀྱི་མཇུག་དང་། ཡང་དག་པར་ལྡན་པ་ཞེས་བྱ་བ་ནི་སྔ་མ་བཞིན་ནོ། །གཞན་ཡང་ངག་གི་ཆད་པ་བཞི་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ལས་དང་ཆོས་དང་རྣམ་པར་སྨིན་པའི་རྣམ་པ་དུ་མ་ཤེས་པ་ཡིན་ཏེ། ཚིག་ཀྱལ་པ་ཞེས་བྱ་བ་སྔ་ཕྱི་འབྲེལ་པ་མེད་པའི་ཚིག་ཀྱལ་པ་སྔ་མ་དང་ཕྱི་མར་མི་སྦྱོར་བ་ཡིན་ཏེ། མྱོང་བར་འགྱུར་བར་མ་ངེས་ཤིང་ཁ་ན་མ་ཐོ་བ་མི་མང་བ་ཡིན་པ་འདི་ནི་ངག་གི་
ཆད་པ་བཞི་པ་ཡིན་ནོ། །གཞན་ཡང་ཡིད་ཀྱི་ཆད་པ་ཇི་ལྟ་བུ་ཡིན། རྣམ་པ་ནི་དུ་ཞིག་ཡོད་ཅེ་ན། རྣལ་འབྱོར་སྤྱོད་པ་ལས་དང་ཆོས་དང་རྣམ་པར་སྨིན་པ་ལ་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པས་ཡིད་ཀྱི་ཆད་པ་རྣམ་པ་གསུམ་མཐོང་སྟེ། འདི་ལྟ་སྟེ། བརྣབ་སེམས་ནི་གཞན་གྱི་འབྱོར་པ་མཐོང་ནས་ཤིན་ཏུ་རྟོག་པར་བྱེད། སེམས་ཀྱིས་འདོད་པར་བྱེད། རྫས་འདི་ནི་བདག་གིར་བྱའོ་སྙམ་སྟེ། བརྣབ་སེམས་འདི་ནི་ཡིད་ཀྱི་ཆད་པ་དང་པོ་ཡིན་ནོ། །གཞན་ཡང་ཡིད་ཀྱི་ཆད་པར་འགྱུར་བ་ནི་ཕ་རོལ་གྱི་ཕུན་སུམ་ཚོགས་པ་མཐོང་ནས་ཡིད་རབ་ཏུ་སྡང་བ་གནོད་སེམས་ཏེ། ཡིད་ཀྱི་ཆད་པ་གཉིས་པ་ཡིན་ནོ། །གཞན་ཡང་ཡིད་ཀྱི་ཆད་པ་གསུམ་པ་ནི་ལོག་པར་ལྟ་བས་ཕྱིན་ཅི་ལོག་ཏུ་མཐོང་བ་ལོག་པར་ལྟ་བའི་ཆད་པའོ། །དེ་ཡང་རྣམ་པ་གཉིས་ཏེ། ཡོད་པ་འཇིག་པ་དང་། ལོག་པར་ཤེས་པའོ། །དེ་ལ་ཡོད་པ་འཇིག་པ་ནི་འདི་ལྟར་སྦྱིན་པ་མེད། སྦྱིན་སྲེག་མེད། མཆོད་སྦྱིན་མེད། ལེགས་པར་བྱས་པ་དང་། ཉེས་པར་བྱས་པ་དག་གི་ལས་ཀྱི་འབྲས་བུ་རྣམ་པར་སྨིན་པ་མེད་དོ་ཞེས་བྱ་བ་རྒྱ་ཆེར་སྦྱར་རོ། །ལོག་པར་ཤེས་པ་ཞེས་བྱ་བ་ནི། བདེ་བ་དང་སྡུག་བསྔལ་གང་ཡིན་པ་དེ་ནི་ལྷས་བྱས་ཀྱི་ལས་ཀྱི་འབྲས་བུས་ནི་མ་བྱས་སོ་ཞེས་ཟེར་བ་སྟེ། འདི་ནི་ལོག་པར་ལྟ་བ་རྣམ་པ་གཉིས་པ་ཡིན་ནོ། །གཞན་ཡང་ཇི་ལྟར་ན་ལུས་དང་ངག་དང་ཡིད་རྣམ་པ་གསུམ་གྱི་ཆད་པ་རྣམ་པ་བཅུ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་ན། ཚེ་འདི་ཉིད་ལ་ལས་ཀྱི་འབྲས་བུ་མྱོང་བར་འགྱུར་བར་ངེས་པ་དང་། ཤི་ནས་གཞན་དུ་སྐྱེས་ན་དེའི་རྒྱུ་ཅན་གྱི་ལས་ཀྱི་འབྲས་བུ་གང་ཡིན་པ་དང་རྒྱུ་འཐུན་པའི་འབྲས་བུ་ཇི་ལྟ་བུ་ཡིན་པ་དང་། ཡང་འཇིག་རྟེན་འདིར་སྐྱེས་ན་ཡང་དེ་དག་ཅི་འདྲ་བར་འགྱུར་ཞེ་ན། རྣལ་འབྱོར་སྤྱོད་པ་ལས་དང་ཆོས་དང་རྣམ་པར་སྨིན་པ་ལ་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ལུས་ཀྱི་སྲོག་གཅོད་པ་དང་པོའོ། །སྲོག་གཅོད་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་
བ་དང་དུད་འགྲོ་དང་ཡི་དགས་ཀྱི་ཡུལ་རྣམས་སུ་སྐྱེ་བར་བྱེད་དོ། །གལ་ཏེ་མི་དག་དང་སྐལ་བ་མཉམ་པར་མིའི་ནང་དུ་སྐྱེས་ན་དེ་ཚེ་ཐུང་བ་ཡིན་ནོ། །གལ་ཏེ་རྔོན་པ་ལྟ་བུ་ལ་ཆགས་པས་སྲོག་གཅོད་པ་བྱས་ན། སྲོག་གཅོད་པ་བྱས་པ་དེ་ཉམས་པར་འགྱུར་ཏེ། དེ་རི་དགས་དང་། ཕག་དང་། སྲེག་པ་དང་། ཁྱིམ་བྱ་དང་། གོང་མ་སྲེག་དང་། ཉ་ལ་སོགས་པར་གྱུར་པ་ན། རྒྱའམ་མཆིལ་བས་གསོད་དོ། །འཁོར་བ་ན་ལས་དེ་ལྟ་བུའི་རྒྱུས་འབྲེལ་པ་གལ་ཏེ་ཡང་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་དེ་ཚེ་ཐུང་བར་འགྱུར་ཞིང་། མཁས་པ་རྣམས་ཀྱི་ཡུལ་དུ་སྐྱེ་བར་མི་འགྱུར་ལ། མཚོན་མང་པོས་འཁྲུག་པའི་ཡུལ་དུ་མྱུར་བ་ཉིད་དུ་གསོད་དོ། །སྲོག་གཅོད་པ་ཆུང་ངུ་དང་འབྲིང་དང་ཆེན་པོའི་ཚིགས་སུ་བཅད་པ། ཁ་ཅིག་མངལ་དང་དེ་བཞིན་གཞན། །བཙས་པའི་ཁྱིམ་དང་གཞན་དག་ནི། །གོག་པ་ཙམ་དང་དེ་བཞིན་དུ། །གཞན་དག་ཡོངས་སུ་རྒྱུག་ན་འཆི། །དེ་ལྟར་སྲོག་གཅོད་པ་ནི་ད་ལྟར་གྱི་ཚེ་ལ་རྣམ་པར་སྨིན་པས་དབང་དུ་བྱས་པའི་ལས་ཡིན་ནོ། །གཞན་ཡང་མ་བྱིན་པར་ལེན་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་རྣམ་པར་སྨིན་པ་རྣམ་པ་གསུམ་པོ་འདི་ལྟ་སྟེ། སེམས་ཅན་དམྱལ་བ་མྱོང་བ་དང་ཚེ་འདི་དང་རྒྱུ་འཐུན་པའི་འབྲས་བུ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ལས་དང་ཆོས་དང་རྣམ་པར་སྨིན་པ་ལ་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པས་མཐོང་སྟེ། དེ་ལྟར་མ་བྱིན་པར་ལེན་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ཡུལ་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ཡང་དབུལ་བར་འགྱུར་ཏེ། ལོངས་སྤྱོད་བསྒྲུབས་པ་གང་དག་ཡོད་པ་དེ་དག་རྒྱལ་པོའི་ཆད་པ་དང་། ཆུ་དང་། མེ་དང་། མཚོན་དང་། ཆོམ་རྐུན་གྱི་འཇིགས་པ་དག་གིས་བསགས་བསགས་པ་དག་ཆུད་ཟ་བར་འགྱུར། ནམས་ཀྱང་བདེ་བར་མི་
འགྱུར་ཏེ། འདི་ནི་མ་བྱིན་པར་ལེན་པའི་ཆད་པའི་འབྲས་བུ་རྣམ་པ་གསུམ་པ་ཡིན་ནོ། །གཞན་ཡང་ནང་གི་འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་འབྲས་བུ་རྣམ་པ་གསུམ་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ལས་དང་ཆོས་དང་རྣམ་པར་སྨིན་པ་ལ་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་མཐོང་སྟེ། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་དང་། དུད་འགྲོ་དང་ཡི་དགས་རྣམས་ཀྱི་ཡུལ་དུ་སྐྱེའོ། །གལ་ཏེ་མིར་སྐྱེས་ན་ཡང་རྒྱུ་འཐུན་པའི་འབྲས་བུས་དེའི་ཆུང་མ་གུས་པ་མེད་པར་འགྱུར། མཚན་གཉིས་པར་འགྱུར། འཇིག་རྟེན་པས་བརྙས་པར་འགྱུར་རོ། །འདི་ནི་ལུས་ཀྱི་ཆད་པ་རྣམ་པ་གསུམ་པའི་རྣམ་པར་སྨིན་པའི་འབྲས་བུ་རྣམ་པ་གསུམ་ཡིན་ཏེ། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་རྣམས་ཀྱི་ལུས་ཀྱི་ཆད་པ་མི་འདོད་པ་ནས་རྒྱས་པར་ལས་ཀྱི་རྣམ་པར་སྨིན་པའི་བར་ནི་དེ་ལྟ་བུ་མ་ཡིན་ནོ། །དེ་ཅིའི་ཕྱིར་ཞེ་ན། གཏི་མུག་དང་འགྲོགས་པ་བསྒོམས་པའི་སེམས་དང་ལྡན་པ་གཞན་གྱིས་ནི་ངའི་ལས་དང་ཆོས་དང་རྣམ་པར་སྨིན་པའི་གང་ཡིན་པ་འདི་མི་མཐོང་གི །འདི་ལྟར་ངའི་ཉན་ཐོས་དང་། ངའི་རྣལ་འབྱོར་སྤྱོད་པ་དག་གིས་རྗེས་སུ་མཐོང་ངོ་། །གཞན་ཡང་ཚིག་དང་ངག་གི་ཆད་པ་ཇི་ལྟ་བུ་ཡིན། རྣམ་པ་ནི་དུ་ཡོད་ཅེ་ན། རྣལ་འབྱོར་སྤྱོད་པ་ཆོས་ལ་ཆོས་ཀྱི་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པས་ངག་གི་ཆད་པ་རྣམ་པ་བཞི་མཐོང་སྟེ། འདི་ལྟ་སྟེ། བརྫུན་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པའོ། །དེ་ལ་བརྫུན་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཀྱི་སྐྱེ་གནས་རྣམས་སུ་སྐྱེའོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ཡང་། སེམས་ཅན་ཐམས་ཅད་ཀྱིས་ཚིག་གཟུང་བར་མི་འགྱུར་ཏེ། རྒྱལ་པོའི་ཕོ་བྲང་འཁོར་དང་ཁྱིམ་བདག་གི་འཁོར་
དང་རྒྱལ་རིགས་ཀྱི་འཁོར་དང་རང་གི་བུ་དང་ཆུང་མས་ཀྱང་ཚིག་གཟུང་བར་མི་འགྱུར། དེའི་ཁ་ནས་དྲི་མནམ་པ་འབྱུང་། སོ་དང་ཁ་དང་མདོག་དང་པགས་པ་མི་སྡུག་པར་འགྱུར། འཇིག་རྟེན་པ་ཀུན་གྱིས་ཀྱང་ལོག་པའི་མངོན་པར་སྤྱོད་པས་མངོན་པར་སྦྱོར་བར་འགྱུར། རྟག་ཏུ་འཇིགས་པར་ཡང་འགྱུར། དེའི་མཛའ་བཤེས་དང་། གཉེན་དང་། སྐྱེ་བོ་སྙིང་དུ་སྡུག་པ་དག་བསྟེན་པར་མི་འགྱུར། བྱེད་པ་བརྩམས་པ་ཐམས་ཅད་འབྲས་བུ་མེད་པར་འགྱུར། དོན་མེད་པ་ཐམས་ཅད་སྤྱོད་པར་འགྱུར་ཏེ། འདི་ནི་བརྫུན་གྱི་ལས་ཀྱི་འབྲས་བུ་མི་འདོད་པ་མི་སྡུག་པ་ཡིད་དུ་མི་འོང་བ་ཡིན་ནོ། །གཞན་ཡང་ངག་གི་ཆད་པ་གཉིས་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་འབྲས་བུ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་ལ་ཆོས་ཀྱི་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་མཐོང་སྟེ། ཕྲ་མ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ཡུལ་དུ་སྐྱེའོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ཡང་དེ་ལྐུགས་པར་འགྱུར། འོན་པར་འགྱུར། དེའི་ཁ་ནས་དྲི་མནམ་པ་འབྱུང་། དེའི་ཚིག་ལ་སུ་ཡང་ཡིད་མི་ཆེས་ཤིང་དེ་སྐྱེ་བོ་ཀུན་གྱི་བཞད་གད་པར་འགྱུར། གདོང་གི་མདོག་མི་སྡུག་པར་འགྱུར། གནས་གཅིག་ལ་མངོན་པར་དགའ་བར་མི་འགྱུར། སེམས་གཡོ་བར་འགྱུར། སེམས་འཐས་པར་འགྱུར་ཏེ། འདི་ནི་ཕྲ་མའི་ཆད་པ་ཡིན་ནོ། །ཚིག་རྩུབ་པོ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་ཆད་པ་ཇི་ལྟ་བུ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་མཐོང་སྟེ། ཚིག་རྩུབ་པོ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ཡུལ་དུ་སྐྱེའོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ཡང་སུ་ལས་ཀྱང་དབུགས་ཕྱིན་པ་མི་འཐོབ། སྐྱེ་བོ་ཀུན་གྱིས་ཀྱང་རྟག་ཏུ་མངོན་
པར་གཙེ་བར་འགྱུར་ཏེ། སུས་ཀྱང་དབུགས་འབྱིན་པར་མི་འགྱུར། བུ་དང་ཆུང་མ་ལས་དགའ་བའི་ཚིག་གཅིག་ཙམ་ཡང་མི་འཐོབ། རི་དགས་ལྟར་རྟག་ཏུ་སྐྱེ་བོ་ཀུན་གྱིས་འཇིགས་པར་འགྱུར། དགེ་བའི་བཤེས་གཉེན་དང་སྤྱོད་པར་མི་འགྱུར། སྡིག་པའི་གྲོགས་པོར་འགྱུར་ཏེ། རྣམ་པ་གསུམ་པོ་འདི་ནི་ཚིག་རྩུབ་པོའི་འབྲས་བུ་ཡིན་ནོ། །གཞན་ཡང་ཚིག་ཀྱལ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་ཆད་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཚིག་ཀྱལ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ཡུལ་དུ་འགྲོའོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ཡང་སྐྱེ་བོ་ཀུན་མི་དགའ་ཞིང་ཡང་བར་འགྱུར། རྒྱལ་པོའི་ཕོ་བྲང་དང་མཛའ་བཤེས་དང་གཉེན་དག་གི་ཁྱིམ་དུ་ཡང་སྨྱོན་ཐབས་མཁན་ལྟ་བུར་འགྱུར་ཏེ། དེ་ནི་ཚིག་ཀྱལ་པའི་ཆད་པ་ཡིན་ནོ། །གཞན་ཡང་ཡིད་ཀྱི་མི་དགེ་བ་རྣམ་པ་གསུམ་པོ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་ཆད་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་མཐོང་སྟེ། བརྣབ་སེམས་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ཡུལ་དུ་སྐྱེའོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་དེའི་རྫས་བསགས་བསགས་པ་དག་རྒྱལ་པོ་དང་། ཆུ་དང་། མེའི་གནོད་པས་འཕྲོག་པར་འགྱུར་རྟག་ཏུ་དབུལ་བར་ཡང་འགྱུར་རོ། །གཞན་ཡང་གནོད་སེམས་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་ཡིད་ཀྱི་ཆད་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་མཐོང་སྟེ། གནོད་སེམས་ཀུན་ཏུ་
བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་རྣམས་ཀྱི་ཡུལ་དུ་སྐྱེའོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ཡང་དེ་རི་བྲགས་དང་། ཀླ་ཀློ་རྟག་ཏུ་མཚོན་གྱིས་འཁྲུག་ཅིང་རྟག་ཏུ་འཇིགས་པ་རྣམས་སུ་སྐྱེ་བར་འགྱུར། རྟག་ཏུ་གཡང་ས་རྣམས་སུ་ལྟུང་བར་འགྱུར། དེའི་སེམས་ནམས་ཀྱང་བདེ་བར་གནས་པར་མི་འགྱུར་ཞིང་། གནོད་པ་དག་གིས་རྟག་ཏུ་གནོད་པར་འགྱུར་རོ། །གཞན་ཡང་ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་ཡིད་ཀྱི་ཆད་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་མཐོང་སྟེ། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་མནར་མེད་པ་ལ་སོགས་པར་སྡུག་བསྔལ་གྱི་ཚོར་བ་ཐམས་ཅད་མྱོང་བར་སྐྱེ། དུད་འགྲོའི་སྐྱེ་གནས་སུ་ཚེ་བྱེ་བ་བརྒྱ་ཕྲག་དུ་མར་འཕོ་ཞིང་སྐྱེ། དེ་བཞིན་དུ་ཡི་དགས་ཀྱི་ཡུལ་དུ་ཡང་སྐྱེའོ། །གལ་ཏེ་བརྒྱ་ལ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ཡང་དེ་ཇི་སྐད་བཤད་པའི་མི་དགེ་བའི་ལས་ཀྱི་ལམ་གྱི་སྐྱོན་སྟོང་དུ་སྒྱུར་བ་ཐམས་ཅད་དེ་ལ་འབྱུང་ངོ་། །གཞན་ཡང་རྣམ་པ་གཞན་གང་གིས་ན་མི་དགེ་བ་བཅུའི་ཆོས་དག་ཤིན་ཏུ་ཕྲ་བ་རྗེས་སུ་སེམས་ན་ཡང་འཁོར་བ་ན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་སུ་འཁྱམ་པ། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། སྲོག་གཅོད་པ་ཇི་ལྟར་ཀུན་ཏུ་སྟེན། ཇི་ལྟར་སྒོམ། ཇི་ལྟར་མང་དུ་བྱེད་ཅེ་ན། འདི་ལ་སྲོག་གཅོད་པ་གྲོགས་པོ་ངན་པའམ། སློབ་མའམ། དེའི་གྲོགས་ལ་ཀུན་ཏུ་སྟེན་པར་བྱེད། དེ་དང་ལྷན་ཅིག་ཀུན་ཏུ་དགའ་བར་བྱེད། རྩེ་བར་བྱེད། ཡོངས་སུ་སྤྱོད་པར་བྱེད། ཀུན་ཏུ་གནས་པར་བྱེད། དེ་ལ་ཡིད་ཆེས་པའི་གནས་སུ་བྱེད། ཐམས་ཅད་ཡོན་ཏན་དུ་ལྟ་བར་བྱེད།
དེའི་ཚུལ་གྱིས་རྗེས་སུ་འཇུག་པར་བྱེད། མི་དགེ་བའི་བཤེས་གཉེན་ནམ། སློབ་མ་དེས་མི་སྲོག་གཅོད་པའི་ཚུལ་ཅན་དེ་སྲོག་གཅོད་པའི་རྒྱུ་བྱེད་པ་གཏམ་སྣ་ཚོགས་ལམ་མ་ཡིན་པར་གྱུར་པ་དང་། སྲོག་གཅོད་པ་ལ་རབ་ཏུ་འཇོག་པར་བྱེད་དེ། དེ་བཞིན་དུ་མཆོད་སྦྱིན་གྱི་གཏམ་མམ། དེ་བཞིན་དུ་རི་དགས་ཀྱི་གཏམ་མམ། དེ་བཞིན་དུ་རོ་ལ་ཆགས་པ་རབ་ཏུ་ཉེས་པའི་གཏམ་མམ། དེ་བཞིན་དུ་དགྲ་བོ་མི་མཛའ་བ་དང་འབྲེལ་བ་ལ་ལན་ལྡོན་པའི་གཏམ་མམ། དེ་བཞིན་དུ་དེའི་རྫས་ལ་ཆགས་པའི་གཏམ་མམ། དེ་བཞིན་དུ་ཉོན་མོངས་པ་ལ་རབ་ཏུ་སྤྲོ་བ་རྫས་ལ་ཆགས་པ་དང་། གྲགས་པའི་ལས་ཀྱི་གཏམ་རྣམས་ལ་རབ་ཏུ་འཇོག་པར་བྱེད། དེ་ཡང་དེ་ལ་ཡིད་ཆེས་པའི་གནས་སུ་རྗེས་སུ་འཇུག་པ་ན། སྲོག་གཅོད་པ་ཀུན་ཏུ་སྟེན་པར་བྱེད་དོ། །དེ་ལྟར་སྲོག་གཅོད་པ་བསྟེན་པ་ནི། སེམས་ཅན་དམྱལ་བར་འགྲོ། ཡི་དགས་ཀྱི་འཇིག་རྟེན་དུ་འགྲོ། དུད་འགྲོའི་འཇིག་རྟེན་དུ་འགྲོ་སྟེ། མི་འདོད་པ། མི་སྡུག་པ། ཡིད་དུ་མི་འོང་བ་སྐྱེ་བོ་མཁས་པ་ཀུན་གྱིས་སྨད་པར་འགྱུར་རོ། །མིར་སྐྱེས་ན་ཡང་ཚེ་ཐུང་བའི་རྒྱུར་འགྱུར་རོ། །དེ་ལྟར་ན་བཤེས་གཉེན་ངན་པའི་ས་བོན་ཅན་གྱི་སྲོག་གཅོད་པ་དེ་ནི་སྲོག་གཅོད་པ་ཀུན་ཏུ་སྟེན་པར་བྱེད་དོ། །མི་ངན་པ་གོམས་པར་བྱེད་པ་ཇི་ལྟ་བུ་ཡིན་ཞེ་ན་མི་ངན་པ་སྲོག་གཅོད་པ་བསྟེན་པ་ཞེས་བྱ་བ་སྔ་མ་བཞིན་སྦྱར་ཏེ། སྲོག་གཅོད་པ་བྱས་ནས་ཡིད་ཀྱིས་དགའ་བར་བྱེད། མགུ་བར་བྱེད། ཡིད་ཀྱིས་ཀུན་ཏུ་རྟོག་པར་བྱེད། ཡོན་ཏན་དུ་ལྟ་བའི་བློ་ཅན་དུ་བྱེད། སྲོག་གཅོད་པ་ཉིད་ལ་ཀུན་ཏུ་རྟོག་པར་བྱེད། རྣམ་པ་མང་པོས་གཞན་གྱི་སྲོག་འཕྲོག་པར་བྱེད་དོ། །དེ་སྐྱོན་དུ་མི་འགྲང་། དེ་ལ་སྨོད་པར་མི་བྱེད། དེ་ལ་དགའ་བ་དང་འབྲལ་བར་མི་བྱེད། ཕྱིར་ཞིང་དེའི་ངང་ཚུལ་དུ་བྱེད། སྲོག་མི་གཅོད་པའི་ཚུལ་ཅན་གཞན་དག་ཀྱང་སྲོག་གཅོད་པ་དེ་ལ་རབ་ཏུ་འཇོག་པར་བྱེད། གཏམ་རྒྱུད་དང་བཅས་པ་སྣ་ཚོགས་དག་གིས་སྔ་མ་བཞིན་དུ་སྦྱར་ཏེ། དེ་ལྟར་སྲོག་གཅོད་པ་གོམས་པར་བྱེད་
དོ། །མང་དུ་བྱེད་པ་ཇི་ལྟ་བུ་ཡིན་ཞེ་ན། འདི་ན་གང་སྲོག་གཅོད་པ་བྱས་ནས་གོམས་པར་བྱེད་པ་སྔ་མ་བཞིན་དུ་སྦྱར་ཏེ། འདི་ལ་སྲོག་གཅོད་པ་བྱེད་པ་ན། དེ་ལ་གོམས་པ་དང་། སྡིག་པའི་གྲོགས་པོ་དང་ཕྲད་པས་རྒྱ་འབྲེ་བར་བྱེད། དེ་ལ་དུག་མདའ་བྱེད། ཁྱི་སོགས་པར་བྱེད། སྲོག་གཅོད་པའི་བྱ་སྡུད་པར་བྱེད། གཏུམ་པོ་དང་སྟེན་པར་བྱེད། ཐབ་མོ་ལ་དགའ་སྟེ། ཡ་ལད་དང་། མཚོན་ཆ་དང་། རལ་གྲི་དང་། མདའ་བོ་ཆེ་དང་། སྟེའུ་ཀ་དང་། འཁོར་ལོ་དང་། གོ་མཚོན་ལ་སོགས་པའི་ངང་ཚུལ་ཅན་ཡིན། སྲོག་གཅོད་པར་བྱེད་པའི་རྒྱུ་གཞན་གང་ཡིན་པ་དེ་ཐམས་ཅད་ཀྱང་ཡོངས་སུ་འཛིན་པར་བྱེད་དོ། །མི་དེ་ལྟ་བུ་ནི་སྲོག་གཅོད་པ་མང་དུ་བྱེད་པ་ཡིན་ནོ། །རྒྱུ་དེ་དང་། གཞི་དེ་དང་། རྐྱེན་དེས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ཡུལ་དུ་སྐྱེ་སྟེ། གནོད་པ་མི་བཟད་པས་མངོན་པར་གནོད་དོ། །སྲོག་གཅོད་པ་ཐ་མ་དང་། འབྲིང་དང་། ཆེན་པོས་རྣམ་པར་སྨིན་པ་ཐ་མ་དང་། འབྲིང་དང་། ཆེན་པོ་ཉེ་བར་སྤྱོད་པར་འགྱུར་རོ། །ལས་བྱས་ལ་བསགས་པས་ནི་ལས་ཀྱི་རྣམ་པར་སྨིན་པ་མྱོང་བར་མི་འགྱུར་བ་མེད་དེ། དེ་ལྟར་ན་བདག་ཉིད་ཀྱིས་བྱས་པའི་ལས་ནི་བདག་ཉིད་ཀྱིས་ཉེ་བར་སྤྱོད་པར་འགྱུར་རོ། །དེ་ལྟ་བས་ན་གལ་ཏེ་འཁོར་བ་ལ་ཡིད་བྱུང་ན་སྡིག་པ་སྤངས་ནས་དགེ་བ་ཀུན་ཏུ་སྤྱད་པར་བྱ་སྟེ། འདི་ནི་སྲོག་གཅོད་པ་ཀུན་ཏུ་སྟེན་ཅིང་མང་དུ་བྱེད་པ་ཡིན་ནོ། །ཇི་ལྟར་ན་མ་བྱིན་པར་ལེན་པ་ཀུན་ཏུ་སྟེན་ཅིང་སྒོམ་སྟེ་མང་དུ་བྱེད་པ་ཡིན། ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས། སེམས་ཅན་དམྱལ་བ་ཇི་ལྟར་མྱོང་བར་འགྱུར་ཞེ་ན། འདི་ལ་ཚུལ་ཁྲིམས་འཆལ་པའི་མི་ནི་ངོ་བོ་ཉིད་ཀྱིས་མ་བྱིན་པར་ལེན་པའི་ངང་ཚུལ་ཅན་ཡིན་ཏེ། གྲོགས་པོ་ངན་པའམ། སློབ་མ་དང་འབྲེལ་པས་མ་བྱིན་པར་ལེན་པ་ཐ་མ་དང་། འབྲིང་དང་། ཆེན་པོ་ཀུན་ཏུ་སྤྱོད་དོ། །དེ་ལ་ཐ་མ་ནི་རྒྱལ་པོའི་ཆད་པས་སྐྲག་ནས་གཞན་གྱི་ལེན་པ་ཡིན་ཏེ་སྔ་མ་བཞིན་ནོ། །འབྲིང་ནི་
དངོས་པོ་ཆུང་ངུ་ཡིན་ཏེ། ཞིང་བཟང་པོ་ལ་བརྐུས་པ་མ་ཡིན་པ་འདི་ནི་མ་བྱིན་པར་ལེན་པ་འབྲིང་ཡིན་ནོ། །སངས་རྒྱས་དང་། ཆོས་དང་། དགེ་འདུན་དག་ལས་ནི་ཆུང་ངུ་ཞིག་བླངས་ན་ཡང་ཆེན་པོར་འགྱུར་ཏེ། སངས་རྒྱས་དང་། ཆོས་དང་། དགེ་འདུན་གྱི་མ་བྱིན་པར་བླངས་པ་དེ་དག་ལས་ཀྱང་རིས་སུ་འཐུན་པར་སླར་ཕུལ་ན། སངས་རྒྱས་དང་། ཆོས་ཀྱི་ནི་དག་པར་འགྱུར་ལ། དགེ་འདུན་གྱི་བརྐུས་པ་ནི་ཚོར་བ་མ་མྱོང་བར་དག་པར་འགྱུར་བ་མེད་དེ་ཞིང་ལྕི་བའི་ཕྱིར་གལ་ཏེ་ཞལ་དུ་འདུ་བའི་སྒོ་ཞིག་ན་ནི་དེ་སེམས་ཅན་དམྱལ་བ་ཆེན་པོར་ལྟུང་ལ་གལ་ཏེ་ཞལ་དུ་འདུ་བའི་སྒོ་མ་ཡིན་ན་ནི། དེའི་ནང་གི་བར་མནར་མེད་པའི་འཁོར་མུན་ནག་ཆེན་པོ་ལ་སོགས་པར་སྐྱེ་བར་འགྱུར་རོ། །གལ་ཏེ་མ་བྱིན་པར་ལེན་པ་ཆུང་ངུ་ཞིག་བླངས་ནས་ཀྱང་ཀུན་ཏུ་སྟེན་ཅིང་སེམས་ལ་དགའ་བར་བྱེད་དེ། གོམས་པར་བྱེད་ལ་མང་དུ་བྱེད་ན། མ་བྱིན་པར་ལེན་པ་ཆུང་ངུ་དེས་ཀྱང་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་འཆགས་པར་བྱེད་ཅིང་རྗེས་སུ་ཡི་རང་བར་མི་བྱེད་ལ་འགྱོད་ན་དེའི་མྱོང་བར་འགྱུར་བར་མ་ངེས་པ་ཡིན་ནོ། །གལ་ཏེ་མ་བྱིན་པར་ལེན་པའི་ངང་ཚུལ་ཅན་ཞིག་དེ་ཐབས་དུ་མས་མ་བྱིན་པར་ལེན་པ་ཀུན་ཏུ་སྤྱོད་ན། འདི་ནི་མ་བྱིན་པར་ལེན་པ་ཀུན་ཏུ་བསྟེན་པ་ཡིན་ནོ། །གོམས་པར་བྱེད་པ་ཇི་ལྟ་བུ་ཡིན་ཞེ་ན། འདི་ལ་མ་བྱིན་པར་ལེན་པའི་རྫས་ཐོབ་ནས་མགུ་བར་འགྱུར་ཞིང་ཆོམ་རྐུན་ལ་མངོན་པར་དགའ་བར་བྱེད་དོ། །དེ་རྫས་དེ་ཐོབ་ནས་བཟའ་བ་དང་། བགོ་བ་བྱས་ཤིང་དགའ་བར་འགྱུར་ཏེ། ཡོན་ཏན་དུ་བཟུང་ནས་གཞན་དག་ཀྱང་མ་བྱིན་པར་ལེན་པ་ལ་རབ་ཏུ་འཇོག་པར་བྱེད། ཡང་དག་པར་འཇུག་པར་བྱེད། ཡང་དག་པར་འཛིན་དུ་བཅུག་ཅིང་བྱེད་དུ་འཇུག་པ་དེ་ལྟ་བུ་ནི་མ་བྱིན་པར་ལེན་པ་གོམས་པར་བྱེད་པ་ཡིན་ནོ། །མ་བྱིན་པར་ལེན་པ་མང་དུ་བྱེད་པ་ཇི་ལྟ་བུ་ཡིན་ཞེ་ན། འདི་ལ་མ་བྱིན་པར་ལེན་པ་བྱས་ནས། མལ་ཆ་དང་། བཟའ་བ་དང་། བཅའ་བ་དང་།
གོས་དང་། རྒྱན་དང་། བཏུང་བ་དང་། སྨད་འཚོང་བ་དང་། རྒྱན་པོ་མང་པོ་དག་ལ་མངོན་པར་དགའ་བར་བྱེད་དོ། །དེ་སེམས་ཀྱིས་མངོན་པར་དགའ་བར་བྱེད་དེ། བདེ་བ་ཐམས་ཅད་ཀྱི་ནང་ན་འདི་ལྟ་སྟེ། མ་བྱིན་པར་ལེན་པ་ཞེས་བྱ་བ་འདི་ནི་ལེགས་པར་བྱས་པ་ཡིན་ནོ། །རྒྱུ་དེས་བདག་མལ་ཆ་དང་། བཟའ་བ་དང་། བཅའ་བ་དང་། གོས་དང་། རྒྱན་དང་། བཏུང་བ་དང་། སྨད་འཚོང་བ་དང་། རྒྱན་པོ་མང་པོ་དག་གིས་མཆོག་ཏུ་བདེ་བ་མྱོང་ངོ་། །མ་བྱིན་པར་ལེན་པ་དེ་བདག་གིས་ཀུན་ཏུ་སྤྱད་པར་བྱ་སྟེ། དེ་བདག་ལ་བདེ་བ་རབ་ཏུ་མང་པོ་དག་ཏུ་འགྱུར་རོ་སྙམ་ན་སྔ་མ་བཞིན་དུ་སྦྱར་ཏེ། འདི་ནི་མ་བྱིན་པར་ལེན་པ་མང་དུ་བྱེད་པ་ཡིན་ཏེ། དེ་ནི་སེམས་ཅན་དམྱལ་བ་རྣམས་སུ་མྱོང་བར་འགྱུར་བར་ངེས་པ་ཡིན་ནོ། །འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ། མང་དུ་བྱེད་པ་ཇི་ལྟ་བུ་ཡིན་ཞེ་ན། འདི་ལ་ཚུལ་བཞིན་མ་ཡིན་པ་ཡིད་ལ་བྱེད་པས་ཟིལ་གྱིས་ནོན་པ་ནི་འདོད་ཆགས་དང་བཅས་པའི་རིས་འཐུན་པ་གཞན་འདི་ལྟ་སྟེ། བྱེའུ་མཆིལ་པ་དང་། ངུར་བ་དང་། གོང་མ་སྲེག་དང་། ནེ་ཙོ་དང་། རྨ་བྱ་དང་། སྲེག་པ་དང་། ཉ་དང་། སྲོག་ཆགས་དུད་ཀ་དག་ནི་ལྷ་མ་ཡིན་གྱི་རིས་དག་ནས་ཤི་འཕོས་ནས་འདིར་སྐྱེས་པ་ཡིན་ཏེ། འདོད་ཆགས་ཤས་ཆེ་བའི་གྲོགས་པོ་ངན་པ་དང་ལྷན་ཅིག་ཡན་ལག་མ་ཡིན་པར་སྤྱོད་པ་ཡིན་ནོ། །དེ་ཚུལ་བཞིན་མ་ཡིན་པ་ཉིས་འགྱུར་གྱིས་མངོན་པར་ཞེན་ལ་དེ་འདོད་ཆགས་ཚིམ་པ་མེད་པ་དང་བཅས་པའི་སེམས་ཀྱིས་ཚུལ་བཞིན་མ་ཡིན་པ་ཀུན་ཏུ་སྤྱོད་དེ། གང་དྲི་ཟ་དེར་ཉེ་བར་འགྱུར་ཞིང་གང་གིས་དེར་སྐྱེ་བར་འགྱུར་བ་ཚུལ་བཞིན་མ་ཡིན་པ་དེ་ནི་སྐྱེ་གནས་ཀྱི་ཞིང་ལ་སྐྱོན་ཡོད་པའི་ཕྱིར་དེར་སྐྱེ་བར་མི་འགྱུར་རོ། །རྒྱུ་དེས་ན་ཚུལ་བཞིན་མ་ཡིན་པ་དང་བཅས་པའི་འདོད་པས་ལོག་པར་སྤྱོད་པ་ནི་ངན་པ་ཡིན་ནོ། །མི་དེ་རེག་བྱའི་འདོད་ཆགས་ཤས་ཆེ་བས་དེ་དང་དེ་ཉིད་ལ་མངོན་པར་དགའ་སྟེ། དེ་ནི་འདི་ལྟར་འདོད་པས་ལོག་པར་གཡེམ་པ་འདི་ཡང་དང་ཡང་དུ་སྟེན་
ཅིང་རེག་བྱ་ངན་པ་ལ་མངོན་པར་དགའ་བ་ཡིན་ཏེ། འདི་ལྟར་འདི་ནི་འདོད་པས་ལོག་པར་གཡེམ་པ་ཀུན་ཏུ་བསྟེན་པ་ཡིན་ནོ། །འདོད་པས་ལོག་པར་གཡེམ་པ་གོམས་པར་བྱེད་པ་ཇི་ལྟ་བུ་ཡིན་ཞེ་ན། འདི་ལས་འདོད་པས་ལོག་པར་གཡེམ་པ་ཡང་དང་ཡང་དུ་སྟེན་ཅིང་ཡིད་ཀྱིས་ཡང་དག་པར་རྟོག་པར་བྱེད། དེའི་ཡིད་ལ་མངོན་པར་དགའ་བ་གཞན་སྤངས་ཏེ། དེ་འདོད་པས་ལོག་པར་གཡེམ་པ་འདི་ཉིད་གོམས་པར་བྱས་ནས། ཡང་ཡུལ་བདེ་བ་དེ་གོམས་པར་བྱེད་པ་ཡིན་ནོ། །མང་དུ་བྱེད་པ་ཇི་ལྟ་བུ་ཡིན་ཞེ་ན། འདི་ལ་ཚུལ་བཞིན་མ་ཡིན་པ་ཡིད་ལ་བྱེད་པས་བརླན་པའི་བྱིས་པ་སོ་སོའི་སྐྱེ་བོ་ནི། འདི་ལྟར་འདོད་པས་ལོག་པར་གཡེམ་པ་ནི་མཆོག་ཏུ་བཟང་བ་ཡིན་ལ། འདོད་པས་ལོག་པར་མི་གཡེམ་པ་ནི་མ་ཡིན་ཞེས་ཡོན་ཏན་མཆོག་དང་འདྲ་བར་ཡང་དག་པར་འཛིན་པར་བྱེད་དོ། །དེ་གཞན་ཤིན་ཏུ་མང་པོ་དག་ཀྱང་འདོད་པས་ལོག་པར་གཡེམ་པ་ལ་མངོན་པར་འཇུག་ཅིང་བྱེད་དུ་འཇུག་སྟེ། འདི་ནི་འདོད་པས་ལོག་པར་གཡེམ་པ་མང་དུ་བྱེད་པ་ཡིན་ནོ། །ལུས་ཀྱི་རྣམ་པ་གསུམ་པོ་འདི་དག་ནི་བྱིས་པ་སོ་སོའི་སྐྱེ་བོ་རྣམས་ཀྱི་མི་དགེ་བ་ཡིན་ནོ། །ངག་གི་ནི་རྣམ་པ་བཞི་སྟེ། བརྫུན་དང་། ཚིག་རྩུབ་པོ་དང་། ཕྲ་མ་དང་། ཚིག་ཀྱལ་པའོ། །དེ་ལ་བརྫུན་གང་ཞེ་ན། འདི་ལྟ་སྟེ། བདག་ཉིད་ལ་བདག་ཉིད་སླུ་ཞིང་གཞན་ཡང་སླུ་བར་བྱེད་པ་ཡིན་ཏེ། བརྫུན་དུ་སྨྲ་བ་འདི་ནི་བདག་དང་གཞན་སླུ་བར་བྱེད་པ་ཡིན་ནོ། །དེ་ཡང་རྒྱུ་ལྔ་དང་ལྡན་པ་ཡིན་ཏེ། འདི་ལྟ་སྟེ། འདོད་ཆགས་དང་། ཞེ་སྡང་དང་། འཇིགས་པ་དང་། རྙེད་པ་དང་། ཆོས་ལོག་པའི་འདུལ་བ་ཡོངས་སུ་སྡུད་པའོ། །བརྫུན་དུ་སྨྲ་བ་ཇི་ལྟ་བུ་ཡིན་ཞེ་ན། འདི་ལ་རྒྱལ་པོའི་ཕོ་བྲང་འཁོར་ན་འདུག་ཀྱང་རུང་། ཁྱིམ་བདག་གི་འཁོར་གྱི་ནང་ན་འདུག་ཀྱང་རུང་། ཉེ་དུའི་ནང་ན་འདུག་ཀྱང་རུང་སྟེ། མཛའ་བཤེས་དང་། མཛའ་བཤེས་མ་ཡིན་པ་དག་སྨྲ་བ་ན། མཛའ་བཤེས་ཀྱི་ཕྱིར་ནི་འདོད་ཆགས་ཀྱིས་བརྫུན་སྨྲ་ལ། མཛའ་བཤེས་མ་ཡིན་
པའི་ཕྱིར་ནི་ཞེ་སྡང་གིས་ཀྱང་བརྫུན་སྨྲའོ། །རྙེད་པའི་ཕྱིར་ཡང་བརྫུན་སྨྲ་སྟེ། ནོར་ལ་ཆགས་པ་དེ་བརྫུན་སྨྲའོ། །ཆོས་ལོག་པའི་ཚིག་ཡོངས་སུ་སྡུད་པས་ཀྱང་བརྫུན་སྨྲ་སྟེ། འདི་ལ་བྲམ་ཟེ་རྣམས་ཡོན་ཏན་གྱི་ཕྱིར་དང་། ནོར་འཕྲོག་པའི་ཕྱིར་དང་། རང་གི་སྲོག་ལ་གནོད་པ་དང་། བག་མ་ལེན་པ་དག་གི་ཕྱིར་བརྫུན་སྨྲས་ཀྱང་མི་གོས་སོ་ཞེས་ཟེར་རོ། །དེ་ནི་ཆོས་ལོག་པའི་ཚིག་ཡོངས་སུ་སྡུད་པའི་བརྫུན་སྨྲ་བ་ཡིན་ཏེ། མི་གཏི་མུག་པ་ལོག་པར་ལྟ་བའི་ཚིག་ཡོངས་སུ་སྡུད་པ་འདི་ནི་སེམས་ཅན་དམྱལ་བ་མི་བཟད་པར་ཡང་འགྱུར་རོ། །སེམས་ཅན་དམྱལ་བ་འགྲུབ་པར་འགྱུར་བའི་ས་བོན་དག་ནི་འདི་ལྟ་སྟེ། བརྫུན་སྨྲ་བ་ཡིན་པས་རང་གི་སྲོག་གི་ཕྱིར་རམ། གཞན་གྱི་སྲོག་གི་ཕྱིར་བརྫུན་ཅུང་ཟད་ཀྱང་སྨྲ་བར་མི་བྱ་བ་འདི་ནི་མཆོག་ཡིན་ནོ། །འཇིགས་པས་ཀྱང་བརྫུན་སྨྲ་སྟེ། གང་བདག་གིས་བརྫུན་འདི་མ་སྨྲས་ན། དེ་བདག་གི་སྲོག་ལ་དམན་པ་དོན་མེད་པ་ཆེན་པོ་འཐོབ་པར་འགྱུར་རོ་སྙམ་ནས་དེ་གང་ལས་འཇིགས་པར་འགྱུར་བ་དེའི་དོན་དུ་བརྫུན་སྨྲ་བ་ཡིན་ཏེ། རྒྱུ་ལྔ་པོ་འདི་དག་གིས་བྱིས་པ་དག་བརྫུན་སྨྲ་བ་སྨྲ་སྟེ། གཏི་མུག་ནི་ཐམས་ཅད་ལ་གནས་པ་ཡིན་ནོ། །འདིར་ཚིགས་སུ་བཅད་པ། འཇིག་རྟེན་ཕ་རོལ་ཁྱད་གསོད་ཅིང་། །ཆོས་གཅིག་ལས་ནི་འདའ་བྱེད་པ། །བརྫུན་དུ་སྨྲ་བའི་ལུས་ཅན་གྱིས། །སྡིག་པ་མི་བྱེད་ཅི་ཡང་མེད། །མི་ཡི་ལུས་སུ་སྐྱེས་མ་ཐག །ཁ་ནས་སྟ་རེ་ལྟ་བུ་ཡི། །ཚིག་འབྱུང་ངན་པར་བརྗོད་སྨྲ་བ། །དེ་ཡིས་བདག་ཉིད་གཅོད་པར་བྱེད། །བདེན་པར་སྨྲ་ཞིང་འཁྲུག་མི་བྱ། །བསླངས་ན་ཆུང་ཡང་སྦྱིན་པར་བྱ། །གནས་འདི་གསུམ་དང་ལྡན་པ་ནི། །ལྷ་རྣམས་དག་གི་དྲུང་དུ་འགྲོ། །དེ་ལྟ་བས་ན་རྒྱུ་ཐམས་ཅད་དང་། རྐྱེན་ཐམས་ཅད་ཀྱིས་བརྫུན་དུ་སྨྲ་བར་མི་བྱ་ཞིང་གཞན་བརྫུན་སྨྲ་བ་ན་རྗེས་སུ་ཡི་རང་བར་མི་བྱ། བརྫུན་སྨྲ་བ་དང་ལྷན་ཅིག་འབེལ་བའི་གཏམ་ཟེར་དུ་མི་འགྲོ། མི་གནས། འདུག་པར་མི་བྱའོ། །གཞན་དུ་ན་འདི་ཡང་བརྫུན་སྨྲ་བ་
མངོན་དུ་ཟེར་བ་ཡིན་ནོ་ཞེས་སྐྱེ་བོ་གཞན་དག་གིས་བསམས་པར་འགྱུར་ཏེ། དེ་ལྟར་ན་ལས་དྲི་མ་ཅན་ལ་མངོན་པར་དགའ་བའི་མི་རྣམས་དང་འགྲོགས་པས་ལས་དྲི་མ་ཅན་དུ་གཞན་དག་སེམས་སོ། །དེ་ལྟ་བས་ན་སྡིག་པའི་གྲོགས་པོ་དང་འགྲོགས་པར་མི་བྱ་སྟེ། འདི་ལྟ་སྟེ། སྡིག་པའི་གྲོགས་པོ་དང་འགྲོགས་པ་ནི་འཁོར་བའི་འཆིང་བ་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་གནས་ཡིན་ལ། དགེ་བའི་བཤེས་གཉེན་དང་འགྲོགས་པ་འདི་ནི་ཐར་པ་མཆོག་ཡིན་ཏེ། འདི་དག་ནི་བརྫུན་དུ་སྨྲ་བ་མདོར་བཤད་པ་ཡིན་ནོ། །གཞན་ཡང་ཕྲ་མ་ཇི་ལྟ་བུ་ཡིན། རྣམ་པ་དུ་ཡོད་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཕྲ་མ་ཞེས་བྱ་བ་ནི་འཐུན་ཞིང་འབྱོར་པ་དག་ལ་དབྱེ་བའི་བསམ་པས་ཚིག་བརྗོད་པ་ནི་ཕྲ་མ་ཡིན་ནོ། །དེ་རྣམ་པ་གཉིས་ཏེ། ཕ་རོལ་དང་སྦྱོར་བ་དང་། མི་སྦྱོར་བའོ། །དེ་ལ་ཁྱོད་ཀྱིས་མི་གཉིས་དང་དབྱེ་བའི་སྦྱོར་བ་གྱིས་ཤིག་ཅེས་དགྲའམ། དགྲ་ཆུང་ངུ་གཞན་དག་གིས་སྦྱོར་བ་བྱེད་པ་དང་། བདག་ཉིད་ཀྱིས་འབྱེད་པར་འདོད་པའོ། །གཞན་ཡང་ཚིག་རྩུབ་པོ་ཇི་ལྟ་བུ་ཡིན། རྣམ་པ་དུ་ཡོད་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཚིག་རྩུབ་པོ་ཞེས་བྱ་བ་ནི་བདག་དང་གཞན་ལ་གནོད་པ་བྱེད་པ། ཁྲོ་བའི་རྒྱུ་འཐུན་པར་གྱུར་པ། ཡིད་དུ་མི་འོང་བ། མི་སྡུག་པ། མི་དགའ་བའི་ཚིག་བརྗོད་པ་ཉན་པ་དང་། མི་འཐུན་པ། འདོད་ཆགས་དང་། ཞེ་སྡང་དང་། གཏི་མུག་དང་བཅས་པ། བྱིས་པ་སོ་སོའི་སྐྱེ་བོ་ཐམས་ཅད་དང་ལྷན་ཅིག་སྤྱོད་པའི་ཚིག་སྨྲ་བ་འདི་ནི་ཚིག་རྩུབ་པོ་ཞེས་བྱ་སྟེ། རྣམ་པ་དུ་མ། དམིགས་པ་དུ་མ། རྒྱུ་དུ་མ། སེམས་ཀྱི་ཀུན་ནས་ལྡང་བ་དུ་མ། རྣམ་པར་སྨིན་པ་དུ་མ། བདེ་འགྲོར་འགྲོ་བ་རྣམ་པར་འཇིག་པ་དུ་
མ། སྐྱེ་བོ་ཐམས་ཅད་མི་དགའ་བར་བྱེད་པ། འཇིག་རྟེན་ལྡང་བའི་རྒྱུར་གྱུར་པ། འཐུན་པར་གྱུར་པ། རྣམ་པར་འཇིག་པར་བྱེད་པ། ཡིད་མི་ཆེས་པའི་གནས་སུ་གྱུར་པ། ཡིད་གཅུགས་པ་མ་ཡིན་པ། ལྕེ་དུག་ལྟ་བུར་གྱུར་པའི་ཚིག་རྩུབ་པོ་དག་གི་དྲི་མ་ནི་ཚངས་པ་མཚུངས་པར་སྤྱོད་པས་རྣམ་པར་སྤངས་པ་ཡིན་ནོ། །འདིར་ཚིགས་སུ་བཅད་པ། བརྟན་པས་ཚིག་རྩུབ་སྤང་བྱ་ཞིང་། །རྟག་ཏུ་ཡང་དག་ཚིག་སྨྲོས་ཤིག །ཚིག་སྙན་མངོན་པར་དགའ་བའི་མི། །མྱ་ངན་འདས་ལ་ཉེ་བར་གནས། །ཚིག་ཞི་རྟག་ཏུ་སྨྲ་བྱ་ཞིང་། །དྲི་མ་ཡོད་པ་རྣམ་པར་སྤང་། །ཚིག་གི་དྲི་མས་ཟིལ་ནོན་པ། །མི་གང་དེ་ནི་དམྱལ་བར་འགྲོ། །ཚིག་གི་དྲི་མས་ཟིལ་ནོན་པ། །གང་ཡིན་དེ་ལ་བདེ་བ་མེད། །སེང་གེ་སྦྲུལ་ནི་འཕགས་མིན་ལྟར། །དེ་དག་ལ་ནི་མཐོ་རིས་མེད། །གང་དག་ཚིག་རྩུབ་མི་སྨྲ་ཞིང་། །གང་དག་གཡོ་ནི་རྣམ་སྤངས་པ། །དེ་དག་ཐམས་ཅད་དགའ་སྐྱེད་ཅིང་། །བདེ་བ་དང་ནི་དབུགས་འབྱིན་བྱེད། །སྐྱེ་བོ་དེ་ནི་འཇིག་རྟེན་འདིར། །དགའ་ཞིང་ཕ་རོལ་མཐོ་རིས་འགྲོ། །དེ་འདྲ་བ་ཡི་མི་དག་ནི། །མཁས་པ་དེ་ལ་ཕྱག་བྱར་འོས། །བདེན་ཚིག་རྟག་ཏུ་ཞི་བ་དང་། །གཡོ་སྒྱུ་མེད་ཅིང་དྲང་པོའི་སེམས། །གཞན་ལ་གནོད་པ་བྱེད་དང་བྲལ། །དེ་ནི་ཆོས་ཀྱི་རྒྱལ་མཚན་དགའ། །ལག་པ་བརྡབས་པའི་སྒྲ་ལྟ་བུར། །མི་ནི་ཆུང་བར་གྱུར་པ་ཡིན། །གང་དག་དེ་ཐོབ་ཆོས་མི་ཤེས། །མི་ནི་རྨོངས་པ་དག་གིས་བསླུས། །གང་དག་བདག་སྡུག་མི་འགྱུར་དང་། །གང་དག་བདེ་བ་མི་འདོད་པ། །དེ་ནི་སྡིག་གི་ལས་བྱེད་ཅིང་། །སྲེད་པའི་རྒྱུ་ཡིས་རྣམ་པར་བསླུས། །གང་དུ་ལས་ཀྱི་རྗེས་འགྲོ་བ། །ནོར་དང་བུ་དང་ཆུང་མ་དང་། །མཛའ་བཤེས་ཉེ་དུ་གཉེན་འདབ་དང་། །དེར་ནི་འགྲོ་བར་མི་ནུས་སོ། །ལེགས་པར་བྱས་དང་ཉེས་པར་བྱས། །དེ་དག་འགྲོ་བའི་རྗེས་སུ་འགྲོ། །མཁའ་ལ་བྱ་དག་གནས་པ་ཡིན། །དེའི་གྲིབ་ལྷན་
ཅིག་འགྲོ་བ་བཞིན། །ཇི་ལྟར་ལམ་རྒྱགས་ཉུང་བ་དག །ལམ་ཞུགས་སྡུག་བསྔལ་འགྲོ་བ་ལྟར། །དེ་བཞིན་ལས་བཟང་མ་བྱས་པའི། །སེམས་ཅན་དག་ནི་ངན་འགྲོར་འགྲོ། །ཇི་ལྟར་ལམ་རྒྱགས་མང་བདོག་པ། །ལམ་ཞུགས་བདེ་བར་འགྲོ་བ་ལྟར། །དེ་བཞིན་ལས་བཟང་བྱས་པ་ཡི། །སེམས་ཅན་དག་ནི་བདེ་འགྲོར་འགྲོ། །ཡུན་རིང་ཡུལ་གཞན་གནས་པ་ཡི། །མི་དག་བདེ་བར་འོངས་པ་ལྟར། །གཉེན་དང་སྡུག་པ་མཛའ་བཤེས་དག །འདིར་འོངས་མངོན་པར་དགའ་བ་ལྟར། །དེ་བཞིན་བསོད་ནམས་བྱས་པའི་མི། །འཇིག་རྟེན་འདི་ནས་ཕར་འགྲོ་བ། །བསོད་ནམས་ཉིད་ཀྱིས་མངོན་དགའ་སྟེ། །གཉེན་སྡུག་དག་ནི་འོངས་པ་བཞིན། །དེ་ལྟ་བས་ན་ཚེ་ཕྱི་མའི། །བསོད་ནམས་དག་ནི་བྱ་ཞིང་བསགས། །བསོད་ནམས་འཇིག་རྟེན་ཕ་རོལ་ཏུ། །སྲོག་ཆགས་རྣམས་ནི་དྲན་གནས་ཡིན། །སྤྱོད་པ་འཐུན་པར་གང་སྤྱོད་པའི། །བསོད་ནམས་དག་ལ་ལྷ་བསྟོད་ཅིང་། །དེ་དག་འདིར་ནི་མངོན་དགའ་ལ། །ཕ་རོལ་མཐོ་རིས་དགའ་བར་འགྱུར། །གནས་འདི་གཞན་གྱིས་མཐོང་བ་ཡི། །མཁས་པ་དག་གིས་ཚུལ་ཁྲིམས་བསྲུངས། །འཕགས་པ་མཐོང་བ་ཕུན་སུམ་ཚོགས། །འཇིག་རྟེན་འདིར་ནི་ཞི་བ་བསྟེན། །གཞན་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེ་མི་དགེ་བའི་ལས་ཀྱི་ལམ་གྱི་ཚིག་བཞི་པའི་ཚིག་ཀྱལ་པ་ལ་རྟོག་པར་བྱེད་དེ། དེ་ལ་ཚིག་ཀྱལ་པ་རྣམ་པ་དུ་ཡོད་ཅེ་ན། ཚིག་འབྱུང་བ་སྔ་ཕྱི་འབྲེལ་པ་མེད་པའི་ཚིག་ཀྱལ་པ་དང་། སེམས་འཇུག་པ་ཡང་བས་སྔ་ཕྱི་འབྲེལ་པ་མེད་པའི་ཚིག་བརྗོད་པའི་ཚིག་ཀྱལ་པའོ། །རྒྱགས་པ་དང་བཅས་པ་དང་། རྒྱགས་པ་མེད་པའི་དུས་ཀྱིས་བསླངས་པ་ཡང་བྱེད་པའི་རྒྱུའི་ངོ་བོ་སྐྱེད་པ་དེ་ཚེ་འདི་ལ་ཡིད་གཅུགས་པའི་གནས་སུ་མི་འགྱུར་ཞིང་ཚེ་འདིའི་ལས་ཀྱི་ལམ་སྐྱེད་པ་འཇིག་རྟེན་པ་ཀུན་གྱིས་སྨོད་པའི་གནས་ཀྱི་རྒྱུ། དོན་མེད་པར་སྨྲ་བ་ནི་ཚིག་ཀྱལ་པ་སྟེ།
ཚིག་གི་དྲི་མ་བཞི་པ་འདི་ནི་མི་དགེ་བའི་ལས་ཀྱི་ལམ་བསྐྱེད་པ་དང་། སྐྱེད་པར་བྱེད་པ་སྨྲ་བར་མི་བྱ་ཞིང་རྗེས་སུ་ཡི་རང་བར་མི་བྱ་ལ། གཞན་གྱི་ཚིག་ཀྱལ་པ་སྨྲ་བ་དེ་ལ་གནས་པར་མི་བྱའོ། །ཡིད་ཀྱི་མི་དགེ་བའི་ལས་ཀྱི་ལམ་ནི་བརྣབ་སེམས་དང་། གནོད་སེམས་དང་། ལོག་པར་ལྟ་བའོ། །དེ་ལ་བརྣབ་སེམས་ནི་གཞན་གྱིས་ཡོངས་སུ་བཟུང་བའི་ནོར་རྫས་དང་། ནོར་རྫས་ཀྱི་རྣམ་པ་ལ། ངག་དང་ཡིད་ཀྱིས་ཤིན་ཏུ་རྟོག་པར་བྱེད་དེ། འདི་ནི་བདག་གིར་བྱའོ་སྙམ་པ་ཡང་དག་པ་མ་ཡིན་པའི་ཚུལ་བཞིན་ཡིད་ལ་བྱེད་ཅིང་དེ་གཞན་གྱི་ཕུན་སུམ་ཚོགས་པ་ལ་འཕྲལ་ལ་སེམས་ལྡང་སྟེ། དོན་ལ་འཆུམས་པ་རྒྱུ་མེད་པ་ཡིན་ནོ། །དེ་ནི་བརྣབ་སེམས་ཡིད་ཀྱི་མི་དགེ་བའི་ལས་ཀྱི་ལམ་ཡིན་ཏེ། མི་འདོད་པ། མི་སྡུག་པ། ཡིད་དུ་མི་འོང་བའི་རྣམ་པར་སྨིན་པ། ཡིད་མ་ཞི་བ། མ་སྦྱངས་པའི་བྱིས་པ་སྐྱེ་བོ་བརྣབ་སེམས་ཀྱིས་རབ་ཏུ་བསླུས་པ་དེ་གཞན་གྱི་ཕུན་སུམ་ཚོགས་པ་ལ་འཕྲལ་ལ་ཡིད་ཀྱིས་ཤིན་ཏུ་རྟོག་པར་བྱེད། རོ་མྱོང་བར་བྱེད། ཡང་དང་ཡང་དུ་བྱེད། ཡོངས་སུ་སྒྱུར་བར་བྱེད། རྟག་ཏུ་འདོད་པར་བྱེད། རྟག་ཏུ་དགའ་བར་བྱེད་ཅིང་གཞན་གྱི་ནོར་རྫས་ཕུན་སུམ་ཚོགས་པ་མཐོང་ན་སྡུག་བསྔལ་བ་ཡིན་ནོ། །འདི་ནི་བརྣབ་སེམས་ཞེས་བྱ་སྟེ། ཡིད་ཀྱི་མི་དགེ་བའི་ལས་ཀྱི་ལམ་གྱི་དྲི་མ་ཆེན་པོ་ཡིན་ནོ། །གཞན་ཡང་སེམས་ལས་བྱུང་བ་གནོད་སེམས་མི་དགེ་བའི་ལས་ཀྱི་ལམ་ལ་སོགས་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། གཞན་དག་གིས་རྒྱུ་མ་ཡིན་པ་ཡིད་ཀྱི་ཉེས་པའི་གནོད་སེམས་དང་། གཞན་དག་གི་ཕུན་སུམ་ཚོགས་པའམ། ཕུན་སུམ་ཚོགས་པ་མ་ཡིན་པ་མཐོང་ནས། རྒྱུ་མ་ཡིན་པ་ཇི་ལྟར་འདོད་པ་བཞིན་བྱས་པ་ཡིད་ཀྱི་ཉེས་པ་མི་བཟད་པ་ཆེན་པོ་སྐྱེ་བར་འགྱུར་ཏེ། གནོད་སེམས་དེ་ནི་སེམས་ཅན་དམྱལ་བ་མྱོང་བར་འགྱུར། དགེ་བའི་ཆོས་ཀྱི་ལོ་ཏོག་ཏུ་གྱུར་པ་རྣམས་ཀྱི་སེར་བ། ཡང་
དག་པའི་ཤེས་རབ་ཀྱི་མིག་གི་མི་འཐུན་པར་གྱུར་པ། མུན་ནག་སྙིང་ལ་གནས་པའི་མེ་དེ་ཚུལ་ཁྲིམས་ཐམས་ཅད་སྲེག་པར་བྱེད་པ། མདོག་ངན་པའི་རྒྱུ། ཆོས་ཀྱི་སྟེགས་གཅོད་པར་བྱེད་པ། འཇིག་རྟེན་འདི་དང་། འཇིག་རྟེན་ཕ་རོལ་གྱི་དགྲ་ནང་དུ་ཞུགས་པ། སེམས་རྩེ་གཅིག་པ་ཉིད་འཇིག་པར་བྱེད་པ། བྱམས་པ་དང་མི་འཐུན་ཞིང་། འཕགས་པའི་བདེན་པ་བཞི་པོ་སྡུག་བསྔལ་དང་། ཀུན་འབྱུང་དང་། ལམ་དང་། འགོག་པ་རྣམས་འཇིག་པར་བྱེད་པ་ཡིན་ནོ། །གནོད་སེམས་ཞེས་བྱ་བ་སེམས་ཅན་དམྱལ་བའི་ཕོ་ཉ་མཆོག་ཡིན་ཏེ། དེ་སྐྱེས་བུ་དམ་པ་དང་། འཕགས་པ་ཉན་ཐོས་དང་། ཐོས་པ་དོན་དུ་གཉེར་བ་རྣམས་ཀྱིས་སྤོང་བར་འགྱུར་རོ། །གཞན་ཡང་ལོག་པར་ལྟ་བ་དམ་པའི་ཆོས་ཀྱི་མི་འཐུན་པར་གྱུར་པ་ལྟ་བ་ངན་པ་ཐམས་ཅད་ཀྱི་མུན་གནག་སྙིང་ལ་ཡང་དག་པར་སྐྱེ་བར་འགྱུར་བ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཐོག་མ་མེད་པའི་དུས་ནས་ཞུགས་ཤིང་སྐྱེས་པ། སེམས་ཅན་དམྱལ་བ་དང་། ཡི་དགས་དང་། དུད་འགྲོའི་འགྲོ་བའི་རྒྱུ་སྐྱེད་པ། མུན་པ་མུན་ནག་ཏུ་གྱུར་པ། ལྟ་བ་ངན་པ་ལ་མངོན་པར་དགའ་བ། ཡང་དག་པའི་ལམ་གྱི་མི་འཐུན་པར་གྱུར་པ། མཚོན་དང་། མེ་དང་། དུག་དང་། གཡང་ས་ལྟ་བུ། སྐྱེ་བོ་ཐམས་ཅད་རྣམ་པར་འཇིག་པར་བྱེད་པ། ཕྱིན་ཅི་ལོག་ཏུ་ལྟ་ཞིང་ལོག་པར་ལྟ་བ་ཡིན་ནོ། །དེ་ཡང་རྣམ་པ་གཉིས་ཏེ། རྐྱེན་ཡོད་པ་དང་། ལས་དང་འབྲས་བུ་ལ་སྐུར་པ་འདེབས་པའོ། །དེ་ལ་རྐྱེན་ཡོད་པ་ནི་བདེ་བ་དང་། སྡུག་བསྔལ་གང་ཡིན་པ་དེ་དག་ནི། དེ་དག་ཉིད་ཀྱིས་བྱས་ཀྱི་ལས་དང་། འབྲས་བུས་བྱས་པ་ནི་མ་ཡིན་ནོ་ཞེས་ཟེར་རོ། །ལས་དང་འབྲས་བུ་ལ་སྐུར་པ་འདེབས་པ་ནི། སྦྱིན་པ་མེད་དོ་ཞེས་བྱ་བ་ལ་སོགས་པ་སྟེ། དེ་ལྟར་དེ་དག་ལོག་པར་ལྟ་བ་མི་དགེ་བ་བཅུའི་ལས་ཀྱི་ལམ་འདི་དག་ཐམས་ཅད་དོན་ཐམས་
ཅད་མེད་པར་བྱེད་པའི་རྩ་བ་ཡིན་ནོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་གཉིས་པ། གཞན་ཡང་མི་དགེ་བ་བཅུའི་ལས་ཀྱི་ལམ་འདི་དག་བཟློག་ནས། ཟག་པ་དང་བཅས་པ་དང་། ཟག་པ་མེད་པ་དག་གི་ལས་བྱེད་པར་འགྱུར་བ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། འདི་ནི་རེ་ཞིག་འཁོར་བའི་འཆིང་བ། ཆོས་ཟད་པར་བྱེད་པ། འདི་ལྟ་སྟེ། འཆིང་བའི་རྒྱུ་མི་དགེ་བའོ། །ཐར་པའི་རྒྱུའི་དངོས་པོ་ནི་དགེ་བ་ཡིན་ཏེ། དེ་ལ་སྲོག་གཅོད་པ་སྤངས་པས། འཁོར་བར་གཏོགས་པའི་སེམས་ཅན་རྣམས་ལ་མི་འཇིགས་པ་སྦྱིན་པར་འགྱུར་ཏེ། དེ་ཚེ་འདི་ཉིད་ལ་བསྔགས་པར་འགྱུར། དེའི་བཞིན་གྱི་མདོག་དང་དབང་པོ་རྣམས་གསལ་བར་འགྱུར། ཚེ་རིང་པོར་འགྱུར་བའི་ལས་བྱེད་པར་འགྱུར། གང་སྲིན་པོ་དང་། ཤ་ཟ་དང་། གྲུལ་བུམ་གྱི་རིགས་དང་། གཞན་ཡང་སེམས་ཅན་འཚེ་བར་བྱེད་པ་དེ་དག་ཀྱང་ཉིན་མཚན་དུ་སྲུང་བར་བྱེད། ཕྱི་བཞིན་དུ་ལྷ་དག་ཀྱང་མངོན་པར་སྲུང་བར་བྱེད་ལ། ལུས་དང་བྲལ་ནས་ཀྱང་བདེ་འགྲོ་མཐོ་རིས་ལྷའི་འཇིག་རྟེན་དུ་སྐྱེ་བར་འགྱུར་ཏེ། གལ་ཏེ་རྣམ་པར་སྨིན་པའི་འབྲས་བུ་མྱོང་བར་འདོད་ན་ཡང་། ཇི་ལྟར་བརྩོན་འགྲུས་བརྩམས་པ་བཞིན་མྱོང་བར་འགྱུར་རོ། །གལ་ཏེ་བྱང་ཆུབ་ཀྱི་ལམ་ཐ་མ་དང་། འབྲིང་དང་། ཆེན་པོ་རྣམས་ཀྱི་སོ་སོ་ཡང་དག་པར་མྱོང་བར་འདོད་ན། དེ་རྣམ་པ་གསུམ་པོ་འདིར་འགྱུར་ཏེ། གལ་ཏེ་ཉན་ཐོས་ཀྱི་བྱང་ཆུབ་ཏུ་ཡོངས་སུ་བསྔོ་ན། དེ་དགྲ་བཅོམ་པར་གྱུར་ནས། ཡོངས་སུ་མྱ་ངན་ལས་འདའོ། །གལ་ཏེ་བྱང་ཆུབ་འབྲིང་དུ་ཡོངས་སུ་བསྔོ་ན། དེ་རང་སངས་རྒྱས་སུ་འགྱུར་རོ། །གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། དེ་ཡང་དག་པར་རྫོགས་པའི་སངས་རྒྱས་སུ་འགྱུར་ཏེ། རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འགྱུར་རོ། །ཆོས་ཐམས་ཅད་ཀྱི་རྩ་བ་ནི་སྲོག་ཡིན་ཏེ། གང་སྲོག་དེ་མངོན་པར་སྲུང་བ་དེས་ནི་བདེ་བ་ཐམས་ཅད་སྦྱིན་པར་འགྱུར་ལ། སྦྱིན་པ་རྣམས་ཀྱི་ནང་ན་མཆོག་ནི་འདི་ཡིན་ཏེ། འདི་ལྟ་སྟེ། སེམས་ལས་བྱུང་བ་སོ་སོར་བསྒོམས་པ་སྲོག་བྱིན་པའོ། །ཚུལ་ཁྲིམས་ཀྱི་ནང་ན་མཐོ་རིས་སུ་སྐྱེ་བའི་མཆོག་ནི་འདི་ཡིན་ཏེ། འདི་ལྟ་སྟེ། སྲོག་བྱིན་པའི་ཚུལ་ཁྲིམས་སོ། །གལ་ཏེ་ཡུལ་གྱི་བདེ་བ་ཀུན་ནས་ཉོན་མོངས་པ་སྲེད་པའི་རྒྱུར་འགྱུར་བར་ཡོངས་སུ་བསྔོ་ན། དེ་ཚངས་པའམ། བདུད་དམ། བརྒྱ་བྱིན་དུ་འགྱུར། གལ་ཏེ་མིའི་བདག་ཉིད་ཆེན་པོར་ཡོངས་སུ་བསྔོ་ན། དེ་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ། གླིང་བཞི་ལ་སྤྱོད་པར་འགྱུར། གལ་ཏེ་ལྷ་མ་ཡིན་གྱི་བདག་ཉིད་ཆེན་པོར་ཡོངས་སུ་བསྔོ་ན། དེ་ལྷ་མ་ཡིན་གྱི་རྒྱལ་སྲིད་བྱེད་པར་འགྱུར། གལ་ཏེ་གནོད་སྦྱིན་གྱི་བདག་ཉིད་ཆེན་པོར་ཡོངས་སུ་བསྔོ་ན། དེ་གནོད་སྦྱིན་གྱི་རྒྱལ་སྲིད་བྱེད་པར་འགྱུར་རོ། །སྙིང་རྗེ་ཆེན་པོ་འདི་ནི་དམ་པའི་ཆོས་ཀྱི་ས་བོན་དུ་གྱུར་པ། འཁོར་བའི་སྐྱབས་སུ་གྱུར་པ། འཁོར་བའི་མུན་གནག་ཏུ་ཞུགས་པ་རྣམས་ཀྱི་སྒྲོན་མར་གྱུར་པ་ཡིན་ཏེ། འདི་ལྟ་སྟེ། སྲོག་གཅོད་པ་སྤོང་བ་ཞེས་བྱའོ། །སྲོག་གཅོད་པ་སྤངས་པ་བྱམས་པ་བསྒོམས་པར་འགྱུར་ཞིང་། སྙིང་རྗེའི་རྒྱུད་ལ་གནས་པ་ཡིན་ཏེ། བསམས་ནས་སྲོག་གཅོད་པ་སྤངས་ན་གཙང་ཞིང་དགའ་བར་འགྱུར། གང་གི་ཚེ་ཕ་རོལ་ཡང་དག་པར་བསྲུང་བར་མ་ནུས་པ་དེའི་ཚེ་བཏང་སྙོམས་སུ་འགྱུར་ཞིང་། དེ་ཚངས་པའི་གནས་བཞི་ལ་གནས་པའི་རྒྱུད་དུ་འགྱུར། སྲོག་གཅོད་པ་སྤངས་པའི་དགེ་བའི་རྩ་བའི་སྙིང་པོ་ནི་བསམ་གྱིས་མི་ཁྱབ་པ་སྟེ། རྣམ་པ་གང་དང་གང་གིས་ཇི་ལྟ་ཇི་ལྟར་ཡོངས་སུ་བསྔོ་བ་དེ་ལྟ་དེ་ལྟར་ཡོངས་སུ་འགྲུབ་བོ། །དཔེར་ན། གསེར་མགར་མཁས་པ་དེ་ནི་
གསེར་བཟང་པོ་བླངས་ནས། ཇི་ལྟ་ཇི་ལྟར་འདོད་པ་དེ་ལྟ་དེ་ལྟར་གསེར་དེ་ལ་བྱེད་དེ། དེ་ལས་རྒྱན་ནམ། དེ་ལས་བུམ་པའམ། དེ་ལས་མིའི་གཟུགས་སམ། དེ་ལས་སངས་རྒྱས་ཀྱི་གཟུགས་བྱེད་དོ། །དེ་བཞིན་དུ་སྲོག་གཅོད་པ་ཡང་དག་པར་བསྲུངས་ཏེ། མ་ཉམས་ཤིང་མ་རལ་ལ། མ་ཞིག་ན་ཇི་ལྟ་ཇི་ལྟར་ཡོངས་སུ་བསྔོ་བ་དེ་ལྟ་དེ་ལྟར་ཡོངས་སུ་འགྲུབ་བོ། །དེ་ལྟ་བས་ན་སྲོག་གཅོད་པ་སྤངས་པའི་སེམས་ཅན་གང་ཡིན་པ་དེ་ནི་མྱ་ངན་ལས་འདས་པ་དང་། ཉེ་བར་གནས་ཤིང་། དེ་དགེ་བའི་བཤེས་གཉེན་དང་ཡང་དག་པར་སྤྱོད། སེམས་ཅན་དེ་བདག་དང་གཞན་ལ་ཕན་པའི་སྐལ་བ་དང་ལྡན་ཞིང་། དེ་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་འགྲོ་བ་ལ་བསོད་ནམས་ཀྱི་ཞིང་དུ་གྱུར་པ་ཡིན། དེས་འཁོར་བ་ན་ཆོས་དང་ལྡན་པའི་ཆོས་ཀྱི་རྗེས་སུ་འཇུག་པ། ཆོས་དང་ལྡན་པའི་ཀུན་ཏུ་རྟོག་པ་རྣམས་འགྲུབ་པར་འགྱུར་ཞིང་། གྲུབ་པ་ཡང་བརྟན་པར་འགྱུར་ལ། རྒྱལ་པོ་དང་། ཆོམ་རྐུན་དང་། ཆུ་དང་། མེས་འཇིགས་པ་དང་། ཐུན་མོང་མ་ཡིན་པར་འགྱུར་ཏེ། བདག་ཉིད་ཉེ་བར་སྤྱོད་པར་འགྱུར་རོ། །ཆོས་དང་ལྡན་པའི་འགྲན་ཟླ་གཞན་དག་གིས་མི་ནོན་པར་མཐོང་སྟེ། དེ་ལྟ་བས་ན་སྲོག་གཅོད་པ་སྤང་བར་བྱའོ། །དེ་ནས་གཞན་ཡང་མ་བྱིན་པར་ལེན་པ་སྤངས་པས་ལེགས་པར་བྱས་པ་མཐོང་བ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། མ་བྱིན་པར་ལེན་པ་སྤངས་པ་ནི། གཞན་གྱིས་ཡོངས་སུ་བཟུང་བའི་ཆགས་པ་ཆེན་པོའི་དྲ་བ་ལས་གྲོལ་བར་འགྱུར། ཚེ་འདི་ཉིད་ལ་དེ་དབུགས་འབྱུང་བར་འགྱུར། རྒྱལ་པོའམ། བློན་པོའི་ཡིད་བརྟན་པར་འགྱུར། རྒྱལ་པོའི་འཁོར་དང་། ཁྱིམ་བདག་གི་འཁོར་དང་། རྒྱལ་རིགས་ཀྱི་འཁོར་དང་། དགེ་སྦྱོང་གི་འཁོར་དང་། བྲམ་ཟེའི་འཁོར་དུ་ཡིད་བརྟན་པ་དང་། དགའ་བ་དང་། སྡུག་པ་དང་། ཡིད་དུ་འོང་ཞིང་ཚིག་ཡོངས་སུ་གཟུང་
བར་འོས་པར་འགྱུར། དེའི་ལོངས་སྤྱོད་གང་ཡིན་པ་དེ་དག་རྟག་ཅིང་གཞན་ལ་གནོད་པ་མེད་པར་འགྱུར་ལ། རྒྱལ་པོ་དང་། ཆུ་དང་། ཆོམ་རྐུན་དང་། མེའི་འཇིགས་པ་མེད་པར་འགྱུར། མ་བསམས་པར་དེ་དག་འཕྲལ་ལ་འབྱུང་བར་འགྱུར་ལ། བྱུང་ནས་ཀྱང་ཞིང་དང་ཚུལ་ཁྲིམས་དང་ལྡན་པ་དང་། ལམ་བཟང་པོ་ལ་ཞུགས་པ་དང་། འཇིག་རྟེན་པ་རྣམས་ལ་ཡང་དག་པར་ཉེ་བར་སྦྱོར་བར་འགྱུར། ལུས་དང་བྲལ་ནས་ཀྱང་བདེ་འགྲོ་མཐོ་རིས་ཀྱི་ལྷའི་འཇིག་རྟེན་རྣམས་སུ་སྐྱེ་བར་འགྱུར་རོ། །གལ་ཏེ་ངེས་པར་འབྱུང་བའི་ལམ་གྱིས་ཡོངས་སུ་བསྔོ་ན། ངེས་པར་འབྱུང་བར་འགྱུར་ལ་སྔ་མ་བཞིན་དུ་ཚངས་པའམ། བདུད་དམ། བརྒྱ་བྱིན་ནམ། འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་བ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། འདི་ལྟར་ཚུལ་ཁྲིམས་ལ་མངོན་པར་དགའ་བ་དེ་བྱང་ཆུབ་རྣམས་འཐོབ་པར་འགྱུར་རོ། །དེ་ནས་གཞན་ཡང་འདོད་པས་ལོག་པར་གཡེམ་པ་སྤངས་པའི་འབྲས་བུ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། འདོད་པས་ལོག་པར་གཡེམ་པ་སྤངས་པ་ནི་དགེ་བའི་ལས་ཀྱི་ལམ་བཟང་པོ་སྤྱོད་ཅིང་། ཚེ་འདི་ཉིད་ལ་དེ་བསྔགས་པར་འགྱུར། ཡིད་ཆེས་པའི་གནས་སུ་ཡང་འགྱུར། བུད་མེད་ཀྱི་ནང་ན་འདུག་ཀྱང་དོགས་པ་མེད་པར་འགྱུར། དེ་རྒྱལ་པོའམ། བློན་པོའི་ཡིད་བརྟན་པར་འགྱུར། དེའི་ཆུང་མ་ནམ་ཡང་གཞན་གྱིས་འཕྲོག་པར་མི་འགྱུར་ཞིང་རྟག་ཏུ་དེའི་རིམ་གྲོ་བྱེད་པར་བརྩོན་པར་འགྱུར་ལ་བསམ་པ་དང་འཐུན་པར་ཡང་འགྱུར། ཉམ་ཐག་པར་གྱུར་པ་ན་ཡང་ཁྱད་དུ་གསོད་པར་མི་འགྱུར་ཞིང་ཚུལ་དང་མི་འཐུན་པར་མི་འགྱུར་ལ། གཅིག་ལ་གཅིག་གནོད་པ་བྱེད་པ་ལ་མངོན་པར་དགའ་བར་མི་འགྱུར། དེའི་ཆུང་མ་དེ་ལ་བརྙས་པ་བྱེད་པར་མི་འགྱུར་ཞིང་འཇིག་རྟེན་ཐམས་ཅད་ལ་མ་དང་སྲིང་མོ་ལྟ་བུར་ཀུན་ཏུ་སྤྱོད་པར་འགྱུར་
ལ་དེའི་ཆུང་མ་འཇིག་རྟེན་ལ་ཁྲོ་བ་མེད་པར་འགྱུར་ཏེ། སྔ་མ་བཞིན་དུ་ལུས་དང་བྲལ་ནས་བདེ་འགྲོ་མཐོ་རིས་ཀྱི་ལྷའི་འཇིག་རྟེན་དུ་སྐྱེ་བར་འགྱུར་རོ། །གང་གི་ཚེ་ལྷ་དག་ལས་འཆི་བར་འགྱུར་བ་དེའི་ཚེ། ལྷའི་བུ་གཞན་ཞིག་དེར་སྐྱེ་བར་འགྱུར་རོ། །གང་གིས་འདོད་པས་ལོག་པར་གཡེམ་པ་བྱས་པར་གྱུར་ན་དེ་ཚེ་མ་འཕོས་པར་ལྷ་གཞན་ཞིག་ལྷའི་བུ་མོ་དེ་དག་གི་ནང་དུ་སྐྱེ་བར་འགྱུར་ལ་དེ་ཡང་དེ་དང་མངོན་སུམ་དུ་འགྱུར་ཏེ། དེ་དང་ལྷ་གཞན་དག་དང་ལྷན་ཅིག་ཏུ་དགོད་པར་བྱེད། འཛུམ་པར་བྱེད། དགའ་མགུར་སྤྱོད་པར་བྱེད་དོ། །དེ་འཆི་བ་ན་དེའི་ཆུང་མས་མཐོང་ནས་གཞན་དུ་འགྲོ་བར་བྱེད་དེ། ཕྲག་དོག་གི་ཞགས་པས་ཡོངས་སུ་བཟུང་བ་དག་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །འདོད་པས་ལོག་པར་གཡེམ་པ་སྤྱོད་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་འདི་ནི་བར་ཆད་ཆེན་པོ་ཡིན་ནོ། །དེ་ལྟ་བས་ན་འདོད་པས་ལོག་པར་གཡེམ་པ་སྤོང་བ་གང་ཡིན་པ་དེ་ནི་དགེ་བའི་ལས་ཀྱི་ལམ་ཆེན་པོ་ཡང་དག་པར་འཛིན་ཅིང་མྱ་ངན་ལས་འདས་པའི་སྐལ་བ་དང་ལྡན་པར་འགྱུར་རོ། །དེ་ནས་གཞན་ཡང་དགེ་བའི་ཕྱོགས་ཐམས་ཅད་དང་མི་འཐུན་པར་གྱུར་པའི་བརྫུན་སྤངས་པས་དགེ་བའི་ཕྱོགས་ཆེན་པོ་ཡང་དག་པར་འཛིན་པ་ཚེ་འདི་ལ་འབྲས་བུ་རྣམ་པར་སྨིན་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། བརྫུན་དུ་སྨྲ་བ་སྤངས་པ་དེ་ནི་སྐྱེ་བོ་ཀུན་གྱི་མིག་དང་རྣ་བའི་ལྐོག་ཏུ་གྱུར་ཀྱང་ཡིད་ཆེས་པའི་གནས་ཆེན་པོར་འགྱུར་ཞིང་ནོར་རྫས་མེད་ན་ཡང་སྐྱེ་བོ་ཀུན་དང་རྒྱལ་པོས་ཇི་ལྟར་འདོད་པ་བཞིན་མཆོད་པར་འགྱུར་ཏེ། ཇི་ལྟར་ནམ་མཁའ་ལ་གཟའ་དང་། རྒྱུ་སྐར་གྱི་དབུས་ན་ཟླ་བ་རབ་ཏུ་གསལ་བ་དེ་ལྟར་འཇིག་རྟེན་ཐམས་ཅད་ཀྱི་ནང་ན་བདེན་པར་སྨྲ་བ་དེ་རབ་ཏུ་གསལ་ལོ། །རིན་པོ་ཆེ་ཐམས་ཅད་ཀྱི་ནང་ན་བདེན་པ་རིན་པོ་ཆེ་མཆོག་ཏུ་བཟང་ངོ་། །འཁོར་བ་ཐམས་ཅད་ལས་སྒྲོལ་བའི་ནང་ན་བདེན་པར་སྒྲོལ་བ་ཁྱད་པར་
དུ་འཕགས་སོ། །ངན་འགྲོ་ཐམས་ཅད་ལས་ཕྱིར་ཟློག་པའི་ནང་ན་བདེན་པས་ཕྱིར་ཟློག་གོ །སྒྲོན་མ་ཐམས་ཅད་ཀྱི་ནང་ན་བདེན་པ་སྒྲོན་མ་ཡིན་ནོ། །ལམ་སྟོན་པ་ཐམས་ཅད་ཀྱི་ནང་ན་བདེན་པ་ལམ་སྟོན་པ་ཡིན་ནོ། །འདུ་བྱེད་ཀྱི་རྫས་འབྱུང་བ་ཐམས་ཅད་ཀྱི་ནང་ན་བདེན་པའི་རྫས་གཞན་གྱི་ནད་འཕྲོག་པ་ཡིན་ནོ། །རྩལ་ཐམས་ཅད་ཀྱི་ནང་ན་བདེན་པ་རྩལ་ཡིན་ནོ། །སྐྱོབ་པ་ཐམས་ཅད་ཀྱི་ནང་ན་བདེན་པ་སྐྱོབ་པ་ཡིན་ནོ། །མཛའ་བཤེས་ཐམས་ཅད་ཀྱི་ནང་ན་བདེན་པ་མཛའ་བཤེས་ཁྱད་པར་འཕགས་པ་ཡིན་ནོ། །གང་བདེན་པའི་ནོར་ཀུན་ཏུ་འཛིན་པ་དེ་ནི་ནམས་ཀྱང་འཁོར་བའི་ངན་འགྲོ་ལོག་པར་ལྟུང་བ་དབུལ་བར་མི་འགྱུར་ཞིང་། ལྷ་རྣམས་དང་ཉེ་བར་འགྱུར་ལ། གང་དང་གང་དུ་སྐྱེ་བ་དེ་དང་དེར་སྐྱེ་བའི་རིགས་ཆེ་ཞིང་། གཟུགས་བཟང་པོར་འགྱུར་ཏེ། སྐྱེ་བོ་ཐམས་ཅད་ལ་སྡུག་པ་དང་། དགའ་བ་དང་། ཡིད་དུ་འོང་བ་དང་། ཚིག་ཡིད་ཆེས་པར་འགྱུར། དེ་གནོད་སྦྱིན་དང་། ཤ་ཟ་དག་གིས་མི་མཐོང་ལ་གཙེ་བར་མི་ནུས་ཤིང་། ཡུལ་གཞན་དུ་ཕྱིན་ན་ཡང་མལ་ཆ་དང་། ན་བའི་གསོས་སྨན་གྱི་རྐྱེན་མང་པོ་ཕུན་སུམ་ཚོགས་པར་འགྱུར། དེས་འདོད་པ་གང་དག་ཡིད་ལ་བསམས་པ་དེ་དག་ཀྱང་དེ་ལས་འགྲུབ་པར་འགྱུར་ཏེ། དེས་མིའི་བདེ་བ་མཆོག་མྱོང་ནས་གལ་ཏེ་འཆི་བའི་དུས་བྱེད་ན། དེ་ལུས་དང་བྲལ་ནས་བདེ་འགྲོ་མཐོ་རིས་ལྷ་རྣམས་ཀྱི་འཇིག་རྟེན་དུ་ཤིན་ཏུ་ཚེ་རིང་བ་དང་། ཤིན་ཏུ་རྫུ་འཕྲུལ་ཆེ་བ་དང་། ཤིན་ཏུ་གནས་མཐོ་བར་སྐྱེ་བར་འགྱུར་རོ། །སྔ་མ་བཞིན་དུ་གལ་ཏེ་རྣམ་པར་བྱང་བ་ཟག་པ་མེད་པའི་ལམ་གྱིས་ཡོངས་སུ་སྔོ་བར་བྱེད་ན། མྱ་ངན་ལས་འདས་པའི་མཐར་འགྱུར་རོ། །དེ་ནས་གཞན་ཡང་དགེ་བའི་ལས་ཀྱི་ལམ་ལ་སྤྱོད་པ། ཕྲ་མ་སྤངས་པས་ཚེ་འདི་དང་ཕ་རོལ་གྱི་ལས་ཀྱི་འབྲས་བུ་རྣམ་པར་སྨིན་པར་ཇི་ལྟར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཕྲ་མ་
སྤངས་པས་ཚེ་འདི་ལ་ལས་ཀྱི་འབྲས་བུ་རྣམ་པར་སྨིན་པ་མྱོང་བར་འགྱུར་བ་ནི་མཛའ་བཤེས་དང་། གཉེན་འདབ་དང་། རྩ་ལག་དང་། ཆུང་མ་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་བརྟན་པར་འགྱུར། གཞན་གྱིས་ཁ་དྲང་དུ་མི་རུང་ཞིང་བཤེས་པ་དང་། རྒྱལ་པོའི་ཕོ་བྲང་འཁོར་དང་། སྤུན་མི་འཐུན་པ་དག་གིས་དབྱེ་བར་མི་ནུས་སོ། །གལ་ཏེ་ནོར་དང་བྲལ་བར་འགྱུར་ཏེ། ནོར་དང་བྲལ་བར་གྱུར་ན་ཡང་མི་གཏོང་ཞིང་མུ་གེ་དང་། འབྲོག་དགོན་པ་དང་། རི་དང་། གཡང་ས་དང་། གནས་སྐབས་མི་འཐུན་པར་ཆུད་ན་ཡང་མི་གཏོང་སྟེ། ནམས་ཀྱང་འབྲལ་བར་མི་འགྱུར་ལ་གང་དག་དེའི་སྐྱོན་སྨྲ་ན་དེ་དག་དེ་ལ་ཐབས་ཀུན་གྱིས་ཉན་པར་མི་བྱེད་དོ། །དེ་རྒྱལ་པོའི་ཕོ་བྲང་འཁོར་དུ་བརྟན་པར་འགྱུར་ཞིང་ཆུ་དང་། མཚོན་ཆ་དང་། མི་མཛའ་བའི་འཇིགས་པ་མེད་པར་འགྱུར་ཏེ། དྲི་མ་ཆེན་པོ་ཕྲ་མ་སྤངས་པའི་ཡོན་ཏན་ནི་དེ་དག་ཡིན་ནོ། །ལུས་དང་བྲལ་ནས་ཤི་བའི་འོག་ཏུ་ཡང་བདེ་འགྲོ་མཐོ་རིས་ལྷའི་འཇིག་རྟེན་དུ་སྐྱེ་བར་འགྱུར་ཏེ། དེ་དེར་ཡང་ལྷའི་རིས་འཐུན་པའི་ལྷ་མོའི་ཚོགས་མང་པོ་རྟག་ཏུ་རྗེས་སུ་ཆགས་པ་རྣམས་ཀྱིས་ཡོངས་སུ་བསྐོར་ཅིང་མེ་ཏོག་ཕྲེང་དང་། ཕྱེ་མ་དང་། བྱུག་པ་དང་། རྒྱན་ཐོགས་པ་རྣམས་ཀྱིས་རྟག་ཏུ་དགའ་བའི་མཆོག་བྱེད་པར་འགྱུར་རོ། །སྔ་མ་བཞིན་དུ་གལ་ཏེ་ཕྲ་མ་སྤངས་པ་རྣམ་པར་བྱང་བ་ཟག་པ་མེད་པར་ཡོངས་སུ་བསྔོ་ན། དེ་ཟག་པ་མེད་པའི་བསམ་གཏན་གྱི་ལམ་ཡོངས་སུ་མྱ་ངན་ལས་འདས་པ་ཐོབ་པར་འགྱུར་རོ། །དེ་ནས་གཞན་ཡང་མི་དགེ་བའི་ལས་ཀྱི་ལམ་འཇིག་རྟེན་ཐམས་ཅད་སྐྱོ་བར་བྱེད་པ་ཚིག་རྩུབ་པོ་སྤངས་པའི་འབྲས་བུ་རྣམ་པར་སྨིན་པ་ཇི་ལྟར་འཐོབ་པར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཚིག་རྩུབ་པོ་སྤངས་པ་དེ་ནི་དགེ་བ་མཐོང་བར་འགྱུར། དྲང་པོའི་རང་བཞིན་དང་། དབུགས་དབྱུང་བའི་གནས་
དང་། འཇིག་རྟེན་ཀུན་གྱིས་རྟོགས་པ་དང་། ཚིག་འཇམ་ཞིང་དེས་ལ་སྙན་པ་དང་། གཞན་ལ་རྣམ་པར་འཚེ་བར་མི་བྱེད་ཅིང་། སྐྱེ་བོ་ཐམས་ཅད་ཀྱི་དབུགས་འབྱུང་བ་བྱེད་པར་འགྱུར། དེ་རྒྱང་རིང་པོ་ནས་མཐོང་ནས། སྐྱེ་བོ་ཀུན་ཉེ་བར་འགྲོ་བར་བྱེད། མཛའ་བཤེས་ཀྱང་མང་བར་འགྱུར། ནོར་རྫས་མེད་ན་ཡང་སྐྱེ་བོ་ཀུན་དེའི་བྲན་དང་འདྲ་བར་འགྱུར་རོ། །གལ་ཏེ་དེ་ལས་གཞན་ཞིག་གིས་ཉོན་མོངས་པ་བྱུང་ན་ཡང་དེ་དག་གིས་དེ་ནམས་ཀྱང་གཏོང་བར་མི་བྱེད་ཅིང་། དེའི་དོན་ཐམས་ཅད་ཉོན་མོངས་པ་མེད་པར་ཉེ་བར་སྒྲུབ་ལ་དེ་ལ་མི་མཛའ་བ་དང་། རྒྱལ་པོ་དང་། ཆུ་དང་། མེ་དང་། མཚོན་གྱིས་འཇིགས་པ་མེད་པར་འགྱུར་རོ། །ལུས་དང་བྲལ་ནས་ཀྱང་བདེ་འགྲོ་མཐོ་རིས་ཀྱི་ལྷ་རྣམས་ཀྱི་འཇིག་རྟེན་དུ་སྐྱེ་བར་འགྱུར་ཏེ། དེར་སྐྱེས་ནས་ཀྱང་ཚིག་གི་རྒྱུ་འཇམ་པ་དང་། ཕན་པ་དང་། སྙན་པ་དང་ལྡན་པར་འགྱུར་ཞིང་རྫུ་འཕྲུལ་ཆེ་བ་དང་། མཐུ་ཆེ་བར་འགྱུར་རོ། །སྔ་མ་བཞིན་དུ་གལ་ཏེ་ངེས་པར་འབྱུང་བའི་བསམ་གཏན་བདེ་བའི་གནས་ཟག་པ་མེད་པར་ཡོངས་སུ་བསྔོ་ན། དེ་བྱང་ཆུབ་གསུམ་འཐོབ་པར་འགྱུར་རོ། །དེ་ནས་གཞན་ཡང་མི་དགེ་བའི་ལས་ཀྱི་ལམ་ཚིག་ཀྱལ་པ་སྤངས་པས་ཚེ་འདི་ལ་ཇི་ལྟར་འཐོབ་པར་འགྱུར་བ་དང་། ཕྱི་མ་ལ་གང་དུ་སྐྱེ་བར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཚིག་ཀྱལ་པ་སྤངས་པ་ནི་འཇིག་རྟེན་ན་རིགས་བཙུན་པར་འགྱུར་ཞིང་དེ་བཀུར་བར་ཡང་འགྱུར། ཚིག་སྔ་ཕྱི་འབྲེལ་པར་འགྱུར་ཞིང་ཚིག་ལ་སྐྱེ་བོ་ཐམས་ཅད་མངོན་པར་དགའ་བར་འགྱུར། དེ་ལ་སྐྱོན་གྱིས་སུ་ཡང་རྣམ་པར་འཚེ་བར་མི་བྱེད་ལ་ཚིག་ཤིན་ཏུ་འབྲེལ་ཅིང་འཇིག་རྟེན་ན་བཙུན་པར་འགྱུར་ཏེ། དལ་བ་དང་། སྙན་པ་དང་། ཁོང་དུ་ཆུད་པ་དང་། ཆོས་དང་ལྡན་པ་དང་། འཇམ་པ་དང་། ཟབ་མོའི་རྒྱུའི་ཚུལ་དང་། ཆོས་ཉིད་དང་མི་འགལ་བའི་གཏམ་སྨྲ་བ་འཇིག་རྟེན་ན་བླ་མ་དང་
འདྲ་བར་ལྟ་ཞིང་ནོར་རྫས་བརྟན་པར་ཡང་འགྱུར། ལོག་པར་སྤངས་པ་ཡང་སྐྱེ་བོ་ཕ་རོལ་དག་གིས་ཡོན་ཏན་དུ་འཛིན་པར་འགྱུར་ཞིང་དེའི་ཡོན་ཏན་དེས་སྐྱེ་བོ་དག་གཟུང་བར་འགྱུར་རོ། །ལུས་དང་བྲལ་ནས་ཀྱང་བདེ་འགྲོ་མཐོ་རིས་ལྷ་རྣམས་ཀྱི་འཇིག་རྟེན་དུ་སྐྱེ་བར་འགྱུར་ཏེ། དེར་སྐྱེས་ནས་ཀྱང་ལྷའི་བུ་ཐམས་ཅད་སེམས་པར་འགྱུར་ཞིང་རྫུ་འཕྲུལ་ཆེ་བ་དང་། ལྷའི་བདེ་བ་དཔེ་མེད་པ་ལ་སྤྱོད་པར་འགྱུར་རོ། །སྔ་མ་བཞིན་དུ་གལ་ཏེ་རྣམ་པར་བྱང་བ་ཟག་པ་མེད་པའི་བསམ་གཏན་གྱི་བདེ་བར་ཡོངས་སུ་བསྔོ་ན། དེ་བྱང་ཆུབ་གསུམ་འཐོབ་པར་འགྱུར་རོ། །དེ་ལྟར་ལུས་ཀྱི་རྣམ་པ་གསུམ་དང་། ངག་གི་རྣམ་པ་བཞི་མི་དགེ་བ་ཡོངས་སུ་སྤངས་ན་མཐར་མྱ་ངན་ལས་འདས་པར་འགྱུར་རོ། །དེ་ནི་དགེ་བའི་ལས་ཀྱི་རྒྱུ་ཡིན་ལ་འཇིག་རྟེན་ན་ཡང་བསྔགས་པར་འགྱུར་ཞིང་ལྷ་རྣམས་ཀྱི་ནང་དུ་ཡང་སྐྱེ་བར་འགྱུར་རོ། །དེ་ལུས་དང་ངག་གི་ལས་ཡང་དག་པར་གྱུར་པའི་ལས་ཀྱི་འབྲས་བུ་རྣམ་པར་སྨིན་པའི་རྒྱུ་ནི་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་བ་ནང་གི་ཡང་དག་པར་གྱུར་པ་རྗེས་སུ་མཐོང་ངོ་། །དེ་ནས་གཞན་ཡང་ཡིད་ཀྱི་ལས་ཇི་ལྟར་དགེ་བར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཡིད་ཀྱི་མི་དགེ་བ་དེ་རྣམ་པ་གསུམ་པོ་དེ་དག་ཟློག་པས་དགེ་བའི་འབྲས་བུ་ཚེ་འདི་ལ་བདེ་བ་གནས་པ་མྱོང་བར་འགྱུར་ཞིང་ལུས་དང་བྲལ་ནས་ཀྱང་བདེ་འགྲོ་མཐོ་རིས་ལྷ་རྣམས་ཀྱི་འཇིག་རྟེན་དུ་སྐྱེ་བར་འགྱུར། གལ་ཏེ་འཁོར་བ་ལ་ཡིད་བྱུང་ན་དེ་རྒྱུ་དེས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་འགྱུར་རོ། །ཡིད་ཀྱི་ལས་ནི་རྣམ་པ་གསུམ་སྟེ། བརྣབ་སེམས་དང་། གནོད་སེམས་དང་། ལོག་པར་ལྟ་བའོ། །དེ་ནས་གཞན་ཡང་བརྣབ་སེམས་སྤངས་པས་དགེ་བའི་ལས་ཀྱི་འབྲས་བུ་རྣམ་པར་སྨིན་པ་ཇི་ལྟ་བུ་ཞིག་འབྱུང་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་
པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། བརྣབ་སེམས་སྤངས་པ་ནི་རྒྱལ་པོའམ། རྒྱལ་པོའི་བློན་པོའི་ནོར་རྫས་ཀྱི་རྣམ་པ་མང་པོ་ཐམས་ཅད་གང་ལ་ཡང་ཡིད་ཀྱིས་དབྲོག་པའི་དོན་དུ་སེམས་པར་མི་བྱེད་པ་ཡིན་ནོ། །དེའི་ནོར་རྫས་གཞིག་ཏུ་སྟོར་ན་ཡང་གཞན་གྱིས་རྙེད་ཅིང་དེ་ལ་སྐྱེ་བོ་དེ་དང་། གཙོ་བོར་གྱུར་པ་ཞིག་ན་ཡང་སླར་སྦྱིན་པར་བྱེད་དེ། ནོར་དང་རྟག་ཏུ་ལྡན་ཞིང་གཞན་དག་གིས་མི་ཐུབ་པར་འགྱུར་རོ། །ལུས་དང་བྲལ་ནས་ཀྱང་བདེ་འགྲོ་མཐོ་རིས་ལྷ་རྣམས་ཀྱི་འཇིག་རྟེན་དུ་སྐྱེ་བར་འགྱུར་ལ། དེར་སྐྱེས་ནས་ཀྱང་ལྷ་དང་ལྷ་མ་ཡིན་དུ་གཡུལ་འགྱེད་པའི་ཚེ་ལྷ་མ་ཡིན་གང་གིས་ཀྱང་ཡོངས་སུ་ཐུབ་པར་མི་འགྱུར་ཞིང་རྡེག་པར་མི་འགྱུར་ལ། རྣམ་པར་ཐོ་འཚམ་པར་མི་འགྱུར་རོ། །དེ་དག་ལས་རྣམ་པར་ཕྱེ་བར་མི་འགྱུར་ཏེ། ལྷའི་བུ་ཐམས་ཅད་ལ་འདོད་པ་དང་། སྡུག་པ་དང་། ཡིད་དུ་འོང་བར་འགྱུར་ཞིང་། སྒྲ་དང་། རེག་བྱ་དང་། རོ་དང་། གཟུགས་དང་། དྲི་སྡུག་པ་དཔེ་མེད་པ་ཉེ་བར་སྤྱོད་པར་འགྱུར་རོ། །སྔ་མ་བཞིན་དུ་གལ་ཏེ་ངེས་པར་འབྱུང་བ་ཟག་པ་མེད་པའི་བསམ་གཏན་གྱི་འབྲས་བུའི་ལམ་དུ་ཡོངས་སུ་བསྔོ་ན། དེ་བྱང་ཆུབ་གསུམ་འཐོབ་པར་འགྱུར་རོ། །དེ་ནས་གཞན་ཡང་གནོད་སེམས་མི་དགེ་བའི་ལས་ཀྱི་ལམ་སྤངས་པས་དགེ་བའི་ལས་ཀྱི་འབྲས་བུ་ཇི་ལྟར་འཐོབ་པར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། གནོད་སེམས་སྤངས་པས་ཚེ་འདི་ཉིད་ལ་འབྱོར་པ་དང་བདེ་བར་གནས་པར་འགྱུར་ལ། སྐྱེ་བོ་ཐམས་ཅད་དགའ་བ་དང་། ཡིད་དུ་འོང་བར་འགྱུར། ཕ་རོལ་གྱིས་འཇིགས་ཤིང་ཉམ་ང་བ་མི་བཟད་པ་ཆེན་པོ་དང་རྣམ་པར་གཙེ་བར་མི་ནུས་ཤིང་། རྒྱལ་པོའི་འཁོར་གྱི་འཇིགས་པ་དང་། ཆོམ་རྐུན་དང་། གཡང་སའི་འཇིགས་པ་དང་། མེའི་འཇིགས་པ་དང་། གནོད་པའི་འཇིགས་པ་དང་། གཡོའི་འཇིགས་པ་དང་། ཆུའི་འཇིགས་
པ་དང་། འཇིགས་པ་དུ་མ་ཉམ་ང་བ་དག་དང་བྲལ་ཞིང་འཇིགས་པ་དང་། ཉམ་ང་བ་དག་ལས་ཀུན་ཏུ་ཐར་ཏེ། སྐྱེ་བོ་ཐམས་ཅད་ཀྱི་སྡུག་པ་དང་། མཆོག་ཏུ་དགའ་བར་འགྱུར། སྡིག་པའི་སྐྱེ་བོ་དང་། དགེ་བའི་སྐྱེ་བོ་ལ་བུ་དང་། སྤུན་དང་འདྲ་བར་སྡུག་པར་འགྱུར་རོ། །ལུས་དང་བྲལ་ནས་ཀྱང་བདེ་འགྲོ་མཐོ་རིས་ལྷ་རྣམས་ཀྱི་འཇིག་རྟེན་དུ་སྐྱེ་བར་འགྱུར་ཏེ། དེར་ཡང་རྫུ་འཕྲུལ་ཆེ་བ་དང་། མཐུ་ཆེ་བར་འགྱུར། གཟུགས་དང་། སྒྲ་དང་། རེག་བྱ་འདོད་པ་ཐམས་ཅད་འབྱོར་པ་ལ་གནས་པར་འགྱུར་ཞིང་དགའ་བའི་ཚལ་དང་། ཡོངས་སུ་འདུ་བ་དང་། རྣམ་པར་མཛེས་པ་དང་། ཤིང་རྟ་སྣ་ཚོགས་ཀྱི་ཚལ་ཆེན་པོ་རྣམས་སུ་ལྷའི་བུ་མོའི་ཚོགས་ཀྱིས་ཡོངས་སུ་བསྐོར་བར་འགྱུར། དེའི་ལུས་དང་། ངག་དང་། ཡིད་ལ་ལྷ་གང་གིས་ཀྱང་རྣམ་པར་གཙེ་བར་མི་ནུས་ཤིང་། དེ་ལ་ལྷ་འབུམ་སྙེད་དག་གིས་དགའ་བ་སྐྱེད་པར་འགྱུར་ལ། ལྷའི་རྒྱལ་པོ་བརྒྱ་བྱིན་གྱི་འདོད་པ་དང་། སྡུག་པ་དང་། དགའ་བ་དང་། ཡིད་དུ་འོང་བར་འགྱུར། ལྷ་དང་ལྷ་མ་ཡིན་གྱི་གཡུལ་འགྱེད་པའི་ཉོན་མོངས་པ་དག་ཀྱང་མེད་ཅིང་འཁྲུག་པ་དག་དང་འབྲལ་བར་འགྱུར་རོ། །གལ་ཏེ་ངེས་པར་འབྱུང་བ་འཇིག་རྟེན་ལས་འདས་པའི་ལམ་ཉོན་མོངས་པ་མེད་པར་ཡོངས་སུ་བསྔོ་ན། དེ་ལྷའི་འཇིག་རྟེན་དེ་ནས་ཤི་ནས་འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་བ་རིན་པོ་ཆེ་སྣ་བདུན་ལ་ཉེ་བར་སྤྱོད་པ་རྣམ་པ་དུ་མར་འགྱུར་ཏེ། འདི་ལྟ་སྟེ། བུད་མེད་རིན་པོ་ཆེ་ནི་དེའི་བུད་མེད་ཀྱི་ལུས་ལས་ཙན་དན་དང་སྤོས་འབྱུང་ཞིང་ཁ་ནས་ཨུད་པ་ལའི་དྲི་འབྱུང་། བྱ་ཀ་ལིང་ག་ལྟར་རེག་ན་བདེ་བར་འགྱུར་ཏེ། བྱ་ཀ་ལིང་ག་ཞེས་བྱ་བ་ནི་རྒྱ་མཚོའི་གླིང་ལ་གནས་པའི་བྱ་ཡིན་ནོ། །དེ་ལྟར་འདིའི་མཐུས་གང་ལ་རེག་པ་ཉིད་ཀྱི་ལུས་ཀྱི་ཉོན་མོངས་པ་མེད་པར་འགྱུར་ཞིང་། གླིང་དེ་ན་གནས་པའི་སྐྱེ་བོ་བཀྲེས་པ་དང་། སྐོམ་པ་དང་། མྱ་ངན་དང་བྲལ་བར་འགྱུར། བུད་མེད་དེ་ལྟ་བུ་དེ་འཁོར་ལོས་སྒྱུར་བའི་རྒྱལ་པོས་མཐོང་ནས་གྲང་བའི་དུས་སུ་ནི་དྲོ་བར་བྱེད་ཅིང་དྲོ་བའི་དུས་སུ་ནི་
བསིལ་བར་བྱེད་དེ། དེ་ལ་མི་གཞན་གང་གིས་ཀྱང་རེག་པར་བྱ་བར་མི་ནུས་སོ། །དེ་གནོད་སེམས་སྤངས་པའི་མཐུས་དགེ་བའི་ལས་ཀྱི་རྗེས་སུ་ཞུགས་པ་དགེ་བ་ཐམས་ཅད་ཡང་དག་པར་རྟོགས་པའི་མི་དེ་དག་ཐམས་ཅད་ཀྱིས་མ་དང་སྲིང་མོ་ལྟར་མཐོང་ངོ་། །དེ་ཡང་རྒྱལ་པོ་དེའི་ཡིད་དུ་འོང་ཞིང་དེ་ལ་གུས་པར་བྱེད་ལ་དེའི་སྙིང་དུ་སྡུག་པ་དང་། རྟག་ཏུ་བདེ་བའི་རྗེས་སུ་འཇུག་པར་འགྱུར་རོ། །བུད་མེད་ཀྱི་སྐྱོན་རྣམ་པ་ལྔ་སྤངས་པ་ཡིན་ཏེ། འདི་ལྟ་སྟེ། སྐྱེས་པ་གཞན་ལ་སེམས་པ་དང་། སེར་སྣ་དང་། མི་རིགས་པར་ཆགས་པ་དང་། མི་རིགས་པའི་གནས་ལ་རྗེས་སུ་དགའ་བ་དང་། ཁྱིམ་ཐབ་ཀྱི་སྲོག་གཅད་པར་འཛིན་པའོ། །བུད་མེད་རིན་པོ་ཆེའི་ཡོན་ཏན་ལྔ་དང་ལྡན་པར་འགྱུར་ཏེ། འདི་ལྟ་སྟེ། བསམ་པ་དང་འཐུན་པར་འགྱུར་བ་དང་། བུ་མང་པོ་བཙའ་བར་འགྱུར་བ་དང་། རིགས་འཐུན་པར་འགྱུར་བ་དང་། སྲིད་མཐོ་བར་འགྱུར་བ་དང་། ཁྱིམ་ཐབ་བུད་མེད་གཞན་ལ་སེམས་ན་ཕྲག་དོག་མི་བྱེད་པའོ། །གཞན་ཡང་བུད་མེད་ཆེན་མོའི་ཡོན་ཏན་གསུམ་དང་ལྡན་པར་འགྱུར་ཏེ། འདི་ལྟ་སྟེ། ཚིག་ཅལ་ཅོལ་མེད་པར་འགྱུར་བ་དང་། ལོག་པར་ལྟ་བ་མེད་པར་འགྱུར་བ་དང་། ཁྱིམ་ཐབ་མེད་ཀྱང་སྒྲ་དང་། དྲི་དང་། རོ་དང་། རེག་བྱ་དག་གི་དབང་དུ་མི་འགྱུར་བའོ། །དེ་རྒྱུ་དེས་ལུས་དང་བྲལ་ནས་བདེ་འགྲོ་མཐོ་རིས་ཀྱི་ལྷ་རྣམས་ཀྱི་འཇིག་རྟེན་དུ་སྐྱེ་བར་འགྱུར་ཏེ། དེ་ལྟར་འཁོར་ལོས་སྒྱུར་བའི་རྒྱལ་པོ་བུད་མེད་རིན་པོ་ཆེ་ལ་ཉེ་བར་སྤྱོད་པར་འགྱུར་རོ། །དེ་ནས་གཞན་ཡང་གནོད་སེམས་ཀྱི་དྲི་མ་ཆེན་པོ་སྤངས་པས་དགེ་བའི་ལས་ཀྱི་རྣམ་པར་སྨིན་པས་འཁོར་ལོས་སྒྱུར་བའི་རྒྱལ་པོར་ཇི་ལྟར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། གཞན་གྱི་མི་དགེ་བའི་ལས་ཀྱི་རྒྱུ་འཐུན་པ་གནོད་སེམས་ཆེན་པོ་སྤངས་པས། རིན་པོ་ཆེ་གཉིས་པ་ནོར་བུ་རིན་པོ་ཆེ་ལ་ཉེ་བར་སྤྱོད་པར་འགྱུར་ཏེ། དེའི་ཡོན་
ཏན་བརྒྱད་དང་ལྡན་པ་ཡིན་ནོ། །འདི་ལྟ་སྟེ། མཚན་མོ་རབ་ཏུ་གསལ་བ་ཡིན་ཏེ། ཇི་ལྟར་སྟོན་ཀའི་ཟླ་བ་ཉ་བ་ནི། སྟོན་ཀ་འོད་གསལ་བར་འགྱུར་བ་དེ་ལྟར་ནོར་བུ་ཡང་མཚན་མོའི་མུན་པ་མུན་ནག་དག་ལ་དཔག་ཚད་བརྒྱར་འོད་འབྱུང་ཞིང་ཉིན་པར་ཚ་བས་གདུངས་པ་རྣམས་ལ་ནི་འོད་བསིལ་བ་འབྱུང་སྟེ། ཚ་བ་སེལ་བར་བྱེད་པ་འདི་ནི་ནོར་བུ་དེའི་ཡོན་ཏན་གཅིག་ཡིན་ནོ། །གཞན་ཡང་ཡོན་ཏན་གཉིས་པ་ནི་གང་གི་ཚེ་ལམ་དུ་ཞུགས་པ་ལ་ཆུ་དང་བྲལ་བ་དེའི་ཚེ། སྐོམ་པས་གདུངས་པ་རྣམས་ལ་ཆུ་ཆེན་པོ་ཡན་ལག་བརྒྱད་དང་ལྡན་པ་རབ་ཏུ་འབྱུང་བར་འགྱུར་ལ་དེས་སྐོམ་པ་དེ་དག་ཐམས་ཅད་སེལ་བར་འགྱུར་ཏེ། འདི་ནི་ནོར་བུ་དེའི་ཡོན་ཏན་གཉིས་པ་ཡིན་ནོ། །གཞན་ཡང་ནོར་བུ་དེའི་ཡོན་ཏན་གསུམ་པ་ནི་གང་འཁོར་ལོས་སྒྱུར་བའི་རྒྱལ་པོས་བསམས་པ་ནོར་བུ་དེ་ལས་འབྱུང་སྟེ། འདི་ནི་ནོར་བུ་དེའི་ཡོན་ཏན་གསུམ་པ་ཡིན་ནོ། །གཞན་ཡང་ནོར་བུ་དེའི་ཡོན་ཏན་བཞི་པ་ནི། ཡན་ལག་བརྒྱད་པར་འགྱུར་ཏེ། དེའི་ཆ་རེ་རེས་འོད་ཀྱི་ཁ་དོག་སྣ་ཚོགས་གཏོང་སྟེ། སྔོན་པོ་དང་། སེར་པོ་དང་། དཀར་པོ་དང་། དམར་པོ་དང་། བཙོད་ཀའི་ཁ་དོག་ལྟ་བུའོ། །གཞན་ཡང་ནོར་བུ་དེའི་ཡོན་ཏན་ལྔ་པ་ནི་ནོར་བུ་དེ་གང་ན་འདུག་པ་དཔག་ཚད་བརྒྱར་ཉེ་བ་དག་གི་ནད་མེད་པར་འགྱུར། རྟག་ཏུ་ཡིད་མཉམ་པར་གཞག་པ་དང་དེའི་འདོད་པ་ཐམས་ཅད་ལས་ཇི་ལྟ་བ་བཞིན་དུ་འབྲས་བུ་མེད་པར་མི་འགྱུར་རོ། །གཞན་ཡང་ནོར་བུ་དེའི་ཡོན་ཏན་དྲུག་པ་ནི་ཀླུ་ངན་པས་ཆར་མི་བཟད་པ་མངོན་པར་དབབ་པར་མི་ནུས་སོ། །གཞན་ཡང་ནོར་བུ་དེའི་ཡོན་ཏན་བདུན་པ་ནི་མྱ་ངམ་དང་། གཡང་ས་དང་། དགོན་པ་དང་། ཤིང་ལྗོན་པ་དང་། ཡུལ་དང་བྲལ་བ་རྣམས་ཤིང་ལྗོན་པ་དང་། མཚེའུ་དང་། ཚལ་དང་། པད་མ་དང་། ནགས་ཚལ་དང་། ནེའུ་གསིང་ཕུན་སུམ་ཚོགས་པར་འགྱུར་རོ། །གཞན་ཡང་ནོར་བུ་དེའི་ཡོན་ཏན་བརྒྱད་པ་ནི་མི་གང་ཡང་དུས་མ་ཡིན་པར་འཆི་བར་མི་འགྱུར་ཞིང་། དུད་འགྲོའི་འགྲོ་བར་མི་འགྱུར་ཏེ། དུད་
འགྲོའི་འགྲོ་བ་དག་གིས་ཀྱང་གནོད་པར་མི་འགྱུར་རོ། །མི་འཐུན་པས་ཡང་མི་འཐུན་པ་ལ་གནོད་པར་མི་འགྱུར་ཏེ། འདི་ལྟ་སྟེ། ནེའུ་ལེ་དང་། སྦྲུལ་ལྟ་བུ་སྟེ་ཡོན་ཏན་ཆེན་པོ་བརྒྱད་པོ་དེ་དག་དང་ལྡན་ནོ། །འཁོར་ལོས་སྒྱུར་བའི་རྒྱལ་པོ་དེའི་གནོད་སེམས་སྤངས་པ་དགེ་བའི་ལས་ཀྱི་རྣམ་པར་སྨིན་པར་འགྱུར་བ་ནི་དེའི་བུ་ཡང་སྟོང་ཐམ་པར་འབྱུང་སྟེ། དཔའ་ཞིང་རྟུལ་ཕོད་ལ་ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་མངོན་པར་འཇོམས་པ། བསམ་པའི་རྗེས་སུ་འཇུག་པ། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། རིགས་འཐུན་པ། འཁོར་གྱི་སྐྱེ་བོ་ཐམས་ཅད་དགའ་ཞིང་རང་བཞིན་གྱིས་རྗེས་སུ་ཆགས་པ་དག་ཡིན་ནོ། །དེ་ནས་གཞན་ཡང་གནོད་སེམས་སྤངས་པས་གསུམ་པ་འཇིག་རྟེན་དུ་འཁོར་ལོ་རིན་པོ་ཆེ་ཇི་ལྟར་འབྱུང་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། འཁོར་ལོ་རིན་པོ་ཆེ་ཡོན་ཏན་ལྔ་དང་ལྡན་པར་མཐོང་སྟེ། འདི་ལྟ་སྟེ། འཛམ་བུའི་ཆུ་བོའི་གསེར་ལས་བྱས་པ། ཚད་དཔག་ཚད་ལྔ་བརྒྱ་ཡོད་པ། རྩིབས་སྟོང་ཡོད་ཅིང་། འཇིག་རྟེན་ན་ཉི་མ་གཉིས་པ་ལྟ་བུར་རྣམ་པར་མཛེས་ཏེ། འདི་ནི་དེའི་ཡོན་ཏན་དང་པོ་ཡིན་ནོ། །གཞན་ཡང་འཁོར་ལོ་རིན་པོ་ཆེའི་ཡོན་ཏན་གཉིས་པ་ནི་ནམ་མཁའ་ལ་དཔག་ཚད་འབུམ་དུ་ཉི་མ་གཅིག་གིས་ཐོགས་པ་མེད་པར་འགྲོའོ། །གཞན་ཡང་འཁོར་ལོ་རིན་པོ་ཆེ་དེའི་ཡོན་ཏན་གསུམ་པ་ནི་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་ནུབ་ཀྱི་བ་ལང་སྤྱོད་དང་། ཤར་གྱི་ལུས་འཕགས་པོ་དང་། བྱང་གི་སྒྲ་མི་སྙན་དང་། རྒྱལ་ཆེན་བཞིའི་ལྷའི་གནས་གང་དུ་འགྲོ་བར་འདོད་པ་དེ་དང་དེར་ནམ་མཁའ་ལ་འཁོར་ལོ་རྩིབས་སྟོང་ཡོད་པས་འགྲོ་ཞིང་། དེའི་མཐུས་དེའི་དཔུང་གི་ཚོགས་ཡན་ལག་བཞི་པ་གླང་པོ་དང་། རྟ་དང་། ཤིང་རྟ་དང་། རྐང་ཐང་བ་དང་ལྷན་ཅིག་ཏུ་ནམ་མཁའ་ལ་འགྲོའོ། །གཞན་
ཡང་འཁོར་ལོ་རིན་པོ་ཆེ་དེའི་ཡོན་ཏན་བཞི་པ་ནི། འཁོར་ལོས་སྒྱུར་བའི་རྒྱལ་པོ་གང་མི་ཐོས་པ་དེ་འཁོར་ལོ་རིན་པོ་ཆེ་དེས་གྲོགས་བྱས་ཏེ་ཐོས་པར་བྱེད་དོ། །གཞན་ཡང་འཁོར་ལོ་རིན་པོ་ཆེ་དེའི་ཡོན་ཏན་ལྔ་པ་ནི་སྔོ་བ་གང་ཡང་མེད་དེ། ཆོས་དང་ལྡན་པའི་ཆོས་ཀྱི་རྗེས་སུ་འཇུག་པའི་རྒྱལ་པོ་ལ། རྒྱལ་པོའམ། བློན་པོའི་ཆོས་ཀྱི་གྲོགས་པོས་མཐོང་མ་ཐག་ཏུ་དེ་དག་ཐམས་ཅད་འབུལ་ཏེ། དེ་ལྟར་འཁོར་ལོ་རིན་པོ་ཆེ་ཡོན་ཏན་ལྔ་དང་ལྡན་ནོ། །རིན་པོ་ཆེ་ཆེན་པོ་གསུམ་པ་བཤད་ཟིན་ཏོ། །དེ་ནས་གཞན་ཡང་གནོད་སེམས་སྤངས་པའི་དགེ་བའི་ལས་ཀྱི་མཐའ་སྤྱད་པ་དག་འཁོར་ལོས་སྒྱུར་བའི་རྒྱལ་པོའི་བཞི་པ་གླང་པོ་རིན་པོ་ཆེ་ཇི་ལྟར་འཇིག་རྟེན་དུ་འབྱུང་བར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། འདི་ལ་འཁོར་ལོས་སྒྱུར་བའི་རྒྱལ་པོ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་གླང་པོར་ འགྱུར་བ་ནི་ཅང་ཤེས་པ། མཆོག་ཏུ་བཀའ་མཉན་པ། ཕ་རོལ་གྱི་སྡེ་ལས་རྒྱལ་བར་བྱེད་པ། ཡན་ལག་བདུན་ལེགས་པར་གནས་པ་ཡིན་ཏེ། འདི་ལྟ་སྟེ། རྐང་ལག་བཞི་དང་མཇུག་མ་མ་ཟེགས་པ་དང་། རླིག་པ་མདོམས་ཀྱི་གནས་ན་འདུག་པ་དང་། སྣ་ལེགས་པར་གནས་པ་སྟེ། དེ་དག་ལ་སོགས་པ་དེའི་ཡན་ལག་བདུན་དག་སའི་སྟེང་ན་ལེགས་པར་རབ་ཏུ་གནས་པ་ཡིན། སྟོབས་ཆེ་བ་ཡིན་ཏེ། རང་བཞིན་གྱིས་གླང་པོ་ཆེ་སྟོང་གི་སྟོབས་ཡང་དག་པར་འཛིན་པར་བྱེད། རྐན་འཇམ་པ་དང་ལྡན་ཞིང་མདོག་དཀར་བ་ཁ་བ་དང་དངུལ་གྱི་མདོག་ལྟ་བུ་ཡིན་ཏེ། འདི་ལྟ་སྟེ། བརྒྱ་བྱིན་གྱི་གླང་པོ་ཆེ་ལྟ་བུ་ཡིན་ལ། གླང་པོ་ཆེ་གཞན་དག་དེའི་དྲི་ཚོར་ནས་མདུན་དུ་འདུག་པར་མི་བྱེད་དོ། །གནས་གསུམ་དུ་གཡུལ་འགྱེད་པར་འགྱུར་ཏེ། འདི་ལྟ་སྟེ། ཆུ་དང་། སྐམ་ས་དང་། བར་སྣང་ལའོ། །ཤུགས་ཕུན་སུམ་ཚོགས་པ་དང་ལྡན་པ་ཡིན་ཏེ། ཉིན་གཅིག་གིས་འཛམ་བུའི་གླིང་ལན་གསུམ་དུ་
སྐོར་བར་བྱེད་དོ། །སྐུད་པས་ཀྱང་དཀྲིར་རུང་བར་འགྱུར་ལ་གང་གི་ཚེ་འཁོར་ལོས་སྒྱུར་བའི་རྒྱལ་པོ་གླང་པོ་ཅང་ཤེས་ལ་ཞོན་པ་དེའི་ཚེ་སེམས་དང་འཐུན་པར་འགྱུར་ཏེ། འཁོར་ལོས་སྒྱུར་བའི་རྒྱལ་པོ་གང་དུ་སེམས་འཇུག་པར་འགྱུར་བ་དེར་གླང་པོ་ཅང་ཤེས་པ་དེ་མ་བསྐུལ་ཀྱང་འཇུག་གོ །དལ་གྱིས་འགྲོ་ཞིང་འགྱིང་བས་སྤྱི་བོ་བསྐྱོད་པ། གནོད་པ་མེད་ཅིང་འཁྲུག་པ་མེད་ལ། སྡུག་པ་དང་མཛེས་པར་འགྲོ་བ་ཡིན། བྱིས་པའི་ནང་དུ་སོང་ན་ཡང་བྱིས་པ་རྣམས་ལ་འཇིགས་པར་མི་བྱེད། ལམ་སྲང་དང་། བཞི་མདོ་དང་། བ་གམ་གྱི་ནང་དུ་སོང་སྟེ། ཕན་ཚུན་འགྲོ་བ་ན་བུད་མེད་ཀྱིས་ཀྱང་རེག་པར་བཟོད་པ་ཡིན། གཡུལ་འགྱེད་པའི་དུས་སུ་དྲག་ལ། གནས་པའི་དུས་སུ་ནི་སྐུད་པས་དཀྲིར་རུང་བ་ཡིན་ཏེ། རྒྱལ་པོའི་གླང་པོ་ཆེའི་ཡོན་ཏན་ནི་དེ་དག་ཡིན་ནོ། །འཁོར་ལོས་སྒྱུར་བའི་རྒྱལ་པོས་དགེ་བ་བཅུའི་ལས་ཀྱི་ལམ་རེ་རེ་སྤྱད་པས་ཀྱང་འཁོར་ལོས་སྒྱུར་བའི་ས་བོན་འདི་དག་འགྲུབ་ན། དགེ་བ་བཅུའི་ལས་ཀྱི་ལམ་མཐའ་དག་གི་རྗེས་སུ་ཞུགས་པ་ལྟ་སྨོས་ཀྱང་ཅི་དགོས། དེ་ལྟར་རྣལ་འབྱོར་སྤྱོད་པ་དེ་ལྷའི་མིག་གིས་འཁོར་ལོས་སྒྱུར་བའི་བཞི་པ་གླང་པོ་རིན་པོ་ཆེ་མཐོང་ངོ་། །དེ་ནས་གཞན་ཡང་འཁོར་ལོས་སྒྱུར་བའི་རྒྱལ་པོའི་རྟ་རིན་པོ་ཆེའི་ཡོན་ཏན་ནི་དུ་ཞིག་དང་ལྡན་པར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། རྟ་རིན་པོ་ཆེ་ངང་པ་དང་མེ་ཏོག་ཀུ་མུ་ད་ལྟར་དཀར་བ་ཡིན། ཀུན་ནས་ལྷའི་ནོར་བུའི་གཙུག་ལ་སོགས་པ་མཚན་བཟང་པོས་བརྒྱན་པ་ཡིན། བོང་སྟོང་དང་། མདོག་དང་། དབྱིབས་ཕུན་སུམ་ཚོགས་པ་ཡིན། བསྒོ་ན་ཉིན་གཅིག་གིས་འཛམ་བུའི་གླིང་ལན་གསུམ་དུ་སྐོར་བར་བྱེད་ལ་དེའི་ལུས་དག་ལ་ཤིན་ཏུ་ནད་མེད་པ་ཡིན་ཏེ། འདི་ནི་འཁོར་ལོས་སྒྱུར་བའི་རྒྱལ་པོའི་རིན་པོ་ཆེ་ལྔ་པ་ཡིན་ནོ། །དེ་ནས་གཞན་ཡང་འཁོར་ལོས་སྒྱུར་བའི་རྒྱལ་པོའི་བློན་པོ་རིན་པོ་ཆེ་ཇི་ལྟ་བུ་ཡིན་ཞེ་ན། རྣལ་
འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། བློན་པོ་རིན་པོ་ཆེའི་ཡོན་ཏན་ནི་འདི་དག་ཡིན་ཏེ། འདི་ལྟ་སྟེ། གང་རྒྱལ་པོའི་བྱ་བའི་རྣམ་པ་ཡིད་ལ་སེམས་པ་དེ་ཉིད་མ་བསྒོས་ཀྱང་དེའི་ཡིད་ཀྱིས་ཤེས་ནས། རྒྱལ་པོ་ལ་ཡོངས་སུ་འབུལ་བར་བྱེད་དེ། ཤིན་ཏུ་རྫོགས་པ་དང་། དེ་བསགས་པ་དང་། མ་ཆགས་པ་དང་། ཆོས་མ་ཡིན་པ་རྣམ་པར་སྤངས་པ་དང་། ཤིན་ཏུ་རིགས་པ་བརྩམས་པ་དང་། ཡུལ་དང་། དུས་དང་ལྡན་པ་དང་། ཉོན་མོངས་མེད་པ་དང་། གཞན་ལ་གནོད་པ་མེད་པ་དང་། སྐྱེ་བོ་ལ་རྣམ་པར་མི་འཚེ་བ་དང་། ཡང་དག་པའི་ཐ་སྙད་དང་ལྡན་པའི་རང་བཞིན་ལ་སྐྱོ་བ་མེད་པར་བྱེད་དོ། །རྒྱལ་པོའི་བྱ་བའི་རྣམ་པའམ་ཆོས་ཀྱི་དོན་གྱི་བྱ་བ་འདོད་པ་དང་ལྡན་ཞིང་མ་འོངས་པའི་བྱ་བ་དང་ལྡན་པ་ཐམས་ཅད་ཡོངས་སུ་འབུལ་བར་བྱེད་དོ། །འདི་ནི་འཁོར་ལོས་སྒྱུར་བའི་རྒྱལ་པོའི་བློན་པོ་རིན་པོ་ཆེ་ཡིན་ཏེ། ལྷག་པའི་གནོད་སེམས་སྤངས་པའི་དགེ་བ་བཅུའི་ལས་ཀྱི་ལམ་སྤྱོད་པ་དག་ནི་འཇིག་རྟེན་ཐམས་ཅད་ལ་ཕ་མ་ལྟར་ཕན་པར་འདོད་པར་གནས་པ་ཡིན་ནོ། །དེ་ནས་གཞན་ཡང་ཇི་ལྟར་ན་བདུན་པ་ཁྱིམ་བདག་རིན་པོ་ཆེ་འབྱུང་བར་འགྱུར། ཁྱིམ་བདག་རིན་པོ་ཆེ་དེའི་ཡོན་ཏན་ནི་དུ་ཞིག་ཡོད་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། ཐོས་པ་ལས་བྱུང་བའི་ཤེས་པའམ་ལྷའི་མིག་གིས་མཐོང་སྟེ། རྒྱལ་པོའི་བཀའ་ཉན་པའི་ཁྱིམ་བདག་རིན་པོ་ཆེའི་ཡོན་ཏན་ནི་འདི་དག་ཡིན་ཏེ། འདི་ལྟ་སྟེ། རྡོ་རྗེ་དང་། རིན་པོ་ཆེ་མཐོན་ཀ་དང་། མརྒད་དང་། སྤུག་ལ་སོགས་པ་རིན་པོ་ཆེ་རྣམས་ཀྱིས་ངམ་གྲོག་དང་། གཡང་ས་དང་། རི་ཁྲོད་དང་། མི་འཐུན་པ་གཞན་དག་ཏུ་མ་བསྐོས་ཀྱང་ཤིན་ཏུ་འགེངས་ལ་རིན་པོ་ཆེ་རྣམས་ཀྱང་ཟད་པ་མེད་པར་འགྱུར་ན། གསེར་དང་དངུལ་ལྟ་ཞིག་སྨོས་ཀྱང་ཅི་དགོས། ཁྱིམ་བདག་རིན་པོ་ཆེ་འདིའི་འབྱོར་པ་ནི་ཤིན་ཏུ་གནས་པ་ཡིན་ཏེ། གཡོ་མེད་པ་དང་། སྒྱུ་མེད་པ་དང་།
གཞན་ལ་མི་གནོད་པ་དང་། སྐྱེ་བོ་ཐམས་ཅད་དགའ་བ་ནི་ཁྱིམ་བདག་རིན་པོ་ཆེ་ཡིན་ནོ། །དེ་ལྟར་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ནི། མིའི་གནས་བཞི་རྣམས་ལ་སྒོ་བར་བྱེད་ཅིང་ཀླུ་དང་། ལྷའི་རིས་གཉིས་དང་། རྒྱལ་ཆེན་བཞི་དང་། སུམ་ཅུ་རྩ་གསུམ་གྱི་ལྷ་རྣམས་ཀྱི་དབང་པོའི་སྟན་ཕྱེད་འཕྲོག་པ་ཡིན་ཏེ། དེ་ལྟར་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ཡིན་ནོ། །དེའི་ཉེ་བའི་རིན་པོ་ཆེ་སྣ་བདུན་ནི་རིན་པོ་ཆེ་དེ་དག་ལས་ཆུང་ཟད་དམན་པ་ཡིན་ཏེ། འདི་ལྟ་སྟེ། རལ་གྲི་ཉེ་བའི་རིན་པོ་ཆེ་དང་། པགས་པ་ཉེ་བའི་རིན་པོ་ཆེ་དང་། མལ་ཆ་ཉེ་བའི་རིན་པོ་ཆེ་དང་། ཚལ་ཉེ་བའི་རིན་པོ་ཆེ་དང་། ཁྱིམ་ཉེ་བའི་རིན་པོ་ཆེ་དང་། གོས་ཉེ་བའི་རིན་པོ་ཆེ་དང་། ལྷམ་ཉེ་བའི་རིན་པོ་ཆེའོ། །དེ་ལ་འཁོར་ལོས་སྒྱུར་བའི་རྒྱལ་པོའི་རལ་གྲི་ཉེ་བའི་རིན་པོ་ཆེའི་ཡོན་ཏན་ནི་འདི་ལྟ་སྟེ། ཡུལ་འཁོར་གང་དག་རྒྱལ་པོའི་ཡིད་དང་། ཚིག་ལས་འགལ་བར་བྱེད་འདོད་པ་དེར་རལ་གྲི་ཉེ་བའི་རིན་པོ་ཆེ་འགྲོ་སྟེ། དེས་བཏབ་པ་མེད་ཅིང་རལ་གྲི་རིན་པོ་ཆེས་སུ་ལ་ཡང་བཏབ་པ་མེད་ཀྱིས་ཀྱང་ཡུལ་འཁོར་ཀུན་གྱིས་མཐོང་ནས་འདུད་པར་བྱེད་དོ། །ཉེ་བའི་རིན་པོ་ཆེ་དེའི་ཡོན་ཏན་ནི་འདི་ཡིན་ཏེ། བཟང་བ། མི་བཟད་པ། ཆད་པ་མེད་ཅིང་མཚོན་གྱིས་བདའ་བ་མེད་ཀྱང་ཡུལ་འཁོར་དེ་དག་ཐམས་ཅད་འདུད་པར་བྱེད་དེ། འདི་ནི་རལ་གྲི་ཉེ་བའི་རིན་པོ་ཆེའི་ཡོན་ཏན་ཡིན་ནོ། །པགས་པ་ཉེ་བའི་རིན་པོ་ཆེའི་ཡོན་ཏན་ཇི་ལྟ་བུ་ཡིན་ཞེ་ན། པགས་པ་རིན་པོ་ཆེ་ནི་རྒྱ་མཚོ་ནས་འབྱུང་སྟེ། དེ་བྱུང་བར་གྱུར་པ་དང་། ཚོང་པ་དག་གིས་རྒྱལ་པོ་ལ་འབུལ་བར་བྱེད་དེ། དེའི་ཡོན་ཏན་ནི་འདི་དག་ཡིན་ནོ། །དེ་རྒྱ་མཚོའི་ཀླུའི་པགས་པ་ཡིན་ཏེ། ཞེང་དུ་དཔག་ཚད་ལྔ་ལ་ཆུར་དཔག་ཚད་བཅུ་སྟེ། དེ་ཆར་གྱིས་མི་རླན། རླུང་གིས་མི་སྐྱོད། མེས་མི་འཚིག ། གྲང་ན་དྲོ་བར་བྱེད་ཅིང་། དྲོ་ན་བདེ་བ་བསིལ་བར་བྱེད་ལ། འཁོར་ལོས་སྒྱུར་བའི་རྒྱལ་པོ་འཁོར་དང་བཅས་པ་གང་དུ་འགྲོ་བ་དེར་བློན་པོ་རིན་པོ་ཆེས་དེ་ཁྱེར་བར་བྱེད་དེ། ཇི་
ལྟར་སོ་སོ་ནས་བྱེད་པ་ལྟར་དེ་རྒྱལ་པོའི་འཁོར་གྱི་ཁྱིམ་གྱི་བྱ་བ་ཐམས་ཅད་བྱེད་དོ། །བུད་མེད་མི་སྡུག་པ་དག་མི་མཐོང་ཞིང་དཀར་བ་དེ་དང་ལྡན་པར་འགྱུར་ལ་ཟླ་བ་དང་། ཉི་མའི་འོད་སྣང་བ་དེ་དང་ཡང་ལྡན་པར་འགྱུར་རོ། །གསུམ་པ་རྒྱལ་པོའི་མལ་ཆ་རིན་པོ་ཆེ་ནི་ཡང་ཞིང་འཇམ་ལ་མཐོན་དམན་ཅན་ཡིན་ཏེ། དེའི་རྒྱུ་མཚན་ནི་བཏེག་ན་འཕར་བ་དང་མནན་པ་ནེམ་བྱེད་པ་ཡིན་ནོ། །གལ་ཏེ་བསམ་གཏན་སེམས་ན་དེའི་བསམ་གཏན་རྣམ་པར་གྲོལ་ཞིང་བློ་གྲོས་གསལ་བར་བྱེད། གལ་ཏེ་འདོད་ཆགས་ཀྱིས་ཟིལ་གྱིས་ནོན་པ་ཡིན་ན་དེ་མལ་ཆའི་སྟེང་དུ་འདུག་ན། དེའི་ཚེ་འདོད་ཆགས་དང་བྲལ་ཞིང་ཆགས་པ་མེད་པར་བྱེད་དོ། །ཞེ་སྡང་དང་གཏི་མུག་དག་ལ་ཡང་དེ་བཞིན་ཏེ། མལ་ཆ་ཉེ་བའི་རིན་པོ་ཆེ་ནི་བསམ་གཏན་གྱི་གནས་དང་འདྲའོ། །རྒྱལ་པོ་མལ་ཆ་རིན་པོ་ཆེའི་ནང་ན་འདུག་པ་བུད་མེད་ཀྱིས་མཐོང་ལ་དེའི་ཚེ་མཆོག་ཏུ་དགའ་བ་སྐྱེས་ཀྱང་ཡིད་ལ་ཤིན་ཏུ་འདོད་ཆགས་པར་མི་འགྱུར་ཏེ། གསུམ་པ་འདི་ནི་མལ་ཆ་ཉེ་བའི་རིན་པོ་ཆེའི་ཡོན་ཏན་ཡིན་ནོ། །བཞི་པ་ཚལ་ཉེ་བའི་རིན་པོ་ཆེ་ཡོན་ཏན་དུ་ཡོད་ཅེ་ན། འདི་ལྟ་སྟེ། གལ་ཏེ་རྒྱལ་པོ་ཚལ་དུ་བསམ་གཏན་ལ་དགའ་བར་འགྱུར་ཏེ། དེ་དེར་ཉེ་བར་འགྲོ་ན་ཚལ་དེའི་མཐུ་དང་། རྒྱལ་པོའི་དགེ་བའི་ལས་ཀྱིས་གང་ལྷའི་འཇིག་རྟེན་གྱི་ཚལ་གྱི་དགའ་བའི་རྣམ་པ་མེ་ཏོག་དང་། འབྲས་བུ་དང་། བྱ་དང་། པད་མ་དང་། ལྟེང་ཀ་དང་། འབབ་པའི་ཆུ་ངོགས་བདེ་བ་དང་། ལྷའི་བུ་མོ་དག་རོལ་མོ་བྱེད་ཅིང་། དགོད་ལ་མཛེས་པ། རྩེ་བ་དེ་དག་ཐམས་ཅད་ལྷའི་རིས་དེ་ནས་ཚལ་དེར་ཉེ་བར་འོང་སྟེ། རྒྱལ་པོ་དེ་ཡང་ལྷ་བཞིན་དུ་ལྷའི་འདོད་པའི་ཡོན་ཏན་ལྔ་དག་དང་ལྡན་པར་འགྱུར། ཚལ་ཉེ་བའི་རིན་པོ་ཆེ་དེར་བུད་མེད་དང་ལྷན་ཅིག་ཤིན་ཏུ་དགའ་ཞིང་དགའ་མགུར་སྤྱོད་པར་བྱེད་དེ། དགེ་བའི་ལས་ཀྱི་རྣལ་འབྱོར་སྤྱོད་པ་དེ་བཞི་པ་ཚལ་ཉེ་བའི་རིན་པོ་ཆེ་མཐོང་ནས་གནས་སོ། །འཁོར་ལོས་སྒྱུར་བའི་རྒྱལ་པོའི་ཁྱིམ་ཉེ་བའི་རིན་པོ་ཆེ་ཇི་ལྟ་བུ་ཡིན། ཡོན་ཏན་ནི་དུ་ཞིག་དང་ལྡན་ཞེ་ན། འདི་ལྟ་སྟེ། གང་འཁོར་
ལོས་སྒྱུར་བའི་རྒྱལ་པོའི་ཁྱིམ་ཉེ་བའི་རིན་པོ་ཆེའི་ནང་དུ་ཉལ་བར་གྱུར་ན། མཚན་མོ་ཉལ་བ་དེའི་ཚེ་ཟླ་བ་ལྟ་བར་འདོད་ན་འོང་ཞིང་གཟའ་དང་། རྒྱུ་སྐར་དང་། སྐར་མདའ་དག་ཀྱང་དེའི་ཁྱིམ་དེར་ཉེ་བར་འོང་བར་འགྱུར། དེའི་ནོར་བུ་ཡང་མཐོང་ན་དགའ་བར་འགྱུར། ལྷ་མོ་དག་ཀྱང་ལྷའི་རོལ་མོ་བྱེད་པར་འགྱུར། གང་མྱ་ངན་མང་པོ་དང་བྲལ་བའི་མི་དེ་བདེ་བར་གཉིད་ལོག་པར་འགྱུར། གཉིད་ལོག་པ་ན་རྨི་ལམ་དགེ་བ་མཆོག་ཏུ་དགའ་བ་དག་མཐོང་བར་འགྱུར། གྲང་བའི་དུས་སུ་ནི་རླུང་དྲོ་བ་ལྡང་ཞིང་། དྲོ་བའི་དུས་སུ་རླུང་བསིལ་བ་རེག་ན་བདེ་ཞིང་འཇམ་པ་ལྡང་ངོ་། །མཚན་མོ་ཐུན་གསུམ་ལས་ཐུན་གཉིས་ལ་ཉལ་ཞིང་ཐུན་གསུམ་པ་ལས་གཉིད་དང་བྲལ་ནས་ལངས་ཏེ། བདེ་བའི་ཆོས་ལ་གནས་པར་འགྱུར་ཏེ། འདི་ནི་འཁོར་ལོས་སྒྱུར་བའི་རྒྱལ་པོའི་ཁྱིམ་ཉེ་བའི་རིན་པོ་ཆེ་ཡིན་ནོ། །གོས་ཉེ་བའི་རིན་པོ་ཆེའི་རྣམ་པ་དུ་ཡོད་ཡོན་ཏན་ནི་དུ་ཞིག་དང་ལྡན་ཞེ་ན། འདི་ལྟ་སྟེ། ཐགས་བཟང་ཞིང་མཆོག་ཏུ་འཇམ་ལ་དྲི་མས་མ་གོས་པ་ཡིན་ཏེ། གྱོན་ནས་གྲང་བ་དང་། དྲོ་བ་དང་། བཀྲེས་པ་དང་། སྐོམ་པ་དང་། ཉམ་ཆུང་བ་དང་། ངལ་བ་དང་། དུབ་པའི་གནོད་པ་མེད་ལ། མེ་དང་མཚོན་དག་གིས་བསྲེག་པ་དང་། གཅད་པར་མི་ནུས་སོ། །དེ་ནས་གཞན་ཡང་འཁོར་ལོས་སྒྱུར་བའི་རྒྱལ་པོའི་ལྷམ་ཉེ་བའི་རིན་པོ་ཆེ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། ལྷམ་ཉེ་བའི་རིན་པོ་ཆེ་འཁོར་ལོས་སྒྱུར་བའི་རྐང་པ་ལ་གྱོན་ན་ཇི་ལྟར་སྐམ་ས་ལ་རྐང་པ་མི་འབྱིང་བ་དེ་བཞིན་དུ་ཆུ་ལ་ཡང་མི་འབྱིང་བར་འགྱུར་རོ། །གལ་ཏེ་དལ་གྱིས་སྔོན་དུ་འགྲོ་བར་འདོད་ན། དཔག་ཚད་བརྒྱར་ཡང་འགྲོ་བར་འགྱུར་ཞིང་ལུས་ལ་ངལ་བ་མེད་དེ། འདི་དག་ནི་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་། ཉེ་བའི་རིན་པོ་ཆེ་སྣ་བདུན་དག་ལ་སྤྱོད་པ་ཡིན་ཏེ། མིའི་
གནས་བཞི་དང་། ལྷའི་རིགས་གཉིས་ལ་ཉེ་བར་སྤྱོད་པ་ཡིན་ནོ། །དེའི་བུ་དཔའ་ཞིང་རྟུལ་ཕོད་ལ་ཕ་རོལ་གྱི་སྡེ་རབ་ཏུ་འཇོམས་པ་སྟོང་ཐམ་པ་ཡོད་དེ། དེ་དག་འཁོར་ལོས་སྒྱུར་བའི་རྒྱལ་པོ་ལ་ཕྱག་བྱེད་དོ། །གནོད་སེམས་མི་དགེ་བའི་ལས་སྤངས་པ་ནི། དགེ་བ་བཅུའི་ལས་ཀྱི་ལམ་གྱི་རྒྱུ་འཐུན་པ་བདེ་བ་དེ་དག་མྱོང་བར་འགྱུར་རོ། །དེ་ནས་གཞན་ཡང་འཁོར་བ་ཐམས་ཅད་ཀྱི་ས་བོན་དུ་གྱུར་པ། ཐོག་མ་མེད་པའི་དུས་ནས་མུན་པ་མུན་ནག་ཏུ་གྱུར་པ། ཡང་དག་པར་སྦྱོར་བ་ཐམས་ཅད་ཀྱི་བག་ལ་ཉལ་དུ་གྱུར་པ་ལོག་པར་ལྟ་བ་སྤངས་པ་ཇི་ལྟ་བུ་ཡིན། ཡང་དག་པའི་ལྟ་བས་འཁོར་བ་ལས་གྲོལ་བ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། རྣལ་འབྱོར་སྤྱོད་པ་དེས་ཆོས་ལ་ཆོས་ཀྱི་རྗེས་སུ་མཐོང་བ་ནི་འདི་ལ་ལོག་པར་ལྟ་བ་སྤངས་ཤིང་། དེའི་ཡང་དག་པའི་ལྟ་བས་དོན་མེད་པ་ཐམས་ཅད་སྤངས་ལ། ཡང་དག་པའི་སྦྱོར་བའི་བག་ལ་ཉལ་འདོར་བར་འགྱུར། དེ་མྱ་ངན་ལས་འདས་པ་ཉེ་བར་འགྱུར་ཞིང་འཁོར་བ་དང་རིང་བར་འགྱུར། འདི་ལ་ལོག་པར་ལྟ་བ་རྣམ་པ་ལྔ་མཐོང་ནས་དབང་པོ་ལྔ་བསྒྲུབས་པར་འགྱུར་བ་ནི་སྐྱེས་བུ་དམ་པ་དམ་པའི་ཆོས་ལ་མངོན་པར་དགའ་བ་དེ་ཐོག་མ་ནས་འདི་ལྟར་སངས་རྒྱས་ཀྱི་ཡོན་ཏན་དེ་དག་རྣར་ཐོས་ནས་དེའི་ཚེ་འདི་ལྟར་འཁོར་བའི་སྡུག་བསྔལ་རྣམ་པ་སྣ་ཚོགས་ལ་དམིགས་ཤིང་འགྲོ་བ་ལྔ་རྣམས་ལ་འཇིགས་པ་ཆེན་པོ་ལྔ་དམིགས་ཏེ། ལྷ་རྣམས་ལ་བག་མེད་པས་འཆི་བའི་སྡུག་བསྔལ་དང་། མི་རྣམས་ལ་འདོད་པའི་སྡུག་བསྔལ་དང་། སེམས་ཅན་དམྱལ་བ་རྣམས་ལ་གནོད་པའི་སྡུག་བསྔལ་དང་། ཡི་དགས་རྣམས་ལ་བཀྲེས་པ་དང་སྐོམ་པའི་སྡུག་བསྔལ་དང་། དུད་འགྲོ་རྣམས་ལ་གཅིག་ལ་གཅིག་ཟ་བའི་སྡུག་བསྔལ་ཏེ། དེ་ལྟར་རྣམ་པ་ལྔ་པོ་དེ་དག་རྣམ་པ་དུ་མ་ཡོད་ཅིང་སྡུག་བསྔལ་གྱི་ཡན་ལག་དབྱེ་བ་དག་དཔག་ཏུ་མེད་པར་དམིགས་སོ། །དེའི་ཚེ་འདི་ལྟར་ཐོག་མ་ཉིད་དུ་འཁོར་བ་
ཐམས་ཅད་ལས་ངེས་པར་བྱུང་བར་གྱུར་ཅིང་སྣང་བར་གྱུར་ལ་དམ་པའི་ཆོས་ངེས་པར་འབྱེད་པའི་ཆ་ལམ་རབ་ཏུ་འབྱུང་བར་སེམས་བསྐྱེད་དེ། དེའི་སེམས་བསྐྱེད་པ་གཅིག་ལས་དགེ་བའི་ཆོས་ཀྱི་རྒྱུན་ཉིད་སྐྱེའོ། །གང་གིས་དེའི་སེམས་བསྐྱེད་པ་དེ་དང་ཡང་དག་པར་ལྡན་པ་ལ་བར་སྣང་ལ་སྤྱོད་པའི་གནོད་སྦྱིན་རབ་ཏུ་མགུ་ཞིང་ཀུན་ཏུ་དགའ་ལ་རབ་ཏུ་དགའ་སྟེ། སེམས་རངས་པར་གྱུར་ནས་ཡིད་ལ་རིགས་ཀྱི་བུ་འདིའི་མིང་ནི་འདི་ཞེས་བྱ། རིགས་ནི་འདི་ཞེས་བྱ་སྟེ། དེ་ཐོག་མ་མེད་པའི་དུས་ནས་འདོད་ཆགས་ཞེ་སྡང་གཏི་མུག་རྣམས་སྤོང་བར་འདོད་ལ་བདུད་ཀྱི་ཡུལ་གྱི་དངོས་པོ་མི་འདོད་པར་ཞུགས་པ། ཀུན་ནས་ཉོན་མོངས་པའི་ཡུལ་དག་གིས་དགའ་བའི་འདོད་ཆགས་ཀྱི་མོད་ལས་སྐྱེས་པའི་སྲེད་པ་དག་ལ་ཀུན་ཏུ་མི་དགའ་བ་ཡིན་ནོ་སྙམ་མོ། །གཞན་ཡང་ལོག་པར་ལྟ་བ་དང་བྲལ་བའི་རིགས་ཀྱི་བུ་དེ་ནི་དེ་ལྟར་རྟག་ཏུ་རབ་ཏུ་འབྱུང་བའི་སེམས་ཀུན་ཏུ་བསྟན་པར་བྱེད་ཅིང་གོམས་པར་བྱེད་ལ་མང་དུ་བྱེད། དགེ་བའི་བཤེས་གཉེན་ལ་བསྙེན་བཀུར་བྱེད། དམ་པའི་ཆོས་ཉན་པ་ལ་དགའ་བར་འགྱུར། སངས་རྒྱས་ཀྱི་ཆོས་ལ་ཕྱིར་ཞིང་སེམས་གསལ་ལ་ཕྱག་འཚལ་བར་བྱེད། ལུས་དང་ངག་གི་ལས་ཀྱི་མཐའ་ཞི་ཞིང་ཤིན་ཏུ་གསལ་བ་ཡིན་ཏེ། དེ་ལྟར་དེའི་ལུས་དང་ངག་དང་ཡིད་ཞི་བས་ཉིན་མོ་མཉམ་པར་གཞག་པར་བར་སྣང་ལ་སྤྱོད་པའི་གནོད་སྦྱིན་གྱིས་རིག་ནས་ཀུན་ཏུ་དགའ་བར་འགྱུར་ཏེ། རིགས་ཀྱི་བུ་འདི་དགེ་བའི་བཤེས་གཉེན་ལ་སེམས་རབ་ཏུ་དང་ཞིང་ཁྱིམ་གྱི་གནས་གཟེབ་ལྟ་བུར་གྱུར་པ་ལ་སེམས་ཀུན་ཏུ་མི་ཆགས། དེས་བདུད་ཀྱི་ཡུལ་རྣམས་ལ་ཐོག་མ་མེད་པའི་དུས་ནས་ཞུགས་པའི་འདོད་ཆགས་ཞེ་སྡང་གཏི་མུག་དག་གིས་འདོད་པའི་ལྷ་དང་ལྷན་ཅིག་ཏུ་འདུ་ཤེས་དག་ལ་ཆགས་པ་མེད་ཅིང་། བདུད་དང་ལྷན་ཅིག་གཡུལ་འགྱེད་པར་འདོད་ལ་ཉོན་མོངས་པ་སྤོང་བར་འདོད་པ་དེ་བར་སྣང་ལ་སྤྱོད་པའི་གནོད་སྦྱིན་གྱིས་རིག་ནས་ཀུན་ཏུ་དགའ་བར་འགྱུར་རོ། །གཞན་ཡང་རིགས་ཀྱི་བུ་དེ་དེ་ལྟར་འཁོར་བའི་སྡུག་བསྔལ་ལ་དམིགས་ནས་ཆེས་ཤིན་ཏུ་རབ་
ཏུ་འབྱུང་བའི་སེམས་སྐྱེད་པར་བྱེད་དེ། དེ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་དང་། སྦྱར་བའི་ཆང་དང་། བརྫུན་དུ་སྨྲ་བ་སྤངས་ནས་སྡོམ་པ་ལེན་པར་འགྱུར་རོ། །དེ་གང་གི་ཚེ་དགེ་བསྙེན་གྱི་སྡོམ་པ་རྫོགས་པར་སྤྱོད་པར་འགྱུར་བ་དེའི་ཚེ། བར་སྣང་ལ་སྤྱོད་པའི་གནོད་སྦྱིན་ཀུན་ཏུ་དགའ་སྟེ། རིགས་ཀྱི་བུ་ཆེ་གེ་མོ་ཞིག་མིང་ནི་འདི་ཞེས་བྱ། རུས་ནི་འདི་ཞེས་བྱ་བ་གྲོང་ཁྱེར་ཆེ་གེ་མོ་ཞིག་དང་། གྲོང་རྡལ་ག་གེ་མོ་ཞིག་དང་། ཡུལ་ག་གེ་མོ་ཞིག་ཏུ་སྐྲ་དང་ཁ་སྤུ་བྲེགས་ཏེ་ཆོས་གོས་ངུར་སྨྲིག་བགོས་ནས་ཡང་དག་པའི་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། བདུད་ཀྱི་ཕྱོགས་ནི་དམས་པར་བྱེད་ཅིང་། དམ་པའི་ཆོས་ཀྱི་ཕྱོགས་ནི་མཐོ་བར་བྱེད། བདུད་ཀྱི་འཆིང་བ་ནི་རྣམ་པར་གཅོད་པར་བྱེད་ཅིང་ཉོན་མོངས་པ་ཆེན་པོ་འདོད་ཆགས་ཞེ་སྡང་གཏི་མུག་ལས་གྲོལ་བར་བྱེད་དོ་ཞེས་མངོན་པར་སྒྲོགས་སོ། །ལོག་པར་ལྟ་བ་ནི་ཀུན་ཏུ་སྦྱོར་བའི་བག་ལ་ཉལ་ཐམས་ཅད་ཀྱི་གཞི་ཡིན་ལ། ཡང་དག་པར་ལྟ་བ་ནི་མཐའ་མྱ་ངན་ལས་འདས་པའི་གཞི་ཡིན་ཏེ། རྣལ་འབྱོར་སྤྱོད་པ་པས་ཆོས་དེ་རྗེས་སུ་མཐོང་ངོ་། །དེའི་ཚེ་འདི་ལྟར་ཐོག་མ་ཉིད་དུ་ཡང་དག་པའི་ལྟ་བ་ལ་མངོན་པར་སྟོད་པར་བྱེད་དེ། མི་དགོད་མི་སྨོད་སྐྱོན་དུ་མི་འགྲང་ལ་ཕ་རོལ་དག་ལ་སྟོན་པར་བྱེད་ཅིང་རབ་ཏུ་འཇོག་པར་བྱེད་དོ། །ལོག་པར་ལྟ་བ་ལ་སྨོད་དེ། སྟོད་པར་མི་བྱེད་ལ་སྨོད་པར་བྱེད་དོ། །ཡང་དག་པར་ལྟ་བས་ནི་ལོག་པར་ལྟ་བ་ལས་དང་། ཆོས་དང་། རྣམ་པར་སྨིན་པ་ཡང་དག་པར་མངོན་པར་སྟོན་པར་བྱེད་ཅིང་འཇོག་པར་མི་བྱེད་དོ། །འཆིང་བ་རྣམས་ཀྱི་རྩ་བ་ནི་ལོག་པར་ལྟ་བ་ཡིན་ཏེ། བྱིས་པ་སོ་སོའི་སྐྱེ་བོ་རྣམས་ཀྱི་འཆིང་བ་ཡིན་ཞིང་འབྱུང་པོ་རྣམས་དང་། སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཀྱི་ཡུལ་དུ་གནས་པའི་མཐའ་ཡིན་ནོ། །རིགས་ཀྱི་བུས་དེ་སྤངས་ན་དགེ་བ་དུ་མ་དེ་དག་ཐོབ་པར་འགྱུར་རོ། །གཞན་ཡང་རིགས་ཀྱི་བུ་དེ་འདི་ལྟར་ཁྱིམ་གྱི་གནས་ནི་སྡུག་བསྔལ་བ་
ཉམ་ང་བ་འཆིང་བར་གྱུར་པ་དུ་མ་ཡིན་ཏེ། རང་དབང་མེད་པར་རིག་ནས་ཁྱིམ་ནས་འབྱུང་ཞིང་རབ་ཏུ་འབྱུང་བར་འདོད་ལ་བདུད་དང་ལྷན་ཅིག་གཡུལ་འགྱེད་པར་འདོད་པའི་སྐྱེས་བུ་དམ་པ་དེ་ས་བླ་དང་། བར་སྣང་ལ་སྤྱོད་པའི་ལྷ་དག་གིས་རིག་ནས་ཀུན་ཏུ་དགའ་སྟེ། རྒྱལ་པོ་ཆེན་པོ་བཞི་རྣམས་ལ་ཀུན་ཏུ་དགའ་བའི་ཡིད་ཀྱིས་རིགས་ཀྱི་བུ་འདི་ཞེས་བྱ་བ་གྲོང་ཆེ་གེ་མོ་ཞིག་དང་། གྲོང་རྡལ་མང་གེ་མོ་ཞིག་དང་། ཡུལ་ག་གེ་མོ་ཞིག་ཏུ་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་ཡང་དག་པའི་དད་པ་ཉིད་ཀྱིས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ཁྱིམ་ནས་བྱུང་བས་བདུད་ཀྱི་ཕྱོགས་ནི་དམས་པར་བྱེད་ཅིང་དམ་པའི་ཆོས་ཀྱི་ཕྱོགས་ནི་མངོན་པར་མཐོ་བར་བྱེད་དོ་ཞེས་མངོན་པར་བསྙད་དོ། །དེ་ནས་རྒྱལ་པོ་ཆེན་པོ་བཞི་པོ་དེ་དག་གིས་ས་བླ་དང་། བར་སྣང་ལ་སྤྱོད་པའི་ལྷ་དག་དང་། གནོད་སྦྱིན་དེ་དག་ལས་དེ་སྐད་ཐོས་ནས་ཡིད་དགའ་ལ་བར་སྣང་ལ་སྤྱོད་པའི་གནོད་སྦྱིན་དག་རབ་ཏུ་དགའ་བར་འགྱུར་རོ། །དེ་ལྟར་འཛམ་བུའི་གླིང་གི་མི་དམ་པའི་ཆོས་དགེ་བའི་གཏམ་གྱིས་སྤྲོ་བ་སྐྱེས་ནས། རིགས་ཀྱི་བུ་དེ་ཇི་ལྟར་རིགས་པར་འཕགས་པ་དགེ་སྦྱོང་གི་མཁན་པོ་ལ་བསྙེན་བཀུར་བྱེད་དོ། །བསྙེན་བཀུར་བྱས་ནས་ཀྱང་སྐྲ་དང་ཁ་སྤུ་བྲེགས་ཤིང་གོས་ངུར་སྨྲིག་བགོས་ཏེ་སོ་སོར་ཐར་པའི་སྡོམ་པ་ལེན་ཏོ། །སྡོམ་པ་བླངས་པས་ས་བླ་དང་། བར་སྣང་ལ་སྤྱོད་པའི་གནོད་སྦྱིན་རྣམས་ལྷག་པར་ཀུན་ཏུ་དགའ་སྟེ། རྒྱལ་པོ་ཆེན་པོ་བཞི་ལ་འཛམ་བུ་གླིང་ན་རིགས་ཀྱི་བུ་ཆེ་གེ་མོ་ཞིག་ཅེས་བྱ་བ་གྲོང་མང་གེ་མོ་ཞིག་དང་། ཡུལ་ག་གེ་མོ་ཞིག་ཏུ་ལོག་པར་ལྟ་བ་སྤངས་ནས་ཡང་དག་པར་ལྟ་བའི་ལས་དང་། ཆོས་ཡང་དག་པར་བླངས་པ། བུ་དང་ཆུང་མ་ལ་སྲེད་པ་དུག་ལྟ་བུ་དོན་མེད་ཅིང་ཉམ་ང་བ་ཐམས་ཅད་སྤངས་ནས། སྐྲ་དང་ཁ་སྤུ་བྲེགས་གོས་ངུར་སྨྲིག་བགོས་ཤིང་སོ་སོར་ཐར་པ་བླངས་ཏེ། བདུད་དང་ལྷན་ཅིག་གཡུལ་འགྱེད་པར་འདོད་པ། དགའ་བའི་འདོད་ཆགས་ཀྱི་མོད་ལས་སྐྱེས་པ་སྤོང་བར་འདོད་པ་ཡིན་ནོ་ཞེས་མངོན་པར་བསྙད་དོ། །དེ་ནས་
དེའི་ཚེ་རྒྱལ་པོ་ཆེན་པོ་བཞི་ཀུན་ཏུ་དགའ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ལ་འཛམ་བུའི་གླིང་དུ་རིགས་ཆེ་གེ་མོ་ཞིག་ལས་གྲོང་མང་གེ་མོ་ཞིག་དང་། ཡུལ་ག་གེ་མོ་ཞིག་ཏུ་རིགས་ཀྱི་བུ་ཆེ་གེ་མོ་ཞིག་ལོག་པར་ལྟ་བ་སྤངས་ནས། ཡང་དག་པར་ལྟ་བས་སྐྲ་དང་ཁ་སྤུ་བྲེགས། གོས་ངུར་སྨྲིག་བགོས་ནས་དད་པ་ཉིད་ཀྱིས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དགེ་སློང་ག་གེ་མོ་ཞིག་གི་དྲུང་དུ་གནས་སོ་ཞེས་མངོན་པར་སྒྲོགས་སོ། །དེ་ལྷ་རྣམས་ཀྱིས་ཐོས་ནས་བདུད་ཀྱི་ཕྱོགས་དམས་པར་འགྱུར་ཞིང་། དམ་པའི་ཆོས་ཀྱི་ཕྱོགས་ནི་འཕེལ་བར་འགྱུར་རོ་ཞེས་ཡིད་དགའ་བར་འགྱུར་རོ། །དེ་ནས་རྒྱལ་པོ་ཆེན་པོ་བཞི་ལས་རྒྱལ་ཆེན་བཞིའི་ལྷ་རྣམས་ཀྱིས་ཐོས་ནས་ཤིན་ཏུ་ཡིད་དགའ་བར་འགྱུར་རོ། །གཞན་ཡང་རིགས་ཀྱི་བུ་དེ་འདི་ལྟར་ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་ལྟ་ལ་བཟོད་ཅིང་དུལ་ཏེ། སེམས་ཡང་དག་པར་སྡོམ་པ། འདུ་འཛི་ལ་མི་དགའ་ཞིང་ཉེ་བར་ཁྲོ་བ་མེད་པ། རིགས་ནས་རིགས་སུ་ཉེ་བར་སྟེན་ཅིང་སྡིག་པའི་གྲོགས་པོ་དང་འགྲོགས་པར་མི་བྱེད་ལ་ཡུལ་གྱི་རྣམ་པར་རྟོག་པ་ལ་ལྟ་བར་མི་བྱེད། བཟའ་བ་ཞིམ་པོ་མང་དུ་མི་འདོད་ཅིང་ཚོགས་ངན་པ་དང་སྤྱོད་པར་མི་བྱེད། ཡུལ་གྱི་སྤྱོད་པ་ལ་མངོན་པར་དགའ་བར་མི་བྱེད་ཅིང་ནམ་དུ་ཡང་མཛའ་བཤེས་སུ་ལྟ་བའི་ངང་ཚུལ་ཅན་དུ་མི་བྱེད། ཡུལ་ལ་སྤྱོད་པའི་ཚུལ་ཁྲིམས་སུ་མི་བྱེད་ཅིང་དྲན་པ་ཉེ་བར་གཞག་པ་ལ་རྟག་ཏུ་བརྩོན་པར་འགྱུར། ཞི་བའི་ཟས་ཀྱིས་གནས་ཤིང་བདུད་ཀྱི་འཆིང་བ་གཅོད་པ་ལ་རྟག་ཏུ་བརྩོན་པར་འགྱུར། ཡང་དག་པར་ལྟ་བ་ལ་རྟག་ཏུ་བརྩོན་ཞིང་སྐྱེས་བུ་དམ་པ་འཇིག་རྟེན་ཐམས་ཅད་ལ་ཕན་པར་འདོད་པ་ཡིན་ནོ། །འདིར་ཚིགས་སུ་བཅད་པ། འབྱུང་པོ་རྣམས་ལ་གང་མི་འཚེ། །རྟག་ཏུ་བྱམས་སེམས་བཟོད་ལྡན་པ། །འབྱུང་པོ་ཀུན་གྱི་ཕ་ལྟ་བུར། །དེ་ལ་འཇིག་རྟེན་རྗེས་སུ་ལྟ། །མ་བྱིན་ལེན་པ་སྤངས་པ་ནི། །རྟག་ཏུ་ཤེས་ལྡན་དབང་པོ་ཐུལ། །ལུས་ཀྱི་ལས་མཐའ་དགེ་བ་དང་། །སྲིད་པ་དག་ལས་དེ་རྒལ་ལོ། །རི་མོར་
བྲིས་པའི་བུད་མེད་ལ། །མིག་གིས་ལྟ་བར་མི་བྱེད་དེ། །འཇིག་རྟེན་འདོད་པ་དམ་བཅོམ་པ། །དེ་ལྟ་བུ་ནི་གྲོལ་ཞེས་བྱ། །དཔའ་ལ་བོང་བ་གསེར་དུ་འདྲ། །མྱ་ངན་བྲལ་ཞིང་མཉམ་པར་གཞག །ཉོན་མོངས་འདོད་ཆགས་མ་འདྲེས་པ། །དེ་ནི་མཐའ་ཡས་སྒོ་ཐོབ་བོ། །གང་ལ་དོན་དང་དོན་མིན་མཉམ། །དེ་བཞིན་རྙེད་དང་མ་རྙེད་དང་། །བདེ་དང་སྡུག་བསྔལ་སེམས་མཉམ་པ། །དེ་ནི་དགེ་སློང་ཞེས་བྱ་འོ། །མཛའ་བཤེས་མི་བཤེས་གཉི་ག་སྤངས། །སེམས་ནི་མཉམ་ཞིང་དབང་པོ་ཐུལ། །གང་དག་ཡུལ་གྱིས་ཉོན་མི་མོངས། །དེ་ཡང་བྲམ་ཟེར་ཤེས་པར་བྱ། །ཡུལ་ནི་གང་ཟག་དུག་འདྲ་ལ། །སྡང་བ་དཔའ་བོ་ཉོན་མོངས་བྲལ། །རྫོགས་སངས་རྒྱས་ཀྱིས་བཤད་པ་ཡི། །དེ་ཡི་མྱ་ངན་འདས་མི་རིང་། །སྐྱེ་དང་འཇིག་པའི་དེ་ཉིད་ཤེས། །ཡང་དག་ལྟ་ལ་ཆགས་པ་མེད། །གངས་རི་ལྟ་བུར་བློ་མི་གཡོ། །དེ་ནི་འཁོར་བ་ལས་གྲོལ་ལོ། །ཙན་དན་དང་ནི་རལ་གྲིར་མཉམ། །ཟས་ནི་ཞིམ་དང་མི་ཞིམ་མཉམ། །ཟབ་དར་སྣམ་བུ་མཉམ་པ་ནི། །སྲེད་པས་གནོད་པར་མི་འགྱུར་རོ། །རྙེད་དང་བཀུར་སྟི་མི་དགའ་ཞིང་། །རྩྭ་སྟན་ཙམ་གྱིས་ཆོག་ཤེས་ལ། །རྙེད་དང་བཀུར་སྟི་མེ་ལྟ་བུར། །གང་གིས་མཐོང་བ་དེ་མཐོང་ངོ་། །གང་དག་ཡུལ་གྱི་དབང་མི་འགྱུར། །སྲེད་པའི་ཆུ་བོར་མི་འཇུག་ལ། །རང་གི་ལས་འབྲས་དེ་ཉིད་ཤེས། །དེ་ནི་དགེ་སློང་སངས་རྒྱས་གསུངས། །གང་དག་འདས་པའི་དུས་མི་འདོད། །མ་འོངས་པ་ལ་བློ་མི་དགའ། །རྣལ་འབྱོར་པ་ནི་ད་ལྟར་ལ། །མི་དགའ་དེ་ཡི་བློ་གྲོས་མེད། །གང་གི་བློ་གྲོས་ཕྱིར་ལོག་པ། །ཆོས་ལ་རྟག་ཏུ་གནས་པར་འགྱུར། །དཀར་པོ་ཆོས་ལ་མཉམ་གཞག་པ། །དེ་ནི་འཁོར་བར་མི་འཇུག་གོ །གང་གིས་སེམས་ལ་རྙོག་མི་བྱེད། །རིག་པ་མེ་ལྟ་བུ་ཡིན་ནོ། །གང་ལ་ཡུལ་ནི་བྲན་ལྟ་བུ། །དེ་ལ་སྡུག་བསྔལ་མེད་པ་ཡིན། །གང་གིས་དབང་པོ་དབང་བྱེད་ཅིང་། །དབང་པོའི་དབང་དུ་མི་
འགྲོ་ལ། །གང་དག་གཟུགས་སོགས་མི་འཕྲོགས་ཤིང་། །ཉོན་མོངས་མེད་པ་ཐུབ་དང་འདྲ། །གང་གིས་བསམས་པ་དགེ་བ་དག །བཟོད་ལྡན་མཐོང་ན་དགའ་བ་དང་། །སེམས་ནི་རབ་ཏུ་དགའ་བྱེད་པ། །མི་དེ་ཟླ་འདྲ་ཐུབ་པ་ཡིན། །གང་དག་དགོན་པར་མངོན་དགའ་བ། །ཁང་བཟངས་མཆོག་ལ་ཆགས་པ་མེད། །ཐང་གི་ཤིང་ལ་མངོན་དགའ་ཞིང་། །ཟས་སློང་དགེ་སློང་ཞེས་བྱའོ། །དཔའ་བོ་ཞི་དུལ་བློ་བཟང་བ། །བདེ་དང་སྡུག་བསྔལ་དེ་ཉིད་རིག །དེ་ནི་བླ་མེད་གནས་འགྲོ་ཞིང་། །གང་དུ་སོང་བར་ཉོན་མི་མོངས། །སྙིང་བརྩེ་ལྡན་ཞིང་བློ་གྲོས་དྲང་། །རྟག་ཏུ་བསམ་གཏན་ཕ་རོལ་འགྲོ། །ཕལ་པ་རྣམས་དང་མཉམ་མི་འགྲོ། །རྣལ་འབྱོར་དེ་ནི་བདེན་ཚིག་ལྡན། །ལོག་པར་ལྟ་བའི་ཆོས་དེ་དག །སྤངས་པས་དེ་དག་འཐོབ་པར་འགྱུར། །གཞན་ཡང་ལོག་པར་ལྟ་བ་སྤངས་པས་ཡང་དག་པར་ལྟ་བ་སྔོན་དུ་འགྲོ་བའི་ཡིད་རྣམ་པར་རྟོག་པ་སྤངས་པའི་རིམ་གྱིས་ཟག་པ་མེད་པའི་བསམ་གཏན་ལ་མངོན་པར་དགའ་བ་ལ་ས་བླ་དང་བར་སྣང་ལ་སྤྱོད་པའི་ལྷ་དང་། གནོད་སྦྱིན་དང་། རྒྱལ་པོ་ཆེན་པོ་བཞི་རྣམས་ཇི་ལྟར་དགའ་བར་འགྱུར་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། རྒྱལ་པོ་ཆེན་པོ་བཞི་པོ་དེ་དག་གིས་རྒྱལ་པོ་ཆེན་པོ་བཞིའི་ལྷ་དེ་དག་དང་། ལྷ་རྣམས་ཀྱི་དབང་པོ་བརྒྱ་བྱིན་ལ་སྒྲོགས་པར་བྱེད་པ་ནི་ལྷ་འདི་ལྟར་འཛམ་བུའི་གླིང་ན་རིགས་ཆེ་གེ་མོ་ཞིག་ལས། གྲོང་ག་གེ་མོ་ཞིག་དང་། གྲོང་རྡལ་ག་གེ་མོ་ཞིག་ཏུ་རིགས་ཀྱི་བུ་མིང་འདི་ཞེས་བྱ་བ་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་ཚུལ་ཁྲིམས་དང་། ཡང་དག་པར་སྡོམ་པ་སྤྱོད་པ། སྤོབས་པ་རིགས་པ་དང་གྲོལ་བ། དྲན་པ་ཉེ་བར་གཞག་པ། ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་ལྟ་བ། བདུད་
ཀྱི་ཕྱོགས་དམས་པར་བྱེད་ཅིང་། དམ་པའི་ཆོས་ཀྱི་ཕྱོགས་ནི་མངོན་པར་མཐོ་བར་བྱེད་དེ། དེ་བདག་ཅག་གིས་ལྷ་རྣམས་ལ་གསོལ་བ་ལགས་སོ། །དེ་ཐོས་ནས་ལྷ་རྣམས་ཀྱི་དབང་པོ་བརྒྱ་བྱིན་ཤིན་ཏུ་ཡིད་དགའ་བ་དང་། བརྒྱ་བྱིན་གྱི་མདུན་ན་འདོན་དེ་དང་སུམ་ཅུ་རྩ་གསུམ་གྱི་ལྷ་རྣམས་ཀུན་ཏུ་དགའ་བར་འགྱུར་རོ། །དགེ་བ་བཅུའི་ལས་ཀྱི་ལམ་ལེའུར་བཅད་པའོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་གསུམ་པ། དེ་ནས་གཞན་ཡང་ཟག་པ་རིམ་གྱིས་སྤངས་པའི་དགེ་སློང་དག་དང་པོ་མི་དགེ་བའི་ཆོས་སྤོང་ཞིང་། དགེ་བའི་ཆོས་ཇི་ལྟར་སྒོམ་པར་བྱེད་ཅིག་གུ་སྙམ་ནས། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། དགེ་སློང་དེ་ཐོག་མ་ཉིད་དུ་ཡུལ་དང་དབང་པོ་འདི་དག་ཕན་ཚུན་རྒྱུ་རྐྱེན་དུ་གྱུར་པ་དག་གིས་སྐྱེ་བོ་ཀུན་ཐོག་མ་མེད་པའི་དུས་ནས་འཁོར་བར་ཞུགས་ཤིང་ཡོངས་སུ་འཁྱམ་པ་དེ་དག་ཉིད་ཀྱི་སྐྱེ་བའི་རྒྱུར་གྱུར་པ། ཡུལ་གྱི་རྒྱ་མཚོ་ལ་རྣམ་པར་རྟོག་པར་བྱེད་དེ། ནང་དང་ཡུལ་དེ་དག་གིས་སྐྱེ་བོ་འདི་དག་འཁྱམ་མོ་སྙམ་མོ། །དེ་རེ་ཞིག་ཐོག་མ་ཉིད་དུ་དེ་ལྟར་དབེན་པ་ལ་མངོན་པར་དགའ་བ་གོམས་པར་བྱེད་དེ། དགོན་པ་དང་། ཚལ་གྱི་ནང་དང་། ཀུན་དགའི་ར་བ་དང་། སོག་མའི་ཁྲོད་དང་། ཤིང་དྲུང་དང་། དུར་ཁྲོད་དབེན་པ་རྣམས་སུ་སེམས་སྤྲེའུ་ལྟ་བུ་གདུལ་བའི་ཕྱིར་གོམས་པར་བྱེད་དེ། དབེན་པ་ལ་མངོན་པར་དགའ་བའི་སེམས་ཤིན་ཏུ་དང་བར་བྱེད་དོ། །དེ་གྲོང་དག་ཏུ་དགོད་དགོད། སྒེག་སྒེག །རྩེ་རྩེ་བ་དག་ལ་མངོན་པར་མི་དགའ་ཞིང་ཕ་རོལ་གྱི་བུད་མེད་དེ་ལ་ལྟ་བར་མི་བྱེད་ལ། འདུ་འཛི་ལ་མངོན་པར་དགའ་བར་མི་བྱེད་དོ། །ཚངས་པར་སྤྱོད་པ་ལ་ཚོགས་གཉིས་འདྲ་སྟེ། འདུ་འཛི་དང་སྨད་འཚོང་ངོ་། །དེ་ཚོགས་གཉིས་སྤངས་ནས་དང་པོར་དེའི་ཡིད་རྩེ་གཅིག་ལ་དགའ་ཞིང་རབ་ཏུ་དང་བར་བྱེད་དེ། དེ་ཐོག་མ་ཉིད་དུ་ཇི་ལྟར་ན་སེམས་འདི་བསྡུ་བ་
དང་གཟུང་བར་ནུས་སྙམ་དུ་ཡང་དག་པར་རྣམ་པར་རྟོག་པར་བྱེད་དོ། །དེ་ཐོག་མ་ཉིད་དུ་འདི་ལྟར་ཡིད་ཀྱི་དཔྱོད་པ་བཅྭ་བརྒྱད་དག་གིས་དགེ་བ་དང་། མི་དགེ་བ་དང་། ལུང་དུ་མ་བསྟན་པ་ལ་ཡིད་འཇུག་པར་བྱེད་དོ་སྙམ་མོ། །བཅྭ་བརྒྱད་གང་ཞེ་ན། འདི་ལྟ་སྟེ། མིག་གིས་གཟུགས་མངོན་ནས་ཡིད་བདེ་བའི་གནས་སུ་འགྱུར་བ་ནི། ཀུན་ནས་ཉོན་མོངས་པ་མི་དགེ་བའི་རྣམ་པར་སྨིན་པར་འགྱུར་བ་སོ་སོར་མྱོང་བར་བྱེད་ཅིང་། ཡང་དག་པར་རབ་ཏུ་རྟོག་པར་བྱེད་དོ། །ཡིད་མི་བདེ་བའི་གནས་སུ་འགྱུར་བ་ནི། འདོད་ཆགས་དང་བྲལ་བ་ཡིན་ཏེ། དེའི་དགེ་བའི་རྣམ་པར་སྨིན་པ་ཡིན་ནོ། །བཏང་སྙོམས་ཀྱི་གནས་སུ་འགྱུར་བ་ནི། ལུང་དུ་མ་བསྟན་པའི་རྣམ་པར་སྨིན་པ་ཡིན་ནོ། །དེ་ལྟར་རྣ་བས་སྒྲ་ཐོས་ནས་ཡིད་བདེ་བའི་གནས་སུ་འགྱུར་བ་ནི། ཀུན་ནས་ཉོན་མོངས་པ་མི་དགེ་བའི་རྣམ་པར་སྨིན་པ་ཡིན་ནོ། །ཡིད་མི་བདེ་བའི་གནས་སུ་འགྱུར་བ་ནི། རྣམ་པར་བྱང་བ་ལ་དམིགས་པ་དགེ་བའི་རྣམ་པར་སྨིན་པ་ཡིན་ནོ། །བཏང་སྙོམས་ཀྱི་གནས་སུ་འགྱུར་བ་ནི། ལུང་དུ་མ་བསྟན་པའི་རྣམ་པར་སྨིན་པ་ཡིན་ནོ། །དེ་བཞིན་དུ་སྣས་དྲི་བསྣམས་ནས་ཡིད་བདེ་བའི་གནས་སུ་འགྱུར་བ་ནི། ཀུན་ནས་ཉོན་མོངས་པ་མི་དགེ་བའི་རྣམ་པར་སྨིན་པ་ཡིན་ནོ། །ཡིད་མི་བདེ་བའི་གནས་སུ་འགྱུར་བ་ནི། རྣམ་པར་བྱང་བ་དགེ་བའི་རྣམ་པར་སྨིན་པ་ཡིན་ནོ། །བཏང་སྙོམས་ཀྱི་གནས་སུ་འགྱུར་བ་ནི། ལུང་དུ་མ་བསྟན་པའི་རྣམ་པར་སྨིན་པ་ཡིན་ནོ། །དེ་བཞིན་དུ་ལྕེས་རོ་མྱོང་ནས། ཡིད་བདེ་བའི་གནས་སུ་འགྱུར་བ་ནི། ཀུན་ནས་ཉོན་མོངས་པ་མི་དགེ་བའི་རྣམ་པར་སྨིན་པ་ཡིན་
ནོ། །ཡིད་མི་བདེ་བའི་གནས་སུ་འགྱུར་བ་ནི། རྣམ་པར་བྱང་བ་དགེ་བའི་རྣམ་པར་སྨིན་པ་ཡིན་ནོ། །བཏང་སྙོམས་ཀྱི་གནས་སུ་འགྱུར་བ་ནི། ལུང་དུ་མ་བསྟན་པའི་རྣམ་པར་སྨིན་པ་ཡིན་ནོ། །དེ་བཞིན་དུ་ལུས་ཀྱིས་རེག་བྱ་ལ་རེག་ནས་ཡིད་བདེ་བའི་གནས་སུ་འགྱུར་བ་ནི། ཀུན་ནས་ཉོན་མོངས་པ་མི་དགེ་བའི་རྣམ་པར་སྨིན་པ་ཡིན་ནོ། །ཡིད་མི་བདེ་བའི་གནས་སུ་འགྱུར་བ་ནི། རྣམ་པར་བྱང་བ་དགེ་བའི་རྣམ་པར་སྨིན་པ་ཡིན་ནོ། །བཏང་སྙོམས་ཀྱི་གནས་སུ་འགྱུར་བ་ནི། ལུང་དུ་མ་བསྟན་པའི་རྣམ་པར་སྨིན་པ་ཡིན་ནོ། །དེ་བཞིན་དུ་ཡིད་ཀྱིས་ཆོས་ཤེས་ནས། ཡིད་བདེ་བའི་གནས་སུ་འགྱུར་བ་ནི། ཀུན་ནས་ཉོན་མོངས་པ་མི་དགེ་བའི་རྣམ་པར་སྨིན་པ་ཡིན་ནོ། །ཡིད་མི་བདེ་བའི་གནས་སུ་འགྱུར་བ་ནི། རྣམ་པར་བྱང་བ་དགེ་བའི་རྣམ་པར་སྨིན་པ་ཡིན་ནོ། །བཏང་སྙོམས་ཀྱི་གནས་སུ་འགྱུར་བ་ནི། ལུང་དུ་མ་བསྟན་པའི་རྣམ་པར་སྨིན་པ་ཡིན་ཏེ། དེ་ལྟར་ཡིད་ཀྱི་དཔྱོད་པ་བཅྭ་བརྒྱད་ཀྱི་རྣམ་པར་སྨིན་པ་དག་གིས་འཁོར་བ་ན་འཆི་བ་དང་སྐྱེ་བར་འགྱུར་རོ་སྙམ་མོ། །གང་གི་ཚེ་དགེ་སློང་དེ་ཡིད་ཀྱི་དཔྱོད་པ་བཅྭ་བརྒྱད་དག་མཐོང་བ་དེའི་ཚེ་བར་སྣང་ལ་སྤྱོད་པའི་གནོད་སྦྱིན་ཀུན་ཏུ་དགའ་ནས་ས་བླའི་གནོད་སྦྱིན་རྣམས་ལ་མངོན་པར་བསྙད་དོ། །བར་སྣང་ལ་སྤྱོད་པ་དང་། ས་བླའི་གནོད་སྦྱིན་ཡིད་རབ་ཏུ་དགའ་བས་རྒྱལ་པོ་ཆེན་པོ་བཞི་ལ་མངོན་པར་བསྙད་དོ། །རྒྱལ་པོ་ཆེན་པོ་བཞི་པོ་དེ་དག་གིས་རྒྱལ་ཆེན་བཞིའི་ལྷ་རྣམས་ལ་གང་འཛམ་བུའི་གླིང་དུ་གྲོང་ཆེ་གེ་མོ་ཞིག་དང་། གྲོང་རྡལ་མང་གེ་མོ་ཞིག་དང་། ཡུལ་ག་གེ་མོ་ཞིག་ཏུ་རིགས་ཆེ་གེ་མོ་ཞིག་གི་རིགས་ཀྱི་བུ་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་ཡིད་ཀྱི་དཔྱོད་པ་བཅྭ་བརྒྱད་དག་ལ་རབ་ཏུ་རྟོག་པར་བྱེད་ཅིང་མངོན་སུམ་དུ་བྱེད་ལ་དབེན་པ་ལ་མངོན་པར་དགའ་སྟེ། མཐའ་གཅིག་ལ་སྤྱོད་པ་ཡིན་ནོ་ཞེས་མངོན་པར་བསྙད་དོ། །རྒྱལ་པོ་ཆེན་པོ་བཞི་དག་ལས་རྒྱལ་ཆེན་བཞིའི་ལྷ་དག་གིས་དེ་ཐོས་ནས་བདུད་ཀྱི་ཕྱོགས་ནི་དམས་པར་འགྱུར་ལ། དམ་པའི་ཆོས་ཀྱི་ཕྱོགས་ནི་མངོན་པར་མཐོ་བར་འགྱུར་རོ་སྙམ་ནས། ཀུན་ཏུ་དགའ་བར་འགྱུར་རོ། །རྒྱལ་ཆེན་བཞིའི་ལྷ་དེ་དག་གིས་ལྷའི་དབང་པོ་བརྒྱ་བྱིན་ལ། ལྷ་གང་འཛམ་བུའི་གླིང་ན་རིགས་ཆེ་གེ་མོ་ཞིག་ལས་ཞེས་བྱ་བ་ནས། རིགས་ཀྱི་བུ་ཆེ་གེ་མོ་ཞིག་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་
བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་དབེན་པ་ནས་དུར་ཁྲོད་ཀྱི་བར་ལ་དགའ་བ་ཡིད་ཀྱི་དཔྱོད་པ་བཅྭ་བརྒྱད་ལ་རབ་ཏུ་རྟོག་པར་བྱེད་ཅིང་མངོན་སུམ་དུ་བྱས་ནས་ཉེ་བར་བསྒྲུབས་ཏེ་གནས་སོ་ཞེས་མངོན་པར་བསྙད་དོ། །རྒྱལ་ཆེན་བཞིའི་ལྷ་དེ་དག་ལས་ལྷའི་དབང་པོ་ཀོའུ་ཤི་ཀས་དེ་ཐོས་ནས་ཡིད་མཆོག་ཏུ་དགའ་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་དེ་ཡིད་ཀྱི་དཔྱོད་པ་བཅྭ་བརྒྱད་རབ་ཏུ་མཐོང་བ། འདོད་པ་ལས་གཞན་པའི་ས་ཇི་ལྟ་བུ་ཡིད་ལ་བྱེད་ཅིག་གུ་སྙམ་ནས། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན། འཕགས་པའི་བྱིན་གྱི་རླབས་བཞི་མཐོང་སྟེ། འདི་ལྟ་སྟེ། ཤེས་རབ་ཀྱི་བྱིན་གྱི་རླབས་དང་། བདེན་པའི་བྱིན་གྱི་རླབས་དང་། གཏོང་བའི་བྱིན་གྱི་རླབས་དང་། ཉེ་བར་ཞི་བའི་བྱིན་གྱི་རླབས་སོ། །དགེ་སློང་གིས་ཤེས་རབ་ཀྱི་བྱིན་གྱི་རླབས་ཇི་ལྟར་མཐོང་ཞེ་ན། འདི་ལ་དགེ་སློང་ནི་དགེ་སློང་བདག་ཉིད་ཀྱི་ལུས་ཇི་ལྟར་གནས་པ་དེ་ཆོས་ཉིད་ཀྱིས་མཐོང་སྟེ། ལུས་འདི་ལ་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་དེ་དག་རབ་ཏུ་ཤེས་ཤིང་རྣམ་པར་འབྱེད་ལ་སོ་སོར་རྟོག་གོ །དེ་ལ་སའི་ཁམས་གང་ཞེ་ན། སའི་ཁམས་རྣམ་པ་གཉིས་ཏེ། ནང་ན་ཡོད་པ་དང་། ཕྱི་རོལ་ན་ཡོད་པའོ། །དེ་ལ་ནང་ན་ཡོད་པ་གང་ཞེ་ན། ལུས་འདི་ལ་གང་ཆུང་ཟད་ནང་དང་སོ་སོའི་ནང་དུ་བཟུང་བ་དང་ཟིན་པའོ། །དེ་ལ་བཟུང་བ་ནི་པགས་པ་དང་། ཤ་ལ་སོགས་པས་བསྡུས་པའོ། །ཟིན་པ་ནི་སྐྲ་དང་། སྤུ་དང་། སེན་མོ་དང་། སོས་བསྡུས་པའོ། །སྲ་བ་དང་མཁྲང་བའི་རྣམ་པ་ནི་བཟུང་བ་དང་ཟིན་པ་སྟེ། དེ་ཡང་གང་ཞེ་ན། འདི་ལྟ་སྟེ། སྐྲ་དང་། སྤུ་དང་། སེན་མོ་དང་། སོ་དང་། རྔུལ་དང་། རང་གི་ཤ་དང་། རུས་པ་དང་། རྩ་དང་། རྒྱུས་པ་དང་། སྙིང་དང་། མཆིན་པ་
དང་། གློ་བ་དང་། མཁལ་མ་དང་། མཆེར་པ་དང་། མཆིལ་མ་དང་། ཕོ་བ་དང་། ལོང་ཀ་དང་། རྒྱུ་མ་དང་། གཉེ་མ་དང། ལྟོ་དང་། ལྟོ་བ་དང་། གླད་པ་དང་། གླད་རྒྱས་རྣམས་སོ། །གང་གཞན་ཡང་ལུས་འདི་ལ་ནང་དང་། སོ་སོའི་ནང་དུ་སྲ་བ་དང་། མཁྲང་བའི་རྣམ་པ་བཟུང་བ་དང་། ཟིན་པ་འདི་ནི་ནང་གི་སའི་ཁམས་ཞེས་བྱའོ། །དེ་ལ་ཕྱི་རོལ་གྱི་སའི་ཁམས་གང་ཞེ་ན། ཕྱི་རོལ་ལ་གང་ཆུང་ཟད་སྲ་བ་དང་མཁྲང་བའི་རྣམ་པ་མ་བཟུང་བ། མ་ཟིན་པ་འདི་ནི་ཕྱི་རོལ་གྱི་སའི་ཁམས་ཞེས་བྱའོ། །དེ་ལ་གང་སའི་ཁམས་དེ་གཅིག་ཏུ་བསྡུས་པའི་ཁམས་འདི་ནི་ཁམས་ཙམ་སྟེ། ཚོར་བས་གནས་སུ་མ་བྱས་ཤིང་། འདོད་རྒྱལ་གྱིས་མ་བྱས་པའི་སའི་ཁམས་རྟག་པར་མ་ཡིན། བདེ་བར་མ་ཡིན། གཙང་བར་མ་ཡིན་པར་མཐོང་ཞིང་། དེ་བདག་ཏུ་མི་ལྟ་བའི་ཤེས་རབ་ཀྱི་བྱིན་གྱིས་བརླབས་ལ་ལྷག་པར་མོས་པའི་དགེ་སློང་དེ་ནི་འདི་དག་ཐམས་ཅད་བདག་གི་མ་ཡིན་དེ་དག་བདག་མ་ཡིན། དེ་དག་བདག་དང་བདག་གི་མ་ཡིན་ནོ་སྙམ་མོ། །འདི་དག་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་མཐོང་ནས། སའི་ཁམས་ལ་སེམས་འདི་འདོད་ཆགས་དང་བྲལ་བར་འགྱུར་ཏེ། དེ་ལྟར་དགེ་སློང་ཤེས་རབ་ཀྱི་བྱིན་གྱིས་བརླབས་ལ་ལྷག་པར་མོས་པར་འགྱུར་རོ། །དེ་ལ་ཆུའི་ཁམས་གང་ཞེ་ན། ཆུའི་ཁམས་ཀྱང་རྣམ་པ་གཉིས་ཏེ། ནང་ན་ཡོད་པ་དང་། ཕྱི་རོལ་ན་ཡོད་པའོ། །དེ་ལ་ནང་ན་ཡོད་པ་ནི་ལུས་འདི་ལ་གང་ཆུང་ཟད་ཆུ་དང་ཆུའི་རྣམ་པ་འབྱུང་བའི་མཚན་ཉིད་ཡིན་ཏེ། ཆུའི་ཁམས་ནི་ལུས་ལ་གཤེར་བའི་བདག་ཉིད་དུ་ཡོད་པ་རྡུལ་དང་། མཆིལ་མ་དང་། སྣབས་དང་། གླད་པའི་པྲི་དང་། ཁྲག་དང་། ཞག་དང་། ཆུ་སེར་དང་། ཚིལ་དང་། རྐང་དང་། མཁྲིས་པ་དང་། གཅིན་དང་། གླད་རྒྱས་རྣམས་སོ། །གང་གཞན་ཡང་ལུས་འདི་ལ་ནང་སོ་སོའི་ནང་དུ་ཆུ་དང་ཆུའི་རྣམ་པ་བཟུང་བ་དང་ཟིན་པ་གང་ཆུང་ཟད་ཡོད་པ་འདི་ནི་ནང་གི་ཆུའི་ཁམས་ཞེས་བྱའོ། །ཕྱི་རོལ་གྱི་གང་ཞེ་ན། གང་ཆུང་ཟད་
ཕྱི་རོལ་གྱི་ཆུ་དང་ཆུའི་རྣམ་པར་གཤེར་བ་དང་། གཤེར་བའི་རྣམ་པ་སྟེ། མ་བཟུང་མ་ཟིན་པ་འདི་ནི་ཕྱི་རོལ་གྱི་ཆུའི་ཁམས་ཞེས་བྱའོ། །དེ་ལ་གང་ནང་གི་ཆུའི་ཁམས་དང་། གང་ཕྱི་རོལ་གྱི་ཆུའི་ཁམས་དེ་དག་གཅིག་ཏུ་བསྡུས་པའི་ཁམས་འདི་ནི་ཁམས་ཙམ་སྟེ། འདི་དག་ཐམས་ཅད་བདག་གི་མ་ཡིན། དེ་དག་བདག་མ་ཡིན། དེ་དག་བདག་དང་བདག་གི་མ་ཡིན་པ་ཆུའི་ཁམས་ཡང་དག་པར་མཐོང་ནས་ཆུའི་ཁམས་ལ་སེམས་འདོད་ཆགས་དང་བྲལ་བར་འགྱུར་ཏེ། དེ་ལྟར་དགེ་སློང་ཤེས་རབ་ཀྱི་བྱིན་གྱིས་བརླབས་ལ་འཇུག་པ་ཡིན་ནོ། །དེ་ལ་མེའི་ཁམས་གང་ཞེ་ན། མེའི་ཁམས་ཀྱང་རྣམ་པ་གཉིས་ཏེ། ནང་ན་ཡོད་པ་དང་། ཕྱི་རོལ་ན་ཡོད་པའོ། །དེ་ལ་ནང་གི་མེའི་ཁམས་ནི་ལུས་འདི་ལ་གང་ཆུང་ཟད་ནང་དང་། སོ་སོའི་ནང་གི་མེ་དང་། མེའི་རྣམ་པ་བཟུང་བ་དང་ཟིན་པའོ། །དེ་དག་གང་ཞེ་ན། འདི་ལྟ་སྟེ། གང་གིས་གདུང་བར་བྱེད་པ་དང་། གང་གིས་ཡོངས་སུ་སྲེག་པར་བྱེད་པ་དང་། གང་གིས་འབར་བར་བྱེད་པ་དང་། གང་གིས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ལེགས་པར་བདེ་བར་འཇུ་བར་འགྱུར་བ་དང་། གང་གཞན་ཡང་ལུས་འདི་ལ་ནང་གི་དང་། སོ་སོའི་ནང་གི་མེ་དང་མེའི་རྣམ་པ་བཟུང་བ་དང་ཟིན་པ་འདི་ནི་ནང་གི་མེའི་ཁམས་ཞེས་བྱའོ། །དེ་ལ་ཕྱི་རོལ་གྱི་མེའི་ཁམས་གང་ཞེ་ན། ཕྱི་རོལ་གྱི་གང་ཆུང་ཟད་མེ་དང་། མེའི་རྣམ་པ་དང་། དྲོ་བ་དང་དྲོ་བའི་རྣམ་པ་སྟེ། མ་བཟུང་མ་ཟིན་པ་འདི་ནི་ཕྱི་རོལ་གྱི་མེའི་ཁམས་ཞེས་བྱའོ། །དེ་ལ་གང་ནང་གི་མེའི་ཁམས་དང་། གང་ཕྱི་རོལ་གྱི་མེའི་ཁམས་དེ་དག་གཅིག་ཏུ་བསྡུས་པའི་ཁམས་འདི་ནི་ཁམས་ཙམ་སྟེ། དེ་དག་ཐམས་ཅད་བདག་གི་མ་ཡིན། དེ་དག་བདག་མ་ཡིན། དེ་དག་བདག་དང་བདག་གི་མ་ཡིན། འདི་ལྟར་དེ་དག་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་མཐོང་ནས་མེའི་ཁམས་ལ་སེམས་འདོད་ཆགས་དང་བྲལ་བར་འགྱུར་རོ། །དེ་བྱེད་པ་པོས་གནས་སུ་མ་བྱས་ཀྱང་མེའི་ཁམས་
རབ་ཏུ་འཇུག་གོ །དེ་ལ་རླུང་གི་ཁམས་གང་ཞེ་ན། རླུང་གི་ཁམས་ཀྱང་རྣམ་པ་གཉིས་ཏེ། ནང་ན་ཡོད་པ་དང་། ཕྱི་རོལ་ན་ཡོད་པའོ། །དེ་ལ་ནང་གི་གང་ཞེ་ན། ལུས་འདི་ལ་གང་ཆུང་ཟད་ནང་དང་། སོ་སོའི་ནང་གི་རླུང་དང་། རླུང་གི་རྣམ་པ་ཡང་བ་དང་། ཡང་ཞིང་གཡོ་བ་བཟུང་བ་དང་། ཟིན་པ་སྟེ། དེ་དག་ཀྱང་གང་ཞེ་ན། སྟེང་དུ་འགྲོ་བའི་རླུང་དང་། འོག་ཏུ་འགྲོ་བའི་རླུང་དང་། ངོས་སུ་འགྲོ་བའི་རླུང་དང་། ལྟོར་འགྲོ་བའི་རླུང་དང་། དེ་བཞིན་དུ་རལ་གྲི་དང་། ཁབ་དང་། མཚོན་ཆ་ལྟ་བུའི་རླུང་དང་། རླུང་སྐྲན་དང་། སྲིན་བུ་དང་། ལྷན་ཅིག་རྒྱུ་བའི་རླུང་བརྒྱད་ཅུ་དག་ཡོད་དོ། །རླུང་བརྒྱད་ཅུ་དག་ཡན་ལག་དང་ཉིང་ལག་དག་གི་རྗེས་སུ་འཇུག་གོ །གང་ལུས་འདི་ལ་གཞན་ཡང་ནང་དང་སོ་སོའི་ནང་གི་རླུང་དང་། རླུང་གི་རྣམ་པ་ཡང་ཞིང་གཡོ་བ་བཟུང་བ་དང་ཟིན་པ་འདི་ནི་ནང་གི་རླུང་གི་ཁམས་ཞེས་བྱའོ། །དེ་ལ་ཕྱི་རོལ་གྱི་རླུང་གི་ཁམས་གང་ཞེ་ན། ཕྱི་རོལ་གྱི་གང་ཆུང་ཟད་རླུང་དང་། རླུང་གི་རྣམ་པ་ཡང་ཞིང་གཡོ་བ་མ་བཟུང་མ་ཟིན་པ་འདི་ནི་ཕྱི་རོལ་གྱི་རླུང་གི་ཁམས་ཞེས་བྱའོ། །དེ་ལ་ནང་གི་རླུང་གི་ཁམས་དང་གང་ཕྱི་རོལ་གྱི་དེ་དག་ཐམས་ཅད་མངོན་པར་བསྡུས་པའི་ཁམས་འདི་ནི་ཁམས་ཙམ་སྟེ། དེ་དག་བདག་གི་མ་ཡིན། དེ་དག་བདག་མ་ཡིན། དེ་དག་བདག་དང་བདག་གི་མ་ཡིན་ལ་བྱེད་པ་པོས་གནས་སུ་མ་བྱས་ཤིང་ཚོར་བ་པོས་གནས་སུ་མ་བྱས་ཏེ། དེ་ལྟར་འདི་དག་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་མཐོང་ནས་རླུང་གི་ཁམས་དེ་ལ་སེམས་འདོད་ཆགས་དང་བྲལ་བར་བྱེད་དེ། འདི་ནི་ཤེས་རབ་ཀྱི་བྱིན་གྱི་རླབས་མངོན་སུམ་དུ་བྱེད་པའི་དགེ་སློང་ཡིན་ནོ། །དེ་ལ་ནམ་མཁའི་ཁམས་གང་ཞེ་ན། ནམ་མཁའི་ཁམས་ཀྱང་རྣམ་པ་གཉིས་ཏེ། ནང་ན་ཡོད་པ་དང་། ཕྱི་རོལ་ན་ཡོད་པའོ། །དེ་ལ་ནང་གི་ལུས་འདི་ལ་གང་ཆུང་ཟད་ནང་དང་། སོ་སོའི་ནང་གི་ནམ་མཁའ་དང་། ནམ་མཁའི་རྣམ་པ་བཟུང་བ་དང་ཟིན་པ་མི་གསལ་ཞིང་གཟུགས་ཀྱི་རྣམ་
པས་ཁྱབ་པར་བྱ་བ་དང་། ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ནང་དུ་འཇུག་པར་སྐབས་འབྱེད་པ་དང་། མིད་པའི་སྦུབས་དང་། མིག་ཕུགས་དང་། སྣའི་བུ་ག་དང་། ལྕེའི་བུ་ག་དང་། ཟས་ནང་དུ་འགྲོ་བ་ལྕེས་སྐབས་འབྱེད་པར་བྱེད་པ་འདི་ནི་ནང་གི་ནམ་མཁའི་ཁམས་ཞེས་བྱའོ། །དེ་ལ་ཕྱི་རོལ་གྱི་ནམ་མཁའི་ཁམས་གང་ཞེ་ན། གང་ཆུང་ཟད་མ་བཟུང་བ་མ་ཟིན་པ་མི་གསལ་ཞིང་ཁྱབ་པར་བྱེད་པ་མ་ཡིན་པ་སྟེ། འདི་ལྟ་སྟེ། ཤིང་ལོའི་བར་གྱི་གསེབ་དང་། རི་ཕུག་གི་བུ་ག་དང་། རི་ཕུག་གི་བུ་གའི་གསེབ་དང་། ཆུ་བོའི་གསེབ་དང་། གང་ཕྱི་རོལ་གྱི་བུ་ག་ཡོད་པ་འདི་ནི་ཕྱི་རོལ་གྱི་ནམ་མཁའི་ཁམས་ཞེས་བྱའོ། །དེ་ལ་གང་ནང་གི་གཟུགས་ཀྱི་རྣམ་པའི་ནམ་མཁའི་ཁམས་དང་། གང་ཕྱི་རོལ་གྱི་དེ་དག་གཅིག་ཏུ་བསྡུས་པའི་ཁམས་འདི་ནི་ཁམས་ཙམ་སྟེ། དེ་དག་ཐམས་ཅད་བདག་གི་མ་ཡིན། དེ་དག་བདག་མ་ཡིན། དེ་དག་བདག་དང་བདག་གི་མ་ཡིན་ཏེ། འདི་ལྟར་དེ་དག་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་མཐོང་ནས་ནམ་མཁའི་ཁམས་ལ་སེམས་འདོད་ཆགས་དང་བྲལ་ཞིང་དེ་དག་མཐོང་ནས་འཇུག་པར་མི་འགྱུར་རོ། །དེ་དག་ཐམས་ཅད་བདག་གི་མ་ཡིན། དེ་དག་བདག་མ་ཡིན། དེ་དག་བདག་དང་བདག་གི་མ་ཡིན་ཏེ། བྱེད་པ་པོས་གནས་སུ་མ་བྱས་ཤིང་། ཚོར་བ་པོས་གནས་སུ་མ་བྱས་པའི་ནམ་མཁའི་ཁམས་ལ་སེམས་འདོད་ཆགས་དང་བྲལ་བར་འགྱུར་རོ། །དེ་ལ་ཡིད་ཀྱི་ཁམས་གང་ཞེ་ན། སྐྱེ་མཆེད་བཅུ་གཉིས་དང་། ཡང་དག་པར་ལྡན་པ་ནི་ཡིད་ཀྱི་ཁམས་ཏེ། མིག་གི་རྣམ་པར་ཤེས་པས་དོན་མཐོང་བ་ཡིད་ཀྱི་རྣམ་པར་ཤེས་པས་རྗེས་སུ་མྱོང་སྟེ། དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པ་དག་ནི་ཡིད་ཀྱི་རྣམ་པར་ཤེས་པའི་ཁམས་རབ་ཏུ་འབྱུང་བའི་རྩ་བ་ཡིན་ནོ། །འདིར་ཚིགས་སུ་བཅད་པ། ཡིད་ནི་སྔོན་དུ་འགྲོ་བའི་ཆོས། །ཡིད་མགྱོགས་ཡིད་ནི་
འགྲོ་བ་ཡིན། །ཡིད་ནི་ཤིན་ཏུ་གསལ་བ་ཡིས། །སྨྲ་བ་དང་ནི་འབྱེད་པར་འགྱུར། །སྡིག་པའི་མཚན་ཉིད་བསལ་བ་ཡིས། །འཆི་དང་སྐྱེ་བ་རྣམ་ཤེས་ཤིང་། །ལས་འབྲས་དེ་ཉིད་ཤེས་པ་ནི། །འཆི་བ་མེད་པའི་གནས་འཐོབ་བོ། །གང་དག་དབང་པོ་ཀུན་འཛིན་པ། །འབྱུང་པོ་ཀུན་ལ་ཕན་པར་དགའ། །དབང་པོ་བདེ་ཞིང་ཞི་ལ་དུལ། །དེ་ལྟ་བུ་ནི་དགེ་སློང་ཡིན། །ཇི་ལྟར་དབང་པོ་དྲུག་ལ་གནས། །འདོད་ཆགས་དགྲ་ནི་ཟློག་པར་བྱེད། །དཔའ་བོ་ཤེས་རབ་བྱེད་ལྡན་གང་། །དེ་ནི་ཞི་བའི་གནས་འཐོབ་བོ། །དགོན་པར་གནས་ལ་དགའ་བྱེད་ཅིང་། །མཉམ་གཞག་ས་ལ་གནས་པ་ནི། །མཁའ་སྤྲིན་རླུང་གིས་གཏོར་བ་ལྟར། །སྡིག་པའི་ཆོས་རྣམས་འཇིག་པར་བྱེད། །ལུས་ངག་ལས་ཀྱི་མཐའ་དགེ་ཞིང་། །སྤྱོད་པ་དགེ་ལ་ཡང་དག་དགའ། །དེ་ཉིད་ལྟ་ཞིང་བྱ་བ་མཁས། །བདུད་ཀྱིས་བསྒྲུབས་པ་འཇིག་པར་བྱེད། །འདོད་ཆགས་ལ་སོགས་མི་གནོད་ཅིང་། །དགེ་བའི་སེམས་ལ་བརྐམ་ཆགས་མེད། །བྱམས་དང་སྙིང་རྗེ་མང་བ་ནི། །དགེ་སློང་ངེས་པར་འབྱུང་ལ་གནས། །གང་དག་ཡུལ་གྱི་འཆིང་བའི་རྒྱུ། །གཟུགས་ལ་སོགས་པ་མི་འདོད་པ། །དེ་ནི་ཞི་བ་མཆོག་འགྲོ་ཞིང་། །གང་དུ་སོང་བར་ཉོན་མི་མོངས། །དེ་ནས་གཞན་ཡང་ཅི་དགེ་སློང་འདི་དང་ཡིད་ཀྱི་དཔྱོད་པ་བཅྭ་བརྒྱད་ཀྱི་དང་པོའི་ས་ལས་ས་གཞན་ གཉིས་པ་ལ་འདུག་པ་ནི། ཁམས་དྲུག་གི་དེ་ཉིད་ཤེས་པའི་ས་ལ་ཅི་ད་ལྟར་ཆོས་རྗེས་སུ་དྲན་པའི་ས་ལ་འཇུག་གམ་སྙམ་ནས། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། ས་གཞན་གསུམ་པ་ལ་འཇུག་གོ །དགེ་སློང་དེ་ཉིད་མཐོང་བ་དེའི་ས་གཞན་གང་ཞེ་ན། སེམས་ཕན་ཚུན་དུ་འགྱུར་བ་ནི་ས་གཞན་ཡིན་ཏེ། དེ་བདེ་བ་སྐྱེས་པ་རྣམ་པར་ཤེས་ཤིང་སྡུག་བསྔལ་སྐྱེས་པ་རྣམ་པར་ཤེས། ཡིད་བདེ་བ་
རྣམ་པར་ཤེས་ཤིང་ཡིད་མི་བདེ་བ་རྣམ་པར་ཤེས། བཏང་སྙོམས་རྣམ་པར་ཤེས་ཤིང་བདེ་བ་ཆུང་ཟད་རྣམ་པར་ཤེས་ཏེ། བདེ་བ་མྱོང་བར་འགྱུར་བའི་རེག་པ་ལ་བརྟེན་ནས་བདེ་བའི་ཚོར་བ་སྐྱེའོ། །དེ་བདེ་བའི་ཚོར་བ་འདི་མྱོང་བ་ན་བདེ་བའི་ཚོར་བ་མྱོང་ངོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནས་དེ་བདེ་བ་མྱོང་བའི་རེག་པ་གང་འགགས་ན། དེ་བདེ་བ་མྱོང་བའི་རེག་པ་ལ་བརྟེན་ནས་ཚོར་བ་སྐྱེས་པ་མྱོང་བ་ན། བདག་གི་བདེ་བའི་ཚོར་བ་ནུབ་བོ་ཞེས་ཚོར་བ་ནུབ་པ་སོ་སོར་མངོན་པར་ཤེས་སོ། །བདག་གི་བདེ་བའི་ཚོར་བ་ཉེ་བར་ཞི་ཞིང་སྡུག་བསྔལ་གྱི་ཚོར་བ་སྐྱེ་སྟེ། བརྟེན་ནས་འབྱུང་བའི་སྡུག་བསྔལ་གྱི་ཚོར་བ་སོ་སོར་མངོན་པར་ཤེས་སོ། །བདག་གི་བདེ་བའི་ཚོར་བ་སྐྱེས་ཏེ། དེ་དག་སོ་སོར་མངོན་པར་ཤེས་སོ། །ཇི་ལྟར་བདེ་བ་མྱོང་བར་འགྱུར་བའི་རེག་པ་བཤད་པ་དེ་ལྟར་སྡུག་བསྔལ་མྱོང་བར་འགྱུར་བ་ཡང་རྒྱ་ཆེར་ཡང་དག་པར་བརྗོད་པར་བྱའོ། །ཡིད་བདེ་བ་རྣམ་པར་ཤེས་པ་ཇི་ལྟ་བུ་ཡིན་ཞེ་ན། ཡིད་བདེ་བའི་གཞིར་འགྱུར་བའི་རེག་པ་ལ་བརྟེན་ནས་ཡིད་བདེ་བ་སྐྱེས་པའོ། །ཡིད་མི་བདེ་བ་སོ་སོར་མངོན་པར་ཤེས་པ་ཇི་ལྟ་བུ་ཡིན་ཞེ་ན། ཡིད་མི་བདེ་བའི་གཞིར་འགྱུར་བའི་རེག་པ་ལ་བརྟེན་ནས་ཡིད་མི་བདེ་བ་སྐྱེས་པའོ། །དེ་ནས་འདི་ལྟར་དེའི་ཡིད་བདེ་བའི་གཞིར་འགྱུར་བའི་ཚོར་བ་ཇི་ལྟ་བ་བཞིན་རྗེས་སུ་རྟོག་སྟེ། ཡིད་བདེ་བའི་གཞིར་འགྱུར་བ་འགོག་པ་མཐོང་ནས་ཡིད་བདེ་བ་ལས་འདོད་ཆགས་དང་བྲལ་བར་འགྱུར་རོ། །གང་བདག་གི་ཡིད་བདེ་བའི་ཚོར་བ་སྔོན་སྐྱེས་པ་དེ་ཟད་ཅིང་ཞི་ལ་རྣམ་པར་བྲལ་བ་དེ་ལས་དེའི་འདོད་ཆགས་དང་བྲལ་བ་སྐྱེ་སྟེ། ཡང་དག་པ་ཇི་ལྟ་བ་བཞིན་སོ་སོར་མྱོང་བར་བྱེད་དོ། །དེ་བཞིན་དུ་ཡིད་མི་བདེ་བ་ལ་ཡང་བརྗོད་པར་བྱ་ཞིང་བཏང་སྙོམས་ལ་ཡང་དེ་བཞིན་དུ་བརྗོད་པར་བྱའོ། །དེའི་ས་གཞན་གསུམ་པ་འདི་ལ་འཇུག་པ་ལ་ས་བླའི་གནོད་སྦྱིན་ཤིན་ཏུ་དགའ་ནས། བར་སྣང་ལ་སྤྱོད་པའི་གནོད་སྦྱིན་རྣམས་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་པོ་ཆེན་པོ་
བཞི་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་ཆེན་བཞིའི་ལྷ་རྣམས་ལ་མངོན་པར་བསྙད་དོ། །དེ་དག་གིས་ཀྱང་ལྷ་རྣམས་ཀྱི་དབང་པོ་བརྒྱ་བྱིན་ཀཽ་ཤི་ཀ་ལ། གང་འཛམ་བུའི་གླིང་ན་རིགས་ཀྱི་བུ་དེ་སྐྲ་དང་ཁ་སྤུ་བྲེགས་ཏེ། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ། ཡུལ་ཆེ་གེ་མོ་ཞིག་དང་། གྲོང་ཁྱེར་མང་གེ་མོ་ཞིག་ཏུ་རིགས་ཆེ་གེ་མོ་ཞིག་ལས་རིགས་ཀྱི་བུ་མིང་ཆེ་གེ་མོ་ཞིག་ཅེས་བྱ་བ་སྐྲ་དང་ཁ་སྤུ་བྲེགས་ཏེ། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ཞིང་། དེ་ས་གཞན་གསུམ་པ་ལ་ཞུགས་ཏེ། བདུད་དང་ལྷན་ཅིག་གཡུལ་འགྱེད་པར་འདོད་པས་བདུད་ཀྱི་ཕྱོགས་ནི་དམས་པར་བྱེད་ལ། དམ་པའི་ཆོས་ཀྱི་ཕྱོགས་ནི་མངོན་པར་མཐོ་བར་བྱེད་དོ་ཞེས་མངོན་པར་བསྙད་དོ། །ལྷ་རྣམས་ཀྱི་དབང་པོ་བརྒྱ་བྱིན་ཀཽ་ཤི་ཀས། དེ་ཐོས་ནས་མཆོག་ཏུ་དགའ་ཞིང་། གླང་པོ་ཆེ་ས་སྲུང་གི་བུ་ལ་ཞོན་ཏེ། རྫུ་འཕྲུལ་ཆེ་བའི་ལྷའི་ཚོགས་ལ་སོགས་པས་བསྐོར་ནས། འཐབ་བྲལ་གྱི་ལྷ་རྣམས་ལ་འཛམ་བུའི་གླིང་ན་རིགས་ཀྱི་བུ་ཞེས་བྱ་བ་ནས་རྒྱ་ཆེར་སྦྱར་ཏེ། ས་གཞན་གསུམ་པ་ལ་ཞུགས་པའི་བར་དང་། བདུད་དང་ལྷན་ཅིག་གཡུལ་འགྱེད་པར་འདོད་པ། བདུད་ཀྱི་ཕྱོགས་དམའ་བར་བྱེད་ཅིང་། དམ་པའི་ཆོས་ཀྱི་ཕྱོགས་མངོན་པར་མཐོ་བར་བྱེད་དོ་ཞེས་བསྙད་དོ། །ལྷའི་དབང་པོ་བརྒྱ་བྱིན་ལས་དེ་ཐོས་ནས། འཐབ་བྲལ་གྱི་ལྷ་རྣམས་ཤིན་ཏུ་ཡིད་དགའ་བར་འགྱུར་རོ། །དེ་ནས་གཞན་ཡང་དགེ་སློང་དེ་ས་གཞན་གསུམ་པ་ལས་ས་གཞན་བཞི་པ་ལ་ཇི་ལྟར་འཇུག་ཅིག་གུ་སྙམ་ནས། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། དེ་ས་གཞན་བཞི་པ་ལ་འཇུག་པ་ནི་རེག་པའི་རྐྱེན་གྱིས་བདེ་བ་མྱོང་བར་འགྱུར་བ་བདེ་བའི་རྒྱུ་དང་། བདེ་བའི་གཞི་དང་། བདེ་བའི་རྐྱེན་གྱིས་བདག་གི་ཚོར་བ་སྐྱེས་སོ། །དེ་འགགས་ཤིང་རྣམ་པར་ཞི་ལ་ནང་དུ་ནུབ་པ་དེ་མ་ཐག་ཏུ་སྡུག་བསྔལ་གྱི་རེག་པ་དང་། སྡུག་བསྔལ་གྱི་
གཞི་དང་། སྡུག་བསྔལ་ཀུན་འབྱུང་བ་དང་། སྡུག་བསྔལ་ཉིད་ཀྱིས་བདག་གི་སྡུག་བསྔལ་གྱི་ཚོར་བ་སྐྱེས་སོ། །དེ་བཞིན་དུ་བཏང་སྙོམས་ཀྱི་རྐྱེན་དང་། རེག་པའི་རྐྱེན་གྱིས་ཚོར་བ་སོ་སོར་མངོན་པར་ཤེས་སོ། །སྐད་ཅིག་སྐད་ཅིག་ལ་བདག་གི་རེག་པའི་ཚོར་བའི་གྲོགས་དང་རེག་པ་འབྱུང་བ་སྐྱེ་སྟེ། དེ་བདེ་བའི་ཚོར་བ་ལ་མི་དགའ་ཞིང་ཆགས་པར་མི་བྱེད་ལ་ཚོར་བ་དེ་ལ་མངོན་པར་མི་དགའ་ཞིང་མང་དུ་མི་བྱེད་དེ་རོ་མྱོང་བར་མི་བྱེད་དོ། །དེ་བཞིན་དུ་སྡུག་བསྔལ་གྱི་ཚོར་བས་ཀྱང་གནོད་པར་མི་བྱེད་ཅིང་རྣམ་པར་འཚེ་བར་མི་བྱེད་ལ་རྙོག་པ་ཅན་དུ་མི་བྱེད་དོ། །དེ་བཏང་སྙོམས་ལ་གནས་ཏེ། དྲན་པ་དང་ཤེས་བཞིན་དང་ལྡན་པ་ཡིན་ན་ནི། ཚོར་བ་གསུམ་པོ་འདི་དག་གིས་གལ་ཏེ་ན་གཏན་དུ་སེམས་འདོད་ཆགས་དང་བྲལ་བར་འགྱུར། ཡང་ན་བཏང་སྙོམས་ཁྱད་པར་ཅན་གཞན་དུ་འགྱུར་ཏེ། ཡོངས་སུ་དག་པ་དང་རྣམ་པར་བྱང་བར་འགྱུར་རོ། །དེ་འདི་སྙམ་དུ་སེམས་ཏེ། ཀྱེ་ཨེ་མ་བདག་གིས་ནམ་མཁའ་མཐའ་ཡས་སྐྱེ་མཆེད་ཀྱི་བཏང་སྙོམས་འདི་ལྟར་ཡོངས་སུ་དག་པ། འདི་ལྟར་རྣམ་པར་བྱང་བ་འདི་རྫོགས་པར་བྱ་ཞིང་བདག་གི་སེམས་དང་འཐུན་པར་བྱ་སྟེ། བདག་གི་བཏང་སྙོམས་ཀྱི་མཐར་གཏུགས་པ་དང་འབྲེལ་པ་མངོན་སུམ་དུ་བྱས་ལ། དེ་ལ་མཆོག་ཏུ་ལྷག་པར་གནས་པར་བྱ། བདག་ནམ་མཁའ་མཐའ་ཡས་སྐྱེ་མཆེད་ཀྱི་བཏང་སྙོམས་ཀྱིས་བསྡུས་པ་དེ་རྫོགས་པར་བྱས་ཏེ་གནས་སོ། །བདག་གིས་འདི་ལྟར་ཡོངས་སུ་དག་ཅིང་འདི་ལྟར་རྣམ་པར་བྱང་བ་རྣམ་ཤེས་མཐའ་ཡས་སྐྱེ་མཆེད་དང་། ནམ་མཁའ་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བཏང་སྙོམས་འདི་རྫོགས་པར་བྱས་ཏེ། གནས་པར་བྱའོ་སྙམ་མོ། །དེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་པ་དེ་དང་བདག་གི་སེམས་འཐུན་པར་བྱེད་ལ་བཏང་སྙོམས་དེ་ལ་གནས་ཤིང་འདུག་སྟེ། དེ་ལ་ལྷག་པར་ཆགས་པ་དང་། དེ་ཉེ་བར་ལེན་པ་བདག་གི་འདུ་ཤེས་མེད་
འདུ་ཤེས་མེད་མིན་སྐྱེ་མཆེད་ཀྱི་བཏང་སྙོམས་རྫོགས་པར་བྱས་ཏེ་གནས་པར་བྱའོ་སྙམ་མོ། །འདི་ལྟ་སྟེ་དཔེར་ན། གསེར་མགར་རམ། གསེར་མགར་གྱི་སློབ་མ་མཁས་པ་དེ་སོལ་མལ་དུ་གསེར་འཇུག་པར་བྱེད་དོ། །བཅུག་ནས་ཕྲ་སྐམ་གྱིས་བཟུང་ཞིང་ཡམ་ཤིང་གིས་འབུད་ཀུན་ཏུ་འབུད་དོ། །ལས་ལེགས་པར་བྱས་པའི་གསེར་དེ་དགེ་ཞིང་བཀྲ་ཤིས་ལ་ཁ་དོག་བཟང་བ། ལས་བྱེད་པ་ཐམས་ཅད་བསྟོད་པ། ཁ་དོག་བཟང་བར་བསྔགས་པ། ཡུལ་ཐམས་ཅད་དུ་རྗེས་སུ་འཐུན་པར་འཇུག་པ་དེ་དྲི་མ་དང་བྲལ་ཞིང་སྐྱོན་ལྷག་མ་ཡང་མེད་ལ་དུལ་ཞིང་བཀྲ་ཤིས་ཏེ། རིན་པོ་ཆེའི་འོད་ཀྱང་ཟིལ་དུ་རླག་པར་བྱེད་དོ། །དེ་གསེར་མགར་རམ། གསེར་མགར་གྱི་སློབ་མ་མཁས་པ་གཞན་ཞིག་གིས་གསེར་ལེགས་པར་སྦྱང་བ་བྱས་པར་རིག་ནས་ཅི་འདོད་པར་བྱེད་དེ། གལ་ཏེ་བགོ་བར་བྱ་བ་དག་ལ་དྲིལ་བུའི་རྒྱན་བྱེད། གལ་ཏེ་ཤིན་ཏུ་བལྟ་ན་སྡུག་པ་དག་བྱེད། གལ་ཏེ་དཔུང་རྒྱན་དུ་བྱེད། གལ་ཏེ་སྙིང་གར་མཛེས་པའི་རྒྱན་བྱེད། གལ་ཏེ་གླེགས་བམ་ལ་མཛེས་པར་བྱེད། གལ་ཏེ་མགོ་རྒྱན་དུ་བྱེད། གལ་ཏེ་སོར་གདུབ་ཏུ་བྱེད། གལ་ཏེ་གསེར་གྱི་ཕྲེང་བར་བྱེད། གལ་ཏེ་རྒྱན་ཅོད་པན་དུ་བྱེད་དེ། གང་དང་གང་དུ་ཁྱེར་བ་དེ་དང་དེར་ལས་དང་ལྡན་པར་འགྱུར་རོ། །དེ་བཞིན་དུ་དགེ་སློང་ཤིན་ཏུ་ཚུལ་ཁྲིམས་དང་ལྡན་པ་ཤེས་རབ་ཅན་ནི་བདག་གིས་འདི་ལྟར་ཡོངས་སུ་དག་ཅིང་འདི་ལྟར་རྣམ་པར་བྱང་བ་གལ་ཏེ་ནམ་མཁའ་མཐའ་ཡས་སྐྱེ་མཆེད་ཀྱི་བཏང་སྙོམས་དེ་རྫོགས་པར་བྱས་ལ་བདག་དེ་དང་འཐུན་པར་དེ་ལ་གནས་ཏེ། དེ་དང་འབྲེལ་པ་དང་། དེ་ལ་ལྷག་པར་གནས་པ་དང་། དེ་ཉེ་བར་ལེན་ཅིང་དེ་ནམ་མཁའ་མཐའ་ཡས་སྐྱེ་མཆེད་ཀྱི་བཏང་སྙོམས་རྫོགས་པར་བྱས་ཏེ་གནས། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་སོ། །དེ་འདི་སྙམ་དུ་སེམས་ཏེ། གང་བདག་གི་བཏང་སྙོམས་
འདི་ནི་མི་རྟག་པ་མི་བརྟན་པ་ཐེར་ཟུག་མ་ཡིན་པ་ཡོངས་སུ་འགྱུར་བའི་ཆོས་ཅན་ཡིན་པར་དེ་གཟུགས་མེད་པའི་སྐྱེ་མཆེད་བཞི་པོ་དེ་ཉིད་ལ་དམིགས་ནས། བདག་གི་བཏང་སྙོམས་མི་རྟག་ཅིང་མི་རྟག་པར་དམིགས། མི་བརྟན་ཞིང་མི་བརྟན་པར་དམིགས་ཏེ། འདུས་བྱས་སུ་རིག་པར་བྱའོ་སྙམ་མོ། །ནམ་མཁའ་མཐའ་ཡས་སྐྱེ་མཆེད་མི་རྟག་ཅིང་རྣམ་ཤེས་མཐའ་ཡས་སྐྱེ་མཆེད་དམིགས་སུ་མེད་པ་དང་། ཅི་ཡང་མེད་པའི་སྐྱེ་མཆེད་དམིགས་སུ་མེད་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བཏང་སྙོམས་འདི་ནི་གཡོ་བ་དང་བྲལ་བ་ཡིན། འདི་ནི་ཞི་བ་ཡིན། འདི་ནི་ཉེ་བར་ཕན་པ་ཡིན་ནོ་སྙམ་མོ། །དེ་ལུས་ཀུན་ཏུ་ཚོར་བ་སྐྱེ་ཞིང་མྱོང་བ་ན་སོ་སོར་མངོན་པར་ཤེས་ཤིང་སྐྱེས་པ་རྣམས་ཀྱང་སོ་སོར་མངོན་པར་ཤེས་སོ། །འགགས་པ་སོ་སོར་མངོན་པར་ཤེས་ཤིང་འགག་པ་ཡང་སོ་སོར་མངོན་པར་ཤེས་སོ། །མིག་གི་རེག་པ་ལས་བྱུང་བ་སོ་སོར་མངོན་པར་ཤེས་ཏེ། དེ་བཞིན་དུ་རྣ་བའི་རེག་པ་ལས་བྱུང་བ་སོ་སོར་མངོན་པར་ཤེས། སྣའི་རེག་པ་ལས་བྱུང་བ་སོ་སོར་མངོན་པར་ཤེས། དེ་བཞིན་དུ་ལྕེ་དང་། ལུས་དང་། ཡིད་ཀྱི་རེག་པ་ལས་བྱུང་བའི་ཚོར་བ་སོ་སོར་མངོན་པར་ཤེས་སོ། །དགེ་སློང་ཚོར་བ་མངོན་སུམ་དུ་བྱས་པ་དེ་ཚོར་བ་དེ་དག་ཉིད་ཤིན་ཏུ་རྒྱས་པར་རྟོག་སྟེ། དེ་མིག་གི་རེག་པ་ལས་བྱུང་བའི་ཚོར་བ་སྐྱེ་བ་ན་སྐྱེས་པ་ལ་གནས་ཤིང་མྱོང་བར་བྱེད་ལ་འགགས་ཤིང་འགག་པ་ན་བདག་གི་ཚོར་བ་འགགས་སོ་ཞེས་སོ་སོར་མངོན་པར་ཤེས་སོ། །གཞན་ཡང་རྣ་བའི་རེག་པ་ལས་བྱུང་བའི་ཚོར་བ་སོ་སོར་མངོན་པར་ཤེས་ཏེ། གང་བདག་གི་མིག་གི་རེག་པ་ལས་བྱུང་བའི་ཚོར་བ་དེ་འགགས་ཤིང་།ནུབ་ལ་མེད་པར་འགྱུར་ཏེ་ཡང་མི་འབྱུང་ངོ་། །དེ་དག་འགགས་ནས་གཞན་ཡང་རྣ་བའི་རེག་པ་ལས་བྱུང་བའི་ཚོར་བ་སྐྱེས་པ་བདེ་བ་འདི་བདེ་བ་ལ་དམིགས་པས་སྡུག་བསྔལ་མ་ཡིན། བདེ་བ་དང་སྡུག་བསྔལ་ལ་དམིགས་པས་བདེ་བ་མ་ཡིན་ཞིང་སྡུག་བསྔལ་མ་ཡིན་ནོ་སྙམ་མོ། །དེ་རྣ་བའི་རེག་པ་ལས་བྱུང་བའི་ཚོར་བ་ཇི་ལྟ་བ་བཞིན་
རྗེས་སུ་མཐོང་ཞིང་རྣམ་པར་ཤེས་ནས། རྣ་བ་དང་འབྲེལ་པའི་ཚོར་བ་དག་ལ་ཀུན་ཏུ་ཆགས་པ་མེད་ལ་དེ་ཚོར་བ་མྱོང་བ་ན་འདོད་ཆགས་དང་བྲལ་ཏེ། རྣམ་པར་གྲོལ་བར་འགྱུར་རོ། །རྣ་བའི་རེག་པ་ལས་བྱུང་བའི་ཚོར་བ་དེ་འགགས་ན་སྣའི་དམིགས་པའི་ཚོར་བ་སྐྱེ་སྟེ། དེ་སྣས་ཀུན་ནས་བསླང་བ་སྣས་ཀུན་ནས་སོ་སོར་མྱོང་བར་བྱེད་དེ། བདག་སྣའི་རེག་པ་ལས་བྱུང་བའི་ཚོར་བ་སྐྱེས་པ་བདེ་བ་ལ་དམིགས་པ་ནི་བདེ་བའོ། །སྡུག་བསྔལ་ལ་དམིགས་པ་ནི་སྡུག་བསྔལ་ལོ། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ལ་དམིགས་པ་ནི་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་ནོ་སྙམ་མོ། །དེ་སྣའི་དམིགས་པའི་ཚོར་བ་ཡང་དག་པ་ཇི་ལྟ་བ་བཞིན་སོ་སོར་མྱོང་བར་བྱེད་དེ། ནུབ་པ་ཡང་སོ་སོར་མྱོང་བར་བྱེད་དོ། །དེ་འགགས་ན་སྣའི་དམིགས་པའི་ཚོར་བ་བདེ་བ་དང་། སྡུག་བསྔལ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་སྐྱེ་སྟེ། དེ་སོ་སོར་མྱོང་བར་བྱེད་དོ། །བདག་གི་སྣའི་དམིགས་པའི་ཚོར་བ་སྐྱེ་སྟེ། ཇི་ལྟར་ལྷག་པར་ཆགས་པ་སྐྱེས་པ་དེ་ལྟར་བདག་གི་འགོག་པ་འདི་དག་ཀྱང་སྐྱེ་སྟེ། དེ་འགགས་ནས་ལྕེའི་དམིགས་པའི་ཚོར་བ་རྣམ་པ་གསུམ་སྐྱེ་བ་ནས་ཡིད་ཀྱི་དམིགས་པའི་ཚོར་བ་རྣམ་པ་གསུམ་སྔ་མ་བཞིན་ནོ། །དེ་ས་གཞན་བཞི་པ་ལ་ཚོར་བ་ཡང་དག་པར་རྒྱ་ཆེ་བ་ལ་འཇུག་སྟེ། དེའི་བརྩོན་འགྲུས་བརྩམས་པ་སྤྲོ་བ་ཆེན་པོ་བདུད་ཀྱི་འཆིང་བ་གཅོད་པར་འདོད་པ་ལ་ས་བླའི་གནོད་སྦྱིན་ཤིན་ཏུ་དགའ་ནས། བར་སྣང་གི་གནོད་སྦྱིན་རྣམས་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་པོ་ཆེན་པོ་བཞི་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་ཆེན་བཞིའི་ལྷ་རྣམས་ལ་མངོན་པར་བསྙད་དོ། །དེ་དག་གིས་ཀྱང་ལྷ་རྣམས་ཀྱི་དབང་པོ་བརྒྱ་བྱིན་ལ་མངོན་པར་བསྙད་དོ། །བརྒྱ་བྱིན་གྱིས་ཀྱང་འཐབ་བྲལ་གྱི་ལྷ་རྣམས་ལ་མངོན་པར་བསྙད་དོ། །གང་འཛམ་བུའི་གླིང་ན་རིགས་ཀྱི་བུ་ཡུལ་ཆེ་གེ་མོ་ཞིག་དང་། གྲོང་མང་གེ་མོ་ཞིག་དང་། རིགས་ག་གེ་མོ་ཞིག་ལས་རིགས་ཀྱི་
བུ་ཆེ་གེ་མོ་ཞེས་བྱ་བ་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་འབད་པ་དང་། བརྩོན་པས་རིམ་གྱིས་ས་གཞན་བཞི་པའི་ཚོར་བ་ཡང་དག་པར་རྒྱ་ཆེ་བ་ལ་ཞུགས་པ་བདུད་ཀྱི་ཕྱོགས་ནི་དམའ་བར་བྱེད་ཅིང་ཡང་དག་པ་དམ་པའི་ཆོས་ཀྱི་ཕྱོགས་ནི་མངོན་པར་མཐོ་བར་བྱེད་པ་དེ་བདག་གིས་ལྷ་རྣམས་ལ་བསྙད་དོ་སྙམ་མོ། །བརྒྱ་བྱིན་གླང་པོ་ཆེ་ས་སྲུང་གི་བུ་ལ་ཞོན་པ་དེ་འཐབ་བྲལ་གྱི་ལྷ་དག་གིས་མཐོང་ནས་དགའ་སྟེ། བརྒྱ་བྱིན་ལ་སྨྲས་པ། བརྒྱ་བྱིན་གང་འཛམ་བུའི་གླིང་གི་མི་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་དེ་བརྒྱ་བྱིན་ཁྱོད་ཀྱི་དམ་པའི་ཆོས་དང་འཐུན་པར་གྱུར་པ་ཉིད་ཡིན་ནོ། །གཞན་ཡང་དགེ་སློང་དེ་བདུད་ཀྱི་འཆིང་བ་སྤོང་ཞིང་རབ་ཏུ་སྤོང་བའི་ཚོར་བ་ལ་ཇི་ལྟར་རྟོག་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། དགེ་སློང་དེ་ཡང་དག་པའི་ཚོར་བ་ཉིད་ལ་འདི་ལྟར་རྣམ་པར་རྟོག་པར་བྱེད་དེ། དེ་མིག་གི་རྣམ་པར་ཤེས་པའི་དམིགས་པ་མི་དགེ་བ་སྐྱེས་པ་དེ་ལངས་པ་ན་དགེ་བ་ལ་དམིགས་པ་གཉིས་པས་འགགས་སོ། །དགེ་བ་སྐྱེས་པ་དེ་ཡང་ལུང་དུ་མ་བསྟན་པ་ལ་དམིགས་པས་འགགས་ཤིང་ལུང་བསྟན་པ་ཡང་འགགས་ལ་ལུང་དུ་མ་བསྟན་པ་སྐྱེས་སོ། །དེ་བཞིན་དུ་རྣ་བའི་རེག་པ་ལས་བྱུང་བའི་ཚོར་བ་དང་། སྣའི་རེག་པ་ལས་བྱུང་བའི་ཚོར་བ་དང་། ལྕེའི་རེག་པ་ལས་བྱུང་བའི་ཚོར་བ་དང་། ལུས་དང་། ཡིད་ཀྱི་རེག་པ་ལས་བྱུང་བའི་ཚོར་བ་སོ་སོར་མྱོང་བར་བྱེད་དོ། །སོ་སོར་མྱོང་བར་བྱེད་པ་ན་དགེ་བའི་ཆོས་རྣམས་ཡོངས་སུ་རྫོགས་པར་འགྱུར་ཞིང་དེའི་ཉོན་མོངས་པ་བསྲབས་པར་འགྱུར་རོ། །དེ་དེ་ལྟར་སྒོམ་པ་ན་ཚོར་བ་ཕྲ་མོ་དེ་དག་སོ་སོར་ཤེས་སོ། །དེ་ཆོས་ཀྱི་ཚོར་བ་དང་ལྷན་ཅིག་འགག་པ་མཐོང་སྟེ། ཇི་ལྟར་མར་མེའི་འོད་ཉི་མའི་འོད་ཀྱིས་འགག་པ་དེ་བཞིན་དུ་ཚོར་བ་གཉི་ག་འགག་གོ །གཞན་ཡང་དགེ་བ་དང་མི་དགེ་བའི་ཚོར་བ་
རྒྱས་པ་སོ་སོར་མྱོང་བར་བྱེད་དེ། དཔེར་ན་མར་མེའི་འོད་ལ་མར་མེའི་འོད་གཉིས་པས་གསལ་བར་བྱེད་པ་བཞིན་ནོ། །གཞན་ཡང་ཚོར་བ་རབ་ཏུ་རྣམ་པར་འབྱེད་པར་བྱེད་དེ། ཚོར་བ་གང་ཞིག་དང་། ཚོར་བ་གཞན་གང་ཞིག་གི་ཚོར་བ་དང་ལྷན་ཅིག་གཏན་དུ་མི་འཐུན་པར་འགྱུར་རམ་སྙམ་པ་ལས་དགེ་བའི་ཚོར་བ་དང་། མི་དགེ་བའི་ཚོར་བ་ལྷན་ཅིག་གཏན་དུ་མི་འཐུན་པར་མཐོང་སྟེ། དཔེར་ན་མར་མེའི་འོད་དང་། སྐར་མའི་འོད་ལྷན་ཅིག་མི་འཐུན་པ་བཞིན་ནོ། །གཞན་ཡང་དགེ་སློང་དེ་རབ་ཏུ་རྣམ་པར་འབྱེད་པར་བྱེད་དེ། ཚོར་བ་གང་ཞིག་ལ་ཚོར་བ་གང་ཞིག་གིས་གཏན་དུ་སེལ་བར་བྱེད་ཅེ་ན། དེ་ཟག་པ་མེད་པ་ལ་དམིགས་པའི་ཚོར་བས་ཟག་པ་དང་བཅས་པ་ལ་དམིགས་པའི་ཚོར་བ་གཏན་སེལ་བ་ཉིད་དུ་མཐོང་སྟེ། དཔེར་ན་མེའི་འོད་ཀྱིས་ཁ་བ་ཞུ་བ་བཞིན་ནོ། །ཚོར་བ་གང་ཞིག་ལ་ཚོར་བ་གང་ཞིག་གིས་གནོད་ཞིག་གུ་སྙམ་ནས་ཡང་འདི་རྒྱས་པར་བྱེད་དེ། གང་གི་ཚེ་མི་བདེ་བའི་ཚོར་བ་ལ་བདེ་བའི་ཚོར་བས་ཟིལ་གྱིས་གནོན་པར་མཐོང་ངོ་། །དེ་ཡང་རྒྱས་པར་བྱེད་དེ། དཔེར་ན་ཉི་མས་ཉིན་མོའི་ཟླ་བའི་འོད་ཟིལ་གྱིས་གནོན་པར་འགྱུར་ཞིང་ཟླ་བའི་འོད་དེ་ཡང་མཚན་མོ་རྒྱས་པར་འགྱུར་བ་བཞིན་ནོ། །དེ་ནས་གཞན་ཡང་དགེ་སློང་དེ་ཚོར་བ་རབ་ཏུ་རྣམ་པར་འབྱེད་པར་བྱེད་དེ། གང་ཚོར་བ་མང་པོ་དང་ལྡན་པ་དག་ཚོར་བ་གཅིག་གི་དྲན་པ་རྩེ་གཅིག་པའི་ཚོར་བ་དང་ལྷན་ཅིག་མི་འཐུན་པ་ཟིལ་གྱིས་གནོན་པར་འགྱུར་རམ་སྙམ་ན། དེ་འཇིག་རྟེན་པ་བྱེད་པའི་ཚོར་བ་མང་པོ་དག་འཇིག་རྟེན་ལས་འདས་པ་ཟག་པ་མེད་པའི་ཚོར་བས་ཟིལ་གྱིས་གནོན་པར་མཐོང་སྟེ། དཔེར་ན་མཚན་མོ་རྒྱུ་སྐར་དང་། གཟའ་དང་། སྐར་མ་མང་པོའི་འོད་དག་ཟླ་བའི་འོད་གཅིག་གི་ཟིལ་གྱིས་གནོན་པ་བཞིན་ནོ། །གཞན་ཡང་དགེ་སློང་དེ་ཚོར་བ་རྗེས་སུ་མཐོང་བའི་ཚོར་བ་ཆེས་ཕྲ་བ་ལ་རྟོག་པར་བྱེད་དེ། མིག་དང་། རྣ་བ་དང་། སྣ་དང་། ལྕེ་དང་། ལུས་ཀྱིས་ཀུན་ནས་བསླང་བ་ཟག་པ་དང་བཅས་པའི་ཚོར་
བ་མང་བ་ནི་གང་ཡིན། དགེ་བ་ནི་ཇི་ལྟར་རྩོམ་ཞིག་གུ་སྙམ་ན་དེ་འཇིག་རྟེན་པའི་ཟག་པ་དང་བཅས་པའི་ཚོར་བ་མང་བ་ཡང་ཟག་པ་མེད་པའི་སྣང་བས་ཐུབ་པར་འགྱུར་ཏེ། དཔེར་ན་མཚན་མོ་རྒྱུ་སྐར་དང་། གཟའ་དང་། སྐར་མ་རྣམས་ཀྱི་འོད་ཟླ་བའི་སྣང་བ་གནས་པས་ཐུབ་པ་བཞིན་ནོ། །དེ་ནས་གཞན་ཡང་དགེ་སློང་དེ་ཚོར་བ་དེ་ལ་རྟོག་སྟེ། བདག་གི་ཚོར་བ་གཞན་ཡུན་ཇི་སྲིད་ཅིག་ཏུ་གནས་སྙམ་མོ། །དེ་སྐད་ཅིག་ལ་བདག་གི་ཚོར་བ་གཞན་སྐྱེ་ཞིང་འཇིག་པར་གནས་པར་མཐོང་སྟེ། དཔེར་ན་གློག་བཞིན་ནོ། །གཞན་ཡང་དགེ་སློང་དེ་འདི་ལྟར་རབ་ཏུ་རྣམ་པར་རྟོག་སྟེ། ཅི་མིག་གི་ཚོར་བ་སྣའི་ཚོར་བའི་རྐྱེན་དུ་འགྱུར་རམ་སྙམ་མོ། །དེ་བློ་གཅིག་བཞིན་དུ་དབང་པོ་ཐ་དད་པའི་དམིགས་པའི་ཚོར་བ་དབང་པོ་དེ་དག་ཐམས་ཅད་ཀྱིར་མཐོང་སྟེ། དཔེར་ན་བ་ལང་གཅིག་ཅིག་རྟ་དང་། རྔ་མོ་དང་། བོང་བུ་དང་། མ་ཧེའི་རིགས་ཐ་དད་པ་རྣམས་ཀྱི་རྐྱེན་དུ་མི་འགྱུར་བ་དེ་བཞིན་དུ་ཐོག་མ་མེད་པ་ནས་བརྩོན་པའི་དབང་པོ་ལྔས་ཀུན་ནས་བསླང་བའི་ཡུལ་གྱི་བྱེ་བྲག་ཐ་དད་པའི་དབང་པོ་རྣམས་ཀྱི་དམིགས་པ་ནི་གཅིག་ཏུ་མི་འགྱུར་ཏེ། དཔེར་ན། གླང་དང་། རྟ་དང་། རྔ་མོ་དང་། བོང་བུ་དང་། མ་ཧེ་དང་། ཕག་བཞིན་ནོ། །དེ་ལྟར་ཚོར་བ་རྗེས་སུ་མཐོང་བའི་དགེ་སློང་དེ་དག་ནི་ཤེས་པ་ཆེས་ཞིབ་པ་སྐྱེ་བར་འགྱུར་ཏེ། དེ་ཤེས་པ་དེ་ལ་ཀུན་ཏུ་སྟེན་ཅིང་སྒོམ་སྟེ་མང་དུ་བྱེད་དོ། །དེ་ཀུན་ཏུ་བསྟེན་པ་ན་ཚོར་བ་རྗེས་སུ་མཐོང་ཞིང་ཟད་པ་དང་འཇིག་པ་རྗེས་སུ་མཐོང་ནས་འདི་སྙམ་དུ་སེམས་ཏེ། བདག་གི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱིས་ཀུན་ནས་བསླང་བའི་ཚོར་བ་གང་ནས་འོང་ཞིང་གང་དུ་སོང་། འགག་པ་ན་གང་དུ་སོགས་པར་འགྱུར་སྙམ་མོ། །དགེ་སློང་ཚོར་བ་ཟད་པ་དང་། འཇིག་པ་རྗེས་སུ་མཐོང་བ་དེ་རབ་ཏུ་སེམས་པ་ན། ལམ་གྱི་རྣམ་པ་ལ་འདི་སྙམ་དུ་སེམས་ཏེ། མིག་གི་ཚོར་བ་གང་ནས་ཀྱང་སྐྱེ་བ་མེད་ཅིང་འོང་བ་མེད་ལ། འགག་པ་ན་ཡང་གང་དུ་ཡང་སོགས་པར་མི་
འགྱུར་ཏེ། མིག་གི་ཚོར་བ་མ་བྱུང་བ་ལས་འབྱུང་ཞིང་། བྱུང་ནས་ཀྱང་སོ་སོར་འབྲལ་བར་འགྱུར་རོ། །མིག་གི་འབྱུང་ཁུང་ལས་ཚོར་བ་འབྱུང་སྟེ། དཔེར་ན་རྒྱ་མཚོའི་གཞི་ལས་ཆུ་འབྱུང་བ་བཞིན་ནོ། །འགག་པ་ན་ཡང་གང་དུ་ཡང་མི་སོགས་ཏེ། དཔེར་ན་ཆུ་བོ་གཞོལ་བར་འགྲོ་བ་རྒྱ་མཚོར་འདུ་བ་བཞིན་ཏེ། མིག་གི་ཚོར་བ་མ་བྱུང་བ་ལས་འབྱུང་ཞིང་བྱུང་ནས་ཀྱང་སོ་སོར་འཇིག་པར་འགྱུར་རོ་སྙམ་མོ། །མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་ཚོར་བ་དག་ནི་རྟེན་ཅིང་འབྲེལ་བར་འབྱུང་བ་ཡིན་ཏེ། དཔེར་ན་རྫ་མཁན་ནམ། རྫ་མཁན་གྱི་སློབ་མ་མཁས་པ་ཞིག་འཁོར་ལོ་ལ་ཡང་བརྟེན། འཇིམ་པ་ལ་ཡང་བརྟེན། རྩོལ་བ་ལ་ཡང་བརྟེན། ཆུ་ལ་ཡང་བརྟེན་ནས་རྒྱུ་འཇིམ་པ་ལ་བརྟེན་པའི་བུམ་པ་འབྱུང་བར་འགྱུར་ཏེ། བུམ་པ་དེ་འབྱུང་ཁུང་གང་ནས་ཀྱང་མ་འོངས་ཤིང་འཇིག་པ་ན་ཡང་གང་དུ་ཡང་སོགས་པར་མི་འགྱུར་མོད་ཀྱི། རྒྱུ་རྐྱེན་ལས་བུམ་པ་འབྱུང་བ་དེ་བཞིན་དུ། མིག་ལ་ཡང་བརྟེན། གཟུགས་ལ་ཡང་བརྟེན། སྣང་བ་ལ་ཡང་བརྟེན། ནམ་མཁའ་ལ་ཡང་བརྟེན། ཡིད་ལ་བྱེད་པ་ལ་ཡང་བརྟེན་ནས། མིག་གི་ཚོར་བ་བདེ་བའམ། སྡུག་བསྔལ་བའམ། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་སྐྱེའོ། །དཔེར་ན་བུམ་པ་གལ་ཏེ་རྒྱུ་རྐྱེན་བཟང་པོ་ལས་བྱུང་ན་བུམ་པ་དེ་ལེགས་པར་འགྱུར་ཞིང་། གལ་ཏེ་ངན་ན་དེའི་ཚེ་བུམ་པ་མ་ལེགས་པར་འགྱུར་བ་དེ་བཞིན་དུ་གལ་ཏེ་དམིགས་པའི་རྒྱུ་དང་རྐྱེན་བཟང་ན་དེའི་ཚེ། མིག་ལ་སོགས་པ་ཚོར་བ་བཟང་པོ་སྐྱེ་བར་འགྱུར་ཏེ། ཆོས་དང་ལྡན་པའི་དགེ་བའི་རིམ་གྱིས་མྱ་ངན་ལས་འདས་པར་འགྲོ་བར་འགྱུར་རོ། །གལ་ཏེ་རྒྱུ་དང་རྐྱེན་མི་བཟང་ན་དེའི་ཚེ་མིག་ལ་སོགས་པའི་ཚོར་བ་ངན་པ་སྐྱེ་བར་འགྱུར་ཏེ། འདོད་ཆགས་ཞེ་སྡང་གཏི་མུག་ལ་དམིགས་པ་འཁོར་བ་ན་སེམས་ཅན་དམྱལ་བ་དང་། ཡི་དགས་དང་། དུད་འགྲོར་འགྲོ་བར་འགྱུར་རོ། །ལས་དང་འབྲས་བུར་འབྲེལ་བ་ཐམས་ཅད་ལ་མཁས་པར་སེམས་པའི་
དགེ་སློང་ནི་ཚོར་བ་རྗེས་སུ་ཚོལ་བ་ན་ཚོར་བ་དུ་མ་ལ་གནས་པར་མཐོང་སྟེ། བྱེད་པ་པོས་གནས་སུ་མ་བྱས་ཤིང་རྒྱུ་མེད་པ་ལས་ཀྱང་མ་བྱུང་ལ་འདོད་རྒྱལ་གྱིས་ཀྱང་མ་བྱས། ཐེར་ཟུག་ཏུ་གནས་པ་མ་ཡིན། རྟག་པ་མ་ཡིན། བརྟན་པ་མ་ཡིན། ཐེར་ཟུག་མ་ཡིན། ཡོངས་སུ་འགྱུར་བའི་ཆོས་ཅན་ཡིན་ཞིང་། དེའི་ཚོར་བའི་ཕུང་པོ་དེ་མཐོང་ནས་ཡང་འབྱུང་བའི་སྲེད་པ་དགའ་བའི་འདོད་ཆགས་ཀྱི་མོད་ལ་སྐྱེས་པའི་དྲི་མ་ཅན་ཡོངས་སུ་ཉམས་པར་བྱེད་དེ། འཁོར་བ་ཐམས་ཅད་མི་རྟག་པར་རྗེས་སུ་མཐོང་བའི་དགེ་སློང་ནི་ལམ་ཀུན་ཏུ་སྟེན་པར་བྱེད་ཅིང་གོམས་པར་བྱེད་ལ་མང་དུ་བྱེད་དོ། །དེ་དེ་ལྟར་སྒོམ་པ་ན་ཀུན་ཏུ་སྦྱོར་བ་དག་སྤོང་བར་བྱེད་ཅིང་བག་ལ་ཉལ་འདོར་བར་བྱེད་དེ། ཀུན་ཏུ་སྦྱོར་བ་དག་གང་ཞེ་ན། རྗེས་སུ་ཆགས་པའི་ཀུན་ཏུ་སྦྱོར་བ་དང་། ཁོང་ཁྲོ་བའི་ཀུན་ཏུ་སྦྱོར་བ་དང་། ང་རྒྱལ་གྱི་ཀུན་ཏུ་སྦྱོར་བ་དང་། མ་རིག་པའི་ཀུན་ཏུ་སྦྱོར་བ་དང་། ལྟ་བའི་ཀུན་ཏུ་སྦྱོར་བ་དང་། མཆོག་ཏུ་འཛིན་པའི་ཀུན་ཏུ་སྦྱོར་བ་དང་། ཐེ་ཙོམ་གྱི་ཀུན་ཏུ་སྦྱོར་བ་དང་། ཕྲག་དོག་གི་ཀུན་ཏུ་སྦྱོར་བ་དང་། སེར་སྣའི་ཀུན་ཏུ་སྦྱོར་བ་སྟེ། ཀུན་ཏུ་སྦྱོར་བ་དེ་དག་སྤོང་བར་བྱེད་དོ། །བག་ལ་ཉལ་གང་ཞེ་ན། འདི་ལྟ་སྟེ། འདོད་པའི་འདོད་ཆགས་ཀྱི་བག་ལ་ཉལ་དང་། སྲེད་པའི་འདོད་ཆགས་ཀྱི་བག་ལ་ཉལ་དང་། ལྟ་བའི་བག་ལ་ཉལ་དང་། ཁོང་ཁྲོ་བའི་བག་ལ་ཉལ་དང་། མ་རིག་པའི་བག་ལ་ཉལ་དང་། ང་རྒྱལ་གྱི་བག་ལ་ཉལ་དང་། ཐེ་ཙོམ་གྱི་བག་ལ་ཉལ་ཏེ། འདི་དག་ནི་གཙོ་བོ་ཇི་ལྟ་བ་བཞིན་དུ་སྲིད་པ་གསུམ་དུ་ཡོངས་སུ་འཇུག་པར་བྱེད་པ། ས་གསུམ་དུ་ཡོངས་སུ་རྒྱུ་བར་བྱེད་པ། ཉེས་པ་གསུམ་ལ་ཡོངས་སུ་འཇུག་པར་བྱེད་པ། དུས་གསུམ་གྱི་རྗེས་སུ་འགྲོ་བ། བར་མ་གསུམ་གྱི་ཚོར་བ་གསུམ་རྗེས་སུ་བསྒོམས་པ། སྐྱེ་བ་གསུམ་དུ་འཕོ་བར་བྱེད་པ་སྟེ། འཁོར་བའི་རྒྱུར་གྱུར་པ་ཡིན་ནོ། །དེ་ནས་གཞན་ཡང་ཇི་ལྟར་དགེ་སློང་དེ་རྒྱུ་དང་རྐྱེན་དུ་བཅས་པ་འདི་དག་ཁོང་དུ་ཆུད་པར་འགྱུར། མིག་གི་རྐྱེན་
ནི་གང་། རྒྱུ་ནི་གང་ལས་སྐྱེས། གཞི་གང་ལ་ལྟ་བར་བྱེད་ཅིག་གུ་སྙམ་ནས། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། མིག་གི་རྒྱུ་ནི་ལས་ལས་བྱུང་ཞིང་། ལས་ཀྱིས་སྐྱེ་བ་མངོན་པར་བསྒྲུབས་ཏེ། དཔེར་ན་ཤིང་བ་ཊའི་ས་བོན་ཆུང་ངུ་ལས་ཤིང་ལྗོན་པ་སྐྱེ་ལ་ཤིང་ལྗོན་པའི་རྒྱུ་རྐྱེན་ལས་ཡང་ཤིང་བ་ཊའི་ས་བོན་ཕྲ་མོ་འབྱུང་བར་འགྱུར་རོ། །དེ་བཞིན་དུ་མི་ཤེས་པ་ལས་ལས་མངོན་པར་འགྲུབ་པར་འགྱུར་ལ། ལས་ལས་ཀྱང་སྐྱེ་བ་མངོན་པར་འགྲུབ་པར་འགྱུར་ཏེ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། འཁྲུག་པ་རྣམས་ཡོད་ཅིང་འབྱུང་བར་འགྱུར་ཏེ། དེ་ལྟར་ལས་ཀྱི་རྒྱུ་སྲེད་པའི་ཞགས་པ་དེས་བཅིངས་པའི་བྱིས་པ་སོ་སོའི་སྐྱེ་བོ་ནི་འཁོར་ལོ་ལྟ་བུའི་རྒྱ་མཚོར་ཡོངས་སུ་འཁྱམ་མོ། །ཚོར་བ་དེ་དག་ཐམས་ཅད་ཀྱི་རྒྱུ་དང་རྐྱེན་འདི་དག་ལ་འདུ་ཤེས་ཀྱི་ལས་སུ་བྱ་བ་མེད་དེ། ལས་མེད་ན་སྲེད་པ་འབྱུང་བར་མི་འགྱུར་ལ། དེ་མེད་ན་ཚོར་བ་མེད་པར་འགྱུར་རོ། །རྒྱུ་རྐྱེན་ནི་དཔེར་ན་སྙིང་པོ་ལ་ཡང་བརྟེན། ཀོང་བུ་ལ་ཡང་བརྟེན། མར་ལ་ཡང་བརྟེན། མེ་ལ་ཡང་བརྟེན་ནས་མར་མེའི་འོད་སྐད་ཅིག་ལ་མངོན་པར་འགྲུབ་པར་འགྱུར་རོ། །དེ་བཞིན་དུ་དགེ་སློང་དེ་ཚོར་བའི་རྒྱུ་དང་རྐྱེན་མཐོང་བ། ལས་ཀྱི་རྒྱུ་ཚོལ་ཞིང་ལས་ཀྱི་རྗེས་སུ་འབྲང་བ། ལས་ཀྱི་མཐུས་ཚོར་བ་ཐམས་ཅད་སྐྱེ་བར་འགྱུར་རོ། །དེ་ལ་ལུས་ནི་ཀོང་བུ་ལྟ་བུ་ཡིན། དབང་པོ་དག་ནི་མར་ལྟ་བུ་ཡིན། འདོད་ཆགས་ཞེ་སྡང་གཏི་མུག་ནི་མེ་ལྟ་བུ་ཡིན་ཏེ། ཤེས་པ་སྐད་ཅིག་མ་ནི་མར་མེའི་འོད་འབར་བ་ལྟ་བུ་ཡིན་ནོ། །རྣལ་འབྱོར་པ་གང་གིས་སྲིད་པ་གསུམ་དུ་འགྲོ་བའི་ཚོར་བ་དེ་ཉིད་ཚོལ་ཞིང་མཐོང་བ་ནི་ཤེས་པ་ཡིན་ཏེ། དཔེར་ན་གསེར་མགར་གསེར་བླངས་ནས། ལས་དང་ལས་སུ་བྱས་པའི་གསེར་ལས་རྒྱན་གྱི་རྣམ་པ་ལེགས་པར་མངོན་པར་འགྲུབ་པར་བྱེད་དོ། །དེ་བཞིན་དུ་རྣལ་འབྱོར་སྤྱོད་
པ་གསེར་མགར་ལྟ་བུ་དེ་དམིགས་པ་གསེར་ལྟ་བུ་ལ་དམིགས་ཏེ། གལ་ཏེ་དམིགས་པ་བཟང་ན་དེ་ལས་བཟང་པོ་མངོན་པར་འགྲུབ་པར་འགྱུར་ཞིང་། མྱ་ངན་ལས་འདས་པར་འགྲོའོ། །གལ་ཏེ་དམིགས་པ་ངན་ན་དེ་ངན་པ་འགྲུབ་པར་འགྱུར་རོ། །འདིར་ཚིགས་སུ་བཅད་པ། རྒྱུ་རྐྱེན་དེ་ཉིད་ཤེས་པ་ནི། །དོན་ཞིབ་ངེས་པར་བྱས་པ་ཡིན། །ཐར་པའི་རྒྱུན་ལ་མངོན་དགའ་ན། །སྲེད་པས་ཁྱེར་བར་མི་འགྱུར་རོ། །ལུས་ཅན་ཐམས་ཅད་ལས་དག་གི །རྗེས་འབྲང་ལས་ཀྱི་སྐྱེ་གནས་དང་། །ལས་ཀྱི་འབྲས་བུར་སྦྲེལ་ནས་སུ། །སྲིད་པ་ཉམ་ངར་ཀུན་ཏུ་འཁྱམ། །གང་ཞིག་མི་དགེ་མི་ལེན་ཅིང་། །རྟག་ཏུ་དགེ་བའི་ལས་དགའ་བ། །ཟླ་འོད་དྲི་མ་མེད་པ་ལྟར། །རྣལ་འབྱོར་འགྲོ་བ་དེ་འདྲར་འགྱུར། །མེ་ཡིས་ཤིང་སྐམ་བསྲེགས་པ་ལྟར། །སྡིག་པའི་ཆོས་རྣམས་རབ་བསྲེགས་པ། །སྡིག་ལས་གྲོལ་ཞིང་ཉོན་མོངས་རྒལ། །ས་གསུམ་དག་ཏུ་རྣམ་པར་མཛེས། །གང་ཞིག་ཡིད་ནི་ཐར་འདོད་ཅིང་། །ནམས་ཀྱང་འཁོར་བར་མི་དགའ་བ། །དེ་ནི་འཁོར་བར་མི་འཆིང་སྟེ། །མཁའ་ལ་བྱ་ནི་འགྲོ་བ་བཞིན། །གང་ཞིག་ཚོར་འབྱུང་དེ་ཉིད་ཤེས། །ཚོར་བའི་འབྲས་བུ་རིག་པ་ནི། །དེ་ཉིད་གྲོལ་བར་ཤེས་པར་བྱ། །དེ་ཉིད་རིག་པ་སྲིད་གསུམ་དུ། །བདེ་སྡུག་གིས་ནི་དེ་མི་གནོད། །ཞིམ་དང་ང་བས་གོས་པ་མེད། །གང་དག་སྲིད་པ་འབར་བ་ལྟར། །རྣལ་འབྱོར་དེ་ནི་བསམ་པ་ལྡན། །བློ་གྲོས་རྟག་ཏུ་མི་རྨོངས་ཤིང་། །རྟག་ཏུ་ཆོས་ཀྱི་ཕ་རོལ་འགྲོ། །དགེ་སློང་སྡོམ་ལ་མངོན་དགའ་བ། །དེ་ལྟ་བུ་ནི་དགེ་སློང་ཡིན། །གཉེན་ལྟ་བ་ལ་དགའ་མེད་ཅིང་། །མཁས་པ་དག་ལ་ལྟ་འདོད་ལ། །ཁྱིམ་གྱི་སྐྱོན་ལས་ངེས་འབྱུང་བ། །དེ་ལྟ་བུ་ནི་དགེ་སློང་ཡིན། །དབང་པོ་ཐམས་ཅད་རབ་ཞི་ཞིང་། །ཡུལ་རྣམས་ལ་ནི་ཆགས་མེད་ལ། །གཉའ་ཤིང་གང་ཙམ་ལྟ་བ་དག །དེ་ལྟ་བུ་ནི་དགེ་སློང་ཡིན། །ཁྲོ་མེད་ཁྱིམ་ལ་སྤྱོད་མེད་ཅིང་། །ཚོང་ཟོང་ཉོ་འཚོང་མི་བྱེད་ལ། །སྲང་དང་བཞི་མདོར་མི་
དགའ་བ། །དེ་ལྟ་བུ་ནི་དགེ་སློང་ཡིན། །གླུ་དང་གར་ལ་མི་ལྟ་ཞིང་། །ཉེས་རྩོམ་རྣམས་ལ་ཆགས་མེད་ལ། །གང་དག་དུར་ཁྲོད་དགའ་བྱེད་པ། །དེ་ལྟ་བུ་ནི་དགེ་སློང་ཡིན། །ཉི་མ་གཅིག་ལ་བསོད་སྙོམས་མཆོག །བླངས་ནས་སང་གིར་མི་སེམས་ལ། །ལྟོ་འགྲངས་ཙམ་གྱིས་ཆོག་བྱེད་པ། །དེ་ལྟ་བུ་ནི་དགེ་སློང་ཡིན། །གང་དག་གོས་མཆོག་རྣམ་སྤོང་ཞིང་། །ཕྱག་དར་ཁྲོད་ཀྱིས་ཆོག་འཛིན་ལ། །གང་དག་རིགས་པར་ཟས་ཟ་བ། །དེ་ལྟ་བུ་ནི་དགེ་སློང་ཡིན། །གང་དག་ལས་ནི་མི་རྩོམ་ཞིང་། །ལས་རྣམས་ཀུན་ལ་བསམ་མེད་ལ། །སྤྲོ་མེད་འདུད་པ་མེད་པ་ནི། །དེ་ལྟ་བུ་ནི་དགེ་སློང་ཡིན། །འདོད་པའི་ཁྲོ་ལས་རྣམ་གྲོལ་ཞིང་། །གཏི་མུག་འདམ་ནི་རྣམ་སྤངས་ལ། །སྡིག་པའི་ཆོས་ཀྱིས་མ་གོས་པ། །དེ་ལྟ་བུ་ནི་དགེ་སློང་ཡིན། །ཀུན་ཏུ་སྦྱོར་བ་ཀུན་ལས་འདས། །བག་ལ་ཉལ་བ་ཐམས་ཅད་སྤངས། །བསམ་པ་ཀུན་ལས་རྣམ་གྲོལ་བ། །དེ་ལྟ་བུ་ནི་དགེ་སློང་ཡིན། །འཕགས་ལམ་ཡན་ལག་བརྒྱད་པ་ཡིས། །མྱ་ངན་འདས་པའི་གྲོང་ཁྱེར་གནས། །གང་དག་ཉོན་མོངས་ཀུན་བཅོམ་པ། །དེ་ལྟ་བུ་ནི་དགེ་སློང་ཡིན། །དབང་པོ་དུལ་ཞིང་བློ་གྲོས་བརྟན། །འདོད་པའི་འདམ་ནི་རྣམ་པར་སྤངས། །རྩེ་གཅིག་ཡིད་ནི་ལེགས་གནས་པ། །དེ་ལྟ་བུ་ནི་དགེ་སློང་ཡིན། །གང་དག་ས་ཡི་རིམ་ཤེས་ལ། །ས་ཡི་དེ་ཉིད་སྟོན་བྱེད་ཅིང་། །གང་དག་ཕན་ཚུན་ས་ཤེས་པ། །དེ་ལྟ་བུ་ནི་དགེ་སློང་ཡིན། །ཟག་བཅས་ཟག་པ་མེད་པའི་ཆོས། །རྒྱུ་དང་རྐྱེན་དུ་འབྱུང་བ་དག །རྣམ་པ་བཞིན་དུ་ཀུན་ཤེས་པ། །དེ་ལྟ་བུ་ནི་དགེ་སློང་ཡིན། །ཚངས་པར་སྤྱོད་པ་དྲང་ཞིང་ཞི། །རྨུགས་དང་གཉིད་ནི་རྣམ་སྤངས་ལ། །ནང་པར་ལྡང་ཞིང་མཁས་གཙང་བ། །དེ་ལྟ་བུ་ནི་དགེ་སློང་ཡིན། །གང་ཞིག་ཞི་གནས་ལྷག་མཐོང་ལ། །དགའ་ཞིང་བསམ་གཏན་བཞི་ལ་དགའ། །དགོན་པ་ཀུན་དགར་དགའ་བ་དག །དེ་ལྟ་བུ་ནི་དགེ་སློང་ཡིན། །ནམ་
མཁའ་ལ་ནི་བྱ་གནས་པ། །དེའི་གྲིབ་རྟག་ཏུ་རྗེས་འགྲོ་ལྟར། །གང་བློ་དམ་པའི་ཆོས་ལ་གནས། །དེ་ལྟ་བུ་ནི་དགེ་སློང་ཡིན། །གང་ཞིག་ཉོན་མོངས་ཉེ་ཉོན་མོངས། །བཅོམ་ཞིང་ཞི་ལྟ་བློ་གྲོས་གཙང་། །དབུགས་དབྱུང་རྔུབ་པའི་རྣམ་པ་ཤེས། །དེ་ལྟ་བུ་ནི་དགེ་སློང་ཡིན། །གང་ཞིག་རིག་པའི་ཆོ་ག་ཤེས། །རྣལ་འབྱོར་རིག་ཅིང་དེ་ཉིད་སྟོན། །ལམ་དང་ལམ་མིན་རིམ་ཤེས་པ། །དེ་ལྟ་བུ་ནི་དགེ་སློང་ཡིན། །གང་ཞིག་དགའ་ལ་མི་ཆགས་ཤིང་། །འཇིགས་པ་དག་ལ་འཇིགས་མེད་ལ། །དཔའ་བོ་དགའ་དང་འཇིགས་མཉམ་པ། །དེ་ལྟ་བུ་ནི་དགེ་སློང་ཡིན། །རྒ་དང་འཆི་བའི་དེ་ཉིད་ཤེས། །ལྷ་དང་ལྷ་མིན་ཕྱག་བྱས་པ། །སེམས་ཀྱི་རྣམ་པ་ཕན་ཚུན་ཤེས། །དེ་ལྟ་བུ་ནི་དགེ་སློང་ཡིན། །གང་ཞིག་སྣམ་སྦྱར་ལྷུང་བཟེད་ཀྱིས། །ཆོག་འཛིན་སོགས་འཇོག་མི་བྱེད་ལ། །འདོད་པ་ཆུང་ཞིང་ཚངས་པར་སྤྱོད། །དེ་ལྟ་བུ་ནི་དགེ་སློང་ཡིན། །དྲི་མེད་སྟན་གཅིག་ཟས་ཟ་ཞིང་། །ཞིམ་པའི་རོ་ལ་མི་ཆགས་ལ། །རྙེད་དང་བཀུར་སྟི་སྤངས་པ་དག །དེ་ལྟ་བུ་ནི་དགེ་སློང་ཡིན། །བཏང་སྙོམས་སྙིང་རྗེ་དག་ལ་དགའ། །འཆབ་དང་སྐྱོན་ནི་རྣམ་སྤངས་ཤིང་། །ཉེས་པའི་རྫས་ཀུན་ངེས་བསྲེགས་པ། །དེ་ལྟ་བུ་ནི་དགེ་སློང་ཡིན། །དགེ་སློང་དེ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་ཚོར་བ་དེ་དག་ཇི་ལྟ་བ་བཞིན་དུ་རྗེས་སུ་རྟོག་སྟེ། དེ་ཤེས་པ་ཤིན་ཏུ་ཞིབ་མོས་མིག་གི་འདུས་ཏེ་རེག་པ་ལས་བྱུང་བའི་ཚོར་བའི་དམིགས་པ་རྗེས་སུ་རྒྱུ་བ་མེད་པར་མཐོང་ངོ་། །དམིགས་པ་གཉིས་པས་ལྷན་ཅིག་འགག་ཅིང་འཇིག་པ་མཐོང་སྟེ། མིག་གི་འདུས་ཏེ་རེག་པ་ལས་བྱུང་བའི་ཚོར་བའི་དམིགས་པ་འདས་ནས་བདག་སྒྲ་ལ་དམིགས་པ་དང་བཅས་པའི་ཚོར་བ་སྡུག་པའམ་མི་སྡུག་པ་སྐྱེ་སྟེ། བདག་གི་སེམས་དེ་དང་ལྷན་ཅིག་གྱུར་པ་མེད་དོ་སྙམ་ནས། དེས་སེམས་ཀྱི་དམིགས་པ་དེ་བརྟན་པར་བྱས་ནས་འཛིན་པར་བྱེད་དོ། །རྣ་བའི་ཚོར་བ་སྒྲ་ལ་དམིགས་པ་དང་བཅས་པ་དེ་འགགས་ནས་སྣའི་ཚོར་བ་དྲི་ལ་དམིགས་པ་སྐྱེ་སྟེ། དེ་སྣའི་ཚོར་བ་
ལ་ཡང་རྟོག་པར་བྱེད་ཅིང་ཤིན་ཏུ་རྟོག་པར་བྱེད་དེ། བདག་གི་སྣའི་ཚོར་བ་དྲི་དང་བཅས་པ་དགེ་བའམ། མི་དགེ་བའམ། ལུང་དུ་བསྟན་པའམ། ལུང་དུ་མ་བསྟན་པ་སྐྱེ་སྟེ། བདག་གི་སྣའི་ཚོར་བ་དེའི་སེམས་གྱུར་པ་གལ་ཏེ་དེས་སེམས་གྱུར་པ་མཐོང་ན། དེས་ཡང་དམིགས་པ་དེ་ཉིད་ལ་གོམས་པར་བྱེད་ཅིང་སྤྱོད་ལ་འབད་ཅིང་བརྩོན་ཏེ་ལས་སུ་རུང་བར་བྱེད་ལ། དགེ་བའི་ཆོས་ཟག་པ་མེད་པས་སེམས་གོམས་པར་བྱེད་དོ། །གལ་ཏེ་མི་གཡོ་ན་ལྕེའི་དམིགས་པ་དགེ་བའམ། མི་དགེ་བའམ། ལུང་དུ་བསྟན་པའམ། ལུང་དུ་མ་བསྟན་པ་ལ་དམིགས་པར་བྱེད་དེ། དེ་དམིགས་པ་དེ་མངོན་སུམ་དུ་བྱས་ནས་བདེ་བ་དང་སྡུག་བསྔལ་དང་། སྡུག་བསྔལ་ཡང་མ་ཡིན་པའི་ཚོར་བ་ལ་ལྟ་བར་བྱེད་ཅིང་ཅི་འདིས་བདག་གི་སེམས་གྱུར་ཏམ་སྙམ་མོ། །གལ་ཏེ་རོ་ལ་དམིགས་པའི་ཚོར་བ་སྐྱེས་པས་སེམས་གྱུར་པ་མཐོང་ན། དེས་ཡང་སེམས་དམིགས་པའི་ཀ་བ་ལ་མོས་པའི་ཐག་པས་བཅིངས་ནས། ཇི་ལྟར་སེམས་འདི་ལྕེའི་ཚོར་བ་དང་བཅས་ཤིང་། སྲེད་པ་དང་བཅས་པས་མི་འཕྲོག་པར་བྱ་སྙམ་ནས་སྤྱོད་ཅིང་འབད་ལ་ནན་ཏན་དུ་བྱེད་དོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་པ། དེ་ནས་གཞན་ཡང་དགེ་སློང་དེ་ལུས་ཀྱི་རེག་བྱ་དང་བཅས་པའི་རེག་བྱའི་ཚོར་བ་དམིགས་པའི་ཀ་བ་ལ་བཅིངས་ནས་དགེ་བ་དང་། མི་དགེ་བ་དང་། ལུང་དུ་མ་བསྟན་པ་ལ་རྟོག་པར་བྱེད་དེ། གལ་ཏེ་དེ་རེག་བྱའི་ཚོར་བ་དེས་སེམས་གྱུར་པར་མཐོང་ན་ཡང་ཇི་ལྟར་དམིགས་པའི་ཀ་བ་ལ་བཅིངས་ནས་ལས་སུ་རུང་བར་བྱེད་ཅིང་གྱུར་པ་མེད་པ་དེ་ལྟར་བྱེད་དོ། །ཡང་དགེ་སློང་དེ་ཡིད་ལ་འོང་བའི་ཡིད་དང་ཤིན་ཏུ་འབྲེལ་པའི་ཆོས་ཀྱིས་ཚོར་བ་དགེ་བ་དང་། མི་དགེ་བ་དང་། ལུང་དུ་བསྟན་པ་དང་། ལུང་དུ་མ་བསྟན་པ་ལ་ལྟ་བར་བྱེད་དེ། གལ་ཏེ་ཚོར་བ་དེ་དག་གིས་ཡིད་གྱུར་ན་དེ་དམིགས་པའི་ཀ་བ་དེ་ལ་མོས་པའི་ཐག་པས་བཅིངས་ནས་ལས་སུ་རུང་བར་བྱེད་དེ། གྱུར་པ་མེད་པ་དེ་ལྟར་བྱེད་དོ། །ཡུལ་དྲུག་ལུས་ལ་ཡོད་པའི་ཚོར་བ་
ལ་ལྟ་བའི་དགེ་སློང་ཡང་དག་པའི་ཚོར་བ་འབྱུང་བ་དང་ཟད་པ་དེ་ཉིད་མཐོང་བ་ནི་གནས་ལྔ་པ་ལ་འཇུག་སྟེ། དེ་མིག་གི་འདུས་ཏེ་རེག་པ་ལས་བྱུང་བའི་ཚོར་བ་ཤེས་པའི་སྒྲོན་མས་ཚོར་བ་མྱོང་བར་བྱེད་པའི་ཚོར་བ་འདི་དག་གང་ཞིག་ཡིན་ཞེས་རྣམ་པར་རྟོག་པར་བྱེད་དོ། །དེ་ཡིད་ཀྱི་རྣམ་པར་ཤེས་པའི་ཚོར་བ་འདི་ནི་རྟེན་ཅིང་འབྲེལ་པར་འབྱུང་བ་ཡིན་ཏེ། ཡིད་དང་ཤིན་ཏུ་འབྲེལ་པར་མཐོང་ལ། བྱིས་པ་སོ་སོའི་སྐྱེ་བོ་ཐམས་ཅད་ནི་ཡིད་ཀྱི་རྣམ་པར་རྟོག་པས་འཕྲོགས་ཤིང་ཤིན་ཏུ་རྟོག་པའི་མེས་བསྲེགས་ཏེ། འདི་ལ་ཚོར་བ་པོ་དང་། བྱེད་པ་པོ་ནི་གང་ཡང་མེད་ཀྱི་རྒྱུ་རྐྱེན་དང་འབྲེལ་པའི་འདུ་བྱེད་ཀྱི་ཕུང་པོ་འདི་ཉིད་སྐྱེ། འདུ་བྱེད་ཀྱི་ཕུང་པོ་འདི་ཉིད་འགག་གོ་སྙམ་མོ། །དེ་མིག་གི་འདུས་ཏེ་རེག་པ་ལས་བྱུང་བའི་ཚོར་བ་ཇི་ལྟ་བ་བཞིན་རྗེས་སུ་མཐོང་ཞིང་རྗེས་སུ་འཇུག་པ་དེས་སེམས་མི་འཕྲོགས་ཤིང་རྣམ་པར་མི་གཡོ་ལ་སྐྱོན་དུ་འགྱུར་བར་མི་བྱེད་དེ་དྲི་མ་ཅན་དུ་མི་བྱེད་དོ། །ཡང་དགེ་སློང་དེ་རྣ་བའི་ཚོར་བ་ལ་རྟོག་པར་བྱེད་དེ། ཚོར་བ་རྗེས་སུ་མྱོང་ཞིང་རིག་པའི་ཚོར་བ་འདི་གང་ཡིན་སྙམ་མོ། །དེ་རྣ་བའི་ཚོར་བ་འདི་ཡིད་ཀྱི་རྣམ་པར་ཤེས་པ་དང་ཤིན་ཏུ་འབྲེལ་པར་མཐོང་སྟེ། ཡིད་དང་ཤིན་ཏུ་འབྲེལ་པ་དེ་ལ་གནས་པར་ཟད་ཀྱི་འདི་ལ་བྱེད་པ་པོ་དང་ཚོར་བ་པོ་མེད་ཅིང་རྣ་བའི་ཚོར་བ་རྟེན་ཅིང་འབྲེལ་པར་འབྱུང་བ་ལ་བྱེད་པ་པོ་དང་། ཚོར་བ་པོ་མེད་དེ། འདུ་བྱེད་ཀྱི་ཕུང་པོ་སྟོང་པ་འདི་རྒྱུ་རྐྱེན་གྱི་དབང་གིས་སྐྱེ་ཞིང་འགག་གོ་སྙམ་མོ། །ཡང་དགེ་སློང་དེ་སྣའི་ཚོར་བ་ལ་རྟོག་པར་བྱེད་དེ། ཚོར་བ་འདི་མྱོང་ཞིང་རིག་པ་གང་ཞིག་ཡིན་སྙམ་མོ། །དེ་ཚོར་བ་ཡིད་ཀྱི་རྣམ་པར་ཤེས་པ་དང་ཤིན་ཏུ་འབྲེལ་པར་མཐོང་སྟེ། དེ་ལ་དམིགས་པ་དེ་ལ་གནས་པ་དེ་རྒྱུ་དང་རྐྱེན་ལས་བྱུང་ཞིང་རྗེས་སུ་མྱོང་བའི་མཚན་ཉིད་ཡིན་གྱི་འདུ་བྱེད་ཀྱི་ཕུང་པོ་སྟོང་པ་འདི་བྱེད་པ་པོས་གནས་སུ་མ་བྱས་ཤིང་ཚོར་བ་པོས་གནས་སུ་མ་བྱས་པ་རྒྱུན་ཆགས་པར་འཇུག་པ་ཡིན་ནོ་སྙམ་སྟེ། དེ་སྣའི་ཚོར་བ་རྟོགས་ནས་བྱེད་པ་པོ་དང་ཚོར་བ་པོ་མེད་ཅིང་དོན་གྱི་བར་དུ་གཅོད་པར་གྱུར་པ་ནི་མེད་དོ་སྙམ་མོ། །ཡང་དགེ་སློང་དེ་ལྕེའི་
ཚོར་བ་ལ་རྣམ་པར་རྟོག་སྟེ། ལྕེའི་ཚོར་བ་འདི་མྱོང་ཞིང་རིག་པ་གང་ཡིན་སྙམ་མོ། །དེ་ལྕེའི་ཚོར་བ་འདི་ཡིད་ཀྱི་རྣམ་པར་ཤེས་པ་དང་ཤིན་ཏུ་འབྲེལ་པར་མཐོང་སྟེ། དེ་ལ་གནས་པ་དེ་དང་འབྲེལ་པ་དེ་ལ་དམིགས་པ་དེའི་རྒྱུ་ལས་བྱུང་ཞིང་། དེ་ལ་བརྟེན་པ་ཡིན་གྱི། འདི་ལ་བྱེད་པ་པོ་དང་། ཚོར་བ་པོ་དང་། དོན་གྱི་བར་དུ་གཅོད་པར་འགྱུར་བ་མེད་དེ། འདུ་བྱེད་ཀྱི་ཕུང་པོ་འདིའི་རྒྱུ་དང་རྐྱེན་གྱི་དབང་གིས་སྐྱེའོ་སྙམ་མོ། །ཡང་དགེ་སློང་དེ་ལུས་ཀྱི་རེག་བྱའི་ཚོར་བ་ལ་རྟོག་པར་བྱེད་དེ། ལུས་ཀྱི་ཚོར་བ་མྱོང་ཞིང་རིག་པ་འདི་གང་ཡིན་སྙམ་མོ། །དེ་ལུས་ཀྱི་ཚོར་བ་འདི་ཡིད་ཀྱི་རྣམ་པར་ཤེས་པ་དང་ཤིན་ཏུ་འབྲེལ་པར་མཐོང་སྟེ། འདི་ལ་བྱེད་པ་པོའམ་ཚོར་བ་པོ་དོན་གྱི་བར་དུ་གཅོད་པར་འགྱུར་བ་ནི་མེད་དེ། འདུ་བྱེད་ཀྱི་ཕུང་པོ་སྟོང་པ་འདི་རྒྱུ་དང་རྐྱེན་གྱི་དབང་གིས་འཇུག་གོ་སྙམ་མོ། །ཡང་དགེ་སློང་དེ་ཡིད་ཀྱི་ཚོར་བ་ལ་རྣམ་པར་རྟོག་པར་བྱེད་དེ། ཡིད་ཀྱི་ཚོར་བ་མྱོང་ཞིང་རིག་པ་འདི་གང་ཡིན་སྙམ་མོ། །དེ་ཡིད་དང་ཆོས་ལ་བརྟེན་ནས་ཡིད་ཀྱི་རྣམ་པར་ཤེས་པ་སྐྱེ་བར་མཐོང་སྟེ། གསུམ་འདུས་པའི་རེག་པ་རེག་པ་དང་ལྷན་ཅིག་བྱུང་བའི་ཚོར་བ། དཔེར་ན་རྫས་དྲི་ཞིམ་པ་དུ་མ་བསྡུས་པ་ལས་སྤོས་བཟང་པོ་འབྱུང་ངོ་། །སྤོས་དེའི་རྒྱུ་མི་འབྱུང་བ་གཅིག་ཀྱང་མེད་པ་དེ་བཞིན་དུ་རྒྱུ་དང་རྐྱེན་འདུས་པ་ལས་ཚོར་བ་ཐམས་ཅད་འབྱུང་གི །བྱེད་པ་པོས་གནས་སུ་མ་བྱས་ཤིང་ཚོར་བ་པོས་གནས་སུ་མ་བྱས་པ་ཡིན་ནོ། །དཔེར་ན་ལོ་མ་ལ་ཡང་བརྟེན། ཟེ་བ་ལ་ཡང་བརྟེན། སྡོང་བུ་ལ་ཡང་བརྟེན། ཟེ་འབྲུ་ལ་ཡང་བརྟེན་ནས་པད་མ་ཞེས་བྱ་བའི་མེ་ཏོག་འབྱུང་སྟེ། པད་མ་དེའི་རྒྱུ་གཅིག་ཀྱང་མེད་དོ། །དེ་བཞིན་དུ་དམིགས་པ་ལ་ཡང་བརྟེན། ནམ་མཁའ་ལ་ཡང་བརྟེན། ཡིད་ལ་བྱེད་པ་ལ་ཡང་བརྟེན། སྣང་བ་ལ་ཡང་བརྟེན་ནས་མིག་གི་འདུས་ཏེ་རེག་པ་ལས་བྱུང་བའི་ཚོར་བ་འབྱུང་སྟེ། མིག་ལས་སྐྱེས་པ། མིག་ལ་བརྟེན་པའི་ཚོར་བ་དེ་རིགས་གཅིག་པ་མ་ཡིན། རྫས་གཅིག་པ་མ་ཡིན། འབྱུང་བ་གཅིག་
པ་མ་ཡིན་ཞིང་ཐེར་ཟུག་ཏུ་གནས་པ་མ་ཡིན་ལ་སྤྲུལ་པ་ལྟ་བུ་ཡིན་ནོ་སྙམ་མོ། །དེ་ཇི་ལྟ་ཇི་ལྟར་དེ་ཉིད་ཚོལ་བའི་དགེ་སློང་དེ་ནི་དེ་ལྟ་དེ་ལྟར་དེའི་ཆོས་དཀར་པོ་འབྱུང་བར་འགྱུར་ཏེ། དཔེར་ན་བུ་རམ་ཤིང་སྣོད་ཀྱི་ནང་དུ་བཅུག་ནས་མེས་བསྐོལ་བ་དེས་དེ་དང་པོ་ཞུ་ཞིང་དྲི་མར་འགྱུར་བ་ནི་བུ་རམ་དྲི་མ་ཅན་ཞེས་བྱའོ། །ལན་གཉིས་སུ་བསྐོལ་བ་དང་། དཀར་བར་འགྱུར་ཞིང་བུ་རམ་དུ་ཤེས་སོ། །ལན་གསུམ་པ་ལ་ཤིན་ཏུ་དཀར་བར་འགྱུར་ཏེ། དེ་ཇི་ལྟ་ཇི་ལྟར་བུ་རམ་ཤིང་བསྐོལ་བ་དེ་ལྟ་དེ་ལྟར་ཤིན་ཏུ་དྲི་མ་དང་བྲལ་བར་འགྱུར་བ་དེ་བཞིན་དུ་དགེ་སློང་དམིགས་པའི་སྣོད་དུ་ཡེ་ཤེས་མེ་ལྟ་བུས་སེམས་ཀྱི་རྒྱུན་བུ་རམ་ཤིང་ལྟ་བུ་ཡོངས་སུ་སྐོལ་བར་བྱེད་དོ། །དེའི་དབུ་བ་ལྟ་བུ་བསམ་གཏན་དང་པོ་ཐོབ་པར་འགྱུར་ཞིང་དེའི་དཀར་བ་ལྟ་བུ་བསམ་གཏན་གཉིས་པ་ཐོབ་པར་འགྱུར་ཏེ། དེ་བཞིན་དུ་ཇི་ལྟ་ཇི་ལྟར་དགེ་སློང་གི་སེམས་ཀྱི་རྒྱུན་ཡེ་ཤེས་ཀྱི་མེས་སྐོལ་བར་བྱེད་པ་དེ་ལྟ་དེ་ལྟར་ཟག་པ་མེད་པའི་ཆོས་ཤིན་ཏུ་དཀར་ཞིང་ཤིན་ཏུ་དྲི་མ་མེད་ལ་ཤིན་ཏུ་སྐྱོན་མེད་པར་འགྱུར་ཏེ། ལས་ཕྱིར་ཕྱོགས་པ་དྲི་མ་དང་བྲལ་ཞིང་དཀར་ལ་དག་པ་སྐྱེ་བར་འགྱུར་རོ། །གཞན་ཡང་དགེ་སློང་དེ་ཚོར་བ་དེ་དག་ལ་ཤིན་ཏུ་རྣམ་པ་ཕྲ་བ་གཞན་གྱིས་རྟོག་པར་བྱེད་དེ། སེམས་ཅན་ཆེ་གེ་མོ་ཞིག་གི་ཚོར་བ་མིག་གི་འདུས་ཏེ་རེག་པ་ལས་བྱུང་བ་ཕྲ་བའམ་རགས་པ་དྲི་མ་ཅན་གཏི་མུག་དང་ལྡན་པ་སྐྱེས་པ་དེ། ཚོར་བ་རགས་པ་ཆེ་གེ་མོ་ཞིག་གིས་བསལ་ཅིང་སྤངས་ཏེ། ལྷག་མ་དང་བཅས་པར་བྱས་སོ། །རྣ་བའི་ཚོར་བ་དང་། སྣའི་ཚོར་བ་དང་། ལྕེའི་ཚོར་བ་དང་། ལུས་ཀྱི་ཚོར་བ་ཡང་དེ་བཞིན་ནོ། །དགེ་སློང་དེ་དེ་ལྟར་བརྩོན་ཞིང་སྤྲོ་ལ་བདུད་ཀྱི་སྡེ་འཇོམས་པ་ན། ས་བླའི་གནོད་སྦྱིན་དང་། བར་སྣང་ལ་སྤྱོད་པའི་གནོད་སྦྱིན་དེ་དག་གིས་ཀྱང་རྒྱལ་པོ་ཆེན་པོ་བཞི་ལ་མངོན་པར་བསྙད་དོ། །ས་བླའི་གནོད་སྦྱིན་དང་། བར་སྣང་ལ་སྤྱོད་པའི་གནོད་སྦྱིན་དེ་དག་དང་། རྒྱལ་པོ་ཆེན་པོ་བཞི་པོ་དེ་དག་གིས་ཀྱང་རྒྱལ་ཆེན་བཞིའི་ལྷ་རྣམས་ལ་མངོན་པར་བསྙད་དོ། །ས་བླའི་གནོད་སྦྱིན་དེ་དག་དང་། བར་སྣང་ལ་སྤྱོད་པའི་གནོད་སྦྱིན་དེ་དག་དང་། རྒྱལ་
པོ་ཆེན་པོ་བཞི་པོ་དེ་དག་དང་། རྒྱལ་ཆེན་བཞིའི་ལྷ་དེ་དག་གིས་ཀྱང་ལྷའི་དབང་པོ་བརྒྱ་བྱིན་ལ་མངོན་པར་བསྙད་དོ། །ལྷའི་དབང་པོ་བརྒྱ་བྱིན་ཡང་གླང་པོ་ཆེ་ས་སྲུང་གི་བུ་ལ་ཞོན་ནས་ཡིད་དགའ་བས་འཐབ་བྲལ་གྱི་ལྷ་རྣམས་ལ་མངོན་པར་བསྙད་དེ། སྔ་མ་བཞིན་ནོ། །འཐབ་བྲལ་གྱི་ལྷ་དེ་དག་ཀྱང་བརྒྱ་བྱིན་ལ་དགའ་ནས་རིན་པོ་ཆེ་སྣ་ཚོགས་ཐོགས་ཤིང་ལུས་ལྷའི་ཕྲེང་བ་དང་། སྤོས་རྣམ་པ་སྣ་ཚོགས་ཀྱིས་བརྒྱན་པ། སྒྲ་དང་། རེག་བྱ་དང་། གཟུགས་དང་། དྲི་ཡིད་དུ་འོང་ཞིང་བདེ་བ་དཔེ་མེད་པ། རབ་ཏུ་དགའ་བའི་ཤུགས་ཀྱིས་དགའ་ལྡན་གྱི་ལྷའི་རིས་ན་རིན་པོ་ཆེ་སྣ་བདུན་ལས་བྱས་པའི་ཁང་པ་དང་། གཞལ་མེད་ཁང་དང་། གྲོང་ཁྱེར་རྣམ་པ་སྣ་ཚོགས་ཀྱིས་བརྒྱན་ཅིང་དཔག་ཚད་སྟོང་ཕྲག་བཞི་བཅུ་ཡོད་པ། ཡིད་ཀྱིས་བརྟགས་པ་ཞེས་བྱ་བ་དེར་བྱང་ཆུབ་སེམས་དཔའི་ཁང་བཟངས་དཔག་ཚད་ཁྲི་ཡོད་པ། ཟག་པ་མེད་པར་འགྲོ་བ་ཞེས་བྱ་བ་དེ་ན་བཅོམ་ལྡན་འདས་བྱམས་པ་བྱང་ཆུབ་སེམས་དཔའ་ལྔ་བརྒྱ་དང་ཐབས་ཅིག་ཏུ་བཞུགས་པ་དེ་ལ་འཐབ་བྲལ་གྱི་ལྷ་དག་ཡིད་རབ་ཏུ་དགའ་ནས་གོས་ཕྱོགས་གཅིག་ཏུ་བགོས་ཏེ། པུས་མོ་ས་ལ་བཙུགས་མགོ་བཏུད་ཐལ་མོ་སྦྱར་ནས་གསོལ་པ། ལྷ་འདི་ལྟར་འཛམ་བུའི་གླིང་ན་ལས་ཀྱི་ས་ལ་གནས་པ། གྲོང་ཆེ་གེ་མོ་ཞིག་དང་། གྲོང་རྡལ་མང་གེ་མོ་ཞིག་དང་། ཡུལ་ག་གེ་མོ་ཞིག་ཏུ་རིགས་ཆེ་གེ་མོ་ཞིག་ལས་རིགས་ཀྱི་བུ་ཆེ་གེ་མོ་ཞིག་སྐྲ་དང་། ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་སྤྱོད་པ་ལ་ནན་ཏན་བགྱིད་ཅིང་བླ་མ་ལ་བསྙེན་བཀུར་བགྱིད་པ། ཟག་པ་མེད་པའི་ཆོས་ཀྱི་དེ་ཉིད་ཚོལ་ཞིང་ཚོར་བའི་དེ་ཉིད་མཐོང་བ་ཞེས་བགྱི་བ་ས་གཞན་བཞི་པ་ལ་ཞུགས་ནས་བདུད་ཀྱི་ཕྱོགས་འཇོམས་པར་བགྱིད་ཅིང་དམ་པའི་ཆོས་ཀྱི་ཟམ་པ་བརྟན་པར་བགྱིད། ཆོས་དཀར་པོ་རབ་ཏུ་སྟོན་པར་བགྱིད་ཅིང་། བདུད་ཀྱི་ཕྱོགས་སྨོད་པར་བགྱིད་ལ། ལྷའི་ཕྱོགས་འཕེལ་བར་བགྱིད་པ་དེ་བདག་ཅག་གིས་ལྷ་རྣམས་ལ་མངོན་པར་གསོལ་ལོ། །འཐབ་བྲལ་གྱི་ལྷ་
རྣམས་ལ་བྱམས་པས་ལྷའི་ཕྱོགས་འཕེལ་བར་གྱུར་པ་དེ་ཐོས་ནས། ཀྱེ་ལྷ་དག་འདི་ལྟར་གང་བདུད་ཀྱི་ཕྱོགས་དམའ་བར་བྱེད་ཅིང་། དམ་པའི་ཆོས་ཀྱི་ཕྱོགས་མངོན་པར་མཐོ་བར་བྱེད་ལ། ཉོན་མོངས་པ་རྣམས་ལས་རབ་ཏུ་གྲོལ་བར་བྱེད་ཅིང་བདུད་ཀྱི་སྡེ་རྣམ་པར་འཇོམས་པར་བྱེད་པ་ལ་བདག་རབ་ཏུ་དགའོ་ཞེས་གཏམ་དུ་བྱེད་དོ། །གཞན་ཡང་དགེ་སློང་དེས་ཚོར་བའི་ཚོགས་དྲུག་མདོར་བསྡུས་པ་ཇི་ལྟ་བ་བཞིན་མཐོང་ནས་ཚོར་བའི་ཕུང་པོའི་སའི་ཆོས་ས་གཞན་ལྔ་པ་ལ་ཇི་ལྟར་འཇུག་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པས་བརྟགས་ན། ཡང་དགེ་སློང་དེ་ཚོར་བའི་དེ་ཉིད་མཐོང་ཞིང་ཚོར་བའི་ཚོགས་དྲུག་གི་ལས་ཀྱི་མཐར་བྱས་ལ། འདུ་ཤེས་ཀྱི་ཕུང་པོ་ཡང་དག་པར་རབ་ཏུ་རྣམ་པར་འབྱེད་ཅིང་མཚན་མར་བྱེད་དོ། །ས་གཞན་འདུ་ཤེས་དང་བཅས་པ་གང་ཡིན་སྙམ་ན། བདག་ཆོས་དཀར་པོ་དབེན་པ་ལ་སྤྱོད་ཅིང་ཕན་པ་དང་མི་ཕན་པ་ལས་དབེན་པར་སྤྱོད་པའི་འདུ་ཤེས་ཀྱིས་འདུ་ཤེས་སུ་བྱེད་ཅིང་། དེ་ཡང་དག་པར་སེམས་པར་བྱེད་ལ། དེ་ཆོས་དཀར་པོ་མཚན་མར་བྱེད་པ་ནི་འདི་ལྟར་ཐོག་མ་ཉིད་དུ་ཆོས་རྣམས་རབ་ཏུ་རྣམ་པར་འབྱེད་དེ། དམིགས་པ་བསྟན་དུ་ཡོད་ཅིང་ཐོགས་པ་དང་བཅས་པ་དང་། བསྟན་དུ་མེད་ཅིང་ཐོགས་པའི་འདུ་ཤེས་ཇི་ལྟར་སྐྱེ་བར་འགྱུར་བ་གང་ཡིན་ཞིག་གུ་སྙམ་ནས། དེ་ཤིན་ཏུ་དབེན་པས་འདུ་ཤེས་དེ་ལ་རྟོག་པར་བྱེད་ཅིང་དེ་འདུ་ཤེས་དེས་གཟུགས་རྣམ་པ་བཅུ་གཅིག་ལ་མཚན་མར་དམིགས་ཏེ། འདི་ལྟ་སྟེ། རིང་བ་དང་། ཐུང་བ་དང་། གྲུ་བཞི་དང་། ཟླུམ་པོ་དང་། ཟུར་གསུམ་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀའོ། །དེ་ལ་འདུ་ཤེས་ཀྱི་མཚན་མས་རིང་པོར་བྱེད་པ་ནི། ཀྱེ་མ་བྱིས་པ་བློ་ཞན་པ་རྣམས་ཀྱིས་ཐོག་མ་དང་ཐ་མ་མེད་པའི་སྐྱེ་བ་དང་། འཆི་བ་དང་། ལས་དང་། འབྲས་བུ་དང་། འཆི་འཕོ་དང་། འབྱུང་བ་དང་། སྡུག་པ་དང་། བྲལ་བ་དང་། གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། དུབ་
པ་དང་། ན་བ་དང་། གཞན་གྱིས་བསྒོ་བ་དང་། བརྙས་པ་དང་། བྲན་གྱི་ངོ་བོ་དང་། གཅིག་ལ་གཅིག་ཟ་བ་དང་། སོགས་པར་བྱེད་ཅིང་དོན་མེད་པར་གྱུར་པ་དཔག་ཏུ་མེད་པ་འདི་ཀུན་ནི་བཟོད་པར་དཀའ་བ་ཡིན་ཏེ། ལུས་དང་། ངག་དང་། ཡིད་ཀྱིས་ཀུན་ནས་བསླངས་པའི་ཉེས་པར་བྱས་པའི་ལས་ཀྱི་བྱེ་བྲག་བྱེ་བ་ཁྲག་ཁྲིག་བརྒྱ་སྟོང་ཕྲག་དཔག་ཏུ་མེད་པ་དག་གིས་བྱིས་པ་སོ་སོའི་སྐྱེ་བོ་དག་ཡང་དང་ཡང་དུ་ཁྱབ་པར་བྱས་ཤིང་རྣམ་པར་གཙེས་པའི་འཁོར་བ་འདི་ནི་རིང་ངོ་སྙམ་མོ། །དེ་ལ་མིར་གྱུར་པ་རྣམས་ལ་འདོད་པས་ཉོན་མོངས་ཤིང་གཅིག་ལ་གཅིག་འདྲིད་པ་དང་། གཞལ་བླུགས་དང་། ཤགས་དང་། ཚོང་པ་དང་། རྒྱལ་པོའི་ཕོ་བྲང་དུ་སྟེན་པ་དང་། མཚོ་དང་། ངམ་གྲོག་དང་། ཡུལ་གཞན་དུ་འགྲོ་བ་དང་། འཐབ་མོ་དང་། ཞིང་རྨེད་པ་དང་། ཕྱུགས་སྐྱོང་བ་དང་། ཀླ་ཀློར་སྐྱེ་བ་དང་། ལོག་པར་ལྟ་བ་དང་། དབང་པོ་མ་ཚང་བ་དང་། དམ་པའི་ཆོས་དང་བྲལ་བ་དང་། སངས་རྒྱས་འབྱུང་བ་དང་བྲལ་བ་དང་། རྐྱེན་མ་ཚང་བ་དང་། མི་ཁོམ་པ་དང་། ཆང་འཐུང་བ་དང་། མ་བྱིན་པར་ལེན་པ་དང་། བརྫུན་དུ་སྨྲ་བ་དང་། འདོད་པས་ལོག་པར་གཡེམ་པ་དང་། བརྣབ་སེམས་དང་། གནོད་སེམས་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་ལ་ཡིད་རྣམ་པར་ཞེན་པའི་འཁོར་བ་འདི་ནི་རིང་ངོ་སྙམ་དུ་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །ལྷ་རྣམས་ཀྱི་འཁོར་བ་ཡང་རིང་བར་འདུ་ཤེས་ཀྱི་མཚན་མ་ལ་དམིགས་པར་བྱེད་དེ། ཡུལ་སྡུག་པ། སྒྲ་དང་། རོ་དང་། གཟུགས་དང་། དྲི་ལ་རབ་ཏུ་ཆགས་ཤིང་། འདོད་ཆགས་དང་། ཞེ་སྡང་དང་། གཏི་མུག་དང་། བག་མེད་པ་དང་། བུད་མེད་ཀྱི་ཉོན་མོངས་པ་དང་། དགའ་བའི་ཚལ་དང་། ཡོངས་སུ་འདུ་དང་། རྣམ་པར་མཛེས་པ་དང་། ཤིང་རྟ་སྣ་ཚོགས་དང་། ཚལ་དང་། ནགས་ཚལ་དང་། ལྟེང་ཀ་དང་། དལ་གྱིས་འབབ་པ་དང་། ཀུན་ཏུ་རྩེ་བ་དང་། མེ་ཏོག་དང་། སྤོས་དང་། བདུད་རྩིའི་རོ་དང་
རྣམ་པ་སྣ་ཚོགས་སུ་རྩེ་བ་དང་། ཁ་ཟས་དང་། གནས་ཁང་ལ་རབ་ཏུ་ཆགས་པ་དང་། ཙན་དན་དང་། ལྷའི་མེ་ཏོག་ཕྲེང་དང་། ཕྱེ་མ་དང་། བྱུག་པ་དང་། མེ་ཏོག་མན་དཱ་ར་བ་དང་། ལྷའི་རོལ་མོ་དང་། ལྷའི་གླུ་དབྱངས་ལ་སེམས་རབ་ཏུ་ཆགས་ཤིང་། དམ་པའི་ཆོས་ལ་ཁ་ཕྱིར་ཕྱོགས་པའི་ལྷ་རྣམས་ཀྱི་འཁོར་བ་ནི་རིང་ངོ་སྙམ་མོ། །ཡི་དགས་རྣམས་ཀྱི་འཁོར་བ་ཡང་རིང་བར་འདུ་ཤེས་ཀྱི་མཚན་མ་ལ་དམིགས་པར་བྱེད་དེ། ཉེས་པར་བྱས་པའི་ལས་ཀྱིས་འགྲོ་བ་བཀྲེས་པ་དང་། སྐོམ་པ་དང་། དུབ་པ་དང་། ཉམ་ཆུང་བ་དང་། མེའི་ཆར་རབ་ཏུ་འབབ་པ་དང་། མིད་པ་ཁབ་ཙམ་ལ་ལྟོ་རི་ཙམ་པ་དང་། ལྟོ་རྒལ་བ་ལ་ཞར་བ་དང་། ཕྲག་དོག་དང་། སེར་སྣ་སྐྱེས་ཤིང་གཅིག་ལ་གཅིག་མཚོན་གྱིས་འདེབས་པ་དང་། མུན་ནག་ཏུ་འཇུག་ཅིང་གཡང་སར་རབ་ཏུ་ལྟུང་བ་དང་། ཆུ་བོ་དང་། ལྟེང་ཀ་དང་། འབབ་ཆུའི་དངོ་དང་། མཚོར་རྒྱུག་པ་དང་། གཤིན་རྗེའི་མིས་རལ་གྲི་དང་། དབྱིག་པ་དང་། གཞོར་དང་། མདུང་གིས་བཏབ་ཅིང་སྡུག་བསྔལ་བ། སྐྱུགས་པ་དང་། ངར་སྣབས་ཀྱི་ཁ་ཟས་ལོ་འབུམ་ཕྲག་དུ་མར་ཟ་བ། སྡུག་བསྔལ་རྣམ་པ་སྣ་ཚོགས་ཀྱིས་མཆི་མ་རབ་ཏུ་འབྱུང་ཞིང་བཟོད་པར་དཀའ་བ། ཡུལ་ངན་བྱུང་ཞིང་གདོང་དང་ལུས་སྐྲས་ཁེབས་པ། ལུས་ལ་སྲིན་བུ་འབུམ་ཞུགས་པ། ལུས་ནད་ཐམས་ཅད་འབྱུང་བའི་གཞིར་གྱུར་ཅིང་ཐེབས་པ། འཁོར་བར་ཡུན་རིང་དུ་ཞུགས་པ། ལྕགས་ཀྱི་བྱ་རོག་མཆུ་འབར་བ་དག་གིས་མིག་ཕྱུང་བ། ལུས་ཤིང་བསྲེགས་པ་འདྲ་ཞིང་ཕ་རོལ་གྱིས་གནོན་པ། གཅིག་ལ་གཅིག་ཟ་བ། དགོན་པ་དཔག་ཚད་བྱེ་བ་བརྒྱ་ཕྲག་སུམ་ཅུ་རྩ་དྲུག་ཏུ་ཞུགས་པ། མགོན་མེད་ཅིང་ཟས་དང་། སྐོམ་གྱི་མེས་ལུས་བསྲེགས་པ། མུན་ནག་ཏུ་ཞུགས་པའི་ཡི་དགས་དག་ནི་དམ་པའི་ཆོས་མཉན་པ་ལ་ཁ་ཕྱིར་ཕྱོགས་པ་ཡིན་ཏེ། ལོག་པར་ལྟ་བས་བསླུས་པ་རྣམས་ཀྱི་འཁོར་བ་ནི་རིང་ངོ་སྙམ་དུ་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །གཅིག་
ལ་གཅིག་ཟ་ཞིང་ཁོང་དུ་ཆུད་པར་བྱ་བ་དང་། ཁོང་དུ་ཆུད་པར་བྱ་བ་མ་ཡིན་པ་ཤེས་པ་ལ་ཁ་ཕྱིར་ཕྱོགས་པ་རྣམས་ནི་ཆུ་དང་ཆུ་ལ་སྤྱོད་པ་རྣམས་རྟག་ཏུ་སྐོམ་པས་གདུངས་ཤིང་སྙིང་ཡོངས་སུ་བསྐམས་པ་དང་། གཟུང་བས་འཇིགས་པ་ཆུ་སྲིན་བྱིས་པ་གསོད་དང་། ཆགས་བརྐམ་དང་། སྲམ་དང་། རུས་སྦལ་དང་། ཉ་དང་། ཉ་མིད་དང་། ཉ་མིད་མིད་དང་། ཆུ་སྲིན་ཀུམ་བྷི་ར་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། ཆུ་སྲིན་ཉ་ཕྱིས་དང་། ཆུ་སྲིན་དུང་ལ་སོགས་པ་ཆེན་པོ་དང་། ཆུང་ངུ་རྟག་ཏུ་གཅིག་ལ་གཅིག་ཟ་བ་དང་། དེ་ལས་གཞན་པ་རྒྱས་བཤོར་ཞིང་བཟུང་བས་འཇིགས་པ་རྣམས་དང་། དེ་བཞིན་དུ་སྐམ་ས་ལ་རྒྱུ་བ་རི་དགས་དང་། མ་ཧེ་དང་། ཕག་རྒོད་དང་། གླང་པོ་དང་། ཁྱུ་མཆོག་དང་། རྟ་དང་། བོང་བུ་དང་། བ་ལང་དང་། རི་དགས་རུ་རུ་དང་། དྲེད་མོ་དང་། བསེ་ལ་སོགས་པ་སྡུག་བསྔལ་སྣ་ཚོགས་ཀྱིས་འཆིང་ཞིང་མཚོན་གྱིས་གསོད་པ་དང་། ནད་དང་། རྒ་བ་དང་། འཆི་བས་གཅིག་ལ་གཅིག་གནོད་པ་བརྒྱ་ཕྲག་སྟོང་གིས་ཉེན་པ་རྣམས་དང་། དེ་བཞིན་དུ་ནམ་མཁའ་ལ་རྒྱུ་བ་བྱ་རོག་དང་། འུག་པ་དང་། ངང་པ་དང་། རྨ་བྱ་དང་། ཁྱིམ་བྱ་དང་། བྱ་ཀོམ་ཥྚི་ཀ་དང་། ཕུག་རོན་དང་། བྱ་དཾ་ཏྱུ་ཧ་དང་། བྱ་ཙ་ཤ་དང་། བྱ་འདབ་བརྒྱ་དང་། བྱ་ཚ་ཡ་བ་ལིན་དང་། བྱ་ཤང་ཤང་ཏེའུ་དང་། བྱ་སན་ཏ་པ་ལ་སོགས་པ་གཞན་ཡང་བྱའི་རིགས་དག་གསོད་པ་དང་། འཆིང་བ་དང་། བཀྲེས་པ་དང་། སྐོམ་པ་དང་། གཅིག་ལ་གཅིག་ཟ་བ་དང་། གྲང་བ་དང་། ཚ་བས་གནོད་པ་རྣམས་དང་། གནས་གསུམ་ལ་གནས་པ་སྐམ་ས་དང་། ཆུ་དང་བར་སྣང་ལ་རྒྱུ་བའི་དུད་འགྲོར་གྱུར་པ་རྣམས་ལ་མི་བཟོད་ཅིང་སོ་སོའི་འཇིགས་པ་རྣམས་ཀྱི་འཁོར་བ་ནི་རིང་བར་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །དེ་བཞིན་དུ་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་
ཏུ་ཚ་བ་དང་། མནར་མེད་པ་རྣམས་ཀྱི་མི་བཟོད་པ། བསམ་པ་ཤིན་ཏུ་ངན་པ་རྣམས་ཀྱི་སོ་སོའི་འཇིགས་པ་བརྒྱ་སྟོང་དུ་མ་ཡོད་པ། མེ་དང་། མཚོན་དང་། གཡང་ས་དང་། བརྐྱལ་པའི་ཆུ་བོ་དམར་པོའི་ནང་དུ་ལུས་རབ་ཏུ་འཇུག་པ། ལོ་མའི་རལ་གྲིའི་ནང་དུ་འཇུག་ཅིང་འདབ་མས་སོ་སོར་ཉམས་སུ་མྱོང་བ། བ་ཚྭའི་ཆུའི་ནང་དུ་འཇུག་ཅིང་ས་རབ་ཏུ་འབར་བ་ལ་འགྲོ་བ། སྲེག་པར་བྱེད་པའི་པད་མ་མི་བཟད་པ། གནོད་པར་བྱེད་པ། བཟོད་པར་དཀའ་བ་རྣམ་པ་དུ་མ་མཚུངས་པ་མེད་པའི་སེམས་ཅན་དམྱལ་བ་རྣམས་ཀྱི་འཁོར་བ་ནི་རིང་བར་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །དགེ་སློང་དེ་འདུ་ཤེས་ཀྱི་ཕུང་པོ་རབ་ཏུ་རྣམ་པར་དཔྱོད་པ་ལ་བསྟན་དུ་ཡོད་ཅིང་། ཐོགས་པ་དང་བཅས་པ་ཡུན་རིང་པོའི་གཟུགས་འཕགས་པའི་བདེན་པ་བཞི་ལ་ལས་དང་འབྲས་བུའི་རྒྱུའི་གཞི་དམིགས་པ་སེམས་ཅན་རྣམ་པ་སྣ་ཚོགས་དཔག་ཚད་བརྒྱ་ཕྲག་སྟོང་གི་འགྲོ་བར་སོང་བ་རྣམས་ལ་ལྟ་བར་བྱེད་ཅིང་། མཚན་མར་བྱེད་ལ། རྣམ་པར་འབྱེད་པར་བྱེད། གཞི་ལ་དམིགས་པའི་འདུ་ཤེས་རབ་ཏུ་གསལ་བས་མཐོང་སྟེ། འཁོར་བ་ལ་ཡིད་འབྱུང་བར་བྱེད་དོ། །གཞན་ཡང་ཇི་ལྟར་ན་དགེ་སློང་དེ་ཐུང་ངུ་རྣམ་པར་འབྱེད་ཅིང་མངོན་སུམ་དུ་བྱེད་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན། དགེ་སློང་དེ་བདུད་ཀྱི་སྡེ་རྣམ་པར་འཇིག་པར་བྱེད་དེ། ཇི་ལྟར་ཐུང་བ་རྣམ་པར་འབྱེད་ཅེ་ན། འཁོར་བ་ཐུང་བའི་བརྟུལ་ཞུགས་དང་། སྡོམ་པ་དང་། སྦྱིན་པ་དང་། ཚུལ་ཁྲིམས་དང་། ཆོག་ཤེས་པ་དང་། བླ་མ་ལ་གུས་པ་དང་། ཡིད་དྲང་བ་དང་། ཡང་དག་པའི་ལྟ་བ་དང་། ཕ་མ་ལ་གུས་པ་དང་། སངས་རྒྱས་ལ་ཆོས་ཉན་ཅིང་ལྟ་ལ་བསྙེན་བཀུར་བྱེད་པ་དང་། གཡོ་བྱེད་པ་དང་། གཞལ་བླུགས་དང་། འདྲིད་པ་དང་། དགེ་བའི་བཤེས་གཉེན་གྱི་སྤྱོད་པ་མ་ཡིན་པ་སྤོང་བ་དང་། ཕྱུག་པ་དང་། ཡིད་དྲང་བ་དང་། སྙིང་བརྩེ་བ་དང་། ལུས་
དང་། ངག་དང་། ཡིད་ལས་སུ་རུང་བ་དང་ལྡན་ཞིང་མིའི་སྙིང་དང་ལྡན་པ་རྣམས་ཀྱི་འཁོར་བ་ནི་ཐུང་བར་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །དེ་བཞིན་དུ་གང་དག་བག་མེད་པ་ལ་ཞུགས་པ་རྣམས་ཀྱི་དགའ་བའི་ཚལ་དང་། རྣམ་པར་མཛེས་པ་དང་། ཤིང་རྟ་སྣ་ཚོགས་དང་། ཡོངས་འདུ་དང་། ནགས་ཚལ་དང་། ལྟེང་ཀ་དང་། པད་མ་སྣ་ཚོགས་དང་། རྒྱན་དང་། དོ་ཤལ་དང་། བྲོ་གར་དང་། ཁྲོན་པ་དང་། ཤིན་ཏུ་མཛེས་པའི་དཔག་བསམ་གྱི་ཤིང་དང་། འབབ་ཆུ་དང་། ཆུ་མིག་ཚག་ཚིག་དང་། ཚལ་དང་། བདུད་རྩི་དང་། ཟས་དང་། གནས་ཀྱི་ཁྱད་པར་དག་སྤངས་ནས། གང་དག་ཚུལ་ཁྲིམས་ཀྱི་རྣམ་པའི་ཟས་བསམ་གཏན་དང་། ཀློག་པ་ལ་གནས་ཤིང་ལེགས་པར་ལྟ་ལ་ཁ་ཏོན་དུ་འདོན་པ་དང་། སྦྱིན་པ་དང་། དུལ་བ་དང་ཡང་དག་པར་སྡོམ་པ་དང་། ཚངས་པར་སྤྱོད་པ་དང་། དབང་པོ་དུལ་བ་དང་། སྨྲ་བའི་ཚིག་ཉུང་བ་དང་། ཆོས་འདོད་པ་དང་། ཞི་བའི་ཟས་ལ་གནས་པའི་ལྷ་གང་ཡིན་པ་དེ་དག་གི་འཁོར་བ་ནི་ཐུང་ངོ་། །ཇི་སྐད་བཤད་པ་བཞིན་དུ་སྡུག་བསྔལ་གྱི་རྣམ་པ་བཀྲེས་པ་དང་། སྐོམ་པ་དང་། ཁ་སྐམས་པ་དང་། ཚལ་ཤིང་བསྲེགས་པ་བཞིན་དུ་དམན་ཞིང་ཞུམ་ལ་སྐྲ་དང་། གདོང་ཤིང་བསྲེགས་པ་ལྟ་བུའི་ལུས་ཅན་གང་ཡིན་པ་དེ་དག་སྡུག་བསྔལ་དུ་མི་བགྲང་བར་གང་དག་སྐད་ཅིག་ཙམ་ཞིག་ཀྱང་སངས་རྒྱས་དང་། ཆོས་དང་། དགེ་འདུན་ལ་དབང་པོ་རབ་ཏུ་དང་བས་དད་པ་ཆུང་ངུ་ཞིག་བྱས་པ་དེ་དག་གི་འཁོར་བ་ནི་ཐུང་བར་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །གཅིག་ལ་གཅིག་ཟ་ཞིང་རྡེག་པ་དང་། གྲང་བ་དང་། ཚ་བ་དང་། ཡུལ་ངན་དང་། འཇིགས་པས་འཇིགས་པ་དེ་དག་གལ་ཏེ་ནུས་ན་སྐད་ཅིག་ཙམ་དུ་རྣམ་པར་གནོད་པ་མི་བགྲང་བར་སྐད་ཅིག་ཙམ་ཞིག་ཀྱང་སངས་རྒྱས་དང་། ཆོས་དང་། དགེ་འདུན་ལ་སེམས་དང་བར་བྱས་པའི་དུད་འགྲོ་དེ་དག་གི་འཁོར་བ་ནི་ཐུང་བར་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །ཡང་སོས་
དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་ལ་སོགས་པའི་སེམས་ཅན་དམྱལ་བ་རྣམས་སུ་སྐྱེས་པ་གང་དག་སྡུག་བསྔལ་ཤིན་ཏུ་གནོད་པ་རྣམ་པ་སྣ་ཚོགས་དེ་དག་སྡུག་བསྔལ་དུ་མི་བགྲང་བར། གང་དག་སྐད་ཅིག་ཙམ་དུ་ཚུལ་ཁྲིམས་ལ་སེམས་དད་པར་བྱེད་པའི་སེམས་ཅན་དམྱལ་བ་དེ་དག་གི་འཁོར་བ་ནི་ཐུང་བར་འདུ་ཤེས་ཀྱི་མཚན་མ་ལ་དམིགས་པར་བྱེད་དེ། དེ་དེ་ལྟར་འཁོར་བ་ཐུང་བར་སེམས་སོ། །འཁོར་བ་གྲུ་བཞི་པོ་ཇི་ལྟ་བུ་ཞིག་སྙམ་ན། དེ་བྱང་གི་སྒྲ་མི་སྙན་གྱི་མི་རྣམས་ནི་བདག་གི་བ་མེད་ཅིང་བདག་ཏུ་ང་རྒྱལ་མེད་ལ་ངེས་པར་གོང་དུ་འགྲོ་བ་དེ་རྣམས་ཀྱི་འཁོར་བ་ནི་གྲུ་བཞི་པོ་ཡིན་པར་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །སེམས་ཅན་དམྱལ་བ་དང་། ཡི་དགས་དང་། དུད་འགྲོ་མི་ཤེས་པས་ཡོངས་སུ་འགྱུར་ཞིང་། སེམས་བཟང་པོ་མ་ཡིན་པའི་རྗེས་སུ་འཇུག་པའི་འཁོར་བ་ནི་ཟླུམ་པོ་ཡིན་པར་འདུ་ཤེས་ཀྱི་མཚན་མ་ལ་དམིགས་སོ། །དགེ་བ་དང་། མི་དགེ་བ་དང་། ལུང་དུ་མ་བསྟན་པའི་ལས་འདྲེན་མ་དག་ནི་སེམས་ཅན་དམྱལ་བ་དང་། ལྷ་དང་། འདྲེན་མ་མི་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་ལ་མི་དགེ་བའི་ལས་ཀྱིས་ནི་སེམས་ཅན་དམྱལ་བ་རྣམས་སུའོ། །དགེ་བའི་ལས་ཀྱིས་ནི་ལྷ་རྣམས་སུའོ། །འདྲེན་མས་ནི་མི་རྣམས་སུ་སྐྱེ་སྟེ། ལས་གསུམ་ཉེ་བར་འགྲོའོ། །གང་དག་གནས་གསུམ་གྱི་སྐྱེ་བར་སྐྱེས་པ་དེ་རྣམས་ཀྱི་འཁོར་བ་ནི་ཟུར་གསུམ་པོ་ཡིན་པར་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །རྒྱལ་ཆེན་བཞི་པ་དང་། འཐབ་བྲལ་གྱི་ལྷ་དང་། གཞན་འཕྲུལ་དབང་བྱེད་ཀྱི་ལས་ལྟ་བུར་སྐྱེས་པའི་ལྷ་དག་ལས་ཤི་ནས་ལྷ་རྣམས་ཀྱི་ནང་དུ་སྐྱེ་བར་འགྱུར། གང་དག་མི་ལས་ཤི་ནས་མི་རྣམས་ཀྱི་ནང་དུ་སྐྱེ་བར་འགྱུར་བ་མི་ཁོམ་པ་མེད་པའི་ས་དེ་དག་གི་འཁོར་བ་ནི་ཟླུམ་པོ་ཡིན་པར་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །ལས་དམར་པོས་ཡོངས་སུ་བཟུང་བ་དག་ནི་དུད་འགྲོ་ཡིན་ཏེ། དེ་དག་ཀྱང་གཅིག་ལ་
གཅིག་ཟ་ཞིང་དམར་པོ་ལ་དགའ་བའི་འདུ་ཤེས་ཀྱི་མཚན་མ་ལ་དམིགས་པར་བྱེད་དོ། །ལས་ཁ་དོག་དཀར་པོས་ཡོངས་སུ་བཟུང་བ་ནི་ལྷ་དང་མི་ཡིན་ཏེ། གཙང་ཞིང་དགེ་བའི་ལས་ཀྱི་ལམ་རིན་པོ་ཆེ་ལས་བྱུང་བའི་རིམ་གྱིས་ལྷ་དང་མིར་སྐྱེ་བ་འཛིན་ཏེ། ལྷ་འཆི་བ་ན་དེ་ལ་ལྷ་དག་བདེ་འགྲོ་མིའི་འཇིག་རྟེན་དུ་བཞུད་ཅིག་ཅེས་སྨྲའོ། །དེ་བཞིན་དུ་མི་འཆི་བ་ན་གཉེན་དང་། མཛའ་བཤེས་དང་། ཆུང་མ་དག་མིག་མཆི་མས་གང་ཞིང་ངོམ་ཟུང་གནག་པ་དག་བདག་ཅག་ཐོང་ལ་བདེ་འགྲོ་མིའི་འཇིག་རྟེན་དགྱེས་པར་བཞུད་ཅིག་ཅེས་སྨྲའོ། །དེ་འདི་སྙམ་དུ་སེམས་ཏེ། མི་དེ་ཉིད་ཐོབ་ཀྱང་གང་དགེ་བ་དང་། སྦྱིན་པ་དང་། ཚུལ་ཁྲིམས་དང་། ཤེས་རབ་ལ་བརྩོན་འགྲུས་མེད་པ་དེ་ནི་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་དགོན་པར་གཙེས་ཤིང་ཡོངས་སུ་འཁྱམ་སྟེ། སོ་སོའི་སྐྱེ་བོ་ནི་ལས་ཀྱི་ལམ་གྱིས་བསླུས་ཤིང་ཆུད་གཟན་པ་ཡིན་ནོ་སྙམ་མོ། །དགེ་སློང་དེ་ཚོར་བའི་དེ་ཉིད་མཐོང་བ། འདུ་ཤེས་ཀྱི་ཕུང་པོ་ལ་ཚུལ་བཞིན་ཡིད་ལ་བྱེད་པ་ལ་དམིགས་པའི་དེ་ཉིད་མཐོང་བ་ནི་འདི་ལྟར་དེ་ཉིད་ཚོལ་བར་བྱེད་དེ། མིག་དང་། གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེའོ། །གསུམ་འདུས་པ་ལས་རེག་པ་བརྗོད་པའི་འདུ་ཤེས་རྣམ་པར་འབྱེད་དེ། གཟུགས་མཐོང་ན་བཟང་བ་དང་། མི་བཟང་བ་དང་། ཉེ་བ་དང་། བསྐལ་པ་དང་། རིང་བ་དང་། ཐུང་བ་དང་། གྲུ་བཞི་དང་། ཟླུམ་པོ་དང་། དཀར་པོ་དང་། ཟུར་གསུམ་དང་། གཟུགས་ཀྱི་དབྱིབས་འདུ་ཤེས་ཀྱིས་ཡང་དག་པར་རྣམ་པར་འབྱེད་ཅིང་མཚན་མར་བྱེད་ལ་གཞི་ལ་ལྟ་བར་བྱེད་དོ། །ཕུང་པོ་དང་། ཁམས་དང་། སྐྱེ་མཆེད་ཀྱི་གཞི་འདུ་ཤེས་སུ་བྱེད་ཅིང་རྣམ་པར་འབྱེད། དགེ་བ་དང་། མི་དགེ་བའི་ལས་ཀྱི་རྣམ་པར་སྨིན་པ་ཤིན་ཏུ་འབྱེད་ཅིང་མངོན་སུམ་དུ་བྱེད་དོ། །རྒྱུ་དང་ལྡན་པ་ལ་དམིགས་ཤིང་། རྒྱུ་མ་ཡིན་པ་དང་ལྡན་པ་ཤེས་ནས་རྣམ་པར་སྤོང་བར་བྱེད། ཕན་པ་དང་། མི་ཕན་པའི་མཚན་ཉིད་མི་འདྲ་བ་འདས་པ་ལ་
འདུ་ཤེས་སུ་བྱེད་དེ། ཇི་ལྟར་འདིས་བདག་གི་བྱས་པ་ཉེས་པ་བྱས་པའི་འདུ་ཤེས་ཀྱིས་འདུ་ཤེས་པར་བྱེད་དེ། སྔ་མ་བཞིན་ནོ། །གལ་ཏེ་འདུ་ཤེས་མེད་ན་དྲན་པ་ཡང་མེད་དེ། དྲན་པ་དེ་དང་འདུ་ཤེས་སུ་འབྲེལ་པ་ནི་དེའི་དམིགས་པ་ཡིན་ཞིང་དེའི་རྐྱེན་ཡིན་ཏེ། དཔེར་ན་འོད་དེའི་རྐྱེན་དེའི་གཞི་དེའི་རྒྱུ་མར་མེ་ཡིན་པ་དེ་བཞིན་དུ་དྲན་པ་ནི་འདུ་ཤེས་ཀྱི་རྒྱུ་འདུ་ཤེས་རབ་ཏུ་བྱུང་བ་འདུ་ཤེས་ཀྱི་བདག་པོ་ཡིན་ནོ་སྙམ་མོ། །དགེ་སློང་དེ་ས་གཞན་ལྔ་པ་འདུ་ཤེས་སུ་རེག་པ་ཞེས་བྱ་བ་ལ་འཇུག་སྟེ། དེ་ཡང་དག་པའི་ཚོར་བ་བདེ་བ་ལ་འདུ་ཤེས་སུ་བྱེད་ཀྱང་དེ་ལ་དགའ་བ་མེད་ལ་སེམས་ཅན་དམྱལ་བ་རྣམས་ཀྱི་ལས་བྱས་པ་སྡུག་བསྔལ་དེ་ཡང་འཇིགས་པ་མེད་པར་དེ་མཚུངས་པར་རྟོག་སྟེ། གསེར་བཟང་པོ་བཞིན་ནོ། །དགེ་སློང་འདུ་ཤེས་ཅན་དེ་འདུ་ཤེས་ཀྱི་རྣམ་པ་གཞན་གྱིས་རྟོག་པར་བྱེད་དེ། དེ་འདུ་ཤེས་ལས་རྣམ་པར་གྲོལ་ཞིང་རྟོག་པར་བྱེད་པ་གཞན་མ་ཡིན་པ་བདག་གི་འདུ་ཤེས་ཀྱི་རྐྱེན་ནི་གང་ཡིན། རྒྱུ་ནི་གང་ཡིན་གཞི་ནི་གང་ཡིན་སྙམ་མོ། །དེ་འདུ་ཤེས་འདི་ནི་རྟེན་ཅིང་འབྲེལ་པར་འབྱུང་བ་ཡིན་ཏེ། རྐྱེན་ཚོགས་པ་དེས་འདི་སྐྱེ་ཞིང་དེ་འགོག་པ་ལས་འགག་པར་འགྱུར་ཏེ། དཔེར་ན་ཟླ་བ་ལ་ཡང་བརྟེན། ཆུ་ཤེལ་ལ་ཡང་བརྟེན་ནས། ནོར་བུ་ཆུ་ཤེལ་ལས་ཆུ་དང་བ་འབྱུང་བ་དེ་བཞིན་དུ་རྒྱུ་དང་རྐྱེན་ལ་བརྟེན་ནས་འདུ་ཤེས་འབྱུང་བར་འགྱུར་ཏེ། འདུ་ཤེས་འདི་ནི་རྒྱུ་མེད་པ་ལས་འབྱུང་བ་མ་ཡིན་ཞིང་། བྱེད་པ་པོ་དང་ཚོར་བ་པོས་མ་བྱས། འདོད་རྒྱལ་བས་མ་བྱུང་བར་འདི་སྐྱེའོ་སྙམ་མོ། །དགེ་སློང་དེ་འདུ་ཤེས་ཀྱི་ཕུང་པོའི་དེ་ཉིད་ཚོལ་བ་ཡིན་ཏེ། དེ་འདུ་ཤེས་ཀྱི་དེ་ཉིད་མཐོང་ཞིང་དེ་སྐྱེ་བ་དང་། འཇིག་པའི་དེ་ཉིད་ཤེས་པ་རིམ་པ་ཤིན་ཏུ་ཕྲ་མོས་ཚོལ་བ་ཡིན་ནོ། །ཆུ་བོའི་རྒྱུན་འབབ་པ་ལྟར་འདུ་ཤེས་ལ་ཞུགས་པ། རྒྱུ་དང་རྐྱེན་གྱི་དབང་གིས་དགེ་བ་འབྱུང་བ། རྒྱུ་དང་རྐྱེན་གྱི་དབང་གིས་མི་དགེ་བར་འགྱུར་བར་སྐྱེས་སོ། །དེ་ཡང་སེམས་སྤྲེའུ་ལྟ་བུ་ཉམས་པས་ལུང་དུ་མ་བསྟན་པ་འགྱུར་བ་ལུང་དུ་མ་བསྟན་པ་སྐྱེས་སོ། །དེ་བདེ་
བའི་འདུ་ཤེས་ལ་བདེ་བར་མི་ལྟ་སྟེ། ཟག་པ་མེད་པའི་བདེ་བ་ལ་བདེ་བར་འདུ་ཤེས་ཤིང་བདེ་བ་ལ་ཡང་བདེ་བ་མ་ཡིན་པར་འདུ་ཤེས་ཏེ། བདེ་བ་དེ་དག་ནི་ཆུང་ངུར་འདུ་ཤེས་སོ། །ཇི་ལྟར་ན་བདེ་བའི་ཕུང་པོ་དང་། ཁམས་དང་། སྐྱེ་མཆེད་ཀྱི་ཕུང་པོ་སྐྱེ་བ་དང་། འགོག་པར་ལྟ་ཞིང་ཚོར་བ་དག་ལ་ཡང་མངོན་པར་ཆགས་པ་མེད་ཅེ་ན། ཚོར་བ་ནུབ་པ་དེས་འདུ་ཤེས་མངོན་པར་དགའ་བ་མེད་ཅིང་འདུ་ཤེས་ནུབ་པ་དེས་འདུ་བྱེད་རྣམས་འབྱུང་བར་འདོད་པ་མེད་དེ། གནས་པ་མེད་ཅིང་འཇིག་པ་མེད་ལ་གཞན་དུ་འགྱུར་བ་མེད་པའི་རྣམ་པར་ཤེས་པ་འབྱུང་བ་ལ་མངོན་པར་འདོད་པ་མེད་དོ། །གནས་པ་མེད་ཅིང་འཇིག་པ་མེད་ལ། གཞན་ལ་འགྱུར་བ་མེད་པའི་ངོ་བོ་འདི་ནི་དགེ་སློང་ཕུང་པོའི་དེ་ཉིད་ཤེས་པ་ཡིན་ཏེ། བདུད་ཀྱི་ཡུལ་ལ་མི་གནས་ཤིང་། འདོད་ཆགས་ཞེ་སྡང་གཏི་མུག་རྣམས་ཀྱིས་གནོད་པ་མེད་པ་ཡིན། དེ་རྟག་པ་དང་། བདེ་བ་དང་། གཙང་བ་དང་། བདག་ཏུ་ལྟ་བ་མ་ཡིན། འཁོར་བ་ན་སྒྲ་དང་། རེག་པ་དང་། གཟུགས་དང་། དྲི་སྡུག་པ་དྲ་བའི་ཞགས་པ་ལྟ་བུ་དག་གིས་འཆིང་བར་མི་འགྱུར་ཞིང་དྲན་པ་ཉམས་པར་མི་འགྱུར་ཏེ། དེ་དྲན་པ་ཉེ་བར་གནས་པ་རྣམ་པར་ཤེས་ཤིང་ཟག་པ་ཟད་པར་བྱ་བ་ནུས་ལ། མྱ་ངན་ལས་འདས་པ་ལ་མངོན་དུ་ཕྱོགས་པར་འགྱུར་རོ། །འདིར་ཚིགས་སུ་བཅད་པ། དགེ་སློང་བརྩོན་འགྲུས་ཞན་པ་དང་། །ལེ་ལོ་བྱེད་ཅིང་ལྟ་བ་ལ། །གང་ཞིག་རྟག་ཏུ་སྤྲོ་དགའ་མེད། །དེ་ལྟ་བུ་ནི་དགེ་སློང་ཡིན། །མལ་ཆ་སྟན་ལ་ལོངས་མི་སྤྱོད། །དགེ་སློང་ཡིན་ཞེས་སངས་རྒྱས་གསུངས། །གང་ཞིག་ལེ་ལོ་མངོན་དགའ་བ། །དེ་ནི་དགེ་བའི་འོས་མིན་ནོ། །ཉོན་མོངས་རྣམས་ཀྱི་གཞི་གཅིག་ནི། །ལེ་ལོ་ཡིན་ཏེ་གང་ལ་ཡོད། །གང་ལ་ལེ་ལོ་གཅིག་ཡོད་པ། །དེ་ལ་ཆོས་ནི་མེད་པ་ཡིན། །བགོ་བ་ཙམ་གྱིས་ཆོག་འཛིན་པ། །དེ་ནི་དགེ་སློང་ཡིན་ཞེས་བརྗོད། །གང་གི་བློ་གྲོས་བརྗོད་མེད་ཅིང་། །བསམ་གཏན་མེད་ལ་ཟག་ཟད་མེད། །ཆ་བྱད་ཙམ་གྱིས་ཆོག་
འཛིན་པ། །དེ་ལྟ་བུ་ནི་དགེ་སློང་མིན། །གཙུག་ལག་ཁང་དང་ཀུན་དགར་བརྩོན། །ཆོས་ཀྱི་སྤྱོད་ཡུལ་དགའ་མེད་ཅིང་། །བུད་མེད་ཆང་ལ་ཆགས་པའི་བློ། །དེ་ལྟ་བུ་ནི་དགེ་སློང་མིན། །གང་ཞིག་བདུད་ཀྱི་འཆིང་གཅོད་དང་། །སྡིག་པའི་ལས་དག་གཅོད་བྱེད་ལ། །དགེ་འདུན་སྤྱོད་ཡུལ་མི་སྤྱོད་པ། །དེ་ནི་དགེ་སློང་སངས་རྒྱས་གསུངས། །སྦྲུལ་གདུག་དང་ནི་ཏ་མྲ་དག །སྨིན་པ་ཟ་བ་ཉིས་ན་རུང་། །ཚུལ་ཁྲིམས་འཆལ་ན་དགེ་འདུན་གྱི། །བཟའ་བཏུང་སྤྱོད་པ་མི་རུང་ངོ་། །གང་ཞིག་ཉོན་མོངས་འདུས་པ་ནི། །དེ་ནི་བསོད་སྙོམས་འོས་མིན་ཞིང་། །དེ་ནི་བསོད་སྙོམས་རིགས་མིན་ཏེ། །དེ་ནི་དམྱལ་བའི་འོས་ཡིན་ནོ། །སྦྲུལ་གདུག་ཁུང་ན་འདུག་ལྟ་བུའི། །ཉོན་མོངས་གང་གིས་བཅོམ་ཞིང་སྤངས། །དགེ་སློང་དེ་ནི་བསོད་སྙོམས་སྤྱོད། །དེ་ནི་བུད་མེད་ལྟ་བ་མེད། །གལ་ཏེ་བདག་ཉིད་གཏར་བཞག་ཅིང་། །སྡིག་པ་རྣམས་ལ་ཆགས་པ་ནི། །དགེ་འདུན་རིན་ཆེན་སུན་བྱེད་པ། །དེ་ནི་དགེ་སློང་ཇི་ལྟར་ཤེས། །གང་ཞིག་རྙེད་དང་བཀུར་སྟི་དང་། །གང་ཞིག་ཡུལ་སྡུག་སེམས་བྱེད་ལ། །བུད་མེད་ལྟ་ཞིང་དེ་འདོད་པ། །དགེ་མིན་ཁྱིམ་མིན་གཡོན་ཅན་ཡིན། །ཇི་ལྟར་མེ་ཡིས་ཚལ་བསྲེགས་བཞིན། །གང་གིས་ཉོན་མོངས་ཚལ་བསྲེགས་པ། །བྲམ་ཟེ་དེ་ཡིན་དེ་དགེ་ཞིང་། །སྡིག་པའི་ཟས་ལ་མི་ཆགས་སོ། །རྟག་པར་གྲོང་དུ་འགྲོ་སྤྲོ་ཞིང་། །གཡོན་ཅན་རྟག་ཏུ་ཁྲུས་བྱེད་པ། །རྨོངས་པ་བདག་དང་གཞན་སླུ་སྟེ། །དམ་ཆོས་ལམ་ལ་རྨོངས་པ་ཡིན། །ཡིད་ནི་ཞི་ཞིང་དགོན་པ་རུ། །རྟག་ཏུ་བསམ་གཏན་ཕ་རོལ་འགྲོ། །བྲམ་ཟེ་དེ་ཡིན་དེ་དགེ་ཞིང་། །དགེ་བའི་ལམ་གྱི་སྤྱོད་ཡུལ་ཡིན། །དགོན་པ་དག་ཏུ་དགའ་བྱེད་པ། །དེར་ནི་འདོད་ཆགས་བྲལ་བ་དགའ། །འདོད་པ་ཚོལ་བའི་ཡིད་དག་ནི། །དེར་ནི་དགའ་བར་མི་འགྱུར་རོ། །གང་ཞིག་འབེལ་བའི་གཏམ་དགའ་ཞིང་། །ཡུལ་གྱི་སྲེད་པས་མངོན་དགའ་བ། །གང་ན་འཆི་
བ་མེད་པ་ཡི། །ཞི་བའི་གྲོང་དུ་མི་འགྲོ་འོ། །རྒྱལ་པོ་བསྟེན་ཅིང་ཟས་དང་སྐོམ། །ཤིན་ཏུ་ཞིམ་འདོད་རྟག་ཁྲོ་བ། །མིང་གི་དགེ་སློང་གཡོ་ཐབས་ཀྱིས། །གང་དག་རྒྱལ་པོའི་སྒོར་འདུག་ཅིང་། །ཁྱིམ་པ་དག་དང་ཉེ་རྩོམ་བཅས། །དེ་ནས་དེ་དག་སུན་འབྱིན་ཅིང་། །སྦྱིན་བདག་བདེན་སེམས་སླུ་བར་བྱེད། །ཇི་ལྟར་གླང་ཆེན་ཚལ་གནས་བཞིན། །གང་དག་བུ་སྨད་ཡོངས་སྤངས་ནས། །ཞི་བའི་ཚལ་ན་གནས་པ་ནི། །དེ་དག་སྲེད་སྤངས་བསམ་པ་མཉམ། །དགེ་སློང་དེ་ཉེས་པ་དེ་དག་སྤངས་ནས་དེ་ཉིད་མཐོང་བ་དེ་ལས་གཞན་པ་གཟུགས་ལ་སོགས་པ་ཕུང་པོའི་དེ་ཉིད་མཐོང་བ། ཐར་པ་ལ་འབད་ཅིང་སྤྱོད་དེ། བླ་མ་ལ་ཡོངས་སུ་འདྲི། ལམ་དང་ལམ་མ་ཡིན་པའི་དེ་ཉིད་ཤེས་ཤིང་། འཕགས་པའི་ལམ་ཡན་ལག་བརྒྱད་པས་ཐར་པའི་གྲོང་ཁྱེར་དེ་ཚོལ་བ་ནི་ལམ་བརྩོན་པའི་ངང་ཚུལ་ཅན་མཉམ་པར་ལྟ་ཞིང་དྲི་མ་མེད་པའི་སེམས་དང་། ཞི་བའི་སེམས་ཀྱིས་ལམ་དེ་ཀུན་ཏུ་སྟེན་ཅིང་སྒོམ་སྟེ་མང་དུ་བྱེད་དོ། །དེ་ཟག་པ་མེད་པའི་ལས་ཀྱི་ལམ་གྱི་དགེ་བ་དང་ཡང་དག་པར་ལྡན་པ་དེས་བདུད་ཀྱི་ཕྱོགས་ནི་དམས་པར་བྱེད་ཅིང་དམ་པའི་ཆོས་ཀྱི་ཕྱོགས་ནི་འཕེལ་བར་བྱེད་དོ་ཞེས་ས་བླའི་གནོད་སྦྱིན་དག་གིས་ཤེས་ནས། བར་སྣང་ལ་སྤྱོད་པའི་གནོད་སྦྱིན་དག་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་པོ་ཆེན་པོ་བཞི་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་ཆེན་བཞི་པ་ནས་སྔ་མ་བཞིན་དུ་སྦྱར་ཏེ། འཐབ་བྲལ་དང་དགའ་ལྡན་གྱི་ལྷ་དག་གིས་དགའ་ལྡན་གྱི་གནས་ན་བྱམས་པ་བཞུགས་པའི་བར་ལ་མངོན་པར་བསྙད་དོ། །དེ་ནས་བྱང་ཆུབ་སེམས་དཔའ་གཅིག་ཅིག་མཆོག་ཏུ་དགའ་ཆེས་ནས། གཞན་འཕྲུལ་དབང་བྱེད་ཀྱི་ལྷ་རྣམས་ལ་མངོན་པར་བསྙད་དེ། འཛམ་བུའི་གླིང་དུ་རིགས་ཀྱི་བུ་ཆེ་གེ་མོ་ཞིག་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་པ་ནས་སྔ་མ་བཞིན་དུ་སྦྱར་ཏེ། དེ་ནས་གཞན་འཕྲུལ་དབང་བྱེད་ཀྱི་ལྷ་རྣམས་ཡིད་མཆོག་ཏུ་དགའ་བའི་བར་དུ་སྔ་མ་བཞིན་དུ་སྦྱར་
རོ། །དེ་ནས་གཞན་ཡང་དགེ་སློང་དེས་གཞན་ལྔ་པ་ལ་ཇི་ལྟར་འཇུག་ཅིག་གུ་སྙམ་ནས། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན། སྐྱེ་མཆེད་གཟུགས་ཅན་བཅུ་ལ་རྟོག་པར་བྱེད་དོ། །བཅུ་གང་ཞེ་ན། འདི་ལྟ་སྟེ། མིག་གི་སྐྱེ་མཆེད་དང་། གཟུགས་ཀྱི་སྐྱེ་མཆེད་དང་། རྣ་བའི་སྐྱེ་མཆེད་དང་། སྒྲའི་སྐྱེ་མཆེད་དང་། སྣའི་སྐྱེ་མཆེད་དང་། དྲིའི་སྐྱེ་མཆེད་དང་། ལྕེའི་སྐྱེ་མཆེད་དང་། རོའི་སྐྱེ་མཆེད་དང་། ལུས་ཀྱི་སྐྱེ་མཆེད་དང་། རེག་བྱའི་སྐྱེ་མཆེད་དེ། སྐྱེ་མཆེད་གཟུགས་ཅན་བཅུ་པོ་དེ་དག་ལ་རྟོག་པར་བྱེད་དོ། །བདག་གི་མིག་གི་སྐྱེ་མཆེད་ལ་ཡང་བརྟེན། གཟུགས་ཀྱི་སྐྱེ་མཆེད་ལ་ཡང་བརྟེན་ནས་འདུ་ཤེས་སུ་ཇི་ལྟར་འགྱུར་ཞེ་ན། མིག་ལ་ཡང་བརྟེན་གཟུགས་ལ་ཡང་བརྟེན་ནས། མིག་གི་རྣམ་པར་ཤེས་པ་སྐྱེ་བར་མཐོང་སྟེ། གསུམ་འདུས་པ་ལས་རེག་པ། རེག་པ་དང་ལྷན་ཅིག་སྐྱེས་པ་ཚོར་བ་དང་། འདུ་ཤེས་དང་། སེམས་པ་འབྱུང་ངོ་། །དེ་ལ་ཚོར་བ་གང་ཡིན་པ་དེ་ནི་མྱོང་བའོ། །སེམས་པ་གང་ཡིན་པ་དེ་ནི་སེམས་པར་བྱེད་པའོ། །དེ་ལ་འདུ་ཤེས་གང་ཡིན་པ་དེ་ནི་ཤེས་པ་ཡིན་ཏེ། འདི་ལྟར་གཟུགས་འདི་ནི་རིང་པོ། གཟུགས་འདི་ནི་ཐུང་ངུ་། གཟུགས་འདི་ནི་སྡུག་པ། གཟུགས་འདི་ནི་མི་སྡུག་པ། གཟུགས་འདི་ནི་བསྟན་དུ་ཡོད་པ། གཟུགས་འདི་ནི་ཐོགས་པ་དང་བཅས་པ། གཟུགས་འདི་ནི་བསྟན་དུ་མེད་པ། གཟུགས་འདི་ནི་ཐོགས་པ་མེད་པ་ཞེས་རྣམ་པར་རིག་བྱེད་མ་ཡིན་པའི་བར་རྣམ་པ་བཅུ་གཅིག་པོ་འདི་ནི་འདུ་ཤེས་ཀྱི་གཟུགས་སུ་རྣམ་པར་དབྱེ་སྟེ། དེ་ལྟར་གསུམ་འདུས་པ་ལས་རེག་པ་སྐྱེའོ། །དེ་རེག་པ་དང་ལྷན་ཅིག་སྐྱེས་པའི་ཚོར་བ་དང་འདུ་ཤེས་དང་སེམས་པ་འབྱུང་སྟེ། དེ་ལ་མིག་གི་འདུས་ཏེ་རེག་པ་ལས་བྱུང་བའི་ཚོར་བ་དང་། འདུ་ཤེས་དང་། སེམས་པ་མྱོང་བའི་དོན་ནི་ཚོར་བའི་དོན་ནོ། །འདུ་ཤེས་ཀྱི་དོན་ནི་ཚོར་བའི་ཚེ་ཡང་དག་པར་ཤེས་པ་ཡིན་ཏེ། ཆོས་འདི་དག་
ལ་ཡིད་འཇུག་པ་སྐྱེ་བའི་མཚན་ཉིད་མི་འདྲ་ཞིང་ངོ་བོ་ཉིད་མི་འདྲ་བ་ཡིན་ཏེ། དཔེར་ན་ས་ཆེན་པོ་བཅུའི་ཆོས་ལྟ་བུའོ། །སེམས་པའི་མཚན་ཉིད་མི་འདྲ་བ་ཡང་དེ་བཞིན་ཏེ། རྣམ་པར་རྟོག་པས་ཡིད་ལ་བྱེད་པ་དང་། དཔྱོད་པ་དང་། དྲན་པ་དང་། ཚོར་བ་དང་། འདུ་ཤེས་དང་། སེམས་པ་དང་། རེག་པ་དང་། བརྩོན་འགྲུས་དང་། ཏིང་ངེ་འཛིན་དེ་དག་ནི་དམིགས་པ་གཅིག་ལ་མཚན་ཉིད་མི་འདྲ་བ་ཉིད་ཡིན་ནོ། །དེ་བཞིན་དུ་ཚོར་བའི་མཚན་ཉིད་ཀྱང་མི་འདྲ་ཞིང་དེ་བཞིན་དུ་འདུ་ཤེས་ཀྱི་མཚན་ཉིད་ཀྱང་མི་འདྲ་བ་ཡིན་ཏེ། དཔེར་ན་ཉི་མའི་གཞི་གཅིག་ཡིན་ཀྱང་འོན་ཀྱང་འོད་ཀྱི་ངོ་བོ་ཐ་དད་པ་དེ་བཞིན་དུ་ཚོར་བའི་ངོ་བོ་ཉིད་ཀྱང་གཞན་ཡིན་ལ། སེམས་པའི་ངོ་བོ་ཉིད་ཀྱང་གཞན་ཡིན་ནོ། །དེ་མིག་གི་འདུས་ཏེ་རེག་པ་ལས་བྱུང་བའི་ཚོར་བ་དང་། འདུ་ཤེས་དང་། སེམས་པའི་དེ་ཁོ་ན་ཉིད་ཤེས་ནས། མིག་འདི་ནི་གསོག་ཏུ་མཐོང་། གསོབ་ཏུ་མཐོང་། སྙིང་པོ་མེད་པར་མཐོང་ངོ་། །ཡང་དག་པར་མཐོང་བའི་དགེ་སློང་དེ་ནི་ལམ་གྱི་དེ་ཁོ་ན་ཉིད་ཤེས་ནས་ལོག་པར་ལྟ་བ་སྤངས་ཏེ། དེ་ཡང་དག་པའི་ལྟ་བ་སྔོན་དུ་བཏང་བས་དེ་མིག་དང་ལྷན་ཅིག་སྐྱེས་པའི་འདུ་ཤེས་ཀྱི་གཏི་མུག་རྙོག་པ་ཅན་གྱི་ངོ་བོ་ཉིད་དུ་གྱུར་པ་སྤོང་ངོ་། །ཤའི་གོང་བུའི་དེ་ཁོ་ན་ཉིད་མཐོང་སྟེ། ཚིལ་དང་། རྣག་དང་། ཁྲག་དང་། མཆི་མའི་གནས་ཡིན་པར་རིག་ནས། འདོད་ཆགས་སྤོང་ཞིང་མི་རྟག་པར་རིག་ནས་རྟག་པར་མི་ལྟ་བ་ཡིན་ལ། རུས་པའི་བུ་གའི་ནང་ན་ཤའི་གོང་བུ་ཡོད་པར་རིག་ནས་འདོད་ཆགས་དང་བྲལ་བར་འགྱུར། རྒྱུས་པས་སྦྲེལ་བར་རིག་ཅིང་མིག་གི་སྐྱེ་མཆེད་འདི་ནི་གཅིག་ལ་གཅིག་འབྲེལ་པར་རྟོགས་ཏེ། འདི་ལ་སྙིང་པོ་མེད་ཅིང་བདག་མེད་པར་རིག་ལ། མདོར་ན་མིག་འདི་ནི་སྡུག་བསྔལ་དུ་གྱུར་པ་ཡིན་ནོ་ཞེས་རྣམ་པར་ཤེས་ཤིང་མཐོང་ནས། མིག་གི་སྐྱེ་མཆེད་ཀྱི་འདོད་ཆགས་དང་བྲལ་བར་འགྱུར་རོ། །དེ་མིག་གི་སྐྱེ་མཆེད་ཡང་དག་པ་ཇི་ལྟ་བ་བཞིན་རྟོགས་ཤིང་གཟུགས་ལ་རྣམ་པར་དཔྱོད་པར་བྱེད་དེ།
གལ་ཏེ་ཡང་དག་པ་མ་ཡིན་པའི་གཟུགས་འདི་སྡུག་པ་དང་། མི་སྡུག་པ་དང་། ལུང་དུ་མ་བསྟན་པ་ཡོངས་སུ་རྟོག་སྟེ། ཅི་འདི་ལ་སྙིང་པོ་ཡོད་དམ། ཅི་གཙང་ངམ། ཅི་རྟག་གམ། ཅི་བདེ་བ་ཡོད་དམ་སྙམ་མོ། །དེ་གཟུགས་ལྟ་ཞིང་ཤེས་ཏེ། རྟོག་པས་གཟུགས་སུ་མི་དམིགས་ཏེ། འདི་ལ་སྙིང་པོ་མེད་དོ། །གཟུགས་སྡུག་པ་དང་། མི་སྡུག་པ་འདི་ནི་ཀུན་ཏུ་རྟོག་པ་ཙམ་སྟེ། འདི་ལ་སྡུག་པ་དང་། མི་སྡུག་པའི་ངོ་བོ་ནི་མེད་ལ། སྡུག་པ་དང་། ཁོང་ཁྲོ་བ་ཁོ་ནར་ཀུན་ཏུ་རྟོག་པས་བཟུང་བའི་འཇིག་རྟེན་འདི་ནི་སྡུག་པ་དང་སྡང་བར་སེམས་སོ་སྙམ་མོ། །དེ་མིག་གི་སྐྱེ་མཆེད་མཐོང་ནས། རྣ་བའི་སྐྱེ་མཆེད་ལ་ལྟ་བར་བྱེད་དེ། དེ་སྒྲ་ལ་སོ་སོར་རྟོག་གོ །སྒྲ་སྐྱེས་པ་དབང་པོའི་ཡུལ་ལ་འཇུག་སྟེ། དེས་རྣ་བ་ལ་ཡང་བརྟེན། སྒྲ་ལ་ཡང་བརྟེན། དེ་སྐྱེད་པའི་ཡིད་ལ་བྱེད་པ་ལ་ཡང་བརྟེན་ནས། རྣ་བའི་རྣམ་པར་ཤེས་པ་སྐྱེ་སྟེ། གསུམ་འདུས་པ་ལས་རེག་པ། རེག་པ་དང་ལྷན་ཅིག་སྐྱེས་པའི་ཚོར་བ་དང་། འདུ་ཤེས་དང་། སེམས་པ་འབྱུང་ངོ་། །དེ་ལ་རེག་པ་དང་། ལྷན་ཅིག་སྐྱེས་པ་གང་གིས་མྱོང་བར་བྱེད། དེ་ལ་རེག་པ་དང་ལྷན་ཅིག་བྱུང་བའི་འདུ་ཤེས་གང་གིས་ཀུན་ཏུ་ཤེས་པར་བྱེད། རེག་པ་དང་ལྷན་ཅིག་བྱུང་བའི་སེམས་གང་གིས་སེམས་པར་བྱེད་སྙམ་ན། འདུ་ཤེས་ནི་འདི་ལྟ་སྟེ། འདི་ནི་རིང་ངོ་སྙམ་པའི་མཚན་ཉིད་དོ། །སྒྲ་འབྱུང་བའི་རྐྱེན་འདི་ལས་སྐྱེས་པའི་སྒྲ་མི་གསལ་བ་དང་ཆུང་བ་དང་། ཆེན་པོར་སྙན་པ་དང་མི་སྙན་པ་འདི་འབྱུང་སྟེ། དེ་སྒྲ་བྱུང་བ་དེ་ལ་སོ་སོར་རིག་པར་བྱེད་ཅིང་ཡང་དག་པར་སེམས་པར་བྱེད་ལ་འདུ་ཤེས་ཀྱིས་རྣམ་པར་འབྱེད་པར་བྱེད། ཡིད་ཀྱི་རྣམ་པར་ཤེས་པས་རྣམ་པར་ཤེས་པར་བྱེད་ཅིང་ཚོར་བས་ཤེས་པར་བྱེད་ལ། སོམ་ཉིས་རྣམ་པར་དཔྱོད་པར་བྱེད་དོ། །དེ་རྣ་བའི་སྐྱེ་མཆེད་ལ་མངོན་པར་ཞེན་པ་ན་རྟོག་པར་བྱེད། རྟོག་པ་ན་རྣམ་པར་དཔྱོད་པར་བྱེད། རྣམ་པར་དཔྱོད་པ་ན་སོ་སོ་ཡང་དག་པར་རིག་པར་བྱེད་དེ། འདི་ལ་སྒྲ་ངོ་བོ་ཉིད་ཀྱིས་སྙན་པའམ་མི་སྙན་པ་ནི་མེད་དོ། །སྒྲ་སྙན་
པའམ་མི་སྙན་པ་འདི་ནི་ཀུན་ཏུ་རྟོག་པ་ཙམ་ཁོ་ན་སྟེ། སྒྲ་འདི་ནི་ངོ་བོ་ཉིད་ཀྱིས་རྟག་པའམ། བདེ་བའམ། སྙིང་པོའམ། བདག་དང་བཅས་པ་ནི་མེད་ལ། སྒྲ་སྙན་པའམ། མི་སྙན་པ་འདི་ནི་འདོད་ཆགས་ཞེ་སྡང་གཏི་མུག་ཁོ་ནའོ་སྙམ་མོ། །དེ་སྒྲའི་སྐྱེ་མཆེད་ལ་མངོན་པར་ཀུན་ཏུ་རྟོག་པ་ན། སྒྲ་ཐོས་པ་ན་རྨོངས་པ་མེད་ཅིང་ཆགས་པ་མེད་ལ། སྙིང་པོ་མེད་པར་རྟོགས་སོ། །དེ་རྣ་བ་དང་། སྒྲའི་སྐྱེ་མཆེད་ལ་མངོན་པར་རྟོག་པ་ན། རྣ་བའི་རྣམ་པར་ཤེས་པ་ལ་ཆགས་པ་མེད་ཅིང་འདོད་ཆགས་དང་བྲལ་བ་འཐོབ་སྟེ། རྣ་བའི་རྣམ་པར་ཤེས་པ་ནི་བདག་མ་ཡིན་ཞིང་། རྣ་བའི་རྣམ་པར་ཤེས་པ་ནི་བདག་གི་མ་ཡིན་ནོ་སྙམ་མོ། །རེག་པ་དང་། ཚོར་བ་དང་། སེམས་པ་ཡང་དེ་བཞིན་ནོ། །ཡང་དགེ་སློང་དེ་སྣ་དང་། དྲིའི་སྐྱེ་མཆེད་ལ་ལྟ་སྟེ། སྣ་ལ་ཡང་བརྟེན། དྲི་ལ་ཡང་བརྟེན། དེ་སྐྱེད་པ་ཡིད་ལ་བྱེད་པ་ལ་ཡང་བརྟེན་ནས། སྣའི་རྣམ་པར་ཤེས་པ་སྐྱེ་སྟེ། ཉེ་བའམ། རིང་བའམ། ཡིད་དུ་འོང་བའམ། ཡིད་དུ་མི་འོང་བའམ། དྲི་ཞིམ་པའམ། དྲི་མི་ཞིམ་པའམ། རླུང་གིས་ཁྱེར་ཏེ་འོངས་པའམ། ཁྱེར་ཏེ་མི་འོང་བའི་དྲི་སོ་སོར་སྣོམ་མོ། །དེ་ལ་སྣའི་སྐྱེ་མཆེད་ལ་ཕྱི་རོལ་གྱི་དྲི་དེ་སྦྱོར་བར་བྱེད་དེ། དེ་ལ་གསུམ་འདུས་པ་ལས་རེག་པ། རེག་པ་དང་ལྷན་ཅིག་སྐྱེས་པའི་ཚོར་བ་དང་། འདུ་ཤེས་དང་། སེམས་པ་འབྱུང་ངོ་། །དེ་ལ་མྱོང་བའི་མཚན་ཉིད་ནི་ཚོར་བའོ། །ཤེས་པའི་མཚན་ཉིད་ནི་འདུ་ཤེས་སོ། །དེ་རྣ་བ་དང་། སྒྲའི་སྐྱེ་མཆེད་མཐོང་ནས། ནང་གི་རེག་པའི་མཚན་ཉིད་ནི་རེག་པ། ཤེས་པའི་མཚན་ཉིད་ནི་འདུ་ཤེས། དེ་སེམས་པའི་མཚན་ཉིད་ནི་འདུ་ཤེས་དེ་སེམས་པར་བྱེད་པ་ཡིན་ཏེ། ཆོས་འདི་དག་ནི་སྐད་ཅིག་མ་གཅིག་ལ་དམིགས་པ་ཡིན་ལ། བྱ་བ་ནི་ཐ་དད་པར་རྩོམ་པ་ཡིན་ཏེ། དཔེར་ན་ཇི་ལྟར་ངོ་བོ་ཉིད་མི་འདྲ་བ་ས་ཆེན་པོའི་ཆོས་བཅུ་པ་ལྟ་བུའོ། །དེ་བཞིན་དུ་ཆོས་འདི་དག་ཐམས་ཅད་ཀྱི་
མཚན་ཉིད་ཐ་དད་ཅིང་སྐད་ཅིག་མ་གཅིག་ལ་གཞན་བྱ་བ་གཅིག་རྩོམ་པ་ཡིན་ནོ་སྙམ་སྟེ། སྔ་མ་བཞིན་ནོ། །དགེ་སློང་དེ་སྣ་དང་དྲིའི་སྐྱེ་མཆེད་ཀྱི་དེ་ཁོ་ན་ཉིད་ཤེས་པར་དེ་ཉིད་འདི་ལྟར་ཚོལ་ཏེ། ཅི་འདི་ལ་སྐྱེ་མཆེད་འདི་རྟག་པ་དང་། བརྟན་པ་དང་། ཐེར་ཟུག་པ་མེད་ཅིང་ཡོངས་སུ་འགྱུར་བ་ཡིན་ཏེ། སྣ་དང་། དྲིའི་སྐྱེ་མཆེད་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཤེས་ལ། དེ་དག་ཐམས་ཅད་ལ་བདག་མེད་ཅིང་བདག་གི་མེད་དོ་ཞེས་རིག་ནས་སྣ་དང་། དྲིའི་སྐྱེ་མཆེད་འདི་ནི་ཀུན་ཏུ་རྟོག་པ་ཁོ་ན་ཙམ་ཡིན་ལ། དེས་སོ་སོའི་སྐྱེ་བོ་ཐམས་ཅད་བཅིངས་པ་ཡིན་ཏེ། བློ་ཞན་པ་དག་ནི་རྣམ་པ་ལ་སོ་སོར་རྟོག་གོ་སྙམ་མོ། །ཡང་དགེ་སློང་དེ་ལྕེའི་སྐྱེ་མཆེད་ཚོལ་བར་བྱེད་དེ། ལྕེ་ལ་ཡང་བརྟེན། རོ་ལ་ཡང་བརྟེན། དེ་སྐྱེད་པ་ཡིད་ལ་བྱེད་པ་ལ་ཡང་བརྟེན་ནས། ལྕེའི་རྣམ་པར་ཤེས་པ་སྐྱེ་སྟེ། གསུམ་འདུས་པ་ལས་རེག་པ་རེག་པ་དང་ལྷན་ཅིག་སྐྱེས་པའི་ཚོར་བ་དང་། འདུ་ཤེས་དང་། སེམས་པ་འབྱུང་ངོ་། །དེ་ལ་མྱོང་བའི་མཚན་ཉིད་ནི་ཚོར་བ། ཤེས་པའི་མཚན་ཉིད་ནི་འདུ་ཤེས། རེག་པའི་མཚན་ཉིད་ནི་རེག་པ། སེམས་པའི་མཚན་ཉིད་ནི་སེམས་པར་བྱེད་པ་ཡིན་ཏེ། ཆོས་འདི་དག་ནི་འདུ་ཤེས་ཀྱི་མཚན་མ་ལ་དམིགས་པ་ཡིན་ཞིང་། རང་གི་མཚན་ཉིད་དང་སྤྱིའི་མཚན་ཉིད་དུ་གྱུར་པ། བྱ་བ་ཐ་དད་པ་རྩོམ་ཞིང་ཐམས་ཅད་ཀྱང་དོན་གཅིག་རབ་ཏུ་སྒྲུབ་པ་ཡིན་ཏེ། དཔེར་ན་ཤིང་ལ་ཡང་བརྟེན། སྐམ་པ་ལ་ཡང་བརྟེན། ཐེའུ་ལ་ཡང་བརྟེན། ཐབ་ལ་ཡང་བརྟེན། མགར་བ་ལ་ཡང་བརྟེན་ནས། ལག་པའི་རྒྱན་སོར་གདུབ་གཅིག་བྱེད་དེ། ཆོས་དེ་དག་ཐམས་ཅད་ཀྱི་མཚན་ཉིད་མི་འདྲ་བ་དེ་བཞིན་དུ་ལྕེའི་སྐྱེ་མཆེད་ཀྱི་ཆོས་འདི་ཡང་། ལྕེའི་སྐྱེ་མཆེད་དང་རོའི་སྐྱེ་མཆེད་སྐྱེད་དོ། །ཡང་དགེ་སློང་དེ་ལྕེའི་སྐྱེ་མཆེད་ཀྱི་དེ་ཁོ་ན་ཉིད་མཐོང་བ་འདི་ལྟར་རབ་ཏུ་རྟོག་པར་བྱེད་དེ། ལྕེའི་སྐྱེ་མཆེད་ལ་རྟག་པའམ། བདེ་བའམ། གཙང་བའམ། བདག་དང་བཅས་པ་ཆུང་ཟད་ཡོད་པ་
རྣམ་པ་ཐམས་ཅད་དུ་རྣམ་པར་བསམས་ན་གང་མཚན་ཉིད་དེ་ལྟ་བུ་དང་ལྡན་པའི་ཆོས་ཆུང་ངུ་ཙམ་ཡང་མི་དམིགས་ཏེ། དེ་ལྕེ་དང་རོའི་སྐྱེ་མཆེད་ཀྱི་འདོད་ཆགས་དང་བྲལ་ལོ། །དེ་སེམས་ཅན་རྒྱ་མཚོ་དེ་དག་ཐམས་ཅད་གང་དུ་ཞུགས་ཤིང་ཆགས་པ། མི་དང་། ལྷ་དང་། སེམས་ཅན་དམྱལ་བ་དང་། དུད་འགྲོ་དང་། ཡི་དགས་འགྲོ་བ་ལྔ་པོ་དག་གཅིག་ལ་གཅིག་གནོད་ཅིང་ཞུགས་ཏེ་འཆིང་ངོ་། །དེ་ལྕེ་དང་རོའི་སྐྱེ་མཆེད་ལས་རྣམ་པར་གྲོལ་ཞིང་འདོད་ཆགས་དང་བྲལ་ཏེ། ལྕེའི་སྐྱེ་མཆེད་དག་ལ་བདག་མེད་ཅིང་ལྕེ་དང་རོའི་སྐྱེ་མཆེད་དག་ལ་བདག་གི་མེད་དེ། བདག་རྟག་པའམ། བརྟན་པའམ། ཐེར་ཟུག་པ་མེད་ཅིང་ཡོངས་སུ་འགྱུར་བའི་ཆོས་ཅན་ཡིན་ཏེ། ལྕེ་དང་རོའི་སྐྱེ་མཆེད་ནི་མེད་པ་ཡིན་ནོ་སྙམ་སྟེ། དེ་དེ་ལས་ཀྱང་འདོད་ཆགས་དང་བྲལ་ལོ། །གཞན་ཡང་དགེ་སློང་དེ་ལུས་དང་། རེག་བྱའི་སྐྱེ་མཆེད་ལ་ལྟ་བར་བྱེད་དེ། དེ་ལུས་ལ་ཡང་བརྟེན། རེག་བྱ་ལ་ཡང་བརྟེན་ནས། ལུས་ཀྱི་རྣམ་པར་ཤེས་པ་སྐྱེ་བར་མཐོང་སྟེ། གསུམ་འདུས་པ་ལས་རེག་པ། རེག་པ་དང་ལྷན་ཅིག་སྐྱེས་པའི་ཚོར་བ་དང་། འདུ་ཤེས་དང་། སེམས་པ་འབྱུང་སྟེ། ཆོས་འདི་དག་ནི་སྔ་མ་བཞིན་དུ་ཤེས་པར་བྱའོ། །ཇི་ལྟར་མིག་གི་དབང་པོའི་སྐྱེ་མཆེད་རྣམས་བཤད་པ་དེ་བཞིན་དུ། ལུས་ཀྱི་རེག་པ་ཡང་ཁོང་དུ་ཆུད་པར་བྱའོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ལྔ་པ། དེ་ནས་གཞན་ཡང་ཇི་ལྟར་ན་དགེ་སློང་དེ་སྐྱེ་མཆེད་གཟུགས་ཅན་བཅུ་བརྟགས་ནས། ཆོས་ཀྱི་སྐྱེ་མཆེད་ཀྱི་དེ་ཁོ་ན་ཉིད་རྟོག་ཅིང་ཆོས་ཀྱི་སྐྱེ་མཆེད་ལ་ལྟ་བར་བྱེད་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། ཆོས་གང་ཆོས་ཀྱི་སྐྱེ་མཆེད་དུ་བསྡུས་པ་ནི་སོ་སོར་བརྟགས་པས་འགོག་པ་དང་། སོ་སོར་བརྟགས་པ་མ་ཡིན་པས་འགོག་པ་དང་ནམ་མཁའོ། །
དེ་ལ་ཆོས་གང་ཆུང་ཟད་མེད་པའི་ཆོས་དེ་བསྡུས་པ་ནི་ནམ་མཁའ་ཡིན་ནོ། །སོ་སོར་བརྟགས་པས་འགོག་པ་ཞེས་བྱ་བ་ནི་མྱ་ངན་ལས་འདས་པ་ལ་སོ་སོར་རྟོག་པའི་ཤེས་རབ་ཡིན་ཏེ། དེ་རྣམ་པ་དུ་མ་མངོན་སུམ་དུ་བྱས་ནས་གནས་སོ་སོར་རྟོག་པས་ཉོན་མོངས་པ་སེལ་ཞིང་ཟད་པར་བྱེད་ལ་འཇིག་པར་བྱེད། ཟག་པ་མེད་པ་ཐམས་ཅད་ལ་ཕྱོགས་པར་བྱེད་ཅིང་མངོན་དུ་བྱེད་པ་ཡིན་ནོ། །སོ་སོར་བརྟགས་པ་མ་ཡིན་པས་འགོག་པ་ནི་སོ་སོར་བརྟགས་པ་མ་ཡིན་པ་ཞེས་བྱ་བ་གང་མི་ཤེས་ཤིང་ཤེས་པ་མེད་ལ། སོ་སོར་རེག་པ་མེད། ཤེས་པ་མ་ཡིན་ཞིང་ཤིན་ཏུ་ཁོང་དུ་ཆུད་པ་མེད་ལ། རབ་ཏུ་རྟོག་པ་མེད། གཞན་གྱི་རྣམ་པར་ཤེས་པ་བརྒྱ་ཕྲག་སྟོང་སྐྱེས་པ་དག་ཀྱང་འཇིག་པར་བྱེད་ཅིང་། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པ་དེ་ལ་བདག་འཇིག་པར་བྱེད་ལ། ཡང་འབྱུང་བར་མི་བྱེད་པ་གསུམ་པ་འདི་ནི་སོ་སོར་བརྟགས་པ་མ་ཡིན་པས་འགོག་པ་སྟེ། ནམ་མཁའ་དང་ཆོས་གསུམ་པོ་འདི་དག་ནི་སྐྱེ་བ་མེད་ལ་རྟག་པ་དེ་དག་དུས་ཀྱིས་མ་བསྐྱེད་ཅིང་སྐྱེ་བར་མི་འགྱུར་ལ་མི་སྐྱེའོ། །དེ་ནས་གཞན་ཡང་ཇི་ལྟར་ན་དགེ་སློང་དེ་ཆོས་ཀྱི་སྐྱེ་མཆེད་གཟུགས་དང་གཟུགས་མ་ཡིན་པ་རྣམ་པ་གཉིས་རྣམ་པར་འབྱེད་ཅེ་ན། དེ་ལ་གཟུགས་ཅན་བཅུ་ནི་སྐྱེ་མཆེད་གཟུགས་ཅན་ཡིན་ནོ། །དེ་ལ་ཇི་ལྟར་ན་བསྟན་དུ་མེད་ཅིང་ཐོགས་པ་མེད་པའི་མིག་གི་རྣམ་པར་ཤེས་པས་བསྟན་དུ་ཡོད་ཅིང་ཐོགས་པ་དང་བཅས་པའི་གཟུགས་ཇི་ལྟར་ན་དམིགས་པར་འགྱུར། དེ་བཞིན་དུ་ཇི་ལྟར་ན་རྣ་བའི་རྣམ་པར་ཤེས་པ་བསྟན་དུ་མེད་ཅིང་ཐོགས་པ་མེད་པས་སྒྲ་འཛིན་པར་འགྱུར། དེ་བཞིན་དུ་ཇི་ལྟར་ན་སྣའི་རྣམ་པར་ཤེས་པ་བསྟན་དུ་མེད་ཅིང་ཐོགས་པ་མེད་པས་དྲི་འཛིན་པར་འགྱུར། དེ་བཞིན་དུ་ལྕེའི་རྣམ་པར་ཤེས་པ་བསྟན་དུ་མེད་ཅིང་ཐོགས་པ་མེད་པས་རོ་རྣམ་པར་ཤེས་པར་འགྱུར། དེ་བཞིན་དུ་ལུས་ཀྱི་རྣམ་པར་ཤེས་པ་བསྟན་དུ་མེད་ཅིང་ཐོགས་པ་མེད་པས་ཕྱི་རོལ་གྱི་སྐྱེ་མཆེད་ལྔ་དང་། གཞན་ནང་གི་སྐྱེ་མཆེད་ལྔ་པོ་འདི་དག་ཇི་ལྟར་ན་བསྟན་དུ་
མེད་ཅིང་ཐོགས་པ་མེད་པ་དག་གིས་བསྟན་དུ་ཡོད་ཅིང་ཐོགས་པ་དང་བཅས་པའི་སྐྱེ་མཆེད་དག་ཇི་ལྟར་དམིགས་པར་འགྱུར་ཞེ་ན། དགེ་སློང་དེ་ཇི་ཙམ་དུ་དམིགས་པའི་རྣམ་པར་འགྱུར་བ་དེ་ཙམ་དུ་རྣམ་པར་མཐོང་ཞིང་དེ་རྣམ་པར་ཤེས་པ་སྐྱེ་སྟེ། རྒྱ་དང་རྒྱའི་འབུར་བཞིན་ནོ། །དེ་ལ་རྒྱ་དེའི་མི་འདྲ་བ་མཁྲང་བ་དང་། རྒྱའི་འཇམ་པ་དང་། སྙི་བ་དང་། མཁྲང་བ་དང་། མི་མཁྲང་བ་དེ་ལས་རྒྱའི་འབུར་འབྱུང་ངོ་། །དེ་བཞིན་དུ་བསྟན་དུ་མེད་ཅིང་ཐོགས་པ་མེད་པའི་རྣམ་པར་ཤེས་པ་བསྟན་དུ་ཡོད་ཅིང་ཐོགས་པ་དང་བཅས་པ་ལ་དམིགས་པ་འཛིན་ཏོ། །གསུམ་པ་རྒྱའི་འབུར་འབྱུང་བ་བཞིན་དུ་མི་འདྲ་བ་དེ་དག་ཐམས་ཅད་ལས་མི་འདྲ་བ་འབྱུང་སྟེ། དེ་ལྟར་མི་འདྲ་བ་ལས་མི་འདྲ་བ་འབྱུང་བ་ནི་མཐའ་དང་པོ་ཡིན་ནོ། །མཐའ་གཉིས་པ་ནི་འདྲ་བ་དག་ལས་འདྲ་བ་འབྱུང་བ་ཡིན་ཏེ། དཔེར་ན་ཐགས་དཀར་པོ་དག་ལས་གོས་ཀྱི་སྣམ་བུ་དཀར་པོར་ཤེས་པ་ལྟ་བུའོ། །མཐའ་གསུམ་པ་ནི་མི་འཐུན་པ་དག་ལས་མི་འཐུན་པ་འབྱུང་བ་ཡིན་ཏེ། དཔེར་ན་གཙུབ་ཤིང་ལས་མེ་འབྱུང་ཞིང་མེ་དང་ཤིང་མི་འཐུན་པར་མཐོང་བ་ལྟ་བུའོ། །མཐའ་བཞི་པ་ནི་སླ་བ་ལས་བསྐ་བ་འབྱུང་བ་ཡིན་ཏེ། དཔེར་ན་འོ་མ་སླ་བ་ལས་བསྐ་བ་འབྱུང་བ་ནི་ཇི་ལྟར་འོ་མ་སླ་བ་ལས་ཞོ་བསྐ་བ་འབྱུང་བ་དེ་བཞིན་དུ་དངོས་པོ་མི་འདྲ་བ་མིག་གི་རྣམ་པར་ཤེས་པ་ལ་སོགས་པ་རྒྱུ་རྐྱེན་གྱི་བྱེ་བྲག་གིས་མིག་གི་རྣམ་པར་ཤེས་པ་ལ་སོགས་པ་སྐྱེའོ། །འདིར་ཚིགས་སུ་བཅད་པ། ཆོས་རྟོགས་པ་ལ་མངོན་དགའ་ཞིང་། །བསམ་གཏན་ཀུན་དགར་གནས་ལྡན་ལ། །དེ་ཡི་མཚན་ཉིད་ཤེས་པ་ནི། །མྱ་ངན་འདས་པ་མཆོག་འཐོབ་བོ། །བྱམས་ལ་རྟག་པར་ཀུན་ཏུ་དགའ། །ཆོས་ཀྱི་སྤྱོད་ཡུལ་བརྩོན་བྱེད་ཅིང་། །ལུས་ཀྱི་མཚན་ཉིད་དེ་ཤེས་པ། །དེ་ཉིད་ཁོ་ན་དགེ་སློང་ཡིན། །གང་གི་བློ་གྲོས་ཚུལ་བཞིན་སེམས། །འདོད་དང་ཁྲོ་བས་མི་ཉམས་པ། །དགེ་སློང་དེ་ཡིན་ཤེས་པར་བྱ། །དེ་ལས་བཟློག་ན་གཞན་དུ་འགྱུར། །འབྱུང་པོ་ཀུན་ལ་བརྩེ་ཞིང་ཞི། །ཆགས་པ་ཐམས་
ཅད་རྣམ་སྤངས་ལ། །འཆིང་བ་ཀུན་ལས་ངེས་གྲོལ་བ། །དེ་ཉིད་རིག་པ་དགེ་སློང་ཡིན། །གང་གི་རྣམ་ཤེས་ལས་རུང་བཞིན། །གང་དག་ཡུལ་གྱིས་མི་ཉམས་པ། །གསེར་ལ་དྲི་མ་མེད་པ་བཞིན། །དག་པ་དགེ་སློང་ཞེས་བྱ་འོ། །གང་གི་ཡིད་ལ་དགའ་བ་དང་། །མི་དགའ་བ་ཡིས་གོས་མེད་ཅིང་། །སྐྱོན་རྣམས་ཐམས་ཅད་རྣམ་སྤངས་པ། །དེ་ནི་དགེ་བའི་གཏེར་དུ་བལྟ། །ཚུལ་ཁྲིམས་ཉེ་བར་ཁྲོ་མེད་ཅིང་། །ཆོས་སྤྱོད་པ་དག་དབང་པོ་ཐུལ། །སེམས་ཅན་མི་དམན་བློ་གྲོས་ལྡན། །དེ་ལྟ་བུ་ནི་དགེ་སློང་ཡིན། །གང་དག་བསྟན་བཅོས་བསྟན་བཅོས་དོན། །རྟག་ཏུ་རྣམ་ཤེས་བློ་གྲོས་དགའ། །བཟའ་བཏུང་དག་ལ་དགའ་མེད་པ། །ཞི་བའི་ཡིད་དེ་དགེ་སློང་ཡིན། །གང་དག་ཚལ་དགོན་གཙུག་ལག་ཁང་། །དུར་ཁྲོད་དང་ནི་རྩྭ་བཏིང་ལ། །ཡིད་ནི་དགའ་བར་བྱེད་པ་དག །དེ་ལྟ་བུ་ནི་དགེ་སློང་ཡིན། །སྐྱོན་རྣམས་དེ་ཉིད་ལས་ཤེས་ཤིང་། །འབྲས་བུའི་བྱེ་བྲག་རིག་པ་དང་། །རྒྱུ་དང་རྐྱེན་གྱི་དེ་ཉིད་ཤེས། །སྡིག་དང་བྲལ་བ་དགེ་སློང་ཡིན། །སྡིག་པའི་དགོན་པ་བཅོམ་བྱས་ཤིང་། །སྐྱོན་བཅོམ་དབང་པོ་ཐུལ་བ་དང་། །ཡང་སྲིད་རྣམ་པ་ཤེས་པ་ནི། །ཞི་བའི་ཡིད་དེ་དགེ་སློང་ཡིན། །བསྔགས་པས་སྙིང་ལ་དགའ་མེད་ལ། །སྨད་པས་ཞུམ་པ་མེད་པ་ནི། །རྒྱ་མཚོ་ལྟ་བུར་ཟབ་པ་སྟེ། །རྣལ་རིག་དགེ་སློང་ཞེས་བྱ་འོ། །བློ་གྲོས་བརྟན་པ་བདག་མི་སྟོད། །སྙན་པར་སྨྲ་ཞིང་དུས་སུ་སྨྲ། །བརྐམ་མེད་གྲགས་པ་མཁས་པ་དག །དགེ་སློང་དེ་ནི་ཞི་ཞེས་བྱ། །འདོད་པའི་ཁམས་སུ་འགྲོ་བའི་རྒྱུ། །དེ་བཞིན་གཟུགས་ཀྱི་ཁམས་དང་ནི། །གཟུགས་མེད་ཁམས་ཀྱི་དེ་ཉིད་ཤེས། །བསྟན་རིག་དགེ་སློང་ཞེས་བྱ་འོ། །འཇིག་རྟེན་གཏམ་ལ་ཆགས་མེད་ཅིང་། །གང་གི་ཡུལ་དག་དུག་ལྟ་བུ། །ཆགས་པའི་སྐྱོན་དག་རྟག་འཇོམས་པ། །དགེ་སློང་དེ་ནི་སངས་རྒྱས་བསྟན། །གང་གི་བློ་གྲོས་འདོད་རྣམས་ལ། །འདམ་ལྟ་བུར་ནི་རྟག་ཏུ་ལྟ། །བརྟན་པ་བློ་གྲོས་ངེས་གྲོལ་ཞིང་། །དེ་ནི་
འཁོར་བའི་འཆིང་ལས་གྲོལ། །གང་ཞིག་ལེ་ལོ་ཐག་བསྲིངས་པ། །བསམ་གཏན་ཁ་ཏོན་ལས་རུང་ཞིང་། །སེམས་ཅན་རྣམས་ལ་ཕན་བྱེད་པ། །དགོན་གནས་དགེ་སློང་ཞེས་བྱའོ། །གང་གི་བློ་གྲོས་དྲིས་ལན་ལྡོན། །སྤོབས་དང་ལྡན་ཞིང་དབང་པོ་ཐུལ། །དེ་ནི་ཆོས་ཀྱི་གཏམ་ཤེས་ཏེ། །གང་དག་བཟློག་ན་རྩྭ་དང་འདྲ། །གང་གི་བློ་གྲོས་ལུས་དུབ་པས། །རྣམ་པ་ཀུན་ཏུ་སྐྱོ་མེད་ཅིང་། །དོན་དུ་བྱ་བ་ཀུན་ཤེས་པ། །དེ་ནི་དགེ་འདུན་སོགས་པ་བྱེད། །ཚོང་ཟོང་ཕྱིར་མིན་ལོངས་ཕྱིར་མིན། །གྲགས་པའི་དོན་དུ་ག་ལ་ཞིག །གང་བློ་དགེ་འདུན་དོན་སེམས་པ། །དེ་ནི་འཁོར་བའི་འཆིང་ལས་གྲོལ། །གང་གི་བརྟུལ་ཞུགས་མཐོ་རིས་དང་། །རྙེད་དང་གྲགས་པའི་དོན་དུ་མིན། །ཐམས་ཅད་མྱ་ངན་འདས་དོན་བྱེད། །དགེ་སློང་དེ་ནི་ཞི་ཞེས་བྱ། །སྡིག་པ་དག་ནི་རྟག་ཏུ་སྤངས། །ལེགས་པར་བྱེད་ལ་རྟག་དགའ་ཞིང་། །སྡིག་པའི་བཤེས་དང་མི་འདྲེ་བ། །སངས་རྒྱས་བསྟན་ལ་དགེ་སློང་ཡིན། །སེམས་ནི་བྱམས་པར་བསྒོམས་བྱས་ཤིང་། །མཁས་པ་དྲང་པོའི་སེམས་ལྡན་ལ། །བསླབ་པའི་གཞི་ལ་ཉམས་མེད་པ། །མྱ་ངན་འདས་པ་ཡོང་མི་རིང་། །འཁོར་བའི་སྐྱེ་དང་རྒ་བ་ཡི། །འཇིགས་ལས་ཁ་ནི་ཕྱིར་ཕྱོགས་ཤིང་། །བསམ་གཏན་ལྡན་ལ་བག་ཡོད་པ། །མྱ་ངན་འདས་པ་ཡོང་མི་རིང་། །མི་རྟག་སྟོང་པ་བདག་མེད་དང་། །བྱ་བའི་རྣམ་པ་ཤེས་པ་དང་། །བསམ་གཏན་འཕེལ་བའི་རྣམ་ཤེས་པ། །མྱ་ངན་འདས་པ་ཡོང་མི་རིང་། །དེ་ནས་གཞན་ཡང་དགེ་སློང་དེ་ས་གཞན་ལྔ་པ་ལས་ས་གཞན་དྲུག་པ་ལ་ཇི་ལྟར་འཇུག་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། དགེ་སློང་དེ་མུ་བཞི་པ་ལ་ལྷག་པར་མོས་པ་ཡིན་ནོ། །ཇི་ལྟར་ན་ཆོས་འདི་དག་གི་རྒྱུ་འདྲ་བ་དག་ལས་འདྲ་བ་འབྱུང་བ་དང་། མི་འདྲ་བ་དག་ལས་མི་འདྲ་བ་དང་། འདྲ་བ་མ་ཡིན་པ་དག་ལས་འདྲ་བ་མ་ཡིན་པ་དང་། ཕྱེད་འདྲ་
བ་དག་ལས་ཕྱེད་འདྲ་བ་འབྱུང་། ཇི་ལྟར་རྒྱུ་འདྲ་བ་དག་ལས་འདྲ་བ་འབྱུང་ཞེ་ན། དཔེར་ན་འབྲུ་དང་། འབྲུའི་རྒྱུར་གྱུར་པ་དག་ལས་འབྲུ་ཉིད་སྐྱེ་བ་དེ་བཞིན་དུ། ནང་གི་དགེ་བའི་ལས་འདྲ་བ་དག་ལས་འདྲ་བའི་འབྲས་བུ་ཉིད་ལྷ་དང་མི་རྣམས་ལ་དམིགས་པ་ནི་མུ་དང་པོ་ཡིན་ནོ། །རྒྱུ་མི་འདྲ་བ་དག་ལས་མི་འདྲ་བ་འབྱུང་བ་ནི་དཔེར་ན་འོ་མ་ལས་ཞོ་སྐྱུར་བ་འབྱུང་བ་དེ་བཞིན་དུ་ནང་གི་ཡང་འཇིག་རྟེན་འདིར་ཀུན་ནས་ཉོན་མོངས་པ་སྒྲ་དང་། རེག་པ་དང་། རོ་དང། གཟུགས་དང་། དྲི་འདོད་པ་སྡུག་པ་དག་བྱས་པས། ཞོ་སྐྱུར་བ་འབྱུང་བ་དེ་བཞིན་དུ་མི་འདོད་ཅིང་མི་སྡུག་ལ་ཡིད་དུ་མི་འོང་བའི་འབྲས་བུ་རྣམ་པར་སྨིན་པ་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ལ་དམིགས་པ་ནི་མུ་གཉིས་པ་ཡིན་ནོ། །རྒྱུ་མི་འདྲ་བ་དག་ལས་མི་འདྲ་བ་འབྱུང་བ་ནི་དཔེར་ན་ཚོན་སྔོན་པོ་དང་། བབ་ལར་སྦྱར་ན་ཁ་དོག་མི་འདྲ་བ་འབའ་ཞིག་ཏུ་འགྱུར་བ་དེ་བཞིན་དུ། ནང་གི་ཆོས་ལ་ཡང་ལས་དང་འབྲས་བུ་རྣམ་པར་སྨིན་པའི་ལས་དང་། འབྲས་བུ་མི་འདྲ་བ་འབྱུང་བ་སྟེ། ལས་དང་འབྲས་བུ་མི་འདྲ་བ་ནི་དཔེར་ན། ལོག་པར་ལྟ་བ་མཆོད་སྦྱིན་པ་དག་མཐོ་རིས་འདོད་པའི་ཕྱིར་ཕྱུགས་དག་གསོད་དེ། དེ་དག་སེམས་ཅན་དམྱལ་བར་འགྲོ་བ་ནི་མུ་གསུམ་པ་ཡིན་ནོ། །རྒྱུ་ཕྱེད་འདྲ་བ་དག་ལས་ཕྱེད་འདྲ་བ་འབྱུང་བ་ནི། ཐགས་ཕྲ་མོ་དཀར་པོ་ཉིད་ལས་སྣམ་བུ་དཀར་པོ་སྟུག་པོ་ཉིད་དུ་བྱེད་དེ། ཕྲ་མོ་དང་། སྟུག་པོ་གཉིས་མི་འདྲ་བ་ཉིད་དུ་ཡོད་པ་དེ་བཞིན་དུ་རྒྱུ་ཕྱེད་འདྲ་བ་དག་ལས་ཕྱེད་འདྲ་བ་འབྱུང་བ་ནི། མི་དགེ་བའི་ལས་བསགས་པ་ཕྲ་མོར་གྱུར་པ་དག་གིས་སེམས་ཅན་དམྱལ་བ་ཆེན་པོ་དག་བྱེད་པ་ནི་མུ་བཞི་པ་ཡིན་ནོ། །དགེ་སློང་དེ་ལས་དང་འབྲས་བུ་འོང་བ་དང་འགྲོ་བའི་བྱེད་པའི་རྗེས་སུ་བསམས་པ་མཐོང་ནས། ལས་དང་འབྲས་བུ་འཁོར་ལོ་བཞིན་དུ་སྲིད་པར་འགྲོ་བའི་མུ་བཞི་པ་སེམས་པར་བྱེད་དེ། རིས་དང་ལྡན་པའི་མི་ལ་གནོད་པར་བྱེད་པའི་ལས་ཐོབ་པ་མེད་པ་གང་ཡིན་པ་དེ་ནི་མུ་དང་པོ་ཡིན་ནོ། །མི་ལ་གནོད་པར་བྱེད་པའི་ལས་ཐོབ་པ་གང་ཡིན་པ་ནི་མུ་གཉིས་པ་ཡིན་ནོ། །གནོད་པར་བྱེད་པའི་ལས་ཐོབ་པ་དང་མ་ཐོབ་པ་གང་ཡིན་པ་ནི་མུ་གསུམ་པ་ཡིན་ནོ། །གནོད་པར་བྱེད་པའི་
ལས་ཐོབ་པ་ཡང་མ་ཡིན། མ་ཐོབ་པ་ཡང་མ་ཡིན་པ་གང་ཡིན་པ་ནི་མུ་བཞི་པ་ཡིན་ནོ། །རིས་དང་ལྡན་པར་གནོད་པར་བྱེད་པའི་ལས་ཐོབ་པ་མེད་པ་གང་ཡིན་པ་དེ་ནི་ཡོད་དེ། དཔེར་ན་འཇིག་རྟེན་པར་གྱུར་པ་དག་རྒྱུ་སྔར་མ་ཐོབ་པར་མི་དག་ལ་གནོད་པར་བྱེད་པ་ལྟ་བུའོ། །འཇིག་རྟེན་ལས་འདས་པ་མིག་གི་རྣམ་པར་ཤེས་པ་ལས་ཀྱི་རྒྱ་མཚོ་ཐོབ་པ་མེད་པའི་མི་ལ་འདོད་པ་དང་། མྱ་ངན་ལ་སོགས་པས་གནོད་པར་བྱེད་པ་ནི་མུ་དང་པོ་ཡིན་ནོ། །མི་ལ་གནོད་པར་བྱེད་པའི་ལས་ཐོབ་པ་གང་ཡིན་པ་ནི། དཔེར་ན་འཇིག་རྟེན་པ་དག་མེའམ། རལ་གྲི་དང་ཕྲད་ན་སྲེག་གོ་ཞེའམ། གཅོད་དོ་ཞེས་ཟེར་བ་ལྟ་བུའོ། །འཇིག་རྟེན་ལས་འདས་པ་ནི་མི་དགེ་བའི་ལས་ཐོབ་ན། སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་སུ་གནོད་པ་བྱེད་པ་ནི་མུ་གཉིས་པ་ཡིན་ནོ། །གནོད་པར་བྱེད་པའི་ལས་ཐོབ་པ་དང་མ་ཐོབ་པ་གང་ཡིན་པ་ནི། དཔེར་ན་འཇིག་རྟེན་པ་དག་རིག་སྔགས་དང་། དུག་གི་མཐུ་ཐོབ་པ་དང་། མ་ཐོབ་པ་སྦྱིན་པར་བྱེད་པ་ལྟ་བུའོ། །འཇིག་རྟེན་ལས་འདས་པ་ནི། འཆི་བའི་ཡུལ་གྱི་དུས་སུ་སེམས་ཅན་དམྱལ་བ་རྣམས་ཀྱི་མཚན་མའི་གཟུགས་བརྙན་ཐོབ་པ་ནི་མུ་གསུམ་པ་ཡིན་ནོ། །གནོད་པར་བྱེད་པའི་ལས་ཐོབ་པ་ཡང་མ་ཡིན། མ་ཐོབ་པ་ཡང་མ་ཡིན་པ་གང་ཡིན་པ་ནི། དཔེར་ན་འཇིག་རྟེན་པ་དག་སྨན་གྱི་ས་བོན་བཏབ་པ་སྐྱེ་བར་འགྱུར་བ་ཐོབ་པ་ཡང་མ་ཡིན། མ་ཐོབ་པ་ཡང་མ་ཡིན་པ་ལྟ་བུའོ། །འཇིག་རྟེན་ལས་འདས་པ་ནི་དཔེར་ན། དགེ་སློང་དགྲ་བཅོམ་པ་ལ་ངེས་པར་མྱོང་བར་འགྱུར་བའི་ལས་རི་རབ་ཙམ་ཡོད་ཀྱང་དགྲ་བཅོམ་པ་མྱ་ངན་ལས་འདས་ཏེ། དགྲ་བཅོམ་པ་ལ་ཡོད་པའི་ལས་དེ་དག་ཐོབ་པ་མེད་ཅིང་གནོད་པར་ཡང་མི་འགྱུར་ལ། གྲོལ་བ་ནི་མུ་བཞི་པ་ཡིན་ནོ། །ཚེ་འདི་ལ་མྱོང་བར་འགྱུར་ལ། སྐྱེས་ནས་མྱོང་བར་འགྱུར་བ་མ་ཡིན་པའི་ལས་ནི་མུ་དང་པོ་ཡིན་ནོ། །སྐྱེས་ནས་མྱོང་བར་འགྱུར་ལ། ཚེ་འདི་ལ་མྱོང་བར་འགྱུར་བ་མ་ཡིན་པ་ནི་མུ་གཉིས་པ་ཡིན་ནོ། །སྐྱེས་ནས་མྱོང་བར་འགྱུར་བ་དང་། ཚེ་
འདི་ལའང་མྱོང་བར་འགྱུར་བ་ནི་མུ་གསུམ་པ་ཡིན་ནོ། །ཚེ་འདི་ལ་ཡང་མྱོང་བར་འགྱུར་བ་མ་ཡིན་པ་དང་། སྐྱེས་ནས་ཀྱང་མྱོང་བར་འགྱུར་བ་མ་ཡིན་པ་ནི་མུ་བཞི་པ་ཡིན་ནོ། །ཚེ་འདི་ལ་མྱོང་བར་འགྱུར་ལ། སྐྱེས་ནས་མྱོང་བར་འགྱུར་བ་མ་ཡིན་པའི་ལས་གང་ཡིན་ཞེ་ན། དཔེར་ན་འཇིག་རྟེན་པ་དག་རྒྱལ་པོ་ལ་གནོད་པ་བྱས་ན། ཆད་པས་གཅོད་པ་ནི་ཚེ་འདི་ལ་མྱོང་བར་འགྱུར་བ་ཡིན་ལ། སྐྱེས་ནས་མྱོང་བར་འགྱུར་བ་མ་ཡིན་པ་ལྟ་བུའོ། །འཇིག་རྟེན་ལས་འདས་པ་ནི་སྦྱིན་པས་དེ་བསྔགས་པར་འགྱུར་བ་ཚེ་འདི་ལ་མྱོང་བ་ཡོད་པ་དེ་དང་། འཇིག་རྟེན་ཕ་རོལ་ཏུ་ལྷན་ཅིག་མི་འགྲོ་བ་ནི་མུ་དང་པོ་ཡིན་ནོ། །སྐྱེས་ནས་མྱོང་བར་འགྱུར་ལ། ཚེ་འདི་ལ་མྱོང་བར་འགྱུར་བ་མ་ཡིན་པ་ནི། དཔེར་ན་འཇིག་རྟེན་པ་དག་མེ་དོང་དུ་ཞུགས་པས་མཐོ་རིས་ཐོབ་པར་འགྱུར་རོ་ཞེས་ཟེར་བ་ལྟ་བུའོ། །འཇིག་རྟེན་ལས་འདས་པ་ནི། ཚེ་འདི་ལ་དགེ་བའམ། མི་དགེ་བ་བྱས་པས་གཞན་དུ་རྒྱུ་དང་འབྲས་བུ་མངོན་སུམ་དུ་མཐོང་བ་ཐོབ་པ་ནི་མུ་གཉིས་པ་ཡིན་ནོ། །ཚེ་འདི་ལ་མྱོང་བར་འགྱུར་ཞིང་། སྐྱེས་ནས་ཀྱང་མྱོང་བར་འགྱུར་བ་ནི་མུ་གསུམ་པ་ཡིན་ཏེ། དཔེར་ན་འཇིག་རྟེན་པ་དག་ཚེ་འདི་ལ་མྱོང་བར་འགྱུར་བ་དང་། སྐྱེས་ནས་མྱོང་བར་འགྱུར་བ་ལྟ་བུའོ། །འཇིག་རྟེན་ལས་འདས་པ་ནི་མུ་གསུམ་པ་བཞིན་ནོ། །ཚེ་འདི་ལ་མྱོང་བར་འགྱུར་བ་མ་ཡིན་ཞིང་། སྐྱེས་ནས་ཀྱང་མྱོང་བར་འགྱུར་བ་མ་ཡིན་པ་ནི་དཔེར་ན། འཇིག་རྟེན་པ་དག་མི་སྨྲ་བའི་བརྟུལ་ཞུགས་ལྟ་བུ་ཡིན་ཏེ། མི་སྨྲ་བའི་བརྟུལ་ཞུགས་དང་། སྦྱིན་པ་དང་། ཚུལ་ཁྲིམས་དག་ནི་ཚེ་འདི་ལ་མྱོང་བར་འགྱུར་བ་ཡིན་ནོ། །འཇིག་རྟེན་ལས་འདས་པ་ནི། ལུང་དུ་མ་བསྟན་པའི་སེམས་ཀྱི་ལས་ཡིན་ཏེ། ལུང་དུ་མ་བསྟན་པའི་ལས་དེས། ཚེ་འདི་ལ་མྱོང་བར་འགྱུར་བའི་འབྲས་བུ་རྣམ་པར་སྨིན་པ་ཡང་མི་དམིགས་ཤིང་། སྐྱེས་ནས་ཀྱང་མྱོང་བར་འགྱུར་བ་
མ་ཡིན་པ་ནི་མུ་བཞི་པ་ཡིན་ནོ། །དེ་ལྟར་དགེ་སློང་དེ་ཕྱོགས་གཅིག་ཏུ་འདུག་ནས། སེམས་ཅན་དམྱལ་བ་དང་། ལྷ་དང་། མི་རྣམས་ཀྱི་ལས་དང་། འབྲས་བུ་དང་། རྣམ་པར་སྨིན་པའི་དྲ་བ་མང་པོ་ཡན་ལག་དུ་མ་མཐོང་ནས། ཡང་དག་པའི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་སོ། །དེ་ནས་གཞན་ཡང་དགེ་སློང་དེ་ལས་ཀྱི་འབྲས་བུ་རྣམ་པར་སྨིན་པ་ཤེས་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེ། ལས་དང་། ལས་ཀྱི་འབྲས་བུ་དགེ་བ་དང་། མི་དགེ་བ་ཤེས་པ་ཡིན་ཏེ། འདི་ལྟར་སེམས་ཅན་འདི་དག་ལུས་ཀྱིས་ཉེས་པར་སྤྱོད་པ་དང་ལྡན། ངག་གིས་ཉེས་པར་སྤྱོད་པ་དང་། ཡིད་ཀྱིས་ཉེས་པར་སྤྱོད་པ་དང་ལྡན་པ་ནི། འཕགས་པ་རྣམས་ལ་སྐུར་པ་འདེབས་ཤིང་། ལོག་པར་ལྟ་བ་ཡང་དག་པར་བླངས་པ་ཡིན་ཏེ། དེ་རྒྱུ་དེ་དང་། རྐྱེན་དེ་དག་གིས་ངན་འགྲོ་ལོག་པར་ལྟུང་བ་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། ཡི་དགས་རྣམས་ཀྱི་ཡུལ་དུ་སྐྱེའོ། །གཞན་ཡང་སེམས་ཅན་འདི་དག་ལུས་ཀྱིས་ལེགས་པར་སྤྱད་པ་དང་ལྡན་པ་དང་། ངག་གིས་ལེགས་པར་སྤྱད་པ་དང་། ཡིད་ཀྱིས་ལེགས་པར་སྤྱད་པ་དང་ལྡན་པ་ནི། འཕགས་པ་རྣམས་ལ་སྐུར་པ་འདེབས་པ་མ་ཡིན་ཏེ། དེ་དག་རྒྱུ་དེ་དང་། རྐྱེན་དེ་དག་གིས་ལུས་དང་བྲལ་ནས། བདེ་འགྲོ་ལྷ་རྣམས་ཀྱི་ནང་དུ་སྐྱེའོ། །རང་གི་ལས་དང་། ཆོས་དང་། རྣམ་པར་སྨིན་པར་ཡང་དག་པ་ཇི་ལྟ་བ་བཞིན་མཐོང་བའི་དགེ་སློང་དེ་ནི། གཞན་དག་ལས་ཐོས་པ་ལ་རྣམ་པར་རྟོག་ཅིང་། བདུད་ཀྱི་དབང་དུ་སོང་བའི་སེམས་ཅན་དག་དང་སྤྱོད་པ་མཚུངས་པར་མི་སྤྱོད་ལ། མྱ་ངན་ལས་འདས་པའི་མཐར་གཏུགས་པའི་སྤྱོད་པ་ལ་ཡིད་འབྱུང་བ་དང་། དགེ་བ་དང་། འཁོར་བའི་མཐར་གཏུགས་པ་དང་ལྡན་པ་དང་། འཁོར་བ་འདི་ལས་ཇི་ལྟར་བདག་ཉིད་ཀྱིས་བདག་དང་། སྦྱིན་
བདག་དང་། སྦྱིན་པ་པོ་དག་སྒྲོལ་བ་དང་། གཞན་དག་ལ་ཡང་ཕན་གདགས་པ་བྱེད་པར་གྱུར་པས་སྤྱོད་དོ། །ཆོས་དང་། ལས་དང་། རྣམ་པར་སྨིན་པ་ཤེས་པའི་དགེ་སློང་དེ། སེམས་ཅན་དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་། མི་རྣམས་ཀྱི་ལས་དང་། ཆོས་དང་། རྣམ་པར་སྨིན་པ་ལ་རྟོག་ཅིང་དཔྱོད་པར་བྱེད་དེ། དཔེར་ན་ནོར་བུ་ཤིན་ཏུ་དང་ཞིང་གསལ་བ། ནོར་བུ་བཻ་དཱུཪྱའི་བུ་གའི་ནང་དུ་སྐུད་པ་བཅུག་པ་སེར་པོའམ། བཙོད་ཀའམ། དཀར་པོ་ཇི་ལྟར་སྣང་བ་དེ་བཞིན་དུ། ལས་ཀྱི་ནོར་བུའི་ནང་དུ་རྣམ་པར་སྨིན་པའི་སྐུད་པ་ཡོད་པ་དེ་དགེ་སློང་ཐོས་པ་ལས་བྱུང་བའི་ཤེས་པའམ། ལྷའི་མིག་རྣམ་པར་དག་པ་དེས་མཐོང་ངོ་། །ཡང་དགེ་སློང་དེ་ཐོས་པ་ལས་བྱུང་བའི་ཤེས་པས་ནོར་བུ་ལྟ་བུའི་ལས་དང་། ཆོས་དང་། རྣམ་པར་སྨིན་པ་མཐོང་སྟེ། དཔེར་ན་ནོར་བུ་དཀར་ཞིང་ཤིན་ཏུ་དཀར་བ་གང་ཞིག །ཀུན་ནས་གསལ་ཞིང་རྨ་མེད་ལ། དང་ཞིང་དབུག་བཟོད་པ། ལས་སུ་བྱར་རུང་ཞིང་ཀུན་ཏུ་སྒོར་གྱུར་ལ། སྐྱེ་བོ་ཐམས་ཅད་ཀྱིས་བསྔགས་པ། ནོར་དང་ལྡན་ཞིང་རྒྱལ་པོ་ལ་འོས་པ། ཡོན་ཏན་རྣམ་པ་དེ་དག་དང་ལྡན་པའི་ནོར་བུ་དེ། རྒྱལ་པོའམ། རྒྱལ་པོའི་བུས་དེའི་ཡོན་ཏན་ཤེས་ཤིང་། དེའི་རིན་ཤེས་པར་གྱུར་ནས། རྒྱན་དུ་བྱ་བ་ནས་གདགས་པའི་བར་དུ་བྱས་པ་དེ་བཞིན་དུ། དགེ་སློང་དེ་ཕྱོགས་དཀར་པོ་དགེ་བ་བཅུའི་ལས་ཀྱི་ལམ་གྱི་ནོར་བུ་འདི་ཀུན་ནས་དཀར་ཞིང་། ཤིན་ཏུ་གསལ་ལ་སྡིག་པ་མེད་པ། ཁ་ན་མ་ཐོ་བ་མེད་ཅིང་དང་ལ་དབུག་བཟོད་པ། ཆོས་ཀྱི་ཕྱོགས་དང་གཉེན་པོ་སྐྱེད་པ། དྲི་བ་དང་ལན་ལྡོན་པ་ལ་ཆོས་ཀྱི་ཐུར་མས་འབིགས་པར་བཟོད་ཅིང་། ལས་སུ་རུང་བ་སྦྱིན་པ་དང་། ཚུལ་ཁྲིམས་དང་། ཤེས་པ་དག་ཇི་ལྟ་ཇི་ལྟར་ཡོངས་སུ་སྔོ་བར་བྱེད་པ་དེ་ལྟ་དེ་ལྟར་དགེ་བ་བཅུའི་ལས་ཀྱི་ལམ་གྱི་ནོར་བུ་འདི་ལས་སུ་རུང་བ་ཉིད་དུ་དེ་འཁོར་ལོས་སྒྱུར་བའི་རྒྱལ་སྲིད་དམ། དེ་བདུད་
ཀྱི་རྒྱལ་སྲིད་དམ། དེ་ཚངས་པའི་རྒྱལ་སྲིད་དམ། དེ་ཟག་པ་མེད་པའི་བསམ་གཏན་གྱི་ཏིང་ངེ་འཛིན་སྒོམ་པའི་རྒྱལ་སྲིད་འགྲུབ་པར་བྱེད་དེ། དེ་དེ་ལྟར་དམ་པའི་ཆོས་ཀྱི་ནོར་བུ་འདི་ལས་སུ་རུང་ཞིང་ཀུན་ཏུ་སྒོར་གྱུར་པ་ཡིན་ནོ། །ཀུན་ཏུ་སྒོ་ནི་ལྷ་དང་མིའི་སྒོར་གྱུར་པ་ཡིན་ཏེ། དེ་ལྟར་དམ་པའི་ཆོས་ཀྱི་ཀུན་ཏུ་སྒོར་གྱུར་པ་ནི། འཁོར་བའི་གྲོང་ཁྱེར་ལས་འབྱུང་ཞིང་། མྱ་ངན་ལས་འདས་པའི་སྒོའི་རྗེས་སུ་འཇུག་པ་ཡིན། སྐྱེ་བོ་ཐམས་ཅད་ཀྱིས་བསྔགས་པ་ཞེས་བྱ་བ་ནི། ཡང་དག་པའི་ལྟ་བ་དང་ལྡན་པ་སློབ་པ་རྣམས་ཀྱིས་བསྔགས་པའོ། །རྒྱལ་པོ་ལ་འོས་པ་ཞེས་བྱ་བ་ནི། དམ་པའི་ཆོས་ཀྱི་ལམ་བསྒྲུབ་པ་ཤེས་པའི་སེམས་ཀྱི་དབང་ཕྱུག་ཏུ་རུང་བའོ། །དེར་ཞུགས་པ་ཞེས་བྱ་བ་ནི། ནོར་བུ་བཻ་དཱུཪྱ་དང་། དམ་པའི་ཆོས་ཀྱི་ནོར་བུ་ཡོན་ཏན་ཐམས་ཅད་ཕུན་སུམ་ཚོགས་པ་དེ་དང་། ཆོས་འཐུན་པར་དམིགས་པའོ། །ཡང་དགེ་སློང་དེ་ལས་དང་། ཆོས་དང་། རྣམ་པར་སྨིན་པ་ནོར་བུ་བཞིན་དུ་མཐོང་སྟེ། དཔེར་ན་ནོར་བུ་གཞན་ཞིག་རྨ་ཡོད་ཅིང་ཐམས་ཅད་དུ་བཟང་བ་མ་ཡིན་ལ། ཀུན་གྱི་སྒོ་མ་ཡིན། དཀར་བ་མ་ཡིན་ཞིང་དབུག་ཏུ་མི་བཟོད་ལ། ལས་སུ་བྱར་མི་རུང་། སྐྱེ་བོ་ཀུན་གྱིས་བསྔགས་པ་མ་ཡིན་ཞིང་། རྒྱལ་པོའམ། རྒྱལ་པོའི་བུ་ལ་རུང་བ་མ་ཡིན་པ་དེ་བཞིན་དུ། གཞན་མུ་སྟེགས་ཅན་ཆོས་ཀྱི་གཟུགས་བརྙན་གྱི་ཆོས་ཀྱི་ནོར་བུ་རྨ་ཡོད་པ་དེའི་རྨ་གཅིག་པོ་ནི་འཇིག་ཚོགས་ལ་ལྟ་བ་དང་། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པ་དང་། ཐེ་ཙོམ་ཡོད་པ་ཡིན་ནོ། །ཀུན་གྱི་སྒོ་མ་ཡིན་པ་ནི། སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྒོ་ཡིན་ནོ། །ནོར་དང་མི་ལྡན་པ་ནི། ཟག་པ་མེད་པའི་བཀྲ་ཤིས་དང་མི་ལྡན་པའོ། །དབུག་པར་མི་བཟོད་པ་ནི། ལེགས་པར་འདྲི་བ་དང་། ལན་གླན་པའི་ཆོས་ཀྱི་གཏམ་འབུགས་པའི་ཐུར་མར་མི་རུང་བའོ། །རྒྱལ་པོའམ། རྒྱལ་པོའི་བུ་ལ་
འོས་པ་མ་ཡིན་པ་ནི། སེམས་ཅན་ཐམས་ཅད་ཀྱི་དབང་ཕྱུག་དམ་པའི་ཆོས་ཀྱི་ལམ་དུ་ཞུགས་པ་སྐྱེས་བུ་གང་ཟག་བརྒྱད་རྣམས་སུ་མི་རུང་བ་སྟེ། རྣམ་པ་དེ་ལྟ་བུའི་ཆོས་ཀྱི་གཟུགས་བརྙན་ཆོས་མ་ཡིན་པ་མགུལ་དུ་ཐོགས་སོ། །དེ་དག་ནོར་བུ་དེའི་གཟུགས་བརྙན་གྱི་ནོར་བུ་ཐོགས་ནས། སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་འཁོར་བ་ཐོག་མ་མེད་པའི་དུས་ནས་ཞུགས་ཏེ་ཡོངས་སུ་འཁྱམ་མོ། །དེ་ལྟ་བས་ན་དགེ་སློང་ནོར་བུ་དེ་ལྟ་བུའི་ནོར་བུར་གྱུར་ཏེ། དཔེར་ན་བྱིས་པ་སོ་སོའི་སྐྱེ་བོ་ནི། བཻ་དཱུཪྱ་དང་འདྲ་བའི་ནོར་བུ་མཆིང་བུ་མཐོང་ནས། བཻ་དཱུཪྱ་ཡིན་ནོ་སྙམ་དུ་སེམས་པ་བཞིན་ནོ། །དགེ་སློང་དེ་ཆོས་དང་ཆོས་མ་ཡིན་པའི་བརྟག་པའི་དེ་ཁོ་ན་ཤེས་པ་ས་གཞན་བདུན་པ་ལ་འཇུག་སྟེ། དེ་ལ་ཞུགས་པའི་བརྟུལ་ཞུགས་ས་བླའི་གནོད་སྦྱིན་དག་གིས་མཐོང་ནས། བར་སྣང་ལ་སྤྱོད་པའི་གནོད་སྦྱིན་དག་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་པོ་ཆེན་པོ་བཞི་ལའོ། །དེ་དག་གིས་ཀྱང་རྒྱལ་ཆེན་བཞིའི་ལྷ་རྣམས་ལའོ། །དེ་དག་གིས་ཀྱང་། སུམ་ཅུ་རྩ་གསུམ་པ་རྣམས་ལའོ། །དེ་དག་གིས་ཀྱང་བརྒྱ་བྱིན་ལའོ། །བརྒྱ་བྱིན་གྱིས་ནི་འཐབ་བྲལ་བ་རྣམས་ལའོ། །འཐབ་བྲལ་བ་དག་གིས་ནི་དགའ་ལྡན་པ་རྣམས་ལའོ། །དགའ་ལྡན་པ་དག་གིས་ཀྱང་བྱམས་པ་ལའོ། །བྱམས་པས་ཀྱང་འཕྲུལ་དགའ་བ་རྣམས་ལའོ། །འཕྲུལ་དགའ་བ་རྣམས་ཀྱིས་ཀྱང་གཞན་འཕྲུལ་དབང་བྱེད་པ་རྣམས་ལ། འཛམ་བུའི་གླིང་དུ་རིགས་ཀྱི་བུ་ཆེ་གེ་མོ་ཞིག་ཅེས་བྱ་བ་སྔ་མ་བཞིན་དུ་སྦྱར་རོ། །དེ་ནས་གཞན་ཡང་དགེ་སློང་དེ་ལས་དང་། ཆོས་དང་། རྣམ་པར་སྨིན་པ་རྣམ་པར་རིག་བྱེད་མ་ཡིན་པའི་འདུ་ཤེས་ཀྱི་གཟུགས་བཅུ་གཅིག་རྗེས་སུ་ཇི་ལྟར་མཐོང་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། གང་གི་ཚེ་ཆོས་ཐམས་ཅད་ཀྱི་བྱེད་པ་དང་ལྡན་པ་གང་སྡོམ་པ་ཉིད་བླངས་ཏེ། དེ་ཕན་ཆད་
གཉིད་ལོག་གམ། མྱོས་སམ། རབ་ཏུ་མྱོས་ཀྱང་། དགེ་བའི་ཆོས་ཀྱི་རྒྱུན་ཉིད་རབ་ཏུ་འཇུག་སྟེ། དཔེར་ན། ཆུ་བོའི་རྒྱུན་བར་ཆད་མེད་པ་རྟག་ཏུ་འབབ་པ་དེ་བཞིན་དུ། སྐྱེས་བུ་དེ་གཉིད་ལོག་གམ། མྱོས་སམ། རབ་ཏུ་མྱོས་པའི་འཇུག་པ་ཡང་དེ་བཞིན་ནོ། །དེ་ལྟར་རྣམ་པར་རིག་བྱེད་མ་ཡིན་པའི་གཟུགས་བསྟན་དུ་མེད་པ། ཐོགས་པ་མེད་པར་འདོད་དོ། །གཟུགས་དེ་ཇི་ལྟ་བུ་ཡིན་ཞེ་ན། ལས་ཀྱི་ངོ་བོ་ཉིད་ཡོད་པ་ཉིད་ཡིན་ཏེ། དེ་ལྟ་བས་ན། གཟུགས་དེ་ཡང་། གཟུགས་རྣམ་པ་བཅུ་གཅིག་པོ་དེ་དག་ཡིན་ལ། དགེ་བའི་ཆོས་ཐམས་ཅད་ཀྱི་རྟེན་དུ་གྱུར་པ་ཡིན་ནོ། །དགེ་སློང་དེས། སེམས་ཅན་འདི་དག་གི་གཟུགས་ཐ་དད་པ། གནས་སྐབས་ཐ་དད་པ། མིང་དང་འགྲོ་བ་ཐ་དད་པ། གནས་ཀྱི་རྣམ་པ་ཐ་དད་པ་ཇི་ལྟ་བུར་མཐོང་ཞེ་ན། འདི་ལྟར་དེ་སེམས་ཅན་དེ་དག་གི །སེམས་ཐ་དད་པ། གནས་ཀྱི་རྣམ་པ་དང་། མོས་པ་ཐ་དད་པ་དང་། ལས་ཀྱི་རྣམ་པ་ཐ་དད་པ་མཐོང་བ་དེའི་ཕྱིར། གཟུགས་ཐ་དད་པ་དང་། གནས་སྐབས་ཐ་དད་པ་དང་། མིང་དང་འགྲོ་བ་ཐ་དད་པ་དང་། གནས་ཀྱི་རྣམ་པ་ཐ་དད་པ་དེ་དག་ནི། དཔེར་ན་རི་མོ་མཁན་ནམ། རི་མོ་མཁན་གྱི་སློབ་མ་མཁས་པ་ཞིག །ས་ཡིད་དུ་འོང་ཞིང་འཇམ་ལ་མཁྲང་བ་ཞིག་མཐོང་ནས་འདུག་སྟེ། ཚོན་སྣ་ཚོགས་དག་གིས། རི་མོའི་རྣམ་པ་སྣ་ཚོགས་གཟུགས་ལེགས་ཤིང་། ལེགས་པའི་རྣམ་པ་སྣ་ཚོགས། སེམས་ཀྱི་དབང་གིས་འདྲི་བ་དེ་བཞིན་དུ། སེམས་རི་མོ་མཁན་ནམ། རི་མོ་མཁན་གྱི་སློབ་མ་ལྟ་བུ་འདི་ལྷག་པར་མོས་པས་ཁམས་གསུམ་གྱི་ས་ཤིན་ཏུ་འཇམ་ཞིང་མཁྲང་བ་དག་ལ། ལས་ཀྱི་འབྲས་བུ་རྣམ་པར་སྨིན་པ་དག་གི་འཁོར་བའི་སར་གནས་སྐབས་ཐ་དད་པ་དང་། མིང་དང་འགྲོ་བ་ཐ་དད་པ་དང་། རྣམ་པ་ཐ་དད་པ་དང་། སེམས་ཅན་གྱི་
གནས་ཀྱི་རྣམ་པ་ཐ་དད་པ་དག །སེམས་རི་མོ་མཁན་ལྟ་བུ་དེས་མངོན་པར་འགྲུབ་པར་བྱེད་དོ། །ཡང་ཇི་ལྟར་ཚོན་དཀར་པོས་ནི། གཟུགས་དཀར་པོར་འདྲི་བར་བྱེད་ལ། དམར་པོས་ནི་དམར་པོར་འདྲི་བར་བྱེད། སེར་པོས་ནི་སེར་པོར་འདྲི་བར་བྱེད། ཚོན་ཕུག་རོན་ཁ་ལྟ་བུས་ནི་ཕུག་རོན་ཁ་ལྟ་བུ་འདྲི་བར་བྱེད། ནག་པོས་ནི་ནག་པོར་འདྲི་བར་བྱེད་པ་དེ་བཞིན་དུ། སེམས་རི་མོ་མཁན་ལྟ་བུ་འདི་སེམས་ཀྱི་དམིགས་པ་དཀར་པོ་ཉེ་བར་བཟུང་ནས། ཟག་པ་དང་བཅས་པ་འདོད་ཆགས་ལ་སོགས་པའི་དྲི་མ་དག་གིས་ཉོན་མོངས་པ་མེད་པའི་ཆོས་དཀར་པོ་ལྷ་དང་མི་རྣམས་ཀྱི་གཟུགས་དཀར་པོ་མངོན་པར་འགྲུབ་པར་བྱེད་དོ། །རི་མོ་མཁན་གྱིས་ཚོན་དམར་པོ་བླངས་ནས། ལྷ་དང་མི་རྣམས་ཀྱི་གཟུགས་དམར་པོ་མངོན་པར་འགྲུབ་པར་བྱེད་དེ། དམར་པོ་ཞེས་བྱ་བ་ནི། སྒྲ་དང་། རོ་དང་། རེག་པ་དང་། གཟུགས་དང་། དྲི་སྟུག་པོ་དག་གིས། རི་མོའི་གཞི་ལ་ཚུལ་བཞིན་དུ་བྱས་པའོ། །ཡང་སེམས་རི་མོ་མཁན་ལྟ་བུ་དེས། ཚོན་སེར་པོ་བླངས་ནས་དུད་འགྲོ་མངོན་པར་འགྲུབ་པར་བྱེད་དེ། དེ་དག་ཀྱང་སེར་པོའི་དབང་གིས། གཅིག་ལ་གཅིག་ཁྲག་འཐུང་བར་བྱེད་ཅིང་ཤ་ཟ་བར་བྱེད་ལ། གཅིག་ལ་གཅིག་ཚོན་སེར་པོ་ལྟ་བུར་གྱུར་པའི་འདོད་ཆགས་ཞེ་སྡང་གཏི་མུག་གིས་གསོད་དོ། །ཡང་སེམས་རི་མོ་མཁན་ལྟ་བུ་དེས། ཚོན་ཕུག་རོན་ཁ་ལྟ་བུ་ལ་དམིགས་པ་མཐོང་ནས། ཚོན་ཕུག་རོན་ཁ་ལྟ་བུའི་ལས་དྲི་མ་ཅན་ཡི་དགས་ཀྱི་འགྲོ་བ་བྱེད་དེ། དེ་དག་ཀྱང་ལུས་ཚལ་ཤིང་བསྲེགས་པ་ལྟ་བུ་ཡིན་ལ། སེམས་རི་མོ་མཁན་ལྟ་བུ་སེར་སྣ་ལ་དམིགས་ཤིང་། གཏི་མུག་རབ་རིབ་ཀྱི་སྒྲིབ་པའི་དབང་གིས་བཀྲེས་ཤིང་སྐོམ།སྡུག་བསྔལ་རྣམ་པ་སྣ་ཚོགས་ཡོངས་སུ་ཉམས་པས་ཟིལ་གྱིས་ནོན་པ་ཡིན་ནོ། །ཡང་སེམས་རི་མོ་མཁན་ལྟ་བུ་དེས། ཚོན་རྩི་ནག་པོ་ལྟ་བུའི་ལས་ཀྱི་ངོ་བོ་བླངས་ནས། སེམས་ཅན་དམྱལ་བའི་གཟུགས་ནག་
པོ་འདྲི་བ་ལྟ་བུར་དེ་དག་ཀྱང་། ལས་ནག་པོས་ལྕགས་ནག་པོའི་ར་བ་འབར་བས་བསྐོར་བ་དེར་སྐྱེས་ཏེ། ལུས་ནག་པོ་ལ་ནད་དང་། གནོད་པ་དང་། བཀྲེས་ཤིང་སྐོམ་པ་རྣམ་པ་སྣ་ཚོགས་ཀྱི་གཞིར་གྱུར་ཅིང་། རང་གིས་ཉེས་པར་བྱས་པ་གཞན་ཡང་མཚུངས་པ་མེད་པའི་གནོད་པའི་སྡུག་བསྔལ་གྱིས་ཉམ་ཐག་པ་ཡིན་ནོ། །ཡང་དགེ་སློང་རྣལ་འབྱོར་སྤྱོད་པ་དེ། ཚོན་རྩི་ལྔའི་རི་མོའི་གཞི་ལྟ་བུའི་འཁོར་བ་ཁམས་གསུམ་དུ་འགྲོ་བ་ལྔར་ཀུན་ཏུ་གནས་ཤིང་། ས་གསུམ་པོ་འདོད་པའི་ཁམས་ཀྱི་ས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ལ་ཀུན་ཏུ་གནས་ཏེ། དེ་ལ་སེམས་རི་མོ་མཁན་ལྟ་བུ་དེ་འདོད་པ་བསྟན་ཅིང་འདོད་པའི་ཁམས་ལ་དམིགས་པས། གཟུགས་རྣམ་པ་ཉི་ཤུ་རྣམ་པ་སྣ་ཚོགས་འདྲིའོ། །འདོད་པའི་ཁམས་དང་བྲལ་བ་དག་ནི། གཟུགས་ཀྱི་ཁམས་ལ་དམིགས་ཤིང་གནས་པ་དེ་ལ་བརྟེན་པའི་སའི་གནས་སྐབས་བཅུ་དྲུག་པོ་དག་ནི་བསམ་གཏན་བཞིའི་པིར་གྱིས། གཟུགས་ཀྱི་ཁམས་མངོན་པར་འདྲིའོ། །གཟུགས་ཀྱི་ཁམས་ལ་དམིགས་པ་དང་བྲལ་བ་དག་ནི། སྙོམས་པར་འཇུག་པ་བཞིའི་སྲེད་པ་ལ་མཉམ་པར་དམིགས་པའི་སེམས་རི་མོ་མཁན་ལྟ་བུས། གཟུགས་མེད་པའི་ཁམས་མངོན་པར་འདྲི་སྟེ། ཁམས་གསུམ་གྱི་གཞི་འདི་ནི་རྒྱ་ཆེ་བ་ཡིན་ནོ། །ཡང་དགེ་སློང་དེས། སེམས་ཅན་གཞན་གྱི་སེམས་རི་མོ་མཁན་ལྟ་བུ་རྣམ་པ་གཞན་གྱིས་མཐོང་སྟེ། དེ་ལ་སེམས་ནི་རི་མོ་མཁན་ལྟ་བུ་ཡིན་ནོ། །ལུས་ནི་རི་མོའི་ཚོན་རྩིའི་སྣོད་ལྟ་བུ་ཡིན་ནོ། །འདོད་ཆགས་ཞེ་སྡང་གཏི་མུག་དག་ནི་ལས་བརྟན་པར་བྱས་པ་ལྟ་བུ་ཡིན་ནོ། །དམིགས་པ་ནི་ཁྲི་ལྟ་བུ་ཡིན་ནོ། །དབང་པོ་ནི་པིར་ལྟ་བུ་ཡིན་ནོ། །ཕྱི་རོལ་གྱི་ཡུལ་སྒྲ་དང་། རེག་པ་དང་། རོ་དང་། གཟུགས་དང་། དྲི་སྣ་ཚོགས་དག་ནི་ཚོན་རྩི་སྣ་ཚོགས་ལྟ་བུ་ཡིན་ནོ། །འཁོར་བ་ནི་རྩིག་པ་ལྟ་བུ་ཡིན་ནོ། །ཤེས་པ་ནི་སྣང་བ་ལྟ་བུ་ཡིན་ནོ། །བརྩོན་འགྲུས་
རྩོམ་པ་ནི་ལག་པ་ལྟ་བུ་ཡིན་ནོ། །ལས་ཀྱི་འབྲས་བུ་རྣམ་པར་སྨིན་པས་བྱས་པའི་གཟུགས་མང་པོ་དག་ནི། རི་མོའི་གཟུགས་ཆ་བྱད་དང་། དབྱིབས་དང་། མདོག་དང་། འབྱོར་པར་གྱུར་པ་མང་པོ་དག་ལྟ་བུ་ཡིན་ནོ། །ཡང་དགེ་སློང་བསམ་གཏན་ལ་ཞུགས་པ་དེ། སེམས་རི་མོ་མཁན་ལྟ་བུ་དེ་ཉིད་རྣམ་པ་གཞན་གྱིས་མཐོང་སྟེ། དཔེར་ན། གང་རི་མོ་མཁན་དེ་མགུ་ན། ཚོན་རྩིའི་རྣམ་པ་ལེགས་པར་སྦྱང་བ་བྱས་པ་གསལ་བར་འགྱུར་ཞིང་། པིར་གྱིས་ཡང་དང་ཡང་དུ་ལེགས་པར་འདྲི་ན་དེའི་ཚེ། གཟུགས་ལེགས་པར་འདྲི་བ་དེ་བཞིན་དུ། གང་སེམས་རི་མོ་མཁན་ལྟ་བུ་འདི་མགུ་ན་བསམ་གཏན་གྱི་བྱ་བ་ལ། ཚོན་རྩི་ལྟ་བུའི་བསམ་གཏན་གྱི་རྣམ་པ་ཡོངས་སུ་སྦྱང་བ་བྱས་པ། ཚོན་རྩི་ལྟ་བུ་གསལ་བར་འགྱུར་ཞིང་། པིར་གྱིས་ཡང་དང་ཡང་དུ་ལེགས་པར་འདྲི་བ་ལྟ་བུའི་དམིགས་པ་ལུང་ཕོག་པ་ཡོངས་སུ་སྦྱང་བ་བྱས་པས། འོག་དང་། སྟེང་དུ་མཉམ་པར་འཇོག་པ་དང་། ལྡང་བ་ལ་སྐྱོ་བ་མེད་ན། སེམས་རི་མོ་མཁན་ལྟ་བུ་དེ། བསམ་གཏན་གྱི་སར་གཟུགས་ལེགས་པར་འདྲིའོ། །གལ་ཏེ་མི་དགའ་ན། སེམས་རི་མོ་མཁན་ལྟ་བུ་དེ། སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ས་ངན་པ་དེར་འགྲོ་བའི་རིས་དང་། གནོད་པ་དང་། ལྕགས་ཀྱི་གཏུན་ཤིང་པིར་ལྟ་བུས་མི་དགེ་བའི་ཚོན་རྩི་བླངས་ནས་སྣོད་ལྟ་བུར་གྱུར་པའི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཀྱི་གཟུགས་དེ་དུད་འགྲོའི་འགྲོ་བའི་གཟུགས་མ་ལེགས་པ་འདྲི་སྟེ། རྒྱ་ཆེར་སྔ་མ་བཞིན་དུ་སྦྱར་རོ། །ཡང་དགེ་སློང་དེ་སེམས་སྤྲེའུ་ལྟ་བུར་མཐོང་སྟེ། ཇི་ལྟར་སྤྲེའུ་ནི་འཕྱར་བ་ཡིན་ཏེ། ཤིང་དང་། ལྕུག་མ་དང་། མེ་ཏོག་དང་། འབྲས་བུ་དང་། རི་བྲགས་ཀྱི་བུ་ག་དང་། སྨན་ལྗོངས་ཐ་དད་པ་ཐོགས་པ་མེད་པར་འགྲོ་བ་དེ་བཞིན་དུ། སེམས་སྤྲེའུ་ལྟར་འཕྱར་བ་འདི་ཡང་ཐ་དད་པ་
ལྟ་བུའི་སེམས་ཅན་དམྱལ་བ་དང་། ཡི་དགས་དང་། དུད་འགྲོ་དག་གི་འགྲོ་བ་ལྔར་འགྲོ་སྟེ། སེམས་ཅན་ནི་ཤིང་ལྟ་བུའོ། །སྲེད་པའི་ལྕུག་མ་ནི་ལྕུག་མའི་རྣམ་པ་དུ་མ་ལྟ་བུ་ཡིན། རྟོག་པ་ནི་མེ་ཏོག་གི་ཡལ་ག་ལྟ་བུ་ཡིན་ནོ། །སྒྲ་དང་། རོ་དང་། གཟུགས་དང་། དྲི་དང་། རི་སུལ་དང་། བུ་ག་དང་། སྤྱོད་པ་སྡུག་པ་དང་མི་སྡུག་པའི་ཁམས་གསུམ་ནི་འབྲས་བུ་ལྟ་བུ་ཡིན་ནོ། །ལུས་ནི་ཕུག་པ་ལྟ་བུ་ཡིན་ནོ། །སེམས་སྤྲེའུ་ལྟ་བུ་སེམས་ཅན་དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་། མི་རྣམས་ཀྱི་གནས་རྣམས་སུ་ཐོགས་པ་མེད་པར་འགྲོ་སྟེ། སེམས་སྤྲེའུ་ལྟ་བུ་དེ་འཁོར་བའི་སར་འཁྱམ་མོ། །ཡང་དགེ་སློང་བསམ་གཏན་ལ་ཞུགས་པ་དེ་སེམས་གར་མཁན་ལྟ་བུར་མཐོང་སྟེ། ཇི་ལྟར་གར་མཁན་དག་ཆ་བྱད་དང་། ཚོན་རྩི་དང་། ས་དང་། གོས་དང་། སིལ་སྙན་སྣ་ཚོགས་དག་ཐོགས་ནས། གར་མཁན་གར་བྱེད་པ་དེ་བཞིན་དུ། སེམས་གར་མཁན་ལྟ་བུ་འདི་ཡང་ས་དང་འགྲོ་བའི་རིས་ཀྱི་ས་སྣ་ཚོགས་སུ་ལས་ཀྱིས་སྤྲུལ་པའི་ཆ་བྱད་སྣ་ཚོགས་ཐོགས་ཤིང་རྒྱུ་དང་རྐྱེན་རྣམ་པ་སྣ་ཚོགས་འཛིན་པ་ནི་ཆ་བྱད་སྣ་ཚོགས་ཐོགས་པ་ལྟ་བུ་ཡིན་ནོ། །བྱེད་པ་དག་ནི་སིལ་སྙན་རྣམ་པ་སྣ་ཚོགས་ལྟ་བུ་ཡིན་ནོ། །འཁོར་བ་གར་མཁན་ལྟ་བུ་ནི་རང་གི་ཡུལ་གར་མཁན་ལྟ་བུ་ཡིན་ཏེ། གར་ཉིད་ཀྱིས་སེམས་གར་མཁན་ལྟ་བུ་འཁོར་བ་ཐོག་མ་མེད་ཅིང་ཡུན་རིང་བ་རྣམ་པ་སྣ་ཚོགས་དུ་མར་གར་བྱེད་དོ། །ཡང་དགེ་སློང་དེ་སེམས་ཉ་ལྟ་བུ་ཆུ་བོའི་ཉ་ལྟ་བུར་མཐོང་སྟེ། ཇི་ལྟར་ཉ་ནི་རིའི་ཆུ་བོ་འགྱུར་ཞིང་དབའ་རླབས་འཁྲུགས་པ་གཏིང་ཟབ་ལ་རྒྱུན་དྲག་སྟེ། བཟོད་པར་དཀའ་ཞིང་འབབ་པའི་རྒྱུན་གྱིས་ཤིང་ལྗོན་པ་མང་པོ་རྩ་ནས་འབྱིན་པར་ནུས་ལ་འགྱུར་བའི་ཤུགས་དྲག་པོ་བཟློག་པར་དཀའ་བའི་ལས་མི་བཟད་པར་འབྱུང་ཞིང་འཇུག་པ་དེ་བཞིན་དུ། སེམས་ཉ་ལྟ་བུ་འདི་ཡང་སྲིད་པ་གསུམ་གྱི་དབའ་རླབས་འཁྲུགས་པ་ནི་འགྱུར་ཞིང་དབའ་རླབས་འཁྲུགས་པ་ལྟ་བུ་ཡིན་ལ། མནར་མེད་པས་མཆོག་ཏུ་ཟབ་པ་ནི་འདོད་པའི་ཁམས་ཀྱི་ཆུ་བོ་རབ་མེད་ལྟར་གཏིང་ཟབ་པ་ཡིན། བྱིས་པ་སོ་སོའི་སྐྱེ་བོ་ཐམས་ཅད་ཀྱི་དགེ་བ་དང་མི་དགེ་བའི་ལས་
ཀྱི་རྒྱུན་བཟོད་པར་དཀའ་བའི་འགྲོ་བ་དག་ཏུ་ཕ་རོལ་དུ་འགྲོ་བ་ནི་རྒྱུན་དྲག་པོ་བཟོད་པར་དཀའ་བ་ལྟ་བུ་ཡིན་ལ། འགྲོ་བ་ལྔའི་ཆུ་བོར་རྒྱུ་བའི་རྒྱུན་དྲག་པོས་བསྐལ་པ་དུ་མ་ཙམ་དུ་འདྲེན་པར་འགྱུར་བ་མི་བཟོད་པ་ནི་འབབ་པའི་རྒྱུད་འགྱུར་བའི་ཤུགས་དྲག་པ་ལྟ་བུ་ཡིན། མི་རྟག་པ་ཉིད་ཀྱིས་འགྱུར་བའི་ཤུགས་བཟློག་པར་དཀའ་བ་ནི་བཟློག་པར་དཀའ་བ་ལྟ་བུ་ཡིན་ཏེ། སྲིད་པ་ཆུ་བོ་ལྟ་བུར་སེམས་ཉ་ལྟ་བུ་འབྱུང་ཞིང་འཇུག་སྟེ། ལྷ་དང་མི་དག་ཏུ་ནི་འབྱུང་ལ་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་སུ་ནི་སྲེད་པ་ཆུ་བོ་ལྟ་བུར་སེམས་ཉ་ལྟ་བུ་འཇུག་གོ །དེ་ནས་གཞན་ཡང་ཇི་ལྟར་ན་དགེ་སློང་རྣལ་འབྱོར་ལ་གནས་པ་དེ་ལས་དང་ཆོས་དང་རྣམ་པར་སྨིན་པ་ཤེས་ཤིང་སེམས་ཅན་ཐམས་ཅད་སེམས་ལ་རག་ལས་པ་མཐོང་ལ། སེམས་ཀྱི་རྣམ་པ་སེམས་ཀྱི་དབང་དུ་གྱུར་ཅིང་སེམས་ཀྱིས་བསླུས་པ་མཐོང་སྟེ། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་སེམས་ཅན་ཐམས་ཅད་སེམས་ཀྱི་ལས་ལ་རག་ལས་ཤིང་སེམས་ཀྱི་ལས་ཀྱི་རྣམ་པ་ལ་སེམས་རག་ལས་པ་མཐོང་སྟེ། ཀྱེ་མ་འཁོར་བ་ཐོག་མ་དང་ཐ་མ་མེད་པ་ནས་འགྲོ་བ་དུ་མར་རབ་ཏུ་རྒྱུ་བའི་སེམས་ཅན་འདི་དག་ཇི་ལྟར་འགྱུར་སྙམ་མོ། །དེ་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་སེམས་ཅན་གྱི་སེམས་ཀུན་ནས་ཉོན་མོངས་པས་འཆིང་ཞིང་རྣམ་པར་བྱང་བས་འགྲོལ་བར་མཐོང་ངོ་། །དེ་ལ་སེམས་ཀྱི་རྣམ་པ་མང་སྟེ། དམིགས་པའི་བྱེ་བྲག་དང་། ངོ་བོ་ཉིད་ཀྱི་བྱེ་བྲག་དང་། འགྲོ་བའི་རིས་ཀྱི་བྱེ་བྲག་གིས་འགྲོ་བ་རྣམས་ཀྱི་རྣམ་པ་ལྔའོ། །རྟེན་བཟང་པོའི་བྱེ་བྲག་གིས་དལ་འབྱོར་དང་ལྡན་པ་དང་། ཀུན་དུ་སྦྱོར་བའི་འདུ་བྱེད་དང་། ཡང་དག་པར་ལྡན་པའི་སེམས་བག་ལ་ཉལ་དང་ལྡན་པ་དང་། ནམ་མཁའ་ལ་སོགས་པ་གསུམ་དང་རྟག་ཏུ་མི་ལྡན་པ་སྟེ། རྣམ་པ་ལྔ་ཡིན་ནོ། །དེ་ཡང་དབང་པོའི་བྱེ་བྲག་གིས་ནི་དཔག་ཏུ་མེད་ལ། སྲེད་པའི་གནས་སྣ་ཚོགས་ཀྱི་བྱེ་བྲག་གིས་མདོར་ན་ཀུན་ནས་ཉོན་མོངས་པ་འདིའི་ཕྱོགས་འདི་ནི་
སེམས་ལས་བྱུང་བ་ལྔར་འགྱུར་རོ། །ཇི་ལྟར་ན་རྣམ་པར་བྱང་བའི་ཕྱོགས་སུ་འགྱུར་ཞེ་ན། ཉོན་མོངས་པའི་རྩ་བ་གསུམ་དག་གི་གཉེན་པོ་གསུམ་ཡིན་ནོ། །འདས་པ་དང་། མ་འོངས་པའི་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་གསུང་རབ་ཡང་དག་པའི་ལམ་སྟོན་པ་ནི་འདི་ལྟ་སྟེ། འདོད་ཆགས་ལ་ནི་མི་སྡུག་པའོ། །ཞེ་སྡང་ལ་ནི་བྱམས་པའོ། །གཏི་མུག་ལ་ནི་རྟེན་ཅིང་འབྲེལ་པར་འབྱུང་བའོ། །དེ་ལུས་ལ་འདོད་ཆགས་སྐྱེ་བ་ན། དེ་ལུས་དེ་ལ་དམིགས་ནས་གནས་ཤིང་རྣམ་པར་འབྱེད་དེ། རྐང་པ་དང་། སེན་མོ་དང་། མདོག་དང་། ཡན་ལག་དང་། ཉིང་ལག་རགས་པའི་བར་ལ་རྣམ་པར་འབྱེད་པ་ནི་བདག་གང་ཡིན། བདག་གི་ཅི་ཡིན་ཞེས་དེ་རང་གི་ཡན་ལག་གི་ཕྱོགས་ལ་རྐང་པ་དང་། སེན་མོ་ལུས་ཐ་དད་པར་ལྟ་སྟེ། གང་ལ་བདག་ཏུ་ང་རྒྱལ་འཇུག་པ་འདི་ནི་སེན་མོ་དང་ལུས་མ་ཡིན་ཞིང་། རྐང་པའི་སེན་མོ་ལུས་སམ་བདག་མ་ཡིན། གང་ལ་བདག་ཏུ་ང་རྒྱལ་འཇུག་པ་འདི་ནི། རྐང་པའི་མཐིལ་ལུས་མ་ཡིན་ཞིང་ལོང་བུ་བདག་གམ་ལུས་མ་ཡིན། རྐང་པའི་རྟིང་བ་བདག་གམ་ལུས་མ་ཡིན་ཞིང་བསྡུས་པ་བདག་གམ་ལུས་མ་ཡིན། སྟ་ཟུར་དང་དཔྱི་བདག་གམ་ལུས་མ་ཡིན། གཞང་བདག་གམ་ལུས་མ་ཡིན། སྒལ་བའི་རུས་པར་གྱུར་པ་བཞི་བཅུ་རྩ་ལྔ་བདག་གམ་ལུས་མ་ཡིན། ལྟག་པ་བདག་གམ་ལུས་མ་ཡིན། བཞིན་གྱི་རུས་པར་གྱུར་པ་བདག་གམ་ལུས་མ་ཡིན་ཏེ། དགེ་སློང་དེས་རྣམ་པར་ཕྱེ་ན་དོན་གཞན་དུ་གྱུར་པའི་ལུས་མ་མཐོང་ཞིང་སོ་སོ་ལ་ཡང་ལུས་མ་མཐོང་ལ། རྣམ་པར་ཕྱེ་ན་ཡང་ལུས་མ་མཐོང་ངོ་། །མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ལ་ཡང་ལུས་སམ་བདག་མི་མཐོང་ཞིང་བདག་ཉིད་མེད་དོ། །དེ་ལྟར་ལུས་རྡུལ་ཕྲ་མོར་སོ་སོར་རྣམ་པར་འབྱེད་དེ། དེ་བདག་གི་ལུས་ཡུངས་ཀར་ཙམ་དང་ཕྱེ་མ་ལྟ་བུར་མཐོང་ངོ་། །དེ་འབྱུང་བ་ཆེན་པོ་རྣམས་རྣམ་པར་འབྱེད་དེ་བདག་ནི་གང་ཞིག །ཅི་སའི་ཁམས་བདག་ཡིན་ནམ། ཆུའི་ཁམས་བདག་ཡིན་ནམ། མེའི་
ཁམས་བདག་ཡིན་ནམ། རླུང་གི་ཁམས་བདག་ཡིན་ནམ་སྙམ་མོ། །དེ་དོན་དམ་པར་ན་བདག་གི་ཁམས་མ་མཐོང་ཞིང་བདག་གི་ཁམས་མཐོང་བ་མེད་པ་ན་དོན་གཞན་དུ་གྱུར་པ་མ་མཐོང་སྟེ། དཔེར་ན་ཤིང་ལྗོན་པ་དུ་མ་འདུས་པ་ལ་ཚལ་དུ་མཐོང་ལ་ཤིང་ལྗོན་པ་རེ་རེ་ལ་ཚལ་མེད་དོ། །དོན་དམ་པར་ན་ཚལ་ཞེས་བྱ་བ་ཤིང་ལྗོན་པ་མ་གཏོགས་པར་ཚལ་མེད་ལ་ཡང་དག་པར་ན་ཤིང་ལྗོན་པ་ཡང་ཤུན་པ་དང་། རྩ་བ་དང་། ཡལ་ག་དང་། ལོ་མ་དང་། ལྕུག་མ་མ་གཏོགས་པར་དོན་གཞན་དུ་གྱུར་པ་མེད་དེ། ཀུན་རྫོབ་ཏུ་ནི་ཚལ་ཡོད་དོ། །དེ་ལྟར་ལུས་འདི་ཡང་ལག་པ་ལ་སོགས་པ་འདུས་པ་ཙམ་འདི་ལ་ཀུན་རྫོབ་ཏུ་འདི་ནི་ལུས་ཡིན་ནོ། །ཞེས་འདུ་ཤེས་འཇུག་གོ་སྙམ་ནས་དེ་ལུས་དེའི་ཆོས་ཀྱི་དེ་ཁོ་ན་ཉིད་ཤེས་ནས་ལུས་ལ་འདོད་ཆགས་དང་བྲལ་ཞིང་ལུས་ཀྱི་ཡན་ལག་དང་ཉིང་ལག་དག་ལ་འདོད་ཆགས་དང་བྲལ་བར་འགྱུར་རོ། །དེ་འདོད་ཆགས་དང་བྲལ་ན་དགའ་བའི་འདོད་ཆགས་ཀྱི་མོད་ལས་སྐྱེས་པ་ཡང་འབྱུང་བའི་སྲེད་པས་གནོད་པ་མེད་དེ། དེ་ལྟར་འདོད་ཆགས་ཀྱི་གཉེན་པོ་ལ་རབ་ཏུ་བརྩོན་ནོ། །ཇི་ལྟར་ན་ཞེ་སྡང་གི་གཉེན་པོ་ལ་རབ་ཏུ་བརྩོན་ཞེ་ན། དེ་བྱམས་པ་ལ་གནས་པར་འགྱུར་ཏེ། ཀྱེ་མ་སེམས་ཅན་འདི་དག་ནི་ཉམ་ང་བར་ཞུགས་པ་ཡིན་ཏེ། འདི་ལྟ་སྟེ། འགྲོ་བ་ལྔ་རྣམས་སུ་སྐྱེ་བ་དང་། འཆི་བ་དང་། འཆི་འཕོ་དང་། འབྱུང་བ་དག་འཇིགས་པ་ལྔར་ཞུགས་ཤིང་ཤི་བའི་ལུས་རུས་པ་ལྟ་བུ་དེ་དག་ལ་མ་ལྟ་བུར་སྙིང་རྗེ་སྐྱེའོ། །རྨ་ལ་བ་ཚྭས་བྱུགས་པ་ལྟ་བུའི་སེམས་ཅན་སྡུག་བསྔལ་བ་འདི་དག་ལ་ཇི་ལྟར་ཁྲོ་བ་སྐྱེད་དེ་སེམས་ཅན་དེ་དག་ནི་རང་བཞིན་གྱིས་སྡུག་བསྔལ་བ་ཡིན་ནོ་སྙམ་སྟེ། དེ་ཉོན་མོངས་པའི་རྣམ་པ་ཆེན་པོ་གཉིས་པ་ལ་གནས་སོ། །ཡང་དགེ་སློང་དེ་ཇི་ལྟར་ན་ཉོན་མོངས་པ་ཆེན་པོ་གསུམ་པ་སོ་སོར་འཇིག་པ་ལ་རབ་ཏུ་བརྩོན་ཞེ་ན། གཏི་མུག་གིས་བསྒྲིབས་པའི་སེམས་ཅན་ནི་ལུས་ཀྱིས་ཉེས་པར་སྤྱད་པ་སྤྱོད་པ་དང་། ངག་གིས་ཉེས་པར་སྤྱད་པ་སྤྱོད་པ་དང་། ཡིད་ཀྱིས་ཉེས་པར་སྤྱད་པ་སྤྱོད་པ་ཡིན་ཏེ། ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་
རྣམས་སུ་སྐྱེའོ། །གང་གི་ཚེ་ཡང་དག་པའི་ལྟ་བ་སྔོན་དུ་སོང་བས་གཏི་མུག་དང་བྲལ་བར་འགྱུར་བ་དེའི་ཚེ་ལུས་ཀྱིས་ལེགས་པར་སྤྱད་པ་དང་། ངག་གིས་ལེགས་པར་སྤྱད་པ་དང་། ཡིད་ཀྱིས་ལེགས་པར་སྤྱད་པ་སྤྱོད་པ་དེ་ཆོས་དང་ཆོས་མ་ཡིན་པའི་དེ་ཁོ་ན་ཉིད་ཤེས་པར་འགྱུར་རོ། །གང་གི་ཚེ་ཆོས་དང་ཆོས་མ་ཡིན་པ་དེ་དག་གི་དེ་ཁོ་ན་ཉིད་ཤེས་ཤིང་། རྣམ་པར་ཤེས་པར་འགྱུར་བ་དེའི་ཚེ་ཉོན་མོངས་པ་ཆེན་པོ་གསུམ་པའི་ངོ་བོ་ཉིད་མེད་པར་འགྱུར་རོ། །དགེ་སློང་དེ་ཉོན་མོངས་པ་གསུམ་པོ་དེ་དག་གཞིག་པའི་གཉེན་པོ་གསུམ་ནི་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་ཀྱི་ཀུན་དུ་སྦྱོར་བ་དང་། བག་ལ་ཉལ་སོ་སོར་གནས་པ་འཇིག་པར་འགྱུར་བ་ཡིན་ཏེ། དཔེར་ན། ཤིང་ལྗོན་པའི་རྩ་བ་བཅད་ན་ཤུན་པ་དང་། རྩ་བ་དང་། འདབ་མ་དང་། ལོ་མ་དང་། སྡོང་པོ་དང་། ཡལ་ག་དང་། མེ་ཏོག་དང་། འབྲས་བུ་ལ་སོགས་པ་དེ་དག་ཐམས་ཅད་རུལ་པའམ། རྙིས་པར་འགྱུར་བ་དེ་བཞིན་དུ་གསུམ་པོ་དེ་དག་བཅོམ་ན། ཉོན་མོངས་པ་ཐམས་ཅད་བཅོམ་པར་འགྱུར་རོ་སྙམ་མོ། །དེ་ནས་གཞན་ཡང་ཇི་ལྟར་ན་དགེ་སློང་དེ་ས་གཞན་བདུན་པ་ལས་ས་གཞན་བརྒྱད་པ་ལ་འཇུག་ཅེ་ན། རྣལ་འབྱོར་སྤྱོད་པ་དེ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེ་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་མཐོང་སྟེ། ཇི་ལྟར་ན་དགེ་སློང་ཐོག་མ་ཉིད་དུ་འདི་ལྟར་མིག་གིས་ཡང་དག་པ་ཇི་ལྟ་བ་བཞིན་མཐོང་ཞིང་ཇི་ལྟར་ན་མིག་གིས་རྣམ་པར་ཤེས་པར་བྱ་བའི་གཟུགས་རྣམས་ལ་བྱིས་པ་སོ་སོའི་སྐྱེ་བོ་ཀུན་དུ་ཆགས་ཤིང་རྣམ་པར་ཆགས་ལ་ཤིན་ཏུ་རྨོངས་ཤིག་གུ་སྙམ་ན། དེ་ལ་ཀུན་དུ་ཆགས་པའི་གནས་སུ་འགྱུར་བ་ནི་མཛའ་བཤེས་མཐོང་བའམ། གཟུགས་སམ། བུད་མེད་དམ། དེ་ལས་གཞན་པ་མཐོང་ན་ཀུན་དུ་ཆགས་པར་འགྱུར་རོ། །ཞེ་སྡང་གི་གནས་སུ་འགྱུར་བ་ནི་འགྲན་ཟླར་གྱུར་པའམ། འགྲན་ཟླའི་གནས་སུ་འགྱུར་བ་དག་ལ་ཞེ་སྡང་བར་འགྱུར་རོ། །འདོད་ཆགས་དང་ཞེ་སྡང་གིས་བསྒྲིབས་པའི་མིག་དག་ནི་ཡང་དག་པ་ཇི་ལྟ་བ་བཞིན་
མི་མཐོང་སྟེ། གཏི་མུག་གིས་བསྒྲིབས་པའི་བྱིས་པ་སོ་སོའི་སྐྱེ་བོའི་སེམས་ནི་ཀུན་དུ་རྟོག་པ་ཙམ་གྱི་མིག་གི་རྣམ་པར་ཤེས་པར་བྱ་བ་ལ་ཀུན་དུ་ཆགས་ཤིང་རྣམ་པར་ཆགས་ལ་ཤིན་ཏུ་རྨོངས་སོ། །སྲེད་པས་བསླུས་པའི་མི་ནི་རང་གི་འདོད་པའི་རྣམ་པར་རྟོག་པས་བདག་ཉིད་ལ་བདག་ཉིད་ཀུན་དུ་ཆགས་པར་བྱེད་དེ། དཔེར་ན་ཁྱི་ནི་ཤ་མེད་པའི་རུས་པ་བླངས་ཏེ་ཁར་བཅུག་གོ །དེ་འགྲམ་སོའི་བར་དུ་རུས་པ་བཅུག་པའི་ཁ་ཆུ་འཛག་པས་གཤེར་བ་ལ་ཟ་ལ། དེ་ལ་ཆགས་པའི་ཁྱི་ཡང་རང་གི་ཁའི་སོའི་བར་ནས་ཁྲག་འོང་སྟེ། དེ་རུས་པ་དེའི་རོ་ཡིན་པར་སེམས་ཀྱི་རོ་འདི་ནི་བདག་ཉིད་ཀྱི་ཁྲག་ལ་བདག་ཉིད་མྱོང་བར་བྱེད་དོ་སྙམ་དུ་མི་སེམས་ཤིང་རོ་ལ་ཆགས་པའི་ཁྱི་དེ་ལྕེ་ཡང་ཟའོ། །རོ་ལ་ཆགས་པའི་བསྒྲིབས་པ་རུས་པ་ཡིན་པར་སེམས་པ་དེ་ནི་ཀུན་དུ་རྟོག་པ་ཙམ་ཁོ་ན་ཡིན་ཏེ། དེ་བཞིན་དུ་བྱིས་པ་སོ་སོའི་སྐྱེ་བོ་མིག་གི་རྣམ་པར་ཤེས་པར་བྱ་བའི་གཟུགས་མིག་ཏུ་སྡུག་པའི་གཟུགས་དག་ལ་ཀུན་དུ་ཆགས་པར་འགྱུར་རོ། །དེ་ཁ་ཆུ་ལྟ་བུའི་རྣམ་པར་རྟོག་པར་བློ་གྲོས་བསྒྲིབས་པ་ཡིན་ལ། རྣམ་པར་དཔྱོད་པ་ནི་རུས་པ་ལྟ་བུ་ཡིན། མིག་ནི་ཁར་བཅུག་པ་ལྟ་བུ་ཡིན་ཏེ། དེ་ལྟ་དེ་ལྟར་ཟའོ། །དེའི་སྲེད་པ་ནི་གང་གིས་ཁྲག་འཛག་པ་ལྟ་བུ་ཡིན་ཏེ། འདི་ནི་བདག་གི་གཟུགས་ཡིན་ནོ་སྙམ་དུ་སེམས་པ་འདི་ནི། སྲེད་པ་ཁྲག་གི་རོ་ལ་ཆགས་པ་ལྟ་བུ་ཡིན་ཏེ། དེ་རོ་དེ་ལ་ཆགས་སོ། །དེ་ལ་ཁྱི་ཇི་ལྟ་བ་བཞིན་དུ་བྱིས་པ་སོ་སོའི་སྐྱེ་བོ་ཡང་དེ་དང་འདྲ། རུས་པ་ཇི་ལྟ་བ་བཞིན་དུ་མིག་གི་རྣམ་པར་ཤེས་པར་བྱ་བའི་གཟུགས་ཀྱང་དེ་དང་འདྲ། འགྲམ་སོས་ཟ་བར་བྱེད་པ་དེ་ཇི་ལྟ་བ་བཞིན་དུ་རྣམ་པར་རྟོག་པ་ཡང་དེ་དང་འདྲ། སོ་ཇི་ལྟ་བ་བཞིན་དུ་ཡུལ་ཡང་དེ་དང་འདྲ་སྟེ། དེ་ལྟ་བས་ན་མིག་གི་རྣམ་པར་ཤེས་པར་བྱ་བའི་གཟུགས་རུས་གོང་ལྟ་བུ་དག་གིས་བྱིས་པ་སོ་སོའི་སྐྱེ་བོ་ཐམས་ཅད་རྣམ་པར་སླུ་བར་བྱེད་དོ་སྙམ་མོ། །ཡང་དགེ་སློང་དེ་སེམས་པར་བྱེད་དོ། །ཇི་ལྟར་ན་འཁོར་བར་ཡིད་བྱུང་བའི་དགེ་སློང་དག་སྲེད་པའི་འཇིགས་པས་འཇིགས་ཤིང་། འདོད་པ་ཐམས་ཅད་རབ་ཏུ་སྤོང་ཞིག་
གུ་སྙམ་མོ། །ཇི་ལྟར་གླང་པོ་ཆེ་ལོ་དྲུག་ལོན་པ་གླང་པོ་ཆེའི་ཆོ་ག་ཤེས་པའི་མིས་བསྐོར་ཅིང་ལུས་ཆེན་པོ་དེ་ཤིང་ཐགས་ཀྱིས་བསྐོར་ཏེ། བཅིང་བ་ལྔ་ཡིས་བཅིངས་ནས་བུ་རམ་ཤིང་དང་། ལ་དུ་དང་། བུ་རམ་ཆང་དང་། བཟའ་བ་དང་། བཏུང་བའི་རོ་མང་པོ་སྦྱར་ཅིང་། སིལ་སྙན་དང་། གླུ་དང་། སྒྲ་དབྱངས་དག་གིས་དེ་རྣམ་པར་འདུལ་བར་བྱེད་དེ། གང་གིས་དེ་ཚལ་གྱི་བདེ་བ་བརྗེད་པར་བྱ་བ་བརྗེད་ནས། དེར་གླང་པོ་ཆེ་ཐ་མལ་པ་དག་དང་ལྷན་ཅིག་གནས་པར་བྱེད་ཅིང་དེ་གཞན་གྱིས་བཀྲིར་རུང་བར་བྱེད་དོ། །དེ་ནས་གླང་པོ་ཆེའི་ཆོ་ག་ཤེས་པ་དེས་དེ་ལྟར་ཡོངས་སུ་སྤྱོད་པ་ན་རང་གི་ཚལ་གྱི་བདེ་བ་འདོད་པའི་གནས་རི་དང་། སྨན་ལྗོངས་དང་། ཚལ་དང་། མེ་ཏོག་དང་། འབྲས་བུ་དང་། བྱའི་སྒྲ་དང་། ཆུའི་རྒྱུན་དང་། ས་ཕྱོགས་དགའ་བ་རྗེས་སུ་བསམས་ཤིང་བཅིངས་པ་ཐམས་ཅད་ཀྱང་བདེ་བ་དེ་དག་རྗེས་སུ་དྲན་ནས། བཅིངས་པ་ཐམས་ཅད་བཅད་དེ། གླང་པོ་ཆེའི་ཆོ་ག་ཤེས་པའི་མི་ལ་ཡང་འཛེམ་པ་མེད་པར་བྱས། ཤིང་ཐགས་བཙུགས་པ་ཡང་བཅོམ། བུ་རམ་ཤིང་གི་དུམ་བུ་དང་། ལ་དུ་དང་། བུ་རམ་ཆང་དང་། བཏུང་བའི་རོ་དག་ནི་འཐུངས་ལ་གླུ་དབྱངས་དག་གིས་གཞག་པར་མ་ནུས་ཤིང་དེའི་ཡིད་རྣམ་པར་གདུལ་བ་དང་། དེའི་ཚལ་གྱི་བདེ་བ་བརྗེད་པར་བྱ་བར་མ་ནུས། གླང་པོ་ཆེ་ཐ་མལ་པ་དང་ལྷན་ཅིག་འདྲ་བར་འགྲོ་བར་མི་འདོད་ཅིང་ཡང་ཚལ་དེ་དག་དྲན་པ་དེ་བཞིན་དུ་རྣལ་འབྱོར་སྤྱོད་པའི་དགེ་སློང་དེ་ཐོག་མ་མེད་པའི་དུས་ནས་ཞུགས་པ། འཆིང་བ་ལྔ་དག་གིས་བཅིངས་ཏེ། ལྔ་གང་ཞེ་ན། འདི་ལྟ་སྟེ། སྒྲ་དང་། རེག་པ་དང་། རོ་དང་། གཟུགས་དང་། དྲི་སྡུག་པ་དག་ཡིན་ནོ། །གླང་པོ་ཆེ་ཆོ་ག་ཤེས་པའི་མིས་བསྐོར་བ་ལྟ་བུ་གང་ཞེ་ན། འདི་ལྟ་སྟེ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པ་ཀུན་ནས་ཉོན་མོངས་པ་རྣམས་ཡིན། རང་གི་བློ་གྲོས་ཁྱིམ་གྱི་གཟེབ་ལྟ་བུས་བསྐོར་བ་ནི་འདི་ལྟ་སྟེ། བུ་དང་། ཆུང་མ་དང་། ཀུན་དགའ་ར་བ་དང་། བྲན་མོ་དང་། བྲན་ཕོ་དང་། ལོངས་སྤྱོད་དང་། ཁྱིམ་གྱིས་བསྐོར་བ་ཡིན། བུ་
རམ་ཤིང་དང་། ལ་དུ་དང། བུ་རམ་ཆང་དང་། བཏུང་བའི་རོ་ཞེས་བྱ་བ་ནི་ཀུན་དུ་རྟོག་པའི་ལ་དུ་འདོད་ཆགས་ཀྱི་སྐོམ་ཞེས་བྱ་བ་དེའི་ཚིག་བླ་དགས་སོ། །སྲེད་པ་ལ་རྣམ་པར་ཆགས་པ་ནི་གླུ་དབྱངས་ལྟ་བུ་ཡིན་ནོ། །དགའ་བའི་འདོད་ཆགས་ནི་བཅིངས་པ་ལྟ་བུ་ཡིན། གླང་པོ་ཆེ་ཐ་མལ་པ་དང་འདྲ་བར་ཞེས་བྱ་བ་ནི་མི་ཐ་མལ་པ་ལོག་པར་ལྟ་བ་གླང་པོ་ཆེ་ཞེས་བྱ་བ་དེའི་ཚིག་བླ་དགས་ཡིན་ནོ། །ལྷན་ཅིག་གནས་ཞེས་བྱ་བ་ནི་དེ་དག་དང་ལྷན་ཅིག་འཇིག་ཚོགས་ལ་ལྟ་ཞིང་ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པ་དང་། ཡང་དག་པར་འབྲེལ་པ་མི་ཐ་མལ་པའི་ཁར་སྦྲང་རྩི་ལྟ་བུ་ལོག་པར་ལྟ་བའི་གཏམ་དག་གིས་རབ་ཏུ་དགའ་བའོ། །གཞན་གྱིས་བཀྲིར་རུང་བ་ཞེས་བྱ་བ་ནི་འདོད་ཆགས་ཞེ་སྡང་གཏི་མུག་གི་དབང་དུ་གྱུར་པ་ཞེས་བྱ་བའི་ཚིག་བླ་དགས་སོ། །གླང་པོ་ཆེའི་ཆོ་ག་ཤེས་པ་ཞེས་བྱ་བ་ནི་རྣལ་འབྱོར་སྤྱོད་པ་ཞེས་བྱ་བ་དེའི་ཚིག་བླ་དགས་ཡིན་ནོ། །ཡོངས་སུ་སྤྱོད་པ་ན་ཞེས་བྱ་བ་ནི་གཏི་མུག་ཉོན་མོངས་པ་ཐམས་ཅད་དང་འགྲོགས་པ་ཞེས་བྱ་བ་དེའི་ཚིག་བླ་དགས་སོ། །ངེས་པར་འབྱུང་བའི་རི་དྲན་ཞིང་རིའི་སྨན་ལྗོངས་ཞེས་བྱ་བ་ནི་བསམ་གཏན་དང་། སྙོམས་པར་འཇུག་པ་ཞེས་བྱ་བ་དེའི་ཚིག་བླ་དགས་སོ། །མེ་ཏོག་དང་འབྲས་བུ་ཞེས་བྱ་བ་ནི་ཡང་དག་པའི་ལམ་ལ་སེམས་བསྐྱེད་པའི་འབྲས་བུར་གྱུར་པ་མྱ་ངན་ལས་འདས་པའོ། །བྱའི་སྒྲ་ཞེས་བྱ་བ་ནི་ཆོས་ཀྱི་གཏམ་གྱི་སྒྲ་ཞེས་བྱ་བ་དེའི་ཚིག་བླ་དགས་སོ། །ཆུ་བོའི་རྒྱུན་དགའ་བ་ཞེས་བྱ་བ་ནི་ཤེས་རབ་ཀྱི་ཆུ་བོ་ཞེས་བྱ་བ་དེའི་ཚིག་བླ་དགས་སོ། །རྒྱུན་ཅེས་བྱ་བ་ནི་སེམས་རྩེ་གཅིག་ཅེས་བྱ་བ་དེའི་ཚིག་བླ་དགས་སོ། །ས་ཕྱོགས་ཞེས་བྱ་བ་ནི་ཚངས་པའི་གནས་ཞེས་བྱ་བ་དེའི་ཚིག་བླ་དགས་ཏེ། འདི་ལྟ་སྟེ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་སོ། །རྗེས་སུ་བསམས་ནས་ཞེས་བྱ་བ་ནི་བསམ་གཏན་གྱི་བདེ་བ་རྗེས་སུ་བསམས་པ་ཡིན་ཏེ། རྣལ་འབྱོར་སྤྱོད་པ་དེ་གླང་པོ་ཆེའི་ཚོགས་ལྟ་བུའི་རྗེས་སུ་འགྲོའོ། །དེ་ལྟ་བས་ན་གླང་པོ་ཆེ་ལྟ་བུར་རྣལ་འབྱོར་སྤྱོད་པས་བྱའི། ཁྱི་ལྟ་བུར་ནི་མི་བྱའོ། །དེ་ནས་གཞན་ཡང་ཇི་ལྟར་ན་དགེ་སློང་
དེ་ས་གཞན་བརྒྱད་པ་ལས་ས་གཞན་དགུ་པ་ལ་འཇུག་ཅེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན། ཁམས་གསུམ་པ་འདི་དག་ཐམས་ཅད་ནི་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དང་། མི་གཙང་བའི་སྣོད་དུ་གྱུར་པ་འདོད་པ་ཐམས་ཅད་ཀྱང་མཐོང་སྟེ། དཔེར་ན་ནགས་ཚལ་གྱི་ཁྲོད་ན་རི་ནགས་ཆེན་པོའི་ངམ་གྲོག་ལ་ཤིང་འབྲ་གོ་སྐྱེ་བ་སྐྱོན་དུ་མ་དང་ལྡན་པ་ཡིན་ཏེ། དེ་ལ་འབྲས་བུ་ཆུང་ངུ་ཡོད་པ་བླང་བར་དགའ་ཞིང་ཉེས་པ་མང་པོར་འགྱུར་བ་དང་། ངམ་གྲོག་ཏུ་ལྟུང་བའི་ཉེས་པས་སྲོག་ལ་ཐེ་ཙོམ་ཟ་བར་བྱེད་པ་དང་། ཁོང་སྟོང་གི་ཉེས་པས་གཡང་སའི་ཕྱོགས་སུ་ལྟུང་བ་དང་། ཤིང་མཐོན་པོ་ལ་འཛེགས་པ་དག་གི་སྲོག་འཆད་པར་བྱེད་པའོ། །གལ་ཏེ་མི་བྱིས་པ་སོ་སོའི་སྐྱེ་བོ་རྨོངས་ཤིང་མུན་པར་གྱུར་པ་དག་རོ་ལ་ཆགས་པ་དེ་འབྲས་བུ་དེ་དག་མཐོང་ནས། ངམ་གྲོག་དང་། གཡང་ས་དང་། ཤིང་ཁོང་སྟོང་མཐོན་པོ་ལྟུང་བའི་སར་འགྲོ་སྟེ་འཆི་བར་འགྱུར་བ་མི་སེམས་སོ། །བྱིས་པ་སོ་སོའི་སྐྱེ་བོ་བློ་ཞན་པ་རོ་ཆུང་ངུ་མྱོང་བས་ཕྲོགས་པ་དེ་དག་ཤིང་དེ་ལ་འཛེགས་སོ། །དེ་ཤིང་དེ་ལས་འབྲས་བུ་དག་མ་ཐོབ་པར་དེའི་སྲོག་ནི་གཡང་སར་གཏོང་ངོ་། །གལ་ཏེ་རང་བཞིན་གྱིས་ཐབས་གཞན་དང་ལྡན་པའམ། དགེ་བའི་ལས་བྱེད་པ་ཁ་ཅིག་ནི་དེ་འདོད་ཆགས་ཀྱི་རོ་ཆེས་ཆུང་བས་བྱིས་པའི་བློའི་ཉེས་དམིགས་ཆེས་མང་བ་བཅིངས་པར་མཐོང་བ་དེ་བཞིན་དུ། དགེ་སློང་དེས་ནགས་ཚལ་གྱི་ཁྲོད་ལྟ་བུར་འགྲོ་བ་ལྔའི་རིམ་པ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་དྲུག་པ། ངམ་གྲོག་ཆེན་པོ་ཞེས་བྱ་བ་ནི་ཉེས་པ་ཐམས་ཅད་ངམ་གྲོག་ལྟ་བུ་ཡིན་ནོ། །ཤིང་འབྲ་གོ་ཞེས་བྱ་བ་ནི་འདོད་པའི་ཤིང་ཞེས་བྱ་བ་དེའི་ཚིག་བླ་དགས་སོ། །སྐྱོན་བརྒྱ་ཕྲག་དུ་མ་ཞེས་བྱ་བ་ནི་ཉོན་མོངས་པ་བརྒྱ་ཕྲག་སྟོང་དུ་མ་སྟེ་དེ་དག་ཚོར་བ་སྡུག་བསྔལ་ཞེས་བྱ་བའི་ཚིག་བླ་དགས་སོ། །ཤིང་ལ་ཡོད་པའི་འབྲས་བུ་ཞེས་བྱ་བ་ནི་སྒྲ་དང་། རེག་པ་དང་། རོ་དང་། གཟུགས་
དང་། དྲི་སྡུག་པ་འདོད་པ་དེ་དག་ལ་རྣམ་པར་ཆགས་པའི་བློ་ཞེས་བྱ་བ་དེའི་ཚིག་བླ་དགས་སོ། །བླང་བར་དཀའ་ཞེས་བྱ་བ་ནི་འདོད་པའི་འབྲས་བུ་བླང་བར་དཀའ་བ་ཡིན་ཏེ། དཔེར་ན་རྒྱ་མཚོར་འཇུག་པ་དང་། མཚོན་གྱིས་འཁྲུག་པ་དང་། རྒྱལ་པོ་ལ་སྟེན་པ་དང་། ཆོམ་རྐུན་དང་། ཚོང་པ་ལ་སོགས་པའི་ཉོན་མོངས་པས་ཐོབ་པ་བཞིན་ནོ། །འདོད་པའི་འབྲས་བུ་ལྟ་བུ་ཉེས་པ་མང་པོ་ཞེས་བྱ་བ་ནི་འདོད་ཆགས་ཞེ་སྡང་གཏི་མུག་ཅེས་བྱ་བ་དེའི་ཚིག་བླ་དགས་སོ། །ངམ་གྲོག་དང་། གཡང་ས་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཀྱི་གཡང་ས་ཞེས་བྱ་བ་དེའི་ཚིག་བླ་དགས་སོ། །སྲོག་ལ་ཐེ་ཙོམ་ཟ་བར་འགྱུར་ཞེས་བྱ་བ་ནི་ཆོས་ཀྱི་སྲོག་ཅེས་བྱ་བ་དེའི་ཚིག་བླ་དགས་སོ། །ཤིང་ཁོང་སྟོང་གི་ཉེས་པ་ཞེས་བྱ་བ་ནི་སྟོང་པ་དང་། གསོག་དང་། གསོབ་དང་། སྙིང་པོ་མེད་པ་ཞེས་བྱ་བ་དེའི་ཚིག་བླ་དགས་སོ། །རྨོངས་པའི་མི་འགྲོའོ་ཞེས་བྱ་བ་ནི་བྱིས་པ་ལོག་པར་ལྟ་བ་ཞེས་བྱ་བ་དེའི་ཚིག་བླ་དགས་ཡིན་ཏེ། དེ་ལྟ་བས་ན་སྐྱོན་མང་པོ་དུ་མ་འབྲས་བུ་མེད་པའི་འདོད་པ་མནོག་ཆུང་བ་མཐོང་ནས་དགེ་སློང་དེ་འདོད་པ་ཐམས་ཅད་ལ་ཀུན་དུ་རྟོག་པར་མི་བྱེད་དོ། །ཡང་དགེ་སློང་དེ་འདོད་པ་མེ་འབར་བ་ལྟ་བུར་མཐོང་སྟེ། ཇི་ལྟར་མར་མེ་མཐོང་ན་དགའ་ལ་རེག་ན་མཆོག་ཏུ་ཚ་བ་ལ། ཕྱེ་མ་ལེབ་རྨོངས་པ་མར་མེ་ཁ་དོག་སྡུག་པར་མཐོང་ནས་མར་མེ་དེའི་ནང་དུ་སོང་བ་དང་། དེ་འཆི་བར་འགྱུར་བ་དེ་བཞིན་དུ་འདོད་ཆགས་ཞེ་སྡང་གཏི་མུག་གིས་བསྒྲིབས་པའི་བྱིས་པ་སོ་སོའི་སྐྱེ་བོ་ཕྱེ་མ་ལེབ་ལྟ་བུ་དག་ནི་འདོད་པ་ཐམས་ཅད་ལ་ཀུན་དུ་དགའ་བར་ལྟའོ། །མར་མེ་ལྟ་བུ་ཞེས་བྱ་བ་ནི་གལ་ཏེ་མར་མེ་དེར་ལུས་སོང་བའི་ཕྱེ་མ་ལེབ་བཞིན་དུ་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་སུ་སྲེག་པར་འགྱུར་ཏེ། དེ་ལྟ་བས་ན་འདོད་པ་དག་གིས་ཆོག་གོ་སྙམ་ནས། དགེ་སློང་དེ་འདོད་པ་དག་ལས་འདོད་ཆགས་དང་བྲལ་བར་འགྱུར་རོ། །དེ་ནས་གཞན་ཡང་དགེ་སློང་དེ་སེམས་ཅན་དག་འཆིང་བ་གང་གིས་བཅིངས་ཤིང་འཁོར་བར་ཀུན་དུ་འཁོར་སྙམ་ནས། རྣལ་འབྱོར་སྤྱོད་པ་ནང་གི་
ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེ་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན། འཇིག་རྟེན་འདི་ནི་འཆིང་བ་གཉིས་ཀྱིས་བཅིངས་ཏེ། ཟས་ཀྱི་འཆིང་བ་དང་། རེག་པའི་འཆིང་བའོ། །དེ་ལ་ཟས་ཀྱི་འཆིང་བ་ནི་རྣམ་པ་བཞི་སྟེ། ཁམ་གྱི་ཟས་གང་ཞེ་ན། འདི་ལྟ་སྟེ། མིའི་གནས་བཞི་དང་། འདོད་པ་ན་སྤྱོད་པའི་ལྷའི་རིས་དྲུག་དང་། སེམས་ཅན་དམྱལ་བ་ཆེན་པོ་བརྒྱད་དང་། དུད་འགྲོ་དང་། ཡི་དགས་ཀྱི་ཕྱོགས་གཅིག་གོ །ཡིད་ལ་བྱེད་པའི་ཟས་ཡོད་པ་དེ་དག་མཐོང་སྟེ། འདི་ལྟ་སྟེ། གཟུགས་ན་སྤྱོད་པའི་ལྷའི་བསམ་གཏན་གྱི་ཟས་སོ། །རེག་པའི་ཟས་ནི་བྱ་དང་། མིག་གིས་ལྟ་བ་དག་གིའོ། །དེའི་རྣམ་པ་གཞན་ནི་འདོད་པའི་ཁམས་ཀྱི་བྱིས་པ་སོ་སོའི་སྐྱེ་བོ་མི་དང་། ཡི་དགས་དང་། དུད་འགྲོ་དང་། སེམས་ཅན་དམྱལ་བ་འདི་དག་ཐམས་ཅད་ནི་འཁྲིག་པའི་རེག་པ་ལ་རབ་ཏུ་ཆགས་པ་ཡིན་ཏེ། གང་འདོད་པ་ལ་སྟེན་པ་དེ་ནི་འདོད་པའི་ཁམས་སུ་འབྱུང་ངོ་། །མཉམ་པར་དམིགས་པའི་ཟས་ནི་གཟུགས་མེད་པའི་སྙོམས་པར་འཇུག་པ་ཡིན་ཏེ། དེ་ལྟ་བས་ན་འཇིག་རྟེན་འདི་ནི་གཉིས་ཀྱིས་བཅིངས་ཏེ། ཀུན་དུ་སྦྱོར་བ་དང་། བག་ལ་ཉལ་བ་ཐམས་ཅད་ཀྱི་འཆིང་བ་དག་ལས་དེ་འདོད་ཆགས་དང་བྲལ་བ་མ་ཡིན་ནོ། །དེ་མིག་གི་རྣམ་པར་རིག་པར་བྱ་བའི་གཟུགས་རྣམས་ལ། རྣམ་པ་གཞན་གྱིས་མིག་གིས་ཡང་དག་པ་ཇི་ལྟ་བ་བཞིན་མཐོང་སྟེ། མིག་གི་འདུས་ཏེ་རེག་པ་ལས་བྱུང་བ་གང་ཡིན་པ་དེ་ལས་བདེ་བར་འགྱུར་བ་དང་། དམིགས་པ་བདེ་བ་ལ་རྣམ་པར་སྨིན་པ་མི་བདེ་བའི་ལས་བྱུང་བ་དེ་ཡང་ཡང་དག་པ་ཇི་ལྟ་བ་བཞིན་དུ་མཐོང་ངོ་། །དེ་བཞིན་དུ་མིག་གི་རྣམ་པར་རིག་པར་བྱ་བ་ཡིད་མི་བདེ་བར་འགྱུར་བའི་གནས་གང་ཡིན་པ་དེ་མིག་གི་འདུས་ཏེ་རེག་པ་ལས་བྱུང་བའི་སྡུག་བསྔལ་རྣམ་པར་སྨིན་པ་བདེ་བ་ལས་བྱུང་བ་དེ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །མིག་གི་རྣམ་པར་རིག་པར་བྱ་བ་དེ་གང་ཡིན་ཞེ་ན། གཟུགས་ལ་དམིགས་པ་བདེ་བ་ནི་རྣམ་པར་སྨིན་པ་མི་བདེ་བ་ཡིན་ཏེ། འདི་ལ་ནང་གི་ཆོས་ལ་ཆོས་ཀྱི་རྗེས་སུ་ལྟ་བའི་མིག་གིས་ཚུལ་བཞིན་མ་ཡིན་པ་ཡིད་ལ་བྱེད་པ་
དམིགས་པའི་གཟུགས་མཐོང་སྟེ། ད་ལྟར་བྱུང་བའི་རྣམ་པར་སྨིན་པ་བདེ་བ་ལ་བདེའོ་ཞེས་རབ་ཏུ་ཤེས་ཤིང་། རྟོག་པར་བྱེད་ལ་རོ་མྱོང་བར་བྱེད་དོ། །ཡོངས་སུ་འགྱུར་བས་རྣམ་པར་སྨིན་པ་སྡུག་བསྔལ་བ་ནི་སེམས་ཅན་དམྱལ་བ་དང་། ཡི་དགས་དང་། དུད་འགྲོར་ཡང་དག་པར་འགྲུབ་པར་འགྱུར་རོ། །གང་དག་ད་ལྟར་བྱུང་བ་ལ་རྣམ་པར་སྨིན་པ་བདེ་བ་མ་ཡིན་པ་མ་ཡིན་ལ་ཡོངས་སུ་འགྱུར་བས་རྣམ་པར་སྨིན་པ་བདེ་བའི་ལས་དེ་གང་ཡིན་ཞེ་ན། འདི་ལ་མིག་གིས་རྣམ་པར་རིག་པར་བྱ་བའི་གཟུགས་རྣམས་མཐོང་ནས་མིག་གི་འདུས་ཏེ་རེག་པ་ལས་བྱུང་བའི་ཚུལ་བཞིན་ཡིད་ལ་བྱེད་པ་ལ་མངོན་དུ་ཕྱོགས་པའི་སེམས་དེ་ལ་ཆགས་པ་མེད་ཅིང་ཡིད་འཇུག་པ་མེད་པ་དེ་ནི་ད་ལྟར་བྱུང་བ་ལ་རྣམ་པར་སྨིན་པ་སྡུག་བསྔལ་བ་ཡིན་ལ། ཡོངས་སུ་འགྱུར་བས་ལྷ་དང་མིའི་བདེ་བར་སྐྱེ་ཞིང་མྱ་ངན་ལས་འདས་པའི་མཐར་ཕྱིན་པར་འགྱུར་རོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པའི་ཆོས་རྣམས་ལ་ཡང་སྦྱར་རོ། །དེ་ནས་གཞན་ཡང་ཇི་ལྟར་ན་དགེ་སློང་དེ་མིག་གིས་རིག་པར་བྱ་བའི་གཟུགས་རྣམས་ལ་བཏང་སྙོམས་སུ་གནས་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པའི་དགེ་སློང་གི་མིག་གིས་འདི་ལ་གཟུགས་མཐོང་ནས། མ་ཆགས་ཤིང་རྣམ་པར་མ་ཆགས་ལ་རྙོག་པ་ཅན་དུ་མ་ཡིན། སྨོད་པ་མེད་ཅིང་དགའ་བར་མི་བྱེད་ལ་ཡིད་ལ་མི་བྱེད། ཚུལ་བཞིན་མ་ཡིན་པ་ཡིད་ལ་བྱེད་པས་བསྒྲིབས་པ་མ་ཡིན་ཞིང་བཏང་སྙོམས་པ་ཡིན་ཏེ། དེ་ནི་བཏང་སྙོམས་སུ་འགྱུར་བའི་གནས་ལ་སྡུག་བསྔལ་དང་། བདེ་བར་འགྱུར་བའི་གནས་མི་དམིགས་སོ། །ཡང་དགེ་སློང་དེ་ས་དྲུག་པའི་རབ་ཏུ་དབྱེ་བའི་ངོ་བོ་ས་གཞན་བཅུ་པ་ལ་འཇུག་སྟེ། འདི་ལྟ་སྟེ། མི་ལྕོགས་པ་མེད་པ་དང་། བསམ་གཏན་དང་པོའི་ས་ཁྱད་པར་ཅན་དང་། བསམ་གཏན་བཞི་པ་སྟེ། ས་དྲུག་པའི་རབ་ཏུ་དབྱེ་བ་ལ་འཇུག་གོ །དེ་སྐྱེས་ནས་འགོག་པར་འགྱུར་བའི་ལམ་འཕགས་པའི་ལམ་ཡན་ལག་བརྒྱད་པའི་སྒོ་རྟོགས་ཤིང་ཁོང་དུ་ཆུད་པའི་ཆོས་སྐྱེ་བ་དང་། འཇིག་པ་མཐོང་ཞིང་ཡང་དག་པར་ཐོབ་ནས་རབ་ཏུ་
འབད་དོ། །དེ་དེ་ལྟར་རབ་ཏུ་འབད་པ་ན་ས་བླའི་གནོད་སྦྱིན་དག་གིས་བདུད་ཀྱི་འཆིང་བ་ཕལ་ཆེར་སྤ་གོང་བར་མཐོང་ནས་དགའ་སྟེ། བར་སྣང་ལ་སྤྱོད་པའི་གནོད་སྦྱིན་དག་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་པོ་ཆེན་པོ་བཞི་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་ཆེན་བཞིའི་ལྷ་རྣམས་ལ་མངོན་པར་བསྙད་དོ། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་ཀྱང་སུམ་ཅུ་རྩ་གསུམ་པ་རྣམས་ལའོ། །སུམ་ཅུ་རྩ་གསུམ་པ་རྣམས་ཀྱིས་ཀྱང་འཐབ་བྲལ་བ་རྣམས་ལའོ། །འཐབ་བྲལ་བ་རྣམས་ཀྱིས་ཀྱང་དགའ་ལྡན་པ་རྣམས་ལའོ། །དགའ་ལྡན་པ་རྣམས་ཀྱིས་ཀྱང་འཕྲུལ་དགའ་བ་རྣམས་ལའོ། །འཕྲུལ་དགའ་བ་རྣམས་ཀྱིས་ཀྱང་གཞན་འཕྲུལ་དབང་བྱེད་པ་རྣམས་ལའོ། །གཞན་འཕྲུལ་དབང་བྱེད་པ་རྣམས་ཀྱིས་ཀྱང་ཚངས་རིས་པ་རྣམས་ལ་མངོན་པར་བསྙད་དེ། དེ་ལྟར་འཛམ་བུའི་གླིང་དུ་རིགས་ཀྱི་བུ་ཆེ་གེ་མོ་ཞིག་ཅེས་བྱ་བ་རྒྱ་ཆེར་སྔ་མ་བཞིན་དུ་སྦྱར་བ་ནས་ས་གཞན་བརྒྱད་པ་ལ་འཇུག་པ་དག་ས་དྲུག་པའི་ནང་དུ་ལྷག་པར་ཞུགས་པ་དེ་ཚངས་རིས་ཀྱི་ལྷ་དག་གིས་ཐོས་ནས་མཆོག་ཏུ་དགའ་ལ་བསམ་གཏན་ལ་བདེ་བར་གནས་པ་བཏང་སྟེ། ཀུན་དུ་དགའ་བར་གྱུར་པའི་བར་དེ་ཐོས་ནས་ཤིན་ཏུ་དགའ་བར་འགྱུར་རོ། །འདིར་ཚིགས་སུ་བཅད་པ། དགེ་དང་མི་དགེ་དག་གི་ལས། །བདག་གིས་བྱས་པའི་ལས་ཀུན་གྱི། །འབྲས་བུ་ངེས་པར་སྤྱོད་འགྱུར་ཏེ། །ལུས་ཅན་དག་དང་འབྲེལ་པ་ཡིན། །ཉོན་མོངས་ས་ནི་དང་པོར་མངར། །རྣམ་པར་སྨིན་པ་ཚ་བ་ཡིན། །དེ་དག་དོན་མེད་བྱེད་པས་ན། །དུག་དང་འདྲ་བར་སྤང་བར་བྱ། །ཉོན་མོངས་དབང་དུ་མི་འགྲོ་ཞིང་། །ཡེ་ཤེས་དབང་དུ་འགྲོ་བྱ་སྟེ། །ཡེ་ཤེས་ལྡན་པ་ཚེ་འདི་དང་། །ཕ་རོལ་དག་ཏུ་བདེ་བ་འཐོབ། །ཇི་ལྟར་རྩྭ་ལ་མེས་བསྲེགས་བཞིན། །ཤེས་པས་རྟག་ཏུ་ཉོན་མོངས་གཞོམ། །ཚངས་པ་དཀོན་མཆོག་གསུམ་སྟོན་པ། །ཡེ་ཤེས་མེ་ལྕེ་མཆོག་ཡིན་ནོ། །གང་དག་ཡེ་ཤེས་སྤྱོད་ཡུལ་དགའ། །དེ་དག་ཞི་བའི་ལམ་ལ་གནས། །གང་དག་ཉོན་མོངས་སྦྲུལ་བསྲེགས་པ། །དེ་དག་ཐམས་ཅད་ཞིགས་པར་གྱུར། །
དཔའ་བོ་གང་དག་ཕན་ཚུན་ཤེས། །མཁས་པ་དེ་ཉིད་མཐོང་བ་ནི། །དེ་དག་གནས་ནི་དམ་པར་འགྲོ། །སྐྱེ་དང་འཆི་བ་སྤངས་པ་ཡིན། །གང་དག་འཁོར་ལ་མངོན་དགའ་ཞིང་། །མགུ་བ་ཉོན་མོངས་དགྲ་དག་གིས། །རྟག་ཏུ་བཅིང་བས་བཅིངས་པ་སྟེ། །དེ་དག་སྲེད་པ་ཉམ་ངར་འཁྱམ། །གང་དག་ངེས་འབྱུང་བློ་ཡོད་ཅིང་། །གང་དག་རྟག་ཏུ་ཞི་སྤྱོད་པ། །དེ་ནི་ལྷ་ཡི་རིས་དག་གི །ཚངས་པའི་འཇིག་རྟེན་འབྱུང་བར་འགྱུར། །འདོད་ལ་སོགས་ལ་གང་སྡང་བ། །སངས་རྒྱས་ལ་སོགས་རྟག་ཏུ་མཆོད། །ཤིང་སྐམ་མེ་ཡིས་བསྲེགས་པ་ལྟར། །དེ་ནི་འཁོར་བ་འཇིག་པར་བྱེད། །གང་དག་སེམས་ཀྱི་དབང་མི་འགྲོ། །རྟག་ཏུ་དེ་རྗེས་སེམས་འགྲོ་བ། །མུན་ལ་ཉི་མ་ཤར་བ་ལྟར། །དེ་ནི་ཉོན་མོངས་ངེས་པར་འཇོམས། །སེམས་ནི་དགྲ་ནང་དགྲ་ཆེན་ཏེ། །དེ་ལས་གཞན་པའི་དགྲ་མེད་དོ། །རི་ནི་དུས་སུ་བསྲེགས་པ་ལྟར། །སེམས་ཅན་རྟག་ཏུ་སེམས་ཀྱིས་བསྲེགས། །བྱིས་པ་བླུན་པོ་སེམས་དབང་སོང་། །དབང་པོ་མ་ཐུལ་གང་ཡིན་པ། །དེ་ཡི་སྡུག་བསྔལ་ཞི་མེད་ཅིང་། །དེ་ཡི་མྱ་ངན་འདས་པ་རིང་། །སྡུག་བསྔལ་སྡུག་བསྔལ་རྣམ་སྨིན་དང་། །སྡུག་བསྔལ་རྒྱུ་ནི་རྣམ་ཤེས་པ། །ཀུན་ནས་ཉོན་མོངས་འདུས་པ་ཡི། །འཆིང་བ་ཐམས་ཅད་འཇིག་པར་བྱེད། །སྣང་བའི་ནང་ན་ཤེས་པ་མཆོག །མུན་པའི་ནང་ན་གཏི་མུག་སྟེ། །དེ་ལྟར་གང་ཞིག་སྣང་ལ་དགའ། །དེ་ནི་མཁས་པ་ཞེས་བྱ་འོ། །དོན་རྣམས་མཆོག་ཀུན་མེད་བྱེད་པ། །དཔའ་བོས་གཏི་མུག་རྣམ་པར་སྤོངས། །གང་ཞིག་གཏི་མུག་དབང་སོང་བ། །དེ་ལ་ཞི་བ་མེད་པ་ཡིན། །གལ་ཏེ་ཆེ་བར་བདག་འདོད་ན། །མེ་ཡིས་རེག་པར་གྱུར་ཀྱང་རུང་། །སྦྲུལ་དང་ལྷན་ཅིག་འདུག་ཀྱང་སླའི། །ཉོན་མོངས་ལྷན་ཅིག་སྦྱོར་མི་བྱ། །བདུད་རྩིའི་ནང་ན་ཤེས་པ་མཆོག །ཆེ་བའི་ནང་ན་གཏེར་མཆོག་ཡིན། །གཉེན་གྱི་ནང་ན་གཉེན་མཆོག་སྟེ། །ནོར་གྱི་ནང་ན་ནོར་མཆོག་གོ །དེ་ལྟ་བས་ན་ཡེ་ཤེས་མེས། །རྟག་ཏུ་ཉོན་མོངས་རི་བསྲེག་གོ །ཉོན་མོངས་རི་དག་བསྲེགས་པ་ནི། །བདེ་བའི་གཞི་ལ་གནས་པ་ཡིན། །མི་གང་བློ་ནི་ཞན་པ་དག །ཆོས་མ་ཡིན་པ་ཉོན་མོངས་གཟེབ། །འཁོར་བ་དག་
ལས་མ་རྒལ་བ། །མུན་པ་མུན་ནག་ནང་དུ་འཇུག །གང་དག་ཆོས་ལ་བློ་རྟག་པ། །དེ་དག་དམ་པ་རྟག་ཏུ་མཆོད། །དེ་དག་ཚེ་རབས་འབྲས་བུར་ལྡན། །དེ་དག་བློ་ཡིས་གཙེ་བ་མེད། །དེ་ལྟར་དགེ་སློང་དེ་ཆོས་དང་ཆོས་མ་ཡིན་པ་དེ་དག་གི་རྣམ་པ་ཡང་དག་པ་ཤེས་པར་གྱུར་ནས་གནས་ཏེ། དེ་ལྟར་དེ་ཤིན་ཏུ་དྲི་མ་མེད་པའི་སེམས་ཀྱིས་ཚེ་འབུམ་ཕྲག་དུ་མའི་འཁོར་བའི་རིའི་རྩེ་མོ་འཇིག་པར་བྱེད་ཅིང་སྤོང་བར་བྱེད་ལ་འཇོམས་པར་བྱེད་དེ། ཡང་འབྱུང་བར་མི་བྱེད། དེའི་ཉོན་མོངས་པའི་དགྲ་འཇོམས་པར་བྱེད་ཅིང་། དེའི་མྱ་ངན་ལས་འདས་པའི་མཐར་བྱེད་དོ། །དེ་ནས་གཞན་ཡང་དགེ་སློང་དེ་ལས་ཀྱི་ཆོས་ཀྱི་རྣམ་པར་སྨིན་པ་གཞན་རྗེས་སུ་སེམས་པར་བྱེད་དེ། ཇི་ལྟར་ན་ཉེས་པར་བྱས་པའི་སེམས་ཀྱི་རྒྱུའི་རྒྱུན་རྣམ་པ་དུ་མ་ཆུ་བོའི་རྒྱུན་ལྟར་འབབ་པའི་སེམས་ཅན་རྣམས་ཀྱིས་ཉེས་པར་བྱས་པའི་ལས་ཀྱི་འབྲས་བུའི་ས་མངོན་དུ་གྱུར་པ་སེམས་ཅན་དམྱལ་བའི་ཚོར་བ་མི་བཟད་པ་ཚ་བ་རྩུབ་པ་དག་མྱོང་བར་འགྱུར་སྙམ་ནས་ནང་གི་ཆོས་ལ་ཆོས་ཀྱི་རྗེས་སུ་ལྟ་བ་དེ་ལེགས་པར་བྱས་པ་དང་། ཉེས་པར་བྱས་པའི་དེ་ཁོ་ན་ཉིད་དཔྱོད་པའི་བློས་རྟོག་པར་བྱེད་དེ། ཀྱེ་མ་སྲོག་ཆགས་འདི་དག་ནི་སེམས་ཀྱིས་བསླུས་ཤིང་སྲེད་པས་བསླུས་ནས་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པའི་གནོད་པའི་ཉེན་འཁོར་གྱི་སེམས་ཅན་དམྱལ་བར་ཇི་ལྟར་སྐྱེ་བར་འགྱུར། འདི་ལྟར་ལས་མངོན་སུམ་དུ་གྱུར་པ་སེམས་ཅན་དམྱལ་བའི་འཁོར་ནི་གང་ཞིག །སེམས་ཅན་དམྱལ་བར་ལས་གང་གིས་སྲོག་ཆགས་རྣམས་སེམས་ཅན་དམྱལ་བའི་འཁོར་དུ་འགྲོ་སྙམ་ནས། དགེ་སློང་དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན་སེམས་ཅན་དམྱལ་བ་ཆེན་པོ་ཡང་སོས་ན་ཡོད་པའི་འཁོར་གྱི་མིང་ནི་འདི་ལྟ་སྟེ། མི་གཙང་བའི་འདམ་དང་། ལྕགས་ཀྱིས་བསྒྱུར་བ་དང་། སྣོད་དུ་བཙོ་བ་དང་། གནོད་པ་རྣམ་པར་མ་ཞི་བ་དང་། མུན་པ་དང་། ཀུན་དུ་མི་དགའ་བ་དང་། ཚོར་བ་བདོ་བ་དང་། ནད་ཐམས་
ཅད་པ་དང་། མཚོན་འབབ་པ་དང་། གནོད་པ་དྲག་པ་དང་། ནེའུ་ལེ་ནག་པོ་ལྟ་བུ་དང་། གཞན་དུ་འགྱུར་བ་དང་། སྡུག་བསྔལ་གྱིས་གནོད་པ་དང་། པད་མའི་ཕྲེང་བ་དང་། མཚེའུ་དང་། གནོད་པ་མཐོ་བ་སྟེ། ཡང་སོས་ཀྱི་འཁོར་བཅུ་དྲུག་ཡིན་ནོ། །དེ་ལ་ལས་གང་གིས་སེམས་ཅན་དམྱལ་བ་ཡང་སོས་ཀྱི་འཁོར་དུ་སྐྱེ་བར་འགྱུར་སྙམ་ནས། དགེ་སློང་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན་སྲོག་གཅོད་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པའི་ལས་དང་ལས་ཀྱི་ཉེར་བསྡོགས་དང་། ལས་ཀྱི་མཇུག་དང་ལྡན་པས་སེམས་ཅན་དམྱལ་བ་ཡང་སོས་སུ་སྐྱེ་བར་འགྱུར་ཏེ། འདི་ལྟར་སྲོག་གཅོད་པ་ཆེན་པོ་དང་། འབྲིང་དང་། ཐ་མས་གནོད་པ་ཆེན་པོ་དང་། འབྲིང་དང་། ཐ་མར་འགྱུར་རོ། །དེ་ལ་སེམས་ཅན་དམྱལ་བ་ཆེན་པོ་ནི་མི་ཚུལ་ཁྲིམས་དང་ལྡན་པའམ་སྡོམ་པ་བླངས་པའམ། ཚུལ་ཁྲིམས་ཀྱི་ཕྱོགས་སྤྱོད་པའི་སེམས་ཅན་གཞན་སེམས་ཅན་དུ་ཡང་ཤེས་ལ་བསམས་བཞིན་དུ་སྲོག་བཅད་དེ་ལས་ཀྱི་མཇུག་ཀྱང་སོགས་ཤིང་འཆགས་པར་མི་བྱེད་ལ་སེམས་འགྱོད་པར་མི་བྱེད། གཞན་དག་ལ་ཡང་རུང་བར་རྗོད་ཅིང་ཕྱིར་ཞིང་བྱེད། གཞན་དག་ཀྱང་སྲོག་གཅོད་པ་དེ་ལ་གཅོད་དུ་འཇུག་ཅིང་རབ་ཏུ་སྤྲོ་བར་བྱེད། དགའ་བར་བྱེད་ཅིང་རབ་ཏུ་གནས་པར་བྱེད་ལ་སློབ་པར་བྱེད། གཞན་དག་གིས་བྱས་པ་ལ་རྗེས་སུ་ཡི་རང་བར་བྱེད་པའི་མི་གཏི་མུག་ཅན་ཡང་དང་ཡང་དུ་བྱེད་པའོ། །དེ་སེམས་ཅན་དམྱལ་བའི་གནས་དེར་སྐྱེ་བར་འགྱུར་ཏེ། མི་རྣམས་ཀྱི་ལོ་ལྔ་བཅུ་གང་ཡིན་པ་དེ་ནི་རྒྱལ་ཆེན་བཞིའི་ཉིན་ཞག་གཅིག་གོ །བགྲང་བའི་ཚུལ་དེ་ལྟ་བུའི་ཉིན་ཞག་སུམ་ཅུ་ལ་ཟླ་བ་གཅིག་གོ །ཟླ་བ་བཅུ་གཉིས་ལ་ལོ་གཅིག་སྟེ། རྒྱལ་ཆེན་བཞི་པ་དག་ནི་ལོ་ལྔ་བརྒྱར་འཚོ་ལ་དེ་ནི་སེམས་ཅན་དམྱལ་བ་ཆེན་པོ་ཡང་སོས་ཀྱི་ཉིན་ཞག་གཅིག་ཡིན་ནོ། །སྡིག་པ་ཐ་མ་དང་། འབྲིང་དང་ཆེན་པོས་ཚེ་ཐུང་ངུ་དང་འབྲིང་དང་རིང་པོར་འགྱུར་ཏེ། དུས་མ་ཡིན་པར་འཆི་བ་ནི་ཡོད་དོ། །གལ་ཏེ་སྡིག་པའི་ས་བོན་མི་བཟད་པ་བྱས་ན་དེའི་འཁོར་གཅིག་གམ།
གཉིས་སམ། གསུམ་མམ། བཞིའམ། ལྔའམ། དྲུག་ནས་དེ་བཞིན་དུ་འཁོར་བཅུ་དྲུག་གི་བར་དག་ཏུ་སྨིན་པར་འགྱུར་བ་ནས་སྡིག་པའི་ལས་བཅོམ་ཞིང་བསལ་ལ་ཟད་པར་མ་བྱས་ཀྱི་བར་དུ་འབྱུང་ངོ་། །སེམས་ཅན་དམྱལ་བ་གཞན་དག་གི་ལོ་ལྔ་བརྒྱ་ནི་ལྷའི་བགྲང་བའི་ཚུལ་དང་འཐུན་ཏེ་མིའི་ནི་མ་ཡིན་ནོ། །དེ་ནས་གཞན་ཡང་ཇི་ལྟར་ན་དགེ་སློང་དེ་སེམས་ཅན་དམྱལ་བའི་འཁོར་དག་གི་ལས་མངོན་སུམ་དུ་གྱུར་པ་ཡིན་ཞེ་ན། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས་སེམས་རི་མོ་མཁན་ལྟ་བུས་རི་མོ་ལྟ་བུའི་རང་གི་ལས་ཀྱི་འབྲས་བུའི་སའི་ཆ་སེམས་ཀྱི་བསམ་པའི་གནས་ཀྱི་རྣམ་པ་གནོད་པ་བྱེ་བ་ཁྲག་ཁྲིག་འབུམ་ཕྲག་དག་གི་འཇིགས་པ་གཞན་དང་མཚུངས་པ་མེད་པའི་སེམས་ཅན་དམྱལ་བ་ཡང་སོས་ཀྱི་འཁོར་དག་རབ་ཏུ་འབྱེད་པར་བྱེད་དོ། །ལས་གང་གིས་འཁོར་མི་གཙང་བའི་འདམ་དུ་སྐྱེ་བར་འགྱུར་སྙམ་ནས་དེ་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན་མི་གཙང་བའི་འདམ་དུ་སྐྱེ་བར་འགྱུར་བ་ནི། མི་དགེ་བའི་ལས་ཀྱི་ས་བོན་དུ་གྱུར་པ་སྲོག་གཅོད་པ་ཡིན་ཏེ། གལ་ཏེ་འདོད་ཆགས་ཀྱིས་བྱེད་ན་བྱ་ཡིས་བྱ་ལའམ། མིག་དུད་ཀ་ལྟ་བུས་མིག་དུད་ཀ་ལྟ་བུ་ལའམ། དུད་ཀ་ལྟ་བུས་དུད་ཀ་ལྟ་བུ་ལའམ། རྒྱའམ་གདོས་ཀྱིས་རི་དགས་དང་རི་དགས་དག་གསོད་པར་བྱེད་ལ། འཆགས་པར་མི་བྱེད་ཅིང་། ལས་ཀྱི་ཉེར་བསྡོགས་དང་། ལས་ཀྱི་མཇུག་སོགས་པ་སྔ་མ་བཞིན་དུ་སྦྱར་ཏེ་དེ་དེར་སྐྱེ་བར་འགྱུར་རོ། །དེའི་གནོད་པའི་ཕྱོགས་གཅིག་ཏུ་འགྱུར་བ་ནི་འདི་ལྟ་སྟེ། མི་གཙང་བའི་འདམ་གྱི་འཁོར་དུ་མི་གཙང་བ་རབ་ཏུ་འབར་བ་རོ་ཚ་བ་ཟངས་བཞུས་པ་ལྟ་བུ་དང་ལྡན་ཞིང་སྲིན་བུ་མཆུ་རྡོ་རྗེ་ལྟ་བུ་དང་ལྡན་པ་དག་གིས་ཀུན་ཏུ་གང་སྟེ། དེ་གལ་ཏེ་མི་གཙང་བ་དེ་དག་ཟ་ན། དེའི་སྲིན་བུ་དེ་དག་གིས་ལུས་དེའི་ནང་དུ་སོང་སྟེ་སྔར་མཆུ་ཟའོ། །ཕྱིས་ལྕེ་ཟ་སྟེ། དེའི་འོག་ཏུ་རྐན་ཟ། རྐན་གྱི་འོག་ཏུ་ཨོལ་གོང་། ཨོལ་གོང་གི་འོག་ཏུ་སྙིང་། སྙིང་གི་འོག་ཏུ་མཆིན་པ། མཆིན་པའི་འོག་ཏུ་མཆེར་པ། མཆེར་པའི་འོག་ཏུ་བཱར་ཤྨ། བཱར་ཤྨའི་འོག་ཏུ་བཱ་ཀྴ་ལི་ཀ །བཱ་ཀྴ་ལི་
ཀའི་འོག་ཏུ་གཉེ་མ། གཉེ་མའི་འོག་ཏུ་རྒྱུ་མ། རྒྱུ་མའི་འོག་ཏུ་ལོང་ཀའི་ནང་དུ་སོང་ནས་གནད་ཐམས་ཅད་དང་། སོའི་གནད་རྒྱུས་པ་དང་། ཤ་དང་། གློ་བ་དག་སྟེ། མི་གཙང་བའི་ལུས་ལས་སྲིན་བུ་འབྱུང་བ་དེ་དག་གིས་ཟའོ། །དེ་སེམས་ཅན་དམྱལ་བའི་ཚོར་བ་ཚ་བ། རྩུབ་པ། མི་བཟད་པ། མིའི་བགྲང་བའི་ཚུལ་གྱིས་ལོ་དུ་མ་ལོ་འབུམ་ཕྲག་དུ་མར་ཚོར་བ་མྱོང་བར་འགྱུར་ཏེ། ཇི་ཙམ་དུ་སྡིག་པ་བྱའི་སྲོག་གཅོད་པ་ནི་བྱས་གསོད། སྲོག་ཆགས་དུད་ཀ་ལྟ་བུ་ནི་དུད་ཀ་ལྟ་བུས་གསོད། རྒྱ་དང་གདོས་ཀྱིས་རི་དགས་གསོད་པ་རྔོན་པ་སྤྱོད་པའི་ངང་ཚུལ་ཅན་ནི་དེ་དག་གིས་གསོད་ཅིང་། དེ་དག་གིས་དབང་དུ་བྱས་ནས་ཟ་སྟེ། དེའི་ལས་ཀྱི་འབྲས་བུ་རྣམ་པར་སྨིན་པས་ཇི་ལྟར་དེ་དག་གིས་དེ་ཟོས་པ་དེ་ལྟར་སྲིན་བུ་དེ་དག་གིས་དེའི་ནང་དུ་སོང་ནས་ཟའོ། །རང་གི་ལས་དགེ་བ་དང་། མི་དགེ་བའི་འབྲས་བུ་འདྲ་བ་ནི་གང་གི་ཚེ་དེའི་སྡིག་པའི་ལས་བཅོམ་ཞིང་སྤངས་པར་གྱུར་ན། དེ་དེའི་ཚེ་མི་གཙང་བའི་འདམ་གྱི་འཁོར་གྱི་སེམས་ཅན་དམྱལ་བ་ལས་ཐར་བར་འགྱུར་ཞིང་། སེམས་རི་མོ་མཁན་ལྟ་བུ་དེ་ཡང་རི་མོ་བྲིས་པ་ལྟ་བུ་འཇིག་པར་འགྱུར་རོ། །དེ་དེ་ལས་ཐར་ནས་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་སུ་མི་འགྱུར་ན་དེ་དུད་འགྲོ་བྱར་སྐྱེ་བར་འགྱུར་ཏེ། དེ་བྱ་དེར་གྱུར་ནས་དེ་བཞིན་དུ་བྱ་དེས་གསོད་དོ། །རི་དགས་སུ་གྱུར་ན་ཡང་དེས་སྔོན་ཇི་ལྟར་རྒྱའམ། གདོས་དག་གིས་བྱའམ་རི་དགས་དག་བསད་པའི་ལས་ཀྱི་འབྲས་བུ་དེས་སེམས་ཅན་དམྱལ་བར་སྨིན་པའི་རྒྱུ་འཐུན་པའི་འབྲས་བུས་དུད་འགྲོར་སྐྱེའོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ལྷའམ་མིར་སྐྱེས་ན་ལས་དེ་དང་རྒྱུ་འཐུན་པར་དེ་ཚེ་ཐུང་བར་འགྱུར་རོ། །དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཡང་སོས་ཀྱི་འཁོར་གཉིས་པ་ལྕགས་ཀྱིས་བསྒྱུར་བ་ཞེས་བྱ་བ་ལ་རྟོག་པར་བྱེད་དེ། སྲོག་གཅོད་པའི་ལས་གང་གིས་དེར་སྐྱེ་བར་འགྱུར་སྙམ་ནས། དེ་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན། གལ་ཏེ་རྙེད་པ་དང་། བཙོང་བ་དང་། བླང་བའི་རྒྱུའི་སེམས་ཅན་དག་སྲོག་གཅོད་པར་བྱེད་དེ། མཚོན་གྱིས་གཞན་
བསད་ཅིང་སྲོག་དང་བྲལ་ན། དེ་རྒྱུ་དེ་དང་། རྐྱེན་དེ་དང་། གཞི་དེ་འཆགས་པར་མི་བྱེད་ཅིང་རབ་ཏུ་སྤྲོ་བར་བྱེད་པའི་ལས་དང་། ལས་ཀྱི་ཉེར་བསྡོགས་བྱས་པ་ནི་སྔ་མ་བཞིན་དུ་སྦྱར་ཏེ། ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ལྕགས་ཀྱིས་བསྒྱུར་བར་སྐྱེ་བར་འགྱུར་རོ། །དེ་ན་ལྕགས་ཀྱི་ར་བ་རབ་ཏུ་འབར་བ་འཕང་དུ་དཔག་ཚད་བཅུ་ཡོད་པ་སེམས་ཅན་དམྱལ་བའི་མེས་རབ་ཏུ་འབར་ཏེ། དེའི་དྲུང་ན་མི་དག་གི་མེ་ནི་སྤྲིན་དང་མཚུངས་སོ། །མཚོན་རབ་ཏུ་འབར་བའི་ཤུགས་ཀྱིས་ཀྱང་དེ་དག་གི་ལུས་ལ་རབ་ཏུ་འབབ་སྟེ། གང་གིས་ལུས་དེ་དག་ཡུངས་ཀར་ཙམ་དུ་གཅོད་ཅིང་འཇིག །སྲེག་ཅིང་གཤེག་གོ །ཐམས་ཅད་དུ་མཚོན་གྱི་ཆར་རབ་ཏུ་འབབ་སྟེ། དཔེར་ན་འཛམ་བུ་གླིང་དུ་དུས་སུ་ཆར་གྱི་རྒྱུན་འབབ་པ་ལྟར་ཕྱོགས་བཅུར་མཚོན་གྱི་ཆར་གྱིས་མངོན་པར་ཁེབས་ཏེ། གང་གིས་སེམས་ཅན་དམྱལ་བ་དེ་དག་གཤེགས་ཀྱང་འཆི་བར་ནི་མི་འགྱུར་རོ། །དེའི་སྡིག་པའི་ལས་ཀྱི་འབྲས་བུ་རྣམ་པར་སྨིན་པས་ཡན་ལག་རྣམས་བཅད་ཅིང་གཏུབས་པ་དང་རབ་ཏུ་ངུའོ། །ལྕགས་ཀྱིས་བསྒྱུར་བའི་སེམས་ཅན་དམྱལ་བ་དེ་ན་རལ་གྲི་ལོ་མ་ལྟ་བུའི་ཚལ་ཡོད་དེ། སྟེང་དང་འོག་གི་སོ་རྣོ་བ། བ་ཚྭ་ལྟ་བུའི་ཚལ་དེ་རྒྱང་རིང་པོ་ནས་ཚལ་ནག་པོའི་ཕུང་པོ་ལྟ་བུ་མཐོང་ནས། དེ་དག་བཀྲེས་པ་དང་། སྐོམ་པས་གདུངས་པ་ཀུན་དུ་རྒྱུག་ཅིང་ཆོ་ངེས་འདེབས་པ་ན་དེ་གང་དུ་ཞུགས་པར་གྱུར་པ་དེ་དག་ཀུན་ནས་མཚོན་གྱི་ཆར་གྱིས་རྣམ་པར་གཤེག་པར་བྱེད་དོ། །དེར་ལས་ཀྱི་རྒྱུ་ནི་ཕྱུགས་དེ་དག་ལ་ཟས་ཀྱིས་བྲིད་ནས་བསླུས་པ་དེའི་ལས་དེ་དང་འབྲས་བུ་དེ་ནི་འདི་ལྟར་སེམས་རི་མོ་མཁན་ལྟ་བུས་སེམས་ཅན་དམྱལ་བའི་རི་མོའི་གཞི་ལ་སེམས་ཅན་དམྱལ་བ་པའི་མི་དགེ་བའི་ལས་མངོན་པར་འདྲི་བ་དེ་ལྟ་དེ་ལྟར་སེམས་ཅན་དམྱལ་བར་འགྲུབ་པའི་ལས་སོ་སོར་མྱོང་བར་འགྱུར་རོ། །དེར་སེམས་ཅན་དམྱལ་བ་དེ་དག་ཇི་ཙམ་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ། ལོ་འབུམ་ཕྲག་དུ་མར་གཤེག་པར་བྱེད་དེ། གང་སེམས་རི་མོ་མཁན་
ལྟ་བུ་དེས་མངོན་པར་འདྲི་བ་ནི་སྔ་མ་བཞིན་ནོ། །དེ་ནས་གཞན་ཡང་དགེ་སློང་དེ་ཡང་སོས་ཀྱི་འཁོར་གསུམ་པ་སྣོད་དུ་བཙོ་བ་ཞེས་བྱ་བ་དེའི་ལས་ཀྱི་འབྲས་བུ་རྣམ་པར་སྨིན་པ་ལ་རྟོག་པར་བྱེད་དེ། ལས་གང་ཞིག་གིས་དེར་སྐྱེས་པར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་སེམས་ཅན་རྔ་མོའམ། ཕག་གམ། མཱ་ཏ་ལ་ཀའམ། རི་བོང་དུ་གྱུར་པའམ། མཱ་ཏོ་ལ་ཀའམ། དྲི་ཤྱ་བྷུ་ཏེ་གསོན་པ་དག་བཟའ་བའི་དོན་དུ་སྤུ་ད་བྱི་བར་བྱ་བའི་ཕྱིར་དེར་འཇུག་ཅིང་རབ་ཏུ་བསྐོལ་ཏེ། འཇོག་པར་བྱེད་པ་དེ་དག་ལུས་དང་བྲལ་ཏེ། ཤི་ནས་ངན་འགྲོ་ལོག་པར་ལྟུང་བར་ས་བོན་དང་མཚུངས་པའི་འབྲས་བུ་སྣོད་དུ་བཙོ་བར་སྐྱེ་བར་འགྱུར་རོ། །དེ་རབ་ཏུ་བཙོ་བ་ལྕགས་ཀྱི་སྣོད་ཀྱི་ནང་དུ་རབ་ཏུ་བཅུག་ནས་སྲན་མ་མུད་ག་བཞིན་དུ་འཚེད་དེ་ལོ་འབུམ་ཕྲག་དུ་མར་སེམས་ཅན་དམྱལ་བ་པའི་མེ་མི་བཟད་པས་འཚེད་དོ། །སེམས་རི་མོ་མཁན་ལྟ་བུའི་གཞི་བཅོམ་ཞིང་སྤངས་ཏེ་ཟད་པར་བྱས་ན་དེ་དེ་ལས་ཡོངས་སུ་ཐར་བར་འགྱུར་ཏེ། སེམས་ཅན་དམྱལ་བ་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བ་དང་། སྐྱེས་ནས་མྱོང་བར་འགྱུར་བའི་འབྲས་བུ་ནི་སྔ་མ་བཞིན་དུ་སྦྱར་ཏེ། གང་ལྷ་དང་མིའི་བར་དག་ཏུ་སྐྱེ་བར་འགྱུར་ལ་དེ་ཚེ་ཐུང་བར་འགྱུར་རོ། །དེ་འཁོར་སྣོད་དུ་བཙོ་བ་མཐོང་ནས་ཡང་དག་པ་ཇི་ལྟ་བ་བཞིན་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པའི་དགེ་སློང་དེ་ཇི་ལྟར་ན། སེམས་ཅན་དམྱལ་བའི་འཁོར་ལ་ལྟ་ཞེ་ན། དེ་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། འདི་ལྟར་དགེ་སློང་དེ་ནི་མཆོག་ཏུ་དཔའ་བ། བདུད་ཀྱི་སྡེ་མངོན་པར་འཇོམས་ཤིང་འཁོར་བའི་རྒྱ་མཚོ་ལས་སྒྲོལ་བ། ཚུལ་ཁྲིམས་ཀྱི་ཆུས་འདོད་ཆགས་ཀྱི་མེ་གསོད་པར་བྱེད་པ། བྱམས་པའི་ཆུའི་བུམ་པས་ཞེ་སྡང་གི་མེ་གསོད་པར་བྱེད་པ། རྟེན་ཅིང་འབྲེལ་པར་འབྱུང་བའི་སྒྲོན་མས་གཏི་མུག་གི་རབ་རིབ་སེལ་བར་བྱེད་དེ། ཟབ་མོ་ཁོང་དུ་ཆུད་པའི་དགེ་སློང་ནི་འཁོར་བའི་རྒྱ་མཚོ་ལས་རྒལ་བ་ཡིན་ནོ། །དེ་ནས་གཞན་ཡང་དགེ་སློང་དེ་ཡང་སོས་ཀྱི་འཁོར་བཞི་པ་གནོད་པ་རྣམ་པར་མ་ཞི་བ་ཞེས་བྱ་བ་ལ་རྟོག་པར་བྱེད་དེ། དེ་རྒྱུ་དང་འབྲས་
བུ་རྣམ་པར་སྨིན་པ་ནི་ས་བོན་དང་། འབྲས་བུར་མཚུངས་ཏེ། གང་གིས་མིར་གྱུར་པའི་ཡང་སོས་གཞན་གནོད་པ་རྣམ་པ་དུ་མ་བྱས་པར་འགྱུར་ཏེ། འདི་ལྟ་སྟེ། ཤིང་གི་བར་དུ་བཙིར་བའི་ཚོར་བ་དང་། ལུམ་པ་ཀའི་ཚོར་བ་དང་། དུད་པའི་ཚོར་བ་དང་། ལམ་གྱི་ཚོར་བ་དང་། དབང་པོའི་ལམ་འདྲེན་པའི་ཚོར་བ་དང་། སའི་ཚོར་བ་དང་། རབ་ཏུ་ལྟུང་བའི་ཚོར་བ་དང་། ཁབ་ཀྱི་ཚོར་བ་དང་། ཐག་པས་འདྲེན་པའི་ཚོར་བ་དང་། གླང་པོ་ཆེའི་སྟེང་ནས་ལྟུང་བའི་ཚོར་བ་དང་། བྱེ་མས་འཐོར་བའི་ཚོར་བ་དང་། གཏུན་ཤིང་གི་ཚོར་བ་དང་། ལྕག་གཞུས་པའི་ཚོར་བ་དང་། གླད་པ་ན་བའི་ཚོར་བ་དང་། བུས་པ་དང་། ཁྱེའུ་པང་བར་བཙིར་བ་ལྟ་བུའི་ཚོར་བ་དང་། གྲང་བ་དང་དྲོ་བའི་ཚོར་བ་དང་། ཆུའི་ཚོར་བ་དང་། ཁར་གོངས་སམ། ཆུ་བླུགས་པའི་ཚོར་བ་དང་། ཤིང་ལ་དཔྱངས་པའི་ཚོར་བ་དང་། ངམ་གྲོག་དང་གཡང་སར་རྣམ་པར་འཇིགས་པའི་ཚོར་བ་དང་། དགྲའི་དབང་དུ་གྱུར་པའི་ཚོར་བ་དང་། སྦ་བ་གཅོད་པའི་ཚོར་བ་དང་། སོར་མོ་ལ་རབ་ཏུ་གནོད་པའི་ཚོར་བ་དང་། སྤུ་འཐོག་པའི་ཚོར་བ་དང་། མགོ་འཁོར་ལོས་བསྐོར་བའི་ཚོར་བ་དང་། ཞ་ཉེ་དང་རོ་ཉེ་དང་ཟངས་རབ་ཏུ་བསྐོལ་བར་འཇུག་པའི་ཚོར་བ་དང་། སྣར་ལྕགས་རྣོན་པོ་འཇུག་པའི་ཚོར་བ་དང་། སྦ་བའི་གནས་སུ་སྦྲུལ་འཇུག་པའི་ཚོར་བ་དང་། བོང་བས་འཕེན་པའི་ཚོར་བ་དང་། སྲེད་པའི་ཚོར་བ་དང་། ལུས་ལ་མེའི་ཕྲེང་བའི་ཚོར་བ་དང་། སྐྲ་འབལ་བའི་ཚོར་བ་དང་། སྲོག་ཆགས་མར་ཀོ་ཏ་ཀ་འཇུག་པའི་ཚོར་བ་དང་། པགས་པ་གཏུབས་པའི་ཚོར་བ་དང་། ཙཱ་ན་ཀའི་ཚོར་བ་དང་། འདུས་པའི་ཚོར་བ་དང་། ལུས་གཏུབས་པའི་ཚོར་བ་དང་། རྫ་མ་དང་བུམ་པར་བཙོས་པའི་ཚོར་བ་དང་། སོ་ཕག་གི་ཚོར་བ་དང་། ལུས་ཕྱེད་དུ་བ་ཚྭ་བླུགས་པའི་ཚོར་བ་དང་། ཕྱག་དར་གྱི་ཕྱེ་མའི་ཚོར་བ་དང་། རབ་ཏུ་བསྲེགས་པའི་ཚོར་བ་དང་། རྐང་པའི་མཐེ་བོ་མཚོན་གྱིས་བཅད་ཅིང་རབ་ཏུ་བསྲེགས་པའི་ཚོར་བ་དང་། ཕྱི་ཕྱི་ལིང་གི་ཚོར་བ་དང་། རྒྱ་མཚོ་སུམ་ཅུའི་དབུ་བའི་ཚོར་བ་དང་། ལག་པ་དང་། རྐང་པའི་ཚོར་བ་དང་། རིང་དུ་འགྲོ་བའི་
ཚོར་བ་དང་། འགྲམ་སོའི་ཚོར་བ་དང་། སྣུམ་གྱི་ཚོར་བ་དང་། གསེར་རྡུང་བའི་ཚོར་བ་དང་། ཚབས་ཆེར་སྐྲངས་པའི་ཚོར་བ་དང་། བསླང་བ་དང་དབབ་པའི་ཚོར་བ་སྟེ། ཚོར་བ་དེ་དག་གིས་གང་སྡུག་བསྔལ་གྱི་ཚོགས་རྣམ་པ་སྣ་ཚོགས་དུ་མ་ཀུན་དུ་སྤྱོད་པ་དེ་དག་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་གནོད་པ་རྣམ་པར་མ་ཞི་བ་དེ་ནི་དེར་རྒྱུ་དང་མཚུངས་པའི་འབྲས་བུ་མྱོང་བར་འགྱུར་ཏེ། སེམས་ཅན་དམྱལ་བ་དེའི་རྣམ་པར་སྨིན་པ་དཔེ་མེད་པ་བྱེ་བ་སྟོང་ཕྲག་བཅུར་བསྒྱུར་བ། སྔར་ཇི་སྐད་བཤད་པའི་གནོད་པ་དེ་དག་ཐམས་ཅད་རང་གི་ལས་ཀྱི་འབྲས་བུ་མངོན་སུམ་དུ་གྱུར་པའི་སེམས་ཅན་དམྱལ་བའི་ས་དེར་དེ་དག་མྱོང་བར་འགྱུར་རོ། །གང་སེམས་རི་མོ་མཁན་ལྟ་བུས་སྲེག་པའི་པིར་དང་། མི་དགེ་བ་ཀུན་དུ་རྟོག་པ་སྣ་ཚོགས་ཀྱི་ཚོན་རྩི་སྣོད་ཀྱི་གཞི་ལྟ་བུའི་སྙིང་ལ་ཀུན་དུ་འདྲི་སྟེ། བུ་དང་ཆུང་མའི་མཚན་མ་དམ་པོས་དེ་རྗེས་སུ་མྱོང་བར་འགྱུར་རོ། །རང་གིས་ལེགས་པར་བྱས་པའི་ལས་ནི་ཕ་མས་བྱས་པ་མ་ཡིན་ཏེ། ཇི་ཙམ་དུ་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཆི་བར་མི་འགྱུར་རོ། །དེ་ནས་ཤི་ནས་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་གང་གིས་དུད་འགྲོ་དང་། ཡི་དགས་དག་ཏུ་མ་སྐྱེས་ལ་གལ་ཏེ་མི་རྣམས་དང་སྐལ་པ་མཉམ་པར་གྱུར་ན། རྒྱུ་འཐུན་པའི་འབྲས་བུས་དེ་རྟག་ཏུ་བཅིང་བ་དང་། གཙེ་བ་དང་། གནོད་པ་དང་། རྒྱལ་པོའི་ཕོ་བྲང་འཁོར་ནས་འཚེ་བ་དང་།མི་བདེ་བར་འགྱུར། སྐྱེ་བོ་ཀུན་གྱིས་ཀྱང་མངོན་པར་གཙེ་སྟེ། རྟག་ཏུ་སྡུག་བསྔལ་མི་བཟད་པར་འགྱུར། གཉེན་འདབ་དང་། མཛའ་བཤེས་དང་། ཆུང་མ་དང་། བུ་དག་དང་ཡང་ཞེ་འགྲས་པར་འགྱུར་རོ། །དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཡང་སོས་ཀྱི་འཁོར་ལྔ་པ་མུན་པ་ཞེས་བྱ་བ་ལ་རྟོག་པར་བྱེད་དེ། སེམས་ཅན་དག་ལས་ཀྱི་རྣམ་པར་སྨིན་པ་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་གང་དག་ལོག་པར་ལྟ་བ་ལས་དང་འབྲས་བུ་ཕྱིན་ཅི་ལོག་ཏུ་སྟོན་པ་མཆོད་སྦྱིན་དག་ལ་ཕྱུགས་བསུབས་ནས་
གསོད་པར་བྱེད་པ་དང་། རུས་སྦལ་དག་སོ་ཕག་གིས་མངོན་པར་གཡོགས་ཤིང་མུན་པར་འཇུག་པར་བྱེད་པ་དེ་དག་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་མུན་པར་སྐྱེ་བར་འགྱུར་རོ། །དེར་སྐྱེས་ནས་ཀྱང་མུན་པ་འབྱུང་བའི་མེས་སྲེག་པར་བྱེད། རྡོ་རྗེ་ལྟ་བུའི་རི་ཤུགས་དྲག་པོ་དག་འོངས་ཤིང་ལས་ཀྱི་རླུང་གིས་བདས་ནས་དེ་གཉིས་ཀྱི་དབུས་སུ་བཅུག་ལ་བྱེ་མ་སྙིམ་པ་ནས་གཏོར་བ་བཞིན་དུ་ཐལ་བར་རློག་སྟེ། ཇི་ལྟར་སྐྲའི་རྩེ་མོ་བསྡུས་པ་ཕན་ཚུན་སྐྱབས་མེད་པ་དེ་ལྟར་རྟག་ཏུ་གནོད་པ་བྱེད་ཅིང་སྤུ་གྲི་ལྟ་བུའི་རླུང་རབ་ཏུ་འབར་བ་ལངས་པ་གང་གིས་འདི་ཡན་ལག་དང་ཉིང་ལག་ཞིགས་པར་བྱེད་དོ། །སྐོམ་པ་དང་། བཀྲེས་པས་ལུས་རབ་ཏུ་འབར་བ་དེ་དག་དེ་ནི་དེ་ན་ངུད་མོ་འབྱིན་ཏེ་ཇི་ལྟར་དེ་དག་གིས་རུས་སྦལ་མེའི་ནང་དུ་བསྲེགས་ཤིང་། སོ་ཕག་དག་གིས་མནན་པ་དེ་ལྟར་ལོ་འབུམ་ཕྲག་དུ་མར་འཁྲུལ་འཁོར་ལ་ཁབ་ཀྱི་བུ་ག་ཙམ་གྱི་སྣང་བ་མེད་པ་བཞིན་དུ་སྣང་བ་མེད་པར་བྱེད་ལ་རང་གི་ལུས་ལས་བྱུང་བའི་སྤུ་རབ་ཏུ་འབར་བ་དག་གིས་ཀུན་དུ་སྲེག་པར་བྱེད་དོ། །སེམས་སྤྲེའུ་ལྟ་བུས་བག་ལ་ཉལ་རི་ལྟ་བུ་ལ་རྣམ་པར་རྒྱུ་ཞིང་རྒྱུ་རིའི་ངོས་ལྟར་བརྟན་པས་རྒྱགས་པ་རིའི་རྩེ་མོ་ལྟ་བུ་ལ་གནས་པ་ལྟ་བ་ངན་པའི་རི་ཁྲོད་ལྟ་བུ་ལ་རྣམ་པར་རྒྱུ་ཞིང་ང་རྒྱལ་ལས་བྱུང་བ་ཤིང་ལྗོན་པ་ཐིབས་པོ་ལྟ་བུར་སྤྱོད་པ། ཁྲོ་བ་བྲག་གསེབ་ལྟ་བུ་ལ་གནས་པ། ཕྲག་དོག་ཡོན་ཏན་བསགས་པ་ལྟ་བུའི་འབྲས་བུ་དང་སྲེད་པ་ཆུ་བོའི་དབང་དུ་སོང་བ་ལྟ་བུས་གང་མི་དགེ་བའི་རླབས་བྱས་པ་དེ་དག་ཇི་ཙམ་དུ་རྣམ་པར་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཆི་བའི་དུས་མི་བྱེད་དོ། །དེ་སེམས་ཅན་དམྱལ་བའི་འཁོར་མུན་པ་དེ་ལས་ཐར་ནས། གལ་ཏེ་ཡི་དགས་དང་དུད་འགྲོར་མ་སྐྱེས་ལ་མི་དག་དང་སྐལ་བ་མཉམ་པར་མི་རྣམས་ཀྱི་ནང་དུ་སྐྱེས་ན། དེ་རྒྱུ་འཐུན་པའི་འབྲས་བུས་རྟག་ཏུ་བཅིང་བས་བཅིངས་པར་འགྱུར་ཞིང་ཚེ་ཐུང་བར་འགྱུར་རོ། །དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཡང་སོས་ཀྱི་འཁོར་དྲུག་པ་ཀུན་དུ་མི་དགའ་བ་ཞེས་བྱ་བ་ལ་རྟོག་པར་བྱེད་དེ། ལས་གང་གིས་སེམས་ཅན་དམྱལ་
བ་ཀུན་དུ་མི་དགའ་བར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་ལ་མངོན་པར་འཁུ་བའི་བསམ་པ་ཡོད་པ་ནི་རྟག་ཏུ་སྲོག་གཅོད་པ་ལ་བརྩོན་པ་ཡིན་ཏེ། དེ་དུང་དང་། རྔ་པ་ཊ་ཧ་དང་། བུང་བུའི་སྐད་ཀྱིས་ནགས་ཁྲོད་ན་རྣམ་པར་རྒྱུ་བའི་སེམས་ཅན་རི་དགས་དང་། བྱ་དང་། སེང་གེ་དང་། དྲེད་དང་། གུང་དང་། སྤྲེའུ་ལ་སོགས་པ་བག་ཚ་བ་མེད་པར་རྒྱུ་བ་དག་སྒྲ་དེ་དག་གིས་ཀུན་དུ་སྐྲག་པར་བྱེད་ཅིང་རྒྱལ་པོའམ། བློན་པོ་ཕལ་པོ་ཆེར་ཡིད་ཀྱིས་བསམ་པ་ཡོད་པའི་རྗེས་སུ་རྔོན་པ་གསད་པའི་བསམ་པ་ཡོད་པ་འགྲོ་བ་དེ་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཀུན་དུ་མི་དགའ་བར་སྐྱེ་བར་འགྱུར་རོ། །རྒྱུ་དང་འཐུན་པར་འབྲས་བུ་འབྱུང་སྟེ། ཇི་ལྟར་སེམས་ཅན་དེ་དག་གིས་ཀུན་དུ་མི་དགའ་བ་བྱས་པ་དེ་ལྟར་སེམས་ཅན་དེ་དག་སེམས་ཅན་དམྱལ་བའི་མེའི་ནང་དུ་བཅུག་ནས། བྱ་རོག་དང་། འུག་པ་དང་། བྱ་རྒོད་དང་། ཁྱི་དང་། སྲིན་པོ་དང་། ཝ་རྣམས་ཀྱི་མཆུ་རྣོ་ལ་སྒྲ་མཆོག་ཏུ་འཇིགས་པ་རྣམས་ཀྱིས་རྣ་བ་དྲུང་ནས་བཅད་ཅིང་ཟ་ལ། མཆོག་ཏུ་འཇིགས་པ་མི་འདོད་ཅིང་མི་སྡུག་ལ་ཡིད་དུ་མི་འོང་བ་སྐྱེ་བོ་ཐམས་ཅད་སྐྲག་པར་བྱེད་པའི་སྒྲ་དེས་ཀུན་དུ་མི་དགའ་བ་ཕལ་ཆེར་ཡིད་ལ་གཅགས་པར་འགྱུར་ཞིང་སྲོག་ཆགས་མར་ཀོ་ཏ་ཀའི་མཆུ་རྡོ་རྗེ་ལྟ་བུས་ཡང་དང་ཡང་དུ་རུས་པའི་གསེབ་དང་ནང་དུ་ཞུགས་པ་དག་གིས་རྣ་བ་ལ་ཟའོ། །སེམས་ཉ་ལྟ་བུ་དེ་སྲེད་པ་ཆུ་བོ་ལྟ་བུ་ལ་རྣམ་པར་རྒྱུ་ཞིང་ཁྲོ་བ་དབའ་རླབས་ལྟ་བུར་འཁྲུག་པས་འཁོར་བ་རི་བོའི་གསེབ་ལྟ་བུ་ལ་གནས་ཤིང་འདོད་ཆགས་ཞེ་སྡང་གཏི་མུག་གི་ཕྱོགས་ཀྱི་ས་འདོད་པའི་རོ་ཆུང་བ་མཆིལ་པ་ལྟ་བུའི་འཆིང་བ་དང་། ལྟ་བ་ངན་པ་ཆུ་ལྟར་ཟབ་པ་ལ་རྣམ་པར་རྒྱུ་བ། སྐྱེ་བ་དང་། འཆི་བའི་འགྲོ་བའི་ལུས་འདི་སྒྲ་དང་། རེག་པ་དང་། རོ་དང་། གཟུགས་དང་། དྲི་ལ་རྟག་ཏུ་སྲེད་པ་གང་མི་དགེ་བའི་ལས་དེས་དགོད་ཅིང་བྱས་ལ་དེའི་ངུད་མོ་འབྱིན་པ་ནི་མི་མྱོང་གི་བར་དུ་འཆི་བའི་དུས་མི་བྱེད་དོ། །འདིར་ཚིགས་སུ་བཅད་པ། རང་གི་སྲེད་པ་གྲོང་གནས་པ། །སེམས་ནི་ཉ་འདྲ་རྨོངས་པ་ཡིས། །ལས་
བྱེད་ཚེ་ན་དགར་འཛིན་ལ། །མྱོང་བའི་ཚེ་ན་ངུ་བར་བྱེད། །གང་ཚེ་མི་དགེ་དེ་ཡི་ལས། །ལྷག་མ་མེད་པར་བཅོམ་ཞིང་སྤངས། །མེད་གྱུར་དེ་ནི་དེ་ནས་སུ། །ཤི་ནས་ཡི་དགས་དུད་འགྲོར་སྐྱེ། །ལན་གྲངས་གཞན་ལ་མྱོང་བའི་ལས། །གང་གིས་གལ་ཏེ་དེར་མི་སྐྱེ། །གལ་ཏེ་དེར་ནི་མི་རྣམས་དང་། །སྐལ་མཉམ་མི་རུ་སྐྱེ་བར་འགྱུར། །དེ་ནི་རྟག་ཏུ་དམན་པ་ཡིས། །ཟིལ་གྱིས་ནོན་ཅིང་ནམས་ཀྱང་ནི། །དེ་སེམས་དགའ་བ་སྐྱེ་མི་འགྱུར། །གང་དང་གང་ནི་བྱེད་པ་དག །དོན་མེད་དགའ་བ་མེད་བྱེད་དང་། །བུ་དང་ཆུང་མ་ནོར་དང་འབྲུ། །གསོད་དང་འཆིང་བར་བྱེད་པ་དང་། །དེ་ནི་མི་དགེ་ལས་ཀྱིས་སུ། །དགའ་མེད་རྒྱུ་འཐུན་འབྲས་བུ་ཡི། །ཀུན་དུ་མི་དགའ་རྟག་ཏུ་ཐོས། །ཡང་དགེ་སློང་དེ་སེམས་ཅན་དམྱལ་བ་ཡང་སོས་ཀྱི་འཁོར་བདུན་པ་ཚོར་བ་བདོ་བ་ལ་རྟོག་པར་བྱེད་དེ། སེམས་ཅན་དག་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་བག་ལ་ཉལ་བདོ་བ་དང་། ཞེ་འགྲས་པ་བདོ་བ་དང་། སེམས་ཟབ་པ་བདོ་བའི་སེམས་ཅན་ནི་སྲོག་གཅོད་པ་མང་པོ་བག་མེད་པ་ལ་འཇུག་སྟེ། དེ་དག་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཚོར་བ་བདོ་བར་སྐྱེ་བར་འགྱུར་རོ། །དེར་ཚ་བ་དང་། མཚོན་དང་། མེ་དང་། ངམ་གྲོག་དང་། གཡང་ས་དང་། ཕུར་བུ་དང་། མེ་འབར་བའི་ཕྲེང་བའི་རྒྱན་བྱས་པའི་ཚོར་བ་ལ་རྟག་ཏུ་རྒྱུན་མི་འཆད་པར་ཉིན་གཅིག་བཞིན་དུ་འཇུག་པར་འགྱུར་རོ། །དེ་ནས་གཞན་ཡང་དགེ་སློང་དེ་ལས་ཀྱི་འབྲས་བུའི་དེ་ཁོ་ན་ཉིད་ཤེས་པ་མྱ་ངན་ལས་འདས་པའི་གྲོང་ཁྱེར་ཚོལ་བ་ན་འཁོར་བའི་སྡུག་བསྔལ་གྱི་དེ་ཁོ་ན་ཉིད་ཤེས་པ་སེམས་ཅན་དམྱལ་བ་ཆེན་པོ་ཐིག་ནག་གི་འཁོར་ལ་རྟོག་པར་བྱེད་དེ། ཇི་ལྟར་ཐིག་ནག་གི་འཁོར་གཞན་གང་ཞིག་ཡོད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་དམྱལ་བར་སྲེག་པ་མི་བཟད་པའི་ཚོར་བ་རྟག་ཏུ་འདུས་པ་ཞེས་བྱ་བའི་སེམས་ཅན་དམྱལ་བ་མཐོང་སྟེ། སེམས་ཅན་དག་ལས་གང་གིས་སེམས་ཅན་
དམྱལ་བ་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་ལྟ་བ་ངན་པའི་བསྟན་བཅོས་ཀྱི་གཏན་ཚིགས་དང་དཔེ་དག་གིས་ཚུལ་ཁྲིམས་སྤངས་པའི་མི་ངམ་གྲོག་གམ་གཡང་སར་རབ་ཏུ་ལྟུང་བ་ཡང་དག་པ་མ་ཡིན་པ་ཐམས་ཅད་ཀྱི་དབང་དུ་སོང་བ་དེ་ལུས་དང་བྲལ་ནས། ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཚོར་བ་འདུས་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། མི་དེ་ཐག་པ་རབ་ཏུ་འབར་བས་བཅིངས་ནས་དཔག་ཚད་དུ་མར་གྱེན་དུ་བཏེག་བཏེག་སྟེ་ངམ་གྲོག་དག་ཏུ་འདོར་བར་བྱེད། སྐྱེས་ནས་སྤུ་གྲི་དང་མཚོན་གྱི་ས་ཕྱོགས་རྣམས་སུ་ཡང་དེ་དག་འདོར་བར་བྱེད། ཡན་ལག་དང་ཉིང་ལག་ཐམས་ཅད་ནས་སྒྲ་འབྱིན་པ་ན་རང་གི་སེམས་ཀྱིས་བསླུས་ཤིང་འཁོར་བའི་འཁོར་ལོར་ཞུགས་ནས་འཁྱམ་པ། གཏི་མུག་གིས་མུན་པས་ལོག་པར་བྱས་ཤིང་ཚལ་ཀུན་ནས་བསྲེགས་པ་ལྟ་བུའི་ལུས་དག་ལ་ཁྱི་མཆེ་བ་རབ་ཏུ་རྣོ་བ་རྣམས་ཀྱིས་ཀུན་དུ་ཟ་བར་བྱེད་ཀྱང་གང་དེ་ན་འདུག་པ་དེ་དག་ལ་སྐྱོབ་པའམ་དཔུང་གཉེན་ནམ་བདེ་བར་བྱེད་པའམ། དབུགས་འབྱིན་པར་བྱེད་པ་གང་ཡང་མེད་དོ། །གཤིན་རྗེའི་འཇིག་རྟེན་པའི་གཤིན་རྗེའི་མི་དེ་དག་གིས་ཅི་རིགས་པར་ཚིགས་སུ་བཅད་དེ་སྨྲས་པ། ལོག་པར་ལྟ་བའི་གཏི་མུག་གིས། །གཏི་མུག་ཞགས་བསྒྲིམས་སྐྱེ་བོ་ཁྱོད། །སེམས་ཅན་དམྱལ་བའི་གནོད་པ་དག །ཤིན་ཏུ་མི་བཟད་འདུས་པ་ཐོབ། །མི་ཡི་སྐྱེས་བུ་ཐ་མ་དག །ལོག་པར་ལྟ་བས་དགེ་ཀུན་བསྲེགས། །དེ་ཡིས་སེམས་ཅན་དམྱལ་དང་འབྲེལ། །གནོད་པ་མི་བཟད་ཁྱེར་ཏེ་འོངས། །གང་དག་ལོག་པའི་དབང་སོང་བ། །སེམས་ཀྱིས་ཡོངས་སུ་བསླུས་པ་ཡི། །སྐྱེས་བུ་བློ་ཞན་དེ་དག་ནི། །སེམས་ཅན་དམྱལ་བར་ཀུན་དུ་འགྲོ། །དགྲ་གཞན་ཤིན་ཏུ་སྤང་བར་སླའི། །སེམས་ཀྱི་དགྲ་ནི་སྤང་བར་དཀའ། །དེ་ཡིས་བཅིངས་པའི་མི་དག་ནི། །གཤིན་རྗེའི་གནས་སུ་ཁྲིད་པར་བྱེད། །ཡུལ་རྣམས་ལ་ནི་རྟག་རྒྱུག་ཅིང་། །དམ་པའི་ཆོས་ལ་མི་རྒྱུག་ལ། །དམ་ཆོས་ལམ་ལ་རྨོངས་པ་ནི། །
སེམས་ཅན་དམྱལ་བ་ཆེན་པོར་ཁྲིད། །གདུལ་བའི་ནང་ན་སེམས་གདུལ་དཀའ། །མེ་ཡི་ནང་ན་མེ་མཆོག་སྟེ། །གདུལ་དཀའ་མྱུར་དུ་འགྲོ་བ་ནི། །དམྱལ་བའི་ནང་ན་དམྱལ་བ་ཡིན། །གང་དག་སེམས་ཀྱི་དབང་སོང་བ། །མི་དེ་སེམས་ཅན་དམྱལ་བར་འགྲོ། །གང་དག་མི་བཟད་དེ་ཟློགས་པ། །དེ་དག་སྡུག་བསྔལ་རྗེས་མི་འགྲོ། །འདོད་ཆགས་མི་བཟད་མེ་གཅིག་ཡིན། །གཏི་མུག་མུན་པ་ཞེས་བྱའོ། །ཞེ་སྡང་མི་བཟད་དགྲ་ཡིན་ཏེ། །འགྲོ་བ་དགྲ་གསུམ་དབང་དུ་སོང་། །སྔོན་གྱི་སེམས་ཀྱི་རྗེས་ཞུགས་པ། །ཁྱོད་ཀྱིས་མི་དགེ་གང་བྱས་པའི། །རྨོངས་པ་དེ་ཡི་འབྲས་བུ་སྤྱོད། །ཁྱོད་ཀྱིས་ལེགས་པ་དག་མ་བྱས། །རང་གི་སེམས་ཀྱིས་ཡོངས་བསླུས་པ། །གཞན་གྱི་ནོར་དག་ཕྲོགས་པ་དང་། །གཞན་གྱི་བུད་མེད་བསྟེན་པ་ཡིས། །སྐྱེ་བོ་དག་ནི་རྟག་ཏུ་བཅིངས། །དེ་ཡི་ལས་ཀྱི་རྣམ་སྨིན་གྱིས། །ཁྱོད་ནི་དེ་རིང་དབང་དུ་གྱུར། །མི་ཡི་ཐ་མ་རང་གིས་སུ། །ལས་ངན་བྱས་པས་ངུར་ཅི་ཡོད། །མི་གང་གིས་ནི་ཉེས་བྱས་པ། །ཕྱི་ནས་བློ་ལ་འགྱོད་པར་འགྱུར། །ཚྭ་སྒོར་ས་བོན་བཏབ་པ་ལྟར། །དེ་ལ་དེ་ཡི་འབྲས་བུ་མེད། །འདོད་པ་མངར་བ་ཆུང་ལྡན་པ། །རྣམ་པར་སྨིན་པ་ཚ་བ་ཡིན། །རྨོངས་པ་གང་ཞིག་དེ་སྟེན་པ། །དེ་ནི་མུན་པ་མུན་ནག་འགྲོ། །བུ་དང་ཆུང་མ་བདེ་བྱའི་ཕྱིར། །རྨོངས་པས་ངན་པ་གང་བྱས་པས། །སེམས་ཅན་དམྱལ་བར་གཅིག་པུ་སྲེག །རང་གི་ལས་ཀྱི་འབྲས་བུས་བསླུས། །གང་ཞིག་བུ་སྨད་དབང་སོང་བ། །མི་ནི་ངན་པར་བྱས་པ་སྟེན། །དེ་ནི་དམྱལ་བ་འདིར་འགྲོ་སྟེ། །ཁྱོད་ཀྱིས་དེ་ཡི་རྗེས་སུ་མྱོང་། །བུ་དང་ཆུང་མའི་དོན་མི་འདོད། །མཛའ་བཤེས་དོན་ལྟ་ག་ལ་ཡོད། །འཆི་བའི་དུས་ནི་བྱུང་བ་ན། །ཉེ་བར་གནས་ཤིང་བསྲུང་བ་མེད། །གང་དག་ཀུན་ནས་ཉོན་མོངས་སེམས། །གང་དག་སྲེད་པས་ཡོངས་བསླུས་པ། །དེ་དག་དེ་ལྟར་གྲོགས་སུ་འགྱུར། །ཅི་ཕྱིར་ཁྱེད་ནི་བསྲེག་མི་བྱ། །སྔོན་ནི་ཡུལ་གྱི་དབང་བྱས་ཤིང་། །སྲེད་པ་དག་གིས་ཡོངས་སུ་བསླུས། །བདག་ཉིད་ངན་པ་བདག་ཉིད་ཀྱིས། །བྱས་པས་
བདག་ཉིད་ཅི་ངུར་ཡོད། །དེ་ལྟར་སེམས་ཅན་དམྱལ་བ་ཚོར་བ་འདུས་པ་ལ་གཤིན་རྗེའི་མི་དག་གིས་སེམས་ཅན་དམྱལ་བ་དེ་དག་ལས་རྗེས་སུ་བསྟན་པ་ན། ཇི་ཙམ་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་གནོད་པ་དྲག་ཅིང་མི་བཟད་པ་དུ་མ་དག་ལོ་འབུམ་ཕྲག་དུ་མར་མྱོང་བར་འགྱུར་རོ། །དེ་ཕྱིས་དེ་ལས་གྲོལ་ཞིང་ཐར་ནས་གལ་ཏེ་མི་དག་དང་སྐལ་བ་མཉམ་པར་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཕྲོགས་པ་མེད་ན། དེ་རྒྱུ་འཐུན་པའི་འབྲས་བུས་འགྲོ་ལྡིང་བ་དང་། བར་བ་རའི་ཡུལ་དང་། རྒྱ་མཚོའི་དབུས་ཀྱི་ཡུལ་དང་སིན་དུའི་ཡུལ་དང་། ཞར་བའི་གླིང་གི་ཡུལ་དང་། གང་ན་བྲན་མཆོག་ཏུ་སྡུག་བསྔལ་བ་དེར་སྐྱེ་བར་འགྱུར་ཞིང་དབུལ་བའི་བྲན་དུ་འགྱུར། སྒོ་སྲུངས་དང་། ཡན་ལག་དང་། ཉིང་ལག་ཐམས་ཅད་ཉམས་ཤིང་མ་ཚང་བ་དང་། ལུས་སྐོམ་པ་དང་། བཀྲེས་པས་ཡོངས་སུ་གདུངས་ཤིང་གྲང་བ་དང་ཚ་བའི་གཞིར་གྱུར་པ་དང་། ཤིན་ཏུ་སྡུག་བསྔལ་ཞིང་གཞན་གྱིས་རྟག་ཏུ་གཙེ་བ་དང་། བྱིས་པ་དག་གིས་དབྱུག་པ་དང་། བོང་བ་དག་གིས་བརྡེག་ཅིང་སྐྱེ་བོ་ཀུན་གྱིས་བརྙས་པར་འགྱུར། བུ་དང་ཆུང་མས་ཀྱང་རྣམ་པར་སྤངས་པར་འགྱུར་ཞིང་མངལ་ནས་སྐྱེས་ཚུན་ཆད་མཆོག་ཏུ་སྡུག་བསྔལ་བར་འགྱུར། ལས་ཀྱི་རྣམ་པར་སྨིན་པའི་འབྲས་བུ་ནི་རྒྱུ་དང་མཚུངས་པ་དང་། རྐྱེན་དང་མཚུངས་པ་ཡིན་ཏེ་ཇི་ལྟར་སྔར་བྱས་པ་དེ་ཕྱིས་དེ་བཞིན་དུ་སྤྱོད་པར་འགྱུར་རོ། །དེ་ནས་དགེ་སློང་དེ་ཉེས་པར་བྱས་པ་མྱོང་བར་འགྱུར་བའི་ལས་དེ་མཐོང་ནས་སེམས་ཅན་དམྱལ་བ་མུན་པ་ལ་དམིགས་པ་དང་། འཁོར་བ་ལ་ཕལ་ཆེར་ཤིན་ཏུ་ཡིད་བྱུང་བར་འགྱུར་རོ། །ཡང་རྣལ་འབྱོར་སྤྱོད་པའི་དགེ་སློང་དེ་རྟོག་པར་བྱེད་དེ་འདི་ལྟར་ལས་ཀྱི་འབྲས་བུའི་དེ་ཁོ་ན་ཉིད་མཐོང་བ་ལ་རྟག་ཏུ་བརྩོན་ཞིང་འགྲོ་བ་ཤིན་ཏུ་བསྔམས་པ་ལ་རབ་ཏུ་སྤྱོད་པ། འཁོར་བ་ཐམས་ཅད་ལ་ཡིད་བྱུང་བ། བདུད་ཀྱི་འཆིང་བ་མཆོག་ཏུ་དམ་པ་གཅོད་པ། བདུད་ཀྱི་ཡུལ་གྱི་དངོས་པོ་མི་འདོད་ཅིང་། ཉོན་མོངས་པ་འདོད་ཆགས་དག་གི་དངོས་པོ་དང་ལྷན་ཅིག་འདུག་པར་མི་འདོད་པ། དགའ་
བའི་འདོད་ཆགས་ཀྱི་མོད་ལས་བྱུང་བའི་སྲེད་པ་ལ་མངོན་པར་མི་དགའ་བའི་དགེ་སློང་ཡོན་ཏན་གྱི་རྣམ་པ་དེ་ལྟ་བུ་དག་དང་ལྡན་པ་དེ་ས་བླའི་གནོད་སྦྱིན་དག་གིས་མཐོང་ནས་བར་སྣང་ལ་སྤྱོད་པ་དག་ལ་མངོན་པར་བསྙད་དོ། །དེ་ལྟར་སྔ་མ་བཞིན་དུ་སྦྱར་ཏེ། ཚངས་རིས་དག་གིས་ཐོས་པའི་བར་རྒྱ་ཆེར་སྔ་མ་བཞིན་དུ་སྦྱར་རོ། །དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཐིག་ནག་གི་འཁོར་ལ་ལྟ་བར་བྱེད་དེ། སེམས་ཅན་དམྱལ་བ་ཐིག་ནག་གི་འཁོར་གཞན་ཡང་གང་ཞིག་ཡོད་སྙམ་མོ། །དེ་སེམས་ཅན་དམྱལ་བ་རབ་ཏུ་མི་བཟད་པ་ཞེས་བྱ་བ་མཐོང་སྟེ། དེས་སེམས་ཅན་དག་ལས་གང་གིས་དེར་སྐྱེ་བར་འགྱུར་སྙམ་ན་ཁྱིམ་པ་གང་གིས་འོས་པ་མ་ཡིན་པའི་གནས་མལ་དང་། ན་བའི་གསོས་སྨན་གྱི་རྐྱེན་གྱི་ཡོ་བྱད་མང་པོ་དག་ལ་སྤྱད་པ་འཆབ་པ་དང་། གཞན་ལ་སྙད་བཏགས་ཏེ་ཕྱུགས་གསོད་པའམ། ལྷ་ལ་སྙད་བཏགས་པའམ། བྲམ་ཟེ་འདོད་པའི་སྡིག་པས་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རབ་ཏུ་མི་བཟད་པར་སྐྱེ་བར་འགྱུར་བ་མཐོང་ངོ་། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། བྱ་རོག་དང་། བྱ་རྒོད་དང་། ཕག་རྒོད་གཏུམ་པོ་དག་གིས་མིག་འབྱིན་ཅིང་། ཕག་དང་འཁྲུགས་པའི་སྒྲ་དང་། གཏུན་ཤིང་དང་། མེ་རབ་ཏུ་འབར་བ་དང་། དམྱལ་བའི་སྲུངས་མ་དྲག་པ་རབ་ཏུ་མི་བཟད་པ་ཡོད་དོ། །སེམས་ཅན་དམྱལ་བ་རབ་ཏུ་མི་བཟད་པར་སྐྱེ་བའི་གནོད་པ་འབྱུང་བ་ནི་འདི་ལྟ་སྟེ། མིག་འབྱིན་པ་དང་། ལྕེ་གཅོད་པ་དང་། ཡན་ལག་དང་། ཉིང་ལག་ཐམས་ཅད་གཅོད་པ་དང་། ལྕགས་ཀྱི་སྣོད་རབ་ཏུ་འབར་བ་དག་ནས་ཟངས་ཀྱི་ཁུ་བ་ལྡུད་པ་དང་། ལུས་ཐམས་ཅད་ལ་ཕུར་བུ་འཛུགས་པ་དང་། རྐང་པ་གཅོད་པ་དང་། བྱ་རོག་གིས་ཟ་བ་དང་། ནད་ཐམས་ཅད་ཀྱིས་གནོད་པ་བྱེད་པར་འགྱུར་ཏེ། ཇི་ཙམ་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་གྱུར་པ་དེ་སྲིད་དུ་སེམས་ཅན་དམྱལ་བ་མི་བཟད་པར་ལོ་འབུམ་ཕྲག་དུ་མར་ངུ་བ་ན་མགོན་མེད་ཅིང་གྲོགས་མེད་ལ། གཤིན་རྗེའི་མི་དག་གིས་གསོད་པར་འགྱུར་རོ། །
དེ་སེམས་ཅན་དམྱལ་བ་དེ་ནས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་གང་གིས་དུད་འགྲོ་དང་ཡི་དགས་དག་ཏུ་མ་སྐྱེས་ལ། མི་དག་དང་སྐལ་བ་མཉམ་པར་མིར་སྐྱེས་ན། དེ་ལག་རྡུམ་མམ་ལོང་བར་འགྱུར་ཞིང་ཡུན་རིང་དུ་གནས་པར་མི་འགྱུར། ཤི་ནས་ཀྱང་སྲོག་ཆགས་ལས་ཀྱི་ལུ་གུ་རྒྱུད་ཀྱིས་སྦྲེལ་བ་དག་ཡང་ངན་སོང་དེ་དག་ཀུན་དུ་འགྲོ་བར་འགྱུར་ལ་ལེགས་པར་བྱས་པས་ནི་ལེགས་པ་དང་། ཉེས་པར་བྱས་པས་ནི་ཉེས་པ་འཐོབ་པར་འགྱུར་ཏེ། འཁོར་བ་ན་སྐྱེ་ཞིང་འབྱུང་བའི་འབྲས་བུ་ནི་རྒྱུ་འཐུན་པའི་འབྲས་བུ་དང་འབྲེལ་པ་ཡིན་ནོ། །དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཐིག་ནག་གི་འཁོར་ལ་ལྟ་བར་བྱེད་དེ། ལས་གང་གིས་སེམས་ཅན་དམྱལ་བ་བྱ་རྒོད་ཀྱིས་འཇིགས་པར་སྐྱེ་བར་འགྱུར་སྙམ་ནས་བརྟགས་ན། མི་གང་གིས་དོན་དུ་བྱ་བའི་ཕྱིར་མི་བསད་དམ། བཅིངས་སམ། བཀྲེས་པའམ། སྐོམ་པར་བྱས་ན། དེ་ལུས་དང་བྲལ་ནས། ངན་འགྲོ་ལོག་པར་ལྟུང་བ་སེམས་ཅན་དམྱལ་བ་བྱ་རྒོད་ཀྱིས་འཇིགས་པར་སྐྱེ་བར་འགྱུར་བར་མཐོང་ངོ་། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་པའི་ས་གཞི་ལྕགས་ལས་བྱས་པ་དཔག་ཚད་བརྒྱ་སྟོང་ཕྲག་བཅུ་ཡོད་པ་མེས་རབ་ཏུ་བསྲེགས་ཤིང་ལྕགས་ལས་བྱས་པའི་འབྲས་བུ་ཟུར་གསུམ་པ་ཁ་དོག་ཆུ་ལྟ་བུ་རབ་ཏུ་འབར་བ་རྣམས་ཀྱིས་ཀུན་དུ་གང་བ་དེ་ན་སེམས་ཅན་དམྱལ་བ་པ་དག་གཤིན་རྗེའི་ཆད་པས་གཅོད་པར་བྱེད་པ་རབ་ཏུ་མང་པོ་དག་གིས་ཀུན་དུ་གསོད་པར་བྱེད་པ་ན་རལ་གྲི་དང་མདའ་བོ་ཆེ་ཡོད་པའི་ལུས་ཀྱི་ཤུགས་དྲག་པོ་དག་གིས་གསོད་ཅིང་ཉིན་མཚན་དུ་གནོད་པ་བྱེད་དོ། །མཚོན་རྣམས་ཀྱིས་གསོད་པ་ན། གང་གི་ཚེ་མགོན་མེད་པ་འབྲོས་པར་འདོད་པ་དེའི་ཚེ། གཤིན་རྗེའི་མི་དེ་དག་གིས་རལ་གྲི་དང་། མདའ་བོ་ཆེ་དང་། མདའ་རབ་ཏུ་འབར་བ་དག་གིས་ཀུན་དུ་གསོད་པར་བྱེད་ཅིང་ཐང་ལ་ཡང་བཀྲེས་པ་དང་སྐོམ་པ་ཡོད་པའི་འཚོ་བ་དང་འབྲེལ་ལ་ཆུ་མེད་ཅིང་མགོན་མེད། དབུགས་འབྱིན་པ་མེད་ཅིང་སྐྱབས་མེད་ལ། ཕ་རོལ་གྱི་གནོད་པས་བཀོལ་བ་ན། ཀུན་དུ་
སྡུག་བསྔལ་ཐམས་ཅད་དང་ལྡན་པར་འགྱུར་རོ། །འདིར་ཚིགས་སུ་བཅད་པ། གྲོགས་མང་དག་དང་ལྷན་ཅིག་ཏུ། །ཉེས་པར་བྱས་པའི་ལས་བྱེད་པ། །དེ་ཡི་ལས་ཀྱི་འབྲས་བུ་ནི། །གཅིག་པུ་སྲིད་པ་སྲིད་པར་སྤྱོད། །ཇི་ལྟར་མི་དག་འཇིག་རྟེན་དུ། །བདག་ཉིད་ངན་བྱས་རྒྱུག་པ་ལྟར། །དེ་ལྟར་མེ་དང་མཚོན་དག་དང་། །དུག་དང་དགྲ་དག་གནས་པ་མིན། །ལས་དང་འབྲལ་བ་མ་ཡིན་གྱི། །རང་གི་གཉེན་འདབ་ཀུན་དང་འབྲལ། །འཇིག་རྟེན་ཕ་རོལ་དགེ་བ་དང་། །མི་དགེ་འགྲོ་ཞིང་རྗེས་སུ་འགྲོ། །གང་ན་མེ་ཏོག་ཡོད་པ་ཡི། །དེར་ནི་དྲི་དག་རྗེས་སུ་འགྲོ། །དེ་ལྟར་དགེ་དང་མི་དགེ་བའི། །ལས་ནི་འགྲོ་ཞིང་རྗེས་སུ་འགྲོ། །ཇི་ལྟར་ཕྱོགས་ཆར་དྲི་འགྲོ་ཞིང་། །ནགས་ཚལ་དག་ཏུ་འདུས་པ་ཡིས། །བྱ་དག་ནང་པར་གྱེས་པ་ལྟར། །སྲོག་ཆགས་འདུས་པའང་དེ་དང་འདྲ། །དཔལ་ཆེ་བ་དག་ཆུད་གསན་ཅིང་། །འཇིག་རྟེན་གྱི་ནི་ཉེས་བྱས་པ། །གཏི་མུག་གིས་ནི་ཡོངས་སུ་བསླུས། །མི་དགེའི་ལས་དག་ཅི་མི་བྱེད། །གང་དག་ཞི་བ་མཆོག་མི་འགྲོ། །གང་དག་ལྷ་ཡི་གནས་མི་འགྲོ། །དེ་ཡི་རྒྱུ་ལ་མཆོག་རྨོངས་པ། །མུན་པའི་ནང་ན་དེ་མུན་གནག །དེ་ལྟར་དམྱལ་བར་བཙོ་བ་ན། །དེ་ནི་བྱེ་བ་དུ་མ་རུ། །རང་གིས་ཉེས་པར་བྱས་པ་ཡིས། །སེམས་ཅན་དམྱལ་བར་ཡོངས་སུ་འཁྱམ། །ཇི་སྲིད་དེ་ཡི་མི་དགེ་བ། །ངན་བྱས་བཅོམ་ཞིང་སྤངས་པ་དང་། །ཟད་པར་མ་གྱུར་དེ་སྲིད་དུ། །འཆི་བའི་དུས་ནི་བྱེད་མི་འགྱུར། །གང་ཚེ་དེ་ཡི་ལས་ཀྱིས་དེར། །ཐམས་ཅད་དུ་ནི་བྱང་གྱུར་ན། །དམྱལ་བ་བྱ་རྒོད་འཇིགས་དེ་ལས། །དེ་ནི་གྲོལ་བར་འགྱུར་བ་ཡིན། །གལ་ཏེ་དེ་ལས་དེ་གྲོལ་ཞིང་། །ཡི་དགས་དུད་འགྲོར་མ་སྐྱེས་ལ། །མི་རྣམས་དང་ནི་སྐལ་མཉམ་པར། །གལ་ཏེ་མི་རུ་སྐྱེས་གྱུར་ན། །དེ་ནི་རྔ་མོ་སྤྱོད་འགྱུར་ཞིང་། །ཁལ་གླང་དག་ལ་སྤྱོད་པར་འགྱུར། །རྒོད་མ་དག་ལ་སྤྱོད་འགྱུར་ཞིང་། །གླང་པོ་ཁ་སྒྱུར་རྟ་རྫི་འམ། །བཤོར་བ་དག་གི་རྒྱ་ཐོགས་པ། །དབུལ་ཞིང་ཚེ་ནི་ཐུང་བར་འགྱུར། །ངན་པར་བྱས་པའི་ལས་དག་དང་། །སྐྱོན་དུ་བགྲང་བའི་ལས་རྣམས་ནི། །རྒྱུ་དང་འབྲས་བུ་འཐུན་པས་ན། །འབྲས་བུ་དེ་དང་འཐུན་པར་འགྱུར།། །།
འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བདུན་པ། དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཆེན་པོ་ཐིག་ནག་གི་འཁོར་ལ་རྟོག་པར་བྱེད་དེ། སེམས་ཅན་དམྱལ་བ་དེའི་འཁོར་ལ་གཞན་དང་གཞན་ནས་ཀུན་དུ་ལྟ་བར་མི་བྱེད་དོ། །སེམས་ཅན་དམྱལ་བ་ཆེན་པོ་ཐིག་ནག་གི་འཁོར་བཅུ་དྲུག་པོ་འདི་ཡང་ཇི་ལྟར་སེམས་ཅན་དམྱལ་བ་ཆེན་པོ་ཡང་སོས་ཀྱི་འཁོར་བཞིན་ནོ། །ཡང་དགེ་སློང་དེ་སེམས་ཅན་དམྱལ་བའི་འཁོར་གཉིས་པ་དག་ལ་བརྟགས་ན་ལས་ཀྱི་ཆོས་ཀྱི་རྣམ་པར་སྨིན་པ་ཤེས་ཤིང་། ཉེས་པར་བྱས་པའི་ལས་ཀྱི་འབྲས་བུ་རྣམ་པར་སྨིན་པའི་སྙིང་པོ་ཐམས་ཅད་རིག་སྟེ། བྱས་ལ་བསགས་པ་དང་། བསགས་ལ་མི་བྱེད་པ་དང་། བྱས་ལ་མ་བསགས་པའོ། །དེ་ལ་བྱས་ལ་བསགས་པ་ནི་མྱོང་བར་འགྱུར་བར་ངེས་པ་ཡིན། བསགས་ལ་མི་བྱེད་པ་ནི་མྱོང་བར་འགྱུར་བར་ངེས་པ་མ་ཡིན། བྱས་ལ་མ་བསགས་པ་འདི་ཡང་མྱོང་བར་འགྱུར་བར་ངེས་པ་མ་ཡིན་ནོ། །དགེ་སློང་དེས་སེམས་ཅན་དམྱལ་བ་གཞན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་མཐོང་སྟེ། ལས་ཀྱི་ཐག་པས་རྒྱུད་ཕན་ཚུན་སྦྲེལ་བའི་འཁོར་དག་གི་ལས་ཀྱི་འབྲས་བུ་རྣམ་པར་སྨིན་པ་རྣམ་པ་གསུམ་གྱི་དེ་ཁོ་ན་ཉིད་ཤེས་པ་ནི་དེ་ཡང་ལས་རྣམ་པ་དུ་མ་སྣ་ཚོགས་དུ་མ་དག་དང་། སེམས་ཕལ་ཆེར་དམིགས་པའི་དབང་དུ་གྱུར་པ་སེམས་ཀྱི་དབང་དུ་གྱུར་པའི་སེམས་ཅན་དག་མཐོང་ནས་སྐྱོ་བར་གྱུར་ཏོ། །དགེ་སློང་དེས་སེམས་ཅན་དམྱལ་བ་གཞན་ལ་བརྟགས་ན་དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆེན་པོ་གསུམ་པ་བསྡུས་གཞོམ་ཞེས་བྱ་བ་མཐོང་ངོ་། །དེར་ལས་བསགས་པ་གང་གིས་སེམས་ཅན་དག་ཉེས་པར་བྱས་པའི་ལས་སྨིན་པར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན་མི་དགེ་བའི་ལས་རྣམ་པ་གསུམ་པོ་བྱས་ལ་བསགས་པ་སོ་སོར་མྱོང་བར་འགྱུར་བའི་འབྲས་བུས་སེམས་ཅན་དག་སེམས་ཅན་དམྱལ་བ་བསྡུས་གཞོམ་དུ་སྐྱེ་བར་འགྱུར་རོ། །འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་མི་
དགེ་བ་གསུམ་པོ་འདི་དག་གི་ལས་ཀྱིས་སྲོག་ཆགས་དག་སེམས་ཅན་དམྱལ་བ་བསྡུས་གཞོམ་དུ་སྐྱེ་བར་འགྱུར་རོ། །དེར་སྡིག་པ་ཆེན་པོས་ནི་སེམས་ཅན་དམྱལ་བའི་གཞིར་སྐྱེ་བར་འགྱུར། འབྲིང་དང་ཆུང་ངུ་དག་གིས་ནི་འཁོར་དུའོ། །དེ་དག་གི་ཆེན་པོ་དང་འབྲིང་དང་ཆུང་ངུ་རྣམས་ཀྱིས་ནི་གནོད་པ་ཡང་ཆེན་པོ་དང་འབྲིང་དང་ཆུང་ངུར་འགྱུར་རོ། །དེ་དག་གི་སེམས་ཀྱི་དབང་དུ་སོང་བའི་ལས་ཀྱིས་ཀྱང་ཚེ་རིང་པོ་དང་འབྲིང་དང་ཐུང་ངུར་འགྱུར། དེ་དག་གི་སེམས་ཀྱི་དམིགས་པ་ཆེན་པོ་དང་འབྲིང་གི་དབང་གིས་ཀྱང་གནོད་པ་ཆེན་པོ་དང་འབྲིང་དུ་འགྱུར་རོ། །ལས་རྣམ་པ་གསུམ་དུ་རྣམ་པར་གཞག་སྟེ་ལུས་དང་ངག་དང་ཡིད་ཀྱིའོ། །དུས་གསུམ་དུ་རྣམ་པར་གཞག་སྟེ། འབྲིང་དང་། ཆེན་པོ་དང་། ། ཐ་མའོ། །ཡང་རྣམ་པ་གསུམ་སྟེ། འདོད་པའི་ཁམས་སུ་སྐྱེད་པ་དང་། གཟུགས་ཀྱི་ཁམས་སུ་སྐྱེད་པ་དང་། གཟུགས་མེད་པའི་ཁམས་སུ་སྐྱེད་པའོ། །ཡང་རྣམ་པ་གསུམ་སྟེ། ད་ལྟར་བྱུང་བ་དང་། འདས་པ་དང་། མ་འོངས་པའོ། །ཡང་རྣམ་པ་གསུམ་སྟེ། ཚེ་འདི་ལ་མྱོང་བར་འགྱུར་བ་དང་། སྐྱེས་ནས་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བའོ། །ཡང་རྣམ་པ་གསུམ་སྟེ། དགེ་བ་དང་མི་དགེ་བ་དང་ལུང་དུ་མ་བསྟན་པའོ། །ཡང་རྣམ་པ་གསུམ་སྟེ། ཚེ་དང་འབྲེལ་པ་དང་། སྲིད་པ་བར་མ་དང་འབྲེལ་པ་དང་། ཚེ་གཞན་དང་འབྲེལ་པའོ། །ཡང་རྣམ་པ་གསུམ་སྟེ། མི་དང་མི་མ་ཡིན་པར་འབྲེལ་པ་རབ་ཏུ་འབྱུང་བ་དག་ཡིན་ཏེ། མི་དང་མི་མ་ཡིན་པར་འབྲེལ་པ་ནི། འདི་ལྟ་སྟེ། མིར་གྱུར་པ་ལས་སེམས་ཅན་དམྱལ་བར་ལས་ཀྱིས་འཕངས་པའོ། །བྱེད་པའི་ཁྱད་པར་ཞེས་བྱ་བ་ནི་གང་ཅི་ཙམ་དུ་བྱེད་པ་རྩོམ་པ་དེའི་བྱེད་པའི་རྣམ་པ་དེ་ཙམ་དུ་ལས་ཀྱི་རྣམ་པ་ཉིད་སྐྱེ་བར་འགྱུར་ཏེ། དགེ་སློང་དག་ཇི་ལྟར་མོས་པའི་རྫུ་འཕྲུལ་ཐོབ་པ་བཞིན་ནོ། །ཡང་རྣམ་པ་གསུམ་སྟེ། བྱེད་པ་བྱས་པ་དང་། མི་བྱེད་པ་བྱས་པ་དང་། འབྲེལ་པར་བྱས་པའོ། །དེ་ལ་བྱེད་པ་བྱས་པ་ནི་ཇི་ལྟར་སྔར་དགེ་སྦྱོང་དུ་གྱུར་པ་ཕྱིས་དེའི་རྗེས་སུ་འཐུན་པར་དགྲ་བཅོམ་པའི་བར་དུ་བྱས་པའོ། །མི་བྱེད་པ་བྱས་
པ་ནི་གང་དག་དགེ་སྦྱོང་དུ་གྱུར་ནས་ལེགས་པར་བྱ་བ་མི་བྱེད་པའོ། །འབྲེལ་པར་བྱས་པ་ནི་ཇི་ལྟར་ཚེ་འདི་ལས་ཤི་ནས་ཚེ་རབས་གཞན་དུ་སྐྱེ་བར་འགྱུར་བའོ། །ཡང་རྣམ་པ་གསུམ་སྟེ། བསམ་གཏན་དང་འབྲེལ་པ་དང་། བསམ་གཏན་དང་འབྲེལ་པ་མ་ཡིན་པ་དང་། རྣམ་པར་སྨིན་པ་དང་འབྲེལ་པ་མ་ཡིན་པའོ། །དེ་ལ་བསམ་གཏན་དང་འབྲེལ་པ་ཞེས་བྱ་བ་ནི་ཇི་ལྟར་བསམ་གཏན་དང་པོའི་ས་ནས། བསམ་གཏན་གཉིས་པའི་སར་འབྲེལ་པ་ཡིན་ཏེ། བསམ་གཏན་གསུམ་པའམ། བཞི་པར་མ་ཡིན་ནོ། །བསམ་གཏན་དང་འབྲེལ་པ་མ་ཡིན་པ་ནི་སྦྱིན་པ་དང་། ཚུལ་ཁྲིམས་ལ་སོགས་པའོ། །རྣམ་པར་སྨིན་པ་དང་འབྲེལ་པ་མ་ཡིན་ཞེས་བྱ་བ་ནི་ཇི་ལྟར་དགྲ་བཅོམ་པ་ཟག་པ་ཟད་པའི་རྣམ་པར་སྨིན་པ་མྱོང་བར་འགྱུར་བར་ངེས་པ། ཚེ་དང་འབྲེལ་པ་མེད་པ་ཡིན་ཏེ། དེ་ལྟར་འཇིག་རྟེན་ལས་ཀྱི་དྲ་བ་དང་འབྲེལ་པ་རྒྱ་མཚོ་ལྟ་བུ་འདི་ཀུན་ཕན་ཚུན་རག་ལས་ཤིང་སྐྱེ་བའི་རིམ་པའི་ལས་ཀྱི་རྣམ་པར་སྨིན་པར་འགྱུར་ཏེ། འདི་ལ་བྱེད་པ་པོའམ་ཚོར་བ་པོའམ་འདོད་རྒྱལ་གྱི་ལས་ནི་གང་ཡང་མེད་དོ་སྙམ་མོ། །དགེ་སློང་དེ་དེ་ལྟར་སེམས་པ་ན་བདུད་ཀྱི་སྡེ་རྣམ་པར་འཇིག་པར་བྱེད་ཅིང་དགེ་བའི་ཆོས་སྒྲུབ་པར་བྱེད་དོ། །སེམས་ཅན་དམྱལ་བ་བསྡུས་གཞོམ་གྱི་ལས་ཀྱི་རྣམ་པར་སྨིན་པ་ཆེན་པོ་ཡང་རྗེས་སུ་མཐོང་སྟེ། ཇི་ལྟར་ན་སེམས་ཅན་དམྱལ་བ་བསྡུས་གཞོམ་གྱི་གཞིར་སྐྱེ་བར་འགྱུར་སྙམ་ན་དེས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་དང་། ལས་ཀྱི་ཉེར་བསྡོགས་པ་དང་། ལས་ཀྱི་མཇུག་དང་། ལས་མངོན་པར་བསྟེན་ཅིང་བསྒོམས་ཏེ་མང་དུ་བྱས་པས་སེམས་ཅན་དམྱལ་བ་བསྡུས་གཞོམ་གྱི་འཁོར་དུ་སྐྱེ་བར་འགྱུར་བ་མཐོང་ངོ་། །དེར་སེམས་ཅན་དམྱལ་བ་གཞིའི་གནོད་པ་འདི་དག་འབྱུང་སྟེ། འདི་ལྟ་སྟེ། ཤིང་ལྗོན་པའི་ཁྲོད་དུ་བྱ་རྒོད་མཆུ་རབ་ཏུ་འབར་བ་དག་གིས་བཟུང་ནས་རྒྱུ་མ་བྲུས་ཏེ་ཟ་བར་བྱེད་དོ། །ཆུ་བོ་ཕུར་བུས་གང་བ་ཞེས་བྱ་བ་ན། ཕུར་བུ་རིང་པོ་རབ་ཏུ་འབར་བ་དེར་བཅུག་ནས་གཤིན་རྗེའི་མིས་ཡང་རལ་གྲི་རབ་ཏུ་འབར་བ་མང་པོ་དག་གིས་གསོད་
པར་བྱེད་དོ། །དེ་དེར་འདུག་པ་ན་ཚོར་བ་དྲག་ཅིང་རྩུབ་པ་གཞན་དང་མཚུངས་པ་མེད་པ་དཔེ་ཟླ་མེད་པ་དག་མྱོང་བར་འགྱུར་རོ། །འདི་ལྟ་སྟེ། ཕུར་བུ་རབ་ཏུ་འབར་བའི་ཚོར་བ་ནི་ཕུར་བུ་རབ་ཏུ་འབར་བ་དག་གིས་འབིགས་པར་བྱེད་ཅིང་སེམས་ཅན་དམྱལ་བ་དེ་དག་གཤིན་རྗེའི་མི་དེ་དག་གིས་བཟུང་ནས་དེ་བཞིན་དུ་སྐྱོད་དེ་སེམས་ཅན་དམྱལ་བ་དེ་དག་ཕན་ཚུན་དུ་བསྐྱོད་པས་རྣམ་པར་འཁྲུགས་ཤིང་ངུ་བར་བྱེད་དོ། །དེ་ན་ཟངས་དམར་པོ་བསྐོལ་ཅིང་བཞུས་པ་རབ་ཏུ་འབར་བས་ལུས་ཤིང་སྐམ་ལྟ་བུར་བྱེད་དེ།རྨོངས་པར་བྱེད་ཅིང་སྲེག་པར་བྱེད་དོ། །ཕུར་བུས་གང་བའི་ཆུ་བོ་དེར་བསྐོལ་བ་ན། སེམས་ཅན་དམྱལ་བ་དེ་དག་ཁ་ཅིག་ནི་ལུས་རྩྭ་ལྟར་རབ་ཏུ་སྲེག་གོ །ཁ་ཅིག་ནི་རྡོ་ལྕི་བ་ལྟར་ནུབ་བོ། །ཁ་ཅིག་ནི་ལུས་ཉ་ལྕིབས་ལྟར་ཆུ་འགྲམ་དུ་བྱུང་ངོ་། །ཁ་ཅིག་ནི་ལུས་ཉ་ལྟ་བུ་ལ་བྱ་རྒོད་ཀྱི་མཆུ་རབ་ཏུ་འབར་བ་དེས་ཟའོ། །ཁ་ཅིག་ནི་ལུས་མར་སར་གྱི་གོང་བུ་ལྟར་ཞུའོ། །ཁ་ཅིག་ནི་ལྕགས་རབ་ཏུ་འབར་བ་ལྟ་བུའི་རྡོ་བས་ལུས་ཀྱི་ཁོག་པ་བྱེ་མ་སྙིམ་པ་ནས་གཏོར་བ་བཞིན་དུམ་བུ་བརྒྱའམ་སྟོང་དུ་རློག་གོ །ཁ་ཅིག་ནི་བ་ཚྭས་སྲེག་པ་ན་ཟངས་སམ་ལྕགས་དག་ནང་དུ་བཅུག་པ་བཞིན་དུ་ཞུའོ། །ཁ་ཅིག་ནི་ཕྲ་སྐམ་རབ་ཏུ་འབར་བ་དག་གིས་བཟུང་ནས་ཡང་མཚོན་སྤུ་གྲི་ལྟ་བུས་ཀུན་དུ་གསོད་དོ། །ཁ་ཅིག་ནི་ལུས་ཐགས་ལྟར་ཆེར་བརྒྱངས་ནས་གསོད་དོ། །ཁ་ཅིག་ནི་ཁས་བུབ་ཏུ་བཞག་ནས་གསོད་དོ། །ཁ་ཅིག་ནི་བུམ་པའི་ནང་དུ་འཇུག་པར་བྱེད་དོ། །ཁ་ཅིག་ནི་བུམ་པ་དེའི་ནང་དུ་བཅུག་ནས་དེར་མོན་སྲན་གྲེའུ་བཙོ་བ་བཞིན་དུ་སྟེང་དུ་འབྱུང་ཞིང་འོག་ཏུ་འཇུག་གོ །ཁ་ཅིག་ནི་སྟེང་དུ་བྱུང་ནས་ངུའོ། །ཁ་ཅིག་ནི་གཅིག་ལ་གཅིག་འཇུས་ནས་ངུའོ། །མགོན་མེད་པ་ཁ་ཅིག་ནི་བྱ་རྒོད་དང་། ཁྭ་དང་། ཝ་དང་། ཁྱི་རབ་ཏུ་འབར་བ་དག་གིས་ས་གཞི་རབ་ཏུ་འབར་བ་ན་གནས་པ་དག་བཟུང་ནས་ཟ་སྟེ། ཉིན་གཅིག་བཞིན་དུ་ཚོར་བ་རྣམ་པ་སྣ་ཚོགས་མྱོང་ངོ་། །དེ་ལྟར་རང་གི་སེམས་ཀྱིས་བསླུས་པ་དེ་ལྟ་བུ་དེ་དག་ནི་འདོད་པས་ལོག་པར་གཡེམ་པ་ཀུན་དུ་སྤྱོད་ཅིང་སྲོག་གཅོད་པ་
དང་མ་བྱིན་པར་ལེན་པས་ཀུན་ནས་བསླང་བ་ལ་དམིགས་པ་དེ་དག་ནི་ཚོར་བའི་རྣམ་པ་འབུམ་ཕྲག་དུ་མ་མྱོང་བར་འགྱུར་རོ། །ཡང་སེམས་ཅན་དམྱལ་བ་ཀུན་ནས་མགོན་ཚོལ་བ། སྐྱབས་ཚོལ་བ་དེ་དག་བདག་ཅག་ཉོན་མོངས་པ་འདི་ལས་སྐྱོབ་པ་སུ་ཞིག་ཡོད་སྙམ་ནས་ཀུན་དུ་རྒྱུག་ཅིང་ངུ་བ་ན། གཤིན་རྗེའི་མི་དེ་དག་གིས་གཏུན་ཤིང་རབ་ཏུ་འབར་བ་དག་གིས་བསྣུན་ཅིང་ཆུ་བོ་དང་།ཤིང་ལྗོན་པ་དང་། བྲག་རབ་ཏུ་འབར་བའི་གསེབ་དང་། སྨན་ལྗོངས་དང་། ཕུ་ཆུའི་གསེབ་དང་། རི་གསེབ་དག་ཏུ་ཤིན་ཏུ་བཅུག་ནས་གནོད་པ་རྣམ་པ་སྣ་ཚོགས་དག་བྱེད་དེ། འདི་ལྟ་སྟེ། ཤིང་ལྗོན་པ་ཤིན་ཏུ་མཐོ་བའི་ཁར་ཁྲིད་ནས་ཡང་དེ་ནས་ས་གཞི་ཕུར་བུ་བཙུགས་པའི་སྟེང་དུ་རབ་ཏུ་འདོར་བར་བྱེད་ཅིང་དེ་དེར་ཡན་ལག་བྱེ་བྲག་ཏུ་ཉམས་པ་བརྒྱའམ་སྟོང་དུ་འགྱུར་རོ། །ཡང་སེམས་ཅན་དམྱལ་བ་དེ་དག་གཤིན་རྗེའི་མི་དག་གིས་བཟུང་ནས། ལོ་མ་རལ་གྲིའི་ནགས་ཚལ་ལྟ་བུར་བཅུག་སྟེ། འདབ་མ་སྤུ་གྲི་ལྟ་བུ་རབ་ཏུ་འབར་བས་གཙེར་ཏོ། །རང་གི་ལས་ཀྱིས་ཤིང་ལྗོན་པ་དེ་ལ་བུད་མེད་ཉམས་དགའ་བ་ཆ་བྱད་མེ་ཏོག་གི་ཕྲེང་བ་དང་། ཕྱེ་མ་དང་བྱུག་པས་ལུས་རྣམ་པར་བཀླུབས་པ། རྒྱན་གྱི་ཆ་བྱད་མཆོག་ཏུ་བཟང་བས་མངོན་པར་བརྒྱན་པ། ཤིན་ཏུ་གཞོན་ཞིང་སེན་མོ་གཙང་ལ་སྒེག་བག་ཅན་དུ་ཆས་པ་བྱིས་པ་སོ་སོའི་སྐྱེ་བོ་ཐམས་ཅད་ཀྱི་ཡིད་འཕྲོག་པར་བྱེད་ཅིང་དགའ་བ་སྣ་ཚོགས་དང་ལྡན་པ། རིན་པོ་ཆེ་རྣམ་པ་སྣ་ཚོགས་ཀྱི་རྒྱན་བཀོད་པ་ཐོགས་པ་མཐོང་ངོ་། །མཐོང་ནས་སེམས་ཅན་དམྱལ་བ་དེ་ཤིང་དྲུང་དུ་སོང་སྟེ། འདི་སྙམ་དུ་སེམས་སོ། །འདི་ནི་གང་མིར་གྱུར་ཅིང་མི་བྱེད་པ་ན་བདག་གི་ཡིན་ནོ་སྙམ་ནས་རང་གི་ལས་ཀྱིས་བསྒྲིབས་པ་དེ་ཤིང་དེ་ལ་འཛེག་པར་བྱེད་དོ། །དེ་ཤིང་དེ་ལ་འཛེག་པ་ན་ལོ་མ་རལ་གྲི་ལྟ་བུ་དེ་དག་གིས་ཤ་གཅོད་པར་བྱེད་དོ། །ཤ་བཅད་ནས་རྒྱུས་པ་གཅོད་དོ། །རྒྱུས་པ་བཅད་ནས་རུས་པ་གཅོད་དོ། །རུས་པ་བཅད་ནས་རྐང་འབྱིན་པར་བྱེད་དོ། །དེ་རལ་གྲིས་ཀུན་དུ་གཤེགས་པ་ན། བུད་མེད་དེ་ལ་མཆོག་
ཏུ་ཆགས་པའི་བློས་ཤིང་དེ་ལ་འཛེག་པར་བྱེད་དོ། །དེ་ལས་གནོད་པ་འདི་དག་མྱོང་བཞིན་དུ་སེམས་ཀྱིས་བསླུས་པ་དེ་ཤིང་དེ་ལ་འཛེག་པར་བྱེད་དོ། །ཤིང་དེའི་ཐོར་ཏོ་ལ་འཛེགས་པ་དང་བུད་མེད་དེ་སའི་སྟེང་ན་གནས་ཤིང་སྐྱེས་བུ་ལ་ལྟ་བ་མཐོང་ངོ་། །སྐྱེས་བུ་ལ་ཀུན་དུ་ཆགས་པའི་མིག་གིས་རྣམ་པར་ལྟ་བར་བྱེད་ཅིང་སྐྱེས་བུ་དེ་ལ་ཚིག་སྙན་པས་འབོད་ལ་སྔར་འཛུམ་ཞིང་སྙན་པར་སྨྲ་སྟེ། འདི་ལྟར་བདག་ནི་ཁྱོད་ཀྱི་སླད་དུ་འདིར་མཆིས་ན་ཅིའི་སླད་དུ་བདག་ལ་ཚིག་མི་གསུང་ཞིང་བདག་གི་ལུས་དང་མཇལ་བར་མི་མཛད། དེ་ནས་སེམས་ཅན་དམྱལ་བ་དེས་ལས་ཀྱིས་སྤྲུལ་པ་བྱས་པ་དེ་མཐོང་ནས་ཡང་ཀུན་དུ་འདོད་ཆགས་ཀྱི་སེམས་ཀྱིས་ཤིང་ལོ་མ་རལ་གྲི་ལྟ་བུ་དེ་ལས་འབབ་པར་བྱེད་དོ། །དེ་འབབ་པ་ན་ལོ་མ་སྤུ་གྲི་རབ་ཏུ་འབར་བ་ལྟ་བུ་དེ་དག་ཁ་གྱེན་དུ་བལྟས་ཏེ། དེ་དག་གིས་ཀྱང་སེམས་ཅན་དམྱལ་བ་དེ་དག་སྔར་ཤ་བཏོགས་སོ། །ཕྱི་ནས་རྒྱུས་པ་གཅོད་དོ། །དེ་ནས་རུས་པ། རུས་པའི་འོག་ཏུ་གནད་ཐམས་ཅད་གཅོད་དོ། །དེ་ནས་རྐང་བྲུས་ཏེ་ཤིན་ཏུ་གནོད་པར་བྱས་སོ། །དེ་ནས་སེམས་ཅན་དམྱལ་བ་སྙིང་ལ་འདོད་པའི་སྲེད་པས་ཡོངས་སུ་གདུངས་པ་དེ་དག་གིས་བཅད་ཅིང་གཤེག་ལ་གནད་དང་གནད་གཅོད་བཞིན་དུ་བུད་མེད་དེ་ལ་ལྟའོ། །འདི་ལྟར་དེ་ལ་ལྟ་བ་ན་བྱ་རྒོད་ཀྱི་མཆུ་རབ་ཏུ་འབར་བས་མིག་འབྱིན་ཅིང་སྤུ་གྲི་རྣོན་པོ་ལྟ་བུས་དེའི་རྣ་བ་ཡང་གཅོད། ངུ་བ་ན་འདབ་མ་རབ་ཏུ་འབར་བ་དག་གིས་ལྕེ་གཅོད་ཅིང་དེའི་སྣ་ཡང་གཅོད་དེ། དེའི་ཡན་ལག་དང་། ཉིང་ལག་ཐམས་ཅད་གཅོད་དོ། །འདོད་ཆགས་ཀྱི་སྲེད་པས་ཡིད་ཕྲོགས་པ་ཡང་ས་ལ་འབབ་པར་བྱེད་པ་དང་ཡང་བུད་མེད་དེ་ཤིང་ཁར་འཛེག་གོ །འཛེགས་པ་དང་། དེ་མཐོང་ནས་ཡང་དེ་ཤིང་གི་ཐོར་ཏོ་དེ་ལ་འཛེག་པར་བྱེད་པ་སྔ་མ་བཞིན་དུ་སྦྱར་ཏེ། དེ་ལྟར་ལས་ཀྱི་དབང་གིས་འཕངས་པར་རང་གི་སེམས་ཀྱིས་ཡོངས་སུ་བསླུས་
པའི་སེམས་ཅན་དམྱལ་བ་དེ་ལོ་འབུམ་ཕྲག་དུ་མ་ལོ་བྱེ་བ་འབུམ་ཕྲག་དུ་མར་སེམས་ཅན་དམྱལ་བར་ཡོངས་སུ་འཁྱམ་མོ། །དེ་ལྟར་སེམས་ཅན་དམྱལ་བ་དེ་དོན་གང་གི་ཕྱིར་ཡོངས་སུ་གདུངས་ཤིང་དེ་ལྟར་འདོད་པས་ལོག་པར་གཡེམ་པའི་རྒྱུས་བསྲེགས་ཀྱང་དེ་དག་འདོད་ཆགས་དང་བྲལ་བར་མི་བྱེད་དོ། །དེ་ལྟར་སེམས་འདི་ནི་ཐོག་མ་མེད་པའི་དུས་ནས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་སུ་སོང་བ་ཡིན་ཏེ། དེ་ལྟ་བས་ན་སེམས་ཅན་དམྱལ་བ་དག་ཏུ་འགྲོ་བའི་སེམས་ཅན་གྱི་སེམས་འདི་ལ་ཡིད་བརྟན་པར་མི་བྱའོ། །ཡང་སེམས་ཅན་དམྱལ་བ་བསྡུས་གཞོམ་དེ་ན་རི་བྱ་རྒོད་དང་ཉེ་བ་ཞེས་བྱ་བ་ཡོད་དེ། དེ་ན་སེམས་ཅན་དམྱལ་བ་སྐོམ་པ་དང་བཀྲེས་པས་གདུངས་པ་དེ་དག་གིས་བརྒྱུགས་པ་དང་། དེའི་ཚེ་རི་བྱ་རྒོད་དང་ཉེ་བ་ལ་བྱ་རྒོད་ལྕགས་ཀྱི་མཆུ་རབ་ཏུ་འབར་བ་ལུས་ཆེ་ཞིང་ལྟོ་ཆེ་བ་དག་གནས་ཏེ། དེ་དག་གི་ལྟོའི་ནང་ན་མེ་མདག་ཡོད་དོ། །གང་གི་ཚེ་སེམས་ཅན་དམྱལ་བ་དག་མགོན་མེད་ཅིང་སྐྱབས་མེད་པ་ན་རི་དེ་ལ་འཛེག་པར་འགྱུར་རོ། །དེ་ནས་མགོན་མེད་པ་ངུ་འབོད་པ་དག་ལ་བྱ་རྒོད་དེ་དག་གིས་གླད་པ་བཏོགས་ཤིང་གླད་རྒྱས་བྲུས་ལ་མིག་ཀྱང་འབྱིན་པར་བྱེད་དོ། །གང་གི་ཚེ་དེའི་གླད་པ་དང་གླད་རྒྱས་དག་འཐུངས་ནས་མགོ་ཡང་འདོར་བར་བྱེད་དོ། །གླད་རྒྱས་དང་མིག་ཕྱུང་བ་དེ་དག་སེམས་ཅན་དམྱལ་བའི་མུན་པ་ཐིབས་པོའི་ནང་དུ་བརྒྱུགས་པ་དང་དེ་ལས་གཞན་པ་ལས་ཀྱིས་བྱས་པའི་བྱ་རྒོད་ལུས་ཆེ་ཞིང་ཁོ་ལག་ཆེ་བ་ལྟོའི་ནང་ན་མེ་མདག་ཡོད་པའི་བྱ་རྒོད་འོངས་ཏེ། དེས་སེམས་ཅན་དམྱལ་བ་དེ་དག་བཟུང་ནས་ཟའོ། །དེ་ལྟར་ལྟོའི་ནང་དུ་སོང་བ་དེ་དག་ལོ་འབུམ་ཕྲག་དུ་མར་སྲེག་ཀྱང་དེ་སྲོག་གཅོད་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པའི་མཐུས་འཆི་བའི་དུས་མི་བྱེད་དོ། །འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་
ཏེ་མང་དུ་བྱས་པའི་མཐུས་ནི་ལོ་མ་རལ་གྲི་ལྟ་བུའི་ནགས་སུ་བུད་མེད་མཐོང་བ་ཡིན་ནོ། །མ་བྱིན་པར་ལེན་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པའི་མཐུས་ནི་སེམས་ཅན་དམྱལ་བའི་ཕྱོགས་གཞན་དུ་འགྲོའོ། །དེ་ན་ཡུལ་ཆུ་བོ་མཐའ་ཡས་ཕ་རོལ་ཞེས་བྱ་བ་ཟངས་བསྐོལ་ཅིང་བཞུས་པས་རབ་ཏུ་གང་བའི་ཆུ་བོ་དེའི་ཕ་རོལ་ན་སེམས་ཅན་དམྱལ་བ་དག་གིས་བཟའ་བ་དང་། བཅའ་བ་དང་། གནས་མལ་མང་ཞིང་བཟང་བ་དང་། གྲིབ་མ་དང་། ནགས་ཚལ་ཤིན་ཏུ་གསལ་བ་དག་མཐོང་ཞིང་ཆུ་བོ་རབ་ཏུ་འབབ་པ་དང་། ལྟེང་ཀའི་ཕྱོགས་བསིལ་བ་དག་མཐོང་སྟེ། དེས་དེ་དག་མཐོང་ནས་སྔ་མ་བཞིན་དུ་སྦྱར་ཏེ་བརྒྱུགས་པ་དང་། གཅིག་ལ་གཅིག་ངུ་ཞིང་འཁྲུགས་སོ། །གྲོགས་པོ་དག་ཚུར་ཤོག་ཚུར་ཤོག །བཟའ་བ་དང་། བཅའ་བ་དང་། གནས་མལ་བདེ་བ་དག་རྙེད་པ་སྔ་མ་བཞིན་དུ་སྦྱར་ཏེ། དེ་ནས་སེམས་ཅན་དམྱལ་བ་དེ་དག་གིས་སྒྲ་ཐོས་ནས་སེམས་ཅན་དམྱལ་བ་གཞན་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དག་ཀུན་དུ་རྒྱུག་གོ །དེ་ནས་སེམས་ཅན་དམྱལ་བ་དེ་དག་འདུས་ནས། ཀྱེ་མ་བདག་ཅག་གི་བདེ་བ་དང་མགོན་སྐྱབས་དེ་ཕྱོགས་གང་ནས་ཐོབ་པར་འགྱུར་ཞེས་སྨྲའོ། །དེ་ནས་སེམས་ཅན་དམྱལ་བ་དེ་དག་གིས་སེམས་ཅན་དམྱལ་བ་གཞན་དག་མཐོང་ནས་སྨྲས་པ། ཀྱེ་གྲོགས་པོ་དག་ཆུ་བོ་མཐའ་ཡས་ཕ་རོལ་ཞེས་བྱ་བའི་ཕ་རོལ་ན། བཟའ་བ་དང་། བཅའ་བ་དང་། གནས་མལ་དང་། ཚལ་དང་། ནགས་ཚལ་མང་པོ་དག་ལ་ལྟོས་ཤིག་ཅེས་བྱ་བ་སྔ་མ་བཞིན་དུ་སྦྱར་ཏེ། དེ་ནས་སེམས་ཅན་དམྱལ་བ་དེ་དག་ཐམས་ཅད་ལ་ཆུ་བོ་མཐའ་ཡས་རབ་མེད་དེས་ཕན་ཚུན་གནོད་པ་རོ་ཉེ་རབ་ཏུ་བསྐོལ་བ་བཞུ་བའི་དབུ་བས་ཁེབས་པ་དག་ཏུ་དེ་དག་ཐམས་ཅད་དེར་ལྷུང་ངོ་། །ལྷུང་ནས་ཁ་ཅིག་ནི་མར་སར་གྱི་གོང་བུ་ལྟར་ཞུའོ། །ཁ་ཅིག་ནི་ཁྭ་མཆུ་རབ་ཏུ་
འབར་བ་དག་གིས་ཟའོ། །ཁ་ཅིག་ནི་ཉའི་ཁ་རབ་ཏུ་འབར་བས་མིད་དེ་ལུས་ཀྱི་ཡན་ལག་དང་ཉིང་ལག་ཞུ་བ་དེ་དག་ཐམས་ཅད་ཆུ་བོ་དེའི་ནང་དུ་དེ་དག་ཐམས་ཅད་ཞུ་བར་གྱུར་ཏོ། །དེ་དག་གི་ལས་ཇི་ལྟར་རིགས་པ་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། ཁྱོད་ནི་སེམས་ཀྱིས་བསླུས་ནས་སུ། །བུ་སྨད་གང་གི་དོན་བྱེད་པ། །སྡིག་ལས་བྱུང་བའི་ཞགས་པ་ཡིས། །སེམས་ཅན་དམྱལ་བའི་གནས་སུ་ཁྲིད། །བློ་ངན་ཞེན་པ་ཁྱེད་རྣམས་ཀྱིས། །གང་གི་དོན་དུ་སྡིག་བྱས་པའི། །བུ་དང་ཆུང་མ་གྲོགས་པོ་དང་། །གཉེན་འདབ་རྩ་ལག་གང་དུ་སོང་། །མི་ཡི་སར་ནི་ཁྱོད་ཀྱིས་སུ། །བདག་ལ་ངེས་པར་སྡུག་མ་བྱས། །མི་ཡི་ཐ་མ་བུ་ཡི་དོན། །དེས་ན་སྡིག་པ་ཁྱོད་ཀྱིས་བྱས། །གང་གིས་སྔན་ཆད་སྡིག་བྱས་པ། །ཕྱིས་ནི་གནོད་པར་མི་འགྱུར་མིན། །བུ་དང་ཆུང་མས་བསླུས་པ་དེ། །སེམས་ཅན་དམྱལ་བ་དྲག་པོར་འགྲོ། །ཆུང་མ་གཉེན་གྱིས་ཅི་བྱེད་ཅིང་། །བུ་དེས་ཅི་ཞིག་བྱེད་པར་འགྱུར། །ལས་ཀྱི་ལམ་རྒྱགས་ཡོད་པ་ནི། །གཅིག་པུ་སེམས་ཅན་དམྱལ་བར་སྲེག །བདེ་བ་འབྱུང་བ་མ་སྨད་པ། །དགེ་བའི་ལས་ནི་མ་བྱས་པས། །བྱིས་པ་གཏི་མུག་གིས་བསླུས་པ། །ཕྱི་ནས་དོན་བྱེད་ཅི་མི་གདུང་། །གང་ཞིག་གཏི་མུག་གིས་བསླུས་པ། །འདོད་ཆགས་ཞེ་སྡང་རྗེས་སུ་འགྲོ། །བུ་དང་ཆུང་མ་བདེ་བྱའི་ཕྱིར། །དེ་དག་ཀུན་གྱི་འོག་ཏུ་འགྲོ། །སྲོག་ཆགས་ལས་ཀྱི་སྐྱེ་གནས་དང་། །རང་གི་ལས་ཀྱི་འབྲས་བུ་སྤྱོད། །ལེགས་བྱས་ལྷ་ཡི་འཇིག་རྟེན་དུ། །ཉེས་པར་བྱས་པས་དེ་བཞིན་དམའ། །དེ་ལྟར་གཤིན་རྗེའི་མི་དེ་དག་གིས་སེམས་ཅན་དམྱལ་བ་བསྡུས་གཞོམ་པ་དེ་དག་ལ་རྗེས་སུ་བསྟན་པ། གང་ཁྱེད་ཅག་གིས་བྱས་པའི་ལས་འདི་དག་སུ་ཞིག་སྤྱོད་པར་འགྱུར་ཏེ་དགེ་བའམ། མི་དགེ་བ་རང་གིས་བྱས་པ་སྤྱོད་པར་འགྱུར་ཞིང་། མ་བྱས་པ་ནི་འོང་བར་མི་འགྱུར་ལ། བྱས་པ་ནི་ཆུད་ཟ་བར་མི་འགྱུར་རོ། །དེ་ལྟར་སེམས་ཅན་
དམྱལ་བ་དེ་དག་ཇི་སྲིད་དུ་སྡིག་པའི་ལས་བཅོམ་ཞིང་སྤངས་ལ། ཟད་པར་མ་གྱུར་པ་དེ་སྲིད་དུ། སེམས་ཅན་དམྱལ་བ་བསྡུས་གཞོམ་དུ་ལོ་འབུམ་ཕྲག་དུ་མར་བཙོ་བར་འགྱུར་རོ། །དེ་ལྟར་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པ་དག་གི་འབྲས་བུ་འཐོབ་པར་འགྱུར་རོ། །ཇི་ལྟར་ཁྱེད་ཅག་གིས་དེ་དག་ཉིད་ཐོབ་པ་འདི་ལྟར་སེམས་ཅན་དམྱལ་བ་དེ་དག་ལས་ཐར་ནས། གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་ཚེ་ཐུང་ཞིང་དབུལ་ལ་ཆུང་མ་ངན་པ་དང་། དེ་གཞན་གྱི་ཆུང་མ་ལ་རབ་ཏུ་ཆགས་པར་གྱུར་པའམ་དེ་ཆུང་མ་མེད་པར་འགྱུར་ལ་བརྙས་ཤིང་གཞན་གྱིས་བཀོལ་བར་འགྱུར་ཏེ། དེ་ལྟར་ལས་དེ་དང་རྒྱུ་འཐུན་པའི་འབྲས་བུའི་ལས་ཀྱི་མཐུས་བསླུས་པའི་མི། སེམས་ཅན་དམྱལ་བར་འགྲོ་བ་ལ་འདི་དག་ཐམས་ཅད་འབྱུང་བར་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེས་ཚོར་བ་ཚད་མེད་པ་དང་། འབྲས་བུ་ཨ་ལ་བུད་ལྟ་བུར་གཅོད་པ་དང་། གནད་དང་། གནད་གཅོད་པ་དང་། བསྡུས་པ་དང་། འཇིགས་པར་ལྟ་བ་དང་། ཉམ་ང་བ་མང་བ་དང་། གནོད་པ་མི་བཟོད་པ་དང་། ཨ་ཙ་ཟེར་བ་དང་། ཀྱི་ཧུད་ཟེར་བ་དང་། རྒྱོབ་ཤིག་པ་དང་། མཆི་མའི་རྒྱུན་མེ་ལྟ་བུར་མི་འཆད་པ་དང་། དབང་པོ་ཐམས་ཅད་འགགས་པ་དང་། ཚོར་བ་མཐའ་མེད་དང་། པད་མ་ལྟར་གས་པ་དང་། པད་མ་ཆེན་པོ་ལྟར་གས་པ་དང་། མེ་ཐབ་དང་། ལྕགས་ཀྱི་མེའི་ར་བ་མཐོང་སྟེ། འདི་དག་ནི་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་བཅུ་དྲུག་ཡིན་ནོ། །དེ་ལས་གང་གིས་དེར་སྐྱེ་བར་འགྱུར་སྙམ་ནས། དགེ་སློང་དེ་སེམས་པར་བྱེད་དེ།
གང་མི་དགེ་བ་བྱས་པ་རྣམ་པ་གསུམ་དུ་འགྱུར་བ་མཐོང་སྟེ། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པ་དེ་ནི་དེའི་མྱོང་བར་འགྱུར་བར་ངེས་པ་ཡིན་ཏེ། སེམས་ཅན་དམྱལ་བའི་ལས་ཀྱིས་ཚོར་བ་ཚད་མེད་པར་སྐྱེ་བར་འགྱུར་རོ། །གང་བུད་མེད་འོས་པ་མ་ཡིན་པ་ལ་ཚུལ་བཞིན་མ་ཡིན་པའི་འདོད་པས་ལོག་པར་བསྟེན་པ་དེ་ནི། སེམས་ཅན་དམྱལ་བ་ཚོར་བ་ཚད་མེད་པར་སྐྱེ་བར་འགྱུར་ཏེ། དེར་གནོད་པ་འདི་དག་འབྱུང་བར་འགྱུར་རོ། །འདི་ལྟ་སྟེ། གསལ་ཤིང་རབ་ཏུ་འབར་བས་རོ་སྨད་དུ་འབིགས་པར་བྱེད་དེ། རོ་སྨད་དུ་བཅུག་པའི་གསལ་ཤིང་དེ་ཡང་གལ་ཏེ་རྒྱབ་འབིགས་པར་བྱེད། གལ་ཏེ་ལྟོར། གལ་ཏེ་དབུས་སུ། གལ་ཏེ་རྐེད་པའི་ཕྱོགས་སུ། གལ་ཏེ་ཕྲག་པར། གལ་ཏེ་དཔུང་མགོར། གལ་ཏེ་མིད་པར། གལ་ཏེ་ཁར། གལ་ཏེ་གླད་རྒྱས་འབིགས། གལ་ཏེ་རྣ་བར་འབིགས་ཏེ། དེ་ལྟར་སེམས་ཅན་དམྱལ་བ་དེའི་གསལ་ཤིང་དེ་ནི་ཡན་ལག་དང་། ཉིང་ལག་ཐམས་ཅད་འབིགས་པར་བྱེད། གནོད་པ་ཆེན་པོར་བྱེད། སྲེག་པར་བྱེད། ཡན་ལག་ཐམས་ཅད་འཚེད་པར་བྱེད་དེ། དེ་གནོད་པ་དེ་དག་མྱོང་བར་བྱས་ནས་ཚོར་བ་མི་བཟད་པ་ཡང་རྗེས་སུ་མྱོང་བར་བྱེད་དོ། །འདི་ལྟ་སྟེ། ལྕགས་ཀྱི་ཕྲ་སྐམ་རབ་ཏུ་འབར་བས་རླིག་པ་འབྱིན་པར་བྱེད་ཅིང་བྱ་རྒོད་ཀྱིས་ཀྱང་བཟུང་ནས་ཟ་སྟེ། ཇི་ཙམ་དུ་བྱས་ལ་བསགས་པའི་ལས་བཅོམ་ཞིང་སྤངས་ལ། ཟད་པར་མ་གྱུར་པ་དེ་སྲིད་དུ་ངུ་སྐད་འདོན་ཏོ། །གང་གི་ཚེ་དེའི་ལས་ཟད་པར་གྱུར་པ་དེའི་ཚེ། སེམས་ཅན་དམྱལ་བ་དེ་ལས་ཐར་པར་འགྱུར་རོ། །ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། དེའི་མི་དགེ་བའི་ལས་ཀྱི་རྒྱུ་འཐུན་པའི་འབྲས་བུ་དེས་
མ་ནིང་དུ་འགྱུར་རོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེས་སེམས་ཅན་དམྱལ་བ་འབྲས་བུ་ཨ་ལ་བུད་ལྟ་བུར་གཅོད་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ན་དེས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་དེ་སེམས་ཅན་དམྱལ་བ་འབྲས་བུ་ཨ་ལ་བུད་ལྟ་བུར་གཅོད་པར་སྐྱེ་བ་མཐོང་ངོ་། །དེར་འདོད་པས་ལོག་པར་གཡེམ་པ་རྣམ་པ་དུ་ཞིག་བྱས་པ་ཡིན་སྙམ་ན་གང་བུད་མེད་འོས་པ་མ་ཡིན་པའི་ཁར་བཅུག་ན། དེ་ལུས་ཞིག་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་སྟེ། དེ་ལ་གནོད་པ་འདི་དག་འབྱུང་བར་འགྱུར་རོ། །འདི་ལྟ་སྟེ། གཤིན་རྗེའི་མིས་དེའི་ཁར་ཕུར་བུ་བཅུག་ནས་བརྡུང་བས་རྡུང་བར་བྱེད་དེ། དེ་ཕུར་བུ་བརྡུངས་པ་དེས་གལ་ཏེ་ལྟག་པར་ཕུག་ནས། འབྱུང་བར་བྱེད་པ་བསྒུལ་བ་དང་རྣ་བར་འབྱུང་ངོ་། །ལྕགས་ཀྱི་སྣོད་ཀྱི་ནང་དུ་ཟངས་རབ་ཏུ་བསྐོལ་བས་ཁར་བླུགས་སོ། །དེས་དེའི་མཆུ་བསྲེགས་ནས་ལྕེ་སྲེག་གོ །ལྕེ་བསྲེགས་ནས་རྐན་སྲེག་སྟེ། དེ་ལྟར་མིད་པ་བསྲེགས་པ་ནས་ལྟོའི་བར་དུ་བསྲེགས་ཏེ་རོ་སྨད་དུ་འབྱུང་ངོ་། །འདི་དག་ནི་འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པའི་ལས་ཀྱི་འབྲས་བུ་རྣམ་པར་སྨིན་པ་ཡིན་ནོ། །སེམས་ཅན་དམྱལ་བ་དེ་ཚོར་བའི་རྣམ་པ་དེ་དག་མྱོང་བ་ནི། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ། ཟད་པར་མ་བྱས་པ་དེ་སྲིད་དུ་ལོ་བྱེ་བ་འབུམ་ཕྲག་དུ་མར་སྲེག་ཅིང་འཚེད་དོ། །དེ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མ་ཕྲོགས་ཏེ། ཡི་དགས་དང་དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་
དེའི་ཁ་ནས་དྲི་རུལ་པ་ལྟ་བུ་འབྱུང་སྟེ། སྲོག་ཆགས་གང་གིས་ཚོར་བ་ཀུན་ཡིད་འབྱུང་བར་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེས་སེམས་ཅན་དམྱལ་བ་གནད་དང་། གནད་གཅོད་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་དེས། དེ་སེམས་ཅན་དམྱལ་བ་ཆེན་པོ་གནད་དང་གནད་གཅོད་པ་སྐྱེ་བར་མཐོང་ངོ་། །གང་འདོད་པས་ལོག་པར་གཡེམ་པ་ལ་མངོན་པར་དགའ་བར་བྱས་པའི་རྣམ་པ་ནི་འདི་དག་ཡིན་ཏེ། འདི་ལྟ་སྟེ། བུད་མེད་གཞན་འདོད་ཆགས་མི་འདོད་པ་དེའི་མངལ་མ་ཡིན་པར་མཐུས་བཅུག་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་གནད་གཅོད་པར་སྐྱེ་བར་འགྱུར་རོ། །དེ་ལ་སྲོག་གཅོད་པ་དང་། མ་བྱིན་པར་ལེན་པ་དག་གི་ཚོར་བ་གང་ཡིན་པ་ནི་སྔ་མ་བཞིན་དུ་སྦྱར་རོ། །འདོད་པས་ལོག་པར་གཡེམ་པའི་བྱེ་བྲག་ནི་འདི་ལྟ་སྟེ། ཛ་ར་ཛ་ར་ཉིས་འགྱུར་དུ་བྱས་པ་བསྲེགས་པ་རབ་ཏུ་འབར་བ་དག་གིས་ཁ་འགེངས་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ། ཟད་པར་མ་གྱུར་པ་དེ་སྲིད་དུ་མགོན་མེད་པ་ལོ་འབུམ་ཕྲག་དུ་མར་ངུ་འབོད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེའི་ཆུང་མ་གཞན་དག་ལ་རབ་ཏུ་ཆགས་པར་འགྱུར་བ་བཟློག་པར་མི་ནུས་ཏེ། བྱས་ལ་བསགས་པའི་ལས་ཀྱི་རྣམ་པར་སྨིན་པ་ནི་ཚོར་བ་མ་མྱོང་གི་བར་དུ་ཆུད་ཟ་བར་མི་འགྱུར་རོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་བསྡུས་གཞོམ་གྱི་
འཁོར་ལ་བརྟགས་ན། དེས་སེམས་ཅན་དམྱལ་བ་འཇིགས་པར་ལྟ་བ་ཞེས་བྱ་བ་མཐོང་ངོ་། །དེར་སྲོག་ཆགས་དག་ལས་ཀྱི་རྣམ་པར་སྨིན་པ་གང་གིས་སྐྱེ་བར་འགྱུར་སྙམ་ན། དེས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་བསྒོམས་ཏེ་མང་དུ་བྱས་པ། བྱས་ལ་བསགས་པ་དེ་ནི་སེམས་ཅན་དམྱལ་བ་འཇིགས་པར་ལྟ་བར་སྐྱེ་བར་འགྱུར་བ་མཐོང་ངོ་། །དེ་ལ་ཇི་ལྟར་ན་སྲོག་གཅོད་པ་དང་། མ་བྱིན་པར་ལེན་པས་འགྱུར་སྙམ་ན་སྔ་མ་བཞིན་དུ་སྦྱར་རོ། །འདོད་པས་ལོག་པར་གཡེམ་པ་ནི་གང་གིས་བྱིས་པ་གཞན་དུ་བཞིན་དུ་མཐུས་སྦ་བའི་གནས་སུ་བཅུག་པ་ནི། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་འཇིགས་པར་ལྟ་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་དེར་སྔོན་མིར་གྱུར་པ་ན། དེའི་བུ་གང་ཡིན་པ་མཐོང་སྟེ། ལས་ཀྱིས་བྱས་པ་དེ་ལ་འདི་ལྟར་དེ་ནི་མིར་གྱུར་པ་ན། མིར་གྱུར་པ་བདག་གི་ཡིན་ནོ། །སྙམ་དུ་སྲེད་པའི་ཡོན་ཏན་འབྱུང་ངོ་། །དེ་ནས་བུ་དེ་ལ་གཤིན་རྗེའི་མི་རྣམས་ཀྱིས་ཕུར་བུ་དག་འདེབས་ཤིང་། དེ་ལྟར་སྦ་བའི་གནས་སུ་ཕུར་བུ་དག་བཏབ་པ་མཐོང་ངོ་། །དེ་མཐོང་ནས་བུ་དེ་ལ་འདི་ལྟར་གནོད་པ་འབྱུང་བ་དེའི་རྣམ་པ་ཡོད་པ་དེ་སྲིད་དུ་ཡིད་ལ་སྡུག་བསྔལ་སྐྱེ་ཞིང་། གང་ལ་སྡུག་བསྔལ་གནོད་པའི་མེ་འབྱུང་བ། དེའི་སྡུག་བསྔལ་གྱི་ཆ་བཅུ་དྲུག་ཡིད་ལ་སྡུག་བསྔལ་གྱི་གནོད་པ་སྐྱེ་བར་འགྱུར་ཏེ། ཡིད་ཀྱི་སྡུག་བསྔལ་ཁྱད་པར་ཆེའོ། །ལུས་ཀྱི་སྡུག་བསྔལ་ཡང་སྡུག་བསྔལ་འདི་དག་འབྱུང་སྟེ། དེ་ལ་གནོད་པ་འབྱུང་བར་འགྱུར་བ་ནི། འདི་ལྟ་སྟེ། གཤིན་རྗེའི་མི་དག་གིས་ཁ་སྦུབ་ཏུ་བཞག་ནས། ལྕགས་རབ་ཏུ་འབར་བའི་སྣོད་ཀྱི་ནང་དུ། ཟངས་རབ་ཏུ་འབར་བས་དེའི་སྦ་བའི་གནས་སུ་ལྡུགས་སོ། །དེ་ལ་དེ་བླུགས་པ་དང་། སྦ་བའི་གནས་ནས་
ལོང་ཀ་སྲེག་གོ །ལོང་ཀ་བསྲེགས་ནས་རྒྱུ་མ་སྲེག་གོ །དེ་ཡང་བསྲེགས་ནས་སྙིང་སྲེག་གོ །སྙིང་ཡང་བསྲེགས་ནས་མཆེར་བ་སྲེག་གོ །མཆེར་བ་ཡང་བསྲེགས་ནས་གློ་བ་སྲེག་གོ །གློ་བ་བསྲེགས་ནས་ཨོལ་གོང་སྲེག་གོ །ཨོལ་གོང་བསྲེགས་ནས་མིད་པ་སྲེག་སྟེ། མཆིལ་མ་ཡང་བསྲེགས་ནས་ལྕེའི་དྲུང་དུ་སྲེག་གོ །ལྕེའི་དྲུང་དུ་ཡང་བསྲེགས་ནས་ལྕེ་སྲེག་གོ །ལྕེ་བསྲེགས་ནས་རྐན་སྲེག་གོ །རྐན་བསྲེགས་ནས་གླད་པ་སྲེག་གོ །གླད་པ་བསྲེགས་ནས་གླད་རྒྱས་སྲེག་སྟེ། འབར་བ་དེ་འོག་ཏུ་བྱུང་ནས་འགྲོའོ། །དེ་ལྟར་འདོད་པས་ལོག་པར་གཡེམ་པ་འདི་ནི་ལོ་འབུམ་ཕྲག་དུ་མར་ལས་ཀྱིས་བྱས་པའི་བུ་དག་མཐོང་སྟེ། དེ་ལུས་དང་ཡིད་ལ་སྡུག་བསྔལ་གྱིས་གནོད་པ་ནི། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ། ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་སྲེག་སྟེ། འཆི་བའི་དུས་མི་བྱེད་དོ། །དེ་ཕྱིས་དེ་ལས་ཐར་པར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། དེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེའི་ཁུ་ཆུ་ཉམས་པར་འགྱུར་ཞིང་། དེ་བུ་མེད་པར་འགྱུར་ལ་དེ་མ་ནིང་ཞེས་བྱ་སྟེ་སྐྱེ་བོ་ཀུན་གྱིས་སྨད་པར་འགྱུར་རོ། །དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་རྟོག་པར་བྱེད་དེ། འཁོར་གཞན་གང་ཞིག་ཡོད་སྙམ་མོ། །དེ་ཐོས་པ་ལས་བྱུང་བའི་ཤེས་པས། སེམས་ཅན་དམྱལ་བ་གཞན་འཁུམས་པ་ཞེས་བྱ་བ་འཁུམས་པའི་རང་བཞིན་ཅན་ཡོད་པར་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་ཞེ་ན། གང་གིས་ཕྱུགས་རྨིག་ཟླུམ་གཅིག་གི་མངལ་དུ་བུད་མེད་གཞན་ཞིག་ཡིན་པར་བསམས་ཏེ། དེ་ལ་སྤྱད་དོ་སྙམ་པས་བཅུག་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་
འཁུམས་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། བ་དེ་དག་གམ། རྟ་རྒོད་མ་དེ་དག་ལ་བདག་གི་སྙིང་གིས་གང་སྔོན་ཆགས་པའི་ལུས་ཡིན་པར་བསམ་པའི། བའམ། རྟ་རྒོད་མ་ལས་ཀྱིས་བྱས་པ་སེམས་ཅན་དམྱལ་བར་མཐོང་ངོ་། །དེ་འདོད་ཆགས་ཀྱིས་ཟིལ་གྱིས་ནོན་པའི་སེམས་ཀྱིས། བའམ། རྟ་རྒོད་མ་དེ་ལ་བསྙེགས་སོ། །དེ་དག་གི་ཁོང་པའི་ནང་ན་ལྕགས་ཀྱི་མེ་མདག་རབ་ཏུ་འབར་བ་དག་གིས་གང་སྟེ། གལ་ཏེ་དེ་དང་ཕྲད་ན་དེ་ཚུལ་བཞིན་མ་ཡིན་པའི་ལས་བྱས་པའི་སྒོ་དེས་ཁོང་པའི་ནང་མེ་མདག་གིས་གང་བ་དེར་འཇུག་པར་འགྱུར་ཏེ། དེ་དེའི་ཁོང་པ་མུན་པ་དེར་ལོ་འབུམ་ཕྲག་དུ་མར་སྲེག་ཅིང་འཚེད་དེ། ངུ་བར་ཡང་མི་ནུས་སོ། །དེ་ཇི་སྲིད་དུ་རྣམ་པ་དུ་མར་བཅོམ་ཞིང་སྤངས་ལ། ཟད་པར་མ་གྱུར་པ་དེ་སྲིད་དུ་འཚེད་དོ། །དེ་ཕྱིས་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་དུད་འགྲོ་དང་། ཡི་དགས་དག་ཏུ་མ་སྐྱེས་ལ། གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། གང་དུ་རང་གི་ཆུང་མ་མ་ཡིན་པ་གཞན་དག་ལ་བྱས་ལ་བསགས་པ། འདོད་པས་ལོག་པར་གཡེམ་པ་རྒྱུ་འཐུན་པའི་འབྲས་བུས་དེ་ཡུལ་དེ་ལྟ་བུར་སྐྱེ་བར་འགྱུར་རོ། །དེ་ནས་གཞན་ཡང་དགེ་སློང་དེས། གང་སེམས་ཅན་དམྱལ་བ་ཆེན་པོ་དེའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཉམ་ང་བ་མང་བ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ན། དེ་དག་གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ལ་མང་དུ་བྱས་པས་འགྱུར་བ་མཐོང་སྟེ། སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་ནི། སྐྱེས་པ་གང་ཞིག་
སྐྱེས་པ་ལ་འཇུག་པར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བའི་སེམས་ཅན་དམྱལ་བ་ཉམ་ང་བ་མང་བར་སྐྱེ་བར་འགྱུར་རོ། །བྱས་ལ་བསགས་པའི་ལས་ཀྱི་མཐུས། དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སྐྱེས་པ་དེ་ཉིད་སེམས་ཅན་དམྱལ་བ་དེར་མཐོང་སྟེ། སྐྲ་རབ་ཏུ་འབར་ཞིང་ལུས་ཐམས་ཅད་རབ་ཏུ་འབར་ལ། ལུས་རྡོ་རྗེ་ལྟར་སྲ་བ་དེས་འཛིན་པ་ནི། ཇི་ལྟར་བྱེ་མ་ཆང་བ་ནས་གཏོར་བ་དེ་ལྟར་ཡན་ལག་དང་ཉིང་ལག་ཐམས་ཅད་ལ་གནོད་པ་བྱེད་དོ། །དེ་མི་དགེ་བའི་ལས་ཀྱིས་ཤི་ནས་ཡང་འཚོ་བར་འགྱུར་ཏེ། དེ་སྐྱེས་པ་རབ་ཏུ་འབར་བ་དེས་འཇིགས་ཤིང་ཞུམ་པར་བྱེད་དོ། །དེས་ངམ་གྲོག་དེ་དག་མཐོང་སྟེ། དེའི་ནང་དུ་ལྷུང་ངོ་། །དེ་ནམ་མཁའ་ལ་གནས་པ་དང་། ཇི་ལྟར་དེ་ཡུངས་འབྲུ་ཙམ་དུ་ཡང་མི་སྣང་བ་དེ་ལྟར་ཁྭ་མཆུ་རབ་ཏུ་འབར་བ་དག་འོངས་ནས་དུམ་བུར་གཅོད་དོ། །དེ་ཡང་བྱུང་བར་གྱུར་ནས་ས་ལ་ལྷུང་བ་དང་། དེར་ཝ་ཁ་རབ་ཏུ་འབར་བ་དག་འོངས་ནས་ཟ་བར་བྱེད་དོ། །གལ་ཏེ་དེའི་རུས་པ་དག་ཟད་པར་བཏོགས་ན་ཡང་སྐྱེ་བར་འགྱུར་ཏེ། དེ་བྱུང་བ་དང་། གཤིན་རྗེའི་མི་དག་གིས་ལྕགས་ཀྱི་རྫ་མ་རབ་ཏུ་འབར་བ་དག་གི་ནང་དུ་འཚེད་དོ། །དེ་ལྟར་ཇི་སྲིད་དུ་མི་དགེ་བའི་ལས་བྱས་ཤིང་བསགས་པ་བཅོམ་ཞིང་སྤངས་ལ། ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་འཚེད་ཅིང་ཟ་ལ་ཕྱེ་མར་རློག་གོ །དེ་ཕྱིས་སེམས་ཅན་དམྱལ་བ་ཉམ་ང་བ་མང་བ་དེ་ལས་ཐར་བར་འགྱུར་ཏེ། ཐར་ནས་ཀྱང་དེ་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། དེ་འདོད་པས་ལོག་པར་གཡེམ་པའི་རྒྱུ་འཐུན་པའི་འབྲས་བུས། དེའི་ཆུང་མ་དུ་མ་ཆུད་ཟ་ཞིང་། ཆུང་མ་གཅིག་ཀྱང་མི་འགྲུབ་ལ་ཀུན་མི་གཞན་གྱི་དྲུང་དུ་འགྲོ་བར་
འགྱུར་རོ། །དེ་ནས་གཞན་ཡང་དགེ་སློང་དེས། སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་རྟོག་པར་བྱེད་དེ། སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་གཞན་གང་ཞིག་ཡིན་སྙམ་མོ། །དེ་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་གནོད་པ་མི་བཟད་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པས་འགྱུར་ལ་དེ་ལ་སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་ནི། སྡེའི་ཚོགས་གཞན་གྱི་བུད་མེད་ཐོབ་ནས་སྐྱེས་པ་མང་པོ་དག་ལ་བྱིན་ཞིང་། བདག་ཉིད་ཀྱང་མངལ་ལམ་མངལ་མ་ཡིན་པར་འཇུག་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་གནོད་པ་མི་བཟད་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། གཤིན་རྗེའི་མི་རྣམས་ཀྱིས་རྐང་པ་གྱེན་དུ་ཤིང་ཁར་བཏགས་ཤིང་། དེ་གྱེན་དུ་བཏགས་པ་ལ་མེས་སྲེག་སྟེ། གང་གིས་དེའི་ཁ་ལ་སོགས་པ་ལུས་ཐམས་ཅད་སྲེག་ཅིང་། དེའི་ཚེ་དེའི་མིག་ཤིན་ཏུ་སྡུག་གུ་བྱུང་ཞིང་སྐྱེས་པ་དག་མེས་སྲེག་གོ །དེ་ལྟར་ན་སེམས་ཅན་དམྱལ་བ་དེའི་ཚོར་བ་དྲག་པ་ཚ་བ་རྩུབ་པ་བཟོད་པར་དཀའ་བ་ཡིན་ནོ། །དེ་ཚོར་བ་དེས་ཉམ་ཐག་པ་ན་འབོད་ཅིང་། ངུ་སྐད་འབྱིན་ལ་ངུ་ཞིང་ཁྲོའོ། །སེམས་ཅན་དམྱལ་བ་དེ་སྐད་འབྱིན་པ་དེའི་ཁར་མེ་བཅུག་སྟེ། ཁའི་ནང་དུ་མེ་བཅུག་པས་གློ་བ་དང་། མཆེར་བ་དང་། ཕོ་བ་དང་། ལོང་ཀ་དང་། མདོམས་དང་། གཞང་བསྲེགས་པ་ནས་རྐང་པའི་བར་དུ་བསྲེགས་སོ། །དེ་སྲེག་པ་ན་
ཡང་ཉམ་ཐག་པའི་ཚོར་བ་མྱོང་བར་འགྱུར་བའི་ཁྭ་དེ་དག་འོངས་ནས་དེའི་ལུས་ལ་ཟ་བར་བྱེད་དོ། །དེ་ཚོར་བ་གཉིས་ཀྱིས་ཞེན་ནས་སྲེག་ཅིང་ངུ་སྟེ། དེ་ལྟར་སྲེག་པ་ན་ཇི་སྲིད་དུ། དེའི་སྡིག་པའི་ལས་བཅོམ་ཞིང་སྤངས་ལ། ཟད་པར་མ་བྱས་པ་དེ་སྲིད་དུ་དེ་འདི་ལྟར་ལོ་འབུམ་ཕྲག་དུ་མར་སེམས་ཅན་དམྱལ་བ་དེའི་ཚོར་བ་དྲག་ཅིང་། ཚ་ལ་མི་བཟད་པ་གཞན་དང་མཚུངས་པ་མེད་པ་ལོ་འབུམ་ཕྲག་དུ་མར་མྱོང་བར་འགྱུར་རོ། །དེ་སེམས་ཅན་དམྱལ་བ་དེ་ལས་ཐར་པར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེའི་མཐུས། དེའི་ཆུང་མ་མཆོག་ཏུ་དགའ་ཞིང་། མཆོག་ཏུ་བལྟ་ན་སྡུག་པ་ཡང་སྡེའི་ཚོགས་གཞན་དག་གིས་ཕྲོགས་པ་དང་། དེ་འོ་དོད་འབོད་ཅིང་ངུ་ལ་མྱ་ངན་བྱེད་དོ། །འདོད་པས་ལོག་པར་གཡེམ་པའི་རྒྱུ་འཐུན་པའི་འབྲས་བུས་ཆུང་མ་དེའི་ཕྱིར་འཇིག་རྟེན་འདི་དང་ཕ་རོལ་དུ་ཡང་འོ་དོད་འབོད་ཅིང་ངུ་བར་བྱེད་ལ་ཡོངས་སུ་གདུང་བར་བྱེད་དོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་རྟོག་པར་བྱེད་དེ། ལས་གང་གིས་སེམས་ཅན་དམྱལ་བ་ཨ་ཙ་ཟེར་བར་སྐྱེ་བར་འགྱུར་སྙམ་ནས། དེ་ཐོས་པ་ལས་བྱུང་བའི་ཤེས་པས་བརྟགས་ན། སྔོན་ཚུལ་བཞིན་མ་ཡིན་པ་ཡིད་ལ་བྱེད་པས་བུད་མེད་གཞན་མ་རྙེད་ནས་ལུག་མ་མོའམ། བོང་མོ་ལ་འཇུག་པར་བྱེད་ཅིང་མཆོད་རྟེན་ནམ། མཆོད་རྟེན་གྱི་ཕྱོགས་སམ། སངས་རྒྱས་ལ་གུས་པ་ཙམ་ཡང་བྱེད་པ་མེད་པ་ནི། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཨ་ཙ་ཟེར་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ལྕགས་ཀྱི་གྲོག་སྦུར་ཚོར་བ་ཆེན་པོ་སྐྱེད་པ་དག་གིས་ཡན་ལག་དང་། ཉིང་ལག་ཐམས་ཅད་ལ་ཟ་བར་བྱེད་དོ། །
སེམས་ཅན་དམྱལ་བ་དེ་དག་གི་ལྟོ་ཡང་མེས་གང་བར་འགྱུར་ཏེ། རང་གི་ལས་ཀྱི་རྣམ་པར་སྨིན་པ་དྲག་ཅིང་མི་བཟད་པས་ལོ་འབུམ་ཕྲག་དུ་མར་ཕྱི་ནང་སྲེག་ཅིང་ཟའོ། །སྲིན་བུ་ཨ་ཙ་ཟེར་ཞེས་བྱ་བར་ཡང་སྐྱེ་བར་འགྱུར་ཏེ། གང་སེམས་ཅན་དམྱལ་བའི་མི་དེ་དག་གི་ཤ་ལ་ཟའོ། །ཤ་ཟོས་ནས་ཁྲག་འཐུང་ངོ་། །ཁྲག་འཐུང་ནས་རྒྱུས་པ་གཅོད་དོ། །རྒྱུས་པ་བཅད་ནས་རུས་པ་འཆའ། རྐང་འཇིབ་ཅིང་རྒྱུ་མ་དང་། གཉེ་མ་དག་ལ་ཟ་བར་བྱེད་དོ། །དེ་སྲེག་ཅིང་འཚེད་ལ་ཟ་བ་ན། འོ་དོད་འབོད་ཅིང་ངུ་ལ་ཆོ་ངེས་འདེབས་ཤིང་སྙིང་རྗེ་རྗེ་སྐད་དུ་སྨྲེ་སྔགས་འདོན་ཏོ། །ཇི་སྲིད་དུ་རྣམ་པར་སྨིན་པའི་འབྲས་བུ་ཉེ་བར་མ་སྤྱད་ཀྱི་བར་དུ་དེའི་ཉེས་པར་སྤྱད་པའི་ལས་དྲག་ཅིང་མི་འདོད་ལ་མི་སྡུག་ཅིང་ཡིད་དུ་མི་འོང་བར་འགྱུར་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེ་ལོ་འབུམ་ཕྲག་དུ་མར་སྲེག་ཅིང་འཚེད་ལ་ཟ་བར་བྱེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། མི་དེའི་ལས་ཀྱི་རྒྱུ་འཐུན་པའི་འབྲས་བུའི་རྒྱུས་དེ་ལ་འགྲན་ཟླ་མང་ཞིང་། རྒྱལ་པོའི་ཕོ་བྲང་འཁོར་དུ་དེའི་འགྲུབ་པ་མེད་པར་འགྱུར། དབུལ་ཞིང་ནོར་རྫས་ཐམས་ཅད་ཉམས་པར་འགྱུར་ལ་ཚེ་ཐུང་བར་འགྱུར་རོ། །དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་རྟོག་པར་བྱེད་དེ། ལས་ཀྱི་རྣམ་པར་སྨིན་པ་བྱས་ལ་བསགས་པ་ལས་ཀྱི་ཉེར་བསྡོགས་དང་། ལས་ཀྱི་མཇུག་གང་གིས་སེམས་ཅན་དམྱལ་བ་ཀྱི་ཧུད་ཟེར་བར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི། དེ་ལུས་དང་བྲལ་ནས་ངན་འགྲོ་ལོག་པར་
ལྟུང་བ་སེམས་ཅན་དམྱལ་བ་ཀྱི་ཧུད་ཟེར་བར་སྐྱེ་བར་འགྱུར་རོ། །དེར་ལས་ཀྱི་རྣམ་པར་སྨིན་པ་གང་གིས་སྐྱེ་བར་འགྱུར་སྙམ་ན། དེ་ལ་སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་ནི་གང་ཀླ་ཀློ་དག་ཏུ་སྐྱེ་བར་འགྱུར་ཏེ། དེ་སྐྱེ་བའི་རིས་འཐུན་པའི་སྐྱོན་གྱིས་དེ་གལ་ཏེ་སྲིང་མོའམ། གཞན་འོས་པ་མ་ཡིན་པ་དེ་ལྟ་བུ་དག་ལ་སྤྱོད་པར་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཀྱི་ཧུད་ཟེར་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་དེར་སེམས་ཅན་དམྱལ་བ་པ་དག་སྲེག་ཅིང་འཚེད་ལ་གཤིན་རྗེའི་མི་རྣམས་ཀྱིས་གསོད་པ་ན། གང་གིས་དཔག་ཚད་ལྔར་གང་བའི་སྒྲ་དེ་ལྟ་བུ་འབྱིན་ཏོ། །སྲིད་པ་བར་མ་ལ་གནས་པའི་སེམས་ཅན་དམྱལ་བ་དེས་གཞི་དེ་ལས་སྙིང་རྗེ་ཞིང་འཇིགས་པར་ཐོས་པ་ལས་ཀྱི་དབང་གིས་མི་འཐུན་པ་ལོག་པར་ཐོས་ཏེ། དེའི་ངུ་བ་གླུ་དབྱངས་སྙན་པའི་སྒྲ་ལྟ་བུ་དང་། ཕེག་རྡོབ་པར་ཐོས་སོ། །དེ་དེ་ལྟར་ལྟ་བ་ན་དེར་བདག་ཀྱང་འགྲོའོ་སྙམ་དུ་སེམས་སོ། །དེས་སེམས་བསྐྱེད་མ་ཐག་ཏུ་སྲིད་པ་ཉེ་བར་ལེན་པའི་རྐྱེན་ལས་བྱུང་བས་དེར་སྐྱེ་བར་འགྱུར་རོ། །གང་དང་གང་དུ་སྲིད་པ་བར་མ་པའི་ཉེ་བར་ལེན་པར་བྱེད་པ་དེ་དང་དེར་སྐྱེ་བར་འགྱུར་ཏེ། ཉེ་བར་ལེན་པ་དེ་བྱས་པས་དེར་སྐྱེས་སོ། །ལྷན་ཅིག་སྐྱེས་མ་ཐག་ཏུ་སེམས་ཅན་དམྱལ་བའི་སྡུག་བསྔལ་འབྱུང་བར་འགྱུར་ཏེ། སྒྲ་དེ་དག་སེམས་ཅན་དམྱལ་བ་པ་དག་གི་ངོ་བོ་ཉིད་དུ་ཐོས་ཏེ། ཚོར་བ་མི་བཟད་ཅིང་དྲག་ལ་ཚ་བ་གཞན་དང་མཚུངས་པ་མེད་ཅིང་དཔེ་ཟླ་མེད་པ་དག་མྱོང་བ་ན། སྒྲ་དེ་ཉིས་འགྱུར་གྱིས་སྙིང་ལ་འབིགས་པར་བྱེད་དོ། །གནོད་པ་འདི་དག་ཀྱང་འབྱུང་བར་འགྱུར་ཏེ། འདི་ལྟ་སྟེ། ལྕགས་ཀྱི་རི་རབ་ཏུ་འབར་བ་ཁྭ་སྤུངས་པ་ཞེས་བྱ་བ་ཡོད་དེ། དེ་དཔག་ཚད་སྟོང་ལྔ་བརྒྱར་འབར་ལ། རིང་ཁྱད་གནམ་ལ་ཐུག་པ་ཞིག་ཡོད་དོ། །དེ་ལ་ལྕགས་ཀྱི་ཤིང་ལྗོན་
པ་དང་། ལྕགས་ཀྱི་ཁྭ་རབ་ཏུ་འབར་བ་དག་གིས་གང་སྟེ། རི་དེ་ཐམས་ཅད་ཀྱང་རབ་ཏུ་འབར་བ་མེ་ལྕེ་གཅིག་ཏུ་གྱུར་ཅིང་། ཀུན་ནས་དེའི་ལས་ཀྱིས་བྱས་པའི་མེས་རྒྱུན་མི་འཆད་པར་རབ་ཏུ་འབར་བ་ན། ཉེས་པར་བྱས་པའི་ལས་ཀྱིས་རི་དེ་པད་མའི་ཚལ་གྱིས་ཁེབས་པར་མཐོང་ཞིང་། པད་མའི་འདབ་མ་དེ་དག་འོད་འཕྲོ་བར་མཐོང་ནས། དེ་དག་གཅིག་ལ་གཅིག་བོས་ཏེ། གྲོགས་པོ་དག་ཚུར་ཤོག །ཚུར་ཤོག །རི་ཚལ་གྲིབ་མ་བསིལ་བ་ཅན་དུ་འདོང་། ཚལ་སྡུག་པ་དག་ཉེ་བར་བསྟེན་པར་བྱའོ་ཞེས་སྨྲའོ། །དེ་ནས་སེམས་ཅན་དམྱལ་བ་པ་དེ་དག་ལ་གཤིན་རྗེའི་མི་རྣམས་ཀྱིས་རྡོའི་ཆར་དག་གིས་རྡེག་པ་ན། སྐྱོབ་པ་འདོད་པ། སྐྱབས་འདོད་པ། མགོན་འདོད་པ་དག་རི་ག་ལ་བ་དེར་དེ་དག་རྒྱུག་གོ །ཇི་ལྟར་རི་དེ་ལ་དེ་ལྟར་འཛེགས་པ་དང་། རི་དེ་ཡང་འབར་བའི་ཕྲེང་བས་འཁྲུགས་ཤིང་ཀུན་ནས་རབ་ཏུ་འབར་ལ། ཁྭ་རབ་ཏུ་འབར་བ་མཆུ་ཤིན་ཏུ་རྣོ་བ་རྣམས་ཀྱིས་སེམས་ཅན་དམྱལ་བ་ཤིན་ཏུ་གང་བ་དེ་དག་མཐོང་ནས་རྒྱུག་ཅིང་། སེམས་ཅན་དམྱལ་བ་དེ་དག་ལ་ཟ་བར་བྱེད་དེ། ཁ་ཅིག་ནི་གླད་པ་དང་གླད་རྒྱས་ལ་འཐོག ། ཁ་ཅིག་ནི་མིག་ལ། ཁ་ཅིག་ནི་སྣ་ལ། ཁ་ཅིག་ནི་འགྲམ་པའི་པགས་པ་ལ། ཁ་ཅིག་ནི་རྐེད་པའི་ངོས་ལ། ཁ་ཅིག་ནི་ལྕེ་ལ། ཁ་ཅིག་ནི་མགྲིན་པ་ལ། ཁ་ཅིག་ནི་མགྲིན་པའི་པགས་པ་ལ། ཁ་ཅིག་ནི་མིད་པ་ལ། ཁ་ཅིག་ནི་སྙིང་ལ། ཁ་ཅིག་ནི་གློ་བ་ལ། ཁ་ཅིག་ནི་མཚེར་པ་ལ། ཁ་ཅིག་ནི་རྒྱུ་མ་ལ། ཁ་ཅིག་ནི་གཉེ་མ་སྦོམ་པོ་ལ། ཁ་ཅིག་ནི་ལྟོ་བའི་པགས་པ་ལ། ཁ་ཅིག་ནི་རྣ་བའི་རུས་པ་ལ། ཁ་ཅིག་ནི་བརླ་ལ། ཁ་ཅིག་ནི་བརླའི་སྦུབས་ལ། ཁ་ཅིག་ནི་རྐང་པའི་རྟིང་པ་ལ། ཁ་ཅིག་ནི་རྟིང་པའི་པགས་པ་ལ། ཁ་ཅིག་ནི་རྐང་མཐིལ་ལ། ཁ་ཅིག་ནི་གཞང་ལ། ཁ་ཅིག་ནི་རྐང་པའི་
སོར་མོ་ལ་འཐོག་གོ །ཡང་རྣམ་པར་ཕྱེ་ནས་ཟ་བར་བྱེད་དེ། ཁ་ཅིག་ནི་མདུན་གྱི་ངོས་ལ། ཁ་ཅིག་ནི་གློ་ལ། ཁ་ཅིག་ནི་གློའི་པགས་པ་ལ། ཁ་ཅིག་ནི་ལག་པའི་རྒྱབ་ཀྱི་རུས་པ་ལ། ཁ་ཅིག་ནི་ཡན་ལག་དང་ཉིང་ལག་ཐམས་ཅད་དང་རྐང་ཡོད་པའི་སེམས་ཅན་དམྱལ་བ་དེ་དག་སོ་སོ་སོ་སོར་ཕྱེ་ནས་ཁྭ་དེ་རྣམས་ཀྱིས་ཟ་བར་བྱེད་དོ། །ཡང་ལས་ཀྱི་དབང་གིས་སྐྱེ་བར་འགྱུར་ཏེ། སྐྱེས་ནས་ཀྱང་གཤིན་རྗེའི་མིས་འཇིགས་ཤིང་ཁྭས་འཇིགས་ལ། སྐྱོབ་པར་འདོད་པ། སྐྱབས་འདོད་པ་དག་རི་ཁྭ་སྤུངས་པ་ག་ལ་བ་དེར་རྒྱུག་གོ །དེ་དག་གང་གི་ཚེ་ལས་ཀྱིས་བྱས་པའི་མེས་འབར་བའི་ཕྲེང་བའི་རི་སྤུངས་པ་དེ་ལ་འཛེག་པ་ན། འབར་བའི་ཕྲེང་བས་ལུས་ཡོངས་སུ་དཀྲིས་པ་དེ་དག་རི་དེ་ལ་ལོ་འབུམ་ཕྲག་དུ་མར་སྲེག་པར་འགྱུར་རོ། །ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ། ཟད་པར་མ་བྱས་ཤིང་ཇི་སྲིད་དུ་དེའི་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ། ཀུན་ནས་བསླང་བ་ལ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པའི་ལས་བཅོམ་ཞིང་སྤངས་ལ། ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་དེའི་ལས་དྲག་ཅིང་ཚ་བ་བྱས་ལ། བསགས་པའི་མཐུས་གང་དག་ཁྭ་སྤུངས་པའི་རི་དེའི་རྩེ་མོ་ལ་ཡང་གང་གིས་བྱུང་བ་དག་འཛེག་པར་བྱེད་དེ། དེ་དག་ལ་འབར་བ་དེ་དག་གིས་དཔག་ཚད་སྟོང་ལྔ་བརྒྱར་གྱེན་དུ་བཏེག་བཏེག་སྟེ། ཕྱེ་མ་ལེབ་བཞིན་དུ་སྲེག་པར་བྱེད་ཀྱང་། ཅིག་ཅར་འཆི་བའི་དུས་ནི་མི་བྱེད་དོ། །གང་གི་ཚེ་དེ་བཅོམ་ཞིང་སྤངས་ལ་ཟད་པར་བྱས་པ་དེའི་ཚེ། སེམས་ཅན་དམྱལ་བ་དེ་ལས་ཐར་པར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། དེའི་ལས་བྱས་ལ་བསགས་པའི་རྒྱུ་འཐུན་པའི་འབྲས་བུས། དེའི་ཡན་ལག་དང་ཉིང་ལག་ཐམས་ཅད་ལས་དྲི་རུལ་པ་འབྱུང་ཞིང་
མཛེའམ་དེ་ལ་ཤ་བཀྲ་འབྱུང་བར་འགྱུར། འགྲན་ཟླ་མང་ཞིང་ཕལ་ཆེ་ལ་དབུལ་བ་དང་། ཡུལ་ངན་པར་སྐྱེ་བར་འགྱུར་རོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་འཁོར་གཞན་མཆི་མའི་རྒྱུན་མེ་ལྟ་བུ་ཞེས་བྱ་བ་ཡོད་པར་མཐོང་ངོ་། །དེར་སེམས་ཅན་ལས་ཀྱི་རྣམ་པར་སྨིན་པ་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་ཏེ། དེ་ལ་སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་ནི་དགེ་སློང་མ་ཚུལ་ཁྲིམས་རལ་ཅིང་སྤྱོད་པ་ངན་པ་ལ་སྔར་གཞན་གང་ཞིག་གིས་ལྷན་ཅིག་མི་ཚངས་པར་སྤྱད་པ་བྱས་ལ། ཕྱིས་གཞན་ཞིག་དེ་དང་ལྷན་ཅིག་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་མཆི་མའི་རྒྱུན་མེ་ལྟ་བུར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ཚ་བ་རྩུབ་པ་མི་འདོད་པའི་ལས་ཀྱི་རྣམ་པ་དེ་ལྟ་བུ་བྱས་པར་འགྱུར་ཏེ། གང་གིས་ཀུན་ནས་རབ་ཏུ་འབར་བའི་མེས་སྲེག་པ་ན། མཆི་མ་གང་འབྱུང་བ་དེ་དག་མེའི་མཆི་མར་འབྱུང་སྟེ། དེ་དག་གིས་ལུས་དེ་དག་སྲེག་ཅིང་སེམས་ཅན་དམྱལ་བ་དེ་དག་ལ་གནོད་པའི་རྣམ་པ་དེ་ལྟ་བུས་ཉེན་པར་འགྱུར་རོ། །དེ་ཡང་གནོད་པ་གཞན་དག་མྱོང་བར་འགྱུར་ཏེ། མིག་གི་ནང་དུ་སེང་ལྡེང་གི་མདག་མས་ཀུན་དུ་འགེངས་ཤིང་། གཤིན་རྗེའི་མི་རྣམས་ཀྱིས་རུས་པ་རྡུང་སོ་སོར་འབྱེད་ལ་སྨྱིག་མ་ལྟ་བུར་འབུད་ཅིང་། སེམས་ཅན་དམྱལ་བ་སོ་སོར་འཇིགས་པ་ལ། ལྕགས་ཀྱི་ཕུར་བུ་དང་གཏུན་ཤིང་དང་མདའ་བོ་ཆེ་རྣམས་ཀྱིས་སེམས་ཅན་དམྱལ་བ་པ་དེ་དག་གི་ལུས་གཅོད་ཅིང་འབིགས་ལ་དུམ་བུར་རློག་གོ །ཕྲ་སྐམ་རབ་ཏུ་
འབར་བས་གཞང་གདངས་པའི་ནང་དུ་ཞ་ཉེ་བསྐོལ་བས་ཀུན་དུ་བཀང་སྟེ། དེའི་ནང་ཞ་ཉེ་བསྐོལ་བས་རབ་ཏུ་སྲེག་ལ། ཕྱི་རོལ་མེ་ཤིན་ཏུ་འབར་བས་རབ་ཏུ་སྲེག་གོ །དེ་གཉི་གས་སྲེག་པ་ན་ཚོར་བ་ཤིན་ཏུ་ཚ་ཞིང་མི་བཟད་པ་རྣམ་པ་དུ་མ་མྱོང་བར་འགྱུར་རོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བརྒྱད་པ། འདིར་ཚིགས་སུ་བཅད་པ། དམྱལ་བའི་སྡིག་པའི་ལས་ཀྱིས་སུ། །ཞ་ཉེ་དག་གིས་ནང་བླུགས་ཤིང་། །མེ་འབར་བ་ཡིས་ཕྱི་རོལ་དུ། །སྲེག་པ་ཤིན་ཏུ་སྡུག་བསྔལ་ཡིན། །གང་དག་སྡུག་བསྔལ་ལས་འབྲས་སྐྱེས། །ཚ་བ་འབྱུང་བ་སྐྱེ་བ་ནི། །ཁམས་གསུམ་དག་ཏུ་དེ་ཡི་དཔེ། །བྱ་བར་སླ་བ་མ་ཡིན་ནོ། །རྣམ་གསུམ་འབྲས་བུ་གསུམ་སྐྱེས་པ། །ཁམས་གསུམ་དག་ཏུ་སྐྱེ་བ་ནི། །སེམས་གསུམ་ལས་བསླང་ཉེས་གསུམ་སྐྱེས། །གནས་གསུམ་དག་ཏུ་སྨིན་པར་འགྱུར། །རྒྱུ་དང་རྐྱེན་ནི་ཚོགས་པ་ཡིས། །ཀུན་བསླང་སོ་སོ་དེ་ཉིད་དག །དེ་ཡི་ལས་ཀྱི་རྣམ་སྨིན་ནི། །ཁམས་གསུམ་དག་ན་སྣང་བ་ཡིན། །ཇི་ལྟ་ཇི་ལྟར་སེམས་འབྱུང་བ། །དེ་ལྟ་དེ་ལྟར་ཡོངས་འགྱུར་ཏེ། །དགེ་བ་ཡིས་ནི་དགེ་བྱེད་ཅིང་། །སྡིག་པ་ཡིས་ནི་སྡིག་པ་བྱེད། །ལས་ནི་སེམས་དང་འབྲེལ་པ་སྟེ། །སྲིད་པ་ལས་དང་འབྲེལ་པ་ཡིན། །སེམས་དང་ལས་ཀྱིས་ཀུན་བསླང་བ། །འདི་ནི་འཁོར་བར་ཡོངས་སུ་བསྒྲགས། །སྲེད་པ་གང་གིས་བསླུས་པ་ཡིས། །སྡང་བའི་སེམས་དང་ལྡན་པའི་ལས། །འདིར་ནི་མི་དག་དེ་བྱེད་དེ། །དེ་ནི་སེམས་ཅན་དམྱལ་བར་འཚེད། །གཞན་གྱིས་བྱས་པའི་སྡིག་པ་ནི། །གཞན་ལ་ཡོངས་སུ་སྨིན་མི་འགྱུར། །སྲོག་ཆགས་ཀུན་གྱིས་བདག་ཉིད་ཀྱི། །ལས་ཀྱི་འབྲས་བུ་དག་ལ་སྤྱོད། །ཁྱོད་ཅག་རང་གི་སེམས་ཀྱིས་སུ། །འདི་དག་ཐམས་ཅད་བསླུས་པ་ཡིན། །མེ་ཡིས་ཡོངས་སུ་གདུངས་པ་ཡིས། །ངུ་སྐད་དོན་མེད་ཅི་ཞིག་འབྱིན། །དེ་ལྟར་སེམས་
ཅན་དམྱལ་བ་དེ་དག་ལ་གཤིན་རྗེའི་མི་དེ་དག་གིས་རང་གི་ལས་དག་རང་ཉིད་ཀྱིས་མ་མྱོང་བར་གྲོལ་བ་མེད་དོ་ཞེས་རྗེས་སུ་བསྟན་ཏེ། དེ་ལྟར་ལས་དང་འབྲས་བུར་འབྲེལ་པ་ནི་དེ་ཐམས་ཅད་སྲིད་པ་བར་མར་དམིགས་སོ། །དེ་ལྟར་རྗེས་སུ་སྟོན་པ་ན་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སེམས་ཅན་དམྱལ་བ་དེ་དག་ལ་གཤིན་རྗེའི་མི་དེ་རྣམས་ཀྱིས་ལོ་འབུམ་ཕྲག་དུ་མར་སྲེག་ཅིང་འཚེད་དོ། །ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་བྱས་ལ་བསགས་པའི་རྒྱུ་འཐུན་པའི་འབྲས་བུའི་མཐུས་སྐྲན་ཅན་དུ་འགྱུར་ཞིང་སྐེམ་པོའམ། བྱད་ངན་པའམ། སྦོམ་པའམ། ལུས་ཚལ་ཤིང་བསྲེགས་པ་ལྟ་བུར་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་དབང་པོ་ཐམས་ཅད་ཀུན་དུ་འགགས་པ་ཞེས་བྱ་བ་ཇི་ལྟར་འདུག་པར་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་བརྟགས་ན་གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པར་གྱུར་པ་དེ་དག་སེམས་ཅན་དམྱལ་བར་སྐྱེ་བར་འགྱུར་རོ། །དེ་ལ་སྲོག་གཅོད་པ་དང་། མ་བྱིན་པར་ལེན་པའི་རྣམ་པར་སྨིན་པ་ནི་སྔར་བཤད་པ་བཞིན་ནོ། །འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པ་རྣམ་པ་དུར་འགྱུར་སྙམ་ན། ཤིན་ཏུ་འདོད་ཆགས་བདོ་བ་གང་གིས་བུད་མེད་ཀྱི་སྐྱེ་གནས་མ་ཡིན་པ། ཁའམ། རྐུབ་ཏུ་ལན་ཅིག་འདོད་པས་ལོག་པར་གཡེམ་པ་ཀུན་དུ་བསྟེན་ན། དེ་
ལུས་དང་བྲལ་ནས་ངན་འགྲོ་ལོག་པར་ལྟུང་བ། སེམས་ཅན་དམྱལ་བ་དབང་པོ་ཐམས་ཅད་ཀུན་དུ་འགགས་པ་ཞེས་བྱ་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ཁར་མེའི་ཁམས་ཀྱིས་གང་བར་བཀང་ཞིང་། ལྕགས་ཀྱི་སྣོད་ཀྱི་ནང་དུ་ཟངས་དམར་པོ་བཞུས་པ་བླུགས་ནས་བརྫང་བས་བརྫངས་ལ། འོག་ནས་ཀྱང་སྲོག་ཆགས་མར་ཀོ་ཏ་ཀའི་མཆུ་རབ་ཏུ་འབར་བས་ཟའོ། །མེ་འབར་བའི་ཕྲེང་བ་བཅུ་གཅིག་གིས་བསྐོར་བའི་དབུས་སུ་གདུངས་ཤིང་སྲེག་སྟེ། ཡང་སོས་ཤིང་ཡང་སྲེག་གོ །གྲོག་སྦུར་རབ་ཏུ་འབར་བ་དག་གིས་ནི་མིག་ཟ་ལ་ཞ་ཉེས་ནི་རྣ་བ་གང་། རལ་གྲིས་ནི་སྣ་བཅད། སྤུ་གྲིས་ནི་ལྕེ་བཅད། སྤུ་གྲིའི་ཆར་གྱིས་ནི་ལུས་གཤེགས་ཏེ་དབང་པོ་ཐམས་ཅད་སྡུག་བསྔལ་ཆེན་པོ་མྱོང་བ་ནི། སེམས་ཅན་དམྱལ་བ་པའི་རྣམ་པར་སྨིན་པ་བདེ་བ་མེད་ཅིང་། སྡུག་བསྔལ་འབྱུང་བ་མི་བཟད་ལ་ཚ་བ་གཞན་དང་མཚུངས་པ་མེད་ཅིང་དཔེ་ཟླ་མེད་པ་དེའི་ཕྱོགས་འགའ་ཞིག་བརྗོད་ན། འདི་ལྟ་སྟེ། ཇི་ལྟར་ཉི་མའི་འོད་ལས་མར་མེའི་འོད་དེ་བས་ཆུང་བ། དེ་ལྟར་སེམས་ཅན་དམྱལ་བ་པའི་སྡུག་བསྔལ་རྗེས་སུ་དཔག་པར་བྱ་ཞིང་ལྷ་རྣམས་ཀྱི་བདེ་བ་དཔེ་ཟླ་མེད་པ་བཞིན་དུ། སེམས་ཅན་དམྱལ་བ་པ་རྣམས་ཀྱི་སེམས་ཅན་དམྱལ་བ་པའི་སྡུག་བསྔལ་ཡང་དཔེ་ཟླ་མེད་དོ། །དེ་ཅིའི་ཕྱིར་ཞེ་ན། ལྷའི་འཇིག་རྟེན་དང་། སེམས་ཅན་དམྱལ་བའི་བདེ་བ་དང་། སྡུག་བསྔལ་ནི་གཞན་དང་མཚུངས་པ་མེད་དེ། འདི་ནི་ཕྱོགས་འགའ་ཞིག་བརྗོད་པ་ཡིན་ནོ། །ཇི་སྲིད་དུ་དེའི་སྡིག་པའི་ལས་བྱས་ཤིང་། བསགས་པ་བྱང་ཞིང་ཞི་ལ། སྤངས་ཤིང་ཟད་པར་མ་བྱས་པ་དེ་སྲིད་དུ། དེར་ཚོར་བ་མི་བཟད་ཅིང་ཚ་ལ་དྲག་པ་དག་མྱོང་བར་འགྱུར་རོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ།
མི་རྣམས་དང་སྐལ་བ་མཉམ་པར་མིར་སྐྱེས་ན་དེའི་ལས་བྱས་ཤིང་བསགས་པའི་རྒྱུ་འཐུན་པའི་འབྲས་བུའི་མཐུས། དེའི་ཆུང་མ་སྡོམ་པ་མེད་པར་འགྱུར་ལ། ཆུང་མ་དེས་ཀྱང་དེ་ལྟར་ཆོམ་རྐུན་པ་དག་གཉེར་ནས་གསོད་པར་བྱེད། དེ་བཞིན་དུ་རྒྱལ་པོའི་ཕོ་བྲང་འཁོར་དུ་གཡོ་ཐབས་སྦྱར་ནས་གསོད་པར་བྱེད། དེ་བཞིན་དུ་དུག་གིས་གསོད་པར་བྱེད་ཅིང་དེ་གཉིད་ལོག་པ་དང་། མཚོན་གྱིས་གསོད་པར་བྱེད་དེ། བྱས་ཤིང་བསགས་པའི་ལས་ཀྱི་རྣམ་པར་སྨིན་པ་མ་མྱོང་བར་ཐར་པ་མེད་དོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཚོར་བ་མཐའ་མེད་ཅེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན་སྲོག་གཅོད་པ་དང་། མ་བྱིན་པར་ལེན་པའི་འབྲས་བུ་ནི་ཇི་སྐད་བཤད་པ་བཞིན་ནོ། །གང་ཤིན་ཏུ་འདོད་ཆགས་ཀྱི་སེམས་ཀྱིས་བུད་མེད་འོས་མ་ཡིན་པ་རྗེས་སུ་དྲན་ནས་ལག་པས་འདོད་པས་ལོག་པར་གཡེམ་པ་བྱས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཚོར་བ་མཐའ་མེད་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། བྱས་ཤིང་བསགས་པའི་ལས་ཀྱིས་ཚོར་བ་ཤས་ཆེ་བར་འགྱུར་བ་ནི་འདི་ལྟ་སྟེ། མེ་ཡི་ཚོར་བ་དང་། མཚོན་གྱི་ཚོར་བ་དང་། བ་ཚྭའི་ཚོར་བ་དང་། ནད་ཀྱི་ཚོར་བ་སྟེ། ཚོར་བ་དེ་དག་གཏིང་དཔག་དཀའ་ཞིང་མཐའ་དཔག་དཀའ་ལ་མཐའ་ཡས་པ་ཡིན་ཏེ། ཇི་སྐད་བཤད་པའི་ཚོར་བ་དེ་དག་ནི་དཔེ་བྱ་བར་སླ་བ་མ་ཡིན་ནོ། །དེ་ལྟར་སེམས་ཅན་དམྱལ་བ་པ་དག་དེར་རང་གི་སེམས་ཀྱིས་ཡོངས་སུ་བསླུས་པ་ཡིན་ཏེ། ཇི་སྲིད་དུ་དེའི་ཉེས་པར་བྱས་པའི་ལས་བཅོམ་ཞིང་སྤངས་ལ་ཟད་པར་མ་བྱས་པའི་བར་དུ་ལོ་འབུམ་ཕྲག་དུ་མར་སྲེག་ཅིང་འཚེད་དོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་
དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དབུལ་པོར་འགྱུར་ཞིང་རི་བྲགས་དང་། དགོན་པ་དང་། འཇིགས་པ་དང་། རི་བྲགས་པ་དག་གི་གཡོག་བྲན་དུ་འགྱུར། ནད་རྣམས་ཀྱིས་རྟག་ཏུ་ན་བར་འགྱུར་རོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆེན་པོ་པད་མ་ལྟར་གས་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ན། དེ་གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་བྱས་ལ་བསགས་པས་དེ་སེམས་ཅན་དམྱལ་བ་པད་མ་ལྟར་གས་པར་སྐྱེ་བར་མཐོང་ངོ་། །དེ་ལ་སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་ནི་དགེ་སྦྱོང་དུ་དམ་བཅས་པ་གང་ཞིག་སྔོན་གྱི་འདོད་པ་དག་ལ་སེམས་གཏོང་ཞིང་རོ་མྱོང་བར་བྱེད་ལ་ཡིད་ལ་བྱེད། ཚུལ་བཞིན་མ་ཡིན་པ་ཡིད་ལ་བྱེད་པའི་རོ་མྱང་བར་བྱས་པས་མཚན་མོ་ཉལ་བ་ན་དེའི་རྨི་ལམ་དུ་བུད་མེད་དེ་ཉིད་དང་ལྷན་ཅིག་འཁྲིག་པར་བྱེད་ཅིང་། སད་ནས་ཀྱང་མི་ཚངས་པར་སྤྱོད་པ་རྨི་ལམ་དུ་རྨིས་པ་དེ་ཉིད་ཀྱི་རོ་མྱོང་བར་བྱེད་ཅིང་ཡང་ཡིད་ལ་བྱེད། རྗེས་སུ་ཡི་རང་ཞིང་གཞན་དག་ལ་ཡང་ཡོན་ཏན་དུ་འཛིན་ལ་དེ་དང་ལྷན་ཅིག་གོམས་པར་བྱེད། མང་དུ་བྱེད་ཅིང་དེ་དང་དེ་ཉིད་ལ་དགའ་བར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་པད་མ་ལྟར་གས་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ཇི་ལྟར་པད་མའི་མདོག་ཉིད་དུ་གྱུར་པ་དེ་ལྟར་དེའི་སྣང་བ་ཀུན་ཏུ་དམར་པོ་ཉིད་དུ་གྱུར་ཏེ། དེར་སེམས་ཅན་དམྱལ་བ་དེ་དག་བུམ་པ་དག་གི་ནང་དུ་འཚེད་ཅིང་ལྕགས་ཀྱི་བྲེ་བོའི་ནང་དུ་ལྕགས་ཀྱི་གཏུན་ཤིང་རྣམས་ཀྱིས་འཚོག་གོ །དེ་དེ་དག་ལས་ཐར་ནས་མཚོ་ཆེན་པོའི་ནང་ན་པད་མ་སྔོན་པོ་སྐྱེས་པ་དེ་རྒྱང་རིང་པོ་ནས་མཐོང་ནས་དེ་ནས་སེམས་ཅན་དམྱལ་བ་པ་སྐྱབས་འདོད་
པ་མགོན་འདོད་པ། བཀྲེས་པ་དང་སྐོམ་པས་ཡོངས་སུ་གདུངས་པའི་ལུས་ཅན་དག་གནོད་པ་དེ་དག་ལས་ཐར་ནས་བདག་ཅག་གིས་བདེ་བ་ཐོབ་པར་བྱའོ་ཞེས་དེར་དོང་ངོ་། །དེ་ནས་བརྒྱའམ་སྟོང་ཡོད་པ་དེ་དག་པད་མ་ག་ལ་བ་དེར་དོང་ངོ་། །དེར་དོང་བ་དང་ལམ་དུ་ཕུར་བུ་བཙུགས་པ་དག་གིས་རྐང་པ་ལ་ཟུག་གོ །རྐང་པ་ཉམས་པ་དེ་ཁས་བུབ་ཏུ་ལྷུང་ངོ་། །ཁས་བུབ་ཏུ་ལྷུང་བ་དེ་དག་ལ་ཕུར་བུ་རྣམས་ཀྱིས་ཟུག་གོ །གལ་ཏེ་ཕྱིས་གན་དུ་འགྱེལ་ན་དེ་དག་གི་རྒྱབ་ལ་ཕུར་བུ་དེ་རྣམས་ཀྱིས་ཟུག་ཅིང་འབིགས་པར་བྱེད་དོ། །གལ་ཏེ་གློས་འགྱེལ་ན་ཕུར་བུ་དེ་རྣམས་ཀྱིས་དེ་དག་གི་གློ་ཡང་འབིགས་པར་བྱེད་དོ། །གལ་ཏེ་འདུག་ན་དེའི་འོག་ནས་འཛུག་གོ །དེ་དག་སྲེག་ཅིང་འཚེད་པ་ན་གཅིག་ལ་གཅིག་སྐད་འབྱིན་ཏེ། སྐོམ་པ་དང་བཀྲེས་པས་ཤིན་ཏུ་གདུངས་པའི་ལུས་ཅན་དག་གཅིག་ལ་གཅིག་སྐད་འབྱིན་ཅིང་ངུའོ། །མྱ་ངན་བྱེད་ཅིང་སྨྲེ་སྔགས་འདོན་པའི་ཡིད་དུ་གྱུར་པ་དེ་དག་ཐམས་ཅད་པད་མ་དེ་ལ་ལྟ་ཞིང་འཁོད་པ་ནི་རྒྱབ་ནས་གཤིན་རྗེའི་མི་རྣམས་ཀྱིས་རལ་གྲི་དང་། དགྲ་སྟ་དང་། མདའ་བོ་ཆེ་དང་། མདུང་ཐུང་རྣམས་ཀྱིས་འདེབས་ཏེ། དེ་ལྟར་སེམས་ཅན་དམྱལ་བ་པ་མགོན་འདོད་པ། སྐྱབས་འདོད་པ། བསིལ་བ་འདོད་པ་དག་ཐབས་འགའ་ཞིག་གིས་པད་མ་དེའི་དྲུང་དུ་ཕྱིན་ཏེ། དེ་ལ་འཛེགས་པ་དང་། པད་མ་དེ་ཡང་སེང་ལྡེང་གི་མེའི་མདག་མ་ལྟ་བུས་གང་ཞིང་། རྡོ་རྗེ་ལྟར་སྲ་བའི་ལོ་མ་རྣམས་ལ་དེ་དག་འཛེག་སྟེ། དེ་ཡང་ཁ་ཞུམ་པར་འགྱུར་རོ། །དེ་ལྟར་ལས་ཀྱི་མཐའ་ཉེས་པར་སྤྱད་པ་དང་། ཉེས་པར་བྱས་པའི་ལས་ཀྱིས་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལས་ཀྱི་དབང་གིས་དེ་དག་སེམས་ཅན་དམྱལ་བ་པད་མ་ལྟར་གས་པ་དེར་ལོ་བརྒྱ་ཕྲག་དུ་མའམ། ལོ་སྟོང་ཕྲག་དུ་མའམ། ལོ་བྱེ་བ་ཕྲག་དུ་མར་བསྐོལ་ཅིང་འཚེད་ཀྱང་དེ་དག་དུས་ལས་འདའ་བར་ནི་མི་བྱེད་དོ། །ཕྱི་ནས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་
དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེའི་ལས་བྱས་ཤིང་བསགས་པ་དག་གིས་མཐུས་དེ་མིག་ཡོན་དུ་འགྱུར། ཚུལ་ཁྲིམས་འཆལ་ཅིང་དབུལ་ལ་ཚེ་ཐུང་བར་འགྱུར་རོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེས་སེམས་ཅན་དམྱལ་བ་པད་མ་ཆེན་པོ་ལྟར་གས་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ན། དེ་དག་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པས་དེ་སེམས་ཅན་དམྱལ་བ་པ་པད་མ་ཆེན་པོ་ལྟར་གས་པར་སྐྱེ་བར་འགྱུར་བ་མཐོང་ངོ་། །དེ་ལ་སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་ནི་དགེ་སྦྱོང་དགེ་སྦྱོང་དུ་དམ་བཅས་པ་གང་ཞིག་ཚུལ་ཁྲིམས་རལ་ལ་ལུད་བོང་ལྟར་སྤྱོད་པ། མྱ་ངན་ལས་འདས་པར་འགྲོ་བ་ལ་སྨོད་པ་ནི་འདི་ལྟར་ཚངས་པར་སྤྱད་པ་སྤྱོད་དེ་འདིར་བདག་ལྷའམ་ལྷ་གཞན་ཞིག་ཏུ་འགྱུར་བར་བྱ་སྙམ་སྟེ། བདག་ལྷའི་འཇིག་རྟེན་དེར་ལྷ་མོས་ཡོངས་སུ་བསྐོར་བར་གྱུར་ཅིག་སྙམ་སྟེ། དེ་ལྟར་ཚངས་པར་སྤྱད་པ་དེ་ཚངས་པར་སྤྱོད་པ་ལོག་པར་ཡོངས་སུ་བསྔོའོ། །དེ་སྲེད་པ་ལ་སྤྱོད་པ་ཡིན་ཏེ། དེ་འཁོར་བའི་རྒྱུར་སྤྱོད་ཅིང་སྲེད་པའི་རྒྱུར་སྤྱོད་ལ་དེ་སྡིག་པ་སྤྱོད་པ་ཡིན། དེ་ན་བ་དང་། རྒ་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལ་སོགས་པ་དག་ལས་ཡོངས་སུ་ཐར་བར་མི་འགྱུར་རོ། །ཤི་སྟེ་ལུས་དང་བྲལ་ནས་ཀྱང་ངན་འགྲོ་ལོག་པར་ལྷུང་བ་སེམས་ཅན་དམྱལ་བ་པད་མ་ཆེན་པོ་ལྟར་གས་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། བ་ཚྭའི་ཆུ་བོའི་རླབས་ཞེས་བྱ་བ་གང་དུ་བ་ཚྭས་གང་བར་མ་གྱུར་པ་ནི། དེ་ན་ཁབ་ཀྱི་བུ་ག་ཙམ་ཡང་མེད་པ། ཞེང་དུ་དཔག་ཚད་ལྔ་ཡོད་ལ། ཆུར་དཔག་ཚད་བརྒྱ་ཡོད་པར་འཇུག་གོ །སེམས་ཅན་དམྱལ་བའི་ཆུ་བོ་དེར་དེ་དག་ཞུགས་པ་དང་། ཚོར་བ་ཤིན་ཏུ་ཚ་བ། ཤིན་ཏུ་རྩུབ་པ།
ཤིན་ཏུ་བཟོད་པར་དཀའ་བ་དག་མྱོང་སྟེ། དེའི་རུས་པ་གང་ཡིན་པ་དེ་དག་ནི་རྡོར་གྱུར། སྐྲ་གང་ཡིན་པ་དེ་དག་ནི་ཉ་ལྕི་བས་སུ་གྱུར། ཤ་གང་ཡིན་པ་དེ་དག་ནི་འདམ་དུ་གྱུར། རོ་ཉེ་བསྐོལ་བ་གང་ཡིན་པ་དེ་དག་ནི་ཆུར་གྱུར། སེམས་ཅན་དམྱལ་བ་གང་ཡིན་པ་དེ་དག་ནི་ཉར་གྱུར་ཏེ། ཆུ་བོ་དེས་ཁས་བུབ་ཏུ་དེད་ཅིང་བསྐོལ་ཏོ། །འགྲམ་དག་ཏུ་ཆགས་ན་ཁྭ་མཆུ་རབ་ཏུ་འབར་བ་རྣམས་ཀྱིས་ཟའོ། །གལ་ཏེ་མགོན་འདོད་པ། སྐྱབས་འདོད་པ་དག་ཆུ་བོ་དེ་ལས་ཐར་ནས་འབྲོས་པ་ན་གཤིན་རྗེའི་མི་རྣམས་ཀྱིས་ལྕགས་ཀྱི་མདུང་རབ་ཏུ་འབར་བ་དག་གིས་བཏབ་ནས་ཆུ་བོའི་རླབས་དེ་ཉིད་ཀྱི་ནང་དུ་འཇུག་པར་བྱེད་དོ། །དེ་ལྟར་དེ་དག་སྟེང་དུ་བྱུང་བ་ན། རྐང་པ་འཚེད་པར་བྱེད་ལ། བརླའི་སྦུབས་དང་། རྒྱབ་ཀྱི་ཤ་དག་འཚེད་པར་བྱེད། མགུལ་པའི་ཤ་ཡང་ཆད་པར་འགྱུར། རུས་པ་ཡང་བསྐོལ་བར་འགྱུར། མགོའི་ཤ་ཆད་ཅིང་མགོའི་ཐོད་པ་ཡང་ཆད་པར་འགྱུར་ཏེ། དེ་ལྟར་སེམས་ཅན་དམྱལ་བ་པ་དེ་དག་ཇི་ལྟ་ཇི་ལྟར་ཆུ་བོ་དེར་འཇུག་ཅིང་ཇི་ལྟ་ཇི་ལྟར་ཞུགས་པ་དེ་དག་དེ་ལྟ་དེ་ལྟར་ལོ་འབུམ་ཕྲག་དུ་མར་སྲེག་ཅིང་བསྐོལ་ལ་འཚེད་དོ། །ཡང་སེམས་ཅན་དམྱལ་བ་དེ་དག་ཉོན་མོངས་པའི་ཆུ་བོ་དེ་ལས་ཐར་ནས་མཚོ་དང་། མེ་ཏོག་དང་། པད་མ་སྔོན་པོ་ཡོད་པར་མཐོང་སྟེ། མགོན་འདོད་པ། སྐྱབས་འདོད་པ། བདེ་བ་འདོད་པ་དག་དེའི་དྲུང་དུ་འགྲོ་བར་འདོད་དེ་དེའི་དྲུང་དུ་དོང་ངོ་། །པད་མའི་ཚལ་དེ་དག་ཀྱང་ལྕགས་ཀྱི་པད་མ་ཡིན་ཏེ། དེ་དག་གི་རེག་པ་ནི་སྤུ་གྲི་ལྟ་བུ་ཡིན་ལ་སེམས་ཅན་དམྱལ་བ་པ་གང་དག་གིས་ལུས་དེ་ལ་རེག་པ་དེ་དག་ནི་གཤེག་པར་བྱེད་ཅིང་གཅོད་པར་བྱེད་ལ་ཟ་བར་བྱེད་ཅིང་རྡུང་བར་བྱེད་དོ། །དེ་ལྟར་གཤིན་རྗེའི་མི་རྣམས་ཀྱིས་མངོན་པར་གཙེས་པ་དག་པད་མའི་ཚལ་དེ་དག་ལ་འཛེག་པར་བྱེད་དེ། པད་མ་དེ་དག་གི་ནང་མེ་མདག་གིས་རབ་ཏུ་གང་བ་ཡིན་ལ། སྟེང་གི་ལོ་མ་ལྕགས་ལས་བྱས་པ་དག་གིས་འཆུམས་པར་བྱེད་དེ། དེའི་ནང་དུ་ལན་དུ་མར་སེམས་ཅན་དམྱལ་བ་པ་ལས་བྱས་པ་དེ་དག་སྐྱེ་བར་འགྱུར་ཏེ། མེ་མདག་དེས་
ལན་འབུམ་ཕྲག་དུ་མར་སྲེག་གོ །ཁྭ་དག་གིས་སེམས་ཅན་དམྱལ་བ་པ་དེ་དག་གི་མིག་ཟ་བར་བྱེད་ཅིང་ལྕེ་གཅོད་པར་བྱེད། རྣ་བ་འབིགས་པར་བྱེད། ལུས་རྣམ་པར་ཟད་པར་བྱེད་དོ། །དེ་ལྟར་རང་གི་ལས་ཀྱི་འབྲས་བུ་ལ་སྤྱོད་པའི་སེམས་ཅན་དམྱལ་བ་པ་དེ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སེམས་ཅན་དམྱལ་བ་ཆེན་པོ་པད་མ་ཆེན་པོ་ལྟར་གས་པ་དེར་འཚེད་པར་བྱེད་དོ། །དེ་ནས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དམུ་རྫིང་ཅན་དུ་འགྱུར་ཞིང་། རྟག་ཏུ་བཀྲེས་པ་དང་སྐོམ་པས་གདུངས་ལ། ཁྲོ་བར་ཡང་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་མེ་ཐབ་ཅེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་ནི་དགེ་སྦྱོང་དགེ་སྦྱོང་དུ་དམ་བཅས་པ་དེས་སྔོན་གྱི་ཁྱིམ་ན་གནས་པའི་བུད་མེད་དག་དང་ལྷན་ཅིག་ཏུ་དགོད་ཅིང་རྩེས་པ་དག་དེའི་ཚེ་དེ་ཚུལ་བཞིན་མ་ཡིན་པ་ཡིད་ལ་བྱེད་པས་དྲན་ཞིང་ཡང་དང་ཡང་དུ་དྲན་པ་ཉིད་དུ་བྱེད། དེ་ལ་ཆགས་ཤིང་ཡོངས་སུ་རྟོག་པར་བྱེད། དེ་འདོད་ཆགས་དེ་ཉིད་ལ་ཡང་དང་ཡང་དུ་སེམས་པར་བྱེད་ཅིང་། དགེ་བའི་ཆོས་ལ་སེམས་པར་མི་བྱེད་ལ་ཆོས་དང་འཐུན་པའི་ཆོས་མི་སྒྲུབ། སྡུག་བསྔལ་བ་དང་། ཀུན་འབྱུང་བ་དང་། འགོག་པའི་ཆོས་རྗེས་སུ་སེམས་པར་མི་བྱེད་ཅིང་རྗེས་སུ་མི་སློབ་ལ་རྗེས་སུ་མི་སྒྲུབ། དེར་ལས་སུ་རུང་བར་མི་བྱེད་ཅིང་སངས་རྒྱས་དང་། ཆོས་དང་། དགེ་འདུན་རྗེས་སུ་དྲན་པར་མི་བྱེད་འཆི་བ་རྗེས་སུ་དྲན་པར་མི་བྱེད་ཅིང་། འཁོར་བ་ལ་ཡིད་འབྱུང་བར་མི་བྱེད་ལ། ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་མི་
ལྟ། གནས་མལ་དང་ན་བའི་གསོས་སྨན་གྱི་རྐྱེན་མང་པོ་འཆང་བར་བྱེད་ཅིང་གནས་མལ་དང་། ན་བའི་གསོས་སྨན་གྱི་རྐྱེན་མང་པོ་འོས་པ་མ་ཡིན་པའི་གནས་མལ་དང་ན་བའི་གསོས་སྨན་གྱི་རྐྱེན་རབ་ཏུ་མང་པོ་དེ་དག་དེས་འཆང་བར་བྱེད་དེ། རྣམ་པ་དེ་ལྟ་བུ་བྱས་པ་ནི་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་མེ་ཐབ་ཏུ་སྐྱེ་བར་འགྱུར་རོ། །མེ་ཐབ་ཀྱི་སེམས་ཅན་དམྱལ་བ་དེ་འབར་རབ་ཏུ་འབར། ཀུན་ཏུ་རབ་ཏུ་འབར་ཞིང་། མེ་ལྕེ་གཅིག་ཏུ་གྱུར་པར་སྲེག་སྟེ། དེར་གང་འབར། རབ་ཏུ་འབར། ཀུན་ཏུ་རབ་ཏུ་འབར་ཞིང་མེ་ལྕེ་གཅིག་ཏུ་མ་གྱུར་པ་ནི་སྐྲའི་རྩེ་མོ་ཙམ་ཡང་མེད་དོ། །དེར་སེམས་ཅན་དམྱལ་བ་པ་དེ་དག་ཤིང་ལྗོན་པ་ལྟ་བུར་རབ་ཏུ་འབར་ཏེ། དེ་འབར་རབ་ཏུ་འབར། ཀུན་ཏུ་རབ་ཏུ་འབར་ཞིང་མེ་ལྕེ་གཅིག་ཏུ་གྱུར་པ་དེར་སྐད་འབྱིན་ཏོ། །དེ་ལྟར་སྐད་འབྱིན་པ་ན་ཁར་མེས་བཀང་ངོ་། །དེ་ཚོར་བས་ཉམ་ཐག་པ་དང་ཡང་དེ་སྐད་འབྱིན་ཏོ། །དེའི་རྣ་བར་མེ་འབར་བ་འཇུག་སྟེ། བཅུག་ནས་སྐད་འབྱིན་ཅིང་ངུ་ལ་སྨྲེ་སྔགས་འདོན་ཏོ། །དེའི་རྣ་བར་ཡང་མེ་འབར་བ་འཇུག་ཅིང་དེའི་ལུས་ཀྱང་ཀུན་ནས་རབ་ཏུ་འབར་བར་འགྱུར་ཏེ། དེ་ཡང་ཤིན་ཏུ་འཁྲུགས་ཤིང་སྐད་འབྱིན་ལ་སྨྲེ་སྔགས་འདོན་ཏོ། །གལ་ཏེ་ཚུལ་ཁྲིམས་དང་མི་ལྡན་པར་གྱུར་པ་ཞིག་ཕ་རོལ་གྱི་བསོད་སྙོམས་ཟོས་ལ་དེའི་ལྕེ་ལྕགས་རབ་ཏུ་འབར་བའི་གླེགས་མས་སྲེག་གོ །གལ་ཏེ་ཚུལ་ཁྲིམས་ཅན་ཚུལ་བཞིན་མ་ཡིན་པ་ཡིད་ལ་བྱེད་པས་བུད་མེད་དག་མཐོང་ན་དེའི་མིག་སྲེག་པར་འགྱུར་རོ། །གང་ཤིན་ཏུ་ཆགས་པའི་སེམས་ཀྱིས་བུད་མེད་གཞན་དག་དགོད་ཅིང་གླུ་དབྱངས་ལེན་ལ་སྒྲ་འབྱིན་པ་དག་ཐོས་ན་དེའི་རྣ་བ་རོ་ཉེ་རབ་ཏུ་བསྐོལ་བས་འགེངས་པར་འགྱུར་རོ། །ཚུལ་ཁྲིམས་འཆལ་པ་འོས་པར་འགྱུར་བ་མ་ཡིན་པ་གང་གིས་དགེ་འདུན་རྣམས་ཀྱི་བདུག་སྤོས་ཡོངས་སུ་བཟུང་བས་སྣ་བཅད་ཅིང་སྲེག་པར་འགྱུར་ཏེ། དེ་ལྟར་ཚུལ་ཁྲིམས་འཆལ་པ་དེའི་དབང་པོ་ལྔ་ཅར་ལ་སྦྱར་ཏེ། སེམས་ཅན་དམྱལ་བར་ལས་དང་མཚུངས་པའི་ཆད་པ་དྲག་པོ་རབ་ཏུ་འབྱུང་ངོ་། །ལས་ཀྱི་མཐའ་ཉེས་པར་སྤྱད་པ་
བྱས་པ་དེ་ནི་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སེམས་ཅན་དམྱལ་བ་ཀུན་ནས་མེ་ལྕེ་འབར་བའི་ཕྲེང་བས་འཁྲུགས་པའི་སེམས་ཅན་དམྱལ་བ་མེ་ཐབ་དེར་སྲེག་ཅིང་འཚེད་དོ། །དེ་དེ་ལས་ཐར་ནས་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེའི་སྡིག་པའི་ལས་དེ་དང་རྒྱུ་འཐུན་པའི་འབྲས་བུས་དེ་བྱད་ལག་ངན་ཅིང་ལོང་བ་དང་། ཞ་ཞིང་དབུལ་བར་འགྱུར་ལ་དར་ལ་བབ་པ་ཉིད་ཀྱི་ཚེ་འཆི་བར་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན་དེས་ཐོས་པ་ལས་བྱུང་བའི་ཤེས་པས་འཁོར་གཞན་ལྕགས་ཀྱི་ཕྱེ་མ་མེ་མདག་གི་ར་བ་ཞེས་བྱ་བ་ཡོད་པ་མཐོང་ངོ་། །དེར་སེམས་ཅན་དག་ལས་ཀྱི་རྣམ་པར་སྨིན་པ་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན་གང་གིས་སྲོག་གཅོད་པ་དང་། མ་བྱིན་པར་ལེན་པ་ནི་སྔ་མ་བཞིན་ནོ། །དགེ་སྦྱོང་དགེ་སྦྱོང་དུ་དམ་བཅས་པ་གང་གིས་མོའི་གར་དང་གླུ་དབྱངས་དང་རྒྱན་དག་གི་སྒྲ་ཐོས་ནས་ཚུལ་བཞིན་མ་ཡིན་པ་ཡིད་ལ་བྱེད་པ་གཡེངས་པའི་བློས་དགོད་པ་དང་། བསྒེགས་པ་དང་། རྩེས་པ་དེ་ཐོས་ནས་ཁུ་བ་བྱུང་ལ་བྱུང་ནས་ཀྱང་རོ་མྱོང་བར་བྱེད་ཅིང་སོགས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ལྕགས་ཀྱི་མེ་མདག་ཏུ་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་པ་དེ་ལྕགས་ཀྱི་ར་བ་གྲུ་བཞི་པས་བསྐོར་བ། འཁོར་དཔག་ཚད་ལྔ་བརྒྱ་ཡོད་པ་དེའི་ནང་དུ་སེམས་ཅན་དམྱལ་བ་པ་རང་གི་ལས་ཀྱིས་སྲེག་ཅིང་དེར་མེའི་ཆར་དང་ལྕགས་ཀྱི་ཆར་རྒྱུན་མི་འཆད་པར་འབབ་བོ། །དེར་སེམས་ཅན་དམྱལ་བ་པ་དག་ལྕགས་ཀྱི་ཆར་པས་ཡན་ལག་དང་ཉིང་ལག་ཐམས་ཅད་ཕྱེ་མར་རློག་ལ། མེ་མདག་གི་ཆར་པས་གདུངས་ཤིང་སྲེག་གོ །དེར་ཆར་པ་གཉིས་ཀྱིས་ཉམ་ཐག་པ་དག་གནོད་པ་དེ་དག་མྱོང་བར་འགྱུར་ཏེ།
ཇི་ལྟར་སེམས་ཅན་དམྱལ་བ་པའི་མྱོང་བ་དེ་དག་གི་གནོད་པ་གང་ཡིན་པ་དེ་ནི་དཔེ་བྱ་བར་སླ་བ་མ་ཡིན་ནོ། །ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དུས་ལས་འདའ་བར་མི་བྱེད་དེ། རྩུབ་ཅིང་མི་བཟད་པ་ཆ་བ་འཇིག་རྟེན་ཐམས་ཅད་འཇིགས་པར་བྱེད་ཅིང་མི་འདོད་ལ་མི་སྡུག་ཅིང་ཡིད་དུ་མི་འོང་བའི་ལས་བྱས་པའི་ཚོར་བ་དེ་ལྟ་བུ་མྱོང་བར་འགྱུར་རོ། །དེ་ཕྱིས་དེ་ལས་ཡོངས་སུ་ཐར་བར་འགྱུར་ཏེ། གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་དེ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་རྟག་ཏུ་ཆུ་བོ་ཆེན་པོའི་མཉན་པར་འགྱུར། རྟག་ཏུ་འཇིགས་པ་དང་། ནད་བུ་ཅན་དུ་འགྱུར། གླང་པོ་ཆེའི་སོས་འཚོ་ཞིང་དེ་རྟག་ཏུ་འཆི་བས་ཉེན་པར་འགྱུར་རོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་བརྟགས་ན། དེ་འཁོར་གཞན་ཞིག་པ་བཅུ་བདུན་པ་མ་མཐོང་ལ། སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་གྱི་ཉེན་ཀོར་བཅུ་དྲུག་པ་ལས་ཀྱི་ཆོས་ཀྱི་རྣམ་པར་སྨིན་པ་ཡོད་པ་མཐོང་ངོ་། །དེ་སེམས་ཅན་རྣམས་ཀྱི་ལས་དང་འབྲེལ་པ་ལས་ཀྱི་འབྲས་བུ་རྣམ་པར་སྨིན་པ་རྣམ་པ་སྣ་ཚོགས་དག་མཐོང་ནས་འཁོར་བ་ལ་ཡིད་བྱུང་ངོ་། །ཡང་དགེ་སློང་དེ་ཇི་ལྟར་སེམས་ཅན་དམྱལ་བ་ཆེན་པོ་གསུམ་གྱི་འཁོར་གྱི་ལས་ཀྱི་འབྲས་བུའི་དེ་ཁོ་ན་ཉིད་རིག་ཅིང་དེ་ལས་ཀྱི་འབྲས་བུ་རྣམ་པར་སྨིན་པ་དག་འཛིན་པར་བྱེད་ལ། དེ་ལྟ་ཞིང་དམིགས་པར་བྱེད་དེ། སྲིད་པ་དག་ལ་ཡིད་བྱུང་བ་ཐོབ་ཅིང་བདུད་ཀྱི་ཡུལ་གྱི་དངོས་པོ་ལ་མི་འདོད་པ་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་སོ། །དེ་ལྟར་བརྩོན་པའི་དགེ་སློང་དེ་ས་བླའི་གནོད་སྦྱིན་དག་གིས་མཐོང་ནས། བར་སྣང་ལ་སྤྱོད་པའི་གནོད་སྦྱིན་རྣམས་ལ་བསྙད་དོ། །དེ་དག་གིས་ཀྱང་རྒྱལ་པོ་ཆེན་པོ་བཞི་ལ་བསྙད་པ་ནས། དེ་ལྟར་སྔ་མ་བཞིན་དུ་སྦྱར་ཏེ། ཚད་མེད་འོད་ཀྱི་བར་གྱི་ལྷ་རྣམས་ལ་བསྙད་དོ། །སྔ་མ་བཞིན་དུ་སྦྱར་ཏེ།
འཛམ་བུའི་གླིང་དུ་རིགས་ཀྱི་བུ་གྲོང་ཁྱེར་ཆེ་གེ་མོ་ཞིག་ཅེས་བྱ་བ་ནས་སྐྲ་དང་ཁ་སྤུ་བྲེགས། གོས་ངུར་སྨྲིག་བགོས་ཏེ། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས། དེ་ས་གཞན་དགུ་པའི་བར་ལ་ཞུགས་པ་དེ་ཚད་མེད་འོད་ཀྱི་ལྷ་དག་གིས་ཐོས་ནས་དགའ་བར་གྱུར་ཏོ། །ཀྱེ་ལྷ་དག་བདུད་ཀྱི་ཕྱོགས་ནི་དམའ་བར་འགྱུར་ཞིང་དམ་པའི་ཆོས་ཀྱི་ཕྱོགས་ནི་མཐོ་བར་འགྱུར་བ་ནི་བདག་ཅག་དགའོ་ཞེའོ། །དེ་ནས་གཞན་ཡང་དགེ་སློང་དེས་སེམས་ཅན་དམྱལ་བ་གསུམ་མཐོང་ནས་སེམས་ཅན་དམྱལ་བ་བཞི་པ་ངུ་འབོད་ཅེས་བྱ་བ་ལ་རྟོག་པར་བྱེད་དོ། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་བཞི་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་དག་གི་ལས་དང་། ཉེར་བསྡོགས་དང་། མཇུག་བྱས་ཤིང་བསགས་པ་དག་གིས་ལུས་དང་བྲལ་ནས་ངན་འགྲོ་སེམས་ཅན་དམྱལ་བ་ཆེན་པོ་ངུ་འབོད་དུ་སྐྱེ་བར་འགྱུར་བ་མཐོང་ངོ་། །དེ་ལ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པའི་འབྲས་བུ་རྣམ་པར་སྨིན་པ་ནི་སྔར་བཤད་པ་བཞིན་ནོ། །ཆང་དང་སྦྱར་བའི་ཆང་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སེམས་ཅན་དམྱལ་བ་ངུ་འབོད་དུ་སྐྱེ་བར་འགྱུར་རོ། །གང་གིས་ཁྱིམ་གྱི་གནས་ནས་བྱུང་སྟེ། སྡོམ་པ་བླངས། བསམ་གཏན་གྱི་བདེ་བས་སེམས་སྦྱངས་ཤིང་ཞི་བའི་དགེ་སློང་གི་དགེ་འདུན་དག་གི་འཁོར་དུ་ཆང་བྲིམས་ཏེ་ར་རོ་བར་བྱས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་རབ་ཏུ་གདུང་བ་ཆེན་པོས་བྱས་པའི་ཚོར་བ་མྱོང་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ཕྲ་སྐམ་གྱིས་ཁ་གདངས་པའི་ནང་དུ། ཟངས་དམར་པོ་བསྐོལ་བ་རབ་ཏུ་འབར་བ་ལྡུགས་སོ། །དེ་འཐུང་བ་ནི་དེའི་ཚེ་སྔར་མཆུ་སྲེག་གོ །མཆུ་བསྲེགས་ནས་རྐན་སྲེག་གོ །རྐན་བསྲེགས་
ནས་ལྕེ་སྲེག་གོ །ལྕེ་བསྲེགས་ནས་མིད་པ་སྲེག་གོ །དེ་བཞིན་དུ་ཨོལ་གོང་། དེ་བཞིན་དུ་གཉེ་མ་དང་རྒྱུ་མ། དེ་བཞིན་དུ་ཕོ་བ་དང་ལོང་ཀ་བསྲེགས་ནས་རོ་སྨད་དུ་འབྱུང་བར་འགྱུར་ལ། དེ་ལྟར་ཆང་འཐུང་བ་དེ་ནི་མི་དགེ་བ་མྱོང་བར་འགྱུར་ཏེ། དེ་འོ་དོད་འབོད་ཅིང་ངུ་འཁྲུག་ཅིང་སྨྲེ་སྔགས་འདོན་ཏོ། །དེ་ཤིན་ཏུ་འཁྲུག་པ་ན་གཤིན་རྗེའི་མི་དག་གིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། སྡིག་པ་དག་ནི་བྱེད་པ་ན། །འབྲས་བུ་ཚ་བ་ཤེས་པར་གྱིས། །རྨོངས་པ་གང་ཞིག་བདག་མི་ཤེས། །ཕྱི་ནས་དེ་ནི་ཡོངས་གདུང་འགྱུར། །ཇི་ལྟར་བློ་གྲོས་ངན་པ་དག །སྡིག་པ་དག་གིས་ལས་བྱས་པ། །མ་ངུ་དེ་ལྟར་ལ་གོར་སྤྱོད། །སྨྲེ་སྔགས་དོན་མེད་ཅི་ཞིག་འདོན། །སྡིག་པའི་ལས་ཀྱི་འབྲས་བུ་ནི། །མི་ནི་ཀུན་གྱིས་ཐོབ་པར་འགྱུར། །གལ་ཏེ་བདག་ཉིད་བདེ་འདོད་ན། །དེ་ལྟར་སྡིག་པ་བསྟེན་མི་བྱ། །དམྱལ་བ་དྲག་པོ་ཆེན་པོ་པ། །དེ་དག་ལས་ཀྱང་སྡིག་པའི་སེམས། །ཐར་ཀྱང་གཏི་མུག་དབང་སོང་བ། །ཡང་དང་ཡང་དུ་སྡིག་པ་བྱེད། །འདི་ཡིས་དམྱལ་བར་མི་འགྲོ་ཞེས། །སྡིག་པ་ལ་ནི་ཡིད་མ་རྟོན། །མེ་ཆུང་བས་ནི་རི་དང་ཚལ། །ལྗོན་པར་བཅས་པ་སྲེག་པ་བཞིན། །རྨོངས་པ་སྡིག་པ་བྱེད་འདོད་ལ། །གནོད་པ་འབྱུང་ལ་འདོད་མི་བྱེད། །སྡིག་པའི་རྗེས་སུ་འབྲས་བུ་འཇུག །རྒྱུ་དང་རྐྱེན་ལས་བྱུང་བ་མཐོང་། །ཆོས་ནི་ཅི་ཕྱིར་བསྟེན་མི་བྱ། །སྡིག་པའང་ཅི་ཕྱིར་རྣམ་མི་སྤོང་། །སྡིག་པ་སྤངས་པའི་མི་དག་ནི། །སེམས་ཅན་དམྱལ་བ་ཉིད་མི་མཐོང་། །བདག་གི་སྡིག་ལས་འབྲས་བུ་དག །རྨོངས་པ་གང་དག་མི་ཤེས་པས། །དེ་ཡིས་ཉེས་པ་འདི་ཐོབ་སྟེ། །བློ་ངན་ཁྱོད་ནི་དེ་དག་སྤྱོད། །སྡིག་པས་སེམས་ཅན་དམྱལ་བར་འགྲོ། །སྡིག་པས་ཡོངས་སུ་སྲེག་འགྱུར་ཏེ། །སྡིག་པས་མྱ་ངན་འདས་མི་འཐོབ། །སྡིག་པ་ལྟ་བུའི་དགྲ་གཞན་མེད། །སྡིག་པས་སྔོན་ནི་བསླུས་པ་དག །སྡིག་པས་ཡོངས་སུ་སྲེག་
འགྱུར་ཏེ། །སྡིག་པ་དག་ནི་མི་བྱེད་པ། །དེ་ཡི་མདུན་དུ་འགྲོ་མི་འགྱུར། །ལམ་འདི་ཞི་བ་གཙོ་བོ་སྟེ། །གང་དག་སྲེད་དབང་མི་གནས་པའོ། །སྲེད་པ་སྤངས་པའི་མི་དག་ནི། །མྱ་ངན་འདས་དང་ཉེ་བར་གནས། །སྡིག་པ་དག་ནི་བྱེད་ལྡན་ཞིང་། །དགེ་བ་རྣམས་ཀྱང་མི་བྱེད་པ། །སྡིག་པས་སྲེག་འགྱུར་དེ་ལྟ་བས། །སྡིག་པ་ཡིད་ལ་མ་བྱེད་ཅིག །སྡིག་པ་སྤྱོད་པའི་མི་དག་ནི། །ནམས་ཀྱང་བདེ་བ་མི་འཐོབ་བོ། །དེ་ལྟར་གལ་ཏེ་བདག་ཉིད་ཀྱིས། །བདེ་འདོད་ཆོས་ལ་རྟག་ཏུ་སྟེན། །གང་དག་སྡིག་པ་སྟེན་བྱེད་པ། །སྡུག་བསྔལ་དེ་ལས་སྡུག་བསྔལ་མེད། །དེ་ལྟ་བས་ན་སྡིག་མི་བསྟེན། །གལ་ཏེ་སྡུག་བསྔལ་དག་གིས་སྐྱོ། །ལེགས་པས་ལེགས་པའི་དོན་བྱ་འོ། །ལེགས་ལ་སྡིག་པའི་བྱ་བ་དཀའ། །སྡིག་ལ་སྡིག་པའི་བྱ་བ་སླ། །འཕགས་ལ་སྡིག་པའི་བྱ་བ་དཀའ། །དེ་ལྟར་གཤིན་རྗེའི་མི་དེ་རྣམས་ཀྱིས་སེམས་ཅན་དམྱལ་བ་པ་དེ་དག་ལ་ཡང་དང་ཡང་དུ་བཤད། ཡང་དང་ཡང་དུ་བསྒོ་ཞིང་གནོད་པ་རྣམ་པ་སྣ་ཚོགས་པ་དག་བྱེད་དེ། འདི་ལྟ་སྟེ། རི་རབ་ཏུ་འབར་ལ་ཀུན་དུ་འབར་ཞིང་མཁྲེགས་པ་གཉིས་ཤུགས་ཀྱིས་རྒྱུག་སྟེ། ཕན་ཚུན་འདུས་པ་དེ་གཉིས་ཀྱི་བར་དུ་སེམས་ཅན་དམྱལ་བ་པ་དེ་དག་འཇུག་སྟེ། འདི་ལྟ་སྟེ། རི་དེ་གཉིས་ཀྱིས་འཐག་པ་ནི་ཇི་ལྟར་མངོན་པ་མེད་པར་དེ་ལྟར་ཤིན་ཏུ་འཐག་གོ །ཡང་འབྱུང་བར་འགྱུར་ཏེ། བྱུང་ནས་ཀྱང་ཡང་རི་དེ་གཉིས་ཀྱི་དབུས་སུ་བཅུག་ནས་འཐག་གོ །དེའི་སྡིག་པའི་ལས་ཟད་པར་མ་གྱུར་གྱི་བར་དུ་ལོ་འབུམ་ཕྲག་དུ་མའི་བར་དུ་བྱུང་ཞིང་འཐག་གོ །དེ་སེམས་ཅན་དམྱལ་བའི་ཕྱོགས་དེ་ནས་ཐར་ནས་སྐྱབས་འདོད་པ། མགོན་འདོད་པ། དཔུང་གཉེན་འདོད་པ་དག་གཞན་དུ་རྒྱུག་པ་དང་། དེ་དག་གཤིན་རྗེའི་མི་གཞན་རྣམས་དང་ཕྲད་ནས་ལྕགས་ཀྱི་རྫ་མའི་ནང་དུ་ཁ་བུབ་ཏུ་བཅུག་གོ །ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་གྱུར་པ་དེ་སྲིད་དུ་དེ་དག་དེར་ཁ་བུབ་ཏུ་ལོ་འབུམ་སྙེད་དུ་སྲེག་པར་འགྱུར་རོ། །སྐྱབས་འདོད་པ། མགོན་འདོད་པ། བདེ་བ་
འདོད་པ་དེ་དག་རྫ་མར་བཙོ་བ་དེ་དག་ལས་ཐར་ནས་གར་བབ་བབ་ཏུ་འབྲོས་སོ། །ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་པར་མ་གྱུར་པ་དེ་སྲིད་དུ་ལོ་འབུམ་ཕྲག་དུ་མར་དེ་དག་གི་མདུན་དུ་ལྕགས་ཀྱི་ཁྭ་རབ་ཏུ་འབར་བ་དེ་དག་གིས་བཟུང་ནས་དེ་དག་གི་ཡན་ལག་དང་ཡན་ལག །གནད་དང་གནད། ཚིགས་དང་ཚིགས་སུ་བརྒྱའམ་སྟོང་དུ་ཟའོ། །སྐྱབས་འདོད་པ། མགོན་འདོད་པ། དཔུང་གཉེན་འདོད་པ་དེ་དག་དེ་ལས་ཐར་ནས་ཀྱང་གར་བབ་བབ་ཏུ་འབྲོས་སོ། །བཀྲེས་པ་དང་། སྐོམ་པས་གདུངས་པ་དེ་དག་མཚོའི་ཆུ་རབ་ཏུ་དང་བ་ཞིག་རྒྱང་རིང་པོ་ནས་མཐོང་སྟེ། དེ་དག་དེར་བརྒྱུགས་པ་དང་། དེ་དག་ཀྱང་རོ་ཉེ་རབ་ཏུ་བསྐོལ་བས་གང་བ་ཡིན་ཏེ། དེར་ཁྲུས་བྱ་བའི་ཕྱིར་འཇུག་གོ །གང་གི་ཚེ་ཞུགས་པར་གྱུར་པ་དང་། ས་ཕྱོགས་དེ་དག་ལས་ཀྱིས་བྱས་པའི་ཆུ་སྲིན་རྣམས་ཀྱིས་བཟུང་ནས་ཁ་བུབ་ཏུ་དྲངས་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་དེ་དག་རོ་ཉེ་དེའི་ནང་དུ་སྐོལ་ལོ། །ཕྱིས་ལས་ཀྱིས་བྱས་པའི་ཆུ་སྲིན་དེ་དག་ལས་ཐར་བར་འགྱུར་ཏེ། ཐར་ནས་ཀྱང་ཚོར་བས་ཉེན་པ་སྐྱབས་འདོད་པ། མགོན་འདོད་པ། དཔུང་གཉེན་འདོད་པ་དག་གར་བབ་བབ་ཏུ་འབྲོས་སོ། །གལ་ཏེ་མདུན་ན་འཁོད་པའི་གཤིན་རྗེའི་མི་རྣམས་ཀྱིས་མཐོང་ན་དེ་དག་དེར་འཛིན་ཏེ། བཟུང་ནས་ཀྱང་མདུང་རྩེ་རབ་ཏུ་འབར་བ་དག་གིས་འབིགས་པར་བྱེད་དོ། །དེ་དག་ལ་མདུང་རྩེ་དེ་དག་བར་འགའ་རྒྱབ་ཏུ་ཕྱུང་ནས་འབྱུང་། བར་འགའ་གློར་ཕུག་ནས་འབྱུང་། བར་འགའ་མགྲིན་པར་ཕུག་ནས་འབྱུང་སྟེ། སེམས་ཅན་དམྱལ་བ་པ་ཚོར་བས་ཉེན་པ་དེ་དག་གི་སྒྲ་དེ་སེམས་ཅན་དམྱལ་བ་པ་གཞན་དག་གིས་ཕྱོགས་དེ་ནས་གླུ་དབྱངས་ཀྱི་སྒྲར་ཐོས་སོ། །དེ་ཡང་ངུ་བའི་སྒྲ་ཡིན་ན་ལས་ཀྱི་དབང་གིས་སྙན་པར་ཐོས་ཏེ། སྐྱབས་འདོད་པ། མགོན་འདོད་པ།དཔུང་གཉེན་འདོད་པ་དེ་དག་གནས་དེར་འགྲོའོ། །ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་
བྱས་པ་དེ་སྲིད་དུ་ལོ་འབུམ་ཕྲག་དུ་མར་དེ་དག་གཤིན་རྗེའི་མི་དེ་དག་གིས་བཟུང་ནས་མདའ་བོ་ཆེ་དང་མདུང་རབ་ཏུ་འབར་བ་དག་གིས་འབིགས་པར་བྱེད་དོ། །དེ་དག་དེ་ལས་ཐར་བར་འགྱུར་ཏེ། ཐར་ནས་ཀྱང་སྐྱབས་འདོད་པ། མགོན་འདོད་པ་དག་གར་བབ་བབ་ཏུ་འབྲོས་སོ། །དེ་དག་གིས་རྒྱང་མི་རིང་བ་ན་གྲོང་དང་ཁྱིམ་ཕུན་སུམ་ཚོགས་པ་དང་། ཆུ་བོ་དང་ལྟེང་ཀ་ཕུན་སུམ་ཚོགས་པ་མཐོང་སྟེ། དེའི་ཕྱོགས་སུ་དེ་དག་རྒྱུག་ཅིང་དེ་དག་གྲོང་དེའི་ནང་དུ་འཇུག་གོ །གྲོང་དེ་ཐམས་ཅད་ཀྱང་རབ་ཏུ་བསྐོལ་བ་འབར་བ་ཡིན་ལ། ནང་ན་ཡང་སྲོག་ཆགས་མར་ཀོ་ཏ་ཀ་ཁ་རྡོ་རྗེ་ལྟ་བུ་ལ་མཆེ་བ་རྣོ་བ་རྣམས་ཀྱིས་ཤིན་ཏུ་གང་བ་ཡིན་ཏེ། དེ་དག་གང་གི་ཚེ་གྲོང་དེའི་ནང་དུ་ཞུགས་པར་གྱུར་པ་དང་། ཁྱིམ་དེའི་སྒོ་གཅོད་པར་གྱུར་ཏེ། དེ་དག་དེར་སྲོག་ཆགས་མར་ཀོ་ཏ་ཀ་ཁ་མཆེ་བ་རྣོ་ལ་རབ་ཏུ་འབར་བ་རྣམས་ཀྱིས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་ཟ་བར་བྱེད་དོ། །གནོད་པ་རྒྱ་མཚོ་ལྟ་བུར་གྱུར་པ་དེ་ལས་ཐར་ནས། གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། ཆང་བཏུང་བ་ལྡུད་པ་གང་ཡིན་པ་དེའི་ཉེས་པར་བྱས་པའི་ལས་ཀྱི་རྒྱུ་འཐུན་པ་དེས། དེ་སེམས་འཁྲུལ་བར་འགྱུར་ཞིང་དབུལ་བ་དང་། ལམ་པོ་ཆེ་དང་། བཞི་མདོའི་ཚོང་པ་དང་། བྱིས་པ་ཐམས་ཅད་ཀྱི་བཞད་གད་པར་གྱུར་ཅིང་བཞིན་གྱི་མདོག་ངན་པ་དང་། སོ་འབའ་ཞིག་སྣང་བ་དང་། རྐང་པ་ཤིན་ཏུ་རྡོལ་བ་དང་། ལུས་རྟག་ཏུ་བཀྲེས་པ་དང་སྐོམ་པས་གདུངས་པ་དང་། བུ་དང་ཆུང་མ་དང་ཕ་དང་མ་དང་གཉེན་བཤེས་རྣམས་ཀྱིས་བཏང་བར་འགྱུར་རོ། །གང་ཆང་དེ་སྡོམ་པ་བླངས་པ་དག་གིས་འཐུངས་ན་དེ་དག་སེམས་ཅན་དམྱལ་བ་ཆེན་པོ་ངུ་འབོད་དུ་རྣམ་པར་སྨིན་པ་མྱོང་བར་འགྱུར་བར་རིག་པར་བྱའོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་
བརྟགས་ན་དེས་འཁོར་སྒྲ་ཆེན་པོ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར། སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པར་འགྱུར་རོ། །དེ་ལ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ནི་སྔ་མ་བཞིན་ནོ། །ཆང་འཐུང་བ་ནི་གང་གིས་གསོ་སྦྱོང་བ་རྣམས་ལ་ཆང་བླུད་ན་དེས་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྒྲ་ཆེན་པོར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། རོ་ཉེ་རབ་ཏུ་བཞུས་པས་ཐོག་མ་ཉིད་དུ་ཁར་ལྡུགས་སོ། །ཇི་ལྟར་དེ་དག་གིས་གསོ་སྦྱོང་བ་རྣམས་ལ་བླུད་པ་དེ་ལྟར་ལྕགས་ཀྱི་ཕོར་བུ་རབ་ཏུ་འབར་བའི་ནང་ནས་ལྡུད་པ་ན། ཇི་ལྟར་སེམས་ཅན་དམྱལ་བ་གཞན་དག་ན་མེད་པ་སྙིང་རྗེ་བའི་སྒྲ་དེ་ལྟ་བུ་འབྱུང་བར་འགྱུར་རོ། །དེ་ལྟར་སྙིང་རྗེ་བའི་སྒྲ་ཀུན་དུ་འབྱིན་པ་ན་གང་སྒྲ་འབྱུང་བ་དེས་ནམ་མཁའ་དེ་ཐམས་ཅད་ཤིན་ཏུ་གང་བར་འགྱུར་རོ། །ལས་ཀྱི་དབང་གིས་སེམས་ཅན་དམྱལ་བ་པ་དེ་རྣམས་དེ་ལྟར་ཁྲོ་བ་ན་ཁྲོ་བ་དེ་གཤིན་རྗེའི་མི་རྣམས་ཀྱིས་ཐོས་ནས་ཀྱང་ཉིས་འགྱུར་གྱིས་ཁྲོ་བར་བྱེད་དོ། །དེ་ལྟར་ཆང་བཏུང་བའི་འཐུང་བ་དེ་མ་ལེགས་པ་ཐམས་ཅད་བྱེད་པ་ཡིན་ཏེ། སེམས་མཉམ་པར་བཞག་པས་དགེ་བའི་ཚོགས་འཛིན་པར་གྱུར་པའི་སེམས་དེ་ཆང་གིས་རྣམ་པར་འཁྲུག་པར་བྱེད་དོ། །རྣམ་པར་འཁྲུགས་པའི་སེམས་དེས་ནི་བྱ་བ་དང་བྱ་བ་མ་ཡིན་པ་སོ་སོའི་ངོ་མི་ཤེས་སོ། །དེས་ན་མི་དགེ་བའི་ཚོགས་ཐམས་ཅད་སློང་བར་འགྱུར་རོ། །གང་ཆང་བཏུང་བ་ལྡུད་པ་ནི་དེའི་རྒྱུ་མི་དགེ་བར་འགྱུར་ཏེ། རྒྱུ་ཇི་ལྟར་བྱས་པ་དེ་ལྟར་འབྲས་བུ་ཉེས་པ་དང་བཅས་པར་འགྱུར་ལ་དེ་གནོད་པ་དེས་ཤིན་ཏུ་རྣོ་བ་དང་ཤིན་ཏུ་ཡུན་རིང་བར་གནོད་པ་དུ་མ་འབྱུང་ངོ་། །ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ། སེམས་ཅན་དེ་དག་
སེམས་ཅན་དམྱལ་བ་སྒྲ་ཆེན་པོ་དེར་གནོད་པ་ཆེན་པོའི་སྒྲ་འབྱིན་པ་དུ་མ་དག་འབྱུང་བར་འགྱུར་ཏེ། དེས་ན་སེམས་ཅན་དམྱལ་བ་དེ་སྒྲ་ཆེན་པོ་ཞེས་བྱའོ། །དེ་དག་ཕྱིས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་དེ་མི་རྣམས་དང་སྐལ་བ་མཉམ་པར་གལ་ཏེ་མིར་སྐྱེས་ན། རྒྱུ་དང་འཐུན་པའི་འབྲས་བུས་དེ་ཡིད་མི་གཞུངས་པར་འགྱུར་ཞིང་དེ་དུས་ཐུང་ངུས་ཀྱང་བརྗེད་པར་འགྱུར། དེའི་ཡིད་གཞུངས་པ་ཆུང་བས་ལོངས་སྤྱོད་མེད་པར་འགྱུར་ཞིང་སྐྱེ་བོ་ཡང་དགའ་བར་མི་འགྱུར། དེའི་ནོར་དེ་དག་མེད་པར་འགྱུར་ཞིང་ནད་ཆུང་ངུས་ཀྱང་འཆི་བར་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན་དེས་ཀྱེ་མ་སེམས་ཅན་དམྱལ་བ་ངུ་འབོད་ཀྱི་འཁོར་བཅུ་དྲུག་མཐོང་སྟེ། འདི་ལྟ་སྟེ། སྒྲ་ཆེན་པོ་དང་། ཐམས་ཅད་སྒྲ་འབྱིན་པ་དང་། སྐྲ་མེ་འབར་བ་དང་། མེའི་ཕྱེ་མ་སྲིན་བུ་དང་། ལྕགས་ཀྱི་མེ་འབར་བའི་གཏུན་ཤིང་དང་། རྡོ་མེ་འབར་བ་ཆར་ལྟར་འབབ་པ་དང་། གསོད་མེད་དང་། ལྕགས་ཚལ་དགོན་པ་དང་། རབ་རིབ་ཀུན་བསགས་དང་། གཤིན་རྗེའི་མཚམས་ཀྱི་དགོན་པ་དང་། ཤིང་ཤལ་མ་ལའི་ཚལ་ཆེན་དང་། ཆུ་ཤིང་བསྲེགས་པ་དུད་པའི་ཚལ་དང་། མེ་མདག་དུད་པའི་ཚལ་དང་། གློག་གི་ན་བུན་ཚལ་དང་། ཀུན་དུ་རྟོག་བྱེད་དེ། དེ་དག་ནི་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་བཅུ་དྲུག་ཡིན་ནོ། །དེར་ལས་ཀྱི་རྣམ་པར་སྨིན་པ་གང་གིས་སྐྱེ་བར་འགྱུར་སྙམ་ནས་དགེ་སློང་དེས་བརྟགས་ན། དེར་སེམས་ཅན་དམྱལ་བ་སྒྲ་ཆེན་པོའི་འཁོར་མཐོང་ནས་འཁོར་གཉིས་པ་ཐམས་ཅད་སྒྲ་འབྱིན་ལ་རྟོག་པར་བྱེད་དོ། །དེས་བརྟགས་ན་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ནི་སྔ་མ་བཞིན་ནོ། །ཆང་འཐུང་བ་ནི་གང་གིས་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་དང་། དང་པོ་སྡོམ་པ་བླངས་མ་ཐག་ལ་ཆང་བླུད་ན་དེ་ལུས་དང་
བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཐམས་ཅད་སྒྲ་འབྱིན་དུ་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། ཇི་ལྟ་ཇི་ལྟར་སེམས་ཅན་དམྱལ་བ་པ་རྣམས་ལྕགས་ཀྱི་གཏུན་ཤིང་གིས་རྡེག་པ་ན་དེ་ལྟ་དེ་ལྟར་སྒྲ་ཆེན་པོ་འབྱིན་ཏེ། དེས་སེམས་ཅན་དམྱལ་བའི་འཁོར་དེ་དག་ཐམས་ཅད་གང་བར་འགྱུར་རོ། །གལ་ཏེ་ཁོར་ཡུག་དང་། ཁོར་ཡུག་ཆེན་པོའི་རི་དག་དང་། ཆུ་བོའི་འཁོར་དག་མེད་ན། སྒྲ་དེས་འཛམ་བུའི་གླིང་ལ་སོགས་པ་མིའི་གནས་བཞི་པོ་དེར་ཐམས་ཅད་དུ་འབྱུང་བར་འགྱུར་རོ། །དེའི་ངུད་མོའི་སྒྲ་འབྱིན་པ་དེས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྙིང་རྗེ་ཞིང་དེ་སྲིད་དུ་རོ་མེད་པ་ཡིན་ཏེ། དེ་དག་རང་གི་ལས་དང་འཐུན་པར་སེམས་ཅན་དམྱལ་བ་པ་དེ་དག་གིས་དེ་སྲིད་དུ་ངུ་བའི་སྒྲ་འབྱིན་ཏོ། །དེ་དག་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན་ཆུ་དཀོན་པའི་ཡུལ་དང་འབྲོག་ཏུ་སྐྱེ་བར་འགྱུར་ཏེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པའི་འབྲས་བུ་ནི་སྔ་མ་བཞིན་ནོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་འཁོར་སྐྲ་མེ་འབར་བ་ཞེས་བྱ་བ་མཐོང་ངོ་། །དེར་སེམས་ཅན་དམྱལ་བ་པ་དག་ལས་ཀྱི་རྣམ་པར་སྨིན་པ་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །དགེ་བསྙེན་བསླབ་པའི་གཞི་ལྔ་ཡོད་པ་ལ་ཆང་འཐུང་བ་ཡོན་ཏན་ཡིན་པར་བསླབ་པའི་གཞི་འཛིན་དུ་བཅུག་ན། དེ་ལུས་
དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྐྲ་མེ་འབར་བར་སྐྱེ་བར་འགྱུར་རོ། །དེར་མེའི་ཆར་རབ་ཏུ་འབར་བ་གང་ཡིན་པ་དེས་སེམས་ཅན་དམྱལ་བ་པ་དག་གི་སྐྲ་ལ་སོགས་པ་ནས་རྐང་པའི་བར་དག་ཏུ་སྲེག་ཅིང་འཚེད་ལ་རབ་ཏུ་འབར་རོ། །སེམས་ཅན་དམྱལ་བ་པ་དེ་དག་གི་རྐང་པ་དག་ལ་ནི་ཁྱི་དང་། གླད་པ་ལ་ནི་བྱ་རྒོད་མཆུ་རབ་ཏུ་འབར་བ་དང་། དབུས་སུ་ནི་ཝ་དག་གིས་ཟ་སྟེ། དེ་ལྟར་རང་གི་མི་དགེ་བའི་ལས་བྱས་པས་སྲེག་ཅིང་ཟའོ། །ཉོན་མོངས་པ་དེ་དག་ངུ་བཞིན་དུ། གཤིན་རྗེའི་མི་རྣམས་ལ་འདི་སྐད་ཅེས་སྨྲས་སོ། །བདག་ཅག་སྙིང་རྗེའི་གནས་སུ་གྱུར། །ཁྱོད་ལ་སྙིང་རྗེ་མེད་དམ་ཅི། །ཁྱོད་ལ་ཞི་བ་མེད་དམ་ཅི། །བདག་ལ་ཁྱེད་ཅག་སྙིང་མི་རྗེ། །དེ་དག་གིས་དེ་སྐད་སྨྲས་པ་དང་། གཤིན་རྗེའི་མི་དག་གིས་སླར་སྨྲས་པ། །ཇི་ལྟར་ཁྱེད་ཅག་གཏི་མུག་གིས། །བསྒྲིབས་པའི་སྡིག་ལས་མང་པོ་བྱས། །མི་བཟད་པ་ཡིས་ཁྱེད་ཅག་བདས། །དེ་ནི་ངེད་ཀྱི་རྒྱུ་མ་ཡིན། །རྨོངས་པས་ཚུལ་ཁྲིམས་མ་བསྲུངས་ཤིང་། །སྡིག་པ་མང་པོ་བསགས་པ་བྱས། །སྡིག་པ་མང་པོ་བསགས་པ་ཡི། །འབྲས་བུ་དེ་ནི་ཉེ་བར་གནས། །དེ་ལ་བདག་ཅག་རྒྱུ་མེད་དེ། །འདི་ནི་ཁྱེད་ཅག་ཉིད་ཀྱི་རྒྱུ། །གང་དག་སྡིག་པའི་ལས་བྱེད་པ། །དེ་ནི་ལས་དེའི་རྒྱུ་ཡིན་ནོ། །སྲེདཔའི་ཞགས་པས་བསླུས་པ་ཡི། །ཁྱེད་ཀྱིས་སྡིག་པ་གང་བྱས་པ། །དེ་ནི་ཁྱེད་ལ་དྲག་ཏུ་འཚེད། །ངེད་ལ་ཅི་ཞིག་སྨྲ་བར་བྱེད། །སྡིག་པ་རྒྱུ་མེད་མ་ཡིན་ཏེ། །སྡིག་མ་བྱས་ལ་རྣམ་མི་སྨིན། །གང་གིས་སྡིག་པ་གང་བྱས་པ། །དེ་ལ་དེ་ནི་ཡོངས་སུ་སྨིན། །ཆང་ནི་དུག་གི་མཆོག་ཡིན་ཏེ། །ཆང་འཐུང་བ་ལ་བསྟེན་མི་བྱ། །ཆང་འཐུང་བ་ལ་བསྟེན་པ་ནི། །དགེ་བའི་ཆོས་རྣམས་ཉམས་པར་འགྱུར། །གང་གིས་རྟག་ཏུ་ཆང་བསྟེན་པ། །དེ་ཡི་བློ་ནི་མི་བརྟན་ཞིང་། །བློ་ཡོ་བ་ལ་ཆོས་མེད་དེ། །དེ་ལྟ་བས་ན་ཆང་སྤོངས་ཤིག །ཉམས་བྱེད་ནང་ན་ཉམས་མཆོག་ནི། །ཆང་ཞེས་མཁས་པ་རྣམས་ཀྱིས་བཤད། །མི་ལས་ཉམས་པས་ཉམས་བྱེད་པ། །
དེ་ལྟ་བས་ན་ཆང་མི་བསྟེན། །ཆང་འཐུང་བ་ལ་སྟེན་བྱེད་པ། །མི་སྡུག་སྡིག་པའི་ཆོས་ཡིན་ཏེ། །དེ་ལྟ་བས་ན་དུག་ལྟ་བུའི། །ཆང་འཐུང་བ་ནི་རྣམ་པར་སྤོངས། །ཆང་འཐུང་བ་ལ་གནས་པའི་སྐྱོན། །ནོར་ཟད་ངན་པར་རྗོད་བྱེད་ཅིང་། །ལེ་ལོ་ཤིན་ཏུ་སྐྱེད་བྱེད་པས། །དེ་ལྟ་བས་ན་དེ་སྤོངས་ཤིག །ཆང་གིས་འདོད་ཆགས་སྐྱེད་བྱེད་ཅིང་། །དེ་བཞིན་ཁྲོ་དང་གཏི་མུག་དག །ཡང་དང་ཡང་དུ་སྐྱེད་བྱེད་པས། །དེ་ལྟ་བས་ན་ཆང་སྤོངས་ཤིག །དེ་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་རང་གི་ལས་ཀྱི་འབྲས་བུ་ལ་སྤྱོད་པའི་སེམས་ཅན་དམྱལ་བ་པ་དག་སེམས་ཅན་དམྱལ་བ་སྐྲ་མེ་འབར་བར་འཚེད་དོ། །དེ་དག་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དང་རྒྱུ་འཐུན་པའི་འབྲས་བུས་གང་དུ་རྣམ་པ་ཐམས་ཅད་དུ་ཆང་མེད་པའི་ཡུལ་དེ་ལྟ་བུར་སྐྱེ་བར་འགྱུར་ཞིང་གཟུགས་དང་རོ་མངོན་པར་ཤེས་པར་མི་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ངུ་འབོད་ཀྱི་འཁོར་ལ་རྟོག་པར་བྱེད་དེ། སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་གཞན་གང་ཞིག་ཡོད་སྙམ་མོ། །དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་མེའི་ཕྱེ་མ་སྲིན་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་ཀྱི་རྣམ་པར་སྨིན་པ་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །ཆང་འཚོང་བ་ནི་ཆུ་མང་བར་བྱེད་ལ་རིན་ཐང་གཞན་ཡིན་ན་གཞན་དུ་འཚོང་སྟེ། དེ་ལ་སྐྱོན་ཁ་ན་མ་ཐོ་བ་བརྫུན་དང་། མ་བྱིན་པར་ལེན་པ་དང་། ཆང་འཐུང་བ་དེ་དག་བྱུང་ངོ་། །དེ་ལུས་དང་བྲལ་ནས་ངན་
འགྲོ་ལོག་པར་ལྟུང་བ་སེམས་ཅན་དམྱལ་བ་མེའི་ཕྱེ་མ་སྲིན་བུར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ནད་བཞི་བརྒྱ་རྩ་བཞི་འབྱུང་སྟེ། རླུང་ལས་གྱུར་པ་བརྒྱ་རྩ་གཅིག་དང་། མཁྲིས་པ་ལས་གྱུར་པ་བརྒྱ་རྩ་གཅིག་དང་། བད་ཀན་ལས་གྱུར་པ་བརྒྱ་རྩ་གཅིག་དང་། འདུས་པ་ལས་གྱུར་པ་བརྒྱ་རྩ་གཅིག་སྟེ། སེམས་ཅན་དམྱལ་བ་པ་དག་དང་འཐུན་པར་འབྱུང་ངོ་། །གང་ནད་གཅིག་གིས་ཉི་མ་གཅིག་ཏུ་འཛམ་བུའི་གླིང་དང་། བྱང་གི་སྒྲ་མི་སྙན་དང་། ནུབ་ཀྱི་བ་ལང་སྤྱོད་དང་། ཤར་གྱི་ལུས་འཕགས་ཀྱི་མི་དེ་དག་ཀུན་མ་ལུས་པར་འཆི་བར་བྱེད་པའི་ནད་ཀྱི་རྣམ་པ་དེ་ལྟ་བུ་དག་སེམས་ཅན་དམྱལ་བ་པ་དེ་དག་ལ་འབྱུང་བར་འགྱུར་རོ། །གནོད་པ་གཞན་དག་ཡང་དང་ཡང་དུ་འབྱུང་སྟེ། འདི་ལྟ་སྟེ། སེམས་ཅན་དམྱལ་བ་པ་རང་གི་ལུས་དེ་དག་ལ་སྲིན་བུ་དག་འབྱུང་བར་འགྱུར་ཏེ། གང་པགས་པ་དང་། ཁྲག་དང་། ཤ་དང་། ཚིལ་དང་། རུས་པ་དང་། རྐང་དག་ལ་ཕུག་ཅིང་ཕུག་ཅིང་འཐུང་ངོ་། །དེ་ལྟར་མགོན་མེད་པ། གཤིན་རྗེའི་མིས་འཇིགས་ཤིང་ངུ་སྐད་འབྱིན་པ་ན་མེའི་གནོད་པ་རྣམ་པ་དུ་མ་འབྱུང་སྟེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་མེ་དེས་སྲེག་ཅིང་འཚེད་ལ་རབ་ཏུ་འབར་བར་བྱེད་དོ། །དེ་དག་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། དེ་ཆང་གི་ཉོ་ཚོང་གི་རྒྱུ་འཐུན་པའི་འབྲས་བུས་སྡུག་བསྔལ་བ་དང་དབུལ་བར་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ངུ་འབོད་ཀྱི་འཁོར་ལ་བརྟགས་ན་སེམས་ཅན་དམྱལ་བ་ལྕགས་ཀྱི་མེ་འབར་བའི་གཏུན་ཤིང་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་
པར་གཡེམ་པ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པ་ནི་སེམས་ཅན་དམྱལ་བ་ལྕགས་ཀྱི་མེ་འབར་བའི་གཏུན་ཤིང་དུ་སྐྱེ་བར་འགྱུར་ཏེ། སྔ་མ་བཞིན་ནོ། །སེང་གེ་དང་། སྟག་དང་། གཟིག་དང་། རི་སྐེགས་དང་། ཤང་ཤང་ཏེའུ་དག་ཆང་གིས་བྲིད་དེ་ཉམས་པར་བྱས་ལ་བཟུང་ནས་བསད་པ་གང་ཡིན་པ་དེ་ནི་དེར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ལྕགས་ཀྱི་གཏུན་ཤིང་རབ་ཏུ་འབར་བ་དག་འབྱུང་ངོ་། །ལས་ཀྱིས་བྱས་པའི་གཏུན་ཤིང་དེ་རྣམས་ཀྱིས་ཡན་ལག་དང་ཉིང་ལག་ཐམས་ཅད་ཕྱེ་མར་རློག་ཅིང་གསོད་དེ་ཇི་ལྟར་བྱེ་མའི་ཚད་ཙམ་དུ་དེ་ལྟར་ཡན་ལག་དང་ཉིང་ལག་ཐམས་ཅད་ཕྱེ་མར་རློག་གོ །ཚོར་བ་དེས་ཉམ་ཐག་པ་དག་འོ་དོད་འབོད་ངུ་སྐད་འབྱིན། སྨྲེ་སྔགས་འདོན་ཅིང་ཕན་ཚུན་དུ་རྒྱུག་སྟེ། བརྒྱུགས་པ་དང་། གཏུན་ཤིང་རབ་ཏུ་འབར་བ་རྣམས་ཀྱིས་ཀུན་དུ་འཚོག་གོ །ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཚོར་བས་ཉེན་པའི་སེམས་ཅན་དེ་དག་གཤིན་རྗེའི་མི་རྣམས་ཀྱིས་བཟུང་ནས་སྤུ་གྲི་དག་གིས་ཡན་ལག་དང་ཉིང་ལག་ཐམས་ཅད་འཇོག་ཅིང་གཤོག་ལ་འདྲལ་ལོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པས་དྲེག་ཅན་དུ་སྐྱེ་བར་འགྱུར། ལས་དེ་དང་རྒྱུ་འཐུན་པས་དབུལ་བར་འགྱུར་ཞིང་སྨན་པ་དང་། སྨན་སྦྱོར་བ་དང་བྲལ་བའི་ཡུལ་ངན་པ་དང་། རྩྭ་དང་། མྱ་ངམ་དང་། མེས་ཚིག་པས་འཇིག་པ་མང་བའི་ཡུལ་ངན་པ་དག་ཏུ་སྐྱེ་བར་འགྱུར་རོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་དགུ་པ། དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་
འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་འཁོར་རྡོ་མེ་འབར་བ་ཆར་ལྟར་འབབ་པ་ཞེས་བྱ་བ་མཐོང་ངོ་། །དེར་སེམས་ཅན་དམྱལ་བ་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སེམས་ཅན་དམྱལ་བ་རྡོ་མེ་འབར་བ་ཆར་ལྟར་འབབ་པར་སྐྱེ་བར་འགྱུར་རོ། །ཆང་ནི་གཡུལ་འགྱེད་པའི་དོན་དུ་ཇི་ལྟར་གླང་པོ་ཆེ་ཆེན་པོས་གཡུལ་དུ་མི་མང་པོ་གསོད་པར་འགྱུར་ཏེ། དེ་ལས་བདག་ཅག་རྒྱལ་བར་འགྱུར་བར་བྱའོ་སྙམ་ནས་གླང་པོ་ཆེ་དག་ལ་ཆང་བླུད་དེ། མི་བསད་ན་དེ་དག་ལས་དེའི་རྣམ་པར་སྨིན་པས་སེམས་ཅན་དམྱལ་བ་རྡོ་མེ་འབར་བ་ཆར་ལྟར་འབབ་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་དེར་ལས་ལས་སྐྱེས་པ་མེ་རབ་ཏུ་འབར་བའི་གླང་པོ་ཆེ་སྲོག་ཐམས་ཅད་འཕྲོག་པར་བྱེད་པ་འབྱུང་སྟེ། དེས་མི་དེ་བཟུང་ནས་ཡན་ལག་དང་ཉིང་ལག་ཐམས་ཅད་ཕུག་ཅིང་ཕྱེ་མར་རློག་པར་བྱེད། འཕེན་པར་བྱེད་ཅིང་རྣམ་པར་འཚེ་བར་བྱེད། རྣམ་པར་འཁྲུག་པར་བྱེད་ཅིང་ཡན་ལག་དང་ཉིང་ལག་སོ་སོར་འབྱེད་པར་བྱེད་དོ། །དེ་ནས་དེ་ལས་ཐར་བར་འགྱུར་ཏེ། ཕྱི་ནས་དེ་གཤིན་རྗེའི་མི་རྣམས་ཀྱིས་གཟུང་ངོ་། །བཟུང་ནས་ཟངས་དམར་པོ་རབ་ཏུ་བསྐོལ་བའི་ནང་དུ་བཅུག་སྟེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་ཀྱི་བར་དུ་དེ་ལོ་འབུམ་ཕྲག་དུ་མར་སྲེག་ཅིང་འཚེད་ལ་གསོད་པར་བྱེད་དོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེས་གླང་པོ་ཆེ་བསད་པར་བཤམས་ཀྱང་གླང་པོ་ཆེ་དེས་གསོད་པར་འགྱུར། དབུལ་ཞིང་བྱད་བཞིན་ངན་ལ་རྐང་པ་དང་ལག་པ་བོང་བུའི་རྐང་པ་ལྟར་འགྱུར་
ཞིང་ལུས་རྟག་ཏུ་རྩུབ་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆེན་པོ་འཆི་མེད་ཅེས་བྱ་བ་མཐོང་ངོ་། །དེར་མི་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །ཆང་ནི་བུད་མེད་གཞན་འོས་པ་མ་ཡིན་པ་ལ་བླུད་དེ་བླུད་ནས་ཀྱང་མྱོས་པས་འཁྲུལ་པར་བྱས་ལ། དེ་དང་ལྷན་ཅིག་ཏུ་མི་ཚངས་པར་སྤྱད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་འཆི་མེད་དུ་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ཁྱི་རབ་ཏུ་འབར་བ་དག་གིས་རླིག་པ་འབྱིན་པར་བྱེད་དོ། །ཕྱུང་ཞིང་བཏོན་ནས་ཀྱང་ཡང་ཤིན་ཏུ་འཇམ་ཞིང་སྡུག་པ་སྐྱེ་བར་འགྱུར་རོ། །ཡང་འབྱིན་པར་བྱེད་དེ། གནོད་པ་དོན་གྱིས་བྱེད་པས་ངུ་སྐད་འབྱིན་པར་བྱེད་དོ། །དེ་ལྟར་དེ་དག་དེ་ལས་ཐར་ནས་གར་བབ་བབ་ཏུ་འབྲོས་སོ། །དེ་དག་བྲོས་པའི་མདུན་ན་ངམ་གྲོག་ཆེན་པོ་དེ་ལ་བྱ་རོག་དང་། བྱ་རྒོད་དང་། འུག་པ་དང་། བྱ་དྷྱ་མི་ཀ་ལྕགས་ཀྱི་མཆུ་དང་སེན་མོ་རབ་ཏུ་འབར་བ་རྣམས་ཀྱིས་གང་བ་མཐོང་ངོ་། །ངམ་གྲོག་དེ་ལས་སེམས་ཅན་དམྱལ་བ་འཁམས་ཏེ་བཞིན་གྱུར་པ། མགོན་འདོད་པ། སྐྱབས་འདོད་པ་དེ་དག་རབ་ཏུ་ལྟུང་ངོ་། །དེ་ནས་བྱ་རོག་དང་། བྱ་རྒོད་དང་། འུག་པ་མཆུ་དང་སེན་མོ་རབ་ཏུ་འབར་བ་རྣམས་ཀྱིས་ཡན་ལག་དང་ཉིང་ལག་སོ་སོར་ཕྱེ་སྟེ་ཟའོ། །ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་ཡང་སྐྱེ་བར་འགྱུར་རོ། །དེ་དག་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལན་གྲངས་གཞན་
ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་སྔ་མ་བཞིན་དུ་སྦྱར་ཏེ། ལས་དེའི་རྒྱུ་དང་འཐུན་པའི་འབྲས་བུས་རྒྱལ་པོས་བཟུང་ཞིང་ལུས་མདོག་ངན་པ་དང་། བཞིན་མདོག་ངན་པར་གྱུར་ཅིང་དེ་ཉིད་དུ་འཆི་བའི་དུས་བྱེད་པར་འགྱུར་བ་མཐོང་ངོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་སྔ་མ་བཞིན་དུ་དེས་མཐོང་ངོ་། །ཆང་ནི་དུག་དང་སྦྱར་ནས་དགྲ་གསད་པར་བྱ་བའི་ཕྱིར་བླུད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་འཁོར་ལྕགས་ཚལ་དགོན་པར་སྐྱེ་བར་འགྱུར་རོ། །འདི་ལྟ་སྟེ། ལྕགས་ཀྱི་འཁོར་ལོ་འཁོར་བ་རབ་ཏུ་འབར་བ་དེར་སེམས་ཅན་དམྱལ་བ་པ་དེ་དག་ལྕགས་ཀྱི་ཐག་པས་བཅིངས་ནས་ལྕགས་ཀྱི་འཁོར་ལོས་སྐོར་བར་བྱེད་དོ། །སྐོར་བ་ན་དགྲ་གཤིན་རྗེའི་མི་རྣམས་ཀྱིས་ཡན་ལག་དང་ཉིང་ལག་ཐམས་ཅད་ལ་མཚོན་ཆ་དག་གིས་འདེབས་པར་བྱེད་དེ། ཇི་ལྟར་ཡུངས་འབྲུ་ཙམ་དུ་སེམས་ཅན་དམྱལ་བ་པ་དེ་དག་གི་ལུས་ཀྱི་ཤ་དེ་དག་ལ་ལྷག་མ་མ་ལུས་པར་བྱེད་ཀྱང་དེའི་ལས་ཉེས་པར་བྱས་པའི་རྣམ་པར་སྨིན་པས་དུས་ལས་འདའ་བར་ནི་མི་བྱེད་དོ། །གལ་ཏེ་དེ་དག་ལས་ཟད་ནས་འཁོར་ལོ་འཁོར་བ་དེ་ལས་ཐར་ནས་གར་བབ་བབ་ཏུ་འབྲོས་པ་དང་། དེ་དག་ལས་ཀྱིས་བྱས་པའི་ལྕགས་ཀྱི་སྦྲུལ་རྣམས་ཀྱིས་བཟུང་བར་འགྱུར་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་། སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་ཟའོ། །དེ་ཕྱིས་སེམས་ཅན་དམྱལ་བ་དེ་དག་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་སྦྲུལ་འཛིན་པའམ་མགོའི་ནོར་བུ་འབྱིན་པར་འགྱུར་
ཡང་ལས་དེ་དང་རྒྱུ་འཐུན་པའི་འབྲས་བུས་སྦྲུལ་རྣམས་ཀྱིས་སྲོག་དང་འབྲལ་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན་དེས་འཁོར་རབ་རིབ་ཀུན་བསགས་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །སེམས་ཅན་སོ་སོ་འཚོ་བར་བྱ་བའི་ཕྱིར་ཆང་འཐུང་བའི་ཟོང་ངམ་རིན་བྱིན་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རབ་རིབ་ཀུན་བསགས་སུ་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་དེ་ཐམས་ཅད་མུན་པ་ཡིན་ཏེ། དེར་གནོད་པ་མྱོང་བ་ནི་གཤིན་རྗེའི་མི་དག་ཀྱང་མི་མངོན་ལ་འདི་དག་སུས་བྱས་ཞེས་གནོད་པ་ཡང་མི་མངོན་ཏེ། མུན་གནག་ལས་བྱུང་བའི་མེའི་ནང་དུ་འཇུག་གོ །མེ་དེའི་འོད་ཀྱང་ཤིན་ཏུ་མི་གསལ་བ་ཡིན་ཏེ། བར་སྐབས་སྐྲའི་རྩེ་མོ་ཙམ་ཡང་མེད་པའི་མེ་དེའི་ནང་དུ་དེ་དག་སྲེག་ཅིང་འཚེད་ལ་གདུངས་སོ། །ངུ་ཞིང་སྐད་འབྱིན་པ་ན་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སོག་ལེ་དག་གིས་ཀྱང་མགོ་ལ་སོགས་པ་ནས་རྐང་པའི་བར་དུ་ཕྱེད་མར་གཤེག་གོ །ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་རྟག་ཏུ་སྐོམ་པ་དང་བཀྲེས་པས་གདུངས་པར་འགྱུར་ཞིང་དེར་ནོར་རྫས་དང་འབྲལ་བར་འགྱུར་ལ་གང་ན་བཟའ་བཏུང་ཉུང་བའི་གླིང་དེ་དག་ཏུ་སྐྱེ་བར་འགྱུར་བ་མཐོང་ངོ་། །དེ་ནས་གཞན་ཡང་
དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་གཤིན་རྗེའི་མཚམས་ཀྱི་དགོན་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །གང་གིས་ནད་མི་བཟད་པས་ཐེབས་པ་དང་། བུ་བཙས་པ་དག་ལ་ཆང་འཐུང་བའི་ཟོང་དང་རིན་གྱི་དོན་དུ་གོས་ཀྱི་རྒྱུའམ་ཟས་ཀྱི་རྒྱུ་བྱིན་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་གཤིན་རྗེའི་མཚམས་ཀྱི་དགོན་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། རྐང་པ་དང་། སེན་མོ་ལ་སོགས་པ་གཤིན་རྗེའི་མིའི་ཁ་འབར་རབ་ཏུ་འབར་བ་དག་གིས་ཟ་བར་བྱེད་དོ། །ཟོས་ནས་ཀྱང་གནོད་པ་འབྱུང་བར་འགྱུར་ཏེ། འདི་ལྟ་སྟེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་མདུང་ཐུང་གི་རྩེ་མོ་རབ་ཏུ་འབར་བ་དག་གིས་ལོ་འབུམ་ཕྲག་དུ་མར་འཚེད་ཅིང་སྲེག་ལ་གཤེག་ཅིང་གསོད་དོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་ཡུལ་ངན་པ་དང་། གནས་ངན་པ་དང་། རི་བྲགས་ངན་པ་དག་ཏུ་ཕག་འཚོ་བ་དང་ལོང་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཤིང་ཤལ་མ་ལིའི་ཚལ་ཞེས་བྱ་བ་ཡོད་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན་གང་གིས་སྲོག་
གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ནི་སྔ་མ་བཞིན་ནོ། །ཆང་འཐུང་བ་ནི་མཆོག་ཏུ་མང་པོས་ཆང་ཤིན་ཏུ་ར་རོ་བར་འགྱུར་བའི་རྫས་དེ་དག་སྦྱོར་བར་བྱེད་དེ། དེའི་ཆང་ཇི་ལྟར་ཁ་ཅིག་ནི་དར་བ་ལྟ་བུ་དང་། ཁ་ཅིག་ནི་ཆུ་ལྟ་བུ་དང་། ཁ་ཅིག་ནི་ཞོག་ཆུ་ལྟ་བུ་དེ་ལྟར་བཅོས་ནས་འབྲོག་དགོན་པར་ཞུགས་པའི་དེད་དཔོན་དག་ལ་བླུད་དེ། དེ་ཡང་ར་རོ་ཞིང་ཤིན་ཏུ་ར་རོ་བར་འགྱུར་བ། དེ་ཀུན་གྱིས་ཤིན་ཏུ་ར་རོ་བར་བྱས་ཏེ་ར་རོ་བ་དེ་དག་དེས་བསད་ནས་ནོར་གང་དང་གང་ཡོད་པ་དེ་དང་དེ་དག་ཕྲོགས་ན་དེས་བསླུས་པ་ཡིན་པས་དེ་འཇིག་རྟེན་ན་ཆོམ་རྐུན་པ་ཞེས་བྱའོ། །དེའི་ལས་ཀྱིས་བསྐྱོད་པས་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཤིང་ཤལ་མ་ལི་ཆེན་པོའི་ནགས་སུ་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། མེ་རབ་ཏུ་འབར་བའི་རྡོའི་ཆར་གྱི་ཚོགས་ཀྱིས་ལུས་དག་ཀུན་དུ་སྲེག་ཅིང་འབིགས་ལ་གཅོད་པར་བྱེད་དེ་སའི་བར་དུ་སྲེག་པར་བྱེད་དོ། །ཆུ་བོ་རབ་ཏུ་བསྐོལ་བའི་མེ་མདག་མ་དམར་པོ་ཚ་བས་བཞུས་པའི་ཆུ་རྟག་ཏུ་འཇིགས་པ་ཞེས་བྱ་བ་ཡོད་དེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཟངས་དང་རོ་ཉེར་བསྲེས་པ་རབ་ཏུ་བསྐོལ་བའི་ཆུ་བོ་དེར་ལོ་འབུམ་ཕྲག་དུ་མར་སྲེག་ཅིང་འཚེད་ལ་གཤིན་རྗེའི་མི་རྣམས་ཀྱིས་ཀྱང་རལ་གྲི་དང་མདའ་བོ་ཆེ་རབ་ཏུ་འབར་བ་དག་གིས་ཀུན་དུ་འདེབས་པར་བྱེད་དོ། །དེ་ཕྱིས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་མིག་གི་མདོག་གནག་ཅིང་རྟག་ཏུ་ཁྲོ་ལ་ཕྲག་དོག་མང་པོར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཤིང་ཤལ་མ་ལི་ཆེན་པོའི་ཚལ་ཡོད་པ་
མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་བར་འགྱུར་ཏེ། སྔ་མ་བཞིན་ནོ། །ཆང་གི་དབང་དུ་བྱས་ནས་སིངས་པོ་ལྟར་བཅོས་ཏེ། འབྲོག་དགོན་པའི་སྐྱེ་བོ་མང་པོ་དག་ལ་བླུད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཤིང་ཤལ་མ་ལི་ཆེན་པོར་སྐྱེ་བར་འགྱུར་རོ། །དེ་ཆང་བླུད་པའི་འབྲས་བུས་དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ལས་ཀྱིས་བྱས་པའི་ཤིང་ཤལ་མ་ལིའི་འཕང་དུ་དཔག་ཚད་གཅིག་ཙམ་ཡོད་པ་འབྱུང་སྟེ། འདབ་མ་སྤུ་གྲི་ལྟ་བུ་ཡིན་ལ། ཡལ་ག་མེ་འབར་བ་ལྟ་བུ་ཡིན། དུད་པ་བདུག་ཅིང་རླུང་དུག་ལྟ་བུ་འབྱུང་སྟེ། དེ་ལྟར་ཆང་གི་ལས་ཀྱིས་བྱས་པ་དེ་འབྱུང་ངོ་། །གང་དཔག་ཚད་གཅིག་ཚུན་ཆད་དུ་རླུང་དུག་ལྟ་བུས་གནོད་པར་བྱེད་ཀྱང་སྲོག་དང་འབྲལ་བར་ནི་མི་འགྱུར་རོ། །ཇི་ལྟ་ཇི་ལྟར་ཤིང་ཤལ་མ་ལི་ཆེན་པོའི་ནགས་དཔག་ཚད་སུམ་སྟོང་ཡོད་པར་ཆུད་ན། དེ་ལྟ་དེ་ལྟར་མདག་མ་དང་དུ་བར་བསྲེས་པ་དུག་ལྟ་བུའི་ཤུགས་ཀྱིས་སྡུག་བསྔལ་འབུམ་སྙེད་མྱོང་ཡང་དུས་ལས་འདའ་བར་ནི་མི་འགྱུར་རོ། །གང་གི་ཚེ་ཤིང་ཤལ་མ་ལི་ཆེན་པོའི་ཚལ་དུ་སེམས་ཅན་དམྱལ་བ་པ་གཤིན་རྗེའི་མི་རྣམས་ཀྱིས་འཇིགས་པར་བྱས་པ་ཆུད་པར་གྱུར་པ་དེའི་ཚེ་ཤིང་རྣམས་ལས་ཀུན་ནས་སྤུ་གྲི་ལྟ་བུའི་ཆར་རབ་ཏུ་འབབ་སྟེ། གང་ལག་ན་རལ་གྲི་དང་མདའ་བོ་ཆེ་མང་པོ་ཐོགས་པ་འཁྲུགས་པ་དག་གིས་ཡན་ལག་དང་ཉིང་ལག་ཐམས་ཅད་དང་རྒྱུས་པ་དང་། གནད་དང་། ཀ་རན་ད་ར་དང་། རུས་པ་དང་། རྐང་ཐམས་ཅད་ཡང་དང་ཡང་དུ་རྣམ་པར་གཤེག་ཅིང་འདྲལ་ལ་དུམ་བུར་བྱེད་དོ། །གཤིན་རྗེའི་མིས་འཇིགས་ཤིང་སྐྲག་པ་དེ་དག་ལྕགས་ཀྱི་ཤིང་ཤལ་མ་ལི་ཆེན་པོའི་ནགས་ཁྲོད་ན་ཁ་ཅིག་ནི་གྲིབ་མའི་ནང་ན་ཞུམ་ཞུམ་པོར་འདུག །ཁ་ཅིག་ནི་ཤིང་ཁར་འཛེག །ཁ་ཅིག་ནི་གཤིན་རྗེའི་
མི་དེ་དག་དང་ཕྲད་ནས་རལ་གྲི་དག་གིས་འདེབས་ཤིང་གཤེག་གོ །དེ་ཆང་འཐུང་བའི་འབྲས་བུས་གང་དག་གི་གྲིབ་མའི་ནང་ན་ཞུམ་ཞུམ་པོར་འཁོད་པ་དེ་དག་གི་མིག་ཀྱང་བྱ་རྒོད་ཀྱིས་འབྱིན་ཅིང་ཁུ་བ་ཡང་འཐུང་ངོ་། །ཆང་འཐུང་བ་དེའི་འབྲས་བུས་ཤིང་དེ་ལ་འཛེག་པ་དེ་དག་ཀྱང་ཤིང་དེ་དག་ལས་ཡལ་ག་ལྷུང་བས་དེ་དག་དུམ་བུ་བརྒྱའམ་ཡང་ན་སྟོང་དུ་ཕྱེ་མར་རློག་གོ །གང་དག་ཚལ་དེའི་ཐོར་ཏོ་ལ་འཛེགས་པ་དེ་དག་བ་ཚྭའི་ཆུ་བོ་བཞུས་པར་འཇུག་སྟེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་རྒྱུས་པ་དང་། རུས་པ་དང་། ལུས་ཉིད་ཀྱིས་གནོད་པ་མྱོང་བར་འགྱུར་ཏེ། འདི་ནི་དེའི་ཕྱོགས་འགའ་ཞིག་བསྟན་པ་ཡིན་ནོ། །དེ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་དེ་ཡི་དགས་དང་དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་དང་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་ཡིད་རྣམ་པར་གཡེངས་ཤིང་ནད་དྲག་པོའམ་གལ་ཏེ་སྙིང་ནད་དམ། གལ་ཏེ་ངལ་སྐྱེན་པ་མང་བའམ། གལ་ཏེ་རྐང་བམ་གྱིས་འདེབས་པར་འགྱུར་ཞིང་གལ་ཏེ་ལོང་བས་ཉམ་ཐག་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན་དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆུ་ཤིང་བསྲེགས་པའི་དུད་པའི་ཚལ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །ཆང་འཐུང་བ་ནི་བུད་མེད་ཡོན་ཏན་ཅན་དག་ལ་ཐབས་གཞན་གྱི་སྤྱོད་པས་བྲིད་དེ་བླུད་ནས་ར་རོ་བར་བྱས་ཏེ་སེམས་འཁྲུལ་བར་གྱུར་ན། འདི་ལྟ་སྟེ། སེམས་ཅན་དམྱལ་བ་དེ་ནི་ལས་དེའི་རྣམ་པར་སྨིན་པས་ཀུན་ནས་
དཔག་ཚད་ལྔ་ཡོད་པ་དེའི་ནང་དུད་པས་འཁྲིགས་ཤིང་རྒྱ་མཚོའི་ཀློང་གི་མེའི་མུན་གནག་གིས་གཏིབས་པ་ཟབས་སུ་ཀུན་ནས་རྒྱང་གྲགས་གསུམ་དུ་ས་བརྐོས་པ་དེར་མེ་མདག་ཁྲོལ་བུ་རབ་ཏུ་འབར་བས་ཤིན་ཏུ་གང་བའི་སའི་བུ་ག་དེར་སེམས་ཅན་དམྱལ་བ་པ་དེ་དག་ཉིན་གཅིག་བཞིན་དུ་འཇུག་སྟེ་ངུ་སྐད་འབྱིན་པར་ཡང་མི་ནུས་ཤིང་དེ་བཞིན་དུ་འཛག་སྒོ་ཐམས་ཅད་ཀྱང་མེས་གང་བར་འགྱུར་རོ། །དེ་ལས་ཐར་ནས་ཆུ་ཤིང་གི་དུད་པ་དེས་དེ་ལྟར་ཡང་དང་ཡང་དུ་འཛག་སྒོ་ཐམས་ཅད་གང་བར་འགྱུར་ལ་འདི་ལྟར་མེ་དེ་ལ་བདེ་བར་སེམས་ཏེ། དུ་བ་དེའི་མཐུ་ནི་དེ་ལྟར་ཤིན་ཏུ་རྣོ་བ་ཉིད་ཡིན་ནོ། །དེ་ལས་ཀྱང་ཐར་ནས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་བྱ་དུ་བའི་མདོག་གི་ཕྲེང་བ་ཞེས་བྱ་བའི་མཆུ་ཤིན་ཏུ་རྣོ་བ་དེ་དག་གིས་རུས་པ་ཕུག་ནས་རྐང་དག་ལ་ཟ་བར་བྱེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་གློ་དང་མཇུག་དོ་དག་ལ་གདོན་གྱི་ནད་ཀྱིས་ཐེབས་ཤིང་དབུལ་བ་དང་ཚེ་ཐུང་བར་འགྱུར་བར་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་མེ་མདག་དུད་པའི་ཚལ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་ནི་སྔ་མ་བཞིན་ནོ། །ཆང་འཐུང་བ་ནི་དགྲ་གསད་པའི་ཕྱིར་དང་། ཆོམ་རྐུན་དང་རྒྱལ་པོས་བཀྲབས་པ་གསད་པའི་ཕྱིར་བླུད་ན། དེ་ལུས་དང་བྲལ་ནས་ངན་འགྲོ་ལོག་པར་ལྷུང་བ་སེམས་ཅན་དམྱལ་བ་མེ་མདག་དུད་པའི་ཚལ་དུ་སྐྱེ་བར་འགྱུར་རོ། །
དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། དེར་ལས་ཀྱིས་བྱས་པའི་མེ་མདག་སྤུ་གྲི་ལྟ་བུའི་རླུང་ལྡང་ལ། རླུང་དེས་སེམས་ཅན་དམྱལ་བ་པ་དེ་དག་ཕན་ཚུན་གྱི་ཤུགས་ཀྱིས་ཐུག་ཅིང་ཤིན་ཏུ་ཐུག་གོ །དེ་དག་གི་ལུས་ཕན་ཚུན་ཐུག་པ་ན་ཇི་ལྟར་བྱེ་མ་ཆང་བ་ནས་གཏོར་བ་བཞིན་དུ་དེ་ལྟར་ལུས་དེ་དག་ཕྱེ་མར་རློག་གོ །ཡང་ལས་ཀྱི་དབང་གིས་སྐྱེ་བར་འགྱུར་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་གནོད་པ་ཐམས་ཅད་མྱོང་བར་འགྱུར་ཏེ། འདི་ལྟ་སྟེ། སྤུ་གྲིས་གཤེག་ཅིང་མེའི་ཚོར་བ་དང་། ནད་ཀྱི་ཚོར་བ་དང་། མཚོན་ཆའི་ཚོར་བ་དང་། བ་ཚྭའི་ཚོར་བ་སྟེ། ཚོར་བ་མཆོག་ཏུ་ཚ་བ། མཆོག་ཏུ་འཇིགས་པ་དེ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་མྱོང་བར་འགྱུར་རོ། །ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས། ཡི་དགས་དང་དུད་འགྲོ་དག་ཏུ་མ་སྐྱེས་ལ། གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་གཞང་འབྲུམ་རིམ་གསུམ་པས་ཐེབས་པར་འགྱུར་ཞིང་། རྟག་ཏུ་གྲང་བའི་རིམས་ཀྱིས་ཐེབས་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་གློག་གི་ན་བུན་ཚལ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །ཆང་འཐུང་བ་ནི་ཕྱི་རོལ་ལ་བློ་མངོན་པར་ཞེན་པའི་ངང་ཚུལ་ཅན་དག་སླུ་བའི་བསམ་པས་བླུད་ན་ལུས་དང་བྲལ་ནས་ངན་
འགྲོ་ལོག་པར་ལྟུང་བ་སེམས་ཅན་དམྱལ་བ་གློག་གི་ན་བུན་ཚལ་དུ་སྐྱེ་བར་འགྱུར་རོ། །དེ་དག་ལ་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་དེ་ཁྲུ་ཉིས་བརྒྱར་སེམས་ཅན་དམྱལ་བ་པའི་མེས་རབ་ཏུ་གང་བ་དེར་སེམས་ཅན་དམྱལ་བ་པ་དག་གཤིན་རྗེའི་མི་རྣམས་ཀྱིས་བཟུང་ནས་འཇུག་སྟེ། རྐང་པ་ནས་མགོ་ལ་སོགས་པའི་བར་བཏེག་ཅིང་བཞུས་སོ། །ལས་ཀྱི་རླུང་གིས་ཡང་སྐྱེ་བར་འགྱུར་ལ་མེ་དེ་ནི་ལོ་མ་སྡུད་པ་ལྟ་བུ་ཡིན་ཏེ། ཇི་ཙམ་དུ་ཕྱོགས་བཅུར་ཐག་པས་དཀྲིས་པ་བཞིན་དུ་སེམས་ཅན་དམྱལ་བ་པ་དེ་དག་དཀྲིས་ནས་ཇི་ལྟར་ཐལ་བ་ཡང་མི་མངོན་པ་དེ་ལྟར་སྲེག་པར་བྱེད་དོ། །ཡང་འབྱུང་བར་འགྱུར་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེ་ལྟར་ལོ་འབུམ་ཕྲག་དུ་མར་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཆང་འཐུང་བའི་རྒྱུ་འཐུན་པའི་འབྲས་བུས་ཡུལ་ཡ་བ་ན་དང་། བ་ལྷི་ཀ་དེར་སྐྱེས་ཤིང་བཀོལ་བས་ཉམས་པར་འགྱུར་ཏེ། ཤུགས་དྲག་པས་བཀོལ་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ངུ་འབོད་ཀྱི་འཁོར་ལ་བརྟགས་ན་དེས་འཁོར་ཀུན་དུ་རྟོག་བྱེད་ཅེས་བྱ་བ་མཐོང་ངོ་། །དེར་སེམས་ཅན་དག་ལས་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ནི་སྔ་མ་བཞིན་ནོ། །ཆང་འཐུང་བ་ནི་ཇི་ལྟར་འདི་དག་ཆང་གིས་ཡིད་གཡེངས་ན་ལམ་དུ་འཇུག་པ་ལ་ངལ་བར་མི་འགྱུར་རོ་སྙམ་ནས་ལམ་དུ་འཇུག་པའི་ཆེད་དང་། རྔོན་པ་དག་རི་དགས་གསད་པ་ལ་འགྲོ་བ་འགྱོགས་པར་འགྱུར་རོ་སྙམ་ནས་བླུད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་
བ་ཀུན་དུ་རྟོག་བྱེད་དུ་སྐྱེ་བར་འགྱུར་རོ། །དེ་དག་ལ་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། འདོད་པ་གང་དང་གང་ཉིད་དུ་ཀུན་དུ་སེམས་པ་དེ་དང་དེ་ཉིད་གཤིན་རྗེའི་མི་དག་གིས་བརྒྱའམ་ཡང་ན་སྟོང་ངམ། བྱེ་བ་བརྒྱའམ་ཡང་ན་སྟོང་དུ་བྱེད་དེ། སེམས་ཅན་དམྱལ་བའི་འཁོར་གཞན་དུ་གནོད་པ་གང་དང་གང་འབྱུང་བ་དེ་ཐམས་ཅད་ཀྱང་བཞི་འགྱུར་དུ་དེར་འབྱུང་སྟེ་སྔ་མ་བཞིན་ནོ། །སེམས་ཅན་དམྱལ་བ་པ་རྣམས་ལ་གཤིན་རྗེའི་མི་དག་གིས་རྗེས་སུ་བསྟན་པའི་ཚིགས་སུ་བཅད་དེ་སྨྲས་པ། དེ་ཡི་ལས་ནི་རྣམ་གསུམ་གྱིས། །གནས་སྐབས་དགུར་ནི་འཚེད་བྱེད་ཅིང་། །རྣམ་པར་སྨིན་པ་བཞི་བཅུ་ཐམ། །དྲག་པོ་རབ་ཏུ་གཡོས་པར་འགྱུར། །དོན་མེད་གཞི་ནི་ཆང་ཡིན་ཏེ། །སེམས་ཅན་དམྱལ་བའི་བཞད་གད་པ། །དབང་པོ་ཐམས་ཅད་རྣམ་ཉམས་ཤིང་། །དོན་མེད་པ་ཡི་རྒྱུར་གྱུར་ཏོ། །ཚིག་ལ་ཤིན་ཏུ་དགའ་བ་དང་། །ཆགས་པ་དང་ནི་འཇིགས་པ་དང་། །ངག་གི་སྐྱོན་དང་རློམ་པ་དང་། །ཚིག་རྩུབ་གཞི་ནི་དེ་ཡིན་ནོ། །ཆང་གིས་ཀུན་དུ་གཡེངས་པའི་ཡིད། །བྱ་དང་མི་བྱ་མི་ཤེས་པ། །མི་དེ་ཕྱུགས་དང་མཚུངས་པ་ཡིན། །དེ་ལྟ་བས་ན་ཆང་སྤོངས་ཤིག །ཆང་གིས་གཡེངས་པའི་མི་དག་ནི། །གསོན་ཡང་ཤི་བ་དག་དང་མཚུངས། །གང་ཞིག་རྟག་ཏུ་གསོན་འདོད་པས། །རྟག་པར་ཆང་ནི་རྣམ་པར་སྤོངས། །ཆང་ནི་ཉེས་པ་ཀུན་གྱི་གཞི། །རྟག་པར་དོན་ཀུན་མེད་པར་བྱེད། །ངན་སོང་གསུམ་གྱི་ཐེམ་སྐས་ཏེ། །མུན་ནག་གནས་ནི་ཆེན་པོ་ཡིན། །ཆང་གིས་སེམས་ཅན་དམྱལ་བར་འགྲོ། །དེ་བཞིན་ཡི་དགས་འཇིག་རྟེན་དང་། །ཆང་གི་སྐྱོན་གྱིས་བསླུས་པ་ཡི། །མི་དག་དུད་འགྲོ་རྣམས་སུ་འགྲོ། །དུག་གི་ནང་དུ་དུག་ནི་ཆང་། །དེ་བཞིན་དམྱལ་བའི་ནང་ན་དམྱལ། །ནད་ཀྱི་ནང་ན་ནད་མཆོག་ནི། །ཆང་ཞེས་མཁས་པ་རྣམས་ཀྱིས་བཤད། །བློ་དང་དབང་པོ་ཉམས་བྱེད་ཅིང་། །རིན་ཆེན་ཆོས་ནི་ཟད་བྱེད་ལ། །ཚངས་པར་སྤྱོད་པ་འཇིག་བྱེད་པ། །མི་བཟད་ཆང་ནི་སྐྱེ་གནས་
གཅིག །རྒྱལ་པོ་དང་ནི་བསྟན་བཅོས་མཁས། །ཆང་གིས་ཡང་བར་བྱེད་འགྱུར་ན། །ཐ་མལ་མི་དག་ཆང་འཐུང་བ། །བསླུས་པར་འགྱུར་བ་ཅི་ཞིག་སྨོས། །ཆང་ལ་བསྟེན་པའི་མི་དག་ནི། །ཆོས་རྣམས་ཀུན་གྱི་སྟ་རེ་ཡིན། །ངོ་ཚ་མེད་པར་བྱེད་པའི་མཆོག །ཡང་བ་དག་ཏུ་ཉེ་བར་བསྟན། །ཆང་གིས་ཕྲོགས་པར་གྱུར་པའི་སེམས། །བྱ་བ་དང་ནི་མི་བྱ་བ། །མི་ཤེས་རྣམ་པར་མི་ཤེས་ཤིང་། །ཐམས་ཅད་མི་ཡིས་མི་ཤེས་སོ། །གང་ཞིག་ཆང་ལ་སྟེན་བྱེད་པ། །སྐྱེ་བོ་རེས་འགའ་དགའ་བྱེད་ཅིང་། །རེས་འགའ་ཡོངས་སུ་གདུང་བྱེད་ལ། །རེས་འགའ་སྡིག་པ་བྱེད་པ་ཡིན། །བློ་ནི་ཤིན་ཏུ་རྨོངས་སྐྱེད་ཅིང་། །འཇིག་རྟེན་གཉིས་ནི་རྣམ་འཇིག་བྱེད། །ཐར་པའི་ཆོས་ལ་མེ་ལྟ་བུར། །སྲེག་བྱེད་ཁོ་ན་ཆང་ཡིན་ནོ། །མི་གང་དག་ནི་ཆང་སྤོང་བ། །ཆོས་ཀྱི་ངང་ཚུལ་མཉམ་པར་བཞག །གང་ན་འཆི་བ་མེད་པ་ཡི། །གནས་མཆོག་དག་ཏུ་དེ་འགྲོ་འོ། །ཆང་འཐུང་བ་ཡིས་བསླུས་པ་དག །དེ་ནི་བྱེད་པ་དམན་པ་ཡིན། །མི་བཟད་སེམས་ཅན་དམྱལ་བར་ལྟུང་། །དོན་མེད་ཅི་ཞིག་ཡོངས་སུ་གདུངས། །འཐུང་བའི་ཚེ་ན་ཆང་ཞིམ་སྟེ། །རྣམ་སྨིན་ཚེ་ན་མཆོག་ཏུ་ཚ། །ཀིམ་པ་ཀ་ནང་ཀིམ་པ་ཀ །ཆང་ཞེས་མཁས་པ་རྣམས་ཀྱིས་བཤད། །བདག་ལ་འདི་ཡིས་མི་གནོད་ཅེས། །བློ་ལྡན་ཆང་ལ་ཡིད་མ་རྟོན། །མྱོང་ན་བསིལ་ཡང་རྣམ་སྨིན་ཚ། །ཆང་ནི་དམྱལ་བར་འགྲོ་བར་བྱེད། །སྡིག་པའི་ཆོས་རྣམས་བྱེད་པ་ལ། །སེམས་གཡེང་བ་དག་དགའ་བར་བྱེད། །ཕྱི་ནས་རྣམ་སྨིན་ཚ་བ་རུ། །བློ་ངན་ཡོངས་སུ་གདུང་བར་འགྱུར། །འདོད་པ་རྣམས་ལ་བློ་མི་གཏང་། །འདོད་པ་མཆོག་ཏུ་སླུ་བ་ཡིན། །འཁོར་བའི་འཆིང་བ་དྲག་པོ་སྟེ། །སེམས་ཅན་དམྱལ་བ་ཀུན་གྱི་རྒྱུ། །གང་ཞིག་འདོད་པ་རྣམས་ལ་དགའ། །དེ་ཡི་སྡུག་བསྔལ་མཐའ་མེད་དོ། །འདོད་པའི་སྦྲུལ་གྱིས་ཟིན་པ་ལ། །བདེ་བ་ནམས་ཀྱང་ག་ལ་ཡོད། །ཁྱེད་ཅག་འདོད་པ་མི་བཟད་ཅིང་། །དྲག་པོ་སེམས་ཅན་དམྱལ་བར་འོངས། །གནོད་
པ་ཤིན་ཏུ་མི་བཟད་ལ། །དོན་མེད་ཅི་ཞིག་ཡོངས་སུ་གདུང་། །གང་ཚེ་འདོད་པས་བསླུས་པ་ཡི། །ཁྱེད་ཅག་གིས་ནི་སྡིག་བྱས་པ། །དེ་ཚེ་ཅི་ཕྱིར་ཁྲོ་མི་བྱེད། །དེ་རིང་ཅི་ཞིག་ཡོངས་སུ་གདུང་། །བྱས་ལ་བསགས་པ་བརྟན་པ་ཡི། །ལས་དག་གི་ནི་འབྲས་བུ་སྣང་། །སྡིག་པའི་ཚོར་བ་མི་བཟད་པས། །དེ་ལྟ་བས་ན་སྡིག་མི་བྱ། །སྡིག་པ་སྡིག་པའི་རྣམ་སྨིན་དེ། །རྟག་ཏུ་སྡིག་པ་རྣམས་སུ་སྨིན། །སྡིག་མི་བྱེད་ལ་སྡིག་མེད་དོ། །དེ་ལྟ་བས་ན་སྡིག་པ་སྤོངས། །སྡིག་པ་ཡོངས་སུ་སྤངས་པ་ལ། །སྡིག་པའི་འཇིགས་པ་མེད་པ་ཡིན། །སྡིག་པ་རང་གིས་བྱས་པ་གནོད། །གཞན་གྱིས་སྤྱོད་པར་མི་འགྱུར་རོ། །དེ་ལྟར་གཤིན་རྗེའི་མི་དེ་དག་སེམས་ཅན་དམྱལ་བ་པ་དེ་རྣམས་ལ་རྗེས་སུ་སྟོན་པ་རྗེས་སུ་བསྟན་ནས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་གནོད་པ་རྣམ་པ་སྣ་ཚོགས་དག་བྱེད་དུ་འཇུག་གོ །ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་མཆོག་ཏུ་ཁྲོ་བས་ཁྲོ་བར་འགྱུར་ཞིང་བཀའ་བློ་མི་བདེ་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་རྟོག་པར་བྱེད་ཀྱི། སེམས་ཅན་དམྱལ་བ་ཆེན་པོའི་འཁོར་གྱི་ཉེན་ཀོར་ལ་ཀུན་དུ་མི་རྟོག་སྟེ། ལས་ཀྱི་འབྲས་བུ་རྣམ་པར་སྨིན་པ་ཡང་མི་མཐོང་ངོ་། །དེ་འདི་སྙམ་དུ་སེམས་ཏེ། ཀྱེ་ཨེ་མ་སེམས་ཅན་དམྱལ་བའི་འཁོར་བཅུ་དྲུག་པོ་འདི་ཡང་ཇི་ལྟར་ཡང་སོས་དང་། ཐིག་ནག་དང་། བསྡུས་གཞོམ་བཞིན་ཏེ། བྱེ་བྲག་ཏུ་ན་སེམས་ཅན་དམྱལ་བ་དེར་གནོད་པ་གཞན་གང་དང་གང་དག་ཡོད་པ་སེམས་ཅན་དམྱལ་བ་དེ་ལ་ཚོར་བ་དེ་དག་ཐམས་ཅད་བཅུ་འགྱུར་དུ་འགྱུར་ཏེ། ལས་བྱས་པའི་རྒྱུ་གང་བརྟན་
པ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། སྡོམ་པ་བླངས་པས་ཆང་ལྡུད་པའམ་འཐུང་བའི་ལས་ངན་པ་བཞི་འགྱུར་བྱས་པས་དེར་སྐྱེ་བར་འགྱུར་ཏེ། ལས་དེའི་འབྲས་བུ་རྣམ་པར་སྨིན་པ་བཞི་འགྱུར་གྱིས་ཚེ་ཤིན་ཏུ་རིང་པོར་དེ་དག་ལ་ཚོར་བ་ཤིན་ཏུ་དྲག་པ་འབྱུང་ངོ་། །དགེ་སློང་དེས་བཞི་འགྱུར་མཐོང་ནས་ལས་ཀྱི་འབྲས་བུ་རྣམ་པར་སྨིན་པ་ཇི་ལྟ་བ་བཞིན་དུ་རྗེས་སུ་བསམས་པ་དང་། འཁོར་བ་ལ་ཡིད་འབྱུང་བ་ཡང་བཅུ་འགྱུར་དུ་ཡིད་འབྱུང་ངོ་། །ཡང་དགེ་སློང་དེ་སེམས་ཅན་དམྱལ་བ་ཇི་ལྟ་བ་བཞིན་མཐོང་ནས་འཁོར་བ་ལ་ཤིན་ཏུ་འཇིགས་ཤིང་སྐྲག་སྟེ། ས་གཞན་བཅུ་པ་ལ་ཞུགས་པ། རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་སོ། །དེ་ཡང་ས་བླའི་གནོད་སྦྱིན་དག་གིས་ཤེས་ནས། བར་སྣང་ལ་སྤྱོད་པའི་གནོད་སྦྱིན་དག་ལ་མངོན་པར་བསྙད་དོ། །སྔ་མ་བཞིན་དུ་སྦྱར་ཏེ། ཚངས་རིས་དང་། ཚངས་པའི་མདུན་ན་འདོན་དང་། ཚངས་པ་ཆེན་པོའི་བར་གྱིས་ཐོས་ནས་བདུད་ཀྱི་ཕྱོགས་ནི་དམའ་བར་འགྱུར་ཞིང་དམ་པའི་ཆོས་ཀྱི་ཕྱོགས་ནི་མངོན་པར་མཐོ་བར་འགྱུར་རོ་ཞེས་ཚངས་པ་ཆེན་པོའི་རིས་ཀྱི་ལྷ་དག་དགའ་སྟེ། རྒྱ་ཆེར་སྔ་མ་བཞིན་དུ་སྦྱར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་གཞན་ལ་བརྟགས་ན། དེ་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ངུ་འབོད་ཆེན་པོ་ཞེས་བྱ་བ་ཡོད་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་རྫོགས་པ་དེ་ནི་སེམས་ཅན་དམྱལ་བ་ངུ་འབོད་ཆེན་པོར་སྐྱེ་བར་འགྱུར་ཏེ། དེ་ལ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ནི་
སྔ་མ་བཞིན་ནོ། །མཆོག་ཏུ་བྱ་བར་དཀའ་བ་སྐྱེ་བོ་མཁས་པ་ཀུན་གྱིས་རབ་ཏུ་སྨད་པ། ངན་སོང་ཀུན་གྱི་སྒོར་གྱུར་པ་རྣམ་པ་དུ་ཞིག་གིས་བརྫུན་དུ་སྨྲ་བ་རྫོགས་པར་འགྱུར་སྙམ་ནས། འདི་ལྟ་སྟེ། རྒྱལ་པོའམ། བློན་པོའམ། འཁོར་གྱི་ནང་དུ་འདུག་ཀྱང་རུང་སྟེ། གཉིས་ཤིག་ཆོས་ཀྱི་སྲང་ལ་ཞོན་ནས་རྩོད་པའི་ཚེ་དཔང་པོ་འདི་ནི་ཚད་མ་ཡིན་ཏེ། གང་འདིས་སྨྲས་པ་དེ་བདག་ཅག་གི་ཚད་མ་ཡིན་ནོ་ཞེས་སྨྲས་པ་ལས་དེ་ཡང་དྲན་བཞིན་དུ་དོན་གཞན་དུ་སྨྲའམ། གལ་ཏེ་ནོར་གྱི་ཕྱིར་རམ། གལ་ཏེ་ཕྱོགས་བཟུང་ངམ། གལ་ཏེ་འདོད་ཆགས་ཀྱིས་བདག་ལ་བདག་ཉིད་སླུ་བ་ནི་སྔ་མ་བཞིན་ཏེ། འདི་ལྟར་བརྫུན་འདི་ལས་ཁ་ན་མ་ཐོ་བར་འགྱུར་བ་ཆུང་ཟད་ཀྱང་མེད་དེ། བདག་གིས་བརྫུན་དེ་བྱའོ་སྙམ་ནས། དེ་ལྟར་དེ་གྲུབ་པ་ན་ཉེས་པ་དོན་མེད་པ་བྱས་པ་དེ་ལས་དེ་གཉིས་ཀྱི་ནང་ནས་གཅིག་ལ་ཆད་པས་གཅོད་དེ། གལ་ཏེ་བསད་དུ་དགོས་པའམ། གལ་ཏེ་གསོད་པའམ། གལ་ཏེ་ཁྱིམ་འཕྲོག་སྟེ། ཇི་ལྟར་ཉེས་པའི་ཚུལ་དང་འཐུན་པར་བརྫུན་དུ་སྨྲས་ན། དེའི་རྒྱུས་སྡིག་པའི་མི་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ངུ་འབོད་ཆེན་པོར་སྐྱེ་བར་འགྱུར་རོ། །དེར་ཤིན་ཏུ་ཚེ་རིང་བར་འགྱུར་ཏེ། གང་འཕྲུལ་དགའི་ལྷ་རྣམས་ཀྱི་ཚེ་ནི་ལྷའི་ལོ་བརྒྱད་སྟོང་ངོ་། །གང་མིའི་བགྲང་བའི་ཚུལ་གྱིས་ན། མི་ལོ་བརྒྱད་བརྒྱ་ལ་ཉིན་ཞག་གཅིག་སྟེ། དེ་འཕྲུལ་དགའ་བ་རྣམས་ཀྱི་ཉིན་ཞག་གཅིག་ཡིན་ནོ། །དེ་ཉིན་ཞག་སུམ་ཅུ་ལ་ཟླ་བ་གཅིག་གོ །ཟླ་བ་བཅུ་གཉིས་ལ་ལོ་གཅིག་སྟེ། ལྷ་དེ་རྣམས་ཀྱི་ཚེ་ནི་ལྷའི་ལོ་བརྒྱད་སྟོང་ཡིན་ལ་དེ་ནི་སེམས་ཅན་དམྱལ་བ་ངུ་འབོད་ཆེན་པོའི་ཉིན་ཞག་གཅིག་ཡིན་ཏེ། དེར་བརྫུན་སྨྲ་བ་སྡིག་ཅན་རྣམས་གནས་སོ། །བདག་དང་གཞན་ལ་སླུ་བ་ནི་དགེ་བའི་རྩ་བ་ཐམས་ཅད་མ་རུང་བར་བྱེད་ཅིང་མུན་པ་ཆེན་པོར་གྱུར་པ། སྐྱེ་བོ་ཆེན་པོའི་ཡིད་ཆེས་པར་མི་བྱེད་ལ་སྐྱེ་བོ་མཁས་པ་ཀུན་དང་ལོ་སྟོང་དུ་མི་འཐུན་པ། ཉན་ཐོས་དང་རང་སངས་རྒྱས་དང་ཡང་དག་པར་རྫོགས་
པའི་སངས་རྒྱས་ཀྱིས་སྨད་པ། འཇིག་རྟེན་པ་དང་འཇིག་རྟེན་ལས་འདས་པའི་ལམ་གྱིས་སྐྱོན་དུ་བགྲང་བ། དགེ་བའི་རྩ་བའི་སྟེགས་ཐམས་ཅད་ལ་སྟ་རེ་ལྟ་བུར་གྱུར་པ། རྟག་ཏུ་གནོད་པས་ཡོངས་སུ་འགྱུར་བ། རོ་མྱགས་པ་སྙིང་པོ་མེད་པ་ལས་དུག་ལྟ་བུར་ལངས་པ། འཁོར་བའི་འགྲོ་བ་ངན་པའི་རྒྱུར་གྱུར་ཅིང་ཉལ་ཉིལ་དུ་གྱུར་པ། ཁ་ནས་དྲི་མནམ་པ་སྐྱེད་པ། རྟག་ཏུ་སྡུག་བསྔལ་གྱི་དྲ་བའི་རྒྱུར་གྱུར་པ། མི་འདོད་ཅིང་མི་སྡུག་ལ་ཡིད་དུ་མི་འོང་བ་སེམས་ཅན་དམྱལ་བ་འཇིགས་པ་ཆེན་པོའི་ཕོ་ཉ། འཆི་བའི་ཚེ་རྣམ་པར་སྡངས་པ་ཆེན་པོར་བྱེད་པ། གཤིན་རྗེའི་མིའི་ཡུལ་དུ་ཕྱིན་པ་རྣམས་ཀྱི་མི་མཛའ་བ་ཆེན་པོར་གྱུར་པ། ཡི་དགས་དང་། དུད་འགྲོའི་འགྲོ་བ་དག་ལས་གཡང་ས་ལྟ་བུར་གྱུར་པ། ཉེས་པར་བྱས་པའི་ལས་ཀྱི་མཐའི་རྒྱུར་གྱུར་པ། དབུལ་པོའི་རྒྱུར་གྱུར་པ། སེམས་ཅན་དམྱལ་བའི་འཇིགས་པ་ཆེན་པོ་བྱེད་པ། དུད་འགྲོ་དག་གཅིག་ལ་གཅིག་ཟ་བའི་རྐྱེན་དུ་གྱུར་པ། ཐོག་མ་མེད་པའི་དུས་ནས་ཞུགས་པ། འཁོར་བའི་ས་བོན་དུ་གྱུར་པ། བརྫུན་སྨྲ་བའི་འབྲས་བུས་དེར་སྐྱེ་བར་འགྱུར་རོ། །སེམས་ཅན་དམྱལ་བ་ཆེན་པོ་དེའི་འཁོར་ནི་འདི་ལྟ་སྟེ། སྒྲ་འབྱིན་ཤིན་ཏུ་སྒྲ་འབྱིན་དང་། ཚོར་བ་དཔག་ཏུ་མེད་དང་། ཚོར་བ་རྩུབ་ཅིང་ཚ་ལ་བཟོད་པར་དཀའ་དང་། གནོད་པ་དཔེ་མེད་པ་དང་། ཐམས་ཅད་མུན་པ་དང་། འཇིག་རྟེན་བར་གྱི་དུ་བ་དང་། ཕྱེ་མ་ལེབ་ལྟར་རབ་ཏུ་ལྟུང་བ་དང་། སྲོག་འཆི་བ་དང་བཅས་པ་དང་། གཞན་དུ་འགྱུར་བ་དང་། བསམ་པ་དགའ་མེད་དང་། ཕན་ཚུན་གནོད་པ་འཇུག་པ་དང་། ནགས་ཚལ་མེས་མཆེད་པའི་རྒྱུད་ལྟ་བུ་དང་། ཚོར་བ་རིང་བ་དང་། ཚོར་བ་མཐའ་ཡས་དང་། ཁྭའི་མཆུ་རྡོ་རྗེ་ལྟ་བུ་དང་། ཁྲག་དང་རྐང་ཟ་བ་དང་། མེ་ལྕེ་བཅུ་གཅིག་སྟེ། དེ་དག་ནི་སེམས་ཅན་དམྱལ་བ་ངུ་འབོད་ཆེན་པོའི་འཁོར་བཅུ་དྲུག་ཡིན་ནོ། །སེམས་ཅན་དམྱལ་བ་ངུ་འབོད་ཆེན་པོ་དེར་སེམས་ཅན་དག་ལས་བྱས་ཤིང་བསགས་པ་གང་གིས་སྐྱེ་བར་འགྱུར་སྙམ་ན་ལས་ཀྱི་ཉེར་བསྡོགས་དང་
ལས་ཀྱི་ལམ་དང་། ལས་ཀྱི་མཇུག་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་སོ་སོར་འཇིགས་པ་ཆེན་པོ་སེམས་ཅན་དམྱལ་བ་ངུ་འབོད་ཆེན་པོར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ལྕེ་པད་མའི་འདབ་མ་ལྟར་ཤིན་ཏུ་འཇམ་པ་དེ་ཁ་ནས་དྲངས་ཏེ་རྒྱང་གྲགས་གསུམ་དུ་བརྒྱངས་པ་གཤིན་རྗེའི་མི་འཇིགས་འཇིགས་ལྟར་འདུག་པས་དེ་བཟུང་ནས་གཤིན་རྗེའི་མི་རྣམས་ཀྱིས་ལྕགས་ཀྱི་ཐོང་གཤོལ་རབ་ཏུ་འབར་བ་དག་གིས་འབུགས་ཤིང་རྨེད་ལ་ཡོངས་སུ་འདྲལ་ལོ། །ཟངས་དམར་པོ་རབ་ཏུ་འབར་བས་ཆག་ཆག་འདེབས་ཤིང་ལྕེ་ལས་བྱུང་བའི་སྲིན་བུ་ཁ་རབ་ཏུ་འབར་བ་དག་སྐྱེ་སྟེ། གང་ལྕེ་དག་ལ་ཟ་ཡང་བརྫུན་སྨྲ་བ་དེས་ལྕེ་དེ་དག་ཕྱིར་ཁའི་ནང་དུ་གཞུག་པར་མི་ནུས་སོ། །དེའི་ཁའི་ནང་གི་སོ་གང་ཡིན་པ་དེ་དག་ལ་སོ་སྲིན་ཨུ་ལུ་ཀ་ལ་ཞེས་བྱ་བ་བྱུང་སྟེ། དེ་དག་གིས་འབྱིན་པར་བྱེད་ཅིང་དེའི་རྐན་ཡང་ལས་ཀྱིས་བྱས་པའི་རླུང་གིས་བྱེ་མའི་ཕྱེ་མ་ལྟར་ཕྱེ་མར་རློག་གོ །དེའི་མིད་པ་ཡང་སྤུ་གྲི་ལྟ་བུའི་རླུང་གིས་འཇོག་པར་བྱེད་ལ། དེའི་སྙིང་ཡང་སྲིན་བུའི་མཆུ་རབ་ཏུ་འབར་བ་དག་གིས་ཟ་བར་བྱེད་དོ། །བརྫུན་སྨྲ་བའི་ལུས་ཅན་ནི་སེམས་ཅན་དམྱལ་བ་ངུ་འབོད་ཆེན་པོའི་གཞིར་སྐྱེས་ནས་སྲེག་སྟེ། ལས་བྱས་པས་ཀུན་ནས་བསླང་བའི་ལུས་ལས་བྱུང་བའི་སྲིན་བུ་རྣམས་ཀྱིས་ལུས་རབ་ཏུ་འབར་བའི་རྒྱུ་མ་དག་ལ་ཟའོ། །དེའི་ནང་ན་འདུག་པའི་སྲིན་བུ་རྣམས་དང་། ནད་རྣམས་ཀྱིས་ཚོར་བ་མི་བཟད་ཅིང་ཚ་ལ་དྲག་པ་རྣམས་མྱོང་ངོ་། །ཕྱི་རོལ་དུ་ཡང་སྡུག་བསྔལ་རྣམ་པ་གཉིས་ཀྱིས་གནོད་དེ། འདི་ལྟ་སྟེ། མེ་ལས་བྱུང་བའི་སེམས་ཅན་དམྱལ་བ་པ་དག་ལ་གཤིན་རྗེའི་མི་རྣམས་ཀྱིས་ཚོར་བའི་རྒྱུ་རྣམ་པ་སྣ་ཚོགས་དག་གིས་འཇིགས་པ་བསྐྱེད་དོ། །ཕུར་བུ་དག་གིས་ཀྱང་ཡན་ལག་དང་ཉིང་ལག་ཐམས་ཅད་དང་། ལུས་ཀྱི་རྩ་དང་། རྒྱུས་པ་དང་། རུས་པའི་གསེབ་ཐམས་ཅད་འབུགས་པར་བྱེད་དོ། །གཞན་ཡང་ཚོར་བ་རྣམས་ཀྱིས་མངོན་པར་གཙེས་པར་འགྱུར་ཏེ། འདི་ལྟ་སྟེ། སྟེའུ་ཡིས་ཡན་ལག་ནས་
རུས་པ་ལ་སོགས་པའི་བར་ཐམས་ཅད་འཇོག་གོ །བརྫུན་སྨྲ་བ་སྨྲས་པ་དེ་ནི་མཆོག་ཏུ་དོན་མ་ཡིན་པ་བྱེད་ཅིང་ཆོས་ཀྱི་སྟེགས་ཀུན་ལས་རྒལ་བ་ཡིན་ཏེ། བརྫུན་སྨྲ་བ་ནི་དོན་མེད་པ་ཐམས་ཅད་ཀྱི་སྒོར་གྱུར་པ། དགེ་བའི་ལོ་ཏོག་ཐམས་ཅད་ལ་སེར་བ་ལྟ་བུར་གྱུར་པ། ངན་འགྲོ་ཐམས་ཅད་ཀྱི་སྒོར་གྱུར་པ། བྱ་བ་མ་ཡིན་པ་ཐམས་ཅད་ཀྱི་གཞིར་གྱུར་པ། སེམས་ཅན་ཐམས་ཅད་ཀྱི་ཡིད་ཆེས་པར་འགྱུར་བ་མ་ཡིན་པ། འཕགས་པའི་སྐྱེ་བོ་ཀུན་གྱིས་མི་གཙང་བ་དང་འདྲ་བར་སྨད་པར་གྱུར་པ། རྫོགས་པའི་སངས་རྒྱས་དང་ཉན་ཐོས་དང་རང་སངས་རྒྱས་དང་དགྲ་བཅོམ་པ་དག་གིས་དུག་བཞིན་དུ་རྣམ་པར་སྤངས་པ། འཇིག་རྟེན་པ་དང་འཇིག་རྟེན་ལས་འདས་པའི་ལམ་གྱི་མུན་པར་གྱུར་ཅིང་སུ་ཡང་འདོད་པ་མེད་པ། གཅིག་ཏུ་སེམས་ཅན་དམྱལ་བ་མངོན་དུ་གྱུར་ཅིང་གཞན་དང་མཚུངས་པ་མེད་པ། མུན་ནག་ཏུ་གྱུར་པ་ཡིན་ཏེ། རྣམ་པ་དེ་དག་ཏུ་གྱུར་པ་དོན་མེད་པ་འབྱུང་བ་ཡིན་ནོ། །གང་དག་སྨྲ་ཞིང་གང་དག་སྨྲས་པ་ན་སེམས་ཅན་དམྱལ་བ་ངུ་འབོད་ཆེན་པོར་རྒྱུ་དེ་དང་མཚུངས་པར་འབྲས་བུ་འབྱུང་སྟེ། དེའི་རྐང་པ་མེས་མར་སར་བཞིན་དུ་འཇུ་ཞིང་དེའི་བར་ཡང་སོག་ལེ་རབ་ཏུ་འབར་བས་གཤེག་གོ །དེ་ལུས་དང་ཡིད་ཐམས་ཅད་དུ་སྡུག་བསྔལ་ཞིང་དོན་མེད་པ་རྒྱུ་འཐུན་པའི་འཁོར་དེའི་མེས་སེམས་ཅན་དམྱལ་བ་ཆེན་པོ་དག་འཚེད་པ་ན། ནད་ཐམས་ཅད་ཀྱིས་སེམས་ཅན་དམྱལ་བ་མཚུངས་པར་ཀུན་དུ་ངུ་སྐད་འབྱིན་ཏོ། །ནད་མི་བཟད་པ་དེ་དག་གི་མིང་གཟུང་བར་སླ་བ་ཡང་མ་ཡིན་ཏེ། དེ་ནི་ཇི་ལྟར་བསྟན་པ་བཞིན་དུ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མ་བརྒྱ་སྟོང་བྱེ་བ་བྱེ་བ་ཁྲག་ཁྲིག་ཁྲིག་ཏུ་སེམས་ཅན་དམྱལ་བ་པའི་སྡུག་བསྔལ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་
ལྟར་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་དུ་སྨྲ་བ་དག་གི་རྒྱུ་འཐུན་པའི་འབྲས་བུས་དེ་དབུལ་ཞིང་ཚེ་ཐུང་ལ་སེམས་གཡེངས་པ། མ་ནིང་སྐྱེ་བོ་ཀུན་གྱིས་སྨད་ཅིང་ཡིད་བརྟན་པའི་གནས་སུ་མི་འགྱུར་རོ། །འདིར་ཚིགས་སུ་བཅད་པ། ལུས་ཅན་བརྫུན་དུ་སྨྲ་བ་ཡི། །ཆོས་གཅིག་ལས་ནི་འགལ་བྱས་པ། །འཇིག་རྟེན་ཕ་རོལ་རྣམ་རྒལ་བའི། །སྡིག་པ་དོན་མེད་གང་མེད་མིན། །ཀུན་ལ་ཡིད་ཆེས་མི་བྱེད་པ། །བརྫུན་གྱི་ཚིག་ནི་མ་སྨྲ་ཤིག །འཁོར་བར་གང་གིས་གནོད་པ་ནི། །བདེ་འགྲོ་ཉིད་ནི་མཐོང་མི་འགྱུར། །བརྫུན་ཚིག་རབ་ཏུ་འཇུག་པ་ནི། །འཇིག་རྟེན་གཉིས་ལ་གནོད་བྱེད་ཅིང་། །ཀུན་གྱི་རྣམ་པར་ལྡང་བྱེད་ལ། །ཆོས་རྣམས་ཀུན་གྱི་དགོན་པ་ཡིན། །གང་གིས་བདག་ཉིད་གཅོད་བྱེད་པ། །ཉེས་སྨྲ་གང་དག་སྨྲས་པ་ནི། །མི་དག་སྐྱེས་མ་ཐག་ཏུ་ནི། །ཁ་ནས་སྟ་རེ་ལྟ་བུ་འབྱུང་། །གང་དག་བརྫུན་ཚིག་སྨྲ་བ་ནི། །དེ་ནི་དོན་མེད་ཀུན་གྱིས་བརྟགས། །ངན་སོང་ཀུན་གྱི་རྒྱུད་ཡིན་ཞིང་། །དེ་ནི་མུན་ནག་སྐྱེ་གནས་གཅིག །བདེན་པས་དམན་པའི་མི་དག་ནི། །མཁས་པ་ཀུན་གྱིས་རྣམ་པར་སྤངས། །འཇིག་རྟེན་འདིར་ནི་རྩྭ་ལྟར་འགྱུར། །ཕ་རོལ་ངན་སོང་རྣམས་སུ་འཚེད། །དཔའ་བོ་ཤིན་ཏུ་བརྫུན་མི་སྨྲ། །ཉོན་མོངས་བརྫུན་ཚིག་སྨྲ་བ་དག །ཁ་ནས་རུལ་བའི་དྲི་འབྱུང་ལ། །ཕྱི་ནས་ལུས་ཀྱིས་གདུངས་པར་འགྱུར། །བདེན་པ་རིན་ཆེན་རྣམ་སྤངས་པ། །དེ་ལ་ཆོས་ནི་མེད་པ་ཡིན། །ཆོས་ནི་རྣམ་པར་སྤངས་པ་ལ། །སྡུག་བསྔལ་མཐའ་མེད་གནས་པ་ཡིན། །ཆོས་རྣམས་ཀུན་གྱི་སྒྲོན་ཡིན་ཞིང་། །མཁས་རྣམས་རིན་ཆེན་ལྟ་བུར་དགའ། །མཐོ་རིས་ལམ་གྱི་དམ་པ་ནི། །བདེན་པ་ཡིན་ཞེས་རིམས་བྲལ་གསུངས། །བདེན་པ་ཡིས་ནི་མཐོ་རིས་དང་། །བདེན་པར་སྨྲ་བ་ཐར་པར་འགྲོ། །བདེན་པས་དམན་པའི་མི་དག་ནི། །ཁྱི་དང་འདྲ་བར་རབ་ཏུ་བསྒྲགས། །གང་ལ་བདེན་པ་མེད་པ་ནི། །
ཐ་ཤལ་ནང་ན་དེ་ཐ་ཤལ། །བདེན་པ་ཆོས་ཀྱི་ཐེམ་སྐས་ཏེ། །སྣང་བའི་འབྱུང་ཁུངས་ཆེན་པོ་ཡིན། །ཐར་པའི་ཆོས་ཀྱི་ལམ་ཡིན་ཞིང་། །ནོར་གྱི་ནང་ན་ནོར་མཆོག་ལ། །སྐྱབས་ཀྱི་ནང་ན་སྐྱབས་མཆོག་ནི། །བདེན་པ་ཡིན་ཞེས་མཁས་པས་བཤད། །སྣང་བའི་ནང་ན་སྣང་བ་མཆོག །མིག་གི་ནང་ནའང་མིག་དང་ལྡན། །ནོར་རྫས་མེད་ལ་ནོར་རྫས་ཏེ། །རྒྱན་གྱི་ནང་ནའང་རྒྱན་བཟང་ཡིན། །བདེན་པ་མི་ཟད་གཏེར་ཡིན་ཏེ། །རྒྱལ་པོ་ཀུན་གྱིས་དབྲོག་མི་ནུས། །མི་དག་གང་གིས་སྨྲ་བ་ནི། །འགྲོ་བ་མཆོག་ཏུ་འགྲོ་བ་ཡིན། །ཇི་ལྟར་བདེན་པས་སྐྱེས་བུ་དག །བརྒྱན་པ་མཛེས་ཏེ་ལྷ་འདྲ་འོ། །སྣ་ཚོགས་རྒྱན་གྱིས་སྐྱེས་བུ་དག །བརྒྱན་པ་དེ་ལྟར་མཛེས་པ་མིན། །ཇི་ལྟར་འཇིག་རྟེན་ཕ་རོལ་དུ། །ཕ་མེད་མ་མེད་དོན་མེད་ཅིང་། །བཤེས་མེད་གཉེན་མེད་སྐྱབས་མེད་པས། །དེ་ལྟར་རྟག་ཏུ་བདེན་པ་སྨྲོས། །མེ་ཡི་ནང་ན་མེ་མཆོག་ལ། །དུག་གི་ནང་ན་དུག་མཆོག་སྟེ། །ངན་འགྲོ་རྣམས་ཀྱི་ཐེམ་སྐས་ནི། །བརྫུན་པ་ཡིན་ཞེས་ཡོངས་སུ་བསྒྲགས། །རེག་ན་དུག་དང་མེ་འདྲ་བ། །བརྫུན་པ་རྣམ་པར་སྤང་བར་གྱིས། །བརྫུན་གྱིས་བསྲེགས་པའི་མི་དག་ནི། །བསྲེགས་པ་ཡིན་ཞེས་མངོན་པར་བརྗོད། །དེ་ལྟར་མངོན་པར་འབད་ཀུན་གྱིས། །མི་དག་བརྫུན་ནི་མ་སྨྲ་ཤིག །འཇིགས་ལ་སོགས་པ་ཉོན་མོངས་ཀུན། །བརྫུན་ལས་བྱུང་ཞེས་ཡོངས་སུ་བརྗོད། །དེ་ལྟར་དགེ་སློང་དེ་བརྫུན་གྱི་ལས་ཀྱི་འབྲས་བུའི་དེ་ཁོ་ན་ལྐོག་ཏུ་མ་གྱུར་པ་མཐོང་བ། བདེན་པའི་ཡོན་ཏན་གྱི་དེ་ཁོ་ན་མཐོང་བ། དགེ་བ་དང་མི་དགེ་བའི་དེ་ཁོ་ན་མཐོང་བ། སེམས་ཅན་དམྱལ་བ་ཆེན་པོ་ངུ་འབོད་ཆེན་པོའི་འཁོར་ལ་རྟོག་པར་བྱེད་དེ། དེས་སེམས་ཅན་དམྱལ་བ་སྒྲ་འབྱིན་ཤིན་ཏུ་སྒྲ་འབྱིན་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ནི་སྔ་མ་བཞིན་ནོ། །
བརྫུན་སྨྲ་བ་ནི་རྩོད་པའི་ཚེ་རང་གི་གཉེན་འདབ་ཀྱི་ཕྱིར་རམ་ཕྱོགས་གཟུང་བའི་ཕྱིར་རམ། ཕྱོགས་སུ་གྱུར་པས་སྨྲས་ལ། དེ་སྨྲས་ནས་ཀྱང་འཆགས་པར་མི་བྱེད་སྐྱོན་དུ་མི་འཛིན་ལ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྒྲ་འབྱིན་ཤིན་ཏུ་སྒྲ་འབྱིན་དུ་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། དེའི་ལྕེ་གང་གིས་བརྫུན་སྨྲས་པ་དེ་ལ་ཆད་པས་གཅོད་པར་བྱེད་དེ། གཤིན་རྗེའི་མི་རྣམས་ཀྱིས་སྤུ་གྲིས་མིད་པ་དྲལ་ནས་དེར་འབྱིན་ཏེ། ཕྱུང་ནས་བ་ཚྭའི་ཆུ་རབ་ཏུ་ཚ་བས་ཆག་ཆག་འདེབས་སོ། །ནང་ན་ཡོད་པའི་ལྕེ་ལ་རུལ་པའི་དྲི་རབ་ཏུ་འབྱུང་ཞིང་སྲོག་ཆགས་མར་ཀོ་ཏ་ཀའི་ཁ་རབ་ཏུ་འབར་བས་ཀྱང་ལྕེ་དེ་ལ་ཟའོ། །ལུས་ཀྱི་ཚོར་བ་ཡང་གང་སེམས་ཅན་དམྱལ་བ་ཡང་སོས་ལ་སོགས་པའི་བཤད་པ་དེ་ཐམས་ཅད་ཀྱི་མཐའ་དག་སྔ་མ་བཞིན་དུ་ཇི་སྲིད་དུ་དེའི་བརྫུན་གྱི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སེམས་ཅན་དམྱལ་བ་པ་དེ་ལ་འབྱུང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་སྨྱོན་པར་འགྱུར་ཞིང་དབུལ་བར་འགྱུར། སེམས་རྣམ་པར་གཡེངས་པ་དང་། ཚེ་ཐུང་བ་དང་། དབང་པོ་མ་ཚང་བ་དང་། སྐྱེ་བོ་ཀུན་གྱིས་སྨད་པ་དང་། དོན་ཐམས་ཅད་མེད་པའི་སྐལ་བ་ཅན་དུ་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ངུ་འབོད་ཆེན་པོའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཇི་ལྟར་སེམས་ཅན་དམྱལ་བ་ངུ་འབོད་ཆེན་པོའི་འཁོར་ཚོར་བ་དཔག་ཏུ་མེད་པ་ཞེས་བྱ་བ་ཡོད་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་
བརྟགས་ན། འདི་ལྟར་གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་བྱས་པ་ནི་སྔ་མ་བཞིན་ནོ། །བརྫུན་སྨྲ་བ་ནི་འདོད་ཆགས་ཀྱི་རྒྱུའམ་ཞེ་སྡང་གི་རྒྱུ་མི་བཟད་པས་སྨྲས་ཤིང་། གཞན་ལ་ཡང་འདི་ལྟར་འདི་ནི་བདག་ཅག་གི་མཛའ་བོ་མཆོག་ཏུ་སྡུག་པ་བདག་ཅག་ལ་བྱམས་པ་ཡིན་ཏེ། ཕྱོགས་བཟུང་བར་བྱ་ཡིས། བདེན་པར་མ་སྨྲ་ཤིག་ཅེས་བསྒོ་སྟེ། དེར་གཟེངས་བསྟོད་ཅིང་རབ་ཏུ་བཀོད་དེ་བཙུད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཚོར་བ་དཔག་ཏུ་མེད་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། གང་སེམས་ཅན་དམྱལ་བ་ཡང་སོས་ལ་སོགས་པའི་བཤད་པ་དེ་མཐའ་དག་སེམས་ཅན་དམྱལ་བ་ངུ་འབོད་ཆེན་པོར་འབྱུང་སྟེ། གང་ལས་ཀྱི་རྒྱུ་ལྕི་བའི་ཕྱིར་གནོད་པ་ཡང་ལྕི་བ་ཉིད་དུ་འགྱུར་རོ། །གནོད་པ་ལྕི་བ་ཉིད་ཀྱིས་ལས་ཀྱི་འབྲས་བུ་རྣམ་པར་སྨིན་པ་ཡང་དག་པར་སྟོན་ཏོ། །དེ་ལྟར་འདི་ནི་དུས་མཐའ་མེད་པ་ནས་འཇིགས་པ་དང་རབ་ཏུ་ལྡན་པའི་ལས་དང་ཉོན་མོངས་པ་དང་བཅས་པ་ཟོ་ཆུན་གྱི་རྒྱུན་ལྟར་འཁོར་བའི་འཁོར་ལོར་རབ་ཏུ་འཇུག་གོ །སྡིག་པ་གཞན་ཐམས་ཅད་ཀྱི་གནོད་པ་གཞན་དུ་འཇུག་པ་ན་བརྫུན་དུ་སྨྲ་བ་ནི་ཆེས་སྡིག་པ་ཆེ་བ་ཡིན་ནོ་ཞེས་བརྗོད་དོ། །བརྫུན་དུ་སྨྲ་བ་རྫོགས་པ་ནི་དགེ་བའི་རྩ་བ་རྟོན་པ་གཅོད་པར་བྱེད་དེ། རྒྱུ་ཇི་ལྟ་ཇི་ལྟ་བ་བཞིན་དུ་འབྲས་བུ་ཡང་དེ་ལྟ་དེ་ལྟར་འགྱུར་ཏེ། རྒྱུ་འདིས་སེམས་ཅན་དམྱལ་བ་ཚོར་བ་དཔག་ཏུ་མེད་པར་ཚོར་བ་འབྱུང་བ་གང་ཡིན་པ་དེ་དག་བརྗོད་པར་མི་ནུས་སོ། །དེར་གནོད་པ་ནི་སེམས་ཅན་དམྱལ་བ་པ་གཞན་ཐམས་ཅད་དང་ཡང་མཚུངས་པ་མེད་དེ། སེམས་ཅན་དམྱལ་བ་པ་སྡིག་པོ་ཆེའི་ཚོར་བ་འབྱུང་བ་ནི་འདི་ལྟ་སྟེ། སྲིན་བུས་བསླང་བའི་ཚོར་བ་དང་། སྲིན་བུའི་ཚོར་བ་དང་། སྐོམ་པ་དང་བཀྲེས་པའི་ཚོར་བ་དང་། རེ་ཐག་ཆད་པའི་ཚོར་བ་དང་། སོ་སོའི་མུན་ནག་གི་སྡུག་བསྔལ་མཐའ་ཡས་པའི་ཚོར་བ་དང་། ཕན་ཚུན་ཕོག་
པའི་ཚོར་བ་དང་། སྒྲ་དང་། རེག་པ་དང་། རོ་དང་། གཟུགས་དང་། དྲི་མི་འདོད་པའི་ཚོར་བ་དང་། ཚེ་རབས་དྲན་པའི་དགྲ་བགེགས་ཀྱི་མཚོན་ཆས་རབ་ཏུ་གཅོད་པའི་ཚོར་བ་དང་། བ་ཚྭའི་ཆུ་བོ་ལས་ཤིན་ཏུ་སྒྲོལ་བའི་ཚོར་བ་དང་། ཕུར་བུ་རྣམས་ཀྱིས་འདེབས་པའི་ཚོར་བ་དང་། རྨོག་ཐག་མེས་བསྲེགས་པའི་ཚོར་བ་དང་། རྩྭ་དར་བ་ལྟར་གཅོད་ཅིང་རྡོ་རྗེས་རེག་པའི་ཚོར་བ་དང་། ཀུན་ནས་མེ་དང་ཚལ་བསྲེགས་པའི་མེ་འབར་བའི་ཕྲེང་བའི་ཚོར་བ་སྟེ། དེ་ལ་སོགས་པ་སེམས་ཅན་དམྱལ་བ་དང་འཐུན་པའི་ཚོར་བ་ཇི་སྲིད་དུ་བརྫུན་སྨྲ་བ་ཉེས་པར་སྤྱད་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་གཡང་ས་ཆེན་པོ་ལྟ་བུའི་བརྫུན་གྱི་འབྲས་བུ་སེམས་ཅན་དམྱལ་བར་ཚོར་བ་དཔག་ཏུ་མེད་པ་འབྱུང་ངོ་། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་བརྫུན་སྨྲ་བའི་རྒྱུ་འཐུན་པའི་འབྲས་བུས་དེ་རྟག་ཏུ་ནད་ཀྱིས་མངོན་པར་འདེབས་ཤིང་སྐེར་བགེགས་པ་དང་། ཁ་ནད་ལ་སོགས་པ་འབྱུང་ལ། དབུལ་བར་འགྱུར། སྦྱིན་པ་པོའམ། སྦྱིན་བདག་ལ་སྨན་སློང་བ་ན་དེ་ཡིད་མི་ཆེས་པར་འགྱུར་ཏེ། འདི་ཡང་ངག་ལོག་པར་སྨྲའོ་སྙམ་ནས་མི་ཐོབ་སྟེ། དེ་ནི་ནད་མི་བཟད་པས་ཐེབས་ནས་འཆི་བའི་དུས་བྱེད་པར་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ངུ་འབོད་ཆེན་པོའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཚོར་བ་རྩུབ་ཅིང་ཚ་ལ་བཟོད་པར་དཀའ་བ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། རྒྱལ་པོའམ། བློན་པོས་བདག་རང་གི་དོན་དུ་རྒྱལ་སྲིད་ཀྱི་ཕྱིར་རམ། ནོར་རྫས་ཀྱི་ཕྱིར་རམ། སྲོག་གི་ཕྱིར་མངོན་སུམ་
དུ་ཡིད་ཆེས་པར་སྨྲས་ལ། ཤིན་ཏུ་མངོན་པར་གནོད་པ་བྱས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཚོར་བ་རྩུབ་ཅིང་ཚ་ལ་བཟོད་པར་དཀའ་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། རང་གི་ལུས་ལས་ལས་ཀྱིས་བྱས་པའི་སྲིན་བུ་དག་སྐྱེ་སྟེ། ལུས་ཐམས་ཅད་ལ་ཞུགས་ཤིང་གནད་ཐམས་ཅད་ལ་ཞུགས་ལ། ཆུ་རྒྱུས་ཐམས་ཅད་གཅོད་ཅིང་རྣམ་པར་གཅོད་དོ། །སེམས་ཅན་དམྱལ་བ་གྲུབ་པ་དག །ཤ་ཐམས་ཅད་ཟ་ཞིང་། གློ་བ་ཟ་ལ་མི་བཟད་པར་ཡོངས་སུ་འགྱུར་བ་དག། སེམས་ཅན་དམྱལ་བ་དེར་ཚོར་བ་མེ་ལྟར་ཤིན་ཏུ་དྲག་པ་དག་ཚོར་བ་ཆེན་པོ་འཕེལ་བ་དང་། དུག་གི་ཚོར་བ་མེ་ལྟ་བུ་དང་། ཚོར་བ་ཤིན་ཏུ་དྲག་པ་ཇི་སྐད་བཤད་པ་དག་ནི་ཚོར་བ་རྩུབ་ཅིང་ཚ་ལ་བཟོད་པར་དཀའ་བ་ཡིན་ཏེ། སེམས་ཅན་དམྱལ་བ་སྡིག་པས་འཚོ་བ་དེའི་མི་བཟད་པ་གང་ཡིན་པ་དག་བརྗོད་པར་མི་ནུས་སོ། །སེམས་ཅན་དམྱལ་བ་པ་དེ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་མའི་མངལ་དུ་ཞུགས་ནས་དེའི་ཉེས་པར་བྱས་པའི་ལས་དེས་ཇི་སྲིད་དུ་དེའི་ཉེས་པར་བྱས་པའི་ལས་ཀྱི་མཐའ་སྤྱད་པ་བཙའ་བར་འགྱུར་བ་དེ་སྲིད་དུ། མ་ཡང་རྟག་ཏུ་ནད་བུ་ཅན་དུ་འགྱུར། གང་གི་ཚེ་མའི་མངལ་དེ་ནས་བྱུང་ནས་དེ་ཕན་ཆད་དེ་ཡང་བྱིས་པ་ནས་རྟག་ཏུ་ནད་བུ་ཅན་དུ་འགྱུར་ཏེ། སྨན་པ་ཐམས་ཅད་ཀྱིས་ནད་གསོ་བར་མི་ནུས་པ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅུ་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་སེམས་ཅན་དམྱལ་བ་
གནོད་པ་དཔེ་མེད་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་བྱས་ཤིང་བསགས་པ་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་དུ་སྨྲ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །འདི་ལྟ་སྟེ། བུ་རམ་ཤིང་དང་། ས་བསྡུ་བའི་དོན་དུ་ཞིང་གི་རྣང་རྒལ་ལ་སོགས་པ་བརྫུན་དང་གཡོ་ཐབས་ཀྱིས་འཕྲོག་ཅིང་རྩོད་ལ་གཞན་ལ་ཡང་བརྫུན་གྱིས་སླུ་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་གནོད་པ་དཔེ་མེད་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། གང་སེམས་ཅན་དམྱལ་བ་ཡང་སོས་ལ་སོགས་པ་དེ་དག་ཐམས་ཅད་ཀྱི་སྔ་མ་བཞིན་དུ་འབྱུང་ངོ་། །གང་སེམས་ཅན་དམྱལ་བ་པ་རྣམས་ཀྱི་ཡང་གནོད་པ་འབྱུང་བ་ནི་འདི་ལྟ་སྟེ། ལྕགས་མགར་སྦུད་པ་དབུགས་ཀྱིས་བཀང་བ་གཉིས་ཀྱིས་ལྕགས་རྡུང་ཞིང་གླེབས་པ་དེ་བཞིན་དུ་གཤིན་རྗེའི་མི་རྣམས་ཀྱིས་སེམས་ཅན་དམྱལ་བ་པ་དེ་སེམས་ཅན་དམྱལ་བ་དེར་སྦུད་པ་གཉིས་ཀྱིས་འབུད་ཅིང་འཇུའོ། །ལས་ཀྱིས་བསྒྲུབས་པའི་ཚ་བ་ཐམས་ཅད་ཀྱིས་འབུད་ཅིང་འཇུའོ། །བརྡུང་ཞིང་གླེབས་པ་ནི་ལྕགས་བཞིན་ཀུན་དུ་རྡུང་ངོ་། །ཡང་སྐྱེ་བར་འགྱུར་ཏེ་དེ་ནས་ཕྱུང་ནས་རྫ་མའི་ནང་དུ་བཅུག་སྟེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་ཇི་སྲིད་དུ་མོན་སྲན་གྲེའུ་བཞིན་དུ་བསྐོལ་ཏོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་རྟག་ཏུ་སྐོམ་པས་གདུངས་ཤིང་ཁྲོ་ལ་སྐྱེ་བོ་ཐམས་ཅད་ཡིད་ཆེས་པར་མི་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་
པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་སེམས་ཅན་དམྱལ་བ་ཐམས་ཅད་མུན་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པར་འགྱུར་རོ། །བརྫུན་སྨྲ་བ་ཡང་གཞན་གྱི་བུད་མེད་ལ་ཉལ་ནས་དེ་རྒྱལ་པོའི་ཕོ་བྲང་འཁོར་དུ་འདི་ལྟར་བདག་གིས་བུད་མེད་འདི་ལ་མ་ཉལ་ཞེས་སྨྲ་ལ། བུད་མེད་ཀྱི་ཁྱིམ་ཐབ་མི་དེ་ལ་ཡང་གནོད་པ་བྱེད་པར་མངོན་པར་སྒྲུབ་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཐམས་ཅད་མུན་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སྤྱི་བོར་ཕུག་ནས་དེར་ལྕེ་འབྱིན་ཏེ་ཕྱུང་ནས་ཀྱང་རལ་གྲི་དག་གིས་གཅོད་དོ། །བཅད་ཅིང་བཅད་ཅིང་ཡང་སྐྱེ་བར་འགྱུར་རོ། །ཡང་མཚོན་ཆ་ཧུ་ལུ་ཀ་རབ་ཏུ་འབར་བ་དག་གིས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་གཅོད་དོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། དེ་ལས་དེ་དང་རྒྱུ་འཐུན་པའི་འབྲས་བུས་དེ་དམུས་ལོང་དང་འོན་པར་འགྱུར་ཞིང་དེ་སྐྱེས་མ་ཐག་ཏུ་ཁ་ཟས་ལམ་པོ་ཆེ་དང་བཞི་མདོར་སྡུག་ཕོངས་པས་འཚོ་བར་འགྱུར། ཁྱིམ་གྱི་སྒོ་དུ་མར་ཁ་ཟས་སློངས་མོས་འཚོ་ཞིང་ཚེ་ཐུང་ལ་བུ་དང་ཆུང་མས་ཀྱང་སྤངས་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་སེམས་ཅན་དམྱལ་བ་མུན་པ་དང་དུད་པ་ཞེས་བྱ་བ་ལ་བརྟགས་ཏེ། དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་
ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པར་འགྱུར་རོ། །བརྫུན་སྨྲ་བ་ཡང་ཚོང་པ་ཁེ་སྤོགས་ཀྱིས་འཚོ་བའི་ཕྱིར། རྫས་འདི་ནི་ཚོང་པའི་ནང་ཁྲིམས་ཀྱིས་བདག་དབང་སྟེ། འདི་གཞན་མི་དབང་ཞེས་དེས་བརྫུན་སྨྲ་ཞིང་གཡོ་ཐབས་ཀྱིས་རྫས་འཕྲོག་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བའི་འཇིག་རྟེན་མུན་པ་དང་དུད་པ་ཞེས་བྱ་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སྔ་མ་བཞིན་དུ་གང་སེམས་ཅན་དམྱལ་བ་ཡང་སོས་ལ་སོགས་པ་ལ་འབྱུང་བ་ལྟར་ཡན་ལག་དང་ཉིང་ལག་ཤིན་ཏུ་འཇམ་པ་ཐམས་ཅད་བཅད་ཅིང་གཏུབས་པ་དང་། ཡང་རབ་ཏུ་ངུའོ། །དེའི་སྡིག་པའི་ལས་ཀྱི་རྒྱུ་འཐུན་པ་རྣམ་པར་སྨིན་པ་ཚ་བ་རྣམ་པར་སྨིན་པ་ཆེན་པོས་ཤིན་ཏུ་འཇམ་པ་དེ་དག་ཀྱང་བཅད་ནས་སྐྱེའོ། །སེམས་ཅན་དམྱལ་བ་པ་དེ་ཆོ་ངེས་འདེབས་པ་ན། ཟླ་བ་དྲུག་ལུས་པའི་རུས་པ་གང་ཡིན་པ་དེ་དག་ཀྱང་རང་གི་ལུས་ལས་བྱུང་བའི་སྲིན་བུ་རྡོ་རྗེ་མཆུ་ཅན་ལ་ཁ་རབ་ཏུ་འབར་ཞིང་ཁ་དོག་སྣ་ཚོགས་ཅན་དག་གིས་ཟ་ལ་གནོད་པ་སྣ་ཚོགས་དང་། གནོད་པའི་ཚོར་བ་བྱེད་དེ། དེ་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་བརྒྱ་སྟོང་ཕྲག་དུ་མར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེའི་ལུས་ལས་དྲི་ང་བ་འབྱུང་། དེའི་མགོའམ་གོས་ལ་ཡང་དྲོད་གཤེར་ལས་སྐྱེས་པའི་སྲིན་བུ་སྐྱེ་བར་འགྱུར་ཞིང་དབུལ་བར་འགྱུར་རོ། །མཆུ་དང་བཞིན་ཁབ་ལྟར་ཕྲ་ལ་ཚེ་ཐུང་བར་ཡང་འགྱུར། ཚིག་ཡིད་མི་ཆེས་ཤིང་སྐྱེ་བོ་ཐམས་ཅད་
མི་དགའ་ལ་སྡུག་ཕོངས་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ཏེ། དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཕྱེ་མ་ལེབ་ལྟར་འཇུག་པ་དང་འདྲ་བ་ཞེས་བྱ་བ་ལ་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །བརྫུན་སྨྲ་བ་ཡང་དགེ་འདུན་གྱི་རྫས་ཀྱི་རྣམ་པ་ཉོ་བ་དང་བཙོང་བ་ཟས་སམ་གོས་ཅུང་ཟད་ཅིག་བླངས་ལ། དགེ་འདུན་གཞན་ལ་རིན་ཐང་ཆེན་པོར་འདེབས་ཤིང་ཆགས་པ་དང་ལྡན་པ་དག་དགེ་འདུན་དེ་དག་ལ་སླུ་བར་ཡང་བྱེད་དེ། འདི་ལྟར་བདག་གིས་ཉོས་པ་འདི་དེ་བཞིན་དུ་ཁྱོད་ལ་སྦྱིན་ནོ་ཞེས་ཀྱང་སྨྲ་ཞིང་སྐྱེས་བུ་རྨོངས་པ་དེ་ཚོང་པའི་བདེ་ལ་ཆགས་ནས་བརྫུན་སྨྲའོ། །དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཕྱེ་མ་ལེབ་ལྟར་འཇུག་པ་དང་འདྲ་བ་ཞེས་བྱ་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ཁྱིས་ལྟོ་ཕུག་ནས་རྒྱུ་མ་དག་ཟའོ། །གཤིན་རྗེའི་མི་རྣམས་ཀྱིས་སྟེའུ་རབ་ཏུ་འབར་བ་དག་གིས་རྒྱབ་ཀྱི་ཤ་བཞོགས་ནས་སྲང་གཅིག་གམ། སྲང་ཕྱེད་དུ་སྲང་གིས་བཅལ་ནས། ཁྱི་དག་ལ་སྦྱིན་པར་བྱེད་ཅིང་རྐང་དབྱུང་བའི་ཕྱིར་སྟེའུ་རྣོན་པོ་དག་གིས་རུས་པ་ཡང་འཇོག་པར་བྱེད་དོ། །སྐམ་པ་རབ་ཏུ་འབར་བས་མགུལ་བའི་ཕྱོགས་ཕུག་ནས་ལྕེ་འབྱིན་ཏོ། །ཡན་ལག་དང་ཉིང་ལག་ཐམས་ཅད་ལ་ཕུར་བུ་རབ་ཏུ་འབར་བ་དག་བཙུགས་ནས་ཤ་དག་བཅད་ཅིང་རྒྱུས་པ་འབྱིན་ཏེ། དེ་ཉེས་པར་བྱས་པའི་ལས་ཀྱི་མཐའ་སྤྱད་པ་རང་གིས་བྱས་པའི་ལས་སྤྱོད་ཅིང་བརྫུན་སྨྲ་བ་དེ་རྣམ་པར་འཚེད་དོ། །སེམས་ཅན་དམྱལ་བ་པ་དག་གཤིན་རྗེའི་མི་རྣམས་ལས་ཐར་ནས་མེ་རྟག་ཏུ་འབར་བས་གང་བའི་སེམས་ཅན་དམྱལ་བ་དེར་ཇི་སྲིད་དུ་དེའི་སྡིག་པའི་ལས་བཅོམ་
ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་ཕྱེ་མ་ལེབ་བཞིན་དུ་སྐྱེ་ཞིང་སྐྱེ་ཞིང་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་དབུལ་ཞིང་དམན་ལ་བཀྲེན་པ་དང་། གཞན་གྱིས་བཀོལ་བའི་རིགས་སུ་སྐྱེ་བར་འགྱུར། དེ་བྱིས་པ་ནས་ཀུན་ནས་ཤིན་ཏུ་བསྲུངས་ཀྱང་མེས་ཚིག་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་སེམས་ཅན་དམྱལ་བ་ཤི་མ་ཐག་ཏུ་འཚོ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་བརྫུན་དུ་སྨྲ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཤི་མ་ཐག་ཏུ་འཚོ་བར་སྐྱེ་བར་མཐོང་ངོ་། །དེར་སེམས་ཅན་དམྱལ་བ་ཡང་སོས་ལ་སོགས་པ་རྣམས་ཀྱི་ཚོར་བ་གང་ཡིན་པ་དེ་དག་ཐམས་ཅད་སྔ་མ་བཞིན་དུ་འབྱུང་བའི་སྟེང་དུ་ཁྱད་པར་དུ་ན་ཐོ་བ་དག་གིས་ཀུན་དུ་བཏགས་པ་ན། ཕོག་མ་ཐག་ཏུ་འཆི་བར་འགྱུར་ཞིང་། བཏེག་པ་དང་ཡང་འཚོ་བར་འགྱུར་ལ། ཕོག་པ་དང་ཡང་འཆི་བར་འགྱུར་ཏེ། དེ་ལྟར་སེམས་ཅན་དམྱལ་བ་པ་དག་ལོ་འབུམ་ཕྲག་དུ་མར་སྐྱེ་ཞིང་འཆིའོ། །དེ་ཉེས་པར་སྤྱད་པའི་ལས་ཀྱི་མཐའ་སྤྱད་པ་དེ་ལས་ཐར་ནས། མེ་ཏོག་ཨུད་པ་ལའི་ཚལ་མཐོང་སྟེ། སྐྱབས་འདོད་པ་དེ་དེར་བརྒྱུགས་པ་དང་། མེ་ཏོག་ཨུད་པ་ལ་དག་མེ་སྔོན་པོས་ཤིན་ཏུ་གང་བར་གྱུར་ཏོ། །བརྫུན་སྨྲ་བ་དེའི་འབྲས་བུ་དེ་གང་ཡིན་སྙམ་ན་འཇིགས་སར་
འགྲོ་བའི་ཚོང་པ་གསད་པའི་ཕྱིར། ཆོམ་རྐུན་པ་གང་ཞིག་དགེ་སློང་གི་ཚུལ་དུ་ཞུགས་ནས་འཇིགས་ས་ན་ཆོམ་རྐུན་མེད་དོ་ཞེས་སྨྲས་པ་དང་། དེ་དག་ནང་དེར་དོང་སྟེ་ཕྱིན་པ་དང་། རྐྱེན་དེས་བཅོམ་པའི་ལས་དེའི་འབྲས་བུས་མེ་ཏོག་ཨུད་པ་ལ་གང་ཡིན་པ་དེ་དག་མདག་མ་སྔོན་པོས་གང་བར་ཞུགས་པ་ཡིན་ཏེ་རྐང་པ་མེད་ཅིང་ཕྱིར་འབྱུང་བར་མི་ནུས་སོ། །དེའི་ལས་ཀྱི་ཚུལ་དེ་ལྟ་བུའི་མཐུས་དེ་ལག་པ་དང་། རྐང་པ་དང་། མིག་དང་བྲལ་ཞིང་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་མེ་ཏོག་ཨུད་པ་ལ་མདག་མེས་གང་བ་དེར་སྲེག་ཅིང་འཚེད་ལ་གསོད་ཅིང་ཡང་འཚོ་བར་བྱེད་དོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པས་དེ་རྟོག་པ་པོ་དང་། གཡོ་ཐབས་སྨྲ་བར་འགྱུར། དེའི་ནོར་རྫས་བསགས་པ་རྒྱལ་པོས་འཕྲོག་ཅིང་དེ་ཡང་བཅིངས་པའི་ཚེ་འཆི་བའི་དུས་བྱེད་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆེན་པོ་ངུ་འབོད་ཀྱི་སེམས་ཅན་དམྱལ་བ་གཞན་དུ་འགྱུར་བ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །བརྫུན་སྨྲ་བ་ཡང་དེ་དབྱེ་བའམ་གསོད་པའམ་ཕ་རོལ་ལས་རྒྱལ་བར་བྱ་བའི་ཕྱིར་གཡོ་སྒྱུ་སྨྲ་བ་ཡིན་ན། འདི་ལྟ་སྟེ། བདག་ནི་རྟག་ཏུ་བདེན་པར་སྨྲ་བ་ཡིན་ཏེ། བདག་བདེན་པ་སྨྲའོ་ཞེས་འཇིག་རྟེན་ཀུན་དད་པ་བསྐྱེད་ནས། དེ་དེའི་ཚེ་བརྫུན་སྣ་ཚོགས་སྨྲས་
པ་གང་གིས་ཡུལ་འཁོར་འཇོམས་པར་བྱེད། སྐྱེས་བུ་དམ་པ་གསོད་པར་བྱེད། དགྲ་གཞན་གྱི་ནོར་རྫས་འཕྲོག་པར་བྱེད་དོ། །སྔོན་བདེན་པ་སྨྲའོ་ཞེས་འཇིག་རྟེན་ཡིད་ཆེས་པ་ཐོབ་པར་བྱས་ཤིང་དད་པ་བསྐྱེད་དེ། དེ་ནས་བརྫུན་སྨྲ་བ་ནི་དེ་ཆ་ལུགས་བཟང་པོར་བསྒྱུར་ཅིང་རྐུན་མ་བརྫུན་སྨྲ་བ་ཡིན་ཏེ། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་གཞན་དུ་འགྱུར་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། རྒྱང་རིང་པོ་ནས་དེའི་མ་དང་ཕ་དང་བྲན་དང་བསྟེན་གྲོགས་དང་སྡུག་པའི་མི་དེ་དག་མཐོང་ངོ་། །སེམས་ཅན་དམྱལ་བ་དེས་མཐོང་བ་དང་། དེ་དག་གི་ཁ་ནས་དེས་ཚིག་སྙན་པ་དག་ཐོས་པ་དང་། དེ་དག་གི་དྲུང་དུ་མགོན་འདོད་པ། སྐྱབས་འདོད་པ། དཔུང་གཉེན་འདོད་པ། དཔུང་གཉེན་ཚོལ་བས་རྒྱུག་གོ །དེ་ཇི་ལྟ་ཇི་ལྟར་དེ་དག་གི་དྲུང་དུ་རྒྱུག་པ་དེ་ལྟ་དེ་ལྟར་མདག་མེ་མཚོ་ལྟ་བུའི་ནང་དུ་ནུབ་སྟེ། ཇི་ལྟར་རྡོ་ཆུར་བོར་བ་བཞིན་དུ་ནུབ་བོ། །དེ་ནས་འབྱུང་ལ་ཡན་ལག་དང་ཉིང་ལག་ཐམས་ཅད་ཤིན་ཏུ་བསྲེགས་ཏེ། ཚོར་བས་ཉམ་ཐག་ནས་ངུ་སྐད་འདོན་པ་ན། དེའི་ཕ་དང་མ་དང་བུ་དང་བསྟེན་གྲོགས་དག་མཐོང་བ་དང་ཡང་རྒྱུག་གོ །དེ་ནས་ཡང་ལས་ཀྱིས་བྱས་པའི་གཤིན་རྗེའི་མི་སོག་ལེ་ཐོགས་པ་དག་ལམ་ནས་བྱུང་སྟེ། དེ་གཤིན་རྗེའི་མི་དེ་དག་གིས་བཟུང་ངོ་། །བཟུང་ནས་ཤིང་བཞིན་དུ་དབུས་གཤོག་གོ །དེ་རེས་འགའ་དེ་ལས་ཐར་ན་པགས་པ་དང་། རུས་པ་ཙམ་ལུས་པ་ཡན་ལག་དང་ཉིང་ལག་ཐམས་ཅད་ཕུག་ཅིང་དྲལ་བའི་ལུས་རྨ་མཚན་ཅན་དག་གར་ཐར་ཐར་དུ་འབྲོས་སོ། །དེ་བྲོས་ན་ཡང་གཤིན་རྗེའི་མི་གཞན་དག་གིས་བཟུང་ངོ་། །བཟུང་ནས་ལས་ལས་བྱུང་བའི་ཟོ་ཆུན་རྒྱུད་མའི་ནང་རྡོས་བཀང་བ་དེར་དེ་བཅུག་གོ །དེ་ནས་ཟོ་ཆུན་རྒྱུད་མོ་རབ་ཏུ་འབར་བ་འཁོར་ལོ་ལྟར་བསྐོར་ཏེ། དེར་བརྫུན་སྨྲ་བ་དེ་ཕྱེ་བཞིན་དུ་འཐག་ཅིང་ཕྱེ་མར་རློག་གོ །དེ་ཟོ་ཆུན་རྒྱུད་མོ་དེ་ལས་བྱུང་སྟེ། ཐར་ནས་མ་དང་ཕ་དང་།
བསྟེན་གྲོགས་དང་། སྙིང་དུ་སྡུག་པ་མཐོང་སྟེ། མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ། དེ་དག་གི་དྲུང་དུ་བརྒྱུགས་རྗེས་སུ་བརྒྱུགས་པ་དང་། ལས་ཀྱིས་བྱས་པའི་ལམ་དུ་ཕུར་བུ་དང་། ལས་ཀྱི་སྟག་བྱུང་སྟེ། དེ་དེས་བཟུང་ངོ་། །བཟུང་ནས་ཁར་བཅུག་སྟེ། དེ་འགྲམ་སོའི་བར་དུ་བཅུག་ནས་ཕུར་བུ་རྣོ་ཞིང་རབ་ཏུ་འབར་བ་རྣམས་ཀྱིས་གཟེར་ནས་འདྲེན་ཏོ། །དེ་སེམས་པ་དང་ལྡན་ནས་རྒྱུག་པ་དང་། དེའི་རྐང་པ་ཡང་གཅོག་ཅིང་འཐུབ། བྱིན་པ་ཡང་གཅོད་ཅིང་འཐུབ་ལ་སྲེག་གོ ། དེའི་ཡན་ལག་དང་ཉིང་ལག་ཐམས་ཅད་ཕུག་ཅིང་དྲལ་ལ་ལུས་བསྲེགས་ཤིང་ལུས་ཉམས་ལ་རྣམ་པར་ཉམས་པ་དང་། རྩ་དང་། རྒྱུས་པ་དང་། རུས་པ་དང་། ལུས་ཀྱི་ལྷག་མ་ལུས་པ་དག་ཤིན་ཏུ་རྒྱུག་སྟེ། དེ་ལྟར་བརྫུན་སྨྲ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་འབྲས་བུས་རྒྱུ་དང་འཐུན་པའི་འབྲས་བུ་གྲུབ་བོ། །འདི་ལྟར་དེ་བདེན་པར་སྨྲ་བར་བསྒྲུབས་ལ། དེ་ནས་བརྫུན་སྨྲ་ཞིང་གཡོ་ཐབས་སྨྲ་ལ་ཤུར་ལུང་སྨྲ་བ་དག་དེ་ལྟར་དེ་མ་དང་ཕ་དང་། བསྟེན་གྲོགས་དང་། སྙིང་དུ་སྡུག་པ་མཐོང་ངོ་། །བརྫུན་སྨྲ་བ་དེ་འདི་ལྟར་ཚོར་བ་རྩུབ་པ་ཚ་བ། ཚོར་བ་རྣོ་བ། མཐའ་ཡས་པ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་སྲེག་གོ །འཚེད་དོ། །གཅོད་དོ། །གསོད་དོ། །དེ་སེམས་ཅན་དམྱལ་བ་དེ་དག་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པར་དེ་དབུལ་ཞིང་ནད་བུ་ཅན་དང་། དམན་པ་དང་། དབང་པོ་མ་ཚང་བར་འགྱུར། སྐྱེ་བོ་ཐམས་ཅད་ལ་ཡིད་མི་ཆེས་ཤིང་ཞེ་འགྲས་པ་དང་མི་འཐུན་པར་འགྱུར། དེའི་བསམ་པ་ཐམས་ཅད་མི་འགྲུབ་ཅིང་ལོག་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་
བརྟགས་ན། དེས་ཐོས་པ་ལས་བྱུང་བའི་ཤེས་པས། སེམས་ཅན་དམྱལ་བ་ཀུན་དགའ་ལ་རེ་བ་མེད་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །བརྫུན་སྨྲ་བ་ནི་རྣམ་པ་འདི་དག་སྨྲ་བ་ཡིན་ཏེ། སྡུག་བསྔལ་བ་དང་། ནད་བུ་ཅན་དང་། ལྟོགས་པ་དང་། དམན་པ་དང་། མགོན་མེད་པ་དང་། བཀྲེན་པ་དག་ལ་ནོར་རྫས་སྦྱིན་པར་ཁས་བླངས་པ་ལས་མ་བྱིན་པ་ཡིན་ཏེ། འབྲས་སཱ་ལུའི་བཟའ་བ་དང་། བཏུང་བ་དང་། གོས་དང་། མལ་ཆ་དང་། ཁྱིམ་སྦྱིན་པར་ཁས་བླངས་པ་ལས་མ་བྱིན་པ་དེ་ནི་རྒྱུ་དེས་རེ་བ་མེད་པར་འགྱུར་ཏེ། དེ་ལུས་དང་བྲལ་བའི་འོག་ཏུ་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཀུན་དགའ་ལ་རེ་བ་མེད་པ་ཞེས་བྱ་བར་སྐྱེ་བར་འགྱུར་རོ། །དེར་གནོད་པའི་རྣམ་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། གང་གིས་བཟའ་བ་སྦྱིན་པར་ཁས་བླངས་པ་ལས་མ་བྱིན་པ་དེ་ནི་སེམས་ཅན་དམྱལ་བར་བཟའ་བ་དང་། བཅའ་བ་ཞིམ་པོ་དང་། རྒྱན་སྣ་ཚོགས་ཀྱིས་བཀླུབས་པ་དག་མཐོང་ངོ་། །སེམས་ཅན་དམྱལ་བ་པ་ལྟོགས་པས་ཉེན་པ་དེ་དག་རྒྱང་རིང་པོ་ན་བཟའ་བ་ཉམས་དགའ་ཞིང་སྨོན་པའི་བཟའ་བ་དེ་དག་མཐོང་སྟེ། བཟའ་བ་དེ་དག་གི་ཕྱོགས་སུ་རྒྱུག་པ་དང་། ལམ་ཕུར་བུ་དང་། སྤས་གང་ཞིང་ལམ་དུ་སོག་ལེ་རབ་ཏུ་འབར་བས་གཤེག་པ་ན་ཕྱོགས་དེར་རྒྱུག་པ་ནི་སྔ་མ་བཞིན་དུ་སྦྱར་རོ། །ནམ་ཟས་དེ་ཐོབ་པ་དང་། དེ་དག་ལྕགས་ཀྱི་ཐུ་ལུམ་རབ་ཏུ་འབར་བ་ལྟ་བུར་གྱུར་ཅིང་དྲི་ང་ལ་མདོག་མི་སྡུག་པ་ལས་ཀྱིས་བྱས་པ་ཚུལ་ལོག་པར་མཐོང་སྟེ། དེ་ཉེ་བར་བལྟས་པ་དང་། མིག་གི་འབྲས་བུ་ལྟུང་ངོ་། །གང་གི་ཚེ་བསྣམས་པ་དང་དྲི་དེས་སྣ་ཚིག་ནས་བྱིད་དོ། །རེག་པས་ཡན་ལག་དང་ཉིང་ལག་ཐམས་ཅད་རབ་ཏུ་
ཚིག་སྟེ། དེའི་ལུས་སྲིན་བུ་མེ་ཁྱེར་ལྟ་བུར་བྱེད་དོ། །རོ་བྲོ་བ་ལྕགས་ཀྱི་ཐུ་ལུམ་བསྲེགས་པ་ལྟ་བུས་ལྕེ་སྲེག་གོ །དེ་བསྲེགས་ནས་ཡང་མིད་པ་དང་། སྙིང་དང་། མཆིན་པ་དང་། གཉེ་མ་དང་། རྒྱུ་མ་དང་། ཕོ་བ་དང་། ལོང་ཀ་ནས་རོ་སྨད་ཀྱི་བར་དུ་བསྲེགས་ནས་འབྱུང་ངོ་། །ཡང་གང་གིས་མལ་ཆ་དང་། ཁྱིམ་སྦྱིན་པར་ཁས་བླངས་པ་ལས་བརྫུན་སྨྲས་པ་དེ་གྲང་བ་དང་ཚ་བས་གདུངས་ཤིང་རེ་བ་མེད་པར་བྱས་སོ། །སེམས་ཅན་དམྱལ་བ་པ་དེ་ས་གཞི་ཟངས་ཀྱི་གླེགས་མ་རབ་ཏུ་བཞུས་པར་བཞག་སྟེ། དེས་ཡན་ལག་དང་ཉིང་ལག་ཐམས་ཅད་རྣམ་པར་འཇུ་ཞིང་སྲེག་གོ །དེས་ཁྱིམ་སྦྱིན་པར་བྱས་པ་ལས་མ་བྱིན་པ་དེ་ཡང་འབྱུང་བར་འགྱུར་ཏེ། ཁྱིམ་གྱི་བརྫུན་སྨྲ་བ་དེ་ལྕགས་ཀྱི་ཁྱིམ་དགའ་བ་དང་། ཉེ་བར་དགའ་བ་ཚད་དཔག་ཚད་ལྔ་བཅུ་པར་ལྕགས་ཁུ་རབ་ཏུ་བསྐོལ་བའི་ནང་དུ་འཇུག་གོ །དེ་དེར་འོག་ནས་སྟེང་དུ། སྟེང་ནས་འོག་ཏུ་བསྐོལ་བ་ན། སྟེང་ནས་སྟེང་དུ་འབྱུང་ཞིང་། འོག་ནས་འོག་ཏུ་འབྱུང་བར་བསྐོལ་བ་དང་། རབ་ཏུ་ཚོས་ཏེ་ཡན་ལག་དང་ཉིང་ལག་ཐམས་ཅད་རྣམ་པར་ཞིགས་ཤིང་ཤ་དང་། རྒྱུས་པ་དང་། པགས་པ་དང་། རུས་པ་དང་། ཚིགས་ལྷག་མ་ལུས་པ་ཐམས་ཅད་ཀྱང་རྣམ་པར་ཞིགས་ནས་རབ་ཏུ་བསྐོལ་བས་གང་བའི་རྫ་མ་མུན་པ་མུན་ནག་དེ་གཉིས་ཀྱི་ནང་དུ་འབྱུང་སྟེ། གདུངས་ཤིང་རྣམ་པར་ཁྲོ་ལ་སྨྲེ་སྔགས་འདོན་ཏོ། །གང་རྫ་མ་གོང་མ་དེར་བཙོས་པ་དང་། དེའི་འོག་ཏུ་ལྕགས་ཀྱི་རྫ་མ་འོག་མ་དེར་རབ་ཏུ་འཚེད་དེ། འདི་ལྟར་འོག་ཏུ་འབྱུང་ཞིང་དེ་དག་གི་ཤུགས་ཀྱིས་གཅིག་ལ་གཅིག་ཕོག་སྟེ། ལུས་དུམ་བུ་བརྒྱའམ་གལ་ཏེ་སྟོང་དུ་གྱེས་སོ། །དེ་ནས་ཡང་འབྱུང་སྟེ། སེམས་ཅན་དམྱལ་བ་པ་གཞན་དག་ལ་ཕོག་སྟེ། ཇི་སྲིད་དུ་བརྫུན་སྨྲ་བ་དེའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལས་ཀྱི་ཞགས་པས་བཅིངས་པ་དག་ཡང་ལན་འབུམ་སྙེད་དུ་རྣམ་པར་ཞིགས་སོ། །དེ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་
ཡི་དགས་དང་དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་བྲན་གྱི་རིགས་སམ་དེ་དང་འཐུན་པར་དེ་ཉིད་དུ་སྐྱེ་བར་འགྱུར་ཏེ། གང་ཁས་བླངས་པ་ལས་བརྫུན་དུ་སྨྲས་པ་དེ་ནི་དེ་དང་འཐུན་པར་ལས་གཞན་དང་གཞན་དུ་འགྱུར་རོ། །དེ་ལ་འཁོར་བ་ཐོག་མ་མེད་པ་ནས་གནོད་པ་གང་ཞུགས་པ་ཐོག་མ་མེད་པ་ནས་དགེ་བ་དང་མི་དགེ་བའི་ལས་ཀྱིས་བྱས་པའི་རྒྱུད་ཀྱི་འཁོར་བའི་མཐའ་ཀུན་ཏུ་ཞུགས་པ་ལས་ཀྱི་རྒྱུད་ཀྱིས་དགའ་བའི་འདོད་ཆགས་ཀྱི་མོད་ལ་སྲེད་པ་གང་བྱུང་བའི་གནོད་པ་དེས་གཞན་དག་གི་བྲན་དུ་འགྱུར་ཏེ། བཟའ་བ་དང་། བཏུང་བ་དང་། མལ་སྟན་དང་། ནད་ཀྱི་རྐྱེན་གསོས་སྨན་མེད་ཅིང་། ཇོ་བོ་དེས་རྟག་ཏུ་སྤྱོ་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ནི་དེས་སྔ་མ་བཞིན་དུ་མཐོང་ངོ་། །བརྫུན་སྨྲ་བ་ནི་བཟོ་བོ་ཚོགས་ཤིང་འདུས་པའི་ནང་དུ་སོང་ནས་རྒྱགས་པ་བདོ་བའམ་ཞེ་སྡང་ངམ་ཕན་ཚུན་མི་འཐུན་པས་གང་དུ་ཚོགས་ཤིང་འདུ་བའི་ཁྲིམས་བཅས་ཏེ་ཆད་པས་གཅད་པར་བྱ་བ་ལས། དེ་ཉེས་པ་མེད་བཞིན་དུ་བདག་དང་གཞན་བསླུས་ནས་ཆད་པས་གཅོད་པར་བྱེད་ཅིང་དེ་ཡང་གོམས་པར་བྱེད། ལན་མང་དུ་བྱེད་ལ་ལས་ཀྱི་མཇུག་བསགས་པ་དེ་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཕན་ཚུན་གནོད་པ་འཇུག་པར་སྐྱེ་བར་འགྱུར་ཏེ། གང་གི་ཚེ་ཚོགས་ཤིང་འདུས་པ་དེ་དག་གི་ནང་དུ་སོང་ནས་གནོད་པ་བྱས་པའི་རྒྱུ་དེ་དང་རྐྱེན་དེས་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཕན་ཚུན་གནོད་པ་འཇུག་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། གང་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་ལ་སོགས་པར་བཤད་པ་སྔ་
མ་བཞིན་དུ་འབྱུང་བའི་སྟེང་དུ་བྱེ་བྲག་ཏུ་འབྱུང་བ་ནི་འདི་ལྟ་སྟེ། ལས་བྱས་པའི་སེམས་ཅན་དམྱལ་བ་དེར་སེང་གེ་མཆེ་བ་རབ་ཏུ་འབར་བ་འབྱུང་སྟེ། དེ་སེམས་ཅན་དམྱལ་བ་པ་བརྫུན་སྨྲ་བ་དེ་ལ་སྔོན་སྨྲས་པའི་ཚོར་བ་དང་ལྡན་པས་ཡང་ནས་ཡང་དུ་ཟའོ། །དེ་འགྲམ་པ་ཕྱེ་བ་དང་འཚོ་བར་འགྱུར་ལ་བཙུམས་པ་དང་ཡང་ལུས་ཐམས་ཅད་ཟ་སྟེ། དེ་སོས་པ་དང་ཟའོ། །དེ་སོས་པ་དང་ཟ་བར་འགྱུར་ཏེ། དེའི་ལས་ཀྱིས་བྱས་པའི་སེང་གེའི་སོ་གཏམས་པའི་བར་དུ་ཆུད་པ་དང་། དེའི་ཁ་མདག་མ་རབ་ཏུ་འབར་བས་གང་སྟེ། དེ་སོས་ནི་ཟ་ལ་མེས་ནི་ཅིག་ཅར་སྲེག་གོ ། དེ་ལྟར་བརྫུན་ཟེར་བ་དེ་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་གནོད་པ་དཔེ་མེད་པ་རྗེས་སུ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་སྦྲུལ་ལམ་སེང་གེའམ་སྟག་གམ་དོམ་གྱིས་གསོད་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་ཟེར་བ་མཐོང་སྟེ། དེ་སྐྱེས་པའི་རིགས་གཅིག་པའི་སྤུན་གྱི་ནོར་གྱི་ཕྱིར་རམ། ཕ་དང་མེས་པོ་གཅིག་པའི་སྤུན་དེ་གཉིས་ནོར་གྱི་ཕྱིར་རྩོད་པ་ན། དེ་སྤུན་གཉིས་པའམ། ཁུ་བོའམ། དེ་དང་རིགས་གཅིག་པའི་ཆེད་དུ་གཡོ་ཐབས་ཀྱི་བློ་དང་། བརྒྱད་པའི་བློས་བརྫུན་མངོན་དུ་ཟེར་ཞིང་ཤེས་པར་བྱས་རིག་པར་བྱས་ལ་ལས་དང་ལས་ཀྱི་མཇུག་དང་། ཉེར་བསྡོགས་དང་ལྡན་པར་གྱུར་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་
བ་ཕན་ཚུན་གནོད་པ་འཇུག་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། གང་ཡང་སོས་ལ་སོགས་པའི་སྔ་མ་བཞིན་དུ་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་ལས་བྱས་པས་ཤན་པར་འགྱུར་ཏེ། གང་རང་གི་གཉེན་འདབ་དེ་ལ་བསླུས་ཤིང་བརྫུན་བྱས་པས་ཤ་དེ་བཅད་ཅིང་བཅད་ཅིང་བདག་གི་ཁ་དེར་འཇུག་སྟེ། སེམས་ཅན་དམྱལ་བ་པ་ལ་དེ་ཟར་འཇུག་གོ ། སེམས་ཅན་དམྱལ་བ་པ་ཉེས་པར་བྱས་པའི་ལས་དེས་རང་གི་ཤ་དེ་ཡང་ལྕགས་ལྟར་རབ་ཏུ་འབར་ཞིང་རོ་བྲོ་བ་མེད་པ་ཡིན་ནོ། །དེ་ལ་གནོད་པ་གཉིས་འབྱུང་སྟེ། ཤན་པ་བྱས་པས་ལུས་ལ་ཚོར་བ་འབྱུང་བ་དང་། བཀྲེས་ཤིང་སྐོམ་པ་བྱས་པ་གཉིས་ཏེ། དེར་ཤ་བཅད་པ་དང་། དེ་ལས་བྱུང་བའི་སྲིན་བུ་དག་སྐྱེས་ཏེ། གང་རུས་པ་གཞན་དག་དང་། རྐང་ཚུན་ཆད་ལ་ཡང་ཟའོ། །དེ་ལྟར་ཉེས་པར་བྱས་པའི་ལས་ཀྱི་མཐའ་སྤྱད་པ་དེ་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་སེམས་ཅན་དམྱལ་བ་ཕན་ཚུན་གནོད་པ་འཇུག་པར་སྐྱེ་བར་འགྱུར་རོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་རྣམས་ཀྱང་ཕ་དང་མེས་པོའི་ནོར་འཐོབ་པར་མི་འགྱུར། ཡིད་ཆེས་པའི་གནས་སུ་མི་འགྱུར་ཞིང་དབུལ་པོར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ནགས་ཚལ་མེས་མཆེད་པའི་རྒྱུད་ལྟ་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་
ལེན་པ་དང་། འདོད་པས་ལོག་པར་གཡེམ་པ་དང་། འབྲུའི་ཆང་དང་། སྦྱར་བའི་ཆང་མྱོས་པར་འགྱུར་བ་བླུད་པས་འགྱུར་རོ། །བརྫུན་སྨྲ་བར་འགྱུར་བ་ནི་གྱད་ཚོགས་ཤིང་འདུ་བའི་ནང་དུ་སོང་སྟེ། ཉེས་པ་བྱས་ནས་ཆད་པས་འཇིགས་པའི་ཕྱིར་བདག་གིས་ཉེས་པ་མ་བྱས་ཞེས་སྨྲ་ན་དེ་ལུས་དང་བྲལ་བའི་འོག་ཏུ་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ནགས་ཚལ་མེས་མཆེད་པའི་རྒྱུད་ལྟ་བུར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་གང་ཡིན་པ་དེ་དག་ཐམས་ཅད་སེམས་ཅན་དམྱལ་བ་འདིར་འབྱུང་བར་འགྱུར་རོ། །ཁྱད་པར་དུ་འབྱུང་བ་ནི་ལྕགས་ཀྱི་གླེགས་མ་རབ་ཏུ་འབར་བས་འཁྲིགས་ཏེ། དེ་ཀུན་ནས་ཁྲག་དང་ཤ་འདམ་ལྟ་བུར་གྱུར་ཅིང་ཤིང་ལྗོན་པ་ཀེང་ཤུ་ཀ་ལྟར་མཚོན་འབབ་སྟེ། དེའི་ཚེ་དེའི་ལུས་དེ་ལ་ལྕགས་ཀྱི་གླེགས་མ་དེ་འབྱར་བར་འགྱུར་རོ། །གང་གི་ཚེ་ངུ་སྐད་འདོན་ན་དེའི་ཤ་དང་། ཚིལ་དང་། ཁྲག་ལྕགས་ཀྱི་གླེགས་མ་དེ་ལ་འཁྲིས་པ་གཤིན་རྗེའི་མི་དག་གི་ཤུགས་ཀྱིས་དེའི་ལུས་ལས་འཆུ་བར་བྱེད་དོ། །དེ་སེམས་ཅན་དམྱལ་བ་དེ་ལས་ཐར་བ་དང་། མགོན་འདོད་པ། སྐྱབས་འདོད་པ། ཀུན་ནས་གཙེས་པ་གཤིན་རྗེའི་མི་རྣམས་ཀྱིས་འཇིགས་ཤིང་སྐྲག་པ། ལུས་ཤིག་ཤིག་པོར་གྱུར་པ་དེས་བ་ཚྭའི་ཆུ་བོ་གནོད་སྐྱེས་ཞེས་བྱ་བ་མཐོང་སྟེ། དེར་རབ་ཏུ་འཇུག་གོ །དེ་ལྟར་གཤིན་རྗེའི་མི་རྣམས་ཀྱིས་འཇིགས་པའི་ཟིལ་གྱིས་གནོན་པ་དེ་དག་ཞུགས་མ་ཐག་ཏུ་ཡན་ལག་དང་ཉིང་ལག་ཐམས་ཅད་དང་། ལུས་ཆུ་རྒྱུས་མང་པོས་བརྒྱུས་ཤིང་སྦྲེལ་བ་དང་། པགས་པ་དང་། རུས་པ་ཀུན་རྣམ་པར་ཉམས་ཤིང་ལུས་ཀྱི་ཤ་སྙིལ་བའི་ལུས་དེ་མར་སར་གྱི་གོང་བུ་བཞིན་རབ་ཏུ་འཇུ་ཡང་དེའི་ཉེས་པར་བྱས་པའི་ལས་ཀྱི་མཐུས་དེ་འཆི་བར་མི་འགྱུར་རོ། །ཇི་ལྟར་འོད་མའི་ལོ་མས་ཁེངས་པ། བར་མེད་པའི་ནགས་ཚལ་མེས་མཆེད་པའི་རྒྱུད་ཀུན་ནས་རྟག་ཏུ་འབར་བར་བྱས་པས་གང་ལ་མེས་མ་མཆེད་པའམ། གང་དུ་སེམས་ཅན་མི་སྲེག་པའམ། མི་འཚེད་པ་མེད་པ་དེ་ལྟར་སེམས་ཅན་དམྱལ་བ་ནགས་
ཚལ་མེས་མཆེད་པའི་རྒྱུད་ལྟ་བུ་ལ་ཁབ་ཀྱི་བུ་ག་ཙམ་གྱི་ཕྱོགས་ཀྱང་མི་དམིགས་ཏེ། གང་དུ་སེམས་ཅན་དམྱལ་བ་པ་མགོན་འདོད་པ། སྐྱབས་འདོད་པ་དག་མི་སྲེག་པའམ། མི་འཚེད་པའམ། ངུ་སྐད་མི་འདོན་པའམ། མི་རྒྱུག་པ་མེད་དོ། །དེ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་དེ་དག་ལས་རེ་ཞིག་ཐར་བར་མི་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེའི་ཁ་ནས་ཚིག་འཁུམས་པ་འབྱུང་སྟེ། སྨྲ་མི་ནུས་ཤིང་འཕྲལ་སྐད་ཀྱང་སྨྲ་བར་མི་ནུས་ན། ལེགས་པར་སྦྱར་ཏེ་སྨྲ་བ་ལྟ་ཞིག་ནུས་པར་ལྟ་ག་ལ་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཚོར་བ་རིང་བ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། མི་དགེ་བ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་བྱས་ཤིང་བསགས་པར་འགྱུར་རོ། །བརྫུན་སྨྲ་བ་ཡང་རྣམ་པ་འདི་དག་སྨྲས་པར་འགྱུར་ཏེ། སྔར་དྲན་བཞིན་དུ་ཆུང་ཟད་ཁས་བླངས་པ་ནི། དགེ་འདུན་ལ་དངོས་པོ་ཆུང་ཟད་ཁས་བླངས་པའམ། དེ་བཞིན་དུ་སངས་རྒྱས་དང་ཆོས་ལ་གསལ་བར་ཁས་བླངས་ལ་དེས་ཕྱིས་མི་བཟོད་པ་བྱུང་ནས་བདག་གིས་ཁས་བླངས་པ་མེད་དོ་ཞེས་སྨྲ་ལ་དགེ་འདུན་ལ་ཡང་དེའི་ཁས་བླངས་པ་གང་ཡིན་པ་དེས་གནོད་པར་གྱུར་ན། དེའི་བརྫུན་དུ་སྨྲ་བ་དེ་བྱས་ཤིང་བསགས་ལ་འདུས་བྱས་པའི་འབྲས་བུས་སེམས་ཅན་དམྱལ་བ་ཚོར་བ་རིང་བ་ཞེས་བྱ་བ་དེར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་ཡང་
སོས་ལ་སོགས་པར་བཤད་པ་གང་ཡིན་པ་དེ་དག་ཐམས་ཅད་སྔ་མ་བཞིན་དུ་འབྱུང་བའི་སྟེང་དུ་ཁྱད་པར་འབྱུང་བ་ནི་འདི་ཡིན་ཏེ། འདི་ལྟ་སྟེ། གཤིན་རྗེའི་མི་རྣམས་ཀྱིས་ཁབ་ཀྱི་རྩེ་མོ་རབ་ཏུ་རིང་བ་རྣོ་ཞིང་ཕྲ་ལ་རབ་ཏུ་འབར་བ་དག་གིས་འབིགས་པར་བྱེད་དེ། དེ་ཚོར་བས་ཉམ་ཐག་ཅིང་ངུ་སྐད་འབྱིན་ཏོ། །དེ་ངུ་སྐད་འབྱིན་པ་ནི་འདི་ལྟ་སྟེ། དོང་བའི་ནང་མདས་བཀང་བ་དེ་ལྟར་དེའི་ཁ་དང་ལྕེ་ལ་ཁབ་དེ་དག་ཉིད་ཀྱིས་རྟག་ཏུ་འགེངས་ཏེ། དེ་ཚོར་བས་ཉམ་ཐག་པར་གྱུར་ཀྱང་ངུ་སྐད་འདོན་པའམ་སྨྲེ་སྔགས་འདོན་པར་མི་ནུས་སོ། །རང་གི་སེམས་ལ་བརྫུན་སྨྲ་བས་བསླང་ཞིང་བདག་གཞན་སླུ་བར་བྱེད་པ་རྟག་ཏུ་ཚོར་བ་གཞན་དང་མི་འདྲ་བའི་ཚོར་བ་མྱོང་བར་འགྱུར་རོ། །སེམས་ཅན་དམྱལ་བའི་འགྲོ་བ་ལས་ཐར་ནས་ཀྱང་ཡན་ལག་དང་ཉིང་ལག་ཐམས་ཅད་བ་སྤུའི་ཁུང་བུ་འདྲ་ཞིང་ལུས་ཐམས་ཅད་ཉམས་པ་དག་དེར་གར་བབ་བབ་ཏུ་ཚོར་བ་རིང་བས་ཉམ་ཐག་པར་ལྟུང་ངོ་། །དེ་ཇི་ལྟ་ཇི་ལྟར་ལྟུང་བ་དེ་ལྟ་དེ་ལྟར་ཁབ་ཤིན་ཏུ་རྣོ་བས་དེའི་ལུས་ལ་འཛུགས་པར་བྱེད་དེ། དེ་ཁབ་དེ་དག་གིས་ཡང་དང་ཡང་དུ་ཉམ་ཐག་པར་བྱེད་ཅིང་ཆེས་ཤིན་ཏུ་སྒྲ་འབྱིན་པར་བྱེད་ལ་ཁ་བཀབ་པས་ཟིལ་གྱིས་ནོན་པ་ནི་འཁུན་ཞིང་ནང་དུ་འཁུན་པར་བྱེད་དོ། །གལ་ཏེ་ཁབ་དེ་དག་རེས་འགའ་ཁ་ནས་བྱུང་ན་དེ་ངུ་སྐད་འབྱིན་པར་ནུས་ལ། གཞན་དུ་ན་ཁ་བཀབ་པས་ཟིལ་གྱིས་ནོན་པ་དག་འཁུན་པར་བྱེད་དོ། །ལྕགས་ཀྱི་ས་གཞི་རབ་ཏུ་འབར་བ་དག་ལ་གྲེད་ཅིང་འགྲེ་ལྡོག །རབ་ཏུ་འབྱིང་ཞིང་རབ་ཏུ་འཇུག་ལ་གཡོ་བར་བྱེད་དེ། གཤིན་རྗེའི་མིས་ཉམ་ཐག་པ་སྟ་རེ་དང་། མདུང་ཐུང་དང་། མདའ་བོ་ཆེ་དང་། གཏུན་ཤིང་དང་། མཚོན་ཆས་ལུས་ཐམས་ཅད་ཤིག་ཤིག་པོར་བྱས་སོ། །དེ་ལྟར་བརྫུན་སྨྲས་པ་དེ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་བྱེ་བ་དུ་མར་ཚོར་བ་དེ་དག་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ།
མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་དབུལ་ཞིང་ཚིག་ཡིད་མི་ཆེས་པར་འགྱུར། གང་དང་གང་ལ་དོན་བཅོལ་བའི་དེ་དང་དེ་ཁས་ལེན་པ་ཙམ་དུ་ཡང་མི་བཏུབ་ཅིང་དེ་ཤིན་ཏུ་དབུལ་བར་བྱས་པས་ཡིད་རེ་བ་མེད་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས། སེམས་ཅན་དམྱལ་བ་ཚོར་བ་མཐའ་ཡས་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བས་འགྱུར་རོ། །བརྫུན་སྨྲ་བར་འགྱུར་བ་ནི་འདི་ལྟར་ཚོང་པ་རྒྱ་མཚོར་ཞུགས་པ་དག་གིས་མཉན་པ་གདོས་པ་འཛིན་པ་ལ་ཆོམ་རྐུན་པ་རྣམས་ཀྱིས་སྙིང་བརྐམ་བཅུག་གམ། ནོར་རྫས་ཀྱིས་དབྱེན་བྱས་པ་ཡིན་ཏེ། ཆོམ་རྐུན་པ་དེ་དག་ཉིད་ཀྱིས་སམ་ཚོང་པ་དེ་དག་གི་ནང་ནས་ཁ་ཅིག་གིས་དབྱེན་བྱས་པས་ཚོང་པ་དེ་དག་ལ་གདོས་པ་འཛིན་པས། འདི་ལྟར་ཁྱེད་ཅག་རིན་པོ་ཆེའི་གླིང་དུ་བཀྲིའོ་ཞེས་སྨྲས་ལ་དེ་དག་ལ་དེ་ལྟར་དམ་བཅས་ནས་བརྫུན་བྱས་ཏེ། ཐང་གི་གླིང་ལ་ཁྲིད་པ་ལས་དེར་གལ་ཏེ་བ་དན་སྔོན་པོ་མཐོང་བཞིན་དུ་ཆོམ་རྐུན་པ་འོང་ངོ་ཞེས་ཚོང་པ་དེ་དག་ལ་མ་སྦྲན་ཏེ། དེ་དག་ཀྱང་གདོས་པ་འཛིན་པ་བདེན་པ་སྨྲ་བ་དེ་བདག་ཅག་ལ་སླུ་བར་མི་བྱེད་དོ་ཞེས་ཡིད་བརྟན་ཅིང་འདུག་འདུག་པ་ལས་གདོས་པ་འཛིན་པ་དེས་ཆོམ་རྐུན་པ་དག་ཚོང་པ་དེ་དག་གི་ནོར་མེད་པར་བྱེད་དུ་འཇུག་ཅིང་བདག་ཀྱང་ནོར་རྫས་དེ་འཕྲོག་པར་བྱེད་ན་བརྫུན་སྨྲས་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཚོར་བ་མཐའ་ཡས་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་ཡང་སོས་ལ་སོགས་པར་སྔར་བཤད་པ་བཞིན་དེ་དག་ཐམས་ཅད་དེར་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་སེམས་ཅན་དམྱལ་བ་པ་དེར་སྐྱེས་པ་དེ་དག་གི་མིག་ཕྲ་སྐམ་འདྲེན་པ་རབ་ཏུ་འབར་བ་དག་
གིས་འདྲེན་ཏོ། །མིག་འདྲེན་པ་དག་གིས་དྲངས་པ་དང་། དེ་ནས་ཡང་ཤིན་ཏུ་གཞོན་ཤ་ཅན་སྡུག་པར་སྐྱེས་ཏེ། གནོད་པ་ཆེས་མང་བ་དག་གིས་དེ་འབྱིན་པར་བྱེད་དོ། །དེ་དག་གི་རྣ་བ་ཡང་རོ་ཉེ་རབ་ཏུ་བསྐོལ་བས་བཀང་ལ་གཤིན་རྗེའི་མི་རྣམས་ཀྱིས་ཡན་ལག་དང་ཉིང་ལག་ཐམས་ཅད་སྤུ་གྲི་དག་གིས་འཇོག་པར་བྱེད་དོ། །སྲིན་བུ་ཏཱ་ལ་ལ་ལྭ་ལ་ཀ་ཞེས་བྱ་བས་དེའི་གཉེ་མ་དང་རྒྱུ་མའི་ནང་དུ་ཞུགས་ནས་རབ་ཏུ་ཟའོ། །ཕྱི་རོལ་དུ་ནི་མུན་པ་ཀུན་ནས་ཤིན་ཏུ་གནག་པ་དེར་འཇུག་ལ་ཕྱི་ནང་དེ་དག་ཐམས་ཅད་དུ་ཡང་ལས་ཀྱིས་བྱས་པའི་ཆུ་སྲིན་རབ་ཏུ་འབར་བ་དག་འབྱུང་སྟེ། དེ་དག་གིས་ཟ་བར་བྱེད། ཁ་དང་སེན་མོ་དང་སོ་རྡོ་རྗེ་ལྟར་རྣོ་ཞིང་འབར་བ་དག་གིས་ཡན་ལག་དང་ཉིང་ལག་ཐམས་ཅད་འབྱེད་པར་བྱེད། ཕྱེ་མར་རློག་པར་བྱེད་དེ། བྱེ་མ་ཆང་པ་ནས་གཏོར་བ་བཞིན་བྱེད་དོ། །དེ་སོའི་བར་དེ་ནས་ཐར་ནས་ཆུ་སྲིན་རབ་ཏུ་འབར་བ་དེ་དག་གི་ལྟོའི་ནང་དུ་འཇུག་པར་བྱེད་དོ། །དེ་ལྟར་དེ་དག་ཆུ་སྲིན་གྱི་ལྟོ་དེར་ལོ་འབུམ་ཕྲག་དུ་མར་ལོ་བྱེ་བ་ཕྲག་དུ་མར་ཆུ་སྲིན་དེ་དག་གི་ལྟོ་རབ་ཏུ་འབར་བར་དབུགས་མེད་པའམ། དབུགས་ཆུང་བར་སྲེག་ཅིང་འཚེད་དོ། །བརྫུན་སྨྲས་པ་དག་ཚོར་བ་དྲག་པ་ཚ་བ་རྩུབ་པ་མྱོང་ཞིང་ལས་ཀྱི་རྒྱུ་བརྫུན་སྨྲ་བ་རང་གི་ལྕེས་ཀུན་ནས་བསླང་བས་སྲེག་ལ་ཕྱིས་སེམས་ཅན་དམྱལ་བ་པའི་མེས་ཀུན་དུ་སྲེག་གོ །འདི་ལྟར་ཆུ་སྲིན་དེ་དག་གིས་ཡན་ལག་དང་ཉིང་ལག་ཐམས་ཅད་དཀྲིས་ནས་ལུས་ཕྱེ་མར་བྱས་པ་ཁ་ནས་འབྱིན་ཏེ། དེ་ནས་ཡང་ཕྱི་རོལ་དུ་མེ་མདག་སྔོན་པོས་སྲེག་གོ །བསྲེག་པ་ན་གཤིན་རྗེའི་མི་རྣམས་ཀྱིས་ཚིགས་སུ་བཅད་དེ་བསྟན་པ། སེམས་ཅན་དམྱལ་བའི་རྒྱུར་གྱུར་པ། །བརྫུན་དུ་སྨྲ་བ་སྟོན་པ་ཡིན། །སྔོན་ཆད་རྒྱུ་ནི་བསྟེན་བྱས་པ། །དོན་མེད་སྨྲེ་སྔགས་ཡོངས་སུ་འདོན། །མེ་ཡི་ནང་ན་མེ་མཆོག་སྟེ། །རྒྱ་མཚོ་དག་ཀྱང་སྲེག་བྱེད་ན། །གང་དག་བརྫུན་སྨྲ་ཤིང་དང་རྡོ། །རང་བཞིན་འདྲ་བ་སྨོས་ཅི་དགོས། །མི་གང་བདེན་པ་སྤངས་ནས་སུ། །བརྫུན་དུ་སྨྲ་བ་སྒྲུབ་བྱེད་པ། །དེ་ནི་རིན་ཆེན་སྤངས་ནས་སུ། །སྡིག་པའི་
བདག་ཉིད་རྡོ་འདྲ་སྒྲུབ། །བདག་ལ་སྡུག་པར་མི་བྱེད་གང་། །དེ་ནི་སེམས་ཅན་དམྱལ་ལ་དགའ། །བརྫུན་གྱིས་རང་ལུས་མེ་འབྱུང་སྟེ། །བློ་དང་མི་ལྡན་དེ་བསྟེན་ཏོ། །བདེན་ཚིག་ལེགས་པར་རྙེད་ཡིན་ཏེ། །ལུས་ཅན་ཀུན་གྱི་རྒྱན་ཡིན་ནོ། །བདེན་པ་སྤངས་ནས་བརྫུན་སྨྲ་བ། །བློ་མེད་ཅི་ཕྱིར་ཆགས་པར་བྱེད། །བདེན་པ་ཡོན་ཏན་བདག་ཉིད་མཆོག །བརྫུན་སྨྲ་དྲན་པ་སྐྱོན་ཡིན་ཏེ། །རྨོངས་པ་ཡོན་ཏན་བཏང་ནས་སུ། །ཅི་ཕྱིར་སྐྱོན་ལ་ཡོངས་སུ་རྒྱུག །སེམས་ཅན་དམྱལ་བར་རྟག་འགྲོ་བ། །སྐྱོན་གྱི་འབྲས་བུ་ཉེས་པ་ཡིན། །ཁྱེད་ཅག་ཡོན་ཏན་དེ་དང་འགྲས། །མི་བཟད་དམྱལ་བར་ཀུན་དུ་གནས། །སྡུག་བསྔལ་ཀུན་གྱི་ས་བོན་ནི། །བརྫུན་དུ་སྨྲ་བར་རབ་ཏུ་གྲགས། །དེ་བཞིན་བདེ་བ་བདེན་ཡིན་ཏེ། །དེ་བས་སུ་ཞིག་བརྫུན་དུ་སྨྲ། །བདེན་པར་སྨྲ་བའི་མི་དག་ནི། །ལུས་ཅན་ཀུན་གྱི་དགའ་བ་ཡིས། །བརྫུན་སྨྲ་མི་དང་འགྲས་པ་སྟེ། །དེ་བས་སུ་ཞིག་བརྫུན་དུ་སྨྲ། །བདེན་པར་སྨྲ་བའི་མི་དག་ནི། །ལྷ་ལྟར་རྟག་ཏུ་དགའ་བ་ཡིན། །དམྱལ་བར་དེ་ལྟར་རྨོངས་པ་དག །དེ་བཞིན་སེམས་ཀྱིས་བརྫུན་དུ་སྨྲ། །ལེགས་པའི་ལས་ནི་མ་བྱས་ལ། །སྡིག་པ་དུ་མ་བྱས་པས་ན། །སྡུག་བསྔལ་མཐའ་ཡས་སྐྱེས་པ་དག །ཅི་ཞིག་སྡིག་པས་ཡོངས་སུ་གདུང་། །དགེ་བས་འབྲས་བུ་ལེགས་པ་ཡིན། །སྡིག་པས་ཉོན་མོངས་འཚེད་པར་བྱེད། །བློ་ལྡན་མི་ཡིས་སྡིག་བྱས་ཀྱང་། །དགེ་བ་རྗེས་སུ་སྟེན་པར་བྱེད། །དགེ་བའི་ནང་ན་བདེན་པ་མཆོག །སྐྱོན་གྱི་ནང་ན་དེ་བཞིན་བརྫུན། །སྐྱོན་སྤངས་ཡོན་ཏན་ཚོལ་བྱེད་པ། །མི་ཡི་ནང་ན་མི་མཆོག་ཡིན། །བདེ་འབྱུང་བདེ་བའི་འབྲས་བུ་ནི། །བདེན་པས་ཡོངས་སུ་འགྲུབ་པར་འགྱུར། །བདེན་པས་བདེ་བ་འཐོབ་འགྱུར་ཏེ། །བདེན་པས་མྱ་ངན་འདས་པར་འགྲོ། །སྡུག་བསྔལ་འབྱུང་བ་འབྲས་བུ་ཚ། །སྡུག་བསྔལ་མོད་ལ་འཚེད་པར་འགྱུར། །སྡུག་བསྔལ་ཀུན་མཐའ་བརྫུན་ཡིན་ན། །མི་ཡིས་ཅི་ཕྱིར་སྤང་མི་བྱ། །བདེན་པ་དོན་གྱིས་འཐོབ་མིན་ཏེ། །ཉོན་མོངས་པས་ཀྱང་འཐོབ་མེད་ན། །ཅི་ཕྱིར་བདེན་པ་ཡོངས་སྤངས་ནས། །བརྫུན་
སྨྲ་བ་ལ་དགའ་བར་བྱེད། །ཡུལ་གཞན་དག་ནས་བདེན་མི་འོང་། །དེ་ནི་གཞན་དུ་བཙལ་བ་མེད། །ཆུ་ལ་སྟེགས་བཏགས་སྟེགས་མིན་ཏེ། །བདེན་པ་སྟེགས་ཀུན་མཆོག་ཡིན་ནོ། །སྒྲོན་མའི་ནང་ན་སྒྲོན་མ་མཆོག །བདེན་པ་ཡིན་ཞེས་སངས་རྒྱས་གསུང་། །སྨན་གྱི་ནང་ན་སྨན་མཆོག་སྟེ། །དེ་ཡིས་རྟག་ཏུ་སྡུག་བསྔལ་སེལ། །ངེད་ཀྱིས་སྡིག་པ་བཟུང་བ་མེད། །ཁྱེད་ཅག་རྨོངས་པའི་སེམས་ཀྱིས་སུ། །ངན་པ་ཁྱེད་ཀྱིས་བྱས་པས་ན། །ཁྱེད་ཅག་ཡོངས་སུ་གདུངས་པ་ཡིན། །སེམས་ཅན་དམྱལ་བར་སྐྱེས་པ་ནི། །སྡིག་པ་བྱང་བས་རྣམ་པར་འགྲོལ། །ཀུན་དུ་ངུ་སྐད་འདོན་པའི་མི། །ནམས་ཀྱང་ཐར་བར་ག་ལ་འགྱུར། །རང་གི་ལས་ཀྱིས་རྣམ་བསླུས་པ། །རྨོངས་པ་ཁྱེད་ཅག་ཅི་ཞིག་ངུ་། །བྱིས་པ་རང་གི་སེམས་ཀྱིས་བསླུས། །བློ་མེད་ཁྱེད་ཅག་ངུ་སྐད་འདོན། །དེ་ལྟར་སེམས་ཅན་དམྱལ་བའི་སྲུངས་མ་དེ་དག་གིས། སེམས་ཅན་དམྱལ་བ་པ་དེ་དག་ལ་སོ་སོར་རྗེས་སུ་བསྟན་ནས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་གནོད་པ་མི་བཟད་པའི་རྣམ་པ་བརྒྱ་ཕྲག་དུ་མ་ཇི་ལྟར་སྔར་བཤད་པ་བཞིན་དུ་འབྱུང་ངོ་། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་རྟག་ཏུ་གཞན་དུ་ཞུགས་ནས་སླུ་བར་བྱེད་ཅིང་ནོར་རྫས་ཐམས་ཅད་ཀྱང་འཕྲོག་པར་བྱེད། དེའི་བྱ་བ་གཞན་གང་ཡིན་པ་དག་ཀྱང་ཚེགས་ཆེན་པོར་འགྱུར་ཞིང་དེའི་ཚིག་ཀྱང་འཇིག་རྟེན་པ་ཡིད་ཆེས་པར་མི་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཁྭ་མཆུ་རྡོ་རྗེ་ལྟ་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་
པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ལ་མང་དུ་བྱས་པས་འགྱུར་ཏེ། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཁྭ་མཆུ་རྡོ་རྗེ་ལྟ་བུའི་ནང་དུ་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་དེ་དག་ཐམས་ཅད་འབྱུང་བར་འགྱུར་རོ། །བརྫུན་ནི་གང་ཞིག་དགེ་འདུན་གྱི་འཁོར་གྱི་ནང་དུ་སོང་ནས་ནད་ཀྱི་རྐྱེན་གྱིས་གསོས་སྨན་སྦྱར་བར་ཁས་བླངས་པ་ལས་མ་བྱིན་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཁྭ་མཆུ་རྡོ་རྗེ་ལྟ་བུའི་ནང་དུ་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདས་པའི་དུས་སུ་ལས་བྱས་པ་དེ་དག་ཁྭ་མཆུ་རྡོ་རྗེ་ལྟ་བུས་ཤ་བཅད་ཅིང་བཅད་ཅིང་ཟའོ། །གང་གི་ཚེ་ཤ་བཅད་པར་གྱུར་པའི་སྐད་ཅིག་དེ་ཉིད་དང་གནས་དེ་ཉིད་དུ་ཡང་ཆེས་ཤིན་ཏུ་གཞོན་ཤ་ཅན་པད་མ་ལྟར་འཇམ་པ་སྐྱེ་བར་འགྱུར་ཏེ། དེ་ཅི་ནས་ཀྱང་ཚོར་བ་ཆེས་དྲག་པར་བྱ་བའི་ཕྱིར་དེ་ཉིད་ཕྱུང་ཞིང་བཏོགས་པ་དང་། དེ་ནས་ཡང་ཆེས་ཤིན་ཏུ་གཞོན་ཤ་ཅན་སར་པ་གཞན་དག་སྐྱེ་བར་འགྱུར་རོ། །དེ་ལྟར་སེམས་ཅན་དམྱལ་བ་པ་དེ་དག་ལོ་འབུམ་ཕྲག་དུ་མར་ཁྭའི་མཆུ་རྡོ་རྗེ་ལྟ་བུས་ཟ་བར་བྱེད་དོ། །དེ་ནས་ཐར་བ་དང་བྱེ་མའི་ནང་ནས་ལྕགས་རབ་ཏུ་འབར་བ་འབྱུང་ལ་དེ་བྱེ་མ་དེ་དག་ལ་རྐང་པས་འགྲོ་སྟེ། དེ་ཇི་ལྟར་ཐལ་བ་ཡང་མི་མངོན་པ་དེ་ལྟར་དེས་སྲེག་པར་བྱེད་དོ། །དེ་ནས་ལངས་པ་དང་ཡང་ཐམས་ཅད་འབྱུང་བར་འགྱུར་ཏེ། གང་གིས་བརྫུན་དེ་སྨྲས་ཤིང་སྡིག་པའི་རྗེས་སུ་སྨྲས་པ་བརྫུན་སྨྲ་བས་བརྫུན་ཟེར་བ་སྨྲས་པ་དེ་ཡང་འབྱུང་ཞིང་འབྱུང་ཞིང་བདག་ཉིད་ཀྱི་ལྕེ་ཡང་བདག་ཉིད་ཟའོ། །འདིར་ཚིགས་སུ་བཅད་པ། བདུད་རྩི་དང་ནི་དུག་ཉིད་དག །མི་རྣམས་ཀྱི་ནི་ལྕེ་ལ་གནས། །བདེན་པར་སྨྲ་བ་བདུད་རྩི་ཡིན། །བརྫུན་གྱི་ཚིག་ནི་དུག་དང་འདྲ། །གང་ཞིག་བདུད་རྩི་མངོན་འདོད་པ། །དེ་ནི་རྟག་ཏུ་བདེན་ལ་གནས། །གང་ཞིག་དུག་ལ་མངོན་དགའ་བ། །དེ་ནི་བརྫུན་
གྱི་ཚིག་ལ་དགའ། །དུག་གིས་གནོད་པར་ངེས་མེད་ཀྱི། །བརྫུན་དུ་སྨྲ་བས་ངེས་པར་འགྱུར། །གང་ཞིག་བརྫུན་ནི་སྔོན་སྨྲ་བ། །སྐྱེས་བུ་དེ་ནི་འཆི་བར་འགྱུར། །བརྫུན་གྱིས་བདག་ལ་མི་ཕན་ན། །གཞན་ལ་ཕན་པར་ག་ལ་འགྱུར། །བདག་དང་གཞན་གང་སྡུག་བསྔལ་བ། །དེ་ནི་མི་ཡིས་ཅི་ཕྱིར་བསྟེན། །དེ་ལྟར་བརྫུན་ལ་བསྟེན་པ་ནི། །སྡིག་པ་སྡིག་པར་འགྲུབ་འགྱུར་ཏེ། །མཚོན་དང་མེ་དང་ངམ་གྲོག་ལས། །མི་ཡི་སྡུག་བསྔལ་དེ་འདྲ་མེད། །ལུས་གཅིག་འཕྲོག་པ་མཐོང་བ་ནི། །འཆི་བ་དུག་ལས་འབྱུང་འགྱུར་ཏེ། །ཚེ་རབས་སྔ་ཕྱི་སྟོང་དག་ཏུ། །བརྫུན་གྱི་ཚིག་གིས་ཆུད་གཟོན་ཏོ། །བཙུན་པའི་རིགས་ལ་མཐོར་བྱེད་ཅིང་། །དམའ་བའི་རིགས་ལ་རྒྱན་དུ་བྱེད། །ཐར་པའི་ལམ་དག་སྟོན་བྱེད་པ། །བདེན་པ་ཡིན་ཞེས་མངོན་པར་བརྟགས། །སེམས་ཅན་རྣམས་ཀྱི་རང་གི་ལས། །སྲེད་པས་ཁྱེར་བར་གྱུར་པ་ན། །གཟིངས་འདྲ་བདེན་སྨྲ་མཆོག་ཡིན་ཞེས། །བདེ་བར་གཤེགས་པས་བཀའ་སྩལ་ཏོ། །འཇིག་རྟེན་ཐོག་མ་ཐ་མ་མེད། །སྲེད་པའི་ཞགས་པའི་དབང་དུ་སོང་། །འདི་ལྟར་སྐྱབས་གཞན་བདེན་པ་ལས། །མེད་ཅེས་ཆོས་ལ་མཁས་པས་རིག །གཅེར་བུ་མཚོན་གྱིས་གཅོད་པ་ལྟར། །བདེན་པས་རྟག་ཏུ་ཉོན་མོངས་གཅོད། །མཚོན་གྱིས་བཏབ་པས་ངུ་བར་འགྱུར། །བདེན་པས་ནམས་ཀྱང་ངུ་བ་མེད། །འཇིག་རྟེན་གཉིས་ལ་ཕན་བྱེད་པ། །བདེན་པ་མི་ཟད་གཏེར་ཞེས་བྱ། །ཆོས་སོ་ཅོག་གི་ཁྲིམས་ཡིན་ཞིང་། །ནོར་གྱི་གཞི་ཡི་མཆོག་ཡིན་ནོ། །བདེན་པའི་ཡོན་ཏན་རབ་བསྒྲུབས་པ། །བདེ་འབྱུང་འབྲས་བུ་ཆེན་པོ་ཡིན། །བློ་ལྡན་ངན་གཡོ་རྣམས་སྤོངས་ཤིག །དེ་ཉིད་མཐོང་བས་སྤངས་པ་ཡིན། །བདེན་པ་སྤངས་པའི་མི་དག་ཁྭ་མཆུ་རྡོ་རྗེ་ལྟ་བུས་ཇི་སྲིད་དུ། དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་འཚེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་
པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུ་ཚ་བ་སེམས་ཅན་དམྱལ་བར་འགྲོ་བ་བདེན་པ་དེ་དང་མི་འཐུན་པར་གྱུར་པ་བརྫུན་སྨྲས་པས། དེ་རྟག་ཏུ་འཐབ་པ་དང་། རྩོད་པ་མང་ཞིང་རྟག་ཏུ་གཞན་རྒྱལ་བར་འགྱུར་ལ། ཚིག་གིས་འཇིག་རྟེན་པའི་ཡིད་མི་ཆེས་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཁྲག་དང་རྐང་ཟ་བ་ཞེས་བྱ་བ་མཐོང་ངོ་། །སེམས་ཅན་དམྱལ་བ་ཁྲག་དང་རྐང་ཟ་བ་དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་བྱས་ཤིང་བསགས་པས་འགྱུར་ཏེ། འདི་ལྟ་སྟེ། རྒྱལ་པོའམ། བློན་པོའམ། རྗེ་དཔོན་དུ་གྱུར་པས་དཔྱ་ཐང་ལས་ལྷག་པར་ཕབ་ལ་འདི་ལྟར་ངས་ལྷག་པར་ཕབ་པ་མེད་དོ་ཞེས་སྨྲ་ཞིང་དཔྱ་འབེབས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཁྲག་དང་ཞག་ཟ་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། གང་སེམས་ཅན་དམྱལ་བ་ཡང་སོས་དང་ཐིག་ནག་ལ་སོགས་པར་འབྱུང་བ་རྣམས་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟ་སྟེ། ཤིང་རབ་ཏུ་འབར་བ་ལོ་མ་སྤུ་གྲི་ལྟ་བུ་ཡོད་པར་བརྫུན་སྨྲ་བ་དེ་གཤིན་རྗེའི་མི་རྣམས་ཀྱིས་ལྕགས་ཀྱི་ཐག་པ་རབ་ཏུ་འབར་བ་དག་གིས་བཅིངས་ནས་ཁ་སྦུབ་ཏུ་དཔྱངས་སོ། །ཁ་སྦུབ་ཏུ་དཔྱངས་པ་དེའི་རྐང་པ་དག་ལ་མཆུ་དང་སེན་མོ་རྡོ་རྗེ་ལྟར་རྣོ་བ་དག་གིས་ཟ་སྟེ། ཁ་སྦུབ་ཏུ་དཔྱངས་པ་དེ་དག་ཁྲག་འབྱུང་བ་གང་ཡིན་པ་དེ་ལ་ཟ་བ་དེས་གནས་པར་བྱེད་དོ། །ཚོར་བ་ཐམས་ཅད་ཀྱི་ནང་ན་ཁ་ཟས་ཀྱི་ཚོར་བ་མི་བཟད་པར་བཤད་དེ། དེ་རང་གི་ཁྲག་ལ་འཐུང་ངོ་། །དེ་ཚོར་བ་གཉིས་དག་གིས་ཡོངས་སུ་གནོད་དེ་མེའི་ཚོར་བ་དང་། བཀྲེས་པ་དང་སྐོམ་པའི་ཚོར་བའོ། །འདིར་ཚིགས་སུ་བཅད་པ། ཇི་ལྟར་བཀྲེས་ཤིང་སྐོམ་པ་ནི། །ལས་ཀྱིས་ཤིན་ཏུ་གཡེངས་པས་གདུངས། །
དེ་ལྟར་སྲེག་པས་སྲེག་མིན་ཞིང་། །རླུང་དྲག་པ་ཡིས་ཁྱེར་མི་བྱེད། །དེ་ལྟར་ལོ་བརྒྱ་སྟོང་ཕྲག་དུ་མར་དེ་རང་གི་ཁྲག་དང་རྐང་དག་ལ་ཟ་སྟེ། འདི་ལྟར་རོ་སྨད་མེ་མཆོག་ཏུ་ཚ་བས་བསྲེགས་སོ། །དེ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ། སེམས་ཅན་དམྱལ་བ་དེར་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་དབུལ་བར་འགྱུར་ཞིང་ངག་ཡིད་མི་ཆེས་པ་དང་། རྟག་ཏུ་དེའི་སྣ་ནས་ཁྲག་འཛག་ཅིང་སོ་ཤིང་འཆའ་བ་ན་ཁྲག་འབྱུང་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་མེ་ལྕེ་བཅུ་གཅིག་པ་ཞེས་བྱ་བ་མཐོང་ངོ་། །དེར་སེམས་ཅན་དམྱལ་བ་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བས་འགྱུར་རོ། །བརྫུན་སྨྲ་བ་ནི་གཉིས་ཤིག་རྩོད་པ་ན་རྒྱལ་པོའམ། བློན་པོའམ། གཞན་ཡིད་ཆེས་པའི་གནས་སུ་བྱ་བས་ནོར་བླངས་སམ། མཛའ་བཤེས་སམ། འདོད་ཆགས་སམ། ཞེ་སྡང་གིས་ཕྱོགས་བཟུང་སྟེ། ཞལ་ཅེ་ཡོན་པོར་བཅད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་མེ་ལྕེ་བཅུ་གཅིག་པ་དེར་སྐྱེ་བར་འགྱུར་རོ། །ཕྱོགས་བཟུང་སྟེ། བརྫུན་སྨྲ་བ་དེ་ལ་གང་སེམས་ཅན་དམྱལ་བ་ཡང་སོས་ལ་སོགས་པའི་ཚོར་བ་གནོད་པ་འདི་དག་ཐམས་ཅད་བཅུ་འགྱུར་དུ་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟ་སྟེ། རང་གི་ལུས་ལས་ཕྱོགས་བཅུར་མེ་ལྕེའི་ཕུང་པོ་བཅུ་གཅིག་འབྱུང་བར་འགྱུར་རོ། །བརྫུན་སྨྲ་བའི་ལྕེའི་ཁ་ལས་བཀྲེས་པ་དང་སྐོམ་པ་འབྱུང་བར་འགྱུར་ཏེ། ཞལ་ཅེ་ཡོན་པོར་
གཅོད་པ་ནི་སྐད་ཅིག་སྐད་ཅིག་ལ་སྐྱེ་ཞིང་སྲེག་གོ །སྲེག་པ་ན་ཚོར་བའི་རྣམ་པ་དེ་ལྟ་བུ་མྱོང་བར་འགྱུར་ཏེ། གང་མེ་ལྕེའི་ཕུང་པོ་བཅུ་གཅིག་པོ་དེ་དག་ནི་བཅུ་དྲུག་གི་ཆར་ཡང་མི་ཕོད་དོ། །ལས་ཀྱིས་བྱས་པའི་ཚོར་བ་དེ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འདི་ལྟར་དེ་སེམས་ཅན་དམྱལ་བ་མེ་ལྕེ་བཅུ་གཅིག་པར་ལོ་འབུམ་ཕྲག་དུ་མར་སྲེག་གོ །འཚེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་། དུད་འགྲོ་དག་ཏུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཞལ་ཅེ་ཡོན་པོར་བཅད་པའི་རྒྱུ་མཐུན་པའི་འབྲས་བུས་དེ་རྟག་ཏུ་བཀྲེས་པ་དང་སྐོམ་པས་གདུངས་ཤིང་ཡན་ལག་ཐམས་ཅད་རྣམ་པར་སྲེག་པ་དང་། དབུལ་ཞིང་ཚེ་ཐུང་བ་དང་། ངག་ཡིད་མི་ཆེས་པ་དང་། ཤིན་ཏུ་གླེན་པ་དང་། གཟུགས་མི་སྡུག་པ་དང་། རྐང་ལག་ཉམས་པ་དང་། དྲི་མ་ཅན་དང་། གནས་ངན་པ་སུམ་མདོ་དང་། བཞི་མདོའི་ཁྱིམ་དུ་འཇུག་ཅིང་ཚེ་གཅིག་གི་བར་དུ་ཤིན་ཏུ་སྡུག་བསྔལ་བར་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ངུ་འབོད་ཀྱི་འཁོར་ལ་བརྟགས་ན། དེས་སེམས་ཅན་དམྱལ་བ་ཆེན་པོ་དེའི་འཁོར་བཅུ་བདུན་པ་ནི་གཅིག་ཀྱང་མ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅུ་གཅིག་པ། དེ་ནས་གཞན་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པའི་དགེ་སློང་དེ་འདི་ལྟར་ཞི་བ། རྒ་བ་མེད་ཅིང་འཆི་བ་མེད་པ། ཟག་པ་མེད་པ། མྱ་ངན་ལས་འདས་པའི་ལམ་ལ་འཇུག་པ་དེའི་བརྩོན་པ་ས་བླའི་གནོད་སྦྱིན་དག་གིས་མཐོང་ནས་བར་སྣང་ལ་སྤྱོད་པའི་ལྷ་རྣམས་ལ་བསྙད་པ་ནས། རྒྱ་ཆེར་སྦྱར་ཏེ། འོད་ཆུང་གི་ལྷ་རྣམས་ཀྱི་བར་ལ་བསྙད་དེ། འདི་ལྟར་འཛམ་བུ་གླིང་དུ་རིགས་ཀྱི་བུ་ཆེ་གེ་མོ་ཞིག་ཅེས་བྱ་བ་ནས་རྒྱ་ཆེར་སྦྱར་ཏེ། ས་གཞན་བཅུ་པའི་བར་ལ་ཞུགས་པ་བདུད་ཀྱི་ཡུལ་གྱི་གཞི་ལ་
མི་འདོད་ཅིང་། དགའ་བའི་འདོད་ཆགས་ཀྱི་མོད་ལས་བྱུང་བའི་སྲེད་པའི་དངོས་པོ་དང་ལྷན་ཅིག་གནས་པ་དང་། ཀུན་ནས་ཉོན་མོངས་པའི་ཡུལ་གྱི་དངོས་པོ་རྣམས་དང་ལྷན་ཅིག་མི་གནས་པ་དེ་འོད་ཆུང་གི་ལྷ་རྣམས་ཀྱིས་ཐོས་ནས་བདུད་ཀྱི་ཕྱོགས་དམའ་བར་འགྱུར་ཞིང་། དམ་པའི་ཆོས་ཀྱི་ཕྱོགས་མངོན་པར་མཐོ་བར་འགྱུར་རོ་ཞེས་ཡིད་དགའ་བར་འགྱུར་རོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་འཁོར་བའི་འཆིང་བ་གཅོད་པ་ལ་བརྩོན་པ་དེ་འདི་སྙམ་དུ་སེམས་ཏེ། ཀྱེ་མ་སེམས་ཅན་འདི་དག་ནི་སྡུག་བསྔལ་བ་ཡིན་ཏེ་སྲེད་པས་བསླུས་པ། གཏི་མུག་གི་ཀུན་དུ་སྦྱོར་བས་བཅིངས་པ། སེམས་བག་ལ་ཉལ་རྣམས་དང་ཡང་དག་པར་ལྡན་པ། དུས་གསུམ་དུ་འཚེད་ཀྱང་འཁོར་བ་གཅད་པའི་ཕྱིར་འབད་པར་མི་བྱེད་པའི་སེམས་ཅན་འདི་དག་ལ་སྙིང་མེད་དམ་ཅི། འོན་ཏེ་སྙིང་ལ་མི་ཤེས་པ་ཞིག་ཡོད་དམ། འོན་ཏེ་ཤེས་པ་ཡོད་ཀྱང་ཡིད་འབྱུང་བར་མི་བྱེད་དམ། སེམས་ཅན་འདི་དག་གི་རྣམ་པར་ཤེས་པ་དེ་གང་ཞིག་ཡིན། གལ་ཏེ་སེམས་ཅན་འདི་ལྟར་མཐོ་རིས་སུ་ཡུན་རིང་དུ་གནས་ཀྱང་ཡིད་འབྱུང་བར་བྱ་བ་ཡིན་ན། འདི་ལྟར་སེམས་སྲ་ཞིང་མཁྲང་བ་དེ་ལྟ་ཅི་སྨོས། གང་གནོད་པའི་རྣམ་པ་དུ་མ་ཀུན་གྱིས་སྡུག་བསྔལ་རྗེས་སུ་མྱོང་ཡང་སྐྱོ་བར་མི་བྱེད་དོ། །ཡུན་རིང་པོ་ནས་བག་ལ་ཉལ་རྗེས་སུ་འབྲང་བའི་སེམས་ལ་མི་འཐུན་པ་ལྔ་ཡོད་དེ། འདི་ལྟ་སྟེ། རྒ་བ་དང་། ན་བ་དང་། འཆི་བ་དང་། མི་སྡུག་པ་དང་ཕྲད་པ་དང་། སྡུག་པ་དང་བྲལ་བའོ། །གཞན་ཡང་ཉེས་དམིགས་ཀྱི་གནོད་པ་བཅུ་འབྱུང་སྟེ། བཀྲེས་པ་དང་། སྐོམ་པའི་ཉེས་དམིགས་དང་། སྡུག་པ་དང་བྲལ་བའི་ཉེས་དམིགས་དང་། ཡུལ་ནས་ཡུལ་དུ་འགྲོ་བའི་ཉེས་དམིགས་དང་། འཆི་བ་དང་སྐྱེ་བའི་ཉེས་དམིགས་དང་། གཞན་གྱིས་བརྙས་པའི་ཉེས་དམིགས་དང་། གཞན་གྱིས་བཅོམ་པའི་ཉེས་དམིགས་དང་། གྲང་བ་དང་ཚ་བའི་ཉེས་དམིགས་དང་། ཟླས་དབྱེ་བའི་ཉེས་དམིགས་དང་། འབྱོར་བ་རྒུད་པའི་ཉེས་དམིགས་དང་། འདོད་པའི་ཉེས་དམིགས་ཏེ། དེ་ལྟར་མདོར་ན་ཉེས་དམིགས་བཅུ་དག་གིས་སེམས་མངོན་པར་གནོད་པར་བྱས་ཀྱང་། ཀྱེ་མི་དགའ་བར་མི་བྱེད་པའི་སེམས་ཅན་འདི་དག་ནི། ཨེ་མ་ཐོག་མ་མེད་པའི་དུས་ནས་སེམས་
དགྲ་ལྟ་བུ་གཡོས་པ་དང་། རྣ་བ་དང་སྙིང་མེད་ཅིང་རྡོ་དང་རྡོ་རྗེ་ལྟ་བུའི་སེམས་ཡུལ་རྣམ་པ་མང་པོས་དམ་པའི་ཆོས་ལ་ནམས་ཀྱང་དགའ་བར་མི་བྱེད་པ། ཡུལ་གཟུགས་དང་། སྒྲ་དང་། རེག་པ་དང་། རོ་དང་། དྲི་དུག་དང་། མཚོན་དང་མེ་ལྟ་བུའི་སྲེད་པས་རྟག་ཏུ་ཆོག་མི་ཤེས་པས་དུག་ལྟ་བུའི་ཡུལ་ལྔ་དང་། ཆོམ་རྐུན་ལྟ་བུའི་སྐྱེ་མཆེད་དྲུག་དང་། བྱང་ཆུབ་ཀྱི་ཡན་ལག་བདུན་མི་ཤེས་པ་དང་། འཕགས་པའི་ལམ་ཡན་ལག་བརྒྱད་པར་འགྲོ་བར་མི་སྤྲོ་བ་དང་། སེམས་ཅན་གྱི་གནས་དགུ་མི་ཤེས་པ་དང་། དགེ་བ་བཅུའི་ལས་ཀྱི་ལམ་མི་ཤེས་པ་དང་། ས་བཅུ་གཅིག་གི་རྣམ་པར་དཔྱོད་པ་ལ་བླུན་པ་དང་། སྐྱེ་མཆེད་བཅུ་གཉིས་ཀྱི་སྐྱེ་བ་དང་གནས་པ་ལ་རབ་ཏུ་རྣམ་པར་སྤྱོད་པ་མཁས་པ་དང་། མི་མཁས་པ་ལ་རྣམ་པར་སྤྱོད་པ། ས་གོང་མ་བཅུ་གསུམ་གྱི་སྤྱོད་པ་ལ་བླུན་པ། སེམས་ཀྱི་དམིགས་པ་བཅུ་བཞི་དང་འགྲོགས་པ། གནོད་པ་བཅོ་ལྔ་མི་བཟོད་པ། གནོད་པ་སྡིག་པའི་མུན་པ་བཅུ་དྲུག་གིས་གནས་པ། བྱིས་པའི་ཤིན་ཏུ་རྣམ་པར་དཔྱོད་པ་བཅུ་བདུན་དང་། ཚོར་བ་རབ་ཏུ་འབྱུང་བའི་བུ་ག་བཅྭ་བརྒྱད་དང་། འགྲོ་བ་རྣམ་པར་རྒྱུ་བའི་སྲང་བཅུ་དགུ་དང་། དགྲ་གནས་པ་ཉི་ཤུས་སེམས་དེ་རྣམ་པ་ཉི་ཤུར་བསླུས་པར་རིག་ནས་དེ་སེམས་ཅན་ལ་སྙིང་རྗེ་བར་སེམས་སོ། །དགེ་སློང་དེ་ལས་ཀྱི་ཆོས་ཀྱི་རྣམ་པར་སྨིན་པ་ལ་རབ་ཏུ་རྣམ་པར་དཔྱོད་པར་བྱེད་དེ། འདི་ལྟར་དེ་བདུད་ཀྱི་འཆིང་བ་གཅོད་པ་དག་ལ་རྟག་ཏུ་བརྩོན་པར་བྱེད་ཅིང་དེ་ནས་ཡང་བློ་སྐྱེད་པར་བྱེད་དེ། སེམས་ཅན་དམྱལ་བ་ངུ་འབོད་ལས་གཞན་པ་སེམས་ཅན་དམྱལ་བ་ཆེས་སྡིག་པ་ཆེ་བ་ཡོད་པ་དེའི་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆེན་པོ་གཞན་ཚ་བ་ཞེས་བྱ་བ་ཉེས་པར་བྱས་པའི་ལས་རབ་ཏུ་བདོ་བས་ཀུན་ནས་བསླང་བ། སེམས་ཅན་དམྱལ་བ་ཆེན་པོ་ངུ་འབོད་ལས་གནོད་པ་བཅུ་འགྱུར་གྱིས་ལྷག་པ་ཞིག་ཡོད་པ་མཐོང་ངོ་། །འཁོར་བཅུ་དྲུག་ལ་འདི་ལྟ་སྟེ། རབ་ཏུ་སྲེག་པ་ཆེན་པོ་དང་། པད་མ་དཀར་པོ་ལྟ་བུ་དང་། སྦྲུལ་འཁྱིལ་བ་ལྟ་བུ་དང་། ཟངས་བཞུས་པར་ཉ་འཁྱུག་པ་ལྟ་བུ་དང་། ལྕགས་ཀྱི་བུམ་པ་དང་། ཆུ་བོ་དམར་པོ་འབབ་པ་དང་། རྐང་དང་རུས་པ་ལ་སྲིན་བུ་མང་བ་དང་། སྐྱེ་བོ་ཐམས་ཅད་སྲེག་པ་དང་། སར་འབྱིན་མཐའ་ཡས་དང་། པད་མ་ཆེན་པོ་ལྟ་བུ་དང་།
མཐའ་དྲག་དང་། རུས་པ་རྡོ་རྗེ་ལྟ་བུ་འབྱུང་ཞིང་འདུ་བ་དང་། ལྕགས་ནག་པོའི་སྐུད་པས་འདྲལ་ཞིང་གཅོད་པ་ཚ་བ་དང་། སྲིན་བུ་ན་ཀྲ་དང་། འཁོར་ལོ་དང་། མེ་འཇིགས་འཇིགས་ལྟར་སྐྱེས་པ་དང་། ནགས་ཚལ་གྱི་མེ་མུན་པ་ལྟར་འཁྲིགས་པ་དང་། བུང་བ་རྡོ་རྗེ་ལྟ་བུས་གནོད་པའི་གོ་ཆ་ཞེས་བྱ་བ་སྟེ། འདི་དག་ནི་སེམས་ཅན་དམྱལ་བ་ཆེན་པོ་ཚ་བའི་འཁོར་བཅུ་དྲུག་ཡིན་ཏེ། དེར་ཚེ་ནི་བགྲང་དུ་མི་ལང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་ལ། ལས་ཀྱི་ཉེར་བསྡོགས་དང་ལས་ཀུན་གྱི་མཇུག་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཆེན་པོ་ཚ་བར་སྐྱེ་བར་འགྱུར་རོ། །དེ་ལ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་རྣམས་ཀྱི་འབྲས་བུ་རྣམ་པར་སྨིན་པ་ནི་བཤད་ཟིན་ཏོ། །ལོག་པར་ལྟ་བ་ནི་གང་གིས་ཀུན་དུ་བསྟེན་ཅིང་བསྒོམས་ལ་ཕ་རོལ་ལ་ཡང་བསྟན་པ་ཡིན་ཏེ། འདི་ལྟ་སྟེ། སྦྱིན་པ་མེད་དོ། །མཆོད་སྦྱིན་མེད་དོ། །ལེགས་པར་བྱས་པ་དང་། ཉེས་པར་བྱས་པ་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །ཞེས་དེ་སྐད་ཆད་པར་སྨྲ་བ་ནི་ལས་ཡོད་པ་འཇིག་པ་ཡིན་ཏེ། གཞན་དག་ལ་ཡང་སྟོན་ཅིང་ཡང་དག་པར་རབ་ཏུ་འཇོག་པར་བྱེད་ལ་ཡང་དག་པར་རབ་ཏུ་དགའ་བར་བྱེད་པ་ལོག་པར་ལྟ་བ་བསྐྱེད་ནས། ཕ་རོལ་དག་ལ་ལས་ཀྱི་ལམ་གྱི་རྒྱུ་མེད་པར་སྟོན་པ་ནི་ཆོམ་རྐུན་པ་ཚུལ་བཟང་པོར་འཆོས་པ་ཡིན་ཏེ། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཆེན་པོ་ཚ་བར་སྐྱེ་བར་འགྱུར་རོ། དེ་ལ་ལས་ཀྱི་ལམ་དང་། ལས་
ཀྱི་འབྲས་བུ་ཡོད་བཞིན་དུ་རྣམ་པར་སླུ་བ་ཡིན་ཏེ། དེ་འཆི་བའི་དུས་བྱས་ནས་སྲིད་པ་བར་མའི་བར་དུ་སྐྱེ་བ་ན། ལྟས་ངན་པའི་མཚན་མ་འབྱུང་བར་འགྱུར་བ་ནི་འདི་ལྟ་སྟེ། འཇིགས་པ་མཆོག་ཏུ་མི་བཟད་པ་མུན་པར་ངེས་པར་གྱུར་པ་དང་། སོ་སོ་ནས་འཇིགས་པར་བྱེད་པ་སེང་གེ་དང་། སྟག་དང་། དྲེད་དང་། གུང་དང་། སྦྲུལ་མང་པོ་ཕུག་དང་། མུན་པ་མེད་པ་ན་འདུག་པ་དང་། དེས་གཞན་ཡང་རི་ཆེ་ཞིང་མཐོ་བ་དེའི་མགོའི་སྟེང་དུ་མྱུར་བར་འོང་བ་མཐོང་བ་དང་། སྟག་དང་། སེང་གེ་དེ་དག་ཀྱང་སོ་སོ་ནས་འཇིགས་པར་བྱེད་ཅིང་སྒྲ་འབྱིན་པ་ཐོས་པ་དང་། གཞན་དག་ཀྱང་གཟུགས་མཆོག་ཏུ་དམན་ཞིང་སྙིང་རྗེ་རྗེ་ལྟར་འདུག་པ་མཐོང་བ་དང་། དེ་དག་ལ་ནག་པོ་ལྟ་བུ་མཐོང་ཞིང་མེ་རབ་ཏུ་འབར་བ་དེའི་སྟེང་ན་འདུག་པ་མཐོང་བ་དང་། ཝ་བརྒྱལ་བའི་སྒྲ་དྲག་པོ་ཐོས་པ་དང་། གཤིན་རྗེའི་མི་གཟུགས་མི་སྡུག་པར་བསྒྱུར་བ་དག་མཐོང་བ་དང་དེ་སྐྲག་གོ །ལོག་པར་སྨྲ་བ། རྒྱུ་ངན་པ་སྨྲ་བ། ཕྱོགས་ངན་པ་སྨྲ་བ། ལྟ་བ་ངན་པ་སྨྲ་བ། ལས་ཀྱི་འབྲས་བུ་རྣམ་པར་སླུ་བ་སྨྲ་བ། ངམ་གྲོག་དང་གཡང་སའི་རྒྱུ་སྨྲ་བ། བདག་ཉིད་ལ་བདག་སླུ་བར་བྱེད་ཅིང་སྡིག་པ་ཆེན་པོ་བྱེད་པ་དེའི་ལས་རྟག་ཏུ་བསྟེན་ཅིང་བསྒོམས་ཏེ་མང་དུ་བྱས་ལ་བསགས་པའི་འབྲས་བུ་ནི་འཆི་ཁར་མཐོང་བར་འགྱུར་ཏེ། དེ་འཇིགས་ཤིང་དབང་པོ་བློང་བློང་པོར་འགྱུར་བ་དང་། བཤང་བ་འབྱུང་བར་འགྱུར་བའམ། དེ་བཞིན་དུ་གཅི་བ་འབྱུང་བར་འགྱུར་བའམ། དེ་བཞིན་དུ་སྐད་འབྱིན་པའམ། དེ་བཞིན་དུ་ཁ་གདོང་བར་བྱེད་པའམ། དེ་བཞིན་དུ་མལ་གྱི་མཐའ་ལ་ནོམ་པར་བྱེད་དོ། །རི་དེ་བདག་གི་སྟེང་དུ་འོང་བ་མཐོང་ནས་ལག་པས་གཟུང་བར་འདོད་པ་དེ་ལ་མི་དག་ན་རེ་འདི་ལྟར་འདི་ནི་ནམ་མཁའ་ལ་རེག་པར་འདོད་དོ་ཞེས་སྨྲ་སྟེ། འདི་ལྟར་རི་འོང་བ་དེ་ཡང་དང་ཡང་དུ་མཐོང་བ་དང་། བདག་ཉིད་ཀྱི་ལུས་ཐམས་ཅད་ཀྱིས་རེག་པར་བྱེད་དོ། །འདི་ལྟར་དེ་ཉེས་པར་བྱས་པའི་ལས་སྤྱད་ཅིང་ལས་ཀྱི་འབྲས་བུ་བསླུས་པ་ནི་དེ་ལྟར་སེམས་ཅན་དམྱལ་བ་ཡང་དག་པར་མྱོང་བར་འགྱུར་བའི་ལྟས་མང་པོ་འབྱུང་བར་འགྱུར་ཏེ། འདི་ལྟ་སྟེ། དཔེར་ན་མི་ཞིག་མི་གཙང་བའི་ཕུང་པོ་ད་དུང་གི་བར་དུ་མ་མཐོང་གིས་ཀྱང་དྲི་ང་
བའི་དྲི་མནམ་པ་དེ་བཞིན་དུ་སེམས་ཅན་དམྱལ་བ་ད་དུང་གི་བར་དུ་མ་མཐོང་གིས་ཀྱང་སེམས་ཅན་དམྱལ་བ་ཆེན་པོའི་མཚན་མ་མཆོག་ཏུ་འཇིགས་ཤིང་དྲག་པ་དག་འབྱུང་བར་འགྱུར་རོ། །ངན་པར་ལྟ་ཞིང་སྨྲ་བ་ཐམས་ཅད་སྐྲག་པར་བྱེད་དེ། སྐྱེ་བོ་བྱིས་པས་བསྒྲུབས་པ་ཉེས་པར་བྱས་པའི་ཟོང་། སེམས་ཅན་དམྱལ་བར་བྲིན་པའི་རིན། དེར་གནས་པའི་རྣམ་པར་སྨིན་པས་དེའི་རླུང་བིབ་པ་ལ་ཀ་དང་། སུ་ཙ་ཀ་ཤིན་ཏུ་དྲག་པ་དག་གིས་ཡན་ལག་དང་ཉིང་ལག་རྣམ་པར་སྐུལ་བར་བྱེད། རྣམ་པར་རྡུང་བར་བྱེད། རྣམ་པར་གཤེག་པར་བྱེད་དོ། །དེའི་ལུས་བདོ་བ་ན། དེའི་སེམས་སྲིད་པ་ཐ་མ་ལ་ཚོར་བ་གཉིས་ཀྱིས་གདུངས་པ་ཡིན་ཏེ། དེ་སྲིད་པ་ཐ་མ་པ་ལ་སེམས་ཀྱི་དམིགས་པ་ལེགས་པར་སྤྱད་པའི་འདུ་ཤེས་སུ་བྱེད་དོ། །དེ་ལྟ་བས་ན་མིའི་འཇིག་རྟེན་ནས་རང་གིས་བྱས་ཤིང་བསླུས་པ་སྲིད་པ་བར་མ་ལ་སེམས་ཅན་དམྱལ་བར་མྱོང་བར་འགྱུར་བའི་ལྟས་དག་འབྱུང་བར་འགྱུར་བ་ནི་འདི་ལྟ་སྟེ། སྙིང་གི་ལམ་ལ་སྒྲ་དང་། རེག་པ་དང་། རོ་དང་། གཟུགས་དང་། དྲི་མི་འདོད་པ་དག་འབྱུང་བར་འགྱུར་ཏེ། སེམས་ཅན་དམྱལ་བ་པ་དག་གི་གཟུགས་མི་སྡུག་པའི་སྒྲ་སྐད་ཐོས་པ་དང་། རླུང་རེག་པ་སྤུ་གྲི་ལྟ་བུས་རེག་པར་བྱེད་པ་དང་། རོ་ཚ་བའི་རོ་མྱོང་བར་བྱེད་པ་དང་། གཟུགས་འཇིགས་པར་སྟོན་པ་རབ་ཏུ་གདུང་བ་ལྟ་བུར་བྱས་པ་དག་ཀྱང་མཐོང་བར་འགྱུར། དྲི་ང་བའི་རྫས་བསགས་པའི་དྲི་དག་མནམ་པར་འགྱུར་རོ། །དེ་ལྟར་ཡུལ་ཐམས་ཅད་ཀྱིས་སྐྲག་པ་སེམས་ཅན་དམྱལ་བ་ཤིན་ཏུ་ལོག་པར་ལྟ་བས་མཐོང་བར་འགྱུར་ཏེ། ཇི་ལྟར་དེས་ཆོས་ལོག་པར་བསྟན་པ་དེ་ལྟར་སེམས་ཅན་དམྱལ་བ་དེས་མཐོང་བར་འགྱུར་རོ། །དེ་འདི་སྙམ་དུ་སེམས་ཏེ། ཀྱེ་མ་ཡུལ་གྲོང་ཁྱེར་གྱི་ཚུལ་དང་འཐུན་པ་འདི་རེ་དགའ་དེར་བདག་ཇི་ལྟར་འདུག་པར་བྱ་སྙམ་སྟེ། དེ་ལ་འདོད་པར་བྱེད་དོ། །དེ་སྲིད་པའི་ཡན་ལག་མྱོང་བར་འགྱུར་བ་རིག་ནས་དེར་སྐྱེ་བར་འགྱུར་ཏེ། ཉེ་བར་ལེན་པའི་རྐྱེན་གྱིས་སྲིད་པ་འབྱུང་བ་དེར་སེམས་བསྐྱེད་མ་ཐག་ཏུ་སྐྱེ་བར་འགྱུར་རོ། །དེར་
སྐྱེས་མ་ཐག་ཏུ་གང་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་དེ་དག་ཐམས་ཅད་བཅུ་འགྱུར་དུ་འབྱུང་ངོ་། །ནད་བཞི་བརྒྱ་རྩ་བཞི་ཡང་འབྱུང་སྟེ། དྲག་པ་སེམས་ཅན་དམྱལ་བ་དང་མཚུངས་པ། གཅིག་གི་དཔེར་གཅིག་རུང་བ། དོན་ཐམས་ཅད་མེད་པར་བྱེད་ཅིང་འཇིགས་པར་བྱེད་པ་ཉེས་པར་བྱས་པའི་ལས་ཀྱི་འབྲས་བུར་གྱུར་པ་དག་ཡིན་ནོ། །མེའི་རྣམ་པ་འདི་ལྟ་བུ་འབྱུང་བར་འགྱུར་ཏེ། གང་ཏིལ་འབྲུ་ཙམ་གྱིས་རི་དང་ནགས་ཚལ་དང་། ཚོང་རྡལ་དང་གླིང་དང་བཅས་པ་དག་སྲེག་ན་སེམས་ཅན་དམྱལ་བ་པའི་ལུས་དག་ལྟ་སྨོས་ཀྱང་ཅི་དགོས་ཏེ། དེས་མར་སར་གྱི་གོང་བུ་བཞིན་དུ་སྲེག་གོ །དེ་ནས་ཡང་འབྱུང་བར་འགྱུར་ཏེ། ཉིན་དང་མཚན་མོར་མི་མངོན་ཞིང་མུན་པར་ཞུགས་པ་ན་ལོ་འབུམ་ཕྲག་དུ་མར་གནོད་པའི་རྒྱ་མཚོར་བྱིང་བ་ཐམས་ཅད་མུན་པ་མུན་གནག་ཏུ་གྱུར་པ། ལོག་པར་ལྟ་བ་བྱས་ཤིང་བསགས་ལ་བསྟེན་པ་དག་གི་འབྲས་བུས་དེ་འདི་ལྟར་ལོ་དཔག་ཏུ་མེད་ཅིང་བགྲང་གིས་མི་ལང་བར་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་དང་ཚ་བ་དཔེ་མེད་པས་འཚེད་དོ། །སྲེག་གོ །དེ་སེམས་ཅན་དམྱལ་བའི་ཡུན་རིང་པོ་དེ་ལས་འདས་ནས་གལ་ཏེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ཚེ་རབས་ལྔ་བརྒྱར་ཡི་དགས་སེར་སྣ་ཅན་ཞེས་བྱ་བ་དེར་སྐྱེ་བར་འགྱུར་རོ། །དེ་ནས་ཐར་ནས་ཀྱང་ཚེ་རབས་ལྔ་བརྒྱར་དུད་འགྲོ་ཐམས་ཅད་ཀྱིས་སྡུག་བསྔལ་བ་གང་ཡིན་པ་དེར་སྐྱེ་བར་འགྱུར་རོ། །གལ་ཏེ་བརྒྱལ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན་ལོག་པར་ལྟ་བ་དེ་དང་རྒྱུ་འཐུན་པའི་འབྲས་བུས་དེ་ཀླ་ཀློའི་རིགས་སུ་སྐྱེ་བར་འགྱུར་ཞིང་དབུལ་བ་དང་། ནད་དང་། ལོང་བ་དང་། ལག་རྡུམ་དང་། ནད་བུ་ཅན་དུ་འགྱུར། ཚེ་ཐུང་བ་དང་། ཚིག་ཡིད་མི་ཆེས་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་
བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་རབ་ཏུ་སྲེག་པ་ཆེན་པོ་ཞེས་བྱ་བ་ཡོད་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ལས་དང་འབྲས་བུ་མི་འཐུན་པར་སྟོན་པ་ཀུན་ཏུ་བསྟེན་ཅིང་བསྒོམས་ཏེ། མང་དུ་བྱས་པས་འགྱུར་རོ། །འདི་ལྟ་སྟེ། སྲོག་གཅོད་པ་བྱས་ན་སྲོག་གཅོད་པ་པོ་ཚེ་ཕྱི་མ་ལ་ལྷ་རྣམས་སུ་སྐྱེའོ་ཞེས་ཟེར་བ་དེ་ནི་འདི་ལྟར་ལས་དང་འབྲས་བུ་མི་འཐུན་པར་སྟོན་པ་ཡིན་ནོ། །དེ་ཅིའི་ཕྱིར་ཞེ་ན། སྲོག་ཆགས་རྣམས་ཀྱི་སྙིང་ལ་ཆེས་སྡུག་བསྔལ་བ་མེད་པ་མ་ཡིན་ལ་འདི་ལྟར་ལྷ་རྣམས་སུ་སྐྱེས་པ་དག་ལ་ཆེས་བདེ་བ་མེད་པ་མ་ཡིན་ཏེ། སྡུག་བསྔལ་གྱི་རྒྱུ་སྲོག་གཅོད་པ་དང་ཡང་དག་པར་ལྡན་པ་ནི་བདེ་བའི་རྒྱུར་མི་འགྱུར་སྡུག་བསྔལ་ཡང་བདེ་བའི་ལས་ཀྱི་འབྲས་བུར་མི་འགྱུར་ཏེ། ལོག་པར་ལྟ་བའི་རྣམ་པ་དེ་དག་སྟོན་པར་བྱེད་པ་དེ་ནི་ལས་དེ་དང་འབྲས་བུ་མི་འཐུན་པར་སྟོན་པ་ཡིན་ནོ། །དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རབ་ཏུ་སྲེག་པ་ཆེན་པོར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། གང་སེམས་ཅན་དམྱལ་བ་ཡང་སོས་ལ་སོགས་པར་ཇི་ལྟར་བསྟན་པའི་སྡུག་བསྔལ་བསྡུས་པ་དེ་དག་ཐམས་ཅད་བཅུ་འགྱུར་དུ་འབྱུང་ངོ་། །རང་གི་ལུས་ལས་ཀྱང་ཀུན་ནས་མེ་འབྱུང་སྟེ། རྣམ་པ་དེ་ལྟ་བུར་རབ་ཏུ་སྲེག་པ་ནི། གང་ལས་བྱས་པའི་སེམས་ཅན་དམྱལ་བ་པའི་མེའི་ཕྱི་རོལ་ན་གནས་པ་བཅུ་དྲུག་གི་ཆར་ཡང་མི་ཕོད་དོ། །མེ་དེའི་མདོག་ཁ་བ་འདྲ་ལ་རྣམ་པ་དེ་ལྟ་བུས་དེ་རབ་ཏུ་སྲེག་པར་བྱེད་དེ། དེའི་ཕྱི་ནང་ཐམས་ཅད་རབ་ཏུ་ཚིག་གོ །ཡིད་ལ་གཅགས་པ་ལས་བྱུང་བའི་མེ་གཞན་གསུམ་པ་འབྱུང་བར་འགྱུར་ཏེ། དེས་ཀྱང་སེམས་ཅན་དམྱལ་བ་པ་དེ་སྲེག་གོ །ལོག་པར་ལྟ་བ་དེ་ཕྱིས་འདི་ལྟར་ལོག་པར་ལྟ་བའི་འབྲས་བུ་ནི་ཚའོ། །རྣམ་པར་སྨིན་པའི་འབྲས་བུ་ནི་ཚའོ། །རོ་མྱང་བ་ནི་ཚའོ་ཞེས་མངོན་
པར་ཤེས་པར་འགྱུར་རོ། །དེ་མེ་གསུམ་གྱིས་མངོན་པར་སྲེག་པ་ནི་སྐད་ཅིག་ཙམ་ཡང་བདེ་བ་མི་འཐོབ་སྟེ། སེམས་ཅན་དམྱལ་བ་ཚ་བའི་འཁོར་རབ་ཏུ་སྲེག་པ་ཆེན་པོར་འདི་ལྟར་ཉེས་པར་བྱས་པའི་ལས་ཀྱི་མཐའ་སྤྱད་པ་དེ། དེར་ལོ་གྲངས་མེད་པར་ཡུན་རིང་མོ་ཞིག་ཏུ་འཚེད་དེ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེ་སྲེག་གོ །འཚེད་དོ། །རྣམ་པར་འཇིག་པར་བྱེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཚེ་རབས་སུམ་བརྒྱར་ཡི་དགས་རྣམས་སུ་སྐྱེ་བར་འགྱུར་རོ། །ཚེ་རབས་ཉིས་བརྒྱར་དུད་འགྲོ་རྣམས་སུ་སྐྱེ་བར་འགྱུར་རོ། །དེ་དེ་ལས་ཐར་ནས་གལ་ཏེ་བརྒྱ་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཕ་མ་ལ་རིམ་གྲོ་བྱ་བ་བཏང་ཞིང་སྒྲ་སྐད་འབྱིན་པར་འགྱུར། མི་གཙང་བ་ཟ་ཞིང་ཡུལ་ནས་ཡུལ་གཞན་དུ་རྒྱུ་བ་དང་། དམ་པའི་ཆོས་དང་བྲལ་བ་དང་། སྐྱེ་བོ་ཀུན་གྱིས་སྨད་པ་དང་། བཟའ་བ་དང་གནས་པའི་ཁྱིའི་སྤྱོད་ལམ་དང་མཚུངས་པ་དང་། རྐང་ལག་ལ་ཐོར་པ་འབྱུང་བ་དང་། ཕ་རོལ་གྱི་བསོད་སྙོམས་ཀྱི་ཟས་གསོབ་གསོག་ཏུ་གྱུར་པ་ཟོས་ནས་མིའི་ཚེ་འདི་ཉིད་ལ་འཆི་བར་འགྱུར་ཏེ། དེ་ལྟར་ལོག་པར་ལྟ་བ་ནི་ཐོག་མ་དང་བར་མ་དང་ཐ་མར་མི་འདོད་པ་འབྱུང་བ་དགེ་སློང་དེས་མཐོང་ངོ་། །ཡང་དག་པའི་ལྟ་བ་ནི་བློའི་སྔོན་དུ་འགྲོ་ཞིང་དེ་ཁོ་ན་ཉིད་མཐོང་ལ་ཡང་དག་པའི་ལམ་ལ་རབ་ཏུ་གནས་པ་མྱ་ངན་ལས་འདས་པར་འགྲོ་བ་ན་སྔོན་དུ་འདྲེན་པ་ཡིན་པར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་འཁོར་པད་མ་དཀར་པོ་ལྟ་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ལོག་པར་ལྟ་བ་ཡང་རྣམ་པ་འདི་དག་ཀུན་དུ་བསྟེན་ཅིང་བསྒོམས་ཏེ་
མང་དུ་བྱས་པས་འགྱུར་བ་ནི་འདི་ལྟ་སྟེ། ཟས་མི་ཟ་བས་མཐོ་རིས་ཐོབ་པར་འགྱུར་རོ། །སྙམ་ནས་དེ་གཞན་ཡང་འཛིན་དུ་འཇུག་ཅིང་རྗེས་སུ་དགའ་བར་བྱེད་དུ་འཇུག་ལ་རབ་ཏུ་འཇོག་པར་བྱེད་པ། རྒྱུ་ངན་པ་དང་། ལྟ་བ་ངན་པ་གཞན་གྱིས་སེམས་བཅིངས་པ་དག་བསྟན་བཅོས་ངན་པ་བྱེད་ཅིང་གཞན་ཡང་འཛིན་དུ་འཇུག་གོ །འཛིན་དུ་བཅུག་སྟེ་ཟས་མི་ཟ་བ་ལ་བཀོད་ནས་སྲོག་དང་བྲལ་བར་བྱེད་དོ། །དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་པད་མ་དཀར་པོ་ལྟ་བུར་སྐྱེ་བར་འགྱུར་རོ། །དེ་དེར་སྐྱེས་ནས་གང་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་དེ་དག་ཐམས་ཅད་ཉིས་འགྱུར་དུ་འབྱུང་བའི་སྟེང་དུ་གནོད་པ་ཁྱད་པར་དུ་འབྱུང་བ་ནི་འདི་ལྟ་སྟེ། ཡན་ལག་དང་ཉིང་ལག་ཐམས་ཅད་རྟག་ཏུ་འབར་བའི་ཕྲེང་བར་འགྱུར་ཏེ། ལུས་དེ་ལ་རྒྱུ་ལས་དང་འཐུན་པའི་རྣོ་བ་དཔེ་མེད་པའི་རྒྱུ་དེས་མེ་རབ་ཏུ་འབར་བ་ཡུངས་ཀར་གྱི་ཚད་ཙམ་ཡང་མ་ཁྱབ་པ་མེད་དེ། དེས་རྟག་ཏུ་རབ་ཏུ་འབར་རོ། །ཇི་ལྟར་མི་གཙང་བ་ཐམས་ཅད་ཀྱི་ནང་ན་ལོག་པར་ལྟ་བ་ཀུན་མི་གཙང་བ་དེ་བཞིན་དུ་མེ་ཐམས་ཅད་ཀྱི་ནང་ན་མེ་འདི་ཀུན་ཚའོ། །མེའི་གནོད་པ་དཔེ་མེད་པ་དེས་སེམས་ཅན་དམྱལ་བ་པ་དེ་དག་ལ་རྒྱུ་དང་འཐུན་པའི་འབྲས་བུ་འབྱུང་སྟེ། དེས་ཡུན་རིང་དུ་སྲེག་གོ །དེ་གལ་ཏེ་ལས་ཀྱི་དབང་གིས་མེ་ཏོག་པད་མ་དཀར་པོའི་ཚལ་ན་བྱའི་ཚོགས་དུ་མས་ཀུན་དུ་བསྟེན་པ་ཆུ་འབབ་པ་ཕུན་སུམ་ཚོགས་པ་མཐོང་བ་དང་། སེམས་ཅན་དམྱལ་བ་པ་གཞན་དག་ལ་སྨྲས་པ། ཀྱེ་འདི་ལྟར་རྒྱུགས་རྒྱུགས། པད་མ་དཀར་པོའི་ཚལ་དེར་བདག་ཅག་ཆུ་བསིལ་བ་བཏུང་བར་བྱའོ། །ཚལ་གྲིབ་བདེ་བ་དག་བསྟེན་པར་བྱའོ་ཞེས་དེ་དག་གིས་དེ་སྤྲོ་བ་བསྐྱེད་ནས། དེ་དག་ཉིད་དང་ལྷན་ཅིག་ཏུ་པད་མ་དཀར་པོའི་ཚལ་དེར་རྒྱུག་གོ །བརྒྱུགས་པ་དང་ཁ་ཅིག་མདག་མེའི་ཆུ་བོ་གང་བ་དག་ཏུ་བྱིང་ངོ་། །བྱིང་ནས་ཡན་ལག་དང་ཉིང་ལག་ཐམས་ཅད་རྣམ་པར་ཞིགས་སོ། །རྣམ་པར་ཞིགས་ནས་ཡང་འབྱུང་བར་འགྱུར་ཏེ། བྱུང་ནས་དེ་ལྟར་པད་མ་དཀར་པོའི་ཚལ་ལ་སྲེག་པས་དེ་ཉིད་དུ་རྒྱུག་གོ །བརྒྱུགས་པ་དང་། སྦའི་ལྕུག་མ་རབ་ཏུ་འབར་བ་དག་
འབྱུང་བར་འགྱུར་ཏེ། དེ་དག་གིས་ཡན་ལག་དང་ཉིང་ལག་ཐམས་ཅད་དཀྲི་དཀྲིས་ནས་ཉམས་རྣམ་པར་ཉམས་པར་བྱས་ཏེ། རུས་པ་དང་རྐང་ཙམ་ཞིག་ཡོད་པར་བྱས་སོ། །དེ་ནས་ཡང་སྐྱེ་བར་འགྱུར་ཏེ། སྐྱེས་ནས་ཀྱང་དེ་བཞིན་དུ་པད་མ་དཀར་པོའི་ཚལ་དུ་རྒྱུག་པ་དང་། དེའི་ཤ་ལ་ལས་ཀྱིས་བྱས་པའི་སྲིན་བུ་དག་བྱུང་སྟེ། དེ་ལ་ཟའོ། །དེ་ལ་དེ་དག་ཐམས་ཅད་ཀྱིས་སྔ་མ་བཞིན་དུ་རེ་ཞིག་མིག་ལ་འཕྱང་འཕྱང་ནས་མིག་ཟའོ། །སྲེད་པས་ཉམ་ཐག་པ་ལོང་བར་གྱུར་པ་དེ་དེར་རྒྱུག་གོ །བརྒྱུགས་པ་ན་སྲིན་བུ་གཞན་དག་འབྱུང་བར་འགྱུར་ཏེ། དེ་དག་གི་ལུས་མུན་པར་བསྒྲིབས་པ་ངུ་སྐད་འདོན་པ་དེ་ལ་རྟག་ཏུ་ཟའོ། །དེ་ནས་ཡང་མིག་ནས་བྱུང་སྟེ། དེ་ལ་ཡང་ཟ་སྟེ། དེ་ལྟར་ལོ་འབུམ་ཕྲག་དུ་མའི་བར་དུ་ཟ་ཟ་ནས་སྐྱེ་བར་འགྱུར་རོ། །ཡོངས་སུ་རྒྱུག་པ་ན་ཡང་གལ་ཏེ་ཡང་པད་མ་དཀར་པོའི་ཚལ་དེ་དག་དང་ཕྲད་ན། དེའི་བསམ་པ་དང་ལུས་ཐམས་ཅད་རབ་ཏུ་སིམ་པ་དང་། བདག་གི་བསམ་པ་བཞིན་དུ་པད་མ་དཀར་པོའི་ཚལ་དེ་དང་ཕྲད་དོ་སྙམ་དུ་དེའི་སེམས་སྐྱེའོ། །དེ་དེར་ཞུགས་པ་དང་། པད་མ་དཀར་པོ་དེ་དག་འཕང་དུ་དཔག་ཚད་ལྔའོ། །རྒྱར་དཔག་ཚད་གཉིས་ཀྱི་ཚད་དེ་མེ་འབར་བའི་པད་མ་དཀར་པོ་དེ་ལ་ལས་ཀྱིས་བསླུས་པ་དག་འཛེག་གོ །ལྷག་མ་གཞན་དག་ནི་འཛེག་ཅིང་འཁོད་ལ་སེམས་ཅན་དམྱལ་བ་པ་དེ་དག་གི་ལུས་འབར་བའི་ཕྲེང་བའི་ཡན་ལག་དང་ལྡན་པར་འགྱུར་ཏེ། འཛེག་བཞིན་དུ་དེ་དག་རེ་བ་མེད་ཅིང་ཤིན་ཏུ་སྡུག་བསྔལ་ལ་བཀྲེས་པ་དང་སྐོམ་པས་ཉེན་པ་དེ་དག་མེ་མདག་པད་མ་དཀར་པོ་ལྟ་བུས་སྲེག་གོ །འཚེད་དོ། །འཆི་ཞིང་སྐྱེའོ། །ལུས་ཀྱི་ཡན་ལག་དང་། ཉིང་ལག་ཐམས་ཅད་བསྲེགས་པ་ཤིང་ཀིང་ཤུ་ཀ་ལྟ་བུའི་ལུས་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་རིང་པོར་གནོད་པ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ཚེ་རབས་བཞི་བརྒྱར་ཡི་དགས་བཀྲེས་ཤིང་སྐོམ་པར་འགྱུར་རོ། །དེ་ལས་ཐར་ནས་ཀྱང་ཚེ་རབས་སུམ་བརྒྱར་དུད་འགྲོ་རྣམས་
སུ་སྐྱེ་བར་འགྱུར་རོ། །གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན་དེས་ལོག་པར་ལྟ་བ་སྤྱད་ཅིང་ཉེས་པར་བྱས་པའི་ལས་དེ་དང་རྒྱུ་འཐུན་པའི་འབྲས་བུས་དེ་མཚོན་གྱིས་འཁྲུག་ཅིང་མུ་གེ་དང་ཆོམ་རྐུན་རབ་ཏུ་མང་བའི་ཡུལ་རྣམས་སུ་སྐྱེ་བར་འགྱུར། དེར་སྐྱེས་ནས་ཀྱང་དབུལ་ཞིང་ནད་བུ་ཅན་དང་གཞན་གྱིས་བཀོལ་ཅིང་སྡུག་ཕོངས་པར་གྱུར་ལ་དབང་པོ་མ་ཚང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྦྲུལ་འཁྱིལ་བ་ལྟ་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ལོག་པར་ལྟ་བ་ཡང་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་བ་ནི་འདི་ལྟར་ཙོག་ཙོག་པོར་བསྒྱིངས་པར་འདུག་ལ་སྐོམ་འཐུང་ཞིང་ལག་པ་ལ་ལྡག་ན་མྱ་ངན་ལས་འདས་པ་འཐོབ་སྟེ། འདོད་ཆགས་ཞེ་སྡང་གཏི་མུག་སྤངས་པས་མ་ཡིན་ཞིང་དབང་པོ་ཞི་བས་མ་ཡིན་ནོ་ཞེས་སྨྲ་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བའི་སེམས་ཅན་དམྱལ་བ་སྦྲུལ་འཁྱིལ་པ་ལྟ་བུར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་དེ་སྦྲུལ་གདུག་པ་གདེངས་ཀ་ཅན་རབ་ཏུ་འབར་བས་ཀུན་དུ་གང་བ་དེ་ན་སྦྲུལ་དཔག་ཚད་ཙམ་ཡོད་ཅིང་སྦྲུལ་གདུག་པ་དཔག་ཚད་ཙམ་ཡོད་པས་ཀྱང་ཤིན་ཏུ་གང་བ་ཡིན་ལ། ཁ་ཅིག་ནི་ལྟ་བའི་དུག །ཁ་ཅིག་ནི་རེག་པའི་དུག །ཁ་ཅིག་ནི་མཆེ་བའི་དུག་སྟེ། དེ་དག་གིས་སེམས་ཅན་དམྱལ་བ་དེ་གང་ངོ་། །དེར་སེམས་ཅན་དམྱལ་བ་ཁ་ཅིག་གི་ནང་དུ་སྦྲུལ་དེ་དག་འབྱུང་བར་འགྱུར་ཏེ། གང་དག་ནང་དུ་སྐྱེས་པ་ལ་དེའི་ཚེ་སྦྲུལ་དེ་དག་གི་ལུས་རེག་པས་ཆད་པའི་ཕྱེ་བཞིན་འཐག་
གོ །གང་དག་ཁའི་ནང་དུ་སྐྱེས་པ་ནི་མཆེ་བ་དང་འདྲེས་པའི་དུག་རབ་ཏུ་འབར་བ་དེ་དག་གིས་སྐྱེ་ཞིང་སྐྱེ་ཞིང་ཡང་འཆིའོ། །ཤི་ནས་ཡང་འཚོ་སྟེ། དེ་དག་མེ་གསུམ་གྱིས་སྲེག་གོ །འདི་ལྟ་སྟེ། དུག་གི་མེ་དང་། སེམས་ཅན་དམྱལ་བ་པའི་མེ་དང་། བཀྲེས་པ་དང་སྐོམ་པའི་མེས་དེ་དག་རང་གི་ལས་དང་འཐུན་པར་མེ་གསུམ་གྱི་དབུས་སུ་བཅུག་ནས་ཚོར་བ་ཚ་བ་རྩུབ་པ་དག་མྱོང་བར་འགྱུར་རོ། །གཞན་ཡང་ནད་ལས་བྱུང་བའི་ཚོར་བ་བརྗོད་པར་ཡང་མི་ནུས་པའི་ནད་བཞི་ལས་བྱུང་བའི་མེས་དེ་སྲེག་གོ །དེ་ལྟར་ཉེས་པར་བྱས་པའི་ལས་ཀྱི་མཐའ་སྤྱད་པ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་རིང་པོར་མེའི་ནང་དུ་བཅུག་ནས་སྲེག་གོ །འཐག་གོ །སྐེམས་སོ། །རྣམ་པར་ཞིགས་པར་བྱེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ཚེ་རབས་བརྒྱ་ལྔ་བཅུར་ཡི་དགས་ཁབ་མགྲིན་དུ་སྐྱེ་བར་འགྱུར། ཚེ་རབས་ཉིས་བརྒྱར་མེ་དང་ཆུ་མེད་པའི་གནས་རི་སུལ་དཔག་ཚད་བཅུ་གཉིས་པར་བཀྲེས་པ་དང་། སྐོམ་པ་ཐམས་ཅད་ཀྱིས་ཡོངས་སུ་གདུངས་པའི་དུད་འགྲོ་སེང་གེ་དང་། སྟག་དང་། དྲེད་དང་། གུང་དུ་སྐྱེ་བར་འགྱུར་རོ། །གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་འབྲོག་དགོན་པའི་མིར་འགྱུར་ཏེ། གང་དག་གིས་ནམ་ཡང་ཁ་ཟས་མཐོང་བར་མི་འགྱུར་ན་བཟའ་བ་ལྟ་སྨོས་ཀྱང་ཅི་དགོས་ཏེ། གཞན་དུ་ན་དེར་རྔད་དང་། རྩྭ་དང་། ཚལ་གྱི་འབྲས་བུས་སྲོག་འཚོ་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་སེམས་ཅན་དམྱལ་བ་ཟངས་བཞུས་པར་ཉ་འཁྱུག་པ་ལྟ་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་
པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བས་འགྱུར་རོ། །ལོག་པར་ལྟ་བ་ཡང་འདི་ལྟར་ཀུན་དུ་བསྟེན་ཅིང་བསྒོམས་ལ་མང་དུ་བྱས་པས་འགྱུར་ཏེ། འདིར་འགྲོ་བ་འདི་དག་ཐམས་ཅད་དབང་ཕྱུག་གིས་སྤྲུལ་ཏེ་ལས་ཀྱིས་མ་བྱས་སོ་ཞེས་སྨྲ་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཟངས་བཞུས་པར་ཉ་འཁྱུག་པ་ལྟ་བུར་སྐྱེ་བར་འགྱུར་རོ། །སེམས་ཅན་དམྱལ་བ་དེ་ཡང་ཟངས་བཞུས་པ་རབ་ཏུ་འབར་བས་རྒྱ་མཚོ་ལྟར་གང་བའི་སེམས་ཅན་དམྱལ་བར་སྐྱེ་བར་འགྱུར་ཏེ། དེར་ཡང་ལས་ཀྱིས་བྱས་པའི་ལྕགས་ཀྱི་ཉ་རབ་ཏུ་འབར་བ་དག་རྣམ་པར་རྒྱུ་ཞིང་ཟངས་བསྐོལ་བ་དེའི་དབུས་སུ་ཤིང་ལོ་མ་སྤུ་གྲི་དང་མདུང་ཐུང་ལྟ་བུ་དག་འབྱུང་སྟེ། དེར་སེམས་ཅན་དམྱལ་བ་པ་དེ་དག་སྐྱེས་ནས་འཆི་ཞིང་སྐྱེ་སྟེ། ཡན་ལག་དང་ཉིང་ལག་ཐམས་ཅད་ཞིགས་སོ། །ཞུགས་པ་ན་ནུབ་ཅིང་འབྱུང་སྟེ་ཚོར་བས་ཉེན་པ་དག་ཕན་ཚུན་རྒྱུག་ཅིང་ངུ་སྐད་འདོན་ཏོ། །གཅིག་ལ་གཅིག་ལོག་པར་སྨྲས་པས་དེ་དག་དེ་ལྟར་ངུ་སྐད་འདོན་པ་ན་ལས་ཀྱིས་བྱས་པའི་ཉ་དེ་དག་སེམས་ཅན་དམྱལ་བ་དེ་དག་གི་དྲུང་དུ་ཁ་གདངས་ཤིང་རྒྱུག་གོ །དེ་ནས་ཉ་དེ་དག་གིས་སེམས་ཅན་དམྱལ་བ་པ་དེ་དག་ཁ་ཆུའི་ཞགས་པས་བཟུང་སྟེ་ཟ་ཞིང་། དེའི་ཚེ་སོའི་བར་དུ་ཕྱེ་མར་རླགས་སོ། །དེ་དག་གི་ལུས་ཕྱེད་ཉ་རྣམས་ཀྱིས་ཟོས་ཤིང་། ཕྱེད་ཟངས་བསྐོལ་བར་འཚེད་དོ། །དེ་དག་ཚོར་བ་དྲག་པས་ཉེན་ལ། ཚ་བ་རྩུབ་པའི་ཚོར་བ་གཉིས་མྱོང་བར་འགྱུར་ཏེ། དེ་ཉ་དེ་རྣམས་ཀྱིས་ཕྱེད་ཟ་བ་དང་། ཕྱེད་ཟངས་བསྐོལ་བར་འཚེད་དོ། །ཡུན་རིང་མོ་ཞིག་འདས་ནས་ཉའི་ཁ་དེ་ནས་ཐར་བ་དང་། ཟངས་བསྐོལ་བའི་བུམ་པའི་ནང་དུ་འཇུག་གོ །ཞུགས་པ་དང་། སྲིན་བུ་ཨ་པ་མཱ་སི་ཀ་ཞེས་བྱ་བ་རྡོ་རྗེ་ལྟ་བུར་མཆེ་བ་རྣོ་བ་དུག་དཔག་ཏུ་མེད་པ་ཡོད་པ་དེ་དག་གིས་བཟུང་ངོ་། །བཟུང་བ་རྣམས་ཟངས་བསྐོལ་བའི་བུམ་པ་མུན་པར་གྱུར་པ་དེར་ཕྱེ་མར་རློག་གོ །ཕྱེ་མར་བརླགས་ནས་ཕྱེ་མའི་དུམ་བུ་ཙམ་དུ་ཟའོ། །གང་ཚོར་བས་ཉེན་པ་ངུ་སྐད་འདོན་པ་དག་ཟངས་བསྐོལ་བས་ཁ་འགེངས་ཤིང་ངུ་སྐད་འདོན་ཏེ། དེ་དག་
གིས་འཛག་སྒོ་ཟངས་བསྐོལ་བ་དེས་འགེངས་ཤིང་འགོག་ལ་འཚེད་ཅིང་རྣམ་པར་ཞིགས་པར་བྱེད་དོ། །ཟངས་བསྐོལ་བ་དེ་ལས་ཡུན་རིང་མོ་ཞིག་འདས་ནས་ཡང་རྐྱལ་ལོ། །རྐྱལ་ནས་ཀྱང་ལས་ཀྱིས་བྱས་པའི་རླུང་སྤུ་གྲི་ལྟ་བུ་རྣམས་ཀྱིས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོག་པར་སྨྲ་བ་ལས་དང་འབྲས་བུ་ལ་སླུ་བར་ཞུགས་པ་དག་ཕྱེ་མར་རློག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ཚེ་རབས་སུམ་བརྒྱར་ཡི་དགས་ཁ་ཟས་མེད་པ་རྣམས་ཀྱི་ནང་དུ་སྐྱེ་བར་འགྱུར་རོ། །ཡི་དགས་ཀྱི་ཡུལ་དེ་ལས་ཐར་ནས་ཀྱང་ཚེ་རབས་སུམ་བརྒྱར་དུད་འགྲོ་གླང་པོ་ཆེ་དང་། དོམ་དང་གྲོག་སྦུར་ལ་སོགས་པ་ཤིན་ཏུ་སྡུག་བསྔལ་བ་རྟག་ཏུ་བཀྲེས་པ་དང་། སྐོམ་པ་དང་། གྲང་བ་དང་། ཚ་བ་དང་། རླུང་དང་། གདུང་བ་རྣམས་སུ་སྐྱེ་བར་འགྱུར་རོ། །དུད་འགྲོ་དེ་ལས་ཐར་ནས་ཀྱང་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་ཁྱིས་འཚོ་བའམ་ཤིང་ཐུན་ནམ་ཉ་བར་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ལྕགས་ཀྱི་བུམ་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ལོག་པར་ལྟ་བ་ནི་འདི་ལྟར་མཐོ་རིས་སུ་མི་འདི་དབང་དུ་འགྱུར་རོ་ཞེས་མཆོད་སྦྱིན་དག་ལ་མི་དག་གསོད་པར་བྱེད་པ་དང་། འཇིག་རྟེན་ཕ་རོལ་དུ་དབང་དུ་བྱ་བའི་ཕྱིར་རུས་སྦལ་དག་གསོད་པར་བྱེད་ཅིང་གཞན་དག་ཀྱང་རབ་ཏུ་འཇོག་པར་བྱེད་པ་ནས་སྐྱེ་བའི་བར་དུ་བྱེད་པ་ཡིན་ཏེ། ལམ་བཟང་པོ་སུན་པར་བྱེད་ཅིང་ལམ་ངན་པ་ལ་འཇོག་
པར་བྱེད་པའི་ལས་ཀྱི་རྣམ་པ་འདི་དག་ནི་ལོག་པར་ལྟ་བ་ཡིན་ནོ། །དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ལྕགས་ཀྱི་བུམ་པར་སྐྱེ་བར་འགྱུར་ཏེ། དེར་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་དེ་དག་ཐམས་ཅད་བཅུ་འགྱུར་དུ་འབྱུང་ངོ་། །བུམ་པ་དཔག་ཚད་བཅུ་པ་དྲུག་འབྱུང་སྟེ། དེ་དག་གི་མིང་ནི་འདི་དག་ཡིན་ཏེ། འདི་ལྟ་སྟེ། ཞུགས་མ་ཐག་ཏུ་སྡུག་བསྔལ་བ་དང་། སྐྱབས་མེད་པ་དང་། རྟག་ཏུ་མེས་བསྐོར་བ་དང་། ཆུ་སོག་ལེ་ལྟ་བུ་དང་། སྤུ་གྲིའི་ཕྲེང་བ་ལྟ་བུ་དང་། ཆུ་བསྐོལ་བའི་ནང་དུ་སྦྲུལ་ཞུགས་པའོ། །དེར་གང་དག་སྡུག་བསྔལ་མཚུངས་པར་འཚེད་པ་དེ་དག་ལ་རྣམ་པ་དེ་ལྟ་བུའི་སྡུག་བསྔལ་འབྱུང་སྟེ། གང་དུ་སེམས་ཅན་དམྱལ་བ་པ་དེ་དག་འཚེད་པ་ན་ཚོར་བའི་སྡུག་བསྔལ་ཡང་མཐའ་དག་འབྱུང་བར་འགྱུར་རོ། །གང་སྐྱབས་མེད་པ། འཚེད་པ་དེ་དག་ལ་ལུས་ཀྱི་སྐྱབས་ཀྱང་མེད་ཅིང་ཡིད་དང་ཆོས་ཀྱི་སྐྱབས་ཀྱང་མེད་དེ། གང་ངན་འགྲོའི་སྐྱབས་ཅན་དེ་དག་ཐམས་ཅད་དེ་ན་སྐྱབས་མེད་དོ། །གང་རྟག་ཏུ་མེས་བསྐོལ་བ་ཡུན་རིང་པོར་འཚེད་པ་དེ་དག་ནི་མེས་བསྐོལ་བའི་ཟངས་བཞུས་པ་ལས་བྱུང་བས་ཇི་ལྟར་ཐལ་བ་ཡང་མི་མངོན་པ་དེ་ལྟར་ལུས་རྣམ་པར་ཞིགས་པར་བྱེད་དོ། །དེ་ནས་ཡང་ལུས་དེ་སྐྱེ་བར་འགྱུར་ཏེ། ཆུ་སོག་ལེ་ལྟ་བུ་དེར་འཇུག་པར་བྱེད་དོ། །ཟངས་བསྐོལ་བའི་ཆུ་དེ་སོག་ལེ་ལྟ་བུ་ཡིན་ཏེ། དེ་དག་ཐམས་ཅད་མེ་འབར་བ་མཆེད་པ་དེར་བཅུག་པ་དང་། འོག་ནས་སྟེང་དུ་འབྱུང་ཞིང་ཟངས་བསྐོལ་བའི་ཆུ་སོག་ལེ་ལྟ་བུར་གནད་དང་གནད་དག་ལ་གནོད་པར་བྱེད། གཤིག་པར་བྱེད་དོ། །དེ་ནས་ཡང་དེ་ལས་སྟེང་ནས་འོག་ཏུ་འབྱུང་སྟེ། སོག་ལེ་དེ་དག་ཉིད་ཀྱིས་གཤེག་ཅིང་འདྲལ་ལོ། །མོན་སྲན་གྲེའུ་ལྟ་བུའི་རིགས་དེ་དག་ལུས་སྟེང་དང་འོག་དང་སའི་ངོས་ལ་ཡུན་རིང་དུ་འཇོམས་སོ། །གཤེག་གོ །སྲེག་གོ །སྤུ་གྲིའི་ཕྲེང་བའི་ནང་དུ་འཇུག་པ་དེ་དག་ལ་གནོད་པ་འབྱུང་སྟེ། འདི་ལྟ་སྟེ། བུམ་པ་དེ་སྤུ་གྲི་རྣམས་ཀྱིས་གང་བ་ཡིན་ཏེ། དེར་སེམས་ཅན་དམྱལ་བ་པ་དག་སྤུ་གྲི་དུག་གིས་གོས་པ་དེ་དག་གིས་ཡན་ལག་དང་ཉིང་ལག་གཤེག་པར་
བྱེད་དོ། །ཆུ་བསྐོལ་བའི་ནང་དུ་སྦྲུལ་ཞུགས་པ་དེ་དག་ལ་གནོད་པ་འབྱུང་བ་ནི་འདི་ལྟ་སྟེ། ཆུ་བསྐོལ་བ་དཔག་ཚད་ཕྱེད་དུ་བསྐོལ་བ་ཤིན་ཏུ་ཚ་བ་འབྱུང་སྟེ། དེར་དབུ་བའི་ནང་ན་སྦྲུལ་གནས་པ་མཆེ་བ་མཆོག་ཏུ་རྣོ་བ་དག་རེག་པ་དང་མཐོང་བས་མེ་བཞིན་དུ་སྲེག་གོ །རེག་པས་སྤུ་གྲི་བཞིན་དུ་གཅོད་དོ། །སེམས་ཅན་དམྱལ་བ་པ་དེ་དག་སྦྲུལ་དེ་དག་གིས་གཅོད་པར་བྱེད་དེ། རེག་པས་རུས་པ་ཙམ་ལུས་པར་བྱེད་ཅིང་མཐོང་བས་སྐོལ་བར་བྱེད་ལ་དབུ་བ་བཞིན་དུ་ཞུ་བར་བྱེད་དོ། །ཆུ་བསྐོལ་བས་སྐོལ་བར་བྱེད་དེ། སེམས་ཅན་དམྱལ་བ་པ་དག་སྡུག་བསྔལ་ཤིན་ཏུ་ཚ་ཞིང་རྩུབ་པ་དག་མྱོང་བར་འགྱུར་རོ། །གལ་ཏེ་གཤིན་རྗེའི་མི་དག་གཞན་དུ་དོང་བར་གྱུར་ན་དེའི་ཚེ་བུམ་པ་དེ་དག་གི་ཁ་འོག་མའི་བུ་ག་མེད་པར་འགྱུར་ཏེ། དེས་སེམས་ཅན་དམྱལ་བ་པ་དག་འབྲོས་པར་བྱེད་མི་ནུས་སོ། །དེ་ནས་གཤིན་རྗེའི་མི་དེ་དག་འདི་སྙམ་དུ་སེམས་ཏེ། འདི་ལྟར་སེམས་ཅན་དམྱལ་བ་པ་བུ་ག་མེད་པའི་བུམ་པའི་ནང་འདིར་ཞུགས་པ་དག་རྡོ་རྗེ་ལྟ་བུའི་སྐྱོང་ནུལ་གྱིས་བུ་ག་མེད་པར་བྱས་ཏེ། གནོད་པ་རྣམ་པ་སྣ་ཚོགས་ཀྱིས་སེམས་ཅན་དམྱལ་བ་པ་དག་འབྲོས་མི་ནུས་པར་བྱའོ་སྙམ་དུ་སེམས་སོ། །དེ་ནས་གཤིན་རྗེའི་མི་དེ་དག་འདི་སྙམ་དུ་སེམས་ཏེ། ལས་ཀྱིས་བྱས་པའི་བུམ་པ་འདི་དག་ཐམས་ཅད་ཀྱི་ཁ་འོག་མ་བདག་ཅག་གིས་ངེས་པར་ཡང་མེ་འབར་བའི་ཕྲེང་བ་མཆེད་པས་ཉིས་འགྱུར་དུ་རབ་ཏུ་འབར་བར་བྱའོ་སྙམ་ནས། དེ་ནས་སེམས་ཅན་དམྱལ་བ་པ་དེ་དག་ལ་གནོད་པ་དེ་དག་གིས་གནོད་པར་བྱེད་དོ། །དེ་ནས་གཤིན་རྗེའི་མི་དེ་དག་ཁྲོས་ནས་ཡང་བུམ་པ་དེ་དག་ལྕགས་ཀྱི་ཤིང་དེ་དག་གིས་ཉིས་འགྱུར་དུ་རབ་ཏུ་སྲེག་པར་བྱེད་དོ། །དེ་ནས་སེམས་ཅན་དམྱལ་བ་པ་དེ་དག་གྱེན་དུ་འགྲོ་བ་ན་ཟངས་དམར་པོ་བསྐོལ་བས་ཕན་ཚུན་གནོད་པར་བྱེད་དེ། སྡུག་བསྔལ་གྱི་གནོད་པ་སྣ་ཚོགས་ཀྱིས་ཉམ་ཐག་པ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཁ་ཅིག་ནི་རྣམ་པར་ཞིགས་སོ། །ཁ་ཅིག་ནི་སྦྲུལ་གདུག་པ་མེ་ལྟར་ཚ་བས་སྐོལ་ཅིང་སྲེག་པར་བྱེད་དོ། །དེ་དག་བུམ་པའི་
གནོད་པ་དེ་ལས་ཐར་བར་འགྱུར་ཏེ། ཐར་ནས་ཀྱང་ཚེ་རབས་སུམ་བརྒྱར་ཡི་དགས་དྲི་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པའི་འབྲས་བུས་དེ་བསྟན་བཅོས་ངན་པའི་གཏན་ཚིགས་ཀྱིས་རྨོངས་པ་བློ་གྲོས་ངན་པས་དོན་གྱི་ཕྱིར་རམ་མཐོ་རིས་ཀྱི་ཕྱིར་ཤ་དག་ལ་སོགས་པར་བྱེད་དོ། །སྲེད་པའི་བག་ལ་ཉལ་གྱིས་འབྲེལ་བས་དེ་དག་ཡང་སྡུག་བསྔལ་དེ་ཉིད་དོན་དུ་གཉེར་བར་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆུ་བོ་དམར་པོ་འབབ་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལོག་པར་ལྟ་བའི་ལས་བྱས་པ་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་འཆལ་པ་གང་གིས་ཚུལ་ཁྲིམས་འཆལ་པ་མང་དུ་བྱས་ནས་ཕྱིས་དེ་འདི་སྙམ་དུ་སེམས་ཏེ། བདག་དཀའ་ཐུབ་དཀའ་བ་བྱས་པ་དང་། བདག་གིས་ཉེས་པར་བྱས་པ་དང་། ཉེས་པར་མ་བྱས་པ་དེ་དག་ཐམས་ཅད་འབྱང་བར་འགྱུར་རོ་སྙམ་ནས་དེ་ཚལ་དུ་སོང་སྟེ། ཤིང་ལ་རྐང་པ་བཏགས་ནས་མགོ་ཐུར་དུ་དཔྱངས་ཏེ། མཚོན་ཆས་སྣའམ་དཔྲལ་བ་གཅོད་དེ། དེ་ལས་གང་ཁྲག་བྱུང་བ་དེ་དག་མེར་སྲེག་ལུགས་བྱེད་དོ། །སྲེག་པས་མཐོ་རིས་འདོད་པ་ལམ་ངན་པར་ཞུགས་པ་བྱེ་མ་དག་ལས་ཏིལ་མར་འབྱུང་བར་འདོད་པ་དེ་ཁྲག་ཟད་ནས་འཆི་སྟེ། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཆུ་བོ་དམར་པོ་འབབ་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། གང་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་བསྡུས་པ་དེ་དག་ཐམས་ཅད་ལྔ་འགྱུར་དུ་འབྱུང་བའི་སྟེང་དུ་ཁྱད་པར་འབྱུང་བ་ནི། འདི་ལྟར་གཤིན་རྗེའི་མི་དག་ཐོ་བ་དང་། རལ་གྲི་དང་། མདའ་བོ་ཆེ་དང་། རྡོ་རྣམས་ཀྱིས་ཇི་ལྟར་ཁྲག་དང་། གླད་རྒྱས་འབྱུང་ཞིང་འབབ་པ་དེ་ལྟར་ཕྱེ་མར་རློག་སྟེ། ཇི་ལྟར་ཆུ་བོ་དེས་དེད་པ་དེ་ལྟར་སེམས་ཅན་དམྱལ་བ་པ་སྐྲ་དང་རུས་པས་མུ་
ཁེབས་པ་གཞན་དག་ཀྱང་ཆུ་བོ་དེས་དེད་དོ། །ཟངས་བསྐོལ་བའི་ཆུ་བོ་རབ་ཏུ་མི་བཟད་ཅིང་མཆོག་ཏུ་འཇིགས་པ་ཞེས་བྱ་བ་གཉིས་པ་འབབ་སྟེ། ཆུ་བོ་དེའི་ནང་ན་སྲོག་ཆགས་ཀྱི་རིགས་ལང་ཀུ་དི་ཀ་ཞེས་བྱ་བ་རེག་ན་མེ་ལྟར་ཚ་བ་ཞིག་ཡོད་པ་དེས་སེམས་ཅན་དམྱལ་བ་པ་དེ་དག་རབ་ཏུ་བསྲེགས་ཤིང་བསྲེགས་ཤིང་ཟའོ། །དེ་ལྟར་ཆུ་བོ་དམར་པོ་འབབ་པའི་སེམས་ཅན་དམྱལ་བ་པ་དག་གི་ལོ་བགྲང་གིས་མི་ལང་སྟེ། ཇི་སྲིད་དུ་དེའི་ལོག་པར་ལྟ་བ་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཆུ་བོ་དམར་པོ་འབབ་པའི་སེམས་ཅན་དམྱལ་བར་ཡུན་རིང་དུ་གནོད་པ་དག་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པས་ཚེ་རབས་ལྔ་བརྒྱར་ཡི་དགས་བདུག་སྤོས་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལས་ཐར་ནས་ཀྱང་ཚེ་རབས་བཞི་བརྒྱར་དུད་འགྲོ་རྒྱ་མཚོའི་བྱར་སྐྱེ་སྟེ། དེ་ཆུ་བོའི་སྒོར་གནས་པའམ། གལ་ཏེ་མགོ་དམར་པོར་འགྱུར་རོ། །དེ་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་དབུལ་ཞིང་ནད་བུ་ཅན་དུ་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་རྐང་དང་རུས་པ་ལ་སྲིན་བུ་མང་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ལུས་སམ། ངག་གམ། ཡིད་ཀྱི་ཆད་པ་མི་དགེ་བ་མང་དུ་བྱས་ནས། དེ་ཕྱིས་ཐོས་པ་ངན་པས་རྨོངས་པ། ཚངས་པའི་འཇིག་རྟེན་ལ་སྲེད་པ། ལམ་ངན་པ་ལ་རབ་ཏུ་གནས་པ། ཚུལ་ཁྲིམས་རྣམ་པར་སྤངས་པ། ཚུལ་ཁྲིམས་འཆལ་པའི་རང་བཞིན་དང་ལྡན་པ། གཡོ་ཅན་ཕ་རོལ་ལ་གནོད་པ་དག་ཚུལ་ཁྲིམས་སྤངས་ནས་ལྕི་བའི་མེ་ཐབ་བྱེད་དེ། སྡུག་བསྔལ་བ་ཚེ་འདི་ལ་མིའི་མེས་སྲེག་གོ །དེ་ལུས་དང་བྲལ་ནས་ངན་
འགྲོ་ལོག་པར་ལྟུང་བ་སེམས་ཅན་དམྱལ་བ་རྐང་དང་། རུས་པ་ལ་སྲིན་བུ་མང་བར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། ལྕགས་ལས་བྱས་པའི་བརྡུང་བས་དེའི་མགོ་མན་ཆད་ཀྱི་བར་དག་རྡུང་བར་བྱེད་དོ། །ངུ་སྐད་འདོན་པ་ན་ཇི་ལྟར་སྦྲང་རྩིའི་ཚིགས་མ་བཞིན་དུ་བྱེད་དེ། ཡན་ལག་དང་ཉིང་ལག་ཐམས་ཅད་མངོན་པར་དམིགས་སུ་མེད་པར་བྱེད་ཀྱང་ལོག་པར་ལྟ་བའི་ལས་དེ་དང་རྒྱུ་འཐུན་པའི་འབྲས་བུས་འཆི་བའི་དུས་ནི་མི་བྱེད་དོ། །སེམས་ཅན་དམྱལ་བ་པ་དེ་དག་གི་ལུས་བསགས་པར་གྱུར་པ་དག་ཇི་ལྟར་རྐང་དང་རུས་པ་ཆེན་པོའི་ཚོགས་ཀྱི་རི་འཕང་དུ་དཔག་ཚད་ལྔ་ཡོད་ཅིང་རྒྱར་དཔག་ཚད་གསུམ་ཡོད་པ་དེ་ལྟར་བསགས་པར་གྱུར་ཏེ། དེ་དག་ལ་སྲིན་བུ་དྲོད་གཤེར་ལས་སྐྱེས་པ་སེམས་ཅན་གྱི་གྲངས་སུ་བགྲང་བ་ཞིག་འབྱུང་བར་འགྱུར་རོ། །གང་དག་ལས་ཅི་ཞིག་བྱས་པས་འགྱུར་སྙམ་ན། སྐྱེས་པའམ། བུད་མེད་གང་དག་གིས་རང་གི་ལུས་སམ། གཞན་གྱི་ལུས་ལས་བྱུང་བའི་ཤིག་གམ། སྲོག་ཆགས་མར་ཀོ་ཏ་ཀའམ། རྐང་ལ་ཟ་བའམ། གཞན་ཡང་རྣམ་པ་དེ་ལྟ་བུ་བསད་པར་གྱུར་ན་དེ་དག་ཀྱང་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྲིན་བུ་ཞེས་བྱ་བ་དེར་སྐྱེ་བར་འགྱུར་རོ། །དེ་དག་གི་འདུ་ཤེས་འབྱུང་བ་ནི་འདི་ལྟ་སྟེ། ལས་དེ་དང་རྒྱུ་འཐུན་པའི་འབྲས་བུས་ལུས་འབྱུང་ཞེས་བྱ་བའི་རི་དེ་ལ་དེ་དག་སྐྱེ་བར་འགྱུར་ཏེ། དེ་དག་ཀྱང་སེམས་ཅན་དམྱལ་བ་རྐང་དང་རུས་པ་ལ་སྲིན་བུ་མང་བའི་གཤིན་རྗེའི་མི་གཞན་དག་འོངས་ནས་ལས་ཀྱིས་བྱས་པའི་མེས་རབ་ཏུ་སྲེག་པར་བྱེད་དོ། །ལུས་འབྱུང་བ་ཞེས་བྱ་བའི་སྲིན་བུ་ཡོད་པ་དེར་སེམས་ཅན་དམྱལ་བ་པ་ལྕི་བའི་མེ་ཐབ་ཀྱིས་བསླུས་པ་དེ་དག་དེ་མ་ཐག་ཏུ་མེས་སྲེག་གོ །དེའི་རི་དེ་སྲེག་པ་ན་འཕང་དུ་མེས་དཔག་ཚད་བཅུ་ཙམ་དུ་འབར་བར་བྱེད་དེ། སེམས་ཅན་དམྱལ་བ་པ་དེ་དག་རང་གི་ལུས་ལས་བྱུང་བའི་མེ་དང་སྲིན་བུ་དེ་དག་གིས་ལྷན་ཅིག་སྲེག་པར་བྱེད་དོ། །ལུས་ལས་འབྱུང་བའི་སྲིན་བུ་བོང་ཆུང་བ་དག་འབྱུང་བར་འགྱུར་ཏེ། དེ་ལས་སྡུག་བསྔལ་ཆེས་ཆུང་བ་འབྱུང་བ་ནི་སེམས་ཅན་དམྱལ་བ་པ་དག་བསྡུས་ནས་
དེ་དག་མངོན་པ་མེད་པར་བྱེད་དེ། ཕན་ཚུན་མེ་འབར་བའི་ཕྲེང་བས་ལུས་ཡོངས་སུ་གདུངས་པ་དག་ཡུན་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་བགྲང་གིས་མི་ལང་བར་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་ལྔ་བརྒྱར་རི་གསེབ་ཏུ་ཡི་དགས་ཁབ་མགྲིན་དུ་སྐྱེ་བར་འགྱུར་རོ། །ཚེ་རབས་ལྔ་བརྒྱར་རྒྱ་མཚོའི་སའི་འོག་གི་ཆུ་གྲང་མོ་བ་ཚྭའི་ཆུའི་ནང་གི་ཉར་སྐྱེ་བར་འགྱུར་རོ། །དེ་དག་དེ་ལས་ཐར་ནས་གལ་ཏེ་བརྒྱ་ལ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཚལ་ན་སྤྱོད་ཅིང་ཚལ་གྱི་ནང་ན་གནས་པའམ། ནགས་ཁྲོད་ན་འཚོ་བའམ། དབུལ་ཞིང་དེ་ཚལ་གྱི་མེས་སྲེག་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྐྱེ་བོ་ཐམས་ཅད་སྲེག་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་སྔ་མ་བཞིན་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ལོག་པར་ལྟ་བ་ཡང་ཐོས་པ་ངན་པས་རྨོངས་པ་ལུས་ཀྱི་ཆད་པ་དང་། ངག་དང་། ཡིད་ཀྱི་ཆད་པས་རྣམ་པར་རྨོངས་པ། རྟག་ཏུ་ཆད་པ་རྣམ་པ་གསུམ་གྱིས་ཉམ་ཐག་པ། ལོག་པར་ལྟ་བ་ཡང་མཚུངས་པར་སྤྱོད་པ་དག་ཚལ་ལམ། རིའམ། མཚམས་ཀྱི་བར་རམ། ཆུའམ། ལྕུག་མའི་ཚལ་དག་ལ་མེས་སྲེག་པར་བྱེད་པ་དག་འདི་ལྟར་མེ་ཚིམ་པར་བྱས་པས་ལྷ་དག་དགའ་བར་འགྱུར་ཏེ། དེ་དག་དགའ་བ་དང་། ལྷ་ཡུལ་དུ་ཁྲིད་པར་བྱེད་དེ། བདག་ལྷའི་འཇིག་རྟེན་དེ་ཐོབ་པ་དང་། མེ་ཚིམ་པར་བྱས་པས་བདག་དེར་ལྷའི་དགའ་བ་ཐོབ་པར་འགྱུར་རོ་སྙམ་སྟེ། རྨོངས་པ་ཐོས་པ་ངན་པས་བསླུས་
པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྐྱེ་བོ་ཐམས་ཅད་སྲེག་པ་ཞེས་བྱ་བ་དེར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་དེ་དག་ཐམས་ཅད་ལྔ་འགྱུར་དུ་འབྱུང་བའི་སྟེང་དུ་ཁྱད་པར་དུ་འབྱུང་བ་ནི། འདི་ལྟར་དེར་སྐྱེས་པ་གང་དག་ལས་ཀྱིས་སྤྲུལ་པའི་བུ་དང་། བུ་མོ་དང་། ཆུང་མ་དང་། དགའ་བའི་བསྟེན་གྲོགས་དང་། ཕ་མ་དང་། དེ་ལས་གཞན་པ་དགའ་བ་དང་འབྲེལ་པ་དེ་དག་དེར་འཚེད་པ་ན། བུ་དང་། ཆུང་མ་དང་། བསྟེན་གྲོགས་དང་། ཕ་མའི་ཚོགས་དེ་དག་ཐམས་ཅད་མཐོང་ངོ་། །དེ་དག་ཀྱང་དེ་ལྟར་སེམས་ཅན་དམྱལ་བར་འཚེད་པ་མཐོང་སྟེ། འཚེད་པ་དེ་མཐོང་བ་དང་། ཡིད་ཀྱི་སྡུག་བསྔལ་མི་བཟད་པ་ཚ་བ་རྩུབ་པ་དག་མྱོང་བར་བྱེད་དོ། །དགའ་བའི་ཚོགས་དེ་དག་ཐམས་ཅད་མཐོང་ནས་མྱ་ངན་གྱི་མེའི་རྣམ་པ་འདི་ལྟ་བུ་འབྱུང་བར་འགྱུར་ཏེ། གང་སེམས་ཅན་དམྱལ་བ་པའི་མེ་དེ་དག་སྲེག་པའི་མེའི་བཅུ་དྲུག་གི་ཆར་ཡང་མི་ཕོད་དོ། །སེམས་ཅན་དམྱལ་བ་པའི་མེ་ཐམས་ཅད་ཀྱི་ནང་ན་སྲེད་པའི་མེ་ཐམས་ཅད་ཆེས་ཤིན་ཏུ་ཚའོ། །མེ་རྣམས་ཀྱི་ནང་ན་ཡང་འདི་མེ་ཡིན་ནོ། །ཞགས་པ་རྣམས་ཀྱི་ནང་ན་འདི་ཞགས་པ་མཆོག་ཡིན་ནོ། །འཆིང་བ་རྣམས་ཀྱི་ནང་ན་འདི་འཆིང་བ་དམ་པ་ཡིན་ཏེ། འཆིང་བ་དམ་པ་དེས་སོ་སོའི་སྐྱེ་བོ་བྱིས་པ་ཐམས་ཅད་བཅིངས་སོ། །གང་ལོག་པའི་ལས་ཀྱིས་བྱས་པའི་དགའ་བའི་ཚོགས་སེམས་ཅན་དམྱལ་བ་པ་དག་མཐོང་ནས་ཀྱང་སྲེད་པས་དེ་བཞིན་སྲེག་སྟེ། གང་མེ་དེ་དག་ལས་བྱུང་བའི་སེམས་ཅན་དམྱལ་བ་པ་ཁ་བ་ལྟ་བུར་གྱུར་པ་དེ་ཡང་དེའི་བུ་དང་ཆུང་མའི་ཚོགས་དང་། ཕ་མའི་ཚོགས་ངུ་སྐད་འདོན་ཏེ། འདི་ལྟར་བདག་ཅག་ལ་ཡོངས་སུ་བསྐྱབ་པ་གྱིས་སྙིང་རྗེ་རྗེ་སྐད་དུ་ངུ་སྐད་འདོན་ཀྱང་དེ་དག་ཡོངས་སུ་བསྐྱབ་པར་ག་ལ་ནུས་ཏེ། གང་སེམས་ཅན་དམྱལ་བ་པ་དབང་མེད་པ་མེས་སྲེག་ཅིང་འཚེད་དོ། །དེ་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེ་ཡུན་རིང་པོ་ལོ་བགྲང་གིས་མི་ལང་བར་ལུས་དང་ཡིད་
ཀྱིས་མེས་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་དེ་ལོ་སུམ་བརྒྱར་ཡི་དགས་གཏོར་མ་ཟ་བར་སྐྱེ་བར་འགྱུར། ཚེ་རབས་ལྔ་བརྒྱར་དུང་མ་ལྟ་བུའི་ནང་དེར་དེའི་བུས་པ་ཕོ་མོ་ཉ་པ་དག་གིས་གསོད་པར་བྱེད་དོ། །གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དབུལ་ཞིང་ཚེ་ཐུང་བ་དང་། དབང་པོ་མ་ཚང་བ་དང་། བུ་དང་། ཆུང་མ་དང་བྲལ་ཞིང་། གང་དག་ཏུ་བྲན་གཡོག་ཏུ་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སར་འབྱིང་མཐའ་ཡས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་ཏེ། མདོར་ན་ལུས་ཀྱི་ཆད་པའམ། ངག་གི་ཆད་པའི་ལས་ཀྱི་ཉེར་བསྡོགས་དང་། ལས་ཀྱི་མཇུག་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སར་འབྱིང་མཐའ་ཡས་སུ་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་བསྡུས་པ་དེ་དག་ཐམས་ཅད་ལྔ་འགྱུར་དུ་འབྱུང་ངོ་། །ལོག་པར་ལྟ་བར་གྱུར་པ་ནི་ཐོས་པ་ངན་པ་གང་གིས་སྲིན་བུ་ཕྲེའུ་དང་། གྲོག་སྦུར་དང་། སྦྲུལ་དང་། སྦྲུལ་ཤིན་ཏུ་གདུག་པ་དང་། རི་དགས་དང་། བྱ་རྣམས་མེའི་ནང་དུ་བཅུག་ན་མེ་དེ་དག་ནི་དགའ་བར་འགྱུར་རོ། །དགའ་ནས་ཀྱང་འཇིག་རྟེན་མཐའ་ཡས་པ་སྦྱིན་པར་བྱེད་དེ། མེར་བསྲེགས་པ་དེ་དག་གིས་ཀྱང་དྲག་པོའི་འཇིག་རྟེན་མི་བཟད་པར་བྱེད་དོ། །གང་མེར་བཅུག་པ་དེ་དག་དེའི་ཆོས་ཆེན་པོ་ཐོབ་པར་འགྱུར་རོ་ཞེས་བསྒྲགས་ཤིང་། དེ་ལྟར་འཛིན་དུ་འཇུག་པ་ནི་ཆོས་
ལོག་པས་རྣམ་པར་བསླུས་པ་ལོག་པར་ལྟ་བ་ཡིན་ཏེ། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སར་འབྱིང་མཐའ་ཡས་སུ་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། མདག་མའི་རི་རྒྱར་དཔག་ཚད་ལྔ་ཡོད་པ་ཀུན་ནས་སེམས་ཅན་དམྱལ་བ་པའི་མེས་རབ་ཏུ་འབར་བ་དེ་ལ་སེམས་ཅན་དམྱལ་བ་པ་དེ་དག་གཤིན་རྗེའི་མི་རྣམས་ཀྱིས་བཏེག་ཅིང་འདོར་བར་བྱེད་དེ། རྐང་པ་དང་། རྐེད་པ་དང་། མདོམས་དང་། རྒྱབ་དང་། དཔུང་པ་དང་། མགྲིན་པ་དང་། ལག་པ་དང་། མིག་དང་། རྣ་བ་དང་། མགོ་དང་། གླད་པའི་བར་བསྲེགས་ནས་དེ་ནས་ཡང་འབྱུང་བར་འགྱུར་ཏེ།སྲེག་པ་ན་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ། དུས་དུ་མ་ཡུན་རིང་པོ་ལོ་བགྲང་གིས་མི་ལང་བར་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལོག་པར་ལྟ་བ་མི་བཟད་པས་ལས་དེ་དང་རྒྱུ་འཐུན་པར་ཚེ་རབས་ལྔ་བརྒྱར་ཡི་དགས་མི་གཙང་བ་ཟ་བ་ལུས་ཐམས་ཅད་རབ་ཏུ་འབར་བ་མཚན་མོ་རྒྱུ་བ་ན་སྐྱེ་བོ་ཀུན་གྱིས་མཐོང་བ་དང་། ལས་ངན་པ་བྱས་པ་དབང་དུ་གྱུར་པར་སྐྱེ་བར་འགྱུར་རོ། །ཡི་དགས་ཀྱི་རིས་དེ་ལས་ཐར་ནས་ཀྱང་དུད་འགྲོ་ལུས་ཐམས་ཅད་ལ་སྲིན་བུ་མེ་ལྕེ་རབ་ཏུ་འབར་བ་འབྱུང་ཞིང་ཉིན་མཚན་དུ་སྐྱེ་བོ་ཀུན་གྱི་མངོན་སུམ་དུ་འགྱུར་བ་དང་། ཁོང་པའི་ནང་དུ་མེ་ཞུགས་པས་སྲེག་ཅིང་ཉི་མའི་འོད་ཟེར་དག་གིས་ཟིལ་གྱིས་ནོན་པར་འགྱུར་བ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅུ་གཉིས་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་སེམས་ཅན་དམྱལ་བ་པད་མ་ཆེན་པོ་ལྟ་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ལ། མང་དུ་བྱས་པས་འགྱུར་ཏེ། མདོར་
བསྡུ་ན་ལུས་ཀྱི་ཆད་པ་དང་། ངག་གི་ཆད་པའི་ལས་ཀྱི་ཉེར་བསྡོགས་དང་། ལས་ཀྱི་མཇུག་དང་ལྡན་པ་དེ་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་པད་མ་ཆེན་པོ་ལྟ་བུར་སྐྱེ་བར་འགྱུར་རོ། །ལོག་པར་ལྟ་བ་ཡང་རྣམ་པ་འདི་དག་བྱས་པས་འགྱུར་ཏེ། འདི་ལྟར་མིས་གསང་གི་མཆོད་སྦྱིན་བྱས་པས་འཇིག་རྟེན་ཉམས་པ་མེད་པ་ཐོབ་པར་འགྱུར་རོ་ཞེས་ཟེར་བ་དེ་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་པད་མ་ཆེན་པོ་ལྟ་བུར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་དེའི་བྱད་གཟུགས་པད་མ་ལྟ་བུ་ཡིན་ཏེ། གང་དེ་དག་གི་ཟེ་བའི་བར་རྡོ་རྗེ་ལྟ་བུའི་ཚེར་མས་གང་བ་དེར་སེམས་ཅན་དམྱལ་བ་དཔག་ཚད་ལྔ་བརྒྱ་ཙམ་པ་དེ་ཚེར་མའི་བར་དེ་དག་ཏུ་སྐྱེ་བར་འགྱུར་རོ། །སྐྱེས་མ་ཐག་ཏུ་དེ་དག་གི་ལུས་ཐམས་ཅད་ཚེར་མ་རྣམས་ཀྱིས་ཤིན་ཏུ་ཕུག་སྟེ། གང་མ་ཕུག་པ་གཅིག་མེད་པ་ནི་དེར་ཁབ་ཀྱི་བུ་ག་ཙམ་གྱི་ཕྱོགས་ཀྱང་མེད་དེ། གང་སེམས་ཅན་དམྱལ་བ་པའི་མེས་རྨས་མ་གང་བ་མེད་དོ། །དེ་ལྟར་ཇི་སྲིད་དུ་དེའི་སྲིད་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་རིང་པོར་འཚེད་དོ། །སྲེག་གོ །དེ་ཕྱིས་སེམས་ཅན་དམྱལ་བ་དེ་དག་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་ཉིས་བརྒྱར་ཡི་དགས་ལྗན་ལྗིན་ཟ་བར་འགྱུར། དེ་དེ་ལས་ཤི་ནས་ཀྱང་ཚེ་རབས་ལྔ་བརྒྱར་རྨ་བྱ་དུག་ཟ་བའི་རིགས་སུ་སྐྱེ་བར་འགྱུར་རོ། །གལ་ཏེ་དེ་ནས་ཤི་ནས་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་དབུལ་ཞིང་རྟག་ཏུ་ཕན་ཚུན་རག་ལས་པ་མང་བ་དང་། གལ་ཏེ་ལྟད་མོ་པས་འཚོ་བའི་གར་མཁན་ནམ། གང་རྣམ་པ་དེ་ལས་གཞན་པའི་ལྟད་མོ་པས་འཚོ་བར་འགྱུར་ཏེ། ཇི་སྲིད་འཚོའི་བར་དུ་བཀྲེན་པ་རབ་ཏུ་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་མཐའ་
དྲག་ཅེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་ནོ། །ལོག་པར་ལྟ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་བ་ནི་འདི་ལྟར་ཆུར་ཞུགས་པས་ཉེས་པར་བྱས་པ་ཐམས་ཅད་འབྱང་བར་འགྱུར་ཞིང་ཁྱབ་འཇུག་གི་འཇིག་རྟེན་དུ་སྐྱེ་བར་འགྱུར་ལ་གནས་དེ་ནམས་ཀྱང་མི་གཡོ་སྟེ། གཡོ་བ་མེད་པ་དེར་སྐྱེ་བར་འགྱུར་རོ་ཞེས་དེ་ཕ་རོལ་དག་ཀྱང་དེ་ཉིད་ལ་འཇོག་པར་བྱེད་ཅིང་ཡང་དག་པར་དགའ་བར་བྱེད་ལ། ཆུར་ཞུགས་པས་སྲོག་དང་བྲལ་བར་བྱེད་ན། དེ་ཆུར་ཞུགས་པས་འཆི་བའི་དུས་བྱས་ནས་སེམས་ཅན་དམྱལ་བ་མཐའ་དྲག་ཏུ་སྐྱེ་བར་འགྱུར་རོ། །ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པས་ཉམས་པ་དེར་སྐྱེས་པ་དག་ལ་གང་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་དེ་དག་ཐམས་ཅད་སྔ་མ་བཞིན་དུ་འབྱུང་བའི་སྟེང་དུ་ཁྱད་པར་དུ་འབྱུང་བ་ནི། སེམས་ཅན་དམྱལ་བ་དེ་ཀུན་ནས་རྡོའི་ཟུར་ཤིན་ཏུ་རྣོ་བ་རྣམས་ཀྱིས་ཁེབས་པ་ཀུན་ནས་རི་རད་རོད་ཤིན་ཏུ་རྣོ་བ་འཕང་དུ་དཔག་ཚད་བཅུ་ཡོད་པས་བསྒྲིབས་པ་དེ་ལ་བྱ་ཡང་འགྲོ་བར་མི་ནུས་ན། སེམས་ཅན་དམྱལ་བ་པ་དག་རི་དེ་ལ་རྒལ་བར་ལྟ་ག་ལ་ནུས་ཏེ། ཀུན་ནས་འབར་རབ་ཏུ་འབར། ཀུན་ཏུ་རབ་ཏུ་འབར་ཏེ། རི་དེ་དག་ཀུན་ནས་མེ་ལྕེ་གཅིག་ཏུ་གྱུར་པ་དང་། སེམས་ཅན་དམྱལ་བ་པ་དེ་ལས་གཅིག་གིས་སེམས་ཅན་དམྱལ་བ་པ་མཐའ་དག་ལ། ཀྱེ་གྲོགས་པོ་དག་རིའི་རྩེ་མོར་སེམས་ཅན་དམྱལ་བ་འདི་དག་རི་འདི་དག་ལས་རྒལ་བ་དང་། བདེ་བ་ཐོབ་བོ་ཞེས་སྨྲ་སྟེ། དེ་ལྟར་ལས་ངན་པས་བསྐུལ་བའི་སེམས་ཅན་དམྱལ་བ་པ་དེ་སེམས་ཅན་དམྱལ་བ་པ་དེ་དག་ལ་སྨྲའོ། །སྨྲས་མ་ཐག་ཏུ་སེམས་ཅན་དམྱལ་བ་པ་ལས་ངན་པས་བསྐུལ་བ་དེ་དག་རི་ཐག་ཐུག་ཟར་ཟུར་ཤིན་ཏུ་མི་བདེ་ཞིང་ཀུན་ནས་རབ་ཏུ་འབར་བ་ག་ལ་བ་དེར་དེ་དག་རྒྱུག་ཀྱང་དེ་དག་འཛེག་པར་
མི་ནུས་ཏེ། དེ་དག་ཁ་ཅིག་ནི་དེ་ཉིད་དུ་མེས་འཚིག་གོ །འཇིགས་སྐྲག་པ་ཁ་ཅིག་ནི་དེ་ཉིད་དུ་རྡོ་རད་རོད་ལ་འཇུ་བཞིན་དུ་སྲེག་གོ །སྐྲག་ཅིང་དངངས་པའི་སེམས་ཅན་དམྱལ་བ་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ་ཁ་ཅིག་ནི་གཤིན་རྗེའི་མི་རྣམས་ཀྱི་ལག་པ་ནས་རལ་གྲི་དང་། ཐོ་བས་ཡང་ནས་ཡང་དུ་བཏགས་ཏེ། དེ་ལྟར་སེམས་ཅན་དམྱལ་བ་པ་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པས་ཉེན་པ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཤིན་ཏུ་ཡུན་རིང་པོར་འཚེད་དོ། །སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ལོ་སུམ་བརྒྱར་ཡི་དགས་ཁྲག་ཟ་བའི་རིས་དང་འཐུན་པར་སྐྱེ་བར་འགྱུར། དེ་ལས་ཐར་ནས་ཀྱང་ལོ་སུམ་བརྒྱར་དུད་འགྲོ་སྦྲུལ་ཆེན་པོའི་རིགས་སུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་དབུལ་ཞིང་ནད་བུ་ཅན་དང་། ཡུལ་ངན་པར་སྐྱེ་ཞིང་དབང་པོ་མ་ཚང་བ་དང་། རྟག་ཏུ་འཇིགས་པ་མང་བའི་ཡུལ་དག་ཏུ་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་རུས་པ་རྡོ་རྗེ་ལྟ་བུ་འབྱུང་ཞིང་འདུ་བ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ལོག་པར་ལྟ་བ་ཡང་ཀུན་དུ་བསྟེན་ཅིང་བསྒོམས་ལ་མང་དུ་བྱས་པས་འགྱུར་ཏེ། འདི་ལྟར་དངོས་པོ་དག་ནི་འདོད་རྒྱལ་ལས་འབྱུང་ཞིང་འདོད་རྒྱལ་ལས་འགག་སྟེ། འདི་ལྟར་ཚེར་མ་རྣོ་བ་དང་། རྨ་བྱ་དག་གི་བཀྲ་བ་དང་། འདི་ལྟར་སྨིག་རྒྱུ་དང་དྲི་ཟའི་གྲོང་ཁྱེར་དག་གི་རྒྱུ་རྐྱེན་ནི་མེད་ཀྱི་འདོད་རྒྱལ་ལས་འབྱུང་ཞིང་འགག་སྟེ། དངོས་པོ་ཐམས་ཅད་ནི་དེ་ལྟ་བུ་ཡིན་ནོ་ཞེས་དེ་དེ་
ལྟར་གཞན་དག་ཀྱང་འདོད་རྒྱལ་དུ་ལྟ་བར་གྱུར་པ་དེར་རབ་ཏུ་འཇོག་པར་བྱེད་ཅིང་། ཡང་དག་པར་སྟོན་པར་བྱེད་ལ། ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པས་ཉམས་པར་བྱེད་པ་དེ་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རུས་པ་རྡོ་རྗེ་ལྟ་བུ་འབྱུང་ཞིང་འདུ་བར་སྐྱེ་བར་འགྱུར་རོ། །དེར་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་གཤིན་རྗེའི་མི་རྣམས་ཀྱིས་གང་གི་ཚེ་སེམས་ཅན་དམྱལ་བ་པ་དེ་དག་མཚོན་ཆ་ཧུ་ལུ་རྣོན་པོ་དག་གིས་དེའི་ཤ་མེད་པར་བྱས་ལ་གང་དགྲ་གཞན་བྱུང་བས་རུས་པ་དེ་དག་བླངས་ཏེ། དགྲ་དེས་རུས་པ་ཕན་ཚུན་བཏགས་སོ། །རུས་པ་དེ་དག་ཀྱང་དེ་དག་གི་ལས་ཉེས་པར་བྱས་པ་དེས་རྡོ་རྗེ་ལྟ་བུར་གྱུར་ཏེ། ཁ་ཅིག་གི་མགོ་ཕུག །ཁ་ཅིག་གི་རྐེད་པ་ཕུག །ཁ་ཅིག་གི་ཡན་ལག་དང་ཉིང་ལག་ཐམས་ཅད་ཐལ་བར་རློག །ཁ་ཅིག་གི་ཁྲག་ཙམ་ལུས་པར་བྱེད། ཁ་ཅིག་གི་ཡན་ལག་གཅིག་འཇིག་པར་བྱེད། ཁ་ཅིག་ལ་ཕན་ཚུན་སྦྲོན་པར་བྱེད། རུས་པ་དང་། རུས་པས་སམ། རྡོ་རབ་ཏུ་འབར་བ་དག་གིས་སེམས་ཅན་དམྱལ་བ་པ་དེ་དག་གཅིག་ལ་གཅིག་རྡེག་ཅིང་གསོད་དེ། སེམས་ཅན་དམྱལ་བ་པ་ལས་ཀྱིས་བསྐུལ་བ་དེ་དག་འདི་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་ཤིན་ཏུ་རིང་པོ། ལོ་བགྲང་གིས་མི་ལང་བར་སེམས་ཅན་དམྱལ་བ་དེ་དག་གཅིག་ལ་གཅིག་གསོད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཡི་དགས་རང་གི་གླད་རྒྱས་ཟ་བའི་ནང་དུ་སྐྱེ་བར་འགྱུར། དེ་ནས་ཤི་ནས་ཀྱང་ཚེ་རབས་སུམ་བརྒྱར་དུད་འགྲོའི་འཇིག་རྟེན་རྩངས་པ་དང་། སྐྱིན་གོར་དང་། སྲོག་ཆགས་བྷི་ལ་ཀར་སྐྱེ་བར་འགྱུར་རོ། །དེ་ནས་ཤི་ནས་ཀྱང་གལ་ཏེ་བརྒྱ་ལ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཚལ་དུ་གནས་པ་དང་། འགྲོ་ལྡིང་བའི་ཡུལ་དང་། ཨན་དྷ་ཀའི་ཡུལ་གྱི་དབུས་དག་ཏུ་དབུལ་བ་དང་། ནད་བུ་ཅན་དང་། གཞན་གྱིས་བཀོལ་བར་འགྱུར་བ་མཐོང་
ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྐུད་པ་ནག་པོས་འདྲལ་ཞིང་གཅོད་པ་ཚ་བ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ལོག་པར་ལྟ་བས་ནི་མཚན་མ་དང་མཚན་མ་ལས་བྱུང་བ་བྱས་པ་སྟོན་པར་བྱེད། སྒོམ་པར་བྱེད། མང་དུ་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ལྕགས་ནག་པོའི་སྐུད་པས་འདྲལ་ཞིང་གཅོད་པ་ཚ་བར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་ལྔ་འགྱུར་དུ་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་རང་གིས་བྱས་པ་ཉེས་པར་བྱས་པའི་ལས་ལས་བྱུང་བའི་སྐུད་པ་ནག་པོས་གཅལ་ནས་གཤིན་རྗེའི་མི་རྣམས་ཀྱིས་མཚོན་ཆའི་སོ་རྣོ་ཞིང་རབ་ཏུ་འབར་བ་དག་གིས་རྐང་པ་ལ་སོགས་པ་ནས་མགོའི་བར་དུ་གཅོད་དོ། །དེ་ལྟར་དེ་དག་གཅོད་པ་ན། སྙིང་རྗེ་ཞིང་རྣམ་པར་ཁྲོ་ལ་སྐད་འབྱིན་ཅིང་ངུའོ། །མཚོན་ཆས་གཤེག་ཅིང་ལྕགས་ནག་པོའི་སྐུད་པས་འདི་ལྟར་ཡུངས་ཀར་ཙམ་དུ་ཡང་མི་མངོན་པར་ཆེས་ཕྲ་བར་གཅོད་དོ། །དེ་ལྟར་སེམས་ཅན་དམྱལ་བ་པ་དེ་དག་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་ཤིན་ཏུ་རིང་པོར་གནོད་པ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་ལྔ་བརྒྱར་ཡི་དགས་གཏོར་མ་ཟ་བ་རྣམས་ཀྱི་ནང་དུ་སྐྱེ་བར་འགྱུར། ཚེ་རབས་ལྔ་བརྒྱར་དུད་འགྲོ་ཆུའི་སྲིན་བུ་དང་། སྡིག་པ་དང་། གྲོག་སྤུར་གྱི་སྐྱེ་གནས་དག་ཏུ་སྐྱེ་བར་འགྱུར། གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དེ་དག་གི་རྒྱུ་འཐུན་པས་དེ་ཚེ་རབས་སུ་བཀྲེས་པ་དང་། སྐོམ་པས་གདུངས་པར་འགྱུར་ཞིང་
གང་རྒྱལ་པོ་གཞན་གྱིས་གནོད་པ་བྱས་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྲིན་བུ་ན་ཀྲ་དང་། འཁོར་ལོ་དང་། མེ་འཇིགས་འཇིགས་ལྟར་སྐྱེས་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ལོག་པར་ལྟ་བ་ཡང་བསམས་ཤིང་བསྒོམས་ལ་མང་དུ་བྱས་པས་འགྱུར་ཏེ། འདི་ལྟར་འཇིག་རྟེན་འདི་རྟག་གོ །འཇིག་རྟེན་འདི་ཐེར་ཟུག་གོ །ཆོས་ཐམས་ཅད་རྟག་གོ །ཆོས་རྣམས་ནི་རྟག་སྟེ། ཕྱིན་ཅི་མ་ལོག་པའོ་ཞེས་དེ་ལྟར་དེ་ཕྱིན་ཅི་ལོག་ཏུ་ལྟ་བ་ནི་ལོག་པར་ལྟ་བ་ཡིན་ཏེ། ཕ་རོལ་དག་ཀྱང་ལོག་པར་ལྟ་བ་དེ་ཉིད་ལ་ཡང་དག་པར་འཇོག་པར་བྱེད། ཡང་དག་པར་འཛིན་དུ་འཇུག་པར་བྱེད། ཡང་ནས་ཡང་དུ་སྟོན་ཅིང་འཁོར་ལ་སྨྲ་བ་དང་། རྒྱུ་ངན་པ་དང་ལྟ་བའི་མཐའ་འཁོར་འཛིན་དུ་འཇུག་ཅིང་ཆོས་མ་ཡིན་པ་ཆོས་ཀྱི་ཚུལ་དུ་སྟོན་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྲིན་བུ་ན་ཀྲ་དང་། འཁོར་ལོ་དང་། མེ་འཇིགས་འཇིགས་ལྟར་སྐྱེ་བར་འགྱུར་རོ། །དེར་སྐྱེས་ནས་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་ལྕགས་ཀྱི་ཀ་བ་འབྱུང་བར་འགྱུར་ཏེ། དེའི་གླད་པར་བརྒྱབ་ནས་རྐུབ་ཏུ་འབྱུང་ངོ་། །དེ་ནས་བྱུང་ནས་ཀྱང་སའི་ནང་དུ་ལྷན་ཅིག་ནུབ་བོ། །གསལ་ཤིང་གིས་ཕུག་ནས་སྲིན་བུ་ན་ཀྲ་ཞེས་བྱ་བས་པགས་པ་དང་ཤ་དང་ཚིལ་ཐམས་ཅད་ཟ་ལ། དེའི་ཡན་ལག་དང་ཉིང་ལག་དག་ཟ་ཞིང་འཐུང་སྟེ། ཁྲག་འབྱིན་པར་བྱེད་པ་དང་། ལུས་སྒུལ་བར་བྱེད་པ་དང་། ཤ་གཅོད་པར་བྱེད་པ་དང་། མིག་འབྱིན་པར་བྱེད་པ་དང་། གཞུངས་པ་དང་། རྒྱུས་པ་འབྱིན་ཅིང་རྩ་
ཡང་གཅོད་པ་དང་འཛག་སྒོ་སྲེག་པ་དང་། སྤུ་འཐོག་པ་དང་། པགས་པ་འདྲལ་བ་དང་། རྒྱུས་པ་མང་པོའི་ནང་དུ་འཇུག་པ་དང་། སྙིང་དྲལ་ནས་འཐུང་བ་དང་། གློ་བ་དང་། རྒྱབ་དང་། གནད་དང་། གནད་དག་ལ་ཟ་བར་བྱེད་དོ། །དེའི་མིད་པ་དང་། ལྕེ་དག་ཕྲ་སྐམ་རབ་ཏུ་འབར་བས་དྲངས་ནས་ཁྱི་ཟར་འཇུག་གོ །རྒྱུ་ངན་པ་དང་། ལྟ་བ་ངན་པའི་མཐར་ཆུད་པ་ངན་པར་སྨྲས་པ་གང་དེ་དེའི་ཉེས་པས་དེ་དག་ཐམས་ཅད་སྡུག་བསྔལ་གྱི་དྲ་བར་ཆུད་པ་ཡིན་ཏེ། སེམས་ཅན་དམྱལ་བ་པ་ལོག་པར་ལྟ་བ་གཡོ་སྒྱུའི་ལྟ་བ། གཡོ་སྒྱུས་འགྱེད་པ་དེ་དག་ལོག་པར་སྨྲ་བ་ཆེན་པོ་ཡིན་ཏེ། གང་དེ་དག་དེས་དེར་རབ་ཏུ་བཙུད་ཅིང་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པས་ཉམས་པ་དེ་དག་ཐམས་ཅད་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་ཤིན་ཏུ་རིང་ཞིང་ལོ་བགྲང་གིས་མི་ལང་བར་སེམས་ཅན་དམྱལ་བར་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་སུམ་བརྒྱར་ཡི་དགས་མི་རོ་ཟ་བར་སྐྱེ་བར་འགྱུར་རོ། །དེ་ལས་ཐར་ནས་ཀྱང་གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་གང་རྒྱལ་པོ་གཞན་གྱིས་ཉེས་པ་བྱས་པ་དེ་དེའི་ལུས་ལ་འབབ་པ་དང་། དེ་དབུལ་ཞིང་ནད་བུ་ཅན་དང་། གཞན་གྱིས་བཀོལ་བར་འགྱུར་ཞིང་མིའི་ཤ་ལ་ཟ་བ་དང་། ལུས་སྣང་བའི་འདུ་ཤེས་མི་འཐོབ་པར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ནགས་ཚལ་གྱི་མེ་མུན་ལྟར་འཁྲིགས་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་།
ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ལ་མང་དུ་བྱས་པས་འགྱུར་ཏེ། ལས་ཀྱི་ཉེར་བསྡོགས་དང་ལས་ཀྱི་མཇུག་དང་ལྡན་པས་འགྱུར་རོ། །དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ནགས་ཚལ་གྱི་མེ་མུན་ལྟར་འཁྲིགས་པ་ཞེས་བྱ་བར་སྐྱེ་བར་འགྱུར་རོ། །ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་བ་ནི། འདི་ལྟར་ཁ་ཅིག་ནི་མི་རྟག་གོ །ཁ་ཅིག་ནི་རྟག་གོ །དེ་ལ་མི་རྟག་པ་ནི་ལུས་ཡིན་ནོ། །རྟག་པ་ནི་ས་ལ་སོགས་པ་འབྱུང་བ་རྣམས་ཡིན་ཏེ། དེ་མཐར་འཛིན་པ་ལྟ་བ་གཉིས་ཀྱི་རྒྱུ་ངན་པ། ལྟ་བ་ངན་པའི་མཐའ་གཞན་དག་འཛིན་དུ་འཇུག་ཅིང་ཡང་དག་པར་དགའ་བར་བྱེད་དུ་འཇུག་ལ་ཡང་དག་པར་རབ་ཏུ་འཇོག །འཁོར་ལ་ཆོས་མ་ཡིན་པའི་ཚུལ་གྱིས་ཆོས་སྟོན་ཅིང་རབ་ཏུ་འཇོག་པར་བྱེད་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ནགས་ཚལ་གྱི་མེ་མུན་ལྟར་འཁྲིགས་པར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་དེ་དག་ཐམས་ཅད་ལྔ་འགྱུར་དུ་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་གང་གི་ཚེ་གཤིན་རྗེའི་མིའི་གནོད་པ་དག་ལས་གལ་ཏེ་ཐར་ནས་ཀྱང་ཕྱིས་དེའི་ལས་ཀྱིས་བྱས་པའི་མུན་པ་མུན་ནག་གི་ཚོགས་ཀྱི་རླུང་ལྡང་སྟེ། དེས་སེམས་ཅན་དམྱལ་བ་པ་དེ་དག་དམིགས་པ་མེད་པ་ནམ་མཁའ་ལ་ཇི་ལྟར་དེའི་ལུས་ཀྱང་མི་མངོན་པ་དེ་ལྟར་སྐོར་རོ། །ཡོངས་སུ་བསྐོར་བ་དེ་ཡོངས་སུ་སྐོར་བ་དང་རླུང་གཞན་སྤུ་གྲི་ལྟ་བུར་ལྡང་སྟེ། དེས་ལུས་དེ་ཆང་པ་ནས་བྱེ་མ་འཐོར་བ་ལྟར་ཕྱོགས་བཅུར་འཐོར་རོ། །དེ་ནས་ཡང་སྐྱེ་བར་འགྱུར་ཏེ། ཡང་འཐོར་རོ། །དེ་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་ཤིན་ཏུ་རིང་བ་ལོ་བགྲང་གིས་མི་ལང་བར་སྡུག་བསྔལ་དྲག་ཅིང་ཚ་ལ་རྩུབ་པ་དག་མྱོང་བར་འགྱུར་རོ། །དེ་ཕྱིས་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་བཞི་བརྒྱར་ཡི་དགས་སྐྱུགས་པ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལས་ཐར་ནས་ཀྱང་གང་དུད་འགྲོ་ལྷག་མ་ཟ་བ་བཀྲེས་པ་དང་སྐོམ་པས་ཡོངས་སུ་གདུངས་པའི་
ལུས་སུ་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་བུང་བ་རྡོ་རྗེ་ལྟ་བུས་གནོད་པའི་གོ་ཆ་ཞེས་བྱ་བ་ཇི་ལྟར་འདུག་པ་དེ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ལོག་པར་ལྟ་བ་ནི་འདི་ལྟར་འཁོར་བ་འདི་ནི་ཐོག་མ་ཡོད་ཅིང་རྒྱུ་ཡོད་པའོ། །གང་འདི་དག་ཐམས་ཅད་ཀྱི་རྒྱུ་རྟག་པ་དང་མི་རྟག་པ་གཉིས་ཏེ། དེས་བསྐྱེད་དོ་ཞེས་བརྫུན་དེ་རྒྱུ་ངན་པ་དང་། ལྟ་བ་ངན་པའི་མཐས་བསླད་པ་དེ་ཆོས་མ་ཡིན་པ་ཆོས་ཀྱི་ཚུལ་དུ་སྟོན་ཅིང་ཕ་རོལ་རབ་ཏུ་འཇོག་པར་བྱེད་ཡང་དག་པའི་ལམ་ལས་བཀོལ་བར་བྱེད་ཅིང་ཆོས་ལས་ཕྱིར་ཟློག་པར་བྱེད་ལ་ལོག་པར་ལྟ་བ་ཡང་དག་པར་འཛིན་དུ་འཇུག་པར་བྱེད་ཀྱང་དེ་དེ་ལྟར་མ་ཡིན་ཏེ། རྒྱུར་གྱུར་པ་རྟག་པ་གང་ཡང་མེད་དོ། །རྟག་པ་ནི་དུས་དང་བྲལ་བ། འགྱུར་བ་མེད་པ། དེ་སྐྱེད་པ་མ་ཡིན་པ། ནམ་མཁའ་ལྟ་བུ་ཡིན་ན་དེ་ཡང་གཞན་དུ་རྟོག་སྟེ། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་བུང་བ་རྡོ་རྗེ་ལྟ་བུས་གནོད་པའི་གོ་ཆར་སྐྱེ་བར་འགྱུར་རོ། །དེ་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པས་ཉེན་པས་ཉམས་པ། སྐྱེས་བུ་ངན་པ། ལོག་པར་ལྟ་བ། ཡང་དག་པར་སྨྲ་བ་ཕྱིར་འགོག་པ། ཡང་དག་པར་མ་ཡིན་པ་སྨྲ་བ་ལ་རབ་ཏུ་འཇོག་པ། རྨོངས་པས་ལམ་ངན་པར་ཞུགས་པ། ཤེས་རབ་ཀྱི་ང་རྒྱལ་ཅན་རང་གིས་ཡོངས་སུ་བརྟགས་པ་སྨྲ་བ་ནི་གནོད་པ་དག་དང་ཕྲད་དེ། གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དག་ལྔ་འགྱུར་དུ་འབྱུང་བའི་སྟེང་དུ་ཁྱད་པར་དུ་འབྱུང་བ་འདི་ལྟ་སྟེ། གཤིན་རྗེའི་མི་ཕྲ་སྐམ་ཕྲ་མོ་ཐོགས་པས་ཤ་བ་སྤུ་ཙམ་དུ་བཏོགས་བཏོགས་ནས་དེ་
ཉིད་ཟར་འཇུག་གོ །བུང་བའི་མཆུ་རྡོ་རྗེ་ལྟ་བུ་དག་འབྱུང་བར་འགྱུར་ལ། གང་དེའི་ལུས་ལ་ལན་ཚྭ་ལྟར་དྲག་པར་བྱེད་དེ་དེ་ལ་ཁྲག་དྲོན་པོ་འབྱུང་ངོ་། །དེ་གཤིན་རྗེའི་མི་རྣམས་ཀྱིས་དེ་ཉིད་ཟར་འཇུག་སྟེ། ཟས་དེས་དེའི་སྲོག་འཚོ་བར་བྱས་སོ། །ཉེས་པར་བྱས་པའི་ལས་ཀྱིས་བསླུས་པ་དེ་ཡང་བཀྲེས་པ་དང་། སྐོམ་པས་ལུས་དང་སྙིང་བཅུ་འགྱུར་དུ་གདུངས་སོ། །དེ་ནས་ཡང་ལས་དེ་དང་རྒྱུ་འཐུན་པར་རང་གི་ཤ་དང་ཁྲག་དེ་ཉིད་འབྱུང་བར་བྱེད་དེ། རང་གི་ལས་ཀྱིས་འཆི་བའི་དུས་མི་བྱེད་དོ། །དེ་ནས་ཡང་རང་གི་ཤ་དང་ཁྲག་དེ་ཉིད་འབྱུང་བར་བྱེད་དེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལས་ཀྱིས་བསླུས་པ་དེ་ཡུན་ཤིན་ཏུ་རིང་པོ་ལོ་བགྲང་གིས་མི་ལང་བར་གནོད་པ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་བཞི་བརྒྱར་ཡི་དགས་ལྷག་མ་ཟ་བར་སྐྱེ་བར་འགྱུར་རོ། །ཚེ་རབས་ལྔ་བརྒྱར་དུད་འགྲོ་ཙི་ལིན་ད་དང་། བ་ལང་གི་ནགས་ཚལ་ལ་སོགས་པར་བཀྲེས་པ་དང་། སྐོམ་པས་གདུངས་པའི་ལུས་སུ་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་ཚ་བའི་འཁོར་ལ་བརྟགས་ན། དེས་བཅུ་བདུན་པ་ནི་གཅིག་ཀྱང་མ་མཐོང་ལ། འདི་ལྟར་སེམས་ཅན་དམྱལ་བ་ཆེན་པོ་ཚ་བའི་འཁོར་འདིའི་མཐའ་ནི་འདི་ཡིན། གནས་པ་ནི་འདི་ཡིན། ལོག་པར་ལྟ་བ་ངན་པར་བྱས་པའི་ལས་བྱས་པ་རྣམས་ཀྱི་གནས་ནི་འདི་ཡིན་ནོ་སྙམ་སྟེ། དེས་སེམས་ཅན་དམྱལ་བ་ཆེན་པོ་བཅུ་དྲུག་པ་ལ་བརྟགས་ནས་ཡང་དག་པ་ཇི་ལྟ་བ་བཞིན་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པའི་རྣལ་འབྱོར་སྤྱོད་པ་དེ་རབ་ཏུ་དགའ་བ་དང་། ས་བླ་བའི་གནོད་སྦྱིན་དག་གིས་དེ་མཐོང་ནས། ཀྱེ་ཨེ་མ་དགེ་སློང་འདི་ནི་བརྩོན་པ་མ་ཉམས་པ་ས་གཞན་བཅུ་གཅིག་པ་ལ་ཞུགས་ཤིང་འཁོར་བའི་དུས་རྣམ་པར་གཅོད་པར་བྱེད་པ་དེ་ཡང་ཤེས་ནས་དགའ་སྟེ། བར་སྣང་ལ་སྤྱོད་པའི་གནོད་སྦྱིན་དག་ལ་སྔ་མ་བཞིན་མངོན་པར་བསྙད་ནས། འོད་ཆུང་གི་ལྷའི་བར་དག་ལ་
འདི་ལྟར་རིགས་ཀྱི་བུ་ཆེ་གེ་མོ་ཞིག་ཅེས་བྱ་བ་སྔ་མ་བཞིན་དུ་སྦྱར་ཏེ། ས་གཞན་བཅུ་གཅིག་པ་ལ་ཞུགས་པ། བདུད་ཀྱི་གཞི་དང་ལྷན་ཅིག་གནས་པར་མི་འདོད་པ། ཉོན་མོངས་པ་འདོད་ཆགས་རྣམས་དང་ལྷན་ཅིག་རྩེ་བར་མི་འདོད་པ། ཡུལ་ལ་གནས་པའི་འགྲོ་བ་སྡུག་བསྔལ་གྱི་གཞི་མཐའ་ཡས་པ་མི་འདོད་པའི་བར་དག་བསྙད་དོ། །དེ་ནས་ཡང་དགེ་སློང་དེས་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བའི་འཁོར་ལ་བརྟགས་ནས་སེམས་ཅན་དམྱལ་བ་གཞན་དག་ལ་ཡང་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་རབ་ཏུ་ཚ་བ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །དགེ་སློང་མ་གཞོན་ནུ་སྡོམ་པ་ལ་གནས་པ། ཚུལ་ཁྲིམས་མ་ཉམས་པ། བརྐམ་པ་མེད་པར་སྤྱོད་པ། འདོད་པ་མེད་པའི་བརྟུལ་ཞུགས་ཉམས་པར་བྱས་ཤིང་དེ་བཞིན་གཤེགས་པའི་བསྟན་པ་ལས་འཁྲུལ་པར་བྱས་ལ་དེ་སངས་རྒྱས་ལ་མི་དད་པར་བྱས་ཏེ། འདི་ལྟར་སངས་རྒྱས་ནི་ཐམས་ཅད་མཁྱེན་པ་མ་ཡིན་ན་དེའི་དགེ་སློང་མའི་དགེ་འདུན་རྣམ་པ་འདི་ལྟ་བུས་ཅི་ཞིག་ཏུ་འགྱུར། དེ་དག་ཐམས་ཅད་ནི་བརྫུན་ཡིན་ཏེ། བསྟན་པ་དེ་ནི་ངན་པ་ཡིན་ཞིང་དེ་ནི་དམན་པ་ཡིན་ཏེ། དེ་ལ་བྱིན་པས་ཆོས་སུ་མི་འགྱུར་ཞིང་དེ་ལ་བྱིན་པས་མྱ་ངན་ལས་འདས་པ་ཡང་འཐོབ་པར་མི་འགྱུར་ཏེ། དགེ་འདུན་འདི་ནི་དམངས་ཡིན་ནོ་ཞེས་དགེ་སློང་མ་གཞོན་ནུའི་བརྟུལ་ཞུགས་ལས་བསྐྱོད་ཅིང་ཆོས་མ་ཡིན་པ་མེད་དོ་ཞེས་དེ་དེ་ལྟར་རྗེས་སུ་སེམས་སུ་བཅུག་ནས་དགེ་སློང་མ་གཞོན་ནུ་དེ་བརྟུལ་ཞུགས་ལས་སྐྱོད་པར་བྱེད། ཆོས་མ་ཡིན་པ་མེད་དོ་ཞེས་ཚུལ་ཁྲིམས་འཁྲུལ་པ་དང་ལྟ་བ་འཁྲུལ་པར་བྱེད་ན། དེ་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པས་ལུས་དང་བྲལ་ནས་ངན་འགྲོ་ལོག་པར་
ལྟུང་བ་སེམས་ཅན་དམྱལ་བ་རབ་ཏུ་ཚ་བར་སྐྱེ་བར་འགྱུར་ཏེ། ལུས་ཀྱི་བོང་ཚོད་དཔག་ཚད་ཙམ་ལ་མར་སར་འཇུ་བ་ལྟ་བུར་ལུས་ཤིན་ཏུ་གཞོན་ཤ་ཅན་དུ་འགྱུར། དེ་བཞིན་དུ་མིག་དང་། སྒྲ་དང་། རེག་པ་དང་། རོ་དང་། གཟུགས་དང་། དྲི་ཤིན་ཏུ་ཆུང་བས་སྲོག་ཆད་པར་བྱེད་དེ། ཇི་ལྟ་ཇི་ལྟར་སྡིག་པའི་ཤས་ཆེར་བྱས་པ་དེ་ལྟ་དེ་ལྟར་ལུས་དང་ཡིད་ཆེས་ཤིན་ཏུ་གཞོན་ཤ་ཅན་དུ་འགྱུར་རོ། །དེའི་ལས་ངན་པ་བྱས་པ་དང་མི་དགེ་བའི་ལས་ཀྱི་མཐུས་འདི་ལྟར་ཚེ་འདི་ལ་སྡུག་བསྔལ་ཤིན་ཏུ་དྲག་པ་དག་མྱོང་བར་འགྱུར་ཏེ། འཆི་བའི་དུས་ཀྱི་ཚེ་ངེས་པར་མྱོང་བར་འགྱུར་བ་ནི། ཇི་ལྟར་སེམས་ཅན་དམྱལ་བ་ཡང་སོས་སུ་སྐྱེས་པ་དེ་ལྟར་འཆི་བའི་དུས་ཀྱི་ཚེ་མྱོང་བར་འགྱུར་རོ། །ཉི་མ་གསུམ་ལོན་ནས་འཆི་བའི་བར་དུ་དེའི་ལྕེ་ལྐུགས་པར་འགྱུར་ཞིང་འཇིགས་པའི་འདུ་ཤེས་སུ་འགྱུར། འདུ་བྱེད་རྣམས་ཉམ་ཆུང་བར་འགྱུར། རྣམ་པར་ཤེས་པ་ཤིན་ཏུ་སྐྲག་པར་འགྱུར་ཏེ། ཚུལ་དེ་ལྟ་བུར་འབྱུང་བ་ཆེན་པོ་བཞི་རྣམས་ཀྱིས་དཀྲུགས་ནས་ཤིན་ཏུ་སྡུག་བསྔལ་བར་འགྱུར་རོ། །སའི་ཁམས་སྲ་བའི་ངོ་བོ་འཁྲུགས་པས་ལུས་དང་རྩ་དང་། རྒྱུས་པ་དང་། མིད་པ་ཐམས་ཅད་ཤིན་ཏུ་འགོག་པར་བྱེད། འབུགས་པར་བྱེད། རབ་ཏུ་འབུགས་པར་བྱེད། རྣམ་པར་ཐོ་འཚམ་པར་བྱེད། མར་སར་གྱི་གོང་བུ་བཞིན་དུ་གནོད་པར་བྱེད། ཤིན་ཏུ་འཐག་པར་བྱེད་ཅིང་འཐས་པར་བྱེད་དོ། །ཆུའི་ཁམས་འཁྲུགས་པས་ཀྱང་ལུས་དང་རྩ་ཐམས་ཅད་དང་། རྒྱུས་པ་བརྒྱ་དག་གིས་འཆིང་བར་བྱེད། ཆེས་མཁྲང་བར་བྱེད། ཆུ་སེར་དུ་བྱེད། ལྷོད་ལྷོད་པོར་བྱེད། དྲི་སྐྱེད་པར་བྱེད། སྲིན་བུ་གསོད་པར་བྱེད། འཛག་སྒོ་ཐམས་ཅད་འགག་པར་བྱེད། སྒྲ་ངར་ངར་པོ་འབྱིན་པར་བྱེད། མིད་པ་དང་། ལྕེའི་འཛག་སྒོར་གྱུར་པའི་ཚོར་བ་གནོད་པར་བྱེད། ཡན་ལག་དང་ཉིང་ལག་ཐམས་ཅད་ལས་རྔུལ་འབྱུང་བར་བྱེད་དོ། །མེའི་ཁམས་འཁྲུགས་པས་ཀྱང་ལུས་དང་རྩ་དང་། རྒྱུས་པ་ཐམས་ཅད་སྲེག་པར་བྱེད། འཚེད་པར་བྱེད། སྡུག་བསྔལ་གྱི་ཉམ་ཐག་པར་བྱེད། པགས་པ་ཟངས་ཀྱི་མདོག་ལྟ་བུར་བྱེད། ནང་དུ་སྲེག་པ་སྐྱེད་པར་བྱེད། ཕྱི་
རོལ་དུ་རྣམ་པར་སྲེག་པ་སྐྱེད་པར་བྱེད།སྲེད་པའི་སྟོབས་རབ་ཏུ་སྐྱེད་པར་བྱེད། ཁ་སྐམ་པར་བྱེད། སྙིང་སྲེག་པར་བྱེད་དོ། །རླུང་གི་ཁམས་འཁྲུགས་པས་ཀྱང་ཡང་བའི་ངོ་བོ་གཡོ་བ་ལས་ནམ་མཁའ་ལ་བཏེག་ནས་འདོར་བ་བཞིན་བྱེད། རྩུབ་པའི་དངོས་པོས་ཡན་ལག་དང་ཉིང་ལག་ཐམས་ཅད་དང་། ཁམས་ཐམས་ཅད་ཤིན་ཏུ་རྩུབ་པར་བྱེད་དོ། །ཡན་ལག་དང་། ཉིང་ལག་ཐམས་ཅད་དང་། གནད་ཐམས་ཅད་ཀྱི་བར་བར་དུ་རླུང་པིབ་པ་ལ་ཀ་དང་། སཱུ་ཙ་ཀ་ཁབ་ལྟ་བུར་གྱུར་པ་རྒྱུ་སྟེ། རླུང་པིབ་པ་ལ་ཀ་ཁབ་ལྟ་བུ་རབ་ཏུ་འབར་བ་དག་གིས་བ་སྤུའི་ཁུང་བུ་ལ་སོགས་པ་ནས། ཁ་ཆུ་དང་། པགས་པ་དང་། ཤ་དང་། ཚིལ་དང་། རུས་པ་དང་། རྐང་པ་དང་། ཁུ་ཆུའི་བར་དག་ལ་འཇོག་པར་བྱེད་དེ། སྟེའུ་བཞིན་དུ་གཅོད་པར་བྱེད། འཇོག་པར་བྱེད། དབང་པོའི་ལམ་ཐམས་ཅད་འགོག་པར་བྱེད། བཤང་བ་དང་། གཅི་བའི་གནས་འགོག་པར་བྱེད། སྲོག་ཆགས་ཀྱི་དབུགས་ཡང་དག་པར་འགོག་པར་བྱེད། མིད་པར་མིད་པའི་སྒོའི་ལམ་ལོག་པར་བྱེད། ལྟ་བས་འདུ་ཤེས་ཕྱིན་ཅི་ལོག་ཏུ་བྱེད། རྣ་བས་སྒྲ་མི་སྙན་པ་ཐོས། དེའི་སྣར་ཆུ་འབྱུང་ཞིང་དེའི་སེན་མོ་དག་སྔོན་པོར་བྱེད། སྣ་ཡོན་པོར་བྱེད་ཅིང་རླིག་པ་མདོམས་སུ་འཕྱང་བར་བྱེད། རྐུབ་ཁ་ན་བ་དང་། ཕོ་མཚན་ན་བ་དང་། རེག་པ་མདག་མེ་དང་མཚུངས་པས་སྡུག་བསྔལ་བར་བྱེད། པགས་པར་གཏོགས་པ་དང་། པགས་པ་དག་སྐྲངས་པར་བྱེད། དེའི་སྐྲ་དང་། སྤུ་དག་ཤིག་ཤིག་པོར་བྱེད་དེ། ཉེས་པར་བྱས་པ་མི་འཐུན་པར་སྤྱད་པ་དག་འཆི་བའི་དུས་སུ་སྡུག་བསྔལ་མི་བཟད་པ་འབྱུང་བའི་ཕྱོགས་ཙམ་ཞིག་བཤད་པ་ཡིན་ཏེ། དེ་ལྟར་ཉིན་ཞག་གསུམ་དུ་འབྱུང་བ་ཆེན་པོ་བཞི་འཁྲུགས་པ་རྣམས་ཀྱིས་རྣམ་པར་འཚེའོ། །གང་གི་ཚེ་དུས་ཐ་མ་འབབ་པར་འགྱུར་བ་ན། སེམས་ཅན་དམྱལ་བ་པ་དེའི་འཇིག་རྟེན་ཕ་རོལ་གྱི་མཚན་མ་འདི་དག་འབྱུང་བར་འགྱུར་ཏེ། འདི་ལྟ་སྟེ། དེའི་གནས་ཐམས་ཅད་ཕྱར་བ་ངན་པ་རབ་ཏུ་འབར་བས་ཁེབས་པར་སྣང་ཞིང་རྨི་ལམ་གྱི་གཟུགས་ལྟ་བུ་དག་མཐོང་ངོ་། །གནས་མེད་པའི་སེང་གེ་དང་། སྟག་གི་
གཟུགས་འཇིགས་འཇིགས་ལྟར་འདུག་པའི་རྣམ་པ་དེ་ལྟ་བུ་དང་། གཞན་ཡང་ཤིན་ཏུ་འཇིགས་འཇིགས་ལྟར་འདུག་པ་མི་སྡུག་པ་དག་མཐོང་ངོ་། །རྣ་བས་སྒྲ་འུར་འུར་པོ་འཇིགས་ཤིང་མི་དགའ་བའི་ཚིག་དག་ཐོས་སོ། །དེའི་པགས་པ་མཚོན་ཉིད་ཀྱིས་གཅོད་དོ། །སྲིད་པ་ཐ་མ་པར་བབ་པ་ན་རླུང་དེ་དེའི་སྟེང་དུ་འབྱུང་བར་འགྱུར་ཏེ། སེན་མོ་དག་བཏང་ནས་རྐང་པ་དག་གཏོང་། རྐང་པ་དག་བཏང་ནས་བྱིན་པ་གཏོང་། བྱིན་པ་བཏང་ནས་བརླ་གཏོང་། བརླ་བཏང་ནས་མདོམས་གཏོང་། མདོམས་བཏང་ནས་ལྟོ་གཏོང་། ལྟོ་བཏང་ནས་སྙིང་གཏོང་། སྙིང་བཏང་ནས་སྒྲ་ངར་ངར་པོར་བྱེད། མཆིལ་མ་དག་སྐམས་པར་བྱེད་ལ་མིག་ཡ་གཅིག་དམར་པོར་བྱེད་དོ། །གཤིན་རྗེའི་མི་ལག་ན་རལ་གྲི་དང་། ཐོ་བ་ཐོགས་པ་ནམ་མཁའ་ལ་འགྲོ་བ་དག་མཐོང་བ་དང་། དེའི་མཛའ་བཤེས་དང་། ཉེ་དུ་དག་ན་རེ་ནམ་མཁའ་ལ་རེག་པར་འདོད་དོ་ཞེས་སྨྲའོ། །དེ་དབུགས་ཆེན་པོས་ཉམ་ཐག་ཅིང་ལུས་དང་བྲལ། དབུགས་ཆད་ནས་མར་མེ་ངན་པ་སྙིང་པོ་དྲི་མ་ཅན་བསྲེགས་པ་ལྟར་འཇིག་རྟེན་འདི་ནས་སྲིད་པ་བར་མར་སྐྱེ་སྟེ། རྒྱུ་དང་མཚུངས་པར་འབྲས་བུ་དག་འབྱུང་ངོ་། །ཉེས་པར་བྱས་པའི་ལས་ཀྱི་མཐའ་སྤྱོད་པ་དེ་སྲིད་པ་བར་མ་པའི་སྡུག་བསྔལ་རྣམས་ཀྱིས་མངོན་པར་ཉམས་པར་འགྱུར་རོ། །དེས་བདག་ཉིད་ཇི་ལྟར་མི་ལོ་བརྒྱད་ཁྲི་བཞི་སྟོང་ཐུབ་པའི་བྱིས་པ་ལོ་བརྒྱད་ལོན་པའི་ཚད་དེ་ལྟ་བུར་མཐོང་སྟེ། སྐྱེ་བོ་དག་ནི་ཐམས་ཅད་ནས་ཐམས་ཅད་དུ་མི་སྣང་ངོ་། །འབྱུང་བ་ཆེན་པོ་ཕྲ་བ་དང་། རགས་པ་དག་འབྱུང་སྟེ། ཕྲ་མོ་བལྟར་མེད་ཅིང་ཐོགས་པ་མེད་པ་དེ་ལྟ་བུ་བྱུང་བས་གང་རི་རབ་ཕུག་ནས་འགྲོ་ཡང་བདག་ཉིད་དང་། རི་རབ་ལ་ཡང་གནོད་པ་མེད་ན། རི་གཞན་དག་ལ་ལྟ་སྨོས་ཀྱང་ཅི་དགོས། དེ་ལྟར་དེ་དག་ཉིད་ལྕགས་ནག་པོ་ལྟ་བུའི་ཁ་དོག་དང་མུན་པ་མུན་ནག་གི་རྫོང་གི་ནང་དུ་ཞུགས་པར་མཐོང་སྟེ། དེ་བདག་ཉིད་ཀྱིས་ལས་བྱས་པ། དེས་སྤུ་ཐམས་ཅད་འབར་བར་མཐོང་ངོ་། །བདག་ཉིད་གཤིན་རྗེའི་མི་རྣམས་ཀྱིས་ལྕགས་ཀྱི་ཐག་པ་ནག་པོས་ཕྱིན་ཅི་ལོག་ཏུ་དམ་པར་རབ་ཏུ་བཅིངས་པར་མཐོང་སྟེ། རྐང་པ་དག་ཀྱང་ཤིན་ཏུ་དྲག་ཅིང་
དུག་གིས་རེག་པ་ལྟར་མཁྲང་བ། གཟུགས་ཤིན་ཏུ་འཇིགས་འཇིགས་ལྟར་འདུག་ཅིང་ཐགས་ཐོགས་མེད་པར་འགྲོ་བ་གཞན་ཡོད་པས་ཐམས་ཅད་ཀྱི་ནང་ན་བཅིང་བ་དམ་པོས་བདག་ཉིད་བཅིངས་པར་མཐོང་སྟེ། ཇི་ལྟར་སྐྲའི་རྩེ་མོའི་ཕྱོགས་ཙམ་ཡང་བཅིངས་པ་དམ་པོ་དེས་དེ་ལྟར་མ་བཅིངས་པ་མེད་དོ། །སྒྲ་དང་། རེག་པ་དང་། རོ་དང་། གཟུགས་དང་། དྲི་མི་འདོད་པ་དག་འབྱུང་བར་འགྱུར་ཏེ། འདི་ལྟ་སྟེ། མིག་གིས་གཟུགས་མིག་དང་མི་འཐུན་པ། ཁ་དོག་མི་སྡུག་པ། འཇིགས་འཇིགས་ལྟར་འདུག་ཅིང་རབ་ཏུ་འབར་བ་མང་པོ་དག་མཐོང་ངོ་། །རྣ་བས་ཀྱང་གང་ཚིག་དེ་ལ་དགའ་བར་མི་འགྱུར་བ་མི་སྙན་པ་མི་འདོད་པ་ཡིད་དུ་མི་འོང་བ་དག་ཐོས་སོ། །འདི་ལྟ་སྟེ། ཉེས་པར་བྱས་པའི་ལས་ཀྱི་མཐའ་སྤྱད་པ་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པ་མི་ཕན་པ་བྱེད་པ་དག་འདིས་འཐོབ་སྟེ། མིས་ལེགས་པར་བྱས་པའི་རིན་པོ་ཆེའི་གླིང་གིས་བསླུས་ཤིང་མི་དགེ་བ་བཅུའི་ལས་ཀྱི་ལམ་མི་གཙང་བ་བསམས་བཞིན་དུ་སྤྱོད་པ། ཕྱིན་ཅི་ལོག་གིས་རིན་པོ་ཆེའི་གླིང་ཉམས་པ། མཚོན་དང་། མེ་དང་། དུག་དང་། གཡང་ས་ལྟ་བུའི་འདོད་པས་བསླུས་པ། གཞན་གྱི་བུད་མེད་ཀྱི་ཚིག་གིས་རྣམ་པར་བསླུས་ཤིང་དེ་ལ་འདོད་པ་དེས་མི་དགེ་བ་རྣམ་པ་གསུམ་བྱས་སོ། །བློ་ངན་པས་རང་གི་ལས་ཉེས་པར་སྤྱད་པ་དེས་དེ་ལྟར་སེམས་ཅན་དམྱལ་བ་རབ་ཏུ་ཚ་བར་སྡུག་བསྔལ་སྣ་ཚོགས་ཀྱིས་ཉམ་ཐག་པ་དག་ཇི་ལྟར་བུ་དང་ཆུང་མ་མཐོང་བས་བསླུས་པ་ཉེས་པར་སྤྱད་པའི་ཆད་པ་རྣམ་པ་འདི་ལྟ་བུ་ཡང་མི་འབྱུང་བར་བྱ་བའི་ཕྱིར་བདག་ཅག་གིས་རྣམ་པ་བརྒྱ་སྟོང་ཕྲག་དུ་མར་གནོད་པ་བྱའོ་སྙམ་ནས་གཤིན་རྗེའི་མི་རྣམས་ཀྱིས་སྲིད་པ་བར་མ་པ་དག་ལ་རྗེས་སུ་བསྟན་པའི་ཚིགས་སུ་བཅད་པ་སྨྲས་པ། གཉེན་བཤེས་ཚུལ་ནི་དགྲ་ཡིན་ཏེ། །མི་ཕན་ཕན་པའི་ཚུལ་གྱིས་ཁྱོད། །བཅོམ་ནས་མི་ཡི་འཇིག་རྟེན་ནས། །དེ་རིང་མུན་ནག་ཆེན་པོར་འགྲོ། །ཇི་ལྟར་ལས་ནི་རྣམ་གསུམ་བྱས། །ཉེས་གསུམ་བྱས་པ་དགྲ་གཞན་མེད། །ལས་རྣམ་གསུམ་གྱིས་ཁྲིད་དེ་འོངས། །གཤིན་རྗེའི་གནས་སུ་ཁྲིད་པར་བྱེད། །ལས་དག་གཅིག་ཅིག་བྱེད་པ་ནི། །འབྲས་བུ་
གཅིག་ཅིག་མྱོང་བར་འགྱུར། །སྐྱེ་བོ་སྐྱེ་བོའི་གྲོགས་མེད་པར། །རྫོང་ནི་གཅིག་ཅིག་རྒལ་བར་འགྱུར། །སྐྱེ་བོ་གང་ཞིག་སྐྱེ་བོ་འདོད། །ཉེས་པར་བྱས་པ་མང་དུ་བྱེད། །སྐྱེ་བོས་སྐྱེ་བོ་སྐྱོབ་མི་ནུས། །སྐྱེ་བོ་རང་གིས་བྱས་ལ་སྤྱོད། །སྐྱེ་བོ་བུ་ཡི་འདུ་ཤེས་ཀྱིས། །རྨོངས་པ་ཅི་ཡི་ཕྱིར་ན་བསླུས། །རྨོངས་པས་བསླུས་པ་ཁྱོད་ཀྱིས་སུ། །སྦྱིན་ལ་སོགས་པའི་བློ་མ་བསྐྱེད། །འཇིག་རྟེན་འདི་དང་ཕ་རོལ་གྱི། །འཇིག་རྟེན་དེ་བཞིན་འབྲང་བའི་དགྲ། །དགྲ་ཡི་ནང་ན་དགྲ་དང་པོ། །ངན་སོང་ཐམས་ཅད་རྣམ་སྟོན་པ། །དུག་དང་མེ་དང་མཚོན་ལྟ་བུ། །རང་གིས་བྱས་པ་ངན་པ་ཡིན། །ཁྱོད་ཀྱིས་ལས་ནི་བྱས་པ་དག །ཁྱོད་ཉིད་རྗེས་སུ་སྤྱོད་པ་ཡིན། །གཞན་གྱིས་བྱས་པའི་ལས་དེ་ནི། །ཕ་རོལ་དག་ལ་འཕོ་བ་མེད། །མི་ཡིས་ཉེས་པར་སྤྱད་བྱས་པ། །འཇིག་རྟེན་འདི་དང་ཕ་རོལ་དང་། །ཐོག་མ་བར་དང་ཐ་མ་རུ། །བདེ་འབྱུང་བདེ་བའི་རོ་མི་མྱོང་། །དེ་ཉིད་འདོད་པར་མི་བྱེད་པའི། །སེམས་ནི་རྣམ་པར་དཀྲུགས་པ་བྱས། །བྱིས་པའི་སེམས་དང་ཡིད་འཕྲོགས་པ། །མི་དགེའི་ཆོས་ནི་རྣམ་པར་འཕེལ། །ཡིད་ཀྱིས་བསླུས་པའི་སེམས་ཅན་ནི། །ཡིད་ཀྱིས་རབ་ཏུ་རྣམ་པར་ཆགས། །མུན་པ་ནས་ནི་མུན་པ་རུ། །སེམས་ཅན་དམྱལ་བར་སྡིག་ཅན་འགྲོ། །འཁོར་བར་མུན་པས་བསྒྲིབས་པ་དག །སངས་རྒྱས་བསྟན་པ་རྙེད་པར་དཀའ། །གང་དག་ཆོས་ནི་མི་འདོད་པ། །སྡུག་བསྔལ་ཤིན་ཏུ་སྡུག་བསྔལ་འགྲོ། །གང་ཞིག་རྟག་ཏུ་སེམས་མ་ཞི། །ཡུལ་རྣམས་ཀྱིས་ནི་ངེས་པར་འཇོམས། །གནས་འདི་དག་ཏུ་དེ་འགྲོ་སྟེ། །འདི་ལྟར་ཁྱོད་ཉིད་རྗེས་སུ་ལྟོས། །དེ་ལྟར་ཉེས་པར་བྱས་པའི་ལས་ཀྱི་མཐའ་སྤྱད་པ། རང་གི་ལུས་དང་ངག་དང་སེམས་ཀྱིས་བསླུས་ཤིང་ཉེས་པར་བྱས་པ་ནི་གཤིན་རྗེའི་མི་དེ་དག་གིས་རྗེས་སུ་བསྟན་ནས་སེམས་ཅན་དམྱལ་བ་ཆེན་པོ་རབ་ཏུ་ཚ་བར་སོང་སྟེ། སྣས་ནི་ལྗན་ལྗིན་དང་རུལ་པ་དང་མི་གཙང་བའི་ཚོགས་ཀྱི་དྲི་ཤིན་ཏུ་མི་ཞིམ་པ་དག་མནོམ་མོ། །ལྕེས་ནི་ཟངས་རབ་ཏུ་ཚ་ཞིང་མཁྲང་ལ་རོ་བྲོ་བ་མེད་པ་དང་། དྲི་དང་རོ་དང་གཟུགས་ཡིད་དུ་མི་འོང་བ་དག་མྱོང་ངོ་། །
སེམས་ཅན་དམྱལ་བ་པའི་ལུས་ཀྱིས་ཀྱང་རླུང་སྤུ་གྲི་དང་མེ་ལྟ་བུ་དང་བཅས་པས་རེག་གོ །ཡུལ་འཇིགས་པ་ལྔས་མི་འཇིགས་པའི་ཡིད་ཀྱང་སེམས་ཅན་དམྱལ་བ་ཆེན་པོ་སྔར་བསྟན་པས་ཤིན་ཏུ་རྣམ་པར་སློང་བར་བྱེད་དོ། །མིད་པ་ཡང་གཤིན་རྗེའི་མིས་རབ་ཏུ་དམ་པོར་བཅིངས་ཤིང་ལས་ཀྱི་རླུང་ལངས་པའི་སེམས་ཅན་དག་གིས་དབང་མེད་པར་ཁྲིད་དོ། །གཤིན་རྗེའི་མི་བཞིན་བསྒྱུར་ཅིང་ལག་པ་དང་རྐང་པ་དང་ལྟོ་དང་སེན་མོ་སོ་སོ་ན་འཇིགས་པ། འབྲུག་གི་འུར་སྒྲ་འཇིགས་ཤིང་ལག་ན་མཚོན་ཆ་ཐོགས་པ་སྤྲིན་ནག་པོ་ལྟ་བུ་དང་། མིག་འབར་ཞིང་རབ་ཏུ་འབར་ལ་མཆེ་བ་འཁོར་ལོ་ལྟར་རྣོ་བ། གསུས་པ་རབ་ཏུ་ཆེ་ཞིང་ལག་པ་ཐུང་བ། སེན་མོ་མཁྲང་ཞིང་རྣོ་ལ་རོད་པ། ལུས་ཐམས་ཅད་རྩ་སྦོམ་པོས་ཁྱབ་པར་སྦྲེལ་བའི་རྣམ་པ་དེ་ལྟ་བུ་དག་གིས་ཉེས་པར་བྱས་པའི་ལས་ཀྱི་མཐའ་དཔྱད་པ་དེ་དེ་ལྟར་དཔག་ཚད་བྱེ་བ་སུམ་ཅུ་རྩ་དྲུག་དང་། འོག་ཏུ་དཔག་ཚད་བྱེ་བ་བཅུ་དང་། ས་དང་རྒྱ་མཚོ་དང་གླིང་དང་ཚོང་འདུས་དང་ལྡན་པ་དཔག་ཚད་སྟོང་ཕྲག་དྲུག་ཅུ་རྩ་བརྒྱད་དུ་ཁྲིད་དེ་རྒྱ་མཚོར་གཏོགས་པར་དེ་འདུག་གོ །རྣམ་པ་འདི་ལྟ་བུའི་ལས་ཀྱི་རླུང་གིས་འཕངས་པ་ནི་གང་དུ་ཡིད་ཀྱིས་ཀྱང་དཔེ་བྱ་བར་སླ་བ་མ་ཡིན་ནོ། །ཉི་མ་དང་། ཟླ་བ་དང་། རླུང་འགྲོ་བ་མེད་དེ། རླུང་རྣམས་ཀྱི་ནང་ན་ནི་ལས་ཀྱི་རླུང་མཆོག་ཡིན་ཏེ། གཞན་རླུང་མ་ཡིན་པ་དེ་ལྟ་བུར་ཉེས་པར་བྱས་པའི་ལས་ཀྱི་མཐའ་སྤྱད་པ་དེ་ཁྲིད་དེ། གཤིན་རྗེས་སྔ་མ་བཞིན་རྗེས་སུ་བསྟན་ཏོ། །ཉེས་པར་བྱས་པའི་ལས་ཀྱི་ཞགས་པས་བཅིངས་པ་གཤིན་རྗེའི་གནས་དེ་ནས་བྱུང་ནས། སེམས་ཅན་དུ་བགྲང་བ་ལུས་དང་ལྡན་པའི་ལས་མི་གཙང་བ་རྣམས་ཀྱིས་བཅིངས་པ་སེམས་ཅན་དམྱལ་བ་རབ་ཏུ་ཚ་བ་དེར་ཁྲིད་དོ། །སེམས་ཅན་དམྱལ་བ་དེ་རྒྱང་རིང་པོ་ན་ཀུན་ནས་རབ་ཏུ་འབར་བ་མུན་པ་མུན་ནག་དང་། རྒྱང་རིང་པོ་ན་མེ་འབར་བ། རང་གི་བོང་ཚོད་དཔག་ཚད་ལྔ་སྟོང་ཡོད་པ། སྐྱེ་འགྲིབ་མེད་པ། ཆེས་ཉུང་བ་དང་། ཆེས་མང་བ་མཐོང་ངོ་། །དཔག་ཚད་སུམ་སྟོང་ན་སེམས་ཅན་དམྱལ་བ་པ་རྣམས་ཀྱི་སྒྲ་འབྱིན་པ་ཐོས་ཏེ། སོ་སོ་ནི་སྙིང་རྗེ་རྗེ་སྐད་དང་། འཇིགས་ཤིང་དམན་ལ་གདངས་མི་སྙན་པ་དགའ་བ་མེད་ཅིང་སྡུག་བསྔལ་ཚ་བ་རྩུབ་པ་བཟོད་པར་དཀའ་ཞིང་རོ་བྲོ་བ་མེད་པ་རྣམ་པ་དུ་མ་དག་ལོ་འབུམ་
ཕྲག་བྱེ་བ་དུ་མར་ལོ་བགྲང་གིས་མི་ལང་བར་རྒྱུན་དུ་སྒྲ་འབྱིན་པ་ཐོས་སོ། །སེམས་ཅན་དམྱལ་བ་པ་དེ་སེམས་ཅན་དམྱལ་བ་པ་རབ་ཏུ་ཚ་བར་སྒྲ་འབྱིན་པ་དེས་ཐོས་ནས་ཡིད་བཅུ་འགྱུར་དུ་འཇིགས་ཤིང་སྐྲག་གོ། །སེམས་ཅན་དམྱལ་བ་ཆེན་པོ་རབ་ཏུ་ཚ་བ་ག་ལ་བ་དེའི་ཕྱོགས་སུ་ཡང་གཤིན་རྗེའི་མི་རྣམས་ཀྱིས་ཁྲིད་ནས་ཚིགས་སུ་བཅད་པ་འདི་དག་སྨྲས་སོ། །འདི་ནི་སེམས་ཅན་དམྱལ་བའི་སྒྲ། །ཐོས་ནས་བློ་ངན་ཁྱོད་འཇིགས་སམ། །གང་དུ་ཁྱོད་ནི་མེ་ཡིས་སུ། །ཤིང་ལྟར་བསྲེགས་ན་ཇི་ལྟར་བྱ། །མེ་ཡིས་བསྲེགས་པ་བསྲེགས་པ་མིན། །ངན་པར་བྱས་པས་ཁྱོད་བསྲེགས་སོ། །མེ་ནི་ཞི་བར་འགྱུར་སྲིད་ཀྱི། །ནམས་ཀྱང་ངན་བྱས་མེ་མི་ཞི། །མེ་ཡིས་འཇིག་རྟེན་མཐར་མི་ཁྱེར། །མེ་ཡི་ཕྱི་བཞིན་མེ་མི་འབྲང་། །ངན་བྱས་སྡིག་པའི་མེ་འདི་ཡིས། །ཁྱོད་དང་བཅས་པར་མྱུར་བར་སྲེག །ངན་བྱས་མེ་ཡིས་གང་བསྲེགས་པ། །མི་དེ་དག་ནི་དམྱལ་བར་སྲེག །ངན་བྱས་མེ་ནི་གང་སྤོང་བ། །དེ་དག་དམྱལ་བའི་འཇིགས་པ་མེད། །གང་དག་བདག་ཏུ་གཅེས་འདོད་དང་། །གལ་ཏེ་དམྱལ་བར་རྣམ་འཇིགས་ན། །སྡིག་པ་དག་ནི་རྣམ་པར་སྤངས། །དེ་ལས་སྡུག་བསྔལ་འབྱུང་མི་འགྱུར། །སྡིག་པ་ཤིན་ཏུ་རྣམ་སྤངས་པ། །སེམས་ནི་རྟག་ཏུ་གཙང་བ་དང་། །ལུས་དང་ངག་གི་ཚོགས་ཞི་བ། །མྱ་ངན་འདས་པ་ཡོང་མི་རིང་། །སེམས་ཅན་རྟག་ཏུ་སྡིག་སེམས་པ། །རྟག་ཏུ་གཏི་མུག་དབང་དུ་སོང་། །སེམས་ཅན་དམྱལ་བ་དྲག་པོ་ཐོབ། །ཅི་ཕྱིར་རབ་ཏུ་མཆི་མ་འབྱིན། །ངན་བྱས་ཐོག་མ་བར་ཐ་མར། །སྡུག་བསྔལ་སྡུག་བསྔལ་རྣམ་སྨིན་དང་། །དེ་བཞིན་སྡུག་བསྔལ་འགྲོ་བ་དང་། །ལེགས་པ་ཡོངས་སུ་སྨིན་མི་འགྱུར། །འཇིག་རྟེན་ཕ་རོལ་ཁྱོད་ཀྱིས་སྡིག །སྡིག་པ་གང་དག་ངན་བྱས་མང་། །དེ་ཡི་འབྲས་བུ་རྣམ་སྨིན་ནི། །དེ་རིང་མི་བཟད་ཉེ་བར་སྤྱོད། །མི་ཡིས་ངན་བྱེད་བྱས་པ་ནི། །མི་བཟད་ཤིན་ཏུ་མི་བཟད་འགྲོ། །མི་ཡིས་ལེགས་བྱེད་བྱས་པ་ནི། །བདེ་ལས་ཤིན་ཏུ་བདེ་བར་འགྲོ། །སྡིག་པའི་འབྲས་བུ་མི་བཟད་པ། །བདེ་བ་འཐོབ་པར་འགྱུར་བ་མེད། །བདེ་བ་དག་གི་འབྲས་བུ་ཡང་། །མི་བཟད་ལོག་པར་སྨིན་མི་འགྱུར། །
འཁོར་བ་ཐོག་མ་མེད་པ་ནས། །ལེགས་བྱས་འབྲས་བུ་བདེ་བ་དང་། །ངན་པར་བྱས་པའི་ལས་དག་ནི། །དེ་བཞིན་སྡུག་བསྔལ་འབྲས་བུ་དྲན། །རྒྱུ་རྐྱེན་འདྲ་བར་འབྱུང་འགྱུར་གྱི། །ལོག་པར་རྟོག་པར་མི་བྱེད་དེ། །ཇི་ལྟར་སྔོན་གྱི་རྒྱུ་བྱས་པ། །དེ་ལྟར་འབྲས་བུ་ཐོབ་པར་འགྱུར། །དེ་ལྟར་སྲིད་པ་བར་མ་དེར་ལས་ཀྱིས་བྱས་པའི་གཤིན་རྗེའི་མི་རྣམས་ཀྱིས་རྗེས་སུ་བསྟན་ནས་དེ་སེམས་ཅན་དམྱལ་བ་དེར་ཁྲིད་དོ། །ཐོས་ན་ཡང་སྤུ་ཟིང་ཞེས་བྱེད་ཅིང་ཤིན་ཏུ་འཇིགས་པ་མཐོང་ན་ལྟ་སྨོས་ཀྱང་ཅི་དགོས་པ་སྲིད་པ་བར་མ་དེས་མཐོང་ནས་གཟུགས་ལ་སོགས་པའི་ཕུང་པོ་དེ་དག་ཇི་ལྟར་སེམས་ཅན་དམྱལ་བས་བྱས་པ་དྲོ་བ་འདོད་པ་དེ་ལྟར་གྲང་བར་བྱས་པའི་སྡུག་བསྔལ་མི་བཟད་པས་སྡུག་བསྔལ་ལོ། །དེ་ཉེ་བར་ལེན་པ་ཉིད་ལས་སྲིད་པ་འབྱུང་ལ་དེ་ལྟར་སྲིད་པའི་ཡན་ལག་ལ་གནས་པ་དེ་ལས་སྐྱེ་བ་འབྱུང་སྟེ། དེའི་མི་དགེ་བའི་ལས་གང་ཡིན་པ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བས་དགེ་སློང་མ་ཞེ་སྡང་མེད་པ། ཚུལ་ཁྲིམས་དང་ལྡན་པ། འདོད་པ་མེད་པ། འོས་པ་མ་ཡིན་པ་ལ་རུང་བར་བཟུང་སྟེ། སུན་ཕྱུང་ན་དེའི་མི་དགེ་བའི་ལས་བྱས་ཤིང་བསགས་པའི་རྣམ་པར་སྨིན་པ་ལྕི་བའི་ཤུགས་གང་ཡིན་པ་དེས་མེའི་ཕུང་པོ་འབར་བ་རྒྱར་དཔག་ཚད་ལྔ་བརྒྱ་ཡོད་ཅིང་འཕང་དུ་དཔག་ཚད་ཉིས་བརྒྱ་ཡོད་པ་དེར་ལས་ངན་པ་བྱས་པས་འཕངས་ཏེ། ཇི་ལྟར་རི་མཐོན་པོ་ལ་ལྕགས་ཀྱི་མདའ་འཕངས་པ་ཐགས་ཐོགས་མེད་པར་འགྲོ་བ་ཤུགས་ཀྱིས་འཕེན་པ་དེ་ལྟར་སེམས་ཅན་དམྱལ་བ་པ་དེ་མེ་ཐབ་དེར་འདོར་རོ། །འདོར་བ་ན་ལས་ཀྱིས་བྱས་པའི་ཕུར་བུ་རྣམས་འབྱུང་བར་འགྱུར་ཏེ། གང་བྱུང་བ་ཙམ་གྱིས་ཀྱང་ལུས་ཡོངས་སུ་མི་གཏོང་ངོ་། །དེ་ལྟར་དེའི་མགོ་ཐུར་དུ་དཔྱངས་ཤིང་རྐང་པ་གྱེན་དུ་བསྒྲེང་སྟེ། འདོར་བ་ན་དང་པོ་ཁོ་ནར་མེས་མིག་དང་མགོའི་པགས་པ་སྲེག་གོ །དེ་ནས་མགོའི་ཐོད་པ། དེ་ནས་འགྲམ་པའི་རུས་པ། དེ་ནས་སོ། །སོའི་འོག་ཏུ་སོ་དྲུང་། སོ་དྲུང་གི་འོག་ཏུ་མགྲིན་པའི་རུས་པ། མགྲིན་པའི་རུས་པའི་འོག་ཏུ་རྒྱབ་ཀྱི་རུས་པ་དང་། བྲང་རུས། བྲང་རུས་ཀྱི་འོག་ཏུ་མགྲིན་པ་དང་། མིད་པ། དེའི་འོག་ཏུ་
མཆིན་པ། མཆིན་པའི་འོག་ཏུ་མཆེར་པ། མཆེར་པའི་འོག་ཏུ་རྒྱུ་མ། རྒྱུ་མའི་འོག་ཏུ་གཉེ་མ། གཉེ་མའི་འོག་ཏུ་མདོམས། མདོམས་ཀྱི་འོག་ཏུ་ཕོ་མཚན། ཕོ་མཚན་གྱི་འོག་ཏུ་བརླ། བརླའི་འོག་ཏུ་པུས་མོའི་ལྷ་ང་། པུས་མོའི་ལྷ་ངའི་འོག་ཏུ་པུས་མོ་གཉི་ག །པུས་མོ་གཉི་གའི་འོག་ཏུ་སོར་མོ་སྟེ། དེ་ལྟར་དང་པོ་ལས་བྱེད་པ་ངན་པ་བྱས་པ་དེ་སེམས་ཅན་དམྱལ་བ་པའི་མེའི་དོང་དུ་འདོར་བ་ན་སྲེག་ཅིང་འཚོ་ཡང་སྡུག་བསྔལ་རྒྱུན་མི་ཆད་པར་འབྱུང་སྟེ། ཇི་ལྟ་ཇི་ལྟར་ངན་པ་བྱས་པའི་ལས་ཡང་དང་ཡང་དུ་བྱས་པ་དེ་ལྟ་དེ་ལྟར་སེམས་ཅན་དམྱལ་བ་པའི་སྡུག་བསྔལ་ཡང་དང་ཡང་དུ་འབྱུང་ལ་དེ་ཤུགས་ཀྱིས་འབར་བའི་ཕྲེང་བའི་ཐབ་ཏུ་འདོར་ཞིང་ས་གཞི་རྡོ་རྗེ་ལྟ་བུ་དག་ལ་ཕྱེར་བཏགས་པ་དང་། སྐྱེས་ནས་དེ་ནས་ཡང་ཇི་ལྟར་ཕོ་ལོང་དང་པོར་ས་ལ་བརྡབས་ནས། བསྟུད་དེ་བརྡབས་པ་དེ་ལྟ་དེ་ལྟར་དེའི་རོ་སྟོད་སྔ་ལ་རོ་སྨད་ཕྱིས་འདོར་བ་ངུ་སྐད་འདོན་པ་ན་དེ་ནས་ཡང་འདོར་རོ། །འབར་བའི་ཕྲེང་བས་ཕངས་པའི་ལུས་དེ་དེ་ནས་ཡང་སྲེག་པ་ན། སྔ་མ་བཞིན་དུ་མེ་ལྕེའི་ནང་དུ་འཇུག་གོ །དེ་ལྟར་དེ་ལོ་འབུམ་ཕྲག་དུ་མར་སེམས་ཅན་དམྱལ་བའི་མེ་ཐབ་དེར་སྲེག་གོ །བསྲེགས་ནས་དེ་ནས་ཡང་དུས་ཟད་ཀྱི་བར་དུ་འབྱུང་ངོ་། །དེ་ནས་མེ་ཐབ་དེ་ལས་སེམས་ཅན་དུ་བགྲང་བ་མ་ཡིན་པ་གཤིན་རྗེའི་མི་ཕྲ་སྐམ་རབ་ཏུ་འབར་བ་ཐོགས་པས་མི་དེ་བཟུང་ནས་འདྲེན་ཏོ། །ཕྲ་སྐམ་རབ་ཏུ་འབར་བའི་རྣམ་པ་དེ་ལྟ་བུ་དེ་བས་གང་མེ་ཐབ་ཆེས་གྲང་སྟེ། ཕྲ་སྐམ་ཉིས་འགྱུར་གྱིས་ཚ་བ་གང་ཡིན་པ་དེའི་རྒྱུ་ནི་གང་རྐྱེན་ནི་གང་ཡིན་སྙམ་ནས་དེ་ལ་རྒྱུ་ནི་འདི་ཡིན་ཏེ། གང་སྲོག་གཅོད་པས་མེ་ཐབ་ཏུ་སྲེག་ལ། སྲོག་གཅོད་པ་དང་། མ་བྱིན་པར་ལེན་པ་ངན་པ་བྱས་པ་དག་ཕྲ་སྐམ་གྱིས་ཉིས་འགྱུར་དུ་རབ་ཏུ་སྲེག་སྟེ། རྒྱུ་ནི་དེ་ཡིན་རྐྱེན་ནི་དེ་ཡིན། གཞི་ནི་དེ་ཡིན་ནོ། །ཕྲ་སྐམ་གྱིས་ཉིས་འགྱུར་དུ་རབ་ཏུ་སྲེག་པ་གང་ཡིན་པའི་ཕྲ་སྐམ་དེས་དྲངས་ནས་སེམས་ཅན་དུ་བགྲང་བ་མ་ཡིན་པ་གཤིན་རྗེའི་མི་དེ་རྣམས་ཀྱིས་ལྕགས་ཀྱི་ས་གཞི་རབ་ཏུ་འབར་བའི་སྟེང་དུ་འཇོག་གོ །ཕུར་བུ་རབ་ཏུ་འབར་བའི་ཕུར་བུ་དེས་དེའི་རྒྱབ་དང་། མདོམས་སྔ་མ་བཞིན་ཕུག་ནས་དེའི་སྟེང་དུ་བཞག་ལ་རལ་གྲི་
ཤིན་ཏུ་རྣོན་པོ་རབ་ཏུ་འབར་བས་རླིག་པ་དང་ཕོ་མཚན་ལྷན་ཅིག་གཅོད་དེ་སྡུག་བསྔལ་སུམ་འགྱུར་དུ་མྱོང་ངོ་། །དེའི་རྒྱུ་ནི་གང་ཡིན། རྐྱེན་ནི་གང་ཡིན། གཞི་ནི་གང་ཡིན་སྙམ་ན། དེ་ལ་རྒྱུ་ནི་འདི་ཡིན། རྐྱེན་ནི་འདི་ཡིན། གཞི་ནི་འདི་ཡིན་ཏེ། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་རྒྱུ་དང་རྐྱེན་དང་གཞིར་གྱུར་ཏེ། རྒྱུ་དེས་སྡུག་བསྔལ་སུམ་འགྱུར་དུ་མྱོང་ངོ་། །འདི་ལྟ་སྟེ། ལྕགས་མགར་གྱི་ས་ན་ལྕགས་མགར་རམ། ལྕགས་མགར་གྱི་སློབ་མས་སྦུད་པ་བླངས་ཏེ་དབུགས་ཀྱིས་བཀང་ནས་ཇི་ལྟ་ཇི་ལྟར་དབུགས་ཀྱིས་འབུད་པ་དེ་ལྟ་དེ་ལྟར་ཉེས་པར་བྱེད་པའི་ལས་ཀྱི་མཐའ་བྱས་པ་དེ་བཞིན་དུ་སྲེག་གོ །ཉེས་པར་བྱས་པའི་མགར་བ་ནི་ལས་དང་མཇུག་ཅེས་བྱ་བའི་ཚིག་བླ་དགས་སོ། །མགར་བའི་སློབ་མ་ཉེས་པར་བྱས་པའི་ལས་ཞེས་བྱ་བ་ནི་ལས་ཀྱི་ཉེར་བསྡོགས་ཞེས་བྱ་བའི་ཚིག་བླ་དགས་སོ། །རླུང་ཞེས་བྱ་བ་ནི་ལས་ཀྱི་རླུང་ཞེས་བྱ་བའི་ཚིག་བླ་དགས་སོ། །སྦུད་པ་ཞེས་བྱ་བ་ནི་ལྟ་བ་ངན་པ་ཞེས་བྱ་བའི་ཚིག་བླ་དགས་སོ། །མདག་མ་རབ་ཏུ་འབར་བ་ཞེས་བྱ་བ་ནི་སེམས་ཅན་དམྱལ་བ་པ་ཞེས་བྱ་བའི་ཚིག་བླ་དགས་སོ། །ཇི་ལྟ་ཇི་ལྟར་སྦུད་པ་འབུད་པ་དེ་ལྟ་དེ་ལྟར་སྲེག་ཅེས་བྱ་བ་ནི་སེམས་ཅན་དམྱལ་བ་པ་དག་ཀྱང་ཇི་ལྟ་ཇི་ལྟར་ཤིན་ཏུ་མི་དགེ་བའི་ལས་བྱས་པ་དེ་ལྟ་དེ་ལྟར་སྡུག་བསྔལ་ཤིན་ཏུ་མི་བཟད་པ་མྱོང་བར་འགྱུར་ཏེ། དེ་ནི་རྒྱུ་ཡིན་དེ་ནི་རྐྱེན་ཡིན་ནོ། །རལ་གྲིའི་གནོད་པ་གང་གིས་དེ་ཤིན་ཏུ་མི་བཟད་པ་སུམ་འགྱུར་དུ་འབྱུང་བར་འགྱུར་ཏེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་རྣམས་ཀྱི་འབྲས་བུ་དེ་ཡིན་པར་རིག་པར་བྱའོ། །སེམས་ཅན་དམྱལ་བ་པ་དེ་འཇིགས་པས་མིག་བློང་བ་རྣམ་པར་སྒྲ་འབྱིན་ཅིང་འཕགས་པ་མ་ཡིན་པའི་ལས་ཀྱིས་འཚེད་པ་ན་དྲིས་པ། ཀྱེ་གྲོགས་པོ་དག་ཁྱེད་ཅག་ལ་ནི་ཅི་ཞིག་གནོད། སྡུག་བསྔལ་དེ་དག་གིས་མངོན་པར་ཉམ་ཐག་པ་དེས་གཤིན་རྗེའི་མི་རྣམས་ལ་འདི་ལྟར་སྡུག་བསྔལ་ཚ་བ་དག་གིས་ཉམ་ཐག་པའི་སྡུག་བསྔལ་འདི་དག་ནི་སྡུག་བསྔལ་བ་མེད་ཀྱི་འདི་ལྟར་བདག་ཅག་ནི་སྐོམ་
པས་གདུངས་སོ་ཞེས་སྨྲས་པ་དང་། དེ་གཤིན་རྗེའི་མི་དེ་དག་གིས་ཐོས་ནས་འཇིགས་པའི་རླབས་ཞེས་བྱ་བ་ཟངས་དང་ཞ་ཉེ་བསྲེས་པ་རབ་ཏུ་བསྐོལ་བའི་རླབས་ཀྱིས་འགྲམ་གཉི་ག་གནོད་པ། ཆུ་བོའི་རླབས་ཀྱིས་སྒྲ་མཐོང་ཞིང་ཐོས་ན། འཇིགས་ཤིང་དངང་བ་དེ་ནས་ལྕགས་ཀྱི་སྣོད་ཀྱི་ནང་དུ་ཟངས་དང་ཞ་ཉེར་བསྲེས་ཏེ་བསྐོལ་བ་དེར་བླུགས་ནས་ཁྱེར་ཏེ་འོངས་ནས། འདི་ལྟར་ཀྱེ་གྲོགས་པོ་དག་འཐུང་ཞེས་སྨྲས་སོ། །དེ་སྐོམ་པས་གདུངས་པའི་བསམ་པས་བཏུང་བ་ཡིན་ནོ་སྙམ་ནས། དེ་ལག་པ་གཉི་གས་བླངས་ནས་ལས་ཀྱིས་བསྒྲིབས་པ་སྐོམ་པས་གདུངས་པ་འཐུང་བ་དང་དེའི་མཆུ་སྲེག་ཅིང་ལྕེ་སྲེག་པ་ནས་མགུལ་བ་དང་མིད་པའི་བར་ནས་རོ་སྨད་ཀྱི་བར་དུ་འབྱུང་སྟེ། དེ་སྡུག་བསྔལ་བཞི་འགྱུར་དུ་མྱོང་ངོ་། །བཞི་འགྱུར་དུ་བསྲེགས་པ་དེའི་ལས་ཀྱི་འབྲས་བུ་གང་ཡིན་སྙམ་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་ནི་སྡོམ་པ་བླངས་པས་འཐུངས་ཤིང་ཁྱིམ་གྱི་གནས་ནས་བྱུང་བ་སྡོམ་པ་བླངས་པའི་དགེ་སློང་མ་དག་ལ་བླུད་པ་དེའི་འབྲས་བུ་ནི་འདི་ཡིན་ཏེ། འདི་ལྟར་སེམས་ཅན་དམྱལ་བ་པ་དེ་ཟངས་དམར་པོ་རབ་ཏུ་བསྐོལ་བ་དེ་ལ་འཐུང་བའི་བསམ་པས་ལེན་པ་དེ་ཡིན་ནོ། །དེ་བཞིན་དུ་དགེ་སློང་ཚུལ་ཁྲིམས་དང་ལྡན་པས་བཏུང་བ་རུང་བ་ཡིན་ནོ་སྙམ་ནས་ཆང་དེ་ཡང་དུག་ཧ་ལ་ཧ་ལ་ལྟ་བུ་ཡིན་ཏེ། དགེ་སློང་བློ་ཞན་པ་དེས་སྦྱིན་པ་པོ་དང་སྦྱིན་བདག་དག་གི་ས་ལ་དབོ་བར་མ་ནུས་ཤིང་དགེ་འདུན་ལ་འཇིགས་ནས་འཐུངས་པ་དེའི་འབྲས་བུ་ནི་འདི་ཡིན་ཏེ། སེམས་ཅན་དམྱལ་བ་པའི་ཟངས་བཞུས་པ་དེ་ས་དག་ལ་དབོ་བར་མི་ནུས་ཏེ། ལས་དེའི་འབྲས་བུ་ནི་དེ་ཡིན་ནོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅུ་གསུམ་པ། དེ་ནས་ཡང་གཤིན་རྗེའི་མི་དེ་དག་གིས་སེམས་ཅན་དམྱལ་བ་པ་དེ་དག་ལ་དྲིས་པ་འདི་ལྟར་ཀྱེ་གྲོགས་པོ་དག་ཁྱེད་ལ་ཅི་ཞིག་གནོད། སེམས་ཅན་དམྱལ་བ་པ་དེ་དག་གིས་སྨྲས་པ། བཀྲེས་པས་རབ་ཁོ་ནར་གནོད་དེ་སྡུག་བསྔལ་འདི་ཡང་བདག་གི་གནོད་པ་དེ་དག་ཐམས་ཅད་ཟིལ་གྱིས་ནོན་ཏེ། བཀྲེས་པའི་སྡུག་བསྔལ་གྱིས་གནས་སོ། །དེ་
ནས་གཤིན་རྗེའི་མི་དག་ཆུ་བོའི་རླབས་འཇིགས་པ་ནས་ལྕགས་ཀྱི་ཐུ་ལུམ་ལྔ་འགྱུར་དུ་རབ་ཏུ་འབར་བ་བླངས་ཏེ། འོངས་པ་དང་། དེ་ནས་སེམས་ཅན་དམྱལ་བ་པ་ལས་ཀྱིས་རྣམ་པར་རྨོངས་པའི་བློ་གྲོས་ཅན་དེ་དག་ལྕགས་ཀྱི་ཐུ་ལུམ་དེ་དག་བཟའ་བ་ཡིན་ནོ་སྙམ་ནས་བླངས་ཏེ་ཟ་བ་དང་། སྔ་མ་བཞིན་དུ་དེའི་མཆུ་སྲེག་པ་ནས་རོ་སྨད་ཀྱི་བར་དུ་བྱུང་གིས་ཀྱང་འཆི་བར་མི་བྱེད་དོ། །དེའི་ལས་ངན་པར་བྱས་པའི་དབང་གིས་ལྕེ་དེ་ཡང་སླར་འབྱུང་བར་འགྱུར་ལ་པད་མའི་འདབ་མ་ལྟར་ཤིན་ཏུ་འཇམ་ཞིང་དེའི་ལུས་ཀྱང་འབྱུང་བར་འགྱུར་ཏེ། དེའི་ལས་ཀྱི་འབྲས་བུ་ནི་དེ་ཡིན་ནོ། །དེ་ནས་ཡང་དགེ་སློང་དེས་ཐོས་པ་ལས་བྱུང་བའི་ཤེས་པས་དེ་བཞིན་གཤེགས་པའི་སྒྲོན་མ་ལྟ་བུར་གྱུར་པ་ལ་གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དེའི་འབྲས་བུ་ནི་འདི་ཡིན་ཏེ། གང་ཚུལ་ཁྲིམས་འཆལ་པ་ལུད་བོང་ལྟར་སྤྱོད་པ་ཚུལ་ཁྲིམས་དང་ལྡན་ནོ་སྙམ་ནས་ཡུལ་འཁོར་གྱི་བསོད་སྙོམས་ལ་ཡོངས་སུ་སྤྱོད་པ་དེའི་འབྲས་བུ་ནི་དེ་ཡིན་པར་ཤེས་སོ། །དེ་ནས་ཡང་སེམས་ཅན་དམྱལ་བ་པ་དེ་གཤིན་རྗེའི་མི་དེ་དག་གིས་མཐོང་ནས་དེ་དག་གི་ལྕེ་བསྲེགས་ཤིང་ལས་ཀྱིས་རྣམ་པར་རྨོངས་པའི་བློ་གྲོས་ཅན་དེ་དག་གི་ལྕེ་དེ་ཁ་དེ་ནས་འབྱིན་པར་བྱེད་དེ། དེ་ཡང་བརྫུན་དུ་སྨྲ་བའི་རྒྱུ་དེས་པད་མའི་འདབ་མ་ལྟར་ཤིན་ཏུ་འཇམ་པ་རྒྱར་དཔག་ཚད་ཕྱེད་ཁེབས་སོ། །དེ་ནས་གཤིན་རྗེའི་མི་དེ་དག་གིས་ལྕེ་དེ་བཟུང་ནས་ལས་ཀྱིས་བསྒྲུབས་པའི་རྨོན་པ་བརྒྱ་ཕྲག་དུ་མ་རྣམས་ཀྱིས་ཉེས་པར་བྱས་པ་ལོག་པར་སྨྲ་བ་ངུ་ཞིང་སྐད་འབྱིན་བཞིན་དུ་ཤིན་ཏུ་རྨེད་དོ། །དེ་ལྟར་ལོ་འབུམ་ཕྲག་དུ་མ་ལོ་བྱེ་བ་བརྒྱ་ཕྲག་བགྲང་གིས་མི་ལང་བའི་བར་དུ་མྱོང་བར་འགྱུར་ཏེ། ལས་བྱས་ཤིང་བསགས་པ་དེ་དག་གི་འབྲས་བུ་རྣམ་པར་སྨིན་པ་དག་མ་མྱོང་བར་སེམས་ཅན་དམྱལ་བ་ལས་ཐར་པ་མེད་དོ། །དེ་ནས་གཤིན་རྗེའི་མི་དེ་དག་གིས་སེམས་ཅན་དམྱལ་བ་པ་དེ་དག་ལ་ཚིགས་སུ་བཅད་པ་འདི་དག་རྗེས་སུ་བསྟན་ཏོ། །ཇི་ལྟར་ཁྱོད་ལ་སྲོག་གཅེས་པ། །གཞན་ལའང་དེ་ལྟར་རབ་ཏུ་གཅེས། །སྡིག་པ་དག་གི་རྗེས་འབྲང་བ། །ཁྱོད་ཀྱིས་ཅི་ཕྱིར་སྲོག་གཅོད་བྱས། །མི་ཡིས་སྲོག་དང་བསྡོས་བྱས་ནས། །ནོར་ནི་གང་ཞིག་ཡང་དག་བསྒྲུབས། །
གཞན་གྱི་ནོར་ལ་འདོད་པས་སུ། །དེ་ནི་ཁྱོད་ཀྱིས་ཅི་ཕྱིར་འཕྲོག །ཀུན་གྱི་ནང་ན་སྡུག་པ་སྟེ། །སྲོག་པས་ཕོངས་པའི་ཆུང་མ་དེ། །ཁྱོད་ཀྱིས་འདོད་ཆགས་ཆགས་པ་ཡི། །སྟོབས་ཀྱིས་ཅི་ཡི་ཕྱིར་ན་དབྲོག །སྐྱེ་བོ་རྣམ་པར་རྨོངས་པའི་བློ། །ཆོས་ལ་མཆོག་ཏུ་སུན་འབྱིན་པ། །སྡིག་པའི་ཆང་ནི་འཐུང་བ་དག །ཁྱོད་ཀྱིས་ཅི་ཕྱིར་ཡོངས་མ་སྤངས། །དུག་ལྟ་བུ་ཡི་ལྕེ་ལས་བྱུང་། །གང་ཀུན་ཡིད་ཆེས་མི་བྱེད་པ། །བརྫུན་དུ་སྨྲ་བའི་སྡིག་པ་དག །ཁྱོད་ཀྱིས་ཅི་ཕྱིར་ཡོངས་མ་སྤངས། །དེ་ལྟར་སྡིག་པ་རྣམ་ལྔ་ཡིས། །གང་ཕྱིར་རྗེས་སུ་ཆགས་ལྡན་ཁྱོད། །དེ་ཕྱིར་མ་ངུ་ལེགས་པར་ཟོ། །སྨྲེ་སྔགས་དོན་མེད་ཅི་ཞིག་འདོན། །དུག་ལྟ་བུ་ཡི་སྡིག་པའི་ཆོས། །གང་ཕྱིར་ཡོངས་སུ་མ་སྤངས་པར། །དེ་ཕྱིར་འབར་བའི་ཕྲེང་བ་ཡིས། །དམྱལ་བ་འཁྲུགས་པ་ཆེན་པོ་འཐོབ། །དེ་ལྟར་སེམས་ཅན་དམྱལ་བ་པ་དེ་དག་ལ་གཤིན་རྗེའི་མི་དེ་རྣམས་ཀྱིས་རྗེས་སུ་བསྟན་པ་བསྟན་ནས། རང་གིས་བྱས་པའི་ལས་རྒྱའི་འབུར་ལྟ་བུར་གྱུར་པའི་གནོད་པ་དྲག་པ་སྣ་ཚོགས་དང་རྣམ་པ་དུ་མ་དག་གིས་རྡེག་ཅིང་གསོད་དེ་ཇི་ལྟར་མི་དགེ་བའི་རྣམ་པ་དུ་མ་ཀུན་ཏུ་སྤྱད་པ་དེ་ལྟར་སྡུག་བསྔལ་རྣམ་པ་དུ་མ་ཡང་སོ་སོར་མྱོང་བར་འགྱུར་ལ་རྒྱུ་དང་མཚུངས་པར་འབྲས་བུ་འབྱུང་ཞིང་ས་བོན་དང་མཚུངས་པར་འབྲས་བུ་འབྱུང་ངོ་། །འདི་ལྟར་སེམས་ཅན་དམྱལ་བ་ཆེན་པོ་རབ་ཏུ་ཚ་བ་དེར་མི་དགེ་བའི་ལས་བྱེད་པས་ཤིན་ཏུ་གང་བའི་འབྲས་བུ་མི་དགེ་བས་ཀྱང་ཤིན་ཏུ་གང་བ་དེ་ལྟ་བུ་ལ་སྤྱོད་དེ། དེ་ལྟར་ལོ་འབུམ་ཕྲག་དུ་མར་སྡིག་པའི་ལས་དགྲ་ལྟ་བུར་གྱུར་ཅིང་མི་ཕན་པར་འདོད་པ་དེས་སེམས་ཅན་དམྱལ་བ་པ་དེ་འཚེད་དོ། །དེ་གལ་ཏེ་དེ་ལས་ཐར་ནས་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་རྒྱུག་པ་དང་། དེས་རྒྱང་རིང་པོ་ནས་ཁྱིའི་ཚོགས་ཆེན་པོ་དག་ཁ་གདངས་ཤིང་སྤྲོ་བ་ཆེ་ལ་ཤིན་ཏུ་མགྱོགས་པ་སོ་རྡོ་རྗེ་ལྟར་རྣོ་ཞིང་ཤིན་ཏུ་འཇིགས་པའི་སྒྲ་འབྱིན་པའི་ཁྱི་དེ་ཁྱི་རྣམས་ཀྱིས་བསྐོར་ནས་རྒྱུག་ཅིང་འོང་བ་མཐོང་ངོ་། །མཐོང་ནས་སེམས་ཅན་དམྱལ་བ་པ་དེ་འབྲོས་པར་བརྩམས་པ་དང་། དེ་ནས་ཁྱི་དེ་དག་ཐམས་ཅད་ཀྱིས་བརྒྱུགས་ནས་དེ་བཟུང་ངོ་། །བཟུང་ནས་ཀྱང་མ་ལུས་པར་ཟ་སྟེ། རྒྱུས་པའི་ཚོགས་ནས་རྒྱུས་
པའི་ཚོགས་དང་། གནད་ཀྱི་བར་ནས་གནད་ཀྱི་བར་དང་། རུས་པའི་ཚིགས་ནས་རུས་པའི་ཚིགས་ཏེ། ཇི་ལྟར་དེ་ཡུངས་འབྲུ་ཙམ་ཡང་མ་ལུས་པ་དེ་ལྟར་ཡན་ལག་དང་ཉིང་ལག་ཐམས་ཅད་ཟའོ། །དེ་ནས་ཡང་འབྱུང་བར་འགྱུར་ཏེ། དེ་ལྟར་དེ་ཡུན་རིང་དུ་ཁྱི་དེ་རྣམས་ཀྱིས་ཟའོ། །དེའི་ལས་ཀྱི་འབྲས་བུ་དེ་གང་ཞིག་ཡིན་སྙམ་ན་གང་དེས་ཤ་སྟོན་བྱ་བའི་ཕྱིར་སེམས་ཅན་བསད་ཅིང་སྲོག་བཅད་པའི་འབྲས་བུ་ནི་དེ་ཡིན་ནོ། །མ་བྱིན་པར་ལེན་པའི་འབྲས་བུ་འབྱུང་བ་ཡང་འདི་ལྟར་སེམས་ཅན་དམྱལ་བ་པ་དེས་ལས་ཀྱིས་བྱས་པར་གྱུར་པའི་ནོར་རྫས་དག་མཐོང་བ་དང་། དེ་དག་ཀྱང་ལས་ལས་བྱུང་བའི་རྨོངས་པ་ཡིན་ཏེ། འདི་ལྟར་འདི་དག་ནི་བདག་གི་ཡིན་ན་ཕ་རོལ་དག་གིས་ཕྲོགས་པ་ལྟ་སྙམ་དུ་ཁོང་དུ་ཆུད་ནས་དེ་དེར་རྒྱུག་པ་དང་། དེ་གཤིན་རྗེའི་མི་གཞན་རྣམས་ཀྱིས་བཟུང་ངོ་། །བཟུང་ནས་ཀྱང་མཚོན་རྣམ་པར་གཅོད་པས་གནད་ནས་གནད་ཤིན་ཏུ་གཅོད་ཅིང་སྲེག་གོ །དེ་སེམས་ཅན་དམྱལ་བ་པ་གཞན་དག་གི་དྲུང་དུ་རྒྱུག་ལ། སེམས་ཅན་དམྱལ་བ་པ་དེ་མཐོང་ནས་དེ་དག་ཀྱང་གཤིན་རྗེའི་མི་དེ་རྣམས་ཀྱིས་བཟུང་སྟེ། རལ་གྲི་དང་། མདུང་ཐུང་དང་། མདའ་བོ་ཆེ་དང་། རྡོ་རབ་ཏུ་འབར་བ་རྣམས་ཀྱིས་རྣམ་པར་གཤེག་པར་བྱེད་དོ། །དེ་དག་ཀྱང་མ་བྱིན་པར་ལེན་པ་དེའི་འབྲས་བུས་ཇི་སྲིད་དུ་མ་བྱིན་པར་ལེན་པའི་འབྲས་བུ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་གཤེག་པར་བྱེད་དོ། །དེ་ཕྱིས་དེ་ལས་ཐར་བར་འགྱུར་ཏེ། འདོད་པས་ལོག་པར་གཡེམ་པས་བུད་མེད་བ་ཚྭའི་ཆུ་བོས་ཁྱེར་ཞིང་ཤིན་ཏུ་རྩུབ་རྩུབ་སྐད་སྨྲ་ལ་རླབས་ཀྱིས་བདས་པ་ན་བར་འགའ་ནི་སྟེང་དུ་འབྱུང་། བར་འགའ་ནི་འོག་ཏུ་འཇུག་ཅིང་སེམས་ཅན་དམྱལ་བ་པ་དེ་ལ་འདི་ལྟར་བདག་ལ་མགོན་མེད་པ་དེ་བ་ཚྭའི་ཆུ་བོའི་ཉོན་མོངས་པ་འདི་ལས་བདག་ཡོངས་སུ་སྐྱོབས་ཤིག་ཅེས་སྨྲ་བ་མཐོང་ངོ་། །དེ་ནས་སེམས་ཅན་དམྱལ་བ་པ་དེས་བུད་མེད་དེའི་སྒྲ་དེ་ཐོས་ནས་ལས་ཀྱིས་རྨོངས་པས་བ་ཚྭའི་ཆུ་བོ་དེར་འཇུག་གོ །དེར་ཞུགས་མ་ཐག་ཉིད་དུ་དེའི་ལུས་བ་ཚྭའི་ཆུ་བོའི་ཤུགས་ཀྱིས་ཇི་ལྟར་རུས་པ་ཡུངས་འབྲུ་ཙམ་ཡང་མ་ལུས་པ་དེ་ལྟར་ཁྱེར་རོ། །དེ་ནས་ཡང་འབྱུང་བར་འགྱུར་ཏེ། ཡང་བུད་མེད་དེ་ཉིད་རྒྱང་རིང་པོ་ནས་བ་ཚྭའི་ཆུ་བོ་དེ་ཉིད་ཀྱིས་
ཁྱེར་བ་ན་བདག་ལ་མགོན་མེད་ན་བདག་ཡོངས་སུ་སྐྱོབས་ཤིག་ཅེས་སྒྲ་འབྱིན་པ་མཐོང་ངོ་། །དེ་ནས་ཡང་བུད་མེད་དེ་ལ་དམིགས་པ་དེའི་དྲུང་ཉིད་དུ་རྒྱུག་གོ །དེ་ནས་བུད་མེད་དེ་དེ་ལ་འཇུ་སྟེ། དེའི་སེན་མོ་ལྕགས་ལས་བྱས་པའི་མཚོན་རྣོན་པོ་རབ་ཏུ་འབར་བ་ལྟ་བུ་དག་གིས་མི་དེ་ལ་འཇུས་པ་དང་། ཇི་ལྟར་དེའི་ལུས་ཡུངས་འབྲུ་ཙམ་ཡང་མ་ལུས་པར་དེ་ལྟར་རྣམ་པར་འཐུབ་བོ། །ལུས་ཀུན་ཏུ་ཁྲག་གིས་ཆག་ཆག་ལྟར་བཏབ་ཅིང་ལུས་རྒྱུས་པའི་དྲ་བ་ལུས་པ་འདོད་ཆགས་དག་གི་ཟིལ་གྱིས་ནོན་པ་ཡང་བུད་མེད་དེ་ཉིད་ཀྱི་ཕྱིར་རྒྱུག་སྟེ། དེ་བ་ཚྭའི་ཆུ་བོ་དེའི་ནང་དུ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ལ། ཐར་ནས་དེ་ནས་ཡང་འབྱུང་བར་འགྱུར་ཏེ། བཀྲེས་པས་ཡོངས་སུ་གདུངས་པའི་ལུས་དེ་གར་བབ་བབ་ཏུ་ཡོངས་སུ་རྒྱུག་གོ །དེ་ཕྱིས་ཆུ་བསིལ་བ་འདོད་པའི་ཕྱིར་ཆུ་བོའི་དངོ་རབ་ཏུ་དང་བ་དེར་རྒྱུག་གོ །དེ་གང་གི་ཚེ་ཕྱིན་པ་དང་། ཆུ་བོའི་དངོ་དེ་ཡང་ཞ་ཉེ་རབ་ཏུ་བསྐོལ་བ་འཇིགས་འཇིགས་ལྟར་འདུག་པ་ཆེན་པོ་ཡིན་ཞིང་ཐམས་ཅད་དུ་དུག་རབ་ཏུ་དྲག་པ་དང་། སྦྲུལ་རྣམས་ཀྱིས་ཁེབས་ཏེ་སྐོམ་པས་གདུངས་པ་དེ་དུག་དང་སྦྲུལ་དེ་རྣམས་དང་ལྷན་ཅིག་འདྲེས་པའི་ཞ་ཉེ་དེ་ལ་འཐུང་ངོ་། །དེ་དག་ཀྱང་ལས་ལས་བྱུང་བ་ཡིན་ཏེ། སྦྲུལ་ཕྲ་མོར་གྱུར་པའི་མགོ་མི་དེ་ལ་རབ་ཏུ་འཇུག་གོ །གང་གི་ཚེ་སེམས་ཅན་དམྱལ་བ་པའི་ལྟོ་དེར་ཞུགས་པར་གྱུར་པ་དེའི་ཚེ། ལུས་ཆེན་པོར་འགྱུར་ཏེ། དེ་ལུས་དེའི་ནང་ན་རྒྱུ་མ་དང་གཉེ་མ་ལ་སོགས་པ་ཐམས་ཅད་འཆའོ། །འཇིབ་བོ། །ཟའོ། །ཆང་འཐུང་བའི་སྡོམ་པ་དེ་ལས་འདའ་བ་ལས་ཀྱིས་རྨོངས་པ་དེ་ལོ་འབུམ་ཕྲག་དུ་མར་དེ་ལ་འཐུང་ཞིང་ཞ་ཉེ་དང་སྦྲུལ་དུ་འདྲེས་པ་དེས་ཀྱང་སྲེག་གོ །གསོད་དོ། །ཤི་ཞིང་ཤི་ནས་ཡང་འབྱུང་བར་འགྱུར་ལ། དེའི་ཆང་གི་སྡོམ་པ་ལས་འདས་པའི་ཉེས་པས་ལྕེ་ཡང་སྦྲུལ་དེ་རྣམས་ཀྱིས་ཟ་བར་བྱེད་དེ། དེ་ནི་བརྫུན་དུ་སྨྲ་བའི་འབྲས་བུ་ཡིན་ནོ། །དེ་ལྟར་དེ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་སྡུག་བསྔལ་མྱོང་བར་འགྱུར་རོ། །ཡང་དེ་ནས་ཐར་ནས་གར་
བབ་བབ་ཏུ་འབྲོས་སོ། །བྱམས་པར་མི་ལྟ་བའི་འབྲས་བུ་ནི་འདི་ལྟར་སེམས་ཅན་དམྱལ་བ་པ་དེའི་ལས་ལས་བྱུང་བའི་སེམས་ཅན་གྱིས་སྨྲས་པ། འདི་ལྟར་ཁྱོད་འདིར་རྒྱུ་མེད་པར་ཅི་སྟེ་འཚེད་གནས་འདི་ལས་གཞན་དག་ཀྱང་ཡོད་ལ་དེ་ངས་ཁྱོད་ལ་བསྟན་པར་བྱ་སྟེ། དེར་ཁྱོད་བདེ་བ་འཐོབ་པར་འགྱུར་རོ། །དེ་ནས་མི་དེས་སེམས་ཅན་དམྱལ་བ་པ་དེ་ཁྲིད་དེ། འཁོར་རྣམས་ཀྱི་ནང་དུ་འཇུག་པར་བྱེད་དོ། །དེར་ཡང་མི་དེས་སེམས་ཅན་དམྱལ་བ་པ་དེ་དག་ལ་གང་གནོད་པ་ཐ་དད་པ་དེ་དག་མྱོང་བར་བྱེད་དེ། འདི་ལྟ་སྟེ། ཕྱོགས་ཐམས་ཅད་རབ་ཏུ་སྲེག་པ་གང་དུ་གནོད་པ་མང་པོ་དག་གི་ཕྱོགས་ཐམས་ཅད་རབ་ཏུ་འབར་ཞིང་སྲེག་གོ །ལུས་ཆེན་པོ་ཤིན་ཏུ་སྒྲ་འབྱིན་པ་འཇིགས་འཇིགས་ལྟར་འདུག་པ་གང་དུ་དེའི་ལུས་དཔག་ཚད་བཅུ་ཡོད་ཅིང་ཤིན་ཏུ་གཞོན་པ་འཚེད་དོ། །མེ་སྤྱི་གཙུག་ལྟ་བུ་གང་དུ་མེ་ལྕེ་ལས་བྱུང་བའི་སྲེག་པ་གཞན་ཐམས་ཅད་དང་མཚུངས་པས་འཚེད་དོ། །མེ་མདག་བྱེ་མ་ལྟ་བུའི་ཆར་རྟག་ཏུ་འབབ་པའི་སྒོ་གང་དུ་ཆར་རབ་ཏུ་འབབ་པ་ལྟར་བྱེ་མའི་ཆར་རབ་ཏུ་འབར་བ་འབབ་པའི་ནང་ན་འདུག་པ་འཚེད་དོ། །མེ་མདག་གང་དུ་བུས་པའི་ལུས་ལྟ་བུ་འཇུག་པ། སེམས་ཅན་དམྱལ་བ་པའི་མདག་མེས་འཚེད་དོ། །སེམས་ཅན་དམྱལ་བ་ཨ་ལ་ལ་ཟེར་བར་ཕན་ཚུན་གྱི་ཡན་ལག་དང་ཉིང་ལག་ཐམས་ཅད་ཕན་ཚུན་གཅད་པའི་སྡུག་བསྔལ་མྱོང་ངོ་། །ཤར་གྱུར་པ་ཐམས་ཅད་སྡུག་བསྔལ་བས་འཚེད་དོ། །དེར་གང་གཞན་ཡང་སོ་སོར་འཇིགས་ཤིང་བག་ཚ་བ། ཁྱི་དང་། སེང་གེ་དང་། ཕག་རྒོད་དང་། ཁྭ་དང་། བྱ་རྒོད་དང་། སྦྲུལ་དག་གིས་དེ་རྣམ་པ་ཐམས་ཅད་དུ་སྡུག་བསྔལ་བར་བྱེད་དོ། །ཆུ་བོ་རབ་མེད་རབ་ཏུ་ཚ་བར་ཡང་འཚེད་དོ། །སྲེག་གོ །བ་ཚྭ་དང་། ཟངས་དམར་པོ་དང་། ཞ་ཉེ་རབ་ཏུ་བསྐོལ་བའི་ཆུ་བོ་གང་དུ་བརྒྱའམ་ཡང་ན་སྟོང་དུ་རབ་ཏུ་དེད་ཅིང་དེ་དག་ཏུ་ཡང་འཚེད་དོ། །རྟག་ཏུ་མུན་པ་མུན་ནག་ལས་བྱུང་བའི་མེའི་གནོད་པ་རྣམ་པ་སྣ་ཚོགས་དག་གིས་ཀྱང་འཚེད་དོ། །སེམས་ཅན་དམྱལ་བ་གནོད་པའི་ཕྲེང་བར་ཡང་འཚེད་དོ། །མགོ་གང་ལ་འཁོར་ལོ་རབ་ཏུ་འབར་བ་འཁོར་ཞིང་ཡན་ལག་དང་ཉིང་ལག་ཐམས་ཅད་ཀྱང་སོག་ལེ་དག་གིས་རྣམ་པར་གཤེག་པར་བྱེད་དོ། །
དེ་ལས་ཐར་ནས་སྲད་བུའི་རྒྱུད་འདྲེ་བ་དུད་པ་ལྟར་འཁྲིགས་པ་དེར་ཡང་གནོད་པར་བྱེད་དེ། གང་དུ་ཀུན་ནས་ཐིག་སྐུད་རབ་ཏུ་འབར་བ་དག་གིས་བརྒྱའམ་ཡང་ན་སྟོང་དུ་བཏབ་བཏབ་ནས་གཤིན་རྗེའི་མི་དག་གིས་སེམས་ཅན་དམྱལ་བ་པ་དེ་དག་མཚོན་ཆ་ཧུ་ལུ་རབ་ཏུ་འབར་བ་རྣམས་ཀྱིས་གཅོད་པར་བྱེད་དོ། །དེ་ལས་རྣམ་པར་ཐར་ནས་སེམས་ཅན་དམྱལ་བ་སྐྲ་ཤད་འཛིངས་པ་དང་། བྱ་ཁྭ་ཡོད་པར་གནོད་པ་བྱེད་དེ། གང་དུ་ལུས་ཚལ་ཤིང་བསྲེགས་པ་ལྟ་བུའི་རང་གི་ལུས་ལས་བྱུང་བའི་མེས་སྲེག་གོ །གཅིག་ལ་གཅིག་ཀྱང་སེམས་ཅན་དམྱལ་བ་པའི་ལོ་འབུམ་ཕྲག་དུ་མར་མཚོན་ཆ་ཆར་ལྟར་འབབ་པས་གཅིག་ལ་གཅིག་འཇོག་གོ །དེ་ལས་ཐར་ནས་ཀྱང་སེམས་ཅན་དམྱལ་བ་སྙིང་རྗེ་རྗེ་སྐད་སྒྲ་འབྱིན་པར་འཚེད་དེ། གང་དུ་གནོད་པའི་རྣམ་པ་འདི་ལྟ་བུས་ཉམ་ཐག་ཅིང་སྒྲ་འབྱིན་པར་གྱུར་པ་ནི་གང་སེམས་ཅན་དམྱལ་བ་གཞན་ཐམས་ཅད་ན་ཡང་རྣམ་པ་དེ་ལྟ་བུ་མེད་དོ། །དེ་ལས་ཐར་ནས་ཀྱང་སེམས་ཅན་དམྱལ་བ་སྙིང་རྗེ་ཆེན་པོར་སྐྱེ་བར་འགྱུར་ཏེ། དེར་ཆོས་ངན་པ་གང་དག་ཆོས་སུ་སྟོན་ཅིང་ལྟ་བ་ངན་པ་རབ་ཏུ་སྟོན་པ་དེ་དེར་བུ་སྡུག་པའི་གཟུགས་དེ་དག་སྲེག་ཅིང་བསྐུལ་བ་ན་དེ་ཡོངས་སུ་སྨྲེ་སྔགས་འདོན་ཏེ། འདི་ལྟར་ཕ་དང་སྤུན་དང་བུ་དང་མཛའ་བ་མགོན་མེད་ན། བདག་ལ་ཡོངས་སུ་སྐྱོབས་ཤིག་ཅེས་དེའི་ལག་པ་གཉི་ག་སྟོད་ནས་ཤིན་ཏུ་སྙིང་རྗེ་རྗེ་སྐད་འབྱིན་པ་མཐོང་ངོ་། །དེ་མཐོང་ནས་མྱ་ངན་གྱི་མེ་སྲེག་པའི་བུད་ཤིང་གིས་སྦར་བ་རྣམ་པ་དེ་ལྟ་བུ་འབྱུང་སྟེ། གང་ཁྱད་པར་ནི་སེམས་ཅན་དམྱལ་བ་པའི་མེ་དེ་ཁ་བ་དང་མཚུངས་སོ། །དེ་ཤིན་ཏུ་ཚ་བ་རྣམ་པ་དེ་ལྟ་བུ་གཉིས་ཀྱིས་སྲེག་ཅིང་ཤིན་ཏུ་ཚ་བའི་སྒྲ་སྐད་འབྱིན་པ་ན་གཤིན་རྗེའི་མིས་རྗེས་སུ་བསྟན་པའི་ཚིགས་སུ་བཅད་པ་སྨྲས་པ། སྲེད་པའི་མེ་འདིའི་དྲུང་ན་ནི། །འབར་བ་དག་ནི་གྲང་ཞེས་བྱ། །དམྱལ་བར་དམྱལ་བ་པ་ཡི་མེ། །ཁམས་གསུམ་དག་ནི་སྲེག་པའི་མེ། །སེམས་ཅན་དམྱལ་བར་གང་འབྱུང་བ། །མེ་འདི་ཆུང་བར་གྱུར་པ་ཡིན། །སྲེག་པའི་རྒྱུ་ལས་བྱུང་བ་ཡི། །མེ་འབར་བ་ནི་མང་པོར་མཆེད། །སེམས་ཅན་དམྱལ་བ་སྡིག་སྤྱད་པ། །ལས་ཟད་ནས་ནི་རྣམ་པར་གྲོལ། །སྲེད་པའི་དབང་དུ་སོང་བའི་མེ། །ཁམས་གསུམ་དག་ཏུ་སྲེག་པར་
བྱེད། །འཁོར་བ་ཐོག་མ་མེད་དུས་ནས། །སྲེད་པའི་མེ་ཡི་རྗེས་འབྲང་བ། །སེམས་ཅན་དམྱལ་བ་སྲེད་པའི་མེ། །ཅི་ཕྱིར་དམྱལ་བའི་མེ་མི་འབྱུང་། །སེམས་ཅན་དམྱལ་བ་པ་ཡི་མེ། །ལུས་ནི་ཤིན་ཏུ་སྲེག་པར་བྱེད། །སྲེད་པའི་མེ་ཡིས་མི་རྣམས་ཀྱི། །ལུས་ཡིད་ཤིན་ཏུ་སྲེག་པར་བྱེད། །དེ་ལྟ་བས་ན་སྲེད་རྒྱུ་ལས། །བྱུང་བའི་མེ་ནི་ཁྱད་པར་ཆེ། །དམྱལ་བ་པ་ཡི་ཁ་བ་འདྲ། །སྲེད་པའི་མེ་ནི་ཁྱབ་པར་དྲན། །སྲེད་འབྲང་རྒྱུ་ནི་གསུམ་ལས་བྱུང་། །ལས་གསུམ་དག་ནི་ཡོངས་སུ་བསྟན། །དུས་གསུམ་འབྱུང་བར་ཤེས་པར་བྱ། །དེ་ལྟར་སྲེད་མེ་གཞན་དུ་མིན། །འདོད་ཆགས་མེས་ནི་མཐོ་རིས་སྲེག །ཞེ་སྡང་མེས་ནི་དུད་འགྲོ་དྲན། །གཏི་མུག་མེས་ནི་དམྱལ་བར་སྲེག །སྲེད་པའི་མེས་ནི་ཀུན་དུ་གནས། །དེ་ལྟར་སྲེད་པའི་མེ་ཡིས་སུ། །གནས་གསུམ་ཐམས་ཅད་རབ་འབར་བར། །མཐོང་ནས་ཆོས་ནི་མ་སྤྱད་པ། །དེ་རིང་ཅི་ཞིག་ཡོངས་སུ་གདུངས། །དེ་ལྟར་སེམས་ཅན་དམྱལ་བ་སྙིང་རྗེ་ཆེན་པོར་སེམས་ཅན་དམྱལ་བ་པ་གཤིན་རྗེའི་མི་དེ་རྣམས་ཀྱིས་རྗེས་སུ་བསྟན་ནས་སྡུག་བསྔལ་དང་གནོད་པ་སྣ་ཚོགས་དག་བྱེད་དོ། །དེ་དེ་ལས་ཐར་ནས་ཀྱང་སེམས་ཅན་དམྱལ་བ་ཚ་བ་པའི་སར་འཚེད་དོ། །དེར་ཡང་སེམས་ཅན་དམྱལ་བ་པ་དག་གི་ལུས་ཀུན་ནས་བསྲེགས་ནས། ལུས་ཤིང་ཀིང་ཤུ་ཀ་ལྟར་བྱས་སོ། །དེ་ལས་ཐར་ནས་ཀྱང་སེམས་ཅན་དམྱལ་བ་ཤིང་སྐམ་ལྟར་འཇིགས་པར་འཚེད་དེ། དེ་ལྟར་ལོག་པར་ལྟ་བས་ཟིན་པའི་དགེ་སློང་མ་སུན་འབྱིན་པ་དེ་འཁོར་བཅུ་དྲུག་ཏུ་འཚེད་དོ། །དེ་དེར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དུས་དཔག་ཏུ་མེད་པར་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་དགེ་སློང་མ་སུན་ཕྱུང་བའི་ལས་དེའི་རྒྱུ་དང་འཐུན་པའི་འབྲས་བུས་ཚེ་རབས་སྟོང་ཕྲག་དུ་མར་ཡི་དགས་དང་དུད་འགྲོ་དག་ཏུ་འཚེད་པར་འགྱུར་ཏེ། བཀྲེས་པ་དང་། སྐོམ་པས་གཅིག་ལ་གཅིག་ཟ་བ་དང་། ལུས་བརྒྱ་ཕྲག་སྟོང་
དུ་དུད་འགྲོ་དག་གིས་ཟ་བར་འགྱུར། ལོག་པར་ལྟ་བ་དགེ་སློང་མ་སུན་ཕྱུང་བ་དེ་འོན་ཀྱང་གལ་ཏེ་དེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་ཚེ་རབས་ལྔ་སྟོང་དུ་མིར་གྱུར་པ་ཟ་མར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཕྱོགས་ཐམས་ཅད་རབ་ཏུ་སྲེག་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ནི་སྔ་མ་བཞིན་ནོ། །དགེ་བསྙེན་མ་བསླབ་པའི་གཞི་ལྔ་ཡོད་པ་སུན་ཕྱུང་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཕྱོགས་ཐམས་ཅད་རབ་ཏུ་སྲེག་པར་སྐྱེ་བར་འགྱུར་རོ། །དེར་གནོད་པ་འདི་དག་འབྱུང་བར་འགྱུར་ཏེ། འདི་ལྟ་སྟེ། སེམས་ཅན་དམྱལ་བ་དེ་ཇི་ལྟར་ཁབ་ཀྱི་བུ་ག་ཙམ་ཡང་མེད་པ་དེ་ལྟར་ཀུན་ནས་རྟག་ཏུ་ནམ་མཁའ་ལ་ཡང་རབ་ཏུ་འབར་བར་འགྱུར་བ་དེར་སྔར་དེའི་ལག་པ་མེའི་ནང་དུ་འཇུག་སྟེ། ངུ་སྐད་འབྱིན་པ་ན་མེ་ཚ་ཞིང་རྩུབ་པ་ཤིན་ཏུ་དྲག་པའི་སྟོབས་ཀྱིས་ཇི་ལྟར་དེའི་ཐལ་བ་ཡང་མི་མངོན་པ་དེ་ལྟར་སྲེག་གོ །དེ་ནས་ཡང་འབྱུང་བར་འགྱུར་ཏེ། ལོ་འབུམ་ཕྲག་དུ་མར་སྲེག་གོ །དེ་ལས་ཐར་ནས་མགོན་འདོད་པ། སྐྱབས་འདོད་པ། དེ་གར་བབ་བབ་ཏུ་འབྲོས་པ་དང་། གཤིན་རྗེའི་མི་རྣམས་ཀྱིས་བཟུང་ངོ་། །བཟུང་ནས་ཀྱང་ལྕགས་ཀྱི་ཐག་པ་ཀུན་ནས་རབ་ཏུ་འབར་བ་དག་གིས་རྐང་མཐིལ་གྱི་བར་ནས་མགོའི་བར་དེ་དག་འཆིང་སྟེ། དེའི་ཁྲག་དེ་དག་ཐམས་ཅད་དེའི་མགོ་ལ་བསྡུས་སོ། །དེ་ཕྱིས་སེམས་ཅན་དམྱལ་བ་པ་དེ་དག་ལ་གཟུགས་པའི་ཕུར་པ་བླངས་ཏེ་མགོར་བཙུགས་ནས་ཤུགས་ཀྱིས་བཏབ་སྟེ། འདི་
ལྟར་ཕུར་པ་དེ་མགུལ་པར་བྱུང་ངོ་། །བྱུང་ནས་ཀྱང་ཤུགས་ཀྱིས་ཕྱུང་བ་དང་། དེའི་ཁྲག་དེ་ཇི་ལྟར་སེམས་ཅན་དམྱལ་བ་པའི་མགོ་ལས་ཟངས་བསྐོལ་བའི་ཁྲག་འབྱུང་བ་དེ་དང་ཆུང་ཟད་ཀྱང་ཁྱད་པར་མེད་པ་དེ་ལྟར་ཚ་བ་འབྱུང་ངོ་། །དེ་རང་གི་ལུས་ལས་བྱུང་བའི་ཁྲག་དེས་ལོ་འབུམ་ཕྲག་དུ་མར་འཁྲུའོ། །སྲེག་གོ །འཆིའོ། །དེའི་ལས་ཀྱི་མཐུས་འབྱུང་བར་འགྱུར་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ། སྡིག་པའི་ལས་དེས་སྲེག་གོ །འཚེད་དོ། །དེ་ཕྱིས་སེམས་ཅན་དམྱལ་བ་པ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ལོ་འབུམ་ཕྲག་དུ་མར་ཡི་དགས་དང་དུད་འགྲོ་དག་ཏུ་སྐྱེ་བར་འགྱུར་ཏེ། དེར་ཡི་དགས་བཀྲེས་པ་དང་སྐོམ་པའི་སྡུག་བསྔལ་དག་མྱོང་བར་འགྱུར་རོ། །དུད་འགྲོ་རྣམས་སུ་གཅིག་ལ་གཅིག་ལུས་བརྒྱ་ཕྲག་དུ་མ་དག་ཟ་ཞིང་ཕ་རོལ་དག་གིས་རྣམ་པར་འཇིག་པར་འགྱུར་རོ། །དེ་སྡུག་བསྔལ་དེ་དག་མྱོང་ནས་གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་དབུལ་ཞིང་ནད་བུ་ཅན་དང་། ཕ་རོལ་གྱིས་གནོད་པ་དང་། སེམས་གཡེངས་པ་དང་། ཚེ་ཐུང་བར་འགྱུར་ཞིང་ཚེ་རབས་བཞི་བརྒྱར་ཟ་མར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ལུས་ཆེན་པོ་ཤིན་ཏུ་སྒྲ་འབྱིན་འཇིགས་འཇིགས་ལྟར་འདུག་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ནི་སྔ་མ་བཞིན་ནོ། །གང་གིས་ཙེ་ལུ་མ་རབ་ཏུ་སུན་འབྱིན་པར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་
སེམས་ཅན་དམྱལ་བ་ལུས་ཆེན་པོ་ཤིན་ཏུ་སྒྲ་འབྱིན་འཇིགས་འཇིགས་ལྟར་འདུག་པར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་འབྱུང་བ་བསྡུས་པ་དེ་དག་ཐམས་ཅད་སེམས་ཅན་དམྱལ་བ་ལུས་ཆེན་པོ་ཤིན་ཏུ་སྒྲ་འབྱིན་འཇིགས་འཇིགས་ལྟར་འདུག་པར་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་གང་གི་ལུས་དཔག་ཚད་ཙམ་ལ་མར་སར་ལྟར་ཤིན་ཏུ་སྙི་བའི་ལུས་དེ་དེ་དག་གིས་བཟུང་ནས་སྤུ་འབྱིན་པའི་ཕྲ་སྐམ་གྱིས་ཇི་ལྟར་ཡུངས་ཀར་གྱི་འབྲུ་ཙམ་དུ་དེ་ལྟར་སེན་མོ་ལ་སོགས་པ་ནས་རྐང་པའི་བར་དག་གཅོད་པར་བྱེད་དོ། །སྡུག་བསྔལ་གྱིས་ཉམ་ཐག་པ་དེ་ཇི་ལྟར་སྒྲ་སེམས་ཅན་དམྱལ་བ་པ་གཞན་དག་གི་ཐོས་ནས་ཀྱང་སྙིང་ཟགས་ཤིང་རྡོལ་བ་དེ་ལྟར་སྒྲ་སྐད་འབྱིན་ཏོ། །ཐོག་མ་མེད་པའི་དུས་ནས་དེའི་ལས་ཀྱི་འབྲས་བུས་བསླུས་ཤིང་སེམས་ཀྱི་དགྲས་ཡོངས་སུ་བསླུས་པའི་སེམས་ཅན་དམྱལ་བ་པ་ཤིན་ཏུ་སྡུག་བསྔལ་བས་ཉམ་ཐག་པ་དེ་དག་ཉིད་མཐོང་ནས་འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པའི་ཚིགས་སུ་བཅད་པ་སྨྲས་པ། འདོད་པ་ཡང་དག་སྟོན་པའི་ཚིག །སྙན་ཅིང་ཡིད་འོང་སྣ་ཚོགས་དག །སྨྲས་པ་སྡིག་པ་ཆེན་པོ་ཡིན། །དེ་ཡི་འབྲས་བུ་འདིར་འོངས་སོ། །འདོད་པར་གྱུར་པའི་ཚིག་སྨྲ་བས། །སྤུ་གྲི་རྣོན་པོར་བརྡར་བ་ཡི། །སོ་ཡིས་བདག་རང་བདག་ཉིད་ཀྱི། །ལྕེ་ནི་ཡང་དག་བཅད་ཀྱང་སླ། །སེམས་ཅན་འདོད་ཆགས་ཀྱིས་བསླུས་ཤིང་། །ཞེ་སྡང་གིས་ནི་ཡོངས་གདུངས་ལ། །གཏི་མུག་དབང་དུ་སོང་བ་དག །ཚིག་མི་སྙན་པར་སྨྲ་བར་བྱེད། །འདོད་ཆགས་ཆུང་བས་ཟིན་པ་གང་། །ཉེས་པར་བྱེད་པ་མང་དུ་བྱེད། །རྨོངས་པ་གཏི་མུག་དབང་སོང་སྟེ། །སྡུག་བསྔལ་ལས་ནི་སྡུག་བསྔལ་འཐོབ། །འདོད་པའི་དགའ་བ་ཡུད་ཙམ་སྟེ། །དེ་ནི་བདེན་མེད་བརྟག་པའང་མིན། །འགྱུར་བ་ཤིན་ཏུ་མི་བཟད་དེ། །དེ་ལྟས་དེ་ནི་ཡོངས་སུ་སྤོངས། །འདོད་ཆགས་ཟིལ་གྱིས་ནོན་པའི་མི། །སེམས་ཅན་དམྱལ་བའི་གནས་སུ་གནས། །གང་དག་འདོད་ཆགས་དབང་མི་འགྲོ། །དེ་དག་དམྱལ་
བའི་འཇིགས་པ་མེད། །དེ་ནི་སྡིག་པའི་ལས་བྱས་པས། །ངན་སོང་ངེས་པར་མྱོང་བ་ཡིན། །བློང་ཞིང་དམན་པ་སྙིང་རྗེའི་སྐད། །ཅི་ཞིག་དེ་རིང་ཡོངས་སུ་གདུང་། །སེམས་ཅན་དམྱལ་བ་སྡིག་བྱེད་པ། །ལས་ཟད་ནས་ནི་ཐར་འགྱུར་གྱི། །རྣམ་པར་སྒྲ་འབྱིན་མང་འགྱུར་བ། །ཐར་པ་དག་ཏུ་ག་ལ་འགྱུར། །མི་འདོད་ངན་འགྲོར་འགྲོ་བའི་ལས། །བྱས་པས་འདོད་ཆགས་དབང་དུ་གནས། །རྨོངས་པ་གང་ཞིག་སྨྲེ་སྔགས་འདོན། །དེ་ནི་དོན་མེད་ཡོངས་སུ་འདོན། །གང་ཞིག་མ་འོངས་འབྲས་བུ་ཤེས། །ད་ལྟར་བྱུང་བའི་དགེ་ལ་དགའ། །དེ་ནི་དམྱལ་བར་སྐད་མི་འབྱིན། །ཁྱོད་ནི་ཇི་ལྟར་རྗེས་སུ་གདུང་། །དེ་ལྟར་ཡང་དེ་ལ་སྟོན་པ་དང་། ལས་བྱེད་པ་ངན་པ་བྱས་པ་དེ་གཤིན་རྗེའི་མི་དེ་རྣམས་ཀྱིས་རྗེས་སུ་བསྟན་ནས་ཀྱང་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་གནོད་པ་རྣམ་པ་ཐ་དད་པ་སྣ་ཚོགས་དུ་མ་དག་གིས་གནོད་པར་བྱེད་དོ། །དེ་སེམས་ཅན་དམྱལ་བ་དེ་ལས་ཐར་ནས་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་སྟོང་ཕྲག་དུ་མར་དུད་འགྲོར་སྐྱེ་བར་འགྱུར། གལ་ཏེ་བརྒྱ་ལ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་ཚེ་ཐུང་ཞིང་དབུལ་བ་དང་། སེམས་གཡེངས་པ་དང་། ངག་སྐྱེ་བོ་ཀུན་གྱི་ཡིད་མི་ཆེས་པར་འགྱུར་ཞིང་ཚེ་རབས་བཞི་སྟོང་དུ་ཟ་མར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན་དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་མེ་སྤྱི་གཙུག་ལྟ་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་
པས་འགྱུར་རོ། །གང་གིས་ཞེ་སྡང་བ་མེད་ཅིང་སྤྱོད་པ་དང་ལྡན་པའི་བུ་མོའི་སྐྱེ་གནས་མ་ཡིན་པའི་སྒོ་སུན་ཕྱུང་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་མེ་སྤྱི་གཙུག་ལྟ་བུར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཆེན་པོ་ཡང་སོས་ལ་སོགས་པའི་སྡུག་བསྔལ་དེ་དག་ཐམས་ཅད་བཅུ་འགྱུར་དུ་འབྱུང་བའི་སྟེང་དུ་ཁྱད་པར་དུ་འགྱུར་བ་ནི་སེམས་ཅན་དམྱལ་བ་མེ་སྤྱི་གཙུག་ལྟ་བུ་དེ་སྤྱི་གཙུག་འདྲ་ལ་སྲོག་ཆགས་སྤྱི་གཙུག་ཅེས་བྱ་བ་བྱད་གཟུགས་གཞུ་རྒྱུད་ལྟར་རིང་ཞིང་དུག་ཤིན་ཏུ་དྲག་པ་ཡོད་ལ་མཐོང་ན་ཡང་ཤིན་ཏུ་དྲག་པ་གནས་སོ། །དེ་ནས་སེམས་ཅན་དམྱལ་བ་པ་དེ། གཤིན་རྗེའི་མི་རྣམས་ཀྱིས་བཟུང་ནས་ལྕགས་ཀྱི་ས་གཞི་རབ་ཏུ་འབར་བར་ཕོར་བུའི་ནང་དུ་ལུས་ཐམས་ཅད་དང་། ལག་པ་དང་། རྐང་པ་ཐམས་ཅད་ནུབ་པར་བཅུག་ཅིང་མེ་ཤིན་ཏུ་ཚ་བས་རྒྱབ་སྲེག་པ་ན་ངུ་སྐད་འབྱིན་ཅིང་ཆོ་ངེས་འདེབས་སོ། །དེ་ནས་གཤིན་རྗེའི་མི་དེ་རྣམས་ཀྱིས་སྲོག་ཆགས་མེ་སྤྱི་གཙུག་ལྟ་བུ་ཞེས་བྱ་བ་དེ་དག་བླངས་ནས་སེམས་ཅན་དམྱལ་བ་པ་དེ་རྣམས་ཀྱི་རྐུབ་ཏུ་འཇུག་པར་བྱེད་དོ། །དེ་དག་གི་ལུས་གཞུ་རྒྱུད་ལྟ་བུ་ཡིན་ཞིང་དུག་རྣོན་པོ་ཤིན་ཏུ་མཁྲང་ལ་ཚ་བ་ཡོད་པའི་ལུས་ཅན་དེ་འཇུག་པར་བྱེད་དོ། །དེ་རབ་ཏུ་འཇུག་པ་ན་རེག་པ་མེ་ལྟ་བུར་ཚ་སྟེ། སེམས་ཅན་དམྱལ་བ་པ་དེ་དག་ཐོག་མ་ཉིད་དུ་དེའི་རྐུབ་སྲེག་པར་བྱེད་དོ། །བསྲེགས་ནས་ཟའོ། །དེ་ཟོས་ནས་ནང་དུ་འཇུག་སྟེ་ལོང་ཀ་སྲེག་གོ །བསྲེགས་ནས་ཀྱང་ཟའོ། །ལོང་ཀ་ཟོས་ནས་ལྷག་མ་མེད་པར་བྱས་ཏེ། གྱེན་དུ་བྱུང་ནས་ཕོ་བ་སྲེག་ཅིང་ཟའོ། །མཆེར་པ་སྲེག་སྟེ་དེ་བསྲེགས་ནས་ཟའོ། །དེ་ཡང་ཟོས་ནས་རྒྱུ་མ་དང་ཕོ་བའི་གནས་ག་ལ་བ་དེར་འགྲོའོ། །སོང་ནས་ཕོ་བའི་གནས་དང་། གཞན་རྒྱུ་མ་དང་གཉེ་མ་དག་འཆའ་ཞིང་ཟའོ། །ཐམས་ཅད་ལྷག་མ་མེད་པར་བསྲེགས་ཤིང་ཟོས་པ་དང་སེམས་ཅན་དམྱལ་བ་པ་དེའི་རུས་པ་སེང་སེང་པོར་བྱས་ཀྱང་སྲོག་དང་ནི་མི་འབྲལ་ལོ། །དེ་ཕྱིས་མིད་པ་ག་ལ་བ་དེར་སོང་ནས་དེ་སྙིང་ལ་འཆའ་ཞིང་ཡོངས་སུ་སྲེག་པར་བྱེད་
དོ། །དེ་སྲེག་ཅིང་ཀུན་ནས་ཟ་བ་ན་ངུ་སྐད་འབྱིན་ཅིང་ཆོ་ངེས་འདེབས་ལ་ཡོངས་སུ་སྨྲེ་སྔགས་འདོན་ཏོ། །དེའི་ནང་ན་མེ་སྤྱི་གཙུག་ལྟ་བུ་འབར་ཞིང་ཕྱི་རོལ་ཏུ་སེམས་ཅན་དམྱལ་བ་པའི་མེ་སྟེ་མེ་དེ་གཉིས་ཀྱིས་སྲེག་ཅིང་ཟའོ། །དེ་ནས་མེ་སྤྱི་གཙུག་ལྟ་བུ་དེས་དེའི་མིད་པའི་ནང་ཟོས་ནས་ཁ་ག་ལ་བ་དེར་སོང་སྟེ། དེ་དང་པོར་ལྕེ་དྲུང་འཆའ་ཞིང་ཟའོ། །དེ་ཟོས་ནས་རྣ་བའི་ཕྱོགས་སུ་སོང་སྟེ། དེ་ཡང་ཟའོ། །གླད་པ་དང་གླད་རྒྱས་ག་ལ་བ་དེར་སོང་སྟེ། དེས་གླད་པ་དང་གླད་རྒྱས་དེ་དག་ཟོས་ཤིང་ཐོད་པ་དང་མགོར་གཏོགས་པ་ཟོས་ནས་ཐོད་པ་དང་མགོར་གཏོགས་པ་ཕུག་སྟེ་འགྲོ་ཡང་དེའི་ལས་ཀྱི་མཐུས་སེམས་ཅན་དམྱལ་བ་པ་དེ་འཆི་བར་ནི་མི་བྱེད་དོ། །དེའི་ལུས་ཀུན་ནས་བུ་ག་ཡོད་དེ། བུ་ག་དེ་དག་ཏུ་ཞུགས་ནས་སེམས་ཅན་དམྱལ་བ་པ་དེ་མེས་སྲེག་པར་བྱེད་ཅིང་རབ་ཏུ་འབར་བར་བྱེད་དོ། །ཉེས་པར་བྱས་པའི་ལས་ཀྱི་མཐའ་སྤྱད་པ་དེའི་ལུས་ཀྱི་ནང་དང་ཕྱི་རོལ་ཀུན་ནས་རབ་ཏུ་འབར་བ་ཡིན་ཏེ། དེ་ལྟར་ལོ་འབུམ་ཕྲག་དུ་མར་ཟ་ཞིང་ཟའོ། །དེ་ནས་ཡང་འཚོ་བར་འགྱུར་ལ་དེ་ནས་ཡང་འཆི་བར་འགྱུར་རོ། །དེ་ནས་ཡང་འཚོ་སྟེ། དེ་ལྟར་མི་འདི་དེའི་ཉེས་པར་བྱས་པ་བྱས་ཤིང་བསགས་པའི་མཐུས་གནོད་པ་དག་མྱོང་བར་འགྱུར་རོ། །དེ་དེ་ལས་ཐར་ནས་གར་བབ་བབ་ཏུ་འབྲོས་པ་དང་། དེས་སྦྲུལ་ཆེན་པོའི་ཚོགས་འོང་བ་མཐོང་ངོ་། །དེས་དེ་མཐོང་ནས་ཤིན་ཏུ་སྐྲག་ཅིང་ཡི་མུག་སྟེ་གར་བབ་བབ་ཏུ་འབྲོས་སོ། །དེ་ནས་ལས་ཀྱིས་བྱས་པའི་རླུང་གི་ཤུགས་ལྟ་བུའི་སྦྲུལ་དེ་དག་མི་དེ་ལ་འཛིན་ཏོ། །བཟུང་ནས་མཆེ་བ་ཆེན་པོ་རྣོ་ཞིང་དུག་ཆེན་པོ་དྲག་པས་ཀུན་ནས་བསྐོར་ནས་སེམས་ཅན་དམྱལ་བ་པ་དེ་ལན་བརྒྱའམ་ཡང་ན་ལན་སྟོང་དུ་སྲེག་པར་བྱེད་དོ། །སྡུག་བསྔལ་གྱིས་ཀུན་ནས་ཉམ་ཐག་པ་དེ་བཀྲེས་པ་དང་། སྐོམ་པའི་མེ་དང་། སྦྲུལ་གྱི་དུག་གི་མེ་དང་། སེམས་ཅན་དམྱལ་བ་པའི་མེ་སྟེ། མེ་གསུམ་གྱིས་སྲེག་གོ །དེ་ལྟར་དེ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མ་ལོ་བགྲང་གིས་མི་ལང་
བར་སྲེག་གོ །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་སྟོང་ཕྲག་དུ་མར་ཡི་དགས་དང་དུད་འགྲོ་དག་ཏུ་སྐྱེ་བར་འགྱུར་ཏེ། ཡི་དགས་རྣམས་སུ་ཤིན་ཏུ་བཀྲེས་པ་དང་། སྐོམ་པས་གདུངས་པར་འགྱུར། ཡི་དགས་དང་དུད་འགྲོ་དག་ཏུ་དུད་འགྲོར་འགྱུར་བ་ཐམས་ཅད་དུ་ཡང་ཚེ་རབས་ཚེ་རབས་སུ་འབྱུང་ཞིང་ཟ་བར་འགྱུར་རོ། །དེ་དེ་ལས་ཐར་ནས་ཀྱང་གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཚེ་རབས་ལྔ་བརྒྱར་མ་ནིང་དུ་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་མདག་མེ་བྱེ་མ་ལྟ་བུའི་ཆར་རྟག་ཏུ་འབབ་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །གང་གིས་ཙེ་ལུ་མ་སུན་འབྱིན་པར་བྱེད་ཅིང་སུན་ཕྱུང་ནས་ཀྱང་རྗེས་སུ་དགའ་བར་བྱེད་ལ་དེ་ཉིད་ལ་ཤིན་ཏུ་ཆགས་པར་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་མདག་མེ་བྱེ་མ་ལྟ་བུའི་ཆར་རྟག་ཏུ་འབབ་པར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་སེམས་ཅན་དམྱལ་བ་འདིར་འབྱུང་བའི་སྟེང་དུ་གནོད་པ་ཁྱད་པར་དུ་འབྱུང་བ་དག་ནི། འདི་ལྟ་སྟེ། སེམས་ཅན་དམྱལ་བ་པ་དེའི་འཁོར་ནི་དཔག་ཚད་ལྔ་བརྒྱ་ཡོད་ལ་དེ་ཐམས་ཅད་རབ་ཏུ་འབར་བ། བྱེ་མ་རྡོ་རྗེའི་མེ་མདག་ལྟ་བུ་དག་གིས་དེར་དཔེ་བྱ་བར་ཡང་མི་ནུས་པར་གང་སྟེ། འདི་ལྟར་འཚེད་པ་པོ་ཡང་ནུབ་པར་འགྱུར་ན་སེམས་ཅན་དམྱལ་བ་པ་ལས་ལྕི་བ་ལྟ་སྨོས་ཀྱང་ཅི་དགོས་ཏེ། དེ་ཇི་ལྟར་
ཆུ་འབབ་པའི་ཤུགས་ཀྱིས་དེད་པ་དེ་ལྟར་དེར་འཇུག་གོ །དེ་ནས་ཡང་ལས་ཀྱིས་ནུབ་པ་འབྱུང་བར་འགྱུར་ཏེ། དེ་བྱེ་མ་རྡོ་རྗེའི་གཟེགས་མ་ལྟ་བུར་ཟུར་གསུམ་ཡོད་ཅིང་སོ་རྣོ་བ་དེ་དག་གིས་ཇི་ལྟར་དེའི་རུས་པ་ལྷག་མ་ཡང་མེད་པ་དེ་ལྟར་འཐག་གོ །དེ་ནས་ཡང་འཚོ་བར་འགྱུར་ལ་དེ་ནས་ཡང་འཐག་སྟེ་འཆི་ཞིང་སྐྱེའོ། །དེ་ཀུན་ནས་དགའ་བ་མེད་ཅིང་བྱེ་མ་རབ་ཏུ་འབར་བའི་ནང་དུ་ནུབ་སྟེ། སྲེག་ཅིང་འཚེད་པ་དང་སྐད་འབྱིན་ཅིང་ཡོངས་སུ་སྨྲེ་སྔགས་འདོན་ཏེ། དེ་ལས་ཀྱིས་བསྒྲིབས་པ་སྡུག་བསྔལ་དེ་ལས་བདག་ཉིད་ཐར་བར་མི་ནུས་སོ། །དེ་ཡུན་རིང་མོ་ཞིག་འདས་ལ་གལ་ཏེ་ལས་ཟད་ནས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། དེ་ལས་དེ་དང་རྒྱུ་འཐུན་པའི་འབྲས་བུས་དེ་ཚེ་རབས་སྟོང་ཕྲག་དུ་མར་ཡི་དགས་དང་དུད་འགྲོ་དག་ཏུ་བཀྲེས་པ་དང་སྐོམ་པས་གདུངས་པར་འགྱུར། དུད་འགྲོ་གཅིག་ལ་གཅིག་ཟ་བར་སྲོག་ལན་སྟོང་འཆད་པར་འགྱུར། དེ་ལས་ཐར་ནས་ཀྱང་གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཚེ་རབས་ལྔ་བརྒྱར་དབུལ་ཞིང་ནད་བུ་ཅན་དང་། སྨྱོ་བ་དང་། ངག་ཡིད་མི་ཆེས་པ་དང་། གཞན་གྱིས་བཀོལ་བ་དང་། ཟ་མར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ནང་ན་མེ་མདག་ཡོད་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་ནི་སྔ་མ་བཞིན་དུ་འགྱུར་རོ། །གང་གིས་དགེ་བསྙེན་མ་བསླབ་པའི་གཞི་ལྔ་ཡོད་པ་སྟོབས་ཀྱིས་མནན་ནས་མི་ཚངས་པར་སྤྱད་པས་བསླབ་པ་དྲལ་ཅིང་འདི་སྙམ་དུ་སྲུང་མ་མོ་བསླབ་པའི་གཞི་ལས་འདས་པ་ཆོས་མ་ཡིན་པ་གང་ཡང་
མེད་དོ་སྙམ་དུ་བློ་སྐྱེ་ཞིང་ལས་ཀྱི་འབྲས་བུ་ལ་ཡིད་མི་ཆེས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ནང་ན་མེ་མདག་ཡོད་པར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་སེམས་ཅན་དམྱལ་བ་འདིར་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་དེ་ཀུན་ནས་མེ་མདག་གི་རི་ལྔ་ལ་འདི་ལྟ་སྟེ། ཀུན་སྲེག་དང་། གཏིང་ཟབ་དང་། མུན་ནག་ཐིབས་དང་། མེ་མདག་ཚ་བ་ལྟ་བུ་དང་། ལས་མངོན་སུམ་པ་རྣམས་ཀྱིས་ཡོངས་སུ་བསྐོར་བ་དེར་སེམས་ཅན་དམྱལ་བ་དེ་ཀུན་ནས་དཔག་ཚད་སྟོང་ཡོད་ལ། རི་དེ་དག་ཀྱང་ཀུན་ནས་རི་ཁོར་ཡུག་དང་ཁོར་ཡུག་ཆེན་པོ་དག་དང་ཧ་ཅང་མི་རིང་བ་ན་ཡོད་དེ། དེར་སེམས་ཅན་དམྱལ་བ་པ་དེས་རི་དེ་དག་མེ་ཏོག་ཨུད་པ་ལས་གང་བ་ལྟ་བུ་དང་། ཤིང་ལྗོན་པ་དང་། ནགས་ཚལ་དང་། ལྟེང་ཀ་ཕུན་སུམ་ཚོགས་པ་ལྟ་བུར་མཐོང་སྟེ། དེ་དག་བདེ་བ་མྱང་བར་བྱ་བའི་ཕྱིར་དེ་གང་གི་ཚེ་བརྒྱུགས་པ་དང་། དེའི་ཚེ་ལས་ཀྱི་རླུང་མེ་ལྟ་བུ་ལངས་པས་བདས་སོ། །མེ་མདག་དེ་དག་ཀྱང་རླུང་དེས་བུས་སོ། །བུས་པ་དེས་སེམས་ཅན་དམྱལ་བ་པ་དེ་ཀུན་ནས་ཡོངས་སུ་དཀྲིས་སོ། །ལུས་ཐམས་ཅད་ཡོངས་སུ་བསྲེགས་པ་དེ་ཡང་རི་དེ་དག་གི་གཟུགས་སྔོན་པོར་མཐོང་སྟེ། ཚ་བས་གདུངས་པ་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ་ཡང་རྒྱུག་གོ །དེ་གང་གི་ཚེ་རི་དེའི་དྲུང་དུ་ཕྱིན་པ་དང་། དེ་འདི་ལྟར་ཀུན་ནས་བྱི་བྲུན་ལ་ལྕགས་ཀྱི་མདའ་འཕེན་པ་འཕངས་པ་ཙམ་གྱིས་འགྲོ་བ་མི་མངོན་པ་དེ་ལྟར་སེམས་ཅན་དམྱལ་བ་པ་དེ་མེ་མདག་གི་ནང་དུ་འགྲོ་བའི་འགྲོས་ཀྱང་གར་སོང་གཏོལ་མེད་པར་མི་མངོན་ནོ། །དེ་དེར་སོང་མ་ཐག་ཏུ་འདི་ལྟར་སྲེག་ཅིང་འཚེད་ལ་སྐོལ་བ་ན་མུན་པ་མུན་ནག་གི་ནང་དུ་སོང་ནས་དབང་པོ་ཐམས་ཅད་འགགས་ཤིང་སྡུག་བསྔལ་ཐམས་ཅད་ཀྱི་གཞིར་གྱུར་ཏེ། ཉེས་པ་བྱས་པའི་འབྲས་བུ་ཐམས་ཅད་མངོན་སུམ་དུ་བྱུང་ལ་དེས་གང་མི་དགེ་བ་བྱས་ཤིང་བསགས་པ་དེ་དག་དེའི་ལས་ཀྱི་ཤུགས་ཀྱིས་
འོངས་པའི་འབྲས་བུ་ལ་ཉེ་བར་སྤྱོད་དོ། །དེ་ལྟར་དེ་མེ་མདག་གི་མུན་པའི་ནང་ན་དཔུང་གཉེན་མེད་ཅིང་གྲོགས་མེད་པ་སྡུག་བསྔལ་མི་བཟད་པས་ཉམ་ཐག་པར་གྱུར་པ། ཡུན་རིང་དུ་རང་གིས་བྱས་པའི་ལས་ཀྱི་འབྲས་བུ་ལ་སྤྱོད་པར་ཞུགས་པ་ཡུན་རིང་དུ་འཚེད་དོ། །དེ་གལ་ཏེ་ཡང་ལས་ཀྱི་རླུང་དེ་དག་ཉིད་ཀྱིས་མེ་མདག་དེ་དག་གི་ནང་ནས་འབྱིན་པར་བྱེད་དེ། ལུས་ཐམས་ཅད་བསྐོལ་ཅིང་སྡུག་བསྔལ་ཐམས་ཅད་ཀྱིས་ཉམ་ཐག་པ་དེ་རྐང་པ་གར་བབ་བབ་ཏུ་འདོར་རོ། །དེ་ནས་ཡང་འབྱུང་བར་འགྱུར་ཏེ། གཤིན་རྗེའི་མི་རྣམས་ཀྱིས་བཟུང་ངོ་། །བཟུང་ནས་ཀྱང་དེའི་རྐུབ་སོག་ལེ་རབ་ཏུ་འབར་བས་གཅོད་དོ། །བཅད་ཅིང་གཏུབས་ནས་ཡང་ཤིན་ཏུ་གཞོན་ཤ་ཅན་དུ་སྐྱེ་བར་འགྱུར་ཏེ། དེ་ལྟར་ལོ་འབུམ་ཕྲག་དུ་མར་དེ་སོག་ལེའི་སྡུག་བསྔལ་མྱོང་ཞིང་དེ་འདི་སྐད་དུ་རྣམ་པར་སྒྲ་འབྱིན་པར་བྱེད་དོ། །བདག་གིས་ལས་དག་བྱས་པ་ཡི། །འབྲས་བུ་དེ་དག་བདག་ཉིད་ཡིན། །འདོད་ཆགས་དགྲ་ཡིས་གདུངས་པ་ན། །ཕྱི་ནས་སེམས་ཅན་དམྱལ་བར་འོངས། །འདོད་ཆགས་གདུངས་པའི་ལས་ཅན་གྱི། །བག་མེད་ས་ན་མི་གཙང་བའི། །ཞགས་པ་དེ་ཡིས་བཅིངས་པ་ཡིས། །བདག་ནི་གནས་འདི་དག་ཏུ་འོངས། །སྔོན་ཆད་བདག་ནི་འདོད་ཆགས་ཀྱི། །འབྲས་བུ་ཚ་སྙམ་མི་བྱེད་དེ། །མི་ཤེས་པ་ཡིས་བདག་བསླུས་པས། །འདིར་ནི་བདག་གིས་བྱས་ལ་སྤྱོད། །བརྩེ་མེད་ཤིན་ཏུ་དྲག་པ་ཡི། །སྡིག་པ་དག་གི་དབང་དུ་སོང་། །སྡུག་བསྔལ་རྒྱ་མཚོ་མཐའ་ཡས་པ། །འདི་ལས་བདག་ཉིད་ཇི་ལྟར་ཐར། །སྡུག་བསྔལ་དག་ལས་སྡུག་བསྔལ་ལས། །འདི་ཡིས་བདག་ནི་ཡོངས་སུ་འཚེད། །བདག་ནི་སེམས་དམྱལ་ཟད་པ་འམ། །བདེ་བ་འཐོབ་པ་མ་མཐོང་ངོ་། །དེ་ལྟར་སེམས་ཅན་དམྱལ་བ་པ་དེ་ནང་ན་མེ་མདག་ཡོད་པའི་སེམས་ཅན་དམྱལ་བར་ཤིན་ཏུ་སྡུག་བསྔལ་བས་ཉམ་ཐག་ཅིང་ངུ་སྐད་འདོན་ཏེ། སེམས་ཅན་དམྱལ་བ་པ་དེ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་མྱོང་བར་འགྱུར་རོ། །དེ་ཕྱིས་སེམས་ཅན་
དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་བརྒྱ་ཕྲག་དུ་མར་ཡི་དགས་དང་དུད་འགྲོ་དག་ཏུ་སྐྱེ་བར་འགྱུར་ཏེ། ཡི་དགས་རྣམས་སུ་བཀྲེས་པ་དང་སྐོམ་པས་གདུངས་པའི་ལུས་ཅན་དག་གཅིག་ལ་གཅིག་ལྟ་བ་ཁོ་ནར་ཟད་དོ། །དུད་འགྲོ་རྣམས་སུ་གཅིག་ལ་གཅིག་ཟ་བ་ལུས་ལན་བརྒྱར་འཆི་བར་འགྱུར་རོ། །དེ་དེ་ལས་ཐར་ནས་གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེའི་ལས་ཀྱི་མཐུས་རྟག་ཏུ་རིམས་ནད་ཀྱིས་འདེབས་ཤིང་དབུལ་བ་དང་། ནད་བུ་ཅན་དང་། ཡན་ལག་མ་ཚང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས། སེམས་ཅན་དམྱལ་བ་ཨ་ལ་ལ་ཟེར་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །དེས་འདི་ལྟར་བསླབ་པའི་གཞི་གཅིག་གམ། གཉིས་སམ། གསུམ་མམ། བཞིའམ། ལྔ་ལས་གཞན་པ་བླངས་པ་དང་། བུ་སྲིང་ངམ། བུ་སྲིང་དང་འདྲ་བའམ། གྲོགས་ཀྱི་ཆུང་མ་འོས་པ་མ་ཡིན་པ་དག་ལ་དེས་འདི་ལྟར་བརྡ་བྱས་ནས་སླུ་བར་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཨ་ལ་ལ་ཟེར་བར་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་རླུང་ཤིན་ཏུ་དྲག་ཅིང་ཤིན་ཏུ་རྩུབ་ལ་ཤིན་ཏུ་མི་བཟད་པ་ཤུགས་ཀྱིས་མགྱོགས་པ་དང་ལྡན་པ་ལྡང་ལ། གང་གིས་སེམས་ཅན་དམྱལ་བ་དེ་དག་གི་ལུས་སོ་སོར་ཁྱེར་བར་བྱེད་དེ། ཇི་ལྟར་རླུང་ཆེན་པོ་
ཤིན་ཏུ་མི་བཟད་ཅིང་རྩུབ་པས་རས་བལ་གྱི་སྤུའམ། སྤུའི་སྣོད་གློངས་ན་སྤུ་རྣམས་ཀྱི་གདགས་པ་ཡང་མི་མངོན་པར་ཁྱེར་རོ། །གང་གིས་ཁྱེར་བའི་རས་བལ་དེ་དག་གི་སྤུ་རྣམས་རླུང་དེས་ཕྱོགས་བཅུར་བདས་ཤིང་ཁྱེར་བ་ཕན་ཚུན་ཐུག་པ་དེ་ལྟར་སེམས་ཅན་དམྱལ་བ་དེ་དག་གི་ལུས་སེམས་ཅན་དམྱལ་བའི་རླུང་སྤུ་གྲི་ལྟ་བུ་དེས་འདི་ལྟར་བྱེ་མའི་ཚད་ཙམ་དུ་ཡང་མི་མངོན་པར་ཁྱེར་རོ། །གང་གིས་ལུས་དེ་དག་སྤུ་ཙམ་དང་ཉུང་ངུ་ཉུང་ངུར་བྱེད་དེ། ཡན་ལག་དང་ཉིང་ལག་ཐམས་ཅད་གདགས་པར་ཡང་མངོན་པར་མི་བྱེད་དོ། །ལས་ངན་པ་བྱས་པས་ཡང་ལུས་དེ་དག་འབྱུང་བར་འགྱུར་ཏེ། དེ་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡང་འདོད་ཆགས་ཀྱི་དབང་གིས་སྔ་མ་བཞིན་དུ་ཁྱེར་རོ། །ཡུན་རིང་མོ་ཞིག་འདས་ནས་གལ་ཏེ་བརྒྱ་ལ་དེའི་རླུང་གི་གནོད་པ་ལས་ཐར་ན་དེ་ལ་བྱི་བ་མཆེ་བ་རྡོ་རྗེ་ལྟ་བུ་ཡོད་པ་འབྱུང་ལ་གང་དེའི་རྐུབ་ཡུངས་འབྲུ་ཙམ་དུ་རློག་སྟེ། བརླགས་ནས་ངུ་སྐད་འདོན་བཞིན་དུ་ཟ་བར་བྱེད་དོ། །དེ་ཟོས་ནས་རྒྱུ་མ་དག་ཟའོ། །ལོང་ཀ་ཐམས་ཅད་ཀྱང་ཟའོ། །ལོང་ཀ་དེ་དག་ཟོས་ནས་རྒྱབ་ཏུ་འབྱུང་ལ་དེའི་རྒལ་ཚིགས་ཟ་སྟེ། དེ་ལྟར་དེའི་ལས་ཀྱི་མཐུས་སེམས་ཅན་དམྱལ་བ་དེ་ལོ་འབུམ་ཕྲག་དུ་མར་སྡུག་བསྔལ་མྱོང་བར་འགྱུར་རོ། །དེ་གལ་ཏེ་དེ་ལས་ཐར་བར་འགྱུར་ཏེ། དེ་ཡུན་རིང་མོ་ཞིག་འདས་ནས་གལ་ཏེ་ཉོན་མོངས་པ་དེ་ལས་ཐར་ནས་དེ་གར་བབ་བབ་ཏུ་འབྲོས་སོ། །དེ་ནས་རང་གི་ལུས་ལས་བྱུང་བའི་སྲོག་ཆགས་མར་ཀོ་ཏ་ཀ་རྣམས་ཀྱིས་གང་ཞིང་དེའི་རྐུབ་ཀྱང་དེ་ནས་འཆའ་ཞིང་ཟའོ། །དེ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྲོག་ཆགས་མར་ཀོ་ཏ་ཀ་དེ་རྣམས་ཀྱི་སྡུག་བསྔལ་མི་བཟད་པས་ངུ་བར་བྱེད་དེ། འོ་དོད་འབོད། སྒྲ་སྐད་འབྱིན། སྨྲེ་སྔགས་འདོན་ཏོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་སྟོང་ཕྲག་དུ་མར་ཡི་དགས་རང་གི་ཤ་ལ་ཟ་བར་སྐྱེ་བར་འགྱུར་
ཏེ། ཇི་ལྟར་དེའི་ཚེ་དེས་བདག་ཉིད་ཀྱི་བུད་མེད་མ་ཡིན་པ་ལ་མི་ཚངས་པར་སྤྱོད་པས་རང་གི་ཤ་ལ་ཟ་སྟེ། དེས་བདག་ཉིད་འཚོ་བར་བྱེད་དོ། །གལ་ཏེ་བརྒྱ་ལ་ཡི་དགས་ཀྱི་འཇིག་རྟེན་དེ་ལས་ཐར་ནས་ཀྱང་དེ་ཕག་གི་སྐྱེ་གནས་སུ་སྐྱེ་བར་འགྱུར་ཏེ། ཇི་ལྟར་དེས་རང་གི་མ་དག་ལ་ཆོས་མ་ཡིན་པ་བྱས་པས་གང་དུ་སྐྱེས་པར་རང་གི་མས་ཟ་བར་བྱེད་དོ། །དེ་གལ་ཏེ་དེ་ལས་ཐར་ནས་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་སྐྱེས་པའི་ནད་ཀྱིས་འདེབས་ཤིང་དེ་ནད་དྲག་པོ་མི་བཟད་པས་གནོད་པ་བྱེད་ལ་དེའི་ཕོ་མཚན་གཅོད་པར་བྱེད་དོ། །གལ་ཏེ་བརྒྱ་ལ་དེའི་ཆུང་མ་ཞིག་ཡོད་པར་གྱུར་ན་ཡང་ཇི་ལྟར་དེས་ཕ་རོལ་གྱི་བུད་མེད་འོས་པ་མ་ཡིན་པར་ཕྲོགས་པ་ལྟར། དེ་ཡང་རུང་བ་མ་ཡིན་པའི་མི་དག་གིས་དེ་འཕྲོག་པར་བྱེད་དེ། མིའི་དོན་འདི་ཐམས་ཅད་མེད་པར་བྱེད་པ་ནི་འདི་ལྟ་སྟེ། འཇིག་རྟེན་དང་འཇིག་རྟེན་ལས་འདས་པའི་ཆོས་རྣམས་དང་འགལ་བ་འོས་པ་མ་ཡིན་པའི་དྲུང་དུ་འགྲོ་བའོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་སེམས་ཅན་དམྱལ་བ་ཤར་གྱུར་པ་ཐམས་ཅད་སྡུག་བསྔལ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །བུད་མེད་སྡོམ་པ་བླངས་པ་གང་གིས་འོས་པ་མ་ཡིན་པའི་དགེ་སློང་དབང་དུ་བྱས་ཏེ། ཆང་བླུད་ནས་དེ་འཁྲུལ་པར་བྱས་ཤིང་ཡིད་ལ་གཅགས་པ་བསྐྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཤར་གྱུར་པ་ཐམས་ཅད་སྡུག་བསྔལ་བར་སྐྱེ་བར་འགྱུར་རོ། །དེར་
གང་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་དང་གནོད་པ་བསྡུས་པ་དེ་དག་ཐམས་ཅད་འབྱུང་བར་འགྱུར་ཏེ། གང་གིས་རྟག་ཏུ་ཚུལ་ཁྲིམས་དང་ལྡན་པ་འོས་པ་མ་ཡིན་པ་ལ་འོས་པ་ཉིད་དུ་གོམས་པར་བྱེད་ན། དེ་རྟག་ཏུ་མི་དགེ་བར་ཞུགས་པ་དེས་ལམ་ངན་པ་དེ་ཉིད་རྗེས་སུ་སྟེན་པར་བྱེད་དོ། །ལས་ཀྱི་གཞི་ངན་པ་བྱས་པའི་ངང་ཚུལ་ཅན་མི་དགེ་བའི་ལས་ཀྱི་མཐའ་སྤྱད་པ་དེས་མི་དགེ་བའི་ལམ་དེ་རྗེས་སུ་སྟེན་ཅིང་གོམས་པར་བྱེད་དོ། །སེམས་ཅན་དམྱལ་བ་དེ་སྡུག་བསྔལ་ཆེས་དྲག་པ་དང་། སྡུག་བསྔལ་ཆེས་མི་བཟད་པ་དང་། སྡུག་བསྔལ་ཆེས་རྩུབ་ཅིང་ཚ་བ་དག་ཤིན་ཏུ་སོ་སོར་མྱོང་བར་འགྱུར་ཏེ། དེར་གང་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟ་སྟེ། རྐང་པའི་མཐེ་བོ་ལ་སོགས་པ་ནས་མགོའི་བར་དུ་མཚོན་ཆ་ཧུ་ལུ་རབ་ཏུ་འབར་བ་དག་གིས་ཤ་མ་གཏོགས་པར་པགས་པ་གཅོད་པར་བྱེད་དེ། དེ་ལྟར་དེའི་ཡན་ལག་དང་ཉིང་ལག་ཐམས་ཅད་དང་། པགས་པ་དག་གཅོད་པར་བྱེད་པའི་སྡུག་བསྔལ་ཤིན་ཏུ་མི་བཟད་དོ། །དེའི་པགས་པ་དེ་དག་ཀྱང་སའི་ནང་དུ་བཅུག་ནས་སྲེག་པར་བྱེད་དེ། དེའི་ལུས་པགས་པ་མེད་པའི་ལུས་དེ་དག་ལ་གཤིན་རྗེའི་མི་དེ་རྣམས་ཀྱིས་ལྕགས་ཀྱི་སྣོད་ཀྱི་ནང་དུ་བ་ཚྭ་རབ་ཏུ་སྐོལ་བ་ཁྱེར་ནས་ལྡུགས་པར་བྱེད་དེ། དེས་དེ་སྲེག་པར་བྱེད། སྐོལ་བར་བྱེད་དོ། །སྡུག་བསྔལ་གྱིས་ཉམ་ཐག་ཅིང་སྡུག་བསྔལ་ཚ་བ་རྩུབ་པས། ཉམ་ཐག་པ་དེ་ངུ་སྐད་འབྱིན་ཅིང་ཆོ་ངེས་འདེབས་ལ་ཡོངས་སུ་སྨྲེ་སྔགས་འདོན་ཏོ། །དེ་ལྟར་དེ་ལོ་འབུམ་ཕྲག་དུ་མར་སྡུག་བསྔལ་མྱོང་བར་འགྱུར་ཞིང་ལོ་བགྲང་གིས་མི་ལང་བའི་བར་དུ་མྱོང་བར་འགྱུར་ཏེ། ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་ཚ་བ་ཤིན་ཏུ་མི་བཟད་པས་གདུངས་སོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ཡི་
དགས་དང་དུད་འགྲོ་དག་ཏུ་མ་སྐྱེས་ལ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་དབུལ་ཞིང་ནད་བུ་ཅན་དང་། ལུས་དག་ལ་ནད་ཤིན་ཏུ་མི་བཟད་པས་ཐེབས་པར་འགྱུར། དེ་རྒྱ་མཚོའི་ནང་གི་བར་དག་ཏུ་གང་རིས་འཐུན་པར་འགྱུར་བ་མི་མ་ཚང་བ་འདི་ལྟ་སྟེ། རྐང་པ་གཅིག་པ་དང་། སྣ་གཅིག་པ་དང་། ལག་པ་གཅིག་པ་དང་། ལུས་ཆུང་བ་དང་། ཚེ་ཐུང་བ་རྣམས་ཏེ། འདི་ལྟ་སྟེ། དེར་སྐྱེས་པ་ཉི་མ་གཅིག་ཅིག་ཐུབ་པར་འགྱུར་བ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅུ་བཞི་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཆུ་བོ་རབ་མེད་རབ་ཏུ་ཚ་བ་ཞེས་བྱ་བ་ཡོད་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །སྟེགས་བུའི་དབུས་སུ་མེ་བུས་ནས་ལག་པས་བཟུང་སྟེ་བསྐོར་ནས་སྣ་བླན་པ་གྲོགས་ཀྱི་ཆུང་མ་ཉམས་པ་མེད་པ་ལ་སུན་འབྱིན་པར་བྱེད་ཅིང་སུན་ཕྱུང་ནས་ཀྱང་མངོན་པར་དགའ་བར་བྱེད། ཡང་དག་པར་དགའ་བར་བྱེད་ལ། དགའ་བར་བྱེད་པ་མི་དགེ་བ་དེ་ཉིད་ལ་ཀུན་ཏུ་སྤྱོད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཆུ་བོ་རབ་མེད་རབ་ཏུ་ཚ་བར་སྐྱེ་བར་འགྱུར་རོ། །དེར་སྐྱེས་ནས་གང་སེམས་ཅན་དམྱལ་བ་ཡང་སོས་ལ་སོགས་པའི་འཁོར་གྱི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་གནོད་པ་ཁྱད་པར་དུ་འབྱུང་བ་ནི་མུན་ནག་ཐིབས་པོས་ནམ་མཁའ་གང་བ་ནས་ལས་ཀྱིས་བྱས་པའི་དབྱུག་པ་དང་། རལ་གྲི་ཤིན་ཏུ་རྣོ་བ་
དག་རབ་ཏུ་འབར་བ་དེར་སེམས་ཅན་དམྱལ་བ་པ་དེའི་ལུས་ནང་དུ་ནུབ་བོ། །ནང་དུ་ནུབ་ནས་སྲེག་པར་བྱེད་ཅིང་ཡན་ལག་དང་ཉིང་ལག་ཐམས་ཅད་ཤིན་ཏུ་འབུགས་པར་བྱེད། གཤེག་པར་བྱེད། སྲེག་པར་བྱེད། འཚེད་པར་བྱེད། ཡན་ལག་དང་། ཉིང་ལག་ཐམས་ཅད་ཕན་ཚུན་འདྲལ་བར་བྱེད་དོ། །དེའི་ཕྱི་རོལ་མེའི་སྡུག་བསྔལ་གྱིས་ཀྱང་སྲེག་པར་བྱེད་ཅིང་ནང་དུ་དབྱུག་པ་དང་རལ་གྲིས་གཤེག་པའི་སྡུག་བསྔལ་བ་ན། སྡུག་བསྔལ་ཤིན་ཏུ་མི་བཟད་ཅིང་ཚ་ལ་རྩུབ་པ་གཞན་དང་མཚུངས་པ་མེད་པའི་སྡུག་བསྔལ་མྱོང་ངོ་། །སྡུག་བསྔལ་དེས་བསྒྲིབས་པ་དེ་གར་བབ་བབ་ཏུ་འབྲོས་པ་དང་། དེས་ངམ་གྲོག་ཆེན་པོ་ན་ཆུ་བོ་རབ་མེད་རབ་ཏུ་ཚ་བ་ཞེས་བྱ་བར་ལས་ལས་བྱུང་བའི་སྦྲུལ་གདུག་པ་རྣམས་ཀྱིས་རབ་ཏུ་གང་བར་མཐོང་ངོ་། །དེར་སྡུག་བསྔལ་གྱིས་གདུངས་པ་དེས་འཁྲུལ་པར་མཐོང་སྟེ། མི་ཐོ་འཚམ་པར་བྱེད་པ་དེ་རྣམས་ཀྱིས་དེ་རབ་ཏུ་སོ་སོར་ཕྱེ་ནས་སྦྲུལ་གདུག་པ་རྣམས་ཀྱིས་ཟ་བར་བྱེད་དོ། །སྦྲུལ་གདུག་པའི་མཆེ་བ་རྣོན་པོ་རྣམས་ཀྱིས་ཀུན་ནས་ཤིན་ཏུ་སྡུག་བསྔལ་གྱིས་ཉམ་ཐག་པ་དེ། དེར་ཇི་སྲིད་དུ་དེ་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ངུ་སྐད་འབྱིན་ཅིང་ཆོ་ངེས་འདེབས་ལ་ཡོངས་སུ་སྨྲེ་སྔགས་འདོན་ཏོ། །དེ་ཕྱིས་དེ་ལས་ཡུན་རིང་མོ་ཞིག་འདས་ཤིང་ལོ་བགྲང་གིས་མི་ལང་བ་ན་ཐར་བར་འགྱུར་ཏེ། ཐར་ནས་ཀྱང་གལ་ཏེ་ཡི་དགས་དང་དུད་འགྲོ་དག་ཏུ་མ་སྐྱེས་ལ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་དབུལ་ཞིང་ནད་བུ་ཅན་དང་། ཡོངས་སུ་སྨྲེ་སྔགས་འདོན་པ་དང་། གཞན་གྱིས་བཀོལ་བ་དང་། དབང་པོ་མ་ཚང་བར་འགྱུར། མི་བྱད་གཟུགས་རྟ་རྒོད་མ་འདྲ་ཞིང་ཚང་ཚིང་གངས་རི་ལྟ་བུའི་ནང་དུ་སྐྱེ་ལ། དེར་ཁ་ཟས་འབྲས་བུའི་རྩ་བ་འབའ་ཞིག་གིས་འཚོ་བར་བྱེད་དེ། དེ་གཞན་ལས་སྐྱེས་པའི་ཁ་ཟས་ནམས་ཀྱང་མངོན་པར་ཤེས་པར་མི་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་
སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་རྟག་ཏུ་མུན་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ཕྱི་རོལ་པའི་འདོད་ཆགས་དང་བྲལ་བ་དེ་ཕྱིས་འདོད་ཆགས་མངོན་པར་སྤངས་ཏེ་འདོད་ཆགས་ཞེ་སྡང་གཏི་མུག་དང་བྲལ་བ་དེ་བུད་མེད་དག་གིས་བསླུས་ནས་ཡང་འདོད་པ་རྣམས་ལ་འཇུག་པར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྟག་ཏུ་མུན་པ་ཞེས་བྱ་བར་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་དྲག་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་སྲིན་བུ་ས་རྐོ་ཞེས་བྱ་བ་དག་གིས་དེ་ཇི་ལྟར་དབུ་བ་ལ་འབིགས་པ་དེ་ལྟར་མཆུ་རྡོ་རྗེ་ལྟར་རྣོ་བ་དེ་དག་སེམས་ཅན་དམྱལ་བ་པ་དེའི་ཉེས་པར་བྱས་པའི་ལས་དེས་འབྱུང་བར་འགྱུར་ལ་གང་དག་པས་ཆེས་མི་བདེ་བ་བྱེད་པ་ཡིན་ཏེ། ཆེས་སྡུག་བསྔལ་བ་ཡིན་ནོ། །ས་རྐོ་དེ་རྣམས་ཀྱིས་རུས་པ་དག་ཕུག་པ་ནས་རྐང་གི་བར་དུ་ཟ་སྟེ། ཇི་ལྟར་སེམས་ཅན་དམྱལ་བ་པའི་སྡུག་བསྔལ་བསྡུས་པ་དེ་དག་ཐམས་ཅད་དེ་ལྟར་བརྒྱའི་ཆ་དང་། སྟོང་གི་ཆ་དང་། བརྒྱ་ཕྲག་སྟོང་གི་ཆར་ཡང་མི་ཕོད་དེ། དེ་ལྟར་བདག་ཉིད་དེ་དག་ལས་ཐར་བར་བྱེད་མི་ནུས་སོ། །དེ་གང་དང་གང་དུ་འབྲོས་པ་དེ་དང་དེ་ཉིད་དུ་སྲིན་བུ་དག་གིས་མི་གཏོང་བར་བྱེད་དེ། དེ་ལྟར་དེ་ལོ་འབུམ་ཕྲག་དུ་མར་སྲེག་གོ །འཚེད་དོ། །སེམས་ཅན་དམྱལ་བ་པའི་སྡུག་བསྔལ་ཆེས་ཤིན་ཏུ་སྡུག་བསྔལ་བ་དག་གིས་ཉམ་ཐག་པ་སེམས་ཅན་དམྱལ་བ་དེར་ཡུན་རིང་དུ་སྲེག་ཅིང་འཚེད་ཀྱང་དེའི་ལས་བྱས་ཤིང་བསགས་པ་སེམས་ཅན་དམྱལ་བར་གྲུབ་པའི་མཐུས་འཆི་བའི་དུས་ནི་མི་བྱེད་
དོ། །དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚེད་དོ། །དེ་གལ་ཏེ་ཡི་དགས་དང་། དུད་འགྲོ་དག་ཏུ་མ་སྐྱེས་ལ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པའི་འབྲས་བུས་དེ་མདོག་ངན་ཅིང་རྐང་ལག་རྡོལ་བ་དང་། ཚོང་པ་མོའི་བྲན་ཕོ་དང་། བྲན་མོ་བུམ་པ་ཐོགས་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་གནོད་པའི་རྒྱུད་ཅེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །ཚུལ་ཁྲིམས་དང་ལྡན་པ་ཆོས་ཀྱི་ལམ་ལས་ཉམས་པ་མེད་པའི་དགེ་སློང་བག་ཚ་བ་མེད་པའི་སར་སོང་བ་ལས། བུད་མེད་སྦྱར་མ་ཞིག་ན་རེ་བདག་ལ་ཅི་དགའ་བ་མཛོད་ཅིག །གལ་ཏེ་དགེ་སློང་ཁྱོད་བདག་དང་ལྷན་ཅིག་མཇལ་བར་མི་མཛད་ན་དེ་བདག་གིས་དགེ་སློང་འདི་བདག་ལ་འདོད་པར་བྱེད་པ་ལས་དེ་ཁོ་མོས་མ་འདོད་དོ་ཞེས་སྨྲ་བར་བྱའོ། །དེས་ན་ཁྱོད་ལ་ཆད་པ་ཆེན་པོས་གཅོད་པར་འགྱུར་ཏེ། གལ་ཏེ་རྒྱལ་པོའི་འཁོར་ནས་སམ། གལ་ཏེ་བདག་གི་ཁྱིམ་ཐབ་ཀྱིས་གཅོད་པར་བྱེད་དོ། །གལ་ཏེ་མཛད་ན་དེ་བདག་གིས་ཁྱོད་ལ་བཟའ་བ་དང་བཅའ་བ་མང་པོ་དབུལ་བར་བྱ་སྟེ། དེ་ལྟར་འོ་སྐོལ་ཤིན་ཏུ་དགྱེས་པར་འགྱུར་ཞིང་གཞན་གྱིས་ཀྱང་མི་ཚོར་བར་འགྱུར་རོ། །འཇིག་རྟེན་པ་དག་ལ་ཡང་དགེ་སློང་འདི་ནི་ཤིན་ཏུ་ཚུལ་ཁྲིམས་དང་ལྡན་པ་ཡིན་ཏེ། འདི་ལ་མལ་ཆ་དང་། ན་བའི་རྐྱེན་གསོས་སྨན་གྱི་ཡོ་བྱད་མང་པོ་དག་ཕུལ་ཅིག་ཅེས་སྨྲ་བར་བགྱི་སྟེ། སྦྱིན་པ་པོ་དང་། སྦྱིན་བདག་
ཏུ་འགྱུར་རོ་ཞེས་དེ་ལྟར་འཇིགས་པས་བསྡིགས་ནས་བྲིད་དེ་དགེ་སློང་ཡང་དག་པའི་ལམ་ལས་ཉམས་པར་བྱེད་ན། བུད་མེད་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་གནོད་པའི་རྒྱུད་ཅེས་བྱ་བ་དེར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཆེན་པོ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་གནོད་པ་ཁྱད་པར་དུ་འབྱུང་བ་དག་ནི་འདི་ལྟར་གཤིན་རྗེའི་མི་དག་གིས་བུད་མེད་དེ་བཟུང་སྟེ་བཙིར་བཙིར་ནས་པགས་པ་འཐོག་པར་བྱེད་དོ། །པགས་པ་དེ་དག་བཏོགས་ནས་ཀྱང་ཡང་གཡོགས་པར་འབྱུང་ཞིང་ཡང་ཤིན་ཏུ་གཞོན་ནུར་སྐྱེ་སྟེ། ཁ་དོག་ཤིན་ཏུ་མི་སྡུག་པར་སྐྱེའོ། །དེ་གཤིན་རྗེའི་མི་རྣམས་ཀྱིས་དམ་པོར་བཟུང་ནས་ལྕགས་ཀྱི་སོ་མངས་རབ་ཏུ་འབར་བ་བླངས་ཏེ་དེའི་ལུས་ཐམས་ཅད་འཆད་པར་བྱེད། རྣམ་པར་གཤེག་པར་བྱེད། ཡོངས་སུ་འདྲལ་བར་བྱེད་དོ། །སྡུག་བསྔལ་གྱིས་ཉམ་ཐག་པའི་བུད་མེད་དེ་ཉེས་པར་བྱས་པའི་ལས་ཀྱིས་བསླུས་པ་ཡུན་རིང་དུ་ངུ་སྐད་འདོན་ཅིང་ཆོ་ངེས་འདེབས་ལ་ཡོངས་སུ་སྨྲེ་སྔགས་འདོན་ཏོ། །དེ་ལྟར་གནོད་པ་མྱོང་བས་གར་བབ་བབ་ཏུ་འབྲོས་པ་དང་། དེ་ནས་ལས་ཀྱིས་སྤྲུལ་པའི་དགེ་སློང་འོང་བ་མཐོང་སྟེ། སེམས་འདོད་པས་བསྒྲིབས་པ་སེམས་ཀྱིས་ཡོངས་སུ་བསླུས་པ་དེ་དེའི་དྲུང་ཉིད་དུ་རྒྱུག་ལ། དེ་ལྟར་འདོད་པ་དགྲ་ལྟ་བུ་ལས་རྒྱལ་བར་བྱ་བར་དཀའ་བ་གང་དེའི་གནས་སུ་རྒྱུག་པར་བྱེད་ལ་དེ་དེ་དང་ཕྲད་པ་དང་ཡོངས་སུ་འཇུ་བར་བྱེད་དོ། །དེ་ཡང་མེ་ཐབ་ཏུ་གྱུར་ནས་ཀུན་ནས་རབ་ཏུ་འབར་བ་དེར་དེ་རབ་ཏུ་འཇུག་པར་བྱེད་དོ། །དེ་མི་དེས་ལོ་འབུམ་ཕྲག་དུ་མར་སེམས་ཅན་དམྱལ་བ་གནོད་པའི་རྒྱུད་དུ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་དྲག་ཅིང་རྩུབ་ལ་ཤིན་ཏུ་མི་བཟད་པ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་ལྔ་བརྒྱར་དུད་འགྲོ་དག་ཏུ་སྐྱེ་བར་འགྱུར་རོ། །གལ་ཏེ་གཉའ་ཤིང་གི་བུ་གར་རུས་
སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཡང་བུད་མེད་དུ་འགྱུར་ཏེ། གྲོང་ཁྱེར་དང་། གྲོང་ཁྱེར་ཐམས་ཅད་ཀྱི་ལྗན་ལྗིན་འཕྱག་པ་དང་། གྲོང་ཁྱེར་པ་ཐམས་ཅད་ཀྱིས་སྨད་པ་དང་། དབུལ་ཞིང་མདོག་ངན་ལ་རྐང་ལག་རྡོལ་བ་དང་། བྱད་བཞིན་མཐོང་ན་འཇིགས་སུ་རུང་བ་དང་། ཕ་མ་དང་། གཉེན་འདབ་ཀྱིས་སྤངས་པར་འགྱུར་རྟག་ཏུ་ཆུ་ཕྱེ་བཀྲ་ཙམ་གྱིས་འཚོ་ཞིང་དྲི་མ་ཅན་དང་། བགོ་བ་ངན་པ་དང་། ལུས་ཀྱི་ཕྱོགས་གཅིག་ཉམས་པ་དང་། ལུས་ཤིན་ཏུ་ཆད་པ་དང་། འགྲོ་བ་ན་བྱིས་པ་རྣམས་ཀྱིས་རྡོ་དང་། བོང་བ་དག་གིས་མངོན་པར་འཚོག་སྟེ། སྡུག་བསྔལ་བས་འཚོ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྲད་བུའི་རྒྱུད་འབབ་པས་དཀྲུགས་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་ཀུན་ཏུ་བྱས་པས་འགྱུར་རོ། །རྒྱལ་པོ་བསྙེམས་པས་སམ་རྒྱལ་སྲིད་གཞན་གྱི་ཡུལ་འཁོར་འཕྲོག་པའི་ཚེ་དགེ་སློང་མ་ཉོན་མོངས་པ་མེད་པ་མཐུས་སུན་ཕྱུང་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྲད་བུའི་རྒྱུད་དཀྲུགས་པར་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་ཇི་ལྟར་སེམས་ཅན་དམྱལ་བ་དེ་ཐམས་ཅད་འདི་ལྟར་དྲ་བ་རྡོ་རྗེ་ལྟར་སྲ་བའི་ནང་དུ་བཅུག་ནས་དེར་ཡན་ལག་དང་ཉིང་ལག་གི་ཕྱོགས་གང་དང་གང་རེག་པ་དེ་དང་དེར་སྤུ་གྲི་ལྟ་བུས་ཀུན་ནས་གཅོད་པར་བྱེད་དོ། །དེར་ཡང་ཇི་ལྟར་སྦྲང་བུ་དག་སྤུ་ལ་རབ་ཏུ་འཕྱང་བ་དེ་ལྟར་སྲད་བུ་རྡོ་རྗེ་ལྟ་
བུའི་དྲ་བ་ལ་འཕྱང་ངོ་། །དེ་ཉིད་དུ་སྐྱེ་ཞིང་སྐྱེ་ཞིང་འཆི་སྟེ། གཤིན་རྗེའི་མི་རྣམས་ཀྱིས་ཡན་ལག་དང་ཉིང་ལག་ཐམས་ཅད་མདའ་རབ་ཏུ་འབར་བ་དག་གིས་སྡོག་པར་བྱེད་དོ། །དེ་དྲ་བ་རྡོ་རྗེ་ལྟར་སྲ་བའི་ནང་དུ་བཅུག་ཅིང་མདའ་དག་གིས་ཀྱང་སྡོག་པ་ན་སྡུག་བསྔལ་ཤིན་ཏུ་ཚ་བ་དྲག་ཅིང་མི་བཟད་པ་དག་མྱོང་བར་འགྱུར་ཏེ། དེ་ངུ་སྐད་འདོན་ཅིང་ཆོ་ངེས་འདེབས་ལ་ཡོངས་སུ་སྨྲེ་སྔགས་འདོན་ཏོ། །སྡུག་བསྔལ་མཐའ་ཡས་པ་དག་གིས་ཉམ་ཐག་ཅིང་ཀུན་ནས་དབྱེར་མེད་ལ་བཅིང་བ་ཀུན་གྱིས་བཅིངས་པ་ན། དེ་གལ་ཏེ་ལས་ཀྱི་རྐྱེན་གྱིས་ཐར་ན་ཤིན་ཏུ་སྡུག་བསྔལ་བ་ཡིན་ཏེ། གར་བབ་བབ་ཏུ་འབྲོས་སོ། །དེ་མེ་མདག་གི་རླུང་དེ་དག་གི་ནང་དུ་འཇུག་སྟེ། རབ་ཏུ་ཞུ་ཞིང་སྲེག་ལ་ཡོངས་སུ་སྨྲེ་སྔགས་འདོན་ཅིང་ངུ་སྐད་འབྱིན་པ་ན། གཉིས་སུ་མེད་ལ་གྲོགས་མེད་པ་དེས་རྒྱང་རིང་པོ་ན་སྒོ་ཆེན་པོ་ཀུན་ནས་གསལ་བ་ཞིག་མཐོང་ནས་དེར་རྒྱུག་ཅིང་དེར་རབ་ཏུ་འཇུག་པར་བྱེད་དོ། །དེ་ཡང་སྦྲུལ་ཆེན་པོ་ཤུགས་རབ་ཏུ་དྲག་ཅིང་གདུག་པ་ཞིག་ཡིན་ཏེ་དེས་མིད་དོ། །སེམས་ཅན་དམྱལ་བ་པ་དེ་ལུས་ཀྱི་ནང་དེར་སྲེག་པ་ན་སྐད་འབྱིན་པར་ཡང་མི་ནུས་སོ། །སྦྲུལ་དེ་ཡང་ལས་ལས་བྱུང་བ་ཡིན་ཏེ། ཇི་ལྟ་ཇི་ལྟར་བདག་ཉིད་ཡོངས་སུ་་བར་བྱེད་པ་དེ་ལྟ་དེ་ལྟར་སེམས་ཅན་དམྱལ་བ་པའི་ལུས་ནང་དུ་ཞུགས་པ་དེ་དག་ཐམས་ཅད་སྒྲ་སྐད་འབྱིན་པར་མི་ནུས་ཤིང་ལུས་རྩ་དང་རྒྱུས་པ་དང་བྲལ་བ་དེ་དག་ཐམས་ཅད་བྱེ་མ་ལྟར་ཞིབ་མོར་བྱེད་དེ་དེ་ལྟར་ལོ་འབུམ་ཕྲག་དུ་མ་ལོ་བྱེ་བ་གྲངས་མེད་པར་དེ་སྦྲུལ་གྱི་ལྟོ་དེར་འཚེད་དོ། །འཐུབ་བོ། །དེ་གལ་ཏེ་ཡང་སྦྲུལ་དེས་སྐྱུགས་པ་དང་། ལུས་ཤིན་ཏུ་མ་ཚང་བ། ལུས་རྩ་དང་། རྒྱུས་པ་ཐམས་ཅད་ཤིག་ཤིག་པོར་གྱུར་པའི་ལུས་གར་བབ་བབ་ཏུ་འབྲོས་པ་དང་། དེས་གཤིན་རྗེའི་མི་རྣམས་འོང་བ་མཐོང་སྟེ། དེ་དག་གིས་བཟུང་ནས་དེ་མཚོན་རྣོན་པོ་རྣམས་ཀྱིས་ཡན་ལག་དང་ཉིང་ལག་ཐམས་ཅད་ཆུ་སྲིན་བྱིས་པ་གསོད་ལྟར་རྣམ་པར་ཞིགས་པར་བྱེད་དོ། །དེ་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་
བྱས་པ་དེ་སྲིད་དུ་ལོ་འབུམ་ཕྲག་དུ་མ་ལོ་བགྲང་གིས་མི་ལང་བར་ཡུན་རིང་དུ་སྡུག་བསྔལ་མྱོང་བར་བྱེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་ལྔ་བརྒྱར་ཡི་དགས་དང་དུད་འགྲོ་དག་ཏུ་སྐྱེ་བར་འགྱུར་རོ། །གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་དབུལ་ཞིང་ནད་བུ་ཅན་དང་གཟུགས་མི་སྡུག་པར་འགྱུར། རྟག་ཏུ་སྒྲ་མི་སྙན་པ་དག་གིས་གནོད་པར་འགྱུར་ལ་ལུས་ཐམས་ཅད་དུག་གིས་ཡོག་ཅིང་ཉམ་ཐག་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་སེམས་ཅན་དམྱལ་བ་སྐྲ་ཤད་འཛིངས་པ་དང་། བྱ་ཁྭ་ཡོད་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །སྲིང་མོ་ཆང་གིས་ར་རོ་བར་གྱུར་པ་ལ་མི་རིགས་པར་བྱས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྐྲ་ཤད་འཛིངས་པ་དང་། བྱ་ཁྭ་ཡོད་པར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཆེན་པོ་ཡང་སོས་ལ་སོགས་པའི་སྡུག་བསྔལ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟ་སྟེ། ཟངས་ཀྱི་ཞི་ག་དག་གི་ནང་དུ་འཇུག་པར་བྱེད་དོ། །ཞུགས་ནས་ཀྱང་དེར་འཇུ་བར་བྱེད་དོ། །དེ་ནས་ཡང་འཚོ་བར་འགྱུར་རོ། །དེ་ནས་ཡང་འཇུ་བར་བྱེད་དེ། ཞི་ག་དེ་དག་གི་ནང་དུ་བཅུག་ནས་འཚོ་ཡང་འཚོ་ལ་འཆི་ཡང་འཆི་སྟེ། འཆི་བ་དང་འཚོ་བར་བྱེད་དོ། །དེ་འདི་ལྟར་གཤིན་རྗེའི་མི་རྣམས་ཀྱིས་སྦུད་པ་གཉིས་ཀྱིས་འབུད་དེ། ཇི་ལྟར་དེའི་སོལ་བ་དང་། དེའི་ཞི་ག་དག་དང་།
སེམས་ཅན་དམྱལ་བ་པ་དེའི་ལུས་ཀྱང་མི་མངོན་པར་འབུད་དོ། །དེ་ལྟར་དེ་ལོ་འབུམ་ཕྲག་དུ་མར་ཞི་ག་དག་གི་ནང་དུ་བཅུག་ནས་ཇི་ལྟར་མེས་གསེར་འཇུ་བ་ལྟར་འཚེད་དོ། །དེ་ལྟར་དེ་སེམས་ཅན་དམྱལ་བ་དེར་ཉེས་པར་བྱས་པའི་ལས་ཀྱི་མཐའ་སྤྱད་པས་འཚེད་དེ། དེ་གལ་ཏེ་ལས་ཟད་པས་ཞི་ག་དེ་དག་གི་ཞབས་ཀྱི་ནང་དུ་ལྷུང་སྟེ། གཤིན་རྗེའི་མི་རྣམས་ཀྱིས་བཟུང་ནས་བརྡུང་བ་རྣམས་ཀྱིས་ཇི་ལྟར་ལྕགས་མགར་ས་དག་ལ་ལྕགས་གོང་བུར་བྱས་ཏེ། ལྕགས་མགར་གྱིས་ཀུན་ཏུ་རྡུང་བ་དེ་ལྟར་ཀུན་ཏུ་རྡུང་ངོ་། །དེ་ལྟར་ཀུན་ཏུ་རྡུང་བ་ན་བརྡུངས་པ་དང་སྲོག་ཆད་ལ་དེ་ནས་ཡང་བརྡུང་བ་བཏེག་པ་དང་ཡང་འཚོ་སྟེ། དེ་ལྟར་སེམས་ཅན་དམྱལ་བ་པ་དེ་ཡུན་རིང་དུ་ལོ་བགྲང་གིས་མི་ལང་བར་འཚེད་དོ། །དེ་བརྒྱ་ལ་དེ་ལས་ཐར་ན་གཤིན་རྗེའི་མི་རྣམས་ཀྱིས་རྔ་བོ་ཆེའི་ནང་དུ་འཇུག་པར་བྱེད་དོ། །བཅུག་ནས་ཀྱང་ལས་ཀྱིས་བྱས་པའི་རྔ་བོ་ཆེའི་སྒྲ་གང་གིས་དེའི་སྙིང་ཞིགས་པར་བྱེད་པ་རྣམ་པ་དེ་ལྟ་བུ་འབྱུང་བར་འགྱུར་ཏེ། སྙིང་རྣམ་པར་ཞིགས་པ་དེ་ཡང་འཚོ་བར་འགྱུར་ལ་དེ་ནས་ཡང་འཆི་བར་འགྱུར་ཏེ། དེ་ལྟར་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚོ་ཞིང་འཆིའོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་དྲུག་བརྒྱར་དུད་འགྲོ་དག་ཏུ་སྐྱེ་བར་འགྱུར་རོ། །གལ་ཏེ་བརྒྱ་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་རྟག་ཏུ་སྙིང་སྐྲག་པར་འགྱུར། རི་དགས་ཀྱི་སེམས་ལྟར་རྣམ་པར་འཁྲུལ་ཅིང་རྒྱལ་པོའི་འཁོར་ནས་རྟག་ཏུ་འཚེ་བར་འགྱུར། གཞན་གྱིས་སྒྲ་འབྱིན་པར་བྱེད་ཅིང་བཅིང་བས་ཀྱང་ཚེ་ཟད་པར་བྱེད་དེ། ནམས་ཀྱང་སེམས་བདེ་བར་མི་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྙིང་རྗེ་རྗེ་སྐད་སྒྲ་འབྱིན་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་
སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །མཆོད་སྦྱིན་གྱི་ལམ་ལོག་པར་ལྟ་བ་ལོག་པར་མཐོང་བའི་ལམ་གྱིས་སྲིང་མོ་གཞོན་ནུ་སུན་འབྱིན་པར་བྱེད་པ་ནི་ཇི་ལྟར་བྲམ་ཟེའི་སྨྲང་ལས་བུད་མེད་གཞོན་ནུ་འདོད་ཆགས་ལངས་པ་གང་བག་མར་མ་བླངས་ན་དེས་མིའི་སྲོག་གཅོད་པ་དང་འདྲ་བ་འཐོབ་པར་འགྱུར་རོ་ཞེས་དེ་ལྟར་སྨྲང་ངན་པས་བསླུས་པས་འོས་པ་མ་ཡིན་པ་ལ་བྱེད་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྙིང་རྗེ་རྗེ་སྐད་སྒྲ་འབྱིན་པར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་གཤིན་རྗེའི་མི་རྣམས་ཀྱིས་ལག་པ་དག་གིས་མདེའུ་སྟེའུ་ཀ་རབ་ཏུ་འབར་བ་འཕེན་པ་དེ་ལྟར་སེམས་ཅན་དམྱལ་བ་པ་འཕེན་ཏེ། ཇི་ལྟར་བུ་ས་ལའི་འདབ་མ་ཙམ་དུ་ལུས་གང་ཉམས་པ་དང་རྣམ་པར་ཉམས་པ་མ་ཡིན་པ་ལ་ལྷག་མ་མེད་པར་བྱེད་དེ། དེ་ལྟར་ཡན་ལག་དང་ཉིང་ལག་ཐམས་ཅད་ཉམས་རྣམ་པར་ཉམས་ཤིང་རབ་ཏུ་འབར་ལ་ཀུན་ནས་སྡུག་བསྔལ་མི་བཟད་པས་ཉམ་ཐག་པ་མགོན་མེད་ཅིང་གྲོགས་མེད་ལ་གཉིས་སུ་མེད་པ་ཡུན་རིང་དུ་ལོ་བགྲང་གིས་མི་ལང་བར་སྡུག་བསྔལ་ཚ་བ་རྩུབ་པ་མྱོང་བར་འགྱུར་རོ། །གལ་ཏེ་ཡང་ལས་ཟད་པའི་རྐྱེན་གྱི་དབང་གིས་མདེའུ་སྟེའུ་ཀ་དང་། རལ་གྲི་ཉམ་ང་བ་དེ་ལས་ཐར་ན་ལྕགས་ཀྱི་ས་གཞིའི་སྟེང་ན་མེ་མདག་རབ་ཏུ་འབར་བའི་ཕུང་པོར་འབྱིང་བཞིན་དུ་འབྲོས་སོ། །སྡུག་བསྔལ་གྱི་གདུང་བ་མང་པོས་ཉམ་ཐག་ཅིང་ངུ་སྐད་འབྱིན་པའི་ཚེ། ཐག་ཉེ་བ་ན་ནགས་ཚལ་ཆེན་པོ་སྤྲིན་ནག་པོ་ལྟ་བུ་ཡོད་དེ། ཀུན་ནས་བྱ་སྐད་སྙན་པས་ཡོངས་སུ་བསྐོར་ཅིང་དེའི་ཐག་ཉེ་བ་ཞིག་ན་མཚོ་ཆེན་པོ་ཆུ་རབ་ཏུ་དང་བ་ཞིག་ཡོད་པ་མཐོང་ནས་དེ་འདི་སྙམ་དུ་སེམས་སོ། །ཀྱེ་ཨེ་མ་ནག་པོ་འདི་ནི་ནགས་ཚལ་ཡིན་ལ་མཚོ་སྔོན་
པོ་དང་ཡང་ལྡན་པ་ཞིག་སྟེ། བདག་ནི་འདིར་བདེ་བ་ཐོབ་པར་འགྱུར་རོ་སྙམ་ནས་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ་ནགས་ཚལ་དེའི་དྲུང་དུ་ས་གཞི་མེ་མདག་རབ་ཏུ་འབར་བའི་ཕུང་པོར་འབྱིང་བཞིན་དུ་རྒྱུག་གོ །དེ་གང་གི་ཚེ་ཐག་ཉེ་བ་ན། ནགས་ཚལ་ཡོད་པ་དེ་དང་བྱ་དག་གིས་ཀྱང་བསྐོར་བ་མཐོང་བ་དང་། ཤིན་ཏུ་བདེ་བ་འདོད་པ་དཔུང་གཉེན་འདོད་པ་དེ་ཡང་ནགས་དེ་དག་ཉིད་ཀྱི་དྲུང་དུ་རབ་ཏུ་རྒྱུག་གོ །དེ་གལ་ཏེ་ཚེགས་ཆེན་པོས་ནགས་དེའི་དྲུང་དུ་ཕྱིན་པ་དང་། སྔར་གཞན་དུ་མཐོང་ལ། དེ་གཞན་ཞིག་ཏུ་མཐོང་སྟེ་སྦྲུལ་ཤིན་ཏུ་གདུག་ཅིང་རབ་ཏུ་འཇིགས་པ་མགོ་སྟོང་ཡོད་པ། མིག་རབ་ཏུ་འབར་བ། བྱད་བཞིན་འཇིགས་འཇིགས་ལྟར་འདུག་པ་ཞིག་དང་། བྱ་གང་ཡིན་པ་དེ་དག་ཀྱང་ལུས་རབ་ཏུ་འབར་ལ་དེ་དག་ཐམས་ཅད་སེམས་ཅན་དམྱལ་བ་པའི་སྒྲ་སྐད་རབ་ཏུ་འབྱིན་པར་མཐོང་ལ་སྦྲུལ་དེས་མོད་བཞིན་དུ་བཟུང་ནས་ཟ་བར་བྱེད་དེ། སྡུག་བསྔལ་སྣ་ཚོགས་ཀྱིས་ཉམ་ཐག་པ་ཆོ་ངེས་འདེབས་པ་ན་དེ་ཡང་སྦྲུལ་དེའི་ཁ་རབ་ཏུ་འབར་བས་བཟུང་ནས་ཁའི་བར་དུ་བཅུག་སྟེ་ཟ་བར་བྱེད་དོ། །དེ་ལས་ཀྱིས་བྱས་པའི་སྦྲུལ་དེ་ཉིད་ཀྱིས་ཟ་བ་ནི་ཡུན་རིང་པོ་ལོ་བགྲང་གིས་མི་ལང་བར་ཟ་བར་བྱེད་དོ། །དེ་གལ་ཏེ་ལས་ཟད་ནས་སྦྲུལ་དེའི་ཁ་དེ་ནས་ཐར་ནས་སྐོམ་པས་གདུངས་པས་མཚོ་དེའི་དྲུང་དུ་རྒྱུག་གོ །མཚོ་དེ་ཡང་དུད་པ་ནག་པོས་བསྒྲིབས་ཤིང་ནང་ཡང་སེམས་ཅན་དམྱལ་བ་པའི་མེས་གང་སྟེ་དེ་མཚོ་དེར་ནུབ་བོ། །མཚོ་དེ་ཟབས་སུ་དཔག་ཚད་ཙམ་སྟེ། དེར་ནུབ་ཅིང་དེར་སྡུག་བསྔལ་མི་བཟད་པ་མྱོང་ངོ་། །ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་རང་གི་ལས་དང་འཐུན་པ་གཞན་དང་མི་འདྲ་བའི་སྡུག་བསྔལ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་བདུན་བརྒྱར་ཡི་དགས་དང་། དུད་འགྲོ་དག་ཏུ་སྐྱེ་བར་འགྱུར་རོ། །དེ་གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་དབུལ་
ཞིང་ནད་བུ་ཅན་དང་། གཞན་གྱིས་བཀོལ་བ་དང་། ལམ་གྱི་བཞི་མདོ་དང་། ལམ་པོ་ཆེར་སྤྲད་པ་དང་། མིའུ་ཐུང་དུ་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྙིང་རྗེ་ཆེན་པོ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །གང་གིས་སློབ་ཏུ་བཅུག་ལ་སློབ་པའི་ཚིག་དེ་ཡང་དག་པའི་ལམ་རབ་ཏུ་སྟོན་པ་ཡིན་ན་དེ་འདོད་ཆགས་བདོ་བས་མཁན་པོ་དེའི་ཆུང་མ་ཉེས་པ་མེད་པ་སུན་འབྱིན་པར་བྱེད་ཅིང་འཇིག་རྟེན་པ་དག་ལ་ཡང་འདི་ལྟར་འདི་ནི་མཁན་མོ་མ་དང་འདྲ་སྟེ། བདག་ནི་བུ་དང་མཚུངས་སོ་ཞེས་ཀྱང་བརྗོད་ལ་ཡིད་གཅུགས་པར་འདོད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྙིང་རྗེ་ཆེན་པོར་སྐྱེ་བར་འགྱུར་རོ། །དེར་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་གོང་དང་འོག་ན་སོ་མི་འཐུན་པའི་ཁ་གཅོད་པ་མཚོན་འཛུགས་པ་ལྟ་བུས་ཡང་དང་ཡང་དུ་གཅོད་པར་བྱེད་དོ། །དེ་གཅོད་པ་ན་ནང་དུ་གཏོགས་པའི་ཤ་དང་། རྒྱུས་པ་དང་། པགས་པ་དང་། ཆུ་སེར་དང་། རུས་པ་དང་། རྐང་གི་བར་ཐམས་ཅད་མཚོན་ཆ་དག་གིས་གཅོད་པར་བྱེད་དེ། དེ་ལྟར་སྙིང་རྗེ་རྗེ་སྐད་དུ་ངུ་ཞིང་ཡོངས་སུ་སྨྲེ་སྔགས་འདོན་ཏོ། །ཇི་ལྟར་སེམས་ཅན་དམྱལ་བ་པ་གཞན་དག་ཀྱང་ངུས་པའི་སྒྲ་དེས་དེ་ལྟར་སྡུག་བསྔལ་མི་བཟད་པས་ཉམ་ཐག་སྟེ། ཤིན་ཏུ་སྙིང་རྗེ་རྗེ་སྐད་ཉམ་ཐག་པ་ན་སྡུག་བསྔལ་དེ་དག་ཐམས་ཅད་མྱོང་ངོ་། །གཅོད་པ་ན་སྲོག་ཆད་པར་མི་
འགྱུར་ཏེ། དེ་ལྟར་དེས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མ་ཀུན་ཏུ་བཅད་ཅིང་བཅད་ཅིང་ཡང་འབྱུང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་དྲུག་སྟོང་དུ་སེམས་ཅན་དམྱལ་བ་དང་། ཡི་དགས་དང་། དུད་འགྲོ་དག་ཏུ་སྐྱེ་བར་འགྱུར་རོ། །དེ་ལས་ཐར་ནས་ཀྱང་གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་གལ་ཏེ་མངལ་དུའམ། གལ་ཏེ་བཙས་ནས་སམ། གལ་ཏེ་གན་རྐྱལ་དུ་བཞག་པ་ནའམ། གལ་ཏེ་གོག་ཙམ་ནའམ། གལ་ཏེ་རྒྱུག་ནུས་ཙམ་ན་འཆི་བར་འགྱུར་ཞིང་གང་དང་གང་དུ་སྐྱེས་པར་དབང་པོ་ཐམས་ཅད་མ་ཚང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྙིང་རྗེ་མེད་པའི་ས་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་བརྟགས་ན། གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །མནའ་མ་ལ་མི་རིགས་པར་བྱས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྙིང་རྗེ་མེད་པའི་སར་སྐྱེ་བར་འགྱུར་རོ། །དེར་སྐྱེས་ནས་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་དེ་དག་སའི་སྟེང་དུ་ཕུང་པོ་བརྩེགས་མར་བྱས་ཏེ། གཤིན་རྗེའི་མི་རྣམས་ཀྱི་ཟངས་ཀྱི་ས་གཞི་རབ་ཏུ་བསྲེགས་པར་བརྒྱའམ་ཡང་ན་སྟོང་གཅིག་གི་སྟེང་དུ་གཅིག་ཕུང་པོར་བྱས་པ་ནི་ཇི་ལྟར་སྐྲའི་རྩེ་མོ་ལ་སྐབས་མེད་པ་དེ་ལྟར་གཅིག་གི་སྟེང་དུ་གཅིག་བསྡུས་ནས་
སྲེག་གོ །དེ་ལྟར་དེ་དག་གཅིག་གི་སྟེང་དུ་གཅིག་བཅེར་བས་གནོད་པ་ན་ཇི་ལྟར་དེ་དག་གཅིག་གི་སྟེང་དུ་གཅིག་ཤིན་ཏུ་ཐགས་དམ་པོར་བཅེར་བའི་བར་མི་མངོན་པ་དེ་ལྟར་བསྡུ་བར་བྱས་ནས་གཤིན་རྗེའི་མི་རྣམས་ཐོ་བ་ཐོགས་ཏེ་ཀུན་ཏུ་འཚོག་གོ །དེ་ལྟར་ཇི་སྲིད་དུ་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་སྡུག་བསྔལ་མི་བཟད་པ་ཚ་བ་རྩུབ་པ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་དགུ་བརྒྱར་ཡི་དགས་དང་། དུད་འགྲོ་དག་ཏུ་སྐྱེ་བར་འགྱུར་རོ། །དེ་ལས་ཐར་ནས་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དབུལ་ཞིང་ནད་བུ་ཅན་དང་། འགྲན་ཟླ་གཞན་གྱིས་བསད་པར་འགྱུར། ཡུལ་ངན་པར་ཆུ་འགྲམ་གྱི་མི་ཀླ་ཀློར་སྐྱེ་བར་འགྱུར་ཏེ། དེར་ཡང་ཐམས་ཅད་ཀྱི་ཐ་མར་འགྱུར་ཞིང་ཚེ་ཐུང་བར་འགྱུར་བ་མཐོང་ངོ་། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་རབ་ཏུ་ཚ་བའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཤིང་སྐམ་བསྡུས་པ་ལྟ་བུ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་བརྟགས་ན་གང་གིས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། ཆང་འཐུང་བ་དང་། བརྫུན་སྨྲ་བ་དང་། ལོག་པར་ལྟ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འགྱུར་རོ། །མི་འཇིགས་པ་སྦྱིན་པ་བྱིན་པའི་ཆུང་མ་ཉེས་པ་མེད་པར་འཕྲོག་པ་ནི་དེ་གསོད་པའི་སར་ཁྲིད་ཅིང་བསད་དུ་དོགས་པ་ན་གང་གིས་སྲོག་ཕྱུང་སྟེ། མི་དེ་བཏང་བ་ལས་དེས་ཀྱང་དྲིན་མེད་པར་བྱས་ནས་དེའི་ཆུང་མ་འཕྲོག་པར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཤིང་སྐམ་བསྡུས་པ་ལྟ་བུར་སྐྱེ་བར་འགྱུར་རོ། །དེར་སྐྱེས་ནས་གང་སེམས་ཅན་དམྱལ་བ་ཡང་སོས་ལ་སོགས་
པའི་གནོད་པ་བསྡུས་པ་དེ་དག་ཐམས་ཅད་འབྱུང་བའི་སྟེང་དུ་ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་དེ་ཆུ་བོ་སྒྲ་ཆེན་ཞེས་བྱ་བ་དེའི་ནང་དུ་འཇུག་པར་བྱེད་དོ། །དེར་སེམས་ཅན་དམྱལ་བ་པ་བརྒྱ་སྟོང་དུ་མ་དག་ཀྱང་འཇུག་པར་བྱེད་དོ། །སེམས་ཅན་དམྱལ་བ་པ་དེ་དག་གི་ནང་དུ་འཇུག་པར་བྱེད་དོ། །དེ་དེ་ལྟར་དེ་དག་གི་ནང་དུ་ཞུགས་ཤིང་ཤུགས་དྲག་པོས་བདས་པ་རྣམས་ཀྱི་འོག་ཏུ་བཅུག་ནས་དེ་ཇི་ལྟར་སྐྲའི་རྩེ་མོ་ཙམ་ཡང་མི་མངོན་པ་དེ་ལྟར་དེ་དག་གིས་སྟེང་ནས་སྟེང་དུ་འདུག་ནས་གནོད་པར་བྱེད་དེ། དེའི་སྟེང་ན་སེམས་ཅན་དམྱལ་བ་པ་རྣམས་འཁོད་དོ། །འོག་ཏུ་ནི་ཞ་ཉེ་རབ་ཏུ་བསྐོལ་བས་འཚེད་ཅིང་སྲེག་ལ་གསོད་དོ། །ཆོ་ངེས་འདེབས་ཤིང་རྟག་ཏུ་སྡུག་བསྔལ་བས་ཉམ་ཐག་སྟེ། དེ་ལྟར་སྡུག་བསྔལ་བས་ཉམ་ཐག་པ་ཕྱིར་ཞིང་ལས་ཀྱིས་བྱས་པའི་ཆུ་སྲིན་དག་ཉེ་བར་འོང་སྟེ། གང་དག་གིས་སེམས་ཅན་དམྱལ་བ་པ་དེ་ཡན་ལག་དང་ཉིང་ལག་ཐམས་ཅད་ཟ་ཞིང་འབྱུང་ངོ་། །དེ་ཤིང་སྐམ་ལྟར་བསྡུས་པའི་སྡུག་བསྔལ་མྱོང་བ་ན་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་རིང་པོར་ལས་ཀྱིས་བྱས་པའི་ཚོར་བ་ཤིན་ཏུ་མི་བཟད་པའི་སྡུག་བསྔལ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་ལྔ་བརྒྱར་ཡི་དགས་དང་དུད་འགྲོ་དག་ཏུ་སྐྱེ་བར་འགྱུར་རོ། །དེ་དེ་ལས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་བུད་མེད་ཀུན་གྱི་ཡིད་ཆགས་པར་མི་འགྱུར་ཏེ། དེ་ཇི་ལྟར་བུའི་ངོ་བོ་དང་ཕའི་ངོ་བོ་དང་། མིང་པོའི་ངོ་བོ་ལྟ་བུ་དང་། ཚེ་རབས་ལྔ་བརྒྱར་ཕོ་མཚན་དང་བྲལ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་རབ་ཏུ་ཚ་བའི་འཁོར་ལ་བརྟགས་ན། དེས་འཁོར་བཅུ་དྲུག་པ་དག་ལས་བཅུ་བདུན་པ་མ་མཐོང་སྟེ། སེམས་ཅན་དམྱལ་བ་ཆེན་པོ་རབ་ཏུ་ཚ་བ་ནི་འཁོར་བཅུ་དྲུག་དག་གིས་ཡོངས་སུ་བསྐོར་ཏོ། །སེམས་ཅན་དམྱལ་བ་ཆེན་པོ་
རབ་ཏུ་ཚ་བའི་མི་བཟད་པ་ཆེན་པོ་ནི་དེ་དག་ཡིན། མཇུག་ནི་དེ་དག་ཡིན། མཐའ་ནི་དེ་དག་ཡིན་ཏེ། དེ་རང་གིས་བྱས་པའི་ལས་ཀྱི་འབྲས་བུའི་ས་ལ་སྤྱོད་པའི་མི་དག་འཚེད་ཅིང་སྲེག་སྟེ། འདི་ལྟར་གཞན་གྱིས་བྱས་པ་འཐོབ་པ་མ་ཡིན་པ་ལས་དང་འཐུན་པར་གནོད་པ་མྱོང་ངོ་། །རང་གིས་བྱས་པ་ཆུད་ཟ་བར་མི་འགྱུར་ལ་གཞན་གྱིས་བྱས་པ་དང་ཕྲད་པ་མེད་དེ། བྱས་པ་ཆུད་ཟ་བར་མི་འགྱུར་ཞིང་རང་གིས་བྱས་པ་དང་འཐུན་པར་འབྲས་བུ་དག་འབྱུང་བར་འགྱུར་རོ། །རང་གིས་བྱས་པའི་སྐྱེ་གནས་ལས་སྐྱེས་པའི་སེམས་ཅན་དག་ནི་རང་གི་ལས་ལ་སྤྱོད་པ་ཡིན་ཏེ། འདི་ལྟར་དགེ་བའམ་སྡིག་པའི་ལས་སུ་འགྱུར་བ་དེའི་ལས་ཀྱི་བགོ་སྐལ་ལ་སྤྱོད་པ་ཡིན་ནོ། །དེ་ལྟར་དགེ་སློང་དེ་སེམས་ཅན་དམྱལ་བ་རྣམས་ལ་སེམས་ཅན་དམྱལ་བར་གཏོགས་པའི་ལས་རྗེས་སུ་སེམས་པ་སྲིད་པ་མངོན་པར་གྲུབ་པ་ལ་ཅུང་ཟད་ཀྱང་བདེ་བ་མེད་དེ། རྟག་པ་མེད་ལ་ཐེར་ཟུག་པ་མེད་ཅིང་བདག་དང་བཅས་པ་མ་ཡིན་པར་མཐོང་སྟེ། འཁོར་བ་ཐམས་ཅད་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་མཐོང་ངོ་། །དེ་དེ་ལྟར་མཐོང་བ་ན། འདོད་པ་ཐམས་ཅད་དང་འདོད་པ་ཀུན་ཏུ་སྦྱོར་བ་དང་། འདོད་པ་སོ་སོར་འབྲང་བ་དང་། འདོད་པ་ལ་རྣམ་པར་རྟོག་པ་དང་། འདོད་པའི་གཞི་དག་ལ་རབ་ཏུ་འདོད་ཆགས་དང་བྲལ་བར་འགྱུར་རོ། །དེ་ཕྱིར་ཞིང་ཡང་འདོད་པའི་ཉེས་དམིགས་དག་ལ་ཆེས་ཤིན་ཏུ་འཇིགས་པར་ཡང་འགྱུར་ཏེ། དེ་ལྟར་ལུས་དང་ངག་དང་ཡིད་ཀྱི་གཡོ་བ་ཤིན་ཏུ་བསྡམས་པ་དེ་ལ་བདུད་དང་བདུད་ཀྱི་འཁོར་གྱིས་རབ་ཏུ་མི་ཚུགས་སོ། །དེ་ལྟ་དེ་ལྟར་གོམས་པར་བྱེད་པ་དེ་འཁོར་བའི་ཚེ་རབས་མང་པོའི་རྒྱུད་ཞིགས་པར་འགྱུར། བསྲབས་པར་འགྱུར། སྤངས་པར་འགྱུར། ལྷོད་ལྷོད་པོར་འགྱུར་རོ། །དེ་ནས་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པའི་དགེ་སློང་འདི་ནི། ཀྱེ་མ་སྤྲོ་བ་མ་བྲི་བ་ཡིན་ཏེ། ས་གཞན་བཅུ་གཅིག་པ་ལ་ཞུགས་པ་ཡིན་ནོ་སྙམ་མོ། །
དེ་ལྟར་སྤྲོ་བ་མ་བྲི་བ་དེ་ལ་ས་བླའི་གནོད་སྦྱིན་དག་དགའ་ནས་བར་སྣང་ལ་སྤྱོད་པའི་གནོད་སྦྱིན་དག་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་ཆེན་བཞི་པ་དག་ལ་མངོན་པར་བསྙད་པ་ནས་སྔ་མ་བཞིན་དུ་སྦྱར་ཏེ། ཚངས་རིས་ཀྱི་ལྷའི་བར་དག་ལ་འདི་ལྟར་འཛམ་བུའི་གླིང་དུ་རིགས་ཆེ་གེ་མོ་ཞིག་ལས་རིགས་ཀྱི་བུ་ཞིག་གྲོང་ཆེ་གེ་མོ་ཞིག་དང་། གྲོང་རྡལ་མང་གེ་མོ་ཞིག་དང་། མིང་ག་གེ་མོ་ཞིག་ཅེས་བྱ་བ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་བདུད་ཀྱི་ཡུལ་གྱི་དངོས་པོ་མི་འདོད་ཅིང་འདོད་ཆགས་ཀྱི་དགའ་བའི་མོད་ལས་སྐྱེས་པའི་སྲེད་པའི་དངོས་པོ་དང་ལྷན་ཅིག་གནས་པར་མི་འདོད། ཉོན་མོངས་པ་སྦྲུལ་ལྟ་བུ་དང་ལྷན་ཅིག་དགའ་བར་མི་བྱེད་ལ། གཞན་གྱི་ཉོན་མོངས་པ་དག་མཐོང་ནས་འཁོར་བ་ཐམས་ཅད་ལས་ཡིད་བྱུང་ངོ་ཞེས་མངོན་པར་བསྙད་དོ། །དེ་ཐོས་ནས་ཚངས་ཆེན་གྱི་རིས་ཀྱི་ལྷ་རྣམས་བདུད་ཀྱི་ཕྱོགས་ནི་དམའ་བར་གྱུར་ཏོ། །དམ་པའི་ཆོས་ཀྱི་ཕྱོགས་ནི་མངོན་པར་མཐོའོ་ཞེས་དགའ་བ་སྐྱེས་སོ། །དེ་ལྟར་ས་གཞན་བཅུ་གཅིག་པ་ལ་ཞུགས་པ། རྣལ་འབྱོར་སྤྱོད་པའི་ལྷའི་མཐོང་བ་དང་ཡང་དག་པའི་ལམ་མཐོང་བ། ལས་ཀྱི་ཆོས་ཀྱི་རྣམ་པར་སྨིན་པ་ཤེས་པ། ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པའི་དེ་ཁོ་ན་ཉིད་མཐོང་བ་དེ་འདི་སྙམ་དུ་སེམས་ཏེ། འདི་ལྟར་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པ་ཤིན་ཏུ་ཞིབ་མོར་རབ་ཏུ་རྣམ་པར་འབྱེད་པ་ན། དགེ་སློང་དག་ལྷ་དང་བཅས་པའི་འཇིག་རྟེན་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་། བྲམ་ཟེ་དང་། སྐྱེ་དགུར་བཅས་པ་དང་། ལྷ་དང་མིར་བཅས་པ་དག་གིས་དེ་ལྟར་རབ་ཏུ་རྣམ་པར་འབྱེད་པ་མི་ཤེས་ན། གཞན་མུ་སྟེགས་ཅན་ཀུན་ཏུ་རྒྱུ་བ་པ་དག་གིས་ཤེས་པ་ལྟ་སྨོས་ཀྱང་ཅི་དགོས་ཏེ། གནས་མེད་ཅིང་སྐབས་མེད་ལ། ངའི་སློབ་མ་དང་། གང་ང་ལས་ཐོས་པ་ནི་མ་གཏོགས་སོ་སྙམ་མོ། །དེ་ལྟར་
ཆད་པ་གསུམ་ཤིན་ཏུ་ཕྲ་བ་རབ་ཏུ་རྣམ་པར་འབྱེད་པ་དེ་ནི་དེ་ལྟར་ཤིན་ཏུ་ཕྲ་བ་ཡིན་ནོ། །དགེ་སློང་དག་གཞན་མུ་སྟེགས་ཅན་ཀུན་ཏུ་རྒྱུ་བ་དག་གིས་དྲིས་ན་ལན་དེ་ལྟར་གདབ་པར་བྱའོ། །གཞན་མུ་སྟེགས་ཅན་ཀུན་ཏུ་རྒྱུ་བ་པ་དག་ནི་དྲིས་པའི་ལན་ལ་ཤིན་ཏུ་རྨོངས་པར་འགྱུར་ཏེ། དེ་ཅིའི་ཕྱིར་ཞེ་ན། དགེ་སློང་དག་འདི་ལྟར་འཁོར་བར་གཏོགས་པའི་སེམས་ཅན་ཐམས་ཅད་ཀྱི་ཡུལ་མ་ཡིན་པའི་ཕྱིར་རོ། །དེ་དག་གི་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པ་རྣམ་པ་གསུམ་པོ་དེ་ནི་རིགས་པ་ཡིན་ཏེ། ཉེས་པ་དང་བཅས་པ། དྲི་མ་དང་བཅས་པ། ཁྱད་དུ་གསོད་པ་དང་བཅས་པ་ལ་སེམས་པ་ཡིན། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་རྣམ་པར་གཅོད་པ་མ་ཡིན། འཕགས་པ་རྣམས་ཀྱི་ཆོས་མངོན་སུམ་དུ་བྱེད་པ་ཡང་མ་ཡིན། མྱ་ངན་ལས་འདས་པའི་མཐར་ཐུག་པ་མ་ཡིན། གཏན་ཟད་པར་བྱེད་པ་མ་ཡིན། ཞི་བ་མ་ཡིན། བདེ་བ་མ་ཡིན། ལྷའི་འཇིག་རྟེན་དུ་སྐྱེ་བར་བྱེད་པ་ཡང་མ་ཡིན་ཏེ། དེ་དག་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པ་རྣམ་པ་གསུམ་པོ་ལ་སེམས་པར་བྱེད་དོ། །དགེ་སློང་དག་གཞན་མུ་སྟེགས་ཅན་ཀུན་ཏུ་རྒྱུ་བ་པ་དག་ནི་རང་གི་ལུས་ཀྱིས་མགུ་ནས་ང་རྒྱལ་འབའ་ཞིག་བྱེད་པར་ཟད་དེ། སྐྱོན་དང་ཡོན་ཏན་དཔྱོད་པར་མི་བྱེད་དོ། །དེ་ལྟར་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པ་རྣམ་པ་གསུམ་པོ་དེ་དག་ནི་མི་བཟད་པ་ཆེན་པོ་ཡིན་ཏེ། དེ་དག་དང་། ངའི་དང་། ཆུང་ཟད་ཀྱང་འདྲ་བ་མེད་པ་ནི་དཔེར་ན་མྱ་ངན་ལས་འདས་པ་དང་འཁོར་བ་གཉིས་ཆུང་ཟད་ཀྱང་མི་འདྲ་བ་བཞིན་ཏེ། དེ་ལྟར་དེ་དག་གི་ཆད་པ་རྣམ་པ་གསུམ་དང་ངའི་དང་འདྲ་བ་མེད་དོ། །དགེ་སློང་དག་དེ་དེ་ལྟར་ལན་གདབ་པར་བྱ་སྟེ། ཕས་ཀྱི་རྒོལ་བ་དག་གི་ནི་སྟོང་པ་ཡིན་ལ། ངའི་ལམ་ནི་བདེ་བ་ཡིན་ནོ། །མྱ་ངན་ལས་འདས་པ་ནི་ཞི་བའོ། །འདུས་
བྱས་ཐམས་ཅད་ནི་གཡོ་བའོ། །འཁོར་བ་ཐམས་ཅད་ན་བདེ་བ་མེད་དེ། གང་རྟག་པ་དང་། བརྟན་པ་དང་། ཐེར་ཟུག་དང་། མི་འགྱུར་བའི་ཆོས་ཅན་དེ་དག་ལ་དེ་ལྟར་བསམ་པར་བྱའོ། །དགེ་སློང་དག་དེ་ལྟར་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པ་རྣམ་པ་གསུམ་གྱི་དེ་ཁོ་ན་ཉིད་མཐོང་བའི་དགེ་སློང་དེ་ནི་ཆེ་བ་ཡིན་ནོ། །རྣལ་འབྱོར་སྤྱོད་པའི་དགེ་སློང་ཐར་པའི་གྲོང་ཁྱེར་གྱི་དེ་ཁོ་ན་ཉིད་མཐོང་བ་དེ་ཡང་རྟོག་པར་བྱེད་དེ། དགེ་སློང་དེ་ཇི་ལྟར་ན་ས་གཞན་བཅུ་གཉིས་པ་ལ་ཞུགས་ཞིག་གུ་སྙམ་ནས་རྣལ་འབྱོར་སྤྱོད་པ་དེས་བརྟགས་ན། དགེ་སློང་འདི་ནི་བརྩོན་པ་མ་བྲི་བ་ཡིན་ལ་ད་དུང་དུ་ལས་ངན་པ་བྱས་པ་རྣམས་ཀྱི་རྒྱུ་དང་འབྲས་བུའི་དེ་ཁོ་ན་ཉིད་ལ་རྟོག་པར་བྱེད་དེ། སེམས་ཅན་དམྱལ་བ་ཆེན་པོ་བདུན་གྱི་འཁོར་དམྱལ་བ་མནར་མེད་པ་ཞེས་བྱ་བ་སྟོང་འགྱུར་དུ་འབྱུང་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་བསམས་བཞིན་དུ་མ་བསད་པ་དང་། ཕ་བསད་པ་དང་། བསྐལ་པའི་ལྷག་མར་གནས་པར་འགྱུར་བ་ནི་གང་བསྐལ་པའི་ཐ་མར་ཉེས་པར་བྱས་པའི་ལས་བྱས་པ་མནར་མེད་པར་འགྲུབ་པར་འགྱུར་བ་དེ་བསྐལ་པའི་ལྷག་མ་དེར་སྨིན་ཏོ། །གནོད་པ་གང་འགགས་པའི་དུས་ནི་ཡང་འབྱུང་བར་འགྱུར་བ་མེད་དེ། དེ་ལྟ་བས་ན་བྱས་པས་བསྐལ་པའི་ལྷག་མར་སྨིན་ཏེ་ལས་ཁྱད་པར་ཅན་བྱས་པས་གནོད་པ་དྲག་པ་རྩུབ་པ་ཚ་བ་ཁྱད་པར་ཅན་འབྱུང་བར་འགྱུར་རོ། །གང་མནར་མེད་པའི་ལས་གཅིག་བྱས་པས་ནི་སེམས་ལ་གནོད་པར་མི་འགྱུར་ཏེ། འཇམ་ཞིང་བསམ་པ་འཇམ་པར་འགྱུར་ལ། འདི་ལྟར་མནར་མེད་པ་འདིའི་ལས་གཅིག་ཅིག་བྱས་ན་གལ་ཏེ་ཡང་སེམས་རྩུབ་ཅིང་སེམས་ཀྱི་བསམ་པ་རྩུབ་ན། དེའི་སྡུག་བསྔལ་དྲག་པ་དང་རྩུབ་པར་འགྱུར་ཏེ། དེའི་གནོད་པ་རྣམ་པ་དེ་ལྟ་བུར་ནི་མི་འགྱུར་རོ། །ལས་ཀྱི་འབྲས་བུ་རྣམ་པར་སྨིན་པ་ཐམས་ཅད་ནི་སེམས་ལ་རག་ལས་ཏེ་
སེམས་ཀྱི་དབང་དུ་སོང་ཞིང་སེམས་ཀྱི་ཀུན་ཏུ་སྦྱོར་བ་ཡིན་ནོ། །སེམས་ཀྱི་ཀུན་ཏུ་སྦྱོར་བས་འཆིང་བའི་སེམས་ཅན་དག་ནི་བཅིངས་པ་ཡིན་ལ། སེམས་རྣམ་པར་བྱང་བས་ནི་གྲོལ་བར་འགྱུར་རོ། །རིམ་པ་ཇི་ལྟ་བ་བཞིན་དུ་མནར་མེད་པ་རྣམས་ཀྱི་གནོད་པའི་རིམ་པ་ཡང་དེ་ལྟར་འབྱུང་སྟེ། དེའི་སྡུག་བསྔལ་བ་ཡང་ལུས་སྦོམ་ཞིང་གཞོན་ཤ་ཅན་དུ་འབྱུང་ངོ་། །དེ་ལ་མཚམས་མེད་པ་ལྔའི་ལས་ཀྱིས་ནི་ལུས་དཔག་ཚད་ལྔར་འགྲུབ་བོ། །ལས་བཞིས་ནི་བཞིའོ། །ལས་གསུམ་གྱིས་ནི་གསུམ་མོ། །ལས་གཉིས་ཀྱིས་ནི་གཉིས་སོ། །ལས་གཅིག་གིས་ནི་ལུས་དཔག་ཚད་གཅིག་འགྲུབ་པར་འགྱུར་རོ། །དེ་ནས་ཡང་དགེ་སློང་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ཏེ། སེམས་ཅན་དམྱལ་བ་ཆེན་པོའི་འཁོར་འདི་ནི་སྤུ་ཟིང་ཞེས་བྱེད་པ་ཡིན་ནོ། །དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བའི་འཁོར་བཅུ་དྲུག་པ་ཇི་ལྟར་འདུག་པ་བཞིན་མཐོང་སྟེ། གང་དག་གིས་སེམས་ཅན་དམྱལ་བ་ཆེན་པོ་དེ་ཡོངས་སུ་བསྐོར་བ་ནི། འདི་ལྟ་སྟེ། བྱ་རོག་ཁ་ཞེས་བྱ་བ་དང་། ས་ཀུན་གྱི་འོག་དང་། ཚོར་བ་མཐའ་མེད་རིང་དང་། ཝ་ལྟར་སྒྲ་འབྱིན་པ་དང་། ལྕགས་དང་ཅེ་སྤྱང་ཟ་དང་། བྱ་རོག་ལྟོ་དང་། ལུས་ཞུམ་དང་། སྒྲ་འཇིགས་སྟོན་དང་། མེ་ཏོག་ཁ་མ་བྱེ་བ་ལྟ་བུ་དང་། རི་བརྩེགས་འབབ་དང་། ཆུ་སྒྲ་དང་། འགྲམ་དངར་དང་། སྡུག་བསྔལ་ཀུན་དཀྲིས་དང་། དྲི་འདོད་དང་། ལྕགས་སྣམ་དང་། འགྲོ་བ་མེས་འཇིག་སྟེ། འདི་དག་ནི་སེམས་ཅན་དམྱལ་བ་ཆེན་པོ་མནར་མེད་པའི་འཁོར་བཅུ་དྲུག་ཡིན་ནོ། །དེ་ནས་ཡང་དགེ་སློང་དེས་འཆི་བའི་དུས་ལ་སོགས་པ་ནས་སྲིད་པ་བར་མར་སྐྱེ་བའི་བར་ལ་རྟོག་སྟེ། ཇི་ལྟར་ན་སེམས་ཅན་དམྱལ་བ་པ་མནར་མེད་པར་འགྲོ་བ་སྡུག་བསྔལ་ལས་སྡུག་བསྔལ་ཉིད་དུ་འབྱུང་བར་འགྱུར་སྙམ་ནས་དེས་བརྟགས་ན། འདོད་ཆགས་དང་། ཞེ་སྡང་དང་། གཏི་མུག་གི་ཟིལ་གྱིས་ནོན་པའི་སྲོག་
ཆགས་ངན་པ་བྱེད་པ་བྱས་པ་དག་ནི་མནར་མེད་པར་འགྲོའོ་སྙམ་མོ། །དེ་ལ་མནར་མེད་པར་ནི་ཁ་ཅིག་འདི་ལྟར་དེ་ལྷའི་འཇིག་རྟེན་འདོད་པའི་ཕྱིར་མེར་འཇུག་པར་བྱེད། གང་དག་རི་ངོས་གཡང་ས་ལས་འདོར་བར་བྱེད། གང་དག་ཆུར་འཇུག་པར་བྱེད། གང་དག་ཟས་མི་སྦྱིན་པས་གསོད་པར་བྱེད་དེ། ལམ་ངན་པས་རྣམ་པར་རྨོངས་པ་ཐོས་པ་ངན་པས་རྣམ་པར་བསླུས་ཤིང་གཏི་མུག་པ་དག་མ་གསོད་པར་བྱེད་དོ། །ཁ་ཅིག་མཐོ་རིས་འདོད་པས་འདི་ལྟར་ཟས་མི་སྦྱིན་པས་སམ། རི་ལ་གཡང་དུ་གཏོང་བས་སམ། མེར་འཇུག་པས་སམ། ཆུར་འཇུག་པས་མ་བསད་ན་མཐོ་རིས་འཐོབ་བོ་སྙམ་ནས་དེ་མཐོ་རིས་ལ་སྲེད་པས་སྲོག་དང་བྲལ་བར་བྱེད་དོ། །ཁ་ཅིག་ནི་ཞེ་སྡང་བ་སེམས་མི་བརྟན་པའི་ངོ་བོ་ཉིད་ཀྱི་རྐྱེན་གྱིས་ཏེ། དེ་ལྟར་ཉེས་པ་གསུམ་གྱི་ཟིལ་གྱིས་ནོན་པའི་སྲོག་ཆགས་དག་གིས་སྲོག་གཅོད་པར་བྱེད་པ་ནི་མནར་མེད་པར་འགྲོའོ། །དེ་ལ་མནར་མེད་པ་ནི་ཁ་ཅིག་ཞིང་ཆེན་པོར་གྱུར་པ་དེ་མ་ཤེས་ནས་ཁྲག་འབྱིན་པར་བྱེད་པ་དང་། དེ་བཞིན་དུ་དགེ་འདུན་དབྱེན་བྱེད་པ་དང་། དགྲ་བཅོམ་པ་ཡང་སྲོག་དང་བྲལ་བར་བྱེད་པ་ནི་ཕྱིར་ཞིང་ཞེ་སྡང་གི་ཟིལ་གྱིས་ནོན་པ་ཡིན་ཏེ། དེ་ལྟར་དོན་ཐམས་ཅད་མེད་ཅིང་རབ་ཏུ་གཅོད་པར་བྱེད་པ་དེ་དག་ནི་སེམས་ཅན་དམྱལ་བ་ཆེན་པོ་མནར་མེད་པར་སྐྱེ་བར་འགྱུར་རོ། །དེ་དག་འཆི་བའི་དུས་ཀྱི་ཚེ་ཁ་ཅིག་རང་གི་ལུས་ཉིད་ལ་མནར་མེད་པའི་མེ་གནས་ཤིང་འབྱུང་བར་འགྱུར། ཁ་ཅིག་འཆི་བའི་དུས་བྱས་མ་ཐག་ཏུ་སྲིད་པ་བར་མར་འབྱུང་བར་འགྱུར་ལ། དེའི་འོག་ཏུ་མནར་མེད་པར་སྐྱེ་བར་འགྱུར་རོ། །གང་གི་ཚེ་མནར་མེད་པའི་ལས་བྱས་པ་དེའི་ཚེ་དེ་ཕན་ཆད་རབ་ཏུ་འབྱུང་བ་མྱོང་བར་འགྱུར་བའི་ལས་ཀྱི་སྐལ་བ་ངེས་པར་བསྲེགས་པར་འགྱུར། དེའི་སྡོམ་པ་སོ་སོར་སྐྱེ་བར་མི་འགྱུར། དགེ་བའི་ལས་ཀྱི་མཐའ་སྤྱད་པ་བསྲེགས་པ་མྱོང་བར་འགྱུར་བར་མ་ངེས་པ་དང་། ལན་གྲངས་གཞན་ལ་མྱོང་བར་འགྱུར་བ་དང་། སྐྱེས་ནས་མྱོང་བར་འགྱུར་བ་དེ་ངེས་པར་སེམས་ཅན་དམྱལ་བར་འབྱུང་བར་འགྱུར། དེ་ཚེ་ཐུང་བར་
ཡང་འགྱུར། གང་གིས་ལོ་བརྒྱ་ཐུབ་པར་འགྱུར་བ་དེ་ལོ་ཉི་ཤུ་ཞིག་ཐུབ་པར་འགྱུར། གང་ཡིད་ཀྱིས་རྟོག་ཅིང་སེམས་པར་བྱེད་པ་དེ་དག་ཐམས་ཅད་ཀྱང་ཇི་ལྟར་ཚྭ་སྒོ་ལ་ས་བོན་བཏབ་པ་བཞིན་འབྲས་བུ་མེད་པར་འགྱུར། དེ་ཕན་ཆད་ལྷ་གང་ཕྱི་བཞིན་དུ་འབྲང་བ་དེས་དེ་ཡོངས་སུ་སྤོང་བར་བྱེད། དེའི་ལས་ཀྱི་མཐའ་འབྲས་བུ་མེད་པར་འགྱུར། དེའི་དབང་པོ་ཡུལ་རྣམས་ལ་ཞེན་པར་འགྱུར། རྟག་ཏུ་རྨི་ལམ་ངན་པ་དག་ཀྱང་མཐོང་བར་འགྱུར། དོན་མེད་པ་ཀུན་ལ་ཡང་སྦྱོར་བར་འགྱུར། གལ་ཏེ་དེའི་བུ་དང་ཆུང་མ་དང་། བྲན་དང་བྲན་མོ་དག་ཡོད་ན་དེ་ཐམས་ཅད་ཀྱིས་ཡོངས་སུ་སྤོང་བར་འགྱུར། རྟག་ཏུ་བཀྲེས་པ་དང་། སྐོམ་པས་ཕོངས་པར་འགྱུར། གལ་ཏེ་ཟས་ཞིམ་པོ་ཞིག་སྦྱར་ན་དེ་ཡང་ཇི་ལྟ་བ་བཞིན་དུ་མི་འགྱུར་སྐད་ཀྱང་འགག་འགག་པོར་འགྱུར། རྟག་ཏུ་བཞིན་གྱི་མདོག་ངན་ཅིང་རྩུབ་པ་དང་། རྟག་ཏུ་སེམས་འཁྲུལ་པ་དང་། རང་གི་ཉེ་དུ་དང་། གཉེན་འདབ་ཀྱི་ཚོགས་ཐམས་ཅད་ཀྱིས་ཀྱང་ཡོངས་སུ་བརྙས་པ་དང་། དེའི་སེམས་ལ་གློ་བུར་དུ་སྐྲག་པ་འབྱུང་བར་འགྱུར། འཇིག་རྟེན་འདི་དག་ཐམས་ཅད་དུད་པས་འཁྲིགས་པར་མཐོང་བར་འགྱུར། དེའི་ཁམས་སྔོན་ལྟར་ནམས་ཀྱང་མཉམ་པར་མི་འགྱུར། རྒྱང་རིང་པོ་ན་གཟུགས་མི་སྡུག་པ་མེད་བཞིན་དུ་མཐོང་བར་འགྱུར། རླུང་ཆུང་ངུས་དེད་པར་འགྱུར། རྟག་ཏུ་བདག་ཉིད་ཚ་བས་གདུངས་པར་འགྱུར། རྟག་ཏུ་མཁྲིས་པའི་ནད་ཀྱིས་ཉམ་ཐག་པར་འགྱུར། དེའི་ཁ་རྟག་ཏུ་ཁ་བ་དང་། ལན་ཚྭ་བྲོ་བར་འགྱུར། མལ་གྱི་གཞི་ཐམས་ཅད་འཇམ་པ་ཡིན་ཡང་རྩུབ་པར་འགྱུར། གླིང་བུ་དང་། ཁར་རྔ་དང་། རྫ་རྔ་དང་། པི་བང་གི་སྒྲ་དག་ཀྱང་འཇིགས་ཤིང་བག་ཚ་བར་ཐོས་པར་འགྱུར་ན་སྒྲ་གཞན་དག་ལྟ་སྨོས་ཀྱང་ཅི་དགོས། དེའི་སྣ་ཡང་རྟག་ཏུ་ཉམས་པར་འགྱུར་ཏེ། དེས་རྫས་དྲི་ཞིམ་པོ་དག་ཀྱང་མི་ཚོར་རོ། །དེའི་ལུས་ཐམས་ཅད་ལས་ཀྱང་དྲི་ང་བ་འབྱུང་བར་འགྱུར། དེའི་སྐྲ་དང་། སྤུ་ཐམས་ཅད་འབྱི་ཞིང་
དེའི་སོ་དག་མདོག་ངན་པར་འགྱུར། རྐང་པ་དང་། ལག་པ་རབ་ཏུ་རྡོལ་བར་འགྱུར་བདེ་བ་ཐམས་ཅད་ལས་ཡོངས་སུ་ཉམས་པར་འགྱུར། རྨི་ལམ་ན་ལྷ་དག་གིས་རྟག་ཏུ་གཙེ་བར་འགྱུར། དེ་རྟག་ཏུ་སྙིང་ནད་ཀྱིས་འདེབས་པར་འགྱུར། དེའི་སྙིང་གས་པར་འགྱུར། ལུས་རྣམས་ཀྱང་སྡུག་པར་མི་འགྱུར། གལ་ཏེ་བརྒྱ་ལ་མེ་ཏོག་དག་བཏགས་ན། དེ་དག་མྱུར་དུ་རྙིས་པར་འགྱུར། དེའི་གོས་དག་ཀྱང་མྱུར་དུ་ཟད་པར་འགྱུར་ཏེ། ལུས་དང་གོས་དག་བཀྲུས་ཀྱང་དྲི་མ་ཅན་དུ་འགྱུར། གློ་བུར་དུ་ལམ་གོལ་བར་འགྲོ་ན་འགྱེལ་བར་འགྱུར་ཏེ། དེའི་ལུས་འགྱེལ་བས་ཉམས་ཤིང་དེའི་ལུས་ལ་རྨ་མང་པོ་འབྱུང་བར་འགྱུར་ལ་ཡུན་རིང་པོས་འཚོ་བར་འགྱུར། གཉིད་ལོག་ན་མགུལ་སྐམས་ཤིང་དེ་སད་ནས་ཀྱང་ཆུ་འཐུང་བ་ཉིད་དུ་འགྱུར། སྦྱིན་བྱེད་མའི་བུས་གནོད་པར་གྱུར་པ་ན་གྲོང་དང་གྲོང་ཁྱེར་དག་སྟོང་པ་ཉིད་དུ་མཐོང་བར་འགྱུར། གཟའ་དང་། སྐར་མ་དང་། རྒྱུ་སྐར་དག་གི་གཟུགས་ལོག་པར་མཐོང་བར་འགྱུར། རླུང་ཆུང་ངུ་ལངས་པ་ཀུན་དང་ཕྲད་ན་ཡང་མཚོན་གྱིས་བཏབ་པ་ལྟ་བུར་དྲག་པར་འགྱུར། མེ་ཆུང་ངུ་དག་གིས་རེག་ན་ཡང་སྲེག་པར་འགྱུར། ཉི་མ་ཡང་ཉིས་འགྱུར་གྱིས་ཚ་བར་འགྱུར། ཟླ་བ་ཡང་དྲོ་བར་འགྱུར་ཏེ། ཟླ་བ་ཤིན་ཏུ་དྲོ་བ་མྱོང་བར་འགྱུར། ཆུ་བསིལ་བ་ཐམས་ཅད་ཀྱང་དྲོ་བར་འགྱུར། ཚལ་དང་ནགས་ཚལ་བདེ་བ་དག་ལ་འཇིགས་འཇིགས་ལྟར་འདུག་པར་མཐོང་བར་འགྱུར། བྱའི་སྐད་སྙན་པ་དག་ཝ་སྐད་འཇིགས་པ་ལྟ་བུར་ཐོས་པར་འགྱུར། འཇིག་རྟེན་ཐམས་ཅད་དུར་ཁྲོད་ལྟ་བུར་རིག་ཅིང་རྟག་ཏུ་དགའ་བ་མེད་པར་འགྱུར། དེ་ཆང་གིས་མཆོག་ཏུ་དགའ་བར་སྐྱེ་བར་མི་འགྱུར། ངོ་ཚ་མེད་ཅིང་ཚུལ་མེད་པར་འགྱུར་ཏེ། སྲང་དང་བཞི་མདོ་དག་ཏུ་སྐྱེ་བོའི་མངོན་སུམ་དུ་བཤང་གཅི་བྱེད་པར་འགྱུར།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅོ་ལྔ་པ། ལྷ་ཐམས་ཅད་ཀྱིས་ཀྱང་ཡོངས་སུ་སྤངས་པར་འགྱུར། དོན་ཐམས་ཅད་མེད་པའི་སྐལ་བ་ཅན་དུ་འགྱུར། མདོག་ཚལ་ཤིང་བསྲེགས་
པ་ལྟ་བུར་འགྱུར། སྐྱེ་བོ་དང་ཡུལ་མི་ཀུན་དང་ཞེ་འགྲས་པར་འགྱུར་ཏེ། དེ་དག་ནི་མནར་མེད་པ་དེའི་མཚན་མ་ཚེ་འདི་ལ་སྔར་འབྱུང་བ་ཡིན་ནོ། །དེའི་འོག་ཏུ་དེ་འཆི་བའི་མཚན་མ་འབྱུང་བ་ནི་ཉིན་པར་ཟླ་བ་མཐོང་ཞིང་མཚན་མོ་ཉི་མ་མཐོང་བར་འགྱུར། རང་གི་གྲིབ་མ་མི་མཐོང་བར་འགྱུར། གློ་བུར་དུ་སྒྲ་མི་སྙན་པ་ཐོས་པར་འགྱུར། དེའི་སྣ་ཡོན་པོར་འགྱུར། དེའི་སྐྲ་དང་ཁ་སྤུ་འཛིངས་པར་འགྱུར། ཐོག་མར་རིམས་ཀྱིས་འདེབས་ཤིང་འཆི་བའི་བར་དུ་ནད་ཀྱིས་འདེབས་ཏེ། དེ་ཀུན་ནས་མེ་མདག་རབ་ཏུ་འབར་བ་ལྟ་བུའི་རིམས་ཀྱིས་ཤིན་ཏུ་གདུངས་ཤིང་ནད་བཞི་བརྒྱ་རྩ་བཞི་ལྟ་བུ་མ་ཡིན་པ་དག་གིས་ཉམ་ཐག་པ། ཀུན་ནས་མེ་མདག་གི་ཀླུང་དག་ཏུ་འཚེད་པ་ན་སྲིན་བུའི་རིགས་བརྒྱད་ཅུ་དག་ལ་རླུང་བརྒྱད་ཅུ་དག་ལུས་དང་རྩ་དང་། རྒྱུས་པ་དང་། པགས་པ་དང་། རུས་པ་དང་། ཤ་དང་། ཚིལ་དག་ཏུ་ཞུགས་ནས་གནོད་པར་བྱེད་དོ། །འདི་ལྟ་སྟེ། སྲིན་བུའི་རིགས་བརྒྱད་ཅུ་དག་ལ་རླུང་བརྒྱད་ཅུ་དག་གིས་གནོད་པར་བྱེད་དོ། །སྲིན་བུ་སྤུ་ཅན་ལ་རླུང་སྤུ་སུན་འབྱིན་གྱིས་གནོད་པར་བྱེད་དོ། །སྲིན་བུ་ཁ་གནག་ལ་རླུང་དག་གི་རྗེས་སུ་འཐུན་པས་གནོད་པར་བྱེད་དོ། །སྲིན་བུ་སྦྲོ་མེད་ལ་རླུང་མི་ལམ་འཁྲུལ་སྟོན་གྱིས་གནོད་པར་བྱེད་དོ། །སྲིན་བུ་རབ་ཕྱེ་བྱེད་ལ་རླུང་བཟོད་མེད་ཀྱིས་གནོད་པར་བྱེད་དོ། །སྲིན་བུ་རྣམ་པར་རྨོངས་བྱེད་ལ་རླུང་ལྕེས་བརྗེད་པ་མི་བཟོད་ཀྱིས་གནོད་པར་བྱེད་དོ། །སྲིན་བུ་མེད་མདོག་བྱེད་ལ་རླུང་རོ་བྲོ་ཁྲིད་བྱེད་ཀྱིས་གནོད་པར་བྱེད་དོ། །སྲིན་བུ་འགྲེད་བྱེད་ལ་རླུང་མཆིན་པ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་འོག་འགྲོ་ལ་རླུང་བཤང་བ་སྟེང་འགྲོས་གནོད་པར་བྱེད་དོ། །སྲིན་བུ་ཨུད་ཏིང་ག་ལ་རླུང་གཞང་རྒྱུས་གནོད་པར་བྱེད་དོ། །སྲིན་བུ་ཀུན་རྟོག་མཐོང་ལ་རླུང་དྲན་པ་ཉམས་བྱེད་ཀྱིས་གནོད་པར་བྱེད་དོ། །སྲིན་བུ་དྲི་ང་ལ་རླུང་པགས་པ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་རུས་པ་ལེགས་སྐྱེས་ལ་རླུང་རོ་བྲོ་བ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་ཁ་དམར་ལ་རླུང་ཤ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་བརྩོན་བཅས་ལ་རླུང་རྒྱགས་པ་འཇིག་བྱེད་ཀྱིས་གནོད་པར་བྱེད་དོ། །
སྲིན་བུ་གནད་རྒྱུ་ཟ་ལ་རླུང་རུས་པ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་མཚོན་ཆ་ཁ་ལ་རླུང་རུས་ཀུན་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་སྤུ་གྲི་ཁ་ལ་རླུང་གཉེར་མར་སོང་གིས་གནོད་པར་བྱེད་དོ། །སྲིན་བུ་སྤུ་མེད་ལ་རླུང་མགོ་སྐྱ་བྱེད་ཀྱིས་གནོད་པར་བྱེད་དོ། །སྲིན་བུ་ཁབ་གདོང་ལ་རླུང་རྡུལ་འཇིག་གིས་གནོད་པར་བྱེད་དོ། །སྲིན་བུ་སྤི་སྤི་ཛ་ལ་རླུང་གཅི་བ་ཤིན་ཏུ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་རྐང་མེད་ལ་རླུང་ཟས་ལྡན་གྱིས་གནོད་པར་བྱེད་དོ། །སྲིན་བུ་བཤང་བ་གཡེང་བྱེད་ལ་རླུང་སོ་འགས་བྱེད་ཀྱིས་གནོད་པར་བྱེད་དོ། །སྲིན་བུ་གསུམ་བྱེད་ལ་རླུང་རྩེའུ་ཆུ་ལ་སོགས་ཀྱིས་གནོད་པར་བྱེད་དོ། །སྲིན་བུ་རྒྱུ་མ་འཇིག་བྱེད་ལ་རླུང་འོག་ཏུ་འགྲོས་གནོད་པར་བྱེད་དོ། །སྲིན་བུ་དཔོས་བྱེད་ལ་རླུང་གྱེན་དུ་འགྲོས་གནོད་པར་བྱེད་དོ། །སྲིན་བུ་མདོག་བཟང་ལ་རླུང་ངོས་ལྡང་གིས་གནོད་པར་བྱེད་དོ། །སྲིན་བུ་གཞང་རྐང་ལ་རླུང་མིད་པར་འགྲོས་གནོད་པར་བྱེད་དོ། །སྲིན་བུ་ལྤགས་བྱེད་ལ་རླུང་སེམས་སུན་འབྱིན་གྱིས་གནོད་པར་བྱེད་དོ། །སྲིན་བུ་ཚིལ་གནོད་ལ་རླུང་འཁྲུག་བྱེད་ཀྱིས་གནོད་པར་བྱེད་དོ། །སྲིན་བུ་བསགས་བྱུང་ལ་རླུང་མིག་འཛུམས་འབྱེད་བྱེད་ཀྱིས་གནོད་པར་བྱེད་དོ། །སྲིན་བུ་དྲི་མི་ཞིམ་ལ་རླུང་ཕན་ཚུན་ཕྲད་པ་ལྔས་གནོད་པར་བྱེད་དོ། །སྲིན་བུ་ས་ཧ་ཙུ་ར་བ་ལ་རླུང་སྙིང་པོ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་གནོད་བྱེད་ལ་རླུང་སྙིང་པོ་འཆགས་བྱེད་ཀྱིས་གནོད་པར་བྱེད་དོ། །སྲིན་བུ་སྙིང་པོ་མེ་ཏོག་སྐྱེད་ལ་རླུང་འོང་བ་དང་། འགྲོ་བ་དང་གནས་པ་དང་རྒྱུག་པར་བྱེད་པས་གནོད་པར་བྱེད་དོ། །སྲིན་བུ་ཀུ་ཧ་ཀ་ཆེན་པོ་དང་། ཕག་འཚོང་དང་། ནག་པོ་དང་། ཟ་ཆེན་དང་། སྲིན་བུ་རྐང་དྲོ་དག་ལ་རླུང་མིག་དང་རྣ་བ་དང་། སྣ་དང་ལྕེ་འཇིག་གིས་གནོད་པར་བྱེད་དོ། །སྲིན་བུ་རུས་པ་འཇིག་བྱེད་ལ་རླུང་མཁྲིས་པ་འཇིག་བྱེད་ཀྱིས་གནོད་པར་
བྱེད་དོ། །སྲིན་བུ་རྐང་གནག་ལ་རླུང་བད་ཀན་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་ཚིགས་གཅོད་ལ་རླུང་གཞུངས་པ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་གླད་པར་རྒྱུ་ལ་རླུང་སྲིན་མོ་གནས་ཀྱིས་གནོད་པར་བྱེད་དོ། །སྲིན་བུ་གླད་རྒྱས་ཟ་ལ་རླུང་རྐང་པ་ངོས་གནས་ཀྱིས་གནོད་པར་བྱེད་དོ། །སྲིན་བུ་ཐོད་པར་རྒྱུ་ལ་རླུང་སེམས་མེད་བྱེད་ཀྱིས་གནོད་པར་བྱེད་དོ། །སྲིན་བུ་སྐྲ་ཟ་ལ་རླུང་འབྱེད་བྱེད་ཀྱིས་གནོད་པར་བྱེད་དོ། །སྲིན་བུ་རྣ་རྒྱུ་ལ་རླུང་འགྲོ་བ་ཉམས་བྱེད་ཀྱིས་གནོད་པར་བྱེད་དོ། །སྲིན་བུ་སྣབས་འཁྲི་ལ་རླུང་ལོང་བུ་འཇིག་གིས་གནོད་པར་བྱེད་དོ། །སྲིན་བུ་ཚིལ་ནད་རྒྱུ་ལ་རླུང་འབྱིན་པ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་ཁ་ཆུ་འདེབས་ལ་རླུང་ཚིགས་འབྱེད་ཀྱིས་གནོད་པར་བྱེད་དོ། །སྲིན་བུ་སོ་དྲུང་ཟ་ལ་རླུང་འབྱིན་པ་འཇིག་པ་ཚོར་མེད་བྱེད་ཀྱིས་གནོད་པར་བྱེད་དོ། །སྲིན་བུ་ཁ་ཆུ་ཟ་ལ་རླུང་སྤྲོ་བ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་བད་ཀན་རླན་བྱེད་ལ་རླུང་སྣ་འཕུལ་རེངས་བྱེད་ཀྱིས་གནོད་པར་བྱེད་དོ། །སྲིན་བུ་རབ་ཏུ་སྐྱུག་བྱེད་ལ་རླུང་རོ་བྲོ་བ་བཅུ་ཁྱེར་བ་ནང་དུ་རྒྱུ་ཞིང་དུ་ཤྱ་ག་ཏ་ལྡོག་བྱེད་ཀྱིས་གནོད་པར་བྱེད་དོ། །སྲིན་བུ་སྦྲང་རྩི་མྱོས་ལ་རླུང་ཚིགས་འཁྲུགས་བྱེད་ཀྱིས་གནོད་པར་བྱེད་དོ། །སྲིན་བུ་རོ་དྲུག་སྲེད་ལ་རླུང་སྤུ་དང་སེན་མོ་དང་བཤང་བ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་བར་བུར་ལ་རླུང་ཁ་ཆུ་འཁྲུལ་བྱེད་ཀྱིས་གནོད་པར་བྱེད་དོ། །སྲིན་བུ་རོ་ཡིད་འབྱུང་ལ་རླུང་ཤིག་ཤིག་བྱེད་ཀྱིས་གནོད་པར་བྱེད་དོ། །སྲིན་བུ་རྨི་ལམ་སྲེད་ལ་རླུང་འདོམས་རེངས་ཀྱིས་གནོད་པར་བྱེད་དོ། །སྲིན་བུ་སྤུ་ཟ་ལ་རླུང་བཤང་བ་སྐམས་བྱེད་ཀྱིས་གནོད་པར་བྱེད་དོ། །སྲིན་བུ་སོ་སུ་ར་ལ་རླུང་རྩིབ་ལོགས་འཆིང་བྱེད་ཀྱིས་གནོད་པར་བྱེད་དོ། །སྲིན་བུ་སྐྱེ་བའི་མ་ལ་རླུང་ཁྭ་བུ་ག་དྲུག་གིས་གནོད་པར་བྱེད་དོ། །སྲིན་བུ་ཨུ་མ་བ་ར་ལ་རླུང་ཡན་ལག་དང་ཉིང་ལག་འཐུང་བྱེད་ཀྱིས་གནོད་པར་བྱེད་དོ། །སྲིན་བུ་རབ་ཟག་ལ་རླུང་མེ་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་སྤུ་གློང་ལ་
རླུང་ཡན་ལག་དང་ཉིང་ལག་ཀུན་བྱེད་ཀྱིས་གནོད་པར་བྱེད་དོ། །སྲིན་བུ་སྤུ་ཟན་ལ་རླུང་བརྟན་འགེམས་ཀྱིས་གནོད་པར་བྱེད་དོ། །སྲིན་བུ་སི་མི་སི་མ་ལ་རླུང་ཡན་ལག་ཀུན་ཁྱབ་ཀྱིས་གནོད་པར་བྱེད་དོ། །སྲིན་བུ་ཨུ་མ་བུ་ག་ལ་རླུང་སྲེག་བྱེད་ཀྱིས་གནོད་པར་བྱེད་དོ། །སྲིན་བུ་རྨས་བསླད་ལ་རླུང་འཇིག་བྱེད་ཀྱིས་གནོད་པར་བྱེད་དོ། །སྲིན་བུ་ཙུན་ཙུ་སྒྲ་ལ་རླུང་སྟེང་འོག་གིས་གནོད་པར་བྱེད་དོ། །སྲིན་བུ་རྒྱུས་པ་གཅོད་ལ་རླུང་མིའི་སྲོག་གང་ལ་སོང་བ་འཆི་བྱེད་ཀྱིས་གནོད་པར་བྱེད་དོ། །སྲིན་བུ་རྩ་གཅོད་ལ་རླུང་མིག་འབྱེད་ཀྱིས་གནོད་པར་བྱེད་དེ། ཇི་ལྟར་སྲོག་ཆགས་ཐམས་ཅད་འཆི་བའི་དུས་སུ་སྲིན་བུ་དག་ལ་རླུང་དག་གིས་སོ་སོ་ངེས་པར་གནོད་པ་བྱེད་པ་དེ་ལྟར་མནར་མེད་པའི་མ་ཡིན་ཏེ། དེའི་ལས་ངན་པ་བྱས་པས་འོག་དང་སྟེང་དུ་མི་འཐུན་པའི་ལས་ཀྱིས་བྱས་པའི་རླུང་རབ་ཏུ་དྲག་པ་དག་སོ་སོར་ལྡང་སྟེ། དེ་ལྟར་རླུང་བརྒྱད་ཅུ་དག་གིས་སྲིན་བུ་བརྒྱད་ཅུ་དག་ལ་གནོད་པར་བྱེད་དོ། །རླུང་དག་གིས་ཇི་ལྟ་ཇི་ལྟར་སྲིན་བུ་དག་ལ་གནོད་པར་བྱེད་པ་བཟློག་པ་དེ་ལྟ་བུ་མི་བྱེད་དོ། །དང་པོར་རླུང་པིབ་པ་ལ་ཀ་དྲི་མི་ཞིམ་པ་དག་གིས་དེའི་ལུས་ཐམས་ཅད་ཇི་ལྟར་བུ་རམ་ཤིང་དབང་ཤིང་གིས་བཙིར་བ་དེ་ལྟར་སྐམས་པར་བྱེད་དོ། །ཁྲག་ཐམས་ཅད་སྐམས་པར་བྱེད། གནད་ཐམས་ཅད་དུ་གནོད་པར་བྱེད། རྒྱུས་པ་ཐམས་ཅད་གཅོད་པར་བྱེད། སྡུག་བསྔལ་གྱིས་རྐང་ཐམས་ཅད་རབ་ཏུ་འཇུ་བར་བྱེད་དོ། །ཉེས་པར་བྱས་པ་ལས་ཀྱི་མཐའ་སྤྱད་པ་འཆི་བའི་དུས་ཀྱི་ཚེ་མནར་མེད་པ་དེའི་ཁར་སྲིན་བུ་གསལ་བར་འབྱུང་བར་འགྱུར་རོ། །སེམས་ཅན་དམྱལ་བ་པ་དེའི་ཁྱིམ་ནི་འདི་ལྟ་སྟེ། ཀོ་བ་ནག་པོས་གཡོགས་ཤིང་ཕྱོགས་གཅིག་ཏུ་རབ་ཏུ་འབར་བ་དང་། ཡང་ཀོ་བ་ནག་པོ་དེའི་ཕྱོགས་གཅིག་ནས་མེ་འབྱུང་སྟེ། ཁང་པའི་ནང་ཐམས་ཅད་རབ་ཏུ་འབར་བར་མཐོང་ངོ་། །དེས་ཁྱིམ་རབ་ཏུ་འབར་བར་མཐོང་ནས་བཞིན་མོག་མོག་པོར་གྱུར་ཏེ། ངུ་ཞིང་སྐད་འབྱིན་ལ་ལག་པ་གཡོབ་པར་བྱེད། མིག་འགུལ་བར་བྱེད། ཁ་ནས་ཁ་ཆུ་འཛག་པར་
འགྱུར། སོ་དག་གིས་སོ་དག་ལ་འདེབས་པར་བྱེད། མཆུས་མཆུ་ལ་རེག་པར་བྱེད་དོ། །སྣང་བ་གཉིས་པ་མཐོང་བ་ནི་མུན་པ་མུན་ནག་ཐིབས་པོར་གྱུར་ཅིང་རི་བྲག་ཆེན་པོ་ལ་སོ་སོར་འཇིགས་པ་ཆེན་པོ་སེང་གེ་དང་། སྟག་དང་། དྲེད་དང་། གུང་དང་། སྦྲུལ་འཇིགས་པས་གང་བ་སྟེང་དུ་འོང་བ་མཐོང་ནས་བཤང་བ་འབྱིན་ཏོ། །དེའི་སྟེང་དུ་རི་དེ་འོང་བའི་འཇིགས་པས་ལག་པ་རྐྱོང་བར་བྱེད་པ་དང་། དེ་ཉེ་དུ་དག་གིས་མཐོང་ནས་ནམ་མཁའ་ལ་རེག་པར་འདོད་དོ་ཞེས་སྨྲའོ། །དེའི་འོག་ཏུ་དེ་བཞིན་དུ་རི་བྲག་དང་། ནགས་ཚལ་དང་། རི་འོར་དང་། ལྕུག་ཚལ་མང་པོ་འབར་བའི་ཕྲེང་བ་སྟེང་དུ་འོང་བར་མཐོང་སྟེ། ཤིན་ཏུ་འཁྲུལ་པ་ངུ་སྐད་འབྱིན་ཅིང་སྒྲ་ངར་ངར་པོ་འཐོན་ལ་བཤང་བ་འབྱིན་ཏོ། །མིག་འགྱུར་བར་བྱེད་ཅིང་འཇིགས་བཞིན་མོག་མོག་པོར་མཆི་མ་འབྱིན་པར་བྱེད། སྤུ་ཚེར་མ་ལྟར་འགྲེང་། དེའི་རླིག་པ་ཡང་གྱེན་དུ་འགྲེང་ལ་ཁུ་ཆུ་གཏོང་བར་བྱེད་དོ། །དེའི་འོག་ཏུ་ཡང་དེ་འབྱུང་བ་ཆེན་པོ་བཞི་དག་ཀུན་ཏུ་འཁྲུགས་པར་འགྱུར་ཏེ། འདི་ལྟ་སྟེ། སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་སོ། །དེ་ལ་སའི་ཁམས་འཁྲུགས་པས་ཡན་ལག་དང་ཉིང་ལག་ཐམས་ཅད་སྲ་བའི་ངོ་བོས་རྡུང་བར་བྱེད་དེ། དཔེར་ན་རྡོ་གཉིས་དག་གི་དབུས་སུ་དབུ་བའི་གོང་བུ་བཞིན་གནོད་པར་བྱེད་པ་དང་། དཔེར་ན་བྱེ་མ་ཆང་པ་ནས་གཏོར་བ་བཞིན་ལུས་ཀྱི་དབྱིབས་ཐམས་ཅད་དང་། ཡན་ལག་དང་ཉིང་ལག་ཐམས་ཅད་ཀུན་ནས་གནོད་པར་བྱེད། རྣམ་པར་ཞིགས་པར་བྱེད། རྣམ་པར་གཅོད་པར་བྱེད་དེ། དེའི་སའི་ཁམས་འཁྲུགས་པས་དེ་སྡུག་བསྔལ་ཤིན་ཏུ་ཚ་བ་མྱོང་བར་འགྱུར་རོ། །དེའི་འོག་ཏུ་དེའི་ལས་ཉེས་པར་བྱས་པས་ཆུའི་ཁམས་ཀྱང་རབ་ཏུ་འཁྲུགས་པར་འགྱུར་ཏེ། དེ་འཁྲུགས་པས་དེ་ངུ་སྐད་འབྱིན་ཅིང་སྒྲ་ངར་ངར་པོ་འདོན་ཏོ། །དེའི་རྒྱུས་པ་དང་ཤར་བཅས་པ་རླན་ཅིང་ལྷོད་ལྷོད་པོར་འགྱུར་ཏེ། ཆུའི་རྒྱུན་མང་དུ་འབྱུང་བར་
འགྱུར། དེའི་རྣ་བ་དང་མིག་ནས་ཀྱང་ཆུའི་རྒྱུན་མང་པོ་བྱུང་བ་ནུབ་པར་འགྱུར་རོ། །དེའི་འོག་ཏུ་མེའི་ཁམས་ཀྱང་འཁྲུགས་པར་འགྱུར་ཏེ། དེ་མེ་མདག་གི་ཚོགས་མང་པོའི་ནང་དུ་བཅུག་ནས་སྲེག་གོ །དེའི་སྡུག་བསྔལ་ནི་ཡན་ལག་དང་ཉིང་ལག་ཐམས་ཅད་སྡུག་བསྔལ་དྲག་ཅིང་ཚ་ལ་རྩུབ་ཅིང་གདུང་བ་སྐྱེ་བར་འགྱུར་ཏེ། འཇིགས་པས་ཉམ་ཐག་པ་དེ་ངུ་སྐད་འབྱིན། འོ་དོད་འབོད། གློ་གཡས་གཡོན་འགྱུར་བར་བྱེད། ལག་པ་གཡོབ་པར་བྱེད་དེ། མགོ་སྐད་ཅིག་ཀྱང་འཇོག་མི་ཕོད་དོ། །དེའི་འོག་ཏུ་རླུང་གི་ཁམས་ཀྱང་འཁྲུགས་པར་འགྱུར་ཏེ། དེའི་རླུང་གི་ཁམས་སྲ་བ་རྩུབ་པ། མང་བ། ཡང་བ། གྲང་བས་ཡན་ལག་དང་། ཉིང་ལག་ཐམས་ཅད་མཁྲང་བ་ཉིད་ཀྱིས་རྡུང་བར་བྱེད། མང་བ་ཉིད་ཀྱིས་གླེབ་པར་བྱེད། ཡང་བ་ཉིད་ཀྱིས་ནམ་མཁའ་ལ་འདེག་པ་ལྟར་བྱེད་ཅིང་གཡང་ས་ཆེན་པོར་འདོར་བ་ལྟར་བྱེད། གྲང་བ་ཉིད་ཀྱིས་རྒྱུས་པ་དག་སྐུམ་པར་བྱེད་དོ། །དེ་འཆི་བའི་དུས་ཀྱི་ཚེ་སྦྲུལ་རབ་ཏུ་གདུག་པ་ལྟ་བུར་འབྱུང་བ་ཆེན་པོ་བཞི་དག་རབ་ཏུ་འཁྲུགས་པའི་སྡུག་བསྔལ་གྱི་རྣམ་པ་དེ་ལྟ་བུ་འབྱུང་བར་འགྱུར་ཏེ། གང་དཔེ་བྱ་བར་ཡང་སླ་བ་མ་ཡིན་ནོ། །དེའི་ལུས་ཐམས་ཅད་དབུ་བའི་གོང་བུ་བཞིན་དུ་མྱུར་དུ་འགྱེས་པར་འགྱུར། རྣམ་པར་འཇིག་པར་འགྱུར། སྲེག་པར་འགྱུར། འཚེད་པར་འགྱུར་ཏེ། ཀུན་ནས་སྡུག་བསྔལ་གྱི་ཚོར་བ་མི་བཟད་པས་ཉམ་ཐག་པ་མལ་གྱི་མཐའ་མ་ནམ་མཁའ་ལ་ཉུག་སྟེ། དེའི་སྲིད་པ་ཐ་མ་པའི་སེམས་ཉེ་བར་འགྱུར་རོ། །དེ་རི་བྲག་ཆེ་ཞིང་མཐོ་བའི་ཁར་བཏེག་བཏེག་ནས་འདོར་བར་བྱེད་དེ་བོར་ནས་དེ་རྟེན་མེད་པ་ནམ་མཁའ་ལ་ཀུན་ཏུ་འཁྱམ་ཞིང་ཡོངས་སུ་འཁྱམ་མོ། །དེ་ནས་རྒྱའི་འབུར་ལྟ་བུར་དེ་སྲིད་པ་ཐ་མའི་སེམས་དང་ལྡན་པར་འགྱུར་ཏེ། དེས་གཤིན་རྗེའི་མི་བྱད་བཞིན་དང་། རྐང་ལག་མི་སྡུག་པར་བསྒྱུར་བ། ཁ་གདོང་གླང་པོ་ཆེ་དང་། རྟ་དང་། བོང་བུ་དང་། ཕག་དང་། གུང་དང་། སེང་གེ་དང་། སྟག་དང་། གཟིག་དང་། ནེའུ་ལེ་དང་། ཝ་དང་། སྐྱུགས་
པ་ཟ་བ་ལག་ན་མཚོན་ཆ་སྣ་ཚོགས་ཐོགས་པ་དག་གིས་སེམས་ཅན་དམྱལ་བ་པ་དེ་ལ་བསྡིགས་པ་ན། དེ་གཅིག་པུས་མཐོང་གི་གཞན་གང་གིས་ཀྱང་དེ་མི་མཐོང་ངོ་། །དེ་འཇིགས་པ་མི་བཟད་པས་མིག་འགྱུར་ཞིང་མར་མེའི་སྣུམ་ཟད་ནས་འཆི་བ་བཞིན་དུ་འཆི་བར་འགྱུར་ཏེ། སྲིད་པ་བར་མར་དེའི་གཟུགས་བལྟར་སྣང་ལ་ཐོགས་པ་མེད་པ་བྱས་པ་བྱིས་པ་ལོ་བརྒྱད་ལོན་པ་ལྟ་བུར་སྐྱེ་བར་འགྱུར་རོ། །འཆི་བའི་དུས་བྱས་མ་ཐག་ཏུ་གཤིན་རྗེའི་མི་རྣམས་ཀྱིས་འཛིན་པར་བྱེད་དེ། བཟུང་ནས་ཀྱང་ལྕགས་ཀྱི་ཐག་པ་རབ་ཏུ་འབར་བས་མགུལ་ནས་འཆིང་ཞིང་ལག་པ་གཉི་ག་ཕྱིན་ཅི་ལོག་ཏུ་བཅིངས་སོ། །དེས་ཕྱོགས་དང་ཕྱོགས་མཚམས་དང་ས་གཞི་དང་ནམ་མཁའ་དག་རྟག་ཏུ་འབར་རབ་ཏུ་འབར་བ་ཀུན་ཏུ་རབ་ཏུ་འབར་བར་མཐོང་ངོ་། །མེའི་ནང་དེ་དག་ན་གཤིན་རྗེའི་མི་བྱད་བཞིན་མི་སྡུག་པར་བསྒྱུར་བ་དུ་མ་དག་ཀྱང་མཐོང་སྟེ། མེའི་ནང་དེ་དག་ཏུ་འདོར་བར་བྱེད་དོ། །འདོར་ཞིང་སེམས་ཅན་དམྱལ་བ་པ་དེ་དག་ལ་བསྡིགས་པ་ན་ལག་ན་མཚོན་ཆ་སྣ་ཚོགས་པ་དེ་དག་མཐོང་ནས་ཐག་པའི་བཅིང་བས་བཅིངས་ཏེ་གཤིན་རྗེའི་མི་མཆོག་ཏུ་འཇིགས་ཤིང་སྐྲག་པར་བྱེད་པ་དེ་དག་གིས་སྤྱོ་ཞིང་ལྷོ་ཕྱོགས་དག་ཏུ་ཁྲིད་པ་ན། འདི་ལྟར་སྙིང་རྗེ་རྗེ་སྐད་ཡོངས་སུ་སྨྲེ་སྔགས་འདོན་ཏོ། །དེད་དཔོན་མི་མཁས་འཁྲུལ་པ་ལྟར། །གསོན་པའི་ས་ནས་བདག་ཉམས་སོ། །བྱད་བཞིན་བསྒྱུར་བས་ཡོངས་བསྐོར་ཅིང་། །དབང་མེད་འཇིགས་པ་དག་ཏུ་ཁྲིད། །རྟག་ཏུ་བར་སྣང་ཕྱོགས་དག་དང་། །ཕྱོགས་མཚམས་ཉིད་དང་ས་རྣམས་དག །ཐམས་ཅད་བར་ཆད་མེད་པར་ནི། །འབར་བའི་ཕྲེང་བ་དག་གིས་འཁྲུགས། །སྡུག་བསྔལ་དབང་མེད་གང་དུ་ཁྲིད། །བདག་གིས་གནས་ནི་མི་ཤེས་སོ། །འབྲོག་དགོན་དག་ཏུ་བདས་པ་ན། །ཀུན་ནས་གྲོགས་ནི་བྱེད་པ་མེད། །སྡུག་བསྔལ་འདི་ལས་རྣམ་གྲོལ་བར། །མགོན་སྐྱབས་བྱེད་པ་གང་ཡང་མེད། །ནུས་པ་མེད་ཅིང་དབང་མེད་ལ། །སྡུག་བསྔལ་མེ་ཡིས་ཡོངས་གདུངས་སོ། །བཅིང་བས་ལག་པ་བཅིངས་ནས་སུ། །
དབང་མེད་བདག་ནི་གང་དུ་ཁྲིད། །དོན་རྣམས་དང་ནི་མཛའ་བཤེས་དང་། །བུ་དག་དང་ནི་ཆུང་མ་ལ། །ཀྱི་ཧུད་བདག་དྲིན་ཆུད་ཟོས་ཏེ། །སྡུག་བསྔལ་འདི་ལས་སྐྱོབ་མི་བྱེད། །དགའ་བ་མེད་ཅིང་ཉམས་གྱུར་ལ། །སེམས་ནི་སྡུག་བསྔལ་དག་གིས་ཉམས། །འཆི་བའི་ཞགས་པས་བཟུང་བ་ཡི། །སྐྱབས་ནི་ཉེ་བར་མི་མངོན་ནོ། །བདག་ལ་ཁྲོས་ལྟར་ཚིག་སྨྲ་བ། །ཀུན་ནས་སྤྱོ་བ་བརྒྱད་པར་བྱེད། །འདི་གང་ཡིན་ཞིག་ཀུན་ནས་སུ། །འཆིང་བ་འདི་ནི་གང་ཞིག་ཡིན། །བདག་གིས་གང་དང་གང་མཐོང་བ། །ཡུལ་དང་དེ་བཞིན་དགོན་པ་སྟེ། །དེ་དང་དེ་དག་ཀུན་གྱི་ནང་། །ཐམས་ཅད་མེ་ཡིས་ཡོངས་སུ་བསྐོར། །ཕྱོགས་རྣམས་ཀུན་ན་དགའ་མེད་དེ། །འཁྲུག་པ་དག་གིས་ཡོངས་སུ་བསྐོར། །སྐྱབས་སུ་འགྱུར་བ་ཡོང་མེད་ཅིང་། །བདག་ལ་ཀུན་ནས་གྲོགས་མེད་དོ། །མུན་གནག་མི་བཟད་ནང་དུ་འཇུག །མེ་མདག་ཕུང་པོར་བཅས་པས་བསྒྲིབས། །ནམ་མཁའ་རྒྱུ་སྐར་གཟའ་དག་དང་། །སྐར་མ་དག་ཀྱང་མི་མཐོང་སྟེ། །འདི་དག་ཐམས་ཅད་ལོག་པ་ཡིན། །མུན་གནག་དག་གིས་ཡོངས་སུ་བསྐོར། །དབང་པོ་ལྔ་ནི་ཐམས་ཅད་དག །ཀུན་ནས་ཕྱིན་ཅི་ལོག་ཏུ་གྱུར། །བདག་གི་ལུས་ནི་ཐམས་ཅད་དག །སོག་ལེས་ཡོངས་སུ་གཤེག་པར་བྱེད། །སྐྱབས་སུ་འགྱུར་བ་ཡོང་མེད་དེ། །བདག་གི་གནས་ནི་གར་འགྱུར་ཞིག །སྡུག་བསྔལ་ཚོགས་ནི་འཕེལ་འགྱུར་ཏེ། །བདག་ནི་ཀུན་ནས་ཡོངས་སུ་བསྐོར། །ལུས་དང་སེམས་ལས་སྐྱེས་པ་ཡི། །སྡུག་བསྔལ་ཡང་དང་ཡང་དུ་འཕེལ། །སྡུག་བསྔལ་གྱིས་ནི་ནོན་པ་ན། །དེ་ལ་ཀུན་ནས་གྲོགས་མེད་དོ། །རང་གི་ལས་ཀྱི་འབྲས་བུས་དཀྲུགས། །ལས་ཀྱིས་བསྐྱེད་པའི་གཤིན་རྗེ་དང་། །འཁོར་དག་ཤིན་ཏུ་འཁྲུགས་ནས་སུ། །བལྟས་ཏེ་དེ་ནས་ཚིག་སྨྲས་པ། །སྔོན་ཆད་བྱ་བ་གང་བྱེད་པ། །དེ་ནི་ཕྱི་ནས་ཡོངས་སུ་སེམས། །གཏི་མུག་གིས་ནི་ཡོངས་བསླུས་པ། །ཕྱི་ནས་ཅི་ཞིག་ཡོངས་སུ་གདུང་། །གནོད་ལས་གནོད་པ་གང་ཆེ་བ། །སྡིག་པ་ལས་ནི་
སྡིག་པ་ཆེ། །ཁྱོད་ཀྱིས་ངན་བྱས་གང་བྱས་པ། །སྡུག་བསྔལ་ལས་ནི་སྡུག་བསྔལ་ཆེ། །བསྐལ་པའམ་བསྐལ་པའི་ལྷག་མ་རུ། །ཁྱོད་ནི་མེ་ཡིས་སྲེག་པར་བྱེད། །ངན་བྱས་མང་པོ་ཅི་བྱས་པ། །གཏི་མུག་ཡོངས་སུ་བསམ་པར་གྱིས། །ལས་ཀྱི་ཞགས་པས་བཅིངས་པ་ལ། །ལྷ་དང་ལྷ་མིན་དྲི་ཟ་དང་། །ཤ་ཟ་ལྟོ་འཕྱེ་སྲིན་པོ་དག །ཁྱོད་ལ་ཡོངས་སུ་སྐྱོབ་མི་བྱེད། །ལས་ཀྱི་ཞགས་པས་གང་བཅིངས་པ། །མི་དེ་སེམས་ཅན་དམྱལ་བར་བཅིངས། །རྒྱུ་དང་རྐྱེན་གྱིས་འགྲོ་བ་ཡི། །ཐམས་ཅད་དབང་མེད་ཁྲིད་པར་བྱེད། །ལས་བྱས་ངེས་པར་འགྲོ་བ་ནི། །མ་ནི་གསོད་པར་བྱེད་པ་སྟེ། །སྡིག་པ་འདི་ནི་ཤིན་ཏུ་སྡིག །སྡིག་ལས་སྡིག་པ་ཆེན་པོ་ཡིན། །གང་གིས་ཁྱོད་ནི་སྔོན་བསྐྱེད་པ། །ཕ་ཡི་ཁུ་ཆུ་ལས་བསྐྱེད་ན། །དེ་ལ་ཁྱོད་ཀྱིས་གནོད་བྱས་ཤིང་། །དབང་མེད་མཚོན་གྱིས་སྲོག་བཅད་བྱས། །གང་ཞིག་ཁམས་གསུམ་ཁྱད་པར་འཕགས། །ཉེས་པ་ཐམས་ཅད་རྣམ་སྤངས་ཤིང་། །འཆིང་བ་ཀུན་ལས་ངེས་གྲོལ་བ། །དེ་ལ་ཁྱོད་ཀྱིས་སྡིག་པ་བྱས། །ཆོས་རྣམས་ཀུན་གྱི་གཏེར་ཡིན་ཞིང་། །ཐར་པའི་སྒོ་ནི་རྣམ་འབྱེད་པ། །ཁྱོད་ཀྱིས་དགེ་འདུན་དབྱེན་བྱས་སྡིག །དེ་ཡི་འབྲས་བུ་འདིར་འོངས་སོ། །སྦྱོར་བ་ཐམས་ཅད་ལས་འདས་ཤིང་། །བག་ལ་ཉལ་བ་ཀུན་སྤངས་པ། །རྨོངས་པས་དགྲ་བཅོམ་གནོད་བསྐྱེད་པའི། །དེ་ཡི་འབྲས་བུ་ཉེ་བར་སྤྱོད། །ཆོས་རྣམས་ཀུན་ལ་མེ་ལྟ་བུ། །བདེན་པ་རིན་ཆེན་རྣམ་འཇིག་པ། །རྟག་ཏུ་ཁྱོད་ཀྱིས་བརྫུན་སྨྲས་པའི། །དེ་ཡི་གནོད་པ་སྤྱད་པར་གྱིས། །ཕན་ཚུན་དབྱེན་ནི་བྱ་བའི་ཕྱིར། །བསམས་བཞིན་དུ་ནི་ཡང་དང་ཡང་། །ཕྲ་མ་དེ་ནི་མངོན་སྨྲས་པ། །དེ་ཡི་འབྲས་བུ་འདིར་འོངས་སོ། །གང་གི་རྒྱུད་ལ་གདུང་བྱེད་མཆོག །མཚོན་དང་མེ་དང་དུག་ལྟ་བུའི། །ཁྱོད་ཀྱིས་རྟག་ཏུ་ཚིག་རྩུབ་སྨྲས། །དེ་ཡི་འབྲས་བུ་ཉེ་བར་སྤྱོད། །སྔ་ཕྱི་འབྲེལ་པ་མེད་པའི་ཚིག །དོན་མེད་རིགས་པ་མེད་པ་དང་། །འབྲེལ་མེད་མང་དུ་སྨྲས་པ་ཡི། །དེ་ཡི་འབྲས་བུ་འདིར་ཐོབ་
བོ། །སྲོག་ནི་རྟག་ཏུ་ལྷུར་ལེན་པ། །སྲོག་ཆགས་དབང་མེད་འཇིགས་བྱས་ཤིང་། །ཁྱོད་ཀྱིས་མང་དུ་རྣམ་པར་གཙེས། །དེ་ཡི་འབྲས་བུ་མང་པོ་ཐོབ། །ཆགས་པས་ནོན་པའི་ཡིད་ཀྱིས་སུ། །ཁྱོད་ཀྱིས་གཞན་གྱི་ནོར་རྫས་ཕྲོགས། །གང་དག་འདོད་པའི་དབང་སོང་བ། །དེ་ཡི་དུས་ནི་འདིར་འོངས་སོ། །རྣམ་རྟོག་བུད་ཤིང་བྱུང་གྱུར་པ། །མེ་ནི་གཉིས་པ་འདྲ་བ་ཡིན། །འདོད་པ་དག་ལ་ལོག་པར་སྤྱད། །དོན་མེད་ཅི་ཞིག་ཡོངས་སུ་གདུང་། །གཞན་གྱི་ནོར་ལ་ཆགས་སེམས་པ། །རང་ཉིད་ཀྱི་ནི་བསམ་པས་བསམས། །དེ་ལ་བྱ་བར་ནུས་པ་མེད། །དེ་ཡི་འབྲས་བུ་དེ་རིང་སྤྱོད། །གང་ལ་གནོད་སེམས་མང་ཡོད་པ། །དེ་ཡིས་གནོད་སེམས་ཡོངས་སུ་བསམས། །དམྱལ་དང་ཉེ་སྟེ་དེ་ལྟ་བས། །ངེད་ཅག་གིས་ནི་ཡོངས་སུ་འདྲེན། །ལོག་པར་སྟོན་པ་མི་བཟད་དེ། །ལས་གཉིས་རྣམ་པར་འཇིག་བྱེད་པ། །ཁྱོད་ཀྱིས་ལོག་པར་ལྟ་བ་ལ། །གཞན་གྱི་ཡིད་དག་མངོན་པར་བཅུག །ལུས་དང་ངག་དང་ཡིད་རྣམས་ཀྱིས། །སྡིག་པའི་ཆོས་ནི་འདི་དག་སྟེ། །གཏི་མུག་རྗེས་སུ་ཞུགས་ཁྱོད་ཀྱིས། །བྱས་ཤིང་གཞན་དག་རབ་ཏུ་སྦྱར། །བྱས་པས་ངེས་པར་འགྲོ་བ་ཡི། །དམྱལ་བ་དྲག་པོ་འདི་ཐོབ་སྟེ། །ངེད་ཅག་གིས་ནི་ཡོངས་བསྐོར་བ། །གཏི་མུག་ཅི་ཞིག་ཡོངས་སུ་གདུང་། །རྒྱ་མཚོའི་ཁྱད་པར་གང་ཡིན་པ། །གང་གི་ཁྱད་པར་ཆུ་ཐིགས་ཙམ། །གང་དག་མི་བཟོད་ཐོབ་པ་ཡི། །སྡུག་བསྔལ་འདི་ནི་དེ་ཙམ་མོ། །མི་ནི་གང་ཞིག་སྡིག་བྱེད་པ། །དེ་བདག་ངེས་པར་ཕངས་མི་བྱེད། །བདག་གི་ཡིད་ལ་སྡིག་པ་བྱས། །སྡིག་པས་སེམས་ཅན་དམྱལ་བར་འཚེད། །སྡིག་པས་སྡིག་པའི་རྗེས་སུ་འགྲོ། །དེ་བཞིན་དགེ་བས་དགེ་བར་མཐོང་། །སྡིག་བྱེད་དགེ་ལ་སྡང་བ་ནི། །སེམས་ཅན་དམྱལ་བར་སྐྱེ་བར་འགྱུར། །མི་དགེའི་བློ་ཡིས་དགེ་བ་དག །བཏང་ནས་ཅི་ཕྱིར་སྡིག་པར་འགྲོ། །རྨོངས་པས་རིན་ཆེན་བོར་ནས་སུ། །ཅི་ཕྱིར་རྡོ་ཡི་རྗེས་སུ་རྒྱུག །སངས་རྒྱས་རིན་ཆེན་ལ་སོགས་
པ། །སྣ་ཚོགས་ཆོས་ཀྱིས་མཚུངས་པར་གང་། །མི་ཡི་ཆོས་ནི་ཐོབ་པ་དག །ཅི་ཕྱིར་མང་དུ་སྤྱད་མི་བྱ། །སྡིག་པ་ཡོངས་སུ་སྤངས་པ་ཡི། །སེམས་ནི་རྟག་ཏུ་དགེ་བ་དག །མྱ་ངན་འདས་པ་ལག་ན་ཡོད། །རྟོག་པ་རྣམས་ཀྱིས་མི་མཐོང་ངོ་། །ཐོག་མ་དབུས་དང་མཐར་དགེ་བ། །བདེ་བའི་ཆོས་ནི་རྟག་ཏུ་འབྱུང་། །ཐོག་མ་དབུས་དང་མཐར་མི་དགེ། །སྡིག་པའི་ལས་ཀྱི་འབྲས་བུ་ཡིན། །དེ་ལྟར་རྟག་ཏུ་སྡིག་སྤངས་ཤིང་། །རྟག་ཏུ་དགེ་ལ་དམིགས་པར་གྱིས། །སྡིག་པ་ཡོངས་སུ་སྤངས་པ་ནི། །རྟག་ཏུ་བདེ་ལ་གནས་པ་ཡིན། །འཁོར་བ་ཐོག་མ་མེད་པ་ནས། །ཡང་དང་ཡང་དུ་སྡིག་པས་གདུངས། །བྱིས་པ་གཏི་མུག་དབང་སོང་བ། །ཅི་ཡི་ཕྱིར་ན་སྐྱོ་མི་བྱ། །སྡིག་པ་ཡིས་ནི་སྔོན་བསྲེགས་ཤིང་། །ཕྱི་ནས་མེ་ཡིས་སྲེག་པར་བྱེད། །སྡིག་པའི་རྒྱུ་ལས་བྱུང་བའི་དམྱལ། །སྡིག་པ་རྣམས་སུ་ཡོངས་སུ་འཚེད། །སྡིག་པ་དོན་མེད་སྨྲ་བ་ནི། །སེམས་ནི་ཡང་བས་སྨྲ་བར་བྱེད། །ཚ་བ་གང་གིས་ཡོངས་སྲེག་པ། །ཅི་ཡི་ཕྱིར་ན་སྡིག་པར་བྱེད། །ཁྱོད་ནི་སྒོ་དག་དུ་མར་གྱུར། །དེ་ལྟ་བས་ན་སྡུག་བསྔལ་འགྱུར། །དེ་ལྟར་དེ་ནི་བསྡིགས་པ་ན། །གཤིན་རྗེའི་ཕོ་ཉ་དུ་མ་ཡིས། །ལས་ཀྱི་ཞགས་པའི་དབང་སོང་ལ། །མི་བཟད་དམྱལ་བར་འཁྲིད་པར་བྱེད། །དེ་ཡི་ཡན་ལག་དང་ཉིང་ལག་ཐམས་ཅད་ཤིང་ཁོང་སྟོང་གི་ནང་ན་མེ་འབར་བ་ལྟ་བུས་བསྲེགས་ཤིང་ཐག་ཉེ་བ་ན་སེམས་ཅན་དམྱལ་བ་ཆེན་པོའི་སྒོ་གང་དཔེ་བྱ་བར་ཡང་མི་ནུས་པ་མཐོང་ངོ་། །འདིར་ཚིགས་སུ་བཅད་པ། གྲུ་བཞི་པ་ལ་སྒོ་བཞི་ཡོད། །དཔག་མེད་སྦྲུལ་གྱིས་རྣམ་པར་ཕྱེ། །སེམས་ཅན་དམྱལ་བ་དུ་མ་དག །དབང་མེད་དེར་ནི་འཚེད་པར་བྱེད། །དེ་ལྟར་དེ་སེམས་ཅན་དམྱལ་བ་པ་རྣམས་ཀྱི་སྒྲ་ཆེན་པོ་ཤིན་ཏུ་མི་བཟད་པ་རྩུབ་པ་ཚ་བ་མི་སྙན་པ་ཐ་དད་པ་འཇིགས་སུ་རུང་ཞིང་གཞན་དང་མཚུངས་པ་མེད་པ་ཐོས་ནས་མི་འཐུན་པ་དག་དཔག་ཚད་ཉི་ཁྲི་ལྔ་
སྟོང་ནས་དེ་མངོན་པར་ཐོས་སོ། །ཐོས་ནས་གང་སེམས་ཅན་དམྱལ་བ་གཞན་དུ་སྐྱེས་པའི་སེམས་ཅན་དེ་དག་ཀྱང་སེམས་ཅན་དམྱལ་བའི་སྡུག་བསྔལ་དེ་ཐམས་ཅད་བརྗེད་ནས་སེམས་འཁྲུགས་པར་གྱུར་ཅིང་དེ་ལས་གཞན་པ་སེམས་ཅན་དམྱལ་བ་པ་ཐམས་ཅད་ཀྱང་བྱས་པའི་སྡུག་བསྔལ་བརྗེད་ནས་འཆི་བའི་དུས་བྱེད་ན། གང་གིས་སྔོན་གྱི་སྒྲ་དེ་དག་རྣམས་ཀྱང་མ་ཐོས་པ་ལྟ་སྨོས་ཀྱང་ཅི་དགོས། སེམས་ཅན་དམྱལ་བ་པའི་སྣང་བ་བྱས་པའི་སྲིད་པ་བར་མ་ལ་སྡུག་བསྔལ་སྣ་ཚོགས་ཀྱིས་ཉེན་པ་དེའི་སེམས་རྣམ་པར་རྨོངས་ཏེ། ཡང་ཕྱིར་ཞིང་སྒྲ་དེས་བཅུ་འགྱུར་དུ་རྣམ་པར་རྨོངས་སོ། །དེའི་སྡུག་བསྔལ་གྱི་རྣམ་པ་མཐའ་དང་མུ་མེད་པ་ལུས་དང་ཡིད་ལ་སྡུག་བསྔལ་གྱིས་ཉམ་ཐག་པའི་སེམས་དེ་ཕྱིར་ཞིང་རྨི་ལམ་གྱི་གཟུགས་བརྙན་ལྟ་བུར་རྣམ་པར་འཁྲུག་པར་འགྱུར་རོ། །དེ་མནར་མེད་པ་དང་ཉེ་བར་གནས་པ་དེའི་ཚེ། ལས་ཀྱིས་བསྐྱེད་པ་ལས་ཀྱིས་བྱས་པའི་རླུང་གྲང་བ་ལྡང་སྟེ། ཁྱད་པར་གང་སའི་འོག་ན་ཆུ་ཡོད་ཅིང་། སའི་འོག་གི་བར་ན་ཆུ་གནས་པ་བར་གྱི་བསྐལ་པའི་ཉི་མ་ཐམས་ཅད་ཀྱིས་ཀྱང་སྔོན་མ་རེག་པ་དེ་ལྟ་བུ་བས་ཀྱང་དེ་གྲང་སྟེ། གང་མིའི་ཆབ་རམ་ཤིན་ཏུ་གྲང་བ་དང་འདྲའོ། །ཆུ་དེ་དག་པས་ཤིན་ཏུ་གྲང་བ་ལས་ཀྱིས་བྱས་པའི་སྤུ་གྲི་ལྟ་བུའི་རླུང་དེ་རི་དཔག་ཚད་བཅུ་པ་ཡང་སྒྱེལ་ནུས་པར་ལྡང་སྟེ། ཕལ་ཆེར་རླུང་དེའི་ནང་དུ་བཅུག་ནས་སྲིད་པ་བར་མ་པའི་གྲང་བ་རྣམ་པ་དེ་ལྟ་བུས་གཟུགས་ལ་སོགས་པའི་ཕུང་པོ་བདས་སོ། །འདི་ལྟར་དེ་དང་འཐུན་པའི་ཉི་མ་བདུན་ཤར་བའི་ཚ་བ་སྟོང་པས་ལྷག་པར་ཚ་བའི་མེ་མངོན་པར་འབར་རོ། །སྲིད་པའི་ཡན་ལག་ནི་འདི་ཡིན་ཏེ། འདི་ལྟ་སྟེ། ཉེ་བར་ལེན་པའི་རྐྱེན་གྱིས་སྲིད་པ་འབྱུང་ངོ་། །དེ་འདོད་པ་བསྐྱེད་མ་ཐག་ཉིད་དུ་སྲིད་པ་བར་མའི་ཕུང་པོ་འགག་པར་འགྱུར་ལ་སྲིད་པ་གཞན་དུ་སྐྱེ་བའི་ཚོར་བའི་ཕུང་པོ་དག་འབྱུང་བར་འགྱུར་ཏེ། དཔེར་ན་སུམ་ཅུ་རྩ་གསུམ་པའི་ལྷ་རྣམས་ཀྱི་མིག་ལྔ་དང་། བཞི་དང་། གསུམ་འབྱུང་བ་དེ་བཞིན་དུ་ལས་ཀྱི་དབང་གིས་མི་འདྲ་བའི་ལུས་དཔག་ཚད་གཅིག་
པ་མངོན་པར་འགྲུབ་པར་འགྱུར་རོ། །དེ་མགོ་ཐུར་དུ་བསྟན་ཅིང་རྐང་པ་གྱེན་དུ་བསྒྲེང་སྟེ་ལྟུང་བ་ན་མནར་མེད་པའི་མེ་ལྕེ་རབ་ཏུ་འབར་བའི་ཤུགས་ཀྱིས་བརྡབས་ཤིང་རབ་ཏུ་ཉམས་པ་ལོ་ཉིས་སྟོང་དུ་འགྲོའོ། །དེ་ལྟར་སྤྱིའུ་ཚུགས་སུ་དེ་མནར་མེད་པའི་སར་སོང་སྟེ། དེའི་འོག་ན་དེ་ལས་གཞན་པ་འདི་ལྟ་སྟེ། མནར་མེད་པ་མེད་དོ། །འདོད་པའི་ཁམས་འདིའི་མཐའ་ནི་མནར་མེད་པ་ཡིན་ལ་གཟུགས་ཀྱི་ཁམས་ཀྱི་མཐའ་ནི་གྱེན་དུ་དྲངས་ཏེ་འོག་མིན་གྱི་ལྷའི་བར་ཡིན་ཏེ་ཁམས་གཉིས་སོ། །དེ་ལྟར་དེ་ལྟུང་བ་ན་སྐྱེ་བའི་སྲིད་པ་ཐོབ་ནས་དེ་མ་ཐག་པའི་རྐྱེན་གྱིས་རྟག་ཏུ་གནོད་ཅིང་སྡུག་བསྔལ་གྱི་ཤུགས་རབ་ཏུ་འབྱུང་སྟེ། དེའི་དྲུང་ན་རབ་ཏུ་ཚ་བར་སྐྱེས་པའི་སེམས་ཅན་དམྱལ་བ་པ་དག་གཞན་འཕྲུལ་དབང་བྱེད་ཀྱི་ལྷ་དང་འདྲ་བར་མངོན་ནོ། །དེ་འབར་བ་འཁྲུགས་ཤིང་མི་བཟད་པའི་སེམས་ཅན་དམྱལ་བའི་ནང་དུ་སྐྱེས་སོ། །སྐྱེས་མ་ཐག་ཏུ་སེམས་ཅན་དམྱལ་བ་པའི་མེས་ཡུད་ཙམ་ཞིག་གདུངས་ཏེ། དེའི་ཚེ་ལུས་ཡོངས་སུ་བསྲེགས་ཤིང་ཚ་བར་འགྱུར་རོ། །དེའི་གནས་དེ་ཡོངས་སུ་ཚོལ་བར་བྱེད་དེ། གལ་ཏེ་རིའི་རྒྱལ་པོ་རི་རབ་ལ་འཁྱུད་ཅིང་། དེ་ལྟར་དེ་སྟོང་ཕྲག་དྲུག་ཅུར་ཡོངས་སུ་བསྐོར་ལ། དེ་ཆུ་བོ་དང་། ཤིང་ལྗོན་པ་དང་། ལྟེང་ཀ་དང་། ནགས་ཚལ་དུ་བཅས་པ་བསྐོར་བ་ཙམ་གྱིས་སེམས་ཅན་དམྱལ་བ་པའི་མེ་དུ་མས་སྲེག་པར་བྱེད་དེ། དེ་སེམས་ཅན་དམྱལ་བ་པ་གཞན་ཡུན་རིང་དུ་སྐྱེས་པ་དག་ནི་མ་གཏོགས་སོ། །དེ་ལྟར་སྲེག་པ་འདི་ཆུང་ཟད་འདྲ་བ་བསྟན་པ་ནི་འདི་ལྟར་མེ་ཤིན་ཏུ་ཚ་བས་དོག་ལེ་ཡོངས་སུ་བསྲེགས་པའི་ནང་དུ་སྣུམ་གྱི་ཐིགས་པ་གཅིག་བསྲེགས་པ་དེ་བཞིན་དུ་ལས་ཀྱི་རྒྱུ་གཅིག་གིས་མནར་མེད་པར་སྐྱེས་པའི་ལུས་ལས་འབྱུང་པོའི་ཚོགས་གནས་དང་བཅས་པ་དང་། རི་དང་། ལྷ་དང་། ལྷ་མ་ཡིན་དང་། རི་ཆེན་པོ་དང་། སྨན་ལྗོངས་དང་། གླིང་དང་། ཚལ་དུ་བཅས་ཤིང་རྒྱ་མཚོ་དང་བཅས་པ་སྲེག་གོ །གང་གིས་ལས་གཉིས་བྱས་ན་དེས་རྒྱ་མཚོ་གཉིས་སྔ་མ་བཞིན་སྲེག་གོ །
གང་གིས་གསུམ་བྱས་ན་རྒྱ་མཚོ་གསུམ་སྲེག་གོ །དེ་ལྟར་བཞིས་རྒྱ་མཚོ་བཞི་སྟེ། ལུས་ལ་དོག་ལེ་བསྲེགས་པ་བཞིན་ལྷུང་མ་ཐག་ཏུ་སྲེག་གོ །རི་ཁོར་ཡུག་དང་། ཁོར་ཡུག་ཆེན་པོ་དང་། རྒྱ་མཚོར་གཏོགས་པ་དག་ནི་ཀླུ་དང་། ལྷ་མ་ཡིན་དང་། དུད་འགྲོར་སྐྱེས་པའི་ཚོགས་དང་བཅས་པ་དང་། མིའི་གནས་བཞི་དང་། འདོད་པ་ན་སྤྱོད་པའི་ལྷ་དྲུག་དག་གི་སྐྱབས་ཡིན་ནོ། །དེ་ཅིའི་ཕྱིར་ཞེ་ན། མནར་མེད་པའི་སེམས་ཅན་དམྱལ་བ་པ་དག་གི་ལུས་དྲི་ང་བ་དེས་དེ་དག་ཐམས་ཅད་མ་རུང་བར་འགྱུར་ཏེ། དེ་ལྟར་སེམས་ཅན་དམྱལ་བ་པ་དག་དྲི་ང་བའི་ལུས་ལས་དྲི་འབྱུང་ངོ་། །རི་མཐོན་པོ་དག་གིས་དྲི་དེ་ཡོང་མི་ཚོར་ཏེ། སེམས་ཅན་དམྱལ་བ་པ་དེ་ལས་བྱས་ཤིང་བསྐྱེད་པ་དང་། མ་བསྐྱེད་པ་དང་། རྣམ་པར་ཕྱེ་བའི་དྲི་ང་བ་དེ་དྲི་གཞན་གྱིས་དཔེ་བྱ་བར་མི་ནུས་སོ། །དེའི་ཚེ་སེམས་ཅན་དམྱལ་བ་པ་རྣམས་ཀྱི་བྱའི་རིགས་དག་འབྱུང་བར་འགྱུར་ཏེ། མཆུ་རབ་ཏུ་འབར་བ་མཁྲང་ཞིང་རྣོ་ལ་ཤུགས་སེར་བ་མྱུར་དུ་འབབ་པ་ལྟ་བུའི་ཤུགས་ཀྱིས་སེམས་ཅན་དམྱལ་བ་པ་དེ་དག་ཐམས་ཅད་ཀྱི་ལུས་དང་། པགས་པ་དང་། ཤ་དང་། ཚིལ་དང་། རུས་པ་དང་། རྐང་རྣམས་རབ་ཏུ་འདྲེན་ཏེ། འདི་ལྟ་སྟེ། མེ་ལས་མེ་འབྱུང་བ་དེ་བཞིན་དུ་འབྱུང་ཞིང་དེར་གནས་དེར་འགྲོ་དེ་ལ་ཟའོ། །སེམས་ཅན་དམྱལ་བ་པ་རྣམས་ཀྱི་ཤ་ཟོས། རུས་པ་ཕུག །ཤ་དྲངས་ནས་ཁྲག་ལ་འཐུང་ངོ་། །དེ་དག་ཀྱང་ཟོས་ནས་རྐང་དག་ལ་ཟའོ། །དེ་ནས་ངུ་ཞིང་ཆོ་ངེས་འདེབས་ལ་ཡོངས་སུ་སྨྲེ་སྔགས་འདོན་ཅིང་རྨོངས་པ་ན་བྱའི་རིགས་གཞན་དག་འབྱུང་བར་འགྱུར་ཏེ། འདི་ལྟ་སྟེ། བྱ་མེ་ལྕེ་སྤྱོད་པ་ཞེས་བྱ་བས་གང་མེ་ལྕེའི་ནང་དུ་ཞུགས་ནས་སྲེག་སྟེ། མཐོང་མ་ཐག་ཏུ་སེམས་ཅན་དམྱལ་བ་པ་རྣམས་ཀྱི་གླད་པ་ཕུག་ནས་ཁྲག་འཐུང་ངོ་། །བྱ་གླད་པའི་བར་ན་རྒྱུ་ཞེས་བྱ་བས་གླད་པ་ཕུག་ནས་མཆུ་རབ་ཏུ་འབར་བས་གླད་རྒྱས་འཐུང་ངོ་། །བྱ་ཟས་སུ་ལྕེ་ཟ་ཞེས་བྱ་བས་ལྕེ་ཁ་གཉིས་སུ་དྲངས་ནས་རབ་ཏུ་ཟ་བར་བྱེད་དོ། །དེ་ཡང་ཟོས་ཤིང་
ཡང་པད་མའི་འདབ་མ་ལྟར་ཤིན་ཏུ་འཇམ་པ་སྐྱེའོ། །བྱ་སོ་འབྱིན་ཞེས་བྱ་བས་མཆུ་གཉི་ག་ཕྲ་སྐམ་ལྟར་འཛིན་ཅིང་རབ་ཏུ་འབར་བས་སོ་ཐམས་ཅད་འབྱིན་པར་བྱེད་དོ། །བྱ་མིད་པ་ལ་སོགས་པ་འདྲེན་པ་ཞེས་བྱ་བས་གང་མིད་པའི་ཤ་དག་ཞིབ་མོར་འཐུབ་ཅིང་ཟ་བར་བྱེད་དོ། །བྱ་གློ་བ་ཟ་བ་ཞེས་བྱ་བས་གང་གློ་བ་དག་ཟ་བར་བྱེད་དོ། །བྱ་སྙིང་ཟ་བ་ཞེས་བྱ་བས་གང་སྙིང་དག་གཤེགས་ནས་ཟ་བར་བྱེད་དོ། །བྱ་ཕོ་བ་ཟ་བ་ཞེས་བྱ་བས་ཕོ་བ་གཤེགས་ནས་དེར་ཞུགས་ཏེ་རོ་བྲོ་བ་ཟ་བར་བྱེད་དོ། །བྱ་མཆིན་པ་འཇིག་བྱེད་ཅེས་བྱ་བས་གང་མཆིན་པ་དག་ཟ་བར་བྱེད་དོ། །བྱ་བུ་གར་ཟ་བ་ཞེས་བྱ་བས་གང་སེམས་ཅན་དག་གི་བུ་ག་ཟ་བར་བྱེད་དོ། །བྱ་སྒལ་ཚིགས་ཟ་ཞེས་བྱ་བས་གང་སྒལ་ཚིགས་དག་ཕུག་ནས་གཞུངས་པ་དག་ཟོས་ཏེ་ཕྱིར་འབྱུང་ངོ་། །བྱ་གནད་གསང་ཞེས་བྱ་བས་གང་གནད་ཀྱི་བར་ཐམས་ཅད་ཕུག་ཅིང་གནད་དག་ཕྱེ་སྟེ། བར་དུ་ཞུགས་ནས་ངུ་བཞིན་ངུ་རྐང་གི་བཅུད་འཐུང་ངོ་། །བྱ་ཁབ་ལྟར་འབིགས་ཞེས་བྱ་བས་གང་མཆུ་ཁབ་ལྟ་བུས་ཁྲག་འཐུང་ངོ་། །དེ་བཞིན་དུ་བྱ་འགྲམ་རུས་ཀྱི་བར་དུ་ཞུགས་ཤིང་རུས་པ་གཞན་དག་ཕུག་ནས་རུས་པའི་བར་ན་གནས་ཞེས་བྱ་བས་ཕྱི་རོལ་ན་ཡང་ཟ་བར་བྱེད་དོ། །བྱ་པགས་པ་རྣམ་དྲུག་ཟ་ཞེས་བྱ་བས་གང་པགས་པ་རྣམ་པ་དྲུག་ཟ་བར་བྱེད་དོ། །བྱ་སེན་མོ་འབྱིན་ཞེས་བྱ་བས་གང་སེན་མོ་ཐམས་ཅད་འབྱིན་ཏོ། །བྱ་ཚིལ་ཟ་ཞེས་བྱ་བས་གང་པགས་པ་དག་ཕུག་ནས་ཚིལ་ཟ་བར་བྱེད་དོ། །བྱ་རྒྱུས་པ་འབྱིན་ཞེས་བྱ་བས་གང་རྒྱུས་པ་ཐམས་ཅད་ཕྱུང་ནས་ཟའོ། །བྱ་སྐྲ་ཤད་འཛིངས་ཞེས་བྱ་བས་སྐྲ་དྲུང་ནས་འབྱིན་པར་བྱེད་དོ། །དེ་ལྟར་དེ་མནར་མེད་པའི་ཕྱོགས་དཔག་ཚད་སུམ་སྟོང་ན་བྱ་འཇིགས་འཇིགས་ལྟར་འདུག་པ་ཞེས་བྱ་བ་དེས་སེམས་ཅན་དམྱལ་བ་པ་དེ་ལས་གཞན་པ་རྣམས་ཀྱིས་དེ་མ་ཐག་ཏུ་ལོ་འབུམ་ཕྲག་དུ་མར་ཟ་བར་བྱེད་ཅིང་ཡང་སླར་འབྱུང་བར་བྱེད་དོ། །དེ་གལ་ཏེ་ཡང་མནར་མེད་པ་ན་བྱ་འཇིགས་འཇིགས་ལྟར་འདུག་པའི་ཕྱོགས་དེ་དག་ལས་ཐར་ན་སྡུག་བསྔལ་གྱི་དྲ་བ་ཐམས་ཅད་ཀྱིས་ཡོངས་སུ་དཀྲིས་པ་ངམ་
གྲོག་དང་གཡང་ས་ཞེས་བྱ་བའི་ཕྱོགས་གཉིས་པ་ཡོད་དེ། དེར་མགོན་འདོད་པ། སྐྱབས་འདོད་པ། སྐྱོབ་པར་འདོད་པ་འགྲོ་བ་ན། ཀུན་ནས་མེ་ལྕེའི་ཕུང་པོ་བཅུ་གཅིག་གིས་ཁེབས་ཤིང་གྲོགས་མེད་ལ་ལས་ཀྱི་ཞགས་པའི་བཅིང་བས་བཅིངས་ནས་ཕྱི་ནང་ཀུན་ཏུ་དགྲས་གང་བའི་དགོན་པར་ཞུགས་སོ། །སེམས་ཅན་དམྱལ་བའི་ཚོགས་ཐམས་ཅད་པས་ཆེས་ཤིན་ཏུ་ཉོན་མོངས་པར་ཞུགས་ལ་ངམ་གྲོག་དང་གཡང་ས་ཞེས་བྱ་བའི་ཕྱོགས་སུ་རྒྱུག་སྟེ། དེར་ལྷུང་ནས་རྐང་པ་རབ་ཏུ་སྲེག་གོ །བཏེག་པ་དང་ཤིན་ཏུ་འཇམ་ཞིང་གཞོན་ཤ་ཅན་དུ་འགྱུར་ཏེ། སྡུག་བསྔལ་ཚ་ཞིང་མི་བཟད་པའི་སྡུག་བསྔལ་གྱིས་མངོན་པར་གདུངས་སོ། །དེ་ལྟར་དེ་འཇིགས་ཤིང་བཞིན་མདོག་མོག་མོག་པོར་གྱུར་པའི་རྐང་ལག་དང་ཡན་ལག་ཐམས་ཅད་རབ་ཏུ་ཞུམ་པ་ན་ངམ་གྲོག་དང་གཡང་ས་ཞེས་བྱ་བའི་ཡུལ་དེ་འབྱུང་བར་འགྱུར་ཏེ། ངམ་གྲོག་དང་གཡང་ས་དཔག་ཚད་སུམ་སྟོང་ཡོད་པའི་ཡུལ་དེར་དེ་ལྷུང་བར་འགྱུར་རོ། །ཡང་ལས་ཀྱིས་བྱས་པའི་རླུང་གིས་འདེག་ཅིང་དེ་འདོར་བ་ན། བྱ་ཀང་ཀ་དང་། ཁྭ་དང་། བྱ་རྒོད་དང་། འུག་པ་རྣམས་ཀྱིས་ཟ་བར་བྱེད་དོ། །དེ་ནས་ཡང་རླུང་སྤུ་གྲི་དང་མེ་ལྟ་བུས་གྱེན་དུ་འདེག་ཅིང་འདོར་བ་ན། དེ་དག་ཉིད་ཀྱིས་ཟ་བར་བྱེད་དེ། དེ་ལྟར་དེ་འདེག་ཅིང་འདོར་བ་ལོ་འབུམ་ཕྲག་དུ་མར་བྱེད་དོ། །དེ་ལ་གལ་ཏེ་ཡང་དེ་ལས་ཐར་ན་འཁོར་ལོ་ལྟར་ཡོངས་སུ་བསྐོར་བ་མཚན་མའི་བར་ཞེས་བྱ་བའི་ཕྱོགས་སུ་རྒྱུག་གོ །ཕྱོགས་དེར་ཡང་འཁོར་ལོའི་རྩིབས་སྟོང་ཡོད་ལ་ལྟེ་བ་རྡོ་རྗེ་ལས་བྱས་པ་ཤིན་ཏུ་འབར་ཞིང་མྱུར་བར་འཁོར་བ་འབྱུང་སྟེ། དེ་དང་ལྷན་ཅིག་འགྲོ་བ་ཉིད་ཀྱིས་འཁོར་ལོ་དེ་ལུས་ལ་བབ་ནས་འཁོར་རོ། །མགོའི་འཁོར་ལོ་གཅིག་གིས་གླད་པ་འཐག་པར་བྱེད། དེ་ནས་གླད་རྒྱས་རབ་ཏུ་འབར་བ་དག་འབྱུང་བ་ནས་མིག་གི་བར་དུ་འབྱུང་བར་བྱེད་དོ། །ཕྲག་པ་གཉིས་ཀ་ལ་འཁོར་ལོ་གཉིས་འཁོར་ཏེ་དེས་རུས་པ་དང་རྐང་དག་ཕྱེ་མར་རློག་གོ །ལག་པ་གཉིས་ལ་ཡང་འབྱུང་སྟེ། དེས་གཙུབ་ཤིང་བཞིན་དུ་ལག་པ་གཉི་ག་ལ་མེ་འབྱུང་ལ། དེ་མེ་ཉིས་འགྱུར་
གྱིས་སྲེག་གོ །དེ་བཞིན་དུ་དེའི་བྲང་ལ་འཁོར་ལོ་རབ་ཏུ་འབར་བ་ཡོངས་སུ་འཁོར་ཏེ་དེས་དེའི་རུས་པ་ཐམས་ཅད་བཅོམ་བཅོམ་ནས་འཐག་སྟེ། བྱེ་མའི་ཕྱེ་མ་བཞིན་དུ་བྱེད་དོ། །དེའི་རྒྱབ་ལ་ཡང་ལྕགས་ཀྱི་མེ་མདག་གིས་རེག་ཅིང་འཁོར་ལོ་རྩིབས་སྟོང་པ་འཁོར་ཏེ། དེས་བྲང་གི་ཕྱོགས་དང་། རྒྱབ་ཀྱི་རུས་པར་གཏོགས་པ་ལ་སོགས་པ་ཐམས་ཅད་འཇོམས་སོ། །དེ་ནས་དེའི་མདོམས་སུ་ལྕགས་ཀྱི་མཚོན་བྲང་ཀོལ་ལི་ཀ་འབྱུང་སྟེ། དེས་མདོམས་ཐམས་ཅད་གཙུབ་ཤིང་བཞིན་དུ་གཙུབས་ནས་འདྲེན་པར་བྱེད་ཅིང་དེའི་ལོང་ཀ་ཐམས་ཅད་འབིགས་པར་བྱེད་དོ། །ཕུག་ནས་ཀྱང་རྒྱུ་མ་དག་ལ་ཡང་འབིགས་པར་བྱེད་དོ། །པུས་མོའི་ལྷ་ང་ལ་ཡང་འཁོར་ལོ་འབྱུང་སྟེ། དེས་པུས་མོའི་ལྷ་ང་དེ་འབིགས་པར་བྱེད་དོ། །དེ་བཞིན་དུ་ལོང་བུ་ལ་ཡང་འབྱུང་སྟེ། དེས་དེའི་རུས་པ་དག་ཕུག་ནས་རྐང་དག་ཟ་བར་བྱེད་དོ། །དེའི་རྐང་མཐིལ་ལ་ཡང་ཕུར་བུ་རྣམས་ཀྱིས་འབིགས་པར་བྱེད་དེ། དེས་ཀྱང་གདུང་བ་ཆེར་བྱས་ཤིང་སྡུག་བསྔལ་སྐྱེད་པར་བྱེད་དོ། །དེ་ལྟར་ལས་ཀྱི་མཐའ་ཉེས་པར་བྱས་པ་སྤྱོད་པ་མནར་མེད་པའི་སྡུག་བསྔལ་རང་གི་ལས་ཀྱིས་བྱས་པ་ཐུན་མོང་མ་ཡིན་པ་མི་བཟད་པ་ཚ་བ་རྩུབ་པའི་གནོད་པ་དག་ལོ་འབུམ་ཕྲག་དུ་མར་འབྱུང་བར་འགྱུར་རོ། །དེ་གལ་ཏེ་ཡང་དེ་ལས་ཐར་ན་གནོད་པ་མྱོང་བཞིན་དུ་འབྲོས་པར་བྱེད་དོ། །མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ་བྲོས་པ་ན་རི་ཆེན་པོ་ཞིག་ཡོད་པར་མཐོང་ནས་དེ་ལ་རྒྱུག་གོ །རི་དེ་ཡང་སྲིན་བུ་མར་ཀོ་ཏ་ཀ་ཡན་ལག་དང་ཉིང་ལག་རབ་ཏུ་འབར་བ་རྣམས་ཀྱིས་གང་ལ། དེ་ལྟར་དེ་སྲིན་བུ་མར་ཀོ་ཏ་ཀ་རེག་ན་རྟག་ཏུ་མེ་ལྟར་ཚ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་རྣམས་ཀྱིས་དེ་ཀུན་ནས་ཡོངས་སུ་བསྐོར་ནས་རྡུལ་ཕྲན་ཙམ་དུ་ཟ་བར་བྱེད་དོ། །ཆོ་ངེས་འདེབས་པ་ན་སྲིན་བུ་མར་ཀོ་ཏ་ཀ་ཁའི་ནང་དུ་ཡང་ཞུགས་ནས་མིད་པར་སོང་སྟེ། ཕོ་བ་དང་། ལོང་ཀའི་ནང་དུ་ཞུགས་ནས་ཟ་བར་བྱེད་ཅིང་དེ་སྡུག་བསྔལ་མི་བཟད་པ་ཚ་བ་རྩུབ་པ་དག་མྱོང་ངོ་། །གང་སྔོན་ཤིན་
ཏུ་ཉེས་པར་སྤྱད་པ་བྱས་པ་དང་། གང་མནར་མེད་པ་བྱས་པ་དང་། མི་དགེ་བ་བཅུའི་ལས་ཀྱི་ལམ་དང་ལྡན་པ་དེ་ནི་རྒྱུ་དེ་དང་འཐུན་པའི་འབྲས་བུ་ཉེ་བར་སྤྱོད་པར་འགྱུར་ཏེ། དེ་ལྟར་དེ་སྲིན་བུ་མར་ཀོ་ཏ་ཀའི་རི་དེར་ལོ་འབུམ་ཕྲག་དུ་མར་སྡུག་བསྔལ་མྱོང་བར་འགྱུར་རོ། །གལ་ཏེ་ཡང་དེ་ལས་ཐར་ན་ཤ་ཟ་བ་སེང་གེ་དང་། སྟག་དང་། དྲེད་དང་། གུང་དང་། དོམ་གྱིས་གང་བའི་ཚལ་དུ་རྒྱུག་པ་དང་། དེ་རྣམས་ཀྱིས་དེ་བཟུང་ངོ་། །བཟུང་ནས་ཀྱང་ཡན་ལག་རབ་ཏུ་ཟ་བར་བྱེད་དེ། ལ་ལ་ནི་གླད་པ་བརྟོལ་ནས་གླད་རྒྱས་ཟ་བར་བྱེད། ལ་ལ་ནི་བརླའི་ངོས་ལ། ལ་ལ་ནི་རྒྱུ་མ་ལ། ལ་ལ་ནི་གཉེ་མ་ལ། ལ་ལ་ནི་ལོང་ཀ་ལ། ལ་ལ་ནི་ཕོ་བ་ལ། ལ་ལ་ནི་བྱིན་པའི་སྦུ་གུ་ལ། ལ་ལ་ནི་པུས་མོ་ལ། ལ་ལ་ནི་རྐང་པ་ལ། ལ་ལ་ནི་རྐང་མཐིལ་ལ་ཟ་སྟེ། དེ་ལྟར་དེ་བཟའ་བཟའ་ནས་ཡང་ཤིན་ཏུ་གཞོན་ཤ་ཅན་དུ་འབྱུང་བར་འགྱུར་རོ། །ཤིན་ཏུ་གཞོན་ཤ་ཅན་དེ་ལ་ཡང་དང་ཡང་དུ་ལྷག་པར་སྡུག་བསྔལ་མྱོང་བར་འགྱུར་ལ་ཡང་ཟོས་ན་ཡང་དེའི་ཤ་རྫོགས་པར་སྐྱེ་བར་འགྱུར་ཏེ། དེས་སྲོག་གཅོད་པ་བྱས་ཤིང་བསགས་པའི་འབྲས་བུ་ནི་དེ་ཡིན་ནོ། །དེ་ལྟར་དེ་རང་གིས་བྱས་པ་གཞན་དང་མི་འདྲ་བའི་སྡིག་པའི་ལས་དེ་ལོ་འབུམ་ཕྲག་དུ་མར་མྱོང་བར་འགྱུར་རོ། །དེ་ནས་ཡང་དགེ་སློང་དེ་མ་བྱིན་པར་ལེན་པ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་འབྲས་བུ་སོ་སོ་ཡང་དག་པར་མྱོང་བ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་དེ་ཉེས་པར་བྱས་པའི་ལས་ཀྱི་མཐའ་ལ་སྤྱོད་པ་མགལ་མེའི་འཁོར་ལོ་དང་། དྲི་ཟའི་གྲོང་ཁྱེར་དང་། རི་དགས་སྐོམ་པ་ལྟ་བུ་དག་ལ་དོན་གྱི་རྣམ་པ་ཆེན་པོ་དབྱིག་དང་། ནོར་བུ་དང་། གོས་དང་། ནོར་དང་། འབྲུའི་ཚོགས་སུ་ལྟའོ། །དེ་ལྟར་དེ་ཆགས་པས་ཟིལ་གྱིས་ནོན་ལ། ལས་ཀྱི་རྨོངས་པ་དག་འདི་སྙམ་དུ་སེམས་ཏེ། འདི་དག་ནི་བདག་གི་ཡིན་ནོ་སྙམ་མོ། །དེ་ལྟར་རྨོངས་པ་སྡིག་པ་བྱེད་པ་དེ་མེ་མདག་རབ་ཏུ་འབར་བའི་ཆུ་བོ་དག་ལས་
རྒལ་ནས་རྫས་ཀྱི་རྣམ་པ་དེ་དག་གི་དྲུང་དུ་རྒྱུག་པ་དང་། ལས་ཀྱིས་བྱས་པའི་གཤིན་རྗེའི་མི་རྣམས་ཀྱིས་བཟུང་སྟེ། དེ་མཚོན་ཆའི་དྲ་བའི་ནང་དུ་བཅུག་ནས་ཡན་ལག་དང་ཉིང་ལག་ཐམས་ཅད་གཤེག་ཅིང་གཅོད་ལ་སྲེག་སྟེ་རུས་པའི་ལྷག་མ་མ་ལུས་པར་བྱེད་ཀྱང་དེ་ཐོག་མ་མེད་པའི་དུས་ནས་ཞུགས་པ་དེ་གནས་སྐབས་དེ་དག་ཏུ་ཡང་འདོད་པ་དེ་སྤོང་བར་མི་བྱེད་དོ། །འདིར་ཚིགས་སུ་བཅད་པ། བུད་ཤིང་ལྟ་བུའི་རྟོག་བྱུང་བས། །ང་རྒྱལ་ཕྲག་དོག་མེ་ལྟར་འབར། །ཤིང་གི་མེས་ནི་མི་སྲེག་གི །འཇིག་རྟེན་འདོད་པའི་མེས་སྲེག་གོ །འདོད་པའི་དུག་གིས་ཟིན་པ་གང་། །དེ་དག་ལ་ནི་བདེ་བ་མེད། །འདོད་པ་བསྙེན་ཅིང་བསྟེན་བྱས་ན། །ཕྱིར་ཡང་དེ་བཞིན་རབ་ཏུ་འཕེལ། །ཇི་ལྟ་ཇི་ལྟར་འདོད་གྱུར་ན། །འདོད་པ་དུ་མ་འཕེལ་བར་འགྱུར། །མེ་ལས་འབྲོས་པར་ནུས་སྲིད་ཀྱི། །འདོད་པའི་མེ་ལས་མི་ནུས་སོ། །འདོད་པས་ཡོངས་སུ་བསླུས་པ་ཡིས། །འཇིག་རྟེན་འཁོར་ལོ་བཞིན་དུ་འཁྱམ། །ཐོག་མ་མེད་པའི་འཇིག་རྟེན་ལ། །འདོད་པ་ལྟ་བུའི་དགྲ་མེད་དོ། །འདོད་པས་ཡོངས་སུ་བསླུས་པ་དག །རྒྱ་མཚོའི་ཆུ་ནང་འཇུག་པར་བྱེད། །མཚོན་ཆ་ཐིབས་པོ་འབབ་པ་ཡི། །གཡུལ་དུ་ཡང་དག་རབ་ཏུ་འཇུག །འདོད་པའི་རྒྱུ་ཡིས་ས་བདག་རྣམས། །ཕན་ཚུན་དག་ཏུ་འཇིག་པར་བྱེད། །ནོར་ལ་སྲེད་པས་མ་བུ་ཡང་། །འཐབ་མོའི་གཡུལ་ནི་འགྱེད་པར་བྱེད། །སྲེད་པའི་དུག་ལས་རྣམ་གྲོལ་བ། །འདོད་པའི་མེ་མདག་རྣམ་པར་སྤངས། །བོང་བ་གསེར་ལྟར་མཉམ་པ་དེ། །མྱ་ངན་འདས་པའི་མཐར་འགྲོ་འོ། །ནོར་གྱི་ནང་ན་ཚུལ་ཁྲིམས་མཆོག །ཉི་མ་འོད་དང་ལྡན་པ་བཞིན། །ནོར་དང་བྲལ་ནས་འགྲོ་འགྱུར་གྱི། །ཚུལ་ཁྲིམས་འདི་ནི་མདུན་ན་གནས། །ཚུལ་ཁྲིམས་ཀྱིས་ནི་སུམ་ཅུ་གསུམ། །དེ་བཞིན་བསམ་གཏན་སྤྱོད་ཡུལ་འགྲོ། །འཇིག་རྟེན་འདི་དང་ཕ་རོལ་དུ། །ཚུལ་ཁྲིམས་གཟི་དང་མཚུངས་པ་མེད། །མནར་མེད་པར་ནི་སྐྱེས་པ་དག །ནོར་ལ་འདོད་པས་བསྲེགས་པ་ཡིན། །
འདོད་པའི་མེ་ནི་གང་འབྱུང་བ། །ཡུལ་དེར་མེ་ནི་འབྱུང་མི་འགྱུར། །མཁས་པའི་ཡེ་ཤེས་ཆུ་ཡིས་སུ། །བསྒྲིམས་ཏེ་འདོད་པའི་མེ་མདག་སོད། །འདོད་པ་མེད་པར་མ་བྱས་ན། །མྱ་ངན་འདས་པ་ཐག་རིང་ངོ་། །དེ་ལྟར་སེམས་ཅན་དམྱལ་བ་པ་དེ་འདོད་པའི་མེ་དེས་སྲེག་པ་ན་ཡང་མནར་མེད་པའི་མེ་གཉིས་པ་མཚོན་འབབ་པ་དང་བཅས་པས་སུམ་འགྱུར་དུ་སྲེག་གོ །དེར་ཡང་མགལ་མེ་བསྐོར་བ་དང་། དྲི་ཟའི་གྲོང་ཁྱེར་དང་། རི་དགས་སྐོམ་པ་ལྟ་བུའི་ནོར་དག་ལ་འཕྲོག་པར་བྱེད་པ་དང་། ལོག་པར་བསྒྱུར་བ་རྨི་ལམ་གྱི་མི་ལྟ་བུ་སེམས་ཅན་དམྱལ་བ་པ་གཤིན་རྗེའི་མི་དེ་དག་གིས་མ་བྱིན་པར་བླངས་པའི་སེམས་ཅན་དམྱལ་བ་པ་དེ་ལོ་འབུམ་ཕྲག་དུ་མར་སྡུག་བསྔལ་མྱོང་བར་བྱེད་དོ། །དེ་ནས་ཡང་དགེ་སློང་དེ་འདོད་པས་ལོག་པར་གཡེམ་པའི་མནར་མེད་པ་དེའི་འབྲས་བུ་ལ་རྟོག་པར་བྱེད་དེ། དེས་བརྟགས་ན། འདི་ལྟར་སྡིག་པ་བྱེད་པ་དེ་མཚོན་ཆ་ཉམ་ང་བ་དེ་ལས་ཐར་ན། ཇི་ལྟར་ཡང་ལས་ཀྱིས་འཁྲུལ་པ་མེ་མདག་གི་ཆུ་བོ་ལས་རྒལ་ནས་ལོག་པར་རྣམ་པར་ལྟ་བ་ཞེས་བྱ་བའི་ཕྱོགས་གཞན་དུ་ཞུགས་སོ། །དེས་ལས་ཀྱིས་བྱས་པའི་བུད་མེད་དག་གང་སྔོན་གྱི་དྲན་པ་ཉམས་པ་དེས་མཐོང་ངོ་། །དེ་དག་མཐོང་ནས་དེ་ཐོག་མ་མེད་པའི་དུས་ནས་གོམས་པའི་འདོད་ཆགས་ཀྱི་མེ་འབྱུང་སྟེ། དེ་དེར་རྒྱུག་པར་བྱེད་དོ། །གང་ན་བུད་མེད་འཁོར་བ་དེ་དག་ལས་ཀྱིས་བྱས་པ། ལྕགས་ཀྱི་བུད་མེད་དག་ཡིན་ཏེ། དེ་དག་གིས་དེ་བཟུང་ངོ་། །བཟུང་ནས་ཀྱང་ལྕེ་ལ་སོགས་པ་ལ་ཟ་སྟེ་ཇི་ལྟར་དེའི་ལུས་དེ་ལ་ཡུངས་འབྲུ་ཙམ་གྱི་ལྷག་མ་ཡང་མ་ལུས་པར་དེ་ལྟར་ཟའོ། །དེ་ནས་ཡང་འབྱུང་བར་འགྱུར་ཏེ། ཡང་ཟའོ། །དེ་སྡུག་བསྔལ་ཚ་བ་རྩུབ་པ་མྱོང་བཞིན་དུ་འདོད་ཆགས་ཀྱི་མེ་དེ་དག་ལས་ལྡོག་པར་མི་བྱེད་ཀྱི། གང་ན་བུད་མེད་དེ་དག་གནས་པ་དེར་ཡང་དང་ཡང་ཤིན་ཏུ་རྒྱུག་པར་བྱེད་དོ། །དེ་ཇི་ལྟར་འདོད་ཆགས་ཀྱི་མེས་གནོད་པ་དེ་ལྟར་སྡུག་བསྔལ་གནོད་པར་མི་རྩིའོ། །དེ་ནས་བུད་མེད་དེ་དག་ཡང་ལུས་རྡོ་རྗེ་དང་ལྕགས་རབ་ཏུ་འབར་བའི་ལུས་ཀྱིས་མི་དེ་བཟུང་ནས་འབར་བའི་ཕྲེང་བ་འཁྲུགས་པའི་ལུས་ཀུན་གྱིས་སེམས་ཅན་དམྱལ་
བ་དེ་བྱེ་མ་ཆང་པ་ནས་གཏོར་བ་བཞིན་དུ་གཏོར་ཏོ། །ལུས་ཐམས་ཅད་ཕྱེ་མར་བྱས་པ་དེ་སླར་ཡང་འབྱུང་བར་འགྱུར་ཏེ། དེ་ནས་ཤིན་ཏུ་རྒྱུག་ཀྱང་དེའི་འདོད་ཆགས་ཞི་བར་མི་འགྱུར་རོ། །དེའི་གནས་དེ་ལྟ་བུ་མཐོང་ནས་དགེ་སློང་དེས་བསམས་ཏེ། ཐོས་པ་ལས་བྱུང་བའི་ཤེས་པས་འདི་ལྟར་ཚིགས་སུ་བཅད་དེ་སྨྲས་པ། བུད་མེད་ངན་སོང་གཞི་ཡིན་ཞིང་། །ཀུན་ནས་ནོར་ནི་ཟད་པར་བྱེད། །མི་གང་བུད་མེད་ཚིག་ཉན་པ། །དེ་ལ་བདེ་བ་ག་ལ་ཡོད། །དོན་མེད་ཆོས་ལ་དགའ་བ་ནི། །བུད་མེད་གཡོ་དང་ཕྲག་དོག་མང་། །འཇིག་རྟེན་གཉིས་ནི་རྣམ་འཇིག་པ། །སྐྱེས་པ་རྣམས་ཀྱི་མདུན་ན་གནས། །དེའི་ཚིག་ཤིན་ཏུ་མི་བརྟན་ཏེ། །རྟག་ཏུ་འདོད་ཆགས་སྐྱེད་ལ་མཁས། །དེ་ཡི་སྙིང་ནི་གཞན་སེམས་ལ། །གཞན་གྱི་ཚུལ་གྱིས་སྨྲ་བར་བྱེད། །དང་པོར་མཉེན་ཞིང་སྲུན་བྱེད་ལ། །ཕྱི་ནས་སེམས་ནི་རྡོ་རྗེ་འདྲ། །སེམས་ནི་ཡང་ལ་ཕན་པ་མེད། །བཀུར་སྟི་དག་ནི་དྲན་མི་བྱེད། །ལེགས་པ་བརྒྱ་ནི་ཆུད་གཟོན་ལ། །མ་ལེགས་གཅིག་པུ་དྲན་པར་བྱེད། །སྡིག་པའི་ས་གཞི་བུད་མེད་ཡིན། །སྙིང་ནི་གློག་གི་ངོ་བོ་བཞིན། །སྐྱེས་པ་ཆགས་པའི་སེམས་ཡོད་པ། །འཇིག་པའི་རྒྱུ་ནི་བུད་མེད་བྱེད། །འཇིག་རྟེན་འདི་དང་ཕ་རོལ་ཏུ། །འཇིག་བྱེད་ནང་ན་བུད་མེད་འཇིག །གལ་ཏེ་བདེ་བའི་མཆོག་འདོད་ན། །དེ་ལྟར་བུད་མེད་རྣམ་པར་སྤོངས། །བུད་མེད་རྟག་ཏུ་སྤངས་པ་ནི། །འཇིག་རྟེན་འདི་དང་ཕ་རོལ་བདེ། །གང་ཞིག་དབུལ་བ་སྤོང་འདོད་ཅིང་། །གང་ཞིག་བདག་ནི་འབྱོར་འདོད་དང་། །གང་ཞིག་མྱ་ངན་འདས་འགྲོ་འདོད། །མི་དེས་བུད་མེད་སྤང་བར་བྱོས། །དེ་ལྟར་ཕྱིན་ཅི་ལོག་ཏུ་མཐོང་བ་སྙིང་རྣམ་པར་རྨོངས་པ་དེ་ལོ་འབུམ་ཕྲག་དུ་མར་སྲེག་གོ །གཤེག་གོ །གསོད་དོ། །དེ་ནས་ཡང་སླར་འབྱུང་བར་འགྱུར་ཏེ། དེ་གལ་ཏེ་དེ་ལས་ཐར་ནས་དེ་ནས་ཡང་མེ་མདག་གི་ཆུ་བོའི་ནང་དུ་བྱིང་ཞིང་འཚེད་པ་ན་བཀྲེས་པ་དང་། སྐོམ་པས་གདུངས་ཏེ། གར་བབ་བབ་ཏུ་འབྲོས་སོ། །དེ་ནས་ཡང་དགེ་སློང་དེ་མནར་མེད་པའི་མི་དགེ་བ་བྱེད་
པས་གང་བརྫུན་དུ་སྨྲ་བ་དེ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་འབྲས་བུ་ལ་བརྟགས་ན་དེས་ཐོས་པ་ལས་བྱུང་བའི་ཤེས་པས་མཐོང་སྟེ། འདི་ལྟར་སེམས་ཅན་དམྱལ་བ་ལུས་བཀྲེས་པ་དང་སྐོམ་པས་འཁྲུགས་ཤིང་གདུངས་པ་དེ་གཤིན་རྗེའི་མི་སྟོབས་པོ་ཆེ་རྣམས་ཀྱིས་བཟུང་ངོ་། །བཟུང་ནས་ཀྱང་ཀྱེ་གྲོགས་པོ་དག་ཁྱེད་ལ་ཅི་གནོད་ཅེས་འདྲིའོ། །ལས་ཀྱི་དབང་གིས་བསྐུལ་བ་དེ་དག་བདག་ཅག་བཀྲེས་སོ་ཞེས་སྨྲའོ། །དེ་ནས་དེ་དག་གཤིན་རྗེའི་མི་དེ་རྣམས་ཀྱིས་བཟུང་ངོ་། །བཟུང་ནས་ཀྱང་དེའི་ཁ་གཤེག་པར་བྱེད་དེ། དེ་ནས་ལྕེ་འབྱིན་པར་བྱེད་དོ། །ལྕེ་དེ་ཡང་ལས་ཀྱི་དབང་གིས་དཔག་ཚད་ལྔ་བརྒྱ་ཙམ་དུ་འགྱུར་རོ། །བརྫུན་དུ་སྨྲ་བ་དེའི་འབྲས་བུས་དེ་ཕྱུང་མ་ཐག་ཏུ། དེ་གཤིན་རྗེའི་མི་རྣམས་ཀྱིས་བཟུང་ནས་ལྕགས་ཀྱི་ས་གཞི་རབ་ཏུ་འབར་བ་ལ་ལྡག་ཏུ་འཇུག་ཅིང་ལས་ཀྱིས་བྱས་པའི་ཐོང་གཤོལ་རྩེ་མོ་རབ་ཏུ་འབར་བ་དང་བཅས་པའི་རྨོན་གླང་སྟོབས་དང་ལྡན་པ་སྟོང་བྱུང་སྟེ། ལྕེ་དེའི་སྟེང་དུ་སོང་ནས་རྨོད་པར་བྱེད་དོ། །དེ་ལས་རྣག་དང་ཁྲག་དང་སྲིན་བུ་འཛག་པ་ཆུ་བོ་ལྟར་འབབ་བོ། །རྣག་དང་སྲིན་བུར་འདྲེས་པའི་ལྕེ་དེ་ཡང་ཇི་ལྟར་ལྷ་རྣམས་ཀྱི་མིག་བཞིན་དུ་གཞོན་ཤ་ཅན་དུ་འགྱུར་ཏེ། དེའི་ལྕེའི་ཕྱོགས་ལ་རྨོས་པ་དེ་དག་སླར་ཡང་ཐ་མལ་པར་འགྱུར་རོ། །དེ་ནས་ཡང་ལོ་འབུམ་ཕྲག་དུ་མའམ། ལོ་བྱེ་བར་རྨོད་དེ་ལྕེ་དེ་ལ་སྡུག་བསྔལ་མི་བཟད་པ་འབྱུང་ངོ་། །ཚ་ཞིང་རྩུབ་ལ་རབ་ཏུ་རྩུབ་པ། དྲག་པས་ཀྱང་ཤིན་ཏུ་དྲག་པ། སྡུག་བསྔལ་མི་བཟད་པ་དག་གིས་ཉམ་ཐག་པ་དེ་ཀུ་ཆོ་འདོན། ཆོ་ངེས་འདེབས་ངུ་སྐད་འབྱིན་ཀྱང་དེའི་སྡུག་བསྔལ་དེ་སུས་ཀྱང་སེལ་བར་མི་བྱེད་དོ། །གང་བདག་གིས་བྱས་པ་དེ་དག་ནི་ཕ་མས་མ་བྱས། ལྷས་མ་བྱས། མི་གཞན་གྱིས་མ་བྱས། འདོད་རྒྱལ་ལས་མ་བྱུང་། གཞན་ནས་མ་འོངས། བྱས་པ་ཆུད་མི་ཟ་སྟེ། རང་གིས་བྱས་པའི་ལས་ཀྱི་འབྲས་བུ་ཡོད་དོ། །དེ་ནས་དེ་དག་ངུ་སྐད་འབྱིན་བཞིན་དུ་འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། རྩུབ་ཤིང་དྲག་ལ་
བདེ་མེད་པ། །བརྫུན་དུ་སྨྲ་བ་རྣམ་པར་སྤོངས། །བརྫུན་དུ་སྨྲ་བའི་མི་རྣམས་ནི། །སེམས་དག་ལ་ཡང་རྣམ་པར་འཇིག །དེ་ནི་ཡིད་ཆེས་གནས་མ་ཡིན། །མཁས་པ་ཀུན་གྱིས་རྣམ་པར་སྤངས། །བདག་ཉིད་ལ་ནི་བསླུས་བྱས་ནས། །ཕ་རོལ་ལ་ནི་བརྫུན་སྨྲ་བ། །སྐྱེས་བུ་དཔའ་སེམས་ཅན་དག་གིས། །དགྲ་བཞིན་དུ་ནི་རྣམ་པར་སྨད། །གང་ཚེ་བདག་དང་གཞན་འཇིག་པ། །དང་པོར་མི་འཐུན་ཁ་ནས་སྨྲ། །མི་ཡིས་རྣམ་པར་མ་སྤངས་ན། །ལྷ་རྣམས་ཀྱིས་ཀྱང་གཏོང་བར་བྱེད། །ཡིད་ལ་བརྫུན་གྱི་ཚིག་སེམས་ན། །དམའ་ཞིང་འོག་མར་འགྲོ་བར་འགྱུར། །མི་གང་ལོག་པས་མངོན་ཉམས་པ། །དེ་དག་བདེ་བའི་གནས་མེད་དོ། །འཇིག་རྟེན་འཇིག་རྟེན་འདས་ལམ་ལ། །བརྫུན་དུ་སྨྲ་བ་རྣམ་པར་སྨད། །འབྱེད་པས་འབྱེད་པའི་རྣམ་སྨིན་ཏེ། །བརྫུན་དུ་སྨྲ་བ་རྣམ་པར་སྤོངས། །དེ་ལྟར་དེ་ལ་གནས་པའི་མི། །དམྱལ་བ་ཡིན་པར་ཉེ་བར་བརྟག །མི་མཆོག་བདེན་པ་སྨྲ་བ་ནི། །འཇིག་རྟེན་ཀུན་གྱིས་མཆོད་པར་འགྱུར། །བརྫུན་དུ་སྨྲ་བ་རྣམ་པར་སྤོངས། །འོན་ཏང་བདེན་པའི་མཆོག་ཏུ་འགྱུར། །འཚེ་མེད་བདེན་ཚིག་སྨྲ་བ་ནི། །འབྱུང་པོ་ཀུན་ལ་བརྩེ་ཞིང་མཉེན། །བདེན་པ་མཐོ་རིས་སྐས་ཡིན་ཞིང་། །ཆོས་རྣམས་འབྱུང་ཁུངས་ཆེན་པོ་ཡིན། །མི་གང་གཤིན་རྗེའི་འཇིག་རྟེན་དང་། །དེ་བཞིན་དམྱལ་བར་འགྲོ་བ་ཡི། །དེའི་རྒྱུ་བརྫུན་དུ་སྨྲ་བ་སྟེ། །མི་མཁས་པ་དག་སྨྲ་བར་བྱེད། །དུག་དང་ཞགས་པ་གདོས་འདྲ་ཞིང་། །དེ་ནི་མཚོན་དུག་མེ་དང་འདྲ། །བརྫུན་དུ་སྨྲ་བར་མི་བྱ་སྟེ། །དེ་ཡི་འབྲས་བུ་སྡུག་བསྔལ་མང་། །དེ་ལྟར་ལས་འབྲས་ཞེ་འགྲས་པ། །དེ་ནི་རྣམ་སྟོན་འཆི་བར་བྱེད། །ཞི་བའི་ཚིག་ནི་སྨྲ་བར་གྱིས། །སྨད་པར་བྱ་བ་རྣམ་པར་སྤོངས། །དེ་ལྟར་སེམས་ཅན་དམྱལ་བ་པ་དེ་སྡུག་བསྔལ་མི་བཟད་པ་མྱོང་བ་ན་དེ་ལོ་འབུམ་ཕྲག་དུ་མར་དེའི་ལྕེ་འབྱིན་པར་བྱེད་དོ། །དེ་གལ་ཏེ་ཡང་སེམས་ཅན་དམྱལ་བ་པ་དེའི་ཁའི་ནང་དུ་ལྡུད་པར་བྱེད་དེ། འཇིགས་ཤིང་སྐྲག་ལ་བྱད་
བཞིན་མོག་མོག་པོ་དེ་མེ་མདག་གི་ཆུ་བོའི་ནང་དུ་སྲེག་བཞིན་དུ་གར་བབ་བབ་ཏུ་འབྲོས་སོ། །དེ་ལྟར་སྡུག་བསྔལ་གྱིས་ཉེན་ཅིང་མགོན་མེད། སྐྱབས་མེད། དཔུང་གཉེན་མེད་པ་དེ་ལ་ཡང་གཤིན་རྗེའི་མི་རྣམས་འབྱུང་བར་འགྱུར་ཏེ། གཤིན་རྗེའི་མི་ལག་ན་ཐོ་བ་དང་རལ་གྲི་ཐོགས་པ་དེ་རྣམས་ཀྱིས་མི་དེ་ངུ་སྐད་འདོན་ཅིང་ཡང་དང་ཡང་དུ་མནར་མེད་པའི་མེས་སྲེག་པ་ན་གླད་པ་ལ་སོགས་པ་ནས་རྐང་པའི་བར་དུ་ཕྱེ་མར་བྱེད་དོ། །དེ་ནས་དགེ་སློང་དེ་ཕྲ་མ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་རྣམ་པར་སྨིན་པ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ཕྲ་མའི་ལས་ཀྱི་འབྲས་བུས་བསྐུལ་བའི་སེམས་ཅན་དམྱལ་བ་པ་དེ་ཤིན་ཏུ་མི་བཟད་པའི་ས་གཞན་ལ་འཇུག་པར་བྱེད་དེ། དེ་གཤིན་རྗེའི་མི་དྲག་ཤུལ་ཆེན་པོ་སྟོན་པ་གཞན་རྣམས་ཀྱིས་བཟུང་ངོ་། །བཟུང་ནས་སེམས་ཅན་དམྱལ་བ་པ་དེ་ལ། གཤིན་རྗེའི་མི་རྣམས་ཀྱིས་སྨྲས་པ། གྲོགས་པོ་དག་ཁྱེད་ལ་ཅི་གནོད། དེ་དག་གིས་སྨྲས་པ། བདག་ཅག་ལ་བཀྲེས་པ་གནོད་དོ། །དེ་ནས་གཤིན་རྗེའི་མི་དེ་རྣམས་ཀྱིས་དེའི་ཁ་དེ་བརྒྱངས་ནས་ལག་པས་ལྕེ་འབྱིན་པར་བྱེད་དོ། །དེ་ཡང་དཔག་ཚད་སུམ་བརྒྱར་འགྱུར་ཏེ་དེ་ལྟར་ཕྱིར་ཞིང་རྒྱ་ཆེར་འགྱུར་རོ། །གཤིན་རྗེའི་མི་རྣམས་རལ་གྲི་སོ་རབ་ཏུ་འབར་བ་དག་བླངས་ཏེ་ལྕེ་དེ་ལ་གཅོད་པར་བྱེད་དོ། །ཁྱི་དང་ཝ་རྣམས་ཀྱིས་ཀྱང་ཕྱོགས་གཞན་དག་ལ་ཟ་བར་བྱེད་དེ། དེ་ལྟར་སྡུག་བསྔལ་མཆོག་ཏུ་ཚ་བ་མྱོང་བ་དག་སོ་སོར་མྱོང་ངོ་། །དེ་ལྕེ་དང་བྲལ་བའི་ཚིག་མི་གསལ་བས་ངུ་སྐད་འབྱིན་ཅིང་ཆོ་ངེས་འདེབས་ཏེ། དེ་ལྟར་དེ་ངུ་སྐད་འབྱིན་པ་ན་འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅུ་དྲུག་པ། དབྱེན་གྱི་བསམ་པ་མང་པོ་ཡིས། །ཁྱོད་ཀྱིས་མང་དུ་གང་སྨྲས་པ། །ཆོས་རྣམས་ཀྱི་ནི་སྡིག་པར་འགྱུར། །དེ་ཡི་འབྲས་བུ་འདིར་འོངས་སོ། །མི་འཐུན་པ་ལ་གང་དགའ་བ། །དེ་ནི་རྟག་ཏུ་མཛའ་
བཤེས་དང་། །གཉེན་འདབ་རྩ་ལག་འབྱེད་པ་ཡིན། །དམ་པས་ཕྲ་མ་རྣམ་པར་སྨད། །སྲིད་པ་ཉམ་ངར་གར་སྐྱེས་པ། །རྟག་ཏུ་དམན་པར་སྐྱེ་བར་འགྱུར། །ཕྲ་མ་ལ་ནི་གང་སྦྱོར་བ། །ཕྱིར་ཞིང་གཏི་མུག་དབང་དུ་འགྲོ། །ཕྲ་མ་ལ་ནི་གང་འཇུག་པ། །སྡིག་པ་སྟེན་པར་བྱེད་པ་སྟེ། །སྡིག་པའི་ལས་ཀྱིས་དམྱལ་བ་རུ། །ཡང་དང་ཡང་དུ་འཚེད་པར་བྱེད། །ཕྲ་མའི་ཁ་ནི་གཉིས་སུ་མཐོང་། །ཕྱི་མའི་ཤ་ལ་ཤིན་ཏུ་ཟ། །ཡིད་གཅུགས་དམ་པ་མེད་པར་བྱེད། །གསང་བའི་ཚིག་ནི་སུན་འབྱིན་ཏོ། །གང་དག་ཕྲ་མ་སྤངས་པ་ནི། །དེ་ལ་རྟག་ཏུ་གྲུབ་པ་གནས། །མཛའ་བཤེས་གཉེན་འདབ་རྩ་ལག་དང་། །དེ་ནི་ནམས་ཀྱང་འབྲལ་མི་འགྱུར། །ཕྲ་མ་སྤངས་པ་ཞི་བ་ནི། །ལེགས་ཤིང་སྡིག་དང་བྲལ་བ་ཡིན། །དེ་ནི་རྟག་ཏུ་ས་བདག་གི། །གསང་བ་འཛིན་པར་བྱེད་པ་ཡིན། །ཆོས་ནི་མ་སྤྱད་གང་ཡང་མེད། །ཕྲ་མ་དག་ཀྱང་མ་སྤངས་པ། །ཕྲ་མའི་འབྲས་བུ་མྱོང་བར་གྱིས། །དེ་རིང་ཅི་ཞིག་ཡོངས་སུ་སྨྲེ། །དེ་ལྟར་རྗེས་སུ་བསྟན་ཅིང་ལྕེའི་སྡུག་བསྔལ་མྱོང་བ་ན་དེ་ལོ་འབུམ་ཕྲག་དུ་མར་སྡུག་བསྔལ་གྱི་ནང་དུ་སོང་སྟེ་བྱིང་ངོ་། །དེ་སྡུག་བསྔལ་ཚ་བ་རྩུབ་པ་མྱོང་བ་ན་གལ་ཏེ་ཡང་དེའི་ལྕེ་འཇམ་པོར་འགྱུར་ཏེ་གཤིན་རྗེའི་མི་དེ་དག་ཀྱང་མི་སྣང་བར་འགྱུར་རོ། །དེ་དག་དེ་ལས་ཐར་ན་སེམས་ཅན་དམྱལ་བ་པ་ཤིན་ཏུ་མི་བཟད་ཅིང་དྲག་པ་ལས་ཀྱི་ཤིང་གི་མཐུ་དང་། རྣམ་པར་སྨིན་པའི་རླུང་དམར་ལངས་པའི་མེས་སྲེག་པ་ན་གར་བབ་བབ་ཏུ་འབྲོས་སོ། །དེ་ནས་གཤིན་རྗེའི་མི་གཞན་དག་གིས་སེམས་ཅན་དམྱལ་བ་དེ་བཟུང་ངོ་། །བཟུང་ནས་ཀྱང་སྨྲས་པ། གྲོགས་པོ་དག་ཁྱེད་ལ་ཅི་ཞིག་གནོད། ལས་ཀྱི་འབྲས་བུས་བསྐུལ་བ་དེ་དག་གིས་སྨྲས་པ། ལྕེའི་སྡུག་བསྔལ་གནོད་དོ། །དེ་ནས་ལྕེ་དེ་བརྒྱངས་ནས་བཟུང་ངོ་། །བཟུང་ནས་མཚོན་ཆ་སོ་བརྡར་བ་རྣམས་ཀྱིས་གཏུབ་གཏུབ་ནས་ཡང་དེ་ཉིད་ཟར་གཞུག་པའི་ཕྱིར་ཁའི་ནང་དུ་འཇུག་སྟེ། བཀྲེས་པ་དང་སྐོམ་པས་གདུངས་ཤིང་ཁ་གདོང་
ཉམས་པ་དེ་རང་གི་ཁྲག་དང་། ཁ་ཆུ་འཛག་པ་དང་། རང་གི་ལྕེ་དེ་ཉིད་ལ་ཟའོ། །ལྕེ་གཏུབ་གཏུབ་པ་དེ་ལས་ཀྱི་དབང་གིས་ཡང་སྐྱེ་བར་འགྱུར་ཏེ། དེ་ནས་ཡང་སྡུག་བསྔལ་གྱིས་ཉམ་ཐག་པ་དག་ས་ལ་འཕྱེ་ཞིང་འགྲེ་ལྡོག་ལ་ཡོངས་སུ་ངུ་སྐད་འབྱིན་ཏོ། །དེ་ལྟར་སྡུག་བསྔལ་གྱིས་ཉམ་ཐག་པ་དེའི་མིག་གི་འབྲས་བུ་ནི་འགྱུར། སྡུག་བསྔལ་གྱིས་ཉམ་ཐག་ཅིང་དམན་ལ་གྲོགས་མེད་པ་གཅིག་པུ་རང་གིས་བྱས་པ་ལ་ཉེ་བར་སྤྱོད་དོ། །འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། ཚིག་རྩུབ་ཞེས་བྱ་གང་མཐོང་བ། །མདའ་ལྟར་རྣོ་བ་ཁྱོད་ཀྱི་ཚིག །གཞུ་ལྟ་བུ་ཡི་ལྕེ་ལས་འཕངས། །དེ་ཡི་འབྲས་བུ་འདིར་འོངས་སོ། །གང་ལ་ཚིག་རྩུབ་འབྱུང་བ་ནི། །དུག་ལྟ་བུ་ཡི་ལྕེ་ལས་འབྱུང་། །འཇིག་རྟེན་ལ་ནི་ཤ་ཟ་འདྲ། །དེ་དག་ཡོངས་སུ་སྤང་བར་གྱིས། །ཇི་ལྟར་ཡིད་འབྱུང་འགྱུར་བ་ནི། །ཉམ་ངར་ཚིག་རྩུབ་སྨྲ་བ་སྟེ། །མེ་མཚོན་དུག་ནི་འབྱུང་བ་ལ། །མི་དགེ་དེ་ལྟར་ཡིད་མི་འབྱུང་། །གཙུབ་ཤིང་ལྟ་བུའི་ལྕེ་ལས་བྱུང་། །ཤིང་ལྟ་བུ་ཡི་སྙིང་གིས་སྤེལ། །འཇིག་རྟེན་ཚིག་རྩུབ་མེ་ལྟར་འབར། །ཤིང་སྐམ་ལྟ་བུར་སྲེག་པར་བྱེད། །གང་དག་སྙན་པར་སྨྲ་ལ་དགའ། །འཇིག་རྟེན་ཀུན་གྱིས་ཕྱག་བྱེད་དོ། །འཇིག་རྟེན་ཀུན་ལ་མ་དང་འདྲ། །དེ་ནི་ཕ་དང་འདྲ་བར་དགའ། །དང་པོར་སྙན་པར་སྨྲ་བ་དགེ། །བདེ་འཇམ་བདེ་བ་འབྱུང་བ་ཡིན། །སྡིག་པ་མི་ཟད་སེལ་བ་དང་། །མི་སྡུག་ས་ཀུན་སྦྱོང་བ་ཡིན། །ཚིག་སྙན་མཐོ་རིས་སྐས་ཡིན་ཏེ། །ཚིག་སྙན་དགེ་བའི་གཏེར་ཡིན་ནོ། །ཚིག་སྙན་འཇིག་རྟེན་གཉེན་ཡིན་ཏེ། །ཚིག་སྙན་ལེགས་པ་མངོན་པར་འགྲུབ། །ཁྱོད་ཀྱིས་ཚིག་རྩུབ་དེ་སྨྲས་པས། །སེམས་ཅན་དམྱལ་བ་དྲག་པོར་འོངས། །ལྕེ་དེ་དག་ལའང་གནོད་པར་བྱེད། །དེ་རིང་ཅི་ཞིག་ཡོངས་སུ་སྨྲེ། །དེ་ལྟར་རྗེས་སུ་བསྟན་པ་ན་བརྫུན་དུ་སྨྲས་པ་དེ་ཀུན་ཏུ་བསྟེན་ཅིང་བསྒོམས་ཏེ། མང་དུ་བྱས་ལ་རྗེས་སུ་ཡི་རང་ཞིང་མ་བཤགས་པ་དང་། ལོ་འབུམ་ཕྲག་དུ་མར་ལྷན་ཅིག་གནས་
སོ། །དེ་གལ་ཏེ་ཡང་དེ་ལས་ཐར་ན་གར་བབ་བབ་ཏུ་འབྲོས་པ་དང་། དེ་ནས་མདུན་ནས་གཤིན་རྗེའི་མི་རྣམས་ཀྱིས་བཟུང་སྟེ། དེ་སྡུག་བསྔལ་མི་བཟད་ལ་དྲག་པས་ཡོངས་སུ་གདུངས་ཤིང་ཚོར་བར་བྱེད་པ་མཐོང་ངོ་། །དེ་ནས་ཡང་དགེ་སློང་དེ་ཚིག་ཀྱལ་པ་ཀུན་ཏུ་བསྟེན་ཅིང་བསྒོམས་ཏེ། མང་དུ་བྱས་པའི་སྡིག་པ་མི་དགེ་བའི་ལས་ཀྱི་འབྲས་བུའི་རྣམ་པར་སྨིན་པ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་དམྱལ་བ་པ་འདི་དག་རང་གི་ལས་ཀྱི་འབྲས་བུ་ལ་སྤྱོད་པ་སྡུག་བསྔལ་གྱིས་ཉམ་ཐག་ཅིང་ཤིན་ཏུ་མི་བདེ་བ་དེ་དག་གཤིན་རྗེའི་མི་རྣམས་ལས་ཐར་ནས་ཀྱང་གར་བབ་བབ་ཏུ་འབྲོས་སོ། །དེ་ནས་གཤིན་རྗེའི་མི་གཞན་དག་གིས་བཟུང་ནས་སྨྲས་པ། ཀྱེ་གྲོགས་པོ་དག་ཁྱེད་ལ་ཅི་གནོད། དེ་དག་གིས་སྨྲས་པ། བདག་ཅག་ལ་བཀྲེས་པ་དང་། སྐོམ་པ་གནོད་དོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། ཐ་མར་གྱུར་པ་སྟོང་ཕྲག་དག །རང་གི་ལུས་ལས་གཙུབ་ཤིང་འབྱུང་། །བཀྲེས་དང་སྐོམ་ལས་བྱུང་བའི་མེས། །བདག་ལ་མི་བཟད་སྲེག་པར་བྱེད། །ཁ་བ་མེ་ལྟར་ཁྱད་པར་ཆེ། །དེ་ནི་རི་རབ་ཡུངས་འབྲུ་བཞིན། །སེམས་ཅན་དམྱལ་བར་སྲེག་པ་ནི། །བཀྲེས་པའི་ཁྱད་པར་དེ་འདྲ་འོ། །སེམས་ཅན་དམྱལ་བའི་མེ་བྱུང་བ། །དེ་ནི་གཞན་དུ་གནོད་པར་བྱེད། །བཀྲེས་དང་སྐོམ་ལས་བྱུང་བའི་མེ། །ལྷ་དག་ལ་ཡང་ཡོད་པ་མིན། །གནོད་པ་མི་བཟད་གང་ཡིན་པ། །དེ་དག་དམྱལ་བར་བདག་ལ་བྱུང་། །བཀྲེས་པའི་མེ་ཡིས་གནོད་པ་ལྟར། །དེ་དག་དེ་ལྟར་མི་གནོད་དོ། །དེའི་ཚིག་དེ་ཐོས་ནས་གཤིན་རྗེའི་ཕོ་ཉ་དག་ཕྲ་སྐམ་རབ་ཏུ་འབར་བ་དག་བླངས་ནས་ཁ་གདངས་པའི་ནང་དུ་སྣོད་རབ་ཏུ་འབར་བར་ཟངས་ཤིན་ཏུ་བཞུས་པ་ཁྱེར་ནས་བླུགས་ཏེ། ཚིག་ཀྱལ་པ་སྨྲས་པའི་འབྲས་བུ་དེས་ཇི་ལྟར་ཁ་བ་ཆལ་ཆོལ་མེའི་ནང་དུ་འཇུ་བ་དེ་བཞིན་དུ་དེའི་ལྕེ་ཡང་དེ་ལྟར་སྲེག་གོ །དེ་སྲེག་པ་མི་འདྲ་བ་གཉིས་ཀྱིས་སྲེག་པ་ན་ངུ་སྐད་འབྱིན་ཆོ་ངེས་འདེབས་ཀུ་ཆོ་འདོན་ཅིང་མིག་ཤིན་ཏུ་
འགྱུར་བར་བྱེད་དེ། ཟངས་དམར་པོ་རབ་ཏུ་འབར་བ་དེས་དེའི་ལྕེ་སྲེག་པར་བྱེད་དོ། །ལྕེ་བསྲེགས་ནས་མིད་པ་སྲེག་གོ །མིད་པ་བསྲེགས་ནས་སྙིང་སྲེག་གོ །སྙིང་བསྲེགས་ནས་རྒྱུ་མ་སྲེག་གོ །དེ་དག་ཀྱང་བསྲེགས་ནས་ལོང་ཀ་སྲེག་གོ །ལོང་ཀ་ཡང་བསྲེགས་ནས་ཐུར་དུ་བྱུང་ངོ་། །དེ་ལྟར་དེ་སྲེག་པ་ན་འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། སྔ་ཕྱི་འབྲེལ་པ་མེད་པའི་ཚིག །དོན་མེད་ཐོག་ཏུ་མི་ཕེབས་ཏེ། །འབྲེལ་མེད་ཁྱོད་ཀྱིས་གང་སྨྲས་པ། །དེ་ཡི་འབྲས་བུ་འདི་འདྲ་འོ། །གང་དག་རྟག་ཏུ་བདེན་མི་སྨྲ། །ཚིག་དོན་བཟང་པོ་མ་ཡིན་ཞིང་། །ལྕེ་དེ་མཁས་པས་མི་མཐོང་སྟེ། །ཤ་ཡི་གོང་བུ་ཙམ་དུ་ཟད། །གང་དག་རྟག་ཏུ་བདེན་སྨྲ་བ། །ཡོན་ཏན་བརྟན་ཞིང་རྟག་ཏུ་ལེགས། །དེ་ནི་མཐོ་རིས་སྐས་ཡིན་ཏེ། །དེ་ལ་ལྕེ་ཞེས་མི་བརྗོད་དོ། །དེ་ནས་གཤིན་རྗེའི་མི་དེ་དག་གིས་སེམས་ཅན་དམྱལ་བ་པ་དེ་ལ་རྗེས་སུ་བསྟན་ནས་ཟངས་དམར་པོ་རབ་ཏུ་བསྐོལ་བ་དེ་དག་སེམས་ཅན་དམྱལ་བ་པའི་ཁར་ལྡུགས་ཏེ། ལོ་འབུམ་ཕྲག་དུ་མར་འབྲེལ་པ་མེད་པར་སྨྲ་བ་དེའི་རྣམ་པར་སྨིན་པ་སྙིང་རྗེ་རྗེ་ལྟར་མྱོང་ངོ་། །དེ་ནས་གལ་ཏེ་སེམས་ཅན་དམྱལ་བ་པ་དེ་གཤིན་རྗེའི་མི་དེ་དག་གིས་བཏང་ནས་གར་བབ་བབ་ཏུ་འབྲོས་སོ། །མེ་མདག་གི་ཆུ་བོའི་ནང་དག་ཏུ་བྱིང་སྟེ། རབ་ཏུ་འཇུ་བ་ན་རྐང་པ་དང་། བྱིན་པ་དང་རྐེད་པ་དག་མེ་མདག་གི་ཆུ་བོ་དེ་དག་གི་ནང་དུ་མར་སར་གྱི་གོང་བུ་ལྟ་བུར་རབ་ཏུ་འཇུ་བར་བྱེད་དོ། །དེ་ནས་ཡང་འབྱུང་བར་འགྱུར་ཏེ། དེ་ལྟར་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ་གར་བབ་བབ་ཏུ་འབྲོས་སོ། །དེ་ནས་ལས་ཀྱིས་བྱས་པའི་ནོར་རྫས་མང་པོ་གསོབ་གསོག་སྙིང་པོ་མེད་པ་གཞན་གྱིས་ཡོངས་སུ་བཟུང་བ་དག་ལས་ཀྱིས་བསྐུལ་བ་རྨོངས་པ་དེ་འདི་ནི། བདག་གི་ཡིན་ནོ་སྙམ་མོ། །དེ་ནས་སེམས་ཅན་དམྱལ་བ་པ་དེ་ནོར་རྫས་ག་ལ་ཡོད་པ་དེ་ཉིད་དུ་རྒྱུག་གོ །དེ་བརྣབ་སེམས་མི་དགེ་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་འབྲས་བུ་འདི་ནི་གང་སེམས་ཅན་དམྱལ་བ་པ་
དེས་དེ་ལྟར་ལོག་པར་མཐོང་བ་ཡིན་ནོ། །དེ་ལྟར་བརྣབ་སེམས་མང་པོར་མཐོང་བ་དེའི་ལག་ཏུ་མཚོན་ཆ་འབྱུང་བར་འགྱུར་ཏེ། དེས་བརྒྱུགས་པ་དང་། སེམས་ཅན་དམྱལ་བ་པ་གཞན་དག་གིས་ལག་ཏུ་ཡང་མཚོན་ཆ་འབྱུང་བར་འགྱུར་ཏེ། དེ་དང་དེ་དག་ལྷན་ཅིག་མཚོན་གྱིས་འགྱེད་དོ། །སེམས་ཅན་དམྱལ་བ་པ་དེ་དང་དེ་དག་མཚོན་རྣོན་པོ་རྣམས་ཀྱིས་འཇོག་པར་བྱེད་དོ། །བཞོག་པ་དེ་དག་ཀྱང་རུས་གོང་གི་ལྷག་མ་དེ་ཙམ་ཞིག་ལུས་པར་བྱེད་དོ། །དེ་ནས་ཡང་སླར་སྐྱེ་བར་འགྱུར་ཏེ། ཡང་དེ་བཞིན་དུ་གཞོག་པར་བྱེད་ཅིང་དེ་དག་ཡང་སྐྱེ་བར་འགྱུར་རོ། །དེ་ནས་ལོ་འབུམ་ཕྲག་དུ་མ་འདས་པ་དང་། ལས་ཀྱིས་བྱས་པའི་གཤིན་རྗེའི་མི་རྣམས་འོངས་ནས་དེ་དག་གི་མཚོན་ཆ་རྣོན་པོ་བླངས་ཏེ། སེམས་ཅན་དམྱལ་བ་པ་དེ་རྣམས་དང་། སེམས་ཅན་དམྱལ་བ་པ་གཞན་དེ་རྣམས་ལ་ཇི་ལྟར་ཡུངས་འབྲུ་བས་ཀྱང་ཕྲ་བ་དེ་ལྟར་ལུས་ཀྱི་ཤ་ལ་འཇོག་སྟེ། དེ་ལྟར་རུས་གོང་གི་ལྷག་མ་ཙམ་ཞིག་ལུས་པར་བྱེད་དོ། །དེ་ངུ་སྐད་འབྱིན་ཆོ་ངེས་འདེབས། ངུ་ཞིང་སྨྲེ་སྔགས་འདོན་པ་བཞོག་བཞོག་ནས་ཡང་སྐྱེ་བར་འགྱུར་ཏེ། ཇི་ལྟར་ཆུ་སྲིན་བྱིས་པ་གསོད་བཞོག་བཞོག་ནས་ཆུའི་ནང་དུ་བཅུག་པ་དང་། དེ་ནས་ཡང་སླར་སྐྱེ་བར་འགྱུར་བ་དེ་བཞིན་དུ་སེམས་ཅན་དམྱལ་བ་པ་དེ་དག་ལ་ཡང་སླར་སྐྱེ་བར་འགྱུར་རོ། །དེ་ལྟར་སྡུག་བསྔལ་གྱིས་ཉམ་ཐག་ཅིང་ངུ་སྐད་འབྱིན་པ་དེ་དག་ལ་འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། བརྣབ་སེམས་ཀྱིས་ནི་ཉམས་པའི་མི། །བརྣབ་སེམས་ཀྱིས་ནི་ཡོངས་སུ་བསླུས། །གཞན་ནོར་བདག་གིར་བྱ་སྙམ་པ། །དེ་ལྟར་དེ་ནི་བསླུས་པ་ཡིན། །བརྣབ་སེམས་སྡིག་པ་ཡིད་བྱེད་པ། །མཛངས་པ་རྣམས་ཀྱིས་མ་བསྟེན་ཏོ། །མར་མེ་འབར་བའི་མེ་བཞིན་དུ། །བདག་གིས་བྱས་པས་སྲེག་པར་བྱེད། །བརྣབ་སེམས་སྡིག་པ་ཡིད་བྱེད་པ། །གནོད་པ་དག་ནི་ཉེ་བར་བྱེད། །ཚ་བར་སྨིན་ཅིང་དུག་འབྱུང་བ། །གང་ཡིན་དེ་ནི་རྟག་ཏུ་སྤོངས། །གཞན་
གྱི་ཕུན་སུམ་ཚོགས་མཐོང་ནས། །བདག་གིར་བྱ་སྙམ་བསམས་པ་ནི། །བརྣབ་སེམས་དེ་ཡིས་བསླངས་པ་ཡི། །དུག་གི་འབྲས་བུ་འདིར་འོངས་སོ། །དེ་ལྟར་དེ་གཤིན་རྗེའི་མི་དེ་རྣམས་ཀྱིས་སྤྱོ་སྤྱོ་བརྒྱད་བརྒྱད་ནས་ལོ་འབུམ་ཕྲག་མང་པོར་གནོད་པ་ཉིད་ཀྱིས་གནོད་པར་བྱེད་དེ། དེའི་སྡིག་པའི་ལས་ཀྱིས་འབྱང་བར་མི་འགྱུར་རོ། །དེ་ནས་ཡུན་རིང་མོ་ཞིག་འདས་ནས་སེམས་ཅན་དམྱལ་བ་པ་དེ་མེ་མདག་གི་ཆུ་བོའི་ནང་དུ་བྱིང་ཞིང་འབྲོས་པ་ན། གར་བབ་བབ་ཏུ་འབྲོས་པ་དང་། ལྕགས་ཀྱི་ས་གཞི་རབ་ཏུ་འབར་བའི་སྟེང་དུ་བབ་ནས་དེ་ནས་ཡང་དང་ཡང་དུ་འགྲེ་ལྡོག་སྟེ། ལངས་ནས་ཀུན་ཏུ་རྒྱུག་པ་ན། གཅིག་པུ་གཉིས་སུ་མེད་ཅིང་གྲོགས་མེད་པ་ལས་ཀྱི་དབང་གིས་གྱུར་པའི་སེམས་ཅན་དམྱལ་བ་པ་ལས་ཀྱིས་དགྲའི་ནང་དུ་སོང་ངོ་། །གལ་ཏེ་ཡང་གཤིན་རྗེའི་མི་དེ་དག་ལས་ཐར་ནས་གར་བབ་བབ་ཏུ་འབྲོས་སོ། །དེ་ནས་གནོད་སེམས་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པ་དེའི་འབྲས་བུ་ཉེ་བར་གནས་པ་ནི་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ་སྐྱབས་དང་དཔུང་གཉེན་འདོད་ཅིང་ལས་ཀྱིས་བྱས་པའི་སེང་གེ་དང་། སྟག་དང་། སྦྲུལ་ཤིན་ཏུ་ཁྲོས་པ་དག་མདུན་དུ་འདུག་པ་དང་། དེ་དེ་དག་ལ་འཇིགས་ནས་གར་བབ་བབ་ཏུ་འབྲོས་ཀྱང་དེ་མི་དགེ་བའི་ལས་ཀྱིས་འབྲོས་པར་ག་ལ་ནུས་ཏེ། དེ་དེ་དག་གིས་བཟུང་ངོ་། །བཟུང་ནས་ཀྱང་ཤིན་ཏུ་འཁྲུགས་པ་རྣམས་ཀྱིས་དང་པོར་རེ་ཞིག་གླད་པ་ལ་ཟའོ། །དེའི་གླད་པ་ལ་ཟ་བ་ན་ངུ་སྐད་འབྱིན་ཅིང་སྨྲེ་སྔགས་འདོན་ལ་འགྲེ་ལྡོག་པར་བྱེད་དོ། །དེའི་རྩིབ་ལོགས་ལ་ཡང་མཆེ་བ་དུག་ལྟར་རྣོ་བ་ཀུན་གྱིས་བྲད་བྲད་ནས་ཟ་ཞིང་སྟག་དག་གིས་ཀྱང་རྒྱབ་ཏུ་ཟོས། རྐང་པ་ནི་མེས་བསྲེགས་ཤིང་གཤིན་རྗེའི་མི་རྣམས་ཀྱིས་ཀྱང་རྒྱང་རིང་པོ་ལ་སོགས་པར་འཕངས་སོ། །དེ་ལྟར་སྙིང་རྗེ་ཆེན་པོའི་ཤུགས་ཐོབ་པ་དེ་ལ་འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། མི་ཡི་སྐྱེས་བུ་ཐ་མ་ལ། །གནོད་སེམས་མེ་འདྲ་ཡོད་པ་ནི། །
སྲེག་པ་དག་ལས་སྲེག་པ་ཐོབ། །དོན་མེད་ཅི་ཞིག་ཡོངས་སུ་སྨྲེ། །སེམས་ཅན་དམྱལ་བར་སྐྱེ་བ་ཡི། །རྒྱུ་ནི་མི་བཟད་གནོད་སེམས་ཡིན། །ཐག་པ་གང་གིས་བཅིངས་པ་ཡི། །མི་ནི་ཡོངས་སུ་ཁྲིད་པར་བྱེད། །གནོད་སེམས་དག་གིས་རྨོངས་པའི་མི། །རྟག་ཏུ་དེ་ལ་ཡིད་འཇུག་པ། །ཞི་བར་ཤིན་ཏུ་མི་འགྱུར་ཏེ། །བུ་གའི་ནང་ན་སྦྲུལ་འདུག་བཞིན། །མི་གང་གནོད་སེམས་མི་བཟད་ཅིང་། །ཤིན་ཏུ་དྲག་པའི་ངོ་བོ་ནི། །ཉི་མ་ལ་ནི་མུན་པ་བཞིན། །དེ་དག་ལ་ནི་བདེ་བ་མེད། །གནོད་སེམས་སྙིང་ལ་ཡོད་པ་ནི། །ཀུན་གྱིས་བསྲུང་བར་མི་ནུས་ཏེ། །བཤེས་གྲོགས་གཉེན་གྱི་མིས་མ་ཡིན། །ཆོས་དང་དོན་གྱི་ཚོགས་ཀྱིས་མིན། །གནོད་སེམས་འདི་ནི་མུན་པ་ཡི། །ཚོགས་དང་འདྲ་ཞེས་བརྗོད་པ་ཡིན། །གནོད་སེམས་སྐྱེད་པར་བྱེད་པ་ནི། །གནོད་སེམས་ཞེས་ནི་ཡོངས་སུ་སྒྲོགས། །གནོད་སེམས་མེད་པ་ཇི་ལྟར་འགྱུར། །གནོད་སེམས་མེད་པ་མཆོག་ཏུ་དགེ། །གནོད་སེམས་ཡོད་པ་ཕ་རོལ་ཏུ། །མི་བཟད་འཆི་བར་དེ་དག་འགྲོ། །གནོད་སེམས་ཀྱིས་ནི་དྲངས་པ་དག །སེམས་ཅན་དམྱལ་བ་དྲག་པོར་འོངས། །ལས་ཟད་ནས་ནི་ཐར་འགྱུར་ཞིང་། །དམྱལ་བར་འགྲེ་ལྡོག་མི་བྱེད་དོ། །དེ་ལྟར་བསྟན་ཅིང་རྗེས་སུ་བསྟན་ནས་གཤིན་རྗེའི་མི་རྣམས་དང་སེང་གེ་དང་། སྟག་གནོད་སེམས་མང་དུ་ཡོད་པ་རྣམས་ཀྱིས་འཐུན་པར་རྡེག་ཅིང་ཟ་བར་བྱེད་དེ། ས་བོན་ལས་འབྲས་བུ་འབྱུང་བ་བཞིན་དུ་དེའི་གནོད་སེམས་དང་འཐུན་པར་ལས་ཀྱི་རྣམ་པར་སྨིན་པ་འབྱུང་སྟེ། དེ་ལྟར་སེམས་ཅན་དམྱལ་བ་པ་དེ་ལས་དེའི་འབྲས་བུས་འཚེད་ཅིང་ཟའོ། །དེ་གལ་ཏེ་ཡང་དེ་ལས་ཐར་ན་མགོན་འདོད་པ། སྐྱབས་འདོད་པ། གར་བབ་བབ་ཏུ་འབྲོས་སོ། །སྡིག་པ་ཆེན་པོས་བསྐུལ་བ་ལོག་པར་ལྟ་བ་མཚམས་མེད་པ་ལྔའི་ལམ་ནི་འདི་ཡིན་ཏེ། མནར་མེད་པར་སྐྱེས་ནས་དེ་ནས་ངེས་པར་མྱོང་བར་འགྱུར་བའི་མཚམས་མེད་པ་གཞན་དག་ཡོད་པ་དེར་སྐྱེ་ལ་སྐྱེས་མ་ཐག་ཏུ་ལས་སོ་སོར་མྱོང་བར་འགྱུར་རོ། །སེམས་ཅན་
དམྱལ་བ་པ་དེ་མུ་སྟེགས་ཀུན་ཏུ་རྒྱུ་དང་། རྫོགས་བྱེད་དང་། ལྷས་བྱིན་དང་། ཀོ་ཀ་ལི་ཀ་གང་དུ་འཚེད་པའི་གནས་དེར་སེམས་ཅན་དམྱལ་བ་པ་ཆེན་པོ་འདི་ཡང་འགྲོ་བར་འགྱུར་ཏེ། གང་ན་སྡུག་བསྔལ་ངེས་པར་མྱོང་བར་འགྱུར་བ་མི་བཟད་པ་ཚ་བ་དྲག་པ་བས་ཀྱང་ཤིན་ཏུ་དྲག་པ། དེ་དག་རྗེས་སུ་མྱོང་ངོ་། །དེའི་སྡུག་བསྔལ་སེམས་ཅན་ཐམས་ཅད་ཀྱིས་དཔེ་བྱ་བར་སླ་བ་མ་ཡིན་ཏེ། མནར་མེད་པའི་སྡུག་བསྔལ་དེ་མྱོང་བར་འགྱུར་རོ། །སྡིག་པ་བྱེད་པ་དེ་མུན་པའི་ཚོགས་སུ་གྱུར་པ་དང་། སེམས་ཅན་ཐམས་ཅད་སྤུ་ཟིང་ཞེས་བྱེད་པ་མནར་མེད་པ་ཆེན་པོ་ག་ལ་བ་དེར་དེའི་འཚེད་དོ། །སྲེག་གོ །གཤེག་གོ །མཚོན་ཆར་ལྟར་འབབ་པས་བཞོག་གོ །དེ་ནས་ཡང་འབྱུང་བར་འགྱུར་ཏེ། ཡང་འཇོག་གོ །གཤེག་གོ །སྲེག་གོ །མདའ་བོ་ཆེ་དང་། རྡོ་རྗེ་དང་། སེར་བ་དང་། རྡོ་ཆར་ལྟར་འབབ་པས་གསོད་དོ། །དེ་ལྟར་མཚམས་མེད་པ་ལྔ་བྱེད་པ་དེ་དག་སྲེག་པ་ན། མེའི་ཕུང་པོ་ཆེན་པོ་བཅུ་གཅིག་བྱུང་སྟེ། དེ་དག་ཤིན་ཏུ་སྡུག་བསྔལ་བར་བྱེད་དོ། །དེར་ཕྱོགས་བཅུའི་མེ་འབར་བ་བཅུ་དང་། མེའི་ཕུང་པོ་བཅུ་གཅིག་འབྱུང་སྟེ། བཀྲེས་པ་དང་། སྐོམ་པ་བྱས་ནས་ཁར་འབྱུང་ངོ་། །དེའི་ལུས་ཀྱི་སྟེང་འོག་དང་། རྩིབ་ལོགས་སུ་འབར་བའི་ཕྲེང་བ་མཆེད་པས་ཇི་ལྟར་དེའི་ལུས་ཀྱི་གསེབ་ཕྲ་མོ་ཡང་མི་མངོན་པ་དེ་ལྟར་སྲེག་གོ །མེ་དེ་ཡང་ཇི་ལྟར་སྐྲ་དེ་དག་གི་རྩེ་མོའི་བར་ཡང་མི་མངོན་པ་དེ་ལྟར་ཕན་ཚུན་ཤིན་ཏུ་ཉོན་མོངས་པར་འཚེད་པས་མནར་མེད་དོ། །བདེ་བའི་བར་སྐབས་ཀྱི་དུས་ཆུང་ཟད་ཀྱང་མེད་པས་མནར་མེད་དོ། །དབང་པོ་ཐམས་ཅད་ཡུལ་ཀུན་ལ་འཚེད་ཅིང་ཡིད་དང་འགལ་བས་མནར་མེད་དེ་འཇིག་རྟེན་དེ་ནས་ཤི་ནས་སེམས་ཅན་དམྱལ་བ་ཆེན་པོ་མནར་མེད་པ་མ་གཏོགས་པར་དེ་ལས་གཞན་དུ་མི་སྐྱེ་སྟེ། མནར་བའི་གཞི་མེད་ཅིང་གནོད་པའི་གྲངས་ཀྱི་བར་མེད་པའི་ཕྱིར་མནར་མེད་དོ། །འདོད་པའི་ཁམས་སུ་གཏོགས་པའི་སེམས་ཅན་ཐམས་
ཅད་ཀྱི་འོག་ཏུ་གྱུར་པ་ནི་མནར་མེད་པ་དེ་དག་ཡིན་ཏེ། གཞན་དག་མནར་མེད་པ་ཡིན་པས་མནར་མེད་དོ། །སེམས་ཅན་དམྱལ་བ་ཆེན་པོ་དེའི་མགོ་ལ་ཇི་ལྟར་སྟེང་ནས་གནོད་པས་ཀུན་ནས་ཉོན་མོངས་པ་ལྟར་དེའི་མགོ་ལ་ཡང་དེའི་བར་སྐབས་ཀྱི་གཞི་མེད་པས་མནར་མེད་དོ། །ས་གཞི་ཟངས་དམར་པོ་རབ་ཏུ་བསྐོལ་བ་དང་། ཁྲག་དང་། ཤ་དང་རུས་པར་འདྲེས་ཤིང་འཁྲུགས་པ་དག་ལ་བར་མེད་པ་དེ་བཞིན་དུ་མནར་མེད་པ་ཡང་པགས་པ་དང་། ཤ་དང་། ཚིལ་དང་། རུས་པ་དང་། རྐང་དུ་གཏོགས་པ་ཐམས་ཅད་རབ་ཏུ་འབར་ཏེ། དེ་ལྟར་ཀུན་ནས་རབ་ཏུ་འབར་བ་དག་ལ་མངོན་པ་ཡང་མེད་ཅིང་མནར་བའི་གཞི་ཆུང་ཟད་ཀྱང་མེད་པའི་ཕྱིར་མནར་མེད་དོ། །རི་ལས་ཆུ་འབབ་པའི་ཤུགས་ལྟར་ཉིན་གཅིག་བཞིན་དུ་གནོད་པ་དཔེ་མེད་པ་འཕེལ་ཞིང་འབྱུང་སྟེ། དེ་ལྟར་གནོད་པ་རྣམས་མནར་བའི་གཞི་ཅུང་ཟད་ཀྱང་མེད་པས་མནར་མེད་དོ། །སྲིད་པ་བར་མ་འགག་པ་དང་། དུས་མཉམ་དུ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་དེར་སྐྱེས་ནས་མནར་བའི་གཞིའི་བར་ཤིན་ཏུ་ཆུང་བ་ཡང་མེད་པའི་ཕྱིར་མནར་མེད་དེ། དེ་ལྟར་གནོད་པ་བརྗོད་པར་མི་ནུས་ཀྱང་ཆུང་ཟད་ཅིག་དཔེར་བྱ་ན་རྒྱ་མཚོའི་ཆུའི་ཐིགས་པ་བགྲང་བར་སླ་བ་མ་ཡིན་པ་དེ་བཞིན་དུ་མནར་མེད་པ་རྣམས་ཀྱི་ལས་ཉེས་པར་བྱས་པ་ལྔའི་གནོད་པ་བགྲང་བའམ། བརྗོད་པར་སླ་བ་མ་ཡིན་ནོ། །འདི་ལྟ་སྟེ། ཇི་ལྟར་མནར་མེད་པའི་ལས་ལྕི་བའི་མཐུས་དེའི་ཚེ་སྡུག་བསྔལ་གྱི་གནས་གཞན་ཅི་ཡང་མེད་དེ་སྡུག་བསྔལ་དེ་ཡང་དེ་ལྟ་བུ་ཡིན་ནོ། །གང་གིས་མནར་མེད་པའི་ལས་གཅིག་བྱས་ན། དེའི་སྡུག་བསྔལ་ཆུང་བར་འགྱུར་རོ། །གང་གིས་ལས་གཉིས་བྱས་ན་དེའི་ཚད་པས་ལུས་ཆེ་བར་འགྱུར་ཏེ། སྡུག་བསྔལ་ཡང་དེ་ལྟར་རྒྱུ་དང་རྒྱུ་ཡིས་འབྲས་བུ་ལྕི་བར་འགྱུར་རོ། །བདེ་བ་དང་སྡུག་བསྔལ་གྱི་རྒྱུ་ནི་དཔེ་མེད་པར་འགྱུར་ཏེ། འདོད་པ་རྣམས་ཀྱི་ནི་བདེ་བ་ཡིན་མི་འདོད་པ་རྣམས་ཀྱི་ནི་སྡུག་བསྔལ་བ་ཡིན་ཏེ། གནས་འདི་གཉིས་ནི་སྟེང་དང་། འོག་དང་
མཐའ་དག་ཏུ་དཔེ་བྱ་བར་མི་ནུས་སོ། །དེ་ཅིའི་ཕྱིར་ཞེ་ན། ལེགས་པར་བྱས་པ་དང་། ཉེས་པར་བྱས་པའི་མཐའ་དག་ནི་རྒྱུ་འཐུན་པར་འབྲས་བུ་འབྱུང་སྟེ། སེམས་ཅན་དམྱལ་བ་པ་རྣམས་ཀྱང་དེ་དང་འདྲ་བར་དཔེ་བྱ་བར་མི་ནུས་སོ། །དེ་ལྟར་དེ་བསྐལ་པའམ། བསྐལ་པ་ལས་ལྷག་པར་བསྲེགས་ནས་ལས་དེ་ཟད་ན་ཐར་བར་འགྱུར་ཏེ། རྒྱུ་རྐྱེན་ཟད་ན་འབྲས་བུ་ཡང་ཟད་པར་འགྱུར་རོ། །ཇི་ལྟར་མེ་ཤི་ན་ཚ་བ་མེད་པར་འགྱུར་བ་དང་། ས་བོན་ཟད་ན་འབྲས་བུ་ཡང་ཟད་པར་འགྱུར་བ་དེ་བཞིན་དུ་གང་གི་ཚེ་མནར་མེད་པའི་མི་དགེ་བའི་ལས་དེ་བཅོམ་ཞིང་སྤངས་ལ་ཟད་པར་གྱུར་པ་དེའི་ཚེ་སེམས་ཅན་དམྱལ་བ་དེ་ལས་ཐར་བར་འགྱུར་རོ། །ཐར་ནས་ཀྱང་རྒྱུ་འཐུན་པའི་འབྲས་བུ་རི་གསེབ་ཁབ་རྩེ་ལྟ་བུའི་ནང་དུ་ཡི་དགས་རྣམས་སུ་སྐྱེ་བར་འགྱུར་རོ། །དེར་སྐྱེས་ནས་བཀྲེས་པ་དང་སྐོམ་པས་གདུངས་ཤིང་ལུས་ཚལ་ཤིང་བསྲེགས་པ་ལྟ་བུར་འགྱུར་རོ། །དེ་ལས་ཐར་ནས་ཀྱང་དུད་འགྲོའམ་ཆུ་སྲིན་བྱིས་པ་གསོད་དག་ཏུ་སྐྱེ་བར་འགྱུར་རོ། །དེ་བཞིན་དུ་ལྗན་ལྗིན་གྱི་ཚོགས་ཕྱི་ས་མི་གཙང་བ་འཇིག་པར་བྱེད་པའི་སྲིན་བུར་འགྱུར་རོ། །ཚེ་རབས་ཉིས་སྟོང་དུ་ཡི་དགས་བཀྲེས་ཤིང་སྐོམ་པ་དག་གིས་གདུངས་པར་འགྱུར་ཞིང་བསྲེགས་པར་འགྱུར། ཚེ་རབས་ཉིས་སྟོང་དུ་དུད་འགྲོ་རྣམས་སུ་སྐྱེ་སྟེ། ཡང་ལས་ཀྱི་དབང་གིས་རྒྱུ་དང་འཐུན་པའི་འབྲས་བུས་དུད་འགྲོའི་རིས་སྡུག་བསྔལ་རྣམ་པ་སྣ་ཚོགས་ཀུན་དང་ཟ་བ་དང་གསད་པའི་བསམ་པ་ཐ་དད་པ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་གཅིག་ལ་གཅིག་ཟ་བའི་སྡུག་བསྔལ་དེ་ལས་ཐར་ནས་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མིའི་ནང་དུ་སྐྱེས་ན་ལས་དེ་དང་རྒྱུ་འཐུན་པར་ཚེ་རབས་ལྔ་བརྒྱར་མངལ་དུ་འཆི་བར་འགྱུར་རོ། །ཚེ་རབས་ལྔ་བརྒྱར་བྱུང་མ་ཐག་ཏུ་འཆི་བར་འགྱུར། ཚེ་རབས་ལྔ་བརྒྱར་གོག་ཐལ་ཐུལ་ཙམ་ན་འཆི་བར་འགྱུར་རོ། །གལ་ཏེ་ཡང་ཕྱིས་རྒྱུ་དང་འཐུན་པའི་འབྲས་བུ་མ་ལུས་པར་འབྱུང་སྟེ་དེ་ལུས་མཐའ་ཡས་པ་ནས་ཞུགས་པ། ལས་ཀྱི་དྲ་བ་དང་འཐུན་པའི་འབྲས་བུ་ཆུང་
ངུ་དང་འབྲིང་དང་ཆེན་པོ་དམིགས་པར་འགྱུར་རོ། །འདིར་དགེ་སློང་གིས་ཚིགས་སུ་བཅད་དེ་སྨྲས་པ། འཁོར་བ་ཐོག་མ་མེད་པ་ནས། །ལས་ཀྱི་དྲ་བས་བསྒྲིབས་པའི་མི། །རང་གི་ལས་ཀྱི་རྒྱུ་འབྲས་ལས། །བྱུང་བ་སྐྱེ་ཞིང་འཆི་བ་ཡིན། །ལྷ་ལས་དམྱལ་བར་སྐྱེ་འགྱུར་ཞིང་། །དམྱལ་ལས་དེ་བཞིན་ལྷ་ཡུལ་དུ། །མི་རྣམས་ཡི་དགས་ཡུལ་དུ་འམ། །སེམས་ཅན་དམྱལ་བར་རབ་ཏུ་འགྲོ། །གཞན་དང་གཞན་དུ་འབྱུང་ཞིང་སྐྱེ། །གཞན་དང་གཞན་དུ་འབྱུང་ཞིང་བདེ། །སྲེད་པའི་ལས་ཀྱིས་བྱུང་བའི་ཚེ། །དབང་ཕྱུག་ལ་སོགས་དེ་མ་བྱས། །འཁོར་བར་སྲོག་ཆགས་རྣམས་ཀྱིས་ནི། །རྟག་ཏུ་ལས་ནི་གྲངས་མེད་བྱས། །དེ་བཞིན་གཤེགས་པ་མ་གཏོགས་པས། །མཁས་པས་ནམ་ཡང་མི་ཤེས་སོ། །ལས་དེའི་རྣམ་པ་བདག་གིས་ཤེས། །རྒྱུ་དང་རྐྱེན་ནི་རྟག་ཏུ་རིག །སྟོབས་དེ་བདག་དང་ལྡན་པས་ན། །སྲོག་ཆགས་ཀུན་ལ་སོ་སོར་ཕན། །དགེ་སློང་དག་དེ་ལྟར་དགེ་སློང་དེས་མནར་མེད་པའི་སྡུག་བསྔལ་དག་སོ་སོར་མཐོང་བ་ན་འཁོར་བ་ཐམས་ཅད་ལ་ཡིད་འབྱུང་ཞིང་བྱམས་པ་མཆོག་གི་བདག་ཉིད་དང་། སྙིང་རྗེས་ཡོངས་སུ་བསྒོས་པའི་སེམས་ཉེ་བར་གཞག་པས་ས་གཞན་བཅུ་གཅིག་པ་ལ་ཞུགས་སོ། །དེ་ས་གཞན་དེ་ལ་ཞུགས་པ་དང། ས་བླ་བ་དག་དགའ་ནས་བར་སྣང་ལ་སྤྱོད་པའི་གནོད་སྦྱིན་རྣམས་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་པོ་ཆེན་པོ་བཞི་ལ་བསྙད་དོ། །དེ་དག་གིས་ཀྱང་རྒྱལ་ཆེན་བཞིའི་ལྷ་རྣམས་ལ་བསྙད་དེ། དེ་ལྟར་སྔ་མ་བཞིན་དུ་སྦྱར་ནས། ཚངས་པ་ཆེན་པོའི་ལྷ་རྣམས་ཀྱི་བར་དག་གཅིག་ལ་གཅིག་སྒྲོགས་ཏེ། འདི་ལྟར་ལྷ་འཛམ་བུའི་གླིང་ན་ཡུལ་ཆེ་གེ་མོ་ཞིག་ན་རིགས་ཀྱི་བུ་མང་གེ་མོ་ཞིག་སྐྲ་དང་ཁ་སྤུ་བྲེགས་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་བདུད་དང་ལྷན་ཅིག་གཡུལ་འགྱེད་པར་འདོད་ལ་དེ་ཡུལ་གྱི་དངོས་པོ་ལ་མི་འདོད་དེ། ཀུན་ནས་ཉོན་མོངས་པའི་ཤུལ་རྣམས་ལ་དགའ་བར་མི་བྱེད་དེ། དེ་ས་གཞན་
བཅུ་གཅིག་པ་ལ་ཞུགས་པ་དེ་ཐོས་ནས་ལྷ་ཚངས་པ་ཆེན་པོ་བདུད་ཀྱི་ཕྱོགས་ནི་དམས་སོ། །དམ་པའི་ཆོས་ཀྱི་ཕྱོགས་ནི་མཐོས་སོ། །དགེ་བའི་ཕྱོགས་ནི་འཕེལ་ཏོ། །ཆོས་ལ་ཆོས་ཀྱི་རྗེས་སུ་འཇུག་པ་ནི་ཀུན་ནས་བྱུང་ངོ་ཞེས་ཡིད་རབ་ཏུ་དགའོ། །དགེ་སློང་དག་དེ་ནས་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་མནར་མེད་པ་ཇི་ལྟ་བ་བཞིན་མཐོང་ནས། དེའི་འཁོར་ཇི་ལྟར་འདུག་སྙམ་ནས་རྟོག་པར་བྱེད་དེ། ཀྱེ་མ་སེམས་ཅན་དམྱལ་བ་ཆེན་པོའི་འཁོར་ཇི་སྙེད་ཅིག་ཡོད་སྙམ་དུ་ཡོངས་སུ་རྟོག་པར་བྱེད་དོ། །དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་འདི་ལྟར་མནར་མེད་པ་དགེ་སློང་གི་ཡིད་བྱུང་བ་དེ་མཐོང་ནས་དེའི་འཁོར་གཞན་ལ་རྟོག་པར་བྱེད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་རྟོག་པར་བྱེད་དེ། ཀྱེ་མ་སེམས་ཅན་དམྱལ་བ་ཆེན་པོའི་འཁོར་ཇི་སྙེད་ཅིག་ཡོད་སྙམ་མོ། །དེས་ཐོས་པ་ལས་བྱུང་བའི་ཤེས་པས་ཇི་ལྟར་སེམས་ཅན་དམྱལ་བ་ཆེན་པོ་གཞན་དག་གི་འཁོར་བཅུ་དྲུག་པ་ཡོད་པ་དེ་བཞིན་དུ་མནར་མེད་པ་ཡང་འཁོར་བཅུ་དྲུག་གི་བར་དུ་ཡོད་པར་མཐོང་སྟེ། འདི་ལྟ་སྟེ། བྱ་རོག་ཁ་དང་། ཐམས་ཅད་ས་འོག་དང་། སྡུག་བསྔལ་མཐའ་ཡས་མང་དང་། ཝ་སྐད་འབྱིན་དང་། ལྕགས་ཀྱི་ཅེ་སྤྱང་གི་ཟས་དང་། ལྟོ་གནག་དང་། ལུས་ཞུམ་དང་། རྨི་ལམ་འཇིགས་བྱེད་སྟོན་དང་། ལུས་ཞུམ་མི་བཟད་འཕྱང་དང་། རི་བརྩེགས་ཆར་ལྟར་འབབ་དང་། བྱ་འཛམ་པ་སྐད་འབྱིན་དང་། སྐར་ཕྲེང་དང་། སྡུག་བསྔལ་ཀུན་གྱིས་ཉེན་དང་། གོས་དྲི་དང་། ལྕགས་གླེབས་དང་། འགྲོ་བ་མེས་སྲེག་སྟེ། འདི་དག་ནི་སེམས་ཅན་དམྱལ་བ་ཆེན་པོའི་འཁོར་བཅུ་དྲུག་ཡིན་ནོ། །དེ་ལ་མི་དགེ་བ་བཅུའི་ལས་ཀྱི་ལམ་དང་། སེམས་ཅན་དམྱལ་བ་ཆེན་པོར་འགྲོ་བ་ལྔ་དག་གིས་མནར་མེད་པ་འགྲུབ་པ་མཐོང་སྟེ། ནང་དུ་ལྔ་དག་བྱས་པས་མནར་མེད་པ་དེར་སྐྱེ་བར་འགྱུར་རོ། །དེ་དང་འཐུན་པའི་
ལས་ཆུང་ངུ་བྱས་པས་ནི་དེའི་འཁོར་དུ་སྐྱེ་བར་འགྱུར་ཏེ། ཇི་ལྟར་ལས་བྱས་ཤིང་བསགས་པ་ལས་ཀྱི་ཉེར་བསྡོགས་དང་། ལས་ཀྱི་མཇུག་བྱས་པ་བསྟེན་ཅིང་བསྒོམས་ཏེ་མང་དུ་བྱས་པ་བཞིན་དུ་སེམས་ཅན་དམྱལ་བའི་འཁོར་གཞན་དུ་སྐྱེ་བར་འགྱུར་རོ། །དེ་ལ་མང་དུ་མནར་མེད་པ་ལྔ་འབྱུང་སྟེ། འདི་ལྟ་སྟེ། བསམས་བཞིན་དུ་མ་ལ་ངན་སེམས་ཀྱིས་ཁྲག་འབྱིན་པར་བྱེད་ཅིང་འབྱིན་པ་དེ་ལ་དགའ་བར་བྱེད། གོམས་པར་བྱེད། མང་དུ་བྱེད། ཕ་རོལ་དག་ལ་སྟོན་པར་བྱེད། དེ་ཉིད་ལ་རབ་ཏུ་འཇོག་པར་བྱེད་ཅིང་དེ་ཉིད་ཀྱི་ལས་བྱེད་དུ་འཇུག་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་བྱ་རོག་ཁ་ཞེས་བྱ་བར་སྐྱེ་བར་འགྱུར་རོ། །དེར་སྐྱེས་ནས་མནར་མེད་པ་མ་གཏོགས་པར་གང་ཡང་སོས་ལ་སོགས་པ་བདུན་གྱི་གནོད་པ་ཐམས་ཅད་བརྒྱ་འགྱུར་དུ་འབྱུང་ངོ་། །ཁྱད་པར་དུ་འབྱུང་བ་ཇི་ལྟར་བྱ་རོག་གི་ཁ་ལྟར་གདངས་ནས་གཤིན་རྗེའི་མི་ནག་པོ་ཞེས་བྱ་བས་བ་ཚྭའི་ཆུ་བོ་དེ་དག་ལེན་པར་བྱེད་དོ། །བ་ཚྭའི་ཆུ་བོ་དེ་དག་ནི་ཤུགས་དྲག་པ་ཡིན་ཏེ། བ་ཚྭའི་ཆུ་བོ་དེ་ལ་དེའི་ཁ་ཟེད་དུ་འཇུག་གོ །བ་ཚྭའི་ཆུ་བོ་དེས་མཆུ་དང་། རྐན་དང་། སོ་དང་། མིད་པ་དང་། རྣ་བ་དང་། སྙིང་དང་། མཆིན་པ་དང་། རྒྱུ་མ་དང་། ཕོ་བ་དང་། ལོང་ཀ་དང་། གློ་བ་དག་བསྲེགས་ནས་ཐུར་དུ་བྱུང་ངོ་། །དེ་ཚ་བའི་ཆུ་བོའི་ནང་དུ་སོང་སྟེ། ཁོང་བའི་ནང་དུ་སོང་ཞིང་བུ་གའི་ནང་དུ་སོང་བ་དེས་གསོག་ཏུ་གྱུར་ཅིང་ཕྱི་རོལ་འབའ་ཞིག་ལུས་ཏེ་ལས་ཀྱི་ཆད་པས་བཟུང་ཞིང་སྡུག་བསྔལ་ཚ་བ་རྩུབ་པ་དག་མྱོང་བ་ན། དུས་ཡུན་རིང་པོ་ལོ་བགྲང་གིས་མི་ལང་བར་འཚེད་པར་བྱེད་དེ། དེ་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་གྱུར་པ་དེ་སྲིད་དུ་འཚེད་དོ། །དེ་དེ་ལས་ཐར་ན་ལས་དེ་དང་རྒྱུ་འཐུན་པར་ཚེ་རབས་སྟོང་དུ་ཡི་དགས་ལྟོ་གུག་ཏུ་སྐྱེ་བར་འགྱུར། ཚེ་རབས་སྟོང་དུ་དུད་འགྲོ་གླང་པོ་ཆེ་དང་། སྲི་མ་ར་དང་། དྷུ་ན་དྷུ་དང་། མ་ར་དང་། སྲེ་མོ་དང་། སྦྲུལ་དང་། འགའ་ལ་དང་། གོ་ཏ་ཀ་དང་། ས་རྐོ་དང་། སྦྲང་བུ་དང་།
ཕྱེ་བ་དང་། བལ་གླང་གི་རིགས་རྣམས་སུ་སྐྱེ་བར་འགྱུར་རོ། །གལ་ཏེ་ཡང་དེ་ལས་ཐར་ནས་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྔོན་པའི་རིགས་སུ་སྐྱེ་བར་འགྱུར་ཏེ། ཚེ་རབས་ཉིས་བརྒྱར་མངལ་དུ་གནས་པ་ཉིད་ནའམ། གོག་ཐལ་ཐུལ་ནའམ། ཁ་སྤུ་སྐྱེས་ཙམ་ན་འཆི་བར་འགྱུར་ཏེ། བག་ཆགས་དེས་དེ་ཕྱིར་ཞིང་སྡིག་པ་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཐམས་ཅད་ས་འོག་ཅེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་བསམས་པ་བཞིན་དུ་དགེ་སློང་མ་དགྲ་བཅོམ་པ་ཟག་པ་ཟད་པ་ལ་སྤྱད་ལ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཐམས་ཅད་ས་འོག་ཏུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་ལ་གང་སེམས་ཅན་དམྱལ་བ་ཡང་སོས་ལ་སོགས་པ་བདུན་གྱིས་གནོད་པ་བསྡུས་པ་དེ་དག་ཐམས་ཅད་བརྒྱ་འགྱུར་དུ་འབྱུང་བར་འགྱུར་རོ། །ཁྱད་པར་དུ་འབྱུང་བ་ནི་འདི་ལྟར་ལྕགས་ཀྱི་ས་གཞི་དེ་བརྐོས་ནས་གཤིན་རྗེའི་མི་རྣམས་ཀྱིས་མགོ་ཐུར་དུ་བསྟན་ཏེ་ས་བརྐོས་པར་དེའི་མགོ་གང་ཡིན་པ་ཐུར་དུ་བསྟན་ཅིང་རྐང་ལག་གང་ཡིན་པ་དེ་དག་གྱེན་དུ་སྟོན་པར་བྱེད་དོ། །དེ་སྡུག་བསྔལ་གྱིས་ཉམ་ཐག་ནས་ངུ་སྐད་འདོན་མི་ནུས། ཆོ་ངེས་འདེབས་མི་ནུས། ཀུ་ཆོ་འབྱིན་མི་ནུས་སོ། །དེའི་ལུས་ཐུར་དུ་བསྟན་པ་གང་ཡིན་པ་དེ་དག་ཐམས་ཅད་གཤིན་རྗེའི་མི་རྣམས་ཀྱིས་སྟེའུ་ཐོགས་ཏེ་རུས་པ་ལྷག་མ་མ་ལུས་པའི་བར་དུ་འཇོག་པར་བྱེད་དོ། །རུས་པ་དེ་དག་ལ་ཡང་བ་ཚྭའི་ཆུས་ཆག་ཆག་འདེབས་ཏེ་དེ་དག་ལ་ཆག་ཆག་བཏབ་ནས་ཀྱང་འགྲེ་ལྡོག་གོ །དེའི་བ་ཚྭའི་ཆག་ཆག་བཏབ་པ་དེ་དག་ལས་དེ་ཕྱུང་ན་སྲོག་གི་ལྷག་
མ་ཆུང་ཟད་ཅིག་ལུས་པ་ཟངས་དམར་པོ་རབ་ཏུ་བསྐོལ་བ་འཁྲིགས་པས་བདས་ཤིང་ལྕགས་ཀྱི་སྣོད་རབ་ཏུ་བསྲེགས་པར་འཇུག་པར་བྱེད་དོ། །དེ་དེར་མོན་སྲན་གྲེའུ་དང་། རྒྱ་སྲན་འཚེད་པ་ལྟར་སྟེང་འོག་ཏུ་འབྱུང་བ་ན་ལྕགས་ཀྱི་བུམ་པ་ཀུན་བལྟར་མི་སྣང་བར་ཀུན་ནས་རླངས་པས་འཁྲིགས་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལོ་འབུམ་ཕྲག་དུ་མར་རྡུང་ཞིང་འཚེད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་ནས་བསྐལ་པའམ་བསྐལ་པའི་ལྷག་མར་སྲེག་པའི་གནོད་པ་བསམ་གྱིས་མི་ཁྱབ་པ་ཆུང་ཟད་ཅིག་འབྱུང་བར་འགྱུར་རོ། །དེ་དེ་ལས་ཐར་ནས་ཚེ་རབས་སྟོང་དུ་ཡི་དགས་ཁ་ཟས་མེད་པའི་ནང་དུ་སྐྱེ་བར་འགྱུར་ཏེ། དེའི་ལུས་བཀྲེས་པ་དང་། སྐོམ་པས་གདུངས་ཤིང་ཀུན་ནས་ཐམས་ཅད་དུ་མར་མེའི་སྙིང་པོ་འབར་བ་ལྟར་རབ་ཏུ་འབར་རོ། །དེ་དེ་ལས་ཐར་ན་ལས་དེ་དང་རྒྱུ་འཐུན་པར་ཚེ་རབས་སྟོང་དུ་དུད་འགྲོ་མྱ་ངམ་གྱི་བྱ་བཀྲེས་པ་དང་། སྐོམ་པས་གདུངས་པ་འདི་ལྟ་སྟེ། བྱེའུ་མཆིལ་པ་དང་། ཝ་དང་། ཟིན་པ་དང་། འབའ་ས་ཀ་དང་། སྐྱིན་གོར་དང་། ཏུང་ཀ་དང་། རི་དགས་མཱ་ཏྲི་ཀ་དང་། བ་ར་པོ་ཏ་དང་། ཁྱི་དང་། མཆེ་བ་གཙིགས་ལ་སོགས་པའི་དུད་འགྲོ་རྣམས་སུ་སྐྱེ་བར་འགྱུར་རོ། །དེ་ལས་ཀྱང་ཐར་ནས་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་མི་རྟ་གདོང་ཅན་གྱི་ཡུལ་དུ་སྐྱེ་བར་འགྱུར། ཚེ་རབས་ཉིས་བརྒྱར་ཡང་མངལ་དུ་འཆི་བར་འགྱུར། གལ་ཏེ་ཡང་བྱང་ནས་འཚོ་ན་དེ་དབུལ་ཞིང་ནད་ཀྱིས་ཉོན་མོངས་པར་འགྱུར། དེ་བཞིན་དུ་ཚེ་རབས་ལྔ་བརྒྱར་ཟ་མ་དང་མ་ནིང་དུ་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྡུག་བསྔལ་མཐའ་ཡས་མང་ཞེས་བྱ་བ་ཇི་ལྟར་གནས་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཤིན་ཏུ་
ཆགས་པའི་སྙིང་གིས་ཡུལ་ལ་སེམས་འཇུག་པའམ། སྡིག་པའི་གྲོགས་པོ་དང་ཕྲད་པས་སམ། ར་རོ་བའི་ཉེས་པས་མ་ལ་འཁྲིག་པ་བྱས་ཤིང་སད་ནས་ཀྱང་ཤིན་ཏུ་ཆགས་པའི་འདོད་ཆགས་དང་ལྡན་པས་འཁྲིག་པ་བྱས་ལ་སྡིག་པའི་གྲོགས་པོའི་ཚིག་གིས་དེ་ནས་ཆགས་པས་ཡང་དེ་ཉིད་ལ་འཁྲིག་པར་བྱེད། ཀུན་ཏུ་སྟེན་ཅིང་སྒོམ་ལ་མང་དུ་བྱེད། གཞན་དག་ཀྱང་དེ་ཉིད་ལ་རབ་ཏུ་འཇོག་པར་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྡུག་བསྔལ་མཐའ་ཡས་མང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་དེ་དག་ཐམས་ཅད་བརྒྱ་འགྱུར་དུ་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར་དེའི་རྐུབ་ཏུ་ཕུར་བུ་རབ་ཏུ་འབར་བ་རྣམས་དང་། ཚེར་མ་གང་ཡིན་པ་དག་འཇུག་པར་བྱེད་དོ། །སྣར་ཡང་ཐོ་བ་དག་བླངས་ནས་ཕུར་བུ་རྣམས་འདེབས་པར་བྱེད། རྣ་གུང་དུ་ཡང་ཐོ་བ་དག་གིས་ཕུར་བུ་རྣམས་འདེབས་པར་བྱེད། ཁར་ཡང་ཐོ་བ་བླངས་ནས་ཕུར་བུ་སོ་རྣོ་ཞིང་འབར་རབ་ཏུ་འབར་བ་རྣམས་ཀྱིས་རབ་ཏུ་འགེངས་པར་བྱེད། དེའི་འོག་ཏུ་ཁའི་སྡུག་བསྔལ་རབ་ཏུ་འབར་བ་དང་། འོག་ཏུ་གྱུར་པའི་སྡུག་བསྔལ་དག་གིས་སྡུག་བསྔལ་བར་བྱེད། སྲེག་པར་བྱེད། གཤེག་པར་བྱེད། རྡེག་པར་བྱེད། རྔོ་བར་བྱེད་དོ། །ནང་གི་མནར་མེད་པའི་ཀུན་ནས་རྣམ་པ་ཐམས་ཅད་དུ་སྡུག་བསྔལ་གྱིས་ཉེན་ཏེ་ཇི་ལྟར་དེ་དཔེ་བྱ་བར་སླ་བ་མ་ཡིན་པ་དེ་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་བསྐལ་པའམ། བསྐལ་པ་ལས་ལྷག་པར་བསྲེགས་པ་དེ་ལས་ཐར་ན་སྡིག་པའི་ལས་དེ་དང་རྒྱུ་འཐུན་པའི་འབྲས་བུས་ཚེ་རབས་བཞི་སྟོང་དུ་ཡི་དགས་ཁ་ཐུར་དུ་བལྟས་པ་མདག་མ་ཟ་བའི་ནང་དུ་ལུས་བཀྲེས་པ་དང་། སྐོམ་པས་གདུངས་པའི་ལུས་སུ་སྐྱེ་བར་འགྱུར་རོ། །མྱ་ངམ་ཆུ་དང་། གྲིབ་མ་མེད་པའི་སྨྱིག་མའི་ཚལ་གྱི་དུད་འགྲོ་དག་ཏུ་ཡང་སྐྱེ་བར་འགྱུར། སྲོག་ཆགས་རི་ལ་གནས་པ་གྲིབ་མ་
འཇིགས་བྱེད་དང་། མུན་པ་ཅན་དང་། ཟིན་པ་གནས་པ་དེ་དག་གི་དུད་འགྲོ་ཁ་གདོང་ཉམས་ཤིང་ཤི་ལ་ཐུག་པའི་རྣམ་པ་དེ་ལྟ་བུར་སྐྱེ་བར་འགྱུར་རོ། །གང་འོད་མའི་ཚལ་དུ་རླུང་གི་དྲུད་པས་མེ་འབྱུང་སྟེ། མེ་དེས་ཚེ་རབས་བཞི་སྟོང་དུ་སྲེག་ཅིང་འཚེད་དོ། །དེ་ལས་ཀྱང་ཐར་ནས་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེའི་ཆུང་མ་བསྲུངས་པར་མི་འགྱུར། གཞན་གྱི་ཆུང་མ་དང་ལྷན་ཅིག་འདུག་པར་འགྱུར། དེ་རྒྱལ་པོའམ། བློན་པོས་དེའི་རླིག་པ་འབྱིན་པར་བྱེད། ཁྱིམ་ཐམས་ཅད་ཡོངས་སུ་སྤངས་པར་འགྱུར། ལམ་པོ་ཆེའམ། བཞི་མདོའམ། གྲོང་ཁྱེར་རམ། གཞན་གྱི་སྒོར་རག་ལུས་པར་འགྱུར། རྟག་ཏུ་སྐོམ་སློང་ཞིང་བཀྲེས་ལ་ལུས་ཆུང་བར་འགྱུར། དེ་ཡང་དང་ཡང་དུ་ནད་ཆེན་པོས་ཐེབས་པར་འགྱུར་ཏེ། དེ་སྲང་ངམ་བཞི་མདོའམ་དུར་ཁྲོད་དུ་སྡུག་བསྔལ་མི་བཟད་པས་ཉམ་ཐག་ནས་འཆི་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ཝ་སྐད་འབྱིན་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་ཐམས་ཅད་མཁྱེན་པའམ། རང་སངས་རྒྱས་སམ། དགྲ་བཅོམ་པའམ། ཆོས་དང་འདུལ་བ་ལ་ངན་དུ་བརྗོད་ཅིང་ཆོས་མ་ཡིན་པ་ལ་ཆོས་ལྟ་བུར་བརྗོད་ལ་གཞན་དག་ཀྱང་ཆོས་མ་ཡིན་པ་ལ་རབ་ཏུ་འཇོག་པར་བྱེད། ཤིན་ཏུ་དགའ་བར་བྱེད། རབ་ཏུ་དགའ་བར་བྱེད་ལ། དེ་ཆོས་མ་ཡིན་པ་དེ་ཉིད་ལ་ཡང་དང་ཡང་དུ་ཆོས་ལྟ་བུར་སྟོན་པར་བྱེད་ཅིང་འཕགས་པ་རྣམས་ལ་རྟག་ཏུ་མི་སྙན་པར་བརྗོད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཝ་སྐད་འབྱིན་པར་སྐྱེ་བར་འགྱུར་རོ། །དེར་སྐྱེས་ནས་ཀྱང་སེམས་ཅན་དམྱལ་བ་ཡང་སོས་ལ་སོགས་པ་བདུན་གྱི་གནོད་པ་
བསྡུས་པ་དེ་དག་ཐམས་ཅད་རང་གི་ལས་ཀྱི་འབྲས་བུ་དང་འཐུན་པར་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་དེའི་ལས་ཀྱིས་བྱས་པའི་ཝ་ཁ་རབ་ཏུ་འབར་བ་རྣམས་ཀྱིས་ཤིན་ཏུ་གང་ལ་དེར་སྐྱེས་མ་ཐག་ཏུ་ཝ་མཆེ་བ་རབ་ཏུ་འབར་བ་རྣམས་རྒྱུག་སྟེ། འཕགས་པ་ལ་སྐུར་པ་འདེབས་པ་དེ་ལ་འཛིན་པར་བྱེད་དོ། །སྡིག་པ་བྱེད་པ་དེའི་མགོ་ཡང་གཞན། ལྕེ་ཡང་གཞན། གླད་པ་ཡང་གཞན། བྲང་ཞོལ་ཡང་གཞན། སྙིང་ཡང་གཞན། མཆེར་པ་ཡང་གཞན། རྒྱུ་མ་ཡང་གཞན། གཉེ་མ་ཡང་གཞན། ལྟོ་བ་ཡང་གཞན། སྟ་ཟུར་ཡང་གཞན། བརླའི་རུས་སྦུབས་ཀྱང་གཞན། བྱིན་པའི་སྦུབས་ཀྱང་གཞན། པུས་མོའི་ལྷ་ང་ཡང་གཞན། ལག་པ་དང་རྐང་པ་ཡང་གཞན། སོར་མོ་ཡང་གཞན། རྐང་པའི་སོར་མོ་ཡང་གཞན་དུ་ཁྱེར་ཏེ། དེ་ལྟར་ཡན་ལག་དང་ཉིང་ལག་ཞིགས་པ་ཐམས་ཅད་སོ་སོར་ཁྱེར་རོ། །དེ་ནས་ཡང་དེའི་སྡིག་པའི་ལས་ཀྱིས་བྱས་ཤིང་བསགས་པ་སོ་སོ་ཡང་དག་པ་མྱོང་བའི་འབྲས་བུ་སྐྱེ་བར་འགྱུར་ཏེ། དེ་ལྟར་ན་ཡུན་རིང་དུ་འབྲས་བུ་དེ་མྱོང་བར་འགྱུར་རོ། །དེ་གལ་ཏེ་ཡང་ཐར་ནས་གར་བབ་བབ་ཏུ་འབྲོས་པ་དང་། གཤིན་རྗེའི་མི་གཞན་དག་གིས་བཟུང་ནས་དེའི་ཁ་དེ་གདངས་ཏེ་ལྕེ་བཟུང་ནས་མཚོན་ཧུ་ལུ་དག་གིས་དུམ་བུ་དུམ་བུར་གཅོད་དོ། །བཅད་ནས་ཀྱང་ཡང་སྐྱེ་བར་འགྱུར་ཏེ། དེའི་ངག་མི་གཙང་བ་འབྱིན་པ་གང་གིས་འཕགས་པ་ལ་སྐུར་པ་བཏབ་པ་དང་། ཕ་རོལ་དག་ལ་ཆོས་མ་ཡིན་པ་ལ་ཆོས་ལྟ་བུར་བསྟན་པ་ནི་དེ་ལྟར་དེ་ཡུན་རིང་དུ་སྡུག་བསྔལ་གྱི་ཚོར་བ་ཚ་བ་དག་མྱོང་བར་འགྱུར་རོ། །དེ་གལ་ཏེ་ཡང་དེ་ལས་ཐར་ནས་མགོན་འདོད་པ། སྐྱབས་འདོད་པ། དཔུང་གཉེན་འདོད་པ། གར་བབ་བབ་ཏུ་འབྲོས་པ་དང་། དེའི་ལས་ཀྱིས་བྱས་པ་གཤིན་རྗེའི་མི་དག་འབྱུང་བར་འགྱུར་ཏེ། དེ་དག་གིས་ཡང་བཟུང་ངོ་། །བཟུང་ནས་ཀྱང་ཕྱིན་ཅི་ལོག་ཏུ་སྨྲ་བ་དང་། གཡོ་ཐབས་སྨྲ་བ། སྡིག་པ་སྨྲ་བ། ཆོས་ངན་པའི་ཆོས་ཀྱིས་སེམས་
ཅན་དག་ལམ་བཟང་པོ་ལས་སྐྱོད་པར་བྱེད་ཅིང་སྨྲ་བ་དེ་དེ་རྣམས་ཀྱིས་བཟུང་སྟེ་ཁ་གདངས་ནས་དེའི་ལྕེ་ཕྱུང་ངོ་། །དེ་ཡང་འཇམ་ཞིང་ཟངས་ཀྱི་མདོག་ལྟར་དམར་བ་རྒྱང་གྲགས་ཙམ་དུ་སྐྱེས་ཏེ། དེ་ཡང་ལྕགས་ཀྱི་ས་གཞི་རབ་ཏུ་འབར་བ་ལ་ལྡག་ཏུ་འཇུག་གོ །ལྡག་ཏུ་བཅུག་ནས་ཐོང་གཤོལ་གྱི་སོ་རྣོ་ཞིང་འབར་ལ་རབ་ཏུ་འབར་བ་བརྒྱ་དང་། རྨོན་གླང་རྨིག་པ་འདོར་བ་རྣོ་ཞིང་རབ་ཏུ་འབར་བ་ཐོང་མཁན་དང་ལྡན་པ་རྣམས་ཀྱིས་དོན་མ་ཡིན་པ་བྱེད་པ་འཇིག་རྟེན་ཕ་རོལ་ཏུ་འགྲོ་བའི་དབང་དུ་གྱུར་ཅིང་དོན་མ་ཡིན་པའི་སྐྱེ་གནས་ལྕེར་མིང་བཏགས་པ་དེ་ལ་རྨེད་པར་བྱེད་དེ། དེ་ལྟར་དེ་ཡུན་རིང་དུ་འཚེད་ཅིང་སྲེག་གོ །དེའི་ལྕེ་གནོད་པ་དང་ཕྲད་པ་དེ་ངུ་བར་བྱེད། འཁུན་པར་བྱེད། ཀུ་ཆོ་འདོན་པར་བྱེད། ངུ་སྐད་འབྱིན་པར་བྱེད། མིག་ཡོངས་སུ་འགྱུར་བར་བྱེད་དོ། །དེ་ལྟར་དེ་ངུ་སྐད་འབྱིན་པ་ན་འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། སྡིག་ཚིག་ཡིད་ལ་བསམས་ནས་སུ། །འཕགས་ལ་སྨོད་གང་དམྱལ་བར་ནི། །བྱེ་བ་ལྔ་བཅུ་རྩ་དྲུག་དང་། །དེ་བཞིན་བྱེ་བ་ཕྲག་དྲུག་གནས། །ཆོས་མ་ཡིན་པ་ཆོས་ཚུལ་དང་། །སྡིག་བྱེད་ལེགས་པའི་ཚུལ་དུ་ནི། །ཁྱོད་ཀྱིས་སྔོན་ནི་གང་སྨྲས་པ། །མེ་དེས་ཁྱོད་ལ་སྐྲག་པར་བྱེད། །ཇི་ལྟར་སེམས་ཅན་ཁྱད་པར་ཅན། །ཆོས་འདོད་དག་ལས་ཁྱོད་ཀྱིས་སུ། །ངེས་པར་ངན་འགྲོར་འགྲོ་བ་ཡིན། །བདེ་མེད་སྡིག་པ་རབ་ཏུ་སྨྲས། །གང་ཞིག་རྟག་ཏུ་བརྫུན་སྨྲ་ཞིང་། །ཆོས་མ་ཡིན་སྨྲ་ཆོས་ལྡན་མིན། །དེ་ཡུལ་ཀུན་གྱི་རྐུན་མ་ཡིན། །རྐུན་མ་ཐ་མལ་རྐུན་མ་མིན། །ཆོས་སྨྲ་བ་ཡི་མི་དག་གང་། །ཆོས་ཉིད་ལ་ནི་སྤྱོད་པ་སྟེ། །གང་དུ་འགྲོ་བ་གནོད་མེད་པའི། །རྟག་པའི་གནས་སུ་དེ་འགྲོ་འོ། །འཁྲུག་མེད་མི་ཟད་ནོར་ཡིན་ཏེ། །སྐྱེ་བོ་ཀུན་གྱི་ཇོ་བོར་ཆེ། །བདེན་པ་མཐོ་རིས་སྐས་ཡིན་ཏེ། །དེ་ཉིད་མྱ་ངན་འདས་པའི་སྒོ། །དེ་ལྟར་བདེན་པ་མཆོག་བརྟགས་པ། །རྟག་ཏུ་ཆོས་ཤེས་དྲན་པ་ནི། །
མྱ་ངན་དགའ་བ་མེད་གནས་སུ། །མི་མཆོག་འདི་ནི་འགྲོ་བར་འགྱུར། །ཁྱོད་ཀྱིས་ཆོས་ནི་རྣམ་སྤངས་པ། །མཁས་པ་རྣམས་ཀྱིས་སྨད་པ་ཡིན། །ཁྱོད་ཀྱིས་མི་བཟད་གང་བསྒྲགས་པ། །དེ་འདིར་ཁྱོད་ལ་རྣམ་པར་འཚེད། །དེ་ལྟར་འཕགས་པ་ལ་སྐུར་པ་འདེབས་པའི་མི་དེ་གཤིན་རྗེའི་མི་དེ་རྣམས་ཀྱིས་རྗེས་སུ་བསྟན་ནས་གནོད་པ་སྔ་མ་དག་པས་མང་བར་གནོད་པར་བྱེད་དེ། གང་དེའི་མིང་ཡང་ཤེས་པར་སླ་བ་མ་ཡིན་ནོ། །འཕགས་པ་ལ་ངན་དུ་བརྗོད་པ་དེ་ཉིད་ཀྱི་གནོད་པ་མི་བཟད་པ་གང་ཡིན་པ་རྒྱུ་དང་འཐུན་པར་འབྲས་བུ་འབྱུང་བ་ནི་དེ་བཞིན་གཤེགས་པས་གསུང་སྟེ། དེ་ལྟར་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚེད་དོ། །དེ་སེམས་ཅན་དམྱལ་བ་དེ་ལས་ཐར་ན། ལས་དེ་དང་རྒྱུ་འཐུན་པར་ཚེ་རབས་འབུམ་དུ་ཡི་དགས་བཟླུམས་པའི་ནང་དུ་སྐྱེ་བར་འགྱུར་ལ་གང་དག་གི་ལུས་ཤའི་གོང་བུ་ལྟར་བཟླུམས་པར་འགྱུར་ཏེ། མཐོང་བ་མེད། ཐོས་པ་མེད། མནོམ་པ་མེད། སྨྲ་བ་མེད་དོ། །དེ་དེ་ལས་ཐར་ནས་ཀྱང་ཚེ་རབས་སུམ་སྟོང་དུ་ལྗན་ལྗིན་གྱི་སྲིན་བུར་འགྱུར། དེ་ལས་ཀྱང་ཐར་ནས་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་ཚེ་རབས་ལྔ་བརྒྱར་དབུལ་ཞིང་ཚིག་ཀུན་གྱིས་ཡིད་མི་ཆེས་པ་དང་། བརྗེད་ངས་པ་དང་། ལྐུགས་པ་དང་། འོན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ལྕགས་ཀྱི་ཅེ་སྤྱང་གི་ཟས་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན།གང་གིས་ཤིན་ཏུ་འཁྲུགས་པའི་སེམས་དང་སེམས་རྩུབ་མོས་བསམས་བསམས་ཏེ། དགའ་ནས་དགེ་འདུན་གྱི་གཙུག་ལག་ཁང་ལ་མེ་སྦར་ལ་དེར་ཡང་སངས་རྒྱས་ཀྱི་སྐུ་གཟུགས་བསྲེགས་ཤིང་དགེ་འདུན་གྱི་གནས་
ན་མལ་སྟན་དང་། གོས་དང་། ནོར་དང་། འབྲུའི་འབྱོར་བ་མང་པོ་དག་མེའི་ཉེས་པས་ཚིག་ལ་ཚིག་པ་དེ་ལ་ཡང་རྗེས་སུ་དགའ་བར་བྱེད་ཅིང་འགྱོད་པར་མི་བྱེད། གཞན་དག་ཀྱང་དེ་ཉིད་ལ་འཇོག་པར་བྱེད། ཤིན་ཏུ་དགའ་བར་བྱེད། ཡང་དག་པར་རབ་ཏུ་དགའ་བར་བྱེད་ལ་ལས་དང་ལས་ཀྱི་ཉེར་བསྡོགས་དང་། ལས་ཀྱི་མཇུག་དང་ལྡན་པར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ལྕགས་ཀྱི་ཅེ་སྤྱང་གི་ཟས་ཞེས་བྱ་བར་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་སྡུག་བསྔལ་བསྡུས་པ་གང་ཡིན་པ་དེ་དག་ཐམས་ཅད་འབྱུང་སྟེ། ཐམས་ཅད་སྟོང་འགྱུར་དུ་འབྱུང་ངོ་། །ཁྱད་པར་དུ་འབྱུང་བ་ནི་ཇི་ལྟར་ལས་ལྕི་བས་གནོད་པ་ཡང་ལྕི་བར་འགྱུར་ཏེ། གང་གནོད་པའི་རྒྱུ་དང་འཐུན་པར་འབྲས་བུ་འབྱུང་ཞིང་ས་བོན་དང་འཐུན་པར་འབྲས་བུ་འབྱུང་ངོ་། །འདི་ལྟར་དེར་སྐྱེས་པའི་ལས་ཀྱི་རྐྱེན་གྱིས་ལུས་ཐམས་ཅད་ཀུན་ནས་རབ་ཏུ་འབར་བར་འགྱུར་ལུས་དེ་ལས་མགོ་བཅུ་གཅིག་བྱུང་བ་དཔག་ཚད་བཅུ་བཅུ་ཡོད་དེ། སེམས་ཅན་དམྱལ་བ་ཐམས་ཅད་པས་ཤིན་ཏུ་དྲག་ཅིང་མི་བཟད་པ་འབྱུང་ངོ་། །དེའི་དབུས་ན་འདུག་པའི་མི་རི་ལྟ་བུར་ཀུན་ནས་རྣམ་པ་ཐམས་ཅད་དུ་རབ་ཏུ་འབར་ཀུན་ཏུ་རབ་ཏུ་འབར་ཏེ། བཀྲེས་པ་དང་སྐོམ་པས་གདུངས་པའི་ལུས་དག་འཚེད་དོ། །སྲེག་གོ །གསོད་དོ། །ཀུན་ནས་ལག་པ་གྱེན་དུ་བསྒྲེང་སྟེ། དེའི་ལག་པ་དེ་ཡང་དཔག་ཚད་ལྔ་བརྒྱ་ཙམ་དུ་འབར་བའི་ཕྲེང་བས་འཁྲུགས་ཤིང་དེ་རྩྭའི་རི་ལྟར་སྲེག་གོ །དེ་ཀུན་ནས་སྲེག་པ་ན་ངུ་སྐད་འབྱིན་འོ་དོད་འབོད་ཀུ་ཆོ་འདོན་ཅིང་ཡོངས་སུ་སྨྲེ་སྔགས་འདོན་ཏོ། །དེ་ངུ་སྐད་འདོན་པ་ན་མེ་ལྕེ་དེས་དེའི་ཁ་ཐམས་ཅད་འགེངས་པར་བྱེད་དོ། །དེའི་ཁ་ཕྱེ་བ་དང་། ཕྱི་རོལ་དུ་ཀུན་ནས་རབ་ཏུ་འབར་ཞིང་རྟག་ཏུ་མེ་ལྕེ་གཅིག་ཏུ་གྱུར་པ་ཡང་དང་ཡང་དུ་འཕེལ་བའི་མེས་སྲེག་པ་ན་ཡུན་རིང་དུ་འཚེད་དོ། །དེ་གལ་ཏེ་ཡང་དེ་ལས་ཐར་ནས་གར་བབ་བབ་ཏུ་འབྲོས་སོ། །མགོན་འདོད་པ། སྐྱབས་འདོད་པ། དཔུང་
གཉེན་འདོད་པ། བདེ་བ་འདོད་པ་དེ་འབྲོས་པ་དང་། ལེགས་པར་བྱས་པ་དང་། ཉེས་པར་བྱས་པའི་ལས་ཀྱིས་འབྲེལ་པ་སེམས་ཅན་དམྱལ་བ་དེ་ལས་གནས་གཞན་དུ་འབྱུང་སྟེ། མཚན་མོ་རི་ལ་ཆར་འབབ་པའི་ཆུ་ལྟར་གནོད་པ་འཕེལ་ལོ། །དེའི་ལྕགས་ཀྱི་རྡོ་རྒྱང་གྲགས་ཙམ་རབ་ཏུ་འབབ་སྟེ་དེ་དག་གིས་དེའི་གླད་པ་ལ་སོགས་པ་ནས་རྐང་པའི་བར་ཇི་ལྟར་བཅའ་སྒ་བཏགས་པ་ལྟ་བུར་དེ་ལྟར་ཕྱེ་མར་བྱེད་དེ་དེའི་ལུས་མངོན་པ་མེད་པར་བྱེད་དོ། །དེ་ལྟར་དེ་ལྕགས་ལས་བྱས་པའི་རྡོ་མི་བཟད་པ་ཆར་ལྟར་འབབ་པས་བཏགས་པ་ན་དེ་ནས་ཡང་སླར་འཚོ་བར་འགྱུར་ཏེ། ཅེ་སྤྱང་གི་མཆེ་བ་རབ་ཏུ་འབར་བ་དག་གིས་དེའི་ལུས་བཅའ་སྒ་ལྟར་སྲབ་མོར་བྱས་ཤིང་ཟའོ། །དེ་ནས་ཡང་བྱུང་ཞིང་སྐྱེས་ནས་ཅེ་སྤྱང་མི་བཟད་པ་དེ་དག་གིས་ཟ་སྟེ། དེ་ལྟར་ཡང་ཡུན་རིང་དུ་འཚེད་ཅིང་སྲེག་གོ །སླར་ཡང་སྐྱེ་བར་འགྱུར་ཏེ། དེ་ལྟར་དེ་ལས་དེ་མྱོང་བར་འགྱུར། སོ་སོ་ཡང་དག་པར་ཚོར་བར་འགྱུར། དེ་སྡུག་བསྔལ་ཚ་བ་རྩུབ་པ་གནོད་པ་དག་མྱོང་བར་འགྱུར་ཏེ། རང་གིས་བྱས་ཤིང་གཞན་གྱིས་མ་བྱས་པ་མ་བྱས་པ་དང་ཕྲད་པ་མ་ཡིན། བྱུང་བ་རྣམས་ཀྱིས་བྱས་པ་ཆུད་ཟ་བ་མ་ཡིན། རྒྱུ་མེད་པ་མ་ཡིན། འདོད་རྒྱལ་ལས་བྱུང་བ་མ་ཡིན། རྒྱུ་དང་རྐྱེན་མི་འཐུན་པ་ལས་བྱུང་བ་མ་ཡིན། བྱེད་པ་པོས་བྱིན་གྱིས་མ་བརླབས། ཚོར་བ་པོས་བྱིན་གྱིས་མ་བརླབས་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་རང་གི་རྒྱུ་རྐྱེན་གྱིས་བྱས་པ་མྱོང་བར་འགྱུར་རོ། །དེ་སེམས་ཅན་དམྱལ་བ་དེ་ལས་ཐར་ན་ལས་དེ་དང་རྒྱུ་འཐུན་པར་ཚེ་རབས་སྟོང་དུ་ཡི་དགས་མཆོག་ཏུ་མི་བཟད་པར་སྨིན་ཏེ། ལུས་ཀུན་ནས་རབ་ཏུ་འབར་ཞིང་ངུ་སྐད་འབྱིན་ཀུ་ཆོ་འདོན་པ་ན་སྐྱེ་བོ་ཀུན་གྱི་གནས་གྲོང་དུ་མཚན་མོ་ངུ་ཞིང་ཉིན་པར་ཡང་ཉི་མའི་འོད་མདག་མེ་ཆར་ལྟར་འབབ་པས་ཇི་སྲིད་དུ་དེའི་སྡིག་པའི་ལས་ཀྱི་མེ་འབྱུང་བ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྲེག་པར་བྱེད་དོ། །དེ་ལས་ཀྱང་ཐར་ན་དགོན་པའི་དུད་འགྲོ་རྐང་པ་བརྒྱ་བར་འགྱུར་ཏེ། རྟག་ཏུ་བཀྲེས་པ་དང་། སྐོམ་
པས་གདུངས་ལ་ཁ་གཉིས་ཀྱིས་བདག་ཉིད་ཉོན་མོངས་པར་འདྲེན་ཅིང་དེའི་ལུས་ཐམས་ཅད་སྲིན་བུ་མར་ཀོ་ཏ་ཀ་རྣམས་ཀྱིས་ཟ་བར་བྱེད་དོ། །དེ་གལ་ཏེ་ཡང་དུད་འགྲོའི་སྐྱེ་གནས་དེ་ལས་ཐར་ལ་གལ་ཏེ་མི་རྣམས་དང་སྐལ་བ་མཉམ་པར་སོ་སོར་མྱོང་བར་འགྱུར་བའི་ལས་ཀྱིས་མིར་སྐྱེས་ན། དེ་སྤྲིན་ནག་པོ་འདྲ་བར་འགྱུར་ཞིང་ཉམས་པར་གྱུར་པ་ཡོངས་སུ་སྤངས་པ་དབུལ་བ་ཡུན་རིང་དུ་རྔ་མོང་གིས་ཉོན་མོངས་ཤིང་གཞན་ལ་རག་ལས་པ་མང་ཞིང་ལུས་བཀྲེས་པ་དང་། སྐོམ་པས་གདུངས་ལ་དེའི་སྲོག་གི་འཚོ་བ་ཡང་གཞན་ལ་རག་ལས་པར་འགྱུར་ཏེ། དེ་ལྟར་ཚེ་རབས་སྟོང་དུ་ཡི་དགས་རྣམས་དང་། ཚེ་རབས་སྟོང་དུ་དུད་འགྲོ་རྣམས་དང་། གནས་སྐབས་དེ་དག་གི་མིར་འགྱུར་བ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅུ་བདུན་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ལྟོ་གནག་ཅེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན།གང་གིས་སངས་རྒྱས་ཀྱི་དཀོར་ནོར་མ་བྱིན་པར་བླངས་ཏེ། དེ་ལ་ཡང་སྤྱོད་ལ་སྤྱད་ནས་ཀྱང་དག་པར་མི་བྱེད། ལས་དེའི་འབྲས་བུ་ལ་ཡིད་མི་ཆེས་ཏེ། དེ་ནས་ཡང་སྤྱོད་པར་བྱེད་གཞན་དག་ཀྱང་དེ་ཉིད་ལ་རབ་ཏུ་འཇོག་པར་བྱེད། སངས་རྒྱས་ཀྱིར་གཏོགས་པ་སངས་རྒྱས་ཀྱི་དཀོར་ནོར་ཡོན་ལ་ཡང་བར་སེམས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ལྟོ་གནག་ཏུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པ་བདུན་གྱི་གནོད་པ་དེ་དག་ཐམས་ཅད་བརྒྱ་འགྱུར་དུ་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར་ལུས་བཀྲེས་པ་དང་སྐོམ་པས་གདུངས་ཏེ། རང་གི་ཤ་ཉིད་ལ་ཟའོ། །དེ་ནས་ཡང་སླར་སྐྱེ་བར་འགྱུར་ཏེ། དེ་ལྟར་དེ་ལོ་བརྒྱ་སྟོང་བྱེ་
བ་ཕྲག་དུ་མར་ཟ་ཞིང་སླར་སྐྱེ་བར་འགྱུར་རོ། །སྡུག་བསྔལ་ཉིས་འགྱུར་གྱིས་གདུངས་པ་དེའི་སྡུག་བསྔལ་གྱི་ལས་བྱས་པ་དེ་བརྒྱ་འགྱུར་དུ་འགྱུར་ཏེ། བཀྲེས་པ་དང་སྐོམ་པའི་སྡུག་བསྔལ་གྱིས་ཀྱང་སྡུག་བསྔལ་ལོ། །རང་གི་ལུས་ལས་བྱུང་བའི་སྡུག་བསྔལ་གྱིས་ཀྱང་སྡུག་བསྔལ་ཏེ། དེ་ལྟར་དེ་རང་གི་ཤ་དག་ལ་ཟ་བར་བྱེད་ཅིང་གར་བབ་བབ་ཏུ་འབྲོས་པ་དང་། དེ་སྦྲུལ་པོ་ཆེ་ལྟོ་གནག་ལ་མདོག་སྤྲིན་ལྟར་འདུག་པ་དང་ཕྲད་དེ། དེས་དེའི་སེན་མོ་ལ་སོགས་པ་དང་རུས་པ་ལ་སོགས་པ་མཐར་ཆགས་ཀྱིས་ཟའོ། །དེ་ནས་སོས་པ་དང་ཡང་ཟ་སྟེ། དེ་ལྟར་གང་ཞིག་ཐམས་ཅད་ཀྱི་མཆོག་ཏུ་གྱུར་པ་སངས་རྒྱས་ཀྱི་མ་རུང་བར་བྱས་པའི་ལས་དེས་ཡུན་རིང་དུ་སྡུག་བསྔལ་མྱོང་བར་འགྱུར་རོ། །དེ་གལ་ཏེ་དེ་ལས་ཐར་ནས་ཕྱོགས་སེང་ལྡེང་གི་མདག་མ་རབ་ཏུ་འབར་བའི་གོང་བུ་བསགས་པ་དཔག་ཚད་ཙམ་གྱི་ནང་དུ་འཇུག་སྟེ། དེ་མདག་མ་དེའི་ནང་དུ་སོང་ནས་ལོ་བརྒྱ་སྟོང་བྱེ་བ་ཕྲག་དུ་མར་སྲེག་ཅིང་འཚེད་དོ། །དེ་ནས་ཡང་སླར་སྐྱེ་བར་འགྱུར་ཏེ། དེ་ལྟར་དེས་མཐོང་ནས་གལ་ཏེ་ཐར་ན་མགོན་འདོད་པ། སྐྱབས་འདོད་པ། དཔུང་གཉེན་འདོད་པའི་དྲུང་དུ་གཤིན་རྗེའི་མི་དག་འོངས་ནས་ཕྲ་སྐམ་རབ་ཏུ་འབར་བ་དེ་དག་གིས་བཟུང་ངོ་། །དེས་བཟུང་ནས་ལྕགས་ཀྱི་བུམ་པ་འབར་བའི་ནང་དུ་བཅུག་སྟེ། དེ་དེར་མོན་སྲན་དང་། སྲན་ཆུང་བཞིན་དུ་སྲེག་ཅིང་འཚེད་ལ་ཡོངས་སུ་སྐོལ་ཏེ། སྟེང་འོག་ཏུ་འབྱུང་བའི་སྡུག་བསྔལ་ཤིན་ཏུ་འཇིགས་ཤིང་ཚ་བ་མྱོང་བ་ནི་དེའི་དཔེ་བྱ་བར་ཡང་སླ་བ་མ་ཡིན་ནོ། །སེམས་ཅན་དམྱལ་བ་པ་དེའི་སྡུག་བསྔལ་ནི་ཁམས་གསུམ་ཐམས་ཅད་ཀྱི་རྒྱུ་འབྲས་འཐུན་པས་ཀྱང་བརྒྱ་དང་སྟོང་གི་ཆར་ཡང་མི་ཕོད་དེ། དེ་ལྟར་དེ་གནོད་པ་བརྒྱ་ཕྲག་སྟོང་ཡོད་ལ་སྡུག་བསྔལ་གྱི་རྒྱ་མཚོ་ཤུགས་དང་ལྡན་པ་ཤིན་ཏུ་ཚ་བར་བདས་པ་ན། རང་གི་ལས་ཀྱི་འབྲས་བུ་མངོན་སུམ་དུ་གྱུར་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚེད་པར་བྱེད་དོ། །དེ་ཕྱིས་སེམས་ཅན་དམྱལ་བ་ལྟོ་གནག་དེ་ལས་ཐར་བར་
འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་ཉིས་བརྒྱར་ཡི་དགས་ཁ་ཟས་མི་གཙང་བ་ཟ་བ་རྣམས་སུ་སྐྱེ་བར་འགྱུར། དེ་གལ་ཏེ་དེ་ལས་ཐར་ནས་ཀྱང་ཚེ་རབས་བདུན་བརྒྱར་དུད་འགྲོ་སྐྱུགས་པ་ཟ་བར་སྐྱེ་བར་འགྱུར། དེ་ལས་ཐར་ནས་ཀྱང་གལ་ཏེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་ཡང་བ་ལང་རྫིར་གྱུར་ནས་མི་གཙང་བ་ཟ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ལུས་ཞུམ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ཆོས་ཀྱི་དཀོར་ནོར་ལ་སྤྱད་ཅིང་བྱས་པ་བསགས་ལ། ལས་དང་ལས་ཀྱི་ཉེར་བསྡོགས་དང་ལས་ཀྱི་མཇུག་དང་ཡང་བཅས་པར་གྱུར། གཞན་དག་ཀྱང་དེ་ལ་གཟེངས་སྟོད་པར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ལུས་ཞུམ་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་དེ་དག་ཐམས་ཅད་བརྒྱ་འགྱུར་དུ་འབྱུང་སྟེ། གང་དེ་དག་གི་མིང་ཡང་ཤེས་པར་སླ་བ་མ་ཡིན་ནོ། །ཁྱད་པར་དུ་འབྱུང་བ་ནི་འདི་ལྟར་ལྕགས་ཀྱི་ལྗོན་ཤིང་རབ་ཏུ་འབར་ཞིང་རབ་ཏུ་མཆེད་པ་གཉིས་འབྱུང་སྟེ། དེ་དག་ཀྱང་ལས་ཀྱི་རླུང་གི་ཤུགས་དྲག་པོས་ཕན་ཚུན་འདྲུད་པར་བྱེད་དོ། །དེ་གཉིས་ཀྱི་དབུས་སུ་སེམས་ཅན་དམྱལ་བ་པའི་ལུས་དེ་གཡས་གཡོས་སུ་ཤུགས་དྲག་པོ་ཀུན་གྱིས་གནོད་པར་བྱེད། རྣམ་པར་ཞུམ་པར་བྱེད། ཏ་ལའི་འདབ་མ་ལྟར་བྱེད་དོ། །དེ་ནས་ཡང་སླར་འབྱུང་སྟེ་ཡང་རྣམ་པར་ཞུམ་པར་བྱེད་དོ། །དེ་ཚལ་ཆེན་པོའི་ཤིང་ལྗོན་པ་ཤིན་ཏུ་མི་བཟད་པ་གཉིས་ཀྱི་བར་དུ་བཅུག་ནས་ཕན་ཚུན་བསྒུལ་བ་དང་ལུས་ལས་བྱུང་བའི་སྡུག་བསྔལ་མྱོང་བར་འགྱུར་ལ། གལ་ཏེ་མ་བསྒུལ་ན་རྣམ་པར་
ཞུམ་པར་བྱས་པ་ལྟུང་བར་འགྱུར་རོ། །དེ་དེ་ལས་ལྟུང་བ་དང་། ལྕགས་ཀྱི་བྱ་རྡོ་རྗེའི་མཆུ་ཅན་དག་ཤིང་དེ་དག་གི་ཡལ་ག་ལ་གནས་ཏེ། དེ་དག་གིས་སེམས་ཅན་དམྱལ་བ་པ་དེའི་མགོ་དང་གླད་པ་བཏོག་བཏོག་ནས་འབིགས་པར་བྱེད་དོ། །ཕུག་ནས་མིག་དག་ལ་ཟ་བར་བྱེད་དོ། །སྙིང་རྗེ་རྗེ་སྐད་དུ་ངུ་སྐད་འབྱིན་ཅིང་སྨྲེ་སྔགས་འདོན་པ་ན་དེའི་མིག་ཟོས་ནས་མགོ་དང་གླད་པ་འབིགས་སོ། །དེ་ཕུག་ནས་གླད་རྒྱས་ལ་ཟའོ། །གླད་རྒྱས་ཀྱང་ཟོས་ནས་སྙིང་གཤེག་པར་བྱེད་དོ། །དེ་ཡང་གཤེགས་ནས་ནང་དུ་སོང་སྟེ། ཁྲག་འཐུང་ངོ་། །འཐུངས་ནས་རྒྱུ་མ་ལ་ཟའོ། །དེ་དག་ཀྱང་ཟོས་ནས་མཆེར་པ་ལ་ཟའོ། །མཆེར་པ་ཟོས་ནས་ལོང་ཀ་ལ་ཟའོ། །དེ་དག་ཀྱང་ཟོས་ནས་མདོམས་ལ་ཟའོ། །བརླའི་སྦུབས་ལ་ཡང་ཟའོ། །པུས་མོའི་ལྷ་ང་ལ་ཡང་ཟའོ། །རྐང་པ་དག་གི་སོར་མོ་ལ་ཡང་ཟ་ལ་དེ་ལྟར་དེ་སྡུག་བསྔལ་དྲག་པོ་དེ་དག་ཡུན་རིང་པོ་ལོ་བགྲང་གིས་མི་ལང་བར་མྱོང་བར་འགྱུར་ཏེ། གང་གི་མིང་ལོ་བརྒྱར་ཡང་ཤེས་པ་སླབ་མ་ཡིན་ནོ། །ཕྱོགས་གཅིག་ཅིག་ཤེས་པར་བྱ་ན། ཇི་ལྟར་རྒྱ་མཚོའི་ཆུ་ཁྱོར་གང་བླངས་པ་དེའི་ཕྱོགས་ཙམ་དུ་བརྗོད་པ་དེ་བཞིན་དུ་འདི་ཡང་ཕྱོགས་གཅིག་ཙམ་ཞིག་བརྗོད་དེ། དེ་ལྟར་དེ་ཇི་སྙམ་དུ་དེའི་སྡིག་པའི་ལས་བྱས་ཤིང་བསགས་པ་སོ་སོར་མྱོང་བར་འགྱུར་བ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་དེ་དག་མྱོང་བར་འགྱུར་རོ། །དེ་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་སྟོང་དུ་ཡི་དགས་མཆིལ་མ་ཟ་བ་རྣམས་སུ་སྐྱེ་བར་འགྱུར་རོ། །དེ་གལ་ཏེ་སྲོག་གིས་འཚོ་བ་ཙམ་དུ་འགྱུར་ཞིང་ལུས་ཤིན་ཏུ་བཀྲེས་པ་དང་། སྐོམ་པས་
གདུངས་པ་ཡི་དགས་ཀྱི་འཇིག་རྟེན་དེ་ལས་ཤི་ནས་ཀྱང་བ་ཚྭའི་ཆུའི་རྒྱ་མཚོའི་ནང་དུ་དུད་འགྲོ་ཉར་སྐྱེ་བར་འགྱུར། རྟག་ཏུ་རྒྱ་མཚོའི་ཆུའི་གསེབ་ཀྱི་ནང་ན་སྤྱོད་པའི་ཆུ་སྲིན་ན་ཀྲའམ། མ་ཀ་རའམ། རུས་སྦལ་དུ་འགྱུར། ཚེ་རབས་སྟོང་དུ་ཀུན་དུ་རྟག་ཏུ་བཀྲེས་པ་དང་། སྐོམ་པས་གདུངས་ཤིང་བ་ཚྭའི་ཆུ་ལ་ཡོངས་སུ་སྤྱོད་པར་འགྱུར། དེ་ལས་ཀྱང་ཐར་ནས་གལ་ཏེ་སོ་སོར་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དེའི་ཚེ་ཡུལ་གཉིས་ཀྱི་བར་དུ་སྐྱེ་བར་འགྱུར་ཏེ། གང་དུ་ས་བདག་གཉིས་ཀྱི་མཚམས་ཕན་ཚུན་ཐབ་མོ་འགྱེད་པའི་ཡུལ་དུ་སྐྱེ་བར་འགྱུར་རོ། །དེར་དེའི་ནོར་རྫས་བསགས་བསགས་པ་དེ་དག་གཞན་གྱིས་འཕྲོག་པར་བྱེད་ཅིང་རྒྱལ་པོའི་ཆད་པས་ཀྱང་དེ་བཟུང་ངོ་། །བཟུང་ནས་ཀྱང་བཙོན་རར་འཇུག་པར་འགྱུར། ལུས་བཀྲེས་པ་དང་སྐོམ་པས་གདུངས་པར་འགྱུར། སྲོག་ཙམ་གྱིས་འཚོ་བ་གཞན་ལ་རག་ལས་ཤིང་ཤིན་ཏུ་སྡུག་བསྔལ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་རྨི་ལམ་འཇིགས་བྱེད་སྟོན་ཅེས་བྱ་བར་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ལོ་ཉེས་བྱུང་བའི་ཚེ་དགེ་འདུན་གྱི་འདུ་བའི་སྒོ་ལ་དགེ་སློང་ཟས་འདོད་པ་དག་ཉེ་བར་ལྷགས་པའི་ཟས་དང་སྐོམ་ཟོས་ཤིང་ཉེ་བར་སྤྱད་ལ་མི་སྡིག་པ་བྱེད་པས་དེ་ཡང་ཕྲོགས་ཏེ་ཁ་ཟས་དེ་དག་ཀྱང་བཅད། ཁ་ཟས་བཅད་པས་དེ་དག་གི་ལུས་ལ་གནོད་ཅིང་དགེ་བའི་ཆོས་ཡིད་ལ་བྱེད་མི་ནུས་པར་གྱུར། བསམ་གཏན་ལ་དགའ་བ་མེད་པར་གྱུར། སེམས་མི་སྦྱོང་བར་གྱུར། མི་སྡིག་པ་བྱེད་པ་དེ་ཡང་དགེ་འདུན་གྱི་འདུ་བའི་སྒོ་དེ་ཕྲོགས་ནས་འཆགས་པར་མི་བྱེད་ཅིང་འགྱོད་པར་མི་བྱེད་ལ་དེ་ནས་སླར་ཡང་འདུ་བའི་སྒོ་དེ་ཉིད་ལ་མི་དགེ་བའི་ལས་མངོན་པར་བྱེད་པར་དགའ་ཞིང་གཞན་དག་ཀྱང་དེ་ཉིད་ལ་བྱེད་དུ་འཇུག་རྗེས་སུ་དགའ་བར་བྱེད་ཅིང་དེའི་ལས་དང་ལས་ཀྱི་ཉེར་བསྡོགས་དང་། ལས་ཀྱི་མཇུག་བྱས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྨི་ལམ་འཇིགས་བྱེད་སྟོན་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་
ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་ངོ་། །ཁྱད་པར་དུ་འབྱུང་བ་ནི་བྱས་པ་བརྒྱ་འགྱུར་དུ་འབྱུང་སྟེ། གང་དེ་ལྟར་སེམས་ཅན་ཐམས་ཅད་ཀྱི་གནོད་པ་དེ་དག་དེ་ལྟར་མི་བཟད་པ་དེ་ལྟར་རྩུབ་པ་དེ་ལྟར་བཟོད་པར་དཀའ་བ་དེ་ལྟར་སྡུག་བསྔལ་མཐའ་མེད་པ་རང་གིས་བྱས་པའི་ལས་ལས་བྱུང་ཞིང་བསླང་བ་དེའི་མིང་ཡང་ཤེས་པར་སླ་བ་མ་ཡིན་ཏེ། དེའི་ཕྱོགས་ཙམ་ཞིག་བརྗོད་ན་འདི་ལྟ་སྟེ། རྒྱ་མཚོ་ལས་ཆུ་སྐྱོར་གང་བླངས་པ་དེ་བཞིན་དུ་དེ་བརྗོད་དོ། །ཇི་ལྟར་མི་དག་གི་རྨི་ལམ་དུ་འཇིགས་པ་དག་མཐོང་བ་དེ་བཞིན་དུ་སེམས་ཅན་དམྱལ་བ་རྨི་ལམ་འཇིགས་བྱེད་སྟོན་དེར་ཡང་། གཤིན་རྗེའི་མི་ལག་ན་ཐོ་བ་སྣ་ཚོགས་ཐོགས་པ་དེ་དག་འབྱུང་སྟེ། སྡིག་པ་བྱེད་པའི་མི་དེ་བཟུང་ནས་ལྕགས་ཀྱི་ས་གཞིའི་སྟེང་དུ་འཇོག་པར་བྱེད་དོ། །ལྕགས་ཀྱི་ལུང་པའི་ནང་དུ་ཡང་དེའི་ལུས་བཅུག་ནས་གཏུན་ཤིང་གིས་ཕྱེ་མར་རློག་སྟེ་རུས་པ་དེ་འདི་ལྟར་སྦྲང་རྩིའི་ཚིགས་མའི་གོང་བུ་ལྟར་བྱེད་དོ། །དེ་ནས་ཡང་སླར་སྐྱེ་བར་འགྱུར་ཏེ། ཡང་ཐོ་བ་རྣམས་ཀྱིས་ཕྱེ་མར་རློག་སྟེ། དེའི་སྡིག་པའི་ལས་བྱས་ཤིང་བསགས་པ་སོ་སོ་ཡང་དག་པ་མྱོང་བར་འགྱུར་བའི་མཐུས་འབྲས་བུ་དེ་ཉེ་བར་སྤྱོད་དོ། །ལུང་པ་གནོད་པ་དེ་ལས་ཐར་ན་གལ་ཏེ་ཡང་རང་གི་ལས་ཀྱིས་མཚོན་ཆའི་ནགས་ཚལ་གྱི་ནང་དུ་ཁྲིད་ནས་འགྲོ་སྟེ། མཚོན་ཆའི་ནགས་ཚལ་དེར་ཕྱིན་ནས་ལུས་ལ་མཚོན་འབབ་པས་གནོད་པ་མང་དུ་བྱེད། གཤེག་པར་བྱེད། འཇོམས་པར་བྱེད། ཕྱེ་མར་རློག་པར་བྱེད། དེའི་ལུས་ཀྱི་པགས་པ་ཐམས་ཅད་ཧྲལ་ཧྲོལ་དུ་བྱས་ནས་རྒྱུག་པར་བྱེད་དོ། །མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དེ་རྒྱུག་པ་དེ་དང་། དེར་མཚོན་ཆ་ཆེན་པོ་ཆར་ལྟར་འབབ་པས་གཤེག་པར་བྱེད། འཇོམས་པར་བྱེད་དོ། །རྩ་དང་རྒྱུས་པ་ཐམས་ཅད་ཤད་ཤད་པོར་བྱས་ཏེ། ལུས་གང་ལ་པགས་པ་བྱ་སྒྲོ་ཙམ་ཡང་མ་ལུས་པར་བྱས་ནས་ལུས་ཀྱི་རུས་པའི་དྲ་བ་ཙམ་ཞིག་འཇོག་གོ །རྒྱུས་པ་སྦྲེལ་བའི་གནད་དེ་དག་ཏུ་ཡང་མཚོན་ཆར་ལྟར་འབབ་པས་གཅོད་ཅིང་གཤེག་པར་བྱེད་དེ།
དེ་གཅོད་པ་ན་སྙིང་རྗེ་རྗེ་སྐད་དུ་ཀུ་ཆོ་འདོན་ཅིང་ཡོངས་སུ་སྨྲེ་སྔགས་འདོན་ལ་ཐམས་ཅད་དུ་འབྲོས་སོ། །རང་གི་ལུས་དང་ཡིད་ཀྱིས་ཀུན་ནས་བསླང་བའི་མི་དགེ་བའི་ལས་ཀྱིས་བསླུས་པ་དེ་བདག་ཉིད་ཐམས་ཅད་དུ་ལས་དེས་ཤིན་ཏུ་འཚེད་པར་བྱེད་དོ། །རྣམ་པར་སྨིན་པ་མ་མྱོང་བར་དེ་དག་འགག་པར་མི་འགྱུར་ཞིང་མི་དགེ་བའི་ལས་དེ་མ་མྱོང་བར་ཐར་བ་མེད་དེ། གང་གི་ཚེ་སོ་སོར་མྱོང་ན་དེ་སེམས་ཅན་དམྱལ་བ་དེ་ལས་ཐར་བར་འགྱུར་རོ། །ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་སྟོང་དུ་ཡི་དགས་མཆིལ་མ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལས་ཐར་ནས་ཀྱང་ཚེ་རབས་ལྔ་བརྒྱར་འོད་མའི་ཚལ་དུ་སྲིན་བུར་སྐྱེ་བར་འགྱུར་ཏེ། གང་དང་གང་དུ་སྐྱེས་པར་རྡོ་འབབ་པས་འདམ་བུ་སྲབ་མོར་བརྡུངས་པ་ལྟར་ལུས་ཤིན་ཏུ་སྲབ་མོར་རྡུང་བའི་གནོད་པ་མྱོང་བར་བྱེད་དོ། །དེ་ལས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དབུལ་ཞིང་ནད་བུ་ཅན་དང་། གཞན་གྱིས་མངག་པ་དང་། ཡུལ་བྱེ་མ་ཅན་དང་། མྱ་ངམ་དང་། གཡང་ས་དང་། ཆུ་མེད་པ་དང་། རྩྭ་མེད་པ་དང་། ནགས་ཚལ་མེད་པ་དང་། ནེའུ་གསིང་མེད་པ་དང་། ལྟེང་ཀ་མེད་པའི་འཁོར་རྟག་ཏུ་གནོད་པར་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ལུས་ཞུམ་མི་བཟད་འཕྱང་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྦྱིན་པ་པོའམ་སྦྱིན་བདག་གང་གིས་འདི་ལྟར་རྫས་འདིས་ནད་པ་དེ་དག་ཉིད་ཀྱི་དོན་དུ་འགྱུར་བར་བྱའོ་སྙམ་ནས་གུས་པ་དང་། དད་པ་དང་། དང་བ་དང་། ཡིད་གསལ་བས་ནད་པ་ཁྱིམ་གྱི་ནང་ནས་བྱུང་བ་དེའི་ནད་ཞི་བར་བྱ་བའི་ཕྱིར་རྫས་བྱིན་པ་སྡིག་པ་ཅན་ལུང་བོང་ལྟར་སྤྱོད་པ་ཁོང་གསོག་ཏུ་འདུག་པ་གོས་ངུར་སྨྲིག་བགོས་པ་དེས་ནད་པའི་གསོས་སྨན་གྱི་རྐྱེན་
གྱིས་ཡོ་བྱད་དུ་བྱས་པ་འཕྲོག་པར་བྱེད་དོ། །ཕྲོགས་ནས་ཀྱང་རང་ཉིད་ཟའོ། །ཟོས་ནས་ཀྱང་འཆགས་པར་མི་བྱེད། འགྱོད་པར་མི་བྱེད། སྦྱོང་བར་མི་བྱེད་ཅིང་དེ་ནས་ཡང་བྱེད་ལ་གཞན་དག་ཀྱང་དད་པར་བྱེད། རབ་ཏུ་འཇུག་པར་བྱེད། རྗེས་སུ་དགའ་བར་བྱེད་ཅིང་ཡང་དང་ཡང་དུ་སེམས་ཀྱིས་རོ་མྱོང་བར་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ལུས་ཞུམ་མི་བཟད་འཕྱང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་དེ་ན་ལྕགས་ཀྱི་ཤིང་ལྗོན་པ་ཡལ་ག་རབ་ཏུ་རྒྱས་ཤིང་རབ་ཏུ་འབར་བ་དཔག་ཚད་ཙམ་ཡོད་དེ་རབ་ཏུ་མཆེད་ཅིང་འབར་བའི་རྣམ་པ་དེ་ལྟ་བུ་དེ་ཁོང་པའི་ནང་དུ་འཚེད་དོ། །གང་གིས་སེམས་ཅན་དམྱལ་བ་དེ་རྡོ་རེག་ན་རྡོ་རྗེ་ལྟར་སྲ་ཞིང་རབ་ཏུ་འབར་བས་ཡལ་ག་རྒྱས་ཤིང་རབ་ཏུ་འབར་བས་ཡང་བརྒྱ་འགྱུར་དུ་རབ་ཏུ་སྲེག་སྟེ་ཤིང་གི་མེ་དེའི་རྣམ་པ་ནི་དེ་ལྟ་བུ་ཡིན་ནོ། །ཤིང་དེའི་རྩ་བའི་འོག་ཏུ་སེམས་ཅན་དམྱལ་བ་པ་དེ་སྐྱེ་བར་འགྱུར་ཏེ། ནད་བཞི་བརྒྱ་རྩ་བཞིས་གནོད་པར་བྱས་ཤིང་འཕེལ་བར་བྱེད་པ་ན། གཅིག་པུ་ཟླ་མེད་ཅིང་གྲོགས་མེད་པར་སྡུག་བསྔལ་མྱོང་ངོ་། །གང་དེའི་མགོ་དེ་ཐུར་དུ་བསྟན་ཅིང་རྐང་པ་གྱེན་དུ་བསྒྲེང་བའི་ཤིང་དེའི་མེའི་མཐུ་དེ་ནི་མེ་གཞན་གང་ཡིན་པ་དེ་དག་ཆུ་བསིལ་བ་དང་འདྲ་སྟེ། དེའི་རྩ་བར་དེ་དེ་ལྟར་གནོད་པར་བྱེད་དེ། ཇི་ལྟར་སྐྲའི་རྩེ་མོའི་བར་ཙམ་ཡང་མེད་པ་དེ་ལྟར་གནོད་པར་བྱེད་དོ། །དེ་ནད་དེ་དག་གིས་ཀྱང་ཉོན་མོངས་ཤིང་མེ་བརྒྱ་འགྱུར་གྱིས་སྲེག་ལ་ཤིང་གི་འོག་ཏུ་སོང་བས་ཀྱང་ཤིན་ཏུ་གནོད་པ་ན་ཡུན་རིང་པོ་ལོ་བགྲང་གིས་མི་ལང་བར་གནོད་པ་མྱོང་ངོ་། །དེ་ལྟར་དེ་གནོད་པ་མྱོང་བ་ན་ཡང་གཤིན་རྗེའི་མི་ལག་ན་མཚོན་ཆ་ཐོགས་པ་དག་མཚོན་ཆ་བླངས་ནས། གནད་དང་། གནད་དག་གཅོད་པར་བྱེད་ཅིང་པགས་པ་འདྲལ་བར་བྱེད་དོ། །དེ་གནོད་པ་ལྔ་ཡིས་གནོད་པར་བྱེད་དེ། ནད་དང་།ཤིང་གི་མེ་དང་། མཚོན་ཆ་དང་། བཀྲེས་པ་དང་། སྐོམ་པས་ཡུན་རིང་པོ་
ལོ་བགྲང་གིས་མི་ལང་བར་སྡུག་བསྔལ་མྱོང་ངོ་། །སྤུ་ཟིང་ཞེས་བྱེད་པ་བརྒྱ་ཕྲག་ཁྲི་དང་ལྡན་པ་དེ་མངོན་པར་བརྗོད་པ་དེས་ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་ཚ་བ་མི་བདེ་བ་རྩུབ་པ་དག་མྱོང་བར་འགྱུར་རོ། །གང་གི་ཚེ་ལས་དེ་ཟད་ན་སེམས་ཅན་དམྱལ་བ་དེ་ལས་ཐར་བར་འགྱུར་ལ་ཐར་ནས་ཀྱང་དེ་ལས་དེ་དང་རྒྱུ་འཐུན་པར་ཡི་དགས་མེ་མདག་དང་དུད་པ་ཟ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། ལུས་བཀྲེས་པ་དང་སྐོམ་པས་གདུངས་ཤིང་ལུས་ཚལ་ཤིང་བསྲེགས་པ་ལྟ་བུར་འགྱུར། ཡི་དགས་ཀྱི་འཇིག་རྟེན་དེ་ལས་ཐར་ནས་ཀྱང་ཚེ་རབས་ལྔ་བརྒྱར་དུད་འགྲོ་མེ་མདག་ཆར་ལྟར་འབབ་པ་དང་བྱེ་མ་ཆར་ལྟར་འབབ་པས་སྲེག་ཅིང་འཚེད་དོ། །དུད་འགྲོའི་འཇིག་རྟེན་དེ་ལས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་འདུ་བའི་གཞིར་གནས་ཤིང་རྡོ་ལ་ཟ་སྟེ། སྐྱེས་ནས་ཤིན་ཏུ་སྡུག་བསྔལ་ལ་ནམས་ཀྱང་ལྟོ་འགྲངས་པར་མི་འགྱུར་ལྕེའི་རྩེ་མོས་ཀྱང་ཟས་ཞིམ་པོ་མྱོང་བར་མི་འགྱུར་ཏེ་ཐོས་པ་ཙམ་འབའ་ཞིག་ཏུ་ཟད་དོ། །གཞན་གྱིས་བཀོལ་ཞིང་དབུལ་བ་དང་། ནད་བུ་ཅན་དང་སྨད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་རི་བརྩེགས་ཆར་ལྟར་འབབ་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་རང་སངས་རྒྱས་བཀྲེས་པའི་ཟས་ཕྲོགས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རི་བརྩེགས་ཆར་ལྟར་འབབ་པ་ཞེས་བྱ་བར་སྐྱེ་བར་འགྱུར་རོ། །དེར་སྐྱེས་ནས་ཀྱང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་བརྒྱ་འགྱུར་དུ་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར། ཐོ་བ་དང་། མདུང་ཐུང་དང་། རྫ་མ་དང་། ལུང་པའི་སྡུག་བསྔལ་དང་།
མཚོན་ཆ་འབབ་པའི་སྡུག་བསྔལ་སྣ་ཚོགས་མྱོང་བར་བྱས་ཤིང་རི་བརྩེགས་ཆར་ལྟར་འབབ་པ་དེའི་སྟེང་དུ་བབ་པོ། །དེའི་སྟེང་དུ་རི་བརྩེགས་པ་དཔག་ཚད་ཙམ་ཡོད་པ་བབ་པ་གང་གིས་དེ་བྱེ་མ་ཆང་པ་ནས་གཏོར་བ་བཞིན་ཕྱེ་མར་རློག་གོ །ཕྱེ་མར་བརླགས་པ་དང་ཡང་སླར་སྐྱེ་བར་འགྱུར་རོ། །དེ་ནས་ཡང་ཕྱེ་མར་རློག་པར་བྱེད་དོ། །མེའི་ཕུང་པོ་བཅུ་གཅིག་གི་དབུས་སུ་བཅུག་ནས་མེ་ཐབ་ཀྱི་ནང་དུ་ལུས་མ་ལུས་པར་བསྲེགས་སོ། །དེའི་མིག་སྐྱེས་པ་ཡང་ཕྱུང་ནས་གཏུབས་ཤིང་བཅད་དེ་གཏོར་ཏོ། །དེའི་ལྕེ་ཡང་གཤིན་རྗེའི་མི་རྣམས་ཀྱིས་བཅད་དོ། །བཅད་ནས་ཀྱང་སླར་སྐྱེའོ། །དེའི་སྣ་ཡང་བཅད་ཅིང་ཞ་ཉེ་རབ་ཏུ་བསྐོལ་བས་འགེངས་སོ། །དེའི་རྣ་བ་ཡང་ཟངས་དམར་པོ་བཞུས་པས་འགེངས་སོ། །བ་ཚྭ་རབ་ཏུ་བསྐོལ་བས་ལྕགས་ཀྱི་སྣོད་རབ་ཏུ་བསྲེགས་པ་བཀང་སྟེ། ཁྱེར་ནས་དེ་ལ་ཆག་ཆག་འདེབས་ཤིང་ཡང་སྤུ་གྲི་རྣམས་ཀྱིས་ཤིན་ཏུ་འཇོག་པར་བྱེད་དོ། །ནད་བཞི་བརྒྱ་རྩ་བཞི་རྣམས་ཀྱིས་རྟག་ཏུ་གནོད་པར་བྱེད་དོ། །དེ་ཀུན་ནས་སྡུག་བསྔལ་གྱིས་ཉམ་ཐག་ཅིང་ཐམས་ཅད་ནས་རབ་ཏུ་འབར་བ་མེ་ལྕེ་གཅིག་ཏུ་གྱུར་པ་ན་སེམས་ཅན་དམྱལ་བ་པའི་སྡུག་བསྔལ་ཚ་བས་རྩུབ་པ་དག་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་སོ་སོར་མྱོང་བར་འགྱུར་བ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡུན་རིང་པོ་ལོ་བགྲང་གིས་མི་ལང་བར་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་ལྔ་བརྒྱར་ཡི་དགས་གྲོག་སྦུར་ཡན་ལག་རྣོ་བ་འབབ་པས་ཉམ་ཐག་ཅིང་ཙན་ད་ནི་ཀ་ཟ་བའི་ནང་དུ་སྐྱེ་བར་འགྱུར་རོ། །དེ་གལ་ཏེ་དེ་ལས་ཐར་ནས་ཀྱང་ཚེ་རབས་བདུན་བརྒྱར་ཙི་རི་ཀ་དགོན་པ་ན་གནས་པ་མ་རུངས་པ་སྒྲ་འབྱིན་པའི་ནང་དུ་རི་དགས་རུ་རུར་སྐྱེ་བར་འགྱུར་ཏེ། ལུས་རྟག་ཏུ་བཀྲེས་པ་དང་སྐོམ་པས་གདུངས་པར་འགྱུར་ཏེ། གལ་ཏེ་དེ་ལས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་ཁུར་འཁུར་ཞིང་གཞན་གྱིས་
བཀོལ་བར་འགྱུར། གནོད་པ་སྣ་ཚོགས་ཀྱིས་ལུས་ཤིག་ཤིག་པོར་གྱུར་ཅིང་མཚན་མོ་དང་ཉིན་པར་བདེ་བར་གནས་པར་མི་འགྱུར། རྐང་པ་དང་ལག་པ་དག་རྡོལ་ཅིང་གདོང་རྟག་ཏུ་རྩུབ་པར་འགྱུར། ལུས་ཀྱི་མདོག་ངན་པ་དྲི་མ་ཅན་ལ་རྟག་ཏུ་གོས་དང་བྲལ་བར་འགྱུར། ལས་དེ་དང་རྒྱུ་འཐུན་པར་མིར་གྱུར་ན་ཡང་ཚེ་རབས་ལྔ་བརྒྱར་མི་ཡི་དགས་ཀྱི་གཟུགས་ལྟ་བུར་འགྱུར། མཚན་མོ་དང་ཉིན་པར་ལུས་དང་ཡིད་བདེ་བར་གནས་པར་མི་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་བྱ་འཛམ་པ་སྒྲ་འབྱིན་ཅེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ཡུལ་དགོན་དུང་ན་ཆུ་ཉུང་ངུ་ཞིག་ཡོད་པ་དང་སྲོག་ཆགས་རྣམས་སུ་འབྲེལ་ཏེ། དེ་ལ་སྲོག་ལྟོས། དེ་ལ་རག་ལས་ཤིང་། འདྲེན་པ་སྲོག་འཚོ་བ་དེ་དག་དང་འབྲེལ་བའི་ཆུ་དེ་མི་ངན་པ་སྡང་བའི་སེམས་ཀྱིས་བཅད་དོ། །དེའི་ཆུ་བཅད་པས་ཡུལ་དེ་ཐམས་ཅད་མ་རུང་བར་བྱས་པ་ནས་རི་དགས་དང་བྱའི་བར་ཐམས་ཅད་ཀྱང་ཤི་ལ་གྲོང་དང་། གྲོང་ཁྱེར་གྱི་དགེ་སྦྱོང་དང་བྲམ་ཟེ་ཀུན་ལ་གནོད་པར་བྱས། སྐོམ་གྱིས་གདུངས་པར་བྱས་ཤིང་དེའི་ཆུ་བཅད་པས་ཡུལ་མ་རུང་བར་བྱས་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་བྱ་འཛམ་པ་སྒྲ་འབྱིན་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར་དགོན་པ་དཔག་ཚད་བདུན་བརྒྱ་ཡོད་པ་དང་། ལྕགས་ཀྱི་ཤིང་ལྗོན་པ་དང་། རི་བྲགས་རབ་ཏུ་འབར་ཞིང་མི་བཟད་པ་དེ་ལ་སེམས་ཅན་དམྱལ་བ་དེས་ཕྱིན་ཅི་ལོག་ཏུ་ཆུ་དང་ཤིང་ལྗོན་པ་དང་ནགས་ཚལ་དང་ལྟེང་ཀ་ཕུན་སུམ་ཚོགས་པར་མཐོང་ངོ་། །དེ་ཡང་བཀྲེས་པ་དང་སྐོམ་པ་དཔེ་
མེད་ཅིང་ཤིན་ཏུ་མི་བཟད་པའི་མེ་དེས་བསྲེགས་ནས་ངུ་སྐད་འབྱིན་ཡོངས་སུ་སྨྲེ་སྔགས་འདོན་བཞིན་དུ་ཆུ་དེ་བདག་གིས་བཏུང་ངོ་སྙམ་ནས་ལྟེང་ཀ་དེའི་དྲུང་དུ་རྒྱུག་པ་དང་། དེ་ཡང་བ་ཚྭ་རབ་ཏུ་བསྐོལ་བས་གང་ངོ་། །དེ་ནས་ཡང་གཤིན་རྗེའི་མི་ལག་ན་མཚོན་ཐོགས་པ་བརྒྱ་འབྱུང་སྟེ། དེ་དག་གིས་དེ་བཟུང་ངོ་། །བཟུང་ནས་ཀྱང་མཚོན་ཆ་རྣམས་ཀྱིས་གཤེགས་ཤིང་འདྲལ་ཏོ། །དེ་སྡུག་བསྔལ་གཉིས་ཀྱིས་སྡུག་བསྔལ་བ་ཡིན་ཏེ། མཚོན་ཆ་དང་བཀྲེས་སྐོམ་གྱི་སྡུག་བསྔལ་གྱིས་སྡུག་བསྔལ་ལོ། །དེ་ལྟར་དེ་ཡུན་རིང་དུ་མཚོན་ཆ་དང་དགོན་པའི་སྡུག་བསྔལ་མྱོང་ངོ་། །དེ་གལ་ཏེ་དེ་ལས་ཐར་ནས་ཀྱང་བཀྲེས་པ་དང་། སྐོམ་པས་ཉེན་པས་གར་བབ་བབ་ཏུ་འབྲོས་པ་དང་། དེས་ཆུ་བསིལ་བ་དག་ཅིག་མཐོང་ནས་དེར་སོང་ངོ་། །དེར་སོང་བ་དང་ཆུ་དེ་དག་ཀྱང་བྱ་འཛམ་པ་སྐད་འབྱིན་ཅེས་བྱ་བ་གླང་པོ་ཆེ་ཙམ་ལ་མཆུ་རྣོ་བ་ཞིག་ཡིན་ཏེ་དེས་བཟུང་ངོ་། །བཟུང་ནས་ཀྱང་གནམ་དུ་འཕངས་སོ། །འཕངས་པ་ན་འཁྲུལ་ཅིང་དྲན་པ་དང་བྲལ་བས་སླར་ལོག་པ་དང་ས་གཞི་རབ་ཏུ་འབར་ལ་སྲ་ཞིང་རེག་པར་མི་བཟོད་པའི་སྟེང་དུ་རྡོ་བཞིན་དུ་ལྷུང་སྟེ། དེ་དེར་དུམ་བུ་བརྒྱར་གྱེས་སོ། །དེ་ནས་ཡང་སླར་འདུས་ཏེ་སོས་པ་དང་། བྱ་དག་གིས་བཟུང་ནས་དེ་སྔོན་བཞིན་དུ་སྡུག་བསྔལ་བར་བྱེད་དོ། །ནད་ཐམས་ཅད་ཀྱིས་ཀྱང་ཐེབས་ནས་དེ་ལྟར་སྔོན་བཞིན་དུ་ལོ་བྱེ་བ་འབུམ་ཕྲག་དུ་མར་བྱས་པའི་སྡུག་བསྔལ་གྱི་རྣམ་པ་དེ་དག་མྱོང་ངོ་། །དེ་གལ་ཏེ་དེ་ལས་ཐར་ནས་ཀྱང་ཡང་གཤིན་རྗེའི་མི་རྣམས་ཀྱིས་བཟུང་ངོ་། །བཟུང་ནས་ཀྱང་ཟངས་དམར་པོ་རབ་ཏུ་བསྐོལ་བ་ཆུ་བོའི་ཀློང་ལྟ་བུར་བཅུག་གོ །དེ་བཅུག་ནས་དབུ་བའི་གོང་བུ་བཞིན་དུ་རབ་ཏུ་བཞུས་སོ། །དེ་ནས་ཡང་སླར་འབྱུང་སྟེ། ཉེས་པར་བྱས་པའི་ལས་ཀྱི་མཐའ་སྤྱད་པ་དེ་དེ་ལྟར་ཡུན་རིང་དུ་ལོ་བགྲང་གིས་མི་ལང་བར་འཚེད་དོ། །དེ་གལ་ཏེ་དེ་ལས་ཐར་ནས་ཀྱང་ལུས་བཀྲེས་པ་དང་། སྐོམ་པས་གདུངས་པ་ཡུལ་མ་རུང་བར་བྱེད་པ་དེ་རང་གི་ལས་ཀྱིས་བྱས་པ་མྱོང་བཞིན་དུ་གར་བབ་བབ་ཏུ་འབྲོས་པ་དང་། ལམ་དུ་ཕུར་བུ་རྩེ་མོ་ཤིན་ཏུ་བརྡར་ཅིང་རྣོ་
བ་བྱུང་སྟེ། དེས་དེའི་རྐང་མཐིལ་ལ་སོགས་པ་བརྟོལ་བ་ནས་པུས་མོའི་ལྷ་ངའི་བར་དུ་བརྟོལ་ཏོ། །རྐང་པ་བརྟོལ་བ་དེ་ལུས་ནི་རབ་ཏུ་འབར། སྡུག་བསྔལ་གྱིས་ཉམ་ནི་ཐག །སྙིང་རྗེ་རྗེ་སྐད་དུ་ཀུ་ཆོ་ནི་འབྱིན། ཡོངས་སུ་སྨྲེ་སྔགས་ནི་འདོན། ངུ་ཞིང་རང་གི་ཁྲག་གི་ནང་དུ་ལྷུང་ཞིང་བྱིང་ངོ་། །དེ་ནས་ཡང་ལུས་ཀྱི་ཡན་ལག་ཐམས་ཅད་བསྲེགས་པ་ལས་ལངས་ནས་དེ་ལྟར་སེམས་བློང་བློང་པོར་གྱུར་པ་དེ་འགྲོ་བ་དང་། ཁྱི་སོ་རབ་ཏུ་འབར་བ་དག་འོངས་ནས་དེ་དག་གིས་བཟུང་སྟེ། དེའི་ཡན་ལག་དང་ཉིང་ལག་ཐམས་ཅད་དང་། པགས་པ་དང་ཁྲག་དང་ཤ་དང་ཚིལ་དང་རྐང་ཡན་ཆད་ལ་ཟའོ། །དེ་ལྟར་ཡུལ་མ་རུང་བར་བྱེད་པ་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་སོ་སོར་མྱོང་བར་འགྱུར་བ་མ་ཟད་ཅིང་མ་སྤངས་པ་དེ་སྲིད་དུ་རང་གི་གནོད་པ་ཡུན་རིང་དུ་མྱོང་བར་འགྱུར་རོ། །དེ་ཕྱིས་ལས་དེ་དང་འཐུན་པར་ཚེ་རབས་ལྔ་བརྒྱར་དུད་འགྲོ་འཕྱེ་བོ་རྣམས་ཀྱི་ནང་དུ་སྐྱེ་བར་འགྱུར་ཏེ། གར་སྐྱེས་པར་སེར་བས་སམ། སྦྲུལ་དག་གིས་གསོད་པའམ། རླུང་དག་གིས་གསོད་པར་འགྱུར། དེ་དེ་ལས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་རི་ཁྲོད་པའི་རིགས་སུ་སྐྱེ་ཞིང་སྐྱེ་བོ་ཀུན་གྱིས་སྨད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྐར་ཕྲེང་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་ཉོན་མོངས་པ་ཐམས་ཅད་ཟད་པར་བྱེད་འདོད་པ་འགོག་པ་ལས་ལངས་པའི་དགེ་སློང་དང་པོ་ཤིན་ཏུ་བཀྲེས་པ་དེའི་ཁ་ཟས་ཕྲོགས་ཏེ་ཕྲོགས་ནས་ཀྱང་མགུ་ཞིང་ཡིད་རབ་ཏུ་དགའ་ལ་ཡང་དང་ཡང་དུ་རོ་མྱོང་བར་བྱེད། ལེགས་པར་སེམས་པ་དེ་ཉིད་ལ་གཞན་དག་ཀྱང་གཟེངས་སྟོད་པར་བྱེད་ལ་ལས་དང་ལས་ཀྱི་ཉེར་བསྡོགས་དང་། ལས་ཀྱི་མཇུག་དང་ཡང་དག་པར་ལྡན་པ་བྱས་ཤིང་
བསགས་པའི་ལས་མི་བཟད་པ་རྣམ་པ་དེ་ལྟ་བུ་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྐར་ཕྲེང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་བརྒྱ་འགྱུར་དུ་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་དེའི་གནས་གྲྭ་གཉིས་པ་ཡོད་དེ་ཀུན་ནས་རྫ་མས་ཡོངས་སུ་བསྐོར་ཏོ། །གྲྭ་གཅིག་ན་རྫ་མ་རབ་ཏུ་འབར་བ་སྐར་མ་བཀྲམ་པ་ལྟ་བུར་ལོ་བྱེ་བ་ཁྲག་ཁྲིག་སུམ་ཅུ་རྩ་དགུ་དང་། ཐེར་འབུམ་དགུ་སྟོང་དང་། བྱེ་བ་དུང་ཕྱུར་ཕྲག་དྲུག་ཅུ་དང་། སྐྱང་འཕྱེས་བྱེ་བ་སུམ་ཅུ་ས་ཛཱ་ལི་ནི་དང་། ཀོད་ཊཱུ་དི་ཀོད་ཊཱུ་དང་། ཀེ་ས་ར་སྟོང་ཕྲག་ཉི་ཤུ་སྟེ། གྲངས་ཀྱི་ཚད་དེ་སྙེད་ཀྱི་བར་དུ་འཚེད་ཅིང་སྲེག་སྟེ། ཉ་ལྟར་འགྲེ་ལྡོག་གོ །ཟངས་དམར་པོ་བསྐོལ་བ་རབ་ཏུ་འབར་བ་རྫ་མར་བླུགས་པར་ཉིན་གཅིག་བཞིན་དུ་ཚ་བར་བྱས་ཤིང་སྡུག་བསྔལ་དྲག་པ་རྩུབ་པ་མི་བཟད་པ་འཕེལ་ཏེ་ངུ་སྐད་འདོན་ཅིང་ཆོ་ངེས་འདེབས་སོ། །དེ་ལྟར་དེ་ཉེས་པར་བྱས་པའི་ལས་སྨད་པར་བྱ་བ་རང་གི་སེམས་ལས་བྱུང་བས་ཡུན་རིང་དུ་སྔ་མ་བཞིན་དུ་འཚེད་དོ། །དེ་གལ་ཏེ་ཕྱོགས་གཅིག་ལས་ཐར་ནས་ཀྱང་རླུང་སེམས་དང་ཕྲག་པར་འཇུག་ཅེས་བྱ་བ་སྤུ་གྲི་ལྟ་བུས་གནད་ཐམས་ཅད་དང་། གནད་སོ་སོ་དག་བཅད་ནས་དེས་སེམས་ཅན་དམྱལ་བ་པ་དེའི་སྟེང་དུ་ཕྱུང་སྟེ། སེམས་ཅན་དམྱལ་བ་པའི་གྲྭ་གཉིས་པ་དེར་བཅུག་གོ །སེམས་ཅན་དམྱལ་བ་པ་རླུང་གིས་བདས་ནས་གྲྭ་གཉིས་སུ་བཅུག་པའི་ལུས་ཀྱི་ཁམས་སུ་གཏོགས་པ་ཐམས་ཅད་བྱེ་མ་སྙེད་དུ་གཏུབས་ཤིང་བཅད་དེ་ལུས་ལ་རྩ་རྒྱུས་ཙམ་ལུས་པར་བྱེད་དོ། །དེ་ལྟར་དེ་བཅད་པའི་ལྷག་མ་དེ་གཤིན་རྗེའི་མི་རྣམས་ཀྱིས་བཟུང་ངོ་། །བཟུང་ནས་རྫ་མ་སྐར་མའི་ཕྲེང་བ་ལྟ་བུར་རླུང་གིས་བདས་ཏེ་བཅུག་གོ །དེ་ཡང་དང་ཡང་དུ་དེར་བཅུག་པ་ན་རྐང་པ་གྱེན་དུ་བསྒྲེང་ཞིང་མགོ་ཐུར་དུ་བསྟན་པ་དང་ཐོག་མ་ཉིད་དུ་མགོ་ལྟུང་ངོ་། །དེའི་འོག་ཏུ་ཟངས་དམར་པོ་རབ་ཏུ་བསྐོལ་བས་མིག་ལྟུང་བར་བྱེད་དོ། །དེའི་འོག་ཏུ་དེའི་ཁའི་པགས་པ་ལྟུང་བར་བྱེད་དོ། །
དེའི་མིད་པར་ཟངས་དམར་པོ་བཞུས་པས་གང་སྟེ། དེའི་མིད་པ་ཐམས་ཅད་ཁྱབ་པར་སྲེག་པ་ན་ངུ་སྐད་འབྱིན་པའམ་འབྲོས་པར་མི་ནུས་སོ། །དེ་ལྟར་དེའི་ལུས་ཀྱི་སྡུག་བསྔལ་གྱིས་ཉམ་ཐག་པ་ཡང་དང་ཡང་དུ་གཤིན་རྗེའི་མི་དེ་དག་གིས། ཐོ་བ་བླངས་ནས་མགོ་སླར་བྱུང་བ་དག་ལ་རྡེག་པར་བྱེད་དོ། །གླད་པ་ཉམས་པ་དེས་དེའི་ལུས་ཐམས་ཅད་ཁྱབ་སྟེ་མགོ་དང་ལུས་དང་ཁོག་པ་ཡུན་རིང་དུ་ཉ་འགྲེ་ལྡོག་པ་ལྟར་འགྲེ་སྟེ། དེ་ལྟར་དེ་སེམས་ཅན་དམྱལ་བ་སྐར་ཕྲེང་གི་གྲྭ་གཉིས་པར་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚེད་དོ། །དེའི་ལས་བྱས་ཤིང་བསགས་པ་ཟད་ནས་དེ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་སྟོང་དུ་ཡི་དགས་ཟས་ལ་རེ་བར་སྐྱེ་བར་འགྱུར་ཏེ། དེ་ལྟར་ཚེ་རབས་བདུན་བརྒྱར་ཚེགས་ཆེན་པོས་ལོ་བརྒྱར་བསྒྲུབས་ན་ཟས་ལན་གཅིག་ཅིག་རྙེད་པར་སྐྱེ་བར་འགྱུར། ཚེ་རབས་ལྔ་བརྒྱར་རི་འོར་ན་གནས་པའི་རི་དགས་རྣམས་ཀྱི་ནང་དུ་སྐྱེ་བར་འགྱུར་ཏེ། རྟག་ཏུ་འཁྲུལ་པས་འཇིགས་ཤིང་སྐྱེ་བོ་ཀུན་གྱིས་འཇིགས་པ་དང་། རི་འོར་གྱི་གསེབ་མི་མེད་པར་ཡང་རྟག་ཏུ་འཁྲུལ་ཅིང་ལུས་སྐེམ་ལ་མདོག་ངན་པར་འགྱུར་རོ། །དེ་ཕྱིས་ལས་ཀྱི་ལྷག་མ་དེས་ལིངས་པ་དག་འོང་བའི་གནོད་པས་སྲོག་དང་བྲལ་བར་འགྱུར་རོ། །དེ་དེ་ནས་ཤི་ནས་ཀྱང་གལ་ཏེ་སོ་སོར་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་ཚོང་པའི་ལམ་སྟོན་པར་བྱེད་པར་འགྱུར། རྟག་ཏུ་ལུས་བཀྲེས་ཤིང་སྐོམ་ལ་དུབ་པ་དང་། ཡི་ཆད་པ་དང་། གཞན་ལ་རག་ལས་པ་མང་བ་དང་། སྲོག་ཙམ་གྱིས་འཚོ་སྟེ། དེ་ལྟར་མིའི་གཟུགས་བརྙན་དུ་གྱུར་པ། རྟག་ཏུ་སྡུག་བསྔལ་གྱིས་སྡུག་བསྔལ་བར་གྱུར་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་སྡུག་བསྔལ་
ཀུན་གྱིས་ཉེན་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ཐམས་ཅད་མཁྱེན་པའི་གསུང་རབ་གླེགས་བམ་ལ་བྲིས་པ་སྡང་བའི་སེམས་དང་ལོག་པར་ལྟ་བ་དང་། ལོག་པར་འཁུ་བའི་སེམས་ཀྱིས་འདི་ལྟར་སངས་རྒྱས་ལ་སྲོག་ཆགས་དག་ཆོས་དེ་ཉན་པ་དད་པ་མེད་པར་བྱ་བའི་ཕྱིར་ཆོས་ཀྱི་གཞི་བཤིག་སྟེ་བཏང་ངོ་སྙམ་ནས་བོར་ན་དེ་ལོག་པར་ལྟ་བ་བྱས་ཤིང་བསགས་པའི་ལས་ཀྱིས་སེམས་རྙོག་པར་བྱས་ཤིང་གཞན་དག་ཀྱང་དེ་ལ་རབ་ཏུ་འཇོག་པར་བྱེད། ཡང་དག་པར་རབ་ཏུ་དགའ་བར་བྱེད་ལ་དེ་ནས་ཡང་ཆོས་ཀྱི་གླེགས་བམ་དུ་གཏོགས་པ་སྡང་བའི་སེམས་ཀྱིས་འདོར་བར་བྱེད་དེ། ལས་དང་ལས་ཀྱི་ཉེར་བསྡོགས་དང་ལས་ཀྱི་མཇུག་ལ་ཕྱི་ཕྱིར་ཞིང་དེ་ཉིད་ལ་དགའ་བར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་སྡུག་བསྔལ་བ་ཀུན་གྱིས་ཉེན་པར་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པ་བདུན་གྱིས་གནོད་པ་བསྡུས་པ་དེ་དག་ཐམས་ཅད་འབྱུང་ངོ་། །ཁྱད་པར་དུ་འབྱུང་བ་ནི། འདི་ལྟར་དམྱལ་བ་པའི་མིག་ལ་ཟངས་དམར་པོ་རབ་ཏུ་བཞུས་ཏེ་ཆག་ཆག་བཏབ་པས་རབ་ཏུ་ཞུ་བ་དང་། དེ་བཞིན་དུ་བྱེ་མ་རབ་ཏུ་འབར་བ་རེག་ན། རྡོ་རྗེ་ལྟར་སྲ་བ་རྣམས་ཀྱིས་མིག་དེ་ལ་བཏབ་ནས་ལག་པས་བཟུང་སྟེ་མི་བཟད་པས་མཉེས་སོ། །དེ་ལྟར་མིག་ལ་མཉེས་པ་གང་ཡིན་པ་དེ་བྱེ་མ་རེག་པས་རབ་ཏུ་ཞུའོ། །དེ་ནས་ཡང་སླར་སྐྱེ་བར་འགྱུར་ཏེ། ཡང་མཉེས་སོ། །སོག་ལེ་རབ་ཏུ་འབར་བ་ཡང་བླངས་ནས་ལག་པ་གཉིས་བཅད་དོ། །དེ་ནས་ཡང་སླར་འབྱུང་བར་འགྱུར་ཏེ། ཕྱེད་རྫ་མ་རབ་ཏུ་འབར་བའི་ནང་དུ་ལྷུང་སྟེ་འཚེད་དོ། །དེའི་ཕྱེད་ཀྱང་མཚོན་གྱིས་བཞོག་པར་བྱེད་ཅིང་གཅོད་པར་བྱེད་དོ། །དེའི་མིག་གཉིས་ཀྱིས་དམ་པའི་ཆོས་མཐོང་ནས་བོར་བ་དེའི་རྣམ་པར་སྨིན་པ་ནི་དེ་ཡིན་ནོ། །གང་ལག་པས་བོར་བ་དེའི་རྣམ་པར་སྨིན་པ་ནི་དེའི་ལག་པ་བཅད་པ་ཡིན་ནོ། །གང་གིས་ཉེས་པར་
སྤྱད་པ་དེ་བསགས་པ་ནི་རྫ་མའི་ནང་དུ་བཅུག་པ་སྟེ། འཚེད་པ་ན་བྱའི་མཆུ་རྣོ་ལ་རབ་ཏུ་འབར་བས་གཟས་ཏེ་ཕུག་ནས་ཟ་ཞིང་སྟེང་གི་ཁུ་བ་ལ་འཐུང་བར་བྱེད་དོ། །དེའི་འོག་ཏུ་སོང་བའི་པགས་པ་ལྷག་མ་རྫ་མའི་ནང་དུ་མ་བཅུག་པ་ཕྱེད་པོ་དེ་ནི་གཤིན་རྗེའི་མི་རྣམས་ཀྱིས་སྟེའུ་ཡིས་འཇོག་གོ །ཕྱེད་བཞོགས་ནས་ཤིན་ཏུ་སྲབ་མོར་བྱེད་དོ། །དེ་ནས་བ་ཚྭའི་ཆུས་ཀྱང་ཆག་ཆག་འདེབས་སོ། །ཁབ་རྩེ་མོ་རྣོ་ཞིང་རབ་ཏུ་འབར་བ་འབིགས་པར་བྱེད་པས་སྐབས་ཡོད་ཡོད་དུ་ལུས་ལ་འབིགས་པར་བྱེད་དོ། །དེའི་མགོ་ཡང་འཁོར་ལོས་ཡོངས་སུ་འཁོར་རོ། །དེ་ལས་ཐར་བ་དང་ཀུན་ནས་རབ་ཏུ་བཞུས་པའི་རྒྱུན་མི་འཆད་པའི་འབབ་པ་དེ་ལ་འཐུང་བར་བྱེད་དོ། །དེ་ལྟར་དེ་གནོད་པ་མྱོང་བ་ན་དེར་ལས་མི་བཟད་པ་བྱས་ཤིང་བསགས་པ་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་ལྔ་བརྒྱར་ཡི་དགས་དུད་པ་ཟ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། དེའི་སྙིང་ངན་སོང་གིས་བསྒྲིབས་ལ་ལུས་ལ་གནོད་པར་འགྱུར་རོ། །གལ་ཏེ་དེ་ལས་ཐར་ནས་ཀྱང་ཚེ་རབས་བདུན་བརྒྱར་དུད་འགྲོ་མཚན་མོ་རྒྱུ་བ་འུག་པ་ཐུར་དུ་ལྟ་བར་སྐྱེ་བར་འགྱུར། དེ་ལས་ཐར་ནས་ཀྱང་སོ་སོར་མྱོང་བར་འགྱུར་བའི་ལས་ཀྱིས་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ཚེ་རབས་བདུན་བརྒྱར་གངས་ཁྲོད་དུ་གནས་ཤིང་ཟས་སུ་ཀོ་དྲ་བ་ཟ་ལ་དབུལ་བ་དང་ཀླ་ཀློར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་གོས་དྲི་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ལོག་པར་ལྟ་བ་གང་གིས་ཆེད་དུ་བསམས། ཆེད་ཆེར་བྱས། དགའ་བར་
བྱས། ཤེས་པར་བྱས་ཤིང་མངོན་པར་ཞེན་པའི་བློས་འདི་ལྟར་ཡོ་བྱད་འདི་དག་བསྲེགས་པས་དགེ་སློང་དེ་དག་མ་རུང་བར་བྱའོ་སྙམ་ནས་དགེ་འདུན་གྱི་ཞིང་ངམ། བུ་རམ་ཤིང་ངམ། ལྡུམ་རའམ། ཀུན་དགའི་ར་བའམ། དེ་ལས་གཞན་པ་དགེ་འདུན་གྱི་འཚོ་བའི་ཡོ་བྱད་རྣམས་མེས་བསྲེགས་ལ་དེ་ལས་དང་ལས་ཀྱི་ཉེར་བསྡོགས་དང་། ལས་ཀྱི་མཇུག་དང་ལྡན་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་གོས་དྲིར་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པ་བདུན་གྱི་གནོད་པ་བསྡུས་པ་དེ་དག་ཐམས་ཅད་བརྒྱ་འགྱུར་དུ་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་དེ་ཀུན་ནས་དྲ་བ་རབ་ཏུ་འབར་བས་འཁོར་ཏེ་ཀུན་ནས་དྲ་བ་ཁབ་ཀྱི་བུ་ག་ཙམ་གྱིས་ཁེབས་པ་དེར་སྐྱེས་སོ། །སེམས་ཅན་དམྱལ་བ་དེ་གཤིན་རྗེའི་མི་རྣམས་ཀྱིས་མདའ་རབ་ཏུ་འབར་ཞིང་རྣོ་ལ་ཤུགས་དྲག་པས་གློ་གཉི་གར་བརྒྱབ་པ་ན་དྲ་བ་དེའི་ནང་ནས་འབྲོས་པ་དང་དེ་དྲ་བའི་མིག་ནས་འབྲོས་པར་མི་ནུས་ཤིང་དེ་དྲ་བ་དེར་ཤིན་ཏུ་ཐོགས་ཏེ། དེའི་དྲ་བ་རྣོ་བའི་མཐུས་བདག་ཉིད་འབྱིན་པར་མི་ནུས་སོ། །དྲ་བ་དེས་ལག་པ་ཡང་གཅོད་པར་བྱེད། རྩིབ་ལོགས་ཀྱང་འཇོག་པར་བྱེད། ཡན་ལག་དང་ཉིང་ལག་ཐམས་ཅད་ཀྱང་རུས་པ་ལ་ཐུག་གི་བར་དུ་འཇོག་པར་བྱེད་དོ། །དྲ་བ་དེས་འཇོག་པ་ན་ཡང་དང་ཡང་དུ་གཤིན་རྗེའི་མི་དེ་རྣམས་ཀྱིས་མདེའུའི་རྩེ་མོ་ཤིན་ཏུ་བརྡར་བས་ལན་བརྒྱའམ་ཡང་ན་སྟོང་དུ་གསོད་དོ། །ལས་ཀྱི་དྲ་བས་བསྒྲིབས་པ་དེ་མདའི་སྡུག་བསྔལ་གྱིས་ཡུན་རིང་དུ་ཉོན་མོངས་ཏེ། སེམས་ཅན་དམྱལ་བ་དེར་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་མི་བཟད་པ་རྩུབ་པ་གཞན་དང་མི་འདྲ་བ་དག་མྱོང་བར་འགྱུར་རོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་བདུན་བརྒྱར་ཡི་དགས་ཁྱིམ་གྱི་ནང་ན་བུ་འབྱིན་པའི་སྐད་ངན་འདོན་པ་རྣམས་ཀྱི་ནང་དུ་སྐྱེ་བར་འགྱུར། དེ་ལས་ཐར་
ནས་ཀྱང་ཚེ་རབས་ལྔ་བརྒྱར་དུད་འགྲོའི་སྐྱེ་གནས་ཁྱིམ་བྱ་དང་རྨ་བྱ་དང་བ་ལང་དག་གི་ལྕི་བའི་ནང་དུ་སྐྱེ་བར་འགྱུར། དེ་ལས་ཐར་ནས་ཀྱང་དེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་ལས་དེ་དང་རྒྱུ་འཐུན་པར་གཏུམ་པོའི་བུ་བཙའ་བའི་ཁྱིམ་དུ་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་ལྕགས་གླེབས་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། མི་བརྟན་པ་དང་། མི་བརྟན་པའི་སེམས་ཀྱི་བློ་ངན་པ་བསླུ་བའི་བསམ་པ་གང་གིས་འདི་ལྟར་དབྱར་ཟས་མེད་པའི་ཚེ། དགེ་སློང་དག་ལ་ནད་ཀྱི་གསོས་སྨན་གྱི་རྐྱེན་དང་ཟས་དག་སྦྱར་གྱིས་དགེ་སློང་དག་སེམས་ལས་ཆུང་ངུར་གྱིས་ཤིག །ཚེགས་ཆུང་ངུས་གནས་པར་གྱིས་ཤིག །ཡིད་ཀྱི་ལས་ཆུང་བར་གྱིས་ཤིག་ཅེས་སྨྲས་ནས། དགེ་སློང་དག་སྤྱན་དྲངས་ལ། དགེ་སློང་དེ་དག་ཀྱང་དེའི་དད་པ་བསྐྱེད་པ་དེས་ཟས་མེད་པའི་ཚེ་ཡང་དེའི་དད་པ་བསྐྱེད་པ་དེས་ཡོན་བདག་གཞན་དུ་མ་བཙལ་ཏོ། །དེ་ནས་ཡང་མི་ངན་པ་དེས་དགེ་སློང་དེ་དག་གི་རེ་བ་མེད་པར་བྱས་པ་དང་། ཟས་མེད་པ་དེའི་ཚེ་ལ་ལ་ནི་འཆི་བའི་དུས་བྱེད། ལ་ལ་ནི་དགེ་བའི་ཆོས་བསྐྱེད་པར་མི་ནུས། ལ་ལ་ནི་ཤིན་ཏུ་སྡུག་བསྔལ་བར་གྱུར། ལ་ལ་ནི་ཡུལ་གཞན་དུ་འགྲོ་བར་བྱེད་དེ། དེ་ལྟར་གང་དགེ་སློང་དེ་དག་ལ་བརྫུན་བྱས་པ་དེ་སེམས་ཅན་དམྱལ་བ་ལྕགས་གླེབས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་འབྱུང་བར་འགྱུར་རོ། །ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་པ་དེ་མེའི་ཕུང་པོ་བཅུ་གཅིག་གིས་ཡོངས་སུ་བསྐོར་ཅིང་བཀྲེས་པ་དང་སྐོམ་པས་ཡོངས་སུ་གདུངས་ལ། གཤིན་རྗེའི་མི་རྣམས་ཀྱིས་ཡང་དང་ཡང་དུ་ཟངས་དམར་པོ་བསྐོལ་བ་དང་། ལྕགས་ཀྱི་ཐུ་ལུམ་རབ་ཏུ་
འབར་བས་སེམས་ཅན་དམྱལ་བ་ལུས་རྣམ་པར་ཞུམ་པ་དེ་པད་མ་ཆེན་པོ་ཁ་བཙུམས་པ་དང་ཕྱེ་བ་ལྟར་སྲེག་གོ །འཚེད་དོ། །སྐེམས་སོ། །གསོད་དོ། །དེ་ནས་ཡང་སླར་སྐྱེ་བར་འགྱུར་ཏེ། གནོད་པ་ཁྱད་པར་དུ་འབྱུང་བ་ནི་ཇི་ལྟར་ལས་བྱས་པ་བཞིན་དུ་དེའི་ལྕགས་གླེབས་པ་ཆུ་ཞེང་དཔག་ཚད་ལྔ་ཡོད་པ་ཀུན་ནས་རབ་ཏུ་འབར་ལ་ཀུན་ནས་མེ་ལྕེ་གཅིག་ཏུ་གྱུར་པ་ཁྱེར་ཏེ་དེས་སླུ་བར་བྱེད་པ་དེ་ཡོངས་སུ་དཀྲིས་ཤིང་དུ་མར་བསྐོར་ཏོ། །ལུས་ཀུན་ནས་རབ་ཏུ་འབར་བ་ཀུ་ཆོ་འདོན་པ་ན་སོ་སོར་ཉམས་ཤིང་ཐམས་ཅད་ནས་བདེ་བ་ཁབ་ཀྱི་བུ་ག་ཙམ་ཡང་མེད་དོ། །མེ་དང་ལྕགས་གླེབས་པ་དེས་རྟག་ཏུ་ཁྱབ་སྟེ། དེ་ལྟར་དེ་སྡུག་བསྔལ་དྲག་པ་རྩུབ་པ་ཤིན་ཏུ་མི་བཟད་པ་དག་མྱོང་ངོ་། །བཀྲེས་པ་དང་སྐོམ་པར་གྱུར་ཅིང་ལྕགས་གླེབས་པ་དང་མེ་འབྱུང་བས་དེ་ལྟར་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་གནོད་པ་དེ་དག་མྱོང་བར་འགྱུར་རོ། །དེ་དེ་ལས་ཐར་ན་ལས་དེ་དག་དང་རྒྱུ་འཐུན་པར་ཚེ་རབས་བདུན་སྟོང་དུ་ཡི་དགས་གླད་རྒྱས་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལས་ཐར་ནས་ཀྱང་ཚེ་རབས་བདུན་སྟོང་དུ་དུད་འགྲོ་ཁ་ཟས་མེད་པའམ་མེ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལས་ཐར་ནས་ཀྱང་གལ་ཏེ་སོ་སོར་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་རྒྱལ་པོས་བཙོན་རར་བཅུག་ཅིང་ཚེ་རབས་ལྔ་བརྒྱར་བཀྲེས་པ་དང་སྐོམ་པ་དག་གིས་འཆི་བའི་དུས་བྱེད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་པའི་འཁོར་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེམས་ཅན་དམྱལ་བ་འགྲོ་བ་མེས་སྲེག་ཅེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་འདི་ལྟར་འཕགས་པ་དང་འཕགས་པའི་གང་ཟག་མི་གནས་པར་བྱའོ་སྙམ་ནས་སངས་རྒྱས་ཀྱི་གཙུག་ལག་ཁང་འཇིག་པར་བྱེད་དམ། དེ་སངས་
རྒྱས་ཀྱི་གསུང་རབ་ཡི་གེར་བྲིས་པ་འབྱིད་དམ། ཀླན་ཀ་བཙལ་བའི་ཕྱིར་མཁས་པ་དག་ལ་མི་མཁས་པའི་བདག་ཉིད་ཅན་གྱིས་སངས་རྒྱས་ཀྱི་གསུང་རབ་ཉན་པར་བྱེད་དེ་ཐོས་ནས་ཀྱང་ཆོས་འདུལ་བ་དེ་ལ་འཇུག་པར་མི་བྱེད་ཅིང་ཡོངས་སུ་མི་སྙན་པར་བརྗོད་ལ་བརྗོད་ནས་ཀྱང་ཀུན་ཏུ་བསྟེན་ཅིང་བསྒོམས་ལ་མང་དུ་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་འགྲོ་བ་མེས་སྲེག་ཏུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་བརྒྱ་འགྱུར་དུ་འབྱུང་ངོ་། །ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་དེ་ལ་ཁྱད་པར་ཐམས་ཅད་སྟོང་འགྱུར་དུ་འབྱུང་སྟེ། སྦྲུལ་རྣམས་ཀྱིས་འཁྲིས་ཤིང་ཀུན་ནས་དྲ་བར་གང་བ་དེར་སེམས་ཅན་དམྱལ་བ་པ་དེར་འགྲོ་བར་བྱེད་དོ། །འགྲོ་བ་ན་གཤིན་རྗེའི་མི་ལག་ན་ཐོ་བ་ཐོགས་པ་དེ་དག་ཐམས་ཅད་ཀྱིས་སྲེག་པར་བྱེད་དེ་དུག་གི་མེ་ཚན་པོ་ཆེས་ཀྱང་སྲེག་པར་བྱེད་དོ། །དེ་དུག་དང་སེམས་ཅན་དམྱལ་བའི་མེ་གཉིས་ཀྱི་ནང་དུ་སྲེག་པ་ན་སྙིང་རྗེ་རྗེ་སྐད་དུ་ངུ་སྐད་འབྱིན་སྨྲེ་སྔགས་འདོན་ཆོ་ངེས་འདེབས་སོ། །དེ་དེ་ལྟར་ཆོ་ངེས་འདེབས་པ་དང་། འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། གླེན་པ་དམ་པའི་ཆོས་ཡུལ་ལ། །རྨོངས་པའི་ཤུགས་ཀྱིས་ཐམས་ཅད་དུ། །སྲེད་པའི་དུག་གིས་མྱོས་པ་དག །དོན་མེད་ཅི་ཞིག་ཡོངས་སུ་སྨྲེ། །སྡིག་བྱེད་དགའ་ལྟར་མཐོང་བ་ནི། །བཟློག་ན་མཐོང་བ་མེད་པ་ཡིན། །སྡིག་པ་བྱེད་ཚེ་བདེ་བ་ནི། །བཟློག་ན་མེ་དང་འདྲ་བ་ཡིན། །སྡིག་པ་བྱེད་པའི་མི་དག་ནི། །འཇིག་རྟེན་ཀུན་གྱིས་རྣམ་པར་སྨད། །དགེ་བ་བྱེད་པ་རྟག་ཏུ་བསྟོད། །དེ་བས་སྡིག་པ་རྣམ་པར་སྤོངས། །མི་འདོད་མི་ཕན་སྡང་བ་ཡི། །རྣམ་པར་སྨིན་པ་སྡུག་བསྔལ་ཚ། །སྡིག་པ་སྡིག་པའི་རྣམ་སྨིན་ཏེ། །དེ་ལྟར་བློ་ལྡན་དེ་སྤོངས་ཤིག །སྡིག་ལ་རྟག་ཏུ་སྡིག་པ་ཡོད། །སྡིག་པ་མེད་ལ་སྡིག་མེད་དོ། །བྱེད་ལ་ལྟོས་ལ་སྡིག་ཡོད་དེ། །བྱེད་པ་རྣམས་ཀྱི་རྗེས་སུ་འཇུག །
སྡིག་པ་སེམས་ལ་རག་ལས་ཤིང་། །འབྲས་བུ་སེམས་ལ་རག་ལས་ཏེ། །སེམས་ནི་རྐྱེན་ལས་སྐྱེས་པར་མཐོང་། །རྒྱུ་དང་རྐྱེན་ལས་ཤིན་ཏུ་བྱུང་། །སེམས་ཅན་སེམས་ཀྱིས་བསླུས་ནས་སུ། །སྡིག་པའི་དབང་གིས་འོངས་པ་དག །གནོད་པའི་མཆོག་སྟེ་སྟོབས་པོ་ཆེ། །སེམས་ཅན་དམྱལ་བ་དྲག་པོར་འགྲོ། །སེམས་དབང་གྱུར་པ་མི་འགྲོ་སྟེ། །རྟག་ཏུ་ཆོས་དབང་འགྱུར་མི་འགྲོ། །ཆོས་སྤྱོད་པ་ནི་རྟག་ཏུ་བདེ། །སྡིག་སྤྱོད་པ་ནི་མི་བདེ་འོ། །ཆོས་མ་ཡིན་པས་ལེགས་མེད་ཅིང་། །ལོག་པར་འཚེད་པར་མི་བྱེད་དེ། །རྒྱུ་དང་འདྲ་བར་དེ་མཐོང་ཞིང་། །འབྲས་བུ་སྣ་ཚོགས་འགྲུབ་པར་འགྱུར། །རྒྱུ་དང་འབྲས་བུ་འཐུན་པར་འབྱུང་། །ནམས་ཀྱང་ལོག་པར་འབྱུང་མེད་དེ། །འདུས་བྱས་ཀྱི་ནི་ཆོས་འདི་དག །རྒྱུ་དང་འབྲས་བུར་ཤིན་ཏུ་འབྱུང་། །རྒྱུ་མེད་འབྲས་བུ་ཡོད་མ་མཐོང་། །སེམས་ཅན་དམྱལ་བར་རྣམ་པར་ཕྱེ། །རྒྱུ་སྦྱོར་ལས་ནི་འབྲས་བུར་སྦྱོར། །སེམས་ཅན་དམྱལ་བར་རྣམ་པར་འཚེད། །བྱས་ཤིང་བསགས་པ་དྲག་པ་དང་། །ངེས་པར་ངན་འགྲོར་འགྲོ་བ་ཡི། །ལས་དང་འབྲས་བུར་འབྲེལ་པ་ནི། །སེམས་ཅན་དམྱལ་བར་རྣམ་པར་འཚེད། །སོ་སོར་བཤགས་པའི་རྣམ་པ་ཡིས། །ལས་གང་རྣམ་པར་བཟློག་བྱ་བ། །དེ་མི་འདོད་པ་ལམ་དེ་ཉིད། །རྣམ་པར་མཐོང་བས་འབྲས་བུ་མཐོང་། །འོད་གང་སྒྲོན་ལ་རག་ལས་ཏེ། །དེ་བཞིན་འབྲས་བུ་ལས་ལ་ཐོགས། །གཞན་དང་གཞན་ལས་འབྲས་འབྱུང་སྟེ། །འདུས་བྱས་ཐམས་ཅད་དེ་འདྲ་འོ། །གཞན་དང་གཞན་ལས་རྒྱུ་མཐོང་སྟེ། །གཞན་དང་གཞན་དུ་དབང་སྦྱོར་རོ། །འཐུན་པར་རྗེས་སུ་འབྲེལ་པ་ནི། །དེ་ཉིད་མཐོང་བ་དག་གིས་མཐོང་། །རྒྱུད་ལ་རྒྱུ་འབྲས་མེད་མིན་ཏེ། །དབང་ཕྱུག་ལ་སོགས་གནས་པ་མེད། །འདུས་བྱས་ཆོས་ཀུན་འབྱུང་བ་ནི། །དེ་ཉིད་མཐོང་བ་དག་གིས་བསྟེན། །འཁོར་བ་ཐོག་མ་མེད་པ་ནས། །རྒྱུ་དང་རྐྱེན་ལས་བྱུང་བ་སྟེ། །ལས་རྣམས་དང་ནི་འཐུན་པར་མཐོང་། །ལོག་པར་བརྟག་པར་མི་བྱ་འོ། །གང་འདོད་ལས་ཀྱི་དབང་སོང་བ། །སྲོག་ཆགས་
ལས་ཀྱི་རྒྱུ་ལས་སྐྱེས། །ལས་འབྲས་དེ་ཉིད་ཤེས་པ་དེ། །དག་པ་ཡིན་ཞེས་མངོན་པར་རྟོགས། །གཏི་མུག་ཞགས་པའི་དབང་སོང་བ། །ཁྱོད་ཀྱིས་སྡིག་དེ་རྟག་ཏུ་བྱས། །སྡིག་དང་བཅས་པའི་ལས་བྱས་པས། །བྱིས་པ་དོན་མེད་ཅི་ཞིག་གདུང་། །སྡིག་ལ་སྡིག་པ་རྟག་ཏུ་གནས། །དེ་བཞིན་ཆོས་ལ་ཆོས་གནས་ཏེ། །དེ་ཉིད་ལས་ནི་སྟོན་བྱེད་པ། །བརྟན་པ་དག་གིས་གཉི་ག་སྤོང་། །སངས་རྒྱས་བསྟན་ལ་རྨོངས་པ་དང་། །ལམ་དང་ལམ་མིན་རྨོངས་པ་གང་། །དེ་དག་ལ་ནི་ཞི་མེད་དེ། །མུན་ལ་ཉི་མ་མེད་པ་བཞིན། །རྟག་ཏུ་ཆོས་དང་ཆོས་མིན་དང་། །རྒྱུ་དང་རྐྱེན་ལ་རྨོངས་པ་དང་། །གནོད་མཆོག་ཤིན་ཏུ་མི་བཟད་པ། །སེམས་ཅན་དམྱལ་བ་དྲག་པོ་ཐོབ། །གཏན་ཚིགས་ལྡན་པའི་ཚིག་རྣམས་ཀྱིས། །དེ་ལ་བསྒོ་ནས་གཤིན་རྗེའི་མི། །མདུང་ཐུང་གཏུན་ཤིང་ཐོགས་ནས་སུ། །དེ་ནས་ཁྲོ་ཞིང་རྔམ་པར་འགྱུར། །དེ་ནས་ཡང་མཚོན་ཆ་རྣམ་པ་དུ་མ་དག་ཐོགས་ནས་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་གྱུར་པ་དེ་སྲིད་དུ་ལོ་འབུམ་ཕྲག་དུ་མའི་དུས་ནས་བསྐྱེད་པ་རང་གི་ལས་ཀྱིས་བྱས་པ་ལ་སྤྱོད་པའི་སེམས་ཅན་དམྱལ་བ་དེ་དག་ལ་གསོད་དོ། །དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེའི་མཐུས་ཚེ་རབས་བདུན་བརྒྱར་ཡི་དགས་སྟོར་ཁུང་ནས་འབབ་པ་འཐུང་བ་རྣམས་ཀྱི་ནང་དུ་སྐྱེ་བར་འགྱུར། དེ་དེ་ལས་ཐར་ནས་ཀྱང་ལས་དེ་དང་རྒྱུ་འཐུན་པར་ཚེ་རབས་ལྔ་བརྒྱར་དུད་འགྲོ་སི་མི་སི་མི་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་ལས་ཐར་ནས་ཀྱང་མི་རྣམས་ཀྱི་ནང་དུ་བྱ་རོག་ལྟར་དམན་པར་སྐྱེ་བར་འགྱུར་ཏེ། དེར་རྟག་ཏུ་ཁ་ཟས་སྙིང་པོ་མེད་པ་ཟ་ཞིང་སྐོམ་ཡང་རྙོག་མ་ཅན་འཐུང་བར་འགྱུར་ལ་སྐོམ་དེ་ཡང་ལན་འགའ་ཞིག་འཐུང་བར་འགྱུར་བ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅྭ་བརྒྱད་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བ་ཆེན་པོ་མནར་མེད་
པའི་འཁོར་ལ་བརྟགས་ན། དེས་འོག་དང་ཐད་ཀར་ཕྲ་བའམ་རགས་པའམ་རྗེས་སུ་སྦྱོར་བའམ་རྗེས་སུ་ཞུགས་པའི་འཁོར་གང་བཅུ་བདུན་པ་གཅིག་ཀྱང་མ་མཐོང་ངོ་། །དེ་དེ་ལྟར་སེམས་པ་ན་ལམ་མཐོང་བའི་དགེ་སློང་དེ་འདི་སྙམ་དུ་སེམས་ཏེ། ཀྱེ་ཨེ་མ་བདག་གིས་སེམས་ཅན་དམྱལ་བ་བརྒྱད་པོ་དག་གི་འཁོར་བཅུ་དྲུག་རྣམས་ཀྱི་མཐའ་མཐོང་སྟེ། ཉེས་པར་བྱས་པའི་ལས་ཀྱིས་འདི་དེ་ཙམ་ཞིག་པ་ལྟ་སྙམ་མོ། །བྱིས་པ་སོ་སོའི་སྐྱེ་བོ་ཐམས་ཅད་ཀྱིས་བྱས་ཤིང་བསགས་པ་གནོད་པའི་ས་དང་། ལས་ངན་པ་བྱས་ཤིང་མངོན་དུ་གྱུར་པའི་སེམས་ཅན་དམྱལ་བ་ཆེན་པོ་བརྒྱད་ཀྱི་འཁོར་ལས་སྐྱེས་པའམ། དེ་བཞིན་དུ་ཆེས་ཤིན་ཏུ་ལྕི་བའི་རྣམ་པ་མནར་མེད་པ་གང་དུ་སེམས་ཅན་དམྱལ་བ་ཆེན་པོ་མནར་མེད་པ་མ་གཏོགས་པར་སྲོག་ཆགས་དག་སྲེག་པའི་སེམས་ཅན་དམྱལ་བ་ཆེན་པོ་གཞན་དགུ་པ་མ་མཐོང་ངོ་། །གང་དུ་འདིའི་ཕྱོགས་གཅིག་ལས་སྟོང་གི་ཆ་གཅིག་ཅིག་བསྟན་ཏེ། རྒྱུ་གང་ངས་བཤད་པའམ། མཉན་པའམ། དཔེ་བྱ་བར་ཡང་སླ་བ་མ་ཡིན་ནོ། །དེ་ལྟར་སེམས་ཅན་དམྱལ་བ་པའི་སྡུག་བསྔལ་བཟོད་པར་དཀའ་བ་དེ་ལྟར་གཞན་དང་མཚུངས་པ་མེད་པ་སྡུག་བསྔལ་དཔེ་མེད་པ་དེ་རྒྱུ་གང་དང་། མཉམ་པ་གང་དང་། གང་དེ་ཉིད་ཁོང་དུ་ཆུད་ཅིང་ཤེས་པར་བྱས་ན་གང་ཁྲག་ཏུ་སྐྱུགས་ནས་འཆི་བར་འགྱུར་ཏེ། དེ་ལྟར་སེམས་ཅན་དམྱལ་བ་པ་དེའི་གནོད་པ་སྡུག་བསྔལ་བས་ཆེས་སྡུག་བསྔལ་བ་མི་འདོད་པ་མི་སྡུག་པ་ཡིད་དུ་མི་འོང་བ་ཡིན་ནོ། །དེ་ནས་དགེ་སློང་དེས་སེམས་ཅན་དམྱལ་བ་དེ་མཐོང་ནས་འཁོར་བའི་སྡུག་བསྔལ་ཐམས་ཅད་ལ་ཡིད་བྱུང་སྟེ། འདུས་བྱས་ཐམས་ཅད་ལ་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་མཐོང་ངོ་། །དེའི་འོག་ཏུ་འཕགས་པའི་བདེན་པ་འདི་ལ་རྣམ་པར་དཔྱད་པས་འཁོར་བ་ལ་སེམས་ཤིན་ཏུ་འདོད་ཆགས་དང་བྲལ་བར་བྱེད། ཡིད་བྱུང་བར་བྱེད། མི་དགའ་བར་བྱེད་ཅིང་འཁོར་བ་ལ་སྨོད་པར་བྱེད་དོ། །རྣམ་པ་དེ་དག་གིས་འཁོར་བ་མི་བཟད་པ་ཤིན་ཏུ་འཇིགས་པར་མཐོང་ནས། དེ་འདི་སྙམ་དུ་སེམས་ཏེ།
ཀྱེ་ཨེ་མ་སེམས་ཅན་འདི་དག་ནི་ལྷའི་ལྟ་བ་དང་ཤིན་ཏུ་བྲལ་ཞིང་མིག་དང་བྲལ་བ་ཡིན་ཏེ། ཡང་དང་ཡང་དུ་སེམས་ཅན་དམྱལ་བ་ཤིན་ཏུ་མི་བཟད་པ། ཤིན་ཏུ་ཚ་བ་ཤིན་ཏུ་འཇིགས་པར་སྐྱེས་ཀྱང་སྐྱོ་བར་མི་བྱེད་དེ། བྱིས་པ་སོ་སོའི་སྐྱེ་བོ་འདི་དག་འཁོར་བ་ཐོག་མ་མེད་པ་ནས་སྲེད་པའི་ཞགས་པས་བཅིངས་པ་ཡིན་ནོ་སྙམ་མོ། །དེ་ནས་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་འདི་ལྟར་དགེ་སློང་རྒྱུན་མི་འཆད་པར་སྤྲོ་བ་དེ་མི་བཟད་པ་བས་ཀྱང་ཤིན་ཏུ་མི་བཟད་པ་སེམས་ཅན་དམྱལ་བ་ཡང་སོས་ལ་སོགས་པ་མནར་མེད་པའི་བར་གྱི་ལས་ཀྱི་འབྲས་བུ་རྣམ་པར་སྨིན་པ་ཐམས་ཅད་ཀྱིས་ས་གཞན་བཅུ་གསུམ་པ་ལ་ཞུགས་ཏེ། བདུད་ཀྱི་ཡུལ་ལ་མི་དགའ་ཞིང་བདུད་ཀྱི་དབང་དུ་མི་འགྲོ་བདུད་ཀྱི་འཆིང་བ་ཐམས་ཅད་རྣམ་པར་གཅོད་ཅིང་བདུད་ཀྱི་ཡུལ་ལ་གནས་པར་མི་བྱེད་དེ་རྟག་ཏུ་བརྩོན་པའི་དགེ་སློང་དེ་བག་ལ་ཉལ་གྱི་སྦྱོར་བ་མ་ལུས་པར་བཅད་ནས་མྱ་ངན་ལས་འདས་པའི་གྲོང་ཁྱེར་དུ་འཇུག་པར་བྱེད་དོ། །དེའི་སྤྲོ་བ་ས་བླ་བའི་གནོད་སྦྱིན་དག་གིས་མཐོང་ནས་བར་སྣང་ལ་སྤྱོད་པའི་གནོད་སྦྱིན་རྣམས་ལ་བསྙད་དེ། འདི་ལྟར་གང་རིགས་ཆེ་གེ་མོ་ཞིག་ལས་རིགས་ཀྱི་བུ་དེ་གྲོང་མང་གེ་མོ་ཞིག་དང་། གྲོང་རྡལ་ག་གེ་མོ་ཞིག་དང་། ཡུལ་ག་གེ་མོ་ཞིག་ནས་སྐྲ་དང་ཁ་སྤུ་བྲེགས་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། རྩོལ་ཞིང་འབད་པ་ན་ཡང་དག་པའི་ལམ་གཞན་དང་མི་འདྲ་བའི་ལྟ་བ་ཐུན་མོང་མ་ཡིན་པ་འཇིག་རྟེན་ལས་འདས་པ་ལས་ཀྱི་ཆོས་ཀྱི་རྣམ་པར་སྨིན་པ་ཤེས་པ་དེས། ས་གཞན་བཅུ་གཅིག་པ་ལ་ཞུགས་ཏེ། སེམས་ཅན་དམྱལ་བར་ཞུགས་པ་རྣམས་ཀྱི་ཐོག་མ་དང་ཐ་མའི་སྡུག་བསྔལ་ཤེས་སོ། །དེ་ལྟར་ས་བླའི་གནོད་སྦྱིན་དག་གིས་བར་སྣང་ལ་སྤྱོད་པའི་གནོད་སྦྱིན་དག་ལ་བསྙད་དོ། །དེ་དག་གིས་ཀྱང་དེ་ལྟར་སྔ་མ་བཞིན་དུ་རྒྱལ་པོ་ཆེན་པོ་བཞི་ལ་བསྙད་དོ། །དེ་དག་གིས་ཀྱང་སུམ་ཅུ་རྩ་གསུམ་པ་རྣམས་ལ། དེ་དག་གིས་ཀྱང་འཐབ་བྲལ་རྣམས་ལ། འཐབ་བྲལ་བ་རྣམས་ཀྱིས་ཀྱང་དགའ་ལྡན་པ་རྣམས་ལ། དགའ་ལྡན་པ་རྣམས་ཀྱིས་ཀྱང་འཕྲུལ་
དགའ་རྣམས་ལ། འཕྲུལ་དགའ་རྣམས་ཀྱིས་ཀྱང་གཞན་འཕྲུལ་དབང་བྱེད་པ་རྣམས་ལ་བསྙད་དོ། །དེ་ལྟར་རིམ་གྱིས་སྔ་མ་བཞིན་དུ་འོད་ཆུང་གི་ལྷ་རྣམས་ཀྱི་བར་ལ་བསྙད་དེ་འདི་ལྟར་ལྷ་ཁྱེད་ཅག་སེམས་ཤིན་ཏུ་མཉམ་པར་བཞག་པས་ཉོན་ཅིག །འདི་ལྟར་འཛམ་བུའི་གླིང་ན་རིགས་ཆེ་གེ་མོ་ཞིག་ལས་རིགས་ཀྱི་བུ་མང་གེ་མོ་ཞིག་ཡུལ་ག་གེ་མོ་ཞིག་ནས་སྐྲ་དང་ཁ་སྤུ་བྲེགས་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་རྩོལ་ཞིང་འབད་ལ་སྒྲིམ་པ་ན་སྤྲོ་བ་མི་འབྲི་ཞིང་བདུད་ཀྱི་ཡུལ་གྱི་དངོས་པོ་མི་འདོད་ལ་དགའ་བའི་འདོད་ཆགས་ཀྱི་མོད་ལས་བྱུང་བའི་སྲེད་པ་དང་ལྷན་ཅིག་ཤིན་ཏུ་ཆགས་པར་མི་བྱེད་ཀུན་ནས་ཉོན་མོངས་ཤིང་མི་སྡུག་པ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཀྱིས་ཤིན་ཏུ་ཆགས་པར་མི་བྱེད་དེ། དེ་ས་གཞན་བཅུ་གསུམ་པ་ལ་ཞུགས་སོ། །སེམས་ཅན་དམྱལ་བ་བརྒྱད་པོ་ཀུན་གྱི་ལས་ཀྱི་ཆོས་ཀྱི་རྣམ་པར་སྨིན་པ་ཤེས་པའི་དགེ་སློང་གིས་འཁོར་བ་མ་རིག་པའི་མུན་པའི་སྡུག་བསྔལ་ཐམས་ཅད་ཤེས་ནས་ཇི་ལྟ་བ་བཞིན་དུ་ཡིད་བྱུང་སྟེ། བདུད་ཀྱི་ཕྱོགས་ཀྱི་དངོས་པོ་ནི་དམས་སོ། །དམ་པའི་ཆོས་ཀྱི་ཕྱོགས་ནི་མངོན་པར་མཐོའོ་ཞེས་དེ་ཐོས་ནས་འོད་ཆུང་གི་ལྷ་རྣམས་མཆོག་ཏུ་དགའ་ཞིང་འཁོད་དེ། འདི་ལྟར་བདུད་ཀྱི་ཕྱོགས་ནི་དམས་སོ། །དམ་པའི་ཆོས་ཀྱི་ཕྱོགས་ནི་མངོན་པར་མཐོའོ་སྙམ་མོ། །དེ་ལྟར་ལྷ་རྣམས་དགའ་བའི་ཡིད་ཀྱིས་དམ་པའི་ཆོས་ཉན་པར་འགྱུར་ན་གང་དད་པ་དང་དད་པའི་རྗེས་སུ་འབྲང་ཞིང་དེ་ཁོ་ན་ཉིད་མཐོང་བའི་སྐྱེས་བུ་དམ་པ་དེ་དག་ལས་དེ་དང་རྒྱུ་འཐུན་པར་དམ་པའི་ཆོས་འཕེལ་ཞིང་རྒྱས་པ་ཡིད་དགའ་བར་འགྱུར་བ་ལྟ་སྨོས་ཀྱང་ཅི་དགོས། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བའི་གནོད་པ་རྒྱ་མཚོའི་ཆུ་ལྟ་བུ་ཀུན་ཏུ་སྲེད་པ་ཀློང་ལྟ་བུར་གཡོ་བ་སེམས་ཅན་དམྱལ་བ་ཆེན་པོ་ཡང་སོས་ལ་སོགས་པ་ནས་མནར་མེད་པའི་བར་རྒྱ་ཆེ་བའི་ནང་སའི་འོག་འཇིགས་པར་རྫོགས་བྱེད་དང་། ཀུན་ཏུ་རྒྱུ་དང་། ཀོ་ཀ་ལི་ཀ་དང་། ལྷས་བྱིན་དག་ཉ་དང་ཆུ་སྲིན་ཆེན་པོ་ལྟར་ཟིན་ཅིང་སེམས་ཅན་
དམྱལ་བ་པའི་ལྷག་མ་ཉ་མིད་དང་། ཉ་མིད་ཆེན་པོ་དང་། ཆུ་སྲིན་ན་ཀྲ་དང་། ཆུ་སྲིན་ཀུམ་བྷི་ར་དང་། ཆུ་སྲིན་བྱིས་པ་གསོད་དང་། རུས་སྦལ་དང་། སྲམ་འཁྲུགས་པ་ལྟ་བུ་དག་འདོད་ཆགས་ཞེ་སྡང་གཏི་མུག་རླུང་གི་ཤུགས་དང་གློག་འཁྱིལ་པ་ལྟ་བུས་སེམས་གཡོ་བའི་རླབས་ཀློང་ལྟ་བུར་འཁྱིལ་པ་དེའི་དུས་ཀྱི་མཐའི་ཤུགས་དབུ་བ་ལྟ་བུས་སེམས་ཅན་དམྱལ་བ་པ་གནོད་པ་རབ་ཏུ་མང་བ་མཆི་མ་ཆར་ལྟར་གང་བར་ངུ་ཞིང་སྨྲེ་སྔགས་འདོན་ལ་ཆོ་ངེས་འདེབས། ཧ་ཧའི་སྒྲ་སྐད་ཀྱི་ཤུགས་དང་སེམས་ཀྱི་ཤུགས་ཆུ་རླབས་ལྟར་མང་བ་ཉེས་པར་བྱས་པའི་ལས་ཀླུའི་ཤུགས་ལྟ་བུས་སྡུག་བསྔལ་ཆར་ལྟར་འབེབས་ཤིང་མནར་མེད་པ་ཟབ་མོར་བསྐལ་པའི་མཐའི་མེ་འབར་བའི་ཤུགས་ཀྱིས་ཁོར་ཡུག་དང་ཆུ་བཙོས་པ་ལྟ་བུའི་སེམས་ཅན་དམྱལ་བ་ཆེན་པོའི་སྡུག་བསྔལ་རྒྱ་མཚོ་ལྟ་བུར་མཐའ་མེད་ལ་མི་བཟད་པ་མཐོང་ནས། དགེ་སློང་དེ་ཡིད་བྱུང་སྟེ། འདི་ལྟར་ཚིགས་སུ་བཅད་དེ་སྨྲས་པ། སྲེད་པས་ཡོངས་སུ་བསླུས་བྱས་ཤིང་། །རྨོངས་པས་རྨོངས་པའི་སེམས་ཅན་དག །སྐྱེ་ཞིང་འཆི་བ་ཉམ་ང་བ། །འོག་ཏུ་འཇིག་རྟེན་འགྲོ་བར་འགྱུར། །མི་ཡུལ་ལས་ནི་དམྱལ་བར་འགྱུར། །དམྱལ་བ་ལས་ནི་ལྷ་ཡུལ་དུ། །མི་ཉིད་ལས་ནི་དུད་འགྲོར་འགྲོ། །དེ་ནས་ཡི་དགས་འགྲོ་བར་འགྱུར། །སེམས་ཅན་འདོད་ཆགས་དབང་སོང་བ། །རང་གི་ལས་ཀྱིས་འགྲོ་བ་འཁྲུལ། །གཏི་མུག་ཞགས་པས་བཅིངས་པ་དག །སྲིད་པའི་མཚོར་ནི་རྣམ་པར་འཁྱམ། །འཁོར་བར་མི་ནི་སྡུག་བསྔལ་འདི། །རྣམ་པ་སྣ་ཚོགས་གོམས་བྱས་ཏེ། །དེར་ནི་རྒྱུ་དེ་གོམས་པས་ན། །ཇི་ལྟར་མཆོག་ཏུ་སྐྱེ་མི་འགྱུར། །ལྷ་དག་བག་མེད་པ་ཡིས་ཉམས། །མི་དག་ཡོངས་སུ་ཚོལ་བས་ཉམས། །ཡི་དགས་བཀྲེས་དང་སྐོམ་པས་ཉམས། །དུད་འགྲོ་གཅིག་ལ་གཅིག་ཟ་འོ། །སེམས་ཅན་དམྱལ་བ་དམྱལ་བའི་མེས། །ཡི་དགས་རྨོངས་པས་རྟག་ཏུ་ཉམས། །འཁོར་བ་ཁབ་ཀྱི་རྩེ་ཙམ་ཡང་། །བདེ་བ་ཉིད་ནི་ཅུང་ཟད་མེད། །རྨོངས་པའི་སེམས་ཀྱིས་སྐྱེ་བོ་དག །སྡུག་
བསྔལ་ལས་ནི་བདེ་ལ་ཆགས། །སྡུག་བསྔལ་འདི་ལས་ཐར་བ་གང་། །ཡང་དག་ལམ་ནི་སྟོན་པ་མེད། །གང་དག་རྟག་ཏུ་ཆོས་མི་སྒྲུབ། །གང་དག་རྟག་ཏུ་བདེན་མི་སྒྲུབ། །བསམ་གཏན་རྟག་ཏུ་མི་སྒྲུབ་གང་། །དེ་དག་སྡུག་བསྔལ་བྲལ་མི་འགྱུར། །འཇིག་རྟེན་འདི་དང་ཕ་རོལ་དུ། །རྟག་ཏུ་མ་འདྲ་ཕ་འདྲ་ཞིང་། །གཉེན་དང་འདྲ་ཞིང་སྒྲོན་འདྲ་བ། །སངས་རྒྱས་ཀྱིས་ནི་ཆོས་བསྟན་ཏོ། །རྟག་ཏུ་ཉེས་གསུམ་དབང་སོང་བ། །ཕུང་པོ་གསུམ་ནས་སེམས་ཅན་དག །རྟག་ཏུ་ཁམས་གསུམ་དག་ཏུ་འཇུག །དེ་ནི་སྡུག་བསྔལ་གསུམ་དང་ལྡན། །ལས་གསུམ་དབང་སོང་འཁྲུལ་པ་དག །དེ་ནི་ངན་སོང་གསུམ་ན་རྒྱུ། །སྲིད་གསུམ་ཆགས་པའི་འགྲོ་བ་དག །རིམ་པ་གསུམ་དུ་རྣམ་པར་རྒྱུ། །གང་ཞིག་དཀོན་མཆོག་མཆོག་གསུམ་དང་། །གང་ཞིག་བྱང་ཆུབ་གསུམ་དབང་སོང་། །གང་ཞིག་ལྟ་བ་གསུམ་སྤངས་པ། །དེ་དག་ལ་ནི་སྡུག་བསྔལ་མེད། །དུས་སྐབས་གསུམ་ལ་རྟག་གནས་ཤིང་། །དགའ་བ་གསུམ་གྱི་དེ་ཉིད་མཐོང་། །གསུམ་གྱི་ཆ་ཡིས་ལྟོ་འགྲངས་པ། །དེ་ནི་མྱ་ངན་བྲལ་བར་འགྱུར། །ཕུང་པོ་གསུམ་ལ་སེམས་མཉམ་ཞིང་། །ལས་གསུམ་རྣམ་པར་དཔྱོད་པ་གང་། །དེ་ནི་འཁོར་བར་མྱ་ངན་གྱི། །རྣམ་པ་བྲལ་ཞིང་རིམས་མེད་འགྱུར། །ལམ་དང་ལམ་མིན་རྣམ་པ་ཤེས། །དངོས་དང་དངོས་མེད་རྣམ་སེམས་པ། །བྱམས་པའི་སེམས་ནི་བསྒོམས་པ་གང་། །དེ་ནི་འགྲོ་བ་མཆོག་ཏུ་འགྲོ། །ཀུན་ནས་རབ་ཏུ་རྣམ་གསལ་ཞིང་། །དཔའ་བོ་རྙོག་པ་མེད་པ་ཡི། །ཡིད་ནི་སྡིག་དང་མ་འདྲེས་པ། །མི་དེ་རྣམ་པར་རབ་ཏུ་གྲོལ། །གང་ཞིག་ཡང་དག་ལམ་ཞུགས་ཤིང་། །དྲན་དང་ལྡན་པ་སྟོབས་ཆེ་ལ། །སྲིད་པ་དག་ལ་འདོད་བྲལ་བ། །དེ་ནི་ངེས་པར་གྲོལ་བར་འགྱུར། །སྲིད་པ་འདོད་ཅིང་དགའ་བ་ལ། །མི་གང་མངོན་པར་མི་དགའ་བ། །དེ་ལ་སྲིད་ལས་སྐྱེས་པ་ཡི། །སྡུག་བསྔལ་ཤིན་ཏུ་ཆུང་བའང་མེད། །མི་བཟད་ལས་ནི་མི་བཟད་འབྱུང་། །མི་བཟད་པ་ཡིས་ཡོངས་བསྒྱུར་བ། །
འདོད་པ་དུག་དང་མེ་ལྟ་བུ། །རབ་ཏུ་བསྒྲིམས་ཏེ་སྤང་བར་གྱིས། །འདོད་པ་ཡོངས་སུ་སྤང་བྱས་ཤིང་། །རྟག་ཏུ་ཐར་ལ་དགའ་བ་ནི། །ཉི་མ་ཤར་བས་མུན་མེད་ལྟར། །མི་དགེའི་ཆོས་རྣམས་འཇིག་པར་འགྱུར། །དེ་ལྟར་རྟག་ཏུ་དགེ་བསྟེན་ཞིང་། །མི་དགེ་བ་ཉིད་སྤང་བར་གྱིས། །མདོར་ན་ངེས་པར་བསྟན་པ་ནི། །དགེ་དང་མི་དགེ་ཡོངས་སུ་རྟོགས། །དེ་ལྟར་དགེ་སློང་དེ་འཇིག་རྟེན་འདི་དང་འཇིག་རྟེན་ཕ་རོལ་དེ་ལ་ཕན་པར་འདོད་པའི་བློས་སེམས་ཅན་དམྱལ་བའི་སྡུག་བསྔལ་མངོན་པར་བརྟགས་ནས། སེམས་ཅན་རྣམས་ལ་སྙིང་བརྩེ་བ་རྗེས་སུ་འཇུག་པར་བྱེད་དེ། བྱམས་པ་བསྒོམས་པའི་སེམས་ཀྱིས་དེ་སེམས་ཅན་དམྱལ་བ་འཇིགས་ཤིང་ཉམ་ང་བ་ཐམས་ཅད་ལ་མངོན་པར་བརྟགས་ཤིང་ལས་ཀྱི་འབྲས་བུ་རྣམ་པར་སྨིན་པ་ཡང་ཤེས་ནས་མཆོག་ཏུ་ཡིད་བྱུང་བའི་སེམས་ཀྱིས་རྟོག་པར་བྱེད་དེ། ཨེ་མ་སེམས་ཅན་འདི་དག་ཇི་ལྟར་སྲིད་པའི་དགོན་པར་འཇིགས་ཤིང་སྡུག་བསྔལ་སྣ་ཚོགས་ཀྱི་ནང་དུ་བྱིང་ཞིག་གུ་སྙམ་ནས་དེ་སྙིང་རྗེའི་བློ་འདི་ལྟར་ཉེ་བར་འཇོག་པར་བྱེད་དེ། འདི་ལྟར་མི་དག་དེ་མ་ཐག་ཏུ་ངན་སོང་དུ་འགྲོ་བ་ནི་ལས་ངན་པ་བྱས་པ་རང་གི་སེར་སྣས་བསླུས་ཤིང་། ལོངས་སྤྱོད་ངན་པ་འདོད་ལ། རྙེད་པ་ངན་པས་ཟིལ་གྱིས་ནོན་པ་རྣམས་སྦྱིན་པ་དག་མ་བྱིན་པར་གྱུར་ཏེ། དེ་དག་གིས་དགེ་སྦྱོང་དང་། བྲམ་ཟེ་དང་། ཕོངས་པ་དང་། ལོང་བ་དང་། བཀྲེན་པ་སློངས་མོ་བ་རྣམས་ལ་སེར་སྣའི་དྲི་མས་སྦགས་པའི་སེམས་ཀྱིས་སྦྱིན་པ་དག་མ་བྱིན་ཞིང་བསོད་ནམས་དག་མ་བྱས་ལ་འཇིག་རྟེན་འདི་དང་ཕ་རོལ་དུ་ཚུལ་ཁྲིམས་མཚོ་ལྟ་བུར་གྱུར་པ་མ་བསྲུངས། བུ་དང་། ཆུང་མ་དང་། བྲན་ཕོ་དང་།བྲན་མོ་དག་ལ་ཡང་སྦྱིན་པ་མ་བྱིན་ལ་སེར་སྣས་འཇིག་རྟེན་ཕ་རོལ་ལ་བསླུས་པ་དེ་ཡི་དགས་རྣམས་ཀྱི་ནང་དུ་སྐྱེ་བར་འགྱུར་ཏེ། ཡི་དགས་ཀྱི་རྒྱུད་དུ་སྐྱེས་པ་ཡང་ཕལ་ཆེར་ཡི་དགས་མོར་སྐྱེ་བར་འགྱུར་རོ། །མི་ཐབ་མོ་དང་ཕྲག་དོག་གི་དྲི་མ་གང་གིས་ནང་གི་སེམས་ཉམས་པར་བྱས་པ་འདིས་ན་ཡི་དགས་མོ་རྣམས་ཀྱི་ནང་དུ་སྐྱེ་བར་འགྱུར་རོ་སྙམ་མོ། །དེ་ནས་ཡང་དགེ་སློང་
ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་ཡུལ་ལ་རྟོག་པར་བྱེད་དེ་ཡི་དགས་ཀྱི་ཡུལ་འདི་གང་ཞིག་ཡིན་སྙམ་མོ། །དེས་ཐོས་པ་ལས་བྱུང་བའི་ཤེས་པས་བརྟགས་ན་ཡི་དགས་ནི་མདོར་བསྡུ་ན་རྣམ་པ་གཉིས་ཏེ། འཇིག་རྟེན་ན་རྒྱུ་བ་དང་། ཡི་དགས་ཀྱི་ཡུལ་ན་གནས་པའོ། །དེ་ལ་འཇིག་རྟེན་ན་རྒྱུ་བ་ནི་མཚན་མོ་དག་གལ་ཏེ་མི་རྣམས་ཀྱིས་མཐོང་བར་འགྱུར་རོ། །ཡི་དགས་ཀྱི་ཡུལ་ན་གནས་པ་ནི་གང་དུ་སའི་འོག་དཔག་ཚད་ལྔ་བརྒྱ་ན་གནས་ཏེ། ཡི་དགས་ཀྱི་ཡུལ་གྱི་རྐྱེན་མ་གཏོགས་པར་འཛམ་བུའི་གླིང་གི་མཐའ་ནས་དཔག་ཚད་སུམ་སྟོང་དྲུག་བརྒྱ་ཡོད་དོ། །དེ་དག་འཛམ་བུའི་གླིང་དང་ཐག་ཉེ་བ་དང་རིང་བ་ནི་ངེས་པ་མེད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འགྲོ་བ་ལ་རྟོག་པར་བྱེད་དེ། ཡི་དགས་ཀྱི་ཡུལ་ཅི་ཙམ་ཡོད་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཡི་དགས་རྣམ་པ་མང་སྟེ་མདོར་བསྡུ་ན་རྣམ་པ་སུམ་ཅུ་རྩ་དྲུག་ཡོད་དོ། །དེ་དག་ཐམས་ཅད་ཕྲག་དོག་དང་སེར་སྣའི་རྒྱུས་དེར་སྐྱེ་བར་འགྱུར་ལ་བསམ་པ་སྣ་ཚོགས་སྐྱེད་པ་དང་། སྡུག་བསྔལ་བ་དང་། བསམ་པ་དང་། བཟའ་བ་སྣ་ཚོགས་དང་། གཡོ་བ་སྣ་ཚོགས་དང་། གནས་སྣ་ཚོགས་དང་། ལུས་བཀྲེས་པ་དང་སྐོམ་པས་གདུངས་པ་ཡིན་ནོ། །དེ་དག་ཐམས་ཅད་མདོར་བསྡུ་ན་རྣམ་པ་སུམ་ཅུ་རྩ་དྲུག་ཡོད་དེ། འདི་ལྟ་སྟེ། ཡི་དགས་ལྟོ་གུག་དང་། ཡི་དགས་ཁ་ཁབ་ལྟར་ཕྲ་བ་དང་། ཡི་དགས་བཤང་བ་ཟ་བ་དང་། ཡི་དགས་ཀུན་སྟོན་དང་། ཡི་དགས་དྲི་ཟ་བ་དང་། ཡི་དགས་ཆོས་ཀྱི་སྦྱིན་པ་ཟ་བ་དང་། ཡི་དགས་སྦྱིན་པ་ཟ་བ་དང་། ཡི་དགས་ཆུ་འཐུང་བ་དང་། བསམ་པས་འཚོ་བ་དང་། མཆིལ་མ་ཟ་བ་དང་། ཕྲེང་བ་ཟ་བ་དང་། ཁྲག་ཟ་བ་དང་། ཤ་ཟ་བ་དང་། བདུག་པ་ཟ་བ་དང་། དྲག་ཤུལ་སྤྱོད་པ་དང་། གླགས་ལྟ་བ་དང་། སའི་འོག་ན་གནས་པ་དང་། ཡི་དགས་མཐུ་བོ་ཆེ་དང་། མཚན་མོ་ལུས་རབ་ཏུ་འབར་བ་དང་། མི་རྣམས་ལ་གླགས་ལྟ་བ་དང་།
འདོད་པའི་གཟུགས་ཅན་དང་། གླིང་གི་བར་ན་གནས་པ་དང་། གཤིན་རྗེའི་དབྱུག་པ་དང་། བྱིས་པ་ལ་ཟ་བ་དང་། ཚངས་པའི་སྲིན་པོ་དང་། འབྲུ་དྲུས་པའི་ཤུན་པ་ཟ་བ་དང་། མི་གཙང་བ་ཟ་བ་དང་། ལམ་པོ་ཆེ་ན་གནས་པ་དང་། མང་དུ་ཟ་བ་དང་། མེ་མདག་ཟ་བ་དང་། དུག་ཟ་བ་དང་། དགོན་པ་ན་གནས་པ་དང་། དུར་ཁྲོད་ན་གནས་པ་དང་། ཤིང་ལ་གནས་པ་དང་། ལམ་གྱི་བཞི་མདོ་ན་གནས་པ་དང་། བདུད་ཀྱི་སྡེ་སྟེ་དེ་ལྟར་མདོར་བསྡུ་ན་ཡི་དགས་ཀྱི་རིགས་སུམ་ཅུ་རྩ་དྲུག་ཡོད་དོ། །རྒྱ་ཆེར་ནི་སེམས་ཀྱི་བསམ་པའི་ལས་ཀྱི་ཆའི་བྱེ་བྲག་དང་བསམ་པ་སྣ་ཚོགས་ཀྱི་བྱེ་བྲག་གིས་དཔག་ཏུ་མེད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཤིན་ཏུ་བཀྲེས་པ་དང་། སྐོམ་པས་གདུངས་པའི་ལུས་ཅན་རྣམས་ཕལ་ཆེར་ཕྲག་དོག་དང་སེར་སྣས་ཉམས་པ་དག་ཡིན་ཞིང་རྒྱ་ཆེར་ནི་ལུས་དང་། ངག་དང་། ཡིད་ཀྱི་ལས་གསུམ་གྱིས་སྐྱེ་ལ་བྱེ་བྲག་ཏུ་དབྱེ་ན་མི་དགེ་བའི་ལས་ཀྱི་ལམ་རྣམ་པ་བཅུ་དང་ཡང་དག་པར་ལྡན་པས་ཡི་དགས་རྣམས་ཀྱི་ནང་དུ་སྐྱེ་བར་འགྱུར་རོ། །དེ་མདོར་བསྡུ་ན་མི་དགེ་བའི་ལས་ཀྱི་ལམ་རྣམ་པ་བཅུའི་མི་དགེ་བའི་རྒྱུ་གང་ཡིན་པ་ལ་སྲོག་ཆགས་ཀྱི་སྡུག་བསྔལ་ཐམས་ཅད་དེ་ལ་རག་ལས། དེ་ལ་སྤྱོད། དེ་ལས་སྐྱེ་ཞིང་འབྱུང་། དེའི་ཕྱི་བཞིན་འབྲང་། དེ་དང་འབྲེལ། རྒྱུ་དེ་ལས་བྱུང་བ་ཡིན་ཏེ། ངན་སོང་གིས་ཀུན་ཏུ་འཁོར་ཡང་འཁོར་བ་ལ་ཡིད་འབྱུང་བར་མི་བྱེད་དོ། །སེམས་སྤྲེའུ་ལྟ་བུ་ཐོག་མ་མེད་པའི་དུས་ནས་འཁོར་བར་ཞུགས་ཤིང་སྡུག་བསྔལ་གཟིང་གཟིང་བའི་བར་ན་གནས་པ་ལ་གོམས་པ་ཡན་ལག་དང་ཉིང་ལག་གི་དྲ་བ་སྣ་ཚོགས་ཅན་གྱི་ནང་ན་སྡོམ་ཞིང་འཁོར་བའི་རི་ལ་མྱུར་དུ་གནས་པ་སེམས་གཟིང་གཟིང་བའི་བག་ཆགས་ཀྱི་རྟོག་པ་ཡང་གཅིག་ཏུ་ཤེས་པར་སླ་བ་མ་ཡིན་ལ་དེ་ལྟར་འགྲོ་བ་མྱུར་དུ་འགྲོ་བ་འདི་སེམས་སྤྲེའུ་ལྟ་བུ་ཡིན་ཏེ། དེ་ལྟ་བས་ན་སེམས་འདི་རེ་ཞིག་ཐོག་མ་ཉིད་དུ་ཤིན་ཏུ་དུལ་བར་བྱའོ། །དེ་ལྟར་མ་བྱས་ན་ངན་སོང་གིས་མི་བཟད་པ་རྣམས་སུ་སེམས་ཅན་དག་ཤིན་ཏུ་སྡུག་བསྔལ་བར་འགྱུར་ཞིང་
དེ་ལྟར་མ་བྱས་ན་འཁོར་བར་སེམས་ཀྱི་དགྲས་ཟིན་ཏེ། བདེ་བ་འཐོབ་པར་མི་འགྱུར་བ་མཐོང་ངོ་། །དེ་ལྟར་དགེ་སློང་དེ་སོ་སོར་རབ་ཏུ་རྣམ་པར་འབྱེད་པ་ན་ཡང་དང་ཡང་དུ་འཁོར་བ་འདི་ལ་ཡིད་བྱུང་ཞིང་མི་དགའ་ལ་འཁོར་བར་གཏོགས་པའི་སྡུག་བསྔལ་ཐམས་ཅད་ལ་རྣམ་པར་སྨོད་པར་བྱེད་དོ། །དགེ་སློང་དེ་དེ་ལྟར་སེམས་པར་བྱེད་ཅིང་ཡི་དགས་རྣམ་པ་དུ་མ་དག་ལ་སེམས་པ་ན་འདི་ལྟར་རབ་ཏུ་རྣམ་པར་འབྱེད་པ་ནི་ལས་དང་ལས་ཀྱི་རྣམ་པར་སྨིན་པའི་བྱེད་རྒྱུ་གང་ཡིན་པའི་ཆ་གཅིག་ཅིག་རབ་ཏུ་རྣམ་པར་འབྱེད་དེ་སྐྱེ་བ་རྒྱུ་མེད་པ་མ་ཡིན་ཞིང་། བདེ་བ་དང་། སྡུག་བསྔལ་དང་། འཐུན་པ་དང་མི་འཐུན་པ་དང་། སྐྱེ་བ་ངན་པ་དང་། བཟང་བ་དང་། རིགས་བཟང་བ་དང་། རིགས་ངན་པར་སྐྱེ་བ་ནི་སྲོག་ཆགས་ཐམས་ཅད་ཀྱི་ཚེ་འཆི་བ་དང་སྐྱེ་བ་འདོད་རྒྱལ་གྱིས་ཆུང་ཟད་ཀྱང་བྱས་པ་མེད་དོ་སྙམ་མོ། །ལས་ཀྱི་ཆོས་ཀྱི་རྣམ་པར་སྨིན་པ་ཤེས་པའི་དགེ་སློང་དེས་ཡི་དགས་རྣམས་ཀྱི་ལས་ཀྱི་ཆོས་རྣམ་པར་དབྱེ་བ་དག་རྣམ་པར་འབྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན་ཡི་དགས་ལྟོ་གུག་ཅེས་བྱ་བ་རང་གི་ལུས་ཉིས་འགྱུར་གྱིས་ཆེ་ཞིང་ཁ་དང་ལག་པ་དང་རྐང་པ་ཉམས་ལ་ཐམས་ཅད་དུ་ལྟོ་གུག་པ་ཡིན་ཏེ། བུ་གའི་གསེབ་དག་ཏུ་མེ་མདག་གིས་རབ་ཏུ་བཀང་། ལུས་བཀྲེས་པ་དང་སྐོམ་པས་གདུངས། ལུས་ཚལ་ཤིང་བསྲེགས་པ་ལྟ་བུ་འགྲོ་བའི་དུས་མཐའ་མེད་པ་ནས་བཅིངས་པ་དག་དགའ་བ་མེད་ཅིང་གྲོགས་མེད་ལ་མགོན་མེད་པ་ཡིན་ནོ། །དེ་དག་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གླ་མི་ནོར་འདོད་པ་གང་གིས་འདི་ལྟར་བདག་གིས་གླ་དག་ཁྱིམ་དུ་བསག་གོ་སྙམ་ནས་སྲོག་གཅོད་པ་བྱེད་ཅིང་ཕྱུགས་ལ་འཚེ་བའམ། དེ་སྙིང་རྗེ་མེད་པ་ཆགས་པའི་དབང་གིས་སྲོག་གཅོད་པ་བྱེད་ལ་སྒོམ་ཞིང་སྟེན་ཏེ་མང་དུ་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སའི་འོག་དཔག་ཚད་ལྔ་བརྒྱ་ན་ཡི་དགས་ལྟོ་གུག་གི་རིགས་རྣམས་སུ་སྐྱེ་བར་འགྱུར་རོ། །དེ་སའི་ཕྱོགས་མུན་པའི་ནང་དེར་སྐྱེས་པ་དང་། སྟེང་གི་ཕྱོགས་ནས་རི་རྣམས་ཀྱིས་བཙིར་ཅིང་འོག་གི་ཕྱོགས་
ནས་རི་གཉིས་པས་བཏེག་སྟེ་དེ་རི་གཉིས་ཀྱི་བར་དུ་རང་གི་ངོ་བོའི་ལུས་ཀྱི་ཚད་དཔག་ཚད་ཙམ་ལ་ལེབ་ལེབ་པོར་བྱས་ཤིང་བཀྲེས་པ་དང་། སྐོམ་པས་ཤིན་ཏུ་གདུངས་སོ། །ཚེའི་ཚད་ཀྱི་མཐའ་ནི་ཚེ་རབས་ལྔ་བརྒྱ་ཡིན་ཏེ། མིའི་ལོ་བཅུ་ལ་ཡི་དགས་ཀྱི་བགྲང་བའི་ཚུལ་གྱིས་ཉིན་ཞག་གཅིག་སྟེ་བར་དུ་འཆི་བའི་དུས་བྱེད་པ་ནི་ཡོད་དོ། །མི་དགེ་བའི་ལས་གཞན་གཉིས་པ་བྱས་པ་ནི་འདི་ལྟ་སྟེ། སྐྱེས་པའམ། བུད་མེད་ལ་ནོར་རྫས་བཅོལ་བ་བཅབས་ནས་འདི་ལྟར་བདག་ལ་བདག་མེད་དོ་ཞེས་སྨྲ་ན་ལས་དེའི་རྣམ་པར་སྨིན་པས་དེར་སྐྱེ་བར་འགྱུར་ལ་ཟང་ཟིང་གི་སྦྱིན་པ་ཡང་མ་བྱིན། ཆོས་ཀྱི་སྦྱིན་པ་ཡང་མ་བྱིན། མི་འཇིགས་པའི་སྦྱིན་པ་ཡང་མ་བྱིན་ཏེ། སྦྱིན་པ་གསུམ་པོ་དེ་དག་དང་བྲལ་ལ་སེར་སྣ་དང་ཕྲག་དོག་གིས་སེམས་རྟག་ཏུ་ཟིལ་གྱིས་ནོན་པ་ནི་དེར་སྐྱེ་བར་འགྱུར་རོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་རྣམས་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཁ་ཁབ་ལྟར་ཕྲ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ནོར་རྫས་ཀྱི་ཕྱིར་མི་རྣམས་གསོད་པའི་གཤེད་མ་གང་ཕ་རོལ་ལ་ཕྲག་དོག་དང་སེར་སྣ་ཡང་དག་པར་བླངས་ཤིང་རྟག་ཏུ་མངོན་པར་བརྩོན་ལ་བཀྲེན་པ་བཀྲེན་པའི་རང་བཞིན་ཅན་འདི་ལྟ་སྟེ། ཟང་ཟིང་གི་སྦྱིན་པ་དང་། ཆོས་ཀྱི་སྦྱིན་པ་དང་། མི་འཇིགས་པ་སྦྱིན་པ་སྟེ། སྦྱིན་པ་རྣམས་སྤངས་པ་ནི་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཁ་ཁབ་ལྟར་ཕྲ་བ་རྣམས་ཀྱི་ནང་དུ་སྐྱེ་བར་འགྱུར་རོ། །རང་གི་ལས་ཀྱི་འབྲས་བུས་བསླུས་པ་དེར་སྐྱེས་པ་དེ་དག་གི་ཁའི་སྒོ་ཁབ་ལྟར་ཕྲ་ཞིང་ལྟོ་རི་ཙམ་དུ་ཆེ་བར་འགྱུར་ལ་རྟག་ཏུ་བཀྲེས་པ་དང་སྐོམ་པའི་ཉོན་མོངས་པས་གདུངས་པར་འགྱུར། ལུས་ཀྱི་མེས་ཀྱང་བཀྲེས་པ་དང་སྐོམ་པས་དཀྲུགས་ལ་ཕྱི་རོལ་དུ་ཡང་ཚལ་ཤིང་གི་མེ་མཆེད་པས་དཀྲུགས་པར་འགྱུར། གྲང་བ་དང་། ཚ་བ་དང་། ཤ་སྦྲང་དང་། སྦྲང་བུ་དང་།
སྲོག་ཆགས་མར་ཀོ་ཏ་ཀས་ཟ་བ་དང་། རིམས་ལ་སོགས་པས་དེ་ལྟར་སྐྱེས་པ་དང་བུད་མེད་དེར་སྐྱེས་པའི་ལུས་དང་ཡིད་ལས་བྱུང་བའི་སྡུག་བསྔལ་སྣ་ཚོགས་ཀྱིས་མིའི་ལོ་བཅུ་ལ་ཡི་དགས་ཀྱི་བགྲང་བའི་ཚུལ་གྱིས་ཉིན་ཞག་གཅིག་པའི་ཚེ་རབས་ལྔ་བརྒྱར་མངོན་པར་གདུངས་ཏེ་ཚེ་བར་ཆད་དུ་འགྱུར་བ་ནི་ཡོད་དོ། །དེར་སྐྱེ་བར་འགྱུར་བའི་ལས་གཉིས་པས་ཀྱང་ཡང་དེར་སྐྱེ་བར་འགྱུར་ཏེ། འདི་ལྟར་དགེ་སྦྱོང་དང་བྲམ་ཟེ་དག་བདག་ཅག་གི་དེར་ཟན་སྦྱིན་ནོ་ཞེས་བྱས་ལ་བཟའ་བ་དང་བཅའ་བ་དག་ཀྱང་ཡོད་བཞིན་དུ་བུད་མེད་སེར་སྣས་མངོན་པར་ཟིན་པ་དེ་ཁྱིམ་ཐབ་ལ་བསླུ་བའི་བསམ་པས་འདི་ལྟར་ཅི་ཡང་མེད་ན། དགེ་སྦྱོང་དང་བྲམ་ཟེ་དག་ལ་སྦྱིན་དུ་ག་ལ་ཡོད་ཅེས་སྨྲས་ན་དེ་ཡང་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཁ་ཁབ་ལྟར་ཕྲ་བ་རྣམས་ཀྱི་ནང་དུ་སྐྱེ་བར་འགྱུར་རོ། །སེར་སྣ་དེ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་བུད་མེད་ཕལ་ཆེར་ཡི་དགས་རྣམས་ཀྱི་ནང་དུ་བརྫུས་ཏེ་སྐྱེ་བར་འགྱུར་བ་དེ་ལྟར་མིའི་ནང་དུ་སྐྱེ་བར་མི་འགྱུར་ཏེ། འདོད་པ་ལ་ཕྲག་དོག་དང་། སེར་སྣས་ཉམས་པའི་རྒྱུ་གང་གིས་ཡི་དགས་མོར་འགྱུར་བ་དེ་ལྟར་མིའི་ནང་དུ་སྐྱེ་བར་མི་འགྱུར་རོ། །བུད་མེད་ནི་སེམས་ཆུང་ཞིང་སེམས་ཡང་བ་ཡིན་ལ་དེ་ལྟར་རྒྱུ་དེ་དང་རྐྱེན་དེས་ཡི་དགས་མོ་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་ཇི་སྲིད་དུ་སེར་སྣ་དང་ཕྲག་དོག་བྱས་པའི་སྡིག་པ་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེར་སྐྱེ་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །བྱ་ཁུག་རྟ་རྣམས་ཀྱི་ནང་དུ་སྐྱེས་ནས་དེ་རྟག་ཏུ་བཀྲེས་པ་དང་སྐོམ་པས་གདུངས་པར་འགྱུར། དེ་ལས་ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་མིར་འགྲུབ་པའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན། སྐྱེས་པའམ་བུད་མེད་དེ་རྟག་ཏུ་བཀྲེས་པ་དང་སྐོམ་པས་གདུངས་པར་འགྱུར།
རྟག་ཏུ་སྡུག་བསྔལ་ཞིང་ཟས་གཞན་དུ་ཚོལ་ལ་ལམ་པོ་ཆེ་དང་། བཞི་མདོར་འཚོ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན་དེས་ཐོས་པ་ལས་བྱུང་བའི་ཤེས་པས་ཡི་དགས་སྐྱུགས་པ་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སྐྱེས་པའམ་བུད་མེད་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། བུད་མེད་གང་བཟའ་བ་དང་། བཅའ་བ་དང་རོ་མྱང་བས་ཁྱིམ་ཐབ་ལ་མངོན་པར་གནོད་པར་བྱེད་ཅིང་བདག་ཉིད་ནི་དེ་དག་ལ་ཟ་བར་བྱེད་ལ་ཕྲག་དོག་དང་སེར་སྣས་ཀྱང་རྟག་ཏུ་ཟིལ་གྱིས་ནོན། བུ་དང་བུ་མོ་གཞན་དང་མི་འདྲ་བར་མི་དགའ་བ་མ་ཡིན་ལ། དགའ་བ་དང་སླུ་བ་མ་ཡིན་ཏེ། མི་སླུ་བ་ལ་མངོན་པར་གནོད་པ་བྱས་ན་དེ་ཡང་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་སྐྱུགས་པ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་རྟག་ཏུ་དེའི་ལུས་ཀྱི་བདག་ཉིད་དཔག་ཚད་ཕྱེད་ཙམ་ཡོད་པ་བཀྲེས་པ་དང་སྐོམ་པས་གདུངས་ཏེ་དགོན་པ་ཆེན་པོར་གཅིག་པུ་ཆུ་བཙལ་བའི་ཕྱིར་རྒྱུག་ཅིང་ཐམས་ཅད་དུ་ཆོ་ངེས་འདེབས་སྨྲེ་སྔགས་འདོན་པ་ན་དེ་ཆོས་སྦྱིན་པ་དང་ཟང་ཟིང་སྦྱིན་པ་དང་མི་འཇིགས་པ་སྦྱིན་པ་མ་བྱས་ཏེ། སྦྱིན་པ་གསུམ་དང་བྲལ་བ་དག་དེར་སྐྱེ་བར་འགྱུར་རོ། །ཚེའི་མཐའ་ནི་སྔ་མ་བཞིན་ཏེ། དེ་ཇི་སྲིད་དུ་སེར་སྣ་བྱས་པའི་སྡིག་པ་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་བཀྲེས་པ་དང་། སྐོམ་པས་གདུངས་པར་འགྱུར་རོ། །དེ་ཕྱིས་སྡིག་པ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་གལ་ཏེ་དུད་འགྲོ་རྣམས་ཀྱི་ནང་དུ་སྐྱེས་ན་དེ་སྐྱུགས་པ་ཟ་བར་འགྱུར་ཏེ། ཇི་ལྟར་ཡི་དགས་རྣམས་ཀྱི་ནང་དུ་སྐྱུགས་པ་ཟ་བས་སྲོག་ཆུང་ཟད་ཀྱང་འཚོ་བར་གྱུར་པ་དེ་ལྟར་དུད་འགྲོ་རྣམས་སུ་ཡང་འགྱུར་རོ། །དེ་ལས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་མཆོད་སྟོན་གྱི་ཚེ་དགེ་སྦྱོང་དང་བྲམ་ཟེ་བཀད་པ་རྣམས་ཀྱི་གྲལ་དུ་སློངས་མོས་དེའི་སྲོག་འཚོ་བ་ཐུབ་པར་འགྱུར་བ་མཐོང་
ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་བཤང་བ་ཟ་བ་ཞེས་བྱ་བ་མཐོང་ངོ་། །དེར་སྐྱེས་པའམ་བུད་མེད་དག་ལས་གང་གིས་སྐྱེ་བར་འགྱུར་ཞིག་གུ་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སེར་སྣ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པར་གྱུར། སྔ་མ་བཞིན་དུ་སྦྱིན་པ་དང་བྲལ་ལ་དགེ་སྦྱོང་དང་བྲམ་ཟེ་དག་ལ་ཡང་ཁ་ཟས་ལྷག་མར་བྱས་པ་བྱིན་ཏེ། དེ་དག་ཀྱང་གཙང་མ་ཞིག་ཡིན་ནོ་སྙམ་ནས་ཟོས་ན་སྐྱེས་པའམ་བུད་མེད་དེ་ལུས་དང་བྲལ་ནས་ཡི་དགས་བཤང་བ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེའི་ལས་ཀྱི་མཐུས་དེའི་ཚེ་ཡང་སྔ་མ་བཞིན་ལ་དེའི་ལུས་བཀྲེས་པ་དང་སྐོམ་པས་གདུངས་ཏེ། གལ་ཏེ་དེ་རྙེད་ན་ཡང་རྟག་ཏུ་མི་རྙེད་ལ་དེ་ཡང་ཆུང་སྟེ། ལྟོ་ཚིམ་པར་མི་འགྱུར་རོ། །གལ་ཏེ་ཡང་ཡི་དགས་རྣམས་ཀྱི་ནང་དུ་བཤང་བ་རྙེད་ན་སྲིན་བུ་ཞུགས་ཤིང་ཟོས་ལ་བུ་གར་བྱས་པ་ངན་ངོན་ཞིག་རྙེད་དེ། རྒྱང་རིང་ཞིང་ཚེགས་ཆེན་པོས་རྙེད་པ་དེ་ཡང་ཆོག་པར་མི་རྙེད་དོ། །དེ་ལྟར་དེའི་ཚེའི་མཐའ་སྡུག་བསྔལ་བ་འཐོབ་སྟེ། དེ་ཇི་སྲིད་དུ་དེའི་སྡིག་པའི་ལས་ཡི་དགས་ཀྱི་འཇིག་རྟེན་འགྲུབ་པ་སེར་སྣ་བྱས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་བཀྲེས་པ་དང་སྐོམ་པ་དེ་བྱས་པའི་སྡུག་བསྔལ་མྱོང་བར་འགྱུར། དེ་ཕྱིས་ཡི་དགས་ཀྱི་འཇིག་རྟེན་བཤང་བ་ཟ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ཇི་ལྟར་ལས་ཉེ་བར་འགྲོ་བས་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་ཡང་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དབུལ་ཞིང་ནད་བུ་ཅན་ལ་བཟའ་བ་ཉུང་བ་དང་། སྲོག་གི་འཚོ་བ་རྟག་ཏུ་གཞན་ལ་རག་ལས་ཤིང་ཚེགས་ཆེན་པོས་འཚོ་བ་འཐོབ་ལ་དོན་དུ་མ་མེད་པའི་སྣོད་དུ་འགྱུར། སེམས་ཤེས་པ་དང་མི་ཤེས་པ་ཕལ་པ་ཡིན་ཞིང་ལུས་རྨ་མཚན་དང་དྲི་མ་ཅན་མི་སྡུག་པ་སྐྱེ་བོ་ཀུན་གྱིས་
སྨད་པར་འགྱུར། དེའི་ཁ་ནས་ཀྱང་དྲི་མནམ་པོ་འབྱུང་ཞིང་གློ་བུར་དུ་སོ་ནག་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེར་སྣའི་གནས་སུ་གྱུར་པའི་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སེར་སྣ་ཐམས་ཅད་ཀྱི་གནས་སུ་གྱུར་པ་ཡི་དགས་ཁ་ཟས་མེད་པ་ཞེས་བྱ་བ་མཐོང་ངོ་། །དེར་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྐྱེས་པའམ་བུད་མེད་སེར་སྣས་ཟིལ་གྱིས་ནོན་ཅིང་ཕྲག་དོག་གི་ཟིལ་གྱིས་ནོན་པ་དང་། གཡོ་ཐབས་སམ་སླུ་བར་བྱེད་པ་སྟོབས་དང་ལྡན་པ་གང་གིས་སེམས་ཅན་དག་བཅིང་བས་བཅིངས་ཏེ། ཁ་ཟས་མ་བྱིན་པས་སྲོག་དང་ཕྲལ་ལ། སྲོག་དང་ཕྲལ་ནས་ཀྱང་སྙིང་ནས་འཆགས་པར་མི་བྱེད་ལ་འགྱོད་པར་མི་བྱེད། ཡང་ལས་དེ་ཉིད་བྱས་ནས་རྗེས་སུ་དགའ་བར་བྱེད་ཅིང་གཞན་དག་ཀྱང་དེ་ཉིད་ལ་རབ་ཏུ་འཇོག་པར་བྱེད། ལས་དང་ལས་ཀྱི་ཉེར་བསྡོགས་དང་། ལས་ཀྱི་མཇུག་དག་བྱས་ནས་ཡང་དེ་ཉིད་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཁ་ཟས་མེད་པ་རྣམས་ཀྱི་ནང་དུ་སྐྱེ་བར་འགྱུར་རོ། །སྐྱེས་པ་དེའམ། བུད་མེད་དེ་དེར་སྐྱེས་ནས་ཁ་ཟས་མེད་པར་བྱས་ནས་བཀྲེས་པ་དང་སྐོམ་པར་བྱས་པ་མེ་དེས་སྲེག་པ་ན་ཡང་དང་ཡང་དུ་རི་ལས་ཆུ་འབབ་པའི་ཤུགས་ལྟར་བཀྲེས་པ་དང་སྐོམ་པའི་སྡུག་བསྔལ་མང་དུ་འཕེལ་ལོ། །དེའི་ཁ་ཟས་མེད་པར་བྱས་པའི་མཐུ་དེས་ཇི་ལྟར་ཐལ་བ་ཡང་མི་མངོན་པ་དེ་ལྟར་དེའི་ནང་དང་ཡན་ལག་དང་ཉིང་ལག་ཐམས་ཅད་སྲེག་གོ །དེ་ནས་ཡང་ཡན་ལག་དང་ཉིང་ལག་དེ་དག་སླར་འབྱུང་བར་འགྱུར་ཏེ། ཡང་སྲེག་པར་བྱེད་དོ། །དེ་བཀྲེས་པ་དང་སྐོམ་པས་གདུངས་པ་དང་། ལུས་བསྲེགས་པ་སྟེ། སྡུག་བསྔལ་གཉིས་ཀྱིས་སྲེག་པ་ན་རང་གི་ལས་ཀྱི་འབྲས་བུ་ཉེས་པར་བྱས་པས་བསླུས་པ་དེ་སྡུག་བསྔལ་གྱིས་ཉམ་ཐག་ནས་ཤིན་ཏུ་ངུ་སྐད་འབྱིན། ཆོ་ངེས་འདེབས། སྨྲེ་སྔགས་འདོན་ཅིང་ཕྱོགས་དང་ཕྱོགས་མཚམས་སུ་རྒྱུག་སྟེ་དེ་ནི་དེའི་ནང་དུ་འབྱུང་བའི་
སྡུག་བསྔལ་ཡིན་ནོ། །ཕྱི་རོལ་དུ་འབྱུང་བ་ཡང་ལས་ཀྱིས་བྱས་པའི་མེས་ཡན་ལག་དང་ཉིང་ལག་ཐམས་ཅད་སྲེག་པར་བྱེད་དོ། །མེ་ནང་དུ་སོང་བ་སླར་བྱུང་ནས་ཕྱི་རོལ་གྱི་ལུས་ཀྱང་སྲེག་པར་བྱེད་དེ། དཔེར་ན་ཤིང་ཁོང་སྟོང་གི་ནང་དུ་མེ་ཞུགས་པ་ཤིང་གི་ནང་བསྲེགས་ནས་ཕྱི་རོལ་སྲེག་པ་དེ་བཞིན་དུ་མེ་དེས་ཡི་དགས་དེའི་ནང་དུ་བསྲེགས་ནས་ཕྱི་རོལ་ཡང་སྲེག་པར་བྱེད་དོ། །དེ་ནང་དང་ ཕྱི་རོལ་ཐམས་ཅད་ཚལ་ཤིང་བསྲེགས་པ་ལྟ་བུར་རབ་ཏུ་བསྲེགས་ཏེ་མེ་ལྕེ་གཅིག་ཏུ་གྱུར་པས་ངུ་སྐད་འབྱིན་ཅིང་ཆོ་ངེས་འདེབས་སོ། །དེ་དེར་ཆོ་ངེས་འདེབས་པ་ན་ཁར་མེ་འབྱུང་སྟེ། དེ་ཡང་དང་ཡང་དུ་དེའི་ལུས་ཐམས་ཅད་འབར་བ་ཉིས་འགྱུར་གྱིས་ཆེས་རབ་ཏུ་འབར་བར་བྱེད་དོ། །གང་དང་གང་དུ་འགྲོ་བའི་ལམ་དེ་དང་དེར་རྩྭ་དར་བྷ་རབ་ཏུ་འབར་བ་ཁབ་ལྟ་བུ་འབྱུང་བར་འགྱུར་ལ་གང་དེའི་རྐང་པ་གཉིས་བོར་བ་མ་རུང་བར་བྱེད་དེ་རྐང་པ་མ་རུང་བ་དེ་ངུ་སྐད་འབྱིན། ཆོ་ངེས་འདེབས། ཡོངས་སུ་སྨྲེ་སྔགས་འདོན་ཏོ། །དེ་ཡོངས་སུ་སྨྲེ་སྔགས་འདོན་པ་ན་དེའི་ལྕེ་མར་སར་གྱི་གོང་བུ་ལྟར་ཞུ་བར་བྱེད་དེ། དེ་ནས་ཡང་ཉེས་པར་བྱས་པའི་ལས་དེས་སླར་འབྱུང་བར་འགྱུར་རོ། །དེ་གང་དང་གང་དུ་རྒྱུག་པ་དེ་དང་དེར་དེའི་ཉེས་པར་བྱས་པའི་ལས་དེས་ཆུ་དང་། ལྟེང་ཀ་དང་། འབབ་ཆུའི་དངོ་དང་། མཚོ་དང་། ཆུ་འཛག་པ་དང་། ཆུ་བོ་དང་། ཁྲོན་པ་ཐམས་ཅད་དང་བྲལ་བར་འགྱུར། ཚལ་དང་། ནགས་ཚལ་དང་། ཁྱིམ་དང་ནེའུ་གསིང་གི་ས་གཞི་དང་བྲལ་བར་འགྱུར། ཚལ་དང་ནགས་ཚལ་དག་ཀྱང་ལོག་པར་མཐོང་སྟེ། རི་དང་། ལྗོན་ཤིང་དང་། རི་སུལ་གྱི་ས་ཕྱོགས་ཐམས་ཅད་ཀྱང་རབ་ཏུ་འབར་བར་མཐོང་ངོ་། །ཀུན་ནས་ཡི་དགས་ཀྱི་ཆང་པ་ལག་ན་རལ་གྲི་དང་གཏུན་ཤིང་ཁྱེར་བ་རྣམས་ཀྱིས་གཙེ་བར་བྱེད་ཅིང་སྤྱོ་བར་བྱེད་པས་མཆོག་ཏུ་སྡུག་བསྔལ་ཏེ། རང་གི་ཕྲག་དོག་དང་སེར་སྣས་བསླུས་ཤིང་སེམས་ཀྱི་དགྲ་དང་ལྷན་ཅིག་ལྡན་པས་ཚེ་ཡང་སྔ་མ་བཞིན་ནོ། །དེ་ལྟར་དེ་ཉེས་པ་བྱས་པའི་ལས་བྱས་པས་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་
ལ་ཟད་པར་མ་བྱས་པ་དེ་སྲིད་དུ་ཡི་དགས་ཁ་ཟས་མེད་པའི་སྡུག་བསྔལ་མྱོང་བར་འགྱུར། དེ་ཕྱིས་ཡི་དགས་ཀྱི་ཡུལ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་རང་གིས་བྱས་པའི་ལས་སྤྱད་པ་ཇི་ལྟར་ལས་ཉེ་བར་འགྲོ་བས་འཁོར་བར་ཡོངས་སུ་འཁྱམ་མོ། །དེ་གལ་ཏེ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་མངལ་ན་གནས་པ་ན་མ་དེ་ཟས་འདོད་པ་མེད་པར་འགྱུར། གང་གིས་མ་དེའི་ལུས་དང་བཞིན་ཁ་དོག་མཆོག་ཏུ་མི་སྡུག་པར་འགྱུར། དེ་གལ་ཏེ་མངལ་དེ་ཉིད་དུ་གནས་པ་ན་ལས་རབ་ཏུ་མཐུ་ཆེ་བ་དང་སྲོག་བཅད་པ་རབ་ཏུ་མཐུ་ཆེ་བ་དེས་འཆི་བའི་དུས་བྱེད་པར་འགྱུར། གལ་ཏེ་ཡང་བརྒྱ་ལ་བཙའ་བར་གྱུར་ན་དེ་ལྟར་ངན་པ་བྱས་པ་འདུས་བྱས་དེའི་མ་རྟག་ཏུ་དྲི་ང་ཞིང་མདོག་མི་སྡུག་ལ་མདངས་མེད་པར་འགྱུར། དེ་སྲོག་གི་འཚོ་བ་དུས་ཐུང་ཞིང་ཚེགས་ཆེན་པོས་ཐོབ་པར་འགྱུར། ཡུལ་གྱི་བདག་པོ་རྒྱལ་པོས་ཀྱང་དེ་ལྟར་བཙོན་རར་བཅུག་ནས་བཀྲེས་པ་དང་། སྐོམ་པ་དག་གིས་འཆི་བའི་དུས་བྱེད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་དྲི་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་བཟའ་བ་དང་བཏུང་བ་མང་པོ་ཤིན་ཏུ་བསྡུས་ནས་བདག་འབའ་ཞིག་ཟ་ལ། བུ་དང་ཆུང་མ་དག་ལ་ཡང་དག་པར་འགེད་པར་མི་བྱེད། དེ་དག་རོ་བྲོ་བ་འདོད་ན་དྲི་ཙམ་ཞིག་ལ་སྣོམ་དུ་འཇུག །དེ་བུ་དང་ཆུང་མ་དེའི་མདུན་དུ་རང་འབའ་ཞིག་ཟ་བར་བྱེད་ལ། ཕྲག་དོག་དང་སེར་སྣས་ཟིན་པས་ཡང་དག་པར་འགེད་པར་མི་བྱེད་དེ། དེ་ལྟར་བུ་དང་ཆུང་མ་རིས་འཐུན་པ་ལྷན་ཅིག་འཁོད་པ་ལ་བརྙས་པར་བྱེད་ཅིང་གཞན་དག་ཀྱང་དེ་ཉིད་ལ་རབ་ཏུ་འཇོག་པར་བྱེད་པ་ལ་རྗེས་སུ་དགའ་ཞིང་དེ་ནས་ཡང་བདག་
གཅིག་པུ་ཟ་བར་བྱེད་ལ་དེ་བྱས་ནས་ཀྱང་སྐྱོན་དུ་མི་འགྱུར་ཞིང་། ངོ་ཚ་བར་མི་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་དྲི་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ལུས་རྟག་ཏུ་བཀྲེས་པ་དང་སྐོམ་པས་གདུངས་ཤིང་གར་བབ་བབ་ཏུ་རྒྱུག་སྟེ་ངུ་སྐད་འབྱིན་ཆོ་ངེས་འདེབས། སྨྲེ་སྔགས་འདོན་ཏོ། །དེ་གལ་ཏེ་ཡང་ལྷ་ཁང་ངམ། མཆོད་རྟེན་ནམ། ཁྱིམ་གཞན་དུ་ཡོན་བདག་དད་པས་བདུག་སྤོས་དྲི་ཞིམ་པོ་དག་བདུགས་པ་དང་དེ་དེས་དགའ་བར་འགྱུར། དེ་བཞིན་དུ་དྲི་གཞན་གྱིས་ཀྱང་དགའ་བར་འགྱུར། དེ་ལྟར་འདི་ནི་ཡི་དགས་དྲི་ཟ་བའི་ཕྱོགས་གཅིག་ཡིན་ནོ། །དྲི་ཟ་བའི་ཕྱོགས་གཞན་ཡང་འདི་ལྟར་མི་དག་ལ་ནད་བྱུང་བ་ན་ནད་པ་གང་ཡིན་པ་དེ་དག་གི་ཕྱིར་ལྷ་ཁང་ངམ། ཀུན་དགའ་ར་བ་དག་ཏུ་བདུག་སྤོས་གང་བདུགས་པའི་དྲི་དེས་དེ་ཚིམ་པར་འགྱུར་ཏེ། དེས་སྲོག་འཚོ་བ་འཐོབ་ཅིང་དེའི་ཕྱི་བཞིན་འབྲང་། གཞི་དེས་ལུས་ཀྱི་སྲོག་འཚོ་བ་འཐོབ་སྟེ། དེ་ལྟར་དེའི་ལས་ཀྱི་མཐུས་ཡི་དགས་དེ་དྲི་ཟ་བར་འགྱུར་ཞིང་སྲོག་གི་ཚེགས་ཆེན་པོས་ཟ་བ་དེ་འཐོབ་པར་འགྱུར། དེར་སྐྱེས་ནས་ཀྱང་ཇི་སྲིད་དུ་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་བཀྲེས་པ་དང་སྐོམ་པའི་སྡུག་བསྔལ་མྱོང་བར་འགྱུར། དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ལས་ཀྱི་འབྲས་བུ་ལ་སྤྱོད་པ་འཁོར་བ་ན་ཡོངས་སུ་འཁྱམ་མོ། །གལ་ཏེ་མིས་བྱས་པའི་མྱོང་བར་འགྱུར་བའི་ལས་ཀྱིས་བརྒྱ་ལ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མིར་སྐྱེས་ན་དེ་དབུལ་ཞིང་ནད་བུ་ཅན་ལ་ལུས་ཐམས་ཅད་ལས་དྲི་དེ་འབྱུང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཆོས་ཀྱི་སྦྱིན་པ་ཟ་བ་ཞེས་བྱ་བ་དེར་འཇུག་པ་ཐོབ་པ་དེས་སྲོག་འཚོ་བ་འཐོབ་པར་འགྱུར་བ་ཇི་ལྟར་འདུག་པ་མཐོང་ངོ་། །དེར་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་
པས་བརྟགས་ན་གང་རང་བཞིན་གྱིས་སེར་སྣ་དང་། ཕྲག་དོག་གིས་ཟིལ་གྱིས་ནོན་པ་ཡིན་ལ་སྲོག་གསོ་བ་ཁོ་ནའི་ཐབས་སམ་རྒྱུ་དེས་དད་པ་མེད་ཅིང་དད་པ་མེད་ལ་ཕ་རོལ་ཕན་གདགས་པའི་བསམ་པ་མེད་པའི་རྒྱུས་སྐྱོན་དུ་བགྲང་བའི་ཆོས་སྟོན་པར་བྱེད་ཅིང་དེ་ཚུལ་ཁྲིམས་དང་ལྡན་པ་མ་ཡིན་ཏེ། འདི་ལྟ་སྟེ། སྲོག་གཅོད་པའི་ཆོས་ཀྱི་གཏམ་དང་། གཡུལ་དུ་འཆི་བའི་ཆོས་དང་། ནོར་རྫས་ནན་གྱིས་འཕྲོག་པའི་ཆོས་དང་། ཁྱུ་མཆོག་བག་ཡངས་སུ་གཏང་བའི་ཆོས་ཏེ། དེས་སྐྱོན་དུ་བགྲང་བའི་ཆོས་ཀྱི་རྣམ་གྲངས་དེ་དག་ཕ་རོལ་དག་ལ་བསྟན་ནས་དེ་ལས་རྙེད་པ་གང་ཡིན་པ་དེ་སྦྱིན་པར་མི་བྱེད་ཅིང་སྩོགས་པ་འབའ་ཞིག་བྱེད་ན་ཕྲག་དོག་གི་ཟིལ་གྱིས་ནོན་པ་མི་ངན་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཆོས་ཀྱི་སྦྱིན་པ་ཟ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། དེའི་ཚེ་ནི་སྔ་མ་བཞིན་ནོ། །དེ་རིའི་ཡུལ་ནས་རིའི་ཡུལ་དུ་ཡོངས་སུ་རྒྱུག་ཅིང་ལུས་བཀྲེས་པ་དང་སྐོམ་པས་གདུངས་ལ་ཐམས་ཅད་དུ་ངུ་སྐད་འབྱིན་པ། ཤིང་སྐམ་འདྲ་ཞིང་སྐྲ་རིང་ལ་ངོམ་ཟུམ་གནག་པ་ལུས་ཐམས་ཅད་སྤུ་ཟིང་པོས་ཁེབས་ཤིང་རྩ་དང་རྒྱུས་པའི་དྲ་བས་དཀྲིས་ལ་པགས་པ་དང་རུས་པ་ཙམ་ལུས་པ། ལུས་རིང་ཞིང་སེན་མོ་མི་སྡུག་པ། རང་གིས་ཉེས་པར་བྱས་པས་ཡོངས་སུ་བསླུས་པ། མིག་གི་ཁུང་རིང་ཞིང་བསྐུམས་ལ་གདོང་མཆི་མས་ཡོག་པ། ལུས་སྤྲིན་ནག་པོ་འདྲ་ཞིང་མི་སྡུག་པས་མངོན་པར་ཁེབས་པ། ཡན་ལག་དང་ཉིང་ལག་ཐམས་ཅད་དང་སྤུ་རྣམས་ཀྱི་ནང་དུ་སྦྲང་བུ་དང་། ཤ་སྦྲང་དང་། སྲོག་ཆགས་མར་ཀོ་ཏ་ཀ་རྣམས་ཞུགས་ནས་ཟ་བ་ན་ཐམས་ཅད་དུ་ཡོངས་སུ་རྒྱུག་གོ །གལ་ཏེ་བརྒྱ་ལ་དགེ་འདུན་གྱི་གཙུག་ལག་ཁང་གི་ནང་དུ་སོང་ནས་ཡོངས་སུ་རྒྱུག་པ་ན། དེ་གལ་ཏེ་དགེ་འདུན་གྱིའམ་དགེ་འདུན་གྱི་གཙུག་ལག་ཁང་དུ་ཚེས་གཅིག་ལ་གནོད་སྦྱིན་ལ་བྱིན་པའི་རྙེད་པ་འཐོབ་ཅིང་དགེ་འདུན་གྱི་གནས་བརྟན་ནམ། གཞན་གྱིས་ཆོས་ཀྱི་སྦྱིན་པ་བྱིན་པས་མངོན་པར་མགུ་བར་འགྱུར་ལ་དེ་དེས་ཤིན་ཏུ་ཚིམ་པར་འགྱུར། དེས་སྲོག་འཚོ་བ་འཐོབ་པར་འགྱུར། དེས་འཚོ་བ་རྙེད་པར་འགྱུར་ཏེ།
ཇི་སྲིད་དུ་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡི་དགས་ཀྱི་སྡུག་བསྔལ་མྱོང་བར་འགྱུར། དེ་དེ་ལས་ཐར་ནས་ཀྱང་ལས་དེ་དང་རྒྱུ་འཐུན་པར་རང་གི་ལས་ལ་སྤྱོད་པ་སྣ་ཚོགས་དང་རྣམ་པ་སྣ་ཚོགས་བྱས་པ་འཁོར་བ་ན་ཚེ་སྣ་ཚོགས་མྱོང་བར་འགྱུར། དེ་གལ་ཏེ་བརྒྱ་ལ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་གཟུགས་བྲམ་ཟེ་ལྟ་བུ་ཡིན་ཞིང་ལྷ་རྟེན་གྱི་དྲུང་དུ་ཕྱུགས་གསོད་པ་བྱེད་དམ་ཟ་བར་བྱེད། སྲོག་འཚོ་བ་གཞན་ལ་རྟག་ཏུ་རག་ལས་ཤིང་དེས་སྲོག་འཚོ་བ་ཐོབ་པར་འགྱུར། དེ་ནས་ཡང་དེ་ཉེས་པར་བྱས་པ་རྗེས་སུ་འབྲེལ་པས་སེམས་ཅན་དམྱལ་བར་འགྲོ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན། ཡི་དགས་ཆུ་འཐུང་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་མི་རིགས་པར་ཆགས་པའི་ཟིལ་གྱིས་ནོན་པའི་སེམས་ཅན་ཆང་འཚོང་བ་གང་གིས་ཁྱིམ་ན་ཆང་ཡོད་པ་དང་། སྦྱར་བའི་ཆང་དང་། བུ་རམ་གྱི་ཆང་འཚོང་བར་བྱེད་པ་སེར་སྣ་དང་ཕྲག་དོག་གིས་མངོན་པར་ཉམས་པ་དེ་ཆང་དེ་དག་ཆུས་བསླད་དེ་ཆང་བཏུང་བ་ཕ་རོལ་པོ་དེ་དག་ལ་འདྲིད་པར་བྱེད། རྣམ་པར་འཚེ་བར་བྱེད་ཅིང་དེས་སྦྱིན་པ་དག་མ་བྱིན། བསོད་ནམས་དག་མི་བྱེད། ཚུལ་ཁྲིམས་མངོན་པར་མི་སྲུང་། ཆོས་མི་ཉན། ཆོས་མི་སྤྱོད། གཞན་དག་ཀྱང་མི་རིགས་པར་ཆགས་པ་དེ་ལ་འཇོག་ཅིང་རྗེས་སུ་དགའ་བར་བྱེད་ལ་ལས་དང་ལས་ཀྱི་ཉེར་བསྡོགས་དང་ལས་ཀྱི་མཇུག་དང་བཅས་པས་བྱེད་ན། དེ་ཉེས་པར་བྱས་པ་དེས་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཆུ་འཐུང་བ་རྣམས་ཀྱི་ནང་དུ་སྐྱེ་བར་འགྱུར་རོ། །ལུས་རྟག་ཏུ་བཀྲེས་པ་དང་སྐོམ་པས་གདུངས་པ་དེ་ཡུལ་ཆུ་མེད་པའི་རི་བྲགས་དང་འབྲོག་དང་དགོན་པ་ཆེན་པོ་རྣམས་སུ་ཡོངས་སུ་འཁྱམ་མོ། །མདོག་བུང་བ་དང་སོལ་བ་འདྲ་
ཞིང་ཡན་ལག་དང་ཉིང་ལག་ཐམས་ཅད་སྲ་ལ་རྩུབ་སྟེ་ཤིན་ཏུ་རྡོལ་བ་དང་། དེའི་ལུས་འབར་བས་འཁྲིགས་ཤིང་ཁ་གདོང་སྐྲ་རིང་པོ་རྣམས་ཀྱིས་མུན་པར་ཁེབས་ཏེ་རྟག་ཏུ་བཀྲེས་པ་དང་སྐོམ་པ་ལས་བྱུང་བའི་མེས་གདུངས་པ་ན་གལ་ཏེ་རེས་འགའ་བརྒྱ་ལ་ཆུ་དང་ཉེ་བར་གྱུར་པ་དེའི་ཚེ་ཆུ་རྒལ་བ་གང་འབོགས་པ་ན། རྐང་པའི་ཆུའི་ཟེར་མ་འབྱུང་བ་དང་། ཆོས་སྤྱོད་པ་གང་དག་ཆུ་འགྲམ་དུ་ལག་པ་དག་གིས་ཆུ་འཐོར་ཞིང་གང་སྐོམ་པ་དེ་དག་ལ་སྦྱིན་ནོ་ཞེས་སྨྲ་བ་དེ་དག་གིས་དེ་སྲོག་འཚོ་བ་འཐོབ་པར་འགྱུར་རོ། །གལ་ཏེ་མ་བྱིན་པར་འདོད་ནས་དེ་ཆུ་འགྲམ་དུ་འདུག་སྟེ། བཏུང་བ་འཐུང་བ་དང་། ཆུའི་རྒྱུན་དེ་སྲུང་བའི་ཡི་དགས་རྣམས་ཀྱིས་མངོན་པར་འཚེ་བར་བྱེད་ཅིང་ལུས་ཀྱང་ཀུན་ནས་གཟེ་གཟེ་བཏོག་བཏོག་པ་ལྟ་བུར་བྱེད་དོ། །སྡུག་བསྔལ་གྱིས་ཉམ་ཐག་པ་དེ་དེ་ནས་ཡང་ངུ་སྐད་འབྱིན། སྨྲེ་སྔགས་འདོན་ཅིང་ཡོངས་སུ་རྒྱུག་གོ །ཉེས་པར་བྱས་པའི་ལས་ཀྱིས་བསླུས་པ་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེར་སྡུག་བསྔལ་དེ་མྱོང་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ནས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་རང་གི་ལས་རླུང་ལྟ་བུས་འཁྱམ་པ་ན་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་བརྒྱ་ལ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཆུ་དང་། ལྟེང་ཀ་དང་། ནགས་ཚལ་དང་བྲལ་བ། རི་བྲགས་དང་། འབྲོག་དང་། གྲོང་ངན་པར་སྐྱེ་བར་འགྱུར། རྟག་ཏུ་ཁྲོན་པའི་ཆུ་ལ་འཐུང་བར་འགྱུར། མཁྲིས་པའི་ནད་ཀྱིས་ཀྱང་འདེབས་པར་འགྱུར། ཉིན་མཚན་དུ་སྐོམ་མེད་པས་གནོད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་ཀུན་སྟོན་ཅེས་བྱ་བ་མཐོང་ངོ་། །དེ་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་
པ་ལས་བྱུང་བའི་ཤེས་པས་བརྟགས་ན། མི་ངན་པ་ཕྲག་དོག་དང་སེར་སྣས་ཟིལ་གྱིས་ནོན་ཅིང་མི་རིགས་པར་ཆགས་པ་ལ་བརྐམ་པ་གང་གིས་མཁས་པ་དབུལ་པོའི་འཚོ་བ་ཚེགས་ཆེན་པོས་བསྒྲུབས་པ་དག་ལ་རིན་ཐང་སྟེང་དུ་མ་བབ་པའི་རིན་མི་འདྲ་བ་ཟང་ཟིང་ཞིག་བྱིན་ལ་དེ་རྟག་ཏུ་དེ་ལ་དགའ་ཞིང་སླུ་བར་བྱེད་དེ། གཞན་དག་ཀྱང་ལས་ངན་པར་བྱེད་པ་དེ་ཉིད་ལ་འགོད་པར་བྱེད་ཅིང་འཇོག་པར་བྱེད་ལ་སྦྱིན་པ་དག་ནི་མི་གཏོང་ངོ་། །བསོད་ནམས་ཀྱང་མི་བྱེད། ཚུལ་ཁྲིམས་ལ་མི་གནས། དད་པས་ཉེ་བར་འགྲོ་བར་མི་བྱེད། ཆོས་དང་འཐུན་པའི་ཆོས་མི་སྤྱོད། དྲང་པོ་དང་དུལ་བར་མི་བྱེད། དགེ་བའི་བཤེས་གཉེན་གྱི་ངང་ཚུལ་ཅན་དུ་མི་བྱེད་ཅིང་ཡང་དང་ཡང་ཕྲག་དོག་དང་སེར་སྣས་ཟིལ་གྱིས་ནོན་པར་གྱུར་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བའི་ཡི་དགས་ཀུན་སྟོན་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་ལ་འཇིག་རྟེན་པ་དེ་དག་ཕ་ཞེས་བརྗོད་དོ། །དེ་རྟག་ཏུ་ལུས་བཀྲེས་པ་དང་། སྐོམ་པས་གདུངས་ཤིང་ལུས་ཚལ་ཤིང་བསྲེགས་པ་འདྲ་ལ་དགའ་བ་མེད་པས་ཉམས་པར་འགྱུར། མཆི་མས་གདོང་ཡོག་ཅིང་རྐང་པ་དང་ལག་པ་ཤིན་ཏུ་རྡོལ་ལ། སྐྲས་ཁ་གདོང་མུན་པ་ལྟར་ཁེབས་པ། ལྟོའི་མདོག་སྤྲིན་ནག་པོ་འདྲ་ཞིང་ངུ་སྐད་འབྱིན། སྨྲེ་སྔགས་འདོན་པ་ན་འདི་ལྟར་སྨྲེ་སྔགས་ཡོངས་སུ་འདོན་ཏེ། མ་བྱིན་པས་ལྟ་ག་ལ་འཐོབ། །མ་བཏབ་འབྲས་བུ་ག་ལ་འབྱུང་། །སྒྲོན་མ་མེད་ན་འོད་མེད་ལྟར། །མ་བྱིན་བདེ་བ་ག་ལ་ཡོད། །ཇི་ལྟར་ལུས་ཅན་ལོང་བ་ཡི། །མིག་གིས་ལྟ་བར་ནུས་མེད་ལྟར། །སྦྱིན་དང་བྲལ་བ་དེ་འདྲ་སྟེ། །ཡི་དགས་བདེ་བ་མི་རྙེད་དོ། །ཡི་དགས་འཇིག་རྟེན་ཡི་དགས་གང་། །དེ་བཞིན་ནོར་མེད་འཇིགས་གསུམ་དུ། །ཤིན་ཏུ་མི་དགའ་འཁྱམ་བྱེད་པ། །དེ་ནི་སེར་སྣའི་འབྲས་བུ་ཡིན། །རང་གི་ལས་འབྲས་ཟ་བ་ཡི། །སྲོག་ཆགས་ལས་ལ་ལོངས་སྤྱོད་པ། །མ་བྱིན་ཅི་ཡང་མིས་ཐོབ་སྟེ། །བྱས་པ་ཆུད་ནི་ཟ་བ་མེད། །ཡི་དགས་འཇིག་རྟེན་གནས་པ་དག །ངན་བྱས་རྣམས་ཀྱིས་བདག་ཅག་བསྲེགས། །བཀྲེས་དང་སྐོམ་ལས་བྱུང་བ་ཡི། །མེ་ཡིས་འདིར་
ནི་ཡོངས་སུ་སྤྱད། །བདག་ཅག་རྣམས་ནི་སྐོམ་པ་ལས། །ནམ་བྲལ་བདེ་བ་འབྱུང་བར་འགྱུར། །ཡོངས་སུ་གདུང་ལས་བདག་ཅག་རྣམས། །ནམ་ན་ཡོངས་སུ་ཐར་བར་འགྱུར། །ལམ་དང་ལམ་མིན་མི་ཤེས་ཤིང་། །ལས་ཀྱི་འབྲས་བུ་དག་མི་ཤེས། །བཀྲེས་དང་སྐོམ་ལས་བྱུང་བའི་མེ། །ཚ་བ་འབྱུང་བ་མ་ཤེས་སོ། །བཞིན་ནི་སྐྲ་ཡིས་མུན་ལྟར་ཁེབས། །རེ་བ་མེད་ཅིང་སྲོག་རྣམས་བཏང་། །པགས་པ་རྒྱུས་པའི་དྲ་བས་སྦྲེལ། །བདག་འཚོ་ཀྱི་ཧུད་སྡུག་བསྔལ་ལོ། །དགོན་པར་ཆུད་པའི་ལུས་ཅན་རྣམས། །ཐམས་ཅད་དུ་ཡང་སྡུག་བསྔལ་ཏེ། །འདིར་ནི་སྐྱོབ་པ་གང་ཡང་མེད། །བདག་ཅག་སྡུག་བསྔལ་ཞུགས་པར་གྱུར། །དེ་ལྟར་ཡི་དགས་ཀུན་སྟོན་པར་བྱེད་པ་དེ་དག་ཀུན་ངུ་སྐད་འབྱིན། སྨྲེ་སྔགས་འདོན་ཅིང་ཐམས་ཅད་ཡོངས་སུ་འཁྱམ་མོ། །དེ་དག་གལ་ཏེ་ཡང་ཡོངས་སུ་རྒྱུག་པ་ན། དགེ་སློང་དེས་མཐོང་ནས་སེམས་པར་བྱེད་དེ། ཀྱེ་ཨེ་མ་ཁྱད་པར་དུ་འདོད་པའི་ཁམས་ཀྱི་འཁོར་བ་རབ་ཏུ་འབར་རོ་སྙམ་མོ། །དེ་ལྟར་ཡོངས་སུ་རྒྱུག་པ་དེ་དག་ལ་གལ་ཏེ་དད་པ་ཅན་ཞིག་གིས་ཀྱང་བྱིན་ལ། དེ་རིགས་དེར་སྐྱེས་པ་ཞིག་ཀྱང་ཡིན་ན་དེ་འབྱུང་བར་འགྱུར་ཏེ། དེ་དེ་ལས་སྲོག་གི་འཚོ་བ་འཐོབ་པར་འགྱུར་ཞིང་སྐྱོབ་པ་དེ་ཡིན་ལ་སྐྱབས་དེ་ཡིན་ཏེ་དེ་ལ་རྟེན་ཏོ། །དེ་ལྟར་དེ་སྲིད་དུ་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚོ་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་རང་གི་ལས་ཀྱི་འབྲས་བུ་ལ་སྤྱོད་པ་རང་གི་ལས་རླུང་ལྟ་བུས་དེད་པར་བྱེད་དོ། །དེ་དག་གལ་ཏེ་ཡང་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་རྫ་རྔ་རྡུང་བའམ། དྲིལ་སྒྲ་སྒྲོགས་པའམ། གཙུག་ལག་ཁང་གི་སྲུང་མར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་རྣམ་པར་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་མཆིལ་མ་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་
ན། འདི་ལྟར་མི་ངན་པ་སྐྱེས་པའམ་བུད་མེད་ཕྲག་དོག་དང་སེར་སྣས་ཟིལ་གྱིས་ནོན་པ་དགེ་འདུན་ནམ་གཞན་མཁས་པའི་རྣམ་པ་དེ་ལྟ་བུ་དག་གི་ཁ་ཟས་ལྷག་མར་བྱས་ལ་དེ་འདི་ལྟར་ལྷག་མར་མ་བྱས་སོ་ཞེས་སྨྲས་ནས། དེ་དག་ཀྱང་ཡིད་ཆེས་པའི་དབང་གིས་ཁ་ཟས་མི་འདྲ་བ་དེ་ཟ་བར་བྱེད་དོ། །མི་ངན་པ་དེ་ཡང་དང་ཡང་དུ་དེ་ལྟར་དེ་ཉིད་ལ་དགའ་བར་བྱེད་ཅིང་གཞན་དག་ཀྱང་དེ་ཉིད་ལ་རབ་ཏུ་འཇོག་པར་བྱེད་ལ་སྦྱིན་དག་གཏོང་བར་མི་བྱེད། ཚུལ་ཁྲིམས་ལ་མི་གནས། མཁས་པ་ལ་མི་རྟེན། ཆོས་དང་འཐུན་པར་མི་སྤྱོད། ཡང་དང་ཡང་དུ་ཁ་ཟས་ལྷག་མར་བྱེད་པའི་ལས་དེ་ཉིད་ལ་མངོན་པར་དགའ་བར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་མཆིལ་མ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ལུས་བཀྲེས་པ་དང་སྐོམ་པས་གདུངས་པའི་མཆིལ་མ་བོར་བ་ལྗན་ལྗིན་ནམ་རྩིག་པ་ལ་རེག་པའམ་ས་ལ་བོར་བ་དེ་ཁམ་གྱིས་ཟ་བར་བྱེད་དེ། དེས་སྲོག་འཚོ་བ་འཐོབ་པར་འགྱུར་ཞིང་དེའི་ཕྱི་བཞིན་འབྲང་ལ་སྐྱབས་དེ་ཡིན་ཟས་དེ་ཡིན་ཏེ། ཇི་སྲིད་དུ་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེར་འབྱུང་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་རང་གི་ལས་ཀྱི་འབྲས་བུ་ལ་སྤྱོད་པ་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་བརྒྱ་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་དབུལ་ཞིང་ནད་བུ་ཅན་ལ་སྣ་རུལ་བར་འགྱུར། རྟག་ཏུ་དགེ་འདུན་གྱི་ནང་ན་ལྗན་ལྗིན་འཕྱག་པར་འགྱུར། ལས་ཀྱི་འཚོ་བ་དང་ལྷག་མ་ཟ་བར་འགྱུར་བ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཅུ་དགུ་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཉེས་པར་བྱས་པ་སྤྱོད་པ། བཀྲེས་སྐོམ་ཆུང་ཞིང་ལུས་གོས་མེད་པ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། དེས་གནོད་སེམས་ཀྱི་ཕྱིར་
ནི་མ་ཡིན་གྱི། གཙང་བ་འདོད་པའི་ཕྱིར་སངས་རྒྱས་ལ་ཕྲེང་བ་ཕུལ་བ་རྐུ་བ་དང་། དེ་བཞིན་དུ་བླ་མ་དག་གི་ཕྲེང་བ་ཡང་རྐུ་བར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཕྲེང་བ་ཟ་བ་རྣམས་ཀྱི་ནང་དུ་སྐྱེ་བར་འགྱུར་ཏེ།དེ་མཆོད་རྟེན་ནམ་གནོད་སྦྱིན་གྱི་གནས་སུ་སྐྱེ་བར་འགྱུར་ཞིང་དེ་མཐུ་ཆེ་བ་དང་དབང་ཆེ་བར་ཡང་འགྱུར་རོ། །དེ་ལེགས་པར་བྱས་པ་དང་ཉེས་པར་བྱས་པའི་རྨི་ལམ་དག་སྟོན་པར་ནུས་སོ། །གལ་ཏེ་མི་གང་ལ་རང་བཞིན་གྱི་མི་དགེ་བ་ཞིག་བྱུང་ལ་ཡི་དགས་དེ་ལ་ཁ་ཟེར་ན། དེ་གཞི་དེས་མི་དེ་ལ་འཚེ་བར་བྱེད་པ་དང་། འཇིག་རྟེན་པ་དེ་དག་གནོད་སྦྱིན་འདི་ནི་རྫུ་འཕྲུལ་ཆེ་བ་མཐུ་ཆེ་བ་ཞིག་གོ་ཞེས་བརྗོད་དོ། །དེ་ཕྲེང་བ་མང་པོ་ཐོབ་སྟེ། དེ་དེས་ཤིན་ཏུ་ཚིམ་པར་འགྱུར་ཞིང་ལུས་བཀྲེས་པ་དང་སྐོམ་པས་གདུངས་པར་ཡང་མི་འགྱུར། འཇིག་རྟེན་གྱིས་ཀྱང་མངོན་པར་བསྟོད་པར་འགྱུར་ཏེ། དེ་དེས་རྟག་ཏུ་རབ་ཏུ་དགའ་བར་འགྱུར་རོ། །དེར་ཡི་དགས་ཕྲེང་བ་ཟ་བ་དེ་སྲིད་དུ་སྡིག་པའི་ལས་སྡིག་པ་ཆུང་བ་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚོ་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་བྱས་པ་ཉེ་བར་འགྲོ་བ་ཇི་ལྟ་བ་བཞིན་དེ་ལ་སྤྱོད་ཅིང་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་བརྒྱ་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ཕྲེང་བ་མཁན་དུ་འགྱུར་ཏེ་མུ་དང་མཐའ་དང་། མཇུག་དེས་དེའི་འཚོ་བ་ཉེ་བར་འགྲུབ་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་ཁྲག་ཟ་བ་ཞེས་བྱ་བ་ཁྲག་གིས་སྲོག་འཚོ་བར་བྱེད་པ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། མི་གང་ལ་ལ་དེའི་ལུས་བརྟན་པར་བྱ་བའི་ཕྱིར་ཤའི་ཁྲག་འཐུང་ལ་དེ་ལ་དགའ་ཞིང་གཏུམ་པ་དང་། ཕྲག་དོག་དང་སེར་སྣས་མངོན་པར་ཉམས་པ། བུ་དང་ཆུང་མ་ལ་སླུ་བར་བྱེད་ཅིང་
སྲོག་གཅོད་པར་བྱེད་ན་ཁྲག་ལ་འཆུམས་པའི་ངང་ཚུལ་ཅན་ཏེ། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཁྲག་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་ལས་དེ་ཉིད་ཀྱིས་བསྐྱེད་པའི་ཡུལ་དུ་སྐྱེ་བར་འགྱུར་ལ་དེ་ལ་མི་དག་འདི་ནི་གནོད་སྦྱིན་ཞིག་ཡིན་ནོ་ཞེས་རྗོད་དེ། དེ་ལ་མཆོད་པ་ཡང་བྱེད་དོ། །དེ་ལ་ཀུན་ནས་བསྐོར་ནས་ཁྲག་གི་གཏོར་མས་ཀྱང་མཆོད་པར་བྱེད་དེ། དེ་ཕྱིར་ཞིང་ཁྲག་འཐུང་བས་མྱོས་ནས་མི་དག་ལ་གནོད་པ་བྱེད་དོ། །དེ་ལ་མི་དག་ཡང་དང་ཡང་གནོད་སྦྱིན་འདི་ནི་རྫུ་འཕྲུལ་ཆེ་ཞིང་མཐུ་ཆེ་བ་ཞིག་ཡིན་ནོ་ཞེས་རྗོད་དེ། དེ་ལྟར་དེ་གཅིག་ནས་གཅིག་ཏུ་རྗོད་པར་བྱེད་དོ། །ཚེ་ཡང་སྔ་མ་བཞིན་ཏེ། དེ་ལྟར་དེ་ཇི་སྲིད་དུ་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེ་ལྟར་ཡི་དགས་རྫུ་འཕྲུལ་ཆེ་བ་དེ་ཉིད་བྱེད་དོ། །དེ་དེ་ལས་ཐར་ན་ལས་དེ་དང་རྒྱུ་འཐུན་པར་རང་གི་ལས་ལ་སྤྱོད་པ་ལས་ཉེ་བར་འགྲོ་བ་ཇི་ལྟ་བ་བཞིན་དུ་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་བརྒྱ་ལ་མི་རྣམས་དང་སྐལ་བ་མཉམ་པར་མིར་སྐྱེས་པའམ་བུད་མེད་དུ་སྐྱེས་ན་མི་དེ་མཁའ་འགྲོ་མའམ་མཁའ་འགྲོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་ཤ་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སེར་སྣ་ལ་ཆགས་པའི་ཟིལ་གྱིས་ནོན་པ་གང་གིས་བ་ལང་ངམ། རྟའམ། རི་དགས་སམ། ཕག་གམ། ལུག་ཤི་བའི་ཤ་རིན་ཐང་ངམ། སྲང་ལ་གཡོ་བྱས་ནས་རིན་ཆེན་པོར་བཙོངས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཤ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་བཞི་མདོ་དང་། སུམ་མདོ་དང་། ཚོང་འདུས་དང་། ལམ་གྱི་བཞི་མདོ་དང་། སྲང་དང་། གྲོང་ཁྱེར་དང་། གཙུག་ལག་ཁང་གི་གནས་རྣམས་ཀྱི་གནོད་སྦྱིན་དུ་སྐྱེ་བར་འགྱུར་ཏེ། ངོ་བོ་ཉིད་གཏུམ་ལ་གྱུར་པ་ཤེས་སོ། །ཡི་དགས་རྫུ་འཕྲུལ་ཆེ་བ་མི་དགེ་བའི་ལས་ཤིན་ཏུ་མི་བཟད་པ་
ཡང་མ་ཡིན་ལ། དེ་སྦྱིན་པ་ཚེར་མ་ལྟ་བུ་ཡང་བྱིན་ཏེ། རྒྱུ་དེས་རྫུ་འཕྲུལ་ཆེ་བ་ཉིད་དུ་འགྱུར་རོ། །དེ་ལ་མི་ཕལ་པ་དག་མ་ཧེ་དང་། རི་དགས་དང་། སྦྲུལ་དང་། ལུག་ལ་སོགས་པ་དག་སྲོག་བཅད་ནས་ཤས་ཤིན་ཏུ་ཚིམ་པར་བྱེད་དོ། །དེ་ལྟར་དེ་ཉེས་པར་བྱས་པའི་ངོ་བོ་ཉིད་ཀྱིས་ཇི་སྲིད་དུ་མི་དགེ་བའི་ལས་ཕྲག་དོག་བྱས་པ་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེར་འབྱུང་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ལས་ཉེ་བར་འགྲོ་བ་དང་། ལས་སོ་སོར་འབྲང་བ་ཇི་ལྟ་བ་བཞིན་དུ་འཁོར་བ་ན་ཡོངས་སུ་འཁྱམ་མོ། །གལ་ཏེ་བརྒྱ་ལ་ལས་ལེགས་པར་བྱས་པ་དེས་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་ཤ་ཟ་བ་ཤེན་པ་ཕལ་པའམ་དུམ་བུར་བྱེད་པའི་མིར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་བདུག་པ་ཟ་བ་ཞེས་བྱ་བ་དེ་ཐོབ་པས་དེས་སྲོག་འཚོ་བ་འཐོབ་པ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ལྷུས་ཆེར་སེར་སྣས་ཟིལ་གྱིས་ནོན་ཅིང་ལས་ཀྱི་འབྲས་བུ་མངོན་པར་མི་ཤེས་པ། སངས་རྒྱས་ཞེས་བྱ་བ་འདི་ཞིང་མ་ཡིན་ནོ་སྙམ་ནས་ཞིང་དུ་མངོན་པར་མ་ཤེས་པ་གང་གིས་བདུག་སྤོས་བཟང་པོ་བཞག་ལ་བདུག་སྤོས་ངན་པ་ཁྱེར་ཏེ། སེམས་དང་བ་མེད་ཅིང་དད་པ་མེད་པར་གྱུར་པ། ལས་ཀྱི་འབྲས་བུ་ཡང་དག་པར་མྱོང་བར་འདོད་པ། གཞན་གྱི་ངོར་འདི་ལྟར་བདུག་སྤོས་ཕུལ་བས་བདག་གི་ལས་ཀྱི་འབྲས་བུར་འགྱུར་སྙམ་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་རྫུ་འཕྲུལ་ཆེ་བ་མེ་ཏོག་ཕྲེང་བ་དང་། ཕྱེ་མ་དང་། བྱུག་པ་དང་། སྤོས་དང་། རོལ་མོའི་སྒྲ་ལ་རབ་ཏུ་དགའ་ཞིང་བདུག་པ་ཟ་བའི་གནོད་སྦྱིན་དུ་འགྱུར་ཏེ། གནོད་སྦྱིན་གྱི་གནས་སུམ་མདོ་དང་། བཞི་མདོའམ། ལམ་པོ་ཆེའམ། སྲང་ངམ། གཙུག་ལག་ཁང་ངམ། ཀུན་དགའ་
ར་བའམ། སྐྱེད་མོས་ཚལ་ལམ། ཁྱིམ་མམ། མཁར་རམ། པུ་ཤུ་དག་ཏུ་ཨ་ག་རུ་ནག་པོའི་བདུག་སྤོས་ཀྱིས་མྱོས་པར་འགྱུར་ཞིང་། སྐྱེ་བོ་ཀུན་གྱིས་ཕྱག་བྱས་པར་འགྱུར་བ་ནི་སེམས་དང་རྫས་ཀྱི་ཡོན་གྱིས་མ་ཡིན་གྱི་ཞིང་བཟང་པོའི་ཡོན་ཡིན་ཏེ། སངས་རྒྱས་དང་། ཆོས་དང་། དགེ་འདུན་ལ་ཆུང་ངུ་ཞིག་ཕུལ་ན་ཡང་འབྲས་བུ་ཆེན་པོར་འགྱུར་རོ། །དཔེར་ན་གང་གི་ཚེ་ཤིང་ནྱ་གྲོ་དྷའི་ས་བོན་ཆུང་ངུ་ཞིང་གཤིན་པ་ལ་བཏབ་པ་དེའི་ཚེ་ཤིང་ལྗོན་པ་ཡལ་ག་བཟང་ཞིང་ལོ་མའི་ཚོགས་ཆེན་པོར་འགྱུར་རོ། །དེ་བཞིན་དུ་དེ་ཞིང་བཟང་པོ་སངས་རྒྱས་དང་། ཆོས་དང་། དགེ་འདུན་ལ་ཕུལ་བའི་འབྲས་བུ་ཡང་ཞིང་གི་ཡོན་ཏན་དང་མཐུས་ཆེན་པོར་འགྱུར་རོ། །དེ་ལྟར་ཡི་དགས་རྫུ་འཕྲུལ་ཆེ་བ་དེ་བདེ་བ་ཉམས་སུ་མྱོང་སྟེ་ལས་ཟད་ནས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ལས་ཉེ་བར་འགྲོ་བ་ཇི་ལྟ་བ་བཞིན་དུ་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་དེ་དབུལ་བའི་རིགས་སུ་སྐྱེ་ཞིང་རྟག་ཏུ་མེ་ཏོག་ཕྲེང་བ་དང་། ཕྱེ་མ་དང་། བྱུག་པས་ལུས་བྱུགས་ཏེ་ལུས་ཤིན་ཏུ་དྲི་ཞིམ་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས། ཡི་དགས་དྲག་ཤུལ་སྤྱོད་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། མི་ངན་པ་སེར་སྣས་ཟིལ་གྱིས་ནོན་ཅིང་དགེ་སྦྱོང་གི་ཚུལ་འཛིན་པ་ཚུལ་ཁྲིམས་འཆལ་པ་གང་གིས་དགེ་སྦྱོང་གཞན་ལ་ཐ་སྙད་བཏགས་ནས་འདི་ལྟར་དགེ་སྦྱོང་ཞིག་ཤིན་ཏུ་ནད་མི་བཟད་པས་ཐེབས་ཏེ་དེ་སྦྱིན་བདག་ཁྱོད་ཀྱིས་ན་བའི་གསོས་སྨན་གྱི་རྐྱེན་གྱི་ཡོ་བྱད་དག་བྱིན་ཅིག་ཅེས་སྨྲས་ནས། དེ་བླངས་ཏེ་བདག་ཉིད་ཟ་བར་བྱེད་དེ་ཟླ་དེས་ངན་གཡོ་བྱེད་པར་གྱུར་ནས་ཚུལ་སྣ་ཚོགས་བཟུང་སྟེ་ཡུལ་ནས་ཡུལ་དུ་རྒྱུག་ཅིང་སྦྱིན་བདག་རྣམས་ལ་སླུ་བར་བྱེད་ན། དེ་ལུས་དང་བྲལ་ནས་ངན་འགྲོ་
ལོག་པར་ལྟུང་བ་ཡི་དགས་དྲག་ཤུལ་སྤྱོད་པ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཁ་ཟས་ལྗན་ལྗིན་མི་གཙང་བ་ཟ་བར་འགྱུར། རྟག་ཏུ་ལུས་བཀྲེས་པ་དང་སྐོམ་པས་གདུངས་པར་འགྱུར། མི་གང་མི་གཙང་བ་དེ་ལ་བརྙས་པར་བྱེད་ཅིང་དེ་ལྟར་ང་རྒྱལ་མེད་པར་བྱེད། གླགས་མཐོང་བ་ཉིད་ཀྱིས་གཞན་དག་གི་རྨི་ལམ་དུ་འཇིགས་པ་སྟོན་པར་བྱེད་ཅིང་དུར་ཁྲོད་རྣམས་སུ་དགའ་བར་བྱེད། ལུས་དང་སྤུ་ཐམས་ཅད་རབ་ཏུ་འབར་ལ་ཡུལ་འཇིག་པའི་ཚེ་རབ་ཏུ་དགའ་བར་འགྱུར། དྲག་ཤུལ་དུ་སྤྱོད་པའི་རིག་སྔགས་དག་གིས་གཞན་དག་དྲངས་ནས་རྣམ་པར་འཚེ་བར་བྱེད། ཡུད་ཙམ་ཅིག་གིས་དཔག་ཚད་བརྒྱ་ཕྲག་སྟོང་ནས་ཀྱང་དྲངས་ཏེ་འོང་བར་བྱེད་དོ། །དེ་ལྟར་དྲག་ཤུལ་སྤྱོད་པའི་ཡི་དགས་དེ་གནོད་སྦྱིན་གྱི་མིང་ཐོབ་སྟེ། དེ་ལ་སྐྱེ་བོ་ཕལ་པ་དག་གནོད་སྦྱིན་འདི་ནི་རྫུ་འཕྲུལ་ཆེ་ཞིང་གནོད་སྦྱིན་མཐུ་ཆེ་བ་ཡིན་ནོ་སྙམ་ནས་མཆོད་པ་བྱེད་དོ། །དེ་ལྟར་དེ་སྐྱེ་བོ་རྣམ་པ་སྣ་ཚོགས་ལ་གནོད་པ་བྱེད་ཅིང་རྣམ་པར་འཚེ་བ་ན་ཇི་སྲིད་དུ་ཚེ་མ་ཟད་པ་དེ་སྲིད་དུ་འཚོ་བར་འགྱུར་རོ། །དེ་ཕྱིས་དེ་ལས་འཆི་བར་འགྱུར་ཏེ་ཤི་ནས་ཀྱང་ལས་དེ་དང་རྒྱུ་འཐུན་པར་རང་གི་ལས་ལ་སྤྱོད་པ་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་བརྒྱ་ལ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་འབྱུང་པོ་མི་བཟད་པ་གནོད་སྦྱིན་མོ་སྐྱོང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་གླགས་ལྟ་བ་ཞེས་བྱ་བ་རང་གི་ངོ་བོ་ཉིད་ཀྱིས་ཀྱང་གླགས་ལྟ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ཕྲག་དོག་དང་སེར་སྣས་ཟིལ་གྱིས་ནོན་པས་གཞན་གྱི་ནོར་རྫས་ལ་གཡོ་ཐབས་དང་ངན་གཡོ་དང་། སླུ་བ་དང་འཁུ་བ་བྱས་ཤིང་གྲོང་དང་། གྲོང་ཁྱེར་དང་། ཚོང་འདུས་པ་ལ་བྲིད་དེ་གླགས་རྙེད་པ་དང་། ཕ་རོལ་འཇིག་པར་བྱེད་ཅིང་སྦྱིན་པ་དག་མི་གཏོང་། བསོད་ནམས་ཀྱང་མི་བྱེད། མཁས་པ་ལ་ལྷུར་མི་ལྟ། རྟག་ཏུ་སེར་སྣས་ཟིལ་གྱིས་ནོན་ཅིང་
གཞན་ལ་འཁུ་བའི་བསམ་པས་གཞན་གྱི་ཕུན་སུམ་ཚོགས་པ་མཐོང་ནས་ཡིད་གཞན་དུ་སེམས། བཤེས་གྲོགས་དང་། གཉེན་འདབ་དང་། རྩ་ལག་དང་མི་འཐུན་ཞིང་ཡུལ་ལ་ཞེ་འགྲས་པ་སྐྱེ་བོ་ཐམས་ཅད་ཀྱི་མངོན་སུམ་དུ་གྱུར་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་གླགས་ལྟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །ལུས་དང་སྤུ་རྟག་ཏུ་རབ་ཏུ་འབར་ཞིང་ལུས་བཀྲེས་པ་དང་སྐོམ་པས་གདུངས་ལ། ལུས་ཤིང་ལྗོན་པ་ཀིང་ཤུ་ཀ་འདྲ་བ་ངུ་སྐད་འབྱིན་སྨྲེ་སྔགས་འདོན་ཅིང་ས་ཕྱོགས་གང་ན་ཆུ་ཡོད་ཅིག་གུ། གཞན་གང་ན་བདག་གིས་བཟའ་བའི་ཁ་ཟས་ཀྱི་རྣམ་པ་ཅུང་ཟད་ཡོད་ཅིག་གུ་སྙམ་ནས་རྒྱུག་པར་བྱེད་དོ། །དེ་རེས་འགའ་གལ་ཏེ་མི་བློ་ཞན་པ་ཞིག་དང་ཕྲད་ལ། མི་དེ་མཆོད་རྟེན་སྐོར་བར་མི་བྱེད་པ་དང་། དེའི་ཕྱི་བཞིན་དུ་འབྲང་བའི་ལྷ་དེས་གཏོང་བར་འགྱུར་ལ། དེའི་ཚེ་མི་དེའི་ཕྱི་བཞིན་འབྲང་བའི་ལྷ་དང་བྲལ་བར་འགྱུར་ཏེ་ཡི་དགས་གླགས་ལྟ་བ་དེས་གླགས་རྙེད་ནས་རྣམ་པར་འཚེ་བར་བྱེད་ཅིང་དེ་བཟུང་ནས་དེའི་ཚེ་སྲོག་འཚོ་བར་བྱེད་དོ། །དེ་བཞིན་དུ་མི་གཞན་གང་དག་བུད་མེད་དང་ཕྲད་པ་བཙོག་གི་ཉེས་པའམ་ཁ་ཟས་དང་བཏུང་བ་ཟོས་པའི་ལྷག་མ་མི་གཙང་བའི་ཉེས་པ་མ་བཀྲུས་ན་ལྷ་ཡང་རྣམ་པར་འཚེ་བར་བྱེད་ལ་ཡི་དགས་དེ་དེ་ཉིད་ཀྱིས་སྲོག་འཚོ་བ་འཐོབ་པར་འགྱུར་ཞིང་དེའི་མགོན་དེ་ཡིན་ལ་སྐྱབས་དེ་ཡིན་ཏེ། ཇི་སྲིད་དུ་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚོ་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ལས་ལ་སྤྱོད་པ་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་རྒྱལ་པོ་དང་། ཆུ་དང་། ཆོམ་རྐུན་དང་། མེ་དང་། དགོན་པ་དག་གིས་མ་རུང་བར་བྱེད་ཅིང་རྟག་ཏུ་དབུལ་བ་དང་ནད་བུ་ཅན་དང་དམན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་སའི་འོག་ན་གནས་པ་ཞེས་བྱ་བ་མཐོང་ངོ་། །དེར་སེམས་ཅན་
དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། མི་བློ་གྲོས་ངན་པ་སེར་སྣས་ཟིལ་གྱིས་ནོན་པའི་གཞི་གང་གི་བཙོན་ར་བྱ་བའི་ཕྱིར་ས་བརྐོས་པ་མུན་ནག་གི་ནང་དུ་སེམས་ཅན་བཅིངས་པ་གང་དག་ཕན་ཚུན་བལྟ་བར་ཡང་མི་མཐོང་སྟེ། དེ་དག་ངུ་སྐད་འབྱིན་ཅིང་ཀུ་ཆོ་འདོན། སོ་སོ་ནས་མགོན་མེད་ལ་ཤིན་ཏུ་སྡུག་བསྔལ་བ་དག་མི་ངན་པ་གང་གིས་བཙོན་རར་འཇུག་པར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་སའི་འོག་ན་གནས་པ་ས་གཞི་མུན་པ་མུན་གནག་གི་ནང་དུ་འབྱུང་བར་འགྱུར་ཏེ། དེ་ལུས་ཀྱི་ཚད་དཔག་ཚད་གསུམ་ཡོད་ལ་ཀུན་ནས་སྦྲུལ་གདུག་པས་དཀྲིས་ཤིང་དེ་རླུང་གྲང་ལ་མི་འཐུན་པ་རྣམས་ཀྱིས་ཤིན་ཏུ་གནོད་པར་བྱེད། ལུས་སྤུ་ཅན་བཀྲེས་པ་དང་སྐོམ་པས་མཆོག་ཏུ་གདུངས་པས་ངུ་ལ་ལུས་སྐྲ་རིང་པོས་ཁེབས་པ། ཡང་དང་ཡང་དུ་སྡུག་བསྔལ་རྣམ་པ་སྣ་ཚོགས་རྣམ་པ་དུ་མ་རྣམས་ཀྱིས་མངོན་པར་གདུངས་ཤིང་དགོན་པ་མི་བཟད་པར་ཞུགས། སྡུག་བསྔལ་དྲག་ཅིང་མི་བཟད་པ་མྱོང་བཞིན་དུ་ཡོངས་སུ་རྒྱུག་ལ། གཅིག་པུ་ཟླ་མེད་ཅིང་གྲོགས་མེད་པ། རླུང་སྤུ་གྲི་ལྟ་བུས་བདས་པ་ན་ཇི་སྲིད་དུ་ཉེས་པར་བྱས་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེ་མྱོང་བར་འགྱུར་རོ། །དེ་ཕྱིས་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ལས་ཉེ་བར་འགྲོ་བ་ཇི་ལྟ་བ་བཞིན་དུ་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་རི་གསེབ་དང་རྒྱ་མཚོའི་རི་དང་ཉི་མ་དང་ཟླ་བ་མེད་པའི་ཡུལ་རྣམས་སུ་ལོང་བར་འགྱུར་ཞིང་སྲོག་འཚོ་བ་གཞན་དག་ལ་རག་ལས་པ་དང་། དབུལ་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་རྫུ་འཕྲུལ་ཆེ་བ་ཞེས་བྱ་བ་རང་བཞིན་གྱིས་རྫུ་འཕྲུལ་ཆེ་ཞིང་མཐུ་ཆེ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་
ལས་བྱུང་བའི་ཤེས་པས་བརྟགས་ན། སེམས་ཅན་སེར་སྣས་ཉམས་པ་གང་གཡོ་ཐབས་དང་སྒྱུས་སམ། མཐུས་གཞན་གྱི་ནོར་ཕྲོགས་ཏེ། གཞན་དག་ལ་བྱིན་པ་དང་། སེམས་དང་ལྡན་པ་མ་ཡིན་ཞིང་། ཞིང་བཟང་པོ་མ་ཡིན་པ་ལ་སྦྱིན་པ་ཚེར་མ་ལྟ་བུ་དང་མཚུངས་པའི་སྦྱིན་པ་འགྲན་པ་དང་། དབང་མེད་པ་དང་། སྦ་བ་དང་། སྤོགས་དང་། ངོ་ཆེན་དང་། སྟེན་སྟེན་པ་དང་། སླར་རེ་བ་ལ་སོགས་པའི་སྦྱིན་པ་ཚེར་མ་ལྟ་བུ་དང་མཚུངས་པ་དག་བྱིན་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་མཐུ་བོ་ཆེར་འགྱུར་རོ། །དེ་དེར་སྐྱེས་ནས་ཡི་དགས་ལུས་བཀྲེས་པ་དང་སྐོམ་པས་གདུངས་པ་རྣམས་ཀྱིས་ཡོངས་སུ་བསྐོར་བ། འབྲོག་དགོན་པའམ། རི་ཟད་ཟེད་ཀྱི་གསེབ་བམ། རྒྱ་མཚོའི་མཐའི་གླིང་དག་ཏུ་ཡི་དགས་རྫུ་འཕྲུལ་ཆེན་པོར་འགྱུར་ཏེ། བདག་གཅིག་པུ་མཆོག་ཏུ་བདེ་བར་འགྱུར་རོ། །གཞན་ལུས་ཚལ་ཤིང་བསྲེགས་པ་ལྟ་བུ་དང་། ལུས་བཀྲེས་པ་དང་སྐོམ་པས་གདུངས་ཤིང་ལུས་གདུངས་པ་བཀྲེན་པའི་མིག་གིས་ལྟ་བ་རྣམས་ཀྱིས་མངོན་པར་བསྐོར་བ་བདག་གཅིག་པུ་མཆོག་ཏུ་བདེ་བར་འགྱུར་ཏེ། སྦྱིན་པ་ངན་པ་དེའི་འབྲས་བུ་བདག་གཅིག་པུ་ཉེ་བར་སྤྱོད་དོ། །ཤིན་ཏུ་སྡུག་བསྔལ་བས་འཁྲིགས་ཤིང་ཡོངས་སུ་བསྐོར་བ་གང་གི་ཚེ་ལས་དེ་ཟད་པར་གྱུར་པ་དེའི་ཚེ་དེ་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་རང་གི་ལས་ཀྱི་འབྲས་བུ་ལ་སྤྱོད་པ་འཁོར་བ་ན་འགྲོ་བ་སྣ་ཚོགས་སུ་སྐྱེ་བར་འགྱུར་རོ། །དེ་གལ་ཏེ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་ལོ་ཉེས་བྱུང་བའི་ཡུལ་དག་ཏུ་རྒྱལ་པོའམ་རྒྱལ་ཕྲན་དུ་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན། ཡི་དགས་མཚན་མོ་ལུས་རབ་ཏུ་འབར་བ་ཞེས་བྱ་བ་ངོ་བོ་ཉིད་ཀྱིས་ཀྱང་མཚན་མོ་རབ་ཏུ་འབར་ཏེ་ངུ་བཞིན་དུ་གྲོང་གི་འདབ་དང་། གྲོང་ཁྱེར་གྱི་འདབ་དང་། ཚོང་འདུས་ཀྱི་འདབ་དང་། རིའི་གནས་རྣམས་སུ་རྒྱུག་པ། ཤིང་ལྗོན་པ་རབ་ཏུ་འབར་བ་འདྲ་ཞིང་ལུས་བཀྲེས་པ་དང་། སྐོམ་པས་
གདུངས་པ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཇི་ལྟར་ཕྲག་དོག་གིས་ཟིལ་གྱིས་ནོན་པ་གང་ཕ་རོལ་ལ་གནོད་པར་བྱེད་པ་གཡོ་ཐབས་དང་སྒྱུ་བྱེད་པ། ཡུལ་མ་རུང་བར་བྱེད་པ། ལྗོངས་འཇིག་པར་བྱེད་པ། མི་གསོད་པ། གཉེན་འདབ་དང་། བཤེས་གྲོགས་དང་། རྩ་ལག་འཇིག་པར་བྱེད་པ། དེ་དག་བཤིག་ནས་ཀྱང་རྒྱལ་པོའམ། བློན་པོ་ལ་འབུལ་བར་བྱེད་དེ། དེ་ལས་ཡང་ཐབས་ཐོབ་ནས་དེ་ནས་ཡང་སྡིག་པ་བྱེད་པའི་མི་ཡུལ་དེ་དག་ཉིད་སྔ་མ་བཞིན་དུ་འཇིག་པར་བྱེད་ལ་སྦྱིན་པ་དང་། ཚུལ་ཁྲིམས་དང་། ཐོས་པ་དང་བྲལ་བ་དང་། མཁས་པ་ལ་སྡང་བར་བྱེད་ཅིང་གནོད་པར་བྱེད་པ་དེ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་མཚན་མོ་ལུས་རབ་ཏུ་འབར་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེས་ཇི་ལྟར་དེ་དག་མཚན་མོ་བཙོན་རར་བཅུག་སྟེ། ལུས་ལ་གནོད་པ་བྱས་པ་དེ་བཞིན་དུ་ལས་དེ་དང་རྒྱུ་འཐུན་པར་ལས་མི་བཟད་པ་དེས་དེའི་ལུས་ཀྱང་མཚན་མོ་རབ་ཏུ་འབར་བར་འགྱུར་རོ། །ཇི་ལྟར་དེས་བཙོན་རར་བཅུག་ནས་ངུ་ཞིང་ངུ་སྐད་འབྱིན་ལ་ཆོ་ངེས་འདེབས་པ་དེ་བཞིན་དུ་ཡི་དགས་དེའི་ལུས་མཚན་མོ་རབ་ཏུ་འབར་བར་འགྱུར་ཏེ། དེ་ལྟར་དེ་ཇི་སྲིད་དུ་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ལས་དེ་མྱོང་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་ལས་ཉེ་བར་འགྲོ་བ་ཇི་ལྟ་བ་བཞིན་དུ་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་གཞན་གྱིས་གནོད་པ་བྱས་པར་འགྱུར། ནོར་རྫས་བསགས་བསགས་པ་ཡང་རྟག་ཏུ་རྒྱལ་པོའི་འཁོར་ནས་ཀྱང་འཕྲོག་པར་བྱེད། ཤིང་ལྗོན་པའི་ཁ་ནས་རྟག་ཏུ་ལྷུང་བར་འགྱུར་ཏེ། དེ་ལྷུང་ནས་ལུས་སྣད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན།
ཡི་དགས་མི་རྣམས་ཀྱི་བུས་པ་ལ་གླགས་ལྟ་བ་ཞེས་བྱ་བ་བུས་པ་གང་བཙས་མ་ཐག་ཏུ་འཕྲོག་པར་བྱེད་པ་ཇི་ལྟར་འདུག་པ་མཐོང་ངོ་། །དེ་ལས་ཀྱི་འབྲས་བུ་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྔོན་གཞན་དུ་སྐྱེས་པ་ན་དེའི་བུས་པ་བསད་པ་དང་སྐྱེས་པའམ་བུད་མེད་དེ་སེམས་ཅན་དེ་ལ་ཞེ་སྡང་སྐྱེས་ནས་འདི་ལྟར་བདག་གནོད་སྦྱིན་དུ་གྱུར་ཏེ། དེ་དག་གི་བུས་པ་གསད་པར་བྱའོ་སྙམ་དུ་སེམས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་གཞན་ལ་གླགས་ལྟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ཁྲོ་བ་དེ་ལ་མངོན་པར་ཞུགས་པའི་བློས་རྟག་ཏུ་དེ་ཡིད་ལ་བྱེད་པར་འགྱུར་ཏེ། གལ་ཏེ་བུད་མེད་དེ་བུ་བཙའ་བར་གྱུར་ན་དེའི་བུས་པ་དེ་དེ་ལས་བདག་གིས་གླགས་རྙེད་ནས་དབྲོག་པར་བྱའོ་སྙམ་དུ་སེམས་སོ། །ཡི་དགས་དེ་མགྱོགས་པར་སྐྱེས་ཏེ་ཇི་ལྟར་དཔག་ཚད་བརྒྱ་ཕྲག་སྟོང་དག་ན་ཁྲག་གི་དྲི་ཚོར་ན་ཡང་དེར་ཡུད་ཙམ་གྱིས་ཕྱིན་པར་འགྲོ་སྟེ། དེ་གང་གི་ཚེ་བུད་མེད་དེ་བཙའ་བར་འགྱུར་བ་དེའི་ཚེ་ཡི་དགས་གླགས་ལྟ་བ་འཁོན་དུ་འཛིན་ཅིང་དགྲའི་གླགས་ལྟ་བ་དེ་ཆུང་ངུར་གྱུར་ནས་གནས་སོ། །དེ་གང་གི་ཚེ་ཐམས་ཅད་དུ་ཚོལ་ཏེ་གླགས་ཚོལ། དམིགས་པ་ཚོལ། གསབ་གསེབ་ཚོལ། གཞི་ཚོལ། རྒྱུ་ཚོལ། ཉེས་པ་ཚོལ། སྤྱོད་པ་ཐ་དད་པ་ཚོལ། བཀྲ་ཤིས་མ་ཡིན་པ་ཚོལ། སྐར་ཁུང་གི་བུ་ག་ཚོལ། སྒོའི་བུ་ག་ཚོལ། གཞིར་འཇུག་པ་ཚོལ། ཆུ་མི་གཙང་བ་ཚོལ། གསང་སྔགས་ལ་གླགས་ཚོལ། རིག་སྔགས་ལ་གླགས་ཚོལ། བཀྲ་ཤིས་ལ་གླགས་ཚོལ། གྲིབ་མ་ལ་གླགས་ཚོལ། དངོས་པོ་ལ་གླགས་ཚོལ། མེ་མདག་གི་བུ་ག་ཚོལ། སའི་བུ་ག་ཚོལ། མཚོན་ཆའི་བུ་ག་ཚོལ། ཁང་པའི་པུ་ཤུ་དང་། ངམ་གྲོག་དང་། གཡང་སའི་བུ་ག་ཚོལ་ཏེ། དེ་ལྟར་ཡི་དགས་སྙིང་ལ་འཁོན་དུ་འཛིན་པ་ཆེན་པོ་ཡོད་པ་དེ་གླགས་རྣམ་པ་སྣ་ཚོགས་དག་ཚོལ་ལོ། །དེ་གལ་ཏེ་ཇི་སྐད་བསྟན་པའི་གླགས་དག་རྙེད་ན་དེ་བཙའ་བའི་ཁྱིམ་ན་གནས་པ་ཉིད་འཕྲོག་པར་བྱེད་དོ། །གལ་ཏེ་མ་རྙེད་ན་གླགས་རྣམ་པ་སྣ་ཚོགས་ཚོལ་བ་དེ་ལོ་བཅུ་འདས་ཀྱི་བར་དུ་ཡང་འཕྲོག་པར་བྱེད་དོ། །དེ་ལྟར་སྙིང་ལ་
འཁོན་དུ་འཛིན་པ་མི་དགེ་བ་དང་འབྲེལ་པ་མི་དགེ་བ་ཉིད་ཀུན་དུ་སྤྱོད་བཞིན་དུ་ལུས་བཀྲེས་པ་དང་། སྐོམ་པས་གདུངས་པ་དེས་གལ་ཏེ་ནུས་ན་དེའི་བུས་པ་དེ་ཕྲོགས་ནས་གསོད་པར་བྱེད་དོ། །ཇི་སྟེ་ལུས་ཀྱི་དབང་ངམ་སྲུང་བའི་དབང་གིས་མ་ནུས་ན་སྙིང་ལ་འཁོན་དུ་འཛིན་པ་དེ་འཆི་བའི་དུས་བྱེད་དེ། དེ་ལྟར་ཤི་ནས་ལས་ཉེ་བར་འགྲོ་བ་ཇི་ལྟ་བ་བཞིན་དུ་ལས་ཀྱི་དབང་གིས་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་ཡང་བརྒྱ་ལ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། སྔོན་འབྲེལ་པའི་སྒྲ་དེ་དང་རྒྱུ་འཐུན་པར་དེ་སྔར་བཤད་པའི་སྙིང་ལ་འཁོན་དུ་འཛིན་པ་དེས་རྒྱུ་མེད་བཞིན་དུ་ཐབས་རྣམ་པ་སྣ་ཚོགས་ཀྱིས་རབ་ཏུ་གསོད་པའི་དགྲ་འབྱུང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་འདོད་པའི་གཟུགས་ཅན་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། བུད་མེད་དམ། མ་ནིང་གང་བུད་མེད་ཀྱི་ཆ་བྱད་དུ་ཞུགས་ཤིང་དེ་བུད་མེད་སྨད་འཚོང་མའི་ཆ་བྱད་སྣ་ཚོགས་སུ་ཞུགས་ནས་ཕ་རོལ་དག་འདོད་ཆགས་སྐྱེད་པར་བྱེད་ཅིང་དེ་ནས་ཡང་འདོད་པ་དེ་ཉིད་ལ་གཡེངས་ནས་འཇུག་པར་བྱེད་ལ་བཅུག་ནས་ཀྱང་ཕྲག་དོག་དང་སེར་སྣས་ཟིལ་གྱིས་ནོན་པས་ཕ་རོལ་ལས་གླ་ནོར་རྫས་དག་ལེན་པར་བྱེད་དོ། །བླངས་ནས་ཀྱང་རེས་འགའ་ཞིང་ངན་པ་དང་སྣོད་ངན་པ་དང་ཡུལ་ངན་པ་ལ་སྦྱིན་པའི་དངོས་པོ་ངན་པ་ཚེར་མ་ལྟ་བུ་དང་ལྡན་པ་ཅུང་ཟད་ཙམ་སྦྱིན་པར་བྱེད་དེ། རྒྱུ་དེས་དེ་འཆི་བའི་དུས་བྱས་པ་ན་ཡི་དགས་འདོད་པའི་གཟུགས་ཅན་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཡི་དགས་ཀྱི་གཟུགས་ཀྱི་ཚུལ་སྣ་ཚོགས་འཛིན་ཏེ། ཚུལ་བཟང་བའམ། ཚུལ་ངན་པའམ། གཟུགས་བཟང་བའམ། གཟུགས་ངན་པའམ། སྡུག་པའམ། སྐྱེས་པའི་གཟུགས་སམ། བུད་མེད་ཀྱི་གཟུགས་སམ། དུད་འགྲོའི་གཟུགས་དག་བྱེད་པར་ནུས་སོ། །དེ་ཚུལ་སྣ་
ཚོགས་དག་བཟུང་ནས་ཡུལ་ནས་ཡུལ་དག་ཏུ་འགྲོ་བར་ནུས་སོ། །དེ་རྒྱུ་དང་བཅས་རྐྱེན་དང་བཅས་པར་གྱུར་ན་ཁ་ཟས་བཟའ་བར་ནུས་སོ། །རྒྱུའི་གཟུགས་དེ་ཤིན་ཏུ་ཆུང་བར་བྱས་ནས་ཁྱིམ་དུ་འཇུག་པར་བྱེད་དེ་ཞུགས་ནས་ཁ་ཟས་དེ་ལ་ཟ་བར་བྱེད་དོ། །ཁྱིམ་ན་གནས་པ་དེ་གཞན་ལ་བདག་ཅག་གི་ཁ་ཟས་ཡི་དགས་ཀྱིས་ཟོས་སོ་ཞེས་སྨྲའོ། །རེས་འགའ་ཡང་ལྷའམ་མིའི་ཚུལ་དུ་གནས་ནས་དུས་ཀྱི་དགའ་སྟོན་དག་གི་ཁ་ཟས་ལ་ཟ་བར་བྱེད་དོ། །རེས་འགའ་ཡང་བྱར་སྤྲུལ་ནས་དུར་འཐོར་བའི་ཁ་ཟས་དག་ལ་ཟ་བར་བྱེད་དོ། །རེས་འགའ་ཡང་མི་སྣང་བར་བྱས་ནས་འཕྲོག་པར་བྱེད་དེ། དེ་ཇི་ལྟར་འདོད་པ་དེ་བཞིན་དུ་གཟུགས་རྣམ་པ་སྣ་ཚོགས་སུ་བྱེད་དོ། །དེ་ལ་འཇིག་རྟེན་དག་གནོད་སྦྱིན་ཇི་ལྟར་འདོད་པའི་གཟུགས་ཅན་ཞིག་ཡིན་ནོ་ཞེས་བརྗོད་དོ། །དེ་རེས་འགའ་ཡང་བུད་མེད་དུ་སྤྲུལ་ནས་གྲོང་མིའི་ཆོས་ཀྱིས་སྐྱེས་པ་འདྲེན་པར་བྱེད་དོ། །དེ་ལྟར་དེ་ཚུལ་སྣ་ཚོགས་བཟུང་ནས་འཇིག་རྟེན་སླུ་བར་བྱེད་དེ། དེ་ཇི་སྲིད་དུ་ཡི་དགས་དང་ལྡན་པའི་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེ་ལྟར་འཇིག་རྟེན་བསླུས་ནས་ཡི་དགས་ཀྱི་འཇིག་རྟེན་དུ་སྐྱེ་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་རང་གིས་བྱས་པའི་ལས་ལ་སྤྱོད་པ་ལ་འཁོར་བ་ན་ཡོངས་སུ་འཁྱམ་མོ། །དེ་གལ་ཏེ་ཡང་བརྒྱ་ལ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་བྲོ་གར་མཁན་ཚུལ་སྣ་ཚོགས་འཛིན་པར་འགྱུར་ཞིང་དེ་བཞིན་དུ་སྤྱོད་པའི་ཚུལ་གཞན་སྣ་ཚོགས་འཛིན་པར་འགྱུར་ཏེ། དེ་ཚུལ་སྣ་ཚོགས་འཛིན་པའི་ལས་དེས་འཚོ་བ་དེ་བཞིན་དུ་བདག་ཉིད་འཚོ་བར་བྱེད་དེ། བདག་གི་ཆུང་མ་གཞན་དག་ལ་བྱིན་ནས་ཚེགས་ཆེན་པོས་འཚོ་བ་འགྲུབ་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་རྒྱ་མཚོའི་གླིང་གི་བར་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་དག་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་
བྱུང་བའི་ཤེས་པས་བརྟགས་ན། དགོན་པར་ཞུགས་པ་གང་འཇིགས་ཤིང་བཞིན་མོག་མོག་པོར་གྱུར། ནད་ཀྱིས་ཉམ་ཐག་སྟེ། མགོན་མེད་ཅིང་བཤེས་པ་མེད་པ་ཅན་དེ་ལ་སེམས་ཅན་གཞན་ཕྲག་དོག་དང་སེར་སྣས་ཉམས་ཤིང་མི་རིགས་པར་ཆགས་ལ་བརྐམ་པ་གང་གིས་ཟོང་ངན་པས་ནོར་རྫས་བཟང་པོ་ལ་རིན་འདྲ་བར་འདེབས་ཤིང་སླུ་བར་བྱེད་ན། མི་སེར་སྣས་ཉམས་པ་དེ་འཆི་བའི་དུས་བྱས་ནས་རྒྱ་མཚོ་དང་། ཉེ་བའི་དགོན་པ་མང་པོ་དང་། ཤིང་ལྗོན་པ་དང་། ལྟེང་ཀ་དང་། ཆུ་བོ་དང་། ཚལ་དང་། ནགས་ཚལ་མེད་པའི་ཡུལ་དག་ཏུ་གྲང་བའི་ཚེ་ནི་བརྒྱ་འགྱུར་དུ་གྲང་ལ་ཚ་བའི་ཚེ་ནི་བརྒྱ་འགྱུར་དུ་ཚ་སྟེ། ལུས་བཀྲེས་པ་དང་སྐོམ་པས་གདུངས་པའམ། ཟིལ་པའི་ཐིགས་པས་སྲོག་འཚོ་བའི་ཡི་དགས་སུ་འགྱུར་རོ། །རྒྱ་མཚོའི་ཆུ་ཡང་བཏུང་བར་མི་ཐོབ་ལ། དེ་དག་གི་ལས་ངན་པར་བྱས་པ་དེས་རྒྱ་མཚོ་ཡང་ཐམས་ཅད་དུ་སྐམས་པར་འགྱུར་ཏེ། རི་དང་ནགས་ཚལ་དང་རྒྱ་མཚོར་བཅས་པ་དེ་ཡང་རབ་ཏུ་འབར་བར་མཐོང་ངོ་། །དེ་རེ་བ་མེད་ཅིང་ཐམས་ཅད་ནས་གནོད་པ། ལུས་བཀྲེས་པ་དང་སྐོམ་པས་གདུངས་པ་ངུ་ཞིང་སྨྲེ་སྔགས་འདོན་བཞིན་དུ་གནས་ནས་གནས་དག་ཏུ་རྒྱུག་ལ། ངུ་སྐད་འབྱིན། སྨྲེ་སྔགས་འདོན། ཆོ་ངེས་འདེབས་ཀྱང་དེ་ལ་གྲོགས་སུ་གྱུར་པ་སུ་ཡང་མེད་དེ་དེ་ལ་སྐྱོབ་པ་མེད། དཔུང་གཉེན་མེད་དོ། །རང་གི་ལས་ཀྱིས་སེམས་བསླུས་པ་དེ་སྐྲས་མུན་པ་ལྟར་ཁེབས་ཤིང་ལུས་ཀྱི་ཡན་ལག་དང་ཉིང་ལག་ཐམས་ཅད་རྒྱུས་པའི་དྲ་བས་སྦྲེལ་བ་ལག་པ་གཉིས་སོ་སོར་ཕྲལ་ཏེ་བརྒྱངས་པ་དང་། ཀུ་ཆོ་འདོན་པ་ཀུན་ནས་མགོན་འདོད་ཅིང་དཔུང་གཉེན་འདོད་ཀྱང་དེའི་མགོན་དུ་འགྱུར་བ་སུ་ཡང་མེད་དེ། དེ་ལྟར་དེ་ཇི་སྲིད་དུ་སྡིག་པའི་ལས་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་འཚོ་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་ལས་དེ་དང་རྒྱུ་འཐུན་པར་གལ་ཏེ་མི་རྣམས་ཀྱི་ནང་དུ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་དེ་བཞིན་དུ་གླིང་གི་བར་ན་གནས་པའི་མིར་འགྱུར་ཏེ། གླིང་ཆུ་ཉུང་བ་དེར་རྐང་པ་གཅིག་པའམ་ལུས་ཐུང་བར་འགྱུར་བ་དེ་མཐོང་ངོ་། །དེ་ནས་ཡང་དགེ་སློང་
ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་འཇིག་རྟེན་ན་ཡི་དགས་གཤིན་རྗེའི་ཆད་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། མི་གང་ཕྲག་དོག་དང་སེར་སྣས་ཉམས་ཤིང་རྒྱལ་པོའི་མི་མནའ་བྱེད་པ་སེམས་དྲག་ཤུལ་ཅན་སྙིང་རྗེ་མེད་པ། ཆོས་ཀྱི་ཚུལ་བཏང་བ། འཇིག་རྟེན་ཐམས་ཅད་ཀྱིས་སྨད་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཀྱི་ཡུལ་ན་ཡི་དགས་གཤིན་རྗེའི་ཆད་པ་ཞེས་བྱ་བར་འགྱུར་ཏེ། གང་མིའི་འཇིག་རྟེན་ན་མི་ཉེས་པར་བྱས་པའི་ལས་ཀྱིས་གཤིན་རྗེའི་བསྒོ་བ་ཉན་པར་འགྱུར་རོ། །དེའི་ཉེས་པར་བྱས་པའི་ལས་ཀྱིས་གཤིན་རྗེའི་མི་ཉེ་བར་འདུག་སྟེ་ཤིན་ཏུ་དངངས་པར་བྱེད་ཅིང་ཆ་བྱད་བསྒྱུར་བ་འཆང་བ། ལུས་བསྒྱུར་བ། ལག་ཏུ་མཚོན་ཆ་ཐོགས་པ། ལུས་སྐྲས་མུན་པ་ལྟར་ཁེབས་པ། མཆུ་དང་ལྟོ་འཕྱང་བ། རྣ་བ་འཕྱང་བ། ཧ་ཧའི་སྒྲ་དང་མཚོན་ཆ་འདེབས་པ་རྣམས་ཀྱིས་མི་དེ་ལ་འཇིགས་པར་བྱེད་དོ། །དེ་དག་གིས་མི་དེ་མཐོང་ནས་ཕྱིས་ལག་པ་བཅིང་བས་བཅིངས་ཏེ་གཤིན་རྗེའི་འཇིག་རྟེན་གཤིན་རྗེའི་དྲུང་དུ་ཁྲིད་དོ། །འདི་ལྟར་དེ་ལྷ་དང་མིའི་འཇིག་རྟེན་ནས་ཡི་དགས་ཀྱི་ཡུལ་དུ་ཁྲིད་དེ་ལུས་ཀྱིས་ཉེས་པར་སྤྱད་པ་དང་། ངག་གིས་ཉེས་པར་སྤྱད་པ་དང་། ཡིད་ཀྱིས་ཉེས་པར་སྤྱད་པ་དང་ལྡན་པ་དེ་ལ་ལྷས་རྗེས་སུ་བསྟན་པར་གསོལ་ཞེས་སྨྲས་སོ། །དེ་ནས་གཤིན་རྗེའི་རྒྱལ་པོས་མི་དེ་ལ་འདི་ལྟར་རྗེས་སུ་བསྟན་པ། མཁས་པ་རང་གི་ལས་ཀྱིས་སུ། །མི་དག་ཏུ་ནི་ཁྱོད་སྐྱེས་ན། །རིན་ཆེན་གླིང་དུ་ཁྱོད་བསླུས་པ། །ཅི་ཡི་ཕྱིར་ན་ཆོས་མ་སྤྱད། །བདེ་བ་ལས་ལ་རག་ལས་མཐོང་། །ཡིད་ནི་དེ་བཞིན་བདེ་བ་ལས། །འཆི་དང་སྐྱེ་བ་རྣམས་སྤྱད་པ། །ཆོས་ནི་ཡིད་དང་རྗེས་སུ་འབྲེལ། །འདུ་བྱེད་ཐམས་ཅད་མི་རྟག་སྟེ། །ཆུ་ཡི་ཆུ་བུར་ལྟ་བུ་ཡིན། །འཇིག་རྟེན་འདི་དང་ཕ་རོལ་དུ། །དེ་ལྟར་ལེགས་པའི་ལས་སྤྱོད་དོ། །གང་ཞིག་རྟག་ཏུ་དགེ་བྱེད་པ། །ཀུན་ཏུ་མི་དགེ་ཡོང་མི་བྱེད། །དེ་ནི་ངར་ལྟ་ལམ་མི་འདོད། །མཐོ་རིས་སྐས་ལ་ཀུན་དུ་གནས། །བྱིས་པ་གང་དག་སེམས་མེད་པ། །
རྟག་ཏུ་ཉེས་པར་སྤྱོད་ལ་དགའ། །སྡིག་པ་ངེས་པར་རྣམ་སྤངས་པ། །འགྲོ་བ་བཟང་པོར་འགྲོ་བར་འགྱུར། །འཇིག་རྟེན་ལས་ཀྱི་འབྲས་བུ་མཐོང་། །ལྷ་ལ་རྣམ་པ་སྣ་ཚོགས་མཐོང་། །གང་ཞིག་བག་མེད་ཤིན་ཏུ་རྩུབ། །དེ་དག་ངེས་པར་འཕགས་མི་བྱེད། །གང་གི་དོན་དུ་ལུས་དང་ངག །ཡིད་ཀྱིས་མང་དུ་སྡིག་བྱས་པ། །དེ་དག་ཐམས་ཅད་གཞན་དུ་དོང་། །གནས་འདིར་ཁྱོད་ནི་གཅིག་པུ་འདུག །མི་ནི་རྙེད་དཀའ་ཐོབ་ནས་སུ། །གང་ཞིག་སྡིག་པ་མང་བྱེད་པ། །ཤིན་ཏུ་སླུ་བ་མི་བཟད་དེ། །ངན་འགྲོར་ངེས་པར་འགྲོ་བ་ཡིན། །གང་ཞིག་སྡིག་ལས་བྲལ་བ་ནི། །ཤིན་ཏུ་དགེ་ལ་དགའ་འགྱུར་ཏེ། །དེ་ནི་བདེ་ལས་བདེ་འཐོབ་ཅིང་། །མྱ་ངན་འདས་པར་རབ་ཏུ་འགྲོ། །གང་ཞིག་དགེ་ལ་ཉེར་སྟེན་པ། །མི་ནི་ཤིན་དུ་བཀྲ་ཤིས་འགྱུར། །གང་ཞིག་སྡིག་ལ་ཉེར་སྟེན་པ། །དེ་ནི་ཤིན་ཏུ་བཀྲ་མི་ཤིས། །ཐོག་མ་བར་དང་མཐར་ངན་པ། །དམ་པས་དེ་ནི་རྣམ་པར་སྨད། །སྡིག་པ་སྡིག་པར་འགྲོ་བ་མཐོང་། །སེམས་ཅན་དམྱལ་བ་ཉེ་བར་རྟོག །ལས་དགེ་དབང་པོ་ཐུལ་བ་ནི། །འཇིག་རྟེན་དག་ན་ཤིན་ཏུ་བཟང་། །ལུས་དང་བྲལ་ནས་བདེ་འགྲོ་སྟེ། །ལྷ་ཡི་འཇིག་རྟེན་སྐྱེ་བར་འགྱུར། །ཁྱོད་ནི་བཅིང་བ་དམ་པོས་བཅིངས། །གཤིན་རྗེའི་ཕོ་ཉས་དབང་དུ་བྱས། །གཤིན་རྗེའི་འཇིག་རྟེན་བསྟེན་དཀའ་བ། །དྲག་པོ་མི་བཟད་ཁྱོད་ཀྱིས་ཐོབ། །ཁྱོད་ཀྱིས་ངན་བྱས་གང་བྱས་པའི། །ལས་དེ་འདིར་ནི་སྤྱད་པར་གྱིས། །བྱིས་པ་རང་གིས་བྱས་ལ་སྤྱད། །གཞན་གྱིས་སྤྱོད་པ་ཉིད་མི་འགྱུར། །དེ་ལྟར་དེ་གཤིན་རྗེས་རྗེས་སུ་བསྟན་པ་ན་གཤིན་རྗེའི་ཆད་པ་དེ་དག་མངོན་སུམ་དུ་གྱུར་ཏོ། །དེ་ནས་དེ་བསྟན་ནས་གཤིན་རྗེའི་མིས་ཉེས་པར་བྱེད་པ་བྱས་པ་རང་གི་ལས་ཀྱི་འབྲས་བུས་བསླུས་པ་དེ་ཕྱིར་བྱུང་ནས་ལས་ཉེ་བར་འགྲོ་བ་ཇི་ལྟ་བ་བཞིན་དུ་ཁྲིད་དེ། ཇི་སྲིད་དུ་སྡིག་པའི་ལས་བྱས་ཤིང་བསགས་པ་དེ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཟས་རླུང་ལ་ཟ་བར་བྱེད་དོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པར་རི་ཉམ་ང་བ་དང་ཆུ་མི་བདེ་བའི་འགྲམ་དུ་གནས་ཏེ་
ལམ་དུ་འགྲོ་བ་སྐྱེད་པར་འགྱུར་བ་མཐོང་ངོ་། །དེ་ནས་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དགེ་སློང་དེས་ས་གཞན་བཅུ་བཞི་པ་ལ་ཇི་ལྟར་འཇུག་སྙམ་ནས། དེས་ཐོས་པ་ལས་བྱུང་བའི་ཤེས་པས་སམ་ལྷའི་མིག་གིས་གཟུགས་ཀྱི་སྐྱེ་མཆེད་བཅུ་མཐོང་སྟེ། འདི་ལྟ་སྟེ། མིག་གི་སྐྱེ་མཆེད་དང་། གཟུགས་ཀྱི་སྐྱེ་མཆེད་དང་། རྣ་བའི་སྐྱེ་མཆེད་དང་། སྒྲའི་སྐྱེ་མཆེད་དང་། སྣའི་སྐྱེ་མཆེད་དང་། དྲིའི་སྐྱེ་མཆེད་དང་། ལྕེའི་སྐྱེ་མཆེད་དང་། རོའི་སྐྱེ་མཆེད་དང་། ལུས་ཀྱི་སྐྱེ་མཆེད་དང་། རེག་བྱའི་སྐྱེ་མཆེད་དོ། །དེ་འདི་སྙམ་དུ་སེམས་ཏེ། མིག་དང་གཟུགས་ལ་བརྟེན་ནས་བདག་གི་འདུ་ཤེས་བྱུང་ངོ་སྙམ་སྟེ། དེས་བརྟགས་ན་མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་སྟེ། གསུམ་འདུས་པ་ལས་རེག་པ། རེག་པ་དང་ལྷན་ཅིག་སྐྱེས་པ་ཚོར་བ་དང་། འདུ་ཤེས་དང་། སེམས་པ་དང་། རྣམ་པར་ཤེས་པ་འབྱུང་སྟེ། རེག་པར་བྱེད་པས་རེག་པ། ཚོར་བར་བྱེད་པས་ཚོར་བ། ཤེས་པར་བྱེད་པས་འདུ་ཤེས་ཏེ། འདི་ལྟར་གཟུགས་འདི་ནི་རིང་ངོ་ཐུང་ངོ་། །སྡུག་གོ་མི་སྡུག་གོ །བསྟན་དུ་ཡོད་པའོ། །ཐོགས་པ་དང་བཅས་པའོ་སྙམ་པའོ། །སེམས་པར་བྱེད་པས་སེམས་པའོ། །ཡང་རྣམ་པར་ཤེས་པར་བྱེད་པས་རྣམ་པར་ཤེས་པ་སྟེ། ཆོས་དེ་དག་དམིགས་པ་གཅིག་ལ་འཇུག་ཅིང་འབྱུང་བར་འགྱུར་ཏེ། མཚན་ཉིད་གཞན་དང་གཞན། ངོ་བོ་ཉིད་གཞན་དང་གཞན་ཡིན་ནོ། །འདི་ལྟར་ས་ཆེན་པོའི་ཆོས་བཅུ་ནི་ཚོར་བ་དང་། འདུ་ཤེས་དང་། སེམས་པ་དང་། རེག་པ་དང་། ཡིད་ལ་བྱེད་པ་དང་། འདུན་པ་དང་། མོས་པ་དང་། དྲན་པ་དང་། ཏིང་ངེ་འཛིན་དང་། ཤེས་རབ་སྟེ། དེ་ལྟར་དམིགས་པ་གཅིག་ལ་མཚན་ཉིད་གཞན་དུ་འདོད་དོ། །རྣམ་པར་ཤེས་པ་ལ་སོགས་པ་ཆོས་བཅུ་གཅིག་པོ་དེ་དག་ཀྱང་ཇི་ལྟར་ཉི་མའི་འོད་ཟེར་གཅིག་ཏུ་འདུ་ཡང་འོན་ཀྱང་ངོ་བོ་ཉིད་གཞན་པ་དེ་བཞིན་དུ་རྣམ་པར་ཤེས་པའི་ངོ་བོ་ཉིད་གཞན་པ་ནས་སེམས་པའི་བར་དུ་གཞན་ནོ་སྙམ་སྟེ། དགེ་སློང་གཟུགས་ཀྱི་སྐྱེ་མཆེད་ཀྱི་དེ་ཁོ་ན་ཉིད་ཤེས་པ་དེས་མིག་གསོག་དང་། གསོབ་དང་། སྙིང་པོ་མེད་པ་དང་། ཡང་དག་པ་མ་ཡིན་པར་མཐོང་ངོ་། །ཕྱོགས་བཅུར་ལམ་གྱི་
དེ་ཉིད་ཤེས་ཤིང་ལོག་པར་ལྟ་བ་སྤངས་པ་ཡང་དག་པའི་ལྟ་བ་སྔོན་དུ་འདྲེན་པས་མིག་གི་རྣམ་པ་གཏི་མུག་གི་རྙོག་པར་གྱུར་པ་སྤོང་སྟེ། དེ་ཁོ་ན་ཉིད་མཐོང་བ་དེས་ཤའི་གོང་བུར་བྱས་པ་རྣག་ཉུང་ངུ་དང་མཆི་མ་མང་པོའི་གནས་ཡིན་ནོ་སྙམ་དུ་རིག་ནས་དེ་ལ་འདོད་ཆགས་སྐྱེ་བ་རབ་ཏུ་སྤོང་ངོ་། །མི་རྟག་པ་ཡིན་ནོ་སྙམ་ནས་མི་རྟག་པར་ལྟ་བར་བྱེད། ཤའི་གོང་བུ་དང་རུས་པའི་བུ་གའི་རྣམ་པ་ཡིན་ནོ་སྙམ་ནས་འདོད་ཆགས་དང་བྲལ་བར་བྱེད། རྒྱུས་པས་སྦྲེལ་པ་ཡིན་ནོ་སྙམ་ནས་མིག་གི་སྐྱེ་མཆེད་ཕན་ཚུན་རག་ལས་པ་འདི་ལ་རྟོག་སྟེ། འདི་ལ་སྙིང་པོ་མེད་ཅིང་བདག་མེད་པར་རིག་གོ །མདོར་ན་མིག་འདི་ནི་སྡུག་བསྔལ་ཡིན་ནོ་བར་ཤེས་ཤིང་མཐོང་ནས་མིག་གི་སྐྱེ་མཆེད་ཀྱི་འདོད་ཆགས་དང་བྲལ་ལོ། །དེ་མིག་གི་སྐྱེ་མཆེད་ཇི་ལྟ་བ་བཞིན་རྟོགས་ནས་གཟུགས་ལ་ཡང་རྣམ་པར་དཔྱོད་པར་བྱེད་དེ། གཟུགས་གང་སྡུག་པ་དང་མི་སྡུག་པ་དང་ལུང་དུ་མ་བསྟན་པ་འདི་ནི་ཀུན་ཏུ་རྟོག་པ་ཙམ་སྟེ། འདི་ལ་སྙིང་པོ་ཅི་ཡོད། གཙང་བ་ཅི་ཡོད། རྟག་པ་ཅི་ཡོད། མི་རྟག་པ་ཅི་ཡོད་ཅེས་ལྟ་བ་ན་རྣམ་པར་རྟོག་ཅིང་དཔྱོད་པར་བྱེད་དོ། །དཔྱོད་པ་ན་སོ་སོ་ཡང་དག་པར་རིག་པར་བྱེད་དེ་གཟུགས་འདི་ལ་ངོ་བོ་ཉིད་ཀྱིས་བདེ་བ་མེད་པ་དེས་གཟུགས་མཐོང་ཞིང་ཤེས་ལ་རྟོག་པ་འཐོབ་བོ། །གཟུགས་འདི་ལ་སྙིང་པོ་མེད་དེ་གཟུགས་སྡུག་པ་དང་མི་སྡུག་པ་འདི་ནི་ཀུན་ཏུ་བརྟགས་པ་ཙམ་མོ། །འདི་ལ་སྡུག་པ་དང་མི་སྡུག་པའི་ངོ་བོ་མེད་དེ། འཇིག་རྟེན་འདི་འབའ་ཞིག་སྡུག་པ་དང་མི་སྡུག་པར་འདོད་དོ། །གཟུགས་འདི་ནི་ངོ་བོ་ཉིད་ཀྱིས་རྟག་པའམ། བརྟན་པའམ། ཐེར་ཟུག་པའམ། བདེ་བའམ། སྙིང་པོའམ། བདག་དང་བཅས་པ་མ་ཡིན་ཏེ། འདོད་ཆགས་དང་། ཞེ་སྡང་དང་། གཏི་མུག་གིས་བསྒྲིབས་པ་ནི་གཟུགས་སྡུག་གོ་མི་སྡུག་གོ་སྙམ་དུ་སེམས་སོ་སྙམ་ནས་དེ་གཟུགས་ཀྱི་སྐྱེ་མཆེད་ཡང་དག་པར་བརྟགས་ཏེ། མིག་དང་གཟུགས་མཐོང་ནས་ཆགས་པར་མི་བྱེད། རྨོངས་པར་མི་བྱེད། སྙིང་པོ་ཡོད་པར་མི་སེམས་སོ། །མིག་དང་གཟུགས་ཀྱི་སྐྱེ་མཆེད་ལ་མངོན་པར་བརྟགས་ནས། མིག་གི་རྣམ་པར་ཤེས་པ་ལ་ཆགས་པར་མི་
བྱེད་ཅིང་འདོད་ཆགས་དང་བྲལ་བར་བྱེད་དོ། །མིག་གི་རྣམ་པར་ཤེས་པ་བདག་མ་ཡིན། མིག་གི་རྣམ་པར་ཤེས་པ་བདག་གི་མ་ཡིན་ཏེ་དེ་བཞིན་དུ་རེག་པ་དང་། ཚོར་བ་དང་། འདུ་ཤེས་དང་། སེམས་པ་བདག་མ་ཡིན། སེམས་པ་བདག་གི་མ་ཡིན་ནོ་བར་རིག་གོ ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་བྱིས་པ་ལ་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ནད་པ་རྣམས་ཀྱི་ལྷ་མཆོད་པའམ་གནོད་སྦྱིན་མཆོད་པའི་ཕྱིར་ལས་མི་བཟད་པ་དྲག་པོ་གང་གིས་གཞན་དག་བསླུས་ནས་ནོར་རྫས་ཕྲོགས་སམ་ལུག་བསད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཡང་སོས་སུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་ཡི་དགས་བྱིས་པ་ལ་ཟ་བའི་ནང་དུ་སྐྱེ་བར་འགྱུར་ལ། གང་སྲོག་གཅོད་པ་གཞན་ཞིག་གལ་ཏེ་མིའི་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མིའི་སྐྱེ་གནས་སུ་སྐྱེས་ན། དེ་སྲོག་གཅོད་པ་མང་དུ་བྱས་པ་ཇི་ལྟ་བ་བཞིན་དུ་ཡི་དགས་དེས་གསོད་པར་བྱེད་དེ། དེ་མངལ་ན་གནས་པ་ན་གསོད་པའམ། དེ་བཙས་པའི་ཁྱིམ་དུ་གསོད་པའམ། དེ་གོག་ཐལ་ཐུལ་ན་གསོད་པའམ། དེ་ཕུད་བུ་བཅས་པ་ན་གསོད་པའམ། དེ་ཡོངས་སུ་རྒྱུག་པ་ན་གསོད་པར་བྱེད་དེ། དེ་ལྟར་ཡི་དགས་དེས་རིམ་གྱིས་བུས་པ་དེ་གསོད་པར་བྱེད་དོ། །དེ་གང་གི་ཚེ་ཉེས་པར་བྱས་པའི་ལས་དེས་ཡི་དགས་དེ་གླགས་ཚོལ་ཏེ། གླགས་རྙེད་ནས་བུས་པ་དེ་ལ་ཟ་བར་བྱེད་དོ། །འདིར་ཚིགས་སུ་བཅད་པ། ཁ་ཅིག་མངལ་ཏེ་དེ་བཞིན་དུ། །གཞན་ནི་བཙས་པའི་ཁྱིམ་དང་གཞན། །དེ་བཞིན་གོག་ནི་ཐལ་ཐུལ་དང་། །ཡོངས་སུ་རྒྱུག་ན་འཆི་བར་འགྱུར། །དེ་ལྟར་སྐོམ་པ་དང་བཀྲེས་པས་གདུངས་པའི་ལུས་དེ་རང་གིས་ཉེས་པར་བྱས་པའི་ལས་མྱོང་བར་འགྱུར་ཏེ། འདི་ལྟར་བྱིས་པའི་སྲོག་འཚོ་བར་གྱུར་པ་ན་ཉེས་པར་བྱས་པ་ལས་ཉེས་པར་བྱས་པ་ཉེ་བར་སྒྲུབ་ཅིང་དེ་ལྟར་བྱིས་པ་ལ་ཟ་བའི་
ཡི་དགས་དེ་ཉེས་པར་བྱས་པ་ལས་ཤིན་ཏུ་ཉེས་པར་བྱས་པའི་ལས་གཞན་རྒྱུན་མི་འཆད་པ་ན་ཡི་དགས་ཀྱི་འཇིག་རྟེན་དེ་མྱོང་བར་འགྱུར་ཏེ། དེ་ལྟར་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡི་དགས་ཀྱི་འཇིག་རྟེན་དེར་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པར་དེའི་བུས་པ་རིམ་གྲོ་བྱས་ཀྱང་འཚོ་བར་མི་འགྱུར་རོ། །འདིར་ཚིགས་སུ་བཅད་པ། ཉེས་པར་བྱས་པའི་ལས་འབྲེལ་བས། །ཉེས་པར་བྱས་པའི་འབྲས་བུར་བརྗོད། །དེ་བཞིན་ལེགས་བྱས་འབྲས་བུ་ནི། །རྣམ་པར་སྨིན་པ་བདེ་བར་མཐོང་། །ལས་ཀྱི་ཐག་པ་རིང་པོ་ཡིས། །བྱིས་པ་དམ་དུ་བཅིངས་པའི་རྣམས། །མྱ་ངན་འདས་པའི་གྲོང་མཆོག་ཏུ། །འགྲོ་བར་མི་འགྱུར་ཐར་བར་དཀའ། །ཡེ་ཤེས་མཚོན་གྱིས་དེ་བཅད་ནས། །གང་དུ་དེ་ནི་མི་འཇུག་ཅིང་། །ངེས་པར་འཁོར་བའི་རིམས་ནད་བྲལ། །དམ་པ་མྱ་ངན་འདས་པར་འགྲོ། །ཇི་ལྟར་ཉ་དག་རྒྱས་བཅུས་ན། །བདེ་བར་ཡོངས་སུ་དབྱུང་དུ་རུང་། །དེ་ལྟར་སེམས་ཅན་སྲེད་བཅིངས་པ། །འཆི་བདག་གིས་ནི་ཉེ་བར་འདྲེན། །དུག་དང་བཅས་པའི་མདས་ཕོག་པའི། །རི་དགས་གང་དང་གར་འགྲོ་བ། །དེ་དང་དེར་ནི་དུག་འགྲོ་སྟེ། །དེ་བཞིན་མིའི་དུག་སྲེད་པ་ཡིན། །འགྲོ་བ་འགྲོ་བར་རྗེས་འབྲང་བ། །སྲེད་པ་དུག་འདྲ་སྤོང་བར་གྱིས། །ཤིང་སྐམ་མེ་ཡིས་སྲེག་པ་ལྟར། །བྱིས་པ་རྣམས་ལ་དེ་ཡིས་སྲེག །རེ་ཞིག་དགའ་སྟེ་ཤེས་པར་དཀའ། །རྣམ་པར་སྨིན་པ་མེ་དང་འདྲ། །གལ་ཏེ་བདེ་བ་ཉིད་འདོད་ན། །སྲེད་པ་དེ་ལས་ཐར་བར་གྱིས། །ཇི་ལྟར་མཆིལ་པས་ཟིན་པ་ཡི། །ཉ་ནི་འཆི་བའི་དབང་དུ་འགྲོ། །དེ་ལྟར་སྲེད་པས་ཟིན་པ་ཡི། །མི་རྣམས་ཡི་དགས་དབང་དུ་འགྲོ། །ཡི་དགས་ཡུལ་དུ་ཡི་དགས་གང་། །སྡུག་བསྔལ་བ་དག་ཡོངས་སུ་རྒྱུག །དམྱལ་བར་སེམས་ཅན་དམྱལ་བ་རྣམས། །དེ་དག་སྲེད་པ་ཆེན་པོས་བསྐྱོད། །མི་གང་ཉོན་མོངས་ནོར་བྲལ་ཞིང་། །གཞན་གྱི་དྲིན་གྱིས་འཚོ་བ་ཡི། །ཕལ་པ་དེ་ནི་སྲེད་པ་ཡིས། །བསྐྱོད་ཅེས་ཐུབ་པ་རབ་
ཏུ་གསུང་། །དེ་ལྟར་དགེ་སློང་དེས་སེར་སྣ་དུག་ལྟ་བུ་ཀུན་གྱིས་བསྐྱོད་པ་དེ་དཔྱད་ནས་ཡང་འཁོར་བ་ལས་ཡིད་འབྱུང་བར་བྱེད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་མདངས་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། དགྲ་མཛའ་བོ་ལྟར་བཅོས་པ་ངོ་གཉིས་པ་གང་གིས་འདི་ལྟར་ཁྱོད་གཡུལ་འགྱེད་པར་ཞུགས་ཤིག་དང་། ཁྱོད་ཀྱི་ཕྱི་བཞིན་བདག་གིས་ཡང་དག་པར་བསྲུང་བར་བྱའོ་ཞེས་ཡོངས་སུ་བསླུས་ནས་དེ་གཟི་བྱིན་དང་མཐུ་ཉིད་སྐྱེས་སོ། །སྐྱེས་ནས་གཡུལ་འགྱེད་པར་ཞུགས་པ་དང་། ཡོངས་སུ་གཏོང་བར་བྱེད་ཅིང་འདི་ལྟར་དེ་འདིར་བཟུང་ན་དེའི་ནོར་གང་ཡིན་པ་དེ་དག་རྒྱལ་པོའི་འཁོར་དུ་གསོལ་ཏེ་བདག་གིར་བྱའོ་སྙམ་ནས་མི་བསླུས་པ་དེ་དེས་བསད་ན་སླུ་སླུ་བ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་མདངས་ཟ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་ལུས་བཀྲེས་པ་དང་སྐོམ་པས་ཤིན་ཏུ་གདུངས་ཤིང་ལུས་མཚོན་གྱིས་རྟག་ཏུ་གཤེག་ལ་ལུས་ཀྱི་པགས་པ་དང་། ཤ་དང་རུས་པ་རྣམ་པར་ཉམས་པ་མཚོན་ཆ་འབབ་པ་རྣམས་ཀྱི་ཕྱོགས་སུ་འགྲོ་བ་ན་གར་བབ་བབ་ཏུ་འབྲོས་སོ། །དེ་རྣམ་པ་གཞན་དུ་འབྲོས་པ་ན་མི་མི་གཙང་བ་གང་གཞན་ནམ་མཆོད་རྟེན་སྐོར་བར་མི་བྱེད་པ་དེའི་གླགས་ཡི་དགས་དེས་རྙེད་ནས་དེའི་གཟི་བརྗིད་འཕྲོག་པར་བྱེད་དོ། །དེས་གལ་ཏེ་ལོ་བཅུའམ་གལ་ཏེ་ལོ་ཉི་ཤུར་དེ་འཚོ་བར་བྱེད་དེ། དེ་ལྟར་ཤིན་ཏུ་སྡུག་བསྔལ་བར་འགྱུར་ཏེ། ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་ངེས་པར་མྱོང་བར་འགྱུར་བ་ལས་ཀྱི་ཉེར་བསྡོགས་དང་། ལས་ཀྱི་དངོས་གཞི་དང་། ལས་ཀྱི་མཇུག་དང་ཡང་དག་པར་ལྡན་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་རང་གི་ལས་ཀྱི་འབྲས་བུ་ལ་སྤྱོད་པ་རང་གིས་བྱས་པ་ལ་ཟ་བ་རང་གི་ལས་ཀྱིས་སྐྱེ་བའི་རྒྱུན་ཤིན་ཏུ་འཁོར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ།
ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་ལྷ་རྟེན་གྱི་སར་འཚོ་བ་དང་། རྟོག་གེ་པ་དང་། ཚེགས་ཆེན་པོས་འཚོ་བ་དང་། གཞན་ལ་རག་ལས་པས་འཚོ་བར་འགྱུར་བ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉི་ཤུ་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་ཚངས་པའི་སྲིན་པོ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། མཆོད་སྦྱིན་ངན་པར་བྱེད་པ་གང་གིས་སྲོག་གཅོད་པ་དང་། ཡང་དག་པར་ལྡན་པ་ཤིན་ཏུ་གསོད་པར་དགའ་བའི་མཆོད་སྦྱིན་བྱས་པ་དང་། ཟས་དང་སྐོམ་སོ་སོར་ཁེ་སྤོགས་བྱེད་པ་དང་། རིན་ཆུང་ངུས་ཉོས་ལ་རིན་ཆེན་པོར་འཚོང་བ་དང་། ཕྲག་དོག་དང་སེར་སྣས་ཉམས་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཀྱི་འཇིག་རྟེན་ན་ལུས་བཀྲེས་པ་དང་སྐོམ་པས་གདུངས་པ་ཚངས་པའི་སྲིན་པོར་འགྱུར་རོ། །དེ་ལྟར་དེ་མིའི་གཟུགས་ཀྱིས་ཡོངས་སུ་རྒྱུག་ཅིང་སེམས་ཅན་རྣམས་ལ་ཉེ་བར་འཚེ་བར་བྱེད་དེ། དེ་སུམ་མདོའམ། བཞི་མདོ་དབེན་པར་འདུག་གོ །འདུག་ནས་ཀྱང་གླགས་ལྟ་བ་དེ་མི་རྣམས་ལ་ཉེ་བར་འཚེ་བར་བྱེད་དོ། །ཕལ་ཆེར་བྲམ་ཟེ་འདྲ་བར་འགྱུར་ལ་དེ་ནས་མི་སྣང་བར་འགྱུར་ཞིང་ཡང་མི་རྣམས་ལ་ཉེ་བར་འཚེ་བར་བྱེད་དེ། ཡི་དགས་ལ་སེམས་པ་དག་ན་རེ། འདི་ལྟར་དེ་ནི་གདོན་གྱིས་ཟིན་ཏོ་ཞེས་འཇིག་རྟེན་པ་དེ་དག་བརྗོད་དོ། །དེ་ལྟར་དེ་སྡིག་པ་དང་འབྲེལ་ཅིང་སྡིག་བྱེད་ལ་ལུས་བཀྲེས་པ་དང་སྐོམ་པས་གདུངས་པ་ཡིན་ཏེ། དེ་ལྟར་ཚངས་པའི་སྲིན་པོ་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་ཕྲག་དོག་དང་སེར་སྣ་དང་ཡང་དག་པར་ལྡན་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡི་དགས་ཀྱི་ཡུལ་དེ་ན་གནས་པར་བྱེད་དོ། །དེ་ཕྱིས་ཡི་དགས་ཀྱི་
འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མིར་སྐྱེས་ན་ལས་དེ་དང་རྒྱུ་འཐུན་པར་དེ་མི་ལ་ཟ་བའམ། དེ་མཁའ་འགྲོ་མ་མིའི་ཁྲག་འཐུང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་མེའི་ཁུང་བུར་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཕྲག་དོག་དང་སེར་སྣས་ཉམས་པ་དགེ་བའི་བཤེས་གཉེན་ལྟ་བུར་བཅོས་ནས་དགེ་འདུན་གྱི་ཟས་སྐོམ་ཟོས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་བར་འགྱུར་རོ། །དེ་ནས་ཤི་ནས་ཡི་དགས་མེའི་ཁུང་བུར་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལུས་ཚལ་ཤིང་བསྲེགས་པ་འདྲ་ཞིང་ལུས་བཀྲེས་པ་དང་སྐོམ་པས་གདུངས་ལ་རང་གི་ལས་ཀྱིས་ཡོངས་སུ་བསླུས་པ་གཅིག་པུ་ཐམས་ཅད་དུ་རྒྱུག་པ་ན་དེའི་སྲོག་གི་འཚོ་བ་འདི་ལྟར་འགྱུར་ཏེ། གང་གི་ཚེ་མེའི་ནང་དུ་གཞན་འགའ་ཞིག་ལྷུང་ན་ཕྱེད་ཚིག་པར་འགྱུར་ཏེ། དེ་མེ་དང་འདྲ་ཞིང་མེའི་ཆར་ལྟ་བུ་ལ་ཟའོ། །དེ་མེའི་ཁུང་བུ་དེ་དང་འདྲ་སྟེ་བཀྲེས་པ་དང་སྐོམ་པས་གདུངས་པ་དེ་ཡང་མེ་དེས་ཉིས་འགྱུར་དུ་སྲེག་གོ །དེ་སྲེག་པ་ན་གང་མི་དགེ་བའི་ལས་དེ་བྱས་ཤིང་བསགས་པ་ངེས་པར་མྱོང་བར་འགྱུར་བ་དེའི་ལས་ཀྱི་མཐུས་ངུ་སྐད་འབྱིན་ཅིང་ཀུ་ཆོ་འདོན་ཏོ། །དེ་དེར་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་མྱོང་ཞིང་ཉེ་བར་སྤྱོད་པར་འགྱུར་རོ། །དེ་ལས་ཟད་དེ་དེ་ལས་ཐར་ནས་གལ་ཏེ་མི་རྣམས་དང་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མིར་སྐྱེས་ན། ལས་དེ་དང་རྒྱུ་འཐུན་པར་དེ་དབུལ་ཞིང་ནད་བུ་ཅན་དུ་འགྱུར་ལ་མེས་བསྲེག་པའི་ཁུང་བུར་སྲེག་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་
ན། དེས་ཐོས་པ་ལས་བྱུང་བའི་ཤེས་པས་གང་གིས་སེར་སྣ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པའི་ལས་ཀྱི་དངོས་གཞི་དང་ལས་ཀྱི་མཇུག་ཡང་དག་པར་བླངས་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཀྱི་འཇིག་རྟེན་སྲང་མི་གཙང་བ་རྣམས་སུ་སྐྱེ་བར་འགྱུར་བ་མཐོང་སྟེ། ཡི་དགས་དེ་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། དགེ་འདུན་གྱི་རིམ་གྲོ་བྱེད་པ་ཕྲག་དོག་དང་སེར་སྣས་ཉམས་པ་གང་གིས་བཟའ་བ་དང་བཅའ་བ་ལ་སོགས་པ་ཞིམ་པོ་དག་ལ་ཡང་དག་པར་སྤྱོད་པར་བྱེད་ཅིང་ཚངས་པར་སྤྱོད་པ་དང་ལྡན་པ་གཙང་མ་རྣམས་ལ་ཁ་ཟས་ངན་པ་སྦྱིན་པར་བྱེད་ན། དེ་སྲང་མི་གཙང་བར་ཡི་དགས་གནས་པ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཉིན་པར་ལུས་བལྟར་མི་མཐོང་ཞིང་། མཚན་མོ་མཐོང་བ་ཉིད་དུ་འགྱུར་རོ། །དེ་དག་གང་གྲོང་ངམ། གྲོང་ཁྱེར་རམ། རི་བྲགས་སམ། འཚོ་སྐྱོང་གི་གནས་སམ། བྱ་རོག་གི་གནས་སམ། གཤེར་ས་ན་གནས་པ་ཀུན་གྱིས་བཤང་བ་དང་། གཅི་བའི་ས་དང་། གཅིག་ཏུ་ཉལ་ཉིལ་དང་། ལྗན་ལྗིན་གྱི་ས་དང་། ཕྱི་ས་བསགས་པར་གྱུར་པའམ། ཀུན་ནས་སྲིན་བུས་ཁེབས་ཤིང་དྲི་ང་བ་ཤིན་ཏུ་འཇིགས་པ། སྐྱེ་བོ་ཀུན་མཐོང་མ་ཐག་ཏུ་སྐྱུག་བྲོ་བར་འགྱུར་བ། སྲིན་བུ་ཡུན་རིང་དུ་གནས་པ། མྱགས་པ་དེར་དགེ་འདུན་གྱི་ཁ་ཟས་ཞིམ་པོ་ཟ་བར་བྱེད་པ་ཡི་དགས་སུ་སྐྱེ་བར་འགྱུར་རོ། །ཤིན་ཏུ་སྡུག་བསྔལ་བ་དག་དེར་སྐྱེས་ནས་ཀྱང་གང་ལས་ཀྱིས་བྱས་པའི་གཤིན་རྗེའི་མི་རྣམས་ཀྱིས་རལ་གྲི་རབ་ཏུ་འབར་བ་ཐོགས་པ་དེ་དག་ལས་མི་གཙང་བ་དེ་དུས་ཐམས་ཅད་དུ་བཟའ་བར་མི་འཐོབ་བོ། །གལ་ཏེ་ཟླ་བ་ཕྱེད་ན་འཐོབ་ཅིང་གལ་ཏེ་ཟླ་བ་གཅིག་ན་ཐོབ་པ་གང་ཡིན་པ་དེ་ཡང་ཚིམ་པར་མི་འཐོབ་ཅིང་ཟོས་ནས་ཀྱང་སྐྱུག་པར་འགྱུར་ཏེ། ལུས་བཀྲེས་པ་དང་སྐོམ་པས་གདུངས་པ་དེ་དག་འདི་ལྟར་ངུ་སྐད་འབྱིན་ཅིང་ཆོ་ངེས་འདེབས་ཕན་ཚུན་རྒྱུག་ཅིང་སྨྲེ་སྔགས་འདོན་ཏེ། ས་བོན་མི་གཙང་གྱུར་པ་ལས། །ཤིན་ཏུ་མི་བཟད་ཡོངས་སུ་འགྱུར། །
སྡིག་པའི་ལས་ཀྱི་འབྲས་བུ་ནི། །རྒྱུ་དང་འདྲ་བར་མཐོང་བ་ཡིན། །སྡིག་པས་དྲངས་པའི་སྐྱེ་བོ་ནི། །མཆིལ་པས་ལོག་པར་དྲངས་པ་བཞིན། །མཆིལ་ལས་ཉ་ནི་ཐར་སྲིད་ཀྱི། །སྡིག་ལས་སྡིག་པ་མི་འཐར་རོ། །སྡིག་པའི་ཐག་པ་མི་བཟད་པས། །གློ་བུར་དུ་ནི་འདྲེན་པ་ན། །ཡི་དགས་གནས་སུ་འདྲེན་བྱེད་དེ། །བཀྲེས་དང་སྐོམ་པ་ཆེན་པོས་བསྒྲིབས། །བཀྲེས་དང་སྐོམ་ལས་བྱུང་བའི་མེས། །མི་བཟད་གདུངས་པར་འགྱུར་བ་ལྟར། །མེ་དང་མཚོན་དང་དུག་རྣམས་ཀྱིས། །དེ་ལྟར་མི་བཟད་གདུང་མི་འགྱུར། །གང་དུ་བདེ་བ་ཆུང་གྱུར་པ། །སྐད་ཅིག་མེད་ཅིང་ཐང་ཅིག་མེད། །ཡུད་ཙམ་མེད་ཅིང་མཚན་མོ་མེད། །རྟག་ཏུ་བདག་ནི་སྡུག་བསྔལ་བསྒྲིབས། །སྡུག་བསྔལ་གྱི་ནི་རྒྱུ་བསྟེན་པས། །སྡུག་བསྔལ་ལས་ནི་སྡུག་བསྔལ་ཐོབ། །སྡུག་བསྔལ་ལས་ནི་རྣམ་གྲོལ་ཏེ། །བདག་ལ་བདེ་བ་འབྱུང་བར་འགྱུར། །གང་དུ་བདག་ནི་རྒྱུག་པ་དེར། །འབབ་ཆུའི་དངོ་དང་ཆུ་མི་མངོན། །ལྟེང་ཀ་རྣམས་ཀྱང་སྐམས་གྱུར་ཅིང་། །ཆུ་བོ་དག་ཀྱང་མེད་པར་གྱུར། །བདག་ནི་རྟག་ཏུ་ཆུ་འདོད་ནས། །ས་ལ་ཡོངས་སུ་རྒྱུག་པ་ན། །བྲག་དང་ནགས་ཚལ་སྟུག་པོར་བཅས། །ཆུ་བོ་དེ་དག་སྐམས་པར་གྱུར། །བདག་གི་ལུས་ནི་བསྲེགས་པ་སྟེ། །བཀྲེས་དང་སྐོམ་པའི་མེ་ཡིས་གདུངས། །ལྷག་པར་སྐྱབས་སུ་འགྲོ་མེད་དེ། །ཉོན་མོངས་ཤིན་ཏུ་མི་བཟད་འོངས། །དེ་ལྟར་རང་གི་ལས་ཀྱི་འབྲས་བུས་བསླུས་པའི་ཡི་དགས་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ངུ་སྐད་འབྱིན་ཅིང་སྨྲེ་སྔགས་འདོན་ཏོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མིར་སྐྱེས་ན་ལས་དེ་དང་རྒྱུ་འཐུན་པར་གལ་ཏེ་བུད་མེད་དམ་བུད་མེད་སྨད་འཚོང་མར་འགྱུར་རོ། །གལ་ཏེ་སྐྱེས་པར་གྱུར་ན་དེ་གྲོང་ཁྱེར་གྱི་ལྗན་ལྗིན་འཕྱག་པའམ། དེ་བུད་མེད་ཀྱི་ཆ་བྱད་དུ་ཞུགས་ནས་དེས་ཉེ་བར་འཚོ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་
དགས་ཀྱི་གནས་ན་ཡི་དགས་གཞན་གང་ཞིག་སྐྱེ་བར་འགྱུར་སྙམ་ནས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་རླུང་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྟོ་བོ་ཆེ་ལྟོ་འབའ་ཞིག་སེམས་པ་གང་གིས་དགེ་སྦྱོང་དང་བྲམ་ཟེ་དང་ཉོན་མོངས་པ་དང་སྡུག་བསྔལ་བ་དག་ལ་ཉི་མ་འགའ་ཙམ་གྱི་ཟས་སྦྱིན་པར་ཁས་བླངས་ཏེ། དམ་བཅས་ནས་བརྫུན་བྱས་ལ་དེ་དག་ཀྱང་དེའི་ཉིན་པར་བཀྲེས་པ་དང་སྐོམ་པས་ཤིན་ཏུ་གདུངས་པར་གྱུར་ནས་རླུང་བསིལ་བས་རེག་པར་གནས་ན། བརྫུན་ཟེར་ཟེར་བ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་རླུང་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་ནས་དེ་ཡོངས་སུ་རྒྱུག་པ་ན་དེའི་ཁ་ཟས་མེད་ཅིང་རེ་བ་མེད་ལ་གནས་མེད་དེ། མགོན་མེད་པར་རང་གི་སེམས་ཀྱིས་ཡོངས་སུ་བསླུས་པ་དེའི་མིག་གི་ཡུལ་དུ་གང་ཡང་སོས་ལ་སོགས་པའི་རྫས་བཟའ་བ་དང་། བཏུང་བ་དང་། གནས་ཁང་དང་། ཀུན་དགའ་ར་བ་ཉམས་དགའ་བ་མང་པོ་དག་རྒྱང་རིང་པོ་ནས་མཐོང་སྟེ་བཟའ་བ་དང་བཏུང་བའི་དོན་དུ་དེར་རྒྱུག་གོ །དེ་དེར་རྒྱུག་པ་ན་ངལ་དུབ་པས་བཀྲེས་པ་དང་སྐོམ་པ་ཉིས་འགྱུར་དུ་འགྱུར་ཏེ། དེ་ཁ་གདང་བར་བྱེད་དོ། །དེའི་ཁ་གདངས་པར་རླུང་འཇུག་སྟེ། དེ་རླུང་དེ་འབའ་ཞིག་ཁའི་ནང་དུ་སོང་བས་བཀྲེས་པ་གང་སེལ་བར་བྱེད་ཅིང་གང་གིས་ལུས་མི་གཙང་བ་དེ་འཛིན་པར་བྱེད་དོ། །དེའི་བཟའ་བ་དང་བཏུང་བ་དེ་དག་ཀྱང་རི་དགས་སྐོམ་པས་ཕྱིན་ཅི་ལོག་ཏུ་མཐོང་བ་ལྟར་གསོབ་དང་། གསོག་དང་། སྙིང་པོ་མེད་པ་དང་། མགལ་མེའི་འཁོར་ལོ་དང་འདྲ་བར་སྣང་བ་ཁོ་ན་ཙམ་དུ་ཟད་དོ། །ཇི་ལྟར་དེས་སྦྱིན་པ་སྙིང་པོ་མེད་པ་གསོག་བྱིན་པ་དེ་བཞིན་དུ་གསོག་རྗེས་སུ་མཐོང་ངོ་། །འདིར་ཚིགས་སུ་བཅད་པ། རྒྱུ་དང་འཐུན་པར་འབྲས་བུ་ཞེས། །བློ་གྲོས་ལྡན་པ་དེ་སྐད་གསུང་། །རྒྱུ་དང་མི་འཐུན་འབྲས་བུ་ནི། །ལུས་ཅན་རྣམས་ལ་སྨིན་མི་འགྱུར། །སྐྱེ་བ་ལུག་རྒྱུད་མང་པོ་
ཡི། །རྒྱུ་དང་རྐྱེན་གྱིས་ཤིན་ཏུ་འབྲེལ། །འཁོར་བར་གང་གིས་སྦྲེལ་བ་ཡི། །ལུས་ཅན་འགྲོ་བར་མི་འགྱུར་རོ། །ཤིན་ཏུ་སྦྲེལ་བ་དམ་པོ་དང་། །མཆོག་ཏུ་མི་བཟད་དེ་བཀྲོལ་ནས། །གང་ན་སྡུག་བསྔལ་མི་གནས་པ། །ཞི་བ་མཆོག་ཏུ་འགྲོ་བར་འགྱུར། །དེ་ལྟར་རྒྱུ་དང་འཐུན་པའི་འབྲས་བུ་ལ་ཉེ་བར་སྤྱོད་ཅིང་རྒྱུག་པ་ན། སེམས་བསླུས་པ་དེ་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་སོ་སོ་ཡང་དག་པར་མྱོང་བར་འགྱུར་བའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་རླུང་འབའ་ཞིག་ཟ་བའི་ལུས་བདག་ཉིད་འཛིན་པར་བྱེད་དོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་མི་ཡིས་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མིར་སྐྱེས་ན་ལས་དེ་དང་རྒྱུ་འཐུན་པར་དེ་རྟག་ཏུ་དབུལ་པོར་འགྱུར། གང་དེ་ལ་ཤེས་བཞིན་དུ་ནོར་དང་བཟའ་བ་དང་བཏུང་བ་དང་སྟོན་མོ་དང་གནས་དང་ཆུ་དག་མེད་པར་འགྱུར་ཞིང་སྦྱིན་པར་མི་བྱེད་ལ་ཡིད་མི་གཅུགས་པར་འགྱུར། ཁ་ཟས་མེད་པར་བྱས་པའི་སེམས་ནི་རེ་བ་ལ་དགའ་ཞིང་རེ་བ་མེད་པ་ལ་ཡང་དགའ་སྟེ། མངོན་པར་ཉམས་པའི་ལུས་ཤིན་ཏུ་སྡུག་བསྔལ་བར་འཚོ་བར་མཐོང་ངོ་། །འདིར་ཚིགས་སུ་བཅད་པ། འདིར་ནི་སྡིག་པའི་བག་ཆགས་ཀྱིས། །ཐམས་ཅད་དུ་ནི་སྡུག་བསྔལ་བྱེད། །ལུས་ཅན་རྣམས་དང་མི་འཐུན་པ། །མི་གཙང་བ་ཡི་དྲི་བཞིན་ནོ། །ཡུན་རིང་ངན་འགྲོ་བཅོམ་པ་ཡི། །དགེ་བའི་བག་ཆགས་དགའ་བྱེད་དེ། །མེ་ཏོག་ཉམས་ཀྱང་ཏིལ་དག་ལ། །བག་ཆགས་སྣང་བ་ཇི་བཞིན་ནོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན། ཡི་དགས་མདག་མེ་ཟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཞལ་ཆེ་བར་བསྐོས་པ་ཕྲག་དོག་དང་སེར་སྣས་འཇུངས་པ་གང་གིས་གཟུང་བར་བྱ་བ་ཉེས་པ་མེད་པ་དག་བཟུང་ནས་བཅིངས་ཏེ། བཀྲེས་པ་དང་སྐོམ་པས་ཡོངས་
སུ་གནོད་པར་བྱས་ལ་དེ་ཡང་གཟུང་བའི་སྡུག་བསྔལ་གྱིས་ཉམ་ཐག་པར་བྱས་ཤིང་། ཤིན་ཏུ་གནོད་པར་བྱས་པ་རེ་བ་མེད་ལ་བཀྲེས་པ་དང་སྐོམ་པས་གདུངས་ནས་ཐལ་བ་ཟ་ལ། དེའི་ལས་ཀྱི་རྣམ་པར་སྨིན་པས་གཞི་དེ་ལས་ཤི་བར་གྱུར་ན། ཞལ་ཆེ་བར་བསྐོས་པའི་མི་སྡིག་པའི་ལས་དེའི་མཐུས་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་མདག་མེ་ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །ལས་མི་བཟད་པ་ད་ལྟར་བདེ་ལ་རྣམ་པར་སྨིན་པ་སྡུག་བསྔལ་མི་འདོད་པ་མི་སྡུག་པ་ཡིད་དུ་མི་འོང་བ་དུག་ནག་པོ་ལྟ་བུ་དང་འདྲེས་པའི་མཐུས་དེ་རྟག་ཏུ་དུར་ཁྲོད་ཀྱི་མདག་མེ་ལ་ཟ་ཡང་མདག་མེ་དེས་ཚིམ་པར་མི་འགྱུར་རོ། །དེ་མདག་མེའི་ཟས་དེས་ལུས་ཀྱི་མེ་ཤིན་ཏུ་ཚ་བ་ཆུང་ཟད་ཞི་བར་བྱེད་དེ། མེ་ལ་ཆུས་བསད་པ་བཞིན་ནོ། །དེ་ལྟ་བས་ན་དུག་ནག་པོ་ལྟ་བུ་དང་ཤིན་ཏུ་རྩེ་རྩེ་བས་ཆོག་སྟེ། ནག་པོ་དང་འདྲེས་པ་སྤངས་ན་འདོད་ཆགས་དང་བྲལ་བར་འགྱུར་རོ། །གང་དུ་བྱིས་པ་ནག་པོའི་དབང་དུ་སོང་བ་དག་ནི་མེའི་སྡུག་བསྔལ་བསིལ་བར་གྱུར་ཀྱང་སྡུག་བསྔལ་ནི་མེ་གཞན་གྱིས་དཔེ་བྱ་བར་ནུས་པ་གང་ཡང་མེད་དོ། །དེ་ལྟར་དེ་ཇི་སྲིད་དུ་དེའི་སྡིག་པའི་ལས་སོ་སོ་ཡང་དག་པར་མྱོང་བར་འགྱུར་བ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡི་དགས་ཀྱི་ཡུལ་དེ་ན་གནས་སོ། །དེ་ཕྱིས་ཡི་དགས་ཀྱི་ཡུལ་དེ་ལས་ཐར་བར་འགྱུར་ཏེ། ཐར་ནས་ཀྱང་མི་དང་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མིར་སྐྱེས་ན། ལས་དེ་དང་རྒྱུ་འཐུན་པར་དེ་རི་འོར་གང་དུ་ལོ་ཉེས་བྱུང་ཞིང་གསོག་ཟ་བ་རྣམས་ཀྱི་ནང་དུ་སྐྱེ་བར་འགྱུར་ལ། རེས་འགའ་ཡང་ཁ་ཟས་ཞིམ་པོར་མི་འགྱུར་ཞིང་རྟག་ཏུ་ཁ་ཟས་ལན་ཚྭ་མེད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པ་དེས་ཡི་དགས་ཀྱི་ཡུལ་ན་ཡི་དགས་དུག་ཟ་བ་ཞེས་བྱ་བ་རང་བཞིན་གྱིས་དུག་ཟ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སེར་སྣས་ཉམས་པ་གང་གིས་ནོར་རྫས་ཀྱི་ཕྱིར་ཕ་རོལ་དག་ལ་དུག་
བླུད་ལ་དེ་ཡང་ཤི་ན་དུག་ལྡུད་ལྡུད་པ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་ཡང་སོས་སུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་ཡི་དགས་དུག་ཟ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་རི་འབིགས་བྱེད་ཀྱི་རི་སུལ་དང་། རི་ཡོངས་འདུའི་རི་སུལ་དང་། རི་ཁ་བ་ཅན་གྱི་རྩེ་མོ་དང་། རི་མ་ལ་ཡའི་གསེབ་གང་ཡིན་པ་དེ་དག་དང་། རིའི་རྩེ་མོ་དུག་མང་ཞིང་ཆུ་མེད་པ་དང་། སྦྲུལ་གནས་པའི་དགོན་པ་དང་། གྲང་ལྷགས་ཆེ་བའི་དགོན་པ་དོག་ཅིང་ཤིན་ཏུ་འཇིགས་པ་དང་། ཤིང་ལྗོན་པ་ཡལ་ག་འཕྱང་བ་མེད་པ་དང་། རྡོ་ངན་པ་འབའ་ཞིག་ཡོད་པ་དང་། སེང་གེ་དང་། སྟག་གིས་གསོད་པ་ཤིན་ཏུ་འཇིགས་པ་གང་ཡིན་པ་དེ་དག་ཏུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གྲང་བའི་དུས་སུ་གྲང་བ་བརྒྱ་འགྱུར་མྱོང་བར་འགྱུར་ལ། ཚ་བའི་དུས་སུ་ཚ་བ་བརྒྱ་འགྱུར་མྱོང་བར་འགྱུར་རོ། །ལས་བྱས་པ་ཚ་བའི་དུས་སུ་ཞག་ལྔར་མེའི་ཆར་པ་ལུས་རྣམས་ལ་འབབ་ཅིང་གྲང་བའི་དུས་སུ་ཞག་ལྔར་ལྷགས་པ་ཆར་པ་ལྟ་བུ་འབབ་བོ། །ཉེས་པར་བྱས་པའི་ལས་དེས་མེ་མདག་དེ་དག་དང་མི་དགའ་བ་དགོན་པ་ལྟ་བུ་དེ་དག་གི་ནང་ན་ལུས་བཀྲེས་པ་དང་སྐོམ་པས་གདུངས་པ་དག་ཀུ་ཆོ་འདོན་ངུ་སྐད་འབྱིན། ཆོ་ངེས་འདེབས་སྨྲེ་སྔགས་འདོན་ཏེ། ལུས་བཀྲེས་པ་དང་སྐོམ་པས་གདུངས་པ་དག་ལ་དུག་གི་རེག་པ་ལྕགས་ཀྱི་ཐུ་ལུམ་རབ་ཏུ་འབར་བ་ལྟ་བུ་གང་ཡིན་པ་དེ་དག་མིད་པར་བྱེད་དོ། །མིད་མ་ཐག་ཏུ་ཤིའོ། །དེ་ནས་ཡང་ཉེས་པར་བྱས་པའི་ལས་དེས་སྐྱེ་བར་འགྱུར་ཏེ། སྐྱེས་ནས་ཀྱང་བཀྲེས་པ་དང་སྐོམ་པ་དེ་སྡུག་བསྔལ་ཉིས་འགྱུར་བས་ལྷག་པར་མྱོང་བར་འགྱུར་རོ། །དེ་ལྟར་དེ་ངུ་སྐད་འབྱིན་པ་ན། བྱའི་མཆུ་རྣོན་པོས་ཀྱང་དེའི་མིག་ཕྱུང་ནས་ཟ་བར་བྱེད་དེ། དེ་ཕྱིར་ཞིང་སྡུག་བསྔལ་གྱིས་ཉམ་ཐག་ནས་ངུ་སྐད་འབྱིན། ཀུ་ཆོ་འདོན། ཆོ་ངེས་འདེབས་སོ། །མིག་ཕྱུང་བ་དེ་དག་སྐྱེ་བར་འགྱུར་ལ་དེ་ནས་ཡང་འབྱིན་པར་བྱེད་དེ། དེ་ལྟར་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་སོ་སོ་ཡང་དག་པར་མྱོང་བར་འགྱུར་བ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་སྡུག་བསྔལ་མྱོང་བར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་
འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མིར་སྐྱེས་ན། ལས་དེ་དང་རྒྱུ་འཐུན་པར་དེ་ལམ་པོ་ཆེ་དང་བཞི་མདོར་འཚོ་བར་འགྱུར། དུག་ལྡུད་ལྡུད་པའི་ལས་ཀྱི་ལྷག་མ་དེས་ཡང་དེའི་སྲོག་ཆད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་དགོན་པ་ན་འདུག་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཆོམ་རྐུན་པ་གང་གིས་འབྲོག་དགོན་པ་ཆེན་པོ་དང་། ཆུ་མེད་པ་དང་། ཤིན་ཏུ་དོག་པ་དང་། ཉི་མའི་འོད་ཀྱིས་ཀུན་ཏུ་ཚ་བ་དག་ཏུ་ལྟེང་ཀ་དང་ནགས་ཚལ་དག་གི་ལམ་བྱས་ནས་ཆོམ་རྐུན་པ་དེ་དག་གིས་ལྟེང་ཀ་དེ་དག་འཛེག་པར་བྱེད་དེ། འདི་ལྟར་བདག་ཅག་གིས་འདིར་འགྲོན་པོ་འོངས་ཏེ་སྐོམ་གྱིས་གདུངས་ཤིང་མཐུ་ཆུང་བ་དག་ནོར་རྫས་ཀྱི་ཕྱིར་གསད་པར་བྱའོ་སྙམ་ནས་དེ་དག་ཕྲག་དོག་དང་སེར་སྣས་ཉམས་ཤིང་སྦྱིན་པ་དང་བྲལ་བ་དག་གིས་དེ་ལྟར་འགྲོན་པོ་དེ་དག་གསོད་པར་བྱེད་དོ། །དེ་དག་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་དགོན་པ་ན་འདུག་པ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་མར་མེའི་ཤིང་ལྟར་འབྲོག་རབ་ཏུ་འབར་བ་རྣམས་ཀྱི་ནང་ཉིད་དུ་ཉི་མའི་གདུང་བས་གདུངས་ཏེ་མགོན་འདོད་པ། སྐྱབས་འདོད་པ། དཔུང་གཉེན་འདོད་པ་དག་ཆུ་དང་བཟའ་བའི་ཕྱིར་རྒྱུག་ཅིང་ཀུ་ཆོ་འདོན་ཏོ། །དེ་དག་ལས་ཀྱི་ཉེས་པ་དེས་རྒྱང་རིང་པོ་ན་རི་དགས་སྐོམ་པ་ལྟ་བུར་ཆུ་དང་བ་འདྲ་བ་ཞིག་ཡོད་པར་མཐོང་ངོ་། །དེ་དག་གིས་དེ་མཐོང་སྟེ་ཆུ་རྙེད་དོ་སྙམ་ནས་རྒྱུག་སྟེ། རེ་བ་དང་བཅས་པའི་སེམས་ཀྱིས་ངལ་བ་གྲངས་སུ་ཡང་མི་རྩི་བ་ན་དེ་ཇི་ལྟ་ཇི་ལྟར་རྒྱུག་པ་དེ་ལྟ་དེ་ལྟར་རི་དགས་སྐོམ་པ་ལྟ་བུར་ངོ་བོ་ཉིད་ཀྱིས་གསོག་ཏུ་འདུག་པ་དེ་དག་ག་ལ་ཞིག་ཐོབ་པར་འགྱུར། དེ་དག་ངལ་བའི་ཉེས་པས་རྩ་དར་བྷའི་རྩེ་མོས་རྐང་པའི་རྟིང་པ་དག་ཏུ་ཟུག་ནས་འགྱེལ་ཞིང་ན་ནས་ཁ་ཅིག་འཆི་བའི་དུས་བྱེད་དོ། །དེ་ནས་ཡང་ལས་ཀྱི་ལྷག་མ་
དེས་ཡང་འཚོ་བར་འགྱུར་ཏེ། དེ་ལྟར་ལུས་བཀྲེས་པ་དང་སྐོམ་པ་བཅུ་འགྱུར་གྱིས་གནས་པར་བྱེད་དོ། །བྱ་རོག་དང་། འུག་པ་དང་། བྱ་རྒོད་བརྒྱ་སྙེད་ཀྱིས་ལུས་དང་མིག་དག་ཅན་ཅོན་དུ་འཐོག་ཅིང་ཟ་སྟེ། རུས་པ་ལ་ཐུག་གི་བར་དུ་འབིགས་པར་བྱེད་དོ། །མགོན་མེད་པ་དཔུང་གཉེན་མེད་པ་དེ་དག་སྡུག་བསྔལ་སུམ་འགྱུར་གྱིས་ཤིན་ཏུ་སྡུག་བསྔལ་ཏེ། ཕན་ཚུན་དེར་སོང་ནས་འདི་ལྟར་སྨྲེ་སྔགས་འདོན་ཏེ། བྱ་རོག་འུག་པ་ཐམས་ཅད་ནས། །རྡོ་རྗེ་ཆེན་པོའི་མཆུ་རྣོན་གྱིས། །མངོན་པར་གཙེས་སོ་སྐྱབས་མེད་ཅིང་། །བདེ་བར་ལྟ་བར་མི་མཐོང་ངོ་། །ཇི་ལྟར་བདག་གིས་འགྲོན་པོ་བཅོམ། །དེ་ཡི་ལས་དེ་ཉེ་བར་གནས། །འདི་ནི་གཟུགས་བརྙན་ལྟ་བུ་སྟེ། །དེ་བཞིན་འབྲས་བུ་འདིར་འོངས་སོ། །ལས་ཀྱི་ཞགས་པས་བཅིངས་གྱུར་ཅིང་། །ལས་ཀྱི་ཐག་པས་གནོད་པར་བྱས། །ལས་ཟད་མ་གྱུར་བར་དུ་ནི། །དཔུང་གཉེན་བྱེད་པ་མི་མཐོང་ངོ་། །སྐྱེ་བོ་ལས་ཀྱིས་ཁྲིད་བྱེད་ཅིང་། །ལས་ཀྱིས་ཡོངས་སུ་འདྲེན་པར་བྱེད། །གང་དུ་ལས་ནི་རྣམ་སྨིན་པ། །དེར་ནི་ལས་ཀྱིས་འཕེན་པར་བྱེད། །གནས་གསུམ་དུ་ནི་ལས་ཀྱིས་འཕངས། །འཁོར་ལོ་བཞིན་དུ་རྟག་ཏུ་འཁྱམ། །དེ་ལྟ་བས་ན་དགེ་བྱ་ཞིང་། །སྡིག་པ་མི་ཕན་རྟག་ཏུ་སྤོངས། །སྡིག་པ་གང་དག་མི་འདོད་ཅིང་། །དེ་དག་མེ་དང་འདྲ་བར་མཐོང་། །བཀྲེས་དང་སྐོམ་པའི་མེས་གདུངས་པ། །དེ་ནི་ཡི་དགས་གནས་སུ་ཁྲིད། །སྐོམ་པའི་སྡུག་བསྔལ་འབྱུང་བ་ནི། །ཡང་དང་ཡང་དུ་རབ་ཏུ་འཕེལ། །བདག་ནི་མེ་ཡི་ཕྲེང་བ་ཡིས། །མཆེད་པའི་རི་དང་འདྲ་བར་འགྱུར། །རི་ལ་མེ་འབར་ཆུ་བོ་ཡི། །རྒྱུན་གྱིས་ཐམས་ཅད་གསད་ནུས་ཀྱི། །རྒྱ་མཚོའི་ཀླུང་གིས་བདག་གི་མེ། །འདི་ནི་གསད་པར་མི་ནུས་སོ། །ལས་ཀྱི་ཤིང་སྐམ་བྱུང་ནས་སུ། །སྲེད་པའི་རླུང་གིས་གྲོགས་བྱས་ཏེ། །བདག་ནི་ཀུན་ནས་ཡོངས་བསྐོར་ནས། །ལས་ཀྱི་མེ་ཡིས་ཤིན་ཏུ་བསྲེགས། །ཚུལ་ཁྲིམས་བརྩོན་འགྲུས་ཡེ་ཤེས་ཆུ། །སྦྱིན་པའི་སྣོད་ནི་རབ་བཟུང་ནས། །སྲིད་གསུམ་རྗེས་འགྲོ་ལས་ཀྱི་མེ། །བདག་ཉིད་ཆེན་པོས་འཇིག་པར་བྱེད། །གང་དག་ལས་ཀྱི་དབང་སོང་ཞིང་། །ལས་གསུམ་གྱིས་ནི་ཡོངས་སུ་བསྒྱུར། །གསུམ་ཉིད་ཀྱིས་ནི་རྨོངས་པ་དག །དེ་ནི་གནས་གསུམ་རྒྱུ་བར་བྱེད། །ལས་དབང་སུམ་ཅུ་རྩ་དྲུག་དང་། །བཞི་བཅུར་སོང་ཞིང་རྣམ་པར་རྒྱུ། །
དགུ་བཅུ་རྩ་བརྒྱད་མ་བཅོམ་པ། །ཁམས་གསུམ་དུ་ནི་དེ་འགྲོ་འོ། །གང་དག་བརྒྱ་རྩ་བརྒྱད་ཤེས་ཤིང་། །བཅུ་གཉིས་དོན་ལ་སེམས་པ་པོ། །ཆོས་དང་ཆོས་མིན་རྣམ་ཤེས་གང་། །དེ་དག་བདེ་བ་མཐའ་ཡས་སོ། །མཚན་ཉིད་གཉིས་ཀྱི་རྣམ་ཤེས་ཤིང་། །བརྒྱད་གཉིས་ཡོངས་སུ་ཤེས་པ་པོ། །བཅུ་དྲུག་སྐྱེ་བ་རིག་པ་གང་། །སྐྱེ་བོ་དེ་ནི་སྡིག་པས་བསྲེགས། །བརྟན་པོ་ལམ་གཉིས་ལྟ་བ་དང་། །གཞི་རྣམས་ཡོངས་སུ་མཐར་ཕྱིན་ཅིང་། །ཆུ་བོ་བཞི་ལས་རྣམ་གྲོལ་བ། །མཁས་པ་དེ་ནི་སྡིག་པ་བསྲེགས། །ལམ་བརྒྱད་དེ་ཉིད་འཇུག་རིག་ཅིང་། །སྟོབས་བཅུ་དག་ནི་མཐོང་བ་དང་། །སྡུག་བསྔལ་གཉིས་ཀྱི་རྒྱུ་རིག་པ། །ཟད་པ་མེད་པའི་གནས་སུ་འགྲོ། །གང་དག་བདེན་གཉིས་ཕ་རོལ་ཕྱིན། །དྲན་པ་བཞི་ལ་རྣམ་པར་དཔྱོད། །བརྟན་པོ་དུས་གསུམ་དོན་སེམས་པ། །དེ་ནི་བདུད་ཀྱི་དབང་མི་འགྲོ། །དཀར་པོའི་ཆོས་ནི་རྣམ་སྤངས་ཤིང་། །རང་གི་ལས་ཀྱི་འབྲས་བུས་རྨོངས། །དེ་ནི་བདག་གི་སྡིག་ལས་ཀྱིས། །ཡི་དགས་འཇིག་རྟེན་འདིར་ཕྱིན་ཏོ། །དེ་ལྟར་ཡི་དགས་དེ་དག་གི་ནང་ནས་ཁ་ཅིག་སྔོན་དགེ་བའི་ལས་ཆུང་ཟད་བྱས་པས་ཤེས་རབ་ཤིན་ཏུ་རྣོ་བར་འགྱུར་ཏེ། དེ་ལ་དམིགས་པར་གྱུར་པའི་ཡི་དགས་དེ་དག་ལ་དེ་སྐད་དུ་རྗེས་སུ་བསྟན་ཏོ། །རྗེས་སུ་བསྟན་ནས་ཀྱང་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་རང་གི་སྡུག་བསྔལ་སོ་སོར་མྱོང་བར་བྱེད་དོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན་ལས་དེ་དང་རྒྱུ་འཐུན་པར་དེ་ཡི་དགས་ཀྱི་བརྟུལ་ཞུགས་དང་ཡི་དགས་ཀྱི་རྗེས་སུ་འབྲང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་དུར་ཁྲོད་ན་
འདུག་པ་ཞེས་བྱ་བ་ཇི་ལྟར་གནས་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་སེར་སྣས་ཉམས་པ་གང་གིས་སངས་རྒྱས་ལ་གཞན་གྱིས་མེ་ཏོག་ཕུལ་བ་དག་དེས་བརྐུས་སོ། །བརྐུས་ནས་ཀྱང་ཁེ་འདོད་པའི་ཕྱིར་བཙོངས་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ལུས་བཀྲེས་པ་དང་སྐོམ་པས་གདུངས་པ་ཡི་དགས་དུར་ཁྲོད་ན་འདུག་པ་རྣམས་ཀྱི་ནང་དུ་སྐྱེ་བར་འགྱུར་རོ། །དུར་ཁྲོད་ན་འདུག་པ་དེ་དག་གི་ཁ་ཟས་ནི་འདི་ལྟ་སྟེ། དུར་ཁྲོད་ཀྱི་ཕྱག་དར་གང་ཡང་རུང་བ་དུ་བའི་རྒྱུན་མེད་པ་དེ་ལ་དེ་དག་ཟླ་བ་གཅིག་གི་བར་དུ་ཟ་ཞིང་འདུག་ལ། དེ་ནས་ཁ་ཟས་མེད་པར་འཁོད་དོ། །རྟག་ཏུ་དེའི་མགོ་ལྕགས་ཀྱི་ཕྲེང་བ་རབ་ཏུ་འབར་བས་བཅིངས་ཤིང་དེ་གང་ནས་གང་དུ་སྐྱེས་པའི་གླད་པ་རབ་ཏུ་འཇུ་བར་བྱེད་ལ་མགོའི་ཐོད་པ་ཡང་སྲེག་པར་བྱེད་དོ། །ལྕགས་ལས་བྱས་པའི་ཕྲེང་བ་གཉིས་པས་ཀྱང་དེའི་མིད་པ་བཅིངས་ཤིང་དེས་དེའི་མིད་པ་དང་བྲང་ཡང་སྲེག་སྟེ། གང་སངས་རྒྱས་ཀྱི་མེ་ཏོག་བརྐུས་པའི་རྒྱུ་དེས་ན་ཡན་ལག་དང་ཉིང་ལག་ཐམས་ཅད་ཀྱི་ནང་དུ་མེ་དེ་དག་སོང་ནས་སྲེག་པར་བྱེད་དོ། །ལུས་ཀྱང་སྲིན་བུས་ཡོག་ཅིང་སྡུག་བསྔལ་མི་བཟད་པས་ཉམ་ཐག་ལ་སྲིན་པོ་གཞན་ཞིག་དུར་ཁྲོད་དེར་འོངས་ནས་དེས་ཀྱང་དེ་དག་ཐོ་བ་དང་། རལ་གྲི་དང་། གཏུན་ཤིང་རྣམས་ཀྱིས་ཀུན་ནས་ཕྱེ་མར་རློག་གོ །དེ་ངུ་སྐད་འབྱིན་ཅིང་སྨྲེ་སྔགས་འདོན་པ་ན་སྡུག་བསྔལ་གསུམ་གྱིས་ཉམ་ཐག་སྟེ། བཀྲེས་པ་དང་། སྐོམ་པའི་སྡུག་བསྔལ་དང་། ལྕགས་ཀྱི་ཕྲེང་བའི་སྡུག་བསྔལ་དང་། གཞན་གྱིས་རལ་གྲི་དང་། ཐོ་བས་བརྡེགས་པའི་སྡུག་བསྔལ་ཏེ། དེ་ལྟར་དེ་དག་མྱོང་ཞིང་ཉེས་པར་བྱེད་པ་དེ་འབྲལ་བར་བྱེད་ལ་སྨྲེ་སྔགས་འདོན་པ་ན་འདི་ལྟར་ཚིགས་སུ་བཅད་དེ་སྨྲས་པ། བཀྲེས་དང་སྐོམ་པའི་སྡུག་བསྔལ་དང་། །གཉིས་པ་མེ་ཡི་སྡུག་བསྔལ་འབྱུང་། །གསུམ་པ་ཐོ་བ་རལ་གྲི་ཡི། །སྡུག་བསྔལ་དེ་ནི་བདག་གིས་མྱོང་། །རང་གི་སེམས་དང་
ལས་ཀྱིས་སུ། །འདིར་ནི་བསླུས་ཤིང་ཡོངས་སུ་རྨོངས། །ཡི་དགས་གནས་སུ་སྐྱེས་གྱུར་ཅིང་། །མཛའ་བཤེས་གཉེན་དང་བྲལ་བར་འགྱུར། །སྟོབས་དང་བྲལ་བའི་ལས་དག་གི །ཞགས་པ་ཡིས་ནི་ཁྲིད་པ་ན། །བཤེས་གཉེན་བུ་དང་ཆུང་མ་དང་། །རྩ་ལག་གིས་ཀྱང་སྐྱོབ་མི་བྱེད། །ཇི་ལྟར་ལས་བཞིན་སྐྱོབ་གཞན་མེད། །རྣམ་པ་གསུམ་ནི་བདག་གིས་མྱོང་། །སྦྱིན་དང་ཚུལ་ཁྲིམས་ཐོས་དང་གཞན། །རྣམ་པ་གསུམ་ནི་ཡོངས་སུ་བསྒྲགས། །གཏི་མུག་དྲ་བས་བསྒྲིབས་པ་འདིར། །བདག་གིས་ངན་བྱས་གང་མ་བྱས། །མི་བཟད་རྒྱུར་ནི་གྱུར་པ་ཡི། །ལས་རྣམས་ཀྱི་ནི་འབྲས་བུ་འོངས། །ཤིན་ཏུ་མི་བཟད་ཡི་དགས་ཡུལ། །སྡིག་ལས་གལ་ཏེ་བདག་གྲོལ་ན། །ཡང་དང་ཡང་དུ་སྡིག་པའི་ལས། །བདག་གིས་ནམས་ཀྱང་མི་བྱ་འོ། །དེ་ལྟར་ཡི་དགས་སྨྲེ་སྔགས་འདོན་པ་དེ་དག་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་སོ་སོ་ཡང་དག་པར་མྱོང་བར་འགྱུར་བ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེར་སྡུག་བསྔལ་ཆེན་པོ་དེས་གནོད་ཅིང་ཡིད་ལ་གཅགས་པར་འགྱུར་རོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་མི་རྣམས་དང་སོ་སོ་ཡང་དག་པར་མྱོང་བར་འགྱུར་བ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་གཏུམ་ཞིང་དུར་ཁྲོད་ཀྱི་གོས་ཀྱིས་འཚོ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་ཤིང་གི་ནང་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་དགེ་འདུན་གྱི་འཚོ་བའི་ཤིང་ལྗོན་པའམ། དེ་བཞིན་དུ་སྐྱེ་བོ་བཀྲེས་པ་དང་། སྐོམ་པ་དང་། ལུས་ངལ་བ་ཀུན་གྱི་
འཚོ་བའི་དོན་དུ་རྫིང་བུ་དང་། ཁྲོན་པ་བྱས་པ་དེ་དག་སེར་སྣས་ཉམས་པ་དེས་མ་རུངས་པར་བྱས་སམ། ཤིང་སྐམ་འདོད་པའི་ཕྱིར་འདི་ལྟར་འདི་དག་ནི་བདག་གི་ཤིང་བྱའོ་སྙམ་ནས་གཅོད་པར་བྱེད་ཅིང་དེ་དེ་བཞིན་དུ་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་ཤིང་གི་ནང་ན་འདུག་པར་འགྱུར་རོ། །དེར་སྐྱེས་ནས་ཀྱང་དེའི་ལས་ཀྱིས་ཤིང་གསེབ་ཏུ་སྐྱེས་པ་དེ་ཤིན་ཏུ་གྲང་བ་དང་ཚ་བས་གནོད་དེ། ཇི་ལྟར་སྲིན་བུ་ཤིང་སྐམ་གྱི་ནང་དུ་སྐྱེས་པ་ཐམས་ཅད་ནས་གནོད་པ་བཞིན་ནོ། །ཤིན་ཏུ་སྡུག་བསྔལ་བས་ཉམ་ཐག་པ་དེ་གལ་ཏེ་བརྒྱ་ལ་སྡུག་བསྔལ་དེ་རྩེ་ཞིལ་བར་བྱེད་ན་དེ་ཤིང་སྐམ་གྱི་གསེབ་ན་སྲིན་བུ་མར་ཀོ་ཏ་ཀ་དང་། ཨ་ཤོ་ཏ་ར་རྣམས་ཀྱིས་ཟ་ཞིང་དེའི་ཟས་སུ་འགྱུར་རོ། །གང་ཁ་ཅིག་གིས་བསམས་ནས་གཏོར་མ་གཏོར་ན་དེས་དེའི་སྲོག་འཚོ་བར་བྱེད་དེ། ཡི་དགས་ཀྱི་ཡུལ་དེ་ན་ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་སོ་སོ་ཡང་དག་པར་མྱོང་བར་འགྱུར་བ་བཅོམ་ཞིང་སྤངས་ལ་ཉམས་པར་མ་བྱས་པ་དེ་སྲིད་དུ་སྡུག་བསྔལ་རབ་ཏུ་མི་བཟད་པ་དེ་མྱོང་བར་འགྱུར་རོ། །དེ་ཕྱིས་ཡི་དགས་ཀྱི་ཡུལ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པར་དེ་ཚལ་དང་། རྩྭ་དང་། སྨན་དང་། ནགས་ཁྲོད་དང་། ཤིང་སྐམ་དང་། མེ་ཏོག་གིས་སྲོག་འཚོ་སྟེ། འཚོ་བ་གཞན་ལ་རག་ལས་ཤིང་ཤིན་ཏུ་སྡུག་བསྔལ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་ལམ་གྱི་བཞི་མདོ་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། རྐུན་པོ་གཞན་ལ་གནོད་པ་བྱ་བའི་བློ་དང་སེར་སྣས་ཉམས་པ་གང་གིས་ཟས་དང་སྐོམ་བརྣོགས་ཤིང་དེ་འགྲོན་པོ་དག་གི་
ཟས་དང་སྐོམ་མ་བྱིན་ནས་དགོད་ལ་དེ་དག་ཀྱང་གནས་དེར་ཤིན་ཏུ་སྡུག་བསྔལ་བར་གྱུར་ནས་རྐུན་པོ་དེ་ལས་ཀྱི་མཐུ་དེས་ཤི་ནས་ལམ་གྱི་བཞི་མདོ་ན་གནས་པའི་ཡི་དགས་སུ་འགྱུར་རོ། །ཕ་རོལ་གྱི་ཡིད་གཅུགས་པ་བཅོམ་པའི་ལས་དེའི་མཐུས་སོག་ལེ་དག་འབྱུང་བར་འགྱུར་ཏེ། དེ་དག་གིས་ཉིན་གཅིག་བཞིན་དུ་དེའི་ལུས་བཀྲེས་པ་དང་སྐོམ་པས་གདུངས་པ་དེ་རྣམ་པ་བཞིར་གཅོད་པར་བྱེད། གཤེག་པར་བྱེད། ཡན་ལག་རྣམས་གཏུབ་པར་བྱེད་དོ། །གང་གི་ཚེ་སྐྱེ་བོ་དག་འཇིག་པར་འགྱུར་བ་དེའི་ཚེ་བྱིས་པ་ཕལ་པ་བྱིས་པའི་རང་བཞིན་ཅན་ལས་དང་འབྲས་བུ་མངོན་པར་མི་ཤེས་ཤིང་འབྲས་བུ་དང་རྒྱུ་ངན་པ་ལ་ལྟ་བ་དེ་དག་དེའི་ཚེ་ལམ་གྱི་བཞི་མདོར་གཏོར་མ་འཐོར་བར་བྱེད་དེ་འདི་ལྟར་འདིས་ནད་པའི་ནད་རབ་ཏུ་ཞི་བར་འགྱུར་རོ་སྙམ་ནས་གཏོར་མ་དེ་ལམ་གྱི་བཞི་མདོ་དེ་དག་ཏུ་འཐོར་བར་བྱེད་དོ། །དེ་དེས་དགའ་བར་འགྱུར་ཏེ། དེས་སྲོག་འཚོ་བར་འགྱུར་ཞིང་དེས་གནས་པར་འགྱུར་ལ་དེས་སོ་སོར་སྟོན་པར་བྱེད་དེ། ཇི་སྲིད་དུ་དེའི་སྡིག་པའི་ལས་བྱས་ཤིང་བསགས་པ་སོ་སོ་ཡང་དག་པར་མྱོང་བར་འགྱུར་བ་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་ཡི་དགས་ཀྱི་ཡུལ་དེར་གནས་སོ། །དེ་ཕྱིས་ཡི་དགས་ཀྱི་འཇིག་རྟེན་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་དང་མི་རྣམས་དང་སྐལ་བ་མཉམ་པར་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མིར་སྐྱེས་ན་ལས་དེ་དང་རྒྱུ་འཐུན་པར་དེ་རིགས་ངན་པ་ཕྱུགས་གསོད་པ་བྱེད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་ཡི་དགས་ཀྱི་ཡུལ་ན་ཡི་དགས་བདུད་ཀྱི་རིས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་ལས་གང་གིས་དེར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ལས་ངན་པས་འཚོ་བ། གཡོས་གཞན་ལ་གནོད་པར་བྱེད་པ། རྒྱུ་ངན་པ་དང་
ལྟ་བ་ངན་པའི་མཐའ་ལ་དེ་ཉིད་ཡིན་ནོ་བར་མངོན་པར་ཞེན་པ་གང་གིས་ལམ་བཟང་པོ་སུན་པར་བྱས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཡི་དགས་བདུད་ཀྱི་རིས་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་རྟག་ཏུ་དགེ་སློང་བསམ་གཏན་གྱི་ཟས་ཀྱིས་གནས་པ་རྣམས་ཀྱི་སེམས་རྙོག་པ་ཅན་དུ་བྱེད། རྣམ་པར་འཚེ་བར་བྱེད། སྒྲ་བོ་ཆེ་འདོན་པར་བྱེད། དེ་རྨི་ལམ་དུ་བགེགས་དག་བྱེད་དེ་དམ་པའི་ཆོས་ལ་སྡང་བ་ནི་བདུད་ཀྱི་དབང་དུ་འགྲོ་བར་འགྱུར་རོ། །དེ་ལྟར་ཡང་དག་པ་མ་ཡིན་པའི་ལམ་དུ་ཞུགས་པ་དེ་ནི་ཚེ་འདི་ལ་མྱོང་བར་འགྱུར་བ་ཡི་དགས་ཀྱི་ཡུལ་དུ་སྐྱེ་བར་འགྱུར་ཏེ། ཁ་ཟས་ནི་ལྕགས་ཀྱི་ཐུ་ལུམ་ཟ་བར་འགྱུར་རོ། །དེ་དེ་དག་གིས་སྲེག་ཅིང་ཤིན་ཏུ་སྡུག་བསྔལ་བ་མྱོང་བ་ན། ཤིན་ཏུ་སྡུག་བསྔལ་བ་དེ་ལས་སྐྱོ་བར་མི་བྱེད་དེ། དེ་དེ་ནས་ཤི་ནས་སེམས་ཅན་དམྱལ་བའི་ནང་དུ་སྐྱེ་བར་འགྱུར་རོ། །དེ་ནས་བསྐལ་པ་མང་པོ་ཞིག་གིས་མི་ལུས་ཐོབ་པར་འགྱུར་ཏེ། གལ་ཏེ་བསྐལ་པ་ཁྲིའམ། གལ་ཏེ་བསྐལ་པ་ཉི་ཁྲིས་འཐོབ་ལ། དེ་ལྟར་ངེས་པར་ངན་སོང་གསུམ་རྣམས་སུ་འཚེད་དོ། །སྲེག་གོ །ཟའོ། །གལ་ཏེ་ཡང་དེ་ནས་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པར་དེ་ལོང་བ་དང་། འོན་པ་དང་། ལྐུགས་པ་དང་། དྲན་པ་ཉམས་པ་དང་། ནད་དུ་མས་ལུས་ཉམས་པ་དང་། ཤིན་ཏུ་དབུལ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཡི་དགས་ཀྱི་འཇིག་རྟེན་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་འདི་ལྟར་ཡི་དགས་ཀྱི་འཇིག་རྟེན་ལས་ཀྱི་འབྲས་བུ་རྣམ་པར་སྨིན་པའི་བྱེ་བྲག་གིས་ཡི་དགས་ཀྱི་འགྲོ་བ་རགས་པ་དེ་ཙམ་དག་ནི་མཐོང་ན་འཁོར་འབུམ་ཕྲག་དུ་མ་ནི་མ་མཐོང་སྟེ། གང་རྒྱ་མཚོའི་མཐའི་བར་རྣམས་དང་། གང་རྒྱ་མཚོའི་གླིང་རྣམས་དང་། གང་འཛམ་བུའི་གླིང་རྣམས་དང་། ནུབ་ཀྱི་བ་ལང་སྤྱོད་དང་།
ཤར་གྱི་ལུས་འཕགས་དང་། བྱང་གི་སྒྲ་མི་སྙན་ལ་སོགས་པའི་གླིང་ཆེན་པོ་རྣམས་ཀྱི་བར་ན་གནས་པ་དེ་དག་གི་མིང་གི་རྣམ་གྲངས་ཙམ་ཤེས་སོ། །སྲིན་པོ་དང་། ཤ་ཟ་དང་། གྲུལ་བུམ་དེ་དག་གི་ལས་ཀྱི་འབྲས་བུ་རྣམ་པར་སྨིན་པ་དག་ནི་ཤིན་ཏུ་ཕྲ་བར་ཤེས་པར་བྱ་སྟེ། གང་ལས་གང་གིས་དེར་སྐྱེས། ཁ་ཟས་ནི་ཅི་ཟ། སྤྱོད་པ་ནི་ཅི་ཡིན། རྒྱུ་ནི་ཅི་ཞིག་ཡིན་སྙམ་མོ། །དེ་དག་གི་གནས་ན་སེམས་ནི་སྤྲེའུ་ལྟར་སྡོམ་པ་མེད་པར་རྣམ་པར་གཡོ་ལ། བ་ལང་གི་རྣ་བ་འགུལ་ཞིང་ལྡོག་པ་ཆུ་ཤིང་ཚལ་དུ་ཞུགས་ན་རྣ་བ་ཤིན་ཏུ་འགུལ་བ་ལྟར་ནི་རབ་ཏུ་རྒྱུ། བུམ་པ་རྡོལ་བ་ལྟར་ཡུལ་ཐམས་ཅད་ལ་ནི་ཁྱབ། རླུང་ཆེན་པོས་རྡུལ་བསླང་བ་ལྟར་ཤིན་ཏུ་གཡོ་བར་ནི་བྱེད། སེང་གེ་དང་སྟག་དང་སྦྲུལ་གདུག་པ་དག་པས་ཀྱང་ཤིན་ཏུ་གདུལ་ནི་དཀའ། གང་གཡོས་པ་ནི་དེའི་ཕ་རོལ་ཏུ་འབྲས་བུ་དེ་དང་འཐུན་པར་ཐོབ་སྟེ། སེམས་ཅན་རྣམས་ཀྱི་སེམས་ཀུན་ནས་ཉོན་མོངས་པ་ལས་ནི་ཀུན་ནས་ཉོན་མོངས་ལ། སེམས་རྣམ་པར་བྱང་བ་ལས་ནི་རྣམ་པར་གྲོལ་བར་འགྱུར་ཏེ་ཤེས་པར་དཀའོ། །སེམས་ནི་རྒྱལ་པོ་འདྲ་ལ། དབང་པོ་རྣམས་ནི་ཞབས་འབྲིང་བ་ལྟ་བུ་ཡིན་ཏེ། དེ་ལ་རག་ལས་པ་ནི་ལས་ཡིན་ལ། ལས་ལ་རག་ལས་པ་ནི་འབྲས་བུ་ཡིན། འབྲས་བུ་ལ་རག་ལས་པ་ནི་འགྲོ་བ་ལྔ་དག་ཡིན་ནོ། །སེམས་འཁྲུལ་འཁོར་མཁན་འདྲ་ཞིང་ལུས་ནི་འཁྲུལ་འཁོར་འདྲ་ལ། དབང་པོ་རྣམས་དང་དབང་པོའི་དོན་ནི་སྐུད་པ་འདྲ་སྟེ། སེམས་མ་དུལ་བ་དེ་ནི་ངན་སོང་དུ་འགྲོ་ལ། ཤིན་ཏུ་དུལ་ཞིང་ལེགས་པར་ཡོངས་སུ་སྦྱང་བ་བྱས་པ་ནི་ལྷ་དང་མིའི་འགྲོ་བར་འགྲོ་བ་དང་། གཡོ་བ་མེད་པའི་གནས་མྱ་ངན་ལས་འདའ་བར་འགྲོའོ་སྙམ་སྟེ། དེ་ལྟར་དགེ་སློང་དེ་སེམས་ཀྱི་རྣམ་པ་ཤིན་ཏུ་ཕྲ་བ་ལ་རྣམ་པར་དཔྱོད་དོ། །རྣམ་པར་དཔྱད་ནས་འཁོར་བ་རྣམས་ལ་ཤིན་ཏུ་སྐྱོ་བ་སྐྱེས་ཏེ། སེམས་ཅན་དམྱལ་བ་འཁོར་དང་བཅས་པ་དག་ལ་སྐྱོ་ལ། དེ་ལྟར་ཡང་ཡི་དགས་ཀྱི་འཇིག་རྟེན་དག་ལ་ལྷག་པར་ཤིན་ཏུ་སྐྱོ་སྟེ། སྡུག་བསྔལ་འཕགས་པའི་བདེན་པ་
རྟོགས། སྡུག་བསྔལ་འཕགས་པའི་ལམ་རྟོགས་ཤིང་ལམ་བཟང་པོ་དང་ལམ་ལ་གནས་པ་རྟོགས་སོ། །ཡི་དགས་ཀྱི་ལེའུ་སྟེ་གཉིས་པ་རྫོགས་སོ།། །།དེ་ནས་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་འདི་ལྟར་དགེ་སློང་ལས་ཀྱི་འབྲས་བུའི་དེ་ཁོ་ན་ཉིད་མཐོང་བ་དེས་སེམས་ཅན་དམྱལ་བ་འཁོར་དང་བཅས་པ་རྣམས་ལ་བརྟགས་ཤིང་འགྲོ་བ་གཉིས་པ་ལ་ཡང་བརྟགས་ནས་འཁོར་བ་མི་བཟད་པ་ཡང་དག་པ་ཇི་ལྟ་བ་བཞིན་མཐོང་སྟེ་ཡིད་ལ་ཡང་འཇོག་པར་བྱེད་དོ། །འདི་ལྟར་དགེ་སློང་དེ་བདུད་ཀྱི་ཡུལ་ན་མི་གནས་ཤིང་། དེ་མྱ་ངན་ལས་འདས་པའི་མཐའ་ལ་གནས་ལ་དེའི་སྤྲོ་བ་མི་ལྡོག་སྟེ། འབྲས་བུར་གྱུར་པ་ས་གཞན་བཅོ་ལྔ་པ་ལ་ཞུགས་སོ། །དེ་ཞུགས་པ་དང་ས་བླའི་གནོད་སྦྱིན་དག་དགའ་ནས་བར་སྣང་ལ་རྒྱུ་བའི་གནོད་སྦྱིན་རྣམས་ལ་བསྙད་དོ། །དེ་དག་གིས་ཀྱང་རྒྱལ་ཆེན་བཞི་རྣམས་ལའོ། །དེ་དག་གིས་ཀྱང་སུམ་ཅུ་རྩ་གསུམ་པ་རྣམས་ལའོ། །སུམ་ཅུ་རྩ་གསུམ་པ་རྣམས་ཀྱིས་ཀྱང་འཐབ་བྲལ་བ་རྣམས་ལའོ། །འཐབ་བྲལ་བ་རྣམས་ཀྱིས་ཀྱང་དགའ་ལྡན་པ་རྣམས་ལའོ། །དགའ་ལྡན་པ་རྣམས་ཀྱིས་ཀྱང་འཕྲུལ་དགའ་བ་རྣམས་ལའོ། །འཕྲུལ་དགའ་བ་རྣམས་ཀྱིས་ཀྱང་གཞན་འཕྲུལ་དབང་བྱེད་པ་རྣམས་ལའོ། །དེ་ལྟར་འདོད་པའི་ཁམས་ཀྱི་སྒྲ་དག་གཟུགས་ཀྱི་ཁམས་སུ་ཡང་གྲག་པ་ནས་ཚངས་རིས་ལ་སོགས་པའི་བར་དག་དང་། འོད་གསལ་གྱི་བར་རྣམས་སུ་སྒྲ་གྲག་སྟེ། འདི་ལྟར་ཀྱེ་ལྷ་དག་འཛམ་བུའི་གླིང་དུ་རིགས་ཀྱི་བུ་ཆེ་གེ་མོ་ཞིག་དང་། གྲོང་མང་གེ་མོ་ཞིག་དང་། གྲོང་ཁྱེར་ག་གེ་མོ་ཞིག་དང་། གྲོང་རྡལ་ཆེ་གེ་མོ་ཞིག་དང་། ཡུལ་མང་གེ་མོ་ཞིག་ན་མིང་ག་གེ་མོ་ཞིག་ཅེས་བྱ་བ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་བདུད་ཀྱི་གཞི་དང་ལྷན་ཅིག་གནས་པར་མི་འདོད་ལ་དེའི་ཡུལ་གྱི་དངོས་པོ་ཡང་མི་འདོད། བདུད་ཀྱི་སྡེ་ནི་འཇོམས་པར་བྱེད། བདུད་ཀྱི་གཡོག་ནི་འཇིག་པར་བྱེད། ཉོན་མོངས་པའི་རི་ནི་ཤིན་ཏུ་གཡོ་བར་བྱེད། དམ་པའི་ཆོས་ཀྱི་ལམ་དུ་ནི་འཇུག་པར་བྱེད།
དེའི་འོད་ནི་རབ་ཏུ་འབྱུང་བར་འགྱུར་ཏེ། དེ་ལྟར་ས་གཞན་བཅོ་ལྔ་པ་ལ་ཞུགས་སོ། །དེ་ཐོས་ནས་འོད་གསལ་གྱི་ལྷ་རྣམས་དགའ་སྟེ། ལྷ་གཞན་དག་ལ་སྨྲས་པ། འདི་ལྟར་ཀྱེ་ལྷ་དག་བདག་ཅག་ནི་མཆོག་ཏུ་དགའ་སྟེ། གང་བདུད་ཀྱི་ཕྱོགས་ནི་དམའོ། །དམ་པའི་ཆོས་ཀྱི་ཕྱོགས་ནི་མངོན་པར་མཐོའོ། །བདུད་ཀྱི་འཁོར་ནི་ཡོངས་སུ་ཉམས་སོ། །དམ་པའི་ཆོས་ཀྱི་ཆུ་བོ་ནི་རབ་ཏུ་འབབ་བོ། །མུ་སྟེགས་ཀྱི་མཚོ་ནི་རྣམ་པར་སྐེམས་སོ། །འདོད་ཆགས་དང་ཞེ་སྡང་དང་གཏི་མུག་རྣམས་ནི་རབ་ཏུ་རྩེ་ཞིལ་ལོ། །ཆོས་མ་ཡིན་པའི་ཕྱོགས་ནི་ཞིག་གོ །དམ་པའི་ཆོས་ཀྱི་ཕྱོགས་ནི་རབ་ཏུ་འཕེལ་ལོ། །འཁོར་བ་ནི་འཇིག་སྟེ། ཀྱེ་དེ་དག་བདག་ཅག་གིས་ཐོས་ནས་མཆོག་ཏུ་དགའོ། །དེ་ལྟར་དམ་པའི་ཆོས་ཀྱི་སྒྲ་འོད་གསལ་གྱི་ལྷའི་རིས་ཀྱི་བར་དུ་གཅིག་ནས་གཅིག་ཏུ་གྲག་སྟེ། དགེ་སློང་དེ་བརྩོན་འགྲུས་ནི་བརྩམས་སེམས་ནི་དགེ་ཞིང་མི་གཡོ་ལ་བརྟན། གཡོ་མེད་ཅིང་དྲང་པོའི་རང་བཞིན་ཅན་ཡིན་ཏེ། དེ་ལྟར་དེའི་དགེ་བའི་སྒྲ་མྱ་ངན་ལས་འདས་པའི་གྲོང་ཁྱེར་གྱི་སྔོན་དུ་འདྲེན་པར་གྲག་གོ །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སེམས་ཅན་དམྱལ་བའི་ལས་ཀྱི་ཆོས་ཀྱི་རྣམ་པར་སྨིན་པ་ཡང་དག་པ་ཇི་ལྟ་བ་བཞིན་ཤེས་ཤིང་སེམས་ཅན་དམྱལ་བ་རྣམས་ཀྱི་འཁོར་བརྒྱ་སུམ་ཅུ་རྩ་དྲུག་གི་ཚེ་རིང་བ་དང་ཚེའི་ལྷག་པའི་ཚད་དང་བཅས་པ་དེ་ཡང་ཡང་དག་པ་ཇི་ལྟ་བ་བཞིན་ཤེས་ནས་འགྲོ་བ་གཉིས་པ་ལ་ཡང་རྟོག་པར་བྱེད་དེ། ཡི་དགས་རྣམ་པ་ཡོད་པ་ཡང་མདོར་བསྡུ་ན་རྣམ་པ་སུམ་ཅུ་རྩ་དྲུག་ཡོད་པ་ལ་རྟོག་པར་བྱེད་དོ། །རིམ་པར་འཁོད་པའི་དེ་དག་གི་དེ་ཁོ་ན་ཉིད་ལ་རྟོག་སྟེ། དེས་ཐོས་པ་ལས་བྱུང་བའི་ཤེས་པས་དུད་འགྲོའི་རྣམ་པ་བྱེ་བ་སུམ་ཅུ་རྩ་བཞི་མཐོང་ནས། འདི་ལྟར་འགྲོ་བ་ལྔ་དག་ནི་སེམས་ཀྱི་ཁ་ན་ལས་ཤིང་རག་ལུས་པ་ཡིན་ལ་ཕལ་ཆེར་ཀུན་ཀྱང་ཆ་བྱད་དང་གཟུགས་དང་འགྲོ་བ་དང་ཁ་ཟས་སྣ་ཚོགས་འཆང་བ། འཐུན་པ་དང་མི་འཐུན་པ་དང་། སྡང་བ་དང་མི་སྡང་བ་དང་། བཤེས་པ་དང་མི་བཤེས་པ་དང་། ལྷན་ཅིག་སྤྱོད་པ་དང་ལྷན་ཅིག་མི་སྤྱོད་པའི་རིགས་ཅན་དག་ཡིན་ནོ། །དེ་དག་
གི་ནང་ནས་འདབ་མ་ཡོད་པར་གྱུར་པ་ནི་འདི་ལྟ་སྟེ། རི་དགས་ཀྱི་ཚོགས་དང་བྱའི་ཚོགས་བྱ་རོག་དང་ངང་པ་ལ་སོགས་པ་ཡིན་ཏེ། འཐུན་པ་དང་མི་འཐུན་པར་གྱུར་པ་དག་ནི་འདི་ལྟར་ཝ་དང་། ཁྱི་ལྟ་བུ་སྟེ་དེ་ལ་སོགས་པའོ། །སྡང་བ་དང་མི་སྡང་བ་དག་ནི་འདི་ལྟ་སྟེ། བྱ་རོག་དང་། འུག་པ་དང་། རྟ་དང་། མ་ཧེ་དང་། སྦྲུལ་དང་ནེའུ་ལེ་ལ་སོགས་པ་ལྟ་བུ་དག་གོ །དེ་ལ་སྲོག་ཆགས་དག་ལས་གང་གིས་ཆ་བྱད་དང་། གཟུགས་དང་། འགྲོ་བ་དང་། ཁ་ཟས་སྣ་ཚོགས་སུ་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་སྲོག་ཆགས་དག་སེམས་སྣ་ཚོགས་དང་། སྲོག་ཆགས་དག་རག་ལས་པ་དང་། ལས་རྣམ་པ་སྣ་ཚོགས་བྱེད་དེ། དེ་དག་གི་འགྲོ་བ་རྣམ་པ་སྣ་ཚོགས་སུ་འགྱུར་ཞིང་ཁ་ཟས་རྣམ་པ་སྣ་ཚོགས་སུ་འགྱུར་རོ། །དེ་ལ་གང་འཐུན་པ་དང་མི་འཐུན་པའི་རྒྱུ་གང་ཡིན་སྙམ་ནས་དེ་དག་གི་ལས་ལ་རྣམ་པར་དཔྱོད་དེ་དེས་ཐོས་པ་ལས་བྱུང་བའི་ཤེས་པས་བརྟགས་ན། མིར་གྱུར་པ་གང་གིས་ལྟ་བ་ལོག་པའི་བསྟན་བཅོས་བརྗོད་ལ་མཁས་པ་ང་རྒྱལ་ཅན་གཉིས་པས་ཀྱང་བསྟན་བཅོས་ངན་པ་གཉིས་པ་བརྗོད་ན་དེ་གཉིས་ཀྱི་ཐོས་པ་དེ་དོན་མེད་པ་དང་། བདེ་བ་མ་ཡིན་པ་དང་། བདེ་འགྲོར་འགྲོ་བ་མ་ཡིན་ཏེ། བསྟན་བཅོས་ངན་པ་དང་རྒྱུ་ངན་པ་དང་ལྟ་བ་ངན་པའི་མཐའ་དེ་གཉིས་ཀྱིས་ཕན་ཚུན་དགའ་བར་བྱེད་ན་དེ་གཉིས་ཤི་ནས་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་དུད་འགྲོ་རྣམས་ཀྱི་ནང་དུ་སྐྱེས་ན་དེའི་ཚེ་འཐུན་པ་དང་མི་འཐུན་པའི་རྒྱུས་ཕན་ཚུན་རབ་ཏུ་སྡང་བར་འགྱུར་ཏེ་འདི་ལྟ་སྟེ། སྦྲུལ་དང་། ནེའུ་ལེ་དང་། རྟ་དང་། མ་ཧེ་དང་། བྱ་རོག་དང་། འུག་པ་དག་ལྟ་བུའོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་དུད་འགྲོའི་འཇིག་རྟེན་ལ་རྟོག་པར་བྱེད་དེ་རྒྱུ་གང་དང་ལས་གང་གིས་དུད་འགྲོ་དག་ལྷན་ཅིག་སྤྱོད་པའི་གྲོགས་སུ་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འཁོར་བ་ལ་མངོན་པར་ཆགས་པའི་སྦྱིན་བདག་གང་གིས་འདི་ལྟར་ལས་འདིས་ནི་བདག་དུད་འགྲོའི་སྐྱེ་གནས་གཞན་དག་ཏུ་སྐྱེས་ན་ཡང་ཁྱོད་བདག་གི་ཁྱིམ་ཐབ་
ཏུ་འགྱུར་ཞིང་བདག་ཀྱང་ཁྱོད་ཀྱི་ཆུང་མར་གྱུར་ཅིག་སྙམ་ནས་སྦྱིན་པ་བྱིན་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་དུད་འགྲོ་བདེ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། འདི་ལྟ་སྟེ་ཤང་ཤང་ཏེའུ་དང་། ཐི་བ་དང་། ངུར་པ་དེ་དག་ལས་ཡོངས་སུ་བྱས་པའི་རྒྱུས་འཁྲིག་པ་ལ་དགའ་བ་ཡིན་ནོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཝ་ལ་སོགས་པའི་མི་འཐུན་པ་ལ་རྟོག་པར་བྱེད་དེ་དེ་དག་ལས་གང་གིས་ཝ་དང་། ཁྱི་དག་ཏུ་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་མཁས་པ་དང་སྡོམ་པ་དང་ལྡན་པ་རྣམས་ཀྱི་ཁ་ཟས་ཞིམ་པོ་ཕྲོགས་ཤིང་དུས་རྟག་ཏུ་འདོད་པར་སེམས་ལ། བརྣབ་སེམས་ཀྱི་ཤས་ཆེ་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་ཏེ། ཝ་དག་དང་འཐབ་འདོད་ཅིང་ཕན་ཚུན་རབ་ཏུ་རྩོད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་རི་དགས་རྣམས་ལ་བརྟགས་ན། དེས་ཐོས་པ་ལས་བྱུང་བའི་ཤེས་པས་སྔོན་མིར་གྱུར་ལ་དུང་དང་རྔ་སྒྲ་དག་གིས་སྦུངས་བྱེད་པ་གང་གིས་གྲོང་དང་གྲོང་ཁྱེར་དང་ཚོང་རྡལ་པ་དག་བསྐྲད་ཅིང་སྒྲ་དེས་ཕ་རོལ་དག་ལ་འཇིགས་པ་བསྐྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་བར་འགྱུར་རོ། །དེ་ནས་ཐར་ནས་རི་དགས་རྣམས་ཀྱི་ནང་དུ་སྐྱེ་བར་འགྱུར་ཏེ། ལས་དེའི་མཐུས་སེམས་རྟག་ཏུ་སྐྲག་པར་འགྱུར་ཞིང་ཇི་ལྟར་གྲོང་དང་། གྲོང་ཁྱེར་དང་། ཚོང་རྡལ་པ་དག་བསྐྲད་ནས་དགོན་པར་བྱས་པ་དེ་བཞིན་དུ་དགོན་པར་གནས་པའམ། ནགས་ཚལ་གྱི་ནང་དུ་གནས་པར་འགྱུར་རོ། །དེ་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པར་དེ་རྟག་ཏུ་སེམས་སྐྲག་པར་འགྱུར། སེམས་ཤིན་ཏུ་ཞན་པ་དང་། སེམས་རྨོངས་པར་འགྱུར་རོ། །དེས་ཕྱོགས་ཙམ་དུ་དུད་འགྲོའི་འཇིག་རྟེན་ལ་རྟོག་པར་བྱེད་དེ། དྲ་བ་མང་པོའི་དུད་འགྲོར་འགྱུར་ལ། དེ་ལྟར་ལྷག་མ་ཡང་ལས་ཀྱི་མཐུས་ཕན་ཚུན་མི་འཐུན་
པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། དུད་འགྲོའི་འཇིག་རྟེན་ལ་རྟོག་པར་བྱེད་དེ། རྫུས་ཏེ་སྐྱེས་པ་དེ་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། མིར་གྱུར་པ་ཆགས་པ་གང་གིས་ཟབ་དར་བྱ་བའི་ཕྱིར། སྲིན་བུ་རྣམས་ཆུའི་ནང་དུ་སྐོལ་བར་བྱེད་དོ། །དེ་དག་བསྐོལ་བ་ན་རྫུས་ཏེ་སྐྱེ་བའི་སྲིན་བུ་གཙུག་ཅེས་བྱ་བ་གཞན་བྱེ་བ་ཚོགས་དུ་མ་དག་སྐྱེ་བར་འགྱུར་ཏེ། ཕྲ་མོ་དེ་དག་མཆོད་སྦྱིན་བྱེད་པས་མཆོད་སྦྱིན་བྱ་བའི་ཕྱིར་མེར་སྲེག་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ནས་ཐར་ནས་དུད་འགྲོར་རྫུས་ཏེ་སྐྱེ་བ་དར་གྱི་སྲིན་བུ་ལ་སོགས་པ་རྣམ་པ་དུ་མར་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། དུད་འགྲོའི་འཇིག་རྟེན་ལ་རྟོག་པར་བྱེད་དེ། དུད་འགྲོ་དྲོད་གཤེར་ལས་སྐྱེས་པ་དེ་དག་ལས་གང་གིས་སྐྱེས་པར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། མི་ངན་པ་ལྟ་བ་ལོག་པ་གང་གིས། ནོར་རྫས་འདོད་པའི་ཕྱིར་ཉ་དང་རུས་སྦལ་དང་སྲོག་ཆགས་དྷུན་དུ་གསོད་པ་དག་ས་བརྐོས་ནས་འཇུག་གམ། དེ་བཞིན་དུ་སྲམ་དང་བཅས་པ་གཞན་དག་ཀྱང་ས་བརྐོས་ནས་འཇུག་ཅིང་། དེར་སྲིན་བུ་དྲོད་གཤེར་ལས་སྐྱེས་པ་རྣམས་སྐྱེས་ལ་དེ་དག་མི་ངན་པ་དེས་མཆོད་སྦྱིན་གྱི་ཕྱིར་རམ། ནོར་རྫས་འདོད་པའི་ཕྱིར་གསོད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་སྲིན་བུ་དྲོད་གཤེར་ལས་སྐྱེ་བ་སྦྲང་བུ་དང་། ཤིག་ལ་སོགས་པའི་ནང་དུ་སྐྱེ་བར་འགྱུར་རོ། །སྐྱེ་གནས་གཉིས་པ་ལ་ཡང་དག་པ་གཞན་མ་ཡིན་པའི་ལམ་གྱིས་ལྟ་བ་དང་བློ་གྲོས་གཞན་མ་ཡིན་པ་ཁོང་དུ་ཆུད་པ་ཤིན་ཏུ་ཞིབ་མོས་སོ་སོར་རྟོག་པར་བྱེད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་
ཤེས་པ་དེས། དུད་འགྲོའི་འཇིག་རྟེན་ལ་རྟོག་པར་བྱེད་དེ། ལས་གང་གིས་དུད་འགྲོ་སྒོ་ང་ལས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་ལ་ལ་འཇིག་རྟེན་པའི་བསམ་གཏན་ཐོབ་པས་འདོད་ཆགས་དང་། ཞེ་སྡང་དང་། གཏི་མུག་རབ་ཏུ་ཞི་བ་ལས། གལ་ཏེ་རྐྱེན་ཞིག་གིས་ཞེ་སྡང་སྐྱེས་ལ་དེ་ཡིད་ཀྱི་ཉེས་པས་ཡུལ་འཇིག་པར་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་། དུད་འགྲོ་སྒོ་ང་ལས་སྐྱེ་བ་བྱ་རྒོད་དང་། ཁྭ་ལ་སོགས་པའི་ནང་དུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་། གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། དེ་རྟག་ཏུ་ཁྲོ་ཞིང་འཇིགས་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། དུད་འགྲོའི་འཇིག་རྟེན་ལ་རྟོག་པར་བྱེད་དེ། ལས་གང་གིས་དུད་འགྲོ་མངལ་ནས་སྐྱེ་བའི་ནང་དུ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདོད་ཆགས་ལ་ཞེན་པ་གང་གིས་གསེབ་རྒོད་མ་ལ་གཏོང་བ་དང་། གླང་ཁྱུ་པ་བ་ལ་གཏོང་བ་དང་། ནགས་ཚལ་ལ་མེ་གཏོང་བ་དང་། མི་སྦྱར་པོ་འོས་མ་ཡིན་པ་ལ་བྱེད་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བའི་ནང་དུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་། དུད་འགྲོ་མངལ་ནས་སྐྱེ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་། གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པར་དེ་འགྲོ་བ་གསུམ་པར་སྐྱེ་བར་འགྱུར་བ་མཐོང་ངོ་། །དེ་ལྟར་དགེ་སློང་དེས་དུད་འགྲོ་རྣམ་པ་བཅུ་གཅིག་ལ་བརྟགས་ན། དེ་ནས་ཡང་ཟས་རྣམ་པ་བཞི། ཁམ་གྱི་ཟས་དང་། ཡིད་ལ་སེམས་པ་དང་། རེག་པ་དང་། དགའ་བ་རྣམས་ལ་རྟོག་པར་བྱེད་ཅིང་། ཟས་རྣམ་པ་བཞིའི་འབྲས་བུ་རྣམ་པར་སྨིན་པ་ལ་རྗེས་སུ་སེམས་
པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ཚུལ་ངན་པ་དང་ལྡན་པ་ཆོམ་རྐུན་པ་དག་ལ་ཁམ་གྱི་ཟས་བྱིན་ཏེ། འདི་ལྟར་འདི་ཟོ་ལ་བདག་གི་དགྲ་སོད་ཅིག་ཅེས་བྱས་པ་དང་། ཁ་ཟས་ལ་བརྐམ་པས་ཉམས་པ་དེ་དག་གིས་ཀྱང་དེ་བཞིན་དུ་སྲོག་བཅད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བའི་ནང་དུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་ལས་དེའི་མཐུས་དུད་འགྲོ་ཁམ་གྱི་ཟས་ཟ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། འདི་ལྟ་སྟེ། བ་ལང་དང་། མ་ཧེ་དང་། བོང་བུ་དང་། ཕག་དང་། ཁྱི་དང་། ཝ་དང་། རྔ་མོ་དང་། བལ་གླང་དང་། རྟ་དང་། ལུག་དང་། རི་དགས་དང་། ར་དང་། སྲོག་ཆགས་སྲི་མར་དང་། ཁྭ་དང་། བྱ་རྒོད་དང་། ངང་པ་དང་། སྲོག་ཆགས་ཏི་ཏི་བྷ་དང་། སྐྱར་མོ་དང་། སྲོག་ཆགས་རཱ་མ་དང་། དགོ་བ་དང་། སྲོག་ཆགས་ཀུ་རང་ག་དང་། རི་དགས་མོ་དང་། སྲོག་ཆགས་ཀ་དམ་བྷ་དང་། ནོར་བུའི་མཆུ་དང་། ཤང་ཤང་ཏེའུ་དང་། སྦྲུལ་དག་གནས་ཚེར་མ་ཅན་དང་། ངམ་གྲོག་ལ་སོགས་པ་མཐའ་ཡས་པ་རྣམས་སུ་སྐྱེ་བར་འགྱུར་རོ། །ཕྱོགས་དག་ལ་ཡང་རབ་ཏུ་དཔྱོད་པར་བྱེད་ཅིང་རེག་པའི་ཟས་ལ་ཡང་རྗེས་སུ་སེམས་པར་བྱེད་དེ། སྒོ་ང་ལས་སྐྱེས་པ་སྒོ་ང་ལས་སྐྱེ་བར་གཏོགས་ཤིང་འབྱུང་བ་དག་ནི་འདི་ལྟ་སྟེ། བྱ་དང་། ཆུ་ན་གནས་པ་དང་། ཤུག་ཏུ་འབྲེལ་པ་དང་། རྒྱ་མཚོའི་འགྲམ་ནས་སྐྱེ་བ་དང་། རྒྱ་མཚོར་སྐྱེས་པ་དང་། ཀླུ་དང་། སྦྲུལ་དང་། ཁུང་ན་གནས་པ་ལ་སོགས་པ་དེ་དག་ལས་གང་གིས་རེག་པའི་ཁ་ཟས་ཟ་བར་འགྱུར་ཞིག་གུ་སྙམ་ནས། དགེ་སློང་དེ་རྣམ་པར་དཔྱོད་པར་བྱེད་དོ། །དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ཕ་རོལ་དག་ལ་སྦྱིན་པ་སྦྱིན་ནོ་སྙམ་དུ་བསམས་ལ། མ་སྨྲས་པར་ཡིད་ཀྱིས་བྱིན་ཏེ། དེ་འཆི་བའི་དུས་བྱས་ན། དེ་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་དུད་འགྲོ་རྣམས་ཀྱི་ནང་དུ་སྐྱེས་ན་བསམ་པ་འབའ་ཞིག་གི་ལས་དེ་
ཉིད་ཀྱི་མཐུས། དེ་རེག་པའི་ཟས་དེ་ཟ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། དུད་འགྲོའི་འཇིག་རྟེན་ལ་རྟོག་པར་བྱེད་དེ། ཟས་གསུམ་པ་ཡིད་ལ་སེམས་པ་ཞེས་བྱ་བ་དེས་སེམས་ཅན་དེ་དག་ཇི་ལྟར་བདག་ཉིད་འཚོ་བར་བྱེད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་སྒོ་ང་ལས་སྐྱེ་བ་ཉ་དང་། ཆུ་སྲིན་མ་ཀ་ར་དང་། ཀུམ་བྷི་ར་དང་། ན་ཀྲ་དང་། ཉ་ཕྱིས་དང་། དུང་ལ་སོགས་པའི་སྒོ་ང་ལས་སྐྱེ་བ་སྐྱེས་པ་རྣམས་ཡིད་ལ་སེམས་པའི་ཟས་དེས་འཚོ་བར་བྱེད་དོ། །གལ་ཏེ་མའམ། གལ་ཏེ་ཕས་རང་གི་བུ་དྲན་ན་དྲན་པ་དེས་ཚིམ་པར་བྱེད་དེ། དེ་ནས་ཡང་འཕེལ་བར་བྱེད་ཅིང་འཚོ་བར་བྱེད་ལ་ཁ་ཟས་ཀྱི་བྱ་བ་ཡང་བྱེད་དོ། །དེ་ལས་གང་གིས་སྐྱེ་བར་འགྱུར་སྙམ་ནས་དགེ་སློང་དེ་རབ་ཏུ་དཔྱོད་དེ་དེས་ཐོས་པ་ལས་བྱུང་བའི་ཤེས་པས་བརྟགས་ན། བློ་ཞན་ཅིང་ལས་དང་འབྲས་བུ་དག་མངོན་པར་མི་ཤེས་པ་གང་གིས་གཞན་དག་ལ་འདི་ལྟར་ངས་ཁྱོད་ལ་ཟླ་བ་ཕྱེད་དམ་ཟླ་བ་གཅིག་ན་ནོར་རྫས་ཀྱི་རྣམ་པའམ། ཁ་ཟས་ཀྱི་རྣམ་པའམ། ནོར་གྱི་དབྱིག་གི་རྣམ་པ་ཆུང་ཟད་སྦྱིན་ནོ་ཞེས་ཁས་བླངས་ལ་དེའི་ཚིག་དེ་དབུལ་པོ་དེས་ཐོས་ནས་དགའ་བར་འགྱུར་ཏེ། འདི་ལྟར་སྦྱིན་བདག་འདིས་བདག་དབུལ་པོ་ལ་ཁས་བླངས་པ་དེ་བདག་ལ་སྦྱིན་པར་བྱེད་དོ་སྙམ་ནས། དེ་ཡིད་མཆོག་ཏུ་དགའ་ནས་དེ་བཞིན་དུ་ཟླ་བ་ཕྱེད་དམ་ཟླ་བ་གཅིག་གི་དུས་སུ་དེ་འོངས་ནས་དེའི་དྲུང་དུ་ཕྱིན་པ་དང་། མི་ངན་པ་དེས་ཁ་སྟོངས་པར་བྱས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དགའ་བ་དང་དགའ་བ་མེད་པའི་ནང་དུ་སྐྱེ་བར་འགྱུར་རོ། །དེ་ནས་ཐར་ནས་ཀྱང་གལ་ཏེ་དུད་འགྲོ་རྣམས་ཀྱི་ནང་དུ་སྐྱེས་ན། འདི་ལྟར་དེས་དེ་ལ་བརྫུན་བྱས་ནས་ཡིད་དགའ་བར་བྱས་པ་དེའི་མཐུས་དེ་ཡིད་ལ་སེམས་པའི་ཟས་འཐོབ་པར་འགྱུར་རོ། །གལ་ཏེ་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་དེའི་བྲན་ཉིད་
དུ་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་དུད་འགྲོའི་འཇིག་རྟེན་ཁ་ཟས་བཞི་པ་དགའ་བ་ཞེས་བྱ་བ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་འདི་ལྟར་དུད་འགྲོའི་ཡུལ་ན་དུད་འགྲོ་ཀུན་ནས་ཉོན་མོངས་པ་ཅན་གྱི་དགའ་བའི་ཟས་ཀྱིས་འཚོ་བ་ཡོད་དེ། ནགས་ཁུང་ན་སྦྲུལ་པོ་ཆེ་ཨ་ཛ་ག་ར་ཞེས་པ་དགའ་བའི་ཟས་དང་རླུང་ཟ་ཞིང་འཚོ་བ་དང་། སྲོག་ཆགས་ག་ལ་གོ་ལི་ཀ་དང་། རི་ཞོལ་གནས་ཞེས་བྱ་བ་ལ་སོགས་པ་དང་གཞན་ཡང་ཡོད་དེ། དེ་ལ་འོད་གསལ་གྱི་ལྷ་རྣམས་ཀྱི་དགའ་བའི་ཟས་ནི་གནོད་སེམས་མེད་པའི་དགའ་བའི་ཟས་ཀྱིས་འཚོ་བ་ཡིན་གྱི་དུད་འགྲོའི་དགའ་བའི་ཟས་ནི་འཁོན་གྱི་ལྟ་བ་དང་། འཁོན་དམ་དུ་འཛིན་པའི་སེམས་དང་ལྡན་པ་ཡིན་ན་དེ་དག་ལས་གང་གིས་དེར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཞེ་སྡང་གི་ཤས་ཆེ་བའམ། ཞེ་སྡང་གི་རང་བཞིན་ཅན་གང་ཡིན་པ་སྟེ། འཁོན་གྱི་རྒྱུ་དང་འཐུན་པ་དང་། གཏི་མུག་གི་ཤས་ཆེ་བ་དེས་སྲོག་གཅོད་པར་བྱས་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་འཁོན་དང་དགའ་བའི་གཞི་ཡོད་པ་དེས་དུད་འགྲོ་རྣམས་ཀྱི་ནང་དུ་སྐྱེས་ན། དགའ་བའི་ཟས་དང་རླུང་ཟ་བར་འགྱུར་རོ། །དེ་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པར་དེ་རྟག་པར་གློ་བུར་དུ་ཕ་རོལ་དང་། ལྷན་ཅིག་རྒྱུ་མེད་པར་འཐབ་པ་དང་འབྲེལ་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་རྣམ་པ་གཞན་གྱིས་དུད་འགྲོའི་འཇིག་རྟེན་མཐའ་ཡས་པ་ལ་རྟོག་པར་བྱེད་དེ། ཡང་ཆུའི་ནང་ན་རྒྱུ་བ་དག་ཇི་ལྟར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་བློ་ཞན་ཅིང་རྣམ་པར་ཤེས་པ་ཞན་པ་སྐོམ་གྱིས་གདུངས་བཞིན་དུ་འཆི་བའི་དུས་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ཆུའི་ནང་ན་རྒྱུ་
བར་འགྱུར་རོ། །དེ་བཞིན་དུ་ཉའི་སྐྱེ་གནས་རྣམ་པ་སྣ་ཚོགས་ཀྱི་ནང་ན་གཅིག་པུ་སྐྱེ་བར་འགྱུར་རོ། །དེ་སྐོམ་གྱིས་གདུངས་ནས་སྲིད་པ་བར་མ་ལ་ཆུ་དེ་མཐོང་བར་འགྱུར་ཏེ། དོན་དུ་གཉེར་བ་དེས་ད་ནི་བདག་འདིར་སྐྱེ་བར་འགྱུར་སྙམ་ནས་སེམས་བསྐྱེད་མ་ཐག་ཏུ་དེ་ཉིད་དུ་སྐྱེ་བར་འགྱུར་ཏེ། སྲིད་པ་ནི་རྒྱུ་དང་རྐྱེན་གྱིས་འབྱུང་ལ་སྲིད་པའི་ཡན་ལག་ལ་གནས་པ་ནི་དེ་ལྟ་བུ་ཡིན་ནོ། །གང་དེ་སྦྱིན་པ་མ་བྱིན་ཞིང་བསོད་ནམས་མ་བསྒྲུབས་པའི་ལས་ཀྱི་རྣམ་པར་སྨིན་པ་དེས་ཆུ་རྟག་ཏུ་དྲོ་བར་འགྱུར་ཞིང་། དེའི་ཁ་ཡོངས་སུ་སྐམ་པར་འགྱུར་ལ་རེག་པ་བ་ཚྭ་དང་འདྲ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་བྱ་སྐམ་ས་ལ་རྒྱུ་བ་དང་། བར་སྣང་ལ་རྒྱུ་བ་དག་ལ་རྟོག་པར་བྱེད་དེ། ལས་གང་གིས་བྱ་དག་བར་སྣང་ལ་འཕུར་ཞིང་ནམ་མཁའ་རྟེན་མེད་པ་ལ་རྟེན་པར་བྱེད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་རྫུ་འཕྲུལ་ནི་རྣམ་པ་གསུམ་སྟེ། འདི་ལྟ་སྟེ། མོས་པས་བསྒྱུར་བ་དང་། ལུས་ཀྱིས་འགྲོ་བ་དང་། ཡིད་ལྟར་མགྱོགས་པའོ། །དེ་ལ་མོས་པས་བསྒྱུར་བ་ནི་རྫུ་འཕྲུལ་ཅན་དག་གི་ཡིན་ཏེ། ཇི་ལྟར་མོས་པ་དེ་ལྟར་འགྲོ་བ་དང་། གལ་ཏེ་སའི་ཁམས་སུ་རབ་ཏུ་མོས་པ་ན། དེའི་ཚེ་ནམ་མཁའ་སའི་ཁམས་སུ་མཐོང་ནས་འགྲོ་བར་བྱེད་པ་ལྟ་བུའོ། །ལུས་ཀྱིས་འགྲོ་བ་ནི་ཆོས་ཉིད་ཀྱི་ཁྱད་པར་ལས་གྱུར་པ་སྟེ། བྱ་རྣམས་ལྟ་བུའོ། །ཡིད་ལྟར་མགྱོགས་པ་ནི། དེ་བཞིན་གཤེགས་པ་སངས་རྒྱས་ཀྱི་ཡིན་ལ། ཡིད་ཀྱིས་ཇི་ལྟར་གཟས་པ་དེ་བཞིན་དུ། གནས་གཞན་དུ་ཕྱིན་པར་བྱེད་པ་ཡིན་ཏེ། དེ་ཡང་ཁམས་གསུམ་གྱི་ལས་སོ་སོའི་བྱེ་བྲག་གིས། དེ་ལྟར་རྫུ་འཕྲུལ་རྣམ་པ་གསུམ་དུ་འགྱུར་བ་མཐོང་ངོ་།། །།