འཕགས་པ་དམ་པའི་ཆོས་དྲན་པ་ཉེ་བར་གཞག་པ།
འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉེར་གཅིག་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་དུད་འགྲོའི་འཇིག་རྟེན་ལ་རྟོག་པར་བྱེད་དེ། སེམས་ཅན་དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་། མི་དང་། ཆུ་དང་། སྐམ་ས་དང་། བར་སྣང་ལ་རྒྱུ་བའི་བྱ་རྣམས་དང་། རི་དགས་ལ་སོགས་པ་འབྱུང་བར་འགྱུར་ལ། ཅིའི་ཕྱིར་ན་སེམས་ཅན་དམྱལ་བའི་སར་སྡུག་བསྔལ་མྱོང་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་དམྱལ་བའི་ས་ན་དུད་འགྲོ་སེམས་ཅན་དུ་བགྲང་བ་དང་། སེམས་ཅན་དུ་བགྲང་བ་མ་ཡིན་པ་སྣ་ཚོགས་དག་མཐོང་ངོ་། །དེར་སེམས་ཅན་དམྱལ་བ་པ་དེ་དག་སྐྱེ་བ་ན་མེས་སྲེག་ཅིང་བྱ་ལུས་ཕྱིན་ཅི་ལོག་ཏུ་འདུག་པ་གཞན་དེ་དག་བདེ་བར་མཐོང་སྟེ། དེ་དག་འདིར་སྐྱེ་བར་འགྱུར་རོ་སྙམ་དུ་བསམས་པ་དང་། སེམས་བསྐྱེད་མ་ཐག་ཉིད་དུ་བྱ་དེ་
རྣམས་ཀྱི་ནང་དུ་སྐྱེ་བར་འགྱུར་ཏེ། ཇི་ལྟར་སེམས་ཅན་དམྱལ་བ་པ་རྣམས་ཀྱི་འབྲས་བུ་རྣམ་པར་སྨིན་པ་སྔར་བསྟན་པ་དེ་བཞིན་དུ་བྱ་དེ་རྣམས་ལ་ཡང་འབྱུང་བར་འགྱུར་རོ། །སེམས་ཅན་དུ་བགྲང་བ་མ་ཡིན་པ་དེ་རྣམས་ནི་ལས་བྱས་ཤིང་བསགས་པ་མི་འདྲ་ལ་སེམས་ཅན་དམྱལ་བར་གང་དང་གང་དག་འབྱུང་བ་དེ་དག་ཐམས་ཅད་འཇིགས་པ་ཆེན་པོར་མཐོང་སྟེ། སེང་གེ་དང་། སྟག་དང་། འུག་པ་དང་། སྲོག་ཆགས་མར་ཀོ་ཏ་ཀ་དང་། སྦྲུལ་དང་སྦྲུལ་ཆེན་པོ་འཇིགས་འཇིགས་ལྟར་འདུག་པ་ཆེན་པོ་དག་འབྱུང་བར་འགྱུར་རོ། །སེམས་ཅན་དམྱལ་བ་པ་སེམས་ཅན་དུ་བགྲང་བ་ལ་སེམས་ཅན་དུ་བགྲང་བ་མ་ཡིན་པ་རྣམས་ཀྱིས་གནོད་པར་བྱེད་དེ། དེར་སེམས་ཅན་དུ་བགྲང་བ་ལ་ལས་ཀྱིས་བསྐྱེད་པའི་དུད་འགྲོ་སེམས་ཅན་དུ་བགྲང་བ་མ་ཡིན་པ་གཞན་དག་གིས་གནོད་པར་བྱས་ཀྱང་། དེ་དག་བདག་ཉིད་ནི་སྡུག་བསྔལ་མྱོང་བར་མི་འགྱུར་རོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། ཡི་དགས་ཀྱི་འཇིག་རྟེན་ལ་རྟོག་པར་བྱེད་དེ། ཡི་དགས་ལུས་བཀྲེས་པ་དང་སྐོམ་པས་གདུངས་པ་དེ་དག་གི་འཇིག་རྟེན་ན་དུད་འགྲོ་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་རྣམ་པ་སུམ་ཅུ་རྩ་དྲུག་གང་ཡིན་པ་རྣམས་སུ་སྐྱེ་བར་འགྱུར་རོ། །བྱར་གྱུར་པ་དེ་དག་ནི་མི་ཡུལ་དུ་བྱར་གྱུར་ལ་དེ་དག་གིས་བྱ་གཞན་འདི་ལྟ་སྟེ། བྱན་ལག་དང་། ནེའུ་ལེ་དང་། བྱ་རོག་དང་། བྱ་རྒོད་ལ་སོགས་པ་དེ་དག་གིས་བསད་ནས་ཟའོ། །དེ་འཆི་བའི་དུས་བྱས་ནས་སྲོག་བཅད་པའི་རྣམ་པར་སྨིན་པས་ཡི་དགས་ཀྱི་འཇིག་རྟེན་
དུ་བྱར་སྐྱེ་བར་འགྱུར་ཏེ། ལུས་བཀྲེས་པ་དང་སྐོམ་པས་གདུངས་པའི་བྱར་འགྱུར་རོ། །དེ་དག་གི་ཁ་ཟས་ནི་ཡི་དགས་རྣམས་ཀྱི་མིག་ཕྱུང་ནས་ཟ་ལ་གླད་པ་ཡང་འཐུང་ངོ་། །གང་གི་ཚེ་དེ་དག་ཟ་བ་ན། དེའི་ཚེ་ཉེས་པར་བྱས་པའི་ལས་ཀྱིས་རྐང་དང་གླད་པ་དག་ཤིན་ཏུ་ཚ་སྟེ། བ་ཚྭ་དང་ཟངས་བཞུས་པ་ལྟ་བུར་འགྱུར་རོ། །དེ་ལྟར་དགེ་སློང་དེ་ཡི་དགས་ཀྱི་འཇིག་རྟེན་ན་བྱ་འདུག་པ་དག་ལ་བརྟགས་ནས། འདི་ལྟར་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། ལས་ངན་མི་དགེ་ཚ་བས་འདིར། །རྣམ་པར་སྨིན་པ་ཚ་བ་སྟེ། །གནོད་པ་ཆེན་པོ་བྱེད་པ་ཡིན། །དེ་ལྟ་བས་ན་སྡིག་པ་སྤོངས། །སེར་སྣས་ཉེ་བར་ཤིན་ཏུ་ཉམས། །ཉེས་བྱས་ལས་ནི་མི་བྱའོ། །སེར་སྣས་ཉམས་པའི་སྐྱེ་བོ་དག །ཡི་དགས་དུད་འགྲོ་རྣམས་སུ་འགྲོ། །དུད་འགྲོའི་སྐྱེ་གནས་བསྒྲུབས་ནས་སུ། །གཅིག་ལ་གཅིག་ནི་ཁྲོ་བ་དང་། །འཆིང་ཞིང་གསོད་ལ་ཟ་བར་བྱེད། །དེ་ལྟ་བས་ན་གཏི་མུག་སྤོངས། །གཏི་མུག་གིས་ནི་ཉམས་པའི་སེམས། །ཚུལ་ཁྲིམས་སྦྱིན་པ་རྣམ་སྤོང་བ། །བྱིས་པ་སྲེད་པས་བསླུས་པ་དག །དུད་འགྲོའི་སྐྱེ་གནས་དག་ཏུ་སྐྱེ། །རུང་དང་མི་རུང་མི་ཤེས་ལ། །བཟའ་དང་མི་བཟའ་དེ་བཞིན་ཏེ། །དོན་དང་དོན་མིན་ཕྱི་རོལ་གང་། །ཆོས་དང་ཆོས་མིན་འགལ་བར་བྱེད། །དབང་པོ་ལྔ་ནི་བླུན་ཞིང་རྨོངས། །མི་རྣམས་དུད་འགྲོའི་སྐྱེ་གནས་འགྲོ། །དེ་ལྟར་དགེ་སློང་དེ་དུད་འགྲོའི་འཇིག་རྟེན་ལ་ཆུང་ཟད་རྟོག་པར་བྱེད་དེ། དེ་ལྟར་ལས་ཀྱི་ལུ་གུ་རྒྱུད་ཀྱིས་ཚེ་འབུམ་ཕྲག་དུ་མར་ཉེ་བར་སྦྲེལ་བ་དག །དེ་ལྟར་སྡུག་བསྔལ་འབུམ་ཕྲག་དུ་མ་དཔག་ཏུ་མེད་པའི་སྡུག་བསྔལ་གྱི་ཀླུང་གིས་སྦྲེལ་ཅིང་དུད་འགྲོར་མངོན་པའི་ལས་དུ་མ་དང་། རྒྱུ་དང་རྐྱེན་དུ་མ་དག་གིས་བསམ་པ་ཕན་ཚུན་འབྲེལ་པ་དག་ནི་གང་རྒྱ་མཚོ་དཔག་ཚད་བཅུ་ཡོད་པར་འཁོད་དེ། ཉ་དང་ཆུ་སྲིན་མ་ཀ་ར་དང་། ཉ་མིད་དང་། ཆུ་སྲིན་ན་ཀྲ་དང་། དུང་གནས་པ་དག་གིས་དེ་དག་ཕན་ཚུན་འཇིགས་པར་བྱེད་དོ། །དེ་དག་རྨོངས་པའི་སེམས་ཀྱིས་འདོད་ཆགས་སྤྱོད་པར་བྱེད་དེ། རྒྱུ་དེས་རུང་བ་དང་མི་རུང་བ་མངོན་པར་
མི་ཤེས་པས། དེའི་ཕྱིར་རྒྱ་མཚོའི་གནས་ཟབ་མོར་སྐྱེ་བར་འགྱུར་ལ། བ་ཚྭའི་ཆུ་ཡིས་བསྐོལ་བ། རྟག་ཏུ་སྐོམ་པས་མངོན་པར་གདུངས་པ་དག་ཕན་ཚུན་གསོད་པའི་རྣམ་པས་འཇིགས་པར་འགྱུར་རོ། །རྒྱ་མཚོ་བར་མ་ན་གནས་པ་གང་ཡིན་པ་དེ་དག་ནི་ཞེ་སྡང་སྤྱོད་པ་དག་ཡིན་ཏེ། དེ་དག་ལྷག་པར་ཞེ་སྡང་གི་རྒྱུས་རྒྱ་མཚོའི་བར་མ་དཔག་ཚད་སྟོང་ཡོད་པ་དེར་ཀླུ་རྣམས་སུ་སྐྱེ་ཞིང་རྟག་ཏུ་གནས་སོ། །ཀླུ་དེ་དག་ཕན་ཚུན་ཁྲོ་བ་དག་སྐྱེད་ཅིང་སེམས་ཁྲོས་པས་འཁྲུགས་ནས་ཕན་ཚུན་དུག་གཏོང་བར་བྱེད་ལ། རྟག་ཏུ་གནོད་པར་སེམས་པ་ཡིན་ནོ། །དེ་དག་གི་གནས་ནི་ལོངས་སྤྱོད་ལྡན་ཞེས་བྱ་སྟེ། དེ་ལ་དཔག་ཚད་སུམ་སྟོང་ཡོད་ལ། གནས་དེ་ཀླུའི་རྒྱལ་པོ་རྣམས་ཀྱིས་ཤིན་ཏུ་གང་ངོ་། །གནས་དེ་རྣམས་ན་ཀླུའི་རྒྱལ་པོ་རྣམ་པ་གཉིས་གནས་ཏེ། ཆོས་དང་ལྡན་པ་དང་། ཆོས་དང་མི་ལྡན་པའོ། །དེ་དག་མིའི་འཇིག་རྟེན་ཐམས་ཅད་ལ་བདེ་བར་བྱེད་པ་དང་། གནོད་པར་བྱེད་པ་ཡིན་ནོ། །གནས་དེའི་ཀླུའི་རྒྱལ་པོ་ཆོས་དང་ལྡན་པ་རྣམས་གང་དུ་གནས་པ་དེར་ཀླུའི་རྡུལ་དག་མི་འབབ་བོ། །གང་དུ་ཆོས་དང་མི་ལྡན་པ་དག་གནས་པ་དེར་ཀླུའི་རྡུལ་དག་འབབ་པར་འགྱུར་ཏེ། དེ་ཡང་བྱེ་མ་རབ་ཏུ་འབར་བ་འདྲ་ལ་མགོ་ལ་འབབ་བོ། །དེས་ཀླུའི་རྒྱལ་པོ་དེ་དག་ཀུན་གྱི་གནས་རབ་ཏུ་སྲེག་པར་བྱེད་ལ། དེས་ཀླུའི་བུ་སྨད་དུ་གཏོགས་པ་ཐམས་ཅད་ཀྱང་སྲེག་པར་བྱེད་དེ། དེ་ནས་ཡང་འབྱུང་བར་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཀླུ་རྣམས་ཀྱི་ཀླུའི་རྡུལ་གྱི་རྒྱུར་གྱུར་པ་དང་། ལས་ལ་རྗེས་སུ་སེམས་པར་བྱེད་དེ། ལས་གང་གིས་ཀླུ་དེ་དག་གི་རྡུལ་དུ་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཁྲོ་བས་ཟིལ་གྱིས་ནོན་ཅིང་བུས་པའི་བློ་ཅན་ནམ། རྨོངས་པའི་བློ་ཅན་གང་གིས་དགེ་འདུན་གྱི་གཙུག་ལག་ཁང་ངམ། གྲོང་ངམ། གྲོང་ཁྱེར་རམ། གྲོང་རྡལ་མེས་བསྲེགས་ན། དེ་ལུས་དང་བྲལ་ནས་སེམས་ཅན་དམྱལ་བའི་ནང་དུ་སྐྱེ་བར་
འགྱུར་རོ། །དེ་ནས་ཐར་ནས་དུད་འགྲོ་ཀླུ་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་སྔོན་མེས་བསྲེགས་པའི་ཉེས་པའི་རྒྱུ་དེས། དེ་ལ་འབབ་པའི་ཕྱིར་ཀླུའི་རྡུལ་འབབ་པར་མཐོང་ངོ་། །དེ་ནས་ཡང་དགེ་སློང་དེ་ཀླུའི་འཇིག་རྟེན་ལ་རྟོག་པར་བྱེད་དེ། ལས་གང་གིས་ཀླུ་རྣམས་ལ་ཀླུའི་བྱེ་མ་མི་འབབ་ཅིང་ལས་གང་གིས་དེར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་མུ་སྟེགས་སུ་གྱུར་ཅིང་འཇིག་རྟེན་པའི་ཀུན་ནས་ཉོན་མོངས་པའི་ཚུལ་ཅན་ཡིན་ལ། དེ་སྦྱིན་པ་ཚེར་མ་དང་བཅས་པ་ཡང་བྱིན་ན། སྔ་མ་བཞིན་ཚེར་མ་བདུན་གྱི་ནང་དུ་སྐྱེས་ལ། ཁྲོས་པས་ཀྱང་བསྒྲིབས་ནས་འདི་ལྟར་ཀླུ་རྣམས་ཀྱི་ནང་དུ་སྐྱེ་བར་གྱུར་ཅིག་ཅེས་ཀླུ་རྣམས་ཀྱི་ནང་དུ་སྨོན་ལམ་བཏབ་ན། དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་ལོངས་སྤྱོད་ལྡན་གྱི་ཀླུ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཧ་ཅང་ཁྲོ་བའི་རང་བཞིན་ཅན་དུ་མི་འགྱུར་ལ། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པར་འགྱུར་ཏེ། དེ་ལ་ཀླུའི་རྡུལ་དེ་མི་འབབ་ཅིང་མགོ་ལ་ཡང་མི་འབབ་བོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ཀླུའི་འཇིག་རྟེན་ལ་རྟོག་པར་བྱེད་དེ། ལས་གང་གིས་ཀླུ་རྣམས་ཀྱི་གནས་ལོངས་སྤྱོད་ལྡན་ན། ཆོས་དང་ལྡན་པའི་ཀླུ་དེ་དག་རྣམ་པ་དུ་ཡོད། ཆོས་དང་མི་ལྡན་པ་དེ་དག་རྣམ་པ་དུ་ཡོད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་དུ་ཆོས་དང་ལྡན་པ་དག་གནས་པ་དེར་ནི་རིན་པོ་ཆེའི་ར་བས་བསྐོར་ཅིང་རིན་པོ་ཆེ་སྣ་བདུན་འབྱུང་ལ། ཀུན་ནས་འོད་འབྱུང་སྟེ། ལྟེང་ཀ་དང་། འབབ་ཆུ་དང་། ཨུད་པ་ལ་ཕུན་སུམ་ཚོགས་པ་ནི་སྐྱེ། བདུད་རྩིའི་ཁ་ཟས་ལ་ནི་ཟ། རྟག་ཏུ་བདེ་བ་ལ་ནི་གནས། ལུས་མེ་ཏོག་དང་། ཕྱེ་མ་དང་། བྱུག་པས་ནི་བརྒྱན། མགོ་སྦྲུལ་དུ་འདུག་པ་ཁོ་ནར་ཟད་ལ། གཞན་དུ་ན་འདོད་པའི་གཟུགས་ཅན་དུ་འགྱུར་ཏེ། གང་དུ་རབ་ཏུ་འགྲོ་བར་འདོད་པ་དང་། གང་དུ་རྣམ་པར་རྒྱུ་བར་འདོད་པ་དེར་སོ་སོར་གནས་པར་བྱེད་དོ། །དེ་ལ་ཀླུའི་རྒྱལ་པོ་འདི་རྣམས་ནི་ཆོས་དང་ལྡན་པ་ཡིན་ཏེ། འདི་
ལྟ་སྟེ། མགོ་བདུན་པ་དང་། གླང་པོའི་གདོང་དང་། ཀླུའི་རྒྱལ་པོ་ནོར་རྒྱས་ཀྱི་བུ་དང་། དེ་བཞིན་དུ་ཀླུའི་རྒྱལ་པོ་འཇོག་པོ་དང་། ཀླུའི་རྒྱལ་པོ་བཟང་ལྡན་དང་། ཀླུའི་རྒྱལ་པོ་སྐྱེད་པ་དང་། ཀླུའི་རྒྱལ་པོ་མི་འཇོམས་པ་དང་། ཀླུའི་རྒྱལ་པོ་སྤྲིན་ཕྲེང་ཅན་དང་། ཀླུའི་རྒྱལ་པོ་འཁྱིལ་པ་དང་། ཀླུའི་རྒྱལ་པོ་ཀུན་འགྲོ་དང་། ཀླུའི་རྒྱལ་པོ་རབ་སྤྲོ་སྟེ། ཀླུའི་རྒྱལ་པོ་འདི་རྣམས་ནི་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་ཡིན་ནོ། །དེ་རྣམས་ནི་ལོ་ལེགས་པར་བྱ་བའི་ཕྱིར་དུས་སུ་འབབ་པའི་ཆར་མི་ཉུང་བར་བདེ་བར་འབེབས་པར་བྱེད་ལ། དུས་མ་ཡིན་པར་འབྱུང་བའི་སེར་བ་དང་། སྤྲིན་དང་། རླུང་དག་གཏོང་བར་མི་བྱེད་དོ། །སངས་རྒྱས་དང་། ཆོས་དང་། དགེ་འདུན་ལ་དད་ཅིང་དད་པས་རྗེས་སུ་འཇུག་པ་ཡིན། སངས་རྒྱས་ཀྱི་སྐུ་གདུང་སྲུང་ལ། ཀླུའི་རྡུལ་དང་བྲལ་བས་ཤིན་ཏུ་བདེ་བ་ཡིན་ནོ། །དེ་ཡང་མིའི་གནས་བཞི་ལ་འདི་ལྟ་སྟེ། འཛམ་བུའི་གླིང་དང་། ནུབ་ཀྱི་བ་ལང་སྤྱོད་དང་། ཤར་གྱི་ལུས་འཕགས་དང་། བྱང་གི་སྒྲ་མི་སྙན་རྣམས་སུ་ཆར་འབེབས་པར་བྱེད་དེ། གང་གི་ཚེ་དགེ་སྦྱོང་དང་། བྲམ་ཟེ་དག་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་འབྱུང་བ་དེའི་ཚེ། ཆོས་ཀྱི་བྱེ་བྲག་གིས་ཀླུའི་རྒྱལ་པོ་ཆོས་དང་ལྡན་པ་དག་སྟོབས་རབ་ཏུ་ཆེ་བར་འགྱུར་ཏེ། དེའི་ཚེ་ཆར་ལེགས་པར་འབེབས་པར་བྱེད་ཅིང་དེའི་ཚེ་ལོ་ལེགས་པར་འགྱུར་ལ། དྲི་དང་རོ་ཁ་དོག་ཕུན་སུམ་ཚོགས་པར་འགྱུར། འགྲོ་བ་དང་། དུག་དང་། རླུང་གཞན་གྱིས་གནོད་པར་བྱེད་པར་མི་འགྱུར་ཞིང་། འབྲས་བུ་བཟང་པོ་འབྱུང་བར་འགྱུར་ལ། ཉི་མ་དང་ཟླ་བའི་འོད་དག་གིས་གནོད་པར་མི་འགྱུར། ཀླུའི་རྒྱལ་པོ་ཆོས་དང་ལྡན་པ་རྣམས་ནི་ཀླུའི་གདུག་པ་དང་རླུང་དག་གཏོང་བར་མི་བྱེད་དོ། །འཛམ་བུའི་གླིང་གི་སེམས་ཅན་རྣམས་ཀྱི་སྲོག་གི་བར་ཆད་ནི་རྒྱུ་བཞིས་བྱེད་དེ། འདི་ལྟ་སྟེ། ལོ་ཉེས་དང་། མཚོན་གྱིས་འཁྲུགས་པ་དང་། དུག་དང་། རླུང་གིས་རེག་པ་དང་། ཆུའི་ཉེས་པའོ། །དེ་ལ་གལ་ཏེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་སྐྱེ་དགུ་
དག་འབྱུང་ན། ཆོས་དང་ལྡན་པའི་ཀླུ་དེ་དག་སྟོབས་དང་ལྡན་པར་འགྱུར་ཏེ། དེ་དག་སྤྲིན་ངན་པ་དག་སྤྲུལ་པར་མི་བྱེད་ཅིང་། དེ་དག་སྤྲིན་ངན་པ་དང་འདུ་བར་མི་བྱེད་ལ། རླུང་ངན་པ་དག་གཏོང་བར་མི་བྱེད་དོ། །དེ་ཆུ་བོ་དག་ལ་གནོད་པར་མི་བྱེད་ཅིང་ཆུ་བཟང་པོས་འབྲུ་རྣམས་ལེགས་པར་སྐྱེད་དེ། མེ་ཏོག་དང་འབྲས་བུ་དག་རོ་བྲོ་བ་དང་། མདོག་བཟང་བ་དང་། དྲི་དང་རོ་ཕུན་སུམ་ཚོགས་པར་འབྱུང་ངོ་། །དེས་སེམས་ཅན་རྣམས་དགའ་བར་བྱེད་ལ། ནད་དག་དང་བྲལ་ཞིང་ཁམས་རྣམས་སྟོབས་དང་ལྡན་པར་འགྱུར། དེ་དག་ཡང་ལས་ལེགས་པ་དག་བྱེད་ལ། དེ་དག་སེམས་ཅན་རྣམས་ཀྱི་དབང་གི་འབྲས་བུ་ཡང་འབྲུ་རྣམས་ཕུན་སུམ་ཚོགས་པར་བྱེད་དེ། དེ་ལྟར་རིམ་གྱིས་འཛམ་བུའི་གླིང་གི་མི་རྣམས་ལ། ཀླུ་དག་གཅེས་སྤྲས་སེམས་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་འཛམ་བུའི་གླིང་སོ་སོར་ཤེས་པར་བྱས་ནས། ནུབ་ཀྱི་བ་ལང་སྤྱོད་ཀྱི་གླིང་ལ་རྗེས་སུ་སེམས་པར་བྱེད་དེ། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་དག་ཇི་ལྟར་ཀུན་ཏུ་སྲུང་བར་བྱེད་ཅིག་གུ་སྙམ་མོ། །གླིང་དེར་མི་ཡིད་ཤིན་ཏུ་འཇམ་པ་དག་འབྱུང་བར་འགྱུར་ལ། དེ་དག་ལ་བར་ཆད་གཅིག་འབྱུང་བ་ནི་འདི་ལྟ་སྟེ་ཆུ་རྙོག་པ་ཅན་ཡིན་ཏེ། དེས་ནུབ་ཀྱི་བ་ལང་སྤྱོད་ཀྱི་མི་རྣམས་དུས་ཉེ་བར་འདུམས་པར་བྱེད་དོ། །ཀླུའི་རྒྱལ་པོ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་དེ་དག་སྤྲིན་ལྡང་བར་མི་བྱེད་ཅིང་ངམ་གྲོག་དང་། གཡང་ས་དང་རི་བོ་མི་བཟད་པ་རྣམས་ལ། དེ་དག་ཆུ་རྙོག་པ་ཅན་མི་འབེབས་ལ། ཀླུ་རྣམས་ཀྱི་མཐུས་ཆུ་རྙོག་པ་མེད་པར་བྱས་པས། ནུབ་ཀྱི་བ་ལང་སྤྱོད་ཀྱི་མི་རྣམས་བདེ་བར་གནས་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ཤར་གྱི་ལུས་འཕགས་གླིང་ལ་རྟོག་པར་བྱེད་དེ། ཀྱེ་མ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་ཀླུ་དག་ཤར་གྱི་ལུས་འཕགས་གླིང་བདེ་བར་བྱ་བ་ལ་ཇི་ལྟར་འབད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཤར་གྱི་ལུས་འཕགས་ཀྱི་མི་རྣམས་ལ་གློག་གི་འཇིགས་པ་དང་། སྒྲའི་
འཇིགས་པས་བར་ཆད་འབྱུང་བར་འགྱུར་ཏེ། དེ་དག་གང་གི་ཚེ་གློག་མཐོང་བ་དང་། སྒྲ་ཐོས་པ་དེའི་ཚེ་སེམས་ཤིན་ཏུ་འཇམ་པ་དག་ལ་ནད་འབྱུང་བར་འགྱུར་རོ། །གང་གི་ཚེ་དེར་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་ཀླུའི་བདག་པོ་དག་སྒྲ་ཡང་མི་འབྱིན། གློག་ཀྱང་མི་གཏོང་སྟེ། དེའི་ཚེ་ཀླུའི་བདག་པོ་རྣམས་ཀྱིས་ཤར་གྱི་ལུས་འཕགས་ཀྱི་མི་རྣམས་ལ་ནད་འབྱུང་བར་མི་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་བྱང་གི་སྒྲ་མི་སྙན་གྱི་མི་རྣམས་ཀྱི་གནོད་པ་ལ་རྗེས་སུ་སེམས་པར་བྱེད་དེ། ཀྱེ་མ་བྱང་གི་སྒྲ་མི་སྙན་གྱི་མི་རྣམས་ལ་གནོད་པ་ཇི་ལྟར་འབྱུང་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། བྱང་གི་སྒྲ་མི་སྙན་པ་རྣམས་ལ་རླུང་གྲང་མོས་གནོད་པར་བྱེད་དེ། སྤྲིན་ནག་པོས་གནོད་པ་དང་། རླུང་གྲང་མོས་མེ་ཏོག་དེ་དག་ཞུམ་པར་འགྱུར་ལ། དྲི་མི་ཞིམ་པར་འགྱུར། དེ་ནས་དེ་དག་ཡིད་མི་དགའ་བ་སྐྱེ་སྟེ། སྤྲིན་ནག་པོའི་རྐྱེན་གྱིས་བྱ་དག་སྐད་མི་སྙན་པ་འབྱིན་ལ། པི་བང་དང་། རྫ་རྔའི་སྒྲ་ཡང་མི་སྙན་པར་འགྱུར་རོ། །རི་ཀུན་ཏུ་སྣང་བྱེད་ལ་སོགས་པ་ལ་གནས་པ་རྣམས་ལ། དེ་ལྟར་ཀླུས་བྱས་པ་དག་གིས་གནོད་པར་བྱེད་དོ། །གང་གི་ཚེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་རྒྱལ་པོ་འབྱུང་བ་དེའི་ཚེ་རླུང་གྲང་མོ་དག་འབྱུང་བར་མི་འགྱུར་ལ། སྤྲིན་ནག་པོ་ཡང་འབྱུང་བར་མི་འགྱུར་རོ། །དེ་ལྟར་མིའི་གནས་བཞི་དག་ལ་ཀླུའི་རྒྱལ་པོ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་རྣམས་བདེ་བ་སྒྲུབ་པར་བྱེད། ཕན་པ་སྒྲུབ་པར་བྱེད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ཀླུའི་འཇིག་རྟེན་ལ་རྟོག་པར་བྱེད་དེ། ལས་གང་གིས་ཆོས་དང་མི་ལྡན་ཞིང་ཆོས་ཀྱི་རྗེས་སུ་འཇུག་པར་མི་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཇི་ལྟར་ཀླུའི་གནས་ལོངས་སྤྱོད་ལྡན་ན། ཀླུ་རྣམས་ཀྱི་རྒྱལ་པོ་ཆོས་དང་མི་ལྡན་པ་འདི་ལྟ་སྟེ། ཀླུའི་རྒྱལ་པོ་རབ་འཇོམས་དང་། ཀླུའི་རྒྱལ་པོ་བསྒྱིངས་པ་དང་། ཀླུའི་རྒྱལ་པོ་ནག་པོ་དང་། ཀླུའི་
རྒྱལ་པོ་ཧུ་ལུ་ཧུ་ལུ་སྟེ། དེ་དག་རྒྱ་མཚོ་བར་མ་ལོངས་སྤྱོད་ལྡན་ན་གནས་སོ། །ཆོས་དང་མི་ལྡན་ཞིང་ཆོས་ཀྱི་རྗེས་སུ་འཇུག་པར་མི་བྱེད་པ་དེ་དག་གི་མཐུ་ཇི་ལྟ་བུ་ཡིན་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གི་ཚེ་དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པའི་སྐྱེ་དགུ་དག་འབྱུང་བ་དེའི་ཚེ། ཀླུ་དེ་དག་གི་དབང་དུ་འགྱུར་རོ། །དེའི་ཚེ་དེ་དག་འཛམ་བུའི་གླིང་དུ་སེམས་གདུག་ཅིང་ལུས་ལས་དུག་མང་པོ་འབྱུང་བར་བྱེད་དེ། དེ་དག་སྤྲིན་ངན་པའི་ནང་ན་རྒྱུ་ཞིང་དུག་གི་ཤིང་ལྗོན་པ་འབྱུང་བར་བྱེད་དེ། དེ་དག་གིས་རླུང་མ་རུང་བར་བྱེད། རླུང་དེས་ཆུ་མ་རུང་བར་བྱེད། ཆུ་མ་རུང་བར་བྱས་པ་དེས། འབྲུའི་ཚོགས་ཤིན་ཏུ་མ་རུང་བར་བྱེད་དེ། ཁ་ཟས་དེ་ཟོས་པ་ལས་ནད་དག་རབ་ཏུ་འཁྲུག་པར་བྱེད་དོ། །འབྲུ་མ་རུང་བར་བྱས་པ་དེས་ཚེ་དག་ཐུང་བར་འགྱུར་ཏེ། དེ་ལྟར་རྒྱལ་པོ་ཉེས་པ་ཆེ་ཞིང་སྡང་བས་ཀྱང་ཕན་ཚུན་གསོད་པ་དག་བྱེད་དོ། །དེ་ནས་ཉེས་པ་དེས་འཛམ་བུའི་གླིང་གི་མི་དག་རབ་ཏུ་ཉུང་བར་འགྱུར་ཏེ། རྐྱེན་འདིས་ཀླུ་མ་རུངས་པ་རྣམས་བར་ཆད་བྱེད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ཀླུའི་རྒྱལ་པོ་ལ་སོ་སོར་རྟོག་པར་བྱེད་དེ། ཆོས་དང་མི་ལྡན་པའི་རྒྱལ་པོ་དག་ནུབ་ཀྱི་བ་ལང་སྤྱོད་ཀྱི་མི་རྣམས་ཀྱི་བར་ཆད་ཇི་ལྟར་བྱེད་ཅིག་གུ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གི་ཚེ་མི་རྣམས་ཀྱི་རྒྱལ་པོ་ཆོས་དང་མི་ལྡན་པ་དེ་དག་འབྱུང་བ་དེའི་ཚེ། ཀླུའི་རྒྱལ་པོ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་དག་ནུབ་ཀྱི་བ་ལང་སྤྱོད་ཀྱི་ངམ་གྲོག་དང་། གཡང་ས་དང་། རི་བོའི་རྩེ་མི་བཟད་པ་རྣམས་ལ་ཆར་དབྱུག་པ་ལྟ་བུ་འབེབས་པར་བྱེད་དེ། ཆར་པའི་ཆུ་དེས་ཆུ་རྙོག་པ་ཅན་དུ་བྱེད་དོ། །ནུབ་ཀྱི་བ་ལང་སྤྱོད་ཀྱི་མི་རྣམས་དེ་ལ་འཐུང་བར་བྱེད་དེ། བར་ཆད་བྱེད་པའི་རྒྱུ་ནི་འདི་ཡིན་ནོ། །དགེ་སློང་དེ་ནུབ་ཀྱི་བ་ལང་སྤྱོད་ཀྱི་གླིང་ལ་ཡང་དག་པ་ཇི་ལྟ་བ་བཞིན་སོ་སོར་བརྟགས་ནས། ནང་གི་སོ་སོར་རིག་པར་བྱེད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ཤར་གྱི་ལུས་འཕགས་གླིང་ལ་རྟོག་པར་བྱེད་དེ། དེས་
ཐོས་པ་ལས་བྱུང་བའི་ཤེས་པས་བརྟགས་ན། གང་གི་ཚེ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པའི་སྐྱེ་དགུ་དག་འབྱུང་བ་དེའི་ཚེ་ཀླུའི་བདག་པོ་མ་རུངས་པ་དག་གི་སྟོབས་རབ་ཏུ་ཆེ་བར་འགྱུར་རོ། །དེ་དག་ཤར་གྱི་ལུས་འཕགས་གླིང་དུ་སྒྲ་རབ་ཏུ་ཆེན་པོར་འབྱིན་ཏེ། འདི་ལྟ་སྟེ། རི་ཆེན་པོ་སྙིལ་བ་ན་སྒྲ་འབྱུང་བ་དེ་ལྟ་བུ་དེ་དག་ཐོས་ནས། ཤར་གྱི་ལུས་འཕགས་གླིང་གི་མི་རྣམས་ཀྱི་སྙིང་ཤིན་ཏུ་འཇམ་པར་མི་འགྱུར་ཏེ། དེ་དག་ཁ་ཅིག་ནད་ཀྱིས་འདེབས་སོ། །དེ་བཞིན་དུ་གློག་ཀྱང་འབྱིན་ཏེ། འདི་ལྟར་ཕྱོགས་བཅུ་ཐམས་ཅད་འབར་བའི་ཕྲེང་བས་འཁྲུགས་པར་འགྱུར་ཞིང་སྤྲིན་གྱི་ནང་དུ་ཞུགས་པའི་ཀླུ་དེ་དག་གཟུགས་འཇིགས་འཇིགས་ལྟར་བསྒྱུར་བ། མིག་ནི་ཤིང་རྟའི་འཁོར་ལོ་ཙམ། གཟུགས་ནི་རི་ནག་པོ་འདྲ་ལ་མགོ་གསུམ་པོ་ལས་མེ་ཐམས་ཅད་གཏོང་ཞིང་ཁྱིའི་གཟུགས་དང་། སྦྲུལ་གྱི་གཟུགས་ཏེ། གཟུགས་དུ་མ། གཟུགས་མི་བཟད་པ་དག་མཐོང་ངོ་། །དེ་དག་མཐོང་ནས་ཤར་གྱི་ལུས་འཕགས་གླིང་གི་མི་རྣམས་ཀྱི་བར་ཆད་དུ་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། མཐོ་རིས་ལས་གཞན་པ་མཐོ་རིས་ཀྱི་འཇིག་རྟེན་གཉིས་པ་ལྟ་བུ། བྱང་གི་སྒྲ་མི་སྙན་གྱི་གླིང་ལ་རྟོག་པར་བྱེད་དེ། ཀླུའི་བདག་པོ་མ་རུངས་པ་དག་བྱང་གི་སྒྲ་མི་སྙན་གྱི་མི་རྣམས་ལ་ཇི་ལྟར་གནོད་པ་སྐྱེད་པར་བྱེད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཇི་ལྟར་བྱང་གི་སྒྲ་མི་སྙན་གྱི་མི་རྣམས་ལ་སྔ་མ་བཞིན་དུ་པད་མ་དང་། རྟག་ཏུ་མེ་ཏོག་རྒྱས་པ་དང་། རྟག་ཏུ་དྲི་ཞིམ་པ་དང་། མཆོག་ཏུ་ཉམས་དགའ་བ་དག་ཡིན་ཏེ། དེ་དག་མཐོང་ནས་བྱང་གི་སྒྲ་མི་སྙན་གྱི་མི་རྣམས་འགྲངས་པ་དང་། དགའ་བར་འགྱུར་རོ། །གང་གི་ཚེ་དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པའི་སྐྱེ་དགུ་དག་འབྱུང་བ་དེའི་ཚེ། ཀླུ་མ་རུངས་པ་དག་གིས་བྱང་གི་སྒྲ་མི་སྙན་དུ་སྤྲིན་སྟུག་པོ་རི་ལྟ་བུ་དག་འབྱིན་པར་བྱེད་དེ། དེ་དག་བྱུང་མ་ཐག་ཏུ་ཉི་མ་སྒྲིབ་པར་བྱེད་དོ། །དེས་བསྒྲིབས་པའི་སྐྱོན་གྱིས་པད་མ་དག་ཞུམ་པར་འགྱུར་ཞིང་དྲི་མི་ཞིམ་པར་འགྱུར་ལ་ཉི་མ་བཞིན་དུ་གསལ་
བར་མི་འགྱུར་རོ། །དེ་དག་ཞུམ་པ་ཙམ་གྱིས་བྱང་གི་སྒྲ་མི་སྙན་གྱི་མི་རྣམས་ཡིད་དམན་པར་འགྱུར་རོ། །སྤྲིན་དང་རླུང་ཡང་གཏོང་བར་བྱེད་ལ་དེས་པི་བང་དང་། རྫ་རྔ་རྣམས་ཀྱི་སྒྲ་མི་སྙན་པར་འགྱུར་ཏེ། དེ་ལྟར་མིའི་གནས་བཞི་ལ་ཀླུ་རྣམས་བར་ཆད་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། གླིང་བཞིའི་ནང་ན་བཟང་བ་དང་། བཟང་བ་མ་ཡིན་པ་དག་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་བྱང་གི་སྒྲ་མི་སྙན་གྱི་ནི་བདེ་བ་མངོན་དུ་ཆེ་བ་ཡིན་ལ། མིའི་གནས་གསུམ་དག་ནི་མ་ཡིན་ནོ། །འཛམ་བུའི་གླིང་དུ་ཇི་ལྟ་ཇི་ལྟར་ཆོས་དང་ལྡན་པ་དང་། ཆོས་དང་མི་ལྡན་པའི་སྐྱེ་དགུ་འབྱུང་བ་དེ་ལྟ་དེ་ལྟར་འཕེལ་བ་དང་། འགྲིབ་པ་དང་། བདེ་བ་དང་། སྡུག་བསྔལ་བ་དག་ཡོད་དེ། གླིང་གསུམ་གྱི་ནང་ན་འདི་ནི་ལས་ཀྱིས་ཡིན་ནོ། །འདིར་ནི་དགེ་བ་བཅུའི་ལས་ཀྱི་ལམ་དག་སེམས་པ་ཡིན་ཞིང་། འདིར་ནི་སངས་རྒྱས་འབྱུང་བ་ཡིན་ལ། འདིར་ནི་མིའི་གནས་བཞི་དག་གི་རག་ལས་པ་ཡིན་ཏེ། འདིར་ནི་དགེ་བ་བཅུའི་ལས་ཀྱི་ལམ་དག་ངེས་པར་སེམས་ཤིང་རྣམ་པར་དཔྱོད་པ་ཡིན། འདིར་ནི་ཚངས་པར་སྤྱོད་པའི་གནས་ཡིན། འདིར་ནི་འཆི་བ་དང་སྐྱེ་བ་སེམས་པ་ཡིན། འདིར་ནི་རྡོ་རྗེ་ལས་བྱས་པའི་རྡོ་རྗེའི་གདན་ཡོད་དེ། གང་འཛམ་བུའི་གླིང་དུ་དཔག་ཚད་བརྒྱད་ཁྲི་བཞི་སྟོང་འབིགས་པ་འཁོར་བ་ཐམས་ཅད་ན་མེད་ལ་རྡོ་རྗེའི་གདན་ཟིལ་གྱིས་གནོན་པ་ཡང་མེད་དེ། སངས་རྒྱས་བཅོམ་ལྡན་འདས་གང་ལ་གནས་ནས་བྱང་ཆུབ་ཏུ་ཐུགས་བསྐྱེད་པའི་རྒྱུ་འདིས་ན་འཛམ་བུའི་གླིང་འདིར་འཁྲུངས་ཏེ། རྒྱུ་གང་དང་བྱང་ཆུབ་ཐོབ་པར་བྱེད་པ་དགེ་བའི་རྩ་བའི་གྲངས་ཀྱི་རྒྱུན་གང་ཡིན་པ་དེ་ནི་རིའི་རྒྱལ་པོ་རི་རབ་ཀྱིས་ཀྱང་ཡང་དག་པར་གཟུང་བར་མི་ནུས་ན་ས་ཕྱོགས་གཞན་ལྟ་སྨོས་ཀྱང་ཅི་དགོས། གང་གིས་འཛམ་བུའི་གླིང་འདིར་སངས་རྒྱས་འབྱུང་བའི་རྒྱུ་ནི་འདི་ཡིན་ཏེ། འདིར་དེ་གཉའ་ཤིང་གི་བུ་གར་རུས་སྦལ་འཇུག་པ་ལྟ་བུར་འཁྲུང་གི །གླིང་གཞན་དུ་ནི་མ་ཡིན་ཏེ། དེའི་རྒྱུ་ནི་དེ་ཡིན་རྐྱེན་ནི་དེ་ཡིན་ནོ། །གང་མིའི་གནས་བཞི་
ལ་ཀུན་གྱི་གཙོ་བོ་ནི་འཛམ་བུའི་གླིང་འདི་ཡིན་ཏེ། གླིང་གཞན་དག་ནི་མ་ཡིན་ནོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ཀླུའི་འཇིག་རྟེན་ལ་རྟོག་པར་བྱེད་དེ། ལས་གང་གིས་ཀླུའི་རྒྱལ་པོ་ཆོས་དང་མི་ལྡན་ཞིང་ཆོས་དང་འཐུན་པར་མི་བྱེད་པ་རྣམས་སྦལ་པ་ཟ་བ་དང་། བྱེ་མ་ཟ་བ་དང་། རླུང་ཟ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྔོན་མིར་གྱུར་པའི་ཚེ་གང་གིས་བུ་དང་ཆུང་མ་རྣམས་བཀོལ་ཏེ། བཙན་སྣོགས་བྱེད་ལ། བུ་སྨད་ནི་འགྲམ་ཆུ་ལངས་ཏེ། རེ་བཞིན་དུ་ལྟ་བ་དང་། དེ་བདག་གཅིག་པུ་ཟས་མང་པོ་ཟ་ལ། བུ་སྨད་ལ་ནི་ཁ་ཟས་ངན་པ་སྦྱིན་པར་བྱེད་པ་ལས། དེ་ལུས་དང་བྲལ་བའི་འོག་ཏུ་ཀླུའི་སྐྱེ་གནས་སུ་སྐྱེ་ལ་ཟས་སུ་སྦལ་པ་ཟ་བ་དང་། བྱེ་མ་ཟ་བ་དང་། རླུང་ཟ་བ་མཐོང་སྟེ། ལས་དང་འདྲ་བར་འབྲས་བུ་སྨིན་པའི་ཕྱིར་རོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཀླུའི་འཇིག་རྟེན་ལ་རྟོག་པར་བྱེད་དེ། ལས་གང་གིས་ཀླུ་དེ་རྣམས་ཆར་འབེབས་པར་བྱེད། ལས་གང་གིས་སེར་བ་འབེབས་པར་བྱེད་ཅིག་གུ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གལ་ཏེ་ཆོས་དང་མི་ལྡན་པའི་ཀླུའི་རྒྱལ་པོ་རྣམས་འཁྲུགས་ན་གཅིག་ལ་གཅིག་བསྙོགས་ཏེ། ཁྲོས་པས་ཆར་སྤྲིན་བསྒྲུབས་ནས། ཆར་འབེབས་པར་བྱེད་ཅིང་གནོད་པའི་སྤྲིན་དང་རླུང་དང་སེར་བ་དང་ལྡན་པའི་ཆར་དྲག་པོ་དག་འབེབས་པར་བྱེད་ལ། དེས་ན་ཞིང་ལ་ནས་དང་འབྲས་དང་འབྲུ་ཐམས་ཅད་མ་རུང་བར་བྱེད་དེ། དེ་ལྟར་གནོད་པའི་ཆར་འབེབས་པར་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ཀླུའི་འཇིག་རྟེན་ལ་རྟོག་པར་བྱེད་དེ། ཀླུ་རྣམས་འཛམ་བུའི་གླིང་དུ་རྙེད་པ་དང་ལྡན་པར་བྱ་བའི་ཕྱིར་བུ་རམ་ཤིང་གི་ཚལ་དང་། ཞིང་ལ་ནས་དང་གྲོ་དང་། འབྲུ་རྣམས་འཕེལ་བར་བྱ་བའི་དོན་དུ་བདེ་བར་བྱེད་པའི་ཆར་ཇི་ལྟར་འབེབས་པར་བྱེད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་རྣམས་ཀྱི་དབང་གི་འབྲས་བུས་སྐྱེ་བོ་ཐམས་ཅད་ལ་ཕན་པ་དང་བདེ་བའི་
ཕྱིར་ཀླུའི་རྒྱལ་པོ་ཆོས་དང་ལྡན་ཞིང་ཆོས་དང་འཐུན་པར་བྱེད་པ་རྣམས་འབྱུང་བར་འགྱུར་ཏེ། དེ་དག་གིས་འབྲུ་མོད་པར་བྱ་བའི་ཕྱིར་ཆར་འབེབས་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། ཀླུའི་འཇིག་རྟེན་ལ་རྟོག་པར་བྱེད་དེ། རྒྱ་མཚོ་དང་རྒྱ་མཚོའི་ཆུ་ལག་དག་ན། ཀླུ་ཇི་སྙེད་ཅིག་གནས་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གལ་ཏེ་འཛམ་བུའི་གླིང་པའི་མི་རྣམས་ཕལ་ཆེར་ཆོས་དང་མི་ལྡན་པར་གྱུར་ན། དེའི་ཚེ་ཆོས་དང་མི་ལྡན་པ་རྣམས་རྒྱ་མཚོའི་ཆུ་ལག་དག་ཏུ་ཀླུ་གྲངས་མེད་པར་སྐྱེ་བར་འགྱུར་རོ། །གལ་ཏེ་ཕལ་ཆེར་ཆོས་དང་ལྡན་ན་ནི་ཀླུ་བྱེ་བ་ཕྲག་ལྔ་བཅུ་རྩ་བདུན་འབྱུང་བར་འགྱུར་ཏེ། དེ་དག་རྒྱ་མཚོའི་ཆུ་ལག་བཞི་པོ་དག་ཏུ་རྒྱུ་བར་འགྱུར་རོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ཀླུའི་འཇིག་རྟེན་ལ་རྟོག་པར་བྱེད་དེ། དེས་རྒྱ་མཚོའི་ཆུ་ལག་དང་བཅས་པའི་རྒྱ་མཚོའི་ནང་གི་ཀླུའི་གྲོང་ཁྱེར་ལོངས་སྤྱོད་ལྡན་ཞེས་བྱ་བ་ལ་བརྟགས་ནས། རྒྱ་མཚོའི་གཏིང་གི་ས་གཞི་ལ་རྟོག་པར་བྱེད་དེ། རྒྱ་མཚོའི་གཏིང་གི་ས་གཞི་ལ་སུ་དག་གནས་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷ་དང་འགྲན་པའི་ལྷ་མ་ཡིན་ཞེས་བྱ་བ་དག་གནས་སོ། །དེ་དག་མདོར་བསྡུ་ན་རྣམ་པ་གཉིས་ཏེ། ཡི་དགས་ཀྱི་འགྲོ་བར་གཏོགས་པ་རྣམས་དང་། དུད་འགྲོའི་འགྲོ་བར་གཏོགས་པ་རྣམས་སོ། །དེ་ལ་ཡི་དགས་ཀྱི་འགྲོ་བར་གཏོགས་པ་རྣམས་ནི་བདུད་ཀྱི་རིས་ཀྱི་ཡི་དགས་རྣམས་དང་། ཡི་དགས་རྫུ་འཕྲུལ་ཆེན་པོ་རྣམས་སོ། །དུད་འགྲོའི་འགྲོ་བར་གཏོགས་པ་གང་ཡིན་པ་དེ་དག་ནི་རྒྱ་མཚོའི་གཏིང་གི་ས་གཞི་ལ་གནས་ཏེ། རི་རབ་ཀྱི་རྟེན་དཔག་ཚད་བརྒྱད་ཁྲི་བཞི་སྟོང་ཡོད་པའི་སའི་འོག་ན་གནས་སོ། །དེ་དག་ཀྱང་མདོར་བསྡུ་ན། ས་གཞི་བཞི་ཡོད་དོ། །དེ་ལ་ས་གཞི་དང་པོ་ལ་ནི་དཔག་ཚད་ཉི་ཁྲི་གཅིག་སྟོང་ཡོད་དེ། ས་གཞི་དེ་ན་ནི་ལྷ་མ་ཡིན་རྣམས་ཀྱི་རྒྱལ་པོ་སྒྲ་གཅན་ཞེས་བྱ་བ་གནས་སོ། །དེས་ནི་འདོད་པའི་ཁམས་སུ་ཐམས་ཅད་པས་ལྷག་པའི་གཟུགས་སྤྲུལ་ནུས་ལ་མི་རྣམས་ཀྱི་དགེ་བ་དང་མི་དགེ་བའི་དབང་གིས་དེ་འདི་སྙམ་དུ་
སེམས་ཏེ། བདག་ཅག་ལྷ་མ་ཡིན་རྣམས་ཀྱི་འགྲན་ཟླ་ནི་ལྷ་རྣམས་ཡིན་གྱིས། བདག་གིས་དགྲ་དེ་དག་གི་ཚལ་དང་། ནགས་ཚལ་དང་། ལྷའི་བུ་མོ་གང་དག་ལ་ལྷ་རྣམས་རབ་ཏུ་ཆགས་ཤིང་དགའ་བར་འཛིན་པ་དེ་དག་བལྟའོ་སྙམ་ནས། དེས་དེ་ལྟར་བསམས་ནས་བདག་ཉིད་ཀྱི་ལུས་བརྒྱན་ཏེ་ནོར་བུའི་རྒྱལ་པོ་མཐོན་ཀ་ཆེན་པོའམ་ནོར་བུའི་རྒྱལ་པོ་པད་མ་རཱ་གའམ། གསེར་གྱི་རྒྱལ་པོ་ལམ་མེར་འདུག་པའམ། དམར་ལྔའི་རྒྱལ་པོ་གསེར་རམ། གོས་ཀྱི་རྒྱལ་པོ་མ་བཏགས་པ་ཁ་དོག་སྣ་ཚོགས་སྔོན་པོ་དང་། དམར་པོ་དང་། སེར་པོ་དང་། ནག་པོ་རྣམས་ཀྱིས་མཛེས་པར་བྱེད་ཅིང་། ནོར་བུའི་རྒྱལ་པོ་གང་རྒྱན་དུ་ཐོགས་པ་དེའི་ཁ་དོག་གིས་སྒྲ་གཅན་དེའི་ལུས་ཀྱི་ཚད་ནི་རི་རབ་ཙམ་ཡོད་པ་དེ་ཐམས་ཅད་ནོར་བུའི་འོད་དེ་ཁོ་ན་དང་འདྲ་བར་སྣང་བར་འགྱུར་ཏེ། གལ་ཏེ་མཐོན་ཀ་ཆེན་པོ་རྒྱན་དུ་ཐོགས་ན་ནི་དེའི་ལུས་ཐམས་ཅད་མཆོག་ཏུ་སྔོན་པོར་སྣང་བར་འགྱུར་རོ། །དམར་པོ་ཡང་དེ་དང་འདྲའོ། །སེར་པོ་ཡང་དེ་དང་འདྲའོ། །གལ་ཏེ་སྤུག་རྒྱན་དུ་ཐོགས་ན་ནི་དེའི་ལུས་ཐམས་ཅད་ནོར་བུ་དེའི་ཁ་དོག་བཞིན་དུ་སྣང་བར་འགྱུར་རོ། །ནོར་བུ་གཞན་དག་རྒྱན་དུ་ཐོགས་ན་ཡང་། དེ་དང་དེ་བཞིན་དུ་དེའི་ཁ་དོག་འདྲ་བར་སྣང་བར་འགྱུར་རོ། །དེ་ལྷ་རྣམས་ཀྱི་འགྲན་ཟླ་ཡིན་ལ། ལྷ་མ་ཡིན་གྱི་བུ་མོ་རྣམས་དང་། ལྷའི་བུ་མོ་རྣམས་ནི་རང་བཞིན་གྱིས་ཆགས་སུ་རུང་བ་ཡིན་ཏེ། དེ་དག་ལ་ཆགས་པར་གྱུར་ནས། སྒྲ་གཅན་དེ་ཕན་ཚུན་འགྲོ་བའི་ཆས་སུ་ཞུགས་ནས་ས་གཞི་དེ་ནས་འབྱུང་ངོ་། །སྒྲ་གཅན་གྱི་ས་གཞི་དེ་ན་དེའི་གྲོང་ཁྱེར་འོད་ཅན་ཞེས་བྱ་བ་དཔག་ཚད་བརྒྱ་སྟོང་ཡོད་པ་རིན་པོ་ཆེ་སྣ་དུ་མའི་ཚལ་དང་། ནགས་ཚལ་དང་། ཤིང་ལྗོན་པ་དང་། ཁང་ཁྱིམ་དང་། ལྟེང་ཀ་དང་། འབབ་ཆུ་དང་། རྫིང་དང་། ཆུ་ཀ་བདེ་བ་རྣམས་ཀྱིས་མཛེས་པར་བྱས་པ་དེའི་ནང་ནས་ལྷ་མ་ཡིན་གྱི་དབང་པོ་དེ་ལུས་མེ་ཏོག་གི་ཕྲེང་བ་དང་། ཕྱེ་མ་དང་། སྤོས་ཀྱི་བྱུག་པ་རྣམས་ཀྱིས་བརྒྱན་ཏེ་བྱུང་ནས། དེ་ལྷ་རྣམས་ཀྱི་ཚལ་དང་། ནགས་ཚལ་རྣམས་ལ་ལྟ་བར་བྱེད་དོ། །དེ་ལྟ་ཞིང་འདུག་པ་ན་གལ་ཏེ་འཛམ་བུའི་གླིང་གི་མི་རྣམས་ཆོས་མ་ཡིན་པ་ལ་ཞུགས་ཏེ། ཕར་མི་
འཛིན་པ་དང་། མར་མི་འཛིན་པ་དང་། དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པ་དང་། རང་གི་ཕ་ཚན་གྱི་ནང་ན་རྒན་རབས་ཀྱི་རིམ་པ་མེད་པ་དང་། ཆོས་ལ་མི་རྟེན་པ་དང་། དཀོན་མཆོག་གསུམ་ལ་མཆོད་པ་མི་བྱེད་པ་དང་། དགེ་བ་དང་མི་དགེ་བའི་ལས་ལ་མི་ལྟ་བར་གྱུར་ན་ནི། དེའི་ཚེ་ས་ཐ་མ་ལ་གནས་པ་རྒྱལ་ཆེན་བཞིའི་རིས་ཀྱི་ལྷ་རྣམས་མཐུ་ཆུང་བར་འགྱུར་ཏེ། གཅིག་གིས་གཅིག་བསོགས་ནས་ཀྱེ་ལྷ་རྣམས་སེང་གེ་མོའི་བུ་སྒྲ་གཅན་ནི་བདག་ཅག་བསད་པའི་ཕྱིར་བཏུལ་ཏེ་བྱུང་ངོ་ཞེས་འཛེར་ཏོ། །གང་གི་ཚེ་འཛམ་བུའི་གླིང་གི་མི་རྣམས་ཆོས་དང་ལྡན་པར་གྱུར་ཏེ། ཕར་འཛིན་པ་དང་། མར་འཛིན་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། རང་གི་ཕ་ཚན་གྱི་ནང་ན་རྒན་རབས་ཀྱི་རིམ་པ་ཡོད་པ་དང་། ཆོས་ལ་རྟེན་པ་དང་། དཀོན་མཆོག་གསུམ་ལ་མཆོད་པ་བྱེད་པ་དང་། དགེ་བ་དང་། མི་དགེ་བའི་ལས་ལ་ལྟ་བར་གྱུར་ན་ནི། དེའི་ཚེ་ས་ཐ་མ་ལ་གནས་པ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་རིན་པོ་ཆེ་སྣ་ཚོགས་བླངས་ནས། ལུས་བརྒྱན། ཆ་ལུགས་སྣ་ཚོགས་སུ་ཆ་ཞིང་། ལུས་མེ་ཏོག་གི་ཕྲེང་བ་དང་། ཕྱེ་མ་དང་། སྤོས་ཀྱི་བྱུག་པ་རྣམས་ཀྱིས་བརྒྱན་ཏེ། མཚོན་ཆ་སྣ་ཚོགས་ཀྱི་ཆར་འབེབས་ལ། ཧ་ཧ་ཞེས་བྱ་བའི་སྒྲ་སྒྲོགས་ཤིང་རི་རབ་ཀྱི་ཁོང་ན་ཚལ་དང་། ནགས་ཚལ་གང་ན་སེང་གེ་མོའི་བུ་སྒྲ་གཅན་འདུག་པ་དེ་དག་ཏུ་རྒྱུག་གོ །དེ་སྟེ་དེ་མི་རྒལ་ན་ནི་རི་རབ་ཀྱི་ངོས་ལ་ཚལ་དང་ནགས་ཚལ་འདུག་པ་དག་ལ་ཉི་མའི་ཟེར་གྱིས་ཕོག་པའི་འོད་ཟེར་འབུམ་ཕྲག་མང་པོ་དེའི་གདོང་དུ་བབ་སྟེ། མིག་ལ་གནོད་པར་གྱུར་པ་མཐོང་ངོ་། །དེས་ཉི་མའི་ཟེར་དེ་མཐོང་ནས། ཉི་མའི་ཟེར་གྱིས་མིག་འཁྲུགས་ཏེ། ཉི་མའི་ལན་གྱིས་ལྷའི་བུ་མོ་རྣམས་ཀྱང་བལྟ་བར་མ་ནུས། ལྷའི་ཚལ་དང་། ནགས་ཚལ་རྣམས་དང་། རྫིང་རྣམས་དང་། ལྷའི་འབྱོར་པ་རྣམས་ཀྱང་བལྟ་བར་མ་ནུས་སྙམ་ནས། དེས་བསམས་པ། ཀྱེ་མ་ཉི་མའི་ལན་གྱིས་ལྷའི་བུ་མོ་རྣམས་བདག་གིས་བལྟ་བར་མ་ནུས་སོ་སྙམ་སྟེ། ཁྲོས་པས་མིག་རྩ་དམར་པོར་གྱུར་ཅིང་། ལག་པས་ཉི་མའི་
དཀྱིལ་འཁོར་སྒྲིབ་པར་བྱེད་དོ། །དེས་ཉི་མའི་དཀྱིལ་འཁོར་ལག་པས་བསྒྲིབས་ནས། དེ་བདག་གིས་ལྷ་མོ་རྣམས་དང་། མཐོ་རིས་བལྟའོ་སྙམ་སྟེ། མདོག་སྡུག་ཅིང་ཡིད་དུ་འོང་བ་བལྟ་བ་ལ་རྩེ་ཚུགས་སུ་འདུད་དོ། །དེ་ནས་རྒྱ་མཚོས་ནི་དེའི་རྐེད་པར་ཕྱིན་ལ། སྔ་མ་བཞིན་དུ་ནོར་བུའི་རྒྱན་ཇི་ལྟ་བུ་ཐོགས་པ་དེ་ལྟ་བུའི་ཁ་དོག་གིས་རྐེད་པ་ཡན་ཆད་ཁྱབ་པར་འདུག་སྟེ། ནོར་བུའི་འོད་ཀྱིས་ལག་པ་སྔོན་པོའམ། དམར་པོའམ། སེར་པོའམ། ནག་པོར་གྱུར་ཏེ། ལག་པས་ཉི་མའི་ཟེར་གྱི་གནོད་པ་བསྒྲིབས་པ་དེ་བྲམ་ཟེ་རྟོག་གེ་པ་ལོག་པའི་ཐོས་པས་བསླུས་པ་རྣམས་ཀྱིས་མཐོང་ནས། ཉི་མ་གཟའ་སྡིག་ཅན་གྱིས་ཟིན་ཏོ། །ཉི་མ་གཟའ་དམར་པོས་ཟིན་ཏོ། །ཉི་མ་གཟའ་སེར་པོས་ཟིན་ཏོ། །ཉི་མ་གཟའ་ནག་པོས་ཟིན་ཏོ་ཞེས་ཟེར་ཞིང་ལས་དང་འབྲས་བུ་རྒྱབ་ཏུ་བོར་ནས་དེ་ལྟ་བུས་འཚོ་བ་ཚོལ་བའི་ཕྱིར། འདི་ལྟར་ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །ལྟས་བཟང་ངོ་། །ལྟས་ངན་པར་འགྱུར་རོ་ཞེས་རྟོག་གེའི་རིག་པས་སྟོན་པར་བྱེད་དོ། །ཡང་དག་པར་ན་ནི་དེས་ཉི་མ་ལག་པས་བསྒྲིབས་ནས་ལྷའི་འཇིག་རྟེན་ཚལ་དང་། ནགས་ཚལ་དང་། ལྟེང་ཀ་དང་། རིན་པོ་ཆེས་མཛེས་པར་བྱས་པ་དང་བཅས་པ་བདེ་བླག་ཏུ་ལྟ་བར་བྱེད་པ་ཡིན་ནོ། །དེ་ནས་ལྷའི་དབང་པོ་བརྒྱ་བྱིན་གྱིས་དེ་མཐོང་ནས་ལྷ་རྣམས་ལ་ངའི་ཤིང་རྟ་སྔོན་དུ་ཐོང་ལ། སྒྲ་གཅན་འདི་ཟློག་ཤིག་ཅེས་བསྒོའོ། །དེ་ནས་ལྷའི་དབང་པོ་བརྒྱ་བྱིན་གྱིས་བསྒོ་བ་བཞིན་དུ་ལྷ་རྣམས་ལུས་རིན་པོ་ཆེ་སྣ་ཚོགས་ཀྱིས་བརྒྱན་ཏེ། སེང་གེ་མོའི་བུ་སྒྲ་གཅན་ག་ལ་བ་དེར་ཐབ་མོ་བྱ་བའི་ཕྱིར་རྒྱུག་གོ །དེ་ནས་དེས་ལྷ་དེ་རྣམས་མཐོང་ནས་ཕྱིར་རང་གི་གནས་སུ་འགྲོ་བར་འགྱུར་རོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ཟླ་བ་ལ་གཟའ་འཇུག་པ་ལ་རྟོག་པར་བྱེད་དེ། ཟླ་བ་ལ་སྒྲ་གཅན་ཇི་ལྟར་འཛིན་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྒྲ་གཅན་གྱི་གཡོག་འཁོར་གང་ཡིན་པ་དེ་དག་རྟག་ཏུ་རྒྱ་མཚོའི་ཆུའི་སྟེང་དུ་རྒྱུ་བ་དེ་དག་གིས་ཟླ་བ་ཤར་ཕྱོགས་ཀྱི་
རིའི་རྩེ་མོ་ནས་འཛམ་བུའི་གླིང་དུ་འོང་བ་ན་བཻ་ཌཱུརྱའི་འོད་ཀྱི་དཀྱིལ་ན་བརྒྱ་འགྱུར་བས་ཀྱང་མཛེས་པར་མཐོང་ནས། སྒྲ་གཅན་གྱི་གཡོག་འཁོར་རྣམས་ཀྱིས་སྒྲ་གཅན་ལ་བསྙད་དེ། རྒྱལ་པོ་ཆེན་པོ་ཟླ་བ་ཉ་བ་དེ་ལྷའི་བུ་མོའི་བཞིན་ཁོ་ན་ལྟར་འདུག་པ་འོང་ངོ་ཞེས་ཟེར་རོ། །དེ་ནས་དེ་དག་ལས་ཐོས་ནས་སྒྲ་གཅན་ལྷའི་བུ་མོ་ལ་ཆགས་པས་ཟླ་བ་ལ་ལྟ་འདོད་པར་གྱུར་ནས། སྒྲ་གཅན་རང་གི་ས་གཞི་ནས་བྱུང་སྟེ། ལྷའི་བུ་མོའི་བཞིན་ལ་རེག་པར་འདོད་པའི་ཕྱིར། ཐག་རིང་པོ་ནས་ཟླ་བའི་དཀྱིལ་འཁོར་ལ་སྒྲིབ་པར་བྱེད་པ་དེའི་ཚེ། རིན་པོ་ཆེ་དུ་མས་སྔ་མ་བཞིན་དུ་ལུས་བརྒྱན་པ་དེ། འཛམ་བུའི་གླིང་པའི་རྟོག་གེ་པ་རྣམས་ཀྱིས་མཐོང་ནས་ཡུལ་གྱི་མི་རྣམས་ལ་བསྙད་དེ། གཟའ་ནག་པོ་ཞིག་གོ །གཟའ་དམར་པོ་ཞིག་གོ །གཟའ་སེར་པོ་ཞིག་གོ །ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །མཚོན་གྱིས་འགྱེད་པར་འགྱུར་རོ། །བདེ་བར་འགྱུར་རོ་ཞེས་ཟེར་རོ། །ནུབ་ཀྱི་བ་ལང་སྤྱོད་དང་། ཤར་གྱི་ལུས་འཕགས་དང་། བྱང་གི་སྒྲ་མི་སྙན་ལོགས་ན་གཟའ་འདུག་སྟེ། ཉི་མ་དང་ཟླ་བ་ལ་སྒྲིབ་ན་ནི་གླིང་དེ་དག་ན་རྟོག་གེ་པ་དག་ཀྱང་མེད། ལོག་པར་སྨྲ་བ་དག་ཀྱང་མེད་དེ། དེ་ལྟར་ན་རྒྱུ་དེ་ལྟ་བུས་གཟས་ཟླ་བ་དང་ཉི་མའི་དཀྱིལ་འཁོར་ལ་སྒྲིབ་པར་བྱེད་དོ། །རྟོག་གེ་པ་རྣམས་ནི་གནམ་གྲུམ་པ་ཡང་སྟོན་པར་བྱེད་དེ། སྒྲ་གཅན་སའི་འོག་ན་འདུག་པ་ལ་ལྷ་མ་ཡིན་རྣམས་ཀྱིས་སྨྲས་པ། ཀྱེ་མ་ཇི་ལྟར་ལྷའི་དབང་པོ་ཀཽ་ཤི་ཀ་རི་རབ་ཀྱི་སྟེང་ན། གྲོང་ཁྱེར་བལྟ་ན་སྡུག་དང་། ལྷའི་འདུན་ས་ཆོས་བཟང་ན་ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་འདུག་ལ་བདེ་བ་རྣམས་ཉམས་སུ་མྱོང་སྟེ། དེ་ལྟར་ལྷ་རྣམས་ཀྱི་རྒྱལ་པོ་ནི་ཀཽ་ཤི་ཀ་ལགས། བདག་ཅག་གི་རྒྱལ་པོ་ནི་ཁྱོད་ལགས་ཏེ། དེ་བས་ཆེས་མཐུ་ཆེ་ཞིང་ཆེས་རྫུ་འཕྲུལ་ཆེ་བ་ལགས་ཀྱིས་བདག་ཅག་དོང་ལ། དབང་པོ་དང་བཅས་པའི་ལྷ་རྣམས་དང་གཡུལ་འགྱེད་པར་བགྱིའོ། །དེའི་གྲོང་ཁྱེར་ཡང་གཞོམ་པར་བགྱིའོ། །ཞེས་ཟེར་རོ། །དེ་ལྟར་ལྷ་མ་ཡིན་གྱི་དབང་པོ་སྒྲ་གཅན། ལྷ་མ་ཡིན་རྣམས་ཀྱིས་རྦད་ནས་ཁྲོས་ཏེ་
སྐད་འབྱིན་ཅིང་གྲོང་ཁྱེར་འོད་ཅན་དེ་ནས་རིངས་པར་བྱུང་སྟེ། གང་གི་ཚེ་དེས་སྐད་ཕྱུང་བ་དེའི་ཚེ། རྟོག་གེ་པ་རྣམས་ན་རེ། གནམ་གྲུམ་པ་འདི་ནི་ལྷའི་ལྟས་ཡིན་ཏེ། ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །མཚོན་གྱིས་འགྱེད་པར་འགྱུར་རོ། །མཚོན་གྱིས་འགྱེད་པར་མི་འགྱུར་རོ་ཞེས་ཟེར་ཏེ། དེ་དག་སྦྱིན་སྲེག་བྱེད་ཅིང་ཞི་བ་དང་། བདེ་ལེགས་སུ་བྱ་བ་དག་བྱེད་དོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་འདི་སྙམ་དུ་སེམས་ཏེ། ཇི་ཙམ་དུ་གྲོང་ཁྱེར་འོད་ཅན་ན། ནོར་བུ་རྣམས་འོད་གསལ་བར་འདུག་པ་ཙམ་དུ་བདག་གི་ཕོ་བྲང་འོད་ཅན་འོད་གསལ་བར་འགྱུར་ལ། འོད་མི་གསལ་ན་ནི་དེ་འོད་ཀྱང་ཞན་པར་འགྱུར་བ་དེ་བཞིན་དུ། ལྷ་རྣམས་ཀྱི་འོད་བྱེད་པ་ཡང་ནོར་བུ་དང་འདྲ་བར་ཟླ་བ་ཉ་བ་དང་ཉི་མ་ཡིན་གྱིས། བདག་གིས་དཀྱིལ་འཁོར་དེ་གཉིས་རེ་རེ་ནས་བསྒྲིབ་པར་བྱའོ། །དེ་ལྟར་བྱས་པ་དང་ལྷ་རྣམས་ཀྱི་འོད་མེད་པར་འགྱུར་རོ་སྙམ་སྟེ། དེ་བློ་དེ་ལྟ་བུས་གལ་ཏེ་ཉིན་པར་བྱུང་ན་ནི་དེས་སྔ་མ་བཞིན་དུ་ལག་པ་ཡ་གཅིག་གིས་ནི་ཉི་མའི་དཀྱིལ་འཁོར་སྒྲིབ་པར་བྱེད་དོ། །ལག་པ་ཡ་གཅིག་གིས་ནི་རི་རབ་ཀྱི་ཟོམ་ལ་ནོམ་པར་བྱེད་དོ། །དེ་ནས་ལྷ་རྣམས་ཀྱིས་དེའི་ལག་པ་མཐོང་ནས། འཐབ་པའི་ཕྱིར་ཆ་བར་བྱེད་དོ། །དེ་ནས་དེ་དུད་འགྲོར་གཏོགས་པ་ཡིན་པས་སྙིང་སྟོབས་ཆུང་ལ་ལྷ་རྣམས་ཀྱི་ལུས་རིན་པོ་ཆེ་སྣ་ཚོགས་ཀྱིས་བརྒྱན་པ་གཟི་བརྗིད་ཀྱི་ལུས་ཅན་དག་མཐོང་ནས་དེ་བག་ཚ་བ་སྐྱེས་ཏེ། ཕྱིར་སའི་འོག་ཏུ་གྲོང་ཁྱེར་འོད་ཅན་དུ་འགྲོ་བར་འགྱུར་བ་འདི་ན་ཉི་མ་དང་། ཟླ་བ་ལ་གཟའ་འཇུག་པ་དང་། གནམ་གྲུམ་པའི་རྒྱུ་གཉིས་པ་ཡིན་ནོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་མ་ཡིན་ཆེན་པོ་སྒྲ་གཅན་གྱི་བདེ་བ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་དེའི་གྲོང་ཁྱེར་ནི་དཔག་ཚད་བརྒྱད་སྟོང་ཡོད་ལ། རི་རབ་ལ་རྟེན་ཏེ། རིན་པོ་ཆེ་སྣ་ཚོགས་ཀྱིས་མཛེས་པར་བྱས་པ། ཆུ་ཀླུང་དང་། ལྟེང་ཀ་དང་། སྐྱེད་མོས་ཚལ་དང་ལྡན་པ། ས་གཞི་གསེར་བཙོ་མས་བརྒྱན་པ། གསེར་གྱི་ཁང་ཁྱིམ་བྱི་རུའི་ཤིང་ལྗོན་པས་མཛེས་
པར་བྱས་པ་དང་ལྡན་པ། དྲིལ་བུ་གཡེར་ཀ་ཅན་གྱི་ཤིང་ལྗོན་པས་སྒྲ་བསྒྲགས་པ། སིལ་སྙན་དང་རོལ་མོའི་སྒྲ་དང་། གླུ་དབྱངས་ཀྱིས་རབ་ཏུ་དགའ་བར་བྱས་པ། མཚེའུ་གསེར་གྱི་པད་མ་དག་གིས་མཛེས་པར་བྱས་པ་དང་ལྡན་པ། གསེར་གྱི་ངང་མོ་དང་། ཟལ་མོ་དང་། ངུར་པ་རྣམས་ཀྱིས་མཛེས་པར་བྱས་པ་དེ་ནི་འདི་ལྟ་སྟེ། ལྷ་ཡུལ་གྱི་བྱ་ལྟ་བུ་རྨ་བྱ་བལྟ་ན་སྡུག་པ་དག་དང་། ནོར་བུའི་མཆུ་ཅན་ལྟ་བུ་དག་དང་། དུས་ཐམས་ཅད་དུ་རབ་ཏུ་དགའ་བཞིན་དུ་འདུག་པ་དག་དང་། འགྲོས་སྡུག་པ་དག་དང་། རིན་པོ་ཆེ་སྣ་བདུན་གྱི་ལུས་ཅན་དག་དང་། བཻ་ཌཱུརྱ་སྔོན་པོའི་མདོག་ཅན་དག་དང་། མཐོན་ཀ་ཆེན་པོའི་མདོག་ཅན་དག་དང་། རབ་ཏུ་དགའ་ཞིང་ཁང་བཟངས་ཀྱི་རྩེ་མོ་མཛེས་པར་བྱེད་པ་དག་དང་། མིག་མི་འཛུམས་ཤིང་ཆར་སྤྲིན་གྱི་འབྲུག་སྒྲ་ལྟ་བུའི་སྒྲ་སྐད་འབྱིན་པ་དག་དང་། ལྟད་མོ་ཆེ་བ་དག་དང་། བྱའོ་ཅོག་དང་འདྲ་བར་སྟོན་པ་དག་དང་། མཐོང་ན་ཡིད་དང་འཐད་པ་དག་དང་། མིག་འགྲམ་རིང་བ་ཤ་སྟག་དང་། བྱ་ཨག་ནི་ཙུ་ཌ་ཞེས་བྱ་བ། མིག་ཟུར་བྱེད་པ་མགོ་གཉིས་པ་ལ་ཆུང་མ་གཉིས་དང་ལྷན་ཅིག་འགྲོགས་པ་དག་དང་། མེ་ཏོག་གི་ཁུ་བས་མྱོས་ཤིང་། བ་ཀུ་ལའི་མེ་ཏོག་བཞིན་དུ་ལྷན་ཅིག་གཏམས་པ་དག་དང་། སྐད་ཀྱི་གདངས་བྲག་ཅ་ཅན་གསེར་གྱི་རྭ་ཅན་དག་དང་། བཻ་ཌཱུརྱའི་རྭ་ཅན་ཆུ་ལ་རྩེ་བ་དག་དང་། དུས་ཚིགས་སུ་རྒྱགས་པ་དང་། རྟག་ཏུ་རྒྱགས་ཤིང་རབ་ཏུ་དགའ་བ་དག་དང་། མིག་གི་མདོག་སྣུམ་པ་ཤ་སྟག་དང་། བྱ་ཀ་ར་ད་ཞེས་བྱ་བ་མེའི་མདོག་ཅན་རྔ་སྒྲ་ལྟ་བུའི་གདངས་དང་ལྡན་པ་ཤ་སྟག་དང་། བྱ་པུ་སྤ་ད་མ་ཞེས་བྱ་བ་མདོག་འཇམ་ཞིང་གློག་གི་ཁ་དོག་ཅན་དག་དང་། སྤུ་སྡུག་སྤེལ་མ་ཅན་ནགས་ཁྲོད་དུ་རྒྱུ་བ་དག་དང་། སལ་སུལ་དང་། གཤང་གཤོང་དག་ན་རྒྱུ་བ་དག་དང་། རྟག་ཏུ་རྒྱགས་པ་ཤ་སྟག་དང་། བྱ་བྷྲིང་ག་ར་ཛ་དང་། ཧུ་ལུ་ཀུན་ད་དང་། མུ་ལུ་ཀུན་ད་དང་། དྒག་ཀ་གན་དྷ་ཞེས་བྱ་བ་ཁང་ཁྱིམ་ལ་གནས་པ། མདོག་འཇའ་ཚོན་ལྟར་འདུག་པ་དག་དང་། མེ་ཏོག་གི་ཆུན་པོ་མཆོག་ལྟ་བུ་དག་དང་། མགྲིན་པ་མཛེས་པ་དག་དང་། མགྲིན་པ་དམར་བ་དག་
དང་། པད་མ་ལྟ་བུ་དག་དང་། འདབ་མ་འཇམ་པ་དག་དང་། འདབ་མ་དྲག་ཏུ་བསྐྱོད་པ་དང་། འདབ་མ་ཁ་དོག་དང་དབྱིབས་དུ་མ་དང་ལྡན་པ་དག་དང་། མཆུ་རིང་ཞིང་ནོར་བུ་དང་། གསེར་ལས་གྲུབ་པ་ཤ་སྟག་དང་། ཁུ་བྱུག་དང་། བྱ་བང་ལུས་མཁྲེགས་ཤིང་མགྲིན་པ་མཐོ་ལ་དྲི་མ་མེད་ཅིང་འདབ་མའི་མདོག་སྡུག་ལ་གཉིས་ཤིང་ནམ་མཁའ་ལ་ལྡིང་བ་དང་། གཉིས་ཤིང་ཆུ་འཐུང་བ་དང་། གཉིས་ཤིང་ཐང་ལ་འགྲོགས་པ་དང་། གར་བྱེད་བཞིན་དུ་སྐད་འབྱིན་པ་དང་། རྒྱགས་ཤིང་སྐད་འབྱིན་པ་ཤ་སྟག་དང་། ཤིང་ལྗོན་པ་བ་ཀུ་ལ་ལ་གནས་པའི་བྱའི་རིགས་རྣམས་སྐྱེད་མོས་ཚལ་དང་། ནགས་ཚལ་དུ་བཅས་པའི་གྲོང་ཁྱེར་དེ་ཁོ་ར་ཁོར་ཡུག་ན་གནས་ཤིང་སྐད་འབྱིན་པ་དང་། གྲོང་ཁྱེར་དེ་ན་མཚོ་ཡོད་པ་རྣམས་པད་མའི་ཚལ་རྣམ་པ་སྣ་ཚོགས་ཀྱིས་གང་ལ། ནགས་ཚལ་གྱིས་འཁོར་ཅིང་མཛེས་པར་བྱས་སོ། །གྲོང་ཁྱེར་དེ་ན་གསེར་གྱི་ཤིང་ལྗོན་པའི་ནགས་ཚལ་བཞི་ཡོད་དེ། གྲོང་ཁྱེར་དེའི་ནགས་ཚལ་དེ་དག་ཐམས་ཅད་ཀྱི་ཚད་ནི་དཔག་ཚད་བརྒྱ་ཡོད་དོ། །དེ་ན་ནགས་ཚལ་གཅིག་གི་མིང་ནི་རྩེད་མོ་ཅན་ཞེས་བྱའོ། །གཅིག་གི་མིང་ནི་རྒྱགས་པའི་ཀུན་དགའ་ར་བ་ཞེས་བྱའོ། །གཅིག་གི་མིང་ནི་ངང་པའི་གནས་ཞེས་བྱའོ། །གཅིག་གི་མིང་ནི་ཁུ་བྱུག་གི་ཀུན་དགའ་ར་བ་ཞེས་བྱ་སྟེ། ནགས་ཚལ་བཞི་པོ་དེ་རྣམས་ཀྱིས་གྲོང་ཁྱེར་དེའི་ཁོ་ར་ཁོར་ཡུག་ནས་སྦ་བར་བྱས་སོ། །ནགས་ཚལ་དེ་ན་ཤིང་ལྗོན་པའི་རིགས་སུམ་སྟོང་ཡོད་དེ། ཤིང་ལྗོན་པ་དེ་དག་གི་ནང་ན་གཙོ་བོ་ནི་འདི་ལྟ་སྟེ། སྤྲིན་ལྟར་སྒྲིབ་པ་དང་། ཡལ་ག་མཐོ་ལ་འཇམ་པ་དང་། བྱ་གནས་དང་། རྟག་ཏུ་མེ་ཏོག་རྒྱས་དང་། དཔག་ཚད་གཅིག་ཏུ་ངད་ལྡང་བ་དང་། བུང་བས་གང་བ་དང་། སྦྲང་རྩི་འཛག་དང་། གསེར་མདོག་ཅན་དང་། ཆང་འཛག་དང་། ཙན་དན་ས་མཆོག་པ་དང་། སྤྲིན་ནག་པོའི་མདོག་ཅན་དང་། ལོ་མ་བདུན་པ་དང་། ཀེ་ཏ་ཀ་དང་། ཤིང་དྒག་ཀ་དང་། སེར་བུ་ངད་ལྡང་དང་། ཨ་ག་རུ་ནག་པོའི་མདོག་ཅན་དང་། ཀུན་ཏུ་མིག་ལྡན་དང་། སྒྲོན་ཤིང་དང་། ནོར་བུའི་ལྗོན་ཤིང་དང་། མེ་མདོག་དང་། མྱ་ངན་འཚང་སྔོན་པོ་དང་། མྱ་
ངན་འཚང་དམར་པོ་དང་། བ་ཀུ་ལ་དང་། ཨརྫུ་ན་དང་། ནི་ཙུ་ལ་དང་། སིན་དུ་བ་ར་ཏི་དང་། ཏི་ལ་ཀ་དང་། ནི་པ་ཞེས་བྱ་བ་རྣམས་ཏེ། ཁོ་ར་ཁོར་ཡུག་ནས་པད་མའི་ཚལ་གྱིས་འཁོར་བ། མེ་ཏོག་རྒྱས་དང་། མ་དུ་ཀ་དང་། ན་ལི་ཀེ་ར་དང་། པ་ན་ས་དང་། ཆུ་ཤིང་དང་། ཀུ་བ་འཕྱང་དང་། བྱི་དུ་ར་དང་། ས་འགེབས་དང་། གནམ་འགྲིབ་དང་། སྤྲིན་མདོག་ཅན་དང་། མཐོང་དགའ་དང་། སྤྲིན་འཁོར་དང་། བྱ་མངས་དང་། བུང་མངས་དང་། སྤོས་ཕྲེང་ལྡན་དང་། མེ་ཏོག་དྲི་ཞིམ་དང་། ཁ་དོག་སྣ་ཚོགས་ཅན་དང་། མེ་ཏོག་ཅན་དང་། དུས་ཚིགས་ཀུན་དགའ་དང་། དུས་ཚིགས་སོ་སོར་དགའ་དང་། བུད་མེད་མཐོང་དགའ་དང་། བུད་མེད་སྦྱིན་དང་། རྒུན་ཤིང་དང་། ཀ་པིད་ཐ་དང་། པ་རུ་ཥ་ཀ་དང་། ཁ་དོག་དང་རྒྱན་གྱིས་བཀླུབས་པ་དང་། འོད་ཅན་དང་། ཆུ་འགྲམ་སྐྱེས་དང་། རི་མཐོངས་དགའ་བྱེད་དང་། རྒྱང་རིང་སྣང་དང་། དེ་ལྟ་བུ་ལ་སོགས་པ་ཁ་ཅིག་ནི་འཛམ་བུའི་གླིང་ན་སྐྱེ་བ། ཁ་ཅིག་ནི་བྱང་གི་སྒྲ་མི་སྙན་ན་སྐྱེ་བ། ཤིང་ལྗོན་པ་ཁ་ཅིག་ནི་ལྷ་མ་ཡིན་གྱི་གྲོང་ཁྱེར་ན་སྐྱེ་བ་དག་ཡོད་དོ། །ལྷ་མ་ཡིན་གྱི་གྲོང་ཁྱེར་སྣང་ལྡན་དེ་ན་ཤིང་ཁ་ཅིག་ནི་མེ་ཏོག་འབའ་ཞིག་གི་ཤིང་དང་། ཁ་ཅིག་ནི་མེ་ཏོག་དང་ལྡན་པའི་ཤིང་དང་། ཁ་ཅིག་ནི་འབྲས་བུའི་ཤིང་དང་། ཁ་ཅིག་ནི་ཆང་འབྱུང་བའི་ཤིང་དག་ཡོད་དོ། །ལྷ་མ་ཡིན་གྱི་དབང་པོ་ཆེན་པོ་སྒྲ་གཅན་དེའི་ཁོ་ར་ཁོར་ཡུག་ནས་ལྷ་མ་ཡིན་གྱི་བུ་མོ་དག་གིས་བསྐོར་ཏེ། ཤིན་ཏུ་གར་བྱེད་ཅིང་དགོད་ལ་ཅི་མཛེས་སུ་འཆོས་ཏེ། རབ་ཏུ་རྩེ་ཞིང་རབ་ཏུ་དགའ་བར་བྱེད་དེ། ཀུན་ནས་ཉོན་མོངས་པ་ཅན་རིང་པོར་མི་ཐོགས་པ། མི་རྟག་ཅིང་མི་བརྟན་པ། མི་བདེ་བར་འགྱུར་བའི་བདེ་བ་ཉམས་སུ་མྱོང་ངོ་། །ལྷ་མ་ཡིན་གྱི་དབང་པོ་དེ་ལ་བཙུན་མོ་བཞི་ཡོད་དེ། གཅིག་གི་མིང་ནི་ཡིད་བཞིན་མཛེས་འགྱུར་ཞེས་བྱ། གཅིག་གི་མིང་ནི་སྤོས་ཀུན་ལྡན་ཞེས་བྱ། གཅིག་གི་མིང་ནི་ནགས་ཚལ་མཛེས་ཞེས་བྱ། གཅིག་གི་མིང་ནི་བཀྲ་ཤིས་མ་ཞེས་བྱའོ། །དེ་དག་གི་གཡོག་མོ་ཡང་ལྷ་མ་ཡིན་གྱི་བུ་མོ་ཁྲག་ཁྲིག་ཕྲག་བཅུ་གཉིས་ཡོད་དེ། དེའི་ནང་ན་དེའི་ཁོ་ར་ཁོར་ཡུག་ནས་བསྐོར་ཏེ།
འདོད་པ་ལ་སེམས་ཞེན་ཅིང་འདུག་གོ །དེའི་ཚེ་ངོ་མཚར་རུང་བའི་བདེ་བ་དང་། ཡུལ་གྱི་ལོངས་སྤྱོད་གང་ཡིན་པ་དེ་དག་གི་མིང་ཡང་ཤེས་པར་སླ་བ་མ་ཡིན་ནོ། །དེ་དེ་ན་ལྷ་མ་ཡིན་བྱེ་བ་ཕྲག་དུ་མས་ཞབས་འབྲིང་བྱས་ཏེ། ཁང་བཟངས་ཀ་བ་སྟོང་གིས་མཛེས་པར་བྱས་པ། དངུལ་ལས་བྱས་པའི་ཁང་བཞག་གིས་དཀྲིགས་པ་དེ་ན། རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ལ་སྤྱོད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སྒྲ་གཅན་གྱི་ལས་དང་ཆོས་ལ་བརྟགས་ཏེ། ལས་གང་གིས་ན་ལྷ་མ་ཡིན་གྱི་དབང་པོ་སྒྲ་གཅན་འགྲོ་བ་དེ་ལྟ་བུར་སོང་ཤིག་གུ། འདི་ལས་ཅི་ཞིག་བྱས་ན་ལས་དེའི་རྣམ་པར་སྨིན་པས་འབྲས་བུ་འདི་ལྟ་བུ་མྱོང་བར་འགྱུར་སྙམ་མོ། །འདི་ལ་ཚིགས་སུ་བཅད་པ་དག་ཡོད་དེ། རྒྱུ་མེད་པར་ནི་བདེ་བ་དག །ཇི་ལྟར་བྱས་ཀྱང་མྱོང་མི་འགྱུར། །འབྲས་བུ་ལས་དང་འབྲེལ་པ་སྟེ། །འབྲས་བུ་ས་བོན་རག་ལས་བཞིན། །ལེགས་བྱས་འབྲས་བུ་དགེ་བ་སྟེ། །ལྷ་དང་མིར་ནི་ངེས་པར་འགྱུར། །ཉེས་བྱས་ངན་སོང་གསུམ་དུ་ངེས། །ལྷ་མིན་འཇིག་རྟེན་ཇི་ལྟ་བུར། །ཤེས་རབ་ཞན་ཞིང་ཤེས་རབ་འཆལ། །དུད་འགྲོའི་སྐྱེ་གནས་སྐྱེས་དེ་དག །ཇི་ལྟར་བདེ་བ་མྱོང་བ་མཐོང་། །འདི་ལ་རྒྱུ་ཞིག་ཡོད་པར་འགྱུར། །དེ་ལྟར་དགེ་སློང་མཆོག་ཏུ་ཡིད་གཞུངས་པ་དང་ལྡན་པ་དེས། ཐོས་པ་ལས་བྱུང་བའི་ཤེས་རབ་ཀྱིས་བརྟགས་ན། དེ་སྔོན་བྲམ་ཟེ་རིག་བྱེད་དང་། རིག་བྱེད་ཀྱི་ཡན་ལག་དང་། གཏམ་རྒྱུད་ལྷུར་བྱེད་པ། སྦྱིན་པ་ལ་མཆོག་ཏུ་དགའ་བ་ཞིག་ཏུ་གྱུར་ནས། དེས་ནགས་ཁུང་གི་ལམ་དུ་ཞུགས་པ་རྣམས་ལ་ཡང་བཏུང་བ་དང་། ཁ་ཟས་དང་། འབྲས་བུ་དང་། རྩ་བ་དང་། ཆུ་དང་། ཁྱིམ་དང་། མལ་ཆ་དང་། སྟན་གྱི་སྦྱིན་པ་དག་བྱིན་ལ། སྒོ་བཞིན་འཁོད་པའི་དམན་པ་དང་། ལོང་བ་དང་། བཀྲེན་པ་དང་། སྡུག་ཕོངས་པ་རྣམས་ལ་ཡང་ཟས་དང་། སྐོམ་དང་། མལ་ཆ་དང་། སྟན་མང་པོ་དག་བྱིན་ཏེ། དེའི་ཚེ་ནི་ཡང་དག་པའི་ལྟ་བ་དང་ལྡན་པར་གྱུར་ཏོ། །དེ་ལན་ཅིག་གཅིག་ན་དགེ་འདུན་གྱི་གཙུག་ལག་
ཁང་མི་ཐི་ལའི་ཚལ་ཞེས་བྱ་བ་རྒྱར་དཔག་ཚད་ཉི་ཤུ་ཡོད་ལ། མཆོད་རྟེན་འབུམ་ཕྲག་དུ་མས་བརྒྱན་པ། གསེར་འབར་བས་འཁོར་བ་ཞིག །རྒྱལ་པོ་ནི་མི་ཞེས་བྱ་བ་ལ་སོགས་པ་རྒྱལ་པོ་ལྔ་བརྒྱས་བྱས་པ་ཡོད་དེ། དེའི་ནང་ན་ཡང་མཆོད་རྟེན་འོག་གི་གདན་གསེར་ལས་བྱས་པ། ཁོ་ར་ཁོར་ཡུག་ནས་གསེར་འབར་བས་འཁོར་བ། རིན་པོ་ཆེ་སྣ་བདུན་གྱིས་མཛེས་པར་བྱས་པ། འབུར་རྣམ་པ་སྣ་ཚོགས་ཀྱིས་མཛེས་པར་བྱས་པ། སངས་རྒྱས་ཀྱི་ཐེག་པའི་ཚིག་སྣ་ཚོགས་ཀྱིས་མཛེས་པར་བྱས་པ་ཞིག་ཡོད་ལ། མཆོད་རྟེན་དེ་ལ་ཡང་ཚལ་དང་། ནགས་ཚལ་བྲིས་པ་དག་ཡོད་དེ། སྔ་མ་བཞིན་ནོ། །དེའི་ཚེ་ན་ཤིང་ལྗོན་པ་གང་དག་སྒྲ་གཅན་གྱི་གནས་སུ་བྲིས་པ་དེ་དག་ཐམས་ཅད་འཛམ་བུའི་གླིང་ན་ཡོད་དེ། རི་མོ་མཁན་རྣམས་ཀྱིས་ཇི་ལྟར་མཐོང་བ་བཞིན་དུ་མཆོད་རྟེན་དེ་ལ་བྲིས་སོ། །རྫིང་བུ་མང་པོ་བྱས་པ་གང་བ་དག་ཀྱང་ཡོད་དེ་སྔ་མ་བཞིན་ནོ། །དེ་ལན་ཅིག་གཅིག་ཤིང་རྟ་བཞི་སྟོང་དང་ནགས་ཁུང་དེར་སོང་སྟེ། འགྲོན་པོ་ནགས་ཁུང་དུ་དོང་བ་རྣམས་ཀྱི་ཕྱིར་ཟས་དང་ཐུག་པ་དང་། ཆུ་དག་ཁྱེར་རོ། །དེ་ནས་རེ་ཞིག་ན་མཆོད་རྟེན་འཕང་དུ་དཔག་ཚད་གཉིས་ཡོད་ལ། ཆུ་ཞེང་དུ་རྒྱང་གྲགས་ལྔ་ཡོད་པ་དེར་མི་སྡིག་ཅན་ཞིག་གིས་གསར་དུ་མེ་བཏང་ནས་མེ་དེས་མཆོད་རྟེན་དེ་ཚིག་ལ་ཐུག་སྟེ། བྲམ་ཟེ་དེས་མེ་ཤོར་བ་དེ་མཐོང་ནས། དེ་འདི་སྙམ་དུ་སེམས་ཏེ། བདག་ལ་འདིའི་བསོད་ནམས་ཀྱང་མི་དགོས། འདི་ཐམས་ཅད་མཁྱེན་པའི་གནས་ཀྱང་མ་ཡིན་མོད་ཀྱི། འོན་ཀྱང་འདི་མཛེས་པ་ཁོ་ན་ཞིག་པས་མེས་ཚིག་ན་མི་རུང་ལ། རྒྱལ་པོས་ཀྱང་བདག་ལ་བཀའ་གྱོད་སྨྲར་མེད་པར་བྱའོ་སྙམ་སྟེ། དེས་དད་ཅིང་གུས་པ་མེད་པར་ཤིང་རྟ་དེ་དག་གིས་ཆུ་བསྐྱས་ནས་མཆོད་རྟེན་དེ་ལས་མེ་བསད་དེ། འདི་ལྟར་དེས་ཆེད་ཆེར་མི་འཛིན་པར་རྒོད་བཞིན་དུ། གལ་ཏེ་འདི་ལས་བསོད་ནམས་ཀྱི་རྣམ་པར་སྨིན་པ་ཞིག་ཡོད་ན་ནི། དེ་རགས་པ་ཞིག་ཡིན་གྲང་གིས། དེའི་རྣམ་པར་སྨིན་པས། ཅི་ནས་ཀྱང་འདོད་པའི་ཁམས་ན་བདག་ལས་ལུས་ཆེ་བ་གཞན་མེད་པ་ཙམ་དུ་གྱུར་ཅིག་ཅེས་བྱས་ཏེ། དད་པ་མེད་པ་དང་། སེམས་པ་མེད་པ་དང་།
རྟག་ཏུ་འཐབ་པར་སེམས་པའི་ཕྱིར། ལས་དེའི་མཐུས་སེམས་པ་མེད་པའི་ལས་དེའི་འབྲས་བུ་ཞིང་དམ་པའི་བསོད་ནམས་ལས་ལྷ་མ་ཡིན་གྱི་དབང་པོར་སྐྱེས་པར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སྒྲ་གཅན་གྱི་ཡུལ་ས་གཞན་ཡང་ཇི་ཙམ་ཞིག་ཡོད་ཅེས་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། ས་གཞི་དཔག་ཚད་ཁྲི་སུམ་སྟོང་ཡོད་དེ། གསེར་གྱི་ས་གཞི་ལ་ཚལ་དང་། ནགས་ཚལ་དང་། ལྟེང་ཀ་དང་། རྫིང་དང་། བྱ་དང་། ཤིང་ལྗོན་པ་དང་། ཁྱིམ་དང་། གྲོང་ཁྱེར་དང་། གླིང་དང་། ལྷ་མ་ཡིན་གྱི་བུ་མོས་གང་བ་དང་། ནོར་བུ་མང་པོ་དང་ལྡན་པའི་ཐང་བུད་མེད་གདུ་བུས་བརྒྱན་པ་བཞིན་དུ་མཛེས་པ་དེ་ན་ལྷ་མ་ཡིན་གྱི་དབང་པོ་སྒྲ་གཅན་དབང་བྱེད་ཅིང་དགྲ་ཟླ་མེད་ལ། རང་དགར་བྱེད་ཅིང་གར་དགའ་བར་འགྲོ་བ་དང་། ལྷ་མ་ཡིན་གྱི་དབང་པོའི་ཡུལ་ས་དེ་ན་ལྷ་མ་ཡིན་རྣམས་ཀྱི་ཡུལ་བཅུ་གསུམ་ཡོད་དེ། དེ་ན་ལྷ་མ་ཡིན་རྣམས་གནས་སོ། །དེ་རྣམས་ཀྱི་མིང་ལ་འདི་ལྟ་སྟེ། ཟ་བ་པོ་རྣམས་དང་། རབ་ཏུ་རྒྱུག་པ་རྣམས་དང་། ནད་གཏོང་བ་ལ་དགའ་བ་རྣམས་དང་། ནོར་བུའི་དོ་ཤལ་ཐོགས་པ་རྣམས་དང་། བུང་བ་ལྟར་འཁྱིལ་པ་རྣམས་དང་། མིག་དམར་བ་རྣམས་དང་། ཀུན་ཏུ་རྒྱུག་པ་རྣམས་དང་། ཆུ་ན་གནས་པ་རྣམས་དང་། ནམ་མཁའ་ལ་གནས་པ་རྣམས་དང་། ལྷུན་པོའི་ཁོང་ན་གནས་པ་རྣམས་དང་། ལྟེང་ཀ་སྡུག་གུ་རྣམས་དང་། ཉ་གདོང་པོ་རྣམས་དང་། ལམ་ཆེན་ལྡན་རྣམས་སོ། །དེ་དག་གི་འཕེལ་འགྲིབ་ནི་གང་གི་ཚེ་སྐྱེ་དགུ་རྣམས་དགེ་སྦྱོང་དུ་མི་འཛིན། བྲམ་ཟེར་མི་འཛིན་པ་དེའི་ཚེ་ནི་ལྷའི་ཕྱོགས་ནི་འགྲིབ་པར་འགྱུར་ལ། ལྷ་མ་ཡིན་གྱི་ཕྱོགས་ནི་འཕེལ་བར་འགྱུར་ཏེ། དེའི་ཚེ་ཆོས་དང་མི་ལྡན་པ་རྣམས་ནི་ཆེས་མཐུ་ཆེ་ལ། ལྷ་རྣམས་ནི་ཞན་པར་འགྱུར་རོ། །གང་གི་ཚེ་སྐྱེ་དགུ་རྣམས་དགེ་སྦྱོང་དུ་འཛིན་ཅིང་བྲམ་ཟེར་འཛིན་པ་དེའི་ཚེ་ནི། ལྷ་མ་ཡིན་གྱི་ཕྱོགས་ནི་འགྲིབ་པར་འགྱུར་ལ། ལྷའི་ཕྱོགས་ནི་འཕེལ་བར་འགྱུར་ཏེ། ལྷ་དང་ལྷ་མ་ཡིན་
གཉིས་ཀྱི་འཕེལ་འགྲིབ་ནི་དེ་ལྟར་ཆོས་དང་ཆོས་མ་ཡིན་པ་ལ་རག་ལས་སོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སྒྲ་གཅན་གྱི་ཡུལ་ན་གནས་པའི་ལྷ་མ་ཡིན་རྣམས་ཀྱི་ལས་དང་ཆོས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་རབ་ཀྱིས་བརྟགས་ན། གང་དག་གིས་དུད་འགྲོ་རྣམས་ལ་སྲོག་གི་སྦྱིན་པ་བྱས་ཏེ། ཉ་རྣམས་གསོན་པར་བྱ་བའི་ཕྱིར། ཉ་བའི་རྒྱ་རྣམས་དྲལ་བ་དང་། གང་དག་གིས་རྙེད་པ་འདོད་པའི་ཕྱིར་རམ། གྲགས་པ་འདོད་པའི་ཕྱིར་རམ། རྒྱལ་པོས་བཀའ་སྩལ་པའི་ཕྱིར་རམ། རིགས་ཀྱི་ཆོས་ལུགས་སུ་ཡོད་པའི་ཕྱིར་སྲོག་ཆགས་ལེགས་པར་བསྲུངས་ལ། ལྷག་མ་གཞན་ནི་ཆོས་མ་ཡིན་པ་ཐམས་ཅད་བྱེད་པ་དེ་དག་ལུས་དང་བྲལ་བའི་འོག་ཏུ་ངན་སོང་ལོག་པར་ལྟུང་བ་སྒྲ་གཅན་གྱི་ཡུལ་དུ་ལྷ་མ་ཡིན་དུ་སྐྱེ་བར་འགྱུར་ཏེ། དེ་དག་གི་ཚེའི་ཚད་ཀྱི་ཁྱད་པར་ནི་མི་རྣམས་ཀྱི་ལོ་ལྔ་བརྒྱ་གང་ཡིན་པ་དེ་དེ་དག་གི་ཉིན་ཞག་གཅིག་ཏུ་རྩི་བ་དེ་ལྟ་བུའི་ལོ་ལྔ་སྟོང་ཐུབ་སྟེ། བར་མ་དོར་འཆི་བ་ནི་ཡོད་དོ། །རབ་འབྲིང་དུ་འགྱུར་བ་ནི་སེམས་ལ་རག་ལས་སོ། །བོང་ཚོད་དང་ཁ་དོག་དང་མཐའ་ཡང་ལས་དང་ཆོས་ལ་རག་ལས་ཏེ། སེམས་ཅན་རྣམས་ཀྱི་སེམས་དང་མོས་པ་སྣ་ཚོགས་ལས་འགྱུར་རོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉེར་གཉིས་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། རྒྱ་མཚོའི་གཏིང་སྒྲ་གཅན་གྱི་ས་གཞི་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པ་ཤིན་ཏུ་གསལ་ཞིང་རྣམ་པར་དག་པས། སྒྲ་གཅན་གྱི་ས་གཞིའི་འོག་ན་ས་གཞི་གཉིས་པ་ཡུལ་ས་ཐ་དད་པ་ཟླ་བའི་ཕྲེང་བ་ཞེས་བྱ་བ་དཔག་ཚད་ཉི་ཁྲི་ཆིག་སྟོང་ཡོད་པ་ཇི་ལྟར་འདུག་པ་མཐོང་ངོ་། །དེ་ན་ལྷ་མ་ཡིན་མགུལ་ཕྲེང་ཞེས་བྱ་བ་གནས་པ་ལྷ་མ་ཡིན་དེ་རྣམས་ཀྱི་བདག་པོ་མགུལ་ཕྲེང་ཞེས་བྱ་བ་ཞིག་ཡོད་དེ། ས་གཞི་དེ་ན་གཉིས་ཤིང་རྩེ་བ་ཞེས་བྱ་བའི་གྲོང་ཁྱེར་དཔག་ཚད་བརྒྱད་སྟོང་པ་ཚལ་དང་། ནགས་ཚལ་དང་། ལྟེང་ཀ་དང་ལྡན་པ་པད་མའི་རྫིང་དང་། འབབ་ཆུ་དང་། རི་སུལ་དང་། གསེར་གྱི་རི་བོ་
དང་། གསེར་གྱི་བྲག་དང་། ཕ་བོང་དང་། བྱ་སྐྱིབས་དང་། རི་དགས་དང་། བྱ་སྤུ་སྡུག་གུ་རྣམས་ཀྱིས་མཛེས་པར་བྱས་པ། བཻ་ཌཱུརྱའི་ས་གཞི་དང་། གསིང་མ་མདོག་སྡུག་གུས་མཛེས་པར་བྱས་པ། བྱ་སྣ་ཚོགས་སྐད་སྙན་པ་འབྱིན་པ་ལྷ་མ་ཡིན་གྱི་ཚོགས་མང་པོ་ཡུལ་གྱི་སྐྱེ་བོ་འབྱོར་པས་གང་བ་ཀུན་ནས་རིན་པོ་ཆེ་སྣ་བདུན་མཆོག་ཏུ་ཡིད་དུ་འོང་བས་བརྒྱན་པ། ཤིང་ལྗོན་པ་དག་གིས་སྔ་མ་བཞིན་དུ་མཛེས་པར་བྱས་པ། ཀླུའི་མེ་ཏོག་དང་། ཀླུའི་ཤིང་མྱ་ངན་འཚང་དང་། ཤིང་དྷ་བ་དང་། སེང་ལྡེང་དང་། རྒྱ་སྐྱེགས་ཀྱི་ཤིང་སྣ་ཚོགས་ཀྱིས་མཛེས་པར་བྱས་པ། དེ་ན་ཤིང་ལྗོན་པའི་སྣ་གྲངས་འདི་ལྟ་བུ་དག་ལྷག་པར་མང་དུ་ཡོད་དེ་འདི་ལྟ་སྟེ། ནི་ཤ་དང་། པྲ་ཧ་ས་དང་། ཨི་ཏི་ནི་ཤ་དང་། བ་གུ་ད་དང་། ནི་ཏན་ཏ་དང་། མེ་ཏོག་ལྗིད་དང་། ཀུན་ཏུ་དགའ་དང་། མེ་ཏོག་རྒྱས་དང་། ལྗིད་ཀྱིས་ནོན་དང་། ལོ་ལྔ་ཞིང་མེ་ཏོག་འབྱུང་བ་དང་། བུང་བ་མངོན་དགའ་དང་། སྒྲ་འུར་འུར་དང་། བྱ་སྐད་ཅ་ཅོ་ཅན་དང་། དཀར་པོར་སྣང་དང་། ལོ་མས་རྒྱས་རྣམས་ཏེ། གཉིས་ཤིང་རྩེ་བའི་གྲོང་ཁྱེར་དེ་ན་ཤིང་ལྗོན་པའི་སྣ་གྲངས་དེ་ལྟ་བུ་དེ་དག་ལྷག་པར་མཐོང་ངོ་། །གྲོང་ཁྱེར་དེ་ཡང་གསེར་གྱི་རི་རྩེ་བཞི་པའི་དབུས་ན་འདུག་སྟེ། འདི་ལྟ་སྟེ། རིའི་རྩེ་མོ་དགའ་བྱེད་དང་། རིའི་རྩེ་མོ་ལྷང་ཚེར་དང་། རིའི་རྩེ་མོ་རྩེ་མི་སྣང་དང་། རིའི་རྩེ་མོ་ཡིད་འོང་གསེར་ཞེས་བྱ་བ་རྣམས་ཏེ། དེ་དག་ཀྱང་ཀུན་ནས་འཕང་དུ་དཔག་ཚད་ལྔ་སྟོང་ཡོད་དོ། །དེ་དག་གི་ཚལ་རྣམས་ཀྱང་འབབ་ཆུ་དང་། ཆུ་བོ་དང་། ཆུ་བསིལ་དང་། རི་དགས་ཀྱི་ཚོགས་ཁ་དོག་རྣམ་པ་སྣ་ཚོགས་ཅན་རྣམས་ཀྱིས་མཛེས་པར་བྱས་པ། སྐྱེས་པ་དང་། བུད་མེད་ཀྱི་ཚོགས་རྟག་ཏུ་དགའ་བ་རྣམས་ཀྱིས་གང་བ། རིན་པོ་ཆེའི་སྒོ་སྣ་ཚོགས་རྣམས་ཀྱིས་མཛེས་པར་བྱས་པ། ཙན་དན་ས་མཆོག་གི་ཤིང་ལྗོན་པ་འདུད་པའི་རླུང་ལྟར་རྟག་ཏུ་བསིལ་ཞིང་དྲི་ཞིམ་པ་རྣམས་ཀྱིས་ཉེ་བར་འཚོ་བ། མེ་ཏོག་གི་རྣམ་པ་དག་གིས་རྟག་ཏུ་བརྒྱན་པ། རྨ་བྱ་འབུམ་ཕྲག་དུ་མ་སྒྲ་སྙན་པ་འབྱིན་པ། ལྷ་མ་ཡིན་ཆེན་པོས་བསྐྱངས་པ། གྲང་བ་དང་ཚ་བས་ཉམས་པ་
མེད་ལ། སྐྱེ་བོ་རབ་ཏུ་དགའ་བས་རྟག་ཏུ་གང་བ། རོལ་མོའི་སྒྲ་དང་། གླུ་དང་། བྲོ་དང་། དགོད་པས་རྟག་ཏུ་དགའ་བ་ཡིན་ནོ། །ལྷ་མ་ཡིན་གྱི་གྲོང་ཁྱེར་ཆེན་པོ་སྐར་ཕྲེང་དེ་དག་གི་དབུས་ན་མཚོ་ཆེན་པོ་ཀུན་ནས་ཆུ་དང་ཞེང་དུ་དཔག་ཚད་ལྔ་ཡོད་པ། རབ་ཏུ་དང་བ། རོ་ཤིན་ཏུ་ཞིམ་པ། འདམ་རྫབ་དང་། རྙོག་པ་མེད་པ། ཆུ་རྟག་པ། ཟླ་བ་གཉིས་པ་ལྟར་རབ་ཏུ་གསལ་བ་ཡིན་ནོ། །སྐར་ཕྲེང་གི་དབུས་ན་མཚོ་ཡོད་པ་གང་ཡིན་པ་དེ་ནི་ཀུན་མཐོང་ཞེས་བྱ་ལ། དེའི་མཐུ་ནི་འདི་ལྟ་བུ་ཡིན་ཏེ། གང་གི་ཚེ་ལྷ་མ་ཡིན་གཡུལ་འགྱེད་པར་བྱེད་པ་དེའི་ཚེ་ལྷ་མ་ཡིན་མགུལ་ཕྲེང་དག་མཚོ་ཀུན་མཐོང་དེར་འགྲོ་བར་བྱེད་དོ། །དེ་དག་མཚོན་ཆ་དང་། གོ་མཚོན་སྣ་ཚོགས་ཐོགས་ནས་གཡུལ་འགྱེད་པའི་ལྟས་བལྟ་བའི་ཕྱིར་མཚོ་དེ་ཡོངས་སུ་བསྐོར་ནས་འཁོད་དོ། །དེ་དག་གི་གཟུགས་བརྙན་དེ་དག་ཇི་ལྟར་མེ་ལོང་གཡའ་མེད་པའི་ནང་ན། གཟུགས་བརྙན་སྣང་བ་དེ་ལྟར་མཚོ་དེའི་ནང་ན་སྣང་ངོ་། །དེ་དག་ལྷ་དང་ལྷ་མ་ཡིན་གྱི་གཡུལ་དུ་གལ་ཏེ་ཕམ་པར་གྱུར་ན། མཚོ་དེའི་ནང་དུ་རང་རང་གི་གཟུགས་བརྙན་དེ་དག་འབྲོས་པར་སྣང་ངོ་། །གང་དག་ལྷ་དང་ལྷ་མ་ཡིན་གྱི་གཡུལ་འགྱེད་པ་དེར་འཆི་བར་འགྱུར་ན་ནི་རང་རང་གི་གཟུགས་བརྙན་མཚོ་དེའི་ནང་ན་འཆི་བར་སྣང་ངོ་། །ལྷ་མ་ཡིན་རྣམས་ཀྱི་བདག་པོ་མགུལ་ཕྲེང་ཞེས་བྱ་བ་གང་ཡིན་པ་དེ་དང་ལྷ་མ་ཡིན་གྱི་དབང་པོ་ལྷ་མ་ཡིན་གྱི་གྲོང་ཁྱེར་འདོད་པའི་ཀླུང་ཞེས་བྱ་བ་ན་འདུག་པ་གང་ཡིན་པ་དེ་འབྲོས་པ་དང་། ངེས་པར་འཆི་བར་འགྱུར་བ་དེ་ལྟར་མཚོ་དེའི་ནང་དུ་མཐོང་ངོ་། །དེ་དག་འདི་སྙམ་དུ་སེམས་ཏེ། གང་གིས་བདག་ཅག་ཀུན་མཐོང་གི་མཚོའི་ནང་དུ་ལྷ་རྣམས་ལས་ཕམ་ཞིང་ཉམས་པར་འགྱུར་བ་མཐོང་བའི་རྒྱུ་གང་ཡིན་རྐྱེན་གང་ཡིན་སྙམ་བྱེད་དོ། །དེ་ནས་ཡང་དེ་རྣམས་གྲོང་ཁྱེར་དེ་དག་ཏུ་དོང་སྟེ། ལོ་བརྒྱ་ལོན་ནམ། ལོ་ལྔ་བརྒྱ་ལོན་ནམ། དེ་ལྟར་ལོ་བཅུ་ལོན་ནམ། དེ་ནས་ཡང་མཚོ་ཀུན་མཐོང་ག་ལ་བར་ལྷ་མ་ཡིན་མགུལ་ཕྲེང་དང་། ལྷ་མ་ཡིན་གྱི་དབང་པོ་བརྟན་པ་དང་ལྷན་ཅིག་དོང་སྟེ། དེ་ལྟར་མཚོན་ཆ་དང་། གོ་མཚོན་སྣ་ཚོགས་ཐོགས་པ། ཆ་བྱད་དང་། མེ་ཏོག་ཕྲེང་དང་། ཕྱེ་མ་དང་། བྱུག་པས་ལུས་བསྐུས་
པ་དེ་དག་མཚོ་ཀུན་མཐོང་དེ་ཡོངས་སུ་བསྐོར་ནས་འཁོད་དོ། །དེ་ནས་ཡང་མཚོ་ཡོངས་སུ་བསྐོར་བ་དེ་དག་ཉིད་ཀྱིས་མཚོ་དེའི་ནང་དུ་འཛམ་བུའི་གླིང་གི་མི་མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། ལྷ་དང་འཐུན་པར་སྒྲུབ་པ་དེ་དག་ཤི་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་བ་མཐོང་ངོ་། །དེ་ནས་མཚོ་དེའི་ནང་དུ་ལྷའི་ཕྱོགས་ནི་རྒྱལ་བར་འགྱུར། ལྷ་མ་ཡིན་གྱི་ཕྱོགས་ནི་ཕམ་པར་འགྱུར་བ་མཐོང་བ་དང་། ལྷ་མ་ཡིན་མགུལ་ཕྲེང་ཞེས་བྱ་བ་དང་། ལྷ་མ་ཡིན་གྱི་དབང་པོ་བརྟན་པ་ཞེས་བྱ་བ་དེ་དག་འདི་སྙམ་སེམས་ཏེ། ཀྱེ་མ་ལྷ་རྣམས་ནི་མི་ལ་རག་ལས། མིའི་ཁ་ན་ལས། མི་ལ་རྟེན་པ་ཡིན་ཏེ། བདག་ཅག་གིས་གང་མི་རྣམས་ལ་མི་ཕན་པ་དང་། མི་བདེ་བར་བྱ་བའི་ཕྱིར་འབད་པ་དང་། དེ་དག་ཉམས་པས་ལྷ་རྣམས་ཀྱང་ཐུབ་པར་འགྱུར་རོ་སྙམ་དུ་དེ་ལྟར་བསམས་ནས། ལྷ་མ་ཡིན་མགུལ་ཕྲེང་དང་། ལྷ་མ་ཡིན་གྱི་དབང་པོ་བརྟན་པ་དག་སེམས་པར་བྱེད་དེ། འདི་ལྟར་མི་རྣམས་ནི་ཁ་ཟས་ལ་རག་ལས་ཤིང་རྟེན་པ་ཡིན་ཏེ། མི་དེ་རྣམས་ཀྱི་ཁ་ཟས་ཆུད་གསན་པ་ལ་འབད་པར་བྱའོ་སྙམ་ནས། དེ་དག་གིས་དེ་ལྟར་ཤེས་ནས་རྒྱ་མཚོའི་ནང་ན་ཀླུ་ཆོས་དང་མི་ལྡན་པ་ཁྲོ་བའི་ཤས་ཆེ་བ། རྟག་ཏུ་གནོད་པའི་བསམ་པ་ཅན་འཁོད་པ་གང་ཡིན་པ་དེ་དག་ལ་སྨྲ་བར་བྱེད་དེ། འདི་ལྟ་སྟེ། ཀླུའི་རྒྱལ་པོ་རབ་འཇོམས་དང་། ཀླུའི་རྒྱལ་པོ་ནག་པོ་དང་། ཀླུའི་རྒྱལ་པོ་བསྒྱིངས་པ་དང་། ཀླུའི་རྒྱལ་པོ་ཧུ་ལུ་ཧུ་ལུ་སྟེ། དེ་དག་ལ་སོགས་པ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་རྣམས་ལ། ལྷ་མ་ཡིན་མགུལ་ཕྲེང་དག་ན་རེ། འདི་ལྟར་ཁྱེད་ཅག་ལ་རག་ལས་པའི་མི་དེ་དག་ནི་ལྷའི་ཕྱོགས་ཡིན་ལ། དེ་དག་གི་སྲོག་ཀྱང་ཁ་ཟས་ཀྱིས་འཚོའོ། །ཁྱེད་ཅག་ལ་རག་ལས་པ་ཁ་ཟས་ཀྱིས་འཚོ་བའི་མི་དེ་དག་ཇི་ལྟར་མེད་པར་འགྱུར་བ་དེ་ལྟར་གྱིས་ཤིག །གང་གི་ཕྱིར་འདི་ལྟར་ཁྱེད་ཅག་དང་། ཀླུའི་རྒྱལ་པོ་ནོར་རྒྱས་དང་། འཇོག་པོ་ལ་སོགས་པ་ཤིན་ཏུ་དགྲར་གྱུར་པ་ལྟར་བདག་ཅག་དང་ལྷ་རྣམས་ཀྱང་དེ་ལྟ་བུ་ཡིན་ཏེ། ཁྱེད་ཅག་གིས་བདག་ཅག་གི་གྲོགས་བྱ་བ་དེ་ནི་
རིགས་པ་ཡིན་ནོ་ཞེས་སྨྲས་སོ། །དེ་ནས་ལྷ་མ་ཡིན་མགུལ་ཕྲེང་དང་། ལྷ་མ་ཡིན་གྱི་དབང་པོ་བརྟན་པ་དག་གི་ཚིག་ཐོས་ནས་ཆོས་དང་མི་ལྡན་པའི་ཀླུ་རྣམས་ཀྱིས་བདག་ཅག་དང་ཁྱེད་ཅག་ཕྱོགས་འཐུན་པ་ཡིན་ཏེ། དེ་ལྟར་བྱའོ་ཞེས་སྨྲས་ནས་དེ་དག་ནི་རང་གི་གནས་སུ་དོང་ངོ་། །ཀླུའི་རྒྱལ་པོ་ཁྲོ་བས་གདུངས་པ་རྣམས་ཀྱང་གནས་སུ་དོང་ནས། གལ་ཏེ་ཆུ་དཔག་ཚད་བརྒྱར་གཡོ་བར་བྱེད་དེ། གལ་ཏེ་དཔག་ཚད་ཉིས་བརྒྱར། གལ་ཏེ་དཔག་ཚད་སུམ་བརྒྱར་གཡོ་བར་བྱེད་དོ། །ཆུའི་སྟེང་ན་ནི་ས་འདུག་སྟེ། གང་གི་ཚེ་ཀླུ་སྡང་བ་རྣམས་ཀྱིས་ཆུ་གཡོ་བར་བྱེད་པ་དེའི་ཚེ་ཆུ་གཡོས་པས་ས་གཡོ་བར་བྱེད་ལ། ཕྱོགས་དེའི་ཆུའི་ཚད་ཇི་ཙམ་དུ་གཡོ་བར་བྱེད་པ་དེ་ཙམ་དུ་ས་གཡོ་བར་བྱེད་དེ། ཀླུ་སྡང་བ་ཁྲོ་བས་གདུངས་པ་རྣམས་ཀྱི་མཐུ་ནི་དེ་ལྟ་བུ་ཡིན་ནོ། །དེ་དག་བྲམ་ཟེ་རྟོག་གེ་པ་བསྟན་བཅོས་ངན་པས་བསླུས་པ་རྣམས་ཀྱིས་ཚོར་ནས་འདི་ལྟར་ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །མཚོན་གྱིས་འཁྲུག་པར་འགྱུར་རོ། །མཚོན་གྱིས་འཁྲུག་པ་མེད་པར་འགྱུར་རོ། །ཆར་ལེགས་པར་འབབ་པར་འགྱུར་རོ། །ཆར་ལེགས་པར་འབབས་པར་མི་འགྱུར་རོ། །བ་ལང་དང་བྲམ་ཟེ་འཕེལ་བར་འགྱུར་རོ། །བ་ལང་དང་བྲམ་ཟེ་འགྲིབ་པར་འགྱུར་རོ་ཞེས་དེ་ལྟར་མི་རྟོག་གེ་པ་དག་མངོན་པར་རྗོད་པར་བྱེད་དེ་དེ་ལྟར་ས་གཡོ་བར་འགྱུར་རོ། །ཡང་རྒྱུ་གཞན་གྱིས་ས་གཡོ་བར་བྱེད་པ་ལ་དེ་ལྟར་དགེ་སློང་དེ་ཐོས་པ་ལས་བྱུང་བའི་ཤེས་པས་རྟོག་པར་བྱེད་དེ། སེམས་ཅན་རྣམས་ཀྱི་དགེ་བ་དང་མི་དགེ་བའི་དབང་གིས་རླུང་ས་འཛིན་ཞེས་བྱ་བ་གཡོ་བར་བྱེད་དོ། །དེ་གཡོས་པས་ཆུ་གཡོ་བར་བྱེད་དེ། ཆུ་གཡོས་པས་ཀྱང་ས་གཡོ་བར་བྱེད་དེ། དཔག་ཚད་ལྔ་བརྒྱའམ། དཔག་ཚད་བརྒྱའམ། དཔག་ཚད་ཉིས་བརྒྱའམ། དཔག་ཚད་སུམ་བརྒྱའམ། དཔག་ཚད་བཞི་བརྒྱའམ། དེ་ལྟར་ཚད་ཇི་ཙམ་དུ་རླུང་གཡོ་བར་བྱེད་པའི་ཚད་དེ་ཙམ་དུ་ཆུ་གཡོ་བར་བྱེད་ལ། ཆུ་གཡོ་བའི་ཚད་ཀྱིས་ས་གཡོ་བར་བྱེད་དོ། །དེ་ལ་གང་རླུང་དག་གཡོ་བ་ན་ཆུ་གཡོ་བར་བྱེད།
ཆུ་གཡོས་པས་ས་གཡོ་བར་བྱེད་པའི་རྒྱུ་ནི་གང་རྐྱེན་ནི་གང་གཞི་ནི་གང་ཡིན་སྙམ་ནས། དགེ་སློང་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། རླུང་གིས་ཆུ་འཛིན་ལ། ཆུ་ལ་ས་བརྟེན་ཏེ། རླུང་དེ་དག་གཡོས་ན་ཆུ་གཡོ་བར་འགྱུར། དེ་དག་གཡོས་པས་ས་གཡོ་བར་འགྱུར་རོ་སྙམ་ནས་དེ་ལྟར་རྒྱུ་དེས་ན་ས་གཡོ་བར་འགྱུར་རོ། །ས་གཡོ་བ་དེ་ཡང་དགེ་སློང་དེས་རྣམ་པ་གཉིས་སུ་མཐོང་སྟེ། གལ་ཏེ་དགེ་བའི་ལས་ཀྱི་དབང་གིས་གཡོ་ན་ནི་དེ་དགེ་བར་འགྱུར་ཏེ། སེམས་ཅན་རྣམས་ཀྱི་བདེ་བ་དང་ལོ་ལེགས་པ་ཡིན་ནོ། །གལ་ཏེ་མི་དགེ་བའི་དབང་གིས་གཡོ་ན་ནི་ལས་ཀྱི་མཐའ་སྤྱད་ཅིང་གང་བྱས་པའི་སེམས་ཅན་རྣམས་ཀྱི་དེ་མི་དགེ་བར་འགྱུར་རོ། །དགེ་བ་དང་མི་དགེ་བ་ལ་རག་ལས་པ་ཐམས་ཅད་ནི་རྒྱུ་མེད་པ་མ་ཡིན། འདོད་རྒྱལ་ལས་བྱུང་བ་མ་ཡིན། བྱེད་པ་པོས་གནས་སུ་བྱས་པ་མ་ཡིན་ཏེ། རྒྱུ་དང་འཐུན་པར་འབྲས་བུ་འབྱུང་ངོ་། །འབྲས་བུ་མངོན་པར་མི་ཤེས་པའི་རྟོག་གེ་པ་དག་ན་རེ། འདི་ལྟར་དབང་པོའི་ཕྱོགས་དག་ས་གཡོའོ། །རླུང་གི་ཕྱོགས་དག་ས་གཡོའོ། །ཆུ་ལྷའི་ཕྱོགས་དག་ས་གཡོ་སྟེ། ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །ཆར་ལེགས་པར་འབབ་པར་འགྱུར་རོ། །ཆར་ལེགས་པར་འབབ་པར་མི་འགྱུར་རོ། །མཚོན་གྱིས་འཁྲུག་པར་འགྱུར་རོ། །མཚོན་གྱིས་འཁྲུག་པ་མེད་པར་འགྱུར་རོ། །བ་ལང་དང་བྲམ་ཟེ་འཕེལ་བར་འགྱུར་རོ། །བ་ལང་དང་བྲམ་ཟེ་འགྲིབ་པར་འགྱུར་རོ་ཞེས་དེ་ལྟར་རྟོག་གེ་པ་དག་རྟོག་པར་བྱེད་དོ། །དེ་ཡང་གཅིག་ཅིག་ཡིན་ཏེ། གལ་ཏེ་འདོད་རྒྱལ་བ་བརྒྱ་སྙེད་ཡོད་པ་དེ་དག་གི་ནང་ན་འདི་ལྟར་འདུ་ཤེས་པ་འདི་ཁོ་ན་ཉིད་གཅིག་ཡིན་ནོ་ཞེས་དེ་དག་རྗོད་པར་བྱེད་དོ། །དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་མ་ཡིན་མགུལ་ཕྲེང་དང་། ལྷ་མ་ཡིན་གྱི་དབང་པོ་བརྟན་པ་དང་། ཀླུའི་རྒྱལ་པོ་ཆོས་དང་མི་ལྡན་པ་རབ་འཇོམས་ལ་སོགས་པ་འཇིག་རྟེན་ལ་ཕན་པར་མི་བྱེད་པ་ཤེས་ནས། གཉེན་པོ་ཆོས་དང་ལྡན་
པ་ལ་རྗེས་སུ་སེམས་པར་བྱེད་དེ། ཀྱེ་མ་ཀླུ་སྡང་བ་དེ་དག་དང་ལྷ་མ་ཡིན་སྡིག་ཅན་འཇིག་རྟེན་ལ་མི་ཕན་པར་བྱེད་པ་དེ་དག་ཇི་ལྟར་ཕམ་པར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་གལ་ཏེ་འཛམ་བུའི་གླིང་དུ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། རིགས་ཀྱི་རྒན་རབས་ལ་གུས་པར་བྱེད་པའི་རྒྱལ་པོ་དང་བློན་པོ་ཆེན་པོ་འབྱུང་ན། ས་བླའི་གནོད་སྦྱིན་དེ་དག་མཐུ་ཆེ་བར་འགྱུར་ཏེ། དེ་དག་གི་ཀླུ་དང་། ལྷ་མ་ཡིན་སྡིག་ཅན་སའི་འོག་ན་གནས་པ་དེ་དག་གཡོས་པར་མཐོང་ནས་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་ས་བླའི་གནོད་སྦྱིན་དེ་དག་གིས་བར་སྣང་ལ་རྒྱུ་བའི་གནོད་སྦྱིན་རྣམས་དང་། ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ལ་ཡང་སྔ་མ་བཞིན་བསྙད་དོ། །དེ་ནས་ས་བླའི་གནོད་སྦྱིན་དེ་དག་ལས་ཐོས་ནས་བར་སྣང་ལ་སྤྱོད་པའི་གནོད་སྦྱིན་རྫུ་འཕྲུལ་ཆེ་ཞིང་མཐུ་ཆེ་བར་འགྱུར་ཏེ། རྒྱལ་ཆེན་བཞིའི་ལྷ་ཀུན་ཏུ་རྒྱུ་བ་རྣམས་ལ་སྦྲན་པའི་ཕྱིར་ཁྲོ་བའི་ཤུགས་ཀྱིས་ཁ་རླངས་དག་པར་སྣང་ལ་འབྱུང་ཞིང་འོང་ལ། འདི་ལྟར་ལྷ་དག་ཀླུ་སྡང་བ་རྣམས་དང་། ལྷ་མ་ཡིན་སྡིག་ཅན་རྣམས་མི་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་རྣམས་མ་རུང་བར་བྱ་བའི་ཕྱིར་འཇུག་པར་བྱེད་དོ་ཞེས་བསྙད་དོ། །གནོད་སྦྱིན་གྱི་ཁ་རླངས་བྱུང་བ་དེ་རྟོག་གེ་པ་བསྟན་བཅོས་ངན་པ་ལ་སེམས་རྣམ་པར་རྨོངས་པ་དག་གིས་མཐོང་ནས། འདི་ལྟར་གཤིན་རྗེའི་བུ་བརྒྱ་རྩ་གཅིག་གི་ནང་ན་གཤིན་རྗེའི་བུ་དུ་བ་མཇུག་རིངས་འབྱུང་ངོ་ཞེས་བརྗོད་དེ། གནོད་སྦྱིན་མཐུ་རབ་ཏུ་ཆེན་པོ་བརྒྱ་རྩ་གཅིག་གྱེན་དུ་འགྲོ་བ་སྣང་བ་དང་མི་སྣང་བ་གང་ཡིན་པ་དེ་དག་ལ་རྟོག་གེ་པ་དག་ན་རེ་འདི་ལྟར་འདི་ནི་གཤིན་རྗེའི་བུ་བརྒྱ་རྩ་གཅིག་གི་ནང་ན་མཇུག་རིངས་འབྱུང་ངོ་ཞེས་གཞན་དུ་ཡོངས་སུ་རྟོག་ཅིང་ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །མཚོན་གྱིས་འཁྲུག་པར་འགྱུར་རོ། །མཚོན་གྱིས་འཁྲུག་པ་མེད་པར་འགྱུར་རོ། །བ་ལང་དང་བྲམ་ཟེ་
འཕེལ་བར་འགྱུར་རོ། །བ་ལང་དང་བྲམ་ཟེ་འགྲིབ་པར་འགྱུར་རོ། །ཆར་ལེགས་པར་འབབ་པར་འགྱུར་རོ། །ཆར་ལེགས་པར་འབབ་པར་མི་འགྱུར་རོ། །ཡུལ་མི་ཆེ་གེ་མོ་ཞིག་ལ་གནོད་པར་འགྱུར་རོ། །ཡུལ་གྱི་མི་ཆེ་གེ་མོ་ཞིག་ལ་གནོད་པར་མི་འགྱུར་རོ་ཞེས་དེ་དག་ལ་ལོག་པར་རྟོག་པར་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ཀླུ་རྣམས་དང་། ལྷ་མ་ཡིན་སྡིག་ཅན་གཡོས་པ་རྣམས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་འདི་ལྟར་གནོད་སྦྱིན་རྫུ་འཕྲུལ་ཆེ་ཞིང་མཐུ་ཆེ་བ་རྣམས་ལྷ་ཀུན་ཏུ་རྒྱུ་བ་རྣམས་ལ་སྒྲོགས་པར་བྱེད་པ་སྔར་བསྟན་པ་ཇི་ལྟ་བ་བཞིན་མཐོང་སྟེ། ཀུན་ཏུ་རྒྱུ་བ་རྒྱལ་ཆེན་བཞི་པ་དེ་རྣམས་ཀྱིས་ཀྱང་འདི་ལྟར་ལྷ་མ་ཡིན་གྱི་ཕྱོགས་ནི་འགྲིབ་བོ། །བདག་ཅག་གི་ལྷའི་ཕྱོགས་ཀྱི་སྟོབས་ནི་རབ་ཏུ་ཆེའོ། །འཛམ་བུའི་གླིང་ན་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། སྡོམ་པ་བླངས་པ་དང་། རིགས་ཀྱི་རྒན་རབས་ལ་གུས་པར་བྱེད་པ་དག་ཡོད་པས་ཀླུ་སྡང་བ་དང་། ལྷ་མ་ཡིན་སྡིག་ཅན་རྣམས་ལས་བདག་ཅག་རྒྱལ་བར་འགྱུར་གྱིས་མ་འཇིགས་ཤིག་མ་འཇིགས་ཤིག་ཅེས་སྒྲོགས་པར་བྱེད་དོ། །གནོད་སྦྱིན་རྫུ་འཕྲུལ་ཆེ་ཞིང་མཐུ་ཆེ་བ་དེ་དག་ལྷ་ཀུན་ཏུ་རྒྱུ་བ་དེ་དག་ལ་ཚིག་དེ་ཐོས་ནས། ལྷ་མ་ཡིན་དུ་གཏོགས་པ་ལ་ཤིན་ཏུ་ཁྲོ་ཡང་ཁྲོ་ལ་རབ་ཏུ་དགའ་བ་རྣམས་ཀླུའི་རྒྱལ་པོ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ལ་དེ་དག་ཐམས་ཅད་སྔ་མ་བཞིན་དུ་བསྙད་དོ། །ལུས་ཐམས་ཅད་རབ་ཏུ་འབར་བ་དག་གལ་ཏེ་ཉིན་པར་འོང་ན་དེའི་ཚེ་ཉི་མའི་འོད་ཟེར་རྣམས་ཟིལ་གྱིས་མནན་ནས་མི་མངོན་ནོ། །དེ་ནས་ལུས་ཐམས་ཅད་རབ་ཏུ་འབར་བ་དག་ཀླུ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་རྣམས་ལ་སྦྲན་པའི་ཕྱིར་མཚན་མོ་རྒྱ་མཚོའི་ནང་དུ་འོང་ན་དེ་དག་ཐམས་ཅད་སྐྱེ་བོ་ཀུན་གྱིས་མཐོང་བར་འགྱུར་ལ། དེ་མཐོང་ནས་རྟོག་གེ་པ་རྣམས་སྐར་མདའ་ལྟུང་བར་སེམས་ཏེ། འདི་ལྟར་སྐར་མདའ་ལྟུང་བས་ལོ་ལེགས་པར་
འགྱུར་རོ། །ལོ་ཉེས་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །མཚོན་གྱིས་འཁྲུག་པར་འགྱུར་རོ། །མཚོན་གྱིས་འཁྲུག་པ་མེད་པར་འགྱུར་རོ། །མི་ངས་འབྱུང་བར་འགྱུར་རོ། །མི་ངས་འབྱུང་བར་མི་འགྱུར་རོ། །བ་ལང་དང་བྲམ་ཟེ་དག་འཕེལ་བར་འགྱུར་རོ། །བ་ལང་དང་བྲམ་ཟེ་དག་འགྲིབ་པར་འགྱུར་རོ་ཞེས་དེ་ལྟར་ལས་མངོན་པར་མི་ཤེས་པ་དག་འཐུན་པར་ཡོངས་སུ་རྟོག་པར་བྱེད་དོ། །དེ་ནས་ཡང་དགེ་སློང་དེ་སྐར་མདའ་ལྟུང་བ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་རྒྱུ་གཞན་གྱིས་སྐར་མདའ་ལྟུང་བ་ཇི་ལྟར་ལྟུང་བ་མཐོང་སྟེ། ལྷ་རྣམས་ཀྱི་གཞལ་མེད་ཁང་མགྱོགས་པར་ནམ་མཁའ་ལ་འགྲོ་ལ། གཞལ་མེད་ཁང་ཕན་ཚུན་འགྲོ་བ་གང་ཡིན་པ་དེ་དག་འདྲུད་པ་ལས་མེ་འབྱུང་བ་གང་ཡིན་པ་དེ་དག་ལ་རྟོག་གེ་པ་དག་ན་རེ། འདི་ལྟར་སྐར་མདའ་རབ་ཏུ་ལྟུང་བ་ལས་ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །བདེ་བར་འགྱུར་རོ། །མི་བདེ་བར་འགྱུར་རོ། །བ་ལང་དང་བྲམ་ཟེ་འཕེལ་བར་འགྱུར་རོ། །བ་ལང་དང་བྲམ་ཟེ་འགྲིབ་པར་འགྱུར་རོ་ཞེས་དེ་ལྟར་རྟོག་གེ་པ་ལས་ཀྱི་འབྲས་བུ་མངོན་པར་མི་ཤེས་པ་དག་འཇིག་རྟེན་པའི་མཚན་མའི་ལྟས་སྟོན་པར་བྱེད་དོ། །དེ་ཅིའི་ཕྱིར་ཞེ་ན། དེ་ལྟར་ལས་ཀྱི་འབྲས་བུ་རྣམ་པར་སྨིན་པ་ཕྲ་མོ་སོ་སོར་ཤེས་པ་གང་ཡིན་པ་ནི་ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་། མི་དང་། ལྷ་མ་ཡིན་རྣམས་ཀྱི་ནང་ན་དེ་མེད་དེ། འདི་ལྟར་བདག་ཅག་གི་ཆོས་འདུལ་བ་ལ་སེམས་པ་ནི་དགེ་བ་བཅུའི་ལས་ཀྱི་ལམ་གཙོ་བོར་བྱེད་པ་ཡིན་ནོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སོ་སོར་རྟོག་པར་བྱེད་དེ། ཀྱེ་མ་བར་སྣང་ལ་རྒྱུ་བའི་གནོད་སྦྱིན་མཐུ་བོ་ཆེ་རྣམས་ཀུན་ཏུ་རྒྱུ་བའི་ལྷ་རྣམས་ཀྱི་དྲུང་དང་། རྒྱ་མཚོ་ན་གནས་པའི་ཀླུ་ཆོས་དང་ལྡན་པ་རྣམས་ཀྱི་དྲུང་དུ་ཇི་ལྟར་འགྲོ་སྙམ་ནས། དེས་ཐོས་པ་ལས་བྱུང་བའི་
ཤེས་པས་བརྟགས་ན། བར་སྣང་ལ་རྒྱུ་བའི་གནོད་སྦྱིན་རབ་ཏུ་འབར་བ་རྣམས་རྒྱ་མཚོར་ཞུགས་ཏེ། ཀླུའི་རྒྱལ་པོ་ཆོས་དང་ལྡན་པ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་ལ་འདི་ལྟར་ལྷ་མ་ཡིན་མགུལ་ཕྲེང་དང་། ལྷ་མ་ཡིན་གྱི་དབང་པོ་བརྟན་པ་དེ་དག་མཚོ་ཀུན་མཐོང་དུ་བདག་ཉིད་ལ་ལྟ་བར་བྱེད་དོ་ཞེས་སྔ་མ་བཞིན་བར་སྣང་ལ་རྒྱུ་བའི་གནོད་སྦྱིན་རྣམས་ལ་ཐོས་ནས་ཀླུའི་རྒྱལ་པོ་ལོངས་སྤྱོད་ལྡན་ལ་གནས་པ་ནོར་རྒྱས་ཀྱི་བུ་དང་། འཇོག་པོ་ལ་སོགས་པས་བར་སྣང་ལ་རྒྱུ་བའི་ཀླུ་རྣམས་ལ་འདི་ལྟར་བདག་གིས་ཆོས་དང་མི་ལྡན་པའི་ཀླུ་དེ་དག་མཐུས་ཕྱིར་བཟློག་ཅིང་བསྐྲད་དེ། ཆད་པས་ཀྱང་བཅད་ནས། འཛམ་བུའི་གླིང་ན་ཆོས་དང་ལྡན་པ་རྣམས་ཀྱི་ལོ་ལེགས་པར་བྱ་བ་དང་། ཆར་དབབ་པ་དང་། རླུང་གིས་གནོད་པ་མེད་པར་བྱ་བ་དང་། འཛམ་བུའི་གླིང་དུ་འབྲས་སཱ་ལུ་དང་། ནས་དང་། བཟའ་བ་དག་འབྱུང་བར་བྱ་བ་དང་། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་རྣམས་ཀྱི་གྲོགས་བྱའོ་ཞེས་བསྙད་དོ། །ཀླུ་དེ་དག་ལ་དེ་སྐད་བསྙད་ནས་ས་བླའི་གནོད་སྦྱིན་རྣམས་ཀླུ་ཆོས་དང་མི་ལྡན་པ་དག་ག་ལ་བ་དེར་གཡུལ་འགྱེད་པའི་ཕྱིར་དོང་སྟེ། ཀླུའི་རྒྱལ་པོ་རབ་འཇོམས་དང་། ཀླུའི་རྒྱལ་པོ་བསྒྱིངས་པ་ལ་སོགས་པ་ལ། འདི་ལྟར་ཁྱེད་ནི་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་ཡིན་ལ། ངེད་ནི་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་ཡིན་ཏེ། དེ་ལྟར་ཁྱེད་ཅག་དང་ངེད་ཅག་མི་འཐུན་པར་གྱུར་ཅིང་འགྲན་ཟླར་གྱུར་པས་ངེད་ཅག་ནི་ཁྱེད་ཅག་ལ་བརྡེག་པའི་ཕྱིར་འདིར་འོངས་སོ་ཞེས་སྨྲས་སོ། །དེ་ཐོས་ནས་ཀླུའི་རྒྱལ་པོ་རབ་འཇོམས་དང་། བསྒྱིངས་པ་ལ་སོགས་པ་དེ་དག་གཡུལ་འགྱེད་དུ་ལྷགས་ཏེ་དེ་དག་ཕན་ཚུན་གློག་གི་ཆར་མང་པོ་བྱུང་བ་ན། དེ་གང་གི་ཚེ་མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པའི་སྐྱེ་དགུ་འབྱུང་བ་དེའི་ཚེ། ཀླུའི་རྒྱལ་པོ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་རྒྱལ་བར་འགྱུར་ལ། ཀླུའི་རྒྱལ་པོ་རབ་འཇོམས་ལ་སོགས་པ་ཕམ་པར་འགྱུར་ཏེ། དེ་ལྟར་འཛམ་བུའི་གླིང་དུ་ཆར་ལེགས་པར་འབབ་པར་འགྱུར་
ཞིང་དེས་ན་ལོ་ལེགས་པར་འགྱུར་རོ། །དེའི་ཚེ་རྟོག་གེ་པ་དག་ན་རེ་འདི་ནི་རྒྱུ་སྐར་གྱི་ཡོན་ཏན་ཡིན་ནོ། །འདི་ནི་གཟའི་ཡོན་ཏན་ཡིན་ནོ། །འདི་ནི་ལྟས་ཀྱི་ཡོན་ཏན་ཡིན་ནོ་ཞེས་བརྗོད་དེ་ཆར་ལེགས་པར་འབབ་པ་གང་དུས་དུས་སུ་འབབ་པས་ཆར་དུས་དང་འཐུན་པར་རབ་ཏུ་འབབ་སྟེ། བ་ལང་དང་བྲམ་ཟེ་དག་ཀྱང་དེའི་འབྲས་བུ་ཡིན་གྱི་གཞན་གྱི་ནི་མ་ཡིན་ནོ་ཞེའོ། །གང་གི་ཚེ་མར་མི་འཛིན་པ་དང་། ཕར་མི་འཛིན་པ་དང་། དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པ་དང་། ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པའི་སྐྱེ་དགུ་དག་འབྱུང་བ་དེའི་ཚེ། ཀླུའི་རྒྱལ་པོ་ཆོས་དང་ལྡན་པ་ནོར་རྒྱས་ཀྱི་བུ་ལ་སོགས་པ་ཕམ་པར་འགྱུར་ལ། ཀླུའི་རྒྱལ་པོ་རབ་འཇོམས་དང་། ཀླུའི་རྒྱལ་པོ་བསྒྱིངས་པ་ལ་སོགས་པ་རྒྱལ་བར་འགྱུར་ཏེ། ལོ་ཉེས་འབྱུང་བར་བྱེད། ཆར་འབབ་མི་མཁས་པར་བྱེད། ཆར་དྲག་རྣམས་ཀྱིས་ལོ་ཏོག་མ་རུང་བར་བྱེད། ཐན་པ་འབྱུང་བར་བྱེད་པ་དང་། བྲམ་ཟེ་རྟོག་གེ་པ་དག་གཞན་དུ་སྒྱུར་བར་བྱེད་དེ། འདི་ལྟར་འདི་ནི་རྒྱུ་སྐར་གྱི་ཉེས་པ་ཡིན་ནོ། །འདི་ནི་གཟའི་ཉེས་པ་ཡིན་ནོ། །འདི་ནི་དུས་ཀྱི་ཉེས་པ་ཡིན་ནོ། །འདི་ནི་ལྟས་ཀྱི་ཉེས་པ་ཡིན་ནོ་ཞེས་དེ་ལྟར་རྟོག་གེ་པ་ལས་ཀྱི་འབྲས་བུ་མངོན་པར་མི་ཤེས་པ་དག་འདི་ལྟར་གཞན་དུ་སྒྱུར་ཡང་དེ་ཁོ་ན་ནི་མི་མཐོང་ངོ་། །དེ་ཅིའི་ཕྱིར་ཞེ་ན། དེ་ནི་ངའི་ཉན་ཐོས་སམ། ངའི་ཆོས་འདུལ་བ་འདི་ཐོས་ནས་ལས་ཀྱི་འབྲས་བུ་རྣམ་པར་སྨིན་པ་སོ་སོར་ཤེས་པ་གཙོ་བོར་བྱེད་པའམ། འབྲས་བུ་སོ་སོར་ཤེས་པ་མ་གཏོགས་པར་ལྷ་དང་བཅས་པའི་འཇིག་རྟེན་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་མི་དང་ལྷ་མ་ཡིན་རྣམས་ཀྱི་ཡུལ་གྱི་འཇུག་པ་མ་ཡིན་ཏེ། གཞན་མ་ཡིན་པར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་མ་ཡིན་གྱི་ས་ལ་རྟོག་པར་བྱེད་དེ། གང་གི་ཚེ་གང་དུ་ཀླུ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་རྣམས་ཀླུ་ཆོས་དང་ལྡན་པ་རྣམས་ཀྱིས་ཕམ་པར་བྱས་པ་དེའི་ཚེ། ལྷ་མ་ཡིན་མགུལ་ཕྲེང་དག་གིས་ཤེས་པར་འགྱུར་ཏེ། ལྷ་མ་ཡིན་མགུལ་ཕྲེང་དག་དང་། ལྷ་མ་ཡིན་སྐར་ཕྲེང་གི་གྲོང་
ཁྱེར་ན་གནས་པ་དང་། གཞན་ཚལ་དང་ནགས་ཚལ་ན་གནས་པ་དེ་དག་ཐམས་ཅད་ཡི་མུག་ཅིང་བྱིན་ཉམས་ལ་བཞིན་ངོ་ཚ་ནས་ཁྱིམ་དུ་ཕྱིར་ལྷགས་ཏེ། ཀྱེ་ཨེ་མ་ལྷ་མ་ཡིན་བདག་ཅག་རྣམས་ཀྱིས་ལྷ་རྣམས་ཐུབ་པར་མ་ནུས་ལ་བྱིན་ཉམས་སོ། །གང་གི་ཚེ་བདག་ཅག་གིས་ལྷ་རྣམས་ཕམ་པར་བྱེད་ནུས་ཞིག་གུ་ཞེས་དེ་སྐད་སྨྲས་ནས། ལྷ་མ་ཡིན་མགུལ་ཕྲེང་དག་གིས་སྒྲ་གཅན་ལ། ལྷ་མ་ཡིན་གྱི་དབང་པོ་འདི་ལྟར་སླད་ཀྱིས་ཡུན་མི་རིང་བར་བདག་ཅག་གིས་ལྷ་རྣམས་ཕམ་པར་བགྱིད་པར་རྔོ་ཐོགས་ཀྱིས་ནན་ཏན་མཛད་དུ་གསོལ་ཞེས་སྨྲས་པ་དང་། དེ་སྐད་ཐོས་ནས། ལྷ་མ་ཡིན་གྱི་དབང་པོ་སྒྲ་གཅན་གྱིས་ལྷ་མ་ཡིན་མགུལ་ཕྲེང་དང་། ལྷ་མ་ཡིན་གྱི་དབང་པོ་བརྟན་པ་དག་ལ་འདི་ལྟར་ངས་ཡུན་མི་རིང་བར་ལྷ་དག་དབང་པོ་དང་བཅས་ཏེ། ཐུབ་པར་བྱ་ཡིས་སྙིང་ལས་ཆུང་ངུར་འཁོད་ཅིག་ཅེས་སྨྲས་སོ། །སྒྲ་གཅན་ལས་ལྷ་མ་ཡིན་མགུལ་ཕྲེང་དག་གིས་དེ་སྐད་ཐོས་ནས། དེ་ནས་ཡིད་རབ་ཏུ་དགའ་སྟེ། རང་གི་གནས་སུ་ཞུགས་སོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ལྷ་མ་ཡིན་གྱི་གྲོང་ཁྱེར་སྐར་ཕྲེང་ཞེས་བྱ་བ་ལ་བརྟགས་ནས། ཕྱི་རོལ་ལ་ཡང་སོ་སོར་རྟོག་པར་བྱེད་དེ། མགུལ་ཕྲེང་ཞེས་བྱ་བ་དག་གིས་གཞན་ཕྱི་རོལ་གྱི་ཚལ་དང་། ནགས་ཚལ་རྣམ་པ་དུ་ཡོད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷ་མ་ཡིན་མགུལ་ཕྲེང་ཞེས་བྱ་བ་དག་གི་ཚལ་དང་། བྱ་རྣམས་དང་། ནགས་ཚལ་དང་། ཉེ་བའི་ཚལ་དང་། ལྟེང་ཀ་དང་། འབབ་ཆུའི་དངོ་དང་། པད་མའི་རྫིང་རྣམས་ཀྱིས་དཔག་ཚད་ཁྲི་ཕྲག་སུམ་སྟོང་དུ་གང་བ། བྱ་ངང་པ་དང་། ཀཱ་རཎྜ་བ་དང་། ངུར་པ་དག་གིས་མཛེས་པར་བྱས་ཤིང་ཉེ་བར་བརྒྱན་ལ་ཀུན་ཏུ་སྡུག་པར་བྱས་པ། ཀུན་ནས་ཉམས་དགའ་བ། སྤྲོ་ཞིང་རབ་ཏུ་དགའ་ལ། རྟག་ཏུ་མང་བ་ཇི་ལྟར་འདུག་པ་མཐོང་སྟེ། དེ་ན་ཚལ་ཆེན་པོ་བདུན་ཡོད་པ་ལ་འདི་ལྟ་སྟེ། གསེར་གྱི་འོག་ཕག་སྤྲིན་དང་། རྟག་ཏུ་ཉམས་དགའ་དང་། སྐྱེད་མོས་ཚལ་དགའ་དང་། འབྲས་བུ་རྟག་ཏུ་མཛེས་དང་། རླུང་བདེ་དང་། ཏིན་དི་ཀུན་དགའ་དང་། སྤྲས་པ་སྟེ། དེ་དག་ནི་ལྷ་མ་ཡིན་མགུལ་ཕྲེང་
དག་གི་སྐྱེ་བོ་གནས་པའི་ཚལ་ཆེན་པོ་དག་ཡིན་ནོ། །ས་དེ་དག་ཀྱང་ལྷ་མ་ཡིན་རྟག་ཏུ་དགའ་བ་རྣམས་ཀྱིས་གང་བ་ཡིན་ཏེ། ལྷ་མ་ཡིན་ལས་ཀྱི་འབྲས་བུ་ལ་སྤྱོད་པ་རྣམས་གནས་པར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་མ་ཡིན་མགུལ་ཕྲེང་དག་གི་ལས་ཀྱི་འབྲས་བུ་རྣམ་པར་སྨིན་པ་ལ་རྟོག་པར་བྱེད་དེ། མགུལ་ཕྲེང་དག་ལས་གང་གིས་དེར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཕྱི་རོལ་པ་གང་གིས་གཏན་པ་དང་བཅས་པ། སྡིག་པ་དང་བཅས་པ། སྐྱོན་དང་བཅས་པས་མཆོད་སྦྱིན་བྱས་ཤིང་བཟའ་བ་དང་། བཅའ་བ་རབ་ཏུ་མང་པོ་དག་བཤམས་ནས། ཚུལ་ཁྲིམས་དང་ལྡན་པ་ལ་མ་བྱིན། སེམས་ཀྱིས་མ་བསྒོམས་པའི་སྦྱིན་པ་ངན་པ་སྦྱིན་པ་དེ་བྱིན་པ་དེ་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་དུད་འགྲོའི་འགྲོ་བ་ལྷ་མ་ཡིན་མགུལ་ཕྲེང་རྣམས་ཀྱི་ནང་དུ་སྐྱེ་བར་འགྱུར་ལ། སྦྱིན་པ་ཐ་མ་དང་། འབྲིང་དང་། མཆོག་རྣམས་ཀྱིས་བདེ་བ་ཐ་མ་དང་། འབྲིང་དང་། མཆོག་མྱོང་བར་འགྱུར་ཏེ། རྒྱུ་དང་འཐུན་པར་འབྲས་བུ་འབྱུང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་མ་ཡིན་གྱི་དབང་པོ་བརྟན་པའི་ལས་ཀྱི་འབྲས་བུ་རྣམ་པར་སྨིན་པ་ལ་རྟོག་པར་བྱེད་དེ། ལས་ཀྱི་འབྲས་བུ་རྣམ་པར་སྨིན་པ་གང་གིས་བརྟན་པ་དག་ལྷ་མ་ཡིན་རྣམས་ཀྱི་རྒྱལ་སྲིད་བྱེད་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་མིར་གྱུར་པ། རྐུན་མ་གཞན་གྱི་ནོར་རྫས་ཀྱིས་འཚོ་བ། སེམས་པ་དང་བྲལ་བའི་སེམས་ཀྱིས་ཕྱི་རོལ་པའི་འདོད་ཆགས་དང་བྲལ་བ་གཅིག་ལ་ཟས་ཀྱིས་ཚིམ་པར་བྱིན་པའི་ལས་དེས་ལྷ་མ་ཡིན་རྣམས་ཀྱི་རྒྱལ་སྲིད་བྱེད་པ་མཐོང་ངོ་། །དེ་ནས་ཡང་དགེ་སློང་དེ་ལྷ་མ་ཡིན་མགུལ་ཕྲེང་ཞེས་བྱ་བའི་ཚེ་ལ་རྟོག་པར་བྱེད་དེ། ལྷ་མ་ཡིན་མགུལ་ཕྲེང་གི་ཚེའི་ཚད་ཇི་སྲིད་དུ་ཐུབ་སྙམ་ནས། དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། མི་རྣམས་ཀྱི་ལོ་དྲུག་བརྒྱ་གང་ཡིན་པ་དེ་དག་ནི་ལྷ་མ་ཡིན་མགུལ་ཕྲེང་རྣམས་ཀྱིས་ཉིན་ཞག་གཅིག་ལ་གྲངས་བརྩིས་པ་དེའི་ལོ་དྲུག་སྟོང་ཐུབ་སྟེ། དུས་མ་ཡིན་པར་
འཆི་བ་ནི་ཡོད་དོ། །ལེགས་པར་བྱས་པ་དང་། ཉེས་པར་བྱས་པའི་ལས་ཀྱི་འབྲས་བུ་ནི་ལས་ཐམས་ཅད་ལ་རག་ལས་པ་ཡིན་ནོ། །དེས་དུད་འགྲོའི་འགྲོ་བར་བསྡུས་པ་ལྷ་མ་ཡིན་གཉིས་པ་དག་གི་ས་ལ་བརྟགས་ན། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་སོ། །སེམས་ཅན་འཁོར་བར་གཏོགས་པ་ཐམས་ཅད་ནི་ཆོས་ལ་རྟེན་པ། ཆོས་ཀྱི་འགྲོ་བ་ཆོས་སྐྱོབ་པ་ཡིན་ཏེ། ལེགས་པར་བྱས་པས་ལྷ་དང་མི་རྣམས་ཀྱི་ནང་དུ་སྐྱེ་ལ། ཉེས་པར་བྱས་པས་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་རྟོག་པར་བྱེད་དེ། ཇི་ལྟར་ན་ལྷ་ཀུན་ཏུ་རྒྱུ་བ་རྣམས་གནོད་སྦྱིན་རྫུ་འཕྲུལ་ཆེན་པོ་རྣམས་ལས་ཐོས་ནས། ཅི་ཞིག་བྱེད་ཅིག་གུ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ལྷ་ཀུན་ཏུ་རྒྱུ་བ་རྣམས་རྒྱལ་ཆེན་བཞི་དང་ལྷ་ཕྲེང་ཐོགས་རྣམས་ལ་འདི་ལྟར་ལྷ་མ་ཡིན་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་རྣམས་ཀྱིས་ཀླུ་རྣམས་ལ་འདི་ལྟར་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་རྒྱུ་གང་གིས་འཆི་བའི་དུས་བྱས་ནས། ལྷ་རྣམས་ཀྱི་ནང་དུ་སྐྱེ་བར་འགྱུར་བ་རྣམས་ལ་བར་ཆད་བྱ་བར་འབོད་ཅིག །དེ་དག་སྦྱིན་པ་དང་། ཚུལ་ཁྲིམས་དང་། ཤེས་པ་ཐམས་ཅད་ཀྱང་ཁ་ཟས་ལ་རག་ལས་པ་ཡིན་ལ། དེ་དག་ཀྱང་ཁ་ཟས་ལ་རྟེན་པ་ཡིན་པས། འཛམ་བུའི་གླིང་དུ་ཁྱེད་དེང་ལ། ལོ་ཏོག་ཐམས་ཅད་དབྲོག་པ་དང་། འབྲུ་ཐམས་ཅད་མ་རུང་བར་བྱ་བའི་ཆར་ཕོབ་ཤིག་ཅེས་རབ་ཏུ་གཟེངས་སྟོད་པར་བྱེད་པ་དེ་དག་བདག་ཅག་ལ་བསྙད་དོ། །ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་བར་སྣང་ལ་རྒྱུ་བའི་གནོད་སྦྱིན་གང་ཡིན་པ་དེ་རྣམས་ཀྱིས་ཀྱང་དེ་དག་བདག་ཅག་ལ་བསྙད་ལ། བདག་ཅག་གིས་ཀྱང་ཁྱེད་ཅག་ལ་བསྙད་པ་ལགས་སོ། །ཁྱེད་ཅག་གིས་ཀྱང་ཉེ་བ་ན་གནས་པའི་ལྷ་གང་ཡོད་པ་དེ་དག་ལ་བསྙད་ཅིང་། ལག་ན་ཡོལ་གོ་ཐོགས་པ་རྣམས་ཀྱིས་ཀྱང་པི་བང་ཅན་གསུམ་པ་རྣམས་ལ། པི་བང་ཅན་གསུམ་པ་རྣམས་ཀྱིས་ཀྱང་རྟག་ཏུ་མྱོས་པ་རྣམས་ལ་བསྙད་དེ། དེ་ལྟར་རྒྱལ་ཆེན་
བཞི་པ་རྣམས་ཀྱིས་ཆོས་དང་མི་འཐུན་པ་འདི་རྒྱ་ཆེར་བསྙད་དོ། །སོ་སོའི་བྱེ་བྲག་ཇི་ལྟ་བུ་ཡིན་པ་རྒྱལ་ཆེན་བཞི་པ་དེ་རྣམས་ཀྱིས་ཀྱང་གྲོང་ཁྱེར་ཆེན་པོ་བལྟ་ན་སྡུག་ན་ལྷའི་འདུན་ས་ཆོས་བཟང་དག་གི་འདོད་པའི་ཡོན་ཏན་ལྔ་འབྱོར་པར་གྱུར་པའི་ལྷ་རྣམས་ཀྱི་དབང་པོ་ཀཽ་ཤི་ཀ་ལ་སྔ་མ་བཞིན་རྒྱ་ཆེར་བསྙད་དོ། །དེ་ནས་ལྷ་རྣམས་ཀྱི་དབང་པོ་ཀཽ་ཤི་ཀས་འཇིག་རྟེན་སྐྱོང་བ་རྣམས་ལ་བསྒོ་བ། འཇིག་རྟེན་སྐྱོང་བ་དག་འཛམ་བུའི་གླིང་ན་ཅི་སངས་རྒྱས་དཀོན་མཆོག་ལ་དད་དམ། ཆོས་དཀོན་མཆོག་ལ་དད་དམ། དགེ་འདུན་དཀོན་མཆོག་ལ་དད་དམ། དགེ་སྦྱོང་དུ་འཛིན་ཏམ། བྲམ་ཟེར་འཛིན་ཏམ། བྱས་པ་གཟོའམ། བྱས་པ་ལ་ཕན་འདོགས་སམ། དྲང་བ་ཡིན་ནམ། དྲང་བའི་རང་བཞིན་ཅན་ཡིན་ནམ། མར་འཛིན་ཏམ། ཕར་འཛིན་ཏམ། རིགས་ཀྱི་རྒན་རབས་ལ་གུས་པར་བྱེད་དམ། ཚེས་གྲངས་ཀྱི་སྨྱུང་བ་ལ་ཉེ་བར་གནས་སམ། གཡོ་ཐབས་དང་ཚུལ་འཆོས་པ་ལ་མ་ཆགས་སམ། གཞལ་ལུགས་ལ་གཡོ་བྱེད་ཅིང་མི་སླུའམ། ཕན་ཚུན་གནོད་པ་དག་བྱེད་དམ་མི་བྱེད། འཛམ་བུའི་གླིང་དུ་དེང་ལ་རྟོགས་ཤིག་ཅེས་བསྒོ་བ་དང་། ལྷ་དེ་ལྟར་འཚལ་ལོ་ཞེས་སྨྲས་ནས། འཇིག་རྟེན་སྐྱོང་བ་དག་མི་རྣམས་ལ་ཕན་པར་བྱ་བའི་ཕྱིར་འཛམ་བུའི་གླིང་ག་ལ་བ་དེར་དོང་སྟེ། ཡུལ་ནས་ཡུལ། ལྗོངས་ནས་ལྗོངས། གྲོང་རྡལ་ནས་གྲོང་རྡལ། གྲོང་ནས་གྲོང་། གྲོང་ཁྱེར་ནས་གྲོང་ཁྱེར། ཚོང་རྡལ་ནས་ཚོང་རྡལ་དུ་དེ་དག་རྟོག་པར་བྱེད་དེ། འཛམ་བུའི་གླིང་ན་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་དག་གང་གནས་པ་འཛམ་བུའི་གླིང་འདི་ཐམས་ཅད་ལ་སྔ་མ་བཞིན་སོ་སོར་རྟོག་པར་བྱེད་དོ། །འཇིག་རྟེན་སྐྱོང་བ་བཞི་པོ་དེ་དག་གལ་ཏེ། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་སྐྱེ་དགུ་དག་མཐོང་ན་དེ་ལྟར་རྒྱ་མཚོའི་ནང་དུ་ཞུགས་ནས་ལོངས་སྤྱོད་ལྡན་ན་གནས་པའི་ཀླུ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་ལ་ཀླུ་དག་མ་འཇིགས་ཤིག །གྲོགས་པོ་དག་མ་འཇིགས་ཤིག །དམ་པའི་ཆོས་ཀྱི་ཕྱོགས་ནི་འཕེལ་ལོ། །བདུད་ཀྱི་ཕྱོགས་ནི་འགྲིབ་བོ། །མུན་ནག་མི་གསལ་བའི་ཕྱོགས་ནི་སེལ་ལོ། །བདུད་ཀྱི་ཕྱོགས་ནི་སྲབས་སོ། །ཆོས་དང་ལྡན་ཞིང་ཆོས་ཀྱི་རྗེས་སུ་
འཇུག་པའི་ལྷ་དང་མི་དང་ཀླུ་རྣམས་རབ་ཏུ་དགའོ། །ཆོས་ཀྱི་རྔ་ནི་ཀུན་ཏུ་བརྡུངས་སོ། །ཆོས་ཀྱི་དབྱངས་རབ་ཏུ་ལེན་དུ་བཅུག་སྟེ། ལྷའི་ཕྱོགས་ནི་འཕེལ་ལོ། །བདུད་ཀྱི་ཕྱོགས་ནི་འགྲིབ་བོ། །ཀླུ་དང་ལྷ་མ་ཡིན་ཆོས་དང་མི་ལྡན་པ་རྣམས་ནི་འགྲིབ་ཅིང་འདུག་གོ་ཞེས་བསྙད་དོ། །དེ་ཐོས་ནས་ཀླུ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་དགའ་བར་གྱུར་པ་རྣམས་ཀྱིས་འཇིག་རྟེན་སྐྱོང་བ་མགུ་བ་དག་ལ་འདི་སྐད་ཅེས་ལྷ་དག་བདག་ཅག་རབ་ཏུ་དགའ་སྟེ། བདག་ཅག་དང་མིའི་འཇིག་རྟེན་ན་མི་རྣམས་ལ་ཀླུ་དང་ལྷ་མ་ཡིན་ཆོས་དང་མི་ལྡན་པ་རྣམས་ཀྱིས་བར་ཆད་བྱ་བར་མི་ནུས་ཏེ། རབ་ཏུ་དགའ་ཞིང་མཆིས་སོ་ཞེས་དེ་སྐད་ལྷ་རྣམས་ཀྱི་དབང་པོ་བརྒྱ་བྱིན་ལ་གསོལ་ཅིག་ཅེས་སྨྲས་པ་དང་། དེ་སྐད་ཐོས་ནས་ཀླུ་རྣམས་ཀྱི་དྲུང་ནས། འཇིག་རྟེན་སྐྱོང་བ་དག་ལྷ་རྣམས་ཀྱི་དབང་པོ་བརྒྱ་བྱིན་ག་ལ་བ་དེར་དོང་སྟེ། སྔ་མ་བཞིན་དེ་སྐད་བསྙད་པ་དང་། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་ཡིད་རབ་ཏུ་དགའ་ནས། །འདི་ལྟར་ཚིགས་སུ་བཅད་དེ་སྨྲས་པ། ཐུབ་པ་དེ་ཉིད་གཟིགས་པ་ཡིས། །ཁྱེད་ལ་ལམ་བཏོད་འདི་གསུངས་ལ། །མི་གང་རབ་ཏུ་གནས་པ་ནི། །ལྷ་ཡི་འདུན་སར་འགྲོ་བར་འགྱུར། །སེམས་ཅན་རྣམས་ལ་བདེན་དང་དེ་བཞིན་དུ། །སྦྱིན་དང་བྱམས་པ་སྲུང་ཞིང་ཚིག་སྙན་སྨྲ། །ཡང་དག་ལྟ་དང་དྲི་མ་བྲལ་བའི་ཡིད། །སངས་རྒྱས་ཀྱིས་ནི་མཐོ་རིས་ལམ་དུ་གསུངས། །དཀར་པོའི་ཆོས་དང་ཡང་དག་ལྡན། །དཀར་པོའི་ཆོས་ལ་རྟེན་པ་རྣམས། །སྣང་ལས་སྣང་བའི་མེ་ཏོག་དང་། །སྒྲོན་ལས་སྒྲོན་མ་གཞན་འབྱུང་ལྟར། །སྣང་ལས་སྣང་བའི་མཆོག་འབྱུང་ཞིང་། །བདེ་ལས་ཤིན་ཏུ་བདེ་བར་འགྲོ། །དེ་བས་སྐྱེས་བུ་སྒྲོན་མ་མཆོག །ངམ་གྲོག་ཏུ་ནི་ལྟུང་མི་འགྱུར། །རྟག་ཏུ་ནོར་བུ་དྲི་མེད་ལྟར། །རྟག་ཏུ་གང་ཞིག་སེམས་དག་པ། །དེ་ནི་ཞི་སྟེ་ང་མེད་བརྟན། །ལྷ་རྣམས་ཀྱི་ནི་ནང་དུ་འགྲོ། །བསམ་གཏན་ཚུལ་ཁྲིམས་ཏིང་འཛིན་དག །གང་གི་སེམས་ལ་ཤིན་ཏུ་བསྒོམས། །བརྟན་པོ་དེ་ནི་གསེར་འདྲ་སྟེ། །ལྷ་རྣམས་ཀྱི་ནི་ནང་དུ་འགྲོ། །སྲོག་གཅོད་པ་དག་སྤངས་པ་དང་། །སེམས་ཅན་ཀུན་ལ་སྙིང་རྗེ་མཆོག །བརྩེ་ལྡན་དྲང་པོ་ཞི་བ་དག །ལྷ་རྣམས་ཀྱི་ནི་ནང་དུ་འགྲོ། །འཇིག་རྟེན་ཀུན་ལ་ཚིག་འཇམ་ཞིང་། །ཞེ་སྡང་ལས་ནི་རྣམ་སྤངས་ལ། །སྡིག་པའི་ཆོས་ཀྱིས་མ་གོས་པ། །ལྷ་རྣམས་ཀྱི་ནི་ནང་དུ་འགྲོ། །
གང་ལ་རྩྭ་དང་གསེར་མཉམ་ཞིང་། །གང་གིས་འདོད་པ་དུག་ལྟ་བུ། །འདོད་པ་སྤངས་པའི་བརྟན་པོ་དེ། །ལྷ་རྣམས་ཀྱི་ནི་ནང་དུ་འགྲོ། །འདོད་ཆགས་རྒྱུ་སྟེ་ཡིད་འོང་བའི། །ཡུལ་གྱིས་མ་དྲངས་གང་ཡིན་པ། །དེ་ནི་འཇིགས་པའི་དགོན་ལས་རྒལ། །ལྷ་རྣམས་ཀྱི་ནི་ནང་དུ་འགྲོ། །གྲོགས་པོ་གཉེན་བཤེས་རྩ་ལག་དང་། །ཕན་ཚུན་མི་འཐུན་གྱུར་པ་ལ། །གང་ཞིག་ཤིན་ཏུ་སྡུམས་བྱེད་པ། །ལྷ་རྣམས་ཀྱི་ནི་ནང་དུ་འགྲོ། །འདོད་པའི་འདམ་ལས་དྲངས་ཤིང་སྐྱོན་བསལ་བ། །སེམས་ཅན་ཀུན་ལ་རྟག་ཏུ་བདེ་འདོད་གང་། །དེ་ནི་དྲི་མེད་ཞི་བ་ཡིད་གྲོལ་ཞིང་། །དེ་ལྟར་བདུད་ཀྱི་སྟོབས་ནི་འཇོམས་པར་བྱེད། །གང་ཞིག་དབང་ལ་བློ་གནས་ཤིང་། །བློ་ཡི་དབང་དུ་མི་འགྲོ་གང་། །དེ་ནི་དགྲ་ལས་རྣམ་རྒྱལ་ཏེ། །ལྷ་རྣམས་ཀྱི་ནི་ནང་དུ་འགྲོ། །ལུས་ཀྱི་ལས་མཐའ་དགེ་བ་དག །སྡིག་ལས་བྲལ་བ་བདེ་ལྡན་གང་། །དེ་ནི་འདོད་སྤངས་བསམ་གཏན་པ། །ལྷ་རྣམས་ཀྱི་ནི་ནང་དུ་འགྲོ། །སྡིག་པའི་གྲོགས་པོ་རྣམ་སྤངས་ཤིང་། །སྲེད་པའི་ཞགས་ལས་རྣམ་གྲོལ་བ། །བུད་མེད་ཞགས་པས་མ་བཅིངས་པ། །ལྷ་རྣམས་ཀྱི་ནི་ནང་དུ་འགྲོ། །གང་དག་ཆོས་ལ་རབ་འབད་ཅིང་། །སྦྱིན་དང་ཚུལ་ཁྲིམས་ཏིང་འཛིན་ལྡན། །བློ་གྲོས་བརྟན་ཞིང་རྟག་བརྩོན་པ། །ལྷ་རྣམས་ཀྱི་ནི་ནང་དུ་འགྲོ། །རལ་གྲིས་ཞགས་པ་བཅད་པ་ལྟར། །གང་གིས་འཆིང་བ་བཅད་པ་དེ། །རང་དབང་ཞགས་པ་བཅད་པ་ཡིན། །ལྷ་རྣམས་ཀྱི་ནི་ནང་དུ་འགྲོ། །འདོད་པའི་དྲི་མས་མ་གོས་བརྐམ་པ་མེད། །སྐྱོན་དག་སྤངས་ཤིང་བཅོམ་སྟེ་སྲེད་དང་བྲལ། །ཉེས་མེད་དྲི་བྲལ་སེམས་ཅན་བརྟན་པ་དེ། །རང་གི་འབྲས་བུ་ལ་སྤྱོད་མཐོ་རིས་འགྲོ། །སེམས་ཅན་མིར་ནི་གྱུར་པ་གང་། །ལེགས་པར་བྱས་པ་མང་སྤྱད་པ། ལས་ཀྱི་རྣམ་སྨིན་དེ་ཡིས་སུ། །ལྷ་ཡི་འཇིག་རྟེན་རབ་ཏུ་འགེངས། །མི་ཡི་མཐུ་ཡིས་ལྷ་འབྱུང་ལ། །ལྷ་ཡི་མཐུ་ཡིས་མི་འབྱུང་སྟེ། །ཕན་ཚུན་མཐུས་འབྱུང་འདི་དག་ནི། །དམ་པའི་ཆོས་ཀྱི་ལམ་དུ་གནས། །ལྷ་ཡི་བདེ་འགྲོ་མི་ཡིན་ལ། །མི་ཡི་བདེ་འགྲོ་ལྷ་ཡིན་ཏེ། །ངན་སོང་གསུམ་གྱི་ས་དག་ནི། །དགེ་
བའི་ལས་རྣམས་སྤངས་པ་ཡིན། །དེ་ནི་ཁྱེད་ཡིན་རྟག་ཏུ་བརྩོན། །ལེགས་པར་མཐོང་བ་མཆོག་ཡིན་ཏེ། །རྟག་ཏུ་ཆོས་སྤེལ་བྱེད་པ་གང་། །ལྷ་མཆོག་རྣམས་ནི་རབ་ཏུ་འབོད། །བདེ་བ་ཐམས་ཅད་ཆོས་ལ་ལས། །མྱ་ངན་འདས་པ་ཆོས་ལ་ལས། །གཉིད་ལོག་རྣམས་ལ་ཆོས་སྟོན་ཅིག །འགྲོ་བ་མཆོག་ནི་ཆོས་ཡིན་ནོ། །དེ་སྐད་ཅེས་བསྒོ་ནས་ལྷ་རྣམས་ཀྱི་དབང་པོ་བརྒྱ་བྱིན་འཇིག་རྟེན་སྐྱོང་བ་དེ་དག་ལ་ཡང་འདི་སྐད་དུ་མི་རྣམས་ཡོངས་སུ་བསྲུང་བའི་ཕྱིར་དང་། ཆོས་རྣམས་འཕེལ་བར་བྱ་བའི་ཕྱིར་འབོད་ཅིག་ཅེས་བསྒོའོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ལྷ་རྣམས་ཀྱི་སེམས་ཀྱི་རྟོག་པ་རིག་ནས་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་སོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ལྷ་མ་ཡིན་རྣམས་ཀྱི་ས་གཉིས་པ་ལ་བརྟགས་ནས། ས་གསུམ་པ་ལ་རྟོག་པར་བྱེད་དེ། ལྷ་མ་ཡིན་རྣམས་ཀྱི་ས་གསུམ་པའི་རྣམ་པ་ཇི་ལྟ་བུ་ཡིན་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ས་གཞི་གསུམ་པ་གང་ཡིན་པ་ནི་དཔག་ཚད་ཉི་ཁྲི་ཆིག་སྟོང་ཡོད་དོ། །ས་གཞི་དེ་ཡང་གནས་བཟང་པོ་ཞེས་བྱ་སྟེ། ཚལ་དང་། ནགས་ཚལ་དང་། ལྟེང་ཀ་དང་། འབབ་ཆུའི་དངོ་དང་། སྐྱེ་བོ་འཐུན་པ་སྣ་ཚོགས་ཀྱིས་གང་བ། རྟག་ཏུ་སྤྲོ་བ་དང་། རོལ་མོའི་སྒྲ་སྙན་པས་གང་ངོ་། །གྲོང་ཁྱེར་ཟབ་པ་ཞེས་བྱ་བ་དཔག་ཚད་བརྒྱད་སྟོང་པ་ཡོད་དེ། གྲོང་ཁྱེར་དེ་ན་ལྷ་མ་ཡིན་གྱི་དབང་པོ་མེ་ཏོག་ཕྲེང་ཞེས་བྱ་བ་གནས་སོ། །ལྷ་མ་ཡིན་དེ་རྣམས་ཀྱང་རྩེ་བ་ལ་གནས་པ་ཞེས་བྱ་ལ། གྲོང་ཁྱེར་ཟབ་པ་དེ་ཡང་རིན་པོ་ཆེའི་རྣམ་པ་དུ་མ་དང་། ཚལ་དང་། ནགས་ཚལ་དང་། ལྟེང་ཀ་དང་། པད་མའི་རྫིང་རབ་ཏུ་མང་པོ་དང་ལྡན་པ། འདམ་དང་རྙོག་པ་དང་བྲལ་བའི་པད་མ་སྐྱེ་བའི་རྫིང་རྣམས་ཀྱིས་མཛེས་པར་བྱས་པ་ལྷ་མ་ཡིན་རྩེ་བའི་གྲོགས་པོ་དང་ལྡན་པ་རྣམས་ཀྱིས་ཀུན་ནས་ཡོངས་སུ་བསྐོར་བ། དུས་ཚིགས་དྲུག་ཉམས་དགའ་བ། ཚལ་ཆེན་པོ་བཞི་རྣམས་ཀྱིས་མཛེས་པར་བྱས་པ་ལ་འདི་ལྟ་སྟེ། དྲིལ་བུ་གཡེར་ཁའི་ཕྲེང་བའི་ཚལ་ཞེས་བྱ་བ། གང་དུ་དྲིལ་བུ་གཡེར་ཁའི་ཤིང་ལྗོན་པ་རྟག་ཏུ་སྒྲ་དབྱངས་སྙན་པ་འབྱིན་པ་
དང་། འདི་ལྟར་ཚལ་གཉིས་པ་གསེར་ཕྲེང་ཞེས་བྱ་བ་གང་དུ་གསེར་གྱི་ཤིང་ལྗོན་པ་སྐྱེ་བ་དང་། ཚལ་གསུམ་པ་མེ་ཕྲེང་ཞེས་བྱ་བ་གང་དུ་མེ་ལྟ་བུའི་ཤིང་ལྗོན་པ་འབྲས་བུ་དམར་པོ་འབྱུང་བ་དང་། ཚལ་བཞི་པ་འདྲེས་པ་ཞེས་བྱ་བ་གང་དུ་མེ་ཏོག་དང་འབྲས་བུ་འདྲེས་པ་རྣམས་ཀྱིས་མཛེས་པར་བྱས་པ་ཡིན་ཏེ། ཚལ་བཞི་པོ་དེ་རྣམས་ཀྱིས་ལྷ་མ་ཡིན་གྱི་གྲོང་ཁྱེར་ཟབ་པ་མཛེས་པར་བྱས་སོ། །གང་ན་ལྷ་མ་ཡིན་རྩེ་བའི་གྲོགས་དང་ལྷན་ཅིག་གནས་པ་ནི་ལྷ་དང་འཐུན་པར་བདེ་བར་གནས་པ་ཡིན་ཏེ། དེ་ལྟར་གནས་པ་དེ་དག་ནི་མེ་ཏོག་ཕྲེང་དང་། ཕྱེ་མ་དང་། བྱུག་པ་རྣམས་ཀྱིས་ལུས་བརྒྱན་པ། སྤྲོ་བ་དང་། དགའ་བ་དང་། རྩེ་བ་དང་། རྒལ་བ་དང་། དགོད་པ་རྣམས་ཀྱིས་རྟག་ཏུ་གནས་པ། ལྷ་མ་ཡིན་གྱི་བུ་མོ་འབུམ་སྙེད་ཀྱིས་ཡོངས་སུ་བསྐོར་བ། ལྷ་མ་ཡིན་གྱི་དབང་པོ་མེ་ཏོག་ཕྲེང་གིས་བསྐྱངས་པ། སྐྱེད་མོས་ཚལ་དུ་རྟག་ཏུ་རྩེ་བར་གནས་པ། ལུས་ཀྱི་བར་བར་ནི་རིན་པོ་ཆེ་རྣམ་པ་སྣ་ཚོགས་ཀྱིས་བརྒྱན་པ་ཡིན་ཏེ། ལྷ་མ་ཡིན་གྱི་དབང་པོ་བརྟན་པས་གནས་གཉིས་པ་ན་གནས་པ། ལྷ་མ་ཡིན་འཛམ་བྷ་ཞེས་བྱ་བ། ལྷ་མ་ཡིན་མེ་ཏོག་ཕྲེང་ཞེས་བྱ་བའི་དྲུང་དུ་མངགས་ཏེ། འདི་ལྟར་མིའི་འཇིག་རྟེན་ན་མི་འདི་དག་ཐམས་ཅད་མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། བྱས་པ་ལ་ཕན་འདོགས་པ་ཡིན་ལ། དེ་ལྟར་གནས་པ་དེ་དག་ནི་མི་མཐུ་ཆེ་བ་རྣམས་ཀྱིས་ལྷ་རྣམས་མཐུ་ཆེ་བ་ཡིན་ཏེ། དེས་ན་བདག་ཅག་དང་ཀླུ་དང་བཅས་པ་རྣམས་ཀྱིས་ངེས་པར་ལྷ་དང་མི་རྣམས་ཀྱི་དམ་པའི་ཆོས་ཀྱི་བར་ཆད་བྱ་བ་ལ་འབད་པར་བྱའོ་ཞེས་སྔ་མ་བཞིན་དུ་དེ་དག་ཐོས་ནས། གནས་གསུམ་པ་ན་གནས་པ་ལྷ་མ་ཡིན་གྱི་དབང་པོ་མེ་ཏོག་ཕྲེང་ཤིན་ཏུ་མི་དགའ་སྟེ། བདག་ཅག་གི་དགྲ་བོ་ལྷ་འདི་དག་ནི་མི་ལ་རག་ལས་པ་ཡིན་པས། ལྷ་དང་མིའི་བར་ཆད་བྱའོ་ཞེས་སྨྲས་སོ། །དེ་ནས་ལྷ་མ་ཡིན་རྩེ་ཞིང་གནས་པ་མཚོན་དང་གོ་ཆ་སྣ་ཚོགས་ཀྱིས་ལུས་རྣམ་པར་བརྒྱན་པ། ཤིན་ཏུ་ཆས་པ་རྣམས་ཀླུ་རྣམས་ཀྱི་གནས་ལོངས་སྤྱོད་ལྡན་ག་ལ་བ་དེར་དོང་ངོ་། །དེ་ནས་ལྷ་མ་ཡིན་གྱི་སྒྲ་དེ་དག་ཐོས་ནས་ཀླུའི་རྒྱལ་པོ་ཆེན་པོ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་ལུས་ལ་གློག་གི་ཕྲེང་
བ་འབར་བ་འབྱུང་བ། ཤིན་ཏུ་ཆས་པ་རྣམས་གློག་མང་པོ་ཆར་ལྟར་འབྱིན་པ་ན་རྒྱ་མཚོའི་དབུས་ནས་ཀླུ་འབུམ་ཕྲག་བྱེ་བ་དུ་མ་དག་མངོན་པར་འབྱུང་ངོ་། །དེ་ནས་ལྷ་མ་ཡིན་དེ་རྣམས་དང་། ཀླུ་དེ་རྣམས་རྒྱ་མཚོའི་དབུས་སུ་གཡུལ་ཆེན་པོ་འགྱེད་པར་འགྱུར་ཏེ། དེ་གང་གི་ཚེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་འབྱུང་བ་དེའི་ཚེ་ལྷ་མ་ཡིན་རྣམས་ཕམ་པར་འགྱུར་ལ། གལ་ཏེ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པའི་སྐྱེ་དགུ་འབྱུང་ན་སྔ་མ་བཞིན་དེའི་ཚེ་ལྷ་མ་ཡིན་གྱི་ཕྱོགས་རྒྱལ་བར་འགྱུར་ཏེ། ཀླུའི་ཕྱོགས་ཕམ་པར་འགྱུར་རོ། །དེ་ལྟར་ཐམས་ཅད་ཆོས་ལ་རག་ལས་པ་ཡིན་ཏེ། དེ་གང་གི་ཚེ་ཀླུ་ཕམ་པར་གྱུར་ན། དེ་དག་ཀུན་ཏུ་རྒྱུ་བའི་ལྷ་རྣམས་ལ་ཀྱེ་གྲོགས་པོ་དག་འདི་ལྟར་ལྷ་མ་ཡིན་རྣམས་ཀྱི་མཐུ་ལ་བགེགས་བྱ་བའི་ཕྱིར་འབོད་ཅིག་ཅེས་སྨྲས་སོ། །དེ་ནས་ཀུན་ཏུ་རྒྱུ་བའི་ལྷ་ཁྲོ་བས་གདུངས་པ་རྣམས་ཁ་རླངས་འབྱིན་བཞིན་དུ་རྒྱལ་ཆེན་བཞིའི་ལྷ་རྣམས་ལ། ཀྱེ་ལྷ་དག་འདི་ལྟར་ལྷ་མ་ཡིན་གྱི་ཕྱོགས་འདི་ནི་མཐུ་ཆེ་སྟེ། ཀླུ་རྣམས་ནི་ཕམ་མོ། །ལྷ་མ་ཡིན་རྣམས་ནི་རྒྱལ་གྱིས་གཡུལ་བཤམ་པ་ལ་རབ་ཏུ་འབོད་ཅིག་ཅེས་སྨྲས་སོ། །ཀུན་ཏུ་རྒྱུ་བའི་ལྷའི་བུ་དེ་དག་དང་། ཁ་རླངས་དེ་མཐོང་ནས་ཀྱང་རྟོག་གེ་པ་དག་ན་རེ། འདི་ལྟར་དུ་བ་མཇུག་རིངས་བྱུང་སྟེ། ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །ཆར་ལེགས་པར་འབབ་པར་འགྱུར་རོ། །ཆར་ལེགས་པར་འབབ་པར་མི་འགྱུར་རོ་ཞེས་སྔ་མ་བཞིན་དུ་སྦྱར་ཏེ། འདི་ནི་དུ་བ་མཇུག་རིངས་སྟོན་པའི་རྒྱུ་གཉིས་པ་ཡིན་ནོ། །དེ་གང་གི་ཚེ་ལྷ་དང་། ཀླུ་དང་། གནོད་སྦྱིན་དག་རྒྱལ་བར་འགྱུར་བ་དེའི་ཚེ། ཆར་ལེགས་པར་འབབ་ཅིང་ལོ་ལེགས་པར་འགྱུར། །དེའི་ཚེ་ནད་འབྱུང་བར་མི་འགྱུར་ཞིང་། མཚོན་གྱིས་འཁྲུག་པར་མི་འགྱུར་བ་དང་། འདི་ལྟ་སྟེ། རྟོག་གེ་པ་དག་ན་རེ་འདི་ལྟར་གཟས་ཆར་ཕབ་བོ་ཞེས་བྱ་བ་ལ་སོགས་པ་རྒྱ་ཆེར་སྦྱར་རོ། །དེ་ནས་གང་གི་ཚེ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པའི་སྐྱེ་དགུ་འབྱུང་ཞིང་མར་མི་འཛིན་པ་དང་། ཕར་མི་འཛིན་པ་དང་། རྒན་རབས་ལ་གུས་པར་མི་བྱེད་པ་དེའི་ཚེ། ལྷ་མ་ཡིན་གྱི་ཕྱོགས་ནི་རྒྱལ་བར་འགྱུར་ཏེ། ཆར་མི་འབབ་ཅིང་ཆོས་དང་མི་ལྡན་པ་རྣམས་ཀྱིས་ལོ་ལེགས་པར་མི་འགྱུར་ལ།
མཚོན་གྱིས་འཁྲུག་པར་ཡང་འགྱུར་རོ། །དེ་ལ་རྟོག་གེ་པ་དག་གཞན་དུ་སྒྱུར་ཏེ། གཟའི་ཉེས་པས་ཆར་མི་འབབ་བོ། །རྒྱུ་སྐར་གྱི་ཉེས་པས་ལོ་ལེགས་པར་མི་འགྱུར་རོ་ཞེས་སྔ་མ་བཞིན་དུ་སྦྱར་ཏེ། དེ་ལྟར་ཆོས་དང་ཆོས་མ་ཡིན་པ་མངོན་པར་མི་ཤེས་པ་རྟོག་གེ་པ་དག་གཞན་དུ་སྒྱུར་ཞིང་འཇིག་རྟེན་པ་ལ་གཞན་དུ་སྒྲོགས་སོ། །དེ་ལྟར་མི་ཤེས་པས་ཉམས་པ་ཐམས་ཅད་ནི་མུ་སྟེགས་ཡ་མཚན་གྱི་བློར་འགྱུར་རོ། །གང་གི་ཚེ་ལྷ་མ་ཡིན་རྣམས་ཀྱིས་ཀླུ་རྣམས་ཟིལ་གྱིས་མནན་པ་དེའི་ཚེ། དེ་ནས་ཡང་འཇིག་རྟེན་སྐྱོང་བ་བཞི་དག་རྒྱལ་ཆེན་བཞི་པ་རྣམས་ལ་འདི་ལྟར་སྒྲ་སྒྲོགས་པར་བྱེད་དེ། ཆོས་ལུགས་རྒྱལ་བར་གྱུར་ཅིག་ཆོས་མིན་རྒྱལ་མ་གྱུར། །བདེན་པ་རྒྱལ་བར་གྱུར་ཅིག་བརྫུན་པ་རྒྱལ་མ་གྱུར། །ལྷ་རྣམས་རྒྱལ་བར་གྱུར་ཅིག་ལྷ་མིན་རྒྱལ་མ་གྱུར། །སྣང་བ་རྒྱལ་བར་གྱུར་ཅིག་མུན་པ་རྒྱལ་མ་གྱུར། །སྦྱིན་པ་རྒྱལ་བར་གྱུར་ཅིག་འཇུངས་པ་རྒྱལ་མ་གྱུར། །ཚུལ་ཁྲིམས་རྒྱལ་བར་གྱུར་ཅིག་གསོད་པ་རྒྱལ་མ་གྱུར། །སངས་རྒྱས་རྒྱལ་བར་གྱུར་ཅིག་མུ་སྟེགས་རྒྱལ་མ་གྱུར། །བརྟན་པ་རྒྱལ་བར་གྱུར་ཅིག་གཡོ་བ་རྒྱལ་མ་གྱུར། །ཆོས་བཞིན་རྒྱལ་བར་གྱུར་ཅིག་དོར་སྒྱུ་རྒྱལ་མ་གྱུར། །སྙིང་རྗེ་རྒྱལ་བར་གྱུར་ཅིག་བརྩེ་མེད་རྒྱལ་མ་གྱུར། །བྱམས་པ་རྒྱལ་བར་གྱུར་ཅིག་ཁྲོ་བ་རྒྱལ་མ་གྱུར། །བརྒྱ་བྱིན་རྒྱལ་བར་གྱུར་ཅིག་ལྷ་མིན་རྒྱལ་མ་གྱུར། །གོང་མ་རྒྱལ་བར་གྱུར་ཅིག་འོག་མ་རྒྱལ་མ་གྱུར། །འགྲངས་པ་རྒྱལ་བར་གྱུར་ཅིག་བཀྲེས་པ་རྒྱལ་མ་གྱུར། །ཡེ་ཤེས་རྒྱལ་བར་གྱུར་ཅིག་གཏི་མུག་རྒྱལ་མ་གྱུར། །བྱ་བ་རྒྱལ་བར་གྱུར་ཅིག་བྱ་མིན་རྒྱལ་མ་གྱུར། །བརྩོན་འགྲུས་རྒྱལ་བར་གྱུར་ཅིག་ལེ་ལོ་རྒྱལ་མ་གྱུར། །སྐྱེས་པ་རྒྱལ་བར་གྱུར་ཅིག་བུད་མེད་རྒྱལ་མ་གྱུར། །རྒན་རབས་རྒྱལ་བར་གྱུར་ཅིག་བྱིས་པ་རྒྱལ་མ་གྱུར། །བཟོད་པ་རྒྱལ་བར་གྱུར་ཅིག་སྡང་བ་རྒྱལ་མ་གྱུར། །མི་རྣམས་རྒྱལ་བར་གྱུར་ཅིག་རབ་འཇོམས་ལ་སོགས་པ། །ཕུང་བར་བྱེད་པའི་ཀླུ་རྣམས་རྒྱལ་བར་མ་གྱུར་ཅིག །ཉིན་མོ་རྒྱལ་བར་གྱུར་ཅིག་མཚན་མོ་རྒྱལ་མ་གྱུར། །ཟླ་བ་རྒྱལ་བར་གྱུར་ཅིག་གཟའ་རྣམས་རྒྱལ་མ་གྱུར། །ལོ་ཏོག་རྒྱལ་བར་གྱུར་ཅིག་རྩིགས་མ་རྒྱལ་མ་གྱུར། །བདེ་བ་རྒྱལ་བར་གྱུར་ཅིག་
བདེ་མིན་རྒྱལ་མ་གྱུར། །ནད་མེད་རྒྱལ་བར་གྱུར་ཅིག་ནད་རྣམས་རྒྱ་ལམ་གྱུར། །འཇམ་པོ་རྒྱལ་བར་གྱུར་ཅིག་རྩུབ་པོ་རྒྱལ་མ་གྱུར། །ཐར་པ་རྒྱལ་བར་གྱུར་ཅིག་བཅིངས་པ་རྒྱལ་མ་གྱུར། །གཞུང་ལུགས་རྒྱལ་བར་གྱུར་ཅིག་ལུགས་མིན་རྒྱལ་མ་གྱུར། །གཅེས་པ་རྣམས་ནི་ཐམས་ཅད་རབ་ཏུ་རྒྱལ་བར་ཤོག །གཅེས་མིན་དག་ནི་དུས་རྣམས་ཀུན་ཏུ་བཅོམ་པར་ཤོག །དེ་ལྟར་འཇིག་རྟེན་སྐྱོང་བ་བཞི་དག་རྔ་བོ་ཆེ་ཐོགས་ནས་ལྷ་རྣམས་ལ་རྒྱུགས་ཤིག་རྒྱུགས་ཤིག་ཅེས་སྨྲས་སོ། །དེ་ནས་ལྷ་རྣམས་དེ་དག་གིས་སྨྲས་པ་ཐོས་ནས་མཚོན་ཆ་དང་གོ་ཆ་སྣ་ཚོགས་བགོས་ཏེ། ཀླུ་རྣམས་དང་། ལྷ་མ་ཡིན་རྣམས་ལྷན་ཅིག་གཡུལ་འགྱེད་པར་མིག་བཙུམས་པ་ཙམ་གྱི་ཚད་དུ་དེར་ཐམས་ཅད་ཕྱིན་ཏོ། །དེ་ནས་ལྷ་མ་ཡིན་རྣམས་ཀྱིས་དེ་དག་ལ་བརྟགས་ནས། འདི་ལྟར་དགེ་སྦྱོང་དུ་འཛིན་པ་དང་། བྲམ་ཟེར་འཛིན་པའི་སྐྱེ་དགུ་འབྱུང་བ་སྔ་མ་བཞིན་སྦྱར་ཏེ། དེའི་ཚེ་ལྷ་མ་ཡིན་རྣམས་ཀྱིས་ལྷ་དེ་དག་མཐོང་ནས། སའི་འོག་གཞན་ག་ལ་བར་ཐམས་ཅད་དུ་འཇུག་པར་བྱེད་དོ། །གལ་ཏེ་དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པའི་སྐྱེ་དགུ་འབྱུང་ན། ལྷ་རྣམས་དང་དེ་དག་ལྷན་ཅིག་གཡུལ་འགྱེད་པར་ཤོམ་སྟེ། དེ་དག་ཡུད་ཙམ་ཞིག་གཡུལ་བཀྱེ་ནས་ལྷ་རྣམས་ཀྱིས་ཕམ་པར་བྱས་ནས། དེ་ནས་ཡང་ལྷ་མ་ཡིན་གྱི་དབང་པོ་མེ་ཏོག་ཕྲེང་དང་། ལྷ་མ་ཡིན་ཕམ་པ་རྣམས་དང་ལྷན་ཅིག་རང་རང་གི་གནས་སུ་འཇུག་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ལྷ་དང་ལྷ་མ་ཡིན་གྱི་གཡུལ་མཐོང་ནས། ཡང་དག་པ་ཇི་ལྟ་བ་བཞིན་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་སོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་གནས་གསུམ་པ་ལ་གནས་པ་ཞེས་བྱ་བའི་ལྷ་མ་ཡིན་མེ་ཏོག་ཕྲེང་ཞེས་བྱ་བ་ལ་སོགས་པའི་ལས་ཀྱི་ཆོས་ཀྱི་རྣམ་པར་སྨིན་པ་ལ་རྟོག་པར་བྱེད་དེ། ལས་ཀྱི་ཆོས་ཀྱི་རྣམ་པར་སྨིན་པ་གང་གིས་ལྷ་མ་ཡིན་གནས་གསུམ་པ་གནས་བཟང་དུ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་དུས་སུ་སྦྱོར་བའི་དོན་དུ་གྱད་དམ། སིལ་ཁྲོལ་བའམ། དུ་གུལ་ལ་ཀ་བའམ། བསྡུས་
པའམ། དགའ་འདུན་པར་གྱུར་པ་དག་ལ་སྦྱིན་པ་ངན་པ་བྱིན་པ་དེ་སེམས་པ་དང་མི་ལྡན་ཞིང་། ཞིང་བཟང་པོ་མ་ཡིན་པ་ལ་བྱིན་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་གནས་གསུམ་པ་ན་གནས་པའི་ལྷ་མ་ཡིན་རྣམས་ཀྱི་ནང་དུ་སྐྱེ་བར་འགྱུར་རོ། །དེ་དག་ནི་མི་རྣམས་ཀྱི་ལོ་བདུན་བརྒྱ་གང་ཡིན་པ་དེ་དག་གི་ཉིན་ཞག་གཅིག་ཡིན་ལ། བགྲང་བ་དེ་ཡི་ལོ་བདུན་སྟོང་ཐུབ་སྟེ། དུས་མ་ཡིན་པར་འཆི་བ་ནི་ཡོད་པར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་མ་ཡིན་གྱི་བདག་པོ་མེ་ཏོག་ཕྲེང་གི་ལས་ཀྱི་འབྲས་བུ་རྣམ་པར་སྨིན་པ་ལ་སེམས་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་སེམས་པ་དང་མི་ལྡན་པ་གང་གིས་ཚུལ་ཁྲིམས་འཆལ་བ་ལ་ཟན་གཅིག་བྱིན་ན་ལས་དེས་ལྷ་མ་ཡིན་གྱི་གནས་ཟབ་པར་ལྷ་མ་ཡིན་གྱི་བདག་པོ་བདུད་རྩི་དྲི་མ་ཅན་ཟ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ས་གཞན་བཞི་པ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་འདི་ལྟར་དུད་འགྲོར་གཏོགས་པ་ལྷ་མ་ཡིན་གྱི་གནས་གཞན་བཞི་པ་མི་གཡོ་བ་ཞེས་བྱ་བ་དཔག་ཚད་ཉི་ཁྲི་ཆིག་སྟོང་ཡོད་པ་མཐོང་ངོ་། །དེའི་དབུས་ན་གྲོང་ཁྱེར་མཛེས་པ་ཞེས་བྱ་བ་དཔག་ཚད་བརྒྱད་སྟོང་པ་གཅིག་ཡོད་དོ། །གནས་དེ་ཡང་དཔག་ཚད་ཁྲི་སུམ་སྟོང་ཡོད་དེ། གྲོང་ཁྱེར་དེ་ན་ལྷ་མ་ཡིན་གྱི་དབང་པོ་རབ་སྤྲོ་ཞེས་བྱ་བ་གནས་སོ། །གནས་དེ་ན་ལྷ་མ་ཡིན་གནས་པ་གང་ཡིན་པ་དེ་དག་གི་མིང་ནི་ཀུན་སྤྲོ་ཞེས་བྱ་སྟེ། སྟོབས་ཆེ་བ་ཡིན་ནོ། །རྒྱལ་པོ་དེ་ཡང་ལྷ་མ་ཡིན་དེ་དག་པས་སྟོབས་ཤིན་ཏུ་ཆེ་བ་ཡིན་ཏེ། ཤིན་ཏུ་བདེ་བ། ཤིན་ཏུ་བརྟན་པ། མཐུ་དང་ལྡན་པ། རྫུ་འཕྲུལ་དང་ལྡན་པ། གར་ཡང་འཇིགས་པ་མེད་པ། དབང་པོ་དང་བཅས་པའི་འཇིག་རྟེན་ཡང་གྲངས་སུ་མི་རྩི་བ། བརྩོན་འགྲུས་ལྷག་པས་རབ་ཏུ་རྒྱགས་པ་ཐམས་ཅད་སའི་འོག་གི་གཏིང་ན་གནས་པ་ཡིན་ལ། དེ་ལས་འོག་ཏུ་གྱུར་པ་ནི་གཞན་གང་ཡང་མེད་དེ། དེ་ནོར་བུའི་ས་གཞིའི་སྟེང་ན་གནས་སོ། །དེ་རྟག་པར་ཡིད་རབ་ཏུ་དགའ་ཞིང་རྟག་ཏུ་སྤྲོ་ལ་དགའ་བ་རྟག་པར་ཡིད་སྣ་ཚོགས་སུ་ཤིན་ཏུ་ཕྱེ་བ། ཡུལ་གྱི་སྲིད་པ་སྣ་ཚོགས་ལ་རྣམ་པར་
ཆགས་པ་དག་གནས་གཞན་བཞི་པ་གྲོང་ཁྱེར་ཟབ་པ་ན་ཤིན་ཏུ་བདེ་བར་གནས་སོ། །གྲོང་ཁྱེར་དེ་ཡང་ཀུན་ནས་པད་མའི་རྫིང་དང་། ལྟེང་ཀ་དང་། འབབ་ཆུའི་དངོ་དང་། བསྐྱེད་པའི་ས་དང་། ར་བས་མཛེས་པར་བྱས་པ། རིན་པོ་ཆེ་སྣ་བདུན་གྱི་ཁང་པས་བརྒྱན་པ། འགྲན་ཟླ་དང་བྲལ་བ། ཕན་ཚུན་བཤེས་གཉེན་མི་འཐུན་པ་དང་བྲལ་བ། ཕན་ཚུན་འཁྲུག་པ་དང་བྲལ་བ། འགྲན་ཟླའི་འཇིགས་པ་དང་བྲལ་བ། ནམ་མཁའ་གཉིས་པ་ལྟ་བུ་ཡིན་ཏེ། ཇི་ལྟར་ནམ་མཁའ་ལ་གཟའ་དང་། རྒྱུ་སྐར་དང་། སྐར་མའི་ཚོགས་རྣམ་པ་དུ་མ་དག་གིས་མཛེས་པར་བྱས་པ་དེ་ལྟར་གྲོང་ཁྱེར་དེ་ཡང་ཀུན་ནས་རིན་པོ་ཆེ་རྣམ་པ་སྣ་ཚོགས་དག་གིས་བརྒྱན་ཅིང་མཛེས་པ་ཡིན་ནོ། །འདིར་ཚིགས་སུ་བཅད་པ། བྱེད་ཀུན་སེམས་ལ་རག་ལས་ཤིང་། །འབྲས་བུ་སེམས་ལ་རག་ལས་མཐོང་། །ཇི་ལྟར་སེམས་ནི་སྣ་ཚོགས་ལྟར། །དེ་ལྟ་བུར་ནི་འབྲས་བུའང་མཐོང་། །འཇིག་རྟེན་སྲིད་གསུམ་རྗེས་འགྲོ་འདི། །ཐམས་ཅད་སེམས་ཀྱིས་སྣ་ཚོགས་བྲིས། །སེམས་ཀྱི་དབང་དུ་མ་གྱུར་གང་། །དེ་ཡི་གནས་ནི་ཡེ་མེད་དོ། །ཡིད་ནི་ཐར་དང་བཅིངས་པ་ཡི། །གཉིས་ཀྱི་གཞི་དང་རྒྱུ་རུ་འགྱུར། །དགེ་བ་ཡིས་ནི་སྐྱེ་བོ་འགྲོལ། །མི་དགེས་མྱུར་དུ་འཆིང་བར་བྱེད། །དེ་ལྟར་སེམས་ཅན་སེམས་ཀྱི་དབང་། །སྲིད་གསུམ་དག་ན་འཁྱམ་པར་འགྱུར། །སྲེད་པས་རྨོངས་པའི་སེམས་ཅན་རྣམས། །སེམས་ཀྱི་དབང་དུ་གྱུར་ནས་འགྲོ། །དམུས་ལོང་ལམ་བཟང་མི་མཐོང་ལྟར། །མྱ་ངན་འདས་པ་ཐོབ་མི་འགྱུར། །ཇི་ལྟར་སེམས་ཅན་དེ་རྣམས་ཀྱིས་ཡང་དག་པའི་ལམ་བསྒྲུབས་པ་དེ་ལྟར་རྒྱུ་སྣ་ཚོགས་དང་འཐུན་པར་གྱུར་པའི་གནས་དེ་སྣ་ཚོགས་སུ་སྣང་ངོ་། །འདི་ལྟར་གནས་དེ་གྲོང་ཁྱེར་དེའི་ཕྱི་རོལ་ན་འདུག་པ་ཡིན་ཏེ། ཤིང་ལྗོན་པ་དང་། ཉེ་བའི་ཚལ་དང་། ལྟེང་ཀ་དང་། གྲོང་རྡལ་དང་། པད་མའི་རྫིང་དང་། ཆུ་བོ་རྣམ་པ་སྣ་ཚོགས་དང་། བྱ་རྣམ་པ་བརྒྱ་སྙེད་ཀྱིས་མཛེས་པར་བྱས་པ་ཡིན་ནོ། །དེའི་གནས་བཞི་པ་དེ་ན་ལྷ་མ་ཡིན་གནས་པ་གང་ཡིན་པ་དེ་དག་ཀུན་སྤྲོ་ཞེས་བྱ་སྟེ། བརྟན་པ། བག་ཚ་བ་མེད་པ། ཆ་བྱད་དང་རྒྱན་ཤིན་ཏུ་བཟང་བས་ལུས་བརྒྱན་པ་རྣམས་གནས་པ། ཕན་ཚུན་
ཡིད་ལ་ཅུང་ཟད་ཀྱང་འཁྲུག་པར་མི་བྱེད་པ། རྟག་ཏུ་ཡིད་ལ་སྤྲོ་ཞིང་དགའ་བ་དང་ལྡན་པ། བུད་མེད་ཆ་བྱད་དང་རྒྱན་སྣ་ཚོགས་ཀྱིས་བརྒྱན་པའི་ཚོགས་རྣམས་ཀྱིས་ཡོངས་སུ་བསྐོར་ཅིང་གནས་ཏེ། བརྒྱའམ་ཡང་ན་སྟོང་དུ་དགའ་བར་བྱེད། རྩེ་བར་བྱེད། ཡོངས་སུ་སྤྱོད་པར་བྱེད་དོ། །གནས་བཞི་པ་དེ་ཡང་ནོར་བུ་ཐོགས་པའི་བུད་མེད་རྣམས་ཀྱིས་རྟག་ཏུ་བརྒྱན་པ། ལྷ་མ་ཡིན་ཀུན་སྤྲོ་རྣམས་རྟག་ཏུ་ལྷ་མ་ཡིན་གྱི་དབང་པོ་རབ་སྤྲོའི་བཀའ་ཤིན་ཏུ་ཉན་པ། ཡིད་ཤིན་ཏུ་ཕྱེ་བ། དེ་ལ་བཀའ་ཉན་པའི་ངོ་བོ་ནི་རྟག་ཏུ་དབང་དུ་གྱུར་པར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་མ་ཡིན་གྱི་དབང་པོ་རབ་སྤྲོའི་ལས་ཀྱི་རྣམ་པར་སྨིན་པ་ལ་རྟོག་པར་བྱེད་དེ། དེར་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་འདས་པའི་དུས་ན་ལོག་པར་ལྟ་བ་ལ་ཞེན་པ། ལས་ཀྱི་འབྲས་བུ་མངོན་པར་མི་ཤེས་པ། སངས་རྒྱས་དང་། ཆོས་དང་། དགེ་འདུན་ལས་ཕྱིར་ཕྱོགས་པར་གྱུར་པ་གང་ལ་རེ་ཞིག་ཅིག་ན་དགེ་སློང་ཚུལ་ཁྲིམས་དང་ལྡན་པ། ཤིན་ཏུ་བརྩོན་འགྲུས་དང་ལྡན་པ་ལམ་དུ་ཞུགས་པར་གྱུར་པ་ཞིག་གིས་ནན་གྱིས་བསོད་སྙོམས་གཅིག་བསླངས་པ་དང་བྱིན་ནོ། །བྱིན་ནས་ཀྱང་བདག་གིས་བསོད་སྙོམས་བྱིན་པའི་འབྲས་བུ་ནི་དོན་མེད་ཅིང་འདི་ལས་བདག་གི་ཆོས་སུ་འགྱུར་བ་ཡང་མེད་ལ། ལོག་པར་རབ་ཏུ་བྱུང་བ། དམངས་རིགས་འདི་ལ་བདག་གིས་བསོད་སྙོམས་སྦྱིན་པ་འདི་ནི་ཚྭ་སྒོ་ཅན་ལ་བསོད་སྙོམས་བྱིན་པར་ཟད་དོ་ཞེས་ཀྱང་སྨྲ་ལ། ཞིང་འབའ་ཞིག་ཡོན་ཏན་དང་ལྡན་ལ། གཞན་གྱི་ངོ་ཆེན་གྱིས་སྦྱིན་པ་ཚེར་མ་ཅན་ཉམས་པ་བྱིན་པ་དེས་ལུས་དང་བྲལ་ནས་ངན་འགྲོ་ལོག་པར་ལྟུང་བ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་ཏེ། ས་གཞི་ཤིན་ཏུ་འབྱོར་པ། རིན་པོ་ཆེས་བརྒྱན་པ། གཡོ་བ་མེད་པ་དག་ཏུ་ཞིང་ཤིན་ཏུ་ཡོན་ཏན་དང་ལྡན་པ་དང་། སེམས་པས་དངོས་པོ་མ་བཟུང་བ་དེའི་ལས་ཀྱི་རྣམ་པར་སྨིན་པས་ལྷ་མ་ཡིན་ཀུན་སྤྲོ་ཞེས་བྱ་བ་རྣམས་ཀྱི་བདག་པོ་རབ་སྤྲོ་ཞེས་བྱ་བ་སོ་སོར་འགྲན་པ་ལྟ་བུའི་བདེ་བ་ཐམས་ཅད་དང་ལྡན་པར་འགྱུར་བ་མཐོང་ངོ་།། །།འཕགས་པ་དམ་པའི་ཆོས་
དྲན་པ་ཉེ་བར་གཞག་པ། བམ་པོ་ཉེར་གསུམ་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་ལྷ་མ་ཡིན་ཀུན་སྤྲོ་ཞེས་བྱ་བ་རྣམས་ཀྱི་ལས་ཀྱི་རྣམ་པར་སྨིན་པ་ལ་རྟོག་པར་བྱེད་དེ། ལས་ཀྱི་རྣམ་པར་སྨིན་པ་གང་གིས་ལྷ་མ་ཡིན་གྱི་གནས་སུ་ལྷ་མ་ཡིན་ཀུན་སྤྲོ་དག་ཇི་ལྟར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྲེད་པའི་རོ་ལ་ཞེན་པར་གྱུར་པ་གང་སེམས་ཅན་ཡོད་པའི་ཚལ་དུ་གནས་ཏེ། འདི་ལྟར་ཚལ་དེ་དག་ན་སེམས་ཅན་འཁོད་པ་དེ་རྣམས་སུས་ཀྱང་མ་བསྡུས། གང་གིས་ཀྱང་ལྷུག་པར་མ་བཀོད་དེ། བདག་གིས་ཚལ་འདིར་བསྡུ་བར་བྱའོ་སྙམ་ནས། སེམས་ཅན་ལ་སྙིང་བརྩེ་བའི་ཕྱིར་དང་། བདག་ཉིད་ཀྱི་འཚོ་བ་སྦྲང་རྩི་དག་འདོད་པའི་ཕྱིར་སྡུད་པར་བྱེད་ན། དེ་ལུས་དང་བྲལ་ནས་ལྷ་མ་ཡིན་རྣམས་ཀྱི་ནང་དུ་སྐྱེ་བར་འགྱུར་ཏེ། དེའི་འཚོ་བའི་ཕྱིར་སེམས་ཅན་བསྲུངས་པའི་རྣམ་པར་སྨིན་པའི་རྒྱུས། ཀུན་སྤྲོ་རྣམས་ཀྱི་ནང་དུ་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། ལྷ་དང་ལྷ་མ་ཡིན་གཡུལ་འགྱེད་པ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ཀླུའི་གཙོ་བོ་ལོངས་སྤྱོད་ལྡན་ན་གནས་པ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་མགོ་བདུན་ཡོད་པ་འདི་ལྟ་སྟེ། ཀླུའི་རྒྱལ་པོ་ནོར་རྒྱས་ཀྱི་བུ་དང་། ཀླུའི་རྒྱལ་པོ་འཇོག་པོ་དང་། ཀླུའི་རྒྱལ་པོ་བཟང་པོ་དང་། ཀླུའི་རྒྱལ་པོ་རོ་ཧི་ན་དང་། ཀླུའི་རྒྱལ་པོ་སྤྲིན་ཕྲེང་དང་། ཀླུའི་རྒྱལ་པོ་ཀློང་དང་། ཀླུའི་རྒྱལ་པོ་ཀུན་འགྲོ་དང་། ཀླུའི་རྒྱལ་པོ་རབ་སྤྲོ་དང་། ཀླུའི་རྒྱལ་པོ་ཆར་འབེབས་ཏེ། དེ་དག་ནི་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། ཡང་དག་པའི་ལྟ་བ་དང་། ཚུལ་ཁྲིམས་ལ་ཞུགས་པ་ཡིན་ནོ། །སྔ་མ་བཞིན་དུ་སྦྱར་ཏེ། ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་ལ་འདི་ལྟ་སྟེ། ཀླུའི་རྒྱལ་པོ་རབ་འཇོམས་དང་། ཀླུའི་རྒྱལ་པོ་བསྒྱིངས་པ་དང་། ཀླུའི་རྒྱལ་པོ་ནག་པོ་དང་། ཀླུའི་རྒྱལ་པོ་ཧུ་ལུ་ཧུ་ལུ་དག་ཕམ་པར་གྱུར་པ་དེའི་ཚེ་སའི་འོག་ན་གནས་པ་དང་། རི་རབ་ལ་རྟེན་པ་དང་། ཆུའི་ནང་དུ་ཞུགས་པ་ག་ལ་བ་དེར་རྒྱུག་
པར་བྱེད་དེ། འདི་ལྟ་སྟེ། གནས་དང་པོ་ལ་རྟེན་པའི་ལྷ་མ་ཡིན་རྣམས་ཀྱིས་གཉིས་ཤིང་རྩེ་བ་ཞེས་བྱ་བའི་ལྷ་མ་ཡིན་དེ་དག་ལ་སྨྲས་པ། ཀླུའི་རྒྱལ་པོ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་འདི་དག་དང་རྒྱལ་ཆེན་བཞིའི་ལྷ་དང་བཅས་པས་བདག་ཅག་གཙེས་ཀྱིས་ཁྱེད་བདག་ཅག་གི་གྲོགས་སུ་ཚུར་ཤོག་རྒྱུག །དེ་ནས་དེ་ཐོས་ནས་ལྷ་མ་ཡིན་གཉིས་ཤིང་རྩེ་བ་དག་ལྷ་མ་ཡིན་གྱི་གྲོང་ཁྱེར་འོད་ལྡན་ཞེས་བྱ་བ་གང་ན་ལྷ་མ་ཡིན་གྱི་དབང་པོ་སྒྲ་གཅན་གནས་པ་ག་ལ་བ་དེར་དོང་སྟེ་ཕྱིན་ནས། ལྷ་མ་ཡིན་གྱི་དབང་པོ་སྒྲ་གཅན་ལ་སྔ་མ་བཞིན་དུ་ཐམས་ཅད་བསྙད་དོ། །དེ་ནས་གལ་ཏེ་ལྷ་མ་ཡིན་གྱི་དབང་པོ་སྒྲ་གཅན་འདི་ལྟར་དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། བྱས་པ་ལ་ཕན་འདོགས་པ་དང་། རིགས་ཀྱི་རྒན་རབས་ལ་གུས་པར་བྱེད་པར་ཤེས་པ་དེའི་ཚེ་ལྷ་མ་ཡིན་གྱི་དབང་པོ་སྒྲ་གཅན་ཀླུའི་རྒྱལ་པོ་རབ་འཇོམས་ལ་སོགས་པ་ལ། འདི་ལྟར་བདག་ཅག་གི་གནས་གཉིས་པ་ན་གནས་པའི་ལྷ་མ་ཡིན་རྣམས་ལ་འདི་ལྟར་ལྷ་རྣམས་ཀྱིས་བདག་ཅག་མངོན་པར་གཙེས་སོ་ཞེས་སྦྲན་པར་བྱ་བའི་བར་དུ་སྔ་མ་བཞིན་དུ་སྦྱར་ཏེ། ཀླུའི་རྒྱལ་པོ་འཇོག་པོ་ལ་སོགས་པ་དེ་དག་ཉིད་ཁོག་ཤིག་ཁོག་ཤིག་ཅེས་བསྒོའོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་གནས་གཉིས་པ་ན་གནས་པའི་ལྷ་མ་ཡིན་མགུལ་ཕྲེང་ཞེས་བྱ་བ་དེ་དག་ལ་འདི་ལྟར་ཀླུའི་རྒྱལ་པོ་རབ་འཇོམས་ལ་སོགས་པ། ཀླུའི་རྒྱལ་པོ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་མངོན་པར་གཙེས་སོ་ཞེས་སྨྲས་སོ། །དེ་ནས་དེ་ཐོས་ནས། ལྷ་མ་ཡིན་མགུལ་ཕྲེང་དག་ལྷ་མ་ཡིན་གྱི་གྲོང་སྐར་ཕྲེང་ཞེས་བྱ་བ་ན་ལྷ་མ་ཡིན་གྱི་དབང་པོ་འཁོད་པ་གང་ཡིན་པ་དེ་དག་ལ་འདི་ལྟར་ཀྱེ་རྒྱལ་པོ་ཆེན་པོ་བདག་ཅག་ལ་ལྷ་མ་ཡིན་གྱི་དབང་པོ་སྒྲ་གཅན་དང་། ཀླུའི་རྒྱལ་པོ་རབ་འཇོམས་ལ་སོགས་པ་ན་རེ་འདི་ལྟར་ཀླུའི་རྒྱལ་པོ་རབ་འཇོམས་ལ་སོགས་པ་དག་ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་དང་། རྒྱལ་ཆེན་བཞིའི་ལྷ་རྣམས་ཀྱིས་མངོན་པར་གཙེས་སོ་ཞེས་མཆིའོ། །ལྷ་མ་ཡིན་གྱི་དབང་པོས་དེ་ཐོས་ནས། གལ་ཏེ་དགེ་སྦྱོང་དུ་འཛིན་པ་དང་། བྲམ་ཟེར་འཛིན་པའི་སྐྱེ་དགུ་
ཆོས་ཀྱི་རྗེས་སུ་འཇུག་པ་འབྱུང་བ་དང་། བདག་ཉིད་ཀྱི་སྟོབས་ཆེ་ཆུང་མཐོང་བ་དེའི་ཚེ། ལྷ་མ་ཡིན་མགུལ་ཕྲེང་དེ་དག་ལ་འདི་ལྟར་ཀྱེ་མ་འཛམ་བུའི་གླིང་གི་མི་རྣམས་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པས་ལྷ་རྣམས་སྟོབས་རབ་ཏུ་ཆེ་སྟེ། འདི་དག་བདག་གིས་གནས་གསུམ་པ་ན་གནས་པའི་ལྷ་མ་ཡིན་རྣམས་ལ་སྔ་མ་བཞིན་བསྙད་པར་བྱའོ་ཞེས་སྨྲས་སོ། །དེ་ནས་ལྷ་མ་ཡིན་ཀུན་འགྲོ་ཞེས་བྱ་བ་ལ་བསྙད་དོ། །དེ་ནས་ལྷ་མ་ཡིན་ཀུན་འགྲོ་དག་གིས་གང་ན་ལྷ་མ་ཡིན་གྱི་དབང་པོ་མེ་ཏོག་ཕྲེང་ཞེས་བྱ་བ་གནས་པའི་གྲོང་ཁྱེར་ཟབ་པ་ཞེས་བྱ་བ་ག་ལ་བ་དེར་དོང་སྟེ་ལྷ་མ་ཡིན་ཀུན་འགྲོས་དེ་ཐམས་ཅད་སྔ་མ་བཞིན་བསྙད་དོ། །དེ་ནས་ལྷ་མ་ཡིན་གྱི་དབང་པོ་མེ་ཏོག་ཕྲེང་ཞེས་བྱ་བས། གལ་ཏེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པའི་སྐྱེ་དགུ་མཐོང་ན། དེས་ལྷ་མ་ཡིན་དེ་དག་ལ་འདི་ལྟར་གནས་བཞི་པ་ན་གནས་པའི་ལྷ་མ་ཡིན་རྣམས་ལ་མངོན་པར་བསྙད་པར་བྱའོ་ཞེས་སྨྲས་སོ། །དེ་ནས་གནས་གསུམ་པ་ན་གནས་པའི་ལྷ་མ་ཡིན་གྱི་དབང་པོས་གནས་བཞི་པ་ལ་གནས་པའི་ལྷ་མ་ཡིན་རྣམས་འཁོད་པ་ག་ལ་བ་དེར་དོང་སྟེ། འདི་ལྟར་ཀླུའི་རྒྱལ་པོ་རབ་འཇོམས་ལ་སོགས་པ་དག་ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་རྒྱལ་ཆེན་བཞིའི་ལྷ་རྣམས་ཀྱིས་མངོན་པར་གཙེས་ཏེ། དེ་ལྟར་ཀླུ་འདི་དག་ནི་བདག་ཅག་གི་ཕྱོགས་ཡིན་པས་བདག་ཅག་རྣམས་ཀྱིས་ངེས་པར་ལྷ་རྣམས་ཀྱི་བར་ཆད་བྱ་བ་ལ་འབད་པར་བྱའོ་ཞེས་སྨྲས་སོ། །དེ་ནས་གནས་བཞི་པ་ལ་གནས་པའི་ལྷ་མ་ཡིན་དཔུང་བཟངས་དག་གིས་དེ་དག་མཐོང་ནས། གྲོང་ཁྱེར་ཟབ་པ་ཞེས་བྱ་བ་གང་ན་ལྷ་མ་ཡིན་གྱི་དབང་པོ་རབ་སྤྲོ་ཞེས་བྱ་བ་ག་ལ་བ་དེར་དོང་ངོ་། །དེ་ནས་ལྷ་མ་ཡིན་རིངས་ཐབས་སུ་འོང་བ་དེ་དག་མཐོང་ནས། ལྷ་མ་ཡིན་རྣམས་ཅིའི་ཕྱིར་རིངས་ཐབས་སུ་འོངས་ཞེས་དྲིས་སོ། །དེ་ནས་ལྷ་མ་ཡིན་དཔུང་བཟངས་དག་གིས་ལྷ་མ་ཡིན་གྱི་དབང་པོ་རབ་སྤྲོ་ལ་སྔ་མ་ཇི་ལྟ་བ་བཞིན་བསྙད་དོ། །དེ་ནས་ལྷ་མ་ཡིན་གྱི་དབང་པོ་རབ་སྤྲོས་ལྷ་མ་ཡིན་གྱི་དབང་པོ་དེ་དག་ལ་འདི་སྐད་ཅེས་ཀྱེ་མ་ལྷ་མ་ཡིན་གྱི་དབང་པོ་སྒྲ་གཅན་དག་བརྩོན་འགྲུས་ཆུང་བ་ཡིན་ཏེ། ཀླུའི་རྒྱལ་པོ་རབ་འཇོམས་ལ་སོགས་
པ་གནས་པ་གང་ཡིན་པ་དེ་དག་རྒྱལ་ཆེན་བཞིའི་ལྷ་རྣམས་ཀྱིས་ཕམ་པར་བྱས་ཏེ། དེ་དག་ལ་བདག་གིས་དགེ་སྦྱོང་དུ་འཛིན་པ་དང་། བྲམ་ཟེར་འཛིན་པའི་སྐྱེ་དགུ་རྩིས་ལ་མ་ཆགས་པ་དང་། ཆོས་ཀྱི་རྗེས་སུ་ཆོས་སྒྲུབ་པ་རྩིས་ལ་མ་ཆགས་པར་བྱའོ་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་དེ་རང་གི་ལྷ་མ་ཡིན་རྣམས་འཁོད་པ་ག་ལ་བ་དེར་དོང་ངོ་། །དེ་ནས་ལྷ་མ་ཡིན་གྱི་དབང་པོ་རབ་སྤྲོ་དཔུང་བཟངས་དག་ལ་འདི་ལྟར་བདག་ནི་ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་དང་། རྒྱལ་ཆེན་བཞིའི་ལྷ་རྣམས་ལ་བར་ཆད་བྱ་བའི་ཕྱིར་ཆས་ཏེ། ལྷ་མ་ཡིན་རྣམས་ཀྱི་དབང་པོའི་བརྩོན་འགྲུས་དང་། སྤྲོ་བ་དང་། འཁོར་དང་བཅས་པ། མཚུངས་པ་མེད་པ་ཐམས་ཅད་ལྷ་རྣམས་དང་གཡུལ་འགྱེད་པར་འདོང་གིས་འདི་ལྟར་ལྷ་མ་ཡིན་རྣམས་མྱུར་དུ་ཆོས་ཤིག་མྱུར་དུ་ཆོས་ཤིག་ཅེས་བསྒོའོ། །དེ་ནས་ལྷ་མ་ཡིན་གྱི་དབང་པོ་རབ་སྤྲོས་ལྷ་མ་ཡིན་གྱི་དབང་པོ་གསུམ་དག་ལ་གང་ཆོས་ཀྱི་རྣམ་པ་འདི་ལྟ་བུ་བཟོད་པ་ཁྱོད་ལ་ཅི་བརྩོན་འགྲུས་མེད་དམ། རྟེན་མེད་དམ། འདི་ལྟར་བདག་ནི་རང་གི་ལག་མཐུ་དང་བརྩོན་འགྲུས་དང་ལྡན་པས་ཆའོ་ཞེས་སྨྲས་སོ། །དེ་ནས་ཡང་ལྷ་མ་ཡིན་གྱི་དབང་པོ་རབ་དགོད་རིང་པོར་མ་ཐོགས་པར་རང་གི་ལྷ་མ་ཡིན་རྣམས་ལ་གྲོགས་པོ་དག་རིངས་པར་ཆོས་ཤིག་རིངས་པར་ཆོས་ཤིག །ཅེས་འདི་ལྟར་བདག་གིས་ལྷ་མ་ཡིན་གྱི་དབང་པོ་མ་ལུས་པ་རྣམས་ལ་ཡང་སྦྲན་ཟིན་ཏེ། བདག་མྱུར་དུ་ཆ་ཡིས། ལག་ཏུ་མཚོན་ཆ་སྣ་ཚོགས་བླངས་པར་ཤེས་ནས། ལྷ་མ་ཡིན་གྱི་གཡུལ་ལ་བརྩོན་པར་གྱིས་ཤིག །དེ་དག་གི་བློ་རིག་ནས་བསྒྲུབ་པར་བྱ་བའི་ཆོས་གང་ཡིན་པ་དེ་དག་བསྒྲུབ་པར་བྱ་སྟེ། ལྷ་རྣམས་ཀྱིས་ཕམ་པར་བྱར་མི་བཟོད་དོ་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་རབ་དགོད་ཀྱིས་དེ་སྐད་སྨྲས་ནས། རང་གི་བརྩོན་འགྲུས་ཆེན་པོ་དང་སྟོབས་ཀྱིས་དྲེགས་པ། བློ་གྲོས་ཤིན་ཏུ་རྒྱ་ཆེ་བ། རང་གི་སྟོབས་དང་གཞན་གྱི་སྟོབས་ཚད་མ་གྲངས་སུ་མི་རྩི་བར་རང་གི་གནས་ནས་ཆས་ནས་གནས་གཞན་གསུམ་པར་འགྲོ་བར་བྱེད་དེ། གྲོང་ཁྱེར་ཟབ་པ་ན་ལྷ་མ་ཡིན་གྱི་བདག་པོ་མེ་ཏོག་ཕྲེང་ལྷ་མ་ཡིན་བྱེ་བ་ཁྲག་ཁྲིག་དུ་མ་ག་ལ་བ་དེར་སོང་སྟེ་ཕྱིན་ནས་བརྩམས་
པའི་ཡིད་ཀྱིས་ལྷ་མ་ཡིན་གྱི་དབང་པོ་མེ་ཏོག་ཕྲེང་ལ་སྨྲས་པ། འདི་ལྟར་ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་དང་། ལྷ་དང་བཅས་པ་དག་ལས་རྒྱལ་བར་བྱ་ཡིས་ལྷ་མ་ཡིན་གྱི་གཡུལ་འགྱེད་པར་འདོང་འདོང་། དེ་སྐད་སྨྲས་པ་དང་། མེ་ཏོག་ཕྲེང་དེས་སྨྲས་པ། འདི་ལྟར་གཡུལ་འགྱེད་པ་འདི་ནི་བདག་ཅག་གི་དུས་མ་ཡིན་ཏེ། མར་འཛིན་པ་དང་། ཕར་འཛིན་པ་དང་། རིགས་ཀྱི་རྒན་རབས་ལ་རིམ་གྲོ་བྱེད་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། ཆོས་ལ་ཆོས་ཀྱི་རྗེས་སུ་འཇུག་པ་དག་ཡོད་པས། ལྷའི་ཕྱོགས་སྟོབས་ཆེ་སྟེ། དེ་ལྟ་བས་ན་དེ་རིང་བདག་ཅག་གི་གཡུལ་འགྱེད་པའི་དུས་མ་ཡིན་ནོ་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་རབ་སྤྲོ་དེའི་ཚིག་མ་མཉན་པར་འདི་ལྟར་ཀླུ་དང་ལྷ་དེ་དག་བདག་གཅིག་པུས་ཕམ་པར་བྱ་བར་ནུས་ན། ཁྱེད་དང་བཅས་པས་ལྟ་སྨོས་ཀྱང་ཅི་དགོས་ཏེ། ཕམ་པར་བྱ་ཡིས་ལྷ་མ་ཡིན་གྱི་དབང་པོ་དག་འདོང་འདོང་ཞེས་སྨྲས་སོ། །དེ་ནས་མེ་ཏོག་ཕྲེང་ཞེས་བྱ་བ་དེས་སྤྲོ་བ་བསྐྱེད་ནས། ལྷ་མ་ཡིན་གྱི་སྡེ་བྱེ་བ་ཕྲག་དུ་མ་དང་ལྷན་ཅིག་གནས་གཞན་གཉིས་པ་ག་ལ་བ་དེར་དོང་ངོ་། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་ལ་རབ་སྤྲོ་དང་། བརྟན་པ་དང་། མེ་ཏོག་ཕྲེང་དག་གིས་ལྷ་རྣམས་ལས་རྒྱལ་བར་བྱ་ཡིས། ལྷ་མ་ཡིན་གྱི་གཡུལ་འགྱེད་པར་འདོང་འདོང་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་གྱིས་དེ་དག་ལ་སྨྲས་པ། ཀྱེ་མ་ལྷ་མ་ཡིན་གྱི་དབང་པོ་དག་དུས་ལ་མ་བབ་སྟེ། བདག་ཅག་གི་གཡུལ་འགྱེད་པའི་དུས་མ་ཡིན་ནོ། །འཛམ་བུའི་གླིང་གི་མི་རྣམས་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་སྟེ། མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པའི་སྐྱེ་དགུ་དག་ལྷ་ཡུལ་དུ་སྐྱེ་ལ། ལྷའི་ཕྱོགས་སྟོབས་ཆེ་བས་གཡུལ་འགྱེད་པར་མི་ནུས་ཏེ། ལྷ་མ་ཡིན་གྱི་དུས་མ་ཡིན་ནོ་ཞེས་སྨྲས་སོ། །དེ་ནས་ཐམས་ཅད་ཡིད་འཐུན་པར་ལྷ་མ་ཡིན་སྒྲ་གཅན་དེ་ལ་འདི་སྐད་ཅེས་འདི་ལྟར་བདག་ཅག་ལྷ་རྣམས་དང་གཡུལ་འགྱེད་པར་སྤྲོ་ཡིས་འདོང་འདོང་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་དེ་དག་གི་བསམ་པ་དང་འཐུན་
པར་རྒྱ་མཚོའི་ནང་ནས་ཆས་ནས་ཀླུའི་རྒྱལ་པོ་རབ་འཇོམས་ལ་སོགས་པ་ག་ལ་བ་དེར་སོང་སྟེ། འདི་ལྟར་བདག་ཅག་ལྷ་མ་ཡིན་གྱི་དབང་པོ་འདི་དག་ཐམས་ཅད་དང་འོངས་ཏེ། ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ག་ལ་བ་དེར་བདག་ཅག་གཡུལ་འགྱེད་དུ་འོང་ངོ་ཞེས་སྨྲས་སོ། །དེ་ནས་རབ་འཇོམས་ཀྱིས་དེ་ཐོས་ནས་ཡིད་རབ་ཏུ་དགའ་སྟེ། འཇོག་པོ་དང་ནོར་རྒྱས་ཀྱི་བུ་ལ་སོགས་པ་ག་ལ་བ་དེར་གཡུལ་འགྱེད་པའི་ཕྱིར་འཁོར་དང་བཅས་པ་དོང་ངོ་། །དེ་ནས་ཀླུའི་བདག་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ཡང་ཀླུའི་རྒྱལ་པོ་རབ་འཇོམས་ལ་སོགས་པ་གང་དུ་གཡུལ་བཤམས་པར་གཡུལ་འགྱེད་དུ་དོང་ངོ་། །དེ་ནས་དེ་དག་དེ་ལྟར་ཕན་ཚུན་གཡུལ་འགྱེད་པ་དང་། ཆོས་དང་མི་ལྡན་པའི་ཀླུའི་བདག་པོ་རྣམས་ཕམ་པར་གྱུར་ཏོ། །དེ་ལྟར་དེ་དག་ཕམ་པ་དང་། ལྷ་མ་ཡིན་བྱེ་བ་ཕྲག་དུ་མ་དག་རྒྱུག་པར་བྱེད་དོ། །དེ་ནས་འཇོག་པོ་དང་། ནོར་རྒྱས་ཀྱི་བུ་ལ་སོགས་པས་དེ་དག་མཐོང་ནས་ལྷ་མ་ཡིན་ག་ལ་བར་འཁོད་པར་གཡུལ་འགྱེད་དུ་བརྒྱུགས་སོ། །དེ་ནས་ཀླུ་རྣམས་དང་། ལྷ་མ་ཡིན་ཚད་མེད་པ་དེ་རྣམས་རྒྱ་མཚོའི་སྟེང་དུ་ཕན་ཚུན་གཡུལ་འགྱེད་དེ། མེ་ཆར་ལྟར་འབབ་པ་དང་། མཚོན་ཆ་ཆར་ལྟར་འབབ་པ་ཚད་མེད་པ་དེ་དང་། དུག་ནག་པོ་རྣམ་པར་གདུངས་ཤིང་བློ་དམན་པ་དེ་རྣམས་ཕན་ཚུན་གཡུལ་འགྱེད་དོ། །དེ་གང་གི་ཚེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པའི་སྐྱེ་དགུ་བྱུང་ན། དེ་དག་ཀླུ་འབའ་ཞིག་གིས་ལྷ་མ་ཡིན་རྣམས་ཕམ་པར་བྱེད་དོ། །གལ་ཏེ་ཤིན་ཏུ་ཆོས་དང་མི་ལྡན་པའི་སྐྱེ་དགུ་བྱུང་ན་དེའི་ཚེ་ལྷ་མ་ཡིན་རྣམས་ཀྱིས་ཀླུ་རྣམས་ཕམ་པར་བྱེད་དོ། །གང་གི་ཚེ་ཀླུ་རྣམས་ཕམ་པར་འགྱུར་བ་དེའི་ཚེ་ལྷ་ཀུན་ཏུ་རྒྱུ་བ་རྣམས་ལ་འདི་ལྟར་སའི་འོག་ན་གནས་པ་འདི་དག་ཐམས་ཅད་ཀྱིས་བདག་ཅག་རྣམ་པ་ཐམས་ཅད་དུ་གཙེས་ཏེ། དེ་དག་དང་བདག་ཅག་ཕན་ཚུན་གཡུལ་འགྱེད་པར་མི་ནུས་ཀྱིས་རྒྱུགས་ཤིག་རྒྱུགས་ཤིག་ཅེས་སྨྲས་སོ། །དེ་ནས་ལྷ་ཀུན་ཏུ་རྒྱུ་བ་རྣམས་མཚོན་ཆ་དང་ལག་ཆ་སྣ་ཚོགས་ཐོགས་ཏེ། ལྷ་མ་ཡིན་
ག་ལ་འཁོད་པ་དེར་འདོང་བར་བྱེད་དོ། །དེ་ནས་ལྷ་ཀུན་ཏུ་རྒྱུ་བ་རྣམས་ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ག་ལ་བ་དེར་དོང་སྟེ་ཕྱིན་ནས། ཀླུ་རྣམས་ལ་སྨྲས་པ། བདག་ཅག་རྣམས་ལྷ་མ་ཡིན་ཚར་གཅད་པའི་ཕྱིར་འདིང་འོངས་ཏེ། བདག་ཅག་ཁྱེད་ཀྱིས་བསྒྲུབས་པ་ལྷ་མ་ཡིན་གཞིག་པའི་ཕྱིར་འདི་ཉིད་དུ་འོངས་སོ། །དེ་སྐད་ཅེས་སྨྲས་པ་དང་། དེ་ནས་ཡང་ཀླུ་རྣམས་ལྷ་དང་ལྷན་ཅིག་ཏུ་ལྷ་མ་ཡིན་གྱི་དབང་པོ་སྒྲ་གཅན་ག་ལ་བ་དེར་དོང་ངོ་། །དེ་ནས་ལྷ་མ་ཡིན་རྣམས་ཀྱིས་དེ་དག་དེ་ལྟར་མཐོང་ནས། དེ་ནས་ཡང་ལྷ་རྣམས་ག་ལ་བ་དེར་གཡུལ་འགྱེད་དུ་དོང་ངོ་། །དེ་ནས་ལྷ་དང་ལྷ་མ་ཡིན་རྒྱ་མཚོའི་ནང་དུ་གཡུལ་འགྱེད་པར་འགྱུར་ཏེ། གང་གི་ཚེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་འབྱུང་བ་དེའི་ཚེ་ལྷ་ཀུན་ཏུ་རྒྱུ་བ་རྣམས་ཀྱིས་མྱུར་དུ་ལྷ་མ་ཡིན་རྣམས་ཕམ་པར་བྱེད་དོ། །དེ་ནས་ལྷ་རྣམས་ཀྱིས་ལྷ་མ་ཡིན་རྣམས་ཕམ་པར་བྱས་ནས། དེ་ནས་ཡང་ལྷ་མ་ཡིན་གྱི་དབང་པོ་སྒྲ་གཅན་གྱི་གནས་ག་ལ་བ་དེར་དོང་ངོ་། །དེ་ནས་ལྷ་མ་ཡིན་གནས་གཞན་གཉིས་པ་ན་གནས་པ་དེ་དག་རང་གི་ཕྱོགས་མངོན་པར་བཅོམ་པ་མངོན་དུ་མཐོང་ནས། བདག་ཅག་འདི་ན་གཡུལ་འགྱེད་པར་འཁོད་ན་ལྷ་མ་ཡིན་རྣམས་ཅིའི་ཕྱིར་འབྲོས། ལྷ་མ་ཡིན་རྣམས་ཅིའི་ཕྱིར་འབྲོས་ཞེས་སྨྲས་སོ། །དེ་ནས་ཡང་ལྷ་མ་ཡིན་རྣམས་གཡུལ་འགྱེད་དུ་ལྷ་རྣམས་ག་ལ་བ་དེར་རྒྱུག་པར་བྱེད་དོ། །དེ་ནས་ལྷ་དང་ལྷ་མ་ཡིན་རྒྱ་མཚོའི་དབུས་སུ་ཕན་ཚུན་མངོན་པར་གནོད་པའི་གཡུལ་ཆེན་པོ་འཁྲུགས་པ་བཀྱེ་བར་གྱུར་ཏོ། །དེ་ནས་གང་གི་ཚེ་ལྷ་རྣམས་རྒྱལ་བ་དེའི་ཚེ་ལྷ་རྣམས་ཀྱིས་ལྷ་མ་ཡིན་གྱི་དཔུང་མངོན་པར་བཅོམ་མོ། །དེའི་ཚེ་འཇིགས་པས་བསྐོར་བའི་ས་ན་གནས་པའི་ལྷ་མ་ཡིན་རྣམས་ལྷ་རྣམས་ག་ལ་བ་དེར་འདོང་བར་བྱེད་དོ། །དེ་ནས་ལྷ་རྣམས་ཀྱིས་ལྷ་མ་ཡིན་གྱི་དཔུང་མི་བཟད་པ་དེ་དག་མངོན་པར་མཐོང་ནས་འཁོད་དོ། །དེ་ནས་ལྷ་མ་ཡིན་རྣམས་ཡང་ལྷ་རྣམས་ག་ལ་བ་དེར་གཡུལ་འགྱེད་དུ་དོང་སྟེ། ཕན་ཚུན་གཡུལ་ཆེན་པོ་དེ་དག་བཀྱེ་བར་གྱུར་ཏོ། །དེ་ནས་གང་གི་ཚེ་ལྷ་རྣམས་ཕམ་པར་གྱུར་པ་དེའི་ཚེ་འཇིག་རྟེན་སྐྱོང་བ་དག་ལྷ་ལག་
ན་ཡོལ་གོ་ཐོགས་པ་དག་ག་ལ་བ་དེར་དོང་སྟེ། འདི་ལྟར་ལྷ་མ་ཡིན་རྣམས་ཀྱིས་བདག་ཅག་མངོན་པར་གཙེས་ཀྱིས་རྒྱུགས་ཤིག་རྒྱུགས་ཤིག་ཅེས་སྨྲས་སོ། །དེ་ཐོས་ནས་ལྷ་ལག་ན་ཡོལ་གོ་ཐོགས་པ་དག་ལྷ་མ་ཡིན་ག་ལ་བ་དེར་གཡུལ་འགྱེད་དུ་དོང་ངོ་། །དེ་ནས་ལྷ་ལག་ན་ཡོལ་གོ་ཐོགས་པ་མཚོན་ཆ་དང་། ལག་ཆ་སྣ་ཚོགས་ཅན་དག་ལྷ་མ་ཡིན་ག་ལ་བ་དེར་དོང་ངོ་། །དེ་ནས་ལྷ་དེ་དག་མངོན་པར་མཐོང་ནས། ཡང་ལྷ་མ་ཡིན་རྣམས་ཁྲོས་ནས་བརྒྱུགས་སོ། །དེ་ནས་ལྷ་ལག་ན་ཡོལ་གོ་ཐོགས་པ་རྣམས་དང་། ལྷ་མ་ཡིན་དེ་རྣམས་ཕན་ཚུན་སྤུ་ཟིང་ཞེས་བྱེད་པའི་གཡུལ་ཆེན་པོ་བཀྱེ་བ་དང་། འདི་ལྟར་ལྷ་དང་ལྷ་མ་ཡིན་གྱི་གཡུལ་འདི་ལྟ་བུ་མཚུངས་པ་མེད་པ་བཀྱེའོ་ཞེས་དེ་དག་མངོན་པར་བརྗོད་དོ། །དེ་དག་གང་གི་ཚེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་སྐྱེ་དགུ་དག་འབྱུང་བ་དེའི་ཚེ་ལྷ་ལག་ན་ཡོལ་གོ་ཐོགས་པ་རྣམས་ཀྱིས་ལྷ་མ་ཡིན་རྣམས་ཕམ་པར་བྱེད་དེ། དེའི་ཚེ་རྒྱ་མཚོའི་དབུས་སུ་ལྷ་དང་ལྷ་མ་ཡིན་ཤིན་ཏུ་འཇོམས་པ་ཆོས་དང་ཆོས་མ་ཡིན་པ་ལ་རྟེན་པའི་རྟགས་ཅན་དུ་གྱུར་པ་དག་ན། གཞན་དང་མི་འདྲ་བའི་གཡུལ་བཀྱེའོ། །གང་གི་ཚེ་ལྷ་ལག་ན་ཡོལ་གོ་ཐོགས་པ་དེ་དག་ཕམ་པར་གྱུར་པ་དེའི་ཚེ་འཇིག་རྟེན་སྐྱོང་བ་རྣམས་ལྷ་ཕྲེང་ཐོགས་དག་ག་ལ་བ་དེར་དོང་སྟེ། ལྷ་མ་ཡིན་རྣམས་ཕམ་པར་མཛོད་ཅིག་ཅེས་སྨྲས་པ་དང་། ལྷ་མ་ཡིན་དེ་རྣམས་ལ་མངོན་པར་བརྟགས་ནས། ལྷ་ཕྲེང་ཐོགས་རྒྱུག་པར་བྱེད་དོ། །ལྷ་ཀུན་ཏུ་རྒྱུ་བ་དང་། ལག་ན་ཡོལ་གོ་ཐོགས་པ་དང་། ལྷ་ཕྲེང་ཐོགས་དེ་རྣམས་ཀྱང་ཕྱོགས་གཅིག་ཏུ་གྱུར་ཅིང་། འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ཡང་གཅིག་ཏུ་འདུས་སོ། །ལྷ་མ་ཡིན་སྒྲ་གཅན་གྱི་ས་པ་དང་། གྲོང་ཁྱེར་འོད་ལྡན་ན་གནས་པ་དང་། གཉིས་ཤིང་རྩེ་བ་དང་། གནས་གཉིས་པ་ན་གནས་པ་དང་། །མགུལ་ཕྲེང་དག་སྟེ། བྱེ་བ་ཁྲག་ཁྲིག་གྲངས་མེད་པ་དུ་མ་ཕྱོགས་གཅིག་ཏུ་གྱུར་པ་དང་གཡུལ་ཆེན་པོ་བཀྱེ་སྟེ། གང་གི་ཚེ་དེ་དག་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་བྱུང་བ་དེའི་ཚེ། ལྷའི་ཕྱོགས་ནི་རྒྱལ་བར་འགྱུར་ལ། ལྷ་མ་ཡིན་གྱི་ཕྱོགས་ནི་ཕམ་པར་འགྱུར་ཏེ།
ཆོས་ལ་རྟེན་པ་ཤིན་ཏུ་ལེགས་པར་འགྱུར་ན། ཆོས་ལ་མི་རྟེན་པ་ལྟ་ག་ལ་ཞིག་འགྱུར། །གང་གི་ཚེ་དེ་དག་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་བྱུང་བ་དེའི་ཚེ་ལྷ་མ་ཡིན་གྱི་ཕྱོགས་རྒྱལ་བར་འགྱུར་རོ། །ལྷ་མ་ཡིན་གྱི་དཔུང་དེ་དག་འཇིག་རྟེན་སྐྱོང་བ་རྣམས་ཀྱིས་མངོན་པར་མཐོང་ནས་ལྷ་རྟག་ཏུ་མྱོས་གནས་ག་ལ་བ་དེར་དོང་སྟེ། ལྷ་དག་ལྷ་མ་ཡིན་གྱི་ཕྱོགས་རྣམས་རྒྱལ་བར་གྱུར་གྱིས་རྒྱུགས་ཤིག་རྒྱུགས་ཤིག་ཅེས་སྨྲས་སོ། །དེ་ཐོས་ནས་ལྷ་རྟག་ཏུ་མྱོས་གནས་དག་ལྷ་མ་ཡིན་གྱི་ཕྱོགས་ག་ལ་བ་དེར་མངོན་པར་འཇོམས་སུ་དོང་སྟེ། མཚོན་ཆ་དང་ལག་ཆ་སྣ་ཚོགས་ཐོགས་པའི་ཚོགས་འབུམ་ཕྲག་དུ་མ་དག་རྒྱ་མཚོའི་ནང་ན་གནས་པ་ག་ལ་བ་དེར་ལྷ་མ་ཡིན་རྣམས་ཕམ་པར་བྱ་བའི་ཕྱིར་ཧ་ཧའི་སྒྲ་ཕྱུང་ནས་རིངས་པར་མངོན་པར་འཇོམས་པར་བྱེད་ཅིང་། རྣམ་པར་འཇོམས་པར་བྱེད་པ་གནོད་པ་དུ་མ་བྱེད་པ་དེ་དག་ཕན་ཚུན་གཡུལ་མི་བཟད་པ་ཆེན་པོ་བཀྱེའོ། །དེ་ནས་གང་གི་ཚེ་ལྷ་རྣམས་ཀྱིས་ལྷ་མ་ཡིན་རྣམས་ཕམ་པར་བྱས་པ་ན། དེ་དག་ལྷ་མ་ཡིན་གྱི་དབང་པོ་སྒྲ་གཅན་ག་ལ་བ་དེར་དོང་ངོ་། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་གྱིས་ལྷ་མ་ཡིན་དེ་དག་ལ་འདི་སྐད་ཅེས་ཁྱེད་ཅག་གི་དཔུང་དུ་བདག་ཅག་གནས་ན། གྲོགས་པོ་དག་ཅི་སྟེ་འབྲོས། ཅི་སྟེ་འབྲོས། ལྷ་དག་ཉུང་ཞིང་འདི་དག་ཁྱེད་ཅག་ལས་ལྷག་པ་མེད་ལ། འདི་དག་ནི་བརྩོན་འགྲུས་ཆུང་སྟེ། བདག་ཅག་གིས་ལྷ་རྣམས་ཕམ་པར་བྱ་ཡིས། དེ་ལྟ་བས་ན་ལྷ་མ་ཡིན་གྱི་དབང་པོ་དག་སླར་ལོག་ཤིག་ཅེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་ལས་དེ་སྐད་ཐོས་ནས། ལྷ་མ་ཡིན་དག་ལྷ་རྣམས་དང་གཡུལ་འགྱེད་དུ་ཕྱིར་ལོག་གོ །དེ་ནས་ཡང་ལྷ་དང་ལྷ་མ་ཡིན་དེ་དག་མཚོན་ཆ་འདེབས་པ་འཁྲུགས་པའི་རྣམ་པ་དུ་མའི་གཡུལ་འགྱེད་པར་བྱེད་དེ། དེའི་ཚེ་ལྷ་མ་ཡིན་གནས་གཉིས་པ་ན་གནས་པ་གཉིས་ཤིང་རྩེ་བ་དང་གནས་གསུམ་པ་ན་གནས་པ་མགུལ་ཕྲེང་གི་རིས་སུ་གཏོགས་པ་ཐམས་ཅད་ལྷ་དང་གཡུལ་འགྱེད་པར་ཕྱིར་ལོག་གོ །དེ་དག་གང་གི་ཚེ། ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་
པའི་སྐྱེ་དགུ་བྱུང་བ་དེའི་ཚེ། ལྷ་མ་ཡིན་གྱི་ཕྱོགས་ཀྱིས་ལྷའི་ཕྱོགས་ཕམ་པར་བྱེད་དོ། །གལ་ཏེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་སྐྱེ་དགུ་དག་བྱུང་ན། ལྷའི་ཕྱོགས་དེ་དག་གིས་ལྷ་མ་ཡིན་གྱི་ཕྱོགས་ཕམ་པར་བྱེད་དེ། དེ་ལྟར་ལྷ་རྣམས་ནི་ཆོས་ཀྱི་གཙོ་བོ། །ཆོས་ཀྱི་རྒྱལ་མཚན། ཆོས་ལ་གཞོལ་བ་ཡིན་ནོ། །ལྷ་མ་ཡིན་དེ་དག་ཐམས་ཅད་ནི་ཆོས་དང་མི་ལྡན་པ། ཆོས་མ་ཡིན་པ་ལ་རྟེན་པ། ཆོས་ཀྱིས་སྐྱོབ་པ་མ་ཡིན་ནོ། །དེ་ནས་ལྷ་རྣམས་འདི་སྙམ་དུ་སེམས་ཏེ། ཀྱེ་མ་ལྷ་མ་ཡིན་འདི་དག་གིས་བདག་ཅག་ལ་དེ་ལྟར་གཙེ་བར་ཅི་སྟེ་གནས། འདི་དག་ནི་བདག་ཅག་ལས་ཁྱད་ཞུགས་པ་ཡང་མེད་ལ། མཚུངས་པ་ཡང་མ་ཡིན་ནོ། །འཛམ་བུའི་གླིང་ན་ཡང་ད་དུང་དུ་མར་འཛིན་པ་དང་། ཕར་འཛིན་པ་དང་། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་དང་། རྒན་རབས་ལ་རིམ་གྲོ་བྱེད་པ་དང་། གསོ་སྦྱོང་ལ་ཉེ་བར་གནས་པ་དང་། སྦྱིན་པ་དག་ཀྱང་སྦྱིན། བསོད་ནམས་དག་ཀྱང་བྱེད། བག་ཡོད་པ་ལ་བག་ཡོད་པར་གནས་པའི་མི་དག་ཡོད་དེ། དེ་ལྟར་བག་ཡོད་པ་ལ་བག་ཡོད་པར་གནས་པ་དེ་དག་འཆི་བའི་དུས་བྱས་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། ལྷ་མ་ཡིན་གྱི་ཆོས་འཕེལ་བ་དང་། ཆོས་འབྱུང་བར་ནི་མི་འགྱུར་རོ་སྙམ་མོ། །དེ་དག་གིས་དེ་ལྟར་རིག་ནས་ཀུན་ཏུ་རྒྱུ་བ་དང་། ཕྲེང་ཐོགས་དང་། ཀུན་དི་པ་ཀ་དང་། རྟག་ཏུ་མྱོས་པའི་ལྷ་རྣམས་ཆོས་ཀྱི་རྒྱལ་མཚན་ཁྱེར་ཏེ། ལྷ་མ་ཡིན་གྱི་དཔུང་ག་ལ་བ་དེར་ལྷ་དེ་དག་ཐམས་ཅད་རེག་མ་ཐོགས་པར་རྒྱུག་པར་བྱེད་ཅིང་འདི་ལྟར་ལྷ་མ་ཡིན་རྣམས་སྡོད་ཅིག །སྡོད་ཅིག །ཁྱེད་ཅག་གིས་ངེད་རྣམས་ལ་ཅིའི་ཕྱིར་གཙེ། ངེད་ཅག་ལས་ཁྱེད་ཀྱི་དཔུང་ཁྱད་ཞུགས་པ་ཡང་མེད། གཙོ་བོ་ཡང་མ་ཡིན། མཚོན་ཆ་ཡང་མི་མང་བས་ངེད་ཅག་འདི་རྣམས་ནི་ཁྱེད་རྣམས་གཞོམ་པའི་ཕྱིར་ལྷགས་པ་ཡིན་གྱིས། ཡང་སའི་འོག་ཏུ་མ་འགྲོ་ཤིག །མངོན་པར་གཙེ་བར་བྱེད་པའི་བློ་ཅན་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་འདི་དག་ཐམས་ཅད་ལ་བདེ་བའམ་མྱ་ངན་ལས་འདས་པ་མེད་དོ། །དེ་སྐད་ཅེས་སྨྲས་ནས། ཀླུ་ནོར་
རྒྱས་ཀྱི་བུ་དང་། འཇོག་པོ་ལ་སོགས་པ་དང་ལྷན་ཅིག་དེ་དག་ཐམས་ཅད་དང་བདག་ཉིད་ཐམས་ཅད་ལས་མཚོན་ཆ་དང་། ལག་ཆ་ཆར་ལྟར་འབེབས་ཤིང་ལྷ་མ་ཡིན་ག་ལ་བ་དེར་འདོང་བར་བྱེད་དོ། །དེ་ནས་ཀླུ་རྣམས་ཀྱང་མེ་རབ་ཏུ་འབར་བ་ཆར་ལྟར་འབེབས་ཤིང་ལྷ་མ་ཡིན་ག་ལ་བ་དེར་རྒྱུག་པར་བྱེད་དོ། །དེ་ནས་ལྷ་མ་ཡིན་རྣམས་ཀྱིས་ཀྱང་ཀླུ་དེ་དག་ལ་མངོན་པར་བརྟགས་ནས། ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པའི་ཀླུ་རབ་འཇོམས་ལ་སོགས་པ་ལ། འདི་ལྟར་ཁྱེད་ཀྱང་བདག་ཅག་གི་ཕྱོགས་ཡིན་གྱིས། ཀླུའི་རྒྱལ་པོ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་ག་ལ་བ་དེར་ཀླུ་རྣམས་དང་གཡུལ་འགྱེད་དུ་རྒྱུགས་ཤིག་ཅེས་བསྒོའོ། །དེ་ནས་དེ་དག་ཐོས་ནས་ཀླུ་རབ་འཇོམས་ལ་སོགས་པ། ཀླུ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ག་ལ་བ་དེར་མེ་ཆར་ལྟར་འབེབས་པས་མངོན་པར་འཚེད་པར་བྱེད་དོ། །ཀླུ་དེ་དག་གིས་ཀྱང་མེའི་ཆར་ཆེན་པོ་འབེབས་ལ་ལྷ་དང་ལྷ་མ་ཡིན་རྣམས་ཀྱང་གཡུལ་ཆེན་པོ་འགྱེད་དེ། དེ་ནས་ཡང་ལྷ་རྣམས་ཀྱིས་ལྷ་མ་ཡིན་རྣམས་ཕམ་པར་བྱས་སོ། །དེ་ནས་དེ་དག་ལྷ་མ་ཡིན་གྱི་དབང་པོ་སྒྲ་གཅན་ག་ལ་བ་དེར་འདོང་བར་བྱེད་དོ། །འཇིགས་ཤིང་བཞིན་མོག་མོག་པོར་གྱུར་པ་སྐྱབས་འདོད་པ་ཀུན་ལྷ་མ་ཡིན་གྱི་དབང་པོ་སྒྲ་གཅན་ག་ལ་བ་དེ་ཉིད་དུ་འདོང་བར་བྱེད་དོ། །དེ་ནས་སྒྲ་གཅན་གྱིས་དེ་དག་མཐོང་ནས་ཡང་འདི་ལྟར་བདག་འདི་ན་གནས་ན་ལྷ་མ་ཡིན་ཁྱེད་ཅག་རྣམས་ལ་ཅི་ཞིག་གནོད། །བདག་གཅིག་པུས་ལྷ་རྣམས་དབང་པོ་དང་བཅས་པ་བཅོམ་སྟེ། ལྷའི་འཇིག་རྟེན་ཐམས་ཅད་བདག་ཅག་གིར་བྱ་ན་ཁྱེད་དང་འཁོད་པས་ལྟ་སྨོས་ཀྱང་ཅི་དགོས། ལྷའི་དཔུང་འདི་དག་ཀྱང་ཆེན་པོ་མ་ཡིན་ན། གྲོགས་པོ་དག་ཅི་གནོད། འདི་ལྟར་བདག་གིས་ལྷ་མ་ཡིན་གྱི་དབང་པོ་བརྟན་པ་དང་། མེ་ཏོག་ཕྲེང་དང་། རབ་དགོད་དང་། ཐགས་བཟངས་རིས་དག་ལ་སྦྲན་ལ་བདག་ཉིད་ཀྱིས་ལྷ་རྣམས་ལས་རྒྱལ་བར་བྱའོ་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་ལྷ་མ་ཡིན་གྱི་དབང་པོ་བརྟན་པ་དང་། ལྷ་མ་ཡིན་གྱི་དབང་པོ་
མེ་ཏོག་ཕྲེང་དང་། ལྷ་མ་ཡིན་གྱི་དབང་པོ་རབ་དགོད་དང་། ལྷ་མ་ཡིན་གྱི་དབང་པོ་ཐགས་བཟངས་རིས་ག་ལ་བ་དེར་རིངས་པར་སོང་སྟེ་ཕྱིན་ནས། དེ་དག་ལ་འདི་ལྟར་ལྷ་འདི་དག་ཐམས་ཅད་དང་། རྒྱལ་ཆེན་བཞི་པ་ཐམས་ཅད་བདག་ཅག་གི་ཕྱིར་འོང་གིས། ལྷ་མ་ཡིན་གྱི་དབང་པོ་འདི་དག་ཀུན་ཤེས་ནས་ལན་བྱ་བ་གང་ཡིན་པ་ལ་སོ་སོར་སོམས་ཤིག་ཅེས་སྨྲས་སོ། །དེ་ནས་ཚིག་དེ་ཐོས་ནས་ལྷ་མ་ཡིན་གྱི་དབང་པོ་ཀུན་གྱིས་སྒྲ་གཅན་དེ་ལ་འདི་ལྟར་ལྷ་རྣམས་དང་གཡུལ་འགྱེད་དུ་བདག་ཉིད་ཐམས་ཅད་ཀྱིས་བདག་ཅག་འདི་དག་འཁོད་ཅིང་བདག་ཅག་རྟོག་པར་བྱེད་ཀྱིས་སུམ་ཅུ་རྩ་གསུམ་པའི་ལྷ་ཀཽ་ཤི་ཀ་ལ་སོགས་པ་དང་བཅས་པ་ལ་བར་ཆད་བྱ་བ་དང་། གང་གིས་ལྷ་མ་ཡིན་རྣམས་འབྱུང་བར་བྱ་བའི་ཕྱིར་ཁྱོད་སོང་ཤིག་ཅེས་སྨྲས་སོ། །དེ་ནས་ལྷ་མ་ཡིན་སྒྲ་གཅན་ལྷ་དང་ལྷ་མ་ཡིན་གྱི་གཡུལ་ག་ལ་བ་དེར་བདག་ཉིད་གཡུལ་འགྱེད་དུ་སོང་སྟེ། དེ་དག་མཐོང་ནས་ལྷ་མ་ཡིན་གྱི་དབང་པོ་དེ་ལྷ་མ་ཡིན་རྣམས་ལ་ཀྱེ་མ་ལྷའི་སྟོབས་རབ་ཏུ་ཆེའོ། །ཀྱེ་མ་ལྷ་མ་ཡིན་རྣམས་ལྷའི་སྟོབས་རབ་ཏུ་ཆེ་སྟེ། གཡུལ་འགྱེད་པར་ལྷ་འཁོད་པ་འདི་དག་ལ་ཕྱིར་བརྒལ་བར་མི་ནུས་སོ་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་ལྷ་རྣམས་ག་ལ་བ་དེར་མཚོན་ཆ་དང་ལག་ཆ་ཆར་ལྟར་འབེབས་ཤིང་གཡུལ་འགྱེད་དུ་སོང་ངོ་། །དེ་ནས་ལྷ་རྣམས་ཀྱིས་ལྷ་མ་ཡིན་གྱི་དབང་པོ་སྒྲ་གཅན་དེ་ལྟར་རྒྱུག་པ་མངོན་པར་མཐོང་ནས། ཀླུ་དེ་དག་ཡང་ལྷན་ཅིག་ཏུ་མེ་ཆར་ལྟར་མངོན་པར་འབེབས་ཤིང་ལྷ་མ་ཡིན་གྱི་དབང་པོ་སྒྲ་གཅན་ག་ལ་བ་དེར་སྒྲ་གཅན་གཞོམ་པའི་ཕྱིར་རྒྱུག་པར་བྱེད་དོ། །དེ་ནས་ལྷ་དང་ལྷ་མ་ཡིན་དེ་དག་གི་གཡུལ་ཆེན་པོ་མཚོན་ཆ་དང་། ལག་ཆ་དང་། རྡོ་རྗེ་ཆར་ལྟར་འབེབས་ཤིང་མཚུངས་པར་གཡུལ་བཀྱེ་བ་དང་། དེ་དག་གང་གི་ཚེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། རིགས་ཀྱི་རྒན་རབས་ཀྱི་རྗེས་སུ་འཇུག་པའི་སྐྱེ་དགུ་དག་བྱུང་བ་དེའི་ཚེ་ལྷ་རྣམས་ཀྱིས་ལྷ་མ་ཡིན་རྣམས་ཕམ་པར་བྱེད་དོ། །གལ་ཏེ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་དག་
བྱུང་བ་དེའི་ཚེ་ལྷ་མ་ཡིན་རྣམས་ཀྱིས་ལྷ་རྣམས་ཕམ་པར་བྱེད་དེ། དེ་ལྟར་ལྷ་དང་ལྷ་མ་ཡིན་གྱི་གཡུལ་ཆེན་པོ་འགྱེད་པ་ནི། ཆོས་དང་ཆོས་མ་ཡིན་པ་ཁོ་ན་ལ་རག་ལས་པ་ཡིན་ནོ། །དེ་ནས་གང་གི་ཚེ་ལྷ་མ་ཡིན་རྒྱལ་ཞིང་ལྷ་ཕམ་པར་གྱུར་པ་དེའི་ཚེ་ལྷ་རྣམས་ཕན་ཚུན་དུ་ལྷ་དག་ཆོས་ལ་སོམས་ཤིག །ལྷ་དག་ཆོས་གཙོ་བོར་གྱིས་ཤིག །ལྷ་རྣམས་ནི་ཆོས་ཀྱིས་རྒྱལ་བར་འགྱུར་རོ་ཞེས་བརྗོད་དོ། །དེ་ནས་ཆོས་ཡིད་ལ་བྱས་ཤིང་ཆོས་ལ་དད་པ་བསྐྱེད་པའི་ལྷ་རྣམས་ཡང་ལྷ་མ་ཡིན་ག་ལ་བ་དེར་དོང་ངོ་། །དེ་ནས་ཆོས་ཀྱིས་བསྐྱབས་པའི་ལྷ་རྣམས་གཟི་བརྗིད་བརྒྱ་འགྱུར་དུ་འབྱུང་སྟེ། དེ་ལྟར་དེ་དག་གཟི་བརྗིད་ཀྱིས་འབར་བ་མངོན་པར་མཐོང་ནས། ལྷ་མ་ཡིན་ཤིན་ཏུ་སྒྱིད་ལུག་པ་རྣམས་ལ་ལྷ་མ་ཡིན་གྱི་དབང་པོས་འདི་སྐད་ཅེས་ཁྱེད་ཅི་སྟེ་སྒྱིད་ལུག །འདི་དག་ནི་བདག་ཅག་ལས་གཟི་བརྗིད་དམ། མཚོན་ཆའམ། ལག་ཆའམ། དཔུང་སྟོབས་སམ། ཕལ་ཆེ་བ་ཁྱད་ཞུགས་པ་མེད་དེ། དེ་དག་ལ་ཁྱེད་ཅི་སྟེ་སྒྱིད་ལུག་ཅེས་སྨྲས་སོ། །དེ་ནས་དེའི་ཚིག་དེ་ཐོས་ནས་ཡང་ལྷ་མ་ཡིན་སྒྲ་གཅན་ལ་སོགས་པ། ལྷ་རྣམས་ག་ལ་བ་དེར་ཕྱིར་ལོག་སྟེ་འོང་ངོ་། །དེ་ནས་ལྷ་ཆོས་ཀྱིས་རྒྱས་པའི་ལུས་ཅན་དེ་དག་ཐམས་ཅད་ལྷ་མ་ཡིན་ག་ལ་བ་དེར་ཤུགས་མྱུར་བར་རྒྱུག་པར་བྱེད་དེ། ལྷ་དང་ལྷ་མ་ཡིན་དེ་དག་ཕན་ཚུན་འདྲེས་ནས་གཡུལ་འགྱེད་དོ། །དེ་དག་གི་ནང་ན་སྒྲ་གཅན་སྟོབས་ཆེན་པོར་གནས་ཏེ། རི་རབ་གཉིས་པ་ལྟ་བུར་གནས་སོ། །དེ་ཆོས་ཉིད་ཀྱི་མཐུས་ལྷ་རྣམས་ཀྱིས་ཕམ་པར་བྱེད་དེ། སྐྱོབ་པ་རྣམས་ཀྱི་ནང་ན་ཆོས་སྐྱོབ་པ་མཆོག་ཡིན་ནོ། །སྣང་བ་རྣམས་ཀྱི་ནང་ན་ཆོས་སྣང་བ་མཆོག་ཡིན་ནོ། །དེ་ནས་ལྷ་མ་ཡིན་སྒྲ་གཅན་ལ་སོགས་པ་ལྷ་མ་ཡིན་ཕམ་པ་རྣམས་མངོན་པར་མཐོང་ནས། ལྷ་མ་ཡིན་ཀུན་ནས་སྒྱིད་ལུག་པ་རྣམས་དེ་ནས་ཡང་དབུགས་ཕྱུང་སྟེ། འདི་སྐད་ཅེས་ལྷ་མ་ཡིན་དག་ཅི་སྟེ་འབྲོས། ལྷ་མ་ཡིན་འདི་དག་མི་ངན་པའི་སར་ཅི་སྟེ་གནས། ལྷ་ནི་ལྷ་མ་ཡིན་དུ་མའི་ནང་ན་དཔའ་བོ་མ་ཡིན། ལག་ཆ་ཐོགས་པ་མ་ཡིན། མཚོན་ཆས་འཇིགས་པ་མ་ཡིན་གྱིས་ཕྱིར་ལོག་སྟེ་
འཁོད་ཅིག །འདི་དག་གིས་ཅི་སྟེ་གནོད་ཅེས་སྨྲས་སོ། །དེ་ནས་དེའི་ཚེ་དེ་ཐོས་ནས་ཡང་ལྷ་མ་ཡིན་རྣམས་གཡུལ་འགྱེད་དུ་ཕྱིར་ལོག་གོ །དེ་ནས་ཡང་དེས་གཟེངས་བསྟོད་ཅིང་མགུ་བར་བྱས་པ། ང་རྒྱལ་གྱིས་ཁེངས་པ་རྣམས། ལྷ་རྣམས་ག་ལ་བ་དེར་གཡུལ་བཀྱེ་བ་དང་། དེ་ནས་ཡང་འབྲོས་སོ། །དེ་ནས་སྒྲ་གཅན་ནི་ལྷ་མ་ཡིན་དེ་དག་ཀུན་གྱི་དང་པོ་ཁོ་ན་ལ་འདུག་སྟེ། དེ་དང་པོ་ཁོ་ནར་འདུག་སྟེ། དེ་ལ་རྟེན། དེས་སྐྱོབ། དེ་ལ་འཁོར་བའི་ལྷ་མ་ཡིན་དེ་དག་ཐམས་ཅད་རྒྱལ་ཆེན་བཞིའི་ལྷ་ག་ལ་བ་དེར་སྒྲ་གཅན་གྱི་མཐུ་ལ་རྟེན་པ། སྟོབས་སྐྱེས་པ་དག་རྒྱུག་པར་བྱེད་ཅིང་། འདི་ལྟར་བདག་ཅག་གི་ལྷ་མ་ཡིན་གྱི་དབང་པོ་སྒྲ་གཅན་འདི་དང་པོ་ཁོ་ན་ལ་ཞུགས་པས་ལྷ་རྣམས་དབང་པོ་དང་བཅས་པ་ཡང་ཐུབ་པར་འགྱུར་ན། རྒྱལ་ཆེན་བཞིའི་ལྷ་འབའ་ཞིག་ལྟ་སྨོས་ཀྱང་ཅི་དགོས་སྙམ་སེམས་སོ། །དེ་ནས་ཡང་ཕན་ཚུན་རྟོག་ཅིང་མཚོན་ཆའི་ཚོགས་ཀྱི་རྒྱུན་གཅིག་ལ་གཅིག་འདེབས་པ་ན། སྒྲ་གཅན་ཡང་ལྷ་མ་ཡིན་རྣམས་རྒྱལ་བར་བྱ་ཞིང་ལྷ་རྣམས་ཕམ་པར་བྱ་བའི་ཕྱིར་ལྷ་ག་ལ་འཁོད་པ་དེར་རྡོ་རི་ཙམ་འཕེན་ཅིང་གནོད་པར་བྱེད་དོ། །དེ་ནས་སྒྲ་གཅན་དེ། དེ་ལྟར་ལྷ་རྣམས་ལ་རྡོ་ཆར་ལྟར་འབེབས་པ། འཇིག་རྟེན་སྐྱོང་བ་དག་གིས་མངོན་པར་མཐོང་ནས། ལྷ་རྣམས་ལ་སྒྲ་གཅན་འདི་ནི་རྡོ་ཆར་ལྟར་འབེབས་པས་བདག་ཅག་ལ་མངོན་པར་གནོད་པར་བྱེད་ན། ལྷ་དག་མཚོན་ཆ་དང་། ལག་ཆ་ཆར་ལྟར་དབབ་པ་རྣམས་ཀྱིས་དེ་བཟློག་ཅིང་། འདི་ལྟར་ཡང་ལྷ་རྣམས་ལ་གནོད་པ་མེད་པར་མཛོད་ཅིག །དེ་དག་ལ་འཇིག་རྟེན་སྐྱོང་བ་དག་གིས་འདི་སྐད་སྨྲས་ནས། ལྷ་མ་ཡིན་གྱི་དབང་པོ་སྒྲ་གཅན་ག་ལ་བ་དེར་སྒྲ་གཅན་ཕམ་པར་བྱ་བའི་ཕྱིར་ཁྲོ་བའི་ཤུགས་ཀྱིས་རྒྱུག་པར་བྱེད་དོ། །དེ་ནས་སྒྲ་གཅན་དང་། འཇིག་རྟེན་སྐྱོང་བ་དག་ཤིན་ཏུ་སྤུ་ཟིང་ཞེས་བྱེད་པ། རྡོ་དང་ལག་ཆར་བསྲེས་པའི་གཡུལ་བཀྱེའོ། །རྡོ་ཆར་ལྟར་འབེབས་པ་དེས་རྒྱ་མཚོ་ཀུན་ནས་རབ་ཏུ་འཁྲུག་པར་བྱེད་ཅིང་། ལྷའི་རྡོ་ཆར་ལྟར་འབེབས་པ་རྣམས་ཀྱིས་ཀྱང་། དེ་ལྟར་རྒྱ་མཚོ་ན་གནས་པའི་སེམས་
ཅན་འབུམ་ཕྲག་དུ་མ་དག་གསོད་པར་བྱེད། འཁྲུག་པར་བྱེད། ཀུན་ནས་རྒྱ་མཚོའི་དཔུང་འཁྲུག་པར་བྱེད་དོ། །དེ་ནས་སྒྲ་གཅན་དེ་དང་། འཇིག་རྟེན་སྐྱོང་བ་དག་གཡུལ་ཆེན་པོར་བཀྱེ་བ་ལྷ་དང་ལྷ་མ་ཡིན་རྣམས་ཀྱིས་མངོན་པར་མཐོང་ནས་ངོ་མཚར་ཆེར་སྐྱེས་ཏེ། ཀྱེ་མ་གཡུལ་འགྱེད་པ་རྣམས་ཀྱི་ནང་ན་འདི་ནི་གཡུལ་ཆེན་པོ་ཡིན་ནོ་ཞེས་བརྗོད་དོ། །དེ་ནས་གང་གི་ཚེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་སྐྱེ་དགུ་དག་བྱུང་བ་དེའི་ཚེ་ལག་ཆ་དང་དཔུང་དང་འཇིགས་པར་བྱ་བ་ཀུན་མེད་ཀྱིས་ཀྱང་། ལྷ་མ་ཡིན་གྱི་དབང་པོ་སྒྲ་གཅན་ཕམ་པར་འགྱུར། གལ་ཏེ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པའི་སྐྱེ་དགུ་དག་བྱུང་བ་དེའི་ཚེ། ལྷ་མ་ཡིན་གྱི་དབང་པོ་སྒྲ་གཅན་མངོན་པར་མཐོ་བར་འགྱུར་ཏེ། ལྷ་རྣམས་ནི་མ་ཡིན་ནོ། །དེ་ལྟར་འདི་དག་ཐམས་ཅད་ནི་ཆོས་གཙོ་བོ་ལས་གྱུར་ཏེ། གློ་བུར་པ་ནི་མ་ཡིན་ནོ། །དེ་ནས་གང་གི་ཚེ་ལྷ་མ་ཡིན་གྱི་དབང་པོ་སྒྲ་གཅན་དཔུང་དང་མཐུ་རྩལ་ཉམས་ཏེ། ཕམ་པར་གྱུར་པ་དེའི་ཚེ་ལྷ་མ་ཡིན་ཤིན་ཏུ་ཡི་ཆད་པ་རྣམས་ཀྱིས་ཡང་སྨྲས་པ། ལྷ་མ་ཡིན་འདི་དག་ཅི་སྟེ་འབྲོས། རྒུད་པའི་ཆོས་མང་པོ་སྒྲུབ་པ་ནི་བདག་ཅག་རྒུད་པར་གྱུར་ཏེ། ཉོན་མོངས་པ་དེས་ཆོག་གོ་ཆོག་གོ །བདག་ཅག་རང་གི་གནས་རྣམས་སུ་ཡང་བདེ་བའམ། ལྷ་མ་ཡིན་རྣམས་ཀྱི་ནང་དུ་ཡང་ཡིད་བདེ་བའི་ངོ་བོར་མི་ནུས་ཏེ། བློ་དེ་ལྟ་བུ་མ་བྱེད་པར་བློ་མཐུ་རྩལ་དང་བཅས་པར་གྱིས་ཤིག །རང་གི་གནས་སུ་འགྲོ་མ་འདོད་པར་སླར་ལོག་ཤིག་སླར་ལོག་ཤིག །དེ་ནས་ཚིག་དེ་ཐོས་ནས་ཡང་ལྷ་མ་ཡིན་ཐམས་ཅད་འཇིག་རྟེན་སྐྱོང་བ་དག་ག་ལ་བ་དེར་གཡུལ་འགྱེད་དུ་བརྒྱུགས་སོ། །དེ་ནས་ཡང་ཕན་ཚུན་ལྷན་ཅིག་རྡོ་མཚུངས་པ་མེད་པ་ཆར་ལྟར་འབེབས་ཤིང་རིའི་རྩེ་མོར་གློག་ཆར་ལྟར་འབྱིན་ཏེ། ཡུལ་ངན་དུ་བྱས་པར་སྤུ་ཤིན་ཏུ་ཟིང་ཞེས་བྱེད་པའི་གཡུལ་བཀྱེའོ། །དེ་ནས་ཡང་ལྷའི་དཔུང་གིས་ལྷ་མ་ཡིན་གྱི་དཔུང་ཕམ་པར་བྱས་སོ། །དེ་ནས་ཡང་ལྷ་མ་ཡིན་དེ་དག་ཐམས་ཅད་འདི་སྙམ་དུ་སེམས་ཏེ། ཀྱེ་མ་ལྷ་འདི་རྣམས་མཐུ་ཆེན་པོ་དང་ལྡན་པ་ཡིན་ནོ། །འདི་ལྟར་བདག་ཅག་རང་གི་མཐུ་བསྐྱེད་
པ་དང་། དེ་བདག་ཅག་གི་དོན་དང་། བདེ་བའི་ཕྱིར་དང་། ཕན་པར་བྱ་བའི་ཕྱིར་གནས་གཉིས་པ་ན་གནས་པ་སྐར་ཕྲེང་གི་བདག་པོ་ལྷ་མ་ཡིན་གྱི་དབང་པོ་བརྟན་པ་ལ་སྐྱབས་སུ་དོང་བར་བྱའོ། །ལྷ་མ་ཡིན་གྱི་དབང་པོ་བརྟན་པ་དེ་ནི་རང་བཞིན་གྱིས་བརྟན་པ་ཡིན་ཏེ། ལྷ་དང་ལྷ་མ་ཡིན་རྣམས་ཀྱི་གཡུལ་དུ་དབང་པོ་དང་བཅས་པར་བརྒྱའམ། ཡང་ན་སྟོང་དུ་སྟོབས་ཀྱིས་རྒྱལ་བ་ཡིན་ནོ་སྙམ་མོ། །དེ་ནས་དེ་ལྟར་ལྷ་མ་ཡིན་གྱི་གཙོ་བོ་དེ་དག་ཐམས་ཅད་ལྷ་མ་ཡིན་གྱི་དབང་པོ་བརྟན་པ་ག་ལ་བ་དེར་དོང་ངོ་། །དེ་ནས་དེ་དག་ཐམས་ཅད་ཀྱིས་ལྷ་མ་ཡིན་གྱི་དབང་པོ་བརྟན་པ་དེ་ལ་འདི་སྐད་སྨྲས་སོ། །ཀྱེ་མ་ལྷ་མ་ཡིན་གྱི་དབང་པོ་དག་འདི་ལྟར་ལྷའི་ཕྱོགས་སྟོབས་རབ་ཏུ་ཆེ་སྟེ། ལྷ་མ་ཡིན་སྒྲ་གཅན་དང་བཅས་པ་རྣམས་ཀྱིས་ཕྱིར་བརྒལ་བར་མི་ནུས་པས། ལྷ་མ་ཡིན་གྱི་དབང་པོས་ལྷ་མ་ཡིན་རྣམས་ཀྱི་དཔུང་བགྱི་བ་དང་། སྐྱབས་བགྱི་བ་དང་། ཕ་རོལ་གཞོམ་པའི་ཕྱིར་དེ་དག་ངེས་པར་བགྱི་བའི་རིགས་སོ། །ཁྱོད་ཀྱི་ལག་ན་མཚོན་ཆ་ཡོད་པས་ལྷ་དག་དབང་པོ་དང་བཅས་པ་ཡང་བདག་ཅག་ལ་ཕྱིར་རྒོལ་བར་མི་ནུས་ཏེ། ཁྱོད་ཀྱིས་ལྷ་དང་ལྷ་མ་ཡིན་རྣམས་ཀྱི་གཡུལ་དུ་རྒྱལ་བ་མང་དུ་བརྙེས་པ་ལགས་སོ། །ལྷ་མ་ཡིན་གྱི་དབང་པོ་དེ་དག་ངེས་པར་བཟློག་ཏུ་གསོལ། ལག་ན་མཚོན་ཆ་ཆེན་པོ་ཐོགས་པ། རང་གི་དཔུང་དང་མཐུ་རྩལ་བསྐྱེད་ཅིང་ལྷ་རྣམས་ཕམ་པར་བགྱི་བའི་ཕྱིར་བཟློག་ཏུ་གསོལ། ཁྱོད་ཀྱིས་བརྒྱ་བྱིན་ཉིད་ཀྱང་བརྒྱ་སྟོང་དུ་ཕམ་པར་བགྱིས་ཏེ། ལྷ་དེ་རྣམས་ཁྱོད་ཀྱི་མཐུ་རྩལ་གྱིས་ཕམ་པར་བགྱིས་པ་ལགས་སོ། །དེ་ནས་བརྟན་པས་ལྷ་མ་ཡིན་གྱི་དབང་པོ་དེ་དག་ལས་ཚིག་དེ་ཐོས་ནས། ལྷ་མ་ཡིན་གྱི་དབང་པོ་མེ་ཏོག་ཕྲེང་ག་ལ་བ་དང་། ཐགས་བཟངས་རིས་དང་། རབ་དགོད་ག་ལ་བ་དེར་དོང་སྟེ་ཕྱིན་ནས། ལྷ་མ་ཡིན་གྱི་དབང་པོ་དེ་དག་ལ་འདི་སྐད་ཅེས་སྨྲས་སོ། །ལྷ་མ་ཡིན་གྱི་དབང་པོའི་ཕྱོགས་སྒྲ་གཅན་དང་བཅས་པ་ལྷ་རྣམས་ཀྱིས་ཕམ་པར་བྱས་ཏེ། ལྷ་རྣམས་ནི་སྟོབས་རབ་ཏུ་ཆེའོ། །སྟོབས་རབ་ཏུ་ཆེ་བས་བཟོད་པར་དཀའ་སྟེ། ལྷ་མ་ཡིན་རྣམས་ཀྱིས་བཟོད་པར་མི་ནུས་སོ། །གཡུལ་འགྱེད་པར་རྒྱལ་བར་བགྱི་བའི་ཕྱིར་དེ་གནང་བར་
མཛོད་ཅིག །དེ་ནས་ལྷ་མ་ཡིན་གྱི་དབང་པོ་མེ་ཏོག་ཕྲེང་དང་། ཐགས་བཟངས་རིས་དང་། རབ་དགོད་ཀྱིས་ལྷ་མ་ཡིན་གྱི་དབང་པོ་བརྟན་པ་དེ་ལ་འདི་སྐད་སྨྲས་སོ། །ལྷ་མ་ཡིན་གྱི་དབང་པོ་བདག་ཅག་འདི་དག་ཁྱོད་ཀྱི་གྲོགས་སུ་འཁོད་པ་ཡིན་གྱིས་ཁྱོད་སོང་ཤིག་ཁྱོད་སོང་ཤིག །བདག་ཅག་གིས་གྲོགས་བྱས་པས་ཁྱོད་དང་སྒྲ་གཅན་དང་བཅས་པས་ལྷ་ཐམས་ཅད་ལས་ཀྱང་རྒྱལ་བར་ནུས་སོ། །དེ་ནས་ཚིག་དེ་ཐོས་ནས་ལྷ་མ་ཡིན་གྱི་དབང་པོ་བརྟན་པ་དེ་ལྷ་མ་ཡིན་གྱི་དབང་པོ་སྒྲ་གཅན་ག་ལ་བ་དེར་གཡུལ་འགྱེད་པའི་ཕྱིར་སོང་ངོ་། །དེ་ནས་ལྷ་མ་ཡིན་རྣམས་ཀྱིས་ལྷ་མ་ཡིན་གྱི་དབང་པོ་བརྟན་པ་དེ་མཐོང་ནས་ཤིན་ཏུ་མགུ་ཞིང་མཐུ་རྩལ་སྐྱེས་པ་རྣམས་ལྷ་རྣམས་ག་ལ་བ་དེར་མཚོན་ཆ་དང་། ལག་ཆ་དང་། མདའ་དག་འཕེན་ཅིང་འདེབས་པ་ན་ཐམས་ཅད་ལྷ་མ་ཡིན་གྱི་དབང་པོ་གཉིས་དང་ལྷན་ཅིག་ལྷ་རྣམས་ག་ལ་བ་དེར་རྒྱུག་པར་བྱེད་དོ། །དེ་ནས་ལྷ་རྣམས་ཀྱིས་ལྷ་མ་ཡིན་དེ་དག་མཐོང་ནས་འདི་སྐད་ཅེས་སྨྲས་སོ། །ལྷ་མ་ཡིན་དག་འདི་ལྟར་ཡང་དང་ཡང་དུ་བདག་ཅག་རྣམས་ཀྱིས་ཕམ་པར་བྱ་འདོད་དམ། དེ་ནས་ཡང་བརྩོན་འགྲུས་ལ་དམིགས་ནས་དུད་འགྲོའི་འགྲོ་བ་ངོ་བོ་ཉིད་ཀྱིས་ཕམ་པ་རྣམས་ཡང་འོང་བར་བྱེད་དོ། །དེ་ནས་དེ་ལྟར་རིག་ནས་ལྷ་ཤིན་ཏུ་བརྩོན་འགྲུས་བརྩམས་པ། མཚོན་ཆ་དང་ལག་ཆ་སྣ་ཚོགས་ཐོགས་པ་དེ་དག་ཐམས་ཅད་ལྷ་མ་ཡིན་ག་ལ་བ་དེ་ཉིད་དུ་འགྲོས་ཤིན་ཏུ་མྱུར་བར་འགྲོ་བར་བྱེད་དོ། །དེ་ནས་ལྷ་མ་ཡིན་གྱི་དབང་པོ་བརྟན་པ་དང་། སྒྲ་གཅན་གྱིས་འདི་སྐད་སྨྲས་སོ། །ལྷ་རྣམས་བདག་ཅག་གི་སྟེང་དུ་འོངས་ཏེ། ལྷ་རྣམས་གཡུལ་འགྱེད་དུ་འོང་ངོ་། །བདག་ཅག་གིས་དེ་དག་ངེས་པར་གཡུལ་འདི་གཉིས་ཀྱི་བར་དུ་བཅུག་སྟེ་གཞོམ་པར་བྱའོ། །དེ་ནས་དེ་སྐད་སྨྲས་མ་ཐག་ཏུ་ལྷ་མ་ཡིན་གྱི་དབང་པོ་བརྟན་པ་དང་། སྒྲ་གཅན་ཕན་ཚུན་རྒྱལ་བར་འདོད་པ་དག་ལྷན་ཅིག་ཏུ་རྒྱལ་ཆེན་བཞིའི་ལྷ་རྣམས་ག་ལ་བ་དེར་འདོང་བར་བྱེད་དོ། །དེ་ནས་ལྷ་རྣམས་ནི་ཉི་མ་ནུབ་པའི་ཕྱོགས་སུ་ལྟ། ལྷ་མ་ཡིན་རྣམས་ནི་ཤར་བའི་ཕྱོགས་སུ་ལྟ་སྟེ། དེ་ལྟར་ཤར་བའི་འོད་ཟེར་གྱི་མཐུ་དེས་མིག་རབ་ཏུ་ཉམས་པ་དང་། དེ་
ནས་ལྷ་མ་ཡིན་གྱི་མཚོན་ཆ་ཆར་ལྟར་འབེབས་པ་རྣམས་ཀྱིས། ལྷ་རྣམས་ལ་དབབ་པར་མ་ནུས་སོ། །དེ་ནས་ལྷ་མ་ཡིན་མིག་བསྒྲིབས་པ་རྣམས་ཕན་ཚུན་དུ་འདི་ལྟར་ཉི་མའི་འོད་ཟེར་རྣམས་ཀྱིས་མིག་རབ་ཏུ་ཉམས་ཏེ། བདག་ཅག་གིས་ལྷ་རྣམས་ལ་བརྒལ་བར་མི་ནུས་སོ་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་གྱིས་རང་གི་ལག་པས་ཉི་མ་སྒྲིབ་པར་བྱེད་དེ། འདི་ཡང་ཉི་མ་གཟས་ཟིན་པའི་རྒྱུ་གསུམ་པ་ཡིན་ནོ། །དེའི་ཚེ་རྒྱུ་མི་ཤེས་པའི་རྟོག་གེ་པ་རྣམས་འདི་ལྟར་ལོ་ལེགས་པར་འགྱུར་རོ། །ལོ་ཉེས་པར་འགྱུར་རོ། །ཆར་ཆེར་ལེགས་པར་འབབ་པར་འགྱུར་རོ། །ཆར་ཆུང་ངུ་འབབ་པར་འགྱུར་རོ། །རྒྱལ་པོ་ལ་རུང་བར་འགྱུར་རོ། །རྒྱལ་པོ་ལ་མི་རུང་བར་འགྱུར་རོ། །སྐྱེ་བོ་འཇིག་པར་འགྱུར་རོ། །སྐྱེ་བོ་འཇིག་པར་མི་འགྱུར་རོ་ཞེས་བརྗོད་དེ། དེ་ལྟར་བསྟན་བཅོས་ངན་པས་བསླུས་པ་རྣམས་གཞན་དུ་རྟོག་པར་བྱེད་དོ། །དེ་ལྟར་སྒྲ་གཅན་དེས་ཉི་མའི་དཀྱིལ་འཁོར་དེ་བསྒྲིབས་ཏེ། འོད་ཟེར་ཡང་བཟློག་ནས་བལྟ་བར་བདེ་བ་དང་། ལྷ་རྣམས་མངོན་པར་མཐོང་ནས་ལྷ་མ་ཡིན་གྱི་དབང་པོ་བརྟན་པ་ལ་སྨྲས་པ། ལྷ་དག་བདེ་བར་མཐོང་ངོ་། །ལྷ་མ་ཡིན་རྣམས་བདེ་བར་མ་མཐོང་གིས་ཕ་རོལ་ཕམ་པར་བྱ་བ་ལ་འབོད་ཅིག །དེ་ནས་ལྷ་མ་ཡིན་རྣམས་མཚོན་ཆའི་ཚོགས་རྣམས་ཆར་ལྟར་མངོན་པར་འབེབས་ཤིང་ལྷ་རྣམས་ག་ལ་བ་དེར་བརྟན་པས་སྣ་དྲངས་ནས་རྒྱུག་པར་བྱེད་དོ། །ལྷ་རྣམས་ཀྱིས་ཀྱང་དེ་དག་མཐོང་ནས་མཚོན་ཆ་སྣ་ཚོགས་ཐོགས་ཏེ། ལྷ་མ་ཡིན་ག་ལ་བ་དེར་རྒྱུག་པར་བྱེད་དོ། །དེ་ནས་ཕྲེང་ཐོགས་ཀྱི་ལྷ་རྣམས་ག་ལ་བ་དེར་བརྟན་པ་དེ་དག་རྒྱུག་ཅིང་། དེ་དག་མཚོན་ཆ་སྣ་ཚོགས་ཀྱི་ཆར་མངོན་པར་འབེབས་པ་ན། ཕྲེང་ཐོགས་ཀྱི་ལྷ་རྣམས་ཀྱིས་དེ་དག་མངོན་པར་མཐོང་ནས་འདི་སྐད་སྨྲས་སོ། །ལྷ་མ་ཡིན་གྱི་དབང་པོ་དག་ལེགས་སོ་ལེགས་སོ། །འདི་ལྟར་ཁྱེད་ལྷ་རྣམས་ཀྱིས་ལན་དུ་མ་ཞིག་ཏུ་ཕམ་པར་བྱས་ཀྱང་ཁྱེད་ཆོས་ལ་སོ་སོར་རིག་པར་མི་བྱེད་དམ། ངེད་ནི་ཆོས་ཀྱི་ཚུལ་དང་ལྡན། ཆོས་ལ་གཞོལ། ཆོས་སྒྲུབ་པ་ཡིན་ཏེ། ངེད་ནི་ཆོས་མ་སྤངས་པས་རྒྱལ་བར་འདོད་
དོ། །ཁྱེད་ནི་བརྣབ་སེམས་ཀྱིས་གནོད་དེ། གཞན་གྱི་རྫས་ལ་རང་གིར་བྱ་བའི་བརྣབ་སེམས་ཡོད་དོ། །བརྣབ་སེམས་མང་བ་དེ་ནི་ཁྱེད་ཡིན་ཏེ། ཆོས་མ་ཡིན་པ་དང་ལྡན་པར་གྱུར་པས། དགེ་བ་བཅུའི་ལས་ཀྱི་ལམ་དང་ཡང་དག་པར་ལྡན་པ། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་ལྷ་རྣམས་ཇི་ལྟར་ཕམ་པར་བྱ་བར་འདོད། མུན་པས་ནི་སྣང་གསལ་ཆེན་པོ་རྣམས་ཀྱང་ཟིལ་གྱིས་གནོན་པར་མི་ནུས་སོ། །དེ་ནས་རྣམ་པ་འདི་དག་སྨྲས་པ་ན། བརྟན་པས་དེ་དག་ལ་འདི་སྐད་སྨྲས་སོ། །ཀྱེ་མང་དུ་སྨྲ་ཅི་དགོས་ཁྱེད་ཀྱི་འབྱོར་པ་ལ་ངེད་རྣམས་ཀྱང་སྨོན་པ་མེད་དོ། །ལྷ་མ་ཡིན་གྱི་དབང་པོ་ཐགས་བཟངས་རིས་དང་། རབ་དགོད་ལ་སོགས་པ་བཞི་པོ་འདི་དག་གི་དཔུང་བཤམས་པ་རྣམས་ཀྱིས་ལྷ་ཐམས་ཅད་ཕམ་པར་བྱ་བའི་ཕྱིར་འཁོད་དེ། ངེད་ནི་ཁྱོད་ཀྱི་འབྱོར་པ་ལ་དགའ་བ་མེད་དོ། །དེ་སྐད་སྨྲས་ནས། ཕྲེང་ཐོགས་ཀྱི་ལྷ་ག་ལ་བ་དེར་རྒྱུག་པར་བྱེད་དོ། །དེ་འོང་བར་མངོན་པར་མཐོང་ནས། ཇི་ལྟར་དེའི་ལུས་ཀྱི་ངོ་བོ་ཤིན་ཏུ་ཕྲ་བ་ཡང་མི་མངོན་པ་དེ་ལྟར་མདའ་སྣ་ཚོགས་ཆར་ལྟར་ཕབ་བོ། །དེ་ལྟར་བརྟན་པ་མཚོན་ཆའི་ཆར་གྱི་ནང་དུ་ཚུད་ནས་ཀྱང་ཕྲེང་ཐོགས་ཀྱི་ལྷ་རྣམས་ཀྱིས་འདི་སྐད་སྨྲས་སོ། །ལས་ཀྱིས་བཅོམ་ཞིང་སྒྲུབ་པ་བརྣབ་སེམས་མང་པོ་འདི་ཅིར་དགོས། ཆོས་མ་ཡིན་པས་ནི་ནམས་ཀྱང་ཆོས་ཟིལ་གྱིས་མནན་པ་མེད་དེ། ངེད་ནི་ཁྱེད་ལ་ཆུང་ཟད་ཀྱང་འཚེ་བར་མི་བྱེད་ན། ངེད་ལ་ཅི་སྟེ་གནོད་པ་བྱེད། དེ་དེ་སྐད་སྨྲ་བ་ན། ལྷ་དེ་དག་ག་ལ་བ་དེར་རྒྱུག་པར་བྱེད་དོ། །དེ་ནས་ཕྲེང་ཐོགས་ཀྱི་ལྷ་རྣམས་ཀྱིས་ཀླུ་དེ་དག་ལ་སྨྲས་པ། དཔུང་དོན་མེད་པས་ཁེངས་པ་འདི་ཁྱེད་ཀྱིས་མེའི་ཆར་མངོན་པར་ཕོབ་ཤིག་དང་། འོན་ཀྱང་དཔུང་གི་མཐུ་འདི་ཉམས་པར་འགྱུར་རོ། །དེ་སྐད་སྨྲས་པ་དང་། ཀླུའི་རྒྱལ་པོ་འཇོག་པོས་ཕྱོགས་གཅིག་ཏུ་ཀླུའི་རྒྱལ་པོ་རབ་འཇོམས་ལ་མེའི་ཆར་ཕབ་པ་དང་། བརྟན་པ་ག་ལ་བ་དེར་རྒྱུག་པར་བྱེད་དེ། མེའི་ཆར་མངོན་པར་ཕབ་པ་ན་དེ་ལྷ་མ་ཡིན་གྱི་དབང་པོ་བརྟན་པ་ག་ལ་བ་དེར་བརྒྱུགས་སོ། །དེ་ནས་ལྷ་མ་ཡིན་དང་
ཀླུ་དེ་དག་མེའི་ཆར་ཆེན་པོའི་ནང་དུ་ཆུད་པར་གྱུར་ཏོ། །དེ་ནས་དེ་དག་ལ་མེའི་ཆར་མངོན་པར་ཕབ་པ་དང་། ལྷ་མ་ཡིན་གྱི་དབང་པོ་སྒྲ་གཅན་རི་དཔག་ཚད་བཅུ་པ་གཅིག་བླངས་ནས། ཕྲེང་ཐོགས་ཀྱི་ལྷ་རྣམས་ག་ལ་བ་དེར་རྒྱུག་པར་བྱེད་དོ། །དེ་འོང་བ་མངོན་པར་མཐོང་ནས་ལྷ་ལག་ན་ཡོལ་གོ་ཐོགས་པ་དག་རི་བསྲེག་པའི་ཕྱིར་མེའི་ཆར་མངོན་པར་འབེབས་ཤིང་རྒྱུག་པར་བྱེད་དོ། །དེ་ནས་མེའི་ཆར་དེས་ནི་རི་དེ་ཐམས་ཅད་བསྲེགས་སོ། །དེ་ལྟར་དེ་བསྲེགས་པར་རིག་ནས་བརྟན་པ་དེ་མཐུ་ཉམས་ཏེ། ལྷ་དེ་རྣམས་ལ་འདི་སྐད་སྨྲས་སོ། །འདི་ལྟར་བདག་གིས་རི་རབ་ཏུ་འབར་བ་གཞན་ཐམས་ཅད་སྟེང་དུ་དབབ་བོ། །དེ་ནས་ལྷ་མ་ཡིན་རྣམས་ཀྱིས་རི་རབ་ཏུ་འབར་བ་གཞན་ཞིག་དེའི་དྲུང་དུ་ཁྱེར་རོ། །དེ་ནས་བརྟན་པ་དེས་དེ་ཁྱེར་ནས་ལྷ་རྣམས་ཀྱི་སྟེང་དུ་འཕངས་སོ། །དེ་ནས་ལྷ་དེ་རྣམས་ཀྱིས་ལྷ་མ་ཡིན་ཆེན་པོ་ལ་འདི་སྐད་སྨྲས་སོ། །ཆོས་མ་ཡིན་པས་ནི་ཆོས་ལས་རྒྱལ་བར་མི་ནུས་ཏེ། ངེད་ནི་ཆོས་མདུན་དུ་བྱས་ནས་གནས་སོ། །ཁྱེད་ནི་ཆོས་མ་ཡིན་པ་ལ་བརྟེན་ནས་གནས་སོ། །དེ་ལྟར་དེ་དག་ལྷ་རྣམས་ཀྱིས་སྤྱོས་པ་མཐོང་ནས། ལྷ་མ་ཡིན་གྱི་དབང་པོ་སྒྲ་གཅན་གྱིས་ལྷ་མ་ཡིན་ཐམས་ཅད་བསྡུས་ཏེ་ལྷ་རྣམས་ག་ལ་བ་དེར་དོང་ངོ་། །དེ་ལྟར་དེ་དག་འོང་བ་མངོན་པར་མཐོང་ནས། ལྷ་རྣམས་ཀྱང་ལྷ་མ་ཡིན་དག་ག་ལ་བ་དེར་རྒྱུག་པར་བྱེད་དེ། ལྷ་དང་ལྷ་མ་ཡིན་དེ་དག་མཚོན་ཆ་དུ་མ་དང་ལྡན་པའི་གཡུལ་ཤིན་ཏུ་མི་བཟད་པ་བཀྱེ་བར་གྱུར་ཏོ། །དེ་ནས་ལྷ་རྣམས་ཀྱིས་ཆོས་བརྗོད། བདེན་པའི་བྱིན་གྱིས་བརླབས་བྱས། དཀོན་མཆོག་གསུམ་ལ་སྐྱབས་སུ་འགྲོ་བ་ཡིད་ལ་བྱས་ནས། ལྷ་མ་ཡིན་ག་ལ་བ་དེར་དོང་ངོ་། །ལྷ་དེ་དག་མཐོང་མ་ཐག་ཏུ་ལྷ་མ་ཡིན་གྱི་དཔུང་དེ་ཐམས་ཅད་བརྒྱའམ་སྟོང་དུ་བཅོམ་མོ། །དེ་ནས་ལྷ་མ་ཡིན་དེ་དག་ཐམས་ཅད་སའི་འོག་ག་ལ་བ་དེར་བྲོས་སོ། །ཀླུ་ཆོས་དང་མི་ལྡན་པ་རབ་འཇོམས་ལ་སོགས་པས་ལྷ་མ་ཡིན་དེ་དག་ལ་འདི་སྐད་སྨྲས་སོ། །ལྷ་མ་ཡིན་དག་བདག་ཅག་བོར་ནས་ཅི་སྟེ་འབྲོས། ཀླུ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་དེ་དག་བདག་
ཅག་གིས་ཐུབ་ན། ཁྱེད་ཀྱིས་ལྷ་འདི་དག་འབའ་ཞིག་ཐུབ་པར་འགྱུར་རོ། །གང་དེ་ལྟར་འཇིགས་པར་གནས་ན། རང་གི་དཔུང་ཉམས་དྲོད་མེད་པར་ཅིའི་ཕྱིར་སའི་འོག་ནས་ལྡང་། ལྷ་རྣམས་དང་ལྷན་ཅིག་ཅིའི་ཕྱིར་འགལ་བར་བྱེད། འགལ་བའི་རང་བཞིན་ཅན་ཁྱེད་ནི་སའི་འོག་ཏུ་འདོང་དུ་ཡོད་གྲང་ན་ངེད་གར་འདོང་། འཇོག་པོ་དང་ནོར་རྒྱས་ཀྱི་བུ་ལ་སོགས་པས་བཅོམ་པ་གར་འདོང་། ལྷ་མ་ཡིན་དེ་དག་གིས་དེ་སྐད་ཐོས་ནས། དེ་ནས་ཡང་ལྷ་རྣམས་ག་ལ་བ་དེར་གཡུལ་འགྱེད་དུ་སླར་ལོག་གོ །དེ་ནས་ཡང་ཐོགས་པ་མེད་པའི་བློ་ཅན་དེ་དག་ལྷ་མ་ཡིན་ག་ལ་བ་དེར་ཐམས་ཅད་འབད་དེ་བརྒྱུགས་སོ། །དེ་ནས་དེ་དག་འོང་བ་མངོན་པར་མཐོང་སྟེ། ལྷ་མ་ཡིན་རྣམས་ཀྱིས་བཟློག་པར་མ་ནུས་སོ། །དེ་ནས་ཡང་ལྷ་མ་ཡིན་གྱི་དབང་པོ་སྒྲ་གཅན་ལྷ་མ་ཡིན་གྱི་དབང་པོ་བརྟན་པ་དང་ལྷན་ཅིག་ཏུ་སའི་འོག་ག་ལ་བ་དེར་དོང་ངོ་། །དེ་ནས་ལྷ་མ་ཡིན་གྱི་དཔུང་དེ་ལྟར་ཉམས་པ་མཐོང་ནས། ལྷ་མ་ཡིན་ཁ་ཅིག་ལྷ་མ་ཡིན་གྱི་དབང་པོ་གནས་གསུམ་པ་ན་གནས་པ་ག་ལ་བ་དེར་བརྒྱུགས་ཏེ། འདི་ལྟར་རྒྱལ་པོ་ཆེན་པོ་མེ་ཏོག་ཕྲེང་བཞེངས། ལྷའི་ཚོགས་དེ་དག་བཟློག་ཏུ་མི་རུང་ལ། ལྷ་མ་ཡིན་ཐམས་ཅད་ཕམ་པར་བྱས་ཏེ་ཕྱོགས་ཀུན་དུ་བཀོད་པར་གྱུར་ཏོ། །ཁྱོད་ཀྱིས་ནི་ལྷ་དང་ལྷ་མ་ཡིན་གྱི་གཡུལ་དུ་མར་རྣམ་པར་རྒྱལ་བ་བརྙེས་ལ། རྒྱལ་བ་བརྙེས་པར་འགྱུར་གྱིས། ཁྱོད་ཀྱིས་དེ་དག་དགོངས་ཏེ་བཞེངས། ལྷའི་དབང་པོ་བཅས་པ་ལས་རྒྱལ་བར་སྤྱོན་ཅིག །ལྷ་མ་ཡིན་གྱི་དབང་པོ་མེ་ཏོག་ཕྲེང་གིས་དེ་དག་ཐམས་ཅད་ཡིད་ལ་བཟུང་ནས་མཚོན་ཆ་དང་ལག་ཆ་རྣམ་པ་སྣ་ཚོགས་ཐོགས། ལྷ་མ་ཡིན་བྱེ་བ་དུ་མས་ཡོངས་སུ་བསྐོར། ནམ་མཁའི་ཕྱོགས་ཐམས་ཅད་སྒྲ་རྣམས་ཀྱིས་ཡོངས་སུ་འགེངས་ཤིང་། དེ་དག་ལྷ་དང་ལྷ་མ་ཡིན་གྱི་གཡུལ་ག་ལ་བ་དེར་འདོང་བར་བྱེད་དོ། །ལྷ་མ་ཡིན་གྱི་དབང་པོ་སྒྲ་གཅན་གྱིས་སྟོང་སྙེད་འོང་བ་མངོན་པར་མཐོང་ནས། བརྟན་པ་ལ་སྨྲས་པ། འདི་དག་ནི་ལྷ་མ་ཡིན་གྱི་དབང་པོ་མེ་ཏོག་ཕྲེང་ཡིན་ཏེ། བདག་ཅག་གི་འབྱོར་པར་བྱ་བ་དང་། ལྷ་རྣམས་ཕམ་པར་བྱ་བའི་ཕྱིར་འོང་གིས། ལྷ་མ་ཡིན་དེ་དག་སླར་ཟློག་ཤིག །འདི་ནི་ལྷ་མ་ཡིན་གྱི་དབང་པོ་བདག་ཅག་གི་འབྱོར་པར་བྱ་
བའི་ཕྱིར་འོང་ངོ་། །དེ་ཐོས་ནས་ལྷ་མ་ཡིན་དག་དེ་ནས་ཡང་གཡུལ་འགྱེད་པའི་ཕྱིར་ཕྱིར་ལོག་གོ །དེ་ནས་ཡང་དེ་དག་རྒྱལ་ཆེན་བཞིའི་ལྷ་རྣམས་ག་ལ་བ་དེར་ལྷགས་སོ། །དེ་དག་ལྷགས་པ་ན་ལྷ་རྣམས་ཀྱིས་འདི་སྐད་སྨྲས་སོ། །དུད་འགྲོ་ཁྱེད་ཡུན་ཇི་སྲིད་ཅིག་ཏུ་དེ་སྐྱོང་བར་བྱེད། གཏི་མུག་གིས་བསྒྲིབས་པ་ཁྱེད་རྣམས་རང་གི་དཔུང་གཞིག་པར་བྱ་བའི་ཕྱིར་ལོག་གམ། དེ་སྐད་སྨྲས་ནས། དེ་ནས་ཡང་ལྷ་རྣམས་ལྷ་མ་ཡིན་ག་ལ་བ་དེར་བརྒྱུགས་སོ། །དེ་ནས་མེ་ཏོག་ཕྲེང་གིས་ལྷ་མ་ཡིན་དེ་དག་ལ་འདི་སྐད་སྨྲས་སོ། །ལྷ་མ་ཡིན་རྣམས་བཟླུམས་ཏེ་འཁོད་པ་ཅི་སེམས་ལྷ་རྣམས་ལ་གནོད་པ་ཅིའི་ཕྱིར་མི་བྱ། སོ་སོར་མི་འཐུན་པར་འཁོད་པ་ལྷ་རྣམས་ཕམ་པར་མི་བྱའམ། །འདི་ན་བདག་གནས་པ་གཅིག་པུས་ལྷ་ཐམས་ཅད་ལས་རྒྱལ་བར་ནུས་ན། གང་ལྷ་མ་ཡིན་གྱི་དབང་པོ་བརྟན་པ་དང་། སེང་གེ་མོའི་བུ་སྒྲ་གཅན་བདག་ཅག་གི་གྲོགས་སུ་གྱུར་པས་སྨོས་ཀྱང་ཅི་དགོས་ཏེ། འཇིགས་པར་མ་བྱེད་ཅིག །ཁྱེད་ཅག་ཀུན་ཀྱང་ཐམས་ཅད་དུ་གཡུལ་གྱི་འཇིགས་པ་མེད་པ་ཡིན་ན། སྒྱིད་ལུག་པ་དེས་མ་ཆོག་གམ། ལྷ་མ་ཡིན་རྣམས་རྒྱལ་བར་གྱུར་ཅིག །ལྷ་མ་ཡིན་རྣམས་མཐུ་རྩལ་དང་བཅས་པས་རྣམ་པར་རྒྱལ་བར་གྱུར་ཅིག །དེ་སྐད་ཅེས་སྨྲས་ནས། དེ་ནས་ཡང་ལྷ་མ་ཡིན་གྱི་དབང་པོ་མེ་ཏོག་ཕྲེང་དང་། ལྷ་མ་ཡིན་གྱི་དབང་པོ་རྣམས་དང་ལྷན་ཅིག་ལྷ་མེ་ཏོག་ཕྲེང་ཐོགས་དང་། རྟག་ཏུ་མྱོས་གནས་དང་། ལག་ན་ཡོལ་གོ་ཐོགས་དང་། པི་བང་ཅན་གསུམ་པའི་ལྷའི་དབང་པོ་རྣམས་བཻ་ཌཱུརྱའི་རིའི་རྩེ་མོར་འཛེགས་ཏེ། འཁོད་ཅིང་ཐམས་ཅད་དུ་ཁྱབ་པར་བྱས་ནས་སྲེད་པ་སྐྱེ་སྟེ། འདི་ལྟར་སུམ་ཅུ་རྩ་གསུམ་པའི་ལྷ་རྣམས་དང་བརྒྱ་བྱིན་མེད་ཀྱང་བདག་ཅག་འབའ་ཞིག་གིས་ལྷ་མ་ཡིན་རྣམས་ཆོས་གཅིག་དང་བཅས་པས་ལན་དུ་མར་ཐུབ་པར་བྱས་སོ། །དེ་དག་གིས་དེ་སྐད་སྨྲས་པ་དང་། ལྷ་མ་ཡིན་རྣམས་ཀྱིས་རྒྱ་
མཚོ་དེ་ཉིད་ཁྱབ་པར་བྱས་ནས། དེ་ནས་ཡང་གཡུལ་འགྱེད་པར་བྱུང་ངོ་། །དེ་ནས་ལྷ་རྣམས་ཀྱིས་ལྷ་མ་ཡིན་དེ་དག་འོང་བ་མངོན་པར་མཐོང་ནས་སྨྲས་པ། འདི་ལྟར་ལྷ་མ་ཡིན་བདག་ཉིད་ཐམས་ཅད་དཔུང་ཆེས་འཕེལ་ཏེ། འོང་གིས་འདི་དག་ནི་ངེས་པར་ལྷ་མ་ཡིན་གྱི་དབང་པོ་གསུམ་པ་མེ་ཏོག་ཕྲེང་ཡིན་ཏེ། དེ་དག་འོང་བ་ལྟ་ཞིང་དེ་དག་ལ་དེ་སྐད་སྨྲས་པ་དང་། ལྷ་མ་ཡིན་གཡུལ་འགྱེད་པར་མདུན་ཉིད་ན་འཁོད་དོ། །དེ་ནས་ལྷ་རྣམས་ཀྱིས་དེ་དག་མཐོང་ནས་སྨྲས་པ། ཁྱེད་གང་གིས་བསླུས་ནས་འོངས། ད་དུང་དུ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་མར་འཛིན་པ། ཕར་འཛིན་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། དགེ་བ་དོན་དུ་གཉེར་བ། དགེ་བ་ལ་ཞུགས་པ་ཡོད་དེ། དེ་དག་ཤི་བའི་དུས་བྱས་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ནི་ངེད་ཡིན་ཏེ། ཁྱེད་པས་ཆེས་དཔུང་ཆེ་ལ་ཆེས་གཙོ་བོ་ཡིན་ནོ། །དེ་ལྟ་བས་ན་ཆོས་བསྒྲུབས་པ་བདག་ཅག་ལ་ཁྱེད་ཀྱིས་མངོན་པར་མ་གཙེ་ཤིག །བདག་ཅག་ལ་ཁྱེད་ཀྱིས་ཅིའི་ཕྱིར་གཙེ། དེ་ནས་དེ་སྐད་སྨྲས་པ་དང་། ལྷ་མ་ཡིན་རྣམས་ཀྱིས་ལྷ་རྣམས་ཀྱི་ཚིག་རྩིས་ལ་མ་ཆགས་པར་བྱས་ནས། ལྷ་རྣམས་དང་གཡུལ་འགྱེད་པའི་ཕྱིར་ལྷགས་སོ། །དེ་ནས་ལྷ་རྣམས་ཡང་ལྷ་མ་ཡིན་རྣམས་ག་ལ་བ་དེར་ནམ་མཁའ་བཀང་ནས་ལྷ་མ་ཡིན་རྣམས་གཞོམ་པའི་ཕྱིར་དང་། དེ་དག་ཕན་ཚུན་རྒྱལ་བར་བྱ་བའི་ཕྱིར་འདོང་བར་བྱེད་དོ། །དེ་ནས་ཡང་དེ་དག་གཡུལ་གྱི་རྣམ་པ་དེ་ལྟ་བུ་བཀྱེ་སྟེ། སྒྲ་གང་གིས་རྒྱ་མཚོ་ན་གནས་པ་ཉ་དང་། སྲོག་ཆགས་དུང་དང་། ཆུ་སྲིན་དང་། ཆུ་སྲིན་བྱིས་པ་གསོད་དང་། ཉ་མིད་དང་། ཉ་མིད་ཆེན་པོ་དང་། ཆུ་སྲིན་ན་ཀྲ་དང་། ཆུ་སྲིན་དུ་ན་དྷུ་གསོད་མང་པོ་རྣམས་ཀྱི་སྙིང་བརྒྱའམ་སྟོང་དུ་རྣམ་པར་གས་སོ། །དེ་དག་མཚོན་ཆ་དཔེ་མེད་པ་དུ་མ་ཆར་གྱི་རྒྱུན་ལྟར་ཤིན་ཏུ་འབབ་པས་ལྷ་དང་ལྷ་མ་ཡིན་གཡུལ་བཀྱེའོ། །ལྷ་མ་ཡིན་གྱི་དབང་པོ་མེ་ཏོག་ཕྲེང་གིས་ལྷ་མ་ཡིན་དེ་དག་བཀྱེ་ནས་གཅིག་པུ་འདུག་སྟེ། ལྷ་རྣམས་ལ་འདི་སྐད་སྨྲའོ། །ང་ཉིད་ཀྱིས་ཡུན་རིང་དུ་གཡུལ་འདིར་
མ་འདུག་སྟེ། དེ་འདུག་ན་ནི་རྣམ་པར་རྒྱལ་བ་ཐོབ་པས་དང་ཁྱེད་རྣམས་གཞོམ་པའི་ཕྱིར་དང་། ལྷ་མ་ཡིན་རྣམས་འབྱོར་པར་བྱ་བའི་ཕྱིར་འོངས་པ་ཡིན་ནོ། །ང་འབའ་ཞིག་འདུག་པས་ལྷ་དབང་པོ་དང་བཅས་པ་ཡང་མདུན་དུ་འདུག་མི་ནུས་ན། རྒྱལ་ཆེན་བཞིའི་ལྷ་འབའ་ཞིག་ལྟ་སྨོས་ཀྱང་ཅི་དགོས་ཏེ། ངས་ཕམ་པར་བྱའོ། །དེ་སྐད་སྨྲས་ནས། ལྷ་རྣམས་ག་ལ་བ་དེར་འགྲོ་བར་བྱེད་དོ། །ལྷ་ལག་ན་ཡོལ་གོ་ཐོགས་པ་རྣམས་ཀྱིས་དེ་འོང་བར་མངོན་པར་མཐོང་ནས། ལྷ་མ་ཡིན་གྱི་དབང་པོ་མེ་ཏོག་ཕྲེང་དེ་གཞོམ་པའི་ཕྱིར་ག་ལ་བ་དེར་འདོང་བར་བྱེད་དོ། །དེ་ནས་རྒྱ་མཚོའི་དབུས་ནས་རི་དཔག་ཚད་ལྔ་པ་དང་། དཔག་ཚད་བཞི་པ་དང་། དཔག་ཚད་གསུམ་པ་དང་། དཔག་ཚད་གཉིས་པ་དང་། དཔག་ཚད་ཀྱི་ཚད་རབ་ཏུ་འབར་བ་དག་ཕྱུང་ཞིང་ཕྱུང་ཞིང་ལྷ་ལག་ན་ཡོལ་གོ་ཐོགས་པ་ག་ལ་བ་དེར་འཕེན་པར་བྱེད་དོ། །དེ་འཕེན་པ་ན་ལྷ་ལག་ན་ཡོལ་གོ་ཐོགས་པ་རྣམས་ཀྱིས་ཆོས་རྗེས་སུ་དྲན་པར་བྱས། དཀོན་མཆོག་གསུམ་ལ་སྐྱབས་སུ་སོང་ནས། མདའི་རྒྱུན་རྣམས་ཀྱིས་རི་དེ་དག་རྒྱ་མཚོའི་དབུས་དེར་བྱེ་མ་ཆང་པ་ནས་གཏོར་བ་བཞིན་དུ་གཏོར་ཏོ། །མེ་ཏོག་ཕྲེང་དེས་ལས་ཀྱི་འབྲས་བུ་དེ་དག་མེད་པར་མངོན་པར་མཐོང་ནས་ལག་ན་དབྱུག་ཏོ་ཐོགས་ཏེ། ལྷ་ལག་ན་ཡོལ་གོ་ཐོགས་པ་ག་ལ་བ་དེའི་མདུན་ཉིད་དུ་འདུག་གོ །དེ་དག་འཁོར་དང་བཅས། དཔུང་དང་། མཐུ་དང་བཅས་པ་འོང་བ་མངོན་པར་མཐོང་ནས་ཆར་གནམ་ལྕགས་ལྟ་བུའི་མཐུ་ཡིས་དབྱུག་ཏོ་དེ་གཅོད་པར་བྱེད་ཅིང་། ལྷ་མ་ཡིན་དེ་དག་ཉམས་སྨད་དེ་དེ་ལྟར་དེ་དག་ཕམ་པར་བྱས་སོ། །ལྷ་མ་ཡིན་གྱི་དབང་པོ་བརྟན་པ་ཡང་ལྷ་རྟག་ཏུ་མྱོས་གནས་ག་ལ་བ་དེར་གཡུལ་འགྱེད་པའི་ཕྱིར་མཚོན་ཆ་ཀུན་འཇོམས་དཔག་ཚད་ཙམ་བླངས་ནས་འདོང་བར་བྱེད་དོ། །དེ་ནས་ལྷ་མ་ཡིན་གྱི་རྒྱལ་པོས་ལྷ་དེ་དག་ལ་འདི་སྐད་སྨྲས་སོ། །འདི་ལྟར་དེ་རིང་བདག་གིས་ཐམས་ཅད་ལས་རྒྱལ་བར་བྱ་སྟེ། ཐམས་ཅད་མཚོན་ཆ་ཀུན་འཇོམས་གྱིས་གཤིན་རྗེའི་གནས་ག་ལ་བ་དེར་ཉེ་བར་བཀྱེའོ་ཞེས་དེ་སྐད་སྒྲ་བསྒྲགས་ནས་ལྷ་རྟག་ཏུ་མྱོས་གནས་རྣམས་ག་ལ་བ་དེར་འདོང་བར་བྱེད་དོ། །འཇིག་རྟེན་སྐྱོང་བ་རྣམས་ཀྱིས་
དེ་འོང་བ་མངོན་པར་མཐོང་ནས་ལག་སྟོབས་ཀྱིས་མཚོན་ཆ་ཕྲོགས་ཏེ། ལྷ་མ་ཡིན་དེ་ཉིད་ཀྱི་བྲང་དུ་བརྒྱབ་བོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉེར་བཞི་པ། དེ་མཚོན་ཆ་དེས་བརྒྱབ་པ་དང་ཉམས་ནས་སའི་འོག་ག་ལ་བ་དེར་འགྲོ་བར་བྱེད་དོ། །དེའི་འཁོར་ལྷ་མ་ཡིན་མགུལ་ཕྲེང་རྣམས་ཀྱིས་གང་གིས་ཉམས་པ་མངོན་པར་མཐོང་ནས། ཉམས་པ་སྲོག་གི་ལྷག་མ་ལུས་པ་དེ་དག་ཐམས་ཅད་ཀྱང་སའི་འོག་ག་ལ་བ་དེར་རྒྱུག་པར་བྱེད་དོ། །ལྷ་མ་ཡིན་གྱི་དབང་པོ་སྒྲ་གཅན་ཡང་འཁོར་དང་བཅས་ཏེ། ལྷ་པི་བང་ཅན་གསུམ་པ་ག་ལ་བ་དེར་འདོང་བར་བྱེད་དོ། །རང་གི་ལག་མཐུས་དྲེགས་པ་དེ་དག་འོངས་པ་མངོན་པར་མཐོང་ནས་ལྷ་རྣམས་མེ་ཆར་ལྟར་མངོན་པར་འབེབས་ཤིང་། དེ་དག་ཀྱང་ལྷ་མ་ཡིན་གྱི་དབང་པོ་སྒྲ་གཅན་ག་ལ་བ་དེར་རྒྱུག་པར་བྱེད་དོ། །མེ་ཆར་ལྟར་ཕབ་པ་དེས་ཀུན་དུ་མངོན་པར་སྲེག་པ་ན་འཁོར་དང་བཅས་པར་སའི་འོག་ག་ལ་བ་དེ་ཉིད་དུ་རྒྱུག་པར་བྱེད་དོ། །ལྷ་མ་ཡིན་གྱི་དབང་པོ་གསུམ་པོ་དེ་དག་མཐོང་ནས་ལྷ་རྣམས་ནི་སྙིང་རབ་ཏུ་དགའ་བར་གྱུར། ལྷ་མ་ཡིན་རྣམས་ནི་ཡིད་དམན་པར་གྱུར་ཏེ། མཐུ་རྩལ་ཉམས་པ། མགོན་འདོད་པ། སྐྱབས་འདོད་པ། དཔུང་གཉེན་འདོད་པ་ཐམས་ཅད་སའི་འོག་གི་སྒོ་ག་ལ་བ་དེར་རྒྱུག་པར་བྱེད་དོ། །དེ་དག་གང་གི་ཚེ་སའི་འོག་གི་སྒོ་དེར་ལྷགས་པ་དེའི་ཚེ། ལྷ་རྣམས་ཡང་བཻ་ཌཱུརྱའི་རིའི་རྩེ་མོ་དེ་ཉིད་ལ་འཛེགས་ཏེ་འཁོད་དོ། །འདི་ལྟར་ལྷ་མ་ཡིན་རྣམས་གོར་མ་ཆག་པར་ཡང་འོང་བར་འགྱུར་ཏེ། གང་གི་ཕྱིར་ཐགས་བཟངས་རིས་དང་རབ་དགོད་དག་ད་དུང་དུ་མ་འོངས་ཏེ། ལྷ་མ་ཡིན་དེ་དག་ནི་དེ་ལ་སྲོག་ལྟོས། དེ་ལ་རྟེན། དེ་གཙོ་བོར་བྱེད་པ་ཡིན་ནོ། །དེ་ལས་རྒྱལ་བ་ནི། ཐམས་ཅད་ལས་རྒྱལ་བར་འགྱུར་ལ། དེ་ལས་ཕམ་ན་ནི་འདི་དག་ཐམས་ཅད་ལས་ཕམ་པར་འགྱུར་རོ་ཞེས་དེ་སྐད་སྨྲས་ནས། ལྷ་ཐམས་ཅད་དགའ་བ་ཤིན་ཏུ་སྐྱེས། མཐུ་ཤིན་ཏུ་སྐྱེས་ཏེ། དེ་སྐད་བརྗོད་ཅིང་གཡུལ་འགྱེད་པའི་ཕྱིར་ངེས་པར་གནས་པར་བྱེད་དོ། །ཀླུའི་རྒྱལ་པོ་རབ་འཇོམས་ལ་སོགས་པ་ཡང་ལོངས་སྤྱོད་ལྡན་གྱི་གྲོང་ཁྱེར་ག་ལ་བ་དེ་ན་ཀླུའི་རྒྱལ་པོ་ནོར་
རྒྱས་ཀྱི་བུ་དང་། འཇོག་པོ་ལ་སོགས་པས་དཔུང་གི་མཐུ་རྩལ་ལྷག་མ་ལུས་པ་རྣམས་བཅོམ་མོ། །དེ་དག་ཀྱང་རབ་དགོད་དེ་ལ་ཤིན་ཏུ་སེམས་ཤིང་དེའི་ཚེ་དེ་ལ་དཔུང་ཚོལ་ཏེ། དེས་ལྷ་རྣམས་གཞོམ་པར་ནུས་ཀྱི། གཞན་དུ་ན་ལྷ་མ་ཡིན་གྱི་ཕྱོགས་ནི་ཤིན་ཏུ་ཕམ་ལ། ལྷའི་ཕྱོགས་ནི་རབ་ཏུ་འཕེལ་ཏོ་སྙམ་མོ། །དེ་ལྟར་ལྷ་མ་ཡིན་གྱི་ཕྱོགས་ཀླུ་དང་ལྷ་མ་ཡིན་དེ་དག་ཐམས་ཅད་ཡིད་སྡུག་བསྔལ་ཞིང་གནས་སོ། །དེ་ལྟར་དེ་དག་གནས་ཤིང་ལྷ་མ་ཡིན་རྣམས་ཀྱང་ཡིད་དམན་པར་གནས་ཏེ། ཐགས་བཟངས་རིས་དང་། རབ་དགོད་དག་གིས་འདི་ལྟར་ལྷ་མ་ཡིན་གནས་གསུམ་པ་ན་གནས་པ་མེ་ཏོག་ཕྲེང་དང་། བརྟན་པ་དང་། སྒྲ་གཅན་ཡང་ཕམ་པར་གྱུར་ཏོ་ཞེས་ཐོས་ཏེ། དེ་ལྟར་མཐུ་མེད་པར་བྱས་སོ། །དེ་ལྟར་སྤྲོ་བ་མེད་པ། དཔུང་དང་མཐུ་ཉམས་པ་དེ་དག་ལ་མགོན་གཞན་མེད་དེ། འདི་ལྟར་ལྷ་མ་ཡིན་གྱི་དབང་པོ་ཁྱོད་དུ་བས་སོ། །དེ་ནས་ལྷ་མ་ཡིན་གྱི་དབང་པོ་རབ་དགོད་ཀྱིས་འདི་སྐད་སྨྲས་སོ། །ལྷ་མ་ཡིན་རྣམས་ལྷ་མ་ཡིན་གྱི་དབང་པོ་གསུམ་དག་ག་ལ་གནས་རྟོགས་ཤིག་རྟོགས་ཤིག །དེ་སྐད་སྨྲས་པ་དང་། ལྷ་མ་ཡིན་རྣམས་ཀྱིས་ལྷ་མ་ཡིན་གྱི་དབང་པོ་དེ་ལ་འདི་སྐད་སྨྲས་སོ། །འདི་ལྟར་སའི་འོག་གི་སྒོའི་ཐ་མ་ན་ལྷ་མ་ཡིན་དཔུང་དང་མཐུ་ཉམས་པ་ཐམས་ཅད་ཁྱོད་ལ་སྲོག་ལྟོས། ཁྱོད་ལ་དཔུང་ཚོལ། ཁྱོད་ལ་རྟེན་ཅིང་མཆིས་ཏེ། མཚར་ཁོ་ནར་ངོ་ཚ་ནས་སའི་འོག་གི་ནང་དུ་ཡང་མཆི་བའི་རྔོ་མ་ཐོགས་སོ། །དེ་ནས་ཐགས་བཟངས་རིས་དང་རབ་དགོད་ཀྱིས་འདི་སྐད་སྨྲས་སོ། །ཅི་ལྷ་དེ་རྣམས་ཀྱི་བརྒྱ་བྱིན་འོངས་སམ་མ་འོངས། ལྷ་མ་ཡིན་རྣམས་ཀྱིས་སྨྲས་པ། མ་མཆིས་སོ། །དེ་ནས་རབ་དགོད་ཁྲོས་པའི་མིག་དམར་པོས་རང་གི་དཔུང་ལ་ལྟ་ཞིང་འདི་སྐད་སྨྲས་སོ། །རྒྱལ་ཆེན་བཞི་པ་དག་ཉི་ཚེས་གནས་གསུམ་དུ་གཏོགས་པའི་ལྷ་མ་ཡིན་རྣམས་ཕམ་པར་བྱས། དཔུང་དང་མཐུ་ཉམས་པར་བྱས། བརྩོན་པ་མེད་པར་བྱས་ཏེ། ཀྱེ་མ་ལྷ་མ་ཡིན་རྣམས་ལྷའི་རིས་ཉི་ཚེ་གང་གིས་དཔུང་དང་མཐུ་ཉམས་པར་བྱས་པ་དེའི་ཕྱིར་འདི་ལྟར་ང་ཆ་སྟེ། ལྷ་ཐམས་ཅད་ཕམ་པར་བྱའོ། །དེ་སྐད་སྨྲས་ནས། ལྷ་མ་ཡིན་གྱི་དབང་པོ་དེ་ལྷ་མ་ཡིན་གྱི་དབང་པོ་
ཀུན་གྱི་དཔུང་བས་ལྷག་པར་བརྩོན་པ་གང་ཡིན་པ་དེས་དཔོན་སྣ་ཐམས་ཅད་ལ་བསྒོ་བ་འདི་ལྟར་ལྷ་གསད་པ་དང་། ལྷ་གཞོམ་པ་དང་། ལྷ་རྣམས་ལ་བར་ཆད་བྱ་བའི་ཕྱིར་བདག་ཆ་ཡིས་རྔ་བོ་ཆེ་རྡུངས་ཤིག་རྡུངས་ཤིག །ལྷ་དང་བརྒྱ་བྱིན་དུ་བཅས་པ་ང་གཅིག་པུས་ཐུབ་པར་བྱ་སྟེ། ང་ནི་བདག་བར་མ་དོར་ཕམ་པར་མི་འདོད་དོ། །གང་ལྷའི་བརྩོན་འགྲུས་དཔུང་དང་ལྡན་པ་དག་ལྷ་མ་ཡིན་གྱི་བུ་མོ་རྣམས་ལ་ལྟ་བ་དང་། ཉུག་པར་འདོད་པ་ཅི་ངས་མི་ཤེས་སྙམ་མམ། དེ་སྐད་སྨྲས་ནས་ཐགས་བཟངས་རིས་དང་། རབ་དགོད་དེ་དག་རྔ་སྒྲ་འབྱིན་ཅིང་ལྷ་མ་ཡིན་རྣམས་རྒྱུགས་ཤིག་རྒྱུགས་ཤིག །འདི་ལྟར་ངས་ལྷ་ཐམས་ཅད་ཕམ་པར་བྱ་བ་དང་། ལྷ་མ་ཡིན་ཐམས་ཅད་འབྱོར་པར་བྱ་བའི་ཕྱིར་བདག་ཉིད་ཆའོ། །དེས་དེ་སྐད་ཅེས་བསྒོ་ནས་ཤིང་རྟ་འཁོར་ལོ་རྩིབས་འབུམ་དང་། ལྷ་མ་ཡིན་གྱི་འོད་ཉི་མ་ལྟ་བུ་བྱེ་བ་ཕྲག་དུ་མ་དག་ཆས་སོ། །དེ་ཆས་པ་དང་། རི་དང་། ཆུ་བོ་དང་། རི་ཁྲད་ཁྲོད་དང་། རི་འོར་དང་། རིའི་རྩེ་མོ་དང་། རི་རབ་ཏུ་བཅས་པ་གཡོ་བ་ནས་ལེགས་མཐོང་གི་ཚལ་ན་ལྷ་རྣམས་ཀྱི་དབང་པོ་བརྒྱ་བྱིན་ལྷའི་འདུན་ས་ཆོས་བཟང་ན་འདུག་པའི་སྟན་གྱི་བར་དུ་གཡོ་བ་དང་། དེ་འདི་སྙམ་དུ་སེམས་ཏེ། །ཀྱེ་ཨེ་མ་བདག་གི་སྟན་ཡང་གཡོ་བ་ལས་ན་གོར་མ་ཆག་པར་ལྷ་དང་ལྷ་མ་ཡིན་གཡུལ་འགྱེད་པར་འགྱུར་ཏེ། ལྷ་མ་ཡིན་གྱི་རྒྱལ་པོ་ཐགས་བཟངས་རིས་དེ་ཆས་པ་ལྟར། འདི་ལྟར་ཚལ་དང་། ནགས་ཚལ་འདི་དང་། རི་ཁྲད་ཁྲོད་དང་། ཆུ་ཀླུང་དང་། རི་ངོས་དང་བཅས་པ་ཐམས་ཅད་དང་། རིའི་རྒྱལ་པོ་རི་རབ་འདི་ཡང་རབ་ཏུ་གཡོའོ། །བརྒྱ་བྱིན་དེས་དེ་ལྟར་རིག་ནས། ལྷ་རྣམས་ལ་བསྒོ་བ། སུམ་ཅུ་རྩ་གསུམ་པའི་ལྷ་རྣམས་ཆོས་ཤིག་ཆོས་ཤིག །འདི་ལྟར་རབ་དགོད་དང་ཐགས་བཟངས་རིས་དག་ལྷ་རྣམས་ཕམ་པར་བྱ་བའི་ཕྱིར་ཆ་ཞིང་འདུག་གོ །དེའི་ཕྱིར་བདག་ཉིད་ཀྱང་འདི་ལྟར་གླང་པོ་ཆེ་ས་སྲུང་གི་བུ་ལ་ཞོན་ཏེ། ལྷ་ཐམས་ཅད་དང་ལྷན་ཅིག་ཏུ་ལྷ་དང་ལྷ་མ་ཡིན་གྱི་གཡུལ་ག་ལ་བ་དེར་འདོང་བར་བྱའོ། །གང་གི་ཕྱིར་རབ་དགོད་དང་། ཐགས་བཟངས་རིས་ཀྱི་གཡུལ་འགྱེད་པ་གང་ཡིན་པ་དེར་ལྷ་འདུག་པ་ནི་ངས་མ་མཐོང་ངོ་། །
དེ་སྐད་སྨྲས་པ་དང་། འདི་ལྟར་ལྷ་རྣམས་ཀྱི་དབང་པོ་བརྒྱ་བྱིན་དེ་ནི་དཔུང་གི་གཙོ་བོ་ཡིན་ཏེ། ལྷའི་འདུན་ས་ཆོས་བཟང་དང་། གྲོང་ཁྱེར་བལྟ་ན་སྡུག་ན་གནས་པ་རྣམས་ལ་ཡང་བསྒོ། བཞི་མདོ་དང་བཞི་མདོ། །སུམ་མདོ་དང་སུམ་མདོ་དག་ཏུ་ཡང་འདི་ལྟར་ལྷ་རྣམས་ཀྱི་དབང་པོ་བརྒྱ་བྱིན་དེ་ནི་ལྷ་དང་ལྷ་མ་ཡིན་གྱི་གཡུལ་འགྱེད་པར་འགྲོ་སྟེ། རབ་དགོད་དང་ཐགས་བཟངས་རིས་དག་ག་ལ་བ་དེ་ཉིད་དུ་ཐམས་ཅད་འདོང་བར་བྱའོ་ཞེས་བསྒོའོ། །དེ་ནས་དེ་དག་ལ་དེ་སྐད་སྨྲས་པ་དང་། ལག་ཆ་དང་། མཚོན་ཆ་སྣ་ཚོགས་ཀྱི་གནས་སུ་གྱུར་པ། ཤིང་རྟ་སྣ་ཚོགས་ཀྱི་ཚལ་དུ་འདོང་བར་བྱེད་དེ། མཚོན་ཆ་ཐམས་ཅད་ཡོད་པ་དེར་ལྷ་བརྒྱའམ། སྟོང་ངམ། ཁྲིའམ། བྱེ་བ་མཚོན་ཆ་དོན་དུ་གཉེར་བ་དེ་དག་ཤིང་རྟ་སྣ་ཚོགས་ཀྱི་ཚལ་དུ་འདོང་བར་བྱེད་དོ། །དེ་དག་རྒྱུག་པ་ན་རྒྱ་མཚོ་བྲུག་པ་ལྟ་བུའི་སྒྲ་བྱུང་སྟེ། ལྷ་རྣམས་ཕན་ཚུན་འདོང་བ་ཤིན་ཏུ་བརྟུལ་བའི་རྡུལ་གང་གིས་ནམ་མཁའ་ཡོག་པར་གྱུར་པ་རྣམ་པ་དེ་ལྟ་བུ་བྱུང་ངོ་། །དེ་ལྟར་དེ་དག་མཚོན་ཆ་རྣམས་བླངས་ནས་ནམ་མཁའ་ལ་རྒྱུ་བ་རྣམས་ནི་ནམ་མཁའ་ལ། སྐམ་ས་ལ་རྒྱུ་བ་རྣམས་ནི་སྐམ་ས་ལ། རིའི་རྩེ་མོ་ལ་རྒྱུ་བ་རྣམས་ནི་རིའི་རྩེ་མོ་ཀུན་དུ་གང་ནས་འདོང་ངོ་། །ལྷ་གཞན་ཚལ་དང་། ནགས་ཚལ་དག་ན་གནས་ཤིང་རྩེར་དོང་བའི་ལྷ་གང་ཡིན་པ་དེ་དག་ཀྱང་རྔ་སྒྲ་ཐོས་ནས། ཤིང་རྟ་སྣ་ཚོགས་ཀྱི་ཚལ་ག་ལ་བ་དེར་རྒྱུག་པར་བྱེད་དོ། །སུམ་ཅུ་རྩ་གསུམ་པའི་ལྷའི་འདོད་པ་ཀུན་ཀྱང་བཏང་ནས། ཐམས་ཅད་རྒྱུག་པར་བྱེད་དོ། །མཚོན་ཆ་དང་། ལག་ཆ་དང་། གོ་མཚོན་རབ་ཏུ་མང་པོ་བརྒྱའམ། སྟོང་ངམ། བྱེ་བའམ། བྱེ་བ་བརྒྱ་ཕྲག་སྟོང་སྙེད་དག་བླངས་ནས། དེ་དག་ཐམས་ཅད་བརྒྱ་བྱིན་ཤིན་ཏུ་མཐོང་བར་འདོད་ཅིང་འཁོད་དོ། །དེ་ནས་བརྒྱ་བྱིན་གྱིས་དེ་དག་གི་ཉམས་དྲོད་རིག་ནས་ལྷ་ཐམས་ཅད་རབ་ཏུ་དགའ་བར་བྱེད་ཅིང་ཤིང་རྟ་རབ་ཏུ་མང་པོ་ལ་ཞོན་ཏེ། ཤིང་རྟ་ཁ་ཅིག་ནི་རིན་པོ་ཆེ་སྣ་བདུན་གྱིས་བརྒྱན། ཁ་ཅིག་ནི་གསེར་གྱིས་བརྒྱན། ཁ་ཅིག་ནི་དངུལ་གྱིས་བརྒྱན། ཁ་ཅིག་ནི་བཻ་ཌཱུརྱས་བརྒྱན། ཁ་ཅིག་ནི་ཤེལ་གྱིས་བརྒྱན། ཁ་ཅིག་ནི་སྤུག་ལ་སོགས་པའི་རིན་པོ་ཆེ་ཆེན་པོ་
རྣམས་ཀྱིས་བརྒྱན། ཁ་ཅིག་ནི་ནོར་བུ་སྣ་ཚོགས་ཀྱིས་བརྒྱན་ཅིང་། དྲིལ་བུ་གཡེར་ཁའི་དྲ་བས་གཏིབས་པ། ཀུན་ནས་མཛེས་པ། ལས་ཀྱི་མཆོག་ཇི་ལྟ་བ་བཞིན་དུ་ཐོབ་པ། རང་གི་གཟི་བརྗིད་ཀྱིས་རྟག་ཏུ་མཛེས་པ་ན་ཁ་ཅིག་ནི་གསེར་གྱི་རི་རབ་ཀྱི་རྩེ་མོ་དག་ཁྱབ་པར་གནས་སོ། །བརྒྱའམ་སྟོང་སྙེད་ཁ་ཅིག་ནི་ནམ་མཁའ་ལ་དོང་སྟེ། ལྷའི་དབང་པོ་ལྷ་མ་ཡིན་རྣམས་ཕམ་པར་བྱ་བའི་ཕྱིར་ནམ་འགྲོ་ཞིག་གུ་སྙམ་ནས། བརྒྱ་བྱིན་ལ་ཤིན་ཏུ་ལྟ་ཞིང་འཁོད་དོ། །དེ་ལྟར་ཕན་ཚུན་ཀུན་ནས་གཏམ་ཟེར་ཞིང་འཁོད་དོ། །འཐབ་པ་ལ་ཡིད་ཞུགས་པ་ཐམས་ཅད་འཁོད་དོ། །དེ་དག་དེ་ལྟར་འཁོད་པ་དང་། ལྷའི་དབང་པོས་གླང་པོ་ཆེའི་ཁ་ལོ་སྒྱུར་བ་མ་ཏ་ལི་ལ་བསྒོ་བ། འདི་ལྟར་བཟང་པོ་སོང་ལ་ངའི་གླང་པོ་ཆེ་ས་སྲུང་གི་བུ་གླང་པོ་ཆེ་ཐམས་ཅད་ཀྱི་ཡོན་ཏན་དང་ལྡན་པ་ཁ་དྲུག་ཡོད་པ་དེ་ལ་ཞོན་ནས་ངས་ལྷ་མ་ཡིན་རྣམས་ཕམ་པར་བྱའོ་ཞེས་སྒོ་ཤིག །དེ་ནས་མ་ཏ་ལིས་བརྒྱ་བྱིན་གྱི་བཀའ་མནོས་ནས། རང་གི་འདོད་པས་སྤྲུལ་པའི་པད་མའི་ཚལ་ན་གླང་པོ་ཆེ་ས་སྲུང་གི་བུ་གླང་པོ་ཆེ་མང་པོས་ཡོངས་སུ་བསྐོར་བ་ག་ལ་བ་དེར་སོང་ངོ་། །དེ་ནས་གླང་པོ་ཆེ་ཅང་ཤེས་དེ་ལ་འདི་སྐད་སྨྲས་སོ། །འདི་ལྟར་ལྷའི་དབང་པོ་བརྒྱ་བྱིན་དེ་ཁྱོད་ལ་འབོད་དེ། ལྷ་མ་ཡིན་གྱི་གཡུལ་དུ་ཁྱོད་ལ་ཞོན་ནས་ལྷ་མ་ཡིན་རྣམས་ཕམ་པར་བྱའོ་ཞེས་གསུང་ངོ་། །དེ་ནས་གླང་པོ་ཆེ་ས་སྲུང་གི་བུ་མ་ཏ་ལི་ག་ལ་བ་དེར་སོང་སྟེ་ཕྱིན་ནས། ལྷའི་འདུན་ས་ཆོས་བཟང་ག་ལ་བ་དེར་སོང་ངོ་། །དེར་འོངས་པ་དང་མ་ཏ་ལིས་བརྒྱ་བྱིན་ལ་སྨྲས་པ། ལྷའི་དབང་པོ་འདི་ལྟར་གླང་པོ་ཆེའི་མཆོག་དེ་མཆིས་སོ། །བརྒྱ་བྱིན་གྱི་རྫུ་འཕྲུལ་གྱིས་དེའི་ལུས་དེ་ལ་ཁ་སྐྱོན་མེད་པ་བརྒྱ་སྤྲུལ་པར་བྱེད་དེ། ཁ་རེ་རེ་ལ་སོ་དཀར་པོ་བཅུ་བཅུ། སོ་རེ་རེ་ལ་པད་མའི་རྫིང་བུ་བཅུ་བཅུ། པད་མའི་རྫིང་བུ་རེ་རེ་ལ་པད་མ་སྟོང་སྟོང་། པད་མ་རེ་རེ་ལ་རི་བོ་བཅུ་བཅུ། རི་བོ་རེ་རེ་ལ་པོག་རི་བརྒྱ་བརྒྱ། པོག་རི་རེ་རེ་ལ་ལྷ་མོ་བརྒྱ་བརྒྱ། སིལ་སྙན་ཡན་ལག་ལྔ་དང་ལྡན་པས་གླུ་ལེན་བྲོ་རྡུང་ཞིང་། ཤིན་ཏུ་ཆགས་སུ་རུང་བ་གཞན་དང་མི་འདྲ་བའི་གླུ་དབྱངས་དང་ཡང་དག་པར་ལྡན་
པ་དག་ལེན་ཏེ། དེ་ལྟར་གླང་པོའི་མཆོག་ས་སྲུང་གི་བུ་ལ་ལྷའི་དབང་པོ་བརྒྱ་བྱིན་སྤྲུལ་པ་བྱེད་དོ། །གླང་པོ་ཆེའི་དབང་པོ་དེ་ཡང་ལུས་ཀུན་ནས་དཔག་ཚད་སྟོང་ཡོད་དོ། །ལྷའི་དབང་པོ་བརྒྱ་བྱིན་ལྷ་མ་ཡིན་རྣམས་ཕམ་པར་བྱ་བའི་ཕྱིར་སིལ་སྙན་དང་། རོལ་མོའི་སྒྲ་དང་། གླུ་དང་། ཅ་ཅོ་དང་། ག་ཞའི་སྒྲ་དབྱངས་འབྱིན་པ་རྣམས་ཀྱིས་རྣམ་པར་མཛེས་པ་ན་ཀུན་ནས་རྣམ་པ་དེ་ལྟ་བུ་དང་ལྡན་པའི་གླང་པོ་ཆེ་མཆོག་དཀར་པོ་དེ་ལ་ཞོན་ནོ། །དེ་ནས་དེ་འགྲོ་བ་མངོན་པར་མཐོང་ནས། ལྷ་རྣམས་ཀྱང་ཤིང་རྟ་ཁ་དོག་རྣམ་པ་སྣ་ཚོགས་ལ་ཞོན་ཏེ། མཚོན་ཆ་སྣ་ཚོགས་ནི་ཐོགས། ལུས་ལ་རྒྱན་སྣ་ཚོགས་ནི་བཏགས། དགོད་པ་དང་། རྩེ་བ་དང་། སྒྲ་དི་རི་རི་འདོན་པ་དང་། རབ་ཏུ་དགའ་བའི་ཡིད་རྣམ་པ་དུ་མ་ཕྱིར་ཞིང་ཡིད་རབ་ཏུ་དགའ་བར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་དབུས་ཀྱི་སྟན་ལ་འདུག་སྟེ། བསོད་ནམས་ཀྱི་སྟོབས་ཆེན་པོ་དང་ནི་ལྡན། ལྷའི་མཆོག་མང་པོས་ནི་ཡོངས་སུ་བསྐོར། གཞན་དང་མི་འདྲ་བར་ནི་བརྗིད། ལྷ་རྣམ་པ་སྣ་ཚོགས་ཀྱིས་ནི་ཡོངས་སུ་བསྐོར་ཏེ། སུམ་ཅུ་རྩ་གསུམ་པའི་བདག་པོ་ཉི་མ་འབུམ་བས་ལྷག་པའི་འོད་ཀྱིས་ནམ་མཁའ་འགེངས་ཤིང་། སིལ་སྙན་དང་། གླུ་དབྱངས་རྣམ་པ་སྣ་ཚོགས་ཀྱིས་འགེངས་པ་ན། ནམ་མཁའི་དཔག་ཚད་ཉི་ཁྲིར་བཀང་ནས་ལྷ་དང་ལྷ་མ་ཡིན་གྱི་གཡུལ་ག་ལ་བ་དེར་འཇུག་པར་བྱེད་དོ། །དེ་ནས་དེ་འཇུག་པ་ན། འཇིག་རྟེན་སྐྱོང་བ་རྣམས་བྲེད་སྐད་འབྱིན་ཅིང་། བརྒྱ་བྱིན་གྱི་དྲུང་དུ་ཕྱིན་ནས། འདི་ལྟར་ལྷའི་དབང་པོ་ལྷ་རྣམས་ཕམ་པར་བྱ་བའི་ཕྱིར་རབ་དགོད་དང་། ཐགས་བཟངས་རིས་དག་མཆི་སྟེ། འདི་ལྟར་རྒྱ་མཚོ་ཐམས་ཅད་རབ་ཏུ་དཀྲུགས། རི་བོར་གཏོགས་པ་སྟོང་རབ་ཏུ་གཡོ་བར་བགྱིད། ལྷ་མ་ཡིན་རྣམས་སྒྲ་འཇེབས་པར་འབྱིན་ཏེ། ཤིན་ཏུ་འཇིགས་པའི་སྒྲ་ཐོས་སོ། །གང་ཐོས་ནས་རྒྱ་མཚོ་ན་གནས་པ་ཉ་དང་ཀླུ་དག་ཀྱང་མཐུ་ཆུང་བར་གྱུར། སྲིན་པོ་དང་ཤ་ཟ་དག་ཀྱང་གུམ་པར་གྱུར། ཀླུའི་རྒྱལ་པོ་ཆོས་དང་མི་ལྡན་པ་རབ་འཇོམས་ལ་སོགས་པ་ནི་ཤིན་ཏུ་དགའ་ནས། འབྲུག་སྒྲ་འབྱིན། ཀླུའི་རྒྱལ་པོ་ཆོས་
དང་ལྡན་པ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ནི་འདི་ལྟར་ལྷ་མ་ཡིན་གྱི་དབང་པོ་ཐགས་བཟངས་རིས་སའི་འོག་ནས་བྱུང་ངོ་སྙམ་ནས། ཡིད་དམན་པར་གྱུར་ཏེ། འབྲུག་སྒྲ་མི་སྒྲོགས། གསེར་གྱི་རི་བོ་དྲུག་ཁྲི་རི་རབ་དང་བཅས་པ་གང་ཡིན་པ་དེ་དག་ཐམས་ཅད་ཀྱང་གཡོ་བར་བགྱིད། འབྱུང་པོ་ཐམས་ཅད་ཀྱང་སྒྱིད་ལུག་པར་གྱུར་ནས། ཕྲེང་ཐོགས་དང་། རྟག་ཏུ་མྱོས་གནས་དང་། ལག་ན་ཡོལ་གོ་ཐོགས་པ་དང་། པི་བང་ཅན་གསུམ་པ་ཤིན་ཏུ་སྒྱིད་ལུག་པ་རྣམས་ཀྱིས་བདག་ལྷའི་དབང་པོའི་དྲུང་དུ་མངགས་པ་ལགས་ན། ལྷ་ལན་དུ་བགྱི་བ་གང་ལགས་པ་དེ་བསྒྲུབ་ཏུ་གསོལ། འདི་ལྟར་བདག་ཅག་རྣམས་ཀྱིས་ནི་གནས་གསུམ་དུ་གཏོགས་པའི་ལྷ་མ་ཡིན་གྱི་དབང་པོ་གསུམ་པོ་མེ་ཏོག་ཕྲེང་དང་། སྒྲ་གཅན་དང་། བརྟན་པ་དག་གཡུལ་དུ་ལན་བརྒྱའམ་སྟོང་དུ་ཐུབ་ལགས་སོ། །འཇིག་རྟེན་སྐྱོང་བ་རྣམས་ལས་དེ་སྐད་ཐོས་ནས། ལྷའི་དབང་པོས་དེ་དག་ལ་སྨྲས་པ། འཇིག་རྟེན་སྐྱོང་བ་རྣམས་འདི་དག་ཐམས་ཅད་ཇི་ལྟ་བ་བཞིན་བདག་གིས་རིག་སྟེ། འདི་ལྟར་རབ་དགོད་དང་ཐགས་བཟངས་རིས་དག་ཆས་པའི་ཕྱིར་བདག་ཀྱང་དེ་དག་ཆད་པས་གཅད་པ་དང་། ལྷ་དེ་རྣམས་ཀྱི་སྐྱབས་དང་དཔུང་བྱ་བའི་ཕྱིར་འདི་ལྟར་བདག་འགྲོ་བར་བྱའོ། །བདག་ནི་ཆོས་ཀྱི་སྐྱབས། ཆོས་ཀྱི་དཔུང་གཉེན། ཆོས་ཀྱི་རྟེན། ཆོས་ཀྱི་རྒྱལ་མཚན། ཆོས་ཚོལ་བ་ཡིན་ཏེ། བདག་ནི་ཆོས་མ་ཡིན་པ་ལ་མི་དགའ་ལ། ཆོས་མ་ཡིན་པ་ལ་ཡིད་ཀྱང་མི་འཇུག་གོ །དེ་ལྟར་བདག་ཅག་ཡོན་ཏན་དེ་ལྟ་བུ་དང་ལྡན་པ་རྣམས་ལ་ནམས་ཀྱང་ཐུབ་པར་མི་འགྱུར་གྱིས། དེ་དག་ལ་མ་འཇིགས་ཤིག་མ་འཇིགས་ཤིག །བདག་ཀྱང་དཔུང་གི་ཚོགས་རབ་ཏུ་མང་པོས་ལྷ་མ་ཡིན་ག་ལ་བ་དེར་འགྲོ་བར་བྱ་ཡིས། དེ་དག་ལ་འཇིགས་པར་མ་བྱེད་ཅིག །འཛམ་བུའི་གླིང་ན་ད་དུང་དུ་མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། བྱས་པ་གཟོ་བ་དང་། ཆོས་དང་ལྡན་ཞིང་ཆོས་སྐྱོང་བ་དང་། དམ་པའི་
ཆོས་ལ་དགའ་བ་དང་། དམ་པའི་ཆོས་དང་དགེ་འདུན་ལ་གུས་པ་དང་། ལས་དང་འབྲས་བུའི་དེ་ཉིད་རིག་པ་དང་། གསོ་སྦྱོང་ལ་ཉེ་བར་གནས་པ་དང་། སྦྱིན་པ་དག་སྦྱིན་པར་བྱེད། བསོད་ནམས་བྱེད་པའི་རང་བཞིན་ཅན་དག་རྗེས་སུ་སྐྱོང་བར་བྱེད། ཡེ་ཤེས་ལ་གོམས་པར་བྱེད། དེ་ལ་ཡིད་ཞུགས་པར་བྱེད་པ་དག་ཡོད་ལ། བདག་གིས་ཀྱང་ཆོས་དང་འཐུན་པའི་ཆོས་ཀྱི་རང་བཞིན་ཅན་བསྒྲུབས་ཏེ། དེ་དག་དང་བདག་ཅག་ཉུང་གིས་ཀྱང་ལྷ་མ་ཡིན་དུ་གཏོགས་པ་རྣམས་ཀྱིས་འཇིགས་པ་མེད་དོ། །དེ་སྐད་སྨྲས་ནས་ལྷའི་དབང་པོ་བཻ་ཌཱུརྱའི་རི་ག་ལ་བ་དང་། རྒྱལ་ཆེན་བཞིའི་ལྷ་རྣམས་ག་ལ་བ་དེར་སོང་སྟེ། དེ་དག་མངོན་པར་མཐོང་ནས་ལྷའི་དབང་པོས་སྨྲས་པ། འཇིག་རྟེན་སྐྱོང་བ་དག་རྒྱལ་ཆེན་བཞིའི་ལྷ་འདི་དག་འཁོད་པ་ནི་ལྷ་མ་ཡིན་རྣམས་ཕམ་པར་བྱ་བའི་ཕྱིར་འཁོད་པ་ཡིན་ནོ། །ལྷའི་དབང་པོས་དེ་སྐད་སྨྲས་པ་དང་། འཇིག་རྟེན་སྐྱོང་བ་དག་གིས་སླར་སྨྲས་པ། འདི་ལྟར་རྒྱལ་ཆེན་བཞིའི་ལྷ་འདི་དག་ནི་བརྒྱ་བྱིན་ཁྱོད་ལ་རྟེན། ཁྱོད་ལ་སྐྱབས་ཚོལ། ཁྱོད་ལ་གནས་པ་ཁོ་ན་ལགས་ཏེ། ལྷ་མ་ཡིན་གྱི་དབང་པོ་ཚོགས་དང་བཅས་པ་ཡང་རྩིས་ལ་མ་ཆགས་པར་བགྱིད་དོ། །དེ་སྐད་སྨྲས་པ་ན་སུམ་ཅུ་རྩ་གསུམ་པའི་ལྷ་རྣམས་བརྒྱ་བྱིན་ལ། ལྷའི་དབང་པོ་བརྒྱ་བྱིན་སྔོན་དུ་འདྲེན་པ་དང་བཅས་པར་རྒྱལ་བར་སྤྱོན་ཅིག་ཅེས་གསོང་པོར་སྨྲ་ཞིང་སྟོད་པར་བྱེད་དོ། །དེ་ལྷའི་ཚོགས་ཀྱིས་བསྟོད་ཅིང་རྒྱལ་ཆེན་བཞིའི་ལྷ་ག་ལ་བ་དེར་འདོང་བར་བྱེད་དོ། །དེ་ནས་ལྷའི་དབང་པོ་འཁོར་དང་བཅས་པ་ཤིང་རྟ་འབུམ་ཕྲག་དུ་མ་དང་ལྷའི་ཚོགས་ཀྱིས་ནི་ཡོངས་སུ་བསྐོར། གླང་པོ་ཆེ་ས་སྲུང་གི་བུ་ལ་ནི་སྔ་མ་བཞིན་ཞོན། རིན་པོ་ཆེ་སྣ་བདུན་གྱིས་ནི་མཛེས་པར་བྱས། ནམ་མཁའ་ལྟར་རྟག་ཏུ་ལུས་འོད་ཀྱིས་ནི་གསལ་བར་བྱས། ཕྱོགས་བཅུར་རོལ་མོའི་སྒྲ་དང་། སིལ་སྙན་གྱི་སྒྲ་དུ་མས་ནི་བཀང་། ལྷ་ཡིད་རབ་ཏུ་དགའ་བ་འབུམ་ཕྲག་དུ་མས་ནི་ཡོངས་སུ་བསྐོར། རི་རབ་ཐམས་ཅད་ལ་གནས་པའི་དྲི་ཟ་རྣམས་ཀྱིས་ནི་མཛེས་པར་བྱས། ལྷ་དང་དྲང་སྲོང་གི་ཚོགས་རྣམས་ཀྱིས་ནི་མངོན་པར་བསྟོད་དེ། བདེ་བ་དཔེ་མེད་པ་
ཉམས་སུ་མྱོང་ཞིང་ལས་ཀྱི་འབྲས་བུ་ཤིན་ཏུ་ལེགས་པ་ལ་སྤྱོད་པ་འོང་བ་དག་མཐོང་ནས་རྒྱལ་ཆེན་བཞིའི་ལྷ་རྣམས་ཡིད་རབ་ཏུ་དགའ་བར་གྱུར་ཏོ། །དེ་ནས་དེ་དག་མངོན་པར་མཐོང་ནས་སྨྲས་པ། འདི་ལྟར་ང་ནི་ལྷ་མ་ཡིན་ཕམ་པར་བྱ་བའི་ཕྱིར་ང་དཔུང་ཆེན་པོ་དང་ལྷགས་པ་ཡིན་གྱིས་མ་འཇིགས་ཤིག་མ་འཇིགས་ཤིག །དེ་ཐོས་ནས་རྒྱལ་ཆེན་བཞིའི་ལྷ་རྣམས་ཡིད་རབ་ཏུ་དགའ་སྟེ་འདི་སྐད་སྨྲས་སོ། །ལྷའི་དབང་པོ་འདི་ལྟར་ལྷ་མ་ཡིན་འདི་དག་བདག་ཅག་འབའ་ཞིག་གིས་ཀྱང་ཕམ་པར་བགྱི་བའི་སླད་དུ་མཆིས་པ་ལགས་ན། ལྷའི་དབང་པོ་དང་བཅས་པས་ལྟ་སྨོས་ཀྱང་ཅི་འཚལ་ཏེ། ཁྱོད་ཀྱི་དཔུང་གིས་བདག་ཅག་བསྐྱབས་པས་ན། ལྷ་མ་ཡིན་དུ་གཏོགས་པའི་འཇིགས་པ་ཆུང་ཟད་ཀྱང་མ་མཆིས་སོ། །དེ་སྐད་སྨྲས་ནས་ལྷ་མ་ཡིན་ལྟ་བ་ཁོ་ནར་འདོད་པ་དེ་ལ་མངོན་དུ་ཕྱོགས་པ་ལྷ་རྣམས་ཀྱི་དབང་པོ་བརྒྱ་བྱིན་དེ་ག་ལ་བ་དེར་ཡོངས་སུ་བསྐོར་ཏེ། འཁོད་པ་རྣམས་འདི་ལྟར་ལྷ་མ་ཡིན་གྱི་དབང་པོ་ཐགས་བཟངས་རིས་དེ་ལྷ་མ་ཡིན་གྱི་དབང་པོ་སྒྲ་གཅན་དང་། བརྟན་པ་དང་། མེ་ཏོག་ཕྲེང་དང་། ལྷན་ཅིག་དུས་ཇི་སྲིད་ཅིག་ན་འོང་བར་འགྱུར་སྙམ་མོ། །དེ་ལྟར་ལྕགས་ཀྱི་ཡ་ལད་མི་ཕྱེད་པ་བགོས་པ། ལག་ན་མཚོན་ཆ་སྣ་ཚོགས་ཐོགས་པ། ལྷ་མ་ཡིན་ཕམ་པར་བྱ་བའི་ཕྱིར་གཡུལ་དུ་ཆས་པ། ཡིད་གཅིག་ཏུ་གྱུར་པ་དག་རིན་པོ་ཆེ་རྣམ་པ་སྣ་ཚོགས་ཀྱིས་མཛེས་པར་བྱས་པའི་ཤིང་རྟ་ལ་ཞོན་པ་རྣམས་འཁོད་དོ། །དེ་ལྟར་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་ཀླུ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་གཡུལ་འགྱེད་པར་ཤིན་ཏུ་ཆས་པ། བརྒྱ་བྱིན་ལ་ལྟ་ཞིང་བཀའ་གུས་པར་ནོད་པ་དག །བརྒྱ་བྱིན་གྱིས་བཀའ་ཅི་ཞིག་སྩོལ་བར་འགྱུར་སྙམ་ཞིང་འཁོད་དེ། དེ་ལྟར་སའི་འོག་མཐའ་དག་ཀུན་ལ་མངོན་པར་རྟོག་པར་འདོད་པ་རྣམས་ལ་ཇི་ལྟར་ལྷ་མ་ཡིན་གྱི་དབང་པོ་བཞི་ལྷ་མ་ཡིན་འཁོར་དང་བཅས་པ་ཐམས་ཅད་ཀྱིས་ཡོངས་སུ་བསྐོར་བ། ལག་ན་མཚོན་ཆ་དང་། ལག་ཆ་སྣ་ཚོགས་བྱེ་བ་ཕྲག་དུ་མ་ཐོགས་པ་ལག་པར་ཤིན་ཏུ་བསྡུས་
པ། ལག་པའི་སོར་མོས་འཛིན་པ་རྣམས་ཀྱིས་ཡོངས་སུ་བསྐོར་བ་དག་རྣམ་པ་དུ་མས་ཆ་བར་བྱེད་དོ། །དེ་དག་གི་ཕྱི་བཞིན་དུ་ཡང་འབུམ་ཕྲག་བྱེ་བ་དུ་མ་དག་གིས་ཡོངས་སུ་བསྐོར་ཅིང་། རི་རབ་ཐམས་ཅད་མཐུ་ཆེན་པོས་སྒུལ་བར་བྱེད་པ། ལྷ་མ་ཡིན་དེ་དག་ཐམས་ཅད་དང་བཅས་པ། དཔུང་དང་བརྩོན་འགྲུས་ལྷག་པར་ཆེ་བ། མཚོན་ཆ་དཔག་ཏུ་མེད་པ་ལ་མཁས་པ། རི་རབ་གཉིས་ལྟ་བུར་ཆ་བ་ན། ཀླུའི་རྒྱལ་པོ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་རབ་འཇོམས་ལ་སོགས་པས་སའི་འོག་གི་བདག་པོ་ཐགས་བཟངས་རིས་དང་། རབ་དགོད་ཡོངས་སུ་བསྐོར་ཏོ། །དེ་ནས་དེ་ལྟར་ལྷ་དང་ལྷ་མ་ཡིན་འཁོད་པ་དག་ལྷ་རྣམས་ཀྱིས་ནི་ནམ་མཁའ་བཀང་ནས་འཁོད། ལྷ་མ་ཡིན་རྣམས་ཀྱིས་ཀྱང་རྒྱ་མཚོ་ཁེབས་པར་འཁོད་དེ། ངོ་མཚར་གྱི་ཡིད་ཀྱིས་ཕན་ཚུན་འཐབ་པ་ལ་ཤིན་ཏུ་མོས་པ། ཕན་ཚུན་དུ་འཐབ་པར་འདོད་པ་ན། དེ་ལྟར་ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་དང་། འཇིག་རྟེན་སྐྱོང་བ་དེ་དག་དང་ལྷན་ཅིག་འཁོད་པ་རྣམས་འདི་ལྟར་ལྷའི་དབང་པོས་བདག་ཅག་གི་མདུན་ན་ལྷ་མ་ཡིན་དེ་ལྟར་འཁོད་པ་འདི་དག་ལ། ལྷ་མ་ཡིན་དང་བདག་ཅག་འཐབ་མོ་གྱིས་ཤིག་ཅེས་ཇི་སྟེ་བཀའ་མི་སྩོལ་ཞེས་བརྗོད་དོ། །དེ་ནས་ལྷའི་དབང་པོས་དེ་དག་ལ་འདི་སྐད་སྨྲས་སོ། །འདི་ལྟར་འཇིག་རྟེན་སྐྱོང་བ་དག་འཛམ་བུའི་གླིང་དུ་རིངས་པར་མངག་པར་བྱ་སྟེ། ཀྱེ་འཛམ་བུའི་གླིང་ན་མར་འཛིན་པ། ཕར་འཛིན་པ། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་དག་ཅི་ཡོད་དམ་མེད། དེ་ལྟར་བརྟགས་ནས་ལྷ་མ་ཡིན་རྣམས་ཕམ་པར་བྱའོ། །ལྷ་དག་ནི་ཆོས་སྐྱོབ་པ་ཡིན། ཆོས་ཀྱི་གནས་ཡིན་ཏེ། ཆོས་འཕེལ་བ་ན་ལྷ་རྣམས་འཕེལ་བར་འགྱུར་ལ། ཆོས་འགྲིབ་པ་ན་ལྷ་རྣམས་འགྲིབ་པར་འགྱུར་རོ། །དེ་ལྟར་འཇིག་རྟེན་སྐྱོང་བ་དག་མི་ཡུལ་འཛམ་བུའི་གླིང་དུ་བདག་གིས་མངག་པར་བྱའོ། །དེ་སྐད་སྨྲས་ནས། ལྷའི་དབང་པོ་བརྒྱ་བྱིན་གྱིས་འཇིག་རྟེན་སྐྱོང་བ་རྣམས་ལ་བསྒོ་བ། ཁྱེད་འཛམ་བུའི་གླིང་དུ་མྱུར་དུ་དེང་ལ། འདི་ལྟར་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། མར་འཛིན་པ། ཕར་འཛིན་པ།
རིགས་ཀྱི་གཙོ་བོའི་རྗེས་སུ་འཇུག་པ། གསོ་སྦྱོང་ལ་ཉེ་བར་གནས་པ། སྦྱིན་པ་གཏོང་བ། ཚུལ་ཁྲིམས་སྲུང་བ། བག་ཡོད་པ་རྣམས་བག་ཡོད་པར་གནས་པ། རང་གི་ཆོས་ཀྱི་རྗེས་སུ་འཇུག་པ་དག་ལ་སོ་སོར་རྟོགས་ཤིག །དེ་སྐད་བསྒོ་བ་དང་། འཇིག་རྟེན་སྐྱོང་བ་བཞི་མདའ་འཕངས་པ་ལྟར་ཤིན་ཏུ་མགྱོགས་པར་འཛམ་བུའི་གླིང་དུ་དོང་ངོ་། །དོང་ནས་གནས་ནས་གནས། གྲོང་ནས་གྲོང་། གྲོང་ཁྱེར་ནས་གྲོང་ཁྱེར། གྲོང་རྡལ་ནས་གྲོང་རྡལ། བཞི་མདོ་ནས་བཞི་མདོ། ཡུལ་ནས་ཡུལ། ལྗོངས་ནས་ལྗོངས། ཐམས་ཅད་དུ་སོ་སོར་རྟོག་པར་བྱེད་དེ། ཀྱེ་འདི་དག་ན་མར་འཛིན་པ། ཕར་འཛིན་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ་དག་སུ་ཡོད། རིགས་ཀྱི་རྒན་རབས་རྗེས་སུ་སྐྱོང་བ་དག་སུ་ཡོད་ཅེས་དེ་ལྟར་འཛམ་བུའི་གླིང་འདི་མ་ལུས་པར་སོ་སོར་རྟོག་པར་བྱེད་དོ། །དེ་དག་གིས་འཛམ་བུའི་གླིང་ན་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི། མར་འཛིན་པ། ཕར་འཛིན་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། རིགས་ཀྱི་རྒན་རབས་རྗེས་སུ་སྐྱོང་སྟེ། འཛམ་བུའི་གླིང་གི་མི་རྣམས་ཆོས་ཐམས་ཅད་དང་ལྡན་པར་མཐོང་ངོ་། །དེ་དག་གིས་དེ་ལྟར་རིག་ནས་ཡིད་དགའ་སྟེ། མདའ་འཕངས་པ་ལྟར་ཤིན་ཏུ་མགྱོགས་པར་ལྷ་རྣམས་ཀྱི་དབང་པོ་བརྒྱ་བྱིན་ག་ལ་བ་དེར་འོངས་ནས་ཡིད་ཤིན་ཏུ་དགའ་བ་དེ་དག་གིས་ལྷའི་དབང་པོ་བརྒྱ་བྱིན་ལ་འདི་སྐད་སྨྲས་སོ། །ལྷ་རྣམས་ཀྱི་དབང་པོ་བརྒྱ་བྱིན་དགྱེས་པར་མཛད་དུ་གསོལ། འཛམ་བུའི་གླིང་ན་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་མི་མར་འཛིན་པ། ཕར་འཛིན་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། རིགས་ཀྱི་རྒན་རབས་རྗེས་སུ་སྐྱོང་བ། སྦྱིན་པ་གཏོང་བ། བསོད་ནམས་བགྱིད་པ་དག་མཆིས་ཏེ། ལྷའི་ཕྱོགས་ནི་རབ་ཏུ་འཕེལ་བར་བགྱིད་ལ། ལྷ་མ་ཡིན་གྱི་ཕྱོགས་ནི་ཡོངས་སུ་འགྲིབ་པར་བགྱིད་ལགས་སོ། །དེ་སྐད་སྨྲས་པ་དང་། ལྷའི་དབང་པོ་བརྒྱ་བྱིན་ཡིད་རབ་ཏུ་དགའ་ནས། འཇིག་རྟེན་སྐྱོང་བ་དག་ལ་སྨྲས་པ། འདི་ལྟར་འཛམ་བུའི་གླིང་ན་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་དག་ཡོད་
པས་ན། བདག་ཅག་གིས་ལྷ་མ་ཡིན་གྱི་ཕྱོགས་ཕམ་པར་བྱ་ཡིས་ལྷ་ཁྱོད་ཀུན་ཡིད་དགའ་བར་གྱིས་ཤིག །དེ་སྐད་ཐོས་ནས་ལྷ་རྣམས་ཡིད་རབ་ཏུ་དགའ་བ་སྐྱེས་ཏེ། ཡིད་དགའ་བ་བཅུ་འགྱུར་དུ་སྐྱེས་པའི་སྟོབས་ཀྱིས་བརྒྱ་བྱིན་ལ་སྨྲས་པ། ལྷའི་དབང་པོ་ཅི་ལ་གཞེས་ཅི་ལ་གཞེས་དགྲ་ལས་རྒྱལ་བར་སྤྱོན་ཅིག །ཁྱོད་ཀྱི་བཀའ་དྲིན་ལ་བདག་ཅག་གིས་ལྷ་མ་ཡིན་རྣམས་ཕམ་པར་བགྱིའོ། །དེ་སྐད་སྨྲས་པ་དང་། ལྷའི་དབང་པོས་ཀླུའི་རྒྱལ་པོ་ནོར་རྒྱས་ཀྱི་བུ་དང་། འཇོག་པོ་ལ་སོགས་པ་ལ་འདི་སྐད་སྨྲས་སོ། །ཆོས་དང་མི་ལྡན་པ་ཀླུ་རབ་འཇོམས་ལ་སོགས་པ་དང་། ལྷ་མ་ཡིན་ཐགས་བཟངས་རིས་དང་། རབ་དགོད་ལ་སོགས་པ་ཐམས་ཅད་གཞོམ་པའི་ཕྱིར་ཁྱེད་རྒྱུགས་ཤིག་རྒྱུགས་ཤིག །དེ་སྐད་སྨྲས་པ་དང་། ཀླུའི་བདག་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ཀླུའི་བདག་པོ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་ལྷ་མ་ཡིན་གྱི་ཕྱོགས་སུ་གནས་པ་རབ་འཇོམས་ལ་སོགས་པ་ག་ལ་བ་དེ་དག་གི་དྲུང་དུ་ཁྲོས་པའི་ཤུགས་ཀྱིས་མེ་ཆར་ལྟར་འབེབས་ཤིང་རྒྱུག་གོ །དེ་ནས་རབ་འཇོམས་ཡང་ཐགས་བཟངས་རིས་དང་རབ་དགོད་ཀྱིས་བསྒོ་བ་དང་། དེ་དག་འོང་བ་མངོན་པར་མཐོང་ནས་གློག་ཆར་ལྟར་མངོན་པར་འབེབས་སོ། །དེ་རབ་ཏུ་འབར་བ་དེ་དག་ཐམས་ཅད་ཚ་བའི་སྡུག་བསྔལ་མངོན་པར་མྱོང་ཞིང་དེ་ནས་ཡང་ཕམ་པ་དག་ལྷ་མ་ཡིན་གྱི་དཔུང་ག་ལ་བ་དེར་རྒྱུག་པར་བྱེད་དོ། །དཔུང་དང་མཐུ་ཉམས་པ་དེ་ལྷ་མ་ཡིན་གྱི་ནང་དུ་སོང་ནས་འདི་སྐད་སྨྲས་སོ། །ཉམས་པ་བདག་ཅག་གིས་རྒྱལ་བར་དཀའ་སྟེ། བདག་ཅག་འདུས་ན་ནི་བསྒྲིམ་མི་དགོས་པར་ལྷ་རྣམས་ལས་རྒྱལ་བར་ནུས་སོ། །དེ་སྐད་སྨྲས་ནས། དེ་ནས་ཡང་ཀླུའི་རྒྱལ་པོ་འཇོག་པོ་དང་། ནོར་རྒྱས་ཀྱི་བུ་ལ་སོགས་པ་ག་ལ་བ་དེར་དོང་བ་དང་། དེ་དག་འོང་བ་འཇོག་པོ་དང་། ནོར་རྒྱས་ཀྱི་བུ་དེས་མཐོང་ནས་སྨྲས་པ། འདི་ལྟར་རབ་འཇོམས་བདག་ཅག་གི་དྲུང་དུ་འོང་བ་ཆད་པ་དྲག་པོས་གཅད་པར་བྱའོ། །གཞན་དུ་ན་དེ་ཡང་དང་ཡང་དུ་བདག་ཅག་ལ་འཚེ་བར་བྱེད་དོ། །དེ་སྐད་སྨྲས་ནས། ཀླུའི་རྒྱལ་པོ་རབ་འཇོམས་ལ་སོགས་
པ་ག་ལ་བ་དེར་བརྒྱུགས་ནས། འཇོག་པོ་དེས་རབ་འཇོམས་དེ་བཟུང་ནས་སྟེང་དུ་མེའི་ཆར་ཕབ་བོ། །དེ་མེའི་ཆར་དེས་རི་དང་བཅས་པ་རབ་ཏུ་སྲེག་པ་ན། སྲོག་འདོད་པ་ལྷ་མ་ཡིན་གྱི་ཕྱོགས་ག་ལ་བ་དེར་རྒྱུག་པར་བྱེད་དོ། །དེ་ལྟར་དེ་འོངས་པ་མངོན་པར་མཐོང་ནས། ལྷ་མ་ཡིན་གྱི་དབང་པོ་སྒྲ་གཅན་གྱིས་ལྷ་མ་ཡིན་གྱི་དབང་པོ་དེ་དག་ལ་སྨྲས་པ། འདི་ལྟར་ཀླུ་ཕམ་པ་དེ་དག་ལ་ཁྱེད་ཀྱི་ཡིད་དྲང་པོར་ལྟོས་ཤིག །དེ་སྐད་སྨྲས་ནས། བདག་དང་བཅས་པའི་དཔུང་དེས་བརྒྱུགས་སོ། །དེ་འོང་བ་མཐོང་ནས་ལྷ་ལག་ན་ཡོལ་གོ་ཐོགས་པ་རྣམས་ཀྱིས་ཀྱང་བརྒྱུགས་ཏེ། དེ་ལྟར་དེ་དག་ཕན་ཚུན་འོང་བ་ན། རྒྱ་མཚོའི་དབུས་སུ་ལྷ་དང་ལྷ་མ་ཡིན་རིའི་རྩེ་མོ་མི་བཟད་པ་འཕེན་པ། ཤིན་ཏུ་འཇིགས་སུ་རུང་བ། ཤིན་ཏུ་བཟོད་པར་དཀའ་བའི་གཡུལ་བཀྱེའོ། །ལྷ་དང་ལྷ་མ་ཡིན་རྣམ་པར་འཁྲུགས་པ་དེས་ལྷ་མ་ཡིན་རྒྱ་མཚོ་ན་རྒྱུ་བ་འབུམ་ཕྲག་དུ་མ་དག་ལས་ཁ་ཅིག་ནི་འོན་པར་གྱུར། ཁ་ཅིག་ནི་སྲོག་དང་བྲལ་ལོ། །ལྷ་དང་ལྷ་མ་ཡིན་དེ་དག་རྣམ་པར་འཁྲུགས་པས། མཚོན་ཆ་འབུམ་ཕྲག་ཉམ་ང་བ་ཆར་ལྟར་བབ་པའི་གཡུལ་བཀྱེའོ། །དེ་ནས་ཁྱད་པར་ནི་འདི་ཡོད་དེ། ལྷ་གང་གི་རྐང་པ་བཅད་ན་སླར་ནད་མེད་པར་སྐྱེ་བར་འགྱུར། ལག་པ་བཅད་ན་ཡང་ནད་མེད་པར་སྐྱེ་བར་འགྱུར། དེ་ལྟར་ཡན་ལག་དང་ཉིང་ལག་ཐམས་ཅད་བཅད་ཅིང་གཏུབས་ཀྱང་སྐྱེ་བར་འགྱུར་ཏེ། ནད་མེད་པ་དང་། གནོད་པ་མེད་པ་དང་། མདོག་ཉམས་པར་མི་འགྱུར་ལ། དེའི་ཚེ་སྐྱེ་ཞིང་འབྱུང་བར་འགྱུར་རོ། །མགོ་བཅད་པ་ནི་མ་གཏོགས་ཏེ། ལྷ་རྣམས་ཀྱི་དགྲ་ཡང་ཞི་བར་འགྱུར་རོ། །ལྷ་མ་ཡིན་རྣམས་ཀྱང་ཇི་ལྟར་མི་རྣམས་ལ་མཚོན་ཆས་བཏབ་ན་གནོད་པ་དེ་ལྟར་ལྷ་མ་ཡིན་རྣམས་ལ་ཡང་དེ་བཞིན་དུ་འབྱུང་སྟེ། ལྷ་དང་ལྷ་མ་ཡིན་དག་ནང་གི་ཁྱད་པར་ནི་དེ་ལྟ་བུ་ཡིན་ཏེ། དེ་ལྟར་ལྷ་ལག་ན་ཡོལ་གོ་ཐོགས་པ་རྣམས་དང་། ལྷ་མ་ཡིན་སྒྲ་གཅན་གྱི་སར་གཏོགས་པ་རྣམས་ཀྱི་ཁྱད་པར་ནི་དེ་ལྟ་བུ་ཡིན་ནོ། །དེ་ནས་ལྷ་ལག་ན་ཡོལ་གོ་ཐོགས་པ་རྣམས་ཀྱིས་རི་རྩེ་མོ་ཅན་དུ་མ་བླངས་ནས་
ལྷ་མ་ཡིན་ག་ལ་བ་དེར་བརྒྱུགས་ཏེ། རི་ཆར་ལྟར་འབེབས་པ་དེས་ལྷ་མ་ཡིན་དེ་དག་གི་དཔུང་བརྒྱའམ། སྟོང་དུ་བཅོམ་མོ། །དེ་བཅོམ་པ་མངོན་པར་མཐོང་ནས། སྒྲ་གཅན་གྱིས་རི་དཔག་ཚད་གསུམ་པ་བླངས་ནས་བརྒྱུགས་སོ། །ལྷ་ལག་ན་ཡོལ་གོ་ཐོགས་པ་རྣམས་ཀྱིས་དེ་ལྟར་འོང་བ་མངོན་པར་མཐོང་ནས། མཚོན་ཆ་དང་ལག་ཆ་ཐོགས་ཏེ། ལྷ་མ་ཡིན་ག་ལ་བ་དེར་བརྒྱུགས་སོ། །རི་དེ་མཚོན་ཆ་ཆར་ལྟར་ཕབ་པ་དེས་ཇི་ལྟར་བྱེ་མ་བཞིན་དེ་ལྟར་ཞིབ་མོར་བརླགས་ནས་རྒྱ་མཚོའི་ནང་དུ་གཏོར་ཏོ། །དེ་འོང་བ་མངོན་པར་མཐོང་ནས་དུད་འགྲོའི་ངོ་བོ་སེམས་ཅན་གྱི་ཐ་མ་སྒྲ་གཅན་དེ་ཡོངས་སུ་ཡི་ཆད་དོ། །མཚོན་ཆ་ཆར་ལྟར་འབབ་པ་ན་ལྷ་མ་ཡིན་གྱི་དཔུང་ག་ལ་བ་དེར་བརྒྱུགས་སོ། །ལྷ་མ་ཡིན་གྱི་དབང་པོ་བརྟན་པས་དེ་འོང་བ་མངོན་པར་མཐོང་ནས། རང་གི་འཁོར་རྣམས་ལ་སྨྲས་པ། རི་རབ་གཉིས་ཀྱི་ཚད་ལྟར་འདུག་པ་ཆས་པ་འདི་གཅིག་པུས་ལྷ་འདི་དག་ཐམས་ཅད་ཆད་པས་གཅད་པར་ནུས་སུ་གཤའ་གཤའ་ལྟ་ཞིག་ན། འདི་ལྟར་བོང་ཚོད་འབའ་ཞིག་ཆེར་ཟད་དེ་མཐུ་ཆུང་ནས་ལྷ་རྣམས་ཀྱིས་བསྔགས་པ་དང་། མགོན་འདོད་པ། སྐྱབས་འདོད་པ། དཔུང་གཉེན་འདོད་པ། ལྷ་མ་ཡིན་ག་ལ་བ་དེར་རྒྱུག་པར་བྱེད་པ། ལྷ་མ་ཡིན་ཕལ་པ་དང་མཚུངས་པ་འདི་ནི་མཐུ་དམན་པ་ཡིན་ལ་སྨད་པ་ཉིད་ཡིན་ནོ། །འདིའི་མདུན་ན་འཐབ་པར་གནས་པ་ལྷ་ལག་ན་ཡོལ་གོ་ཐོགས་པ་གང་ཡིན་པ་འདི་དག་ནི་སྙིང་སྟོབས་ཆེ་བ་ཡིན་ནོ། །དེ་སྐད་སྨྲས་ནས། ལྷ་མ་ཡིན་གྱི་དབང་པོ་བརྟན་པ་རང་གི་འཁོར་དང་ཡང་ལྷན་ཅིག་ལྷ་མ་ཡིན་མཆོག་ཏུ་རྒྱ་ཆེ་བ་མགུལ་ཕྲེང་དང་ཡང་ལྷན་ཅིག་ཏུ་གཡུལ་འགྱེད་པའི་ཕྱིར་ལྷ་ལག་ན་ཡོལ་གོ་ཐོགས་པ་ག་ལ་བ་དེར་རྒྱུག་པར་བྱེད་དོ། །ལྷ་རྣམས་ཀྱིས་བརྟན་པ་དང་དེ་དག་ལྷན་ཅིག་འོང་བ་མཐོང་ནས་ལྷ་ཕྲེང་ཐོགས་རྣམས་ལ་སྨྲས་སོ། །འདི་ལྟར་བརྟན་པ་བདག་ཉིད་ཐམས་ཅད་ལྷ་ལག་ན་ཡོལ་གོ་ཐོགས་པ་རྣམས་ཀྱི་དྲུང་དུ་རྒྱུག་གིས་ལྷ་རྣམས་ཀྱང་རྒྱུགས་ཤིག་རྒྱུགས་ཤིག །དེ་སྐད་སྨྲས་ནས་དེ་ནས་ཡང་ལྷ་མ་ཡིན་གྱི་དབང་པོ་སྒྲ་གཅན་དང་།
བརྟན་པ་ག་ལ་བ་དེར་དོང་ངོ་། །དེ་ནས་ཡང་སྒྲ་གཅན་དེ་བརྟན་པས་ཕྱིར་བཟློག་སྟེ། ཁོང་བརྟ་བརྟ་ནས་དེ་ནས་ཡང་ཕན་ཚུན་འདུས་ཏེ། ལུས་ཀྱི་མཐུ་དང་དཔུང་ཚོལ་བར་འདོད་པ་འདུས་པ་དག་ལྷ་ག་ལ་བ་དེར་ཕྱིར་ལོག་པ་དང་། ལྷ་ལག་ན་ཡོལ་གོ་ཐོགས་པ་དང་། ལྷ་མ་ཡིན་སྒྲ་གཅན་གྱི་སར་གཏོགས་པ་མགུལ་ཕྲེང་དེ་དག་དང་ཕན་ཚུན་དགྲར་གྱུར་པ། ཕན་ཚུན་མི་བཟོད་པ། སོ་སོའི་དཔུང་ཆེན་པོའི་གཡུལ་འགྱེད་དེ། རིའི་རྩེ་མོ་རྣམས་དང་། བྲག་གི་རྩེ་མོ་རྣམས་དང་། མདའ་ཆར་ལྟར་འབབ་པ་རྣམས་དང་། མཚོན་ཆར་ལྟར་འབབ་པ་རྣམས་དང་། ཤིང་ལྗོན་པ་ཆར་ལྟར་འབབ་པ་རྣམས་ཀྱིས་རྟག་ཏུ་ནམ་མཁའ་ཕན་ཚུན་མུན་པ་ཐིབས་པོ་ལྟར་གསལ་བར་མི་མངོན་ཏེ་བར་ཆད་བྱེད་པ་བྱེ་བ་འབུམ་ཕྲག་དུ་མའི་གཡུལ་དཔེ་མེད་པ་འགྱེད་དོ། །དེ་ལྟར་ལྷ་རྣམས་ཀྱི་ཡན་ལག་དང་ཉིང་ལག་བཅད་ཅིང་གཏུབས་པ་དག་ནི་དེ་ནས་ཡང་སྔ་མ་བཞིན་སླར་སྐྱེའོ། །ལྷ་མ་ཡིན་རྣམས་ཀྱི་ཡན་ལག་དང་ཉིང་ལག་དུ་མ་བཅད་པ་དག་ནི་ནད་དང་བཅས་པར་འགྱུར་ལ། སྐྱེ་བར་ཡང་མི་འགྱུར་རོ། །མགོ་བཅད་པ་རྣམས་ཀྱང་མི་དང་འདྲ་བར་མི་སྐྱེའོ། །ལྷ་རྣམས་ཀྱང་མགོ་བཅད་པ་དང་། རྐེད་པ་བཅད་པ་ཡང་འཆི་བར་འགྱུར་རོ། །དེ་ལྟར་ལྷ་མ་ཡིན་ཇི་ལྟ་བ་དེ་ལྟར་ལྷ་རྣམས་ཟད་པར་མི་འགྱུར་རོ། །དེ་ནས་ལྷ་དང་ལྷ་མ་ཡིན་རྣམ་པར་ཉམས་པ་ན་ལྷ་མ་ཡིན་རྣམས་ཤིན་ཏུ་ཟད་པ་དེ་ལྟར་ལྷ་རྣམས་ནི་མ་ཡིན་ནོ། །དེ་ནས་ལྷག་མ་ཕྱེད་ཙམ་ལུས་པ་ལྷ་རྣམས་ཀྱིས་བཅོམ་པ། སྐྱབས་འདོད་པ། དཔུང་གཉེན་འདོད་པ་དག་སའི་འོག་གི་སྒོ་ག་ལ་བ་དེར་རྒྱུག་པར་བྱེད་དེ། སྒྲ་ཧ་ཧ་འབྱིན་པའི་ལྷ་རྣམས་ཀྱིས་ཉེ་བར་བཅོམ་པ། བརྩོན་འགྲུས་ཆུང་བ། སྐྱབས་ཞན་པ། སྲོག་དམན་པ་དག་ལྷ་མ་ཡིན་གྱི་དབང་པོ་བརྟན་པ་དང་ཡང་ལྷན་ཅིག་སྒྲ་གཅན་དང་ཡང་ལྷན་ཅིག་ཏུ་བྲོས་སོ། །ལྷ་མ་ཡིན་གྱི་དབང་པོ་དེ་གཉིས་མཐུ་ཉམས་ཤིང་གནས་ཉམས་པ་དག་མེ་ཏོག་ཕྲེང་གིས་མཐོང་ནས་ལྷ་མ་ཡིན་གྱི་དབང་པོ་གསུམ་པ་ལ་སྨྲས་པ། འདི་ལྟར་བདག་ཅག་གི་ལྷ་མ་ཡིན་ག་
ལ་བ་དེར་འདོང་གིས་རྒྱུགས་ཤིག །བརྩོན་འགྲུས་ཆུང་བའི་ལྷ་རྣམས་བདག་ཅག་གི་དཔུང་དང་། བརྩོན་འགྲུས་དང་འཐུན་པས་ཕམ་པར་བྱའོ། །དེས་དེ་སྐད་སྨྲས་པ་དང་། དེ་ནས་མེ་ཏོག་ཕྲེང་ལྷ་རྣམས་ག་ལ་བ་དེར་རྒྱུག་པར་བྱེད་དོ། །དེ་ནས་དེ་དག་འོང་བ་མཐོང་ནས་དཔུང་ཆེན་པོས་དེ་ནས་ཡང་བཅོམ་པའི་ལྷག་མ་ཕན་ཚུན་གྱི་བརྩོན་འགྲུས་དང་། ཕན་ཚུན་གྱི་དཔུང་གིས་འདུས་པ་བདག་ཉིད་དང་འཁོར་མང་པོ་དང་བཅས་པ་ཕྱིར་ལོག་སྟེ་ཕན་ཚུན་འདི་སྐད་སྨྲའོ། །འདི་ལྟར་ལྷ་མ་ཡིན་ཞེས་མིང་དུ་བཏགས་པ་འདི་ཅི་འབྲོས་པ་ཁོ་ནར་གྱུར་ཏམ། བརྩོན་པ་ལ་མི་གནས་སམ། མཚོན་ཆ་ལ་མི་རྟེན་པ་ལྟ་ཞིག་སྟེ། རང་གི་གནས་སུ་ཡོངས་སུ་ཉམས་པར་འགྱུར་ལ། ཆུང་མ་དེ་དག་གི་ནང་དུ་ཡོངས་སུ་ཉམས་པར་འགྱུར་རོ། །དེ་སྐད་སྨྲས་ནས། དེ་ནས་ཡང་དཔུང་དང་མཐུ་རྒྱས་པ་མཚོན་ཆ་སྣ་ཚོགས་ཐོགས་པ་དག་ལྷ་ག་ལ་བ་དེར་རྒྱུག་པར་བྱེད་དེ། རིའི་རྩེ་མོ་འཚེར་བ་ལྟ་བུ་དང་རླུང་གི་ཤུགས་ལྟར་མངོན་པར་མགྱོགས་པ་དེ་དག་གཡུལ་འགྱེད་པའི་ཕྱིར་ཡང་ལོག་གོ །དེ་ནས་ལྷ་ཀུན་དུ་རྒྱུ་བ་དང་། ལྷ་ཕྲེང་ཐོགས་དང་། ལྷ་རྟག་ཏུ་མྱོས་གནས་དང་། ལྷ་ལག་ན་ཡོལ་གོ་ཐོགས་པ་ཐམས་ཅད་ཕན་ཚུན་དུ་འདི་ལྟར་ཀྱེ་མ་ལྷ་མ་ཡིན་འདུས་པ་འདི་དག་ཐམས་ཅད་ནི་བློ་གྲོས་མི་བརྟན་པ་ཡིན་ཏེ། ཀྱེ་མ་ལྷ་མ་ཡིན་རྣམས་གང་གིས་བདག་ཉིད་དང་། བདག་ཅག་གི་དཔུང་གི་ཁྱད་པར་ཁོང་དུ་ཆུད་ཀྱང་དེ་དག་རྒྱུག་པར་བྱེད་དོ་ཞེས་བརྗོད་དོ། །དེ་དག་གིས་དེ་སྐད་སྨྲས་ནས། ལྷ་རྣམས་ཀྱང་ལྷ་མ་ཡིན་དག་ག་ལ་བ་དེར་རྒྱུག་པར་བྱེད་དོ། །ཕན་ཚུན་རྒྱལ་བ་བརྟོད་པ་ན་ལྷ་དང་ལྷ་མ་ཡིན་དེ་དག་གཞན་དང་མི་འདྲ་བའི་གཡུལ་བཀྱེ་སྟེ། ཕན་ཚུན་རི་བོ་ཆར་ལྟར་འབེབས་པ་དང་། མེ་ཆར་ལྟར་འབེབས་པ་དང་། རྡོ་ཆར་ལྟར་འབེབས་པ་དང་། མཚོན་ཆ་ཆར་ལྟར་འབེབས་པ་དང་། དཔུང་གི་ཚོགས་རྣམ་པར་འཇོམས་པས་མངོན་པར་བཅོམ་མོ། །དེ་དག་མཚོན་ཆ་དུ་མ་དང་། རྣམ་པར་འཇོམས་པ་དུ་མ་དང་། ཉམ་ང་བ་དུ་མ་དང་། དེ་ལྟར་སྲོག་གཅོད་པ་དུ་མ་དག་གིས་གཡུལ་དཔེ་མེད་པ་བཀྱེ་སྟེ། དེ་དག་རྒྱ་མཚོ་ཀུན་ནས་བར་མེད་པར་འཁོད་ནས་གཡུལ་བཀྱེའོ། །འདི་ལྟར་དེ་གཞན་དང་མི་འདྲ་བའི་ཕྱིར་དེ་ནི་དཔེ་བྱ་བར་ཡང་མི་ནུས་ཏེ། དེ་དག་གཡུལ་རྣམ་པ་དུ་མ་བཀྱེའོ། །ཀླུ་རྣམས་ཀྱང་ཀླུ་རྣམས་དང་ལྷན་ཅིག་གཡུལ་དཔེ་མེད་
པ་བཀྱེའོ། །དེ་ལྟར་གཡུལ་རྣམ་པ་དུ་མ་དེ་དག་ལྷའི་དབང་པོ་བརྒྱ་བྱིན་གྱིས་མཐོང་ནས་སུམ་ཅུ་རྩ་གསུམ་པའི་ལྷ་རྣམས་ལ་སྨྲས་པ། འདི་ལྟར་རབ་དགོད་ནི་ད་དུང་འདུག་སྟེ། མ་གཏོགས་པར་ལྷ་མ་ཡིན་དེ་དག་ཐམས་ཅད་རྒྱུག་པར་བྱེད་ཀྱིས་ཁྱེད་ཆོས་ཤིག་ཆོས་ཤིག །དེ་དག་ཆས་པའི་ཕྱིར་བདག་ཀྱང་གླང་པོ་ཆེ་ས་སྲུང་གི་བུ་ལ་ཞོན་ཏེ་ཆའོ། །དེ་ནས་བརྒྱ་བྱིན་གྱིས་ལྷ་རྣམས་ལ་དེ་སྐད་སྨྲས་ནས་ཡིད་རྩེ་གཅིག་གིས་གླང་པོ་ཆེ་ས་སྲུང་གི་བུ་ལ་འདི་སྐད་ཅེས་སྨྲས་སོ། །གླང་པོ་ཆེའི་རྒྱབ་ཏུ་ཞོན་ཏེ། ངས་ལྷ་མ་ཡིན་གྱི་ལྷག་མ་ལུས་པ་ཐགས་བཟངས་རིས་དང་། རབ་དགོད་ཁོ་ན་དང་། ལྷ་མ་ཡིན་དེ་དག་གི་ལྷག་མ་ཐམས་ཅད་ལས་རྣམ་པར་རྒྱལ་བར་བྱའོ། །དེ་སྐད་སྨྲས་ནས། དེ་རྡོ་རྗེ་གསོར་ཏེ་ལྷ་མ་ཡིན་གྱི་དཔུང་ལ་ཀུན་དུ་ལྟ་ཞིང་འདུག་གོ །དེ་ནས་ལྷ་དང་ལྷ་མ་ཡིན་གཡུལ་ཤིན་ཏུ་མི་བཟད་པར་འཇུག་པ་ན། ལྷ་མ་ཡིན་རྣམས་ནི་ཡོངས་སུ་ཉམས། ལྷ་རྣམས་ནི་རྒྱལ་ཏེ་ཤིན་ཏུ་དགའ་ནས། ལྷ་མ་ཡིན་རྣམས་ཀྱི་དྲུང་དུ་རྒྱུག་པར་བྱེད་དོ། །ལྷ་རྣམས་ཀྱི་དབང་པོ་བརྒྱ་བྱིན་ཡང་འཛུམ་རངས་ཏེ། ལྷ་མ་ཡིན་ཐམས་ཅད་ཀྱི་དཔུང་འཇོམས་སུ་ཆས་པ་ན་རབ་དགོད་འདི་སྙམ་དུ་སེམས་ཏེ། ཀྱེ་མ་འདི་ལྟར་ལྷ་མ་ཡིན་གྱི་དབང་པོ་གསུམ་པོ་དང་། གནས་གསུམ་ན་འཁོད་པའི་ལྷ་མ་ཡིན་བྱེ་བ་ཕྲག་དུ་མ་མཐུ་ཉམས་པར་བྱས་པ་འདི་དག་ནི་ཇི་ལྟར་སྔར་མཚོ་ཀུན་མཐོང་དུ་མཐོང་བ་དེ་ལྟར་འདི་དག་གྱུར་ཏེ། ཀྱེ་མ་མཚོ་དེར་མཐོང་བ་ནི་མ་ནོར་བ་ཡིན་ནོ། །འདི་ལྟར་བརྒྱ་བྱིན་ཕམ་པར་བྱ་བ་དང་། ལྷ་ཐམས་ཅད་ཀྱང་གཞོམ་པར་བྱ་བའི་ཕྱིར་བདག་ཆ་སྟེ། ཀྱེ་མ་ལྷ་དེ་དག་དང་བདག་ཁྱད་པར་ཅང་མེད་དོ་སྙམ་མོ། །བློ་དེ་ལྟ་བུ་བསྐྱེད་ནས་གཡུལ་དུ་རིངས་པར་འཇུག་པར་བྱ་བའི་ཕྱིར་སའི་འོག་གི་སྒོར་འཁོད་དོ། །རབ་དགོད་
དང་ཐགས་བཟངས་རིས་ཁྲོས་པས་གཟིར་བ་དེ་ཉིད་དུ་འཁོད་པ་དང་རི་ཀུན་ནི་གཡོས། རྒྱ་མཚོ་ཡང་རླབས་རྣམས་ཀྱིས་ཀུན་ཏུ་འཁྲུགས་པར་བྱེད། ཉི་མའི་འོད་ཟེར་དམར་པོ་ཐམས་ཅད་ཀྱང་རི་ལ་ཤར་ཏེ། འཁོར་དང་བཅས་པ་སའི་འོག་གི་སྒོ་དེ་ཉིད་དུ་འཁོད་པ་དང་། དེ་ནས་ལྷ་རྣམས་ཀྱིས་ལྷ་མ་ཡིན་སྒྲ་གཅན་ལ་སོགས་པ་ཕམ་པར་བྱས་ཤིང་ཉམས་པར་བྱས་པ་རྣམས་སའི་འོག་གི་སྒོ་ག་ལ་བ་དེར་རྒྱུག་ཅིང་སྤྲོ་བ་མེད་པ། མགོན་མེད་པ། ཀུན་ནས་གནོད་པ། ཧ་ཧའི་སྒྲ་རྣམས་ཀྱིས་སེམས་དཀྲུགས་པ། ཀུན་ནས་ཞུམ་པ། མགོན་མེད་པར་གྱུར་པ་རྣམས་དེ་སྐད་ཕན་ཚུན་རྗོད་པ་ན་ལྷ་མ་ཡིན་གཞན་ཁ་ཅིག་གིས་སྨྲས་པ། ལྷ་མ་ཡིན་དག་མ་འབྲོས་མ་འབྲོས། ཅི་སྟེ་བྱོལ། ཅི་སྟེ་བྲོས། སླར་ལོག་སླར་ལོག །དེ་སྐད་སྨྲ་ཞིང་ཕན་ཚུན་དེ་སྐད་བརྗོད་པའི་ལྷ་མ་ཡིན་རྣམས་རི་རྩེ་མོ་ཅན་ཆར་ལྟར་ཕབ་པས་ཀུན་དུ་བཏགས་པ་ན། ལྷ་ཡིད་རབ་ཏུ་དགའ་བ་རྣམས་ལྷ་མ་ཡིན་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་དག་ཟུང་ཤིག་གཏོགས་ཤིག །བདག་ཅག་ལ་དུད་འགྲོ་འདི་དག་གློ་བུར་དུ་ཁྲོ་བར་བྱེད་ཀྱང་གཡུལ་ལ་འཇིགས་པ་མེད་དེ། ལྷ་ངན་པ་འདི་དག་གི་གཡུལ་ལ་འཇིགས་པ་མེད་དོ། །མཚོན་ཆ་དང་། ལག་ཆ་ལ་མཁས་པ་ཡང་མ་ཡིན་ཏེ། འདི་དག་ནི་ཇི་ལྟར་སླར་ལྡོག་པར་མི་འགྱུར་བ་དེ་ལྟར་རྒྱལ་བར་བྱ་སྟེ། ཀྱེ་མ་དུས་མ་ཡིན་པའི་གཡུལ་འགྱེད་པར་རྟག་ཏུ་འདོད་པ་འདི་དག་ནི་ཇི་ལྟར་ཕྱིར་མི་ལྡོག་པར་འགྱུར་བ་དེ་ལྟར་རྒྱལ་བར་བྱའོ། །དེ་ལྟར་ཕན་ཚུན་སྤྲོ་བ་བསྐྱེད་ནས། ལྷ་མ་ཡིན་རྣམས་ཤིན་ཏུ་གཞོམ་པར་ཡིད་ཞུགས་པ་ཁྲོས་པ་མིག་ཤིན་ཏུ་དམར་བ་དག་ལྷ་མ་ཡིན་ག་ལ་བ་དེར་དོང་ནས་རལ་གྲི་དང་། མཚོན་ཆ་ཀུན་ནས་ཆར་ལྟར་འབེབས་ཏེ། ཇི་ལྟར་ཆར་གྱི་རྒྱུན་འབབ་པ་ལྟར་འབེབས་ཤིང་། དེ་ལྟར་མེ་ཡང་ཆར་ལྟར་འབེབས་སོ། །དེ་ནས་དེ་ལྟར་ལྷ་མ་ཡིན་བློང་བློང་པོར་འཁོད་པ་ཤིང་རྟ་འབུམ་སྙེད་ལ་ཞོན་པ། ལྷ་མ་ཡིན་དུ་མས་ཡོངས་སུ་བསྐོར་བ་དག་སའི་འོག་གི་སྒོར་འཁོད་དེ། ལྷ་རྣམས་ག་ལ་བ་དེར་མཚོན་ཆ་སྣ་ཚོགས་ཆར་ལྟར་འབེབས་ལ། རི་དཔག་ཚད་གསུམ་དང་། བཞི་དང་། ལྔའི་ཚད་ཙམ་འཕེན་པར་བྱེད་དོ། །དེ་ལྟ་བུ་ཆར་
ལྟར་མངོན་པར་འབེབས་པ་དང་། རྣམ་པ་དེ་ལྟ་བུར་ཆས་པ་དེ་དག་ལྷ་མ་ཡིན་རྣམས་ཀྱིས་ཀྱང་མངོན་པར་མཐོང་ནས། དེ་ནས་ཡང་དབུགས་ཕྱིན་ཏེ། གཡུལ་འགྱེད་པར་ཕྱིར་ལོག་ནས། རབ་དགོད་དང་ལྷ་མ་ཡིན་དེ་དག་ཉིད་ལ་སྤྲོ་བ་སྐྱེད་པར་བྱེད་དེ། འདི་ལྟར་བདག་ནི་ལྷ་ཐམས་ཅད་གཞོམ་པའི་ཕྱིར་ཆས་པ་ཡིན་གྱིས་ལྷ་མ་ཡིན་དག་སླར་ལོག་སླར་ལོག །ལྷ་མ་ཡིན་གྱི་དབང་པོ་དག་ཅི་སྟེ་འབྲོས་ཅི་སྟེ་འབྲོས། མ་ལ་ཁྱིམ་དུ་བུད་མེད་དག་གི་ངོར་ཡང་ཇི་སྐད་སྨྲ། འདི་ལྟར་སྐྱེས་པ་ནི་བདག་ཅག་ཡིན་ན་སྐྱེས་པའི་མིང་ཡང་མེད་དེ། སྐྱེས་པ་ཞེས་བྱ་བ་དོན་མེད་པར་འགྱུར་རོ། །དེ་སྐད་སྨྲས་པ་དང་། རབ་དགོད་ལྷ་རྣམས་ག་ལ་བ་དེར་རྒྱུག་པར་བྱེད་དོ། །དེ་རྒྱུག་པ་མངོན་པར་མཐོང་ནས་ལྷ་རྣམས་ཀྱང་དེ་དང་གཡུལ་འགྱེད་པར་རབ་དགོད་ག་ལ་བ་དེར་བརྒྱུགས་སོ། །ལྷ་དང་ལྷ་མ་ཡིན་དེ་དག་ཕན་ཚུན་གཡུལ་འདྲེས་པར་བཀྱེ་སྟེ། སྒྲ་བྱུང་བ་གང་ཡིན་པ་དེས་རིའི་ལྕོང་དང་རི་རབ་ཐམས་ཅད་ཀྱང་ཀུན་དུ་གང་ངོ་། །སྒྲ་གཅན་འབའ་ཞིག་ལམ་དུ་ཞུགས་ནས་ལྷ་ལག་ན་ཡོལ་གོ་ཐོགས་པ་དག་ག་ལ་བ་དེར་བརྒྱུགས་སོ། །ལྷ་མ་ཡིན་གྱི་དབང་པོ་བརྟན་པ་ལག་ན་དབྱུག་ཏོ་ཐོགས་པ་ཡང་ལྷ་ཕྲེང་ཐོགས་དག་ག་ལ་བ་དེར་བརྒྱུགས་སོ། །ལྷ་མ་ཡིན་གྱི་དབང་པོ་མེ་ཏོག་ཕྲེང་ཡང་རི་དཔག་ཚད་གསུམ་པ་ཙམ་ཅིག་བླངས་ནས། ལྷ་པི་བང་ཅན་གསུམ་པ་དང་། ལྷ་ཀུན་དུ་རྒྱུ་བ་དག་ག་ལ་བ་དེར་བརྒྱུགས་ཏེ། ཕན་ཚུན་གཡུལ་ཆེན་པོ་བཀྱེ་བ་ན་གཏམ་དུ་བརྗོད་ན་སེམས་ཅན་ཐམས་ཅད་ཀྱི་སྤུ་ཟིང་ཞེས་བྱེད་ན། གང་མངོན་དུ་མཐོང་བའམ། ཐོས་པ་ལྟ་སྨོས་ཀྱང་ཅི་དགོས། ལྷ་མ་ཡིན་གྱི་དབང་པོ་རབ་དགོད་ཀྱང་རླུང་གིས་ནམ་མཁའི་སྤྲིན་ལྟར་ལྷ་རྣམས་མངོན་པར་འཇོམས་ཏེ། ཤིན་ཏུ་བརྩོན་འགྲུས་དང་ལྡན་པ་དེ་ལ་ལྷ་གང་གིས་ཀྱང་ཕྱིར་བརྒལ་བར་མི་ནུས་སོ། །དེ་ནས་དེ་ལྟར་རྒྱལ་ཆེན་བཞིའི་ལྷ་རྣམས་ལ་མངོན་པར་འཚེ་བ་ན་སུམ་ཅུ་རྩ་གསུམ་གྱི་བདག་པོ་བརྒྱ་བྱིན་གྱིས་སུམ་ཅུ་རྩ་གསུམ་པ་རྣམས་ལ་འདི་སྐད་སྨྲས་སོ། །ལྷ་མ་ཡིན་འབའ་ཞིག་གིས་ལྷ་འདི་དག་ལ་མངོན་པར་འཚེ་ཞིང་འདུག་ན། དཔུང་ཕྱི་
མ་པའི་ལྷ་དེ་དག་ཅི་སྟེ་མི་རྒྱུག །ལྷ་མ་ཡིན་གྱི་དཔུང་གིས་ལྷ་རྣམས་ཡོངས་སུ་ཉམས་ཤིང་བཅོམ་པ་དག་ཅི་ཁྱེད་ཕམ་པར་དགའ་འམ། གང་ལྷའི་འདུན་ས་ཆོས་བཟང་ན་འཁོད་པ་དག་མ་གཏོགས་པར་སུམ་ཅུ་རྩ་གསུམ་པའི་ལྷ་རྣམས་རྒྱུགས་ཤིག །མ་ལུས་པར་རྒྱུགས་ཤིག །དེ་སྐད་བསྒོ་ནས་རབ་དགོད་དང་ཐགས་བཟངས་རིས་ག་ལ་བ་དེར་བརྒྱུགས་སོ། །རབ་དགོད་ཀྱི་སྟེང་དུ་སུམ་ཅུ་རྩ་གསུམ་པའི་མདའི་ཚོགས་རྣམས་དང་། རི་བོ་ཆར་ལྟར་བར་མཚམས་མེད་པས་ནམ་མཁའ་བཀང་ནས་མངོན་པར་འབེབས་ལ། རབ་དགོད་ཀྱང་རི་བོ་ཆར་ལྟར་མངོན་པར་འབེབས་ཤིང་སུམ་ཅུ་རྩ་གསུམ་པའི་ལྷ་རྣམས་ག་ལ་བ་དེར་འདོང་བར་བྱེད་དོ། །ནམ་མཁའ་ཐམས་ཅད་སྒྲས་ཀུན་དུ་འགེངས་ཤིང་ལྷ་དང་ལྷ་མ་ཡིན་ཕན་ཚུན་རྒྱལ་བ་ལ་རྟོད་པ་དེ་དག་དཔུང་གི་ཚོགས་མ་ལུས་པ་ཐམས་ཅད་ཀྱིས་གཡུལ་འགྱེད་དོ། །དེ་ལྟར་གཡུལ་འགྱེད་པ་ན། གསེར་གྱི་རི་བོ་འབུམ་སྙེད་ཕན་ཚུན་འདྲུད་པའི་བུར་མ་ལྷུང་བའི་རྡུལ་གྱིས་ནམ་མཁའ་ཁེབས་ཏེ། ནམ་མཁའ་ཀུན་ནས་བར་མཚམས་མེད་པར་དཔག་ཚད་སྟོང་ཙམ་གསེར་གྱི་རྡུལ་གྱིས་ཁེབས་སོ། །རྡུལ་གྱི་བར་དེ་དག་ན་ཡང་ཇི་ལྟར་ཆར་གྱི་རྒྱུན་རྒྱུན་མི་འཆད་པར་འབབ་པ་ལྟར་རྣམ་པ་དེ་ལྟ་བུའི་མདའི་ཚོགས་ཕན་ཚུན་ཆར་ལྟར་འབེབས་སོ། །དེ་བཞིན་དུ་ཕན་ཚུན་རི་བོ་ཆར་ལྟར་མངོན་པར་འབེབས་ཤིང་ལྷ་མ་ཡིན་བྱེ་བ་དུ་མ་དེ་དག་འཇོམས་པར་བྱེད་པའི་གཡུལ་བཀྱེའོ། །ལྷ་སྟོང་ཕྲག་དུ་མ་རྣམས་ཀྱང་གཞོམ་པར་བྱ་བའི་ཕྱིར་གཡུལ་ཤིན་ཏུ་མི་བཟད་པ་བཀྱེའོ། །བཀྱེ་ནས་ལྷ་མ་ཡིན་སྙིང་སྟོབས་ཆུང་བ་ཕམ་པར་གྱུར་པ་ཤིར་དོགས་པ་གང་ཡིན་པ་དེ་དག་སའི་འོག་ཏུ་ཞུགས་སོ། །མ་ལུས་པར་བཅོམ་པ་ཞུགས་པ་དེ་དག་ལ་ལྷ་མ་ཡིན་གྱི་བུ་མོ་དག་གིས་སྨྲས་པ། ཀྱེ་མ་ལྷག་མར་གྱུར་པ་བདག་ཅག་གི་ཁྱིམ་ཐབ་དེ་དག་ག་རེ། དེ་སྐད་འདྲི་བ་དེ་དག་ལ་ལྷ་མ་ཡིན་རྣམས་ཀྱིས་སྨྲས་པ། དེ་དག་ནི་འདི་ལྟར་ལྷ་དང་ལྷ་མ་ཡིན་གྱི་གཡུལ་ལས་རྒྱལ་བ་ཐོབ་སྟེ། འདིར་འོང་ངོ་། །དེ་ནས་ལྷ་མ་ཡིན་གྱི་བུ་མོ་དག་མཚོ་ཀུན་མཐོང་བ་ག་ལ་བ་དེར་དོང་བ་དང་། དེ་དག་ཐམས་ཅད་མཐོང་
སྟེ། ཇི་ལྟར་ལྷ་རྣམས་ཀྱིས་ལྷ་མ་ཡིན་རྣམས་བཏགས་ཤིང་བཅོམ་སྟེ། དེ་ལྟར་ལན་བརྒྱའམ་སྟོང་དུ་ཕམ་པར་བྱས་པ་དེ་དག་དེ་བཞིན་མཐོང་ནས། ཁྱིམ་ཐབ་བསད་པའི་ཕྱིར་ཉོན་མོངས་ཤིན་ཏུ་ཡི་ཆད་དེ་སའི་སྟེང་དུ་འདུག་ནས་ངུ་བར་བྱེད། སྨྲེ་སྔགས་འདོན། རབ་ཏུ་སྡུག་བསྔལ་བ་ཀུན་མཚོ་དེ་ཡོངས་སུ་བསྐོར་ནས་འཁོད་ལ་བྲང་རྡུང་བར་བྱེད། སྐྲ་འབལ་བར་བྱེད། ལུས་ལ་འབྲད་པར་བྱེད། མཆི་མས་གདོང་གཤེར་བར་བྱེད་དོ། །དེ་ལྟར་མཚོའི་ནང་ན་ཁྱིམ་ཐབ་དག་ཕམ་སྟེ། བསད་པར་མཐོང་ནས། སྨྲེ་སྔགས་འདོན་ཏོ། །དེ་ནས་ལྷ་དང་ལྷ་མ་ཡིན་གྱི་གཡུལ་ཤིན་ཏུ་མི་བཟད་པར་འཇུག་པ་ན་ལྷ་མ་ཡིན་གྱི་དབང་པོ་རབ་དགོད་ལྷ་མ་ཡིན་བྱེ་བ་སྙེད་ཀྱིས་ཡོངས་སུ་བསྐོར་ནས། ལྷའི་དབང་པོ་བརྒྱ་བྱིན་ག་ལ་བ་དེར་འགྲོ་བར་བྱེད་དོ། །དེ་དག་ཉིད་འོང་བ་མངོན་པར་མཐོང་ནས་ལྷ་རྣམས་ལ་བསྒོ་བ། འདི་ལྟར་ལྷ་མ་ཡིན་འདི་དག་ནི་གཡུལ་འགྱེད་དུ་བདག་ཅག་ག་ལ་བ་དེར་འོང་སྟེ། དཔུང་ཆུང་ངུ་གདུལ་བར་དཀའ་བ་དེ་དག་ནི་ཇི་ལྟར་འོད་ཀྱིས་མུན་པ་བསལ་བ་དེ་ལྟར་གྲོགས་ཆོས་ཀྱིས་རྒྱལ་བར་བྱའོ། །དེས་ལྷ་རྣམས་ལ་དེ་སྐད་བསྒོ་ནས། གླང་པོ་ཆེའི་རྒྱལ་པོ་ས་སྲུང་གི་བུ་ལ་ཞོན་ཏེ། ལྕགས་ཀྱི་མདའ་འཕངས་པ་བཞིན་དུ་རབ་དགོད་ག་ལ་བ་དེར་བརྒྱུགས་སོ། །དེ་རྒྱུག་པ་ན་ལྷའི་དབང་པོ་བརྒྱ་བྱིན་འདུན་ས་ཆོས་བཟང་ན་གནས་པའི་ལྷ་རྣམས་ཀྱིས་ཡོངས་སུ་བསྐོར་ནས། རྡོ་དང་ཤིང་གིས་འགྱེད་པ་དག་ལྷ་མ་ཡིན་གྱི་དཔུང་ག་ལ་བ་དེར་བརྒྱུགས་སོ། །ཁ་ཅིག་ནི་མདའ་ཆར་ལྟར་མངོན་པར་འབེབས་ཤིང་རབ་དགོད་ག་ལ་བ་དེར་རྒྱུག་པར་བྱེད་དོ། །རབ་དགོད་ཀྱང་བརྒྱ་བྱིན་ག་ལ་བ་དེར་ཤིང་རྟ་སྒྱུར་བར་བྱེད་ཅིང་འདི་ལྟར་བརྒྱ་བྱིན་པས་བདག་རྒྱལ་བར་བྱའོ་ཞེས་ཟེར་རོ། །དེ་ནས་བརྒྱ་བྱིན་གྱིས་རབ་དགོད་དེ་ལ་འདི་སྐད་སྨྲས་སོ། །ཆོས་མ་ཡིན་པའི་ལམ་ལ་གནས་པའི་དུད་འགྲོ་ད་གར་འགྲོ། །འདི་ལྟར་ང་ནི་ཁྱོད་ཕམ་པར་བྱ་བའི་ཕྱིར་འོངས་ཏེ། འདི་ལྟར་ངས་ཁྱོད་རྒྱགས་པ་དང་ཕྲལ་ནས། དེ་ནས་ཡང་སའི་འོག་ཏུ་གཏང་བར་བྱའོ། །དེ་ནས་ཐགས་བཟངས་རིས་དང་།
རབ་དགོད་ཀྱིས་བརྒྱ་བྱིན་ལ་སྨྲས་པ། འདི་ལྟར་ང་ཡང་བརྒྱ་བྱིན་ཁྱོད་དང་ལྷ་ཐམས་ཅད་ཆད་པས་གཅད་པར་བྱ་བའི་ཕྱིར་འོངས་པ་ཡིན་ནོ། །དེ་ནས་ཐགས་བཟངས་རིས་དང་རབ་དགོད་ཀྱིས་གསེར་གྱི་རི་དཔག་ཚད་ལྔ་པ་གཅིག་འཕངས་སོ། །འཕངས་པ་དེ་མངོན་པར་མཐོང་ནས་གླང་པོ་ཆེ་ས་སྲུང་གི་བུའི་ཁ་ནས་དབུགས་ཕྱུང་བས་རི་དེ་བྱེ་མ་ཆང་པ་ནས་གཏོར་བ་བཞིན་ཕྱིར་བཟློག་ནས་རྒྱ་མཚོར་ལྷུང་ངོ་། །རི་ཕྱེ་མར་བརླགས་ཤིང་གཏོར་བ་དེ་མངོན་པར་མཐོང་ནས། དེ་ནས་ཡང་ལྷ་མ་ཡིན་དག་གིས་རི་བོ་རྡོ་རྗེའི་ལྟེ་བ་ཅན་དཔག་ཚད་ལྔ་པ་གཅིག་བླངས་ནས་བརྒྱ་བྱིན་ག་ལ་བ་དེར་འཕངས་སོ། །འཕངས་པ་དེ་མངོན་པར་མཐོང་ནས་ས་སྲུང་གི་བུའི་སྣའི་ཐོར་ཏོས་བཟུང་སྟེ། སླར་ལྷ་མ་ཡིན་གྱི་དབང་པོ་ལ་འཕངས་ཏེ། གླང་པོ་ཆེ་འདི་ནི་ཅང་ཤེས་པ་ཡིན་ནོ། །རང་གི་རི་འཕངས་པ་དེས་དེའི་བྲང་དུ་བརྒྱབ་པ་དང་། རབ་དགོད་དེ་བརྒྱབ་པ་དེས་ཉམས་ནས་སྟན་དེ་ལས་ལྷུང་ཞིང་། སླར་འཁོད་དེ་བརྒྱབ་པ་དེས་རབ་ཏུ་ཉམས་སོ། །དེ་མཐོང་ནས་སུམ་ཅུ་རྩ་གསུམ་པ་དག་སྒྲ་ཆེན་པོས་ནམ་མཁའ་བཀང་ནས། འདི་ལྟར་ལྷའི་དབང་པོས་དུད་འགྲོ་དེ་ཕམ་པར་བྱས་ཏེ། འདིར་རེ་ཞིག་གླང་པོ་ཆེའི་མཆོག་འདིས་འཕངས་པའི་ཤུགས་ཀྱིས་མངོན་པར་ཉམས་ཤིང་གཡོས་ན་གལ་ཏེ་རྡོ་རྗེས་བརྒྱབ་པར་གྱུར་ན་ལྟ་སྨོས་ཀྱང་ཅི་དགོས། དེ་སྐད་སྨྲས་ནས། ལྷ་མ་ཡིན་ག་ལ་བ་དེར་བརྒྱུགས་ཏེ། ལ་ལ་ནི་རྡོ་དང་ཤིང་གིས་འགྱེད། ལ་ལ་ནི་རི་བོས་འགྱེད། ལ་ལ་ནི་རྩེ་གསུམ་ཁ་གདེང་གིས་འགྱེད། ལ་ལ་ནི་སྟེའུ་ཁས་འགྱེད། ལ་ལ་ནི་གློག་འབྱུང་བས་འགྱེད། ལ་ལ་ནི་ཐོང་གཤོལ་གྱིས་འགྱེད། ལ་ལ་ནི་སྟོབས་ཀྱིས་འགྱེད། ལ་ལ་ནི་འཁོར་ལོས་འགྱེད། ལ་ལ་ནི་རལ་གྲིས་འགྱེད། ལ་ལ་ནི་ནམ་མཁའ་ལ་འགྲོ་བས་འགྱེད། ལ་ལ་ནི་སྣ་ཚོགས་པས་འགྱེད། ལ་ལ་ནི་ཐོ་བས་འགྱེད། ལ་ལ་ནི་མཚོན་ཆ་མཆོག་ཏུ་གདམས་པས་འགྱེད། ལ་ལ་ནི་མཚོན་ཆ་དྲི་མ་མེད་པས་འགྱེད། ལ་ལ་ནི་མཚོན་ཆ་རབ་བྱེད་ཀྱིས་འགྱེད། ལ་ལ་ནི་མཚོན་ཆ་བྱི་བདར་བྱེད་ཀྱིས་འགྱེད། ལ་ལ་ནི་མཚོན་ཆ་བརྩེགས་པས་འགྱེད། ལ་ལ་ནི་མེས་འགྱེད།
ལ་ལ་ནི་ཆུས་འགྱེད། ལ་ལ་ནི་ཆུ་འབེབས་པས་འགྱེད། ལ་ལ་ནི་ཐམས་ཅད་ཀྱིས་འགྱེད། ལ་ལ་ནི་མཚོན་ཆ་ནག་པོས་འགྱེད། ལ་ལ་ནི་སྒྱུ་མས་འགྱེད། ལ་ལ་ནི་འདུད་པས་འགྱེད། ལ་ལ་ནི་སེན་མོས་འགྱེད། ལ་ལ་ནི་སྒྲས་འགྱེད་དེ། སྒྲའི་ཤུགས་གང་མཉན་པར་ཡང་མི་ནུས་སོ། །ལ་ལ་ནི་རྡོག་པ་རྡེག་པས་འགྱེད་དེ། རྣམ་པ་དེ་ལྟ་བུའི་གོ་མཚོན་སྣ་ཚོགས་ཀྱིས་ལུས་ཤིན་ཏུ་བསྲུངས་པ་རྣམས་ཀྱིས་ལྷ་མ་ཡིན་རྣམས་ཕམ་པར་བྱ་བའི་ཕྱིར་བརྒྱ་བྱིན་ལྷ་ཐམས་ཅད་ཀྱི་མདུན་དུ་བཞག་གོ །དེ་ནས་མོག་མོག་པོར་གྱུར་པ་དེ་མངོན་པར་མཐོང་ནས། ལྷ་མ་ཡིན་གྱི་དབང་པོ་ཐགས་བཟངས་རིས་ལ་སོགས་པ་ལག་ན་མཚོན་ཆ་སྣ་ཚོགས་པ་རྣམས་རབ་དགོད་ཀྱི་དཔུང་བྱ་བ་དང་། བརྒྱ་བྱིན་གཏག་པའི་ཕྱིར་བརྒྱ་བྱིན་ག་ལ་བ་དེར་འདོང་བར་བྱེད་དོ། །དེ་ནས་ལྷ་མ་ཡིན་གྱི་དབང་པོ་བཞི་པོ་དག་བརྒྱ་བྱིན་ཁོ་ན་ལ་འགྱེད་དུ་འོང་བ་མངོན་པར་མཐོང་ནས། ལྷ་རྣམས་བརྒྱ་བྱིན་གྱི་དཔུང་གི་རིམ་གྲོ་བྱ་བ་དང་། རང་གི་རྩལ་སྟོན་ཅིང་བརྒྱ་བྱིན་ག་ལ་བ་དེར་འདོང་བར་བྱེད་དོ། །དེ་ནས་བརྒྱ་བྱིན་གྱིས་འོང་བ་དེ་དག་མངོན་པར་མཐོང་ནས་ཤིན་ཏུ་ཁྲོས་ཏེ་ཆས་ནས་སྨྲས་པ་དུད་འགྲོ་ཁྱེད་ཅི་སྟེ་ཤིན་ཏུ་རྨོངས། གང་ཁྱེད་ཀྱི་དཔུང་རྣམ་པ་འདི་ལྟ་བུ་ནི་རེ་ཞིག་ལྷ་མ་ཡིན་ཐམས་ཅད་ལ་བདོག་པར་གྱུར་ཀྱང་དེ་དག་ང་འབའ་ཞིག་གིས་ཕམ་པར་བྱ་བར་ནུས་སོ། །དེ་ཅིའི་ཕྱིར་ཞེ་ན། འདི་དག་གི་དཔུང་ནི་ཆོས་ཡིན་ཏེ། ལྷ་རྣམས་ཀྱི་དཔུང་ནི་ཆོས་ཡིན་ནོ། །ལྷ་མ་ཡིན་རྣམས་ཀྱི་དཔུང་ནི་ཆོས་མ་ཡིན་ནོ། །ཆོས་དང་ཆོས་མ་ཡིན་པའི་ཁྱད་པར་ནི་ཆེ་སྟེ། གང་ཁྱད་པར་ནི་མུན་པ་དང་ཉི་མ་ལྟར་ཆེའོ། །གང་ཁྱད་པར་ནི་བདེན་པ་དང་བརྫུན་པ་ལྟར་ཆེའོ། །གང་ཁྱད་པར་ནི་རི་རབ་དང་ཡུངས་འབྲུ་ལྟར་ཆེའོ། །གང་ཁྱད་པར་ནི་ཐར་པ་དང་བཅིངས་པ་ལྟར་ཆེའོ། །གང་ཁྱད་པར་ནི་བཟར་རུང་བ་དང་བཟར་མི་རུང་བ་ལྟར་ཆེའོ། །གང་ཁྱད་པར་ནི་བདུད་རྩི་དང་དུག་ལྟར་ཆེའོ། །གང་ཁྱད་པར་ནི་མཚན་མོ་དང་ཉིན་པར་ལྟར་ཆེའོ། །གང་ཁྱད་པར་ནི་ནོར་བུ་མཆིང་བུ་དང་། རིན་པོ་ཆེ་ལྟར་ཆེའོ། །གང་ཁྱད་པར་ནི་དབུལ་བ་དང་ཕྱུག་པ་ལྟར་ཆེའོ། །གང་ཁྱད་པར་
ནི་བྱ་བ་དང་མི་བྱ་བ་ལྟར་ཆེའོ། །གང་ཁྱད་པར་ནི་ཉི་མ་དང་སྲིན་བུ་མེ་ཁྱེར་ལྟར་ཆེའོ། །གང་ཁྱད་པར་ནི་ཁྲོ་བ་ལ་རླུང་དང་སྲིན་བུ་མང་ཀུ་ལྟར་ཆེའོ། །གང་ཁྱད་པར་ནི་མཐོང་བ་དང་། མི་མཐོང་བ་ལྟར་ཆེའོ། །གང་ཁྱད་པར་ནི་ཡང་དག་པའི་ལམ་དང་། ཡང་དག་པ་མ་ཡིན་པའི་ལམ་ལྟར་ཆེའོ། །གང་ཁྱད་པར་ནི་སངས་རྒྱས་དང་གཞན་མུ་སྟེགས་པ་ལྟར་ཆེའོ། །གང་ཁྱད་པར་ནི་གནམ་དང་ས་ལྟར་ཆེའོ། །གང་ཁྱད་པར་ནི་བསྐལ་པ་དང་སྐད་ཅིག་མ་ལྟར་ཆེ་སྟེ། ང་དང་ཁྱེད་ནི་ཁྱད་པར་དེ་ལྟར་ཆེའོ། །ཁྱེད་ནི་ཆོས་མ་ཡིན་པ་ལ་གཙོ་བོར་བྱེད་ལ། ངེད་ནི་ཆོས་གཙོ་བོར་བྱེད་དོ། །ཁྱོད་ནི་ཤེས་རབ་དམན་པ་ཡིན་ལ། ལྷ་རྣམས་ནི་ཤེས་རབ་དང་བཅས་པ་ཡིན་ནོ། །ཁྱེད་ནི་བརྩོན་པ་མེད་པ་ཡིན་ལ། ལྷ་རྣམས་ནི་བརྩོན་པ་དང་བཅས་པ་ཡིན་ནོ། །ཁྱེད་ནི་དུད་འགྲོ་ཡིན་ལ་ལྷ་རྣམས་ནི་ལྷ་ཡིན་ཏེ། ལྷ་དེ་དག་ནི་དེ་ལྟ་བུ་ཡིན་པར་ཁོང་དུ་ཆུད་ནས་ཁྱེད་ངེད་ཀྱི་དྲུང་དུ་མངོན་པར་རྒྱུག་པ་ནི་མི་རིགས་སོ། །དེ་སྐད་སྨྲས་ནས། གླང་པོ་ཆེ་ས་སྲུང་གི་བུ་ཁ་ལོ་བསྒྱུར་ཏེ། འདི་ལྟར་ཚིགས་སུ་བཅད་པ་འདི་དག་ཀྱང་སྨྲས་ནས། ལྷ་མ་ཡིན་གྱི་དབང་པོ་ག་ལ་བ་དེར་རྒྱུག་པར་བྱེད་དོ། །ཆོས་ཀྱིས་ཆོས་མིན་ཕམ་པར་བྱས། བདེན་པས་བརྫུན་པ་ཕམ་པར་བྱས། །ཤེས་པས་གཏི་མུག་ཕམ་པར་བྱས། །ལྷ་ཡིས་ལྷ་མིན་ཕམ་པར་བྱས། །དེས་དེ་སྐད་སྨྲས་ནས། གླང་པོ་ཆེ་ས་སྲུང་གི་བུ་ཁ་ལོ་བསྒྱུར་ཏེ། སྤྲུལ་པ་ཡང་སྔ་མ་བཞིན་བྱས་ནས་ལྷ་མ་ཡིན་གྱི་དབང་པོ་བཞི་པོ་དེ་དག་ཐམས་ཅད་ག་ལ་བ་དེར་ལྷའི་དབང་པོ་བརྒྱ་བྱིན་རྡོ་རྗེ་རྩེ་མོ་སྟོང་ཡོད་པ་ནི་ཐོགས། བསྡིགས་པའི་མཚན་མ་ཙམ་སེམས་ཀྱིས་གསད་ཅིང་བཅིང་བར་ལྷག་པར་མོས་པའི་སེམས་ནི་མེད་པས། རླུང་གི་ཤུགས་པས་ཆེས་མགྱོགས་པར་རབ་ཏུ་རྒྱུག་པར་བྱེད་དོ། །ལྷ་མ་ཡིན་དེ་དག་མངོན་པར་རྒྱུག་པ་དང་། དེ་དག་འོང་བ་མངོན་པར་མཐོང་ནས། རྒྱལ་ཆེན་བཞི་དང་སུམ་ཅུ་རྩ་གསུམ་པའི་ལྷ་རྣམས་ཀྱང་རྒྱུག་པར་བྱེད་དོ། །ལྷ་དང་ལྷ་མ་ཡིན་དེ་དག་ཕན་ཚུན་རྣམ་པར་འཇོམས་པ་ན་སོ་
སོར་རྒྱལ་བར་འདོད་པ། གཅིག་ལ་གཅིག་མངོན་པར་འདེབས་པ། མོག་མོག་པོར་གྱུར་པ། ལྷ་མ་ཡིན་ཁ་ཅིག་ནི་སྲོག་དང་བྲལ་བར་གྱུར། དེ་བཞིན་དུ་ལྷ་མ་ཡིན་ཁ་ཅིག་ནི་སྡུག་བསྔལ་གྱིས་ཉམ་ཐག་སྟེ། ཕྱིར་ལོག །ཁ་ཅིག་ནི་ཡི་ཆད་ནས་ཕྱིར་ལོག །ཁ་ཅིག་ནི་མིག་ཚུགས་སུ་ལྟ་ཞིང་འཁོད། ཁ་ཅིག་ནི་རང་གི་གནས་སུ་འགྲོ་བར་སེམས་ཤིང་འཁོད། ཁ་ཅིག་ནི་ཞེ་སྡང་གིས་ཉམ་ཐག །ཁ་ཅིག་ནི་གཏི་མུག་གིས་སེམས་བསྒྲིབས། ཁ་ཅིག་ནི་ཡོངས་སུ་ཉམས་ཤིང་ཡིད་དམན་པར་གནས་ཏེ་དེ་ལྟར་གནས་པ་རྣམས་ལ་ས་སྲུང་གི་བུའི་སྟེང་ན་འདུག་པ་ལྷའི་དབང་པོ་སྤྲུལ་པ་བྱེད་དོ། །དེ་ནས་གླང་པོ་ཆེ་ས་སྲུང་གི་བུ་ཁ་རེ་རེ་ལ་པད་མ་རེ་རེ། པད་མ་རེ་རེ་ལ་དབང་པོ་ལག་ན་རྡོ་རྗེ་ཐོགས་པ་མཚོན་ཆ་དང་གོ་མཚོན་བགོས་པ་རྣམས་སྔར་བསྟན་པ་བཞིན་ལྷ་མ་ཡིན་གྱི་དབང་པོས་མཐོང་སྟེ། དེ་དག་ཀྱང་དབང་པོའི་གླང་པོ་ཆེ་ས་སྲུང་གི་བུ་ཁ་སྟོང་ཡོད་པ། ཁ་རེ་རེ་ལ་པད་མའི་རྫིང་བུ་སྟོང་ཡོད་དོ། །པད་མའི་རྫིང་རེ་རེ་ལ་པད་མ་སྟོང་ཡོད་དོ། །པད་མ་རེ་རེ་ལ་འདབ་མ་སྟོང་ཡོད་དོ། །པད་མ་རེ་རེ་ལ་སྙིང་པོ་བརྒྱ་ཡོད་དོ། །དེ་དག་ཀྱང་ས་སྲུང་གི་བུའི་ཁ་ནས་བྱུང་སྟེ། འདབ་མ་དེ་དག་དང་སྙིང་པོ་དེ་དག་ཐམས་ཅད་ལ་དབང་པོ་རྟག་ཏུ་ལག་ན་རྡོ་རྗེ་དང་། མཚོན་ཆ་དང་། ལག་ཆ་ཐོགས་པ་བྱེ་བ་ཁྲག་ཁྲིག་འབུམ་ཕྲག་དུ་མ་འཁོད་པར་མཐོང་ངོ་། །དེ་ནས་སྤྲུལ་པ་དེ་ལྟ་བུ་མངོན་པར་མཐོང་ནས། ལྷ་མ་ཡིན་རྣམས་སྐྲག་འཁྲུགས་ཏེ། དབང་པོ་གོ་མཚོན་དང་ཆ་བྱད་སྣ་ཚོགས་ཐོགས་པ་རྣམས་ཀྱིས་དེ་རྟག་ཏུ་གང་ཞིང་དཔུང་དང་མཐུ་དཔེ་མེད་པ་རྣམས་ཀྱིས་ནམ་མཁའ་འདི་བར་མཚམས་མེད་པར་བྱས་སོ། །མཚོན་ཆའི་ཚོགས་ཀྱིས་ཕྱོགས་དང་ཕྱོགས་མཚམས་ཐམས་ཅད་བར་མཚམས་མེད་པར་གང་བར་བྱས་སོ། །དབང་པོ་རྣམས་ཀྱིས་སའི་འོག་གང་ཡིན་པ་དེ་དང་། དེ་ཡང་བར་མཚམས་མེད་པར་བྱས་པར་དོགས་སོ་ཞེས་དེ་སྐད་ལྷ་མ་ཡིན་ཤིན་ཏུ་སྐྲག་པ་དེ་རྣམས་ཕན་ཚུན་སྨྲའོ། །དེ་སྐད་སྨྲ་བ་དེ་རྣམས་ལ་རབ་དགོད་ཀྱིས་སྨྲ་བ། ལྷ་
མ་ཡིན་དག་ངས་དབང་པོ་ས་སྲུང་གི་བུ་དང་བཅས་ཏེ་ཕྱིར་བཟློག་པར་བྱས། མ་འཇིགས་ཤིག་མ་འཇིགས་ཤིག །དེ་སྐད་སྨྲས་ནས་གླང་པོ་ཆེའི་རྒྱལ་པོ་ས་སྲུང་གི་བུ་ག་ལ་བ་དེར་བརྒྱུགས་སོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉེར་ལྔ་པ། དེ་འོང་བ་མངོན་པར་མཐོང་ནས། ས་སྲུང་གི་བུའི་སྣའི་ཐོར་ཏོས་བཟུང་སྟེ། ནམ་མཁའ་ལ་གསོབ་བཞིན་སྐོར་བར་བྱེད་དོ། །དེ་བསྐོར་བ་ན་སྲོག་གི་ལྷག་མ་ཆུང་ཟད་ཅིག་ལུས་ནས་བཏང་ངོ་། །དེ་བཏང་བ་དང་དེ་ནས་ཡང་འདུ་ཤེས་རྙེད་ནས་ལྷ་མ་ཡིན་དེ་དག་ལ་འདི་སྐད་སྨྲའོ། །ཅི་དཔུང་འདི་གཅིག་པུ་དཔའ་བ་ཡིན་ནམ། ལྷ་མ་ཡིན་གྱི་དབང་པོ་ཁྱེད་ཀུན་ལྷའི་དབང་པོ་ལ་རྒོལ་མི་ནུས་སམ། དེ་ནས་ལྷ་མ་ཡིན་གྱི་དབང་པོ་བསྡུས་པ་དེ་དག་ཐམས་ཅད་དེ་ནས་ཡང་ས་སྲུང་གི་བུ་ག་ལ་བ་དེར་བརྒྱུགས་སོ། །དེ་དག་འོང་བ་མངོན་པར་མཐོང་ནས། དབང་པོས་དེ་དག་གི་སྲོག་གཅད་པར་བྱ་བའི་ཕྱིར་ནི་མ་ཡིན་གྱི། ཕ་རོལ་ཕམ་པ་ཁོ་ནར་བྱ་བའི་ཕྱིར་སྒྱུ་མའི་སེར་བ་རྡོ་རྗེ་ལྟ་བུ་རྣམ་པ་དུ་མ་ཕབ་བོ། །དེ་ནས་ཡང་དབང་པོ་ག་ལ་བ་དེར་རི་ཆར་ལྟར་འབེབས་ཤིང་ལྷའི་དབང་པོ་དེའི་སྟེང་དུ་མཚོན་ཆ་རྣམ་པ་སྣ་ཚོགས་འཕེན་ཏོ། །དེ་ལ་རི་བོ་དེ་ཆར་ལྟར་འབེབས་པ་ན། ཆར་གྱི་རྒྱུན་དུས་སུ་འབབ་པ་ལྟར་རི་བོ་ཆར་ལྟར་འབབ་པ་རྣམས་ཀྱང་མཛེས་པ་ཡིན་ཏེ། དེ་ལྟར་ལྷ་དང་ལྷ་མ་ཡིན་གྱི་གཡུལ་དཔེ་མེད་པ་རྣམ་པ་སྣ་ཚོགས་བཀྱེའོ། །དེ་ནས་ལྷ་རྣམས་ཀྱིས་ལྷ་མ་ཡིན་དེ་དག་མངོན་པར་མཐོང་ནས། དེ་ནས་ཡང་ལྷ་རྣམས་ལྷ་མ་ཡིན་གྱི་དཔུང་ག་ལ་བ་དེར་བརྒྱུགས་སོ། །དེ་ནས་ལྷ་མ་ཡིན་ཡང་གཡུལ་འགྱེད་པའི་ཕྱིར། ལྷ་རྣམས་ག་ལ་བ་དེར་བརྒྱུགས་སོ། །དེ་ནས་རྣམ་པ་དུ་མར་འཁྲུགས་ཤིང་སྐྲག་པར་བྱེད་པ་རྣམ་པ་དུ་མ་བྱུང་སྟེ། དེ་ལྟར་ལྷ་དང་ལྷ་མ་ཡིན་རྣམས་ཀྱང་གཡུལ་གསལ་བར་བཀྱེའོ། །དེ་ལྟར་དབང་པོ་དང་ལྷ་མ་ཡིན་རྣམས་མཚོན་ཆ་དང་རྡོ་རྗེས་འཇོམས་པ་ལྟ་བུའི་གཡུལ་ཆེན་པོ་གཞན་དང་མི་འདྲ་བ་མང་པོ་བཀྱེའོ། །ལྷ་མ་ཡིན་རྣམ་པ་དུ་མ་དག་མངོན་པར་མཐོང་ནས་བརྒྱ་བྱིན་གྱིས་ལྷ་མ་ཡིན་
གྱི་དབང་པོ་དག་སྲོག་དང་བྲལ་བར་ནི་མི་བྱེད་ལ། ཕམ་པ་ཁོ་ནར་བྱ་བའི་ཕྱིར་ཆེད་དུ་གནས་སོ། །དེ་ནས་ལྷ་མ་ཡིན་གྱི་དབང་པོ་དེ་དག་ཐམས་ཅད་ཀྱང་ལྷ་མ་ཡིན་གྱི་དབང་པོ་རབ་དགོད་དང་ཐགས་བཟངས་རིས་དེ་དག་དང་བཅས་པ་མ་ལུས་པར་ཕམ་པ་ཉིད་དུ་གྱུར་ཏེ། མགོན་འདོད་པ། སྐྱབས་འདོད་པ། གནས་འདོད་པ། སྤྲོ་བ་མེད་པ་དག་སའི་འོག་གི་སྒོ་ག་ལ་བ་དེ་དང་དེར་འབྲོས་པར་བྱེད་དོ། །རབ་དགོད་དེ་ཤིན་ཏུ་འབྲོས་པ་ནི། ལྷ་མ་ཡིན་གྱི་དབང་པོ་གཞན་གསུམ་པོ་འཁོར་འབུམ་སྙེད་དང་ལྡན་པ་རྣམས་ཀྱིས་མདུན་ན་སྐད་ངན་ཐོན་ཅིང་ཀུན་ནས་མངོན་པར་གནོད་པ་རྣམས་ཀྱིས་འབྲོས་པ་ན་བརྒྱ་བྱིན་གྱིས་ས་སྲུང་གི་བུ་ལ་སྨྲས་པ། གླང་པོ་ཆེའི་དབང་པོ་རབ་དགོད་དང་ཐགས་བཟངས་རིས་ཀྱི་བརྩོན་འགྲུས་ནི་ཤོར། ཤིང་རྟ་ནི་ཆག་ཀྱང་ངས་དེ་དག་གསད་པར་མི་ནུས་ཏེ། དྲང་སྲོང་ཆེན་པོས་མྱ་ངན་ལས་འདས་པར་འགྲོ་བའི་གཞི་ནི་སྲོག་གཅོད་པ་སྤངས་པ་ཡིན་ནོ་ཞེས་གསུངས་ཏེ། འདི་ནི་སེམས་ཅན་ཐམས་ཅད་ལ་སླུ་བ་མེད་པའི་གཞི་ཡིན་ནོ། །དེ་རང་གི་སྲོག་དང་ལྷན་ཅིག་སོང་ཡང་བླས། དེའི་ཤིང་རྟ་བརྒྱའམ་སྟོང་དུ་གཞོམ་པར་བྱ་བ་ལ་ཁྱོད་རིངས་པར་ཆོས་ཤིག །དེས་དེ་སྐད་བསྒོ་ནས་བརྒྱ་བྱིན་དེས་སྤྲུལ་པ་བྱས་པ་དང་། གླང་པོ་ཆེའི་དབང་པོ་དང་ལྷན་ཅིག་སའི་འོག་གི་སྒོ་ག་ལ་བ་དེར་རླུང་གི་ཤུགས་ལྟར་བརྒྱུགས་སོ། །དེ་འོང་བ་མངོན་པར་མཐོང་ནས། རབ་དགོད་དང་ཐགས་བཟངས་རིས་ཤིན་ཏུ་སྐྲག་སྟེ། མཐུ་མེད་པ་དག་སའི་འོག་གི་སྒོ་ག་ལ་བ་དེར་རིངས་པར་རྒྱུག་གོ །དེ་ནས་མགྱོགས་པར་སོང་ནས། ས་སྲུང་གི་བུའི་སྟོབས་ཀྱིས་ཤིང་རྟ་དེ་ལས་རབ་དགོད་དེ་ཕབ་ནས་ཤིང་རྟ་དང་ཕྲལ་ལོ། །དེ་ནས་ཤིང་རྟ་དེ་སྣའི་ཐོར་ཏོས་དེའི་མིག་སྔར་རྩྭ་བཞིན་དུ་བརྒྱའམ་སྟོང་དུ་བཅོམ་མོ། །མེ་ཏོག་ཕྲེང་ཡང་དཔུང་དང་མཐུ་ཉམས་ནས། སའི་འོག་གི་སྒོ་ག་ལ་བ་དེར་འབྲོས་པར་བྱེད་དེ། སྲོག་ལ་བསམ་པ་བསྡུས་པ། བརྩོན་འགྲུས་ཉམས་པ། སྤྲོ་བ་མེད་པ། རང་གི་བུ་དང་ཆུང་མ་སྙིང་ལ་བསམས་ནས། སའི་
འོག་གི་སྒོ་ག་ལ་བ་དེར་རྒྱུག་གོ །ལྷ་མ་ཡིན་གྱི་དབང་པོ་བརྟན་པ་ཡང་གསོན་པར་འདོད་དེ། རང་གི་ཁྱིམ་དུ་ཕྱོགས་ནས་སའི་འོག་གི་སྒོ་ག་ལ་བ་དེར་རྒྱུག་གོ །ལྷ་མ་ཡིན་གྱི་དབང་པོ་སྒྲ་གཅན་གསོན་པར་འདོད་པ་ལུས་བོང་ཆེ་བ་འབའ་ཞིག་ཏུ་འདུག་པ་ཡང་སའི་འོག་གི་སྒོ་ག་ལ་བ་དེར་རྒྱུག་གོ །དེ་ལྟར་ལྷ་མ་ཡིན་གྱི་དབང་པོ་འཁོར་དང་བཅས་པ་དེ་དག་ཐམས་ཅད་ཉམས་པ་དང་། ལྷ་རྣམས་ཤིན་ཏུ་དགའ་ནས། འདི་སྐད་སྨྲས་སོ། །ལྷ་མ་ཡིན་རྣམས་ཀྱིས་མི་འཐུན་པའི་མཐའ་ལས་འབྲས་བུ་ཉམས་པའི་ལྷག་མ་ཐོབ་སྟེ། འབྲོས་ཁུང་ཚོལ་བར་གྱུར་པ་རྣམས་ངེད་ཆོས་ལ་ལྟ་ཞིང་སའི་འོག་གི་སྒོ་གཟུང་བར་བྱའོ་ཞེས་སྨྲས་ནས། ལྷ་ཤིན་ཏུ་དགའ་བ་དེ་དག་རླུང་གིས་སྤྲིན་ཀུན་དུ་གཏོར་བ་ལྟར་ལྷ་མ་ཡིན་རྣམས་ལ་རླུང་གི་ཤུགས་ལྟ་བུས་ཀུན་དུ་འཚེ་བར་བྱེད་དོ། །དེ་ནས་དབང་པོས་ལྷ་དེ་དག་ལ་སྨྲས་པ། གང་རང་གི་ལུས་མེད་པར་བྱ་བའི་ཕྱིར་དང་ལྷ་མ་ཡིན་མང་པོ་འདི་རྣམས་སྲོག་དང་བྲལ་བར་བྱ་བའི་ཕྱིར་དོན་མེད་པ། འཁོན་ཞུགས་པ། ཉེས་པའི་གནས་འདི་དག་ཅིའི་ཕྱིར་བྱས། ལྷ་རྣམས་ཀྱི་རྒྱལ་བ་དང་ཕམ་པ་ནི་མི་ལ་རག་ལས་པ་ཡིན་ལ། ད་དུང་དུ་མིའི་འཇིག་རྟེན་ན་སྐྱེས་བུ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་ཐམས་ཅད་བརྟན་པ་དག་ཡོད་ན། ཁྱེད་ཀྱིས་ཡུལ་དང་དུས་དེ་དག་ཤེས་བཞིན་དུ་བདག་ཉིད་གསོད་པའི་དགྲ་དོན་མེད་པ་འདི་དག་བྱས་སོ། །དེ་ནས་ཡང་ལྷ་མ་ཡིན་ཉམས་པ་སྲོག་གི་སྐྱབས་ཚོལ་བ་རྣམས་སའི་འོག་གི་སྒོ་ག་ལ་བ་དེ་ཉིད་དུ་རྒྱུག་གོ །དེ་ནས་དབང་པོས་ལྷ་རྣམས་ལ་བསྒོ་བ། ལྷ་དག་སླར་ལོག་སླར་ལོག །ཕྱིས་ཕམ་པར་འགྱུར་བའི་སྲོག་དང་ལྡན་པ་རྣམས་རང་གི་གནས་སུ་ཐོང་ཤིག །དེ་ནས་དབང་པོ་ལ་ལྷ་རྣམས་ཀྱིས་སྨྲས་པ། འདི་ལྟར་ལྷ་མ་ཡིན་ཁེངས་པ་འདི་དག་ནི་བདག་ཉིད་དང་གཞན་གྱི་དཔུང་ཁོང་དུ་མ་ཆུད་པ་ལགས་ཏེ། འདི་དག་ནི་བདག་ཅག་གིས་ངེས་པར་ཇི་ལྟར་སླར་ལྡོག་པར་མི་འགྱུར་བ་དེ་ལྟར་དགྲ་བསལ་བར་བགྱིའོ། །བདག་ཅག་ནི་འདི་དག་ལ་གནོད་པ་མི་བགྱིད་དེ། འདི་ལྟར་བདག་ཅག་མཐོ་རིས་ན་རང་
གི་ལས་ཀྱི་འབྲས་བུ་ལ་སྤྱོད་ཅིང་མཆིས་ན། འདི་དག་གིས་མིའི་འཇིག་རྟེན་ན་བདག་ཅག་གི་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་རྣམས་ལ་ཅི་སྟེ་བར་ཆད་བགྱི་བར་འབད། དགྲ་འདི་དག་མ་བསལ་བར་བདག་ཅག་སླར་མི་མཆིའོ། །དེ་དག་གིས་དེ་སྐད་སྨྲས་ནས། དེ་ནས་ཡང་ལག་ཆ་དང་། མཚོན་ཆ་དང་། གོ་མཚོན་སྣ་ཚོགས་བགོས་ཏེ། འདི་ལྟར་ལྷ་མ་ཡིན་འདི་དག་ངེས་པར་ཤིན་ཏུ་ཚར་གཅད་པར་བྱའོ་སྙམ་པའི་བློ་དེས་ལྷ་མ་ཡིན་རྣམས་གཞོམ་པའི་ཕྱིར་ཤུགས་དང་ལྡན་པས་བརྒྱུགས་སོ། །དེ་ལྟར་ཡིད་ལ་བྱེད་པ་དེ་ལྟ་བུ་དང་འབད་པ་དེ་ལྟ་བུ་དག་ལ། དེ་ནས་ཡང་ལྷའི་དབང་པོའི་ཡིད་སྙིང་རྗེས་བརླན་པས་སྨྲས་པ། ལྷ་མ་ཡིན་རབ་དགོད་ལ་སོགས་པ་བཏག་པ་ཁྱེད་ཀྱི་སྙིང་ལ་བརྩེ་བ་མེད་དམ། དེ་སྐད་སྨྲས་ནས། ལྷའི་འདུན་ས་ཆོས་བཟང་ན་ལྷ་འཁོད་པ་གང་ཡིན་པ་དེ་དག་བསྡུས་ནས་སླར་ལོག་གོ །དེ་ནས་ལྷའི་དབང་པོ་སླར་ལོག་པ་མཐོང་ནས། རྒྱལ་ཆེན་བཞིའི་ལྷ་རྣམས་ཀྱིས་སུམ་ཅུ་རྩ་གསུམ་པ་རྣམས་ལ་སྨྲས་པ། འདི་ལྟར་ལྷའི་དབང་པོ་དེ་སླར་གཤེགས་སོ། །ལྷའི་དབང་པོ་དེ་སླར་གཤེགས་ཀྱིས་ཁྱེད་ཀྱང་མ་ལུས་པར་སླར་གཤེགས་ཤིག་ཅེས་སྨྲས་ནས། རྒྱལ་བ་ཐོབ་པའི་ལྷ་རྣམས་སླར་ལོག་སྟེ། དེ་ནས་ཡང་ཕན་ཚུན་དགའ་བའི་ཡིད་ཀྱིས་རང་གི་གནས་སུ་དོང་ངོ་། །ལྷའི་དབང་པོ་བརྒྱ་བྱིན་ཡང་སུམ་ཅུ་རྩ་གསུམ་པ་རྣམས་ཀྱིས་མངོན་པར་བསྟོད་ཅིང་ས་སྲུང་གི་བུ་ལ་ཞོན་ཏེ། ཡིད་དགའ་བས་སུམ་ཅུ་རྩ་གསུམ་པའི་ལྷའི་འདུན་ས་ཆོས་བཟང་ག་ལ་བ་དེར་འཛེགས་ཏེ་དོང་ངོ་། །ལྷ་རྣམས་ཀྱང་རང་རང་གནས་སུ་དོང་ནས། དེ་ནས་ཡང་གོ་མཚོན་དང་། ལག་ཆ་རྣམས་ཤིང་རྟ་སྣ་ཚོགས་ཀྱི་ཚལ་དུ་བཞག་གོ །གླང་པོ་ཆེ་ས་སྲུང་གི་བུ་ཡང་སྤྲུལ་པ་དེ་དག་བསྡུས་ནས་ཐ་མལ་པར་གནས་ཏེ། རང་གི་རྫིང་བུ་པད་མ་དང་། ཨུད་པ་ལས་ཁེབས་པར་ཞུགས་སོ། །དེ་ལྟར་ལྷ་རྣམས་ལྷའི་འཇིག་རྟེན་དུ་དོང་ནས། གཟུགས་དང་། སྒྲ་དང་། དྲི་དང་། རོ་ཡིད་དུ་འོང་བ་ལ་ཉེ་
བར་སྤྱོད་དེ། ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱི་གནས་སོ། །ཀླུའི་རྒྱལ་པོ། འཇོག་པོ་དང་། ནོར་རྒྱས་ཀྱི་བུ་ལ་སོགས་པ་རྒྱལ་བ་ཐོབ་པ་རྣམས་ཀྱང་སྙིང་རབ་ཏུ་དགའ་སྟེ། རང་གི་གནས་ལོངས་སྤྱོད་ལྡན་ག་ལ་བ་དེར་དོང་ངོ་། །ལྷ་མ་ཡིན་བཏག་བཏག་སྟེ་ཉམས་པའི་ལྷག་མ་ལུས་ཤིག་ཤིག་པོར་གྱུར་པ་ཉམས་རབ་ཏུ་ཉམས་པའི་སེམས་ཅན་ངོ་ཚ་ནས་མགོ་སྨད་པ་རྣམས་ཀྱང་། བུད་མེད་རབ་ཏུ་ངུ་ཞིང་ཡིད་དམན་པ་རྣམས་ཀྱིས་མདུན་ནས་བསུ་བ་ན། སྒྲ་གཅན་གྱིས་ལྷ་མ་ཡིན་གྱི་དབང་པོ་སྙིང་སྟོབས་ཉམས་པ་དེ་དག་ལ་སྨྲས་པ། ད་ལྟར་འཐབ་པའི་དུས་ལ་མ་བབ་བོ་ཞེས་ངས་སྔར་མ་བྱས་སམ། ད་དུང་དུ་མིའི་འཇིག་རྟེན་ན་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་མར་འཛིན་པ། ཕར་འཛིན་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། རིགས་ཀྱི་རྒན་རབས་ཀྱི་རྗེས་སུ་འཇུག་པ་དག་ཡོད་པས་ལྷའི་ཕྱོགས་ནི་རབ་ཏུ་འཕེལ་ལ། བདག་ཅག་གི་ཕྱོགས་ནི་འགྲིབ་པོ་ཞེས་བདག་གིས་སྔར་བསྒོ་ན། དེ་ཡང་ཁྱེད་ཀྱིས་མ་མཉན་ཏེ། བདག་གི་ཚིག་དེ་ལྟར་མ་བྱས་པས་འདི་ནི་དེའི་འབྲས་བུ་ཡིན་ནོ། །ལྷ་རྣམས་ཀྱིས་ལྷ་མ་ཡིན་ཉམས་པར་བྱས་པ་འབུམ་ཕྲག་དུ་མ་གང་ཡིན་པ་དག་ལ་སྒྲ་གཅན་གྱིས་དེ་སྐད་སྨྲས་པ་དང་། ལྷ་མ་ཡིན་གཞན་ཞིག་གིས་ཀྱང་སྨྲས་པ། འདི་ལྟར་གཡུལ་འགྱེད་པའི་དུས་ལ་མ་བབ་བོ་ཞེས་སྨྲས་པ། མ་མཉན་པའི་འབྲས་བུ་ནི་འདི་ཡིན་ནོ། །ལྷ་མ་ཡིན་མགུལ་ཕྲེང་གིས་ཀྱང་སྨྲས་པ། འདི་ལྟར་གང་གིས་མི་བྱ་བར་བྱ་བ་དེ་དག་གི་ངོ་བོ་མེད་པ་ལ་བློ་གྲོས་ངན་པ་འདི་སྐྱེས་པ་ཉེ་བར་གནས་སོ། །དེ་དག་ཐམས་ཅད་ཕན་ཚུན་དེ་སྐད་སྨྲེ་ཞིང་རང་རང་གི་གནས་ག་ལ་བ་དེར་དོང་ངོ་། །ཐགས་བཟངས་རིས་ཀྱང་གནས་གཞན་བཞི་པར་ངོ་ཚ་ནས་མགོ་སྨད་དེ་ཞུགས་པ་དང་། ལྷ་མ་ཡིན་གྱི་བུ་མོ་ཉམས་པ་རབ་ཏུ་ངུ་ཞིང་ངོམ་ཟུམ་གནག་པ་རྣམས་ཀྱིས་ཡོངས་སུ་བསྐོར་ནས་རང་གི་གནས་སུ་དོང་ངོ་། །ཀླུ་རབ་འཇོམས་ལ་སོགས་པ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ། སྙིང་སྟོབས་རབ་
ཏུ་ཉམས་པ་རྣམས་ཀྱང་ཀླུའི་གནས་ལོངས་སྤྱོད་ལྡན་ག་ལ་བ་དེར་དོང་ངོ་། །དེ་ལྟར་སྲེད་པའི་དུག་གིས་ཉམས་པའི་སེམས་ཅན་ཕན་ཚུན་རབ་ཏུ་ཉམས་པ་དག་འཁོར་བ་ན་འཁོར་ཞིང་འཁྱམ་ཡང་བདེ་བ་མི་མཐོང་ངོ་། །དེ་དག་རྗེས་སུ་མཐོང་ནས་འཕགས་པ་ཉན་ཐོས་འདོད་པ་དག་གི་འདོད་ཆགས་དང་བྲལ་ལོ། །དེ་ནས་གཞན་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་ལ་འདི་ལྟར་དགེ་སློང་འདི་ནི་ས་གཞན་བཅུ་བདུན་པ་ལ་ཞུགས་ཏེ། དེ་ཁོ་ན་ཉིད་ལ་བློ་ཤིན་ཏུ་ཞེན་ཏོ། །དེ་ཐོས་ནས་ས་བླའི་གནོད་སྦྱིན་ཤིན་ཏུ་དགའ་ནས་བར་སྣང་ལ་རྒྱུ་བའི་གནོད་སྦྱིན་རྣམས་ལ་སྦྲན་ཏོ། །དེ་དག་གིས་ཀྱང་འཇིག་རྟེན་སྐྱོང་བ་རྣམས་ལ་སྔ་མ་བཞིན་སྦྱར་ཏེ། ཆུང་དགེའི་བར་དུ་ཡང་དེ་བཞིན་དུ་སྦྲན་ཏེ། འདི་ལྟར་འཛམ་བུའི་གླིང་ན་རིགས་ཀྱི་བུ་ཆེ་གེ་མོ་ཞིག་གྲོང་མང་གེ་མོ་ཞིག །གྲོང་རྡལ་ག་གེ་མོ་ཞིག་ཏུ་མིང་ཆེ་གེ་མོ་ཞེས་བྱ་བ་སྐྲ་དང་ཁ་སྤུ་བྲེགས། གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་བདུད་ཀྱི་ཡུལ་གྱི་དངོས་པོ་ནི་མི་འདོད། ཉོན་མོངས་པའི་དངོས་པོ་རྣམས་དང་ཡང་ལྷན་ཅིག་གནས་པར་མི་བྱེད་ལ། འཁོར་བ་ལས་ཤིན་ཏུ་འདོད་ཆགས་དང་བྲལ་ཏེ། དེ་ལྟར་འབད་པས་ཀུན་དུ་ཁྱབ་ནས། ས་གཞན་བཅུ་བདུན་པ་ལ་ཞུགས་སོ། །དེ་ཐོས་ནས་ལྷ་རྣམས་ཤིན་ཏུ་དགའ་ནས་བསྟོད་དེ། འདི་ལྟར་གང་བདུད་ཀྱི་ཕྱོགས་ནི་འགྲིབ་ལ། དམ་པའི་ཆོས་ཀྱི་ཕྱོགས་འཕེལ་བ་ནི་བདག་ཅག་དགའོ། །དུད་འགྲོའི་ལེའུ་རྫོགས་སོ།། །།དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཉེས་པར་བྱས་པ་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པ་ཤིན་ཏུ་ཕྲ་བ་ཐམས་ཅད་ཀྱང་ཇི་ལྟ་བ་བཞིན་བརྟགས་ཤིང་ཤེས་ཏེ། ཡིད་ལ་བཟུང་ནས་ལེགས་པར་བྱས་པའི་ལས་རྣམས་ལ་ཡང་ལས་ཀྱི་འབྲས་བུ་རྣམ་པར་སྨིན་པ་ལ་རྟོག་པར་བྱེད་དེ། འདི་ལྟར་སེམས་ཅན་ཐམས་ཅད་ནི་སྡུག་བསྔལ་
དང་མི་འཐུན་པ་བདེ་བ་འདོད་པ་ཡིན་ལ། ལྷ་རྣམས་ནི་བདེ་བ་བསགས་པ་ལ་དགའ་བ་ཡིན་ཏེ། དེ་རྣམས་ཀྱི་ལས་ཀྱི་ཆོས་དང་། རྣམ་པར་སྨིན་པ་དང་། སྐྱེ་བ་དང་། འཆི་བ་ཤིན་ཏུ་ཕྲ་བ་དག་ལ་ཡང་རྟོག་པར་བྱེད་དོ། །ལས་དགེ་བ་བྱས་ཤིང་བསགས་པ་སོ་སོར་ཡང་དག་པར་མྱོང་བར་འགྱུར་བ་ནི་ལས་ཀྱི་འབྲས་བུ་རྣམ་པར་སྨིན་པ་འདོད་པ་སྡུག་པ་ཡིད་དུ་འོང་བ་སོ་སོར་ཡང་དག་པར་མྱོང་བར་འགྱུར་བར་སོ་སོར་རིག་པར་བྱའོ། །དེ་ལ་ཚུལ་ཁྲིམས་རྣམ་པ་བདུན་གྱིས་མཐོ་རིས་སུ་སྐྱེ་བར་འགྱུར་ཏེ། ལུས་ཀྱི་གསུམ་དང་། ངག་གི་བཞི་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པས་འདོད་པ་ན་སྤྱོད་པའི་ལྷ་དྲུག་གི་ནང་དུ་སྐྱེ་བར་འགྱུར་རོ། །ཆུང་ངུ་དང་། འབྲིང་དང་། ཆེན་པོས་འདོད་པ་ན་སྤྱོད་པའི་ལྷ་དྲུག་དག །ཆུང་ངུ་དང་། འབྲིང་དང་། ཆེན་པོའི་འགྲོ་བ་འཐོབ་སྟེ། ཚེ་ཐུང་ངུ་དང་། འབྲིང་དང་། རིང་པོ་དང་། ཁ་ཟས་ངན་པ་དང་། འབྲིང་དང་། བཟང་པོ་དང་། གཟུགས་ངན་པ་དང་། འབྲིང་དང་། བཟང་པོ་དང་། བརྩོན་འགྲུས་ཆུང་ངུ་དང་། འབྲིང་དང་། ཆེན་པོ་དང་། བདེ་བ་ཆུང་ངུ་དང་། འབྲིང་དང་། ཆེན་པོར་འགྱུར་རོ། །དེ་ལ་ལྷའི་རིས་གཉིས་ནི་རི་རབ་ལ་གནས་སོ། །བཞི་ནི་སྤྲིན་གྱི་ཕུང་པོ་ལྟར་ནམ་མཁའ་ལ་གནས་སོ། །དེ་ལ་ལྷའི་རིས་དང་པོ་ནི་མདོར་བསྡུ་ན་རྒྱལ་ཆེན་བཞིའི་རིས་རྣམས་སོ། །དེ་དག་གི་གནས་དང་པོ་ནི་ཕྲེང་ཐོགས་རྣམས་ཏེ། དེ་དག་ཀུན་ནས་རི་རབ་ཀྱི་ཕྱོགས་བཞི་ལ་རྟེན་ཅིང་གནས་སོ། །དེ་ལ་ཕྲེང་ཐོགས་དེ་རྣམས་ཀྱི་བྱེ་བྲག་དང་པོ་ཉིད་དུ་འབྱུང་བ་ནི་འདི་ལྟ་བུ་ཡིན་ལ། ཕྱོགས་ཕྱོགས་དེ་རྣམས་ཀྱི་བྱེ་བྲག་ཀྱང་མིང་དང་ལས་ཀྱིས་འགྱུར་ཏེ། དེ་ལྟར་ལས་དུ་མས་བསྐྱེད་པའི་ཚེ་དེ་ལ་གནས་པ་བདེ་བ་ཉམས་སུ་མྱོང་བར་འགྱུར་ལ། གཟུགས་དང་ལང་ཚོ་དང་གཡོ་བ་རྣམ་པ་དུ་མར་འགྱུར་རོ། ལས་ཀྱི་དྲ་བ་ཀུན་ནི་རྒྱའི་འབུར་ལྟར་འབྱུང་སྟེ། རྒྱུ་མེད་པ་མ་ཡིན། འདོད་རྒྱལ་ལས་མ་བྱུང་། ལས་གཞན་གྱིས་བསྐྱེད་པ་མ་ཡིན་ནོ། །དེ་ལྟ་བས་ན་སྐྱེས་བུ་གང་བདག་སྐྱིད་པར་
འདོད་ན་དགེ་བའི་ཆོས་རྣམས་ལ་འབད་པར་བྱའོ། །སེམས་ཅན་རྣམས་ཀྱི་ལས་དགེ་བ་དང་མི་དགེ་བ་དང་། ལུང་དུ་མ་བསྟན་པའི་ལས་ཀྱི་དྲ་བ་ནི་ཐོག་མ་མེད་པའི་དུས་ནས་ཞུགས་པ་ཡིན་ཏེ། ལས་ཀྱི་དྲ་བ་གང་གིས་སྦྲེལ་བའི་སེམས་ཅན་རྣམས་ནི་ཟོ་ཆུན་རྒྱུད་མོ་ལྟར་སེམས་ཅན་དམྱལ་བ་དང་། དུད་འགྲོ་དང་། མིའི་འཇིག་རྟེན་གྱི་འཁོར་བར་ཡོངས་སུ་འཁྱམ་མོ། །སྲོག་ཆགས་རྣམས་ནི་ཀུན་ནས་གར་གྱི་ལྟད་མོ་པ་ལྟ་བུ་ཡིན་ཏེ། དགེ་བའི་ལས་ཀྱི་མཐའ་སྤྱད་པ་ནི་ལྷའི་འཇིག་རྟེན་དུ་སྐྱེ་བར་འགྱུར་རོ། །དེ་ལ་ལྷ་རྣམས་གནས་པ་རིའི་རྒྱལ་པོ་རི་རབ་ནི་རི་བོ་ཁྲི་ཕྲག་དྲུག་ཅུས་ཡོངས་སུ་བསྐོར་བ་ཡིན་ལ། རིན་པོ་ཆེ་སྣ་ཚོགས་འབར་བའི་ཕྲེང་བའི་འོད་ཀྱིས་གསལ་བར་བྱས་པ། སྟེང་ན་འབབ་ཆུ་དང་། ལྟེང་ཀ་དང་། པད་མོའི་རྫིང་རྣམ་པ་སྣ་ཚོགས་ཀྱིས་མཛེས་པར་བྱས་པ། འཕང་དུ་དཔག་ཚད་བརྒྱད་ཁྲི་བཞི་སྟོང་ཡོད་པ། ངོས་བཞི་རིན་པོ་ཆེ་ལས་བྱས་པ། ལས་ལེགས་པར་བྱས་པའི་ལྷ་རྣམས་ཀྱིས་ཡོངས་སུ་བསྐོར་བ། ས་བདེ་བ་འབར་བ་དུ་མས་གསལ་ཞིང་དགའ་བ་ཡིན་ཏེ། དེ་ལ་འདི་ལྟར་དགེ་སློང་དེ་ཐོག་མ་ཁོ་ནར་སའི་ཆ་རྣམ་པར་འབྱེད་དོ། །དེ་ལ་གནས་དང་པོ་ནི་ལྷ་ཕྲེང་ཐོགས་རྣམས་ཀྱི་ཡིན་ལ། དེ་དག་གི་གནས་བཅུ་ཡོད་དེ། འདི་ལྟ་སྟེ། ཟུར་ལ་གནས་པ་དང་། མཐའ་ལ་གནས་པ་དང་། འབྲས་བུས་ཉེ་བར་འཚོ་བ་དང་། ཡོན་ཏན་དཀར་པོ་སྤྱོད་པ་དང་། ཐམས་ཅད་རབ་ཏུ་དགའ་བར་གནས་པ་དང་། འགྲོ་མགྱོགས་པ་དང་། ཡུལ་ལ་ཆགས་པ་དང་། འདོད་པ་ལ་ཆགས་པ་དང་། ཡིད་གཡོ་བ་དང་། ཚལ་དང་ཉེ་བའི་ཚལ་ན་གནས་པ་ཡིན་ཏེ། དེ་ལྟར་གནས་རབ་ཏུ་དབྱེ་བ་ནི་བཅུ་ཡོད་དོ། །རི་རབ་ཀྱི་ངོས་འཛམ་བུའི་གླིང་ལོགས་སུ་ལྟ་བ་གང་ཡིན་པ་དེ་ན་ནི། ཟུར་ན་གནས་པ་ཞེས་བྱ་བར་མིང་བཏགས་སོ། །དེའི་འོག་ཏུ་གནས་པ་དེ་དང་དེ་གང་ཉེ་བ་ན་མཐའ་ལ་གནས་པ་ཞེས་བྱ་བར་མིང་བཏགས་སོ། །ནུབ་ཀྱི་བ་ལང་སྤྱོད་ཀྱི་ཕྱོགས་གང་ཡིན་པ་དེ་ན་འབྲས་བུས་ཉེ་བར་འཚོ་བ་ཞེས་བྱ་བར་མིང་བཏགས་སོ། །དེ་དང་ཉེ་བ་ན་ཡོན་ཏན་དཀར་པོ་སྤྱོད་པ་གནས་
སོ། །ཤར་གྱི་ལུས་འཕགས་ཀྱི་ཕྱོགས་གང་ཡིན་པ་དེ་ན་ཐམས་ཅད་རབ་ཏུ་དགའ་བར་གནས་པ་ཞེས་བྱ་བ་གནས་སོ། །དེ་དང་ཉེ་བ་ན་འགྲོ་མགྱོགས་གནས་སོ། །བྱང་གི་སྒྲ་མི་སྙན་གྱི་གླིང་གི་ཕྱོགས་གང་ཡིན་པ་དེ་ན་ཡུལ་ལ་ཆགས་པ་གནས་སོ། །དེ་དང་ཉེ་བ་ན་འདོད་པ་ལ་ཆགས་པ་དང་། དེ་དང་ཉེ་བ་ན་ཡིད་གཡོ་བ་དང་། དེ་དང་ཉེ་བ་ན་ཚལ་དང་ཉེ་བའི་ཚལ་ན་གནས་པ་ཞེས་བྱ་བ་གནས་ཏེ། དེ་དག་གི་གནས་སོ་སོ་ཀུན་ལ་དཔག་ཚད་སྟོང་སྟོང་ཡོད་དོ། །དེ་དག་གི་དང་པོ་ནི་རྒྱ་མཚོའི་ནང་གི་སྟེང་ཡིན་ཏེ། དེ་དག་གི་ཚེ་ནི་མི་རྣམས་ཀྱི་ལོ་ལྔ་བཅུ་གང་ཡིན་པ་དེའི་ཉིན་ཞག་གཅིག་ཡིན་ནོ། །དེ་ལྟར་བསྒྱུར་བའི་ལོ་ལྔ་བརྒྱ་ཐུབ་སྟེ། དུས་སུ་འཆི་བ་ཡང་ཡོད། དུས་མ་ཡིན་པར་འཆི་བ་ཡང་ཡོད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། གནས་དེ་དག་གི་དགའ་བ་ལ་རྟོག་པར་བྱེད་དེ། ལས་གང་གིས་གནས་དེར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ལེགས་པར་བྱས་པའི་ལས་འདི་བྱས་ན་སྐྱེ་བར་འགྱུར་ཏེ། དེ་ནི་འདི་ལྟར་ཤིན་ཏུ་དང་བའི་སེམས་དེ་ལ་ཡིད་ཞུགས་པ་གཞན་དུ་མ་གཡེངས་པའི་ཡིད་གསལ་བས་སངས་རྒྱས་སམ། ཆོས་སམ། དགེ་འདུན་ལ་སྐྱབས་སུ་སོང་ན། དེ་འཆི་བའི་དུས་བྱས་ནས་བདེ་འགྲོ་མཐོ་རིས་ཀྱི་འཇིག་རྟེན་ཟུར་ན་གནས་པ་ཞེས་བྱ་བ་དེར་ཤིན་ཏུ་དང་བའི་སེམས་དེ་སྐྱབས་སུ་སོང་བའི་རྒྱུས་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ལུས་གཟི་བརྗིད་དང་ལྡན་ཞིང་ལུས་རང་གི་འོད་ཀྱིས་བརྒྱན་ལ་བདེ་བར་གནས་པར་འགྱུར་རོ། །འདི་ལྟ་སྟེ། ཆུང་ཟད་ཅིག་དཔེ་བྱ་ན་འཁོར་ལོས་སྒྱུར་བའི་རྒྱལ་པོའི་བདེ་བ་གང་ཡིན་པ་དེ་ནི་ལྷ་གནས་པ་གཅིག་གི་བཅུ་དྲུག་གི་ཆར་ཡང་མི་ཕོད་དོ། །གནས་དེ་དག་ནི་ཆུའི་ནང་ན་མུ་ཏིག་གི་བྱེ་མ་ཡོད་ལ། དེའི་མིང་ནི་འདི་ཡིན་ཏེ། འདི་ལྟ་སྟེ། འདོད་པ་འབྱུང་ཞེས་བྱའོ། །དེའི་མཐུ་ནི་འདི་ལྟ་བུ་ཡིན་ཏེ། འདི་ལྟ་སྟེ། མཐའ་ལ་གནས་པ་དང་། ཟུར་ལ་གནས་པའི་ལྷའི་ཡིད་ལ་བསམས་པ་གང་ཡིན་པ་དེ་དག་ཆུའི་རྣམ་པ་
ཆུ་བོ་དེ་ལས་འཐོབ་བོ། །གཞན་ཡང་ཆུ་བོ་མུ་ཏིག་དང་། བྱི་རུ་འབབ་པ་ཞེས་བྱ་བ་ཡོད་དེ། ལྷ་མོའི་ཚོགས་ཀྱིས་ཡོངས་སུ་བསྐོར་བ་ཡིན་ནོ། །དེ་ན་ཡང་རིན་པོ་ཆེ་རྣམ་པ་སྣ་ཚོགས་འབབ་སྟེ། འདི་ལྟ་སྟེ། བཻ་ཌཱུརྱའི་ཐུར་མ་དང་། རྡོ་རྗེའི་དུམ་བུ་དང་། ནོར་བུ་མཐོན་ཀ་དང་། མཐོན་ཀ་ཆེན་པོ་དང་། སྤུག་མེ་མདོག་རྣམ་པ་དུ་མ་སྟེ། གཞན་ཡང་ཟུར་ན་གནས་པའི་ལྷ་དེ་དག་བརྒྱན་པར་བྱ་བའི་ཕྱིར་རྣམ་པ་དེ་ལྟ་བུ་དག་འབྱུང་ངོ་། །དེ་དག་གི་སེམས་ལ་བརྒྱན་པར་འདོད་པའི་རྒྱན་གང་ཡིན་པ་དག་དེ་ལ་འཐོབ་པར་འགྱུར་རོ། །གཞན་ཡང་ཆུ་བོ་སྤོས་ཆུ་ཞེས་བྱ་བ་འབབ་སྟེ། དེ་ན་ཡང་བྱ་ངང་པ་དང་། ཀཱ་རཎྜ་བ་དང་། ངུར་པས་བརྒྱན་ལ། འགྲམ་གཉི་ག་ཤིང་ལྗོན་པ་དང་། གསེར་གྱི་ཤིང་ལྗོན་པ་དབྱིབས་དང་ཁ་དོག་སྣ་ཚོགས་དང་ལྡན་པ་རྣམས་ཀྱིས་ཡོངས་སུ་བསྐོར་ཅིང་བྱ་རྣམས་ཀྱིས་ཀྱང་ཡོངས་སུ་བསྐོར་བ་ཡིན་ནོ། །འདི་ལྟར་ལྷ་རྣམས་ཀྱིས་དྲི་བསྣམས་ན་ཡིད་རབ་ཏུ་དགའ་ལ། དེ་ལྟར་ཡང་དང་ཡང་རྟག་ཏུ་དེ་ལ་སྣས་བསྣམས་ནས་དྲི་ཚོར་བ་དང་། སྣོམ་པ་པོ་བརྒྱ་འགྱུར་དུ་ཡིད་དགའ་བར་འགྱུར་ཏེ། དེ་དག་གཞན་ཡང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་དགའ་བར་བྱེད་དོ། །ཤིང་རྣམས་ཀྱི་རྣམ་པ་ནི་འདི་ལྟ་བུ་ཡིན་ཏེ། འདི་ལྟ་སྟེ། ཡལ་ག་དམར་ལ་ལོ་མ་ལྗང་ཁུར་འདུག་པ་དང་། ཡལ་ག་ལྗང་ཁུ་ལ་ལོ་མ་དམར་པོར་འདུག་པ་དག་གོ །ལོ་མའི་ཁ་དོག་ལྔ་ལ་འདི་ལྟ་སྟེ། སྔོན་པོ་དང་། སེར་པོ་དང་། ལྗང་ཁུ་དང་། ནག་པོ་དང་། དཀར་པོ་དང་། བུང་བ་ཁ་དོག་སྣ་ཚོགས་དང་ལྡན་པ་རྣམས་ཀྱིས་མཛེས་པར་བྱས་པ་སྒྲ་འབྱིན་པ་རྣམས་ཀྱིས་རྟག་ཏུ་ཡིད་དགའ་བ་ཡིན་ཏེ། དེ་ལྟར་ལེགས་པར་བྱས་པའི་ལས་ཀྱི་འབྲས་བུ་དག་ལ་རྩེ་བར་བྱེད། དགའ་བར་བྱེད། ཡོངས་སུ་སྤྱོད་པར་བྱེད་དོ། །རི་རབ་དག་ལ་རིན་པོ་ཆེ་སྣ་ཚོགས་ཀྱི་རྩེ་མོ་དང་། གད་ཁ་དང་། བུ་ག་དག་ཀྱང་ཡོད་དེ། དེ་ལ་རི་འདི་ལྟ་བུ་དག་ཡོད་དེ། འདི་ལྟ་སྟེ་མཐོ་ཞིང་བཀྲ་བ། འབབ་ཆུ་སྣ་ཚོགས་བསིལ་
བ། བྱ་སྐད་སྙན་པ་འབྱིན་པ། སྤོས་ཀྱིས་བསྒོས་པ། དུས་ཚིགས་དང་རྟག་ཏུ་ལྡན་པ་ཡིན་ཏེ། རིན་པོ་ཆེ་སྣ་བདུན་གྱིས་བརྒྱན་པའི་རི་རྣམ་པ་དེ་ལྟ་བུ་ལ་ཟུར་ན་གནས་པའི་ལྷ་རྣམས་དགའ་བར་བྱེད། ཡོངས་སུ་སྤྱོད་པར་བྱེད་ཅིང་བདེ་བ་སྣ་ཚོགས་ཀྱིས་ནི་མྱོས། ལྷ་མོ་རྣམ་པ་སྣ་ཚོགས་ཀྱིས་ནི་ཡོངས་སུ་བསྐོར། དགོད་པ་དང་། འགྱིང་བ་དང་། རྩེད་མོ་ནི་བྱེད་དེ། ཇི་སྲིད་དུ་གསུམ་ལ་སྐྱབས་སུ་སོང་བའི་ལས་ཀྱི་རྣམ་པར་སྨིན་པ་ལས་བྱུང་བ་འདོད་པ་སྡུག་པ་ཡིད་དུ་འོང་བ་ཟད་པར་མ་གྱུར་པ་དེ་སྲིད་དུ་འདོད་པའི་ཡོན་ཏན་ལྔ་རྣམས་ཀྱིས་དགའ་བར་བྱེད་ལ། ཕྱིས་ཀྱང་མྱ་ངན་ལས་འདས་པའི་མཐའ་འཐོབ་པར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པར་དེ་རྟག་ཏུ་དགའ་ལ་མཆོག་ཏུ་བདེ་བ་དང་ལྡན་པར་སྤྱོད་པ་དང་། ནོར་རྫས་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷའི་འཇིག་རྟེན་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་ཕྲེང་ཐོགས་རྣམས་ཀྱི་གནས་གཞན་མཐའ་ལ་གནས་པ་ཞེས་བྱ་བ་མཐོང་ངོ་། །ལྷའི་འཇིག་རྟེན་དེར་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པ་གང་གིས་ཚུལ་ཁྲིམས་དང་ལྡན་པ་དག་ལ་ཚུལ་ཁྲིམས་དང་ལྡན་པ་ཡིན་ནོ་སྙམ་ཡིད་ལ་བྱས་ནས། ཆུ་བོ་ལས་བསྒྲལ་བའི་ཕྱིར་སྟེགས་བཙུགས་སམ་གྲུ་བྱིན་ཏེ། ཆུ་བོ་ཆེན་པོ་སྐྱེ་བོ་མི་བདེ་བ་ལས་སྒྲོལ་བར་བྱེད་ཅིང་སྡིག་པ་ལ་ཡང་མི་འཇུག་ན། དེ་ལུས་དང་བྲལ་ནས་བདེ་འགྲོ་མཐོ་རིས་ལྷའི་འཇིག་རྟེན་མཐའ་ལ་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ་དེ། ལྷའི་རིས་དེར་བདེ་བ་སྣ་ཚོགས་ལ་གནས་ཤིང་ལྷའི་འཇིག་རྟེན་དེ་པད་མའི་རྫིང་གིས་ཡོངས་སུ་བསྐོར་བ་ཡིན་ནོ། །དེ་ནས་པད་མའི་རྫིང་བསིལ་ལ་ཤིན་ཏུ་དང་བ་རོ་དང་། དྲི་དང་མདོག་སྐྱོན་མེད་པས་གང་བ་ཡིན་ལ། ལྷ་མོའི་ཚོགས་
རྟག་ཏུ་དགོད་པ་དང་། ལྡེམ་པ་དང་། རྩེ་བ་དང་། ཡོངས་སུ་སྤྱོད་པ་རྣམས་ཀྱིས་གང་བ་ཡིན་ནོ། །དེ་ན་དེ་ལྷ་མོའི་ཚོགས་མང་པོ་དག་གིས་ཤིན་ཏུ་མཆོད་ལ། ལུས་རིན་པོ་ཆེ་སྣ་ཚོགས་ཀྱིས་བརྒྱན་ཏོ། །རྣ་བར་སིལ་སྙན་རྣམ་པ་ལྔ་དང་ལྡན་ལ། ལྷ་མོ་དེ་རྣམས་ཀྱིས་ཉེ་བར་རྩེན་ཏེ། བདེ་བར་གནས་པ། ཚལ་དང་། ཉེ་བའི་ཚལ་དང་། ལྟེང་ཀ་དང་། ཀུན་དགའ་ར་བ་རྣམས་སུ་བདེ་བ་མྱོང་བར་བྱེད་དོ། །དེ་ན་ལྟེང་ཀ་ཡོད་པ་དག་ནི་འདི་ལྟ་སྟེ། འབབ་བདེ་དང་། བུད་མེད་སྡུག་དང་། མཐོང་དགའ་དང་། ཀུན་དགའ་དང་། སྤྲིན་ཕྲེང་དང་། ལྟེང་ཀ་ཕྲེང་དང་། ཡིད་བཞིན་སྣ་ཚོགས་དང་། དུས་མི་མཐོང་ངོ་། །ཚལ་དག་ཀྱང་ཡོད་དེ། མཐོང་ན་ཉམས་དགའ་དང་། མཐོང་ན་ཡིད་འཐུན་དང་། རླུང་ལེགས་པར་མངོན་ལྡང་དག་གོ །མེ་ཏོག་གི་རྣམ་པས་མཛེས་པ་བཞི་ཡོད་དེ། འདི་ལྟ་སྟེ། སྤོས་འབྱུང་དང་། སྣ་ཚོགས་དང་། བུང་བ་མངོན་དགའ་དང་། རྟག་ཏུ་ཉམས་དགའ་སྟེ། ཚལ་དེ་རྣམས་སུ་ལྷ་དེ་ལྷ་མོ་རྣམ་པ་སྣ་ཚོགས་དག་གིས་ཡོངས་སུ་བསྐོར་ཅིང་འདོད་པའི་ཡོན་ཏན་ལྔ་ལ་སེམས་ཆགས་པ་བདེ་བ་མྱོང་བར་བྱེད་དོ། །རིན་པོ་ཆེ་སྣ་ཚོགས་ཀྱིས་ལུས་བརྒྱན་པ་དེ་ཐོགས་པ་མེད་པའི་འགྲོས་དང་། ཉམས་པ་མེད་པའི་འགྲོས་ཀྱིས་གང་དགའ་བར་འགྲོ་ཞིང་གར་དགའ་བར་བྱེད་དོ། །ཡུལ་ལྔ་ལ་ཆགས་པ་དེ་རི་ལས་ཆུ་བོ་འབབ་པ་ལྟར་ཉིན་གཅིག་བཞིན་བདེ་བ་འཕེལ་ཏེ། དབང་པོ་ལྔ་པོ་ཆུ་ལྟ་བུ་འདོད་པ་རླབས་ལྟ་བུ་དག་ལ་རྩེ་ཞིང་སྐྱེད་མོས་ཚལ་ནས་སྐྱེད་མོས་ཚལ། ནགས་ཚལ་ནས་ནགས་ཚལ། ལྟེང་ཀ་ནས་ལྟེང་ཀ །གསེར་གྱི་རིའི་རྩེ་མོ་རིན་པོ་ཆེ་སྣ་ཚོགས་ཀྱིས་བརྒྱན་པ་ནས། རིའི་རྩེ་མོ་གཞན་དག་ལ་འགྲོ་བར་བྱེད་དོ། །རྩེ་བར་བྱེད་པ་ལྷ་མོ་ཡིད་དུ་འོང་ཞིང་དགའ་བ་མེ་ཏོག་ཕྲེང་བཟང་པོ་དཔེ་མེད་པ་ཐོགས་པ་རྣམས་ཀྱིས་ཡོངས་སུ་བསྐོར་ཅིང་བཟའ་བ་དང་། བཏུང་བ་རྣམ་པ་སྣ་ཚོགས་ཀྱིས་ལུས་ཤིན་ཏུ་ཚིམ་པ་ཡིན་ཏེ། དེ་ལྟར་དེ་ཇི་སྲིད་དུ་དེའི་འདོད་པ་སྡུག་པ། ཡིད་དུ་འོང་བ་ལེགས་པར་བྱས་པའི་ལས་ཀྱི་སྤྲུལ་པ་
དཔེ་མེད་པ་ལེགས་པར་བྱས་པའི་རྒྱུ་ལས་བྱུང་བ་ཟད་པར་མ་གྱུར་པ་དེ་སྲིད་དུ་བདེ་བ་དེ་མྱོང་བར་བྱེད་དོ། །དེ་ལས་དེ་ཟད་ནས་དེ་ནས་ཤི་སྟེ། གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ནས། ལས་དེ་དང་རྒྱུ་འཐུན་པར་དེ་དྲང་དཀན་ཆེ་ལ་འབྱོར་པ་དང་ལྡན་ཞིང་རྒྱལ་པོའི་མཛོད་ཀྱི་སྤྱན་དུ་ཡང་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ཕྲེང་ཐོགས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷ་ཕྲེང་ཐོགས་རྣམས་ཀྱི་གནས་གསུམ་པ་འབྲས་བུས་ཉེ་བར་འཚོ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་ལེགས་པར་བྱས་པའི་ལས་གང་གིས་ལྷ་རྣམས་ཀྱི་ནང་དུ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པ་ལུས་དང་། ངག་དང་། ཡིད་རབ་ཏུ་ཞི་བ། བྱམས་པ་བསྒོམས་པའི་སེམས་གང་གིས་ལོ་ཉེས་མི་བཟད་པ་ཕལ་ཆེར་བྱུང་བའི་ཡུལ་རྣམས་སུ། འདི་ལྟར་ལམ་དུ་ཞུགས་པ་བཀྲེས་པར་གྱུར་པ་གང་ཡིན་པ་དེ་དག་འབྲས་བུ་དེ་རྣམས་ཀྱིས་ཤིན་ཏུ་ཚིམ་ཞིང་བདེ་བར་གནས་པར་བྱའོ་སྙམ་ནས། སེམས་ཅན་རྣམས་ལ་ཕན་པ་དང་བདེ་བར་བྱ་བའི་ཕྱིར་འབྲས་བུའི་ཤིང་ངམ། ཀུན་དགའ་ར་བ་དག་བསྐྱེད་ཅིང་བྱས་ལ། དེ་དག་ཀྱང་དེ་ལྟར་ཤིན་ཏུ་བདེ་བར་གྱུར་ན་དེ་ལུས་དང་བྲལ་ནས་བདེ་འགྲོ་མཐོ་རིས་ལྷའི་འཇིག་རྟེན་འབྲས་བུ་ཉེ་བར་འཚོ་བ་ཞེས་བྱ་བའི་ལྷ་དེ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་ལྷ་མོ་གཟུགས་དང་ལང་ཚོ་དཔེ་མེད་པ་དང་ལྡན་པ། བདེ་བར་གནས་པ་མཚུངས་པ་མེད་པ་རྣམས་ཀྱིས་ཡོངས་སུ་བསྐོར་བར་འགྱུར་རོ། །ཚལ་དང་ཉེ་བའི་ཚལ་དང་། ལྷའི་མེ་ཏོག་དང་འབྲས་བུ་ཕུན་སུམ་ཚོགས་པ་དང་། གསེར་གྱི་བྱི་རུའི་དྲ་བ་འཕྱང་བ་དང་། དྲིལ་བུ་གཡེར་ཀའི་སྒྲ་བསྒྲགས་པ་དེ་དག་ཤིན་ཏུ་དགའ་བར་བྱེད་དེ། བདེ་བ་ལ་ཆགས་པའི་དབང་པོ་ལྔ་ཤིན་ཏུ་བདེ་བ་དང་ལྡན་ནོ། །དེ་ན་ཚལ་དང་དགའ་བར་འགྱུར་བ་འདི་ལྟ་བུ་དག་འབྱུང་བར་འགྱུར་ཏེ། འདི་ལྟ་སྟེ། འབྲས་བུ་ཀུན་ཕྱེད་ཅེས་བྱ་བའི་ཚལ་དང་། ཀུན་དགའ་
གཞི་ཞེས་བྱ་བའི་ཚལ་དང་། དམའ་བ་དང་མཐོ་བ་ཞེས་བྱ་བའི་ཚལ་དང་། ཀུན་ནས་བདེ་བ་ཞེས་བྱ་བའི་ཚལ་དང་། རྟག་ཏུ་དགའ་བ་ཞེས་བྱ་བའི་ཚལ་དང་། བུང་བ་རྟག་མྱོས་ཞེས་བྱ་བའི་ཚལ་དང་། གསེར་གྱི་གྲིབ་མ་ཞེས་བྱ་བའི་ཚལ་ཏེ། ཚལ་དེ་རྣམས་སུ་ལྷ་མོའི་ཚོགས་ཀྱིས་ཡོངས་སུ་བསྐོར་ནས་དགའ་བར་བྱེད་ལ། པད་མའི་ཚལ་དང་། ལྟེང་ཀ་དང་། འབབ་ཆུ་སྒྲ་ལྷུང་ལྷུང་འབབ་པའི་ཚལ་རབ་ཏུ་མང་པོ་དག་ན་ཡང་དགའ་བར་བྱེད་དོ། །རང་གི་འོད་དང་ཤིང་ལྗོན་པ་རབ་ཏུ་འབར་ཞིང་གསལ་བ་དང་། བྱ་རྟག་ཏུ་མྱོས་ཤིང་སྒྲ་འབྱིན་པ་དང་། ཁ་ཟས་མང་པོ་བཟས་མི་ལང་བ་དང་། རིན་པོ་ཆེ་སྣ་བདུན་གྱིས་མཛེས་པར་བྱས་པ་རི་བོའི་རྩེ་མོ་རྣམ་པ་སྣ་ཚོགས་དག་ན་ཡང་མངོན་པར་དགའ་བར་བྱེད་དོ། །དེ་ན་རི་རབ་ཀྱི་རྩེ་མོའི་མིང་འདི་ལྟ་བུ་དག་ཡོད་དེ། འདི་ལྟ་སྟེ། རིའི་འོད་ཀྱི་ཕྲེང་བ་ཞེས་བྱ་བ་དང་། འཛམ་བུའི་ཚལ་དང་། ཆུ་དཀར་དང་། དགོད་ཕྲེང་དང་། རྟག་དགའ་སྟེ། རི་བོའི་རྩེ་མོ་དེ་དག་ན་ལེགས་པར་བྱས་པའི་ལས་ཀྱི་མཐའ་སྤྱད་པ་དག་མངོན་པར་དགའ་བར་བྱེད་དོ། །རང་གིས་ལེགས་པར་བྱས་པའི་ལས་ཀྱིས་བསྒྱུར་ཏེ། གནས་པ་རྟག་ཏུ་ཡུལ་ལ་དགའ་སྟེ། ཇི་སྐད་བསྟན་པའི་གནས་དེ་དག་ན། ལྷ་མོ་བརྒྱ་ཕྲག་དུ་མས་ཡོངས་སུ་བསྐོར་བ་དང་ལྷན་ཅིག་དགའ་བར་བྱེད། ཡོངས་སུ་སྤྱོད་པར་བྱེད་དོ། །འདིར་ཚིགས་སུ་བཅད་པ། མཐོ་རིས་ཐམས་ཅད་འདོད་པ་ནི། །རྒྱུ་ཆུང་བ་ཡིས་ཐོབ་པར་འགྱུར། །དེ་བས་ཉེས་པར་སྤྱད་སྤངས་ཏེ། །རྟག་ཏུ་ལེགས་པར་སྤྱད་ལ་སྤྱོད། །སྦྱིན་པ་སེམས་ལ་གོམས་པ་དང་། །ཚུལ་ཁྲིམས་ཡོངས་སུ་བསྲུངས་པ་ནི། །འདོད་པའི་ཡོན་ཏན་ལྔ་འབྱོར་པ། །ལྷ་ཡི་གནས་སུ་འགྲོ་བར་བྱེད། །ཇི་ལྟར་ཚུལ་ཁྲིམས་ལེགས་བསྲུངས་པ། །ཕ་མ་དོན་དང་བཤེས་གྲོགས་དང་། །གཉེན་འདུན་དག་གི་བདེ་བ་ཡང་། །དེ་ལྟ་བུར་ནི་མྱོང་མི་འགྱུར། །ཚུལ་ཁྲིམས་འདི་དང་ཕ་རོལ་སྐྱོབ། །ཚུལ་ཁྲིམས་འདི་ཡི་རྟེན་གྱི་མཆོག །ཚུལ་ཁྲིམས་རྟག་ཏུ་ལྡན་པའི་མི། །བདེ་ལས་བདེ་བ་འཐོབ་
པར་འགྱུར། །རང་གི་ལས་ཀྱིས་བསྒྱུར་བ་དག །སྦྱིན་དང་ཚུལ་ཁྲིམས་ཡང་དག་སྤྱོད། །མི་གང་གཙང་མར་སྤྱོད་པ་རྣམས། །དེ་དག་ལྷ་ཡི་གནས་སུ་འགྲོ། །ཚུལ་ཁྲིམས་གཏེར་ནི་ཟད་མི་ཤེས། །ཚུལ་ཁྲིམས་བདེ་བ་མཐའ་ཡས་ཏེ། །ཚུལ་ཁྲིམས་ལྷག་པར་སྲུང་བའི་མི། །རྟག་ཏུ་བདེ་བར་གནས་པ་ཡིན། །བསྔགས་པ་དང་ནི་ནོར་འདོད་དང་། །ཕ་རོལ་མཐོ་རིས་དག་ལ་དགའ། །བདེ་གསུམ་ཚོལ་བར་འདོད་པ་ཡི། །བློ་དང་ལྡན་པས་ཚུལ་ཁྲིམས་སྲུངས། །མི་གང་ཚུལ་ཁྲིམས་ལྡན་པ་ནི། །ཚུལ་ཁྲིམས་ཉིད་ལ་རྟེན་པར་བྱེད། །གང་ལ་འཆི་བ་མེད་པ་ཡི། །བདེ་ལས་དེ་ནི་མྱ་ངན་འདའ། །ཐོག་མ་མེད་པའི་འཁོར་བ་ནས། །འདོད་ཆགས་གཏི་མུག་ལ་སོགས་བསྒྲིབས། །སྣང་བྱེད་མཆོག་ནི་ཚུལ་ཁྲིམས་ཏེ། །དེ་བས་ཚུལ་ཁྲིམས་ཡང་དག་སྤྱོད། །ཚུལ་ཁྲིམས་མཚོ་ལྟར་རྙོག་མེད་པ། །ཚུལ་ཁྲིམས་དེ་ནི་བསྔགས་པ་ཡིན། །རྒྱལ་པོ་ཆོམ་རྐུན་མེ་དང་ཆུས། །ཚུལ་ཁྲིམས་ནོར་ལ་འཕྲོགས་མི་ནུས། །དེ་བས་ཚུལ་ཁྲིམས་རྟག་ཏུ་བརྟེན། །ཚུལ་ཁྲིམས་འཆལ་པ་རྣམ་པར་སྨད། །ཚུལ་ལ་མངོན་པར་དགའ་བའི་མི། །དེ་ནི་མྱ་ངན་འདས་དང་ཉེ། །སྐྱེས་བུ་ཚུལ་ཁྲིམས་ལྡན་པ་བསྔགས། །ཚུལ་ཁྲིམས་ལྡན་པའང་སྟེན་པར་བྱེད། །ཚུལ་ཁྲིམས་ཉི་མ་ལྟ་བུར་མཛེས། །ཚུལ་ཁྲིམས་འཆལ་པ་རྣམ་པར་སྨད། །དྲི་མ་མེད་ཅིང་གནོད་པ་མེད། །རིམས་ནད་མེད་ཅིང་མྱ་ངན་མེད། །རྫོགས་སངས་རྒྱས་ཀྱིས་ཚུལ་ཁྲིམས་བསྔགས། །མྱ་ངན་འདས་པའི་གྲོང་ཁྱེར་ཉེ། །རྟག་ཏུ་ཚུལ་ཁྲིམས་ལྡན་པ་ཡི། །མི་དག་ངེས་པར་ཀུན་ཏུ་འགེངས། །ཚུལ་ཁྲིམས་ཡོངས་སུ་བསྲུངས་པ་ནི། །འཆི་བའི་ཚེ་ན་མི་འཇིགས་སོ། །ཚུལ་ཁྲིམས་ཐོག་མ་ཐ་མར་དགེ །།བདེ་བ་ཐམས་ཅད་རབ་ཏུ་འཇུག །སྐྱེས་བུ་ཚུལ་ཁྲིམས་ལྡན་པ་བསྔགས། །ཚུལ་འཆལ་དགའ་བ་བ་ལང་ཡིན། །ཚུལ་ཁྲིམས་འཆལ་པའི་མི་དག་ནི། །དུད་འགྲོ་རྣམས་དང་མཚུངས་པ་ཡིན། །བྱ་དང་མི་བྱ་མི་ཤེས་ཏེ། །དེ་བས་ཚུལ་ཁྲིམས་
ཡང་དག་སྤྱོད། །ཚུལ་ཁྲིམས་གོས་ཀྱིས་གང་གཡོགས་པ། །སྐྱེས་བུ་དེ་ནི་གཡོགས་པ་ཡིན། །ཚུལ་ཁྲིམས་སྤངས་པ་གང་ཡིན་པ། །གཅེར་བུ་དེ་ནི་ཕྱུགས་དང་མཚུངས། །སྐྱེས་བུ་ཚུལ་ཁྲིམས་ལྡན་པ་ནི། །རང་གི་སྐྱེད་ཚལ་འགྲོ་བ་བཞིན། །ཚུལ་ཁྲིམས་ལྡན་པ་འདིར་འོངས་པ། །དེར་ནི་གཉེན་ལྟར་སེམས་པར་བྱེད། །ཚུལ་ཁྲིམས་གཙང་མ་ཡང་དག་སྤྱོད། །དགེ་བའི་ལས་དང་ལྡན་པ་ཡི། །སྐྱེ་བོ་བྱ་བ་ལེགས་བྱས་པ། །དེ་ནི་ལྷ་ཡི་འཇིག་རྟེན་འགྲོ། །སྐྱེས་བུ་ཚུལ་ཁྲིམས་རྟག་ལྡན་པ། །འདོད་པ་གང་དང་གང་ཚོལ་བ། །དེ་དག་དེ་ཡི་སོ་སོར་འགྲུབ། །ཚུལ་ཁྲིམས་ཀྱིས་ནི་ཡོངས་སུ་འཕེལ། །འཇིག་རྟེན་འདི་དང་ཕ་རོལ་ཏུ། །ཚུལ་ཁྲིམས་གྲོགས་ཀྱི་མཆོག་ཡིན་ནོ། །དེ་བས་གྲོགས་པོ་ཡོན་ཏན་མཆོག །ཚུལ་ཁྲིམས་ཉིད་ལ་རྟག་ཏུ་སྤྱོད། །བཀྲེས་སྐོམ་འཇིགས་པ་མི་བཟད་པ། །ཉམ་ངར་སྐྱོབ་པ་མཆོག་ཡིན་ཏེ། །ཚུལ་ཁྲིམས་གནས་ཤིང་བསྒོམས་པ་བསྟོད། །འཇིག་རྟེན་ཕ་རོལ་ཉེ་བར་འགྲོ། །གང་ཞིག་ཚུལ་འབྲས་འདི་ལྟ་བུར། །གལ་ཏེ་ཚུལ་ལྡན་རབ་ཤེས་ན། །དེ་ནི་མཚོན་རྣོན་ཐོགས་ནས་འདིར། བདག་ཉིད་མགུལ་གཅོད་ལ་སོགས་བྱེད། །དཔེ་མེད་བཤད་དུ་མེད་པ་སྟེ། །ཤིན་ཏུ་དགེ་དང་ཡང་དག་ལྡན། །ཚུལ་ཁྲིམས་འབྲས་བུ་དྲི་མ་མེད། །བདེ་བར་གཤེགས་པས་རབ་ཏུ་བསྟན། །དང་པོ་དེ་བཞིན་བར་དུ་དགེ །།དེ་བཞིན་ཐ་མར་དགེ་བ་ཡིན། །ཚུལ་ཁྲིམས་འབྲས་བུ་དྲི་མ་མེད། །དེ་ནི་དགེ་ལས་བདེ་ཆེན་ཐོབ། །དེ་བས་དེ་ཡིས་དེའི་ཡོན་ཏན། །རིག་ནས་ཚུལ་ཉིད་རྟག་ཏུ་སྤྱོད། །འདི་དང་གཞན་དུ་སྐྱོབ་བྱེད་པ། །ཚུལ་ཁྲིམས་ལྟ་བུ་གང་ཡང་མེད། །དེ་ལྟར་དགེ་སློང་ཚུལ་ཁྲིམས་ཀྱི་ཡོན་ཏན་གྱི་དེ་ཁོ་ན་ཉིད་ལ་སེམས་པ་དེ། ཚུལ་ཁྲིམས་ལ་ནི་སྟོད་པར་བྱེད་ལ། ཚུལ་ཁྲིམས་འཆལ་པ་ལ་ནི་རྟག་ཏུ་སྨོད་པར་བྱེད་དོ། །དེ་ལྟར་དེ་ལྷའི་གནས་ན་འདོད་པའི་ཡོན་ཏན་ལྔ་འབྱོར་པས་བདེ་སྟེ། དེར་ཇི་སྲིད་དུ་དགེ་བའི་ཚུལ་ཁྲིམས་དེ་སོ་སོ་ཡང་དག་པར་ལྡན་པར་འགྱུར་བ་དེ་སྲིད་དུ་དགའ་བར་
བྱེད་དོ། །དེ་དག་ཟད་ནས་ཤི་སྟེ། །གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན། ལས་དེ་དང་རྒྱུ་འཐུན་པར་རྫུ་འཕྲུལ་དང་ལྡན་ཞིང་གཟུགས་ཤིན་ཏུ་བལྟ་ན་སྡུག་པ་དང་། གནས་དང་ཉེ་བའི་ཚལ་གྱི་བར་དག་ཏུ་སྐྱེ་བར་འགྱུར་རོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་ཕྲེང་ཐོགས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་ཕྲེང་ཐོགས་རྣམས་ཀྱི་གནས་བཞི་པ་གང་ན་ལྷ་དག་དགའ་བར་བྱེད་པ། ཡོན་ཏན་དཀར་པོ་སྤྱོད་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་མེ་ཏོག་ཕྲེང་བས་འཚོ་བ་བློ་ཞན་པ་ཡིད་དང་བས་སེམས་ཆུང་ཟད་བསྐྱེད་པ། ཞིང་དང་དངོས་པོ་ཁོ་ན་ཡོན་ཏན་དང་ལྡན་ལ་སེམས་ཡོན་ཏན་དང་ལྡན་པ་མ་ཡིན་པ་ལམ་དུ་ཞུགས་པ་གང་གིས་སངས་རྒྱས་སམ། མཆོད་རྟེན་དག་ལ་མེ་ཏོག་སྙིམ་པ་གང་ཞིག་ཕུལ་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཡོན་ཏན་དཀར་པོ་སྤྱོད་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ལུས་ཡོན་ཏན་དཀར་པོའི་ཕྲེང་བ་བཏགས་སོ། །གནས་དེ་ཡང་ཀུན་ནས་བཻ་ཌཱུརྱ་བས་ལྷག་པའི་རིན་པོ་ཆེ་སྣ་བདུན་གྱི་རྡོ་རྣམས་ཀྱིས་མཛེས་པ་ཡིན་ནོ། །གནས་དེ་རིན་པོ་ཆེ་སྣ་བདུན་གྱིས་སྤྲས་པའི་བྱ་སྐད་སྙན་པ་འབྱིན་པ་རྣམས་ཀྱིས་ཀྱང་ཡོངས་སུ་བསྐོར་བ་ཀུན་ནས་གསལ་བ་ཡིན་ཏེ། དེ་ནས་ཡང་བརྒྱ་འགྱུར་དུ་ཤིན་ཏུ་གསལ་བས་མཛེས་པ་ཡིན་ནོ། །དེ་ལྟར་གནས་དེ་རྣམ་པ་དུ་མས་བརྒྱན་ཅིང་ཤིང་ལྗོན་པ་རྣམས་ཀྱིས་ཀྱང་མཛེས་པ་ཡིན་ཏེ། འདི་ལྟ་སྟེ་འགྲམ་ན་པད་མ་སྐྱེ་བ་དང་། རྒྱན་དུ་བྱ་བར་བློ་ཡོད་པ་ལྟ་བུའི་ཤིང་ལྗོན་པ་དག་ལ་གོས་སྤོས་ཀྱིས་བསྒོས་པའི་དྲི་རྣམས་ཀྱིས་དཔག་ཚད་དུ་ཁྱབ་ལ། མེ་ཏོག་རྟག་ཏུ་འབྱུང་བ་དང་། འབྲས་བུ་རྟག་ཏུ་འབྱུང་བ་ཡིན་ཏེ། གནས་དེ་རྣམ་པ་དེ་དག་དང་། གཞན་དེ་དག་གིས་མཛེས་པ་ཡིན་ནོ། །དེ་ན་བདེ་བ་ལ་གནས་པ་དེ་དག་ཀུན་དགའ་ར་བ་དང་། ཆུ་བོ་དང་
ལྷ་མོའི་ཚོགས་སྣ་ཚོགས་གླུ་ལེན་ཅིང་ཡུལ་ནས་ཡུལ་དང་། གནས་ནས་གནས་དང་། སྐྱེད་མོས་ཚལ་ནས་སྐྱེད་མོས་ཚལ་དུ་ཡོངས་སུ་རྒྱུ་བ་ན་བདེ་བ་དག་མྱོང་བར་བྱེད་ལ། བགད་པ་དང་རྩེས་པ་དང་། དགའ་བ་དང་། དགའ་དགུར་སྤྱད་དེ་བདེ་བར་གནས་པ་དགའ་དགུར་སྤྱོད་པ་སྤྱད་ཅིང་བདེ་བ་དཔེ་མེད་པ་དག་མྱོང་བར་བྱེད་དོ། །གནས་དེ་དམའ་བ་དང་། མཐོ་བར་ཡང་འགྱུར་ཏེ། མར་སར་ལྟར་འཇམ་པ་རྐང་པ་བཞག་ན་ནེམས་ཞེས་བྱེད་ལ། རྐང་པ་བཏེག་ན་པར་ཅེས་བྱེད་དོ། །གནས་དེ་ཕྱོགས་གཞན་དག་ཏུ་ཤིང་བལ་ལྟར་ཡང་འཇམ་པར་འགྱུར་ཏེ། ནེམས་ཞེས་བྱེད་པ་དང་། པར་ཅེས་བྱེད་པ་ནི་སྔ་མ་བཞིན་ནོ། །ཤིང་ཐམས་ཅད་ཀྱང་རང་ལས་འོད་འབྱུང་སྟེ། ཉི་མའི་འོད་ལྟར་བདེ་བ་ཡིན་ལ། གསེར་གྱི་ཤིང་ལྗོན་པ་དེ་རྣམས་ནི་གནས་ཀྱང་ལོ་མ་རྙིས་པར་མི་འགྱུར། མེ་ཏོག་རྙིས་པར་མི་འགྱུར་ཏེ། དེ་ལྟར་ལས་ལས་སྐྱེས་པའི་ཚུལ་ཁྲིམས་ཀྱི་དབང་གིས་ཡོངས་སུ་སྦྲེལ་ལ། ལེགས་པར་བྱས་པའི་ལས་ཀྱིས་མངོན་སུམ་དུ་གྱུར་པ་རྒྱའི་འབུར་ལྟ་བུར་ལྷའི་བདེ་བ་དཔེ་མེད་པ་དག་མྱོང་ངོ་། །རྣམ་པ་དེ་ལྟ་བུར་ཉམས་དགའ་བ་སྐྱེད་མོས་ཚལ་དང་། ནགས་ཚལ་དང་། ལྟེང་ཀ་དེ་དག་ཏུ་རང་གི་ལས་ངན་པ་དང་། འབྲིང་དང་། བཟང་པོ་རྣམས་ཀྱིས་ལྷ་དག་རྩེ་བར་བྱེད་ཅིང་དགའ་དགུར་སྤྱོད་དོ། །རང་གི་ལས་ཀྱིས་ལུས་བརྒྱན་པ་རྣམས་རང་ལས་འོད་འབྱུང་ལ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དག་མྱོང་ཞིང་དེ་དག་གི་ལུས་ནམས་ཀྱང་ཉམས་པར་མི་འགྱུར་ལ། བཀྲེས་པ་དང་། སྐོམ་པ་ཡང་མེད་དོ། །སྒྲ་དང་རོ་དང་གཟུགས་དང་དྲི་ཞིམ་པ་རྣམས་ཀྱིས་ཚིམ་པ་མེད་པའི་ལྷ་སྲེད་པ་ལ་སེམས་ཆགས་པ་དག་གང་དང་གང་འདོད་པ་དེ་དང་དེ་ཉིད་ལྷ་རྣམས་ལ་འགྲུབ་ལ། གང་དང་གང་འགྲུབ་པ་དེ་དང་དེ་དག་གཞན་གྱིས་ཉམས་པར་མི་བྱེད་དོ། །ལྷ་རང་དགར་སྤྱོད་ཅིང་རྟག་ཏུ་མགུ་བ། རྟག་ཏུ་ཡིད་རབ་ཏུ་དགའ་བ། གར་དགའ་དགུར་རབ་ཏུ་འགྲོ་བའི་ལྷ་སྤྲུལ་པ་དག་རང་དགར་རྣམ་པར་རྒྱུ་ལ། ལུས་སྦོམ་པའི་ལྷ་དག་ནི་ལུས་ཡང་བར་འགྱུར་རོ། །མིག་
འཛུམས་པ་དང་ཕྱེ་སྟེ་འགྲོ་བའི་ལྷ་དག་ནི་མིག་འཛུམས་པ་དང་ཕྱེ་བས་དཔག་ཚད་བྱེ་བ་བྱེ་བར་འགྲོ་ཡང་ངལ་བ་མེད་ལ་ཡང་བར་འགྱུར་རོ། །དཔེར་ན་ནམ་མཁའ་ལ་རླུང་ངལ་བར་མི་འགྱུར་ལ། དེ་བཞིན་དུ་ལྷ་རྣམས་ལ་ཡང་ངལ་བའི་སྐྱོན་མེད་པར་འགྱུར་རོ། །ཡིད་གསལ་བའི་ལྷ་རྣམས་ཀྱི་ལུས་ནི་ཡང་ལ་དྲི་མ་དང་བྲལ་བ་ཡིན་ནོ། །ཐམས་ཅད་དུ་འགྲོ་བར་ནུས་པ་དག་ནི་གཟུགས་ཇི་ལྟར་འདོད་པ་བཞིན་དུ་འགྱུར་ལ། ལྷ་དང་ལྷ་མོ་རབ་ཏུ་དགའ་བས་ཀུན་ཏུ་གང་བ། ལྷའི་ན་ཆུང་ཐམས་ཅད་ཚལ་དང་ཉེ་བའི་ཚལ་དག་ན་འཁོད་པ། ལྷ་དང་ལྷ་མོ་རྣམས་ལྷན་ཅིག་འདོད་པའི་ཡོན་ཏན་ལྔ་འདོད་པ་མྱོང་བར་བྱ་བ། སྡུག་པ་མྱོང་བར་བྱ་བ། ཡིད་དུ་འོང་བ་མྱོང་བར་བྱ་བ་དང་། བདེ་བར་གནས་པ་མྱོང་བར་བྱ་བ་རྣམས་ཀྱིས་དགའ་བར་བྱེད་དོ། །དེ་ལྟར་ཕན་ཚུན་གནས་པ་མཐོ་རིས་ཀྱི་གནས་རི་བྲགས་དང་། ཚལ་དང་ཉེ་བའི་ཚལ་གྱི་བར་སྣ་ཚོགས་དག་ན་འབྲལ་བའི་སྡུག་བསྔལ་རྩིས་ལ་མ་ཆགས་པར་ཡུལ་མི་བརྟན་པ་རྣམས་ཀྱིས་ཉིན་གཅིག་བཞིན་མྱོས་པ་ན་བག་མེད་པར་གནས་པ་དགའ་བའི་འདོད་ཆགས་ཀྱི་མོད་ལས་བྱུང་བའི་སྲེད་པས་བསླུས་པ་རྣམས། ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བའི་ལས་མཐོ་རིས་སུ་སྐྱེ་བའི་རྒྱུ་ལས་བྱུང་བ། བྱས་ཤིང་བསགས་པ་ཟད་པར་མ་གྱུར་པ་དེ་སྲིད་དུ་དགའ་བར་བྱེད་དོ། །དེ་ཕྱིས་དེ་ནས་འཆི་བར་འགྱུར་ཏེ། ཤི་ནས་ཀྱང་རང་གི་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་ཡང་ལེགས་པར་བྱས་པའི་ལས་ཀྱིས་མི་དང་སོ་སོ་ཡང་དག་པར་མྱོང་བར་འགྱུར་བའི་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་གྲོང་ཁྱེར་གྱི་དཔོན་པོའམ་ཡུལ་གྱི་དཔོན་པོར་འགྱུར་ཏེ། སྐྱེ་བོ་རྟག་ཏུ་དགའ་བ་རྣམས་ཀྱིས་གང་བའི་ཡུལ་དུ་སྐྱེ་བར་འགྱུར་ལ། ནད་མེད་པ་དང་། གཟུགས་བཟང་པོ་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ཕྲེང་ཐོགས་ཀྱི་གནས་ལ་རྟོག་པར་བྱེད་དེ། དེས་ཐོས་
པ་ལས་བྱུང་བའི་ཤེས་པས་ལྷ་ཕྲེང་ཐོགས་རྣམས་ཀྱི་གནས་ཐམས་ཅད་དགའ་བར་གནས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པའི་སེམས་པ་གང་གིས་གཞན་ལ་མི་གནོད་པར་མེ་ཏོག་བསྐྱེད་ནས་སམ། ཚོང་ཟོང་གིས་ཉོས་ནས་བཏོགས་ཏེ། སངས་རྒྱས་བཅོམ་ལྡན་འདས་ལ་ཕུལ་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཐམས་ཅད་དགའ་བར་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་བདེ་བ་རྣམ་པ་བཞི་མྱོང་བར་འགྱུར་ཏེ། འདི་ལྟ་སྟེ། འགྲན་ཟླ་མེད་པ་དང་། གར་དགའ་དགུར་འགྲོ་བ་དང་། ལྷ་གཞན་གྱི་ཟིལ་གྱིས་མི་ནོན་པ་དང་། ལྷ་མོ་ཡང་ལྷ་གཞན་ལ་མི་རྟེན་པ་དང་། སིལ་སྙན་ཡན་ལག་ལྔ་དང་ལྡན་པས་སྐྱིད་པར་བྱེད། ཡོངས་སུ་སྤྱོད་པར་བྱེད། རྩེ་བར་བྱེད། དགའ་བར་བྱེད། ཡང་དག་པར་དགའ་བར་བྱེད་ཅིང་གནས་སོ། །རྩེ་བ་རྣམ་པ་སྣ་ཚོགས་ཀྱིས་རྩེ་བར་བྱེད་དེ། འདི་ལྟ་སྟེ། ཆུ་ན་རྩེ་བ་དང་། པད་མའི་རྫིང་ལ་རྩེ་བ་དང་། མེ་ཏོག་ལ་རྩེ་བ་དང་། འབྲས་བུ་ལ་རྩེ་བ་དང་། སྤོས་ལ་རྩེ་བ་དང་། བྱ་ལ་རྩེ་བ་དང་། ཚལ་གྱི་ནང་ན་རྒྱུ་ཞིང་རྩེ་བ་དང་། བུང་བ་སྒྲ་འབྱིན་པས་རྩེ་ལ་ཕན་ཚུན་ལྟ་བས་མི་ངོམས་པའི་ལྷ་མོའི་ཚོགས་ཀྱིས་ཡོངས་སུ་བསྐོར་བ་དག་དགའ་བར་བྱེད་དོ། །ལྷ་དང་ལྷ་མོ་ཕན་ཚུན་དུ་ཕྲག་དོག་བྱེད་པའི་སྡུག་བསྔལ་སྤངས་པ་དག་དྲི་ཤིན་ཏུ་ཞིམ་པོས་ལེགས་པར་བདེ་བ་དང་ལྡན་ནོ། །གནས་དེ་ན་པད་མའི་རྫིང་རྣམས་ཀྱིས་ཀྱང་ཡོངས་སུ་བསྐོར་བ་ཡིན་ཏེ། །འདི་ལྟ་སྟེ། པད་མའི་རྫིང་ཤིན་ཏུ་དྲི་ཞིམ་པ་དང་། པད་མ་མ་རྙིས་པའི་པད་མའི་རྫིང་དང་། པད་མ་དང་། ཨུད་པ་ལར་འདྲེས་པ་དང་ལྡན་པའི་པད་མའི་རྫིང་དང་དེ་དང་གཞན་དག་གིས་ཀྱང་རྟག་ཏུ་གང་བའི་པད་མའི་རྫིང་དག་ཡོད་དེ། རྣམ་པ་དེ་ལྟ་བུའི་པད་མ་རྣམ་པ་དུ་མ་དག་གིས་པད་མའི་རྫིང་དེ་ཀུན་ནས་ཁེབས་པ་ཡིན་ནོ། །དེ་རྣམས་སུ་ལྷ་དགའ་བ་ལ་གནས་
པ་དག་ཤིན་ཏུ་ཉམས་དགའ་བ་དང་། མཆོག་ཏུ་བདེ་བར་བྱེད་པ་རྣམ་པ་སྣ་ཚོགས་ཀྱི་བདེ་བ་མྱོང་ངོ་། །ཚལ་གསེར་གྱི་ལོ་མ་ཅན་བུང་བས་འཁྲིགས་པའི་ཚལ་གྱི་བར་བར་དག་ན་ཡང་དགའ་བར་བྱེད་དོ། །སྤོས་སྣ་ཚོགས་དང་ལྡན་པ་དག་ན་བྱ་སྒྲ་སྙན་པ་འབྱིན་པ་དག་ཀྱང་ཐོས་ཏེ། དེའི་ཁྱད་པར་ནི་མིའི་སིལ་སྙན་ཡན་ལག་ལྔ་དང་ལྡན་པ་དག་གིས་བཅུ་དྲུག་གི་ཆར་ཡང་མི་ཕོད་དོ། །དེ་ལྟར་དེ་དག་གི་མིག་ཀྱང་གཟུགས་རྣམས་ཀྱིས་ཡང་དག་པར་ཚིམ་པར་བྱེད། རྣ་བ་ཡང་རོལ་མོ་སྣ་ཚོགས་དང་གླུ་རྣམ་པ་སྣ་ཚོགས་ཀྱིས་སྙན་པར་བྱེད། པགས་པ་ཡང་གོས་ཐགས་སུ་མ་བཏགས་པ་རྣམས་ཀྱིས་འཇམ་པར་བྱེད། སྣ་ཡང་ལྷའི་དྲི་རྣམ་པ་དུ་མས་ཞིམ་པར་བྱེད་དེ། དེ་ལྟར་ཡུལ་ལྔ་ལ་ཆགས་པ་དེ་དགའ་བ་རྣམ་པ་དུ་མ་དང་། གཟུགས་རྒྱུན་མི་འཆད་པ་གཞན་གྱིས་མི་འཕྲོགས་པ་གཞན་གྱིས་བསྐྲུན་དུ་མེད་པའི་བདེ་བ་དུ་མ་དང་། ལྷའི་བཟའ་བ་དང་བཏུང་བ་མདོག་བཟང་བ་དྲི་དང་རོ་ཞིམ་པ་དུ་མ་དག་ཀྱང་མྱོང་ངོ་། །དེ་གར་དགའ་བར་ཡང་འགྲོ་སྟེ། རང་གི་ལས་དང་འཐུན་པར་གར་དགའ་བར་འགྲོའོ། །དེ་ལྟར་དེ་ཚལ་ནས་ཚལ་དང་། པད་མའི་རྫིང་ནས་པད་མའི་རྫིང་དང་། ཉེ་བའི་ཚལ་ནས་ཉེ་བའི་ཚལ་དག་ཏུ་ལྷ་མོའི་ཚོགས་དུ་མས་ཡོངས་སུ་བསྐོར་ཏེ་ཡོངས་སུ་རྒྱུ་བར་བྱེད་ཅིང་བདེ་བ་སྣ་ཚོགས་དག་ལ་གནས་སོ། །དེ་འདོད་པ་སྡུག་པ་ཡིད་དུ་འོང་བའི་ལས་ཀྱི་འབྲས་བུ་ལ་ཉེ་བར་སྤྱོད་པ་ན། ཤིང་ལྗོན་པ་རང་གི་འོད་དང་ལྡན་པ་རྣམས་ཀྱིས་ཡོངས་སུ་བསྐོར་བ། གསེར་གྱི་བྱའི་ཚོགས་ཀྱི་སྒྲ་ཐོས་ན་ཡིད་དགའ་བར་བྱེད་པ་རྣམས་ཀྱིས་རྣ་བར་སྙན་པར་བྱེད་དེ། དེ་ལྟར་དེ་ལྷའི་གཟུགས་ཀྱི་བདེ་བ་དཔེ་མེད་པ་དུ་མས་གཞན་གྱིས་མི་འཕྲོགས་པ་དེ་ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བ། ཞིང་དམ་པས་བསྐྱེད་པ། མཐར་མྱ་ངན་ལས་འདའ་བར་འགྱུར་བའི་ལས་ཟད་པར་མ་གྱུར་པ་དེ་སྲིད་དུ་མྱོང་བར་བྱེད་དོ། །གང་གི་ཚེ་ཟད་པར་གྱུར་ཏེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་རང་གི་
ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་དང་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མི་རྣམས་ཀྱི་ནང་དུ་སྐྱེས་ན། དེ་གྲོང་ཁྱེར་རམ་གྲོང་ཁྱེར་ཆུང་ངུར་དབང་བྱེད་པར་འགྱུར། འབྱོར་པ་མང་བ་དང་། བློ་རྒྱ་ཆེ་བ་དང་། བྲན་ཁོལ་དུ་མ་དང་ལྡན་པ་དང་། ཤིན་ཏུ་བདེ་བ་དང་ལྡན་པ་དང་། ཞིང་བཟང་པོ་ལ་ལེགས་པར་བྱས་པའི་ལས་དེས་མཐར་མྱ་ངན་ལས་འདའ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ཕྲེང་ཐོགས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷའི་འཇིག་རྟེན་གྱི་གནས་དག་ན་ལྷའི་གནས་འགྲོ་མགྱོགས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་པ་གང་གིས་ཚལ་མེས་བསྲེགས་པའི་གསབ་གསེབ་ཏུ་སྲོག་ཆགས་དག་སྲེག་པ་ན། ཆུས་གཏོར་ཏེ་ཐར་བར་བྱས་པ་དང་། སྐད་ཅིག་དེ་ལ་ཤི་བ་ལ་ཐུག་པ་རྣམས་ཀྱི་འཇིགས་པ་བསྐྱབས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་ཕྲེང་ཐོགས་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་མི་འཇིགས་པ་སྦྱིན་པར་བྱེད་པ། མི་འཇིགས་པ་སྦྱིན་པའི་ཚུལ་ཁྲིམས་ཀྱི་རྒྱུ་ལས་བྱུང་བ་དེ་ལྷའི་བདེ་བ་དཔེ་མེད་པ་དེ་མྱོང་བར་འགྱུར་རོ། །དེའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་བདེ་བ་དག་འཐོབ་ལ། ལྷ་མོའི་ཚོགས་བརྒྱ་ཕྲག་དུ་མ་དག་གིས་ཡོངས་སུ་བསྐོར་ཅིང་སིལ་སྙན་དང་། བྲོ་གར་དང་། དགའ་དགུར་སྤྱོད་པའི་ཚོགས་མང་པོ་བརྒྱ་སྙེད་ཀྱིས་ཡོངས་སུ་བསྐོར་ཏོ། །གཞལ་མེད་ཁང་ཆེན་པོ་གསེར་གྱི་ལན་ཀན་ནི་བྲེས། དྲིལ་བུ་གཡེར་ཀའི་སྒྲ་ནི་དྲག་ཏུ་འཁྲོལ། མུ་ཏིག་གི་དྲ་བས་ནི་སྐར་ཁུང་གཡོགས། ནོར་བུ་སྔོན་པོ་བརྒྱ་སྙེད་ཀྱིས་བརྒྱན་པ་དག་ན། ལྷ་མོའི་ཚོགས་དུ་མས་ཡོངས་སུ་བསྐོར་ཅིང་དགའ་བར་བྱེད་དོ། །ལྷ་མོ་གང་དང་གང་མཐོང་བ་དེ་
དང་དེ་དག་གི་རྗེས་སུ་ཡིད་ཆགས་ཤིང་། དེ་དག་ལ་དགའ་བ་བསྐྱེད། དེ་དག་ལ་མིག་ཆགས་དེ་དག་ལ་རྗེས་སུ་ཆགས་ལ། དེ་བདེ་བ་ལ་མངོན་པར་རྟོག་པ་ན། རྒྱན་དང་ཆ་བྱད་སྣ་ཚོགས་འབུམ་སྙེད་ཀྱིས་བརྒྱན་པ། ལུས་རྟག་ཏུ་སྤོས་ཀྱིས་བྱུགས་པ། རྟག་པར་རབ་ཏུ་དགའ་བ་རྣམས་ཀྱིས་ཡོངས་སུ་བསྐོར་བ་ཡིན་ཏེ། དེ་ལྟར་ཚུལ་དང་འཐུན་པ་རྣམས་མཐོང་ནས། ཤིན་ཏུ་དགའ་བར་བྱེད་དོ། །རྣ་བས་སྒྲ་མཉན་པར་བྱ་བ་ཡང་འདོད་པ་སྡུག་པ་ཡིད་དུ་འོང་བ་རྣམ་པ་དུ་མ་དག་ཐོས་ཏེ། འདི་ལྟ་སྟེ། གསེར་གྱི་བྱ་རྐང་པ་དང་མཆུ་བྱི་རུ་ལྟར་དམར་བ། རི་དང་འབབ་ཆུ་དང་། གསབ་གསེབ་ན་འཁོད་པ་སྣ་ཚོགས་དག་གི་སྒྲ་རྣམས་ཐོས་སོ། །གང་དག་དཔེ་བྱ་བར་ཡང་མི་ནུས་པ་དེ་དག་ཁ་ཅིག་ནི་རིལ་དོང་སྟེ། མངོན་པར་དགའ་བར་བྱེད་དོ། །ཁ་ཅིག་ནི་རིའི་གསེབ་ཏུ་དོང་། ཁ་ཅིག་ནི་མེ་ཏོག་གི་གསེབ་ཏུ་དོང་། ཁ་ཅིག་ནི་ཆུའི་ནང་ན་རྒྱུ། ཁ་ཅིག་ནི་ནམ་མཁའ་ལ་དོང་། ཁ་ཅིག་ནི་གད་ཁ་དང་སྨན་ལྗོངས་སུ་དོང་། །ཁ་ཅིག་ནི་གསེར་གྱི་རིའི་ཕུག་ཏུ་དོང་ནས་སྒྲ་སྙན་པ་འབྱིན་ཏེ། དེ་ལྟར་རྣ་བས་ཀྱང་འདོད་པ་སྡུག་པ་ཡིད་དུ་འོང་བ་ཐོས་སོ། །སྣས་ཀྱང་ཤིན་ཏུ་དྲི་ཞིམ་པ་མྱོང་སྟེ། འདི་ལྟ་སྟེ། མེ་ཏོག་དྲིའི་ངད་དང་ལྡན་པ་དཔེ་མེད་པ་དུ་མ་བསྣམས་ན་བདེ་བ་དང་། ལྷ་མོ་དྲི་བསུང་དང་ལྡན་པ་དང་། གཞན་ཡང་དྲི་ཞིམ་པོ་རྣམ་པ་སྣ་ཚོགས་དག་ལ་སྣོམ་པར་བྱེད་དེ། དེ་ལྟར་སྣས་ཀྱང་དྲི་འདོད་པ་སྡུག་པ་ཡིད་དུ་འོང་བ་དག་ལ་སྣོམ་པར་བྱེད་དོ། །ལྕེས་ཀྱང་རོ་མྱོང་བར་བྱེད་དེ། འདི་ལྟ་སྟེ། བདུད་རྩི་རྣམ་པ་དུ་མ་དག་གི་ཁྱད་པར་གང་ཡིན་པ་དག་ནི་མིའི་སྦྲང་ཆང་དང་སྦྱར་བའི་ཆང་གིས་འབུམ་གྱི་ཆར་ཡང་མི་ཕོད་དོ། །དེ་ནི་ཆུང་ཟད་ཅིག་དཔེར་བྱ་བ་ཡིན་ནོ། །ལུས་ཀྱིས་ཀྱང་གང་དང་གང་ལ་རེག་པ་ཐགས་སུ་མ་བཏགས་པའི་གོས་ཉིད་ལ་རེག་པར་བྱེད་དེ། དེ་དག་ཀྱང་འཇམ་ཞིང་ནེམ་ལ་སྲབ་པ། རེག་ན་བདེ་ཞིང་དགའ་བ་རྣམ་པ་དུ་མ་དག་གྱོན་ནོ། །ཡིད་ཀྱིས་གང་དང་གང་བསམས་པ་དེ་དང་དེ་ཉིད་ལ་འགྲུབ་པར་འགྱུར་ཏེ།
འགྲུབ་པ་གང་ཡིན་པ་དེ་ནི་འདོད་པ་སྡུག་པ་ཡིད་དུ་འོང་བ་གཞན་དང་ཐུན་མོང་མ་ཡིན་པ་འགྲུབ་པར་འགྱུར་རོ། །དེ་ལྟར་སྲེད་པ་དྲུག་པོ་རྣམ་པ་དུ་མ་དག་ལ་བློ་རྣམ་པར་ཆགས་པ་དེ་བདེ་བ་དུ་མ་འབྱོར་ཅིང་ལྡན་པར་གྱུར་ནས་པད་མའི་ཚལ་དུ་མའི་ནང་ན་མངོན་པར་དགའ་བར་བྱེད་དོ། །དེ་བཞིན་དུ་བྱི་རུ་དང་གསེར་བཙོ་མའི་ཚལ་དུ་མ་དང་། བྱ་སྒྲ་སྙན་པ་འབྱིན་པ་རྣམ་པ་སྣ་ཚོགས་ཀྱི་ནང་ན་མངོན་པར་དགའ་བར་བྱེད་དོ། །དེ་བཞིན་དུ་ལྷ་མོའི་ནང་དུ་སོང་ནས་དགའ་བར་བྱེད་དོ། །དེ་བཞིན་དུ་ནོར་བུའི་གཞལ་མེད་ཁང་གི་ནང་ན་དགའ་བར་བྱེད་དོ། །དེ་བཞིན་དུ་ལྷའི་པད་མའི་རྫིང་གིས་ཡོངས་སུ་བསྐོར་བ། ཆུ་བོ་དང་། འབབ་ཆུའི་ཕྱོགས་བཀྲ་ཤིས་པ་རྣམས་སུ་དགའ་བར་བྱེད་དོ། །དེ་ལྟར་རྣམ་པར་སྨིན་པ་སྲེད་པ་སྣ་ཚོགས་དེ་དགེ་སློང་དེས་ཐོས་པ་ལས་བྱུང་བའི་ཤེས་པས་མངོན་པར་བརྟགས་ནས་འདི་ལྟར་ཚིགས་སུ་བཅད་དེ་སྨྲས་པ། དབང་པོ་དྲུག་ལས་བྱུང་བ་ཡི། །ཡུལ་གྱི་བུད་ཤིང་སྲེག་བྱེད་པ། །སྲེད་པའི་མེ་ཡིས་ལྷ་རྣམས་སྲེག །ཤིང་མེས་དེ་ལྟར་ག་ལ་སྲེག །བདེ་བས་ཡོངས་སུ་བསླུས་པ་རྣམས། །བདེ་ལ་དགའ་ཞིང་བདེ་བས་བསྒྲིབས། །སྲེད་པས་ཡོངས་སུ་བསླུས་པ་རྣམས། །ལྟུང་བར་འགྱུར་བ་མི་ཤེས་སོ། །བདེ་ཀུན་ཟད་པའི་མཐར་འགྱུར་ཏེ། །བདེ་བ་ལ་ནི་རྟག་པ་མེད། །ལྷ་དག་ལྷ་ཡི་འཇིག་རྟེན་ནས། །འཆི་བའི་སྡུག་བསྔལ་གང་ཡིན་དང་། །དམྱལ་བར་སྡུག་བསྔལ་གང་འབྱུང་དང་། །བྲལ་བ་སྔོན་དུ་འདྲེན་བྱེད་པས། །གལ་ཏེ་བདག་ཉིད་བདེ་འདོད་ན། །དེ་ཕྱིར་དེ་ལ་ཆགས་མི་བྱ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉེར་དྲུག་པ། དགེ་སློང་དེས་དེ་ལྟར་རྗེས་སུ་བསམས་ནས་འཇིག་རྟེན་དུ་གཏོགས་པའི་བདེ་བ་རང་དབང་མེད་ཅིང་མི་བརྟན་པ་མཐར་ལྟུང་བར་འགྱུར་བ་དེ་དག་ལ་ཡང་མངོན་པར་བརྟགས་ཏེ། ཀྱེ་མ་སེམས་ཅན་འདི་དག་ནི་སྲེད་པས་ཡོངས་སུ་བསླུས་ནས་ལྟུང་བར་འགྱུར་བ་ཁོང་དུ་མ་ཆུད་དོ་སྙམ་ནས། དེ་མཐོ་རིས་ལ་ཡང་སེམས་འདོད་ཆགས་དང་བྲལ་
ལོ། །དེ་ལྟར་ལྷ་དེ་ལྷའི་འཇིག་རྟེན་དེ་ན་ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པ་ཟད་པར་མ་གྱུར་པ་དེ་སྲིད་དུ་ལྷ་མོ་དེ་དག་དང་དགའ་བར་བྱེད་ཡོངས་སུ་སྤྱོད་པར་བྱེད་དོ། །དེ་ཕྱིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་ཤིན་ཏུ་བདེ་བ་དང་ལྡན་ཞིང་རྟག་ཏུ་འཇིགས་པ་མེད་པ་དང་། སྐྱེ་བོ་ཐམས་ཅད་དགའ་བ་དང་། རྒྱལ་པོས་བཀུར་བ་དང་། ཇི་སྲིད་འཚོའི་བར་དུ་གནོད་པ་མེད་ལ་མི་འཇིགས་པ་བྱིན་པ་དེ་ཕྱིས་མཐར་མྱ་ངན་ལས་འདའ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ཕྲེང་ཐོགས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་ཕྲེང་ཐོགས་རྣམས་ཀྱི་གནས་ཡུལ་ལ་ཆགས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་བྱས་པའི་ལས་ཀྱི་མཐའ་སྤྱད་པ། ཕན་པར་འདོད་པའི་སེམས་དང་ལྡན་པ་གང་གིས་མཛའ་བཤེས་དང་། གཉེན་འདབ་དང་། རྩ་ལག་དག་སོ་སོར་ཕྱེ་སྟེ། གཅིག་ལ་གཅིག་གནོད་པར་བྱེད་པའི་བློ་ཅན་དག་བསྡུམ་བྱས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཡུལ་ལ་ཆགས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ་དེ། གནས་དེར་བསམ་པ་དགའ་དགུར་འགྲུབ་སྟེ། གང་དང་གང་བསམས་པ་དེ་དང་དེ་དག་དེ་ནས་འཐོབ་པར་འགྱུར་རོ། །འདི་ལྟ་སྟེ། རྒྱན་དང་བགོ་བ་སྣ་ཚོགས་དང་། དེ་བཞིན་དུ་རྣ་ཆ་གདུབ་ཀོར་དང་། དཔུང་རྒྱན་དེ་དག་མཐོ་རིས་དང་འཐུན་པར་འཐོབ་བོ། །ཆུ་བོ་དང་འབབ་ཆུ་དང་སལ་སུལ་དང་། གླུ་དང་རོལ་མོའི་སྒྲ་དབྱངས་སྣ་ཚོགས་འབྱུང་བ་དང་། འདི་ལྟ་སྟེ། བྱ་ཏན་
ད་པའི་སྒྲ་རྣམས་ཀྱི་ནང་ན་དགའ་བར་བྱེད། ལྷ་མོའི་གླུ་དབྱངས་སྙན་པ་བྲག་ཅ་འབྱིན་པས་ཀྱང་དགའ་བར་བྱེད་དེ། དེ་རྟག་ཏུ་ཡིད་དགའ་བ་ཡིན་ནོ། །ངང་པའི་ཤིང་རྟ་རིན་པོ་ཆེ་སྣ་ཚོགས་ཀྱིས་བརྒྱན་པ། རིན་པོ་ཆེ་སྣ་བདུན་གྱིས་སྤྲས་པ་རྣམས་ཀྱིས། ཚལ་དང་ཉེ་བའི་ཚལ་དང་། འབབ་ཆུ་དང་། པད་མའི་ཚལ་རྣམས་སུ་རྒྱུ་བར་བྱེད་དོ། །ལྷ་མོའི་ཚོགས་ཀྱིས་ཡོངས་སུ་བསྐོར་ཅིང་ཚལ་དང་ཉེ་བའི་ཚལ་བཟང་པོས་འཚོ་ལ། གསེར་གྱི་པད་མ་རྣམས་ཀྱི་ནང་ན་མངོན་པར་དགའ་བར་བྱེད་དོ། །དེ་ན་ཚལ་འདི་ལྟ་བུ་དག་ཡོད་དེ། འདི་ལྟ་སྟེ། བྱི་རུའི་ཚལ་དང་། བཻ་ཌཱུརྱའི་ཚལ་དང་། ཤིང་ཏ་ལ་བ་ཏིན་ཏུ་ཀའི་ཚལ་དང་། བྱ་མྱོས་པའི་ཚལ་དང་། པད་མ་དང་ལྡན་པའི་ཚལ་དང་། བྱ་ཏན་ད་པའི་ཚལ་དང་། ཁུ་བྱུག་གི་ཚལ་ཏེ། ཚལ་དེ་རྣམས་སུ་ལེགས་པར་བྱས་པའི་ལས་ཀྱི་ས་བོན་གྲོགས་སུ་གྱུར་པ་དགའ་བར་བྱེད་དོ། །ཆུ་བོ་ཡང་ལྷའི་ཆུ་བོ་དང་བ་དག་ཡོད་དེ། འདི་ལྟ་སྟེ། འབབ་ཆུ་དང་། པད་མ་དང་། ཉེ་བའི་ཚལ་དང་། ལྟེང་ཀ་ནོར་བུས་བརྒྱན་པ་དང་། ཡིད་ལ་ཇི་ལྟར་འདོད་པའི་ཆུ་སྒྲ་ཡིད་དུ་འོང་བ་དང་། བྱའི་སྒྲ་མྱུར་བར་འབྱུང་སྟེ། ཆུ་བོ་དེ་དག་གིས་གནས་གང་ཡིན་པ་རྟག་ཏུ་བརྒྱན་པ་ཡིན་ནོ། །འདི་ལྟ་སྟེ། གང་ན་ཆུ་བོ་འབབ་པ་མེད་པ་ན། གཟུགས་དང་། སྒྲ་དང་། དྲི་དང་། རོ་རྣམ་པ་སྣ་ཚོགས་དང་། བུད་མེད་གཟུགས་སྣ་ཚོགས་དང་ལྡན་ཡང་། གང་ཡོན་ཏན་དང་མི་ལྡན་པའམ། སྦྲུམ་མ་ལྟ་བུར་མི་མཛེས་ལ། དེ་བཞིན་དུ་མཐོ་རིས་ཀྱི་གནས་དེར་དགའ་བར་མི་འགྱུར་རོ། །དེ་ལྟ་བས་ན་ལྷའི་འཇིག་རྟེན་ན་ཆུ་གཙོ་བོ་ཡིན་ཏེ། ཆུ་ལས་སྐྱེ་བ་འབྱུང་། ཆུས་མངོན་པར་དགའ་བར་བྱེད་ལ། ཀུན་ནས་ཉོན་མོངས་པ་རྣམས་ཀྱི་རོ་དང་། ཉེ་བའི་ཚལ་དུ་བགྲོད་པ་དེའི་ནང་ན། འདི་ལྟ་སྟེ། ཆུ་འདི་ནི་རོའི་མཆོག་ཡིན་ནོ། །དེ་ལྟ་བས་ན་ལྷ་དང་། མི་རྣམས་ཀྱི་རྒྱན་དུ་གྱུར་པ་དང་། ཡོ་བྱད་དུ་གྱུར་པ་ནི་ཆུ་ཡིན་ལ། ལྷ་དང་མི་ཀུན་གྱི་བྱ་བ་འམ། དོན་ནི་དེ་ལ་རག་ལས་པ་ཡིན་ནོ། །ཆུ་ཡོན་ཏན་དེ་ལྟ་བུ་དང་ལྡན་པར་རིག་ནས།
ཆུ་ལ་མངོན་པར་དགའ་བའི་ལྷ་དེ་དག་མངོན་པར་དགའ་བར་བྱེད། ཡོངས་སུ་སྤྱོད་པར་བྱེད་ལ། ཆུ་སྒྲ་ལྷུང་ལྷུང་པོར་འབབ་པ་དེ་དག་ཏུ་དགའ་བར་བྱེད་དོ། །དེ་ཆུ་བོའི་འགྲམ་དེ་དག་ཏུ་མངོན་པར་རྩེས་ནས། ཆུ་མེ་ལོང་ལྟར་གསལ་བ་ག་ལ་བ་དེར་འགྲོ་བར་བྱེད་དོ། །དེ་ལྷའི་ཚལ་ལྷའི་བདེ་བ་ཕུན་སུམ་ཚོགས་པ་དེ་ན་ཤིང་ལྗོན་པ་མེ་ལོང་ལྟར་གསལ་བ་མཐོང་ངོ་། །ཤིང་ལྗོན་པ་དེ་དག་གི་སྡོང་པོ་མེ་ལོང་ལྟར་གསལ་ལ། དེ་དག་གི་ནང་དུ་གང་གིས་ལེགས་པར་བྱས་པའི་ལས་ངེས་པར་མྱོང་བར་འགྱུར་བ་བྱས་པ་དག་ཐམས་ཅད་ནས་ཐམས་ཅད་དུ་སྣང་ངོ་། །ལེགས་པར་བྱས་པའི་ལས་དེ་དག་གི་མཐུས་ཤིང་དེ་དག་གམ། ཚལ་གྱི་བར་གྱི་ས་གཞི་གསལ་བ་དེ་དག་ཏུའམ། གསེར་གྱི་ས་གཞི་མེ་ལོང་ལྟ་བུར་གསལ་བའམ། ཚལ་གྱི་བར་གྱི་ས་གཞི་བསིལ་བ་རྣམས་སུ་གང་དང་གང་ལེགས་པར་བྱས་པ་དང་། ཉེས་པར་བྱས་པ་དེ་དང་དེའི་ལེགས་པར་བྱས་པའི་ལས་ཀྱི་མཐུས་གནས་དེ་རྣམས་སུ་མཐོང་བར་འགྱུར་རོ། །ཤིང་ལྗོན་པ་དེ་དག་ལའམ། ཚལ་གྱི་བར་གྱི་ས་གཞི་དེ་དག་ཏུའམ། ས་གཞི་བསིལ་བ་དེ་དག་ཏུ་ལས་ལེགས་པར་བྱས་པའི་བདེ་བ་དང་། ཚེ་རབས་བརྒྱ་སྙེད་ནས་བསགས་པའི་ཉེས་པར་བྱས་པ་དེ་དག་ཀྱང་མཐོང་ངོ་། །དེ་ལེགས་པར་བྱས་པའི་ལས་ཀྱིས་བསྒྲུབས་པ་མཐོང་བ་དང་། ས་དེ་རྣམས་དང་གཞན་དག་ལ་ཡང་སྔ་མ་བཞིན་དུ་དགའ་བར་བྱེད་དོ། །དེས་ཇི་ལྟར་སྔོན་སྐྱེ་བ་དང་། འཆི་བའི་ལས་ཀྱི་འབྲས་བུ་བྱས་ཤིང་། འགྲོ་བ་ལྔར་གཏོགས་པའི་བདེ་བ་དང་། སྡུག་བསྔལ་བསྒྲུབས་པའི་ལས་དེ་དག་ཇི་ལྟ་བ་བཞིན་མཐོང་སྟེ། དེས་གལ་ཏེ་སེམས་ཅན་དམྱལ་བའི་ལས་མི་གཙང་བར་བྱས་ན་དེས་དེ་བཞིན་དུ་མཐོང་ངོ་། །སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་ལ་སོགས་པར་སེམས་ཅན་དམྱལ་བའི་གནོད་པ་གང་འབྱུང་བ་དེ་དག་ཐམས་ཅད་སྔ་མ་བཞིན་དུ་མཐོང་སྟེ། སེམས་ཅན་དམྱལ་བ་རྣམས་སུ་འབྱུང་བ་ཡན་ཆད་སྔ་མ་བཞིན་དུ་མཐོང་ངོ་། །ཇི་ལྟར་ལྷ་རྣམས་ཀྱི་བདེ་བ་དཔེ་མེད་པ་དེ་
ལྟར་སེམས་ཅན་དམྱལ་བ་པ་རྣམས་ཀྱི་སྡུག་བསྔལ་རྣམ་པ་དུ་མ་ཡང་མཐོང་སྟེ། དེ་སེམས་ཅན་དམྱལ་བ་དེར་གཏོགས་པའི་སྡུག་བསྔལ་ལས་ཆེས་སྡུག་བསྔལ་བ་མངོན་པར་མཐོང་ངོ་། །བདག་གཅིག་པུས་མཐོང་བ་དང་། གང་ལྷའི་འཇིག་རྟེན་དུ་གཏོགས་པ་དང་། ལྷའི་བདེ་བ་ཡུལ་གྱི་རྣམ་པ་དེ་ལྟར་བྱུང་བ་དེ་དག་ཀྱང་ཇི་ལྟར་ཚེ་རབས་གཞན་དུ་ཉེ་བར་སྤྱད་པ་དེ་ལྟར་མ་བརྗེད་དེ་དེས་མཐོང་ངོ་། །ཤིན་ཏུ་མི་འཐུན་པར་གྱུར་པ་སེམས་ཅན་དམྱལ་བའི་སྡུག་བསྔལ་རྣམ་པ་མང་པོ་དེ་དག་དེས་མཐོང་ནས། བདེ་བ་དེ་ཐམས་ཅད་བདེ་བར་ཚོར་བ་མེད་དེ། འདི་ལྟ་སྟེ། ཆུ་བོ་གང་གཱའི་ནང་དུ་ལན་ཚྭ་སྲང་གཅིག་བཏབ་པ་མི་ཚོར་བ་དེ་བཞིན་དུ། དེའི་ཡིད་ལས་བྱུང་བ་ངེས་པར་མྱོང་བར་འགྱུར་བའི་ལྷའི་བདེ་བ་དེ་དག་ཚོར་བ་མེད་དོ། །གླུ་དབྱངས་དང་། སིལ་སྙན་གྱི་དབྱངས་ལ་དགའ་བ་དང་། བྱའི་སྒྲ་དི་རི་རི་འདོན་པ་ཡང་བདག་ཉིད་ཀྱི་གནས་སྐབས་དེ་དག་དྲན་ནས། ཚལ་གྱི་བར་གྱི་ས་གཞི་དག་ལ་བདེ་བ་སོ་སོར་མྱོང་བ་མེད་དོ། །དེ་གལ་ཏེ་ལྷའི་བདེ་བ་དེས་སེམས་གཡེངས་ནས་བརྗེད་པ་དང་། ཡང་དེ་ཕྱོགས་གཞན་ཞིག་གི་ཤིང་ལྗོན་པའི་སྡོང་པོ་དག་ལ་བདག་ཉིད་ཡི་དགས་སུ་གྱུར་ནས་སྡུག་བསྔལ་རྣམ་པ་སྣ་ཚོགས་ཀྱིས་གཟིར་ཅིང་ལུས་བཀྲེས་པ་དང་སྐོམ་པས་གདུངས་པར་མཐོང་ངོ་། །ངེས་པར་མྱོང་བར་འགྱུར་བའི་ལས་དེས་བསྐུལ་བ་དེ། བདག་ཉིད་དེ་ལྟར་མཐོང་ནས་དེ་ནས་ཡང་འཇིགས་པ་སྐྱེས་ཏེ། དེས་ལྷ་གཞན་དག་ལ་འདི་སྐད་སྨྲས་སོ། །གྲོགས་པོ་དག་ཤིང་ལྗོན་པ་རྣམས་ལ་མི་སྡུག་པ་འདི་དག་མཐོང་ངམ། ཇི་ལྟར་བདག་གིས་མཐོང་བ་ལྟར་ཅི་ཁྱེད་ཀྱིས་མཐོང་ངམ། དེ་དག་གིས་འདི་སྐད་སྨྲས་སོ། །བདག་ཅག་གིས་མ་མཐོང་སྟེ། གང་གིས་ངེས་པར་མྱོང་བར་འགྱུར་བའི་ལས་མ་བྱས་པ་དེ་དག་གིས་ནི་དེ་ཉིད་མི་མཐོང་ལ། གང་གིས་བྱས་པ་དེས་ནི་མཐོང་ངོ་། །བདག་ཉིད་ཡི་དགས་ཀྱི་འཇིག་རྟེན་དུ་འགྲོ་བ་དེས་ལྷ་དེ་དག་ལ་སྨྲས་པ། གྲོགས་པོ་དག་ཁྱེད་ཀྱིས་མཐོང་ངམ། དེས་སྨྲས་པ། མཐོང་ངོ་། །དེ་གཉིས་ཡི་དགས་ཀྱི་འགྲོ་བ་དེར་སྡུག་བསྔལ་ཆེན་པོ་མཐོང་ནས་ཇི་ལྟར་ཚེ་
རབས་སྟོང་དུ་གྱུར་པ་དེ་ལྟར་ལྷའི་བདེ་བ་དེ་དག་བརྗེད་དེ། དེ་ཤིན་ཏུ་ཡི་ཆད་ནས་དེ་ནས་ཡང་ཡུལ་དེ་ནས་འཕོ་བར་བྱེད་དོ། །དེ་ནས་ཡང་ལྷའི་བདེ་བའི་དབང་དུ་གྱུར་ནས། དེ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་ཡིད་དུ་འོང་བ་ལ་ནི་ཆགས། ཚལ་དང་། ཉེ་བའི་ཚལ་དང་། པད་མའི་རྫིང་གི་འགྲམ་རྣམ་པ་སྣ་ཚོགས་དང་། བྱ་སྒྲ་སྣ་ཚོགས་འབྱིན་པ་དང་། ཚལ་གྱི་བར་བར་དག་ན་དགའ་བར་བྱེད་ལ། ལྷ་མོ་ཆ་བྱད་སྣ་ཚོགས་ཐོགས་པ་དང་ཡང་ལྷན་ཅིག་དགའ་བར་བྱེད་དོ། །དེ་ནས་ཡང་སྲེད་པས་བདས་པ་ན། ཡང་སྐབས་ཤིག་ཏུ། མེ་ལོང་ལྟ་བུའི་ཚལ་དུ་སོང་བ་དང་། དེ་ནས་ཡང་ངེས་པར་མྱོང་བའི་ལས་ཀྱི་སྐུལ་བས་བསྐུལ་བ་བདག་ཉིད་དུད་འགྲོར་སོང་ནས་གཅིག་ལ་གཅིག་ཟ་བ་དེ་མཐོང་སྟེ། གཞན་གྱིས་ཀྱང་དེ་ལ་ཟ་ལ་དེས་ཀྱང་གཞན་ལ་ཟ་བ་དུད་འགྲོ་ཕན་ཚུན་ཟ་བའི་སྡུག་བསྔལ་ཆེན་པོ་ཇི་ལྟར་སྔོན་དེས་བྱས་པ་བདག་ཉིད་ཀྱིས་མཐོང་ངོ་། །དེས་བདག་ཉིད་དེ་ལྟ་བུར་གྱུར་པ་མཐོང་ནས་དེ་ནས་ཡང་མི་དགའ་བ་ཆེན་པོ་སྐྱེས་ཏེ། བདག་ཉིད་ཀྱི་གཟུགས་ཆེ་ལ་མི་སྡུག་པ་སྡུག་བསྔལ་གྱི་རྣམ་པ་མང་པོ་དུ་མ་ཅི་སྟེ་མཐོང་ཞིག་གུ་སྙམ་ནས་དེས་ཡང་གཞན་དག་ལ་ཡང་སྔ་མ་བཞིན་དུ་སྨྲས་སོ། །དེ་ནས་ཡང་ཡུལ་ལ་སེམས་རྣམ་པར་ཆགས་པ། ཡུལ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་སྡུག་པ་རྣམས་ཀྱི་དབང་དུ་གྱུར་པ་དག་དེ་ལྟར་འཁོར་བའི་སྡུག་བསྔལ་གྱི་ཕྱང་མོ་ལ་ཉུག་གོ །དེ་ནས་ཡང་མེ་ལོང་ལྟ་བུའི་ཚལ་དེ་ཉིད་དུ་མིར་སྐྱེས་པ་མཐོང་སྟེ། ཇི་ལྟར་མཛའ་བཤེས་དང་། གཉེན་འདུན་དང་། རྩ་ལག་ཕན་ཚུན་ཁོ་ན་བྱུང་སྟེ། བྱེ་བ་དག་སྡུད་ཅིང་བསྡུམ་བྱས་པའི་ཚུལ་ཁྲིམས་ཀྱི་ལས་དང་ལྡན་པ་ཐམས་ཅད་དེས་མཐོང་བ་དང་། བདག་ནི་རྒྱུ་དེ་དང་། རྐྱེན་དེ་དང་། གཞི་དེས་ལུས་དང་བྲལ་ནས་བདེ་འགྲོ་ལྷའི་ནང་འདིར་སྐྱེས་པ་ལྟ་སྙམ་ནས། དེ་ལས་བདག་གིར་བྱ་བ་དང་། ལས་ཀྱི་བགོ་སྐལ་ལ་སྤྱོད་པར་བདག་ཉིད་ཀྱིས་མཐོང་ངོ་། །དེས་དེ་དག་མཐོང་ནས་དེ་ནས་ཡང་མི་དགའ་བ་སྐྱེས་སོ། །དེ་ནས་ཡང་སེམས་མི་བརྟན་པ་ལྷའི་བདེ་བའི་དབང་དུ་གྱུར་པ་དེ།
གཟུགས་དང་། སྒྲ་དང་། དྲི་དང་། རོ་དང་། རེག་བྱ་བདེ་བ་དག་ལ་སྤྱོད་པར་བྱེད་དོ། །དེ་ལྟར་སེམས་རབ་ཏུ་མྱོས་པ་དེ། དེ་ནས་ཡང་བདེ་བའི་མྱོས་པས་སེམས་གཡེངས་པ་རབ་ཏུ་མྱོས་ཤིང་བག་མེད་པ་ལ་གནས་པ་དག་དགེ་བའི་ལས་ཀྱི་འབྲས་བུ་དེ་ཉིད་ལ་སྤྱོད་པར་བྱེད་དོ། །དེས་བདག་ཉིད་ལྷའི་འཇིག་རྟེན་དེ་ནས་ཤི་སྟེ། གཞན་དུ་སྐྱེ་ལ། དེ་ནས་ཡང་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་མཐོང་ངོ་། །དེ་ནས་བདག་ཉིད་དེ་ལྟ་བུར་འགྱུར་བ་མཐོང་བ་དང་། ཤིན་ཏུ་མི་དགའ་བ་སྐྱེས་ནས། གནས་འདི་ནི་མི་རྟག་པ། མི་བརྟན་པ། འགྱུར་བའི་ཆོས་ཅན་ཡིན་ཏེ། དེ་ལྟ་བས་ན་འདི་ནས་བདག་ཉིད་འཆི་བར་འགྱུར་ཞིང་། ལྷ་མོ་འདི་དག་ལ་ཡང་བདག་དབང་བར་མི་འགྱུར་ཏེ། ཀྱེ་མ་ཆོས་ཐམས་ཅད་ནི་འབྲལ་བ་དང་། འདུས་བྱས་ཀྱི་ཆོས་རྣམས་ནི་མི་བརྟན་ལ་གནོད་པ་དང་བཅས་པས་རྟབ་རྟབ་པོར་འདུག་པ་ཡིན་ཏེ། བདག་ཅག་ནི་ཕན་ཚུན་འབྲལ་བ་ཡིན་ནོ་སྙམ་མོ། །དེ་དེ་ལྟར་སེམས་པ་དང་། འཇིག་རྟེན་སྐྱོང་བ་དག་གིས་ལྷའི་འཇིག་རྟེན་ལ་སྨྲས་པ། ད་ཁྱེད་ཅག་ཐུགས་དགྱེས་པར་མཛོད་ཅིག །འཛམ་བུའི་གླིང་ན་ད་དུང་དུ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་མར་འཛིན་པ། ཕར་འཛིན་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ་དག་ཡོད་པས་ལྷའི་ཕྱོགས་ནི་འཕེལ་ལོ། །བདུད་ཀྱི་ཕྱོགས་ནི་འགྲིབ་པོ། །འཇིག་རྟེན་ན་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ་བྱུང་སྟེ། དེ་ཆོས་འཆད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་བདེ་བ་ཐམས་ཅད་དང་ལྡན་པ། ཞི་བའི་ཆོས་འདི་ལྟ་སྟེ། འདི་ནི་གཟུགས། གཟུགས་འདི་ནི་ཀུན་འབྱུང་བ། གཟུགས་འདི་ནི་འགོག་པ། གཟུགས་འདི་ནི་འགོག་པར་འགྱུར་བའི་ལམ་ཡིན་ནོ་ཞེས་འཆད་དོ། །དེ་ཐོས་ནས་མེ་ལོང་ལྟ་བུའི་ཚལ་དེ་ན་འཁོད་པ་
གང་ཡིན་པ་བདག་ཉིད་ཀྱི་ལས་ཀྱི་འབྲས་བུའི་རྣམ་པ་མཐོང་བ་དེས། འཇིག་རྟེན་སྐྱོང་བ་དེ་དག་ལ་སྨྲས་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། དེ་སུ་ཞིག་ཡིན། དེ་ནས་འཇིག་རྟེན་སྐྱོང་བ་དེ་དག་གིས་སླར་སྨྲས་པ། འཛམ་བུའི་གླིང་དུ་བྱུང་བ་འདི་ནི་སེམས་ཅན་ཐམས་ཅད་ལ་ཆོས་སྟོན་པ་ཡིན་ནོ། །དེ་ནས་ལྷ་དེ་འཇིག་རྟེན་སྐྱོང་བ་དག་ལས་དེ་སྐད་ཐོས་ནས་འཛམ་བུའི་གླིང་ག་ལ་བ་དེར་འགྲོ་བར་བྱེད་དེ། ལྷ་དེ་ལྷའི་འཇིག་རྟེན་ནས་འཆི་བའི་སྡུག་བསྔལ་གྱིས་འཇིགས་སྐྲག །མིའི་འཇིག་རྟེན་ནས་འཆི་བས་འཇིགས་སྐྲག །དུད་འགྲོའི་འཇིག་རྟེན་ན། གཅིག་ལ་གཅིག་ཟ་བས་འཇིགས་སྐྲག །ཡི་དགས་ཀྱི་འཇིག་རྟེན་ན་བཀྲེས་པ་དང་། སྐོམ་པའི་སྡུག་བསྔལ་གྱིས་འཇིགས་སྐྲག །སེམས་ཅན་དམྱལ་བ་དག་ན་གནོད་པས་འཇིགས་སྐྲག་སྟེ། དེ་ལྟར་འགྲོ་བ་ལྔ་རྣམས་ན་འཇིགས་པ་ལྔ་ཡོད་པར་མཐོང་ནས། བཅོམ་ལྡན་འདས་ཀྱི་དྲུང་དུ་སོང་བ་དང་། བཅོམ་ལྡན་འདས་མཛེས་པ། གསལ་བ། དབང་པོ་ཞི་བ། ཐུགས་ཞི་བ། དུལ་བ་དང་ཞི་གནས་མཆོག་བརྙེས་པ། དུལ་བ་དང་ཞི་གནས་དམ་པ་བརྙེས་པ། སྐྱེས་བུ་གླང་པོ། སྐྱེས་བུ་ཅང་མཁྱེན་པ། གསེར་གྱི་ཕུང་པོ་ལྟར་གཟི་བརྗིད་འབར་བ། ཉི་མ་གཉིས་པ་ལྟར་འོད་གསལ་བ། རི་རབ་ལྟར་བརྟན་པ། མཚོ་ལྟར་ཟབ་པ། གསེར་གྱི་རི་བོ་ལྟ་བུ་ཤིང་ལྗོན་པའི་དྲུང་ན་བཞུགས་པ་དེས་རྒྱང་རིང་པོ་ནས་མཐོང་ངོ་། །ལྷའི་ཡང་ལྷ་རྣམས་དེ་ལྟ་བུ་དེ་མཐོང་ནས་དད་པ་སྐྱེས་པའི་ལྷ་བཅོམ་ལྡན་འདས་ག་ལ་བ་དེར་སོང་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་ཕྱག་འཚལ་ནས་ཕྱོགས་གཅིག་ཏུ་འདུག་སྟེ། ལྷས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་རྟག་པ་བརྟན་པ་ཐེར་ཟུག་འགྱུར་བ་མ་མཆིས་པའི་ཆོས་དང་ལྡན་པའི་གནས་ལྟ་མཆིས་ལགས་སམ། དེ་ནས་བཅོམ་ལྡན་འདས་ཀྱིས་ལྷ་དག་ལ་འཕགས་པའི་བདེན་པ་བཞིའི་གཏམ་དེ་དག་བསྟན་ཏོ། །དེ་
ནས་ལྷ་རྣམས་ཀྱིས་བཅོམ་ལྡན་འདས་ལས་གཏམ་དེ་དག་ཐོས་ནས་ཇི་ལྟ་བ་བཞིན་སེམས་ལ་བཟུང་སྟེ། དེ་ནས་ཡང་ལྷའི་འཇིག་རྟེན་ག་ལ་བ་དེར་དོང་ངོ་། །དེར་དོང་ནས་ཀྱང་དེ་ནས་ཡང་ལྷའི་བདེ་བ་རྣམ་པ་ལྔ་དང་ལྡན་པ་རྣམས་ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པ་ཟད་པར་མ་གྱུར་པ་དེ་སྲིད་དུ་དགའ་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་ཁོ་ན་ཉིད་མཐོང་བར་མི་འགྱུར་ལ། དེ་རྟག་ཏུ་མཛའ་བཤེས་དང་། གཉེན་འདབ་དང་། རྩ་ལག་ཤིན་ཏུ་མི་ཕྱེད་པ་དང་ལྡན་ཞིང་ནོར་བཟང་པོ་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ཕྲེང་ཐོགས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷའི་འཇིག་རྟེན་ན་འདོད་པ་ལ་ཆགས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་གང་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ཆོས་མཉན་པར་བྱས་ན་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཡུལ་ལ་ཆགས་པ་ཞེས་བྱ་བའི་གནས་ཀྱི་ཕ་རོལ་ན་འདོད་པ་ལ་ཆགས་པ་ཞེས་བྱ་བ་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེས་ལེགས་པར་བྱས་པའི་ལས་ཀྱི་འབྲས་བུ་འབྱུང་བ་ནི་འདི་ལྟ་སྟེ། དངུལ་གྱི་ཁང་པ་ན་འདུག་པ་ལྟར་རིན་པོ་ཆེ་སྣ་བདུན་གྱི་གཞལ་མེད་ཁང་ཡངས་པ་གསེར་གྱི་སྟེགས་བུ་ཅན་ལྷའི་བྱ་རྣམས་ཀྱིས་ཡོངས་སུ་བསྐོར་བ་དག་འབྱུང་སྟེ། འདི་ལྟ་སྟེ། བྱ་ཡིད་དུ་འཐད་པ་དང་། སྒྲ་ཀུན་འབྱིན་པ་དང་། ཆུ་ན་རྒྱུ་བ་དང་། གསེར་ལྟ་བུ་དག་སྟེ། བྱ་དེ་ལྟ་བུ་དག་གིས་ཀུན་ཏུ་གང་བ་ཡིན་ནོ། །ས་ཕྱོགས་དེ་ན་ཆུ་བོ་དང་། འབབ་ཆུ་དང་། ལྟེང་ཀ་དང་། ཉེ་བའི་ཚལ་དང་ཡང་ལྡན་པ་ཡིན་ནོ། །ཕྱོགས་དེ་ན་བྱའི་རྣམ་པ་འབུམ་སྙེད་ཀྱིས་ཀྱང་
ཀུན་ཏུ་གང་བ་ཡིན་ཏེ། དེ་ན་ལྷ་རྣམས་འདོད་པའི་ཡོན་ཏན་བཞི་དང་། ཁ་ཅིག་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་དགའ་བར་བྱེད་དོ། །ལྷའི་མིག་གིས་གཟུགས་གང་དང་གང་མཐོང་བ་དེ་དང་དེ་དག་འདོད་པ་སྡུག་པ་ཡིད་དུ་འོང་བ་མཐོང་ངོ་། །རྣ་བས་སྒྲ་གང་དང་གང་ཐོས་པ་དེ་དག་ཀྱང་འདོད་པ་སྡུག་པ་ཡིད་དུ་འོང་བ་ཐོས་སོ། །སྣས་དྲི་གང་དང་གང་བསྣམས་པ་དེ་དང་དེ་དག་ཀུན་ཀྱང་འདོད་པ་སྡུག་པ་ཡིད་དུ་འོང་བ་ལ་སྣོམ་མོ། །ལྕེས་རོ་གང་དང་གང་མྱོང་བར་བྱེད་པ་དེ་དང་དེ་དག་ཀྱང་འདོད་པ་སྡུག་པ་ཡིད་དུ་འོང་བ་མྱོང་ངོ་། །ལུས་ཀྱིས་གང་དང་གང་ལ་རེག་པ་དེ་དང་དེ་དག་ཀྱང་འདོད་པ་སྡུག་པ་ཡིད་དུ་འོང་བ་ལ་རེག་པར་བྱེད་དོ། །ཡིད་ཀྱིས་གང་དང་གང་ལ་སེམས་པ་དེ་དང་དེ་དག་ཀྱང་འདོད་པ་སྡུག་པ་ཡིད་དུ་འོང་བ་ལ་སེམས་ཤིང་འགྲུབ་པར་གྱུར་ཏེ། འདོད་པའི་ཡོན་ཏན་ལྔ་ལ་སེམས་ཆགས་པ་དེ་ཤིན་ཏུ་བདེ་བ་དང་ལྡན་པར་གནས་སོ། །འདོད་པ་ལ་ཆགས་པའི་ལྷ་རྣམས་ཀྱི་གནས་ནི་གཞན་དང་མི་འདྲ་བར་ལྷའི་གནས་དང་ལྡན་ཏེ། བདེ་བ་དག་མྱོང་བ་ན་ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བ། བདེ་བར་བྱས་པ་ཤིན་ཏུ་ཉམས་དགའ་བ། འཇིག་རྟེན་འདི་དང་འཇིག་རྟེན་ཕ་རོལ་ལ་ཕན་པ། ཚུལ་ཁྲིམས་ཀྱི་ལས་བྱས་པ་མ་ཟད་ཀྱི་བར་དུ་དེ་དེ་ན་བདེ་བ་མྱོང་ངོ་། །དེ་ཕྱིས་འདོད་པ་སྡུག་པ་ཡིད་དུ་འོང་བའི་གནས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་དེ་ལས་དེ་དང་རྒྱུ་འཐུན་པར་ཡུལ་ཆེན་པོ་ཤིན་ཏུ་འབྱོར་པ་དང་ལྡན་པ་དག་ཏུ་སྐྱེ་བར་འགྱུར་ཏེ། འདི་ལྟ་སྟེ། ཀ་ཤི་ཀ་དང་། ཀོ་ས་ལ་དག་ཏུ་རྒྱལ་རིགས་ཤིང་སཱ་ལ་ཆེན་པོ་ལྟ་བུ་དང་། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུར་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷའི་འཇིག་རྟེན་ལ་རྟོག་པར་བྱེད་དེ། ལེགས་པར་བྱས་པའི་ལས་ཀྱི་མཐའ་སྤྱད་པ་གང་གིས་ཕྲེང་
ཐོགས་ཀྱི་གནས་ཡིད་གཡོ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་ཚུལ་ཁྲིམས་དང་ལྡན་པར་གྱུར་པ་སེམས་པ་ཡོད་པ་ཡིད་གསལ་བས་ཞིང་བཟང་པོ་མངོན་པར་ཤེས་པ་གུས་ཤིང་སེམས་དང་བ་གང་གིས་སངས་རྒྱས་སམ། མཆོད་རྟེན་ནམ། དགེ་འདུན་གྱི་གནས་ཕྱག་དར་ལེགས་པར་བྱས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཡིད་གཡོ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ལུས་ཤ་དང་། རུས་པ་དང་། ཆུ་སེར་དང་བྲལ་བ་ལས་དྲི་བསུང་དཔག་ཚད་བརྒྱར་འབྱུང་ལ། ཇི་ལྟར་མེ་ལོང་ཤིན་ཏུ་གཡའ་མེད་པའི་ནང་དུ་ཐམས་ཅད་སྣང་བ་དེ་ལྟར་ལྷའི་ལུས་དེ་ལ་ལྷའི་རིས་དེ་ན་ཉེ་བར་གནས་པ་གང་ཡིན་པ་ཐམས་ཅད་སྣང་སྟེ། དེ་ལྟར་ལེགས་པར་བྱས་པའི་ལས་ཀྱི་འབྲས་བུ་ལ་ཉེ་བར་སྤྱོད་དོ། །གནས་དེ་དག་ན་ལྷའི་ཚལ་བཞི་ཡོད་དེ། འདི་ལྟ་སྟེ། སྐྱོན་མེད་པའི་ཚལ་དང་། གསལ་བའི་ཚལ་དང་། དྲི་ཞིམ་པའི་ཚལ་དང་། མེ་ཏོག་མན་དཱ་ར་བའི་ཚལ་ཏེ། མང་པོ་དེ་དག་ན་སྡོང་བུ་ནི་བཻ་ཌཱུརྱ། ཟེ་བ་ནི་དངུལ་ལས་བྱས་པའི་པད་མའི་རྫིང་ཡོད་ལ། བྱ་ངང་པ་དང་། ཀཱ་རཎྜ་པ་དང་། ངུར་པ་སྒྲ་འབྱིན་པས་གང་བ། མེ་ཏོག་མདོག་དང་དྲི་སྣ་ཚོགས་དང་ལྡན་པ་རྣམས་ཀྱིས་ཁེབས་པ་འདམ་རྫབ་ཀྱི་སྐྱོན་དང་བྲལ་བ། ཆུ་རྙོག་པ་དང་བྲལ་བ། ཉ་ལྕིབས་དང་བྲལ་བ། ཆུ་རྟག་ཏུ་དྲི་ཞིམ་པས་གང་བ་ཡིན་ནོ། །ཚལ་དེ་དག་ན་དུས་ཚིགས་རབ་ཏུ་དགའ་བར་བྱེད་པ་དྲུག་ཡོད་ལ། བྱ་དག་བྱ་མོ་དང་ལྷན་ཅིག་འཁོད་པ་ཡང་སྣང་སྟེ། རྫིང་དུ་དོང་ནས་དགའ་བར་བྱེད་ཅིང་རང་གིས་བྱས་པའི་ལས་ལ་སྤྱོད་དོ། །ཤིང་ལྗོན་པ་དེ་དག་ཀྱང་དུས་ཚིགས་ཐམས་ཅད་དུ་རྟག་ཏུ་མེ་ཏོག་གིས་རྒྱས་ལ་རྙིས་པའི་སྐྱོན་དང་བྲལ་བ་ཕན་ཚུན་འགྲན་པ་ལྟར་དུས་ཐམས་ཅད་དུ་མེ་ཏོག་རྒྱས་སོ། །དེ་ལྟར་ལེགས་པར་བྱས་པའི་ལས་ཀྱི་མཐའ་སྤྱད་པ་དེ། ཚལ་དང་ཉེ་བའི་ཚལ་དེ་རྣམས་སུ་ལྷ་མོ་ཡིད་དུ་འོང་བ་རྒྱན་དང་ཆ་བྱད་དང་། སྤུད་པ་སྣ་ཚོགས་ཐོགས་པ་རྣམས་ཀྱིས་ཡོངས་སུ་བསྐོར་ནས་འདོད་པ་སྡུག་པ་ཡིད་དུ་འོང་བའི་བདེ་བ་དག་མྱོང་བར་
བྱེད་དོ། །སྲེད་པའི་ཡུལ་ལ་རྣམ་པར་ཆགས་ཤིང་དགའ་བ། ཡུལ་དྲུག་ལ་བློ་ཤིན་ཏུ་ཆགས་པ་དེ། ཆུའི་ནང་ན་ཉ་རྒྱའི་གསེབ་ཏུ་ཉ་ཆུད་དེ་ཉ་རྒྱས་བསྡུས་པ་ལྟར་བདེ་བས་ནམ་ཆུང་ཟད་ཀྱང་སྐྱོ་བར་མི་བྱེད་དེ། དེ་ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བའི་ལས་མ་ཟད་པ་དེ་སྲིད་དུ་དེ་ན་ལྷའི་བདེ་བ་རྣམ་པ་དུ་མ་ལ་སྤྱོད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་རང་གི་ལས་དང་རྒྱུ་འཐུན་པར་དེད་དཔོན་ཆེན་པོར་གྱུར་ཏེ། ཤིན་ཏུ་འབྱོར་པ་དང་ལྡན་པ་དང་རྒྱལ་པོས་ཀྱང་བཀུར་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ཕྲེང་ཐོགས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་ཕྲེང་ཐོགས་རྣམས་ཀྱི་གནས་གང་ན་ལྷ་འཁོད་པ་ཚལ་དང་ཉེ་བའི་ཚལ་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེ་དག་ལས་གང་གིས་དེར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་པ། སེམས་དང་བ། དགེ་འདུན་ལ་ཞིང་དུ་ཤེས་པ་གང་གིས་ཆོས་གོས་བྱ་བའི་ཕྱིར་སེ་འབྲུ་གཅིག་ཕུལ་ལ། ཕུལ་ནས་ཀྱང་ཡང་དང་ཡང་དུ་སེམས་ཀྱིས་ཡོངས་སུ་སྤེལ་བར་བྱེད། རྗེས་སུ་དགའ་བར་བྱེད། བདག་ཉིད་ལ་བདག་ཉིད་རབ་ཏུ་དགའ་བར་བྱེད་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཚལ་དང་ཉེ་བའི་ཚལ་གྱི་ནང་ན་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་དེ་ལྷའི་ཚལ་དང་ཉེ་བའི་ཚལ་ན་ནི་གནས། བདག་ཉིད་གར་དགའ་དགུར་ནི་འཆག་ཅིང་འགྲོ། ཆུ་ལ་ཡང་མི་ནུབ་པར་འགྲོ་སྟེ། འདི་ལྟ་སྟེ། ཐང་ལ་འགྲོ་བ་བཞིན་དུ་འགྲོ་ལ། དེ་བཞིན་དུ་བར་སྣང་ལ་ཡང་ཐོགས་པ་མེད་པར་འགྲོའོ། །དེ་ཇི་སྐད་བསྟན་པའི་གནས་རྣམས་སུ་ལྷའི་ཕྲེང་བ་དང་། གོས་ནི་གྱོན། ཤིན་ཏུ་བདེ་བ་དང་ནི་
ལྡན། རང་དགའ་ཉམས་བག་ཏུ་གནས་ཤིང་དགའ་བར་ནི་བྱེད། ཚལ་དང་ཉེ་བའི་ཚལ་དང་། འབབ་ཆུ་དང་། ལྟེང་ཀ་ཉམས་དགའ་ཞིང་ཤིན་ཏུ་དྲི་ཞིམ་པ་སྣ་ཚོགས་ཀྱི་ནང་ན་ལྷ་མོའི་ཚོགས་ཀྱིས་ནི་ཡོངས་སུ་བསྐོར། ཉི་མ་གཉིས་པ་ལྟར་རང་གི་གཟི་བརྗིད་ཀྱིས་འབར་ཞིང་ལྷའི་བདེ་བ་རང་གིས་བྱས་པའི་རྒྱུ་ལས་བྱུང་བ། རྒྱུའི་སྟོབས་དང་འབྲེལ་པ་ལ་ཉེ་བར་སྤྱོད་པར་བྱེད་དེ། གཞན་གྱིས་བྱས་ལ་གཞན་སྤྱོད་པ་ནི་མེད་དོ། །རང་གིས་བྱས་པའི་ལས་ཀྱི་འབྲས་བུ་ལ་སྤྱོད་པ། ལས་ཀྱིས་ངེས་པར་འབྱུང་བའི་སྲོག་ཆགས་རྣམས་ལེགས་པར་བྱས་པས་ནི་ལྷ་དང་མི་རྣམས་ཀྱི་ནང་དུ་སྐྱེ་བར་འགྱུར་ལ་ཉེས་པར་བྱས་པས་ནི། སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །ལེགས་པར་བྱས་པའི་ལས་ཀྱིས་དེར་སྐྱེས་པ་དེ་ཇི་སྲིད་དུ་ལེགས་པར་བྱས་པའི་ལས་ཟད་པར་མ་གྱུར་པ་དེ་སྲིད་དུ་དེ་ན་བདེ་བ་ལ་སྤྱོད་པར་བྱེད་དོ། །དེ་ཕྱིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་སྐྱེ་བོ་ཚལ་ན་གནས་པ་རྣམས་ཀྱི་ནང་ན་འབྱོར་པ་དང་ལྡན་ཞིང་གཞན་གྱིས་གནོད་པ་མེད་ལ་རང་དགར་ལོངས་སྤྱོད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ཕྲེང་ཐོགས་རྣམས་ཀྱི་གནས་བཅུ་མ་ལུས་པར་བརྟགས་ནས། ལྷ་གཞན་ལག་ན་ཡོལ་གོ་ཐོགས་ཞེས་བྱ་བ་དག་ལ་རྟོག་པར་བྱེད་དོ། །ལྷ་དེ་རྣམས་ཀྱི་གནས་གང་ན་གནས་པ་རང་དགའ་ཞིང་རང་གི་ཡིད་དང་འཐུན་པར་འདོད་པ་ཇི་ཙམ་ཡོད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ཀྱང་བཅུ་ཡོད་དེ། འདི་ལྟ་སྟེ། པད་མའི་ནང་ན་རྒྱུ་བ་དང་། བུང་བའི་སྒྲ་སྙན་པ་དང་། སྒྲ་ལ་ཆགས་པ་དང་། དྲིས་དྲེགས་དགའ་དང་། རླུང་ལ་སྤྱོད་པ་དང་། མེ་ཏོག་
ཕྲེང་དགའ་དང་། ཀུན་ཏུ་ལྟ་བ་དང་། རྟག་ཏུ་དགའ་བ་དང་། དྲི་ལ་ཆགས་པ་དང་། སྤྱི་གཙུག་ཐར་ཏེ། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ནི་བཅུ་པོ་འདི་དག་ཡིན་ནོ། །ས་དེ་རྣམས་ན་ལྷ་དག་ལས་སོ་སོར་བྱས་པ་གང་གིས་ལྷའི་འཇིག་རྟེན་དུ་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་ཅིང་ལེགས་པར་བྱས་པའི་ལས་ཀྱི་མཐའ་སྤྱད་པ་སེམས་བསྒོམས་པའི་ཡིད་དང་ལྡན་པ་གང་གིས་སངས་རྒྱས་དང་། ཆོས་དང་། དགེ་འདུན་ལ་ཕྱག་འཚལ་ལོ་ཞེས་ལན་གསུམ་བརྗོད་ན། དེ་དེར་མཐར་ཤིན་ཏུ་མྱ་ངན་ལས་འདའ་བར་འགྱུར་བའི་ལས་སྐྱེད་པ་ཡིན་ཏེ། མིའི་གནས་སྐབས་ཀྱི་རྣམ་པར་སྨིན་པ་གང་ཡིན་པ་དེ་ནམ་འཆི་བའི་དུས་བྱས་ནས་ལུས་དང་བྲལ་ན་བདེ་འགྲོ་མཐོ་རིས་ཀྱི་འཇིག་རྟེན་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་པད་མའི་ནང་ན་རྒྱུ་བ་ཞེས་བྱ་བ་དེར་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་གནས་དེ་ནི་ཡོན་ཏན་ལྔ་དང་ལྡན་པའི་རོ་ཤིན་ཏུ་ཞིམ་པ་ལ་ཆགས་པའི་མིག་མི་འཛུམས་པ། ལུས་ཉི་མ་ལྟར་གསལ་བ། ལྷའི་འདོད་པ་དང་སྡུག་པ་དང་ཡིད་དུ་འོང་བ་ལ་མངོན་པར་དགའ་བ། བྱ་ཆུ་སྐྱར་གྱི་མདོག་ལྟ་བུའི་པད་མ་ཀུན་གྱིས་མཛེས་པར་བྱས་ལ། པད་མ་དེ་དག་ནམས་ཀྱང་ཞུམ་པར་མི་འགྱུར་བ་དང་། པད་མ་རེ་རེ་ལས་ཀྱང་ལྷའི་དྲི་དཔག་ཚད་ཙམ་དུ་འབྱུང་སྟེ། དེས་ལྷའི་དྲི་དེ་དག་ཐམས་ཅད་དང་། གཞན་ཡང་མེ་ཏོག་རྣམ་པ་སྣ་ཚོགས་ཀྱི་དྲི་རྣམས་ཟིལ་གྱིས་གནོན་པར་བྱེད་པ་དང་། བུང་བ་ཁ་དོག་སྣ་ཚོགས་ཅན་ཁ་ཅིག་གསེར་གྱི་བྱ་ལྟ་བུར་འདུག་ལ། ཁ་ཅིག་མ་ཧེའི་མིག་གི་མདོག་ལྟ་བུ་དང་། ཁ་ཅིག་བཻ་ཌཱུརྱའི་མདོག་ལྟ་བུར་འདུག་པ་དག་སྒྲ་རྣམ་པ་སྣ་ཚོགས་འབྱིན་ཏེ། དེའི་ཁྱད་པར་ནི་མི་རྣམས་ཀྱིས་ལེགས་པར་བསླབས་པའི་པི་བང་གི་སྒྲ་འབྱིན་པ་ན། ཤིན་ཏུ་སྙན་ཅིང་ལྷག་པར་དགའ་བར་བྱེད་པའི་སྒྲ་ཀུན་དུ་གང་བར་འབྱུང་བ་དག་འབུམ་གྱི་ཆར་ཡང་མི་ཕོད་དོ། །དེ་ཅིའི་ཕྱིར་ཞེ་ན། ལྷའི་འདོད་པ་ལ་མི་ཡིས་དཔེར་བྱར་མེད་པའི་ཕྱིར་ཏེ། མི་གང་གིས་ཀྱང་ལྷའི་སྒྲ་མཉན་པར་མི་ནུས་སོ། །དེ་ཅིའི་ཕྱིར་ཞེ་ན། འཁོར་ལོས་སྒྱུར་བ་དང་། འདོད་ཆགས་དང་
བྲལ་བ་མ་གཏོགས་པར་དེ་ལ་མིའི་འཇུག་པའི་ཡུལ་མ་ཡིན་ནོ། །འདི་ལྟར་འཁོར་ལོས་སྒྱུར་བ་ནི་སྟོབས་དང་ལྡན་ལ་དབང་པོ་རྣམས་ཀྱང་སྟོབས་དང་ལྡན་པས་ལྷ་དང་མིའི་འདོད་པ་ལ་སྤྱོད་པར་ནུས་སོ། །འདི་ལྟར་འདོད་ཆགས་དང་བྲལ་བ་ནི་དེའི་དབང་པོ་དགའ་བར་འགྱུར་བ་ཡང་མེད་ལ་གཡོ་བ་ཡང་མེད་དེ། དེ་ལྟར་དེ་ན་བུང་བའི་སྒྲ་འབྱུང་བ་དག་དེས་མཉན་པར་ནུས་སོ། །དུད་འགྲོར་གྱུར་པ་སེམས་རྨོངས་པར་གྱུར་པ་རྣམས་ཀྱི་སྒྲ་ཡང་དེ་ལྟ་བུ་ཡིན་ན། འདོད་པ་ལ་སེམས་ཆགས་པའི་ལྷའི་ཚོགས་རྣམས་ཀྱི་གླུ་དབྱངས་དང་སྒྲ་ལྟ་སྨོས་ཀྱང་ཅི་དགོས་ཏེ། དཔེ་མེད་པ་ཡིན་ལ། འདི་ལྟར་སྒྲ་ལ་ཆགས་པར་བྱེད་པ་ལ་ཡང་སྐྱོ་བར་མི་འགྱུར་ཞིང་། གཟུགས་དང་། དྲི་དང་། རོ་དང་། རེག་བྱ་རྣམས་ཀྱིས་ཀྱང་དེ་དང་མི་འཐུན་པར་སྐྱོ་བར་མི་བྱེད་དོ། །དེ་ལྟར་དེ་སྒོ་དུ་མ་དེ་དང་། སྲེད་པའི་སྒོའི་ཐབས་དུ་མའི་བདེ་བ་དེ་དག་ལ་ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བའི་ལས་མཐོ་རིས་སུ་སྐྱེས་པ་ཟད་པར་མ་གྱུར་པ་དེ་སྲིད་དུ་སྤྱོད་པར་བྱེད་དོ། །དེ་ཕྱིས་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་གྲོང་ཁྱེར་དུ་གྲོང་གི་བདག་པོ་ཤིན་ཏུ་འབྱོར་པ་དང་ལྡན་པའམ་ཚོང་དཔོན་དུ་འགྱུར་ལ་གཞན་དུ་ཡང་རྒྱུ་དང་རྐྱེན་དེ་དང་གཞི་དེས་མཐར་མྱ་ངན་ལས་འདས་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་བུང་བ་སྒྲ་སྙན་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་ཚུལ་ཁྲིམས་དང་ལྡན་ཞིང་ཤེས་རབ་དང་ལྡན་པ་སེམས་པས་བསྒོམས་པའི་སྙིང་དང་། སྙིང་རྗེས་བརླན་པའི་ཡིད་སེམས་ཅན་ལ་ཕན་པར་ཞུགས་པས་མཆོད་རྟེན་ལ་རོལ་མོའི་སྒྲ་དང་དྲིས་མཆོད་ན། དེ་ལུས་དང་བྲལ་ནས་བདེ་འགྲོ་མཐོ་རིས་
ཀྱི་འཇིག་རྟེན་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་བུང་བའི་སྒྲ་སྙན་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་རང་གི་ལས་ཀྱི་འབྲས་བུ་ལ་གནས་པ་དེ་སིལ་སྙན་དང་། གླུ་དབྱངས་དང་། བྲོ་གར་དང་། དགོད་པ་དང་། འཇོ་བ་དང་། ཉམས་དགའ་བ་རྣམ་པ་སྣ་ཚོགས་ཀྱི་བདེ་བ་ལ་སྤྱོད་པ་པད་མའི་དྲིས་མྱོས་པའི་ལྷ་མོ་གླུ་དབྱངས་ཐོས་ན་ཡིད་འཕྲོག་པར་བྱེད་པའི་དབྱངས་ལ་ནི་ཉན། བདེ་བར་གནས་པའི་ཀུན་དགའ་ར་བ་ན་ཉེ་བར་སྤྱོད་པའི་ལྷ་མོའི་ཚོགས་དུ་མ་དག་ནི་དབྱངས་ཀྱི་སྒྲ་འབྱིན། མེ་ཏོག་རྣམ་པ་སྣ་ཚོགས་འདྲེས་པའི་དྲིའི་ངད་ཀྱིས་ནི་ལུས་ལ་རེག་ཅིང་རིན་པོ་ཆེ་དུ་མས་མཛེས་པར་བྱས་པའི་རི་རབ་ཀྱི་རྩེ་མོ་རྣམས་ལ་སྡུག་པ་ཐོས་ན་ཤིན་ཏུ་དགའ་བར་བྱེད་པ་རྣམས་དང་ལྷན་ཅིག་རྣམ་པར་རྒྱུ་ཞིང་གནས་ལ་དགའ་བར་བྱེད་དོ། །དེ་ལྟར་ལེགས་པར་བྱས་པའི་ལས་ཀྱི་འབྲས་བུ་ལ་ཉེ་བར་སྤྱོད་པ་མངོན་པར་མཐོང་ནས། དགེ་སློང་དགེ་བའི་ལས་ལ་སྟོད་ཅིང་འདི་ལྟར་ཚིགས་སུ་བཅད་དེ་སྨྲས་པ། ལས་འདི་དག་ནི་ལྷ་ཡི་ཡུལ། །གསུམ་གྱི་ཐེམ་པའི་སྐས་སུ་གྱུར། །དེ་ལ་འཛེག་པའི་མི་རྣམས་ནི། །ལྷ་ཡུལ་བདེ་བ་འབྱུང་བར་འགྲོ། །ངག་ལ་རྣམ་པ་བཞི་བསྡམས་ཏེ། །ལུས་ལས་བྱུང་བ་རྣམ་གསུམ་མོ། །ཐེམ་སྐས་བདུན་ལ་འཛེགས་ནས་སུ། །ལྷ་ཡུལ་གསུམ་དུ་འགྲོ་བར་བྱེད། །ཚུལ་ཁྲིམས་སྤྱོད་པ་ཤིན་ཏུ་བདེ། །ནོར་སྤྱོད་དེ་ལྟར་བདེ་བ་མིན། །ནོར་གྱིས་མི་ནི་འགྲིབ་བྱེད་ལ། །ཚུལ་ཁྲིམས་ཀྱིས་ནི་འགྲིབ་མི་བྱེད། །དེས་ནི་མི་དག་ལེགས་པར་བྱེད། །སོ་སོ་དག་ཏུའང་དེ་མཛེས་སོ། །དེ་བས་མཐོ་རིས་འགྲོ་བ་ལ། །ཐུབ་མཆོག་རྣམས་ཀྱིས་དགེ་བར་བསྔགས། །སྐྱེས་བུ་དགེ་བ་སྤྱོད་པ་རྣམས། །སྐྱེད་མོས་ཚལ་དུ་འགྲོ་བ་བཞིན། །ལྷ་ཡི་འཇིག་རྟེན་དུ་མར་དེ། །བདེ་བ་རྣམས་ཀྱི་འབྱུང་ཁུང་མཆོག །རང་གི་ལུས་ལས་བྱུང་བ་ཡི། །འོད་ཀྱིས་དེ་དག་འབར་བ་ན། །རང་གི་ལས་ཀྱིས་བསྐུལ་བ་རྣམས། །མཐོ་རིས་གནས་ན་དགའ་བར་བྱེད། །རྟག་ཏུ་དགའ་བར་གནས་པ་དང་། །རྟག་ཏུ་བདེ་བར་གནས་པ་ཡི། །ལྷ་གང་ཡིན་པ་ལྷ་ཡི་གནས། །དེ་ན་ཚུལ་ཁྲིམས་བྱེད་རྒྱུ་ཡིན། །ཚུལ་ལྡན་དེ་ཡི་ཚུལ་ཁྲིམས་ནི། །དུ་མའང་
ལེགས་པར་བསྲུངས་པ་ཡི། །འབྲས་བུ་མཐོ་རིས་སྨིན་པར་འགྱུར། །དེ་བས་ཚུལ་ཁྲིམས་རྟག་ཏུ་སྤྱོད། །ཚུལ་ཁྲིམས་མཐོ་རིས་སྐས་ཡིན་ལ། །བདེ་རྒྱུ་འབྱུང་བའི་གནས་ཡིན་ནོ། །ཚུལ་ཁྲིམས་སྤངས་པའི་མི་དག་ནི། །གང་དུའང་བདེ་བ་མི་འཐོབ་བོ། །ཚུལ་ཁྲིམས་ཆུ་ནི་དང་བ་དང་། །ཀུན་དུ་རྣམ་པར་གང་བ་ཡིས། །ཁྲུས་བྱས་མི་དག་ལྷ་ཡི་གནས། །ལྷ་ཡི་འཇིག་རྟེན་འགྲོ་བར་འགྱུར། །ལྷ་ཡི་ཕྲེང་བ་རྒྱན་རྣམས་དང་། །ལྷ་ཡི་བདེ་བ་ལྡན་པ་གང་། །དེ་ཀུན་དགེ་བའི་རྒྱུ་ལས་བྱུང་། །ལྷ་ཡི་གནས་ན་དགའ་བར་བྱེད། །གང་ཞིག་ལྷ་མོས་ཡོངས་བསྐོར་དང་། །གང་ཞིག་ཉི་ཟླ་འདྲ་བ་རྣམས། །དེ་ཀུན་དགེ་བའི་རྒྱུ་ལས་བྱུང་། །ལྷ་དག་ལྷ་ཡི་ནང་ན་དགའ། །གང་ཞིག་བསམས་ན་འབྱུང་བྱེད་པ། །བྱུང་ནས་ཀྱང་ནི་འགྲིབ་མེད་ཅིང་། །དགེ་བ་རྟག་ཏུ་འཕེལ་འགྱུར་བ། །དེ་ཀུན་དགེ་བའི་རྒྱུ་ལས་བྱུང་། །གང་ཞིག་ཚུལ་ཁྲིམས་རྗེས་སུ་འཇུག །བདེ་བ་དག་ནི་གྲངས་མེད་ལ། །ཐམས་ཅད་དུ་ནི་འཕེལ་བྱེད་ལ། །མི་ཡིས་ཐམས་ཅད་འཐོབ་པར་འགྱུར། །རྟག་ཏུ་དགེ་བ་སྤྱོད་པའི་མི། །རྒྱལ་པོས་ཀྱང་ནི་རྟག་ཏུ་བཀུར། །དགེ་བས་མི་ནི་དགེ་བར་འགྱུར། །དེ་བས་ཚུལ་ཁྲིམས་རྟག་ཏུ་སྤྱོད། །དགེ་བ་སྤྱོད་པ་རྟག་ཏུ་དུལ། །འབྱུང་པོ་ཀུན་ལ་སྙིང་བརྩེ་མཆོག །རྟག་ཏུ་སྦྱིན་དང་བྱམས་ལྡན་པ། །ལྷ་དག་འདུ་བའི་གནས་སུ་འགྲོ། །སྲོག་གཅོད་པ་ལས་ལྡོག་པ་དང་། །སེམས་ཅན་ཀུན་ལ་སྙིང་བརྩེ་མཆོག །ཡང་དག་ལས་ཀྱི་མཐའ་ལྡན་པ། །ལྷ་དག་འདུ་བའི་གནས་སུ་འགྲོ། །མ་བྱིན་ཆུང་ཟད་ལེན་མི་བྱེད། །སྦྱིན་ལའང་དེ་ནི་རྟག་ཏུ་དགའ། །བློ་ལྡན་བློ་གྲོས་དབང་པོ་ཞི། །ལྷ་དག་འདུ་བའི་གནས་སུ་འགྲོ། །གང་ཞིག་ལོག་པར་གཡེམ་དང་བྲལ། །ཡང་དག་ལམ་ལ་རྟག་ཏུ་དགའ། །མྱ་ངན་འདས་ལ་སོམ་ཉི་མེད། །ལྷ་རྣམས་ཀྱི་ནི་ནང་དུ་འགྲོ། །གང་ཞིག་འཐུངས་ན་སྐྱེས་བུ་དག །ཡིད་ལ་མི་དགའ་མང་བྱེད་པ། །ཆང་སྤངས་ཤིན་ཏུ་བརྟན་པ་དག །ལྷ་རྣམས་ཀྱི་ནི་ནང་དུ་འགྲོ། །བདེ་བ་དུ་མ་སྐྱེད་བྱེད་ཅིང་། །ཐམས་ཅད་དབུགས་ནི་འབྱིན་བྱེད་པ། །ཚུལ་
ཁྲིམས་ལེགས་པར་སྤྱད་བྱ་ཞིང་། །ཉེས་པ་བྱས་པའང་རྣམ་པར་སྤོངས། །དེ་ལྟར་དགེ་སློང་དེས་བདེ་བ་འབྱུང་བ་རྣམ་པ་དུ་མ་དག་མངོན་པར་མཐོང་ནས་བུང་བ་སྒྲ་སྙན་གྱི་ལྷ་རྣམས་ལ་མངོན་པར་བསྟོད་དོ། །དེ་ལྟར་ལྷ་དེ་དག་ལྷའི་འཇིག་རྟེན་དུ་གཏོགས་པའི་བུང་བ་མང་པོ་རྣམས་ཀྱིས་སྒྲ་སྙན་པ་འབྱིན་པ་ན། ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པ་ཟད་པར་མ་གྱུར་པ་དེ་སྲིད་དུ་སྒྲ་དང་། དྲི་དང་། རོ་དང་། རེག་བྱ་ཁྱད་པར་དུ་སྡུག་པ་དག་མྱོང་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་མེ་ཏོག་གི་ཕྲེང་བ་བཟང་པོ་ཐོགས་ཤིང་རྟག་ཏུ་བདེ་བ་དང་ལྡན་པ་དང་། གནོད་པ་མེད་པར་གནས་པ་དང་། ཡུན་རིང་དུ་འཚོ་བ་དང་། ལོངས་སྤྱོད་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་སྒྲ་ལ་ཆགས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་ཅིང་སེམས་ཤིན་ཏུ་བསྒོམས་པ་གང་གིས་སངས་རྒྱས་གཟི་བྱིན་དཔག་ཏུ་མེད་པ་དང་ལྡན་པ་ལ་གདུགས་ཕུལ་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སྒྲ་ལ་ཆགས་པ་ཞེས་བྱ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལྷའི་བདེ་བ་དང་ལྡན་པ་དེ་གསེར་དང་། དངུལ་དང་། བཻ་ཌཱུརྱའི་རི་རྣམ་པ་སྣ་ཚོགས་ལ་རྒྱུ་བ་དག་ལ་བདེ་བ་རྣམ་པ་སྣ་ཚོགས་འབྱུང་སྟེ། ལྷ་མོའི་ཚོགས་ཀྱིས་ཡོངས་སུ་བསྐོར་བ་འཁོར་དང་བཅས་པ་དག་རིན་པོ་ཆེ་སྣ་བདུན་གྱི་རིའི་རྩེ་མོ་རྣམས་སུ་རྒྱུ་ཞིང་རོལ་མོའི་ཚལ་ཞེས་བྱ་བའི་ཚལ་དེར་འཇུག་
པར་བྱེད་དོ། །ལྷའི་ཕྲེང་བ་དང་། གོས་གྱོན་པ་མེ་ཏོག་གི་ཕྲེང་བ་དང་། ཕྱེ་མ་དང་། བྱུག་པ་དང་ལྷན་ཅིག་སྐྱེས་པའི་དྲིས་རྣམ་པར་བརྒྱན་པ་དེ་རེས་འགའ་སྤོས་ཀྱི་ཚལ་ཞེས་བྱ་བ་ཤིང་ལྗོན་པ་སྣ་ཚོགས་ཀྱིས་མཛེས་པར་བྱས་པའི་ཚལ་དུ་ཡང་འཇུག་པར་བྱེད་དོ། །ཚལ་དེ་ན་ཆུ་བོ་དང་། འབབ་ཆུ་དང་། ལྟེང་ཀ་དང་། པད་མའི་རྫིང་དང་། ཤིང་ལྗོན་པས་མཛེས་པར་བྱས་པ་ཡིན་ཏེ། རྣམ་པ་ཇི་ཙམ་དུ་བྱ་འདབ་ཆགས་ཀྱིས་མཛེས་པར་བྱས་པའི་རྣམ་པ་དེ་ཙམ་དུ་འོད་གང་གིས་སྡུག་པ་ལྟ་བུར་ལྷའི་འོད་སྟོང་དང་། འོད་ཀྱི་རྣམ་པ་གཞན་ཡང་སྔོན་པོ་དང་། སེར་པོ་དང་། བཙོད་ཀའི་མདོག་ཏུ་འབྱུང་སྟེ། ཚལ་དེ་ཁ་དོག་བཟང་པོ་ཡིན་ནོ། །ལས་ཀྱི་མཐའ་སྤྱད་པ་ལ་ཞུགས་པའི་ཚལ་དེ་ན་མེ་ཏོག་དུ་མས་བསྒོས་པ་དྲི་ཤིན་ཏུ་ཞིམ་པའི་དྲི་ངད་དང་པོའི་རྫི་འབྱུང་སྟེ། གང་གི་ཚེ་རྫི་དེས་ལོ་མ་དེ་དག་ལ་ཕོག་པར་གྱུར་པ་དེའི་ཚེ་རྫིས་ཕོག་པའི་ལོ་མ་ཕན་ཚུན་རེག་པ་ལས་རོལ་མོའི་སྒྲ་འབྱུང་སྟེ། དེའི་ཁྱད་པར་ནི་ལྷ་མ་ཡིན་གྱི་གནས་ན་སྤྱོད་པའི་རོལ་མོ་དག་གིས་བཅུ་དྲུག་གི་ཆར་ཡང་མི་ཕོད་པའི་རྣམ་པ་དེ་ལྟ་བུ་དག་འབྱུང་ངོ་། །གང་གི་ཚེ་ལོ་མ་རེ་རེ་ལ་ཕོག་པ་དེའི་ཚེ་ཡང་རོལ་མོའི་སྒྲ་ཤིན་ཏུ་ཆགས་སུ་རུང་བ་དག་འབྱུང་སྟེ། དེ་སིལ་སྙན་ཡན་ལག་ལྔ་འབྱོར་ཅིང་ལྡན་པར་གྱུར་ལ། ཡུལ་ཤིན་ཏུ་ཉམས་དགའ་ཞིང་ཡིད་དུ་འོང་བ་རྣམས་ཀྱིས་མྱོས་སོ། །དེ་ནས་ཡང་ལོ་མའི་རོལ་མོའི་སྒྲ་དེས་སྲེད་པ་ལ་ཆགས་ཤིང་དགའ་བ་བག་མེད་པ་བརྒྱ་སྙེད་ལ་གནས་པར་བྱེད་དོ། །སྒྲ་ལ་ཆགས་པ། སྒྲ་ལ་ཞེན་པ། སྒྲས་བསླུས་པ་དེ། ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པ་ཟད་པར་མ་གྱུར་པ་དེ་སྲིད་དུ། སྒྲ་དང་། དྲི་དང་། རོ་དང་། རེག་བྱ་ཁྱད་པར་དུ་སྡུག་པ་དག་མྱོང་བར་བྱེད་དོ། །དེ་ཕྱིས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རོལ་མོ་ལ་མངོན་པར་དགའ་བར་འགྱུར་
ཞིང་ནོར་དང་། འབྲུ་དང་། ཁྱིམ་དང་ཆུང་མ་ཤིན་ཏུ་འབྱོར་བ་དང་། ཡུན་རིང་དུ་འཚོ་བ་དང་། རྒྱལ་པོའི་ཕོ་བྲང་དུ་ཡང་བཀུར་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེར་ལྷ་དག་ལས་གང་གིས་སྐྱེ་བར་འགྱུར་མིང་ནི་ཅི་ཞེས་བྱ་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན་ལྷའི་འཇིག་རྟེན་ན་ལྷ་རྣམས་ཀྱི་གནས་དྲིས་དྲེགས་དགའ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཤིན་ཏུ་ཚུལ་ཁྲིམས་དང་ལྡན་པ། སེམས་ཡོངས་སུ་བསྒོམས་པ་གང་གིས་མཆོད་རྟེན་གྱི་བུམ་པའམ་གདུགས་ལ་དྲི་ཆབ་ཕུལ་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་དྲིས་དྲེགས་དགའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལྷའི་བདེ་བ་དང་ནི་ལྡན། བདེ་བ་དཔེ་མེད་པའི་ཁ་ཟས་ལ་ནི་རྟེན། ལྷའི་བདུད་རྩིའི་ཟས་ཀྱིས་ནི་ཚིམ། ལུས་དང་ཡིད་ཀྱི་གདུང་བ་དང་ནི་བྲལ། ལྷའི་ཕྲེང་བ་དང་། གོས་གྱོན་པ་རྟག་ཏུ་སིལ་སྙན་ཡན་ལག་ལྔས་རྩེན་ཅིང་། དགོད་པ་དང་། དགའ་བ་དང་། རྩེ་བའི་གྲོགས་དང་ལྡན་པ་ལྷ་མོའི་ཚོགས་རྣམས་ནི་གླུ་དབྱངས་ལེན། ཉིན་གཅིག་གཅིག་བཞིན་རྒྱུན་མི་ཆད་པར་རི་སུལ་ལས་ཆུའི་ཤུགས་འབབ་པ་ལྟར་བདེ་བ་རྣམས་ནི་འཕེལ། ནོར་བུ་མཐོན་ཀ་དང་། སྤུག་དང་། དངུལ་གྱི་རིའི་རྩེ་མོ་རྣམས་སུ་དགའ་བར་བྱེད་ཅིང་། ཆུ་བོ་དང་། འབབ་ཆུ་དང་། ལྟེང་ཀ་རྣམ་པ་སྣ་ཚོགས་ནི་མཐོང་། ཚལ་གྱི་ནང་ན་གནས་པ་བྱ་དང་ཁུ་བྱུག་རྣམས་ཀྱང་མཐོང་སྟེ། ལྟ་བ་དུ་མའི་ཟི་ལང་བར་ལྟ་བ། ཚལ་དང་ནགས་ཚལ་ཡིད་དུ་འོང་བ་རྣམས་སུ་ལྟ་བར་བྱེད་ཀྱང་། སེམས་ཚིམ་པ་མེད་པ་དག་ལྷའི་འཇིག་རྟེན་དེ་ན་གནས་སོ། །ཆུ་བོ་དང་། འབབ་ཆུ་དང་། ལྟེང་ཀ་དང་། ཚལ་དང་ཉེ་བའི་ཚལ་རྣམས་ན་མཐོ་རིས་ཀྱི་ཆུའི་རོ་གང་དང་གང་འབྱུང་བ་དག་ནི་འདི་ལྟར་འཛམ་བུའི་གླིང་ན་ལེགས་པར་བྱས་པའི་
ལས་ཀྱིས་དགུན་ཆང་དང་སྦྱར་བའི་ཆང་དང་། ཤ་ཁ་རའི་ཆང་གི་རོ་འབྱུང་བ་རྣམ་པ་དེ་ལྟ་བུར་འབྱུང་ངོ་། །དེ་ལྟར་ལེགས་པར་བྱས་པའི་ལས་ཀྱི་མཐའ་སྤྱད་པ་དེ། ལྷའི་འཇིག་རྟེན་དེ་ན་ཇི་སྲིད་དུ་དེའི་ལེགས་པར་བྱས་པའི་ལས་ཟད་པར་མ་གྱུར་པ་དེ་སྲིད་དུ་ལྷ་མོའི་ཚོགས་དུ་མས་ཡོངས་སུ་བསྐོར་བ་དག་དང་དགའ་བར་བྱེད་དོ། །དེ་ཕྱིས་དེ་ནས་འཆི་བར་འགྱུར་ཏེ་ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་བྲན་ཁྱིམ་བདོག་ཅིང་ནོར་དང་འབྲུ་མང་པོ་ཀུན་ནས་གང་བར་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་རླུང་གི་རྒྱུ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་ཅིང་། སེམས་ཡོངས་སུ་བསྒོམས་པའི་སྙིང་དང་ལྡན་པ་གང་གིས་ཚ་བས་གདུངས་པའི་དགེ་སློང་རྣམས་ལ་རླུང་ཡབ་ཀྱིས་རླུང་གཡབས་ཏེ། གང་གིས་རླུང་འབྱུང་བ་རེག་ན་བདེ་བ་ཀུ་ཤི་རའི་དྲི་དང་འདྲེས་པས་དགེ་སློང་ཤིན་ཏུ་ཚ་བས་གདུངས་པ་དེ་རྣམས་རླུང་དེས་བསམ་གཏན་དང་། ཁ་ཏོན་འདོན་པ་དང་འཇུག་པར་བྱ་བ་དག་བྱེད་པར་ནུས་ན། སྦྱིན་བདག་དེ་ལས་བྱས་པའི་རྐྱེན་དེས་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་རླུང་ལ་སྤྱོད་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ་དེ་ལ་རླུང་དྲི་ཞིམ་པ་དཔེ་མེད་པ་ལྡང་ངོ་། །གང་རྒྱལ་ཆེན་བཞིའི་ལྷ་རྣམས་ཀྱི་རླུང་དཔེ་མེད་པ་ལྡང་བ་འབའ་ཞིག་ཏུ་མ་ཟད་ཀྱི། ལྷའི་རིས་གཞན་ནས་རླུང་ལངས་པའི་དྲི་འབུམ་འགྱུར་དུ་ཞིམ་ལ། ཤིན་ཏུ་བསིལ་བར་ཡང་ལྡང་སྟེ། རྣམ་པར་སྨིན་པ་
བཟང་པོ་གཅིག་དང་། གཉིས་དང་། གསུམ་དང་། བཞི་དང་། ལྔ་འགྱུར་དུ་འབྱུང་ངོ་། །དེར་རྒྱལ་ཆེན་བཞི་པ་རྣམས་ཀྱི་རླུང་ནི་ཉིས་འགྱུར་དུ་འབྱུང་ངོ་། །རྒྱལ་ཆེན་བཞི་པ་རྣམས་ལས་ལྷག་པར་སུམ་ཅུ་རྩ་གསུམ་པ་རྣམས་ཀྱི་སུམ་འགྱུར་དུ་འབྱུང་ངོ་། །སུམ་ཅུ་རྩ་གསུམ་པ་རྣམས་ལས་ལྷག་པར་འཐབ་བྲལ་བ་རྣམས་ཀྱི་བཞི་འགྱུར་དུ་འབྱུང་ངོ་། །འཐབ་བྲལ་བ་རྣམས་ལས་ལྷག་པར་དགའ་ལྡན་པ་རྣམས་ཀྱི་ལྔ་འགྱུར་དུ་འབྱུང་ངོ་། །དགའ་ལྡན་པ་རྣམས་ལས་ལྷག་པར་འཕྲུལ་དགའ་བ་རྣམས་ཀྱི་དྲུག་འགྱུར་དུ་འབྱུང་ངོ་། །དེ་དག་པས་ཀྱང་ལྷག་པར་གཞན་འཕྲུལ་དབང་བྱེད་རྣམས་ཀྱི་ཡང་འབྱུང་སྟེ། དེ་ལྟར་སེམས་ཅན་རྣམས་ཀྱི་ལས་ཀྱི་བྱེ་བྲག་ལས་འགྲོ་བའི་རིས་ཀྱི་བྱེ་བྲག་ཏུ་འགྱུར་རོ། །ལས་བྱས་པ་དེ་དག་མངོན་པར་མཐོང་ནས། ལེགས་པར་བྱས་པའི་ལས་དེས་རླུང་ལ་སྤྱོད་པའི་ལྷ་དེ་རྣམས་ལ། ལྷའི་རིས་དྲུག་ན་རླུང་ལངས་པ་དཔེ་མེད་པ་དྲི་ཞིམ་པ་བདེ་བ་གང་ཡིན་པ་དེ་དག་ལྡང་ངོ་། །རླུང་དེ་དག་གི་མཐུ་གཅིག་ཅིག་བཤད་པར་བྱ་སྟེ། འདི་ལྟར་དེའི་མཐུ་ཐམས་ཅད་ནི་བཤད་པར་མི་ནུས་སོ། །ལྷ་དེ་རྣམས་ཀྱི་རླུང་དགའ་དགུར་བྱེད་པ་ལྡང་སྟེ། དེ་ནི་གང་གི་ཚེ་རོལ་མོའི་སྒྲ་འབྱུང་བར་འདོད་ན་དེའི་ཚེ་རླུང་དེ་རི་དང་ནགས་ཚལ་གྱི་གསེབ་ཏུ་སོང་ནས་ཇི་ལྟར་དེ་ལྷ་མོས་རོལ་མོ་བྱས་པ་ཆུང་ཟད་ཀྱང་སྙན་པར་མི་འགྱུར་བ་དེ་ལྟ་བུར་ལྡང་ངོ་། །གལ་ཏེ་ཤིན་ཏུ་དྲི་ཞིམ་པར་འདོད་ན་དེ་གཞན་འཕྲུལ་དབང་བྱེད་ཀྱི་ལྷའི་རིས་མན་ཆད་ཀྱི་མདོག་དཔེ་མེད་པ་དང་ལྡན་པ་དག་ལས་ལངས་ནས་ལྷ་དེ་རྣམས་ཀྱི་དྲུང་དུ་ལྡང་བར་བྱེད་དོ། །གལ་ཏེ་བསིལ་བ་འདོད་ན་དེ་ཇི་ལྟར་དེ་དག་གི་ལུས་ལ་བཟོད་པ་རྣམ་པ་དེ་ལྟ་བུའི་བསིལ་བ་ལྡང་ངོ་། །གལ་ཏེ་ཡུལ་གཞན་དུ་འགྲོ་བར་འདོད་དམ། དེ་བཞིན་དུ་བཻ་ཌཱུརྱའི་རི་རབ་ཀྱི་རྩེ་མོ་ལྟ་བར་འདོད་དམ། དེ་བཞིན་དུ་དངུལ་གྱིའམ། དེ་བཞིན་དུ་འཛམ་བུའི་ཆུ་བོའི་གསེར་གྱིའམ། དེ་བཞིན་དུ་ཤེལ་གྱིའམ། དེ་བཞིན་དུ་མེ་ཏོག་དང་། འབྲས་བུ་དང་། ཆུ་བོ་དང་། འབབ་ཆུ་དང་། ལྟེང་ཀ་དང་། ཚལ་དང་། ཉེ་བའི་ཚལ་བྱ་
དང་མེ་ཏོག་ཉམས་དགའ་བའི་ཡུལ་སྣ་ཚོགས་ལྟ་བར་འདོད་པ་དང་། ལྷ་མོ་སྣ་ཚོགས་ཀྱིས་ཡོངས་སུ་བསྐོར་ཏེ་འགྲོ་བར་འདོད་པའི་ལྷ་རྣམས་ལ་རླུང་སྒྲ་དང་། དྲི་དང་། བདེ་བ་རྣམ་པ་དུ་མ་དང་ལྡན་པ་དེ་དག་ལྡང་བར་བྱེད་དོ། །ཚལ་དང་ཉེ་བའི་ཚལ་དང་། དཀའ་ཐུབ་ཀྱི་ཚལ་དང་། རི་ཁྲོད་རྣམ་པ་སྣ་ཚོགས་སུ་སྔ་མ་བཞིན་ཁྱེར་བར་ཡང་བྱེད་དེ། དེ་ལྟར་རླུང་འོང་བ་དང་འགྲོ་བ་དག་འདོད་པ་ལྔ་ལ་དགའ་བའི་ལྷ་རྣམས་དང་ལྷན་ཅིག་དགའ་བར་བྱེད། རྩེ་བར་བྱེད། ཡོངས་སུ་སྤྱོད་པར་བྱེད་དོ། །ཕྲག་དོག་དང་འཐབ་མོ་དག་གིས་སྐྱོ་བ་མེད་པ། ཕན་ཚུན་གྲོགས་སུ་གྱུར་པ། ཕན་ཚུན་གནོད་པ་མེད་པ་རྣམས་ཡིད་གཅུགས་ཤིང་གནས་དེ་དག་ལ་ཡིད་ཞུགས་པ། རང་གི་ལས་ཀྱིས་བསྒྱུར་བ་རྣམས་དགའ་བར་བྱེད་དོ། །ལྷའི་འཇིག་རྟེན་ན་ལྷ་རང་གི་ལས་ཐ་མ་དང་འབྲིང་དང་བཟང་པོ་རྣམས་ཀྱིས་རྒྱའི་འབུར་ལྟ་བུར་ལས་ཀྱི་འབྲས་བུ་འབྱུང་བ་ནི། ཇི་ལྟར་རླུང་ཕྲག་དོག་དང་སེར་སྣ་དང་བྲལ་བའི་ཤུགས་འབྱུང་ལ། ཤུགས་ཟད་ནས་ས་ལ་འབབ་པ་དེ་ལྟར་ཇི་སྲིད་དུ་ལས་ཀྱི་རྣམ་པ་ཐ་མ་དང་། འབྲིང་དང་། བཟང་པོ་ལེགས་པར་བྱས་པའི་རྣམ་པ་དེ་སྲིད་དུ་འབྱུང་བའི་ཤུགས་སྤྱད་ལ། དེ་ནས་ཡང་ལེགས་པར་བྱས་པའི་ལས་ཟད་ནས་ལྷའི་འཇིག་རྟེན་དེ་ནས་འཆི་བར་འགྱུར་རོ། །སེམས་ཅན་རྣམས་ནི་ལས་ཀྱི་སྐྱེ་གནས་ལས་སྐྱེ་ཞིང་ལས་ལ་རྟོན་པ་ཡིན་ལ། ཇི་ལྟར་ལས་བྱས་པ་དེ་ལྟར་འགྲོ་བར་འགྱུར་ཏེ། སེམས་ཅན་རྣམས་ཀྱི་སྐྱེ་བ་ནི་རྒྱུ་མེད་པ་ལས་བྱུང་བ་མ་ཡིན་ནོ། །དགེ་སློང་དེས་ལས་དེ་དག་མཐོང་ནས་འདི་ལྟར་ཚིགས་སུ་བཅད་དེ་སྨྲས་པ། ཇི་ལྟར་ཉི་མའི་རྗེས་སུ་དུས་འགྱུར་ཞིང་། །ཇི་ལྟར་དུས་ཀྱི་རྗེས་སུ་ཞིང་རྣམས་སྐྱེ། །དེ་ལྟར་ལས་ཀྱི་རྗེས་སུ་སྐྱེ་བ་འབྱུང་། །རྒྱུ་མེད་པ་ལས་སྐྱེ་བ་འབྱུང་མི་འགྱུར། །གང་གིས་ལུས་ཅན་བཅིངས་པ་རྣམས། །ཚེ་རབས་གཞན་ནི་སྟོང་དག་ཏུ། །རྣམ་པར་ཆགས་པ་མང་པོའི་ལས། །རྣམ་གསུམ་ལུ་གུ་རྒྱུད་ཀྱིས་བཅིངས། །ཇི་ལྟར་སྦྲང་རྩི་དུག་དང་ཟས། །འདྲེས་པ་ཡོངས་སུ་སྤོང་བར་བྱེད། །དེ་ལྟར་ལྷ་ཡི་བདེར་གཏོགས་པ། །
མཐར་ནི་ལྟུང་བ་རྣམ་པར་སྤོངས། །གང་ཞིག་སྡུག་བསྔལ་འཆི་བ་ན། །བསོད་ནམས་ཟད་དེ་དམན་པ་ནི། །རང་གི་ཆུང་མ་རྣམས་ཀྱིས་སྤངས། །དེ་འདྲ་བ་ནི་དཔེ་མེད་དོ། །ལེགས་བྱས་ཟད་དེ་དམན་པ་ནི། །སྒྲོན་མ་འབར་བ་ཟད་པ་ལྟར། །ལྷ་ཁྱོད་གང་དུ་འགྲོ་འགྱུར་ཞེས། །སྡུག་བསྔལ་ཆེན་པོ་རབ་ཏུ་སྐྱེད། །སྲེད་པའི་དུག་གིས་རྣམ་བསྲེགས་ཤིང་། །མྱ་ངན་གྱིས་ནི་སེམས་ཉམས་ཏེ། ལུས་དང་ངག་གི་སྤྱོད་དམན་པ། །ལྷ་ནི་ལྟུང་བ་དག་གིས་འཇིགས། །འདོད་རྣམས་ཤིན་ཏུ་སླུ་བྱེད་དེ། །ཇི་ལྟ་ཇི་ལྟར་བདེ་མྱངས་པ། །དེ་ལྟ་དེ་ལྟར་ཡོངས་སུ་གཏོང་། །དེ་དག་སྡུག་བསྔལ་རབ་ཏུ་ཆེ། །ལྷ་ཡི་ཡུལ་ནས་ལྟུང་བ་ན། །སྡུག་བསྔལ་རབ་ཏུ་སྐྱེ་བ་གང་། །དེ་ཡི་ཁྱད་པར་སེམས་ཅན་དམྱལ། །བཅུ་དྲུག་ཆར་ཡང་མི་ཕོད་དོ། །སྲེད་པས་འཁོར་བ་ཀུན་བྱས་པ། །འབར་བའི་ཕྲེང་བ་རྣམས་ཀྱིས་དཀྲུགས། །སྲིད་པའི་སྒྲོག་གིས་བཅིངས་པ་ཡི། །སེམས་ཅན་རྣམས་ནི་ངན་འགྲོར་འགྲོ། །ལྷ་ཡི་འཇིག་རྟེན་འཆི་བའི་མཐའ། །དེ་བཞིན་ས་སྟེང་འཆི་བའི་མཐའ། །འཁོར་བ་ལས་ནི་མི་འབྱུང་བས། །སྡུག་བསྔལ་མཐོང་ནས་རྣམ་པར་སྤོངས། །སྐྱེ་བོ་བག་མེད་དགའ་བ་གང་། །དེ་ནི་ཐར་པ་མི་འཐོབ་སྟེ། །བག་མེད་དུག་གིས་རྨོངས་པ་ནི། །དེ་ལ་མྱ་ངན་འདས་པ་རིང་། །བག་མེད་དགྲ་ཡི་མཆོག་ཡིན་པས། །བག་མེད་རྣམས་ལ་ཆགས་མ་བྱེད། །ཤིན་ཏུ་བག་མེད་ལྷ་རྣམས་ནི། །ཡང་དང་ཡང་དུ་དམྱལ་བར་ལྟུང་། །གནས་གསུམ་འཁྲུལ་འཁོར་འཁོར་བ་ལྟར། །འཁྲུལ་འཁོར་ལས་ཀྱིས་འཁྱམ་པར་བྱེད། །དེ་བས་སྲེད་པའི་ཆགས་པ་སྤོངས། །འདོད་ཆགས་བྲལ་བ་ཞི་བའི་གནས། །དེ་ལྟར་དགེ་སློང་དེས་ལྷའི་འཇིག་རྟེན་གྱི་མཐའ་ལྟུང་བར་མཐོང་ནས་འདོད་པ་ལ་འདོད་ཆགས་དང་བྲལ་ལོ། །རླུང་ལ་སྤྱོད་པའི་ལྷ་དེ་རྣམས་ཀྱི་མི་རྟག་པ་དང་། བདེ་བ་དེ་དག་ལ་ལས་ཀྱི་རྒྱུས་བསྐྱེད་ཅིང་མི་རྟག་པ་ཉིད་དང་འབྲེལ་བ་ཡིན་པ་ལྟ་ཞེས་རྣམ་པར་དཔྱོད་པར་བྱེད་དོ། །ལྷ་དེ་རྣམས་ཀྱང་ཇི་སྲིད་དུ་དེའི་ལེགས་པར་བྱས་
པའི་ལས་ཟད་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད་དོ། །དེ་ཕྱིས་དེ་ནས་འཆི་བར་འགྱུར་ཏེ། ཇི་ལྟར་དུས་ཇི་སྲིད་དུ་ལེགས་པར་བྱས་པའི་ལས་ཡོད་པ་དང་འོད་གསལ་བ་འབྱུང་བའི་དུས་དེ་སྲིད་དུ་ལྷ་རྣམས་ལྷའི་འཇིག་རྟེན་ན་སྤྱོད་དོ། །དེ་ཟད་ནས་ལྷུང་བར་འགྱུར་ལ། །ལྷུང་ནས་ཀྱང་ཡང་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རླུང་གིས་བདས་ནས། འགྲོ་བ་རྒྱ་མཚོར་སྤྱོད་ཅིང་འཚོ་བའི་དེད་དཔོན་དུ་འགྱུར་བ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉེར་བདུན་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་མེ་ཏོག་ཕྲེང་དགའ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་ཅིང་ལུས་དང་ངག་གི་ལས་ཀྱི་མཐའ་ཡང་དག་པ་སེམས་པས་ཡོངས་སུ་བསྒོམས་པའི་སེམས་དང་ལྡན་པ་གང་གིས་ཚ་བའི་དུས་སུ་དགེ་འདུན་ལ་ཆུ་རིལ་བ་གང་ཕུལ་བའམ། ལམ་དུ་ཞུགས་པའམ། འབྲོག་དགོན་པར་ཞུགས་པ་དག་ལ་ཡང་ཆུ་རིལ་བ་གང་བྱིན་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་མེ་ཏོག་ཕྲེང་དགའ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ལུས་བདེ་བ་དང་སྒེག་པ་སྣ་ཚོགས་སུ་ནི་སྤྱོད། ལྷ་མོའི་སིལ་སྙན་གྱི་སྒྲ་འབྱིན་ཅིང་དགོན་པ་སྣ་ཚོགས་ཀྱི་ནང་དུ་ནི་ཞུགས། བཻ་ཌཱུརྱ་དང་། གསེར་དང་། དངུལ་གྱི་རི་རབ་ཀྱི་གཤོང་ན་རྩེན་པ་དག་དང་ལྷན་ཅིག་ནི་གནས། རི་ཁྲོད་རྣམ་པ་སྣ་ཚོགས་ན་ལྷ་མོ་དང་ནི་ལྷན་ཅིག་འཁོད། རླུང་དྲི་ཞིམ་པོས་རེག་པའི་ལུས་མེ་ཏོག་ཕྲེང་བ་ཐོགས་པ། འབབ་ཆུ་དང་། ལྟེང་ཀས་བརྒྱན་པའི་ཡུལ་རྣམས་ན་དགའ་
བར་བྱེད་ཅིང་ལྷ་མོ་མང་པོའི་ནང་ན་སྤྱོད་པ་ན་ལོ་འབུམ་ཕྲག་དུ་མ་སོང་ངོ་། །དེ་ལྟར་གནས་པ་དེ་རེས་འགའ་ཚལ་འབབ་ཆུ་ཞེས་བྱ་བ་ན་གནས་ཏེ་ཚལ་དེ་ན་དགའ་བར་བྱེད་དོ། །ཚལ་དེ་ནི་བཻ་ཌཱུརྱའི་ཤིང་ལྗོན་པ་ལ་གསེར་གྱི་འདབ་མ་ཡོད་པ་དང་། གསེར་གྱི་ཤིང་ལ་བཻ་ཌཱུརྱའི་འདབ་མ་ཡོད་པ་དང་། དངུལ་གྱི་ཤིང་ལ་གསེར་གྱི་འདབ་མ་དག་ཡོད་དེ། ཚལ་དེའི་ནང་དུ་ཞུགས་པ་དེ་རྟག་པར་ཡིད་རབ་ཏུ་དགའ་ལ། ལུས་རང་གི་འོད་དང་ལྡན་པ་ཡིན་ནོ། །དེའི་ལེགས་པར་བྱས་པའི་ལས་དེས་ཤིང་དེ་དག་བརྟོལ་བ་ལས་མཐོ་རིས་དང་འཐུན་པའི་སྐོམ་འབྱུང་སྟེ། སྐོམ་དེའི་ཁྱད་པར་ནི་མིའི་རྒུན་ཆང་དང་སྦྱར་བའི་ཆང་དང་། ཤ་ཁ་རའི་ཆང་དག་འབྲས་བུ་པི་ཙུ་མན་དའི་རོ་དང་མཚུངས་ཏེ། སྐོམ་དེ་ནི་ལྷའི་རོ་དང་མདོག་དང་སྟོབས་དང་ལྡན་པ་ཡིན་ནོ། །དེའི་དྲི་དཔག་ཚད་དུ་ཡང་འབྱུང་སྟེ་བྱའི་ཚོགས་ལུས་གསེར་དང་དངུལ་གྱི་མདོག་ལྟ་བུ་ཡིད་རབ་ཏུ་དགའ་བ་ཀུན་གྱིས་སྐོམ་དེ་འཐུངས་ནས་ཚལ་དེ་ན་སྒྲ་ཡིད་དུ་འོང་བ་འབྱིན་ཅིང་ཀུན་དུ་འགེངས་སོ། །ཤིང་དེ་དག་གི་སྡོང་པོ་བརྟོལ་ནས་སྐོམ་འབྱུང་བ་དེ་ལ་བུང་བའི་ཚོགས་འུབ་འུབ་འདུ་སྟེ། སྐོམ་ཁ་ཅིག་གི་མདོག་ནི་གསེར་ལྟ་བུ་ཡིན། ཁ་ཅིག་གི་མདོག་ནི་བཻ་ཌཱུརྱ་ལྟ་བུ་ཡིན། ཁ་ཅིག་གི་མདོག་ནི་སྤུག་ལྟ་བུ་ཡིན། ཁ་ཅིག་གི་མདོག་ནི་པད་མ་རཱ་ག་ལྟ་བུ་ཡིན། ཁ་ཅིག་གི་མདོག་ནི་མ་རྒད་ལྟ་བུ་ཡིན་ཏེ། སྐོམ་དེ་དག་ཀུན་ནས་བྱུང་ནས་བྲུག་པ་ཆུ་བོ་ལྟར་འབབ་བོ། །སྐོམ་གྱི་ཆུ་བོ་དེའི་མིང་ཡང་མཐའ་མེད་འབབ་ཅེས་བྱ་སྟེ། ཆུ་བོའི་རྒྱར་དཔག་ཚད་གཉིས་ཡོད་པའི་འགྲམ་གཉི་ག་ཉམས་དགའ་ལ། འགྲམ་གཉི་ག་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་ཅིང་གླུ་ལེན་ལ་གསེར་གྱི་པད་མས་ཁེབས་པ་འབབ་བོ། །དེ་ནས་ལྷ་མོའི་ཚོགས་ཀྱིས་འཐུངས་པ་དང་ཡིད་རབ་ཏུ་དགའ་སྟེ། དགོད་པར་བྱེད། རྩེ་བར་བྱེད། ཕན་ཚུན་གསེར་གྱི་པད་མའི་སྡོང་བུ་བཻ་ཌཱུརྱ་རྣམས་ཀྱིས་སྒེག་པར་བྱེད། རྩེ་བར་བྱེད། དགོད་པར་བྱེད་དོ། །ཤིང་རྟ་སྣ་ཚོགས་ལ་ཞོན་པ་རྣམས་རྒྱུག་པར་བྱེད་ཅིང་དགོད་པར་བྱེད་ལ། ལྷའི་ཆུ་ཡན་
ལག་བརྒྱད་དང་ལྡན་པས་ཕན་ཚུན་འཐོར་བར་བྱེད་དོ། །ལྷ་དེ་རྣམས་ཀྱི་པད་མའི་རྫིང་ཡོད་པ་དེ་ནི་ཀུན་ནས་བསྟེན་པ་ཞེས་བྱ་ལ་གཞན་དང་མི་འདྲ་བ་དཔེ་མེད་པ་ཡིན་ཏེ། ལེགས་པར་བྱས་པའི་ལས་ཀྱིས་བསྒྱུར་བའི་ལྷ་དེ་རྣམས་ཇི་སྲིད་དུ་དེའི་འདོད་པ་སྡུག་པ་ཡིད་དུ་འོང་བའི་ལས་ཟད་པར་མ་གྱུར་པ་དེ་སྲིད་དུ་གནས་སོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་བཀྲེས་པ་དང་སྐོམ་པ་ཡོང་ཡེ་མེད་ཅིང་འབྱོར་པ་དང་ལྡན་པའི་ཡུལ་དུ་སྐྱེ་ལ། ནོར་དང་ཤིན་ཏུ་ལྡན་པ་དང་སྐྱེ་བོ་ཐམས་ཅད་དགའ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ཀུན་ཏུ་ལྟ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་ཅིང་ལེགས་པར་བྱས་པའི་ལས་ཀྱི་མཐའ་སྤྱད་པར་གྱུར་པ། སེམས་པས་ཡོངས་སུ་བསྒོམས་པའི་སྙིང་གིས་བརླན་པ། སྐྱོ་བ་མེད་ཅིང་ཤིན་ཏུ་དགའ་བའི་སེམས་པ་གང་བདག་ལ་ཕན་པ་མེད་ཀྱང་། ཚུལ་ཁྲིམས་འཆལ་པའི་ནད་པའི་རིམ་གྲོ་བྱེད་ན་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཀུན་ཏུ་ལྟ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལྷའི་ཕྲེང་བ་དང་། གོས་གྱོན་པ་རབ་ཏུ་དགའ་སྟེ་ལྷའི་འདོད་པའི་ཡོན་ཏན་ལྔ་འབྱོར་པའི་བདེ་བ་དང་ནི་ལྡན། ཡིད་རྟག་ཏུ་དགའ་བ་ལྷའི་འདོད་པའི་ཡོན་ཏན་ལྔ་རྣམས་དང་ལྡན་པ་དག་སྐྱེད་མོས་ཚལ་ནས་སྐྱེད་མོས་ཚལ་དུ་ནི་རྒྱུ། དགའ་དགུར་གནས་པ་གྲོགས་སྡུག་གུ་ལྷ་མོའི་ཚོགས་
དུ་མས་བསྐོར་ཅིང་ཡོངས་སུ་སྤྱོད་པར་ནི་བྱེད། ཉི་མའི་འོད་ལྟར་ནི་གསལ། དགེ་བ་ནི་རྒྱ་ཆེར་འཕེལ། ལྷའི་ཚོགས་ཐམས་ཅད་ཀྱིས་ནི་མཆོད། རི་རབ་རིན་པོ་ཆེ་དུ་མའི་འོད་ཀྱིས་གསལ་བར་བྱས་ཤིང་རབ་ཏུ་འབར་བ་དག་ལ་ནི་གནས། གོས་ཚོན་ཅན་རྣམ་པ་སྣ་ཚོགས་ནི་བགོས། མཐོ་རིས་དང་འཐུན་པའི་རིན་པོ་ཆེ་དུ་མ་དག་གི་རྒྱན་གདགས་པར་བྱ་བ་ནི་བཏགས། ཚལ་ན་རྣམ་པར་རྒྱུ་བའི་ལྷས་བསམས་པའི་ཚལ་དཀྲིགས་པ་སྣ་ཚོགས་དག་ན་ནི་གནས། པད་མའི་རྫིང་དང་། ལྟེང་ཀ་དང་། ཆུའི་དངོ་དང་། འབབ་ཆུ་དང་། ཆུ་བོ་དང་། འབབ་ཆུའི་རྒྱུན་དང་། སྟེགས་སྣ་ཚོགས་དག་ལ་རྣམ་པར་རྒྱུ་བ་ན། རང་གི་ལས་རྣམས་ལས་ཀྱི་བྱ་བ་བྱེད་དོ། །དེ་ལྟར་དེ་ཡོངས་སུ་རྒྱུ་བ་ན། ཕྱོགས་གཞན་ཞིག་ན་ཚལ་དྲིལ་བུ་གཡེར་ཀའི་དྲ་བས་གཏིབས་ཤིང་གསེར་གྱི་ལན་ཀན་བྲེས་པ་ཞིག་དེས་མཐོང་སྟེ། བྱ་རྣམ་པ་སྣ་ཚོགས་གནས་པ། བྱའི་ཚོགས་སྐད་སྙན་ཅིང་འཇེབས་པ་འབྱིན་པ་རྣམས་ཀྱིས་ནི་ཀུན་ཏུ་གང་། རླུང་གིས་ཕོག་ནས་རབ་ཏུ་གཡོས་པའི་དྲིལ་བུ་གཡེར་ཀའི་སྒྲ་ནི་དྲག་ཏུ་འཁྲོལ། ཉི་མ་འབུམ་སྙེད་ཀྱི་འོད་དང་ནི་ལྡན། རི་རབ་ལས་བྱུང་བ་གསེར་གྱི་རི་བདུན་ལ་འདི་ལྟ་སྟེ། ཤིན་ཏུ་མཐོ་དང་། རབ་སྦྱོར་དང་། ཆར་དགའ་དང་། ཀླུས་བརྟོལ་དང་། རབ་ཆགས་གསལ་དང་། རིན་ཆེན་ཆར་འབེབས་དང་། རྒྱུ་སྐར་ཕྲེང་གིས་ཡོངས་སུ་བསྐོར་བ། དྲིལ་བུ་གཡེར་ཀའི་དྲ་བས་གཏིབས་པའི་ཚལ་དེར་འཇུག་པར་བྱེད་དོ། །རྣམ་པ་དེ་ལྟ་བུའི་ཚལ་ལྷའི་ཕྲེང་བ་ལ་སོགས་པས་རྣམ་པར་བརྒྱན་པ་དེ་ན། ལྷ་མོ་ཚལ་གྱི་གསབ་གསེབ་ན་རྒྱུ་ཞིང་རྩེ་བ་གང་ཡིན་པ་དེ་དག་འོད་ཟེར་འབུམ་སྙེད་འབྱུང་བ་ལྟར་ཚལ་དེ་ན་སྣང་ངོ་། །ཤིང་ལྗོན་པའི་བར་བར་ན་འཁོད་པའི་ལྷ་དེ་དག་གིས་དེ་རྣམས་མཐོང་ནས། དེ་ནས་ཡང་འདོད་པའི་ཡོན་ཏན་ལྔ་ལ་བློ་རྣམ་པར་ཆགས་པ་དག་བལྟ་བའི་ཕྱིར་དེའི་དྲུང་དུ་འདོང་ཞིང་ཤིན་ཏུ་རྒྱུག་པར་བྱེད་དེ། གསེར་གྱི་པད་མ་རྣམས་ཀྱིས་དེ་དག་དང་རྩེ་བར་བྱེད། ཡོངས་སུ་སྤྱོད་པར་བྱེད། དགོད་པར་བྱེད། སྒེག་པར་བྱེད་ལ།
རོལ་མོའི་སྒྲ་རྣམས་ཀྱིས་ཀྱང་ཤིན་ཏུ་དགའ་བར་བྱེད་དོ། །དེ་ལྟར་འདོད་པ་ལ་བློ་རྣམ་པར་ཆགས་པ་དེ་མིག་ལྷའི་གཟུགས་ཡིད་དུ་འོང་བ་རྣམས་ཀྱིས་ཆོག་མི་ཤེས་སོ། །རྣ་བ་སྒྲ་སྙན་པ་གསལ་བ་ཡིད་དུ་འོང་བ་རྣམས་ཀྱིས་ཆོག་མི་ཤེས་སོ། །སྣ་དྲི་ཞིམ་པ་བསུང་ཆེ་བ་ཡིད་དུ་འོང་བ་རྣམས་ཀྱིས་ཆོག་མི་ཤེས་སོ། །ལྕེ་རོ་ཞིམ་པ་བྲོ་བ་མང་ལ་ཡིད་དུ་འོང་བ་རྣམས་ཀྱིས་ཆོག་མི་ཤེས་སོ། །པགས་པ་རེག་བྱ་བདེ་བ་འཇམ་པ་ཡང་བ་ཡིད་དུ་འོང་བ་རྣམས་ཀྱིས་ཆོག་མི་ཤེས་ཏེ། སྲེད་པ་དྲུག་གི་མེས་ཡོངས་སུ་བསྐོར་བ་དེ་ཀུན་ནས་སྲེག་པར་བྱེད་དོ། །དེ་ལྟར་ཆོག་མི་ཤེས་པ་དེ་དགེ་སློང་དེས་མངོན་པར་མཐོང་ནས་འདི་ལྟར་ཚིགས་སུ་བཅད་དེ་སྨྲས་པ། ལྷ་ཡི་འཇིག་རྟེན་ཀུན་ནས་སུ། །སྲེད་པའི་མེ་ཡིས་ཡོངས་སུ་བསྐོར། །རྨོངས་པ་འདོད་པའི་དབང་སོང་བ། །ཆགས་པ་དབང་མེད་སྲེད་པར་བྱེད། །ཇི་ལྟ་ཇི་ལྟར་ཤིང་རྙེད་ན། །དེ་ལྟ་དེ་ལྟར་སྲེག་པ་འཕེལ། །ཇི་ལྟ་ཇི་ལྟར་བདེ་ཐོབ་ན། །དེ་ལྟ་དེ་ལྟར་སྲེད་མེ་འཕེལ། །ཤིང་མེས་སྲེག་པའི་ཉེས་པ་རྣམས། །མི་ཡིས་ཡོངས་སུ་སྤང་ནུས་ཀྱི། །འཇིག་རྟེན་སྲེད་མེས་སྲེག་པ་ནི། །ཡོངས་སུ་སྤང་བར་མི་ནུས་སོ། །ཆུ་བོ་ཆེན་པོ་རྒལ་འདོད་ལ། །ཆུ་སྲིན་གྱིས་ནི་འཇིགས་པ་གང་། །དེ་དག་བདེ་བའི་མཐར་ཕྱིན་ན། །སྲེད་པས་དེ་ལ་གནོད་མི་འགྱུར། །སྲེད་པའི་ཞགས་ལས་རྣམ་གྲོལ་ཞིང་། །འདོད་ཆགས་ཞེ་སྡང་སྤོང་བ་པོ། །ཉེས་སྡིག་ལས་ནི་གྲོལ་བ་གང་། །མཁས་པ་དེ་ནི་མྱ་ངན་བྲལ། །གང་ཞིག་ཚུལ་ཁྲིམས་སྲུང་བ་ཉིད། །མཐོ་རིས་དེ་ལ་ཡིད་ཞུགས་ན། །དེ་དག་ཚུལ་ཁྲིམས་སྡིག་དང་བཅས། །ཟས་དང་དུག་ནི་འདྲེས་པ་བཞིན། །བསྐལ་པ་བྱེ་བ་སྟོང་རྣམས་སུ། །སྲེད་པས་བསླུས་པའི་མི་རྣམས་ནི། །ཤིན་ཏུ་རྨོངས་པས་དེ་མི་གཏོང་། །ཡིད་ནི་གཏི་མུག་དབང་དུ་སོང་། །སྐོམ་གྱིས་གདུངས་པའི་ཁུར་ཙ་བ། །ལན་ཚྭའི་ཆུ་ནི་འཐུངས་པ་ལྟར། །སྲེད་པས་བསླུས་པའི་སེམས་ཅན་རྣམས། །སྲེད་པ་ཉིད་ཀྱི་རྗེས་
སུ་འབྲང་། །སྐྱེ་བོ་སྐད་ཅིག་ཚིམ་བྱེད་ལ། །སྐད་ཅིག་གིས་ནི་སྐོམ་བྱེད་པ། །སྐྱེས་བུ་ཐ་མ་སྲེད་པ་ཡིས། །གདུངས་པ་ལམ་གོལ་ཚོལ་བ་བཞིན། །དེ་བས་སྲེད་པ་བསྟེན་མི་བྱ། །སྲེད་པ་དེ་ནི་བསྟེན་པར་དཀའ། །སྲེད་པའི་དབང་དུ་སོང་བའི་མི། །འཁོར་བ་ལས་ནི་འགྲོལ་མི་འགྱུར། །གང་ཞིག་བདེ་བ་བླ་ན་མེད། །བསམ་གཏན་སྐྱེད་མོས་ཚལ་ལ་དགའ། །མྱ་ངན་འདས་པའི་གྲོང་སྟོན་པ། །དེ་དག་བདེ་བ་དེ་བཞིན་འགྱུར། །བདེ་བ་བླ་ན་མེད་པ་རྣམས། །ལྷ་ཡུལ་སྤྱོད་པའི་སྐྱེ་བོ་དག །སྲེད་པའི་ཞགས་པས་དྲངས་ནས་སུ། །ཡང་དང་ཡང་དུ་དམྱལ་བར་ལྟུང་། །འཆི་མཐའ་དང་པོར་དགེ་བ་སྨིན། །ཡང་དག་ལམ་ནི་སྟོན་མཛད་པས། །སྲེད་ལ་རྟག་ཏུ་སྟེན་བྱེད་པ། །འདི་ཡིས་སྡུག་བསྔལ་ཚ་ཞེས་གསུངས། །དེ་ལྟར་དགེ་སློང་དེས་ལྷའི་འཇིག་རྟེན་འདོད་པའི་དབའ་རླབས་ཀྱིས་བདས་ཤིང་འཆི་བའི་སྡུག་བསྔལ་མངོན་པར་མཐོང་ནས་འཁོར་བ་ལ་ཡིད་བྱུང་ངོ་། །དེ་ལྟར་ལྷའི་དེ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་གནས་ཀུན་ཏུ་ལྟ་བ་དག་ལ་དགའ་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། ལས་དེ་དང་རྒྱུ་འཐུན་པར་བུ་དང་། ཆུང་མ་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དང་། རྟག་ཏུ་ལྡན་ཞིང་ཤིན་ཏུ་འབྱོར་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་རྟག་ཏུ་དགའ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་
སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་ཅིང་སེམས་པ་གསལ་བའི་སྙིང་དང་ལྡན་པ་གང་གིས་རྒྱལ་པོས་གསད་པར་བྱ་བ་བཙོན་རའི་ནང་དུ་བཅུག་པ་ལས་ནོར་རྫས་ཐམས་ཅད་ཕུལ་ནས། དེ་ཐར་བར་བྱས་སམ། དེ་བཞིན་དུ་རྒྱལ་པོའི་བུའམ། དེ་དང་འཐུན་པ་དག་ལ་ཕུལ་ནས་དེ་ཐར་བར་བྱས་ལ། དེ་ལས་ནོར་རྫས་སྣ་འགའ་ཡང་ལེན་པར་མི་བྱེད་དེ། སྙིང་རྗེས་བརླན་པའི་སྙིང་གིས་སེམས་ཅན་རྣམས་ལ་ཕན་པ་ཁོ་ན་བྱེད་ཅིང་ལེགས་པར་བྱས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་རྟག་ཏུ་དགའ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལྷ་དེ་རྣམས་ངོ་བོ་ཉིད་ཀྱིས་ཡིད་རབ་ཏུ་དགའ་བ་ཡིན་ལ། དེ་དག་པས་ཀྱང་དེ་བརྒྱ་འགྱུར་དུ་ཡིད་རབ་ཏུ་དགའ་བར་འགྱུར་ཏེ། ལས་དེ་དང་རྒྱུ་འཐུན་པར་འབྲས་བུ་འབྲེལ་པས་རྒྱུ་དང་འཐུན་པར་འབྲས་བུ་འབྱུང་ངོ་། །ལྷའི་འཇིག་རྟེན་དེར་སྐྱེས་པ་དེ་ལྷ་མོའི་ཚོགས་མང་པོས་ནི་ཡོངས་སུ་བསྐོར། གླུ་དབྱངས་དང་། བྲོ་གར་དང་། བཞད་གད་དང་། རྩེད་མོ་དང་། དགའ་དགུར་སྤྱོད་པའི་ལྷ་མོ་རྣམས་ཀྱིས་ནི་མཐའ་འཁོར་ཏེ། ཉེ་བར་སྤྱོད་ཅིང་རི་རབ་དང་། རི་དང་། རི་ཕུག་དང་། རི་ཁྲོད་རྣམས་སུ་ནི་རྒྱུ། དེ་བཻ་ཌཱུརྱའི་རྡོ་ལེབ་བཟང་པོ་རེག་ན་ཤིན་ཏུ་བདེ་བ་རྣམས་ཀྱི་སྟེང་ན་རང་དགར་ནི་སྤྱོད། ཆུ་བོ་དང་། འབབ་ཆུ་དང་། ལྟེང་ཀ་དང་། ཚལ་དང་། ཉེ་བའི་ཚལ་རྣམས་སུ་ཤིན་ཏུ་བདེ་བ་དང་ལྡན་པ་དག་དགའ་བར་བྱེད། བདེ་བ་དེའི་ཁྱད་པར་ནི་འཁོར་ལོས་སྒྱུར་བའི་བདེ་བས་འབུམ་གྱི་ཆར་ཡང་མི་ཕོད་དོ། །དེ་ཅིའི་ཕྱིར་ཞེ་ན། རིས་འཐུན་པ་དེ་དང་། ཤ་དང་། རུས་པ་དང་། ཆུ་སེར་དང་བྲལ་བ་དེའི་ཕྱིར་བདེའོ། །ལྷའི་རིན་པོ་ཆེའི་ཕྲེང་བ་དང་། གོས་དུ་མ་གྱོན་པ་མེ་ཏོག་བརྒྱུས་པ་དང་། བགོ་བ་སྣ་ཚོགས་ཀྱིས་ལུས་བརྒྱན་པ་དེ། རི་རབ་ཀྱི་དྲུང་དག་ན་རྒྱུ་བར་བྱེད་དེ། གལ་ཏེ་གསེར་གྱི་རི་ཟོམ་ལ་འཛེགས་ན་གསེར་དེའི་མཐུས་དེ་གསེར་ལྟ་བུར་འགྱུར་རོ། །གལ་ཏེ་བཻ་ཌཱུརྱའི་རི་ཟོམ་
ལ་འཛེགས་ན་བཻ་ཌཱུརྱ་དེའི་མཐུས་བཻ་ཌཱུརྱའི་མདོག་ལྟ་བུར་འགྱུར་ཏེ། བདག་ཉིད་མཚོའི་ནང་དུ་ཞུགས་པ་ལྟར་གྱུར་ཀྱང་འདམ་རྫབ་ཀྱིས་གོས་པ་ལྟ་བུར་ནི་མི་འགྱུར་རོ། །གལ་ཏེ་ཤེལ་གྱི་རི་ཟོམ་ལ་འཛེགས་ན་ཤེལ་གྱི་འོད་དེས་དེ་ཟླ་བ་གཉིས་པ་ལྟ་བུར་འགྱུར་རོ། །གལ་ཏེ་དངུལ་གྱི་རི་ཟོམ་ལ་འཛེགས་ན་དངུལ་དེའི་མཐུས་དེའི་ཡན་ལག་དང་ཉིང་ལག་ཐམས་ཅད་ཁ་བ་དང་མེ་ཏོག་ཀུ་མུ་ད་ལྟར་འགྱུར་ཏེ། དེ་ལྟར་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ། སིལ་སྙན་ཡན་ལག་ལྔ་དང་ལྡན་པའི་ཚལ་དང་། ཉེ་བའི་ཚལ་རྣམས་སུ་དགའ་བར་བྱེད། ཡོངས་སུ་སྤྱོད་པར་བྱེད་ཅིང་། ལྷའི་བདེ་བ་དཔེ་མེད་པ་དག་མྱོང་བར་བྱེད་དོ། །དེ་ལྟར་དེ་རྣམ་པར་སྤྱོད་པ་ན་ཤིང་ལྗོན་པ་དུ་མས་མཛེས་པར་བྱས་པ། ལྷའི་ཉམས་དགའ་བར་བྱེད་པའི་ཚལ་ཞེས་བྱ་བ་ཞིག་རྒྱང་རིང་པོ་ནས་མཐོང་བ་དང་། དེར་ལྷ་དེ་དག་འཛམ་བུའི་ཆུ་བོའི་གསེར་གྱི་ཤིང་རྟ་ལ་ཞོན་ནས་འགྲོ་བར་བྱེད་དོ། །ཚལ་དེ་ཡང་བྱ་རྣམ་པ་སྣ་ཚོགས་སྒྲ་འབྱིན་ཅིང་ཚལ་གྱི་ལྕུག་མ་གཞོན་ནུ་འཕྱང་བ་དག་ཏུ་ཤིང་རྟས་ཕྱིན་པ་དང་། བྱ་ལྷའི་སྐད་དུ་རྩེ་བ་ཞེས་བྱ་བ་ལྷ་རྣམས་དང་སྨྲ་བ་འཐུན་པ་དག་ལྷ་དེའི་དགེ་བའི་ལས་ཀྱི་མཐུས་བསྐུལ་བ་དང་། འདི་ལྟར་ཚིགས་སུ་བཅད་དེ་སྨྲས་པ། དགའ་བར་བྱེད་པའི་ལས་རྣམས་དག །སྐྱེས་བུ་གང་ཞིག་འདིར་བྱེད་པ། །དེ་ཡི་ལས་ཀྱི་རྣམ་སྨིན་ནི། །ལེགས་པར་ཡོངས་སུ་སྨིན་པར་འགྱུར། །བདེ་བ་ཐོབ་པའི་ལྷ་དེ་དག །བག་མེད་པ་ལ་མ་བསྟེན་ན། །དེ་ནི་བདེ་ལས་བདེ་ཐོབ་ཅིང་། །མྱ་ངན་འདས་པའི་རྗེས་སུ་འགྲོ། །བདེ་བའི་མཐའ་དེ་ཟད་འགྱུར་ཞིང་། །འདི་ལ་རྟག་དང་ཐེར་ཟུག་མེད། །དེ་ཐོབ་གཞལ་མེད་ཁང་རྣམས་ལ། །སྐྱེས་བུ་མཆོག་རྣམས་ཆགས་མ་བྱེད། །བདེ་མཐའ་རྟག་ཏུ་ལྷུང་འགྱུར་ཞིང་། །བདེ་ལ་རྟག་པ་ཉིད་མེད་དེ། །རྒྱུ་དེ་ཐམས་ཅད་རིག་ནས་སུ། །ཡིད་ལ་ངེས་པར་ལེགས་པར་བྱོས། །བསགས་པ་ཐམས་ཅད་ཐ་མར་ཟད། །མཐོ་བའི་མཐའ་ནི་ཐ་མར་རྙིལ། །འདུ་བའི་མཐའ་ནི་ཐ་མར་འབྲལ། །འཚོ་བའི་མཐའ་ནི་ཐ་མར་འཆི། །སྐྱེས་པ་རྟག་ཏུ་
འཆི་འགྱུར་ཞིང་། །དེ་ལ་རྟག་པ་ཉིད་མེད་དེ། །ཁམས་གསུམ་དག་ཏུ་སྔོན་བྱུང་ཞེའམ། །ཕྱི་ནས་འབྱུང་བ་ཉིད་མེད་དོ། །ཇི་ལྟར་ཉི་མ་འཆར་བ་དང་། །ནུབ་པར་འགྱུར་བ་རབ་ཏུ་མངོན། །དེ་ལྟར་སྐྱེས་པ་ཐམས་ཅད་ཀྱི། །ཐ་མར་འཆི་བ་གནས་པ་ཡིན། །ཆོས་རྣམས་ཀྱི་ནི་ངོ་བོ་ཉིད། །སྐྱེ་དང་འཇིག་པ་འདི་ཤེས་ནས། །བག་མེད་ཡིད་ལ་མ་བྱེད་ཅིག །བག་མེད་དུག་གི་མཆོག་ཡིན་ནོ། །བག་ཡོད་འཆི་མེད་གནས་ཡིན་ལ། །བག་མེད་འཆི་བའི་གནས་ཡིན་ནོ། །བག་ཡོད་འཆི་བར་མི་འགྱུར་ལ། །བག་མེད་རྣམས་ནི་རྟག་ཏུ་འཆི། །ཇི་ལྟར་དུག་དང་ཇི་ལྟར་མེ། །སྲོག་ཆགས་བག་མེད་དེ་བཞིན་ཏེ། །བག་མེད་མྱོས་པའི་སེམས་ཅན་རྣམས། །སྡུག་ལས་སྡུག་བསྔལ་དེ་འགྲོའོ། །རྟག་ཏུ་བག་ཡོད་མི་རྣམས་ནི། །འཇིག་རྟེན་ཀུན་གྱིས་ཕྱག་བྱས་ཤིང་། །གང་ན་བག་མེད་མི་གནས་པ། །ཞི་བ་མཆོག་ཏུ་འགྲོ་བར་བྱེད། །དེ་ཀུན་མཐའ་ནི་ཟད་འགྱུར་ཏེ། །རྨོངས་པ་གང་ཞིག་མི་རིག་པ། །དེ་ནི་ཕྱི་ནས་འཆི་འགྱུར་ཏེ། །མ་བྱས་དོན་མེད་གདུང་བར་བྱེད། །རྟག་ཏུ་བདག་ཉིད་དགའ་འདོད་ན། །འཆི་བའི་བར་དུ་དགེ་བ་བྱོས། །ཆོས་སྤྱོད་བདེ་བ་ཡིན་ནོ་ཞེས། །མཁས་པ་རྣམས་ཀྱིས་གདམས་པ་ཡིན། །རྒྱུ་ཡི་དེ་ཉིད་རྣམ་སྟོན་པ། །སངས་རྒྱས་རྣམས་ཀྱིས་འཁོར་བ་ཀུན། །རྟག་ཏུ་མི་རྟག་མི་བརྟན་ལ། །འགྱུར་ཞིང་ཚ་བར་རྟག་ཏུ་གསུངས། །དེ་ནས་ལྷ་དེས་བྱ་དེ་རྣམས་ཀྱི་ཚིག་ཐོས་ནས། ཡང་དག་པར་བསམས་ཏེ་ཡིད་ལ་ཡང་དགའ་བ་བསྐྱེད་པ་དང་། །སྔོན་གྱི་ཚེའི་འབྲས་བུ་དྲན་ནས་ཡུད་ཙམ་ཞིག་བག་མེད་པ་ལ་མ་ཞུགས་སོ། །མོས་པའི་སྲབ་སྐྱོགས་ཀྱིས་ཡིད་དེ་འཛིན་པར་བྱེད་དེ། གཟུགས་དང་། སྒྲ་དང་། དྲི་དང་། རོ་དང་། རེག་བྱ་ཡིད་དུ་འོང་བ་རྣམས་ལ་བག་མེད་པ་མ་སྐྱེས་སོ། །དེ་ནས་ཡང་ཡིད་མི་བརྟན་པ་དེ་ལྷའི་བདེ་བའི་དབང་དུ་གྱུར་ཏེ། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་དེ་མ་ཟད་ཀྱི་བར་དུ། དེ་ཡུལ་སྡུག་པ་དེ་རྣམས་ལ་སྤྱོད་པར་བྱེད་དེ། དེ་ཕྱིས་ལྷ་ཡུལ་དེ་
ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་ནམས་ཀྱང་བཅིངས་པར་མི་འགྱུར་ཞིང་། རྟག་ཏུ་བདེ་བ་དང་ལྡན་ལ་ཉམ་ང་བ་རྣམས་ལས་ཐར་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་དྲི་ལ་ཆགས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྐྱེས་བུ་ཚུལ་ཁྲིམས་དང་ལྡན་པ་སེམས་པས་ཡོངས་སུ་བསྒོམས་པའི་སྙིང་དང་ཡིད་ཤིན་ཏུ་དང་བ། སེམས་རྙོག་པ་མེད་པར་གྱུར་པ། གཞན་ལ་གནོད་པ་མེད་པ་གང་གིས་སངས་རྒྱས་སམ། ཆོས་སམ་དགེ་འདུན་ལ་ཞིང་ཆེན་པོར་ཤེས་ནས། གོས་ཤིན་ཏུ་དྲི་ཞིམ་པ་རྣམས་ཀྱིས་མཆོད་པ་བྱས་ལ་ལེགས་པར་བྱས་སོ་སྙམ་དུ་ཡང་སེམས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་དྲི་ལ་ཆགས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཤིན་ཏུ་བདེ་བ་དང་། རང་གི་འོད་དང་ལྡན་པ་དང་། སིལ་སྙན་ཡན་ལག་ལྔ་དང་ལྡན་པས་ཡིད་རབ་ཏུ་དགའ་ཞིང་དགའ་དགུར་སྤྱོད་པ་དེ་དུས་རིང་མོ་ཞིག་འདས་སོ། །དུས་རིང་པོ་འདས་པ་དེ་ཡང་ཡུལ་གྱི་བདེ་བ་དེས་ལྷ་དེ་དག་གིས་མི་རིག་སྟེ། གང་བདག་གི་དུས་འདི་འདས་སོ་ཞེས་དབང་པོ་དང་བདེ་བ་མི་བརྟན་པ་ཐོག་མ་མེད་པའི་དུས་ནས་ཞུགས་པའི་ཡུལ་རྣམས་ལ་ཆོག་མི་ཤེས་པ་རྣམས་ཀྱིས་མི་རིག་གོ །དེ་ལྟར་སྙིང་ལ་ཆགས་པའི་མེ་ཏོག་གི་ཕྲེང་བ་དང་ཕྱེ་མ་དང་། བྱུག་པས་ལུས་བསྐུས་པ་དེ། ཚལ་གྱི་བར་བར་དག་ན་རྒྱུ་བར་བྱེད་ལ། ཤིང་ལྗོན་པ་མང་
པོའི་འོད་ཀྱིས་བརྒྱན་པ། ཆུ་བོ་དང་། སྟེགས་དང་། ཚལ་དང་། སྐྱེད་མོས་ཚལ་དག་གིས་བརྒྱན་པའི་ཡུལ་ཉམས་དགའ་བའི་ཚལ་རྣམས་ལ་སྟེན་པར་བྱེད་པ། འདོད་པ་མང་པོ་ལ་སྙིང་ཆགས་པ་དག་ཡུལ་གྱི་བདེ་བ་དེས་ལྷའི་འཇིག་རྟེན་གྱི་མཐའ་འདི་ལྟུང་བར་ཁོང་དུ་མི་ཆུད་དོ། །དེ་ལྟར་ཡུལ་གྱི་སྲེད་པས་ཡོངས་སུ་བསླུས་པ་དེ། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་ལྷའི་འཇིག་རྟེན་དེ་དག་ན་དགའ་བར་བྱེད། ཡོངས་སུ་སྤྱོད་པར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་ཡུལ་རྟག་ཏུ་བསིལ་བར་སྐྱེ་བར་འགྱུར་ཏེ། ཡུལ་གནོད་པ་མེད་པ་དང་། མཚོན་ཆ་དང་། དགོན་པ་དང་། ལོ་ཉེས་འབྱུང་བ་དང་བྲལ་བའི་ཡུལ་རྣམས་སུ་སྐྱེ་ལ། སྐྱེ་བོ་ཀུན་གྱིས་མཆོད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་སྤྱི་གཙུག་ཐར་ཅེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། རྒྱལ་པོ་ལ་གནོད་པ་བྱེད་པའི་མི་སྤྱི་གཙུག་ནས་བཟུང་སྟེ་སྤྱངས་པ་དང་། སྡུག་བསྔལ་བ་ལས་གང་གིས་དེ་ཐར་བར་བྱས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སྤྱི་གཙུག་ཐར་ཞེས་བྱ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །རྒྱལ་ཆེན་བཞིའི་གནས་གསུམ་གྱི་ནང་ན་དེའི་ཉམས་དགའ་བ། ཤིན་ཏུ་ཡིད་དུ་འོང་བ། འདོད་པ་ལ་རྟེན་པ། དེའི་ངོ་བོ་འདོད་པ། འདོད་པ་ཉེ་བར་མཆོད་པ། འདོད་པ་རྒྱུན་ཆད་པ་མེད་པ་གང་ཡིན་པ་བསྡུས་པ་དེ་དག་
ཐམས་ཅད་འབྱུང་ལ། བདེ་བའི་གནས་དེ་ན་བདེ་བ་དེས་མངོན་པར་འདོད་པ། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དེ་ན་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ་སིལ་སྙན་ཡན་ལག་ལྔ་དང་ལྡན་ཞིང་ཡུལ་གྱི་བདེ་བ་དང་། ཉམས་བདེ་བ་དེས་དགའ་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་མྱ་ངན་དང་། འཇིགས་པ་དང་། གནོད་པ་དང་བྲལ་བར་འགྱུར་ལ། སྐྱོན་མེད་པ་དང་། གཟུགས་བཟང་བ་དང་། སྐྱེ་བོ་ཐམས་ཅད་དགའ་བ་དང་། ཤིན་ཏུ་འབྱོར་པ་དང་ལྡན་པ་དང་། དུས་དང་འཐུན་པའི་གཟུགས་བཟང་བ་དང་། ཚེའི་བར་ཆད་མེད་པར་འཆི་བར་འགྱུར་བ་མཐོང་ངོ་། །དེ་ནས་ཡང་དགེ་སློང་དེ་གནས་བཅུ་མཐར་ཆགས་སུ་རྟོག་པར་བྱེད་དེ། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་དེ་ཙམ་དུ་ཟད་དམ་ཞེས་རྟོག་པར་བྱེད་དོ། །དེས་གནས་བཅུ་ལས་གནས་གཞན་བཅུ་གཅིག་པ་མེད་དེ། ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་བཅུ་ནི་དེ་དག་ཉིད་ཡིན་པར་མཐོང་ངོ་། །དེས་ལྷ་ལག་ན་ཡོལ་གོ་ཐོགས་པ་རྣམས་ཀྱི་གནས་བཅུ་མ་ལུས་པར་བརྟགས་ནས། རྒྱལ་ཆེན་བཞིའི་ནང་ན་ཆེ་བ་གནས་གསུམ་པ་རྟག་ཏུ་མྱོས་གནས་ཞེས་བྱ་བ་ཐམས་ཅད་ལ་རྟོག་པར་བྱེད་དེ། ལྷ་རྟག་ཏུ་མྱོས་གནས་དེ་དག་གི་གནས་ཇི་ཙམ་ཞིག་ཡོད་ཞིག་གུ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། རྟག་ཏུ་མྱོས་གནས་དེ་དག་གི་གནས་ཀྱང་བཅུ་ཡོད་དེ། འདི་ལྟ་སྟེ། ལྷག་པར་དགའ་བ་དང་། ཨུད་པ་ལའི་མདོག་དང་། པད་མ་དཀར་སྤྱོད་དང་། གྲོང་ཁྱེར་དམར་གནས་དང་། སྣ་ཚོགས་དང་། མཐོ་བར་གནས་དང་། རྒུན་ཆང་མྱོས་གནས་དང་། ཡུལ་ལ་འདོད་པ་དང་། ཆུ་བསིལ་གནས་དང་། བརྟན་དགའ་སྟེ། ལྷ་རྟག་ཏུ་མྱོས་གནས་
རྣམས་ཀྱི་གནས་ནི་བཅུ་པོ་འདི་དག་ཡིན་ནོ། །ས་གཞན་གང་ཞིག་ཏུ་ལས་གང་གིས་གང་དུ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཤིན་ཏུ་དང་ཞིང་རྙིང་ལ་རྙོག་པ་མེད་པ་དང་། སེམས་བཟང་པོ་ཡང་དག་པའི་ལྟ་བ་དང་ལྡན་པ་གང་གིས་ཤིང་ལྗོན་པ་ཆེན་པོ་གང་ལ་ཡི་དགས་དང་། གནོད་སྦྱིན་དང་། སྲིན་པོ་དག་གནས་པའི་ཤིང་ལྗོན་པ་དེ། གཅོད་པ་ན་ཡོངས་སུ་སྐྱོབ་པར་བྱེད་ལ། ཡི་དགས་དང་། གནོད་སྦྱིན་དང་། སྲིན་པོ་དེ་དག་གནས་དང་བྲལ་བས་འཚེ་བར་མི་བྱེད། དེའི་མཐུས་བདེ་བར་གནས་ན་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་གནས། ལྷག་པར་དགའ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་གནས་གཞན་དེ་ན་ཆུ་བསིལ་བ་ཞེས་བྱ་བའི་རྫིང་བུ་ཡངས་པ་གསེར་གྱི་མདོག་དང་ལྡན་པ། བྱ་ངང་པ་དང་། ཀཱ་རཎྜ་བ་དང་། ངུར་པ་ལུས་གསེར་གྱི་ཁ་དོག་ཅན་སྒྲ་འབྱིན་པ་རྣམས་ཀྱིས་མཛེས་པར་བྱས་པ། རིན་པོ་ཆེ་སྣ་བདུན་གྱི་པད་མ་རབ་ཏུ་མང་པོ་རྣམས་ཀྱིས་མཛེས་པར་བྱས་པ་ཡིན་ནོ། །པད་མའི་རྫིང་ཆུ་བསིལ་བ་དེ་དག་ན་ཡང་ཀུན་ནས་གསེར་གྱི་ཚལ་ཞེས་བྱ་བ་ཡོད་དེ། པད་མའི་རྫིང་དེ་གསེར་དང་དངུལ་གྱི་ཤིང་ལྗོན་པ་རྣམས་ཀྱིས་ཀུན་ནས་དཀྲིགས་ཤིང་བསྐོར་ནས་སྐྱེའོ། །ཤིང་དེ་རྣམས་ཀྱང་པད་མའི་རྫིང་གི་ཆུ་དེའི་ནང་ན། དེ་རྣམས་ཀྱི་གྲིབ་མ་འབབ་པའི་གཟུགས་དུ་མ་གཟུགས་བརྙན་ལྟ་བུར་སྣང་ལ། པད་མའི་རྫིང་དེ་ཡང་ཆུའི་ནང་དུ་ཤིང་ལྗོན་པའི་གྲིབ་མ་དེ་རྣམས་ཀྱི་གཟུགས་བརྙན་ལྟ་བུར་སྣང་ངོ་། །དེ་ཡང་པད་མ་དང་། མེ་ཏོག་ཨུད་པ་ལ་དང་། ཀུ་མུ་དས་མཛེས་པར་བྱས་པ་དག་ནི། ཇི་ལྟར་བརྒྱ་བྱིན་ཡང་དེར་རྩེ་བའི་བློ་སྐྱེ་བ་དེ་ལྟར་མཛེས་པ་ཡིན་ནོ། །གང་གི་ཚེ་ལྷ་དང་ལྷ་མ་ཡིན་གཡུལ་འགྱེད་པར་འབབས་པ་ན་ཉི་མ་ཤར་བའི་མདོག་ལྟ་བུའི་པད་མ་འབུམ་ཕྲག་དུ་མས་མཛེས་པར་བྱས་པ་དེ་རྣམས་མཐོང་སྟེ། བརྟགས་ནས་ལྷ་རྣམས་ལ་སྨྲས་པ། ཀྱེ་མ་འདི་ལྟར་ཆུ་བསིལ་བའི་རྫིང་བུ་སྐྱོན་མེད་
པ་འདི་ཉིད་ཤིན་ཏུ་ཉམས་དགའ་བ་ཡིན་ནོ། །དེ་ནས་ཡོན་ཏན་དེ་ལྟ་བུ་དང་ལྡན་པའི་རྫིང་བུ་དེ་རྣམས་སུ་ཡིད་རྟག་ཏུ་དགའ་ཞིང་རྫིང་བུའི་འགྲམ་དུ་ཡིད་རབ་ཏུ་མགུ་བའི་ལྷ་དང་། ལྷ་མོའི་ཚོགས་དང་བཅས་པས་སིལ་སྙན་ཡན་ལག་ལྔ་དང་ལྡན་ཞིང་བདེ་བ་དཔེ་མེད་པ་དང་ལྡན་པ་ཅི་དགའ་དགུར་བྱེད་པའི་ལྷ་མོའི་ཚོགས་ཀྱིས་ཡོངས་སུ་བསྐོར་བ། ཤིན་ཏུ་བདེ་བ་དང་ལྡན་པ། ཁ་ཟས་དང་། གནས་དང་། རང་དགར་ཟ་ཞིང་འཁོད་པ་རྣམས་དགའ་བར་བྱེད། ཡོངས་སུ་སྤྱོད་པར་བྱེད་དོ། །དེ་ནས་ཡང་བྱུང་ནས་གལ་ཏེ་གནས་གཞན་དུ་འགྲོ་བར་འདོད་ན། ལུས་དང་སེམས་གདུང་བ་རྣམས་དང་བྲལ་བ། སེམས་ཤིན་ཏུ་དགའ་བ་བདེ་བ་ཤིན་ཏུ་རྒྱ་ཆེ་ཞིང་འདོད་པ་དང་ལྡན་པ་རྣམས་ལྷ་དང་ལྷ་མོའི་ཚོགས་དགོད་ཅིང་གླུ་དབྱངས་ལེན་ལ། བྲོ་གར་བྱེད་པ་དང་ལྡན་པ་རྣམས་ཀྱིས་ཡོངས་སུ་བསྐོར་ཅིང་རྟག་ཏུ་རྩེ་བ་ན། ལྷའི་ལུས་དང་ཡིད་ལ་བདེ་བ་གང་དང་གང་དག་འདོད་པ་དེ་དང་དེ་དག་ཉོན་མོངས་པ་མེད་ཅིང་ཤིན་ཏུ་རྒྱས་པ་དང་། ཚེགས་ཆུང་ངུས་འབྱུང་བར་འགྱུར་རོ། །དབང་པོ་ལྔ་ཡུལ་ལྔ་དག་ལ་སྤྱོད་པ་ཡང་བདེ་བ་ལ་གནས་པ་དེས་ཚིམ་མི་མྱོང་བར་འགྱུར་རོ། །དེ་ཅིའི་ཕྱིར་ཞེ་ན། སྲེད་པ་མེ་ལྟ་བུ་དག་ལ་སྤྱོད་པ་དེ་ཡུལ་གང་གིས་ཀྱང་ཚིམ་པར་མི་འགྱུར་རོ། །དེ་ལྟར་རི་དང་སྐྱེད་མོས་ཚལ་དང་། ཆུ་བོ་དང་། གཞལ་མེད་ཁང་དང་། ལྟེང་ཀ་དང་། ཆུ་དངོ་རྣམ་པ་སྣ་ཚོགས་དང་། རིན་པོ་ཆེ་སྣ་ཚོགས་དང་། རིན་པོ་ཆེ་སྣ་བདུན་གྱིས་མཛེས་པར་བྱས་པ། བྱ་རྣམ་པ་སྣ་ཚོགས་སྒྲ་སྙན་པ་འབྱིན་ཅིང་འདོན་པ་རྣམས་སུ་ལྷ་དེ་གྲོགས་དང་ལྷན་ཅིག་བདེ་བ་དུ་མ་ལ་གནས་ཤིང་བཻ་ཌཱུརྱའི་ཚལ་གྱི་གྲིབ་མས་མཛེས་པར་བྱས་པ་དག་ན་བྱ་རྣམ་པ་སྣ་ཚོགས་སྒྲ་འབྱིན་ཅིང་འདོན་པའི་ཚལ་དང་ཉེ་བའི་ཚལ་རྣམས་ན་དགའ་བར་བྱེད། རྩེ་བར་བྱེད། མགུ་བར་བྱེད། དགའ་དགུར་སྤྱོད་པར་བྱེད་དོ། །བཻ་ཌཱུརྱ་དང་། གསེར་དང་། དངུལ་དང་། བྱི་རུའི་རི་རབ་ཀྱི་ཟོམ་ལ་རང་དགར་འཁོད་པ། ཁ་ཅིག་ནི་ཉི་མ་ལྟར་གཟི་ཆེ། ཁ་ཅིག་ནི་ཟླ་བ་ལྟར་མདངས་གསལ། ཁ་ཅིག་ནི་གཟུགས་དཔེ་མེད་པ་དང་ལྡན་ཏེ།
ཇི་ལྟར་ལེགས་པར་བྱས་པའི་ལས་དེ་རྣམས་ཀྱིས་ལུས་མངོན་པར་བསྒྲུབས་པ་དེ་ལྟར་ལྷ་ཡུལ་དུ་ཡང་རྣམ་པར་མཛེས་པ་ཡིན་ནོ། །རྒྱུ་རྐྱེན་དང་འཐུན་པར་སྤྱོད་པ་དེ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་ལྷའི་འཇིག་རྟེན་དེ་ན་སིལ་སྙན་ཡན་ལག་ལྔ་དང་ལྡན་པས་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་ཤིན་ཏུ་ཉམས་དགའ་བའི་ཡུལ་ལོ་ལེགས་ཤིང་བདེ་བར་སྐྱེ་ལ། ཤིན་ཏུ་འབྱོར་པ་དང་ལྡན་ཞིང་། མཆོག་ཏུ་བདེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་རྟག་ཏུ་མྱོས་གནས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་རྟག་ཏུ་མྱོས་གནས་རྣམས་ཀྱི་གནས་ཨུད་པ་ལ་མདོག་ཅེས་བྱ་བ་ཇི་ལྟར་གནས་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། ཚུལ་ཁྲིམས་དང་ལྡན་པ་གང་གིས་འདི་ལྟར་མེ་ཏོག་ཨུད་པ་ལ་བསྐྱེད་པ་འདིས་སངས་རྒྱས་དང་། ཆོས་དང་དགེ་འདུན་རྣམས་ཀྱི་ལོངས་སྤྱོད་བྱའོ་སྙམ་དུ་བསམས་ནས་བསྐྱེད་ལ། དེ་ཡང་འབུལ་བར་བྱེད་ཅིང་དེ་སེམས་ལ་དགའ་བར་ཡང་འཛིན་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཨུད་པ་ལ་མདོག་གི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལྷ་ཡུལ་དུ་རྩེ་བའི་སྐྱེ་བོ་དང་། དགའ་དགུར་སྤྱད་པ་དེ་དགའ་ཡ་ཡར་རྩེ་བ་དང་། དགའ་བ་དང་། སྟེག་པ་དང་། འཇོ་བ་དང་། རོལ་མོའི་སྒྲ་དང་། གླུ་དབྱངས་དང་། བྲོ་གར་བྱེད་པ་དང་ནི་ལྡན། བདེ་བ་དུ་མ་ལ་ནི་གནས།
ཚལ་ནས་ཚལ་དང་། བཻ་ཌཱུརྱའི་ཚལ་གྱི་གྲིབ་མ་མཛེས་པ་དང་། གསེར་བཙོ་མ་དང་། བྱི་རུ་ལྟ་བུའི་ས་གཞི་བདེ་བ་མཐོན་དམན་རན་པ་རྣམས་སུ་ནི་རྒྱུ། ལྷ་མོའི་ཚོགས་དུ་མས་ནི་ཡོངས་སུ་བསྐོར། ཁ་ཟས་ཞིམ་པོ་ནི་ཟ། ཅི་དགའ་དགུར་འདོད་པ་ཐམས་ཅད་བསམ་པ་ཙམ་གྱིས་ནི་འགྲུབ། ངོ་བོ་ཉིད་ཀྱི་རི་དུ་མ་ལ་ནི་གནས། བདེ་བ་ལས་མཆོག་ཏུ་བདེ་བ་ནི་ཐོབ། དབང་པོ་ལྔ་ཡུལ་ལྔ་ལ་ཆགས་ཤིང་དགའ་བ་ནི་ཉིན་གཅིག་བཞིན་ཉམས་དགའ་བར་བྱེད། ཨུད་པ་ལ་སྔོན་པོ་དང་། བཻ་ཌཱུརྱའི་མདོག་ལྟ་བུའི་ལུས་ནི་ཨུད་པ་ལའི་ཚལ་ནས་ཨུད་པ་ལའི་ཚལ་དུ་རྒྱུ། ཨུད་པ་ལའི་དྲི་གང་ཡིན་པ་དེ་དཔག་ཚད་བརྒྱར་ནི་ལྡང་། ཨུད་པ་ལའི་དྲི་ཞིམ་པོ་དེས་ལྷའི་མེ་ཏོག་གི་དྲི་ཞིམ་པོ་གཞན་ཐམས་ཅད་ཟིལ་གྱིས་མནན་ནས་རྒྱལ་པོ་བཞིན་དུ་ནི་མཛེས། རྒྱུ་དང་འཐུན་པར་འབྲེལ་པའི་རིམ་གྱིས་རྒྱུ་དང་འཐུན་པར་འབྲས་བུ་འབྱུང་བར་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསུངས་ཏེ། དེ་མཐོ་རིས་སུ་ཕྱིན་ནས་ཀྱང་མེ་ཏོག་ཨུད་པ་ལ་དེ་རྣམས་ལས་དགའ་བ་རྣམ་པ་མང་པོ་དུ་མ་འཐོབ་བོ། །དེ་ནས་དེ་ལྟར་སྤྱོད་ཅིང་བདེ་བ་ལ་གནས་པའི་དབང་པོ་དྲུག་ངེས་པར་འབྱུང་བ་ལ་དགའ་བ། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་། སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་མེ་ཏོག་མང་པོ་བསྐྱེད་ཅིང་འབྱོར་པའི་ཡུལ་རྣམས་སུ་སྐྱེ་བར་འགྱུར་ལ། ཤིན་ཏུ་རྒྱ་ཆེ་བ་དང་ལྡན་པ་དང་། མཆོག་ཏུ་བདེ་བ་དང་ལྡན་པ་དང་། གནོད་པ་མེད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་རྟག་ཏུ་མྱོས་གནས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་
ཡུལ་ན་རྟག་ཏུ་མྱོས་གནས་རྣམས་ཀྱི་གནས། པད་མ་དཀར་སྤྱོད་ཅེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་ཅིང་། ལུས་ངག་གི་དྲི་མ་དང་བྲལ་བ་སེམས་པས་ཡོངས་སུ་བསྒོམས་པའི་སྙིང་དང་ལྡན་པ་གང་གིས་སངས་རྒྱས་སམ། ཆོས་སམ། དགེ་འདུན་ལ་མེ་ཏོག་དབུལ་བའི་དོན་དུ་པད་མའི་ཚལ་བསྐྱེད་ཅིང་། སངས་རྒྱས་དང་། ཆོས་དང་། དགེ་འདུན་ལ་ཡང་སེམས་དད་པ་དང་ལྡན་པར་གྱུར་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་གནས་པད་མ་དཀར་སྤྱོད་ཀྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་འབྲས་བུ་ལ་སྤྱོད་དེ། འདི་ལྟ་སྟེ། རྒྱན་དང་། རིན་པོ་ཆེ་དང་། འོད་སྣ་ཚོགས་ཀྱིས་ནི་ལུས་བརྒྱན། ལྷའི་ཚོགས་ཐམས་ཅད་ཀྱིས་ནི་མཆོད། ལྷ་མོའི་ཚོགས་མེ་ཏོག་ཕྲེང་བ་ཐོགས་པ་རྣམས་ཀྱིས་ནི་ཡོངས་སུ་བསྐོར། རྡོ་རྗེ་དང་། མཐོན་ཀ་དང་། མ་རྒད་དང་། སྤུག་དང་། འཕྱང་འཕྲུལ་གྱི་འོད་ཀྱིས་ནི་ལུས་བརྒྱན། དགའ་ཡ་ཡར་རབ་ཏུ་དགའ་ཞིང་རྩེ་བར་ནི་གནས། མཐོ་རིས་དང་འཐུན་པའི་ཀུན་དགའི་ར་བར་གནས་ཤིང་བདེ་བ་རྟག་ཏུ་མྱོང་སྟེ། ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དེ་བདེ་བ་དཔེ་མེད་པ་རྣམ་པ་དུ་མ་ཡོན་ཏན་ཤིན་ཏུ་ཆེ་བ་དང་ལྡན་པ། སྐྱེ་བོ་ཐམས་ཅད་དང་ལྷན་ཅིག་གཞན་ལ་གནོད་པ་མེད་ཅིང་ཀུན་ནས་ཉོན་མོངས་པ་མེད་པ་རྣམ་པ་སྣ་ཚོགས་དེ་དང་དེ་དག་མྱོང་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མི་རྣམས་ཀྱི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་ནོར་གྱི་བདག་པོ་ཤིན་ཏུ་བདེ་བ་དང་ལྡན་ཞིང་བུ་དང་དབང་ཕྱུག་དང་
ལྡན་པ་དང་། རྒྱལ་པོས་ཀྱང་བཀུར་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་རྟག་ཏུ་མྱོས་གནས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྟག་ཏུ་མྱོས་གནས་རྣམས་ཀྱི་གནས་གྲོང་ཁྱེར་དམར་གནས་ཞེས་བྱ་བ་ཇི་ལྟར་འདུག་པ་མཐོང་ངོ་། །གནས་དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་པ་དང་ལྡན་པ་ཕན་པར་འདོད་པ་གུས་པའི་སྙིང་དང་ལྡན་པ་གང་ཡིན་པ་དེས། དགེ་སློང་ཡང་དག་པར་རབ་ཏུ་བྱུང་བའི་ཆོས་གོས་ཤིང་བྱིས་པ་ལའི་ཤུན་པས་ཁ་དོག་དམར་པོར་བསྒྱུར་ཏམ། གུར་གུམ་མམ། བཙོད་དམ། མཚལ་ལམ། སྐྱུ་རུ་རའམ། བཙག་གམ། བབ་ལའམ། ལྡོང་རོས་སམ། མེ་ཏོག་བན་དུ་ས་ཚུར་དང་བཅས་པས་ཁ་དོག་དམར་པོར་བསྒྱུར་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་གྲོང་ཁྱེར་དམར་གནས་ཀྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཕྲེང་བ་དང་གོས་དམར་པོ་གྱོན་པ་དེའི་གནས་དེ་ནི་འོད་ཀྱིས་བརྒྱན་པའི་ལུས་ཀྱིས་རྟག་ཏུ་གསལ་བར་བྱས་པ་ཡིན་ལ། ལྷ་དེ་དག་ཐམས་ཅད་ཀྱང་ཅི་དགའ་དགུར་སྤྱོད་པ་ཡིན་ཏེ། དེ་རྣམས་ཀྱི་མཐུས་གནས་དེ་དག་ཐམས་ཅད་རྣམ་པ་དེ་ལྟ་བུར་དམར་བར་འགྱུར་རོ། །ཇི་ལྟར་པད་མ་རཱ་གའི་འོད་དེ་གོས་པ་མེད་པ་ལྟར་ལྷ་དེ་རྣམས་ཀྱང་དེ་ལྟར་དམར་པོར་སྣང་བར་འགྱུར་རོ། །རྒྱན་གྱི་ཁ་དོག་སྔོན་པོ་དང་། སེར་པོར་འདྲེས་ཤིང་རིན་པོ་ཆེས་བཀླུབས་པ་གཞན་གང་ཡིན་པ་དེ་དག་ཐམས་ཅད་ཀྱང་དམར་པོར་འགྱུར་ཏེ། ལེགས་པར་བྱས་པའི་ལས་དེས་དེའི་གོས་གསལ་བ་རྣམས་ཀྱིས་དམར་པོར་འགྱུར་རོ། །གང་གི་ཚེ་དེ་རྩེ་ཞིང་གཞལ་མེད་ཁང་དང་པད་མའི་ཚལ་དང་། ལྟེང་ཀ་དང་། ཚལ་དང་། ཉེ་བའི་ཚལ་སྣ་ཚོགས་དང་། ལྷ་མོ་ཆ་བྱད་དང་རྒྱན་དམར་པོ་སྣ་ཚོགས་ཐོགས་པ་རྣམས་ཀྱིས་ཡོངས་སུ་བསྐོར་བ་དག་ཡུལ་དུ་མར་འགྲོ་བ་ན། དེའི་ཚེ་དེ་དག་གི་རྒྱན་རྣམས་ཀྱི་ཚོན་རྩི་གསལ་
བ་དང་། ཁ་དོག་ཐམས་ཅད་ཀྱང་གསལ་བར་སྣང་ངོ་། །རིན་པོ་ཆེའི་འོད་སྣ་ཚོགས་ཀྱིས་བརྒྱན་པ། ལྷའི་བུ་དེ་ཚལ་ནས་ཚལ་དང་། རིའི་ཟོམ་ནས་རིའི་ཟོམ་དང་། པད་མའི་ཚལ་ནས་པད་མའི་ཚལ་དང་། ཆུ་བོ་དང་། འབབ་ཆུ་དང་། ལྟེང་ཀ་དང་། ཉེ་བའི་ཚལ་ནས་ཆུ་བོ་དང་། འབབ་ཆུ་དང་། ལྟེང་ཀ་དང་། ཉེ་བའི་ཚལ་དུ་འགྲོ་བར་བྱེད་དོ། །སིལ་སྙན་ཡན་ལག་ལྔ་དང་ལྡན་པའི་གླུ་དབྱངས་ཉེ་བར་ལེན་ཅིང་ཕན་ཚུན་གྲོགས་སུ་གྱུར་པ། སོ་སོར་ཆགས་པའི་སྙིང་གིས་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །སྲེད་པའི་ཚོགས་དྲུག་གིས་ཡིད་རབ་ཏུ་དགའ་བ་དག་བདུད་རྩིའི་ཟས་བཟང་པོ་ལ་ནི་ཟ། མྱོས་པའི་སྐྱོན་དང་བྲལ་བའི་བཏུང་བ་ཞིམ་པོ་ནི་ཚིམ་པར་འཐུང་སྟེ། ཇི་སྲིད་དུ་ཚོགས་ཆེན་པོས་ཡོངས་སུ་བསྐོར་ནས་དགའ་བ་སྣ་ཚོགས་བྱེད་དོ། །དེ་ལྟར་དེ་དག་རྩེ་བ་སྣ་ཚོགས་དགེ་སློང་དེས་མངོན་པར་མཐོང་ནས། འདི་ལྟར་ཚིགས་སུ་བཅད་དེ་སྨྲས་པ། མཐོ་བས་མཐོ་བའི་རི་རབ་ན། །དེ་བས་མཐོ་བ་རྟག་ཏུ་དགེ །།ལྷ་མཆོག་རྣམས་ཀྱི་འོག་མིན་དུ། །དགེ་བས་སྐྱེ་བོ་ཁྲིད་པར་བྱེད། །རྣམ་པ་སྣ་ཚོགས་དུ་མ་ཡི། །ཚུལ་ཁྲིམས་དག་ཀྱང་བསྲུངས་ན་ནི། །དགེ་བའི་ལས་ཀྱི་རྣམ་སྨིན་འདི། །ལྷ་རྣམས་ནང་དུ་སྨིན་པར་འགྱུར། །ཚུལ་ཁྲིམས་ཆུ་ནི་ཤིན་ཏུ་དང་། །རབ་ཏུ་གང་བར་ཀུན་ནས་སུ། །ཁྲུས་བྱས་མི་ནི་ལྷ་རྣམས་ཀྱི། །བདེ་བའི་དྲུང་དུ་འགྲོ་བར་འགྱུར། །སྦྱིན་དང་ཚུལ་ཁྲིམས་རྟག་ཏུ་དུལ། །འབྱུང་པོ་ཀུན་ལ་ཕན་པར་དགའ། །ཡེ་ཤེས་བརྩོན་ལ་བྱམས་སེམས་ལྡན། །ལྷ་ཡི་འདུན་སར་འགྲོ་བར་འགྱུར། །ཉེས་བཅོམ་བྱེད་དང་ལྡན་པ་དང་། །ཚུལ་ཁྲིམས་རིན་པོ་ཆེ་ཡིས་བརྒྱན། །སེམས་ཅན་ཀུན་ལ་བརྩེ་ལྡན་པ། །ལྷ་ཡུལ་རྣམས་ན་དེ་དག་མཁས། །དྲང་པོ་རྣམས་ནི་གསེར་འདྲ་སྟེ། །དྲི་མ་དང་ནི་སྡིག་རྣམས་སྦྱངས། །ཡང་དག་ལས་ཀྱི་མཐའ་བརྩོན་པ། །ལྷ་ཡུལ་རྣམས་ན་དེ་དག་མཁས། །སེམས་ཅན་ཀུན་ལ་བརྩེ་ལྡན་ཞིང་། །སེམས་ཅན་ཀུན་ལ་ཕན་འདོད་ལ། །སྡིག་ཀུན་རྣམ་
པར་སྤངས་པ་གང་། །དེ་དག་ལྷ་ཡི་གནས་ན་གནས། །ལེགས་པར་རྟོག་པ་ཉིན་གཅིག་བཞིན། །ཚུལ་ཁྲིམས་སྲུང་བར་བྱེད་པ་གང་། །ཉིན་གཅིག་བཞིན་དུ་དེ་རྣམས་ཀྱི། །བདེ་བ་དུ་མ་དེ་དག་མྱོང་། །སྐྱེས་བུ་དེ་ཉིད་སེམས་པ་པོ། །ཚུལ་ཁྲིམས་རྟ་ལ་ཞོན་ནས་སུ། །རྩེན་པ་དུ་མ་ལྡན་པ་དག །ལྷ་ཡི་གནས་སུ་འགྲོ་བར་བྱེད། །གང་ཞིག་ལྷ་ཡི་གནས་ན་རྩེ། །གང་ཞིག་བདེ་བ་བླ་ན་མེད། །དེ་དག་འཐུན་པར་ཚུལ་ཁྲིམས་ཀྱི། །འབྲས་བུར་དེ་བཞིན་གཤེགས་པས་གསུངས། །གང་ཞིག་ལྷ་ཡི་ཕྲེང་རྒྱན་དང་། །ལྷ་ཡི་ཕྲེང་བས་བཀླུབས་པ་དང་། །ལྷ་རྣམས་མཐོ་རིས་རྩེ་བ་ནི། །དེ་ཀུན་དགེ་བའི་རྒྱུ་ལས་བྱུང་། །པད་མ་ཨུད་པལ་ཉམས་དགའི་ཚལ། །ཚལ་དང་ནགས་ཚལ་བརྒྱན་པ་དང་། །མཐོ་རིས་ལྷ་རྣམས་དགའ་བ་གང་། །དེ་ཀུན་དགེ་ལས་སྐྱེས་པའི་འབྲས། །ནམ་མཁའ་གཞལ་མེད་ཁང་གནས་དང་། །ལྷ་ཡི་རིན་ཆེན་བརྒྱན་པ་དང་། །ལྷ་རྣམས་དྲི་མེད་གསལ་བ་གང་། །དེ་དག་ཚུལ་ཁྲིམས་འབྲས་བུ་ཡིན། །གསེར་དང་མེ་ཏོག་སྣ་ཚོགས་དང་། །ཀུན་ནས་རི་བོའི་སྟེང་རྣམས་སུ། །ལྷ་རྣམས་དགའ་བྱེད་གང་ཡིན་དེ། །ཚུལ་ཁྲིམས་ལས་བྱུང་འབྲས་བུ་ཡིན། །ཇི་ལྟར་མི་དག་རང་ཁྱིམ་དུ། །ཞུགས་ནས་འཇིགས་པ་མེད་པར་འགྱུར། །དེ་བཞིན་ཚུལ་ཁྲིམས་ཡང་དག་སྤྱོད། །མི་རྣམས་ལྷ་ཡི་གནས་སུ་འགྲོ། །འདི་ལྟར་ལྷ་ཡི་ནང་དུ་འགྲོ་བའི་དྲི། །བླ་མེད་ཚུལ་ཁྲིམས་ལྡན་པ་དྲི་ཞིམ་པ། །མེ་ཏོག་ཀེ་ཏ་ཀ་དང་མ་ལུ་ཀ །ཙམ་པ་ཀ་ཡི་དྲི་དང་མཚུངས་པ་མིན། །ཚུལ་ཁྲིམས་ཡོངས་སུ་སྲུང་བ་གང་། །དེ་དག་འཚོ་བའི་ཕུལ་ཡིན་ནོ། །གང་ཞིག་ཚུལ་ཁྲིམས་ཡོངས་སྤོང་བ། །འཆི་བའི་ནང་ན་མི་བཟད་འཆི། །བདག་ལ་རྟག་ཏུ་བྱམས་འདོད་པའང་། །ཡོན་ཏན་འདི་དག་རིག་ནས་སུ། །ཚུལ་ཁྲིམས་ལེགས་པར་བསྲུང་བྱ་ཞིང་། །ཚུལ་ཁྲིམས་འཆལ་པ་རྣམ་པར་སྤོང་། །ཚུལ་ཁྲིམས་སྲུང་བ་རྟག་ཏུ་དུལ། །བཟོད་པ་ལྡན་ཞིང་བལྟ་ན་སྡུག །ཐེམ་སྐས་ལྟ་བུར་འཛེགས་ནས་སུ། །ལྷ་ཡི་འདུན་སར་འགྲོ་བར་བྱེད། །དེ་ལྟར་དགེ་སློང་དེས་
རང་གི་ལས་ལ་སྤྱོད་པའི་ལྷ་རྣམས་ཀྱང་མཐོང་། ལས་ཀྱི་འབྲས་བུ་སྣ་ཚོགས་ཀྱང་མཐོང་ནས་འཁོར་བ་ལས་འདོད་ཆགས་དང་བྲལ་ལོ། །གྲོང་ཁྱེར་དམར་པོ་ན་གནས་པའི་ལྷ་དེ་དག་ཀྱང་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ལེགས་པར་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད། །རྩེ་བར་བྱེད། དགའ་དགུར་སྤྱོད་པར་བྱེད་དོ། །དེ་ཕྱིས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་འཇིག་རྟེན་པ་ཐམས་ཅད་དགའ་ཞིང་ནོར་མང་པོ་དང་ལྡན་པ་དང་། ལྷོ་ཕྱོགས་སུ་གནོད་པ་མེད་པར་སྐྱེ་བར་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་རྟག་ཏུ་མྱོས་གནས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་རྟག་ཏུ་མྱོས་གནས་རྣམས་ཀྱི་གནས་སྣ་ཚོགས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་འདི་ལྟར་སེམས་པ་དང་ལྡན་པར་གྱུར་ཅིང་སེམས་པས་བརླན་པའི་སྙིང་དང་ལྡན་པ་གང་གིས་སེམས་ཅན་ཚུལ་ཁྲིམས་དང་ལྡན་པ་རྣམས་ལ་བཟའ་བ་དང་། བཏུང་བ་དང་། བཟའ་བཅའ་དང་། ཚོད་མ་སྣ་ཚོགས་དག་བྱིན་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སྣ་ཚོགས་ཀྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ལས་སྣ་ཚོགས་ཀྱིས་བསྐྱེད་པ། བདེ་བ་སྣ་ཚོགས་ལ་ནི་སྤྱོད། གཡོག་པ་དང་མལ་སྟན་སྣ་ཚོགས་ཀྱི་ནང་ན་ནི་འགྲེ། བདེ་བར་གནས་པའི་ཀུན་དགའ་ར་བ་དང་། རྩེ་བ་དང་། འགྲོས་སྣ་ཚོགས་ནི་བྱེད། ཚལ་དང་སྐྱེད་མོས་ཚལ་སྣ་ཚོགས་སུ་ནི་འགྲོ། ལྷ་མོའི་ཚོགས་ཆ་བྱད་སྣ་ཚོགས་ཐོགས་པ་ནི་ཕྱི་བཞིན་འབྲང་། ཚལ་དང་། ནགས་ཚལ་
དང་། རི་བོ་སྣ་ཚོགས་དང་། ཆུ་བོ་དང་། པད་མའི་ཚལ་དང་། ཨུད་པ་ལ་དང་། མེ་ཏོག་དང་། འབྲས་བུའི་སྐྱེད་མོས་ཚལ་སྣ་ཚོགས་དག་ན་ནི་གནས། བགོ་བ་དང་། མལ་ཆ་དང་། སྒེག་པའི་ཚལ་སྣ་ཚོགས་ན་ནི་སྤྱོད། ག་ཞའི་གཏམ་བརྗོད་ཅིང་འདུ་འཛི་ལ་དགའ་ལ། ཤིན་ཏུ་ཆགས་པའི་སེམས་སྣ་ཚོགས་ཀྱིས་ནི་འཚོ། རྟོག་པས་བསྐྱེད་པ་ལ་དགའ་ཞིང་། བློ་རྣམ་པར་ཆགས་པ་རབ་ཏུ་མྱོས་པ་ཡིན་ཏེ། དེ་ལྟར་ལས་སྣ་ཚོགས་བྱས་ནས་རྒྱུ་སྣ་ཚོགས་བྱེད་པ་དེ་ཚལ་སྣ་ཚོགས་རྣམས་སུ་བདེ་བ་སྣ་ཚོགས་དག་མྱོང་བར་བྱེད་དོ། །དེ་ནས་དགེ་སློང་དེ་ཤིན་ཏུ་དགའ་ནས་འདི་ལྟར་ཚིགས་སུ་བཅད་དེ་སྨྲས་པ། རི་མོ་མཁན་གྱི་རི་མོ་རྣམས། །དེ་ནི་སྣ་ཚོགས་འདྲི་མ་ཡིན། །གང་ཞིག་ལས་ཀྱི་རི་མོ་མཁན། །མཐོ་རིས་སུ་ནི་མང་དུ་འདྲི། །ཚོན་རྩིས་བྲིས་པ་བྲིས་མི་འགྱུར། །དེ་ནི་བགྲང་བར་གྲངས་ཡོད་ཀྱི། །ལས་ཀྱིས་བྲིས་པ་གྲངས་མེད་དེ། །དེ་ནི་སེམས་ཀྱིས་འདྲི་བར་བྱེད། །རྩིག་པ་ཞིག་ན་ངེས་པར་ཡང་། །རི་མོ་མ་ལུས་འཇིག་པར་འགྱུར། །ལས་ཀྱིས་བྲིས་པ་ལུས་ཞིག་ཀྱང་། །འཇིག་པ་ཉིད་དུ་མི་འགྱུར་རོ། །ཇི་ལྟར་རི་མོ་མཁན་གཅིག་ཅིག །རི་མོ་སྣ་ཚོགས་འདྲི་བ་དག །དེ་བཞིན་སེམས་ནི་གཅིག་པུ་ཡིས། །ལས་རྣམས་སྣ་ཚོགས་བྱེད་པར་འགྱུར། །ཇི་ལྟར་ཚོན་རྩི་གསལ་བ་ལྔས། །བྲིས་པ་སྣང་ལ་སྟོད་པར་བྱེད། །དེ་ལྟར་དབང་པོ་ལྔ་རྣམས་ཀྱི། །ལས་ཀྱིས་འཁོར་བར་འཁོར་བར་འདྲི། །རི་མོ་མཁན་གྱི་མི་དག་ནི། །དུ་མ་དག་ཏུ་སྣང་འགྱུར་གྱི། །རི་མོ་མཁན་དེ་སེམས་ཕྲ་བས། །ཐམས་ཅད་དུ་ནི་མི་མཐོང་ངོ་། །རི་མོ་ལེགས་ཤིང་ལེགས་པ་དག །ཇི་ལྟར་རྩིག་ངོས་རྣམས་ལ་འདྲི། །ལས་རྣམས་ལེགས་ཤིང་ལེགས་པ་དག །དེ་ལྟར་སེམས་ལ་འདྲི་བར་བྱེད། །ཇི་ལྟར་ཉིན་དང་མཚན་རྣམས་སུ། །སེམས་རྒྱུན་འབྱུང་ལ་སེམས་གནས་འགྱུར། །དེ་ལྟར་ཉིན་དང་མཚན་རྣམས་སུ། །དེ་བཞིན་ལས་ཀྱི་རྗེས་སུ་འཇུག །ཇི་ལྟར་རླུང་དང་དུད་པ་རྡུལ། །གདུང་བ་རྣམས་ཀྱིས་རི་མོ་འཇིག །དེ་ལྟར་དགེ་དང་མི་དགེ་བ། །སྤངས་ན་ལས་ཀྱི་རི་
མོ་འཇིག །དེ་ལྟར་དགེ་སློང་དེས་སེམས་རི་མོ་མཁན་ལྟ་བུ་ལ་རག་ལས་པ་མངོན་པར་མཐོང་ནས། ལས་ཀྱི་དེ་ཉིད་རྣམ་པར་མཐོང་བ་འཁོར་བ་ལས་ཡིད་བྱུང་ངོ་། །ལྷ་སྣ་ཚོགས་དེ་དག་གི་ལས་སྣ་ཚོགས་དེ་དག་ཀྱང་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པ་བདེ་འགྲོ་ངེས་པར་མྱོང་བར་འགྱུར་བ་དེ་ཟད་པར་མ་གྱུར་པ་དེ་སྲིད་དུ་མྱོང་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་རྒྱུ་ཞེས་བྱ་བ་རྫུ་འཕྲུལ་ཆེ་བ་དང་། ནོར་དང་ལྡན་པ་དང་། དཔོན་སྣ་བྱེད་པས་འཚོ་བར་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་རྟག་ཏུ་མྱོས་གནས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷ་རྟག་ཏུ་མྱོས་གནས་རྣམས་ཀྱི་གནས་མཐོ་བར་གནས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་སྤྱད་པའི་ལས་མངོན་པར་ཤེས་པས། སེམས་པས་ཡོངས་སུ་བསྒོམས་པའི་སེམས་དང་ལྡན་པ་གང་གིས་སེམས་ཅན་རྣམས་ཀྱི་གྲང་བ་དང་ཚ་བ་ཡོངས་སུ་བསྐྱབ་པའི་ཕྱིར་བསོད་ནམས་ཀྱི་གནས་མལ་བྱས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་མཐོ་བར་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་རེག་པ་ལས་བདེ་བར་གནས་པ་དེ་དབང་པོ་ལྔའི་ཡུལ་གྱི་བདེ་བ་རྣམ་པ་དུ་མ་རྣམ་པ་མང་པོ་དག་མྱོང་བར་འགྱུར་རོ། །ལྷའི་རིས་དེ་ན་ཚལ་དང་ཉེ་བའི་ཚལ་དག་ཡོད་དེ། འདི་ལྟ་སྟེ། མེ་ཏོག་མན་དཱ་ར་བ་ལ་རྩེ་བ་དང་། སྟུག་པོ་སྦྱོར་གནས་དང་། ངལ་བསོ་བདེ་དང་། རྩེ་དང་སྒྲ་འབྱིན་ལྡན་དང་། སྒྱུ་མ་ཀུན་དགའ་
དང་འཇིགས་མེད་དེ། ཚལ་དང་ཉེ་བའི་ཚལ་དེ་དག་ཏུ་ལྷ་དེ་ལྷ་མོའི་ཚོགས་ཀྱིས་ཡོངས་སུ་བསྐོར་བ་དང་བཅས་པ་དག་དགའ་བར་བྱེད། དགོད་པར་བྱེད། རྩེ་བར་བྱེད། སྒེག་པར་བྱེད་དོ། །སིལ་སྙན་ཡན་ལག་ལྔ་དང་ལྡན་པས་དགའ་བར་བྱེད་ཅིང་བློ་རང་དགར་གནས་པ་བདག་ཉིད་ཆེན་པོ་ཅི་དགར་སྒྲོགས་པ། བདེ་བ་མཆོག་དང་ལྡན་པ་སྐྱིད་པར་གནས་པ་རྣམས་པད་མའི་ཚལ་ནས་པད་མའི་ཚལ་དུ་འདོང་བར་བྱེད་དེ། མཐོ་རིས་དང་འཐུན་པའི་རིན་པོ་ཆེའི་སྙིང་པོ་རབ་ཏུ་མང་པོས་རྣམ་པར་བརྒྱན་པ། རྟག་ཏུ་བག་ཚ་བ་མེད་པར་སྤྱོད་པ་རྣམས་ཡུལ་མཐོ་བ་ནས་ཡུལ་མཐོ་བ་དང་། གསེར་གྱི་རི་རབ་འབར་བའི་ཕྲེང་བའི་འོད་རྣམས་ཀྱིས་གསལ་བར་བྱས་པ་དེ་དག་ལ་ལུས་ནད་མེད་པ་རྣམས་ཡོངས་སུ་རྒྱུ་བར་བྱེད་ཅིང་རྟག་ཏུ་བདེ་བས་མྱོས་པར་གནས་པ། ལེགས་པར་བྱས་པ་མང་པོ་འདོད་པར་བྱས་པའི་ལས་ཀྱིས་དེར་སྐྱེས་པ་རྣམས་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །ཆུ་བོ་དང་། འབབ་ཆུ་དང་། ལྟེང་ཀས་བརྒྱན་པའི་མཐོ་རིས་ཀྱི་ཡུལ་རྣམས་ན། ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་དེ་ཟད་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྒྱལ་པོ་ཆོས་སེམས་པ་ཆེན་པོར་འགྱུར་ཞིང་འཇིག་རྟེན་ཐམས་ཅད་དགའ་བར་འགྱུར་བ་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉེར་བརྒྱད་པ། དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་རྟག་ཏུ་མྱོས་གནས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷ་རྟག་ཏུ་མྱོས་གནས་རྣམས་ཀྱི་གནས་རྒུན་ཆང་མྱོས་གནས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་
ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་བྱས་པའི་ལས་ཀྱི་མཐའ་སྤྱད་པ། ཚུལ་ཁྲིམས་དང་ལྡན་པར་གྱུར་པ། ཕན་པར་འདོད་པ། འཇམ་པའི་སྙིང་རྗེ་དང་། རང་བཞིན་གྱིས་ངང་འཇམ་པ། དྲང་བ། གཡོ་མེད་པ། གཞན་ལ་གནོད་པ་མེད་པ་གང་གིས་ཕྱོགས་བཞིའི་དགེ་སྦྱོང་དང་བྲམ་ཟེ་ཉོན་མོངས་པ་མགོན་མེད་པ་རྣམས་ལ་ཉིན་གཅིག་གམ། གཉིས་སམ། གསུམ་མམ། བཞི་ལྟ་སྨོས་ཀྱང་ཅི་དགོས་ཏེ། དེ་ལྟར་རིམ་གྱིས་རྒྱ་ཆེར་རྟག་རེས་འཁོར་བྱིན་ན་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྟག་ཏུ་མྱོས་གནས་རྣམས་ཀྱི་གནས་རྒུན་ཆང་མྱོས་གནས་རྣམས་ཀྱི་ནང་དུ་སྐྱེ་བར་འགྱུར་བ་མཐོང་ངོ་། །དེར་སྐྱེས་ནས་ཀྱང་མཐོ་རིས་ཀྱི་སྐྱེད་མོས་ཚལ་ན་བདེ་བར་གནས་པ་དེ་གསེར་གྱི་དྲིལ་བུ་གཡེར་ཀའི་དྲ་བས་བྲེས་པ། སྒྲ་མང་པོ་འབྱིན་པ་དང་ལྡན་པའི་ཚལ་རྣམས་ཀྱི་ནང་ན་ལྷ་མོའི་ཚོགས་ཀྱིས་ཡོངས་སུ་བསྐོར་ཅིང་། འདོད་པ་སྡུག་པ་ཡིད་དུ་འོང་བའི་ཡུལ་ལ་ཆགས་པ་དག་དགའ་དགུར་སྤྱོད་པར་བྱེད་དོ། །ལྷ་གཞོན་ནུ་གཞན་རབ་ཏུ་མང་པོ་རྣམས་ཀྱིས་མངོན་པར་མཆོད་ཅིང་ལྷའི་བདུད་རྩིའི་སྐོམ་མང་པོས་ནི་མྱོས། མེ་ཏོག་མན་དཱ་ར་བའི་ཕྲེང་བས་ནི་མགོ་བརྒྱན། པད་མའི་ཚལ་གྱི་གསབ་གསེབ་ན་ནི་གནས། གསེར་དང་། བཻ་ཌཱུརྱ་དང་། ཤེལ་དང་། དངུལ་གྱི་རི་དག་ལ་ནི་འཛེག །བུང་བ་སྒྲ་སྐད་སྙན་པ་འབྱིན་པའི་པད་མའི་ཚལ་རྣམས་ཀྱི་ནང་ན་རྣམ་པར་རྒྱུ་བར་ནི་བྱེད། ལྷ་མོའི་ཚོགས་ཀྱིས་ཡོངས་སུ་བསྐོར་ཅིང་ཉི་མ་འབུམ་སོ་སོ་ན་འགྲན་པ་ལྟ་བུའི་མེ་ཏོག་མན་དཱ་ར་བ་དང་། པད་མའི་ཚལ་རྣམས་ཀྱི་ནང་ན། གསེར་གྱི་བྱ་སྒྲ་འབྱིན་པ་ཐོས་ན་རྣར་སྙན་པ་དང་། རོལ་མོ་ཡན་ལག་ལྔ་དང་ལྡན་པ་ཐོས་ན་སྙན་ཅིང་བདེ་བ་རྣམས་ཀྱི་ནང་ན་མངོན་པར་དགའ་བར་བྱེད་དོ། །གསེར་དང་། བཻ་ཌཱུརྱའི་རྡོ་ལེབ་ཀྱིས་ས་གཞི་ལེགས་པར་བསྙམས་པ་དང་། མུ་ཏིག་གི་བྱེ་མས་གཞི་བསྙམས་པའི་མཚོ་ལྷའི་ཆུ་ཡོན་ཏན་ཡན་ལག་བརྒྱད་དང་ལྡན་པ་རྣམས་ཀྱི་ནང་ན་དགའ་བར་བྱེད་དོ། །རང་གིས་བྱས་
པའི་བསོད་ནམས་ཀྱིས་སྤྲུལ་པའི་ལྷུན་པོ་དག་ལ། གསེར་དང་། བཻ་ཌཱུརྱ་དང་། དངུལ་དང་། ཤེལ་གྱི་རྡོ་ཡིས་མཛེས་པར་བྱས་པའི་རི་བཟང་པོའི་རྩེ་མོ་དག་ན་མངོན་པར་དགའ་བར་བྱེད་དེ། དགའ་བ་དང་སྐྱིད་པ་སྣ་ཚོགས་ལ་གནས་པ། ལྷ་དང་ལྷ་མོས་དཀྲིགས་པའི་ནང་ན་དགོད་ཅིང་རྩེ་ལ་གཡེར་བ། ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་རང་གིས་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་རང་གིས་ལེགས་པར་བྱས་པའི་ལས་ཀྱི་འབྲས་བུ་ལ་ཉེ་བར་སྤྱོད་པར་བྱེད་དོ། །གང་གི་ཚེ་ལས་ཟད་པར་གྱུར་པ་དང་། དེ་ཕྱིས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་བདེ་བ་དང་ལྡན་ཞིང་རི་འབིགས་བྱེད་ཀྱི་སྨན་ལྗོངས་དག་ཏུ་གནས་པ་དང་། རྒྱལ་པོའི་ཡིད་ཆེས་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་རྟག་ཏུ་མྱོས་གནས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་རྟག་ཏུ་མྱོས་གནས་རྣམས་ཀྱི་གནས་ཡུལ་ལ་འདོད་པ་ཞེས་བྱ་བ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་དང་ལྡན་པར་གྱུར་པ་གང་གིས་ཚུལ་ཁྲིམས་དང་ལྡན་ཡང་རུང་། མི་ལྡན་ཡང་རུང་། ལྟ་བ་ལོག་ཀྱང་རུང་། མ་ལོག་ཀྱང་རུང་བ་ཞིག་ནད་ཀྱིས་ཐེབས་པ་ལ། ནད་རྐྱེན་དང་སྨན་དང་ནད་གཡོག་དག་བྱིན་ལ། དེ་ཡང་ནད་སོས་པར་གྱུར་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཡུལ་ལ་དགའ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་འཇིགས་པ་ཐམས་ཅད་དང་བྲལ་བར་ཤེས་པ་དེ། ལྷའི་གནས་གཞན་དག་ཏུ་མཆོད་ཅིང་ལས་འཕེལ་
བ་ལས་བདེ་བ་འཕེལ་བར་འགྱུར་ཏེ། ཇི་ལྟར་མར་མེ་འབར་བ་ལས་འོད་འབྱུང་བ་དེ་ལྟར་ལས་འཕེལ་བ་ལས་བདེ་བ་འཕེལ་བར་འགྱུར་རོ། །དེ་ལྟར་ལྷ་རྣམས་ལྷའི་འཇིག་རྟེན་ན་ལས་ཀྱི་འབྲས་བུ་དེ་ལ་སྤྱོད་པ་རྣམ་པར་སྨིན་པ་ཤིན་ཏུ་ཉམས་དགའ་བ། དཔེ་མེད་པ་ཐུན་མོང་མ་ཡིན་པ་དག་འབྱུང་ངོ་། །ལེགས་པར་བྱས་པའི་ལས་དེས་དེར་སྐྱེས་པ་དེ་བཻ་ཌཱུརྱ་དང་། ནོར་བུ་དང་། དངུལ་གྱི་ལྷུན་པོ་གསལ་བའི་རྩེ་མོ་མཐོན་པོ་རྣམས་ན་ཤིན་ཏུ་བདེ་བར་གནས་པའི་ཀུན་དགའི་ར་བ་དག་ཡོད་དེ། སྐྱེད་མོས་ཚལ་དང་། སྟེགས་དུ་མས་བརྒྱན་པའི་ས་དག་ལ་གནས་ཤིང་ཚལ་དང་ཉེ་བའི་ཚལ་རིན་པོ་ཆེ་སྣ་བདུན་གྱིས་བརྒྱན་པ། འོད་སྣ་ཚོགས་ཀྱིས་ཡུན་རིང་དུ་ཉམས་དགའ་བར་བྱེད་པ་རྣམས་ཀྱི་ནང་ན་ལྷ་མོའི་ཚོགས་ཀྱིས་ཡོངས་སུ་བསྐོར་ཏེ། དེ་དག་གིས་རྩེད་མོ་བྱེད་པ་ན། དེ་ལྟར་དབང་པོ་ལྔ་དང་། བློ་ཡུལ་ལ་ཆགས་པ་དེ་ཅི་དགའ་དགུར་བདེ་བ་ལ་གནས་ཏེ། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་ལྷ་ཡུལ་ལྷའི་གནས་དེ་ན་འདོད་པ་ཐམས་ཅད་ལ་བློ་རྣམ་པར་ཆགས་པ་དེ། དགའ་བར་བྱེད། གནས་པར་བྱེད། དགའ་དགུར་སྤྱོད་པར་བྱེད་དེ། ལས་དེ་ཟད་ནས་དེ་ནས་ཡང་ལས་ཀྱི་འབྲས་བུ་ལ་སྤྱོད་པ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་བྱེད་གཟུགས་བཟང་པོ་དང་ལྡན་ཞིང་གར་ཡང་འཇིགས་པ་མེད་པ་དང་། ནོར་བཟང་པོ་དང་ལྡན་པ་དང་། རྒྱལ་པོའི་འཁོར་གྱིས་མཆོད་པ་དང་། ཚེ་རིང་བ་དང་། ཡུལ་བཟང་པོར་སྐྱེ་སྟེ། དུས་ཀྱང་ཆོས་བཟང་པོ་ལ་དགའ་བའི་དུས་སུ་སྐྱེ་བར་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། ལྷ་རྟག་ཏུ་མྱོས་གནས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་རྟག་ཏུ་མྱོས་གནས་རྣམས་ཀྱི་གནས་ཆུ་བསིལ་
གནས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྙིང་རྗེ་ཅན་སེམས་པས་ཡོངས་སུ་བསྒོམས་པའི་སྙིང་དང་ལྡན་པ་གང་གིས་སེམས་ཅན་གཞན་འཆི་བའི་དུས་ཀྱི་ཚེ། སྐོམ་གྱིས་གདུངས་པའི་སྐོམ་པ་བསལ་བར་བྱ་བའི་ཕྱིར་རམ། གཤིན་རྗེའི་མི་ཡིས་འཇིགས་པ་བསྟན་ནས་འཁྲུགས་པར་གྱུར་པ་ལ་བུ་རམ་ཆུའམ། ཆུ་གྲང་མོ་བླུད་ན་དེ་ལེགས་པར་བྱས་པའི་ལས་ཀྱི་མཐུ་དེས་གང་གི་ཚེ་འཆི་བར་འགྱུར་བ་དེའི་ཚེ། ལྷ་རྟག་ཏུ་མྱོས་གནས་རྣམས་ཀྱི་གནས་ཆུ་བསིལ་བར་གནས་ཞེས་བྱ་བའི་ལྷ་དེ་དག་གི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཆུ་བསིལ་བའི་ཚོགས་འབབ་ཆུ་དང་། ཆུ་བོ་ཕུན་སུམ་ཚོགས་པའི་ས་ཕྱོགས་དག་ན་དེ་དགའ་བར་བྱེད་དོ། །དེ་ལྷའི་བཏུང་བའི་རྣམ་པ་འདི་ལྟ་བུ་དག་འབྱུང་བར་འགྱུར་ཏེ། འདི་ལྟ་སྟེ་མཐོང་ན་མྱོས་པ་སྐྱེད་པ་དང་། དྲིས་མྱོས་པ་སྐྱེད་པ་དང་། རེག་པས་མྱོས་པ་སྐྱེད་པ་དང་། སྒྲ་ཐོས་ན་མྱོས་པ་སྐྱེད་པར་བྱེད་པ། མྱོས་པའི་སྐྱོན་དང་བྲལ་ཞིང་སྙིང་དགའ་བར་བྱེད་པ་ཡིན་ནོ། །ཡོན་ཏན་ལྔ་དང་ལྡན་པའི་བཏུང་བ་དག་ཀྱང་འབྱུང་སྟེ། འདི་ལྟ་སྟེ། བཏུང་བ་དེ་དག་འཐུངས་ནས་ལྷ་རྣམས་ལྷའི་སྟོབས་བཅུ་འགྱུར་དུ་འབྱུང་བར་འགྱུར་རོ། །ཇི་ལྟར་ནམ་མཁའ་ལ་འགྲོ་བ་ཉམས་པར་ཡང་མི་འགྱུར་ཞིང་ལྟུང་བར་ཡང་མི་འགྱུར་ལ། དེ་བཞིན་དུ་ས་ལ་ཡང་འབྱིང་བར་མི་འགྱུར་རོ། །དེའི་བརྩོན་འགྲུས་ཡོངས་སུ་ཉམས་པ་ཡང་མེད་ལ་ཅ་ཅོ་དང་། ག་ཞའི་སྒྲ་ལ་མངོན་པར་དགའ་ཞིང་ཡིད་ཤིན་ཏུ་དགའ་བ་དེ་རབ་ཏུ་དགའ་བ་བརྒྱ་འགྱུར་དུ་འབྱུང་བར་འགྱུར་རོ། །དེའི་རྣ་བ་ཡང་མཉན་པར་བྱ་བ་ལ་ཐོགས་པ་མེད་དེ། ཤིན་ཏུ་བདེ་བ་ཡང་དག་པར་འབྱུང་བར་འགྱུར་བ། མཐོ་རིས་དང་འཐུན་པར་གནས་པ། ཡུལ་གྱི་བདེ་བ་ཉམས་དགའ་བ་དག་མྱོང་བར་འབྱུང་བར་འགྱུར་རོ། །རིན་པོ་ཆེ་སྣ་བདུན་གྱི་ཤིང་ལྗོན་པའི་ཚལ་འདི་ལྟ་བུ་དག་ཀྱང་ཡོད་དེ། འདི་
ལྟ་སྟེ། ཚལ་གཡེར་བྱེད་དང་། ཚལ་ཀུན་དགའ་དང་། ཚལ་དགའ་བདེར་གནས་དང་། ཚལ་ཡིད་ཚིམ་དང་། ཚལ་རླུང་བདེ་དང་། ཚལ་སྒྲ་ལྔ་འབྱིན་དང་། ཚལ་འབབ་ཟེར་སྒྲ་རོལ་མོ་དང་། ཚལ་ཡིད་འཐུན་དང་། ཚལ་བདེ་བར་གནས་པ་དེ་རྣམས་ཀྱི་ནང་ན་མངོན་པར་དགའ་བར་བྱེད་དོ། །མིག་གིས་ཀྱང་གཟུགས་འདོད་པ་སྡུག་པ་ཡིད་དུ་འོང་བ་དག་མཐོང་ངོ་། །རྣ་བས་ཀྱང་སྒྲ་སྙན་པ་རྣར་འཐད་པ་ཡིད་དུ་འོང་བ་དག་ཐོས་སོ། །སྣས་ཀྱང་དྲི་ཞིམ་པ་བསུང་ཆེ་བ་ཡིད་དུ་འོང་བ་དག་སྣོམ་མོ། །དེ་ལྟར་ལྕེས་ཀྱང་རོ་ཞིམ་པ་བྲོ་ཆེ་བ་ཡིད་དུ་འོང་བ་དག་མྱོང་སྟེ། དེ་ལྟར་རྣམ་པ་དེ་ལྟ་བུས་ཡིད་ཚིམ་པར་བྱས་པའི་སྙིང་དང་དབང་པོ་ལྔ་ཡུལ་ལ་ཆགས་པའི་དགའ་བ་དང་བདེ་བ་དག་མྱོང་བར་བྱེད་དོ། །དེ་ལྟར་དེ་སྲེད་པའི་ཚོགས་དྲུག་གི་མེས་ཉིན་གཅིག་བཞིན་སྲེག་པར་བྱེད་ལ། འདོད་ཆགས་ཀྱི་མེས་ཀྱང་ཉིན་གཅིག་བཞིན་ཡོངས་སུ་སྲེག་སྟེ། འདོད་ཆགས་ཀྱི་མེ་དང་། བག་མེད་པའི་མེ་ལྕེ་དྲུག་ཤིན་ཏུ་སྟོབས་ཆེ་བར་གྱུར་ཀྱང་དེ་དག་དེས་མི་རིག་གོ །བག་མེད་པ་དེས་ཡིད་ཕྲོགས་ཤིང་བག་མེད་པའི་གནས་སུ་སྐྱེས་པ། བག་མེད་པ་དེས་ཉམས་པ། ལེགས་པར་བྱས་པའི་ལས་དེས་ཡུལ་གྱི་བདེ་བ་ལ་ལྷག་པར་དགའ་བ་ཟད་པ་མེད་པ་དེ་ནི་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དེ་ནས་བདེ་བ་མྱོང་བར་བྱེད་དོ། །གང་གི་ཚེ་ལས་ཟད་པར་གྱུར་པ་དང་། དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་བཀྲེས་པ་དང་། སྐོམ་པ་དང་། ངལ་བ་དང་། ལོ་ཉེས་འབྱུང་བའི་འཇིགས་པ་ཡང་མི་འབྱུང་ལ། རྟག་པར་ཤིན་ཏུ་བདེ་བར་གནས་པ་དང་། ཡུལ་མ་མཐོང་བ་རྣམས་སུ་འོངས་ན་ཡང་དགའ་བ་དང་མགུ་བར་འགྱུར་བ་
དང་། དེ་ལ་བྱ་བ་མེད་བཞིན་དུ་ཡང་མལ་སྟན་དང་། ན་བའི་གསོས་སྨན་གྱི་རྐྱེན་གྱིས་ཡོ་བྱད་མང་པོ་དག་སྦྱིན་པ་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་རྟག་ཏུ་མྱོས་གནས་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྟག་ཏུ་མྱོས་གནས་རྣམས་ཀྱི་གནས་བརྟན་དགའ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་སྤོང་བའི་ཚུལ་ཁྲིམས་དང་ལྡན་པའི་དགེ་སློང་ཡིད་སྐྱོ་བར་བྱ་བའི་ཕྱིར་མི་རོ་འམ་མི་རོ་ལྟ་བུར་བྲིས་པ་ཞིག་བཞག་ན། དེ་བདེ་འགྲོ་མཐོ་རིས་ཀྱི་འཇིག་རྟེན་བརྟན་དགའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་རྟག་ཏུ་བརྟན་དགའ་དེ་བཻ་ཌཱུརྱ་དང་། གསེར་དང་། བྱི་རུ་དང་། ཨན་ད་རྙིལ་དང་། མ་རྒད་ལྟ་བུའི་མཐོ་རིས་ཀྱི་གནས་དག་ན་ཡང་དང་ཡང་དུ་དགའ་བར་བྱེད་ཅིང་ཉིན་གཅིག་བཞིན་དུ་བདེ་བ་བར་ཆད་མེད་པ་འབུམ་སྙེད་དག་མྱོང་བར་བྱེད་དོ། །རོལ་མོ་མང་པོ་དུ་མ་འབུམ་སྙེད་དག་མང་དུ་ཐོས་ན་བར་ཆད་མེད་པར་དགའ་བ་ལྷག་པར་ཆགས་ཏེ། ཀུན་ནས་ཉོན་མོངས་པ་འབྱུང་བ་གང་ཡིན་པ་དེ་ནི་དཔེར་བྱར་ཡང་མེད་ལ། མཐོ་རིས་སུ་ཟས་དང་། སྐོམ་དང་། གོས་དང་། མེ་ཏོག་དང་། དྲིས་མྱོས་ཤིང་དགའ་བ་མང་པོ་དུ་མ་འབྱུང་ངོ་། །དེར་དགའ་བ་འདི་ལྟ་བུ་དག་འབྱུང་སྟེ། འདི་ལྟ་སྟེ། ཚལ་མཐོང་ན་དགའ་བ་དང་། བྱ་སྣ་ཚོགས་སྒྲ་འབྱིན་ན་དགའ་བ་དང་། རོལ་མོས་དགའ་བ་དང་། ལྷ་མོ་མཐོང་ན་དགའ་བ་དང་། རྒྱགས་པར་གནས་ན་དགའ་བ་དང་། དྲི་ཞིམ་པོས་དགའ་བ་དང་། ཐགས་སུ་མ་བཏགས་པའི་གོས་གྱོན་ན་དགའ་བ་དང་། སྤོས་སྣ་ཚོགས་ཀྱིས་ཕོག་ན་དགའ་བ་དང་། བཟའ་བ་དང་། བཏུང་བ་ཚོགས་ན་དགའ་བ་དང་། རྩེན་པས་དགའ་བ་དང་། ནམ་མཁའ་ལ་འགྲོ་བས་དགའ་བ་དང་། སྙིང་དུ་སྡུག་པའི་ལྷ་མཐོང་ན་དགའ་བ་དང་། རིན་པོ་ཆེའི་རིའི་རྩེ་མོ་ནས་རིའི་རྩེ་མོ་བལྟ་ན་དགའ་
སྟེ། དེ་དག་ལ་སོགས་པས་མངོན་པར་དགའ་ལ། དགའ་བ་དུ་མ་གཞན་རྣམས་ལ་ཡང་ཤིན་ཏུ་ཆགས་ཏེ། བདེ་བ་ཤིན་ཏུ་ཡིད་དུ་འོང་བའི་ཀུན་དགའ་ར་བ་དང་། སིལ་སྙན་ཡན་ལག་ལྔ་དང་ལྡན་པའི་གླུ་དབྱངས་ལེན་པ་དང་། རང་གིས་བྱས་པའི་བདེ་བ་ལ་གནས་པ་ལྷའི་བདེ་བ་རྣམ་པ་དུ་མ་དེ་དག་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ལེགས་པར་བྱས་པའི་ལས་དེ་ཟད་པར་མ་གྱུར་པ་དེ་སྲིད་དུ་མྱོང་བར་བྱེད་དོ། །ལས་དེ་ཟད་ནས་དེ་ནས་ཡང་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་སྐྱེད་མོས་ཚལ་སྣ་ཚོགས་ཀྱི་ནང་ན་གནས་ཤིང་ཤིན་ཏུ་བདེ་བ་དང་ལྡན་པ་དང་། བགོ་བའི་གོས་སྣ་ཚོགས་དང་། དགའ་གཏམ་སྣ་ཚོགས་དང་། སྤྱོད་པ་སྣ་ཚོགས་དང་། བལྟ་བར་བྱ་བ་སྣ་ཚོགས་མཐོང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་དེས་རྒྱལ་ཆེན་བཞིའི་ལྷ་རྣམས་ཀྱི་གནས་གསུམ་དང་། ལས་ཀྱི་འབྲས་བུ་རྣམ་པར་སྨིན་པ་དང་བཅས་པ་རྣམ་པར་ཕྱེ་ནས་གནས་བཞི་པ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་པི་བང་ཅན་གསུམ་པ་ཞེས་བྱ་བའི་ལྷ་རྣམས་མཐོང་ངོ་། །དེ་རྣམས་ཀྱི་གནས་བཅུ་པོ་ཡང་འདི་ལྟ་སྟེ། དྲི་དགའ་དང་། སྒྲ་སྙན་པ་དང་། དེ་ལ་ཆགས་དང་། སྐྱོར་ཆུ་སྐྱེས་དང་། ལུས་དཀར་དང་། ཕན་ཚུན་དགའ་དང་། ཡང་དག་ཆགས་སྤྱོད་དང་། འཁོར་དང་། རྣམ་སྤྱོད་དང་། སྐྱིལ་མོ་ཀྲུང་གི་སྟེང་དུ་སྐྱེ་བ་དང་ལྡན་པར་གནས་པ་དག་སྟེ། ལྷ་པི་བང་ཅན་གསུམ་པ་རྣམས་ཀྱི་གནས་ནི་བཅུ་པོ་དེ་དག་ཡིན་ནོ། །དགེ་སློང་དེ་དེ་རྣམས་ཀྱི་ལས་ཀྱི་རྣམ་པར་སྨིན་པ་རྣམ་པར་འབྱེད་པར་བྱེད་དེ། གནས་དེ་རྣམས་སུ་ལྷ་དག་ལས་གང་གིས་སྐྱེ་བར་འགྱུར་ཞིག་གུ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ལས་
དེ་དག་བྱེད་ན་དེ་ལྟར་དེ་དང་འཐུན་པར་སྐྱེ་བར་འགྱུར་ལ། ལས་དེ་དང་འཐུན་པར་རྣམ་པར་སྨིན་པ་འབྱུང་ངོ་། །དེ་ལ་རྒྱལ་ཆེན་བཞིའི་གནས་དང་པོ་དྲི་དགའ་ཞེས་བྱ་བ་དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་པ་དང་ལྡན་པར་གྱུར་ཅིང་། དེས་སེམས་བསྒོམས་པ་དེས་ལུས་བསྒོམས་པ་གང་གིས་བསོད་ནམས་བསགས་པར་བྱ་བའི་ཕྱིར། དགེ་འདུན་དག་ལ་ཀུན་དགའ་ར་བའི་སའམ། བུ་རམ་ཤིང་གི་ར་བའམ། འབྲ་གོའི་ར་བའམ། ཤིང་ཨ་མྲའི་ར་བ་ཕུལ་ལ། དེ་ཡང་ཡོངས་སུ་སྤྱོད་པར་བྱེད་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་དྲི་དགའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་བདེ་བ་དུ་མ་ཐོབ་ཅིང་སྤྱོད་པ་དེ། ལྷའི་ཙན་དན་དང་། ཙན་དན་ས་མཆོག་གི་བྱུག་པས་ལུས་བྱུགས་པ། ལྷ་མོའི་ཚོགས་དུ་མས་ཡོངས་སུ་བསྐོར་བ། གཟུགས་དང་ཆ་བྱད་སྣ་ཚོགས་དང་ལྡན་པ་དགོད་པ་དང་། རྩེ་བ་དང་། སྒེག་ཆོས་ལ་མཁས་པ་རྣམས་དང་། ལྷན་ཅིག་པད་མའི་ཚལ་དང་། ལྟེང་ཀ་དང་། ནགས་ཚལ་གྱི་བར་དག་ན་མེ་ཏོག་གི་ཕྲེང་བ་དང་། གོས་གྱོན་པ། ཡིད་རབ་ཏུ་དགའ་བ་རྣམས་དགའ་བར་བྱེད། དགའ་དགུར་སྤྱོད་པར་བྱེད་དོ། །དེའི་ལྷའི་དྲི་རྣམ་པ་དུ་མ་དག་པད་མའི་ཚལ་དེ་དག་དང་། ལྷའི་མེ་ཏོག་དེ་དག་བརྟོལ་ནས་དཔག་ཚད་བརྒྱར་བསུང་སྟོབས་ཆེར་འབྱུང་ངོ་། །དྲི་སྣོམས་པའི་ལྷ་མོ་གང་ཡིན་པ་དེ་དག་ཐམས་ཅད་དྲི་ཤིན་ཏུ་ཉམས་དགའ་ཞིང་མཆོག་ཏུ་ཡིད་དུ་འོང་བ་རྣམ་པ་དུ་མས་མྱོས་པ་རྣམས། ཡང་ལྷའི་དྲི་དེས་བརྒྱ་འགྱུར་དུ་མྱོས་པར་འགྱུར་རོ། །ཤིན་ཏུ་མྱོས་པའི་ལྷའི་རིས་དེ་དག་ཉིད་ལ་སེམས་ཆགས་པ་རྣམས་ལྷ་དེ་དག་ཉིད་དང་། རྣམ་པ་དུ་མ་བརྒྱ་འགྱུར་དུ་དགའ་དགུར་སྤྱོད་པར་བྱེད་ལ། དེ་རྣམས་ལྷན་ཅིག་ཆུ་བོའི་དྲུང་དུ་འགྲོ་བར་བྱེད་དོ། །ཆུ་བོ་དེ་དག་གི་མིང་ནི་འདི་ལྟ་སྟེ། རིན་ཆེན་འབབ་ཅེས་བྱ་བ་དང་། རིན་པོ་ཆེའི་དུམ་བུ་འབབ་དང་། གསེར་འབབ་དང་། ཆང་འབབ་ཆུ་བོ་དང་། སྦྲང་རྩི་འབབ་པའི་ཆུ་བོ་དང་།
དབུ་བ་རོག་རོག་འབབ་པ་དག་སྟེ། ཆུ་བོ་དེ་དག་ཐམས་ཅད་ཀྱི་འགྲམ་ན། བྱ་ངང་པ་དང་། ཀཱ་རཎྜ་བ་དང་། ངུར་པའི་ཚོགས་ཀྱིས་བརྒྱན་པ་བྱ་སྒྲ་འབྱིན་པ་རྣམས་དང་། ཤིང་ལྗོན་པས་མཐའ་ཁེབས་པ་ཡིན་ལ། ཤིང་དེ་དག་ཀྱང་རིན་པོ་ཆེ་སྣ་བདུན་གྱི་བྱ་རྣམས་ཀྱིས་ཀུན་ནས་དཀྲིགས་ཤིང་སྒྲ་ཡིད་དུ་འོང་བ་འབྱིན་པ་དག་ཡིན་ཏེ། ལྷ་མོའི་ཚོགས་གླུ་སྙན་པ་ལེན་པ་ལ་མཁས་པ་གང་ཡིན་པ་དེ་དག་ཀྱང་བྱའི་སྒྲ་དབྱངས་འབྱིན་པ་ཐོས་ནས། ཚལ་གྱི་ནང་ན་རྒྱུ་བའི་བྱ་གཞན་སྒྲ་འབྱིན་པ་ལྷའི་རྣར་སྙན་པ་དེ་དག་ལ་ཤིན་ཏུ་ཉན་པར་བྱེད་དོ། །ཡུལ་གྱི་འདོད་པ་ལ་སེམས་རྣམ་པར་ཆགས་ཤིང་བྱའི་སྒྲ་འབྱིན་པ་དེ་ལ་སྙིང་ཤིན་ཏུ་ཆགས་པ་དེ་དག་གིས་བདེ་བ་དེ་ཐམས་ཅད་བོར་ནས་བྱའི་སྒྲ་དེ་ལ་ཉན་པར་བྱེད་དེ། བྱའི་སྒྲ་ཡིད་དུ་འོང་བ་སྣ་ཚོགས་དག་ཐོས་ན་བདེ་བ་རྣམ་པ་དུ་མ་སྣ་ཚོགས་དང་། སྒྲ་དབྱངས་བདུན་དང་ལྡན་ཞིང་རྒྱུན་མི་དྲག་པ་འབྱིན་པ་ལ་ཉན་པར་བྱེད་དོ། །ཆུ་བོ་གཞན་དག་ཏུ་སྒྲ་འབྱིན་པར་ལྷ་མོ་རྣམས་དགའ་བར་བྱེད། གླུ་དབྱངས་ལེན། དགོད་པར་བྱེད་ལ། ལྷའི་ཆང་མྱོས་པའི་སྐྱོན་དང་བྲལ་བ་དག་ལ་འཐུང་བར་བྱེད་དོ། །དེ་དག་དེ་རྣམས་ཀྱིས་མཐོང་ནས་ཀྱང་དེ་རྣམས་དང་ལྷན་ཅིག་དགའ་བར་བྱེད་ལ། བཻ་ཌཱུརྱ་དང་། དངུལ་དང་། ཤེལ་དང་། གསེར་གྱི་རི་བོ་གཞན་དག་གི་རྩེ་མོ་དང་། ཆུ་བོ་དང་། འབབ་ཆུ་དང་། ལྟེང་ཀ་དང་། ནགས་ཚལ་མཛེས་པ་དང་། པད་མའི་ཚལ་བྱའི་ཚོགས་སྣ་ཚོགས་ཀྱིས་བརྒྱན་པ་རྣམས་སུ་ལྷ་མོ་དེ་རྣམས་དང་ལྷན་ཅིག་དགའ་བར་བྱེད་དོ། །གཞན་ཡང་ཕྱོགས་གཞན་དག་ན་བཻ་ཌཱུརྱ་སྔོན་པོའི་དུམ་བུ་ལྟ་བུ་དང་། མེ་ཏོག་སྣ་ཚོགས་ཀྱིས་ཁེབས་པའི་ས་ཕྱོགས་དག་ན་དགའ་བར་བྱེད་དེ། དེ་ལྟར་དེ་ལེགས་པར་བྱས་པའི་ལས་དེ་དང་རྒྱུ་འཐུན་པར་སིལ་སྙན་ཡན་ལག་ལྔ་དང་ལྡན་པས་མཐོ་རིས་ཀྱི་བདེ་བ་ཡིད་དུ་འོང་བ་རྣམ་པ་དུ་མ་དག་མྱོང་ངོ་། །ལྷའི་བདེ་བ་དེ་ཡང་དགེ་སློང་དེས་ཐོས་པ་ལས་བྱུང་བའི་ཤེས་པས་རྟོགས་ནས་འདི་ལྟར་ཚིགས་སུ་བཅད་དེ་སྨྲས་པ། རྣམ་པར་ཆགས་པའི་དབང་པོ་ལྔ། །དེ་ལྟར་ཡུལ་
རྣམས་ལྔ་ལ་ཆགས། །འདོད་ཆགས་སྐད་ཅིག་མི་འབྱུང་བའང་། །ཡུལ་གྱིས་ཚིམ་པར་མི་བྱེད་དོ། །ཡུལ་རྣམས་ཀུན་གྱི་ནང་ན་གཅིག །འདིར་ནི་བུད་མེད་ཁོ་ན་ལྟ། །ཡུལ་ཀུན་ཟིལ་གྱིས་མནན་ནས་སུ། །འདོད་ཆགས་མེ་ནི་ཆེན་པོར་འབར། །ཚོགས་པ་དང་ནི་མ་ཚོགས་དང་། །འཆི་བ་དང་ནི་གཏམ་བརྗོད་པའང་། །བུད་མེད་རྒྱུ་ལས་ཀུན་འབྱུང་སྟེ། །མེ་ཡིས་མི་འདི་སྲེག་པར་བྱེད། །མེ་ནི་ཚོགས་དང་འབར་འགྱུར་གྱི། །མ་ཚོགས་འབར་བར་མི་འགྱུར་ལ། །ཚོགས་ནའང་འབར་ལ་མ་ཚོགས་ཀྱང་། །ལྷ་རྣམས་འདོད་ཆགས་མེ་འབར་རོ། །མེ་དེའི་ཡུལ་དེ་མེད་པ་དང་། །རྒྱང་རིང་ན་གོ་སྲེག་མི་བྱེད། །འདོད་ཆགས་མེ་ནི་ཉེ་རིང་འདྲ། །མི་བཟད་དགའ་བས་སྲེག་པར་བྱེད། །ཀུན་དུ་རྟོག་པའི་ཤིང་སྐམ་འབྱུང་། །དགའ་བ་ཡ་ཡོའི་ཤུགས་དང་ལྡན། །སྲེག་པའི་མར་ལ་སྨྱུགས་པ་འདི། །འདོད་ཆགས་མེ་ཡིས་དགའ་བས་སྲེག །འདི་ལྟར་མེ་ཡིས་ལུས་གཅིག་ནི། །བསྲེགས་ནས་རབ་ཏུ་ཞི་བར་འགྱུར། །མིང་དང་གཟུགས་དང་མ་བྲལ་བའི། །འདོད་ཆགས་མེ་ནི་ཞི་མི་འགྱུར། །སྲེག་བྱེད་མི་བཟད་མེ་ལ་ནི། །འབྱུང་པོ་དགའ་བར་མི་བྱེད་ལ། །འདོད་ཆགས་མེ་ནི་རབ་རྣོ་ཡང་། །མི་རྣམས་ཡིད་ནི་འབྱུང་མི་བྱེད། །དབང་པོ་ལྔ་ལས་བྱུང་བ་ཡི། །འདི་ནི་ཡུལ་རྣམས་ལྔ་ཡིས་བསྒྲིབས། །སྲེད་པ་རླུང་གི་སྟོབས་དང་མཚུངས། །འདོད་ཆགས་མེ་ཡིས་སྐྱེ་དགུ་སྲེག །རྟོག་པའི་གཙུབ་ཤིང་ལས་བྱུང་བའི། །ཡུལ་རྣམས་ཀྱིས་ནི་ཡོངས་སུ་སྤེལ། །ལུས་ནི་ཤིང་ལྟར་སྲེག་བྱེད་ཀྱང་། །དེ་ནི་སྐྱེ་བོས་མི་མཐོང་ངོ་། །ཇི་ལྟ་ཇི་ལྟར་འདོད་ཆགས་མེ། །རབ་ཏུ་འབར་བས་སྲེག་བྱེད་པ། །དེ་ལྟ་དེ་ལྟར་འདོད་ཆགས་དྲི། །བདེ་བ་བཞིན་དུ་ཡོངས་སུ་བསྟེན། །མེ་ནི་རབ་ཏུ་གསལ་འགྱུར་ལ། །འདོད་ཆགས་མེ་ནི་མུན་པས་བསྒྲིབས། །དེ་བས་དུག་དང་དགྲ་ལྟ་བུ། །བརྟན་པོས་འདོད་ཆགས་མེ་སྤོངས་ཤིག །དེ་ལྟར་དགེ་སློང་དེས་དེ་དག་མཐོང་ནས་འདོད་ཆགས་ཀྱི་མེས་སྲེག་པའི་ལྷ་ལ་སྙིང་བརྩེ་བར་བྱེད་ལ། ལྷའི་སྲིད་པར་གཏོགས་པ་དག་ལ་ཡང་སྐྱོན་དེ་
དག་རྟོགས་ནས། སྲེད་པར་མི་བྱེད་དོ། །དེ་ལྟར་དྲི་དགའི་ས་ཕྱོགས་ན་བདེ་བ་རྣམ་པ་དུ་མ་དག་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ལེགས་པར་བྱས་པའི་ལས་དེ་ཟད་པར་མ་གྱུར་པ་དེ་སྲིད་དུ་མྱོང་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་མ་སྐྱེས་ལ། མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་ས་ཕྱོགས་བདེ་བ་ཐོབ་ཅིང་ཤིན་ཏུ་འབྱོར་པ་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་རྣམས་ཀྱི་གནས་སྒྲ་སྙན་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་བྱས་པའི་ལས་སྤྱད་ཅིང་། སེམས་པ་དང་། ཡང་དག་པའི་ལྟ་བ་དང་ལྡན་པར་གྱུར་པ་གང་གིས་ལྟ་བ་ལོག་པར་ཞུགས་པ་དག་ལ་ཚིགས་བཅད་གཅིག་བསྟན་ལ། དེ་དག་ཀྱང་སེམས་ཡུད་ཙམ་ཞིག་སངས་རྒྱས་ལ་དད་པ་སྐྱེས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སྒྲ་སྙན་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དབང་པོ་ཡུལ་ལ་དགའ་ཞིང་བདེ་བ་དེ་ལྷའི་མཚོ་འགྲམ་ན་རྩེ་བ་ལ་ནི་དགའ། པད་མའི་ཚལ་གྱི་ཕྲེང་བ་དང་། གསེར་གྱི་རི་ལ་གནས་ཤིང་ལྷའི་རོལ་མོ་བྱེད་པ་ལ་ནི་དགའ། ལྷ་མོ་གཟུགས་དང་། རྣམ་པ་སྣ་ཚོགས་ཐོགས་པ། འཛུམ་ཞིང་འཇོ་སྒེག་ལ་མངོན་པར་དགའ་བ། བྱད་བཞིན་གྱི་མདངས་སྡུག་ཅིང་དབང་ཕྱུག་མཚུངས་པ་མེད་པ་ལ་དགའ་བ་རྣམས་ཀྱིས་ནི་ཡོངས་སུ་བསྐོར། རྟག་ཏུ་ཉིན་གཅིག་བཞིན་བདེ་བ་ལ་གནས་པ་རབ་ཏུ་འཕེལ་ཞིང་བཻ་ཌཱུརྱའི་རིའི་རྩེ་མོ་དག་ན་གནས་ལ། བདེ་བ་སྣ་ཚོགས་སྤྱོད་པ་མེ་ཏོག་གི་ཕྲེང་བ་དང་། ཕྱེ་མ་དང་།
བྱུག་པས་ལུས་བརྒྱན་པ་དག་དེ་ན་དགའ་བར་བྱེད་དོ། །ཡུལ་གྱི་རྣམ་པ་མང་པོ་ལ་དགའ་བ། རི་རབ་དང་རི་ཁྲོད་ཡངས་པ་ན་གནས་པ་དག་གསེར་གྱི་རི་དང་ཚལ་རྣམས་ཀྱི་ནང་ན་དགའ་བར་བྱེད་དེ། དེ་ན་གསེར་གྱི་རི་འདི་ལྟ་བུ་དག་ཡོད་དེ། འདི་ལྟ་སྟེ། རི་མཁའ་ཐུག་ཅེས་བྱ་བ་དང་། རི་གྲིབ་མེད་ཅེས་བྱ་བ་དང་། རི་ཐམས་ཅད་དགའ་ཞེས་བྱ་བ་དང་། རི་ཡིད་བཞིན་སྤྲུལ་ཅེས་བྱ་བ་དག་སྟེ། རི་དེ་དག་ནི་རིན་པོ་ཆེས་རྣམ་པར་ཕྱེ་ཞིང་མཛེས་ལ། གསེར་གྱི་ཚལ་གྱིས་མཛེས་པར་བྱས་པ། རིའི་རྩེ་མོ་རྣམས་ན་ལྷའི་ཚོགས་སྙིང་རབ་ཏུ་དགའ་བ་རྣམས་རྟག་ཏུ་གླུ་དབྱངས་ཀྱི་སྒྲ་ནི་འབྱིན། ཆུ་དང་ཞིང་བསིལ་ལ་གཙང་བའི་རྒྱུན་དག་དང་། པད་མའི་རྫིང་རྣམས་ཀྱིས་ནི་རྟག་ཏུ་མཛེས་པར་བྱས། བྱ་རྟག་ཏུ་མྱོས་ཤིང་རྣར་སྙན་པ། སྒྲ་འབྱིན་པ་རྣམས་ནི་ཉེ་བ་ན་འཁོད། མིག་ཏུ་ཤིན་ཏུ་སྡུག་པའི་རིའི་ས་ཕྱོགས་ཀྱི་སྨན་ལྗོངས་དེ་རྣམས་ན་རང་གི་ལས་ལ་སྤྱོད་པའི་ལྷ་དེ་དག་དགའ་བར་བྱེད། རྒྱུ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །ལྷ་མོ་བཟང་མོ་རྣམས་ཀྱིས་ཡོངས་སུ་བསྐོར་ཅིང་། བྱ་མྱོས་པ་སྒྲ་འབྱིན་པ་དང་། གསེར་གྱི་བུང་བ་མྱོས་པ་མང་པོ་རྣམས་ཀྱིས་ཡོངས་སུ་བསྐོར་བའི་ལྷ་དེ་དག་ཐམས་ཅད་རེག་ན་བདེ་བའི་ལྷའི་ལྕུག་མའི་ཁྱིམ་རྣམས་སུ་འཁོར་དང་ལྷན་ཅིག་དགའ་བར་བྱེད་དོ། །དེ་ལྟར་དེ་ན་གནས་པ་དེ་ནི། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ལྷ་ལས་ལྡོག་པར་མི་འགྱུར་བའི་ལས་དེ་ཟད་པར་མ་གྱུར་པ་དེ་སྲིད་དུ་དགའ་བར་བྱེད་དོ། །གང་གི་ཚེ་ཟད་པར་གྱུར་པ་དང་། དེ་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་འཁོར་བར་ཡོངས་སུ་འཁྱམ་པར་འགྱུར་རོ། །གལ་ཏེ་མི་རྣམས་ཀྱི་ནང་དུ་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་རིགས་ཤིན་ཏུ་ཆེ་བའི་ནང་དུ་སྐྱེ་ཞིང་ཤིན་ཏུ་འབྱོར་པ་དང་ལྡན་པ་དང་། སྐྱེ་བོ་ཀུན་གྱིས་མཆོད་པ་དང་། རིས་འཐུན་པའི་གཟུགས་བཟང་པོ་དང་ལྡན་པ་དང་། རིས་འཐུན་པའི་
སྐལ་བ་དང་ལྡན་པ་དང་། སྐྱོན་མེད་པ་དང་། བྲན་ཕོ་དང་། བྲན་མོ་དང་། སྐྱེ་བོ་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་ལྷའི་གནས་དེ་ལ་ཆགས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་བྱས་པའི་ལས་ཀྱི་མཐའ་སྤྱད་པར་གྱུར་པ། དེ་ལ་རབ་ཏུ་ཆགས་པའི་ཡིད་སེམས་པ་དང་ལྡན་པར་གྱུར་པ་གང་གིས་གྲོགས་པོ་ལ་སྐོམ་ཕོར་གང་ཙམ་བླུད་པའམ། འགྲོན་པོ་རྣམས་ལ་སྲོག་ཆགས་ལུ་ཏ་དང་། ཀི་ཏ་དང་། སྦྲང་བུ་མཆུ་རིངས་དག་གིས་འཇིགས་པ་ལས་བདེ་བར་བྱ་བའི་ཕྱིར་ཁྲོན་པ་དག་འགེབས་པར་བྱེད་དེ། འདི་ལྟར་སྲོག་ཆགས་དུག་དང་འདྲེས་པ་འདི་དག་གི་དུག་ཆུའི་ནང་དུ་སོང་ན། དེ་ལས་འགྲོན་པོ་ལམ་དུ་ཞུགས་པ་རྣམས་ཀྱི་སྲོག་གི་བར་ཆད་དུ་འགྱུར་རོ་སྙམ་ནས་བྱ་བ་ཅི་ཡང་མེད་ཀྱིས་ཀྱང་། བྱམས་སེམས་ཀྱིས་ཁྲོན་པ་ལ་འཐུང་བའི་སྐྱེ་བོ་གཞན་ལ་ཕན་པར་བྱ་བའི་ཕྱིར་གཞི་དེ་ལས་དེ་གཡོག་པར་བྱེད་ན། སྐྱེས་བུ་དགེ་བ་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་པི་བང་ཐོགས་པ་རྣམས་ཀྱི་གནས་དེ་ལ་ཆགས་པ་ཞེས་བྱ་བར་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ལུས་ནི་ཉི་མ་གཉིས་པ་ལྟ་བུར་གཟི་ཆེ་སྟེ། ལེགས་པར་བྱས་པའི་ལས་རྣམས་ཀྱིས་ལུས་ཐམས་ཅད་ནི་བརྒྱན། རི་དང་། རི་བོ་དང་། རི་སུལ་དང་། འབབ་ཆུ་ན་གནས་པ་རྣམས་དེ་དང་སྤྱོད་པའི་ངང་ཚུལ་འཐུན་པའི་ལྷ་མོའི་ཚོགས་གཟུགས་དང་། ལང་ཚོ་དང་། རྒྱན་རྣམ་པ་སྣ་ཚོགས་ཐོགས་པ་རྣམས་ཀྱིས་ནི་ཡོངས་སུ་བསྐོར། གཟུགས་དང་། སྒྲ་དང་། དྲི་དང་། རོ་དང་། རེག་བྱ་སྡུག་པ་དུ་མ་ལ་རབ་ཏུ་ཆགས་ཤིང་མཆོག་ཏུ་བདེ་བ་དང་ལྡན་པ་ཡིན་ནོ། །གནས་དེ་དག་ན་རིན་པོ་ཆེ་སྣ་བདུན་གྱི་ཤིང་ལྗོན་པ་རྣམས་ཀྱིས་ཡོངས་སུ་བསྐོར་བའི་རི་དང་
ཚལ་འདི་ལྟ་བུ་དག་ཡོད་དེ། འདི་ལྟ་སྟེ། རྙིས་པ་མེད་པའི་ཚལ་དེ་ན་མེ་ཏོག་རྣམས་ཀྱང་རྙིས་པ་མེད་ཅིང་། དྲི་དང་ཡང་བྲལ་བ་མེད་པ་དང་། གསེར་གྱི་གྲིབ་མའི་ཚལ་ཞེས་བྱ་བ་གསེར་གྱི་ལྕུག་མས་དྲ་བར་བྲིས་ཤིང་། བཻ་ཌཱུརྱའི་བུང་བ་རྣམས་ཀྱིས་མཛེས་པར་བྱས་ལ། རྨ་བྱ་དང་ཁུ་བྱུག་སྒྲ་འབྱིན་ཏོ། །བྱ་དེ་དག་ཀྱང་རིན་པོ་ཆེ་སྣ་བདུན་གྱི་སྒྲོ་གཤོག་དང་ལྡན་ལ། སྒྲ་སྙན་ཅིང་འཇེབས་པར་འབྱིན་པ་ཡིན་ཏེ། ཚལ་དེ་ན་ཤིན་ཏུ་ཉམས་དགའ་བར་ཡང་བདག་ཉིད་ཀྱིས་མཐོང་ནས་ཤིན་ཏུ་བདེ་བར་གྱུར་ཏོ། །དེ་ན་བྱ་འདི་ལྟ་བུ་དག་ཡོད་དེ་བཀྲ་བ་དང་སྒྲོ་གཤོག་བཀྲ་བ་དང་། ལྷ་རྣམས་ཀྱི་སྙིང་ལ་འདོད་པ་སྐྱེད་པ་གང་ཡིན་པ་དེ་དག་དེས་སྒྲ་འབྱིན་པར་བྱེད་དེ། དེ་ཐོས་ནས་ལྷ་རྣམས་ཀྱང་ངོ་མཚར་ཆེར་སྐྱེས་ལ། འདི་ལྟར་བྱ་འདི་དག་ནི་ལྷ་དང་འཐུན་པར་མཐོང་སྟེ། གང་བདག་ཅག་གི་ཡིད་ལ་འདོད་པ་དེ་དག་བྱ་དེ་རྣམས་སྒྲ་འབྱིན་པར་བྱེད་དོ་སྙམ་མོ། །བྱ་ཆུ་ཞིམ་གནས་ཞེས་བྱ་བ་དེ་དག་གི་ཁ་ནས་ཆང་རོ་དང་དྲིའི་ངོ་བོ་གཙང་བ་ཕུན་སུམ་ཚོགས་པ་འབྱུང་ངོ་། །ཁ་ནས་བྱུང་བའི་ཆང་དེ་ལ་ཡང་བྱ་གཞན་རྣམས་འཐུང་བར་བྱེད་དེ། དེ་འཐུངས་ནས་བྱ་དེ་དག་བཅུ་འགྱུར་དུ་མྱོས་ཤིང་ཡིད་རབ་ཏུ་དགའ་ནས་བརྒྱ་འགྱུར་དུ་སྒྲ་འབྱིན་པར་བྱེད་དོ། །ལྷ་དེ་དག་གི་ནང་ན་གླུ་དབྱངས་ཕན་ཚུན་འདྲེས་པ་བརྒྱ་འགྱུར་དུ་སྙན་པ་ཡིན་ཏེ། བྱ་དེ་དག་གི་སྒྲ་དང་། ལྷ་མོ་དེ་དག་གི་གླུ་དབྱངས་ཐོས་ནས་འདོད་པ་ལ་ཆགས་པའི་ལྷ་ཡིད་ཤིན་ཏུ་བདེ་བ་རྣམས་བརྒྱ་འགྱུར་དུ་དགའ་བ་སྐྱེ་ཞིང་དེ་དག་གི་གླུ་དབྱངས་དང་སྒྲ་ལ་ཆགས་པར་བྱེད་དོ། །བྱ་མཆུ་སྒྱུར་འགྲོ་ཞེས་བྱ་བ་གང་དྲིལ་བུ་གཡེར་ཀའི་དྲ་བ་སྒྲ་འཁྲོལ་བའི་གསབ་གསེབ་ན་དགའ་བར་བྱེད་པ་ལ་འདི་ལྟར་ཅི་འདི་ན་བྱའི་སྒྲ་འབྱིན་ནམ། ཅི་དྲིལ་བུ་གཡེར་ཀའི་སྒྲ་འབྱིན་ཅེས་གསལ་བར་མི་མངོན་པ་དེ་ལྟར་དེ་དག་དང་ལྷན་ཅིག་སྒྲ་འབྱིན་ཏེ། ཕན་ཚུན་འདྲེས་པ་ཉིས་འགྱུར་དུ་ཡང་སྙན་པ་ཡིན་ནོ། །བྱ་འགྲམ་གྱི་མཐའ་ན་སྤྱོད་པ་ཞེས་བྱ་བ་གང་ཆང་རྟག་ཏུ་ཆུ་བོ་ལྟར་འབབ་པའི་འགྲམ་དང་གསེར་གྱི་པད་མའི་བར་བར་དག་ན་གནས་སོ། །བྱ་གྲིབ་མའི་ནང་ན་རྒྱུ་བ་
ཞེས་བྱ་བ་གང་ཇི་ཙམ་དུ་སྲེད་པའི་རྣམ་པ་དང་འདྲེས་ན་གཟུགས་ཀྱི་རྣམ་པ་དེ་ཙམ་འགྱུར་ཏེ། རྣམ་པ་དེ་སྲིད་དུ་གནས་སོ། །བྱ་ཆགས་པ་ཞེས་བྱ་བ་གང་གལ་ཏེ་ལྷ་ཤིན་ཏུ་ཉམས་དགའ་བ་རྣམས་དང་ཉེ་བར་ལྷ་མོ་དེ་དག་གནས་ན་བརྒྱ་འགྱུར་དུ་མཛེས་ཏེ་ཚལ་དང་། ནགས་ཚལ་དུ་མ་རྣམས་ཀྱི་ནང་ན་ཡང་རྟག་ཏུ་བདེ་བར་གནས་པ་དག་དགའ་བར་བྱེད་དོ། །ཡིད་ལ་བསམས་པ་གང་ཡིན་པ་དེ་དང་དེ་དག་ཉིད་འགྲུབ་པར་འགྱུར་ཏེ། ཤིན་ཏུ་རྒྱ་ཆེ་བར་གྱུར་ཅིང་། དགའ་བ་དང་། སྡུག་པ་དང་། ཡིད་དུ་འོང་བ་སྐྱེའོ། །ལྷ་མོའི་ཚོགས་དུ་མས་ཡོངས་སུ་བསྐོར་བའི་ལྷ་དེ་ཚལ་དང་། ཉེ་བའི་ཚལ་དེ་རྣམས་ཀྱི་ནང་ན་དགའ་བར་བྱེད་དེ། གསེར་དང་། དངུལ་དང་། བཻ་ཌཱུརྱའི་རིའི་རྩེ་མོ་གཞན་དང་། གཞན་དག་ལ་བཻ་ཌཱུརྱའི་པད་མའི་རྫིང་གིས་ཡོངས་སུ་བསྐོར་ཅིང་། བྱ་ངང་པ་དང་། ཀཱ་རཎྜ་བས་ཀྱང་བསྐོར་བ། བཻ་ཌཱུརྱ་སྔོན་པོ་ལྟ་བུའི་ཆུ་ཤིན་ཏུ་དྲི་ཞིམ་པས་གང་བ། ཆང་དུ་མ་འབྱུང་བ། བཻ་ཌཱུརྱ་དང་། གསེར་དང་། དངུལ་གྱི་ཤིང་ལྗོན་པ་ཤིན་ཏུ་དྲི་ཞིམ་པ་རྣམ་པ་དུ་མས་གཏིབས་པ། ཀུན་ནས་རི་འདི་ལྟ་བུ་ཀུན་ཡོད་དེ། བསམས་ན་སྣ་ཚོགས་འབྱུང་དང་། ས་སྟེངས་ཡངས་དང་། ས་ཕྱོགས་མཐོ་དམའ་དང་། གཞི་མཉམ་སྟེངས་དགའ་སྟེ། དེ་རྣམས་སུ་ལྷ་མོའི་ཚོགས་ཀྱིས་ཡོངས་སུ་བསྐོར་བའི་ལྷ་ཐམས་ཅད་ནམ་མཁའ་ལས་འགྲོ་ཞིང་འབབ་ལ། ཀུན་ནས་དགའ་བར་བྱེད་ཅིང་དགའ་དགུར་སྤྱོད་པར་བྱེད་དོ། །གཟུགས་སྡུག་པ་འབུམ་ཕྲག་དུ་མ་དག་ལ་ལྟ་བར་བྱེད་དེ། སྒྲ་སྙན་པ་འཇེབས་པ་ཡིད་དུ་འོང་བ་འབུམ་ཕྲག་དུ་མ་ལ་ཉན་པར་བྱེད་དོ། །དྲི་ཞིམ་པ་བྲོ་ཆེ་བ་ཡིད་དུ་འོང་བ་འབུམ་ཕྲག་དུ་མ་དག་ལ་སྣོམ་པར་བྱེད་དོ། །དེ་བཞིན་དུ་རེག་པས་རེག་པར་བྱ་བ་དག་ལ་རེག་པར་བྱེད་དོ། །དེ་ལྟར་དབང་པོ་ཐམས་ཅད་ཡུལ་ལ་མྱོང་བར་བྱེད་དེ། རང་གིས་བྱས་པ་དེ་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་དེ་ཟད་པར་མ་གྱུར་པ་དེ་སྲིད་དུ་གནས་དེ་དག་ན་དགའ་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་
འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་འཁོར་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་པར་རྒྱུན་དུ་བདེ་བ་དང་ལྡན་ཞིང་ཀུན་དགའི་ར་བར་བདེ་བར་གནས་པ་དང་། རྒྱལ་པོ་བྱམས་པ་དང་སྐྱེ་བོ་ཐམས་ཅད་ལ་སྡུག་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་པའི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་སྐྱོར་ཆུས་སྐྱེས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་བྱས་པའི་ལས་ཀྱི་མཐའ་སྤྱད་པ། སེམས་པས་ཡོངས་སུ་བསྒོམས་པའི་སྙིང་དང་། སྙིང་རྗེས་བརླན་པའི་སེམས་དང་ལྡན་པ་གང་གིས་སེམས་ཅན་འཆི་བར་འགྱུར་བ་སྐོམ་གྱིས་གདུངས་ཏེ། མགུལ་སྒྲ་ངར་ངར་པོར་བགགས་ཤིང་སྲོག་ཆུང་ཟད་ཡོད་པ་ལ་སྐོམ་བླུད་དམ། དེ་བཞིན་དུ་གང་གིས་དེའི་སྲོག་བདེ་བར་འགྱུར་བར་བྱ་བའི་ཕྱིར་སྨན་དག་བྱིན་ན་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་པི་བང་ཅན་གསུམ་པའི་ལྷ་རྣམས་ཀྱི་ནང་སྐྱོར་ཆུས་སྐྱེས་པའི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་ལྷའི་དབང་པོའི་ལུས་དང་མཚུངས་ཤིང་ལྷ་མོའི་ཚོགས་ཀྱིས་ཀུན་ནས་བསྐོར་ཏེ། བདེ་བ་རྒྱུན་མི་འཆད་ལ་རྟག་ཏུ་གནས་པ་ཡིན་ནོ། །དེ་ལྟར་རང་གི་ལས་ལ་སྤྱོད་པ་དེ་ཚལ་དུ་མ་དང་། ཆུ་བོ་དང་། འབབ་ཆུ་དུ་མ་དག་ཀྱང་རབ་ཏུ་མཐོང་སྟེ། དེ་རེས་འགའ་ལྷ་མོའི་ཚོགས་ཀྱིས་ཡོངས་སུ་བསྐོར་ནས། ཚལ་ཕྲེང་ཞེས་བྱ་བ་དེར་འདོང་བར་བྱེད་དོ། །ཚལ་དེ་ཡང་ཆུ་བོ་དང་། ལྟེང་ཀ་དང་། པད་མའི་ཚལ་དུ་མ་དག་གིས་བརྒྱན་ཅིང་ལྷའི་རོལ་མོའི་སྒྲ་དག་གིས་མཛེས་པར་བྱས་ལ་ལྷ་དང་ལྷ་མོའི་ཚོགས་རབ་ཏུ་དགའ་བ་རྣམས་ཀྱིས་གང་བ་ཡིན་ནོ། །ཚལ་དེ་ན་ཤིང་ལྗོན་པ་མེ་ཏོག་དང་འབྲས་བུ་དུ་མས་བརྒྱན་པ། ལྷའི་རོལ་མོའི་
སྒྲ་འབྱིན་པ། བྱའི་སྒྲ་ཅ་ཅོ་སྙན་པ་འབྱིན་པ་ཡིན་ནོ། །ཚལ་དེ་ནི་རིན་པོ་ཆེ་སྣ་ཚོགས་ཀྱི་ཤིང་ལྗོན་པ་རྣམས་ཀྱིས་ཡོངས་སུ་བསྐོར་བ་ཡིན་ཏེ། འདི་ལྟ་སྟེ། རྟག་ཏུ་དགའ་བ་དང་། ཡང་དག་པར་དགའ་བར་བྱེད་པའི་མེ་ཏོག་མན་དཱ་ར་བ་དང་། པད་མ་དང་། དྲི་ཇི་ལྟར་དགའ་བ་རྣམས་ཀྱིས་བསྐོར་བ་ཡིན་ནོ། །མེ་ཏོག་དེ་དག་གི་དྲིའི་མཐུ་ནི་འདི་ལྟ་བུ་ཡིན་ཏེ། ལྷ་རྣམས་དྲི་ཇི་ལྟ་ཇི་ལྟར་འདོད་པ་དེ་ལྟ་དེ་ལྟར་མེ་ཏོག་དེ་དག་ལས་འབྱུང་ལ། མེ་ཏོག་གཅིག་གིས་མེ་ཏོག་དེ་ཐམས་ཅད་ཀྱི་དྲིའི་བྱ་བ་བྱེད་དོ། །ཚལ་ཕྲེང་བ་དེ་ཉིད་ན་ལྷ་རབ་ཏུ་དགའ་ཞིང་བྲོ་གར་བྱེད་པ་ཕན་ཚུན་གྲོགས་སུ་གྱུར་པ་རྣམས་ཚལ་མེ་ཏོག་ལྔ་པ་ཞེས་བྱ་བར་འདོང་བར་བྱེད་དོ། །དེ་ན་ཡང་བྱ་དུས་སུ་དྲན་པར་བྱེད་པ་ཞེས་བྱ་བ་ཡོད་དེ། དེས་ལྷ་དེ་དག་མཐོང་ནས་འདི་ལྟར་ཚིག་འབྲེལ་བའི་ཚིགས་སུ་བཅད་དེ་སྨྲས་པ། བསོད་ནམས་དག་ནི་ཉམས་དགའ་ལ། །དེ་དག་འབྲས་བུ་མཆོག་ཏུ་དགེ །།བསོད་ནམས་ལྟ་བུར་སྒྲོལ་བ་མེད། །དེ་ལྟ་བས་ན་བསོད་ནམས་བྱོས། །བསོད་ནམས་གཉེན་གྱི་མཆོག་ཡིན་ཏེ། །བསོད་ནམས་གཏེར་ནི་ཟད་མི་ཤེས། །བསོད་ནམས་མར་མེ་ལྟ་བུ་ཡིན། །དེ་བཞིན་ཕ་དང་མ་དང་མཚུངས། །བསོད་ནམས་བྱས་ན་འགྲོ་བའི་ལྷ། །བསོད་ནམས་ཀྱིས་ནི་བཟང་འགྲོར་འཁྲིད། །མི་ཡུལ་བསོད་ནམས་བྱས་པ་ནི། །དེ་དག་ལྷ་ཡུལ་དགའ་བར་བྱེད། །འདི་ལྟར་བསོད་ནམས་ཆེ་བའི་མི། །རྟག་ཏུ་བདེ་དང་ལྡན་པར་འགྱུར། །བསོད་ནམས་ལྟ་བུའི་བདེ་བ་མེད། །དེ་ལྟ་བས་ན་བསོད་ནམས་ཀྱིས། །འཇིག་རྟེན་གཉིས་ལ་ཕན་བྱེད་ཅིང་། །དགའ་དང་ནོར་གྱི་རྒྱུར་གྱུར་པ། །བསོད་ནམས་ཡིན་པར་རྟག་ཏུ་མཐོང་། །དེ་ལྟར་བསོད་ནམས་བདེ་མཆོག་ལྡན། །རྟག་ཏུ་བསོད་ནམས་རྗེས་འབྲང་སྟེ། །དེ་ནི་གྲིབ་མ་བཞིན་དུ་འབྲང་། །དེ་བས་བསོད་ནམས་བདེ་མཆོག་སྟེ། །བསོད་ནམས་ལྟ་བུའི་བདེ་བ་མེད། །བསོད་ནམས་ཟད་པའི་ལྷ་རྣམས་ནི། །རང་གིས་བྱས་པའི་རྗེས་སུ་ལྟུང་། །འཇིག་རྟེན་དགེ་དང་མི་དགེའི་འབྲས། །དེ་བས་བསོད་ནམས་ཡང་དག་སྤྱོད། །ལྷ་ཡི་ཡུལ་དུ་བདག་ཅག་གང་། །དུད་འགྲོའི་
སྐྱེ་གནས་འཐུན་པར་གནས། །བསོད་ནམས་མ་ཡིན་རྒྱུར་གྱུར་པ། །རང་གིས་བྱས་པས་སེམས་རྨོངས་སོ། །གང་ཞིག་བསོད་ནམས་དམན་པ་ནི། །གདུལ་དཀའ་རྟག་ཏུ་ངན་འགྲོར་འགྲོ། །བྱེ་མ་ལ་ནི་མར་མེད་ལྟར། །དེ་ལ་བདེ་བ་ག་ལ་ཡོད། །སེམས་ཀྱིས་བསླུས་པའི་རྨོངས་པ་རྣམས། །བསོད་ནམས་ཀྱིས་ནི་ཡོངས་སུ་སྤངས། །དེ་དག་ལ་ནི་བདེ་མེད་ཅིང་། །དེ་དག་སྡུག་བསྔལ་མཐའ་མེད་དོ། །ཡང་དང་ཡང་དུ་སྐྱེ་འགྱུར་ཞིང་། །ཡང་དང་ཡང་དུ་འཆི་འགྱུར་བ། །ལྷ་དག་བདེ་བས་མྱོས་པ་གང་། །དེ་དག་ལ་ནི་བདེ་རྟག་མེད། །ལས་ཀྱིས་རྒྱར་ནི་བཅུག་གྱུར་ཅིང་། །གཏི་མུག་གིས་ནི་བསླུས་པ་རྣམས། །འཁོར་བ་ཐོག་མ་མེད་པ་ནས། །འཁྲུལ་འཁོར་བཞིན་དུ་འཁྱམ་པར་བྱེད། །ལྷ་དག་ལྷ་ཡི་འཇིག་རྟེན་ནས། །འཆི་བར་འགྱུར་བའི་སྡུག་བསྔལ་གང་། །དེ་ནི་དམྱལ་ལས་དམྱལ་བ་རུ། །དེ་ཡི་དཔེ་བྱར་ཡོད་མེད་དོ། །བདེ་མཐའ་རྟག་ཏུ་ལྟུང་བར་གོ །འདི་དག་ཅི་ཞིག་མི་ཤེས་སམ། །ལྷ་རྣམས་འཆི་མེད་ཡུལ་ལྟ་བུར། །བདེ་བས་རྨོངས་རྣམས་ལྟ་བར་བྱེད། །སྐྱེ་དང་འཆི་བའི་འཇིག་རྟེན་ནི། །གྲངས་སུ་བགྲང་དུ་ཡོད་མེད་ཀྱང་། །སྲེད་པས་ཡོངས་སུ་བསླུས་པ་ཡི། །མི་རྣམས་ཡིད་ནི་འབྱུང་མི་བྱེད། །དེ་ནས་ལྷ་དེ་རྣམས་ལྷའི་བྱ་དེའི་སྒྲ་དེ་ཐོས་ནས། ཆུང་ཟད་ཅིག་ཡིད་ལ་བྱེད་པ་དང་། ཡང་བག་མེད་པ་དེ་ཉིད་ཀྱི་དབང་དུ་གྱུར་ཏེ། སྲེད་པས་སྲིད་པར་སྤྱོད་པ་དེ་དག་ཐམས་ཅད་ནི་སེམས་ལ་རྟག་ཏུ་རག་ལས་པ་ཡིན་ནོ། །ཕྲེང་བའི་ཚལ་དེ་ན་བདེ་བ་ལས་བདེ་བར་གནས་པ་དེ་དག་སིལ་སྙན་ཡན་ལག་ལྔ་དང་ལྡན་པས་བྲོ་གར་བྱེད། དགོད་པར་བྱེད་དོ། །ཡུལ་བུད་ཤིང་ལྟ་བུར་གྱུར་པ་ལ། བག་མེད་པ་མེ་ལྟ་བུས་རྒྱུན་མི་འཆད་པར་སྲེག་པ་ན་ཡུལ་ནས་ཡུལ་དང་། ཉེ་བའི་ཚལ་ནས་ཉེ་བའི་ཚལ་དང་། རིའི་སྟེང་ནས་རིའི་སྟེང་དང་། གཞལ་མེད་ཁང་ནས་གཞལ་མེད་ཁང་དང་། པད་མའི་ཚལ་ནས་པད་མའི་ཚལ་དང་། རིན་པོ་ཆེའི་རིའི་རྩེ་མོ་ནས་རིན་པོ་ཆེའི་རིའི་རྩེ་མོར་རྒྱུ་སྟེ། དེ་ལྟར་ལྷ་མོ་དང་ལྷན་ཅིག་ཡུལ་གྱི་སྲེད་པས་བདས་པས་ན། ལྷ་དེ་རྣམས་ཇི་སྲིད་
དུ་འདོད་པ་སྡུག་པ་ཡིད་དུ་འོང་བའི་ལས་དེ་ཟད་པར་མ་གྱུར་པ་དེ་སྲིད་དུ་ལྷའི་འཇིག་རྟེན་དེ་ན་དགའ་བར་བྱེད་དོ། །དེ་ཟད་ནས་དེ་ནས་ཡང་ལྟུང་བར་འགྱུར་ཏེ། ལྷུང་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་འཁོར་བར་ཡོངས་སུ་འཁྱམ་མོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་དེ་ལས་དེ་དང་རྒྱུ་འཐུན་པར་ཚེ་རབས་ཚེ་རབས་སུ་ནད་མེད་པར་འགྱུར་ཞིང་ཉོན་མོངས་པ་མེད་པ་དང་། སྐྱེ་བོ་དམ་པ་ཀུན་གྱི་ཡིད་དུ་འོང་བ་དང་། བཀྲེས་པ་དང་། སྐོམ་པ་དང་བྲལ་བའི་ཡུལ་བཟང་པོར་སྐྱེ་བ་དང་། མེ་ཏོག་གིས་བརྒྱན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་པི་བང་ཅན་གསུམ་པ་རྣམས་ཀྱི་གནས་ལུས་དཀར་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཞིང་དང་ཞིང་མ་ཡིན་པའི་རྣམ་པ་ཤེས་ཤིང་ཡིད་ཤིན་ཏུ་དད་པ་དང་། སེམས་པས་ཡོངས་སུ་བསྒོམས་པའི་སྙིང་དང་ལྡན་པ་དང་། དེར་ཡིད་ཞུགས་ཤིང་སེམས་གཡེང་བ་མེད་པ་ལས་ཀྱི་འབྲས་བུ་མངོན་པར་ཤེས་པ་གང་གིས་མཆོད་རྟེན་ནམ། དགེ་འདུན་གྱི་གཙུག་ལག་ཁང་གི་སྐྱོང་ནུལ་རླུང་ངམ། ཉི་མའམ། ཆར་པས་ཟད་པ་སླར་སྐྱོང་ནུལ་བྱུགས་ལ། དེ་ལྟར་བྱས་ནས་དེ་རྗེས་སུ་དགའ་ཞིང་གཞན་དག་ཀྱང་དེ་ཉིད་ལ་དགའ་བར་བྱེད་དུ་འཇུག་ལ། ལུགས་བཞིན་དུ་བྱེད་དུ་འཇུག་སྟེ་དེ་ལྟར་བྱེད་ན་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ལུས་དཀར་གྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་དག་ཐམས་ཅད་དཀར་པོ་ཁོ་ནར་སྣང་སྟེ། དེའི་ཁྱད་པར་ནི་དུང་དང་། ཁ་བ་དང་། མེ་ཏོག་ཀུ་མུ་ད་དང་། འོ་མ་དང་བཅས་པ་དག་གིས་ནི་བཅུ་དྲུག་གི་ཆར་ཡང་མི་ཕོད་དོ། །དེ་ལྟར་རྣམ་པ་དེ་ལྟ་བུའི་གཞལ་མེད་ཁང་དང་། ཤིང་རྟ་དང་གནས་དག་དང་གཞན་དག་ཀྱང་ཀུན་ནས་དཀར་ཞིང་མཆོག་ཏུ་དཀར་པོར་
སྣང་བར་འགྱུར་ཏེ། འདི་ལྟར་ལུས་ཀྱང་མཆོག་ཏུ་དཀར་བ་ཉིད་དུ་འགྱུར་རོ། །དགའ་བར་བྱེད་པའི་ངང་ཚུལ་ཅན་དེ་དག་སྐྱེད་མོས་ཚལ་དུ་དགའ་སྟོན་བྱེད་དུ་འདོང་སྟེ། འདི་ལྟར་བྱི་རུའི་ཚལ་ཞེས་བྱ་བ་གནས་དེ་དག་ཏུ་སིལ་སྙན་དང་གླུ་དབྱངས་སྣ་ཚོགས་ཀྱི་སྒྲ་འབྱིན་ཅིང་དགོད་པ་དང་། ཤིན་ཏུ་ཡིད་དགའ་བའི་གྲོགས་པོ་རྣམས་དང་ལྷན་ཅིག་ཚལ་དེར་འདོང་བར་བྱེད་དོ། །དེ་ལྟར་དེ་དག་བྱི་རུའི་ཚལ་གྱི་ནང་དུ་འདོང་སྟེ། གང་གི་ཚེ་ཞུགས་པ་དང་བྱ་སྣ་ཚོགས་སྒྲ་འབྱིན་ཅིང་གསེར་བཙོ་མའི་ཤིང་ལྗོན་པས་མཛེས་པ་ཡིན་ནོ། །ཤིང་ལྗོན་པའི་ཉེ་བའི་ཚལ་གྱིས་མཛེས་པར་བྱས་པའི་བྱི་རུའི་ཚལ་དེའི་མཐུ་ནི་འདི་ལྟ་བུ་ཡིན་ཏེ། ཇི་ལྟར་ཁ་དོག་དམར་པོ་གཞན་དང་མི་འཐུན་པར་འབྱུང་བ་དེ་ལྟར་ཤིང་ལྗོན་པའི་འོད་དམར་པོ་རྣམ་པ་དེ་ལྟ་བུ་འབྱུང་ངོ་། །ལྷ་དེ་དག་ཐམས་ཅད་ཚལ་དེའི་མཐུས་དཀར་པོ་དེ་རྣམས་དང་བྲལ་ནས་ཁ་དོག་ཤིན་ཏུ་དམར་པོར་གྱུར་པ་དང་། ཕན་ཚུན་གཏམ་དུ་བདག་ཅག་གི་ལུས་ལྷན་ཅིག་སྐྱེས་པའི་མཛེས་པ་གང་ཡིན་པ་དེ་དག་ཚལ་གྱི་ཁ་དོག་གི་མཐུས་མི་སྣང་བར་གྱུར་ཏོ། །ཤིང་ལྗོན་པ་དེ་དག་ཀུན་ནས་ཁ་དོག་དམར་པོ་ཁོ་ན་ཡིན་ཏེ། བདག་ཅག་ནི་ཚལ་གཞན་དུ་འདོང་བར་བྱའོ་ཞེས་བརྗོད་དོ། །དེ་ནས་ལྷ་དེ་རྣམས་ལྷ་མོ་དེ་དག་དང་ལྷན་ཅིག་བཻ་ཌཱུརྱའི་ཚལ་ག་ལ་བ་དེར་འདོང་བར་བྱེད་དོ། །ཚལ་དེ་ཡང་བཻ་ཌཱུརྱའི་མདོག་དེས་ཇི་ལྟར་འཛམ་བུའི་གླིང་གི་གནམ་ལྟར་ཀུན་ནས་སྔོ་བ་ཡིན་ནོ། །དེ་ནས་ལྷ་རྣམས་ཚལ་དེར་ཡང་ཁ་དོག་དཀར་པོ་གང་ཡིན་པ་དེ་དག་བཻ་ཌཱུརྱའི་ཤིང་ལྗོན་པའི་དབྱིབས་དེ་རྣམས་ཀྱིས་ཀྱང་ཟིལ་གྱིས་མནན་ཏེ། ཤིང་དེ་རྣམས་ལ་བྱ་གནས་པ་གང་ཡིན་པ་དེ་དག་ཀྱང་ཁ་དོག་སྔོན་པོར་གྱུར་ལ། པད་མ་གང་ཡིན་པ་དེ་དག་ཀྱང་སྔོན་པོར་གྱུར་ཏེ། དེ་ལྟར་བཻ་ཌཱུརྱའི་ཚལ་དེ་དག་ཐམས་ཅད་སྔོན་པོ་ཉིད་ཡིན་ནོ། །དེ་ནས་ལུས་དཀར་བ་ལྷ་མོའི་ཚོགས་མང་པོས་ཡོངས་སུ་བསྐོར་བ་ལྷའི་རོལ་མོའི་སྒྲ་དང་། དྲི་དང་གླུ་དབྱངས་དང་བཅས་པ་རྣམས་ཚལ་དེ་ན་ཡུན་རིང་དུ་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་ཅིང་། ལྷའི་བདེ་བ་འདོད་པའི་ཡོན་ཏན་ལྔ་མྱོང་བར་བྱེད་དོ། །དེ་ནས་
ཡུན་རིང་ཞིག་ལོན་ནས་ལྷ་ལུས་དཀར་པོ་རྣམས་རྩེ་བའི་དོན་དུ་དངུལ་གྱི་ཤིང་ལྗོན་པའི་ཚལ་དུ་འདོང་བར་བྱེད་དོ། །དངུལ་གྱི་ཚལ་དེ་ནི་ཀུན་ནས་ཁ་དོག་དཀར་པོར་སྣང་ཞིང་ཚལ་དེ་ན་གང་ཅི་ཡོད་པ་དེ་ཐམས་ཅད་དཀར་བ་ཡིན་ལ། ཚལ་དེ་ན་པད་མ་ཡང་དངུལ་གྱི་པད་མ་ཤིན་ཏུ་ཉམས་དགའ་བ་ཡིན་ནོ། །བྱ་རྣམས་ཀྱང་དངུལ་གྱི་བྱ་ཡིན་ཏེ། དེ་ལྟར་ལྷ་ལུས་དཀར་པོ་དང་ལྡན་པ་དེ་དག་ཐམས་ཅད་ཚལ་དེའི་ནང་དུ་ཞུགས་པ་ཇི་ལྟར་འོ་མའི་ནང་ན་ཟླ་བའི་གཟུགས་བརྙན་སྣང་བ་དེ་ལྟར་མཛེས་པ་ཡིན་ནོ། །ཚལ་དེ་ན་ལྷ་རྣམས་ཡུན་རིང་དུ་དགའ་བར་བྱེད། དགའ་དགུར་སྤྱོད་པར་བྱེད་ཅིང་ལྷའི་དཔེ་མེད་པ་འདོད་པའི་བདེ་བ་ཡན་ལག་ལྔ་དང་ལྡན་པས་བདེ་བ་མྱོང་བར་བྱེད་དོ། །དེ་དག་དེར་ཡང་དགའ་བར་བྱས་ནས་ཚལ་སྣ་ཚོགས་ག་ལ་བ་དེར་འདོང་བར་བྱེད་དོ། །ཚལ་དེ་ཡང་ཤིང་ལྗོན་པ་སྣ་ཚོགས་ཀྱིས་མཛེས་པར་བྱས་ཤིང་གསེར་གྱི་ཤིང་ལྗོན་པ་རྣམས་ཀྱིས་ཀྱང་མཛེས་པར་བྱས་པ་ཡིན་ཏེ། །དེ་བཞིན་དུ་དངུལ་གྱི་ཤིང་ལྗོན་པ་རྣམས་དང་། དེ་བཞིན་དུ་བཻ་ཌཱུརྱའི་ཤིང་ལྗོན་པ་རྣམས་དང་། དེ་བཞིན་དུ་ལོ་མ་སྣ་ཚོགས་རྣམས་ཀྱིས་མཛེས་པར་བྱས་པ་ཡིན་ནོ། །ཤིང་དེ་རྣམས་ཀྱང་ཁ་དོག་སྣ་ཚོགས་ཀྱི་ལོ་མ་དང་། མདོག་སྣ་ཚོགས་ཀྱིས་མཛེས་པ་ཡིན་ལ། ཚལ་དེའི་ནང་ན་ལྷ་དེ་རྣམས་དེ་དག་ཉིད་ཀྱིས་ལུས་རྣམས་རྒྱན་སྣ་ཚོགས་ཀྱིས་བརྒྱན་པར་གྱུར་ཏོ། །ཚལ་དེ་ན་ཡང་ལྷ་དེ་རྣམས་ཡུན་རིང་དུ་དགའ་བར་བྱེད། དགའ་དགུར་སྤྱོད་པར་བྱེད་དེ། ལྷ་མོའི་ཚོགས་ཀྱི་ནང་ན་འཁོད་པ་རྣམས་དེ་དག་གིས་གླུ་དབྱངས་ཉེ་བར་ལེན་ཅིང་དེ་ན་ཡང་དེ་རྣམས་ཡུན་རིང་དུ་རྩེས་ནས་ཀུན་དུ་མཐོང་བའི་གསེར་གྱི་རི་ག་ལ་བ་དེར་འདོང་བར་བྱེད་དོ། །དེ་ཡང་རིན་པོ་ཆེ་སྣ་བདུན་གྱིས་བརྒྱན་པ་ཡིན་ཏེ། ལྷ་དེ་དག་གིས་རི་ཀུན་ཏུ་མཐོང་། ཆུ་བོ་དང་། འབབ་ཆུ་དང་། ལྟེང་ཀ་མང་པོས་བརྒྱན་པ། ཚལ་དང་། ནགས་ཚལ་དང་ལྡན་པ། པད་མའི་རྫིང་བུ་དུ་མས་འཁོར་བ། བྱའི་ཚོགས་མང་པོའི་སྒྲ་འབྱིན་པའི་རི་བོ་དེ་ལ་འཛེགས་ནས་རིའི་རྒྱལ་པོ་རི་རབ་དྲུག་ཁྲིས་བསྐོར་བ་དེ་རྣམས་ཀྱི་དབུས་ན་རིའི་རྒྱལ་པོ་རི་རབ་
འདུག་པ་དེ་དག་ཐམས་ཅད་མཐོང་ངོ་། །དེ་ནས་ལྷ་ལུས་དཀར་པོ་རྣམས་ཀུན་ནས་མཐོང་བའི་རི་བོ་དེ་ལ་ལྷ་མོ་དང་ལྷན་ཅིག་ཡུན་རིང་དུ་རྩེ་བར་བྱེད། དགའ་དགུར་སྤྱོད་པར་བྱེད་དོ། །དེ་ནས་ཡང་དེ་རྣམས་དེ་ལས་བབས་ནས་རི་བོ་ཕྱོགས་གཙང་མ་ཞེས་བྱ་བ་ག་ལ་བ་དེར་འཛེག་པར་བྱེད་དེ། རི་བོ་དེ་ལ་ཡང་གནས་གཞན་དག་ནས་སྐྱེས་པའི་ལྷ་རྣམས་དགའ་བའི་མཐུས་རི་བོ་དེ་ལ་འོངས་ནས་དགའ་བར་བྱེད་དོ། །ལྷ་གཞན་དེ་རྣམས་དང་ལྷ་ལུས་དཀར་པོ་དེ་རྣམས་དང་ཡང་ཕན་ཚུན་ལྷན་ཅིག་སིལ་སྙན་ཡན་ལག་ལྔ་དང་ལྡན་པས་དགའ་བར་བྱེད་ཅིང་དགའ་དགུར་སྤྱོད་པར་བྱེད་དོ། །དེ་ནས་ལྷ་ཡུལ་གྱི་ཕྱོགས་ཆ་དགའ་བ་དེ་རྣམས་སུ་ལྷ་དེ་དག་ཡུན་རིང་དུ་དགའ་བར་བྱས་ནས། མར་ཟད་ནས་མར་མེ་འཆི་བར་འགྱུར་ཞིང་ཉིན་པར་གྱི་མཐའ་ཟད་ན་ཉི་མ་ནུབ་པར་འགྱུར་བ་དེ་ལྟར་ལྷ་དེ་རྣམས་ལེགས་པར་བྱས་པའི་ལས་ཟད་ནས་མར་མེ་ལྟར་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་པད་མའི་རྩ་ལག་ལྟ་བུར་མདོག་དཀར་ཤམ་བཟང་པོར་འགྱུར་ཞིང་སྟོད་ཕྱོགས་སམ་རྒྱ་ཡུལ་ལ་སོགས་པར་སྐྱེ་བར་འགྱུར་ལ། རྟག་ཏུ་བདེ་བ་དང་ལྡན་པ་དང་། མིའི་གཙོ་བོ་ཆེན་པོའི་ཡིད་གཅུགས་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་པི་བང་ཅན་གསུམ་པ་རྣམས་ཀྱི་གནས་སུ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷའི་འཇིག་རྟེན་ན་ལྷ་ཕན་ཚུན་དགའ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །གནས་དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་དགེ་བ་ཕན་ཚུན་གྲོགས་སུ་གྱུར་པ། སེམས་པ་དང་ཚུལ་ཁྲིམས་དང་ལྡན་པ། གྲོལ་བའི་དགེ་འདུན་གྱི་གཙོ་བོར་གྱུར་པ་གང་དག་གིས་སྦྱིན་པ་བྱིན། ཚུལ་ཁྲིམས་བསྲུངས་ན་དེ་དག་ཐམས་ཅད་རྒྱུ་དེ་དང་རྐྱེན་དེ་ལས་
ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཕན་ཚུན་དགའ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཕན་ཚུན་བདེ་བ་སྐྱེད་ཅིང་སེམས་འཐུན་པར་བསྐྱེད་པ་དེ་རྣམས་བསོད་ནམས་ཀྱི་ཚོགས་དེ་སྨིན་པར་འགྱུར་རོ། །དེ་ན་ལྷའི་པད་མའི་རྫིང་ན་གནས་ཤིང་ཁ་ཟས་ལ་དགའ་བ་དེ་ཡུལ་ཉམས་དགའ་ཞིང་བདེ་བ་དག་མྱོང་བར་བྱེད་དེ། སིལ་སྙན་ཡན་ལག་ལྔ་དང་ལྡན་པས་ཡིད་རབ་ཏུ་དགའ་བ་དག་དགོད་པར་བྱེད། དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་ལ། ལྷ་མོའི་ཚོགས་གཟུགས་དང་ཆ་བྱད་སྣ་ཚོགས་དང་ལྡན་པ་རྣམས་ཀྱིས་ཡོངས་སུ་བསྐོར་ནས་གསེར་དང་རིན་པོ་ཆེ་སྣ་ཚོགས་ཀྱི་ས་གཞི་དང་། རི་དེ་རྣམས་ལ་དགའ་བར་བྱེད་དོ། །དེ་ལྟར་རང་གི་ལས་ཀྱི་འབྲས་བུ་ལ་སྤྱོད་ཅིང་དགའ་བ་དེ་རྣམས་སུ་ཆུ་བོའི་འགྲམ་བཻ་ཌཱུརྱ་དང་། ནོར་བུའི་ལན་ཀན་བྲེས་པ་དང་། གསེར་གྱི་རྣམ་པའི་བྱ་ངང་པ་དང་། ངུར་པ་རྣམས་ཀྱིས་མཛེས་པར་བྱས་པ། འགྲམ་ན་ཤིང་ལྗོན་པ་སྐྱེས་པ་རྣམས་ཀྱི་སྡུག་གུར་བརྒྱན་པའི་སྨན་ལྗོངས་དག་ན་ལྷ་མོའི་ཚོགས་ཀྱིས་ཡོངས་སུ་བསྐོར་བ་རྣམས་དགའ་བར་བྱེད་དོ། །དེར་དེ་དག་དགའ་བར་བྱས་ནས་མུ་ཏིག་འབབ་པར་བྱེད་པ་ཞེས་བྱ་བའི་ཆུ་བོ་ག་ལ་བ་དེར་འདོང་བར་བྱེད་དོ། །ཆུ་བོ་དེ་དག་ན་ཆུ་གང་ཡིན་པ་དེ་དག་ནི་ཆང་རོ་རྣམ་པ་དུ་མ་དང་ལྡན་པ་རྙོག་པ་མེད་པ་འབབ་བོ། །བྱེ་མ་གང་ཡིན་པ་དེ་དག་ནི་མུ་ཏིག་ཡིན་ལ། འདམ་རྫབ་གང་ཡིན་པ་དེ་དག་ནི་གསེར་ཡིན་ཏེ། ཆུ་བོ་དེ་ནོར་བུ་ཁ་དོག་བཟང་པོ་དུ་མས་བརྒྱན་པ་ཉ་རྣམས་ཀྱིས་ཤིན་ཏུ་མཛེས་པ་ཡིན་ནོ། །དེའི་ངོས་གཉི་ག་ན་གསེར་གྱི་ཤིང་ལྗོན་པ་རྣམས་ལ་འདབ་མ་ནི་བཻ་ཌཱུརྱ། བཻ་ཌཱུརྱའི་ཤིང་ལྗོན་པ་རྣམས་ལ་གསེར་གྱི་འདབ་མ་ཡོད་དེ། འདབ་མ་ཡོད་པ་དེ་དག་ཐམས་ཅད་ལ་དུས་ཚིགས་ཐམས་ཅད་ཀྱི་འབྲས་བུ་དང་མེ་ཏོག་བཟང་དགུས་ཁེབས་པ་ཡིན་ནོ། །བྱའི་ཚོགས་རྟག་པར་རབ་ཏུ་དགའ་བ་རྣམས་ཀྱིས་ཀུན་དུ་གང་ལ་ཐོས་ན་ཡིད་འཕྲོག་པའི་སྒྲ་འབྱིན་པ་ཡིན་ཏེ། བྱའི་ཚོགས་མཐོང་ན་དགའ་བ་རྣམ་པ་དེ་ལྟ་བུ་དག་དང་། རྟག་ཏུ་ཀུན་
ནས་དགའ་བའི་ལྷ་དེ་རྣམས་དང་། ལྷན་ཅིག་བྱེད་པ་ལྟ་བུར་དུས་ཐམས་ཅད་དུ་དགའ་བར་བྱེད་དོ། །དེར་དེ་རྣམས་ཀྱིས་ཡང་དག་པར་དགའ་བར་བྱས་ནས་ཕྱོགས་གཞན་སྙན་པ་སྤྱོད་པ་ཞེས་བྱ་བ་ག་ལ་བ་དེར་འདོང་བར་བྱེད་དོ། །ཕྱོགས་དེ་ན་ལྕུག་མས་གཡོགས་པའི་ཁྱིམ་ཡོད་དེ། རིན་པོ་ཆེ་མ་རྒད་ཀྱི་དུམ་བུ་རིང་པོ་སྐྱོན་མེད་པས་ཕྱེ་བ། ས་ཕྱོགས་ཀྱི་རིམ་པ་མཐོ་དམའ་དང་ལྡན་ཞིང་པད་མའི་ཚལ་གྱིས་བརྒྱན་པ། ས་ཕྱོགས་ཤིན་ཏུ་རྣམ་པར་ཕྱེ་བ་རིན་པོ་ཆེ་སྣ་ཚོགས་ཀྱི་བྱ་རྣམས་ཀྱིས་མཛེས་པར་བྱས་པ། ལ་ལ་དག་ན་ཡང་གསེར་གྱི་ས་གཞིའི་ཕྱོགས་ཉམས་དགའ་བར་བཻ་ཌཱུརྱའི་ལྕུག་མའི་དྲ་བས་གཏིབས་པ། བུང་བ་དང་མེ་ཏོག་གིས་ཀུན་ཏུ་གང་བ། ལྷ་དང་ལྷ་མོའི་ཚོགས་རྟག་ཏུ་དགའ་ཡ་ཡ་སྟེ། རབ་ཏུ་དགའ་བ་རྣམས་ཀྱིས་ཀུན་དུ་གང་བ། ལེགས་པར་བྱས་པའི་ལས་ལ་སྤྱོད་པའི་ལྷ་དེ་རྣམས་ཀུན་དུ་དགའ་བར་བྱེད་དོ། །དེ་ནས་ཀྱང་ཕྱོགས་གཞན་ཞིག་ན། ཆུ་དང་། ལྟེང་ཀ་དང་། ཚལ་དང་། འབབ་སྟེགས་མང་པོ་ཡོད་པར་འདོང་བར་བྱེད་དོ། །འབབ་སྟེགས་དང་། ཚལ་དེ་དག་ན་ཆུ་ན་རྒྱུ་བའི་བྱ་མདོག་བཟང་པོ་གང་ཡིན་པ་དེ་རྣམས་ཀྱིས་ནམ་མཁའི་ཕྱོགས་དེ་དག་ཐམས་ཅད་བར་མཚམས་མེད་པར་ཀུན་དུ་བཀང་ནས་སྒྲ་འབྱིན་ཏོ། །ཆང་ཆུ་བོ་ལྟར་འབབ་པ་རྙོག་པ་མེད་པ་རྣམ་པ་དུ་མ་དག་འབབ་སྟེ། གསེར་གྱི་རྡོ་ལས་དབའ་རླབས་ཀྱི་སྒྲ་འབྱུང་ཞིང་དབུ་བ་འཁྲུགས་པའི་སྒྲ་ཁྲོ་ལོ་ལོ་འབྱུང་ལ། བྱ་རབ་ཏུ་དགའ་བའི་སྒྲ་འབྱིན་པ་ལོང་ལོང་པོ་རྣམས་དང་ཆུ་བོ་དེ་རྣམས་ཀྱི་ངོས་གཉི་ག་ན་འཁོད་པའི་ལྷ་མོའི་ཚོགས་ཀྱིས་ཡོངས་སུ་བསྐོར་བ་རྣམས་དང་དགའ་བར་བྱེད་རྩེ་བར་བྱེད་དོ། །ལག་ན་གསེར་གྱི་པད་མ་ཐོགས་པ་རྣམས་ཕན་ཚུན་རྡེག་པ་ན་དེ་ལྟར་ཕན་ཚུན་ཡིད་གཅུགས་པ་ལྷན་ཅིག་རྩེ་བ་དེ་རྣམས་ཀྱིས་དུས་རིང་དུ་འདས་སོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་ཉེར་དགུ་པ། ཕྱོགས་དེ་ནས་ཀྱང་མྱོས་བྱེད་ཚལ་ཞེས་བྱ་བ་དེར་ལྷ་ཐམས་ཅད་རྩེ་བའི་གྲོགས་དང་ལྷན་ཅིག་འདོང་བར་བྱེད་དོ། །ཚལ་དེ་ན་སེམས་ཀྱི་རྣམ་པ་ཐམས་ཅད་མྱོས་བྱེད་ཀྱིས་མུན་པར་གྱུར་ཏེ། བྱ་དེ་དག་ནི་
འབྲས་བུའི་རོ་རྣམས་ཀྱིས་མྱོས། བཻ་ཌཱུརྱའི་བུང་བ་དག་ནི་མེ་ཏོག་གི་རོ་རྣམས་ཀྱིས་མྱོས། ཁུ་བྱུག་དག་ནི་དཔྱིད་མཐོང་ནས་མྱོས། འགྲམ་ན་རྒྱུ་བའི་བྱ་དག་ནི་ཆང་གི་རོ་རྣམས་ཀྱིས་མྱོས། དེ་བཞིན་དུ་ལྷ་རྣམས་ནི་ལྷའི་འདོད་པའི་ཡོན་ཏན་ལྔ་རྣམས་ཀྱིས་མྱོས། དེ་བཞིན་དུ་ལྷ་མོ་རྣམས་ཀྱང་ལྷའི་ཚོགས་དང་ལྷན་ཅིག་འདོད་པའི་རོས་མྱོས་ཏེ། དེ་ལྟར་འདོད་པའི་རོས་མྱོས་པའི་བུད་མེད་རྣམས་ནི་གཞན་གྱིས་མྱོས་པར་མི་འགྱུར་གྱི། འདི་ལྟར་བུད་མེད་ཐམས་ཅད་ནི་འདོད་པ་ལྷུར་ལེན་པ་ཡིན་ལ། དེ་ལ་སེམས་ཞུགས། དེ་ལ་གཞོལ། དེ་ལ་གནས། དེའི་རང་བཞིན་ཡིན་ནོ། །ལྷ་དེ་དག་ཀྱང་མྱོས་བྱེད་མཐོང་ནས་བརྒྱ་འགྱུར་དུ་མྱོས་པ་རྣམས་དེ་ན་དགའ་བར་བྱེད་དོ། །དེ་ལྟར་ལྷ་དེ་རྣམས་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་ཟད་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད་དོ། །དེ་ལས་དེ་ཟད་ནས་ལྷའི་རིས་དེ་ནས་ཀྱང་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་འཁོར་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། བསོད་ནམས་གཅིག་པ་དེ་དག་ཐམས་ཅད་ཡུལ་དང་ལྗོངས་དང་གྲོང་ཁྱེར་གཅིག་ཏུ་སྐྱེ་བར་འགྱུར་ཞིང་ཐམས་ཅད་འབྱོར་པ་ཕུན་སུམ་ཚོགས་པ་དང་། ཐམས་ཅད་རིགས་ཆེ་ཞིང་བཙུན་པར་སྐྱེ་བ་དང་། ཐམས་ཅད་ཕན་ཚུན་དགའ་ཞིང་བྱ་བ་གཅིག་པ་དང་། དགེ་བའི་ནང་དུ་སྐྱེ་བར་འགྱུར་བ་མཐོང་སྟེ་དེ་དག་ལས་དེ་དང་རྒྱུ་འཐུན་པར་དགེ་བའམ་མི་དགེ་བ་གང་ཡིན་པ་དེ་དག་ཐམས་ཅད་ཀུན་ལ་འབྱུང་གི་སོ་སོ་ལ་ནི་མ་ཡིན་ནོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་པའི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་པི་བང་ཅན་གསུམ་པ་རྣམས་ཀྱི་གནས་ཡང་དག་ཆགས་སྤྱོད་ཅེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་ཀ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཞལ་ཏ་པ་ཚུལ་ཁྲིམས་དང་ལྡན་པར་གྱུར་པ་གང་གིས་ཁྱིམ་པ་གཞན་དག་དགའ་བར་བྱས། གཟེངས་བསྟོད་མགུ་བར་བྱས།
དད་པར་བྱས་ནས་སེམས་ཡོངས་སུ་བསྒོམས་པ་དེ། ཞིང་ཡོན་ཏན་དང་ལྡན་པ་ལ་སྦྱིན་པ་སྦྱིན་དུ་བཅུག་ཅིང་ཚུལ་ཁྲིམས་ཀྱང་སྲུང་དུ་བཅུག་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཡང་དག་ཆགས་སྤྱོད་ཀྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་རང་གི་མཐུ་འདི་ལྟ་བུ་འབྱུང་བར་འགྱུར་ཏེ། ལས་གང་གིས་བདག་ཅག་འདིར་སྐྱེས་ཞིག་གུ་སྙམ་ནས། དེ་དག་མིར་སྐྱེས་པ་ཡང་དག་པར་དྲན་ནོ། །འདི་ནི་མིའི་འཇིག་རྟེན་ན་བདག་གི་དགེ་བའི་བཤེས་གཉེན་དུ་གྱུར་པ་ཡིན་ཏེ། འདིའི་སྦྱིན་བདག་ནི་བདག་ཡིན་ནོ། །རྒྱུ་དེ་དང་རྐྱེན་དེ་དང་གཞི་དེས་དེ་དང་བདག་བསོད་ནམས་འཐུན་པར་གྱུར་ནས། འདིར་འོངས་པ་ལྟ་ཞིག་གུ་སྙམ་མོ། །དེ་བཞིན་དུ་དགེ་བའི་བཤེས་གཉེན་ཉན་ཐོས་དེ་ཡང་སྐྱེ་བ་དྲན་ཏེ། འདི་ལྟར་འདི་ནི་བདག་གི་སེམས་དང་བས་སྦྱིན་པ་སྦྱིན་དུ་བཅུག་པ་ཡིན་ཏེ། རྒྱུ་དེ་དང་རྐྱེན་དེ་དང་གཞི་དེས་དེ་ནས་བདག་ལྷའི་འཇིག་རྟེན་འདིར་སེམས་དང་ལྡན་པར་སྐྱེས་པ་ལྟ་སྙམ་ནས། དེ་ལྟར་ཡང་དག་ཆགས་སྤྱོད་ཀྱི་ལྷ་རྣམས་ཀྱི་གནས་སུ་སྐྱེས་སོ། །དེ་ནས་གཞན་དུ་གྱུར་ཏེ། པད་མའི་ཚོགས་ལྟ་བུའི་ལྷ་མོ་མང་པོ་བྱད་གཟུགས་དང་མདོག་དང་ལང་ཚོ་དང་སྡུག་པ་སོ་སོ་དུ་མས་བརྒྱན་པ་མཐོང་ངོ་། །ལྷ་མོ་དེ་དག་མཐོང་ནས་ལྷ་དེ་རྣམས་ཀྱིས་མཐོང་མ་ཐག་ཏུ་ཇི་ལྟར་ཚེ་རབས་སྔ་མ་ལ་བྱས་པ་ཤིན་ཏུ་ཕྲ་མོ་ཡང་མི་དྲན་ཞིང་ཡུལ་ལ་སེམས་རྣམ་པར་ཆགས་པ། བག་མེད་པའི་གནས་སུ་སྐྱེས་པ། ཡུལ་གྱི་བདེ་བས་སེམས་ཕྲོགས་པ་དེ་ལྟར་འདོད་པ་རྣམས་ཀྱིས་འཕངས་པའི་ཡིད་སྐྱེ་བར་བྱེད་དོ། །དེ་ནས་ཡང་དག་ཆགས་སྤྱོད་ཀྱི་ལྷ་རྣམས་ཀྱིས། ལྷ་མོའི་ཚོགས་འབུམ་ཕྲག་དུ་མ་བྱད་གཟུགས་དཔེ་མེད་པ་དང་ལྡན་པ་དེ་དག་མཐོང་ནས། ཐོག་མ་མེད་པའི་དུས་ནས་ཞུགས་པའི་འདོད་ཆགས་ཀྱི་མེས་ཡིད་རབ་ཏུ་བསྲེགས་པ་ནི། ཇི་ལྟར་མེས་བུད་ཤིང་སྐམ་པོ་ཡུན་རིང་དུ་སྲེག་པར་བྱེད་པ་དེ་ལྟར་ལྷ་དེ་རྣམས་ཀྱི་ཡིད་དེ་དག་རབ་ཏུ་སྲེག་པར་བྱེད་དོ། །ལྷ་མོ་དེ་དག་ག་ལ་བ་དེར་འགྲོ་བར་བྱེད་ལ་ལྷ་མོ་རྟག་ཏུ་འདོད་པ་ལ་དོན་གཅིག་ཏུ་བྱེད་པ་ཡང་ཁ་རླངས་དྲི་ཞིམ་པོས་ནམ་མཁའ་འགེངས་ཤིང་ལྷའི་ཆ་བྱད་
དུ་མ་ཐོགས་ལ་ལག་ན་པད་མ་ཁྱེར་ཏེ། ལྷ་ག་ལ་བ་དེར་འདོང་བར་བྱེད་དོ། །དེ་ནས་ལྷ་དེ་རྣམས་དང་ལྷ་མོ་དེ་རྣམས་ལྷའི་འདོད་པ་བདེ་བ་རྣམ་པ་དུ་མ་དེ་དག་མྱོང་བར་བྱེད་དོ། །དེ་ནས་བག་མེད་པ་དེ་ལྟ་བུར་རིག་ནས་དགེ་སློང་དེ་འཁོར་བའི་སྡུག་བསྔལ་ཉམ་ང་བ་དུ་མ་ལས་ཡིད་བྱུང་ནས་འདི་ལྟར་ཚིགས་སུ་བཅད་དེ་སྨྲས་པ། ཉིན་མོ་གསར་དུ་བྱུང་བ་ཡིས། །རྙིང་པ་མེད་པར་བྱེད་པ་ལྟར། །བདེ་དང་སྡུག་བསྔལ་སར་པ་ཡིས། །རྙིང་པ་ཉེ་བར་རྗེད་པར་བྱེད། །དེ་ལྟར་ལྷ་ཡི་འཇིག་རྟེན་དུ། །བདེ་བ་འཛིན་པའི་སྐྱེ་བོ་དག །འཚོ་བའི་མཐའ་ནི་འཆི་བ་དང་། །ཇི་སྟེ་འབྲལ་བའི་མཐའ་མི་རིག །ཇི་ལྟར་ཤིང་དང་སྦྲང་རྩིར་བསྲེས། །ཇི་ལྟར་དུག་དང་ཟས་བསྲེས་པ། །དེ་ལྟར་བདེ་བ་འདི་ཀུན་གྱི། །མཐའ་མི་བདེ་བ་མ་རིག་གོ །ལྷ་ཡུལ་དུ་ནི་ལྷག་པར་ཡང་། །ཡུལ་རྣམས་ལྟ་ལ་ག་ལ་ངོམས། །སྲེད་པས་ངོམས་པ་མེད་པ་དེ། །ཁྱད་པར་དུ་ཡང་ག་ལ་བདེ། །ཤིན་ཏུ་བདེ་བའི་སྟོབས་ལས་ནི། །ལྷ་ཡུལ་རྣམས་སུ་ཡེ་ནས་སྲེད། །སྲེད་མེས་ཡོངས་སུ་གདུང་རྣམས་ཀྱི། །བདེ་བ་ཉེ་བར་མ་དམིགས་སོ། །གཅིག་ཏུ་བདེ་སྤྱོད་སྲེད་བྲལ་ཞིང་། །ང་མེད་རེ་བ་མེད་པ་དང་། །མྱ་ངན་འདས་གྲོང་འགྲོ་བ་ནི། །བདེ་གང་ཡིན་པ་དེ་འཐོབ་བོ། །གང་དག་སྲེད་པའི་བག་ལ་ཉལ། །ཡང་ཡེ་སེམས་ལ་མི་འཇོག་པ། །དེ་དག་ཐོག་མཐའི་དྲི་མ་བྲལ། །བདེ་བའི་ནང་ནའང་དེ་བདེའོ། །སེམས་ནི་ཤིན་ཏུ་བསྡུས་པ་དང་། །ཐམས་ཅད་དུ་ནི་རེ་མེད་དང་། །བྱ་དང་མི་བྱ་མ་རྨོངས་པ། བདེ་བ་རྟག་ཏུ་ཉེ་བར་གནས། །གང་གིས་འཁོར་བའི་རྒྱུར་གྱུར་པ། །དགའ་བཅས་འབྱུང་བ་བཅོམ་པ་དག །བརྟན་པོ་གཙོ་དེ་ཕ་རོལ་འགྲོ། །བདེ་ལྡན་མྱ་ངན་འདས་ལ་གནས། །གང་ཞིག་འདོད་ཆགས་ཞེ་སྡང་ལྡན། །སྲེད་བཅས་དེ་ལ་བདེ་བ་མེད། །གང་ཞིག་འདོད་ཆགས་མེ་ལས་གྲོལ། །དེ་ནི་དྲི་མེད་བདེ་བར་འདོད། །དེ་ལྟར་དགེ་སློང་དེས་བག་མེད་པ་ལ་གནས་པའི་ལྷ་དེ་རྣམས་ཉིན་གཅིག་བཞིན་དུ་སྲེད་པའི་མེ་རབ་ཏུ་འཕེལ་བར་བྱེད་པའི་བག་མེད་པ་རྣམས་མཐོང་ནས་སྙིང་རྗེ་བར་བྱེད་དོ། །དེ་ནས་ལྷ་དེ་རྣམས་ཀྱང་ལྷ་མོའི་ཚོགས་དང་ལྷན་ཅིག་ཏུ་ཚལ་དུ་བས་འཁྲིགས་
པ་ཞེས་བྱ་བ་ག་ལ་བ་དེར་ལྷ་མོའི་ཚོགས་གཡེར་བ་རོལ་མོ་དང་། གླུ་དབྱངས་དང་། གད་མོ་སྣ་ཚོགས་འདོན་པས་ཡོངས་སུ་བསྐོར་བ་བདེ་བར་གནས་པ་རྣམས་སྐྱེད་མོས་ཚལ་དུ་དགའ་སྤྱོད་བྱེད་དུ་དོང་སྟེ། ཁ་ཅིག་ནི་ལྷ་མོའི་ཚོགས་ཀྱིས་ཡོངས་སུ་བསྐོར་ནས་ནམ་མཁའ་ལ་བྱ་བཞིན་དུ་འགྲོ། ཁ་ཅིག་ནི་གཞལ་མེད་ཁང་བྱ་ངང་པས་བཏེག་པ་རྣམས་ཀྱིས་འགྲོ། ཁ་ཅིག་ནི་གྲོགས་དང་ལྡན་པའི་གཞལ་མེད་ཁང་རྣམས་ཀྱིས་འགྲོ། ཁ་ཅིག་ནི་ལྷ་མོའི་ཚོགས་དེ་དག་ཉིད་ཀྱིས་བསྐོར་ནས་རྐང་པས་འགྲོ་སྟེ། བདེ་བར་གནས་པ་དེ་རྣམས་གླུ་དབྱངས་ལེན་ཞིང་ལུས་ངལ་བ་མེད་པ་དེ་ཐམས་ཅད་ཚལ་དུ་བས་འཁྲིགས་པ་ཞེས་བྱ་བ་ག་ལ་བ་དེར་འདོང་བར་བྱེད་དོ། །དེ་ནས་ཚལ་དེ་ན་ལྷ་གཞན་སྔར་འོངས་པ་གང་ཡིན་པ་དེ་རྣམས་ཀྱིས་ལྷ་གཞན་དེ་དག་མཐོང་ནས་དེ་ནས་ཡང་རབ་ཏུ་དགའ་སྟེ། ཡིད་ཤིན་ཏུ་མགུ་བར་གྱུར་ཏོ། །དེ་ནས་ལྷ་གསར་དུ་འོངས་པ་རྣམས་དང་། ལྷ་རྙིང་པ་རྣམས་ཕན་ཚུན་འདྲེས་ནས་ཅ་ཅོ་དང་རོལ་མོའི་སྒྲ་སྐྱེས་ཏེ། རབ་ཏུ་དགའ་ཞིང་ཉམས་དགའ་བ་སྐྱེས་སོ། །དུ་བས་འཁྲིགས་པའི་ཚལ་དེ་ཀུན་སྒྲ་རྣམ་པ་དུ་མས་ཀུན་དུ་གང་སྟེ། འདི་ལྟ་སྟེ། གླིང་བུའི་སྒྲ་དང་། པི་བང་གི་སྒྲ་དང་། རྫ་རྔའི་སྒྲ་དང་། ཁར་རྔའི་སྒྲ་དང་། ལྷ་མོ་རྒྱན་གྱིས་བརྒྱན་པའི་སྒྲ་དང་། དེ་བཞིན་དུ་དེ་ན་གླུ་དབྱངས་དང་དགོད་པའི་སྒྲ་དང་། ཆུ་བོ་དང་། མཚོ་དང་། ཆུ་མང་པོ་རྣམ་པ་སྣ་ཚོགས་འབབ་པའི་སྒྲ་དང་། རིན་པོ་ཆེའི་བྱ་ཁ་དོག་དང་། དབྱིབས་རྣམ་པ་སྣ་ཚོགས་སུ་འདུག་པའི་སྒྲ་དང་། ལྷ་རྣམས་ཀྱི་གླུ་དབྱངས་ཀྱི་སྒྲ་ཐོས་ན་སྙན་པ་དག་སྟེ། དེ་ལྟར་ཚལ་དེ་སྒྲ་སྙན་པ་ཀུན་གྱིས་གང་བ་ཡིན་ནོ། །ཚལ་དེ་ན་ལྷའི་སྨན་དང་། བྱ་དང་། ཀླུང་དང་། ལྟེང་ཀ་དང་། མེ་ཏོག་དང་། འབྲས་བུ་ཕུན་སུམ་ཚོགས་པ་དང་། ལྷའི་འདོད་པའི་ཡོན་ཏན་ལྔ་འབྱོར་པ་དག་གིས་ལྷ་རྣམས་སྐྱེད་མོས་ཚལ་གྱི་དགའ་སྤྱོད་བྱས་ནས་བདེ་བ་ཉམས་སུ་མྱོང་ངོ་། །དེ་རྣམས་ཚལ་དེ་ནས་བྱུང་ནས་ཡང་ལྷུན་པོ་སོ་སོར་སྣང་བ་ཞེས་བྱ་བའི་རིའི་རྩེ་མོ་ག་ལ་བ་དེར་ལྷ་མོའི་ཚོགས་ཀྱིས་ཡོངས་སུ་བསྐོར་ནས་འདོང་བར་བྱེད་དེ། ལྷ་དེ་རྣམས་དེར་འདོང་བ་ན་སོ་སོར་སྣང་བའི་རིའི་རྩེ་མོ་དེར་ལྷགས་སོ། །ལྷའི་པད་མའི་རྫིང་དང་ལྟེང་ཀ་དང་ཉེ་བའི་ཚལ་
ཕུན་སུམ་ཚོགས་པ་དང་ལྡན་པའི་ལྷུན་པོ་སོ་སོར་སྣང་བའི་རིའི་རྩེ་མོ་དེ་ན་རྒྱལ་པོ་ཆེན་པོ་འཕགས་སྐྱེས་པོ་ལྷ་མོའི་ཚོགས་ཀྱིས་ཡོངས་སུ་བསྐོར་བ་གནས་ཏེ། འཇིག་རྟེན་ཐམས་ཅད་ཀྱི་དོན་སྒྲུབ་ཅིང་མིའི་འཇིག་རྟེན་ན་ཆོས་དང་ཆོས་ཀྱིས་བསྐྱེད་པའི་མི་ཆོས་དང་ལྡན་པ་ནི་ཇི་ཙམ་ཞིག་ཡོད། ཆོས་དང་མི་ལྡན་པ་ནི་ཇི་ཙམ་ཞིག་ཡོད། འཇིག་རྟེན་ལ་ཕན་པར་སྒྲུབ་པ་ནི་ཇི་ཙམ་ཞིག་ཡོད། ཕན་པར་མི་སྒྲུབ་པ་ནི་ཇི་ཙམ་ཞིག་ཡོད། དམ་པའི་ཆོས་ཀྱི་མཐུ་ཆེའམ་ཆོས་མ་ཡིན་པ་མཐུ་ཆེ། བདུད་ཀྱི་ཕྱོགས་ལྷ་མ་ཡིན་བརྟན་པ་དང་། ཀླུ་རབ་འཇོམས་ལ་སོགས་པ་མཐུ་ཆེའམ་མི་ཆེ་ཞེས་རྟོག་པར་བྱེད་དེ། དེ་ལྟར་སྐྱེ་དགུ་རྣམས་སྐྱོང་བ་དེ་རི་ཀུན་སྣང་དེ་ལ་གནས་སོ། །རིའི་རྩེ་མོ་དེ་དང་ཧ་ཅང་མི་ཉེ་བ་རི་རབ་ཀྱི་ངོས་ལ་ཉི་མ་འཁོར་བར་བྱེད་དེ། དེའི་འོད་ལ་རྒྱལ་པོ་ཆེན་པོ་འཕགས་སྐྱེས་པོ་དེ་ཆོས་དང་ལྡན་པའི་ཆོས་ཀྱི་བྱེ་བྲག་གིས་མིའི་འཇིག་རྟེན་དུ་ཉི་མའི་འོད་ཇི་ལྟར་གཏོང་ཞིག་གུ་ཞེས་དཔྱོད་པར་བྱེད་དོ། །ཉི་མ་འཁོར་བའི་གཞི་ལ་མཁས་པ་དེ་ཉི་མ་ལ་རྟོག་པར་བྱེད་དེ། གལ་ཏེ་ཆོས་དང་ལྡན་པའི་མི་ཆོས་རྗེས་སུ་སྐྱོང་བ་བྱུང་བ་དེའི་ཚེ། དེ་བཞིན་དུ་ཉི་མ་ཆོས་ཀྱིས་ཡོངས་སུ་རྒྱས་པ་ཡིན་ཏེ། དེ་ལྟར་མདོག་གསལ་བ་ཉིད་དང་། དུས་དང་འཐུན་པར་ལྷན་ནེར་འཆར་ལ། དེ་ལས་མི་རྣམས་ཀྱི་ལུས་ལ་ནི་ནད་མི་འབྱུང་ཞིང་འབྲུ་རྣམས་ལ་ཡང་ནད་མི་འབྱུང་ངོ་། །གལ་ཏེ་ཆོས་དང་མི་ལྡན་པའི་ཆོས་ཀྱི་རྗེས་སུ་འཇུག་པ་བྱུང་ན། དེའི་ཚེ་ཉི་མའི་འོད་ཆོས་མ་ཡིན་པ་དང་འཐུན་པར་ལྷན་ནེར་མི་འཆར་ཏེ། དེ་ལས་ཆོས་མ་ཡིན་པའི་མཐུ་དེས་འབྲུ་རྣམས་མི་སྐྱེ་ཞིང་ཉམས་པར་འགྱུར་རོ། །དེ་ལྟར་འདི་དག་ཐམས་ཅད་ནི་ཆོས་དང་ཆོས་མ་ཡིན་པ་བྱས་པའི་དབང་གི་འབྲས་བུ་ཡིན་ཏེ། རྒྱུ་མེད་པ་ལས་ནི་མ་བྱུང་ངོ་། །རི་དེ་ཡང་ཉི་མའི་འོད་དང་འཐུན་པས་སོ་སོར་སྣང་བ་ཞེས་མིང་དུ་བཏགས་ཏེ། རྒྱལ་པོ་ཆེན་པོ་འཕགས་སྐྱེས་པོ་དེ་ལ་གནས་ནས་འཇིག་རྟེན་ལ་རྟོག་པར་བྱེད་དོ། །ཡང་དག་ཆགས་སྤྱོད་ཀྱི་ལྷ་དེ་རྣམས་སོ་སོར་སྣང་བའི་རིའི་རྩེ་མོར་དོང་ནས་ཡིད་རབ་ཏུ་དགའ་ལ་གསལ་བ་དེ་མཐོང་ནས་ཀྱང་བརྒྱ་འགྱུར་དུ་ཡིད་རབ་ཏུ་དགའ་བ་སྐྱེས་སོ། །
འཕགས་སྐྱེས་པོས་འཇིག་རྟེན་དེ་དག་མངོན་པར་བརྟགས་ཤིང་རང་གིས་བྱས་པའི་ལས་དེས་ལྷ་དང་ལྷ་མོ་དེ་དག་ཐམས་ཅད་ཀུན་ནས་བརྒྱ་འགྱུར་དུ་གཟི་བརྗིད་འབར་བར་མཐོང་བ་དང་། ཀ་འཇིག་རྟེན་སྐྱོང་བ་འཕགས་སྐྱེས་པོ་དེ་ཡིད་རབ་ཏུ་དགའ་ནས་འདི་ལྟར་ཚིགས་སུ་བཅད་དེ་སྨྲས་པ། རྒྱུ་གསུམ་རྣམ་གསུམ་ལས་བྱུང་བ། །ལེགས་བྱས་རྣམ་གསུམ་བྱས་པས་ན། །འབྲས་བུ་ཆེ་གསུམ་ཡོན་ཏན་གསུམ། །གསུམ་གནས་ས་ནི་གསུམ་དུ་གནས། །ཁྱེད་རྣམས་ཆོས་ལ་མཆོག་ཏུ་གཞོལ། །འཚེ་བ་མེད་པའི་སྦྱིན་མཆོག་དང་། །བདེན་དང་བཟོད་དང་དུལ་དང་ལྡན། །ཐམས་ཅད་མཐོ་རིས་གནས་སུ་ལྷགས། །ལྷ་ཡི་གནས་ན་ལྷ་གང་དག །ལྷ་ཡི་རྒྱན་དང་ལྷ་ཡི་ཕྲེང་། །ཕུན་སུམ་ཚོགས་པས་བརྒྱན་པ་རྣམས། །དགའ་བར་བྱེད་པ་འདི་དག་དགེ །།བག་མེད་དགའ་བའི་སྐྱེ་བོ་གང་། །དགེ་བ་སྤྱོད་པར་མི་བྱེད་པ། །ཆོས་ལ་རྣམ་པར་རྨོངས་པ་དེ། །མཐོ་རིས་དག་ཏུ་ག་ལ་སྐྱེ། །ལེགས་པར་བྱས་པས་མི་དག་འདིར། །ལུས་ཅན་རྣམས་ནི་སྐྱེས་གྱུར་ཏེ། །ལས་ཀྱི་རྣམ་སྨིན་དེ་ཡིས་ན། །ལྷ་ཡི་ཡུལ་དུ་དེ་དག་སྐྱེས། །གང་ཞིག་བདག་ཉིད་དགའ་འགྱུར་ཞིང་། །གང་ཞིག་བློ་གྲོས་བདེར་གནས་པ། །ལྷ་ཡི་ཡུལ་དུ་སྐྱེ་འགྱུར་བ། །དེ་ནི་བསོད་ནམས་ཆེན་པོ་བྱེད། །ཆུང་དང་འབྲིང་དང་བདེར་གནས་པ། །ལྷ་རྣམས་ཀྱི་ནི་བདེ་ཆེན་གང་། །འདི་ནི་ཆུང་དང་འབྲིང་དང་ཆེའི། །བསོད་ནམས་ཀྱི་ནི་འབྲས་བུར་མངོན། །ལུས་ཅན་གང་གིས་ཇི་ཙམ་དུ། །བསོད་ནམས་ཀྱི་ནི་རྣམ་པ་བྱས། །རྣམ་པ་དེ་ཙམ་དེའི་བདེ་བ། །ལྷ་ཡི་འཇིག་རྟེན་རྣམས་སུ་སྨིན། །ཁ་དེ་ལྟར་འཕགས་སྐྱེས་པོ་དེས་ལྷ་དེ་དག་མཐོང་སྟེ། ཚིགས་སུ་བཅད་པ་སྨྲས་ནས་དེ་དག་ཉིད་དང་ལྷན་ཅིག་འཐུན་པར་དགའ་བར་བྱེད་དེ། རི་དང་། ནགས་ཚལ་དང་། ལྟེང་ཀ་དང་། ཚལ་དང་། ལྷའི་མེ་ཏོག་དང་། འབྲས་བུར་ལྡན་པའི་ས་ཕྱོགས་དང་། བྱ་སྣ་ཚོགས་སྒྲ་འབྱིན་པ་དང་། ཀུན་ནས་ལྷ་དང་ལྷ་མོའི་ཚོགས་ཀྱིས་གང་བ་དང་། རི་མཐོང་ན་ཉམས་དགའ་བ་དང་། དབང་པོ་དྲུག་བདེ་བར་བྱེད་པ་རྣམས་སུ། དབང་པོ་དྲུག་དོན་ལ་
ཆགས་པ་བག་མེད་པར་གནས་པའི་ལྷ་དེ་རྣམས་སིལ་སྙན་ཡན་ལག་ལྔ་དང་ལྡན་པས་ཁ་མངོན་པར་དགའ་བར་བྱེད་ཅིང་། པད་མའི་ཚལ་དང་། སྐྱེད་མོས་ཚལ་དང་། ཆང་ཆུ་ལྟར་འབབ་པ་དང་། བཻ་ཌཱུརྱའི་ཚལ་དང་། ལྟེང་ཀ་དང་། ཆུ་མིག་གིས་བརྒྱན་པ་ཕན་ཚུན་གྲོགས་སུ་གྱུར་པ་རྣམས། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ལེགས་པར་བྱས་པའི་ལས་དེ་ཟད་པར་མ་གྱུར་པ་དེ་སྲིད་དུ་དགའ་བར་བྱེད་དོ། །དེ་ཟད་ནས་དེ་ནས་ཡང་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་མང་དུ་སྨྲ་བ་ནོར་མང་བ་དེད་དཔོན་ཆེན་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་པ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། དེ་དག་གི་གནས་འཁོར་དང་སྤྱོད་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །ང་དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པར་གྱུར་ཅིང་། སེམས་ཀྱི་རྒྱུད་སེམས་པས་བསྒོམས་པ་གང་གིས་སྦྱིན་པ་སྦྱིན། ཚུལ་ཁྲིམས་བསྲུངས། ཆོས་མཉན་པར་བྱས་པའི་སྦྱིན་བདག་དེ་ལ་ལག་ནས་སྦྱིན་པ་པོ་གྲོགས་སུ་གྱུར་པ་གཞན་ཞིག །དེས་སྙིང་བརླན་ཅིང་དགེ་བའི་སེམས་དང་ལྡན་པ། དད་པས་སེམས་བརླན་པ། འདི་ལྟར་ཡང་སེམས་ལ་རྟོག་པར་བྱེད་དེ། སྦྱིན་བདག་འདི་ནི་བསོད་ནམས་དང་ལྡན་པ་ཞིག་གོ །ད་བདག་ལ་ཡང་རྫས་ཀྱི་རྣམ་པ་དེ་སྙེད་ཡོད་ན། དེ་ལྟར་བདག་གིས་ཀྱང་གཞན་དག་ལ་སྦྱིན་པར་བྱའོ་སྙམ་སེམས་ན་སྦྱིན་པ་ལ་སེམས་དང་བ་དེས་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་འཁོར་དང་སྤྱོད་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཡུལ་དུ་མས་སྙིང་
རབ་ཏུ་མྱོས་པ་རྣམས་རྟག་ཏུ་ལྡན་པར་གྱུར་ཏེ། སིལ་སྙན་སྣ་ཚོགས་སྒྲ་འབྱིན་པའི་ཉེ་བའི་ཚལ་དང་། བཻ་ཌཱུརྱ་དང་། ནོར་བུའི་ལན་ཀན་བྲེས་པའི་རྫིང་རྣམས་ན་གསེར་གྱི་པད་མས་ཁེབས་པ་དང་། བྱའི་ཚོགས་ཀྱི་རྣམ་པ་སྒྲ་འབྱིན་པའི་ཚལ་དང་། ཉེ་བའི་ཚལ་དེ་རྣམས་ན། བྱ་མྱོས་པ་སྒྲ་འབྱིན་པ་ཉམས་དགའ་བར་བྱེད་པ་དག་ན་དགའ་བར་བྱེད་ལ། །ཁ་ཅིག་ནི་ཤིང་ལྗོན་པ་ཚང་ཚིང་དག་གི་ནང་ན་ཁུ་བྱུག་དང་། རྨ་བྱ་སྒྲ་སྙན་པ་ཆགས་སུ་རུང་བ་འབྱིན་པ་རྣམས་ན་ལྷ་མོ་དག་དང་ལྷན་ཅིག་དགའ་བར་བྱེད་དོ། །ཁ་ཅིག་ནི་པད་མའི་ཚལ་སྡོང་བུ་ནི་བཻ་ཌཱུརྱ་འདབ་མ་ནི་གསེར། ཟེ་བ་རྡོ་རྗེར་འདུག་པ་རྣམས་ཀྱི་ནང་ན་དགའ་བར་བྱེད་དོ། །ཁ་ཅིག་ནི་རྒུན་ཆང་གི་ཚལ་རྣམས་ན་འབྲས་བུ་ཉེ་ཕན་གྱིས་མྱོས་པའི་ལྷ་མོ་ཡུལ་ལ་རྣམ་པར་ཆགས་པ་རྣམས་དང་ལྷན་ཅིག་རྒུན་ཆང་འཐུང་བར་བྱེད་དོ། །ཁ་ཅིག་ནི་རིའི་ཟོམ་བཻ་ཌཱུརྱའི་རྡོས་གཅལ་བཀྲམ་པས་རྣམ་པར་ཕྱེ་བའི་ས་ཕྱོགས་རྣམས་ན་དགའ་བར་བྱེད་དོ། །ཁ་ཅིག་ནི་རིའི་ཟོམ་མུ་མེན་གྱིས་གཏམས་པའི་ཆུ་གཙང་མ་དྲི་མ་མེད་པ་འབབ་པའི་ཆུ་བོ་རྣམས་ཀྱི་ནང་ན་སྡུག་པ་དག་དང་ལྷན་ཅིག་དགའ་བར་བྱེད་དོ། །ཁ་ཅིག་ནི་འབབ་སྟེགས་དང་ས་གཞི་མུ་ཏིག་གི་བྱེ་མ་བདལ་བ་དག་ན་ཆུ་བསིལ་ལ་དང་ཞིང་གཙང་སྟེ་དྲི་མ་མེད་པ་རྣམས་ཀྱི་ནང་ན་དགའ་བར་བྱེད་དོ། །ཁ་ཅིག་ནི་རིན་པོ་ཆེ་སྣ་བདུན་གྱིས་བརྒྱན་པའི་ཡང་ཐོག་ནམ་མཁའ་ལ་ཐུག་པ་རྣམས་ཀྱི་ནང་ན་དགའ་བར་བྱེད་དོ། །ཁ་ཅིག་ནི་ལྷ་མོའི་ཚོགས་ཀྱིས་ཡོངས་སུ་བསྐོར་ནས། སིལ་སྙན་ཡན་ལག་ལྔ་དང་ལྡན་པས་དགའ་བར་བྱེད་དོ། །ཁ་ཅིག་ནི་དཔག་བསམ་གྱི་ཤིང་ལྗོན་པ་ལ་དྲིལ་བུ་གཡེར་ཀའི་སྒྲ་དྲག་ཏུ་འཁྲོལ་བས་མཛེས་པ་རྣམས་ཀྱི་ནང་ན་དགའ་བར་བྱེད་དོ། །ཁ་ཅིག་ནི་དུས་ཚིགས་དྲུག་གི་ཚལ་ཤིང་ལྗོན་པ་དག་དང་ཉེ་བ། རྟག་ཏུ་དགའ་ཡ་ཡར་གྱུར་པ་རྣམས་ཀྱི་ནང་ན་སྙིང་དུ་སྡུག་ཅིང་འདོད་པ་རྣམས་དང་ལྷན་ཅིག་དགའ་བར་བྱེད་དོ། །ཁ་ཅིག་ནི་ས་ཕྱོགས་གསེར་བཙོ་མས་བརྒྱན་པ་དང་། རི་བོའི་ཟོམ་གྱི་སྟེང་དུ་འཛེགས་ནས་ས་ཕྱོགས་ཀྱི་ཆུ་བོ་རྣམས་ལ་ཡང་ལྟ་བར་བྱེད་དེ། དེ་ལྟར་རང་གི་ལས་ཀྱིས་སྤྲུལ་སྤྲུལ་པའི་
ལྷའི་བདེ་བ་དཔེ་མེད་པ་རྣམ་པ་སྣ་ཚོགས་མྱོང་ངོ་། །དེ་ལྟར་སྲེད་པ་ལ་རྣམ་པར་ཆགས་པའི་ལྷ་རྣམས་ཀྱི་མིག་གཟུགས་དང་ཁ་དོག་འདོད་པ་སྡུག་པ་ཡིད་དུ་འོང་བ་རྣམ་པ་དུ་མ་དག་གིས་ཆོག་མི་ཤེས་སོ། །རྣ་བ་ཡང་ཡུལ་བདེ་བ་སྒྲ་སྙན་པ་གསལ་བ་ཡིད་དུ་འོང་བ་རྣམ་པ་དུ་མ་དག་གིས་ཆོག་མི་ཤེས་སོ། །སྣ་ཡང་ཡུལ་བདེ་བ་དྲི་ཞིམ་པ་བསུང་ཆེ་བ་ཡིད་དུ་འོང་བ་རྣམ་པ་དུ་མ་དག་གིས་ཆོག་མི་ཤེས་སོ། །ལྕེ་ཡང་ཡུལ་བདེ་བ་རོ་ཞིམ་པ་བྲོ་ཆེ་བ་ཡིད་དུ་འོང་བ་རྣམ་པ་དུ་མ་དག་གིས་ཆོག་མི་ཤེས་སོ། །ལུས་ཀྱང་ཡུལ་བདེ་བ་རེག་བྱ་འདོད་པ་འཇམ་པ་ཡིད་དུ་འོང་བ་རྣམ་པ་དུ་མ་དག་གིས་ཆོག་མི་ཤེས་སོ། །ཡིད་ཀྱང་ཡུལ་རྙོག་པ་མེད་པ་འདོད་པ་སྡུག་པ་ཡིད་དུ་འོང་བ་རྣམ་པ་དུ་མ་དག་གིས་ཆོག་མི་ཤེས་ཏེ། དེ་ལྟར་དབང་པོ་དྲུག་ཡུལ་ལ་ཆགས་པའི་ལྷ་རྣམས་ཆོག་མི་ཤེས་པ་ཡིན་ནོ། །ཇི་ལྟར་ཡུལ་རྣམས་ཀྱིས་སྲེད་པ་སྤེལ་བ་དེ་ལྟར་འཕེལ་བར་འགྱུར་ཏེ། མེ་འབར་བ་བཞིན་ལ་དེ་ཡང་ཡུལ་གྱི་བདེ་བ་ཇི་ལྟར་དམིགས་པ་དེ་ལྟར་རྣམ་པ་དུ་མར་འཕེལ་བར་འགྱུར་རོ། །སྲེད་པ་དེས་བསྒྲིབས་པའི་ལྷ་ཆོག་མི་ཤེས་པར་གྱུར་པ་རྣམས་ཤིན་ཏུ་བདེ་བའི་མཐའ་དམིགས་སུ་མེད་དེ། དེ་ལྟར་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ལེགས་པར་བྱས་པའི་ལས་དེ་ཟད་པར་མ་གྱུར་པ་དེ་སྲིད་དུ། ལྷའི་བདེ་བ་དཔེ་མེད་པ་རྣམ་པ་དུ་མ་མྱོང་ངོ་། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་རང་གིས་བྱས་པའི་ལས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་ཚོགས་གཅིག་ཏུ་སྤྱོད་པ་རྒྱ་མཚོའི་ཚོང་པའམ། ཚོང་རྡལ་དུ་གནས་པའམ། རི་བོའི་བར་ན་གནས་པར་འགྱུར་ལ་གཉེན་ཆེ་བ་དང་འབྲེལ་པ་དང་རང་དགར་གནས་པ་དང་། རྒྱལ་པོ་ལ་རག་ལས་པར་མི་འགྱུར་བ་དང་། ཤིན་ཏུ་འབྱོར་པ་དང་། རང་དབང་དུ་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་
པའི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་དེ་རྣམས་ཀྱི་གནས་སྐྱིལ་མོ་ཀྲུང་གི་སྟེང་དུ་སྐྱེས་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྙིང་རྗེ་དམ་པ་དང་ལྡན་པ་གང་གིས་སེམས་ཅན་ཆུས་ཁྱེར་བའམ། ལོ་ཉེས་བྱུང་ནས་ལྟོགས་ཏེ་སྲོག་ཆད་ལ་ཐུག་པ་ལ་བྱམས་པས་བརླན་པའི་ཡིད་ཀྱིས་བུ་བཞིན་སྐྱོང་བར་བྱེད་ཅིང་དགོས་པ་མེད་ཀྱང་སེམས་པས་བསྒོམས་པའི་སྙིང་ཁོ་ནས་ཡང་དག་པར་བསྐྱབས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སྐྱིལ་མོ་ཀྲུང་དུ་གནས་པའི་ལྷ་རྣམས་ཀྱི་ནང་དུ་རྫུས་ཏེ་སྐྱེ་བར་འགྱུར་རོ། །དེ་ན་ལྷ་དང་ལྷ་མོ་གནས་ལ། ལྷ་གཞན་ཡང་ཕྱོགས་གཞན་ན་ལྷན་ཅིག་ཉེ་བར་གནས་ཏེ། ལྷའི་བུ་དེ་ལྷའི་སྐྱིལ་མོ་ཀྲུང་བཅས་པའི་སྟེང་དུ་སྐྱེས་སོ། །དེ་ལ་ལྷ་དེ་བུའི་བློ་སྐྱེ་ལ་ལྷ་མོ་དེ་ཡང་དེ་བཞིན་དུ་བུའི་བློ་སྐྱེའོ། །དེ་ནས་ལྷའི་བུ་དེ་ཡང་དེ་གཉིས་ལ་ཕ་མའི་བློ་སྐྱེའོ། །དེ་དག་དང་ལྷའི་བུ་དེ་ཉིད་དང་རྩེ་བར་བྱེད་དེ། ཇི་ལྟར་འཛམ་བུའི་གླིང་ན་མི་ཤིན་ཏུ་དགའ་བ་རྩེ་བ་དེ་ལྟར་དེ་དག་ཀྱང་ལྷའི་འཇིག་རྟེན་ན་ལྷ་དང་སྐྱིལ་མོ་ཀྲུང་གི་སྟེང་ན་གནས་པ་དེ་དང་རྩེ་བར་བྱེད་དོ། །འདི་ལྟར་བུ་ཁྱོད་བདག་ཅག་གི་བུར་གྱུར་པ་ནི་འབྲས་བུ་དང་བཅས་པ་ཡིན་ཏེ། ཁྱོད་བདག་ཅག་གིས་ལྷའི་ཚལ་དང་ཉེ་བའི་ཚལ་དང་། ལྟེང་ཀ་ཐམས་ཅད་དུ་བདེ་བ་བསྐྱེད་པར་བྱའོ། །རིའི་ཟོམ་དང་གསེར་གྱི་ལྕུག་མའི་དྲ་བས་བྲེས་པ་དང་། མཚེའུ་དང་འབབ་ཆུ་ཕུན་སུམ་ཚོགས་པ་དང་། ལྕུག་མའི་ཁྱིམ་ཕུན་སུམ་ཚོགས་པ་དང་། པད་མའི་རྫིང་རྣམས་ན་གསེར་གྱི་པད་མས་ཁེབས་ཤིང་བུང་བས་མཛེས་པ་དང་། ཆུ་དང་བ་ལྡན་པ་དང་། ཆང་ཆུ་བོ་ལྟར་འབབ་པ་དང་། རྒུན་ཆང་རོ་ཞིམ་པོ་སྣ་ཚོགས་ཀྱི་རྒྱགས་པ་སྐྱེད་པར་བྱེད་པའི་མཐོ་རིས་ཐམས་ཅད་དུ་ཁྱོད་དང་ལྷན་ཅིག་དགའ་བར་བྱ་སྟེ། དེར་ཁྱོད་དང་བདག་ཅག་ལྷན་ཅིག་དགའ་བར་བྱའོ། །དེ་ནས་ལྷའི་བུ་དེས་ཕ་མ་དེ་གཉིས་ལ་འདི་སྐད་ཅེས་སྨྲས་སོ། །བདག་ལ་ཡབ་ཡུམ་གྱིས་རྣམ་པ་འདི་ལྟ་བུ་སྩལ་བ་གང་ལགས་པ་དེ་
ནི་བདག་བདེ་འགྲོར་སྐྱེས་པ་འབྲས་བུ་མཆིས་སོ། །བདག་ཀྱང་ཡབ་ཡུམ་ལ་གུས་པར་བགྱིད་པ་དང་གུས་པར་མཉན་པར་བགྱིའོ། །དེ་ནས་ལྷ་དེ་ཡིད་རབ་ཏུ་དགའ་ནས་ལྷའི་བུ་དེ་བླངས་ཏེ། ལྷ་མོ་དང་ལྷན་ཅིག་འཛམ་བུ་ན་ད་ཆར་འབེབས་ཞེས་བྱ་བའི་ཚལ་དེར་འདོང་བར་བྱེད་དོ། །ལྷ་དེ་ཡང་ལྷ་མོས་བསྐོར་ཅིང་། ལྷའི་བུ་དེ་ཡང་དེ་དག་ཐམས་ཅད་དང་འཛམ་བུ་ན་ད་ཆར་འབེབས་ཀྱི་ཚལ་དེར་དོང་བ་དང་། ཚལ་དེ་འཛམ་བུ་ན་དའི་ཤིང་ལྗོན་པ་ཐམས་ཅད་དང་། མེ་ཏོག་གི་ཚོགས་འཕྱང་བ་དང་། ཁ་ཅིག་འབྲས་བུའི་ཚོགས་འཕྱང་བ་རྣམས་ཀྱིས་ཁེབས་པ་ཡིན་ནོ། །མེ་ཏོག་གི་ཤིང་ལྗོན་པ་གང་ཡིན་པ་དེ་དག་ནི་ཤིན་ཏུ་དྲི་ཞིམ་པ་དཔག་ཚད་ལྔར་འབྱུང་བའི་མེ་ཏོག་ཁ་དོག་དང་དབྱིབས་སྣ་ཚོགས་དག་འཐོར་བར་བྱེད་དེ། འདི་ལྟ་སྟེ་སྔོན་པོ་དང་། སེར་པོ་དང་། ལྗང་གུ་དང་། དམར་པོ་དང་། བཙོད་ཀ་དག་གོ །དབྱིབས་སྣ་ཚོགས་པ་དག་ནི་འཇོག་པོ་ལྟར་ཟླུམ་པ་དང་། རིང་པོ་དང་། གྲུ་བཞི་དང་། ལྷའི་དགའ་བ་དང་འཐུན་པའི་རྣ་བའི་གོང་རྒྱན་དང་། གདུབ་ཀོར་འགྲན་པ་ལྟ་བུར་གྱུར་པ་མཐོང་ངོ་། །དེ་ནས་ལྷ་དེས་ལྷའི་བུ་དེ་ལ་འདི་སྐད་སྨྲས་སོ། །བུ་འདི་ནི་འཛམ་བུ་ཆུ་བོ་ཆར་འབེབས་ཞེས་བྱ་བའི་ཚལ་ཡིན་ལ། ཚལ་འདི་ནི་དགའ་དགའ་ལྟར་མེ་ཏོག་རྒྱས་པ་ཡིན་ཏེ། ཤིང་ལྗོན་པ་ཕན་ཚུན་རླུང་གི་ཤུགས་ཀྱིས་བསྐྱོད་པ་དང་། ལྷའི་ཚོགས་ཐམས་ཅད་ལ་འཐོར་བར་བྱེད་དོ། །བུ་དེར་ཁྱོད་དང་བདག་ཅག་ལྷན་ཅིག་དགའ་བར་བྱོས་ཤིག །རྩེས་ཤིག །དགའ་དགུར་སྤྱད་པར་གྱིས་ཤིག །བུ་ཁྱོད་ཀྱང་ལྷ་མོའི་ཚོགས་སྙིང་དུ་སྡུག་ཅིང་མཛེས་པ་དང་ལྡན་པ་རྟག་ཏུ་ཡིད་དུ་འཐད་པ་རྣམས་དང་དགའ་དགུར་སྤྱོད་པར་འགྱུར་རོ། །དེ་སྐད་སྨྲས་ནས་ཚལ་དེར་ཡང་ཐམས་ཅད་རྩེ་བའི་དོན་དུ་འཇུག་པར་བྱེད་དེ། ཚལ་དེ་ན་ལྷའི་བྱ་འབོད་པ་ཞེས་བྱ་བས་ལྷའི་བུ་གང་ཡིན་པ་དེ་དག་ལ་འདི་ལྟར་ཚིགས་སུ་བཅད་དེ་སྨྲས་པ། བཟང་པོ་ཁྱོད་ནི་ལེགས་པར་བྱོན། །ཁྱོད་ཀྱིས་ལེགས་བྱས་བྱས་དང་ལྡན། །ཚུལ་ཁྲིམས་རྣམ་པ་བདུན་བསྲུངས་པ། །དེ་ཡི་འབྲས་བུ་འདིར་འོངས་སོ། །ཚུལ་ཁྲིམས་འབྲས་བུ་བདེ་བ་ནི། །ལྷ་ཡི་
འཇིག་རྟེན་རྣམས་སུ་སྨིན། །སྒྲོལ་བར་བྱེད་པའི་ཚུལ་ཁྲིམས་ཀྱིས། །འཁོར་བ་འདི་ལས་སྒྲོལ་བར་བྱེད། །ཚུལ་ཁྲིམས་ཆུ་ནི་རྣམ་དག་པས། །སེམས་བརྟན་གང་ཞིག་འཁྲུ་བྱེད་པ། །འཛམ་བུ་གསེར་གྱི་མེ་ཏོག་གིས། །ལྷ་ཡི་ཡུལ་དུ་དེ་འཁྲུའོ། །ཚུལ་ཁྲིམས་ས་བོན་བསྐྱེད་ནས་སུ། །ཚུལ་ཁྲིམས་སྣ་ཚོགས་རྣམས་ལ་ནི། །འདི་ལྟར་ལྷ་ཡི་ཡུལ་རྣམས་ཀྱིས། །ཁྱོད་ནི་རྩེ་ཞིང་སྤྱོད་པར་བྱེད། །མི་གང་རྟག་ཏུ་ཡིད་དུལ་ཞིང་། །ཚུལ་ཁྲིམས་ཀྱིས་ནི་བརྒྱན་པ་རྣམས། །གང་ན་བདེ་བ་མཐའ་ཡས་པ། །ལྷ་ཡི་གནས་སུ་དེ་འགྲོའོ། །ལེགས་པར་བྱ་བ་བྱས་པའི་མི། །བདེ་ལས་བདེ་བ་མཆོག་ཏུ་འགྲོ། །ཚུལ་ཁྲིམས་ཀྱིས་ནི་ཡོངས་སྤེལ་རྣམས། །ལྷ་ཡི་གནས་ན་རྩེ་བར་བྱེད། །ཚུལ་ཁྲིམས་སྐས་ལ་འཛེགས་པ་ཡི། །མི་རྣམས་བདེ་འགྲོར་རབ་ཏུ་འགྲོ། །ཤེས་པས་ཡོངས་སུ་སྤེལ་བ་རྣམས། །ཡེ་ཤེས་ཀྱིས་ནི་མཁའ་ལ་གཞོལ། །དེ་བས་ཚུལ་ཁྲིམས་རྟག་སྲུང་ཞིང་། །སྦྱིན་ཤེས་དཀའ་ཐུབ་ནོར་རྣམས་ཀྱིས། །དུག་དང་མཚོན་དང་མེ་ལྟ་བུའི། །ཚུལ་ཁྲིམས་འཆལ་པ་རྟག་ཏུ་སྤོངས། །དེ་ལྟར་ཚུལ་ཁྲིམས་ལེགས་བསྲུངས་པ། །མི་ནི་བཟང་འགྲོར་ཁྲིད་པར་བྱེད། །བདེ་གནས་ཐོབ་པར་བྱ་བ་ལ། །ཚུལ་ཁྲིམས་ལྟ་བུ་གང་ཡང་མེད། །དེ་ལྟར་བྱ་འབོད་པ་པོ་དེ་རྣམས་ཀྱིས་ལྷའི་བུ་དེའི་སེམས་ལ་གཟུང་དུ་རུང་བའི་ཚིགས་སུ་བཅད་པ་རྣམས་ཀྱིས་མངོན་པར་དགའ་བར་བྱས་ཤིང་རྗེས་སུ་དགའ་བར་བྱས་པ་དང་། ལྷའི་བུ་དེས་བྱའི་སྒྲ་དབྱངས་དེ་དག་ཡིད་ལ་བཟུང་ནས་རྗེས་སུ་དགའ་བར་བྱེད་དོ། །དེ་རྗེས་སུ་དགའ་བར་བྱས་ནས། དེ་ནས་ཡང་ཕ་དེ་དང་ལྷན་ཅིག་ཚལ་དེར་འཇུག་པར་བྱེད་དོ། །དེ་ནས་དཔག་བསམ་གྱི་ཤིང་ལྗོན་པ་རྣམས་ཀྱིས་མཛེས་པར་བྱས་པའི་ཚལ་དེ་ཉི་མ་ལྟར་གསལ་ཞིང་རྣམ་པར་མཛེས་པ་འབུམ་ཕྲག་དུ་མའི་ཚོགས་དང་ལྡན་པ་དེ་ན་འབབ་ཆུ་དང་ལྟེང་ཀས་བརྒྱན་པ། བཻ་ཌཱུརྱ་དང་དངུལ་གྱི་ཤིང་ལྗོན་པ་རྣམས་ཀྱིས་ཀྱང་ཉེ་བར་མཛེས་པར་བྱས་པ་ཉམས་དགའ་བ་རྣམ་པ་དུ་མ་དེ་དག་མཐོང་ནས་ལྷའི་བུ་སྐྱེས་ནས་ཡུན་རིང་དུ་མ་ལོན་པ་དེ་ཤིན་ཏུ་དགའ་
བ་དཔེ་མེད་པ་ཐོབ་བོ། །དེ་ནས་དེའི་བར་སྐབས་སུ་ཚལ་དེ་ན་རྣམ་པར་རྒྱུ་བ་ན་ལྷ་མོ་ཁྱིམ་ཐབ་ཤི་སྟེ་ཡུན་རིང་དུ་མ་ལོན་པ་གཞན་དག་གིས་མཐོང་ངོ་། །དེ་ནས་ལྷ་མོའི་ཚོགས་དེ་དག་གིས་ལྷའི་བུ་གསར་དུ་བྱུང་བ་འདི་ལ་ཆུང་མ་མེད་པར་ཡང་རིག །དེ་བྱད་གཟུགས་དང་ལྡན་པར་མཐོང་ནས། དགོད་པར་བྱེད། རྩེ་བར་བྱེད། སྒེག་པར་བྱེད། བྲོ་གར་བྱེད་ཅིང་རོལ་མོའི་སྒྲ་དང་། སིལ་སྙན་དང་བཅས་པ་ཐམས་ཅད་ལྷའི་བུ་དེའི་དྲུང་དུ་རྒྱུག་པར་བྱེད་དོ། །ལྷའི་བུ་ཡང་ཕ་མ་དག་བོར་འདོད་པས་བསྒྲིབས་པའི་ཡིད་ཀྱིས་ལྷ་མོ་དེ་དག་ག་ལ་འཁོད་པ་དེར་རྒྱུག་པར་བྱེད་དོ། །དེ་ནས་དེ་དག་ཕན་ཚུན་མཐོང་ནས། ལྷ་དེ་དག་ལྷ་མོ་དེ་དག་དགའ་བ་སྐྱེས་ཤིང་བདེ་བ་དཔེ་མེད་པ་ཉེ་བར་སྐྱེས་སོ། །ཕན་ཚུན་དགའ་བ་སྐྱེས་པ་དེ་རྣམས་ཀྱང་སིལ་སྙན་ཡན་ལག་ལྔ་དང་ལྡན་པས་ཇི་ལྟར་བདེ་བ་སྣ་ཚོགས་ལ་གནས་པའི་ལྷ་གཞན་དག་དགའ་བར་བྱེད་པ་དེ་ལྟར་དགའ་བར་བྱེད་དེ། རི་དང་། ནགས་ཚལ་དང་། ལྟེང་ཀ་དང་། གསེར་དང་། དངུལ་དང་། སྤུག་དང་། གསེར་བཙོ་མའི་རིའི་ཟོམ་དང་། མུ་ཏིག་གི་བྱེ་མ་བདལ་བ་དང་། དངུལ་གྱི་རྡོ་དང་། ལྷའི་པད་མས་རྫིང་ཁེབས་པ་དང་། བྱ་སྣ་ཚོགས་སྒྲ་སྙན་པ་འབྱིན་པ་དང་། ཆུ་བོ་དང་། འབབ་ཆུ་དང་། ལྟེང་ཀས་བརྒྱན་པ་རྣམས་སུ་ལྷ་མོ་དེ་རྣམས་དང་ལྷན་ཅིག་དགའ་བར་བྱེད་དོ། །ལྷའི་བདེ་བ་དང་ལྡན་པ་དེ་རི་ནས་རི་དང་སྐྱེད་མོས་ཚལ་ནས་སྐྱེད་མོས་ཚལ་དུ་འགྲོ་བར་བྱེད་དོ། །དེ་ལྟར་ངོ་མཚར་གྱི་སེམས་བསྒྲིབས་པ་དེ་ལྷའི་འཇིག་རྟེན་རྨད་དུ་བྱུང་བ་མཐོང་ནས། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དེ་དག་དང་ལྷན་ཅིག་དགའ་བར་བྱེད་དོ། །དེ་ནས་དེའི་ཚེ་ཟད་པ་དང་། ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྒྱལ་པོའམ་བློན་པོ་ཆེན་པོར་འགྱུར་ལ། སྐྱེ་བོ་ཐམས་ཅད་དགའ་བ་
དང་། བྱད་གཟུགས་བཟང་པོ་དང་ལྡན་པ་དང་། ཡོན་ཏན་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་པའི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། ལྷ་པི་བང་ཅན་གསུམ་པའི་གནས་སྤྱོད་པ་དང་ལྡན་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་ང་ཅ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་བྱས་པའི་ལས་ཇི་ལྟར་ཡོད་པ་བཞིན་སྤྱོད་པ། སེམས་ཅན་དག་འཛིངས་ཏེ་འཐབ་པའམ་ཚལ་ཁུང་སྟུག་པོའི་ནང་དུ་སོང་ནས། སྲོག་ལ་ཐེ་ཚོམ་ཟ་བ་འཆི་བ་ལ་ཐུག་པ་དག་ཐར་པར་བྱས་ཤིང་། སེམས་ཅན་ལ་ཕན་པའི་སེམས་དང་ལྡན་པ་དང་། ཤིན་ཏུ་བསྡམས་པ་དང་། ལུས་དང་། ངག་དང་། ཡིད་ཀྱི་ཚུལ་ཁྲིམས་སྤྱོད་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སྤྱོད་པ་དང་ལྡན་པར་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཟླ་བའི་འོད་དང་མཚུངས་པ་དེ་ཀུན་ནས་གཟི་བརྗིད་ནི་འབར། དབང་པོ་དུལ་བའི་བདེ་བ་དང་ནི་ལྡན། འདོད་པའི་ཡོན་ཏན་ལྔ་རྣམས་ཀྱིས་ཉིན་གཅིག་བཞིན་དུ་ནི་རྩེ། ལྷ་མོའི་ཚོགས་དུ་མ་དང་ནི་ཉེ་བར་སྤྱོད། ལྷའི་ཕྲེང་བ་དང་གོས་ནི་གྱོན། ཡང་དང་ཡང་དུ་འཇོ་སྒེག་ནི་བྱེད། ཚལ་དང་ཉེ་བའི་ཚལ་དང་འབབ་ཆུའི་དངོ་མང་པོ་རྣམས་སུ་ནི་རྩེ་སྟེ། དེ་ལྟར་དེ་རྩེ་བ་ན་ཤེལ་གྱི་ཚལ་ཞེས་བྱ་བ་དེར་འགྲོ་བར་བྱེད་དོ། །ཚལ་དེ་ན་ཤེལ་གྱི་ཤིང་ལྗོན་པ་ཐམས་ཅད་ཀྱིས་ཀུན་ནས་གསལ་བ་ཡིན་ལ་ཤིང་ལྗོན་པ་མེ་ཏོག་དང་འབྲས་བུས་ཁེབས་པ་དེ་དག་གི་མེ་ཏོག་དང་ལོ་མ་ཕུན་སུམ་ཚོགས་པ་རྣམས་ཀྱང་ཇི་ལྟར་ལྷང་ཚེར་ལྟར་གསལ་བའམ་མེ་ལོང་ལྟར་གསལ་བ་ཡིན་ནོ། །འབྲས་བུ་རྣམས་ཀྱང་གྲུ་བཞི་དང་ཟླུམ་པོར་སྐྱེས་ཏེ། མེ་ལོང་བཞིན་དུ་གསལ་བ་ཡིན་ནོ། །དེ་ནས་ལྷ་དེ་གང་གི་ཚེ་ཚལ་དེའི་ནང་དུ་ཞུགས་པ་དང་། དེའི་ཚེ་རང་གི་ལུས་ཀྱི་གཟུགས་བརྙན་འབུམ་སྙེད་འབྱུང་བ་མཐོང་ངོ་། །དེས་གཟུགས་བརྙན་ཤིན་ཏུ་རྒྱ་ཆེ་བ་མེ་ཏོག་ཕྲེང་བ་དང་། བྱུག་
པས་རྣམ་པར་བརྒྱན་པ་ཕུན་སུམ་ཚོགས་པ་དེ་དག་མཐོང་ནས་དེ་བརྒྱ་འགྱུར་དུ་དྲེགས་པ་སྐྱེ་སྟེ། ཀྱེ་ཨེ་མ་བདག་གི་གཟུགས་བརྙན་གྱི་རྣམ་པ་ཇི་སྙེད་འབྱུང་བ་འདི་དག་ལྷ་གཞན་རྣམས་ལ་རྣམ་པ་དེ་ལྟ་བུ་མི་འབྱུང་ངོ་སྙམ་མོ། །འཇིག་རྟེན་སྐྱོང་བ་མིག་མི་བཟང་དེ་ཚལ་དེའི་ནང་དུ་ཞུགས་ནས། འཇིག་རྟེན་གྱི་བྱ་བ་དག་ལ་རྟོག་པར་བྱེད་དོ། །ཚལ་དེའི་མཐུ་ནི་འདི་ལྟ་བུ་ཡིན་ཏེ། གལ་ཏེ་ས་དང་བར་སྣང་ལ་རྒྱུ་བའི་གནོད་སྦྱིན་དག་གིས་འཛམ་བུའི་གླིང་གི་སེམས་ཅན་རྣམས་ཀྱི་དབང་གི་འབྲས་བུས་ཆོས་དང་ཆོས་མ་ཡིན་པ་བྱས་པ་དེ་དག་རིངས་པར་མ་སྦྲན་ན་ཇི་ལྟར་མི་ཆོས་དང་ལྡན་པའམ། མི་ཆོས་དང་མི་ལྡན་པ་བྱུང་བ་དེ་ལྟར་ཤེལ་གྱི་ཤིང་ལྗོན་པ་རྣམས་ཀྱི་ཚལ་དེའི་ནང་དུ་མཐོང་ལ། ཕྱིས་གནོད་སྦྱིན་དག་རྒྱལ་པོ་ཆེན་པོ་ལ་མིའི་བྱ་བའི་རྣམ་པ་སྦྲོན་པར་བྱེད་དོ། །དེ་ནས་མིག་མི་བཟང་དེ་མིར་གཏོགས་པའི་མི་ཆོས་དང་ཆོས་མ་ཡིན་པ་བྱས་པ་ཐམས་ཅད་མཐོང་ནས་ཚལ་དེ་ལ་མགུའོ། །གལ་ཏེ་མི་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་དག་བྱུང་ན། དགེ་བ་དང་མི་དགེ་བ་དག་དེ་བཞིན་དུ་བརྒྱ་བྱིན་ལ་སྦྲོན་པར་བྱེད་དོ། །དེ་ལྟར་ཚལ་དེའི་མཐུ་མཐོང་ནས། དེ་ནས་ལྷ་དེ་ཚལ་དེ་ན་གཟུགས་དང་། སྒྲ་དང་། དྲི་དང་། རོ་དང་། རེག་བྱ་འདོད་པ་སྣ་ཚོགས་ཀྱིས་མྱོས་ཏེ། ཅི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་འཁོར་བ་ན་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་ཡང་དག་པའི་ལྟ་བ་དང་ལྡན་ལ། ཆོས་ཀྱི་གནས་ལ་འབྱོར་ཅིང་འགྲུབ་པ་ཆེན་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ལྷ་པི་བང་ཅན་གསུམ་པའི་གནས་ལ་རྟོག་པར་བྱེད་དེ། དེས་དེ་དག་གི་གནས་གཞན་བཅུ་གཅིག་པ་ནི་མ་མཐོང་ངོ་། །རྒྱལ་ཆེན་བཞིའི་ལྷ་རྣམས་ཀྱི་གནས་རྣམ་པ་བཞི་པོ་ཀུན་ཏུ་རྒྱུ་ཞེས་བྱ་བ་ཁོ་ནར་ཟད་དེ། གང་དེ་དག་ནི་རིའི་
རྒྱལ་པོ་རི་རབ་ཀྱི་ངོས་ལ་འཁོར་རོ། །གཞལ་མེད་ཁང་དང་ལྡན་པའི་ལྷ་གང་ཡིན་པ་དེ་དག་ལ་མུ་སྟེགས་པ་གཞན་དག་གཟའ་དང་། སྐར་མ་དང་། རྒྱུ་སྐར་དག་ཡིན་པར་འདུ་ཤེས་ཏེ། དེ་རྣམས་ཀྱི་རགས་པ་བགྲངས་ན་བྱེ་བ་ཕྲག་སུམ་ཅུ་རྩ་དྲུག་ཡོད་དོ། །དེ་ནས་ལས་གང་གིས་དེར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། དེར་ཡང་ལུས་དང་ངག་གི་ཚུལ་ཁྲིམས་བདུན་པོ་རྣམ་པ་སྣ་ཚོགས་ཀྱིས་དེར་སྐྱེའོ། །ཅ་དེ་ལ་ལུས་ཀྱི་རྣམ་པ་གསུམ་དང་། ངག་གི་རྣམ་པ་བཞི་སྟེ། མདོར་བསྡུ་ན། སེམས་ཅན་རྣམས་ལས་ཀྱི་དབང་གི་འབྲས་བུ་རྣམ་པ་དུ་མས་དེར་སྐྱེ་བར་འགྱུར་རོ། །དེའི་ཕྱིར་སེམས་ཅན་རྣམས་ཀྱི་ལས་དགེ་བ་དང་། མི་དགེ་བ་བྱས་པའི་རྐྱེན་གྱི་བྱེ་བྲག་གིས་ཤེས་པར་བྱེད་དོ། །ཉི་མ་དང་ཟླ་བ་དེ་ཡང་ལྷ་ཀུན་དུ་རྒྱུ་བ་དེ་རྣམས་རིའི་རྒྱལ་པོ་རི་རབ་ཀྱི་ངོས་ལ་འཁོར་བའི་སར་འཁོར་བར་བྱེད་དེ། རླུང་འཁོར་ལོས་བསྐོར་བ་ཞེས་བྱ་བ་གང་གིས་བྱས་པ་དེས། ལྷ་དེ་དག་ཐམས་ཅད་རིའི་རྒྱལ་པོ་རི་རབ་དེ་ལ་འཁོར་བར་བྱེད་དོ། །དེ་དག་གི་བར་ཡངས་པ་ན་འཇིག་རྟེན་སྐྱོང་བ་ཡུལ་འཁོར་སྐྱོང་དང་ཀུ་བེ་ར་གཉིས་གནས་ཏེ། ལྷ་དེ་རྣམས་རྒྱལ་པོ་ཆེན་པོ་དེ་དག་དང་ལྷན་ཅིག་གླིང་བཞི་རྣམས་སུ་ཀུན་དུ་རྒྱུའོ། །ནོར་བུ་སྔོན་པོ་དང་། སེར་པོ་དང་། ལྗང་གུ་སྣ་ཚོགས་ཀྱི་གཞལ་མེད་ཁང་རྣམས་ཀྱི་ནང་ན་སྔ་མ་བཞིན་དུ་སྦྱར་ཏེ། དེ་དག་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ། ཀུན་ཏུ་རྒྱུ་བ་དེ་དག་ན་འདོད་པའི་ཡོན་ཏན་ལྔ་ཇི་ལྟར་འདོད་པ་རྣམས་ཀྱིས་དགའ་བར་བྱེད་དོ། །དེའི་ལས་ཟད་ནས་དེ་ནས་ཡང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་ཡུལ་ནས་ཡུལ་དུ་འགྲོ་བའི་ངང་དུ་འགྱུར་ཏེ། འདི་ལྟར་ཚུལ་ཁྲིམས་ཀྱི་རྒྱུ་དེས་བདེ་ཡང་རུང་། མི་བདེ་ཡང་རུང་གློ་བུར་དུ་ཡུལ་གཞན་ཀུན་ཏུ་འགྲོ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། རྒྱལ་ཆེན་
བཞིའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། གནས་སྐབས་གཞན་གཅིག་ཀྱང་ཤེས་པར་མ་ནུས་ལ། གནས་སྐབས་གཞན་གཅིག་ཀྱང་མཐོང་བར་མ་གྱུར་ནས། དེ་འདི་སྙམ་དུ་སེམས་ཏེ། རྒྱལ་ཆེན་བཞིའི་ལྷ་རྣམས་ནི་མཐའ་ཡས་ཏེ། དེ་ལྟར་མཐའ་མེད་དོ་སྙམ་མོ། །རང་གི་ལས་ཀྱིས་རི་རབ་ལ་ཚལ་དང་། ཉེ་བའི་ཚལ་བཞི་དག་ཏུ་དགའ་བར་བྱེད་ཅིང་སྐོར་བར་བྱེད་དོ། །རི་རབ་ཀྱི་ངོས་གང་ལ་ཉི་མ་འཁོར་བའི་ངོས་དེ་དང་དེས་མིའི་གནས་གང་དུ་རི་རབ་ཀྱི་གྲིབ་མ་དེ་འབབ་སྟེ། དེ་ལྟར་དེ་འཛམ་བུའི་གླིང་དུ་མཚན་མོར་འགྱུར་རོ། །བྱང་ཕྱོགས་ན་རླུང་འཁོར་ལོའི་གཟུགས་ཞེས་བྱ་བ་ཡོངས་སུ་འཁོར་ཞིང་། དེས་བྱང་ཕྱོགས་ཀྱི་སྐར་མ་གང་ཡིན་པ་དེ་དག་ཐམས་ཅད་འཆར་དུ་མི་སྟེར་ལ། ནུབ་ཏུ་ཡང་མི་སྟེར་ཏེ། དེ་ལྟར་རླུང་གི་དབང་གིས་ཕྱོགས་སུ་འཁོར་ཞིང་འདུག་གོ །མུ་སྟེགས་པ་གཞན་དེ་ཉིད་མ་མཐོང་ཞིང་སྐར་མའི་དཔྱད་མངོན་པར་མི་ཤེས་ལ་ཕྱོགས་གཅིག་ཏུ་ལྟ་བའི་མུ་སྟེགས་པ་དེ་དག་གིས་མཐོང་ནས། འདི་ལྟར་དེ་ནི་ཆུ་སྲིན་བྱིས་པ་གསོད་ཡིན་ཏེ། ནུབ་ཏུ་མི་སྟེར་ལ། དྲང་སྲོང་བདུན་དག་གིས་འཇིག་རྟེན་འཛིན་ཏོ་སྙམ་མོ། །དེ་ལྟར་དེས་རྒྱལ་ཆེན་བཞིའི་ལྷ་རྣམས་མ་ལུས་པར་མཐོང་ཞིང་ས་དང་བཅས་པ་ལ་ཡང་དག་པ་ཇི་ལྟ་བ་བཞིན་མཐོང་ནས་འཁོར་བ་ལ་ཡིད་བྱུང་ངོ་། །དེ་ལྟར་དེ་དག་མཐོང་ནས་ལྷ་རྣམས་ཀྱི་ལྟུང་བའི་སྡུག་བསྔལ་མངོན་པར་བརྟགས་ནས་ཡིད་བྱུང་སྟེ། འཁོར་བ་ན་གནས་སུ་རུང་བ་རྟག་པའམ། བརྟན་པའམ། ཐེར་ཟུག་པའམ། མི་འགྱུར་བའི་ཆོས་ཅན་གང་ཡང་མེད་ལ། འདུ་བ་དང་འབྲལ་བའི་བགོ་སྐལ་ལ་སྤྱོད་པ། ལས་ཀྱི་བགོ་སྐལ་ལ་སྤྱོད་པ། ལས་ཀྱི་སྐྱེ་གནས་པ། ལས་ལ་རྟོན་པར་མི་བྱེད་པ་མེད་དེ། དེ་ལྟར་དགེ་སློང་དེས་ཐོས་པ་ལས་བྱུང་བའི་ཤེས་པས་བརྟགས་སོ། །དེ་ནས་ཡང་རྣལ་འབྱོར་སྤྱོད་པ་ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་སོ། །དེ་ལྟར་དགེ་སློང་དེ་བྱིས་པ་སོ་སོའི་སྐྱེ་བོ་ཀུན་གང་ལ་དགའ་བ་དེ་ལ་རག་ལས་པར་འགྱུར་ཏེ། སྲེད་པའི་རྒྱུ་བ་སྐྱེད་པ་དེ་དག་འདི་ལྟར་བདག་ཅག་མཐོ་རིས་སུ་སྐྱེ་བར་འགྱུར་ཞིང་དེར་
བདག་ཅག་བདེ་བར་གྱུར་ཅིག་སྙམ་ནས་ཚངས་པར་སྤྱད་པ་སྤྱོད་དོ། །དེ་ལྟར་སྤྱོད་པ་དེ་ལ་ཡང་དགེ་སློང་དེ་ལྷའི་བདེ་བ་རྣམ་པ་གཞན་དག་ལ་ཡང་དམིགས་ཤིང་ཐོས་པ་ལས་བྱུང་བའི་ཤེས་པས་མཐོང་ནས་དགའ་བར་མི་བྱེད། ཆགས་པར་མི་བྱེད། རོ་མྱོང་བར་མི་བྱེད་ལ། བདུད་དང་ལྷན་ཅིག་འགྱེད་པར་ནུས་ཤིང་འཁོར་བའི་རྒྱ་མཚོ་ལས་རྒལ་བའི་བསམ་པ་ཅན་ཡིན་ཏེ། དེ་ལྟར་དགེ་སློང་དེ་ས་གཞན་བཅུ་བདུན་པ་ལ་ཞུགས་སོ། །ས་བླའི་གནོད་སྦྱིན་དག་གིས་དེ་ཐོས་ནས་དགའ་སྟེ། བར་སྣང་ལ་སྤྱོད་པའི་གནོད་སྦྱིན་རྣམས་ལ་མངོན་པར་བསྙད་དོ། །དེ་དག་གིས་ཀྱང་རྒྱལ་ཆེན་བཞི་པ་རྣམས་ལ་བསྙད་ལ། སྔ་མ་བཞིན་ཚད་མེད་འོད་ཀྱི་ལྷ་རྣམས་ཀྱི་བར་ལ་གཅིག་ནས་གཅིག་ཏུ་བསྙད་དོ། །འདི་ལྟར་ལྷ་དག་འཛམ་བུའི་གླིང་ན་རིགས་ཀྱི་བུ་གྲོང་ཆེ་གེ་མོ་ཞིག་དང་། གྲོང་རྡལ་མང་གེ་མོ་ཞིག་དང་། རིགས་ག་གེ་མོ་ཞིག་དང་། ཡུལ་ཆེ་གེ་མོ་ཞིག་ནས་མི་མང་གེ་མོ་ཞེས་བྱ་བ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དགེ་སློང་དེ་བདུད་དང་ལྷན་ཅིག་འགྱེད་པར་འབད་ཅིང་བརྩོན་ལ་སྲིད་པ་ཉམ་ང་བ་ལས་རྒལ་བའི་བསམ་པ་ཡོད་དོ། །དེ་ལྟར་ཚད་མེད་འོད་ཀྱི་ལྷ་རྣམས་ཀྱིས་ཐོས་ནས་ཡིད་མཆོག་ཏུ་དགའ་ཞིང་དེ་དག་ལ་ལྷ་བདག་ཅག་ནི་དགའ་སྟེ། གང་མིའི་འཇིག་རྟེན་དུ་མི་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་དག་ངེས་པར་འབྱུང་ལ། ཡེ་ཤེས་རྩོམ་པ་གོམས་པར་བྱེད། ཡོངས་སུ་སྤྱོད་པར་བྱེད། བདུད་དང་ལྷན་ཅིག་འགྱེད་པར་བྱེད་དེ། བདུད་ཀྱི་ཕྱོགས་ནི་དམའོ། །དམ་པའི་ཆོས་ཀྱི་ཕྱོགས་ནི་མཐོའོ། །སངས་རྒྱས་རྣམས་ཀྱིས་བཤད་པའི་དམ་པའི་ཆོས་ནི་འཕེལ་ལོ་ཞེས་ལྷ་དེ་དག་ལ་བསྙད་དོ། །དེ་ནས་ཡང་དགེ་སློང་དེ་ཚུལ་ཁྲིམས་ལ་རབ་ཏུ་རྣམ་པར་དཔྱོད་པར་བྱེད་དེ། ཚུལ་ཁྲིམས་མེད་པའམ་ཤེས་པ་མེད་པ་ནི་མཐོ་རིས་ཀྱི་འཇིག་རྟེན་དུ་ལྷར་སྐྱེ་བ་མེད་དོ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་ཙམ་གྱིས་ནི་མཐོ་རིས་སུ་སྐྱེ་བར་འགྱུར་རོ། །སྦྱིན་པས་ནི་དེར་སྐྱེ་བར་མི་འགྱུར་ཞིང་ལོངས་སྤྱོད་ཤིན་ཏུ་ཆེ་བར་འགྱུར་ལ། ཤེས་པས་ནི་དེ་ནས་ཤི་ནས་ངན་སོང་དུ་འགྲོ་བར་མི་འགྱུར་རོ། །
དེ་ལ་ཚུལ་ཁྲིམས་གང་དང་རྣམ་པ་དུས་ལྷའི་འཇིག་རྟེན་གང་དུ་སྐྱེ་བར་འགྱུར་སྙམ་ནས། དེས་བརྟགས་ན་ཚུལ་ཁྲིམས་རྣམ་པ་བདུན་གྱིས་ལྷའི་རིས་དྲུག་རྣམས་ཀྱི་ནང་དུ་ཐ་མ་དང་འབྲིང་དང་མཆོག་ཏུ་སྐྱེ་བར་འགྱུར་ཏེ། སྲོག་གཅོད་པ་སྤངས་པའི་ཚུལ་ཁྲིམས་ཀྱིས་རྒྱལ་ཆེན་བཞི་པ་རྣམས་ཀྱི་ནང་དུ་སྐྱེ་བར་འགྱུར་རོ། །སྲོག་གཅོད་པ་དང་། མ་བྱིན་པར་ལེན་པ་སྤངས་པས་སུམ་ཅུ་རྩ་གསུམ་པ་རྣམས་ཀྱི་ནང་དུ་སྐྱེ་བར་འགྱུར་རོ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་སྤངས་པས་འཐབ་བྲལ་བ་རྣམས་ཀྱི་ནང་དུ་སྐྱེ་བར་འགྱུར་རོ། །སྡོམ་པ་བླངས་ཏེ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་སྤངས་ཤིང་བརྫུན་དང་ཕྲ་མ་དང་། ཚིག་རྩུབ་པོ་དང་། ངག་ཀྱལ་པ་སྤངས་པས་དགའ་ལྡན་པ་རྣམས་ཀྱི་ནང་དུ་སྐྱེ་བར་འགྱུར་རོ། །འཇིག་རྟེན་པའི་སྡོམ་པ་བླངས་ཏེ། སངས་རྒྱས་འབའ་ཞིག་ལ་དད་ལ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དང་། ཕྲ་མ་དང་། ཚིག་རྩུབ་པོ་སྤངས་པས་འཕྲུལ་དགའ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་བཞིན་དུ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དང་། ཕྲ་མ་དང་། ཚིག་རྩུབ་པོ་དང་། ངག་ཀྱལ་པ་སྤངས་པས་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལྟར་དགེ་སློང་དེ་ལས་དང་ཚུལ་ཁྲིམས་སུ་འབྲེལ་པ་རྣམས་ལྷའི་འཇིག་རྟེན་དུ་སྐྱེ་བ་ལ་རྗེས་སུ་སེམས་ཏེ། སྡོམ་པ་བླངས་པའི་གང་ཟག་གང་དུ་ཇི་ལྟར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ནས། སྲོག་གཅོད་པ་སྤངས་པའི་སྡོམ་པ་བླངས་པ་ནི་དེ་རྒྱལ་ཆེན་བཞི་པ་རྣམས་ཀྱི་ནང་དུ་སྐྱེ་བར་འགྱུར་ཏེ། སྲོག་གཅོད་པ་སྤངས་པ་སྔ་མ་བས། བོང་ཚོད་དང་། བརྩོན་འགྲུས་དང་། ཁ་དོག་དང་། དབང་ཕྱུག་དང་། ཚེ་དག་ཆེས་རིང་བར་འགྱུར་རོ། །སྲོག་གཅོད་པ་དང་། མ་བྱིན་པར་ལེན་པ་དག་སྤངས་པའི་སྡོམ་པ་བླངས་པ་ནི་སུམ་ཅུ་རྩ་གསུམ་པ་རྣམས་ཀྱི་ནང་དུ་སྐྱེ་བར་འགྱུར་ཏེ། སྤངས་པ་དེ་དག་པས་བོང་ཚོད་དང་། བརྩོན་འགྲུས་དང་། སྤྲོ་བ་དང་། གཟུགས་དང་། སྟོབས་
དང་། དབང་ཕྱུག་དང་། ཚེ་དག་མཆོག་ཏུ་རིང་བར་འགྱུར་རོ། །སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་སྤང་བ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་འཐབ་བྲལ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། སྤངས་པ་དེ་དག་པས་དེ་བོང་ཚོད་དང་། ཁ་དོག་དང་། དབང་ཕྱུག་དང་། ཚེ་དང་། གཟུགས་ལ་སོགས་པ་ཆེས་བཟང་བར་འགྱུར་རོ། །དགའ་ལྡན་པ་རྣམས་ཀྱི་ནང་དུ་སེམས་དང་ཤེས་པ་གཉིས་ཀྱི་ཁྱད་པར་གྱིས་བོང་ཚོད་དང་། ཁ་དོག་དང་། དབང་ཕྱུག་དང་། དད་པ་དང་། བདེ་བ་ཁྱད་པར་ཅན་དུ་འགྱུར་རོ། །སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དང་། ཕྲ་མ་སྤངས་པའི་སྡོམ་པ་ལ་གནས་པ་ནི་འཕྲུལ་དགའ་བ་རྣམས་ཀྱི་ནང་དུ་སྐྱེ་བར་འགྱུར་ཏེ། སྤངས་པ་དེ་དག་པས་དེ་བོང་ཚོད་དང་། དབང་ཕྱུག་དང་། བདེ་བ་དང་ཚེ་རིང་བ་དག་ཆེས་མཆོག་ཏུ་འགྱུར་རོ། །སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དང་། ཕྲ་མ་དང་། ཚིག་ཀྱལ་པ་སྤངས་པའི་སྡོམ་པ་ལ་གནས་པ་ནི་གཞན་འཕྲུལ་དབང་བྱེད་རྣམས་ཀྱི་ནང་དུ་སྐྱེ་བར་འགྱུར་ཏེ། སྤངས་པ་དེ་དག་པས་དེ་བོང་ཚོད་དང་། དབང་ཕྱུག་དང་། བདེ་བ་དང་། མཐུ་དང་། གཟུགས་དང་། ཚེ་དག་ཆེས་ལྷག་པར་འགྱུར་ཞིང་བདུད་སྡིག་ཅན་གྱི་ཚིག་ཉན་པར་མི་འགྱུར་ལ། དེ་དེས་ཐུབ་པར་མི་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ཚུལ་ཁྲིམས་མཐོ་རིས་སུ་སྐྱེ་བའི་ས་བོན་དུ་ཇི་ལྟར་འགྱུར་སྙམ་ནས་ཤིན་ཏུ་ཞིབ་མོར་དཔྱོད་དེ། དེས་བརྟགས་ན་སེམས་དང་སེམས་ལས་བྱུང་བ་ཆེན་པོས་ཚུལ་ཁྲིམས་ཆུང་ངུ་དང་འབྲིང་དང་ཆེན་པོར་འགྱུར། འདོད་པ་ན་སྤྱོད་པའི་ལྷ་དྲུག་རྣམས་ཀྱི་ནང་དུ་སེམས་ཀྱི་ཁྱད་པར་གྱིས་སེམས་ལས་བྱུང་བ་ཁྱད་པར་དུ་འགྱུར་ལ། སེམས་ལས་བྱུང་བའི་ཚུལ་ཁྲིམས་ཀྱི་ཁྱད་པར་གྱིས་སྐྱེ་བ་ཁྱད་པར་དུ་འགྱུར་བ་མཐོང་ངོ་། །དེ་ནས་ཡང་དགེ་སློང་དེ་ཚུལ་ཁྲིམས་ལ་དཔྱོད་པར་བྱེད་དེ་ཚུལ་ཁྲིམས་རྣམ་པ་དུ་ཡོད་སྙམ་ནས། དེས་བརྟགས་ན་ཚུལ་ཁྲིམས་རྣམ་པ་གཉིས་ཏེ། འཇིག་
རྟེན་པ་ལྷན་ཅིག་སྐྱེས་པ་དང་། འདུ་བ་བྱས་པའོ། །དེ་ལ་ལྷན་ཅིག་སྐྱེས་པ་ནི་བཅོས་མ་མ་བྱས་པའོ། །འདུ་བ་ནི་བཅོས་མ་བྱས་པའོ། །ཡང་ཚུལ་ཁྲིམས་རྣམ་པ་གཉིས་ཏེ། ཁྱིམ་ན་གནས་པའི་སྤྱོད་པ་དང་། ཁྱིམ་ན་མི་གནས་པའི་སྤྱོད་པའོ། །དེ་ལ་ཁྱིམ་ན་གནས་པའི་སྤྱོད་པ་ནི་བསླབ་པའི་གཞི་ལྔའོ། །ཁྱིམ་ན་མི་གནས་པའི་སྤྱོད་པ་ནི་བསླབ་པའི་གཞི་སོ་སོ་ཐར་པས་རབ་ཏུ་བྱུང་བ་རྣམས་ཀྱིའོ། །ཡང་ཚུལ་ཁྲིམས་རྣམ་པ་གཉིས་ཏེ། སྣ་གཅིག་སྤྱོད་པ་དང་། དུ་མ་སྤྱོད་པའོ། །དེ་ལ་སྣ་གཅིག་སྤྱོད་པ་ནི་བསླབ་པའི་གཞི་གཅིག་འཛིན་པའོ། །དུ་མ་སྤྱོད་པ་ནི་གཉིས་སམ། གསུམ་འཛིན་པའོ། །ཡང་རྣམ་པ་གཉིས་ཏེ། སྐྱེ་མཆེད་དང་། སྐྱེ་མཆེད་མ་ཡིན་པའོ། །དེ་ལ་སྐྱེ་མཆེད་ནི་ཚེ་རབས་ཐམས་ཅད་དུ་བསླབ་པའི་གཞི་འཛིན་པའོ། །སྐྱེ་མཆེད་མ་ཡིན་པ་ནི་འདི་ལྟར་སེམས་ཀྱི་ཁྱད་པར་གྱིས་སམ། སྤྲོ་བའི་ཁྱད་པར་གྱིས་བསླབ་པའི་གཞི་འཛིན་པའོ། །ཡང་རྣམ་པ་གཉིས་ཏེ། རྙོག་པ་དང་བཅས་པ་དང་། རྙོག་པ་མེད་པའོ། །དེ་ལ་རྙོག་པ་དང་བཅས་པ་ནི་མཐོ་རིས་སུ་སྐྱེ་བར་འདོད་པའི་སེམས་སོ། །རྙོག་པ་མེད་པ་ནི་མྱ་ངན་ལས་འདའ་བར་འགྲོ་བར་འདོད་པའོ། །ཡང་རྣམ་པ་གཉིས་ཏེ། འཇིག་རྟེན་པ་དང་། འཇིག་རྟེན་ལས་འདས་པའོ། །དེ་ལ་འཇིག་རྟེན་པ་ནི་ཟག་པ་དང་བཅས་པའོ། །འཇིག་རྟེན་ལས་འདས་པ་ནི་ཟག་པ་མེད་པའོ། །ཡང་རྣམ་པ་གཉིས་ཏེ། བདག་འཛིན་པ་དང་། གཞན་འཛིན་པའོ། །དེ་ལ་བདག་འཛིན་པ་ནི་བདག་ཉིད་ཀྱིས་ཚུལ་ཁྲིམས་འཛིན་པའོ། །གཞན་འཛིན་པ་ནི་གཞན་ཡང་རིགས་པའི་ཚུལ་ཁྲིམས་ལ་འཇོག་པར་བྱེད་པའོ། །ཡང་རྣམ་པ་གཉིས་ཏེ། འཇུག་པ་དང་། ལྡོག་པའོ། །དེ་ལ་འཇུག་པ་ནི་འཁོར་བར་འཇུག་པར་བྱེད་པའོ། །ལྡོག་པ་ནི་ཡེ་ཤེས་ཀྱི་རྒྱུ་སྟེ་མི་སློབ་པའི་ཡེ་ཤེས་ལ་དམིགས་པའོ། །ཡང་རྣམ་པ་གཉིས་ཏེ། ཡེ་ཤེས་དང་ལྡན་པ་དང་། སྦྱིན་པ་དང་ལྡན་པའོ། །དེ་ལ་སྦྱིན་པ་དང་ལྡན་པ་ནི་ལོངས་སྤྱོད་ཆེན་པོ་ཐོབ་པའོ། །ཡེ་ཤེས་དང་ལྡན་པ་ནི་མྱ་ངན་ལས་འདས་པ་ཐོབ་པའོ། །ཡང་རྣམ་པ་གཉིས་ཏེ། ཕྱི་རོལ་དུ་སྤྱོད་པ་འཇུག་པ་དང་། ནང་དུ་སྤྱོད་པ་འཇུག་པའོ། །དེ་ལ་ཕྱི་
རོལ་དུ་སྤྱོད་པ་འཇུག་པ་ནི་ལུས་ལ་རྟེན་པའོ། །ནང་དུ་སྤྱོད་པ་འཇུག་པ་ནི་སེམས་རབ་ཏུ་དད་པས་བྱས་པའི་སེམས་དང་ངག་གོ །ཡང་རྣམ་པ་གཉིས་ཏེ། གོམས་པ་དང་། མ་གོམས་པའོ། །དེ་ལ་གོམས་པ་ནི་ཚེ་རབས་དུ་མ་དག་ཏུ་གོམས་པའོ། །མ་གོམས་པ་ནི་ཚེ་གཅིག་ཏུ་གོམས་པ་སྟེ། དེ་ལྟར་དགེ་སློང་དེ་རྣམ་པ་དུ་མས་ཚུལ་ཁྲིམས་རྣམ་པ་གཉིས་གཉིས་ལ་དཔྱོད་པར་བྱེད་དོ། །དེ་ནས་ཡང་དགེ་སློང་དེ་ཤིན་ཏུ་ཞིབ་པོར་ཚུལ་ཁྲིམས་རབ་ཏུ་རྣམ་པར་འབྱེད་པར་བྱེད་དེ། ཚུལ་ཁྲིམས་སྣ་ཚོགས་དུ་ཡོད། རྣམ་པ་དུ་ཡོད་སྙམ་ནས་དེས་བརྟགས་ན། ཚུལ་ཁྲིམས་རྣམ་པ་གསུམ་སྟེ། ཕྱོགས་གཅིག་པ་དང་། ཕྱོགས་གཅིག་པ་མ་ཡིན་པ་དང་། མཐོ་རིས་སུ་འགྲོ་བའོ། །དེ་ལ་ཕྱོགས་གཅིག་པ་ནི་བསླབ་པའི་གཞི་གཅིག་འཛིན་པའོ། །ཕྱོགས་གཅིག་པ་མ་ཡིན་པ་ནི་བསླབ་པའི་གཞི་གཉིས་སམ་གསུམ་འཛིན་པའོ། །མཐོ་རིས་སུ་འགྲོ་བ་ནི་བསླབ་པའི་གཞི་ཚོགས་པར་འཛིན་པའོ། །ཡང་རྣམ་པ་གསུམ་སྟེ། ནོར་ལ་སྲེད་པར་བྱས་པ་དང་། ནོར་ལ་སྲེད་པར་མ་བྱས་པ་དང་། ལྷན་ཅིག་སྐྱེས་པའོ། །དེ་ལ་ནོར་ལ་སྲེད་པར་བྱས་པ་ནི་སྟོབས་འགྱེད་པས་འཚོ་བའོ། །ནོར་ལ་སྲེད་པར་མ་བྱས་པ་ནི་ནད་བུ་ཅན་རྣམས་ཀྱིའོ། །ལྷན་ཅིག་སྐྱེས་པ་ནི་མྱ་ངན་ཆེན་པོས་ཐེབས་པ་ཡིན་ཏེ་འདི་ནི་ཆུང་ངོ་། །ཡང་རྣམ་པ་གསུམ་སྟེ། བསམ་གཏན་དང་ལྷན་ཅིག་སྤྱོད་པ་དང་། བསམ་གཏན་མ་ཡིན་པ་དང་ལྷན་ཅིག་སྤྱོད་པ་དང་། ལངས་ནས་ལྷན་ཅིག་སྤྱོད་པའོ། །དེ་ལ་བསམ་གཏན་དང་ལྷན་ཅིག་སྤྱོད་པ་ནི་འཇིག་རྟེན་པ་རྣམས་ཀྱི་རྐྱེན་མེད་པའི་བར་གྱིས་འདོད་ཆགས་ལ་སོགས་པ་སྐྱེད་པར་མི་བྱེད་པའོ། །བསམ་གཏན་མ་ཡིན་པ་དང་ལྷན་ཅིག་སྤྱོད་པ་ནི་ཕྱི་རོལ་པ་རྣམས་ཀྱི་བསམ་གཏན་མེད་ཀྱང་དེ་ལྟར་ཚུལ་ཁྲིམས་སུ་འགྱུར་བ་ཡིན་ནོ། །ཡང་ལངས་ནས་ལྷན་ཅིག་སྤྱོད་པ་ནི་སྐྱོན་གང་དམིགས་ནས་དེ་དག་དེས་ཡོངས་སུ་སྤོང་བར་བྱེད་པ་ཡིན་ཏེ། ཇི་ལྟར་ཆང་གིས་མྱོས་ནས་མི་གཙང་བ་ཀུན་ཏུ་སྤྱོད་དོ། །དེས་ཆང་དེ་སོ་སོར་གཅོད་པར་བྱེད་པ་བཞིན་ནོ། །ཡང་རྣམ་པ་གསུམ་སྟེ། ངན་གཡོ་བྱེད་པས་སྲུང་བ་དང་། ངན་གཡོ་བྱེད་པ་མ་ཡིན་པས་སྲུང་བ་དང་། ལྷན་ཅིག་སྐྱེས་པའོ། །དེ་ལ་ངན་གཡོ་བྱེད་པས་སྲུང་
བ་ནི་ཉོན་མོངས་ཤིང་འབྲས་བུ་ཆུང་བའོ། །ངན་གཡོ་བྱེད་པ་མ་ཡིན་པས་སྲུང་བ་ནི་འབྲས་བུ་ཆེ་བའོ། །ལྷན་ཅིག་སྐྱེས་པ་ནི་སེམས་ལས་བྱུང་བའི་བྱེ་བྲག་གིས་འབྲས་བུ་ཆེ་བའམ། །འབྲས་བུ་ཆུང་བར་འགྱུར་བའོ། །ཡང་རྣམ་པ་གསུམ་སྟེ། རྐྱེན་གྱིས་འཛིན་པ་དང་། རྐྱེན་མེད་པས་འཛིན་པ་དང་། བྱ་བ་མ་ཡིན་པའོ། །དེ་ལ་རྐྱེན་གྱིས་འཛིན་པ་ནི་བསླབ་པའི་གཞི་ཚུལ་ཁྲིམས་ཡང་དག་པར་བླངས་པ་དེ་རྐྱེན་རྙེད་ནས་སྲུང་བ་ཡིན་ཏེ། བསླབ་པའི་གཞི་བསྡུས་ནས་འཛིན་པའོ། །རྐྱེན་མེད་པས་འཛིན་པ་ནི་གང་རྐྱེན་མེད་པ་དེས་སྲུང་བའོ། །བྱ་བ་མ་ཡིན་པ་ཞེས་བྱ་བ་ནི་རིགས་ཆེན་པོར་སྐྱེས་པ་རྣམས་ཀྱི་བྱ་བ་མ་ཡིན་པ་སྡིག་པ་མི་བྱེད་པའོ། །དེ་ལ་རྐྱེན་གྱིས་འཛིན་པ་ནི་སེམས་ལས་བྱུང་བའི་བྱེ་བྲག་གིས་འཛིན་ཏེ་འབྲས་བུ་ཆེ་བ་ཡིན་ནོ། །རྐྱེན་མེད་པས་འཛིན་པ་ནི་དེ་རྣམ་པར་མི་ཤེས་ཏེ་འབྲས་བུ་ཆུང་བ་ཡིན་ནོ། །བྱ་བ་མ་ཡིན་པས་བྱས་པ་ནི་འཇིག་རྟེན་འདིར་ལེགས་པར་བྱེད་པ་ཡིན་ཏེ། འབྲས་བུ་ཆེ་བའམ། སླར་ཆུང་བར་འགྱུར་རོ། །ཡང་རྣམ་པ་གསུམ་སྟེ། བླ་མས་འཇིགས་པ་དང་། བླ་མ་མ་ཡིན་པས་འཇིགས་པ་དང་། ངན་སོང་དུ་འགྲོ་བས་འཇིགས་པའོ། །དེ་ལ་གང་བླ་མས་འཇིགས་ནས་ཚུལ་ཁྲིམས་ལེན་པ་དེ་ནི་ཆུང་བ་ཡིན་ནོ། །གང་བླ་མ་མ་ཡིན་པས་འཇིགས་ནས་ལེན་པ་དེ་ནི་འབྲིང་ཡིན་ནོ། །གང་ངན་སོང་དུ་འགྲོ་བས་འཇིགས་ནས་ལེན་པ་དེ་ནི་ཆེན་པོ་ཡིན་ནོ། །ཡང་རྣམ་པ་གསུམ་སྟེ། བདག་ཉིད་ཚུལ་ཁྲིམས་དང་ལྡན་པར་བྱེད་པ་དང་། གཞན་ཚུལ་ཁྲིམས་ལ་འཇོག་པར་བྱེད་པ་དང་། གཞན་ལ་བཏང་སྙོམས་སུ་གནས་པའོ། །ཡང་ཚུལ་ཁྲིམས་རྣམ་པ་གསུམ་སྟེ། གགས་དང་བཅས་པ་དང་། གགས་མེད་པ་དང་། གགས་ཐམས་ཅད་པའོ། །དེ་ལ་གགས་དང་བཅས་པ་ནི་གང་སྔོན་ཚུལ་ཁྲིམས་དང་ལྡན་ལ། ཕྱིས་ཚུལ་ཁྲིམས་འཆལ་པ་ཡིན་ཏེ། གགས་དང་བཅས་པའི་ཚུལ་ཁྲིམས་ནི་དེ་ཡིན་ནོ། །གགས་མེད་པ་ནི་རྟག་པར་ཚེ་རབས་སུ་ཐོག་མ་དང་བར་དང་ཐ་མའི་མཐར་ཚུལ་ཁྲིམས་དང་ལྡན་པ་ཉིད་ཡིན་ནོ། །གགས་ཐམས་ཅད་པ་ཞེས་བྱ་བ་ནི་ལྟ་བ་ལོག་པས་སྲོག་གཅོད་པ་ལ་སོགས་པའི་མཆོད་སྦྱིན་བྱེད་པའི་ཚུལ་ཁྲིམས་ཡིན་ནོ། །དེ་ནས་ཡང་དགེ་སློང་དེ་ཚུལ་ཁྲིམས་རྣམ་པ་བཞི་རྣམ་པར་འབྱེད་ཅིང་རྟོག་པར་བྱེད་དེ། ངག་
གི་བརྫུན་དང་ཕྲ་མ་དང་ཚིག་རྩུབ་པོ་དང་ཚིག་ཀྱལ་པ་སྟེ། དེ་དག་དང་འབྲལ་བར་བྱེད་དོ། །ཡང་ཚུལ་ཁྲིམས་རྣམ་པ་ལྔ་སྟེ། ཡུལ་ལྔ་སྤངས་པ་བསྐྱེད་པའོ། །ཡང་ཚུལ་ཁྲིམས་རྣམ་པ་དྲུག་སྟེ། བར་ཆད་བྱེད་པ་དང་བར་ཆད་བྱེད་པ་མེད་པ་དང་། རྒྱལ་པོའི་ཆད་པས་འཇིགས་ནས་བླངས་པ་དང་། འབྲེལ་པས་བླངས་པ་དང་རྟོག་པ་མེད་པ་དང་ལྷན་ཅིག་སྐྱེས་པའོ། །ཡང་ཚུལ་ཁྲིམས་རྣམ་པ་བདུན་ཏེ། ལུས་དང་ངག་གིའོ། །དེ་ལྟར་དགེ་སློང་དེ་ཚུལ་ཁྲིམས་རྣམ་པ་དུ་མ་ལ་རབ་ཏུ་སྤྱོད་པར་བྱེད་དེ། གང་གིས་སེམས་ཅན་རྣམས་ངན་འགྲོའི་འཇིགས་པ་ལས་གྲོལ་བར་བྱེད་པ་དེ་ནི་མདོར་ན་རྣམ་པ་གཉིས་ཏེ། འཇིག་རྟེན་པ་དང་། འཇིག་རྟེན་ལས་འདས་པ་ཡིན་ནོ་སྙམ་མོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་པ། དེ་ནས་རྒྱལ་ཆེན་བཞིའི་ལྷ་རྣམས་མཐོང་ནས། སུམ་ཅུ་རྩ་གསུམ་པའི་གནས་དང་། ལས་རྣམས་ལ་རྟོག་པར་བྱེད་དེ། ལེགས་པར་བྱས་པའི་ལས་དང་། ལེགས་པར་མ་བྱས་པའི་ལས་ཀྱི་རྗེས་སུ་སྤྱད་པ་གང་གིས། སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སུམ་ཅུ་རྩ་གསུམ་པའི་ལྷ་རྣམས་ཇི་ལྟར་འདུག་པ་ནི་འདི་ལྟ་སྟེ། ཆོས་བཟང་ན་གནས་པ་དང་། མཐོ་བ་ན་གནས་པ་དང་། རི་རྩེ་ན་གནས་པ་དང་། ལེགས་མཐོང་ན་གནས་པ་དང་། ཕྱོགས་གཅིག་ན་གནས་པ་དང་། ཤིང་གསེབ་ན་གནས་པ་དང་། ཤིང་རྟ་སྣ་ཚོགས་ན་གནས་པ་དང་། དགའ་བྱེད་ན་གནས་པ་དང་། རྣམ་མཛེས་ན་གནས་པ་དང་། ཡོངས་འདུ་ན་གནས་པ་དང་། འདྲེས་པའི་འགྲམ་ན་གནས་པ་དང་། ཚང་ཚིང་གི་འགྲམ་ན་གནས་པ་དང་། ནོར་བུའི་སྙིང་པོ་ན་གནས་པ་དང་། ཀུན་དུ་གསལ་བར་སྤྱོད་པ་དང་། གསེར་ཕུག་གི་ཁང་པ་དང་། ཕྲེང་བའི་གྲིབ་མ་དང་། དམའ་བ་དང་མཐོ་བ་ན་རྒྱུ་བ་དང་། བཀྲ་བ་སྣ་ཚོགས་ཀྱིས་ཕྱེ་བ། སྦྱོར་བ་ལ་འཇུག་པ་དང་། ཞིབ་ཏུ་སྤྱོད་པ་དང་། གླུའི་སྒྲ་ལ་ཤིན་ཏུ་དགའ་ཞིང་མངོན་པར་ཆགས་པ་དང་། གཟི་བརྗིད་འབར་བ་དང་། ཟླ་བའི་གནས་ལྟར་ཉ་བ་དང་། ཤིང་སཱ་ལ་ཟུང་དང་། མིག་ཕྱེ་ཞིང་འགྲོ་བ་དང་། བཙུམས་ནས་འགྲོ་བ་དང་། ལུས་ཀྱི་མདོག་བཟང་ཞིང་ཆེ་བ་དང་། ནོར་བུ་འཕྱང་
བ་དང་། རིས་འཐུན་པ་དང་། འཁོར་ན་གནས་པ་དང་། མཐོ་བར་སྤྱོད་པ་དང་། གཟི་བརྗིད་མཆོག་དང་། གཟི་བརྗིད་ཕྲེང་དང་། མ་འདྲེས་པ་དག་སྟེ། དེ་ལྟར་སུམ་ཅུ་རྩ་གསུམ་པའི་ལྷ་དེ་རྣམས་ནི་གནས་སུམ་ཅུ་རྩ་གསུམ་ན་འཁོད་དོ། །དེ་ལ་དགེ་སློང་ལས་ཀྱི་ཆོས་ཀྱི་འབྲས་བུ་རྣམ་པར་སྨིན་པ་དང་། ཚུལ་ཁྲིམས་ཞིབ་ཏུ་ཁོང་དུ་ཆུད་པ་དེ། དེ་ལྟར་ན་ལྷ་རྣམས་ཀྱི་ལེགས་པར་བྱས་པའི་ལས་དག་ལ་རྟོག་པར་བྱེད་དེ། ལས་བྱས་ཤིང་བསགས་པ་གང་གིས་བདེ་འགྲོ་སྐྱེད་པ་འདོད་པ་དང་སྡུག་པའི་རྣམ་པར་སྨིན་པ་བདེ་བས་རྣམ་པར་སྨིན་པ་བདེ་ཞིང་སྐྱེ་བོ་ཡོངས་སུ་སྨྲ་བ་བསྡུས་པ། སྒྲ་དང་། རེག་པ་དང་། རོ་དང་། རྣམ་པར་སྨིན་པ་བདེ་བ་སྐྱེད་པ་རྣམས་ཀྱིས་གང་དུ་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཡ་མཚན་ཅན་གྱི་མཐོང་བ་དང་ཐོས་པ་ཀུན་ནས་དགོས་པ་གཞན་མ་ཡིན་པ་སངས་རྒྱས་ཀྱི་བསྟན་པས་ལྷ་རྣམས་ཀྱི་སྐྱེ་བ་དགའ་ཞིང་བདེ་བར་གནས་པ་དཔེ་མེད་པ་དག་མཐོང་སྟེ། ལྷའི་འདུན་ས་ཆོས་བཟང་གང་དུ་ལྷའི་རྒྱལ་པོ་ཀཽ་ཤི་ཀས་ཆོས་དང་འཐུན་པར་སྐྱོང་ངོ་། །ཕྱི་རོལ་གྱི་འདུ་ཤེས་རྙེད་པས་ལྷ་རྣམས་ཀྱི་གནས་པ་དང་པོར་བྱས་ནས། དེ་ལྟར་ས་ཀུན་གྱི་རིས་རྣམ་པར་འབྱེད་པར་བྱེད་དེ། དགེ་སློང་དེ་ཚུལ་ཁྲིམས་ཤིན་ཏུ་བསྒོམས་པ་རྣམ་པ་གང་གིས་ལྷའི་འདུན་ས་ཆོས་བཟང་དུ་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་གང་ཚུལ་ཁྲིམས་རྣམ་པ་བདུན་བསྲུངས་ཏེ། དེ་མ་ཉམས་པ་དང་། མ་རལ་བ་དང་། མ་ཞིག་པ་དང་། དམ་ཞིང་གཞན་དང་མི་འདྲ་བར་རབ་ཏུ་སྤྱོད་ལ། སེམས་ལས་བྱུང་བས་ཡོངས་སུ་བསྒོམས་པའི་སྦྱིན་པ་དུས་ལ་བབ་པ་ཡང་བྱིན་ཅིང་ཡོན་ཏན་དུ་གྱུར་པ་ཡང་འདི་ལྟ་སྟེ་དགྲ་བཅོམ་པའམ། ཕ་མ་ནད་པའམ། ཕྱིར་མི་འོང་བའམ། ལན་ཅིག་ཕྱིར་འོང་བའམ། རྒྱུན་དུ་ཞུགས་པའམ། འགོག་པ་ལས་ལངས་པའམ། ལམ་ལ་ཞུགས་པའམ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་བསྒོམས་པའམ། འཆི་བས་འཇིགས་ཤིང་ཉེན་པ་ལ་སྲོག་བྱིན་ན། ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷའི་འདུན་ས་ཆོས་བཟང་དུ་ལྷའི་བདག་པོར་འགྱུར་ལ། བརྒྱ་བྱིན་ཀཽ་ཤི་ཀ་ལྷའི་འདུན་ས་ཆོས་
བཟང་ན་གནས་ཏེ་ལྷ་མོ་སྡུག་པ་ཡིད་དུ་འོང་བ་བྱེ་བ་ཕྲག་དགུ་བཅུ་རྩ་དགུས་ཡོངས་སུ་བསྐོར་བའི་ནང་ན་ཡོངས་སུ་དགའ་བར་བྱེད་ཅིང་ལྷ་མོ་དེ་དག་གིས་ཀྱང་དེ་ལ་རིམ་གྲོ་བྱེད་དེ། ཇི་ལྟར་སྐྱེས་པ་གཅིག་ལ་བུད་མེད་གཅིག་གིས་རིམ་གྲོ་བྱེད་པ་དེ་བཞིན་དུ་དེ་དག་ཐམས་ཅད་དེ་ལ་རིམ་གྲོ་བྱེད་དོ། །དེ་དག་གི་ནང་ན་སྡུག་ཅིང་ཡིད་དུ་འོང་བ་སེམས་གཅིག་པའི་བཙུན་མོ་དམ་པ་ལ་ལྷ་མོ་དེ་དག་རིམ་གྲོ་བྱེད་དེ། དེ་ཡང་དེ་དག་ལ་གུས་པར་བྱེད་དོ། །ལྷའི་འདུན་ས་ཆོས་བཟང་དེ་ཡང་དཔག་ཚད་ལྔ་བརྒྱ་ཡོད་དེ། ཁ་ཁྱེར་ནི་ནོར་བུ་བཻ་ཌཱུརྱ། ཀ་བ་ནི་བྱི་རུས་ཤིན་ཏུ་མཛེས་པར་བྱས་པ་ལན་ཀན་ནི་ཤེལ་ལས་བྱས་ཤིང་སྤུག་གིས་ནི་བརྒྱན། རྩིག་པ་ནི་གསེར་བཙོ་མ་ལས་བྱས་ཤིང་རྡོ་རྗེས་བརྒྱན་ཏེ། ནོར་བུས་དགའ་བར་བྱེད་པ་ཁྲི་ནི་པད་མ་རཱ་ག་དང་། ཨན་ད་རྙིལ་གྱིས་མཛེས་པར་སྤྲས་པ། ལ་ལ་ཁ་ཅིག་ཏུ་པད་མ་འདབ་མ་ནི་བཻ་ཌཱུརྱ། ཟེ་བ་ནི་རྡོ་རྗེའི་མྱུ་གུ། སྡོང་བུ་ནི་འདམ་རྫབ་མེད་པའི་ཐང་ལས་སྐྱེས་པ་གསེར་ལྟ་བུས་མཛེས་པར་བརྒྱན་ཏོ། །རྫིང་བུའི་བར་ཁ་ཅིག་ན་བྱ་འཁོད་པ་ཡང་སྒྲོ་ནི་བཻ་ཌཱུརྱ། མཆུ་ནི་པད་མ་རཱ་ག །ལུས་ནི་མཐོན་ཀ་ལྟ་བུ་རྣམས་ཀྱིས་པད་མའི་རྫིང་དེ་གང་ངོ་། །ཁ་ཅིག་ཏུ་ནོར་བུའི་བྱ་རྣམ་པ་གཞན་གྱིས་རྫིང་དེ་ཀུན་དུ་གང་སྟེ། འདི་ལྟ་སྟེ། རྐང་པ་ནི་བཻ་ཌཱུརྱ། སྒྲོ་ནི་མཐོན་ཀ །མཆུ་ནི་སྤུག །མིག་ནི་བྱི་རུ་ལྟ་བུ་རྣམས་ཀྱིས་རྫིང་གི་བར་དག་ཀུན་དུ་གང་ངོ་། །ཁ་ཅིག་ཏུ་ཡང་རྫིང་དེ་རྣམ་པ་གཞན་གྱིས་མཛེས་པར་བྱས་པ་ཡིན་ཏེ། འདི་ལྟ་སྟེ། ལུས་ཐམས་ཅད་ནི་འཛམ་བུ་ཆུ་བོའི་གསེར། སྒྲོ་ནི་བྱི་རུ། མིག་ནི་ཤིན་ཏུ་འཇམ་པ། རྐང་པ་ནི་མུ་ཏིག་གི་ཁ་དོག་ལྟ་བུ་ཡིན་ནོ། །པད་མའི་རྫིང་ཁ་ཅིག་དག་ཏུ་ཡང་བུང་བ་མྱོས་པ་བཻ་ཌཱུརྱའི་མདོག་ལྟ་བུ་རྣམས་ཀྱིས་པད་མའི་རྫིང་ཆེན་པོ་བཅུ་མཛེས་པར་བྱས་པས། ལྷའི་འདུན་ས་ཆོས་བཟང་མཛེས་པར་བྱས་པ་ཡིན་ཏེ། འདི་ལྟ་སྟེ། དགའ་འབྱུང་དང་། པད་མ་ཆེ་འབྱུང་དང་། རབ་ཏུ་དགའ་བ་དང་། རབ་དགའ་ཆེན་པོ་དང་། རྩེ་དགའ་དང་། བསམས་འགྲོ་དང་། ཤིང་རྟ་ཀུན་འགྲོ་དང་། ཀུན་རྟོག་རྒྱུ་དང་། དཔག་བསམ་གྱི་ཤིང་ལ་སྤྱོད་པ་དང་། དབེན་འགྲོ་དབང་པོའི་འོད་དེ་མཚོ་དེ་རྣམས་ཀྱིས་ལྷའི་འདུན་ས་ཆོས་བཟང་དེ་བརྒྱན་ཏོ། །ཡང་པད་མའི་ཚལ་རྣམ་པ་གཞན་དག་ཡོད་དེ། པད་མའི་ཚལ་དེ་དག་གི་སྡོང་བུ་ནི་དངུལ། ཟེ་བ་ནི་གསེར། འདབ་མ་ནི་
བཻ་ཌཱུརྱ། སྙིང་པོ་ནི་འདམ་རྫབ་མེད་པ་ནས་སྐྱེས་པ་རྡོ་རྗེའི་མདོག་ལྟ་བུ་ཡིན་ནོ། །ཡང་པད་མ་རྣམ་པ་གཞན་དག་ནི་འདི་ལྟ་བུ་ཡིན་ཏེ། འདི་ལྟ་སྟེ། སྡོང་བུ་ནི་རྡོ་རྗེའི་མདོག་ལྟ་བུ། འདབ་མ་ཕན་ཚུན་འདྲེས་པ་ནི་འདི་ལྟར་པད་མ་རཱ་ག་དང་། འདབ་མ་ཁ་ཅིག་ནི་བཻ་ཌཱུརྱ། འདབ་མ་ཁ་ཅིག་ནི་སྤུག་རྒྱན་གྱི་མདོག །འདབ་མ་ཁ་ཅིག་ནི་གསེར་ལྟ་བུ་ཡིན་ཏེ། དེ་ལྟར་པད་མ་དེ་དག་གི་ཁ་དོག་འདྲེས་པ་ཡིན་ནོ། །ལྷའི་རྒྱལ་པོ་བརྒྱ་བྱིན་གྱི་པད་མ་ནི་འདབ་མ་བརྒྱ་པ་དང་། ལ་ལ་ནི་འདབ་མ་ཉིས་བརྒྱ་པ། ལ་ལ་འདབ་མ་སུམ་བརྒྱ་པ། ལ་ལ་འདབ་མ་བཞི་བརྒྱ་པ། ལ་ལ་འདབ་མ་ལྔ་བརྒྱ་པ། ལ་ལ་འདབ་མ་དྲུག་བརྒྱ་པ། ལ་ལ་འདབ་མ་བདུན་བརྒྱ་པ། ལ་ལ་འདབ་མ་བརྒྱད་བརྒྱ་པ། ལ་ལ་འདབ་མ་དགུ་བརྒྱ་པ། ལ་ལ་འདབ་མ་སྟོང་ཡོད་དེ། ཁ་དོག་སྣ་ཚོགས་དང་། ཁ་དོག་གཅིག་པ་དང་། རྒྱུ་བ་དང་མི་རྒྱུ་བ་དག་བརྒྱ་བྱིན་གྱི་གནས་ལྷའི་འདུན་ས་ཆོས་བཟང་དུ་འབྱུང་ངོ་། །ཡང་པད་མའི་ནང་དེ་དག་ཉིད་དུ་ལྷའི་བྱ་འཇུག་པ་དང་། གསབ་གསེབ་ཀྱི་ནང་ན་གནས་པ་རྣམས་ཀྱིས་ཀུན་ཏུ་གང་བ་ནི་འདི་ལྟ་སྟེ། གང་དུས་ཚིགས་ཐམས་ཅད་དུ་རྒྱགས་པ། འགྲམ་པ་རྡུལ་ཅིང་རོལ་མོའི་སྒྲས་རྟག་ཏུ་གར་བྱེད་པ་དག་ཡིན་ཏེ། དེ་དག་གང་གི་ཚེ་བརྒྱ་བྱིན་རྫིང་དེ་དག་ཏུ་ལྷ་མོའི་ཚོགས་ཀྱིས་ལྷན་ཅིག་ཡོངས་སུ་བསྐོར་ནས་རྩེ་བ་དེའི་ཚེ་བྱ་དེ་དག་དེ་བཞིན་དགའ་བར་བྱེད་དེ། ཇི་ལྟར་ཡན་ལག་ལྔ་དང་ལྡན་པའི་སིལ་སྙན་གྱི་སྒྲ་དེ་བཞིན་དུ་བྱ་དེ་དག་ཀྱང་སྒྲ་འབྱིན་ལ། རྒྱགས་པས་མྱོས་པ་ཞེས་བྱ་བའི་བྱ་རབ་ཏུ་གར་བྱེད་པ་དག་བྱུང་ངོ་། །གང་གི་ཚེ་བརྒྱ་བྱིན་གང་རྫིང་དེ་དག་ཏུ་དགའ་བར་བྱེད་པ་དེའི་ཚེ་དེ་དག་ཀྱང་དེ་བཞིན་དུ་གར་བྱེད་དེ། ཇི་ལྟར་ལྷ་མོ་དག་བྱེད་པ་དེ་བཞིན་ནོ། །བྱ་ཁོར་ཡུག་ཅེས་བྱ་བ་གསེར་གྱི་མདོག་ཅན་མེ་ཏོག་གི་ཕྲེང་བ་མཆུ་ལ་འཕྱང་བ་དག་འབྱུང་སྟེ། གང་རྫིང་དེ་དག་གི་འགྲམ་གྱི་ནང་ཕན་ཚུན་ཀུན་ནས་རྫིང་དེ་དག་ཏུ་གནས་ནས་གར་བྱེད་ཅིང་སྒྲ་འབྱིན་པར་བྱེད་དེ། ལྷའི་རྒྱལ་པོ་བརྒྱ་བྱིན་གྱི་རྫིང་ནི་དེ་ལྟ་བུ་ཡིན་པར་མཐོང་ངོ་། །དེ་ནས་ཡང་དགེ་སློང་དེ་བརྒྱ་བྱིན་གྱི་ལྷའི་འདུན་ས་ཆོས་བཟང་ལེགས་པར་བྱས་པའི་ལས་ཀྱིས་སྤྲུལ་པ་ལ་རྟོག་པར་བྱེད་དེ། དེས་བརྟགས་ན་རྫིང་གི་བར་ན་གནས་པའི་ཉ་རྣམས་ཁ་ཅིག་ནི་གསེར་གྱི་མདོག་ཅན། ཁ་ཅིག་
ནི་དངུལ་གྱི་མདོག་ཅན། ཁ་ཅིག་ནི་བཻ་ཌཱུརྱའི་མདོག་ཅན་ལ། འདབ་མ་ནི་པད་མ་རཱ་གའི་མདོག །མིག་ནི་སྤུག་ལྟ་བུ། ལྟོ་ནི་པད་མའི་མདོག །ཁ་ཅིག་གི་རྒྱབ་ནི་རིན་པོ་ཆེ་སྣ་ཚོགས་ཀྱི་ཐིག་ལེ་བཀྲ་བ་དག་གིས་བརྒྱན། ཁ་ཅིག་གི་འདབ་མ་ནི་རིན་པོ་ཆེ་རྣམ་པ་སྣ་བདུན་གྱི་མདོག་ཏུ་འདུག་སྟེ། པད་མའི་རྫིང་དེ་རྣམས་སུ་དགའ་བར་བྱེད་དོ། །དེ་ནས་ཡང་དགེ་སློང་དེ་བརྒྱ་བྱིན་གྱི་པད་མའི་རྫིང་རྣམ་པ་གཞན་དེ་དག་ཉིད་ལ་རྟོག་པར་བྱེད་དེ། གང་གིས་རྫིང་དེ་དག་གི་རིས་ཉིད་རྣམ་པ་དུ་ཡོད་ཅིག་གུ་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ས་དེ་དག་གི་རིས་ཁ་ཅིག་དག་བྱེ་མ་བདལ་བ་ལྟ་བུར་མུ་ཏིག་བཀྲམ་པ། ཁ་ཅིག་དངུལ་གྱི་ཕྱེ་མ། ཁ་ཅིག་གསེར་གྱི་ཕྱེ་མ། ཁ་ཅིག་ནོར་བུ་བཻ་ཌཱུརྱ་བཀྲམ་སྟེ། དེ་ལྟར་བརྒྱ་བྱིན་གྱི་ལེགས་པར་བྱས་པའི་ལས་ཀྱི་སྤྲུལ་པས་དེ་དག་གི་རིས་བཀྲ་བ་དག་མཐོང་ངོ་། །དེ་ནས་ཡང་དགེ་སློང་དེ་གནས་དེ་དག་གི་རིས་ཉིད་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་རྫིང་དེ་དག་ཉིད་ཀྱི་འགྲམ་དེ་ཀུན་ནས་ཁ་ཅིག་གི་ཁ་ཁྱེར་གསེར་ལས་བྱས་པ་དག་གིས་ཡོངས་སུ་བསྐོར། ཁ་ཅིག་གི་ཁ་ཁྱེར་ནོར་བུ་བཻ་ཌཱུརྱ། ཁ་ཅིག་ནི་དངུལ་ལས་བྱས། ཁ་ཅིག་གསེར་དག་ལས་བྱས་ལ། མུ་ཏིག་གི་དྲ་བས་ཀུན་ནས་བྲེས་པ་ཡིན་ཏེ། དེ་ལྟར་བྱའི་ཚོགས་ཁ་དོག་སྣ་ཚོགས་དགའ་བའི་སྒྲ་དང་འགྲོ་བ་རྣམས་ཀྱིས་པད་མའི་རྫིང་གི་འགྲམ་དེ་དག་ཀུན་དུ་གང་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷའི་འདུན་ས་ཆོས་བཟང་ལ་རྟོག་པར་བྱེད་དེ། པད་མའི་རྫིང་གི་པད་མ་དེ་དག་གི་ནང་ན་རྒྱུ་བ་བུང་བའི་ཚོགས་ཀྱི་མདོག་དང་ཁ་དོག་སྣ་ཚོགས་ལ་འདི་ལྟ་སྟེ། གསེར་གྱི་མདོག་ཅན་རྣམས་ཀྱི་ནང་དུ་བུང་བ་དངུལ་གྱི་མདོག་ཅན། འདབ་མ་རྡོ་རྗེའི་མྱུ་གུ་ལྟ་བུ་རེག་ན་བདེ་བ་དག་རྒྱུ་ལ་དངུལ་གྱི་པད་མ་རྣམས་ཀྱི་ནང་དུ་བུང་བ་གསེར་གྱི་མདོག་ཅན་དག་རྒྱུ་སྟེ། དེ་ལྟར་སྣ་ཚོགས་དག་པད་མ་སྣ་ཚོགས་རྣམས་ཀྱི་ནང་ན་རྒྱུའོ། །དེ་ལྟར་ལས་དགེ་བས་འབྲས་བུ་སྣ་ཚོགས་དག་འབྱུང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་དེ་ལྷའི་འདུན་ས་ཆོས་བཟང་དེ་ཉིད་ལ་ཐོས་པ་ལས་བྱུང་བའི་ཤེས་པས་རྟོག་ཅིང་དེའི་ཚལ་དག་ལ་ཡང་རབ་ཏུ་དཔྱོད་པར་བྱེད་དེ། ལྷའི་དབང་པོ་བརྒྱ་བྱིན་གྱི་ཚལ་དག་
རྣམ་པ་དུ་ཡོད་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ལྷའི་འདུན་ས་ཆོས་བཟང་དག་ན་ཚལ་ཡོད་ལ། དེ་ལྟར་ཚལ་དེ་རེ་རེ་ལ་རབ་ཏུ་དཔྱོད་པར་བྱེད་དེ། དེའི་ཚལ་བུད་མེད་དགའ་བ་ཞེས་བྱ་བ་དང་། ཀུན་དགའ་ཞེས་བྱ་བ་དང་། དཔེ་མེད་པ་ཞེས་བྱ་བ་དང་། བཀྲ་བ་ཞེས་བྱ་བ་ཚལ་བཞི་པོ་དེ་དག་ནི་ལྷའི་འདུན་ས་ཆོས་བཟང་དག་ན་ཡོད་དོ། །དེ་ལྟར་དེ་ཚལ་རེ་རེ་དག་ལ་རབ་ཏུ་དཔྱོད་པར་བྱེད་དེ། ཚལ་གང་དུ་ལྷ་རྣམས་ཀྱི་དབང་པོ་བརྒྱ་བྱིན་ལྷ་མོའི་ཚོགས་ཀྱིས་ཡོངས་སུ་བསྐོར་ཅིང་། ལྷའི་འདོད་པའི་ཡོན་ཏན་ལྔ་ལ་གཟུགས་དང་། སྒྲ་དང་། དྲི་དང་། རོ་དང་། རེག་པ་རྣམས་ཀྱིས་དགའ་ཞིང་མགུ་ལ་རྩེ་ཞིང་ཡོངས་སུ་སྤྱོད་པའི་ཚལ་ནི་གང་ཡིན། དགའ་བར་སྤྱོད་པའི་རྣམ་པ་ནི་དུ་ཞིག་ཡོད་ཅིག་གུ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། བུད་མེད་དགའ་བ་ཞེས་བྱ་བའི་ཚལ་ཡོད་དེ། ཚལ་དེ་ནི་ལྷའི་ཤིང་ལྗོན་པ་དང་། མེ་ཏོག་དང་འབྲས་བུས་ནི་བརྒྱན། བྱའི་ཚོགས་ཀྱིས་ནི་ཡོངས་སུ་བསྐོར། ཤིང་དེ་དཔག་བསམ་གྱི་ཤིང་ཞེས་བྱ་ལ། དེ་ལྟར་དེ་དག་ནི་ཇི་ལྟར་འདོད་པ་ཞེས་བྱ་བར་འགྱུར་ཏེ། གང་སུམ་ཅུ་རྩ་གསུམ་དག་ཡིད་ལ་སེམས་པར་བྱེད་པ་དེ་ཚལ་དེ་དག་ལས་རྙེད་པར་འགྱུར་རོ། །དེ་དག་གང་གི་ཚེ་རྩེ་བའི་ཕྱིར་ཚལ་དེར་ཉེ་བར་འགྲོ་བར་བྱེད་ན་དེའི་ཚེ་ཤིང་ལྗོན་པ་དེ་དག་གི་མེ་ཏོག་ཤིན་ཏུ་བཟང་པོ་རབ་ཏུ་རྒྱས་ཤིང་མེ་ཏོག་ཁ་ཕྱེ་བར་འགྱུར་རོ། །གང་གི་ཚེ་བུད་མེད་དག་ཚལ་དེ་དག་གི་ནང་དུ་ཞུགས་ལ་ཤིང་ལྗོན་པའི་དྲུང་དུ་ཉེ་བར་སོང་སྟེ། ཤིང་ལྗོན་པ་དག་ལས་མེ་ཏོག་རྣམས་ལེན་པར་འདོད་པ་དེའི་ཚེ་ཇི་ལྟར་བུད་མེད་ཀྱིས་སླེབས་ཙམ་དུ་ཤིང་ལྗོན་པ་དེ་དག་འཕྱང་བར་འགྱུར་རོ། །ཡང་དེ་ལྟར་མེ་ཏོག་གི་རྣམ་པ་དེ་དག་བླངས་པ་དང་། མེ་ཏོག་གི་རྣམ་པ་གཞན་དང་། ཁ་དོག་གཞན་དང་། དྲི་གཞན་དང་། དབྱིབས་གཞན་དང་། རྣམ་པ་གཞན་དག་འབྱུང་བར་འགྱུར་ཏེ། ལྷ་མོ་དེ་དག་གིས་ཇི་ལྟ་ཇི་ལྟར་བསམས་པ་བཞིན་དཔག་བསམ་གྱི་ཤིང་དེ་དག་གི་དོན་དུ་འབྱུང་བར་འགྱུར་རོ། །ཡང་དཔག་བསམ་གྱི་ཤིང་དེ་དག་རྣམ་པ་གཞན་དུ་སྟོན་ཏེ། རོལ་མོའི་སྒྲའི་རྣམ་པ་ཐོས་ན་ཉམས་དགའ་བ་རྣམ་པ་ལྔའི་བར་དག་འབྱུང་བ་ནི། རྒྱུད་ཅན་དང་། རྔ་དང་། སིལ་དཀྲོལ་དང་། གླིང་བུ་དང་། སྒྲ་
སྙན་པ་དག་ལྷ་མོ་དེ་དག་གི་ཡིད་ཀྱིས་བསམས་ཤིང་། དེ་བཞིན་དུ་དབྱངས་ཀྱི་རྣམ་པ་མཉན་པར་བྱའོ་སྙམ་མོ། །དེ་ནས་སེམས་བསྐྱེད་མ་ཐག་ཏུ་ཤིང་ལྗོན་པའི་ལོ་མ་རྣམས་ཀྱི་ནང་དུ་དགེ་བའི་ལས་ཀྱིས་བསྐྱེད་པའི་རླུང་དེ་དག་རབ་ཏུ་ལྡང་ངོ་། །རླུང་གང་གིས་ལོ་མ་དེ་དག་ལ་དེ་བཞིན་ཕོག་པ་དང་། དེ་ལྟར་རྣམ་པ་ཇི་སྙེད་ཡོད་པའི་ལོ་མ་དེ་དག་རྣམ་པ་དེ་སྙེད་དུ་དེ་ལྟར་སྒྲ་འབྱིན་པར་བྱེད་དེ། ཇི་ལྟར་ཡན་ལག་ལྔ་དང་ལྡན་པའི་སིལ་སྙན་ཆགས་པར་འོས་པའི་རྒྱུད་ཅན་དང་། རྔ་དང་། སིལ་དཀྲོལ་དང་། གླིང་བུ་དང་། སྒྲ་སྙན་པའི་རྣམ་པ་དེ་དག་ལོ་མ་དེ་དག་ལས་འབྱུང་སྟེ། དེ་བས་ན་དཔག་བསམ་གྱི་ཤིང་ཞེས་བྱའོ། །ཡང་དཔག་བསམ་གྱི་ཤིང་རྣམ་པ་གཞན་དུ་འགྱུར་ཏེ། ཇི་ལྟར་ལྷ་མོ་འདོད་འགྲོ་དག་སེམས་དང་འཐུན་པའི་རྒྱན་དང་། གོས་དང་འབྲས་བུའི་རྣམ་པ་ཇི་ལྟ་བ་བཞིན་ལྷ་མོའི་ཡིད་ལ་འདོད་ན། དེ་སེམས་བསྐྱེད་མ་ཐག་ཏུ་དཔག་བསམ་གྱི་ཤིང་དེ་དག་ལས་འབྱུང་ཞིང་། དེ་ནས་ཡང་དེ་མཛེས་པར་འདུག་སྟེ། དེ་བས་ན་དཔག་བསམ་གྱི་ཤིང་ཞེས་བྱའོ། །དེ་དག་ཀྱང་ཁ་ཅིག་བཻ་ཌཱུརྱའི་མདོག་ལ་གསེར་གྱི་ལོ་མ་དང་། ཁ་ཅིག་སྡོང་པོ་གསེར་ལ་དངུལ་གྱི་ཡལ་ག་དང་། བཻ་ཌཱུརྱའི་འདབ་མ་དང་། ཀེ་ར་ཊ་ཀའི་ལོ་མ་དང་། ཁ་ཅིག་ལོ་མ་རིན་པོ་ཆེ་སྣ་བདུན་ལྟ་བུ་ལས་རྣམ་པ་དུ་མ་རོ་བྲོ་བ་དང་། འབྲས་བུ་དུ་མ་དག་ཐོབ་པར་བྱེད་དོ། །ཡང་དཔག་བསམ་གྱི་ཤིང་རྣམ་པ་གཞན་དུ་བསྟན་པ་དེ་གང་ཞེ་ན། འདི་ལྟ་སྟེ། ལྷ་མོ་གང་དག་བརྒྱ་བྱིན་ལ་ལྟ་བར་སྤྲོ་ན། བརྒྱ་བྱིན་དེའི་དགེ་བའི་ལས་ཀྱིས་སྤྲུལ་པ་སྒྱུ་མ་བྱས་པའི་དབང་པོ་དེ་མཐོང་བར་འགྱུར་ཏེ། དེ་དག་དང་ལྷ་མོ་དག་ལྷན་ཅིག་དགའ་བར་བྱེད་ཅིང་ཡོངས་སུ་སྤྱོད་པར་བྱེད་དོ། །དེ་ལྟར་དབང་པོ་དེ་དབང་པོ་བྱེ་བ་དེ་སྙེད་སྤྲུལ་པར་བྱེད་དེ། ཤིང་ལྗོན་པ་དེ་དག་གི་དྲུང་དུ་ལྷ་མོ་བྱེ་བ་དགུ་བཅུ་རྩ་དགུ་རེ་རེ་དང་། དབང་པོ་དེ་དག་དང་། ལྷན་ཅིག་རྩེ་ཞིང་ཡོངས་སུ་སྤྱོད་པ་ན། ལྷ་མོ་དེ་དག་གཅིག་ལ་གཅིག་ནི་མི་མཐོང་ངོ་། །གང་དང་གང་གི་ཚེ་ལྷ་མོ་དག་ཇི་ཙམ་དུ་བརྒྱ་བྱིན་གྱི་ཆ་བྱད་དང་། རྒྱན་གྱི་རྣམ་པ་དག་ཡིད་ལ་སེམས་པ་དེ་སྲིད་དུ་ཆ་བྱད་དང་རྒྱན་གྱི་རྣམ་པ་ཉིད་མཐོང་ནས་གཉིས་སྤྲོད་པར་བྱེད་ལ། དེ་སྲིད་དུ་ཚལ་གྱི་ནང་དུ་རྣམ་པ་དུ་མར་དགའ་བར་བྱེད་ཅིང་ཡོངས་སུ་སྤྲོད་པར་བྱེད་དེ། དེ་བས་ན་དཔག་བསམ་གྱི་ཤིང་ཞེས་བྱའོ། །དེ་དག་གལ་
ཏེ་རབ་ཏུ་འབྱེད་པ་ན། ཚལ་དེའི་ནང་ན་རི་ཡོད་པ་རི་རྩེ་བ་ཞེས་བྱ་བ་མཐོང་སྟེ། རི་དེ་ཡང་རིན་པོ་ཆེ་སྣ་བདུན་གྱི་རང་བཞིན་ཡིན་ཞིང་། རྡོ་རྗེ་མྱུ་གུའི་རྡོ་རྗེ་བཀྲམ་པ་གསེར་གྱི་ལྕུག་མ་ཚང་ཚིང་འདྲེས་པས་ཁྱིམ་བྱས་པ། གསེར་དང་དངུལ་མཐོན་ཀ་ལྟ་བུའི་རི་དགས་རྣམས་ཀྱིས་མཛེས་པར་བྱས་པ་བྱ་སྣ་ཚོགས་སྐད་འབྱིན་པ། དགའ་བའི་རི་དེ་ལ་ཁང་བཟངས་རྒྱལ་བ་མཆོག་འགྲོ་ཞེས་བྱ་བ་ཀ་བ་སྟོང་ཡོད་དེ། གསེར་དང་། བཻ་ཌཱུརྱ་དང་། མཐོན་ཀའི་ཀ་བ་འདྲེས་པ་རྣམས་ཀྱིས་མཛེས་པར་བྱས་པ། ཀུན་ནས་རྡོ་རྗེ་དང་། མུ་ཏིག་རགས་པ་རྣམས་ཀྱིས་སྤྲས་པ། འཇའ་ལྟ་བུའི་རྣམ་པ་ཁྲི་སྙེད་ཀྱིས་སྡུག་པར་བྱས་པ། བཻ་ཌཱུརྱའི་སེང་གེའི་ཁྲི་ལ་སྟན་ཁྲ་བོས་གཡོགས་ཤིང་། སྟེང་དུ་གདིང་བ་འཇམ་པོ་བཏིང་བ། ཁང་བཟངས་དེ་ན་བཻ་ཌཱུརྱའི་སྟན་སྟོང་གིས་མཛེས་པར་བྱས་པ། བརྒྱ་བྱིན་ལྷ་དང་ལྷ་མ་ཡིན་དུ་གཡུལ་བཀྱེ་བ་ལས་རྣམ་པར་རྒྱལ་ནས་མཛེས་པར་བྱས་པ་དེ་སུམ་ཅུ་རྩ་གསུམ་གྱི་སར་སོང་ནས། ལྷ་ཐམས་ཅད་ཀྱི་རང་བཞིན་ལྷ་རྣམས་དང་ལྷན་ཅིག་རབ་ཏུ་དགའོ། །དེ་ནས་ལྷ་མོ་དེ་དག་ཁང་བཟངས་དེར་སོང་ནས་རྩེ་བར་བྱེད། གླུ་ལེན་པར་བྱེད། བྲོ་རྡུང་བར་བྱེད། ཡོངས་སུ་སྤྱོད་པར་བྱེད། ཕན་ཚུན་རྩེད་མོ་དག་བྱེད་པ་ན། རང་གི་ལས་ངན་པ་དང་བཟང་པོ་དང་འབྲིང་པོ་རྣམས་ཀྱིས་དགའ་བར་བྱེད་དོ། །དེ་དག་རེས་འགའ་ཁང་བཟངས་རྒྱལ་བ་མཆོག་འགྲོ་དེ་ནས་བབས་ནས། དེ་ནས་ཡང་རི་རྩེ་བ་དེ་ཉིད་ལ་གནས་པར་བྱེད་ཅིང་དེར་འདོད་ཆགས་དང་ལྡན་པའི་སེམས་ཀྱིས་འདོད་ཆགས་གཅིག་པུ་དོན་དུ་བྱེད་པ་དག་ཕན་ཚུན་དགའ་བར་བྱེད་དོ། །འདི་ལྟར་བུད་མེད་ཐམས་ཅད་ནི་འདོད་ཆགས་ཀྱི་ཚོགས་དང་ལྡན་པ་ཡིན་ལ། མཐོ་རིས་ན་ཁྱད་པར་དུ་ལྷའི་ཡུལ་དག་ན་ཆེ་བ་ཡིན་ནོ། །དེ་དག་གལ་ཏེ་ཡོངས་སུ་རྒྱུ་བ་ན་རི་དེ་ལ་བཟའ་བ་དང་བཏུང་བ་ཡོད་པའི་སར་ཉེ་བར་འགྲོ་བར་བྱེད་དེ། དེ་ཡང་གཟུགས་དང་། ཁ་དོག་དང་། དྲི་དང་། རོ་སྣ་ཚོགས་ཡོད་ལ་བཏུང་བ་མྱོས་པར་བྱེད་པ། ལྷའི་གཟུགས་དང་། དྲི་དང་། རོ་ཕུན་སུམ་ཚོགས་པ་རྣམས་ཀྱིས་གང་བ་ཡིན་ནོ། །དེ་ལ་བཏུང་བའི་རྣམ་པ་དེ་དག་ནི་ར་རོ་བའི་སྐྱོན་དང་བྲལ་བ་ཡིན་ཏེ། འདི་ལྟ་སྟེ། དགའ་བར་བྱེད་པའི་བཏུང་བ་གང་འཐུངས་ན་ལྷ་མོ་དག་ཤིན་ཏུ་དགའ་བར་འགྱུར་བ་དང་། མཐོང་བར་བྱེད་པ་ཞེས་བྱ་བའི་བཏུང་བ་
གང་འཐུངས་ན། མཐོ་རིས་ཀྱི་ཚལ་དང་། ཉེ་བའི་ཚལ་ཐམས་ཅད་རི་གཞན་དུ་མས་ཆོད་ཀྱང་མཐོང་བར་འགྱུར་བ་དང་། རོ་རབ་ཏུ་མང་པོ་ཞེས་བྱ་བའི་བཏུང་བ་རོ་མང་པོའི་འདོད་པ་གང་འཐུངས་ན་སྤྲོ་བ་དང་། ཁ་དོག་དང་། གཟུགས་དང་། སྟོབས་བརྒྱ་འགྱུར་དུ་འགྱུར་བའི་བཏུང་བ་དེ་དག་ལྷ་མོས་འཐུངས་ནས། ཡང་ཟས་ཀྱི་དོན་དུ་ཟས་ཡོད་པ་དག་ཏུ་འགྲོ་བར་བྱེད་དོ། །དེའི་ཟས་དག་རང་གི་ལས་དང་རྗེས་སུ་འཐུན་པ་ཡིན་ཏེ། ངན་པ་དང་། འབྲིང་དང་། བཟང་པོ་ཡིན་ལ། རོ་དང་། ཁ་དོག་དང་། དྲི་དང་། རེག་པའི་རྣམ་པ་ལས་ཀྱིས་བསྒྲུབས་པ་ཕུན་སུམ་ཚོགས་པ་ཡིན་ནོ། །དེ་བཞིན་དུ་བཏུང་བ་དག་ཀྱང་རང་གི་ལས་ཀྱིས་བསྒྲུབས་པའི་ངོ་བོ་སོ་སོར་བསྟན་པ་ཡིན་ཏེ། དེ་དག་གིས་བཏུང་བ་དེ་འཐུངས་ཤིང་ཟས་བདུད་རྩི་དེ་ཡང་ཟོས་ནས། རྩེ་བའི་རི་དེ་ལ་རོལ་མོའི་ས་ག་ལ་བ་དེར་འདོང་ངོ་། །ས་དེ་དག་ན་པི་བང་ཁོག་པ་ནི་བཻ་ཌཱུརྱ་གསེར་གྱི་འདབ་མས་ནི་བརྒྱན། གསེར་སྐུད་རིང་པོས་ནི་རྒྱུད་བྱས་པ་དང་། གསེར་ལས་བྱས་པའི་རྔ་དག་ལས་སྒྲ་སྙན་པ་དག་འབྱུང་ངོ་། །དེ་བཞིན་དུ་སྨྱུག་མའི་ནང་འདྲེས་པའི་སྦུ་གུ་རྣམ་པ་དུ་མ་དག་ཀྱང་ལྷ་མོ་དེ་དག་གིས་མཐོང་སྟེ། དེ་ལྟར་སིལ་དཀྲོལ་དང་། གླིང་བུ་དང་། སྒྲ་སྙན་པ་ལ་སོགས་པ་རོལ་མོའི་རྒྱུ་དུ་མ་དག་གིས་ཡང་དེ་དག་གི་ཡིད་རབ་ཏུ་དགའ་བར་བྱེད་དོ། །ཐམས་ཅད་རྒྱན་ཐམས་ཅད་ཀྱིས་བརྒྱན་པ་དེ་རྣམས་རོལ་མོའི་རྒྱུ་དེ་དག་བླངས་ནས། ཕན་ཚུན་ཡང་དག་པར་དགའ་བར་བྱ་བ་དང་། འདོད་ཆགས་སྣ་ཚོགས་སྐྱེད་པ་དང་། ཆགས་པ་མཉམ་པ་དང་། ཚང་ཚིང་ན་གནས་པ་མྱོག་ཅེས་བྱེད་པ་དང་། ཤིན་ཏུ་འདོད་ཆགས་སྐྱེད་པ་ཕུན་སུམ་ཚོགས་པ་བྱ་བའི་ཕྱིར་རོལ་མོ་དག་བྱེད་དོ། །དེ་ནས་ཡང་དེ་དག་གིས་རོལ་མོ་དེ་བྱས་ནས་དྲིལ་བུ་གཡེར་ཀ་ཡོད་པའི་ས་ག་ལ་བ་དེར་འདོང་ངོ་། །ས་དེ་དག་ན་དྲིལ་བུ་གཡེར་ཀ་སྒྲ་མང་པོའི་ཚོགས་དག་འཁྲོལ་ཏེ། གང་དག་རླུང་གིས་བསྐྱོད་པའི་སྒྲ་རྣམ་པ་བརྒྱ་ཕྲག་དུ་མ་དག་གྲག་གོ །དེ་དག་གིས་སྒྲ་དེ་ཐོས་ནས་ཡང་ཆ་བྱད་དང་། གཟུགས་དང་རྒྱན་སྣ་ཚོགས་ཐོགས་པ་རྣམས་ཤིན་ཏུ་དགའ་སྟེ། བྲོ་གར་བྱེད། དགོད་པར་བྱེད། གླུ་ལེན་ནོ། །སྒྲ་དེས་ཚིམ་ནས་ཡང་དེ་ནས་བབས་ཏེ། ངང་པ་དང་། ངུར་པས་མཛེས་པར་བྱས་པའི་རྫིང་ག་ལ་བ་དེར་འདོང་བར་བྱེད་
དེ། བྱ་ངང་པ་དང་། ཀཱ་རཎྜ་བ་དང་། ངུར་པ་དང་། གསེར་དང་། དངུལ་གྱི་མདོག་ལྟ་བུའི་བྱའི་ཚོགས་གཞན་རྣམས་ཀྱིས་ཀྱང་རྫིང་མཛེས་པར་བྱས་པ་དེ་དང་དེ་དག་ཏུ་ཆུ་ལ་རྩེ་བའི་ཕྱིར་ཞུགས་སོ། །སེར་སྣ་དང་ཕྲག་དོག་དང་བྲལ་བ་དེ་དག་ཐམས་ཅད་དེར་བབས་ནས། པད་མའི་སྡོང་བུ་གསེར་དང་དངུལ་དང་བཻ་ཌཱུརྱ་ལྟ་བུ་རྣམས་ཀྱིས་ཕན་ཚུན་རྡེག་པར་བྱེད་ལ། དེ་དག་ཡུན་རིང་དུ་ཅ་ཅོའི་སྒྲ་དང་། ཆུ་ཡན་ལག་བརྒྱད་དང་ལྡན་ཞིང་ཡོན་ཏན་ཐམས་ཅད་དང་ལྡན་པ་ལ་ཡུན་རིང་དུ་རྩེས། བྱའི་ཚོགས་རྣམས་དང་ཡང་ལྷན་ཅིག་རྩེས་ནས། དེ་ནས་ཡང་རྒྱགས་པ་དུ་མ་བྱེད་པ་རྒྱགས་པ་ལ་དགའ་བ། རྒྱགས་པ་དོན་དུ་གཉེར་བ། རྒྱགས་པའི་ངོ་བོ་རྒྱགས་པས་ངོམས་མི་མྱོང་བ། ཡུལ་ལ་བརྐམ་པ་དག་ས་རིས་གཞན་དག་ཏུ་འདོང་བར་བྱེད་དེ། ཚལ་མེ་ལོང་ཚལ་ཞེས་བྱ་བ་དེར་དོང་ངོ་། །དེར་བདག་ཉིད་ཀྱི་གཟུགས་བརྙན་ཆ་བྱད་དང་། རྒྱན་བཟང་པོས་བརྒྱན་པར་གྱུར་པ་མཐོང་སྟེ། བདག་ཉིད་ཀྱི་གཟུགས་བརྙན་ཡོན་ཏན་སྣ་ཚོགས་ཕུན་སུམ་ཚོགས་པ་དེ་ཉེ་བར་མཐོང་ཞིང་མེ་ལོང་གི་དཀྱིལ་འཁོར་སྣ་ཚོགས་སུ་རང་གི་ཡོན་ཏན་ཕུན་སུམ་ཚོགས་པ་དང་། ཆ་བྱད་དང་། རྒྱན་ཕུན་སུམ་ཚོགས་པ་མཐོང་ངོ་། །དེར་མཐོང་ནས་དེ་ནས་ཡང་གཟུགས་ཀྱིས་རྒྱགས་པ་བཅུ་འགྱུར་དུ་འཇུག་སྟེ། གང་གི་ཕྱིར་བུད་མེད་རྒྱགས་པས་མྱོས་པ་ནི་རྣམ་པ་གསུམ་སྟེ། འདི་ལྟ་སྟེ། གཟུགས་ཀྱིས་རྒྱགས་པ་དང་། སྐྱེས་པས་རྒྱགས་པ་དང་། ང་རྒྱལ་གྱིས་རྒྱགས་པའོ། །དེ་དག་རང་གི་གཟུགས་རྒྱགས་པས་མྱོས་པ་མཐོང་ནས། གཞན་དག་ལ་བུད་མེད་ཀྱི་གྲངས་སུ་ཆུང་ཟད་ཀྱང་མི་རྩིའོ། །དེ་ནས་ཡང་མེ་ལོང་གི་ས་དེ་ལས་གཞན་པ་དུས་ཚིགས་ཐམས་ཅད་ཅེས་བྱ་བའི་ཚལ་དུ་འདོང་བར་བྱེད་དེ། ཚལ་དེ་ན་དུས་ཚིགས་དྲུག་རྟག་ཏུ་ཡོད་ལ་འཁོར་ལོ་བཞིན་ཡོངས་སུ་འཁོར་བ་ཡིན་ཏེ། འདི་ལྟ་སྟེ། དགུན་དང་། དགུན་སྨད་དང་། དཔྱིད་དང་། སོས་ཀ་དང་། དབྱར་དང་། སྟོན་ཏོ། །ཚལ་དེ་ཀུན་ནས་དུས་ཚིགས་དང་འཐུན་པར་ས་རིས་དང་། ཚལ་གྱི་བྱ་ཁ་དོག་བཟང་པོ་དུ་མ་རྣམས་དང་དུས་ཚིགས་དང་འཐུན་པར་འགྲོ་བ་རྣམས་ཀྱིས་སྡུག་པར་བྱས་པའི་ཚལ་དེར་བདེ་བར་གནས་པར་བྱ་བའི་ཕྱིར་དོང་ངོ་། །ཕན་ཚུན་གྲོགས་བྱེད་པ། ཕན་ཚུན་ཐབ་མོ་དང་ཕྲག་དོག་གིས་མི་དགའ་
བ་མེད་པ། ཕན་ཚུན་འཛེམ་པ་མེད་པ་ཕན་ཚུན་སྡུག་ཅིང་བྱམས་པ། དེ་རྣམས་ཚལ་དེ་མཐོང་ནས་དུས་ཚིགས་གང་ཡིན་པ་དང་འདོད་པ་གང་ཡིན་པའི་ཚལ་དེར་དེ་རྣམས་དོང་སྟེ། ཚལ་དེ་ན་དུས་ཚིགས་དང་འཐུན་པར་རྩེ་དགའ་བར་བྱེད་དོ། །དུས་ཚིགས་ཀུན་སོ་སོར་བྱུང་བའི་ཚལ་ན་དུས་ཚིགས་སྣ་ཚོགས་སུ་བྱུང་བ་རྣམས་ཀྱིས་ཡིད་ལ་རྩེ་བའི་རྣམ་པ་སྐྱེས་པ་ལྷ་མོ་དེ་དག་དང་བྱའི་ཚོགས་དང་ལྷན་ཅིག་ཇི་སྲིད་གཞན་དུ་སྤྲོ་བ་མ་སྐྱེས་པ་དེ་སྲིད་དུ་དགའ་བར་བྱེད་རྩེ་བར་བྱེད་དོ། །དེ་ནས་ཡང་རྩེ་ཞིང་གནས་པ་ཡིད་རབ་ཏུ་དགའ་བ་དེ་དག་ཡང་ལྷའི་རྒྱལ་པོ་བརྒྱ་བྱིན་ག་ལ་བ་དེར་དོང་སྟེ་ཁྱིམ་ཐབ་དེ་མངོན་པར་མཐོང་ནས་ཆོ་ག་སྣ་ཚོགས་ལ་མཁས་པའི་ལྷ་མོ་དེ་རྣམས་ཀྱིས་ཀུན་ནས་ཡོངས་སུ་བསྐོར་ཏེ། བྲོ་གར་བྱེད། དགོད་པར་བྱེད། གླུ་དབྱངས་ལེན་ཏོ། །དེ་ལྟར་ལྷའི་རྒྱལ་པོ་བརྒྱ་བྱིན་གྱི་ཚལ་གཅིག་ལ་ཡོན་ཏན་གྱི་རྣམ་པ་ཕུན་སུམ་ཚོགས་པ་ཡིན་ཏེ། ལྷའི་རྒྱལ་པོ་བརྒྱ་བྱིན་གྱི་ཚལ་གཅིག་ནི་དེ་ལྟ་བུ་ཡིན་ནོ། །དེ་ནས་ཡང་དགེ་སློང་དེ་ལྷའི་རྒྱལ་པོ་བརྒྱ་བྱིན་གྱི་ཚལ་གཉིས་པ་ལ་རྟོག་པར་བྱེད་དེ། ཚལ་དེ་རྣམ་པ་ནི་དུ་ཡོད། མིང་ནི་ཇི་སྐད་བཏགས་ཞིག་གུ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚལ་ཀུན་དགའ་ཞེས་བྱ་བ་ཡོད་དེ། ཚལ་དེ་ན་ཡོན་ཏན་དུ་ཡོད་ཅིག་གུ་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་ཚལ་དེ་ནི་ངོ་བོ་ཉིད་ཀྱིས་ཀུན་དགའ་བ་ཡིན་ཏེ། ཚལ་དེ་ན་ལྷ་དང་ལྷ་མོའི་ཚོགས་རབ་ཏུ་དགའ་བས་ནི་ཀུན་དུ་གང་། ཐམས་ཅད་ནས་རྟག་ཏུ་དོག་ཅིང་ཕན་ཚུན་གྱི་གདོང་མཐོན་པོ་གཞན་དང་གཞན་འབྱེས་པ་སྐྱེད་པར་ལྷའི་རྒྱལ་པོ་བརྒྱ་བྱིན་ལྷའི་བུ་མོ་འབུམ་གྱིས་ཡོངས་སུ་བསྐོར་ཏེ། དགའ་སྤྱོད་ལ་གནས་པར་བྱ་བའི་ཕྱིར་འགྲོ་བར་བྱེད་དོ། །ལྷའི་དབང་པོ་བརྒྱ་བྱིན་དེ་འགྲོ་བ་ན་སྐྱེད་མོས་ཚལ་དུ་འགྲོ་བའི་ཤིང་རྟ་བརྒྱད་ཁྲི་བཞི་སྟོང་གི་རྒྱུ་བཻ་ཌཱུརྱ་ལས་བྱས་ཤིང་དྲིལ་བུ་གཡེར་ཀ་མང་པོ་འཕྱང་བ་ཁ་ཅིག་རྟ་མགོ་བོ་འཛམ་བུའི་ཆུ་བོའི་གསེར་གྱིས་བརྒྱན་ཅིང་། རྩིབ་ལོགས་དངུལ་གྱིས་གཏམས་ལ་རིན་པོ་ཆེ་སྣ་བདུན་གྱིས་མཛེས་པར་བྱས་པས་ཁྲིད། ཁ་ཅིག་ནི་ངང་པས་ཁྲིད། ཁ་ཅིག་ནི་ནམ་མཁའ་ལ་འགྲོ། ཁ་ཅིག་ནི་ས་ལ་འགྲོ་ལ། གླུ་
དབྱངས་དང་། སིལ་སྙན་དང་། རོལ་མོ་རྣམ་པ་སྣ་ཚོགས་ཀྱིས་བསྐོར་བའི་ལྷའི་གཙོ་བོ་དག་ཞུགས་ཏེ། བརྒྱ་བྱིན་གྱི་འཁོར་བྱས་ནས་དོང་ངོ་། །བལ་གླང་བརྒྱད་ཁྲི་བཞི་སྟོང་གི་ལུས་གསེར་གྱི་དྲ་བས་གཡོགས་ཤིང་། ལུས་ལ་དྲིལ་བུ་གཡེར་ཀ་ནི་འཕྱང་། ལུས་ལ་སྟན་ཁྲ་བོ་དང་གདིང་བས་ནི་གཡོགས། འགྲམ་པ་ལ་དངུལ་གྱི་ཐིག་ལེ་གསལ་བ་ནི་འཛག །ལྷའི་རོལ་མོའི་གླུ་དབྱངས་དག་ལེན་པ་ན། ལྷའི་གཙོ་བོ་དག་ཞོན་ཏེ། བརྒྱ་བྱིན་གྱི་ངོ་འབའ་ཞིག་ཏུ་ལྟ་བས་བརྒྱ་བྱིན་ཡོངས་སུ་བསྐོར་ནས་སྐྱེད་མོས་ཚལ་དུ་འདོང་ངོ་། །ལྷ་མོ་བརྒྱད་ཁྲི་བཞི་སྟོང་ཆ་བྱད་དང་རྒྱན་སྣ་ཚོགས་ཐོགས་ཤིང་ཁ་དོག་དང་། གཟུགས་སྣ་ཚོགས་སུ་འདུག་པ་དག་བརྒྱ་བྱིན་འབའ་ཞིག་ལྟ་ལ། ཁ་ཅིག་ནི་བྲོ་གར་བྱེད། ཁ་ཅིག་ནི་གླུ་ལེན། དེ་དག་གི་ནང་ན་ཁ་ཅིག་ནི་ཡན་ལག་ལྔ་དང་ལྡན་པའི་རོལ་མོ་བྱེད། ཁ་ཅིག་ནི་རྩེད་མོ་སྣ་ཚོགས་བྱེད་ཅིང་སྐྱེད་མོས་ཚལ་དུ་དགའ་སྤྱོད་བྱེད་དུ་འདོང་ངོ་། །བྲོ་གར་མཁན་ཆ་བྱད་རྣམ་བཞི་དང་། གཟུགས་དང་། ཆ་བྱད་སྣ་ཚོགས་དང་ལྡན་པ་དག་ཀྱང་བྲོ་གར་བྱེད། རྩེད་མོ་བྱེད་ཡོངས་སུ་སྤྱོད་པར་བྱེད་པ་དག་བརྒྱ་བྱིན་གྱི་ངོ་འབའ་ཞིག་ཏུ་ལྟ་ཞིང་སྐྱེད་མོས་ཚལ་ག་ལ་བ་དེར་དགའ་སྤྱོད་བྱེད་དུ་འདོང་སྟེ། ལྷའི་དབང་པོ་བརྒྱ་བྱིན་བདེ་སོགས་དང་ལྷན་ཅིག་དེ་དག་གི་ནང་དུ་ཞུགས་ནས། ཤིང་རྟ་རྩིབས་བརྒྱ་པ་བཻ་ཌཱུརྱ་དང་། གསེར་དང་། སྤུག་དང་། པད་མ་རཱ་ག་དང་། ཨན་ད་རྙིལ་དང་། མཐོན་ཀ་ཆེན་པོས་བརྒྱན་པའི་ཤིང་རྟ་གང་ཡིན་པ་དེ། ངང་པའི་ལུས་ནི་འཛམ་བུ་ཆུ་བོའི་གསེར། རྐང་པ་ནི་བྱི་རུ། མིག་ནི་རིན་པོ་ཆེ་ཀེ་ཀེ་རུ། ལུས་ནི་པད་མ་རཱ་ག །མཆུ་ནི་བྱི་རུ། སྒྲོ་ནི་མུ་ཏིག་གི་མདོག་ལྟ་བུ་སྟོང་ཕྲག་བརྒྱ་སྙེད་ཀྱིས་ཤིང་རྟ་དེ་འདྲེན་པར་བྱེད་དེ། བརྒྱ་བྱིན་གྱི་ཡིད་ལ་འདོད་པ་བཞིན་དུ་འགྲོ་བར་བྱེད་དོ། །ཤིང་རྟ་མཆོག་དེའི་ནང་ན་བརྒྱ་བྱིན་ལྷའི་རིན་པོ་ཆེ་སྣ་ཚོགས་ཀྱིས་བརྒྱན་ཅིང་། ཉི་མ་བརྒྱ་བས་ལྷག་པའི་གཟི་དང་ལྡན་པ་བདེ་སོགས་དང་ལྷན་ཅིག་ཏུ་སྐྱེད་མོས་ཚལ་ག་ལ་བ་དེར་འདོང་ངོ་། །ལྷ་མོ་ཐམས་ཅད་ཀྱི་ནང་ན་བདེ་སོགས་གཟུགས་དང་ཆ་བྱད་དང་། རྒྱན་བརྒྱ་འགྱུར་གྱིས་ཕུན་སུམ་ཚོགས་ལ་དེ་རིན་པོ་ཆེས་བརྒྱན་ཏེ། བརྒྱ་བྱིན་གྱི་སྟན་ཕྱེད་ལ་འདུག་ནས། སྐྱེད་མོས་ཚལ་ག་ལ་བ་དེར་འདོང་ངོ་། །སུམ་
ཅུ་རྩ་གསུམ་གྱི་ལྷ་དེ་དག་ཐམས་ཅད་དེ་ལྟར་ལྷའི་བདེ་བ་དང་ནི་ལྡན། ལྷའི་སྒྲ་དང་། རེག་པ་དང་། རོ་དང་། གཟུགས་དང་། དྲིའི་རེག་པས་མྱོས་ཤིང་ལྷའི་དབང་པོ་བརྒྱ་བྱིན་ལྷ་ཀུན་གྱིས་ཡོངས་སུ་བསྐོར་ཏེ། ཚལ་དང་ཉེ་བའི་ཚལ་དག་ཡང་དག་པར་ལྟ་བར་བྱེད་ལ་གསེར་གྱི་ཤིང་རྟའི་ནང་དུ་ཞུགས་ཏེ། བདེ་སོགས་དང་ལྷན་ཅིག་སྔ་མ་བཞིན་དུ་ཀུན་དགའི་ཚལ་ག་ལ་བ་དེར་འདོང་ངོ་། །ལྷའི་བདག་པོ་དེ་བདེ་བ་རྣམ་པ་བརྒྱ་སྟོང་ཕྲག་དུ་མ་དག་ཉེ་བར་སྤྱོད་པ་ན། ཤིང་རྟ་དང་། གླང་པོ་ཆེ་དང་། ལྷ་དང་། ལྷའི་བློན་པོ་གླུ་དང་། སིལ་སྙན་དང་། དབྱངས་དང་། རོལ་མོའི་སྒྲ་རྣམས་ཀྱིས་མངོན་པར་མཆོད་ཅིང་ཀུན་དགའི་ཚལ་ག་ལ་བ་དེར་གནས་པར་བྱ་བའི་དོན་དུ་འདོང་ངོ་། །བརྒྱ་བྱིན་དེ་ལྟར་འགྲོ་བ་ན་གང་དེའི་ཚལ་དེ་ན་ལྷ་མོ་སྒེག་མོ་འཁོད་པ་དེ་དག་གིས་གླུ་དང་། རོལ་མོའི་སྒྲ་དང་། སིལ་སྙན་སྣ་ཚོགས་ཐོས་པ་དེ་དག་ལྷ་གཞན་རྣམས་དང་ལྷན་ཅིག་ཏུ་དེ་ཐོས་ཏེ་ཡིད་རབ་ཏུ་དགའ་ནས་རྒྱུག་པར་བྱེད་དོ། །དེ་དག་ལག་ན་པད་མ་ཐོགས་ཤིང་སིལ་སྙན་སྣ་ཚོགས་དང་། གླུ་དབྱངས་ཉེ་བར་ལེན་ལ་ཚལ་དེ་ནས་འབྱུང་བར་བྱེད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་དེ་དག་མཐོང་ནས་རང་གི་ལྷ་དག་ལ་སྨྲས་པ། ཀྱེ་ལྷ་རྣམས་ལྷ་མོ་འདི་དག་ནི་ཀུན་དགའི་ཚལ་ནས་ང་མཐོང་སྟེ་བསུར་འོངས་ལ། སིལ་སྙན་དང་། རོལ་མོའི་སྒྲ་བྱུང་བ་དང་། གཞན་ཡང་རིན་པོ་ཆེའི་ཆ་བྱད་དང་། གཟུགས་རྣམ་པ་དུ་མ་ཡོད་པ་དེ་དག་ལ་ལྷ་རྣམས་ལྟོས། གང་ལྷ་མོ་དེ་དག་དང་བདག་ཅག་ལྷན་ཅིག་ལྷའི་ཚལ་སྐྱེད་མོས་ཚལ་དུ་རྩེ་ཞིང་དགའ་སྤྱོད་བྱེད་དུ་འདོང་ངོ་། །དེ་ནས་ལྷའི་དབང་པོ་བརྒྱ་བྱིན་གྱི་ཚིག་དེ་ཐོས་ནས་ལྷ་རྣམས་ཀྱིས་ཚིག་འདི་སྐད་ཅེས་སྨྲས་སོ། །ལྷའི་དབང་པོ་ལྷ་མོ་འདི་དག་ཐམས་ཅད་ནི་ཁྱོད་ཀྱི་ལགས་ཏེ། སྐྱབས་ཁྱོད་ལགས། རྟེན་ཁྱོད་ལགས། མགོན་ཁྱོད་ལགས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་ཚིག་འདི་སྐད་ཅེས་སྨྲས་སོ། །འདི་དག་གི་གཙོ་བོ་ནི་ང་མ་ཡིན་ཏེ། རྟེན་ང་མ་ཡིན། སྐྱབས་ང་མ་ཡིན། འདི་དག་ནི་ངའི་མ་ཡིན་ནོ། །འདི་དག་ལས་ཀྱི་མཐུས་རབ་ཏུ་རྒྱུག་པ་ཡིན་ཏེ། བདག་པོ་ལས་ཡིན། རྟེན་ལས་ཡིན། རྟོན་པ་ལས་ཡིན་ཏེ། ལས་ངན་པ་དང་། འབྲིང་དང་། བཟང་པོ་གང་ཡིན་པ་དེ་དག་གིས་དེ་ལྟར་འགྱུར་ལ། ལས་ཀྱི་དབང་དེ་དག་གིས་ངན་པ་དང་།
འབྲིང་དང་། བཟང་པོར་བྱས་པ་ཡིན་གྱི་ངའི་མཐུ་ནི་མ་ཡིན་ནོ། །དེ་ནས་དེའི་ཚེ་འདི་ལྟར་ལྷ་རྣམས་ཀྱི་དབང་པོས་ཚིགས་སུ་བཅད་དེ་སྨྲས་པ། ལས་ངན་པས་ནི་ལུས་ཅན་རྣམས། །འགྲོ་བ་དག་ནི་ངན་པར་འགྱུར། །འབྲིང་དག་གིས་ནི་འབྲིང་དུ་མཐོང་། །དེ་བས་བཟང་བ་མི་རྣམས་སོ། །གང་གིས་གང་དུ་གང་གི་ཚེ། །གང་བྱས་ལས་ནི་རྗེས་མྱོང་བ། །དེ་ཡིས་དེར་ནི་དེ་ཡི་ཚེ། །ལས་དེ་ལུས་ལ་རྣམ་སྨིན་འགྱུར། །ལྷ་ཁང་འོད་ཀྱི་ཕྲེང་བ་ཅན། །བདེ་བའི་རྣམ་པས་རྩེ་བྱེད་པ། །དེ་ནི་དགེ་བའི་འབྲས་བུར་མཐོང་། །ཁྱད་པར་དུ་ནི་དྲི་མ་མེད། །མི་ནི་ལས་དག་གང་བྱེད་པ། །དགེ་འམ་ཡང་ན་མི་དགེ་བྱེད། །དེ་ཡི་འབྲས་བུ་དེ་ཚེ་མཐོང་། །བདེ་འམ་ཡང་ན་མི་བདེར་འགྱུར། །བདེ་བའི་རྣམ་པ་འདི་རྣམས་ཀྱིས། །ལྷ་དག་དུ་མར་རྩེ་བ་གང་། །དེ་རྒྱུ་ང་ཡི་མ་ཡིན་ཏེ། །རྒྱུ་དེ་སྔོན་ནི་བྱས་པ་ཡིན། །དེ་ནས་ལྷ་དེ་རྣམས་ཀྱིས་བརྒྱ་བྱིན་དེའི་ཁ་ནས་ཚིགས་བཅད་དེ་དག་ཐོས་ཏེ་རྗེས་སུ་ཡི་རང་ལ་སྤྱི་བོས་བླངས་ནས། ཡང་སྐྱེད་མོས་ཚལ་དུ་གནས་པར་བྱ་བའི་ཕྱིར། སྐྱེད་མོས་ཚལ་ག་ལ་བ་དེར་འདོང་ངོ་། །དེ་ནས་ལྷ་མོ་སྟོང་ངམ། སྟོང་ཕྲག་བརྒྱ་དེ་དག་སོ་སོའི་ལག་པ་པད་མས་བྲེལ་ཅིང་། ཆ་བྱད་དང་། གཟུགས་དང་། རྒྱན་སྣ་ཚོགས་ཐོགས་པ་ཡིན་ཏེ། འདི་ལྟར་ལྷ་མོ་དེ་དག་ཕན་ཚུན་སོ་སོ་ན་ཆ་བྱད་དང་། གཟུགས་དང་། འགྲོས་དང་། གླུ་དབྱངས་དང་། རོལ་མོ་བྱེད་པ་དག་མི་འདྲ་བ་ཡིན་ནོ། །དེ་ལྟར་དགེ་བའི་ལས་དུ་མས་སྤྲུལ་པའི་ལྷ་མོ་བརྒྱའམ་སྟོང་དེ་དག་ཤིན་ཏུ་མཁས་པས་སྤྲུལ་པ་ཡིན་ནོ། །དེ་ནས་དེ་དག་ཐམས་ཅད་ལྷའི་དབང་པོ་བརྒྱ་བྱིན་ག་ལ་བ་དེ་ལོགས་སུ་ཕྱོགས་ཤིང་བྲོ་གར་བྱེད་ལ། ཀུན་དགའི་ཚལ་དེ་ག་ལ་བ་དེར་འདོང་བར་བྱེད་དོ། །ཚལ་དེར་སྔར་འཇུག་པ་ན་དངུལ་གྱི་ཤིང་ལྗོན་པ་རྣམས་དང་། དངུལ་གྱི་འདབ་མ་དང་། དངུལ་གྱི་ས་གཞི་དང་། དངུལ་གྱི་མདོག་ལྟ་བུ་རྣམས་ཀྱིས་མཛེས་པར་བྱས་པ། བྱ་ཐམས་ཅད་ཀྱང་དངུལ་གྱི་བྱ་སྟེ། བྱའི་ཚོགས་ཀྱི་རྣམ་པས་ཀུན་དུ་གང་ལ། སྒྲ་རྣམ་པ་སྣ་ཚོགས་འབྱིན་པས་མཛེས་པར་བྱས་པ་དང་པོ་ཉིད་དུ་ལྷའི་དབང་པོ་བརྒྱ་བྱིན་ཞབས་འབྲིང་བ་དང་། ལྷན་ཅིག་འཇུག་པར་བྱེད་དོ། །དེ་འཇུག་པ་ན་རིན་པོ་ཆེ་རྣམ་པ་སྣ་ཚོགས་ཀྱིས་
བརྒྱན་པའི་འོད་དང་། ཚལ་དངུལ་གྱིས་བརྒྱན་པའི་འོད་གང་ཡིན་པའི་འོད་གཉིས་པོ་དེ་དག་ཕན་ཚུན་འཁྲིལ་བ་ལྟ་བུར་འབྱུང་ཞིང་འོད་དག་གིས་ནམ་མཁའ་བརྒྱན་པ་ལྟ་བུར་ཡང་འབྱུང་ངོ་། །བརྒྱ་བྱིན་དེ་ཡང་ཡིད་རབ་ཏུ་དགའ་ལ། ལྷ་མོ་དེ་དག་སོ་སོའི་གླུ་ཤིན་ཏུ་སྙན་ཅིང་སྙོམས་པ་ལེན་ཏེ། སིལ་སྙན་ཡན་ལག་ལྔ་དང་ལྡན་པ་ཕྱད་པར་བྱེད་དོ། །ཤིང་རྟ་བརྒྱད་ཁྲི་བཞི་སྟོང་དང་། དེ་བཞིན་དུ་གླང་པོ་ཆེ་བརྒྱད་ཁྲི་བཞི་སྟོང་རྣམས་ཀྱང་སྔ་མ་བཞིན་ཏེ། ནོར་བུ་དང་། དྲིལ་བུ་གཡེར་ཀ་དང་། གླིང་བུའི་སྒྲ་རྣམས་ཐོས་ནས། ལྷ་མོ་སྟོང་ཕྲག་དུ་མ་རྣམས་ཀྱིས་བསྟོད་ཅིང་ལྷ་མོ་འབུམ་ཕྲག་དགུ་བཅུ་རྩ་དགུས་ཡོངས་སུ་བསྐོར་བ་ཡིན་ཏེ། སུམ་ཅུ་རྩ་གསུམ་གྱི་དབང་ཕྱུག་གི་ལུས་དང་སེམས་ཀྱི་བདེ་བ་གང་ཡིན་པ་དེ་ནི་དཔེ་བྱ་བར་སླ་བ་མ་ཡིན་ནོ། །དེ་ཅིའི་ཕྱིར་ཞེ་ན། སུམ་ཅུ་རྩ་གསུམ་གྱི་དབང་ཕྱུག་གི་ལྷའི་གནས་པ་དང་། ཁ་ཟས་ཀྱི་བདེ་བ་དེ་ནི་གཞན་དང་མི་འདྲའོ། །དེ་ནས་ལྷའི་དབང་པོ་བརྒྱ་བྱིན་ལྷའི་འདོད་པའི་ཡོན་ཏན་ལྔ་འབྱོར་པ་དངུལ་གྱི་ཚལ་དེའི་ནང་དུ་ཞུགས་ནས། ལྷའི་ཚོགས་དང་ལྷ་མོའི་ཚོགས་ཐམས་ཅད་དང་བཅས་པ་ཡུན་རིང་དུ་རྩེ་བར་བྱེད། ཡོངས་སུ་སྤྱོད་པར་བྱེད་དེ། ཡུལ་གྱི་བདེ་བ་དེས་མཆོག་ཏུ་བདེའོ། །དེ་ནས་ཡང་ལྷའི་དབང་པོ་བརྒྱ་བྱིན་རྩེ་ཞིང་གནས་པའི་དོན་དུ་ཡང་ལྷ་མོའི་ཚོགས་ཐམས་ཅད་དང་། ཤིང་རྟ་དང་། གླང་པོ་ཆེ་རྣམས་དང་བཅས་པ་སྔ་མ་བཞིན་ཚལ་དེ་ག་ལ་བ་དེར་འདོང་ངོ་། །དེར་ཕྱིན་ནས་གསེར་གྱི་ཚལ་གཉིས་པ་གསེར་བཙོ་མའི་ཁ་དོག་ལྟ་བུ་དང་དེ་བཞིན་དུ་འབྲས་བུ་རྣམས་ཀྱིས་མཛེས་པར་བྱས་པ་མཐོང་ངོ་། །མི་ལྔའི་ཞེང་གི་ཚད་ཙམ་གྱི་འབྲས་བུ་རོ་སྦྲང་རྩི་ལྟར་མངར་ལ་དྲིའི་རྣམ་པ་ཕུན་སུམ་ཚོགས་པའི་འབྲས་བུ་དེ་གང་ཟོས་ན། ཤིན་ཏུ་དྲེགས་པ་སྐྱེ་བར་འགྱུར་བ་མཐོང་ནས་ཡལ་ག་བཀུག་སྟེ་འབྲས་བུ་དེ་དག་གླང་པོ་ཆེ་རྣམས་ཀྱིས་ཟ་བར་བྱེད་དོ། །དེ་ནས་འབྲས་བུ་ཟོས་པའི་གླང་པོ་ཆེ་དེ་དག་མྱོས་ཏེ་འགྱིང་ཞིང་འགྲོ་བ་རྣམས། ཇི་ལྟར་ལྷ་རྣམས་ཀྱང་། ཀྱེ་ཨེ་མ་གླང་པོ་ཆེ་མྱོས་ཤིང་འགྱིང་ལ་འགྲོ་བ་རྣམས་འབྲས་བུའི་རོ་ཐམས་ཅད་ཟོས་ནས་མྱོས་ཏེ། རབ་ཏུ་གར་བྱེད་པ་ངོ་མཚར་དུ་བྱེད་པ་དེ་ལྟར་སིལ་སྙན་གྱི་སྒྲ་དེས་ལྷན་ཅིག་
གར་བྱེད་དོ། །དེ་བཞིན་དུ་གསེར་གྱི་ཚལ་དེ་ན་བྱའི་ཚོགས་དུ་མ་སྒྲ་འབྱིན་ལ། ཚལ་དེ་ན་བྱ་དངུལ་གྱི་ཁ་དོག་ཅན་དེ་དག་དེ་རྣམས་ལ་ཆགས་ཤིང་འདུག་པས་ཤིན་ཏུ་མཛེས་པར་བྱས་སོ། །ལྷའི་དབང་པོ་བརྒྱ་བྱིན་ཡང་ལྷ་མོ་དེ་དག་དང་། ལྷན་ཅིག་ལྷ་དེ་དག་དང་ཡང་ལྷན་ཅིག་ལྷའི་བུ་མོ་བདེ་སོགས་དང་ཡང་བདག་ཉིད་ལྷན་ཅིག་ཏུ་དགའ་བར་བྱེད། ཡོངས་སུ་སྤྱོད་པར་བྱེད་རྩེ་བར་བྱེད་ཚིམ་པར་བྱེད་དོ། །ལྷ་དེ་དག་ཀྱང་རང་གི་སླས་རྣམས་ཀྱི་ནང་ན་དགའ་བར་བྱེད། ཡོངས་སུ་སྤྱོད་པར་བྱེད། གླུ་དབྱངས་ལེན། བྲོ་གར་བྱེད། དགོད་པར་བྱེད་དེ། ལེགས་པ་བྱས་པའི་ལྷ་རྣམས་ཕན་ཚུན་ཕྲག་དོག་དང་། སེར་སྣ་དག་མེད་པར་རྩེད་མོ་བྱེད་དོ། །དེ་ནས་གསེར་གྱི་ཚལ་དེའི་ནང་ན་ཆུ་བསིལ་བ་ཞེས་བྱ་བའི་རྫིང་བུ་གཉིས་པ་ཡོད་དེ། དེ་ཡང་གསེར་དང་བཻ་ཌཱུརྱའི་པད་མ་རྣམས་ཀྱིས་བཀྲ་བར་བརྒྱན་པ་ཡིན་ལ། སུམ་ཅུ་རྩ་གསུམ་ན་གནས་པའི་ལྷ་རྣམས་དང་། ལྷའི་འདུན་ས་ཆོས་བཟང་ན་གནས་པ་བརྒྱ་བྱིན་གྱི་སྔོན་དུ་འགྲོ་བ་གང་ཡིན་པ་དེ་དག་གིས་ཡོངས་སུ་བསྐོར་ཏེ། རྫིང་དེ་དག་གི་འགྲམ་ན་ལྷ་མོའི་ཚོགས་རྣམས་དང་ལྷན་ཅིག་སིལ་སྙན་ཡན་ལག་ལྔ་དང་ལྡན་པ་རྣམས་ཀྱིས་རྩེ་བར་བྱེད་དེ། ཡོངས་སུ་སྤྱོད་པར་བྱེད་དོ། །དེ་ནས་ཡང་ཁང་པ་ཆོས་བཟང་གི་ནང་ན་ལྷ་འཁོད་པ་དེ་དག་ཚལ་ཀུན་དགའ་ག་ལ་བ་དེར་འདོང་ངོ་། །ཚལ་དེའི་ནང་ན་བཻ་ཌཱུརྱའི་ཤིང་ལྗོན་པས་མཛེས་པར་བྱས་ཤིང་། གསེར་གྱི་མདོག་གི་འབྲས་བུས་བརྒྱན་པ་ཡིན་ལ། ལྷའི་འབྲས་བུ་དེ་དག་གི་ནང་དུ་ཁུ་བ་ཞིམ་པོས་ཇི་ལྟར་གང་བ་ནི་འཛམ་བུའི་གླིང་ན་ནཱ་ཌི་ཀེ་རྱ་དང་། པ་ན་ས་བཞིན་ནོ། །ཤུན་པ་སྲ་བའི་ནང་ན་འབྲས་བུ་མངར་བ་ཞེས་བྱ་བ་དྲི་ཞིམ་ལ། མདོག་བཟང་པོ་མང་བ་ཡོད་དེ། དེ་ནས་ལྷ་དེ་དག་གིས་འབྲས་བུ་དེ་བླངས་ནས་གཤགས་ཏེ་འཐུང་ངོ་། །སྦྲང་རྩི་བས་ལྷག་པའི་རོ་ཡོད་པ་འཐུངས་ནས་ཀྱང་མྱོས་པའི་ཉེས་པ་དང་། འབྲེལ་བས་མྱོས་སོ། །དེ་ནས་ལྷ་དག་མྱོས་པ་རྣམ་པ་གསུམ་གྱིས་མྱོས་པར་འགྱུར་ཏེ། འདི་ལྟ་སྟེ། བུད་མེད་ཀྱིས་མྱོས་པ་དང་། འབྲས་བུའི་ཁུ་བས་མྱོས་པ་དང་། ལྷའི་འདོད་པའི་ཡོན་ཏན་ལྔ་རྣམས་ཀྱིས་
མྱོས་པ་ཡིན་ཏེ། དེ་ལྟར་ལྷ་རྣམས་ལྷ་མོའི་ཚོགས་དག་དང་ལྷན་ཅིག་མྱོས་པ་རྣམ་པ་གསུམ་གྱིས་མྱོས་སོ། །ལྷའི་དབང་པོ་བརྒྱ་བྱིན་ཡང་བརྒྱ་བྱིན་གྱི་འདུན་སར་འགྲོ་བ་དང་ལྷན་ཅིག་བདུད་རྩི་ལ་ཟ་སྟེ། རང་གི་ལས་ཀྱི་འབྲས་བུ་ཚོང་པ་ལྟ་བུས་བསྒྲུབས་པའི་བདུད་རྩི་དེ་བླངས་ནས་ཟ་བར་བྱེད་དོ། །བརྒྱ་བྱིན་ལྷའི་ཚོགས་དང་བཅས་པ་ཐམས་ཅད་ཀྱིས་ཡོངས་སུ་བསྐོར་ནས་ཡུལ་ནས་ཡུལ། གནས་ནས་གནས་སུ་སོང་སྟེ། དགའ་བར་བྱེད། རྩེ་བར་བྱེད། ཡོངས་སུ་སྤྱོད་པར་བྱེད་དོ། །བཻ་ཌཱུརྱའི་ཚལ་དེ་དག་ཐམས་ཅད་བྱ་དང་། བུང་བ་དང་། དྲིལ་བུ་གཡེར་ཀ་དང་། རོ་སྣ་ཚོགས་དག་གིས་ཉམས་དགའ་བ་ཡིན་ཏེ། ཚལ་དེར་ཡུན་རིང་དུ་དགའ་བར་བྱས་སོ། །དེ་ནས་ཡང་ལྷའི་དབང་པོ་བརྒྱ་བྱིན་ལྷའི་ཚོགས་དེ་དག་ཉིད་དང་། ལྷའི་འདུན་ས་ཆོས་བཟང་དུ་འཇུག་པར་བྱེད་དོ། །དེ་ནས་ཡང་ལྷའི་འདུན་ས་ཆོས་བཟང་ན་ལྷའི་ཚལ་གསུམ་པ་དཔེ་མེད་པ་ཞེས་བྱ་བ་ཡོད་དེ། ཚལ་ངོ་བོ་ཉིད་ཀྱིས་དཔེ་མེད་པ་གང་ཡིན་པ་དེར་ལྷའི་རྒྱལ་པོ་བརྒྱ་བྱིན་གྱི་བུ་ལྔ་བརྒྱ་རང་གི་སླས་ཀྱིས་ཡོངས་སུ་བསྐོར་ནས་རྩེ་བར་བྱེད། ཡོངས་སུ་སྤྱོད་པར་བྱེད་དེ། འདི་དག་ནི་འབྱོར་པ་ཡིན་ནོ། །དེའི་འོག་ཏུ་རྒྱས་པ་ནི་འདི་ལྟ་སྟེ། ལྷའི་དབང་པོ་བརྒྱ་བྱིན་གྱི་བུ་དེ་དག་འདི་ལྟ་བུ་ཡིན་ཏེ། ཐམས་ཅད་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་ཐམས་ཅད་ཡང་དག་པའི་ལྟ་བ་དང་ལྡན་པ། ཡང་དག་པའི་ལྟ་བ་སྔར་བླངས་པའི་ལྷ་རྣམས་ལྷ་དང་ལྷ་མ་ཡིན་ལས་རྣམ་པར་རྒྱལ་བ་འཐོབ་པ་ཐམས་ཅད་མར་འཛིན་པ། ཕར་འཛིན་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། ཕན་ཚུན་ཀུན་ཡིད་འཐུན་པར་གྱུར་པ་ཡིན་ལ་དེ་དག་རེས་འགའ་འདི་སྙམ་དུ་འདི་ལྟར་བདག་ཅག་ངེས་པར་སྐྱེད་མོས་ཚལ་དཔེ་མེད་པ་ཞེས་བྱ་བ་དེར་དགའ་སྤྱོད་བྱེད་དུ་བདག་ཅག་ལྷ་མོའི་ཚོགས་དང་བཅས་པས་ཡོངས་སུ་བསྐོར་ཏེ་འདོང་བར་བྱའོ་སྙམ་མོ། །དེ་ལྟར་དེ་དག་ཐམས་ཅད་བསམས་ནས་སྐྱེད་མོས་ཚལ་དཔེ་མེད་པ་ག་ལ་བ་དེར་འདོང་ངོ་། །དེ་ལྟར་ལྷའི་བུ་རེ་རེ་དག་གི་ལྷ་མོ་བྱེ་བ་ཡོད་པ་དེ་དག་གཟུགས་དང་། ལང་ཚོ་ཕུན་སུམ་ཚོགས་པའི་ཕན་ཚུན་གྱི་བྱ་བ་གཅིག་པུ་
ནི་རྒྱགས་པར་གནས་པ། རྒྱགས་པ་ལྷུར་བྱེད་པ་རྟག་ཏུ་འཐུན་པ་ཡིན་ཏེ། ལྷའི་དབང་པོ་བརྒྱ་བྱིན་ག་ལ་བ་དེར་དོང་ནས་ལྷ་འདི་ལྟར་བདག་ཅག་སྐྱེད་མོས་ཚལ་དེར་གནས་པར་བགྱི་བའི་སླད་དུ་སྐྱེད་མོས་ཚལ་དཔེ་མ་མཆིས་པར་མཆི་བར་བགྱིའོ། །ལྷ་སྐྱེད་མོས་ཚལ་དཔེ་མ་མཆིས་པ་དེར་བདག་ཅག་དང་ལྷན་ཅིག་གནས་པར་མཛད་པའི་སླད་དུ་གཤེགས་པ་ནི་འོས་པ་ལགས་ན་དགོངས་སུ་གསོལ། བརྒྱ་བྱིན་གྱིས་སྨྲས་པ། དེ་ལྟ་མ་ཡིན་ནོ། །སྐྱེད་མོས་ཚལ་གྱི་དགའ་སྤྱོད་ནི་ངས་བྱས་ཟིན་ཏེ། ཆོས་ཀྱི་རྗེས་སུ་ཆོས་བསྒྲུབས་པ་དང་། འདུན་པ་སྔོན་དུ་བཏང་བའི་ཕྱིར་བདག་ཅག་གི་དོན་རྗེས་སུ་བསྒྲུབ་པར་བྱའོ། །ངས་ནི་ལྷ་རྣམས་ཀྱི་བག་ཡོད་པས་སྐྱེད་མོས་ཚལ་དུ་དགའ་སྤྱོད་བྱས་ནས་སླར་འོངས་པ་ཡིན་ནོ། །ལྷ་རྣམས་ནི་བག་མེད་པའི་ཉེས་པས་ཉོན་མོངས་པ་ཡིན་ཏེ། དེ་ལྟར་བག་ཡོད་པར་བྱ་ཞིང་དེ་ལྟ་བས་ན་བག་མེད་པའི་ཉེས་པའི་དུག་མི་བཟད་པ་སྤོངས་ཤིག་ཅེས་སྨྲས་སོ། །འདིར་ཚིགས་སུ་བཅད་པ། བག་ཡོད་བདུད་རྩིའི་གནས་ཡིན་ཏེ། །བག་མེད་འཆི་བའི་གནས་ཡིན་ནོ། །བག་ཡོད་འཆི་བར་མི་འགྱུར་ཏེ། །བག་མེད་པ་ནི་རྟག་ཏུ་འཆི། །བག་ཡོད་འཆི་མེད་གཞི་ཡིན་ཏེ། །བག་མེད་པ་ནི་འཆི་བའི་གཞི། །བུ་དག་བདག་ནི་བག་ཡོད་པས། །ལྷ་རྣམས་ཀྱི་ནི་གཙོ་བོར་གྱུར། །དེ་ནི་བདག་སྟེ་བདེ་གཤེགས་བཀའ། །བུ་དག་བདག་གིས་བསྒྲུབ་པར་བྱ། །བདག་གིས་སྡོམ་བརྩོན་ཅན་གྱི་བཀའ། །ནམས་ཀྱང་འདའ་བ་མི་བྱ་སྟེ། །ཐུབ་པའི་བཀའ་ལས་འདའ་བ་གང་། །འདོད་པ་ཡིས་ནི་རྨོངས་པ་ཡིན། །སྡུག་བསྔལ་དེ་ལས་ཐར་མེད་དེ། །རྟག་ཏུ་སྡུག་བསྔལ་རྗེས་སུ་འགྲོ། །དེ་ལྟར་ལྷའི་དབང་པོ་དེས་བུ་དེ་དག་ལ་བསྒོ་ནས། རང་གི་གནས་ལྷའི་འདུན་ས་ཆོས་བཟང་དུ་ཞུགས་སོ། །དེ་ནས་བརྒྱ་བྱིན་གྱི་བུ་ཡིད་རབ་ཏུ་དགའ་ཞིང་ཕན་ཚུན་ནང་འཐུན་པ་རྣམས་རང་གི་གནས་ལྷའི་གསེར་བཟང་པོ་ལས་བྱས་ཤིང་རྒྱན་གྱིས་བརྒྱན་པ། གླུ་དབྱངས་དང་། རོལ་མོའི་སྒྲ་འབྱིན་པ། རྣམ་པ་སྣ་ཚོགས་ཕན་ཚུན་བརྒྱན་པའི་བརྒྱ་བྱིན་གྱི་གནས་ག་
ལ་བ་དེར་འཇུག་གོ །ཞུགས་ནས་ཀྱང་འདི་ལྟར་བདག་ཅག་ནི་སྐྱེད་མོས་ཚལ་དུ་དགའ་སྤྱོད་བྱ་བའི་ཕྱིར། སྐྱེད་མོས་ཚལ་དཔེ་མེད་པར་དགའ་སྤྱོད་བྱེད་དུ་འདོང་ངོ་ཞེས་སྨྲས་སོ། །དེ་ནས་ལྷའི་བུ་གཞོན་ནུ་བདུན་ཁྲི་དག་ཁ་ཅིག་ནི་གསེར་གྱི་ཤིང་རྟ་ལ་ཞོན། ཁ་ཅིག་ནི་ལྷའི་བྱའི་སྟེང་དུ་ཞོན། ལྷ་མོ་དག་རྗེས་སུ་འགྲོ་ཞིང་ལྷ་མོ་ཁ་ཅིག་ནམ་མཁའ་ལ་འགྲོ་ཁ་ཅིག་ལྷ་མོ་དང་ལྷའི་ཚོགས་ཀྱིས་ཡོངས་སུ་བསྐོར་ཏེ། པད་མ་མཆོག་གི་ནང་ནས་འགྲོ་ལ། བདེ་བ་མཆོག་རྗེས་སུ་མྱོང་ཞིང་། རོལ་མོ་དང་། གླུ་དབྱངས་ལེན་པ་དག་དང་ལྷན་ཅིག་ཚལ་དཔེ་མེད་པ་ག་ལ་བ་དེར་འདོང་བར་བྱེད་དོ། །དེ་ནས་བརྒྱ་བྱིན་གྱི་བུ་དེ་རྣམས་ཀྱི་ལུས་ལྷའི་ཕྲེང་བས་བརྒྱན་ཅིང་ལྷའི་ཙན་དན་གྱིས་བསྐུས་ཏེ། རང་གི་འོད་ཁ་ཅིག་ནི་ཉི་མའི་འོད་དང་འདྲ། ཁ་ཅིག་ནི་ཟླ་བའི་འོད་དང་འདྲ། ཁ་ཅིག་གཟའ་དང་སྐར་མའི་འོད་དང་འདྲ་སྟེ། ཇི་ལྟར་ལས་དག་བྱས་པ་བཞིན་མཛེས་ཤིང་། སྐྱེད་མོས་ཚལ་ཤིན་ཏུ་གང་བ་དཔེ་མེད་པ་ག་ལ་བ་དེར་འདོང་བར་བྱེད་དེ། གཅིག་ལ་གཅིག་ལེགས་པར་བྱ་བ་ལ་གཞོལ་ཞིང་སྡུག་པ་ལྷའི་ཡུལ་དག་ཉེ་བར་སྤྱོད་བཞིན་དུ་ཚལ་དེར་ཞུགས་སོ། །ཚལ་དེ་ཡང་ངོ་བོ་ཉིད་ཀྱིས་དཔེ་མེད་པ་ཡིན་ཏེ། དེའི་ཕྱོགས་འགའ་ཁོ་ན་ཞིག་དཔེར་གཟུང་ཞིང་བྱ་ན་ཚལ་དེར་ཞུགས་ན་དེའི་ཚེ་དྲིའི་རྣམ་པ་དཔེ་མེད་པ་རབ་ཏུ་ལྡང་སྟེ། གང་ཙན་དན་ས་མཆོག་གི་དྲི་གཞན་བཅུ་དྲུག་གི་ཆར་ཡང་མི་ཕོད་དོ། །དེ་ལྟར་དྲི་དེ་ཡིད་དུ་འོང་སྟེ། སྣོམས་པ་གང་ཡིན་པ་དེ་ཡང་བདེ་བ་དང་ལྡན་པའི་རྣམ་པ་དེ་ལྟ་བུ་ཡིན་ནོ། །དེར་དེ་དག་ཕན་ཚུན་ངོ་མཚར་སྐྱེ་བར་འགྱུར་ཏེ། བདག་ཅག་གི་བདེ་བ་མ་ཡིན་ནོ་སྙམ་ནས། སྐོམ་འཐུངས་ཏེ་ཚལ་དེར་ཞུགས་སོ། །དེ་ནས་ཞུགས་པ་དང་ཚལ་དེ་དག་གི་དང་པོ་བསྟན་པ་ནི་དགེ་བའི་ལས་འབད་པ་དག་གིས་བསྐྱེད་པའི་ཤིང་ལྗོན་པའི་ཆ་སྡུག་པ་ཡིན་ཏེ། ཚལ་དེ་ན་ཤིང་ལྗོན་པའི་སྡོང་པོ་རྣམས་ཀྱི་ཆ་སྡུག་པར་བྱས་པ་ཡིན་ནོ། །དེ་དག་བརྒྱ་ཙམ་ནི་བཻ་ཌཱུརྱ་ལས་བྱས། བརྒྱ་ཙམ་ནི་གསེར་ལས་བྱས། བརྒྱ་ཙམ་ནི་དངུལ་ལས་བྱས། བརྒྱ་ཙམ་ནི་ཤེལ་ལས་བྱས་པ་ཡིན་ཏེ། དེ་ལྟར་དེའི་ཚེ་ཤིང་ལྗོན་པ་རྣམས་ཀྱི་སྡོང་པོ་སྣ་ཚོགས་ཡིན་ནོ། །འདི་ལྟ་སྟེ་དཔེར་ན་འཛམ་བུའི་གླིང་ན་རི་མོ་བྲིས་པའི་ངོས་སྡུག་པ་དེ་བཞིན་དུ་
ཤིང་ལྗོན་པ་སྣ་ཚོགས་དེ་དག་སྡུག་པ་ཡིན་ནོ། །ཤིང་ལྗོན་པ་སྡུག་པ་དེ་རྣམས་ཀྱི་རྣམ་པ་དུ་མ་དང་། ཁ་དོག་དུ་མ་དང་། གཟུགས་དུ་མ་དང་། དབྱིབས་དུ་མ་ཡོད་པ་དེ་དག་ལྷའི་བུ་མེ་ལོང་གི་ངོས་ལྟར་དྲི་མ་མེད་པ་དེ་དག་གིས་མཐོང་ནས། དེ་ནས་ཡང་ལྟ་བ་སྐྱེད་ཅིང་ཀུན་དུ་རྒྱུ་བ་འབུམ་ཕྲག་དུ་མ་དག་ཀུན་ནས་རབ་ཏུ་དགའ་ཞིང་ལྷ་མོའི་ཚོགས་ཀྱིས་གང་བ། རོལ་མོ་དང་། སིལ་སྙན་གྱི་སྒྲ་འབྱིན་པའི་རྣམ་པ་རབ་ཏུ་དགའ་བའི་ཡིད་ཀྱིས་སྐྱེད་མོས་ཚལ་དུ་ཡུན་རིང་དུ་བདེ་བར་བྱ་བའི་ཕྱིར། ཚལ་དཔེ་མེད་པ་དེ་ག་ལ་བ་དེར་འདོང་བར་བྱེད་དོ། །དེ་ལྟར་དེར་ཞུགས་པ་དང་ལྷའི་བྱའི་ཚོགས་དེ་དག་སྒྲོ་ནི་གསེར། ལྟོ་ནི་བཻ་ཌཱུརྱ། རྐང་པ་ནི་བྱི་རུ། རྒྱབ་ནི་དངུལ། མིག་ནི་རིན་པོ་ཆེ་ཀེ་ཀེ་རུ་སྟེ། ཤིན་ཏུ་རྣར་སྙན་པའི་རྣམ་པ་དེ་དག་གི་སྒྲ་འབྱིན་པར་བྱེད་དོ། །དེ་ནས་ལྷའི་བུ་རྣམས་ཀྱིས་བྱའི་ཚོགས་དེ་རྣམས་ཀྱང་མཐོང་ངོ་། །སྒྲ་མཆོག་ཏུ་སྙན་ཅིང་འཇེབས་པ་འབྱིན་པ་ཡང་རྣར་ཐོས་ཤིང་། བྱ་དེ་དག་མཐོང་ནས། ལྷའི་བུ་དེ་རྣམས་རང་གི་བྱ་དག་ལ་ཕན་ཚུན་སྨོད་པར་བྱེད་དེ། འདི་ལྟར་ཁྱེད་ཀུན་གསོན་ཅིག །བྱ་སྒྲ་འབྱིན་པ་རྣམ་པ་དུ་མ་དང་། ཁ་དོག་དང་ལྡན་པ་དུ་མ་དང་། སྒྲ་རྣམ་པ་དུ་མས་ལྷ་མོའི་ཚོགས་དེ་རྣམས་ཀྱི་གླུ་དབྱངས་དེ་དག་ཐམས་ཅད་ཀུན་ནས་མི་མངོན་པ་དེ་ལྟར་ཟིལ་གྱིས་ནོན་ཏོ། །དེ་ནས་བྱ་དེ་དག་གི་སྒྲ་ཐོས་ནས་དེ་ནས་ཡང་དེའི་འོག་ཏུ་སྐྱེད་མོས་ཚལ་དུ་རྩེ་བར་བྱ་བའི་ཕྱིར་ཚལ་དུ་འདོང་བར་བྱེད་དོ། །དེ་ནས་པད་མའི་རྫིང་པད་མའི་ཉི་མའི་འོད་ལྟ་བུ་ཞེས་བྱ་བ་ཐམས་ཅད་མཐོང་སྟེ། པད་མའི་འདབ་མ་ཉི་མ་ལྟ་བུ་སྟོང་གིས་ཡོངས་སུ་བསྐོར་བ་དེ་དག་ལ་མངོན་པར་བརྟགས་ནས། ལྷའི་བུ་ཆ་བྱད་དང་། གཟུགས་སྣ་ཚོགས་འཆང་བ་དེ་དག་སྔ་མ་བཞིན་པད་མའི་རྫིང་དེ་ག་ལ་བ་དེར་འདོང་བར་བྱེད་དོ། །དེ་ནས་ལྷའི་བུ་དེ་དག་ལྷ་མོའི་ཚོགས་དང་བཅས་པས་ཡོངས་སུ་བསྐོར་ཅིང་པད་མའི་རྫིང་དེ་བསྐོར་ནས། བྲོ་རྡུང་བར་བྱེད། གླུ་དབྱངས་ལེན། དགོད་པར་བྱེད། རྩེད་མོ་བྱེད། ཡོངས་སུ་སྤྱོད་པར་བྱེད་དེ། ལྷའི་བུ་དེ་དག་བདེ་བ་སྣ་ཚོགས་ཀྱི་རྒྱགས་པས་མྱོས་སོ། །དེ་ནས་ཡང་པད་མའི་ཚལ་གྱི་ཕྱོགས་དེ་ནས་དེ་དག་ཕན་ཚུན་ལྷན་ཅིག་ཏུ་ལྷའི་རྒྱགས་པས་མྱོས་ཤིང་། ལྷ་ཡུལ་གྱི་གནས་ཆེན་
པོ་ཚལ་དེའི་ནང་ག་ལ་བ་དེར་འདོང་བར་བྱེད་དོ། །དེ་ནས་ལྷ་མོའི་ཚོགས་གར་བྱེད་ཅིང་། ལུས་ལ་ཆ་བྱད་དང་། རྒྱན་སྣ་ཚོགས་ཐོགས་པ་དེ་དག་ཐམས་ཅད་ཆུ་བོ་འབབ་པའི་ཚལ་དགའ་བ་ག་ལ་བ་དེར་འདོང་བར་བྱེད་དེ། ཚལ་དེ་ན་ཡང་ཆུ་བོ་འབབ་པའི་ཆུའི་རྣམ་པ་ནི་འདི་ལྟ་སྟེ། འོ་མའི་ཆུ་དང་། ཆང་གི་རོའི་ཆུ་དང་། སྦྲང་རྩིའི་ཆུ་དང་། རྒུན་ཆང་གི་ཆུ་དང་། ལྷའི་བཏུང་བའི་ཆུ་དང་། བུང་བས་ཁེབས་པ་དང་། བྱའི་ཚོགས་བརྒྱས་ཡོངས་སུ་བསྐོར་བ་དང་། གསེར་གྱི་རྡོ་དང་། བྱི་རུའི་རྡོ་དང་། དངུལ་གྱི་རྡོ་དང་། རྡོ་སྣ་ཚོགས་འབབ་པ་དག་མཐོང་ངོ་། །དེ་ནས་ལྷའི་བུ་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ་དག་དེར་རྩེས་ནས། ཚལ་ག་ལ་བ་དེར་ལྷ་མོ་རྣམས་དང་ལྷན་ཅིག་ཡུན་རིང་དུ་དགའ་བར་བྱེད་ཡོངས་སུ་སྤྱོད་པར་བྱེད་དོ། །དེ་ནས་ཆུ་བོ་འབབ་པའི་ཕྱོགས་དེ་ནས་ཀྱང་ལྷའི་མེ་ཏོག་གི་ཚལ་ག་ལ་བ་དེར་འདོང་བར་བྱེད་དོ། །དེ་ན་ལྷའི་མེ་ཏོག་མ་རྙིས་པ་དཔག་ཚད་བཅུར་དྲི་རྒྱ་ཆེར་འབྱུང་བ་དག་ཡོད་དེ། འདི་ལྟ་སྟེ། མེ་ཏོག་ཟླ་བའི་འོད་ཅེས་བྱ་བ་ཟླ་བའི་མདོག་ལྟ་བུ་དང་། མེ་ཏོག་ཉི་མའི་འོད་ཅེས་བྱ་བ་ཉི་མའི་མདོག་ལྟ་བུ་ཡིན་ཡང་འོད་ཚ་བ་མེད་པ་དང་། གཟའ་དང་སྐར་མ་ལྟ་བུའི་འབྲས་བུའི་ཚལ་ཐམས་ཅད་དུ་ལྷའི་བུ་དེ་དག་འདོང་བར་བྱེད་དོ། །ཚལ་དེར་འབྲས་བུ་འབྱུང་བ་དག་ནི་འདི་ལྟ་སྟེ། སྦྲང་རྩི་གོང་བུའི་འབྲས་བུ་དང་། འབྲས་བུ་རྣོ་བ་དང་། འཇམ་པ་ཞུ་བའི་འབྲས་བུ་དང་། དྲིའི་འབྲས་བུ་སྟེ། དྲི་གང་ཤིན་ཏུ་ཚིམ་པར་བྱེད་པ་ཉིད་དང་། རོ་དྲུག་པའི་འབྲས་བུ་དང་། ཇི་ལྟར་རོ་འདོད་པའི་འབྲས་བུ་དང་། རོ་མི་ངོམས་པའི་འབྲས་བུ་སྟེ། འབྲས་བུའི་རྣམ་པ་དེ་དག་ནི་ལྷ་རྣམས་ཀྱིས་ལེགས་པར་བྱས་པའི་ལས་ཀྱི་སྤྲུལ་པའི་འབྲས་བུ་ཡིན་ཏེ། ཚལ་དཔེ་མེད་པ་དེར་འབྱུང་བར་འགྱུར་རོ། །ཚལ་དེར་ཡང་ལྷ་རྣམས་དགའ་བར་བྱེད། རྩེ་བར་བྱེད། ཡོངས་སུ་སྤྱོད་པར་བྱེད། ཟ་བར་བྱེད། འཆའ་བར་བྱེད། འཐོག་པར་བྱེད། འཐུང་བར་བྱེད། འཇིབ་པར་བྱེད། དེ་དག་དེར་དགའ་བར་བྱས་ནས། ཚལ་བྱ་བྲོ་གར་བྱེད་པ་ཞེས་བྱ་བའི་ཕྱོགས་ག་ལ་བ་དེར་འདོང་བར་བྱེད་དེ། ཚལ་དེ་ན་བྱའི་ཚོགས་སྐད་འབྱིན་པ་དག་མཐོང་ཞིང་གླུ་དབྱངས་ཀྱི་སྒྲ་གཞན་འབྱིན་པ་དང་། གར་གཞན་བྱེད་པ་དང་། སྒྲ་སྙན་པ་གཞན་གྱིས་རྣ་ལམ་ཡོངས་སུ་གང་སྟེ། དེ་རྣམས་ཀྱིས་དེར་སྒྲ་སྙན་
པ་ཡིད་དུ་འོང་བ་དེ་དག་ཐོས་ནས་ཀྱང་རྩེ་བར་བྱེད་དོ། །དེ་ནས་འདྲེས་པའི་ཚལ་གཞན་དུ་འདོང་བར་བྱེད་དེ། ཚལ་དེ་ཐམས་ཅད་འདྲེས་པ་འདི་ལྟ་བུ་ཡིན་ཏེ། ཇི་ལྟར་ཐམས་ཅད་སྔར་བསྟན་པ་བཞིན་དུ་ཚལ་འབྲས་བུ་དང་། མེ་ཏོག་དང་། ཆུ་བོ་དང་། ཤིང་ལྗོན་པ་དང་། བྱའི་ཚོགས་ཕུན་སུམ་ཚོགས་པ་ཡོད་དེ། དེས་ན་འདྲེས་པའི་ཚལ་ཞེས་བྱའོ། །དེ་དག་ཀྱང་འདྲེས་པའི་ཚལ་དེར་ལྷའི་འདོད་པའི་ཡོན་ཏན་ལྔ་དག་འབྱོར་ཅིང་ལྡན་པར་གྱུར་པས་རྩེ་ཞིང་འོང་བའི་སྒྲས་དགའ་བར་བྱེད་དེ། དེ་ནས་དེ་དག་དེ་ན་གནས་ཤིང་ཤིན་ཏུ་ཡུན་རིང་བར་རྩེ་བར་བྱེད་དོ། །དེ་ནས་ལྷའི་རྒྱལ་པོ་བརྒྱ་བྱིན་འདི་སྙམ་དུ་སེམས་ཏེ་ལྷའི་བུ་བག་མེད་པ་ལ་གནས་པ་དེ་དག་གང་ཡིན་བདེ་བ་འདི་ཐམས་ཅད་ཀྱི་མཐའ་ཟད་པར་འགྱུར་བ་ཁོང་དུ་མ་ཆུད་དོ་སྙམ་མོ། །དེ་ནས་ལྷའི་བུ་དེ་དག་ཐམས་ཅད་ཀྱིས་ལྷའི་རྒྱལ་པོ་བརྒྱ་བྱིན་གྱི་བསམ་པ་ཤེས་ནས། ཇི་ལྟར་དོང་དོང་བའི་ལམ་དེ་ཉིད་ནས་དེ་ལྟར་སླར་འགྲོ་སྟེ། འདི་ལྟར་ལྷའི་རྒྱལ་པོ་བརྒྱ་བྱིན་ག་ལ་བ་དེར་འདོང་བར་བྱེད་དོ། །དེ་ནས་ལྷ་མོ་དེ་དག་ཀྱང་འགྲོས་མྱུར་བར་ལྷའི་འདུན་ས་ཆོས་བཟང་ག་ལ་བ་དེར་རྩེ་བའི་དོན་དུ་འཇུག་པར་བྱེད་དོ། །དེ་ནས་བརྒྱ་བྱིན་གྱིས་ལྷའི་བུ་དེ་རྣམས་ལ་མངོན་པར་བརྟགས་ནས་འདི་ལྟར་ཚིགས་སུ་བཅད་དེ་སྨྲས་པ། སྲེད་དང་བཅས་པའི་ཡུལ་རྣམས་ལ། །ངོམས་པ་དག་ཏུ་ག་ལ་འགྱུར། །ངོམས་པ་སྲེད་བྲལ་གང་ཡིན་པ། །ལུས་ཅན་དེ་ནི་མྱ་ངན་བྲལ། །སྐྱེ་བོ་ཡུལ་ལ་མངོན་དགའ་བ། །ནམས་ཀྱང་བདེ་བར་མི་འགྱུར་ཏེ། །ཡུལ་ནི་དུག་དང་འདྲ་བར་མཐོང་། །ཡོངས་སུ་གྱུར་པ་མི་བཟད་དོ། །འདིར་ནི་ཡུལ་ལ་འཇུག་བྱེད་པ། །ཐོག་མ་བར་དང་ཐ་མ་མེད། །འཇིག་རྟེན་འདི་མིན་ཕ་རོལ་མིན། །བདེ་བ་བྱེད་པ་ག་ལ་ཡོད། །སྐྱེ་བ་རྟག་པ་ཤིན་ཏུ་ཟད། །ལང་ཚོ་དག་ནི་རིངས་པར་འགྲོ། །འདུ་བ་དང་ནི་འབྲལ་བ་དང་། ལྷན་ཅིག་སྐྱེ་བར་ཡོངས་སུ་མཐོང་། །རབ་ཏུ་བསླུས་པ་དུ་མ་དག །བདེ་དང་སྡུག་པས་རྟག་བསྒྲིབས་ཀྱང་། །སྲོག་ཆགས་རྨོངས་པས་བསླུས་པ་དག །ཡིད་ནི་འབྱུང་བར་མི་བྱེད་དོ། །འདི་ལྟར་བྱིས་པ་ཐམས་ཅད་ནི། །སྲེད་པ་དག་ལ་རྩེ་བར་བྱེད། །ཇི་ལྟར་ཤིང་ལ་མེ་འབར་བཞིན། །ཡུལ་རྣམས་ལ་ནི་ངོམས་པ་མེད། །སྐྱེ་བོ་ངོམས་མེད་འདི་དག་ཀུན། །ཡུལ་རྣམས་ཀྱིས་
ནི་ཡོངས་སུ་བསླུས། །འཆི་དང་ཉེ་བར་འགྲོ་བྱེད་ཀྱང་། །གཟུགས་རྣམས་དང་ནི་འབྲལ་མི་བྱེད། །ལམ་རྒྱགས་དག་ནི་མ་བསགས་པ། །ཡུལ་རྣམས་ཀྱིས་ནི་ཡོངས་སུ་བསླུས། །སྲེད་པས་ཡོངས་སུ་རྨོངས་པ་ཡི། །ལྷ་དག་དབང་མེད་འཆི་བར་འགྱུར། །འདོད་པས་རྨོངས་པ་ཁྱེད་ཀུན་ལ། །ང་ཡིས་རྗེས་སུ་བསྟན་པ་ཡིན། །འདི་ལྟར་ཆོས་གནས་དམ་པ་སྟེ། །བདག་ལ་ཕན་པ་རྟག་ཏུ་གྱིས། །ཆོས་ལ་སྤྱོད་པའི་མི་དག་ནི། །བདེ་ལས་བདེ་བ་འཐོབ་འགྱུར་ཏེ། །མྱ་ངན་འདས་དང་གཞན་ཞི་བ། །མྱུར་བ་ཉིད་དུ་ཤིན་ཏུ་འགྲོ། །དེ་ལྟ་བས་ན་ཕ་རོལ་གྱི། །བསོད་ནམས་དག་གི་ཕུང་པོ་གྱིས། །རྟག་ཏུ་བསོད་ནམས་བྱེད་པ་ནི། །དུལ་ཞིང་ཟག་མེད་གནས་སུ་འགྲོ། །དེ་ནས་བརྒྱ་བྱིན་ཚིག་ཐོས་ནས། །སེམས་བྱུང་བཟང་བ་ཞི་དང་དུལ། །བརྒྱ་བྱིན་བུ་སྟེ་དེ་དག་ཀུན། །ཕ་ཡིས་རྗེས་སུ་བསྟན་པ་ཡིན། །དེ་ནས་ལྷའི་རྒྱལ་པོ་བརྒྱ་བྱིན་ལེགས་པར་བྱ་བའི་ལས་བྱེད་པ་ངན་སོང་གི་སྒོ་བཅད་པས་བུ་དེ་དག་ལ་མངོན་པར་གཏམ་དེས་ལམ་བཟང་པོ་ལ་ཡང་དག་པར་བཙུད་ནས་ཚལ་སྣ་ཚོགས་ག་ལ་བ་དེར་བདག་ཉིད་བདེ་བར་གནས་པ་དང་། དགེ་བ་བྱ་བའི་ཕྱིར་འགྲོ་བར་བྱེད་དེ། དེ་ནས་ལེགས་པར་བྱས་པའི་ལས་སྣ་ཚོགས་བྱས་པའི་ཚལ་སྣ་ཚོགས་ན་ལྷའི་རྒྱལ་པོ་བརྒྱ་བྱིན་གྱི་ཁང་པ་བརྩེགས་པ་སྣ་ཚོགས་ལ་འདི་ལྟ་སྟེ། ཤེལ་ལས་བྱས་པ་དང་། བྱི་རུ་ལས་བྱས་པ་དང་། གསེར་ལས་བྱས་པ་དང་། དངུལ་ལས་བྱས་པ་དང་། མཐོན་ཀ་ལས་བྱས་པ་དང་། མཐོན་ཀ་ཆེན་པོ་ལས་བྱས་པ་དང་། གསེར་བཙོ་མ་ལས་བྱས་པ་ལྔ་བརྒྱ་སྙེད་ཡོད་དོ། །དེ་ནས་བརྒྱ་བྱིན་གྱི་ཚལ་སྣ་ཚོགས་དེ་ཤིང་ལྗོན་པ་འབུམ་ཕྲག་དུ་མ་སྙེད་ཀྱིས་མཛེས་ཤིང་། །པད་མ་ཉི་མ་འཆར་བའི་མདོག་ལྟ་བུ་རྣམས་ཀྱིས་མཛེས་པར་བྱས་པ་དེ་ལ་མངོན་པར་བརྟགས་ནས། འདི་ལྟར་ཚིགས་སུ་བཅད་དེ་སྨྲས་པ། བསོད་ནམས་དག་གིས་དགའ་འགྱུར་ཏེ། །བརྒྱ་སྟོང་དག་ཏུ་བྱ་བ་ཡིན། །བསོད་ནམས་སྣ་ཚོགས་བྱས་པ་ཡིས། །ཀུན་ནས་སྣ་ཚོགས་སྨིན་པར་འགྱུར། །ལེགས་བྱས་ལས་ནི་མ་བྱས་པ། །སེམས་ཀྱི་བྲན་དུ་སོང་བའི་མི། །སེམས་ཀྱི་དགྲ་ཡིས་ཡོངས་བསླུས་པ། །དབང་མེད་ངན་སོང་རྣམས་སུ་ལྟུང་། །ཁང་པ་བརྩེགས་པ་ཐམས་ཅད་དག །ཀུན་ཏུ་སྣ་ཚོགས་ལས་ཡིན་ཏེ། །ལྷ་རྣམས་
ནང་དུ་ལྷ་སྤྱོད་པ། །ལེགས་པར་བྱས་པས་མང་པོར་འཕེལ། །དེ་ནས་ལྷའི་རྒྱལ་པོ་བརྒྱ་བྱིན་གྱིས་ཚིགས་སུ་བཅད་པ་དེ་དག་སྨྲས་ནས་ཁང་པ་བརྩེགས་པ་གཞན་ག་ལ་བ་དེར་འགྲོ་བར་བྱེད་དོ། །ལེགས་པར་བྱས་པའི་ལས་ཀྱིས་སྤྲུལ་པའི་ཁང་པ་བརྩེགས་པ་དེར་སྟན་ཁྲ་བོ་འཇམ་ཞིང་འཕར་ལ་ལྷོད་པ་དག་ནི་བཏིང་། རིན་པོ་ཆེ་ལས་བྱས་པའི་སྟན་དུ་མས་ནི་མཛེས་པར་བྱས། འོད་ཀྱི་ཕྲེང་བ་རྣམ་པ་དུ་མ་ཡོད་པ་དེ་དག་ལ་མངོན་པར་བརྟགས་ནས་ལྷའི་རྒྱལ་པོ་བརྒྱ་བྱིན་ནང་དུ་ཞུགས་སོ། །ཞུགས་ནས་དེ་ན་དགའ་བར་བྱེད། ཡོངས་སུ་སྤྱོད་པར་བྱེད་དོ། །ནང་དུ་ཞུགས་པའི་ཁང་པ་བརྩེགས་པ་དེ་རིན་པོ་ཆེ་ལས་བྱས་པ་ཡིན་ཏེ། རིན་པོ་ཆེ་འབར་བ་དུ་མས་རྣམ་པར་བརྒྱན་པ། འོད་དུ་མ་འབྱུང་བ། མེ་ཏོག་རྣམ་པ་དུ་མས་མཛེས་པར་བྱས་པ། དེའི་ནང་དུ་ཞུགས་ནས་ཀྱང་ལྷ་མོའི་ཚོགས་དུ་མས་ཡོངས་སུ་བསྐོར་ཏེ། དེ་ལྟར་དེ་རྣམས་གླུ་དབྱངས་ལེན་བཞིན་དུ་ཚལ་དེ་ན་རྩེ་བར་བྱེད། ཡོངས་སུ་སྤྱོད་པར་བྱེད་དོ། །ཚལ་དེ་ན་ཡང་མཐོ་ཞིང་དམའ་བའི་ས་རིས་ལེགས་པར་རྣམ་པར་ཕྱེ་བ་དང་། མེ་ཏོག་རྣམ་པ་སྣ་ཚོགས་ཀྱིས་ཁེབས་པའི་ས་རིས་ལེགས་པར་རྣམ་པར་ཕྱེ་བ་དང་། གསེར་གྱི་བྱ་རྣམ་པ་སྣ་ཚོགས་སྐད་འབྱིན་པའི་ས་རིས་ལེགས་པར་རྣམ་པར་ཕྱེ་བ་དང་། ལ་ལ་དག་ཏུ་ཡང་རིན་པོ་ཆེ་སྣ་བདུན་གྱི་ཤིང་ལྗོན་པ་རྣམས་ཀྱིས་མཛེས་པར་བྱས་པ་བྱ་དང་བུང་བ་སྣ་ཚོགས་སྒྲ་སྐད་སྙན་པ་འབྱིན་ཅིང་། ཁ་ཅིག་དག་ན་ཡང་དཔག་བསམ་གྱི་ཤིང་ལྗོན་པའི་ས་རིས་ལེགས་པར་རྣམ་པར་ཕྱེ་བ་དག་ལ་ལྷའི་དབང་པོ་བརྒྱ་བྱིན་དེ་ཀུན་དུ་མིག་གིས་རྟོག་པར་བྱེད་ཅིང་། ལྷའི་ཚོགས་ཀྱིས་གང་བ་ཟླ་བ་དང་ཉི་མ་བས་ལྷག་པའི་འོད་དག་གི་གཟི་བརྗིད་འབར་བས་དགའ་བར་བྱེད་དོ། །གསེར་གྱི་ཤིང་ལྗོན་པ་རྣམས་ཀྱིས་ཡོངས་སུ་བསྐོར་ཅིང་། བཻ་ཌཱུརྱའི་ཁང་བཟངས་ཀྱིས་དཀྲིགས་པ། ཀུན་ནས་གསེར་དང་། དངུལ་གྱི་ཀ་བ་ཟུང་རྣམས་ཀྱིས་མཛེས་པར་བྱས་ཤིང་། བཻ་ཌཱུརྱ་སྔོན་པོའི་པད་མའི་མཚོ་རྣམས་ཀྱིས་མཛེས་པར་བྱས་པ་དེ་མཐོང་ངོ་། །དེ་ནས་ལྷའི་རྒྱལ་པོ་བརྒྱ་བྱིན་འདི་སྙམ་དུ་སེམས་ཏེ། ཁང་བཟངས་འདིར་བདག་གནས་པར་བྱ་བའི་ཕྱིར་འཇུག་པར་བྱའོ་སྙམ་མོ། །དེ་ནས་ལྷ་རྣམས་ཀྱང་འདི་སྙམ་དུ་སེམས་ཏེ། ད་ནི་ལྷའི་རྒྱལ་པོ་བརྒྱ་བྱིན་ཁང་པ་བརྩེགས་པ་འདིར་འཇུག་པར་འགྱུར་ཏེ། དེར་བདག་ཅག་རང་གི་འཁོར་གྱིས་ཡོངས་སུ་བསྐོར་ཅིང་
ལྷ་མོའི་ཚོགས་ཀྱིས་ཉེ་བར་གླུ་ལེན་པ་དང་། ཚལ་དང་ཉེ་བའི་ཚལ་དུ་འཆག་ཅིང་རྩེད་མོ་བྱ་ཞིང་གླུ་དག་བླངས་ཏེ་བདེ་བ་ཉམས་སུ་མྱོང་བར་བྱའོ་སྙམ་མོ། །དེ་ནས་བརྒྱ་བྱིན་འདི་སྙམ་དུ་སེམས་ཏེ། གལ་ཏེ་ལྷ་དང་ལྷ་མོ་དག་གིས་སྐབས་ཕྱེ་ན། བདག་ཁང་བཟངས་འདིར་འཇུག་པར་བྱའོ་སྙམ་མོ། །དེ་ནས་ལྷ་དག་གིས་འཕྲལ་ལ་འདི་སྐད་ཅེས་སྨྲས་སོ། །ཁྱོད་རང་གི་སྐྱེད་མོས་ཚལ་དག་ཏུ་གཤེགས་ལ་དགྱེས་པ་མཛད་དུ་གསོལ། དེ་ནས་བརྒྱ་བྱིན་གྱིས་ཚིག་དེ་ཐོས་ནས་ལྷ་དེ་དག་རང་གི་ཚལ་དང་། ཉེ་བའི་ཚལ་དང་སྐྱེད་མོས་ཚལ་དང་། པད་མའི་རྫིང་དང་། མཚེའུ་དང་། རང་གི་སླས་ག་ལ་ཡོད་པ་དེར་རྩེ་བའི་ཕྱིར་འགྲོ་བར་བྱེད་དོ། །དེ་ནས་ལྷའི་རྒྱལ་པོ་དབང་པོ་ཁང་པ་བརྩེགས་པ་ག་ལ་བ་དེར་འགྲོ་བར་བྱེད་དེ། བཻ་ཌཱུརྱའི་ཚལ་དྲི་མ་མེད་པ་དེར་ཞུགས་ནས་ཐགས་སུ་བཏགས་པ་མ་ཡིན་པའི་ལྷའི་སྟན་ཁྲ་བོ་བཏིང་བའི་སྟེང་དུ་འདུག་གོ །འདུག་ནས་དེའི་ལེགས་པར་བྱས་པའི་ལས་དང་། དགེ་བའི་ལས་དེས་བསྐུལ་ནས། རྩིག་ངོས་ཤིན་ཏུ་གསལ་བ་ལ་རྟོག་པར་བྱེད་དེ། བརྒྱ་བྱིན་གང་ཚེ་འཕོས་པ་རི་མོར་བྲིས་པ་ལྟ་བུ་དེ་དག་ས་དེར་མཐོང་ངོ་། །དེ་དག་གི་མིང་དེར་བྲིས་པ་རྣམས་ལ་ཡང་རྟོག་པར་བྱེད་དེ་དེར་དབང་པོ་ཚེ་འཕོས་པ་ནི་འདི་རྣམས་ཡིན་ནོ། །འདི་ལྟ་སྟེ། ལེགས་འབྱོར་ཞེས་བྱ་བ་དང་། འབྱོར་པ་ཞེས་བྱ་བ་དང་། ལེགས་སྤྱོད་ལྡན་ཞེས་བྱ་བ་དང་། དཀར་པོ་ཞེས་བྱ་བ་དང་། བློ་གྲོས་བཟང་ཞེས་བྱ་བ་དང་། ཀུན་བདེ་ཞེས་བྱ་བ་དང་། བརྟན་པ་ཞེས་བྱ་བ་དང་། ཀུན་ཏུ་མིག་ཅེས་བྱ་བ་དང་། མིག་སྟོང་ཞེས་བྱ་བ་དང་། ཐམས་ཅད་དགའ་ཞེས་བྱ་བ་དང་། སྟོང་སྣང་ཞེས་བྱ་བ་དང་། གཟི་བརྗིད་ཕྲེང་ལྡན་ཞེས་བྱ་བ་དང་། དཔལ་འཛིན་ཅེས་བྱ་བ་དང་། མདོག་སྔོན་ཞེས་བྱ་བ་དང་། མི་འཆི་ཞེས་བྱ་བ་དང་། མི་འགྱུར་ཞེས་བྱ་བ་དང་། བདེ་བྱེད་ཅེས་བྱ་བ་དང་། མཆོག་སྦྱིན་འཛིན་ཅེས་བྱ་བ་དང་། བཀྲ་ཤིས་འཛིན་ཅེས་བྱ་བ་དང་། ཀུན་དགའ་ཞེས་བྱ་བ་དང་། བརྒྱ་བྱིན་ཞེས་བྱ་བ་ལ་སོགས་དབང་པོ་སུམ་ཅུ་ལྷའི་འཇིག་རྟེན་ནས་ཚེ་འཕོས་པ་དང་། དགེ་བའི་ལས་ཀྱིས་དེར་སྐྱེས་པ་དང་། དེའི་དགེ་བའི་ལས་ཟད་ནས་ལྷའི་དབང་པོའི་གནས་དེ་ནས་ཚེ་འཕོས་ཏེ། དེ་ནས་ཡང་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ནང་དུ་སྐྱེས་པ་མཐོང་ཞིང་ལུས་སྡུག་བསྔལ་དུ་མས་མངོན་པར་ཉམས་པ་དག་མཐོང་ངོ་། །ཚེ་རབས་དེ་དག་གི་ནང་དུ་སྐྱེས་པ་དེ་དག་ཤིན་ཏུ་སྡུག་བསྔལ་ཞིང་སྡུག་བསྔལ་གྱིས་གནོད་པ་དེ་རྣམས་གཟུགས་བརྙན་ལྟ་བུར་གྱུར་པ་མཐོང་ངོ་།། །།
འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་གཅིག་པ། ཡི་དགས་རྣམས་ཀྱི་ནང་དུ་སྐྱེས་པ་དག །ལུས་བཀྲེས་པ་དང་། སྐོམ་པས་གདུངས་ཤིང་ལུས་པགས་པ་དང་། རུས་པ་དང་། རྒྱུས་པས་སྦྲེལ་བ་ལྟ་བུ་གང་ཡིན་པ་དེ་དག་དང་། དུད་འགྲོ་རྣམས་ཀྱི་ནང་དུ་སྐྱེས་པ། ཕན་ཚུན་ལུས་ལ་ཟ་བའི་སྡུག་བསྔལ་གྱིས་གདུངས་ཤིང་ཟ་བ་གང་ཡིན་པ་དེ་དག་དང་། མི་རྣམས་ཀྱི་ནང་དུ་སྐྱེས་པ་ཚོལ་བའི་སྡུག་བསྔལ་གྱིས་མངོན་པར་གདུངས་པ་གང་ཡིན་པ་དེ་དག་ཀྱང་མཐོང་སྟེ། དེ་ལྟར་དེ་དག་མཐོང་ནས་འཁོར་བ་མི་བཟད་པར་བྱས་པ་ལ་བདེ་བ་འབྱུང་བ་མེད་ཅིང་། ཀྱེ་མ་འཁོར་བ་འདི་ཀུན་ནི་གནོད་པ་ཕལ་ཆེ་ཞིང་མང་བ་ཡིན། ཀུན་ནས་སྙིང་པོ་མེད་པ་ཡིན། འཁོར་བ་འདི་ལ་གང་རྟག་པའམ། བརྟན་པའམ། ཐེར་ཟུག་གམ། མི་འགྱུར་བའི་ཆོས་ཅན་སྐྲའི་རྩེ་མོ་ཙམ་ཡང་མེད་དོ། །ཀྱེ་མ་དབང་པོ་འདི་དག་རང་གི་ལས་ཀྱི་འབྲས་བུ་ལ་ལོངས་སྤྱད་ནས་འདི་ནས་ཚེ་འཕོས་ཏེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ནང་དུ་སྐྱེས་པ་རྣམས་བདེ་བའི་རྣམ་པ་འདི་ལྟ་བུའི་མཐའ་སྡུག་བསྔལ་གྱི་རྣམ་པ་དེ་ལྟ་བུ་སྟེན་པར་ག་ལ་ནུས། ཀྱེ་མ་འཁོར་བ་འདི་ནི་ཤིན་ཏུ་མི་བཟད་པ་ཡིན་ཞིང་། ཤིན་ཏུ་འཇིགས་པ་ཡིན་ལ། མཆོག་ཏུ་མི་དགའ་བར་བྱེད་པ་ཡིན་ནོ། །སུམ་ཅུ་རྩ་གསུམ་གྱི་དབང་ཕྱུག་ཅེས་བྱ་བ་ཤིན་ཏུ་བདེ་བའི་སྐལ་བ་ཅན་གང་ཡིན་པ་དེ་དག་ཀྱང་མཆོག་ཏུ་མི་བཟད་པའི་གནས་སྐབས་འདི་དག་ཏུ་སོང་བ་ལྟ་ཞིག་སྙམ་སེམས་སོ། །དེ་ལྟར་དེ་ཡིད་བྱུང་ནས་བདག་ཉིད་ལ་རྟོག་པར་བྱེད་དེ། དེ་བདག་ཉིད་ཀྱི་ངན་སོང་གི་འགྲོ་བ་ནི་བཅད། ལྷ་དག་ལས་མི་རྣམས་ཀྱི་ནང་དུ་སྐྱེ་ཞིང་། མི་དག་ལས་ཚེ་འཕོས་ནས་དེ་ནས་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་བ་མཐོང་ངོ་། །གང་གི་ཚེ་མི་རྣམས་ཀྱི་ནང་དུ་སྐྱེ་བར་འགྱུར་བ་དེའི་ཚེ་ཡུལ་བཟང་པོ་ཤིན་ཏུ་རྒྱས་པའི་ལྗོངས་དང་། གྲོང་དང་། གྲོང་ཁྱེར་དང་། རིགས་བཟང་པོ་དང་། སྤྱོད་པ་བཟང་ཞིང་ཡོན་ཏན་ཕུན་སུམ་ཚོགས་པ་དང་། ལྟ་བ་ལོག་པ་དང་། ཁེངས་པ་དང་། རྒྱགས་པ་དང་། ང་རྒྱལ་དང་བྲལ་བའི་རིགས་བཟང་པོར་སྐྱེ་བར་འགྱུར་རོ། །གལ་ཏེ་ཡང་བདག་ཉིད་མི་རྣམས་ཀྱི་
ནང་དུ་སྐྱེས་ན་ཡང་དེ་རྒྱལ་པོའི་རིགས་སམ། གལ་ཏེ་བློན་པོ་རྟག་ཏུ་སྤྱོད་པ་གཙང་ཞིང་ཡོན་ཏན་ཕུན་སུམ་ཚོགས་པ་དབང་ཕྱུག་དམ་པ་མཐུ་ཆེན་པོར་འགྱུར་བ་མཐོང་ངོ་། །འདི་ལྟར་བདག་མི་ཡུལ་དེ་ནས་ཤི་ནས་ཡང་གར་སྐྱེ་བར་འགྱུར་ཞིག་གུ་སྙམ་མོ། །དེ་བདག་ཉིད་ལྷ་རྣམས་ཀྱི་ནང་དུ་སྐྱེས་ཏེ། མཆོག་ཏུ་རྫུ་འཕྲུལ་ཆེ་ཞིང་ཤིན་ཏུ་མཐུ་ཆེ་བ་དང་། ངོ་ཚའི་ཁ་ན་ལས་པ་མེད་པར་འགྱུར་བ་མཐོང་ངོ་། །ལྷ་གཞན་རྣམས་ཁ་ཟས་ཟ་བའི་དུས་དེའི་ཚེ་ལྷ་རྣམས་བདག་ཉིད་ཀྱིས་སྡིག་པ་དང་འདྲེས་པའི་ཟས་ཀྱི་ལས་ངན་པ་བསྐྱེད་པ་དེས་ཤིན་ཏུ་ངོ་ཚ་བར་འགྱུར་རོ། །གང་གི་ཇི་སྲིད་དུ་ལས་ཀྱི་རྣམ་པ་བྱས་པ་དེ་སྲིད་དུ་དེའི་ཟས་ཀྱི་རྣམ་པ་དེ་ལྟ་བུ་འབྱུང་བར་འགྱུར་ཏེ། ཟས་དེ་མངོན་པར་མཐོང་ནས་ལྷ་རྣམས་ཤིན་ཏུ་ངོ་ཚ་བར་འགྱུར་རོ། །དེ་ལྟར་བདག་གི་ཟས་ཤིན་ཏུ་ཆེ་བ་མཆོག་ཏུ་ཞིམ་པ། རབ་ཏུ་མང་བ་དེ་དག་བདག་ཉིད་ཀྱིས་མཐོང་ནས་དེ་འདི་སྙམ་དུ་སེམས་ཏེ། བདག་ཚེ་རབས་ཇི་སྙེད་ཅིག་ཏུ་འདི་ལྟར་འགྱུར་སྙམ་ནས་དེས་ཁང་པ་བརྩེགས་པའི་རྩིག་པ་དེ་ཉིད་ལ་བརྟགས་ན། དགེ་བའི་ལས་དེས་བདག་ལྷ་རྣམས་ཀྱི་ནང་དུ་ལན་བདུན་མི་རྣམས་ཀྱི་ནང་དུ་ལན་བདུན་ཕན་ཚུན་ཚེ་འཕོ་བ་ལན་བདུན་མཐོང་ནས། བདག་གི་ཚེ་འཕོ་བ་བརྒྱད་པ་ལྷ་རྣམས་དང་། མི་རྣམས་དང་། སེམས་ཅན་དམྱལ་བ་རྣམས་དང་། དུད་འགྲོ་རྣམས་དང་། ཡི་དགས་རྣམས་ཀྱི་ནང་དུ་སྐྱེ་བ་མ་མཐོང་ནས། དེ་འདི་སྙམ་དུ་སེམས་ཏེ། འདི་དག་གང་དུ་ཡང་བདག་ཉིད་མ་མཐོང་སྟེ། བདག་གང་དུ་ཇི་ལྟར་སྐྱེ་བར་འགྱུར་ཞིག་གུ་སྙམ་མོ། །དེ་བདག་ཉིད་གང་དུ་ཡང་མ་མཐོང་ནས། དེ་ཤིན་ཏུ་ངོ་མཚར་ཆེར་སྐྱེས་ཏེ། ཀྱེ་མ་བདག་གི་ཚེ་བརྒྱད་པ་མ་མཐོང་ངོ་སྙམ་ནས་དེ་སེམས་ཤིང་འདུག་འདུག་པ་ལས་ཡུན་རིང་ཞིག་ལོན་པ་དང་དྲན་པ་རྙེད་དེ། བདག་གིས་བཅོམ་ལྡན་འདས་ལས་བདག་ཚེ་རབས་བདུན་རྗེས་ནས་རྒྱུན་དུ་ཞུགས་པར་འགྱུར་ལ། ཕྱིས་ཕུང་པོའི་ལྷག་མ་མེད་པའི་དབྱིངས་ལ་འཇུག་པར་འགྱུར་རོ་ཞེས་ཐོས་སོ། །ད་ནི་བདག་སྐལ་བ་དེ་ལྟ་བུ་དང་ལྡན་པར་འགྱུར་རོ་སྙམ་སྟེ། དེ་ལྟར་བརྟགས་ནས། དེ་ནས་ཡང་བཅོམ་ལྡན་འདས་ལ་ཕྱག་འཚལ་བར་བྱེད་དེ། ཡིད་ཤིན་ཏུ་དང་ཞིང་རྙོག་པ་མེད་པས་བཅོམ་ལྡན་འདས་ལ་
ཕྱག་འཚལ་བར་བྱེད་དོ། །ཡིད་རབ་ཏུ་དགའ་བས་ཕྱག་བྱས་ནས། དེ་ནས་ཡང་གདིང་བ་ཤིན་ཏུ་འབྱོར་པ་བཏགས་པ་ལས་བྱས་པ་མ་ཡིན་པ་ཕུན་སུམ་ཚོགས་པ་དང་། འཛམ་བུ་ཆུ་བོའི་གསེར་བཟང་པོའི་སྟན་དེ་ཉིད་ལ་འདུག་པ་དང་། བརྒྱ་བྱིན་གྱི་གཟུགས་དེ་ཉིད་རྩིག་པའི་ནང་ན་སྣང་བ་མཐོང་ངོ་། །དེ་ནས་ལྷའི་རྒྱལ་པོ་བརྒྱ་བྱིན་འདི་སྙམ་དུ་སེམས་ཏེ། འདི་ལྟར་བདག་ཡང་ལྷའི་འདུན་ས་ཆོས་བཟང་དུ་ལྷ་རྣམས་ཡང་དག་པར་བལྟ་བར་བྱ་བའི་ཕྱིར་འཇུག་པར་བྱའོ་སྙམ་མོ། །དེ་ནས་ལྷའི་རྒྱལ་པོ་བརྒྱ་བྱིན་སྟན་དེ་ལས་ལངས་ནས་ཚལ་སྣ་ཚོགས་ཀྱི་ཕྱོགས་ག་ལ་བ་དེར་འགྲོ་བར་བྱེད་དེ། དེར་ཡང་ལྷ་དང་ལྷ་མོའི་ནང་ན་དགའ་བར་བྱེད། དགའ་དགུར་སྤྱོད་པར་བྱེད་ལ། ལྷའི་འདོད་པའི་ཡོན་ཏན་ལྔ་རྣམས་འབྱོར་ཅིང་ལྡན་པར་གྱུར་པས་དགའ་བར་བྱེད། ཡོངས་སུ་སྤྱོད་པར་བྱེད་དོ། །བྱ་དང་། ཤིང་ལྗོན་པ་དང་། པད་མའི་རྫིང་དང་། ལྟེང་ཀ་དང་། ཉེ་བའི་ཚལ་གྱི་རྣམ་པས་མཛེས་པར་བྱས་པའི་ཚལ་སྣ་ཚོགས་སུ་དེ་དག་གིས་ལྷའི་རྒྱལ་པོ་བརྒྱ་བྱིན་དེ་མངོན་པར་མཐོང་ནས། དེ་དག་ཐམས་ཅད་ཀྱིས་སིལ་སྙན་དང་། རོལ་མོ་རྣམ་པ་སྣ་ཚོགས་དག་བླངས་ཏེ། ལྷའི་རྒྱལ་པོ་བརྒྱ་བྱིན་ག་ལ་བ་དེར་འདོང་བར་བྱེད་དོ། །དོང་ནས་ཀྱང་བརྒྱ་བྱིན་ལ་གསོང་པོར་སྨྲས་ཤིང་བརྒྱ་བྱིན་ཡོངས་སུ་བསྐོར་ནས། ལྷའི་ཚོགས་ཐམས་ཅད་བྲོ་རྡུང་བར་བྱེད། གླུ་དབྱངས་ལེན། དགོད་པར་བྱེད་དོ། །བརྒྱ་བྱིན་སྔར་འགྲོ་ལ། ལྷ་མོ་ཆ་བྱད་དང་། གཟུགས་སྣ་ཚོགས་དང་ལྡན་པ་དག་ཕྱི་བཞིན་འབྲང་ཞིང་རོལ་མོའི་སྒྲ་སྣ་ཚོགས་ཀྱིས་ལྷའི་འདུན་ས་ཆོས་བཟང་དེར་འགྲོ་བར་བྱེད་དོ། །དེ་དག་ཐམས་ཅད་ཡིད་རབ་ཏུ་དགའ་བས་སིལ་སྙན་དང་། རོལ་མོ་སྣ་ཚོགས་དང་། གར་བྱས། གད་མོ་བགད། དགའ་བར་བྱས། རྩེད་མོ་རྩེས་ནས་ལྷན་ཅིག་ཏུ་འདོང་བར་བྱེད་དོ། །དེ་ནས་ཆོས་བཟང་ན་གནས་པའི་ལྷ་བརྒྱ་བྱིན་ལ་རིམ་གྲོ་བྱེད་པར་འདོད་པ་རྣམས་ཀྱང་ལྷའི་རྒྱལ་པོ་བརྒྱ་བྱིན་ག་ལ་བ་དེར་འདོང་བར་བྱེད་དོ། །དེ་ནས་སིལ་སྙན་དང་། གླུ་དབྱངས་ཀྱི་སྒྲ་སྣ་ཚོགས་འབྱིན་པའི་ལྷ་དེ་རྣམས་ཀྱང་ཕྱིར་བྱུང་ནས་དེ་དག་ཕན་ཚུན་འདུས་སོ། །ལྷའི་ཚོགས་འདུས་ཤིང་ཡང་དག་པར་དགའ་ལ།
མངོན་པར་མཐོང་བ་དེ་རྣམས་ཀྱི་བྲོ་གར་དང་། གླུའི་སྒྲ་ཤིན་ཏུ་སྙན་པ་སྲེད་པ་ཀུན་དུ་སྟོན་པའི་སྒྲ་དེས་ལྷའི་འཇིག་རྟེན་དང་བཅས་པ་ཐམས་ཅད་ཀུན་དུ་གང་ངོ་། །སྒྲ་དེ་དག་ཐོས་ནས་ལྷ་གང་ཚལ་དང་། ཉེ་བའི་ཚལ་གཞན་རྣམས་ཀྱི་ནང་ན་འཁོད་པ་དག་ལྷའི་འདོད་པའི་ཡོན་ཏན་ལྔ་རྣམས་འབྱོར་ཅིང་ལྡན་པར་གྱུར་པས་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །དེ་དག་ཀྱང་ལྷའི་འདུན་ས་ཆོས་བཟང་ག་ལ་བ་དེར་འདོང་བར་བྱེད་དེ། དོང་ནས་ཀྱང་བརྒྱ་བྱིན་ལ་གསོང་པོར་སྨྲས་ཤིང་རྒྱལ་བར་སྤྱོན་ཅིག་ཅེས་བརྗོད་ནས། འབུམ་ཕྲག་དུ་མར་ཡོངས་སུ་བསྐོར་ཏེ་ལྷའི་འདུན་ས་ཆོས་བཟང་ག་ལ་བ་དེར་འདོང་བར་བྱེད་དོ། །དགེ་བའི་ལས་སྣ་ཚོགས་ཀྱིས་གླུ་ལེན། བྲོ་རྡུང་ཞིང་ཆ་བྱད་དང་། རྒྱན་རྣམ་པ་བཞི་ཐོགས་པ་དེར་སྐྱེས་པ་དག་ནི་ཚུལ་ཁྲིམས་ཕུན་སུམ་ཚོགས་པ་ལེགས་པར་བསྲུངས་ཤིང་བསྒོམས་པ་དེའི་འབྲས་བུའི་རྣམ་པ་ཡིན་ཏེ། དེ་ལ་ཉེ་བར་སྤྱོད་པར་བྱེད་དོ། །ལྷའི་ཚོགས་ཐམས་ཅད་ཆོས་བཟང་དུ་ཞུགས་ཏེ། བརྒྱ་བྱིན་གྱི་གནས་དཔག་ཚད་ལྔ་བརྒྱར་རྒྱ་ཆེ་ཞིང་གསེར་བཙོ་མས་རྣམ་པར་བརྒྱན་པ། བཻ་ཌཱུརྱའི་ཤིང་ལྗོན་པས་ཉེ་བར་མཛེས་པར་བྱས་པ། ཤིང་ལྗོན་པ་གཞན་རྣམས་ཀྱིས་ཀྱང་མཛེས་པར་བྱས་པ། མེ་ཏོག་འཇམ་པོས་རྒྱས་པ། ཤིན་ཏུ་དྲི་ཞིམ་ཞིང་དཔག་ཚད་ལྔའི་བར་དུ་དྲི་རབ་ཏུ་འབྱུང་བར་བྱེད་པ། ཡིད་དུ་འོང་བ་དགའ་བར་བྱེད་ལ། སྡུག་ཅིང་ཡིད་དུ་འཐད་པ་གཞན་གྱིས་མི་ཐུབ་པ་དག་ཡོད་དེ། དེ་དག་ཐམས་ཅད་ཀྱང་ལྷའི་འདུན་སར་བརྒྱ་བྱིན་གྱིས་ཡོངས་སུ་བསྐྱངས་པ་ཡིན་ནོ། །དེ་དག་ལྷའི་དབང་པོ་བརྒྱ་བྱིན་དང་བཅས་ཤིང་ལྷ་མོའི་ཚོགས་བྱེ་བ་ཕྲག་དགུ་བཅུ་རྣམས་དང་ལྷན་ཅིག་ཏུ་འདོད་པའི་ཡོན་ཏན་ལྔ་པོ་དེ་རྣམས་ཀྱིས་དགའ་བར་བྱེད། རྩེ་བར་བྱེད་དོ། །དེར་ཞུགས་ནས་ཁང་བཟངས་རབ་ཏུ་དགའ་བར་གནས་པ་ཞེས་བྱ་བ་དེའི་ནང་དུ་འདོང་བར་བྱེད་དོ། །བཻ་ཌཱུརྱ་དང་། གསེར་དང་། དངུལ་དང་། སྤུག་ལས་བྱས་པའི་ཀ་བ་རྣམས་དང་། གསེར་ལས་བྱས་པའི་སྟན་རྣམས་ཀྱིས་ཉེ་བར་མཛེས་པར་བྱས་པ། ཐགས་སུ་བཏགས་པ་མ་ཡིན་པའི་སྟན་ཁྲ་བོ་འཇམ་ལ་ནེམས་ཞེས་བྱེད་ཅིང་འཕར་ལ་ལྷོད་པ་རྣམས་བཏིང་བ། སྟེང་དུ་གདིང་
བ་ཡོན་ཏན་ཕུན་སུམ་ཚོགས་པའི་སྟན་རྣམས་ལ་ལྷའི་ཚོགས་ཐམས་ཅད་བརྒྱ་བྱིན་གྱིས་གནང་ནས་འཁོད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷ་རྣམས་ལ་འདི་སྐད་སྨྲས་སོ། །བདག་ཅག་ལེགས་པར་བྱས་པའི་ལས་དེས་ལྷའི་འཇིག་རྟེན་འདིར་སྐྱེས་ལ། དེ་ཟད་ནས་ལྟུང་བ་ནི་གདོན་མི་ཟའོ། །བདག་ཅག་ཐམས་ཅད་ལས་ཀྱི་འབྲས་བུའི་བགོ་སྐལ་ལ་ཇི་ལྟར་སྤྱོད་པ་བཞིན་བདག་ཅག་ལྷ་རྣམས་ཀྱི་ནང་དུ་འོང་ལ། དེ་ནས་ཡང་བདག་ཅག་ལྟུང་བའི་མཐར་འགྱུར་ཏེ། དེ་ལྟ་བས་ན་ལྷ་དག་སྡུག་བསྔལ་དེ་དག་ཐམས་ཅད་མངོན་པར་ཤེས་པར་བྱོས་ལ་དགེ་བ་ལ་འབད་པར་གྱིས་ཤིག །དེ་ནས་བརྒྱ་བྱིན་གྱི་ཚིག་དེ་ཐོས་ནས། དེ་དག་ཀུན་གྱིས་བརྒྱ་བྱིན་ལ་འདི་སྐད་སྨྲས་སོ། །བརྒྱ་བྱིན་ཁྱོད་ཀྱིས་དེ་ཇི་ལྟར་ཐུགས་སུ་ཆུད་པ་དེ་བཞིན་ལགས་ཏེ། བདག་ཅག་ཀུན་དེ་ལྟར་རང་གི་ལས་ཀྱི་འབྲས་བུ་ལ་ཉེ་བར་སྤྱོད་པ་ལྷའི་དགའ་བ་དང་བདེ་བ་དེ་ལས་ལྟུང་བར་འགྱུར་ན། དེ་ལས་གཞན་པ་བདག་ཅག་རྒྱུ་གང་གིས་ལྟུང་བར་མི་འགྱུར་བ་བསྟན་དུ་གསོལ། དེ་ནས་བརྒྱ་བྱིན་གྱིས་ལྷ་དེ་རྣམས་ལ་འདི་སྐད་སྨྲས་སོ། །གང་འདུས་བྱས་ཀྱི་རྣམ་པ་འཇིག་པའི་མཐའ་ཅན་རྟག་པར་འགྱུར་བའམ། ཐེར་ཟུག་ཏུ་འགྱུར་བའམ། མི་འགྱུར་བའི་ཆོས་ཅན་གྱི་གནས་དེ་ནི་འོག་གམ། ཐད་ཀའམ། དབུས་སམ། སྟེང་ན་ཡང་མེད་དོ། །ཀུན་ནས་ཉོན་མོངས་པ་ལ་རྟག་ཏུ་ཆགས་པའི་བློ་དེས་ནི་ཆོ་ག་འགྲངས་ཏེ། སྡུག་བསྔལ་ལ་མཐའ་མེད་ཅིང་ལེགས་པ་མེད། བདེ་བའི་རང་བཞིན་མ་ཡིན། རྒྱུ་དང་རྐྱེན་ཁོང་དུ་ཆུད་པ་སྐྱེད་པ་མ་ཡིན། ཡང་དག་པར་སྐྱེད་པ་ཡིན། སྡུག་བསྔལ་གྱི་མཐའ་འདི་ལྟ་བུ་ལ་རྟོག་པར་མི་བྱེད་དེ། ཁྱེད་ཅག་ཕལ་ཆེར་མཐོ་རིས་ནས་ཚེ་འཕོས་ཏེ། སེམས་ཅན་དམྱལ་བ་དང་། ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེའོ། །དེ་ནས་ཡང་ལེགས་པར་བྱས་པའི་ལས་ཀྱིས་འདིར་སྐྱེས་པ་རྣམས་རང་གི་ལས་ཀྱི་འབྲས་བུའི་བགོ་སྐལ་ལ་སྤྱོད་པ་མཐོ་རིས་ན་ལྷའི་བདེ་བ་དག་མྱོང་བར་འགྱུར་རོ། །དེ་ནས་ཡང་ལས་ཀྱིས་གཟིངས་པ་རྣམས་ལྟུང་བར་འགྱུར་ཏེ། སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་ཉེ་བར་སྤྱོད་པར་འགྱུར་གྱིས་ལྷ་
རྣམས་དེ་ལ་ཤིན་ཏུ་བག་ཡོད་པར་གྱིས་ཤིག །འདི་ལྟར་བདག་གིས་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་རྣམས་ཀྱིས་མདོར་བསྡུས་ཏེ་གསུངས་པའི་ཆོས་དེ་ཁོ་ན་དང་། གཞན་གང་གིས་འཁོར་བ་ལས་ཐར་བར་འགྱུར་བ་བཤད་པར་བྱའོ། །འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ། །ཡང་མ་རིག་པ་འགགས་པས་འདུ་བྱེད་འགག་པར་འགྱུར་ལ། འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་པར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འགག་པར་འགྱུར་རོ། །དེ་ལྟར་ལྷ་དག་འཁོར་བ་འདིའི་འཇུག་པ་དང་། ལྡོག་པ་ཞེས་བྱ་བ་མཐོང་ཞིང་ཤེས་ན་ཉོན་མོངས་པ་ཟད་ནས་ཐར་བར་འགྱུར་ཏེ། མྱ་ངན་ལས་འདས་པ་ཞེས་བྱ་བ། འཇིག་པ་མེད་པ། རྟག་པ། རྒ་བ་མེད་པ། འཆི་བ་མེད་པ། ཟག་པ་མེད་པ་འཐོབ་སྟེ། དེ་ལྟར་ལྷ་དག་སྲོག་ཆགས་རྣམས་
འཁོར་བ་འདི་ལས་ཐར་བར་འགྱུར་རོ། །གང་འདུས་བྱས་ཀྱི་རྣམ་པ་འཇིག་པ་མེད་པའི་མཐའ་འམ། ཟད་པ་མེད་པའི་མཐའ་འམ། ཆུད་ཟ་བ་མེད་པའི་མཐའ་འམ། ཚེ་རབས་སུ་འགག་པ་མེད་པའི་ཆོས་ཞེས་བྱ་བའི་གནས་གཞན་འཁོར་བ་ན་མེད་དོ། །གང་ན་གཏན་དུ་བདེ་བར་འགྱུར་བ་དང་། ལྟུང་བའི་མཐའ་མེད་པ་དང་། ཟད་པ་དང་འཇིག་པའི་མཐའ་མེད་པ་དང་། འབྱུང་བ་དང་འཇིག་པར་འགྱུར་བའི་ཆོས་ཅན་མ་ཡིན་པ་མེད་དོ། །དེ་ནས་བརྒྱ་བྱིན་གྱི་ཁ་ནས་ཚིག་དེ་དག་ཐོས་ནས། ལྷ་གང་ཚེ་རབས་གཞན་དག་ཏུ་སེམས་བསྒོམས་པ་དམ་པའི་ཆོས་ལ་མངོན་པར་དགའ་ཞིང་། བློ་ཤིན་ཏུ་ཞེན་པ་དེ་དག་ནི་ཡིད་ལ་བག་ཡོད་པར་འགྱུར་ཞིང་། སངས་རྒྱས་དང་། ཆོས་དང་། དགེ་འདུན་རྣམས་ལ་གཅིག་ཏུ་དད་ལ། མྱ་ངན་ལས་འདས་པའི་ས་བོན་བདེ་བའི་ལས་འཕེན་པར་བྱེད་དོ། །ཡིད་མ་བསྒོམས་པ་གང་ཡིན་པ་དེ་དག་ནི། དེ་ནས་ཡང་བག་མེད་ཅིང་སེམས་འཁྲུགས་པར་འགྱུར་ལ། སྲེད་པས་བསླུས་པ་རྣམས་ལྷའི་འདོད་པའི་ཡོན་ཏན་ལྔ་རྣམས་འབྱོར་ཅིང་ལྡན་པར་གྱུར་པས་དགའ་བར་བྱེད་དོ། །དེ་ནས་ཡང་དེས་བསླུས་པ་རྣམས་རྩེ་བ་དོན་དུ་བྱེད་ཅིང་། དགའ་བར་བྱེད་དེ། དེ་ལྟར་དེ་དག་གི་འཁོར་བའི་སྡུག་བསྔལ་མཐའ་མེད་པར་འགྱུར་རོ། །དེ་ལྟར་ལྷའི་རྒྱལ་པོ་བརྒྱ་བྱིན་དེས་ཆོས་བཤད་པ་ན། འཇིག་རྟེན་སྐྱོང་བ་བཞི་རྣམས་ལྷའི་འདུན་ས་ཆོས་བཟང་དག་ཏུ་སོ་སོར་འཁོད་དེ། འདི་ལྟར་ལྷའི་རྒྱལ་པོ་བརྒྱ་བྱིན་ལྷ་རྣམས་དང་ལྷན་ཅིག་གང་ན་བཞུགས་ཞེས་དཔྱོད་པར་བྱེད་དོ། །དེ་ནས་དེ་ལྟར་བརྒྱ་བྱིན་ལྷའི་སྟན་ལ་འདུག་ཅིང་། ལྷའི་ཚོགས་ཀྱིས་ཡོངས་སུ་བསྐོར་ལ་གཟི་བརྗིད་འབར་བ་ན། ལྷ་ཡུལ་གྱི་བདེ་བ་དཔེ་མེད་པ་དུ་མ་དང་ལྡན་པ་རྒྱང་རིང་པོ་ནས་མཐོང་ངོ་། །དེ་མཐོང་ནས་འཇིག་རྟེན་སྐྱོང་བ་བཞི་རྣམས་བརྒྱ་བྱིན་ག་ལ་བ་དེར་འདོང་བར་བྱེད་དོ། །དོང་ནས་བརྒྱ་བྱིན་ལ་གསོང་པོར་སྨྲ་སྟེ། ལྷའི་སྟན་མཆོག་ཏུ་ཉམས་དགའ་བ་བཟང་པོ་ལ་ཕྱོགས་གཅིག་ཏུ་འཁོད་དོ། །དེ་ནས་ཡང་སྟན་མཆོག་ཏུ་ཉམས་དགའ་བ་བཟང་པོ་དེ་དག་ལས་ལངས་ཏེ། བརྒྱ་བྱིན་
ག་ལ་བ་དེ་ལོགས་སུ་ཕྱོགས་ནས་འདུག་སྟེ། བརྒྱ་བྱིན་ལ་འདི་སྐད་སྨྲས་སོ། །ལྷའི་དབང་པོ་འདི་ལྟར་འཛམ་བུའི་གླིང་གི་མི་རྣམས་ནི་དགེ་བ་བཅུའི་ལས་ཀྱི་ལམ་ལ་མངོན་པར་བརྩོན་ཞིང་ཆོས་ལ་དགའ་བ། མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། རིགས་ཀྱི་རྒན་རབས་ལ་གུས་པར་བགྱིད་ཀྱིས། ལྷའི་དབང་པོ་ཁྱོད་དགྱེས་པར་མཛད་དུ་གསོལ། དེ་ནས་ལྷའི་དབང་པོ་བརྒྱ་བྱིན་གྱིས་ཚིག་དེ་དག་ཐོས་ནས་འདི་སྐད་སྨྲས་སོ། །ལྷ་དག་བདག་ནི་དགའོ། །རྒྱལ་པོ་ཆེན་པོ་ཁྱེད་ཅག་ནི་འཇིག་རྟེན་སྐྱོང་ཞིང་། འཇིག་རྟེན་ལ་ཕན་པར་འདོད་པ་ཕན་གདགས་པར་རབ་ཏུ་ཞུགས་པ་ཡིན་ཏེ། བདག་གི་དགའ་བ་ཡང་ཐོས་ནས། ཁྱེད་བདེ་ལེགས་སུ་གྱུར་ཅིག །དེ་ནས་འཛམ་བུའི་གླིང་དུ་ཆོས་དང་མི་ལྡན་ཞིང་། ཆོས་མ་ཡིན་པའི་རྗེས་སུ་ཞུགས་པའི་མི་དེ་དག་དེ་བཞིན་དུ་འཇིག་རྟེན་སྐྱོང་བ་རྣམས་བརྒྱ་བྱིན་ལ་སྨྲ་བར་བྱེད་དེ། འཛམ་བུའི་གླིང་ན་མི་ཆོས་དང་མི་ལྡན་ཞིང་། ཆོས་མ་ཡིན་པའི་རྗེས་སུ་འཇུག་པ། མར་མི་འཛིན་པ་དང་། ཕར་མི་འཛིན་པ་དང་། དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པ་དང་། རིགས་ཀྱི་རྒན་རབས་ཀྱི་རྗེས་སུ་མི་འཇུག་པ་དག་མཆིས་ཏེ། བདུད་ཀྱི་ཕྱོགས་ནི་འཕེལ་ལོ། །དམ་པའི་ཆོས་ཀྱི་ཕྱོགས་ནི་འགྲིབ་པོ་ཞེས་བསྙད་དོ། །ལྷའི་རྒྱལ་པོ་བརྒྱ་བྱིན་གྱིས་དེ་ཐོས་ནས་རྒྱལ་ཆེན་བཞིའི་ལྷ་རྣམས་དང་། སུམ་ཅུ་རྩ་གསུམ་པ་ཇི་ལྟར་ཕྱོགས་པ་རྣམས་ལ་བོས་ནས་སྨྲས་པ། ལྷ་མ་ཡིན་བརྟན་པ་དང་། རབ་སྤྲོ་ལ་སོགས་པ། ཀླུ་ཆོས་མ་ཡིན་པ་དང་ལྡན་པ་རབ་འཇོམས་ལ་སོགས་པ་སའི་འོག་ནས་ལངས་ཏེ། བདག་ཅག་ལ་གཡུལ་འགྱེད་དུ་འོང་གིས། ལྷ་ཁྱེད་རྣམས་ཆོས་ཤིག །དེ་ནས་བརྒྱ་བྱིན་གྱི་བཀའ་དེ་མནོས་ནས། གང་རྒྱལ་ཆེན་བཞིའི་ལྷ་རྣམས་བརྒྱ་བྱིན་གྱི་བཀས་ཤིན་ཏུ་རིངས་པར་ལག་ཆ་དང་། མཚོན་ཆ་སྣ་ཚོགས་སྔ་མ་བཞིན་ཐོགས་ཏེ། རི་བོ་ཟླ་བ་ཞེས་བྱ་བའི་རི་ག་ལ་བ་དེར་འདོང་བར་བྱེད་དོ། །དེ་ནས་འཇིག་རྟེན་སྐྱོང་བ་དེ་རྣམས་དོང་བ་དང་། ལྷའི་དབང་པོ་བརྒྱ་བྱིན་ཡང་ལྷའི་ཚོགས་སྣ་ཚོགས་
ཀྱིས་ནི་བསྐོར། ལྷའི་ཕྲེང་བ་དང་གོས་ནི་གྱོན། ལང་ཚོ་ལ་བབ་པའི་གཟུགས་རྒྱན་སྣ་ཚོགས་ཀྱིས་ནི་བརྒྱན། ལྷ་མོ་རྣམས་ནི་རྗེས་སུ་འབྲང་ཞིང་། ལྷའི་ཚོགས་ཀྱིས་ཡོངས་སུ་བསྐོར་བ་དང་ལྷན་ཅིག་ཐམས་ཅད་མངོན་པར་འབྱོར་ཅེས་བྱ་བ་ག་ལ་བ་དེར་འདོང་བར་བྱེད་དེ། སྐྱེད་མོས་ཚལ་གང་ཡིན་པ་དེ་རི་རབ་དང་སྐྲ་ལྟ་བུར་ཆུང་ཟད་འདྲ་བའི་དཔེར་བྱ་ན། འདི་ལྟར། ཟླ་བ་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ་ལྟ་བུ་དང་། ཉི་མ་གཟའི་ཚོགས་ཀྱིས་བསྐོར་བ་མི་འཐུན་པར་མཐོང་བ་ལྟ་བུ་དང་། རི་རབ་གསེར་གྱི་རི་སྟོང་གིས་བསྐོར་བ་ལྟ་བུ་དང་། ཤིང་ལྗོན་པ་ལྷའི་གསེར་དང་། དངུལ་དང་། བཻ་ཌཱུརྱ་དང་། མཐོན་ཀ་དང་། པད་མ་རཱ་གའི་མདོག་ལྟ་བུ་རྣམས་ཀྱིས་ཉེ་བར་མཛེས་པར་བྱས་པའི་སྐྱེད་མོས་ཚལ་དེ་ལྷའི་མེ་ཏོག་གིས་མཛེས་པར་བྱས་ཤིང་། བྱའི་ཚོགས་ཀྱིས་ཡོངས་སུ་བསྐོར་ལ་སྒྲ་སྐད་སྙན་པ་འབྱིན་པ། ལྷའི་པད་མའི་རྫིང་རྣམས་ཀྱིས་མཛེས་པར་བྱས་པ་ཡིན་ནོ། །ལྷའི་རྒྱལ་པོ་བརྒྱ་བྱིན་གྱི་གླང་པོ་ཆེའི་རྒྱལ་པོ་ས་སྲུང་གི་བུ་ཞེས་བྱ་བ་སྐྱེད་མོས་ཚལ་ཆེན་པོ་དེ་ན་རྫིང་དེ་དག་སྔ་མ་བཞིན་ཡོད་པའི་ནང་ན་བལ་གླང་མོ་དང་ལྷན་ཅིག་རྩེ་བར་བྱེད། གསེར་དང་། བཻ་ཌཱུརྱའི་པད་མའི་འདམ་བུའི་ནང་ན་བལ་གླང་མོ་དང་ལྷན་ཅིག་རྩེ་ཞིང་ཡུལ་དེར་འགྲོ་བར་བྱེད་དོ། །ལྷའི་རྒྱལ་པོ་བརྒྱ་བྱིན་ལྷའི་ཚོགས་དང་། ལྷ་མོའི་ཚོགས་སྣ་ཚོགས་ཀྱིས་ཡོངས་སུ་བསྐོར་བ་ལྟར། གླང་པོ་ཆེའི་རྒྱལ་པོ་དེ་ཡང་དེ་ལྟ་བུ་ཡིན་ལ། པད་མ་གསེར་བཙོ་མ་ལྟ་བུ་དང་། ནམ་མཁའ་ལ་ཉི་མ་འབུམ་ཕྲག་འཆར་བ། དེ་ལྟ་བུའི་འོད་བཟང་པོ་འཆར་བ་དང་ལྡན་པ་རྣམས་ཀྱིས་མཛེས་པར་བྱས་པ་དེར་དེ་དགའ་བར་བྱེད། ཡོངས་སུ་སྤྱོད་པར་བྱེད། རྩེད་མོ་བྱེད། དུད་འགྲོར་གྱུར་ཀྱང་ལྷའི་བདེ་བ་མྱོང་བ་ཡིན་ནོ། །དེ་ནས་ལྷའི་རྒྱལ་པོ་བརྒྱ་བྱིན་དེར་སོང་ནས། ལག་པ་གཉིས་ཀྱིས་བྱུགས་ཤིང་ཕྱི་བདར་བྱེད་ལ། ཀྱེ་བདག་གི་གླང་པོ་ཆེའི་རྒྱལ་པོ་འདི་ནི་གཡུལ་འགྱེད་པ་ལ་དགོས་པ་ཡིན་ཏེ། ལྷ་དང་ལྷ་མ་ཡིན་འཐབ་པའི་ཚེ། འདིའི་སྟེང་ནས་བདག་རྒྱལ་བ་ཐོབ་
བོ། །དེ་ནས་གླང་པོ་ཆེ་མཆོག་ཕྱི་བདར་བྱས་ནས། སྐྱེད་མོས་ཚལ་ཐམས་ཅད་འབྱོར་ལྡན་ན་ཁང་བཟངས་མྱ་ངན་བྲལ་ཞེས་བྱ་བ་ག་ལ་བ་དེར་འགྲོ་བར་བྱེད་དེ། ཆུའི་ཟམ་པ་ལྟ་བུའི་སྐས་དེ་ལས་འཛེགས་ནས། དེར་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་ཏེ་འཇུག་པར་བྱེད་དོ། །དེར་ཞུགས་ནས་ལྷའི་རྒྱལ་པོ་དེ་ལྷ་མོ་བྱེ་བ་ཕྲག་དགུའི་མདུན་ན་རྩེ་བར་བྱེད། དགའ་བར་བྱེད་དོ། །ལྷའི་རྒྱལ་པོ་དེ་རྣམས་དང་ལྷན་ཅིག་ལྷའི་འདོད་པའི་ཡོན་ཏན་ལྔ་རྣམས་འབྱོར་ཅིང་ལྡན་པར་གྱུར་པས་རྩེ་བར་བྱེད། དགའ་བར་བྱེད། ཡོངས་སུ་སྤྱོད་པར་བྱེད་དོ། །ལྷའི་རྒྱལ་པོ་རང་གི་ལས་དང་འཐུན་པར་ལོངས་སྤྱོད་འབྱོར་ཏེ། ལྷ་དེ་དག་དང་ལྷའི་རྒྱལ་པོ་དེ་ཇི་སྲིད་དུ་འདོད་པ་སྡུག་པ། ཡིད་དུ་འོང་བ་བྱས་ཤིང་བསགས་པ་དང་། སོ་སོ་ཡང་དག་པར་མྱོང་བར་འགྱུར་བ་བདེ་བའི་རྣམ་པར་སྨིན་པ། བདེ་བ་སོ་སོར་ཡང་དག་པར་མྱོང་བར་འགྱུར་བའི་ལས་ཟད་པར་མ་གྱུར་པ་དེ་སྲིད་དུ་འདི་ལྟར། སྐྱེད་མོས་ཚལ་བརྒྱ་སྙེད་ཀྱིས་བརྒྱན་པའི་ལྷའི་འདུན་ས་ཆོས་བཟང་གི་སྐྱེད་མོས་ཚལ་དེ་ན་བདེ་བ་ཀུན་དང་ལྡན་ཞིང་། ལྷའི་ཚོགས་ཐམས་ཅད་དང་བཅས་པས་ཡན་ལག་ལྔ་དང་ལྡན་པའི་རོལ་མོ་རྣམས་ཀྱིས་རྩེ་བར་བྱེད། དགའ་བར་བྱེད་དོ། །དེ་དག་ཕྱིས་ལྷའི་འདུན་ས་ཆོས་བཟང་ནས་འཆི་བར་འགྱུར་ཏེ། ཤི་ནས་ཀྱང་ཇི་ལྟར་ལས་དེ་དང་ཉེ་བར་འགྲོ་ཞིང་། མྱོང་བར་འགྱུར་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་མཆོག་ཏུ་བདེ་བ་དང་། རིག་པའི་བློ་དྲི་མ་མེད་པ་དང་། ཕན་ཚུན་གྱི་གཙོ་བོའམ། གྲོང་གི་གཙོ་བོའམ། ཡུལ་གྱི་གཙོ་བོའམ། གྲོང་ཁྱེར་གྱི་གཙོ་བོའམ། ཕན་ཚུན་གྱི་གཉེན་འདབ་དང་། རྩ་ལག་དང་། བདེ་བར་ལྷན་ཅིག་འཁོད་པར་འགྱུར་རོ། །ལྷའི་རྒྱལ་པོ་དེ་ནི་ངན་སོང་གི་སྒོ་བཅད་པ་ཡིན་ཏེ། ལྷ་དེ་དག་གི་འཆི་འཕོ་བ་ལ་མངོན་པར་བརྟགས་ནས་འདི་ལྟར་ཚིགས་སུ་བཅད་དེ་སྨྲས་པ། ས་གང་
ཡིན་པ་དེ་དག་གི །ཚལ་ནི་པད་མ་སྣ་ཚོགས་དང་། །རྩེ་མོ་མཆོག་སྟེ་ཉམས་དགའ་དང་། །རིན་པོ་ཆེ་དང་ལྡན་པ་དང་། །མཚོ་དང་འབབ་ཆུ་རིན་པོ་ཆེའི། །རྡོ་བ་སྣ་ཚོགས་རྣམས་ཀྱིས་བརྒྱན། །ལྗོན་ཤིང་མེ་ཏོག་སྣ་ཚོགས་དང་། །བྱ་ནི་སྣ་ཚོགས་དག་གིས་ཁེབས། །གསེར་ལས་བྱས་པའི་དཔག་བསམ་ཤིང་། །ཁ་ཅིག་དྲི་མེད་བཻ་ཌཱུརྱ། །དངུལ་དང་གསེར་ནི་བཙོ་མ་ཡིན། །ཚལ་ནི་རྣམ་པར་འདྲེས་པ་བསྐྱེད། །བུང་བ་རྣམས་ནི་སྒྲ་འབྱིན་པས། །པད་མའི་རྫིང་ནི་རྣམ་པར་མཛེས། །ཁང་བཟངས་མཆོག་ནི་ཉམས་དགའ་ཞིང་། །རིན་པོ་ཆེ་ནི་ཆེ་དང་ལྡན། །རྣམ་པར་བརྒྱན་པ་ཉམས་དགའ་སྟེ། །ལྷ་ལ་འོས་པ་ཐམས་ཅད་ཡོད། །དེ་དག་ཐམས་ཅད་དེ་བཞིན་འཇུག །སྐྱེ་བོ་རྣམས་ནི་ཡོངས་སུ་འགྱུར། །ཀྱེ་མ་སྲེད་པས་བསླུས་པ་ཡི། །ལྷ་རྣམས་ཀུན་གྱི་བདེ་བ་ནི། །སྒྱུ་མ་ཆུ་བུར་དབུ་བ་དང་། །དྲི་ཟའི་གྲོང་ཁྱེར་ལྟ་བུ་ཡིན། །སྲེད་པ་དུག་དང་མེ་འདྲ་བ། །འཇིག་རྟེན་འཇིག་པའི་ཕྱིར་གནས་ཏེ། །སྲེད་པའི་མཚོར་ནི་འཁྱམ་བྱེད་ཅིང་། །སྐྱེ་བོ་དེ་ཀུན་འཇིག་པར་བྱེད། །འདོད་པ་ལོངས་པས་ཆོག་མི་ཤེས། །བདེ་བ་འདོད་པས་ཆོག་མི་ཤེས། །འཆི་བའི་མེ་ཡིས་རྣམ་བསྲེགས་པ། །ལྷ་ཚོགས་དེ་དག་ག་ལས་འོངས། །སྲེད་འདིས་འཇིག་རྟེན་གཟེངས་པ་རྣམས། །ཡེ་ནས་ངན་ཏེ་འཕགས་པ་མིན། །གང་གིས་རྣམ་པར་རྨོངས་པའི་ལྷ། །འཆི་བ་ཡི་ནི་དབང་དུ་སོང་། །ལྷ་དང་མི་དང་ལྷ་མ་ཡིན། །གནོད་སྦྱིན་སེམས་ཅན་དམྱལ་བ་ཀླུ། །འཆི་བའི་ཞགས་པ་མི་བཟད་པས། །ཐམས་ཅད་དབང་མེད་འགྲོ་བར་འགྱུར། །ཁམས་གསུམ་པ་སྟེ་འདི་དག་ཀུན། །འཆི་བའི་ཞགས་པས་སྦྲེལ་གྱུར་ཀྱང་། །སྲེད་པའི་རྨོངས་པས་རྨོངས་པ་རྣམས། །དབང་མེད་མཐོང་བར་མི་འགྱུར་རོ། །དེ་ལྟར་བརྒྱ་བྱིན་གྱིས་རྟག་ཏུ་ལྷ་དེ་རྣམས་ཀྱི་སྐྱེ་བ་དང་། གཞན་མི་རྟག་པ་འཆི་བ་དག་མཐོང་ནས། ལྷ་དག་ཤིན་ཏུ་གོ་བར་བྱ་བའི་ཚིགས་སུ་བཅད་དེ་སྨྲས་པ། འབྱུང་པོ་ཀུན་ལ་ཕན་བཞེད་པ། །བཅོམ་ལྡན་དེ་ལ་ཕྱག་འཚལ་ལོ། །གང་གིས་སྲེད་པ་དུག་འདྲ་འདི། །འཇིག་རྟེན་པ་
ལ་མང་དུ་གསུངས། །མདོར་ན་ཤེས་དང་ཤེས་བྱ་དག །དེ་ཡིས་འདི་ཀུན་ཐུགས་སུ་ཆུད། །ཤེས་དང་ཤེས་བྱ་མ་གཏོགས་པར། །གསུམ་པ་དམིགས་པར་མི་འགྱུར་རོ། །འདི་ནི་མི་རྟག་སྡུག་བསྔལ་སྟོང་། །བྱེད་པ་པོ་ཡང་སྤངས་པ་ཡིན། །དེ་ཉིད་ལམ་ནི་རྣམ་སྟོན་པ། །སངས་རྒྱས་ཀྱིས་ནི་འཁོར་བར་གསུངས། །དེ་ལྟར་དབང་པོ་དེ་ཕྱག་རྒྱ་འདིས་བཏབ་པའི་ཡིད་དྲི་མ་མེད་པས་བཅོམ་ལྡན་འདས་ལ་བསྟོད་དོ། །བསྟོད་ནས་དེ་ནས་ཡང་ལྷའི་བདེ་བ་ཡང་ཉམས་སུ་མྱོང་བར་བྱེད་དེ། དེ་ལྟར་དེ་ལྷའི་བདེ་བ་ཐམས་ཅད་མྱོང་བ་ཡིན་ནོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་མཐོ་བ་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །སེམས་ཅན་དག་ལས་གང་གིས་དེར་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་འདི་ལྟར་གང་གཞན་གྱིས་གསོད་པ་པོ་དག་ཉི་མ་གཅིག་ཙམ་དུ་སྲོག་གཅོད་པ་སྤོང་བའི་ཚུལ་ཁྲིམས་སྲུང་དུ་བཅུག་ལ། འཁོར་བ་ལས་ཐར་པ་འདོད་པ་རྣམས་མ་བྱིན་པར་ལེན་པ་དང་། རྒྱལ་པོའི་ཆད་པས་འཇིགས་ནས་འབྲས་བུ་ཆུང་ངུར་འགྱུར་བ་ཡང་སྤོང་དུ་འཇུག་ན། དེ་ལུས་དང་བྲལ་ནས་བདེ་འགྲོ་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ན་མཐོ་བའི་གནས་སུ་སྐྱེ་བར་འགྱུར་རོ། །གནས་མཐོ་བ་དེ་ཡང་རི་རབ་ཀྱི་སྟེང་ན་མཐོ་བ་ཡིན་ལ། ཁྱེད་ཅག་གི་ལས་སྣ་ཚོགས་སྣང་བ་བཞིན་གསེར་དང་དངུལ་གྱི་བཀྲ་བས་ཕྱེ་བ་ཡིན་ནོ། །ལྷ་རྣམས་མཐོ་བའི་གནས་དེར་འཛེགས་ནས། རི་རབ་ཀྱི་དྲུང་ཐམས་ཅད་ལྟ་བར་བྱེད་དེ། གསེར་དང་དངུལ་ལས་བྱས་ཤིང་། བཻ་ཌཱུརྱ་བཀྲ་བས་རྣམ་པར་ཕྱེ་བ་རྣམ་པ་དུ་མ་ལ་ལྟ་བར་བྱེད་དོ། །ལྷའི་ཕྲེང་བ་དང་གོས་གྱོན་པ་རྣམས་གསེར་གྱིས་བརྒྱན་པའི་ས་གཞི་རྣམས་ལ་དགའ་བར་བྱེད། ཡོངས་སུ་སྤྱོད་པར་བྱེད་ལ། ལྷ་མོའི་ཚོགས་སྣ་ཚོགས་ཀྱིས་ཡོངས་སུ་བསྐོར་ཅིང་སྡུག་པ་དང་། ལྷན་ཅིག་བཻ་ཌཱུརྱའི་ཚལ་དང་ཉེ་བའི་ཚལ་རྣམས་སུ་
དགའ་བར་བྱེད། ཡོངས་སུ་སྤྱོད་པར་བྱེད་དོ། །དེར་དེ་དག་གི་རྟག་ཏུ་བཟའ་བ་དང་། བཏུང་བ་ཆུ་བོ་ལྟར་འབབ་སྟེ། འདི་ལྟ་སྟེ། ཆུ་བོ་རོ་ཞིམ་ཞེས་བྱ་བ་དང་། ཆུ་བོ་ཤུགས་ཆེན་འབབ་ཅེས་བྱ་བ་དང་། ཆུ་བོ་དགའ་བཅས་ཞེས་བྱ་བ་དང་། ཆུ་བོ་དགའ་བཅས་ཆེ་ཞེས་བྱ་བ་དང་། ཆུ་བོ་བརྩེགས་འབབ་ཅེས་བྱ་བ་དང་། ཆུ་བོ་ཤུགས་ཕྲེང་ཞེས་བྱ་བ་དང་། ཆུ་བོ་སྟོང་འབབ་ཅེས་བྱ་བ་དང་། ཆུ་བོ་གར་དགར་འབབ་ཅེས་བྱ་བ་སྟེ། ཆུ་བོ་དེ་དག་ནི་མྱོས་པའི་སྐྱོན་དང་བྲལ་ཞིང་། བཏུང་བ་རྣམ་པ་སྣ་ཚོགས་ཐམས་ཅད་རབ་ཏུ་འབབ་པ་ཡིན་ནོ། །རོ་སྣ་ཚོགས་དང་མདོག་སྣ་ཚོགས་ཡོད་པ་ཡིན་ཏེ། འདི་ལྟ་སྟེ། འོ་མའི་མདོག་དང་། པད་མ་རཱ་གའི་མདོག་དང་། ཨན་ད་རྙིལ་གྱི་མདོག་དང་འཐུན་པ་དང་། བཻ་ཌཱུརྱའི་མདོག་དང་། གསེར་གྱི་མདོག་ལྟར་སེར་བ་དང་། ཁ་ཅིག་མདོག་འདྲེས་པ་དང་། ཆུ་ཤིན་ཏུ་དྲི་ཞིམ་ཞིང་བརྟན་པ་དག་ཏུ་ཁྱད་པར་འཕགས་པ་ཡང་འབབ་བོ། །གཞན་ཡང་བཟའ་བ་རོ་དང་། དྲི་དང་མདོག་སྣ་ཚོགས་སུ་འབྱུང་སྟེ། འདི་ལྟ་སྟེ། རོ་ཤ་ཁ་ར་འདྲ་བ་དང་། ལྷའི་དྲི་དང་། མདོག་དང་མདོག་སྐྱ་བོ་དང་། རོ་ཇི་ལྟར་འདོད་པ་དག་སྟེ། ལྷ་རྣམས་ཇི་ལྟར་འདོད་པ་དེ་བཞིན་དུ་བཟའ་བ་རྣམས་ཀྱི་རོ་དེ་དག་ཀྱང་དེ་ལྟར་འགྱུར་རོ། །ཚལ་དང་ནགས་ཚལ་སྣ་ཚོགས་དག་མེ་ཏོག་དྲི་ཞིམ་པོ་རྣམས་ཀྱིས་ཉེ་བར་མཛེས་པར་བྱས་ཤིང་། བྱ་ཁ་དོག་སྣ་ཚོགས་དང་། རྣམ་པ་སྣ་ཚོགས་རྣམས་ཀྱིས་མཛེས་པར་བྱས་པ་ཡིན་ཏེ། དེ་དག་སའི་ཕྱོགས་ཉམས་དགའ་བ་དེར་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་ནས་སིལ་སྙན་དང་། གླུ་དབྱངས་དང་། བྲོ་གར་སྣ་ཚོགས་ཀྱིས་རྩེ་བར་བྱེད། དགའ་བར་བྱེད། ཡོངས་སུ་སྤྱོད་པར་བྱེད་དོ། །དེར་ཚལ་འདི་དག་འབྱུང་བར་འགྱུར་ཏེ། འདི་ལྟ་སྟེ། ཤིང་་ལའི་ཚལ་དང་། ཤིང་སཱ་ལ་ཆེན་པོའི་ཚལ་དང་། ཇི་ལྟར་འདོད་པའི་ཤིང་ལྗོན་པའི་ཚལ་དང་། མེ་ཏོག་རྟག་ཏུ་ཡོད་པའི་ཚལ་དང་། རླུང་ཇི་ལྟར་འདོད་པ་བཞིན་བདེ་བར་འབབ་པའི་ཚལ་ཏེ། ཚལ་དགའ་བ་དེ་རྣམས་ན་གསེར་གྱི་ལྕུག་མ་འཕྱངས་པས་
ནི་མཛེས། དྲིལ་བུ་གཡེར་ཀའི་དྲ་བས་ནི་དཀྲིགས། བྱ་འབུམ་སྙེད་སྒྲ་འབྱིན་པ་དགའ་བ་ལྷའི་དབང་པོ་འདོད་པའི་ཡོན་ཏན་ལྔའི་བདེ་བ་དག་གིས་ལྷ་རྣམས་ཉེ་བར་འཚོ་བར་བྱེད་དོ། །ཕན་ཚུན་གྲོགས་སུ་གྱུར་ཅིང་ཕན་ཚུན་ལོངས་སྤྱོད་པ་གཅིག་པུ་དོན་དུ་བྱེད་པ། ནད་དང་མྱ་ངན་དང་བྲལ་བ། བཀྲེས་པ་དང་སྐོམ་པ་དང་བྲལ་བ། ལུས་ངལ་བ་དང་བྲལ་བ། ཚོལ་བའི་ཉོན་མོངས་པ་དང་བྲལ་བ། ཅི་དགར་སྤྱོད་པ་ལ་བརྩོན་པ། ཅི་དགར་རྒྱུ་བ། ཅི་དགར་གནས་པ་དག་ཚལ་གྱི་ནང་དང་། སྐྱེད་མོས་ཚལ་དང་། པད་མའི་ཚལ་དང་། མཐོང་ན་ཡིད་འཕྲོག་རྣམས་སུ་དགའ་བར་བྱེད་དོ། །མཐོ་བ་ན་གནས་པ་འདོད་པའི་ཡོན་ཏན་ལྔས་ཚིམ་པའི་ལྷ་རྣམས་འོད་ནི་རང་གི་འོད་ལ་ལུས་ནི་ཇི་ལྟར་འདོད་པ་བཞིན། ཕྲ་བ་དང་། སྦོམ་པ་དང་། ཡང་བར་སྒྱུར་བ། ཅི་དགར་འགྲོ་བ། གར་དགར་འགྲོ་བ། རང་དགར་འགྲོ་བ། གང་ཐོབ་པར་འདོད་པ་དེ་ཐོབ་པར་འགྱུར་ཞིང་། ཐོབ་ནས་སུས་ཀྱང་མི་འཕྲོགས་ལ་ཐོབ་ནས་དེའི་དབང་དུ་འགྱུར་རོ། །མཐོ་བའི་གནས་ན་གནས་པར་གྱུར་པའི་ལྷ་དེ་རྣམས་ལ་བདེ་བའི་རྣམ་པ་གཞན་ཡང་ཡོད་དེ། རང་གིས་ལེགས་པར་བྱས་པའི་ལས་རྒྱུ་དང་འབྲས་བུས་ཀུན་ནས་བསླང་བས། ཇི་སྲིད་དུ་འདོད་ཅིང་སྡུག་ལ་ཡིད་དུ་འོང་བ་ལེགས་པར་བསྲུངས་པའི་ཚུལ་ཁྲིམས་སྲོག་གཅོད་པ་དང་། མ་བྱིན་པར་ལེན་པ་སྤངས་པ་ཟད་པར་མ་གྱུར་པ་དེ་སྲིད་དུ་ལྷ་མོའི་ཚོགས་རྣམས་དང་དགའ་བར་བྱེད། དགའ་དགུར་སྤྱོད་པར་བྱེད་དོ། །དེར་ལས་ཟད་ནས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ལས་ཀྱིས་འགྲོ་བ་ཇི་ལྟ་བ་དང་ལས་ལ་རྟོན་པ་དང་། འགྲོ་བ་ཇི་ལྟ་བ་བཞིན་སྐྱེ་བར་འགྱུར་ཏེ། སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་ན་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རི་ལ་གནས་པ་རྟག་ཏུ་བདེ་བར་འགྱུར་ཞིང་། ནོར་དང་ཤིན་ཏུ་ལྡན་པ་དང་། རབ་ཏུ་བདེ་བ་དང་། མཆོག་ཏུ་གཟུགས་བཟང་བ་དང་། འཇིག་རྟེན་གྱི་བར་བཟང་པོར་དྲོ་བ་དང་། བསིལ་བའི་ཉེ་བའི་ཚལ་རྣམས་ཀྱི་ནང་དུ་སྐྱེ་བར་
འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་རི་རྩེ་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་ལུས་ཀྱི་ཚུལ་ཁྲིམས་རྣམ་གཉིས་བསྲུངས་པ་ཡིན་ཏེ། སྲོག་ཆགས་གསད་པར་ཆད་པ་དང་། བཅིངས་པ་ཐར་བར་བྱས་ཤིང་། མཐུ་རབ་ཏུ་ཆེ་བར་གྱུར་ལ་ནུས་པར་ལྡན་པ་ཞིག་ལམ་དུ་ཞུགས་ཏེ། བཀྲེས་ཤིང་སྐོམ་བཞིན་དུ་བུ་རམ་ཤིང་ངམ། ལྡུམ་རའམ། རྫིའུའི་གྲོང་དག་ཏུ་བའི་བཅུད་དམ། བུ་རམ་ཤིང་གི་བཅུད་མ་བྱིན་པར་མ་བླངས། སེམས་ཅན་གསད་པར་བྱ་བ་དང་། མ་བྱིན་པར་བླངས་ནས་འཇིགས་ཏེ་འགྲོ་བ་ཐར་བར་བྱས་པའི་སྐྱེས་བུ་དམ་པ་དེ་ལུས་དང་བྲལ་ནས། བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་གྱི་གནས། རི་རྩེར་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་བདེ་བའི་ལོངས་སྤྱོད་དུ་མ་དང་ལྡན་ཞིང་། དེ་ཡུལ་ཆུ་བོ་ལྟ་བུ་དུ་མས་བདས་པ་ཡིན་ལ། དེ་ཡང་འདོད་ཆགས་ཆུ་བོ་ལྟ་བུ་ཡིན། འདི་ལྟ་སྟེ། འདོད་ཆགས་ཀྱི་ཆུ་བོ་དང་། རྒྱགས་པའི་གློང་དང་། མགུ་བའི་གླིང་དུ་ཆགས་པ་དང་། ཀུན་དགའི་ཆུ་མིག་དང་། ཀུན་དུ་རྟོག་པའི་རླབས་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་སྡུག་པའི་བྱ་དང་། ལྟ་བ་ཆུ་སྲིན་འཛིན་ཁྲི་ཀུན་དུ་འཁྲུགས་པ་དང་། རབ་ཏུ་ཐོགས་པ་དུ་མ་ཡ་ཡོར་འགྲོ་བ་དང་། ཚལ་དང་། ཉེ་བའི་ཚལ་ཆུ་ཡིས་བར་བུར་དེད་པ་དང་། ཕྲ་དོག་གི་ཉ་དང་། སྤྲོ་བ་ཆུ་ལས་བརྒལ་བ་དང་། ཡུལ་དུ་མའི་རི་ཁྲོད་ནས་ཆུ་འབབ་སྟེ། སྲེད་པའི་ཆུ་བོ་འདམ་རྫབ་ལ་སོགས་པ་རྣམ་པ་དེ་ལྟ་བུ་དག་ལས་ལྷ་རྣམས་འབྱུང་བར་མི་ནུས་སོ། །གཞན་ཡང་ཆུ་བོ་གང་གཱའི་ཕ་རོལ་གྱི་འགྲམ་གྱི་རླབས་མི་མངོན་པ་ལྟར། ཐོག་མ་མེད་པའི་དུས་ནས་རྒྱུན་དུ་ཤིན་ཏུ་
ཟབ་མོར་རབ་ཏུ་ཞུགས་པ། འདོད་པ་དང་། གཟུགས་དང་། གཟུགས་མེད་པའི་ཁམས་ན་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རླབས་ལྟ་བུས་ཁྱབ་ཅིང་། མྱུར་དུ་འགྲོ་བའི་སྲེད་པ་ཆུ་ཀླུང་ལྟ་བུ་དེ་སེམས་ཅན་དམྱལ་བའི་རྒྱུ་ཡང་ཡིན་ལ། མི་རྣམས་ཀྱིས་ཀྱང་ཆོག་པར་འཛིན་མི་ནུས་ཏེ། དེ་ལྟར་སྲེད་པའི་རྣམ་པ་ཆུ་བོ་ལྟ་བུས་རི་རྩེ་ན་གནས་པའི་ལྷ་རྣམས་རབ་ཏུ་བདས་སོ། །དེར་ལྷ་དེ་དག་ལྷ་མོའི་ཚོགས་ཀྱིས་ཡོངས་སུ་བསྐོར་ཏེ། ལྷའི་འདོད་པའི་ཡོན་ཏན་ལྔ་རྣམས་འབྱོར་ཅིང་ལྡན་པར་གྱུར་པས་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །དེར་ཚལ་འདི་ལྟ་བུ་དག་འབྱུང་བར་འགྱུར་ཏེ། འདི་ལྟ་སྟེ། ཚལ་རྟག་ཏུ་རབ་དགའ་ཞེས་བྱ་བ་དང་། ཚལ་རྟག་ཏུ་མངོན་དགའ་ཞེས་བྱ་བ་དང་། ཚལ་སྤྲིན་ལྟར་དཀར་བརྩེགས་ཞེས་བྱ་བ་དང་། ཚལ་ཀུན་ནས་མངོན་དགའ་ཞེས་བྱ་བ་དང་། ཚལ་ཟླ་བ་འདྲ་ཞེས་བྱ་བ་དང་། ཚལ་གང་གཱའི་སྟེང་དུ་རྒྱུ་ཞེས་བྱ་བ་སྟེ། ཚལ་འདི་དག་ནི་རི་རྩེ་ན་གནས་པའི་ལྷ་རྣམས་ཀྱི་ཡིན་ནོ། །ཚལ་དེ་རྣམས་ཀྱི་ནང་དུ་ལྷ་དག་བདེ་བ་དུ་མ་དང་ལྡན་ཞིང་། བུད་མེད་ཀྱི་དགའ་བ་རྣམས་དང་ལྷན་ཅིག་རྩེ་བར་བྱེད། དགའ་དགུར་སྤྱོད་པར་བྱེད་དོ། །བཏུང་བའི་ཆུ་བོ་རྣམས་ཀྱང་འདི་ལྟ་སྟེ། ཆུ་བོ་སྣ་ཚོགས་ཞེས་བྱ་བ་དང་། ཆུ་བོ་ལག་མཐིལ་གྱིས་བྱུག་ཅིང་རེག་པ་ཞེས་བྱ་བ་དང་། ཆུ་བོ་ངོམས་མི་མྱོང་ཞེས་བྱ་བ་དང་། ཆུ་བོ་མེ་ཏོག་ཀུ་མུ་ད་དང་། ཨུད་པ་ལ་སྐྱེ་ཞེས་བྱ་བ་སྟེ། ཆུ་བོ་དེ་དག་གི་འགྲམ་གཉི་ག་རིལ་ཁེབས་པ་ཡིན་ནོ། །དངུལ་དང་། ཤེལ་དང་། གསེར་གྱི་ཤིང་ལྗོན་པ་འབྲས་བུ་དང་ལྡན་ཞིང་། མེ་ཏོག་དང་ལྡན་པ་རྣམས་ཀྱིས་ལྷའི་ས་གཞི་དེ་དག་ཉམས་དགའ་བར་བརྒྱན་པའི་ས་གཞི་དེར་དགེ་བའི་ལས་སྣ་ཚོགས་དང་། ལས་བྱས་པ་སྣ་ཚོགས་ཀུན་ནས་བསླང་བ་རྣམས་ཀྱིས་ཚལ་དེ་དག་དང་། ཆུ་བོ་དེ་དག་དང་། ས་གཞི་དེ་དག་དང་། ཟས་དང་སྐོམ་ཆུ་བོ་ལྟར་འབབ་པ་དེ་དག་ཏུ། ལྷ་དེ་རྣམས་
ལྷའི་རོལ་མོ་དང་། ལྷའི་གནས་ཆེན་པོ་དང་། ཐགས་སུ་བཏགས་པ་མ་ཡིན་པའི་ལྷའི་གོས་རྣམས་ཀྱིས་དགའ་བར་བྱེད་དོ། །ལྷ་དེ་རྣམས་རང་ལས་འོད་འབྱུང་ལ། ཤ་དང་། རུས་པ་དང་། རྣག་ཁྲག་དང་བྲལ་བ། ལུས་དང་། ངག་དང་། ཡིད་ངལ་བ་དང་བྲལ་བ། ལུས་དང་ཡིད་རྟག་ཏུ་ཀུན་ནས་དགའ་བ་རྣམས་ཇི་སྲིད་དུ་ལུས་དང་ངག་གི་འདོད་པ་སྡུག་པ་ཡིད་དུ་འོང་བ་ཤིན་ཏུ་བསིལ་བ། རྣམ་པར་སྨིན་པ་མཆོག་ཏུ་བདེ་བ། མཐོ་རིས་སུ་སྐྱེ་བ་ངེས་པར་མྱོང་བར་འགྱུར་བའི་དགེ་བའི་ལས་མ་ཟད་པ་དེ་སྲིད་དུ་འགྲོས་འཆོས་ཤིང་དགའ་བར་བྱེད། རྩེ་བར་བྱེད། ཡོངས་སུ་སྤྱོད་པར་བྱེད་དོ། །དེ་དག་ལས་ཟད་དེ་ལྷའི་འཇིག་རྟེན་དེ་ནས་འཆི་བར་འགྱུར་ལ་ཤི་ནས་ཀྱང་ལས་ཇི་ལྟར་བྱས་པ་བཞིན་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བ་མིར་འགྲུབ་པའི་ལས་ཀྱིས་མི་རྣམས་ཀྱི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་དེ་རྟག་ཏུ་ལོངས་སྤྱོད་ཅན་དུ་འགྱུར་ཞིང་རྟག་ཏུ་ཤེས་པ་ལ་དགའ་བ། ཡིད་ལ་དགོད་པ་དང་། རྩེད་མོ་དང་། རྩེ་བ་དང་། ཡུལ་བཟང་པོར་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། སུམ་ཅུ་རྩ་གསུམ་ན་ལྷ་རྣམས་ཀྱི་གནས་གཞན་གང་ཞིག་ཡོད་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། བལྟ་ན་སྡུག་པ་གནས་པ་ཞེས་བྱ་བའི་གནས་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་བརྟགས་ན་གང་ཚུལ་ཁྲིམས་དང་ལྡན་པའམ། སེམས་ཅན་གཞན་ཆུས་ཁྱེར་བའམ། མཚོན་གྱིས་གསད་པར་བྱ་བ་སྲོག་ཕྱུང་ཞིང་། ནོར་རྫས་སམ། བདག་ཉིད་ལ་མི་ལྟ་བར་ཆུ་ནས་ཕྱུང་བ་དང་། བཀྲེས་བཞིན་དུ་ལམ་དུ་འགྲོ་བ་ན་གཞན་གྱིས་མ་བྱིན་པར་བླང་བ་ལ་རབ་ཏུ་སྤྲོ་བ་བསྐྱེད་ཀྱང་ལེན་པར་མི་བྱེད། གཞན་ཡང་ཕྱོགས་དབེན་པར་ཕྱིན་ལ་འཚོ་བ་ཉམ་ང་བར་གྱུར་ཀྱང་འབྲས་བུ་དང་རྩ་བ་དག་མ་བྱིན་པར་ལེན་པར་
མི་བྱེད་ཅིང་། ཚུལ་ཁྲིམས་དང་ལྡན་པ་མ་གུས་པར་བསླབ་པའི་གཞི་རྡུལ་ཕྲ་མོ་ཙམ་རལ་བ་ལ་ཡང་འཇིགས་པར་ལྟ་ན། དེ་ལུས་དང་བྲལ་ནས་བདེ་འགྲོ་གྲོང་ཁྱེར་ཆེན་པོ་བལྟ་ན་སྡུག་ཏུ་སྐྱེ་བར་འགྱུར་རོ། །གྲོང་ཁྱེར་དེ་ཡང་དཔག་ཚད་ཁྲི་ཡོད་ལ། ཁྱམས་ཁྲིས་ལེགས་པར་རྣམ་པར་ཕྱེ་བ་ཡིན་ནོ། །གྲོང་ཁྱེར་དེའི་ས་གཞི་འཛམ་བུ་ཆུ་བོའི་གསེར་ལས་བྱས་ལ། ཀུན་ནས་ཁང་པ་ཆེན་པོ་བཻ་ཌཱུརྱ་ལས་བྱས་པ་དང་། གཞན་ཡང་དངུལ་ལས་བྱས་པ་དང་། གཞན་ཡང་འཛམ་བུ་ཆུ་བོའི་གསེར་ལས་བྱས་པ་དང་། མཐོན་ཀ་སྣ་ཚོགས་ལས་བྱས་པ་དང་། གཞན་ཡང་རིན་པོ་ཆེ་སྣ་བདུན་ལས་བྱས་པའི་ཁྲི་དག་གིས་བཀྲ་བར་ཕྱེ་བ་ཡིན་ནོ། །དེ་དག་གི་སྲང་ཡང་ཀུན་ནས་ཤིན་ཏུ་རྣམ་པར་ཕྱེ་བ་ཡིན་ལ། བཞི་མདོ་དང་། བ་གམ་དང་། སྒོ་དང་། པུ་ཤུའི་རྩེ་མོ་དང་། ཁང་བཟངས་ཀྱི་རིས་ཤིན་ཏུ་རྣམ་པར་ཕྱེ་བ་ཡིན་ནོ། །ཁང་པ་དེ་དག་ཀྱང་ཉི་མ་གང་མེད་ཀྱང་སྒྲོན་མ་ལྟ་བུར་འགྱུར་ཏེ། ཇི་ལྟར་ཉི་མ་མེད་ན་སྒྲོན་མ་གསལ་བར་བྱེད་པ་དེ་ལྟར་ཉི་མ་མེད་ཀྱང་ཁང་པའི་མཆོག་དེ་རྣམས་ལས་དེ་ལྟར་འོད་འབྱུང་ངོ་། །གྲོང་ཁྱེར་དེ་དག་ཀུན་ནས་ཚལ་དང་། ཉེ་བའི་ཚལ་དེ་རྣམས་ཀྱིས་མཛེས་པར་བྱས་པ་ཡིན་ཏེ། ཚལ་དང་ཉེ་བའི་ཚལ་ཁ་ཅིག་བཻ་ཌཱུརྱ་ལས་བྱས་པ་དག་ལ་མུ་ཏིག་གི་དྲ་བས་བྲེས། ཁ་ཅིག་གསེར་གྱི་ཤིང་ལྗོན་པ་དག་ལ་དངུལ་གྱི་དྲ་བས་བྲེས། ཁ་ཅིག་དངུལ་གྱི་ཤིང་ལྗོན་པ་དག་ལ་གསེར་གྱི་དྲིལ་བུ་གཡེར་ཀའི་སྒྲ་འབྱིན། ཁ་ཅིག་ནི་རིན་པོ་ཆེ་སྣ་བདུན་གྱི་ཤིང་ལྗོན་པའི་སྐྱེད་མོས་ཚལ་བཀྲ་བ་ཡིན་ལ། ཁ་ཅིག་དཔག་བསམ་གྱི་ཤིང་ཡིན་ཏེ། ལྷ་གང་དག་གི་ཡིད་ལ་བསམས་པ་དེ་ཚལ་དེ་དག་ལས་ཐོབ་པར་འགྱུར་རོ། །ཚལ་ཁ་ཅིག་ཨན་ད་རྙིལ་དང་། བཻ་ཌཱུརྱ་ལས་བྱས་པ་ཡིན་ཏེ། དེ་ན་གསེར་གྱི་བྱ་རྣམས་སྒྲ་སྙན་པ་སྣ་ཚོགས་འབྱིན་ལ། གསེར་གྱི་ཚལ་གང་ཡིན་པ་དེ་ན་དངུལ་གྱི་བྱ་རྣམས་སྐད་སྙན་པ་འབྱིན་ཅིང་རྩེ། མཐོན་ཀའི་ཚལ་གང་ཡིན་པ་དེ་ན་བྱ་པད་མ་རཱ་གའི་མདོག་ཏུ་འདུག་པ་རྣམས་སྐད་སྙན་པ་འབྱིན་ཅིང་རྩེ། གསེར་གྱི་ཚལ་གང་ཡིན་པ་དེ་ན་བྱ་ལུས་སྣ་ཚོགས་འདྲེས་པ་རྣམས་སྐད་སྙན་པ་འབྱིན་ཅིང་རྩེ་སྟེ། དེ་ལྟར་གྲོང་ཁྱེར་
ཆེན་པོ་ལེགས་པར་མཐོང་ན་ཉེ་བའི་ཚལ་དུ་གྱུར་པ་རྣམས་མཛེས་པ་ཡིན་ནོ། །སྲང་དང་གསེར་གྱི་ཁང་པ་མཛེས་པར་བྱས་པ་གང་ཡིན་པ་དེ་དག་ལ་དངུལ་གྱི་ཀ་བ་དང་། བཻ་ཌཱུརྱའི་ཤིང་ལྗོན་པ་རྣམས་ཀྱིས་མཛེས་པར་བྱས་པ་ཡིན། གསེར་གྱི་སྲང་གང་ཡིན་པ་དེ་དག་ལ་བཻ་ཌཱུརྱའི་ཀ་བ་བཙུགས་ཤིང་གསེར་གྱི་ཤིང་ལྗོན་པ་དང་ཁང་པས་བརྒྱན། སྲང་དང་། ཁྱིམ་འདྲེས་པས་མཛེས་པར་བྱས་པ་གང་ཡིན་པ་དེ་ན་བྱ་གསེར་གྱི་མདོག་ཅན་ཡོད་དེ། གྲོང་ཁྱེར་བལྟ་ན་སྡུག་གང་དང་གང་དུ་སྣང་བ། དེ་དང་དེ་དཔེ་མེད་པར་མཐོང་ངོ་། །གྲོང་ཁྱེར་དེ་ཡང་ཀུན་ནས་ཚལ་ཆེན་པོ་བཞི་རྣམས་ཀྱིས་མཛེས་པར་བྱས་པ་ཡིན་ཏེ། འདི་ལྟ་སྟེ། དྲ་བའི་ཕྲེང་བ་དང་། ཤིང་ཆེན་པོ་དང་། འོད་གསལ་བ་དང་། མཐོང་ན་དགའ་བས་སོ། །ཚལ་ཐམས་ཅད་དཔག་ཚད་ཉིས་བརྒྱ་ལྔ་བཅུ་ཡོད་དེ། ཚལ་དེ་ཐམས་ཅད་ན་ཆུ་བོ་ཆེན་པོ་ཁྲི་ཡོད་པ་གསེར་གྱི་པད་མས་ཁེབས་པ་ཡིན་ནོ། །ཆུ་བོ་དེ་དག་ཤིན་ཏུ་ཉམས་དགའ་བ་ཡིན་ཞིང་འགྲམ་གཉི་ག་ཞིག་པ་མེད་ལ། དེ་དག་གསེར་དང་། དངུལ་དང་། ཤེལ་དང་། ཨན་ད་རྙིལ་དང་། ཤིང་ལྗོན་པ་རྣམས་ཀྱིས་མཛེས་པར་བྱས་པ་ཡིན་ནོ། །ཚལ་ཆེན་པོ་དེ་དག་བུང་བ་འདབ་མ་བཻ་ཌཱུརྱ་ལ་ལུས་དངུལ་དུ་འདུག་པའི་ཚོགས་རྣམས་ཀྱིས་མཛེས་པར་བྱས་པ་ཡིན་ཏེ། གང་བུང་བ་རྣམས་ཀྱི་སྒྲ་སྙན་པའི་དྲུང་ན་མིའི་གླིང་བུའི་སྒྲས་བཅུ་དྲུག་གི་ཆར་ཡང་མི་ཕོད་དོ། །བཻ་ཌཱུརྱའི་ཤིང་ལྗོན་པ་རྣམས་ལ་འབྲས་བུ་གསེར་གྱི་མདོག་ཅན་ཤིན་ཏུ་དྲི་ཞིམ་ཞིང་ཁར་སྙི་བ་བས་ཆེས་ལྷག་པའི་རོ་དག་ཡོད་ལ། འབྲས་བུ་རྣམས་ཀྱི་དྲི་གང་ཡིན་པ་དཔག་ཚད་དུ་འབྱུང་ངོ་། །བྱ་རྣམས་ངོ་བོ་ཉིད་ཀྱིས་རྒྱགས་པ་ཡིན་ལ། དེ་ནས་ཡང་དྲི་གང་ཡིན་པ་དེས་བརྒྱ་འགྱུར་དུ་ཤིན་ཏུ་རྒྱགས་པར་འགྱུར་རོ། །གསེར་གྱི་ཤིང་ལྗོན་པ་གང་ཡིན་པ་དེ་རྣམས་ལ་དངུལ་གྱི་འབྲས་བུ་ལྷའི་དྲི་དང་། མདོག་དང་། རོ་ལྔ་དང་ལྡན་པ་དག་འབྱུང་། ཤིང་ལྗོན་པ་བཻ་ཌཱུརྱའི་སྡོང་པོ་དང་གསེར་གྱི་འདབ་མ་ཡོད་པ་གང་ཡིན་པ་དེ་རྣམས་ལ་འབྲས་བུ་ཁ་དོག་སྣ་ཚོགས་ཡོད་པ་དག་འབྱུང་སྟེ། དེ་ལྟར་ཚལ་ཁ་དོག་རྣམ་པ་དུ་མ། རྣམ་པ་སྣ་ཚོགས་དཔེ་མེད་པ་གཞན་དང་མི་འདྲ་བས། གྲོང་
ཁྱེར་ཆེན་པོ་བལྟ་ན་སྡུག་ཡོངས་སུ་བསྐོར་ནས་རྣམ་པར་གནས་སོ། །ཀུན་དུ་རྟོག་པའི་རི་མོ་བྲིས་པ་ལྟར་ལྷའི་ལས་རྣམ་པ་དུ་མ་བྱས་ཤིང་ལས་རྣམ་པ་དུ་མ་སྣ་ཚོགས་བྱས་པ་རྣམས་ཀྱིས་དེ་རྣམས་ཀྱང་སྣ་ཚོགས་སུ་བྱུང་བ་ཡིན་ཏེ། དེ་ལྟར་འབྲས་བུ་རྒྱུ་དང་འཐུན་པར་རྒྱུའི་འབྲས་བུ་ཡིན་ནོ། །ཇི་ལྟར་ས་བོན་གྱི་རྣམ་པ་ཇི་སྲིད་ཡོད་པ་དེ་སྲིད་དུ་འབྲས་བུའི་རྣམ་པ་ཡང་འབྱུང་བར་འགྱུར་ཏེ། དེ་ལྟར་གྲོང་ཁྱེར་བལྟ་ན་སྡུག་ན་གནས་པའི་ལྷ་རྣམས་བདེ་བ་མང་པོ་དུ་མ་དག་གིས་ཕྲོགས་པ་ཡིན་ནོ། །གྲོང་ཁྱེར་དེ་ངོ་བོ་ཉིད་ཀྱིས་ལེགས་མཐོང་ཉིད་ཡིན་ཏེ། ཚལ་ཁང་བཟངས་གསེར་དང་། བྱི་རུ་དང་། སྤུག་དག་གིས་བརྒྱན་ཅིང་མཛེས་པར་བྱས་པ། དྲིལ་བུ་གཡེར་ཀའི་དྲ་བ་སྣ་ཚོགས་ཀྱིས་དཀྲིགས་པ། གསེར་གྱི་དྲིལ་བུ་གཡེར་ཀ་སྒྲ་སྙན་པ་འབྱིན་པས་མཛེས་པར་བྱས་པ། ཚལ་དང་ཉེ་བའི་ཚལ་དང་། སྐྱེད་མོས་ཚལ་དེ་དག་ཏུ་བལྟ་ན་སྡུག་ན་གནས་པའི་ལྷ་རྣམས་འཁོད་དོ། །ལྷའི་གྲོང་ཁྱེར་ན་གནས་རྒྱན་དང་། རོལ་མོ་དང་། སིལ་སྙན་རྟག་ཏུ་སྒྲ་འབྱིན་པ་རབ་ཏུ་འབྱིན་ཅིང་། ལྷ་དང་ལྷ་མོའི་ཚོགས་རྣམས་ཀྱིས་ཀུན་དུ་གང་བ་དེ་ན་བཏུང་བ་དང་ཕྲེང་བ་དག་གིས་མཛེས་པར་བྱས་པ། རྒྱལ་མཚན་དང་། བ་དན་བྱེ་བ་འབུམ་ཕྲག་དུ་མ་དག་རླུང་གིས་རབ་ཏུ་བསྐྱོད་དོ། །ཡང་རི་རབ་ཀྱི་སྟེང་གི་གྲོང་ཁྱེར་དུ་ལྷའི་ཚོགས་བྱེ་བ་ཕྲག་བརྒྱ་སྟོང་དུ་མ་དག་གིས་ཀུན་དུ་གང་ཞིང་ལས་ཆེན་པོ་རྣམས་ཀྱིས་མཛེས་པར་བྱས་པ་དེ་ན། འདི་ལྟར་ལྷ་མཐུ་རབ་ཏུ་ཆེ་བ་མཆོད་པར་འོས་པ་ཆེན་པོ། རྫུ་འཕྲུལ་ཆེ་བ། སྐྱེད་མོས་ཚལ་གྱི་དགའ་སྤྱོད་ལ་རྟག་ཏུ་ཡིད་མི་དགའ་བ། ལྷ་དང་ལྷ་མོའི་ཚོགས་འབུམ་ཕྲག་དུ་མས་ཀུན་དུ་གང་བ་ས་ཡ་ཕྲག་འབུམ་འཁོད་པ་རྣམས་བརྒྱ་བྱིན་གྱིས་མ་ལུས་པར་ཡོངས་སུ་ཤེས་སོ། །གང་གི་ཚེ་ལྷ་དེ་རྣམས་གལ་ཏེ་ལྷའི་གྲོང་ཁྱེར་ཆེན་པོ་སྐྱེད་མོས་ཚལ་གྱི་དགའ་སྤྱོད་དེ་ནས་སྐྱེད་མོས་ཚལ་དུ་དགའ་སྤྱོད་བྱེད་དུ་འགྲོ་བ་དེའི་ཚེ་ལྷ་རྣམས་ཤིང་རྟ་འབུམ་ཕྲག་དུ་མ་རྣམས་དང་འགྲོ་སྟེ། ལྷ་དེ་རྣམས་འགྲོ་བ་ན་རྒྱལ་མཚན་དང་། རུ་མཚོན་སྡུག་གུ་རྣམ་པ་སྣ་ཚོགས་ཀྱིས་མཛེས་པར་བྱས་པའི་ཤིང་རྟ་རྣམ་པ་སྣ་ཚོགས་དང་། ཁ་དོག་སྡུག་གུ་རྣམ་པ་སྣ་ཚོགས་དང་། དབྱིབས་སྣ་
ཚོགས་སུ་འདུག་པ་བྱེ་བ་ཕྲག་སྟོང་དཀྲིགས་པ་དག་བྱུང་ངོ་། །འདི་ལྟ་སྟེ། ཨན་ད་རྙིལ་ལས་བྱས་པའི་གཞལ་མེད་ཁང་གང་ཡིན་པ་དེ་ལ་ཤིང་རྟའི་མདའ་པད་མ་རཱ་ག་ལས་བྱས་ཤིང་། དེ་ལ་ཤིང་རྟའི་སྟེང་གི་ཁང་པ་རིན་པོ་ཆེ་ལས་བྱས། ནང་ནི་སྤུག་ལས་བྱས། ཕྱི་རོལ་ནི་བཻ་ཌཱུརྱ་ལས་བྱས། ས་རིས་ནི་གསེར་ལས་བྱས་ལ། ཀུན་ནས་དྲིལ་བུ་གཡེར་ཀ་འཁྲིགས་པའི་སྒྲ་འབྱིན་པ་ཡིན་ནོ། །དེ་ནས་ཡང་ལྷ་རྣམས་གཞལ་མེད་ཁང་རྣམ་པ་སྣ་ཚོགས་གཞན་གྱིས་འགྲོ་བར་བྱེད་དེ། འདི་ལྟ་སྟེ། ཤིང་རྟའི་མདའ་ནི་གསེར་ལས་བྱས། ཤིང་རྟའི་སྟེང་གི་ཁང་པ་ནི་བཻ་ཌཱུརྱ་ལས་བྱས། ས་རིས་ནི་སྤུག་ལས་བྱས། མུ་ཏིག་གི་དྲ་བས་ནི་གཡོགས། ཕྱི་རོལ་ནི་རིན་པོ་ཆེ་མ་རྒད་ལྟ་བུ་ལས་བྱས། ངོས་ནི་བྱི་རུ་ལས་བྱས། སྲོག་ཤིང་ནི་དངུལ་ལས་བྱས་པ་ཡིན་ནོ། །ཁ་ཅིག་ཤིང་རྟའི་མཆོག་རྣམ་པ་གཞན་གྱིས་འགྲོ་བར་བྱེད་དེ། འདི་ལྟ་སྟེ། ཀུན་ནས་ཤིང་རྟའི་མདའ་ནི་གསེར་ལས་བྱས། ངོས་ནི་མུ་ཏིག་གིས་གཡོགས། ས་རིས་ནི་པད་མ་རཱ་གས་ཤིན་ཏུ་རྣམ་པར་ཕྱེ། སྲོག་ཤིང་ནི་དངུལ་ལས་བྱས། ཀུན་ནས་བྱི་རུས་ནི་མཛེས་པར་བྱས་པ་ཡིན་ཏེ། ཤིང་རྟ་འབུམ་ཕྲག་མང་པོ་གསལ་བ་མཚན་ཉིད་དཔེ་མེད་པ་དེ་དག་ལྷའི་ཚོགས་རྣམས་ཀྱིས་ཀུན་ནས་ཡོངས་སུ་བསྐོར་ཏེ། འབུམ་ཕྲག་རྣམ་པ་དུ་མ་དེ་རྣམས་ལ་ལྷ་དག་ཉིད་ཞོན་ནས་ཚལ་ཆེན་པོ་དེ་རྣམས་ག་ལ་བ་དེར་འདོང་བར་བྱེད་དེ། རྒྱལ་མཚན་ལ་ལ་བཻ་ཌཱུརྱ་ལས་བྱས། རྒྱལ་མཚན་ལ་ལ་གསེར་ལས་བྱས། ཡུ་བ་ལ་ལ་དངུལ་ལས་བྱས། རྒྱལ་མཚན་ལ་ལའི་ཡུ་བ་པད་མ་རཱ་ག་ལས་བྱས། རྒྱལ་མཚན་དང་རུ་མཚོན་ལ་ལའི་མདོག་དུ་མ་ཡོད་པ་དག་གིས་ནམ་མཁའ་བར་མེད་པར་བྱས་ནས། སྐྱེད་མོས་ཚལ་དུ་གནས་པར་བྱ་བའི་ཕྱིར། ཡིད་རབ་ཏུ་དགའ་བས་ཚལ་ཆེན་པོ་བཞི་པོ་ག་ལ་བ་དེར་འདོང་བར་བྱེད་དོ། །དེ་ལྟར་ལྷ་དེ་རྣམས་འདོང་བ་ན་སིལ་སྙན་བྱེ་བ་འབུམ་ཕྲག་དུ་མ་སྒྲ་འབྱིན་ཅིང་། རོལ་མོའི་སྒྲ་སྙན་པ་སྣ་ཚོགས་ཕན་ཚུན་རྡོབ་པར་ཞུགས་པ་དག་ཡོད་དེ། ཤིན་ཏུ་བཟང་ཞིང་ཉམས་དགའ་བའི་ཁྱད་པར་ཆེ་བ་ཡིན་ནོ། །ཇི་ལྟར་ལས་བྱས་པ་ངན་པ་དང་།
འབྲིང་དང་། ཆེན་པོ་བྱས་པ་བཞིན་ལས་བདེ་བ་རྣམས་ཀྱི་རྗེས་སུ་འཇུག་པ་ན་འདོང་བར་བྱེད་དེ། ལྷ་དེ་རྣམས་སོ་སོ་ལ་ལྷ་མོའི་ཚོགས་བརྒྱའམ། སྟོང་ངམ། འབུམ་རྣམས་གར་བྱེད། གླུ་ལེན། རབ་ཏུ་དགོད་ཅིང་ཡན་ལག་ལྔ་དང་ལྡན་པའི་རོལ་མོ་སྙན་པ་དང་བཅས་པ་རྡོབ་པ་ཞེས་བྱ་བ་ཀུན་དུ་གང་ཞིང་བྱེད་ལ་ཚལ་ཆེན་པོ་ཞེས་བྱ་བ་ག་ལ་བ་དེར་འདོང་བར་བྱེད་དོ། །ལྷའི་འདོད་པའི་ཡོན་ཏན་ལྔ་རྣམས་འབྱོར་ཅིང་ལྡན་པར་གྱུར་པའི་ལྷ་མོ་དེ་དག་ཐམས་ཅད་ལྷ་དེ་རྣམས་དང་སོ་སོར་ཕྲད་ནས་དེ་ལྟར་བྲོ་གར་བྱེད། དགོད་པར་བྱེད། རྩེད་མོ་བྱེད་དོ། །འདི་ལྟར་ལྷ་དེ་རྣམས་འདོད་པ་ལ་རྣམ་པར་ཞེན་པ་ཞེས་བྱ་བས་དགའ་བར་བྱེད་དེ། ལྷའི་སྒྲ་སྙན་པ་ཚང་ཚིང་གི་ནང་ན་ལྷའི་སྒྲ་སྙན་པ་དེ་དང་། གར་དགའ་དགུར་འགྲོ་བའི་ལྷ་དེ་རྣམས་ལྷའི་འདོད་པའི་རྣམ་པ་གང་ཡིན་པ་དེ་ཉིད་ཀྱིས་དེར་སྐྱེད་མོས་ཚལ་དུ་འགྲོ་བར་བྱེད་དེ། ལ་ལ་ནམ་མཁའ་ལ་སྤྲིན་ནག་པོ་འགྲོ་བ་ལྟ་བུ་བཻ་ཌཱུརྱའི་མདོག་ཅན་དེ་རྣམས་འགྲོ་བར་བྱེད། ལྷའི་མཆོག་དེ་དག་ཁ་ཅིག་ནི་འདི་ལྟར་རྒྱན་སྣ་ཚོགས་དང་། གོས་སྣ་ཚོགས་དང་། ཆ་བྱད་སྣ་ཚོགས་དང་། དགའ་བའི་གཏམ་སྣ་ཚོགས་ཀྱིས་དགའ་གཏམ་སྨྲ་ཞིང་ནམ་མཁའ་ཁྱབ་པར་བྱས་ནས་ཚལ་ཆེན་པོ་ག་ལ་བ་དེར་འདོང་བར་བྱེད་དོ། །ལྷའི་མཆོག་གཞན་ཁ་ཅིག་ནི་གསེར་གྱི་ས་གཞིའི་ལམ་ནས་རབ་ཏུ་འགྲོ་ལ། འགྲོ་བ་དེ་རྣམས་ཀྱི་ཤིང་རྟ་འབུམ་ཕྲག་དུ་མའི་མུ་ཁྱུད་ཀྱིས་གསེར་གྱི་རྡུལ་བསླང་སྟེ་ནམ་མཁའ་ཁྱབ་པར་བྱས་ནས་འདུག་གོ །གང་གིས་ནམ་མཁའ་དེ་སྐྱ་བོར་བྱེད་ཀྱང་། ལྷ་རྣམས་ལ་འགོ་བར་མི་བྱེད་ལ། ལྷ་གང་འཆི་བ་དང་ཉེ་བར་འགྱུར་བ་དེ་རྣམས་ཀྱི་གདོང་ངམ། གོས་དེ་ལ་ནི་འགོ་བར་བྱེད་དོ། །ལྷ་གང་གཞན་དག་གིས་རྡུལ་དེ་མཐོང་ཞིང་འཆི་བའི་ལྟས་མཐོང་ལ། དེ་འཆི་བའི་སྡུག་བསྔལ་མཐའ་མེད་པར་འགྱུར་བ་མངོན་པར་མཐོང་ནས། དེ་སྙིང་རྗེ་རྗེ་ལྟ་བུར་གྱུར་པའི་སེམས་ཀྱིས་འདི་ལྟར་ཚིགས་སུ་བཅད་དེ་སྨྲས་པ། བུད་ཤིང་ལྟ་བུའི་ཡུལ་འབྱུང་དང་། །མེས་བསྲེགས་ལྟ་བུའི་འཆི་འགྱུར་བ། །ལམ་འདི་ནས་ནི་ལྷ་རྣམས་དག །བརྒྱའམ་ཡང་ན་སྟོང་དུ་འདིར། །འཆི་བ་གཞན་གྱིས་མཐོང་འགྱུར་ལ། །བདག་ཉིད་ཀྱིས་ནི་མི་མཐོང་སྟེ། །ཕྱི་
ནས་ཉོན་མོངས་ཕྲད་པ་དང་། །བདག་ཉིད་ཀྱིས་ནི་སྡུག་བསྔལ་རིག །བག་མེད་པ་དང་འདྲེས་པའི་སེམས། །ཡུལ་ལ་རྟག་ཏུ་མངོན་པར་དགའ། །ལུས་ཅན་ལྷན་ཅིག་སྐྱེས་གནས་པ། །འཆི་བ་བརྟན་པ་མི་རིག་གོ །བག་མེད་པ་ལ་མངོན་དགའ་ཞིང་། །བདེ་བ་ཉམས་དགའ་བྱེད་པ་ན། །འཆི་བདག་སྡེ་ཡིས་འདི་དྲངས་པ། །རབ་ཏུ་འཇོམས་ཏེ་དུག་དང་འདྲ། །འཆི་བའི་ཞགས་པས་བཟུང་བ་ཡི། །ཁྱོད་ལ་སྐྱོབ་པ་བྱེད་མེད་དེ། །སྨན་དང་སྔགས་དང་ལས་མི་སྐྱོབ། །དེ་བཞིན་ལྷ་མིན་ལྷ་མི་སྐྱོབ། །རྡུལ་རྣམས་ཀྱིས་ནི་གདོང་གཡོགས་པ། །བདག་ཉིད་ཀྱིས་ནི་མི་རིག་སྟེ། །འདི་ནི་འཆི་བའི་ཕོ་ཉ་ཡིན། །ཤི་བ་ཕྱི་ནས་ཐོབ་པར་འོང་། །གང་ཞིག་བདེ་བའི་དོན་མ་མཐོང་། །སྐྱེ་བ་རྟག་ཏུ་བརྐམ་ཆགས་ཤིང་། །སྲེད་པས་ངོམས་ནི་མི་མྱོང་བ། །གློ་བུར་དུ་ནི་འཆི་བར་འགྱུར། །འཆི་བས་བཏང་བ་ཆེན་པོ་འདི། །ཁྱོད་ཀྱི་ཕོ་ཉ་དང་པོ་སྟེ། །འདི་ཡི་འོག་ཏུ་འཆི་བ་ཡང་། །ཤིན་ཏུ་མི་བཟད་འབྱུང་བར་འགྱུར། །ཚལ་དང་ཉེ་བའི་ཚལ་བརྒྱན་པ། །རང་གི་ལས་ཀྱི་འབྲས་བུ་སྤྱད། །སེམས་ཅན་རི་བོ་མཆོག་དེ་ནས། །དབང་མེད་བཅིངས་ཏེ་ཁྲིད་པར་འགྱུར། །མྱོས་པས་རྩེ་བར་གནས་པ་དག །བདེ་བས་ངོམས་ནི་མི་མྱོང་ཞིང་། །རྨོངས་པ་སྲེད་པས་མ་ངོམས་པ། །དབང་མེད་ས་སྟེང་ལྟུང་བར་འགྱུར། །ཇི་ལྟར་རྟག་ཏུ་མེ་དག་ལས། །དུ་བ་སྔར་ནི་འབྱུང་འགྱུར་བ། །དེ་ལྟར་འཆི་བའི་རྟགས་བྱུང་སྟེ། །ཕྱི་ནས་འཆི་བ་གནས་པར་འགྱུར། །དེ་ལྟར་ལྷ་དེ་དག་བག་མེད་པ་ཆུང་བ་ལ་གནས་ཤིང་། སེམས་སྔོན་དགེ་བའི་རྩ་བ་སྤྱད་པ་ལ་གོམས་པ་ཡིན་ལ། ལྷ་དེའི་བར་ཆད་དེ་མཐོང་ནས་བདག་ཉིད་དང་ལྷ་དེ་རྗེས་སུ་སྟོན་པར་བྱེད་དོ། །དེ་ལྟར་ལྷ་དེའི་གཏམ་སྨྲ་བ་ན། ཤིང་རྟ་ལ་ཞོན་པ། ཤིང་རྟ་སྣ་ཚོགས་ལ་ཞོན་ཞིང་། ཤིང་རྟའི་དྲིལ་བུ་གཡེར་ཀའི་དྲ་བས་དཀྲིགས་པ། ལུས་ཆ་བྱད་དུ་མས་འབར་བ། མིག་རྒྱས་པ་ལྟ་བུར་འདུག་པ། ལྷའི་ཕྲེང་བ་དང་གོས་གྱོན་པ། གསེར་བཙོ་མས་རྣམ་པར་བརྒྱན་པ། གང་རི་རབ་ཀྱི་རིའི་རྩེ་མོ་སྟོང་སྙེད་དུ་ཕྱེ་མར་རློག་ཅིང་འོང་ངོ་། །དེ་ནས་ལྷ་དེ་ལྷའི་ཚོགས་དེ་རྣམས་རྟོག་ཅིང་འོང་བ་ན། དེ་བཞིན་དུ་ལ་ལ་ནི་ནམ་མཁའ་ལ།
ལ་ལ་ནི་ས་ལ། ལ་ལ་ནི་བྱའི་ཤིང་རྟ་རྣམས་ཀྱིས། ལ་ལ་ནི་ལྷ་མོ་དང་ལྷན་ཅིག་གླུ་ལེན། བྲོ་རྡུང་ཞིང་འོང་སྟེ། ཚལ་དང་ཉེ་བའི་ཚལ་དེ་དག་ལྷའི་པད་མ་དང་། ཤིང་ལྗོན་པ་དང་། ཆུ་བོ་དང་། བྱ་དང་། འབྲས་བུ་དང་། མེ་ཏོག་དང་། རིན་པོ་ཆེ་སྣ་ཚོགས་དང་། ཀུན་ནས་མཆོག་ཏུ་ཉམས་དགའ་བའི་ཚལ་དང་། ཉེ་བའི་ཚལ་གྱི་ཕྱོགས་ག་ལ་བ་དེར་འདོང་བར་བྱེད་དོ། །བལྟ་ན་སྡུག་ན་གནས་པའི་ལྷ་དེ་རྣམས་ཤིང་རྟའི་མཆོག་དེ་དག་ལ་ཞོན་ནས། གསེར་གྱི་ཤིང་ལྗོན་པ་ཉི་མ་ལྟ་བུ་ཡོད་པ་ག་ལ་བ་དེར་དོང་ངོ་། །གང་གཞན་བར་སྣང་ལ་རྒྱུ་བ་དེ་དག་ཀྱང་བར་སྣང་དེ་ལས་བབས་ནས་སྐྱེད་མོས་ཚལ་ག་ལ་བ་དེར་དོང་ངོ་། །དེ་ལྟར་ལྷའི་ཚོགས་དེ་དག་ཐམས་ཅད་འདུས་ནས་སིལ་སྙན་གྱི་སྒྲ་དང་། གླུ་དབྱངས་ཀྱི་སྒྲ་རྣམ་པ་སྣ་ཚོགས་ཀྱིས་དགའ་བར་བྱེད། ཡོངས་སུ་སྤྱོད་པར་བྱེད་དེ། ཕན་ཚུན་གྲོགས་སུ་གྱུར་ཅིང་ཕན་ཚུན་འགྱེད་པ་དང་། ཕྲག་དོག་ལ་སྐྱོ་བ་མེད་པ་རྣམས་བྲོ་གར་བྱེད། དགོད་པར་བྱེད། དགའ་དགུར་སྤྱོད་པར་བྱེད་དོ། །སིལ་སྙན་ཡན་ལག་ལྔ་དང་ལྡན་པ་ལ་འདི་ལྟ་སྟེ། རྒྱུད་དང་། རྔ་དང་། སིལ་དཀྲོལ་དང་། གླིང་བུའི་སྒྲ་དང་། གླུ་སྟེ་རྣམ་པ་འདི་ལྔས་ཁ་ཟས་ཆུ་བོ་ལྟར་འབབ་པ་དང་། བཏུང་བ་ཆུ་བོ་ལྟར་འབབ་པའི་ངོགས་སུ་ལྷ་དང་ལྷ་མོའི་ཚོགས་དེ་དག་ཕན་ཚུན་དགའ་ཞིང་ལྷན་ཅིག་ཏུ་སྐྱེད་མོས་ཚལ་དེར་རྩེས་ནས། གང་ན་བཻ་ཌཱུརྱ་དང་གསེར་གྱི་འབྲས་བུ་ཡོད་པ། འབྲས་བུ་མདོག་དང་དྲི་ཞིམ་པ་རོ་མངར་བ། སྦྲང་རྩི་ལྟ་བུ་རྣམས་ཀྱིས་མཛེས་པར་བྱས་པ་ཡིན་ཏེ། དེ་ཤིང་ལྗོན་པའི་དྲུང་དེ་དག་ཏུ་ཡང་འདོད་པ་ཉམས་དགའ་བའི་ལྷ་མོ་གཟུགས་མི་མཛེས་པ་མེད་པའི་གཟུགས་རྣམས་དང་ལྷན་ཅིག་འབྲས་བུའི་རོས་མྱོས་ནས་ཡུན་རིང་དུ་དགའ་བར་བྱེད་དོ། །དེ་ནས་དེ་ལྟར་བདེ་བ་ལ་གནས་ཤིང་རྒྱགས་པས་མྱོས་པའི་ལྷ་དང་ལྷ་མོའི་ཚོགས་དེ་རྣམས་བྲོ་གར་དང་། གླུ་དབྱངས་དང་། དགོད་པའི་སྒྲ་དེ་དག་ཐོས་ཤིང་། གང་ལྷའི་རྒྱལ་པོ་བརྒྱ་བྱིན་གྱི་རྗེས་སུ་འགྲོ་ལ་ཕྱི་བཞིན་དུ་འབྲང་བ་དེ་རྣམས་སྒྲ་དེ་དག་ཐོས་ནས། ལྷའི་རྒྱལ་པོ་བརྒྱ་བྱིན་ག་ལ་བ་དེར་འདོང་བར་བྱེད་དོ། །དེ་ལྟར་དེ་དག་ཐམས་ཅད་བརྒྱ་བྱིན་གྱི་དྲུང་དུ་དོང་ནས། བརྒྱ་
བྱིན་ལ་གསོང་པོར་སྨྲས་ཤིང་ཐལ་མོ་སྦྱར་ནས་མགོ་བོ་གཏུགས་ཏེ། བརྒྱ་བྱིན་ལ་བསྙད་པ། ལྷའི་དབང་པོ་འདི་ལྟར་བལྟ་ན་སྡུག་ན་གནས་པའི་ལྷའི་ཚོགས་དེ་དག་ཐམས་ཅད་སྐྱེད་མོས་ཚལ་དུ་དགའ་སྤྱོད་བགྱིད་དུ་མཆི་ན། ལྷའི་དབང་པོ་དེ་དག་མཁྱེན་པར་མཛོད་ཅིག །དེ་ནས་བརྒྱ་བྱིན་དེ་དག་ལས་ཚིག་དེ་ཐོས་ནས། ལྷ་རྣམས་ལ་འདི་ལྟར་བལྟ་ན་སྡུག་ན་གནས་པའི་ལྷ་དག་གང་ནས་དོང་བའི་སྐྱེད་མོས་ཚལ་དུ་བདག་ཅག་ཀུན་འདོང་གིས་ཁྱེད་རྣམས་འདོང་བར་ཤོམས་ཤིག་ཅེས་བསྒོའོ། །དེ་ནས་བརྒྱ་བྱིན་གྱིས་ཚིག་དེ་ཐོས་ནས་ཆོས་བཟང་ན་གནས་པའི་ལྷ་རྣམས་ཀྱང་ཤིང་རྟ་རྒྱལ་མཚན་སྣ་ཚོགས་ཅན་ལ་ཞོན། ལ་ལ་གསེར་གྱི་ཤིང་རྟ་སྲོག་ཤིང་བཻ་ཌཱུརྱ་ལས་བྱས་པ་བ་དན་བཏགས་པ་རྣམས་ལ་ཞོན། ལ་ལ་བཻ་ཌཱུརྱའི་ཤིང་རྟ་སྲོག་ཤིང་གསེར་ལས་བྱས་པ་རྣམས་ལ་ཞོན། ལ་ལ་ནི་རིན་པོ་ཆེ་སྣ་བདུན་བཀྲ་ཞིང་བ་དན་སྣ་ཚོགས་ཀྱིས་མཛེས་པར་བྱས་པ་རྣམས་ལ་ཞོན། ལ་ལ་གསེར་གྱི་བྱ་སྒྲ་སྙན་ཅིང་ཤིན་ཏུ་མཛེས་པར་འབྱུང་བའི་བྱའི་ཤིང་རྟ་རྣམས་ལ་ཞོན། ལ་ལ་རྟ་ཁྲ་བོ་འགྲོས་འཆམ་ཞིང་བདེ་བ་དག་ལ་ཤིང་རྟས་བླངས་ནས། ཤིང་རྟ་དེ་རྣམས་རྟ་དེ་རྣམས་ལ་བཏགས་ཏེ། རྟའི་ཤིང་རྟས་འགྲོ་བར་བྱེད། དེ་ལྟར་གཞན་ཡང་གསེར་གྱི་བྱ་ངང་པ་རྐང་པ་ནི་བཻ་ཌཱུརྱ། སྒྲོ་ནི་པད་མ་རཱ་གའི་མདོག་ལྟ་བུ་རྣམས་ཀྱི་སྟེང་དུ་ཞོན་ནས། ལྷའི་དབང་པོ་བརྒྱ་བྱིན་དང་ལྷན་ཅིག་ཏུ་བལྟ་ན་སྡུག་གི་གྲོང་ཁྱེར་ཆེན་པོ་ག་ལ་བ་དང་། སྐྱེད་མོས་ཚལ་ག་ལ་བ་ཡོད་པ་དེར་འདོང་བར་བྱེད་དོ། །ཡང་ལྷ་གཞན་དག་རིན་པོ་ཆེ་སྣ་བདུན་གྱི་རྨ་བྱའི་གཟུགས་དང་ལྡན་ཞིང་། མདོངས་ཀྱི་ཚོགས་ཀྱིས་ཁེབས་པ་གང་མིའི་འཇིག་རྟེན་ན་ཡང་གཟུགས་ཕུན་སུམ་ཚོགས་པ་ཡིན་ལ་ལྷའི་འཇིག་རྟེན་ན་ལྷ་གཞན་དང་མི་འདྲ་བ་ལེགས་པར་བྱས་པའི་ལས་རྣམས་ཀྱིས་མངོན་པར་བརྒྱན་པ་ལྟ་སྨོས་ཀྱང་ཅི་དགོས་ཏེ། དེ་དག་གི་མདོག་སྡུག་ཅིང་དབྱིབས་ལེགས་པ་དཔེ་བྱ་བར་ཡང་མི་ནུས་པའི་སྟེང་དུ་ཞོན་ནོ། །རྣམ་པ་དེ་ལྟ་བུ་དང་ལྡན་པ་དེ་དག་ལ་གཞན་དག་ཞོན་ནས་བལྟ་ན་སྡུག་གི་སྐྱེད་མོས་ཚལ་དང་། ཉེ་བའི་ཚལ་ག་ལ་བ་དེར་འདོང་བར་བྱེད་དེ། ལྷའི་ཚོགས་དེ་རྣམས་རོལ་མོའི་སྒྲ་དང་། གླུ་དབྱངས་སྣ་
ཚོགས་ཀྱིས་དགོད་ཅིང་རྩེ་ལ་ཡོངས་སུ་སྤྱོད་པ་དང་། ལྷ་གཞན་མྱོས་ཤིང་འཁོད་པ་རྣམས་སྐྱེད་མོས་ཚལ་ག་ལ་བ་དེར་འདོང་བར་བྱེད་དོ། །ལྷའི་རྒྱལ་པོ་བརྒྱ་བྱིན་གྱི་ཤིང་རྟ་བཞི་ཡང་འཁོར་ལོ་རྩིབས་སྟོང་དང་ལེགས་པར་ལྡན་པ། ཤིང་རྟ་རིན་པོ་ཆེ་སྣ་བདུན་ལས་བྱས་པ་ཡིན་ཏེ། འདི་ལྟ་སྟེ། ཨན་ད་རྙིལ་དང་། པད་མ་རཱ་ག་དང་། སྤུག་ཤིན་ཏུ་གསལ་བ་དང་། བཻ་ཌཱུརྱ་དང་། བྱི་རུ་དང་། རྡོ་རྗེ་དང་། ཤེལ་ལ་གསེར་གྱི་ཁྱེའུ་རྣམས་ཀྱིས་མངོན་པར་བརྒྱན་པ། ཤིང་རྟའི་མཆོག་དེ་ལ་བརྒྱ་བྱིན་ཞོན་ནས། རིན་པོ་ཆེ་སྣ་བདུན་གྱི་བྱ་ངང་པ་གསེར་གྱི་པད་མ་ལྟར་རྒྱས་ཤིང་། དབྱིབས་དང་། ཆ་བྱད་སྣ་ཚོགས་དང་ལྡན་པ་སྒྲ་ཆེ་ཞིང་གདངས་སྙན་པ་འབྱིན་པ་དེའི་དྲུང་ན་ལྷ་མོའི་དབྱངས་ཀྱང་སྙན་པར་མི་འགྱུར་བ་སྟོང་གིས་ཁྲིད་དེ། བརྒྱ་བྱིན་གྱི་ཤིང་རྟ་རྣམ་པ་དེ་ལྟ་བུ་དང་ལྡན་པ་ངང་པ་རྣམས་ཀྱིས་ཁྲིད་པར་བྱེད་དོ། །ཤིང་རྟ་དེ་ལ་ཡང་ཚོན་རྩི་སྣ་ཚོགས་ཀྱིས་བསྒྱུར་བའི་འཕན་ལྔ་བརྒྱ། འཕན་ཤིང་བཻ་ཌཱུརྱ་དང་། གསེར་དང་དངུལ་ལས་བྱས་པ་ལ་བཏགས་སོ། །འཕན་གྱི་ཁ་དོག་ནི་འདི་ལྟ་སྟེ། སྔོན་པོ་དང་། སེར་པོ་དང་། བཙོད་ཀ་དང་། དམར་པོ་དང་། དཀར་པོས་མཛེས་པར་བྱས་པ་ཡིན་ལ། ཤིང་རྟ་དེ་ལ་ལྷའི་རྒྱལ་པོ་དེ་ཞོན་ནས། ལྷ་མོའི་ཚོགས་དུ་མ་ནི་ཉེ་བ་ན་གླུ་དབྱངས་ལེན། ལྷ་འབུམ་ཕྲག་དུ་མ་ཡང་མདུན་དུ་སོང་ནས་གླུ་དབྱངས་ལེན་ཅིང་ནམ་མཁའ་ལ་ནི་ཡང་དང་ཡང་དུ་འགྲོ། ས་ལ་ནི་ཡང་དང་ཡང་དུ་འགྲོ་སྟེ། གར་དགའ་བར་འགྲོ་བ། ཅི་དགར་བྱེད་པ། ལྷའི་བདེ་བ་དེ་ལ་ཉེ་བར་སྤྱོད་ཅིང་སིལ་སྙན་ཡན་ལག་ལྔ་དང་ལྡན་པས་ཉམས་དགའ་བཞིན་དུ་གྲོང་ཁྱེར་བལྟ་ན་སྡུག་དང་། སྐྱེད་མོས་ཚལ་ག་ལ་བ་དེར་འདོང་བར་བྱེད་དོ། །དེར་འདོང་བ་ན་ལྷའི་ཚོགས་གཞན་དག་གིས་མཐོང་ནས་བྲོ་གར་བྱེད། གད་མོ་དགོད། རྩེད་མོ་རྩེ། རོལ་མོ་བྱེད་ཅིང་པད་མ་སྣ་ཚོགས་སྡོང་བུ་བཻ་ཌཱུརྱ་ལས་བྱས་པ་དག་ལག་ཏུ་ཁྱེར་ནས། ལྷའི་རྒྱལ་པོ་བརྒྱ་བྱིན་ལྷ་རྣམས་དང་ལྷན་ཅིག་གང་ནས་མངོན་དུ་འོང་བ་དེར་བལྟ་ན་སྡུག་པ་ན་གནས་པའི་ལྷ་དེ་རྣམས་ཀྱིས་ཀྱང་སྐྱེད་མོས་ཚལ་ནས་བྱུང་ནས་འོང་ངོ་། །དེ་ནས་བརྒྱ་བྱིན་གྱིས་བདག་ཅག་གི་དྲུང་འདིར་འོང་གིས་ཁྱེད་
ཀྱིས་འདི་དག་དང་རྩེ་བ་དེ་བྱ་བའི་རིགས་སོ་ཞེས་ཀྱང་བསྒོའོ། །དེ་ནས་བརྒྱ་བྱིན་གྱི་ཁ་ནས་ཚིག་ཐོས་པ་སྤྱི་བོས་བླངས་ནས། བལྟ་ན་སྡུག་ན་གནས་པའི་ལྷ་ག་ལ་བ་དེར་ཆུ་བླང་བའི་ཕྱིར་བརྒྱུགས་སོ། །ལྷ་མོའི་ནང་ནས་ལྷ་མོ་དེ་དག་ཀྱང་བལྟ་ན་སྡུག་པའི་གནས་པའི་ནང་དུ་ཆུ་བླང་བའི་ཕྱིར་བརྒྱུགས་སོ། །བལྟ་ན་སྡུག་ན་གནས་པའི་ལྷ་མོ་དང་། ཆོས་བཟང་ན་གནས་པའི་ལྷ་མོ་དག་ཀྱང་གང་དེ་ནས་ཕན་ཚུན་རྒྱུག་གོ །དེ་ལྟར་ལྷ་རྣམས་ཕན་ཚུན་དུ་གསེར་གྱི་པད་མའི་འདབ་མ་དག་བླངས་ནས་སྐྱེད་མོས་ཚལ་ག་ལ་བ་དེར་རྒྱུག་ལ། དེ་དག་ཕན་ཚུན་ལྷན་ཅིག་ཏུ་དགོད་ཅིང་རྩེ་ལ་རྒྱུའོ། །ལྷའི་དབང་པོ་བརྒྱ་བྱིན་བར་སྣང་ལ་རྒྱུ་ཞིང་འདུག་པས་ཀྱང་ལྷ་དང་ལྷ་མོ་རྣམས་མེ་ཏོག་ཀུ་མུ་དས་རྩེ་བ་དེ་དག་མཐོང་ངོ་། །ལྷ་དེ་རྣམས་ཆུ་ལ་ཡུན་རིང་དུ་རྩེ་བ་དེ་བྱས་ནས། དེ་ནས་ཡང་མཆོག་སྟེ། པད་མ་ལ་རྩེ་བ་རྩོམ་པར་བྱེད་དོ། །ལྷ་དང་ལྷ་མོ་དེ་དག་ཕན་ཚུན་པད་མ་ལ་རྩེ་བར་བྱེད་དེ། ལ་ལ་གསེར་གྱི་པད་མ་རྣམས་ཀྱིས། ལ་ལ་བཻ་ཌཱུརྱ་དང་གསེར་གྱི་སྡོང་བུ་རྣམས་ཀྱིས། ལ་ལ་སྡོང་བུ་སྣ་ཚོགས་རྣམས་ཀྱིས་རྩེ་སྟེ་དེ་ལྟར་ཕན་ཚུན་རྩེད་མོ་བྱེད་དོ། །དེ་ལྟར་ཕན་ཚུན་ཡུན་རིང་དུ་བསྟེགས་ཤིང་རྩེས་ནས། འབྲས་བུའི་ཚལ་ག་ལ་བ་དེར་འདོང་བར་བྱེད་དོ། །དེ་དག་གིས་འབྲས་བུ་སྙི་བ་རྣམས་བླངས་ནས། ཕན་ཚུན་སྟེག་འདོད་པ་འཕེན་པར་བྱེད་དོ། །འབྲས་བུ་ལ་རྩེ་བ་དེ་ཡང་བྱས་ནས་ཆང་གི་ཚལ་ག་ལ་ཡོད་པ་དེར་འདོང་བར་བྱེད་དོ། །ཚལ་དེར་སོང་ནས་མྱོས་པའི་སྐྱོན་དང་བྲལ་ཞིང་འཁྲུག་པ་མེད་པ་ཇི་ལྟར་འདོད་པ་བཞིན་རོ་ཞིམ་པ་ལས་ཇི་ལྟར་བྱས་པ་བཞིན་དུ་ཞིམ་པ་དག་ལ་འཐུང་བར་བྱེད་དོ། །ལྷའི་རྒྱལ་པོ་བརྒྱ་བྱིན་ཡང་ཤིང་རྟའི་མཆོག་དེ་ལས་བབས་ནས་ལྷའི་ཀུན་དགའ་ར་བ་ག་ལ་བ་དེར་སོང་སྟེ། དེ་དག་གི་ནང་དུ་འདུག་གོ །ལྷའི་རྒྱལ་པོ་དེ་རྣམས་ཀྱིས་མཐོང་ནས་ཕན་ཚུན་ཀུན་ཡིད་དགའ་སྟེ་ལྷའི་རྒྱལ་པོ་ལ་མཆོད་པ་བྱེད་དོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་གཉིས་པ། དེ་ལྟར་ཀུན་གྱིས་ཐལ་མོ་སྤྱི་བོར་སྦྱར་ཏེ་མཆོད་པ་བྱས་ནས། འདི་ལྟར་ལྷའི་དབང་པོ་བཞུགས་པ་བདག་ཅག་གི་སྲོག་གི་འབྲས་བུ་མཆིས་པ་ལགས་ཏེ། ལྷའི་རྒྱལ་པོ་བརྒྱ་
བྱིན་ནི་གང་བདག་ཅག་གི་ཕ་མ་དག་པས་ལྷག་པར་སྲོག་སྩོལ་བ་ལགས་སོ་ཞེས་སྨྲས་ནས། དེ་ལྟར་བརྒྱ་བྱིན་དེ་ལ་དེ་རྣམས་ཀྱིས་ལེགས་པར་མཆོད་དོ། །དེ་ནས་ཡང་ལྷ་དེ་དག་ལ་འདི་སྐད་ཅེས་ཁྱེད་ནི་བདག་གི་བུ་དང་འདྲ། སྤུན་དང་འདྲ་ཞེས་སྨྲས་ནས་དེ་ལྟར་དེ་དག་ཕན་ཚུན་ལེགས་པར་མཆོད་པ་བྱས་ཏེ། དེ་ནས་ཡང་བག་མེད་པའི་སར་ཞུགས་ནས། བག་མེད་པ་དེ་ཉིད་ལ་གནས་སོ། །དེ་ནས་ཡང་ཚལ་དང་ཉེ་བའི་ཚལ་དག་བྱའི་ཚོགས་རྣམས་ཀྱིས་སྒྲ་འབྱིན་པ། འབབ་ཆུ་དང་། ཀླུང་དང་། ཚང་ཚིང་སྣ་ཚོགས་ཀྱིས་བརྒྱན་པ། གསེར་གྱི་ཆུ་བོ་པད་མའི་ཚལ་དང་ཉེ་བའི་ཚལ་མཛེས་པར་བྱས་པ། ས་གཞི་མཉམ་ཞིང་འཇམ་ལ་མི་རྩུབ་པ། མཐོ་དམན་གྱིས་བརྒྱན་པ། བཻ་ཌཱུརྱ་དང་གསེར་དང་དངུལ་དང་ཤེལ་གྱི་ཤིང་ལྗོན་པས་བརྒྱན་པ། བཟའ་བ་དང་བཏུང་བ་ཆུ་བོ་ལྟར་འབབ་ཅིང་འབྲས་བུ་སྣ་ཚོགས་དང་ལྡན་པ། མེ་ཏོག་མན་དཱ་ར་དང་པད་མ་ལ་སོགས་པ་མེ་ཏོག་ཆེན་པོ་རྣམས་ཀྱིས་མཛེས་པར་བྱས་པ། ཚང་ཚིང་རྣམས་ཀྱི་ནང་ན་ལྷའི་མི་དང་བུད་མེད་དགོད་དགོད། རྩེ་རྩེ་རྒལ་རྒལ་ཡོངས་སུ་སྤྱད་པས་བསྟེན་པའི་ཚང་ཚིང་གི་ཚལ་དང་སྐྱེད་མོས་ཚལ་རྣམས་སུ་ལྷའི་སིལ་སྙན་ཡན་ལག་ལྔ་དང་ལྡན་པ་དང་ལྷའི་ཁ་ཟས་དང་།ལྷའི་ཡུལ་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་ཀྱང་དགའ་བར་བྱེད་དོ། །དེ་ནས་ཡང་བལྟ་ན་སྡུག་པ་ན་གནས་པ་དང་ཆོས་བཟང་ན་གནས་པ་དགའ་བར་བྱེད་པ། རང་གི་གནས་གནས་སུ་ཞུགས་སོ། །དེ་དག་དེར་ཞུགས་ནས་ཀྱང་ཇི་སྲིད་དུ་འདོད་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དགའ་བར་བྱེད་དོ། །དེ་དག་ཕྱིས་ལྷའི་རིས་དེ་ནས་འཆི་བར་འགྱུར་ཏེ་ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན། སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་རྟག་ཏུ་ཤིན་ཏུ་བདེ་བར་འགྱུར་ཞིང་། རིག་པའི་བློ་དྲི་མ་མེད་པ་དང་། རོལ་མོ་ལ་དགའ་བ་སྟེ། བྲོ་གར་དང་གླུ་དབྱངས་དང་དགོད་པ་དང་རྩེ་བ་ལ་དགའ། རྟག་ཏུ་སྤྲོ་བ་ལ་དགའ་ཞིང་བཟའ་བ་དང་བཏུང་བ་དང་།
བཅའ་བ་དང་བཟའ་བར་བྱ་བ་མང་པོ་ལ་དགའ་བ་དང་ཡམས་ཀྱི་ནད་མེད་ཅིང་། རིམས་ནད་མེད་ལ་མྱ་ངན་དང་བྲལ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་ཕྱོགས་གཅིག་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཚུལ་ཁྲིམས་དང་ལྡན་པ། འབྱོར་པ་ཡང་ཤིན་ཏུ་ཆུང་ཞིང་དམན་པར་གྱུར་པ་གང་གིས་གཞན་དག་ལས་ནོར་རྫས་ཀྱི་རྣམ་པའམ། ཁ་ཟས་དག་བླངས་ཏེ། ཤིན་ཏུ་སྡུག་བསྔལ་ཡང་བུ་དང་ཆུང་མ་འབའ་ཞིག་ལ་མི་སྦྱོར་བར་སེམས་ཡོངས་སུ་བསྒོམས་པའི་ཡིད་ཀྱིས་ནོར་རྫས་སམ། ཁ་ཟས་དེ་དག་གཞན་སྡུག་བསྔལ་ཞིང་ཕ་རོལ་གཞན་དག་ཉོན་མོངས་པ་དང་ལོང་བ་དང་དབུལ་བ་དང་མགོན་མེད་པ་རྣམས་ལ་བགོ་བཤའ་བྱས་ནས་སྦྱིན་པར་བྱེད་པ་དང་སྲོག་ཆགས་གཞན་གྱི་ཆུང་མ་ལ་འཁྲིག་པའི་དགའ་བས་རབ་ཏུ་ཆགས་པ་དག །གཞི་དེས་མངོན་པར་བཟུང་སྟེ། སྲོག་ཆད་པའི་ཉོན་མོངས་པ་འཐོབ་ཅིང་གཤེད་མའི་ལག་ཏུ་བསྐུར་བ། ལྷོ་ཕྱོགས་ཀྱི་སྒོ་ནས་ཁྲིད་དེ་སྲོག་གཅོད་པར་འགྱུར་བ། ཉོན་མོངས་པའི་རྣམ་པ་དེ་ལྟ་བུའི་ནང་དུ་ཆུད་པ་ལས་ཐར་བར་བྱས་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཕྱོགས་གཅིག་ན་གནས་པའི་ལྷ་རྣམས་ཀྱི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱ་བ་བྱས་པ། དགེ་བའི་ལས་ཤིན་ཏུ་རྒྱ་ཆེ་བ་བྱས་ཤིང་ཡང་དག་པར་སྤྱད་པ་དེ་རང་གི་ལུས་ལས་ཀུན་ནས་འོད་འབྱུང་སྟེ། དཔེར་ན་ཉི་མའི་འོད་འབྱུང་བ་བཞིན་ནོ། །ཡང་འོད་དེ་དག་གི་ཁ་དོག་སྔོན་པོ་དང་། སེར་པོ་དང་། བཙོད་ཀ་དང་། ལྗང་གུ་དང་། དཀར་པོར་འབྱུང་སྟེ། ལྷ་དེའི་འོད་དེས་ལྷའི་འཇིག་རྟེན་གྱི་འོད་གསལ་བ་དེ་དག་ཐམས་ཅད་དེ་ནས་ཡང་བཅུ་འགྱུར་བས་ལྷག་པར་གསལ་བར་བྱེད་དོ། །དཔེར་ན་གཟའ་དང་སྐར་མའི་འོད་ཀྱིས་འཛམ་བུའི་གླིང་གསལ་བར་བྱེད་ལ། དེ་ནས་ཡང་ཟླ་བའི་འོད་ཀྱིས་གསལ་བར་བྱེད་པ་དེ་
བཞིན་དུ། ལྷ་དེའི་རང་གི་ལུས་ཀྱི་འོད་ཀྱིས་ལྷའི་གནས་དེ་དག་ཐམས་ཅད་བརྒྱན་པ་བཞིན་རྣམ་པར་གསལ་བར་བྱེད་དོ། །འོད་དེས་གཟུགས་ཕུན་སུམ་ཚོགས་པ་དེ་དག་ཐམས་ཅད་དང་ལྡན་པའི་ལྷ་དེ་ལ། ལྷ་དེ་དག་གིས་མངོན་པར་བརྟགས་ཏེ། རྣམ་པ་དེ་ལྟ་བུའི་ཁྱད་པར་གང་གི་དྲུང་ན་ལྷ་གཞན་དེ་དག་སྲིན་བུ་མེ་ཁྱེར་བཞིན་གསལ་བ་མེད་དོ། །ལྷའི་རིས་དེར་ལྷ་དེ་སྐྱེས་མ་ཐག་ཏུ་ལྷ་མོ་དེ་དག་ཐམས་ཅད་ལྷ་དེ་ག་ལ་བ་དེར་རྒྱུག་ཅིང་སྐྱེས་མ་ཐག་ཏུ་རྒྱན་ཐམས་ཅད་འབྱུང་བར་འགྱུར་ཏེ། འདི་ལྟ་སྟེ་གང་གི་གཙུག་གི་ནོར་བུ་མཐོན་ཀ་ཆེན་པོའི་འོད་ཀྱིས་དཔག་ཚད་དག་ཏུ་འོད་སྣང་བར་བྱེད་པ་བཞིན་དུ། འོད་གང་གིས་གཞན་མཐོ་རིས་ན་གནས་པའི་འོད་དེ་དག་ཐམས་ཅད་དང་ཕྱི་རོལ་གྱི་ནོར་བུ་དེ་དག་ཐམས་ཅད་དེ་ལྟར་ཟིལ་གྱིས་གནོན་པར་བྱེད་དོ། །ཇི་ལྟར་ཉི་མ་ཤར་བས་སྲིན་བུ་མེ་ཁྱེར་རྣམས་ཀྱི་འོད་ཟིལ་གྱིས་གནོན་པར་བྱེད་པ་དེ་བཞིན་དུ་ལྷ་དེ་དག་ཟིལ་གྱིས་གནོན་པར་བྱེད་དོ། །དེ་ནས་སྐྱེས་མ་ཐག་ཏུ་རིན་པོ་ཆེ་སྣ་བདུན་གྱི་ཅོད་པན་དཔག་ཚད་བརྒྱར་འོད་འཕྲོ་བ་འབྱུང་བར་འགྱུར་ཏེ། འོད་ཀུན་གྱིས་བརྒྱན་ཅིང་འོད་ཟེར་འབྱུང་ལ་གང་གིས་འོད་སྔོན་པོ་དང་། སེར་པོ་དང་། བཙོད་ཀ་དང་། ལྗང་གུ་དང་། དཀར་པོ་དག་འབྱུང་བར་འགྱུར་རོ། །དེའི་འོག་ཏུ་རིན་པོ་ཆེ་སྣ་བདུན་གྱི་མགུལ་རྒྱན་དཔག་ཚད་བརྒྱར་འོད་འཕྲོ་བ་འབྱུང་བར་འགྱུར་རོ། །དེ་ལྟར་དེའི་འོག་ཏུ་རིན་པོ་ཆེ་སྣ་བདུན་གྱི་རྒྱན་ཕྲེང་འབྱུང་བར་འགྱུར་རོ། །དེའི་འོག་ཏུ་ཕྲེང་བ་འཕྱང་བ་རྡོ་རྗེས་བརྒྱན་པ་འབྱུང་བར་འགྱུར་རོ། །དེའི་འོག་ཏུ་དེའི་རྐེད་པའི་ཕྲེང་རྒྱན་ཇི་ལྟར་འཇའི་ཁ་དོག་ལྟ་བུར་སྐྱེ་ཞིང་འབྱུང་བར་འགྱུར་རོ། །དེའི་འོག་ཏུ་དེའི་ལྷམ་རིན་པོ་ཆེ་སྣ་བདུན་གྱིས་སྤྲས་པ། འོད་སྣ་ཚོགས་དང་ལྡན་པ་འབྱུང་བར་འགྱུར་ཏེ། ཤུགས་གང་གིས་རིམ་པ་འདི་ལྟར་འགྲོ་བ་ནི། གང་གི་ཚེ་ལྷ་དེ་འདི་སྙམ་དུ་འདི་ལྟར་བདག་ཆེ་གེ་མོ་ཞིག་ཏུ་ནམ་མཁའ་ལས་འགྲོའོ་སྙམ་དུ་བསམས་ན་སེམས་བསྐྱེད་མ་ཐག་ཏུ་ལྷ་ཡུལ་དུ་འབྱུང་བའི་ལྷམ་དེས་ལྷ་དེ་བཏེག་སྟེ་ནམ་མཁའ་ལ་ཁྱེར་ནས་གནས་དེར་འགྲོ་སྟེ། ལུས་ངལ་བ་མེད་ཅིང་གནོད་པ་ཐམས་ཅད་དང་བྲལ་བར་འགྱུར་རོ། །གང་དེའི་འོག་ཏུ་དེའི་གོས་ཐགས་སུ་བཏགས་པ་མ་ཡིན་པ་རིན་
པོ་ཆེ་སྣ་ཚོགས་ལས་བྱས་པ་འོད་གསལ་བ་འབྱུང་བར་འགྱུར་ཏེ། གང་གི་འོད་ཀྱིས་ལྷའི་རིས་ཉམས་དགའ་བ་དེ། དེ་ནས་ཡང་ཤིན་ཏུ་ཉམས་དགའ་བར་འགྱུར་རོ། །ལྷ་དེ་སྐྱེས་མ་ཐག་ཏུ་འདི་སྙམ་དུ་སེམས་ཏེ། ལས་བྱས་པ་གང་གིས་བདག་འདིར་སྐྱེས་ཤིག་གུ་སྙམ་ནས། དེས་བརྟགས་ན་ལས་ལེགས་པར་བྱས་པ་དང་ཉེས་པར་བྱས་པའི་གཞི་འཛམ་བུ་གླིང་དེ་ནས་བདག་ཤི་སྟེ། དེར་གང་བྱ་བ་ལེགས་པར་བྱ་བའམ། ཉེས་པར་བྱས་པ་དེ་འདིར་ཉེ་བར་སྤྱོད་པར་འགྱུར་ཏེ། དེར་བདག་གིས་ལེགས་པར་བྱས་པའི་ལས་ཀྱི་རྒྱུ་དེས་བདག་འདིར་སྐྱེས་ཏེ། རྒྱུ་མེད་པས་ནི་མ་ཡིན་ནོ་སྙམ་མོ། །དེ་དེ་ལྟར་བསམས་པ་དང་ཐང་ཅིག་ཏུ་ལྷ་མོ་གཟུགས་དང་ལང་ཚོ་ཕུན་སུམ་ཚོགས་པ་ཇི་སྙེད་པ་ཐམས་ཅད་ཉེ་བར་འོང་བར་བྱེད་དེ། དེ་དག་གི་རྒྱན་གྱི་སྒྲ་ཇི་ལྟར་མི་ཡུལ་ན་སིལ་སྙན་ཡན་ལག་ལྔ་དང་ཤིན་ཏུ་ལྡན་པ་དེ་དག་གི་སྒྲ་འབྱུང་བ་དེ་ལྟར་དེ་རྣམས་ཀྱི་སྒྲ་འབྱུང་བར་བྱེད་དོ། །དེ་དག་གི་དྲི་ཡང་དཔག་ཚད་གཉིས་སུ་གང་བར་འགྱུར་ཏེ། དྲི་གང་གིས་མེ་ཏོག་ཐམས་ཅད་ཀྱི་དྲི་ཟིལ་གྱིས་གནོན་པར་འགྱུར། དེ་དག་གི་གཟུགས་དང་ལང་ཚོ་སྔོན་མ་བྱུང་བ་འབྱུང་བར་འགྱུར་ཞིང་ཚིམ་པ་དང་དགའ་བ་འབྱུང་བར་འགྱུར་ལ། སྔོན་གྱི་གོས་ཀྱི་ཡོན་ཏན་རྣམས་ཀྱང་འབྱུང་བར་འགྱུར་རོ། །ལྷ་དེའི་ལེགས་པར་བྱས་པའི་ལས་དེས་འདི་ལྟ་སྟེ། ཉི་མ་ཤར་བའི་ཉི་མའི་འོད་ཀྱིས་མེ་ཏོག་ཐམས་ཅད་རབ་ཏུ་རྒྱས་པར་འགྱུར་བ་དེ་ལྟར་ལྷ་དེའི་འོད་བྱུང་བས་ལྷ་མོ་དེ་དག་ཐམས་ཅད་ཀྱི་གཟུགས་རབ་ཏུ་རྒྱས་པར་འགྱུར་ཏེ། དེ་དག་དང་དེ་ཕྲད་ནས་འཛུམ་ཞིང་དགའ་བ་དག་གིས་རྩེད་མོ་བྱེད་དོ། །དེ་དག་གིས་དེ་པང་དུ་བླངས་ཏེ་ཚལ་དང་ཉེ་བའི་ཚལ་ག་ལ་བ་དེ་ཉིད་དུ་འགྲོས་སྡུག་གུས་ཁྱེར་ཞིང་ལྷ་དེའི་མདུན་དུ་སིལ་སྙན་སྣ་ཚོགས་དང་དགོད་པའི་སྒྲས་དགའ་བར་བྱེད་པ་དེ་དག་ལྷ་ལ་ལྟ་ཞིང་ཚལ་དང་ཉེ་བའི་ཚལ་དེ་དག་ག་ལ་བ་དེར་འདོང་བར་བྱེད་དོ། །ལྷ་དེའི་གནས་སུ་ཚལ་འདི་དག་འབྱུང་བར་འགྱུར་ཏེ། འདི་ལྟ་སྟེ། པད་མ་རྨད་བྱུང་གི་ཚལ་ཡོད་དེ། ཚལ་དེ་ན་གང་གི་ཚེ། ལྷ་དེ་འཇུག་པ་དེའི་ཚེ། གོམ་པ་འདོར་བའི་ས་དག་ལ་པད་མ་སྡོང་བུ་ནི་བཻ་ཌཱུརྱ། མྱུ་གུ་ནི་རྡོ་རྗེ། སྙིང་པོ་ནི་
གསེར། ལོ་མ་འཇམ་ཞིང་འདབ་མ་འཇམ་པ་དང་བུང་བའི་ཚོགས་ཀྱིས་མཛེས་པར་བྱེད་པ་དག་འབྱུང་བར་འགྱུར་ལ། དེ་དག་ལ་ལྷ་དེའི་རྐང་པ་གཉིས་འཇོག་པར་བྱེད་དོ། །དེ་ནས་རྐང་པ་བཏེག་པ་དང་པད་མ་གཞན་དག་འབྱུང་བར་འགྱུར་ཞིང་སྔ་མ་ཞུམ་པར་འགྱུར་རོ། །དེ་པད་མའི་ཚལ་དེ་ནས་སྦྲང་རྩིའི་ཆུའི་ཚལ་ཞེས་བྱ་བ་སྦྲང་རྩིའི་ཆུའི་ཚལ་ག་ལ་བ་དེར་འདོང་བར་བྱེད་དེ། ཚལ་དེ་ན་ལྷའི་ཤིང་ལྗོན་པ་གསེར་ལས་བྱས་པ་དེ་དག་ཐམས་ཅད་ལས་ལྷའི་རྒུན་ཆང་འཛག་སྟེ། ལྷའི་རོ་དང་དྲི་དང་ལྡན་པའི་རྒུན་ཆང་དེ་དག་ལ་ལྷའི་མཆོག་དེ་འཐུང་བར་བྱེད་དེ། མྱོས་པའི་སྐྱོན་དང་བྲལ་བའི་སྦྲང་རྩི་དེ་དག་ལ་ལྷ་དེ་རྣམས་འཐུང་བར་བྱེད་དོ། །དྲི་དང་རོ་སྔོན་མ་བྱུང་བ་དེ་དག་ལ་འཐུངས་ནས་ཀྱང་ཚལ་གསུམ་མཛེས་ཞེས་བྱ་བ་ག་ལ་བ་དེར་འདོང་བར་བྱེད་དོ། །དེར་གསུམ་མཛེས་དཔེ་མེད་པ་འབྱུང་སྟེ། འདི་ལྟ་སྟེ། བྱ་དང་བུང་བའི་ཚོགས་སྒྲ་འབྱིན་པ་དང་། གཞན་དང་མི་འདྲ་བའི་སྒྲ་དང་ལྷ་མོ་རོལ་མོ་བྱེད་པ་འབྱུང་ངོ་། །ལྷའི་མཆོག་དེ་ཚལ་གསུམ་མཛེས་དེ་ན་སྐྱེད་མོས་ཚལ་ནས་སྐྱེད་མོས་ཚལ་དང་ཉེ་བའི་ཚལ་ནས་ཉེ་བའི་ཚལ་དང་། པད་མའི་རྫིང་ནས་པད་མའི་རྫིང་དང་། ལྟེང་ཀ་ནས་ལྟེང་ཀར་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །བྱ་སྒྲ་སྣ་ཚོགས་འབྱིན་པ་ལ་ཉན་ཅིང་དབང་པོ་ལྔ་ཡུལ་ལྔ་ལ་ཚིམ་པ་མེད་པའི་ཡིད་སྲེད་པའི་མེས་སྲེག་པ་ན། ཇི་སྲིད་དུ་དེའི་ལེགས་པར་བྱས་པའི་ལས་མ་ཟད་པ་དེ་སྲིད་དུ་དགའ་བར་བྱེད་དོ། །དེ་ལས་དེ་ཟད་ནས་དེ་ནས་ཡང་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཀྱི་ཐག་པས་བཅིངས་པ་རང་གིས་བྱས་པའི་ལས་རྣམས་ཀྱིས་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མིའི་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་གཟུགས་དང་རིགས་དང་ཡོན་ཏན་ཕུན་སུམ་ཚོགས་ཤིང་ཀུན་ནས་མཆོག་ཏུ་བདེ་བ་དང་ལྡན་པ་དང་རང་དང་འབྲེལ་བ་ལས་འཚོ་ཞིང་གཞན་ལ་རག་མ་ལུས་པ་དང་རང་འདོད་པ་བཞིན་སྤྱོད་ཅིང་ནད་མེད་པ་དང་གནོད་པ་མེད་པ་དང་ཚེར་མ་མེད་པ་དང་ཤིན་ཏུ་འབྱོར་པ་དང་དེ་
བཞིན་དུ་གསུམ་ལྡན་གྱི་དུས་སུའམ་དེ་བཞིན་དུ་གཙོ་བོའི་ནང་དུའམ། དེ་བཞིན་དུ་རྒྱལ་སྲིད་ཕྱེད་ལ་དབང་བའམ། རྒྱལ་ཚབ་བམ། ཚོང་པ་འབྱོར་པའི་མཆོག་ནོར་དང་འབྲུ་དང་གསེར་དངུལ་ཐམས་ཅད་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ཤིང་གསེབ་ན་གནས་པ་ཞེས་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་གིས་རྐུན་པོ་ཆད་པས་བཅད་པར་འོས་པ་བཟུང་བ། གང་འཇིག་རྟེན་ཕ་རོལ་ལ་འཇིགས་པའི་བསམ་པས། དེ་ལ་ཆད་པས་མི་གཅོད་ཅིང་གནོད་པར་མི་བྱེད་པ་དང་ཕ་རོལ་གཞན་གྱིས་རྐུན་པོ་བཟུང་བ་དེ་ཡང་སེམས་ཅན་ལ་ཕན་པར་འདོད་པ། བྱམས་པར་གཞོལ་བའི་སེམས་དང་ལྡན་པའི་བསམ་པས་ཐར་བར་བྱེད་པ་དང་། མ་ལ་ཡང་མལ་ཆ་དང་ན་བའི་རྐྱེན་གྱི་གསོ་སྨན་དང་། ཡོ་བྱད་སྦྱིན་པར་བྱེད་ཅིང་གོང་མའི་རྫས་བསྒྲུབས་པ་དེ་དག་རྐུ་བའི་སེམས་ཀྱིས་མི་རྐུ་བ་དང་། ཚིག་འཇམ་ཞིང་ཚིག་ཉུང་ལ་ཕན་པར་སྨྲ་བ་དང་། ཉིན་གཅིག་བཞིན་སངས་རྒྱས་ལ་གུས་པར་ཕྱག་འཚལ་ཞིང་། སངས་རྒྱས་ལ་སྤོས་སམ་མེ་ཏོག་གམ་བདུག་པ་དག་ཕུལ་ཏེ་ཕྱག་འཚལ་ལ། དེའི་ཡོན་ཏན་ཡང་རྗེས་སུ་དྲན་པ་དང་། བླ་མ་ལ་ལུས་ཀྱིས་ཀྱང་གུས་པར་བྱེད་ཅིང་མྱུར་དུ་ལྡང་བ་དང་། གུས་པར་ཕྱག་འཚལ་བ་དང་། རྟག་ཏུ་སྙན་པར་སྨྲ་བ་དང་། སྡིག་པའི་གྲོགས་པོ་མཐོང་ན་ཤིན་ཏུ་འདྲེ་བར་མི་བྱེད་ལ། དེ་དག་དང་ལྷན་ཅིག་དགའ་བ་དང་འགྲོ་བ་དང་ཕྲད་པ་དང་མངོན་པར་སྨྲ་བར་མི་བྱེད། མི་ཉོན་མོངས་པའི་སེམས་དང་ལྡན་པ། འཕགས་པ་མ་ཡིན་པ། འཇིག་རྟེན་པས་སྤངས་པ་རྣམས་དང་ལྷན་ཅིག་དགའ་བར་མི་བྱེད་ལ། ཐད་ཀར་ལྟ་ཞིང་འདུག་པར་མི་བྱེད་པ་དང་། རྒན་པོ་ལ་ལེགས་པར་ལྟ་སྟེ་རྒན་པོ་ཤེས་པ་དང་ལྡན་པ། སེམས་ཅན་ལ་བྱམས་ཤིང་ཕ་རོལ་གདུང་བར་མི་བྱེད་པ། འཇིག་རྟེན་ཀུན་གྱིས་བཀུར་བ། སྙན་པར་སྨྲ་བ། འཇམ་
པོར་སྨྲ་བ་དག་ལ་བསྙེན་བཀུར་བྱེད་ཅིང་། ཡང་དག་པར་རྣམ་པར་འབྱེད་པའི་ཚུལ་ཁྲིམས་ཀྱང་ཡོད་པ་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་རྣམས་ལ་རྒྱུ་མེད་པར་འཚེ་བར་མི་བྱེད་པ་དང་། བཟའ་བ་མང་དུ་མི་ཟ་བ་དང་། འདོད་དགུར་འགྲོ་བའི་ཚུལ་དུ་མི་བྱེད་པ་དང་། གནོད་པའི་ཚུལ་མེད་པ་དང་། གློ་བུར་དུ་མི་འཁྲུག་པ་དང་། ཤན་པ་དང་། ཉོ་ཚོང་དང་། ཁྱི་ཡིས་འཚོ་བ་དང་། རྙིས་འཚོ་བ་དྲི་མ་དང་བཅས་པ་ལ་སོགས་པ་དང་། ཉོ་ཚོང་ལ་སོགས་པ་ཆོས་མ་ཡིན་པ་དང་ཡང་དག་པར་འབྲེལ་བར་མི་བྱེད་པ་དང་། ཆང་འཚོང་གི་ཁྱིམ་དུ་དགའ་བ་མེད་པ་དང་། བུད་མེད་ལ་རག་ལས་ཤིང་སྡིག་པ་བྱེད་པ་དང་། སྤྱོད་པ་ཉམས་པ་དང་། རྟབ་རྟབ་པོར་མི་འགྲོ་བ་དང་། སྨྲ་བ་ན་གཞན་གྱི་གསང་མི་ཤོར་བ་དང་། གྲོགས་པོ་རྣམས་ལ་གླགས་ལྟ་ཞིང་གསང་སྟེ་དགྲ་མི་བྱེད་པ་དང་། གནད་བཙལ་ཏེ་རྒྱལ་པོ་ལ་མི་སྨྲ་བ་དང་། གཞན་གྱི་ཞིང་རྣམས་ལ་སྐྱེ་བའི་ལྡུམ་ར་མཐོང་ན་བདག་ཉིད་ཀྱིར་མི་བྱེད་པ་དང་། ཡུལ་མིའི་དཔྱ་ནར་མ་དྲུག་ཆ་གཅིག་འབུལ་བ་ལས་ལྷག་པར་མི་འབེབས་པ་དང་། གཞན་གྱི་ཞིང་དང་། ཆུ་དང་། སྐལ་བ་བྱིན་པ་མི་འཕྲོག་པ་དང་། མཚན་མོའམ་ཉིན་མོ་གཞན་གྱི་འབྲས་བུ་མི་འཕྲོག་པ་དང་། རྐུ་སེམས་ཐམས་ཅད་དང་བྲལ་བའམ། རེ་རེ་དང་བྲལ་བའམ། ཉུང་ངུར་བྲལ་བ་ཡིན་ཏེ། ཇི་ལྟར་ན་ཉུང་ངུར་བྲལ་བ་ཡིན་ཞེ་ན། ལས་ཀྱི་ཉེར་བསྡོགས་མི་བྱེད་པ་དང་། ལས་བར་མ་དང་བྲལ་བ་ཡིན་ཏེ། གང་བྱས་པ་འཆགས་པར་བྱེད་ཅིང་སྐྱོན་དུ་རྩི་ལ་མི་བྱེད་པ་དང་ཆེན་པོ་དང་བྲལ་བ་ཡིན་ཏེ། ལས་ཀྱི་ཉེར་བསྡོགས་མི་བྱེད་པ་དང་དེ་བཞིན་བྱེད་དུ་མི་འཇུག་ཅིང་། གཞན་གྱིས་བྱས་ནས་ཀྱང་འཆགས་སུ་འཇུག་པ་དང་། སོ་སོར་རྗེས་སུ་ཡི་རང་བར་མི་བྱེད་པ་དང་མི་ངན་པ་དེ་རྣམ་པར་སྤོང་བར་བྱེད་ལ། ཆུང་ངུ་དང་འབྲིང་དང་ཆེན་པོ་བྱེད་པ་དེ་ཆུང་ངུ་དང་འབྲིང་དང་ཆེན་པོའི་འབྲས་བུ་ལ་སྤྱོད་པ་ཡིན་ཏེ། དེ་ལྟར་ལེགས་པར་བྱས་པའི་ལས་ཀྱི་མཐའ་སྤྱོད་པ། ཉེས་པར་བྱེད་པ་རྣམ་པར་སྤངས་པ་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཤིང་གསེབ་ན་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་དེར་སྐྱེས་ནས་ཀྱང་ལྷའི་ལུས་ཤ་དང་རུས་པ་དང་རྣག་ཁྲག་
དང་བྲལ་བ་ཡིན་ཏེ། གང་བདེ་བ་མྱོང་བར་འགྱུར་བ་དེའི་དཔེ་བྱ་བར་ཡང་སླ་བ་མ་ཡིན་མོད་ཀྱི། ཅུང་ཟད་ཅིག་དཔེར་བྱ་ན་འདི་ལྟ་སྟེ། སེམས་ཅན་གང་སེམས་ཅན་དམྱལ་བ་ཡང་སོས་སུ་སྐྱེ་བ་དང་གང་གསེར་གྱི་འཁོར་ལོས་སྒྱུར་བའི་རྒྱལ་པོའི་ཁྱད་པར་གང་ཡིན་པ་དང་ལྷའི་བདེ་བ་མྱོང་བའི་མི་འཁོར་ལོས་སྒྱུར་བའི་རྒྱལ་པོ་གླིང་བཞི་པའི་རིན་པོ་ཆེ་སྣ་བདུན་དང་ལྡན་པའི་ཁྱད་པར་གང་ཡིན་པའི་ཁྱད་པར་དེ་ནི་ཤིང་གསེབ་ན་གནས་པའི་ལྷ་དེའི་དཔེར་ཅུང་ཟད་བྱ་བ་ཡིན་ནོ། །ཤིང་གསེབ་ན་གནས་པའི་ལྷ་དེ་རི་རབ་ཀྱི་སྟེང་དཔག་ཚད་སུམ་སྟོང་ཡོད་པར་དཔལ་དང་ལྡན་པ་རིན་པོ་ཆེ་སྣ་བདུན་གྱི་ལྷའི་ཤིང་ལྗོན་པ་དང་ཆུ་བོས་མཛེས་པར་བྱས་པ་ལྟ་བུར། ཕྱོགས་དེ་ན་ཚལ་ཀུན་སྤྱོད་ཅེས་བྱ་བ་གསེར་གྱི་ཤིང་ལྗོན་པ་ཡོད་པ་དེར་འདི་ལྟར་ལྷ་རྣམས་ཀྱི་སེམས་ལ་གང་དུ་བདག་ཅག་འགྲོ་བར་བྱ་བ་དེར་ཤིང་ལྗོན་པ་དག་བདག་ཅག་གི་ཕྱི་བཞིན་དུ་དེ་ལྟར་འོང་བར་ཤོག་ཤིག་སྙམ་མོ། །དེ་སེམས་བསྐྱེད་མ་ཐག་ཉིད་དུ་ཤིང་གསེབ་ན་གནས་པའི་ལྷ་རྣམས་གར་འགྲོ་བ་དེ་དག་གི་ཕྱི་བཞིན་དུ་དེ་ལྟར་འོང་སྟེ། དཔེར་ན། འཁོར་ལོས་སྒྱུར་བའི་རྒྱལ་པོ་སེམས་བསྐྱེད་མ་ཐག་ཉིད་དུ་འཁོར་ལོ་ནམ་མཁའ་ལ་འགྲོ་བ་དེ་ལྟར་ལྷ་རྣམས་ཀྱི་སེམས་བསྐྱེད་མ་ཐག་ཉིད་དུ་ཤིང་ལྗོན་པ་དག་ནམ་མཁའ་ལས་འོང་ངོ་། །ལྷ་རྣམས་གར་འདོད་པ་དེར་ཡང་སའི་སྟེང་དུ་འབབ་པར་འགྱུར་ཏེ། དཔེར་ན་བྱ་དག་སའི་ཕྱོགས་གང་དང་གང་དུ་འགྲོ་ཞིང་གནས་པ་དེ་དང་དེ་ཉིད་དུ་གནས་པར་འགྱུར་བ་དེ་བཞིན་དུ་ཤིང་ལྗོན་པ་དེ་དག་ཐམས་ཅད་དེ་ལྟར་འགྱུར་ཏེ། འདི་ནི་ཤིང་གསེབ་ན་གནས་པའི་ལྷ་རྣམས་ཀྱི་རང་གིས་བྱས་པའི་ལས་ཀྱི་མཐུ་གཅིག་ཡིན་ནོ། །དེ་ནས་ཡང་མཐུ་འབྱུང་སྟེ། དེ་ལྟར་ལེགས་པར་བྱས་པའི་ལས་དེ་དག་གི་མཐུ་ནི་ལྷ་རྣམས་གང་དུ་འདོང་བ་དེར་བྱ་དག་སིལ་སྙན་ཡན་ལག་ལྔ་དང་ལྡན་པ་ལྟ་བུའི་སྒྲ་འབྱིན་བཞིན་དུ་ཕྱི་བཞིན་འབྲང་ཞིང་འདོང་ངོ་། །དེ་ནས་གཞན་ཡང་ལེགས་པར་བྱས་པའི་ལས་རྣམས་ཀྱི་མཐུ་ནི་ལྷ་རྣམས་ནམ་མཁའ་ལ་འདོད་པ་དང་བཅས་པར་འགྲོ་བའི་ལྷ་དག་པད་མའི་རྫིང་ན་བུང་བ་མྱོས་པའི་སྒྲ་འབྱིན་པ་དང་གསེར་གྱི་བྱ་ངང་པས་མཛེས་པར་བྱས་ཤིང་། བྱ་ཀཱ་
རཎྜ་བ་དང་ངུར་པ་རྣམས་ཀྱིས་མཛེས་པར་བྱས་པ་ག་ལ་བ་དེར་འདོང་བར་བྱེད་དོ། །དེ་ནས་གཞན་ཡང་ཤིང་གསེབ་ན་གནས་པའི་ལྷ་རྣམས་ཀྱིས་ལེགས་པར་བྱས་པའི་མཐུ་ནི་ལྷ། ལྷའི་ཕྲེང་བ་དང་གོས་གྱོན་པ་དག་ནམ་མཁའ་གང་ལ་འགྲོ་བའི་ནམ་མཁའ་དེར། ལྷའི་པད་མ་སྡོང་བུ་བཻ་ཌཱུརྱ་ལས་བྱས་པའི་གནས་དག་འབྱུང་བར་འགྱུར་ཏེ། འདབ་མ་སྟོང་ཡོད་པའི་འདབ་མ་དེ་རེ་རེ་ལ་ལྷ་མོ་འཁོད་ནས། ལྷ་ག་ལ་བ་དེར་འདོང་བར་བྱེད་དོ། །དེ་ནས་ཡང་ཤིང་གསེབ་ན་གནས་པའི་ལེགས་པར་བྱས་པ་རྣམས་ཀྱི་ལས་ཀྱི་མཐུ་ནི་ལྷ་དག་ལྷའི་པད་མ་ལ་འདུག་ནས་གང་དུ་འགྲོ་བ་དེར་ནམ་མཁའ་དེ་ལས་ལྷའི་བཏུང་བས་གང་བའི་ལྷའི་སྣོད་དག་ལག་ཏུ་འོང་སྟེ། བཏུང་བ་དེ་དག་ལྷ་དང་ལྷ་མོ་དེ་དག་དང་ལྷན་ཅིག་འཐུང་ཞིང་དགའ་བར་བྱེད། གླུ་དབྱངས་ལེན། ཡོངས་སུ་སྤྱོད་པར་བྱེད་ལ། ཕྱོགས་གཞན་གང་དུ་འདོང་བར་ཡང་འགྲོའོ། །དེ་ནས་གཞན་ཡང་ཤིང་གསེབ་ན་གནས་པ་རྣམས་ཀྱི་ལས་ཀྱི་མཐུ་ནི་ལྷ་རྣམས་གང་དང་གང་འདོད་པ་དེ་དང་དེ་ཐམས་ཅད་འབྱོར་བར་འགྱུར་ཞིང་། ལྷའི་འཇིག་རྟེན་གྱི་གནས་ནས་གནས་གཞན་དུ་རྣམ་པ་གང་གཞན་གྱིས་འགྲོ་འདོད་པའི་རི་དང་རིའི་རྩེ་མོ་དེ་དག་ཏུ་ཡང་ལྷའི་མེ་ཏོག་དང་། འབྲས་བུ་དང་། ཆུ་བོ་ཕུན་སུམ་ཚོགས་པ་དང་ཚལ་དང་ཉེ་བའི་ཚལ་ཕུན་སུམ་ཚོགས་པ་དག་ནམ་མཁའ་ལས་འབྱུང་བར་འགྱུར་རོ། །ལྷ་གནས་པ་དེ་རྣམས་ལྷ་མོ་དག་གིས་ཡོངས་སུ་བསྐོར་ལ་ལྷན་ཅིག་ཏུ་ལྷའི་སིལ་སྙན་ཡན་ལག་ལྔ་དང་ལྡན་པའི་གླུ་དབྱངས་ཉེ་བ་ན་ལེན་ཅིང་། དེ་དག་ཉིད་དང་ཡུལ་ནས་ཡུལ་དུ་ནམ་མཁའ་ལ་འགྲོ་བ་ན། དེ་ནས་ཆོས་བཟང་ན་གནས་པ་དང་བལྟ་ན་སྡུག་པ་ན་གནས་པ་ཡིད་དགའ་བས་གནས་མཐོན་པོ་མཐོང་སྟེ། ཇི་ལྟར་འཛམ་བུའི་གླིང་ན་མི་རྒྱུ་བ་དག་ལྷ་གཞལ་མེད་ཁང་གསལ་བ་ན་གནས་པས་མཐོང་བ་བཞིན་ནོ། །དེ་ལྟར་ཆོས་བཟང་ན་གནས་པའི་ལྷ་དེ་དག་དང་བལྟ་ན་སྡུག་ན་གནས་པའི་ལྷ་དེ་དག་ཕན་ཚུན་དུ་ཀྱེ་འདི་ལྟར་ཤིང་གསེབ་ན་གནས་པའི་ལྷ་དེ་དག་བདེ་བ་མཆོག་དང་ལྡན་ཏེ། བདག་ཅག་པས་ཁྱད་ཆེས་བདེ་ལ། ལྷའི་སིལ་སྙན་ཡན་ལག་ལྔ་དང་ལྡན་པ་དག་ཉེ་བར་ལེན་ཅིང་གར་དགའ་དགུར་རྒྱུ་བ། གར་འདོད་པར་འགྲོ་བ།
ཅི་བདེར་གནས། ཐོགས་པ་མེད་པར་འགྲོ་བ། ཡུལ་ནས་ཡུལ་དུ་འགྲོའོ་ཞེས་བརྗོད་དོ། །དེ་ནས་ལྷའི་རྒྱལ་པོ་བརྒྱ་བྱིན་ཡང་པད་མ་འདབ་མ་སྟོང་ལ་སྡོང་བུ་ལྷའི་གསེར་དང་བཻ་ཌཱུརྱ་ལས་བྱས་པའི་སྟེང་དུ་འདུག་ནས། ལྷ་མོ་བཟང་མོ་དག་དང་ལྷན་ཅིག་ནམ་མཁའ་ལས་འགྲོའོ། །ལེགས་པར་བྱས་པའི་ལས་ཀྱིས་སྤྲུལ་པའི་པད་མ་དེ་ཡང་ཉམས་དགའ་བ་འདི་ལྟ་བུ་ཡིན་ཏེ། འདབ་མ་ཐམས་ཅད་ལ་ལྷ་མོ་ལྷའི་ཕྲེང་བ་དང་གོས་གྱོན་པ་གསེར་གྱི་རྒྱན་གྱིས་བརྒྱན་པ་ཐམས་ཅད་ཡིད་རབ་ཏུ་དགའ་བ། ཐམས་ཅད་སིལ་སྙན་ཡན་ལག་ལྔ་དང་ལྡན་པའི་དགའ་བས་མྱོས་པ་ཐམས་ཅད་བརྒྱ་བྱིན་ལ་ཕྱོགས་པ། སོ་སོ་གཟུགས་དང་ལང་ཚོ་དར་ལ་བབ་པའི་དྲེགས་པས་མྱོས་པ་ལྔ་འཁོད་དེ། དེ་དག་ཐམས་ཅད་ལྷའི་རྒྱལ་པོ་བརྒྱ་བྱིན་དང་ལྷན་ཅིག་ཏུ་ཤིང་གསེབ་ན་གནས་པའི་ལྷ་རྣམས་ག་ལ་བ་དེར་ནམ་མཁའ་ལས་འདོང་བར་བྱེད་དོ། །ཤིང་གསེབ་ན་གནས་པའི་ལྷ་དེ་དག་གིས་ཀྱང་བརྒྱ་བྱིན་དེ་མཐོང་ནས་ཕྱིར་ཞིང་ཡིད་རབ་ཏུ་དགའ་ལ། ཡང་ཇི་ལྟར་བཤད་པའི་གནས་དེ་དག་ལས་བབས་ནས། ལྷའི་རྒྱལ་པོ་བརྒྱ་བྱིན་ག་ལ་བ་དེར་འདོང་བར་བྱེད་དོ། །དོང་ནས་བརྒྱ་བྱིན་དེ་ལ་སྤྱི་བོས་ཕྱག་འཚལ་ཏེ་ཚིག་གིས་ཀྱང་བསྟོད་དོ། །བརྒྱ་བྱིན་གྱི་སྔོན་དུ་འགྲོ་བ་དང་། ཤིང་གསེབ་ན་གནས་པའི་ལྷ་སྙིང་དགའ་བ་རྣམས་ཀྱིས་བརྒྱ་བྱིན་དེ་ཡོངས་སུ་བསྐོར་ནས། བརྒྱ་བྱིན་མངོན་པར་འདོད་པའི་གནས་སམ། སྐྱེད་མོས་ཚལ་ལམ། རི་བོའི་སྟེང་ངམ། ཚལ་ལམ། ཉེ་བའི་ཚལ་ལམ། པད་མའི་རྫིང་ངམ། གནས་གཞན་ག་ལ་བ་དེར་ནམ་མཁའ་ལས་འདོང་བར་བྱེད་དོ། །བརྒྱ་བྱིན་གྱི་སྔོན་དུ་འགྲོ་བ་དེ་རྣམས་དེར་ཡུན་རིང་དུ་རྩེས་ནས། དེ་ནས་ཡང་རང་གི་གནས་ག་ལ་བ་དེར་འདོང་བར་བྱེད་དེ། བརྒྱ་བྱིན་གྱི་སྔོན་དུ་འགྲོ་བ་རྣམས་ཇི་ལྟར་སོང་བ་དེ་ལྟར་སླར་འོང་བར་བྱེད་དོ། །དེ་ནས་བརྒྱ་བྱིན་ཡང་ལྷའི་འདུན་ས་ཆོས་བཟང་ག་ལ་བ་དེར་འགྲོ་བར་བྱེད་དོ། །གཟུགས་དང་། སྒྲ་དང་། དྲི་དང་། རོ་དང་། རེག་བྱ་སྡུག་གུས་མྱོས་པའི་ལྷ་དེ་དག་ཀྱང་ཇི་སྲིད་དུ་སྡུག་པ་འདོད་པ། ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དགའ་བར་བྱེད་དོ། །དེ་ཕྱིས་ལྷའི་རིས་དེ་ནས་
འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་རྟག་ཏུ་བདེ་བ་མཆོག་དང་ལྡན་ཞིང་རྟག་ཏུ་ནད་མེད་པ་དང་། གནོད་པ་མེད་པ་དང་། ནོར་དང་ཤིན་ཏུ་ལྡན་ཞིང་མཆོག་ཏུ་བདེ་བ་དང་། དེ་བཞིན་དུ་སྡེ་གཞན་གྱིས་འཇིགས་པ་མེད་པའི་བར་གྱི་གླིང་དག་གི་རྒྱལ་པོར་འགྱུར་བའམ་རྒྱལ་ཚབ་ཏུ་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ཤིང་རྟ་སྣ་ཚོགས་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། མཆོད་རྟེན་གྱི་གནས་རྣམས་སུ་སྔོན་ཡོ་བྱད་སྦྱར་བ་རྣམས་རྒྱལ་པོ་མི་རིགས་པའམ། བློན་པོ་མི་རིགས་པའམ། མི་རིགས་པར་ཆགས་པ་ལ་བརྐམ་པ། ལས་ལ་འཇིགས་པ་མེད་པ། གང་གིས་གཅོད་པར་བྱེད་པ་ལ་སྐྱེས་བུ་དམ་པ་ཡིད་དང་སེམས་བསྒོམས་པ་སངས་རྒྱས་ཀྱི་ཡོན་ཏན་མངོན་པར་དྲན་པའམ་ཚིག་ཤིན་ཏུ་སྙན་ཅིང་གསལ་བས་སངས་རྒྱས་ལ་བསྟོད་ནས་དེ་ཕྱིར་ཟློག་པར་བྱེད་དམ་འཚོབ་པར་བྱེད་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་ཤིང་རྟ་སྣ་ཚོགས་ན་གནས་པའི་སར་སྐྱེ་བར་འགྱུར་རོ། །དེར་སྐྱེས་ནས་ཀྱང་ཤིན་ཏུ་དགེ་བའི་ལས་བྱེད་པ་དེ་སིལ་སྙན་ཡན་ལག་ལྔ་དང་ལྡན་པས་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད། གནས་པར་བྱེད་དོ། །ས་དེར་ལས་ཀྱི་འབྲས་བུ་གཞན་གྱིས་ཀྱང་སྐྱེ་བར་འགྱུར་བ་ནི། སྲོག་གཅོད་པ་དང་། མ་བྱིན་པར་ལེན་པ་སྤངས་པས་འགྱུར་ཏེ། འདི་ལྟ་སྟེ། ཁྱིས་འཚོ་བ་ལས་རི་དགས་ཐར་བར་བྱེད་ལ། བདག་ཉིད་ཀྱང་མི་བྱེད། བྱེད་དུ་ཡང་མི་འཇུག །གཞན་གྱིས་བྱས་པ་ལ་རྗེས་སུ་ཡི་རང་བར་ཡང་མི་བྱེད་པ་དང་། ཇི་ལྟར་མ་བྱིན་པར་ལེན་པ་མི་བྱེད་དེ། མ་
བྱིན་པར་ལེན་པ་ཇི་ལྟར་སྤངས་པ་ཡིན་ཞེ་ན། བདག་ཉིད་ཡུལ་གྱི་བདག་པོའམ། རྒྱལ་པོའམ། བློན་པོར་གྱུར་པས་ཕ་རོལ་ལ་ཆད་པས་གཅོད་པར་མི་བྱེད་ཅིང་། གཞན་བྱེད་པ་ཡང་ཟློག་པར་བྱེད་ལ། ཆོས་སམ་ཁྲིམས་ལ་འཇོག་པར་བྱེད་པ་དེ་དག་ནི་ཤིང་རྟ་སྣ་ཚོགས་སུ་སྐྱེས་པར་འགྱུར་བའི་ལས་རྣམ་པ་གཉིས་པ་ཡིན་ནོ། །ཚལ་གྱི་རྒྱར་དཔག་ཚད་སུམ་སྟོང་ཡོད་པ་དེ་ན། ལྷ་དག་ཤིང་རྟ་སྣ་ཚོགས་རྣམས་ཀྱིས་དགའ་བར་བྱེད་དེ། དེས་ན་ཤིང་རྟ་སྣ་ཚོགས་ཞེས་བྱ་བའི་མིང་དུ་བཏགས་ལ། ཤིང་རྟ་སྣ་ཚོགས་དེར་གནས་པའི་ལྷ་རྣམས་རྩེ་བར་བྱེད་དོ། །ཤིང་རྟ་དང་ཤིང་རྟའི་ནང་ན་གསེར་དང་དངུལ་གྱི་པད་མ་འདབ་མ་བཻ་ཌཱུརྱ་ཤིན་ཏུ་བལྟ་ན་སྡུག་པ། དྲི་མཆོག་ཏུ་ཡིད་དུ་འཐད་པའི་རྫིང་འབྱུང་ལ། བུང་བ་བཻ་ཌཱུརྱའི་མདོག་ལྟ་བུའི་ཚོགས་ལྡིང་བ་རྣམས་ཀྱིས་ཉེ་བར་མཛེས་པར་བྱས་པ་ཡིན་ནོ། །ཚལ་དེར་བཀྲ་བ་འདི་དག་ཀུན་འབྱུང་བར་འགྱུར་ཏེ་དེ་བརྗོད་པ། པད་མའི་རྫིང་རྣམས་སུ་པད་མ་བཀྲ་བ་འབྱུང་བ་ནི་འདི་ལྟ་སྟེ། པད་མ་ལ་ལ་པད་མའི་ཕྱེད་མཐོན་ཀ་ལས་བྱས་པ། ཕྱེད་བཻ་ཌཱུརྱ་ལས་བྱས་པ་ཡིན་ཏེ་བཀྲ་བ་གཅིག་ཡིན་ནོ། །ཡང་བཀྲ་བ་གཞན་ནི་ཕྱེད་བཻ་ཌཱུརྱ་ལས་བྱས་ལ། ཕྱེད་གསེར་ལས་བྱས་པ་ཡིན་ཏེ་བཀྲ་བ་གཞན་ཡིན་ནོ། །ཡང་བཀྲ་བ་གཞན་ནི་པད་མ་འདབ་མ་བརྒྱ་པ་ཐམས་ཅད་ཀྱི་པད་མ་ལ་པད་མ་ཕྱེད་ཀྱི་པད་མའི་འདབ་མ་ནི་གསེར་ལས་བྱས་ལ་གཞན་ནི་པད་མ་རཱ་གའི་མདོག་ལྟ་བུ་ཡིན་ནོ། །ཡང་བཀྲ་བ་གཞན་འབྱུང་བ་ནི། པད་མ་བཻ་ཌཱུརྱའི་འདབ་མ་དག་ལ་བུང་བ་གསེར་གྱི་མདོག་ཅན་རྒྱུ་ལ། དངུལ་གྱི་འདབ་མ་དག་ལ་བུང་བ་པད་མ་རཱ་གའི་མདོག་ཅན་རྒྱུའོ། །ཡང་བཀྲ་བ་གཞན་འབྱུང་བ་ནི་བཻ་ཌཱུརྱའི་པད་མའི་སྡོང་བུ་ལ་ནི་གསེར་གྱིས་ཡོངས་སུ་དཀྲིས། གསེར་གྱི་པད་མའི་སྡོང་བུ་ལ་ནི་རིན་པོ་ཆེས་ཡོངས་སུ་དཀྲིས། དངུལ་གྱི་པད་མའི་སྡོང་བུ་ལ་ནི་སྤུག་གིས་ཡོངས་སུ་དཀྲིས། རིན་པོ་ཆེ་མ་རྒད་ཀྱི་ཁ་དོག་ལྟ་བུའི་སྡོང་བུ་ལ་ནི་འཛམ་བུ་ཆུ་བོའི་གསེར་གྱིས་ཡོངས་སུ་དཀྲིས་སོ། །བུང་བ་སྒྲ་འབྱིན་པ་ཁ་དོག་རྣམ་པ་སྣ་ཚོགས་སུ་འདུག་པ་རྣམས་ཀྱིས་པད་མའི་རྫིང་བུ་དེ་དག་ཁེབས་པ་ཡིན་ཏེ། འདི་ལྟ་སྟེ། འཛམ་བུའི་
གླིང་ན་མེ་ཏོག་ཙུ་ལ་སའི་དོག་པ་ལ་བུང་བ་རྣམས་ཀྱིས་རྟག་ཏུ་ཁེབས་པ་ལྟར་ཤིང་རྟ་སྣ་ཚོགས་ཀྱི་ཡང་དེ་དང་འདྲའོ། །དེ་ནས་ལེགས་པར་བྱས་པའི་ལས་རྣམས་ཀྱིས་གནས་སྣ་ཚོགས་འབྱུང་བར་འགྱུར་ཏེ། འདི་ལྟ་སྟེ། འཛམ་བུའི་གླིང་ན་ལག་བཟོ་མཁས་པའམ། ལག་བཟོའི་སློབ་མ་མཁས་པ་ཞིག་གིས། རྩིག་ངོས་ལ་བཀྲ་བ་འདབ་མ་སྣ་ཚོགས་བཀོད་པ། ཚོན་རྩི་སྣ་ཚོགས་ཀྱིས་བྲིས་པ་ལྟར། ཚལ་གྱི་གནས་དེ་ན་ཡང་དེ་ལྟ་བུ་ཡིན་ནོ། །ཡང་ཤིང་རྟ་སྣ་ཚོགས་ཀྱི་ཚལ་གྱི་བཀྲ་བ་གཞན་ནི་བྱ་སྣ་ཚོགས་ཀྱི་སྒྲོ་དང་། རྐང་པ་དང་། མགོ་དང་། ལྟོ་དང་། མིག་བཀྲ་བ་དག་འབྱུང་སྟེ། འདི་ལྟ་སྟེ། བྱ་གང་གི་ལྟོ་གསེར་དུ་འདུག་པ་དེའི་སྒྲོ་དངུལ་ཡིན་ལ། རྒྱབ་པད་མ་རཱ་གའི་མདོག་དང་། མིག་རིན་པོ་ཆེ་ཀེ་ཀེ་རུའི་མདོག །དེ་བཞིན་དུ་གང་དངུལ་གྱི་ལྟོར་འདུག་པ་དེའི་སྒྲོ་གསེར་ལ། མིག་བཻ་ཌཱུརྱའི་མདོག་དང་མིག་གི་འབྲས་བུ་པད་མ་རཱ་གའི་མདོག་ལ་རྒྱབ་བཀྲ་བར་འདུག་སྟེ། རིན་པོ་ཆེ་སྣ་བདུན་གྱི་མདོག་ལྟ་བུའི་བྱ་སྣ་ཚོགས་རྣམས་ཀྱིས་ཉེ་བར་མཛེས་པར་བྱས་སོ། །འདི་ནི་ཤིང་རྟ་སྣ་ཚོགས་ཀྱི་ཚལ་གྱི་བཀྲ་བ་གཞན་ཡིན་ཏེ། འདི་ལྟ་སྟེ། རིའི་རྩེ་མོ་འབྱུང་བ་དང་། འདི་ལྟ་སྟེ། མཐོན་ཀ་དང་། བཻ་ཌཱུརྱ་དང་། སྤུག་དང་། རིན་པོ་ཆེ་ཀེ་ཀེ་རུ་དང་གསེར་ཏེ། དེ་རྣམས་ཀྱི་འོད་ཀྱིས་ཚལ་དེ་སྤྲས་ཤིང་བརྒྱན་པ་ཡིན་ནོ། །ཚལ་དེ་ཕན་ཚུན་གྱི་འོད་ཟེར་འཁྱིལ་པས་ཤིན་ཏུ་གང་ལ། ལྷའི་འོད་ཟེར་གྱི་མཐུས་ཤིན་ཏུ་མཛེས་པར་བྱས་པ་ཡིན་ནོ། །ཡང་ཚལ་སྣ་ཚོགས་བཀྲ་བ་གཞན་ནི་ལྕུག་མ་འཕྱང་བ་དང་། ཤིང་གེལ་བ་སྣ་ཚོགས་དག་ཕན་ཚུན་འཛིངས་པར་འདུག་ལ། ཁ་དོག་གསུམ་འབྱུང་བ་ནི་འདི་ལྟ་སྟེ། བཻ་ཌཱུརྱའི་ལྕུག་མ་ལ་པད་མ་རཱ་གའི་མདོག་གི་འབྲས་བུ་དེ་འཕྱང་བར་འགྱུར་ཞིང་། ཨན་ད་རྙིལ་གྱི་མདོག་ལྟ་བུས་ལྷན་ཅིག་དཀྲིས་པ་ཡིན། དངུལ་གྱི་ལྕུག་མ་ལ་པད་མ་རཱ་གའི་མདོག་གི་འོད་ཀྱིས་ལྷན་ཅིག་བསྐོར་བ་ཡིན། དེ་བཞིན་དུ་སྤུག་དང་། གསེར་གྱི་ལྕུག་མ་ལ་གསེར་གྱི་ལྕུག་མས་ལྷན་ཅིག་དཀྲིས་པ་ཡིན། འདི་ལྟ་སྟེ། རིན་པོ་ཆེ་ཀེ་ཀེ་རུའི་མདོག་ལྟ་བུའི་ལྕུག་མ་ལ་དངུལ་
གྱིས་ཡོངས་སུ་དཀྲིས་པ་ཡིན་ཏེ། དེ་ལྟར་ལྕུག་མ་ཁ་དོག་གཉིས་པ་འཕྱང་བ་ཡོངས་སུ་དཀྲིས་པ་ཡིན་ནོ། །ལྕུག་མ་འཕྱང་བ་ཁ་དོག་གསུམ་པ་རྣམས་ལ་ཡོངས་སུ་དཀྲིས་པ་ནི་འདི་ལྟ་སྟེ། བཻ་ཌཱུརྱའི་ལྕུག་མ་ལ་གསེར་དང་། ཀེ་ཀེ་རུའི་མདོག་ལྟ་བུས་ཀུན་དུ་དཀྲིས་པ་ཡིན། དེ་བཞིན་དུ་ལྕུག་མ་ཀེ་ཀེ་རུའི་མདོག་ལྟ་བུ་ལ། །གསེར་དང་དངུལ་ལྟ་བུས་ཡོངས་སུ་དཀྲིས་པ་ཡིན། དེ་བཞིན་དུ་དངུལ་གྱི་ལྕུག་མ་ལ་པད་མ་སྤུག་དང་། མཐོན་ཀ་ལྟ་བུས་ཡོངས་སུ་དཀྲིས་པ་ཡིན་ཏེ། དེ་ལྟར་ལྕུག་མ་རེ་རེ་ལ་གཉིས་གཉིས་ཀྱིས་ཀུན་དུ་དཀྲིས་པ་ཡིན་ནོ། །ཡང་ཤིང་རྟ་སྣ་ཚོགས་ཀྱི་ཚལ་དུ་བཀྲ་བ་གཞན་འབྱུང་བ་ནི། གསེར་གྱི་ལྕུག་མ་དག་ལས་མེ་ཏོག་བཻ་ཌཱུརྱའི་མདོག་ལྟ་བུ་འབྱུང་། དེ་བཞིན་དུ་དངུལ་གྱི་ལྕུག་མ་དག་ལས་མེ་ཏོག་མཐོན་ཀའི་མདོག་ལྟ་བུ་འབྱུང་། དེ་བཞིན་དུ་གསེར་གྱི་ལྕུག་མ་དག་ལས་མེ་ཏོག་ཀེ་ཀེ་རུའི་མདོག་ལྟ་བུ་འབྱུང་། དེ་བཞིན་དུ་སྤུག་གི་ལྕུག་མ་དག་ལས་མེ་ཏོག་བཻ་ཌཱུརྱའི་མདོག་ལྟ་བུ་འབྱུང་སྟེ། དེ་ལྟར་ལྕུག་མ་སྣ་ཚོགས་དག་ལས་མེ་ཏོག་སྣ་ཚོགས་དག་འབྱུང་ངོ་། །ལས་སྣ་ཚོགས་ཀྱིས་བསྐྱེད་པ། སེམས་སྣ་ཚོགས་ཀྱིས་བསླང་བ། རྒྱུ་སྣ་ཚོགས་དང་འཐུན་པ་ནི་ཡང་དག་པར་སྐྱེས་པ་སྣ་ཚོགས་དག་ཡིན་ཏེ། དེ་ལྟར་ལས་རྣམས་ཀྱི་རྒྱུ་དང་གཞི་དེས། དེ་ལྟར་ཤིང་རྟ་སྣ་ཚོགས་ཀྱི་ཚལ་ཐམས་ཅད་བཀྲ་བ་ཡིན་ནོ། །ཇི་ལྟར་ས་བོན་ལས་འབྲས་བུ་འབྱུང་བ་དེ་བཞིན་དུ་རྒྱུ་དང་འཐུན་པར་འབྲས་བུ་འབྱུང་སྟེ། གང་འདིར་ལས་བྱེད་པ་རྣམ་པ་གང་ཇི་ལྟར་འཕངས་པ་དང་། གང་གི་ཚེ་ཞིང་གི་རྣམ་པ་ཇི་ལྟ་བུ་དང་། སེམས་པའི་རྣམ་པ་ཇི་ལྟ་བུ་ནས། སྣ་ཚོགས་སུ་སློང་བར་བྱེད་པའི་བར་གྱི་ལས་རྣམ་པ་སྣ་ཚོགས་བྱས་པའི་འབྲས་བུ་ནི་དེ་ལྟར་རྒྱའི་འབུར་ལྟ་བུར་འབྱུང་བར་འགྱུར་རོ། །མཐོ་རིས་སམ་སེམས་ཅན་དམྱལ་བ་གང་རྒྱུ་མེད་པར་འབྲས་བུ་འབྱུང་བ་དེ་མེད་དེ། གཞན་གྱིས་བྱས་ལ་རྣམ་པར་སྨིན་པ་གཞན་ལ་འབྱུང་བ་དེ་ནི་གནས་མེད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། ཤིང་རྟ་སྣ་ཚོགས་ཀྱི་ཚལ་བཀྲ་བ་དང་། འཇིག་རྟེན་བཀྲ་བ་ལ་ཡང་རྟོག་པར་བྱེད་དེ།
སུམ་ཅུ་རྩ་གསུམ་པའི་ཤིང་རྟ་སྣ་ཚོགས་ན་ལྷ་རྣམས་ལས་ཅི་ཞིག་བྱེད་ཅིག་གུ་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་དུས་གང་གི་ཚེ། མི་ཆོས་དང་མི་ལྡན་པ་ཆོས་མ་ཡིན་པའི་རྗེས་སུ་འཇུག་པ། མར་མི་འཛིན་པ། ཕར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་རྒན་རབས་ལ་གུས་པར་མི་བྱེད་པ། དགེ་བའི་བཤེས་གཉེན་དུ་མི་འཛིན་པ། ལས་དང་འབྲས་བུ་ལ་ཡིད་མི་ཆེས་པ། ཡང་དག་པའི་ལྟ་བ་མེད་པ། ཡང་དག་པའི་ལྟ་བའི་སྔོན་དུ་འགྲོ་བ་མེད་པ་དེའི་ཚེ། བདུད་སྡིག་ཅན་དག་དགའ་བར་འགྱུར་ལ། དེའི་ཆོས་དང་ཆོས་ཀྱི་རྗེས་སུ་འཇུག་པའི་འཁོར་བཞི་པོ་དེ་དག་འཇིག་རྟེན་དུ་འབྱུང་བར་འགྱུར་ཏེ། འདི་ལྟ་སྟེ། བདུད་ཀྱི་རིས་འཇིག་རྟེན་སྐྱོང་བ་འཐབ་པ་ཞེས་བྱ་བ་དང་། བདུད་ཀྱི་རིས་འཇིག་རྟེན་སྐྱོང་བ་གཡེང་བྱེད་ཅེས་བྱ་བ་གང་ཆོས་སྤྱོད་པའི་སེམས་ཅན་རྣམས་ཀྱི་སེམས་གཡེང་བར་བྱེད་པའམ། དམ་པའི་ཆོས་ཉན་པ་གཉིད་ལོག་པར་བྱེད་པ་དང་། གསུམ་པ་ལྷག་པར་ཆགས་པར་རྨོངས་པ་ཞེས་བྱ་བ་སྦྱིན་པ་དག་གཏོང་བ་ན། སྦྱིན་པ་པོ་དང་སྦྱིན་བདག་རྣམས་ཀྱི་སེམས་ཆགས་པ་སྐྱེད་པར་བྱེད་དེ། འདི་ལྟར་བདག་གིས་གང་དགེ་སྦྱོང་དང་། བྲམ་ཟེ་ཞིང་དུ་གྱུར་པ་རྣམས་ལ་སྦྱིན་དུ་བདག་གི་བུ་དང་ཆུང་མ་ཅི་བཟའ་ཅི་བགོ་སྙམ་དུ་སེམས་པར་བྱེད་དེ། བདུད་ཀྱི་རིས་འཇིག་རྟེན་སྐྱོང་བ་གསུམ་པ་དག་སེམས་ཅན་རྣམས་རྣམ་པར་རྨོངས་པར་བྱེད་ཅིང་། འཇིག་རྟེན་ན་རྒྱུ་བར་བྱེད་དོ། །བདུད་ཀྱི་རིས་འཇིག་རྟེན་སྐྱོང་བ་བཞི་པ་འདུ་ཤེས་ལོག་པ་ཞེས་བྱ་བ་དེ་འཇིག་རྟེན་ན་རྒྱུ་ཞིང་། དེ་རབ་ཏུ་འབྱུང་བ་རྣམས་ཀྱི་སེམས་རབ་ཏུ་མི་འབྱུང་བར་འགྱུར་རོ། །དང་པོ་ནི་ཆགས་པ་དང་། སྦྱོར་བ་དང་། གྲོང་དུ་འཇུག་པ་དང་། ཚོང་ཟོང་ཉོ་ཚོང་བྱེད་པ་དང་། བུད་མེད་ལ་ལྟ་འདོད་པ་དང་། ཆང་འཚོང་གི་ཁྱིམ་དུ་འཇུག་པ་དང་། འཐབ་རྩོད་དང་། དགེ་འདུན་འབྱེད་པ་དང་། རྨི་ལམ་གྱི་གནོད་པའི་སེམས་སྐྱེད་པར་བྱེད་དོ། །བདུད་ཀྱི་རིས་འཇིག་རྟེན་སྐྱོང་བ་བཞི་པོ་དེ་དག་གང་གི་ཚེ། ཆོས་དང་མི་ལྡན་པའི་སྐྱེ་དགུ་འཛམ་བུའི་གླིང་དུ་བྱེད་པར་ནུས་པ་
དང་ལྡན་པ་འབྱུང་བ་དེའི་ཚེ། བདུད་སྡིག་ཅན་དག་ལ་ལྷ་དག་དམ་པའི་ཆོས་ཀྱི་ཕྱོགས་ནི་འགྲིབ་བོ། །བདུད་ཀྱི་ཕྱོགས་ནི་འཕེལ་ཏེ་དགྱེས་པར་མཛོད་ཅིག་ཅེས་བསྙད་དོ། །དེ་དག་ལས་ཐོས་ནས་བདུད་སྡིག་ཅན་དག་གི་རྗེས་སུ་འབྲང་བ་དེ་དག་ལ། བདག་ཅག་གི་ཕྱོགས་ཇི་ལྟར་འཕེལ། དམ་པའི་ཆོས་ཀྱི་ཕྱོགས་ཇི་ལྟར་འགྲིབས་ཞེས་དྲིས་སོ། །དེ་དག་གིས་ལྷ་འཛམ་བུའི་གླིང་ན་མི་ཆོས་མ་ཡིན་པ་དང་ལྡན་པ། ཆོས་མ་ཡིན་པའི་རྗེས་སུ་འཇུག་པ། མར་མི་འཛིན་པ། ཕར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་རྒན་རབས་ཀྱི་རྗེས་སུ་མི་འཇུག་པ། བདག་ཅག་གི་འདོད་ཆགས་ཀྱི་ཆགས་པས་ཟིལ་གྱིས་མནན་ཅིང་། དམ་པའི་ཆོས་མཉན་པ་ལ་ཡང་གནོད་པ་བགྱིད་དོ། །དེ་ནས་རབ་ཏུ་འབྱུང་བའི་བློས་ཕལ་ཆེར་རབ་ཏུ་བྱུང་བ་རྣམས་དང་། ཁྱིམ་ན་གནས་པ་སྡོམ་པ་བླངས་ཤིང་། ཚངས་པར་སྤྱོད་པ་རྣམས་ཀྱི་རྨི་ལམ་དུ་ཡང་བུད་མེད་ཀྱི་གཟུགས་སུ་སྤྲུལ་ནས། རྨི་ལམ་གྱི་གནོད་པ་བགྱིད་དུ་སྩལ། སྦྱིན་པ་པོ་དང་སྦྱིན་བདག་རྣམས་ཀྱི་སྦྱིན་པ་གཏོང་བ་ན། བུ་དང་ཆུང་མ་ལ་རག་ལས་པའི་སེམས་ཀྱིས་ཡིད་ཆགས་པར་གྱུར་པ་བགྱིས། ཡིད་མཛའ་བ་དང་འཁྲུགས་པར་བགྱིས། རབ་ཏུ་བྱུང་བ་ཡང་ཉོ་ཚོང་གི་ཟོང་ལ་སེམས་བརྩོན་པར་བགྱིས། འཐབ་པ་དང་། རྩོད་པ་དང་། མཚང་འདྲུད་པ་ལ་དགའ་བར་བགྱིས་ཏེ། དེ་ལྟར་བདག་ཅག་གི་ཐབས་འདི་རྣམས་ཀྱིས་བདུད་ཀྱི་ཕྱོགས་ནི་སྤེལ། དམ་པའི་ཆོས་ཀྱི་ཕྱོགས་ནི་བཤིག་གོ་ཞེས་སྨྲས་སོ། །བདུད་སྡིག་ཅན་གྱིས་དེ་ཐོས་ནས། ལྷ་མ་ཡིན་སྒྲ་གཅན་དང་། བརྟན་པ་དང་། རབ་དགོད་དང་། གཞན་དག་དང་། ཀླུ་རབ་འཇོམས་ལ་སོགས་པ་དག་ལ་འདི་ལྟར་སངས་རྒྱས་ཀྱི་བསྟན་པ་ནི་ཡོངས་སུ་དམས་སོ། །བདག་ཅག་གི་ཕྱོགས་ནི་འཕེལ་ཏེ། ཁྱེད་དགའ་བར་གྱིས་ཤིག་ཅེས་བསྒོའོ། །དེ་ལྟར་ཡང་འཇིག་རྟེན་སྐྱོང་བ་དེ་དག་ཉིད་ཡང་སའི་འོག་ཏུ་གཏོང་བར་བྱེད་དེ། སའི་འོག་ཏུ་སོང་ནས། རབ་དགོད་དང་ཐགས་བཟངས་རིས་ལ་སྔ་མ་བཞིན་དུ་བསྙད་དོ། །དེ་ཐོས་
ནས་ལྷ་མ་ཡིན་རྣམས་རབ་ཏུ་དགའ་སྟེ། ཀླུ་རབ་འཇོམས་ལ་སོགས་པ་ཆོས་དང་མི་ལྡན་ཞིང་། ཆོས་ཀྱི་རྗེས་སུ་མི་འཇུག་པ་རྣམས་ལ་བསྙད་དོ། །ལོངས་སྤྱོད་ལྡན་ན་གནས་པའི་ཀླུ་དེ་རྣམས་ཀྱིས་ཐོས་ནས་ཀྱང་ཤིན་ཏུ་དགའ་སྟེ། དེ་དག་མི་རྣམས་ལ་སྔ་མ་བཞིན་དུ་བགེགས་བྱེད་དོ། །དེ་དག་ཀྱང་འཕགས་སྐྱེས་པོ་ལ་སོགས་པ་འཇིག་རྟེན་སྐྱོང་བ་གཞན་དག་ལས། དེ་དག་ཐམས་ཅད་སྔ་མ་བཞིན་དུ་ཐོས་ནས། ལྷའི་རྒྱལ་པོ་བརྒྱ་བྱིན་སུམ་ཅུ་རྩ་གསུམ་པའི་ལྷ་རྣམས་དང་ལྷན་ཅིག་ཤིང་རྟ་སྣ་ཚོགས་ཀྱི་ཚལ་དུ་འཇུག་པར་བྱེད་དོ། །དེ་ཞུགས་ནས་ལྷ་རྣམས་བོས་ཏེ། འདི་ལྟར་འཇིག་རྟེན་སྐྱོང་བ་འདི་དག་ན་རེ། འདི་ལྟར་བདུད་ཀྱི་རིས་ཀྱི་ལྷ་རྣམས་རབ་ཏུ་མཐུ་དང་ལྡན་ཏེ། ལྷ་མ་ཡིན་ཐགས་བཟངས་རིས་དང་རབ་དགོད་ལ་སོགས་པ་དང་། ཀླུ་རབ་འཇོམས་ལ་སོགས་པ་མཐུ་རབ་ཏུ་ཆེའོ་ཞེས་ཟེར་གྱིས། དེ་ལ་ལྷ་ཁྱེད་ཅག་གིས་ལྷའི་ཚོགས་ཐམས་ཅད་འདིར་བསྡུ་བའི་རིགས་སོ། །འདུས་ནས་ཀྱང་བདག་ཅག་ལྷའི་ཚོགས་ཐམས་ཅད་ལྷ་མ་ཡིན་དང་གཡུལ་སྤྲད་པའི་ཕྱིར། རིན་པོ་ཆེས་བརྒྱན་པའི་ཁང་པ་བརྩེགས་པ་སྣ་ཚོགས་སུ་འདོང་ངོ་། །དེ་ཐོས་ནས་ལྷ་ཐམས་ཅད་ཀྱིས་དེ་ལྟར་འཚལ་ལོ་ཞེས་སྨྲས་ནས། རང་གི་གནས་ག་ལ་བ་དེར་འདོང་ངོ་། །དོང་ནས་ལྷ་གཞན་ཐམས་ཅད་བསྡུས་ནས། མདོར་བསྡུས་ཏེ། ཤིང་རྟ་སྣ་ཚོགས་ཀྱི་ཚལ་ག་ལ་བ་དེར་འདོང་ངོ་། །དོང་ནས་སྐྱེད་མོས་ཚལ་ཤིང་རྟ་སྣ་ཚོགས་ཀྱི་གནས་ཉིད་དུ་འཁོད་ཅིང་། སིལ་སྙན་སྒྲ་དབྱངས་སྣ་ཚོགས་དང་གླུ་དག་ལེན་པ་ན། ཤིང་རྟ་སྣ་ཚོགས་ཀྱིས་བཀྲ་བ་རྣམས་སུ་དགའ་བར་བྱེད་དོ། །གང་ཤིང་རྟ་སྣ་ཚོགས་ཀྱི་ཚལ་ན་རྟག་པ་རྟག་པ་ཉིད་དུ་འཁོད་པའི་ལྷ་དེ་དག་ནི་སྐྱེད་མོས་ཚལ་གར་ཡང་མི་འགྲོའོ། །དེ་ནས་ལྷའི་དབང་པོ་དེས་ལྷ་དེ་དག་བསྡུས་ནས། ཤིང་རྟ་སྣ་ཚོགས་ཀྱི་ཚལ་དེ་ནས་དོང་ངོ་། །ཤིང་རྟ་སྣ་ཚོགས་ཀྱི་ཚལ་ན་གནས་པའི་ལྷ་དེ་དག་ཀྱང་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་། བསགས་པའི་ལས་ཟད་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད་དོ། །དེ་ཟད་ནས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་ཉེ་
བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་རྟག་ཏུ་བདེ་བར་འགྱུར་ཞིང་། ན་ཚོད་ཐོག་མ་ནས་འཆི་བའི་བར་དུ་མེ་ཏོག་གི་ཕྲེང་བ་སྡུག་གུ་ཐོགས་ཤིང་། ཆ་བྱད་སྣ་ཚོགས་དང་ཤིང་རྟ་སྣ་ཚོགས་ལ་དགའ་བ་དང་སྐྱེ་བོ་ཀུན་དགའ་བར་འགྱུར། གལ་ཏེ་དེ་རབ་ཏུ་བྱུང་ན་དེ་སེང་གེའི་ཁྲི་ལ་འདུག་ནས་ཆོས་དང་གཏམ་སྣ་ཚོགས་སྨྲ་བ་དང་། གཏམ་སྣ་ཚོགས་ཀྱིས་འཁོར་ཀྱང་ཀུན་ནས་ཤིན་ཏུ་དགའ་བར་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་དགའ་བ་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྐྱེས་བུ་དམ་པ་བསམ་པ་དགེ་བར་གྱུར་པ་གང་གིས་སྲོག་གཅོད་པར་མི་བྱེད་ཅིང་མ་བྱིན་པར་ལེན་པ་ཡང་མི་བྱེད་ལ། བྱེད་དུ་མ་བཅུག །ཕ་རོལ་བྱེད་པ་ཡང་བཟློག །བདག་ཉིད་མི་བྱེད། བྱེད་དུ་མི་འཇུག །བྱས་ན་ཡང་འཆགས་པར་བྱེད་ཅིང་སྐྱོན་དུ་འགྲང་བར་བྱེད་ལ་སྡིག་པའི་གྲོགས་པོ་དེ་ཡོངས་སུ་སྤོང་བར་བྱེད་དོ། །དེ་ལ་སྲོག་གཅོད་པ་དང་བྲལ་བ་ནི་གང་ཡིན། རྣམ་པ་ནི་དུ་ཡོད་ཅིག་གུ་སྙམ་ནས། འདི་ནི་བྱ་ནེའུ་བཟུང་བ་ཐར་བར་བྱེད་ཅིང་སྡོམ་པ་ལེན་དུ་བཅུག་ནས་བདག་ཉིད་མི་བྱེད་ལ་སོ་སོར་འཆགས་པར་བྱེད་པའམ། བྱ་པས་བྱ་བཟུང་བ་ནོར་རྫས་ཀྱིས་བསླུས་ཏེ་ཐར་བར་བྱེད་ལ། གཞན་ཡང་དེ་ཉིད་ལ་རབ་ཏུ་འཇོག་པར་བྱེད། རབ་ཏུ་དགའ་བར་བྱེད། རབ་ཏུ་སྤྲོ་བར་བྱེད་པ་དང་། མ་བྱིན་པར་ལེན་པ་སྤངས་པ་ཇི་ལྟ་བུ་ཡིན། མ་བྱིན་པར་ལེན་པ་སྤངས་པ་གང་ཡིན་ཞིག་གུ་སྙམ་ན། འདིར་སྡུད་པ་པོར་གྱུར་ནས་གྲོང་རྣམས་འཛིན་ཏམ། ཚོང་རྡལ་ལམ། གྲོང་རྡལ་ལམ། ཕྱུགས་ཀྱི་ལྷས་འཛིན་པའམ། རྒྱལ་པོས་འདི་ལྟར་ལུག་དང་བ་ལང་དང་བོང་བུ་ལ་སོགས་པ་སྡུས་ཤིག་ཅེས་
བསྒོ་བ་ལས། དེ་ཡང་སྡོམ་པའི་འཇིགས་པས་སྐྲག་ནས་མ་བྱིན་པར་ལེན་པ་མི་བྱེད་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དགའ་བའི་ཚལ་དུ་སྐྱེ་བར་འགྱུར་རོ། །ལས་གཞན་གྱིས་ཀྱང་འགྱུར་ཏེ། ཆོས་འཆད་པ་ཡང་ཆོས་ཉན་པ་པོ་རྣམས་དགའ་བར་བྱ་བའི་ཕྱིར་ཚེས་གྲངས་དང་། ཡུལ་དང་། དུས་དང་ལྡན་པར་བྱས་ལ་དེ་དག་ཀྱང་དགའ་བར་བྱས་ཏེ། དེ་དག་ཡིད་རབ་ཏུ་དགའ་བ་སེམས་རྩེ་གཅིག་གིས་ཆོས་ཉན་ན། དམ་པའི་ཆོས་འཆད་པའི་སློབ་དཔོན་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་དགའ་བའི་ཚལ་དུ་སྐྱེ་བར་འགྱུར་རོ། །སྦྱིན་པ་ཐམས་ཅད་ཀྱི་ནང་ན་སྦྱིན་པའི་མཆོག་འདི་ཡིན་ཏེ། འདི་ལྟ་སྟེ། ཆོས་ཀྱི་སྦྱིན་པ་ཞེས་བྱའོ། །རྒྱུ་འདིས་ཀྱང་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ན་དགའ་བའི་ཚལ་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་ལྷའི་བདེ་བ་ཕུན་སུམ་ཚོགས་པ་དཔེ་མེད་པ་བརྒྱ་ཕྲག་སྟོང་དུ་མ་མྱོང་བ་ན། འདི་ལྟར་གང་དུ་ཚལ་དེའི་ཕྱོགས་ཀྱི་ཆ་ནི་འདི་ཡིན་ཏེ། དཔག་ཚད་སུམ་སྟོང་ཡོད་ལ་རིན་པོ་ཆེ་སྣ་བདུན་གྱི་ཤིང་ལྗོན་པ་རྣམས་ཀྱིས་ཉེ་བར་མཛེས་པར་བྱས་པ་ཡིན་ཏེ། དེར་ལྷ་རྣམས་རྟག་ཏུ་དགའ་བར་བྱེད་ཅིང་། གཞན་གར་ཡང་མི་འགྲོ་སྟེ། དེ་བས་ན་ལྷན་ཅིག་སྐྱེས་པའི་ཡོན་ཏན་གྱིས་དེ་དགའ་བའི་ཚལ་ཞེས་བྱའོ། །དེ་ན་ཤིང་ལྗོན་པ་ཐམས་ཅད་འདོད་པ་དག་གང་ལྷ་རྣམས་ཀྱི་ཡིད་ཀྱིས་ཡང་དག་པར་སེམས་པར་བྱེད་པ་དེ་དག་ཉིད་ལྷ་དེ་རྣམས་ཀྱིས་ཤིང་ལྗོན་པ་ལས་འཐོན་པར་འགྱུར་ཏེ། འདི་ལྟར་ལྷ་རྣམས་ཀྱི་ཡིད་ལ་བདག་ཁྱིམ་ཞིག་འདོད་དོ་སྙམ་ན། དེ་ནས་དེ་ལྟར་ལྷ་དེས་ཡིད་ལ་བྱས་མ་ཐག་ཏུ། ཤིང་ལྗོན་པ་དེའི་ཡལ་གའི་རྩེ་མོ་ལས་འབྱུང་བར་འགྱུར་ཏེ། ཤིང་ལྗོན་པ་དེའི་ཁང་བཟངས་རིན་པོ་ཆེ་སྣ་བདུན་དང་ལྡན་ཞིང་ཉེ་བར་མཛེས་པར་བྱས་པ། ཀ་བ་སྟོང་ཡོད་པའི་ཁང་བཟངས་མཐོང་བར་འགྱུར་རོ། །ཁང་པ་དེའི་ཀ་བ་སོ་སོར་དེའི་ཕྱོགས་ཕྱོགས་བཻ་ཌཱུརྱ་ལས་བྱས་ཤིང་། ལ་ལ་གསེར་ལས་བྱས། ལ་ལ་ཤེལ་ལས་བྱས། ལ་ལ་ཀེ་ཀེ་རུ་ལས་བྱས། ལ་ལ་སྤུག་ལས་བྱས་པ་ཡིན་ནོ། །
དེ་ནས་ཁྱིམ་གྱི་མཆོག་དེ་ཤིང་ལྗོན་པའི་རྩེ་མོ་དེ་ལ་ཡོད་པ་མཐོང་ནས། དེ་འདི་སྙམ་དུ་སེམས་ཏེ། ད་ནི་བདག་ལམ་འཇམ་ཞིང་མཐོན་དམན་དུ་གྱུར་པ་ནས། ཁྱིམ་འདིར་འཇུག་པར་བྱའོ་སྙམ་བསམས་མ་ཐག་ཉིད་དུ་ཤིང་ལྗོན་པ་དེ་ཉིད་ལ་ལམ་མཐོང་སྟེ་དེར་འཇུག་པར་བྱེད་དོ། །དེ་ལྟར་ལམ་དེ་ཉིད་ནས་ཞུགས་པ་དང་། དེ་འདི་སྙམ་དུ་སེམས་ཏེ། ད་ནི་བདག་གི་ཁྱིམ་འདིར་ཁྱིམ་ནང་དུ་པད་མའི་རྫིང་ཞིག་ཡོད་ན་རུང་ངོ་སྙམ་མོ། །དེ་སེམས་བསྐྱེད་མ་ཐག་ཉིད་དུ་པད་མའི་རྫིང་རིན་པོ་ཆེ་སྣ་བདུན་ལས་བྱས་པ། བྱ་ངང་པ་དང་། ཀཱ་རཎྜ་བ་དང་། ངུར་པ་སྣ་ཚོགས་ཀྱིས་ཉེ་བར་མཛེས་པར་བྱས་པ་འབྱུང་ངོ་། །དེ་ནས་ཡང་ལྷ་དེ་འདི་སྙམ་དུ་སེམས་ཏེ། བདག་གི་སིལ་སྙན་དང་། གླུ་དབྱངས་ཡན་ལག་ལྔ་དང་ལྡན་པ་འབྱུང་བར་གྱུར་ཅིག་སྙམ་མོ། །དེ་སེམས་བསྐྱེད་མ་ཐག་ཉིད་དུ་གང་རླུང་ངད་འཇམ་པ་རབ་ཏུ་ལྡང་བར་འགྱུར་ཏེ། རྣམ་པ་ཇི་སྲིད་དུ་ཕན་ཚུན་རེག་པ་ན་སྒྲ་འབྱུང་བའི་རྣམ་པ་དེ་སྲིད་དུ་སིལ་སྙན་ཡན་ལག་ལྔ་དང་ལྡན་པ་འབྱུང་ངོ་། །ལྷ་དེ་འདི་སྙམ་དུ་སེམས་ཏེ། ཤིང་ལྗོན་པའི་ནང་གི་ཁང་པར་ད་ནི་བཟའ་བ་དང་། བཏུང་བ་ཆུ་བོ་ལྟར་འབབ་པར་གྱུར་ཅིག་སྙམ་མོ། །དེ་སེམས་བསྐྱེད་མ་ཐག་ཉིད་དུ་ཤིང་ལྗོན་པའི་ཡལ་ག་དེ་དག་རྡོལ་ནས། བཟའ་བ་ཆུ་བོ་སྙེད་དང་བཏུང་བ་ཆུ་བོ་སྙེད་ཁ་དོག་དང་། རོ་དང་། རེག་པ་ཕུན་སུམ་ཚོགས་པ་བྱུང་ངོ་། །དེ་འདི་སྙམ་དུ་སེམས་ཏེ། ད་ནི་བདག་བདུད་རྩི་བཟའ་བར་བྱའོ་སྙམ་མོ། །དེ་སེམས་བསྐྱེད་མ་ཐག་ཉིད་དུ་བདུད་རྩི་ལྷའི་རོ་དང་། དྲི་དང་། མདོག་ཕུན་སུམ་ཚོགས་པ་འབྱུང་སྟེ། དེ་དེ་ལ་ཟ་བར་བྱེད་དོ། །དེ་དེས་ཤིན་ཏུ་ཚིམ་པ་དང་། དེ་ནས་ཡང་ལྷ་མོ་དེ་རྣམས་དང་ལྷན་ཅིག་རྩེ་བར་བྱེད། ཡོངས་སུ་སྤྱོད་པར་བྱེད་དེ། དེ་ལྟར་དགའ་བའི་ཚལ་དུ་ལྷ་དག་ཤིང་གི་དྲུང་དུ་སོང་སྟེ་བདེ་བ་ཉེ་བར་སྤྱོད་པར་བྱེད་དོ། །དེ་གལ་ཏེ་ཡང་ཤིང་ལྗོན་པའི་མཆོག་དེ་ལས་འབེབས་པར་བྱེད་དེ། དེ་སའི་སྟེང་དུ་སོང་ནས་ས་དེ་ལ་འཆག་པར་བྱེད་དོ། །དེ་འཆག་པ་ན་བཻ་ཌཱུརྱའི་སྡོང་བུ་དང་ལྡན་པའི་པད་མ་གསེར་གྱི་འདབ་མ་མཐོ་རིས་སུ་འོས་པ། འཇམ་
ཞིང་འཕར་བ་ཀུན་ནས་མཆོག་ཏུ་ཉམས་དགའ་ཞིང་། ཤིན་ཏུ་དྲི་ཞིམ་པ་དག་འབྱུང་བར་འགྱུར་ཏེ། དེ་དག་ལ་རྐང་པས་འགྲོ་ཞིང་ལྷ་དེ་འཆག་པར་བྱེད་ལ། ལྷའི་སིལ་སྙན་ཡན་ལག་ལྔ་དང་ལྡན་པའི་དབྱངས་ལེན་པ་ན། དེ་ལྟར་ལྷ་དེ་རྐང་པས་འཆག་པའི་བདེ་བ་ཉེ་བར་མྱོང་ངོ་། །དེ་རྣམ་པར་རྟོག་པ་འབུམ་སྙེད་དུ་མ་དག་འགྲུབ་ཅིང་བདེ་བ་མྱོང་སྟེ། དབང་པོ་ལྔ་རྣམས་ཀྱི་ཡུལ་ལྔ་རྣམས་ལ་མྱོང་བར་བྱེད་དོ། །དབང་པོ་ཀུན་རང་གི་ཡུལ་གྱིས་ཚིམ་པ་མེད་པར་འགྱུར་ཏེ། འདི་ལྟ་སྟེ། མིག་གིས་གཟུགས་གང་མཐོང་བ་དེ་དག་ཟློས་པ་མེད་པར་མཐོང་ལ། གང་མཐོང་བ་དེ་དག་སྣ་ཚོགས་པ། ཉམས་དགའ་བ་མིག་ཏུ་འོང་བ་ཡིན་ནོ། །མིག་དང་བས་འདོད་པ། སྡུག་པ། ཡིད་དུ་འོང་བ་འཛིན་ཅིང་མཐོང་སྟེ། དེ་ལྟར་མིག་གཟུགས་རྣམས་ཀྱིས་ཚིམ་པ་མེད་དོ། །གང་རྣ་བས་མཉན་པ་ཡང་ཉམས་དགའ་བ་གཞན་དང་མི་འདྲ་བ་ཡིན་ཏེ། རྣ་བ་ཡང་སྒྲ་རྣམས་ཀྱིས་ཚིམ་པ་མེད་དོ། །དེ་ལྟར་སྣས་ཀྱང་དྲི་སྣོམ་པར་བྱེད་དེ། གང་སྣོམ་པ་དེ་དག་ཀྱང་འདོད་པ། སྡུག་པ། ཡིད་དུ་འོང་བ་རྣམས་ལ་སྣོམ་སྟེ་སྣ་ཡང་དྲི་རྣམས་ཀྱིས་ཚིམ་པ་མེད་དོ། །དེ་ལྟར་ལྕེས་ཀྱང་རོ་རྣམས་མྱོང་བར་བྱེད་དེ། གང་མྱང་བར་བྱ་བ་དེ་དག་ཀྱང་ཤིན་ཏུ་འདོད་པ་དག་ལ་མྱོང་བར་བྱེད་ཅིང་ཡིད་དུ་འོང་བ་དག་ལ་མྱོང་བར་བྱེད་དོ། །དེ་ལྟར་ལུས་ཀྱིས་ཀྱང་རེག་བྱ་ལ་རེག་པར་བྱེད་དེ་གང་རེག་པར་བྱ་བ་དེ་དག་ཀྱང་འདོད་པ། སྡུག་པ། ཡིད་དུ་འོང་བ་དག་ལ་མྱོང་བར་བྱེད་དོ། །དེ་ལྟར་ཡིད་ཀྱིས་གང་བསམ་པར་བྱ་བ་དེ་ཡང་འདོད་པ། སྡུག་པ། ཡིད་དུ་འོང་བ་དག་ལ་སེམས་པར་བྱེད་དེ། དེ་ལྟར་སྲེད་པའི་ཚོགས་དྲུག་ལ་ལུས་རྣམ་པར་ཆགས་པ་དག་ཚལ་དེ་ན་དགོད་པར་བྱེད། དགའ་བར་བྱེད། དགའ་དགུར་སྤྱོད་པར་བྱེད། རྩེ་བར་བྱེད་ཀྱང་འདོད་པ་རྣམས་ཀྱིས་ཚིམ་པ་མེད་དོ། །དེ་ཡུལ་འོག་མ་དགོན་པ་ལྟ་བུ་ལ་དབང་པོ་མཐོན་པོར་བྱུང་བའི་རྣམ་པར་རྟོག་པ་རླུང་ལྟ་བུས་བསྐྱོད་པའི་དགེ་བ་མེད་པ་ཤིན་ཏུ་བྱུང་བའི་མེས་ཉིན་གཅིག་བཞིན་སྲེག་ཀྱང་། དེ་སྲེད་པའི་འདོད་པ་རྣམས་ཀྱིས་ཚིམ་པ་སྐྱེད་པར་མི་བྱེད་དོ། །དེ་ལྟར་དེ་དག་དགའ་བའི་ཚལ་ན་
རྩེ་ཞིང་ཡུལ་དུ་མ་ལ་དགའ་བ་མྱོང་བ་ཀུན་དུ་རྩེ་སྟེ། དགའ་བ་མྱོང་བ་ན་ལྷ་མ་ཡིན་ལས་རྣམ་པར་རྒྱལ་བ། ལྷའི་རྒྱལ་པོ་བརྒྱ་བྱིན་ཡང་སྔ་མ་བཞིན་དུ་རི་བརྩེགས་པ་སྣ་ཚོགས་ག་ལ་བ་དེར་འགྲོ་བར་བྱེད་དོ། །དེར་སོང་ནས་ཀྱང་ལྷ་རྣམས་བོས་ཏེ་ལྷ་དག་དགའ་བའི་ཚལ་དུ་དགའ་བར་གྱིས་ཤིག །ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་རྩེས་ཤིག །འདི་ལྟར་བདག་ནི་བདུད་ཀྱི་སྡེ་ཐགས་བཟངས་རིས་ལ་སོགས་པ་ལས་རྣམ་པར་རྒྱལ་ཏེ། བདག་དགའ་བའི་ཚལ་དུ་འགྲོ་ཡིས། དེ་ལྟར་ལྷ་ཐམས་ཅད་ལྷ་མོའི་ཚོགས་དང་བདག་ཅག་རྣམས་ཀྱི་དབྱར་ཟླ་བ་བཞིར་གནས་པའི་སྐྱེད་མོས་ཚལ་དུ་དགའ་སྤྱོད་བྱ་བ་ག་ལ་བ་དེར་དོང་ལ། ལྷའི་འདོད་པའི་ཡོན་ཏན་ལྔ་རྣམས་ཀྱིས་ངེས་པར་དགའ་བར་བྱའོ་ཞེས་བསྒོའོ། །དེ་ནས་ལྷའི་རྒྱལ་པོ་བརྒྱ་བྱིན་གྱིས་སུམ་ཅུ་རྩ་གསུམ་པ་རྣམས་ལ་བསྒོ་ནས། ཤིན་ཏུ་དགའ་བ་ཆེན་པོ་དང་ཡང་དག་པར་ལྡན་པ་གླང་པོ་ཆེ་ས་སྲུང་གི་བུ་བོས་ཏེ། འདི་ལྟར་གླང་པོ་ཆེའི་མཆོག་ཆོས་ཤིག །ང་སྐྱེད་མོས་ཚལ་དུ་དགའ་སྤྱོད་བྱ་བའི་ཕྱིར་དགའ་བའི་ཚལ་ན་སྐྱེད་མོས་ཚལ་གྱི་དགའ་སྤྱོད་ག་ལ་བ་དེར་འགྲོ་སྟེ། ལྷ་དང་ལྷ་མོའི་ཚོགས་དང་བཅས་པས་ཡོངས་སུ་བསྐོར་ལ་དགའ་བའི་ཚལ་ག་ལ་བ་དེར་འདོང་གིས་ཁྱོད་ཀྱིས་ཇི་ལྟར་སྔོན་ཡང་ཡོངས་སུ་སྤྲུལ་པ་བྱས་པ་དེ། དེ་ལྟར་ཁྱོད་ཀྱི་རྒྱབ་ཏུ་ཞོན་པ་དང་། མགོ་ལ་ཞོན་པ་དང་། སོ་ལ་ཞོན་པ་དང་། རྩིབ་ལོགས་ལ་ཞོན་པ་དང་། གདེག་པ་དང་། ཚལ་དང་། མཚོ་དང་། རི་དང་། རི་རྩེ་དང་། ཚལ་དང་། ཉེ་བའི་ཚལ་དག་སྤྲུལ་པ་གྱིས་ཤིག་ཅེས་བསྒོའོ། །དེ་ནས་བརྒྱ་བྱིན་གྱི་ཚིག་ཐོས་ནས། གླང་པོ་ཆེའི་མཆོག་ས་སྲུང་གི་བུ་བདག་ཉིད་ཆེན་པོར་སྤྲུལ་ཏེ་ལུས་ཆེན་པོར་བྱས་སོ། །དེ་མགོ་བརྒྱར་སྤྲུལ་ཏེ་མགོ་རེ་རེ་ལ་སོ་བཅུ་བཅུའོ། །སོ་རེ་རེ་ལ་པད་མའི་རྫིང་བཅུ་བཅུའོ། །པད་མའི་རྫིང་རེ་རེ་ལ་པད་མ་སྟོང་སྟོང་ངོ་། །པད་མ་སྟོང་སྟོང་ལ་ནི་རིན་པོ་ཆེ་སྣ་བདུན་གྱི་འདབ་མ་ཡོད་དོ། །འདབ་མ་སྟོང་སྟོང་ལ་རིན་པོ་ཆེ་སྣ་བདུན་གྱི་བུང་བ་ཡོད་ཅིང་། འདབ་མ་སྟོང་སྟོང་ལ་ལྷ་རྣམས་འཁོད་ཀྱང་ལྷ་མོའི་ཚོགས་དང་ཕན་ཚུན་ཉམ་ང་བ་མེད་དོ། །དེ་དག་གླང་པོ་ཆེ་མཆོག་གི་མགོ་ལ་ཞོན་པ། ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་
དགའ་བའི་ཚལ་ག་ལ་བ་དེར་ནམ་མཁའ་ལས་འདོང་ངོ་། །གླང་པོ་ཆེའི་མཆོག་གི་རྩིབ་ལོགས་ལ་ཡང་ཚལ་གཉིས་སྤྲུལ་ཏེ། ཚལ་རབ་ཏུ་དགའ་བ་ཞེས་བྱ་བ་དང་། ཚལ་གཉིས་པ་འདོད་བདེ་ཞེས་བྱ་བའོ། །ཚལ་གཉིས་པོ་དེ་ན་ཤིང་ལྗོན་པ་དང་། འབབ་ཆུ་དང་། ལྟེང་ཀ་ཕུན་སུམ་ཚོགས་པ་དང་། རིན་པོ་ཆེ་སྣ་བདུན་གྱི་ཤིང་ལྗོན་པ་ཕུན་སུམ་ཚོགས་པ་དང་། དཔག་བསམ་གྱི་ཤིང་ལྗོན་པ་ཕུན་སུམ་ཚོགས་པ་ཡོད་དོ། །ཚལ་དེ་ན་གནས་པའི་ལྷ་རྣམས་དགའ་ཞིང་དགའ་དགུར་སྤྱོད་ལ། ལྷའི་འདོད་པའི་ཡོན་ཏན་ལྔ་རྣམས་ཀྱིས་དགའ་བ་ན་ལྷ་དང་ལྷ་མོའི་ཚོགས་ཀྱིས་གང་བ། གླང་པོ་ཆེའི་རྒྱལ་པོ་ས་སྲུང་གི་བུ་རི་རབ་གཉིས་པ་ལྟ་བུ་དགའ་བའི་ཚལ་ག་ལ་བ་དེར་འགྲོ་བར་བྱེད་དོ། །གླང་པོ་ཆེ་མཆོག་གི་རྒྱབ་ཏུ་ཡང་གྲོང་ཁྱེར་མཉམ་ཞིང་འཇམ་པའི་ངོས་ཞེས་བྱ་བ་བལྟ་ན་སྡུག་གཉིས་པ་ལྟ་བུ་སྤྲུལ་ཏེ། སྲང་དང་། བཞི་མདོ་དང་། སུམ་མདོ་དང་། ཉེ་བའི་ཚལ་དང་། ཤིང་ལྗོན་པ་དང་། རིན་པོ་ཆེ་སྣ་བདུན་ལས་བྱས་པའི་ཁང་པ་རྣམས་ཀྱིས་ཉེ་བར་མཛེས་པར་བྱས་སོ། །དེའི་དབུས་སུ་ཁང་པ་སྤྲུལ་ཏེ་རིན་པོ་ཆེ་སྣ་བདུན་ལས་བྱས་པའི་ཀ་བ་བརྒྱ་ཡོད་པའི་ཀ་བ་རྣམས་ཀྱིས་ཉེ་བར་མཛེས་པར་བྱས་སོ། །དེའི་དབུས་སུ་མཚོ་འབྱུང་སྟེ་དེར་ལྷའི་རྒྱལ་པོ་ལྷ་མོའི་ཚོགས་རྣམས་དང་ལྷན་ཅིག་རྩེ་བར་བྱེད་ཅིང་། སིལ་སྙན་ཡན་ལག་ལྔ་དང་ལྡན་པས་ལྷའི་རྒྱལ་པོ་བརྒྱ་བྱིན་དགའ་བར་བྱེད་ལ། དགའ་དགུར་སྤྱོད་བཞིན་དུ་དགའ་བའི་ཚལ་ག་ལ་བ་དེར་འགྲོ་བར་བྱེད་དོ། །དེ་འགྲོ་བ་ན་ཡང་འགྱུར་བ་མེད་དེ། ཇི་ལྟར་རི་རབ་ལ་གནས་པ་འགྱུར་བར་མི་མངོན་པ་དེ་ལྟར་གླང་པོ་ཆེའི་མཆོག་འགྲོ་ཡང་མི་མངོན་ནོ། །དེ་ནས་ཡང་གླང་པོ་ཆེའི་རྣ་བ་ལ་པད་མའི་རྫིང་གཉིས་སྤྲུལ་ཏེ། རྒྱར་དཔག་ཚད་བཅུ་གཅིག་གོ །གཉིས་པ་ཡང་དཔག་ཚད་བཅུ་ཡོད་དོ། །གཅིག་ནི་ཟབ་པ་ཞེས་བྱའོ། །གཉིས་པ་ནི་དང་བ་ཞེས་བྱ་སྟེ། ཆུ་ཡོན་ཏན་ཡན་ལག་བརྒྱད་དང་ལྡན་པས་ཤིན་ཏུ་གང་བ་ཡིན་ནོ། །དེ་ན་ཨུད་པ་ལ་བཻ་ཌཱུརྱའི་འདབ་མ་དང་། རིན་པོ་ཆེའི་སྡོང་བུ་དག་སྐྱེས་ལ། ཁ་ཅིག་ནི་པད་མ་རཱ་གའི་མདོག་ལྟ་བུ་ལ་བུང་བས་ཉེ་བར་མཛེས་པར་བྱས་ཤིང་། མེ་ཏོག་རྒྱས་
ལ་ལྷའི་དྲི་ཕུན་སུམ་ཚོགས་པ་ཡིན་ཏེ། ཨུད་པ་ལ་དེ་དག་གི་ནང་གི་ཟེ་བའི་སྟན་ལ་ལྷ་དང་ལྷ་མོ་གང་དག་ལྷན་ཅིག་འཁོད་དེ་དགའ་བར་བྱེད་ལ། ལྷ་ཁ་ཅིག་ནི་ཆུས་རྩེ་ཞིང་པད་མས་རྩེ་བར་བྱེད་ཀྱང་། ལྷ་རྣམས་ཀྱིས་ཅི་གླང་པོ་ཆེའི་མཆོག་འདི་འགྲོའམ་མི་འགྲོ་མི་རིག་གོ །གླང་པོ་ཆེ་མཆོག་གི་ལག་པའི་སྟེང་དུ་རྫིང་རིང་པོ་སྤྲུལ་ཏེ་སྲིད་དུ་དཔག་ཚད་ལྔ་ཡོད་པ། ཁང་བཟངས་ཡང་ཏོག་ཅན་གྱིས་ཡོངས་སུ་བསྐོར་ལ་ལྷའི་ཤིང་ལྗོན་པ་དང་ལྡན་པ། མེ་ཏོག་སྣ་ཚོགས་ཀྱིས་ཁེབས་པ། མེ་ཏོག་མན་དཱ་ར་བས་ཁེབས་པ། བུང་བ་སྒྲ་དི་རི་རི་འབྱིན་པ་དང་ལྡན་པ། ལྷའི་ཙན་དན་གོར་ཤིར་ཥའི་འདབ་མས་ཉེ་བར་མཛེས་པར་བྱས་པ། གསེར་གྱི་ཤིང་ལྗོན་པ་དང་མེ་ཏོག་རྣམ་པ་སྣ་ཚོགས་གཞན་རྣམས་ཀྱིས་ཤིན་ཏུ་ཁེབས་པ་ཡིན་ཏེ། མེ་ཏོག་དེ་རྣམས་ཀྱི་ནང་ན་འཁོད་པའི་ལྷ་མོ་མེ་ཏོག་གི་ཟེ་བའི་སྟེང་ན་འདུག་པ་དག་རོལ་མོ་བྱེད་ཅིང་དེ་དག་གླུ་དབྱངས་ལེན་ལ། ལྷའི་རྒྱལ་པོ་དེ་ལ་ཡང་ཚིག་དགེ་བ་རྣམས་ཀྱིས་སྟོད་པར་བྱེད་དེ། དེ་ལྟར་གླང་པོ་ཆེ་མཆོག་གི་ལག་པའི་སྟེང་དུ་ཡང་རྫིང་རིང་པོ་སྤྲུལ་ཏོ། །དེ་ནས་ཡང་གླང་པོ་ཆེའི་རྒྱལ་པོའི་སྣའི་ཐོར་ཏོ་ལ་རྫིང་ཆེན་པོ་རྒྱར་དཔག་ཚད་ཙམ་ཡོད་པ་སྤྲུལ་ཏེ། པད་མ་རྒྱ་ཆེ་བ་འབུམ་ཕྲག་དུ་མ་དྲི་ཤིན་ཏུ་ཞིམ་པ་ཡིན་ལ་གང་ལྷའི་དྲི་དེ་དཔག་ཚད་བཅུར་ལྡང་ངོ་། །པད་མ་ཆེན་པོ་འདབ་མས་ཉེ་བར་མཛེས་པར་བྱས་པའི་འདབ་མ་རེ་རེ་ལ་ལྷ་དང་ལྷ་མོའི་ཚོགས་རྣམས་ཉེ་བར་གླུ་དབྱངས་ལེན་ཅིང་རྩེ་བར་བྱེད། དགའ་དགུར་སྤྱོད་པར་བྱེད་ཀྱང་ལྷ་རྣམས་རྩེ་ཞིང་ཡོངས་སུ་སྤྱོད་པ་ཕན་ཚུན་མི་མཐོང་ལ་དེ་བཞིན་དུ་གནོད་པ་དང་བྲལ་བ་ཡིན་ནོ། །དེ་ལྟར་ཡང་སྣའི་ཐོར་ཏོ་ལ་གནས་པ། སུམ་ཅུ་རྩ་གསུམ་པའི་ལྷ་དེ་རྣམས་དགའ་བའི་ཚལ་ག་ལ་བ་དེར་འདོང་བར་བྱེད་དེ། དེ་ལྟར་རི་རབ་ཀྱི་སྟེང་དུ་འགྲོ་ཡང་གླང་པོ་ཆེའི་མཆོག་འགྱུར་བར་ལྷ་རྣམས་ཀྱིས་མི་རིག་གོ །དེ་ནས་ཡང་གླང་པོ་ཆེའི་མཆོག་གི་སྣ་ལ་རི་ཆེན་པོ་འབྱུང་ཁུངས་ཀྱིས་བརྒྱན་པ་ཞེས་བྱ་བ་སྤྲུལ་ཏེ། རི་དེ་ཉིད་ལ་འབྱུང་ཁུངས་སྣ་ཚོགས་ཀྱིས་བརྒྱན་ཅིང་། ལྷའི་ཤིང་ལྗོན་པས་ཉེ་བར་མཛེས་པར་བྱས་པ། འབབ་ཆུ་དང་། ལྟེང་ཀ་དང་། ཉེ་བའི་ཚལ་དང་།
མཚོ་དང་། པད་མའི་རྫིང་གིས་བརྒྱན་པར་ལྷ་གཞན་དག་ཀྱང་རྩེ་བར་བྱེད། དགའ་བར་བྱེད། དགོད་པར་བྱེད་དེ། གླང་པོ་ཆེའི་མཆོག་མེ་ཏོག་གིས་བཀྲ་བ་དེའི་མགོ་ལ་ཡང་རི་སྤྲུལ་ཏོ། །དེ་ནས་ཡང་གླང་པོ་ཆེ་མཆོག་གི་སོའི་ཐོར་ཏོ་ཟླ་བ་ཚེས་པ་ལྟ་བུ་ལ་ཉེ་བའི་ཚལ་དག་སྤྲུལ་ཏེ། མེ་ཏོག་དང་མཚོས་ས་གཞི་རྟག་ཏུ་གང་བའི་ཐང་ལྟ་བུར་བཀྲ་བར་བྱས་ཤིང་འདབ་མས་ཀྱང་ཉེ་བར་མཛེས་པར་བྱས། བུང་བ་ལང་ལོང་འཁྲིགས་པ་དང་། ཁུ་བྱུག་གི་སྒྲ་དི་རི་རི་འབྱིན་པ་དང་། སྐམ་ལ་རྒྱུ་བ་རིན་པོ་ཆེ་སྣ་བདུན་གྱི་རྨ་བྱ་དང་ཤང་ཤང་ཏེའུ་ཤིན་ཏུ་ཡིད་དུ་འོང་བ་དུ་མ་དང་། གཞན་ཡང་ལྷའི་བྱ་རྣམས་ཀྱིས་སོ་ལ་སྤྲུལ་པ་ཉེ་བར་མཛེས་པར་བྱས་སོ། །གླང་པོ་ཆེའི་མཆོག་ལུས་ཆེན་པོར་གྱུར་ནས་དགའ་བའི་ཚལ་ག་ལ་བ་དེར་འགྲོ་བར་བྱེད་དེ། ལྷའི་ཚོགས་ཀྱིས་ཡོངས་སུ་བསྐོར་ཅིང་ངལ་བ་མེད་ལ་སྟོབས་དང་ལྡན་པ་འགྲོས་མཛེས་པས་རབ་ཏུ་འགྲོའོ། །དེ་ནས་ཡང་གླང་པོ་ཆེའི་མཆོག་དེའི་སྣ་གཉིས་ཀྱི་ནང་ནས་སྣ་ཆུའི་རྒྱུན་འཛག་སྟེ། འདི་ལྟ་སྟེ། འཛམ་བུའི་གླིང་ན་མཚོ་གང་གཱ་དང་ཡ་མུ་ནའི་ཆུ་འབབ་པ། ཤིན་ཏུ་དང་ཞིང་རྙོག་པ་མེད་པ་བསིལ་བ་རབ་ཏུ་འབབ་པ་བཞིན་ནོ། །དེ་བཞིན་དུ་ཅུང་ཟད་དཔེར་བྱ་ན་ཇི་ལྟར་མིའི་གནས་བཞི་དག་ན་སྨན་དང་། རྩྭ་དང་། ནགས་ཁྲོད་དང་། ནས་དང་། གྲོ་ཚ་བས་གདུངས་ཤིང་སྐམས་པ་རྣམས་དེ་ནས་ཡང་སོས་པར་བྱ་བའི་ཕྱིར། འབྲུ་དང་ལོ་མ་རྣམས་ཀྱི་སྟེང་ན་ཆུ་འབབ་པ་མངོན་པ་དེ་ལྟར་གླང་པོ་ཆེའི་རྒྱལ་པོ་དེའི་རབ་ཏུ་དབྱེ་བ་ཡང་རྟག་ཏུ་དེ་ལྟ་བུ་ཡིན་ནོ། །གལ་ཏེ་ཆུ་འབབ་པ་དེ་རླུང་གིས་ནམ་མཁའ་ལ་འཐོར་བར་བྱེད་ཅིང་། རླུང་གིས་རྒྱང་རིང་དུ་སྐམས་པར་བྱེད་པ་དེ་ནི་ཟིལ་པ་འདི་ཡིན་ཏེ་མིའི་གནས་གསུམ་ན་སྣང་ངོ་། །དེ་ནས་ཡང་གླང་པོ་ཆེའི་རྒྱལ་པོའི་མཆོག་དེའི་སྣ་སྒྲ་འབུད་པས་འབྱུང་བ་དེ་ནི་ནམ་མཁའི་དབུས་ན་ལྷ་རྒྱུ་བ་རྣམས་ཀྱི་ནང་དུ་འབབ་པ། འོད་དཀར་པོར་རྒྱུ་བ་མངོན་པ་འདི་ཡིན་ཏེ། གང་མུ་སྟེགས་པ་གཞན་དག་ན་རེ་འདི་ལྟར་འདི་ནི་དབང་པོའི་ལམ་མོ་ཞེས་རྗོད་དོ། །ཡང་གཞན་དག་ན་རེ་འདི་ལྟར་འདི་ནི་གླང་པོ་ཆེ་ས་སྲུང་གི་བུའི་ལམ་ཡིན་ནོ་ཞེས་བརྗོད་ཀྱང་དེ་ལྟར་ཆུ་དཀར་པོའི་ངོ་བོ་ཉིད་དེ་མི་ཤེས་སོ།། །།
འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་གསུམ་པ། དེ་དག་རླུང་གིས་གཏོར་བ་དང་འཕྲལ་ལ་འབབ་ཅིང་དེ་ཉིད་རི་དགས་སྐོམ་པ་ལྟ་བུར་མཐོང་ལ། ངོ་བོ་གཞན་དུ་འགྱུར་ཏེ་ངོ་བོ་དག་ནི་མི་གསལ་བའི་ངོ་བོར་སྣང་ངོ་། །དེ་ནས་ཡང་གླང་པོ་ཆེའི་རྒྱལ་པོའི་མཆོག་དེའི་སྤྱི་བོ་ལ་རི་ཡོད་པ་གང་ཡིན་པ་དེའི་སྤྱི་བོ་ཐམས་ཅད་ལ་རྒྱལ་མཚན་གྱི་མཆོག་བཻ་ཌཱུརྱའི་གདུབ་ཀོར་དང་། གསེར་གྱི་གདུགས་སྤྲུལ་ཏེ། ཇི་ལྟར་ཉི་མ་གཉིས་པ་ལྟ་བུར་དེ་དེ་ལྟར་རྣམ་པར་མཛེས་སོ། །གླང་པོ་ཆེའི་མཆོག་དེའི་སྟེང་ན་བ་དན་ཡང་སྤྲུལ་ཏེ་རིང་ཁྱད་དཔག་ཚད་ཙམ་མོ། །བ་དན་དེ་ཀུན་ནས་འོད་དཀར་པོ་འབྱུང་སྟེ། གང་མཐོང་ནས་ལྷ་མ་ཡིན་རྒྱ་མཚོ་ན་གནས་པ་རྣམས་ཕན་ཚུན་དུ་འདི་ལྟར་འདི་ནི་ལྷ་རྣམས་འོངས་པ་ཡིན་ཏེ། ལྷའི་རྒྱལ་པོ་བརྒྱ་བྱིན་གྱི་བ་དན་རྒྱལ་བྱེད་ཅེས་བྱ་བ་སྣང་ངོ་ཞེས་ཟེར་རོ། །དེ་ནས་གླང་པོ་ཆེའི་རྒྱལ་པོའི་མཆོག་དེ་དགའ་བའི་ཚལ་ག་ལ་བ་དེར་འགྲོ་བར་བྱེད་དོ། །ཚལ་དེ་རྒྱང་རིང་པོ་ཉིད་ནས་མཐོང་ནས་ལྷ་རྣམས་ལ་སྨྲས་པ། ཁྱེད་ཅག་ཐམས་ཅད་དུ་ཉམས་དགའ་བ་ཆེན་པོ་དེ་ཉིད་ལ་ལྟོས། ཚལ་ཆེན་པོ་ཀུན་ནས་མཐོང་ན་དགའ་བ་གང་དུ་ལྷ་འདི་དག་ལྷ་མ་ཡིན་ལས་རྒྱལ་བ་ཐོབ་པ། སུམ་ཅུ་རྩ་གསུམ་པའི་ལྷ་རྣམས་དང་ལྷན་ཅིག་ཏུ་ཟླ་བ་བཞིར་དགའ་བར་གྱིས་ཤིག །དེ་ནས་ལྷ་དག་གིས་ཚིག་དེ་ཐོས་ནས་ལྷ་དེ་དག་གིས་སྨྲས་པ། ཇི་ལྟར་བདག་ཅག་ལ་བརྒྱ་བྱིན་གྱིས་བཀའ་སྩལ་པ་དེ་ལྟར་བདག་ཅག་རྣམས་ཀྱིས་བསྒྲུབ་པར་བགྱིའོ། །དེ་སྐད་ཅེས་སྨྲས་ནས་བརྒྱ་བྱིན་གྱི་གླང་པོ་ཆེ་ས་སྲུང་གི་བུ་དགའ་བའི་ཚལ་དུ་ཉེ་བར་ཕྱིན་ནོ། །དེ་ནས་གང་ལྷ་གཞན་དགའ་བའི་ཚལ་དེ་ན་རྩེད་མོ་བྱེད་པ་དེ་དག་དགའ་བར་བྱེད་ཅིང་ཡོངས་སུ་སྤྱོད་པར་བྱེད་ལ། ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་དེ་དག་ཐམས་ཅད་རྒྱལ་མཚན་གྱི་མཆོག་དང་གླང་པོ་ཆེའི་རྒྱལ་པོ་ས་སྲུང་གི་བུ་ཉེ་བར་མཐོང་ནས། དགའ་བའི་ཚལ་གྱི་རི་ལ་རྩེ་ཞིང་གནས་པའི་ལྷ་རྣམས་ཡིད་རབ་ཏུ་དགའ་ཞིང་། ལྷའི་རྒྱལ་པོ་བརྒྱ་བྱིན་ག་ལ་བ་དེར་དོང་སྟེ་ཕྱིན་ནས་ལྷའི་རྒྱལ་པོ་ལ་མགོར་ཐལ་མོ་སྦྱར་ཏེ་མཆོད་ནས།
བརྒྱ་བྱིན་གྱི་མདུན་དུ་སིལ་སྙན་དང་སྒྲ་དབྱངས་དང་རོལ་མོ་སྣ་ཚོགས་ཀྱི་དགའ་བ་དང་བརྒྱ་བྱིན་གྱི་མདུན་ན་བྲོ་གར་དག་བྱེད་བཞིན་དུ་དགའ་བའི་ཚལ་ཆེན་པོ་དེ་ག་ལ་བ་དེར་འདོང་བར་བྱེད་དོ། །ལྷའི་རྒྱལ་པོ་བརྒྱ་བྱིན་ཡང་གླང་པོ་ཆེ་ས་སྲུང་གི་བུ་ལས་བབས་ནས། ལྷའི་ཚོགས་དང་ལྷན་ཅིག་ཏུ་དགའ་བའི་ཚལ་ག་ལ་བ་དེར་འཇུག་གོ །སྟེང་དུ་ཞོན་པའི་ལྷ་ཀུན་དང་དེ་བཞིན་དུ་མགོ་ལ་ཞོན་པ་དང་དེ་བཞིན་དུ་སོ་ལ་ཞོན་པ་དང་དེ་བཞིན་དུ་རྩིབ་ལོགས་ལ་ཞོན་པ་དེ་དག་ཐམས་ཅད་གླང་པོ་ཆེ་ས་སྲུང་གི་བུ་ལས་བབས་ནས། དགའ་བའི་ཚལ་ག་ལ་བ་དེར་རྩེ་བ་དང་དགའ་བ་དང་བདེ་བར་གནས་པར་བྱ་བའི་ཕྱིར་དོང་ངོ་། །དེ་ནས་གང་དགའ་བའི་ཚལ་ཆེན་པོ་ན་སྔ་ན་འཁོད་པའི་ལྷ་དེ་དག་དང་གང་བརྒྱ་བྱིན་དང་ལྷན་ཅིག་ལྷ་མ་ཡིན་གྱི་གཡུལ་ལས་རྣམ་པར་རྒྱལ་བ་ཐོབ་པ་དེ་དག་ཐམས་ཅད་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས། དབྱར་ཟླ་བ་བཞིར་བདེ་བ་དཔེ་མེད་པ་དེ་རྗེས་སུ་མྱོང་ངོ་། །ལྷའི་རྒྱལ་པོ་བརྒྱ་བྱིན་ཡང་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར། དེ་དག་ཀྱང་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་ནས། དགའ་བར་བྱེད་དགའ་དགུར་སྤྱོད་པར་བྱེད་དོ། །བདེ་བ་དཔེ་མེད་པ་དེ་རྗེས་སུ་མྱོང་བ་ན། སྐབས་དེར་ཇི་སྲིད་དུ་ལས་བྱས་ཤིང་བསགས་པ་དེ་ཟད་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད་དོ། །ལས་དང་ཚེ་ཟད་པའི་ལྷ་གང་ཡིན་པ་དེ་དག་ཕྱིས་ལྷའི་འཇིག་རྟེན་དགའ་བའི་ཚལ་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། ལས་དེ་དང་རྒྱུ་འཐུན་པར་རྟག་ཏུ་བདེ་བར་འགྱུར་ཞིང་། སྒྱུ་རྩལ་གྱི་བློ་དྲི་མ་མེད་པ་དང་གཟུགས་མཆོག་ཏུ་མཛེས་པ་དང་སྐྱེ་བོ་ཐམས་ཅད་ཀྱི་ཡིད་དུ་ཤིན་ཏུ་འཐད་པ་དང་ཚལ་དང་འབབ་ཆུ་དང་རི་དང་ལྟེང་ཀ་དང་ཉེ་བའི་ཚལ་ཡོད་པ་དགའ་བ་རྣམས་ཀྱི་ནང་དུ་སྐྱེ་བར་འགྱུར་ལ། དེར་ཡང་སྐྱེ་བོ་མང་པོ་དགའ་བ་དང་དབང་ཆེ་བ་དང་ཤིན་ཏུ་འབྱོར་བ་དང་བདེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། གླང་པོ་
ཆེའི་རྒྱལ་པོ་ཆེན་པོ་ས་སྲུང་གི་བུའི་ལས་དང་འབྲས་བུ་རྣམ་པར་སྨིན་པ་ལ་རྟོག་པར་བྱེད་དེ། འདི་ལྟར་དེ་ལས་ཀྱི་རྣམ་པ་གང་གིས་རྫུ་འཕྲུལ་ཆེ་བ་དང་མཐུ་ཆེ་བར་གྱུར་ནས། ལྷ་ཆེན་པོ་ལྷ་མ་ཡིན་གྱི་གཡུལ་ལས་རྣམ་པར་རྒྱལ་བ་ཐོབ་ཅིང་ལས་གང་དང་རྣམ་པ་ཇི་ལྟ་བུ་ཞིག་གིས་དུད་འགྲོར་སྐྱེས་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་འདི་ནི་སྔོན་སེམས་ཅན་ཚེ་ལོ་བདུན་ཁྲི་ཐུབ་པ་ན་བྲམ་ཟེ་ཆེན་པོ་རིག་བྱེད་དང་རིག་བྱེད་ཀྱི་ཡན་ལག་དང་སྔོན་བྱུང་བ་དང་སྔོན་གྱི་རབས་ཤེས་པ་ཞིག་བྱུང་སྟེ། དེས་སྦྱིན་པ་བྱིན་བསོད་ནམས་བྱས་དམན་པ་དང་མགོན་མེད་པ་དང་ལོང་བ་དང་སྡུག་བསྔལ་བ་རྣམས་ལ་རྟག་རེས་འཁོར་ཡང་བྱས། སེམས་ཤིན་ཏུ་དགེ་ཞིང་འཇིག་རྟེན་ཀུན་ལ་ཕན་པར་བྱེད་པ་ཡིན་ནོ། །དེའི་ཚེ་རྒྱལ་པོ་ལེགས་མཐོང་ཞེས་བྱ་བ་དེའི་དགའ་སྤྱོད་ཆེན་པོ་ཤིན་ཏུ་ཉམས་དགའ་བ་ཇི་ལྟར་ལྷ་རྣམས་དང་ཇི་ལྟར་དེ་བཞིན་གཤེགས་པའི་ལྟ་བུ་བྱེད་དེ། གླང་པོ་ཆེ་བརྒྱད་ཁྲི་བཞི་སྟོང་གསེར་གྱི་དྲ་བས་གཡོགས་ཤིང་དྲིལ་བུ་གཡེར་ཀའི་དྲ་བ་བཏགས་པ། ཀུན་ནས་གསེར་གྱི་དྲ་བས་བརྒྱན་པ་དང་རྟ་བརྒྱད་ཁྲི་བཞི་སྟོང་ཀུན་ནས་གསེར་གྱི་དྲིལ་བུ་གཡེར་ཀའི་སྒྲ་འབྱུང་བས་བརྒྱན་པ་དང་། དེ་བཞིན་དུ་བུད་མེད་བརྒྱད་ཁྲི་བཞི་སྟོང་གིས་ཡོངས་སུ་བསྐོར་ཅིང་རྗེས་སུ་འབྲང་བ་དང་། དེ་བཞིན་དུ་སིལ་སྙན་བརྒྱད་ཁྲི་བཞི་སྟོང་དག་གིས་ཡོངས་སུ་བསྐོར་ཏེ། ཉེ་བའི་ཚལ་གྱི་ཕྲེང་བ་ཞེས་བྱ་བ་གཞལ་མེད་ཁང་ག་ལ་བ་དེར་དོང་བར་བྱེད་དོ། །རྒྱལ་པོ་ལེགས་མཐོང་གི་མཆོག་ཏུ་བདེ་བ་ཤིན་ཏུ་རྒྱ་ཆེ་བའི་འབྱོར་པ་དེ་དག་ལ་བྲམ་ཟེ་དེས་ཀུན་ནས་མངོན་པར་བརྟགས་ནས། བྲམ་ཟེའི་འབྱོར་པ་ཤིན་ཏུ་ཕུན་སུམ་ཚོགས་པས་ཀྱང་རྒྱལ་པོ་ཆེན་པོ་དེའི་དགའ་སྤྱོད་བྱེད་པ་ག་ལ་བ་དེར་སོང་ངོ་། །བྲམ་ཟེ་དེའི་མིང་ནི་སྐྱེ་བོ་ཀུན་སྙོམས་ཞེས་བྱའོ། །དེ་ནས་བྲམ་ཟེ་སྐྱེ་བོ་ཀུན་སྙོམས་རྒྱལ་པོ་དེ་དང་དེའི་འབྱོར་པ་དང་ལྡན་པ་དང་། རྒྱལ་པོ་དེའི་རྟག་ཏུ་བཞོན་པ་གླང་པོ་ཆེ་སྤྲིན་བརྩེགས་ཞེས་བྱ་བ་ཡོད་དེ། དེའི་ལུས་དེ་ཀུན་ནས་དྲིལ་བུ་གཡེར་ཀའི་དྲ་བས་བརྒྱན་པ་མུ་ཏིག་གི་ཕྲེང་བ་རྣམས་བཏགས་པ། ཀུན་ནས་བཟོ་མཁས་པས་རྒྱན་བྱས་པ། རྣམ་པ་སྣ་ཚོགས་ཀྱིས་ཉེ་བར་མཛེས་པར་བྱས་
པ། སིལ་སྙན་གྱི་སྒྲ་རྣམ་པ་སྣ་ཚོགས་ཉེ་བར་འབྱིན་པ་ན། སྐྱེད་མོས་ཚལ་དུ་འགྲོ་བའི་གླང་པོ་ཆེ་ཤིན་ཏུ་རྒྱ་ཆེ་བ་མཆོག་ཏུ་བལྟ་ན་སྡུག་པ། རབ་ཏུ་བདེ་བ་མཐོང་བ་དང་བྲམ་ཟེ་སྐྱེ་བོ་ཀུན་སྙོམས་དེ། ཀྱེ་ཨེ་མ་གླང་པོ་ཆེ་འདི་ནི་མཆོག་ཏུ་བདེ་བ་དང་ལྡན་པ་ཡིན་ཏེ། ལྷ་དེ་བཞིན་དུ་བདག་ཀྱང་ད་ནི་ལྷའི་རྒྱལ་པོ་བརྒྱ་བྱིན་གྱི་རྟག་ཏུ་བཞོན་པའི་གླང་པོ་ཆེའི་རྒྱལ་པོར་གྱུར་ཅིག་སྙམ་དུ་སེམས་སྐྱེས་སོ། །དེ་སྦྱིན་པ་དེའི་མཐུ་དང་དེའི་ལས་ཀྱི་མཐུས་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷའི་རིས་སུ་ལྷའི་རྒྱལ་པོ་བརྒྱ་བྱིན་གྱི་རྟག་ཏུ་བཞོན་པ་གླང་པོ་ཆེའི་རྒྱལ་པོར་སྐྱེས་སོ། །དེ་ནས་དེའི་ཚེ་དགེ་སློང་དེས་འདི་ལྟར་ཚིགས་སུ་བཅད་དེ་སྨྲས་པ། ལས་འདི་རི་མོ་མཁན་ལྟ་བུ། །གང་དང་གང་དུ་འདྲི་བྱེད་པ། །སེམས་ཀྱི་དབང་ཕྱུག་ཆེན་པོ་ཡིས། །དེ་དང་དེར་ནི་འདི་འདྲི་བྱེད། །ཡོངས་སུ་འགྱུར་བའི་བྱེ་བྲག་གིས། གང་དང་གང་དུ་སྦྱོར་བྱེད་པ། །ཁམས་གསུམ་འཁོར་བར་རྒྱུ་བ་རྣམས། །དེ་དང་དེར་ནི་སེམས་ཀྱིས་གཏོང་། །ལུས་ཅན་རྣམས་ཀྱི་ལས་ཀུན་ནི། །སེམས་ལ་རག་ལས་འཇུག་པར་འགྱུར། །དེ་ལྟར་རྟག་ཏུ་སེམས་དུལ་བ། །འཆི་མེད་གནས་སུ་ཁྲིད་པར་འགྱུར། །བསྙེན་པར་དཀའ་ཞིང་ཡང་བ་དང་། །གང་ཡང་རུང་བར་ལྟུང་བ་ཡི། །སེམས་ནི་དུལ་ན་ལེགས་པ་ཡིན། །སེམས་དུལ་བདེ་བ་ཐོབ་པར་འགྱུར། །གང་གིས་རྟག་ཏུ་སེམས་དུལ་བ། །དེ་ཡིས་རྟག་ཏུ་ཉེས་པ་བཅོམ། །ཉེས་པ་བཅོམ་པའི་བརྟན་པོ་ལ། །སྡུག་བསྔལ་ཉིད་ཀྱིས་གནོད་མི་འགྱུར། །གང་ཞིག་འདིར་ནི་སྡུག་བསྔལ་ཞིང་། །གང་ཞིག་གཞན་དུ་སྡུག་བསྔལ་བ། །དེ་དག་ཐམས་ཅད་མི་བཟད་པའི། །སེམས་འདི་ཡང་ཞིང་གཡོས་པ་ཡིས། །ལྷ་དང་ལྷ་མིན་ཤ་ཟ་ཀླུ། །ལྟོ་འཕྱེ་སྲིན་པོར་བཅས་པ་ཡི། །གཙོ་བོ་མཆོག་གཅིག་སེམས་ཡིན་ཏེ། །དེ་ནི་སྲིད་གསུམ་རྒྱལ་པོ་བཞིན། །སེམས་ནི་ལྷ་ཡི་ཡུལ་རྣམས་དང་། །སེམས་ནི་མི་ཡུལ་རྣམས་སུ་ཁྲིད། །སེམས་ནི་ངན་འགྲོ་རྣམས་སུ་ཁྲིད། །སེམས་ཀྱིས་སྐྱེ་དགུ་འཁྱམ་པར་བྱེད། །ཕན་པ་མེད་པའི་ཡུལ་རྣམས་ཀྱིས། །འཁྲུལ་ཞིང་ཉམས་པར་གྱུར་པའི་སེམས། །
སྲེད་པ་ཡིས་ནི་བདས་པ་ན། །སྡུག་བསྔལ་མཐའ་མེད་པ་ལ་གནས། །སྤྱོད་པ་གཅིག་ལ་རྟག་ཏུ་སྦས། །བསྙེན་པར་དཀའ་ལ་སྟོབས་པོ་ཆེ། །ཉམས་པར་བྱེད་ལ་མི་མངོན་པ། །དེ་ནི་མི་བརྟན་མྱུར་དུ་འགྲོ། །དེ་འདྲའི་སེམས་ནི་གང་ཡིན་པ། །མཁས་པ་རྣམས་ནི་འདུལ་བར་བྱེད། །དེ་དག་བདུད་ཀྱིས་བཅིངས་ལས་འདས། །ཕ་རོལ་བདེ་བ་འབྱུང་བ་ཐོབ། །རྣམ་རྟོག་མི་བཟད་གཡོན་ཅན་ཏེ། །དེ་ནི་གཏིང་དཔག་དཀའ་ཞིང་གཡོ། །དེ་ལྟ་བུ་ལ་རྟེན་པའི་སེམས། །དམྱལ་བའི་གཡང་སར་ཉེ་བར་ལྟུང་། །ཉེས་པ་དེ་དག་ལས་གྲོལ་ཞིང་། །དབང་པོ་དོན་གྱི་དབང་མི་འགྲོ། །སྡིག་པའི་ཆོས་ཀྱིས་མ་གོས་པ། །འཆི་མེད་གནས་སུ་ཁྲིད་པར་འགྱུར། །སེམས་ནི་རྒྱུ་དང་རྐྱེན་ལས་སྐྱེས། །དེ་ནི་རྣལ་འབྱོར་མཆོག་ལ་འཇུག །མྱུར་དུ་གྱུར་པའི་དབང་གིས་སུ། །དེ་བཞིན་དེ་ནི་ཤིན་ཏུ་འཇུག །དེ་ལྟར་ལས་ནི་བྱེད་པ་ཡིས། །འབྲས་བུ་དེ་ནི་སྣ་ཚོགས་འབྱུང་། །གཅིག་ཏུ་ཕྲ་མོ་གཅིག་སྤྱད་པ། །སྐད་ཅིག་གཉིས་པར་མི་འདུག་སྟེ། །དེ་ཡི་ལུས་དང་འགྲོ་བ་ནི། །འཇིག་རྟེན་མཐའ་ནི་གང་དུ་ཁྲིད། །ལམ་ནི་གང་ནས་འགྲོ་འགྱུར་བ། །ཐམས་ཅད་དུ་ནི་ཤེས་པར་དཀའ། །གང་དུ་ལུས་ནི་འགྲོ་བ་དང་། །འདུག་པ་དང་ནི་ལས་བྱེད་པ། །དེ་ཡི་ལས་ནི་མཐོང་འགྱུར་ན། །རྣལ་འབྱོར་དེ་ནི་མི་མཐོང་ངོ་། །དེ་ནི་གདུལ་བར་དཀའ་བ་སྟེ། །དེ་ཡི་ལུས་ཀྱང་མི་རིག་གོ །སེམས་ཅན་ཀུན་གྱི་རྟོག་མི་བཟད། །ཡང་བར་སྤྱོད་ལ་མིག་ཀྱང་མེད། །སྡིག་དང་སྡིག་མི་བྱེད་པ་མཐོང་། །དེ་ནི་སྒྱུ་མ་ལྟ་བུ་ཡིན། །དེ་ཡི་རྟོག་པ་མི་རིག་ཅིང་། །འགྲོ་བ་མེད་པ་མི་མཐོང་ངོ་། །ཚེ་རབས་དག་ནི་བརྒྱ་སྙེད་དུ། །སྐྱེ་བོ་ཐམས་ཅད་ཁྲིད་བྱེད་པ། །འདི་ནི་མཚོན་གྱིས་མི་ཆོད་ཅིང་། །མེ་ཡིས་སྲེག་པར་མི་བྱེད་དོ། །སྐྱེ་བོ་མིག་མེད་ཐམས་ཅད་ནི། །གཅོད་པར་བྱེད་ཅིང་སྲེག་པར་བྱེད། །ལས་ཀྱི་ཐག་པ་དམ་པོ་ཡིས། །སྐྱེ་བོ་བཅིངས་པ་སྡུག་བསྔལ་ཆེ། །ཚེ་རབས་དག་ནི་སྟོང་སྙེད་དུ། །ཁྲིད་པར་བྱེད་ཀྱང་མི་མཐོང་ངོ་། །སྐད་ཅིག་ཏུ་ནི་དགེ་བྱེད་ཅིང་། །སྐད་ཅིག་ཏུ་ནི་མི་དགེ་བྱེད། །དགེ་དང་མི་དགེ་བྱེད་པ་ཡི། །སེམས་དུལ་བ་ནི་བདེ་བར་འགྱུར། །སྒོ་དྲུག་ནས་ནི་བྱུང་བ་ཡིས། །ཡུལ་རྣམས་ལ་ནི་རབ་ཏུ་
བརྐམ། །འཇིག་རྟེན་མཐར་ནི་སེམས་ཁྲིད་པ། །ཉོན་མོངས་པ་ཡང་མི་རིག་གོ །དེ་ལྟར་དགེ་སློང་དེས་ལེགས་པར་བྱས་པ་ཆེན་པོ་དེ་ཆུང་ངུར་བསྒྱུར་བ་མཐོང་ནས། ཡིད་ལ་ལེགས་པར་བྱས་ཞེས་བྱ་བའི་ལས་གང་གིས་ཕལ་ལམ་ལྷ་གཞན་དུ་འགྱུར་བ་ཞིག་ན། འདི་ལྟར་དེ་སེམས་གཙོ་བོའི་དབང་དང་། སེམས་ཡོངས་སུ་འགྱུར་བའི་དབང་གིས་དུད་འགྲོར་གྲུབ་པ་ལྟ་ཞེས་བརྗོད་དོ། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ས་རྣམ་མཛེས་ན་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། གང་བདག་ཉིད་ཚུལ་ཁྲིམས་བསྲུངས་ཤིང་། གཞན་ཡང་བསྲུང་དུ་བཅུག །བདག་ཉིད་སྡིག་པ་མི་བྱེད་ཅིང་། གཞན་ཡང་ཟློག་པར་བྱེད། སྐྱོན་དུ་འགྲང་བར་བྱེད་ལ། ཚུལ་ཁྲིམས་ལ་ཡང་རབ་ཏུ་བཀོད། དེ་བདག་ཉིད་ཀྱང་ཚུལ་ཁྲིམས་དྲི་མ་མེད་པ་བརྟན་པ་དང་། ཉེར་བསྡོགས་ཡོངས་སུ་དག་པ་སྲུང་བར་བྱེད་པ་དང་། སྲོག་གཅོད་པ་དང་། མ་བྱིན་པར་ལེན་པ་སྤངས་པ་ཡིན་ཏེ། སྲོག་གཅོད་པ་རྣམ་པ་དུ་སྤངས་ཞེ་ན། འདིར་སྡོམ་པས་བསྡམས་པས་སེམས་ཅན་མང་པོ་དང་། གྲོག་སྦུར་མང་པོ་དང་། སྡིག་པ་མང་པོ་དང་། སྦལ་པ་མང་པོ་དང་། སྲོག་ཆགས་གནས་ན་གནས་པ་མང་པོ་དང་། ནེའུ་ལེ་མང་པོ་གནས་པའི་ས་བརྐོས་པ་གང་གིས། སེམས་ཅན་གནོད་པར་འགྱུར་བ་རྐོ་བར་མི་བྱེད་ལ། གཞན་སྡོམ་པ་བླངས་པའམ། སྡོམ་པ་མ་བླངས་པ་ཡང་ཕྱིར་ཟློག་པར་བྱེད་སྐྱོན་དུ་འགྲང་བར་བྱེད་འགོག་པར་བྱེད། འཆགས་སུ་འཇུག་པར་བྱེད་པའོ། །མ་བྱིན་པར་ལེན་པ་སྤངས་པའི་ཚུལ་ཁྲིམས་ཇི་ལྟར་འཛིན་ཅེ་ན། འདི་ལ་རྫ་མཁན་ནམ་གཞན་གྱིས་ཡོངས་སུ་བཟུང་བ་ལ་རྐུ་སེམས་ཀྱིས་ཅུང་ཟད་ཙམ་ཡང་མི་ལེན་ལ། གཞན་ལེན་ན་ཡང་ཕྱིར་ཟློག་པར་བྱེད་ཅིང་། ཚུལ་ཁྲིམས་ལ་རབ་ཏུ་འཇོག་པར་བྱེད་ལ་རྗེས་སུ་ཡི་རང་བར་མི་བྱེད་པ་ཡིན་ཏེ། དེ་ལྟར་སྲོག་གཅོད་པ་དང་། མ་བྱིན་པར་ལེན་པ་རྣམ་པར་སྤངས་པའི་སྐྱེས་བུ་དམ་པ་ཚུལ་ཁྲིམས་སྤྱོད་པ་དེ། ལུས་དང་བྲལ་ནས་བདེ་འགྲོ་མཐོ་རིས་ཀྱི་
འཇིག་རྟེན་རྣམ་པར་མཛེས་ན་གནས་པའི་གནས་སུ་སྐྱེ་བར་འགྱུར་རོ། །རྟག་ཏུ་དགའ་ཞིང་གླུ་དབྱངས་དང་། བགད་པ་དང་། རྩེས་པ་དང་། རབ་ཏུ་རྩེས་པ་དང་། དགའ་དགུར་སྤྱོད་པ་སྐྱེ་བོ་རང་གི་འོད་དང་ལྡན་པས་རྟག་ཏུ་གང་བའི་ཚལ་དང་ཉེ་བའི་ཚལ་དང་སྐྱེད་མོས་ཚལ་གྱི་གནས་རྣམས་སུ་སྐྱེ་བར་འགྱུར་ཏེ། ཚུལ་ཁྲིམས་བཟང་པོ་བསྲུང་བ་མཐོ་རིས་ཀྱི་གནས་སུ་སྐྱེ་བར་འགྱུར་རོ། །ལས་བྱ་བ་ལེགས་པར་བྱས་པ་དེའི་ཡུལ་ཤིན་ཏུ་ཉམས་དགའ་ཞིང་ལོངས་སྤྱོད་དང་ལྡན་པའི་འབྱོར་པའི་འདི་ཡིན་ཏེ་འདི་ལྟ་སྟེ། ཚལ་དེ་ཀུན་ནས་གསེར་གྱི་དྲ་བའི་སྐུད་པས་ཉེ་བར་སྦྲེལ་ཞིང་དྲིལ་བུ་གཡེར་ཀའི་སྒྲ་སི་ལི་ལི་འབྱུང་ངོ་། །དེ་ལ་དྲིལ་བུ་གཡེར་ཀའི་རྣམ་པ་ནི་འདི་དག་ཡིན་ཏེ་འདི་ལྟ་སྟེ། གང་ལས་ཀྱིས་བྱས་པའི་བཻ་ཌཱུརྱའི་དྲིལ་བུ་གཡེར་ཀ་རྒྱང་རིང་པོ་ཉིད་ནས་མཐོང་ནས། འདི་ལྟར་ལས་བྱ་བ་ལེགས་པར་བྱས་པ་ཞི་བ་ཁྱོད་བྱོན་པ་ལྟ་ཞེས་སྨྲ་ཞིང་། འདི་ལྟར་ཚིགས་སུ་བཅད་དེ་སྨྲས་པ། ཡིད་ནི་ཤིན་ཏུ་དང་བ་ཡིས། །ཚུལ་ཁྲིམས་དག་ནི་གང་བསྲུངས་པ། །དེ་ནི་ཚུལ་ཁྲིམས་བསྲུངས་པ་ཡི། །བདེ་བ་འདིར་ནི་ཉེ་བར་གནས། །ཚུལ་ཁྲིམས་ལེགས་པར་བསྲུངས་པ་དང་། །གོམས་པ་དུ་མ་བྱས་པ་ཡི། །ཡོངས་སུ་འགྱུར་བ་བདེ་བ་དང་། །མྱ་ངན་འདས་པའང་རྟོགས་པར་འགྱུར། །ཚུལ་ཁྲིམས་ངན་འགྲོ་རྣམས་ལས་སྐྱོབ། །ཚུལ་ཁྲིམས་བཟང་འགྲོར་ཁྲིད་པར་བྱེད། །དེ་ལྟར་ཚུལ་ཁྲིམས་རྟག་ཏུ་སྲུངས། །ཡོངས་སུ་འགྱུར་བའི་བསིལ་བ་ཡིན། །འཆི་དུས་ཡང་དག་འབྱུང་བའི་ཚེ། །ཚུལ་ལྡན་ག་ལས་འཇིགས་པ་མེད། །ངན་འགྲོ་ལས་སྐྱོབ་བདག་ལས་མེད། །ཚུལ་ཁྲིམས་སྐྱོབ་པ་མཆོག་ཡིན་ནོ། །དེ་ནི་ཁྱོད་དེ་ཚུལ་ཆེན་གྱིས། །ཐམས་ཅད་དུ་ནི་བསྲུངས་པ་ཡིན། །ལྷ་ཡི་གནས་སུ་འོངས་པ་དག །ཤིན་ཏུ་བག་མེད་མ་བྱེད་ཅིག །དེ་ལྟར་ལྷ་དེ་ལེགས་པར་བྱས་པའི་ལས་ཀྱིས་དྲིལ་བུ་གཡེར་ཀའི་སྒྲ་དེས་བག་མེད་པའི་ཉེས་པ་རྣམས་ཁོང་དུ་ཆུད་པར་བྱེད་དོ། །དེ་ནས་གང་ལྷ་ཡུན་རིང་བར་ཚུལ་ཁྲིམས་བསྲུངས་པ་དེ། ལེགས་པར་ཁོང་དུ་ཆུད་ནས། སྐད་ཅིག་ཙམ་དུ་ཡང་ཤིན་ཏུ་བག་མེད་པ་མི་བྱེད་དོ། །གང་གིས་ཚེ་རབས་མང་པོ་ཤིན་ཏུ་གོམས་པ་མེད་པ་དེ་ནི་དེའི་ཚེ། སྒྲ་རྣམ་པར་འབྱིན་
པ་ཡི་ཁོང་དུ་མི་ཆུད་པར་འགྱུར་ལ། དེ་ལྟར་དེ་ཕྱིར་ཞིང་ཤིན་ཏུ་བག་མེད་པར་འགྱུར་བ་ཞིག་ན། དེ་ལྟར་དེ་ཡང་དག་པར་ཁོང་དུ་ཆུད་ནས། དེ་ནས་ཡང་གཞན་དུ་འགྲོ་བར་བྱེད་དེ། ཚལ་དང་ཉེ་བའི་ཚལ་རིན་པོ་ཆེ་སྣ་བདུན་གྱིས་ཉེ་བར་མཛེས་པར་བྱས་པའི་གནས་རྣམས་ག་ལ་བ་དེར་འགྲོ་བར་བྱེད་དོ། །རྣམ་མཛེས་ཀྱི་ཚལ་དེ་ཡང་ཀུན་ནས་དཔག་ཚད་སུམ་སྟོང་ཡོད་པ་ས་བཞི་པོ་འདི་དག་སྟེ་ཚལ་ཆེན་པོའི་ས་གཞི་དང་གྲོང་ཁྱེར་ཆེན་པོ་བལྟ་ན་སྡུག་པ་ཞེས་བྱ་བ་ཐམས་ཅད་ཆེ་བ་ཡིན་ལ། ས་ལྷག་མ་གཞན་དག་ནི་ཆུང་བ་ཡིན་ནོ། །ཚལ་དེ་ཡང་ཀུན་ནས་གྲུ་བཞི་པ་ཡིན་ཏེ། ཚལ་དེའི་ངོས་བཞི་ལ་བཻ་ཌཱུརྱ་ཤིན་ཏུ་དྲི་མ་མེད་པའི་དཔག་བསམ་གྱི་ཤིང་ཆེན་པོ་བཞི་ཡོད་དེ་ཤིང་དེ་དག་གི་འོད་རྒྱར་ཀུན་ནས་དཔག་ཚད་ཙམ་ལ། རིང་དུ་ཡང་དཔག་ཚད་ལྔ་སྟོང་དུ་འབྱུང་སྟེ། ཤིང་དེ་དག་གི་འོད་ཉི་མ་བཞིན་དུ་སྣང་ངོ་། །ཤིང་དེ་དག་གི་ཡལ་ག་དང་ལོ་མ་རྣམས་ལ་ལྷ་དང་ལྷ་མོའི་ཚོགས་ལྷན་ཅིག་རྩེ་བར་བྱེད་ཅིང་ཡིད་ལ་གང་དང་གང་འདོད་པ་དེ་དེ་དག་ལས་འཐོབ་བོ། །ཤིང་དེ་དག་གི་དབུས་ན། རྣམ་མཛེས་ཀྱི་ཚལ་དེ་ཀུན་ནས་གསེར་དང་དངུལ་དང་བཻ་ཌཱུརྱའི་པད་མའི་རྫིང་རྣམས་ཀྱིས་ཉེ་བར་མཛེས་པར་བྱས། གསེར་བཙོ་མ་དྲི་མ་མེད་པའི་ཤིང་ལྗོན་པ་རྣམས་ཀྱིས་ཉེ་བར་མཛེས་པར་བྱས། ཀུན་ནས་ཞིང་མ་རྨོས་པ་ཆེན་པོ་ཤིན་ཏུ་དྲི་མ་མེད་ཅིང་ཤིན་ཏུ་གཙང་བ་དང་ཤིན་ཏུ་རོ་ཞིམ་པ་དང་བརྩོན་འགྲུས་ཆེན་པོས་ཉེ་བར་མཛེས་པར་བྱས། བྱ་དཀར་པོ་དྲི་མ་མེད་པ་ལྟ་བུ་མཐོང་ན་ཡིད་དུ་འཐད་པ་ཐོས་ན་ཉམས་དགའ་བ་སྒྲ་འབྱིན་པ་རྣམས་ཀྱིས་ཉེ་བར་མཛེས་པར་བྱས་སོ། །ཚལ་དེ་ན་གང་བྱ་དངུལ་གྱི་སྒྲོ་ཡོད་པ་དེ་དག་གི་མགོ་གསེར་ལ། ལྟོ་བ་བཻ་ཌཱུརྱ། མཆུ་ཀེ་ཀེ་རུ། མིག་པད་མ་རཱ་གའི་མདོག་ལྟ་བུ་ཡིན་ཏེ། དེ་ལྟར་བྱ་ཐམས་ཅད་ཀྱི་ཁ་དོག་རྣམ་པར་དབྱེའོ། །གང་ཤིང་རྣམས་ཀྱི་ཁ་དོག་དངུལ་ལྟ་བུ་དེ་དག་གི་སྟེང་ན་གསེར་གྱི་བྱ་རྣམས་གནས། གང་གསེར་གྱི་ཤིང་ལྗོན་པ་དེ་དག་ལ་དངུལ་གྱི་བྱ་རྣམས་གནས། གང་བཻ་ཌཱུརྱའི་ཤིང་ལྗོན་པ་དེ་དག་གི་ཡལ་གའི་གསབ་གསེབ་ན་བྱ་པད་མ་རཱ་གའི་མདོག་ལྟ་བུ་གནས། གང་ཤིང་ལྗོན་པ་པད་མ་རཱ་གའི་མདོག་ལྟ་བུ་དེ་དག་ལ་བྱ་མཐོན་ཀའི་ཁ་
དོག་ལྟ་བུ་རྒྱུ་སྟེ། འབྲས་བུ་ཐམས་ཅད་ལ་ཟ་ཞིང་སྦྲང་རྩི་དག་ལ་ཡང་འཐུང་ངོ་། །གང་ཀུན་ནས་རིན་པོ་ཆེ་སྣ་བདུན་གྱི་ཤིང་ལྗོན་པ་རྣམས་ལ་རིན་པོ་ཆེ་སྣ་བདུན་གྱི་སྒྲོ་བཀྲ་བའི་བྱ་དེ་དག་ཀྱང་རྩེ་བར་བྱེད། སྐད་འབྱིན་པར་བྱེད་དོ། །དེ་ལྟར་བུང་བའི་ཚོགས་ཀྱང་པད་མ་མང་པོ་རྣམས་ཀྱི་ནང་ན། ལས་སྣ་ཚོགས་བྱས་པ། ལུས་བཀྲ་བ། དུས་ཀྱི་བསམ་པ་སྣ་ཚོགས་ཡོད་པ། པད་མའི་གསེབ་ཏུ་ཞུགས་ཤིང་ཟེ་བའི་གསབ་གསེབ་ན་གནས་པ་རྣམས་དགའ་བར་བྱེད་ཕན་ཚུན་རྩེ་བར་བྱེད། ཡོངས་སུ་སྤྱོད་པར་བྱེད་དོ། །དེ་ལྟར་ཤིང་ལྗོན་པའི་རྣམ་པ་དེ་ལྟ་བུའི་གྲིབ་མ་ཡོན་ཏན་ཀུན་འབྱོར་པའི་སྟེང་ན། ལྷ་རྣམས་ལྷ་མོའི་ཚོགས་དང་ལྷན་ཅིག་ཏུ་དགའ་བར་བྱེད། ཡོངས་སུ་སྤྱོད་པར་བྱེད་དོ། །ཚལ་དེ་ཡང་ལྷ་ཐམས་ཅད་ཀྱི་ཡོན་ཏན་ཀུན་ཤིན་ཏུ་ཕུན་སུམ་ཚོགས་པ་ཡིན་ཏེ། གང་གི་ཚེ་ལྷ་རྣམས་ལྷ་མ་ཡིན་རྣམས་དང་གཡུལ་འགྱེད་པར་འགྱུར་བ་དེའི་ཚེ། ལྷའི་རྒྱལ་པོ་བརྒྱ་བྱིན་ལྷ་རྣམས་ལ་འདི་ལྟར་ལྷ་རྣམས་སྟ་གོན་གྱིས་ཤིག །རི་བོ་ཟླ་བ་ལ་གནས་པའི་ལྷ་མ་ཡིན་འདི་དག་ལྷ་རྣམས་ལ་མངོན་པར་གནོད་པ་བྱེད་ཀྱིས་ཆོས་ཤིག་ཅེས་བསྒོའོ། །དེ་ཐོས་ནས་སུམ་ཅུ་རྩ་གསུམ་པའི་ལྷ་རྣམས་རྣམ་མཛེས་ཀྱི་ཚལ་ག་ལ་བ་དེར་དོང་སྟེ་ཕྱིན་ནས། ལྷའི་ཚོགས་ཐམས་ཅད་དང་བརྒྱ་བྱིན་གྱི་མདུན་དུ་འགྲོ་བ་དག་རྣམ་མཛེས་ཀྱི་ཚུལ་དུ་འཇུག་གོ་དེ་རྣམས་ཞུགས་ནས་ཀྱང་ཕྱོགས་བཞི་དག་གི་ཕྱོགས་བཞི་ག་ལ་བ་དེ་རྣམས་ན། ལྷའི་བཻ་ཌཱུརྱའི་ཤིང་ལྗོན་པ་ཆེན་པོ་ཤིན་ཏུ་དྲི་མ་མེད་པ་བཞི་ཡོད་པ་དེ་དག་གི་སྡོང་པོ་གང་ཡིན་པ་དེ་དག་ལ་མེ་ལོང་བཞིན་དུ་ལྷ་རྣམས་ཀྱི་ལུས་མངོན་ནོ། །དེ་དག་རྣམ་པར་རྒྱལ་བའི་མཚན་མ་མཐོང་བ་དང་ཡང་ལྷ་གང་དག་ལྷ་དང་ལྷ་མ་ཡིན་གྱི་གཡུལ་འགྱེད་པ་ན་ཡན་ལག་དང་འབྲལ་བའམ་ཆད་པར་འགྱུར་བ་རང་གིས་སྤྱོད་པ། གཟུགས་བརྙན་གང་འབྱུང་བ་ཤིང་དེ་རྣམས་ཀྱི་ནང་ན་སྣང་སྟེ། གང་ལྷ་ཡན་ལག་ཆད་པར་འགྱུར་བ་དེ་དག་དེ་ཉིད་དུ་ཡང་ཕྱིར་སྐྱེ་བར་འགྱུར་ལ་གང་དེའི་མགོ་གཅོད་པའམ་རྐེད་པ་གཅོད་པ་ནི་མ་གཏོགས་ཏེ། དེ་ལྟར་ལྷ་དེ་དག་ཕྱིར་སྐྱེ་བར་མི་འགྱུར་རོ། །ཇི་ལྟར་ལྷ་མགོ་གཅོད་པའམ་རྐེད་པ་གཅོད་པར་འགྱུར་བ་དེ་བཞིན་བདག་
ཉིད་ཀྱིས་མཐོང་བར་འགྱུར་ཏེ། དེ་ལ་བདག་ཉིད་དེ་མཐོང་ནས་ལྷ་དེ་དག་ལ་བསྙད་དོ། །ལྷ་དེ་རྣམས་དེ་འཆི་བའི་དུས་ཡོངས་སུ་སྤང་བའི་དོན་དུ་བརྒྱ་བྱིན་ལ་འདི་ལྟར་ལྷ་འདི་དག་ནི་ལྷ་མ་ཡིན་རྣམས་དང་། གཡུལ་འགྱེད་པའི་ཚེ་འགུམ་པར་འགྱུར་རོ་ཞེས་བསྙད་དོ། །དེ་ཐོས་ནས་བརྒྱ་བྱིན་གྱིས། གྲོགས་པོ་ཁྱོད་གཡུལ་འགྱེད་པར་མ་འགྲོ་ཤིག །ཁྱོད་ཀྱི་ཚེའི་བར་ཆད་དུ་མ་གྱུར་ཅིག་ཅེས་ཟློག་པར་བྱེད་དོ། །འབྲས་བུ་དེ་གང་གི་ཡིན་ཞིག་གུ་སྙམ་དུ་དགེ་སློང་དེ་སེམས་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་དང་ཡིད་སྙིང་རྗེ་དང་ལྡན་པར་འགྱུར་བ་གང་གིས་ཤེན་པས་གསད་པར་བཤམས་པ་ལས་ཐར་བར་བྱས་པའི་ལས་ཀྱི་རྣམ་པར་སྨིན་པ་དེས་རྣམ་མཛེས་སུ་ཤིང་ལྗོན་པའི་རྣམ་པ་དེ་ལྟ་བུ་སྐྱེ་སྟེ། མེ་ལོང་ལྟ་བུར་གྱུར་པ་དེ་ལ་གཟུགས་བརྙན་སྣང་ངོ་། །དེ་ནས་ཡང་ལྷ་རྣམས་རྣམ་མཛེས་ཀྱི་ཚལ་ག་ལ་བ་དེར་འདོང་ངོ་། །དོང་ནས་ཀྱང་རྣམ་མཛེས་ཀྱི་ཚལ་དེའི་དབུས་ན་ཚལ་ཡོད་དེ། དེ་ཡང་འདོད་པ་ཐམས་ཅད་ཀྱི་ཤིང་ལྗོན་པ་རྣམས་ཀྱིས་ཉེ་བར་མཛེས་པར་བྱས་པ་ཡིན་ལ་དེར་ཞུགས་ནས་ལྷ་རྣམས་གྲོས་བྱེད་དོ། །འདི་ལྟར་ལྷ་དང་ལྷ་མ་ཡིན་རྣམས་ཀྱི་དཔུང་ཆེ་ཆུང་ལ་སེམས་པར་བྱེད་དེ། ལྷ་མ་ཡིན་རྣམས་དཔུང་གང་དང་ལྡན་ཞིང་། ལྷ་རྣམས་དཔུང་གང་དང་ལྡན་ཞིག་ཅེས་ལྷ་དེ་རྣམས་ཕན་ཚུན་དཔྱོད་པར་བྱེད་དོ། །དེ་ནས་ལྷའི་རྒྱལ་པོ་བརྒྱ་བྱིན་གྱིས་ལྷ་རྣམས་ལ་སྨྲས་པ། ཆོས་ལ་རྟེན་པ་དག་ནི་ཆོས་ཀྱིས་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། གང་གི་ཚེ་འཛམ་བུའི་གླིང་ན་གནས་པའི་མི་རྣམས་རྩོད་པའི་དུས་སུ་དགེ་བ་བཅུའི་ལས་ཀྱི་ལམ་གཙོར་འཛིན་ཅིང་། དགེ་བ་བཅུའི་ལས་ཀྱི་ལམ་ཡང་དག་པར་བླངས་ཏེ་སྤྱོད་པ་དང་ཕ་རོལ་ཡང་སྤྱོད་དུ་འཇུག་པ་དང་ལུས་དང་ངག་གི་ཚུལ་ཁྲིམས་རྣམ་པ་བདུན་ཡང་མ་རལ་བ་དང་མ་ཞིག་པ་དང་མ་ཉམས་པ་དང་བརྟན་ཞིང་ཚུལ་འཆོས་པ་མེད་པར་བསྲུངས་པ་དེའི་ཚེ། འཛམ་བུའི་གླིང་གི་མི་རྣམས་འཆི་བའི་དུས་བྱས་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། ཇི་ལྟར་སྒྲོ་བ་བྱེ་མས་བཀང་བ་ཁ་ཐུར་དུ་བསྟན་པའི་བྱེ་མའི་ཤུགས་འབབ་པ་བཞིན་དུ་དེ་ལྟར་མི་དག་ལྷ་རྣམས་ཀྱི་ནང་དུ་སྐྱེ་
བར་འགྱུར་རོ། །དེ་ལྟར་ལྷའི་དཔུང་མངོན་པར་འཕེལ་ལ། ལྷ་མ་ཡིན་གྱི་དཔུང་ཡོངས་སུ་འགྲིབ་སྟེ། ལྷ་མ་ཡིན་གྱི་བརྩོན་འགྲུས་ཞན་པར་འགྱུར་བ་དེའི་ཚེ། རི་བོ་ཟླ་བ་ལ་གནས་པའི་ལྷ་མ་ཡིན་གྱི་དཔུང་། ལྷ་རྣམས་ཀྱིས་ཟློག་པ་ཉིད་དུ་བྱེད་དོ། །དེ་ནས་དུས་གཞན་དུ་ལས་ཀྱི་ལམ་དྲི་མ་ཅན་སྤྱོད་པའི་མི་རྣམས་དགེ་བའི་ལས་ཀྱི་ལམ་རལ་བ་དང་ཞིག་པ་དང་ཉམས་པ་དང་བརྟན་པོར་མི་སྤྱོད་པ་དེའི་ཚེ། འཛམ་བུའི་གླིང་གི་མི་རྣམས་འཆི་བའི་དུས་བྱས་ནས། ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ་འདི་ལྟ་སྟེ། ཤིང་ལྗོན་པ་ཨ་མྲ་རབ་ཏུ་སྨིན་པ་དག་ལ་སྐྱེས་བུ་སྟོབས་དང་ལྡན་པས་ཤིན་ཏུ་སྒུལ་བར་བྱེད་དོ། །དེ་ཤིན་ཏུ་བསྒུལ་བ་ན་ཇི་ལྟར་ཨ་མྲ་ལྷུང་བ་དེ་ལྟར་མི་དག་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ནས་ཡང་དུས་དམས་པ་ན། དགེ་བ་ཤིན་ཏུ་དྲི་མ་ཅན་སྤྱོད་པའི་མི་འབྱུང་བ་རྣམས་ལུས་དང་ངག་གི་ཚུལ་ཁྲིམས་མི་སྲུང་ཞིང་ཤིན་ཏུ་བརྟན་པོར་མི་སྤྱོད། །ཤིན་ཏུ་དཀར་བ་མ་ཡིན། རྟག་པར་མ་ཡིན་པ་དེ་དག་འཆི་བའི་དུས་བྱས་ནས་ལྷ་ཤིན་ཏུ་དམན་པ་རྣམས་ཀྱི་ནང་དུ་སྐྱེ་བར་འགྱུར་ཏེ་འདི་ལྟ་སྟེ། ཤིང་ལྗོན་པ་བིལ་བ་སྦོམ་པོ་བརྟན་པ་འབྲས་བུ་མ་སྨིན་པར་གྱུར་པ་ལ་མི་སྟོབས་ཆུང་ངུའི་འདོམ་གྱིས་འཁྱུད་ནས་ཤིན་ཏུ་སྒུལ་བར་བྱེད་པ་དེ་ཚེགས་ཆེན་པོས་ཤིན་ཏུ་སྒུལ་བར་བྱེད་དོ། །གང་སྒུལ་བར་བྱེད་པ་དེ་དག་ཀྱང་ཤིན་ཏུ་ཞན་པ་ཡིན་ཏེ། དེ་བསྒུལ་བ་ན་བིལ་བའི་འབྲས་བུ་གང་ཞིག་འབབ་པ་ན་སྨིན་པ་ཉུང་ཟད་ཅིག་འབབ་པར་འགྱུར་བ་དེ་བཞིན་དུ། ད་ལྟར་གྱི་མི་ཚུལ་ཁྲིམས་དྲི་མ་ཅན་དེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ལྷ་ཁྱེད་ཅག་ཀྱང་ཤིན་ཏུ་བག་མེད་པ་ལ་གནས་ལ། ཤིན་ཏུ་བག་མེད་པ་ལ་གནས་པ་དེ་ནི་བག་མེད་པས་ཆོག་སྟེ། ལྷ་མ་ཡིན་གྱི་དཔུང་ནི་འཕེལ་ལོ། །ལྷའི་དཔུང་ནི་འགྲིབ་བོ། །དེ་ལྟར་ཆོས་མ་ཡིན་པ་སྤྱོད་པའི་མི་རྣམས་ཆོས་མ་ཡིན་པའི་ཚུལ་དང་། ལུས་དང་ངག་གི་ཚུལ་ཁྲིམས་རྣམ་པ་བདུན་མི་སྤྱོད་ཅིང་མ་རུངས་པ། ཕ་རོལ་གདུང་བར་བྱེད་པ། མར་མི་འཛིན་པ། ཕར་མི་འཛིན་པ། ཆོས་མ་ཡིན་པ་དང་ལྡན་པ། ཆོས་མ་ཡིན་པའི་རྗེས་སུ་འཇུག་པ་དེ་དག་འཆི་བའི་དུས་བྱས་ནས་སེམས་ཅན་དམྱལ་བ་དང་ཡི་དགས་དང་ལྷ་མ་ཡིན་རྣམས་ཀྱི་ནང་
དུ་སྐྱེ་བར་འགྱུར་ཏེ་འདི་ལྟ་སྟེ། སྒྲོ་བ་བྱེ་མས་བཀང་བའི་ཁ་ཐུར་དུ་བསྟན་ནས། སྐྱེས་བུ་སྟོབས་དང་ལྡན་པས་ཇི་ལྟར་ཁ་ནས་བླུགས་ཏེ་གཏོང་བ་དེ་བཞིན་དུ་ད་ལྟར་གྱི་མི་རྣམས་སེམས་ཅན་དམྱལ་བ་དང་དུད་འགྲོ་དང་ལྷ་མ་ཡིན་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་དགེ་བ་དང་མི་དགེ་བ་སྤྱོད་པའི་མི་འབྱུང་བ་དེ་དག་དེ་ལྟར་ཚུལ་ཁྲིམས་ཕྱོགས་གཅིག་པ་ཅུང་ཟད་དང་ལུས་ཀྱི་ཅུང་ཟད་དང་ངག་གི་ཅུང་ཟད་སྲུང་བ་དེའི་ཚེ། འཆི་བའི་དུས་བྱས་ནས། ཁ་ཅིག་ནི་སེམས་ཅན་དམྱལ་བ་དང་ཡི་དགས་དང་ལྷ་མ་ཡིན་རྣམས་ཀྱི་ནང་དུ་སྐྱེ་ལ། ཁ་ཅིག་ནི་ལྷ་རྣམས་ཀྱི་ནང་དུ་སྐྱེ་སྟེ་འདི་ལྟ་སྟེ་ཤིང་ལྗོན་པ་ཨ་མྲ་སྨིན་པ་དག་ལ་སྐྱེས་བུ་སྟོབས་དང་ལྡན་པའི་འདོམ་གྱིས་འཁྱུད་པ་དག་གང་ཨ་མྲ་རབ་ཏུ་སྨིན་པའི་འབྲས་བུ་དེ་དང་དེ་དག་ཏུ་ལྟུང་བར་འགྱུར་ལ། གང་མ་སྨིན་པ་དེ་དག་ནི་ལྟུང་བར་མི་འགྱུར་རོ། །དེ་བཞིན་དུ་དགེ་བ་འདྲེས་པར་སྤྱོད་པའི་མི་རྣམས་ཁ་ཅིག་ནི་ལྷ་རྣམས་ཀྱི་ནང་དུ་སྐྱེ་ལ། ཁ་ཅིག་ནི་སེམས་ཅན་དམྱལ་བ་དང་ཡི་དགས་དང་ལྷ་མ་ཡིན་རྣམས་ཀྱི་ནང་དུ་སྐྱེ་བར་འགྱུར་རོ། །གང་གི་ཚེ་ཐམས་ཅད་དུ་ཆོས་མ་ཡིན་པའི་སྐྱེ་དགུ་ཕལ་ཆེར་འབྱུང་བ། མར་མི་འཛིན་ཕར་མི་འཛིན་དགེ་སྦྱོང་དུ་མི་འཛིན་བྲམ་ཟེར་མི་འཛིན་རིགས་ཀྱི་རྒན་རབས་ཀྱི་རྗེས་སུ་མི་འཇུག་པ། ལུས་དང་ངག་གི་ཚུལ་ཁྲིམས་ཅུང་ཟད་ཀྱང་མི་སྲུང་བ་དེའི་ཚེ། འཛམ་བུའི་གླིང་གི་མི་དེ་རྣམས་འཆི་བའི་དུས་བྱས་ནས་སེམས་ཅན་དམྱལ་བ་དང་ཡི་དགས་དང་ལྷ་མ་ཡིན་རྣམས་ཀྱི་ནང་དུ་སྐྱེ་བར་འགྱུར་ཏེ། དེའི་ཚེ་ལྷ་མ་ཡིན་གྱི་སྟོབས་ནི་འཕེལ་ལོ། །ལྷའི་སྟོབས་ནི་ཡོངས་སུ་འགྲིབ་བོ། །དེ་ལ་ང་ཡང་ལྷ་དང་ལྷ་མ་ཡིན་གྱི་གཡུལ་འགྱེད་པར་འགྲོ་སྟེ། ང་ཉིད་ཀྱིས་རྒྱལ་བར་ནུས་ཀྱི། ལྷ་གཞན་དག་གིས་ནི་མ་ཡིན་ནོ། །དེ་ལྟར་འདི་ཡིད་ལ་བྱོས་ལ་ལྷ་རྣམས་ཆོས་ལ་འབད་པར་གྱིས་ཤིག །ཆོས་ལ་ཡང་དག་པར་དགའ་བས་ནི་འཇིག་རྟེན་འདི་དང་ཕ་རོལ་ཀུན་ཏུ་བསྲུངས་པར་འགྱུར་རོ། །མཐུ་རྣམས་ཀྱི་ནང་ན་ནི་ཆོས་མཐུ་ཆེ་སྟེ་གཞན་མཐུར་མི་སྣང་ངོ་། །དེ་ལྟར་ཡིད་ལ་བྱ་བ་འདི་ཡིད་ལ་བྱོས་ཏེ། ལྷ་མ་ཡིན་ཕམ་པར་བྱ་བ་ལ་རབ་ཏུ་འབོད་ཅིག །དེ་སྐད་ཅེས་བསྒོ་བ་དང་བརྒྱ་
བྱིན་ལ་འདི་སྐད་ཅེས་སྨྲས་སོ། །ཇི་ལྟར་ཁྱོད་ཀྱིས་བཀའ་སྩལ་པ་དེ་བཞིན་དུ་སྒྲུབ་ཅིང་མཆིས་ཏེ། ཇི་ལྟར་བརྒྱ་བྱིན་གྱིས་བདག་ཅག་ལ་བཀའ་སྩལ་པ་དེ་བཞིན་ནོ་ཞེས་སྨྲས་ནས། གོ་ཆའི་ཚལ་ག་ལ་བ་དེར་གོ་ཆ་བགོ་བའི་དོན་དུ་འདོང་བར་བྱེད་དོ། །དེ་ནས་ཤིང་དེ་དག་ལས་ལྷ་རྣམས་ཀྱི་གོ་ཆ་མི་ཕྱེད་པ་དག་རབ་ཏུ་འབྱུང་སྟེ། གང་གྱོན་ནས་ལུས་མི་ཕྱེད་པ་རྣམས་དེ་ལྟར་ཐམས་ཅད་རྣམ་པར་སྤང་ངོ་། །ཇི་ལྟར་རི་བོའི་རྩེ་ལ་གནས་པའི་ཉི་མ་འོད་དམར་པོ་འཆར་བ་དེ་ལྟར་བརྗིད་པ་ན། རི་བོ་ཟླ་བ་ཞེས་བྱ་བ་ག་ལ་བ་དེར་གཡུལ་འགྱེད་པའི་དོན་དུ་འདོང་བར་བྱེད་དེ། དེ་ནས་ཡང་ལྷ་དང་ལྷ་མ་ཡིན་གཡུལ་འགྱེད་པ་སྔ་མ་བཞིན་དུ་དེ་རྣམས་གཡུལ་འགྱེད་དོ། །དེ་ནས་གང་ལྷ་དེ་རྣམས་རྣམ་མཛེས་སུ་སོ་སོར་གནས་ཏེ། འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་དེ་དག་ཕན་ཚུན་གྲོགས་སུ་གྱུར་པ། ཡིད་འདོད་ཆགས་ཀྱིས་རབ་ཏུ་མྱོས་པ་ཀུན་འདི་ལྟ་སྟེ། བཻ་ཌཱུརྱའི་ཚལ་དང་གསེར་གྱི་ཤིང་ལྗོན་པའི་ཚལ་དང་རིན་པོ་ཆེ་ཀེ་ཀེ་རུའི་ཚལ་དང་ལྷའི་མེ་ཏོག་དང་འབྲས་བུ་འབྱོར་པ་དང་བྱ་སྒྲ་སྣ་ཚོགས་འབྱིན་པ། དགའ་བ་རྣམས་ཀྱི་ནང་ན་དགའ་བར་བྱེད་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷའི་བྱ་རྣམས་ཀྱི་ལས་ཀྱི་རྣམ་པར་སྨིན་པ་ལ་རྗེས་སུ་སེམས་པར་བྱེད་དེ། བྱ་འདི་དག་ལས་གང་གིས་ཁ་དོག་དང་ཆ་བྱད་སྣ་ཚོགས་སུ་འདུག་པ་དང་སྒྲ་སྣ་ཚོགས་འབྱིན་པ་དང་རིན་པོ་ཆེའི་ཤིང་ལྗོན་པ་སྣ་ཚོགས་ཀྱི་ནང་ན་བདེ་བར་འཁོད་ཅིང་། ཚལ་དང་ཉེ་བའི་ཚལ་རྣམས་ཀྱི་ནང་ན་དགའ་བར་བྱེད་རྩེ་བར་བྱེད་ཡོངས་སུ་སྤྱོད་པར་བྱེད་སྙམ་མོ། །ལས་ཀྱི་དེ་ཁོ་ན་ཞིབ་མོར་ཤེས་པ་དེ་ལས་ཀྱི་འབྲས་བུ་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་བརྟགས་ན། རི་མོ་མཁན་གླ་ཟ་བ་སེམས་ལ་གཡོ་མེད་པ་གང་གིས་གཟུགས་སམ་ཀུན་དགའ་ར་བའམ། སྐྱེད་མོས་ཚལ་ཚོན་རྩི་ཁ་དོག་བཟང་པོ་སྣ་ཚོགས་ཀྱིས་རྣམ་པར་འདྲི་བ་འདི་ལྟ་སྟེ། ཁ་དོག་སྔོན་པོ་དང་སེར་པོ་དང་དམར་པོ་དང་འདྲེས་པ་རྣམས་ཀྱིས་རྩིག་ངོས་སམ་གཙུག་ལག་ཁང་ངམ་མཆོད་རྟེན་ཀྱི་ཁང་པའི་ནང་དུ་སངས་རྒྱས་ཀྱི་བྱིན་གྱི་རླབས་ཀྱིས་གླ་ཟ་བས་ཤིང་ལྗོན་པ་
དང་། བྱ་དང་། མི་དང་། སྟག་དང་། རྟ་དང་། གྲོང་ཁྱེར་དང་། ཚལ་དང་། ཉེ་བའི་ཚལ་དང་། ལྟེང་ཀ་དང་། སྐྱེད་མོས་ཚལ་དང་། པད་མའི་ཚལ་དང་། མཚོ་དང་། དགེ་སྦྱོང་དང་། བྲམ་ཟེ་དང་། གྲོང་དང་། ཚོང་རྡལ་དང་། གཞལ་མེད་ཁང་ལ་སོགས་པ་བྲིས་པ་དང་སངས་རྒྱས་དང་ཆོས་ཀྱི་བྱིན་གྱི་རླབས་ཀྱིས་ཡོན་བདག་རྣམས་ཀྱི་ལུང་བཞིན་དུ་བཟོ་བོ་གླ་བ་ལས་བྱེད་པ་རྣམས་ཀྱིས་གཞི་བསྙམས་པ་དང་། བྱུགས་པ་དང་། གསེར་དང་། དངུལ་ལས་བྱས་པའམ་ཟངས་ལས་བྱས་པའམ་དེ་དག་ལ་སོགས་པ་གཟུགས་གཞན་དག་ཚོན་རྩི་བཟང་པོ་དག་གིས་སྣ་ཚོགས་སུ་བྲིས་ན། དེ་དག་ལུས་དང་བྲལ་ནས་བདེ་འགྲོ་ལྷ་རྣམས་ཀྱི་ནང་དུ་འདྲི་འདྲི་བ་དེ་བཞིན་དུ་བྱར་སྐྱེའོ། །ཚུལ་ཁྲིམས་སྤངས་པ་ལས་སྣ་ཚོགས་བྱས་པ་དེས་རི་དགས་དང་བུང་བར་གྱུར་ནས་དགའ་བར་བྱེད་དོ། །དེ་ལྟར་ལྷ་རྣམས་ཀྱི་ལས་དང་འབྲས་བུ་དང་འཐུན་པར་འགྱུར་ཏེ། ཇི་ལྟར་བླུན་པོ་དེ་རྣམས་ཀྱིས་ལས་དེ་དག་སེམས་པ་བཞིན་བྱས་པ་དེ་བཞིན་དུ་དེ་དག་བླུན་པོར་གྱུར་ནས། ལྷ་རྣམས་ཀྱི་ཚལ་དང་ཉེ་བའི་ཚལ་བདེ་བ་དང་ཤིང་ལྗོན་པ་དང་རིའི་རྩེ་མོ་རྣམས་སུ་བདེ་བ་དེ་དག་མྱོང་བར་འགྱུར་རོ། །གང་གིས་ཇི་ལྟར་གཞི་སྦྱངས་པ་དང་བྱུགས་པ་དང་བལ་གླང་གི་སོའམ་དངུལ་ལམ་གསེར་ལ་སོགས་པ་ལ་གཟུགས་ཇི་ལྟ་བ་བཞིན་བྱས་པ་ནི། ལས་རྣམ་པ་སྣ་ཚོགས་དུ་མའི་གཟུགས་རྒྱའི་འབུར་ལྟ་བུར་སྐྱེ་བར་འགྱུར་རོ། །ལྷ་དེ་དག་ཀྱང་རྣམ་མཛེས་ཀྱི་ཚལ་དེ་ན་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པ་སོ་སོར་ཡང་དག་པར་མྱོང་བར་འགྱུར་བའི་ལས་ཟད་པར་མ་གྱུར་པ་དེ་སྲིད་དུ། ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ། དགའ་བར་བྱེད་དགའ་དགུར་སྤྱོད་པར་བྱེད། རྩེ་བར་བྱེད་དེ་ལྷའི་བདེ་བ་སྣ་ཚོགས་མྱོང་བར་འགྱུར་རོ། །དེ་ཟད་ནས་དེ་ནས་ཡང་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བ་ལེགས་པར་བྱས་པའི་ལས་མི་དང་སོ་སོ་ཡང་དག་པར་མྱོང་བར་འགྱུར་བས། མི་རྣམས་ཀྱི་ནང་དུ་སྐྱེས་ན། ལེགས་པར་བྱས་པའི་ལས་དེ་དང་རྒྱུ་འཐུན་པར་དེ་རྟག་ཏུ་སོ་སོ་
ཡང་དག་པར་མྱོང་བར་འགྱུར་བ། བདེ་བར་གནས་པའི་བདེ་བས་རྒྱལ་པོའམ་རྒྱལ་ཚབ་ཏུ་ཡང་དག་པར་འགྲུབ་ལ། སྐྱེ་བོ་དུ་མས་མཆོད་པར་འགྱུར་བ་དང་རྟག་ཏུ་སྐྱེད་མོས་ཚལ་ལ་དགའ་བ་དང་རྟག་ཏུ་དགའ་སྟོན་ལ་དགའ་བ་དང་རྟག་ཏུ་ཡིད་རབ་ཏུ་དགའ་ཞིང་གཟུགས་དང་རྒྱན་དང་ཆ་བྱད་བཟང་བ་དང་རྟག་ཏུ་བཟའ་བ་དང་བཏུང་བ་དང་ཁ་ཟས་གཞན་བཅའ་བ་བདེ་བ་དང་ཡང་དག་པར་ལྡན་པ་དང་རྟག་ཏུ་མལ་ཆ་དང་སྐྱེད་མོས་ཚལ་དུ་གནས་པ། བདེ་བ་དང་ལྡན་པ་དང་བྲན་དང་བྲན་མོ་དང་ལས་བྱེད་པ་དང་ཞོ་ཤས་འཚོ་བ་དང་འཁོལ་བ་དག་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་ས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་ས་ཡོངས་འདུ་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་སྐྱེས་བུ་དམ་པ་ཤེས་པ་དང་ལྡན་པར་འགྱུར་བ་གང་གིས་ཕ་མ་ལ་གོས་དང་ཟས་དང་མལ་ཆ་དང་ན་བའི་གསོས་སྨན་གྱི་རྐྱེན་གྱི་ཡོ་བྱད་ཡོངས་སུ་བྱིན་ལ། གཞན་དག་ཀྱང་དགེ་བའི་ལས་དེ་ཉིད་ལ་འཇོག་པར་བྱེད་ཅིང་། ཡང་དག་པར་འཇོག་པར་བྱེད་ལ་སོ་སོར་འཇོག་པར་བྱེད་དེ། རྣམ་པ་དེ་ལྟ་བུའི་སྦྱིན་པ་སྦྱིན་པར་བྱེད་པ་དང་སྲོག་གཅོད་ཕྲ་མོ་ཡང་སྲུང་བ་ཡིན་ཏེ། འབྲས་བུ་སྨིན་པ་རུལ་བར་གྱུར་པའི་ནང་ན་སྲིན་བུ་ཡོད་པར་བག་ཚ་ནས་ཟ་བར་མི་བྱེད་ལ། གཞན་དག་ཟ་ན་ཡང་ཟློག་པར་བྱེད་ཅིང་སྨོད་པར་བྱེད་ལ། དེ་བདག་ཉིད་ཀྱང་ཚུལ་ཁྲིམས་སྲུང་གཞན་དག་ཀྱང་ཚུལ་ཁྲིམས་ལ་རབ་ཏུ་འཇོག་པར་བྱེད་དོ། །ཇི་ལྟར་ན་མ་བྱིན་པར་ལེན་པ་སྤངས་ཞེ་ན། འདི་ལ་མ་བྱིན་པ་ལེན་པ་འདི་ལྟ་སྟེ། མཚམས་སུ་བྱས་པར་བྱ་བ་དང་འབྲས་བུ་སར་པ་ཤུགས་ཀྱིས་ཁྱེར་ཏེ་བོར་བའམ་ཀུན་དགའ་ར་བར་ལྷུང་སྟེ་བོར་བ་ཡང་སྤོང་བར་བྱེད་ལ། གཞན་ཡང་ཟློག་ཅིང་ལེན་པ་ལ་སྨོད་པར་བྱེད། དགེ་བའི་ལམ་ལ་རབ་ཏུ་འཇོག་པར་བྱེད་པ། བདག་དང་གཞན་ལ་ཕན་པར་ཞུགས་པའི་སྐྱེས་བུ་དམ་པ་དེ་ལུས་དང་བྲལ་ནས་ཤི་བའི་འོག་ཏུ་སུམ་ཅུ་
རྩ་གསུམ་པའི་ལྷ་རྣམས་ཀྱི་སར་སྐྱེ་བར་འགྱུར་ཏེ། ཡོངས་འདུ་ན་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཤིང་ལྗོན་པ་གཅིག་པུ་དེ་ལྷག་པར་མཛེས་པ་ཡིན་ཏེ། གང་གི་ཚེ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་འབྱུང་བ་ན། འདི་ལྟར་ཡང་ལྷའི་རྒྱལ་པོ་ལྷ་ཐམས་ཅད་ཀྱི་བྱ་བ་ལེགས་པར་བྱས་པ་དང་ཉེས་པར་བྱས་པ་དང་འཛམ་བུ་གླིང་གི་མི་རྣམས་ཀྱི་སྤྱད་པ་ལེགས་པར་བྱས་པ་དང་ཉེས་པར་བྱས་པའི་ནང་ན་དེའི་དྲི་དང་མདོག་དང་མེ་ཏོག་དང་ལོ་མ་དང་འབྲས་བུ་ཕུན་སུམ་ཚོགས་པ་ཡིན་ནོ་ཞེས་དེ་རྗོད་པར་བྱེད་དོ། །གང་གི་ཚེ་འཛམ་བུའི་གླིང་དུ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་འབྱུང་བ་དེའི་ཚེ། ཤིང་ཡོངས་འདུ་ས་བརྟོལ་མེ་ཏོག་རྒྱས་པར་འགྱུར་ཞིང་། དཔག་ཚད་བརྒྱར་དྲི་འབྱུང་ལ། འོད་ཀྱིས་རྣམ་པར་མཛེས་ཏེ། གཟི་བརྗིད་ཀྱིས་ཀྱང་འབར་བ་དེའི་ཚེ། སུམ་ཅུ་རྩ་གསུམ་པའི་ལྷ་རྣམས་ཡིད་དགའ་ནས། ཤིང་ཡོངས་འདུ་ས་བརྟོལ་ཡོངས་སུ་བསྐོར་ཏེ་འཁོད་ལ། ཨེ་མ་འདི་ལྟར་ཡོངས་འདུ་ས་བརྟོལ་རྣམ་པ་ཐམས་ཅད་དུ་མེ་ཏོག་རྒྱས་པ་འདི། གོར་མ་ཆག་པར་འཛམ་བུའི་གླིང་གི་མི་རྣམས་དགེ་སྦྱོང་དུ་འཛིན། བྲམ་ཟེར་འཛིན་རིགས་ཀྱི་རྒན་རབས་ལ་མཆོད་པ་བྱེད། རིགས་ཀྱི་རྒན་རབས་ཀྱི་རྗེས་སུ་ཞུགས་པ་ལྟ་ཞིག་སྟེ། འདི་ལྟར་བདག་ཅག་གི་ཤིང་ལྗོན་པ་འདི་རྣམ་པ་ཐམས་ཅད་དུ་མེ་ཏོག་རབ་ཏུ་རྒྱས་སོ་སྙམ་སེམས་སོ། །ལྷ་དེ་དག་དེ་དང་ཉེ་བར་དབྱར་ཟླ་བ་བཞིར་ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་གནས་པར་བྱེད་དོ། །གང་གི་ཚེ་ཤིང་ཡོངས་འདུ་ས་བརྟོལ་གྱི་མེ་ཏོག་གི་རྣམ་པ་ཕྱེད་རྒྱས་པ་དེའི་ཚེ། སུམ་ཅུ་རྩ་གསུམ་པའི་ལྷ་རྣམས་ཤིན་ཏུ་དགའ་བར་འགྱུར་ཏེ། ཨེ་མ་འཛམ་བུ་གླིང་གི་མི་རྣམས་གོར་མ་ཆག་པར་ཚུལ་ཁྲིམས་འདྲེས་པར་སྤྱོད་པ་ལ་ཞུགས་པ་དེའི་ཚེ། ཤིང་ཡོངས་འདུ་ས་བརྟོལ་གྱི་མེ་ཏོག་གི་རྣམ་པ་འདྲེས་པར་འབྱུང་བར་འགྱུར་རོ། །གང་གི་ཚེ་ཐམས་ཅད་དུ་ཆོས་མ་ཡིན་པའི་སྐྱེ་དགུ་ཕལ་ཆེར་འབྱུང་བ་དེའི་ཚེ། ཤིང་ཡོངས་འདུ་ས་བརྟོལ་ཐམས་ཅད་དུ་ལོ་མ་དང་འདབ་མ་རྙིས་པར་འགྱུར་ཞིང་། དེ་བཞིན་
དུ་མདོག་ཀྱང་མི་སྡུག །དེ་བཞིན་དུ་དྲི་ཡང་མི་ཞིམ། དེ་བཞིན་དུ་འོད་ཀྱང་མི་གསལ་ཏེ། དཔེར་ན་དགུན་ཁུག་རྣ་དང་སྤྲིན་གྱིས་འཁྲིགས་ན། ཉི་མའི་འོད་རབ་ཏུ་དྲོ་བ་དང་ལྡན་པ་མེད་ལ། འོད་ཀྱི་མཐུ་ཉམས་པ་སེམས་ཅན་རྣམས་ཀྱིས་མཐོང་བར་འགྱུར་བ་དེ་བཞིན་དུ། ཤིང་ཡོངས་འདུ་ས་བརྟོལ་གྱི་འོད་ཆུང་ལ་དྲིའི་རྣམ་པ་དེ་ལྟ་བུ་དང་ལྡན་པར་མི་འགྱུར་ཞིང་། འོད་ཀྱིས་གནས་པར་མི་འགྱུར་བ་དེའི་ཚེ། ཤིང་ཡོངས་འདུ་ས་བརྟོལ་ན་གནས་པའི་ལྷ་རྣམས་བརྒྱ་བྱིན་ལ། ལྷ་ཀྱེ་མ་ཤིང་ཡོངས་འདུ་ས་བརྟོལ་འོད་ཆུང་ཞིང་དྲི་མི་བདའ་ལ། ཇི་ལྟར་སྔོན་མཛེས་པ་དང་ལྡན་པ་དེ་ད་ལྟར་མཛེས་པ་མ་ལགས་ཏེ། གོར་མ་བཀུམ་པར་འཛམ་བུའི་གླིང་ན་སྐྱེ་དགུ་ཆོས་མ་ལགས་པ་བགྱིད་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་རྒན་རབས་ཀྱི་རྗེས་སུ་མི་འཇུག་པ་དག་མཆིས་སོ་ཞེས་བསྙད་དོ། །ལྷའི་རྒྱལ་པོ་བརྒྱ་བྱིན་གྱིས་དེ་ཐོས་ནས། སངས་རྒྱས་ཀྱི་སྐུ་གཟུགས་བླངས་ཏེ། ཤིང་ཡོངས་འདུ་ས་བརྟོལ་ག་ལ་བ་དེར་ལྷའི་ཚོགས་དང་ལྷན་ཅིག་ཡོངས་སུ་བསྐོར་ནས་འདོང་བར་བྱེད་དེ། སངས་རྒྱས་ལ་ཤིན་ཏུ་གུས་པ་སྐྱེས་ཤིང་། སངས་རྒྱས་ཀྱི་ཡོན་ཏན་མངོན་པར་དྲན་པ་ན། ལྷ་རྣམས་ལ་འདི་ལྟར་ཤིང་ཡོངས་འདུ་ས་བརྟོལ་འདི་ཐམས་ཅད་དུ་ལོ་མ་རྙིས་པར་གྱུར་པའི་ཤིང་ཡོངས་འདུ་ས་བརྟོལ་ག་ལ་བ་དེར་ཁོ་བོ་འགྲོ་ཡིས་ལྷ་གཞན་དེ་དག་ཆོས་ཤིག །འདི་ལྟར་བདག་ནི་ཤིན་ཏུ་གསལ་བར་གནས་པའི་མཆོད་རྟེན་ཁྱེར། བཅོམ་ལྡན་འདས་ཀྱི་སྐུ་གཟུགས་ཐོགས་ཏེ་ཤིང་གི་རྒྱལ་པོ་དེ་དག་ག་ལ་བ་དེར་སོང་ལ་ཤིང་དེའི་དྲུང་དུ་བདག་བཅོམ་ལྡན་འདས་ལ་ལྷའི་དྲི་དང་ཕྲེང་བ་དང་བྱུག་པས་མཆོད་པ་བྱའོ་དེ་སྐད་ཅེས་སྨྲས་སོ། །དེ་ནས་བརྒྱ་བྱིན་གྱི་ཚིག་ལྷ་རྣམས་ཀྱིས་ཐོས་ནས་ལྷ་བརྒྱ་ཕྲག་སྟོང་དུ་མ་དག་ལྷའི་རྒྱལ་པོ་བརྒྱ་བྱིན་ག་ལ་བ་དེར་འདོང་ངོ་། །བརྒྱ་བྱིན་ཡང་སངས་རྒྱས་ཀྱི་སྐུ་གཟུགས་སྤྱི་བོ་ལ་ཁྱེར་ནས། ཤིང་ཡོངས་འདུ་ས་བརྟོལ་ག་ལ་བ་དེར་དོང་བ་དང་ཤིང་ཡོངས་འདུ་ས་བརྟོལ་གྱི་དྲུང་ན་གནས་པའི་ལྷ་གཞན་དག་གིས་རྒྱང་རིང་པོ་ཉིད་ནས་མཐོང་སྟེ། ཤིང་ཡོངས་འདུ་ས་བརྟོལ་གྱི་ལོ་མ་རྙིས་
པར་འགྱུར་ཅིང་འོད་མི་གསལ་ལ་དཔལ་དང་ལྡན་པ་མེད་ནས་ཡིད་ཤིན་ཏུ་ལྷག་པར་མི་དགའོ། །དེ་ནས་བརྒྱ་བྱིན་གྱིས་བཅོམ་ལྡན་འདས་དེ་ཤིང་གི་དྲུང་དུ་གསེར་བཙོ་མ་ལྟ་བུའི་ས་གཞི་ལ་བཻ་ཌཱུརྱའི་གདན་གྱི་སྟེང་དུ་བཞག་ནས། ལྷའི་ཚོགས་དང་བཅས་པ་དད་པ་སྐྱེས་པ་དང་བཅས་པའི་རིམ་གྲོ་ཐམས་ཅད་ཀྱིས་བཅོམ་ལྡན་འདས་ལ་དྲི་དང་ཚལ་གྱི་མེ་ཏོག་མ་ལི་ཀ་དང་མན་དཱ་ར་བ་དང་པད་མ་དག་སྟེ། རྣམ་པ་དེ་ལྟ་བུའི་སྤོས་དང་མེ་ཏོག་རྣམས་ཀྱིས་བཀྲུས་ཤིང་མཆོད་པ་བྱས་ནས། བརྒྱ་བྱིན་གྱིས་ལྷ་རྣམས་ལ་ཇི་ལྟར་ལྷ་དག་དད་པ་ཡང་དག་པར་སྐྱེས་པ་ནི་སེར་སྣ་དང་བྲལ་ཞིང་བག་མེད་པ་དང་བྲལ་བ་ལ་གནས་པར་དགའ་བ་ཡིན་ཏེ། དེ་ལྟར་སངས་རྒྱས་དང་ཆོས་དང་འཕགས་པའི་ཚོགས་ནི་ཁམས་གསུམ་པའི་བླ་མ་ཡིན་ལ། བདག་ཅག་གི་བླ་མ་ཡང་ཡིན་ནོ་ཞེས་སྨྲས་སོ། །དེ་ནས་ལྷ་དད་པ་སྐྱེས་པ་ཐམས་ཅད་སངས་རྒྱས་ལ་ཕྱག་འཚལ་བར་བྱེད་དོ། །དེ་ནས་དེའི་ཚེ་བརྒྱ་བྱིན་གྱིས་འདི་ལྟར་ཚིགས་སུ་བཅད་དེ་སྨྲས་པ། སེམས་ཅན་ཀུན་གྱི་གཉེན་གཅིག་པ། །སྲེད་པའི་དུག་ལས་རྣམ་གྲོལ་ཞིང་། །སྲིད་པའི་ཕ་རོལ་ཡང་དག་རྒལ། །ཐམས་ཅད་མཁྱེན་ལ་ཕྱག་འཚལ་ལོ། །དེ་ནས་བརྒྱ་བྱིན་ཐལ་མོ་སྦྱར་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་ལྷའི་ཚོགས་དང་ལྷན་ཅིག་ཡོངས་སུ་བསྐོར་ཅིང་པུས་མོ་བཙུགས་ནས་འདི་ལྟར་ཚིགས་སུ་བཅད་དེ་སྨྲས་པ། སེམས་ཅན་ཀུན་གྱི་གཙོ་གཅིག་པ། །འདོད་ཆགས་ཞེ་སྡང་གཏི་མུག་བཅོམ། །རིམས་ནད་མེད་ཅིང་མཚུངས་མེད་པ། །ཐམས་ཅད་མཁྱེན་ལ་ཕྱག་འཚལ་ལོ། །དེ་ནས་ལྷའི་ཚོགས་དེ་དག་ཐམས་ཅད་ཀྱང་། ཤིང་གི་རྒྱལ་པོ་དེ་ཡོངས་སུ་བསྐོར་ནས་འཁོད་དེ། ཐམས་ཅད་དད་པ་ཡང་དག་པར་སྐྱེས་པ། ཐམས་ཅད་དབང་པོ་གཞོལ་བའི་ལྷ་ཀུན་ཇི་ལྟ་ཇི་ལྟར་སེམས་དང་ལ་ཡིད་དགེ་ཞིང་། སངས་རྒྱས་དང་ཆོས་ལ་ཕལ་ཆེར་མཆོད་པ་བྱེད་པ་དེ་ལྟ་དེ་ལྟར་ཤིང་དེ་འདབ་མ་བྱེ་ནས། ཁ་འབྱེ་བར་འགྱུར་རོ། །དེ་ནས་དེ་མཐོང་ནས་དེ་ལྟར་ཕྱིར་ཞིང་ཤིང་ཡོངས་འདུ་ས་བརྟོལ་རིམ་གྱིས་སྔོན་
བཞིན་དུ་མེ་ཏོག་རྣམ་པ་ཐམས་ཅད་དུ་རྒྱས་པར་འགྱུར་ལ། ཤིང་ཡོངས་འདུ་ས་བརྟོལ་གྱི་འོད་ཀྱིས་དཔག་ཚད་བརྒྱ་དག་ཏུ་མཛེས་ཏེ། དྲིས་ནི་ཁྱབ་འདབ་མ་ནི་སྤྲིན་གྱི་མདོག་ལྟར་དཀར་བུང་བས་ནི་ཉེ་བར་མཛེས་པར་བྱས། གྲིབ་མ་ནི་བདེ། ཀུན་ནས་ལྷའི་ཚོགས་ཀྱིས་ནི་གང་། ཉི་མ་གཉིས་པ་ལྟར་ནི་མཛེས་ཏེ་དེའི་སྔོན་གྱི་དཔལ་དེ་དག་མཐོང་ནས་ལྷ་རྣམས་དགའ་བར་འགྱུར་རོ། །དཔག་ཚད་བརྒྱ་དག་ཏུ་དྲི་འབྱུང་བ་ལྡང་ལ་རླུང་ཡང་དཔག་ཚད་བརྒྱ་དག་ཏུ་རབ་ཏུ་ལྡང་སྟེ། དྲི་ཡིད་དུ་འོང་བར་འགྱུར་ཞིང་ཤིང་གི་རྒྱལ་པོ་འོད་ཀྱིས་མཛེས་པ་ཡིན་ནོ། །དཔེར་ན་རི་བོ་སྟོང་ཕྲག་དྲུག་ཅུ་ཐམས་ཅད་ཀྱི་ནང་ན་རིའི་རྒྱལ་པོ་རི་རབ་མཛེས་པ་དེ་བཞིན་དུ། ཤིང་ལྗོན་པ་རྣམ་པ་སྣ་ཚོགས་ཀྱི་ནང་ན་ཤིང་ཡོངས་འདུ་ས་བརྟོལ་དེ་བཞིན་དུ་རྣམ་པར་མཛེས་ཤིང་ཀུན་དུ་སྣང་ལ་ལྷན་ནེ་བ་ཡིན་ནོ། །དེ་ནས་ཡང་དཔལ་རྫོགས་ཤིང་དཔལ་ཤིན་ཏུ་རྒྱས་ལ། དཔལ་འབར་ཏེ་ཀུན་ནས་ཀྱང་འོད་འབར་བ་ན། སུམ་ཅུ་རྩ་གསུམ་པའི་ལྷ་རྣམས་ཡིད་རབ་ཏུ་དགའ་བར་གྱུར་ཏེ་ཕན་ཚུན་དུ་འདི་ལྟར་ལྷ་རྣམས་སངས་རྒྱས་ཀྱི་སྤྱན་མཚུངས་པ་མེད་པའི་མཐུ་ལ་ལྟོས། གང་དུ་སངས་རྒྱས་ཀྱི་མཐུས་ཤིང་ཡོངས་འདུ་ས་བརྟོལ་འདི་སྔོན་གྱི་མདོག་དང་དྲི་དང་ཕྲེང་བ་དང་ལོ་མ་དང་འོད་རྣམས་ཡོད་དེ། ཇི་ལྟར་འདི་འཕེལ་བ་དེ་ལྟར་སུམ་ཅུ་རྩ་གསུམ་པའི་ལྷ་རྣམས་ཀྱང་གོར་མ་ཆག་པར་སྟོབས་དང་མཐུ་དང་རྫུ་འཕྲུལ་བྱས་པ་ཡང་ཆེ་བར་འགྱུར། འཛམ་བུའི་གླིང་གི་ཆོས་ཀྱི་རྗེས་སུ་འཇུག་པ་རྣམས་ཀྱང་ཆོས་ལ་བློ་གྲོས་འཇུག་སྟེ། ཆོས་དང་ལྡན་པའི་བསམ་པ་དེ་དག་ད་ལྟར་ཉེ་བར་འཇུག་པ་ནི། བདུད་ཀྱི་སྒྲུབ་པའི་སྟོབས་རབ་ཏུ་མེད་པར་འགྱུར་ཞིང་བདུད་ཀྱི་རིས་ཀྱི་ལྷ་མ་ཡིན་དང་ཀླུ་འཇིག་རྟེན་སྐྱོང་བ་ཆོས་མ་ཡིན་པ་དང་ལྡན་པ་དག་ཆོས་ལ་བགེགས་བྱེད་པར་མི་འགྱུར། ཆོས་ལ་སྨོད་པ་བྱེད་པར་མི་འགྱུར་ལ། ལྷ་མོ་རྣམས་ཀྱི་ནང་དུ་ལྷ་བདག་ཅག་ཟིལ་གྱིས་གནོན་པར་མི་འགྱུར་ཏེ། ཤིང་གི་རྒྱལ་པོ་འདི་མཐོང་བས་བདུད་ཀྱི་སྟོབས་ནི་ཉམས་ཤིང་། ལྷའི་སྟོབས་ནི་རབ་ཏུ་འཕེལ་བར་ཁྱེད་ཅག་གིས་ཤེས་པར་གྱིས་ཤིག་ཅེས་སྨྲས་སོ། །དེ་ནས་བརྒྱ་བྱིན་
གྱི་སྔོན་དུ་འགྲོ་བའི་ལྷ་རྣམས་དེ་ལྟར་ཕན་ཚུན་གཏམ་ཡང་དག་པར་རྗོད་པ་ན། དེ་ནས་ཡང་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་འཇིག་རྟེན་སྐྱོང་བ་བཞི་དག་འཛམ་བུའི་གླིང་ནས་སུམ་ཅུ་རྩ་གསུམ་པའི་ལྷ་རྣམས་ཀྱི་འདུན་ས་ག་ལ་བ་དེར་འདོང་བར་བྱེད་དོ། །དེ་ནས་ཤིང་ཡོངས་འདུ་ས་བརྟོལ་གྱི་དྲུང་ན་ལྷའི་གཙོ་བོ་བརྒྱ་བྱིན་ལ་སོགས་པ་སངས་རྒྱས་བཅོམ་ལྡན་འདས་ལ་སེམས་རབ་ཏུ་དང་བ་དང་ཡིད་རབ་ཏུ་དང་བ་དང་རང་གི་འོད་ཟེར་འབར་བ་གསལ་བས་མཆོད་པ་བྱེད་པ་ན་འཇིག་རྟེན་སྐྱོང་བ་བཞི་དག་གིས་རྒྱང་རིང་པོ་ཉིད་ནས་མཐོང་ངོ་། །དེ་ནས་དེ་དག་གི་དྲུང་དུ་ཕྱིན་ནས་འཇིག་རྟེན་སྐྱོང་བ་བཞི་དག་གིས་ལྷའི་རྒྱལ་པོ་བརྒྱ་བྱིན་ལ་སྤྱི་བོས་ཕྱག་འཚལ་ཏེ་སྨྲས་པ། འདི་ལྟར་ལྷའི་གཙོ་བོ་བརྒྱ་བྱིན་ལ་སོགས་པ་དགྱེས་པར་མཛོད་ཅིག །ད་ལྟར་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་མི་རྣམས་ཆོས་ནི་སྤྱོད། ཆོས་མ་ཡིན་པ་ནི་མི་སྤྱོད་དེ། མར་འཛིན་པ་ཕར་འཛིན་པ་དགེ་སྦྱོང་དུ་འཛིན་པ་བྲམ་ཟེར་འཛིན་པ་རིགས་ཀྱི་རྒན་རབས་ཀྱི་རྗེས་སུ་འཇུག་པ་རྣམས་ཆོས་སྤྱོད་ཀྱིས་དགྱེས་པར་མཛོད་ཅིག །དེ་ནས་དེ་དག་ལས་ཐོས་ནས་ལྷའི་གཙོ་བོ་བརྒྱ་བྱིན་ལ་སོགས་པ་ཡིད་རབ་ཏུ་དགའ་བ་མཆོག་ཏུ་དགའ་སྟེ། དེ་ནས་ཡང་འཇིག་རྟེན་སྐྱོང་བ་དག་ལ་མཆོད་ནས། འདི་ལྟར་མིའི་འཇིག་རྟེན་ན་མི་ཆོས་པ་དང་ལྡན་པ་རྣམས་འཇིག་རྟེན་སྐྱོང་བ་དག་གི་ཀུན་དགའ་བའི་སྐལ་བར་གྱུར་ཅིག །དེ་ནས་ལྷ་དེ་དག་ཐམས་ཅད་ཀུན་དགའ་བ་སྐྱེས་པར་རིག་ནས། ཤིང་ཡོངས་འདུ་ས་བརྟོལ་གྱི་དྲུང་དུ་སངས་རྒྱས་བཅོམ་ལྡན་འདས་བླངས་པ་དེ་ནས་ཡང་མཆོད་ནས། ལྷའི་འདུན་ས་ཆོས་བཟང་ག་ལ་བ་དེར་སངས་རྒྱས་བཅོམ་ལྡན་འདས་ཁྱེར་རོ། །ལྷ་གཞན་ལྷག་མ་གང་ཡིན་པ་དེ་དག་ནི་ཤིང་ཡོངས་འདུ་ས་བརྟོལ་ག་ལ་བ་དེར་དོང་སྟེ་ཕྱིན་ནས་བརྒྱ་བྱིན་གྱི་མདུན་དུ་འགྲོ་བ་ཡིད་རབ་ཏུ་དགའ་བ་རྣམས་ཤིང་ཡོངས་འདུ་ས་བརྟོལ་ག་ལ་བ་དེར་དོང་སྟེ་ཕྱིན་ནས། ཤིང་གི་རྒྱལ་པོ་དེའི་དྲུང་དུ་དབྱར་ཟླ་བ་བཞིའི་བར་དུ་ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་དགའ་བར་བྱེད། ཡོངས་སུ་སྤྱོད་པར་བྱེད་དོ། །ལྷ་ཡིད་
རབ་ཏུ་དགའ་བ་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་བ་དག་དགའ་བར་བྱེད། ཡོངས་སུ་སྤྱོད་པར་བྱེད་ཅིང་། བདེ་བ་དཔེ་མེད་པ་ཉེ་བར་མྱོང་བར་བྱེད་དོ། །དེ་ལྟར་དེ་ཉིད་ན་གནས་པ་དབྱར་ཟླ་བ་བཞི་འདས་པ་དང་དེ་དག་གི་ནང་ནས་ལས་དང་ཚེ་ཟད་པའི་ལྷ་གང་ཡིན་པ་དེ་དག་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན། སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་མི་དང་སོ་སོ་ཡང་དག་པར་མྱོང་བར་འགྱུར་བས། མི་དག་དང་སྐལ་བ་མཉམ་པར་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་རྟག་ཏུ་གཟུགས་བཟང་ཞིང་ཤིན་ཏུ་བལྟ་ན་སྡུག་པ་དང་ཡིད་རབ་ཏུ་དགའ་བར་འགྱུར། རྟག་ཏུ་བདེ་ཞིང་བྱད་བཞིན་ཀུན་གྱིས་བལྟ་བར་མངོན་པར་དགའ་བ་དང་རྩེ་བ་ལ་དགའ་བར་འགྱུར། རྟག་ཏུ་དགོད་པ་དང་དགའ་བ་དང་རྩེ་བ་ལ་དགའ་ཞིང་བུད་མེད་ཐམས་ཅད་ཀྱིས་བལྟ་བར་མངོན་པར་དགའ་བ་དང་ཤིན་ཏུ་བདེ་བ་དང་ལྡན་ཏེ། རྒྱལ་པོའམ་རྒྱལ་ཚབ་ཏུ་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སུམ་ཅུ་རྩ་གསུམ་པའི་ལྷ་རྣམས་ཀྱི་ས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། སུམ་ཅུ་རྩ་གསུམ་པའི་ལྷ་འདྲེས་པའི་འགྲམ་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་ཚུལ་ཁྲིམས་དང་ལྡན་པར་གྱུར་ཅིང་། སེམས་ཅན་གཞན་ལ་ཕན་པར་འདོད་པའི་སེམས་ཡོངས་སུ་བསྒོམས་པའི་སྙིང་དང་ལྡན་པ་གང་གིས། ཡོན་ཏན་མཆོག་དང་ལྡན་པའམ། ཚུལ་ཁྲིམས་དང་ལྡན་པའམ། ཤེས་རབ་དང་ལྡན་པའམ། ནད་པ་ལ་ཟན་གཅིག་ཙམ་བྱིན་པའམ། བདག་ཉིད་ཀྱང་སྲོག་གཅོད་པ་མི་བྱེད་ལ། ཤིང་ལྗོན་པའི་གསེབ་ན་གྲོག་སྦུར་རམ་སྲོག་ཆགས་མར་ཀོ་ཏ་ཀའམ། སེམས་ཅན་གྱི་རྣམ་པ་དེ་ལྟ་བུ་གཞན་དག་ལ་བ་ལང་རྫིའམ། ཕྱུགས་རྫིའམ། རྔ་མོའི་རྫིའམ།
གླང་པོ་ཆེའི་རྫིའམ། དེ་བཞིན་དུ་གཞན་བོང་བུའི་རྫིའམ། རྟ་རྫི་དགུན་གྱི་དུས་སམ། དགུན་སྨད་ཀྱི་དུས་སུ་གྲང་བས་ཉེན་ཏེ་འབྲོག་དགོན་པ་དག་ཏུ་ཕྱིན་ནས་མེ་བུས་ན། སྐྱེས་བུ་དམ་པ་སེམས་ཅན་ལ་ཕན་པར་ཞུགས་པ་དེས་མེ་དེ་ཆུའམ་ཐལ་བས་ཞི་བར་བྱས་ནས། སྲིན་བུ་དེ་དག་ཐར་བར་བྱེད་པ་དང་གཞན་སྲོག་གཅོད་པ་བྱེད་པ་ཡང་ཕྱིར་ཟློག་པར་བྱེད། བདག་ཉིད་ཀྱང་མི་བྱེད་ལ་གལ་ཏེ་བྱས་པ་ཞིག་ཡོད་ན་ཡང་དེ་སྨོད་པར་བྱེད། སོ་སོར་འཆགས་པར་བྱེད། གཞན་ལ་ཡང་རྗེས་སུ་ཡི་རང་བར་མི་བྱེད། སྐྱོན་དུ་འགྲང་བར་མི་བྱེད་འཇོག་པར་མི་བྱེད། ལམ་བདེ་བ་ལ་རབ་ཏུ་འཇོག་པར་བྱེད་དེ། དེ་ལྟར་རྣམ་པ་དེ་དག་དང་ཚུལ་དེ་དག་གིས་སྲོག་གཅོད་པ་སྤངས་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་སྙམ་ན། འདི་ལ་མ་བྱིན་པར་ལེན་པ་མི་བྱེད་པ་ཡིན་ནོ། །མ་བྱིན་པར་ལེན་པ་མི་བྱེད་པའི་རྣམ་པ་དུ་ཡོད་སྙམ་ན་འདི་ལྟ་སྟེ། དགུན་དང་དགུན་སྨད་གྲང་བའི་དུས་སུ་ཤིང་སྐམ་པོ་མེད་པ། ཤིང་ལྗོན་པ་མེད་པའི་དགོན་པར་ལམ་དུ་ཞུགས་པ་དེ་ན། བ་ལང་རྫིའམ། གླང་པོ་ཆེའི་རྫིའམ། རྔ་མོའི་རྫི་གྲང་བས་ཉེན་པ་དག་གིས་མེ་བུད་པའི་ཕྱིར་རམ། མཚན་མོ་བསྲོ་བར་བྱ་བའི་ཕྱིར། བ་ལང་གི་ལྕི་བའམ། གླང་པོ་ཆེའི་ལྕི་བའམ། ལོ་མའམ། འདབ་མའམ། ཤིང་བུར་དག་སྤུངས་ཏེ། བཞག་པ་དེ་དག་ལ་ལམ་དུ་ཞུགས་པ་དེ་གྲང་བས་ཤིན་ཏུ་ཉེན་པར་གྱུར་ཀྱང་ཕ་རོལ་གྱི་ཡིན་ནོ་སྙམ་དུ་བསམས་ནས། རྐུ་བའི་སེམས་ཀྱིས་ལེན་པར་མི་བྱེད། ཕ་རོལ་ལེན་པ་ཡང་ཟློག་པར་བྱེད། གལ་ཏེ་བདག་གིས་བླངས་ན། དེ་འཆགས་པར་བྱེད་ལ་ཕྱིར་ཞིང་མི་བྱེད། གཞན་དག་ཀྱང་ལམ་དགེ་བ་ལ་རབ་ཏུ་འཇོག་པར་བྱེད། གཞན་གྱིས་བླངས་པ་ལ་ཡང་རྗེས་སུ་ཡི་རང་བར་མི་བྱེད་དེ། ལས་ཀྱི་ཉེར་བསྡོགས་དང་ལས་ཀྱི་མཇུག་མ་བྱིན་པར་ལེན་པ་ལས་བྱུང་བ་ཟློག་པར་བྱེད་ཅིང་། བདག་ཉིད་ཀྱང་མི་བྱེད་པ་ཡིན་ཏེ། སྡིག་པའི་ལས་རྡུལ་ཕྲན་ཙམ་གྱིས་ཀྱང་འཇིགས་པར་ལྟ་བའི་སྐྱེས་བུ་དགེ་བ་དེ། ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་གྱི་ལྷ་འདྲེས་པའི་འགྲམ་ན་གནས་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །འདྲེས་
པའི་འགྲམ་ན་གནས་པའི་ས་དེ་ཡང་འདི་ལྟ་སྟེ། དངུལ་གྱི་ས་གཞི་ལ་གསེར་རྣམས་ཀྱིས་བཀྲ་བར་བརྒྱན། གསེར་རྣམས་ཀྱིས་འགྲམ་དེ་ཡང་བཀྲ་བར་བརྒྱན་དངུལ་གྱིས་བཀྲ་བར་བརྒྱན་པ་ཡང་དེ་བཞིན་བཀྲ་བར་བརྒྱན། དེ་བཞིན་དུ་ཀེ་ཀེ་རུས་བཀྲ་བར་བརྒྱན་པ་དང་། དེ་བཞིན་དུ་རྡོ་རྗེ་མང་པོས་བཀྲ་བར་བརྒྱན་པ་ཡིན་ཏེ། དེ་ལྟར་ས་དེ་ལས་ཀྱི་འབྲས་བུ་དང་འཐུན་པར་རྣམ་པར་མཛེས་པ་རིན་པོ་ཆེ་སྣ་ཚོགས་ཀྱིས་སྤྲས་པ། ཤིང་ལྗོན་པ་རྒྱན་རྣམ་པ་སྣ་ཚོགས་ཀྱིས་བརྒྱན་པ་རྣམས་ཀྱིས་ཉེ་བར་མཛེས་པར་བྱས་ཤིང་སྡུག་པར་བྱས་པ། ཀུན་ནས་རི་དགས་དང་བྱ་སྡུག་པ་རྣམ་པ་སྣ་ཚོགས་ཀྱིས་བརྒྱན་པ། རི་དགས་དང་བྱའི་ཁ་དོག་རྣམ་པ་སྣ་ཚོགས་ཀྱིས་འགྲམ་ཁེབས་པ། ཚལ་དང་ཉེ་བའི་ཚལ་ཡང་རིན་པོ་ཆེ་སྣ་བདུན་རྣམ་པ་དུ་མ་དག་གིས་ཉེ་བར་མཛེས་པར་བྱས་པ་ཡིན་ནོ། །དེ་ནས་ཚལ་དེ་ན་འདྲེས་པའི་འགྲམ་ན་གནས་པའི་ལྷ་ཤིང་གསེབ་ན་འཁོད་པ་རྣམས་ལུས་ཀུན་གསེར་བཙོ་མས་བརྒྱན་ཅིང་། ལྷ་མོ་བརྒྱ་ཕྲག་སྟོང་གིས་ཡོངས་སུ་བསྐོར་བ། ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་དགའ་བར་བྱེད་དེ། དེ་དག་རྣམ་པ་ཇི་སྲིད་དུ་འགྲམ་གང་དང་གང་དུ་གནས་ཤིང་རིན་པོ་ཆེའི་འོད་གང་གིས་བརྒྱན་པའི་རྣམ་པ་དེ་སྲིད་དུ། ལུས་ཐམས་ཅད་ཀྱི་ཁ་དོག་ཏུ་འགྱུར་ཏེ། རིན་པོ་ཆེའི་ཤིང་ལྗོན་པ་དེ་རྣམས་ཀྱི་འོད་ཀྱིས་ལུས་ཐམས་ཅད་བརྒྱན་པ་ཉིད་ཡིན་ནོ། །ཤིང་ལྗོན་པ་དེ་དག་གི་དྲུང་དུ་སོང་ནས་བདེ་བ་སྣ་ཚོགས་དང་ལྡན་པ་རྣམས་དགའ་བར་བྱེད་ཡོངས་སུ་སྤྱོད་པར་བྱེད་དོ། །དེ་ལྟར་དེ་དག་གིས་དགའ་བར་བྱས་ནས། ལྷ་མོ་དེ་རྣམས་དང་ལྷན་ཅིག་ཏུ་འབབ་ཆུའི་ཚལ་ག་ལ་བ་དེར་འདོང་བར་བྱེད་དོ། །འབབ་ཆུའི་ཚལ་དེ་ཡང་ཀུན་ནས་གསེར་གྱི་ཤིང་ལྗོན་པ་འགྲམ་ནས་སྐྱེས་པ་རྣམས་ཀྱིས་ཁེབས་པ་ཡིན་ཏེ། ཤིང་ལྗོན་པ་དེ་རྣམས་ཀྱི་ལོ་མ་སེར་པོས་ཁེབས་པའི་འོད་ཀྱིས་འབབ་ཆུ་ཀུན་ནས་ཆུ་སེར་པོར་གྱུར་ཏེ། དེ་དག་དྲག་ཏུ་འབབ་ཀྱང་དེ་དཀར་པོ་ཉིད་དུ་མི་མངོན་ནོ། །ཤིང་ལྗོན་པ་རྣམས་ཀྱི་གསབ་གསེབ་ན། ལྷ་གང་དག་ལྷ་མོ་དང་ལྷན་ཅིག་དགའ་བར་བྱེད། ཡོངས་སུ་སྤྱོད་པར་བྱེད་པ་དེ་
དག་འདི་སྙམ་དུ་སེམས་ཏེ། འདི་ལྟར་ཤིང་ལྗོན་པ་རྣམས་ཀྱི་ཡལ་ག་དག་རྡོལ་ནས། བདག་ཅག་རྣམས་ཀྱི་ཆང་ཞིམ་པོ་འབྱུང་བར་གྱུར་ཅིག་ཅེས་སྙམ་མོ། །དེ་ནས་སེམས་བསྐྱེད་མ་ཐག་ཏུ་ཤིང་ལྗོན་པ་དེ་དག་རྡོལ་ནས། ལྷ་རྣམས་ཀྱི་དགེ་བའི་ལས་དེས་ཆང་རོ་དང་མདོག་དང་། དྲི་སྣ་ཚོགས་དང་ལྡན་པ་དག་བྱུང་ནས། ཤིང་ལྗོན་པའི་ཡལ་ག་དག་ལས་འབབ་བོ། །དེ་འབབ་པ་ན་ལྷ་དག་གིས་མངོན་པར་མཐོང་ནས། སྣོད་རྣམ་པ་སྣ་ཚོགས་ཀྱིས་བཅུས་ཏེ། རིན་པོ་ཆེའི་སྣོད་རྣམ་པ་སྣ་ཚོགས་ཐོགས་ནས། དེ་དག་འཐུང་བར་བྱེད་དེ། ལྷའི་ཆང་བདེ་བ་དེས་བརྒྱ་སྙེད་དུ་མྱོས་སོ། །ཆང་དེས་མྱོས་པ་རྣམས་བུད་མེད་མཐོང་བའི་བདེ་བ་སྲེད་པའི་མེས་ཀུན་ནས་སྲེག་པར་བྱེད་ཀྱང་། བསྲེགས་སོ་སྙམ་དུ་མི་སེམས་ཏེ་བདེ་བས་བསྒྲིབས་པ་རྣམས་སེམས་པ་མེད་དོ། །དེ་ནས་ཡང་ལྷ་དེ་རྣམས་འདི་སྙམ་དུ་སེམས་ཏེ། ཇི་ལྟ་ཇི་ལྟར་ལྷའི་ཐོས་པ་ཉམས་དགའ་བ་རྟག་ཏུ་དགའ་བར་བྱེད་པའི་རོལ་མོ་རྣམ་པ་སྣ་ཚོགས་བདག་ཅག་གིས་མཉན་པར་བྱའོ་སྙམ་མོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་བཞི་པ། དེ་ལྟར་སེམས་བསྐྱེད་མ་ཐག་ཉིད་དུ་དགེ་བའི་ལས་དེས་རོལ་མོའི་སྒྲ་ཤིང་ལྗོན་པ་རྣམས་ལས་འབྱུང་སྟེ། ཤིང་དེ་དག་རླུང་གིས་སྐྱོད་པར་བྱེད་དོ། །དེ་དག་བསྐྱོད་པ་ན་ལོ་མ་དེ་དག་ལས་རྣམ་པ་འདི་ལྟ་བུའི་སྒྲ་འབྱུང་སྟེ། ཇི་ལྟར་སིལ་སྙན་ཡན་ལག་ལྔ་དང་ལྡན་པའི་སྒྲ་སྙན་སིམ། ཞེས་བྱེད་པ་དང་ཡང་དག་པར་ལྡན་པ་དེ་ལྟ་བུའི་སྒྲ་ཤིན་ཏུ་ཐོས་པར་འགྱུར་རོ། །སྒྲ་དེ་དག་ཐོས་ནས་ཀྱང་ལྷ་དེ་དག་འདི་སྙམ་དུ་སེམས་ཏེ། འདི་ལྟར་ད་ནི་ཤིང་དག་ལས་བདུད་རྩི་འབྱུང་བར་གྱུར་ཅིག་སྙམ་མོ། །དེ་ལྟར་སེམས་བསྐྱེད་མ་ཐག་ཉིད་དུ་ཇི་ལྟར་ཟོ་བ་ཁ་ཐུར་དུ་བསྟན་པ་རྣམས་ཀྱི་ནང་ནས་ཁ་རའམ་ཁ་རའི་དུམ་བུ་ཁ་དོག་དཔེ་མེད་པ་དང་ལྡན་པ་འབྱུང་བ་དེ་བཞིན་དུ་ཤིང་ལྗོན་པ་རྣམས་ལས་བདུད་རྩི་འབྱུང་སྟེ་དེ་དག་ལྷ་རྣམས་ཟ་བར་བྱེད་དོ། །དེས་ཚིམ་ནས་གླུ་དབྱངས་དང་། སིལ་སྙན་གྱི་སྒྲ་འབྱུང་བ་རྣམས་ཉེ་བར་ལེན་བཞིན་དུ་རིན་པོ་ཆེའི་ས་ག་ལ་བ་དེར་ལྷ་མིག་མི་འཛུམས་པར་རྒྱུ་བ་
རྣམས་འདོང་བར་བྱེད་དོ། །དེ་དག་རིན་པོ་ཆེའི་སར་དོང་ནས་ཕན་ཚུན་གྲོགས་སུ་གྱུར་པ། འདོད་ཆགས་ལྷུར་འཛིན་པར་སེམས་པ་ཡིན་ཏེ། དེར་ཡིད་ཞུགས་པ་དེར་དགའ་བར་གྱུར་པ་དེ་དང་འཐུན་པའི་སྤྱོད་པ་དང་དགའ་བའི་ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་དགའ་བར་བྱེད། དགའ་དགུར་སྤྱོད་པར་བྱེད་དོ། །ཚལ་དེ་ནས་ཡང་ཀུན་ནས་ཚལ་ཞེས་བྱ་བ་དེར་འགྲོ་བར་བྱེད་འདོང་བར་བྱེད་དོ། །ཚལ་དེ་ན་བྱའི་རིགས་བདུན་ལ་འདི་ལྟ་སྟེ། གསེར་གྱི་ངང་པ་ཁ་ཅིག་རིན་པོ་ཆེ་སྣ་བདུན་ལྟ་བུ་དང་། ནེ་ཙོ་ཁ་དོག་སྣ་ཚོགས་སུ་འདུག་པ། ཁ་ཅིག་ཨན་ད་རྙིལ་ལྟ་བུ་དང་། བྱ་ཀཱ་རཎྜ་བ་ཁ་ཅིག་ཀེ་ཀེ་རུའི་མདོག་ལྟ་བུ་དང་། ཁ་ཅིག་བཻ་ཌཱུརྱ་ལྟ་བུ་དང་། ངུར་པ་ཁ་ཅིག་ཨན་ད་རྙིལ་ལྟ་བུ་ཡིན་ལ། ཁ་ཅིག་སྤུག་ལྟ་བུ་དང་རྨ་བྱ་ཁ་དོག་རིན་པོ་ཆེ་སྣ་བདུན་ལྟ་བུ་ཡིན་ལ། ཁ་ཅིག་མཐོན་ཀ་ལྟ་བུ་དང་། ཤང་ཤང་ཏེའུ་ཡང་སྣ་ཚོགས་སུ་འདུག་སྟེ། ཁ་ཅིག་བྱི་རུ་ལྟ་བུ་དང་། བྱ་ཀ་ལ་པིང་ཀ་རིན་པོ་ཆེ་སྣ་བདུན་ལྟ་བུ་ཡིན་ལ། ཁ་ཅིག་དངུལ་གྱི་མདོག་ལྟ་བུ་ཡིན་ནོ། །དེ་དག་ཐམས་ཅད་མཐོང་བ་བདེ་བ། སྒྲ་སྙན་ཅིང་འཇེབས་པ་འབྱིན་པ་ལ་མཁས་པ་ཡིན་ཏེ། ཁ་ཅིག་ནམ་མཁའ་ལ་བདག་ཉིད་ཕན་ཚུན་འཁོར་ལོ་བཞིན་བྱས་ནས་རྩེ་བར་བྱེད་དེ། ཇི་ལྟར་ལྷ་རྣམས་ཀྱི་རོལ་མོའི་སྒྲ་འབྱུང་བ་དེ་ལྟར་ཡོངས་སུ་འབྱིན་པར་བྱེད་ཅིང་། ཇི་ལྟར་ལྷ་མོའི་ཚོགས་ཡན་ལག་ལྔ་དང་ལྡན་པ་ལ་ཤིན་ཏུ་ཆགས་པར་འགྱུར་བ་དེ་ལྟར་སྒྲ་གཞན་དག་འབྱུང་བར་བྱེད་དོ། །གཞན་ཁ་ཅིག་པད་མའི་ཚལ་བུང་བའི་ཚོགས་ཀྱིས་ཉེ་བར་མཛེས་པར་བྱས་པ་རྣམས་སུ་བྱ་མོ་རྣམས་དང་ལྷན་ཅིག་བཅས་པར་དགའ་བར་བྱེད་སྐད་འབྱིན་པར་བྱེད་དོ། །གཞན་དག་སྐམ་ས་ལ་འདུག་ནས་བྱ་མོ་རྣམས་དང་ལྷན་ཅིག་བཅས་པར་དགའ་བར་བྱེད་དགའ་དགུར་སྤྱོད་པར་བྱེད་དོ། །གཞན་དག་གསེར་དང་དངུལ་གྱི་ཤིང་ལྗོན་པ་འདབ་མ་སྣ་ཚོགས་ཀྱིས་ཉེ་བར་མཛེས་པར་བྱས་པ་རྣམས་ཀྱི་ནང་ན་དེའི་གྲིབ་མས་ལུས་མངོན་པར་བརྒྱན་པ་རྣམས་རྩེ་བར་བྱེད་དགའ་དགུར་སྤྱོད་པར་བྱེད་དེ། དེ་ལྟར་བྱ་དེ་དག་དགའ་བར་བྱེད་དོ། །དེ་ནས་བྱ་དེ་རྣམས་ཡོངས་སུ་རྩེ་བ་ན་ལྷ་དེ་རྣམས་ཀྱིས་
མཐོང་ནས། དེ་ནས་ཡང་རབ་ཏུ་དགའ་བའི་ཡིད་དང་རྣར་སྙན་པའི་ཡིད་ཀྱིས་བྱའི་སྒྲ་རྣམ་པ་སྣ་ཚོགས་འབྱིན་པ་བདེ་བར་ཐོས་སོ། །དེ་ནས་ལྷ་དེ་དག་དང་ལྷ་མོ་དེ་དག་ཀྱང་ནམ་མཁའ་ལ་རྒྱུ་བ་དེ་དག་གི་ནང་དུ་ཞུགས་ནས། ནམ་མཁའ་ལ་རྒྱུ་ཞིང་རྩེ་བར་བྱེད་དོ། །དེ་བཞིན་དུ་བྱ་ཆུ་ལ་རྒྱུ་བ་རྣམས་དང་ལྷན་ཅིག་ཆུའི་ནང་ན་རྒྱུ། སྐམ་ལ་རྒྱུ་བ་རྣམས་དང་ལྷན་ཅིག་སྐམ་ལ་རྒྱུ་ཞིང་རྩེ་བར་བྱེད་དོ། །ལྷ་དེ་དག་ཀྱང་ལྷ་མོ་རྣམས་དང་ལྷན་ཅིག་བྱ་དེ་དག་དང་དེ་བཞིན་རྩེ་བར་བྱེད། དགའ་དགུར་སྤྱོད་པར་བྱེད་དོ། །དེ་ནས་དགེ་སློང་དེས་ལྷ་དེ་དག་དང་བྱ་དེ་དག་མཚུངས་པར་འདོད་པས་སེམས་ཕྲོགས་ཤིང་མྱོས་པ་རྣམས་ལ་འདི་ལྟར་ཚིགས་སུ་བཅད་དེ་སྨྲས་པ། དུད་འགྲོ་འདོད་པ་སྤྱོད་པ་དག །གཏི་མུག་གིས་ནི་བསྐྱོད་པ་ཡིན། །དེ་ལྟ་བས་ན་ལྷ་རྣམས་ནི། །ལྷ་དང་དུད་འགྲོ་མཚུངས་པ་ཡིན། །སྐལ་བ་བཟང་པོ་ཐོབ་པའི་མི། །བག་མེད་རྣམས་ལ་མི་སྤྱོད་ན། །དེ་ནི་མཁས་པ་ཞེས་བརྗོད་དེ། །དེ་ལས་ཟློག་པ་གཞན་ཡིན་ནོ། །ལྷ་རྣམས་བག་མེད་པ་ཡིས་ཕྲོགས། །སེམས་ཅན་དམྱལ་བར་རབ་ཏུ་འགྲོ། །དེ་ལྟ་བས་ན་མཁས་པ་རྣམས། །བག་མེད་དུག་དང་འདྲ་བར་བརྗོད། །བློ་ཞན་བག་མེད་རྣམ་དག་གིས། །སྔར་ནི་བདེ་བ་ལྟ་བུར་མཐོང་། །བག་མེད་ལས་བྱུང་འབྲས་ཐོབ་ནས། །དོན་མེད་དེ་ནི་ཕྱིས་གདུང་ངོ་། །སྐྱེ་བོ་མཁས་པས་བག་མེད་པ། །དོན་ཀུན་མེད་པར་བྱེད་མཐོང་ནས། །དེ་ལྟར་དེ་ལས་གཞན་དགེ་བ། །གང་ཡིན་བག་མེད་མི་སྟེན་ཏོ། །བག་མེད་གཞན་དུ་སྡུག་བསྔལ་ཞིང་། །བག་ཡོད་གཞན་དུ་བདེ་བ་སྟེ། །བག་མེད་པ་དང་བག་ཡོད་དག །མཚན་ཉིད་བསྡུས་ཏེ་བཤད་པ་ཡིན། །གང་ཞིག་སྡུག་བསྔལ་འདོད་འགྱུར་བ། །དེ་ནི་བག་མེད་སྟེན་པར་བྱེད། །གང་ཞིག་ཤིན་ཏུ་བག་མེད་པ། །ནམ་ཡང་བདེ་བ་མི་འཐོབ་བོ། །བག་མེད་བྲལ་བ་དམ་པ་ནི། །འཆི་བ་མེད་པའི་གནས་སུ་འགྲོ། །གང་ཞིག་ཤིན་ཏུ་བག་ཡོད་པ། །དམྱལ་བའི་སྡུག་བསྔལ་མི་མྱོང་ངོ་། །གལ་ཏེ་བློ་ཞན་ལྷ་རྣམས་དང་། །དུད་འགྲོ་མཚུངས་པར་རྩེ་བྱེད་ན། །ལྷ་རྣམས་དང་ནི་དུད་འགྲོ་དག །ཁྱད་པར་མེད་པ་ཉིད་ཡིན་ནོ། །ལྷ་དང་ལྷ་མ་ཡིན་དང་ནི། །ཡི་དགས་དེ་བཞིན་དམྱལ་བ་རྣམས། །
རིས་འཐུན་བློ་དང་འགྲོ་བ་དག །ཀུན་དུ་མི་འཐུན་ཐ་དད་དོ། །བློ་མི་འཐུན་པས་ལས་མི་འཐུན། །ལས་མི་འཐུན་ལས་དེ་བཞིན་འགྲོ། །ལས་མི་འཐུན་པ་སྣ་ཚོགས་ལས། །འགྲོ་བ་རྣམས་ཀྱང་སྣང་བ་ཡིན། །ལས་རྣམས་སྣ་ཚོགས་ཐ་དད་པས། །ལྷ་རྣམས་ཤིན་ཏུ་བག་མེད་དེ། །ལྷ་ཡི་འཇིག་རྟེན་ལས་ལྟུང་བ། །ཁོང་དུ་ཆུད་པར་མི་འགྱུར་རོ། །གང་ཚེ་ལྷ་ཡི་འཇིག་རྟེན་ལས། །ལྟུང་བར་འགྱུར་བ་དེ་ཚེ་ལྷ། །ཁྱེད་ཀྱི་སྡུག་བསྔལ་ཉེ་བ་ཡིན། །བདག་ཉིད་བདེ་བ་ཤེས་པར་གྱིས། །དེ་ལྟར་རྟོག་པས་རྣམ་པར་ཉམས། །བག་མེད་པས་ཀྱང་བསླུས་པ་ཡིན། །སྲེད་པས་གདུངས་པའི་ལྷ་རྣམས་ནི། །སེམས་ཅན་དམྱལ་བར་ལྟུང་བར་འགྱུར། །ལྷ་དག་དམྱལ་བར་གང་སོང་བ། །འདི་ནི་ཤིན་ཏུ་དཔྱ་བ་ཡིན། །རྩེ་མོ་ཉམས་སུ་ལེན་འགྱུར་རྣམས། །གནོད་པ་མི་བཟད་ཉམས་སུ་མྱོང་། །སྲོག་ཆགས་སེམས་ནི་རྨོངས་པ་དག །འཁོར་བ་ལས་ནི་ཡིད་མི་འབྱུང་། །སྲེད་པས་ཡོངས་སུ་བསླུས་པ་རྣམས། །སྡུག་བསྔལ་ལས་ནི་སྡུག་བསྔལ་འཐོབ། །དེ་ལྟར་དགེ་སློང་དེས་ལྷ་དེ་རྣམས་ནི་ཤིན་ཏུ་བག་མེད་པ་ཁོང་དུ་ཆུད་ནས་རྗེས་སུ་སྟོན་པར་བྱེད་དོ། །དེ་ནས་ལྷ་དེ་རྣམས་ཡུལ་གྱི་བདེ་བ་ཐམས་ཅད་ཉེ་བར་མྱོང་ཡང་། ཇི་ལྟར་མེ་ཤིང་ལ་མཆེད་པ་ལྟར་ཡུལ་རྣམས་ཀྱིས་ཚིམ་པ་ཉིད་མེད་དེ། ཇི་སྲིད་དུ་ལས་བྱས་ཤིང་བསགས་པ་དེ་ཟད་པར་མ་གྱུར་པ་དེ་སྲིད་དུ་དགའ་བར་བྱེད་ལ། དེའི་འདོད་པ་སྡུག་པ་ཡིད་དུ་འོང་བའི་བདེ་བ་རྗེས་སུ་མྱོང་བར་བྱེད་དོ། །དེ་ཟད་ནས་དེ་ནས་ཡང་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ལས་དེ་དང་རྒྱུ་འཐུན་པར་དེ་རྟག་ཏུ་ཤིན་ཏུ་བདེ་བར་འགྱུར། ཟས་དང་སྐོམ་མང་བའི་ཡུལ་དུ་ནོར་དང་འབྲུའི་བང་མཛོད་མང་པོ་འབྱོར་པ་དང་རྒྱལ་པོའམ་བློན་པོ་ཆེན་པོ་བྱེད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་ས་ལ་རྟོག་པར་བྱེད་དེ། དེས་ཐོས་པ་ལས་
བྱུང་བའི་ཤེས་པས་ལྷ་རྣམས་ཀྱི་གནས་ཚང་ཚིང་གི་འགྲམ་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་སྐྱེས་བུ་དམ་པ་སེམས་དགེ་བར་བསྒོམས་པའི་སྙིང་དང་ལྡན་པ་གང་གིས་བསམ་གཏན་དང་པོ་ཐོབ་པའི་དགེ་སློང་དག་ལ་བསོད་སྙོམས་བྱིན་ཞིང་གཞན་དག་ཀྱང་སྦྱིན་དུ་འཇུག །བྱིན་པ་ལ་རྗེས་སུ་ཡི་རང་བར་བྱེད། གཞན་དག་ཀྱང་དེ་ཉིད་ལ་རབ་ཏུ་དགའ་བར་བྱེད། རབ་ཏུ་འཛུད་པར་བྱེད་རབ་ཏུ་འཇོག་པར་བྱེད་དེ། དེ་ལྟར་སྦྱིན་པ་ལ་བདག་ཉིད་མངོན་པར་དགའ་བ་ཡིན། སྲོག་གཅོད་པ་དང་མ་བྱིན་པར་ལེན་པ་དག་དང་བྲལ་བ་ཇི་ལྟ་བུ་ཞིག་ཡིན། འདི་ལ་མ་བྱིན་པར་ལེན་པ་སྤངས་པ་རྣམ་པ་དུ་ཡོད་རྣམ་པ་ཇི་ལྟ་བུ་ཡིན་ཞེ་ན། འདི་ནི་ལམ་དུ་ཞུགས་པ་ན་ཁྲོན་པ་དང་ལྟེང་ཀ་དང་འབབ་ཆུ་དག་ཏུ་འགྲོན་པོ་རྣམས་ལ་ཕན་པར་བྱ་བའི་ཕྱིར་ཆུ་རྫའམ་ཁམ་ཕོར་སྦྱར་བ་གང་ཡིན་པ་དེ་དག་ལ་གཞན་གྱིས་འདི་ལྟར་དབྱེ་འདི་ནི་རྒྱ་ཆེ་ཞིང་ཕྱོགས་གཞན་ན་ཡང་ཆུ་མེད་ལ་བདག་ཅག་ལ་ཡང་ཆུ་སྣོད་ཆུ་རྫའམ་ཕྲུ་བ་ཁྱེར་བ་མེད་དེ། དེ་གལ་ཏེ་བདག་ཅག་གིས་ཁྲོན་པའི་ཕྱོགས་དེ་ནས་མ་ཁྱེར་ན་སྐོམ་པས་བདག་ཅག་གི་སྲོག་ཆད་པར་འགྱུར་རོ། །ཞེས་བསྐུལ་ཀྱང་དེ་ལེན་པར་མི་བྱེད་པ་ཡིན་ཏེ། བདག་ཉིད་སྐོམ་པར་ཤེས་ཀྱང་མ་བྱིན་པར་ལེན་པའི་འཇིགས་པས་ཆུ་རྫའམ་ཁམ་ཕོར་ལེན་པར་མི་བྱེད་ལ་གཞན་ལེན་པ་ལ་ཡང་རྗེས་སུ་ཡི་རང་བར་མི་བྱེད། ཕྱིར་ཟློག་པར་བྱེད། དགེ་བའི་ལམ་ལ་རབ་ཏུ་འཇོག་པར་བྱེད་དེ། དེ་ལྟར་མ་བྱིན་པར་ལེན་པ་སྤངས་པ་ཡིན་ཞིང་རྣམ་པ་དེ་དག་ཡིན་ཏེ་སྲོག་ཆད་པར་འགྱུར་ཡང་མ་བྱིན་པར་ལེན་པ་མི་བྱེད་པ་ཡིན་ནོ། །སྲོག་གཅོད་པ་སྤངས་པ་ཇི་ལྟ་བུ་ཡིན་རྣམ་པ་དུ་ཡོད་ཅེ་ན། འདི་ལ་བདག་ཉིད་སྲོག་གཅོད་པར་མི་བྱེད་གཞན་བྱེད་པ་ཡང་ཕྱིར་ཟློག་པར་བྱེད། རབ་ཏུ་མི་འཇོག་པར་བྱེད། བྱས་ན་ཡང་སྐྱོན་དུ་འགྲང་ཞིང་མང་དུ་སྨོད་པར་བྱེད་པ་ཡིན་ནོ། །འདི་ནི་སྐར་ཁུང་ནས་འོང་བའམ་གཡོགས་པའི་སྟེང་ན་འདུག་པའམ་ཉི་མའམ་དུད་པས་གདུངས་པ་ན་སྲིན་བུ་ཕྲེའུའམ་གྲོག་སྦུར་ཕྲ་མོ་དག་ལ་ཡང་ཀུན་ནས་གནོད་
པའི་སེམས་ཀྱིས་གནོད་པར་མི་བྱེད། སྲོག་དང་བྲལ་བར་མི་བྱེད། །གཞན་བྱེད་ན་ཡང་ཕྱིར་ཟློག་པར་བྱེད། སྐྱོན་དུ་འགྲང་བར་བྱེད། དགེ་བའི་ལམ་ལ་རབ་ཏུ་འཇོག་པར་བྱེད། དགེ་བའི་མི་བདག་ཉིད་དགེ་བ་བྱེད་ཅིང་གཞན་ཡང་རབ་ཏུ་འཇོག་པར་བྱེད་པ་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་འདྲེས་པའི་འགྲམ་ན་གནས་པའི་སར་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ་དེ་དགེ་བའི་ལས་ལ་སྤྱོད་པ། ལས་བྱས་པའི་རྣམ་པར་སྨིན་པ་ལས་འབྱུང་བ་ནི་འདི་ལྟ་སྟེ། དུས་ཀྱི་ཚལ་རྒྱ་ཆེ་ཞེས་བྱ་བ་འབྱུང་སྟེ། ཚལ་དེ་ན་རིན་པོ་ཆེ་སྣ་ཚོགས་ཀྱི་འོད་གསལ་བ་རིན་པོ་ཆེ་ཨན་ད་རྙིལ་དང་། བཻ་ཌཱུརྱའི་འོད་དྲི་མ་མེད་ཅིང་གསལ་ལ་བྱ་སྣ་ཚོགས་སྒྲ་འབྱིན་པ་རྣར་སྙན་པ་དུས་ཚིགས་དྲུག་ཏུ་རྟག་པར་ཤིང་ལྗོན་པ་མེ་ཏོག་མཆོག་རབ་ཏུ་རྒྱས་པ་འབབ་ཆུ་དང་ཆུ་ཀླུང་དང་ལྟེང་ཀས་བརྒྱན་པ་རིན་པོ་ཆེ་ཨན་ད་རྙིལ་དང་བཻ་ཌཱུརྱའི་པད་མ་ཉམས་དགའ་བ་གསེར་བཙོ་མའི་རི་བོ་མཐོན་པོས་བརྒྱན་པ་ཆུ་ན་རྒྱུ་བ་དང་སྐམ་ལ་རྒྱུ་བའི་བྱ་རི་བོ་མཐོན་པོའི་གསབ་གསེབ་དང་འགྲམ་ན་གནས་པ། གཟུགས་དང་ཆ་བྱད་སྣ་ཚོགས་སུ་འདུག་པ། སྒྲ་སྐད་ཆེན་པོ་འབྱིན་པ་རྣམས་ཀྱིས་བརྒྱན་པ་དགེ་བའི་ལས་ཀྱི་འབྲས་བུས་སྤྲུལ་པ་ན། ལྷ་དེ་དགེ་བའི་ལས་ཀྱི་འབྲས་བུ་ལ་སྤྱོད་དེ་ཡུན་རིང་དུ་བདེ་བ་རྒྱུན་མི་འཆད་པར་སྤྱོད་དོ། །ལྷ་མོའི་ཚོགས་རྣམ་པ་སྣ་ཚོགས་སྟོང་སྙེད་ཀྱིས་ཡོངས་སུ་བསྐོར་ཅིང་། ལྷའི་ཕྲེང་བ་དང་གོས་གྱོན་ལ་དཔལ་རྣམ་པ་སྣ་ཚོགས་ཀྱི་གཟུགས་དང་ལྡན་པ་དེ། ལྷ་མོ་དེ་དག་ཉེ་བར་གླུ་དབྱངས་ལེན་ཅིང་ཡོངས་སུ་སྤྱོད་པ་ན། ཚལ་དེར་རྣམ་པར་རྒྱུ་བར་བྱེད་དོ། །དེ་རྒྱུ་བ་ན་དགེ་བའི་ལས་དེས་བསྐུལ་བའི་བྱ་རྣམས་ཀྱིས་འདི་ལྟར་ཚིགས་སུ་བཅད་དེ་སྨྲས་པ། དགེ་བའི་ལས་ཀྱིས་སྐྱེ་བོ་དག །ལྷ་ཡི་ཡུལ་དུ་མཆོད་པར་འགྱུར། །དེ་ལྟར་མི་དགེས་དམྱལ་བར་ཁྲིད། །ལས་ཀྱི་འགྱུར་བ་དེ་འདྲའོ། །ལྷ་ཡི་འཇིག་རྟེན་ཐོབ་ནས་སུ། །ལྷ་གང་ཁྱད་དུ་གསོད་མི་བྱེད། །གང་དུ་སྲེད་པས་མི་གནོད་པ། །དེ་ནི་བདེ་ལས་བདེ་བར་འགྲོ། །ལས་ཀྱི་ཐག་པ་རིང་པོ་ཡིས། །སྲིད་པར་རྒྱུ་བ་བཅིངས་པ་རྣམས། །དགྲ་དག་འཁོར་
ལོས་བཅིངས་པ་ལྟར། །དབང་མེད་ལས་ཀྱིས་འཁྱམ་པར་བྱེད། །ཇི་ལྟར་མཁའ་ལ་རླུང་ཤུགས་ཀྱིས། །ཕྱག་དར་དུམ་བུར་གཏོར་བ་ལྟར། །དེ་ལྟར་སྲིད་པར་རྒྱུ་བ་རྣམས། །སྟེང་དང་ཐད་ཀར་འཁྱམ་པར་འགྱུར། །ཇི་ལྟར་རྒྱུ་དང་རྐྱེན་དག་ལས། །པད་མ་བྱུང་བ་མཛེས་པ་ལྟར། །དེ་བཞིན་དགེ་བའི་ལས་ཀྱིས་སུ། །ལྷ་ཡུལ་དུ་ནི་བྱུང་བ་མཛེས། །ཇི་ལྟར་ཤེལ་ནི་རབ་དང་ཞིང་། །ཇི་ལྟར་ནམ་མཁའ་རབ་དང་ལྟར། །དེ་ལྟར་སེམས་ནི་རབ་དང་བ། །བདེ་བ་མཆོག་ཏུ་འགྲོ་བར་འགྱུར། །དེ་ཡིས་ལྔ་དག་བསྲུངས་པ་ཡིས། །རྟག་ཏུ་བཅིངས་པ་གསུམ་ལས་གྲོལ། །ཆོས་གཅིག་ལས་ནི་རབ་འདས་པ། །ལྷ་ཡི་འཇིག་རྟེན་མཆོད་པར་འགྱུར། །ངོ་ཚ་མེད་ཅིང་ཁྲེལ་མེད་དང་། །རྒོད་དང་སྡིག་པའི་གྲོགས་པོ་ནི། །འདི་དག་དུག་དང་མེ་དང་འདྲ། །མཁས་པས་དེ་དག་བསྲུང་བར་གྱིས། །བདེན་དང་སྦྱིན་དང་དེ་བཞིན་དུ། །བཟོད་དང་རྟག་ཏུ་དགེ་བཤེས་གཉེན། །འབྱུང་པོ་རྣམས་ལ་རྟག་བྱམས་པ། །ལྷ་ཡུལ་གྱི་ནི་ལམ་རྒྱགས་ཡིན། །མི་དག་སེམས་ལ་གཡོ་མེད་པ། །བདེ་བས་བསྐྱོད་པ་མཉམ་བཞག་པ། །རང་གི་ལས་འབྲས་མངོན་སུམ་སྟེ། །ལྷ་ཡི་གནས་སུ་འོངས་པ་ཡིན། །ཆོས་དང་ཆོས་མིན་གཙོར་འཛིན་པ། །ཀུན་ནས་འཇིག་རྟེན་སྲོག་ཡིན་ཏེ། །འདི་ལྟར་ཆོས་ལས་སྐྱོབ་གཞན་མེད། །དེ་བས་ཆོས་ལ་དགའ་བར་གྱིས། །གང་ཞིག་ཆོས་ནི་ཡོངས་སྤངས་ནས། །མི་དག་ཉེས་པར་བྱེད་ལ་དགའ། །དེ་ནི་ཉེས་པས་གདུངས་པ་ཡིས། །རྟག་ཏུ་སྡུག་བསྔལ་ཉིད་དུ་འགྱུར། །ལྷ་ཡི་འཇིག་རྟེན་ཐོབ་ནས་སུ། །བག་མེད་རྣམས་ལ་ཆགས་གྱུར་པ། །དེ་ནི་དགེ་བའི་ལས་མཐའ་ཟད། །འཆི་བའི་མཐའ་ནི་མི་རིག་གོ །གང་ན་འཆི་བར་འགྱུར་བ་མེད། །དེ་ནི་གཏན་དུ་བདེ་དང་ལེགས། །འཆི་བའི་ཞགས་པས་བཅིངས་པ་དག །ནམ་ཡང་བདེ་བ་ཡོད་མ་ཡིན། །ཇི་ལྟ་ཇི་ལྟར་བདེ་ཐོབ་པ། །དེ་ལྟར་སྲེད་པའི་ཚོགས་འཕེལ་ལོ། །སྲེད་པའི་མེ་ཡིས་གདུངས་པ་ནི། །སེམས་ཅན་དམྱལ་བར་ཉེ་བར་འདྲེན། །ལྷ་ལ་བག་མེད་མི་རིགས་ཀྱིས། །ཤིན་ཏུ་བག་མེད་མ་བྱེད་ཅིག །བག་མེད་ཉེས་པས་རྣམ་ཉམས་པ། །སུམ་ཅུ་རྩ་གསུམ་གནས་ནས་འཆི། །དེ་ལྟར་བྱ་
དེ་རྣམས་ཀྱིས་རྗེས་སུ་བསྟན་པ་ན། ལྷ་མོས་ཡིད་གཡེངས་ཤིང་ཡུལ་གྱི་སྲེད་པས་བློ་གྲོས་དང་བློ་ཕྲོགས་པ་དང་བྱའི་སྒྲ་རྣམ་པར་འབྱིན་པ་བདེན་པ་དེ་ཐོས་པར་མི་འགྱུར་ལ། དེ་ཚལ་དང་ཉེ་བའི་ཚལ་དང་ལྟེང་ཀ་དང་འབབ་ཆུ་དག་ལ་རྗེས་སུ་སྟེན་པར་བྱེད་དོ། །དེ་གལ་ཏེ་ཀུན་དགའ་ར་བ་བདེ་བར་གནས་པའི་ལྟེང་ཀ་ཞེས་བྱ་བ་རི་མཐོ་བ་ག་ལ་བ་དེར་འདོང་བར་བྱེད་དོ། །རི་མཐོ་བ་དེ་ན་བྱ་མངོན་པར་དགའ་བ་ཞེས་བྱ་བ་བྱ་མོ་རྣམས་དང་ལྷན་ཅིག་ཕན་ཚུན་དགའ་ཞིང་ཕན་ཚུན་ཤིན་ཏུ་ལྟ་འདོད་པ་དག་ལྟེང་ཀ་དང་པད་མའི་ཚལ་སྣ་ཚོགས་དེ་རྣམས་སུ་རྩེ་བར་བྱེད་དོ། །དེ་ནས་བྱ་དེ་རྣམས་མཐོང་ནས་ལྷ་དེ་དག་འདི་སྙམ་དུ་སེམས་ཏེ། ཀྱེ་ཨེ་མ་བྱ་གཟུགས་སྣ་ཚོགས་ཅན་འདི་དག་སྒྲ་སྣ་ཚོགས་འབྱིན་ཅིང་ཉམས་དགའ་བར་བྱེད་པ་ཡིན་ཏེ། མཐོ་རིས་ཀྱི་བྱ་བསྡུས་པ་ཐམས་ཅད་འཐུན་པར་སྒྲ་འབྱིན་པའམ་སྣ་ཚོགས་སུ་སྒྲ་འབྱིན་པར་བྱེད་པའི་བྱ་དེ་རྣམས་ཀྱི་སྟེང་དུ་གནས་བཅས་ལ་བདག་ཞོན་ཏེ། ཚལ་དང་ཉེ་བའི་ཚལ་དང་ལྟེང་ཀ་དག་བལྟ་བར་བྱའོ་སྙམ་མོ། །དེ་ནས་སེམས་བསྐྱེད་མ་ཐག་ཉིད་དུ་ལྷ་དེ་དག་གི་བྱ་རྣམས་ལུས་ཆེན་པོར་གྱུར་ནས། ལྷ་དེ་དག་ག་ལ་བ་དེར་མྱུར་དུ་ཉེ་བར་འདོང་བར་བྱེད་དོ། །དེ་ནས་ལྷ་དེས་བྱ་དེ་དག་ལ་ལག་གིས་ཉུག་པར་བྱེད་དོ། །བྱུགས་ནས་ཀྱང་ཞོན་ནོ། །དེ་ནས་བྱ་རྣམས་ལ་ཞོན་མ་ཐག་ཉིད་དུ་ལས་སྤྲུལ་པ་མངོན་པར་དགའ་བའི་བྱའི་ཚོགས་དག་ནམ་མཁའ་ལ་འདོང་བར་བྱེད་དོ། །དེ་ནས་བྱ་སྣ་ཚོགས་པ་དེ་རྣམས་ཀྱི་རྒྱབ་ཏུ་ཞོན་མ་ཐག་ཉིད་དུ་ཡིད་ལ་རིན་པོ་ཆེ་སྣ་བདུན་གྱི་གཞལ་མེད་ཁང་ཚལ་དང་ཉེ་བའི་ཚལ་དང་ལྟེང་ཀ་དང་འབབ་ཆུ་དང་པད་མ་ཕུན་སུམ་ཚོགས་ཤིང་བྱ་རྣམ་པ་སྣ་ཚོགས་ཉེ་བར་རྩེ་བར་སེམས་པར་བྱེད་དོ། །དེ་ནས་སེམས་བསྐྱེད་མ་ཐག་ཉིད་དུ་བྱ་དེ་རྣམས་ཀྱི་རྒྱབ་ཏུ་གཞལ་མེད་ཁང་དེ་དག་ཇི་ལྟར་ལྷ་དེས་ཡིད་ལ་བསམས་པ་དེ་བཞིན་དུ་འབྱུང་ངོ་། །དེ་ནས་ལྷ་དེ་དག་གི་ཕྱི་བཞིན་དུ་ལྷ་མོ་ཆ་བྱད་རྣམ་པ་སྣ་ཚོགས་ཐོགས་པ་དག་རྗེས་སུ་འབྲང་ཞིང་ཉེ་བར་སྤྱོད་པ་ན་ནམ་མཁའི་དཀྱིལ་ནས་འདོང་སྟེ་ཡུལ་ནས་ཡུལ་དག་ཏུ་འདོང་བར་བྱེད་ལ། དེ་ཐམས་ཅད་ལྷའི་བདེ་བ་དག་གིས་རྩེ་ཞིང་ཉེ་བར་སྤྱོད་པ་ན། མཐོ་རིས་ཀྱི་གནས་
དག་ལ་དགའ་བ་དང་ཤིན་ཏུ་དགའ་བ་དང་མཆོག་ཏུ་དགའ་བར་རྟོག་པར་བྱེད་དོ། །དེས་ས་དེ་དག་ལ་རྟོག་རྟོག་ནས་སྲེད་པ་འབུམ་འགྱུར་གྱིས་གཡེང་བར་བྱེད་དེ། འདི་ལྟར་སེམས་ཅན་ཐམས་ཅད་ཀྱི་གནས་དཔེ་བྱ་བར་མི་ནུས་སོ། །དེ་ལྟར་སྒོ་དྲུག་ནས་སྲེད་པའི་མེ་འབར་བ་མཆོག་ཏུ་མི་བཟད་པ་ཡིད་ལ་འབར་བ་ཡིན་ཏེ། དེ་བདེ་བ་གཟུགས་བརྙན་ལྟ་བུའི་སྡུག་བསྔལ་དེས་མངོན་པར་ཉམས་བཞིན་དུ་བྱ་དེ་རྣམས་ཀྱི་སྟེང་དུ་ཞོན་ནས། སིལ་སྙན་ཡན་ལག་ལྔ་དང་ལྡན་པའི་སྒྲ་སྙན་པ་ཡིད་དུ་འོང་བ་དཔེ་མེད་པ་ཉེ་བར་ལེན་ཅིང་རི་རབ་ཀྱི་ཞབས་ཐམས་ཅད་ལ་ལྟ་བར་བྱེད་དེ། དེ་ཚལ་དང་ཉེ་བའི་ཚལ་དང་ལྟེང་ཀ་ཕུན་སུམ་ཚོགས་པ་དང་ནགས་ཚལ་དང་རི་ངོས་དང་ཤིང་ལྗོན་པ་དང་ཕྱོགས་གཅིག་པ་དང་པད་མའི་ཚལ་དུ་མས་ཁེབས་པ་དང་བྱ་སྣ་ཚོགས་ཀྱིས་གང་བ་དང་ལྷ་དང་ལྷ་མོ་དང་ལྷའི་བུ་མོ་ཕན་ཚུན་རྩེ་བ་ན་མཐོང་ངོ་། །ཡུལ་དེ་ན་དགའ་བ་འབུམ་ཕྲག་དུ་མ་ཡོད་དེ། ཡུལ་ཤིན་ཏུ་རྣམ་པར་ཕྱེ་བའི་དགའ་བ་ཐམས་ཅད་མཐོང་ཡང་འདོད་པ་རྣམས་ཀྱིས་དེ་སྲིད་དུ་ཚིམ་པ་མེད་པ་ཉིད་ཡིན་ཏེ། དགའ་བའི་འདོད་ཆགས་ཀྱི་མོད་ལས་སྐྱེས་པའི་སེམས་ཀྱིས་གཡེངས་པའི་སྲེད་པའི་ལྷ་དེ་རྣམས་ཡུལ་དག་གིས་དབང་པོ་རྣམས་ཤིན་ཏུ་ཚིམ་པ་མེད་དོ། །དེ་ལྟར་དེ་ཡུན་རིང་པོ་དུ་མར་བྱའི་སྟེང་གཞལ་མེད་ཁང་ན་གནས་པ་དེས་རི་བོ་ཁྲི་ཕྲག་དྲུག་ཅུའི་ནང་ན། རིའི་རྒྱལ་པོ་རི་རབ་འདུག་པ་དེ་དག་ཐམས་ཅད་ལ་ལྟ་བར་བྱེད་དེ། ལྷ་ལས་ལེགས་པར་བྱས་པ། ཐམས་ཅད་ཀྱི་གནས་དཔེ་མེད་པ་ཉམས་དགའ་བ་རིན་པོ་ཆེ་དུ་མ་འབར་བ། ངོས་བཞི་ཀུན་ནས་ལྷམ་པ་ཁ་དོག་རྣམ་པ་བཞིས་ཤིན་ཏུ་རྣམ་པར་ཕྱེ་བ་ཡིན་ཏེ། འདི་ལྟ་སྟེ། བཻ་ཌཱུརྱ་དང་དངུལ་དང་གསེར་དང་ཤེལ་ཤིན་ཏུ་བཟང་བའི་རི་རབ་དེ་ལ་དེས་མ་ལུས་པར་བལྟས་ནས་རང་རང་གི་གནས་ག་ལ་བ་དེར་འདོང་བར་བྱེད་དོ། །དེ་ལྟར་བྱ་རྣམས་ཀྱི་སྟེང་ན་ཞོན་པ་དེ་དག་བྱ་དེ་དག་ལ་སྣ་ཚོགས་སུ་སེམས་པར་བྱེད་དེ་ཇི་ལྟ་ཇི་ལྟར་ཁ་དོག་དང་གཟུགས་དང་ཆ་བྱད་དང་དབྱིབས་བསམས་པ་དེ་ལྟ་དེ་ལྟར་འགྱུར་རོ། །དེ་ནས་ཡང་དེ་བྱ་དེ་རྣམས་ཀྱི་སྟེང་དུ་ཞོན་ནས་རྫིང་ཆུ་དང་བ་ཞེས་བྱ་བ་ག་ལ་བ་དེར་འདོང་བར་བྱེད་དོ། །རྫིང་དེ་ཡང་ཀུན་ནས་དཔག་ཚད་ལྔ་ཡོད་ལ་ཀུན་ནས་ལྷམ་པ་
རིན་པོ་ཆེ་ཨན་ད་རྙིལ་དང་བཻ་ཌཱུརྱ་རྣམས་ཀྱིས་སྣ་ཚོགས་སུ་བརྒྱན་ཅིང་གཞན་པད་མ་རྣམས་ཀྱིས་ཀྱང་ཉེ་བར་མཛེས་པར་བྱས་པ། ལེགས་པར་བྱས་པའི་ལས་མངོན་སུམ་དུ་གྱུར་པ་དེར་དོང་ནས་དེ་ན་ལྷ་མོ་དེ་རྣམས་དང་ལྷན་ཅིག་ཏུ་ལྷའི་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་རྩེ་བར་བྱེད་དོ། །པད་མ་དེ་རྣམས་ཀྱི་བར་དག་ན་བུང་བ་བཞིན་དུ་སྦྲང་རྩི་དེ་དག་ལ་འཐུང་བར་བྱེད་ཅིང་། བདུད་རྩི་ལ་ཡང་ཟ་བར་བྱེད། ལྷའི་དྲི་དང་རོ་དང་མདོག་ཕུན་སུམ་ཚོགས་ཤིང་། ཟླ་བ་ལྟར་དྲི་མ་མེད་ལ་རོ་དང་ཤིན་ཏུ་ལྡན་པ་དེ་དག་ལ་ཟ་བར་བྱེད་དོ། །གོས་དེ་དག་ཀྱང་གྱོན་ནས་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དེ་དག་དང་ལྷན་ཅིག་ཏུ་དགའ་བར་བྱེད་དགའ་དགུར་སྤྱོད་པར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ལས་དེ་དང་རྒྱུ་འཐུན་པར་དེ་རྟག་པར་ཤིན་ཏུ་བདེ་ཞིང་བཞོན་པ་དང་སྐྱེད་མོས་ཚལ་ཕུན་སུམ་ཚོགས་ལ་སྐྱེ་བོ་ཀུན་དགའ་བའི་རྒྱལ་པོའམ་བློན་པོ་ཆེན་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་རྣམས་ཀྱི་གནས་ནོར་བུའི་སྙིང་པོ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྐྱེས་བུ་དགེ་བ་ཕན་པར་འདོད་པ་གང་གིས་སྲོག་གཅོད་པ་དང་མ་བྱིན་པར་ལེན་པ་མི་བྱེད་ལ་གཞན་བྱེད་པ་ཡང་ཕྱིར་ཟློག་པར་བྱེད་དེ་དགེ་བའི་ལམ་ལ་རབ་ཏུ་འཇོག་པ་ཡིན་ནོ། །བདག་ཉིད་ཀྱིས་སྲོག་གཅོད་པ་མི་བྱེད་པའི་རྣམ་པ་དུ་ཡོད་ཅེ་ན། འདི་ལ་སྦྲང་བུའི་སྦྲང་རྩི་དང་བུང་བའི་སྦྲང་རྩི་དག་ལས་དྲོད་གཤེར་ལས་སྐྱེ་བའི་སྲིན་བུ་དག་འབྱུང་བར་མཐོང་ནས། དེ་སྲོག་གཅོད་པའི་འཇིགས་པས་སྦྲང་རྩི་ཟ་བར་མི་བྱེད་ཅིང་གཞན་ཟ་ན་
ཡང་ཕྱིར་ཟློག་པར་བྱེད་ལ། རྗེས་སུ་ཡི་རང་བར་མི་བྱེད་འདི་ནི་སྡིག་པའི་ཡིན་ནོ་བར་ཤེས་ནས་སྤོང་བར་བྱེད་དེ། དེ་ཐབས་ཀྱིས་ཀུན་ཀྱང་འདྲེ་བར་མི་བྱེད་ལ་མིག་ཟུར་ཙམ་གྱིས་ཀྱང་ལྟ་བར་མི་བྱེད་དེ་སྲོག་གཅོད་པ་དང་བྲལ་བའི་རྣམ་པ་ནི་དེ་དག་ཡིན་ནོ། །མ་བྱིན་པར་ལེན་པ་དང་བྲལ་བ་ཇི་ལྟ་བུ་ཡིན་ཞེ་ན། འདི་ལ་སྡོམ་པ་བླངས་པས་མཆོད་རྟེན་གྱི་གནས་སུ་སངས་རྒྱས་ལ་མར་མེ་ཕུལ་བ་དེའི་འོད་ལ་ཡང་སྐྲུ་བར་མི་བྱེད་ཅིང་དེས་བདག་གི་ལས་མི་བྱེད། དེ་ལས་སྣག་ཚ་ཡང་འབྱིན་པར་མི་བྱེད་ལ་ཕྲ་རབ་ཙམ་ལ་ཡང་འཇིགས་པར་ལྟ་བ་ཡིན་ཏེ། དེ་ལྟར་སྲོག་གཅོད་པ་དང་མ་བྱིན་པར་ལེན་པ་དག་སྤངས་པ་ཡིན་ནོ། །ཡང་སྲོག་གཅོད་པ་དང་མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། འདི་ལ་སྦྲང་བུའམ་སྲོག་ཆགས་མར་ཀོ་ཏ་ཀའམ་ནམ་མཁའ་ལ་རྒྱུ་བ་དག་གསོད་པར་མི་བྱེད་པ་ཡིན་ཏེ། དེ་དག་ལ་འཕྲལ་ལ་བསམས་ནས་གསོད་པར་མི་བྱེད་ལ། གཞན་གྱིས་བཟུང་བ་ཞིག་ཡོད་ན་ཡང་ཐར་བར་བྱེད་སྲོག་གཅོད་པ་བྱས་པ་ཉེས་པར་བྱས་པའི་འབྲས་བུ་འཆགས་པར་བྱེད་གཞན་གྱིས་སྲོག་གཅོད་པ་བྱས་ན། སྡིག་པའི་འབྲས་བུ་སེམས་ཅན་དམྱལ་བ་ཆེན་པོ་ཡང་སོས་སུ་འགྲུབ་ཀྱིས་ཁྱེད་མ་བྱེད་ཅིག་ཅེས་འདོམས་པ་ཡིན་ཏེ། དེ་ལྟར་གཞན་ཡང་བཟློག་ནས་སྡོམ་པ་ལ་རབ་ཏུ་འཇོག་པར་བྱེད་དེ། དེ་ནི་སྡིག་པ་སྤངས་པ་ཡིན་ནོ། །བདག་དང་གཞན་གྱི་རྒྱུད་ཚུལ་ཁྲིམས་ལ་རབ་ཏུ་ཞུགས་པའི་རྒྱུན་རབ་ཏུ་འཇུག་པར་འགྱུར་བ་ནི་འདི་ལ་དགོན་པ་འམ་ལམ་དུ་ཞུགས་པ། ལམ་རྒྱགས་ཉུང་ཡང་སྲོག་ལ་མི་ལྟ་བར་གཞན་ལམ་རྒྱགས་ཉུང་བའམ་ལམ་རྒྱགས་མེད་པ་སྡུག་བསྔལ་བ་ལ་སྲོག་ཡོངས་སུ་བཏང་ནས་རང་གི་ཁ་ཟས་བགོ་བཤའ་བྱེད་པ་དེ་ནི་འབྲས་བུ་ཆེ་བ་ཡིན་ནོ། །ཞིང་གི་འབྲས་བུའི་ཁྱད་པར་སེམས་པ་ནི་དུས་སུ་བྱིན་པ་དང་ལྡན་པ་ཡིན་ཏེ། འདི་ལྟར་ནད་རྣམས་ཀྱི་ནང་ན་བཀྲེས་པ་ནད་ཆེ་བ་ཡིན་ན། དེ་ལ་མ་བལྟས་པར་འབྲས་བུ་ཆེན་པོར་ཡང་དག་པར་སྦྱོར་བ་ཡིན་ནོ། །དེ་ལྟར་ཚུལ་ཁྲིམས་གཉི་ག་སྲུང་བ་བདག་དང་། གཞན་ལ་ཕན་པར་རབ་ཏུ་ཞུགས་པ་སེམས་རྙོག་པ་མེད་པ་དྲང་པོའི་རང་བཞིན་ཅན་སེམས་ཅན་ཤིན་ཏུ་མི་དགེ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་དེ། མ་དང་
ཕའི་ལུས་ལ་ནོར་བུ་དག་གི་རྒྱན་འདོགས་པའམ་སངས་རྒྱས་ལ་ནོར་བུ་དག་གི་རྒྱན་འབུལ་བའི་མི་དེ་ལུས་དང་བྲལ་ནས། སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ནོར་བུའི་སྙིང་པོའི་སར་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱེད་པའི་ལས་བྱས་པ་དེ་ཤིན་ཏུ་བལྟ་ན་སྡུག་པ་ལྷའི་ཡུལ་གྱི་བདེ་བ་བྱུང་སྟེ། འདི་ལྟ་སྟེ། དགེ་བའི་ལས་ཀྱི་མཐའ་སྤྱད་པ་དེའི་ལུས་དེ་ཐམས་ཅད་གཟི་བརྗིད་འབྱུང་ལ། ལུས་དེ་ལས་གཟི་བརྗིད་འབྱུང་བ་ཀུན་དུ་དཔག་ཚད་ལྔ་བརྒྱར་འབྱུང་ངོ་། །དཔེར་ན་ཉི་མ་ཤར་བ་ན་ཉི་མས་རི་གསལ་བར་བྱེད་པ། དེ་ལྟར་དེའི་གསལ་བས་ཐམས་ཅད་དུ་སྣང་བར་བྱེད་ལ་གནས་གཞན་ཐམས་ཅད་ཀྱང་དེའི་རབ་ཏུ་གསལ་བ་དེས་དེ་ནས་ཡང་བརྒྱ་འགྱུར་དུ་རབ་ཏུ་གསལ་བར་བྱེད་དོ། །མདོག་སྔོན་པོ་དང་། སེར་པོ་དང་། བཙོད་ཀ་དང་། དམར་པོ་རྣམས་ཀྱིས་གསལ་བར་བྱེད་དོ། །དཔེར་ན་འཇའི་མདོག་མཛེས་པར་འགྱུར་བ་དེ་བས་ཀྱང་ལྷའི་རང་གི་ལུས་ལས་འོད་བྱུང་བ་བརྒྱ་འགྱུར་གྱིས་མཛེས་པ་ཡིན་ཏེ། དགེ་བའི་ལས་དེས་མངོན་པར་བསྒྲུབས་པའི་ལུས་ཀྱི་འོད་བྱུང་བས་ལྷའི་ཚོགས་ཐམས་ཅད་ཟིལ་གྱིས་མནན་ནས་རྣམ་པར་མཛེས་སོ། །ཇི་ལྟར་ཉི་མའི་འོད་ཀྱིས་གཟའ་དང་སྐར་མ་དང་རྒྱུ་སྐར་ཐམས་ཅད་ཟིལ་གྱིས་མནན་ནས་རྣམ་པར་མཛེས་པ་དེ་བཞིན་དུ། ལྷ་དེ་འོད་ཀྱི་ཕྲེང་བ་འབར་ཞིང་དེ་རང་གི་གཟི་བརྗིད་དེས་འབར་བ་ན་རང་གི་གནས་དེ་དག་ལ་རྟོག་པར་བྱེད་དོ། །གནས་དེ་ཡང་ཀུན་ནས་ནོར་བུ་རྣམ་པ་སྣ་ཚོགས་ཀྱིས་ཉེ་བར་སྤྲས་ཤིང་སྣ་ཚོགས་སུ་བརྒྱན་པ། ཀུན་ནས་ཐམས་ཅད་དུ་རྣམ་པར་མཛེས་པ་ཡིན་ཏེ་ཉི་མ་བརྒྱ་ལྟ་བུར་འོད་འབྱུང་བ་ཡིན་ནོ། །དེས་དེ་དག་མཐོང་ནས་ཡིད་རབ་ཏུ་དགའ་བས་ཕྱོགས་གཉིས་པ་ལ་རྟོག་པར་བྱེད་དེ། དེ་ན་ལྷ་མོ་གཟུགས་བཟང་མོ་དང་ལྡན་པ་རྒྱན་དཔེ་མེད་པ་ཐོགས་པ་འདོད་པའི་རྒྱུ་རྣམ་པ་སྣ་ཚོགས་སྐྱེད་པ་སྟེན་པ་དག་མཐོང་སྟེ། འདི་ལྟ་སྟེ། དེ་དག་གི་ནང་ནས་ཁ་ཅིག་ནི་རོལ་མོའི་རྣམ་པ་རྫ་རྔ་དང་། གླིང་བུ་དང་། ལྕགས་ཀྱི་སིལ་དཀྲོལ་དེ་དག་ལ་སྟེན་ཏོ། །དེ་དག་གི་ནང་ནས་གཞན་ཁ་ཅིག་ནི་ལྷ་མོ་རྣམས་ཀྱི་ནང་དུ་སོང་ནས་བྲོ་རྡུང་ཞིང་གླུ་ལེན་ལ་མེ་ཏོག་ཕྲེང་བས་མགུལ་བརྒྱན་པ་དག་ངང་པ་རྣམས་དང་། ལྷན་ཅིག་པད་མའི་
ཚལ་རྣམས་ཀྱི་ནང་དུ་ཆུ་ལ་རྣམ་པར་རྩེ་བར་བྱེད་དོ། །གཞན་དག་ནི་ལྷའི་འབྲས་བུ་དག་ལ་ཟའོ། །གཞན་དག་ནི་དཔག་བསམ་གྱི་ཤིང་གི་ནང་དུ་དོང་ནས་མེ་ཏོག་རྣམས་འཐོག་པར་བྱེད་ཅིང་ལྷའི་གླུ་དབྱངས་དཔེ་མེད་པ་དག་ཀྱང་ལེན་ཏེ་འདོད་པ་ཡང་དག་པར་སྟོན་པ། སྐྱེ་བོ་ཀུན་གྱི་ཡིད་ཤིན་ཏུ་མགུ་བར་བྱེད་པ་རྣམ་པ་དུ་མ་ཡོད་དོ། །དེ་དེར་སྐྱེས་ཏེ་ལྷ་མོ་དེ་དག་མཐོང་ནས་ཐོག་མ་ཉིད་དུ་ཡུལ་གྱི་མཆོག་འདོད་ཆགས་ཀྱི་སྦྲུལ་གྱི་མཆེ་བ་ལྟ་བུའི་ཡུལ་གྱི་བདེ་བ་ལྔས་མངོན་པར་ཟིན་པ། སྟན་དེ་ལས་ལངས་ནས་གཞན་དུ་འགྲོ་སྟེ་གང་ན་ལྷ་མོ་ན་ཚོད་དཔེ་མེད་པ་དང་ལྡན་པ་ལྷའི་ཕྲེང་བ་དང་། གོས་གྱོན་པ་དེ་དག་མཐོང་ནས་དེ་འདོད་ཆགས་ཀྱི་མེས་ཡོངས་སུ་གདུངས་པའི་ཡིད་ཀྱིས་དེར་འགྲོ་བར་བྱེད་ལ་དེ་དག་ཀྱང་ལྷ་དེ་ག་ལ་བ་དེར་འདོང་བར་བྱེད་དོ། །དེ་ནས་ལྷའི་བུ་གཞན་དེ་འཆི་བ་ན་ཡོངས་སུ་གཏོང་བར་བྱེད་དེ། ཇི་ལྟར་བུང་བ་དག་གིས་མེ་ཏོག་སྐམ་པོ་བོར་ནས་སར་པའི་དྲུང་དུ་འགྲོ་བ་དེ་ལྟར་ལྷ་དེ་འཆི་བ་ན་ལྷ་མོ་དག་གིས་ཡོངས་སུ་བཏང་ནས། མེ་ཏོག་སར་པ་ལྟ་བུའི་ལྷའི་བུ་གཞན་གྱི་དྲུང་དུ་འགྲོ་བར་བྱེད་ལ། མེ་ཏོག་སྣ་ཚོགས་ཀྱི་ཕྲེང་བ་ཐོགས་པ་སྙིང་དུ་སྡུག་ཅིང་ཆགས་པ་ལྷའི་བུ་གཞོན་ནུ་དང་ཐམས་ཅད་དུ་འདྲིས་པ། ཐོག་མ་མེད་པའི་དུས་ནས་གོམས་པའི་འདོད་ཆགས་ཀྱིས་ཉེ་བར་སྤྱོད་པས་རྩེ་བར་བྱེད་དོ། །ལྷའི་བུ་དེ་ཡང་འཆི་བ་ན་རང་གི་ལྷ་མོ་དེ་དག་གཞན་དུ་དོང་བ་མངོན་པར་མཐོང་ནས་ཡིད་ལ་གདུང་བའི་རྣམ་པ་དེ་ལྟ་བུས་ཤིན་ཏུ་གདུངས་ཏེ། ཇི་ལྟར་སེམས་ཅན་དམྱལ་བ་མནར་མེད་པའི་མེས་མནར་མེད་པའི་ལུས་བསྲེགས་པ་དེ་ལྟར་དེའི་སྡུག་པ་གཞན་དུ་དོང་བར་གྱུར་པའི་ཡིད་ལ་འཆི་བའི་སྡུག་བསྔལ་གྱིས་ཡིད་ཤིན་ཏུ་གདུངས་པས་ཤིན་ཏུ་གདུངས་ཏེ། སུམ་ཅུ་རྩ་གསུམ་གྱི་གནས་ནས་ལྷའི་བུ་འཆི་བ་ན་ཕྲག་དོག་དང་། སེར་སྣའི་ཡིད་སྡུག་བསྔལ་བ་དེས་མངོན་པར་ཉམས་པ་དེ་འཆི་བའི་དུས་བྱེད་དོ། །དེ་སྲིད་པ་ཕྱི་མར་སེམས་ཤིན་ཏུ་གདུངས་པ་དེ་ལ་དམིགས་པའི་ཉེ་བར་ལེན་པའི་རྐྱེན་གྱི་སྲིད་པས་སེམས་རྙོག་པ་ཅན་དུ་བྱས་པ་དེ། དེ་ལས་གཞན་ཡང་མི་མཐོང་སྟེ། དེ་དེ་ནས་ཤི་ནས་ཡང་སེམས་ཅན་དམྱལ་བ་དང་ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །དེའི་རྒྱུ་འཐུན་
པའི་འབྲས་བུ་གང་ཞིག་ཡིན་ཞེ་ན་གང་གིས་གཞན་གྱི་བུད་མེད་ལ་སྡོམ་པ་མ་བཟུང་བ་ཡིན་ཏེ་བྱི་བ་བྱས་པ་ཡིན་ནོ། །དེ་གལ་ཏེ་དགེ་བའི་ལས་གཞན་གྱིས་ལྷ་རྣམས་ཀྱི་ནང་དུ་སྐྱེས་ཀྱང་འཆི་བའི་དུས་དེའི་ཚེ། དེ་ལ་གཞན་གྱི་ཆུང་མ་ཕྲོགས་པའི་སྡིག་པའི་ལས་ཀྱི་རྐྱེན་འབྱུང་ངོ་། །དེ་ལྟར་ལེགས་པར་བྱས་པའི་ནང་ན་ཉེས་པར་བྱས་པ་ཡང་དེ་ལྟར་སྨིན་པར་འགྱུར་ཏེ། དེ་ལྟ་བས་ན་ཉེས་པར་བྱེད་པ་ཆུང་ངུ་ཡང་མི་བྱའོ། །ཇི་ལྟར་ལྷ་རྣམས་འཆི་བ་ན་ཚུལ་ཁྲིམས་རྣམ་པ་བདུན་མ་རལ་པའི་རྒྱུ་འཐུན་པའི་འབྲས་བུ་མི་འབྱུང་བ་དེ་ལྟར་འཐབ་བྲལ་བ་རྣམས་ཀྱི་ཡང་ཡིན་ཏེ། དེ་ནི་རྒྱ་ཆེར་ཕྱིས་འཆད་དོ། །དེ་ནས་ལྷའི་བུ་ཤི་བ་དེའི་ལྷའི་བུ་མོ་དེ་དག་ལྷའི་བུ་གསར་དུ་བྱུང་བ་དེ་ག་ལ་བ་དེར་ལྷའི་ཕྲེང་བ་མདོག་བཟང་པོ། དྲི་དང་རེག་པ་མ་རྙིས་པ་དེ་དག་བླངས་ནས་ལྷའི་བུ་དེའི་ལུས་ལ་འདོགས་པར་བྱེད་དོ། །ལྷའི་བུ་དེ་ཡང་ཐོག་མ་སྐྱེས་མ་ཐག་ཏུ་དགའ་ཡིད་རབ་ཏུ་དགའ་སྟེ། ལྷའི་བུ་མོ་དེ་དག་གི་དྲུང་དུ་འགྲོ་བར་བྱེད་དོ། །དེ་ནས་ལྷའི་བུ་དེ་ལྷའི་བུ་མོ་དེ་དག་དང་། ཕན་ཚུན་སྙིང་ཤིན་ཏུ་དགའ་བ་རྣམས་ཚལ་དང་། ཉེ་བའི་ཚལ་ག་ལ་བ་དེར་འདོང་བར་བྱེད་དོ། །དེ་ལྷའི་རིས་དེ་ན་ཆུ་རྙོག་པ་མེད་པའི་ནང་ན་པད་མ་བཻ་ཌཱུརྱའི་མདོག་ལ་འདབ་མ་གསེར་དང་སྙིང་པོ་རྡོ་རྗེར་སྐྱེས་པ་དག་ལ་བུང་བ་འབུམ་སྙེད་ཀྱིས་ཡོངས་སུ་བསྐོར་བ་ཡིན་ཏེ། བུང་བ་དེ་དག་ཀྱང་ཁ་ཅིག་གི་ལུས་བཻ་ཌཱུརྱ་ལ་སྒྲོ་གསེར་དུ་འདུག་པ་དང་། ཁ་ཅིག་གི་ལུས་གསེར་ལ་སྒྲོ་དངུལ་དུ་འདུག་པ་དང་ཁ་ཅིག་གི་ལུས་འདྲེས་པ་དང་། ཁ་ཅིག་གི་ལུས་བྱི་རུ་ལ་སྒྲོ་ཀེ་ཀེ་རུར་འདུག་པ་ཡིན་ཏེ། དེ་དག་རྟག་ཏུ་འདམ་ནས་སྐྱེས་པའི་པད་མ་མ་རྙིས་པ་དག་གི་ནང་ན་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ལྟར་ལྷ་མོ་རྣམས་སྒྲ་སྙན་པ་དེས་གླུ་དབྱངས་ཤིན་ཏུ་ལེན་ཅིང་། ཕེག་རྡོབ་པར་བྱེད་པ་དེ་བཞིན་དུ་བུང་བ་པད་མའི་གསབ་གསེབ་ཏུ་དོང་བ་དེ་རྣམས་སྒྲ་འབྱིན་པར་བྱེད་དོ། །དེ་ནས་ལྷའི་བུ་དེ་ལྷ་མོ་དེ་རྣམས་དང་ལྷན་ཅིག་རྫིང་དེ་དག་གི་ནང་དུ་འཇུག་སྟེ། དེ་ཆུ་ལ་རྩེ་བར་བྱེད་ཅིང་། དགོད་རྩེ་དགའ་དགའ་དགུར་སྤྱོད་པར་བྱེད་དོ། །དེ་ལྟར་དེ་རྣམས་ཀྱིས་ཤིན་ཏུ་ཡུན་རིང་བར་རྩེ་བ་ཉེ་བར་སྦྱར་ནས་ཚལ་གསེར་གྱི་ཤིང་ལྗོན་པའི་ཕྲེང་བ་ཞེས་བྱ་བ་ཤིང་
ལྗོན་པ་གཉིས་ཀྱིས་ཁེབས་པ་ག་ལ་བ་དེར་དོང་བར་བྱེད་ལ་གླུ་དབྱངས་དང་། སིལ་སྙན་དང་རོལ་མོའི་སྒྲ་སྣ་ཚོགས་དང་ལྡན་པ་གསེར་བཙོ་མའི་རི་བོ་རིན་པོ་ཆེའི་རྩེ་མོ་བཟང་པོ་ལ་རྟོག་སྟེ། རྩེ་མོ་དང་ལྡན་པ་དེ་དག་ལ་ལྷའི་ཚོགས་དུ་མ་དང་ལྷ་མོ་གཞན་དག་དང་ལྷན་ཅིག་རྩེ་ཞིང་ལྟ་བར་བྱེད་དོ། །ལྷའི་རང་གི་པད་མའི་ཚལ་དང་། མེ་ཏོག་ཨུད་པ་ལའི་ཚལ་དྲི་རྣམ་པ་སྣ་ཚོགས་དང་། ལྷའི་དྲི་ཕུན་སུམ་ཚོགས་པ་རྣམས་ཀྱི་ནང་ན་ལྷའི་ཕྲེང་བ་དང་གོས་དར་གྱོན་པ་འཛམ་བུ་ཆུ་བོའི་གསེར་བཙོ་མས་བརྒྱན་པའི་ལྷ་དང་ལྷ་མོ་གཞན་དེ་དག་དང་ལྷན་ཅིག་སིལ་སྙན་ཡན་ལག་ལྔ་དང་ལྡན་པ་ཉེ་བར་ལེན་ཅིང་རྩེ་བར་བྱེད་དོ། །གཞན་དག་ནི་བྱ་ངང་པ་དང་ཀཱ་རཎྜ་བ་སྒྲ་སྙན་པར་འབྱིན་ཅིང་རྨ་བྱ་དང་ངང་པ་སྦྲེངས་པའི་ནང་དུ་ཞུགས་ནས་རྩེ་བར་བྱེད་དོ། །དེ་ནས་ཡང་ལྷའི་ཚོགས་ནམ་མཁའི་གཞལ་མེད་ཁང་ན་འཁོད་པ་གཞན་དག་ནམ་མཁའ་ལ་ལྷ་མོའི་ཚོགས་དག་དང་ལྷན་ཅིག་རྩེ་བར་བྱེད་དོ། །ནམ་མཁའ་ལ་སྒྲོན་མ་ལྟ་བུར་གྱུར་པ་ལྷའི་རོལ་མོ་ལ་བློ་ཤིན་ཏུ་ཆགས་པ་རྣམས་མེ་ཏོག་གི་ཆར་མངོན་པར་འབེབས་ཤིང་སིལ་སྙན་ཡན་ལག་ལྔ་དང་ལྡན་པ་ཉེ་བར་ལེན་པ་ན་ལྷའི་བདེ་བ་དག་རྗེས་སུ་མྱོང་བར་བྱེད་དོ། །དེ་ནས་ཡང་ལྷའི་ཚོགས་གཞན་དག་ཕན་ཚུན་གྲོགས་སུ་གྱུར་པ་ཆང་ཞིམ་པོ་དག་འཐུང་ཞིང་ཕན་ཚུན་དགའ་ལ་འཐུན་པའི་ཚིག་གིས་འདུམ་པ་དག་མཐོང་ངོ་། །དེ་ནས་ཡང་ལྷའི་ཚོགས་རང་གི་ལས་དང་རྒྱུ་འཐུན་པའི་བདུད་རྩི་མདོག་དང་། རོ་དང་དྲི་དང་། བདེ་བ་ཕུན་སུམ་ཚོགས་པ་དག་ཟ་བ་མཐོང་ངོ་། །དེ་ནས་ཡང་ལྷ་གཞན་དག་རིན་པོ་ཆེ་སྣ་བདུན་གྱི་ལྷའི་ཤིང་ལྗོན་པ་དག་ལས་རིན་པོ་ཆེ་སྣ་བདུན་གྱི་མེ་ཏོག་དག་འཐོག་ཅིང་བདག་ཉིད་ལ་འཆིང་བ་དག་མཐོང་ངོ་། །དེ་ནས་ཡང་ལྷའི་ཚོགས་གཞན་དག་ལྷའི་འབྲས་བུ་ལག་ན་ཐོགས་ཏེ་ཕན་ཚུན་འཕེན་ཞིང་ཟ་བ་དག་མཐོང་ངོ་། །དེ་ནས་ཡང་ལྷའི་ཚོགས་གཞན་དག་ལྷའི་ངང་པ་རིན་པོ་ཆེ་སྣ་བདུན་གྱི་སྒྲོ་གཤོག་བརྐྱང་བའི་སྟེང་དུ་ཞོན་ནས་ནམ་མཁའ་ལ་འགྲོ་བ་ན་ཕན་ཚུན་ལུས་ལ་གནོད་པ་མེད་དོ། །དེ་ནས་ཡང་ལྷ་གཞན་དག་ཅོང་དང་རྔ་དང་སིལ་དཀྲོལ་དང་གླིང་བུ་དག་དང་ཡང་དག་པར་རབ་ཏུ་ལྡན་པའི་རོལ་མོ་བྱེད་པ་ན་ལྷ་མོ་རྣམས་ལྷ་དེ་རྣམས་ཀྱི་མདུན་ན་བྲོ་གར་བྱེད་དེ་དེ་དག་
དང་ལྷན་ཅིག་རྩེ་ཞིང་ལྷན་ཅིག་དགའ་བ་དང་ལྷའི་པད་མ་རྣམས་ཀྱིས་ཕན་ཚུན་རྡེག་པ་ན་འདོད་པ་ལ་ཞེན་པ་དེ་ཡོངས་སུ་དགོད་ལ་འདོད་པ་སྟེན་ཅིང་སྨྲ་བ་དག་མཐོང་ངོ་། །དེ་ལྟར་ལྷའི་བུ་གསར་དུ་སྐྱེས་པ་དེ་ལྷའི་འཇིག་རྟེན་སྣ་ཚོགས་ལས། སྣ་ཚོགས་ཀྱིས་སྤྲུལ་པ་དེ་མཐོང་སྟེ། ཡིད་ལ་སེམས་པ་དག་གི་མིག་གཟུགས་སྣ་ཚོགས་ལྟ་བ་ལ་ངོམས་པ་མི་སྐྱེ། བདག་གི་རྣ་བ་སྒྲ་རྣམ་པ་སྣ་ཚོགས་དུ་མ་ལ་ཉན་པ་ལ་ངོམས་པ་མི་སྐྱེ། བདག་གི་སྣ་དྲི་རྣམ་པ་སྣ་ཚོགས་པ་སྣོམས་པ་ལ་ངོམས་པ་མི་སྐྱེ། བདག་གི་ལྕེ་རོ་ཕུན་སུམ་ཚོགས་པ་རོ་མྱང་བར་བྱ་བ་དྲུག་ལ་ངོམས་པ་མི་སྐྱེ། བདག་གི་ལུས་བགོ་བའི་རེག་པ་དང་རྒྱན་དང་བྱུག་པའི་རེག་པ་སྟེ། རེག་པ་རྣམ་པ་སྣ་ཚོགས་དག་ལ་ངོམས་པ་མི་སྐྱེ། བདག་གི་ཡིད་སྡུག་པ་སྣ་ཚོགས་ཡིད་དུ་འོང་བའི་ཆོས་བྱུང་བ་ཐམས་ཅད་ལ་ངོམས་པ་སྐྱེ་བ་མེད་པ་དེ་ནི་བདག་ཡིན་ཏེ། ཀུན་ནས་བདེ་བ་ལ་ཆགས་པ་བདེ་བ་མྱོང་བར་བྱའོ་སྙམ་མོ། །དེ་ལྟར་རྗེས་སུ་བསམས་པ་དེ་ཕན་ཚུན་ཤིན་ཏུ་ཉམས་དགའ་བ་མཐོ་རིས་དང་འཐུན་པ་སྣ་ཚོགས་དག་གི་ཡུལ་དང་ཡུལ་དག་ལ་ཉེ་བར་སྟེན་པར་བྱེད་དོ། །སྲེད་པའི་ཚོགས་དྲུག་ལ་རྣམ་པར་ཆགས་པ་དེ་ཀུན་ནས་སྲེད་པའི་མེས་ཡོངས་སུ་བསྐོར་ནས་སྲེག་པར་བྱེད་དེ། དཔེར་ན་སོས་ཀ་རབ་ཏུ་ཚ་བའི་ཉི་མའི་གུང་ལ་མི་ཞིག་མྱ་ངམ་གྱི་ནང་དུ་ཞུགས་ཏེ། མྱ་ངམ་གྱི་ནང་དུ་ཞུགས་པ་དེའི་མྱ་ངམ་ཀུན་ནས་རྩྭ་དང་འདབ་མ་དང་ལོ་མ་དང་ཤིང་ལྗོན་པའི་ཡལ་ག་འཕྱང་བ་དང་ཚལ་དང་རི་ཁྲོད་ཀྱི་ཚལ་སྐམ་པོ་དང་བྲག་དང་རི་སུལ་དེར་མི་གང་ཞིག་གིས་མེ་བཏང་ངོ་། །དེ་ནས་མི་དེ་ཀུན་ནས་ཚལ་གྱི་མེ་དེས་ཡོངས་སུ་བསྐོར་བ་སྐོམ་གྱིས་གདུངས་ཏེ། གར་བབ་བབ་ཏུ་འབྲོས་སོ། །དེ་ནས་གང་དང་གང་དུ་འབྲོས་པ་དེ་དང་དེ་ཉིད་དུ་མེའི་ཕུང་པོ་རབ་ཏུ་ཚ་བ། ཚལ་གྱི་ཤིང་སྲེག་པར་བྱེད་པ་ཀུན་ནས་ཤིན་ཏུ་འབར་བ་ཡིན་ཏེ། དེ་ལྟར་ཤིན་ཏུ་འབར་བར་བྱས་པས་ཚལ་གྱི་ཤིང་ཐམས་ཅད་སྲེག་པར་བྱེད་དོ། །དེ་ནས་མི་དེ་ལམ་གང་དང་གང་དུ་འགྲོ་བ་དེ་དང་། དེ་ཉིད་དུ་ཀུན་ནས་རབ་ཏུ་འབར་བ་མཐོང་སྟེ། དེ་མེ་དེའི་ནང་དུ་སོང་ནས་སྲེག་པར་བྱེད་ཀྱང་འབྲོས་པར་མི་ནུས་ལ། དེ་ལྟར་མེའི་ནང་དུ་སོང་བ་དེ་ཐུལ་གྱིས་ཚིག་པར་འགྱུར་བ་དེ་བཞིན་དུ་བྱིས་
པ་སོ་སོའི་སྐྱེ་བོ་ལས་ཀྱི་མེ་ཐམས་ཅད་རྩྭ་དང་ཡལ་ག་དང་ལོ་མ་དང་། འདབ་མ་སྐམ་པོ་ལ་སྲེག་པའི་ཚལ་གྱི་མེ་ལྟ་བུའི་སྲེད་པའི་མྱ་ངམ་གྱི་ནང་དུ་རབ་ཏུ་འཇུག་པར་བྱེད་དོ། །དེ་ནས་དེ་སྲེད་པ་མེ་ལྟ་བུའི་བག་ལ་ཉལ་གྱི་ཀུན་དུ་སྦྱོར་བའི་སྟོབས་རབ་ཏུ་ཆེ་བ། རྣམ་པར་རྟོག་པ་རླུང་ལྟ་བུས་བསྐྱོད་པའི་འཇིག་རྟེན་པའི་བསམ་གཏན་ཐོབ་པ་ཐམས་ཅད་ཤིང་དང་ཚལ་དང་ལྕུག་མ་འཕྱང་བ་སྐམ་པོ་དང་རི་ཁྲོད་ལྟ་བུ་ཡིན་ཏེ། དེ་ཡང་དེ་ལྟར་སྲེད་པ་མེ་ལྟ་བུས་ངེས་པར་སྲེག་པར་བྱེད་དོ། །ཀུན་ནས་རབ་ཏུ་འབར་ཞེས་བྱ་བ་ནི་ཀུན་ནས་སྲེད་པའི་ཚོགས་དྲུག་རབ་ཏུ་འབར་བ་ཡིན་ནོ། །གར་བབ་བབ་ཏུ་འབྲོས་ཞེས་བྱ་བ་ནི། གང་དང་གང་དུ་དབང་པོ་ཤིན་ཏུ་ཆགས་པའི་སེམས་ཡུལ་ལ་རྗེས་སུ་སྟེན་པར་བྱེད་པ་དེ། དེ་ཉིད་དུ་ཡུལ་ལ་སྲེད་པའི་མེ་ལྟ་བུས་སྲེག་པར་བྱེད་ལ་ཤིན་ཏུ་རྣམ་པར་རྟོག་པའི་ཡུལ་རླུང་ལྟ་བུས་གཡེངས་པ་ཡིན་ནོ། །དེ་དེ་ཉིད་དུ་ཡུལ་ལ་སྲེད་པའི་མེས་སྲེག་པ་ན་ལྷ་དག་ཀུན་དུ་འཇིགས་པར་འགྱུར་ཏེ། དེ་ནི་མེ་ཐ་མལ་པ་ལ་སྲེད་པར་བྱ་བའི་དཔེར་བྱ་བ་ཡིན་ནོ། །དེ་ལྟར་ལྷ་དེ་ལྷའི་གནས་དེ་ན་ལེགས་པར་བྱས་པའི་རྣམ་པ་འབུམ་སྙེད་དག་ལ་ཉེ་བར་སྤྱོད་པ་ཡིན་ཏེ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་དགའ་བར་བྱེད་དོ། །དེ་ཕྱིས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན། སེམས་ཅན་དམྱལ་བ་དང་། ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་དང་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ལས་དེ་དང་རྒྱུ་འཐུན་པར་དེ་རིན་པོ་ཆེའི་ས་གཞི་དག་ལ་རིན་པོ་ཆེ་ཀུན་གྱིས་བརྒྱན་པའི་ཁང་པ་ཕུན་སུམ་ཚོགས་པ་ཐམས་ཅད་དུ་རྒྱལ་པོའམ་བློན་པོ་ཆེན་པོར་སྐྱེ་བར་འགྱུར་ཏེ། རྟག་ཏུ་རབ་ཏུ་བདེ་བ་དང་ལྡན་པར་འགྱུར། རྒྱལ་པོ་དགའ་བ་དང་སྐྱེ་བོ་ཀུན་དགའ་བ་དང་བུ་དང་ནོར་དང་འབྲུ་ཕུན་སུམ་ཚོགས་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་
ཀུན་དུ་གསལ་བར་སྤྱོད་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན་སྐྱེས་བུ་དམ་པ་དགེ་བ་སྤྱོད་པ་གང་གིས་སྲོག་གཅོད་པ་དང་མ་བྱིན་པར་ལེན་པ་མི་བྱེད་ལ་རྗེས་སུ་ཡི་རང་བར་མི་བྱེད་གཞན་གྱིས་བྱས་ན་ཡང་ཕྱིར་ཟློག་པར་བྱེད་ཅིང་སྨོད་པར་བྱེད་དོ། །ཉེས་པར་བྱས་པ་སྲོག་གཅོད་པའི་ལས་ཀྱི་འབྲས་བུའི་རྣམ་པར་སྨིན་པ་ཡང་དག་པར་སྟོན་པ་རྣམ་པ་དུ་ཡོད་ཅེ་ན། འདི་ལ་ལོ་མ་སྔོན་པོའམ། ཆུ་དག་གི་ནང་ན་སྲིན་བུ་ཤིན་ཏུ་ཕྲ་མོ་ཡང་མཐོང་ནས་ཟ་བར་མི་བྱེད་ལ་ཆུ་ལ་ཡང་འཐུང་བར་མི་བྱེད་ཅིང་། ཡོངས་སུ་འཚག་པར་བྱེད་དེ་བཙགས་ནས་ཀྱང་ཆུའི་ནང་ནས་བྱུང་བའི་སྲིན་བུ་དེ་དག་ས་སྐམ་པོའི་སྟེང་དུ་ཆུ་ཚགས་དེ་སྤྲུག་པར་མི་བྱེད་ཀྱི། སྲིན་བུ་དེ་དག་གི་སྲོག་ཆད་པར་མི་འགྱུར་བའི་ཆུའི་གནས་གང་ཡིན་པ་དེ་ཉིད་དུ་སྲིན་བུ་དེ་དག་འཇོག་པར་བྱེད་དོ། །ཡང་དེས་ཤིན་ཏུ་འཚོ་བར་བྱེད་དེ་གཞན་དག་ཀྱང་དེ་བཞིན་དུ་བྱེད་དུ་འཇུག་ཅིང་། དགེ་བའི་ལམ་ལ་གནས་པར་བྱེད་ལ་རབ་ཏུ་འཇོག་པར་བྱེད་དོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན། རྣམ་པ་དུ་ཡོད་ཅེ་ན། འདི་ལ་བུ་རམ་ཤིང་གི་ཚལ་ལམ། འབྲ་གོའམ། འབྲས་བུ་མ་དུ་ལུང་གའམ། ཏཱ་མ་པུ་ར་ཀའམ། པ་ན་སའམ། ནཱ་ཌི་ཀེ་རའམ། ཆུ་ཤིང་གི་འབྲས་བུ་གཞན་གྱིས་ཡོངས་སུ་བཟུང་བ་རྣམས་ལ་རྐུ་སེམས་ཀྱིས་རང་གི་སྐྱེད་ཤིང་དུ་བྱ་བའམ། ཀུན་དགའ་ར་བ་ཉམས་དགའ་བར་བྱ་བའམ། ལོངས་སྤྱད་པ་དགའ་བར་བྱ་བའམ། ཆགས་པའི་རྒྱུའམ། ཚོང་པའི་ཁེ་སྤོགས་བྱ་བར་བསམས་ནས། ས་བོན་འབྲུ་གཅིག་ཙམ་ཡང་ལེན་པར་མི་བྱེད་ལ། གཞན་བྱེད་པ་ཡང་ཕྱིར་ཟློག་པར་བྱེད། དེ་བཞིན་དུ་བྱེད་དུ་འཇུག་ཅིང་། དགེ་བའི་ལམ་ལ་ཡང་རབ་ཏུ་འཇོག་པར་བྱེད་པ་ཡིན་ཏེ། དེ་བདག་ལ་ཕན་ཞིང་གཞན་ལ་ཕན་པར་བྱེད་པ། ཚུལ་ཁྲིམས་སྲུང་བ་མ་བྱིན་པ་ལེན་པར་སྤངས་པ་ཡང་དག་པར་བླངས་པ་ཡིན་ནོ། །ཡང་སྲོག་གཅོད་པ་དང་མ་བྱིན་པར་ལེན་པ་དག་ལས་ཚུལ་ཁྲིམས་ཚོལ་ཞིང་ཚུལ་ཁྲིམས་ལ་རབ་ཏུ་གནས་པ་ཇི་ལྟ་བུ་ཡིན་ཞེ་ན། འདི་ལ་སྲིན་བུས་བསླང་བའི་ནད་མི་བཟད་པ་ཆེན་པོས་ཐེབས་ཏེ། སྲོག་ཆད་དུ་དོགས་
ཀྱང་སྲིན་བུ་རྣམས་གསད་པར་མི་བྱའོ་སྙམ་ནས་སྲིན་བུ་གསད་པའི་སྨན་སྦྱོར་བར་མི་བྱེད་ཅིང་གཞན་ཡང་བྱེད་དུ་མི་འཇུག་ལ་དེ་ལྟར་སྲོག་ཆད་དུ་དོགས་ཀྱང་སྲིན་བུ་གསོད་པར་མི་བྱེད་པ་ཡིན་ཏེ། འདི་ནི་བདག་དང་གཞན་ལ་ཕན་པར་སྦྱོར་བ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། འདི་ལ་མ་བྱིན་པར་ལེན་པ་ཤིན་ཏུ་ཕྲ་མོ་ཡང་མི་ལེན་པ་ཡིན་ནོ། །སྦྱིན་པ་ཡང་སྦྱིན་པར་བྱེད་དེ་རྣམ་པ་དུ་ཡོད་ཅེ་ན། འདི་ལ་བདག་ཉིད་ཀྱི་ནད་རབ་ཏུ་ཞི་བར་བྱ་བའི་ཕྱིར་སྨན་སྦྱར་བ་དེ་གཞན་མཐོང་ངམ་ཐོས་ནས་བདག་ཉིད་ཀྱིས་སྨན་སྦྱར་བ་དེ་བདག་གིར་མ་བྱས་ཀྱང་རུང་འདི་ལྟར་དེ་བདེ་བར་གྱུར་ཅིག་སྙམ་ནས་གཞན་ལ་སྦྱིན་པར་བྱེད་དེ། སྦྱིན་བདག་དམ་པ་མྱ་ངན་ལས་འདས་པའི་མཐར་ཐུག་པའི་སྦྱིན་པ་སྦྱིན་པ་དེ། ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ཀུན་ཏུ་གསལ་བར་སྤྱོད་པ་ཞེས་བྱ་བའི་གནས་དེར་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ལེགས་པར་བྱས་པའི་ལས་དེས། གནས་དེ་ཡང་རིན་པོ་ཆེ་ཐམས་ཅད་ཀྱི་འོད་ཀྱིས་ཀུན་དུ་གསལ་བ་བཞིན་དུ་རྣམ་པར་མཛེས་པ་ཡིན་ནོ། །དེ་དེར་སྐྱེས་པ་དང་ཤིན་ཏུ་རྒྱ་ཆེ་བ་དང་ལྡན་པའི་ལྷ་མོ་རྣམས་ཀྱིས་མངོན་པར་མཆོད་ནས། ཚལ་སིལ་སྙན་རྣམ་པ་སྣ་ཚོགས་ཀྱི་སྒྲ་དང་ལྡན་པའི་འཁོར་ཞེས་བྱ་བ་དེར་འདོང་བར་བྱེད་དོ། །བྱ་དང་ཤིང་ལྗོན་པས་བརྒྱན་པ་ཞེས་བྱ་བའི་ཚལ་དེ་ཡང་དེ་རྣམས་ཀྱིས་ཉེ་བར་བརྒྱན་པ་ཡིན་ནོ། །བྱ་དེ་རྣམས་ཀྱི་མཐུ་ནི་འདི་ལྟ་བུ་ཡིན་ཏེ། བྱ་དེ་གང་དང་གང་དུ་ནམ་མཁའ་ལ་འགྲོ་བ་དེ་དང་དེར་ཤིང་དེ་དག་ཀྱང་བྱ་དེ་རྣམས་ཀྱི་མཐུས་ནམ་མཁའ་ལ་འགྲོའོ། །ལྷ་གང་དག་ཤིང་ལྗོན་པ་ལ་གནས་པའི་ཤིང་དེ་དག་ཀྱང་དེ་བཞིན་དུ་ནམ་མཁའ་ལ་འགྲོའོ། །གནས་དེ་ན་ཤིང་ལ་གནས་པ་རྣམས་ཀྱི་པད་མའི་རྫིང་དག་འབྱུང་བར་འགྱུར་ཏེ། པད་མ་སྣ་ཚོགས་གསེར་གྱིས་བརྒྱན་པ། འདབ་མ་བཻ་ཌཱུརྱ་སྡོང་བུ་གསེར་ལ། ཟེ་བ་དངུལ་ཡིན་ཏེ། པད་མ་དེ་དག་ལྷ་མོ་རྣམས་འཛེགས་ནས་སྙིང་པོ་ལ་འཁོད་ཅིང་གླུ་དབྱངས་ལེན་ནོ། །གླུ་དབྱངས་ལེན་པ་ན་དགེ་བའི་ལས་དེས་པད་མ་དེ་དག་གི་བར་བར་ནས་ཆང་ཞིམ་པོ་དག་འབྱུང་བར་འགྱུར་ལ། དེ་ཡང་དགའ་
འབབ་ཅེས་བྱ་བ་ཡིན་ཏེ། དེ་དག་ལ་དེ་རྣམས་འཐུང་བར་བྱེད་དོ། །དེ་བཞིན་དུ་པད་མའི་སྙིང་པོ་ལ་འཁོད་པའི་ལྷའི་བུ་དེ་དག་ཐམས་ཅད་མངོན་པར་གླུ་དབྱངས་ལེན་ཅིང་དགའ་དགུར་སྤྱོད་པ་ན་འཐུང་བར་བྱེད་དེ། དེ་ལྟར་པད་མའི་གསབ་གསེབ་ན་འཁོད་པ་བདེ་བ་དེ་ལྷ་མོ་རྣམས་ཀྱིས་ཡོངས་སུ་བསྐོར་ཅིང་ཡུན་རིང་དུ་ཆང་ཞིམ་པོ་དག་ལ་འཐུང་བར་བྱེད་དོ། །ཡུན་རིང་དུ་བདེ་བ་ཉེ་བར་སྤྱད་ནས་ནམ་མཁའ་དེ་ལས་འབབས་པར་བྱེད་དེ། དེ་ལྟར་བྱ་དེ་དག་དང་འདི་ལྟར་ལྷ་མོའི་ཚོགས་ཀྱིས་ལྷན་ཅིག་བསྐོར་བ་མེ་ཏོག་ཀུ་བ་ལ་ཡའི་ཁྱིམ་ཞེས་བྱ་བ་དེར་འདོང་བར་བྱེད་དོ། །ཁྱིམ་དེ་ཡང་མེ་ཏོག་ཀུ་བ་ལ་ཡ་ལས་བྱས་པ། ཀུན་ནས་རྒྱར་དཔག་ཚད་བརྒྱ་ཕྲག་སྟོང་ཡོད་དེ་འདབ་མ་རེ་རེ་ལ་ལྷ་མོ་སྣ་ཚོགས་སིལ་སྙན་ཡན་ལག་ལྔ་དང་ལྡན་པ་གླུ་ལེན་ཞིང་བྲོ་རྡུང་བར་བྱེད་དོ། །གལ་ཏེ་མེ་ཏོག་ཀུ་བ་ལ་ཡའི་འདབ་མ་སྔོན་པོའི་འོད་དེས་ཀུན་ནས་ཐམས་ཅད་དུ་སྔོན་པོར་འགྱུར་ལ་གལ་ཏེ་འདབ་མ་གཞན་དམར་ན་དེ་དེ་ལྟར་མེ་ཏོག་ཀུ་བ་ལ་ཡའི་འདབ་མ་དམར་པོ་དེས་ཁ་དོག་སྣ་ཚོགས་ཀྱིས་བརྒྱན་པ་གཞན་གང་ཡིན་པ་དེ་དག་ཀྱང་དམར་པོ་དེའི་མཐུས་དེ་བཞིན་དུ་དམར་པོར་འགྱུར་རོ། །ཨུད་པ་ལ་དམར་པོ་དང་། རྩ་བ་དང་སྙིང་པོ་ལས་བྱུང་བའི་སྟོབས་ཀྱིས་ཟེ་བའི་ནང་ན་སྙིང་པོ་ཡོད་པ་གང་ཡིན་པ་དེ་དག་ལ་ལས་བྱ་བ་ལེགས་པར་བྱས་པའི་ལྷ་མོ་རྣམ་པ་སྣ་ཚོགས་ཀྱིས་ཡོངས་སུ་བསྐོར་ཏེ་གནས་སོ། །ཟེ་བའི་ཁྲི་དེ་རྣམས་ཀྱི་སྟེང་ན། ལྷ་མོའི་ལག་པ་ན་པད་མ་སྣ་ཚོགས་ཐོགས་པ་དག །ལྷའི་བུ་དང་ལྷན་ཅིག་གླུ་དབྱངས་ལེན་བྲོ་གར་བྱེད་རྩེད་མོ་བྱེད། དགའ་དགུར་སྤྱོད་པར་བྱེད་དོ། །དེར་ཡང་ཡུན་རིང་དུ་རྩེས་ནས། འདབ་མ་ལས་བྱས་པའི་ཁྱིམ་དུ་འཇུག་པར་བྱེད་དེ། དེས་ཆུ་ཀླུང་ཡིད་འོང་ལྟ་ཞེས་བྱ་བ་ཤིན་ཏུ་ཉམས་དགའ་ཞིང་འགྲམ་གཉི་ག་ཤིང་ལྗོན་པས་ཡོངས་སུ་བསྐོར་བ་མཐོང་ངོ་། །ཆུ་ཀླུང་དེ་ཡང་ཤིན་ཏུ་ཉམས་དགའ་བ་ཡིན་ལ། དགའ་བ་འདི་ལྟ་བུ་ཡིན་ཏེ། འདི་ལྟ་སྟེ་འགྲམ་གཉི་ག་ཤིང་ལྗོན་པ་རྣམ་པ་སྣ་ཚོགས་ཀྱིས་ཤིན་ཏུ་རྣམ་པར་ཕྱེ་བ་ཁ་དོག་དང་ལོ་མ་རྣམས་ཀྱིས་ཤིན་ཏུ་རྣམ་པར་ཕྱེ་བ། ཡལ་ག་དང་ལྕུག་མ་རྣམ་པ་སྣ་ཚོགས་ཀྱིས་ཤིན་ཏུ་རྣམ་པར་ཕྱེ་བ་ལོ་མ་རྣམས་ཀྱི་བར་
བར་ན། བྱ་གནས་པ་སྒྲོ་དང་མཆུ་སྡུག་ལ་སྒྲ་སྙན་ཅིང་འཇེབས་པ་འབྱིན་པ། བདེ་བ་རྣམ་པ་དུ་མ་ཡིད་དུ་འོང་བའི་བྱ་རྣམས་ཀྱིས་འགྲམ་མཐའ་དག་བརྒྱན་པ་ཡིན་ནོ། །ཡིད་ལ་ཟས་སམ་སྐོམ་ནས་རྣམ་པ་གཞན་ཅུང་ཟད་ཡིད་དུ་འཐད་པའི་བར་གང་དང་གང་བསམས་པ་དེ་དང་དེ་ཉིད་ཆུ་བོ་དེ་ལས་རབ་ཏུ་འབྱུང་ངོ་། །དེ་ནས་ཡང་ཆུ་བོ་ཤིན་ཏུ་ཉམས་དགའ་བ་དེ་ལས་རྣམ་པ་གཞན་འབྱུང་བ་ནི་འདི་ལྟ་སྟེ། མཐའ་གཉི་ག་ན་ལྷ་མོ་ཆ་བྱད་དང་གཟུགས་སྣ་ཚོགས་དང་ལྡན་པ་ལག་ན་རོལ་མོའི་སྒྲ་རྣམ་པ་སྣ་ཚོགས་ཐོགས་ཤིང་གླུ་དབྱངས་ལེན་བྲོ་གར་བྱེད་རྩེད་མོ་བྱེད་དེ་ཕན་ཚུན་འདྲེས་པ་ཡིན་ནོ། །འདི་ལྟར་ཡང་ཡིད་དུ་འཐད་པ་འབའ་ཞིག་ཡོད་ལ་དགའ་བའི་རྣམ་པ་དེ་ལྟ་བུ་དང་ལྡན་པ་དེ་ཆུ་བོའི་ནང་དུ་འཇུག་པར་བྱེད་དེ་ལྷའི་བུ་ལས་སྤྱོད་པ་ལེགས་པར་བྱས་པ་དེས་དེ་དག་ཀྱང་མཐོང་ངོ་། །དེ་ནས་ཡང་ལྷའི་བུ་མོ་ཡིད་རབ་ཏུ་དགའ་བ་དེ་རྣམས་བྲོ་གར་བྱེད་གླུ་དབྱངས་ལེན་དགོད་པར་བྱེད་ཅིང་། རོལ་མོའི་སྒྲ་སྣ་ཚོགས་དག་ཀྱང་འབྱིན་པར་བྱེད་དོ། །ལྷ་མོ་ཡིད་རབ་ཏུ་དགའ་བ་དེ་དག་ཀྱང་ལྷའི་རོལ་མོ་སིལ་སྙན་ཡན་ལག་ལྔ་དང་ལྡན་པ་དག་ཐོགས་ནས་ལྷ་ལས་སྤྱོད་པ་ལེགས་པར་བྱས་པ་ག་ལ་བ་དེར་འདོང་བར་བྱེད་དོ། །ལྷ་དེས་ལྷ་དེ་དག་དང་ལྷ་མོ་གཞོན་ནུ་ན་ཚོད་དང་ལྡན་ཞིང་ཆ་བྱད་དང་རྒྱན་ཐོགས་པ། ཤིན་ཏུ་དགའ་བར་བྱེད་པ་དག་མཐོང་ནས། དེ་ནས་ཡང་དགའ་བའི་འདོད་ཆགས་བརྒྱ་འགྱུར་གྱིས་སྐྱེད་པ་ན། ལྷ་མོ་གཞན་དེ་དག་དང་ལྷན་ཅིག་ལྷ་མོ་དེ་དག་ག་ལ་བ་དེར་རྒྱུག་པར་བྱེད་དོ། །དེ་ནས་ཆུ་བོའི་འགྲམ་གྱི་ལྷ་མོ་གང་ཡིན་པ་དེ་དག་དང་མེ་ཏོག་ཀུ་བ་ལ་ཡའི་ཁྱིམ་ནས་བྱུང་བ་གང་ཡིན་པ་དེ་དག་ཕན་ཚུན་འདྲེས་ཤིང་ཕན་ཚུན་ཉམས་དགའ་བའི་སྒྲ་འབྱིན་པར་བྱེད་དོ། །ལྷའི་ཚོགས་གང་ཡིན་པ་དེ་དག་ཐམས་ཅད་རིན་པོ་ཆེའི་རི་རབ་ཀྱི་རྩེ་མོ་རྣམས་སུ་ལྷའི་རོལ་མོའི་སྒྲས་འགེངས་པར་བྱེད་དོ། །རྣམ་པ་དེ་ལྟ་བུའི་ཡིད་དུ་འོང་བའི་སྒྲ་དེ་དག་ཐོས་ནས་ལྷ་གཞན་དག་རྩེ་མོ་གཞན་དག་ཏུ་ལྷ་མོའི་ཚོགས་དང་ལྷན་ཅིག་རྩེ་བར་བྱེད་དོ། །དེ་དག་གིས་ཀྱང་སྒྲ་དེ་ཐོས་ནས་དགའ་བ་ཉིད་ཡིད་ལ་བྱས་ཏེ་རིངས་པར་ཆུ་བོའི་འགྲམ་ཡིད་དུ་འོང་བ་དེ་དག་ག་ལ་བ་དེར་
འདོང་བར་བྱེད་དོ། །ལྷ་དང་ལྷ་མོའི་ཚོགས་ཕན་ཚུན་འདྲེས་པ་དེ་དག་འཐབ་པ་དང་ཕྲག་དོག་དང་རྒྱགས་པ་རྣམས་ཀྱིས་སྐྱོ་བ་མེད་ཅིང་། ཕན་ཚུན་གྲོགས་སུ་གྱུར་ལ་གནོད་པ་མེད་པ་དག་གླུ་ལེན་ཞིང་དགོད་པར་བྱེད་དོ། །ཕན་ཚུན་གཞན་དག་ནི་ཆང་ཞིམ་པོ་འདྲིམ་པར་བྱེད་ཅིང་འཐུང་བར་བྱེད་ལ། ལྷ་དང་ལྷ་མོའི་ཚོགས་གཞན་དག་ཀྱང་བདུད་རྩི་ལ་ཟ་བར་བྱེད་དོ། །དེ་ལྟར་ཡུན་རིང་དུ་རྩེ་བ་ལ་ཞུགས་པ་དེ་དག་དེ་ནས་ཡང་ཆུ་བོའི་འགྲམ་དེ་ནས་རྒྱགས་པ་ལ་གནས་པའི་ལྷ་རྩེ་ཞིང་འགྱིང་བར་འགྲོ་བ་དག་ཚལ་དང་ཉེ་བའི་ཚལ་དེ་རྣམས་ག་ལ་བ་དེར་འདོང་བར་བྱེད་དོ། །བདེ་བ་འབུམ་ཕྲག་དེ་ལྟ་བུ་དང་ལྡན་པའི་ལྷ་རྣམས་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པ་དེ་ཟད་པར་མ་གྱུར་པ་དེ་སྲིད་དུ་ཉེ་བར་སྤྱོད་པར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་བརྒྱ་ལ་མི་དང་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མི་རྣམས་ཀྱི་ནང་དུ་སྐྱེས་ན་ལས་དེ་དང་རྒྱུ་འཐུན་པར་དེ་རྟག་ཏུ་བདེ་བ་དང་ལྡན་ཞིང་ཁྲུས་དང་བྱུག་པ་དང་རྒྱན་ལ་དགའ་བར་འགྱུར། རྟག་ཏུ་པད་མ་དང་མེ་ཏོག་ཀུ་མུ་ད་དང་ཀོ་ཀ་ན་ད་དང་ཀུ་བ་ལ་ཡ་ལ་དགའ་བར་འགྱུར། དྲང་ཞིང་དྲང་པོའི་རང་བཞིན་ཅན་མཁས་པ་ཆོས་དང་ལྡན་པ་ལ་དགའ་བ་རྒྱལ་པོའམ་བློན་པོ་ཆེན་པོའམ་ཁྱིམ་བདག་གམ་ཡུལ་གྱི་སྤྱན་ནམ་དེད་དཔོན་ཆེན་པོའམ་ཚོང་པ་ཐམས་ཅད་ཀྱི་གཙོ་བོར་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། ལྷ་རྣམས་ཀྱི་གནས་གསེར་གྱི་རྣ་ཕུག་གི་ཁང་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན། སྐྱེས་བུ་དགེ་བ་ཚུལ་ཁྲིམས་དང་ལྡན་པར་གྱུར་པ་གང་གིས་སྲོག་གཅོད་པ་དང་མ་བྱིན་པར་ལེན་པ་དག་སྤངས་པ་ཡིན་ཏེ། རྣམ་པ་དུ་སྤངས་
པ་ཇི་ལྟ་བུ་ཡིན་ཞེ་ན། དགྲ་བདག་གི་སྲོག་གཅོད་པར་བྱེད་པའམ། བུ་བསད་པའམ་ཆུང་མ་ཕྲོགས་པ་གཡུལ་གྱི་ནང་དུ་ཞུགས་པ་ལ་ཡོངས་སུ་སྐྱོབ་པར་བྱེད་ཅིང་རྡེག་པར་ཡང་མི་བྱེད། གཞན་ཕ་རོལ་དག་གིས་དགྲ་བཟུང་ཡང་ཡོངས་སུ་སྐྱོབ་པར་བྱེད་ཅིང་ཚིག་སྙན་པར་སྨྲ་ལ། ནོར་རྫས་དག་བྱིན་ནས་ཐར་བར་བྱེད། ཕྱིར་ཞིང་ཕན་པ་ཉིད་བྱེད། དེ་ལྟར་མི་ངན་པ་དེ་ཡང་གཡུལ་གྱི་ནང་དུ་ཞུགས་པ་ཐར་བར་བྱས་ནས། སྔ་མ་བཞིན་ཡང་དང་ཡང་དུ་འཆི་བར་འགྱུར་བ་སྲོག་བྱིན་ཞིང་མི་དགའ་བར་མི་བྱེད་དོ། །སྡོམ་པ་བླངས་པ་ལས་ཀྱི་འབྲས་བུ་ལ་འཇིགས་པ་དེས། དགྲའི་སྟེང་དུ་མཚོན་ཆ་བསགས་པ་འབབ་པ་ལས་སྲུང་བར་བྱེད་ཅིང་། སྲོག་གཅོད་པའི་འཇིགས་པས་འདེབས་པར་མི་བྱེད། བདག་ཉིད་ཀྱི་སྲོག་ཀྱང་ཡོངས་སུ་གཏོང་ལ་འདེབས་པར་མི་བྱེད་པ་ཡིན་ཏེ། རྣམ་པ་དེ་དག་ནི་སྲོག་གཅོད་པ་དང་བྲལ་བ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་རྣམ་པ་དུ་ཞིག་རྣམ་པ་ནི་ཇི་ལྟ་བུ་ཡིན་ཞེ་ན། འདི་ལ་སྡོམ་པ་བླངས་པ་ཁ་ན་མ་ཐོ་བ་རྡུལ་ཕྲན་ཙམ་ལ་ཡང་འཇིགས་པར་ལྟ་ཞིང་ལས་དང་ལས་ཀྱི་འབྲས་བུ་ལ་འཇིགས་སྐྲག་པ་དེ་སྡིག་པ་རྣམས་མི་བྱེད། བསོད་ནམས་མ་ཡིན་པ་དག་ལ་མི་སྟེན། ལས་སྤྱོད་པ་འོས་པ་མ་ཡིན་པའི་གནས་དག་མི་བྱེད་པའི་སྐྱེས་བུ་དམ་པ་དེ་ནི་མ་བྱིན་པར་ལེན་པ་སྤངས་པ་ཡིན་ནོ། །འདི་ལ་སྡོམ་པ་བླངས་པ་རྡུལ་ཕྲན་ཙམ་ལ་ཡང་འཇིགས་པར་ལྟ་བར་གྱུར་པས་གཙུག་ལག་ཁང་དུ་འགྲོའམ་ཉེ་བའི་ཚལ་དུ་སློབ་ཏུ་འགྲོའམ་ཆུའི་དོན་དུ་འགྲོ་བའི་ཕྱིར་གཞན་དག་གི་གཡུལ་འགྱེད་པའི་ལྷམ་མམ་རྩྭ་ལས་བྱས་པའམ་གྲོང་མིའམ་སྲེད་ལས་བྱས་པའམ། སྦ་ལས་བྱས་པ་གཞན་གྱིས་མ་གནང་བར་མི་སྤྱོད་ཅིང་། གང་དེ་དག་བསླབ་པའི་གཞི་ལས་འདའ་བའི་འཇིགས་པས་ཉིན་མོའམ་མཚན་མོར་རྐུ་སེམས་ཀྱིས་མི་རྐུ་བ་ཡིན་ཏེ། རྣམ་པ་དེ་དག་ནི་སྲོག་གཅོད་པ་དང་མ་བྱིན་པར་ལེན་པ་དག་དང་བྲལ་བ་ཡིན་ནོ། །ཚུལ་ཁྲིམས་ལ་རབ་ཏུ་བཞག་པ་ཇི་ལྟ་བུ་ཡིན་ཞིག་གུ་སྙམ་ན། འདི་ལ་མི་དགེ་བ་མི་འདོད་པ་མི་སྡུག་པ་ཡིད་དུ་མི་འོང་བ་སྡིག་པའི་ཆོས་རྣམས་སྤངས་པ་ཡིན་ཏེ། རྙོག་པ་མེད་པ་སྤངས་པ་དང་ལྡན་པ་ལེགས་པར་
འཕེལ་བ་སླུ་བ་མེད་པའི་ཚུལ་ཁྲིམས་སྲུང་བ་ཡིན་ནོ། །ཚུལ་ཁྲིམས་དེ་ནི་མཐོ་རིས་སུ་སྐྱེ་བར་ངེས་པ་ཡིན་ལ། མྱ་ངན་ལས་འདས་པའི་མཐར་ཐུག་པར་འགྱུར་ཏེ། འདོད་ན་བྱང་ཆུབ་གསུམ་གྱི་སོ་སོ་ཡང་དག་པར་མྱོང་བ་མྱ་ངན་ལས་འདས་པའི་མཐར་ཐུག་པར་འགྱུར་རོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་ལྔ་པ། གཞན་ཡང་འདི་ལ་གལ་ཏེ་ནགས་ཀྱི་ནང་དུ་འགྲོན་པོར་སོང་བའམ་ལམ་གོལ་བར་ཞུགས་སམ་གྲོགས་དང་བཅས་པའམ་གྲོགས་མེད་པར་སོང་བ་དང་ཤ་རྗེན་པ་ཟ་བ་ལྟོགས་པ་དག་ལྟོགས་པའི་མཐུས་རང་གི་བུ་བཙས་པ་དག་ལ་ཟ་བར་བྱེད་པ་མཐོང་བ་དང་། འདི་ལྟར་ཤ་རྗེན་ཟ་བ་འདི་རང་གི་བུ་ལ་ཟ་བར་མ་གྱུར་ཅིག །བཀྲེས་པས་ཉེན་པ་འདི་སྲོག་ཡོངས་སུ་གཏོང་བར་མ་གྱུར་ཅིག །བདག་གི་ཤ་དག་གིས་འདི་ཚིམ་པར་གྱུར་ཅིག་སྙམ་ནས་དེའི་དྲུང་དུ་ཟར་གཞུག་པའི་ཕྱིར་སོང་སྟེ། དེ་བདག་ཉིད་ཀྱི་ལུས་གཏོང་བར་བྱེད་པ་སེམས་ཅན་ལ་སྙིང་རྗེ་ཞིང་མཁས་པ་མ་དང་བུའི་སྲོག་སྦྱིན་པར་བྱེད་པ་དེ་ནི་ཚུལ་ཁྲིམས་ལ་རབ་ཏུ་ཞུགས་པ་ཡིན་ནོ། །སྦྱིན་པ་ལ་རབ་ཏུ་ཞུགས་པ་ཇི་ལྟ་བུ་ཡིན་ཞེ་ན། འདི་ལ་དབུལ་པོར་གྱུར་ཅིང་ཚེགས་ཆེན་པོས་འཚོ་བར་བྱེད་པ་ཆོས་དང་ལྡན་པ་སྡོམ་པ་བླངས་པ་ཁ་ན་མ་ཐོ་བ་རྡུལ་ཕྲན་ཙམ་ཡང་མི་སྐྱེད་པ་དེ་གལ་ཏེ་འགོག་པ་ལས་ལངས་པའི་དགེ་སློང་དེར་འོངས་ནས་བསླངས་པ་དང་དེ་སེམས་པ་དང་ལྡན་པར་གྱུར་ནས། དེའི་བུ་དང་ཆུང་མའི་ཟས་སུ་སྦྱར་བ་ཉུང་ངུ་གང་ཡིན་པ་དེ་དག་འགོག་པ་ལས་ལངས་པའི་དགེ་སློང་དེ་ལ་འབུལ་བར་བྱེད་ཅིང་བདག་ཉིད་ཀྱང་ཉིན་མཚན་དུ་མི་ཟ་འམ་ཉུང་ངུ་ཟ་ལ་ལྷག་མ་ལ་ཡང་སེམས་པར་བྱེད་གཞན་དག་ཀྱང་དེ་ལྟར་སྲོག་གཅོད་པ་དང་མ་བྱིན་པར་ལེན་པ་དག་ལས་ཕྱིར་ཟློག་པར་བྱེད། དགེ་བའི་ལམ་ལ་རབ་ཏུ་འཇོག་པར་བྱེད་པ་ན་ཡང་ཤིན་ཏུ་རྗེས་སུ་ཡི་རང་བར་བྱེད་ཅིང་རབ་ཏུ་སྤྲོ་བར་བྱེད་དགེ་བའི་ལས་དེ་ཉིད་ལ་རབ་ཏུ་འཇོག་པར་བྱེད། དེ་ནས་ཡང་རབ་ཏུ་གཟེངས་སྟོད་པར་བྱེད། སྐྱེས་སུ་དགེ་བ་བདག་ཉིད་ལ་ཕན་པ་གཞན་ལ་ཕན་པ་བྱེད་པ་ནི། ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་
དྲི་ཙམ་ཞིག་གིས་གསེར་གྱི་ཡོན་ཏན་གྱི་ཁྱིམ་གྱི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལས་བྱ་བ་ལེགས་པར་བྱས་པ་དེ་གསེར་གྱི་ཡོན་ཏན་གྱི་ཁྱིམ་གྱི་གནས་སུ་སྐྱེས་ནས་བདེ་བ་ཡང་དག་པར་མྱོང་བར་འགྱུར་བ་འདོད་པའི་བདེ་བ་ངེས་པར་མྱོང་བར་འགྱུར་རོ། །གནས་དེ་ན་གསེར་ལས་བྱས་པའི་ཁྱིམ་རིན་པོ་ཆེ་ཐམས་ཅད་ཀྱི་འོད་ཀྱིས་བརྒྱན་པ་ཡོད་དེ་ཕུག་དེ་ནི་འོད་ཉིད་ཡིན་ནོ། །ཁྱིམ་ཞེས་བྱ་བའི་ཕུག་ནི་འདི་ཡིན་ཏེ་དེར་བརྒྱ་བྱིན་ཡང་འོངས་ནས་ངོ་མཚར་སྐྱེས་ཏེ་བརྒྱ་འགྱུར་དུ་རྩེ་བར་བྱེད་ཅིང་། འདི་ལྟར་ཚིགས་སུ་བཅད་དེ་ཡང་སྨྲས་པ། ཀྱེ་མ་དགེ་བ་སྔོན་བྱས་པའི། །ཡང་དང་ཡང་དུ་བདེ་བ་དག །སྔོན་བྱས་རྗེས་སུ་ལྡན་པའི་རྒྱུ། །མཐོ་རིས་རྣམས་སུ་ལྷ་སྤྱོད་དོ། །སྔར་ནི་རྟ་གཉིས་ལྡན་པ་ཡི། །ཤིང་རྟ་ཡོན་ཏན་དེ་བཞིན་གཉིས། །ཡེ་ཤེས་ལྕག་དང་ལྡན་པ་ཡིས། །ཤིང་རྟ་ཉི་མ་བཞིན་དུ་གསལ། །ཚུལ་ཁྲིམས་ལྡན་ཞིང་སྙིང་རྗེར་ལྡན། །འབྱུང་པོ་ཀུན་ལ་སྙིང་བརྩེ་ཞིང་། །མ་ལྟ་བུར་ནི་ཕན་བྱེད་པ། །ལྷ་ཡི་གནས་སུ་རབ་ཏུ་འགྲོ། །འདི་ལྟར་སྙིང་རྗེ་ཚོལ་བའི་མི། །འབྱུང་པོ་ཀུན་ལ་ཕན་དགའ་བ། །དེ་ལ་རྟེན་པའི་མི་དག་ནི། །སུམ་ཅུ་རྩ་གསུམ་གནས་སུ་འགྲོ། །རྟག་ཏུ་དུལ་ཞིང་སྙིང་རྗེར་ལྡན། །འབྱུང་པོ་ཀུན་ལ་ཕན་དགའ་བ། །དེ་ནི་མཆོད་པའི་གནས་འགྱུར་ཞིང་། །འཇིག་རྟེན་ཕ་རོལ་མཐོ་རིས་དགའ། །སྙིང་རྗེར་ལྡན་པའི་མི་དག་ནི། །ཟླ་བ་ལྟ་བུར་མཛེས་འགྱུར་ཞིང་། །མི་དེ་རྟག་ཏུ་ལྷ་འདྲ་ལ། །ལྷ་རྣམས་ཀྱིས་ནི་འདུད་པར་བྱེད། །འབྱུང་པོ་ཀུན་གྱི་གནས་གྱུར་པ། །མྱ་ངན་བྲལ་ཞིང་ཉོན་མོངས་བྲལ། །དེ་ལྟར་བདེ་བ་འདོད་པ་ཡིས། །རབ་ཏུ་དང་བས་སྙིང་རྗེ་རྟེན། །དེ་ནས་དེ་ལྟར་བརྒྱ་བྱིན་གྱིས་ཚིགས་སུ་བཅད་པ་དག་སྨྲས་ནས་ཕུག་དེ་ན་སྟན་གྱི་མཆོག་གསེར་ལས་བྱས་པ་རིན་པོ་ཆེ་སྣ་བདུན་འོད་རབ་ཏུ་འབར་བ། སྟེང་དུ་གདིང་བ་སྟན་ཁྲ་བོ་དང་ལྡན་པ་རྡོ་འཇམ་པ་གཤིས་སུ་བབ་པ་དབྱིབས་དང་ཆ་བྱད་སྣ་ཚོགས་དང་ལྡན་པ་དེ་དག་གི་སྟེང་དུ་འདུག་སྟེ། ལྷའི་རྒྱལ་པོ་བརྒྱ་བྱིན་དེ་ལྷའི་ཚོགས་རྣམས་དང་ལྷན་ཅིག་འཁོད་དོ། །ལྷ་རྣམས་དང་ལྷན་ཅིག་འཁོད་ནས་ལྷ་མོའི་ཚོགས་ཀྱིས་ཡོངས་སུ་བསྐོར་ཅིང་
གཟུགས་དང་ཆ་བྱད་སྣ་ཚོགས་དང་ལྡན་པའི་ལྷ་མོ་རྣམས་དང་ལྷན་ཅིག་ཡུན་རིང་དུ་རྩེ་བར་བྱེད་ཡོངས་སུ་སྤྱོད་པར་བྱེད་དོ། །དེ་ལྟར་ཡུན་རིང་ཞིག་ལོན་པ་དང་ཕུག་དེ་དག་ནས་བྱུང་སྟེ། ལྷ་སྣ་ཚོགས་བརྒྱ་སྙེད་ཀྱིས་ཡོངས་སུ་བསྐོར་ནས་ཀུན་དགའ་ར་བའི་སྐྱེད་མོས་ཚལ་ཞེས་བྱ་བ་ག་ལ་བ་དེར་འདོང་བར་བྱེད་དོ། །དེ་ལྟར་སིལ་སྙན་དང་རོལ་མོའི་སྒྲ་སྣ་ཚོགས་འབྱིན་པའི་ལྷའི་ཚོགས་མཐུ་ཆེ་བ་རྣམས་ཕྱི་བཞིན་འབྲང་ཞིང་འདོང་བ་ན་དེས་ཀུན་དགའ་ར་བའི་སྐྱེད་མོས་ཚལ་ཤིང་ལྗོན་པ་འབུམ་ཕྲག་དུ་མ་གསལ་བ། གསེར་དང་། བཻ་ཌཱུརྱའི་ཤིང་ལྗོན་པའི་འོད་ཀྱི་ཕྲེང་བ་འབར་བ་རྣམས་ཀྱིས་ཀུན་ནས་མཛེས་པར་འདུག་པ་དེ་དག་རྒྱང་རིང་པོ་ནས་མཐོང་ངོ་། །སྐྱེད་མོས་ཚལ་དང་ཚལ་རྣམ་པ་སྣ་ཚོགས་ཀྱིས་བརྒྱན་པ་དེ་དཔེར་བྱ་བར་མི་ནུས་ཀྱང་། ཅུང་ཟད་ཅིག་དཔེར་བྱ་ན་ཇི་ལྟར་ཉི་མ་བདུན་ཤར་བའི་འོད་ཟེར་འབྱུང་བ་ལྟར། སྐྱེད་མོས་ཚལ་དེའི་འོད་ཀྱང་དེ་ལྟ་བུ་ཡིན་ཏེ། འོད་སྣ་ཚོགས་དེ་དག་འབྱུང་བ་ནི་འདི་ལྟ་སྟེ། ཁ་དོག་སྔོན་པོ་དང་། སེར་པོ་དང་། བཙོད་ཀ་དང་། དཀར་པོ་སྟེ། འོད་ཁ་ཅིག་ནི་འདྲེས་པ་ཡིན་ནོ། །དེས་ཚལ་དེ་དག་དང་སྐྱེད་མོས་ཚལ་དེ་ཀུན་ནས་རབ་ཏུ་འབར་བ་ལྟ་བུར་རྣམ་པར་མཛེས་ཏེ། འོད་ཀྱི་ཁ་དོག་སྣ་ཚོགས་རྣམས་ཀྱིས་འཁོར་གསལ་བར་བྱས་ཤིང་བརྒྱན་པ་དེ་ཡང་ལྷའི་རྒྱལ་པོ་བརྒྱ་བྱིན་གྱིས་མཐོང་ནས་ལྷ་རྣམས་ལ་སྨྲས་པ། འདི་ལྟར་ཀུན་དགའ་ར་བའི་སྐྱེད་མོས་ཚལ་དང་ཉེ་བའི་ཚལ་བརྒྱན་པ་ལ་ལྷ་ཁྱེད་ཀུན་ལྟོས་ཤིག །འདི་དག་ཀུན་མཐོང་ལགས་སོ་ཞེས་སྨྲས་སོ། །འདིར་སྔོན་བརྒྱ་བྱིན་གྱི་སྟན་གྱི་ཕྱེད་ལ་འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་བར་འདུག་སྟེ། ལྷ་མོའི་ཚོགས་ཀྱིས་ཡོངས་སུ་བསྐོར་ནས་རྩེས་སོ། །ལྷའི་འཇིག་རྟེན་གཉིས་ལ་དབང་བ་ལོ་འབུམ་ཕྲག་བྱེ་བ་དུ་མར་སྤྱད་ཀྱང་ཚིམ་པ་མེད་དེ། དུས་དེ་ཟད་ནས་ལས་ཀྱི་མཐའ་སྤྱད་པ་ལེགས་པར་བྱས་པ་ཚལ་དེར་གནས་པ་དེའི་བཟང་བ་གང་ཡིན་པ་དང་བརྗིད་པ་གང་ཡིན་པ་དེ་སྲིད་དུ་རབ་ཏུ་མཐུ་ཆེ་བར་གྱུར་ཏོ། །དེ་ལྟར་ལྷ་ཀུན་ཉོན་ཅིག །སྔོན་གྱི་དུས་ན་རྒྱལ་པོ་ང་ལས་ནུ་ཞེས་བྱ་བ་ཞིག་བྱུང་སྟེ། དེ་མིའི་གནས་བཞི་རྣམས་ལ་ཆད་པ་མེད་ཅིང་མཚོན་གྱིས་བདའ་བ་མེད་པར་བཀའ་སྩོལ་བར་བྱེད་དོ། །དེ་སྔོན་ལས་ལེགས་པར་
བྱས་པ་རྣམས་ཀྱིས་འདོད་པ་དག་ལ་ཚིམ་པ་མེད་ཅིང་། དེ་ལྷའི་ཡུལ་འདིར་འོང་བར་བྱེད་དོ། །དེ་འོང་བ་ན་རང་གི་ལུས་ལས་འོད་འབྱུང་བས། རིའི་རྒྱལ་པོ་རི་རབ་འདི་བཅུ་འགྱུར་དུ་འོད་དང་ལྡན་པར་གྱུར་ཏོ། །ལྷ་ཐམས་ཅད་ཀྱང་ཟིལ་གྱིས་མནན་ནས་འོད་ཀྱི་ནང་དུ་འདུག་སྟེ། དེའི་ཚེ་རྒྱལ་པོ་དེ་རྒྱལ་ཆེན་བཞི་པའི་ལྷ་རྣམས་ཀྱིས་མངོན་པར་མཐོང་ནས། མཆོད་ཡོན་དང་རྐང་པ་བཀྲུ་བ་དག་ཐོགས་ནས་དོང་སྟེ། རྒྱལ་པོ་ཆེན་པོ་ཚུར་གཤེགས་བདག་ཅག་ནི་ཁྱོད་ཀྱི་སླད་དུ་མཆིས་པ་ལགས་ཏེ། བདག་ཅག་གི་མཆོད་ཡོན་ཁྱོད་ལ་འོས་པ་ལགས་སོ། །དེས་ལྷ་རྣམས་ཀྱི་ནང་དུ་མཆོད་ཡོན་བླངས་ནས་དེ་ནས་ཡང་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་འགྲོ་བར་བྱེད་དོ། །འོད་དེས་སུམ་ཅུ་རྩ་གསུམ་གྱི་འོད་ཀུན་མེད་པར་བྱས་ཏེ། དེ་ལྟར་དེ་གཅིག་པུ་མི་རྣམས་ཀྱི་ནང་ན་ཉི་མ་རྣམ་པར་མཛེས་པ་དེ་བཞིན་དུ་དེ་ལྷའི་རིས་འདིར་ཡང་རྣམ་པར་མཛེས་པ་ཡིན་ནོ། །དེ་ལྟར་ལྷ་དེ་དག་གི་འོད་མེད་པར་བྱས་པ་འཇིག་རྟེན་སྐྱོང་བ་བཞི་རྣམས་ཀྱིས་མངོན་པར་མཐོང་ནས། ལྷ་བརྟབས་པ་དེ་རྣམས་ལ་སྨྲས་པ། འདི་ལྟར་རྒྱལ་པོ་ང་ལས་ནུ་དེ་སུམ་ཅུ་རྩ་གསུམ་དུ་འོང་སྟེ། འོད་འདི་ནི་འཁོར་ལོས་སྒྱུར་བ་དེའི་ཤིང་རྟ་དང་འཁོར་ལོ་དང་ལུས་ཀྱི་གཟི་བརྗིད་ཡིན་གྱི། འོད་འདི་ནི་ལྷ་མ་ཡིན་རྣམས་ཀྱི་མ་ཡིན་ལ། ས་ལ་རྒྱུ་བ་གང་གི་ཡང་མ་ཡིན་ཏེ་བརྟབས་པས་ཆོག་ཆོག །རྒྱལ་པོ་དེ་ནི་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་ཡིན་ནོ། །དེ་དག་ལ་དེ་སྐད་སྨྲས་པ་དང་། རྒྱལ་པོ་དེ་སུམ་ཅུ་རྩ་གསུམ་དུ་འོངས་སོ། །དེའི་ཚེ་བརྒྱ་བྱིན་ཀུན་དགའ་ར་བའི་སྐྱེད་མོས་ཚལ་ན་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ནས་བརྒྱ་བྱིན་གྱིས་རྒྱལ་པོ་དེ་མཐོང་ནས་ཁྱོད་འདིར་བྱོན་པ་སྟན་གྱི་ཕྱེད་འདི་ལགས་སོ་ཞེས་སྟན་གྱི་ཕྱེད་བསྟབས་སོ། །དེ་ནས་ལྷའི་དབང་པོ་བརྒྱ་བྱིན་དེ་དང་ལྷན་ཅིག་སྟན་ཕྱེད་ཕྱེད་ལ་འཁོད་དེ། འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་ཡུན་རིང་དུ་འཁོད་དོ། །དེ་ལེགས་པར་བྱས་པའི་ལས་ཟད་ནས། དེ་ནས་ཡང་སླར་ལྟུང་ངོ་། །དེས་སུམ་ཅུ་རྩ་གསུམ་གྱི་གནས་འདི་དག་ཀུན་དཔྱད་ནས། འདི་ལྟར་ཀུན་དགའ་ར་བའི་སྐྱེད་མོས་ཚལ་འདིར་དགའ་བའི་རྣམ་པ་འདི་ལྟ་བུ་གཞན་མ་
མྱོང་ངོ་། །དེ་ལྟར་སྐྱེད་མོས་ཚལ་རིན་པོ་ཆེ་དུ་མས་རྣམ་པར་བརྒྱན་པ་འདི་ཉམས་དགའ་བ་ཡིན་ཏེ། དེ་ལྟར་ས་འདིའི་གཞལ་མེད་ཁང་མཛེས་པ་གང་ཡིན་པ་དེ་ཉི་མ་བཞིན་རྣམ་པར་མཛེས་པ་ཡིན་ནོ། །དེ་ནས་ལྷའི་དབང་པོས་དེ་སྐད་སྨྲས་ནས། ལྷ་བརྒྱ་ཕྲག་སྟོང་གིས་ཀུན་ནས་ཡོངས་སུ་བསྐོར་ཏེ། ཀུན་དགའ་ར་བའི་སྐྱེད་མོས་ཚལ་ག་ལ་བ་དེར་འདོང་བར་བྱེད་དོ། །སྐྱེད་མོས་ཚལ་དུ་དོང་སྟེ། ལྷ་དང་ལྷ་མོའི་ཚོགས་ཀྱི་རྣམ་པས་ཡོངས་སུ་བསྐོར་ནས། རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ལྟར་དེ་ཤིང་ལྗོན་པ་སྣ་ཚོགས་དང་འོད་རྣམ་པ་སྣ་ཚོགས་ཀྱིས་བརྒྱན་པར་ཡུན་རིང་དུ་བདེ་བ་རྣམ་པ་དུ་མ་མྱོང་ནས་རིན་པོ་ཆེ་སྣ་བདུན་ལས་བྱས་པའི་ཤིང་རྟ་ཉི་མ་ལྟར་གསལ་བས་ནམ་མཁའ་དེ་ཉིད་ལ་སིལ་སྙན་དང་། རོལ་མོ་སྣ་ཚོགས་རྗེས་སུ་འབྲང་བཞིན་དུ་ལྷའི་འདུན་ས་ཆོས་བཟང་ག་ལ་བ་དེར་དོང་སྟེ་ཕྱིན་པ་དང་། དེ་ཉིད་དུ་ལྷ་གཞན་དག་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པ་དེ་ཟད་པར་མ་གྱུར་པ་དེ་སྲིད་དུ་འདོད་པའི་ཡོན་ཏན་ལྔ་དང་ལྡན་པ་རྣམས་ཀྱིས་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ཟད་ནས་དེ་ནས་ཡང་སེམས་ཅན་དམྱལ་བ་དང་དུད་འགྲོ་དང་ཡི་དགས་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་རྩོད་པའི་དུས་སུ་མི་སྐྱེ་ཞིང་རྫོགས་ལྡན་གྱི་དུས་སུ་སྐྱེ་བར་འགྱུར། ཡུལ་ཤིན་ཏུ་ཉམས་དགའ་ཞིང་ཚལ་དང་ཉེ་བའི་ཚལ་དང་ལྡན་པ་དང་འབྲས་སཱ་ལུ་དང་ནས་དང་གྲོ་དང་བུ་རམ་ཤིང་རོ་དང་ལྡན་པ་དང་སྐྱེ་བོ་དང་ཤིན་ཏུ་ལྡན་པ་དང་ཆོས་དང་ཤིན་ཏུ་ལྡན་པར་སྐྱེ་བར་འགྱུར་ཏེ། རྒྱལ་པོའམ་བློན་པོ་ཆེན་པོ་སྐྱེ་བོ་ཀུན་དགའ་བ་གཟུགས་བཟང་པོ་དང་ལྡན་ཞིང་དབང་པོ་ཚང་བ་དང་བུ་དང་ཚ་བོ་དང་ལྡན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ཕྲེང་བའི་གྲིབ་མ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་
ཤེས་པས་བརྟགས་ན། ལས་ཀྱི་མཐའ་སྤྱད་པ་ལེགས་པར་བྱས་པ་སེམས་དགེ་བའི་བསམ་པ་དང་ལྡན་པར་གྱུར་པ་གང་གིས་སྲོག་གཅོད་པ་དང་མ་བྱིན་པར་ལེན་པ་སྤངས་པ་ཡིན་ནོ། །རྣམ་པ་དུ་ཡོད་ཅེ་ན། གང་བདག་ཉིད་ཀྱིས་སྲོག་མི་གཅོད་པ་ཡིན་ཏེ། འདི་ལྟར་ཆུ་སྲིན་བྱིས་པ་གསོད་དམ། ཀུམ་བྷི་རའམ། ན་ཀྲའམ། ཤང་ཀ་ཆུ་འགྲམ་དུ་བཟུང་སྟེ། བཅིངས་ནས་གསོན་བཞིན་དུ་ཤ་བཏོགས་ནས་ཟ་བ་འམ། འཚོང་བ་སྲོག་གཅོད་པའི་རྣམ་པ་དེ་ལྟ་བུ་དང་བྲལ་ཞིང་སྲོག་གཅོད་པ་གཞན་ཡང་ཚུལ་ཁྲིམས་ལ་རབ་ཏུ་འཇོག་པར་བྱེད། སྲོག་གཅོད་པ་ལ་རྗེས་སུ་ཡི་རང་བར་མི་བྱེད་ཅིང་ཕྱིར་ཟློག་པར་བྱེད་ལ། ཕྱིར་བཟློག་ནས་དགེ་བའི་ལམ་ལ་རབ་ཏུ་འཇོག་པར་བྱེད་པ་ཡིན་ཏེ་རྣམ་པ་དེ་དག་ནི་སྲོག་གཅོད་པ་སྤངས་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། འདི་ལ་སྐྱེས་བུ་དགེ་བ་དད་པ་དང་ལྡན་པར་གྱུར་པ། དྲང་ཞིང་དྲང་པོའི་རང་བཞིན་ཅན་སྡོམ་པ་བླངས་པ་ཆགས་པའི་བསམ་པ་མེད་པ། གང་གིས་དགེ་འདུན་གྱི་ནང་ངམ་མཆོད་རྟེན་ལ་བདུག་སྤོས་ཕུལ་བ་དེ་ལ་དེ་སྡོམ་པའི་བསམ་པས་སྣོམ་པར་མི་བྱེད། དྲི་ཞིམ་པོ་དེས་གོས་ལ་གོས་པར་མི་བྱེད་མྱོང་བར་མི་བྱེད་སྣའི་ཡུལ་དང་ཕྲད་ཀྱང་མི་འདོད་པ་ཡིན་ཏེ་རྣམ་པ་དེ་དག་ཡིན་ནོ། །གཞན་ཡང་མ་བྱིན་པ་ལེན་པ་ཤིན་ཏུ་ཆུང་བ་ཡང་མི་ལེན་ལ། གཞན་ལེན་པ་ཡང་དེ་ལྟར་ཕྱིར་ཟློག་པར་བྱེད། དགེ་བའི་ལམ་ལ་རབ་ཏུ་འཇོག་པར་བྱེད། དེ་ལྟར་ཕྱིར་ཞིང་ལམ་བཟང་པོ་ལ་གནས་པར་བྱེད་པ་ཡིན་ཏེ། དེ་ནི་བདག་ལ་ཕན་པ་གཞན་ལ་ཕན་པ་བྱེད་པའི་སྐྱེས་བུ་ཡིན་ནོ། །སྲོག་ཆགས་རྣམས་ཀྱི་ཕན་པ་ལ་རབ་ཏུ་ཞུགས་པ་ཇི་ལྟ་བུ་ཡིན་ཞེ་ན། ཇི་ལྟར་རང་གི་བུའི་སྲོག་གཅོད་པར་མི་བྱེད་པ་དེ་བཞིན་དུ་སྲོག་ཆགས་ཕྲེའུ་དང་གྲོག་སྦུར་ལ་སོགས་པ་སྲོག་ཆགས་ཐམས་ཅད་གསོད་པར་མི་བྱེད་ཅིང་དེ་ལྟར་གཞན་དག་ཀྱང་ཚུལ་ཁྲིམས་དེ་ཉིད་སྲུང་དུ་འཇུག་ལ་དགེ་བའི་ལམ་ལ་རབ་ཏུ་འཇོག་པ་ཡིན་ནོ། །སྦྱིན་པ་ལ་དགའ་བ་ཇི་ལྟ་བུ་ཡིན་ཞེ་ན། འདི་ལ་དབུལ་པོ་ཚེགས་ཆེན་པོས་འཚོ་བ་བསམ་གཏན་དང་པོ་ཐོབ་པ་ལམ་དུ་ཞུགས་པ་ལ་རང་གི་སྣོད་དེ་ནས་ཟས་ཀྱི་སྐལ་བ་སྦྱིན་པར་བྱེད་ཅིང་། གཞན་ཡང་སྦྱིན་པ་དེ་
ལྟ་བུ་བྱེད་དུ་འཇུག་ལ་བསོད་ནམས་དག་བྱེད་དུ་འཇུག་པ་ཡིན་ཏེ། བདག་དང་གཞན་ལ་ཕན་པ་བྱེད་པ་དེ་ལུས་དང་བྲལ་ནས་བདེ་འགྲོ་མཐོ་རིས་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ཕྲེང་བའི་གྲིབ་མའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ཕྲེང་བའི་གྲིབ་མའི་ལྷ་རྣམས་ཀྱི་ནང་ལྷའི་རིས་དེ་ན་ཤིང་ལྗོན་པ་ཕྲེང་བའི་གྲིབ་མ་ཞེས་བྱ་བ་ཀུན་ནས་འོད་ཀྱི་ཕྲེང་བ་འབྱུང་བ་ཡོད་དེ། མེ་ཏོག་དེ་དག་གི་དྲི་ཤིན་ཏུ་ཞིམ་པ་ཀུན་དུ་དཔག་ཚད་ཙམ་དུ་འབྱུང་ལ། ཤིང་ལྗོན་པ་གཞན་དག་གི་མེ་ཏོག་རྡོལ་ནས་དྲི་ཞིམ་པོ་རབ་ཏུ་འབྱུང་ངོ་། །དེ་ལྟར་ཡུན་རིང་དུ་དགའ་བའི་མེ་ཏོག་རེ་རེ་གང་ཡིན་པས་ཕྲེང་བ་ལྷའི་མགོ་ལ་འཆིང་བར་བྱེད་དོ། །ཕྲེང་བ་དེ་ཡང་ཁ་དོག་རྣམ་པ་སྣ་ཚོགས་སུ་ཡོད་དེ། ཁ་དོག་སྔོན་པོ་དང་སེར་པོ་དང་བཙོད་ཀ་དང་དཀར་པོ་རྣམས་ཀུན་ནས་ཤིན་ཏུ་རྣམ་པར་ཕྱེ་བ་ཡིན་ནོ། །ཇི་ལྟར་མིའི་འཇིག་རྟེན་ན་རི་མོ་མཁན་ཤིན་ཏུ་མཁས་པ། ལེགས་པར་བསླབས་པ་བྱང་ཞིང་མཁས་པའི་ལས་ཀྱིས་གནས་དང་གནས་དག་ཏུ་ཕྲེང་བ་ཤིན་ཏུ་སྡུག་པར་བྲིས་པ་དེ་ལྟར་ཤིང་ལ་རྣམ་པར་འབྱུང་བར་འགྱུར་ཏེ། ཤིང་དེ་རྣམས་ལས་ཕུན་སུམ་ཚོགས་པ་དེ་ལྟ་བུ་སྐྱེ་བར་འགྱུར་རོ། །དེ་ནས་ཡང་རྣམ་པ་གཞན་གྱིས་ལྷ་དེ་རྣམས་ཡུལ་གྱི་བདེ་བ་ལྔ་མྱོང་བར་འགྱུར་ཏེ། སིལ་སྙན་ཡན་ལག་ལྔ་དང་ཡང་དག་པར་ལྡན་པ་རྣམས་ཚལ་དང་ཉེ་བའི་ཚལ་དུ་རྩེ་བར་བྱེད། དགའ་དགུར་སྤྱོད་པར་བྱེད་དོ། །འདོད་པ་ཐམས་ཅད་ཡང་དག་པར་འབྱོར་པ་དེས། ལྷ་རྣམས་གང་དང་གང་ཡིད་ལ་སེམས་པ་དེ་དང་དེ་ཉིད་ཡང་དག་པར་འགྲུབ་བོ། །དེ་ལྟར་ཉམས་སུ་དགའ་བ་རྣམ་པ་སྣ་ཚོགས་དུ་མ་འབྱུང་བར་འགྱུར་ཏེ། ལས་ལེགས་པར་བྱས་པ་དེས་ལྷ་རྣམས་ཀྱི་ཐམས་ཅད་ཡང་དག་པར་འགྲུབ་བོ། །དེ་ནས་བདེ་བ་གཞན་དང་ཡང་དག་པར་ལྡན་པར་འགྱུར་ཏེ། རྫིང་མེ་ཏོག་སྣ་ཚོགས་དང་ལྡན་པ་ཞེས་བྱ་བ་ཡོད་ལ་དེའི་མཐུ་འདི་ལྟ་བུ་འབྱུང་སྟེ་འདི་ལྟ་སྟེ། མེ་ཏོག་ཁ་ཕྱེ་བ་ཞེས་བྱ་བ་འབྱུང་ངོ་། །དེ་ནམ་ཡང་ཞུམ་པར་མི་འགྱུར་ལ། རིན་པོ་ཆེ་སྣ་བདུན་གྱི་བུང་བ་རྣམས་ཀྱིས་ཉེ་བར་བརྒྱན་ཏེ་བུང་བ་དེ་དག་ཀྱང་ལྷའི་གླུ་དབྱངས་ལེན་པ་ཡིན་ནོ། །དེར་ལྷ་མོ་དེ་རྣམས་ཤིན་ཏུ་དགའ་བ་སྐྱེད་དེ། ཀྱེ་ཨེ་མ་བུང་བ་སྣ་ཚོགས་དག་ཤིན་ཏུ་ཉམས་དགའ་བར་བྱེད་
པ་ཡིན་ལ། བདག་ཅག་གི་སྙིང་ལ་ཡང་རབ་ཏུ་སིམ་པ་འབྱུང་ངོ་ཞེས་ཕན་ཚུན་སྨྲ་སྟེ་དེ་ལྟར་བུང་བ་སྣ་ཚོགས་ཀྱི་རྫིང་རྣམས་སུ་གླུ་དབྱངས་ལེན་ནོ། །དེ་ནས་ཡང་རྫིང་ཤིན་ཏུ་བཀྲ་བ་རྣམས་སུ། བྱ་ངང་པ་དང་ངང་མོ་བབས་པ་རྣམས་ཀྱིས་པད་མའི་རྡུལ་སློང་སྟེ། གསེར་དང་དངུལ་གྱི་ཁ་དོག་ལྟ་བུའི་རྡུལ་གང་གིས་ཆུ་དེ་དག་ཐམས་ཅད་མཉམ་པར་ཁེབས་སོ། །ཆུ་ཁེབས་པ་དེ་ངུར་པ་རྣམས་ཀྱིས་མངོན་པར་མཐོང་ནས་སྐད་སྙན་པ་འབྱིན་ཅིང་རྒྱུག་གོ །དེ་ལྟར་བྱ་རྣམས་ཀྱིས་འདྲ་བར་གང་བའི་རྫིང་དེ་དག་ཡང་དག་པར་ཤེས་ནས། ལྷ་དང་ལྷ་མོའི་ཚོགས་ཀྱིས་གང་བ་རྣམས་ཡིད་ཤིན་ཏུ་རབ་ཏུ་དགའ་བས་བྱའི་ཚོགས་དེ་དག་ག་ལ་བ་དེར་ཤིན་ཏུ་གླུ་ལེན་བྲོ་རྡུང་ཞིང་འདོང་བར་བྱེད་དོ། །ལྷ་གཞན་གང་ཡིན་པ་དེ་དག་ཀྱང་རོལ་མོའི་སྒྲ་རྣམ་པ་སྣ་ཚོགས་ཀྱིས་རྩེ་བ་རྣམས་ཡོངས་སུ་བཏང་ནས་བྱའི་ཚོགས་འདུས་པ་ག་ལ་བ་དེར་རྩེ་བའི་དོན་དུ་འདོད་པར་བྱེད་དོ། །དེ་ནས་དེར་ཡང་དགའ་བར་བྱས་ནས་སྐྱེད་མོས་ཚལ་ཁང་བཟངས་དཀྲིགས་པ་ཞེས་བྱ་བ་ག་ལ་བ་དེར་འདོང་བར་བྱེད་དོ། །ཁང་བཟངས་དཀྲིགས་པ་དེ་ན་རིན་པོ་ཆེ་སྣ་བདུན་གྱི་ཀ་བ་རྣམས་ཀྱིས་ཡོངས་སུ་བསྐོར་བ་ཡིན་ཏེ་འདི་ལྟ་སྟེ། བཻ་ཌཱུརྱ་དང་གསེར་དང་དངུལ་དང་ཤེལ་དང་སྤུག་རྣམས་ཀྱིས་བརྒྱན་ཅིང་མཛེས་པར་བྱས་སོ། །ལྷ་མོ་རྣམ་པ་སྣ་ཚོགས་ཀྱིས་ཀྱང་བརྒྱན་ཅིང་ས་ཕྱོགས་དེ་མཛེས་པར་བྱས་པ་ཡིན་ཏེ། དེར་ཡང་ལྷ་རྣམས་དགའ་བར་བྱེད་རྩེ་བར་བྱེད། དགའ་དགུར་སྤྱོད་པར་བྱེད་དོ། །དེར་ཡང་ཡིད་ཤིན་ཏུ་བདེ་བ་ལྷའི་རྒྱན་གྱིས་རྣམ་པར་བརྒྱན་པ། ལྷའི་ཙན་དན་གྱིས་ལུས་བསྐུས་པ་ཕན་ཚུན་གནོད་པ་ཀུན་མེད་པ་དང་ལྡན་པ་ཕན་ཚུན་དགའ་བ་ཕན་ཚུན་སྙིང་ལ་མི་བདེ་བ་མེད་པ་དང་ལྡན་པ། ཕན་ཚུན་ཕྲག་དོག་དང་ཐབ་མོ་རྣམས་ཀྱིས་སྐྱོ་བ་མེད་པ་རང་གི་ལས་ཀྱི་འབྲས་བུ་ལ་སྤྱོད་པ་མཐོ་རིས་ཀྱི་ས་སྣ་ཚོགས་རྣམས་སུ་ལས་སྣ་ཚོགས་དང་ལྡན་པ། རང་གི་ལས་ཀྱི་འབྲས་བུ་མངོན་སུམ་པའི་ལྷ་རྣམས་རྩེ་བར་བྱེད་ཉེ་བར་སྤྱོད་པར་བྱེད་དོ། །དེ་ནས་ཡང་དཔག་བསམ་གྱི་ཤིང་གི་ཚལ་ག་ལ་བ་དེར་འདོང་བར་བྱེད་དོ། །དེར་མཐུ་འདི་འབྱུང་སྟེ། ཡིད་ལ་གང་དང་གང་སེམས་པ་དེ་དང་དེ་དག་ཤིང་དེ་རྣམས་ཉིད་ལས་འཐོབ་བོ། །ཚལ་དེ་ན་ཤིན་ཏུ་དྲི་ཞིམ་ཞིང་
རོ་ཕུན་སུམ་ཚོགས་པའི་བཟའ་བ་དང་བཏུང་བ་ཆུ་བོ་ལྟར་འབབ་སྟེ་ལས་ལེགས་པར་བྱས་པ་མངོན་སུམ་དུ་གྱུར་པའི་ལྷ་དེ་རྣམས་ཡིད་རབ་ཏུ་དགའ་བས་རྩེ་ཞིང་ཆུ་བོ་དེ་རྣམས་ཀྱི་ཆང་ཞིམ་པོ་ལ་འཐུང་ལ་བདུད་རྩི་ལ་ཡང་ཟ་བར་བྱེད་དོ། །བཟའ་བ་དང་བཏུང་བའི་རོ་དེས་ཚིམ་པ་མེད་པ་དེ་རྣམས་བདེ་བ་འབར་བ་ལྟ་བུ་དེ་བརྒྱ་འགྱུར་དུ་མཛེས་པ་ཡིན་ནོ། །དེ་ནས་དེར་ཡང་རྩེ་བར་བྱེད་དེ། རྩེ་བ་སྣ་ཚོགས་བྱས་ནས་པད་མ་དཀར་པོའི་ལོ་མའི་ཚལ་ཞེས་བྱ་བ་ག་ལ་བ་དེར་འདོང་བར་བྱེད་དོ། །ཚལ་དེ་ན་པད་མ་དཀར་པོ་གང་ཡིན་པ་དེ་དག་གི་ལོ་མ་དང་མདོག་དང་དྲི་དང་རོ་ཤིན་ཏུ་ཕུན་སུམ་ཚོགས་པ་ཡིན་ལ་དེ་དག་ལས་ཆང་ཞིམ་པོ་འབྱུང་སྟེ། ཇི་ལྟར་སྟོན་ས་ནས་ཆང་གི་རྒྱུན་འབྱུང་བ་དེ་བཞིན་དུ་ཡོངས་སུ་འབྱུང་ངོ་། །པད་མ་དཀར་པོའི་མདོག་གང་ཡིན་པ་ལས་ཆང་གི་མདོག་དང་རོ་དང་དྲི་དེ་དང་འཐུན་པར་དེ་ཉིད་ལས་འབྱུང་ངོ་། །པད་མ་གསེར་གྱི་མདོག་གང་ཡིན་པ་ལས་ཆང་གི་མདོག་དེ་དང་འཐུན་པར་འབྱུང་ངོ་། །བཻ་ཌཱུརྱའི་མདོག་གང་ཡིན་པ་ལས་དེ་དག་ཀྱང་མདོག་དེ་ཉིད་དང་འཐུན་པར་འབྱུང་ངོ་། །ཤེལ་གྱི་མདོག་གང་ཡིན་པ་ལས་དེ་དག་ཀྱང་དེ་ཉིད་དང་འཐུན་པར་འབྱུང་ངོ་། །སྔོ་བསངས་དང་སྤུག་ལྟ་བུ་གང་ཡིན་པ་ལས་ཆང་གི་མདོག་དེ་དག་ཀྱང་དེ་དང་འཐུན་པར་འབྱུང་ངོ་། །ཁ་དོག་སྣ་ཚོགས་གསེར་གྱི་འདབ་མ་བཻ་ཌཱུརྱའི་སྡོང་བུ། རྡོ་རྗེའི་མྱུ་གུ་དང་། ཟེ་བ་གང་ཡིན་པ་ལས་ཆང་སྣ་ཚོགས་དེ་དག་ཀྱང་དེ་ལྟ་བུ་ཉིད་དུ་འབྱུང་སྟེ། ཀུན་ནས་དྲི་ཤིན་ཏུ་ཞིམ་པ་དང་ལྡན་པའི་ཆང་དེ་དག་ལས་ཀྱང་འཐུངས་ནས་རྩེ་ཞིང་སྐྱེད་མོས་ཚལ་གཞན་ཀུན་སྣང་ཞེས་བྱ་བ་ག་ལ་བ་དེར་རྩེ་བ་ལ་གནས་པར་བྱ་བའི་ཕྱིར་འདོང་བར་བྱེད་དོ། །དེ་ནས་སྐྱེད་མོས་ཚལ་ཀུན་སྣང་དེར་ཡང་ཕྱིན་ནས། དེ་ན་གནས་པའི་ལྷ་ཀུན་སུམ་ཅུ་རྩ་གསུམ་པའི་ལྷ་རྣམས་རྩེ་ཞིང་གནས་པའི་ས་དེ་དག་ཉིད་ལ་ལྟ་བར་བྱེད་དེ། དེ་ན་ལྷ་རྣམས་ལྷའི་བདེ་བ་ལ་ཉེ་བར་སྤྱོད་པ་མཐོང་ངོ་། །དེ་ནས་དེ་དག་ཐམས་ཅད་ཀྱང་མཐོང་ནས་དེ་ན་དགའ་བ་འདི་དག་ཡོད་དེ་འདི་ལྟ་སྟེ། ཀུན་ནས་རྫིང་ཀུན་དུ་བསྐོར་བ་ཞེས་བྱ་བ་ཡོད་དེ། དེས་སྐྱེད་མོས་ཚལ་དེ་ཀུན་ནས་ཡོངས་སུ་བསྐོར་བ་ཡིན་ལ། ཞེང་དུ་རྒྱང་གྲགས་གསུམ་ཡོད་པ་ཆུ་ཤིན་ཏུ་དང་བས་ཡོངས་
སུ་གང་བ་བཻ་ཌཱུརྱ་བཅག་འཕྲོའི་མདོག་ལྟ་བུའི་ཆུས་ཤིན་ཏུ་གང་བ་ཡིན་ནོ། །རྫིང་ཀུན་ནས་བསྐོར་བར་བྱ་ངང་པ་དང་ངུར་པས་མཛེས་པར་བྱས་པ་ཡིན་ཏེ། བྱ་ཐམས་ཅད་ཀྱང་ཀུན་ནས་མདོག་བཟང་པོ་རྒྱབ་ནི་གསེར་བཙོ་མ་རྐང་པ་ནི་བྱི་རུ་མིག་ནི་ཀེ་ཀེ་རུ་མགོ་གི་ཝང་གིས་ཐིག་ལེར་བྲིས་པ་སྒྲ་སྙན་པ་སྙན་པར་འབྱིན་ཏེ། སྒྲའི་གདངས་སྣ་ཚོགས་སུ་འབྱིན་ཅིང་རྩེ་བར་བྱེད་དོ། །དེར་དོང་ནས་སྐྱེད་མོས་ཚལ་གྱི་ནང་དུ་ཞུགས་པའི་ལྷ་དེ་རྣམས་གསེར་གྱི་འོད་དེས་ཇི་ལྟར་སེང་ལྡེང་གི་འདབ་མ་བསྡུས་པའི་ནང་ན་གསེར་དང་། ར་གན་བསྲེགས་པ་ལྟ་བུར་དེ་ལྟར་མཛེས་པ་ཡིན་ལ། ལྷ་དེ་རྣམས་ཕན་ཚུན་རང་རང་གི་དངོས་པོ་དེ་དག་ལ་ལྟ་བར་བྱེད་དེ། འདི་ལྟར་ལྷའི་གཞལ་མེད་ཁང་གི་མཐུ་འདི་ལ་ཁྱེད་རྣམས་ལྟོས། འདིར་བདག་ཅག་གི་གཞལ་མེད་ཁང་གི་མཐུས་ཁ་དོག་སེར་པོ་ཉིས་འགྱུར་དུ་འབྱུང་ངོ་ཞེས་སྨྲས་སོ། །དེ་རྣམས་གཞལ་མེད་ཁང་སྣ་ཚོགས་དེ་དག་ན་ཤིན་ཏུ་དགའ་སྟེ། དེར་ཡང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་དགའ་བར་བྱེད་རྩེ་བར་བྱེད་དོ། །ལྷའི་ཡུལ་ལ་སེམས་ཆགས་པ་དག་སྲེད་པས་ཆོག་མི་ཤེས་ཏེ། ཇི་ལྟར་སྦྱིན་སྲེག་བྱེད་པའི་མེ་ཆོག་མི་ཤེས་པ་དེ་བཞིན་དུ་ལྷ་རྣམས་ཀྱིས་སྒྲ་དང་རོ་དང་གཟུགས་དང་དྲི་སྡུག་པ་ཡུལ་གྱི་ཆུ་བོ་རྣམས་ཉིད་ཀྱིས་ཆོག་མི་ཤེས་ཏེ། ཇི་སྲིད་དུ་ལས་བྱས་ཤིང་བསགས་པ་བཅོམ་ཞིང་སྤངས་པར་མ་གྱུར་པ་དེ་སྲིད་དུ། དེས་དེ་དག་ན་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ཟད་ནས་དེ་ནས་ཡང་ལྷའི་རིས་དེ་ནས་འཆི་བར་འགྱུར་ཏེ་ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན། སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་རྟག་ཏུ་ཤིན་ཏུ་བདེ་བར་འགྱུར། ལུས་མེ་ཏོག་གི་ཕྲེང་བ་དང་ཕྱེ་མ་དང་བྱུག་པས་བྱུགས་པ་དང་རྟག་ཏུ་ཡིད་རབ་ཏུ་དགའ་ལ་མཆོག་ཏུ་འབྱོར་པ་དང་ལྡན་པའི་རྒྱལ་པོའམ་བློན་པོ་ཆེན་པོར་འགྱུར་ཏེ། སྐྱེ་བོ་ཀུན་དགའ་བ་དང་ནད་མེད་པ་དང་གནོད་པ་མེད་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ།
སུམ་ཅུ་རྩ་གསུམ་གྱི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་དམའ་བ་དང་མཐོ་བ་ན་རྒྱུ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་གང་གིས་སྲོག་གཅོད་པ་དང་མ་བྱིན་པར་ལེན་པ་དག་སྤངས་པ་ཡིན་ཏེ་འདི་ལྟ་སྟེ། འཚོ་བའི་དོན་དུ་སྦྲུལ་གསོད་པ་པོས་སྦྲུལ་རྣམས་ཀྱི་མགོ་བོ་གཤགས་ནས་ནོར་བུ་འབྱིན་པར་བྱེད་དེ། འདི་ལྟར་ནོར་བུ་འདི་དག་གིས་བདག་ཅག་གི་འཚོ་བ་བྱའོ་སྙམ་ནས། སྦྲུལ་དེ་དག་གསོད་པར་བྱེད་དོ། །རྣམ་པ་དེ་ལྟ་བུའི་སྲོག་གཅོད་པ་མི་བྱེད་ཅིང་། གཞན་གྲོག་སྦུར་ལ་སོགས་པ་ལ་ཡང་ཡིད་ཀྱིས་གནོད་པ་མི་བྱེད་ལ། སེམས་ཅན་གཞན་སེམས་ཅན་དུ་འདུ་ཤེས་ནས་སྲོག་གཅོད་པར་མི་བྱེད་པ་ཡིན་ཏེ་རྣམ་པ་དེ་དག་ནི་སྲོག་གཅོད་པ་སྤངས་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། འདི་ལ་རྩྭ་དང་བོང་བ་ཙམ་ཡང་རྐུ་སེམས་ཀྱིས་རྐུ་བར་མི་བྱེད་ཅིང་མ་བྱིན་པར་ལེན་པ་ཤིན་ཏུ་ཕྲ་མོ་ཡང་མི་ལེན་པ་ཡིན་ནོ། །འདི་ལྟ་སྟེ། གླེགས་བམ་མམ་དེ་དང་འཐུན་པ་གཞན་དག་རྐུ་སེམས་ཀྱིས་ལེན་པར་བྱེད་ལ། དེ་བླངས་ནས་གཞུང་སློབ་པར་བྱེད་པ་ཡིན་ཏེ། རྣམ་པ་དེ་ལྟ་བུ་ཡང་སྤངས་པ་ཡིན་ནོ། །སྦྱིན་པ་སྦྱིན་པ་ཇི་ལྟ་བུ་ཡིན་ཞེ་ན། འདི་ལ་ཚེགས་ཆེན་པོས་འཚོ་བར་གྱུར་ཀྱང་། གང་བདོག་པ་དེ་ལ་སེར་སྣ་མི་བྱེད་ལ། བསམ་གཏན་དང་པོ་ཐོབ་པ་དག་ལ་ཆོས་གོས་དང་བསོད་སྙོམས་དང་མལ་ཆ་དང་ན་བའི་གསོ་སྨན་གྱི་རྐྱེན་གྱི་ཡོ་བྱད་དག་འབུལ་བར་བྱེད་ཅིང་། དེ་བཞིན་དུ་བསོད་སྙོམས་འབུལ་བར་བྱེད། དགེ་འདུན་གནས་པའི་ས་ཕྱོགས་ཀྱི་བདེ་བ། དགེ་འདུན་བདེ་བར་གནས་པར་བྱ་བའི་ཕྱིར་མཉམ་པར་བྱེད་པ་ཡིན་ཏེ། དེ་ལྟར་བདག་ཉིད་ཀྱང་སྦྱིན་པ་ལ་དགའ་ལ། གཞན་ཡང་དགེ་བའི་ལམ་དེ་ཉིད་ལ་རབ་ཏུ་འཇོག་པར་བྱེད། སྡིག་པ་ལས་ཀྱང་ཟློག་པར་བྱེད་པའི་སྐྱེས་བུ་དགེ་བ་བདག་ཉིད་དང་། གཞན་ཉིད་ལ་ཕན་པར་རབ་ཏུ་ཞུགས་པ་ནི། ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་
ཀྱི་ནང་དམའ་བ་དང་མཐོ་བའི་གནས་སུ་སྐྱེ་བར་འགྱུར་རོ། །ཤིན་ཏུ་བདེ་བར་གནས་པ་དེར་སྐྱེས་པའི་གནས་དེ་དག་ཏུ་སྟན་ཁྲ་བོའི་ནང་རས་བལ་གྱིས་གང་བ་ལྟ་བུར་མཉེན་ཞིང་གཞི་ཤིན་ཏུ་འཇམ་པ་ལ་རྐང་པ་བཞག་ན་ནེམས་ཞེས་བྱེད། དེ་ནས་རྐང་པ་བཏེག་ན་པར་ཅེས་བྱེད་ལ་མཉེན་པ་ཡིན་ཏེ། དཔེར་ན་རླུང་གི་ཤུགས་ཀྱིས་ཆུ་རབ་ཏུ་བསྐྱོད་ན་རླབས་མི་འཐུན་པར་འབྱུང་ལ། དེ་ནས་རླུང་གི་ཤུགས་མེད་ན་མཉམ་པར་འགྱུར་བ་དེ་བཞིན་དུ་ས་གཞི་དེ་ཡང་ཀུན་ནས་དམའ་བ་དང་མཐོ་བ་ཡིན་ནོ། །དེ་ནས་ཡང་གནས་དེ་ཀུན་ནས་ཤིན་ཏུ་དྲི་མ་མེད་པ་ཡིན་ཏེ། དཔེར་ན་མེ་ལོང་ཤིན་ཏུ་དྲི་མ་མེད་པའི་ནང་དུ་གཟུགས་བརྙན་བསྒྱུར་བ་འབྱུང་བ་དེ་བཞིན་དུ་གནས་དེ་དག་ཏུ་ལྷ་དེའི་གཟུགས་བརྙན་སྣང་ངོ་། །དེ་ནས་ཡང་གནས་དེ་ཉིད་དུ་ལྷའི་ངོ་མཚར་དུ་བྱ་བ་འབྱུང་སྟེ། གང་ལྷ་གཞན་དེ་དག་བསམ་པ་སེམས་པའམ་ལྷ་གཞན་དུ་འགྲོ་བར་སེམས་ན། དེ་ཇི་ལྟར་ཡི་གེར་བྲིས་པའམ་ཡི་གེ་ཀུན་དུ་མངོན་པར་བྲིས་པ་མཐོང་བ་དེ་ལྟར་ལྷ་དེ་སོ་སོར་ཤེས་ཤིང་སོ་སོར་མངོན་པར་ཤེས་ཏེ། དེ་ནས་ཡང་ལྷ་མོ་དེ་དག་དང་ཤིན་ཏུ་རྩེ་བར་བྱེད་དོ། །དེ་ནས་གཞན་ཡང་གནས་དེ་དག་ཏུ་ངོ་མཚར་དུ་བྱ་བ་གཞན་གང་བསྟན་པའི་གནས་ནི་འདི་ལྟ་བུ་ཡིན་ཏེ། ལྷ་དེ་དག་གང་འདོད་པའི་བདེ་བ་དེ་དག་ཐམས་ཅད་འབྱོར་པར་འགྱུར་ལ། དེ་ལྟར་ལྷ་དེ་རྣམས་སུམ་ཅུ་རྩ་གསུམ་པའི་ལྷའི་རིས་མཐོ་བ་དང་དམའ་བའི་གནས་དག་ན་བདེ་བ་མྱོང་བ་ཡིན་ནོ། །དེ་ནས་ཡང་ལྷ་གནས་པ་སྐྱེད་མོས་ཚལ་ན་རྩེ་ཞིང་གནས་པ་དེ་དག་སྐྱེད་མོས་ཚལ་དུ་དགའ་སྤྱོད་བྱེད་དུ་འདོང་སྟེ། འདི་ལྟ་སྟེ། ཆང་ཞིམ་པོའི་ཚལ་ཞེས་བྱ་བ་ཚལ་ཆེན་པོ་ཀུན་ནས་དྲིལ་བུ་གཡེར་ཀའི་དྲ་བ་སྒྲ་འབྱིན་པས་དཀྲིགས་པ། ཤིང་ལྗོན་པ་རྣམ་པ་དུ་མ་རྣམས་ཀྱིས་བརྒྱན་པ། བྱ་སྣ་ཚོགས་དང་མེ་ཏོག་དང་འབྲས་བུས་ཤིན་ཏུ་རྣམ་པར་ཕྱེ་བའི་ཚལ་དེ་ན། ལྷ་དེ་རྣམས་སིལ་སྙན་ཡན་ལག་ལྔ་དང་ལྡན་པས་ཀུན་ནས་བསྐོར་ནས་རྩེ་བར་བྱེད་དེ། ཤིན་ཏུ་ཡིད་དུ་འོང་བ་དབང་པོ་ལྔའི་ཡུལ་གྱི་འབྲས་བུ་བདེ་བ་དག་མྱོང་བར་བྱེད་དོ། །དེ་ནས་ཡང་གནས་དེ་དག་ན་གཞལ་མེད་ཁང་གི་ཚལ་དག་ཡོད་དེ། འདི་ལྟ་སྟེ་ཚལ་སར་པའོ། །ཚལ་དེ་ན་གང་གི་ཚེ་ལྷ་དག་སྐྱེད་མོས་ཚལ་དུ་དགའ་སྤྱོད་བྱེད་
དུ་འདོང་བ་དེའི་ཚེ་ཤིང་ལྗོན་པ་དེ་རྣམས་ཀྱི་གཟུགས་གསར་དུ་སྐྱེ་སྟེ། འདི་ལྟར་ལྷ་མོ་དེ་དག་གིས་འབྲས་བུ་བདེ་བར་བཏོག་ཏུ་སླེབས་པར་འགྱུར་རོ། །ཚལ་དེ་ཡང་ཀུན་ནས་རིན་པོ་ཆེ་སྣ་བདུན་ལས་སྐྱེས་པ། ཤིང་ལྗོན་པ་ཉི་མ་ཤར་བའི་འོད་ལྟ་བུ་རྣམས་ཀྱིས་བརྒྱན་པ། མེ་ཏོག་དང་འབྲས་བུ་ཁ་དོག་དུ་མ་རྣམས་ཀྱིས་བརྒྱན་པ། བྱ་སྣ་ཚོགས་སྒྲ་འབྱིན་ཅིང་དགའ་བར་བྱེད་པའི་བྱ་རྣམས་ཀྱིས་བརྒྱན་པ། ལོ་མའི་ནང་དུ་གནས་པའི་བྱ་སྒྲ་འབྱིན་པ་རྣམས་ཀྱིས་ཚལ་དེ་ཀུན་ནས་སྒྲ་འབྱིན་པ་ལྟ་བུ་ཡིན་ཏེ། དེ་ལྟར་ཤིན་ཏུ་དགའ་བའི་ཚལ་དེ་ན་ལྷ་དེ་རྣམས་ཡུལ་དྲུག་ལ་ཆགས་པའི་སྲེད་པས་དགའ་བར་བྱེད། དགོད་པར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །དེ་དག་འདི་ལྟར་ཤིན་ཏུ་ཉམས་དགའ་བ་མིག་དང་རྣ་བ་དང་སྣའི་རོ་དགའ་བའི་ཚལ་དེ་ནས་མཐོ་བརྩེགས་ཞེས་བྱ་བ་རི་རབ་ཀྱི་རྩེ་མོ་དེར་འདོང་བར་བྱེད་དོ། །ལྷ་མོ་བལྟ་ན་སྡུག་ཅིང་རྒྱན་དང་ཆ་བྱད་སྡུག་པ་དེ་རྣམས་ཉེ་བ་ན་གླུ་དབྱངས་ལེན་བཞིན་དུ་མཐོ་བརྩེགས་ཞེས་བྱ་བ་རི་རབ་ཀྱི་རྩེ་མོ་ཀུན་ནས་རྒྱར་དཔག་ཚད་བཅུ་ཡོད་པ་དེར་དོང་ངོ་། །དེའི་སྟེང་ན་རྣམ་པར་མཛེས་པ་ཞེས་བྱ་བའི་རྫིང་རིན་པོ་ཆེ་སྣ་བདུན་གྱི་མེ་ཏོག་ཨུད་པ་ལ་སྔོན་པོ་དང་། ཀོ་ཀ་ན་དང་། ཀུ་མུ་ད་རྣམས་ཀྱིས་ཁེབས་པ་ཆུ་རྙོག་པ་མེད་ཅིང་། བྱ་ངང་པ་དང་ངུར་པའི་སྒྲ་རྣར་སྙན་པ་འབྱིན་པ་ཀུན་ནས་ཁང་བཟངས་ཀྱིས་ཡོངས་སུ་བསྐོར་ཅིང་། རིན་པོ་ཆེ་སྣ་བདུན་གྱི་ཀ་བ་རྣམས་ཀྱིས་བརྒྱན་པ། ཀུན་ནས་ཚལ་དང་ཉེ་བའི་ཚལ་གྱིས་ཕྱོགས་བསྐོར་བ། གཟུགས་བལྟ་ན་སྡུག་པ་རྣམས་ཀྱིས་རྫིང་བསྐོར་བར་ལྷ་དེ་རྣམས་ལྷ་མོའི་ཚོགས་ཀྱིས་ཡོངས་སུ་བསྐོར་ནས་བྲོ་གར་བྱེད། དགོད་པར་བྱེད། རྩེ་བར་བྱེད་དོ། །མྱོས་པའི་སྐྱོན་དང་བྲལ་བའི་ལྷའི་ཆང་དག་ལ་འཐུང་བར་བྱེད་ཅིང་། འདོད་པའི་རོ་དྲུག་ཏུ་གྱུར་པའི་འབྲས་བུ་ཞིམ་པོ་གཞན་དག་ལ་ཟ་ལ། འབྲས་བུ་དེ་དག་གི་ནང་ན་ཡོད་པའི་ཆང་ལ། ལྷ་མོ་རྒྱན་དང་ཆ་བྱད་སྣ་ཚོགས་ཐོགས་པ་དེ་དག་དང་ལྷན་ཅིག་འཐུང་བར་བྱེད་དོ། །ཕྱོགས་གཞན་ན་ལྷ་མོ་རྣམས་གླུ་དབྱངས་ལེན། དགོད་པ་བྱེད་ཅིང་པི་བང་དང་གླིང་བུ་དང་ཁར་རྔ་ལ་མཁས་པ་ཕན་ཚུན་དགའ་བར་གནས་པའི་ལྷ་མོ་དང་ལྷའི་ཚོགས་དག་རྫིང་
དེ་བསྐོར་ནས་ལྷ་དང་ལྷ་མོའི་ཚོགས་ཡིད་དུ་འོང་བ་རྣམ་པ་སྣ་ཚོགས་ཉེ་བར་གནས་པ་རྣམས་ཀྱིས་ཡུན་རིང་དུ་རྩེ་བར་བྱེད། དགའ་དགུར་སྤྱོད་པར་བྱེད་དོ། །དེ་ནས་གལ་ཏེ་ཡུན་རིང་དུ་འདས་ན། ལྷ་དེ་རྣམས་རྫིང་གི་ཕྱོགས་དེ་ནས་ཐམས་ཅད་ཡིད་དུ་འོང་བའི་སྐྱེད་མོས་ཚལ་ག་ལ་བ་དེར་འདོང་བར་བྱེད་དེ། ལུས་མེ་ཏོག་གི་ཕྲེང་བ་དང་ཕྱེ་མ་དང་བྱུག་པས་བྱུགས་པ། རང་གི་འོད་ལ་རང་གི་ལེགས་པར་བྱས་པ། དམན་པ་དང་འབྲིང་དང་ཁྱད་པར་དུ་འཕགས་པ་ལས་བྱས་པའི་མཐུ་དེ་དག་དང་ལྷན་ཅིག་ཏུ་རྩེ་བར་བྱེད་དོ། །ལས་དེ་དང་རྒྱུ་འཐུན་པར་ཡིད་བདེ་བ་འབྱུང་བར་འགྱུར་ཏེ། གང་གིས་ལེགས་པར་བྱས་པ་རྣམ་པ་ཇི་ཙམ་དུ་བྱས་པ་དེའི་རྣམ་པ་དེ་ཙམ་ཉིད་དུ་མིག་གི་རྣམ་པར་ཤེས་པའི་དམིགས་པ་ཡིད་བདེ་བ་འབྱུང་ངོ་། །འདི་ལྟར་གང་གིས་ལས་དམན་པ་བྱས་ན་དེ་དང་འཐུན་པར་གཟུགས་དམིགས་པ་གཅིག་ལ་གཟུགས་དེ་ཉིད་མཐོང་བར་འགྱུར། གང་གིས་ལས་འབྲིང་དུ་བྱས་ན་དེ་གཟུགས་འབྲིང་པོ་བལྟ་ན་སྡུག་པ་གཟུགས་དེ་ཉིད་མཐོང་བར་འགྱུར་ཏེ། དེའི་ཡིད་བདེ་བ་འབྲིང་དུ་འབྱུང་བར་འགྱུར། གང་གིས་ལས་ཁྱད་པར་དུ་འཕགས་པ་བྱས་ན། ལྷ་དེ་གཟུགས་དང་བོང་ཚོད་དང་མདོག་དང་དབྱིབས་དང་གཟུགས་ཤིན་ཏུ་བལྟ་ན་སྡུག་པ་མཐོང་བར་འགྱུར་ཏེ། ལྷའི་རིས་འདོད་པ་ན་སྤྱོད་པ་ཐམས་ཅད་དང་། ས་ཐམས་ཅད་དུ་བསྙེད་པ་གང་ཡིན་པ་གཟུགས་དང་དྲི་དང་རེག་པ་དམིགས་པ་ཐམས་ཅད་ནི་དེ་ལྟ་བུ་ཡིན་ལ། དེ་དག་གི་ནང་ན་ལྷ་དག་ཉིད་ནི་སྤྱི་གཅིག་སྟེ། གཞན་དུ་ན་ལས་ཀྱི་འབྲས་བུ་རྣམ་པར་སྨིན་པ་རྣམ་པ་གསུམ་དུ་མི་འགྱུར་རོ། །དེ་ལྟ་བས་ན་ཡིད་བདེ་བ་རྣམ་པ་གསུམ་ཡང་གཞན་དང་གཞན་དུ་རིག་པར་བྱ་སྟེ་དེ་བཞིན་དུ་ལས་སོ་སོས་ལྷ་མོ་གཟུགས་བཟང་ཞིང་རྒྱན་དང་ཆ་བྱད་ཐོགས་པ་སོ་སོར་རིག་པར་བྱའོ། །དེ་ནས་ལྷ་ཡིད་བདེ་བ་སྐྱེད་མོས་ཚལ་དུ་དོང་བ་སྒྲ་དང་རེག་པ་དང་རོ་དང་གཟུགས་དང་དྲི་ལ་ཚིམ་པ་མེད་པ་དེ་དག་ཐམས་ཅད་དགེ་སློང་དེས་མཐོང་ནས་འདི་ལྟར་ཚིགས་སུ་བཅད་དེ་སྨྲས་པ། བསྐལ་མཐའི་ཉི་མས་རབ་བསྲེགས་ན། །རྒྱ་མཚོ་རྣམས་ཀྱང་སྐམ་འགྱུར་གྱི། །བསྐལ་པ་བྱེ་བ་བརྒྱ་རྣམས་སུའང་། །མཐོང་བའི་གཟུགས་ཀྱིས་ཚིམ་མི་འགྱུར། །ཆར་འབབ་ལ་སོགས་ཆུ་རྣམས་ཀྱིས། །
རྒྱ་མཚོ་གང་བར་འགྱུར་སྲིད་ཀྱི། །ལྟ་བ་རྒྱ་མཚོའི་གཟུགས་རྣམས་ཀྱིས། །ཚིམ་པ་ཡོད་པར་མི་འགྱུར་རོ། །འདོད་པ་དག་ལས་ཚིམ་མེད་པ། །ལུས་ཅན་མྱ་ངན་ལྡན་པ་ཡི། །སྲེད་པ་སྣ་ཚོགས་གང་ཡིན་པ། །སྲེད་དེ་ཅི་ག་བདེར་བརྟག་གམ། །འདོད་པ་སྐྱེད་པའི་བདེ་བ་གང་། །མཁས་ལ་བདེ་བ་དེ་མི་འདོད། །འདོད་ལས་རྣམ་པར་གྲོལ་བ་གང་། །དེ་ནི་བདེ་ལས་བདེ་མཆོག་འགྱུར། །བདེ་དང་འདྲ་བར་འདྲེས་པ་གང་། །ཟས་ནི་དུག་དང་འདྲེས་པ་བཞིན། །སྲེད་དང་རྣམ་པར་བྲལ་བ་གང་། །ཟས་དང་འོ་མར་འདྲེས་པ་བཞིན། །གཏི་མུག་མུན་པ་མི་ཤེས་པ། །བྱིས་པ་རྣམས་ནི་འདོད་པས་བསྲེགས། །མ་ལ་ཡ་ཡི་ནགས་ཚལ་གང་། །སྲིན་བུ་ངན་པས་ཆུད་གཟན་བཞིན། །སྲེད་དང་བཅས་ལ་རྟོག་པ་གང་། །དེ་རྣམས་ཀྱི་ནི་གྲངས་མེད་ལ། །རྣམ་པར་རྟོག་པ་ཚིམ་མེད་པ། །འཆི་བདག་རྒྱལ་པོས་མངོན་པར་འཇོམས། །རྣམ་རྟོག་འདོད་པའི་དབང་སོང་རྣམས། །སྲེད་པ་དག་གི་ཡུལ་ན་གནས། །བདེ་བའི་སྐལ་བ་མ་མཐོང་སྟེ། །དེ་ལྟར་དེ་བཞིན་གཤེགས་པས་མཁྱེན། །འདོད་པ་རབ་ཏུ་སླུ་བྱེད་པ། །རྨོངས་པའི་ཆོས་ཏེ་རྨི་ལམ་དང་། །དྲི་ཟའི་གྲོང་ཁྱེར་ལྟ་བུ་དང་། །གསོག་དང་གསོབ་སྟེ་སྙིང་པོ་མེད། །སྒྱུ་མ་འདྲ་ཞིང་དབུ་བ་འདྲ། །དེ་བཞིན་འབྲས་བུ་ཀིམ་པ་འདྲ། །འདོད་པ་འཇིག་རྟེན་ཕན་མི་བྱེད། །མེ་ལྟ་བུར་ནི་ཡོངས་སུ་བསྒྲགས། །འདོད་པའི་ཉེས་དམིགས་ཤེས་པ་གང་། །དེ་ནི་འབྲས་བུ་མྱོང་བས་རྨོངས། །བརྟན་པོ་དེ་ཉིད་མཐོང་བ་དེ། །ཐེ་ཚོམ་བྲལ་ཞིང་ཉོན་མོངས་བྲལ། །བསམས་ན་དེ་བཞིན་འཐོབ་འགྱུར་ལ། །མི་རྣམས་དེ་བཞིན་རབ་ཏུ་ཉམས། །ཐམས་ཅད་དུ་ནི་སྡིག་བྱེད་པ། །འདོད་པ་འཇིག་རྟེན་ཟང་ཟིང་བཞིན། །འདོད་པས་ཡིད་ནི་ཚིམ་མེད་པ། །ལྷ་རྣམས་དེ་དང་དེ་འཆི་སྟེ། །འདོད་པའི་དགྲ་ཡིས་ཡོངས་སུ་བསླུས། །རྨོངས་པ་སེམས་ཅན་དམྱལ་བར་ལྟུང་། །འདོད་པ་ཆགས་པ་དུག་གི་གནས། །བུད་མེད་ཉ་ལྟར་འཇུག་པ་དག །ཆུ་བོའི་རླབས་ནི་གཡོ་བ་དང་། །གློག་གི་ཕྲེང་བ་ལྟ་བུ་ཡིན། །རྣམ་པར་བསམས་ན་རྣམ་པར་འཕེལ། །འཕེལ་བ་རྣམས་ནི་མེ་དང་འདྲ། །འདོད་
གཞི་ཐོག་མ་ཐ་མ་མེད། །དེ་བས་བློ་ལྡན་རྣམ་པར་སྤོངས། །ཇི་ལྟ་ཇི་ལྟར་སྟེན་བྱེད་པ། །དེ་ལྟ་དེ་ལྟར་འཕེལ་འགྱུར་ཏེ། །རེག་པ་མེ་དང་འདྲ་བར་མཆེད། །འདོད་པའི་རྣམ་པར་སྨིན་པ་ཚ། །རྟག་ཏུ་ཉེས་པ་འདི་ཤེས་ན། །བརྟན་པོ་འདོད་ལ་འབྲལ་བར་བྱེད། །འདོད་པ་ཡོངས་སུ་སྤངས་པ་ཡི། །བདེ་བ་མཐར་ཐུག་ཐོབ་པར་འགྱུར། །སྟོང་ཕྲག་དག་ནི་འབུམ་སྙེད་ཀྱི། །གྲངས་མེད་པ་ཡི་ལྷ་རྣམས་དག །མེ་ཡིས་འཇིགས་པ་དམྱལ་བ་རུ། །འདོད་པ་བསྟེན་པ་ལྟུང་བར་འགྱུར། །ཇི་ལྟར་བདེ་བ་འདོད་པ་དག །མེ་དང་དུག་དང་མཚོན་ཆ་སྤོངས། །སེམས་ཅན་དམྱལ་བའི་རྒྱུར་འགྱུར་བ། །དེ་ལྟར་རྟག་ཏུ་འདོད་པ་སྤོངས། །མི་གང་འདོད་པའི་དབང་སོང་བ། །འདོད་པ་དག་གིས་མ་བསླུས་ཞེའམ། །སྡུག་བསྔལ་གྱིས་ནི་མི་གནོད་ཅེས། །ནམ་ཡང་མ་མཐོང་མ་ཐོས་སོ། །ཐམས་ཅད་གནས་སྐབས་ཐམས་ཅད་དུ། །འདོད་པ་མེ་ལྕེ་འབར་བ་འདྲ། །དེ་དག་ཡིད་ལ་མ་བྱེད་ཅིག །དེ་ལྟ་བས་ན་འདོད་པས་ཆོག །དེ་ནས་དགེ་སློང་དེས་ལྷ་འདོད་པའི་དབང་དུ་སོང་བ་དེ་དག་མངོན་པར་མཐོང་ནས། གཞན་ཡང་ལྷ་ཤིན་ཏུ་བག་མེད་པ་རྣམས་ལ་སྙིང་རྗེས་ཡང་དང་ཡང་དུ་སྟོན་ཏོ། །དེ་ནས་ཡང་ཡིད་བདེ་བ་དེ་ཐམས་ཅད་དང་ལྡན་པའི་ལྷ་དེ་དག་ཐམས་ཅད་སྐྱེད་མོས་ཚལ་དུ་འདོང་སྟེ། ལྷ་མོ་ཆ་བྱད་དང་སིལ་སྙན་སྣ་ཚོགས་ཐོགས་པ་དེ་རྣམས་ཉེ་བར་གླུ་དབྱངས་ལེན་ཅིང་། སིལ་སྙན་དང་རོལ་མོ་སྣ་ཚོགས་ཀྱིས་དབང་པོ་ཐམས་ཅད་གཡེངས་པ་སྐྱེད་མོས་ཚལ་དེ་ཉིད་དུ་འདོང་བར་བྱེད་དོ། །སྐྱེད་མོས་ཚལ་དེ་ཡང་འབབ་ཆུ་དང་ལྟེང་ཀ་དང་ཚལ་དང་ཉེ་བའི་ཚལ་དང་གླིང་དང་པད་མའི་རྫིང་དུ་མ་རྣམས་ཀྱིས་བརྒྱན་པ་མཐོང་ན་ཤིན་ཏུ་ཡིད་དུ་འཐད་པ། ཕྱོགས་གང་དང་གང་དུ་ལྷའི་མིག་བལྟ་བ་འཇུག་པ་དེ་དང་དེར་འདོད་པ་སྡུག་པ། ཡིད་དུ་འོང་བའི་གཟུགས་རྣམ་པ་སྣ་ཚོགས་མཐོང་སྟེ། དེ་ལྟར་མིག་གིས་གཟུགས་སྡུག་པ་རྣམས་མཐོང་ངོ་། །དེ་ནས་ཡང་ལྷ་རྣམས་གང་དང་གང་དུ་སྒྲ་མཉན་པར་འདོད་དེ། འགྲོ་བ་དེ་དང་དེར་ལྷ་རྣམས་ཀྱིས་སྒྲ་འདོད་པ་སྙན་པ་ཡིད་དུ་འོང་བ་རྣམས་ཐོས་སོ། །དེ་བཞིན་དུ་གང་དང་གང་དུ་སྣས་དྲི་སྣོམ་པར་འདོད་པ་དེ་དང་དེ་ཉིད་དུ་འདོད་པ་ཞིམ་པ་ཡིད་དུ་འོང་བ་ཆགས་པར་
འགྱུར་བ་ཤིན་ཏུ་ཡིད་དུ་འོང་བའི་དྲི་དག་སྣོམ་མོ། །དེ་བཞིན་དུ་རོ་དང་རོའི་དབང་པོ་ཡང་གང་དང་གང་དུ་ལྷ་རྣམས་གཏོང་བ་དེ་དང་དེ་ཉིད་དུ་ལྷ་དེ་རྣམས་རོ་ཉམས་དགའ་བ། རོ་ཤིན་ཏུ་ཞིམ་པའི་རོའི་སྟོན་མོ་སྒྲིབ་པ་མེད་ཅིང་ཇི་ལྟར་འདོད་པ་རྣམས་ལ་ཟ་བར་བྱེད་དོ། །དེ་བཞིན་དུ་ལུས་ཀྱིས་ཀྱང་རེག་བྱ་གང་དག་འདོད་པ་དེ་དག་ཀྱང་འདོད་པ་སྡུག་པ་ཡིད་དུ་འོང་བ་དེ་དག་ཉིད་ལ་རེག་པར་བྱེད་དོ། །དེ་བཞིན་དུ་ཡིད་ཀྱིས་ཀྱང་ཆོས་གང་དག་འདོད་པ་དེ་དག་ཀྱང་འདོད་པ་སྡུག་པ་ཡིད་དུ་འོང་བ་དེ་དག་ཉིད་ཡང་དག་པར་ཤེས་སོ། །ལྷའི་ཡུལ་ལ་ཆགས་ཤིང་བག་མེད་པ་ལ་གནས་པའི་ལྷ་དེ་རྣམས་ཡིད་ལ་སྒྲིབ་པ་མེད་ལ། བདེ་བ་དང་ཆ་བྱད་དང་འདོད་པ་ཉེ་བར་སྤྱོད་པ་ན་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པ་སོ་སོ་ཡང་དག་པར་མྱོང་བར་འགྱུར་བ་དེ་ཟད་པར་མ་གྱུར་པ་དེ་སྲིད་དུ་རྩེ་བར་བྱེད་དོ། །དེ་ཟད་ནས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །ལས་ཇི་ལྟར་བྱས་པ་བཞིན་གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ལས་དེ་དང་རྒྱུ་འཐུན་པར་དེ་རྟག་ཏུ་ཤིན་ཏུ་བདེ་བ་དང་ལྡན་ཞིང་མེ་ཏོག་ཕྲེང་དང་ཕྱེ་མ་དང་བྱུག་པ་ལ་དགའ་བ། སེམས་དྲང་ཞིང་ནོར་མང་པོ་དང་ལྡན་པ་དང་ཡིད་རབ་ཏུ་བདེ་བ་དང་སེམས་ཅན་ཐམས་ཅད་ཀྱི་ཡང་དག་པར་མྱོང་བར་འགྱུར་བ་གཟུགས་བཟང་པོ་དང་ལྡན་པ་དང་སྐྱེ་བོའི་ཚོགས་ཐམས་ཅད་རབ་ཏུ་དགའ་བ་དང་ཤིན་ཏུ་སྡུག་པའི་བུ་དང་ཆུང་མ་དང་ལྡན་པ་དང་སྤྱོད་པ་ཉམས་པ་མེད་པ་དང་ལྡན་པར་འགྱུར། ནམ་ཡང་དེ་དག་གི་ནོར་དག་རྒྱལ་པོ་དང་ཆུ་དང་མེ་དག་གི་འཇིགས་པས་འཕྲོག་པ་མེད་ཅིང་རྒྱལ་པོའི་བུའམ་རིགས་ཆེན་པོར་སྐྱེ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་བཀྲ་བ་སྣ་ཚོགས་ཀྱིས་ཕྱེ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་
འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྐྱེས་བུ་དགེ་བ་དགེ་བའི་བསམ་པ་ཅན་དུ་གྱུར་པ་གང་གིས་སྲོག་གཅོད་པ་དང་མ་བྱིན་པར་ལེན་པ་སྤངས་ཤིང་། གཞན་དག་ཀྱང་དེ་ལྟར་བྱེད་དུ་འཇུག་ལ་དགེ་བའི་ལམ་ལ་རབ་ཏུ་འཇོག་པར་བྱེད་པ་ཡིན་ནོ། །སྲོག་གཅོད་པ་སྤངས་པ་རྣམ་པ་དུ་ཡོད་ཅེ་ན། འདི་ལ་གཞན་ལ་ཐམས་ཅད་ནས་གནས་སྐབས་ཐམས་ཅད་དུ་གནོད་པ་མི་བྱེད་ཅིང་གནོད་པ་བྱེད་དུ་མི་འཇུག་ལ་རྗེས་སུ་ཡི་རང་བར་མི་བྱེད། སྲོག་གཅོད་པ་དང་ལྷན་ཅིག་རྩེ་བར་མི་བྱེད་འདྲེ་བར་མི་བྱེད་ཚིག་ཙམ་ཡང་མི་སྨྲ་ཀུན་ནས་ཉོན་མོངས་པའི་གཏམ་མི་ཟེར་སྡིག་པ་བྱེད་པ་དེ་དང་ལྷན་ཅིག་ལམ་དུ་ཡང་འགྲོགས་ཏེ་མི་འགྲོ་བ་ཡིན་ནོ། །སྲོག་གཅོད་པ་མི་བྱེད་པ་ཇི་ལྟ་བུ་ཡིན་ཞེ་ན་འདི་ལ་སླུ་བར་བྱེད་པ་གང་གླུའམ་རོལ་མོའི་སྒྲའམ་པི་ཝང་ངམ་རྔ་སྒྲའམ་གླིང་བུའི་སྒྲས་རི་དགས་སམ་བྱ་དག་གསོད་པར་བྱེད་པའམ་རིའི་གསབ་གསེབ་ན་འཁོད་པའི་རི་དགས་སམ་བྱ་དག་གསོད་པར་བྱེད་ཅིང་། གཞན་དག་ཀྱང་དེ་ཉིད་ལ་རབ་ཏུ་འཇོག་པར་བྱེད་པའི་ཕྱོགས་དེ་དག་སྤངས་ཤིང་དེ་དག་ཐར་བར་བྱེད་སྨོད་པར་བྱེད་བྱེད་དུ་མི་འཇུག་ཡིད་ལ་ཡང་སེམས་པར་མི་བྱེད་པ་ཡིན་ཏེ་རྣམ་པ་དེ་དག་ནི་སྲོག་གཅོད་པ་སྤངས་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། འདི་ལ་འཇལ་བླུགས་ལ་གཡོ་བྱེད་ཅིང་སླུ་བར་བྱེད་པ་ཚོང་པའི་བསམ་པ་ཅན་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་འཇུག་པ་མ་བྱིན་པར་ལེན་པས་འཇིག་རྟེན་སླུ་བར་བྱེད་པ་ཡིན་ནོ། །སླུ་བར་བྱེད་པ་ཇི་ལྟ་བུ་ཡིན་རྣམ་པ་ནི་དུ་ཡོད་ཅེ་ན། འདི་ལྟ་སྟེ། སྲང་མདའི་ནང་དུ་བྱེ་མ་བླུགས་ནས་བྱེ་མས་གཞལ་བླུགས་ལ་གཡོ་བྱེད་པ་ཡིན་ཏེ། རྣམ་པ་དེ་དག་གིས་སྐྱོན་དུ་མི་ལྟ་བར་སེམས་ཅན་སླུ་བར་བྱེད་པ་ཡིན་ནོ། །དེ་དག་ཕྱིར་ཟློག་པར་བྱེད་དེ་འདི་ལྟར་བདག་གི་ཕྱིར་རམ་བུ་དང་ཆུང་མའི་ཕྱིར་རམ་ནོར་རྫས་བསགས་པའི་ཕྱིར་རམ་སྡིག་པའི་གྲོགས་པོའི་ཕྱིར་རྟག་ཏུ་མ་བྱིན་པར་ལེན་པ་མ་བྱེད་ཅིག །ཡི་དགས་དང་དུད་འགྲོ་དག་གི་འགྲོ་བར་མི་ལྟུང་བར་གྱིས་ཤིག །རྣམ་པར་སྨིན་པ་མི་བཟད་པ་ཡིན་ཏེ་མ་བྱིན་པར་ལེན་པའི་རྣམ་པར་སྨིན་པ་མི་བཟད་པ་ཡིན་ནོ་ཞེས་དེ་ལྟར་བདག་ཉིད་མི་བྱེད་ཅིང་རྐྱེན་དུ་གཏོགས་པ་ཡང་ཡོངས་
སུ་སྤོང་བར་བྱེད། གཞན་དག་ཀྱང་ཕྱིར་ཟློག་པར་བྱེད་རྗེས་སུ་ཡི་རང་བར་མི་བྱེད་དགེ་བའི་ལམ་ལ་ཡང་དག་པར་རབ་ཏུ་འཇོག་པར་བྱེད་པ་ཡིན་ཏེ། དེ་ལྟར་སྐྱེས་བུ་དེ་ནི་བདག་ལ་ཕན་པ་དང་གཞན་ལ་ཕན་པ་བྱེད་པ་ཡིན་ནོ། །ཡང་སྦྱིན་པ་ལ་དགའ་བ་ཇི་ལྟ་བུ་ཡིན་ཞེ་ན། འདི་ལ་རྒྱུ་མེད་ཅིང་འབྲས་བུ་དང་མི་ལྡན་པ་རྒྱ་མཚོ་རྒལ་ཏེའམ་འབྲོག་དགོན་པ་རྒལ་ཏེའམ་གཞན་དག་ལ་བསྟེན་ནས། ནོར་བསྒྲུབས་པ་གང་ཡིན་པ་དེ་དག་མགོན་མེད་ཅིང་ཉོན་མོངས་སྡུག་བསྔལ་བ་ལ་སེམས་བསྒོམས་པ། ཡིད་གུས་པ་བསྐྱེད་པར་གྱུར་པ། དབང་པོ་དང་བ་སྔོན་དུ་འགྲོ་བས་སྦྱིན་པར་བྱེད་པ་དང་བསམ་གཏན་གཉིས་པ་ཐོབ་པའམ། དེ་ལས་གཞན་པ་སྡུག་བསྔལ་བ་ལ་སྦྱིན་པར་བྱེད་པ་ཡིན་ཏེ། དེ་དག་ནི་སྦྱིན་པ་ལ་མངོན་པར་དགའ་བ་ཡིན་ནོ། །སྲོག་ཆགས་རྣམས་ཀྱི་སྲོག་སྦྱིན་པ་ཇི་ལྟ་བུ་ཡིན་ཞེ་ན། འདི་ལ་ཉ་པའམ་བྱ་པས་ཉ་དག་བཟུང་ནས་དེ་ཡང་འཚོང་པར་བྱེད་པ་ན་སྲོག་གི་ལྷག་མ་རིན་གྱིས་བླུས་ནས་ཐར་བར་བྱེད་པ་ཡིན་ཏེ། དེ་རང་གི་ཆུའི་ནང་དུ་འཇུག་ཅིང་གཏོང་ལ་རབ་ཏུ་འཇོག་པར་བྱེད་སེམས་དང་དབང་པོ་ཡང་རབ་ཏུ་དགའ་བར་བྱེད། གཞན་དག་ཀྱང་དེ་ལྟ་བུར་བྱེད་དུ་འཇུག །ཡང་དག་པར་དགའ་བར་བྱེད། དགེ་བ་ལ་མངོན་པར་འཇུག་པར་བྱེད། བསམས་ནས་ཀྱང་ཀྱེ་ཨེ་མ་བདག་གིས་ལས་ལེགས་པར་བསྒྲུབས་སོ། །ཡང་བྱའོ་གཞན་དག་ཀྱང་བྱེད་དུ་གཞུག་གོ་སྙམ་སྟེ། དེ་ལྟར་ལེགས་པར་བྱས་པའི་ལས་ཀྱི་ཉེར་བསྡོགས་དང་ལས་ཀྱི་ལམ་དང་ལས་ཀྱི་མཇུག་བདག་དང་གཞན་གཉི་ག་ལ་ཕན་པར་བྱེད་པ་དང་སྲོག་གཅོད་པ་དང་མ་བྱིན་པར་ལེན་པ་དག་སྤངས་པ་ཡིན་ཏེ། ཡང་དང་ཡང་དུ་སྲོག་ཆགས་ལ་ཕན་པའི་ཕྱིར་རམ་སྲོག་ཡོངས་སུ་བསྐྱབ་པའི་ཕྱིར་རམ་སྲོག་སྦྱིན་པའི་ཕྱིར་མ་བྱིན་པར་ལེན་པ་སྤངས་པ་ཡིན་ནོ། །བདག་དང་གཞན་ཡང་སྦྱིན་པ་ལ་མངོན་པར་དགའ་བ་ཡིན་ཏེ་བདག་དང་གཞན་ཉིད་ཚུལ་ཁྲིམས་རྣམ་པ་གཉིས་སྲུང་ངོ་། །རྣམ་པ་ཡང་བདག་ཉིད་འཇུག་པ་དང་ལྡོག་པ་ཡིན་ཏེ། སྐྱེས་བུ་ཚུལ་ཁྲིམས་དང་ལྡན་པ་བདག་དང་གཞན་ལ་ཕན་པར་བྱེད་པ་ལུས་དང་བྲལ་ཏེ། ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་
རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་བཀྲ་བ་སྣ་ཚོགས་ཀྱིས་ཕྱེ་བའི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ་ནོར་བུའི་གཟུགས་རྣམ་པ་སྣ་ཚོགས་ཀྱི་འོད་ཀྱིས་ཕྱེ་བ་བཀྲ་བའི་གནས་རྣམས་སུ་སྐྱེས་པ་དེ་དང་པོ་ཉིད་དུ་རེ་ཞིག་ལུས་ལས་འོད་འབྱུང་སྟེ། གཟུགས་སྣ་ཚོགས་དང་ཁ་དོག་དང་བགོ་བ་རྣམ་པ་སྣ་ཚོགས་འབྱུང་ངོ་། །དེའི་ལྷའི་བགོ་བ་དང་བྱུག་པ་དང་ལུས་བརྒྱན་པ་སྣ་ཚོགས་ཕྱི་བཞིན་འབྲང་ངོ་། །ལྷ་དེའི་དང་པོ་བྱུང་བ་དག་ལ་འདི་སྙམ་དུ་སེམས་ཏེ། བདག་ལས་གང་གིས་འདིར་སྐྱེས་ཞིག་གུ་སྙམ་སྟེ། དེ་ཡིད་ཀྱིས་སྔོན་ཇི་ལྟར་བྱས་པ་སྔོན་གྱི་ཚེ་རྗེས་སུ་དྲན་པར་བྱེད་དོ། །དེ་འདི་སྙམ་དུ་སེམས་ཏེ། ཀྱེ་ཨེ་མ་འདི་ནི་ལེགས་པར་བྱས་པའི་ལས་ཀྱི་འབྲས་བུ་ཉེ་བར་གནས་པ་ཡིན་ཏེ། ཨེ་མ་བདག་ནི་ལེགས་པར་བྱས་པའི་ལས་ཀྱི་མཐའ་སྤྱད་པ། ལེགས་པར་བྱས་པའི་ལས་ཀྱིས་འདིར་སྐྱེས་པ་ལྟ་ཞིག་སྙམ་མོ། །དེ་དེ་ལྟར་སེམས་པ་ན་དེ་ནས་ལེགས་པར་བྱས་པའི་ལས་ཀྱི་དབང་དེ་དང་ལྷན་ཅིག་ཏུ་ལྷ་དེའི་ལས་དང་ལས་ཀྱི་དབང་གིས་ཐོག་མ་ཁོ་ནར་རེ་ཞིག་སིལ་སྙན་ཡན་ལག་ལྔ་དང་ལྡན་པའི་སྒྲ་ཐོས་སོ། །ཐོག་མར་ཀུན་ནས་འོངས་པ་མངོན་པར་འདོད་ཅིང་དགའ་བའི་ལྷ་མོ་དེ་དག་གླུ་ལེན་ཏེ། གླུ་གང་གིས་གནས་དེ་ཀུན་ནས་རིའི་རྩེ་མོ་དང་ཕུག་གང་བར་བྱེད་ཅིང་སྙན་པ་དེས་རི་དགས་དང་བྱ་རྒྱགས་པ་ཐམས་ཅད་གར་བྱེད་དོ། །ཡང་དང་ཡང་གླུ་དེ་དག་གི་སྒྲ་ཐོས་ནས་བརྒྱ་འགྱུར་དུ་རྒྱགས་པས་དྲེགས་ཏེ། དེ་ལྟར་ཐོག་མ་ཁོ་ན་དེའི་གླུའི་སྒྲས་སེམས་གཡེང་བར་བྱེད་དོ། །དེའི་འོག་ཏུ་དེའི་གཟུགས་མཐོང་བ་ལ་ཐོག་མར་འདོད་པ་དང་ལྷན་ཅིག་འདོད་ཆགས་སྐྱེ་སྟེ། དེ་ལྟར་དེ་ཡོན་ཏན་དུ་མས་ཡིད་གཡེངས་པ། གཟུགས་མཐོང་བས་ཚིམ་པའི་ལྷ་མོ་དེ་དག་ཕྱིར་ཕྱོགས་པ་མཐོང་ལ། དེ་དག་ཀྱང་གཟུགས་དང་ཆ་བྱད་དང་རྒྱན་དུ་མས་བརྒྱན་པ་གཟུགས་དང་ཆ་བྱད་དཔེ་མེད་པ་དང་ལྡན་པ་ཡིན་ནོ། །དེ་འདི་སྙམ་དུ་སེམས་ཏེ། འདི་དག་སུ་ཡིན་འདི་དག་གང་གི་ཡིན་སྙམ་མོ། །དེ་སེམས་བསྐྱེད་མ་ཐག་ཉིད་དུ་ཤིན་ཏུ་འདོད་ཆགས་བསྐྱེད་པའི་བློ་ལ་ལྷ་མོ་དེ་དག་གིས་འདི་ལྟར་ཚིགས་སུ་བཅད་དེ་སྨྲས་པ། ཤིན་ཏུ་འདོད་ཆགས་སྣ་ཚོགས་ཀྱི། །རྒྱུ་ཡི་མཆོག་ནི་བདག་ཅག་
སྟེ། །དེ་ནི་ལྷ་ཁྱོད་ཀྱི་ལགས་པས། །བདེ་བའི་རྣམ་པས་རོལ་པར་མཛོད། །དེ་ལྟར་དེས་ཚིགས་སུ་བཅད་པ་ཡིད་ལ་བཟུང་སྟེ་བདེ་བའི་རྣམ་པ་དེ་དག་མཐོང་ནས། ལྷ་མོ་དེ་དག་ག་ལ་བ་དེ་ལོགས་སུ་ཤིན་ཏུ་ཕྱོགས་ཤིང་མཐོང་བར་འདོད་པ་རེག་པ་འདོད་པ་ཡང་དང་ཡང་དུ་དེ་ཉིད་དུ་འགྲོ་བར་བྱེད་དོ། །འདི་ལྟར་དེའི་འདོད་ཆགས་ཀྱི་རྒྱུ་གསུམ་པ་འབྱུང་སྟེ། སེམས་ནི་དབང་པོ་ལ་རག་ལས་པར་འགྱུར་ལ། དབང་པོ་ལ་རག་ལས་པ་ནི། ཡུལ་ལ་སེམས་འགྱུར་བ་ཁོ་ན་ལ་རག་ལས་པ་ཡིན་ཏེ། དེ་ལྟར་ཆགས་སེམས་དང་ལྡན་པ་དེ་ཡང་དེ་དག་ལ་རེག་པར་འདོད་པ་རེག་པར་བྱེད་ལ། ཤིན་ཏུ་ཆགས་སེམས་དང་ལྡན་པ་དེ་དག་ཀྱང་ལྷ་དེ་ཉིད་ལ་རེག་པར་བྱེད་དེ། དེ་ལྟར་འདོད་ཆགས་ཀྱི་རྒྱུ་གསུམ་པ་ཉེ་བར་འབྱུང་ངོ་། །དེའི་དྲི་མཚུངས་པ་མེད་པ་ཐོབ་ནས་འདི་སྙམ་དུ་སེམས་ཏེ། འདི་ལྟ་བུར་ཡིད་དུ་འོང་བ་བདག་ཅག་གི་སྣ་འདྲེན་པར་བྱེད་པ་ཤིན་ཏུ་ཆགས་པའི་རྒྱུ་དྲི་འདི་སུའི་ཡིན་ཞིག་གུ་སྙམ་མོ། །དེ་ལྷ་མོ་དེ་དག་གིས་དེ་ལྟར་འཁྱུད་པ་དང་དྲི་མཚུངས་པ་མེད་པ་ཉིད་ལ་དེ་སྣོམ་པར་བྱེད་དོ། །གང་དཔེར་བྱ་བ་མེད་པ་དེ་བརྟགས་ནས་དྲི་འདི་ནི་ལྷ་མོའི་ཡིན་ནོ་སྙམ་སྟེ། དེ་ལྟར་དེ་འདོད་ཆགས་ཀྱི་རྒྱུ་བཞི་པའི་དབང་དུ་གྱུར་པ་ཡིན་ནོ། །དེ་ལྟར་ཡུལ་བཞི་ལ་སེམས་ཤིན་ཏུ་ཆགས་པ་དེ་ལ་ལྷ་མོ་དེ་དག་ཆང་ཞིམ་པོ་རྣམ་པ་སྣ་ཚོགས་དང་ལྷའི་ཟས་བདུད་རྩི་དག་སྟོབས་པར་བྱེད་དེ། དེ་ལྟར་དེའི་འདོད་ཆགས་བསྐྱེད་པའི་རྒྱུ་ལྔ་ལ་འབྱུང་ངོ་། །དེ་ལྟར་དེའི་ཤིན་ཏུ་འདོད་ཆགས་བསྐྱེད་པའི་རྒྱུ་ལྔ་ལ་རྣམ་པར་ཆགས་པ། དཔེ་མེད་པ་ཐོག་མ་ཁོ་ནར་འབྱུང་སྟེ། ལྷའི་འདོད་པ་སྟེན་པ་ཡང་དག་པ་མ་ཡིན་པའི་ལས་ཀྱི་འབྲས་བུ་དང་པོར་ཤེས་པ་དེ་དག་ཐམས་ཅད་ཡུལ་གྱི་བདེ་བ་ལ་རྣམ་པར་ཆགས་པས་མི་མངོན་ནོ། །དེ་ནས་ཡང་ཤིན་ཏུ་ཆགས་ཤིང་ཤིན་ཏུ་འདོད་ཆགས་པའི་སེམས་པ་འདོད་ཆགས་ཀྱིས་བསྐྱེད་པའི་སྙིང་གིས་ལྷ་མོ་དེ་དག་ག་ལ་བ་དེར་འགྲོ་བར་བྱེད་དོ། །དེ་དག་ཐམས་ཅད་ཀྱང་ལྷའི་བུ་དེ་ག་ལ་བ་དེར་ཕན་ཚུན་དགོད་ཅིང་རྩེ་ལ་དགའ་དགུར་སྤྱོད་པ་བཞིན་དུ་འདོང་བར་བྱེད་དོ། །དེ་དག་གི་ལྷའི་བུ་དེ་དང་ཕྲད་ནས་ཤིན་ཏུ་འདོད་ཆགས་ཀྱིས་བསྐྱེད་པའི་ཚིག་རྣམས་ཀྱིས་
དེ་དང་རྩེ་བར་བྱེད་དེ། བྲོ་རྡུང་། གླུ་ལེན། དགོད་དགོད། རྩེ་རྩེ། རྒལ་རྒལ། དགའ་དགུར་སྤྱད་ནས་འཁོད་པ། གཟུགས་དང་ཆ་བྱད་སྣ་ཚོགས་དང་དར་ལ་བབ་པ་དང་ལྡན་པ་རྣམས་ཚལ་དང་ནགས་ཚལ་དང་ལྟེང་ཀ་དང་འབབ་ཆུ་དང་པད་མ་ཆེན་པོའི་ཚལ་ག་ལ་བ་དེ་དག་ཏུ་འདོང་བར་བྱེད་དོ། །དེ་ནས་ཡང་དེ་རྣམས་ཀུན་མཐོང་ཡིད་འོང་ཞེས་བྱ་བའི་ཚལ་ག་ལ་བ་དེར་ལྷ་དག་དང་ལྷན་ཅིག་འདོང་བར་བྱེད་དེ། ཀུན་མཐོང་ཡིད་འོང་གི་ཚལ་དེ་ཡང་གནས་དེ་དང་ལྷན་ཅིག་པའི་ལྷ་དེ་དག་ཐམས་ཅད་རྟག་ཏུ་ཀུན་དགའི་ར་བར་དགའ་ཞིང་གནས་སོ། །ཚལ་དེ་ཡང་རྟག་ཏུ་འདོད་པ་ཐམས་ཅད་དང་ཡང་དག་པར་ལྡན་པའི་ཤིང་ལྗོན་པ་རྣམ་པ་དུ་མས་བརྒྱན་པ་ཡིན་ཏེ་འདི་ལྟ་སྟེ། གསེར་གྱི་སྡོང་པོ་ལ་དངུལ་གྱི་ལོ་མ་དང་ཀེ་ཀེ་རུའི་ཡལ་ག་དང་མུ་ཏིག་ལྟ་བུའི་འབྲས་བུ་དང་རོ་དང་གཟུགས་ཕུན་སུམ་ཚོགས་པ་ཡིན་ལ། དེ་ལྟར་ཤིང་ལྗོན་པ་རྣམ་པ་དུ་མ་དཔེ་མེད་པ་རྣམས་ཀྱིས་ཚལ་དེ་བརྒྱན་ཏོ། །གཞན་ཡང་རྣམ་པ་གཞན་གྱིས་ཚལ་དེ་ཉིད་བརྒྱན་པ་ཡིན་ཏེ་འདི་ལྟ་སྟེ། བཻ་ཌཱུརྱའི་ཤིང་ལྗོན་པའི་སྡོང་པོ་ལ་གསེར་གྱི་ལོ་མ་དང་ཀེ་ཀེ་རུའི་འདབ་མ་དང་འབྲས་བུ་དངུལ་མདོག་དང་སྤུག་གིས་རྣམ་པར་ཕྱེ་བ་ཡིན་ནོ། །ཡང་ཤིང་ལྗོན་པ་རྣམ་པ་གཞན་འབྱུང་སྟེ་འདི་ལྟ་སྟེ། སྡོང་པོ་ཉེར་ཉེར་པོས་རྣམ་པར་ཕྱེ་ཞིང་ཐམས་ཅད་དུ་རིན་པོ་ཆེ་སྣ་བདུན་ལས་བྱས་པ་ཡིན་ནོ། །འདི་ལྟ་སྟེ། གསེར་ལས་བྱས་པ་དང་ཐམས་ཅད་བཻ་ཌཱུརྱ་ལས་བྱས་པ་དང་། ཐམས་ཅད་ཀེ་ཀེ་རུ་ལས་བྱས་པ་དང་། ཐམས་ཅད་དངུལ་ལས་བྱས་པ་དང་། ཐམས་ཅད་སྤུག་ལས་བྱས་པ་ཡིན་ཏེ་ཤིང་ལྗོན་པའི་སྡོང་པོ་ཐམས་ཅད་ཤིན་ཏུ་རྣམ་པར་ཕྱེ་བ་ཡིན་ནོ། །ཡང་ཤིང་ལྗོན་པ་དེ་དག་གི་མཐའ་དང་ཡལ་ག་རྣམས་ཀྱང་དེ་བཞིན་དུ་ཐམས་ཅད་རིན་པོ་ཆེ་སྣ་བདུན་ལས་བྱས་པ་ཡིན་ཏེ་འབྲས་བུ་དང་མེ་ཏོག་ཕུན་སུམ་ཚོགས་པ་དག་ལྷའི་མེ་ཏོག་རྣམས་ཀྱིས་བརྒྱན་པ་ཡིན་ནོ། །མེ་ཏོག་དེ་དག་ལས་ཀྱང་ཁ་དོག་སྣ་ཚོགས་དང་དྲི་རྣམ་པ་སྣ་ཚོགས་དག་འབྱུང་སྟེ་མེ་ཏོག་དེ་རྣམས་ཀྱི་དྲི་དཔག་ཚད་དྲུག་ཏུ་འབྱུང་ངོ་། །བུང་བ་ཁ་དོག་སྣ་ཚོགས་རྣམས་ཀྱང་མེ་ཏོག་གི་རོས་མྱོས་ནས་ཤིང་ལྗོན་པ་དེ་རྣམས་ཀྱི་ནང་ན་རྒྱུ་བར་བྱེད་དེ། དེ་ལྟར་ལས་དཀར་པོ་རྣམ་པ་སྣ་ཚོགས་ཀྱིས་ཀུན་མཐོང་ཡིད་འོང་གི་
ཤིང་ལྗོན་པ་རྣམས་མཛེས་པ་ཡིན་ནོ། །ཡང་པད་མ་དང་ཨུད་པ་ལའི་ཚལ་དག་མཛེས་པ་ཇི་ལྟ་བུ་ཡིན་ཞེ་ན་འདི་ལྟ་སྟེ། ཚལ་དེ་ཀུན་ནས་བཻ་ཌཱུརྱའི་སྡོང་བུ་དང་གསེར་གྱི་འདབ་མ་དང་ཀེ་ཀེ་རུའི་ཟེ་བ་དང་ཨན་ད་རྙིལ་གྱི་མདོག་ལྟ་བུའི་བུང་བ་རྣམས་ཀྱིས་བརྒྱན་པའི་བུང་བ་ཐམས་ཅད་སྒྲ་སྙན་པ་འབྱིན་ཏེ། ཇི་ལྟར་ལྷ་རྣམས་ཀྱི་ཐོས་པ་ཉམས་དགའ་བ་དེ་བས་ཀྱང་རབ་ཏུ་སྟོབས་ཆེ་བར་ཡིད་བདེ་བ་སྐྱེའོ། །ཡང་ཚལ་དེ་ཉིད་ཀུན་ནས་གསལ་ཞིང་མཛེས་པ་ཡིན་ཏེ། འདི་ལྟ་སྟེ། ཚལ་གྱི་ཁ་དོག་རྣམ་པ་སྣ་ཚོགས་ཀྱིས་མཛེས་པ་དག་ནི། འདི་ལྟ་སྟེ། ཁ་དོག་སྔོན་པོ་དང་སེར་པོ་དང་བཙོད་ཀ་དག་ཡིན་ནོ། །ཇི་ལྟར་འཛམ་བུའི་གླིང་ནས་ཕྱོགས་ཤིན་ཏུ་སྡུག་པར་བྱས་པ་ལྟར་ཚལ་རྣམ་པར་མཛེས་ཞེས་ཚལ་གསལ་བ་དེ་ན་སྟེགས་དང་། ལྟེང་ཀ་དང་ཚལ་བུ་དང་པད་མའི་འདབ་མ་དག་གིས་བརྒྱན་པ་དེ་ཀུན་ནས་རྣམ་པར་མཛེས་པ་ཡིན་ནོ། །ཚལ་ཡོན་ཏན་དེ་ལྟ་བུ་དང་ལྡན་པ་དེ་ན་ལྷ་དེ་རྣམས་རྩེ་བ་ན་མངོན་པར་མཐོང་ནས་ཡིད་རབ་ཏུ་དགའ་བའི་ལྷ་དེ་དག་ལྷ་མོའི་ཚོགས་དེས་ཡོངས་སུ་བསྐོར་བ་དང་ལྷན་ཅིག་བདེ་བར་འདོང་བར་བྱ་བའི་ཕྱིར་ནམ་མཁའ་ལ་གར་བབ་བབ་ཏུ་འདོང་བར་བྱེད་པ་དང་། ལྷ་གཞན་དག་ལྷ་སྔོན་མ་བྱུང་བ་འདི་དག་བདག་ཅག་གི་དྲུང་དུ་འོངས་སོ་ཞེས་ཤེས་ནས་ལྷ་དེ་དག་ཉིད་ཀྱི་དྲུང་དུ་འདོང་བར་བྱེད་དེ། ཕན་ཚུན་ཚིག་སྙན་པ་ཉིད་ཀྱིས་བོས་ནས་ཕན་ཚུན་གྲོགས་སུ་གྱུར་པ་པད་མའི་ཚལ་རྣམ་པ་སྣ་ཚོགས་ལ་དགའ་བ་དག་སིལ་སྙན་ཡན་ལག་ལྔ་དང་ལྡན་པས་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ནས་ལྷ་དེ་རྣམས་དེ་ལྟར་ཡུན་རིང་དུ་ཀུན་མཐོང་གི་ཚལ་དེར་ལྷའི་འདོད་པའི་ཡོན་ཏན་ལྔ་རྣམས་ཀྱིས་རྩེས་ནས། སྐྱེད་མོས་ཚལ་མྱོས་གནས་ཞེས་བྱ་བ་ག་ལ་བ་དེར་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་འདོང་བར་བྱེད་དོ། །སྐྱེད་མོས་ཚལ་དེ་ཡང་ཁ་ཁྱེར་རྣམ་པ་སྣ་ཚོགས་ཀྱིས་ཡོངས་སུ་བསྐོར་ཅིང་ཁྲོན་པ་དང་འབབ་ཆུ་དང་རྫིང་རིང་པོ་ཉམས་དགའ་བ་ཡིན་ནོ། །དེ་ན་རིན་པོ་ཆེ་སྣ་བདུན་ལས་བྱས་པའི་ཁང་བཟངས་དཀྲིགས་པ་གསེར་གྱིས་ཕྱེ་བ་དང་ཡང་དག་པར་ལྡན་པ། ས་དུ་མ་ཤིན་ཏུ་རྣམ་པར་ཕྱེ་བ་ཉམས་དགའ་བ་ཡིན་ནོ། །
བྱ་སྣ་ཚོགས་སྒྲ་སྙན་པ་འབྱིན་ཅིང་གར་བྱེད་པ་དག་ཉམས་དགའ་བ་ཡིན་ནོ། །རྟག་ཏུ་འབབ་ཆུ་དང་ཆུ་བོའི་སྒྲ་ཁྲུ་ལུ་ལུ་སྙན་པར་འབྱིན་པ་ཉམས་དགའ་བ་ཡིན་ནོ། །རྟག་ཏུ་བཟའ་བ་དང་བཏུང་བ་མདོག་དང་རོ་དང་དྲི་ཕུན་སུམ་ཚོགས་པ་ཆུ་བོ་ལྟར་འབབ་བོ། །དེ་ནས་ཡུལ་དེར་དོང་ནས་ལྷ་དེ་རྣམས་ལྷ་མོའི་ཚོགས་ཆ་བྱད་དང་རྒྱན་སྣ་ཚོགས་ཀྱིས་རྣམ་པར་བརྒྱན་པ་རང་གིས་ལེགས་པར་བྱས་པའི་ལས་ལ་སྤྱོད་པ་རྣམས་དང་ལྷན་ཅིག་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་རྩེ་བར་བྱེད་དོ། །དེ་ལྟར་ལྷ་དེ་རྣམས་ཀྱི་རྩེ་བ་དང་དགའ་དགུར་སྤྱོད་པ་དག་ཡུན་རིང་དུ་འདས་ཀྱང་ལྷ་བག་མེད་པ་ལ་གནས་པ་དེས་ཁོང་དུ་མི་ཆུད་དོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་དྲུག་པ། དེ་ལྟར་ཡུལ་ལྔ་ལ་རྣམ་པར་ཆགས་ཤིང་བདེ་བ་ལ་གནས་པ་དེ་རྣམས་ཀྱི་ལས་ལེགས་པར་བྱས་པ་གང་ཡིན་པ་དེ་དག་ཟད་པར་འགྱུར་རོ། །དེ་ཟད་ནས་དེ་ནས་ཡང་འཆི་བ་འབྱུང་ཡང་སེམས་བག་མེད་པའི་དབང་དུ་གྱུར་པ་སྲེད་པས་བསླུས་པ་ཀུན་ནས་སྲེད་པས་བདས་ཤིང་འདོད་ཆགས་ཀྱི་མེས་གདུངས་པ་ན་བདེ་བས་མྱོས་པས་སྙིང་མྱོས་པ་རྣམས་མི་མཐོང་ངོ་། །གང་གི་ཚེ་བདེ་བའི་རྩེ་བ་ཐམས་ཅད་ཀྱི་གཞི་ཡོངས་སུ་བཏང་བ། འཇིགས་པའི་གྲོང་ཁྱེར་ཆེན་པོའི་མི་རྟག་པ་ཉིད་མཐོང་བར་གྱུར་པ་མ་ནོར་ཅིང་ངེས་པར་འགྲོ་བའི་ངོ་བོ་འཆི་བ་མངོན་དུ་འོངས་པ་དེའི་ཚེ་སྡུག་བསྔལ་ཆེན་པོ་ཡང་རིག་པར་འགྱུར་ཏེ། དེའི་ཚེ་ལྷ་རྣམས་ཀྱི་སེམས་ཁོང་དུ་ཆུད་པའི་དུས་ཡིན་ནོ། །དེ་ལྟར་བག་མེད་པའི་ཡུལ་ལ་དགའ་བ་དེ་རྣམས་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ངེས་པར་མྱོང་བར་འགྱུར་བའི་ལས་དེ་ཟད་པར་མ་གྱུར་པ་དེ་སྲིད་དུ་བདེ་བ་དེ་དག་མྱོང་བར་འགྱུར་རོ། །དེ་ཟད་ནས་ཡང་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ངེས་པར་མྱོང་བར་འགྱུར་བའི་ལས་མི་དང་སོ་སོ་ཡང་དག་པར་མྱོང་བར་འགྱུར་བས་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་ཤིན་ཏུ་བདེ་བར་འགྱུར་ཞིང་། ནོར་དང་འབྲུ་ཕུན་སུམ་
ཚོགས་པ་དང་དྲང་ཞིང་དྲང་པོའི་རང་བཞིན་ཅན་ཡུལ་དབུས་སུ་སྐྱེ་བར་འགྱུར་ཏེ། གང་དུ་བྱ་བ་དང་མི་བྱ་བ་ཤེས་ཤིང་ཆོས་དང་ཆོས་མ་ཡིན་པ་ཤེས་པར་འགྱུར་བ་དང་། གང་དུ་མི་ཚོགས་པ་ཐམས་ཅད་ཀྱི་ནང་དུ་སྐྱེ་བར་འགྱུར་བ་དང་གང་དུ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པའི་རྒྱལ་པོར་འགྱུར་བ་དང་གང་དུ་འཇིག་རྟེན་གྱི་སྤྱོད་པ་སྨད་པ་མེད་པར་འགྱུར་བ་དེར་སྐྱེ་བར་འགྱུར་ལ། སྐྱེ་བོ་ཀུན་གྱི་མིག་དགའ་ཞིང་བྱིས་པ་དང་རྒན་པོ་ཐམས་ཅད་ཀྱང་དགའ་བར་འགྱུར། ལུས་རྟག་ཏུ་ནད་མེད་པ་དང་གཟུགས་བཟང་པོ་དང་ལྡན་པ་དང་སྟོབས་དང་ལྡན་པ་དང་། གང་ལས་ཀྱང་འཇིགས་པ་མེད་པ་དང་སེམས་ཅན་ཐམས་ཅད་དབུགས་འབྱིན་པ་དང་བུ་དང་ཆུང་མ་དང་ལྡན་པ་དང་འདོད་པ་ཐམས་ཅད་ཡང་དག་པར་འབྱོར་པ་དང་། ནོར་རྫས་ཀྱི་རྣམ་པ་ལ་རྒྱལ་པོའམ་ཆུའམ་མེའམ་ཆོམ་རྐུན་གྱི་འཇིགས་པ་དང་དོགས་ཤིང་འཇིགས་པ་གང་ནས་ཀྱང་མི་འོང་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་སྦྱོར་བ་ལ་འཇུག་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སེམས་ཅན་དགེ་བར་གྱུར་པ་ལྟ་བ་མ་ནོར་བ་མང་པོས་རྟག་ཏུ་ལས་ཀྱི་འབྲས་བུའི་དེ་ཁོ་ན་ཉིད་མཐོང་བ་རྟག་ཏུ་ཡང་དག་པའི་ལྟ་བ་ལ་ཡིད་ཞེན་པ། རྟག་ཏུ་དྲང་པོའི་རང་བཞིན་ཅན་གཞན་ལ་གནོད་པ་མི་བྱེད་པ། རྟག་ཏུ་ཕ་མ་ལ་གུས་པ་རྟག་ཏུ་ཆོས་ལ་ཕྱིར་མི་ལྡོག་ཅིང་སྤྲོ་བ། སངས་རྒྱས་དང་ཆོས་དང་དགེ་འདུན་ལ་གུས་པ་སྐྱེས་པ་གང་གིས་སྲོག་གཅོད་པ་དང་མ་བྱིན་པར་ལེན་པ་མི་བྱེད་ཅིང་བྱེད་དུ་མི་འཇུག་ལ། རྗེས་སུ་ཡི་རང་བར་མི་བྱེད། ཕ་རོལ་བྱེད་པ་ཡང་ཕྱིར་ཟློག་པར་བྱེད། གཟེངས་མི་སྟོད། བྱས་ན་ཡང་སྨོད་པར་བྱེད། ལས་ཀྱི་འབྲས་བུ་ཡང་དག་པར་སྟོན་པར་བྱེད། གཞན་ལ་དེ་ཁོ་ན་ཉིད་བསྟན་པས་གང་ལེགས་པར་བྱ་བ་བྱས་པ་དེ་རབ་ཏུ་གཟེངས་སྟོད་པར་བྱེད། དགེ་བའི་ལམ་ལ་རབ་ཏུ་འཇོག་པར་བྱེད། དེ་
ནས་ཡང་བྱེད་དུ་འཇུག །བྱས་པ་ལ་ཡང་རྗེས་སུ་ཡི་རང་བར་བྱེད། བདག་ཉིད་ཀྱང་སྲོག་གཅོད་པ་དང་མ་བྱིན་པར་ལེན་པ་དག་སྤངས་ལ་གཞན་དག་ཀྱང་དེ་ཉིད་ལ་རབ་ཏུ་སྦྱོར་བར་བྱེད་དོ། །ལེགས་པར་བྱས་པའི་ལམ་རྣམ་པ་གཉིས་ཀྱིས་གང་སྡོམ་པ་མ་བླངས་པ་དེ་ནི་ལེན་དུ་འཇུག་པར་བྱེད་ལ། གང་བླངས་པ་དེ་ནི་བརྟན་པོར་བྱེད་དུ་འཇུག་སྟེ། གཉི་ག་ལེགས་པར་བྱ་བ་བྱས་པ་བདག་ཉིད་དང་གཞན་ཉིད་ལ་ཕན་པ་བྱས་པ་དེ་ནི་མཐོ་རིས་སུ་སྐྱེ་བར་འགྱུར་རོ། །སྲོག་གཅོད་པ་སྤངས་པ་རྣམ་པ་དུ་ཡོད་ཅིག་གུ་སྙམ་ན། འདི་ལ་སྲོག་གཅོད་པ་མི་དགེ་བ་མི་བྱེད་པ་ཡིན་ནོ། །རྣམ་པ་ཇི་ལྟ་བུ། རྣམ་གྲངས་དུ་ཡོད་ཅེ་ན། འདི་ལ་སེམས་ཅན་གཞན་ལ་སེམས་ཅན་དུ་འདུ་ཤེས་ནས་སྲིན་བུ་ཕྲེའུ་དང་གྲོག་སྦུར་ལ་སོགས་པ་ལ་འཚེ་བར་མི་བྱེད་ཅིང་སྲོག་གཅོད་པར་མི་བྱེད་པ་ཡིན་ནོ། །འདི་ལ་སྲོག་གཅོད་པ་མི་བྱེད་པ་ནི་གང་། བྱི་བའམ་སྐྱིན་གོར་རམ་འོལ་པའམ་རི་དགས་དག་གཡོ་ཐབས་ཀྱིས་འཛིན་པ་དེ་དག་ཕྱིར་ཟློག་པར་བྱེད་པ་ཡིན་ནོ། །གཡོ་ཐབས་ཀྱི་རྣམ་པ་དུ་ཡོད་ཅེ་ན། འདི་ལ་འཛིན་པར་བྱེད་པ་རྙོང་ལྟ་བུས་སམ། བུ་གར་རྒྱས་འགེབས་པས་སམ་རྩྭའི་དྲ་བས་སམ་རྙིས་སམ་འབྲེལ་བས་སམ་རླུབས་ཀྱིས་སམ་གདོས་ཀྱིས་འཛིན་པར་བྱེད་ལ། བཟུང་ནས་ཀྱང་སྲོག་གཅོད་པར་བྱེད་པ་དེ་དག་ཟློག་པར་བྱེད་ཅིང་ཡང་དག་པར་དགའ་བར་མི་བྱེད་གཟེངས་སྟོད་པར་མི་བྱེད་འདི་ལྟར་སྲོག་ཆགས་དག་གི་སྲོག་གཅོད་པར་མ་བྱེད་ཅིག་ཅེས་ཟློག་པར་བྱེད་ཅིང་ཆོས་ལ་ཡང་རབ་ཏུ་འཇོག་པར་བྱེད་དེ། རྣམ་པ་དེ་དག་ནི་སྲོག་གཅོད་པ་ལ་ཡང་དག་པར་ཆགས་པའི་སྲོག་ཆགས་ཟློག་པར་བྱེད་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན་འདི་ལ་རྩྭ་ཙམ་ལ་ཡང་རྐུ་སེམས་ཀྱིས་མི་རྐུ་ལ་གཞན་དག་ཀྱང་ཟློག་པ་ཡིན་ནོ། །རྣམ་པ་དུ་ཞིག་ཅེ་ན། འདི་ལ་མ་བྱིན་པར་ལེན་པའི་མི་ཁ་ཅིག་དེ་ཉིད་ལ་དགའ་བའོ། །རྣམ་པ་དུ་ཞིག་ཡོད་སྙམ་ན། འདི་ལ་མཆོད་རྟེན་ལ་བུད་མེད་དག་དང་ལྷན་ཅིག་རོལ་མོའི་སྒྲ་བྱེད་པ་དང་གཞན་དག་བྲོ་གར་བྱེད་གཞན་དག་གླུ་དབྱངས་ལེན་གཞན་དག་ཡོངས་སུ་སྤྱོད་པར་བྱེད་དགོད་པར་བྱེད་རྩེ་བར་བྱེད་དགའ་དགུར་སྤྱོད་པར་བྱེད། རབ་ཏུ་དགའ་བར་བྱེད་པ་དག་ལ་
ཆོས་དང་མི་ལྡན་པའི་མི་དགེ་འདུན་གྱི་ཀུན་དགའ་ར་བ་དང་གནས་སྲུང་བའམ་རོལ་མོ་བྱེད་པའམ་མཆོད་རྟེན་ལས་འཚོ་བ་དག །རོལ་མོའི་སྒྲ་བྱེད་པ་དེ་དག་ལས་ལེན་ཏམ་མ་བྱིན་པར་ལེན་པ་གཞན་བྱེད་དམ་ཡང་རྣམ་པ་གཞན་གྱིས་མ་བྱིན་པར་ལེན་པ་བྱེད་པའོ། །འདི་ལ་གླ་ནི་དེ་ལ་བུད་མེད་རྣམས་གླ་ལེན་པ་ཡིན་ཏེ། གླ་སྦྱིན་པར་བྱས་ནས། འཁྲིག་པར་བྱ་བར་བོས་ཏེ། འཁྲིག་པ་དག་བྱས་ནས་ཇི་ལྟར་སྔར་དམ་བཅས་པ་བཞིན་དེ་ལྟར་མི་སྟེར་བ་ཡིན་ནོ། །ཡང་རྣམ་པ་གཞན་གྱིས་མ་བྱིན་པར་ལེན་པ་བྱེད་དེ། འདི་ལྟར་ཉ་པའམ་རྔོན་པའམ་ཤེན་པ་དག་ལས་འཚོ་བ་རིན་སྦྱིན་པར་བྱས་པ་ལས་མི་སྟེར་བ་ཡིན་ཏེ། རིན་གྱི་རྣམ་པ་འདིས་སྲོག་གཅོད་པ་དང་མ་བྱིན་པར་ལེན་པ་ཡིན་ན། ལས་དེ་དག་མི་བྱེད་ཅིང་བྱེད་ན་ཡང་རྗེས་སུ་ཡི་རང་བར་མི་བྱེད་ལ་ཡིད་ཀྱིས་ཀྱང་རྟོག་པར་མི་བྱེད་པ་ཡིན་ནོ། །སྦྱིན་པ་སྦྱིན་པ་ཇི་ལྟ་བུ་ཡིན་ཞེ་ན། འདི་ལ་ཚེགས་ཆེན་པོས་འཚོ་བར་གྱུར་ཀྱང་བསམ་གཏན་གསུམ་པ་འཐོབ་པའམ་གཞན་དག་ལ་སྦྱིན་པ་སྦྱིན་ཞིང་བསོད་ནམས་དག་བྱེད་པ་ཡིན་ཏེ། རྣམ་པ་དེ་ལྟ་བུར་ཕོངས་པར་གྱུར་ཀྱང་གཞན་ལ་སྦྱིན་པར་བྱེད་པ་ནི། ཇི་ལྟར་གཞན་དག་ལ་སྦྱིན་པར་བྱེད་པ་དེ་ལྟར་རང་གི་བུ་ལ་ཡང་ཡིད་ཀྱི་ཤེས་པ་གུས་པས་སྦྱིན་པར་མི་བྱེད་དེ། དེ་ལྟར་སྦྱིན་པ་སྦྱིན་པར་བྱེད་དོ། །སྲོག་གཅོད་པ་སྤངས་ནས་ཚུལ་ཁྲིམས་ལ་རབ་ཏུ་ཞུགས་པ་ཇི་ལྟ་བུ་ཡིན་ཞེ་ན། འདི་ལ་ལྗན་ལྗིན་ཕྱགས་པས་སེམས་ཅན་དག་སྲོག་ཆད་པར་བྱེད་པ་ན་ཕྱིར་ཟློག་པར་བྱེད་ཅིང་དེ་ཉིད་དུ་ཆུ་ལྡུགས་པར་བྱེད་སྐམ་ས་ལ་ཕྱུང་བ་དེ་དག་ཀྱང་ལྗན་ལྗིན་དེ་ཉིད་དུ་ཕྱིར་འཇུག་པར་བྱེད་པ་ཡིན་ཏེ། དེ་དག་ནི་སྲོག་གཅོད་པར་མི་བྱེད་པ་དང་དགེ་བ་ལ་རབ་ཏུ་ཞུགས་པ་ཡིན་ནོ། །དགེ་བའི་ལས་འདི་གཉིས་བྱས་པའི་སྐྱེས་བུ་དམ་པ་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལས་ཀྱི་མཐའ་སྤྱད་པ་ལེགས་པར་བྱས་པ་འདོད་པ་ཐམས་ཅད་ལ་རྣམ་པར་ཆགས་པ་དེ་ལྷའི་སིལ་སྙན་ཡན་ལག་ལྔ་དང་ལྡན་པའི་དབྱངས་ཉེ་བར་ལེན་པ་ན། ལྷ་མོའི་ཚོགས་སྣ་ཚོགས་ཀྱིས་ཡོངས་སུ་
བསྐོར་བ་བདེ་བ་དཔེ་མེད་པ་རྗེས་སུ་མྱོང་ངོ་། །དེའི་དཔེ་འདིར་ཅུང་ཟད་ཅིག་བྱ་ན་འདི་ལྟར་གང་འཁོར་ལོས་སྒྱུར་བའི་རྒྱལ་པོ་གསེར་གྱི་འཁོར་ལོས་སྒྱུར་བའི་ཤིན་ཏུ་བདེ་བར་གྱུར་པ་དག་ལྷའི་སྟན་ལ་གནས་ལ་ལྷའི་བདེ་བ་དེའི་བཅུ་དྲུག་གི་ཆར་ཡང་མི་ཕོད་དོ། །འདི་ལ་ལྷ་ཤ་དང་རུས་པ་དང་ཆུ་སེར་དང་བྲལ་བ་སེར་སྣ་དང་བྲལ་བ་མིག་འཛུམས་པ་དང་ཕྱེ་བ་དང་བྲལ་བ་གོས་ཀྱི་རྡུལ་དང་བྲལ་བ་དུ་བ་དང་ཁུག་རྣ་འདྲེས་པ་དང་བྲལ་བ་བཤང་བ་དང་གཅི་བ་དང་བྲལ་བ་རང་ལ་འོད་ཡོད་པ་ཡིན་ཏེ། འཁོར་ལོས་སྒྱུར་བའི་རྒྱལ་པོ་ནི་དེ་ལྟ་བུ་མ་ཡིན་ནོ། །རང་གི་བུ་དང་ཆུང་མ་ལ་འཛིན་པ་དང་བྲལ་བ་ཕྲག་དོག་དང་བྲལ་བ་རང་གི་བཟའ་བ་དང་བཏུང་བ་དང་བྲལ་བ་གཉིད་དང་སྙོམ་པ་དང་བྲལ་བ་ཡིན་ལ་འཁོར་ལོས་སྒྱུར་བའི་རྒྱལ་པོ་ནི་དེ་ལྟ་བུ་མ་ཡིན་ཏེ། རྣམ་པ་འདིས་འཁོར་ལོས་སྒྱུར་བའི་རྒྱལ་པོ་ལྷ་རྣམས་ཀྱི་བཅུ་དྲུག་གི་ཆར་ཡང་མི་ཕོད་དེ། དེ་ལྟར་མིའི་རིམ་པ་མངོན་སུམ་གྱི་ཅུང་ཟད་ཅིག་དཔེར་བྱ་བ་ཡིན་ནོ། །དེ་ལྟར་ལྷ་རྣམས་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་རྩེ་ཞིང་གནས་སོ། །དེར་སྐྱེས་པའི་ལྷ་དེ་རྣམས་ཀྱི་ཚལ་ཀཱ་བཱི་ར་ཞེས་བྱ་བ་སྲིད་དུ་དཔག་ཚད་བཅུ་ཡོད་ལ་ཞེང་དུ་དཔག་ཚད་ལྔ་ཡོད་དེ། ཀུན་ནས་གསེར་གྱི་བྱ་རྣམ་པ་སྣ་ཚོགས་དུ་མ་རྣམས་ཀྱིས་ཡོངས་སུ་བསྐོར་བ། ཀུན་ནས་གི་ཝང་གི་ཐིག་ལེས་བཀྲ་བར་བརྒྱན་ཏོ། །དེ་ནས་ཚལ་དེ་མེ་ཏོག་བཟང་པོ་རྣམས་ཀྱིས་ཤིན་ཏུ་རྣམ་པར་མཛེས་པར་བརྒྱན་ཅིང་། རིན་པོ་ཆེ་སྣ་བདུན་གྱི་ཤིང་ལྗོན་པ་རྣམས་ཀྱིས་བརྒྱན་པ་ཡིན་ཏེ། ཤིང་ལྗོན་པ་དེ་རྣམས་ཀྱི་ནང་ན་བྱ་གནས་པ་དེ་དག་ཤིན་ཏུ་རྣམ་པར་མཛེས་པ་ཡིན་ནོ། །དཔེར་ན་གསེར་མགར་དག་གིས་རིན་པོ་ཆེ་རྣམ་པ་སྣ་ཚོགས་དང་ཤིང་ལྗོན་པ་སྣ་ཚོགས་ཀྱི་རི་མོ་རྣམས་ཀྱིས་མི་རྣམས་ཀྱི་རྒྱན་སྡུག་གུར་བྱེད་པ་དེ་ལྟར་ལྷ་དེ་རྣམས་ཀྱི་ཚལ་དེ་དང་ཤིང་ལྗོན་པ་དེ་དག་རྣམ་པར་མཛེས་པ་ཡིན་ལ་བྱའི་གཟུགས་དང་ཁ་དོག་རྣམ་པ་སྣ་ཚོགས་དེ་རྣམས་ཀྱིས་བརྒྱན་པ་ཡིན་ཏེ་འདི་ནི་ཅུང་ཟད་ཅིག་འདྲ་བའི་དཔེར་བྱ་བ་ཡིན་ནོ། །དེ་ནས་ཡང་ལྷ་དེ་རྣམས་ཚལ་དེ་ཉིད་ན་ཕན་ཚུན་པད་མ་རྣམ་པ་སྣ་ཚོགས་དག་གིས་རྩེ་བར་བྱེད་དེ་འདི་ལྟ་སྟེ། ཀུན་
ནས་བཻ་ཌཱུརྱའི་འདབ་མ་དང་སྦུ་གུ་དང་ཟེ་བ་དང་ལོ་མ་རྣམས་ཀྱིས་རྩེ་བར་བྱེད་དོ། །གང་འདབ་མ་རྣམས་ཀྱི་ནང་དེ་དག་ན་པད་མ་རཱ་གའི་མདོག་ལྟ་བུར་ཤིན་ཏུ་དམར་ཞིང་ཤིན་ཏུ་དྲི་ཞིམ་པ་མེ་ཏོག་དེ་དག་ཐམས་ཅད་བརྟོལ་ནས་དཔག་ཚད་བརྒྱར་འབྱུང་ལ། དྲི་གང་གིས་མྱོས་པའི་ལྷ་དེ་དག་ཀྱང་པད་མའི་ལོ་མའི་དྲིས་བཅུ་འགྱུར་དུ་ལྷག་པར་མྱོས་པར་འགྱུར་རོ། །དེ་ནས་ཡང་ཀཱ་བཱི་རའི་ཚལ་ན་ལྷ་དག་ལྷ་མོའི་ཚོགས་དང་ལྷན་ཅིག་དགའ་བར་བྱེད་དགའ་དགུར་སྤྱོད་པར་བྱེད་དོ། །དེ་ནས་སེམས་བསྐྱེད་མ་ཐག་ཉིད་དུ་ད་ནི་བདག་ཅག་བཟའ་བ་ཆུ་ལྟར་འབབ་པ་དང་བཏུང་བ་ཆུ་ལྟར་འབབ་པའི་དྲུང་དུ་འདོང་ངོ་སྙམ་སེམས་སོ། །དེ་ནས་དེ་དག་སེམས་བསྐྱེད་མ་ཐག་ཉིད་དུ་གཞལ་མེད་ཁང་ཆེན་པོ་པུ་ཤུ་དང་རྟ་བབས་སྣ་ཚོགས་དང་དྲིལ་བུ་གཡེར་ཀ་འཁྲོལ་བའི་དྲ་བ་རྣམ་པ་སྣ་ཚོགས་དཀྲིགས་པ། རིན་པོ་ཆེའི་འཕན་བཏགས་པའི་རྟ་བབས་རྣམ་པ་སྣ་ཚོགས་དང་གསེར་དང་ཤེལ་དང་རིན་པོ་ཆེ་དང་ཀེ་ཀེ་རུའི་ཀ་བ་སྣ་ཚོགས་བཙུགས་པ་དག་བྱ་ངང་པས་ཁྱེར་རོ། །ཁ་ཅིག་ནི་བྱ་ཀཱ་རཎྜ་བས་ཁྱེར་རོ། །ཁ་ཅིག་ནི་ཕུག་རོན་གྱིས་ཁྱེར་རོ། །ཁ་ཅིག་ནི་ཤང་ཤང་ཏེའུས་ཁྱེར་རོ། །ཁ་ཅིག་ནི་བྱ་ཙ་ཀོ་རས་ཁྱེར་རོ། །ཁ་ཅིག་ནི་བྱ་སྣ་ཚོགས་ལྷན་ཅིག་གིས་ཁྱེར་ཏེ། རྒྱལ་མཚན་དེ་དག་གི་སྟེང་དུ་འདུག་པ། ལས་ཀྱི་མཐའ་སྤྱད་པ་ལེགས་པར་བྱས་པའི་ལྷ་རྣམས་ཀཱ་བཱི་རའི་ཚལ་ཆེན་པོའི་བཟའ་བ་དང་བཏུང་བ་ཆུ་བོ་ལྟར་འབབ་པ་ག་ལ་བ་དེར་འདོང་བར་བྱེད་དེ། རྒྱགས་པར་གནས་པ་རྩེ་བའི་དོན་དུ་ལྷ་མོའི་ཚོགས་དང་ལྷན་ཅིག་ཟས་དང་སྐོམ་ཆུ་བོ་ལྟར་འབབ་པ། ག་ལ་བ་དེར་འདོང་བར་བྱེད་དོ། །དེ་ནས་ཟས་དང་སྐོམ་གྱི་ཡུལ་དེར་ཕྱིན་ཏེ། ལྷ་དེ་དག་རིན་པོ་ཆེའི་གཞལ་མེད་ཁང་དེ་དག་ནས་འཐུང་བར་བྱེད་དགའ་བར་བྱེད་ཡོངས་སུ་སྤྱོད་པར་བྱེད་དེ། སིལ་སྙན་དང་རོལ་མོའི་སྒྲ་དང་གླུ་རྣམ་པ་སྣ་ཚོགས་ཀྱིས་དགའ་བར་བྱེད་དོ། །དེ་ལྟར་དེ་རྣམས་ཡོངས་སུ་སྤྱོད་པ་ན་ཡུན་རིང་དུ་འདས་ཀྱང་ལྷ་དེ་རྣམས་བདེ་བར་གནས་པ་དེས་མི་ཚོར་རོ། །དེ་དག་གལ་ཏེ་ཡུན་རིང་ཞིག་ལོན་ནས་ཀུན་དགའ་ར་བ་ཀུན་མཐོང་མཐོ་ཞེས་བྱ་བ་ག་ལ་བ་དེར་ལྷའི་ཚལ་བལྟ་བའི་ཕྱིར་འདོང་བར་བྱེད་དེ། གཞལ་
མེད་ཁང་དེ་རྣམས་ཀྱི་ནང་ན་འཁོད་པ་དེ་དག་ལྷ་གཞན་དག་དང་ལྷན་ཅིག་མཐོ་བར་ཕྱིན་ནོ། །ཀུན་དགའ་ར་བ་ཀུན་མཐོང་མཐོ་ཞེས་བྱ་བ་དེ་ན་གླུ་རྣམ་པ་སྣ་ཚོགས་ལེན་ཞིང་རོལ་མོའི་སྒྲ་འབྱིན་པར་བྱེད། བྲོ་རྡུང་བར་བྱེད་དགོད་པར་བྱེད་དེ་ཕན་ཚུན་གྲོགས་སུ་གྱུར་པ་རྒྱགས་པ་གཅིག་པུ་དོན་དུ་བྱེད་པ་དག་རྩེ་བར་བྱེད་དོ། །དེ་ནས་ཀུན་དགའ་ར་བ་ཀུན་མཐོང་གི་ཚལ་དེ་ན་ལྷ་གནས་པ་རྣམས་མཐོང་སྟེ། རིའི་རྒྱལ་པོ་རི་རབ་ཀྱི་ཕྱོགས་གཅིག་ན་གང་ཚལ་དང་ཉེ་བའི་ཚལ་གྱིས་བརྒྱན་པ། གསེར་བཙོ་མའི་རྡོ་ལེབ་འབར་བ་སྤུངས་པ། འབབ་ཆུ་དང་ཆུ་བོ་དང་སྟེགས་དང་ལྟེང་ཀ་དང་ཟས་དང་སྐོམ་ཆུ་བོ་ལྟར་འབབ་པ་རྣམ་པ་སྣ་ཚོགས་ཀྱིས་བརྒྱན་པ། ལྷ་མོའི་ཚོགས་རྣམ་པ་སྣ་ཚོགས་གྲངས་མེད་པས་ཀུན་དུ་གང་བ། ཐམས་ཅད་དང་འཐུན་པའི་ལས་ཀྱི་འཇིག་རྟེན་གྱིས་བཟུང་བ། རི་བོ་སྟོང་ཕྲག་དྲུག་ཅུས་ཡོངས་སུ་བསྐོར་བ། བརྩེགས་མཐོ་ཆེན་པོ་ན་ལྷ་དང་ལྷ་མ་ཡིན་དང་མིའམ་ཅི་དང་ལྟོ་འཕྱེ་ཆེན་པོ་གནས་པ། དགེ་བ་དུ་མའི་ལས་ཀྱི་མཐའ་སྤྱད་པའི་ལྷ་རྣམས་གནས་པ། དགེ་བའི་ལས་རྣམ་པ་སྣ་ཚོགས་མངོན་དུ་གྱུར་པ། རྩེ་མོ་རིན་པོ་ཆེ་སྣ་བཞིས་བརྒྱན་པ། གནས་དང་གནས་དག་ཏུ་ལྷ་རྣམས་འདོང་བ་ན་ཆ་བྱད་དང་རྒྱན་སྣ་ཚོགས་དང་གཟུགས་སྙིང་དུ་སྡུག་ཅིང་ཡིད་དུ་འོང་བ་དང་ལྡན་པ། ལྷ་རྣམས་ཕན་ཚུན་གྲོགས་སུ་གྱུར་ཅིང་སེམས་ཤིན་ཏུ་འདོད་ཆགས་དང་ལྡན་པ། ཕན་ཚུན་བག་མེད་པར་གནས་པའི་ས་ཕན་ཚུན་གཏམ་ཤིན་ཏུ་སྙན་པ་ཉམས་དགའ་བ་སྣ་ཚོགས་ཟེར་བ་ན། ཆ་བྱད་དང་གཟུགས་དང་ཁ་ཟས་དང་གནས་པ་ཐ་མ་དང་འབྲིང་དང་ཁྱད་པར་དུ་འཕགས་པ་དག་མཐོང་ངོ་། །དེ་དག་འདི་སྙམ་དུ་སེམས་ཏེ། བདག་ཅག་འབའ་ཞིག་ལ་བདེ་བ་ཡོད་པ་མ་ཡིན་གྱི། ལྷ་གཞན་དག་ལ་ཡང་ཤིན་ཏུ་ཉམས་དགའ་བའི་ངོ་བོ་ལྷ་མོ་རྣམས་ཀྱི་ཚོགས་དང་རྩེ་བར་བྱེད་དགའ་དགུར་སྤྱོད་པར་བྱེད་དོ་སྙམ་སྟེ། དེ་ལྟར་སྣ་ཚོགས་ལྷ་རྣམ་པ་དུ་མ་དང་དཔག་བསམ་གྱི་ཤིང་མདོག་དང་རོ་དང་གཟུགས་དང་དྲི་རྣམ་པ་སྣ་ཚོགས་ཀྱིས་བརྒྱན་པ་དང་གཞན་ཡང་ཚལ་དང་ཉེ་བའི་ཚལ་དག་མཐོང་ངོ་། །དེ་ནས་ཡང་ལྷ་རྣམས་གནས་གཞན་དུ་དོང་སྟེ་ཕྱིན་ནས་ལྷ་གཞན་རི་བརྩེགས་མཐོ་
བ་དང་བརྩེགས་པ་ཆེན་པོ་འབབ་ཆུ་དང་ཆུ་བོ་དང་ལྟེང་ཀ་སྣ་ཚོགས་ཀྱིས་བརྒྱན་པ་དག་མཐོང་སྟེ། རི་གང་གི་རྩེ་མོ་དག་ལ་ཉི་ཟླ་འཁོར་ཞིང་འགྲོ་བ་དེ་དག་ལ་ཡང་རྟོག་པར་བྱེད་དོ། །དེ་ཉི་མ་རབ་ཏུ་སྣང་བའི་གཟུགས་བརྙན་བརྒྱའམ་ཡང་ན་སྟོང་དུ་སྣང་སྟེ་གང་དུ་སྒྲ་གཅན་ཟིན་གྱི་ལག་གིས་བཟུང་བ་ནི་སྔ་མ་བཞིན་ནོ། །དེ་ནས་ཡང་གཞལ་མེད་ཁང་ན་གནས་པའི་ལྷ་དེ་དག་ནམ་མཁའི་སྟེང་ནས་འགྲོ་ཞིང་ཡིད་ལ་ངོ་མཚར་སྐྱེས་པ་དེ་བཞིན་དུ་ལྷ་མོའི་ཚོགས་ཀྱིས་ཡོངས་སུ་བསྐོར་ཅིང་བྲོ་གར་དང་སིལ་སྙན་དང་བཅས་པ། སིལ་སྙན་ཡན་ལག་ལྔ་དང་ལྡན་པའི་གླུ་དབྱངས་ལེན་ཅིང་རིའི་རྒྱལ་པོ་དེ་ཐམས་ཅད་སྐོར་བར་བྱེད་དོ། །དེ་དག་གིས་རིའི་རྒྱལ་པོ་ཚལ་དང་ནགས་ཚལ་དང་རི་ཁྲོད་དང་བཅས་པ་དེ་ཐམས་ཅད་མཐོང་ནས། དེ་ནས་ཡང་རང་གི་གནས་དེ་དག་ཉིད་དུ་དོང་སྟེ་ཕྱིན་པ་དང་སིལ་སྙན་ཡན་ལག་ལྔ་དང་ལྡན་པས་བྲོ་རྡུང་བར་བྱེད། དགོད་པར་བྱེད་དགའ་དགུར་སྤྱོད་པར་བྱེད་དོ། །བདེ་བའི་རྣམ་པའི་མྱོས་པས་མྱོས་པ་དུས་དུ་མ་རྣམ་པར་ཆགས་པ་ལ་དགའ་བ་དག་ཚལ་དང་ནགས་ཚལ་དང་ལྟེང་ཀ་རྣམས་སུ་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་དག་གིས་རྩེ་བར་བྱེད་དོ། །དེ་ལྟར་དེ་དག་ཡུན་རིང་དུ་ཡོངས་སུ་འདས་ཀྱང་དུས་ཚོད་མི་ཤེས་ཏེ་ཐམས་ཅད་དུ་ཡིད་བག་མེད་པའི་དབང་དུ་གྱུར་པ་དག་ཁོང་དུ་མི་ཆུད་དོ། །ཡང་དེ་དག་རྩེ་བ་ན། རི་ཀུན་ནས་དགའ་བ་ཞེས་བྱ་བ་རྒྱར་དཔག་ཚད་ལྔ་ལ་འཕང་དུ་དཔག་ཚད་བཅུ་ཡོད་པ་དེ་ལ་ཁ་ཅིག་གཞལ་མེད་ཁང་གི་སྟེང་དུ་འདུག །ཁ་ཅིག་བྱའི་སྟེང་དུ་ཞོན་ནས་འཛེག་པར་བྱེད་དོ། །རི་ཀུན་ནས་དགའ་བ་དེ་རིན་པོ་ཆེ་སྣ་ཚོགས་ཀྱིས་བརྒྱན་པ། སྟེགས་དང་ཉེ་བའི་ཚལ་དང་ལྟེང་ཀས་བརྒྱན་པ། སྟེགས་ཀྱི་རིམ་པ་འབུམ་སྙེད་དང་པད་མའི་ཚལ་བརྒྱ་སྙེད་ཀྱིས་བརྒྱན་པ། རི་འབྱུང་ཁུངས་སྣ་ཚོགས་ཀྱིས་བརྒྱན་པ། རིན་པོ་ཆེ་སྣ་བདུན་འོད་འབྱུང་བས་བརྒྱན་པ། དཔག་བསམ་གྱི་ཤིང་དག་འབར་བ་དེ་ན་ལྷ་དེ་དག་རྩེ་བར་བྱེད་དགའ་དགུར་སྤྱོད་པར་བྱེད་དེ། ཅོང་དང་རྔ་དང་སིལ་དཀྲོལ་དང་གླིང་བུ་དང་གླུ་དག་གིས་མྱོས་པ་ཕན་ཚུན་གྲོགས་སུ་གྱུར་པ། རང་གིས་བྱས་པའི་
ལས་ཀྱི་འབྲས་བུ་ལ་སྤྱོད་པ་རྣམས་རྩེ་བར་བྱེད་ཡོངས་སུ་སྤྱོད་པར་བྱེད་དོ། །དེ་དག་དུས་ཡུན་རིང་དུ་རྩེ་བར་བྱེད་ཀྱང་བག་མེད་པ་ལ་གནས་པ་དག་ཁོང་དུ་མི་ཆུད་དེ། ཡུལ་གྱིས་ཀུན་ནས་བསླང་བ་དེ་དག་ཉིད་ཀྱིས་ཚིམ་པ་མེད་ཅིང་ཤིན་ཏུ་སྡུག་པའི་བདེ་བས་རྣམ་པར་རྨོངས་པ་དེ་དག་མེ་ཏོག་ཀུ་བ་ལའི་ཚལ་དུ་འདོང་བར་བྱེད་དོ། །མེ་ཏོག་ཀུ་བ་ལའི་པད་མ་རྣམས་ཀྱི་ཁ་རབ་ཏུ་བྱེ་བ་དེ་ཡང་བུང་བ་འབུམ་སྙེད་ཀྱིས་གང་བ་ཡིན་ཏེ། བུང་བ་དེ་དག་ཉིད་དང་ལྷན་ཅིག་འདོད་པའི་བདེ་བ་ཚིམ་པ་མེད་པས་ཆང་འཐུང་ཞིང་གླུ་ལེན་ནོ། །འདོད་པ་དག་གིས་བརྒྱའམ་ཡང་ན་སྟོང་དུ་ཚིམ་པ་མེད་པ་ལ་ལག་ན་རོལ་མོའི་སྒྲ་སྣ་ཚོགས་ཐོགས་ཤིང་རྟག་ཏུ་མྱོས་པར་གནས་པ། ཕན་ཚུན་རྒྱགས་པ་དུ་མ་དོན་དུ་བྱེད་པ་དེ་དག་སྐྱེད་མོས་ཚལ་ཆེན་པོ་འདོད་པ་ངེས་པར་ཐོབ་ཅེས་བྱ་བ་ག་ལ་བ་དེར་འདོང་ངོ་། །ཚིམ་པ་མེད་པ་དེ་དག་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ། བག་མེད་པ་ལ་གནས་པ་དག་ཕན་ཚུན་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་རྟག་ཏུ་ན་བ་མེད་ཅིང་བཞིན་གྱི་མདོག་བཟང་བར་འགྱུར། རྒྱལ་པོས་བཀྲབས་པའམ་ཚོང་པའམ་ཁྱིམ་བདག་རྣམས་ཀྱིས་བརྡུང་བར་མི་འགྱུར། ཤིན་ཏུ་བདེ་ཞིང་ཡིད་ལ་རིག་པའི་བློ་གསལ་བར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་ཞིབ་ཏུ་དཔྱོད་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་སྐྱེས་བུ་དགེ་བ་བདག་དང་གཞན་ལ་ཕན་པར་ཞུགས་པ་གཡོ་མེད་པ། གཞན་ལ་གནོད་པ་
མི་བྱེད་པ། མི་དྲང་པོའི་རང་བཞིན་ཅན། མིའི་ལས་སུ་གྱུར་པ། གང་གིས་དགེ་བའི་ལས་ཀྱི་ངོ་བོ་ཉིད་བྱས་པ། རྣམ་པར་སྨིན་པ་བདེ་བ། བསིལ་བ། རྣམ་པར་སྨིན་པ་བསིལ་བ། བདེ་བ། བཀྲ་ཤིས་པ། རྣམ་པར་སྨིན་པ་བཀྲ་ཤིས་པ། སྐྱེ་བོ་ཐམས་ཅད་ཀྱིས་མཆོད་པ། སྐྱེ་བོ་ཐམས་ཅད་ཀྱི་སྡུག་པ། འཇིག་རྟེན་འདི་དང་འཇིག་རྟེན་ཕ་རོལ་ཏུ་བདེ་བ་བྱེད་པ། སྐྱེས་བུ་གང་འཇིག་རྟེན་འདི་ནས་འགྲོ་ཞིང་འཇིག་རྟེན་ཕ་རོལ་ཏུ་ཕ་མར་གྱུར་པ། སྐྱབས་སུ་གྱུར་པ། བདེ་བ་དུ་མ་འབྱུང་བར་གྱུར་པ། བདེ་བ་བྱས་པ་སྐྱེ་བར་གྱུར་པ་ནི་ལེགས་པར་བྱས་པ་དེའི་ལས་ཀྱིས་བྱེད་པར་འགྱུར་ཏེ། འདི་ལྟ་སྟེ་སྲོག་གཅོད་པ་དང་མ་བྱིན་པར་ལེན་པ་མི་བྱེད་ཅིང་བྱེད་དུ་མི་འཇུག་ལ། བྱེད་དུ་མི་གནང་ཉེས་པར་བྱས་པའི་ཚུལ་ཁྲིམས་ལ་དད་པ་དང་ཐད་ཀར་ལྷན་ཅིག་གནས་ཤིང་འདྲེ་བར་མི་བྱེད་དགའ་བར་ཡང་མི་བྱེད་ཚུལ་ཁྲིམས་འཆལ་པ་དེ་དང་ལྷན་ཅིག་རྣམ་པར་བྱང་བ་འཐུན་པར་མི་སྒྲུབ་ལ། འདི་ལྟར་ཚུལ་ཁྲིམས་དང་ལྡན་པ་དང་ལྷན་ཅིག་རྟག་ཏུ་དགའ་བར་བྱེད། དེ་དང་ལྷན་ཅིག་འདྲེ་བར་བྱེད། དེ་དང་རྣམ་པར་བྱང་བ་འཐུན་པར་སྒྲུབ། དེ་དང་ཐད་ཀར་འདུག་པར་ཡང་བྱེད། དེ་དང་ལྷན་ཅིག་རྩེ་ཞིང་འཇིག་རྟེན་གྱི་སྤྱོད་པ་བྱེད། ཆོས་དང་ཆོས་མ་ཡིན་པར་སེམས་པར་བྱེད་དེ། སྐྱེས་བུ་དགེ་བ་དེ་བདག་ཉིད་སྡིག་པ་དག་མི་བྱེད་ལ། སྡིག་པའི་གྲོགས་པོ་དང་ལྷན་ཅིག་དགའ་བར་མི་བྱེད། ཐམས་ཅད་ཀུན་ནས་ཡོངས་སུ་དག་པར་བྱེད་པའི་སྐྱེས་བུ་དམ་པ། ཤིན་ཏུ་ཚུལ་ཁྲིམས་འཆལ་པ་དག་ཀྱང་དགེ་བའི་ལམ་ལ་རབ་ཏུ་འཇོག་པར་བྱེད་ཅིང་ཡང་དག་པའི་ལམ་སྟོན་པར་བྱེད་འགྲོ་བའི་ཞིང་བཟང་པོ་ལ་དགེ་བའི་ལས་ཀྱི་ས་བོན་འདེབས་པར་བྱེད། དེ་ཀུན་ནས་སེམས་གསེར་ལྟར་སྦྱངས་ཤིང་དྲི་མ་མེད་པའི་སེམས་དགེ་བའི་ལས་ཀྱི་མཐའ་སྤྱད་པའི་བདེ་བ་ནི། ཚེ་འདི་དང་ཕ་རོལ་ལ་འཐོབ་ཅིང་སོ་སོ་ཡང་དག་པར་མྱོང་བར་འགྱུར་རོ། །སྲོག་གཅོད་པ་སྤངས་པ་ཇི་ལྟ་བུ་རྣམ་པ་ནི་དུ་ཞིག་ཡོད་ཅེ་ན། འདི་ལ་ཀུན་ནས་འདོད་པར་བྱ་བ་མེ་ཏོག་གི་རྒྱུ་དག་བསྐྱེད་པར་བྱ་བའི་དོན་དུ། དུ་བ་དང་དུག་བསྲེས་པ་བཞག་ནས་སྲོག་ཆགས་དུན་དུ་བའམ་འོལ་བའམ་ཤ་སྦྲང་ཆེན་པོའམ་རྐང་བརྒྱ་པ་
དག་ལ་རེག་པར་བྱས་ནས་གསོད་པར་བྱེད་པ་ནི། འདི་ལྟར་བདག་གི་མེ་ཏོག་གི་རྒྱུའམ་ལྕུག་མ་གཟིངས་པའམ་མེ་ཏོག་གམ་འབྲས་བུ་དག་མི་ཉམས་པར་བྱའོ་སྙམ་ནས། སྲིན་བུ་གསད་པའི་ཕྱིར་དུ་བས་གསོད་པ་དང་འབྲ་གོ་དང་རྒུན་འབྲུམ་རྙིས་པའི་ནང་ན་སྲིན་བུའི་རྣམ་པ་ཡོད་པ་ལག་གིས་གནོད་པར་མི་བྱེད་ལ། བཏུང་བ་མ་བརྟགས་པར་འཐུང་ཞིང་དེ་ལས་སྐྱེས་པའི་སྲིན་བུ་ཡང་གསོད་ན་དེ་ལྟུང་བར་འགྱུར་ཏེ། སྲིན་བུ་དེ་རྣམས་དང་སྲོག་ཆགས་དེ་དག་ཀྱང་སོ་སོར་བརྟགས་ནས་འཐུང་བར་བྱེད་ལ་ཡུན་རིང་དུ་བཞག་པ། དྲོད་གཤེར་ལས་ཆུང་ངུར་སྐྱེས་པའི་འཇིགས་པ་དང་མྱོས་བྱེད་ལས་སྐྱེས་པའི་འཇིགས་པས་ཀྱང་འཐུང་བར་མི་བྱེད་པ་ཡིན་ཏེ། རྣམ་པ་ཕྲ་མོ་དེ་དག་ནི་སྲོག་གཅོད་པ་སྤངས་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ། རྣམ་པ་དུ། རྣམ་པ་ནི་ཇི་ལྟ་བུ་ཡིན་ཞེ་ན། འདི་ལ་རྟག་ཏུ་ལོ་ཉེས་བྱུང་བར་འདོད་པ་དེ་ལོ་ཉེས་བྱུང་ན་བདག་གིས་འགྲོན་བུའི་ཁེ་བརྒྱད་འགྱུར་དུ་ཐོབ་པར་བྱའོ། །ཡུལ་མ་ག་དྷཱའི་གཞལ་བྲེ་ཡང་ཤིན་ཏུ་ཆུང་བར་འགྱུར། གང་གི་ནས་དང་གྲོ་ལ་སོགས་པ་དང་འབྲུ་ཞག་དྲུག་ཅུས་སྨིན་པ་ལ་སོགས་པ་ཡང་མི་འབྱུང་ལ་བདག་གཅིག་པུའི་ཡོད་པར་གྱུར་ཅིག་སྙམ་དུ་དེ་ལྟར་སེམས་སོ། །སེམས་ཅན་རྣམས་ཀྱི་བར་ཆད་བྱ་བར་སེམས་ཏེ། དེ་ལྟར་བདག་གིས་སྲོག་ཆགས་རྣམས་གཙེ་བར་བྱའོ། །བསྡུ་བར་བྱའོ་སྙམ་སྟེ་དེ་ཡང་དང་ཡང་དུ་དེ་ལྟར་བསམས་པ་དང་གལ་ཏེ་སེམས་ཅན་རྣམས་ཀྱི་སྐལ་བ་ཆུང་བ་དེས། དུས་ངན་པ་ཞིག་བྱུང་བ་དང་དགའ་ལ་ཡིད་ཤིན་ཏུ་དགའ་ནས་ཇི་ལྟར་བདག་གིས་བསམས་པ་དེ་ལྟར་བདག་དགའ་བར་བྱེད་པ་འོངས་སོ་སྙམ་ནས། དེ་བྲེ་མི་འཐུན་པ་དང་ཡོན་ཏན་དང་བྲལ་བ་བརྩོན་འགྲུས་ཉམས་པའི་ཡོན་ཏན་མི་འཐུན་པས་ནས་དང་གྲོ་དང་འབྲས་སཱ་ལུ་དག་གིས་གཞན་ལ་སླུ་བར་བྱེད་དོ། །དེ་ལྟར་གང་གི་ཚེ་སེམས་པར་བྱེད་པ་ལས་ཀྱི་ཉེར་བསྡོགས་ཡིན་ནོ། །གང་གི་ཚེ་སླུ་བར་བྱེད་པ་དེའི་ཚེ་ལས་ཡིན་ནོ། །གང་གི་ཚེ་སྲོག་ཆགས་དག་བསླུས་ནས་སེམས་ལ་འདོད་པར་བྱེད་ལ་དགའ་བར་བྱེད་པ་དེའི་ཚེ་ལས་ཀྱི་མཇུག་ཡིན་ཏེ། ཇི་སྐད་བཤད་པའི་ཉེས་པ་དག་སྤངས་ཤིང་མི་བྱེད་པ་
ཡིན་ནོ། །འབྱོར་པ་ཉུང་བར་གྱུར་ཀྱང་གཞལ་བླུགས་ཀྱི་གཡོ་དག་གིས་གཞན་ལ་སླུ་བར་མི་བྱེད་ལ་གཞན་བྱེད་ན་ཡང་རྗེས་སུ་ཡི་རང་བར་མི་བྱེད། གལ་ཏེ་ལོ་ཉེས་བྱུང་བའི་ཚེ་བདག་ཉིད་ཚོང་པ་ཞིག་བྱེད་ན་ཡང་དེ་ཇི་ལྟ་བ་བཞིན་དེ་ལྟར་འཚོང་བར་བྱེད་ལ། ཆོས་དང་ལྡན་ཞིང་ཆོས་ཀྱི་བསམ་པས་རྙེད་པའི་རིན་ཐོབ་པར་བྱེད་དེ། དེ་ལྟར་དེ་སྲོག་གཅོད་པ་དང་མ་བྱིན་པར་ལེན་པ་སྤངས་པ་ཡིན་ནོ། །མི་དགེ་བ་ལ་ཞུགས་པ་དགེ་བ་ལ་རབ་ཏུ་འཇུག་པ་ཇི་ལྟ་བུ་ཡིན་ཞེ་ན། འདི་ལ་སྐྱེས་བུ་དམ་པ་ལེགས་པར་སྤྱོད་ཅིང་དགེ་བ་སྤྱོད་པ་རྟག་ཏུ་བདག་ལ་ཕན་པ་དང་གཞན་ལ་ཕན་པར་བྱེད་པ། འབྱོར་པ་ཉུང་བར་གྱུར་པ། ཚེགས་ཆེན་པོས་འཚོ་བ། ཚེགས་ཆེན་པོས་འབྱོར་པ་དག་སྦྱིན་པ་པོ་དང་སྦྱིན་བདག་གི་དྲུང་དུ་འདུག་སྟེ། དེ་དག་ལ་སློབ་པར་བྱེད། སྦྱིན་པའི་འབྲས་བུ་དག་ཀྱང་ཤེས་ལ། སྦྱིན་པའི་འབྲས་བུ་དེ་ཀུན་དུ་རོ་མྱོང་བར་བྱེད། ཀུན་དུ་མྱངས་ནས་ཀྱང་ཡང་དང་ཡང་དུ་མགོན་མེད་ཅིང་ཉོན་མོངས་སྡུག་བསྔལ་བའམ་བསམ་གཏན་གསུམ་པ་ཐོབ་པའམ་དེ་དང་འཐུན་པའམ་དེ་ལ་ཞུགས་པ་ལ་སྦྱིན་པ་བྱེད་པ་ཡིན་ཏེ། དེ་ནི་ལེགས་པར་བྱས་པའི་ལས་ཀྱི་མཐའ་སྤྱད་པ་རྣམས་ཀྱིས་ཆོས་དང་འཐུན་པའི་ལོངས་སྤྱོད་བསྒྲུབས་ནས་དེ་གསུམ་གྱིས་སྦྱིན་པར་བྱེད་དོ། །གསུམ་ནི་གང་གི་ཚེ་སྦྱིན་པ་སྦྱིན་པར་བྱའོ་སྙམ་དུ་སེམས་པ་དེའི་ཚེ་ལས་ཀྱི་ཉེར་བསྡོགས་ཡིན་ནོ། །གང་སྦྱིན་པར་བྱེད་པ་དེ་ལས་ཡིན་ནོ། །གང་གི་ཚེ་བྱིན་ནས་ཡིད་ཀྱིས་རོ་མྱོང་བར་བྱེད་ཅིང་དེ་ལྟར་ཡིད་ལ་སེམས་པ་དེའི་ཚེ་ལས་ཀྱི་མཇུག་ཡིན་ནོ། །དེ་ལྟར་དགེ་བ་སྟོང་ཉིས་བརྒྱ་བྱ་བ་བྱས་པ་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ཞིབ་ཏུ་སྤྱོད་པའི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དགེ་བའི་ལས་ཀྱི་མཐའ་སྤྱད་པ་དེ་ལས་ཞིབ་མོ་དེས་ཡིད་ལ་ཇི་ལྟར་འདོད་པ་བཞིན་བདག་ཉིད་ཀྱི་ངོ་བོ་ཆེ་བའམ་ཆུང་བར་འགྱུར་རོ། །ལྷའི་གནས་དེ་དག་ཀྱང་རིན་པོ་ཆེ་སྣ་བདུན་གྱི་ཤིང་ལྗོན་པ་རྣམས་མདོག་ཤིན་ཏུ་གསལ་ཞིང་རང་གི་དགེ་བའི་ལས་ཀྱིས་དྲི་མ་མེད་པ་ཡིན་ནོ། །ཚལ་དེ་ཡང་སྲིད་དུ་དཔག་ཚད་ཉི་ཤུ་ལ་ཞེང་དུ་དཔག་ཚད་བཅུ་ཡོད་དེ། ཆུ་བོ་དང་འབབ་ཆུ་དང་ལྟེང་ཀ་དང་ཚལ་དང་ཉེ་བའི་
ཚལ་དང་ནང་གི་ཚལ་རྣམས་ཀྱིས་ཤིན་ཏུ་གང་བ་ཤིན་ཏུ་བལྟ་ན་སྡུག་པ་ཡིན་ལ། ཤིང་ལྗོན་པ་རྣམས་ཀྱིས་ཚལ་གང་ཡིན་པ་འདི་དྲི་མ་མེད་པ་དང་གསལ་བ་ཡིན་ཏེ། དེ་ཡལ་ག་དང་ལོ་མ་དང་འདབ་མ་རྣམས་ཁ་དོག་དང་མེ་ཏོག་སྣ་ཚོགས་ཀྱིས་བརྒྱན་པ། གསེར་བཙོ་མའི་མདོག་དང་མཚུངས་པ་ཁ་ཅིག་དངུལ་གྱི་མདོག་ལྟ་བུ་དང་གཞན་དག་བཻ་ཌཱུརྱའི་མདོག་ལྟ་བུ་ཡིན་ནོ། །ཚལ་དང་ཚལ་གྱི་ཤིང་ལྗོན་པ་དེ་རྣམས་ཀྱི་ལོ་མ་དང་འདབ་མ་དང་ཤིང་གཞོན་ནུ་དང་ཡལ་ག་དང་ཡལ་ག་ཕྲ་མོ་མེ་ལོང་ལྟ་བུའི་ནང་དག་ཏུ་ལྷ་དེ་རྣམས་ཀྱི་ངོ་བོ་གསལ་བར་སྣང་སྟེ། འདི་ལྟ་སྟེ་ཤིང་གཅིག་གི་ནང་དུ་སྣང་བ་དེ་བཞིན་དུ་ཤིང་ལྗོན་པ་འབུམ་རྣམས་ཀྱི་ནང་དུ་ཡན་ལག་དང་ཉིང་ལག་ཐམས་ཅད་སྣང་སྟེ། ལྷའི་ལུས་དེ་གཅིག་པུ་ལས་ཀྱི་གཟུགས་བརྙན་དང་འཐུན་པར་ཤིང་ལྗོན་པ་འབུམ་ཕྲག་དུ་མ་དག་གི་ནང་ན་སྣང་ངོ་། །ཡང་ཤིང་ལྗོན་པ་དེ་རྣམས་ཀྱི་ངོ་མཚར་བ་གཞན་ནི། ཇི་ཙམ་དུ་ལས་ཀྱི་རྣམ་པ་དམན་པ་དང་འབྲིང་དང་ཁྱད་པར་དུ་འཕགས་པ་གང་དག་གིས་ལྷ་དེ་དག་ལས་ཀྱི་རྣམ་པར་སྨིན་པ་དང་བཅས་པ་ཡིན་ཏེ། དེ་ཡང་ལས་བྱས་པ་ཇི་ལྟ་བ་བཞིན་ཤིང་ལྗོན་པ་དེ་རྣམས་ཀྱི་ཤུན་པ་དང་རྩ་བ་དང་ཡལ་ག་དང་ལོ་མ་དང་འདབ་མའི་ནང་ན་ཐམས་ཅད་སྣང་ངོ་། །དེ་ནས་ལྷའི་རྒྱལ་པོ་བརྒྱ་བྱིན་ལྷ་དང་ལྷ་མོའི་ཚོགས་འབུམ་ཕྲག་དུ་མས་ཡོངས་སུ་བསྐོར་བ། ལུས་ཐམས་ཅད་མེ་ཏོག་གི་ཕྲེང་བ་དང་བྱུག་པས་རྣམ་པར་བརྒྱན་པ། ཉི་མ་འབུམ་པས་ལྷག་པའི་འོད་འབར་བ། ཚལ་དེར་འདོང་བར་བྱེད་དོ། །དེ་ནས་ཞིབ་ཏུ་སྤྱོད་པའི་ལྷ་རྣམས་བརྒྱ་བྱིན་དེ་འོང་བ་མངོན་དུ་མཐོང་ནས་གུས་པ་དང་བཅས་པའི་སེམས་ཀྱིས་ལྷའི་རྒྱལ་པོ་བརྒྱ་བྱིན་ག་ལ་བ་དེར་དོང་སྟེ། ཕྱིན་ནས་བརྒྱ་བྱིན་ལ་གསོང་པོར་སྨྲས་ཤིང་སྤྱི་བོར་ཐལ་མོ་སྦྱར་ཏེ་མཆོད་ནས་ཡིད་ལ་གུས་པ་དང་བཅས་པ་ཐམས་ཅད་ཚལ་ག་ལ་བ་དེར་འདོང་བར་བྱེད་དོ། །དེ་ནས་ལྷའི་རྒྱལ་པོ་བརྒྱ་བྱིན་ལ་སྙན་པ་དང་ཕན་པའི་སེམས་ཐམས་ཅད་ཀྱིས་མཆོད་དེ། ལྷ་དང་ལྷ་མོའི་ཚོགས་དགེ་བའི་ལས་ཀྱི་མཐའ་ཤིན་ཏུ་རྒྱ་ཆེ་བ་སྤྱད་པ་དེ་དང་ལྷན་ཅིག་ཡོངས་སུ་བསྐོར་ནས་བདེ་བར་གནས་པར་བྱ་བའི་ཕྱིར་ཚལ་ག་ལ་བ་དེར་འདོང་བར་བྱེད་དོ། །དེ་བྱ་སྣ་ཚོགས་
སྐད་འབྱིན་པས་ཤིན་ཏུ་གང་བ། གསེར་གྱི་ཤིང་ལྗོན་པ་རྣམས་ཀྱིས་བརྒྱན་པའི་ཚལ་དེར་ཕྱིན་ཏེ། ལས་འཐུན་པ་མངོན་སུམ་དུ་གྱུར་པ་དེ་དག་ཀྱང་ལས་ཀྱི་ཆོས་ཀྱི་རྣམ་པར་སྨིན་པ་མངོན་པར་མཐོང་ནས་བརྒྱ་བྱིན་དེས་འདི་ལྟར་ཚིགས་སུ་བཅད་དེ་སྨྲས་པ། ལྗོན་པ་སྣ་ཚོགས་འདི་རྣམས་ནི། །དགེ་བའི་ལས་ཀྱིས་མངོན་དུ་གྱུར། །ཡི་གེ་མེད་ཀྱང་ཤིན་ཏུ་འཐུན། །མཁས་པ་རྣམས་ནི་རྗོད་པར་བྱེད། །རྣམ་པར་སྨིན་པ་གང་གང་གིས། །གང་དང་གང་དུ་སྐྱེ་འགྱུར་བ། །མི་ཡིས་དེ་དང་དེ་དག་ཏུ། །དགེ་བའམ་ཡང་ན་མི་དགེ་འཐོབ། །སྐྱེ་བོ་དགེ་བའི་ལས་ཀྱིས་སུ། །རྟག་པར་ལྷ་རྣམས་ནང་དུ་སྐྱེ། །དེ་བཞིན་མི་དགེས་མི་ཐ་མ། །སེམས་ཅན་དམྱལ་བར་ལྷུང་བར་གྱུར། །དགེ་དང་མི་དགེ་དག་ལ་ཆགས། །འདོད་ཅན་འདོད་པས་རྨོངས་པ་རྣམས། །གང་དག་ངེས་པར་འབྱུང་འགྱུར་བ། །འཆི་བ་ཁོང་དུ་མི་ཆུད་དོ། །ལྗོན་པ་རྣམས་ལ་མངོན་པ་གང་། །འདི་ནི་དགེ་བའི་རྣམ་སྨིན་ཏེ། །བདེ་བས་ཡིད་ནི་རྨོངས་པ་དག །བདེ་ལས་དགའ་བ་འབྲལ་མི་ནུས། །ཡུལ་འདོད་པ་ཡི་སྲོག་ཆགས་རྣམས། །འདོད་པའི་རོ་ཡིས་རབ་མྱོས་པ། །གང་གིས་བཅིངས་པའི་ལུས་ཅན་ནི། །དྲ་བ་ལྡན་པས་རྟག་ཏུ་གནོད། །ཇི་ལྟར་འཇིག་རྟེན་དག་གི་མེ། །ཚ་དང་ལྷན་ཅིག་སྐྱེ་བ་ལྟར། །བུད་མེད་མི་བཟད་འདོད་ཆགས་དང་། །ངེས་པར་ལྷན་ཅིག་སྐྱེ་བར་འགྱུར། །ཇི་ལྟར་བུད་མེད་ལས་བྱུང་མེ། །ལུས་ཅན་རྣམས་ཀྱི་སྙིང་འཇུག་པ། །མེ་འདི་གང་ཞིག་བྱུང་བ་ནི། །དེ་ལྟར་ཚ་བར་མི་འགྱུར་རོ། །འཇིག་རྟེན་ཐམས་ཅད་རྣམ་འཇིག་ཅིང་། །ཆོས་ནི་ཐམས་ཅད་ཟད་བྱེད་ལ། །སེམས་ཅན་དམྱལ་བ་འདི་ཡི་རྒྱུ། །བུད་མེད་ཡིན་ཞེས་དྲང་སྲོང་གསུང་། །བུད་མེད་ཁར་ནི་ཚིག་སྙན་སྨྲ། །སྙིང་ནི་གདུག་པའི་དུག་དང་མཚུངས། །ཡིད་དུ་འོང་ལའང་འདུག་མི་བྱེད། །དེ་ལ་མི་ནི་སུ་ཞིག་དགའ། །ཡུད་ཙམ་གྱིས་ནི་དགའ་བྱེད་ལ། །དེ་བཞིན་ཡུད་ཀྱིས་དགའ་མི་བྱེད། །སྙིང་དུ་སྡུག་པའང་གནས་མི་བྱེད། །བརྟན་པ་མེད་དེ་གློག་དང་མཚུངས། །སླུ་བར་བྱེད་པའི་སྒྱུ་ལ་མཁས། །རྟག་ཏུ་བྱ་བ་ལྷུར་བྱེད་ཅིང་། །རྟག་ཏུ་ཡིད་ལ་ཕྲད་པར་འདོད། །རྟག་ཏུ་ང་རྒྱལ་འབའ་ཞིག་སེམས། །ལྷ་དང་མི་དང་ཤ་ཟ་དང་། །ལྟོ་འཕྱེ་རྣམས་དང་སྲིན་པོ་ཡི། །
འཆིང་བར་གྱུར་པ་བུད་མེད་དེ། །ཤིན་ཏུ་མི་བཟད་དུག་དང་མཚུངས། །ཕན་པ་མེད་དང་རིགས་མེད་དང་། །མཐུ་རྩལ་ཆེ་བའང་དྲན་མི་བྱེད། །སེམས་ནི་གནས་པ་མེད་པ་སྟེ། །བུད་མེད་རླུང་གི་ཤུགས་དང་མཚུངས། །གང་དུ་ཕུན་སུམ་ཚོགས་གྱུར་པ། །དེར་ནི་བུད་མེད་ཆགས་བྱེད་ལ། །དབུལ་བར་གྱུར་དང་འདོར་བྱེད་དེ། །སྐྱེས་པ་ངེས་པར་གཏོང་བར་བྱེད། །སྐྱེས་པ་གང་དང་གང་ཕྲད་པ། །དེ་ལ་བུད་མེད་ཆགས་འགྱུར་ཞིང་། །དེ་ནི་མྱུར་ཞིང་ཆེས་མྱུར་བར། །གཏོང་སྟེ་མི་འཐུན་གནས་པར་བྱེད། །ཇི་ལྟར་བུང་བ་མེ་ཏོག་དག །སྐམས་ན་ཐམས་ཅད་གཏོང་བར་བྱེད། །དེ་ལྟར་ནོར་དང་བྲལ་བ་ཡི། །མི་ནི་བུད་མེད་རྣམས་ཀྱིས་གཏོང་། །སྙིང་ནི་མི་བཟད་རལ་གྲི་འདྲ། །མུན་པས་ཁེབས་པ་བརྟན་པ་མེད། །གང་གི་རྒྱུ་ཡིས་བུད་མེད་རྣམས། །སྐྱེས་པ་འཇིག་པའི་ཕྱིར་སྐྱེས་སོ། །ཇི་ལྟར་བུད་མེད་འཆིང་བྱེད་པ། །ལྷ་རྣམས་ལ་ནི་འཆིང་གཞན་མེད། །བུད་མེད་འཆིང་བས་བཅིངས་པ་དག །སེམས་ཅན་དམྱལ་བར་ལྟུང་བར་བྱེད། །བུད་མེད་ལས་བྱུང་འདོད་ཆགས་གང་། །འདོད་ཆགས་ནང་ན་འདི་ཆེ་སྟེ། །བུད་མེད་འདོད་ཆགས་ཡིད་བསྲེགས་པ། །ཕྱི་ནས་མེ་ཡིས་སྲེག་པར་བྱེད། །འདོད་ཆགས་ཀྱིས་ནི་ཉམས་པའི་མི། །ལས་རྣམས་ཀྱང་ནི་མངོན་སུམ་སྟེ། །བུད་མེད་འདོད་ཆགས་རྣམ་རྨོངས་པ། །རྨུགས་པའི་སྙིང་གིས་མི་རིག་གོ །སྐྱེས་པ་དང་ནི་ཡིད་གཅུགས་ཤིང་། །དགའ་བ་དུ་མ་བྱས་ནས་སུ། །སྦྲུལ་གྱི་པགས་པ་འདོར་བ་ལྟར། །བུད་མེད་ཀྱིས་ནི་གློ་བུར་འདོར། །ཐབས་ཀུན་གྱིས་ནི་བུད་མེད་བསྒྲུབས། །ཐམས་ཅད་དུ་ནི་ཡོངས་བསྐྱངས་ཀྱང་། །བུད་མེད་ཤིན་ཏུ་མི་བཟད་པ། །བདག་གིར་བྱ་བར་མི་ནུས་སོ། །དེ་ལྟར་རང་བཞིན་དེ་ཡིན་ཏེ། །བུད་མེད་རྣམས་ནི་སེམས་མི་བརྟན། །སྐྱེས་པ་བརྟན་པའི་སེམས་ཀྱིས་སུ། །དེ་ལ་ནམ་ཡང་ཡིད་མི་རྟོན། །དེ་ནས་ལྷའི་དབང་པོ་དེའི་ཁ་ནས་ཐོས་ཤིང་ལས་ལེགས་པར་བྱས་པ་གང་ཡིན་པའི་ལྷ་དེ་དག་གིས། བརྒྱ་བྱིན་གྱི་ཚིག་དེ་ཐོས་ནས་ཡིད་ལ་བྱེད་པ་དང་བྲལ་ཞིང་སྐྱོ་བ་སྐྱེས་པ་རྣམས། སྐྱོ་བ་སྐྱེས་ནས་འདི་ལྟར་ཚིགས་སུ་བཅད་དེ་སྨྲས་པ། ཇི་ལྟར་བརྒྱ་བྱིན་དེ་བཞིན་ཏེ། །དེ་ཉིད་མཚན་ཉིད་ཁྱོད་ཀྱིས་གསུངས། །བུད་མེད་ཞགས་པར་གྱུར་
པའི་སེམས། །བདག་ཅག་གིས་ནི་མ་རྟོགས་སོ། །དེ་ནས་བརྒྱ་བྱིན་གྱིས་ལྷ་དེ་དག་ལས་ཚིགས་སུ་བཅད་པ་དེ་ཐོས་ནས། ཚལ་དེ་བྱ་སྒྲ་སྙན་པ་འབྱིན་ཅིང་ཉམས་དགའ་བ་གཞལ་མེད་ཁང་དུ་མས་བརྒྱན་པ་འབབ་ཆུ་དང་ཆུ་བོ་དང་ལྷའི་རོལ་མོའི་སྒྲ་རྣར་སྙན་ཅིང་ཡིད་དུ་འོང་བ། གསེར་བཙོ་མ་ལྟ་བུའི་རི་དགས་ཀྱིས་རྣམ་པར་བརྒྱན་པ་ལྷ་དང་ལྷ་མོའི་ཚོགས་ཀྱིས་ཀུན་ཏུ་གང་བ་ག་ལ་བ་དེར། ལྷའི་རྒྱལ་པོ་ཀཽ་ཤི་ཀ་དེ་ལྷའི་ཚོགས་དང་ལྷན་ཅིག་བདེ་བ་ལ་གནས་པར་བྱ་བ་དང་ལྷའི་བདེ་བ་ཉིད་ལ་ཡང་དང་ཡང་དུ་སྤྱད་པར་བྱ་བའི་ཕྱིར་འདོང་བར་བྱེད་དེ། དེ་ཚལ་དེ་ན་འདོད་པའི་ཡོན་ཏན་ལྔ་རྣམས་དང་ཡང་དག་པར་ལྡན་ཞིང་ཤིན་ཏུ་ཉམས་དགའ་བ། དབང་པོ་མཆོག་ཐམས་ཅད་ཡུལ་ཐམས་ཅད་ལ་རྣམ་པར་དགའ་བའི་བདེ་བ་མྱོང་བར་བྱེད་དོ། །དེ་དག་ཀྱང་སྤྱད་ནས་རི་རབ་ཀྱི་རྩེ་མོ་སྤོས་བརྩེགས་ཞེས་བྱ་བ་རིན་པོ་ཆེ་སྣ་བདུན་འབར་བ་ལྷའི་འབྱུང་ཁུངས་མུ་ཏིག་གི་ཕྲེང་བ་རྣམས་ཀྱིས་རྣམ་པར་བརྒྱན་པ་ལྟར་འབབ་ཆུ་དང་ཆུ་བོ་བྱེ་མ་མུ་ཏིག་ལྟ་བུ་རྣམས་ཀྱིས་ཉེ་བར་བརྒྱན་པ། ཆུ་བོ་དེ་དག་གི་འགྲམ་གཉི་ག་ན་ལྷའི་བྱ་སྒྲ་འབྱིན་ཅིང་ཤིན་ཏུ་བལྟ་ན་སྡུག་པ། ཡིད་དུ་འོང་ཞིང་ཉམས་དགའ་བ་དེ་དག་ན་ལྷའི་རྒྱལ་པོ་བརྒྱ་བྱིན་དེ་ལྷ་མོའི་ཚོགས་ཀྱིས་ཡོངས་སུ་བསྐོར་ནས། ལྷ་ཆ་བྱད་དང་གཟུགས་སྣ་ཚོགས་དང་ལྡན་པ་རྣམས་རྗེས་སུ་འབྲང་ཞིང་རྩེ་བར་བྱེད་དོ། །དེ་དེར་ཡང་ཡུན་རིང་དུ་སིལ་སྙན་ཡན་ལག་ལྔ་དང་ལྡན་པས་རྩེས་ནས། གཞལ་མེད་ཁང་སྐྱེད་མོས་ཚལ་གྱིས་བརྒྱན་པ་སྤྱི་བོ་ཞེས་བྱ་བ་ག་ལ་བ་དེར་འདོང་བར་བྱེད་དེ། ལྷ་དང་ལྷ་མོའི་ཚོགས་ཡིད་རབ་ཏུ་དགའ་བ་དང་ལྷན་ཅིག་དེར་དོང་སྟེ་ཕྱིན་པ་དང་གང་ལྷ་གཞན་འདོད་པའི་ཡོན་ཏན་ལྔས་ཡིད་ཕྲོགས་པ་དག་གནས་གཞན་དག་ན་རྩེ་བར་བྱེད་ལ། དེ་དག་སྐྱེད་མོས་ཚལ་སྤྱི་བོ་ག་ལ་བ་དེར་འདོང་བར་བྱེད་དོ། །གཞལ་མེད་ཁང་དང་སྐྱེད་མོས་ཚལ་ཕུན་སུམ་ཚོགས་པ་དེ་ཡང་རི་བོ་ཐམས་ཅད་བས་འཕང་མཐོ་ལ། འདི་ལྟར་འཐབ་བྲལ་བའི་ལྷ་རྣམས་ཀྱི་དྲུང་ནས་འོད་གསལ་བ་ཅུང་ཟད་འབྱུང་སྟེ། ཇི་ལྟར་མིའི་གནས་བཞི་རྣམས་སུ་རི་རབ་ལས་འོད་གསལ་བ་འབྱུང་བ་དེ་ལྟར་འཐབ་བྲལ་བའི་ལྷ་རྣམས་ཀྱི་དྲུང་ནས་འོད་གསལ་བ་ཕྱིས་འབྱུང་ངོ་། །འཇིག་རྟེན་
སྤྱི་བོ་པ་ལ་འོད་ཅུང་ཟད་ཀྱང་མེད་ཀྱང་འཇིག་རྟེན་སྤྱི་བོ་པ་དེ་སྟོང་གྱུར་དུ་མཛེས་པ་ཡིན་ནོ། །དེ་ནས་དེར་ཡང་བརྒྱ་བྱིན་གྱིས་དུས་ཡུན་རིང་དུ་རྩེས་ནས་དེ་ནས་ཡང་དེ་བཞིན་དུ་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་ཏེ་ལྷའི་འདུན་ས་ཆོས་བཟང་ག་ལ་བ་དེར་འདོང་བར་བྱེད་དོ། །ཞིབ་ཏུ་སྤྱོད་པའི་ལྷ་དེ་དག་ཀྱང་ལྷའི་གནས་དེ་དག་ན། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་ཀྱི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་རྟག་པར་མཆོག་ཏུ་བདེ་སྟེ་རྒྱལ་པོའམ་བློན་པོ་ཆེན་པོར་འགྱུར། རྟག་ཏུ་སྐྲ་ཞིབ་མོ་སྡུག་གུར་འཁྱིལ་བ་དང་རྟག་ཏུ་ཡིད་ཤིན་ཏུ་ཟབ་པ་དང་ཐམས་ཅད་ཀྱིས་དཀའ་བར་བྱ་བ་རྣམས་ལ་དོན་དང་ལྡན་པར་ཤེས་པ་དང་རབ་ཏུ་མང་པོར་མི་སྨྲ་ཞིང་ཉུང་ངུར་སྨྲ་བ་དང་རྟག་ཏུ་ཤིན་ཏུ་གོས་གཙང་ཞིང་དཀར་བ་དང་། ཆུང་མ་མི་གཡེམ་པ་དང་། ཁྱིམ་ཐབ་ཀྱི་གནས་ལ་དགའ་ཞིང་ཁྱིམ་ཐབ་ལ་དགའ་ལ་ཕྱི་རོལ་དུ་མི་འཁྱམ་པ་དང་། རྟག་ཏུ་སྦྱིན་པ་ལ་དགའ་ཞིང་སེམས་ཤིན་ཏུ་དྲང་བ་དང་། རང་གི་འཁོར་དང་མཛའ་བཤེས་དང་། རྩ་ལག་ལ་དགའ་བ་དང་། བླ་མ་ལ་དགའ་བ་དང་། ཚེས་གྲངས་ལ་དགའ་བ་དང་། རང་གི་བུད་མེད་ལ་དགའ་བ་དང་། ཚུལ་ཁྲིམས་དང་ལྡན་པ་དང་གཞན་གྱི་བུད་མེད་ལ་མི་དགའ་བ་དང་། སྤོས་དང་ཕྲེང་བ་ལ་དགའ་བ་དང་། སྡིག་པའི་གྲོགས་པོ་ལ་མི་དགའ་བ་དང་། རིགས་དམའ་བར་མི་སྐྱེ་བ་དང་། གཟུགས་དང་ཆ་བྱད་དང་རྒྱན་བཟང་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་གླུའི་སྒྲ་ལ་ཤིན་ཏུ་དགའ་ཞིང་མངོན་པར་
ཆགས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །ས་དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། བདག་ལ་ཕན་པ་དང་གཞན་ལ་ཕན་པའི་ཕྱིར་སེམས་དགེ་བ་ལས་དགེ་བ་སེམས་དྲི་མ་དང་བྲལ་ཞིང་གསལ་བ། ལུས་དང་ངག་གི་ལས་ཀྱི་མཐའ་དགེ་བ། ལས་ཀྱི་མཐའ་སྤྱད་པ་དགེ་ཞིང་འདོད་པ། གཏན་དུ་ཕན་པར་འདོད་པ། སྙིང་རྗེའི་བདག་ཉིད་ཅན་ལས་དང་འབྲས་བུ་ལ་དད་པ། ཡང་དག་པའི་ལྟ་བ་དང་ཡང་དག་པའི་ལས་ཀྱི་མཐའ་དང་། ཚུལ་ཁྲིམས་ཀྱི་ཡོན་ཏན་གཉིས་ལ་རབ་ཏུ་ཞུགས་པ། རྐོག་མ་ཡིན་པར་བྱེད་པ། སེམས་མ་གཡེངས་པ། སྤྱོད་པ་མ་གཡེངས་པ། སྡིག་པའི་གྲོགས་པོའི་ངང་ཚུལ་ཅན་མ་ཡིན་པ། མར་འཛིན་པ། ཕར་འཛིན་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། གང་གི་ལས་ཀྱི་ཉེར་བསྡོགས་དང་ལས་དང་ལས་ཀྱི་མཇུག་དང་གསུམ་སྟེ། ཚུལ་ཁྲིམས་དེ་དག་ཀུན་ཀྱང་ཤིན་ཏུ་ཡོངས་སུ་དག་པར་བྱས། ཚུལ་ཁྲིམས་ཀྱི་ཡོན་ཏན་གཉིས་ཀྱང་བསྲུངས། སྲོག་གཅོད་པ་དང་མ་བྱིན་པར་ལེན་པ་ཡང་རྣམ་པར་སྤངས་པ་ཡིན་ནོ། །སྲོག་གཅོད་པ་ཤིན་ཏུ་བསྲུངས་པ་རྣམ་པ་དུ་ཡོད་ཅེ་ན། འདི་ལ་ནས་དང་གྲོ་དང་འབྲས་སཱ་ལུ་རྣམས་ཀྱི་ནང་ན་སེམས་ཅན་སྲིན་བུ་ཕྲ་མོ་སྐྱེས་པ་དག་རང་ཐག་ལ་མི་འཐག་ལ། དེ་ལྟར་སྲོག་ཆགས་དེ་དག་ཤིན་ཏུ་བསྲུང་བའི་ཕྱིར་རམ། མ་བྱིན་པར་ལེན་པས་འཇིགས་པའི་ཕྱིར། ནས་དང་གྲོ་དེ་དག་ཀྱང་འཚོང་བར་མི་བྱེད། བ་ལང་དང་རྟ་དང་རྔ་མོ་དང་། བོང་བུ་དག་ལ་ཁུར་བཀལ་བས་རྒྱབ་སྣད་པ་དང་དེ་དག་ལ་སྲིན་བུ་བྱུང་བ་རྣམས་ཆུའམ་རྩབ་མོས་འཁྲུ་ཞིང་སྲིན་བུ་མི་ཤི་བའི་ཆོ་ག་ཡང་བྱེད་དེ། འདི་ལྟར་བྱ་སྒྲོ་རྣམས་ཀྱིས་བླངས་ནས། ཤ་ཉམས་པ་གཞན་ལ་སྲིན་བུ་དེ་དག་འཇོག་པར་བྱེད། ཆོས་མ་ཡིན་པའི་འཇིགས་པས་འདི་ལྟར་བ་ལང་དང་རྟ་དང་རྔ་མོ་དང་བོང་བུ་དག་ལ་གནོད་པར་མ་གྱུར་ཅིག །སྲིན་བུར་གྱུར་པའི་སྲིན་བུ་རྣམས་ཀྱང་འཆི་བར་མ་གྱུར་ཅིག་ཅེས་དེ་ལྟར་གཉི་གའི་སྲོག་སྲུང་བར་བྱེད། སྲོག་ཆགས་ཕྲེའུ་དང་གྲོག་སྦུར་ལ་སོགས་པ་ཡང་ཤིན་ཏུ་སྲུང་བར་བྱེད། རྣམ་པ་ཐམས་ཅད་ཀྱི་ཐམས་ཅད་དུ་ཀུན་ལ་ཕན་པར་འདོད་པ། ཉིན་མོ་དང་
མཚན་མོ་ཡིད་ལ་བག་མེད་པར་མི་བྱེད། སྲོག་ཆགས་རྣམས་ལ་ཡིད་ཀྱིས་ཀྱང་འཁུ་བར་མི་བྱེད། སེམས་ཅན་ཕ་རོལ་ལ་དང་པོ་ནས་སེམས་ཅན་གྱི་འདུ་ཤེས་བསྐྱེད་དེ། སྲོག་ཆགས་ཕྲེའུ་དང་གྲོག་སྦུར་ལ་སོགས་པ་དེ་དག་ཀུན་དུ་སྲུང་བར་བྱེད་ཅིང་གནས་སྐབས་ཐམས་ཅད་དུ་དགེ་བའི་ལས་ཀྱི་མཐའ་སྤྱོད་པ་ཡིན་ཏེ། དེ་དག་ནི་སྲོག་གཅོད་པ་སྲུང་བ་ཡིན་ཞིང་དེ་དག་ནི་སྲོག་གཅོད་པ་སྤངས་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན། རྣམ་པ་ནི་དུ་ཡོད་ཅེ་ན། འདི་ལ་དེ་ལྟར་དགེ་བའི་ལས་ཀྱི་མཐའ་སྤྱོད་པ་དེ་སེམས་ཅན་སྦལ་བའམ་སྲེ་མོའམ་ཁྱིའམ་ཝ་བཟུང་བ་དེ་དག་ཟས་གཞན་གྱིས་ཐར་བར་བྱེད་དོ། །ཐར་བར་བྱས་ནས་ཀྱང་ཤ་རྗེན་ཟ་བ་དེ་དག་ལ་ཟས་དེ་དག་སྦྱིན་པར་བྱེད་དོ། །བཀྲེས་པ་དེ་དག་ཀྱང་དེ་དག་ཉིད་ཟ་བར་བྱེད་དེ། དེ་ལྟར་སྲོག་ཆགས་དེ་དག་ཀྱང་ཤིན་ཏུ་བསྲུངས་པ་ཡིན་ནོ། །དེ་ནི་ལྷ་རྣམས་ཀྱི་ནང་དུ་སྐྱེ་བར་འགྱུར་ལ་དེ་ལྟར་མ་བྱིན་པར་ལེན་པས་ནི་ལྷ་རྣམས་ཀྱི་ནང་ནས་ཤི་ནས་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་ཏེ་རྣམ་པ་དེ་དག་ནི་མ་བྱིན་པར་ལེན་པ་སྤངས་པ་ཡིན་ནོ། །བདག་ཉིད་ཀྱིས་ཀྱང་སྤངས་ལ་གཞན་དག་ཀྱང་དགེ་བའི་ལམ་ལ་རབ་ཏུ་འཇོག་པར་བྱེད། དགེ་བ་ལ་མ་ཞུགས་པ་ཡང་དགེ་བའི་ལམ་ལ་རབ་ཏུ་འཇོག་པར་བྱེད། ཞུགས་པའང་ཡང་དང་ཡང་དུ་གཟེངས་སྟོད་པར་བྱེད། ལས་ཀྱི་འབྲས་བུ་ཉེ་བར་སྟོན་པར་བྱེད། རྒྱུར་བྱེད། ཁོང་དུ་ཆུད་པར་བྱེད་དེ། རྣམ་པ་དེ་དག་ནི་སྲོག་གཅོད་པ་དང་མ་བྱིན་པར་ལེན་པ་སྤངས་པ་ཡིན་ནོ། །ལེགས་པ་ལ་འཇུག་པ་ཇི་ལྟ་བུ་ཡིན་ཞེ་ན། འདི་ལ་འབྱོར་པ་ཉུང་བར་གྱུར་ཀྱང་ཆོས་རྟོགས་པས་འཚོ་བ། སྦྲང་རྩི་དང་སྦྲང་བུའི་སྦྲང་རྩིའི་ཕྱིར་སེམས་ཅན་གསོད་པ་དག་ནོར་ཟས་བྱིན་ནས་སྦྲང་བུ་རྣམས་ཀྱི་སྲོག་སྐྱོབ་པ་ཡིན་ཏེ། དེ་ནི་སེམས་ཅན་རྣམས་ཀྱི་སྲོག་སྦྱིན་པ་ཡིན་ནོ། །མ་བྱིན་པར་ལེན་པ་སྤངས་ཤིང་། སྦྱིན་པ་ལ་མངོན་པར་དགའ་བ་ཇི་ལྟ་བུ་ཡིན་ཞེ་ན། འདི་ལ་དེ་ལྟར་ཚེགས་ཆེན་པོས་འཚོ་བ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ་དེ། བསམ་གཏན་བཞི་ཐོབ་པའམ་གཞན་དག་ལ་ཟས་སྦྱིན་པ་དང་དེ་བཞིན་དུ་ཚེགས་ཆེན་པོས་འཚོ་བས་སྲོག་ཆགས་དག་དགྲའི་
ལག་ཏུ་སོང་སྟེ། མཚོན་གྱིས་འཁྲུག་ཅིང་བསད་དུ་དོགས་པ་ན་དེ་ཐར་བར་བྱེད་པ་ཡིན་ནོ། །སྦྱིན་པ་རྣམས་ཀྱི་ནང་ན་མཆོག་ནི་འདི་ཡིན་ཏེ་འདི་ལྟ་སྟེ། ཆོས་སྦྱིན་པའམ་སྲོག་སྦྱིན་པ་ཡིན་ལ་དེ་གཉི་གའི་སྦྱིན་པ་དག་ཏུ་གྱུར་པ། སྐྱེས་བུ་དམ་པ་དེ་གཞན་དག་ཀྱང་དེ་ལྟར་བྱེད་དུ་འཇུག །བྱས་པ་ལ་ཡང་རྗེས་སུ་ཡི་རང་བར་བྱེད་པ་དེ་ནི་དགེ་བའི་ཚུལ་ཁྲིམས་ལ་རབ་ཏུ་ཞུགས་པ་ཡིན་ནོ། །ཚུལ་ཁྲིམས་དང་ལྡན་པ་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་གླུའི་སྒྲ་ལ་ཤིན་ཏུ་དགའ་ཞིང་མངོན་པར་ཆགས་པའི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དགེ་བའི་ལས་ཀྱིས་སྤྲུལ་པ་དེ་ལ་མཆོད་པ་བྱེད་དེ། འདི་ལྟར་གང་ཤིན་ཏུ་རྒྱ་ཆེ་བ་ཐམས་ཅད་དང་ལྡན་པའི་ཚལ་འདི་ཐམས་ཅད་མངོན་པར་བརྒྱན་པ། འདི་ཐམས་ཅད་ལེགས་པར་བྱས་པའི་ལས་ཀྱིས་བསྐྱོད་པ་ཡིན་ཏེ། ལྷའི་གནས་འདི་གོམ་གང་ཙམ་ཡང་གང་ལེགས་པར་བྱས་པའི་ལས་ཀྱིས་མ་སྤྲུལ་པའམ་གང་དུ་ལྷ་རྣམས་ཀྱིས་མ་རྩེས་པའམ་དེར་བདེ་བའི་རྣམ་པ་སྤྱད་ནས་མ་ཤི་བའམ་རང་གིས་བྱས་པའི་ལས་ཀྱི་འབྲས་བུ་ཟད་ནས་ཉམས་པར་མ་གྱུར་པ་མེད་དེ། གང་དུ་བདག་ཅག་གི་ལུས་མངོན་སུམ་དུ་གྱུར་ཀྱང་སྲེད་པའི་ཞགས་པས་བཅིངས་པ། སྲེད་པས་རྣམ་པར་བསྒྱུར་བ། ཡང་དང་ཡང་དུ་རྣམ་པར་བསླུས་པ་རྣམས་ཡིད་འབྱུང་བར་མི་བྱེད་དོ། །དེ་ལྟར་དེ་བརྒྱ་བྱིན་གྱིས་མཐོང་ནས་ཡང་དང་ཡང་དུ་ཚལ་དེ་དག་ཉིད་ག་ལ་བ་དེར་བདེ་བར་གནས་པར་བྱ་བའི་ཕྱིར་འདོང་བར་བྱེད་དོ། །དེ་སྐལ་བ་ངེས་པར་མྱོང་བར་བྱེད་པ། མེ་ཏོག་དང་འབྲས་བུ་དང་ལྕུག་མ་འཕྱང་བས་ཁེབས་པའི་ཤིང་ལྗོན་པ་སྣ་ཚོགས་དང་བཟའ་བ་དང་བཏུང་བ་ཆུ་བོ་ལྟར་འབབ་པ་ཕུན་སུམ་ཚོགས་པ་ག་ལ་བ་དེར་ལྷའི་ཚོགས་དང་ལྷན་ཅིག་འདོང་བར་བྱེད་དོ། །ཚལ་གྱི་ཕྱོགས་དེར་ཡང་ལྷ་མོའི་ཚོགས་དང་ལྷན་ཅིག་རྩེས་ནས། སྐྱེད་མོས་ཚལ་མྱོས་འགྲོ་འདུལ་ཞེས་བྱ་བ་ག་ལ་བ་དེར་བདེ་བར་གནས་པར་བྱ་བའི་ཕྱིར་འདོང་བར་བྱེད་དོ། །དེ་ནས་བརྒྱ་བྱིན་ལྷ་དེ་དག་དང་ལྷ་གཞན་རྣམས་དང་ཡང་ལྷན་ཅིག་ཏུ་གཞལ་མེད་ཁང་མྱོས་འགྲོ་འདུལ་ཞེས་བྱ་བ་ག་ལ་བ་དེར་འདོང་བར་བྱེད་
དོ། །དེ་ནས་བརྒྱ་བྱིན་གྱིས་སྐྱེད་མོས་ཚལ་དེ་མངོན་པར་མཐོང་ནས་ཁྱེད་ཅག་སྐྱེད་མོས་ཚལ་འདི་ལྟོས་ཤིག་ཅེས་སྨྲས་སོ། །ལྷ་རྣམས་ཀྱིས་བརྒྱ་བྱིན་མཐོང་ལགས་སོ་ཞེས་སྨྲས་སོ། །དེ་ནས་ཡང་བརྒྱ་བྱིན་གྱིས་ལྷ་རྣམས་ལ་སྔོན་བྱུང་བའི་རབས་རྗོད་པར་བྱེད་དེ། འདི་ལྟར་བདག་གིས་ཚལ་འདིར་ལྷ་རྣམས་ཀྱི་ནང་དུ་སྔོན་གྱི་རབས་ཐོས་ཏེ། བཅོམ་ལྡན་འདས་འཁོར་བ་འཇིག་གིས་ལྷ་རྣམས་ལ་ཆོས་བཤད་པ་འདི་ལྟ་སྟེ། ཐོག་མར་ཡང་དགེ །བར་དུ་ཡང་དགེ །ཐ་མར་ཡང་དགེ་བ། དོན་བཟང་པོ། ཚིག་འབྲུ་བཟང་པོ། ཡོངས་སུ་རྫོགས་པ། ཡོངས་སུ་བྱང་བའི་ཆོས་བསྟན་ཏེ་འདི་ལྟ་སྟེ། འདི་ཡོད་པས་འདི་འབྱུང་། འདི་སྐྱེས་པའི་ཕྱིར་འདི་སྐྱེ། འདི་འགག་པའི་ཕྱིར་འདི་འགག་གོ །གང་ཞིག་ཡོད་ན་ཅི་ཞིག་འབྱུང་ཞེ་ན་འདི་ལྟ་སྟེ། འདོད་པ་རྣམས་ཡོད་ན་ཉེས་དམིགས་འབྱུང་ལ། འདོད་པ་རྣམས་མེད་ན་ཉེས་དམིགས་མི་འབྱུང་སྟེ། ལྷ་དག་འདི་ནི་ཡོད་པས་འདི་འབྱུང་བ་ཡིན་ནོ། །གང་ཞིག་མེད་ན་ཅི་ཞིག་མི་འབྱུང་ཞེ་ན། ལྷ་དག་འདི་ལྟ་སྟེ། འདོད་པ་རྣམས་མེད་ན་འདོད་པའི་ཉེས་དམིགས་རྣམས་མི་འབྱུང་སྟེ་འདི་ནི་འདི་མེད་པས་འདི་མི་འབྱུང་བ་ཡིན་ནོ། །གང་ཞིག་འགག་ན་ཅི་ཞིག་འགག་ཅེ་ན། སྲེད་པ་འགགས་པས་འདོད་པའམ་འདོད་པའི་ཉེས་དམིགས་འགགས་ཏེ། ལྷ་དག་འདི་ནི་འདི་འགགས་པས་འདི་འགག་པ་ཡིན་ནོ། །ལྷ་དག་གཞན་ཡང་འདི་ཡོད་པས་འདི་འབྱུང་ལ། འདི་མེད་པས་འདི་མི་འབྱུང་བ་ནི་འདི་ལྟ་སྟེ། སྲེད་པའི་རྐྱེན་གྱིས་འདུན་པ་སྔོན་དུ་འགྲོ་བ་འབྱུང་ལ། འདུན་པའི་རྐྱེན་གྱིས་འདུན་པ་སྐྱེད་པ་ཡིད་ལ་བྱེད་པ་མི་འཐུན་པ་འབྱུང་ངོ་། །དེ་ལ་འདུན་པ་གང་ཡིན་པ་དེ་ནི་བྱ་བའི་བསམ་པ་ཡིན་ནོ། །རྨོངས་པ་ཚོལ་བ་གང་ཡིན་པ་དེ་ནི་མ་རིག་པ་ཡིན་ནོ། །མ་རིག་པས་རྨོངས་པ་ཡང་དང་ཡང་དུ་ཡུལ་རྣམས་ལ་ཚིམ་པ་མེད་པ་གང་ཡིན་པ་དེ་ནི་སྲེད་པ་ཡིན་ནོ། །གང་ཚིམ་པ་མེད་པའམ་ཚོལ་བ་གང་ཡིན་པ་དེ་ནི་འདོད་ཆགས་ཡིན་ཏེ། ལྷ་དག་འདི་ཡང་འདི་ཡོད་པས་འདི་འབྱུང་བ་ཡིན་ནོ། །གང་ཞིག་མེད་ན་ཅི་ཞིག་འབྱུང་ཞེ་ན་འདི་ལྟ་སྟེ། སྲེད་པ་མེད་ན་ཚིམ་པ་མེད་པའི་ངོ་བོ་ཉིད་མི་འབྱུང་སྟེ། འདི་ཡང་འདི་འགགས་པས་འདི་འགག་པ་ཡིན་ནོ། །ལྷ་དག་
གཞན་ཡང་འདི་ཡོད་པས་འདི་འབྱུང་ལ་འདི་མེད་པས་འདི་མི་འབྱུང་བ་ནི་འདི་ལྟ་སྟེ། བྱས་ཤིང་བསགས་པའི་ལས་རྣམ་པར་སྨིན་པ་འབྱུང་ལ། བྱས་ཤིང་བསགས་པའི་ལས་མེད་ན་རྣམ་པར་སྨིན་པ་མི་འབྱུང་སྟེ། ལྷ་དག་འདི་ཡང་འདི་ཡོད་པས་འདི་འབྱུང་ལ་འདི་མེད་པས་འདི་མི་འབྱུང་བ་ཡིན་ནོ། །ལྷ་དག་གཞན་ཡང་འདི་ཡོད་པས་འདི་འབྱུང་ལ་འདི་མེད་པས་འདི་མི་འབྱུང་བ་ནི་འདི་ལྟ་སྟེ། མིག་ལ་ཡང་བརྟེན་གཟུགས་ལ་ཡང་བརྟེན་ནས་ཡིད་ལ་བྱེད་པ་སྔོན་དུ་འགྲོ་བའི་མིག་གི་རྣམ་པར་ཤེས་པ་འབྱུང་སྟེ་ལྷ་དག་འདི་ཡང་འདི་ཡོད་པས་འདི་འབྱུང་བ་ཡིན་ནོ། །གང་ཞིག་མེད་ན་ཅི་ཞིག་མི་འབྱུང་ཞེ་ན་འདི་ལྟ་སྟེ། གཟུགས་ཀྱང་མེད་མིག་ཀྱང་མེད་ཡིད་ལ་བྱེད་པ་ཡང་མེད་ན་མིག་གི་རྣམ་པར་ཤེས་པ་མི་འབྱུང་སྟེ། ལྷ་དག་འདི་ཡང་འདི་མེད་པས་འདི་མི་འབྱུང་བ་ཡིན་ནོ། །ལྷ་དག་གཞན་ཡང་འདི་ཡོད་པས་འདི་འབྱུང་བ་ནི་འདི་ལྟ་སྟེ། བྱེ་མ་དང་འཇིམ་པ་དང་འཁོར་ལོ་དང་སྐུད་པ་དང་ཆུ་ལ་སོགས་པ་རྒྱུ་ལ་བརྟེན་ནས་བུམ་པ་འབྱུང་བར་འགྱུར་ཏེ། ལྷ་དག་འདི་ཡང་འདི་ཡོད་པས་འདི་འབྱུང་བ་ཡིན་ནོ། །ཡང་གང་ཞིག་མེད་ན་ཅི་ཞིག་མི་འབྱུང་བར་འགྱུར་ཞེ་ན་འདི་ལྟ་སྟེ། བྱེ་མ་དང་འཇིམ་པ་དང་འཁོར་ལོ་དང་སྐུད་པ་དང་ཆུ་ལ་སོགས་པ་རྒྱུ་རྣམས་མེད་ན་བུམ་པ་མི་འབྱུང་སྟེ། འདི་ཡང་མེད་ན་འདི་མི་འབྱུང་བ་ཡིན་ནོ། །ལྷ་དག་གཞན་ཡང་འདི་ཡོད་ན་འདི་འབྱུང་བ་ནི་འདི་ལྟ་སྟེ། འདུ་བ་ཡོད་ན་འབྲལ་བ་འབྱུང་སྟེ། འདི་ཡང་འདི་ཡོད་ན་འདི་འབྱུང་བ་ཡིན་ནོ། །གང་ཞིག་མེད་ན་ཅི་ཞིག་མི་འབྱུང་ཞེ་ན་འདི་ལྟ་སྟེ། འདུ་བ་མེད་ན་འབྲལ་བའི་སྡུག་བསྔལ་མི་འབྱུང་སྟེ། ལྷ་དག་འདི་ཡང་འདི་མེད་པས་འདི་མི་འབྱུང་བ་ཡིན་ནོ། །ལྷ་དག་གཞན་ཡང་འདི་ཡོད་པས་འདི་འབྱུང་བ་ནི་འདི་ལྟ་སྟེ། སྐྱེ་བ་ཡོད་ན་འཆི་བ་འབྱུང་ལ། སྐྱེ་བ་མེད་ན་འཆི་བ་མི་འབྱུང་སྟེ། ལྷ་དག་འདི་ཡང་ཡོད་པས་འདི་
འབྱུང་ལ་འདི་མེད་པས་འདི་མི་འབྱུང་བ་ཡིན་ནོ། །ལྷ་དག་གཞན་ཡང་འདི་ཡོད་པས་འདི་འབྱུང་བ་ནི་འདི་ལྟ་སྟེ། འདོད་ཆགས་ཀྱི་མེ་ཡོད་ན་ངེས་པར་གདུང་བར་འགྱུར་ཏེ། ཇི་ལྟར་མེ་ཡོད་ན་ངེས་པར་སྲེག་པ་ཡོད་པ་བཞིན་ནོ། །ལྷ་དག་འདི་ཡང་འདི་ཡོད་པས་འདི་འབྱུང་བ་ཡིན་ནོ། །གང་ཞིག་མེད་ན་ཅི་ཞིག་མི་འབྱུང་ཞེ་ན་འདི་ལྟ་སྟེ། འདོད་ཆགས་མེད་ཅིང་འདོད་ཆགས་ཀྱི་མེ་མེད་ན་འདོད་ཆགས་ཀྱི་གདུང་བ་མི་འབྱུང་སྟེ། ཇི་ལྟར་མེ་མེད་ན་སྲེག་པ་མི་འབྱུང་བ་བཞིན་ནོ། །ལྷ་དག་འདི་ཡང་འདི་མེད་ན་འདི་མི་འབྱུང་བ་ཡིན་ནོ། །ལྷ་དག་གཞན་ཡང་འདི་ཡོད་ན་འདི་འབྱུང་བ་ནི་འདི་ལྟ་སྟེ། ཕ་མ་དང་ཁུ་ཆུ་དང་ཁྲག་དང་ངེས་པར་འབྱུང་བ་སྐྱེ་བ་དང་མངལ་དུ་སྐྱེ་བར་འགྱུར་བའི་ལས་ངེས་པ་དང་དྲི་ཟ་ཉེ་བར་ལེན་པ་ཡོད་ན་སྐྱེ་བ་འབྱུང་བ་ཡོད་དེ། ལྷ་དག་འདི་ཡང་འདི་ཡོད་པས་འདི་འབྱུང་བ་ཡིན་ནོ། །གང་ཞིག་མེད་ན་ཅི་ཞིག་མི་འབྱུང་ཞེ་ན་འདི་ལྟ་སྟེ། ཕ་མ་ཡང་མེད་ཁུ་ཆུ་དང་ཁྲག་ཀྱང་མེད་ཡང་དག་པར་མྱོང་བར་འགྱུར་བའི་ལས་ཀྱང་མེད་ན་མངལ་དུ་ཉེ་བར་ལེན་པ་སྔོན་དུ་འགྲོ་བ་མི་འབྱུང་སྟེ། ལྷ་དག་འདི་ཡང་འདི་མེད་པས་འདི་མི་འབྱུང་བ་ཡིན་ནོ། །ལྷ་དག་གཞན་ཡང་འདི་ཡོད་པས་འདི་འབྱུང་ལ་འདི་མེད་པས་འདི་མི་འབྱུང་བ་ནི་འདི་ལྟ་སྟེ། ཚུ་རོལ་ཡོད་ན་ཕ་རོལ་ཡོད་པ་ཡིན་ནོ། །གང་ཞིག་མེད་ཅིང་ཅི་ཞིག་མི་འབྱུང་ཞེ་ན་འདི་ལྟ་སྟེ། ཚུ་རོལ་མེད་ན་ཕ་རོལ་མེད་དེ་ལྷ་དག་འདི་ཡང་ཡོད་ན་འདི་འབྱུང་ལ། འདི་མེད་ན་འདི་མི་འབྱུང་བ་ཡིན་ནོ། །དེ་ལྟར་ཕན་ཚུན་རྐྱེན་དང་བཅས་པ་ཉེ་བར་བཟུང་ནས་བརྟགས་པ་ཡིན་ཏེ། ཕན་ཚུན་རྐྱེན་དང་བཅས་པས་འདུས་བྱས་ཐམས་ཅད་འབྱུང་ཞིང་འབྲེལ་བར་འབྱུང་བ་ལ་བརྟེན་ནས་འབྱུང་སྟེ་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་སྟེ། དེ་ལྟར་རྟེན་ཅིང་འབྲེལ་པར་འབྱུང་བ་ཐམས་ཅད་རྒྱ་ཆེར་ཁོང་དུ་ཆུད་པར་བྱའོ། །ལྷ་དག་དེ་ཡང་བཅོམ་ལྡན་འདས་དེས་མྱོས་འགྲོ་འདུལ་གྱི་གཞལ་མེད་ཁང་ཆེན་པོ་དེར་མིའི་ཉིན་ཞག་བགྲང་བའི་ཚུལ་གྱིས་ལོ་ལྔ་སྟོང་དུ་ཆོས་བཤད་དོ། །འདིར་བདག་གིས་ཁྱེད་ལ་ཕྱོགས་གཅིག་ཙམ་ཞིག་བཤད་པ་འདི་ཡིན་ཏེ། དེ་ལྟར་གང་གཱའི་ཀླུང་གི་བྱེ་མ་ལྟར་རྒྱ་ཆེ་བ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་ཀྱི་འཐུན་ཏེ་ཆོས་ཀྱི་ལུས་ནི་གཅིག་ཡིན་ནོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་བདུན་པ། དེ་ནས་བཅོམ་ལྡན་འདས་དེས་ལྷ་དུང་ཕྱུར་ཕྲག་
བདུན་དག་གི་ཟག་པ་ཟད་པར་མཛད་ཅིང་མིག་དྲི་མ་དང་བྲལ་བ་བསྐྱེད་ནས། དེ་ནས་ཡང་འཛམ་བུའི་གླིང་ག་ལ་བ་དེར་གཤེགས་སོ། །དེར་གཤེགས་ནས་མི་རྣམས་ལ་ཡང་ཐུགས་རྗེ་དམ་པས་ཆོས་སྟོན་ཏེ་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས་ཞེས་རྒྱ་ཆེར་ཁོང་དུ་ཆུད་པར་བྱའོ། །དེར་ཡང་སེམས་ཅན་ལ་ཕན་པར་བཞེད་པ་དེས་མི་རྣམས་ཀྱི་ཟག་པ་དུ་མ་ཟད་པར་མཛད་དེ། དེ་ལྟར་སངས་རྒྱས་བཅོམ་ལྡན་འདས་ལྷ་དང་མི་རྣམས་ལ་ཆོས་འཆད་པ། ལྷ་དང་མི་རྣམས་ཀྱི་སྟོན་པ་ཡིན་ནོ། །དེ་བཞིན་དུ་བརྒྱ་བྱིན་དེས་ལྷ་དེ་རྣམས་ལ་སྨྲས་ནས། གཞལ་མེད་ཁང་ཆེན་པོ་མྱོས་འགྲོ་འདུལ་ཞེས་བྱ་བ་ག་ལ་བ་དེར་དོང་སྟེ་ཕྱིན་པ་དང་པད་མའི་རྫིང་བྱ་ཁ་དོག་སྣ་ཚོགས་དག་དང་རིན་པོ་ཆེ་སྣ་བདུན་གྱི་པད་མ་རྣམས་ཀྱིས་ཉེ་བར་བསྐོར་བ་མཐོང་ངོ་། །རིན་པོ་ཆེ་སྣ་བདུན་གྱི་པད་མ་ཡང་འདབ་མ་ཁ་དོག་སྣ་ཚོགས་དང་ཆ་བྱད་སྣ་ཚོགས་དང་དབྱིབས་དང་ཆ་བྱད་དང་ལྡན་པ་དང་། ཉི་མ་ཤར་བ་ལྟ་བུའི་མདོག་རྣམས་ཀྱིས་བརྒྱན་པ་ཡིན་ནོ། །གང་དུ་པད་མ་དང་བཻ་ཌཱུརྱའི་ཤིང་ལྗོན་པའི་འོད་ཀུན་དུ་འབྱུང་བ་རྣམས་ཀྱིས་གཞལ་མེད་ཁང་ཆེན་པོ་དེ་ཉེ་བར་བརྒྱན་ཏེ། རབ་ཏུ་གསལ་བ་ཡིན་ནོ། །གཞལ་མེད་ཁང་ཆེན་པོ་དེ་འོད་སྔོན་པོས་རྣམ་པར་མཛེས་ཤིང་གསེར་གྱི་ལོ་མ་རྣམས་དང་འོད་དམར་པོས་ཀྱང་རྣམ་པར་མཛེས་པ་ཡིན་ནོ། །དེ་ནས་ཡང་གཞལ་མེད་ཁང་ཆེན་པོ་དེ་ཉིད་ན་ཁྱིམ་དང་ཉེ་བའི་ཚལ་རྣམ་པ་གཞན་གྱིས་མཛེས་པ་ཡིན་ཏེ། ཁྱིམ་དང་ཉེ་བའི་ཚལ་དེ་ནི་རབ་ཏུ་དབྱེ་བ་དུ་མས་བརྒྱན་པ། རིན་པོ་ཆེ་སྣ་ཚོགས་ཀྱིས་བཀྲ་བར་བྱས་པ། རིན་པོ་ཆེ་སྣ་བདུན་གྱི་ཤིང་ལྗོན་པ་རྣམས་དང་། ཁྱིམ་དང་ཚལ་རྣམས་ཀྱིས་བརྒྱན་པ། ཤིན་ཏུ་ཉམས་དགའ་ཞིང་མཐོང་ན་ཡིད་དུ་འཐད་པ་གང་ཡིན་པ་དག་མཐོང་ནས། བརྒྱ་བྱིན་ཡང་ངོ་མཚར་ཆེར་སྐྱེས་སོ། །དེའི་དབུས་ན་མཚོ་ཆེན་པོ་ཡོད་དེ། གསེར་བཙོ་མ་ལྟ་བུའི་ཆུ་རྣམས་ཀྱིས་མཛེས་པར་བྱས་པ། ཕྱེ་མ་དུ་མས་བཀྲ་བར་བྱས་པ། བྱ་ཁ་དོག་སྣ་ཚོགས་ཅན་རྣམས་ཀྱིས་བརྒྱན་པ་ཡིན་ནོ། །དེ་ནས་ལྷ་དེ་དག་སིལ་སྙན་སྣ་ཚོགས་ཀྱི་སྒྲ་འབྱིན་ཅིང་འགྲོ་བ་ན་བྲོ་རྡུང་། གླུ་ལེན་
རྩེ་དགོད། ཕན་ཚུན་ཡིད་གཅུགས་པ་དག་མཚོ་རྣམ་པར་རྒྱལ་བྱེད་ཅེས་བྱ་བ་དེར་དོང་ངོ་། །དེ་ནས་ལྷ་དག་ཤིན་ཏུ་བག་མེད་པ་དེ་དག་རྣམ་པར་རྒྱལ་བྱེད་ན་གནས་པའི་བྱ་རྣམས་ཀྱིས་མཐོང་ནས་འདི་ལྟར་ཚིགས་སུ་བཅད་དེ་སྨྲས་པ། ཇི་ལྟར་པད་མའི་ཚལ་དག་ཏུ། །རྗེན་ཟ་བྱ་རྒོད་མཛེས་མ་ཡིན། །དེ་བཞིན་ཞི་བའི་དགོན་པ་རུ། །མི་དགེ་སྤྱོད་པ་མི་མཛེས་སོ། །ཇི་ལྟར་ཉི་མ་འོད་གྲང་ན། །ལོག་པར་གྱུར་ཏེ་མི་འཐུན་ལྟར། །བག་མེད་ལྷ་རྣམས་ག་ལ་ཞིག །ཞི་བའི་ཚལ་དུ་ག་ལ་དགའ། །སྲེད་དང་བྲལ་བའི་བདེ་བ་དང་། །སྡུག་བསྔལ་གྲོལ་བའི་སྐྱོབ་པ་གང་། །བདེ་བ་དེ་ཡི་ཁྱད་པར་ལས། །བདེ་བའི་གྲངས་སུ་མི་རྩིའོ། །རབ་ཏུ་མྱོས་མེད་བསམ་གཏན་པ། །ཀུན་ཏུ་ཞགས་ལས་གྲོལ་བ་ཡི། །བདེ་གང་དེ་ནི་བདེ་མཆོག་སྟེ། །སྲེད་པས་བསླུ་བ་འདི་མ་ཡིན། །ཚལ་འདི་ཐུབ་པས་བསྟན་པ་སྟེ། །ཤིན་ཏུ་བསྒོམས་པ་རྣམས་ཀྱིས་བསྟན། །ལྷ་མཆོག་འདོད་ཆགས་ཡིད་བྱེད་ཀྱི། །བསྟེན་པར་འོས་པ་མ་ཡིན་ནོ། །ཁྱོད་ཀྱི་བདེ་བ་གང་ཡིན་འདི། །དེ་ནི་རྟག་པར་མ་ཡིན་ཏེ། །སྲེད་པ་མེད་པས་བསྟེན་པ་གང་། །དེ་ནི་ཞི་མཆོག་བདེ་བ་ཡིན། །གང་ཞིག་ཐོབ་ནས་སྡུག་བསྔལ་ཀུན། །ཐམས་ཅད་དུ་ནི་གཅོད་པར་འགྱུར། །གནས་མཆོག་རྟོག་པ་གང་ཡིན་པ། །ཚལ་འདི་ངེས་པར་སྟེན་པ་ཡིན། །ངན་གཡོ་སྤྱོད་ཅིང་ཞིམ་ཟ་ལ། །བརྐམ་ཆགས་ཀྱིས་ནི་སེམས་བསླུས་པ། །ཤིན་ཏུ་བསྒོམས་པ་ཞི་བའི་ཚལ། །དགའ་བ་བསྟེན་པར་མི་འོས་སོ། །དགེ་བའི་ཡུལ་དུ་ཞི་བ་ཉིད། །བསྒོམས་པའི་སེམས་ནི་དགའ་བྱེད་ཀྱི། །འདོད་ཆགས་སྤྱོད་པ་རྣམས་ཀྱི་སེམས། །ཚལ་གྱི་གནས་སུ་མི་དགའོ། །གང་ཞིག་རྟག་ཏུ་སེམས་ཞི་བ། །མི་དེ་ཚལ་དུ་དགའ་འགྱུར་གྱི། །འདོད་ཆགས་ཀྱིས་ནི་སེམས་དཀྲུགས་པ། །ཚལ་རྣམས་སུ་ནི་དགའ་མི་འཐོབ། །དམིགས་པ་ལྔ་ཡིས་འཇིགས་བྱེད་པ། །སྲེད་པ་ཉིད་ཀྱིས་སྲེག་མི་འགྱུར། །སྲེད་ལས་རྣམ་གྲོལ་དྲི་མེད་པ། །ངན་སོང་གྲོང་ཁྱེར་མི་འགྲོའོ། །སྐྱེ་བ་ཡོད་ན་རྟག་ཏུ་འཆི། །ནད་མེད་མེད་ན་ནད་ཡོད་ཅིང་། །ཕུན་སུམ་སྡུག་བསྔལ་ལྷན་ཅིག་སྐྱེ། །གཞོན་ནུ་དག་ཀྱང་རྟག་ཏུ་རྒས། །སྡུག་
པ་ཀུན་དང་བྲལ་འགྱུར་ཞིང་། །རྟག་ཏུ་འདུ་བ་མེད་པར་ཤེས། །འདི་ནི་རྟག་ཏུ་འཇིག་རྟེན་ཆོས། །ཡང་དག་རྫོགས་སངས་རྒྱས་ཀྱིས་བཤད། །རྟག་ཏུ་སྲིད་གསུམ་ཉམ་ང་བར། །གང་གི་བློ་ནི་མི་རྨོངས་པ། །སྐྱེས་བུ་དམ་པ་དེ་ཡིས་ནི། །ཞི་བའི་ཚལ་དུ་དགའ་བ་འཐོབ། །ཀུན་རྟོག་འདོད་ཆགས་མི་བརྟན་པ། །རྟག་ཏུ་འདོད་ཆགས་ལ་སོགས་བསྒྲིབས། །བདེ་བ་འབྱུང་བ་ཞི་བའི་ཚལ། །ཞི་བ་དེ་ཉིད་འཐོབ་མི་འགྱུར། །གང་ཞིག་རྟག་ཏུ་ཡིད་ཞི་ཞིང་། །ཚལ་དུ་རྣལ་འབྱོར་བསམ་གཏན་པ། །དེ་དག་རྟག་པར་ཚལ་དུ་དགའ། །འདོད་ཆགས་ཚོལ་བ་མ་ཡིན་ནོ། །ཚལ་རྣམས་སུ་ནི་བསྒོམས་པའི་སེམས། །གྲོང་དག་ཏུ་ཡང་གཡོ་མི་འགྱུར། །དེ་བས་རྟག་ཏུ་ཚལ་བསྟེན་བྱ། །གྲོང་ཁྱེར་གྱིས་ནི་གནོད་མི་འགྱུར། །མི་ཡི་འདོད་ཆགས་ལ་སོགས་འདི། །གྲོང་ཁྱེར་དག་ཏུ་རྣམ་པར་གཡེང་། །རྨོངས་པ་མི་བརྟན་གཡེངས་པ་དེ། །ཚལ་དུ་ཕྱིར་ཞིང་དོང་བར་བྱེད། །གང་ཕྱིར་སྡིག་དང་བྲལ་བ་དེ། །བྲལ་བའི་ཡིད་ཀྱིས་བསྟེན་བྱ་སྟེ། །དེ་བས་མཆོག་ཏུ་ཞི་བའི་ཚལ། །རྣལ་འབྱོར་རྣམས་ཀྱི་གནས་ཆེན་ཡིན། །སེམས་དང་དབང་པོ་རབ་ཞི་བ། །རྣལ་འབྱོར་སྙིང་ལ་དགའ་བ་གང་། །དེ་ནི་བརྒྱ་བྱིན་སྟོང་སྙེད་ཀྱི། །ཤིན་ཏུ་དགའ་བར་མི་འགྱུར་རོ། །ཐམས་ཅད་དུ་ནི་རྣམ་བྱང་བ། །རྣལ་འབྱོར་པ་ཡི་དགའ་མཐོང་གང་། །རྟག་ཏུ་འདོད་ཆགས་རྗེས་འགྲོ་བ། །འཐབ་བྲལ་བ་ཡང་དེ་མ་མཐོང་། །འདོད་པའི་དབང་སོང་དགའ་བ་གང་། །དེ་ནི་རྟག་ཏུ་སྡུག་བསྔལ་འབྱུང་། །ཉོན་མོངས་བཅོམ་པའི་དགའ་བ་གང་། །དེ་ནི་རྟག་ཏུ་དགའ་བ་ཡིན། །འཁོར་བ་ཐོག་མ་མེད་པ་ནས། །དགྲ་རྣམས་སུ་ནི་སེམས་འབྱུང་སྟེ། །དེ་ནི་བཅོམ་ནས་དགའ་འབྱུང་གང་། །དེ་ལ་འདོད་པས་ག་ལ་གནོད། འདོད་པ་ལས་བྱུང་དགའ་བ་ནི། །སྡིག་བཅས་སྡུག་བསྔལ་འབྲས་བུ་ཚ། །གང་ཞིག་འདོད་ལས་རྣམ་གྲོལ་བ། །དེ་ནི་དགའ་བ་མཆོག་ཡིན་ནོ། །དེ་ལ་བརྟེན་ནས་རྣལ་འབྱོར་པ། །འགྲོ་བ་མཆོག་ཏུ་འགྲོ་བར་འགྱུར། །འདོད་པས་བྱས་པའི་དགའ་བ་ཡིས། །འཆི་མེད་གནས་སུ་ཁྲིད་མི་འགྱུར། །སྟེན་པའི་ཚེ་ན་མངར་ལ་དགའ། །རྣམ་པར་སྨིན་པ་མེ་
དང་མཚུངས། །འདོད་ལས་བྱུང་བའི་དགའ་བ་ནི། །རྟག་ཏུ་སེམས་ཅན་དམྱལ་བར་འགྲོ། །སྟེན་པའི་ཚེ་ན་མངར་ལ་དགའ། །བར་དུ་ཀུན་ནས་དགའ་འགྱུར་ཏེ། །མཐར་ཡང་ཞི་ཞིང་དྲི་མེད་པ། །འཆི་བ་མེད་པའི་གནས་སུ་འགྲོ། །ཐོག་མ་བར་དང་མཐར་དགེ་གང་། །རྟག་ཏུ་མ་ལྟར་སྡུག་པ་ཡིན། །དེ་ནི་སྤངས་ནས་བྱིས་པ་དག །འདོད་པའི་ཡུལ་ལ་ཅི་ཕྱིར་ཆགས། །བར་དང་མཐའ་ངན་སྡུག་བསྔལ་དང་། །རྟག་ཏུ་སྐྱོན་གྱི་གློང་གིས་བསྒྲིབས། །བདེ་བ་འབྱུང་བ་མ་མཐོང་གང་། །དེ་ནི་བྱིས་པས་ཅི་ཕྱིར་བསྟེན། །ཇི་ལྟར་དུག་གི་སྙེ་མ་ལ། །དགའ་བ་རེག་ན་འབར་བ་འབྱུང་། །དེ་ལྟར་འདོད་པས་དགའ་བྱས་པ། །ཡོངས་སུ་བྱུང་ན་དུག་དང་མཚུངས། །ཇི་ལྟར་མེ་ཡིས་སྲེག་པ་ན། །འབར་བར་འགྱུར་ཏེ་ཞི་མེད་ཅིང་། །སྲེག་པས་ཀྱང་ནི་གཞན་གསོད་དེ། །འདོད་བྱས་དགའ་བ་དེ་དང་མཚུངས། །ཕྱེ་མ་ལེབ་ཀྱིས་འབར་བ་མཐོང་། །ཚིག་པའི་ཉེས་པ་མི་མཐོང་སྟེ། །དེ་ལྟར་འདོད་བསྐྱེད་དགའ་བ་ནི། །བློ་མེད་རྣམས་ཀྱིས་མཐོང་བར་འགྱུར། །འདོད་ཆགས་བསྐྱེད་པའི་གདུང་བ་གང་། །འདོད་པ་པ་རྣམས་རྟག་ཏུ་སྲེག །ཕྱེ་མ་ལེབ་ནི་འཚིག་པ་ལྟར། །ཐམས་ཅད་དུ་ནི་མི་མཐོང་ངོ་། །དེ་བས་འདོད་པའི་དུག་སྤངས་ཏེ། །ལྷ་རྣམས་ཡེ་ཤེས་རྟག་དགའ་ཞིང་། །ཚེ་ནི་དོན་མེད་མི་བྱ་ལ། །ཁྱེད་ཅག་བག་མེད་མ་འགྲོ་ཞིག །བག་མེད་པ་ཡིས་རྣམ་རྨོངས་པ། །སྐྱེས་བུ་ཐམས་ཅད་ཆགས་པར་འགྱུར། །དེ་ནི་ཕྱི་ནས་བྲལ་བ་ན། །དེ་ཚེ་གདུང་བས་གདུངས་པར་འགྱུར། །རྟག་ཏུ་འདོད་པས་རྣམ་རྨོངས་པ། །དེ་ནི་དགེ་བའི་ལས་མཐའ་ཟད། །འདོད་པ་རྨོངས་པས་བསླུས་པ་ནི། །སུམ་ཅུ་གསུམ་ནས་དམྱལ་བར་འགྲོ། །ཇི་སྲིད་འཆི་བ་མི་འོང་དང་། །ཇི་སྲིད་སེམས་ཉིད་རྫོགས་པ་ནི། །དེ་སྲིད་ཆོས་ལ་ཡིད་ཀྱི་དོན། །ཉེ་བར་ཞི་བ་དག་ཏུ་འགྱུར། །སྲེད་ཆུ་ཤིན་ཏུ་མི་བཟད་པ། །མཐོ་རིས་ཀྱི་ནི་ཡུལ་དུ་འབབ། །རྣམ་རྟོག་ཤུགས་ལྟར་མི་བརྟན་ཞིང་། །ཉེས་གསུམ་བྲོ་བ་ལྟ་བུ་འབྱུང་། །བག་མེད་པ་ནི་ཆུ་ལྟར་ཟབ། །བུད་མེད་འདོད་ཆགས་ཉ་ལྕིབས་འདྲ། །གླུ་དང་སིལ་སྙན་སྒྲ་མྱུར་མཚུངས། །དེ་ནི་རྡོ་ལྟར་མི་བརྟན་ནོ། །སྦྲུལ་ལྟ་བུ་ཡི་ཡུལ་གྱིས་
ཁེབས། །ཡིད་ནི་མྱུར་བའི་རླབས་དང་འདྲ། །ལྷ་རྣམས་འདོད་ཆགས་ཀྱིས་བསླུས་པ། །རྨོངས་པ་དེ་དག་འཇུག་པར་བྱེད། །འདི་ལྟར་དེ་ནི་མི་མཐོང་སྟེ། །བློ་མེད་པ་དག་འཇུག་པར་འགྱུར། །ཇི་ལྟར་དུག་གི་ལྗོན་ཤིང་གི །མེ་ཏོག་བུང་བ་རྣམས་འཇིབ་པ། །དེ་ལྟར་འདི་ནི་དུག་འདྲ་སྟེ། །རྨོངས་པ་རྣམས་ནི་བདེ་ལ་སྤྱོད། །བུང་བས་དུག་ནི་འཐུངས་པ་དག །གལ་ཏེ་ཁ་ཅིག་འཚོ་འགྱུར་གྱི། །འདོད་པའི་དུག་ནི་འཐུངས་པ་ཡིས། །འཚོ་བ་རྙེད་པ་དཀའ་བར་འགྱུར། །ཉེས་གསུམ་སྐམ་ཤིང་ལྟ་བུ་བྱུང་། །བག་མེད་རླུང་ཤུགས་ལྡན་པ་འདྲ། །སྲེག་པ་མེ་འདྲར་ལྷ་ཡི་ཚོགས། །སྲེག་པར་བྱེད་ཀྱང་མི་རིག་གོ །ཉེས་པ་ལས་བྱུང་ས་འདི་ནི། །བག་མེད་པ་ཡི་གསིང་མས་བསྒྲིབས། །རང་གིས་བྱས་པ་རྨོངས་པའི་ལྷ། །རྨུགས་པ་རྣམས་ནི་རྟག་ཏུ་རྒྱུ། །བག་མེད་པ་རྣམས་འདོད་པའི་རྒྱུ། །ཡུལ་དག་མི་བརྟན་མི་བཟད་དེ། །བརྟན་པོ་དེ་ལ་ཡིད་མ་རྟོན། །འདི་ལྟར་དེ་ནི་རྨི་ལམ་འདྲ། །རྨི་ལམ་དམྱལ་བའི་རྒྱུ་མ་ཡིན། །འདོད་པའི་རྨི་ལམ་རྒྱུ་ཡིན་ཏེ། །དེ་བས་འདོད་པ་འདི་སྤོངས་ལ། །རྟག་ཏུ་ལེགས་པར་སྤྱད་པ་སྤྱོད། །ཚལ་ནི་ལེགས་པ་ཤིན་ཏུ་སྤྱད། །ཉེས་པར་སྤྱད་པའི་མི་ཡིས་མིན། །འདི་ལྟར་དེ་དང་འབྲེལ་བ་ནི། །ལེགས་པའི་གནས་ཞེས་བརྗོད་པ་ཡིན། །འདོད་པ་ཚོལ་བའི་ལྷ་ཀུན་གྱིས། །གནས་ནི་གང་ཞིག་མ་ཐོབ་པ། །བརྟན་པོ་བག་ཡོད་པ་ལ་དགའ། །མི་ཡིས་གནས་དེ་འཐོབ་པར་འགྱུར། །དེ་ལྟར་བརྒྱ་བྱིན་དེ་ཚལ་མྱོས་འགྲོ་འདུལ་དུ་འཇུག་པ་ན་ཚིགས་སུ་བཅད་པ་སྨྲས་ནས། །ཡང་ཚལ་དེ་ཉིད་ག་ལ་བ་དེར་དོང་སྟེ་ཕྱིན་པ་དང་ཚལ་དེ་དགེ་བ་སྤྱད་པ་དུ་མ་དང་སློབ་པ་དང་མི་སློབ་པའི་སྐྱེ་བོ་བསོད་ནམས་སྣ་ཚོགས་བྱས་པས་གཙང་བ། དྲང་སྲོང་ཆེན་པོ་བཅོམ་ལྡན་འདས་འཁོར་བ་འཇིག་གི་དྲུང་དུ་གང་བྱུང་བ་ལེགས་པར་བྱས་པའི་ལས་ཀྱི་མཐའ་སྤྱད་པ་དེ་རྣམས་ཀྱིས་བསྟེན་པ་ཡིན་ནོ། །དེ་ནས་ལྷའི་རྒྱལ་པོ་བརྒྱ་བྱིན་ལྷའི་ཚོགས་དང་ལྷན་ཅིག་ཡོངས་སུ་བསྐོར་ཏེ། ལྷའི་སིལ་སྙན་རྣམ་པ་སྣ་ཚོགས་ཀྱི་སྒྲ་རྣམས་ཀྱིས་དགའ་བཞིན་དུ་འཇུག་པར་བྱེད་དོ། །དེ་ལ་འཇུག་པ་ན་ཚལ་དེས་ཚལ་དེ་དག་ཐམས་ཅད་ཀྱི་མཛེས་པ་ཟིལ་གྱིས་
མནན་ནས། རྣམ་པར་གནས་པ་དེ་མཐོང་སྟེ། ཇི་ལྟར་རི་བོ་སྟོང་ཕྲག་དྲུག་ཅུ་རྣམས་ཀྱི་ནང་ན་རིའི་རྒྱལ་པོ་རི་རབ་རྣམ་པར་མཛེས་པ་དེ་ལྟར་ཆེས་ཤིན་ཏུ་མཛེས་པ་ཡིན་ནོ། །ཇི་ལྟར་ལྷའི་དབང་པོ་བརྒྱ་བྱིན་དེ་ལྷ་དེ་རྣམས་ཀྱི་ནང་ན་ཆེས་ཤིན་ཏུ་རྣམ་པར་མཛེས་པ་དེ་ལྟ་བུའི་རིམ་པ་ཀུན་གྱིས་ཚལ་དེ་དག་ཟིལ་གྱིས་མནན་ཅིང་སུམ་ཅུ་རྩ་གསུམ་པའི་ཚལ་དང་ཉེ་བའི་ཚལ་དེ་དག་ཐམས་ཅད་ཟིལ་གྱིས་མནན་ནས་མཛེས་པ་བཟང་བ་ཡིན་ནོ། །བརྒྱ་བྱིན་དེ་ལྷའི་ཚོགས་ཐམས་ཅད་ཀྱིས་ཡོངས་སུ་བསྐོར་ནས་འཛམ་བུའི་གསེར་གྱི་ཚལ། གསེར་གྱི་ལན་ཀན་གྱི་དྲ་བས་ཡོངས་སུ་བསྐོར་བ་དང་གསེར་གྱི་ཤིང་ལྗོན་པ་ཐམས་ཅད་ཀྱིས་ཡོངས་སུ་བསྐོར་བ་ག་ལ་བ་དེར་འདོང་བར་བྱེད་དོ། །དེ་ནས་བརྒྱ་བྱིན་གྱིས་ལྷ་དེ་དག་ལ་སྨྲས་པ། ཀྱེ་ལྷ་དག་སྡུག་པ་ཐམས་ཅད་ཟིལ་གྱིས་མནན་ནས་རྣམ་པར་གནས་པ། ལྟེང་ཀ་དང་འབབ་ཆུའི་དངོ་དང་ཚལ་དང་ཆུ་བོ་དུ་མ་ཕུན་སུམ་ཚོགས་པའི་ཚལ་འདི་ལ་ལྟོས། ཀྱེ་ལྷ་ཡོན་ཏན་ཀུན་གྱིས་ཡོངས་སུ་བསྐོར་བ་མཐོང་ལགས་ཏེ། དྲང་སྲོང་ཆེན་པོ་དེའི་ཐུགས་དང་ཞིང་སྐུ་གསལ་བ་མཚུངས་པ་མེད་པ་ཐམས་ཅད་མཁྱེན་པ་ཉིད་དང་འཐུན་པ། ཐམས་ཅད་མཁྱེན་པ་ཉིད་ཀྱིས་ཡོངས་སུ་བསྒོམས་པའི་ཤིང་ལྗོན་པའི་ཚལ་དང་ཉེ་བའི་ཚལ་འདི་དག་ལ་བདག་ཅག་ཀྱང་ངོ་མཚར་ཆེར་གྱུར་ཏོ། །གང་དུ་ལྷའི་ཚོགས་ཀྱི་ཤིན་ཏུ་ཆེས་བདེ་བ་ལྷག་པར་བདེ་བ་དཔེ་མེད་པ། རྣམ་པ་དུ་མ་དག་ཀྱང་མངོན་པར་ཟིལ་གྱིས་མནན་ཏེ། སྐྱེས་བུ་ཁ་ལོ་སྒྱུར་བ་དམ་པ་འདི་ཞི་བ་མཆོག་ཏུ་འདས་ཀྱང་ད་དུང་དུ་འབྲས་བུའི་ལྷག་མ་འདི་དེ་རིང་གི་འབྲས་བུ་ལྟ་བུར་མཆིས་སོ། །དེ་ནས་ཡང་ལྷའི་རྒྱལ་པོ་བརྒྱ་བྱིན་ཚལ་ཁང་པ་བརྩེགས་པའི་ཚལ་ཞེས་བྱ་བ་ཚལ་ཆེན་པོ་དེ་ཉིད་ཀྱི་ཕྱོགས་གང་དུ། བཅོམ་ལྡན་འདས་དེ་བཞུགས་བཞུགས་པ་དེ་ག་ལ་བ་དེར་འགྲོ་བར་བྱེད་དོ། །དེ་ནས་ཁང་པ་བརྩེགས་པ་བཞི་འབུམ་གྱིས་ཡོངས་སུ་བསྐོར་བ། རིན་པོ་ཆེ་སྣ་བདུན་ལ་འདི་ལྟ་སྟེ། ཨན་ད་རྙིལ་དང་། རྡོ་རྗེ་དང་། མ་རྒད་དང་། སྤུག་དང་།བཻ་ཌཱུརྱ་རྣམས་ལས་བྱས་པ། ཁ་ཁྱེར་བྱེ་བ་རྣམ་པ་སྣ་ཚོགས་ཀྱིས་ཡོངས་སུ་བསྐོར་བ། རྒྱལ་མཚན་དང་བ་དན་རྣམ་པ་སྣ་ཚོགས་བསྒྲེང་བ།
བ་དན་དམར་པོ་ཕྲ་མོ་སྣ་ཚོགས་ཀྱིས་བསྐོར་བ། ཀུན་ནས་ཚལ་དེ་རབ་ཏུ་བྲོ་རྡུང་བ་ལྟ་བུར་རྣམ་པར་མཛེས་པ་ཡིན་ཏེ། ཁང་པ་བརྩེགས་པ་དེ་རྣམས་ཀྱི་ནང་ན་ཐམས་ཅད་མཁྱེན་པའི་ཁང་པ་བརྩེགས་པ་དེ་དེ་ལྟར་མཛེས་པ་ཡིན་ནོ། །ཇི་ལྟར་འཛམ་བུའི་གླིང་ན་དབྱར་གྱི་དུས་སམ་སྟོན་གྱི་དུས་སུ་ནམ་མཁའ་ལ་སྤྲིན་མེད་པ་ན་ཉི་མ་དང་ཟླ་བས་གཟའ་དང་སྐར་མའི་ཚོགས་ཐམས་ཅད་ཀྱི་འོད་ཟིལ་གྱིས་མནན་ནས། དབུས་ན་མཛེས་པ་དེ་ལྟར་ཁང་པ་བརྩེགས་པ་དེ་དག་ཐམས་ཅད་ཀྱི་འོད་ཟིལ་གྱིས་མནན་ནས། བཅོམ་ལྡན་འདས་ཀྱི་ཁང་པ་བརྩེགས་པ་དེ་རྣམ་པར་མཛེས་པ་ཡིན་ནོ། །དེ་ལ་ཡང་དང་ཡང་དུ་རྣམ་པ་དེ་ལྟ་བུའི་འོད་འབྱུང་སྟེ། འདི་ལྟར་བརྒྱ་བྱིན་འབའ་ཞིག་མ་གཏོགས་པར་ཁང་པ་བརྩེགས་པའི་འོད་རབ་ཏུ་འབར་བ་དེ་ལ་ལྷ་གང་ཡང་ཡུན་རིང་དུ་ལྟ་བར་མི་ནུས་ཏེ། དཔེར་ན་འཛམ་བུའི་གླིང་གི་མི་རྣམས་སོ་ག་རབ་ཏུ་ཚ་བའི་ཉི་མའི་གུང་ལ་ཉི་མ་ཡུན་རིང་དུ་བལྟ་བར་མི་ནུས་པ་ལྟར། ཁང་པ་བརྩེགས་པ་འདི་ཡང་དེ་ལྟ་བུ་ཡིན་ནོ། །དེ་ནས་བརྒྱ་བྱིན་ཁང་པ་བརྩེགས་པ་དེར་སོང་སྟེ་ཕྱིན་ནས་ལྷ་རྣམས་ལ་སྨྲས་པ། ལྷ་དག་ཁང་པ་བརྩེགས་པའི་འོད་ལ་ལྟོས། ལྷའི་མཆོག་མཐོང་ལགས་སོ། །འདི་ལྟར་བཅོམ་ལྡན་འདས་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་དེ་ཉན་ཐོས་སོམ་ཉི་དང་བྲལ་བ། བདེན་པ་མཐོང་བ། གཉི་གའི་ཆ་ལས་རྣམ་པར་གྲོལ་བ། མངོན་པར་ཤེས་པ་དྲུག་དང་ལྡན་པ། རྫུ་འཕྲུལ་གྱི་རྐང་པ་བཞི་བསྒོམས་པ་འབུམ་ཕྲག་བཞི་རྣམས་དང་ཐབས་ཅིག་ཏུ་ལྷ་རྣམས་ལ་ཕན་པ་དང་བདེ་བའི་ཕྱིར་ཚལ་དང་གཞལ་མེད་ཁང་མྱོས་འགྲོ་འདུལ་བ་འདིར་གཤེགས་སོ། །དེ་དབྱར་ཟླ་བ་བཞིར་གནས་འདིར་བཞུགས་ནས་སུམ་ཅུ་རྩ་གསུམ་པའི་ལྷ་རྣམས་ལ་ཆོས་བཤད་དེ། འདི་ལྟར་འདི་ནི་གཟུགས་སོ། །འདི་ནི་གཟུགས་ཀུན་འབྱུང་བའོ། །འདི་ནི་གཟུགས་འགག་པའོ། །འདི་ནི་གཟུགས་འགག་པར་འགྱུར་བའི་ལམ་མོ། །དེ་བཞིན་དུ་ཚོར་བ་དང་འདུ་ཤེས་དང་འདུ་བྱེད་རྣམས་ལ་ཀུན་འབྱུང་བ། རྟག་ཏུ་ཉེས་དམིགས་འབྱུང་བ་རིམ་བཞིན་དུ་བཤད་དོ། །དེ་ལྟར་བཅོམ་ལྡན་འདས་དེས་རིམ་གྱིས་ལྷ་རབ་ཏུ་མྱོས་ཤིང་། །རབ་ཏུ་བག་མེད་པར་གནས་པ།
འཆི་བའི་སྡུག་བསྔལ་ལ་མི་ལྟ་བ། རྒྱགས་པ་འབའ་ཞིག་དོན་དུ་བྱེད་པའི་ལྷ་རྣམས་ལ་ཕན་པ་དང་བདེ་བའི་ཕྱིར་རང་གི་མཚན་ཉིད་དང་སྤྱིའི་མཚན་ཉིད་ཀྱིས་ཆོས་ཇི་ལྟ་བ་བཞིན་བཤད་དོ། །དེ་ནས་ཡང་བཅོམ་ལྡན་འདས་དེས་རྣམ་པ་གཞན་གྱིས་ལྷ་བག་མེད་པར་གནས་པ་རྣམས་ལ་རྗེས་སུ་བསྟན་པ་འདི་ལྟར་ཚིགས་སུ་བཅད་དེ་བཀའ་སྩལ་པ། བག་མེད་འཁོར་བའི་རྩ་བ་སྟེ། །དེ་བཞིན་ལྷ་ཡི་གནས་ཀྱང་ཡིན། །བག་མེད་དུག་གིས་མྱོས་པ་གང་། །དེ་དག་སྲིད་པ་ཉམ་ངར་བྱིང་། །བག་མེད་རྣམས་ལས་གྲོལ་བ་གང་། །དེ་ནི་སྲིད་པའི་མཚོ་ལས་རྒལ། །བག་མེད་མུན་པའི་རྩ་བ་སྟེ། །མ་རིག་མུན་པ་བྱེད་པ་ཡིན། །མུན་པ་ཡིས་ནི་རྨོངས་པ་གང་། །དེ་དག་ལ་ནི་མིག་མེད་དོ། །འདི་ལྟར་སྣང་བའི་གཞི་པོ་ནི། །མེ་དང་ཉི་མ་ཡིན་པར་བརྗོད། །དེ་ལྟར་རྨོངས་པ་རྣམས་ཀྱི་གཙོ། །བག་མེད་ཡིན་པར་ཡོངས་སུ་བརྗོད། །བག་མེད་པ་ཡི་མེས་གདུངས་པས། །དེ་ཡི་ཡིད་ནི་རྣམ་པར་གཡོ། །གང་གིས་རྨོངས་པའི་བྱིས་པ་དག །སེམས་ཅན་དམྱལ་བར་རབ་ཏུ་འགྲོ། །བག་མེད་པ་ཡིས་རྨོངས་པའི་ལྷ། །བུད་མེད་དབང་གྱུར་མི་བརྟན་པ། །འབྲལ་དང་སྡུག་བསྔལ་བརྗེད་ནས་སུ། །འདུ་བ་དང་ནི་བདེ་བ་འདོད། །སྡུག་བསྔལ་ཆེ་ལ་ཉེ་བར་གནས། །འཚོ་བའི་མཐའ་ནི་འཆི་བ་ཡིན། །བདེ་བའི་མཐའ་ནི་མི་བརྟན་ལྟུང་། །འདུ་བའི་མཐའ་ཡང་འབྲལ་བར་འགྱུར། །བདེ་མཐའ་རྟག་ཏུ་ལྟུང་བ་དང་། །ལང་ཚོའི་མཐའ་ནི་རྒ་བ་སྟེ། །ལུས་ཅན་ཀུན་ནི་ལས་ཀྱི་མཐའ། །དགེ་དང་མི་དགེ་ལས་ཀྱིས་སུ། །ལུས་ཅན་ཐམས་ཅད་བཅིངས་གྱུར་པ། །ཕྱི་ནས་རོ་བྲོ་མེད་པར་ཤེས། །འདི་དག་འགྲོ་བ་ཐ་དད་པར། །གར་མཁན་བཞིན་དུ་གར་བྱེད་དེ། །ལས་ཀྱི་གར་གྱིས་བཅིངས་པ་དག །འདི་ནི་འཁོར་བར་རྟག་ཏུ་འཁྱམ། །བརྟན་པོ་དེ་ལ་ཡིད་མ་རྟོན། །ལས་འགྲོར་རྟག་ཏུ་མ་འགྲོ་ཤིག །ཐབས་རྣམས་ཀུན་གྱིས་དུག་ལྟ་བུར། །བག་མེད་ཡོངས་སུ་སྤང་བར་གྱིས། །བག་མེད་པ་ལས་གྲོལ་བ་ནི། །སྲིད་གསུམ་མཚོ་ལས་རྒལ་བ་ཡིན། །དེ་ལྟར་བཅོམ་ལྡན་འདས་འཁོར་བ་འཇིག་དེས་ལྷ་ཁྲི་ཕྲག་དགུ་བཏུལ་ཅིང་། བག་མེད་པར་རོ་བྲོ་བ་དང་བྲལ་བ་
མཐོ་རིས་ཐམས་ཅད་དུ་བསྟན་ཏེ། ལྷའི་བྱ་བ་ཆེན་པོ་ཡང་མཛད། གནས་འདི་ཡང་རྗེས་སུ་བཟུང་ནས་དེ་ནས་ཡང་སློབ་མ་དེ་དག་ཉིད་དང་ལྷན་ཅིག་ཏུ་འཛམ་བུའི་གླིང་ག་ལ་བ་དེར་གཤེགས་སོ། །དེ་ནས་བརྒྱ་བྱིན་གྱིས་དེ་ལྟར་མ་ལུས་པར་དེ་ཐམས་ཅད་ལྷ་དེ་དག་ལ་བསྙད་ནས་ཁང་པ་བརྩེགས་པ་དེ་ག་ལ་བ་དེར་དོང་ངོ་། །དེ་ནས་ཁང་པ་བརྩེགས་པ་རིན་པོ་ཆེ་དུ་མས་རྣམ་པར་བརྒྱན་པ། ཇི་ཙམ་དུ་རིན་པོ་ཆེའི་རྣམ་པ་ཤིན་ཏུ་ཁྱད་པར་དུ་འཕགས་པའི་རྣམ་པ་དེ་སྙེད་ཀྱིས་བརྒྱན་པ་དེར་ཞུགས་སོ། །ལྷ་དེ་རྣམས་ཀྱིས་ཀྱང་སྔོན་མ་མཐོང་སྟེ། དེ་ནས་ལྷ་དེ་དག་ངོ་མཚར་དུ་གྱུར་པར་རིག་ནས། དེ་ནས་ཡང་བརྒྱ་བྱིན་དེས་ལྷ་དེ་དག་ལ་འདི་སྐད་སྨྲས་སོ། །ཁང་པ་བརྩེགས་པ་རིན་པོ་ཆེ་རྣམས་ཀྱིས་མཛེས་པར་བྱས་ལ་སྔོན་མ་མཐོང་བ་འདི་ལ་ཁྱེད་ཅག་ལྟོས། བརྒྱ་བྱིན་མཐོང་ལགས་སོ། །རིན་པོ་ཆེའི་ཁང་པ་བརྩེགས་པ་འདི་དག་ནི། བཅོམ་ལྡན་འདས་དེ་ལ་འཐབ་བྲལ་གྱི་ལྷ་དད་པར་གྱུར་པ་རྣམས་ཀྱིས་འདིར་ཕུལ་བ་ཡིན་ལ་དེ་དག་གི་མཐུས་འདི་བལྟ་བར་མི་ནུས་ཏེ་ལྷ་དེ་དག་གི་མཐུ་ནི་དེ་ལྟ་བུ་ཡིན་ནོ། །དེ་དག་ཀྱང་ཇི་ལྟར་ཁྱེད་ཅག་བཞིན་ཤིན་ཏུ་བག་མེད་པ་ཡིན་ནོ། །དེ་ནས་སྨད་པར་བདག་ཉིད་ཀྱིས་རིག་ཅིང་ལེགས་པར་བྱས་པའི་ལས་ཀྱང་ཉམས་པར་རིག་པར་ལྷ་དེ་དག་ཀུན་གྱིས་རྒྱགས་པ་བཅོམ་སྟེ། གུས་པས་མགོ་བོ་སྨད་ཐོར་ཚུགས་རབ་ཏུ་གཡོས། མིག་དང་བཞིན་རབ་ཏུ་དགའ་བར་གྱུར་པ་ཐམས་ཅད་བཅོམ་ལྡན་འདས་ཀྱི་ཁང་པ་བརྩེགས་པ་དེ་ལ་ཕྱག་འཚལ་བར་བྱེད་དོ། །དེ་ལྟར་ཡིད་ལ་སྐྱོ་བ་སྐྱེས་པ་རྣམས་ཀྱི་ལས་ཉམས་པར་བདག་ཉིད་ཀྱིས་རིག་ནས། སྐྱོ་བ་སྐྱེས་པ་གང་ཁ་ཅིག་གིས་ནི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་སངས་རྒྱས་སུ། ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ། ཁ་ཅིག་ནི་བཅོམ་ལྡན་འདས་དེ་ལ་དད་པ་ཆེར་སྐྱེས་སོ། །དེ་ནས་བརྒྱ་བྱིན་གྱི་སྔོན་ན་འདུག་པའི་ལྷ་དེ་དག་ཐམས་ཅད་བཅོམ་ལྡན་འདས་ལ་ཡིད་དད་པ་སྐྱེས་སོ། །དེ་ནས་ལྷའི་རྒྱལ་པོ་བརྒྱ་བྱིན་ཡང་རང་གཅིག་པུ་གང་དུ་བཅོམ་ལྡན་འདས་དེ་བཞུགས་ཤིང་གནས་ལ་ཆོས་ཀྱང་བསྟན་པའི་གཞལ་མེད་ཁང་དེ་ཉིད་དུ་སོང་ནས། བཅོམ་ལྡན་འདས་
འཁོར་བ་འཇིག་དེའི་གཟིམས་ཆ་རྡོ་རྗེ་ལྟ་བུ་དང་ཡོ་བྱད་ཕུན་སུམ་ཚོགས་པ་རྣམ་པ་སྣ་ཚོགས་རྨད་དུ་བྱུང་བ་གང་ཡིན་པ་དེ་དག་ལ་དཔྱོད་པར་བྱེད་དོ། །འདི་ལྟར་གཟིམས་ཆ་འདི་དག་གི་ནང་ན་བཅོམ་ལྡན་འདས་བཞུགས་བཞུགས་པ་ཡིན་ནོ། །སྙམ་ནས་དེ་དག་ལ་ཡང་བརྒྱ་བྱིན་དེ་གུས་པས་མགོ་བཏུད་དེ་ལུས་ཐམས་ཅད་ཀྱིས་ཕྱག་འཚལ་ཞིང་། བཅོམ་ལྡན་འདས་དེ་ལ་གུས་པ་ཆེན་པོས་གཟིམས་ཆའི་གདན་གྱི་གཞི་དེ་ལ་ཕྱག་འཚལ་བར་བྱེད་དོ། །དེས་དེ་ལ་ཕྱག་འཚལ་ཏེ་ལངས་པ་དང་རྩིག་ངོས་དག་ལ་འདི་ལྟར་ཚིགས་སུ་བཅད་པ་དེ་བྲིས་པ་མཐོང་བ། གཡང་སར་ལྷུང་བའི་གང་ཟག་ནི། །གལ་ཏེ་འཚོ་བར་འགྱུར་ཡང་སྲིད། །བག་མེད་པར་ནི་ལྟུང་བ་དག །ནམ་ཡང་བདེ་སྐལ་མི་འཐོབ་བོ། །གལ་ཏེ་ལས་རྣམས་ཐམས་ཅད་ལ། །གང་ཟག་ཤིན་ཏུ་བག་མེད་པ། །དེ་ནི་ཉིན་དང་མཚན་དག་ཏུ། །ནམ་ཡང་དགེ་བར་མི་འགྱུར་རོ། །འཇིག་རྟེན་ཅུང་ཟད་བདེ་གང་དང་། འཇིག་རྟེན་འདས་པའི་འདོད་པ་གང་། །དེ་དག་བག་མེད་པ་ཡིས་འཇིག །དེ་བས་དེ་ནི་ཡོངས་སུ་སྤོངས། །བག་ཡོད་བདུད་རྩིའི་གཞི་ཡིན་ལ། །བག་མེད་འཆི་བའི་གཞི་ཡིན་ཏེ། །བག་ཡོད་པས་ནི་མི་འཆི་ཞིང་། །བག་མེད་པས་ནི་རྟག་ཏུ་འཆི། །བག་ཡོད་པས་ནི་ལྷ་རྣམས་ཀྱི། །གཙོ་བོ་མཆོག་དང་ལྡན་པར་འགྱུར། །བག་མེད་འཁོར་བའི་གཞི་ཡིན་ལ། །བག་ཡོད་འཁོར་བའི་ཕ་རོལ་འགྲོ། །དེ་ལྟ་བས་ན་བག་མེད་སྤོངས། །ཐམས་ཅད་དུ་ནི་བདེ་ལྡན་འགྱུར། །གང་ཞིག་རྟག་ཏུ་བདེ་འདོད་ཅིང་། །སྡུག་བསྔལ་ལས་ནི་འཇིགས་པ་གང་། །བག་མེད་མི་ལ་དུག་དང་འདྲ། །དེ་ཡིས་བག་མེད་རྣམ་པར་སྤོངས། །སྐྱེ་བོ་བྱ་བ་ངན་བྱས་པ། །བག་མེད་ཉིད་ལ་མངོན་དགའ་སྟེ། །བག་མེད་དུག་གིས་རྨོངས་པ་རྣམས། །གཡང་སར་རབ་ཏུ་ལྟུང་བར་འགྱུར། །བག་ཡོད་གཞན་དུ་ལེགས་པར་འགྱུར། །བག་མེད་པ་ལྟ་ག་ལ་ཞིག །བག་ཡོད་པ་ཡིས་བདེ་འགྱུར་ལ། །བག་མེད་པས་ནི་སྡུག་བསྔལ་ཏེ། །བདེ་དང་སྡུག་བསྔལ་གཞི་འདི་དག །ཐམས་ཅད་བསྡུས་ཏེ་བཤད་པ་ཡིན། །ཡོན་ཏན་སྐྱོན་དག་རྣམ་ཤེས་གང་། །དེ་ནི་གང་བཟང་ལེན་པར་བྱེད། །དེ་ནས་བརྒྱ་བྱིན་གྱིས་ཚིགས་
སུ་བཅད་པ་དེ་དག་སྨྲས་ནས། དེ་ནས་ཡང་གུས་པ་ཆེན་པོ་སྐྱེས་པའི་ཡིད་རབ་ཏུ་གསལ་བས་བཅོམ་ལྡན་འདས་དེ་ཉིད་ལ་ཕྱག་འཚལ་ལོ། །དེ་ནས་ཡུན་རིང་དུ་བག་ཡོད་པ་བསྔགས་ཤིང་བག་མེད་པ་སྨད་ནས་ཡང་ལྷ་དེ་དག་ག་ལ་བ་དེ་ཉིད་དུ་སོང་ངོ་། །དེ་ནས་ལྷ་རྣམས་ཀྱང་བརྒྱ་བྱིན་དེ་མཐོང་ནས། དེ་དག་གུས་པས་རིངས་ཐབས་སུ་བརྒྱ་བྱིན་ག་ལ་བ་དེར་དོང་ངོ་། །དེ་ནས་བརྒྱ་བྱིན་གྱིས་ཀྱང་དེ་དག་གི་ནང་དུ་ཚིགས་སུ་བཅད་པ་འདི་དག་སྨྲས་ཏེ། འདི་ལྟར་ཚིགས་སུ་བཅད་པ་འདི་དག་ནི་བདག་ཅག་ལ་ཕན་པ་དང་བདེ་བའི་ཕྱིར། བཅོམ་ལྡན་འདས་དོན་མཛད་པར་བཞེད་པ་དེས་བྲིས་པ་ཡིན་ནོ། །དེ་དག་ཐོས་ནས་ཡིད་རབ་ཏུ་དང་བའི་ལྷ་དེ་དག་ཀུན་ཀྱང་བཅོམ་ལྡན་འདས་ལ་ཕྱག་འཚལ་ཞིང་འདི་སྐད་ཀྱང་སྨྲ་སྟེ། འདི་ལྟར་བཅོམ་ལྡན་འདས་དེ་ངེས་པར་སྐྱེ་བོའི་མིག་ཡིན་ཏེ། དེས་བདག་ཅག་གི་དོན་དུ་ཚིགས་སུ་བཅད་པ་འདི་དག་གསུངས་པ་ལྟ་ཞེས་སྨྲས་ནས། དེ་དག་དེ་ན་ཡུན་རིང་ཞིག་ཏུ་ཤིན་ཏུ་བག་ཡོད་པར་གྱུར་ཏོ། །དེ་ནས་གཞན་ཡང་ལྷ་དག་གིས་སིལ་སྙན་དང་རོལ་མོའི་སྒྲ་དབྱངས་རྣམ་པ་ཤིན་ཏུ་མང་པོ་དག་བླངས་པ་དང་དེ་ནས་ལྷ་དེ་དག་གིས་འདི་ལྟར་འདི་དག་ནི་ཞིབ་ཏུ་སྤྱོད་པའི་ལྷ་དག་སྐྱེད་མོས་ཚལ་དུ་དགའ་སྤྱོད་བྱེད་དུ་འདོང་སྟེ། གནས་འདིར་དོང་ཞིང་སིལ་སྙན་དང་རོལ་མོའི་སྒྲ་དབྱངས་སྣ་ཚོགས་ཉེ་བར་ལེན་ལ། ལྷ་མོའི་ཚོགས་རྣམ་པ་དུ་མ་གླུ་དབྱངས་ལེན་ཞིང་འདིར་འོང་ངོ་སྙམ་དུ་དེ་དག་རིག་ནས། གང་ལྷ་དེ་དག་སྐྱེད་མོས་ཚལ་དུ་དགའ་སྤྱོད་བྱེད་དུ་འདོང་བར་བདག་ཅག་ཀྱང་དེ་དག་གི་དྲུང་ཉིད་དུ་ངེས་པར་འདོང་བར་བྱའོ་སྙམ་མོ། །དེ་ནས་དེ་ལྟར་རིག་ནས་བག་མེད་པའི་ངོ་བོ་ཉིད་ཀྱིས་ཕྲོགས་པ་རྣམས། དེ་ནས་ཡང་སིལ་སྙན་གྱི་སྒྲ་དང་གླུ་དབྱངས་དང་རོལ་མོའི་སྒྲ་སྣ་ཚོགས་ཕྱུང་ནས། ཞིབ་ཏུ་སྤྱོད་པའི་ལྷ་དེ་དག་ག་ལ་བ་དེར་ཕན་ཚུན་ཤིན་ཏུ་མཐོང་བར་འདོད་པ་རྣམས་དོང་སྟེ། ཡིད་རྟག་པར་རབ་ཏུ་དགའ་བའི་ཚལ་དང་ཉེ་བའི་ཚལ་རིན་པོ་ཆེ་སྣ་ཚོགས་དང་ལྡན་པ། གསེར་གྱི་ལྕུག་མ་འཕྱང་བས་ཁེབས་པ་རྣམས་སུ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་ཕན་ཚུན་དགའ་བར་བྱེད་རྩེ་བར་བྱེད་
དགའ་དགུར་སྤྱོད་པར་བྱེད་དོ། །དེ་ཟད་ནས་རབ་ཏུ་ལྟུང་སྟེ་ལས་ཉེ་བར་འགྲོ་བ་ཇི་ལྟ་བ་བཞིན་འཁོར་བར་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །ངན་སོང་གི་སྒོ་བཅད་པ་གང་ཡིན་པ་དེ་དག་གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། ལས་དེ་དང་རྒྱུ་འཐུན་པར་ཡུལ་ཤིན་ཏུ་རྒྱས་པ་འབབ་ཆུ་དང་ཆུ་བོ་དང་ལྟེང་ཀ་རབ་ཏུ་མང་བ་ཕུན་སུམ་ཚོགས་པ། རྟག་ཏུ་ལེགས་པར་བྱས་པའི་ལས་ཀྱི་མཐའ་རྣམས་སུ་ཤིན་ཏུ་རྒྱས་པར་འགྱུར་ཏེ། མཆོག་ཏུ་རྒྱ་ཆེ་བའི་རྒྱལ་པོའམ་བློན་པོ་ཆེན་པོ་སྐྱེ་བོ་ཀུན་དགའ་བ། བློ་གྲོས་རྒྱ་ཆེ་ཞིང་སྦྱིན་པ་དང་ཚུལ་ཁྲིམས་ལ་མངོན་པར་དགའ་ལ་རྟག་ཏུ་དགེ་བ་བྱེད་པར་མངོན་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་ས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་གཟི་བརྗིད་འབར་བ་ཞེས་བྱ་བ། ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། འདི་ལྟར་སྐྱེས་བུ་དམ་པ་དགེ་བ་དང་ལྡན་པ། སྐྱེས་བུ་དམ་པ་རྟག་ཏུ་བག་ཡོད་པ་དང་ལྡན་པར་གྱུར་པ། སེམས་ཅན་རྣམས་ལ་ཕན་པར་འདོད་པ། ལས་ཀྱི་འབྲས་བུ་ལ་དད་པ། སྐྱེས་བུ་དམ་པ་འདུ་བ་གང་གིས་སྲོག་གཅོད་པ་དང་མ་བྱིན་པར་ལེན་པ་སྤངས་པས་འགྱུར་ཏེ་འདི་ལྟ་སྟེ། ཤིང་ཤ་བ་སྐྱེ་བའི་ནང་ངམ་ཨ་མྲ་སྐྱེ་བའི་ནང་ངམ། ནཱ་ཌི་ཀེ་ར་སྐྱེ་བའི་ནང་ན་སྒོ་ང་ཡོད་པ་དག་བྱའམ་སྦྲུལ་དག་གིས་བཟུང་ན། དེ་དག་གཞན་ལ་ཕན་པར་ཞུགས་པ་སྙིང་རྗེས་བརླན་པའི་ཡིད་ཀྱིས་ཐར་བར་བྱེད་པ་ཡིན་ཏེ། དེ་ལྟར་སྲོག་ཆགས་དག་ཐར་བར་བྱེད་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། འདི་ལ་ཤིང་བ་ལ་ཤའི་ཚལ་དུ་བ་ལ་ཤའི་ལོ་མ་ཡང་ལེན་པར་མི་བྱེད་ལ། གཞན་གྱིས་བླངས་པར་ཤེས་ནས་ཀྱང་ཟློག་པར་བྱེད། ལམ་དུ་ཞུགས་པ་ན་འབྲ་གོ་ས་ལ་ལྷུང་བ་ཡང་ལེན་པར་མི་བྱེད་ལ། གཞན་གྱིས་བླངས་པར་ཤེས་ནས་ཀྱང་ཟློག་པར་བྱེད་པ་ཡིན་ཏེ། དེ་ལྟར་མ་བྱིན་པར་ལེན་པ་སྤངས་པ་ཡིན་ནོ། །དགེ་བ་སྤྱོད་པ་ཇི་ལྟ་བུ་ཡིན་ཞེ་ན། འདི་
ལ་སྦྱིན་པ་ལ་མངོན་པར་དགའ་སྟེ། ལོ་ཉེས་བྱུང་བའི་ཚེ་དགེ་སྦྱོང་དག་ལ་ལོ་ལྔ་པའི་གཞལ་བ་ཕྱེད་སྦྱིན་ནམ་སྡོམ་པ་བླངས་པའི་ནད་པ་དག་ལ་ཟས་སྦྱིན་པར་བྱེད་ཅིང་། གཞན་དག་ཀྱང་དེ་ཉིད་ལ་རབ་ཏུ་འཇོག་པར་བྱེད་དགའ་བར་བྱེད་རབ་ཏུ་དགའ་བར་བྱེད་ལས་ཀྱི་འབྲས་བུ་སྟོན་པར་བྱེད། སངས་རྒྱས་དང་ཆོས་དང་དགེ་འདུན་རྟག་པར་རྗེས་སུ་དྲན་པར་བྱེད། ཕ་མ་འམ་དགེ་བསྙེན་སྡོམ་པ་བླངས་པ་ཕལ་པ་ལ་ཡང་ན་བའི་གསོས་སྨན་གྱི་རྐྱེན་གྱི་ཡོ་བྱད་སྦྱིན་པར་བྱེད། གཞན་དག་ཀྱང་དེ་ཉིད་ལ་དེ་ལྟར་རབ་ཏུ་འཇོག་པར་བྱེད། ལས་ཀྱི་འབྲས་བུ་ཡང་སྟོན་པར་བྱེད། ཡང་དང་ཡང་དུ་གཞན་ལ་ཕན་པར་རབ་ཏུ་ཞུགས་ཤིང་། སྡིག་པའི་གྲོགས་པོ་དང་སྤྱོད་པར་མི་བྱེད། ཐད་ཀར་ཟུར་ཙམ་ཡང་མི་གནས། དེ་དང་ལྷན་ཅིག་སྨྲ་བར་མི་བྱེད། དེ་ལ་ཚིག་ཙམ་ཡང་མི་སྨྲ། ལུས་དང་ངག་གི་ལས་ཀྱི་མཐའ་རྟག་ཏུ་ལེགས་པར་བསྡམས་པ། བདག་ལ་ཕན་པ་དང་གཞན་ལ་ཕན་པར་ཞུགས་པ་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་གཟི་བརྗིད་འབར་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ་དེ། རང་གི་འོད་ཟླ་བའི་འོད་དང་མཚུངས་པ་ཡིན་ནོ། །ས་གཞི་དེ་ཡང་ཉམས་དགའ་བ་འདི་ལྟ་བུ་ཡིན་ཏེ་འདི་ལྟ་སྟེ། ཚལ་དང་ཉེ་བའི་ཚལ་རིན་པོ་ཆེ་སྣ་བདུན་གྱིས་ཤིན་ཏུ་གང་བ་ཡིན། ཆུ་བོ་ཡང་ཆུ་འབབ་པ་སྣ་ཚོགས་འབྱུང་ཞིང་། པད་མ་སྡོང་བུ་བཻ་ཌཱུརྱ་རྣམས་ཀྱིས་ཡོངས་སུ་བསྐོར་བ་ཡིན། པད་མ་གསེར་གྱི་འདབ་མ་རྣམས་ཀྱིས་ཀྱང་ཆུ་བོ་དེ་དག་ཁེབས་པ་ཡིན་ལ། ཆུ་རབ་ཏུ་གསལ་བ་གསེར་གྱི་རྡོ་སྣ་ཚོགས་པ་རྣམས་ཀྱིས་སྒྲ་མཐོན་དམན་དུ་འབྱིན་པ། གར་བྱེད་པ་ལྟ་བུར་འབབ་པ། བྱ་སྣ་ཚོགས་སྒྲ་འདྲེས་པར་འབྱིན་པ་རབ་ཏུ་དགའ་བ་མང་བ་དང་། ལྷ་དང་ལྷ་མོའི་ཚོགས་རབ་ཏུ་དགའ་བས་གང་ཞིང་གསེར་གྱི་རི་བོའི་རྩེ་ལ་རྒྱུ་བ་གཞན་དག་བཻ་ཌཱུརྱའི་རི་ལ་རྒྱུ་བ་བྱ་ངང་པ་དང་ཀཱ་རཎྜ་བ་དང་ངུར་པའི་ཚོགས་མྱོས་པ་སྒྲ་སྣ་ཚོགས་འབྱིན་པ། པད་མའི་ཚལ་གྱི་གསབ་གསེབ་ན་ལྷ་དང་ལྷ་མོའི་ཚོགས་རབ་ཏུ་དགའ་ཞིང་དགོད་པ་འགྲམ་གཉི་ག་
ལྷའི་ཚོགས་རྣམས་ཀྱིས་ཀུན་དུ་གང་བ་ཡིན་ཏེ། ཆུ་བོ་དེ་དག་ཐམས་ཅད་ཀྱི་རླབས་རབ་ཏུ་འབྱུང་བའི་སྒྲ་ཡིད་དུ་འོང་བ་འབྱུང་བ་ཡིན་ནོ། །གཞན་ཡང་པད་མའི་རྫིང་དག་ཡོད་དེ། པད་མའི་གསབ་གསེབ་དེ་དག་ན་ཡང་རིན་པོ་ཆེ་སྣ་ཚོགས་ཀྱི་བུང་བ་འོད་གསལ་ཞིང་མཛེས་པ་སྣ་ཚོགས་ཀྱིས་བརྒྱན་པ་ཡིན་ནོ། །ལྷ་དག་དེ་དག་ལ་ཡང་རྟོག་པར་བྱེད་དེ་ལྷའི་ཚོགས་ཀྱིས་ཡོངས་སུ་བསྐོར་བ། ལུས་རིན་པོ་ཆེ་སྣ་ཚོགས་ཀྱིས་རྣམ་པར་བརྒྱན་པ། འོད་ཀྱི་ཕྲེང་བ་རྒྱ་ཆེ་བ་དག་ཆུ་བོ་དེ་དག་ན་རྩེ་བར་བྱེད་ཅིང་དུས་ཡུན་རིང་དུ་དགའ་བ་ངེས་པར་མཐར་བྱེད་ཅེས་བྱ་བའི་ཚལ་དེར་འདོང་བར་བྱེད་དེ་རྩེ་བའི་ཕྱིར་ཉེ་བར་འདོང་ངོ་། །སིལ་སྙན་དང་རོལ་མོའི་སྒྲ་སྣ་ཚོགས་འབྱིན་པ་རྗེས་སུ་འབྲང་ཞིང་ཕན་ཚུན་གྲོགས་སུ་གྱུར་པ་རྒྱགས་པ་འབའ་ཞིག་དོན་དུ་བྱེད་པ་དེ་དག་ཚལ་དེར་དོང་ནས། པད་མའི་ཚལ་པི་ཝང་གིས་རྩེ་བ་ཞེས་བྱ་བ་ཀུན་ནས་དཔག་ཚད་ལྔ་བརྒྱར་མཚུངས་པར་གང་བ་དེར་དགའ་བར་གནས་པ་དག་འཇུག་པར་བྱེད་དོ། །པད་མ་དེ་དག་ཀྱང་མདོག་དང་རོ་དང་དྲི་མཆོག་དང་ལྡན་ཞིང་མཐོ་རིས་དང་འཐུན་པའི་ཆང་གིས་ཤིན་ཏུ་གང་བ་ཡིན་ནོ། །དེ་ནས་ལྷ་ཤིན་ཏུ་བདེ་བ་དེ་དག་ཆང་ཞིམ་པོ་དེ་དག་ལ་འཐུང་ཞིང་གླུ་ལེན་ཏོ། །དེ་ནས་བག་མེད་པར་གནས་པ་དེ་དག་བྱ་བགེགས་མི་བྱེད་པར་འགྲོ་བ་ཞེས་བྱ་བས་མཐོང་སྟེ། དེ་དག་གིས་ལྷ་བག་མེད་པར་གནས་པ་དེ་དག་ལ་མངོན་པར་བརྟགས་ནས་འདི་ལྟར་ཚིགས་སུ་བཅད་དེ་སྨྲས་པ། ཁྲེལ་མེད་ངོ་ཚ་མེད་པ་དང་། །ལེ་ལོའི་སྡིག་པའི་གྲོགས་པོ་རྣམས། །འདི་དག་མཐོ་རིས་ས་བོན་མིན། །མཁས་པས་དེ་དག་བསྲུང་བར་གྱིས། །ཁྲེལ་མེད་ངོ་ཚ་མེད་པ་དང་། །རྟག་ཏུ་སྡིག་པ་རྗེས་སུ་སྤྱོད། །མི་ནི་གཡང་ས་ལས་ལྟུང་སྟེ། །དེ་ནི་ཕྱི་ནས་རིག་པར་འགྱུར། །མ་དད་པ་དང་རྨུགས་དང་གཉིད། །དེ་བཞིན་གར་ཡང་འཇིགས་མི་བྱེད། །འཆབ་དང་འཚིག་དང་རྨོངས་པ་ནི། །དེ་དག་མཐོ་རིས་རྒྱུར་མི་འགྱུར། །ཆང་འཐུང་བརྫུན་ཚིག་རབ་ཏུ་སྨྲ། །གནོད་སེམས་དེ་བཞིན་ལྷག་པར་བརྐམ། །ལས་འབྲས་ལ་ནི་དད་མེད་པ། །ཀུན་དུ་སེམས་ཅན་དམྱལ་བའི་རྒྱུ། །ཡིད་ཀྱི་སྐྱོན་དང་གནོད་སེམས་དང་། །སྡང་བའི་ལས་རྣམས་བསྲུང་བར་གྱིས། །
མི་ཀུན་སྡང་བའི་ལས་ཀྱིས་སུ། །སེམས་ཅན་དམྱལ་བ་ཉེ་བར་རྟོག །བརྟན་པ་མེད་པ་སྡིག་སྤྱོད་ཅིང་། །རྟག་ཏུ་འདོད་པའི་དབང་དུ་སོང་། །ལེ་ལོ་ཁོར་མོར་བརྫུན་སྨྲ་བ། །དེ་ནི་དགེ་བའི་འོས་མིན་ནོ། །གང་གི་ཚུལ་ཁྲིམས་འཆིང་བུ་དང་། །སྤྲིན་གྱིས་ཁེབས་ལྟར་སྨད་པ་དག །དེ་ནི་སྨད་པའི་ཚུལ་ཁྲིམས་ཀྱིས། །མི་ནི་སྨད་པར་སྐྱེ་བར་འགྱུར། །གང་དག་སྡིག་ལ་བློ་གནས་པ། །དེ་དག་མུན་པ་མཐའ་མེད་ལ། །གང་དག་སངས་རྒྱས་བློ་གནས་པ། །དེ་དག་མུན་པ་བསལ་བ་ཡིན། །དེ་བཞིན་དུ་ཆོས་དང་དགེ་འདུན་ལ་ཡང་བརྗོད་པར་བྱའོ། །བག་མེད་རྨོངས་པའི་ལྷ་རྣམས་ནི། །ཡང་དང་ཡང་དུ་ཆང་གིས་རྨོངས། །བག་མེད་གཉིད་ཀྱིས་རྨོངས་པ་དེ། །མི་རྣམས་སེམས་ཅན་དམྱལ་བར་རྒྱུ། །ཇི་ལྟར་སྐྱེས་ན་ངེས་པར་ནི། །འཆི་བ་ཡོད་པ་དེ་ལྟ་བུར། །སྐྱེ་བོ་སྐྱེ་བ་ཡོད་པ་ཡི། །སྟེང་ན་འཇིག་པ་ཡོད་པར་འགྱུར། །བག་མེད་རྒྱ་ལྟ་བུ་ཡིས་བཟུང་། །རྒྱ་མཚོ་ལྟ་བུའི་ཡུལ་དུ་བརླུབས། །སྲེད་པའི་ལྕགས་སྒྲོག་དག་ཏུ་བཅུག །ལྷ་རྣམས་དུ་མར་རྩེ་བར་བྱེད། །སྐྱེས་མ་ཐག་ཏུ་ལྷ་དག་གི །སྐད་ཅིག་དེ་ལ་བདེ་ཟད་འགྱུར། །བག་མེད་པ་ཡིས་བསྒྲིབས་པའི་སེམས། །དབང་མེད་པ་དག་ཤེས་མི་འགྱུར། །བག་མེད་པ་ཡིས་འཁྲུལ་པའི་ཡིད། །རྟག་ཏུ་ཡུལ་ལ་འདོད་པར་བྱེད། །འདོད་པའི་བདེ་བས་ཚིམ་མེད་པ། །ལྷ་རྣམས་དག་ནི་སྡུག་བསྔལ་ལོ། །གང་ཞིག་སྲེད་པའི་དབང་སོང་བ། །ལྷ་དེ་སྐད་ཅིག་ཐང་ཅིག་དང་། །ནམ་ཡང་ཡུད་ཙམ་དག་ཏུ་ཡང་། །ཉེ་བར་སྤྱོད་པར་མི་འགྱུར་རོ། །གང་དུ་ལྷ་དག་དབང་མེད་ཅིང་། །འདོད་པའི་དབང་སོང་རྩེ་བྱེད་པ། །ས་འདི་སྲེད་པས་ཉོན་མོངས་ཏེ། །རྣམ་པར་རྟོག་པ་བརྒྱ་ཡིས་བསྒྲིབས། །ཇི་ལྟར་དམྱལ་བར་རྒྱུ་བ་རྣམས། །དེ་ཡི་མེ་ཡིས་སྲེག་པར་བྱེད། །དེ་ལྟར་འདོད་པ་ལས་བྱུང་མེས། །ལྷ་རྣམས་དག་ནི་སྲེག་པར་བྱེད། །བཀྲེས་དང་སྐོམ་ལས་བྱུང་བའི་མེས། །དེ་ལྟར་ཡི་དགས་རྣམས་ཀྱང་སྲེག །གསོད་པའི་མེ་ཡིས་དུད་འགྲོ་རྣམས། །མི་རྣམས་ཀུན་དུ་ཚོལ་བས་སོ། །དེ་ལྟར་ཀུན་ནས་བྱུང་བའི་མེས། །སེམས་ཅན་འཇིག་རྟེན་མ་ལུས་པར། །ཀུན་ནས་ཡོངས་སུ་
བསྐོར་ནས་སུ། །སྲེག་པར་བྱེད་ཀྱང་མི་རིག་གོ །དེ་ལྟར་བྱ་དེ་དག་གིས་ལྷ་དེ་རྣམས་ལ་མངོན་པར་བརྟགས་ནས། ཡང་དང་ཡང་དུ་རབ་ཏུ་གོ་བར་བྱེད་དོ། །དེ་ནས་དེ་ན་ལྷ་གང་དག་སྔོན་ལས་དགེ་བ་བྱས་ཤིང་སྤྱད་པ་དེ་དག་གལ་ཏེ་ཡང་བྱ་དེ་དག་གི་སྒྲ་རྣར་ཐོས་ནས་འཐུང་བར་མི་བྱེད་དེ། ཡུད་ཙམ་ཞིག་བག་ཡོད་པ་དང་ལྡན་ནས། དེ་ནས་ཡང་ཡུལ་སྒྲ་དང་རེག་པ་དང་གཟུགས་དང་རོ་དང་དྲི་སྡུག་པ་དཔེ་མེད་པ་རྣམས་ཀྱི་དབང་དུ་སོང་སྟེ། དེའི་ངོ་བོ་ཉིད་ཀྱི་དབང་དུ་སོང་བའི་ཡིད་དག་དེ་ནས་ཡང་སིལ་སྙན་ཡན་ལག་ལྔ་དང་ལྡན་པས་ཚལ་དང་ཉེ་བའི་ཚལ་རྣམས་སུ་ལྷ་དག་རྩེ་ཞིང་གང་དང་གང་མྱོང་བར་འདོད་པ་དེ་དང་དེ་ཤིན་ཏུ་མྱོང་ངོ་། །ལྷ་དང་ལྷ་མོ་འབུམ་སྙེད་ཀྱིས་ཡོངས་སུ་བསྐོར་ཅིང་རང་གིས་བྱས་པ་ལ་སྤྱོད་པ་ཁ་ཅིག་ནི་བཻ་ཌཱུརྱ་དང་། ཨན་ད་རྙིལ་དང་སྤུག་ལས་བྱས་པའི་རི་རབ་ཀྱི་རིའི་རྩེ་མོ་དང་ཚལ་དང་ཉེ་བའི་ཚལ་གྱི་ས་དང་འབབ་ཆུ་དང་ལྟེང་ཀ་པད་མས་རྣམ་པར་བརྒྱན་པ་རིའི་རྩེ་མོ་བྱ་སྡུག་གུ་སྣ་ཚོགས་ཀྱིས་རྣམ་པར་བརྒྱན་པ། བཻ་ཌཱུརྱའི་འདབ་མ་དང་གསེར་གྱི་ཟེ་བ་དང་ཤེལ་གྱི་སྡོང་བུའི་པད་མའི་རྫིང་དག་ཏུ་བུང་བའི་ཚོགས་ཀྱིས་ཤིན་ཏུ་གང་བའི་ཡུལ་དཔེ་མེད་པ་ཆུ་བོའི་ཀླུང་ལྟ་བུ་རྣམ་པ་སྣ་ཚོགས་ཀྱི་དབང་དུ་སོང་བ་ན་ཡང་དང་ཡང་དུ་རྩེ་བར་བྱེད་ཀྱང་ངེས་པར་མྱོང་བར་འགྱུར་བའི་སྡུག་བསྔལ་གང་ཡིན་པ་དེ་དག་མི་རིག་སྟེ། དེ་ལྟར་ཇི་སྲིད་དུ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་ཕན་ཚུན་གྲོགས་སུ་གྱུར་པ་དག་དགའ་བར་བྱེད་རྩེ་བར་བྱེད་དོ། །དེ་ཟད་ནས་ལྟུང་བར་འགྱུར་ཏེ། ཇི་ལྟར་ཉི་མ་ནུབ་ན་ཉིན་མོ་ཟད་པ་དེ་ལྟར་ལྷ་རྣམས་ལེགས་པར་བྱས་པ་ཟད་ན་མཐོ་རིས་ཀྱི་མཐའ་ནས་ལྟུང་བར་འགྱུར་རོ། །ལྷུང་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན་ལས་དེ་དང་རྒྱུ་འཐུན་པར་དེ་ཤིན་ཏུ་བདེ་བར་འགྱུར་ཏེ། ནོར་མང་བ་དང་མཆོག་ཏུ་རྒྱ་ཆེ་བ་ལ་དགའ་བ་དང་། དམ་པའི་ཆོས་ལ་དགའ་བ་དང་། རྟག་ཏུ་ཤེས་པ་ལ་དགའ་བ་དང་། དགེ་སྦྱོང་དང་བྲམ་ཟེ་ལ་དགའ་བ་དང་། ཚེ་རིང་པོར་འགྱུར་བ་ཡང་
མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ཟླ་བའི་གནས་ལྟར་རྒྱུ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན་དགེ་བའི་ལས་ཀྱི་མཐའ་སྤྱོད་པ་སེམས་དྲི་མ་དང་བྲལ་བ། སེམས་ཤིན་ཏུ་བསྒོམས་པ། ཡིད་ཤིན་ཏུ་བསྒོམས་པ་གང་གིས་སངས་རྒྱས་ཀྱི་སྐུ་གཟུགས་བྱ་བ་སྐྱོན་མེད་པར་བྱས་པ་དང་། དེ་བཞིན་དུ་བཅོམ་ལྡན་འདས་ཀྱི་སྐུ་གཟུགས་གསེར་རམ་དངུལ་ལམ་ཟངས་སམ་ལྕགས་ལས་བྱས་པ་ལ་ཡིད་དང་བས་པིར་རམ་རབ་ཏུ་གསལ་བར་བྱེད་པས་སྡུག་པར་བྱེད་ཅིང་སྐུ་གཟུགས་དྲི་མ་དང་བྲལ་བ་མཆོག་ཏུ་སྡུག་པ་དེ་དག་མཐོང་ནས་སྦྱིན་བདག་དེ་ཤིན་ཏུ་སྙིང་དགའ་ལ་སེམས་ཀྱིས་ཀྱང་ཡང་དང་ཡང་དུ་བྱེད་ན། དེ་སེམས་ཀྱི་ཞིང་ཡོན་ཏན་བཟང་པོ་དང་སེམས་ཀྱི་རྒྱུ་སེམས་བསྒོམས་པས་དགེ་བ་སྤྱོད་པ་བདེ་བ་དང་ལྡན་པར་འགྱུར། གཞན་ཡང་སྲོག་གཅོད་པ་དང་མ་བྱིན་པར་ལེན་པ་སྤོང་བ་ཡིན་ཏེ། སྲོག་ཆགས་རྣམས་ལ་ཡིད་ཀྱིས་ཀྱང་གསོད་པར་མི་བྱེད་ཅིང་གནོད་པར་མི་བྱེད་ལ། གཞན་བྱེད་ན་ཡང་རྗེས་སུ་ཡི་རང་བར་མི་བྱེད་ཕྱིར་ཟློག་པར་བྱེད། དགེ་བའི་ལམ་ལ་རབ་ཏུ་འཇོག་པར་བྱེད་པ་བདག་དང་གཞན་ལ་ཕན་པ་བྱེད་པའི་སྐྱེས་བུ་དམ་པ་དེ་ནི་བདེ་བ་མྱོང་བར་འགྱུར་རོ། །སྲོག་གཅོད་པ་སྤངས་པ་རྣམ་པ་དུ་ཡོད་ཅེ་ན། འདི་ལ་ཤིན་ཏུ་གུས་པས་བསམས་ནས་ཡིད་ཀྱིས་ཀྱང་གསོད་པར་མི་བྱེད་ཅིང་། གསོད་པར་བྱེད་དུ་མི་འཇུག །ལེགས་པར་བྱས་པའི་ལས་བྱེད་པ་དེ་དྲོད་གཤེར་ལས་སྐྱེས་པའི་སེམས་ཅན་མལ་གཞིའི་འོག་ཏུ་སྐྱེས་ནས་ཟ་བར་བྱེད་པ་དེ་དག་ཀྱང་བཟུང་ནས་གསོད་པར་མི་བྱེད་ལ། སྲིན་བུ་ཕྲེའུ་དང་གྲོག་སྦུར་ཡང་གསོད་པར་མི་བྱེད་པ་ཡིན་ཏེ། རྣམ་པ་དེ་དག་ནི་སྲོག་གཅོད་པ་སྤངས་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། ཡང་སྐྱེས་བུ་དམ་པ་དགེ་བ་ལེགས་པར་བྱས་པའི་ལས་ལ་
ཚིམ་པ་མེད་པས་ཐམས་ཅད་དུ་མ་བྱིན་པར་མི་ལེན་ཏེ་དེ་ལྟ་བས་ན་མ་བྱིན་པར་ལེན་པ་སྤངས་པ་ཡིན་ནོ། །རྣམ་པ་ཇི་ལྟ་བུ་ཡིན་རྣམ་པ་དུ་ཡོད་ཅེ་ན། འདི་ལ་གྲང་བས་ཉེན་པའམ་དྲོ་བས་ཉེན་ཀྱང་གཞན་གྱིས་ཡོངས་སུ་བཟུང་བའི་ཤིང་སྐམ་མམ། བོང་བའམ། གདུགས་ཀྱི་གྲིབ་མ་ཙམ་གྱིས་ཀྱང་འཚོ་བར་མི་བྱེད། གྲིབ་མས་འཚོ་བའི་མི་རྣམས་ཀྱི་གྲིབ་མ་འཕྲོག་པར་མི་བྱེད། འགྲོན་པོ་དག་ཤིང་ལྗོན་པའི་གྲིབ་མ་དག་ལ་ངལ་སོ་ཞིང་འདུག་པ་དབང་གིས་བསྐྲད་ནས། གྲིབ་མ་དེ་དག་ལ་བསིལ་བར་འདུག་ཅིང་དེ་དག་ཀྱང་གདུང་བས་གདུངས་ལ་ཤིན་ཏུ་སྡུག་བསྔལ་བར་གྱུར་པ་རྣམ་པ་དེ་ལྟ་བུའི་མ་བྱིན་པར་ལེན་པ་ཡང་ཡོངས་སུ་སྤོང་ཞིང་མི་བྱེད་ལ། གྲིབ་མ་མ་བྱིན་པར་ལེན་པ་གཞན་བྱེད་པ་ཡང་ཕྱིར་ཟློག་པར་བྱེད་པ་ཡིན་ཏེ། མ་བྱིན་པར་ལེན་པ་ཤིན་ཏུ་ཆུང་ངུ་ཡང་སྤོང་ཞིང་སྲོག་གཅོད་པ་ཡང་སྤོང་བ་ནི་ལུས་དང་བྲལ་ནས་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ཟླ་བའི་གནས་ལྟར་རྒྱུ་བའི་ལྷ་རྣམས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ། རྒྱུ་རྐྱེན་དང་འཐུན་པར་སྤྱད་པ་དེ་འབྲས་བུ་དེ་དང་འཐུན་པར་འབྱུང་སྟེ་འདི་ལྟ་སྟེ། ཟླ་བ་ཉ་བ་བཅུའི་འོད་ཀྱི་རྣམ་པ་ཇི་སྙེད་ཡོད་པའི་རྣམ་པ་དེ་སྙེད་ཀྱི་འོད་ལྷའི་ལུས་དེ་ཐམས་ཅད་ལས་ཤིན་ཏུ་དྲི་མ་མེད་པ་འབྱུང་ངོ་། །ལྷ་དེའི་འོད་གང་ཡིན་པའི་འོད་དེས་མཐོ་རིས་ཀྱི་ཕྱོགས་དང་བཅས་པ་བརྒྱ་འགྱུར་དུ་གསལ་བ་དང་ལྡན་པར་འགྱུར་རོ། །འོད་དེ་ཡང་ཚ་བ་དང་བསིལ་བ་མེད་དེ་ལྷ་ཐམས་ཅད་ཀྱི་མིག་ཏུ་སྡུག་པ་ཡིན་ནོ། །ལྷ་དེ་དག་ཀྱང་གནས་གཞན་དུ་སྐྱེས་པའི་ལྷ་དེ་དག་གི་འོད་པས་ཁྱད་པར་དུ་འཕགས་པ་ཡིན་ཏེ། དེའི་ལས་དགེ་བའི་མཐུས་ཀུན་ནས་དཔག་ཚད་བཅུར་རིན་པོ་ཆེ་དང་རིན་པོ་ཆེའི་འོད་ཐམས་ཅད་ཀྱང་ཟིལ་གྱིས་མནན་ནས་ལྷ་དེའི་འོད་མངོན་པར་གསལ་ལོ། །དེ་ནས་ལྷ་དེ་ལྷའི་ཚོགས་དུ་མས་ཡོངས་སུ་བསྐོར་ཅིང་སིལ་སྙན་དང་རོལ་མོའི་སྒྲ་སྣ་ཚོགས་འབྱིན་ལ། གླུ་དབྱངས་ཉེ་བར་ལེན་བཞིན་དུ་སྐྱེད་མོས་ཚལ་དགའ་བ་ལྔ་ཞེས་བྱ་བ་ག་ལ་བ་དེར་འདོང་བར་བྱེད་དོ། །ཚལ་དེ་ན་གང་སུམ་ཅུ་རྩ་གསུམ་པ་ཐམས་ཅད་པས་ཁྱད་པར་དུ་འཕགས་པ་ཤིན་
ཏུ་དགའ་བ་ལྔ་འབྱུང་སྟེ་འདི་ལྟ་སྟེ། ཤིང་ལྗོན་པ་རྣམས་ཀྱི་གཟི་བརྗིད་དང་འབྲས་བུ་དང་བྱ་བློ་གྲོས་རྒྱ་ཆེ་བ་དང་པད་མའི་རྫིང་གི་ཆུ་དང་འབབ་ཆུ་རབ་ཏུ་མང་བ་དང་ནམ་མཁའ་ལ་རླུང་དྲི་དང་ལྡན་པ་དྲིལ་བུ་གཡེར་ཀའི་སྒྲ་ལྟ་བུ་དུ་མ་ལྡང་བའོ། །དེ་ནས་ལྷ་དེ་ལྷའི་ཚོགས་ཀྱིས་ཡོངས་སུ་བསྐོར་ནས་དགའ་བ་ལྔའི་ཚལ་དེ་ག་ལ་བ་དེར་འདོང་བར་བྱེད་དེ། སིལ་སྙན་དང་རོལ་མོའི་སྒྲ་དང་གླུ་སྒྲ་རྣམ་པ་སྣ་ཚོགས་ཀྱིས་དགའ་བ་དང་ལྷ་མོ་གཟུགས་བཟང་མོ་དང་ལྡན་ཞིང་ཆ་བྱད་དང་རྒྱན་སྣ་ཚོགས་ཐོགས་པ་རྗེས་སུ་འབྲང་བ་དང་ལྷའི་ཚོགས་རྣམ་པ་སྣ་ཚོགས་ཀྱིས་ཡོངས་སུ་བསྐོར་ཅིང་སིལ་སྙན་དང་རོལ་མོའི་སྒྲ་ཡན་ལག་ལྔ་དང་ལྡན་པ་ཉེ་བར་ལེན་པ་ན་བདེ་བ་ཤིན་ཏུ་རྒྱ་ཆེ་བ་དག་མྱོང་ངོ་། །ཤིང་གི་ཡོན་ཏན་ཤིན་ཏུ་རྒྱ་ཆེ་བ་མངོན་དུ་གྱུར་པ་གང་ཡིན་པའི་ལས་བྱས་པ་དེས་དྲི་ཐམས་ཅད་ཟིལ་གྱིས་མནན་ནས་དཔག་ཚད་ལྔར་འབྱུང་ངོ་། །འདི་ལྟར་མཐོ་རིས་པས་ཀྱང་བཟང་བའི་མཐོ་རིས་ཀྱི་ཤིང་ལྗོན་པ་ཁ་ཅིག་གི་འོད་ནི་ཉི་མ་བས་ལྷག་པར་གསལ་ཏེ་འོད་ཤིན་ཏུ་བཟང་པོ་མི་ཚ་མི་གྲང་ངོ་། །འབྲས་བུ་ཡང་དྲི་དང་རོ་དང་རེག་པ་དང་ལྡན་ཏེ་དྲི་དེ་དག་གིས་དྲི་ཐམས་ཅད་ཟིལ་གྱིས་མནན་ནས་དཔག་ཚད་ལྔར་འབྱུང་ངོ་། །འབྲས་བུ་གཟའ་དང་སྐར་མའི་ཚོགས་ལྟ་བུ་དེ་དག་ལས་ཆང་ཞིམ་པོ་མྱོས་པའི་སྐྱོན་དང་བྲལ་བ་རྣམ་པ་སྣ་ཚོགས་དག་རྟག་ཏུ་འབྱུང་ལ། ཆང་གི་མདོག་དྲི་དང་རོ་སྣ་ཚོགས་སུ་འགྱུར་ཏེ་དེ་དག་གི་དྲི་དཔག་ཚད་ལྔར་འབྱུང་ངོ་། །རོ་ཡང་རྣམ་པ་ཇི་སྙེད་དུ་འདོད་པའི་རྣམ་པ་དེ་སྙེད་དུ་ཆང་དེའི་རོ་འགྲུབ་པར་འགྱུར་ཏེ་ཡོན་ཏན་དེ་སྙེད་དང་ལྡན་པ་ཡིན་ནོ། །བྱ་ཡང་བག་མེད་པ་ཡང་དག་པར་ཁོང་དུ་ཆུད་པར་བྱ་བ་ཞེས་བྱ་སྟེ། དེ་དག་གིས་ནི་ལྷ་ཤིན་ཏུ་བག་མེད་པ་རྣམས་ལ་འདི་ལྟར་ཡང་དང་ཡང་དུ་ཚིགས་སུ་བཅད་དེ་སྨྲས་པ། སྐྱེས་བུ་མཆོག་དག་ཆོས་འདུལ་བ། །རྟབ་རྟབ་པོར་ནི་བྱེད་པ་དེ། །ལེགས་པར་བྱས་པའི་ལས་ཟད་ཅིང་། །ཚེ་ཡང་སྐད་ཅིག་བྱེད་པའི་རྒྱུ། །དར་ལ་བབ་པ་ཤིན་ཏུ་འཇོམས། །སྲོག་ཀྱང་ཐམས་ཅད་བྲལ་བར་བྱེད། །ཕུན་སུམ་ཚོགས་པ་ཐམས་ཅད་འཇིག །བག་མེད་ཡིད་ལ་མ་བྱེད་ཅིག །མཐོ་རིས་རྟག་ཏུ་མི་འཐོབ་ལ། །དལ་བ་རྟག་ཏུ་མི་ལྡན་
པས། ཇི་སྲིད་དེ་ནི་མི་ལྟུང་བར། །དེ་སྲིད་དགེ་ལ་བརྩོན་པར་གྱིས། །ཆོས་ལ་ཤིན་ཏུ་བསྡམས་པ་དང་། །སེམས་ཀྱང་བསྲུང་བ་བྱས་པས་ནི། །གང་ན་སྐྱོན་དག་མེད་པ་ཡི། །སྔོན་མ་མཐོང་བའི་གནས་འཐོབ་འགྱུར། །གང་དག་རྟག་ཏུ་ཡིད་གཡེངས་ཤིང་། །ཆོས་ལའང་གཞོལ་བར་མི་བྱེད་པ། །དེ་དག་གི་ནི་བདེ་བ་འདི། །དོན་མེད་འགྱུར་ཏེ་མི་ལྡོག་གོ །ཚུལ་ཁྲིམས་གཞིས་ནི་ལུས་ཅན་གྱིས། །མཐོ་རིས་རྣམས་སུ་དེ་འདི་ཐོབ། །ཚུལ་ཁྲིམས་དེ་ལ་མི་སྟེན་གང་། །དེ་ནི་ཕྱི་ནས་ཡོངས་སུ་གདུང་། །དེ་བས་ཚུལ་ལྡན་རྟག་པར་ནི། །ཚུལ་ཁྲིམས་ཉིད་ལ་བསྟེན་པར་བྱ། །ཚུལ་ཁྲིམས་མེད་པ་རྨོངས་པའི་མི། །མཐོ་རིས་སུ་ནི་འགྲོ་མི་འགྱུར། །ལྷ་ཡི་འདོད་པ་ལྔ་ལྡན་པ། །བདེ་བ་སྤྱོད་པ་གང་ཡིན་འདི། །དེ་ནི་ཚུལ་ཁྲིམས་དག་པ་ཡི། །འབྲས་བུ་ཆེན་པོ་ཐོབ་པ་ཡིན། །བག་མེད་དུག་གིས་ཤིན་ཏུ་རྨོངས། །འདོད་པ་སྤྱོད་པའི་ལྷ་གང་དག །འཚོ་བའི་མཐའ་ནི་འཇིག་པ་དང་། །གཡོ་བ་ཐམས་ཅད་མི་རིག་གོ །བག་མེད་པ་ཡིས་རྣམ་རྨོངས་པ། །ལྷ་རྣམས་དག་ནི་སྟོང་ཕྲག་དང་། །འབུམ་ཕྲག་དག་ནི་དུ་མ་རྣམས། །འདོད་པའི་མེ་ཡིས་རྣམ་པར་བསྲེགས། །བག་མེད་རྣམ་པར་རྨོངས་པ་ཡིས། །མི་རྣམས་ཐམས་ཅད་དབང་དུ་བྱེད། །དེ་ནི་ཕྱི་ནས་ཉོན་མོངས་འཐོབ། །འབྲས་བུ་གང་ཡིན་དེ་རིག་གོ །ཡུལ་རྣམས་ལ་ནི་རྟག་པར་སེམས། །གཡོ་བ་ཆེན་པོ་རྒྱུག་བྱེད་པ། །ཉོན་མོངས་རྨོངས་པ་སྐྱེད་པ་གང་། །འབྱུང་བར་འགྱུར་བ་དེ་མཐོང་ངོ་། །ཡུལ་རྣམས་ལ་ནི་ཆགས་པའི་སེམས། །ཉོན་མོངས་ཁོང་དུ་མི་ཆུད་དེ། །ཉོན་མོངས་གློང་དུ་སྐྱེས་པ་དག །དེ་ནི་ཕྱི་ནས་ཡོངས་སུ་གདུང་། །ཀུན་ཏུ་སྦྱོར་བ་ཕྲ་རྒྱས་བཅས། །ཡུལ་ལ་རྣམ་རྟོག་འབྱུང་བ་ནི། །འཁོར་འདྲ་སེམས་ནི་རྒྱལ་པོ་བཞིན། །དེ་དག་ལྷན་ཅིག་སྤྱོད་པར་འགྱུར། །གང་དག་ཏུ་ནི་ཡིད་འཇུག་པ། །མི་ཤེས་པ་རྣམས་དེར་འཇུག་སྟེ། །མཐུ་ཡིས་ཕན་ཚུན་མྱོས་པ་དག །སྲིད་པ་གསུམ་ན་འཁྱམ་པར་འགྱུར། །བརྟན་པོ་གང་དག་དེ་ཉིད་རིག །མི་བརྟན་སྡུག་བསྔལ་སྟོང་ལ་སོགས། །འགྲོ་བའི་གནས་པ་མཐོང་འགྱུར་ཏེ། །དེ་དག་ལ་ནི་སྡུག་བསྔལ་མེད། །རྟག་ཏུ་འདོད་པ་ཚོལ་བྱེད་པ། །
བུད་མེད་རག་ལས་རྨོངས་པ་གང་། །དེ་དག་ལྷ་ཡི་འཇིག་རྟེན་དུ། །ཐ་མ་དག་ནི་མཐོང་བར་འགྱུར། །རི་འདི་ལྗོན་ཤིང་ཚལ་དུ་བཅས། །རིན་ཆེན་སྣ་ཚོགས་རྣམ་པར་བརྒྱན། །ལྕུག་མ་ཚང་ཚིང་དག་གིས་ཁེབས། །པད་མའི་རྫིང་གིས་རྣམ་པར་བརྒྱན། །འབབ་ཆུ་རྣམ་པ་སྣ་ཚོགས་དང་། །འཁྲི་ཤིང་རྣམས་ཀྱིས་མཛེས་པར་བྱས། །སྐྱེ་བོའི་ལས་ཀྱི་མངོན་སུམ་འདི། །བརྟོལ་ནས་མཁའ་ལ་བྱུང་གྱུར་པ། །རི་རབ་བསྐལ་པའི་མེས་བསྲེགས་ཏེ། །ཐམས་ཅད་དུ་ནི་མི་འབྱུང་ན། །བག་མེད་རྒྱགས་པས་རྨོངས་པ་ཡི། །སྐྱེ་བ་དང་ནི་འཇིག་འགྱུར་བ། །དབུ་བ་ཆུ་བུར་ལྟ་བུ་ཡིན། །དེ་ནི་ལྷ་གང་སྨོས་ཅི་དགོས། །དེ་ནས་དེ་ན་ལྷ་སྔོན་དགེ་བའི་ལས་ཀྱི་མཐའ་སྤྱད་པ་ལ་གོམས་པ་གང་ཡིན་པ་དེ་དག་བྱའི་སྒྲ་དེ་ཐོས་ནས། འདི་ལྟར་བྱ་འདི་དག་རྣམ་པར་སྒྲ་འབྱིན་པ་དེ་བཞིན་ཡིན་ནོ་སྙམ་ནས་དེ་ནས་ཡུད་ཙམ་ཞིག་ཁོང་དུ་ཆུད་དོ། །ཁོང་དུ་ཆུད་ནས་དེ་ནས་ཡང་ཡུལ་ལ་རྣམ་པར་རྨོངས་པ། ཡུལ་རྣམས་ཀྱིས་དབང་དུ་བྱས་པ་ཉིད་སྒྲ་དང་རེག་པ་དང་རོ་དང་གཟུགས་དང་དྲི་སྡུག་པ་རྣམ་པ་སྣ་ཚོགས་དག་གིས་དབང་དུ་བྱས་པ་དག་ཇི་ལྟར་ཚེ་རབས་གཞན་དུ་བྱ་བ་དང་མི་བྱ་བ་དག་བྱས་པ་ལྟར་བྱའི་སྒྲ་དེ་དག་ཅུང་ཟད་ཀྱང་ཡིད་ལ་མི་འཇོག་གོ །དེ་ལྟར་སེམས་འདི་ད་ལྟར་བྱུང་བའི་ཡུལ་ལ་བརྐམ་ཞིང་མ་འོངས་པའི་ཉོན་མོངས་པ་ཁོང་དུ་མི་ཆུད་ལ་ཤིན་ཏུ་མི་དྲན་ནོ། །ད་ལྟར་བྱུང་བའི་ཡུལ་ལ་མངོན་པར་འདོད་པས་རྨོངས་པ། སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་སམ་གལ་ཏེ་ཡང་ལྷ་དང་མི་རྣམས་ཀྱི་ནང་ན་འཁྱམ་མོ། །དེ་ལྟར་ཐོག་མ་མེད་པའི་དུས་ནས་ཉོན་མོངས་པ་རྩུབ་མོ་བྱས་པ་མི་དྲན་ལ་སྡུག་བསྔལ་རྗེས་སུ་མྱོང་སྟེ། སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྡུག་བསྔལ་མི་བཟད་པ་ཤིན་ཏུ་ཚ་བ་འབྱུང་ངོ་། །ཐོག་མ་མེད་པའི་དུས་ནས་བཅོས་དཀའ་ཞིང་གདུལ་བ་དཀའ་བ་དེ་དག་ཡིད་ཤིན་ཏུ་རྒྱ་ཆེ་བ་མ་གཏོགས་པར་གདུལ་བར་མི་ནུས་སོ། །དེ་ནས་དགེ་སློང་དེ་དཔྱོད་པར་བྱེད་དེ་བྱ་རྣམས་ལས་གང་གིས་བག་མེད་པར་གནས་པའི་ལྷ་རྣམས་ལ་ཡང་དག་པར་གྱུར་པ། སྙིང་པོ་མེད་པ་མ་ཡིན་
པའི་ཆོས་ཁོང་དུ་ཆུད་པར་བྱེད་སྙམ་ནས། དེས་ཐོས་པ་ལས་བྱུང་བའི་ཤེས་པའམ་ལྷའི་མིག་གིས་བརྟགས་ན། མིའི་འཇིག་རྟེན་ན་གྱད་དམ་སིལ་དཀྲོལ་བའམ་གར་མཁན་རབ་ཏུ་མྱོས་པར་གནས་པ་གང་ཡིན་པ་དེ་དག་གོས་ངུར་སྨྲིག་བགོས་ཏེ་གར་བྱེད་དམ། དེ་ནས་སངས་རྒྱས་ཀྱི་ཡོན་ཏན་གླུ་དབྱངས་སུ་ལེན་ལ། དེ་ལས་ནོར་རྫས་ཀྱི་རྣམ་པའམ་གོས་སམ་འབྲས་བུ་བྷ་ལ་ལཱ་ཏ་ཀ་ཐོབ་པ་དེ་དག་དགེ་སློང་དང་བྲམ་ཟེ་དག་ལ་སྦྱིན་པར་མི་བྱེད་ཀྱི། གཞན་དུ་ན་ཤིན་ཏུ་མགུ་ནས་སྤྱོད་པར་བྱེད་པ་དེ་དག་གོས་ངུར་སྨྲིག་བགོས་པ་ཙམ་ཉིད་ཀྱིས་དེ་ལུས་དང་བྲལ་ནས་ཤི་བའི་འོག་ཏུ་དེའི་ལས་ཀྱི་མཐུས་ལྷ་རྣམས་ཀྱི་བྱ་ཤིན་ཏུ་བདེ་བར་འགྱུར་བ་མཐོང་ངོ་། །དེ་ནས་ཡང་ལྷ་ཕན་ཚུན་གྲོགས་སུ་གྱུར་པ་རྒྱགས་པ་འབའ་ཞིག་དོན་དུ་བྱེད་པ་དག་བཻ་ཌཱུརྱའི་ཤིང་ལྗོན་པ་གསེར་གྱི་འདབ་མ་དང་ཤེལ་གྱི་ལྕུག་མས་དཀྲིགས་པའི་ལོ་མ་དང་། གཞན་ཡང་ལྕུག་མ་དང་། ཤིང་གིས་ཁེབས་པ་དང་བྱི་རུ་མཛེས་པ་སྣ་ཚོགས་དང་། བུང་བ་འབུམ་སྙེད་ཀྱིས་ཡོངས་སུ་བསྐོར་བ་དང་། གསེར་དང་། མུ་ཏིག་གི་ལྡུམ་བུ་སྔོན་པོ་ཉམས་དགའ་བ་རྣམས་ན་བྲོ་རྡུང་གླུ་ལེན་ཏོ། །གཞན་ཡང་རིའི་རྒྱལ་པོ་རི་རབ་ཀྱི་རྩེ་མོ་རིན་པོ་ཆེ་སྣ་བདུན་གྱིས་རྣམ་པར་བརྒྱན་པ། འབར་བའི་ཕྲེང་བ་འཁྲུགས་པ་ལྟ་བུ་དང་། གཞན་ཡང་གསེར་དང་། དངུལ་དང་། ཤེལ་དང་། བཻ་ཌཱུརྱའི་པད་མའི་རྫིང་རྣམས་སུ་རྩེ་བར་བྱེད་དོ། །ཡང་ཕྱོགས་གཞན་ན་གཞལ་མེད་ཁང་བ་གམ་གྱི་ཕྲེང་བ་གསལ་ཞིང་མཛེས་པ་རྣམས་ན་རྩེ་བར་བྱེད་ཡོངས་སུ་སྤྱོད་པར་བྱེད་དེ། ལྷ་མོ་དང་ལྷན་ཅིག་འཐབ་མོ་དང་ཕྲག་དོག་གི་རྣམ་པ་འཇིགས་པས་སྐྱོ་བ་མེད་པ་ཕན་ཚུན་གནོད་པ་མེད་པ། གུས་པ་སྐྱེ་ཤིང་དེ་ལ་ཡིད་དད་པར་གྱུར་པ་རྣམས་བདེ་བ་ཤིན་ཏུ་དཔེ་མེད་པ་མྱོང་བར་བྱེད་དོ། །དེ་ནས་ཡང་ལྷ་དེ་རྣམས་དཔག་བསམ་གྱི་ཤིང་གི་ཕྱོགས་སུ་བྲོ་རྡུང་ཞིང་འཇུག་པར་བྱེད་ལ། དེར་ཞུགས་ནས་ཀྱང་རྟོག་པ་དང་བཅས་པའི་བློ་ཡིད་ལ་འདོད་པ་གང་ཡིན་པ་དེ་དག་ཐམས་ཅད་མཐོ་རིས་དང་འཐུན་པར་འཐོབ་སྟེ། དེ་དག་དཔག་བསམ་གྱི་ཤིང་ཞེས་བྱ་བའི་མིང་འཐོབ་བོ། །
དེར་ཡང་དེ་དག་ཡུན་རིང་དུ་ཡུལ་གྱི་བདེ་བ་འདོད་པ་སྡུག་པ་ཡིད་དུ་འོང་བ་ཉེ་བར་སྤྱད་ནས། གསེར་ལས་བྱས་པའི་རི་རབ་མཐོ་བ་དེ་ག་ལ་བ་དེར་འདོང་བར་བྱེད་དེ། འབབ་ཆུ་སྣ་ཚོགས་ཀྱིས་བརྒྱན་པར་དེ་དག་འཛེག་པར་བྱེད་དོ། །ལྷའི་ཚོགས་ཀྱིས་ཡོངས་སུ་བསྐོར་ཅིང་གླུ་དབྱངས་དང་སིལ་སྙན་དང་རོལ་མོའི་སྒྲ་འབྱིན་པས་རྣ་གུང་གཡེར་བ་དེ་ལ་ཡིད་ཞུགས་པ་ཡུལ་གྱི་བདེ་བ་ལྷའི་རྣ་བར་སྒྲ་སྙན་པ་ཐོས་སོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་བརྒྱད་པ། ལྷ་རྣམས་ཀྱི་མིག་གི་ཡུལ་དུ་བྱས་པ་ཡང་བདེ་བ་དཔེ་མེད་པ་ཤིན་ཏུ་རྒྱ་ཆེ་བ་མྱོང་སྟེ་འདི་ལྟ་སྟེ། ལྷའི་གཟུགས་དང་ཆ་བྱད་དང་རྒྱན་སྣ་ཚོགས་དང་རང་གི་ལས་ཀྱིས་སྤྲུལ་པའི་གཟུགས་དང་ཆ་བྱད་དང་རྒྱན་གོང་ནས་གོང་དུ་རྣམ་པ་སྣ་ཚོགས་དག་མཐོང་ངོ་། །རི་རབ་ལ་ཡང་ཚལ་དང་ནགས་ཚལ་དང་ལྟེང་ཀ་དང་པད་མའི་གཟུགས་རྣམ་པ་དུ་མ་དང་དེ་བཞིན་དུ་མེ་ཏོག་གི་ཚལ་དང་ཉེ་བའི་ཚལ་རྣམ་པ་སྣ་ཚོགས་དམིགས་པ་དུ་མ་ཡོད་པའི་དྲི་ཞིམ་པོ་མངོན་པར་འབྱུང་བ་དག་ལ་ལྷ་རྣམས་སྣོམ་པར་བྱེད་དེ། ཤིན་ཏུ་ཡིད་དུ་འཐད་ཅིང་ཡུལ་གྱི་རེག་པ་ལ་རྣམ་པར་ཆགས་པར་འགྱུར་རོ། །ལྷ་རྣམས་གང་རེག་པར་འདོད་པ་དེ་ཉིད་ཀ་ཙ་ལིན་དི་ཀ་ལྟ་བུར་འཇམ་པ་ཡིན་ཏེ། རྡུལ་དང་བྲལ་བ་དྲི་མ་དང་བྲལ་བ་ཐགས་སུ་མ་བཏགས་པ། ཚོན་དུ་མ་གསལ་བ། དྲི་མངོན་པར་ཞིམ་པ། མཐོང་ན་ཤིན་ཏུ་ཡིད་འཕྲོག་པ་ཡིན་ཏེ། དེ་ལྟར་རེག་པའི་ཡུལ་གྱིས་ལྷ་རྒྱགས་པ་རྣམས་མྱོས་ཤིང་གནས་སོ། །གཞན་ཡང་ཡིད་ལ་སེམས་པ་གང་ཡིན་པ་དེ་དེ་ཉིད་ཡོན་ཏན་དུ་མ་དང་ལྡན་པ། ཐུན་མོང་མ་ཡིན་པ། གཞན་གྱི་མཐུས་ཉམས་པ་མ་ཡིན་པ། གདུག་པ་མ་ཡིན་པ་དག་འགྲུབ་པར་འགྱུར་རོ། །དེ་ལྟར་བདེ་བའི་མྱོས་པ་རྣམ་པ་དུ་མ་ལ་གནས་པ་རང་གི་འོད་དང་ལྡན་ཞིང་ལྷ་མོའི་ཚོགས་དུ་མས་ཡོངས་སུ་བསྐོར་བའི་ལྷ་དེ་དག་གནས་དེ་རྣམས་སུ་སྐྱེ་བར་འགྱུར་ཏེ། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་དེ་ཟད་པར་མ་གྱུར་པ་དེ་སྲིད་དུ་རྩེ་བར་བྱེད་དགའ་དགུར་སྤྱོད་པར་བྱེད་བདེ་
བ་མྱོང་བར་བྱེད་དོ། །དེ་ཕྱིས་ལྷའི་འཇིག་རྟེན་ཤིན་ཏུ་ཡིད་དུ་འོང་བ་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། ལས་དེ་དང་རྒྱུ་འཐུན་པར་དེ་སྐྱེས་ཕན་ཆད་ནས་རྟག་ཏུ་བདེ་བར་འགྱུར་ཞིང་། བོང་སྐྱེད་ཆེ་བ་དང་གང་ན་ཆོས་དང་འཐུན་པ་དང་ཡང་དག་པའི་ལྟ་བ་དང་ལྡན་པའི་ཡུལ་བཟང་པོར་རྒྱལ་པོའམ་བློན་པོ་ཆེན་པོར་སྐྱེ་བར་འགྱུར་ཏེ། སྐྱེས་བུ་དམ་པ་སྡིག་པའི་གྲོགས་པོ་དང་ཕྲད་པར་མི་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་ས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ཤིང་སཱ་ལ་ཟུང་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ཡང་དག་པའི་ལྟ་བ་ལ་ཞུགས་པ་ཚུལ་ཁྲིམས་དང་ལྡན་པར་གྱུར་ཅིང་། སེམས་ཅན་རྣམས་ལ་ཕན་པར་འདོད་པས་རྟག་ཏུ་ཚུལ་ཁྲིམས་དང་ལྡན་པར་གྱུར་ལ། ཡང་དག་པའི་ལུས་དང་ངག་ལ་ཞུགས་པར་གྱུར་པ་གང་གིས་འདི་ལྟར་འབྲོག་གི་སེམས་ཅན་སྐོམ་པ་རྣམས་སྲོག་ཆད་པར་མི་བྱའོ་སྙམ་ནས། དེ་ཡང་དེ་ལྟར་སེམས་པ་ཡོངས་སུ་བསྒོམས་པས་སེམས་སྒོམ་པར་བྱེད་དེ་རི་འོར་དང་འབྲོག་དག་ཏུ་ཡུར་ཆུ་དང་འབབ་ཆུ་དང་ལྟེང་ཀ་དང་རྫིང་བུ་དག་བྱས་པར་ཆུ་ཆེན་པོ་དག་ལས་འབེབས་པར་བྱེད། སྲོག་ཆགས་རྣམས་ཀྱི་ལམ་ནོར་བ་དང་ལམ་ནོར་ནས་འབྲོག་དགོན་པ་དག་ཏུ་ཞུགས་ཏེ། འཇིགས་ནས་བཞིན་མོག་མོག་པོར་གྱུར་པ་ལམ་གོལ་བ་དགོན་པ་ཆེན་པོར་ཞུགས་པ་དེ་དག་ལ་ལམ་སྟོན་པར་བྱེད་ཅིང་། ཉོན་མོངས་པ་ཆེན་པོ་དེ་ལས་སྒྲོལ་བར་བྱེད་ཀྱང་དེ་དག་གིས་འཚོ་བར་མི་བྱེད་ལ་སེམས་ཅན་ལ་ཕན་པར་ཞུགས་པ་ཁོ་ན་ཡིན་ཏེ། དེ་དག་ནི་སྦྱིན་པ་སྦྱིན་ཞིང་སྲོག་སྐྱོབ་པ་ཡང་ཡིན་ནོ། །ཡང་སྲོག་གཅོད་པ་དང་མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། འདི་ལ་
དེ་དག་ཉིད་དམ་གཞན་ཞིག་བསམ་པ་དེ་དང་འཐུན་པར་ཞུགས་པ་དགེ་བའི་ལས་ཀྱི་མཐའ་སྤྱད་པ་དག །དེ་ལྟར་སྲོག་ཆགས་གསད་པའི་རྒྱུ་ཡོད་ཀྱང་གསོད་པར་མི་བྱེད་པ་ཡིན་ཏེ་འདི་ལྟ་སྟེ། ཁྱིམ་ན་སྲོག་ཆགས་དྲོད་གཤེར་ལས་སྐྱེས་པའམ་མངལ་ནས་སྐྱེས་པ་ཕྲ་མོའམ་སྦོམ་པོར་འབྱུང་བ་དག་ཁྱིམ་དེའི་རྫས་འཇིག་པར་བྱེད་པའམ་དེ་བཞིན་དུ་ཉལ་བའི་སྟེང་དུ་ལྷུང་ནས་གཉིད་འདྲོགས་པར་བྱེད་ཀྱང་སེམས་ཅན་རྣམས་ལ་ཕན་པར་འདོད་པ་དེ་གསོད་པར་མི་བྱེད། སྦལ་པ་དང་སྡིག་པ་ཡང་གསོད་པར་མི་བྱེད། སྲོག་ཡོངས་སུ་ཆད་ལ་ཐུག་ཀྱང་དེ་དག་ལ་གསོད་པར་མི་བྱེད་ཅིང་གདུག་པ་ལ་ཡང་བཟོད་པར་བྱེད་དོ། །དེ་ལྟར་དེ་དག་གསད་པའི་རྒྱུ་ཡོད་ཀྱང་སྲོག་ཆགས་རྣམས་ལ་འཚེ་བར་མི་བྱེད་ཅིང་སྲུང་བར་བྱེད་པ་ཡིན་ཏེ་དེ་དག་ནི་སྲོག་གཅོད་པ་སྤངས་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་རྣམ་པ་ནི་དུ་ཡོད་ཅེ་ན། དེ་ལྟར་ལེགས་པར་བྱས་པའི་ལས་ཀྱི་མཐའ་སྤྱོད་པ་དེའི་འབྲོག་དགོན་པར་ཞུགས་པའི་དཔོན་པོར་གྱུར་ཀྱང་། ཚོང་པ་རྣམས་ཀྱིས་ཚོང་པའི་ཕྱིར་ཆུ་དང་ལན་ཚྭ་ནག་པོར་བསྲེས་པ་གང་ཡིན་པ་དེ་དག་ཀྱང་སྲུང་བར་བྱེད་ལ་སྐོམ་པས་གདུངས་ཏེ། སྲོག་ཆད་ལ་ཐུག་ཀྱང་ཆུ་དེ་དག་ཚོང་པས་མ་བླུད་ཀྱི་བར་དུ་འཐུང་བར་མི་བྱེད་ལ། གང་གི་ཚེ་ཚོང་པས་བླུད་པ་དེའི་ཚེ་ཆུ་དེ་ལ་འཐུང་བར་བྱེད་ཅིང་གཞན་དག་ལ་ཡང་ལྡུད་པར་བྱེད་དེ། དེ་ལྟར་དབང་ཡོད་པར་གྱུར་ཀྱང་རིན་མ་བྱིན་པར་མི་ལེན་ཏེ། འདི་ཡང་མ་བྱིན་པར་ལེན་པ་སྤངས་པ་ཡིན་ནོ། །ལས་ཀྱི་འབྲས་བུ་ཤིན་ཏུ་ཕྲ་མོ་མཐོང་བ། རྟག་པར་སངས་རྒྱས་དང་ཆོས་ཀྱི་རྗེས་སུ་ཞུགས་པ། དེའི་ཡོན་ཏན་དྲན་པ་ལྷུར་བྱེད་ལ། སེམས་པས་སེམས་བསྒོམས་པ་ནི་སྡིག་པའི་གྲོགས་པོ་དང་ཡུད་ཙམ་ཡང་མི་སྟེན། ཀུན་དུ་སྨྲ་བའི་ཚིག་ཙམ་ཡང་མི་སྨྲ། དེ་དང་ལམ་དུ་ཡང་འགྲོགས་པར་མི་བྱེད། གང་དགེ་བའི་ཆོས་ཐམས་ཅད་ཀྱི་བར་ཆད་བྱེད་པའི་གཙོ་བོ་ནི་འདི་ཡིན་ཏེ་འདི་ལྟ་སྟེ། སྡིག་པའི་གྲོགས་པོ་དང་འདུ་བ་ཞེས་བྱ་བ་ཡིན་ལ། དེ་དང་སྨྲ་བའམ་དེ་དང་ལྷན་ཅིག་འོང་ཞིང་འགྲོ་བའམ་དེའི་གྲིབ་
མ་དང་ཕྲད་པར་ཡང་མི་བྱེད་དོ། །དེ་ཅིའི་ཕྱིར་ཞེ་ན། འདོད་ཆགས་དང་ཞེ་སྡང་དང་གཏི་མུག་རྣམས་ཀྱི་གཞིར་གྱུར་པ་ནི་སྡིག་པའི་གྲོགས་པོ་དུག་གི་ཤིང་ལྗོན་པ་ལྟ་བུ་ཡོངས་སུ་སྤང་བར་བྱ་བ་ཡིན་ཏེ། དེ་ལྟར་སྐྱེས་བུ་དམ་པ་ཀུན་ནས་གསེར་བཙོ་མ་ལྟ་བུར་གྱུར་པ་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ཤིང་སཱ་ལ་ཟུང་གི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ་དེ། ལེགས་པར་བྱས་པ་ཁ་ན་མ་ཐོ་བ་མེད་པ། སྐྱེ་བོ་དགེ་བ་ཀུན་གྱིས་མཆོད་པ། དེའི་ལེགས་པར་བྱས་པའི་ལས་ངེས་པར་མྱོང་བར་འགྱུར་བ། ལྷའི་ནང་དུ་སྐྱེ་བར་འགྱུར་བའི་འབྲས་བུ་ལ་ཉེ་བར་སྤྱོད་པར་འགྱུར་ཏེ་འདི་ལྟ་སྟེ། ལྷ་དེ་རང་གི་འོད་འབྱུང་བར་འགྱུར་ལ་དེའི་འོད་ཇི་ལྟར་མིའི་གྲངས་ཀྱི་ཚུལ་གྱིས་ཉིན་གཅིག་བཞིན་བགྲངས་པ་དང་ཞག་དང་ཟླ་བར་འཕེལ་བར་འགྱུར་བ་དེ་ལྟར་རྒྱུ་གང་གིས་འོད་དེ། ལྷ་རྣམས་ཀྱི་ཉིན་མོ་དང་མཚན་མོ་མེད་པར་རང་གི་འོད་ཀྱིས་གསལ་བར་འགྱུར་ཏེ། དེ་ལྟར་ལྷའི་འོད་དེ་འཕེལ་བ་ཡིན་ནོ། །འདི་ལྟར་ལྷ་གཞན་དག་ཀྱང་། འདི་ནི་བདག་ཅག་གི་གནས་གཞན་དུ་སྐྱེས་པའི་ལྷ་ཐམས་ཅད་པས་འོད་ལྷག་པར་བཟང་ངོ་སྙམ་ནས། ལྷ་མོ་དག་གི་མདུན་དུ་ཤིན་ཏུ་ངོ་ཚ་བ་སྐྱེའོ། །དེ་ནས་ལྷ་རྣམས་བརྒྱ་བྱིན་གྱི་དྲུང་དུ་སོང་ནས་དྲིས་པ། ཀྱེ་བརྒྱ་བྱིན་འདི་ལྟར་ལྷ་གསར་དུ་སྐྱེས་པ་ཞིག་མཆིས་ཏེ། དེའི་འོད་ཀྱིས་བདག་ཅག་ཐམས་ཅད་ཟིལ་གྱིས་མནན་ནས་མཆིས་སོ། །དེ་ནས་བརྒྱ་བྱིན་གྱིས་དེའི་ཚེ་འདི་ལྟར་ཚིགས་སུ་བཅད་དེ་སྨྲས་པ། གསེར་གྱི་རི་བོ་རི་རབ་འདི། །འོད་ཀྱི་ཕྲེང་བ་གང་ཡིན་པ། །འོད་དེ་ཚུལ་ཁྲིམས་ལས་བྱུང་འདིའི། །བཅུ་དྲུག་ཆར་ཡང་མི་ཕོད་དོ། །ཚུལ་ཁྲིམས་རྟག་ཏུ་འབར་བ་ན། །གསེར་ནི་བཙོ་མ་ལྟ་བུ་སྟེ། །རང་གི་ལས་ཀྱིས་ཡང་དག་ལྡན། །སུམ་ཅུ་རྩ་གསུམ་བརྒྱན་པར་འགྱུར། །དམན་དང་འབྲིང་དང་ཁྱད་པར་འཕགས། །ཚུལ་ཁྲིམས་རྣམ་པ་གསུམ་རྣམས་ཀྱི། །འབྲས་བུ་དེ་བཞིན་རྣམ་གསུམ་སྟེ། །དམན་དང་འབྲིང་དང་མཆོག་ཏུ་མཐོང་། །བག་མེད་སྤངས་པའི་ཚུལ་ཁྲིམས་ནི། །བག་ཡོད་པ་ཡིས་
འཕེལ་བ་ཡིན། །དེ་ནི་རྟག་ཏུ་བདེ་སྦྱིན་མཐོང་། །འདི་ནི་ཆོས་ཉིད་རྣམ་པར་གནས། །ལུས་ཅན་ཚུལ་ཁྲིམས་ལས་བྱུང་བའི། །དྲི་མེད་འོད་ནི་གང་ཡིན་པ། །དེ་ནི་ཉི་མ་སྟོང་སྙེད་དག །འདུས་པའི་འོད་ཀྱིས་ཐུབ་མི་འགྱུར། །ཚུལ་ཁྲིམས་རྣམ་བདུན་དགའ་བ་དག །མི་མཆོག་དམ་པ་གང་སྲུང་བ། །སངས་རྒྱས་ཀྱིས་ནི་བཤད་པ་གང་། །དེ་ནི་ལས་ཀྱི་འབྲས་བུ་སྤྱོད། །ལུས་ཅན་ལེགས་པར་བྱས་པ་ཡི། །ལས་རྣམས་འདིར་ནི་ཆུད་མི་ཟ། །དེ་བཞིན་ལས་རྣམས་མ་བྱས་པའི། །འོང་བར་མ་མཐོང་འཇིག་པའང་མེད། །བྱིས་པ་རྒྱུ་ལ་མ་ཆགས་ལ། །རྣམ་པར་སྨིན་ལ་ཆགས་པར་བྱེད། །བྱེ་མ་རྣམས་ལ་མར་མེད་ལྟར། །རྒྱུ་མེད་ན་ནི་འབྲས་བུ་མེད། །སེར་སྣ་མེད་ཅིང་དགེ་བ་ཡི། །སྐྱེས་བུ་དགེ་བ་སྤྱོད་པ་ཡིན། །སྡིག་པའི་བདག་ཉིད་རྨོངས་པ་གང་། །དེ་ནི་རྟག་ཏུ་ཁྲོ་ལ་སྤྱོད། །དེ་ལྟར་ལྷ་དེ་དག་ལ་བརྒྱ་བྱིན་དེས་ལེགས་པར་བྱས་པའི་ལས་ཀྱི་འབྲས་བུ་ཁོང་དུ་ཆུད་པར་བསྙད་དོ། །དེ་ནས་ལྷ་རྣམས་བརྒྱ་བྱིན་གྱི་ཚིག་དེ་སྤྱི་བོས་བླངས་ནས་ཡང་ཤིང་སཱ་ལ་ཟུང་གི་གནས་ག་ལ་བ་དེ་ཉིད་དུ་འདོང་བར་བྱེད་དོ། །དོང་ནས་དེ་ལྷ་དང་ལྷ་མོའི་ཚོགས་དང་ལྷན་ཅིག་དགའ་བར་བྱེད། དགའ་དགུར་སྤྱོད་པར་བྱེད་ཅིང་སིལ་སྙན་སྣ་ཚོགས་ཀྱི་སྒྲ་འབྱིན་པ་རྗེས་སུ་འབྲང་བཞིན་དུ་ཤིང་སཱ་ལ་དེ་གཉིས་ཀྱི་གནས་ག་ལ་བ་དེ་ཉིད་དུ་འདོང་བར་བྱེད་དོ། །ཤིང་སཱ་ལ་དེ་གཉིས་ཀྱང་སུམ་ཅུ་རྩ་གསུམ་དུ་གཏོགས་པའི་ཚལ་དང་ཉེ་བའི་ཚལ་ཐམས་ཅད་པས་ཚད་དང་མདོག་དང་མེ་ཏོག་དང་འོད་དག་གིས་ལྷག་པ་ཡིན་ནོ། །ཤིང་སཱ་ལ་དེ་གཉིས་ཀྱང་དྲིལ་བུ་གཡེར་ཀ་སྒྲ་འབྱུང་བའི་དྲ་བ་འཕྱང་བ་དང་། ལོ་མ་ལས་ཀྱང་ཇི་ལྟར་སིལ་སྙན་ཡན་ལག་ལྔ་དང་ལྡན་པའི་སྒྲ་འབྱུང་བ་དེ་ལྟར་དེ་གཉིས་ལ་སྒྲ་འབྱུང་ངོ་། །དེ་དག་ལོ་མའི་སྒྲ་དེ་ཐོས་ནས་ཡང་དགའ་བར་གནས་པར་བྱ་བའི་ཕྱིར་ཤིང་སཱ་ལ་དེ་གཉིས་ག་ལ་བ་དེ་ཉིད་དུ་འདོང་བར་བྱེད་དོ། །དེ་ནས་ཉེ་བར་དོང་ནས་ལྷ་དེ་དག་ཤིང་སཱ་ལ་དེ་གཉིས་ལ་འཛེག་པར་བྱེད་དོ། །ཤིང་སཱ་ལ་དེ་གཉིས་ཀྱི་སྟེང་ན་ཡང་པད་མའི་རྫིང་ཆུ་རབ་ཏུ་དགའ་
བ་ཞེས་བྱ་བ་ཡོད་དེ། བྱ་ངང་པ་དང་ཀཱ་རཎྜ་བ་དང་ངུར་པ་སྒྲ་སྙན་པ་འབྱིན་ཅིང་རྟག་ཏུ་ཆུ་ཡན་ལག་བརྒྱད་དང་ལྡན་པས་ཤིན་ཏུ་གང་བ་ཡིན་ནོ། །དེ་ལ་འཛེགས་ནས་ལྷ་རྣམས་ཀྱིས་འདི་ལྟར་ཤིང་སཱ་ལ་འདི་གཉིས་མ་གཏོགས་པར་ཤིང་ལྗོན་པ་གང་གི་སྟེང་ན་ཡང་། པད་མའི་རྫིང་མེད་པ་ཤིན་ཏུ་ངོ་མཚར་ཆེ་བ་འདི་མཐོང་སྟེ། ཀྱེ་མ་ཤིང་སཱ་ལ་འདི་གཉིས་ནི་ཤིང་ཡོངས་འདུ་ས་བརྟོལ་མ་གཏོགས་པར་ཤིང་ལྗོན་པ་ཐམས་ཅད་ཀྱི་ནང་ན་ཀུན་གྱི་གཙོ་བོ་ཡིན་ཞིང་ཐམས་ཅད་དུ་དགའ་བ་ཡིན་ནོ་སྙམ་མོ། །དེ་ནས་དེ་དག་རིག་ནས་དེ་གཉིས་ཀྱི་སྟེང་ན་ལྷ་དེ་དག་ལྷ་མོའི་ཚོགས་དང་ལྷན་ཅིག་བདེ་བ་ཉེ་བར་སྦྱར་བ་དང་ཡུལ་གྱི་བདེ་བ་སྣ་ཚོགས་ཀྱིས་དགའ་བར་བྱེད་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་དག་དེར་ཡུན་རིང་དུ་བདེ་བ་དག་མྱོང་ནས་རྟག་ཏུ་རྩེ་བ་ཞེས་བྱ་བ་ག་ལ་བ་དེར་མགོ་ལ་པད་མའི་ཕྲེང་བ་ཐོགས་པ་ཐགས་སུ་མ་བཏགས་པའི་གོས་ཁ་དོག་རྣམ་པ་སྣ་ཚོགས་བགོས་པ། ཁ་དོག་སྣ་ཚོགས་ལས་ལུས་ཀྱི་འོད་འབྱུང་བ་རྣམས་འདོང་བར་བྱེད་དོ། །ལྷ་དེ་རྣམས་ཀྱི་ལུས་ལས་འོད་འབྱུང་བ་གང་ཡིན་པ་དེ་ཅུང་ཟད་ཅིག་དཔེར་བྱ་ན། ཇི་ལྟར་མིའི་འཇིག་རྟེན་ན་དབྱར་གྱི་དུས་སུ་འཇའ་ཁ་དོག་ཅན་ཁ་དོག་སྡུག་གུ་གསུམ་དང་ལྡན་པ་འབྱུང་བ་དེ་ལྟར་ལྷ་དེ་རྣམས་ཀྱི་པད་མ་དེ་དག་ལས་འོད་སྔོན་པོ་དང་སེར་པོ་དང་དམར་པོ་འབྱུང་ངོ་། །དེ་ནས་ལྷ་དེ་དག་དགའ་བར་གནས་པར་བྱ་བའི་ཕྱིར་སྐྱེད་མོས་ཚལ་དུ་དགའ་སྤྱོད་བྱེད་དུ་འདོང་སྟེ། འདོད་པའི་ཡོན་ཏན་ལྔ་དང་ལྡན་ཞིང་ཡུལ་གྱི་བདེ་བ་ལ་ཉེ་བར་སྤྱོད་པ་ནི། རི་བོའི་ཆུ་བོའི་ཤུགས་ལྟར་ཐམས་ཅད་དུ་ཡུལ་གྱི་བདེ་བ་རྗེས་སུ་མྱོང་ངོ་། །དེ་ནས་ལྷའི་རྒྱལ་པོ་བརྒྱ་བྱིན་ཤིང་སཱ་ལ་ཟུང་གི་ལྷ་རྣམས་ཀྱི་ས་ག་ལ་བ་དེར་ཆོས་བཟང་ན་གནས་པའི་ལྷའི་ཚོགས་ཀུན་དང་ལྷན་ཅིག་སྐྱེད་མོས་ཚལ་དུ་དགའ་སྤྱོད་བྱ་བའི་ཕྱིར་འདོང་བར་བྱེད་དེ། སིལ་སྙན་དང་རོལ་མོའི་སྒྲ་སྣ་ཚོགས་འབྱིན་ཅིང་། ལྷ་མོའི་ཚོགས་རྣམ་པ་སྣ་ཚོགས་དག་མདུན་ན་གླུ་དབྱངས་ལེན་བཞིན་དུ་འདོང་བར་བྱེད་དོ། །དེ་ནས་བརྒྱ་བྱིན་གང་ནས་འོང་བ་དེར་ཤིང་སཱ་ལ་ཟུང་གི་ལྷ་རྣམས་འོང་བར་བྱེད་དོ། །འོངས་ནས་དེ་དག་ཀྱང་སིལ་སྙན་དང་རོལ་མོའི་སྒྲ་སྣ་
ཚོགས་འབྱིན་ཅིང་། ལྷ་མོའི་ཚོགས་ཀྱིས་བསྐོར་བ་རྣམས་ཐལ་མོ་སྤྱི་བོར་སྦྱར་ཏེ། བརྒྱ་བྱིན་ལ་མཆོད་ནས་ལྷ་མོ་དང་ལྷ་དེ་དག་ཀུན་ཀྱང་ཕན་ཚུན་འདྲེས་ཤིང་ཆོས་བཟང་ན་གནས་པ་དང་ཤིང་སཱ་ལ་ཟུང་གི་ས་ན་གནས་པ་དེ་དག་ཕན་ཚུན་གྲོགས་སུ་གྱུར་པ། ཤིན་ཏུ་སྙིང་དུ་སྡུག་པར་གྱུར་པ་ཕན་ཚུན་ཡིད་ལ་གནོད་པ་མེད་པ་ཕན་ཚུན་འཐུན་པར་གྱུར་པ་རྣམས་སིལ་སྙན་ཡན་ལག་ལྔ་དང་ལྡན་པ་ཆགས་སུ་རུང་བ་སྙན་པ་འཐུན་པ་འཐུན་པ་ཉིད་དང་རྗེས་སུ་ལྡན་པ་སྐྱེ་བོ་ཐམས་ཅད་ཀྱི་སྙིང་འཛིན་པར་གྱུར་པས་བྲོ་རྡུང་ལ་དགོད་བཞིན་དུ་ཤིང་སཱ་ལ་ཟུང་དེ་གཉིས་ག་ལ་བ་དེར་འདོང་བར་བྱེད་དོ། །དོང་ནས་ཀྱང་ལྷ་དེ་རྣམས་ཀུན་གྱི་སྔོན་དུ་འགྲོ་བ་བརྒྱ་བྱིན་ཡོངས་སུ་བསྐོར་ནས་བྲོ་རྡུང་བར་བྱེད་དགོད་པར་བྱེད་ཆང་ཞིམ་པོ་དག་ཀྱང་འཐུང་བར་བྱེད་དོ། །དེ་ནས་ལྷའི་རྒྱལ་པོ་བརྒྱ་བྱིན་གྱིས་ལྷ་དེ་དག་ལ་འདི་སྐད་སྨྲས་སོ། །ལྷ་དག་ཤིང་ཡོངས་འདུ་ས་བརྟོལ་མ་གཏོགས་པར་སུམ་ཅུ་རྩ་གསུམ་པའི་ཚལ་དང་ཉེ་བའི་ཚལ་ཤིང་ལྗོན་པ་ཐམས་ཅད་ཀྱི་ནང་ན་ཀུན་ཏུ་གཙོ་བོར་གྱུར་པ་ཤིང་སཱ་ལ་ཟུང་འདི་གཉིས་ལ་ལྟོས། ལྷའི་རྒྱལ་པོ་མཐོང་ལགས་སོ། །དེ་ནས་བརྒྱ་བྱིན་གྱིས་དེ་དག་ལ་འདི་སྐད་སྨྲས་སོ། །ཀྱེ་ལྷ་ཁྱེད་ཅག་གིས་ཤིང་སཱ་ལ་ཟུང་འདིའི་མཐུ་མ་ཤེས་ཀྱི་ལྷ་ཁྱེད་རྣམས་ཀྱིས་གཟུགས་འབའ་ཞིག་ཤེས་པར་ཟད་དེ། ཤིང་སཱ་ལ་འདི་གཉིས་ཀྱི་མཐུ་ལྟོས་ཤིག །དེ་ནས་ལྷའི་རྒྱལ་པོ་བརྒྱ་བྱིན་ཤིང་རྟ་ལས་བབས་ནས། རྡོ་རྗེའི་ཕྱོགས་གཅིག་གིས་ཤིང་སཱ་ལ་ཟུང་ཡ་གཅིག་ལ་བསྣུན་པ་དང་། དེ་ནས་སྡོང་པོ་ལས་སྒོ་བྱེ་སྟེ་ཤིང་སཱ་ལ་དེའི་ནང་ན་སྟེགས་དང་འབབ་ཆུ་དང་ལྟེང་ཀ་དང་ཚལ་དང་ཉེ་བའི་ཚལ་ཉམས་དགའ་བ་སྣ་ཚོགས་དང་འབབ་ཆུ་ཡང་ཤིན་ཏུ་བསིལ་ཞིང་པད་མའི་ཚལ་གྱིས་ཁེབས་པ། སྟེགས་དང་རི་རྩེ་དག་གིས་བརྒྱན་པ། ཁ་ཅིག་ནི་ནོར་བུ་ལས་བྱས། ཁ་ཅིག་ནི་དངུལ་ལས་བྱས། ཁ་ཅིག་ནི་ཤེལ་ལས་བྱས། ཁ་ཅིག་ནི་བཻ་ཌཱུརྱ་ལས་བྱས་པ་ཡིན་ཏེ། འབབ་ཆུ་དང་ཆུ་བོ་དང་རི་བོ་ཉམས་དགའ་བ་སྣ་ཚོགས་པ་དག་མཐོང་ངོ་། །དེ་ནས་
གཞན་ཡང་ལྷ་དེ་རྣམས་ཤིང་སཱ་ལ་ཟུང་དེ་ཡ་གཅིག་གི་ནང་དུ་ཞུགས་པ་དང་པད་མའི་རྫིང་རིན་པོ་ཆེ་སྣ་བདུན་གྱི་པད་མ་རྣམས་ཀྱིས་བརྒྱན་པ། བུང་བ་འབུམ་སྙེད་ཀྱིས་ཡོངས་སུ་བསྐོར་བ་དག་མཐོང་ངོ་། །གསེར་དང་དངུལ་དང་བཻ་ཌཱུརྱ་དང་ཨན་ད་རྙིལ་གྱི་ཤིང་ལྗོན་པ་འོད་གསལ་བའི་ཚལ་བྱའི་ཚོགས་ཀྱིས་ཡོངས་སུ་བསྐོར་བ་དག་ཀྱང་མཐོང་ངོ་། །བྱ་དེ་དག་ཀྱང་འདབ་གཤོག་གི་མཐའ་རིན་པོ་ཆེ་སྣ་བདུན་ལས་བྱས་ཤིང་རྒྱས་པ་ཡིན་ཏེ། ཇི་ལྟར་སྒྲ་འབྱིན་པ་ཐོས་ནས་ལྷ་དག་ཀྱང་སྔོན་མ་བྱུང་བ་ངོ་མཚར་ཆེ་བ་མཐོང་ནས་ཤིན་ཏུ་དགའ་བ་མྱོང་ཞིང་། གཞན་ལ་ཡང་ངོ་མཚར་སྐྱེད་པ་དེ་ལྟ་བུའི་སྒྲ་སྙན་པ་རྣམ་པ་དུ་མ་འབྱིན་ཏོ། །དེ་ནས་ལྷའི་རྒྱལ་པོ་བརྒྱ་བྱིན་ཡང་ལྷའི་ཚོགས་དང་ལྷན་ཅིག་ཡོངས་སུ་བསྐོར་ཏེ། ཚལ་དང་ཉེ་བའི་ཚལ་ལེགས་པར་མཐོང་བར་འདོད་པ་ཤིང་སཱ་ལ་ཟུང་ཡ་གཅིག་གི་ནང་ན་གཞལ་མེད་ཁང་དཀྲིགས་པ་ག་ལ་བ་དེར་དོང་ངོ་། །དེར་ཡང་ལྷ་རྣམས་ཀྱིས་ཁང་བཟངས་རྣམ་པ་སྣ་ཚོགས་དཀྲིགས་པ་དག་ན་ཀ་བ་ཉམས་དགའ་བ་རྣམ་པ་སྣ་ཚོགས་ཀྱིས་བརྒྱན་པ། ཀ་བ་དང་ར་བ་རིན་པོ་ཆེ་སྣ་བདུན་གྱིས་རྣམ་པར་བརྒྱན་པ་ལ་འདི་ལྟ་སྟེ། ཨན་ད་རྙིལ་དང་བཻ་ཌཱུརྱ་དང་གསེར་དང་དངུལ་དང་སྤུག་དང་ཤེལ་དང་མུ་ཏིག་རྣམས་ཀྱིས་ཀ་བ་རྣམ་པ་དུ་མར་ཕྱེ་ཞིང་སྣ་ཚོགས་སུ་བརྒྱན་པ། སྟན་ཁྲ་བོ་རྣམ་པ་སྣ་ཚོགས་ལེགས་པར་བཏིང་བ། རིན་པོ་ཆེའི་གོས་སྣ་ཚོགས་ཀྱིས་མཛེས་པར་བྱས་པ། འདུག་ཁྲི་དེ་དག་ཀྱང་སྡུག་པར་བྱས་ཤིང་རྐང་པ་རྣམ་པ་སྣ་ཚོགས་ཀྱིས་མཛེས་པར་བྱས་པའི་འདུག་ཁྲིའི་རྐང་པ་དེ་ལ་ཉེ་བར་བརྒྱན་པ་འདི་ལྟ་སྟེ། རྡོ་རྗེ་དང་ཨན་ད་རྙིལ་དང་ཤེལ་དང་གསེར་དང་དངུལ་གྱིས་རྣམ་པར་བརྒྱན་པ་དག་མཐོང་ངོ་། །དེ་ནས་གཞན་ཡང་བརྒྱ་བྱིན་སྔོན་དུ་འགྲོ་བའི་ལྷ་ཤིང་སཱ་ལ་ཟུང་གི་ནང་དུ་ཞུགས་པ་རྣམས་རིའི་རྩེ་མོ་ཀུན་ནས་མཐོང་ན་ཡིད་དུ་འོང་བ། བྱ་སྣ་ཚོགས་འབུམ་སྙེད་ཀྱིས་ཡོངས་སུ་བསྐོར་ཅིང་སྐད་འབྱིན་པ་དག་མཐོང་ངོ་། །དེ་ནས་ལྷ་རྣམས་ལ་བརྒྱ་བྱིན་གྱིས་འདི་སྐད་སྨྲས་སོ། །ཤིང་སཱ་ལ་ཟུང་གི་ནང་ན་ཉམས་དགའ་བ་འདི་ལ་ཁྱེད་ཅག་ལྟོས། ལྷའི་རྒྱལ་པོས་དེ་སྐད་སྨྲས་པ་དང་། ལྷ་རྣམས་
ཀྱིས་འདི་སྐད་སྨྲས་སོ། །བརྒྱ་བྱིན་ཇི་ལྟ་བ་བཞིན་མཐོང་ལགས་སོ། །དེ་ནས་ལྷའི་འཁོར་དེ་ན་འདི་ལྟར་ལྷ་བག་མེད་པས་ཡིད་ཤིན་ཏུ་ལྷག་པར་དབང་དུ་བྱས་པ་གང་ཡིན་པ་དེ་དག་མཐོང་བ་དང་དེ་དག་བཀར་ནས་ལས་ཀྱི་འབྲས་བུ་ཤིན་ཏུ་བསྟན་པའི་ཕྱིར་ལས་ཀྱི་མེ་ལོང་གི་ཁང་པ་ཞེས་བྱ་བ་དེར་འཇུག་པར་བྱེད་དོ། །དེ་ནས་ལས་ཀྱི་མེ་ལོང་གི་ཁང་པ་དེར་ཞུགས་ནས་བརྒྱ་བྱིན་དེས་བཻ་ཌཱུརྱའི་རྩིག་ངོས་ཤིན་ཏུ་དྲི་མ་མེད་པ། མེ་ལོང་གཡའ་མེད་པ་ལྟར་ཀུན་ནས་གསལ་བ་དེ་དག་སྟོན་པར་བྱེད་དོ། །དེ་ནས་གཞན་ཡང་བརྒྱ་བྱིན་དེས་ལྷ་རྣམས་ལ་སྟོན་པར་བྱེད་དེ། ལྷ་དག་ལས་ཀྱི་འབྲས་བུ་ལ་ཉེ་བར་སྤྱོད་པ་རྩིག་ངོས་མེ་ལོང་ལྟ་བུ་ལ་བྲིས་པ་སྣ་ཚོགས་སྣང་བ་འདི་ཡིན་ཏེ། གང་དང་གང་གིས་ལས་གང་བྱས་པ་དང་རྣམ་པ་གང་དང་གུས་པ་གང་གིས་གང་གི་ཚེ། ཞིང་གང་ལ་དངོས་པོ་གང་བྱིན་པ་ཇི་ལྟར་བྱིན་པ་དང་དད་པ་གང་གིས་སྦྱིན་པ་དང་དུས་གང་གི་ཚེ་བྱིན་པ་དེ་ལྟར་ཡོངས་སུ་བསྔོས་པ་དང་། གང་གི་ཚེ་ཡོངས་སུ་བསྔོས་པ་དང་འབྲས་བུ་གང་དུ་སྐྱེ་བར་ཡོངས་སུ་བསྔོས་པ་དང་རྣམ་པ་གང་གིས་ཡོངས་སུ་བསྔོ་བའི་སྦྱིན་པའི་འབྲས་བུ་སྣང་བ་དེ་དག་ལ་ཁྱེད་ཅག་ལྟོས། དེ་ནས་གཞན་ཡང་བརྒྱ་བྱིན་དེས་ལྷ་དེ་དག་ལ་རབ་ཏུ་སྟོན་པར་བྱེད་དེ། འདི་ལྟར་ཚུལ་ཁྲིམས་ཤིན་ཏུ་བསྒོམས་པ། འགྲོ་བ་ཐམས་ཅད་དུ་ཕ་མ་ལྟ་བུར་གྱུར་པ། སླུ་བ་མེད་པ། རྣམ་པར་སྨིན་པ་མཆོག་ཏུ་ཉམས་དགའ་བ། མཚོ་ལྟར་རྙོག་པ་མེད་པ། མཐོ་རིས་སུ་འགྲོ་བའི་ས་བོན་གང་གིས་གང་གི་ཚེ་ཇི་ལྟར་གང་ཞིག་གང་རྣམས་ལ་རྣམ་པ་གང་གིས་ཚུལ་ཁྲིམས་རྣམ་པ་བདུན་སྲུང་བ་དེ། དེའི་ཚེ་རྣམ་པ་དེས་གནས་སྐབས་དེར་སྐྱེས་པ་དེའི་ཚུལ་ཁྲིམས་ཀྱི་འབྲས་བུ་དེ། ལྷ་དང་མི་རྣམས་ཀྱི་ནང་དུ་སྨིན་པ་ལ་ཁྱེད་ཅག་ལྟོས། དེ་ནས་གཞན་ཡང་བརྒྱ་བྱིན་དེས་ལྷ་དེ་དག་ཉིད་ལ་དེར་ལས་ཀྱི་མེ་ལོང་ཉིད་རབ་ཏུ་སྟོན་པར་བྱེད་དེ། འདི་ལྟར་འདི་དག་ཀུན་ནི་ལས་ཀྱི་འབྲས་བུའི་ཚོགས་ཡིན་ཏེ། ཡེ་ཤེས་ཀྱི་སྒྲོན་མའི་སྐྱེས་བུ་གང་གིས་གང་གི་ཚེ་འདི་ལྟར་ཡེ་ཤེས་ལ་གོམས་ཤིང་། ཡང་དག་པའི་ལྟ་བར་གྱུར་པ་ཡེ་ཤེས་
དེའི་ཐ་མ་དང་འབྲིང་དང་མཆོག་ཟག་པ་དང་བཅས་པ་དང་ཟག་པ་མེད་པའི་འབྲས་བུ་ལ་ཁྱེད་ཅག་ལྟོས། དེ་ནས་གཞན་ཡང་བརྒྱ་བྱིན་དེས་ལྷ་དེ་དག་ཉིད་ལ་སྦྱིན་པ་དང་ཚུལ་ཁྲིམས་དང་ཡེ་ཤེས་རྣམ་པ་དགུའི་གནས་སྐབས་རབ་ཏུ་སྟོན་པར་བྱེད་དེ། སྦྱིན་པ་ཐ་མ་དང་འབྲིང་དང་མཆོག་གིས་མཐོ་རིས་རྣམས་སུ་འབྲས་བུ་རྣམ་པར་སྨིན་པ་འབྱུང་བར་འགྱུར་རོ། །དེ་ལ་སེམས་བསྒོམས་ཤིང་། ཞིང་ཡོན་ཏན་དང་ལྡན་ལ་སླུ་བ་མེད་པའི་མཚན་ཉིད་དང་ལྡན་ཡང་དངོས་པོ་ཕུན་སུམ་ཚོགས་པ་མ་ཡིན་ན་འབྲས་བུ་དེ་ཉིད་ཆུང་ལ། འབྲས་བུ་ཡི་དགས་མཐུ་བོ་ཆེར་འགྱུར་ཏེ། དུད་འགྲོ་ཞིག་ན་ཡང་འབྲས་བུ་བདེ་བ་འཐོབ་པར་འགྱུར་རོ། །ལྷ་དག་ལས་ཀྱི་མེ་ལོང་འདི་ཉིད་ཀྱི་ནང་ན་འབྲས་བུ་གཟུགས་བརྙན་སྣང་བ་སྦྱིན་པ་འབྲིང་འདི་ལ་ལྟོས། ལས་ཀྱི་འབྲས་བུ་སྣ་ཚོགས་བྲིས་པའི་རྩིག་ངོས་ལ་སྦྱིན་པའི་འབྲས་བུ་འབྲིང་ནི། སེམས་མ་བསྒོམས་ཤིང་དངོས་པོ་ཡོན་ཏན་དང་ཡང་མི་ལྡན་ལ། ཞིང་ཡོན་ཏན་དང་ལྡན་པ་ཁོ་ན་ལ་སྦྱིན་པའི་འབྲས་བུ་ནི། ནུབ་ཀྱི་བ་ལང་སྤྱོད་དམ་ཤར་གྱི་ལུས་འཕགས་གླིང་གི་མི་རྣམས་ཀྱི་ནང་ངམ་དུད་འགྲོའམ་གནོད་སྦྱིན་ནམ་ལྷ་མ་ཡིན་རྣམས་ཀྱི་ནང་དུ་འབྲས་བུ་འཐོབ་པར་འགྱུར་ཏེ། འབྲས་བུ་འབྲིང་པོ་ཐོབ་པ་དེ་ཡང་དེ་ལྟར་མེ་ལོང་ལྟ་བུར་ལྷ་དེ་དག་ཉིད་ཀྱི་མངོན་སུམ་དུ་སྣང་ངོ་། །དེ་ནས་གཞན་ཡང་བརྒྱ་བྱིན་གྱིས་ལས་ཀྱི་མེ་ལོང་དེ་ཉིད་ཀྱི་ནང་ན་གཟུགས་བརྙན་གྱི་ངོ་བོར་གྱུར་པ། འདི་ལྟར་སྦྱིན་པའི་འབྲས་བུ་རྣམ་པ་གསུམ་པོ་འདི་ཡང་རབ་ཏུ་སྟོན་པར་བྱེད་དོ། །གཞན་ཡང་ལྷ་ཁྱེད་ཅག་ཐ་མ་དང་འབྲིང་དང་མཆོག་ལ་ལྟོས་ཤིག །དེ་ལ་ཐ་མ་ནི་རྣམ་པ་གཞན་གྱིས་མི་འགྱུར་ཏེ། འདི་ལྟར་སེམས་མ་བསྒོམས་ལ་ཞིང་ཕུན་སུམ་ཚོགས་པ་ཡིན་ནོ། །དེ་ལ་སེམས་མ་བསྒོམས་པ་ཇི་ལྟ་བུ་ཡིན་ཞེ་ན། སྦྱིན་བདག་གང་སྲོག་ཆགས་ལ་ཤིན་ཏུ་ཕན་པ་བྱས་ཤིང་། ཞིང་དང་དངོས་པོ་རྙེད་ཀྱང་སེམས་དང་བ་མ་ཡིན་ཏེ། ལུས་ཀྱིས་མངོན་པར་ལྡང་བ་དང་། ཕྱག་འཚལ་བ་ལ་སོགས་པ་གུས་པར་མི་བྱེད་པ་འདི་ནི་ཞིང་ཡོན་ཏན་དང་ལྡན་ཞིང་། དངོས་པོ་ཡོན་ཏན་དང་ལྡན་པ་ཡིན་
ཡང་སེམས་ཡོན་ཏན་དང་ལྡན་པ་མ་ཡིན་ཏེ། སྦྱིན་པ་སླུ་བ་མེད་པ་བྱས་པས། རི་བྲགས་སམ་ཀླ་ཀློ་རྣམས་ཀྱི་རྒྱལ་པོའམ་བློན་པོ་ཆེན་པོར་འགྱུར་བ་ལས་ཀྱི་མེ་ལོང་གི་ས་གཞི་ཉིད་ལ་ཁྱེད་ཅག་ལྟོས་ཤིག་ཅེས་དེ་ལྟར་བརྒྱ་བྱིན་དེ་ལྷ་རྣམས་ལ་རབ་ཏུ་སྟོན་པར་བྱེད་དོ། །གཞན་ཡང་སྦྱིན་པའི་མཆོག་འདི་ནི་སེམས་དང་ལྡན་པ་དང་། ཞིང་ཡོན་ཏན་ཕུན་སུམ་ཚོགས་པ་དང་དངོས་པོ་ཡོན་ཏན་ཕུན་སུམ་ཚོགས་པ་དང་སེམས་བསྒོམས་པ་ཡོན་ཏན་ཕུན་སུམ་ཚོགས་པ་ཡིན་ནོ། །དེ་ལ་ཞིང་དམ་པ་ནི་སངས་རྒྱས་ལ་སོགས་པའོ། །དངོས་པོ་ནི་བཟའ་བ་ལ་སོགས་པའོ། །སེམས་བསྒོམས་པ་ནི་སེམས་དང་བ་དང་གུས་པ་ཡིན་ཏེ་སྦྱིན་པ་འབྲས་བུ་ཆེན་པོ་འདི་ནི་ལྷ་དང་མི་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལ་ལྷ་རྣམས་ཀྱི་ནང་དུ་ནི་ལྷ་ཆེན་པོར་འགྱུར་ལ། མི་རྣམས་ཀྱི་ནང་དུ་ནི་གླིང་བཞི་པ་འཁོར་ལོས་སྒྱུར་བའི་རྒྱལ་པོ་རྫུ་འཕྲུལ་ཆེ་བ། རིན་པོ་ཆེ་སྣ་བདུན་དང་ལྡན་པ། ཉེ་བའི་རིན་པོ་ཆེ་སྣ་བདུན་དང་ལྡན་པ། ཆོས་དང་ལྡན་ཞིང་ཆོས་ཀྱི་རྗེས་སུ་ལྟ་བ། ཕུན་སུམ་ཚོགས་པ་ཐམས་ཅད་སྤྱད་ནས་དེ་ལ་བརྟེན་ཏེ་ཚུལ་ཁྲིམས་སྤྱོད་ཅིང་ཡེ་ཤེས་ཀྱང་ཤེས་པར་བྱེད་དོ། །དེ་མྱ་ངན་ལས་འདས་པའི་གྲོང་ཁྱེར་དུ་འཇུག་པར་བྱེད་དེ། སྦྱིན་པ་འདི་ནི་བླ་ན་མེད་ཅིང་སྦྱིན་པ་འདི་ཉིད་བླ་ན་མེད་པ་ཡིན་ནོ། །གཞན་ཡང་སྦྱིན་པའི་འབྲས་བུ་བཻ་ཌཱུརྱ་ཤིན་ཏུ་དྲི་མ་མེད་པའི་ལས་ཀྱི་རྩིག་ངོས་ལ་སྣང་བ་འདི་བརྒྱ་བྱིན་དེས་ལྷ་དེ་དག་ཉིད་ལ་རབ་ཏུ་སྟོན་པར་བྱེད་དེ། འདི་ལྟར་རྣམ་པ་གཞན་རྣམ་པ་གསུམ་གྱིས་སྦྱིན་པའི་འབྲས་བུ་གཟུགས་བརྙན་སྣང་བ་འདི་ལ་ལྟོས། དེ་ནས་ཡང་བརྒྱ་བྱིན་དེས་ལྷ་དག་ལ་རབ་ཏུ་སྟོན་པར་བྱེད་དེ། འདི་ལྟར་ཟང་ཟིང་སྦྱིན་པ་དང་མི་འཇིགས་པ་སྦྱིན་པ་དང་ཆོས་སྦྱིན་པའོ། །དེ་ལ་ཟང་ཟིང་སྦྱིན་པས་ནི་སྔ་མ་བཞིན་ལོངས་སྤྱོད་ཆེན་པོར་འགྱུར། མི་འཇིགས་པ་བྱིན་པས་ནི་ཡུལ་བཟང་པོའི་རྒྱལ་པོར་འགྱུར་ཏེ། མཚོན་ཆ་དང་ལོ་ཉེས་དང་དགོན་པ་དང་བྲལ་བ། དུས་མ་ཡིན་པར་འཆི་བའི་འཇིགས་པ་དང་བྲལ་བ། འགྲན་ཟླའི་འཇིགས་པ་དང་བྲལ་བ། ནད་ཀྱི་
འཇིགས་པ་དང་བྲལ་བ། མེའི་འཇིགས་པ་དང་བྲལ་བ། ཆུའི་འཇིགས་པ་དང་བྲལ་བ། འཆི་བའི་འཇིགས་པ་དང་བྲལ་བར་རྒྱལ་པོའམ་བློན་པོ་ཆེན་པོ་ཡུན་རིང་དུ་གནས་པར་བྱེད་དོ། །འདི་ནི་མི་འཇིགས་པ་བྱིན་པའི་འབྲས་བུ་ལས་ཀྱི་མེ་ལོང་གི་ནང་དུ་སྦྱིན་པ་འབྲིང་པོ་འདི་ཇི་ལྟ་བ་བཞིན་སྣང་ངོ་། །གཞན་ཡང་སྦྱིན་པ་རྣམས་ཀྱི་ནང་ན་སྦྱིན་པ་མཆོག་ལས་ཀྱི་མེ་ལོང་གི་རྩིག་ངོས་ལ་སྣང་བ། སྦྱིན་པ་འདི་དག་གི་ནང་ན་དམ་པ་ནི་འདི་ལྟ་སྟེ། འཁོར་བ་ཐམས་ཅད་ལས་ངེས་པར་འབྱུང་བའི་ས་བོན། ཆོས་སྦྱིན་པ་ཡིན་ཏེ། སྦྱིན་པ་མཆོག་འདི་སྦྱིན་པའི་འབྲས་བུ་ནི་བྱང་ཆུབ་གསུམ་སྨིན་པར་འགྱུར་རོ། །གཞན་ཡང་ཆོས་སྦྱིན་པ་དེ་ཉིད་ཀྱི་འབྲས་བུ་སྣང་སྟེ། ཉེ་བར་འཚོ་བའི་རྒྱུ་དང་གྲགས་པའི་རྒྱུ་དང་འགྲན་ཟླ་གཞན་ཟིལ་གྱིས་གནོན་པའི་རྒྱུ་དང་གཞན་ལ་ཕན་གདགས་པའི་རྒྱུ་ཁོ་ན་ཡིན་ནོ། །དེ་ལ་ཉེ་བར་འཚོ་བའི་རྒྱུ་ནི་གང་གཞན་ལ་ཕན་གདགས་པར་ཞུགས་པས་མ་ཡིན་གྱི། ཉེ་བར་འཚོ་བར་བྱ་བའི་དོན་དུ་ཆོས་སྟོན་པར་བྱེད་པ་འདི་ནི་ཐ་མ་ཡིན་ཏེ། འདི་ལྟར་གཞན་ལ་ཕན་གདགས་པར་སེམས་བསྒོམས་པའི་སྙིང་གིས་འཆད་པར་མི་བྱེད་པ་ཡིན་ལ་ནོར་རྫས་ཁོ་ནའི་ཕྱིར་འཆད་པ་ཡིན་ནོ། །ཇི་ལྟར་གཞན་དག་ལ་འཆད་པ་དེ་ལྟར་སྒྲུབ་པ་མི་བྱེད་པ་འདི་ནི་སྦྱིན་པ་ཐ་མ་ཡིན་ནོ། །དེ་ལྟ་བས་ན་ནོར་རྫས་ཐོབ་པ་གང་ཡིན་པ་དེ་དག་ཆང་གིས་ཟད་པར་བྱེད་དམ་བུད་མེད་དང་ལྷན་ཅིག་ཟད་པར་བྱེད་པ་ཚུལ་ཁྲིམས་རྣམ་པར་སྤངས་པ་འདི་ནི་གར་མཁན་ལྟ་བུའི་ཆོས་ཉིད་ཁོ་ནར་ཞུགས་པ་ཡིན་ཏེ་ཆོས་ཀྱི་སྦྱིན་པ་འདི་ནི་འབྲས་བུ་ཆུང་བ་ཡིན་ནོ། །དེའི་རྣམ་པར་སྨིན་པ་གར་སྐྱེ་ཞེ་ན། དེས་ལས་ཀྱི་མེ་ལོང་ལ་མཐོང་སྟེ་ལྷ་རྣམས་ཀྱི་ནང་དུ་བྱ་མཁས་པའི་རང་བཞིན་ཅན་དུ་འགྱུར་ལ། དེ་བཞིན་དུ་ཚིགས་སུ་བཅད་པ་སྟོན་པར་འགྱུར་ཏེ་འདི་ནི་ཆོས་ཀྱི་སྦྱིན་པ་ཐ་མ་ཡིན་ནོ། །ཆོས་ཀྱི་སྦྱིན་པ་འབྲིང་ཇི་ལྟ་བུ་ཡིན་ཞེ་ན། གྲགས་པ་འདོད་པའི་ཕྱིར་ཆོས་འཆད་པའམ་ཆོས་སྨྲ་བ་གཞན་ཟིལ་གྱིས་གནོན་པའི་ཕྱིར་ཞེ་སྡང་གི་ཚུལ་གྱིས་འཆད་པ་དེའི་ཆོས་ཀྱི་སྦྱིན་པ་ནི་འབྲས་བུ་ཆུང་བ་ཡིན་ལ། དེའི་འབྲས་བུ་རྣམ་པར་སྨིན་པས་ནི་
ལྷའམ་མི་འབྲིང་པོ་རྣམས་ཀྱི་ནང་དུ་སྨིན་པར་འགྱུར་ཏེ། དེ་ལྟར་བརྒྱ་བྱིན་དེས་ལས་ཀྱི་མེ་ལོང་གི་གནས་དག་ཏུ་ལྷ་རྣམས་ལ་སྟོན་པར་བྱེད་མཐོང་བར་བྱེད་དོ། །གཞན་ཡང་ཆོས་སྦྱིན་པ་མཆོག་ནི་སེམས་བསྒོམས་པ། སྐྱོན་མེད་པ་བློ་གདུལ་བར་བྱ་བའི་ཕྱིར་སྟོན་པ་ཡིན་ལ་འཚོ་བར་མི་བྱེད་ལོག་པར་ལྟ་བ་གཞན་དག་ཀྱང་ཆོས་འདུལ་བ་ལ་རབ་ཏུ་འཇོག་པར་བྱེད་ལ་འཚོ་བར་མི་བྱེད་པ་ཡིན་ཏེ། དེ་ལྟར་བདག་དང་གཞན་ལ་ཕན་པར་ཞུགས་པ་མཐར་མྱ་ངན་ལས་འདས་པའི་ཆོས་སྦྱིན་པ་མཆོག་ཡིན་ནོ། །ཡང་བརྒྱ་བྱིན་དེས་ཆོས་ཀྱི་སྦྱིན་པ་དེ་ཉིད་ཀྱི་འབྲས་བུ་རྣམ་པ་གཞན་གྱིས་ལྷ་རྣམས་ལ་སྟོན་པར་བྱེད་ཡང་དག་པར་འཆད་པར་བྱེད་དེ། ཤེས་རབ་ཀྱིས་མ་གྲོལ་བ་ནི་ཐ་མ་ཡིན་ནོ། །ཚུལ་ཁྲིམས་ལ་ཞུགས་པ་ནི་འབྲིང་ཡིན་ནོ། །ཤེས་རབ་ཀྱིས་རྣམ་པར་གྲོལ་བ་ནི་མཆོག་ཡིན་ནོ། །དེ་ལ་ཤེས་རབ་ཐ་མ་ནི་དེ་སྦྱིན་པའི་གཏམ་དང་ཡང་དག་པར་ལྡན་པ་ཤིན་ཏུ་ཁོང་དུ་ཆུད་པར་ཆོས་སྟོན་པ་མ་ཡིན་ལ་སྦྱིན་པའི་འབྲས་བུ་འབའ་ཞིག་སྟོན་པ་ཡིན་ཏེ་དེ་རྒྱུ་དེ་དང་གཞི་དེ་ལ་བརྟེན་ནས་སྦྱིན་པ་ལ་གནས་ཤིང་ཚུལ་ཁྲིམས་དང་ཤེས་རབ་ལ་ཡང་གནས་སོ། །དེ་དད་པ་འབའ་ཞིག་གི་རྗེས་སུ་འབྲང་བ་ཡིན་ལ། དགྲ་བཅོམ་པ་ཟག་པ་ཟད་པ་གཉི་གའི་ཆ་ལས་རྣམ་པར་གྲོལ་བ་འདི་ཆོས་སྦྱིན་པ་ཐ་མ་ཡིན་ཏེ། འདི་ལྟར་སྦྱིན་པའི་གཏམ་དང་ལྡན་པ་འདི་ནི་ཆོས་སྦྱིན་པ་ཡིན་ནོ། །ཆོས་སྦྱིན་པ་འབྲིང་ནི་ཚུལ་ཁྲིམས་ཀྱི་གཏམ་དང་རབ་ཏུ་ལྡན་ཞིང་སེམས་ཡོངས་སུ་བསྒོམས་པས་སྟོན་པ་ཤེས་རབ་འབྲིང་ཡིན་ལ། དེའི་ལས་ཀྱི་འབྲས་བུ་རྣམ་པར་སྨིན་པ་ནི་ལས་ཀྱི་མེ་ལོང་གི་རྩིག་ངོས་ཀྱི་ནང་ན་སྣང་སྟེ། འདི་ལྟར་ཤེས་རབ་ཀྱི་རྗེས་སུ་འབྲང་བ་དགྲ་བཅོམ་པའམ་ཤིན་ཏུ་མྱུར་བར་ཟག་པ་ཟད་པར་བྱེད་ན་རང་སངས་རྒྱས་སུ་འགྱུར་ཏེ། ཆོས་སྦྱིན་པ་འབྲིང་དེའི་རྒྱུས་ལས་ཀྱི་རྣམ་པར་སྨིན་པ་ལས་ཀྱི་མེ་ལོང་གི་ནང་ན་སྣང་ངོ་། །གཞན་ཡང་ཆོས་སྦྱིན་པ་མཆོག་ནི་འདི་ལྟ་སྟེ། སེམས་ཤིན་ཏུ་ཡོངས་སུ་བསྒོམས་པ། འདོད་པ་མེད་པར་ཤེས་པ་སྦྱིན་ཞིང་ཡོན་ཏན་འབའ་ཞིག་མངོན་པར་རྗོད་པར་བྱེད། གཞན་ལ་ཕན་གདགས་པར་ཞུགས་པ་ཆོས་
སྟོན་པ་ཡིན་ཏེ་འདི་ལྟ་སྟེ། འདོད་པའི་ཉེས་དམིགས་ཀྱི་རོ་མྱང་བ་ལས་ངེས་པར་འབྱུང་བའམ། གཞན་ལོག་པའི་ལྟ་བ་ལ་ཞུགས་པ་ཡང་ཆོས་འདུལ་བ་ལ་རབ་ཏུ་འཇོག་པར་བྱེད་ཅིང་། ཆོས་འདུལ་བ་སྐྱོན་མེད་པ་ཡང་སྟོན་པར་བྱེད་པ་ཡིན་ཏེ་འདི་ནི་ཆོས་སྦྱིན་པ་མཆོག་ཡིན་ནོ། །དེའི་འབྲས་བུ་ནི་བྱང་ཆུབ་ཏུ་འགྱུར་ཏེ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། ཆོས་འདུལ་བ་བླ་ན་མེད་པ། ཐོག་མ་དང་བར་དང་ཐ་མར་དགེ་བ། དེ་ནི་ཆོས་སྦྱིན་པ་མཆོག་ཡིན་ནོ། །དེ་ལྟར་བརྒྱ་བྱིན་དེས་ལས་ཀྱི་མེ་ལོང་གི་རྩིག་ངོས་ལ་རྣམ་པ་དུ་མ་ཡོད་པ་ལྷ་རྣམས་ལ་སྟོན་པར་བྱེད་དེ། དེ་ལྟར་ཐམས་ཅད་སྟོན་པར་བྱེད་དོ། །འདི་ལྟར་ལྷ་གཞན་གང་ཡིན་པ་དེ་དག་ལ་མངོན་པར་བརྟགས་ན། ལྷ་དེ་དག་ཀུན་ནས་ཤིན་ཏུ་ངོ་ཚ་བར་གྱུར་པ་དང་དེ་དག་ལ་དེ་ལྟར་མ་བྱེད་ཅིག །འདི་ལྟར་སྲིད་པ་དང་སྲིད་པར་རྒྱུ་དང་འཐུན་པར་འབྲས་བུ་མངོན་པར་འགྲུབ་བོ་ཞེས་བསྟན་ཏེ། དེ་ལྟར་ཟླ་བ་བས་ལྷག་པའི་ལུས་གང་ཡིན་པ་དེ་དག་མཐོང་ནས། བདག་གི་དྲུང་དུ་ལྷགས་པ་དེ་དག་ཉིད་ལ་བསྟན་པའི་ཕྱིར། ལས་བྱས་པ་འདིས། ལས་ཐ་མ་དང་འབྲིང་དང་མཆོག་དང་གསུམ་པོ་འདི་དག་ལྷ་རྣམས་ལ་བསྟན་པ་ཡིན་ཏེ་ལྷ་དག་ངོ་ཚ་བར་བྱས་པས་དེས་ཆོག་ཆོག །དེ་ནས་ལྷ་དེ་རྣམས་ཀྱིས་མ་མཐོང་བ་ངོ་མཚར་ཆེ་བ་དེ་ལ་མངོན་པར་བརྟགས་ནས་འཁོར་བ་ལ་ཤིན་ཏུ་ཡིད་སྐྱོ་བ་རྣམས་ཀྱིས་འདི་ལྟར་ཚིགས་སུ་བཅད་དེ་སྨྲས་པ། འདོད་པ་དོན་མེད་རྒྱགས་པས་མྱོས། །ལྷ་རྣམས་རང་བཞིན་སྟོབས་ཆུང་བ། །འདོད་པ་རྣམས་ཀྱིས་འཁྱམ་ཞིང་རྩེ། །འཇིགས་པ་ཆེན་པོ་མི་མཐོང་ངོ་། །འདོད་པ་མི་ཕན་བྱེད་རྣམས་ལ། །ལྷ་གང་ཡིད་ནི་རྟོན་བྱེད་པ། །ལེགས་བྱས་ཟད་ནས་བླུན་པོ་དག །ཕྱི་ནས་སོ་སོར་རིག་པར་འགྱུར། །ལྷ་རྣམས་ལ་ནི་བྱེ་བྲག་ཏུ། །ཕུན་སུམ་ལྡན་པ་མོད་ལ་འཇིག །ཇི་ལྟ་ཇི་ལྟར་བདེ་དང་དགའ། །དེ་འཇིག་དེ་ལྟར་ཉོན་མོངས་སོ། །གང་ཚེ་ལྷ་ཡི་འཇིག་རྟེན་ནས། །སེམས་ཅན་དམྱལ་བར་ལྷ་ལྟུང་བ། །ལུས་དང་ཡིད་ཀྱི་སྡུག་བསྔལ་གྱིས། །
ཐམས་ཅད་དུ་ནི་གནོད་པར་འགྱུར། །དེ་ཡི་སྡུག་བསྔལ་ཤིན་ཏུ་ཚ། །དེ་ནི་ཚད་གཟུང་མི་ནུས་སོ། །སྡུག་བསྔལ་རྣམས་ཀྱི་ནང་ན་མཆོག །འབྲལ་བ་སྡུག་བསྔལ་ཡོངས་སུ་རྗོད། །དེ་ཡང་ལྷ་ཡི་ཚོགས་ནང་ན། །གཙོ་བོར་རྟག་ཏུ་ཡང་དག་འཇུག །སེམས་ཀྱིས་ཡོངས་སུ་བསླུས་པ་ཡི། །ལྷ་རྣམས་ཀྱིས་ཀྱང་མི་མཐོང་ངོ་། །འདོད་པས་ཤིན་ཏུ་བསླུས་པ་རྣམས། །ད་ལྟར་བཟང་བ་སྐད་ཅིག་སྟེ། །བརྒྱ་དང་འབུམ་དང་དེ་བཞིན་དུ། །བྱེ་བ་ཐེར་འབུམ་ཕྲག་བརྒྱ་ཡི། །འདོད་པ་ཐོབ་ཀྱང་འཇིག་འགྱུར་བ། །དེ་ལ་མི་དག་ཡིད་མ་རྟོན། །ལེགས་པར་བྱས་པའི་ལས་ཀྱི་རྒྱུས། །དེ་ཡི་འབྲས་བུ་རྟག་ཏུ་བདེ། །ཤིང་ཉམས་འབྲས་བུ་མེད་པ་ལྟར། །རྒྱུ་ཟད་ནས་ནི་འབྲས་བུ་མེད། །བག་མེད་དེ་ཉིད་མཐོང་རྣམས་ཀྱིས། །སྲོག་ཟད་བྱེད་པ་དུག་ལྟར་མཐོང་། །རྟག་ཏུ་མེ་ལྟར་སྲེག་བྱེད་ཅིང་། །མཚོན་ཆ་ལྟར་ནི་གཅོད་པར་བྱེད། །སྔོན་ནི་མཛའ་བཤེས་ལྟ་བུར་མཐོང་། །ཕྱི་ནས་དགྲ་ལྟ་བུར་མཐོང་ངོ་། །ལུས་ཅན་ཀུན་ལ་བག་མེད་པ། །མཆིལ་པ་ལྟ་བུར་རབ་ཏུ་འཇུག །ལྷ་དང་ལྷ་མིན་མི་དག་དང་། །ཀླུ་རྣམས་ལ་ཡང་ཁྱད་པར་དུ། །དོན་རྣམས་ཐམས་ཅད་མེད་བྱེད་པ། །དེ་ཡིས་བག་མེད་རྒྱུ་མཐོང་ངོ་། །བརྒྱ་བྱིན་བདག་ཅག་བསོད་ནམས་ཀྱིས། །ལེགས་པར་བགྱིས་པ་དག་ཀྱང་བསྲུངས། །ཁྱོད་ཀྱིས་སྲིད་པའི་བཙོན་ར་གང་། །འདི་དག་ཐམས་ཅད་བསྟན་པ་ལས། །དེ་ལྟར་བརྒྱ་བྱིན་ལྷ་དེ་ལ། །སྨྲས་ནས་དེ་ལ་འདི་སྐད་སྨྲས། །བརྒྱ་བྱིན་ཁྱོད་ལ་ངོ་མཚར་རྨད། །ཆེན་པོ་འདི་ནི་སུ་ཡིས་བསྟན། །དེ་ལ་བརྒྱ་བྱིན་དེས་སྨྲས་པ། །གང་གིས་བསྟན་འདི་ང་ལས་ཉོན། །བདག་སྐྱེས་པ་ན་སྔོན་གྱི་ལྷ་ཕྲེང་བཟང་ཞེས་བྱ་བ་ཞིག་ཡོད་དེ། དེ་དང་བདག་ཤིན་ཏུ་བཤེས་པར་གྱུར་ཏོ། །དེས་བརྒྱུད་པ་ལས་ཐོས་ལ་འགའ་ཞིག་གི་ཕྱིར་ཡང་འདི་ལྟར་བཅོམ་ལྡན་འདས་འོད་སྲུང་ཞེས་བྱ་བ་ཞིག་གདུལ་བའི་དབང་གིས་མཐོ་རིས་འདིར་གཤེགས་ཞེས་ཐོས་སོ། །དེས་ཀྱང་ལྷ་ཤིན་ཏུ་བག་མེད་པར་གནས་པ་རྣམས་རྟག་ཏུ་གཟིགས་ནས། དེ་དག་ལ་ཕན་པར་མཛད་པའི་ཕྱིར་ཤིང་སཱ་ལ་ཟུང་འདི་བསྐྲུན་ཏོ། །ལས་ཀྱི་མེ་ལོང་སྤྲུལ་པའི་ནང་དེ་
ཡང་བདག་ཅག་རབ་ཏུ་བག་མེད་པར་གྱུར་པ་དང་ཁྱོད་བག་མེད་པར་མ་གནས་ཤིག་ཅེས་ལྷ་དེས་ཤིན་ཏུ་བསྟན་ཏེ་འདི་ལྟར་འདུས་བྱས་ཐམས་ཅད་ནི་ལོག་པར་ལྟུང་བ་ཡིན་ལ། གང་གི་ཚེ་ཁྱོད་དམ་ལྷ་བག་མེད་པར་གནས་པ་གཞན་དག་ཕན་ཚུན་གཟུགས་ཐ་མ་དང་འབྲིང་དང་མཆོག་ལ་ངོ་ཚ་དང་བཅས་པར་གྱུར་པ་དེའི་ཚེ། ཁྱོད་ཀྱིས་ལྷ་དད་པ་ཅན་བག་ཡོད་པ་ལ་གནས་པ་མ་ཡིན་པ་གང་ཡིན་པ་དེ་དག་ནང་དུ་བཅུག་སྟེ། འདི་དག་བསྟན་ཅིང་དེ་རྣམས་ལ་རྨད་དུ་བྱུང་བ་འདི་ཡང་དག་པར་བསྟན་པར་བྱའོ། །འདི་ལྟར་བཅོམ་ལྡན་འདས་དེས་ཀྱང་ལྷ་རྣམས་ལ་ཕན་པར་མཛད་པའི་ཕྱིར་འདི་བསྟན་ཅིང་། ལྷ་དག་ཀྱང་བཏུལ་ལ་ལས་ཀྱི་མེ་ལོང་གིས་རྒྱགས་པ་དང་ཕྲལ་ནས་དགེ་བའི་ལམ་ལ་རབ་ཏུ་བཀོད་དེ། དེ་ནས་ཡང་སླར་འཛམ་བུའི་གླིང་དུ་གཤེགས་སོ་ཞེས་བསྟན་ཏོ། །ལྷ་དེ་ལས་བདག་གིས་དེ་སྐད་ཐོས་ཏེ་ཐོས་ནས་ཀྱང་གཅིག་ཏུ་འགའ་ལ་ལྷ་དེ་དག་ངོ་ཚ་བ་དང་བཅས་ཏེ་ལྷགས་སོ། །དེ་དག་གི་ངོ་ཚ་བ་བསལ་བའི་ཕྱིར་དང་བག་མེད་པ་དང་དྲེགས་པ་བསལ་བའི་ཕྱིར་ལས་ཀྱི་མེ་ལོང་གི་རྩིག་ངོས་ལ་བྲིས་པ་ཐ་མ་དང་འབྲིང་དང་མཆོག་འདི་ཁྱེད་ཅག་ལ་རབ་ཏུ་བསྟན་པ་ཡིན་ནོ། །གཞན་ཡང་ཤིང་སཱ་ལ་ཟུང་གཉིས་པ་འདི་ཉིད་དུ་འཇུག་པར་བྱའོ། །དེ་ཡང་དེ་བཞིན་དུ་བཅོམ་ལྡན་འདས་འོད་སྲུང་དེ་ཉིད་ཀྱིས་ལྷ་རྣམས་ལ་ཕན་པར་མཛད་པའི་ཕྱིར། ལས་ཀྱི་དྲ་བ་སྐྱེ་བ་དང་འཆི་བ་ལྟ་བུར་སྤྲུལ་པ་མཛད་པ་དེ་ཡང་བདག་གིས་ཁྱེད་ཅག་ལ་རབ་ཏུ་བསྟན་པར་བྱའོ། །དེ་ནས་དེ་སྐད་སྨྲས་ནས། ཡང་བརྒྱ་བྱིན་གྱིས་ལྷ་དེ་དག་ལ་འདི་སྐད་དུ། བཅོམ་ལྡན་འདས་འོད་སྲུང་དེ་ལ་སྤྱི་བོས་ཕྱག་འཚལ་ལོ་ཞེས་སྨྲས་ནས། དེ་ནས་ཡང་དེ་ལྟར་སྒོ་དེ་ཉིད་ནས་ཕྱིར་བྱུང་བ་དང་སྒོ་ཡང་དེ་བཞིན་དུ་བཅད་དོ། །དེ་ནས་ལྷ་ཡིད་རབ་ཏུ་དགའ་བ། ཕྱི་རོལ་གྱི་སྐྱེད་མོས་ཚལ་ན་དགའ་སྤྱོད་བྱེད་པར་ཞུགས་པ། སིལ་སྙན་གྱི་སྒྲ་རྣམ་པ་སྣ་ཚོགས་འབྱིན་པ་རབ་ཏུ་མྱོས་པ་བྲོ་རྡུང་ཞིང་དགོད་པ་གང་ཡིན་པ་དེ་དག་གིས་བརྒྱ་བྱིན་ཉེ་བ་ན་འདུག་པར་རིག་ནས་མགོ་བོས་སོ་སོར་ཕྱག་འཚལ་ནས། ཡང་ཡིད་ཤིན་ཏུ་ཆགས་པ་དག་བྲོ་རྡུང་བར་བྱེད་དགོད་པར་བྱེད་ཕན་ཚུན་པད་མ་དག་བླངས་ནས་རྡེག་པར་བྱེད་དོ། །
དེ་ནས་བརྒྱ་བྱིན་དང་ལྷན་ཅིག་ཤིང་སཱ་ལ་ཟུང་དེར་ཞུགས་པའི་ལྷ་གང་ཡིན་པ་དེ་དག་གིས་ལྷ་དེ་རྣམས་ལ་རྨད་དུ་བྱུང་བ་དེ་དག་སྟོན་པར་བྱེད་ཀྱང་། བག་མེད་པའི་དབང་དུ་གྱུར་པ་དེ་དག་ཉན་པར་ཡང་མི་བྱེད་ལ་རྨད་དུ་བྱུང་བ་དེ་ལ་གང་ཡང་དད་པ་མི་སྐྱེད་དོ། །དེ་ནས་བརྒྱ་བྱིན་ཡང་ལྷ་དེ་རྣམས་ཀྱི་སེམས་བསྲུང་བའི་ཕྱིར་སྤྱོད་པ་དེ་དག་ཉིད་དང་ལྷན་ཅིག་པད་མའི་ཚལ་དེ་རྣམས་ན་དགའ་བར་བྱེད་ཅིང་སིལ་སྙན་དང་རོལ་མོའི་སྒྲ་སྣ་ཚོགས་འབྱིན་པ། ཕན་ཚུན་གྲོགས་སུ་གྱུར་པ། རྒྱགས་པ་འབའ་ཞིག་དོན་དུ་བྱེད་པ། ལྷའི་ཕྲེང་བ་དང་རྒྱན་དང་ལྡན་པ། ཤིན་ཏུ་བདེ་བ་དང་ལྡན་པ། འདོད་པའི་ཡིད་ལ་རབ་ཏུ་མྱོས་པ་རང་གི་ལེགས་པར་བྱས་པ་ལ་ཆགས་པ་རྣམས་ཚལ་དང་ཉེ་བའི་ཚལ་དག་ན་ཡོངས་སུ་སྤྱོད་པར་བྱེད་དགའ་བར་བྱེད་མཆོག་ཏུ་དགའ་བར་བྱེད་དོ། །དེ་རྣམས་ཀྱི་ནང་ན་ལས་བྱས་པའི་མེ་ལོང་གི་གནས་རྨད་དུ་བྱུང་བ་མཐོང་བའི་ལྷ་གང་ཡིན་པ་དེ་དག་བྱ་བ་བྱས་པ་བཞིན་དུ་རྒྱགས་པའི་སྤྱོད་ལམ་ལ་གནས་པ་དང་བྲལ་ཞིང་སེམས་སྙིང་རྗེ་ཅན་དུ་གྱུར་ནས་ལྷ་དེ་དག་ལ་མངོན་པར་རྟོག་པ་ན། ཀྱེ་མ་ལྷ་རབ་ཏུ་མྱོས་པར་གནས་པ་འདི་དག་གིས་ནི་འདི་ལྟར་ངེས་པར་ལྟུང་བར་འགྱུར་ཞིང་ལྷུང་ནས་ཀྱང་། སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་ལ། འཁོར་བའི་མཐར་གཏུགས་པའི་བར་དུ་ལས་ལ་རྟོན་པ་ལས་ཀྱི་རང་བཞིན་ཅན་དག་ཇི་ལྟར་ལས་དགེ་བའམ་སྡིག་པ་བྱེད་པ་དེ་དེ་བཞིན་དུ་ལས་ཀྱི་སྐལ་བར་འགྱུར་བ་དག་མི་ཤེས་སོ་སྙམ་ནས། དེ་ལྟར་ལྷ་དེ་རྣམས་ལྷ་དེ་དག་ལ་སྙིང་རྗེ་བར་བྱེད་དོ། །དེ་ནས་ཆོས་བཟང་ན་གནས་པའི་ལྷ་ཕྱི་མ་དེ་དག་ཀྱང་བརྒྱ་བྱིན་ལ་འདི་ལྟར་ལྷའི་རྒྱལ་པོ་ཁྱོད་ཀྱི་བཀའ་དྲིན་ལ་བདག་ཅག་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་ལྷའི་ཚལ་དང་ཉེ་བའི་ཚལ་དག་ན་དགའ་བར་བགྱིད་དགའ་དགུར་སྤྱོད་པར་བགྱིད་ན། ལྷའི་རྒྱལ་པོ་བདག་ཅག་ལ་དགོངས་པར་མི་མཛད་དམ་ཞེས་སྨྲས་སོ། །དེ་ནས་བརྒྱ་བྱིན་གྱིས་འདི་ལྟར་ཚིགས་སུ་བཅད་དེ་འདི་སྐད་སྨྲས་པ། ལྷ་དག་བདག་ནི་བྱེད་པ་མང་། །བག་མེད་པ་ལ་གནས་པ་མེད། །གང་ཟག་བག་མེད་དབང་
གྱུར་པ། །དེ་ཉིད་རབ་ཏུ་མི་མཐོང་ངོ་། །རྟག་ཏུ་བག་མེད་དབང་གྱུར་གང་། །དེ་ནི་དགེ་བའི་འོས་མིན་ཏེ། །དགེ་བ་སྤངས་པའི་གང་ཟག་ནི། །སེམས་ཅན་དམྱལ་བར་ཉེ་བར་འདྲེན། །དགའ་ཞིང་ཡིད་དུ་འོང་བ་ཀུན། །རབ་ཏུ་འབྲལ་བར་འགྱུར་སྲིད་ཀྱང་། །འཚོ་བའི་མཐའ་ནི་འཆི་བ་དག །ལྷ་ཡིས་ཤིན་ཏུ་མི་མཐོང་ངོ་། །འཆི་བའི་ཚེ་ན་འབྱུང་བ་གང་། །དབང་པོ་སེམས་ནི་བློང་བ་དག །ངེས་པར་འབྱུང་བར་འགྱུར་བ་གང་། །སྡུག་བསྔལ་མི་བཟད་དེ་ཤེས་ཀྱི། །སྲིད་གསུམ་འདུས་བྱས་ཐམས་ཅད་ནི། །མགལ་མེའི་འཁོར་ལོ་ལྟ་བུ་དང་། །དྲི་ཟའི་གྲོང་ཁྱེར་ལྟ་བུ་དང་། །དབུ་བ་ཆུ་བུར་ལྟ་བུ་སྟེ། །རྨོངས་པ་དབུ་བའི་ཕུང་པོ་ལ། །མལ་སྟན་འདིང་བར་བྱེད་པ་གང་། །རྨོངས་པ་འདུས་བྱས་བྱེད་པ་དེ། །མི་བརྟན་བདག་ཉིད་མངོན་པར་ཆགས། །ལས་ཀྱིས་ཡོངས་སུ་སྦྲེལ་བ་ནི། །འཆི་བའི་ཚེ་ན་ལྷ་དང་མི། །དེ་བཞིན་གནོད་སྦྱིན་ལྷ་མ་ཡིན། །ཀླུ་དང་མཁའ་ལྡིང་སྐྱོབ་མི་བྱེད། །འཆི་བའི་རྒྱལ་པོ་མི་བཟད་པ། །ཇི་སྲིད་མ་འོངས་བར་དུ་ནི། །དེ་སྲིད་ལེགས་པར་བྱས་སྤྱོད་པ། །ཕྱི་ནས་གདུང་བར་མ་བྱེད་ཅིག །སྲིད་པས་དེ་དག་ཡང་དྲངས་པ། །ཡུལ་རྣམས་ལ་ནི་རྒྱུག་པར་བྱེད། །ཁྱེད་ལ་དུ་མར་བསྒོ་བ་ཡིན། །བག་མེད་རྣམས་ལ་མ་ཆགས་ཤིག །ཡུལ་གྱིས་དམ་དུ་བཅིངས་པ་ནི། །སེམས་ཅན་དམྱལ་བ་ཀུན་གྱི་རྒྱུ། །དེ་བས་གཏན་དུ་སྤངས་ནས་སུ། །ངེས་པར་ལེགས་པར་ཡིད་ལ་བྱོས། །དེ་ལྟར་བརྒྱ་བྱིན་དེས་ལྷ་དེ་རྣམས་ལ་རྗེས་སུ་བསྟན་པ་དང་འདི་ལྟར་བདེ་བ་དེའི་དབང་དུ་གྱུར་པ་རྣམས་ཅུང་ཟད་ཀྱང་སེམས་ལ་མི་འཇོག་གོ །ལས་ཀྱི་མེ་ལོང་མངོན་སུམ་དུ་མཐོང་བའི་ལྷ་གང་ཡིན་པ་དེ་དག་ནི་མ་གཏོགས་ཏེ། དེ་རྣམས་ནི་ཤིན་ཏུ་ཡི་ཆད་ནས་བརྒྱ་བྱིན་ལ་འདི་སྐད་སྨྲས་སོ། །ལྷའི་དབང་པོ་འདི་ལྟར་ཤིང་སཱ་ལ་ཟུང་གཉིས་པར་གཤེགས་དང་། དེ་ནས་ཡང་བཅོམ་ལྡན་འདས་འོད་སྲུང་དེས་ལྷ་བག་མེད་པས་རྨོངས་པ་རྣམས་ལ་ཕན་པར་བགྱི་བའི་སླད་དུ། ལས་ཀྱི་དྲ་བ་སྐྱེ་བ་དང་འཆི་བར་འཐུན་པའི་སྤྲུལ་པ་གང་ལགས་པ་དེ་དག་ལྷའི་རྒྱལ་པོས་བདག་ཅག་ལ་རབ་ཏུ་བསྟན་དུ་གསོལ། དེ་ནས་བརྒྱ་བྱིན་གྱིས་ལྷ་ཤིན་ཏུ་བག་མེད་པས་
གནས་པ་དག་རིག་ནས་ཚལ་དང་ཉེ་བའི་ཚལ་རྣམས་སུ་རྩེ་བར་དོང་ངོ་། །དེ་ནས་ཡང་ལྷ་རྣམ་པར་གཡེངས་པ་དེ་རྣམས་དང་ཤིན་ཏུ་ཡི་ཆད་པ་དག་དང་ཡང་ལྷན་ཅིག་ཤིང་སཱ་ལ་ཟུང་གཉིས་པ་ག་ལ་བ་དེར་དོང་སྟེ་ཕྱིན་ནས། དེ་བཞིན་དུ་དེས་སྡོང་པོ་དེ་ཉིད་ཀྱི་སྒོ་འབྱེད་པར་བྱེད་དོ། །འབྱེད་པ་དང་དེ་བཞིན་དུ་སྒོ་ཕྱེ་སྟེ། བརྒྱ་བྱིན་དེ་ལྷ་དེ་རྣམས་དང་ལྷན་ཅིག་དེ་ཉིད་དུ་ཞུགས་པ་དང་ལྷ་རྣམས་ཀྱིས་ཚལ་དང་ཉེ་བའི་ཚལ་ཉམས་དགའ་བ། སྔོན་ཆད་གར་ཡང་མ་མཐོང་བའི་དགའ་བ་གང་ཡིན་པ་དེ་དག་དང་འདོད་པ་ཐམས་ཅད་འབྱོར་པ། བྱ་རྣམ་པ་སྣ་ཚོགས་ཀུན་ནས་ལོང་ལོང་པོར་འཁོད་པ། པད་མའི་ཚལ་གྱིས་བརྒྱན་པ། གསེར་བཙོ་མའི་ཤིང་ལྗོན་པས་ཀུན་ནས་འཁྲིགས་པ་ཐམས་ཅད་དུ་མཐོང་ན་དགའ་ཞིང་ཡིད་དུ་འོང་བ། འཇིག་རྟེན་གྱི་བདེ་བའི་མཆོག་བལྟ་ན་སྡུག་པ། རླུང་བསྟེན་ན་བདེ་བ། རིའི་ཟོམ་ཡང་རིན་པོ་ཆེའི་རྡོ་སྣ་བདུན་གྱིས་རྣམ་པར་བརྒྱན་པ། བྱ་རྣམ་པ་སྣ་ཚོགས་སྐད་འབྱིན་པ་མཐོང་ངོ་། །དཔག་བསམ་གྱི་ཤིང་ཉི་མ་ལྟར་གཟི་ཆེ་བས་ཀུན་ནས་གསལ་བ་ཡིན་ཏེ། ཉི་མ་ལྟ་བུ་དེ་རྣམས་ཀྱིས་ཤིང་སཱ་ལའི་ནང་དེ་དག་ཐམས་ཅད་རྣམ་པར་གསལ་བ། བཟའ་བ་དང་བཏུང་བའི་ཆུ་བོ་ཡང་དྲི་དང་རོ་དང་མདོག་སྣ་ཚོགས་སུ་འབབ་པ་རྣམས་མཐུ་རབ་ཏུ་ཆེ་བར་འབབ་པ། དེའི་ནང་ན་དྲི་ཤིན་ཏུ་མི་བཟད་པར་ཞིམ་པོ་ཡོད་དེ། ཡོན་ཏན་སྣ་ཚོགས་ཕུན་སུམ་ཚོགས་པ་དེ་རྣམས་སྣས་རིམ་གྱིས་ཤིན་ཏུ་མྱོང་བར་བྱེད་དོ། །དེ་ལྟར་དབང་པོ་ལྔ་རྣམས་ཀྱི་ཡུལ་ལྔ་སེམས་དང་ལྡན་པ་ལྟར་སྡུག་པར་སྟོན་པ། ཉི་མ་ནུབ་པ་ལྟར་མི་རྟག་སྟེ་འཕྲལ་འཕྲལ་ལ་བྱུང་བའི་སྟོབས་ཀྱིས། དབང་དུ་གྱུར་པའི་ལྷ་གང་ཡིན་པ་དེ་རྣམས་ཀྱི་དབང་པོ་ཡང་ཤིན་ཏུ་བདེ་བ་ཉིད་ཡིན་ན། གང་ལས་བར་མས་ཉེ་བར་འགྲོ་བ་རྣམས་ལྟ་སྨོས་ཀྱང་ཅི་དགོས། དེ་ནས་ལྷའི་རྒྱལ་པོ་བརྒྱ་བྱིན་ཚལ་དང་ཉེ་བའི་ཚལ་ཤིན་ཏུ་ཉམས་དགའ་བ་གང་ཡིན་པ་དེ་དག་ཐམས་ཅད་དེ་རྣམས་ལ་ཡང་དག་པར་བསྟན་ཏེ་དེ་དག་གི་ཁྱད་པར་ནི་ཕྱི་རོལ་ན་གནས་པ་རྣམས་ཀྱི་ཚལ་དང་ཉེ་བའི་ཚལ་ཉམས་དགའ་བ་གང་ཡིན་པ་དེ་དག་
དེའི་བཅུ་དྲུག་གི་ཆར་ཡང་མི་ཕོད་དོ། །དེ་ནས་ལྷའི་དབང་པོས་ཐམས་ཅད་མ་ལུས་པར་བསྟན་ནས་རྡོ་ཤིན་ཏུ་གསལ་བ་ལས་ས་གཞི་བྱས་པ། ལྷག་པར་ཉམས་དགའ་བ་བསྟན་པར་བྱ་བའི་ཕྱིར་ག་ལ་བ་དེར་འདོང་བར་བྱེད་དོ། །བཻ་ཌཱུརྱའི་ཁང་བཟངས་ཀ་བ་སྟོང་ཡོད་ལ་པད་མ་རཱ་གའི་ལན་ཀན་བྲེས་པ། ས་གཞི་གསེར་ལས་བྱས་པ། ཚུར་དཔག་ཚད་ལྔ་ཡོད་ལ། ཞེང་དུ་དཔག་ཚད་གསུམ་ཡོད་པ། བཅོམ་ལྡན་འདས་འོད་སྲུང་དེའི་རྫུ་འཕྲུལ་གྱིས་མཛད་པ་ཡིན་ནོ། །དེ་ནས་བརྒྱ་བྱིན་ཁང་བཟངས་རིན་པོ་ཆེ་སྣ་བདུན་གྱི་ཐེམ་སྐས་ཀྱིས་བརྒྱན་པ་དེ་ལ་ལྷ་དེ་རྣམས་དང་ལྷན་ཅིག་དེར་འཛེགས་པ་དང་ཁང་བཟངས་དེ་ལ། བཅོམ་ལྡན་འདས་དེ་ཉིད་ཀྱི་གཟུགས་བརྙན་སྤྲུལ་པ་གང་ཡིན་པ་དེ་ལ། འདི་ནི་བཅོམ་ལྡན་འདས་ཉིད་ཆོས་སྟོན་པ་ཡིན་ནོ་སྙམ་དུ་སེམས་སོ། །དེ་ནས་བརྒྱ་བྱིན་གྱིས་བཅོམ་ལྡན་འདས་ཀྱི་གཟུགས་བརྙན་དེ་ལ་མགོ་བོས་ཕྱག་འཚལ་ཏེ། ལྷའི་ཚོགས་རྣམས་དང་ལྷན་ཅིག་ཤིན་ཏུ་གུས་པར་གྱུར་པའི་ཡིད་ཀྱིས་ཕྱག་འཚལ་ནས། འདི་ལྟར་ཚིགས་སུ་བཅད་དེ་སྨྲས་པ། རབ་ཏུ་གྲོལ་བ་སྐྱོབ་མཛད་ཅིང་། །ཞི་བ་དང་ནི་ཐར་པའི་སྒོ། །འབྱེད་པར་མཛད་པ་འཇིག་རྟེན་མགོན། །དེ་ཡི་གཟུགས་བརྙན་འདི་བཞུགས་སོ། །མི་གང་ཞི་བའི་ཡིད་ཀྱིས་སུ། །འདི་ལ་རྟག་ཏུ་ཕྱག་འཚལ་ན། །དེ་ནི་སྲིད་པའི་འཇིགས་ལས་ཐར། །མྱ་ངན་འདས་པའང་རྟོགས་པར་འགྱུར། །མྱ་ངན་འདས་གྲོང་སྟོན་མཛད་པ། །ཆོས་འདི་གསུང་བ་གང་ཡིན་པ། །དེ་ནི་ཞི་བ་མཆོག་ཏུ་དགའ། །དེ་ནི་མཐའ་ལས་བྱུང་ཞེས་བྱ། །སྐྱེས་བུ་བརྟན་པོ་རྩལ་པོ་ཆེས། །དེ་ཡི་བཀའ་ལ་བརྟེན་ན་ནི། །གཏན་དུ་བདེ་བ་འབྱུང་བ་གང་། །རྟག་པའི་གནས་ནི་འཐོབ་པར་འགྱུར། །སྐྱེས་བུ་དེ་ཉིད་སེམས་པ་པོ། །སྒྲོལ་བྱེད་འདི་ལ་བརྟེན་ནས་སུ། །སྲིད་གསུམ་རྒྱ་མཚོ་ཆུ་བོའི་ཀློང་། །མི་བཟད་འཇིགས་ལས་སྒྲོལ་བར་བྱེད། །འདི་ནི་འཇིག་རྟེན་བཅས་པའི་མིག །ཀུན་ནས་འབྲལ་བའི་མིག་རྣམས་ཡིན། །ཤིང་ལས་བྱུང་བ་མེ་མིན་གྱི། །འདི་ནི་མེ་ཡི་ནང་ན་མཆོག །འདོད་ཆགས་ལ་སོགས་དྲི་མ་ཡིས། །མི་རྣམས་སེམས་ལ་སྡིག་བཅས་པ། །ཁྱུ་མཆོག་
དེའི་བཀའ་ཡེ་ཤེས་ཆུས། །དག་པ་ཉིད་དུ་འཁྲུ་བར་མཛད། །མུ་སྟེགས་ཤེས་པའི་ང་རྒྱལ་ཅན། །ཀུན་གྱིས་གནས་གང་མ་མཐོང་བ། །གནས་དེ་ཁྱོད་ཀྱི་དྲི་མ་མེད། །གསུང་རྣམས་ཀྱིས་ནི་མི་ལ་བསྟན། །སྐྱེ་བོ་ཤིན་ཏུ་བག་མེད་པ། །འདི་དག་མགོན་པོ་ཁྱོད་ཀྱིས་བསྒྲལ། །མགོན་པོ་རྒལ་ནས་ཕ་རོལ་གཤེགས། །སྐྱེ་བོ་གཞན་ཡང་སྒྲོལ་བར་མཛད། །སྐྱེ་བོ་ཀུན་ལ་སྨན་སླད་དུ། །ཁྱོད་ཉིད་གཅིག་པུར་བཞུགས་པར་བྱས། །ཕན་མེད་རྣམས་ལ་ཕན་མཛད་ཕྱིར། །ཁྱོད་ཉིད་ཁོ་ན་མི་མཆོག་ལགས། །དེ་ལྟར་བརྒྱ་བྱིན་དེས་གཟུགས་བརྙན་དེ་ལ་བསྟོད་ཅིང་། གུས་པར་ཕྱག་འཚལ། ལྷ་ཐམས་ཅད་དང་བཅས་པས་ཀྱང་བཅོམ་ལྡན་འདས་ཀྱི་གཟུགས་བརྙན་སྤྲུལ་པ་དེ་ལ་མངོན་པར་ཕྱག་འཚལ། ན་བཟའ་ཆོས་གོས་བྱིན་གྱིས་བརླབས་པ་ཐགས་སུ་མ་བཏགས་པ་གང་ཡིན་པ་དེ་ལ་ཡང་ལྷ་རྣམས་མགོ་བོས་ཕྱག་འཚལ་ཏེ། གཟུགས་བརྙན་དེ་མཐོང་ནས་ཡང་རྒྱགས་པ་ཉིད་ཡོངས་སུ་ཉམས་པར་གྱུར་ཏོ། །དེའི་རྫུ་འཕྲུལ་གྱིས་མཛད་པའི་གཟུགས་བརྙན་གྱི་རྣམ་པ་ཇི་ལྟ་བུར་བཞུགས་པ་དེ་ལྟ་བུར་བརྒྱ་བྱིན་གྱིས་འབུམ་གྱི་ཆར་ཡང་མི་ཕོད་ན། ལྷ་གཞན་གྱིས་ལྟ་སྨོས་ཀྱང་ཅི་དགོས། དེ་ནས་བརྒྱ་བྱིན་གྱིས་རྫུ་འཕྲུལ་མཛད་པའི་གཟུགས་བརྙན་དེ་མཐོང་ནས། དེ་ནས་ཡང་ལྷ་དེ་རྣམས་ལ་ཕན་པར་བྱ་བ་དང་ལྷ་བག་མེད་པས་མྱོས་པ་རྣམས། བག་མེད་པ་དང་དབྲལ་བར་བྱ་བའི་ཕྱིར། ལས་ཀྱི་དྲ་བ་སྐྱེ་བ་དང་འཆི་བའི་ངོ་བོ་རྫུ་འཕྲུལ་བྱས་པ་དེ་བསྟན་ཏོ། །དེ་ནས་ལྷ་དེ་རྣམས་ཀྱིས་བརྒྱ་བྱིན་ལ་སྨྲས་པ། ལྷའི་དབང་པོ་འདི་ལྟར་བཅོམ་ལྡན་འདས་དེས་ཤིང་སཱ་ལ་ཟུང་འདིའི་ནང་དུ་ལས་ཀྱི་དྲ་བ་སྐྱེ་བ་དང་འཆི་བའི་ངོ་བོ་འདི་སྤྲུལ་པ་མཛད་ལ། སླད་རོལ་དུ་ཅིའི་སླད་དུ་མ་མཛད། འདི་ལྟར་ང་ཡང་དེ་ལ་ངོ་མཚར་ཆེར་སྐྱེས་ཏེ། དེ་ནས་ལྷ་དེས་ང་རྒྱགས་པ་དང་དབྲལ་བར་བྱ་བའི་ཕྱིར་འདི་བསྟན་ཏོ། །དེ་ཉིད་ལ་ངས་དྲིས་པ་དང་དེས་སྨྲས་པ། འདི་ལྟར་འདི་རྟག་ཏུ་མཐོང་བ་དང་སྐྱེ་བོ་ཐམས་ཅད་ངོ་མཚར་ཆེར་སྐྱེས་ཏེ། དེ་ངོ་མཚར་ཆེ་བར་རིག་ནས་འཇིགས་པར་བྱ་བ་དང་
དད་པར་བྱ་བ་དང་དང་བར་བྱ་བའི་ཕྱིར། རྒྱུ་འདིས་ན་བཅོམ་ལྡན་འདས་དེས་ཕྱི་རོལ་དུ་སྤྲུལ་པ་མ་མཛད་དོ། །ཕྱི་རོལ་དུ་སྤྲུལ་པ་མཛད་ན་ནི་སྐྱེ་བོ་ཀུན་གྱིས་ཡང་དང་ཡང་དུ་མཐོང་ཞིང་། ཕན་མི་ཐོགས་ལ་གཟུགས་བརྙན་དེ་ཞིག་པར་ཡང་འགྱུར་ཏེ། རྒྱུ་འདིས་ན་ཤིང་སཱ་ལ་ཟུང་གི་ནང་དུ་སྤྲུལ་པ་འདི་མཛད་ཅིང་། ཤིང་སཱ་ལ་ཟུང་གི་ནང་དུ་ངོ་མཚར་ཆེ་བའི་སྤྲུལ་པ་གཉིས་མཛད་དོ། །གང་སྐྱེ་བོ་ཀུན་གྱིས་བལྟ་བར་མི་བྱ་བའི་རྒྱུ་འདིས་ན་བཅོམ་ལྡན་འདས་དེས་ཤིང་ལྗོན་པའི་ནང་དུ་སྐྱེ་བ་དང་འཆི་བའི་ངོ་བོ་ལས་ཀྱི་དྲ་བའི་སྤྲུལ་པ་འདི་མཛད་དོ། །དེ་ནས་བརྒྱ་བྱིན་ལས་ལྷ་རྣམས་ཀྱིས་དེ་སྐད་ཐོས་ནས་ངོ་མཚར་ཆེའོ་སྙམ་པ་དང་བྲལ་ནས། དེ་ནས་ཡང་སྐྱེ་བ་དང་འཆི་བའི་ངོ་བོ་ལས་ཀྱི་དྲ་བ་དེ་ཁང་བཟངས་དཔག་ཚད་ལྔ་པའི་རྩིག་ངོས་དག་ལ་བྲིས་པ་དེ་དག་རབ་ཏུ་བསྟན་པར་བརྩམས་སོ། །དེ་ལ་རེ་ཞིག་དང་པོར་སྲོག་གཅོད་པ་རྣམས་ཀྱི་གནས་ཀྱང་སྔར་བསྟན་པ་བཞིན་གནོད་པ་ཡང་སྔར་བསྟན་པ་བཞིན་དུ་སྦྱར་ཏེ། སེམས་ཅན་དམྱལ་བ་ཡང་སོས་འཁོར་བཅུ་དྲུག་པ་སྤྲུལ་ཏོ། །དེ་ནས་ཐར་ནས་གལ་ཏེ་ཡི་དགས་རྣམས་ཀྱི་ནང་དུ་སྐྱེས་ན། ཤིན་ཏུ་ཕྲག་དོག་ཅན་དང་ཤིན་ཏུ་ཁྲོ་བར་འགྱུར་ལ། དེ་གཞན་གྱིས་མཚོན་ཆ་རྣམ་པ་དུ་མ་དག་གིས་གསོད་པར་བྱེད་དོ། །དེ་ནས་ལས་ཀྱི་དྲ་བས་འབྲེལ་པ་དུད་འགྲོ་རྣམས་ཀྱི་ནང་དུ་སྐྱེས་ན་དེ་ཤ་ཟ་བའི་སྐྱེ་གནས་སུ་སྐྱེ་བར་འགྱུར་ལ། དེ་ཤའི་དོན་དུ་མཚོན་ཆ་དག་གིས་བསད་ནས་ཟ་བར་བྱེད་དོ། །དེ་བཞིན་དུ་ཤ་རྗེན་ཟ་བ་སེང་གེ་དང་སྟག་དག་གི་སྐྱེ་གནས་སུ་སྐྱེ་བར་འགྱུར་ལ་ཤིན་ཏུ་མི་སྡུག་པ་དེ་མཚོན་ཆས་གསོད་པར་འགྱུར་རོ། །དེ་ནས་ཤི་ནས་གལ་ཏེ་མི་རྣམས་ཀྱི་ནང་དུ་སྐྱེས་ན། དེ་ཤིན་ཏུ་ཐབ་མོ་བྱེད་པ་འཁྲུག་པ་ལ་དགའ་ལ་སེམས་བདེ་བར་མི་གནས་པ་ཁོ་ན་ཡིན་ཏེ། དེ་མཚོན་གྱིས་བསད་ནས་ཚེ་ཐུང་བར་འགྱུར་རོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་འགའ་ཞིག་གིས་ལྷ་རྣམས་ཀྱི་ནང་དུ་སྐྱེས་ན། དེ་བོང་སྐྱེད་དང་མདོག་དང་དབྱིབས་རྣམས་ཉམས་པར་འགྱུར་ལ་ཚེ་ཐུང་བར་འགྱུར་ཏེ། ལྷ་དང་ལྷ་མ་ཡིན་གྱི་གཡུལ་དུ་གསོད་པར་
འགྱུར་བ་དེ་དག་གི་རྣམ་པ་རྩིག་ངོས་དག་ལ་སྣང་ངོ་། །དེ་ནས་སྲོག་གཅོད་པ་དང་མ་བྱིན་པར་ལེན་པའི་རྒྱུ་ལས་བྱུང་བའི་སེམས་ཅན་དམྱལ་བ་ཆེན་པོ་གཞན་ཐིག་ནག་འཁོར་བཅུ་དྲུག་པ་སྔར་བསྟན་པ་བཞིན་མཐོང་ངོ་། དེ་ནས་ཤི་ནས་གལ་ཏེ་ཡི་དགས་རྣམས་ཀྱི་ནང་དུ་སྐྱེས་ན། དེ་སྔ་མ་བཞིན་དུ་མཚོན་གྱིས་གསོད་པར་འགྱུར་རོ། །གལ་ཏེ་རེས་འགའ་ཡང་མི་གསོད་པའམ་གཞན་ཞིག་གམ་དེ་དང་འཐུན་པ་ཞིག་སྲོག་འཚོ་བའི་དོན་དུ་རྙེད་ན། དེ་ཡི་དགས་གཞན་གྱིས་ཡན་ལག་དང་ཉིང་ལག་ཐམས་ཅད་ཕྱེ་མར་བརླགས་ནས་འཕྲོག་པར་བྱེད་དོ། །དེ་རྒྱུ་དེས་ཤི་ནས་གལ་ཏེ་དུད་འགྲོ་རྣམས་ཀྱི་ནང་དུ་སྐྱེས་ན་དེ་བྱ་ཁུག་རྟའམ་འབྲོག་དགོན་པ་ཆུ་དང་བྲལ་བ་རྣམས་སུ་སྐྱེ་བར་འགྱུར་རོ། །བཀྲེས་པ་དང་སྐོམ་པས་གདུངས་པའི་ལུས་དེ་ནས་ཀྱང་ཤི་ནས་གལ་ཏེ་མི་རྣམས་ཀྱི་ནང་དུ་སྐྱེས་ན། དབུལ་པོ་དེ་ཡུལ་མཚོན་གྱིས་འཁྲུག་པའམ་ལོ་ཉེས་བྱུང་བར་སྐྱེ་བར་འགྱུར་ཏེ། མཚོན་གྱིས་འཆི་བའམ་ལྟོགས་ཏེ་འཆི་བར་འགྱུར་རོ། །གང་གི་ཚེ་རེས་འགའ་ཡང་བཟའ་བ་ཞིག་རྙེད་ན་དེ་གཞན་གྱིས་འཕྲོག་པར་བྱེད་ལ་ཟོས་ན་ཡང་འཇུ་བར་མི་འགྱུར་རོ། །དེ་ནས་ཤི་ནས་ཀྱང་གལ་ཏེ་ལྷ་རྣམས་ཀྱི་ནང་དུ་སྐྱེས་ན། དེའི་ལུས་དང་བོང་སྐྱེད་དང་མདོག་དང་དབྱིབས་དེ་དག་དམན་པར་འགྱུར་རོ། །བདུད་རྩི་ཡང་སྐྱོན་དང་བཅས་པར་འབྱུང་སྟེ། དེ་ལྷ་གཞན་རྣམས་ཀྱི་དྲུང་དུ་ཤིན་ཏུ་ངོ་ཚ་བས་སྐྱེངས་པར་འགྱུར་རོ། །སིལ་སྙན་ཡན་ལག་ལྔ་དང་ལྡན་པ་ཡང་མི་སྙན་པར་འགྱུར་ལ་ཚེ་ཐུང་བར་ཡང་འགྱུར་ཏེ། དེ་ལྟར་ལྷ་རྣམས་ཀྱིས་ལས་ཀྱིས་བྱས་པའི་སྤྲུལ་པ་དེ་མཐོང་ངོ་། །དེ་ནས་ཡང་བརྒྱ་བྱིན་དང་ལྷ་རྣམས་ཀྱིས། སེམས་ཅན་དམྱལ་བ་བསྡུས་གཞོམ་དེར་ལས་ཀྱི་རྣམ་པ་སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་སྤྱད་པས་སྐྱེ་བར་འགྱུར་བ་འཁོར་བཅུ་དྲུག་པ་སྔར་བསྟན་པ་བཞིན་མཐོང་ངོ་། །དེ་ནས་ཐར་ནས་གལ་ཏེ་ཡི་དགས་རྣམས་ཀྱི་ནང་དུ་སྐྱེས་ན། དེ་ཚེ་རིང་བར་འགྱུར་ཞིང་རེས་འགའ་སྲོག་གཟུངས་ཀྱི་ཟས་རྙེད་པ་གང་ཡིན་པ་དེ་དག་ཀྱང་གཞན་གྱིས་ཕྲོགས་ལ། ཡི་དགས་སྐྱུགས་པ་
ཟ་བ་རྣམས་ཀྱི་ནང་དུ་སྐྱེ་བར་འགྱུར་རོ། །དེའི་ཆུང་མ་གང་ཡིན་པ་དེ་དེའི་མངོན་སུམ་དུ་ཡི་དགས་གཞན་དག་གིས་འཕྲོག་པར་བྱེད་ལ། དེ་མཚོན་ཆ་བླངས་ནས་མཚོན་གྱིས་བཏབ་སྟེ་གསོད་པར་བྱེད་དོ། །དེ་ནས་ཐར་ནས་ཀྱང་གལ་ཏེ་དུད་འགྲོ་རྣམས་ཀྱི་ནང་དུ་སྐྱེས་ན་དེ་མ་ཧེ་དང་རྟ་དང་བ་ལང་དང་སྐྱུགས་པ་ཟ་བ་ལ་སོགས་པའི་ནང་དུ་སྐྱེ་ཞིང་ཚེ་རིང་བར་འགྱུར། བདོག་པ་གཞན་གང་ཡིན་པ་དེ་དག་ཀྱང་མཐུ་ཆུང་ངུར་གྱུར་པས་གཞན་དག་གིས་འཕྲོག་པར་བྱེད་དོ། །དེ་ནས་ཐར་ནས་ཀྱང་གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ཚེ་ཐུང་ཞིང་དབུལ་བ་དང་དེའི་ཆུང་མ་ཡང་གཞན་གྱིས་འཕྲོག་པར་འགྱུར་རོ། །དེའི་ལས་ཀྱི་རྩིག་ངོས་དག་ལ་གཟུགས་བརྙན་བྲིས་པ་འདི་ལྟ་བུ་ཡང་སྣང་སྟེ་འདི་ལྟ་སྟེ་སེམས་ཅན་དམྱལ་བ་ཆེན་པོ་ངུ་འབོད་འཁོར་དང་བཅས་པའི་ལས་ཀྱི་འབྲས་བུ་སྔར་བསྟན་པ་བཞིན་སྣང་ངོ་། །དེ་ནས་ཐར་ནས་ཀྱང་གལ་ཏེ་ཡི་དགས་རྣམས་ཀྱི་ནང་དུ་སྐྱེས་ན། དེ་རྟག་ཏུ་ཚེ་རིང་བ་ཉིད་དུ་འགྱུར་ཞིང་ལས་དེ་སྨིན་པར་འགྱུར་བ་ཇི་ལྟ་བ་བཞིན་དམ་པ་ཆད་པའི་སའམ་ཁབ་མགྲིན་རྣམས་ཀྱི་ནང་དུ་སྐྱེ་བར་འགྱུར་རོ། །དེ་རང་བཞིན་གྱིས་བཀྲེས་པས་ཉམ་ཐག་ཅིང་རང་གི་ཆུང་མ་གང་ཡིན་པ་དེ་གཞན་དག་གིས་འཕྲོག་པར་བྱེད་དོ། །དེ་གལ་ཏེ་ཡང་རྒྱགས་པའི་ཚུལ་དང་རྒྱགས་པའི་རྒྱུས་དུག་ཟ་བར་བྱེད་ལ། དེ་དུག་གི་མེ་མི་བཟད་པས་སྲེག་པར་བྱེད་དོ། །དེ་ལས་ཐར་ནས་ཀྱང་གལ་ཏེ་དུད་འགྲོ་རྣམས་ཀྱི་ནང་དུ་སྐྱེས་ན། དེ་ཕན་ཚུན་ཟ་བའི་སྡུག་བསྔལ་གྱིས་མངོན་པར་ཉམས་པར་འགྱུར། དེ་ནས་ཐར་ནས་ཀྱང་གལ་ཏེ་ལྷ་རྣམས་ཀྱི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་བོང་སྐྱེད་དང་མདོག་དང་དབྱིབས་དམན་ཞིང་ཚེ་ཐུང་བ་དང་ལྷ་དང་ལྷ་མ་ཡིན་གྱི་གཡུལ་འགྱེད་པར་འཆི་བ་དང་དེའི་ལུས་ལ་རིན་པོ་ཆེ་བཏགས་པ་ཡང་འོད་མི་གསལ་བ་དང་དེའི་ལྷ་མོ་ཡང་གུས་པར་མི་ཉན་ཅིང་གཞན་དུ་འགྲོ་བ་དང་དེའི་བདུད་རྩི་ཡང་རོ་ཆུང་བ་དང་བློ་ཞན་པ་དང་སེམས་གཡེངས་པ་དང་དེ་ལ་ལྷ་གཞན་རྣམས་ཀྱིས་གནོད་པར་བྱེད་དོ། །དེ་ནས་ཡང་བརྒྱ་བྱིན་དེ་དང་ལྷ་དེ་རྣམས་དང་ལྷན་ཅིག་
ལས་ཀྱི་རྩིག་ངོས་དེ་དག་ཉིད་ལ་རྟོག་པར་བྱེད་དེ། འདི་ལྟར་སེམས་ཅན་དམྱལ་བ་ངུ་འབོད་འཁོར་དང་བཅས་པའི་ལས་ཀྱི་འབྲས་བུ་སྔར་བསྟན་པ་བཞིན་མཐོང་ངོ་། །དེ་ནས་ཐར་ནས་ཀྱང་གལ་ཏེ་ཡི་དགས་རྣམས་ཀྱི་ནང་དུ་སྐྱེས་ན་སྔ་མ་བཞིན་དུ་འགྱུར་ལ་ཁྱད་པར་དུ་འབྱུང་བ་ནི། དེ་གང་དང་གང་དུ་འགྲོ་བ་དེ་དང་དེར་ལྕེ་བཅད་ཅིང་བཅད་ཅིང་སྐྱེ་བར་འགྱུར་རོ། །དེ་ནས་ཐར་ནས་ཀྱང་གལ་ཏེ་དུད་འགྲོ་རྣམས་ཀྱི་ནང་དུ་སྐྱེས་ན། དེ་བྱ་གོང་མ་སྲེག་དང་སྲེག་པ་དང་ཀ་ར་ཀ་བྷ་རྣམས་ཀྱི་ནང་དུ་སྐྱེ་བར་འགྱུར་ལ། བརྫུན་དུ་སྨྲ་བ་དེ་དང་རྒྱུ་འཐུན་པར་རང་གིས་སྐད་ཕྱུང་བ་ཉིད་ཀྱིས་གསོད་པར་བྱེད་དོ། །དེ་ནས་ཐར་ནས་ཀྱང་གལ་ཏེ་མི་རྣམས་ཀྱི་ནང་དུ་སྐྱེས་ན། དེའི་ལས་ཀྱི་འབྲས་བུ་སྔ་མ་དང་འཐུན་པར་ཚིག་གཟུང་བར་འོས་པར་མི་འགྱུར་རོ། །དེ་ནས་ཐར་ནས་ཀྱང་གལ་ཏེ་ལེགས་པར་བྱས་པའི་ལས་ཀྱིས་ལྷ་རྣམས་ཀྱི་ནང་དུ་སྐྱེས་ན། དེ་བརྫུན་དུ་སྨྲས་པའི་ལས་དེ་དང་རྒྱུ་འཐུན་པར་སྒྲ་མི་སྙན་པའམ་གླུ་བླང་བར་མི་ནུས་པའམ་སྐད་གག་གག་པོའམ་ལྷ་ཀུན་གྱི་ནང་ན་ཚིག་གཟུང་བར་མི་འོས་པ་དང་ཇི་ལྟར་ལྷ་གཞན་དག་སྨྲ་བ་དེ་ལྟར་མངོན་པར་བརྗོད་པ་ལེགས་པར་སྦྱར་བ་ཤིན་ཏུ་ཡིད་དུ་འོང་བར་སྨྲ་མི་ནུས་པར་འགྱུར་རོ། །དེ་ནས་ཡང་བརྒྱ་བྱིན་དེ་སེམས་ཅན་དམྱལ་བ་ཚ་བའི་ལས་ཀྱི་འབྲས་བུ་ལ་སྔར་བསྟན་པ་བཞིན་རྟོག་པར་བྱེད་དོ། །དེ་ལས་ཐར་ནས་གལ་ཏེ་ཡི་དགས་རྣམས་ཀྱི་ནང་དུ་སྐྱེས་ན་ལྗན་ལྗིན་སྤྱོད་པ་རྣམས་ཀྱི་ནང་དུ་སྐྱེ་བར་འགྱུར་ཏེ། དེ་སྔ་མ་བཞིན་དུ་ལྔ་འགྱུར་གྱིས་སྡུག་བསྔལ་བར་འགྱུར་རོ། །གལ་ཏེ་དུད་འགྲོ་རྣམས་ཀྱི་ནང་དུ་སྐྱེས་ན་དེ་རྒྱ་མཚོའི་ཆུ་སྲིན་དུ་འགྱུར་རོ། །གལ་ཏེ་མི་རྣམས་ཀྱི་ནང་དུ་སྐྱེས་ན་བཞིན་མི་སྡུག་པར་འགྱུར་རོ། །དེ་ནས་ཀྱང་ཐར་ནས་གལ་ཏེ་ལྷ་རྣམས་ཀྱི་ནང་དུ་སྐྱེས་ན་དེ་སྔ་མ་བཞིན་དུ་སྨད་པར་འགྱུར་རོ། །རབ་ཏུ་ཚ་བ་དང་མནར་མེད་པའི་ལས་ཀྱི་རྣམ་པར་སྨིན་པ་དག་ནི་ལྷ་རྣམས་མཐོང་བ་ཙམ་ཉིད་ཀྱིས་ཤི་བར་གྱུར་ན་མི་རུང་ངོ་སྙམ་ནས། སེམས་ཅན་དམྱལ་བ་ཆེན་པོ་དེ་གཉིས་ཀྱི་འཇིགས་པ་དག་སྤྲུལ་པ་མ་མཛད་དེ། ལྷ་ཡུལ་རྣམས་སུ་སེམས་ཅན་དམྱལ་བ་དེ་
གཉིས་ཀྱི་སྐྱེ་བ་སྤྲུལ་པ་མ་མཛད་དོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་སུམ་ཅུ་དགུ་པ། དེ་ནས་བརྒྱ་བྱིན་གྱིས་ལྷ་དེ་རྣམས་མངོན་པར་མཐོང་ནས་འདི་ལྟར་ཚིགས་སུ་བཅད་དེ་སྨྲས་པ། ཇི་ལྟར་ཕྱག་དར་རྣམས་ལ་རླུང་། །བབ་ན་ཡང་དག་འཐོར་བྱེད་ཅིང་། །དབང་མེད་མཁའ་ལ་འཁྱམ་པ་ལྟར། །ལས་འགྲོ་སྐྱེ་དགུ་དེ་བཞིན་ནོ། །དབྱེ་བ་དང་ནི་འབྲལ་བ་དང་། །བདེ་དང་དེ་བཞིན་སྡུག་བསྔལ་དག །ལས་ལ་རག་ལས་དེ་མེད་པར། །དེ་བས་ཅུང་ཟད་འཇུག་མི་འགྱུར། །ཐུབ་པ་དེ་ཉིད་གཟིགས་པ་ཡིས། །ལས་ཀྱི་ཕྱོགས་འདི་སྤྲུལ་པ་མཛད། །སེམས་ཀྱི་ས་བོན་ལས་རྣམས་ནི། །འདི་ལྟར་ཀུན་ནས་མཐའ་མེད་དོ། །ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །དེ་བཞིན་གཤེགས་པ་མ་གཏོགས་པར། །སེམས་དང་ལྡན་པས་ཤེས་པར་དཀའ། །གཅིག་དང་བརྒྱ་དང་སྟོང་དང་ནི། །ཁྲི་ཕྲག་དང་ནི་འབུམ་རྣམས་ཀྱིས། །སྣ་ཚོགས་སུ་ནི་སྐྱེད་བྱེད་པ། །ལས་ཀྱི་དྲ་བ་འདི་ཆེའོ། །ཇི་ལྟར་སྐུད་པས་བཏགས་པ་ཡི། །བྱ་དག་ཐག་རིང་གནས་པ་ཡང་། །ཀུན་ཏུ་དྲངས་ནས་འཆིང་བྱེད་ལྟར། །ལས་སྐུད་འདི་ཡང་དེ་དང་འདྲ། །དེ་ལྟར་བརྒྱ་བྱིན་དེས། ལྷ་དེ་རྣམས་ལ་སེམས་ཅན་རྣམས་ཀྱི་ཚེ་འདི་ལ་མྱོང་བར་འགྱུར་བ་དང་། མྱོང་བར་འགྱུར་བར་མ་ངེས་པ་དང་། སྐྱེས་ནས་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བའི་ངོ་མཚར་ཆེ་བ་རྣམ་པ་དུ་མ་དེ་དག་བསྟན་ཅིང་། དེ་ནས་ཡང་དགེ་བ་དང་མི་དགེ་བ་དང་ལུང་དུ་མ་བསྟན་པ་རྣམ་པ་མཐའ་ཡས་པ་དང་ལས་ཀྱི་དྲ་བ་མཐའ་ཡས་པ་བསྟན་ནས། བཅོམ་ལྡན་འདས་ཀྱི་གཟུགས་བརྙན་སངས་རྒྱས་ཀྱི་མཛད་པ་དེ་དག་ལ། ལྷ་དེ་རྣམས་དང་ལྷན་ཅིག་མགོ་བོས་ཕྱག་འཚལ་ནས། དེ་ནས་ཡང་འཁོར་བ་ལ་ཡིད་སྐྱོ་བའི་ལྷ་དེ་རྣམས་དང་ལྷན་ཅིག་ཤིང་སཱ་ལ་ཟུང་དེ་ནས་བྱུང་ངོ་། །དེ་ནས་སྒོ་དེ་བརྒྱ་བྱིན་དེས་ཇི་ལྟར་སྔར་བཅད་པ་དེ་ལྟར་བཅད་དོ། །དེ་ནས་བརྒྱ་བྱིན་ཕྱིར་བྱུང་ནས་ལྷ་དེ་རྣམས་ལ་རྟོག་པར་བྱེད་དེ། བག་མེད་པར་གནས་པ་རྣམས་ཕན་ཚུན་རྩེ་ཞིང་དགའ་
དགུར་སྤྱོད་པ་མཐོང་བ་དང་། ལྷའི་རྒྱལ་པོ་དེ་སྙིང་རྗེ་སྐྱེས་ནས་འདི་ལྟར་ཚིགས་སུ་བཅད་དེ་སྨྲས་པ། བག་མེད་པ་ཡིས་ཡོངས་བསླུས་པ། །དེ་ཡི་བློ་ལ་འཁྲིག་པ་དང་། །ཟས་ལ་རྟག་ཏུ་དགའ་བ་རྣམས། །ལྷ་ཡི་ལུས་མདོག་དུད་འགྲོར་ཟད། །གང་ཚེ་ལེགས་པར་སྤྱད་པའི་ལས། །ལྷ་ཡི་གནས་ནས་ཟད་གྱུར་ན། །དེ་ཚེ་ཕྱིར་ཡང་ཁྱོད་ཉིད་གོ །བག་མེད་པ་ལ་སྤྱོད་པར་འགྱུར། །བག་མེད་དགྲ་ཡིས་ཟིན་པ་དང་། །ལས་ཀྱི་རླུང་གིས་བདས་པ་རྣམས། །འགྲོ་བ་དེ་དང་དེ་དག་ཏུ། །ལྷ་རྣམས་ཤིང་བཞིན་ལྟུང་བར་འགྱུར། །ལྷ་ཡི་གནས་ནས་ལན་བརྒྱའམ། །ཁྲི་ཕྲག་ཉིད་དུ་སྐྱེ་འཆི་ཡང་། །སྐྱོ་བ་སྐྱེད་པར་མི་བྱེད་པ། །སྙིང་ལ་མྱ་ངན་རབ་ཏུ་སྐྱེ། །དེ་ལྟར་བརྒྱ་བྱིན་དེ་ལྷ་དག་གི་དྲུང་དུ་འགྲོ་བར་བྱེད་ལ། དེ་དག་ཀྱང་ལྷའི་རྒྱལ་པོ་དེ་ཉིད་མཐོང་ནས་ཡིད་རབ་ཏུ་དགའ་ཞིང་གུས་པ་དང་བཅས་པས་རིངས་པར་དོང་ངོ་། །དེ་ནས་བརྒྱ་བྱིན་ལྷ་དེ་དག་ཉིད་དང་ལྷན་ཅིག་སེམས་གཟུང་བར་བྱ་བའི་དོན་དུ། སིལ་སྙན་ཡན་ལག་ལྔ་དང་ལྡན་པ་ཚལ་དང་ཉེ་བའི་ཚལ་ཉམས་དགའ་བ་རྣམས་སུ་བྲོ་གར་བྱེད་དགའ་དགུར་སྤྱོད་པར་བྱེད་དོ། །ཤིང་སཱ་ལ་ཟུང་གི་ཕྱི་རོལ་དག་ན་གནས་པའི་ལྷ་གང་ཡིན་པ་དེ་དག་ཀྱང་འབབ་ཆུ་དང་ཚལ་དང་ཉེ་བའི་ཚལ་དང་ལྡན་པ་དེ་རྣམས་ན་དགའ་བར་བྱེད་དོ། །བརྒྱ་བྱིན་ཡང་ཆོས་བཟང་ན་འཁོད་པའི་ལྷ་ཐམས་ཅད་དང་ལྷན་ཅིག་ཆོས་བཟང་དེ་ཉིད་དུ་དོང་ངོ་། །ཤིང་སཱ་ལ་ཟུང་གི་ནང་ན་འཁོད་པའི་ལྷ་དེ་དག་ཀྱང་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པ་དེ་ཟད་ཅིང་མཐར་ཐུག་པར་མ་གྱུར་པ་དེ་སྲིད་དུ་དགའ་བར་བྱེད་དོ། །དེ་ནས་ཕྱིས་ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་དང་སོ་སོ་ཡང་དག་པར་མྱོང་བར་འགྱུར་བའི་ལས་ཀྱིས་མིའི་ནང་དུ་སྐྱེས་ནས། དེ་ལས་དེ་དང་རྒྱུ་འཐུན་པར་རྟག་ཏུ་བདེ་བ་དང་ལྡན་ཞིང་ཚལ་གྱི་བདག་པོ་ཚལ་གྱིས་འཚོ་བ་དང་ཚལ་གྱི་ནང་ན་འཚོ་བའམ་རི་མ་ལ་ཡ་ན་གནས་ཤིང་རྟག་ཏུ་བདེ་བ་དང་ལྡན་པར་འགྱུར་བ་
མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་མིག་ཕྱེ་ཞིང་འགྲོ་བ་དང་བཙུམས་ནས་འགྲོ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་བྱས་པའི་ལས་ཀྱི་མཐའ་སྤྱད་པ། དྲང་པོའི་རང་བཞིན་ཅན་གཡོ་སྒྱུ་མེད་པ་གཞན་ལ་མི་གནོད་པ། ལས་དང་འབྲས་བུ་ལ་དད་པ་ཡང་དག་པའི་ལྟ་བ་དང་ཡང་དག་པའི་ལས་ཀྱི་མཐའ་དང་ལྡན་པ་གང་ཞིག་ནོར་རྫས་མང་པོ་དང་ལྡན་པར་གྱུར་ནས་སྦྱིན་པ་སྦྱིན་ཞིང་། རྒྱ་མཚོར་འཇུག་པའི་ཚོང་པའི་ཆེད་དུ་ཆོས་ཀྱི་སྟེགས་གྲུ་བྱིན་ལ་ཚོང་པ་དེ་ཡང་དེར་ཞུགས་ཏེ། ཤིན་ཏུ་འབྱོར་པ་དང་ལྡན་པས་སྦྱིན་པ་སྦྱིན། བསོད་ནམས་དག་བྱེད་ལ་དེ་ཡང་དེ་ལས་འཚོ་བར་མི་བྱེད་ན། དེ་ལྟར་སྦྱིན་པ་བྱིན་ཞིང་བསོད་ནམས་བྱེད་པ་ཡིན་ནོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། རེས་འགའ་སྡེ་གཞན་གྱིས་འཇིགས་སམ། རྒྱལ་པོས་འཇིགས་ནས་གྲོང་མེད་པར་ལམ་དུ་ཞུགས་པ་གང་ཡིན་པ་དེ་འཇུག་པར་བྱེད་ལ། ཞུགས་ནས་ཀྱང་ལས་ཀྱི་འབྲས་བུས་འཇིགས་པ། དད་པ་དང་ལྡན་པ་རྒྱལ་པོའི་ཆད་པས་འཇིགས་པ་མ་ཡིན་པས། དེ་ནས་ཆུང་ཟད་ཕུབ་མ་ཙམ་ཡང་ལེན་པར་མི་བྱེད་ན་དེ་མ་བྱིན་པར་ལེན་པ་སྤངས་པ་ཡིན་ནོ། །སྲོག་གཅོད་པ་སྤངས་པ་ཇི་ལྟ་བུ་ཡིན་ཞེ་ན། འདི་ལ་སྲོག་ཆགས་རྐང་བརྒྱ་པ་ཁ་གཉིས་ཡོད་པ་རྒྱས་བཟུང་བ་དག་གསོད་པར་མི་བྱེད་ལ། ཡིད་ལ་ཡང་སྡིག་པ་སེམས་པར་མི་བྱེད་པ་དང་སེང་གེ་དང་སྟག་རྒྱུ་བའི་ས་དག་ཏུ་དེ་དག་གསད་པར་བྱ་བའི་ཕྱིར། རྔོན་པ་དེ་རྣམས་ཀྱིས་རྙི་བཙུགས་ན་རྔོན་པ་དེ་རྣམས་ལ་ནོར་རྫས་བྱིན་ནས། རྙི་དེ་དག་ལས་ཐར་བར་བྱས་ལ་དེ་ལ་རུང་བར་མི་རྗོད་ཀྱི། ཡིད་ལ་གཅུགས་པར་བྱེད་ཅིང་གཞན་དག་ཀྱང་དགེ་བ་དེ་ཉིད་ལ་སྦྱོར་བར་བྱེད། རབ་ཏུ་འཇོག་པར་བྱེད། ཡང་དང་ཡང་དུ་ལེགས་པར་བྱས་པ་གཞན་དང་གཞན་དག་ཤིན་ཏུ་ལེགས་པར་སྤྱད་པ་བྱེད་ན།
དེ་ལྟར་སྲོག་གཅོད་པ་དང་མ་བྱིན་པར་ལེན་པ་སྤངས་པའི་སྐྱེས་བུ་དེ་ནི་དགེ་བའི་ལས་རྣམས་ལ་དམིགས་ཤིང་། དེའི་ལས་ཀྱི་མཐའ་ཡང་འགྲུབ་པ་དང་དེའི་བསམས་པ་ཐམས་ཅད་ཀྱང་ལྷ་རྣམས་སྒྲུབ་པ་དང་དེའི་བཞིན་གྱི་མདོག་ཀྱང་གསལ་བ་དང་དེ་ལ་ལྷ་རྣམས་ཀྱིས་ཀྱང་མཆོད་པར་འགྱུར་ཏེ། དེ་དག་ནི་དེའི་ལས་ཀྱི་འབྲས་བུ་ཚེ་འདི་ལ་འབྱུང་བ་ཡིན་ནོ། །ཕྱིས་ལུས་དང་བྲལ་ནས་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། ལེགས་པར་བྱས་པའི་ལས་ཀྱི་མཐའ་སྤྱད་པ་སུམ་ཅུ་རྩ་གསུམ་པའི་ལྷ་མིག་ཕྱེ་བ་དང་བཙུམས་ཏེ་འགྲོ་བའི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱིས་མཐའ་ཤིན་ཏུ་བརྒྱན་པ་དེའི་ཉམས་དགའ་བའི་གནས་གང་ཡིན་པ་དེ་ནི། མི་ཐམས་ཅད་ཀྱི་བསམ་པས་བསམ་པར་ཡང་མི་ནུས་ཏེ་དེར་སྐྱེ་བར་འགྱུར་རོ། །ལྷ་དེ་རང་གི་འོད་དང་བདེ་བ་མཆོག་དང་ལྡན་ལ་ཤ་དང་རུས་པ་དང་ཆུ་སེར་དང་བྲལ་བ། འགྲན་ཟླའི་འཇིགས་པ་གཞན་དང་བྲལ་བ། ཀུན་དུ་ཚོལ་བའི་འཇིགས་པ་དང་བྲལ་བ། སེར་སྣ་དང་བྲལ་བ། མི་མཛའ་བ་དང་ཕྲད་པ་དང་བྲལ་བ། འཆི་བའི་དུས་དེ་མ་གཏོགས་པར་དུས་དེ་ལ་ནད་ཀྱི་འཇིགས་པ་དང་བྲལ་བ། གནོད་པའི་འཇིགས་པ་དང་བྲལ་བ། ནད་དང་འཆི་བའི་འཇིགས་པ་དང་བྲལ་བ། རྒ་བའི་འཇིགས་པ་དང་བྲལ་བ། རབ་ཏུ་བག་མེད་པ་དུས་དེ་སྲིད་དུ་ཤིན་ཏུ་ཉམས་དགའ་བ་ཐམས་ཅད་མཐོང་སྟེ། མཐོ་རིས་ཀྱི་བདེ་བ་ལ་འཆུམས་པའི་འདོད་པའི་ཡོན་ཏན་ལྔ་གཅིག་ཏུ་ཡིད་དུ་འོང་བ། ཡུལ་གྱི་བདེ་བ་རྣམ་པ་དུ་མ་རྣམས་ཀྱིས་གཞལ་མེད་ཁང་གསེར་དང་བཻ་ཌཱུརྱ་དང་ནོར་བུའི་ལན་ཀན་བྲེས་པའི་གཞལ་མེད་ཁང་དཀྲིགས་པ། གཞན་དག་ན་ཤིང་ལྗོན་པ་དང་ཉེ་བའི་ཚལ་རྣམ་པ་སྣ་ཚོགས་ཡོད་པ། རིན་པོ་ཆེ་སྣ་བདུན་གྱི་པད་མའི་རྫིང་རྣམས་ཀྱི་ནང་ན་བྱ་ངང་པ་དང་ངུར་པ་དང་ཀཱ་རཎྜ་པས་བརྒྱན་ཅིང་རྨ་བྱ་མྱོས་པ་སྒྲ་འབྱིན་པ་རིའི་སྨན་ལྗོངས་རྣམས་ན་བྱ་སྣ་ཚོགས་ཀྱིས་བསྟེན་པ། རི་རབ་ཀྱི་རིའི་རྩེ་མོ་རྣམས་ན་ཡང་རིན་པོ་ཆེ་སྣ་བདུན་གྱི་འབྱུང་ཁུངས་ཀྱིས་བརྒྱན་པ། ལྟེང་ཀ་
རྣམས་ཀྱི་ནང་ན་གསེར་དང་དངུལ་དང་མུ་ཏིག་གི་བྱེ་མ་བདལ་བ། རི་རབ་ཀྱི་སྨན་ལྗོངས་རྣམས་ཀྱི་ནང་ན་ཡང་རིན་པོ་ཆེ་སྣ་ཚོགས་ཀྱི་ཤིང་ལྗོན་པ་རྣམས་ཀྱིས་བརྒྱན་པ། ཤིང་ལྗོན་པ་རྣམས་ཀྱང་ཉི་མ་ལྟར་གསལ་བ། རི་ཁྲོད་ཚང་ཚིང་དག་ན་ཡང་གསེར་དང་བཻ་ཌཱུརྱའི་ལྕུག་མའི་ཚོགས་འཕྱང་ཞིང་། མེ་ཏོག་གི་ལྕུག་མ་འཕྱང་བས་བརྒྱན་པ། བུང་བ་འབུམ་གྱིས་བརྒྱན་པ། རི་རབ་ཀྱི་ཕུག་པ་རྣམས་ཀྱང་རིན་པོ་ཆེ་བཟང་པོས་བརྒྱན་པ། རྡོ་ལེབ་དང་སའི་ཕྱོགས་ཆ་མཐོན་དམན་རན་པ། རིའི་ཟོམ་རྣམས་ཀྱང་རིན་པོ་ཆེ་སྣ་ཚོགས་ཀྱིས་བརྒྱན་ཅིང་རྡོ་ལེབ་ཀྱིས་བརྒྱན་པ། མེ་ཏོག་དྲི་ཞིམ་པོ་རྒྱ་ཆེར་དཔྱངས་པ་དང་ལྡན་པ། རང་གི་བསམ་པས་བརྒྱན་པ་བས་ཀྱང་ཆེས་ལྷག་ཅིང་། ཉམས་དགའ་བའི་ས་ཕྱོགས་སྙིང་དགའ་བ་རྣམས་དང་། གཞན་ཡང་གད་ཀ་དང་དགོན་པ་དག་ན་ཤིང་ལྗོན་པ་རབ་ཏུ་འབར་བ་ལྟ་བུས་བརྒྱན་པ། དཔག་བསམ་གྱི་ཤིང་ལྗོན་པ་འབུམ་གྱིས་མཛེས་པར་བྱས་པ། རང་གིས་བྱས་པའི་ལས་ཀྱི་མཐའ་ལ་སྤྱོད་པ། ལྷ་དང་ལྷ་མོ་འབུམ་སྙེད་ཀྱིས་ཡོངས་སུ་བསྐོར་བ། རོལ་མོ་དང་སིལ་སྙན་གྱི་སྒྲས་རྣ་བ་ཚིམ་པར་བྱེད་ཅིང་། པི་བང་གི་སྒྲ་ཡོངས་སུ་འབྱིན་པར་བྱེད་པ་དེ་རྣམས་ན་རྩེ་བར་བྱེད་དོ། །དེས་གང་དང་གང་མཐོང་བ་དེ་དང་དེ་ཉིད་འཐོབ་ཅིང་འགྱུར་བ་མེད་ལ་ཡོན་ཏན་ཐམས་ཅད་དང་ལྡན་པ། ཐུན་མོང་མ་ཡིན་པ་གཞན་གྱིས་འཕྲོག་པར་མི་ནུས་པ་ཡིན་ནོ། །དེ་ནས་ལྷ་འབུམ་སྙེད་ཀྱིས་ཡོངས་སུ་བསྐོར་བ་དེ། ལྷའི་ཚོགས་གཞན་རྣམས་ཀྱི་ནང་ན་ཡོངས་སུ་སྤྱོད་པ་ན། རེས་འགའ་དེ་དུས་སྟོན་གྱི་ཚིགས་ཞེས་བྱ་བ་འདོད་པ་ཀུན་ལས་བྱུང་བའི་ཤིང་ལྗོན་པ་རྣམས་ཀྱིས་བརྒྱན་པ། འབབ་ཆུའི་ཚོགས་བརྒྱ་སྙེད་ཀྱིས་གང་བ། པད་མའི་རྫིང་དུ་མས་རྣམ་པར་བརྒྱན་པ། ལྷ་འབུམ་སྙེད་དུ་མས་བསྟེན་བསྟེན་པ། བཻ་ཌཱུརྱའི་ལྕུག་མ་འཕྱང་བས་བསྐོར་བ། གཞལ་མེད་ཁང་གི་རྩེ་མོ་ལ་བྱ་སྐད་འབྱིན་པ་འབུམ་སྙེད་ཀྱིས་བསྐོར་ཅིང་ཉམས་དགའ་བར་བྱེད་པའི་རི་དེ་ལ་འཛེག་པར་བྱེད་དོ། །དེ་ནས་ལེགས་པར་བྱས་པའི་ལས་ཀྱི་མཐའ་སྤྱད་པ་དེ་ཉམས་དགའ་བའི་རིའི་ཟོམ་དེ་ན་བདེ་བ་མྱོང་བར་བྱེད་དེ།
ལེགས་པར་བྱས་པའི་ལས་ཀྱི་རིན་གྱིས་ཉོས་པ་རྣམས་ནི། འདོད་རྒྱལ་ལས་མ་བྱུང་། གཞན་གྱིས་མ་བྱས། གཞན་ནས་མ་འོངས་ཉམས་པ་མ་ཡིན། དབང་ཕྱུག་ལ་སོགས་པ་མགུ་ནས་བྱིན་པ་མ་ཡིན་པ་དེ་དག་ལ་དེ་འཛེགས་ནས་རིའི་ཟོམ་དེ་ན། བདག་ཉིད་དང་མཚུངས་པའི་འོད་དང་ལྡན་པའི་ལྷ་དང་ལྷ་མོའི་ཚོགས་རྣམ་པ་དུ་མ་འབུམ་སྙེད་ཀྱིས་ཀུན་དུ་གང་ཞིང་། སིལ་སྙན་ཡན་ལག་ལྔ་དང་ལྡན་པས། དགའ་བར་བྱེད་པ་གང་ཡིན་པ་དེ་དག་དགའ་བར་བྱེད་ཅིང་། དགའ་དགུར་སྤྱོད་པར་བྱེད་ལ་ལྷ་དེ་དག་ཀྱང་དེ་བཞིན་དུ་རང་གི་འོད་དང་དེ་བཞིན་གཟུགས་དང་དབང་ཕྱུག་གི་མཐུ་དང་ལྡན་ཞིང་། དེ་དག་ཀྱང་དེ་བཞིན་དུ་མིག་མི་འཛུམས་པར་ལྟ་བ། དེ་དག་ཀྱང་དེ་བཞིན་དུ་པད་མའི་ཕྲེང་བ་ཐོགས་པ། དེ་དག་ཀྱང་དེ་བཞིན་དུ་ཐགས་སུ་མ་བཏགས་པའི་གོས་གྱོན་པ་ཡིན་ཏེ། དེ་ལྟར་ལྷ་མཐུ་བོ་ཆེ་དེ་ཐམས་ཅད་མཐོང་ངོ་། །དེ་ནས་ལྷའི་བུ་དེ་རིའི་ཟོམ་དེ་ལ་འཛེགས་ནས་ས་ཕྱོགས་དག་ལ་རྟོག་པར་བྱེད་དེ། ལེགས་པར་བྱས་པའི་ལས་ཀྱི་མཐའ་སྤྱད་པའི་ལྷ་དེའི་གནས་སུ་གྱུར་པ་གནས་གཉིས་ན་གནས་པ། ཆུ་བོ་དང་རི་རབ་འོད་ཀྱི་ཕྲེང་བ་འབར་བ། རྣམ་པ་སྣ་ཚོགས་ཀྱིས་ཡང་དག་པར་གང་བའི་ས་ཕྱོགས་རྣམས་མངོན་པར་མཐོང་ནས་སྔ་མ་བཞིན་སྙིང་ཤིན་ཏུ་དགའ་སྟེ། ལྷའི་བདེ་བ་མཆོག་མྱོང་ངོ་། །ལྷ་དེ་རྣམས་ཀྱི་མཐུ་ནི་འདི་ལྟ་བུ་ཡིན་ཏེ། གང་གི་ཚེ་ལྷ་དང་ལྷ་མ་ཡིན་གཡུལ་འགྱེད་པར་འགྱུར་བ་ན། དེ་མིག་ཕྱེ་བ་ཙམ་གྱིས་བརྒྱབ་པར་འགྱུར་ལ། གང་གི་ཚེ་ལྷ་མ་ཡིན་མིག་ཚུམས་ཀྱིས་བྱས་པ་དེའི་ཚེ། སུམ་ཅུ་རྩ་གསུམ་གྱི་བར་དུ་འགྲོ་སྟེ། དེ་ལྟར་མགྱོགས་པ་ཡིན་ནོ། །རྒྱུ་དང་མཚུངས་པར་འབྲས་བུ་འབྱུང་སྟེ། ཇི་ལྟར་རྒྱ་མཚོ་ལས་སྒྲོལ་བར་བྱེད་པའི་གྲུ་མྱུར་དུ་སྦྱིན་པར་བྱ་བ་དེ་དག་བྱིན་པ་དེས། སེམས་ཅན་དག་སྒྲོལ་བར་བྱེད་པ་དེ་ལྟར་དེ་དག་གི་མགྱོགས་པར་འགྱུར་བ་དེ་ནི་མིག་ཕྱེ་བ་ཙམ་གྱིས་འགྲོ་ལ། བཙུམས་པ་ཙམ་གྱིས་སླར་ལྡོག་སྟེ། སྔོན་བྱས་པའི་རྒྱུ་དེས་ན་མྱུར་བར་འགྲོ་བ་ཡིན་ནོ། །དེ་ནས་ཡུན་རིང་མོ་ཞིག་ཏུ་ལྷའི་བདེ་བ་དེ་མྱོང་བར་བྱེད་དོ། །དེ་ནས་གལ་ཏེ་ལེགས་པར་བྱས་པའི་ལས་ཟད་
ནས་ལྷའི་བུ་འཆི་བར་འགྱུར་ལ། དེའི་འཆི་བའི་ལྟས་ལྔ་པོ་འབྲུ་མར་ཟད་ན་མར་མེའི་སྣང་བ་ཟད་པ་འདི་ལྟ་བུ་དག་འབྱུང་བར་འགྱུར་ཏེ། དེ་དང་པོ་རྡུལ་འབྱུང་བར་འགྱུར་བ་དང་དབང་པོ་ཐམས་ཅད་ཉམས་པ་དང་འདོད་པའི་ཡོན་ཏན་ལྔ་ཐམས་ཅད་དུ་རོ་མི་བྲོ་བ་མྱོང་སྟེ། ལྷ་གཞན་དག་གིས་མཐོང་ནས་ངོ་ཚ་བ་དང་རང་གི་ལྷ་མོ་ལྷ་གཞན་གྱི་དྲུང་དུ་འགྲོ་བ་དང་དེ་ཡང་མཐོང་ནས། ཕྲག་དོག་དང་སེར་སྣས་བསྐྱེད་པ་འབྲལ་བའི་སྡུག་བསྔལ་སྣ་ཚོགས་གང་རབ་ཏུ་ཚ་བའི་མེ་ལྟ་བུ་འབྱུང་ངོ་། །གལ་ཏེ་གཞན་དུ་མ་བྱིན་པར་ལེན་པ་ཞིག་བླངས་ན། དེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་དུས་དེའི་ཚེ་སྣོན་དུ་འགྱུར་ཏེ། དེའི་རྒྱན་དེ་དག་ཐམས་ཅད་ལྷ་མོ་དེ་དག་གིས་འཕྲོག་པར་བྱེད་ལ། ཕྲོགས་ནས་ཀྱང་ལྷའི་བུ་གཞན་ལ་འདོགས་པར་བྱེད་དོ། །གལ་ཏེ་བརྫུན་སྨྲས་པ་ཞིག་ཡིན་ན། དེ་དག་གཞན་དུ་སྨྲ་བར་བྱེད་ཅིང་གཞན་དུ་འགྲོ་བར་བྱེད་ལ། ལྷ་མོ་དེ་དག་གཞན་དུ་ཉན་པར་བྱེད་དེ། ཚིག་བརླང་པོས་དེ་ལ་མངོན་པར་སྤྱོ་བར་བྱེད་དོ། །གལ་ཏེ་སྐྱེ་བ་གཞན་དག་ཏུ་སྡོམ་པ་བླངས་པ་རྣམས་ལ། བཏུང་བ་ཆང་བླུད་དམ་བདག་ཉིད་ཀྱི་བསླབ་པ་བཤིག་གམ་ཆང་འཐུངས་ན། དེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་དུས་དེའི་ཚེ་སྣོན་དུ་འགྱུར་ཏེ། དེ་འཆི་བའི་དུས་དེ་ན་སེམས་འཁྲུག་པའམ་དྲན་པ་ཉམས་པའམ་དེ་བཞིན་དུ་ཉིས་འགྱུར་དུ་ཀུན་དུ་གདུང་བར་བྱེད་ལ། དེ་སེམས་ཅན་དམྱལ་བར་འགྲོ་བར་འགྱུར་རོ། །གལ་ཏེ་སྲོག་གཅོད་པ་ཞིག་ཡིན་ན། དེ་ཚེ་ཐུང་ངུར་གྱུར་ནས་མྱུར་དུ་འཆི་བར་འགྱུར་རོ། །འདོད་པས་ལོག་པར་གཡེམ་པས་ནི་ཆུང་མ་གཞན་གྱི་དྲུང་དུ་འགྲོ་བར་འགྱུར་ཏེ། དེ་ལྟར་སྡོམ་པ་ལྔ་དྲལ་བ། ལན་གྲངས་གཞན་ལ་མྱོང་བར་འགྱུར་བའི་ལས་ཀྱི་ཞགས་པས་བཅིངས་པ། འཆི་ལྟས་ལྔས་རྣམ་པར་དཀྲུགས་པ། བག་མེད་པར་གནས་པ། དེ་འཆི་བདག་གི་རྒྱལ་པོས་འདྲེན་པར་བྱེད་དོ། །དེ་ལྟར་གནས་སྐབས་ཐམས་ཅད་དུ་ཚུལ་ཁྲིམས་ཀྱི་མཐའ་ལེགས་པར་མ་སྤྱད་དེ། མཐོ་རིས་ཀྱི་རྒྱུར་སྤྱོད་པ་གང་ཡིན་པ་དེ་ནི་སྲེད་པ་ཡིན་ནོ། །དེ་ནས་ལས་ཀྱི་ཞགས་པས་བཅིངས་པ་དེ་སེམས་ཅན་
དམྱལ་བ་དང་ཡི་དགས་དང་དུད་འགྲོའི་ནང་དུ་སྐྱེ་བར་འགྱུར་རོ། །ལེགས་པའི་མཐའ་མ་ཡིན་པ། མཐོ་རིས་ཀྱི་བདེ་བ་དེ་དག་ཉིད་དགེ་སློང་དེས་མཐོང་སྟེ། འདུས་བྱས་ཀྱི་ཆོས་ཐམས་ཅད་ཀྱི་ནང་ན་ཕྱོགས་གཅིག་ཏུ་གྱུར་པ་ཉམས་དགའ་བ་རྣམས་ཀྱི་ནང་ན། ཉམས་པར་བྱེད་ཅིང་ཉེས་པ་ཁོ་ནར་གྱུར་པ། ངེས་པར་གཞན་དུ་གྱུར་ཅིང་གནས་པ་མ་ཡིན་ལ། གློག་ལྟར་འབྲས་བུ་མི་བརྟན་པ་འདོད་པ་ཐམས་ཅད་ཀྱི་ནང་ན། ཉེས་པ་དང་བཅས་པའི་གཡོ་བ་ཉིད་རྟོགས་ནས། འདི་ལྟར་ཚིགས་སུ་བཅད་དེ་སྨྲས་པ། རྨོངས་པ་བག་མེད་ལྷ་ཡུལ་དུ། །མི་བཟད་མེ་ཡིས་ཡོངས་སུ་བསྐོར། །བཏུང་བ་རྙོག་ཅན་འཐུངས་ནས་སུ། །སེམས་ཅན་དམྱལ་བར་ལྟུང་བར་བྱེད། །དང་པོར་འདོད་ཆགས་ཉིད་ཀྱིས་བསྒྱུར། །ཞེ་སྡང་གིས་ཀྱང་ཟིལ་གྱིས་ནོན། །གཏི་མུག་ཉིད་ཀྱིས་རྨོངས་བྱས་པ། །དེ་ཡིས་བྱ་བ་སྟོངས་པར་བྱས། །སིལ་སྙན་ཡན་ལག་ལྔ་དག་གིས། །ཀུན་ནས་རབ་ཏུ་བསླུས་པ་རྣམས། །གང་དག་ངེས་པར་འབྱུང་འགྱུར་བ། །འཆི་བའི་སྡུག་བསྔལ་མི་རིག་གོ །ཁྱོད་ཀྱིས་གང་ལ་འདོད་ཆགས་སྤྱད། །ལྷ་མོ་འདི་དག་མི་བརྟན་ཏེ། །དེ་དག་གིས་ནི་ཁྱོད་སྤངས་ནས། །དེ་ནས་གཞན་དུ་འགྲོ་བར་བྱེད། །སྐྱེས་པ་དར་ན་སྟེན་བྱེད་ལ། །རྒུད་པར་གྱུར་ན་སྤོང་བྱེད་པ། །བུད་མེད་ལྷན་ཅིག་སྤྱད་པ་ཡི། །འདི་དག་གི་ནི་རང་བཞིན་མཐོང་། །འདོད་ཆགས་རྨོངས་པའི་སྐྱེས་པ་འདི། །རི་དགས་བཞིན་དུ་རྨོངས་པར་བྱེད། །ཕྱི་ནས་རྒུད་པར་གྱུར་པ་དང་། །ཡང་བའི་སེམས་ཀྱིས་གཏོང་བར་བྱེད། །དེ་ནི་ཉོན་མོངས་མི་བཟད་ལ། །ཉེ་བར་གནས་ཚེ་བུད་མེད་ནི། །ཕན་དང་བཀུར་སྟི་དགའ་བ་དང་། །རྒྱུན་རིངས་བཤེས་པའང་དྲན་མི་བྱེད། །ཇི་ལྟར་མེ་ཏོག་རྙིངས་གྱུར་ན། །བུང་བས་བཏང་སྟེ་གཞན་དུ་འགྲོ། །དེ་ལྟར་ཉོན་མོངས་གྱུར་པའི་ཚེ། །བུད་མེད་རྣམས་ཀྱིས་བཏང་ནས་འགྲོ། །དུག་དང་སྦྲང་རྩིར་འདྲེས་པ་ལྟར། །བུད་མེད་ཐམས་ཅད་མ་བརྟགས་ན། །དགའ་བ་རྣམས་ཀྱི་རྒྱུར་འགྱུར་ཞིང་། །སྙིང་དུ་སྡུག་ཀྱང་བརྟན་པ་མེད། །མི་དག་འདོད་པ་རྣམས་ཀྱིས་རྨོངས། །ཚིག་རྣམས་ཀྱིས་ཀྱང་ཁྱད་པར་དུ། །སྐྱེས་བུ་བརྟན་
པོ་ཁོང་བརྟན་པ། །ཡིད་ལ་དེ་དང་གཅུགས་མ་བྱེད། །འདི་རྣམས་ཀྱིས་ནི་མི་དག་རྨོངས། །ཁྱད་པར་དུ་ནི་འདོད་པས་བསྒྱུར། །ཕ་རོལ་ཏུ་ནི་འགྲོ་བ་གང་། །བདག་ལ་ཕན་པར་མི་བྱེད་དོ། །ལྷ་དང་མི་དང་ལྷ་མ་ཡིན། །གནོད་སྦྱིན་ཤ་ཟ་ལྟོ་འཕྱེ་སྲིན། །མིག་འཕྲུལ་ལྟ་བུའི་བུད་མེད་ཀྱིས། །ཁྱད་པར་དུ་ནི་སླུ་བར་བྱེད། །འདོད་ལས་སྐྱེས་པའི་བདེ་བ་གང་། །ཕལ་པ་ཡུལ་ལས་བྱུང་གྱུར་པ། །འཆི་བའི་དུས་ལ་བབ་པ་ན། །ཐ་ཆད་ལྷ་རྣམས་ཉམས་པར་བྱེད། །འཆི་བའི་ཞགས་པས་དམ་བཅིངས་པ། །ཁྱོད་ནི་དུས་སུ་ཁྱེར་འགྱུར་གྱི། །ས་གཞི་འདི་དག་ཐམས་ཅད་དང་། །ཚལ་དང་ཉེ་ཚལ་བརྒྱན་མི་ཁྱེར། །ཀུན་ནས་ལྷ་ཡི་འཇིག་རྟེན་ནས། །འཆི་བདག་གིས་ནི་དྲངས་པ་ན། །བུད་མེད་ཅི་བྱེད་གཉེན་རྣམས་ཅི། །བདེ་བ་དག་གིས་ཞི་ཅིག་འགྱུར། །དེ་ལྟར་དགེ་སློང་དེ་ལྷ་དེའི་འཆི་བ་མངོན་པར་མཐོང་ནས་སྙིང་རྗེ་བར་བྱེད་ཅིང་ཡུལ་རྣམས་ལ་ཡང་སྨོད་པར་བྱེད་དོ། །རང་གིས་བྱས་པ་སྤྱད་པའི་ལྷའི་བུ་དེ་ཡང་ལས་ཀྱི་ཞགས་པས་གང་དུ་འདྲེན་པ་དེར་ཁྲིད་པར་བྱེད་དེ། ལྷ་བག་མེད་པ་ལ་གནོས་པ་འདོད་པ་ལྔ་ལ་རྣམ་པར་ཆགས་པ་དེ་དག་ཀྱང་། དེ་ནས་ཡང་དགའ་བར་བྱེད་དགའ་དགུར་སྤྱོད་པར་བྱེད་དེ། ཡུལ་གཉིས་ཀྱིས་ཀུན་དུ་དྲངས་པ་ན། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ངེས་པར་མྱོང་བར་འགྱུར་བའི་བདེ་བ་དེ་ཟད་པར་མ་གྱུར་པ་དེ་སྲིད་དུ། ཚལ་དང་ནགས་ཚལ་ཐམས་ཅད་ན་དགའ་བར་བྱེད། དགའ་དགུར་སྤྱོད་པར་བྱེད་དོ། །དེ་ཕྱིས་ངེས་པར་བསྒོམས་པའི་དུས་བྱེད་པ་ཆོས་དང་ཡང་དག་པར་ལྡན་པས་ལས་ཉེ་བར་འགྲོ་བ་ཇི་ལྟ་བ་བཞིན། སེམས་ཅན་དམྱལ་བ་དང་ཡི་དགས་དང་དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་བདེ་བ་དང་ལྡན་ཞིང་ནོར་བཟང་པོ་དང་ལྡན་པ་དང་ལམ་དུ་འགྲོ་བ་ན་རྐང་གིས་མི་འགྲོ་སྟེ། རྟ་དང་གླང་པོ་ཆེ་དང་དྲེའུའི་བཞོན་པ་ལ་ཞོན་པ་དང་རྒྱལ་པོའམ་བློན་པོ་ཆེན་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་
བྱུང་བའི་ཤེས་པས་བརྟགས་ན། སུམ་ཅུ་རྩ་གསུམ་པའི་ལྷ་རྣམས་ཀྱི་གནས། ལུས་ཀྱི་མདོག་བཟང་ཞིང་ཆེ་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྐྱེས་བུ་དམ་པ་སེམས་ཚུལ་ཁྲིམས་དང་ལྡན་པ་གང་གིས་ཚུལ་ཁྲིམས་རྣམ་པ་བདུན་དང་འཐུན་པའམ་གཞན་ནམ་ཕྱོགས་འགའ་ལེགས་པར་བསྲུངས་ན། དེ་རྒྱུ་དང་འཐུན་པར་འབྲས་བུ་མྱོང་བར་འགྱུར་ལ། སེམས་ཀྱིས་བསྒོམས་པ་ཁོ་ནའམ་ལྟ་བ་དང་ལྡན་པ་དེ་སྲོག་གཅོད་པ་དང་། མ་བྱིན་པར་ལེན་པ་དག་ནི་ཤིན་ཏུ་བསྲུངས། སྡོམ་པ་སྐྱོན་མེད་པ་ནི་བླངས། གཅིག་ཏུ་སྐྱེས་བུ་དམ་པ་འདོད་ཅིང་བདེ་བ་ངེས་པའི་རྒྱུར་གྱུར་པ། འཇིག་རྟེན་འདིའི་སྡོམ་པ་ལེགས་པ་ཞེས་བྱ་བ་རྣམ་པ་དེ་ལྟ་བུའི་ལས་ལེགས་པར་བྱས་པ། འཕགས་པ་མ་ཡིན་པའི་སྐྱེས་བུ་དམ་པ། མ་བྱིན་པར་ལེན་པ་ཉིད་སྤོང་བ་ནི། འདི་ལ་མ་བྱིན་པར་ལེན་པ་ཆུང་ངུ་ཡང་ལེན་པར་མི་བྱེད་དེ་འདི་ལྟ་སྟེ། རྒྱ་མཚོ་དང་ཉེ་བ་ནའམ་འབབ་ཆུ་དང་ཉེ་བར་གནས་པ་ན། གཞན་གྱིས་ཕྱོགས་གང་ཡིན་པ་དག་ལ་གཞན་གྱི་རྒྱ་མཚོའི་རླབས་ཀྱིས་བདས་ཏེ་འོངས་པ། དུང་ངམ་བྷལ་ལཱ་ཏ་ཀའམ་ཤ་བྷ་རི་ཀའམ་དེ་དང་འཐུན་པ་དེ་དག་ཀྱང་ལེན་པར་མི་བྱེད། གཞན་གྱི་ནོར་རྫས་ཀྱི་རྣམ་པ་གཞན་དག་ཀྱང་ལེན་པར་མི་བྱེད་ལ། ནོར་རྫས་ཀྱི་རྣམ་པ་རྩྭ་ཡང་ལས་ཀྱི་འབྲས་བུ་ལ་འཇིགས་ལ། རྒྱལ་པོའི་ཆད་པས་འཇིགས་པ་མ་ཡིན་པ། རྐུ་བའི་སེམས་ཀྱིས་ལེན་པར་མི་བྱེད་པ་ཡིན་ཏེ། རྣམ་པ་དེ་ལྟ་བུ་ནི་མ་བྱིན་པར་ལེན་པ་སྤངས་པ་ཡིན་ནོ། །སྲོག་གཅོད་པ་སྤངས་པའི་རྣམ་པ་ཇི་ལྟ་བུ་ཡིན་ཞེ་ན། འདི་ནི་ལེགས་པར་བྱས་པའི་ལས་ཀྱི་མཐའ་སྤྱད་པ། འཇིག་རྟེན་ཕ་རོལ་ལ་འཇིགས་པར་སེམས་པ། ལས་ཀྱི་འབྲས་བུ་ལ་སེམས་དད་པ་དྲང་པོ་དྲང་པོའི་རང་བཞིན་ཅན། གཞན་ལ་མི་གནོད་པ་སྡིག་པའི་གྲོགས་པོ་སྤངས་པ་བདེ་བ་ཚོལ་བ་དེ་ལྕུག་མའི་ནང་དུ་འགྲོ་བའམ་ཆུ་རྒལ་བ་ན་གྲིབ་གནོན་གྱི་གདོན་གྱིས་ཟིན་ཏམ་སྲོག་ཆགས་ཏན་ཏུས་ཟིན་ཏེ་ཤི་ལ་ཐུག་ཀྱང་གྲིབ་གནོན་
གྱི་གདོན་དེ་གསད་འདོད་པའི་ཕྱིར་དུག་གིས་འཐོར་བར་མི་བྱེད་དེ། འདི་ལ་གང་གི་ཚེ་གྲིབ་མ་ལ་དུག་གཏོར་ན། དེའི་ཚེ་རང་གི་གྲིབ་གནོན་དེའི་གྲིབ་མ་དེ་ལ་བབ་པས་འཆི་བར་འགྱུར་ཏེ། དེའི་ཕྱིར་གནོད་པ་བྱ་བ་ཤེས་ཀྱང་གྲིབ་གནོན་གྱི་གདོན་དེ་གསོད་པར་མི་བྱེད་དོ། །སྲོག་ཆགས་ཏན་ཏུ་ལ་སླར་གནོད་པར་བྱ་བ་ཤེས་ཀྱང་གསོད་པར་མི་བྱེད་དེ། དེ་ལ་ཆུ་མེད་པར་བྱས་ན་འཆི་བར་འགྱུར་བའམ་མེ་ལོང་བསྟན་པའམ་མེ་ལོང་རྟག་ཏུ་བསྟན་པས་འཆི་བར་འགྱུར་ཏེ། དེ་ཕྱིར་གནོད་པར་བྱ་བའི་རྒྱུ་ཤེས་ཀྱང་གསོད་པར་མི་བྱེད་ལ། རང་གི་སྲོག་ཆད་ལ་ཐུག་ཀྱང་ཉེས་པར་བྱ་བ་མི་བྱེད་དེ། དེ་ལྟར་ལེགས་པར་བྱ་བའི་ལས་ཀྱི་མཐའ་བྱེད་པ་དེ། ལུས་དང་བྲལ་ཏེ་ཤི་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལུས་དང་མདོག་བཟང་ཞིང་ཆེ་བའི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་སྤྱད་པ་དེ། རང་གི་འོད་དང་ནི་ལྡན་སིལ་སྙན་ཡན་ལག་ལྔ་དང་ལྡན་པའི་སྒྲ་ནི་འབྱིན། ཡིད་ཤིན་ཏུ་བདེ་བ་དང་ནི་ལྡན། འདོད་པ་ཐམས་ཅད་ནི་འབྱོར། དེ་ལྷ་མོ་སྟོང་གིས་བསྐོར་ཏེ། རི་རབ་ཀྱི་ས་གཞི་ལ་ནི་རྒྱུ། ས་ཕྱོགས་འཛམ་བུ་ནཱ་དའི་གསེར་གྱིས་བརྒྱན་པའི་འཇིག་རྟེན་གྱི་ཁམས་ཉམས་དགའ་བ་དང་རིའི་ཟོམ་གྱི་བར་བར་དག་ན་དགའ་ཞིང་བདེ་བ་ནི་མྱོང་བར་བྱེད་དོ། །འདོད་པའི་ལོངས་སྤྱོད་ཐམས་ཅད་དང་ལྡན་པ། དཔག་བསམ་གྱི་ཤིང་ལ་བསམས་པས་འདོད་པ་ཐམས་ཅད་འགྲུབ་པ་དེ་ཡུན་རིང་དུ་བདེ་བ་མྱོང་བར་བྱེད་དོ། །འཁོར་དང་བཅས་པ་ཡོངས་སུ་སྤྱོད་པ་དེ། ཕྱི་རོལ་གྱི་གྲིབ་མ་ཞེས་བྱ་བའི་ཚལ་དེར་འདོང་བར་བྱེད་དེ། འཛམ་བུ་ནཱ་དའི་གསེར་གྱི་ཤིང་ལྗོན་པས་བརྒྱན་པ། དེ་བཞིན་དུ་དངུལ་གྱི་ཤིང་ལྗོན་པ་ལ་གསེར་གྱི་འདབ་མ་དང་། བཻ་ཌཱུརྱའི་འབྲས་བུས་མཛེས་པ་ཡིན་ནོ། །ཕྱི་རོལ་གྱི་གྲིབ་མའི་ཚལ་དེའི་ཕྱོགས་གཞན་དུ་ཡང་། དེ་རེས་འགའ་ཡོངས་སུ་རྒྱུ་བ་ན་ལུས་རིན་པོ་ཆེ་སྣ་བདུན་གྱིས་བརྒྱན་ཞིང་། ཐིག་ལེ་སྣ་ཚོགས་ཀྱིས་སྤྲས་པ། རྟོག་པ་སྣ་ཚོགས་ཅན་ཏེ། རྨ་བྱའི་ཚོགས་དེ་དག་མཐོང་ནས་ལེགས་པར་བལྟ་ཞིང་རྩེ་བའི་ཕྱིར་དེར་འགྲོ་བར་བྱེད་དོ། །དེ་དེ་དག་གི་ནང་དུ་ཕྱིན་ནས་རྨ་བྱ་མཐོང་ན་ཡིད་འཕྲོག་པར་བྱེད་པ་དེ་རྣམས་ཀྱི་ནང་ན་དགའ་བར་བྱེད་དོ། །རྨ་བྱ་དེ་དག་
གིས་དེ་མཐོང་ནས་སིལ་སྙན་ཐམས་ཅད་པས་ཆེས་ལྷག་པའི་སྒྲ་ཉམས་དགའ་བ་ཆགས་སུ་རུང་བ་རྣམ་པ་སྣ་ཚོགས་དུ་མ་འབྱིན་ཏོ། །རྨ་བྱ་དེའི་སྒྲ་རྣམ་པ་དེ་ལྟ་བུ་འབྱིན་པ་དེའི་ཁྱད་པར་ནི་ལྷའི་རོལ་མོའི་སྒྲ་དག་བཅུ་དྲུག་གི་ཆར་ཡང་མི་ཕོད་དེ། རྨ་བྱ་དེའི་སྒྲའི་དྲུང་ན་ལྷ་མོ་དེའི་གླུ་དབྱངས་དག་བོང་སྐད་འབྱིན་པ་དང་མཚུངས་སོ། །དེ་ནས་ལྷ་དེ་འདི་སྙམ་དུ་སེམས་ཏེ། བདག་ཀྱང་མཐུ་འདི་ལྟ་བུར་གྱུར་པས་ད་ནི་རྨ་བྱ་དེ་དག་ལ་ཞོན་ཏེ། གནས་ནས་གནས་དང་ཚང་ཚིང་ནས་ཚང་ཚིང་དང་རི་རབ་ཀྱི་རིའི་རྩེ་མོ་ནས། རི་རབ་ཀྱི་རིའི་རྩེ་མོར་ལྷ་མོའི་ཚོགས་ཀྱིས་བསྐོར་བ་དང་ལྷན་ཅིག་ཡོངས་སུ་རྒྱུ་ཞིང་དེ་ལྟར་རྨ་བྱའི་སྟེང་དུ་ཞོན་ནས། རེ་ཞིག་འཇིག་རྟེན་གྱི་དགའ་བ་འདི་དག་ཐམས་ཅད་ལ་བལྟ་བར་བྱའོ་སྙམ་མོ། །ལས་བྱ་བ་ལེགས་པར་བྱས་པ་དེ་བསམས་མ་ཐག་ཏུ་བོང་སྐྱེད་དང་མདོག་དང་སྟོབས་དང་བརྩོན་འགྲུས་ཕུན་སུམ་ཚོགས་པ། ལུས་རིན་པོ་ཆེ་ཐམས་ཅད་ཀྱིས་བརྒྱན་པའི་རྨ་བྱ་བཞོན་དུ་རུང་བར་རྐེད་པ་སྟོད་པ་དེ་དག་ཉེ་བར་ལྷགས་སོ། །དེས་དེ་དག་མཐོང་ནས་དེ་ལ་ཞོན་པ་དང་། རྨ་བྱ་དེ་ཡང་དེས་ཞོན་པར་རིག་ནས་ནམ་མཁའི་དཀྱིལ་ན་རྒྱུ་བར་བྱེད་དོ། །དེ་ལྟར་ལྷ་དེ་དག་ཀུན་གྱིས་ཀྱང་སོ་སོར་ཞོན་ནས། དེའི་རི་རབ་ཀྱི་རིའི་རྩེ་མོ་ནས་རིའི་རྩེ་མོ་དང་པད་མའི་ཚལ་ནས་པད་མའི་ཚལ་དང་ཚལ་ནས་ཚལ་ཏེ། རི་རབ་ཀྱི་ས་ཕྱོགས་དེ་དག་ཐམས་ཅད་དུ་དེ་སྐྱེ་བོ་དང་ལྷན་ཅིག་མཐོང་ན་དགའ་བ་རྣམས་ལ་ལྟ་བར་བྱེད་དོ། །དེ་ནས་དེ་ལྟར་དེ་ཡོངས་སུ་རྒྱུ་བ་ན་རེས་འགའ་འཇིག་རྟེན་སྐྱོང་བ་དག་འཛམ་བུའི་གླིང་གི་བྱ་བ། ཆོས་དང་ཆོས་མ་ཡིན་པ་དག་སྦྲན་པའི་ཕྱིར། རྒྱལ་ཆེན་བཞི་པའམ་སུམ་ཅུ་རྩ་གསུམ་དུ་གཅིག་ནས་གཅིག་ཏུ་སྦྲོན་པར་བྱེད་དོ། །དེ་ནས་ལྷ་དེ་དང་འཇིག་རྟེན་སྐྱོང་བ་དེ་དག་ནམ་མཁའ་ལ་གློ་བུར་དུ་འོངས་ཏེ་ཕྲད་པ་དང་ལྷ་དེས་དེ་དག་ལ་སྨྲས་པ། །ཁྱོད་གང་ནས་འོངས། །དེ་དག་གིས་ལྷ་དེ་ལ་འདི་སྐད་སྨྲས་སོ། །བདག་ཅག་ནི་ཆོས་དང་ཆོས་མ་ཡིན་པ་སྦྲན་པའི་ཕྱིར། འཛམ་བུའི་གླིང་ལེགས་པར་བྱས་པའི་ལས་ཀྱི་གཞི་ཤིན་ཏུ་ཉམས་དགའ་བ། ཆུ་བོ་དང་འབབ་ཆུ་དང་ལྟེང་ཀ་དང་ཉེ་བའི་ཚལ་དང་ཀུན་དགའ་ར་བ་མང་པོ་ཕུན་སུམ་ཚོགས་པ་ནས་མཆིས་སོ། །དེ་ནས་ལྷའི་བུ་དེས་འཇིག་རྟེན་སྐྱོང་བ་དེ་དག་ལས་
ཐོས་ནས་ངོ་མཚར་སྐྱེས་ཏེ། མཐུ་ཆེན་པོ་དང་ལྡན་པ། རྨ་བྱ་མཐུ་ཆེན་པོ་ལ་ཡང་ཞོན་པ། འགྲོ་བ་ཐམས་ཅད་དུ་སྟོབས་ཐོགས་པ་མེད་པའི་ལྷ། ངོ་མཚར་སྐྱེས་པ་དེ་འཛམ་བུའི་གླིང་ག་ལ་བ་དེར་འབབ་པར་བྱེད་དེ། ཉི་མ་གཉིས་པ་ལྟར་གསལ་ཞིང་ལྷའི་ཕྲེང་བ་དང་གོས་གྱོན་པ་དེ་འཛམ་བུའི་གླིང་གི་ཚལ་དང་ཉེ་བའི་ཚལ་དང་ཆུ་བོ་དང་ལྟེང་ཀ་དང་པད་མའི་ཚལ་དང་ཤིང་ལྗོན་པ་དང་གྲོང་དང་གྲོང་ཁྱེར་དང་ཚོང་འདུས་དང་ལྡན་པ་འདི་ཐམས་ཅད་ལ་དེ་ལྟད་མོ་ལྟ་བར་བྱེད་དོ། །དེ་ནས་བྲམ་ཟེ་དེ་དག་གིས་དེ་རྣམས་མཐོང་ནས་རྟོག་པར་བྱེད་དེ། འདི་ལྟར་བྱ་ཁྱུང་ལ་ཞོན་པ་འདི་ནི་གཏོགས་འདོད་ཡིན་ནོ། །གཞན་དག་ཀྱང་རྟོག་པར་བྱེད་དེ། འདི་ལྟར་རྨ་བྱ་ལ་ཞོན་པ་འདི་ནི་གཞོན་ནུ་ཡིན་ཏེ། འཇིག་རྟེན་དང་བྲམ་ཟེ་དག་སྲུང་བར་བྱེད་དོ། །གཞན་མུ་སྟེགས་པ་དག་ཀྱང་རྟོག་པར་བྱེད་དེ། འདི་ལྟར་ཁྱུ་མཆོག་ལ་ཞོན་པ་འདི་ནི་དབང་ཕྱུག་ཆེན་པོ་ལྷ་དང་བཅས་པ་ཡིན་ཏེ། འཇིག་རྟེན་སྐྱེད་པར་བྱེད་སྲུང་བར་བྱེད། འཛིན་པར་བྱེད་སྐྱེད་པར་བྱེད་ཅིང་། འཇིག་པར་ཡང་བྱེད་དོ། །དེ་ནས་ཡང་འཇིག་རྟེན་རྣམས་སྐྱེད་པ་དང་གནས་པ་དང་འབྱིན་པར་བྱེད་པ་ཡིན་ནོ་ཞེས་རྟོག་སྟེ། དེ་ལྟར་ལྷ་དེ་རྣམས་ལ་བྲམ་ཟེ་དག་རྣམ་པ་དུ་མར་ཡོངས་སུ་རྟོག་པར་བྱེད་ལ། སྟོད་ར་དག་བྱེད། བསྟན་བཅོས་དག་བྱེད། དེ་ཁོ་ན་ཉིད་མ་ཡིན་པ་ལ། དེ་ཁོ་ན་ཉིད་ལྟར་ལྟ། ཚིག་འཁྱལ་པ་སྨྲ་བ། ཡིད་ཤིན་ཏུ་རྣམ་པར་རྨོངས་པ་དེ་དག་གཞན་དག་ལ་ཡང་ལོག་པ་ཉིད་ཀྱིས་སྦྱོར་བར་བྱེད་དོ། །ལྷའི་བུ་དེ་རྣམས་ཀྱིས་ལྟད་མོ་བལྟས་ནས། དེ་ནས་ཡང་རང་གི་གནས་དེ་ཉིད་དུ་སླར་འདོང་ངོ་། །དེ་ལྟར་ལྟ་བར་གྱུར་པའི་བྱིས་པ་རྣམས་དེ་ཁོ་ན་ཉིད་མ་ཡིན་པ་དེ་ཁོ་ན་ལྟར་ལྟའོ། །ལྷ་དེ་རྣམས་ལ་ལྟ་བ་དེ་ཡང་འཇིག་པའི་དུས་སུ་འབྱུང་བའམ་རེས་འགའ་ཆ་གཉིས་ལྡན་པའམ་གསུམ་ལྡན་གྱི་དུས་ན་འབྱུང་སྟེ། ལྷ་དེ་རྣམས་ལ་ལྟ་བ་ནི་ལྟ་བ་ངན་པ་དང་མཚུངས་སོ། །དེ་ལྟར་བདག་ཉིད་རབ་ཏུ་རྟོག་པར་བྱེད་ལ། བདག་ཉིད་ཀྱིས་རབ་ཏུ་བརྟགས་ན་གཞན་དག་ལ་ཡང་སྒྲོགས་པར་བྱེད་དེ། འདི་དག་ནི་བྲམ་ཟེ་རྣམས་ཀྱི་ལྟ་བར་གྱུར་པ་ཡིན་ནོ། །དེ་ནས་ལྷ་དེ་རྣམས་སླར་
འོངས་ནས་ལྷ་གཞན་དེ་དག་ལ། ཀྱེ་མ་གྲོགས་པོ་དག་འདི་ལྟར་བདག་ཅག་སའི་སྟེང་དུ་བབས་ཏེ། ས་ཕྱོགས་ཤིན་ཏུ་རྣམ་པར་ཕྱེ་བ་ཉམས་དགའ་བ་དེ་དག་བདག་ཅག་གིས་མཐོང་ངོ་ཞེས་སྨྲས་སོ། །དེ་སྐད་ཐོས་ནས་ལྷ་གཞན་དག་ཀྱང་བཞོན་པ་སྣ་ཚོགས་ལ་ཞོན་ཏེ། རྒྱན་དང་ཆ་བྱད་སྣ་ཚོགས་བཏགས་ནས་འཛམ་བུའི་གླིང་ག་ལ་བ་དེར་འབབ་པར་བྱེད་དེ། ཁ་ཅིག་ནི་གླང་པོ་ཆེ་ལ་ཞོན། ཁ་ཅིག་ནི་མ་ཧེ་ལ་ཞོན། ཁ་ཅིག་ནི་རྨ་བྱ་ལ་ཞོན། ཁ་ཅིག་ནི་བཞོན་པ་མེད་པར་ནམ་མཁའ་ལ་འདུག་སྟེ། དེ་རྣམས་ཀྱིས་ས་ཕྱོགས་ཉམས་དགའ་བ་ཐམས་ཅད་ལ་ལྟ་བར་བྱེད་དོ། །དེ་དག་བལྟས་ནས་ས་ཕྱོགས་ཉམས་དགའ་བ་ལྟེང་ཀ་དང་ཉེ་བའི་ཚལ་དང་ནེའུ་གསིང་ག་ལ་ཡོད་པ་དེར་འབབ་པར་བྱེད་དོ། །ཚལ་གྱི་ཕྱོགས་དེ་དག་གི་ནང་ན་བྲམ་ཟེ་ཁ་ཅིག་དཀའ་ཐུབ་དྲག་པོ་སྤྱོད་པ་ཡོད་དེ། དེ་ལྟར་ཐོས་པ་ངན་པ་དང་མཚུངས་ཤིང་ཐོས་པ་ངན་པ་དང་འབྲེལ་བ་དག །གང་གི་ཚེ་ཕན་ཚུན་གྲོགས་དང་བཅས་པ་དེ་དག་ས་ཕྱོགས་དེ་ལ་ལྟ་བ་དེའི་ཚེ། ཚལ་གྱི་ནང་ན་སྤྱོད་པའི་བྲམ་ཟེ་དེ་དག་གིས་ལྷ་དེ་རྣམས་མངོན་སུམ་དུ་མཐོང་ནས་གཞན་དག་ལ་སྒྲོགས་པར་བྱེད་དོ། །གང་ས་ཕྱོགས་འདིར་སྐྱེས་པ་དེ་ནི་རང་དགར་ཀུན་ཏུ་བརྟགས་པ་ཞེས་བྱ་བ་ཡིན་ལ། སྔོན་ཐོས་པ་དང་འབྲེལ་པས་རྗོད་པར་བྱེད་དེ། འདི་ལྟར་འདི་ནི་བྲམ་ཟེའོ། །འདི་ནི་གཏོགས་འདོད་དོ། །འདི་ནི་དབང་ཕྱུག་ཆེན་པོའོ། །འདི་ནི་གཞོན་ནུའོ་ཞེས་དེ་ལྟར་སོ་སོར་རྟོག་པར་བྱེད་དོ། །ས་ཕྱོགས་འདི་ནི་ལྷ་ཆེན་པོའི་གནས་ཡིན་ནོ། །འདི་ནི་གཏོགས་འདོད་ཀྱིའོ། །འདི་ནི་གཞོན་ནུའི་འོ། །འདི་ནི་ཚངས་པའི་ཡིན་ནོ་ཞེས་དེ་ལྟར་རབ་ཏུ་བརྟགས་ནས། གཏན་ཚིགས་དང་ཉེ་བར་སྦྱོར་བ་དང་མཇུག་བསྡུ་བ་ལྟ་བ་ངན་པ་དང་འབྲེལ་བའི་བསྟན་བཅོས་དག་ཀྱང་བྱེད་དོ། །དེ་ཉིད་ལ་དེ་དག་གིས་གཞན་དང་གཞན་དག་ཀྱང་འཇོག་པར་བྱེད་དོ། །དེ་ལྟར་དེ་བདག་ཉིད་ཀྱིས་ལྟ་བ་ངན་པ་མངོན་པར་བརྟགས་ནས་གཞན་དག་ལ་ཡང་སྒྲོགས་པར་བྱེད་ལ། དེ་དག་ཀྱང་གཞན་ལ་སྒྲོགས། དེ་དག་ཀྱང་ཡང་གཞན་ལ་སྒྲོགས་པར་བྱེད་དེ། དེ་ལྟར་རིམ་པ་དེ་དག་གིས་ལྟ་བར་གྱུར་པ་ཡིན་ནོ། །གང་གི་ཚེ་ལྷ་
དེ་རྣམས་མཐོ་རིས་ཀྱི་དགའ་བ་དང་འཐུན་པར་མཚོ་དང་ཉེ་བར་འཁོད་དམ། དེ་བཞིན་དུ་མཚོའི་ནང་དུ་ཞུགས་པ་དེ་ལ་ཚལ་གྱི་ནང་ན་སྤྱོད་པ་རང་དགར་གོམས་པ་དེ་དག་གཞན་ལ་སྒྲོགས་པར་བྱེད་དེ། འདི་ལྟར་མཚོ་འདི་ནི་ཚངས་པའི་ཡིན་ནོ། །འདི་ནི་སྐལ་ལྡན་སྲེད་མེད་ཀྱི་བུའི་ཡིན་ནོ། །འདི་ནི་དབང་ཕྱུག་ཆེན་པོའི་ཡིན་ནོ། །འདི་ནི་གཞོན་ནུའི་ཡིན་ནོ་ཞེས་དེ་ལྟར་ལྟ་བ་ངན་པའི་དབང་དུ་གྱུར་པའི་སེམས་ཀྱིས་གཏན་ཚིགས་དང་དཔེ་དང་ཉེ་བར་སྦྱོར་བ་དང་མཇུག་བསྡུ་བ་དང་ལྡན་པའི་བསྟན་བཅོས་དག་བྱེད་ལ་དེ་ལྟར་གཞན་དག་ལ་བསྟན་བཅོས་རབ་ཏུ་གྲགས་པར་འགྱུར་ཏེ། དེ་ལྟར་གཞན་དང་གཞན་དུ་ལྟ་བར་གྱུར་པ་ཡིན་ནོ། །དེ་ནས་ཡང་རྣམ་པ་གཞན་གྱིས་རབ་ཏུ་རྟོག་པར་བྱེད་དེ། དེ་ཁོ་ན་ཉིད་ཁོང་དུ་ཆུད་པར་ནི་མི་འགྱུར་རོ། །ཚལ་གྱི་ནང་ན་སྤྱོད་པ་དེ་དག་གིས་ལྷ་དེ་རྣམས་གསལ་བར་མི་མཐོང་སྟེ། བྱད་གཟུགས་མ་ནོར་བར་ཤེས་པར་མི་འགྱུར་རོ། །དེ་ནས་ཀྱང་ལྷ་དེ་རྣམས་མེ་ལྟར་གཟི་བརྗིད་འབར་ཞིང་ཡུལ་ནས་ཡུལ་དུ་འདོང་བར་བྱེད། ཚལ་ནས་ཚལ་དུ་འདོང་བར་བྱེད་པ་དང་ཚལ་གྱི་ནང་ན་སྤྱོད་པའི་བྲམ་ཟེ་གང་ཡིན་པ་དེ་དག་གཞན་དུ་རྟོག་པར་བྱེད་དེ། འདི་ལྟར་བདག་ཉིད་མེའི་ནང་དུ་མངོན་པར་བཅུག་པ་དེ་དག་ནི་རྒྱུ་དེ་དང་རྐྱེན་དེས་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་དེ་ལྟར་གཞན་དུ་བརྟགས་ནས་ལྟ་བའི་རྣམ་པ་སྐྱེད་པར་བྱེད་ལ་གཏན་ཚིགས་དང་། དཔེ་དང་ཉེ་བར་སྦྱོར་བ་དང་མཇུག་བསྡུ་བ་ངན་པ་དང་འབྲེལ་བའི་བསྟན་བཅོས་དག་ཀྱང་བྱེད་དོ། །དེ་ནས་གཞན་དག་གིས་བསྟན་བཅོས་དེ་དག་ཐོས་ནས་བདག་ཉིད་མེའི་ནང་དུ་འཇུག་པར་བྱེད་དེ། དེ་ལྟར་ཡང་དག་པ་མ་ཡིན་པའི་ལྟ་བར་གྱུར་ཏོ། །དེ་རྣམས་ནི་ལས་ཀྱི་འབྲས་བུ་སྤོང་བར་བྱེད་པ་ཡིན་ཏེ། དེ་སྤངས་པས་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་བར་འགྱུར་རོ། །དེ་ནས་གཞན་ཡང་ཡང་དག་པ་མ་ཡིན་པའི་ལྟ་བའི་རྣམ་པ་སྒྲུབ་པ་ནི་ཚལ་གྱི་ནང་ན་སྤྱོད་པའི་བྲམ་ཟེ་དག་གིས། ལྷ་དེ་རྣམས་རྒྱང་རིང་པོ་ཞིག་ན་ལྟ་
བ་མི་གསལ་བར་མཐོང་སྟེ། འདི་ལྟར་རིའི་རྩེ་མོ་མེ་ཏོག་དང་ལྟེང་ཀ་ཕུན་སུམ་ཚོགས་པ་གང་ཡིན་པ་དེ་དག་ལ་ལྷ་འཛེགས་ནས་གཟི་བརྗིད་འབར་ཞིང་ནམ་མཁའ་ལ་འགྲོ་བ་དང་། དེ་ནས་ཚལ་གྱི་ནང་ན་སྤྱོད་པའི་བྲམ་ཟེ་དག་གིས་མཐོང་ནས་རང་དགར་རྟོག་པར་བྱེད་དེ། འདི་ལྟར་མིར་གྱུར་པ་འདི་རྣམས་ཀྱིས་རི་ལས་གཡང་དུ་ལྟུང་བར་བྱས་ན་རྒྱུ་དེ་དང་རྐྱེན་དེས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་བས། བདག་ཅག་ཀྱང་རི་རྩེ་ནས་ཐར་བར་བྱའོ་ཞེས་དེ་ལྟར་གཞན་དག་ལ་ཡང་སྟོན་པར་བྱེད་ལ། བསྟན་བཅོས་ངན་པ་དག་ཀྱང་བྱེད་ཅིང་ལས་ཀྱི་འབྲས་བུ་ལ་ཡང་སྐུར་པ་འདེབས་སོ། །ལས་ཀྱི་འབྲས་བུ་ལ་སྐུར་པ་འདེབས་པ་བདག་དང་གཞན་ལོག་པར་ལྟ་བ་རྣམས་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ། སེམས་ཅན་དམྱལ་བའི་ནང་དུ་སྐྱེ་བར་འགྱུར་ཏེ། དེ་ལྟར་ཡང་ལྟ་བའི་རྣམ་པ་གཞན་ཡིན་ནོ། །དེ་ནས་ཡང་ཚལ་གྱི་ནང་ན་སྤྱོད་པའི་བྲམ་ཟེ་དེ་དག་གིས། ལྷ་དེ་རྣམས་གཞན་དུ་མཐོང་ནས་རང་དགར་གཞན་དུ་རྟོག་པར་བྱེད་དེ། འདི་ལྟ་སྟེ། ལྷ་རྣམས་ཧ་ཅང་ཡང་མི་ཉེ་ཧ་ཅང་ཡང་མི་རིང་བ་ཞིག་ན་འཁོད་པ་དེ་རྣམས་ཀྱི་ཆ་བྱད་གཟུགས་ཅུང་ཟད་ཅིག་ཤེས་པ་དང་། དེ་བཞིན་དུ་མཐོང་ནས་གཟུགས་དེ་རྣམས་གཞན་ཉིད་དུ་རྟོག་པར་བྱེད་དེ། འདི་ལྟར་ལྷ་རྣམས་ཀྱི་ཞལ་ནི་མེ་ཡིན་པས། དེ་ལྟར་རྣམ་པ་གཞན་གྱིས་མེའི་ནང་དུ་སྦྱིན་སྲེག་བྱེད་པ་གང་ཡིན་པ་དེ་ནི་ལུས་དང་བྲལ་ནས་དེ་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་དེ་ལྟར་དེ་ཁོ་ན་ཉིད་མ་མཐོང་བ་རྣམས་ནི། གཏན་ཚིགས་དང་དཔེ་ངན་པ་དང་སྦྱར་བའི་བསྟན་བཅོས་དག་ཀྱང་བྱེད་དོ། །དེ་ལྟར་གཏན་ཚིགས་དང་དཔེ་ངན་པ་དང་སྦྱར་བའི་ལྟ་བའི་རྣམ་པ་གཞན་ཡང་བྱེད་ལ། ཕ་རོལ་དག་ཀྱང་དེ་ཉིད་ལ་འཛིན་དུ་འཇུག་པར་བྱེད་དེ། བདག་ལ་ཕན་པ་དང་གཞན་ལ་ཕན་པར་ཞུགས་པ་མ་ཡིན་པ་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ། སེམས་ཅན་དམྱལ་བའི་ནང་དུ་སྐྱེ་བར་འགྱུར་རོ། །དེ་ནས་ཡང་ཚལ་གྱི་ནང་ན་སྤྱོད་
པའི་བྲམ་ཟེ་གཞན་དག་གིས་ལྷ་དེ་རྣམས་མཐོང་ནས་གཟུགས་སམ་སྤྱོད་པ་ནི་ཤེས་ལ། དེ་དག་གིས་དེ་རྣམས་ཟས་ཟ་བ་མ་མཐོང་། སྦྱིན་པ་བྱེད་པ་མ་མཐོང་བ་དང་འདི་སྙམ་དུ་སེམས་ཏེ། འདི་ལྟར་ལྷ་འདི་རྣམས་ཟས་མི་ཟ། སྐོམ་མི་འཐུང་བ་ལས་ན། གོར་མ་ཆག་པར་བདག་ཅག་གིས་ཀྱང་ཟས་མ་ཟོས་ཀྱང་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་སྙམ་ནས་དེ་དག་ལས་ཀྱི་འབྲས་བུ་ལ་སྐུར་པ་འདེབས་ཤིང་། འདི་ལྟར་ཟས་མ་ཟོས་པའམ་ཟས་ཞིམ་པོ་མ་ཟོས་པས་མཐོ་རིས་འཐོབ་པར་འགྱུར་རོ་ཞེས་བསྟན་བཅོས་ངན་པ་དག་ཀྱང་བྱེད་ལ། དེ་གཞན་དག་ཀྱང་གཏན་ཚིགས་དང་དཔེ་ངན་པ་སྟོན་པའི་ཚིག་རྣམས་ཀྱིས་དེ་ཉིད་འཛིན་དུ་འཇུག་པར་བྱེད་དེ། དེ་ལྟར་བདག་དང་གཞན་ལོག་པར་ལྟ་བ། ལས་ཀྱི་འབྲས་བུ་ལ་སྐུར་པ་འདེབས་པ་ནི། ལུས་དང་བྲལ་ནས་ངན་འགྲོ་ལོག་པར་ལྟུང་བ། སེམས་ཅན་དམྱལ་བའི་ནང་དུ་སྐྱེ་བར་འགྱུར་རོ། །དེ་ལྟར་དེ་ཁོ་ན་ཉིད་མ་མཐོང་བ་ནི་ངན་འགྲོ་ཐམས་ཅད་ཀྱི་སྒོར་གྱུར་པ་ཡིན་ནོ། །ལྷ་དེ་རྣམས་ཀྱི་སྐད་ཅིག་ཙམ་མམ་ཐང་ཅིག་ཙམ་མམ་དེ་ཙམ་གང་ཡིན་པ་དེ་ལ་མི་རྣམས་ཀྱི་ལོར་བགྲངས་ན་ཡུན་རིང་སྟེ། དེ་ལ་བྲམ་ཟེ་དེ་དག་འདི་ལྟར་ལྷ་འདི་དག་ནི་རྟག་པ་བརྟན་པ་ཐེར་ཟུག་པ་མི་འགྱུར་བའི་ཆོས་ཅན་ཡིན་ལ། དེ་དག་འཇིག་རྟེན་སྐྱེད་པར་ཡང་བྱེད་ལ་འཇིག་པར་བྱེད་པ་ཡིན་ནོ་ཞེས་དེ་ལྟར་བསྟན་བཅོས་བྱེད་ཅིང་གཞན་དག་ཀྱང་དེ་ཉིད་ལ་འཛིན་དུ་འཇུག་པར་བྱེད་པ། རྒྱུ་དང་འབྲས་བུ་ལ་སྐུར་པ་འདེབས་པ་དེ་ནི་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བའི་ནང་དུ་སྐྱེ་བར་འགྱུར་རོ། །དེ་ལྟར་སེམས་ཀྱི་དགྲས་ཡོངས་སུ་བསླུས་པའི་སེམས་ཅན་རྣམས་རྣམ་པ་དུ་མར་དེ་ཁོ་ན་ཉིད་ལ་མི་ལྟ་བ། དེ་ཁོ་ན་ཉིད་མ་མཐོང་བ་ནི་ལྟ་བར་གྱུར་པའི་བསྟན་བཅོས་དག་བྱེད་དོ། །དེ་ནས་དེ་ལྟར་དེ་ཁོ་ན་ཉིད་མ་ཡིན་པས་སེམས་ཡོངས་སུ་བསླུས་པའི་སེམས་ཅན་རྣམས། དགེ་སློང་དེས་མངོན་པར་མཐོང་ནས་ཚིགས་སུ་
བཅད་དེ་སྨྲས་པ། སེམས་ཀྱི་སྦྲུལ་ནི་མི་བཟད་དང་། །སྲེད་པའི་དུག་དང་རྣམ་འདྲེས་པ། །མགོ་ལྔ་པ་ཡིས་ཟིན་པ་དག །དོན་མེད་ཅི་ཞིག་ཡོངས་སུ་གདུང་། །སྲེད་པའི་ཆུ་བོ་ཆེན་པོ་འདི། །མུ་ལྔ་ལས་ནི་ཀུན་དུ་བྱུང་། །དེ་ཡི་ཚུ་རོལ་འགྲམ་དག་ན། །དོགས་དང་བཅས་ལ་ཕ་རོལ་ཞིང་། །མ་མཐོང་བར་ནི་ཤི་ཡང་སླ། །ལྟ་བ་ངན་པ་ག་ལ་རུང་། །ལྟ་བ་ངན་པས་རྨོངས་པ་ཡི། །མི་རྣམས་སེམས་ཅན་དམྱལ་བར་འགྲོ། །ལོག་པར་སྨྲ་བས་བསླུས་པ་ཡི། །མི་རྣམས་ལོག་པར་ལྟ་དང་ལྡན། །རྒྱུ་མ་ཡིན་ལ་རྒྱུ་ལྟར་ལྟ། །མི་བཟད་སེམས་ཅན་དམྱལ་བར་འགྲོ། །རྒྱུ་འབྲས་དག་ལ་རྨོངས་གྱུར་ཅིང་། །དེ་ཉིད་ལྟ་ལ་རྣམ་རྨོངས་པ། །སེམས་ཅན་སྡུག་བསྔལ་སྐལ་བ་ཅན། །སྲིད་པའི་བཙོན་རར་ཤིན་ཏུ་ཆགས། །ལས་དང་འབྲས་བུ་རྣམ་སྨིན་དང་། །དེ་བཞིན་སྐྱེ་དང་འཆི་བ་དང་། །འགྲོ་བ་དེ་ཉིད་མཐོང་བ་ནི། །མི་དེ་ཕ་རོལ་འགྲོ་བ་ཡིན། །བྱིས་པ་འདོད་པ་ཚོལ་བྱེད་པ། །ཕྱི་ཕྱིར་འདོད་པ་རྣམས་ཀྱིས་རྨོངས། །ཕྱེ་མ་ལེབ་ལྟར་རྨོངས་པ་དེ། །སེམས་ཅན་དམྱལ་བའི་མེ་ཡིས་སྲེག །དཀའ་ཐུབ་ངན་པ་མི་སྤྱོད་ཅིང་། །ཚུལ་ཁྲིམས་སྤྱོད་ལ་བརྟེན་ནས་སུ། །ཡང་དག་ལྟ་བ་ལྷུར་ལེན་རྣམས། །མི་ཡུལ་ནས་ནི་ལྷ་ཡུལ་འགྲོ། །ཁྱེད་ཅག་དཀའ་ཐུབ་ངན་པས་གདུངས། །ལོག་པར་ལྟ་བ་ལྷུར་ལེན་རྣམས། །ཤེས་པས་ལྷག་པའི་ང་རྒྱལ་རྨོངས། །སྐྱེ་བོ་གཞན་ཡང་རྨོངས་པར་བྱེད། །གཏི་མུག་མུན་རུམ་ཐིབས་པོ་ཡི། །ཆུ་བོ་ཆེན་པོར་འཇུག་བྱེད་པ། །སྐྱེ་བོ་འདི་དག་རྒྱུར་གྱུར་ཏེ། །འཇིག་རྟེན་རང་བཞིན་སྡུག་བསྔལ་ལོ། །ལུས་ཀྱི་དཀའ་ཐུབ་མི་བཟད་ཞེས། །མཁས་པ་རྣམས་ནི་དེ་སྐད་གསུང་། །སེམས་ཀྱི་དཀའ་ཐུབ་ཉིད་ཀྱིས་ནི། །ཉོན་མོངས་རི་ཀུན་སྲེག་པར་བྱེད། །ཡང་དག་ཡེ་ཤེས་སྔོན་འདྲེན་པ། །ཉོན་མོངས་ཟད་ལས་རྣམ་ཐར་འདི། །སྐྱེས་བུ་དེ་ཉིད་མཐོང་བའོ། །དགོན་དང་བྲལ་བས་ཐོབ་པར་འགྱུར། །བློ་གྲོས་གཞན་དང་གཞན་རྣམས་ཀྱིས། །
འཇིག་རྟེན་འདི་ཀུན་རྣམ་པར་བསླུས། །གང་ལ་ལོག་པར་སྨྲ་བ་དག །མཆོག་ཏུ་ཞི་བར་འགྲོ་མི་འགྱུར། །འཇིག་རྟེན་པ་ལ་ལོག་པའི་ཚིག །ཤིན་ཏུ་མང་པོར་རབ་ཏུ་གྲགས། །འཇིག་རྟེན་འདས་པའི་བསྐལ་པ་བརྒྱར། །ནམ་ཡང་གྲགས་པར་མི་འགྱུར་རོ། །དེ་བས་འཇིག་རྟེན་འདས་ཚིག་གཟུང་། །འཇིག་རྟེན་པ་ལྟ་ག་ལ་ཞིག །འཇིག་རྟེན་པ་ཡི་ཚིག་དག་ནི། །དུག་འདྲ་འཁོར་བར་འཆི་བར་མཐོང་། །སྲེད་ལ་མི་དགའ་རྟག་བདེ་བ། །ངེས་པར་བསོད་ནམས་བྱེད་པ་པོ། །འཇིག་རྟེན་འདས་ཚིག་དགེ་བ་ཞེས། །མཁས་པ་རྣམས་ནི་ཡང་དག་གསུང་། །ལྟ་བ་དང་ནི་གཏན་ཚིགས་ངན་པས་བསྒྱུར། །གསོབ་དང་གསོག་དང་སྡིག་དང་འདྲེས་པ་ཡི། །ཚིག་གིས་ཀུན་ནས་བསླུས་པའི་མི་རྣམས་ནི། །མུན་གནག་ཆེན་པོའི་ངན་སོང་རྣམས་སུ་ལྟུང་། །དེ་ལྟར་དགེ་སློང་དེས་དེ་ཁོ་ན་ཉིད་མ་མཐོང་བར་འགྱུར་བའི་སེམས་ཅན་རྣམས་ལ། དེ་ཁོ་ན་ཉིད་བསྟན་པར་བྱ་བའི་ཕྱིར་ཚིགས་སུ་བཅད་དེ་སྨྲས་པ། སེམས་ཅན་འདི་ཀུན་དེ་ཉིད་ཁོང་མ་ཆུད། །དོན་མེད་དཔེ་དང་གཏན་ཚིགས་ངན་པ་ཡིས། །གཞན་ཡང་རྨོངས་པར་བྱེད་ལ་བདག་ཉིད་ཀྱང་། །དམྱལ་བར་ལྟུང་བྱེད་གཞན་ཡང་བྱེད་དུ་འཇུག །ལྷ་དེ་རྣམས་ཀྱིས་མིའི་འཇིག་རྟེན་འདི་ཐམས་ཅད་རིག་ནས། བཞོན་པ་དེ་རྣམས་དང་ལྷན་ཅིག་ཏུ་སུམ་ཅུ་རྩ་གསུམ་པ་རྣམས་ཀྱི་རང་གི་གནས་ག་ལ་བ་དེར་དོང་སྟེ། ལྷ་གཞན་རྣམས་ལ་ཡང་སྔ་མ་བཞིན་དུ་བསྙད་དོ། །སིལ་སྙན་རྣམ་པ་སྣ་ཚོགས་སྒྲ་འབྱིན་པའི་ཚལ་དང་ཉེ་བའི་ཚལ་ལྷའི་ཡོན་ཏན་ཕུན་སུམ་ཚོགས་པ་རིན་པོ་ཆེ་ཐམས་ཅད་འབར་བའི་འོད་ཀྱིས་བརྒྱན་པ་རྣམས་ན། ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པ། བདེ་བ་ངེས་པར་འགྲུབ་པའི་ལས་དེ་ཟད་པར་མ་གྱུར་པ་དེ་སྲིད་དུ་དགའ་བར་བྱེད། །དགའ་དགུར་སྤྱོད་པར་བྱེད་དོ། །དེ་ཟད་ནས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་ཡི་དགས་དང་དུད་འགྲོའི་ནང་དུ་སྐྱེ་བར་འགྱུར་
རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་བདེ་བ་དང་ལྡན་ཞིང་ཤིན་ཏུ་ནད་མེད་པ་དང་ལྡན་པ་དང་གནོད་པ་ཐམས་ཅད་དང་བྲལ་བ་དང་ཡུལ་དང་ལྗོངས་ཤིན་ཏུ་ལོ་ལེགས་པ་རྣམས་སུ་སྐྱེ་ལ། དེར་སྐྱེས་ནས་ཀྱང་བྱད་གཟུགས་བཟང་པོར་འགྱུར་ཏེ། ཤིན་ཏུ་བྱད་གཟུགས་བཟང་པོ་དང་ལྡན་པ་དང་སྐྱེ་བོ་ཐམས་ཅད་ཡང་དག་པར་དགའ་བ་དང་དབང་པོ་ཚང་བ་དང་ནོར་རྫས་དམ་པ་དང་ལྡན་ཏེ། རྒྱལ་པོའམ་བློན་པོ་ཆེན་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ནོར་བུ་འཕྱང་བ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། བློ་རྒྱ་ཆེ་ཞིང་ཚུལ་ཁྲིམས་དང་ལྡན་པར་གྱུར་ལ། ལེགས་པར་བྱས་པའི་ལས་ཀྱི་མཐའ་སྤྱད་པ། རྟག་ཏུ་ལས་དང་འབྲས་བུའི་དེ་ཁོ་ན་ཉིད་ལ་ལྟ་བ་སེམས་དམ་པ་དང་ལྡན་པ། ཡང་དང་ཡང་དུ་ལས་དང་འབྲས་བུ་ལ་དད་པར་གྱུར་པ་གང་གིས། དགེ་བའི་ལས་བྱས་ལ་མི་དགེ་བ་སྤངས་པ། དྲང་པོ་དྲང་པོའི་རང་བཞིན་ཅན། སྡིག་པའི་གྲོགས་པོ་དག་མི་སྟེན་ཅིང་། དེ་དག་དང་ལྷན་ཅིག་དགའ་བར་ཡང་མི་བྱེད་ལ། ལམ་དུ་འགྲོགས་པ་ན་ཚིག་ཀྱང་སྨྲ་བར་མི་བྱེད་ལ། མིག་ཟུར་གྱིས་ཀྱང་ལྟ་བར་མི་བྱེད་དེ། དེ་ལྟར་ཀུན་ནས་དགེ་བའི་ལས་ཀྱི་མཐའ་སྤྱོད་པ། གསེར་སྦྱངས་པ་དང་མཚུངས་པ་དེ་ལེགས་པར་བྱ་བ་བྱས་པ་དེས། ཚེ་འདི་ལ་གཞན་ཡང་དགའ་བར་འགྱུར་རོ། །ལེགས་པར་བྱ་བ་བྱས་པ་ཇི་ལྟ་བུ་ཞིག །རྣམ་པ་ནི་དུ་ཞེ་ན། འདི་ནི་མདོ་སྡེ་དང་འདུལ་བ་དང་ཆོས་མངོན་པ་ཁ་ཏོན་སློབ་པ་ལ་ཞུགས་པའི་དགེ་སློང་ཉིན་མཚན་དུ་བརྩོན་པ་གང་དག་མར་མེ་མེད་པའི་གཞིས། སངས་
རྒྱས་ཀྱི་གསུང་རབ་སློབ་མ་ནུས་པ་དེ་མར་མེ་མེད་ནས་ཁ་ཏོན་སློབ་པ་བཏང་སྟེ། འདུག་པ་ལ་སངས་རྒྱས་ཀྱི་གསུང་རབ་ལ་གུས་ཤིང་། དགེ་སློང་དེ་རྣམས་ལ་ཡང་སེམས་དད་པས་བསྒོམས་པའི་སྙིང་དང་ལྡན་པ། ཆོས་དང་དགེ་འདུན་ལ་གུས་པ་དཀོན་མཆོག་གསུམ་ལ་དད་པ་སྐྱེས་པ་དེ་དགེ་འདུན་ཞིང་ཆེན་པོ་དེ་ལ་མར་མེ་དག་འབུལ་བར་བྱེད་ལ། གཞན་ཡང་དགེ་བ་ཉིས་འགྱུར་དུ་བྱེད་དུ་འཇུག་པ་དང་། དེ་ལྟར་དགེ་སློང་དེ་རྣམས་བརྩོན་འགྲུས་བྱ་བའི་དོན་དུ་ཡུལ་ས་ཚ་བར་ཞུགས་པ་རྣམས་ལ་བསིལ་ཡབ་སྦྱིན་པར་བྱེད་དོ། །དེས་དགེ་སློང་རྣམས་དགེ་བའི་ཕྱོགས་བྱེད་དེ། ཚ་བ་བསལ་བ་དང་མར་མེ་བྱིན་པས། དེ་དག་མུན་པའི་མི་བདེ་བ་དང་བྲལ་ཞིང་ཚ་བའི་གནོད་པ་དང་བྲལ་ཏེ། ཀུན་ནས་ཤིན་ཏུ་བདེ་བ་དང་ལྡན་ལ། ངལ་སོར་ཡོད་པ་ཚངས་པར་སྤྱོད་པ་དེ། ཐམས་ཅད་མཁྱེན་པའི་བཀའ་བདེ་བར་སློབ་པར་བྱེད། སེམས་པར་བྱེད་ལ་ཐམས་ཅད་མཁྱེན་པའི་བཀའ་དྲི་བ་དང་། ལན་གླན་པ་ལ་ཕན་ཚུན་ཁ་ཏོན་སློབ་པར་བྱེད་དེ། མར་མེའི་ཡོན་ཏན་དེ་དང་བསིལ་ཡབ་ཀྱི་རླུང་བསིལ་བ་དེས་དགེ་སློང་རྣམས་མུན་པའི་མི་བདེ་བ་དང་བྲལ་ཞིང་ཚ་བའི་གནོད་པ་དང་བྲལ་ཏེ། སྦྱིན་བདག་དེའི་མཐུས་བདེ་བླག་ཏུ་ཁ་ཏོན་སློབ་པར་བྱེད། ཡང་དག་པར་སེམས་པར་བྱེད། ཡིད་ཤིན་ཏུ་བརྩོན་པར་གྱུར་ན། དེ་ལྟར་བདག་དང་གཞན་ལ་ཕན་པར་ཞུགས་པའི་སྐྱེས་བུ་དགེ་བ་དང་ཚུལ་ཁྲིམས་དང་ལྡན་པར་གྱུར་པ་དེ། ལུས་དང་བྲལ་ནས་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་ནོར་བུ་འཕྱང་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ལེགས་པར་བྱས་པའི་ལས་ཀྱི་མཐའ་མངོན་སུམ་དུ་གྱུར་པ་དེ། ཤིན་ཏུ་བདེ་བའི་རྒྱུ་ལེགས་པར་བྱས་པའི་ལས་ཀྱི་འབྲས་བུའི་སྐལ་བ་ལ་ནི་སྤྱོད། ཇི་ལྟར་ཉི་མ་རང་ལས་འོད་འབྱུང་བ་དེ་བས་བཅུ་འགྱུར་གྱིས་ལྷག་པའི་འོད་ཀྱི་ཕྲེང་བ་ནི་འབྱུང་། ལྷའི་ཚོགས་ཐམས་ཅད་ཀྱིས་ཤིན་ཏུ་བཀུར་བ་ན་ལྷ་མོ་དུ་མ་འབུམ་སྙེད་རིམ་གྲོ་བྱ་བའི་ཕྱིར་ནི་འོང་། ལྷ་
མོ་གུས་པ་སྐྱེས་པ་དེ་རྣམས་ཇི་ལྟར་སྔ་ནས་བཤེས་པ་ལྟར་ཡིད་གཅུགས་པར་གྱུར་ཅིང་། བཞིན་འཛུམ་ལ་རྒྱན་ཐམས་ཅད་ཀྱིས་བཀླུབས་པས་གང་བ་རྣམས་ནི། བྱད་གཟུགས་དང་ཆ་བྱད་དང་རྒྱན་ལྷག་པར་བཟང་བ་དང་གཟུགས་བཟང་བ་དང་དབྱིབས་ལེགས་པ་དང་ལུས་ལེགས་པ་ཡིན་ལ། ཕན་ཚུན་ཐབ་མོ་དང་ཕྲག་དོག་དང་འཇིགས་པའི་ངོ་བོ་ནི་མེད། གཅིག་ལ་གཅིག་ཡིད་གཅུགས་པ་ནི་སྐྱེས། གནོད་པ་མེད་པའི་སྙིང་དང་ལྡན་པ་རྣམས་ཕན་ཚུན་འབྲལ་བར་དགའ་བ་སྐད་ཅིག་ཙམ་ཡང་མེད་དེ། དེ་སྐད་ཅིག་ཀྱང་ཉམས་པ་མེད་དོ། །ཡོན་ཏན་དེ་ལྟ་བུ་དང་ལྡན་པ་ཀུན་ཡིད་རབ་ཏུ་དགའ་བར་གྱུར་ནས་ཐམས་ཅད་ཀྱིས་ཀྱང་པད་མ་དག་བླངས་ཏེ་ལྷ་དེའི་དྲུང་དུ་འདོང་བར་བྱེད་དོ། །ཁ་ཅིག་གིས་ནི་གསེར་གྱི་པད་མ་བླངས། ཁ་ཅིག་གིས་ནི་དངུལ་གྱི་པད་མ། ཁ་ཅིག་གིས་ནི་བཻ་ཌཱུརྱའི་པད་མ། ཁ་ཅིག་གིས་ནི་ཤེལ་གྱི་པད་མ། ཁ་ཅིག་གིས་ནི་རིན་པོ་ཆེ་དང་འདྲེས་པ་དག་བླངས་ཏེ། འདི་ལྟར་གང་གི་ལག་ན་དངུལ་གྱི་པད་མ་ཡོད་པ་དེའི་པད་མའི་སྡོང་བུ་ནི་གསེར། ཟེ་བ་ནི་པད་མ་རཱ་གའི་མདོག་ཡིན་ནོ། །གང་གི་པད་མ་བཻ་ཌཱུརྱའི་པད་མ་ཡིན་ན་དེའི་སྡོང་བུ་ནི་གསེར་ཡིན་ནོ། །གང་གི་པད་མ་གསེར་ཡིན་ན་དེའི་མེ་ཏོག་ཨན་ད་རྙིལ་ཡིན་ནོ། །གང་གི་པད་མ་སྤུག་ཡིན་ན་དེའི་སྡོང་བུ་ཨན་ད་རྙིལ་ཡིན་ནོ། གང་གི་ལག་ན་པད་མ་དམར་པོ་ཐོགས་ན་དེའི་ཟེ་བ་ནི་རྡོ་རྗེའི་མདོག་ལྟ་བུ་ཡིན་ཏེ། དེ་ལྟར་ལྷ་མོ་དེ་རྣམས་ལྷ་དེའི་དྲུང་དུ་འདོང་བར་བྱེད་དོ། །དོང་ནས་ཀྱང་ཡིད་གཅུགས་པ་དེ་ལ་ཀུན་ནས་པད་མ་ཆར་ལྟར་འབེབས་ཏེ། ཇི་ལྟར་དབྱར་གྱི་དུས་རྣམས་སུ་སྤྲིན་གྱི་རྒྱལ་པོ་དག་ལས་ཆར་ཀྱི་རྒྱུན་མངོན་པར་འབབ་པ་དེ་ལྟར་ལྷ་དེ་ལ་ལྷ་མོ་དེ་རྣམས་ཀྱིས་པད་མའི་ཆར་འབེབས་པར་བྱེད་དོ། །ལྷ་དེ་སྐྱེས་མ་ཐག་ཉིད་དུ་དང་པོར་ལྷ་མོ་དེ་རྣམས་མཐོང་ནས། ལྷ་རྣམས་ཀྱི་ངོ་བོ་ཉིད་ཀྱི་སྙིང་གཡོ་བར་བྱེད་ན་ཡིད་ཤིན་ཏུ་དགའ་བར་གྱུར་པ་ལྟ་སྨོས་ཀྱང་ཅི་དགོས། དེ་སྐྱེས་མ་ཐག་ཏུ་དང་པོར་དེ་རྣམས་མཐོང་ནས་འདོད་ཆགས་ཀྱིས་འཕངས་པའི་ཡིད་དང་། ངོ་མཚར་དུ་གྱུར་པའི་སྙིང་
རབ་ཏུ་དགའ་བ་དང་ཡན་ལག་དང་ཉིང་ལག་ཐམས་ཅད་ཀྱང་དགའ་བར་གྱུར་ནས། མོད་ཉིད་ལ་སྟན་དེ་ནས་ལྷ་མོ་དེ་རྣམས་ག་ལ་བ་དེར་རྒྱུག་པར་བྱེད་དོ། །འདོད་ཆགས་སྐྱེས་པ་དེ་དག་ཕན་ཚུན་འདྲེས་པར་གྱུར་ནས། དེ་ནས་ཡང་ལྷ་མོ་དེ་རྣམས་དང་ལྷ་དེ་ཡང་དང་ཡང་དུ་དགའ་བ་ཉིད་ལྷག་པར་བསྐྱེད་པར་བྱ་བའི་ཕྱིར། ཤིན་ཏུ་བྲོ་གར་བྱེད་དགོད་པར་བྱེད་གླུ་ལེན་པར་བྱེད་དོ། །དེ་ནས་ལྷ་དེ་ལྷ་མོ་དེ་རྣམས་ཀྱིས་ཡོངས་སུ་བསྐོར་ནས། ཚལ་དང་ཉེ་བའི་ཚལ་རིན་པོ་ཆེ་སྣ་ཚོགས་འབར་བ། འདོད་པའི་ཡོན་ཏན་ཐམས་ཅད་དང་ལྡན་པ། ཤིང་ལྗོན་པ་རྣམས་དང་ཤིང་ལྗོན་པའི་དྲུང་རྣམས་དང་ལྡན་པ། བྱ་སྣ་ཚོགས་འདྲེས་ཤིང་སྒྲ་འབྱིན་པ་ཐོས་ན་སྙན་པ། མེ་ཏོག་དང་འབྲས་བུའི་ཕྱོགས་ཇི་ལྟར་འདོད་པ་བཞིན་འགྲུབ་པ་ཆུ་བོ་དང་འབབ་ཆུ་དང་ལྟེང་ཀ་རྣམས་འབུམ་སྙེད་ཀྱིས་གང་བའི་ཚལ་དང་ཉེ་བའི་ཚལ་དེ་རྣམས་སུ། ལྷ་དེ་ལྷ་མོ་དེ་རྣམས་དང་ལྷན་ཅིག་གནས་པར་བྱ་བའི་ཕྱིར་འདོང་བར་བྱེད་དེ། རང་གིས་བྱས་པའི་ལས་མངོན་སུམ་དུ་གྱུར་པ་དེས། བདེ་བ་དཔེ་མེད་པ་རྣམ་པ་དུ་མ་དག་མྱོང་ངོ་། །དེ་ནས་དེ་དེ་རྣམས་ཀྱིས་ཡོངས་སུ་བསྐོར་ནས་སིལ་སྙན་ཡན་ལག་ལྔ་དང་ལྡན་པས་རྩེ་ཞིང་། འདོད་པ་ཐམས་ཅད་བསམས་ན་འགྲུབ་པ་ལུས་ཀྱི་མཐའ་རྒྱ་ཆེན་པོ་བྱེད་པའི་ལྷ་དེ། འཕགས་པའི་ཚུལ་ཁྲིམས་དེ་ལ་བརྟེན་པའི་འབྲས་བུ་ལ་སྤྱོད་པར་བྱེད་དོ། །དེ་ནས་དེ་ལྟར་ལྷ་དེ་དེ་རྣམས་ཀྱིས་ཡོངས་སུ་བསྐོར་ནས། ལྷ་དེ་རྣམས་དང་ཡང་ནོར་བུ་འཕྱང་བའི་ཚལ་ག་ལ་བ་དེར་འདོང་བར་བྱེད་དོ། །ལྷ་གཞན་རྣམས་ཀྱིས་དེ་དག་མཐོང་ནས། ཡིད་རབ་ཏུ་དགའ་བ་གུས་པ་དང་བཅས་པ། ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་རྣམས། ལྷ་གསར་དུ་བྱུང་བ་དེ་ག་ལ་བ་དེར་འདོང་བར་བྱེད་དོ། །གུས་པ་དང་བཅས་པའི་ཡིད་ཀྱིས། དེ་ལ་གཉེན་ལྟར་སེམས་ཤིང་ཐམས་ཅད་ཡིད་རབ་ཏུ་དགའ་བས་ལྷ་དེའི་དྲུང་དུ་དོང་ངོ་། །ལྷ་གསར་དུ་བྱུང་བ་དེ་ཡང་ཡིད་དགའ་བ་སྐྱེས་ནས་ལྷ་དེ་རྣམས་འོང་བ་ག་ལ་བ་དེར་འགྲོ་བར་བྱེད་དོ། །དེ་ནས་ཡང་ལྷ་དེ་རྣམས་དང་ལྷ་གསར་དུ་བྱུང་བ་དེ་དང་ནོར་བུ་འཕྱང་བའི་ཚལ་འདོད་པ་ལྔ་འགྲུབ་པ་དེ་ན་དགའ་བར་བྱེད། དགའ་དགུར་སྤྱོད་པར་བྱེད་ཅིང་དགའ་
བ་དང་འཐུན་པའི་སིལ་སྙན་ཡན་ལག་ལྔ་དང་ལྡན་པ། ཐོས་ན་ཤིན་ཏུ་ཡིད་དུ་འོང་ལ་དེ་བཞིན་དུ་རྣར་སྙན་པ་དག་གིས་ལྷ་དེ་རྣམས་དགའ་བར་བྱེད་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ནས་ཡང་ལྷ་རྣམས་ནོར་བུ་འཕྱང་བའི་ཚལ་ན། ལྷ་མོ་སྒེག་མོ་རབ་ཏུ་དགའ་བ་རྣམ་པ་དུ་མ་རོལ་མོའི་སྒྲ་འབྱིན་ཞིང་ཤིན་ཏུ་ཉམས་དགའ་བར་བྱེད་པའི་ནང་ན། ལྷ་རྣམས་ལྟ་བས་བདེ་བ་མྱོང་བར་བྱེད་དེ་འདི་ལྟ་སྟེ། ཚལ་གྱི་ནང་གི་ས་གཞི་རིན་པོ་ཆེ་སྣ་བདུན་གྱིས་བརྒྱན་པ། ཀུན་ནས་ཁ་དོག་དང་མདོག་གསེར་གྱི་གོས་བགོས་པ་ལྟར་མཛེས་པ་ཡིན་ཏེ། དེ་ལྟར་དགའ་བར་བྱེད་པའི་ཤིང་ལྗོན་པ་སྐྱེས་པ་རྣམས་ཕན་ཚུན་འགྲན་པ་ལྟར་མེ་ཏོག་རབ་ཏུ་རྒྱས་པ། རིན་པོ་ཆེ་སྣ་ཚོགས་ཀྱི་ཤིང་ལྗོན་པ་རྣམས་ཀྱིས་བརྒྱན་པ། ཚལ་དང་ཉེ་བའི་ཚལ་གྱི་ས་གཞི་མཐོན་དམན་རན་པ། བཟའ་བའི་ཚོགས་དང་བཏུང་བའི་ཚོགས་མང་པོས་གང་བ་ཀུན་ནས་བལྟ་ན་སྡུག་ཅིང་ཉམས་དགའ་ལ་ལྷག་པར་མཛེས་པ་ཡིན་ནོ། །དེ་ནས་ཡང་ལྷ་དེ་ལྷ་དེ་རྣམས་དང་ལྷན་ཅིག་སིལ་སྙན་སྣ་ཚོགས་དང་བཅས་པས་དགའ་བར་བྱེད། དགའ་དགུར་སྤྱོད་པར་བྱེད་ལ། ཤིན་ཏུ་བདེ་བ་དང་ལྡན་པ་དག་འཕྱང་བའི་ཚལ་ལ་སྟེན་པར་བྱེད་དོ། །ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ། བཻ་ཌཱུརྱའི་རྡོ་ལེབ་ཅེས་བྱ་བའི་ས་ཕྱོགས་དེ་ལ་ཡང་སྟེན་པར་བྱེད་དེ། དེས་ས་ཕྱོགས་དེ་ན་ནོར་བུ་ལས་བྱས་པའི་གོས་ཀྱི་ངོ་བོ་ཉིད་ཤིང་ལྗོན་པ་རྣམས་ལས་འཕྱང་བ་མཐོང་སྟེ། ཉི་མ་ཤར་བ་ལྟ་བུར་ཤིན་ཏུ་གཟི་བརྗིད་དང་ལྡན་པ། སྐྱེ་བོ་ཐམས་ཅད་ཀྱིས་མཐོང་ན་བདེ་བ་ཡིན་ལ་རླུང་གིས་བསྐྱོད་ན་མཐོན་དམན་དུ་འཕར་བ་ཡིན་ནོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་བཅུ་ཐམ་པ། བུང་བ་འབུམ་སྙེད་ཀྱིས་ཀྱང་ཁྱབ་པ་ཡིན་ལ། བུང་བ་ཁ་དོག་མཛེས་པ་རྣམ་པ་སྣ་ཚོགས་དག་གིས་བརྒྱན་པ། ཀུན་ནས་ཤིང་ལྗོན་པ་འབུམ་སྙེད་འོད་འབར་བ་ལྟར་གསལ་བ་ཡིན་ནོ། །ལྷ་དེ་རྣམས་ཀྱིས་ཤིང་ལྗོན་པ་དེ་དག་མཐོང་ནས་ངོ་མཚར་ཆེར་སྐྱེས་པའི་མིག་ཕྱེ་སྟེ། ཤིང་ལྗོན་པ་དེ་དག་རླུང་གིས་བསྐྱོད་པའི་ལོ་མ་འཕྱང་བ་ཀུན་ནས་མཛེས་པ་ག་ལ་བ་དེར་ལྷ་མོའི་ཚོགས་ཐམས་ཅད་དང་ལྷན་ཅིག་འདོང་བར་བྱེད་དོ། །
དེ་དག་ཀུན་ནས་རྒྱ་ཆེ་བ་དེ་རྣམས་ཀྱི་ནང་ན་སིལ་སྙན་ཡན་ལག་ལྔ་དང་ལྡན་པས་དགའ་བར་བྱེད་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ནས་ཚལ་འཕྱང་བའི་ནང་དེ་ན་སེམས་ངོ་མཚར་དུ་དགའ་བའི་ལྷ་དེ་རྣམས་ལྕང་ལོ་འཕྲུགས་པ་དེ་དག་རྩེ་བའི་དོན་དུ་སྤྱང་བར་བྱེད་དོ། །སྤྱངས་པ་དག་ལ་རྩེ་བ་ན་ལྕང་ལོ་འཕྲུགས་པ་ལ་ལྟ་བས་ཆོག་ནས་དེ་དག་འདི་སྙམ་དུ་སེམས་ཏེ། ད་ནི་ལྕང་ལོ་འཕྲུགས་པ་དག་ལས་རྒུན་ཆང་ཡོན་ཏན་ཐམས་ཅད་དང་ལྡན་པ་འབྱུང་བར་གྱུར་ཅིག་སྙམ་དུ་སེམས་བསྐྱེད་མ་ཐག་ཉིད་དུ་ལྕང་ལོ་འཕྲུགས་པ་དེ་དག་ལས་ལྷ་དེ་རྣམས་ཀྱི་རྒུན་ཆང་བྱུང་ངོ་། །དེ་དག་ཀྱང་ལྷ་དེ་རྣམས་ཀྱིས་སྔོན་མ་མཐོང་བ་ཡིན་ཏེ། སྔོན་མ་བྱུང་བའི་བཏུང་བ་མདོག་དང་དྲི་དང་རོ་དང་རེག་པ་བྱུང་བར་གྱུར་པ་དག་ལ་དེ་རྣམས་ངོ་མཚར་ཆེར་སྐྱེས་ཤིང་མིག་དང་བཞིན་འཛུམ་ལ་ཡིད་བརྒྱ་འགྱུར་དུ་རབ་ཏུ་དགའ་བ་སྐྱེས་སོ། །རྒུན་ཆང་ངོ་མཚར་ཆེ་བ་མདོག་དང་དྲི་དང་རོ་ཕུན་སུམ་ཚོགས་པ། ཤིང་ལོ་འཕྲུགས་པ་རྣམས་ལས་བྱུང་བ་དེ་དག་འཐུངས་ནས་བདག་ཅག་བཅུ་འགྱུར་དུ་རབ་ཏུ་དགའ་བར་བྱའོ་སྙམ་མོ། །དེ་ནས་ལྷ་དེ་རྣམས་བཻ་ཌཱུརྱའི་སྣོད་ཐོགས་ཏེ་རྒུན་ཆང་དེ་དག་བཅུས་ནས། རྒུན་ཆང་འདི་ཅི་བདེར་གསོལ་ཅིག་ཅེས་ཕན་ཚུན་འབྲིམ་པར་བྱེད་དོ། །དེ་ལྟར་དེ་རྣམས་འཐུང་བ་ནི་གང་གིས་ཇི་སྲིད་དུ་སྦྱིན་པ་བྱིན་ནམ། ཚུལ་ཁྲིམས་བསྲུངས་པ་དེ་ནི་དེ་སྲིད་དུ་ཆང་དེ་མདོག་དང་དྲི་དང་རོ་དང་ལྡན་པའི་ཡོན་ཏན་ཁྱད་པར་ཆེ་བར་འབྱུང་ངོ་། །དེ་ནས་ཆང་དེ་ལྷག་པར་ཞིམ་པར་རིག་ནས། དེ་ན་ལྷ་སྦྱིན་པ་དང་ཚུལ་ཁྲིམས་ཆུང་ངུ་དང་ལྡན་པ་གང་ཡིན་པ་དེའི་ཆང་དེ་དག་མི་ཞིམ་པར་ཤེས་ནས་ཤིན་ཏུ་ངོ་ཚ་བ་སྐྱེས་སོ། །ཤིན་ཏུ་ངོ་ཚ་བར་རིག་ནས་བྱ་ལོ་མ་དང་རྒུན་ཆང་གི་ནང་ན་སྤྱོད་པ་ཞེས་བྱ་བ་གང་ཤིང་ལྗོན་པ་དེ་རྣམས་ཀྱི་ལོ་མའི་ནང་དུ་སོང་སྟེ། རྒུན་ཆང་རྟག་ཏུ་འཐུང་བ་དག་གིས་འདི་ལྟར་ཚིགས་སུ་བཅད་དེ་སྨྲས་པ། ཆང་འཐུང་རྒྱགས་པས་མྱོས་པ་ཡི། །སེམས་ཅན་གཏི་མུག་དབང་གྱུར་རྣམས། །གཏི་མུག་ཞགས་པས་མངོན་སུམ་དུ། །སྲེད་པའི་རོས་ནི་འཐུང་བར་བྱེད། །གཏི་མུག་ཞགས་པ་ཆང་ཡིན་ཏེ། །འཐུངས་ནས་གཤིན་རྗེས་སྐུལ་བར་བྱེད། །མཐོ་རིས་ནས་ནི་དམྱལ་བར་ལྟུང་། །
དེ་བས་ཆང་ལ་མ་རེག་ཅིག །མཐོང་དང་རེག་དང་བསྣམས་པ་ལས། །ཆང་གིས་མི་ནི་རྨོངས་པར་བྱེད། །དེ་བས་ཀུན་ཏུ་ཞགས་པ་ཡིན། །དེ་ནི་རིང་བར་ཡོངས་སུ་སྤོངས། །མཐོང་བ་ལས་ནི་ཆགས་པ་སྐྱེ། །རེག་པ་ལས་ནི་དྲི་འབྱུང་ལ། །དྲི་ལས་རོ་ལ་ཆགས་པ་འབྱུང་། །རོ་རྣམས་ཀྱིས་ནི་ཐ་མར་འགྲོ། །ཇི་ལྟར་ཆང་ལ་ངེས་བརྟེན་ན། །དེ་ལྟར་མིང་དང་གཟུགས་འཇིག་སྟེ། །ཞགས་པའི་ནང་ན་ཐ་མ་ནི། །ཆང་ཞེས་མཁས་པ་རྣམས་གསུང་ངོ་། །ངག་དང་མིག་དང་འགྲོ་བ་ཉིད། །ཚབས་པོ་ཆེར་ནི་འཁྲུལ་བྱེད་ལ། །བློ་བྲལ་རྨོངས་པ་འཁྲུལ་པ་ནི། །ཅི་ཡང་སྒྲུབ་པར་མི་བྱེད་དོ། །ས་ལ་ལྟུང་བའི་མི་དེ་ལ། །བུད་མེད་རྣམས་ཀྱང་འཕྱ་བར་བྱེད། །འགུལ་བ་མེད་པ་ཤིང་སྐམ་འདྲ། །གཡོ་བ་མེད་པ་ས་ལ་ལྟུང་། །ཆང་འཐུང་བ་ལ་གོམས་པ་ནི། །འཆི་བར་འགྱུར་ཞེས་གྲགས་པར་བྱེད། །ཧ་ལ་ཧ་ལའི་དུག་བས་ལྷག །འཆི་ཞགས་པས་ཀྱང་དེ་ལྷག་གོ །ཆང་འཐུང་བ་ལ་རྟག་ཏུ་ནི། །ཉེས་དམིགས་སུམ་ཅུ་རྩ་དྲུག་ཡོད། །དེ་བས་ཉེས་དམིགས་ཤེས་པ་གང་། །དེ་ཡིས་ཆང་ནི་རྣམ་པར་སྤོངས། །རིགས་བཙུན་མཁས་པ་དག་ལ་ནི། །དྲི་མ་ཆེན་པོར་བྱེད་པ་ཡིན། །སྐྱེ་བོ་ཀ་སའི་མེ་ཏོག་ལྟར། །ཡང་བ་ཁོ་ནར་བྱེད་པ་ཡིན། །དེ་ལྟར་བྱ་དེ་དག་དུད་འགྲོར་གྱུར་གྱིས་ཀྱང་ལྷ་དེ་དག་ལ་སྨོད་པར་བྱེད་ན། ལྷ་གཞན་དག་ལྟ་སྨོས་ཀྱང་ཅི་དགོས། དེ་ནས་ལས་ལེགས་པར་བྱས་པའི་ས་བོན་གྱིས་ཇི་ལྟ་བ་བཞིན་གྱུར་པའི་ལྷ་རྣམས། སྦྲང་རྩིའི་ཆང་མདོག་དང་དྲི་དང་རོ་ཕུན་སུམ་ཚོགས་པ་དང་ཐ་མ་དང་འབྲིང་དང་ཁྱད་ཞུགས་པ་དེ་དག་འཐུངས་ནས། ཚལ་རྒྱུན་གྱི་གནས་ཞེས་བྱ་བ་ག་ལ་བ་དེར་གནས་པར་བྱ་བའི་དོན་དུ་འདོང་བར་བྱེད་ལ། རྣ་གུང་དུ་སིལ་སྙན་གྱི་སྒྲས་འདིར་ཅིང་ཡིད་རབ་ཏུ་དགའ་ལ། མེ་ཏོག་ཨུད་པ་ལ་སྔོན་པོའི་ཕྲེང་བ་བརྒྱུས་པས་མཛེས་པ་དག་དོང་ངོ་། །རྒྱུན་གྱི་གནས་དེ་ནས་ཀྱང་ལྷ་དང་ལྷ་མོའི་ཚོགས་ཀྱིས་གང་བ་རབ་ཏུ་དགའ་ལ། ཕན་ཚུན་ཤིན་ཏུ་མགུ་བར་གནས་པ། ལུས་གསེར་གྱི་འོད་ཀྱིས་བརྒྱན་པ་རྣམས་སྤྲིན་གྱི་ཚལ་དེར་མྱུར་བར་དོང་ངོ་། །དེ་ནས་སྤྲིན་གྱི་
ཚལ་དུ་དོང་བའི་ལྷ་དགའ་བ་ལ་གནས་པ། བག་མེད་པ་དེ་རྣམས་ལ་བསྐུལ་བར་བྱ་བའི་ཕྱིར། བརྒྱ་བྱིན་གླང་པོ་ཆེ་ས་སྲུང་གི་བུ་རྣམ་པར་རྒྱལ་བྱེད་ཅེས་བྱ་བ་དེ་ཉིད་རྒྱན་འབུམ་སྙེད་ཀྱིས་བརྒྱན་པ་ལ་ཞོན་ནས། ལྷ་དང་ལྷ་མོའི་ཚོགས་རབ་ཏུ་དགའ་བས་གང་བ་དང་སྤྲིན་གྱི་ཚལ་ཞེས་བྱ་བ་དེར་དོང་ངོ་། །དེ་ནས་ལྷ་དེ་རྣམས་ཀྱིས་ལྷའི་རྒྱལ་པོ་བརྒྱ་བྱིན་མཐོང་ནས། སེམས་གུས་པ་དང་བཅས་ཤིང་ཐོར་ཚུགས་དང་མེ་ཏོག་ཕྲེང་བ་དང་རྒྱན་ཕྲེང་ཐོགས་པ་ཐམས་ཅད་ཀྱིས་བརྒྱ་བྱིན་ལ་བསྟོད་ཅིང་། སིལ་སྙན་སྣ་ཚོགས་ཀྱི་སྒྲ་དང་དབྱངས་ཉེ་བར་འབྱིན་ལ་བརྒྱ་བྱིན་གྱི་མདུན་དུ་བྲོ་གར་དང་ཚུལ་སྡུག་གུས་འགྲོ་བར་བྱེད་དོ། །ལྷའི་རྒྱལ་པོ་བརྒྱ་བྱིན་ཡང་དེ་བཞིན་དུ་གླང་པོ་ཆེ་ས་སྲུང་གི་བུ་ལ་ཞོན་བཞིན་དུ། ལྷ་དེ་རྣམས་ལ་ཚིག་སྙན་པ་རྣམས་ཀྱིས་མངོན་པར་དགའ་བར་བྱེད་དོ། །དེ་ནས་བརྒྱ་བྱིན་ལྷ་དེ་རྣམས་ཀྱི་ནང་ན་ཅུང་ཟད་ཅིག་དགའ་བར་གནས་རྩེ་བར་བྱས་ནས། ལྷ་དེ་རྣམས་ལ་འདི་སྐད་སྨྲས་སོ། །འདི་ལྟར་ལེགས་པར་བྱས་པའི་ལས་ཀྱི་མཐའ་སྤྱད་པའི་ལྷ་ཁྱེད་རྣམས་ང་ལྷ་མ་ཡིན་རྒྱགས་ཤིང་ཁྲོ་བར་གྱུར་པ་རྒྱགས་པ་དང་དབྲལ་བར་བྱ་བའི་ཕྱིར། དགའ་བའི་ཚལ་དུ་འགྲོ་བའི་བར་དུ་དགའ་བར་གྱིས་ཤིག །དེ་ནས་བརྒྱ་བྱིན་གྱི་ཚིག་དེ་སྐད་ཐོས་ནས་ལྷ་རྣམས་ཀྱིས་སྨྲས་པ། འདི་ལྟར་ལྷ་བདག་ཅག་ཀྱང་ལྷ་མ་ཡིན་དེ་རྒྱགས་པ་དང་དབྲལ་བར་བགྱི་བའི་སླད་དུ་མཆིའོ། །དེ་ནས་བརྒྱ་བྱིན་གྱིས་ལྷ་དེ་རྣམས་ཟློག་པར་བྱེད་དེ། དོན་འདི་ང་འབའ་ཞིག་གིས་ནུས་ཀྱིས་ཁྱེད་སྤྲོ་བར་མ་བྱེད་ཅིག །དེ་ནས་ལྷ་དེ་རྣམས་བཟློག་ནས། ལྷའི་རྒྱལ་པོ་བརྒྱ་བྱིན་དེ་དགའ་བའི་ཚལ་ག་ལ་བ་དང་རང་གི་ཀུན་དགའ་ར་བ་ག་ལ་བ་དེར་སོང་བ་དང་། གང་ན་ཉལ་མལ་བཅས་པའི་ཉལ་མལ་དེ་ན། ལྷ་མ་ཡིན་སྤྲིན་གྱི་ཕུང་པོ་ལྟ་བུར་འཕེལ་བ་ཞུགས་པ་དག་ལ་ལྷ་མང་པོས་སྤྱོ་བར་བྱེད་དེ། ཇི་ལྟ་ཇི་ལྟར་སྤྱོས་པ་དེ་ལྟ་དེ་ལྟར་འཕེལ་བར་འགྱུར་རོ། །དེ་ལྟར་དེ་འཕེལ་བར་གྱུར་པ་མཐོང་ནས་ལྷ་མི་བཟོད་པར་གྱུར་པ་དེ་རྣམས་ཡང་སྤྱོ་བར་བྱེད་དོ། །དེ་ནས་ཡང་ལྷ་མ་ཡིན་རྒྱགས་ཤིང་ཁྲོ་བར་གྱུར་པ། རབ་ཏུ་འཕེལ་ཞིང་
མངོན་པར་འཕེལ་ལ། དེ་ལྟར་བཟོད་པ་མེད་པའི་གཟུགས་མཐོང་ནས། བརྒྱ་བྱིན་གྱིས་སྨྲས་པ། འདི་ལྟར་ཁྲོ་བས་མངོན་པར་འཕེལ་བ་འདི་ལ་ནི་གང་གིས་དེའི་རྒྱགས་པ་བསལ་བའི་གཉེན་པོ་བྱ་དགོས་སོ་སྙམ་ནས། དེ་ནས་དེའི་ཚེ་བརྒྱ་བྱིན་གྱིས་འདི་ལྟར་ཚིགས་སུ་བཅད་དེ་སྨྲས་པ། ཁྲོ་བས་ཉམས་པའི་ཁྲོ་བ་ནི། །བཟོད་པས་ཁྲོ་བ་ཉིད་ལས་རྒྱལ། །ཆོས་མིན་ཆོས་ཀྱིས་ངེས་པར་རྒྱལ། །མུན་པ་འོད་ཀྱིས་རྣམ་པར་རྒྱལ། །བདེན་པ་རྣམས་ཀྱིས་བརྫུན་ཚིག་བཅོམ། །ཕྲ་མའང་ཏིང་ངེ་འཛིན་གྱིས་བཅོམ། །ཚིག་རྩུབ་མཉེན་པ་རྣམས་ཀྱིས་རྒྱལ། །སྡང་བ་མཉེན་པ་ཉིད་ཀྱིས་རྒྱལ། །སྲོག་གཅོད་བྱམས་པ་རྣམས་ཀྱིས་རྒྱལ། །རྐུ་སེམས་རྟག་ཏུ་སྦྱིན་པས་རྒྱལ། །ཚུལ་བཞིན་ཡིད་ལ་མི་བྱེད་པ། །ཚུལ་བཞིན་གྱིས་ནི་རྟག་ཏུ་རྒྱལ། །མ་རིག་པ་ནི་རིག་པས་རྒྱལ། །དེ་བཞིན་མུན་པ་སྣང་བས་སོ། །མུན་པའི་ཕྱོགས་ཀྱི་དེ་ཉིད་ནི། །སྣང་བའི་ཕྱོགས་ཀྱིས་རྒྱལ་བར་འགྱུར། །ལོག་པའི་འདོད་པ་མི་གཙང་བ། །དཔྱོད་ཅིང་རིག་པས་རྣམ་པར་རྒྱལ། །ལམ་ངན་ཞུགས་པའི་འཕགས་པའི་ལམ། །ཡན་ལག་བརྒྱད་པས་རྟག་ཏུ་རྒྱལ། །སྡར་མ་འདི་ནི་མི་འཇིགས་པ། །བཞི་རྣམས་ཁོ་ནས་རྒྱལ་བ་ཡིན། །བརྗེད་ངས་པ་ནི་དྲན་པས་བཅོམ། །མི་ཤེས་པ་ནི་ཤེས་ཉིད་ཀྱིས། །འདོད་ཆགས་བདོ་བའི་མི་རྣམས་ནི། །དགོན་གནས་བརྩོན་པ་རྣམས་ཀྱིས་རྒྱལ། །ཚལ་རྣམས་དཀྲིགས་པ་ཐམས་ཅད་ནི། །རི་རབ་རི་ཡིས་རྣམ་པར་རྒྱལ། །ས་ལས་བྱུང་བའི་ཆུ་ཀུན་ནི། །རྒྱ་མཚོ་ཡིས་ནི་རྒྱལ་བར་འགྱུར། །ཀུན་ནས་གཟའ་དང་སྐར་མ་རྣམས། །ཉི་མའི་འོད་ཀྱིས་རྣམ་པར་རྒྱལ། །ལུགས་མིན་དེ་བཞིན་ལུགས་ཀྱིས་རྒྱལ། །དབུལ་བ་སྦྱིན་པ་ཚོགས་པས་རྒྱལ། །ངོར་སྒྱུ་དྲང་པོ་རྣམས་ཀྱིས་རྒྱལ། །བརྫུན་ཟེར་བ་ནི་བདེན་པས་བཅོམ། །ལོག་པ་ཡང་དག་ཉིད་ཀྱིས་རྒྱལ། །གྲང་བ་བྱུང་བ་མེ་ཡིས་རྒྱལ། །སྐོམ་པ་ཆུ་ཡིས་རྣམ་པར་རྒྱལ། །བཀྲེས་པ་དེ་བཞིན་སྟོན་མོས་རྒྱལ། །རི་དགས་སྙིང་སྟོབས་ཡོད་པ་གང་། །ཐམས་ཅད་སེང་གེས་རྣམ་པར་རྒྱལ། །འདོད་
ཆེན་ཆེ་བ་ཆོག་ཤེས་པས། །རྟག་ཏུ་རྒྱལ་བར་རབ་ཏུ་གྲགས། །སྙིང་རྗེ་རྟག་ཏུ་བསྔགས་པ་ཡིན། །སྙིང་རྗེ་མེད་པ་བསྔགས་པ་མིན། །ཤེས་པ་ཆེ་ལ་རྟག་ཏུ་དུལ། །སྐྱེས་བུ་དེ་ཉིད་སྨྲ་རྣམས་ཀྱིས། །ལས་ངན་རྣམས་ཀྱི་ལོག་པ་ཉིད། །ལྷག་པར་སྨྲ་བའི་མི་རྣམས་བཅོམ། །ཡོན་པོར་སྨྲ་བའི་མུ་སྟེགས་ཀུན། །སངས་རྒྱས་ཀྱིས་ནི་རྣམ་པར་རྒྱལ། །ལྷ་མ་ཡིན་ནི་ལྷ་ཡིས་རྒྱལ། །ཆོས་ཉིད་འདི་ནི་རྣམ་པར་གནས། །བརྒྱ་བྱིན་ལྟར་ནི་བཅོས་པ་བྱེད། །ཀུན་ལས་ངས་ཀྱང་རྣམ་རྒྱལ་ན། །འོག་མ་ཁྱེད་ཅག་གང་ཡིན་པ། །འདི་དག་འོངས་པ་སྨོས་ཅི་དགོས། །མལ་གཞི་འདི་དག་ཐམས་ཅད་ནི། །ཆོས་ལྷུར་ལེན་པ་རྣམས་སྟེན་གྱི། །ཆོས་མིན་པ་ལ་བརྩོན་པ་ཡི། །རྨོངས་པའི་བློ་ཡིས་བསྟེན་བྱ་མིན། །དེ་ནས་བརྒྱ་བྱིན་གྱི་ཁ་ནས་ཚིག་དེ་དག་ཐོས་ནས་གང་གི་ཚེ། ཇི་ལྟ་ཇི་ལྟར་སྤྱོས་པ་དང་དེ་ལྟ་དེ་ལྟར་འཕེལ་བའི་ལྷ་མ་ཡིན་གང་ཡིན་པ་དེ་དག་ལ་བདེན་པའི་ཚིག་འདིས་ཕོག་པ་དང་འཕེལ་བ་མེད་ལ། སྟོབས་དང་མདོག་དང་སྙིང་སྟོབས་དག་བྲི་བར་གྱུར་ཏོ། །སེམས་ཅན་དམན་པ་དེ་དག་མཐོང་ནས་བརྒྱ་བྱིན་གྱི་ཞབས་འབྲིང་བ་གང་ཡིན་པ་དེ་རྣམས་ཀྱིས། སེམས་ཅན་དམན་པའི་རྐང་པ་དག་ནས་བཟུང་སྟེ། ཕྱུང་ནས་དགའ་བའི་ཚལ་དེ་ནས་བསྐྲད་དོ། །བརྒྱ་བྱིན་ཡིད་རབ་ཏུ་དགའ་བ་ཡང་གླང་པོ་ཆེ་ས་སྲུང་གི་བུ་ལ་ཞོན་ནས། ནོར་བུ་འཕྱང་བའི་ལྷ་རྣམས་ཀྱི་གནས་ག་ལ་བ་དེར་འགྲོ་བར་བྱེད་དེ། བྱ་བ་བྱས་པའི་ལྷའི་ཚོགས་ཐམས་ཅད་ཀྱིས་ཡོངས་སུ་བསྐོར་བ་ཤིན་ཏུ་དཔེ་མེད་པའི་ལྷའི་འདོད་པ་ཐམས་ཅད་གྲུབ་ཅིང་ལྡན་པ་དེ་ནས་ཡང་ལྷ་དེ་དག་གི་དྲུང་དུ་ཕྱིན་ཏོ། །ནོར་བུ་འཕྱང་བ་ན་གནས་པའི་ལྷ་དེ་རྣམས་ཀྱང་བརྒྱ་བྱིན་དང་ཕྲད་ནས་མངོན་པར་བསྟོད་དོ། །ཡང་ཐམས་ཅད་སྤྲིན་གྱི་ཚལ་ག་ལ་བ་དེ་ཉིད་དུ་དོང་ངོ་། །དེ་ལྟར་བརྒྱ་བྱིན་གྱི་མདུན་ན་འདོན་པ་ཡིད་ཤིན་ཏུ་མགུ་བ་འདོད་པ་ཐམས་ཅད་དང་ལྡན་པ་རྣམས། ཚལ་དང་ཉེ་བའི་ཚལ་གྱི་ས་གཞི་མཐོན་དམན་རན་པ། ས་ཕྱོགས་ཤིན་ཏུ་རྣམ་པར་ཕྱེ་བ་མེ་ཏོག་མང་པོ་བསགས་པ།
ཚལ་དཀྲིགས་པ་མེ་ཏོག་གི་ལྡུམ་བུ་འཕྱང་བའི་ལྗིད་ཀྱིས་ལྡུམ་བུ་འཕྱང་བའི་ཁྱིམ་ཉམས་དགའ་བ། ཀུན་ནས་ཤིན་ཏུ་དགའ་བ་རྣམས་སུ་དགའ་བར་བྱེད་དོ། །བརྒྱ་བྱིན་གྱི་མདུན་ན་ལྷ་མོའི་ཚོགས་ཡིད་རབ་ཏུ་དགའ་བ་རྣམས་ཀྱང་པི་བང་དང་རྫ་རྔ་དང་ཁར་རྔ་དང་གླིང་བུ་དང་པི་ལྡིར་དག་ཁྱེར་ནས་གླུ་ལེན་པར་བྱེད་དགའ་བར་བྱེད་དགའ་དགུར་སྤྱོད་པར་བྱེད་དོ། །བརྒྱ་བྱིན་ཡང་གླང་པོ་ཆེ་ས་སྲུང་གི་བུ་ལ་ཞོན་ཏེ། རོལ་མོའི་ཁ་དཔོན་གཞན་རྣམས་ཀྱིས་བསྐོར་ནས་བསྟོད་ཅིང་། སིལ་སྙན་ཡན་ལག་ལྔ་དང་ལྡན་པས་ལྷན་ཅིག་རྩེ་བར་བྱེད་དེ་འདི་ལྟ་སྟེ། ཇེང་དང་རྔ་དང་ཁར་དཀྲོལ་དང་གླིང་བུ་དང་གླུ་དབྱངས་ཀྱིས་མདུན་དུ་བསྐོར་ནས་རྩེ་བར་བྱེད་དགའ་བར་བྱེད་དོ། །གླང་པོ་ཆེའི་རྒྱལ་པོ་དེ་ཡང་གཟུགས་རི་བས་ཆེ་སྟེ། རི་ཆེན་པོ་འགུལ་བ་ལྟ་བུར་འདུག་པའི་གླང་པོ་ཆེ་དེ་ལ་ཞོན་པ་ནི། ཇི་ལྟར་གངས་རི་ཁ་བས་ཡོག་པའི་རིའི་རྩེ་མོའི་སྟེང་ན་སོས་ཀའི་དུས་སུ་ཉི་མའི་འོད་ཟེར་སྤྲིན་དང་མུན་པ་དང་བྲལ་བ་ཤིན་ཏུ་གསལ་བར་ཤར་བ་དེ་ལྟར་མཛེས་པ་ཡིན་ནོ། །དེ་ལྟར་བརྒྱ་བྱིན་ལྷ་དང་ལྷ་མོའི་ཚོགས་ངན་སོང་གི་སྒོ་གཅོད་པ་ཡིད་ཤིན་ཏུ་མགུ་བ་བློ་གྲོས་བཟང་པོ་དང་འཐུན་པས་ཡོངས་སུ་བསྐོར་བ་དང་ལྷན་ཅིག །བཻ་ཌཱུརྱ་དང་དངུལ་དང་ཤེལ་དང་ཨན་ད་རྙིལ་དང་མཐོན་ཀ་ཆེན་པོ་དང་པད་མ་རཱ་ག་དང་གསེར་བཙོ་མ་དང་སྤུག་པས་ཆེས་ལྷག་པའི་ཚལ་དང་ཉེ་བའི་ཚལ་ཉམས་དགའ་བ་རྣམས་ན། རྒྱུ་བར་བྱེད་རྩེ་བར་བྱེད་དགའ་བར་བྱེད་དེ། གང་དེ་ཁོ་ན་ཉིད་ཤིན་ཏུ་ཕུན་སུམ་ཚོགས་པ་ལྷག་པར་བདེ་བ་མྱོང་ངོ་། །དེ་ལྟ་མོད་ཀྱི་དེས་འདོད་པ་ཡང་དག་པར་གྲུབ་པ། འཇིག་རྟེན་གྱི་ཕུན་སུམ་ཚོགས་པ་འབྱུང་བ་འཇིག་པར་རིག་ནས། དགའ་བ་ཡང་མེད་ལ་འཁྲུག་པ་ཡང་མེད་དོ། །ཕུན་སུམ་ཚོགས་པ་ཐམས་ཅད་ཀྱི་མཐའ་ནི་རྒུད་པར་འགྱུར་རོ་སྙམ་དུ་རིག་ནས། འདི་ལྟར་རང་གི་ལས་ལ་སྤྱོད་པ། ལས་ཀྱི་རླུང་གིས་གཏོར་བ་རྣམས་སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་ན་འཁྱམ་ཞིང་། ལྷ་དང་ལྷ་མོའི་ཚོགས་འགྲོགས་པ་འདི་ཐམས་ཅད་དང་བྲལ་བའི་ལྷ་རྣམས་ཤི་ནས་གར་འགྲོ། །ཀྱེ་མ་བྱིས་པ་སོ་སོའི་
སྐྱེ་བོ་བསླུས་པ་འདི་དག་ཐམས་ཅད་ནི་ལས་བྱས་པ་ཆེན་པོ་མྱོང་ངོ་སྙམ་དུ་ནང་དུ་ཡིད་ལ་སེམས་པར་བྱེད་དོ། །དེ་ནས་དེའི་ཚེ་བརྒྱ་བྱིན་གྱིས་འདི་ལྟར་ཚིགས་སུ་བཅད་དེ་སྨྲས་པ། ནམ་མཁའ་ལ་ནི་སྤྲིན་ཆགས་པ། །རླུང་གིས་ཀུན་དུ་གཏོར་བ་རྣམས། །འདུས་པ་དག་ཀྱང་འགྱེས་པ་ལྟར། །འཁོར་བའི་སྲོག་ཆགས་དེ་བཞིན་ནོ། །ཇི་ལྟར་དུས་ཚིགས་དུས་ཚིགས་སུ། །མེ་ཏོག་བྱུང་བ་མི་ཡིས་མཐོང་། །དུས་ཚིགས་ཐམས་ཅད་ཐལ་གྱུར་ན། །ཇི་ལྟར་བྱུང་བ་སོ་སོར་འཇིག །དེ་ལྟར་ལེགས་པར་བྱས་པའི་ལྷ། །དུས་སུ་བྱུང་ན་དགའ་བྱེད་ལ། །དགེ་བའི་དུས་ནི་ཐལ་གྱུར་ན། །ཇི་ལྟར་བྱུང་བ་སོ་སོར་འཇིག །ཇི་ལྟར་དུས་ཚིགས་དུས་ཚིགས་སུ། །ཤིང་ལོ་དུ་མ་སྐྱེ་འགྱུར་བ། །དུས་ཚིགས་དུས་ནི་ཐལ་འགྱུར་ན། །དེ་དག་ཀུན་ནས་འཇིག་པར་འགྱུར། །དེ་ལྟར་ལྷ་རྣམས་ལོ་མ་འདྲ། །སྲིད་པ་འདི་ནི་ཤིང་ལྟ་བུ། །བདེ་བ་རྟག་ཏུ་འཇིག་འགྱུར་ཏེ། །བརྟན་པ་དང་ནི་རྟག་པ་མེད། །ཇི་ལྟར་ཆར་པ་འབབ་དུས་ན། །མཁའ་ལ་ཆར་འབབ་ལྡོག་པ་མེད། །དེ་ལྟར་བདེ་བ་འདི་དག་ཀུན། །འགྲོ་བར་འགྱུར་ཏེ་ལོག་པ་མེད། །ཇི་ལྟར་རྨ་བྱའི་སྒྲོ་དག་ནི། །རླུང་གིས་ཀུན་དུ་ཁྱེར་གྱུར་པ། །དེ་ནི་ཟད་པར་བྱ་ཕྱིར་འཇིག །བདེ་བའི་གཞི་ནི་དེ་དང་འདྲ། །ཇི་ལྟར་མེར་ནི་ཤིང་བཅུག་ན། །ངེས་པར་རབ་ཏུ་སྲེག་པར་བྱེད། །དེ་ལྟར་དུས་ནི་མེ་དང་འདྲ། །མི་རྣམས་ཤིང་སྐམ་ལྟ་བུ་ཡིན། །བརྒྱའམ་ཡང་ན་སྟོང་དག་ཏུ། །འདི་དག་འོང་དང་འགྲོ་འགྱུར་ཡང་། །དེ་ལྟར་སྲེད་པས་རྨོངས་པ་འདི། །ཡང་དག་རིག་པར་མི་འགྱུར་རོ། །སྲེད་དང་རྨོངས་པའི་མིག་འཕྲུལ་གྱིས། །ཐམས་ཅད་དུ་ནི་རྣམ་པར་གང་། །ཇི་ལྟར་དགེ་སྐལ་མ་ཡིན་པ། །དེ་ལྟར་ལྷ་རྣམས་རབ་ཏུ་བསླུས། །དེ་ལྟར་བརྒྱ་བྱིན་དེས་ལྷ་དེ་རྣམས་ལ་སྙིང་རྗེ་བསྐྱེད་ནས། དེ་ནས་ཡང་གླང་པོ་ཆེ་ས་སྲུང་གི་བུ་དེ་ལ་ཞོན་ཏེ། ལྷའི་ཚོགས་ཀྱིས་ཡོངས་སུ་བསྐོར་བ། སིལ་སྙན་དང་རོལ་མོའི་སྒྲ་དབྱངས་སྣ་ཚོགས་ལེན་བཞིན་དུ་ལྷའི་འདུན་ས་ཆོས་བཟང་དེ་ཉིད་དུ་འདོང་བར་བྱེད་དེ། ཆོས་བཟང་ན་གནས་པ་རྒྱལ་བ་ཐོབ་པ་དག་ལ་ལྷ་གཞན་རྣམས་ཀྱིས་མཆོད་ཅིང་ཕྱིན་ཏེ། ནོར་བུ་འཕྱང་བ་ན་གནས་པའི་ལྷ་
འདོད་པས་ཚིམ་པ་མེད་པ་རྣམས་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པ། སོ་སོ་ཡང་དག་པར་མྱོང་བར་འགྱུར་བའི་ལས་དེ་ཟད་པ་དང་སྤངས་པ་དང་། ཞིག་པར་མ་གྱུར་པ་དེ་སྲིད་དུ་གཟུགས་དང་སྒྲ་དང་དྲི་དང་རོ་རྣམས་ཀྱིས་ཚལ་དང་ཉེ་བའི་ཚལ་རྣམས་ཀྱི་ནང་ན་རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་དེ་ནས་ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན། སེམས་ཅན་དམྱལ་བ་དང་ཡི་དགས་དང་དུད་འགྲོའི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རིགས་རྒྱ་ཆེན་པོའི་ནང་དུ་སྐྱེ་ལ། ཤིན་ཏུ་བདེ་བ་དང་ལྡན་པ་དང་། བོང་ཚོད་ཆེ་ཞིང་བཟང་བ་དང་། ཡུལ་དབུས་སུ་སྐྱེ་བ་དང་། ཆོས་བཟང་པོ་དང་ལྡན་པ་དང་། ཤིན་ཏུ་འབྱོར་པ་དང་། བུ་དང་ཚ་བོ་དང་ལྡན་པ་དང་། ཡུན་རིང་དུ་གནས་པ་དང་། གནོད་པ་མེད་པའི་བྲན་ཁོལ་བདོག་པ་དང་། སྐྱེ་བོ་ཐམས་ཅད་དགའ་བ་དང་། ཡང་དག་པར་ལྡན་པ་དང་། རྒྱལ་པོའམ་བློན་པོ་ཆེན་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་རིས་འཐུན་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། ལེགས་པར་བྱས་པའི་ལས་ཀྱི་མཐའ་སྤྱད་པ། ལུས་དང་ངག་དང་ཡིད་ཀྱི་མཐའ་ཡང་དག་པར་བསྡམས་པ། གཡོ་སྒྱུ་མེད་པ། གཞན་ལ་མི་གནོད་པ་བློ་གྲོས་རྟག་ཏུ་རྒྱ་ཆེ་བ། དྲང་པོ་དྲང་པོའི་རང་བཞིན་ཅན་སྡིག་པའི་གྲོགས་པོ་སྤོང་བ། གང་ཐབས་ཀུན་གྱིས་སྡིག་པའི་གྲོགས་པོ་སྤོང་བར་བྱེད་ལ། དེ་དང་ལྷན་ཅིག་འདྲེ་བར་མི་བྱེད། དེ་དང་ཚིག་ཀྱང་མི་སྨྲ། དེ་ལ་མིག་ཟུར་ཙམ་ཡང་མི་ལྟ། ལམ་དུ་ཡང་ལྷན་ཅིག་མི་འགྲོགས། དེ་མཐོང་ནས་ཀྱང་རྟག་ཏུ་སྤོང་བར་བྱེད་ལ། དེའི་གྲོགས་པོ་གང་ཡིན་པ་དེ་ཡང་སྤོང་བར་བྱེད། བཙུན་པ་དག་ལ་རྟེན་པར་བྱེད་ཅིང་། རྟག་ཏུ་དམ་
པའི་ཆོས་ཉན་པའི་ངང་ཚུལ་ཅན་ཡིན་ལ། དེ་ཐོས་ནས་དགེ་བ་དང་མི་དགེ་བ་དང་ལུང་དུ་མ་བསྟན་པའི་ཆོས་རྣམས་ཀྱང་རྣམ་པར་ཤེས། སྤང་བར་བྱ་བ་སྤོང་བར་བྱེད་ལ། སྤང་བར་མི་བྱ་བ་ཡང་སྤང་བར་མི་བྱ་བ་རབ་ཏུ་ཤེས་ནས་ཡིད་ལ་ལེགས་པར་བྱེད་པ་དང་། ཤིན་ཏུ་མཉམ་པར་བཞག་པ་དང་། དྲན་པ་དང་། སེམས་ཀྱི་དབང་དུ་མི་འགྲོ་བར་དྲན་པ་ཉེ་བར་གནས་པ་དང་། བརྐམ་ཆགས་མེད་པ་དང་། ཚུལ་ཁྲིམས་རྣམ་པ་བདུན་རྗེས་སུ་སྐྱོང་ལ་རྡུལ་ཙམ་ཡང་འཁྲུལ་པ་མེད་པ་དང་། ཁ་ན་མ་ཐོ་བ་ཕྲ་མོ་རྡུལ་ཙམ་ལ་ཡང་འཇིགས་པར་ལྟ་བ་དང་། ཀུན་ནས་ལས་དག་ལ་དྲི་མ་མེད་པ་ཡིན་ཏེ། གསེར་བཙོ་མ་ལྟར་སྐྱོན་མེད་པ་སྲོག་གཅོད་པ་དང་། མ་བྱིན་པར་ལེན་པ་དེ་དང་དེ་དག་སྤོང་བར་བྱེད་ལ། སྦྱིན་པ་ཡང་བྱིན། བསོད་ནམས་ཀྱང་བྱེད་དོ། །སྲོག་ཆགས་དག་ཐར་པར་བྱེད་པ་ཇི་ལྟ་བུ་ཡིན་ཞེ་ན། འདི་ནི་རྒྱལ་པོའམ། བློན་པོས་སྐྱེས་པ་དང་བུད་མེད་བྱི་བ་བྱེད་པ་ལྷན་ཅིག་བཟུང་ནས་བཅིངས་ཏེ། གྲོང་ཁྱེར་གྱི་ལྷོ་ཕྱོགས་ཀྱི་སྒོར་ཁྲིད་ལ། རྔ་བརྡུངས་ནས་མིང་དང་རུས་ཀྱང་བསྒྲགས་ཏེ། གྲོགས་བྱེད་པ་སུ་ཡང་མེད། མི་དགའ་ལ་འཇིགས་བཞིན་མོག་མོག་པོར་གྱུར་པ་དུར་ཁྲོད་ལོགས་སུ་ཁ་བསྟན་ཏེ། ཁྲིད་པ་དང་དེས་ནོར་རྫས་ཀྱིས་བསླུས་ཏེ། ཐར་བར་བྱེད་པ་དང་གཞན་ཡང་སྦྱིན་པ་གཏོང་། །བསོད་ནམས་དག་བྱེད་པ་ཡིན་ནོ། །དགེ་བ་དག་ཇི་ལྟ་བུ་ཡིན་ཞེ་ན། དེ་ལྟར་དེ་གལ་ཏེ་ཆུ་ཉུང་བ་མྱ་ངམ་གྱི་ཕྱོགས་སུ་དགེ་འདུན་གནས་པར་གྱུར་ལ། དེ་ཡང་དགེ་སློང་དག་སྐོམ་གྱིས་སྲོག་ཆད་ལ་ཐུག་སྟེ། ཤིན་ཏུ་སྡུག་བསྔལ་བར་གྱུར་པ་དང་། དེས་གནས་པ་དེ་རྣམས་ཀྱི་དོན་དུ་ཀུན་དགའ་ར་བའི་དབུས་སུ་རྫིང་བུའམ་ཁྲོན་པ་དག་བྱས་ལ། ཆུ་ཕྱུང་བ་དེ་དག་གི་ནང་འདམ་རྫབ་ཀྱིས་གང་ངམ་སྲིན་བུ་རྣམས་ཀྱིས་ཡོག་པ་དང་དེ་དག་ལ་དེ་ལས་བྱེད་དེ། སྲིན་བུ་དེ་དག་ས་སྐམ་པོ་དག་ལ་འཆི་བར་མི་འགྱུར་བར་བྱ་བའི་ཕྱིར། གཤེར་སའི་ཕྱོགས་གཞན་དུ་འཇོག་པར་བྱེད་དེ། དེ་ལྟར་སྲོག་གཅོད་པ་ཆུང་ངུ་ཡང་སྲུང་བར་བྱེད་དོ། །གཞན་དུ་ཡང་འབབ་ཆུ་དག་གི་
ནང་ན་སྲིན་བུ་གནས་པ་དེ་དག་ཀྱང་བླངས་ནས་དེ་ནས་ཡང་སྲོག་བཙའ་བར་བྱ་བའི་ཕྱིར། ཆུ་ཡོད་པའི་ཕྱོགས་རྣམས་སུ་འཇོག་པར་བྱེད་དེ། དེ་ལྟར་ཀུན་ནས་དགེ་བའི་ལས་ཀྱི་མཐའ་སྤྱོད་པ་ནི་སྲོག་གཅོད་པར་མི་བྱེད་དོ། །མ་བྱིན་པར་ལེན་པ་སྤངས་པ་ཇི་ལྟ་བུ་ཡིན་ཞེ་ན། འདི་ནི་རྐུ་སེམས་ཀྱིས་རྩ་བ་ཡང་ལེན་པར་མི་བྱེད་པ་ཡིན་ཏེ། ཕྱོགས་དག་ན་ཤིང་དང་སྨྱིག་མའི་ལྡུམ་བུ་སྐྱེས་པ་ཡང་ལེན་པར་མི་བྱེད། གཞན་དུ་འཕོས་པའི་གྲོང་དང་ཀུན་དགའ་ར་བ་རྙིང་པ་དག་གཞན་གྱིས་ཡོངས་སུ་བཟུང་བ་མེད་ལ། ད་དུང་དུ་སུས་ཀྱང་འཛིན་པར་མི་འགྱུར་གྱིས་ཀྱང་། སྔོན་གཞན་གྱིས་བསྒྲུབས་པ་ཞིག་ཡིན་ནོ་སྙམ་དུ་ཡིད་ལ་སེམས་པར་བྱེད་ལ། དེ་བསམ་པ་དེས་ལེན་པར་མི་བྱེད་དེ། དེ་ལྟར་མ་བྱིན་པར་ལེན་པ་སྤངས་པ་ཡིན་ནོ། །ཀུན་ནས་ལེགས་པར་བྱས་པའི་ལས་ཀྱི་མཐའ་སྤྱད་པ་དེ། ལུས་དང་བྲལ་ནས་ཤི་བའི་འོག་ཏུ་རིས་འཐུན་པའི་ལྷ་རྣམས་ཀྱི་གནས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་དེ་ཕྱིར་ཕྱོགས་པ་ཉིད་དུ་སྐྱེ་སྟེ། གལ་ཏེ་གསེར་གྱི་སྟན་ནམ། གལ་ཏེ་དངུལ་གྱིའམ། གལ་ཏེ་ཤེལ་གྱིའམ། གལ་ཏེ་གསེར་བཙོ་མའི་འམ། གལ་ཏེ་ཨན་ད་རྙིལ་གྱིའམ། གལ་ཏེ་མཐོན་ཀ་ཆེན་པོའི་འམ། གལ་ཏེ་མུ་ཏིག་གིའམ། གལ་ཏེ་སྤུག་གི་སྟན་གྱི་སྟེང་དུ་སྐྱེ་བར་འགྱུར་རོ། །དེ་སྐྱེས་མ་ཐག་ཏུ་འདི་སྙམ་དུ་སེམས་ཏེ། ལས་དགེ་བ་གང་ཞིག་གིས་བདག་འདིར་སྐྱེས་སྙམ་མོ། །དེས་སྔོན་གྱི་ལས་རྗེས་སུ་དྲན་ཏེ། འདི་ལྟར་དགེ་བའི་རྣམ་པ་ཕ་མ་ལྟར་བྱམས་པ། རྣམ་པར་སྨིན་པ་བསིལ་བ། བདེ་བ་ངེས་པར་མྱོང་བར་འགྱུར་བའི་རྣམ་པ་ཇི་སྙེད་པ་དེས་ལྷ་རྣམས་ཀྱི་ནང་དུ་སྐྱེས་སོ་སྙམ་སྟེ། དེས་ལས་དེ་དག་རྗེས་སུ་དྲན་ཞིང་ལས་ཀྱི་འབྲས་བུ་ཡང་མངོན་སུམ་ཉིད་དུ་མཐོང་ནས། དགེ་བའི་ལས་རྣམས་ལ་ནི་སྟོད་པར་བྱེད་ལ། མི་དགེ་བ་དག་ལ་ནི་སྨོད་པར་བྱེད་དོ། །ཚེ་རབས་དྲན་ཞིང་ལས་ཀྱི་གཞིར་གྱུར་པ། དགེ་བ་ཕ་མ་ལྟ་བུ་དུ་མའི་ལས་ཀྱི་གཞི་མིའི་རྗེས་སུ་དྲན་ནས། དེ་ནས་དེའི་ཚེ་འདི་ལྟར་ཚིགས་སུ་བཅད་དེ་སྨྲས་
པ། གང་ཞིག་བག་ཡོད་ཐོབ་ནས་སུ། །མི་ཡི་ཚེ་ནི་ལེགས་པར་ཐོབ། །ལེགས་པར་བྱ་བའི་ལས་བྱས་ན། །ལྷ་ཡི་འཇིག་རྟེན་ཉེ་བར་འགྲོ། །མི་ཡི་ཚེ་ནི་རྙེད་དཀའ་སྟེ། །དེ་ནི་རྙེད་ནས་བག་མེད་གང་། །མི་དེ་བག་མེད་མུན་པ་ལས། །འཁྱམས་ནས་སེམས་ཅན་དམྱལ་བར་ལྟུང་། །ལེགས་བྱས་རྣམ་པ་གསུམ་བྱས་ཤིང་། །རྣམ་པ་བདུན་ཡང་གོམས་བྱས་ལ། །དགྲ་གསུམ་བསད་པའི་མི་དག་ནི། །ལྷ་རྣམས་ཀྱི་ནི་ནང་དུ་འགྲོ། །ཉོན་མོངས་ངེས་པར་སེལ་བྱེད་ལ། །དགའ་བས་སེལ་བར་མི་བྱེད་གང་། །དགའ་བ་བསལ་བའི་དག་པ་དེ། །ལྷ་རྣམས་ཀྱི་ནི་ནང་དུ་འགྲོ། །སྡུག་བསྔལ་ཆེན་པོའི་སྒོར་གྱུར་པ། །སེར་སྣ་ངེས་པར་བསལ་བྱས་ཤིང་། །སྦྱིན་པའང་སྣ་ཚོགས་བྱིན་པ་ནི། །ལྷ་རྣམས་ཀྱི་ནི་ནང་དུ་འགྲོ། །སྲོག་ཆགས་དག་ནི་སྲོག་བཞིན་དུ། །སྙིང་བརྩེས་རྟག་ཏུ་བསྲུང་བྱས་ཤིང་། །བྱམས་སེམས་རྟག་ཏུ་དུལ་བ་དག །ལྷ་རྣམས་ཀྱི་ནི་ནང་དུ་འགྲོ། །མ་བྱིན་མེ་ལྟར་རིག་ནས་སུ། །ཀུན་ནས་བྱིན་པ་བྱས་གྱུར་ཞིང་། །སེམས་དང་བློ་གྲོས་བསྒོམས་པ་ནི། །ལྷ་རྣམས་ཀྱི་ནི་ནང་དུ་འགྲོ། །དེ་ཉིད་དོན་ལ་སེམས་པ་པོ། །གཞན་གྱི་ཆུང་མའང་མ་ལྟར་ལྟ། །འདོད་སྐྱེས་ཉེས་པས་མ་གོས་པ། །ལྷ་རྣམས་ཀྱི་ནི་ནང་དུ་འགྲོ། །གང་ཞིག་རང་སེམས་མེ་འདི་དག །ལྕེ་ཡི་གཙུབ་ཤིང་ཡང་དག་བྱུང་། །བརྫུན་དུ་སྨྲ་བ་རྗོད་བྱེད་གང་། །དེ་ནི་བཅོམ་ན་བདེ་འགྲོར་འགྲོ། །བཤེས་གྲོགས་རྟག་ཏུ་དོན་མེད་བྱེད། །ཕྲ་མ་རྟག་ཏུ་བཅོམ་ནས་སུ། །འཇམ་པོར་སྨྲ་བར་དགའ་བ་ནི། །ལྷ་རྣམས་ཀྱི་ནི་ནང་དུ་འགྲོ། །མཚོན་ཆ་ལྟ་བུའི་ཚིག་རྩུབ་དག །བརྟན་པོས་ཡོང་ཡེ་སྤོང་བྱེད་ལ། །རྟག་ཏུ་ཚིག་འཇམ་རབ་ཏུ་སྨྲ། །དེ་ནི་བདེ་འགྲོར་འགྲོ་བར་འགྱུར། །གང་གི་ལྕེ་ཡི་རྩེ་མོ་ལ། །འབྲེལ་མེད་མི་སྨྲ་སྨྲ་མི་འགྱུར། །ཡང་དག་སྨྲ་ལ་དུས་ཉིད་ཤེས། །ལྷ་རྣམས་ཀྱི་ནི་ནང་དུ་འགྲོ། །སངས་རྒྱས་གསུངས་པའི་རྣམ་པ་བདུན། །གང་གིས་ཚུལ་ཁྲིམས་འདི་བསྲུངས་པ། །བརྟན་པོ་ཚུལ་ཉིད་ཤེས་པ་དེ། །ལྷ་རྣམས་ཀྱི་ནི་ནང་དུ་འགྲོ། །དེ་ལྟར་ལྷ་གསར་དུ་སྐྱེས་པ་དེ་ཕྱིར་ཕྱོགས་པ་སྐྱེས་མ་ཐག་ཉིད་དུ་ཚེ་རབས་དྲན་ནས་
ཡུལ་རྣམས་ཀྱི་དབང་ཉིད་བློ་གྲོས་སུ་གྱུར་ཀྱང་། སྔོན་བསྒོམས་ཤིང་གོམས་པའི་བློས་སྨྲས་སོ། །དེ་ནས་གསར་དུ་སྐྱེས་པ་དེ་ཤིན་ཏུ་གཞོན་ལ་གཙང་གཙང་ལྟར་འདུག་པར་མཐོང་ཞིང་རྟོགས་ནས། ལྷ་མོ་དེ་རྣམས་ལྷ་དེའི་དྲུང་དུ་རྒྱུག་པར་བྱེད་དེ་ཇི་ལྟར་མེ་ཏོག་གི་རོ་འཐུང་བར་འདོད་པའི་བུང་བ་རྣམས་མེ་ཏོག་ཉིད་ལ་རྒྱུག་པར་བྱེད་པ་དེ་ལྟར་ལྷ་མོ་ལག་ན་སིལ་སྙན་དང་རོལ་མོ་རྣམ་པ་སྣ་ཚོགས་ཐོགས་པ། གཞན་དག་གི་ལག་ན་གླིང་བུ་དང་རྫ་རྔ་ཐོགས་པ། ལུས་ལ་མེ་ཏོག་ཕྲེང་བ་དང་ཕྱེ་མ་དང་བྱུག་པས་བསྐུས་པ་མེ་ཏོག་གི་ཕྲེང་བ་རྣམས་ཐོགས་པ་དང་། གཞན་དག་ནི་མེ་ཏོག་གི་ཆར་མངོན་པར་འབེབས། གཞན་དག་ནི་གླུ་ལེན་ཞིང་གར་མཁན་ལྟར་མཛེས་པ་དེ་རྣམས། ལྷ་དེའི་དྲུང་དུ་ཀུན་དུ་རྒྱུག་པར་བྱེད་དོ། །དེ་ལྟར་རྒྱན་དང་ཆ་བྱད་རྣམ་པ་སྣ་ཚོགས་ཐོགས་པ། གཟུགས་རྣམ་པ་སྣ་ཚོགས་དང་ལྡན་པ། ཆོ་ག་རྣམ་པ་སྣ་ཚོགས་ལ་མཁས་པ། ཆ་བྱད་རྣམ་པ་སྣ་ཚོགས་འཆང་བ་རྣམ་པ་སྣ་ཚོགས་བདོག་པ། གཟུགས་གཅིག་པས་གཅིག་བཟང་ཞིང་བྱད་གཟུགས་མཆོག་དང་ལྡན་པ་རྣམས། ལྷ་གསར་དུ་སྐྱེས་པ་དེ་ལ་ལན་བརྒྱའམ་ལན་སྟོང་དུ་མངོན་པར་བརྟགས་ནས་སྔོན་གྱི་ལྷ་འཆི་བ་དག་བོར་ཏེ། ལྷ་གསར་པ་གསར་དུ་སྐྱེས་པ་ཡིད་དུ་སྡུག་པའི་དྲུང་དུ། ལྷ་མོ་དེ་རྣམས་ཇི་ལྟར་ཤིན་ཏུ་སྐོམ་པ་དག་མཚོ་སྐམས་པ་བོར་ནས། མཚོ་ཆུ་བསིལ་ཞིང་དང་བས་ཀུན་དུ་གང་བའི་དྲུང་དུ་རྒྱུག་པ་དེ་ལྟར་གསར་དུ་སྐྱེས་པ་ལ་འདོད་པ་ངོམས་མི་མྱོང་བའི་ལྷ་མོ་དེ་དག་ཐམས་ཅད་ཀྱིས་རབ་ཏུ་བརྒྱུགས་སོ། །དེ་ནས་ལྷ་གསར་དུ་སྐྱེས་པ་དེས་དེ་རྣམས་ཀྱི་རྒྱན་གྱི་སྒྲ་ཉིད་ཐོས་ནས། སེམས་འདོད་ཆགས་ཀྱིས་གཡེངས་པར་འགྱུར་ན། དེ་རྣམས་ཀྱི་བྱད་གཟུགས་དེ་དང་སྤྱོད་པ་དེ་དག་མཐོང་ན་ལྟ་སྨོས་ཀྱང་ཅི་དགོས། དེ་བཞིན་དུ་དེའི་སེམས་སིལ་སྙན་ཡན་ལག་ལྔ་དང་ལྡན་པ་དང་ཡོ་བྱད་དེ་དག་གིས་གཡེངས་པ་དང་ཇི་ལྟར་ཚེ་རབས་འབུམ་ལོན་པ་ལྟར་བརྗེད་དེ། འདི་ལྟར་ལྷ་རྣམས་ཀྱི་ངོ་བོ་ནི་འདི་ལྟ་སྟེ། ལྷ་ཉིད་བག་མེད་པའི་གནས་ཡིན་ནོ། །དེ་ནས་ལྷ་གསར་དུ་སྐྱེས་པ་དེ་ལྷ་མོ་སྒེག་ཆོས་མཁས་པ་དེ་རྣམས་ཀྱིས་ཀུན་ནས་འཁོར་བར་བསྐོར་ནས། ཚུལ་བཞིན་མ་ཡིན་པའི་སེམས་འདོད་ཆགས་
ཀུན་ཏུ་སྟོན་པའི་ཚིག་རྣམས་ཀྱིས་དེ་ལྟར་གཡེངས་ཏེ། འདི་ལྟར་དེ་ལྟར་དེ་དག་གི་དབང་ཁོ་ནར་གྱུར་ནས་ཤིན་ཏུ་བག་མེད་པར་གནས་སོ། །དེ་དེ་རྣམས་ཀྱིས་བསྐོར་ནས་འདོད་པ་ཐམས་ཅད་འབྱོར་པ། སྔོན་མ་མྱོང་བའི་བདེ་བ་འཐོབ་སྟེ། ཡིད་ཤིན་ཏུ་མགུ་བས་ལྷ་མོ་དེ་དག་ག་ལ་བ་དེར་འགྲོ་བར་བྱེད་དོ། །དེ་ཡང་དེ་རྣམས་ཀྱིས་ཉེ་བར་བསྟེན་ཏེ། དགོད་དགོད། རྩེ་རྩེ། སྨྲ་སྨྲ། འབུར་འབུར་བའི་བློས་ལམ་དེ་ཉིད་ནས་འདོང་བར་བྱེད་དོ། །བྱ་རྙིས་བཟུང་བ་ལྟར་ཀུན་དུ་འདོད་ཆགས་ཀྱི་རྙིས་བཟུང་བ་དེ། རྙི་དེ་རྣམས་ཀྱིས་ཀུན་ནས་བཟུང་ནས་མངོན་པར་མཛེས་པ་དེ་དག་ག་ལ་བ་དེར་ཁྲིད་པ་དང་། དེས་སྔོན་མ་མཐོང་བ་ཤིན་ཏུ་ཉམས་དགའ་བ་རིན་པོ་ཆེ་སྣ་བདུན་གྱི་ས་ཕྱོགས་མཐོང་ན་ཤིན་ཏུ་ཡིད་འཕྲོགས་པ། རིན་པོ་ཆེ་སྣ་བདུན་འབར་བའི་ས་ཕྱོགས་དག་མཐོང་ངོ་། །དེ་ནས་ཡང་དེ་དག་ཏུ་ལྷའི་ཕྲེང་བ་དང་གོས་རྣམ་པ་དུ་མ་གྱོན་པ། བདེ་བ་དང་ཉམས་དགའ་བ་རྣམ་པ་དུ་མ་ཡུན་རིང་དུ་མྱོང་ནས། ཚལ་དགོན་པ་དགའ་བ་ཞེས་བྱ་བ་ག་ལ་བ་དེར་སིལ་སྙན་ཡན་ལག་ལྔ་དང་ལྡན་པའི་གླུ་དབྱངས་ལེན་ཞིང་འདོང་བར་བྱེད་དོ། །ལྷ་དེ་ལྷ་མོ་དེ་རྣམས་དང་ལྷན་ཅིག་མངོན་པར་རྩེ་ཞིང་ཚལ་དེར་ཕྱིན་པ་དང་། བྱ་ཁ་དོག་དང་དབྱིབས་དང་འགྲོས་དང་གཟུགས་སྣ་ཚོགས་སུ་འདུག་པ། སྒྲ་ཤིན་ཏུ་སྙན་པ་འབྱིན་པ། བྱད་གཟུགས་རྣམ་པ་སྣ་ཚོགས་སུ་འདུག་པ་དག་མཐོང་ངོ་། །དེ་དག་ཀྱང་བྱ་མོ་རྣམས་ཀྱི་དབང་དུ་གྱུར་པ་ཡིན་ཏེ། དེ་རྣམས་གར་འགྲོ་བ་དེར་བྱ་དེ་དག་ཀྱང་དེ་རྣམས་ཀྱི་དབང་དུ་གྱུར་ནས་འགྲོའོ། །དེ་བཞིན་དུ་ལྡུམ་བུའི་ནང་ག་ལ་བ་དེ་རྣམས་འདུག་པ་དང་དེར་ཡང་བྱ་དེ་དག་འདུག་པར་བྱེད་དོ། །མེ་ཏོག་གི་ཆང་གང་ན་ཡོད་པར་དེ་རྣམས་འཐུང་བ་དང་བྱ་དེ་དག་ཀྱང་དེ་ན་འཐུང་བར་བྱེད་དོ། །མེ་ཏོག་གི་དོག་པ་དག་གི་ནང་ག་ལ་བར་ལུས་ཞུགས་པ་དང་དེར་ཡང་བྱ་དེ་དག་དེ་བཞིན་དུ་འཇུག་པར་བྱེད་དོ། །ཡུལ་གང་དག་བཏང་ནས་ནམ་མཁའ་ལ་འགྲོ་བ་དང་དེར་ཡང་བྱ་དེ་དག་འགྲོ་བར་བྱེད་དོ། །འབྲས་བུ་གང་ཡིན་པ་དག་ལ་དེ་རྣམས་ཀྱི་མཆུས་ཟ་བ་དང་དེ་དག་ཀྱང་དེ་བཞིན་དུ་འབྲས་བུ་དེ་ཉིད་ལ་ཟ་བར་བྱེད་དོ། །པད་མའི་ཚལ་ག་ལ་བར་དེ་རྣམས་ལ་གནས་པར་བྱ་བའི་ཕྱིར་འདོང་བ་དང་། དེ་དག་ཀྱང་དེ་བཞིན་དུ་དེ་རྣམས་དང་ལན་ཅིག་
ཕྱོགས་དེའི་པད་མའི་རྫིང་ཉིད་དུ་འདོང་བར་བྱེད་དོ། །ལྷན་ཅིག་སྤྱོད་པ་བྱ་མོ་རྣམས་རིའི་རྩེ་མོ་ག་ལ་བར་འདོང་བ་དང་དེ་དག་ཀྱང་མགུལ་དུ་སྐུད་པས་བཏགས་པ་བཞིན་དུ་དེ་རྣམས་ཀྱི་དབང་དུ་གྱུར་ནས་འདོང་བར་བྱེད་དོ། །དེ་བཞིན་དུ་བུང་བ་མོ་དག་པད་མའི་གསབ་གསེབ་ཏུ་འདོང་བ་དང་བུང་བ་རྣམས་ཀྱང་འདོང་ལ་རི་དགས་མོ་རྣམས་ཀྱིས་ཀྱང་རི་དགས་དག་དབང་དུ་བྱས། ལྷ་མོ་རྣམས་ཀྱིས་ཀྱང་ལྷ་དག་དབང་དུ་བྱས་ཏེ། དེ་དག་ནི་དབྱར་གྱི་དུས་སུ་མཚོ་གཅིག་ཏུ་ཆུས་གང་བར་གྱུར་པ་ལྟར་ཤིན་ཏུ་ལྷོད་ལྷོད་པོར་ཐར་བར་དཀའ་བའི་བཅིང་བས་བསྡམས་པ། འདི་དག་ཐམས་ཅད་ནི་བུད་མེད་ཀྱི་དབང་དུ་གྱུར་པར་རིག་ནས། དགེ་སློང་དེས་འདི་ལྟར་ཚིགས་སུ་བཅད་དེ་སྨྲས་པ། ཞགས་པའི་ནང་ན་འདི་དམ་སྟེ། །འདི་ལྟར་བུད་མེད་ཞགས་པ་དམ། །འདི་ཡིས་བཅིངས་པའི་མི་རྣམས་ནི། །སྲིད་པའི་བཙོན་རར་རྒྱུག་པར་བྱེད། །ཞགས་པས་མགུལ་བཅིངས་ཞགས་མིན་གྱི། །སྙིང་ཞགས་བུད་མེད་འདི་མི་བཟད། །སྙིང་གི་ཞགས་པས་བཅིངས་པ་ཡི། །མི་རྣམས་སྡུག་བསྔལ་སྐལ་བ་ཅན། །ཞགས་པ་བསྲེག་ཅིང་གཏུབ་ཏུ་རུང་། །བུད་མེད་ཞགས་པ་བསྲེག་མི་རུང་། །དམྱལ་བ་ཡི་དགས་དུད་འགྲོའི་ནང་། །འགྲོ་ཞིང་རྗེས་སུ་འགྲོ་བར་བྱེད། །ལུས་ཅན་ཚོགས་སུ་ལྡན་པ་ལ། །ཞགས་པ་ཆེན་པོས་འཆིང་བར་བྱེད། །དེ་བཞིན་ལུས་མེད་སེམས་འདི་ལ། །བུད་མེད་ཞགས་པས་འཆིང་བར་བྱེད། །གང་གིས་སྐྱེ་བོ་འཆིང་བྱེད་པ། །ཞགས་པ་དེ་ནི་ཚད་གཟུང་རུང་། །བུད་མེད་ཀྱི་ནི་འཆིང་བ་ཆེ། །དེ་ནི་ཚད་གཟུང་མི་རིག་གོ །འདིས་ནི་རེ་ཞིག་དགའ་བ་དང་། །ཀུན་ནས་ཐར་བར་དཀའ་བ་ཡི། །ཞགས་པས་བཅིངས་པའི་མི་རྣམས་ནི། །སྲིད་པའི་མཚོ་ལས་མི་འགྲོལ་ལོ། །ཞགས་པས་མགུལ་ལམ་ལུས་གཅིག་ཅིག །འཆིང་བྱེད་གལ་ཏེ་འཆིང་མི་བྱེད། །བུད་མེད་ཞགས་པ་ཆེན་པོ་འདི། །དབང་པོ་དྲུག་རྣམས་འཆིང་བར་བྱེད། །ལྕགས་སམ་ཤིང་ངམ་གྲེས་མ་གང་ཡིན་པ། །འཆིང་བ་འདི་ནི་དམ་པར་འཕགས་མི་གསུང་། །བློ་ཞན་བུད་མེད་རྣམས་ལ་ལྟ་བ་གང་། །ཀུན་དུ་ཆགས་པའི་སེམས་
ནི་དམ་ཞེས་གསུང་། །དེ་ལྟར་དགེ་སློང་དེ་འདོད་པ་ལ་སྨོད་པར་བྱེད་དོ། །དེ་ནས་ལྷ་དེ་བུད་མེད་མཆོག་དེ་རྣམས་ཀྱིས་ཀུན་ནས་དགའ་བ་ཉིད་ཀྱི་ཞགས་པས་བཅིངས་ནས། ཚལ་དང་ཉེ་བའི་ཚལ་མཐོང་ན་ཡིད་འཕྲོག་པ་རྣམ་པ་སྣ་ཚོགས་གང་དག་དཔེ་བྱ་བར་ཡང་སླ་བ་མ་ཡིན་པ་དེ་དག་ཏུ་ཁྲིད་དོ། །དེ་ནས་དེ་ལྟར་ལྷ་དེ་དགའ་དགུར་སྤྱོད་པ་ན་རེས་འགའ་པད་མའི་ཚལ། ངང་པའི་པད་མའི་ཚལ་ཞེས་བྱ་བ་དེར་དེ་ལྷ་མོའི་ཚོགས་ཀྱིས་ཡོངས་སུ་བསྐོར་ནས་འགྲོ་བར་བྱེད་དོ། །པད་མའི་ཚལ་དེ་ཡང་ལྷ་དང་ལྷ་མོའི་ཚོགས་མང་པོས་ཡོངས་སུ་བསྐོར་ནས་དགའ་བར་བྱེད་པ། །འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་པ་རྣམས་ཀྱིས་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །ལྷ་མོས་ཡོངས་སུ་བསྐོར་བ་རིས་འཐུན་པའི་ལྷ་རྣམས་སིལ་སྙན་ཡན་ལག་ལྔ་དང་ལྡན་པའི་སྒྲ་འབྱུང་བ་ཆགས་སུ་རུང་བ་སྙན་པ་ལྷ་ཐམས་ཅད་འཐུན་པར་ཡིད་འཕྲོག་པར་བྱེད་པ། ཤིན་ཏུ་འདོད་པ་སྟོན་པར་བྱེད་པས་ལྷན་ཅིག་དགའ་བར་བྱེད་དོ། །དེ་རྣམས་གསེར་གྱི་རི་ལས་གསེར་གྱི་རི་གཞན་ལ་འཛེག་པར་བྱེད་དེ། ཐམས་ཅད་ཀྱང་ཉམས་དགའ་བ་རྒྱ་ཆེ་ཞིང་དགའ་བར་བྱེད་པའི་ཡུལ་གྱི་རྗེས་སུ་འཇུག་གོ །དེ་དག་དེ་ལྟར་དགའ་བ་ན་བློ་འདི་ལྟ་བུ་སྐྱེ་སྟེ། བདག་ཅག་ཀུན་ཕན་ཚུན་གྲོགས་སུ་གྱུར་པ་ཡིན་ཏེ། ལྷའི་འདུན་ས་ཆོས་བཟང་གི་སྐྱེད་མོས་ཚལ་དུ་དགའ་སྟོན་བྱ་བའི་ཕྱིར་འདོང་ངོ་སྙམ་མོ། །དེ་ནས་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ་དག་ཐམས་ཅད་ཁ་ཅིག་ནི་ནམ་མཁའ་ལ་འཛེགས་ནས་འགྲོ། ཁ་ཅིག་ནི་ངང་པའི་ཤིང་རྟ་ལ་ཞོན། ཁ་ཅིག་ནི་རྨ་བྱའི་ཤིང་རྟ་ལ་ཞོན། ཁ་ཅིག་ནི་ནམ་མཁའ་ལ་བཀད་ས་ཕུབ་པའི་ནང་དུ་ཞུགས། ཁ་ཅིག་ནི་གཞལ་མེད་ཁང་དང་ར་བ་རྣམ་པ་སྣ་ཚོགས་སུ་ཕྱེ་བའི་ནང་དུ་ཞུགས་ནས། བརྒྱ་བྱིན་བལྟ་བའི་ཕྱིར་ལྷའི་འདུན་ས་ཆོས་བཟང་ག་ལ་བ་དེར་དོང་ངོ་། །སིལ་སྙན་དང་རོལ་མོའི་སྒྲ་དང་གླུ་དབྱངས་རྣམ་པ་སྣ་ཚོགས་ཀྱིས་ཕྱོགས་ཐམས་ཅད་རབ་ཏུ་འགེངས་ཤིང་བརྒྱ་བྱིན་གྱི་གནས་སུ་ཕྱིན་ཏོ། །དེ་རྣམས་ཀྱི་གླུ་དབྱངས་ཀྱི་སྒྲ་སྙན་པ་དཔེ་མེད་པ་དེ་ཐོས་ནས། ལྷའི་རྒྱལ་པོ་བརྒྱ་བྱིན་གྱིས་ཆོས་བཟང་ན་གནས་པའི་ལྷ་
རྣམས་ལ་སྨྲས་པ། ཀྱེ་གྲོགས་པོ་དག་དགའ་བར་གནས་པའི་ལྷ་འདི་དག་གང་ཡིན། གནས་ནི་གང་ན་གནས། དེ་ནས་ལྷ་དེ་དག་གིས་དེ་སྐད་ཐོས་ནས། ལྷ་དེ་རྣམས་མྱུར་དུ་ཤེས་པར་བྱ་བའི་ཕྱིར་དེ་ནས་ཡང་ལྷ་དེ་རྣམས་ལ་མྱུར་དུ་བརྟགས་ནས། བརྒྱ་བྱིན་ལ་སྨྲས་པ། བརྒྱ་བྱིན་འདི་ལྟར་ལྷ་འདི་རྣམས་ནི་གནས་རིས་འཐུན་པ་ན་གནས་པ་ལགས་ཏེ། འདིར་བརྒྱ་བྱིན་གྱི་ཞལ་མཐོང་བར་བགྱི་བའི་སླད་དུ་མཆིའོ། །དེ་ནས་བརྒྱ་བྱིན་གྱིས་དེ་དག་ལ་འདི་སྐད་སྨྲས་སོ། །འདི་ལྟར་ཡིད་རབ་ཏུ་དགའ་བ་སིལ་སྙན་དང་རོལ་མོའི་སྒྲ་དང་ཡོ་བྱད་རྣམ་པ་སྣ་ཚོགས་དང་ལྡན་པའི་ལྷ་ཁྱེད་རྣམས་ཀྱང་རིས་འཐུན་པའི་ལྷ་རྣམས་གང་ནས་འོང་བ་དེར་དགའ་བར་གནས་པར་བྱ་བའི་ཕྱིར་བསུར་དེང་ཤིག །བརྒྱ་བྱིན་གྱིས་དེ་སྐད་བསྒོ་བ་དང་། ཆོས་བཟང་ན་གནས་པའི་ལྷ་ལག་ན་སིལ་སྙན་དང་རོལ་མོ་རྣམ་པ་སྣ་ཚོགས་ཐོགས་པ་མེ་ཏོག་ཕྲེང་བ་དང་ཕྱེ་མ་དང་བྱུག་པ་དང་དོ་ཤལ་དང་ནོར་བུ་དང་རྒྱན་ཕྲེང་འཕྱང་བ་དཔུང་པ་རྣམས་ལ་དཔུང་རྒྱན་བཏགས་པ། ཐོར་ཚུགས་དང་ཡིད་གཡོས་པ། རིན་པོ་ཆེ་འོད་གསལ་བ་སྣ་ཚོགས་ཀྱིས་ལུས་བརྒྱན་པ། ངོ་བོ་ཉིད་ཀྱིས་ལུས་དཀར་ཤམ་ཉིད་དུ་འདུག་པ། རིན་པོ་ཆེ་སྣ་ཚོགས་ཀྱིས་ལུས་གསལ་བར་བྱས་པ་རྣམས་རིས་འཐུན་པའི་ལྷ་དག་ག་ལ་བ་དེར་དོང་ངོ་། །ཡིད་ལྷག་པར་རབ་ཏུ་དགའ་བ་དེ་རྣམས་ཕན་ཚུན་རྫུ་འཕྲུལ་གྱིས་འགྲན་ཅིང་སིལ་སྙན་དང་རོལ་མོའི་སྒྲ་དང་གླུ་དབྱངས་རྣམ་པ་སྣ་ཚོགས་ལ་མངོན་པར་དགའ་བ་དག་ལྷའི་རྒྱལ་པོ་བརྒྱ་བྱིན་ག་ལ་བ་དེར་འདོང་བར་བྱེད་དེ་བརྒྱ་བྱིན་དེའི་གནས་སུ་དོང་ངོ་། །དེ་ནས་ལྷའི་རྒྱལ་པོ་བརྒྱ་བྱིན་ཁང་བཟངས་ཀ་བ་འབུམ་རྙེད་ཡོད་པའི་ནང་ན་རྒྱལ་བ་ཐོབ་པ་ཞེས་བྱ་བའི་སེང་གེའི་ཁྲི་ལ་འདུག་གོ །བདེ་བར་འདུག་པ་གཟི་བརྗིད་འབར་ཞིང་ལྷ་འབུམ་སྙེད་ཀྱིས་བསྐོར། ཤིན་ཏུ་ལེགས་པར་བྱས་པ་རྣམས་ཀྱི་ལས་དག་ལ་ནི་ཉེ་བར་སྤྱོད། གཟི་བརྗིད་ནི་ཉི་མ་བརྒྱ་བས་ལྷག །ལྷའི་རྒྱལ་པོར་གྱུར་གྱིས་ཀྱང་བག་ཡོད་པ་ལ་ནི་གནས་ཏེ། ལྷའི་རྒྱལ་པོ་དེ་ལྟ་བུ་དེ་མཐོང་ནས། ལྷ་དེ་དག་ཐམས་ཅད་ཡིད་བཅུ་འགྱུར་དུ་རབ་ཏུ་དགའ་ནས། བརྒྱ་བྱིན་ལ་གསོང་པོར་སྨྲ་ཞིང་
བྲོ་གར་བྱེད་དགོད་པར་བྱེད་ལ། འདི་ལྟར་བརྒྱ་བྱིན་ལ་མངོན་པར་བསྟོད་པའི་ཚིགས་སུ་བཅད་པ་སྨྲས་པ། ཆོས་སྤྱོད་རྟག་ཏུ་ཞི་བ་དང་། །གང་དག་ཡུལ་གྱིས་མི་གཙེ་བ། །ལྷ་རྣམས་དང་ནི་འཇིག་རྟེན་བཅས། །ལྷ་རྒྱལ་བརྒྱ་བྱིན་རྟག་ཏུ་སྐྱོངས། །ཆོས་ཀྱིས་འཇིག་རྟེན་རྣམས་འཆོས་ཀྱི། །ཆོས་མ་ཡིན་པ་ག་ལ་ཞིག །ཆོས་སྤྱོད་རྟག་ཏུ་བདེ་དང་ལྡན། །དེ་ལས་བཟློག་ན་བདེ་ལྡན་མིན། །ཆོས་སྤྱོད་པ་ཡང་ཡེ་ཤེས་ལ། །ངེས་པར་བསྟེན་པ་བདེ་བ་ལགས། །འཚེ་བ་མེད་ཅིང་བདེན་ཚིག་སྨྲ། །དེ་ཡང་གཅིག་ཏུ་བདེ་བ་ལགས། །འཇིག་རྟེན་ཡོན་ཏན་གང་ལགས་དང་། །འཇིག་རྟེན་འདས་པའི་ཡོན་ཏན་གང་། །དེ་དག་ཐམས་ཅད་མ་ལུས་པར། །སུམ་ཅུ་གསུམ་དབང་བརྒྱ་བྱིན་མངའ། །འཇིགས་པ་རྣམས་ཀྱི་སྐྱབས་མཛད་ཅིང་། །སྡུག་བསྔལ་རྣམས་ཀྱི་རྟག་ཏུ་རྟེན། །ལྷ་དང་ལྷ་མིན་མིར་བཅས་པའི། །འཇིག་རྟེན་དེ་ཡང་འཛིན་མཛད་པ། །དེ་ནི་རྒྱལ་པོ་བརྒྱ་བྱིན་ལགས། །དྲི་མ་དང་ནི་སྐྱོན་རྣམས་བསལ། །བདག་ཉིད་སྡིག་པ་གསུམ་བསལ་ཅིང་། །དཀོན་མཆོག་གསུམ་ལ་སྐྱབས་སུ་གཤེགས། །ལས་འབྲས་གསུམ་གྱི་དེ་ཉིད་མཁྱེན། །བྱང་ཆུབ་གསུམ་ནི་རབ་ཏུ་རྟོགས། །བག་མེད་གནས་སུ་སྐྱེས་གྱུར་ཀྱང་། །བག་མེད་རྣམས་ལ་ཆགས་མི་མངའ། །དགྲ་ལས་རྒྱལ་ཞིང་མཛད་པ་ཚོལ། །བརྒྱ་བྱིན་སྐྱེ་དགུ་འཛིན་པར་མཛད། །དེ་ལྟར་ལྷ་གང་ཡིན་པ་དེ་རྣམས་ཀྱི་ནང་ན་བློ་གྲོས་མཆོག་དང་ལྡན་པ་བརྒྱ་བྱིན་དེ་ལ་རིས་འཐུན་པའི་ལྷ་དེ་རྣམས་ཀྱིས་མངོན་པར་སྟོད་པར་བྱེད་དོ། །དེ་ནས་བརྒྱ་བྱིན་གྱིས་ལྷ་དེ་རྣམས་མཐོང་ནས་ཚིག་འཇམ་པོ་བཟང་པོས་སྟོད་པར་བྱེད་ཅིང་སྟོན་པར་བྱེད་དེ། འདི་ལྟར་ལྷ་ཁྱེད་རྣམས་ནི་བག་མེད་པ་ལ་གནས་པ་ཡིན་ནོ། །ལེགས་པ་ཐམས་ཅད་ཀྱི་ནང་ན་ནི་བག་ཡོད་པ་ནི་གཏེར་ཡིན་ལ། བག་མེད་པ་ནི་དོན་མེད་པ་ཡིན་ནོ། །དེ་ནས་ལྷ་དེ་རྣམས་ཀྱིས་ཡུན་རིང་མོ་ཞིག་ཏུ་བརྒྱ་བྱིན་ལ་མངོན་པར་བསྟོད་ནས་གང་ནས་འོངས་པ་དེ་ཉིད་ནས་ནམ་མཁའ་ལ་འགྲོ་བར་བྱེད་དེ། སྔར་ཇི་ལྟར་འོངས་པ་བཞིན་བརྒྱ་བྱིན་སྔ་ལ་ལྷ་དེ་རྣམས་ཕྱི་ནས་
དོང་ངོ་། །དེ་ནས་བརྒྱ་བྱིན་འདི་སྙམ་སེམས་ཏེ། ཀྱེ་མ་བག་མེད་པ་ལ་གནས་པའི་ལྷ་རྣམས་ནི་འཆི་བའི་སྡུག་བསྔལ་ཁོང་དུ་མ་ཆུད་དེ། འདི་རྣམས་སྐྱོ་བ་བསྐྱེད་པར་བྱ་བའི་ཕྱིར། བདག་གི་གོར་མ་ཆག་པར་སྤྲུལ་པ་ཞིག་བྱའོ་སྙམ་མོ། །དེ་ནས་བརྒྱ་བྱིན་གྱི་རྫུ་འཕྲུལ་གྱིས་སྲིད་པ་བར་མ་པའི་སྤྲུལ་པ་བྱས་པ་གང་ཡིན་པ་དེ་དག་ལྷ་དེ་རྣམས་ལ་བསྟན་ཏེ། ཚལ་དང་ཉེ་བའི་ཚལ་དང་རིའི་ཟོམ་དང་པད་མའི་ཚལ་རྣམས་སུ་ཡོ་བྱད་མཁོ་བ་ཉེ་བར་བསྟེན་པ་གང་ཡིན་པ་དེ་དག་གིས་ལྷན་ཅིག་རྩེས་གླུ་བླངས་དགའ་བར་བྱས་ཤིང་དགའ་དགུར་སྤྱད་པ་དང་བྱད་གཟུགས་ཆེ་ཞིང་འོད་ལྷག་པར་བཟང་བ་དེ་དག་འཆི་ཞིང་དབང་ཕྱུག་དང་ལྷ་མོའི་འཁོར་རྣམས་ཀྱིས་ནི་བཏང་། དབང་ཐང་ཐམས་ཅད་དང་སྐལ་བ་བཟང་པོ་ཐམས་ཅད་ནི་ཟད། བཞིན་ནི་མོག་མོག་པོར་གྱུར། སེམས་ཅན་དམྱལ་བར་སྐྱེ་བར་འགྱུར་བ་གང་དག་ལིག་རིས་ནི་ལག་པ་རྒྱབ་ཏུ་བཅིངས། རྟག་ཏུ་ངུས་པའི་མིག་དང་བཞིན་མཆི་མས་ནི་གཤེར། དུ་བ་འཐུལ་བའི་མུན་པ་དང་མེས་ནི་ཡོངས་སུ་བསྐོར། གཤིན་རྗེའི་མི་རྣམས་ཀྱིས་སྤྱོ་བརྒྱད་ཅིང་། ཤིན་ཏུ་བཀྲེས་པ་དང་སྐོམ་པས་གདུངས་པའི་བཞིན་འཇིགས་པ་ཉམ་ང་བ་ཆེན་པོར་ནི་བདས། ལུས་ཚལ་ཤིང་བསྲེགས་པ་ལྟ་བུ་དག །མི་ཤིན་ཏུ་འཇིགས་འཇིགས་ལྟར་འདུག་པ་རྣམས་ཀྱིས་དེད་པར་བྱེད་པ་ན། མི་སྡུག་པར་སྒྱུར་བ་ཆ་བྱད་སྣ་ཚོགས་ནི་ཐོགས། ལུས་དང་གཟུགས་རྣམ་པ་སྣ་ཚོགས་སུ་འདུག་པའི་ལག་པ་དག་ན་རལ་གྲི་དང་དབྱུག་པ་དང་ཞགས་པ་ནི་ཐོགས། གཞན་དག་ནི་ལྷའི་འཇིག་རྟེན་དེར་འགྲོ་བར་བྱེད་ལ། གཞན་དག་ནི་འབབས་པར་བྱེད་པ་དེ་རྣམས་ཀྱིས་རི་རབ་དེ་ལ་ཀུན་ནས་ཁྱབ་པར་ལྷགས་ནས། དེ་རྣམས་ཀུན་ནས་འོང་བར་བྱེད་ཅིང་འཇུག་པར་བྱེད་དོ། །ཞུགས་པ་གང་ཡིན་པ་དེ་དག་གིས་ལྷ་རྣམས་བཟུང་ནས། ཞགས་པ་རྣམ་པ་སྣ་ཚོགས་ཀྱིས་བཅིངས་ཏེ་ཐུར་དུ་ཁྲིད་པར་བྱེད་ལ། རྒྱ་ལྕག་རྣམས་ཀྱིས་ཀྱང་རྡོབ་པར་བྱེད་སྤྱོ་བར་བྱེད། མེའི་ཕྲེང་བ་འབར་བ་འཁྲིགས་པའི་ཚོགས་ཀྱིས་གདུང་བར་བྱེད་པ་དེ་བཞིན་དུ་སེམས་ཅན་
དམྱལ་བ་ག་ལ་བ་དེར་འདྲེན་པར་བྱེད་དོ། །གཤིན་རྗེའི་མི་ལག་ན་ཞགས་པ་ཐོགས་ཤིང་། ཁྲོ་བ་དེ་དག་ཕན་ཚུན་དུ་འདི་ལྟར་གཤིན་རྗེའི་ཕོ་ཉ་རྣམས་རིངས་པར་ཤོག་རིངས་པར་ཤོག །བག་མེད་ཅིང་བག་མེད་པར་གནས་པའི་ལྷ་འདི་དག་ཇི་ལྟར་ཡང་ཡང་བག་མེད་པར་མི་འགྱུར་བའམ་བག་མེད་པར་མི་གནས་པ་དེ་ལྟར་སེམས་ཅན་དམྱལ་བ་རྣམས་ཀྱི་ནང་དུ་བདག་ཅག་གིས་གདུལ་བར་བྱའོ་ཞེས་སྨྲ་སྟེ། དེ་ལྟར་ཧ་ཧ་ཞེས་སྒྲ་འདོན་ཅིང་། རིའི་རྒྱལ་པོ་རི་རབ་ཀྱི་ནམ་མཁའ་ལས་འབབ་པར་བྱེད་དོ། །དེ་ནས་སྟེང་དང་འོག་དང་ངོས་ཀྱི་གནས་དེ་དག་ཐམས་ཅད་བརྒྱའམ་སྟོང་ངམ་ཁྲིའམ་བྱེ་བར་འཇོམས་ཤིང་ཀུན་གྱིས་ནམ་མཁའ་དེ་བར་མཚམས་མེད་པར་ཁྱབ་པར་འཁོད་ནས། འཕེལ་བ་དང་འགྲིབ་པར་བྱེད་ཅིང་འདི་ལྟར་ཁྱེད་རྣམས་ཀྱིས་འདོད་པ་མྱོང་བ་དང་ཡན་ལག་ལྔ་དང་ལྡན་པ་གང་ཡིན་པ་དེ་དག་གཤིན་རྗེའི་མིའི་ཞགས་པ་རྣམས་ཀྱིས་བཅིངས་ནས། གཤིན་རྗེའི་འཇིག་རྟེན་དུ་རྟའི་ཤུགས་བཞིན་དུ་ཁྲིད་པ་ན། ཁྱེད་ལ་ཕན་པ་ཅི་བྱེད་ཅེས་ཀུན་ནས་སྤྱོ་བར་བྱེད་དོ། །དེ་ལྟར་སེམས་ཅན་དམྱལ་བར་སྐྱེ་བ་གང་ཡིན་པ་དེ་དག་དེ་བཞིན་དུ་རིས་འཐུན་པའི་ལྷ་ལེགས་པར་བྱས་པའི་སེམས་དང་ལྡན་པ་དེ་རྣམས་ཀྱིས་མཐོང་ངོ་། །དེ་ནས་སྲིད་པ་བར་མ་པའི་ལྷ་གང་ཡིན་པ་དེ་དག་ལ་འདི་ལྟར་གཤིན་རྗེའི་མི་རྣམས་ཀྱིས་ཚིགས་སུ་བཅད་དེ་སྨྲས་པ། འདོད་པ་རྣམས་ལ་ཆགས་པའི་བློས། །ཁྱེད་ཀྱིས་ལེགས་བྱས་མ་སྤྱད་པ། །གང་ཡིན་བདེ་དང་བྲལ་བ་དེའི། །འབྲས་བུ་འདི་ནི་ཉེ་བར་གནས། །བག་མེད་པ་ལ་དགའ་བའི་ལྷ། །བྱ་བ་རྣམས་ལ་འཇུག་བྱེད་གང་། །དེ་ནི་ཕྱི་ནས་འཆི་བའི་ཚེ། །རང་གི་སེམས་ཀྱིས་གདུང་བར་བྱེད། །ཇི་ལྟར་དབང་པོ་ལྔ་དག་ལས། །བྱུང་བའི་བག་མེད་སྲེག་བྱེད་པ། །དེ་ལྟར་མེ་ཡིས་སྲེག་མི་བྱེད། །མཚོན་ཆས་ཀྱང་ནི་གཅོད་མི་བྱེད། །ཇི་ལྟར་བདེ་གཞི་སྡུག་བསྔལ་ལ། །དེ་ལྟར་བཤེས་གཞི་དགྲར་འགྱུར་བ། །བག་མེད་བསྟེན་ལས་འབྱུང་འགྱུར་ཏེ། །དེ་བས་དེ་ནི་ཡོངས་སུ་སྤོངས། །བག་མེད་སྲེད་དང་འདྲེས་པ་དང་། །འདོད་ཆགས་དེ་
ཡི་རྗེས་འབྲེལ་པ། །དགྲ་གསུམ་འདི་ནི་མི་བཟད་དེ། །མི་ཡི་བདེ་བ་འཇིག་པར་བྱེད། །རྒོད་པ་དང་ནི་སྡིག་པར་འདྲེ། །ལེ་ལོ་དེ་བཞིན་བརྐམ་ཆགས་ཉིད། །ཚུལ་ཁྲིམས་དག་ཀྱང་སྤོང་བྱེད་པ། །དེ་དག་སེམས་ཅན་དམྱལ་བའི་རྒྱུ། །ཚུལ་ཁྲིམས་གང་ཞིག་བདེ་ལ་བསིལ། །ཡོངས་སུ་གྱུར་པའང་བསིལ་བ་ལ། །རྟག་ཏུ་རྨོངས་པ་མི་སྟེན་ན། །དེ་ནི་ཕྱིས་ནས་ཡོངས་སུ་གདུང་། །ཆང་འཐུང་དེ་བཞིན་འཚེ་བ་དང་། །གཞན་གྱི་བུད་མེད་མངོན་པར་དགའ། །ཆགས་ཤིང་བློ་གྲོས་འཐབ་པ་ཉིད། །དེ་ནི་སེམས་ཅན་དམྱལ་བའི་རྒྱུ། །ཕྲ་མ་སྡིག་དང་འདྲེ་བ་དང་། །ཡང་དག་སྡོམ་མེད་ལོག་པར་ལྟ། །སེམས་ལ་ཅལ་ཅོལ་མང་བ་ཉིད། །མི་ནི་རྟག་ཏུ་འཇིགས་པར་བྱེད། །བརྣབ་སེམས་ཚིག་རྩུབ་བཅས་པ་དང་། །མངོན་པའི་ང་རྒྱལ་ལོག་པར་སྨྲ། །དེ་ནི་འཇིག་རྟེན་འདིར་མི་ཕན། །ཕ་རོལ་ཏུ་ཡང་ཕན་མི་འགྱུར། །དགེ་བ་རྣམས་ཀྱིས་རྟག་ཏུ་སྤོང་། །མི་དགེ་རྣམས་ཀྱིས་སྟེན་བྱེད་པ། །ལས་འདི་ལ་ནི་མ་དད་ན། །དོན་མེད་རྣམས་ཀྱི་གཞི་འདི་ཡིན། །སེམས་ཅན་རྣམས་ཀྱི་བདེ་སྡུག་གང་། །ལས་ཀྱི་འབྲས་བུ་མ་རིག་ལ། །རྒྱུ་འབྲས་ལ་ནི་རྨོངས་པ་དེ། །ཕྱི་ནས་གདུང་བས་གདུངས་པར་འགྱུར། །གང་ཞིག་ལོག་པར་སྨྲ་ལ་བརྩོན། །རྟག་ཏུ་མཁས་ལྟར་ང་རྒྱལ་ཅན། །ཕྱི་ནས་ཉོན་མོངས་བྱུང་བའི་ཚེ། །དེ་ཡིས་ལས་ཀྱི་འབྲས་བུ་རྟོགས། །གང་ཞིག་འཇིག་རྟེན་འདིར་འཁྱམ་ཞིང་། །གང་ཞིག་སྡུག་བསྔལ་དེས་བྱིང་བ། །མ་རིག་པ་ཡིས་དེ་བསྐྱེད་ཅེས། །དེ་བཞིན་གཤེགས་པ་རྣམས་གསུང་ངོ་། །དེ་ལྟར་བརྒྱ་བྱིན་གྱིས་སྤྲུལ་པའི་གཤིན་རྗེའི་མི་དེ་རྣམས་སྲིད་པ་བར་མ་དེ་དག་ལ་གཏམ་རྗོད་ཅིང་སྤྱོ་བར་བྱེད་དོ། །དེ་ནས་ཡང་བརྒྱ་བྱིན་དེ་ལྷ་དེ་རྣམས་ལ་གང་དུད་འགྲོ་རྣམས་ཀྱི་ནང་དུ་སྐྱེ་བའི་སྤྲུལ་པ་སྟོན་པར་བྱེད་དོ། །དེ་རྣམས་ཀྱི་སྲིད་པ་བར་མ་པར་དེ་དག་དང་ཚུལ་འཐུན་པ་གཟུགས་བརྙན་དུ་གྱུར་པ། དེ་དང་འཐུན་པ་རྒྱའི་འབུར་ལྟར་གྱུར་པ། སྲིད་པ་བར་མ་པའི་གཟུགས་རྣམ་པ་དུ་མ་དག་བྱུང་སྟེ། དེ་དག་གཅིག་
ལ་གཅིག་ཟ་བ་དང་གསོད་པ་དང་ངོ་བོ་ཡོད་པ་དང་ངོ་བོ་མེད་པར་བྱེད་པ་དང་འཇིགས་པ་ཆེན་པོ་སྐྱེད་པ་ན། དེར་ལྷ་ཡིད་རྨོངས་པ་གང་ཡིན་པ་དེ་དག་གིས་མཐོང་ངོ་། །དེ་ནས་ཡང་བརྒྱ་བྱིན་དེ་ལྷ་དེ་རྣམས་ལ་གང་ཡི་དགས་རྣམས་ཀྱི་ནང་དུ་སྐྱེ་བའི་སྤྲུལ་པ་སྟོན་པར་བྱེད་དེ་འདི་ལྟ་སྟེ། ལུས་བཀྲེས་པ་དང་སྐོམ་པས་གདུངས་པ། བཞིན་རྟག་ཏུ་སྐྲས་མུན་པར་ཁེབས་པ། བཞིན་ཤིན་ཏུ་འཇིགས་འཇིགས་ལྟར་འདུག་པ། ལུས་ཚལ་ཤིང་བསྲེགས་པ་ལྟར་འདུག་པ། བྱ་རོག་དང་འུག་པ་རྣམས་ཀྱིས་མིག་དང་རྣ་བ་དང་སྣ་དང་ལྕེ་བཏོགས་པ་དག་ལྷའི་འཇིག་རྟེན་དེ་ནས་འོག་གི་ནམ་མཁའ་དེ་ལ་ལྟུང་བར་མཐོང་ངོ་། །དེ་ལྟར་ལྷ་དེ་རྣམས་ཀྱིས་སྤྲུལ་པ་ཤིན་ཏུ་འཇིགས་འཇིགས་ལྟར་འདུག་པ། རབ་ཏུ་དངངས་པར་བྱེད་པ་དེ་དག་མཐོང་བ་དང་། དེ་རྣམས་ཀྱིས་བརྒྱ་བྱིན་དེ་ལ་བལྟས་ནས་སྨྲས་པ། བརྒྱ་བྱིན་སྔོན་མ་མཐོང་བའི་ལྷ་མ་ཡིན་ནམ། དེ་དང་ཚུལ་འཐུན་པ་གཞན་རྣམས་ཀྱིས་ལྷ་འདི་དག་ལ་ལིག་རིས་ཕྱིན་ཅི་ལོག་ཏུ་བཅིངས་ནས་ཁྲིད་ན་ཅི་སྟེ་བཏང་སྙོམས་སུ་བཞུགས། རི་རབ་མ་ལུས་པར་ཁྱབ་པ་ལྷ་མ་ཡིན་གྱི་གཟུགས་འདི་དག་ནི། སྔོན་ཆད་ལྷ་དང་ལྷ་མ་ཡིན་ཐམས་ཅད་གཡུལ་འགྱེད་པ་ན་བདག་ཅག་གིས་མ་མཐོང་སྟེ། གནས་འདིར་ནི་སྔོན་ཆད་ལྷ་མ་ཡིན་ཀུན་ལན་འགའ་ཡང་མ་མཆིས་པ་ལགས་ན། བརྒྱ་བྱིན་ཅི་ཆོས་ཉམས་ལགས་སམ། འདི་ལྟར་འཇིག་རྟེན་སྐྱོང་བ་དག་སུམ་ཅུ་རྩ་གསུམ་གྱི་དབང་ཕྱུག་ཁྱོད་དང་བདག་ཅག་ལ་དུས་དུས་སུ་སྒྲོལ་བ་ལགས་ན། འཇིག་རྟེན་ན་ཕར་འཛིན་པ་དང་མར་འཛིན་པ་དང་དགེ་སྦྱོང་དུ་འཛིན་པ་དང་བྲམ་ཟེར་འཛིན་པ་དང་རིགས་ཀྱི་རྒན་རབས་ལ་རི་མོར་བགྱིད་པ་དག་མ་མཆིས་སམ། བརྒྱ་བྱིན་འཇིག་རྟེན་ན་སངས་རྒྱས་མཆོད་པ་མ་མཆིས་སམ། ཆོས་མཆོད་པ་མ་མཆིས་སམ། དགེ་འདུན་མཆོད་པ་མ་མཆིས་སམ། རྒྱུ་དང་འབྲས་བུའི་དེ་ཁོ་ན་ཉིད་འཚལ་བ་མ་མཆིས་སམ། ཅི་ན་ལྷ་འདི་རྣམས་ཤིན་ཏུ་འཇིགས་པར་བགྱིད། སུམ་ཅུ་རྩ་གསུམ་གྱི་དབང་ཕྱུག་གླང་པོ་ཆེའི་རྒྱལ་པོ་ས་སྲུང་གི་བུ་ལ་བཅིབས་ལ་གཡུལ་བཤམ་དུ་གསོལ།
ལྷ་མཚོན་ཆ་སྣ་ཚོགས་ཐོགས་པ་རྣམས་གོ་བསྐོན་དུ་གསོལ། རྔ་བོ་ཆེ་བརྡུང་དུ་གསོལ། ཁྱོད་དང་བདག་ཅག་གཡུལ་དུ་ཆ་བར་བགྱིའོ་ཞེས་རིས་འཐུན་པའི་ལྷ་ཁ་ཅིག་བརྒྱ་བྱིན་ལ་དེ་སྐད་སྨྲ་ལ། གཞན་ཁ་ཅིག་ནི་ངོ་མཚར་ཆེ་བ་འདི་དག་མཐོང་ནས་ཡིད་ཤིན་ཏུ་མི་དགའ་ལ། རབ་ཏུ་འཇིགས་པའི་མིག་དང་བཞིན་མོག་མོག་པོར་གྱུར་ནས་བརྒྱ་བྱིན་ཉིད་ལ་སྐྱབས་སུ་སོང་སྟེ། ལྷའི་དབང་པོ་བདག་ཅག་གི་གནས་འདིར་སྔོན་མ་མཐོང་བའི་ལྷ་མ་ཡིན་རྣམས་མཆིས་ཀྱིས་བདག་ཅག་བསྐྱབ་ཏུ་གསོལ། བདག་ཅག་བསྐྱབ་ཏུ་གསོལ་ཞེས་སྨྲའོ། །དེ་ལྟར་འཇིགས་པས་དཀྲུགས་པ་གཞན་དག་བརྒྱ་བྱིན་གྱི་དྲུང་དུ་དོང་ནས་སྨྲས་སོ། །ལྷ་གཞན་དག་ཕྱིས་དགེ་བར་འགྱུར་བ་གང་ཡིན་པ་དེ་དག་གིས་སྤྲུལ་པ་དེ་མཐོང་ནས། དེ་ནས་ཡང་སྙིང་འཇིགས་པ་རྣམས་ལྷའི་འདུན་ས་ཆོས་བཟང་ག་ལ་བ་དེར་བརྒྱུགས་སོ། །ཡང་མཚོན་ཆ་དོན་དུ་གཉེར་བ་གཞན་དག་གིས་ནི་ཚལ་དང་ཉེ་བའི་ཚལ་རྣམས་སུ་བརྒྱུགས་སོ། །དེར་མཚོན་ཆ་དོན་དུ་གཉེར་བ་གང་ཡིན་པ་དེ་དག་གིས་སྤྲུལ་པ་དེ་མཐོང་ཡང་བརྒལ་བའམ། གཟུང་བར་མི་ནུས་ཏེ་མཐོང་བ་ཁོ་ནར་ཟད་དེ་དཔེར་ན་མེ་ལོང་གི་ནང་ན་གཟུགས་བརྙན་མཐོང་ཡང་གཟུང་བའམ། བརྒལ་བར་མི་ནུས་པ་བཞིན་ནོ། །བརྒྱ་བྱིན་དེས་སྤྲུལ་པ་གཞན་བྱས་པ་ནི་ཇི་ལྟར་ལྷ་མ་ཡིན་གྱི་གཙོ་བོ་སྒྲ་གཅན་དང་བརྟན་པ་ལ་སོགས་པ་དེ་ལྟར་འདྲེན་པར་བྱས་ཏེ། གཙོ་བོ་ཐམས་ཅད་ལིག་རིས་ལག་པ་ཕྱིན་ཅི་ལོག་ཏུ་བཅིངས་ནས་རྒྱ་ལྕག་རྣམས་ཀྱིས་འཇུ་བར་བྱེད། མཚོན་ཆ་རྣམས་ཀྱིས་གཤེག་པར་བྱེད་ཅིང་སྤྱོ་བར་བྱེད་དོ། །ལིག་རིས་ལག་པ་ཕྱིན་ཅི་ལོག་ཏུ་བཅིངས་པ་དེ་དག་སྙིང་རྗེ་རྗེ་སྐད་དུ། ངུ་སྐད་འབྱིན་ཅིང་སྨྲེ་སྔགས་འདོན་ཏེ། ལྷ་མ་ཡིན་རྣམས་ལ་ཡང་ལྷ་རྣམས་ཀྱིས་སྡུག་བསྔལ་སྤྲུལ་པ་དེའི་ནང་ན་སྣང་བ་གང་ཡིན་པ་དེ་དག་སྟོང་འགྱུར་དུ་སྣང་ངོ་། །དེ་དག་གིས་ཀྱང་སྤྲུལ་པ་གང་ཡིན་པ་དེ་མཐོང་བ་དང་། ཡང་དང་ཡང་ཤིན་ཏུ་འཇིགས་སྐྲག་ཅིང་ངོ་མཚར་དང་འདྲེས་པ་རྣམས། དེ་ནས་ཡང་ལྷའི་རྒྱལ་པོ་བརྒྱ་བྱིན་དེ་ག་ལ་བ་དེར་དོང་ནས། དེ་དག་གིས་
ཡང་བརྒྱ་བྱིན་ལ་སྨྲས་པ། བརྒྱ་བྱིན་ཤིན་ཏུ་དཔུང་ཆེ་བ་འདི་དག་སུ་ལགས། ཤིན་ཏུ་སྤྲོ་བ་ཆེ་བ་འདི་དག་སུ་ལགས། འདི་ལྟར་ལྷ་དང་ལྷ་མ་ཡིན་གཙོ་བོ་གང་ལགས་པ་དེ་དག་ལིག་རིས་ལག་པ་ཕྱིན་ཅི་ལོག་ཏུ་བཅིངས་ནས་ཁྲིད་པར་བགྱིད་ལ། རྡེག་པར་བགྱིད། གསོད་པར་བགྱིད། སྤྱོ་བར་བགྱིད་པ་དང་ཤིན་ཏུ་སྤུ་ཟིང་ཞེས་བགྱིད་པ་ངོ་མཚར་ཆེ་བ་འདི་དག་ཅི་ལགས། བརྒྱ་བྱིན་བདག་ཅག་དང་ཉེ་བ་ན་མཆིས་པ་འདི་དག་སུ་ལགས་མཁྱེན་ཏམ། ལྷ་དང་ལྷ་མ་ཡིན་གཞིག་པར་བགྱི་བའི་སླད་དུ་ལྷགས་པ་འཇིག་རྟེན་ཐམས་ཅད་གཞོམ་པར་བགྱི་བ་ལ་བརྩོན་པ། འདི་དག་བདག་ཅག་ཡོང་ཡེ་གློ་བར་མ་ཆུད་ན་སུ་ལགས། གལ་ཏེ་མཁྱེན་ན་འདི་དག་བདག་ཅག་ལ་བཀའ་སྩལ་དུ་གསོལ། ཇི་སྟེ་མི་མཁྱེན་ན་དེ་དག་ལ་ལན་ཅི་བགྱི་བ་དགོངས་སུ་གསོལ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་བཅུ་གཅིག་པ། དེ་ནས་བརྒྱ་བྱིན་འདི་སྙམ་དུ་སེམས་ཏེ། བག་མེད་པ་ལ་གནས་པའི་ལྷ་འདི་དག་ནི་དེ་ཁོ་ན་ཉིད་ཁོང་དུ་མ་ཆུད་ལ་ཆོས་ལ་སྐྱབས་སུ་འགྲོ་བ་ལ་ཡང་བརྩོན་པ་མ་ཡིན་ནོ། །དེ་རྣམས་ཀྱི་དྲེགས་པ་བསལ་བར་བྱ་བའི་ཕྱིར་ངས་སྤྲུལ་པ་འདི་དག་བྱས་པར་ཟད་དེ། ད་འདི་རྣམས་ཡིད་བྱུང་བ་དང་སེམས་ལས་སུ་རུང་བར་འགྱུར་ལ། སེམས་ཤིན་ཏུ་ལས་སུ་རུང་བའི་ལྷ་གང་ཡིན་པ་དེ་རྣམས་ལ་ད་བདག་གིས་བཤད་པར་བྱའོ་སྙམ་མོ། །དེ་ནས་སེམས་ལས་སུ་རུང་བར་རིག་ནས་བརྒྱ་བྱིན་དེས་སྨྲས་པ། འདི་ལྟར་ཉོན་ཅིག །ཤིན་ཏུ་དཔུང་ཆེ་བ་གཟུགས་ཤིན་ཏུ་བཟོད་པར་དཀའ་བ་ཀུན་ནས་གཞན་འཇོམས་པར་བྱེད་པ་གང་ཡིན་པ་འདི་དག་ནི། ལྷ་འདི་དག་ཐམས་ཅད་ཀྱི་དཔུང་རྣམས་ཀྱིས་ཕྱིར་གཞིལ་བའམ། སྔགས་རྣམས་ཀྱིས་ཀྱང་ཕྱིར་བཟློག་པར་མི་ནུས་སོ། །ཁྱེད་པས་ཁྱད་པར་དུ་འཕགས་པ་གཞན་གང་ཡིན་པ་དེ་དག་གིས་ཀྱང་འདི་དག་ལ་མི་བཟོད་ན། གང་བྱད་གཟུགས་དང་མདོག་དང་དབང་ཕྱུག་དམན་པ་ཁྱེད་ལྟ་སྨོས་ཀྱང་ཅི་དགོས། གཤིན་རྗེའི་ཕོ་ཉ་འདི་དག་ནི་ཕོ་ཉ་ནག་པོ་ཞེས་བྱ་སྟེ། གང་འཆི་བའི་དུས་ལ་ཉེ་བར་གནས་པ་ལས་དང་ཉོན་མོངས་པས་
ཉེ་བར་སྦྲེལ་བའི་སྲོག་ཆགས་རྣམས་བཅིངས་ནས། སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་ཁྲིད་པར་བྱེད་དོ། །འདི་ནི་འཁོར་བ་ཐམས་ཅད་དུ་གཏོགས་པའི་སེམས་ཅན་ཐམས་ཅད་ཀྱི་ཆོས་ཉིད་དུ་གནས་པ་ཡིན་ནོ། །འཁོར་བར་གཏོགས་པའི་སེམས་ཅན་རྣམས་ཀྱི་ཆོས་བརྒྱད་ཡོད་དེ་བརྒྱད་གང་ཞེ་ན། སྐྱེས་ནས་འཆི་བ་ནི་གནས་དང་པོ་ཡིན་ནོ། །ནད་མེད་པ་ན་བ་ནི་གནས་གཉིས་པ་ཡིན་ནོ། །ལང་ཚོ་རྒ་བ་ནི་གནས་གསུམ་པ་ཡིན་ནོ། །ལྡན་པ་ལས་མི་ལྡན་པ་ནི་གནས་བཞི་པ་ཡིན་ནོ། །འཇིག་རྟེན་འདི་ནི་ལས་བདག་གིར་བྱ་བ་ལས་ཀྱི་བགོ་སྐལ་ལ་སྤྱོད་པ་ལས་ལ་རྟོན་པ་ཡིན་ཏེ། ཇི་ལྟ་ཇི་ལྟར་དགེ་བའམ། སྡིག་པ་བྱེད་པ་དེ་ལྟ་དེ་ལྟར་ལས་དག་ལ་སྤྱོད་པར་འགྱུར་བ་ནི་གནས་ལྔ་པ་ཡིན་ནོ། །དགའ་བ་དང་ཡིད་དུ་འོང་བ་འདི་དག་ཐམས་ཅད་ལས་དངོས་པོ་ཐ་དད་པ་དང་དངོས་པོ་མེད་པ་དང་དམས་པ་དང་མི་ལྡན་པ་དང་བྲལ་བ་འདི་ནི་གནས་དྲུག་པ་ཡིན་ནོ། །འཇིག་རྟེན་ན་མི་སླུ་བ་ནི་གཞན་གྱིས་བསོད་ནམས་སམ་སྡིག་པ་བྱས་པ་གཞན་ལ་འགྲོ་བར་འགྱུར་རོ་ཞེས་བྱ་བ་འདི་ནི་གནས་མེད་ལ་ཆོས་ཉིད་འདི་ནི་འགྲོ་བ་ལ་མི་སླུ་བ་ཡིན་ཏེ། འདི་ནི་གནས་བདུན་པ་ཡིན་ནོ། །འགྲོ་བ་བག་མེད་པ་དག་རེས་འགའ་དགེ་བར་འགྱུར་རོ་ཞེས་ཟེར་བ་འདི་ནི་གནས་མེད་དེ། གནས་བརྒྱད་པོ་གང་རྣམས་ཀྱིས་འཁོར་བ་འདིར་འཇུག་པའི་གནས་ནི་བརྒྱད་པོ་འདི་དག་ཡིན་ནོ། །འདི་ལྟར་ཆོས་འདི་རྣམས་ནི་ངོ་བོ་ཉིད་དུ་གནས་པ་ཡིན་ཏེ། རྒྱུ་རྐྱེན་ལས་བྱུང་བ་འདི་དག་ནི་མགྱོགས་པས་བཟློག་པའམ་དཔུང་གིས་ཕྱིར་བཟློག་པར་མི་ནུས་སོ། །དེ་བཞིན་དུ་གཤིན་རྗེའི་མི་འདི་དག་དཔུང་ངམ་མགྱོགས་པས་བཟློག་པར་མི་ནུས་ལ་གཟུང་བར་ཡང་མི་ནུས་ཏེ། འདི་ནི་འཁོར་བ་ཐམས་ཅད་ཀྱི་ཆོས་ཉིད་ཡིན་ནོ། །གང་དག་སྡིག་པ་བྱེད་པ་དེ་དག་ལ་འདི་དག་གིས་གཤིན་རྗེའི་འཇིག་རྟེན་དུ་ཆད་པས་གཅོད་པར་བྱེད་དེ། ལྷ་དང་ལྷ་མ་ཡིན་དང་སེམས་ཅན་དམྱལ་བ་དང་གནོད་སྦྱིན་དང་སྲིན་པོ་དང་ཤ་ཟ་དང་ཀླུ་ལ་སོགས་པ་སེམས་ཅན་དམྱལ་བ་དང་ཡི་དགས་དང་དུད་འགྲོའི་ནང་དུ་སྐྱེས་པའི་སེམས་ཅན་རྣམས་ལ་འདི་
དག་རྣམ་པ་དུ་མར་ཆད་པས་གཅོད་པར་བྱེད་དོ། །དེ་ནས་ལྷ་རྣམས་ཀྱིས་བརྒྱ་བྱིན་ལ་འདི་སྐད་སྨྲས་སོ། །བརྒྱ་བྱིན་འདི་ལྟར་ཐབས་ཀུན་གྱིས་བདག་ཅག་འདི་དག་གི་དབང་དུ་མཆི་བར་མི་འགྱུར་བའི་ཐབས་བསྒྲུབ་པ་དེ་མཁྱེན་ལགས་སམ། དེ་ནས་བརྒྱ་བྱིན་གྱིས་དེའི་ཚེ་ལྷ་དེ་རྣམས་ལ་འདི་སྐད་སྨྲས་སོ། །ཐབས་ཡོད་དེ་ཐབས་གང་གིས་ལྷ་རྣམས་ལ་འདི་དག་གིས་ཅུང་ཟད་ཀྱང་བྱར་མི་ནུས་སོ། །ལྷ་རྣམས་ཀྱི་ཐབས་དེ་ཡང་གང་ཞེ་ན་འདི་ལྟ་སྟེ། ཆོས་གཅིག་ཅིག་སྤང་བར་བྱ་སྟེ། འདི་ལྟ་སྟེ་བག་མེད་པའོ། །ཆོས་གཉིས་ཤིག་བསྒོམ་པར་བྱ་སྟེ། ཞི་གནས་དང་ལྷག་མཐོང་ངོ་། །སྐྱོན་གསུམ་ཞིག་སྤང་བར་བྱ་སྟེ་འདི་ལྟ་སྟེ། འདོད་ཆགས་དང་ཞེ་སྡང་དང་གཏི་མུག་རྣམས་སོ། །འཕགས་པའི་བདེན་པ་བཞི་ཤེས་པར་བྱ་སྟེ། སྡུག་བསྔལ་དང་ཀུན་འབྱུང་དང་ལམ་དང་འགོག་པ་ནི་སྡུག་བསྔལ་འགོག་པའོ། །ལྔ་ཞིག་དོན་དུ་ལེགས་པར་སྲུང་ཞིང་དེ་ཁོ་ན་ཉིད་ཡོངས་སུ་ཤེས་པར་བྱ་བ་ནི་འདི་ལྟ་སྟེ། གཟུགས་ལ་སོགས་པ་ཡུལ་ལྔའོ། །དྲུག་ཅིག་ལེགས་པར་བསྲུང་བར་བྱ་བ་ནི་འདི་ལྟ་སྟེ་དབང་པོ་དྲུག་གོ །བདུན་ཞིག་ལེགས་པར་ཤེས་པར་བྱ་སྟེ། བྱང་ཆུབ་ཀྱི་ཡན་ལག་བདུན་ནོ། །ལམ་བརྒྱད་ཀྱིས་འགྲོ་བར་བྱ་སྟེ། ཡང་དག་པའི་རྟོག་པ་ལ་སོགས་པས་སོ། །སེམས་ཅན་དགུའི་གནས་ཡོངས་སུ་ཤེས་པར་བྱ་སྟེ། དེ་རྣམས་ཀྱི་ལས་ཀྱི་འབྲས་བུ་ཐོབ་པའོ། །ས་ཆེན་པོ་བཅུ་ཤེས་པར་བྱ་ཞིང་། བསྒོམ་པ་བཅུ་གཅིག་ཤེས་པར་བྱ། སྐྱེ་མཆེད་བཅུ་གཉིས་ཤེས་པར་བྱ། དྲན་པ་བཅུ་གསུམ་དྲན་པར་བྱ། སེམས་ཀྱི་རྣམ་པ་བཅུ་བཞི་བསྒོམ་པར་བྱ། དངོས་པོ་བཅོ་ལྔ་ཡོངས་སུ་ཤེས་པར་བྱ། དབུགས་འབྱུང་བ་དང་རྔུབ་པ་དྲན་པ་རྣམ་པ་བཅུ་དྲུག་ཤེས་པར་བྱ། སྲིད་པ་བར་མ་པའི་འགྲོ་བ་དང་འབྲེལ་པ་ཟག་པ་བཅུ་བདུན་སྤང་བར་བྱ། ཁམས་བཅྭ་བརྒྱད་ཀྱི་མཚན་ཉིད་ཡོངས་སུ་ཤེས་པར་བྱ། སྲིད་པ་བར་མ་པའི་བཅུ་དགུ་ཡོངས་སུ་ཤེས་པར་བྱ། འདོད་པའི་ཁམས་སུ་ཉེ་བར་འགྲོ་བར་སེམས་ཅན་གྱི་གནས་ཉི་ཤུ་དང་དེ་དག་གི་འགྲོ་བ་དང་རིས་དང་ཉོན་མོངས་པ་འབྱུང་བ་རྣམས་ཡོངས་སུ་
ཤེས་པར་བྱ་སྟེ། དེ་དག་ཤེས་ན་ལྷའམ་མི་དག་ངན་སོང་གི་གནས་གསུམ་དུ་དེ་རྣམས་ཀྱི་དབང་དུ་མི་འགྱུར་ཏེ་དེ་དག་འཇུག་པའི་ཡུལ་མ་ཡིན་ནོ། །དགེ་བའི་ཆོས་ཐམས་ཅད་བསྐྱེད་པར་བྱ་བའི་ཕྱིར། ལྷའམ་མིའི་དགེ་བའི་རྩ་བ་ཡང་དག་པར་བཟུང་བ་ལ་ངན་སོང་གི་འཇིགས་པ་མི་འབྱུང་བ་ལ་འཆི་བའི་ཚེ་ཡང་། གཤིན་རྗེའི་མི་བྱད་མི་སྡུག་པར་བསྒྱུར་བ་འཇིགས་པ་སྐྱེད་པར་མི་བྱེད་དོ། །དེ་ལྟ་བས་ན་དང་པོ་ཁོ་ནར་བག་མེད་པ་ཡོངས་སུ་སྤང་བར་བྱ་སྟེ། དེ་ནི་ཕྱོགས་དཀར་པོ་ཐམས་ཅད་ཀྱི་བགེགས་སུ་གྱུར་པ་ཡིན་ནོ། །སྐྱེས་བུའི་འཇིག་རྟེན་པའི་དོན་ཡང་མ་ཡིན་ལ། འཇིག་རྟེན་ལས་འདས་པའི་བདེ་བའི་སྐལ་བར་ཡང་མི་འགྱུར་རོ། །སེམས་བག་མེད་པའི་དབང་དུ་འགྱུར་བའི་མི་ཕྱུགས་དང་མཚུངས་ཏེ། གཉིད་མ་ལོག་ཀྱང་གཉིད་ལོག་པ་ཉིད་དང་མཚུངས་སོ། །དོན་དང་དོན་མ་ཡིན་པ་དང་བསོད་ནམས་དང་བསོད་ནམས་མ་ཡིན་པ་དང་བཤེས་གཉེན་དང་བཤེས་གཉེན་མ་ཡིན་པ་དང་ཞིང་དང་ཞིང་མ་ཡིན་པ་དང་བརྗོད་པར་བྱ་བ་དང་བརྗོད་པར་བྱ་བ་མ་ཡིན་པ་དང་ཟས་དང་ཟས་མ་ཡིན་པ་དང་ཡོན་ཏན་དང་སྐྱོན་ཡིན་པ་མི་ཤེས་པ་ཡིན་ཏེ། དེ་ལྟ་བས་ན་ཐམས་ཅད་དོན་མེད་པར་བྱེད་པའི་གཞིར་གྱུར་པ། དང་པོ་ཁོ་ནར་བག་མེད་པ་ཡོངས་སུ་སྤང་བར་བྱའོ། །ཤིན་ཏུ་བག་མེད་པའི་ལྷ་དེ་དག་གཤིན་རྗེ་མིའི་དབང་དུ་ཅི་སྟེ་མི་འགྱུར། དེ་ནས་དེའི་ཚེ་བརྒྱ་བྱིན་གྱིས་འདི་ལྟར་ཚིགས་སུ་བཅད་དེ་སྨྲས་པ། བླུན་པོ་ཆོས་ལ་མི་དགའ་ཞིང་། །རྟག་ཏུ་བག་མེད་དགའ་བ་གང་། །དེ་ནི་འཆི་བའི་དུས་བབ་ཚེ། །གཤིན་རྗེའི་ཕོ་ཉའི་དབང་དུ་འགྲོ། །བག་མེད་པ་ནི་དུག་ལྟ་བུར། །མཁས་པ་ཡོངས་སུ་བསྲུང་བ་གང་། །དེ་ནི་འཆི་བའི་དུས་བབ་ཚེ། །སྐལ་བ་ལྡན་པ་བདེ་བར་འགྱུར། །བག་མེད་ཤིན་ཏུ་འཆི་བར་བྱེད། །བག་ཡོད་པ་ནི་བདེ་བ་ཆེ། །དེ་ལྟ་བས་ན་བདེ་འདོད་པས། །ཡིད་ལ་རྟག་ཏུ་བག་ཡོད་བྱོས། །དེ་ལ་ལྷ་དག་ཆོས་གཅིག་སྤང་བར་བྱ་སྟེ། འདི་ལྟ་སྟེ། བག་མེད་པའོ་ཞེས་གང་སྨྲས་པ། བག་མེད་པ་ལ་ཞུགས་པ་དེ་ནི་རྣམ་པ་དྲུག་ཡོད་དེ། དྲུག་གང་ཞེ་ན། འདི་ནི་མིག་གིས་གཟུགས་མཐོང་ནས་བག་
མེད་པས་ཕྲོགས་པའི་སེམས་ཀྱིས་གཟུགས་བཟང་པོའམ། གཟུགས་ངན་པའམ། ནག་པོའམ། དཀར་པོའམ། དམར་པོའམ། རིང་པོའམ། ཐུང་ངུའམ། གྲུ་བཞིའམ། ཟླུམ་པོ་དག་གི་དེ་ཁོ་ན་ཉིད་ཁོང་དུ་མི་ཆུད་དོ། །དེ་བཞིན་དུ་བག་མེད་པས་ཕྲོགས་པའི་བློས། འཇིག་རྟེན་པའི་དེ་ཁོ་ན་ཉིད་ཀྱང་ཁོང་དུ་མི་ཆུད་ལ། བག་མེད་པས་ཕྲོགས་པའི་བློས་འཇིག་རྟེན་ལས་འདས་པའི་ཡང་ཁོང་དུ་མི་ཆུད་དོ། །དེ་བཞིན་དུ་བག་མེད་པས་ཕྲོགས་པའི་བློས་གཟུགས་དེ་ཉིད་མཐོང་ནས་ཇི་ལྟ་བ་བཞིན་ཁོང་དུ་མི་ཆུད་ལ། ལུས་ལ་ལུས་ཀྱི་རྗེས་སུ་ལྟ་བར་ཡང་མི་འགྱུར་རོ། །འཕགས་པའི་བདེན་པ་བཞི་ལ་མངོན་པར་ཞུགས་པའི་ཡིད་ཀྱིས་གཟུགས་དེ་ལ་དཔྱོད་པར་མི་བྱེད། དེ་ཁོ་ན་ཚོལ་བར་མི་བྱེད་དོ། །དེ་བཞིན་དུ་བག་མེད་པས་འཇིག་རྟེན་པའི་དོན་ཡང་མི་མཐོང་ལ། འཇིག་རྟེན་ལས་འདས་པ་ཡང་མི་མཐོང་ངོ་། །ཡང་དེ་བཞིན་དུ་དེ་བག་མེད་པས་ཕྲོགས་པའི་བློས་རྣ་བས་སྒྲ་ཐོས་ཀྱང་། གླུ་བླངས་པའམ། སྨྲས་པ་འདིའི་དོན་གང་ཡིན་པའམ། རང་གི་དོན་ནམ། དོན་མེད་པ་མི་ཤེས་ཏེ། དེ་ལྟར་འཇིག་རྟེན་པའི་དོན་མི་ཤེས་སོ། །ཆོས་མདོའི་སྡེ་དང་། ཚིགས་སུ་བཅད་པའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་སྡེ་དང་། རྣམ་པར་གཏན་ལ་དབབ་པ་བསྟན་པའི་སྡེ་འཆད་པ་འདི་ནི་མི་ཤེས་ལ། དེས་བཤད་པ་དེའི་དོན་ཡང་ཤེས་པར་མི་འགྱུར་རོ། །བག་མེད་པས་ཕྲོགས་པ་དེ་འཆི་བའི་དུས་ན་གཤིན་རྗེའི་མིའི་དབང་དུ་འགྱུར་རོ། །ཡང་བག་མེད་པས་ཕྲོགས་པའི་སེམས་ཀྱི་སྣས་དྲི་སྣོམ་པ་ན་དྲི་ཞིམ་པའམ་དྲི་ང་བའམ་མེ་ཏོག་གི་དྲི་མི་ཤེས་སོ། །དེ་བཞིན་དུ་འཇིག་རྟེན་པའི་དྲི་ཡང་མི་ཤེས་ལ། འཇིག་རྟེན་ལས་འདས་པའི་ཡང་མི་ཤེས་སོ། །བདུག་སྤོས་ཀྱི་དྲི་ཡང་མི་ཤེས་ལ། དེའི་ཚེ་བག་མེད་པ་དེས་དཀོན་མཆོག་གསུམ་ལ་རེས་འགའ་ཡང་བདུག་སྤོས་དབུལ་བ་མ་ཕུལ་ཏེ། དེ་ལྟར་བག་མེད་པ་དག་དྲི་མི་ཤེས་སོ། །
ཡང་བག་མེད་པས་ཕྲོགས་པ་དག་རོ་ཤེས་པར་མི་འགྱུར་ཏེ། རོ་མྱོང་བར་བྱེད་པ་ན་ཡང་བློ་གཞན་དུ་ཞུགས་པས་རོ་འདི་མངར་བའམ། སྐྱུར་བའམ། ལན་ཚྭ་འམ། ཚ་བའམ། ཁ་བའམ། བསྐ་བའམ། བ་ཚྭ་གང་ཡིན་པ་མི་ཤེས་པ་ནི་དེ་ལྟར་གཞན་དུ་ཕྲོགས་པའི་བློས་མི་ཤེས་སོ། །བག་མེད་པས་ཕྲོགས་པའི་བློས་འཇིག་རྟེན་ལས་འདས་པའི་རོ་ཡང་མི་ཤེས་ལ་ཆོས་ཀྱི་རོ་ཡང་མི་ཤེས་སོ། །ཡང་བག་མེད་པས་ཕྲོགས་པའི་བློས་ལུས་ཀྱི་རེག་པ་ཡང་མི་ཤེས་ལ། ལུས་ལ་རྟེན་པའི་ལས་ཀྱང་མི་བྱེད། ཁྱིམ་གྱི་ལས་ཀྱང་མི་བྱེད། ལས་ཀྱི་མཐའ་ལ་ཡང་མི་རྟེན། ལེགས་པར་བྱ་བ་ཡང་མ་བྱས། དེའི་ཁྱིམ་གྱི་ཡོ་བྱད་ཀྱང་མི་སོགས་པས་དེའི་ཁྱིམ་དབུལ་བར་འགྱུར་རོ། །འཇིག་རྟེན་ལས་འདས་པའི་ལས་ཀྱང་མི་བྱེད། བླ་མ་རྣམས་ལ་ཡང་མི་སྟེན་ཅིང་། གསོང་པོར་སྨྲ་བ་དང་ཕྱག་འཚལ་བའི་ངོ་བོ་ཉིད་མ་ཡིན་ཏེ། བག་མེད་པས་ཕྲོགས་པའི་བློས་ནི་རེག་པ་ཡང་མི་ཤེས་སོ། །དེ་བཞིན་དུ་ཡིད་ཀྱིས་ཀྱང་གཙང་བ་དང་མི་གཙང་བ་དང་། དགེ་བ་དང་མི་དགེ་བ་དང་ལུང་དུ་བསྟན་པ་དང་ལུང་དུ་མ་བསྟན་པའི་ཆོས་རྣམས་མི་ཤེས་ལ། དེ་ཤི་བའི་ཚེ་འཆི་བའི་ཆད་པས་ཉེན་ནས་ཤིན་ཏུ་སྡུག་བསྔལ་ཏེ། གཤིན་རྗེའི་མིའི་དབང་དུ་འགྱུར་རོ། །དེ་ལྟ་བས་ན་ཆོས་གཅིག་ཅིག་སྤང་བར་བྱ་བ་ནི་འདི་ལྟ་སྟེ། བག་མེད་པ་ཡིན་ནོ། །ཆོས་གཉིས་བསྒོམ་པར་བྱ་སྟེ། ཞི་གནས་དང་ལྷག་མཐོང་ངོ་ཞེས་གང་སྨྲས་པ། དེ་གཉིས་ནི་མྱ་ངན་ལས་འདས་པའི་ལམ་སྟོན་པ་ཤིན་ཏུ་གྱ་ནོམ་པའོ། །དེ་ལ་ཞི་གནས་ཞེས་བྱ་བ་ནི་ཆོས་སྐྱེས་པ་དང་མ་སྐྱེས་པ་རྣམས་ཞི་བར་བྱེད་པ་ཡིན་ནོ། །ལུས་དང་ཆོས་དང་སེམས་དང་སེམས་ཀྱི་ཆོས་དང་སེམས་མེད་པའི་ཆོས་དང་ཕྱོགས་དཀར་པོ་དང་ཕྱོགས་ནག་པོ་མཐོང་བས་ལྷག་མཐོང་ངོ་། །སྐྱོན་གསུམ་སྤང་བར་བྱའོ་ཞེས་གང་སྨྲས་པ། དེ་ལ་མི་གཙང་བས་ནི་འདོད་ཆགས་སྤང་བར་བྱའོ། །བྱམས་པས་ནི་ཞེ་སྡང་སྤང་བར་བྱའོ། །ཡེ་ཤེས་ཀྱིས་ནི་གཏི་མུག་སྤང་བར་བྱ་སྟེ་དེ་ལྟར་ཕྱོགས་གསུམ་མོ། །ཕྱོགས་གསུམ་གྱི་གཉེན་པོ་ཡང་གསུམ་སྟེ་དེ་དག་ཀྱང་བག་མེད་པས་སྤོང་བར་
མི་བྱེད་དོ། །དེ་ཕྱིས་འཆི་བའི་དུས་ཡང་དག་པར་བྱུང་བ་ན་གཤིན་རྗེའི་མིའི་དབང་དུ་འགྱུར་རོ། །འཕགས་པའི་བདེན་པ་བཞི་གང་ཞེ་ན། འདི་ལྟ་སྟེ། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་ལམ་མོ་ཞེས་གང་སྨྲས་པ། དེ་ལ་སྡུག་བསྔལ་བ་ནི་ལུས་དང་སེམས་ཀྱིའོ། །ཀུན་འབྱུང་བ་ནི་ཕུང་པོ་དང་ཁམས་དང་སྐྱེ་མཆེད་རྣམས་ཀྱི་ཀུན་འབྱུང་བའོ། །འགོག་པ་ནི་ཞི་བའོ། །ལམ་ནི་ཡན་ལག་བརྒྱད་དེ། འཕགས་པའི་བདེན་པ་བཞི་པོ་འདི་དག་བསྒོམ་པར་བྱའོ། །ལྔ་ཞིག་ལེགས་པར་བསྲུང་བར་བྱའོ་ཞེས་གང་སྨྲས་པ་ཡུལ་ལྔ་སྟེ། གཟུགས་དང་། སྒྲ་དང་། དྲི་དང་། རོ་དང་། རེག་བྱ་འདི་ལྔ་བསྲུང་བར་བྱ་བ་ཡིན་ནོ། །དེ་ཁོ་ན་ཉིད་ཡོངས་སུ་ཤེས་པར་བྱ་བ་གང་ཡིན་ཞེ་ན། བསྲུང་བར་བྱ་བ་དྲུག་པོ་འདི་ལྟ་སྟེ། མིག་ལ་སོགས་པ་དབང་པོ་དྲུག་ཡུལ་རྣམས་ལ་བསྲུང་བར་བྱ་བ་ཡིན་ནོ། །བདུན་ཞིག་ལེགས་པར་ཤེས་པར་བྱ་བ་གང་སྨྲས་པ། གང་ཞེ་ན་འདི་ལྟ་སྟེ། བྱང་ཆུབ་ཀྱི་ཡན་ལག་བདུན་ཡིན་ཏེ་བདུན་པོ་དེ་བྱང་ཆུབ་ཀྱི་ཡན་ལག་ཏུ་འགྱུར་རོ། །དཔེར་ན་ལུས་ཀྱི་ཡན་ལག་དང་། གྲོང་ཁྱེར་གྱི་ཡན་ལག་དང་། གནས་ཀྱི་ཡན་ལག་ཏུ་འགྱུར་བ་དེ་བཞིན་དུ་འདི་དག་བྱང་ཆུབ་ཀྱི་ཡན་ལག་ཏུ་འགྱུར་རོ། །དེ་དག་ཀྱང་གང་ཞེ་ན་འདི་ལྟ་སྟེ། དྲན་པ་ཡང་དག་བྱང་ཆུབ་ཀྱི་ཡན་ལག་དང་། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང་། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང་། དགའ་བ་ཡང་དག་བྱང་ཆུབ་ཀྱི་ཡན་ལག་དང་། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང་། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ །དེ་ལ་དྲན་པ་ཡང་དག་བྱང་ཆུབ་ཀྱི་ཡན་ལག་གི་མཚན་ཉིད་ཅི་ཡིན་ཞེ་ན་འདི་ལྟ་སྟེ། འདུས་བྱས་ཀྱི་ཆོས་ཀྱི་ཉེས་དམིགས་ཀྱི་ཆོས་དེ་ཁོ་ན་ཉིད་བདེན་པ་བདེན་པར་དྲན་པ་དང་། མྱ་ངན་ལས་འདས་པ་ཞི་བ་བསགས་པར་དྲན་པ་ཡིན་ཏེ། དེ་ནི་དྲན་པ་ཡང་དག་བྱང་ཆུབ་ཀྱི་ཡན་ལག་དེའི་དང་པོ་ཡིན་ནོ། །ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གཉིས་པ་དེའི་མཚན་ཉིད་ཅི་ཡིན་ཞེ་ན་འདི་ལྟ་སྟེ།
ཤེས་རབ་ཀྱིས་དོན་དམ་པར་འབྱེད་པར་བྱེད་དོ། །འབྱེད་པ་ཞེས་བྱ་བ་ནི་ཆོས་རྣམས་ཀྱི་དེ་ཁོ་ནའི་མཚན་ཉིད་ཡིན་ཏེ། འདི་ནི་ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ཡིན་ནོ། །དོན་དེ་དག་ཉིད་ཡང་དང་ཡང་ཡིད་ལ་བྱེད་ཅིང་འབད་པ་དང་འགྲུས་པ་དང་བརྩོན་པར་འགྱུར་ཏེ། དེ་ནི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ཡིན་ནོ། །ཡང་ཡིད་ལ་བྱེད་པར་མངོན་པར་འདོད་ཅིང་དགའ་བ་ཉིད་དུ་འགྱུར་བ་ནི། དགའ་བ་ཡང་དག་བྱང་ཆུབ་ཀྱི་ཡན་ལག་ཡིན་ནོ། །ཡང་དོན་དེ་དག་ཉིད་ཡིད་ལ་བྱེད་ཅིང་ལུས་ཀྱི་ཆོས་དང་སེམས་ཀྱི་ཆོས་ཉིད་ཇི་ལྟར་དེ་ལས་སུ་རུང་བ་ཉིད་དང་འཇམ་པ་དང་ཡང་དེ་ལྟར་རྣལ་འབྱོར་ལ་བདེ་བ་འདུ་བ་ཉིད་དུ་འགྱུར་བ་ནི། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ཡིན་ནོ། །ཡང་དོན་དེ་དག་ཉིད་ཡིད་ལ་བྱེད་ཅིང་དམིགས་པ་ལས་གཞན་དུ་མི་གནས་པ་དེས་སེམས་འཛིན་པར་འགྱུར་བ་ནི། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ཡིན་ནོ། །ཡང་ཏིང་ངེ་འཛིན་དེ་དག་ཉིད་བཏང་སྙོམས་སུ་བློ་གཞན་དུ་མི་འགྱུར་བ་ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ཡིན་ནོ། །བྱང་ཆུབ་ཀྱི་ཡན་ལག་གི་འབྲས་བུ་སྣ་ཚོགས་སུ་འབྱུང་སྟེ། ཡེ་ཤེས་སྣ་ཚོགས་དང་། ཚུལ་ཁྲིམས་སྣ་ཚོགས་དང་། ཉོན་མོངས་པ་སྤོང་བ་སྣ་ཚོགས་འབྱུང་ངོ་། །བྱང་ཆུབ་ཀྱི་ཡན་ལག་འདི་རྣམས་དམིགས་པ་གཅིག་ལ་གོང་ནས་གོང་དུ་རིམ་པར་འཕེལ་ལ་འབྲས་བུ་ནི་ཐ་དད་པར་འབྱུང་ངོ་། །ལྷ་དག་དེ་ལྟར་བྱང་ཆུབ་ཀྱི་ཡན་ལག་བདུན་ལ་བག་ཡོད་པས་བལྟ་བར་བྱ་ཞིང་ཡིད་ལ་བྱའོ། །འདི་ལ་མྱོས་པ་མེད་པའི་བདེ་བ་ཚོལ་བ་འཇིག་རྟེན་ཕ་རོལ་ལ་འཇིགས་སྐྲག་པ། མྱ་ངན་ལས་འདས་པའི་གྲོང་གི་ལམ་ཚོལ་བའི་འཕགས་པའི་ལམ་ཡན་ལག་བརྒྱད་པ་ནི། འཕགས་པའི་བདེན་པ་ཡང་དག་པའི་ལྟ་བ་དང་། འཕགས་པའི་བདེན་པ་ཡང་དག་པའི་རྟོག་པ་དང་། འཕགས་པའི་བདེན་པ་ཡང་དག་པའི་ངག་དང་། འཕགས་པའི་བདེན་པ་ཡང་དག་པའི་ལས་ཀྱི་མཐའ་དང་། འཕགས་པའི་བདེན་པ་ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །ལྷ་དག་
དེ་ལ་འཕགས་པའི་བདེན་པ་འདི་དག་ཐམས་ཅད་ཅི་ཡིན་ཞེ་ན། འབྲས་བུ་ནི་ཅི་ཡོད། མཚན་ཉིད་ནི་གང་ཡིན། འཕགས་པའི་ལམ་ཡན་ལག་བརྒྱད་པ་ཅི་ཞིག་དང་ལྡན་ཞེ་ན། དེ་ལ་འཕགས་པའི་བདེན་པ་ཡང་དག་པའི་ལྟ་བ་ནི་ཡང་དག་པ་ཇི་ལྟ་བ་བཞིན་ལྟ་བ་ཡིན་ཏེ། ཆོས་རྣམས་ཀྱི་རང་གི་མཚན་ཉིད་དང་སྤྱིའི་མཚན་ཉིད་ལ་ཡང་དག་པ་ཇི་ལྟ་བ་བཞིན་ལྟ་བ་ཡིན་ནོ། །ཆོས་དེ་དག་ཉིད་ལ་སེམས་བསྐྱེད་པ་ནི་ཡང་དག་པའི་རྟོག་པའོ། །ཡང་དག་པའི་ངག་བསྡུ་བ་ནི་ཡང་དག་པའི་རྟོག་པས་ངག་གི་སྡོམ་པ་བརྫུན་ལ་སོགས་པ་རྣམ་པ་བཞི་ལྡོག་པའི་སྡོམ་པ་འདི་ནི་ཡང་དག་པའི་ངག་ཡིན་ནོ། །ལུས་ཀྱིས་ཉེས་པར་སྤྱད་པ་རྣམ་པ་གསུམ་ལྡོག་ཅིང་ཡང་དག་པར་ལེན་པ་འདི་ནི་ཡང་དག་པའི་ལས་ཀྱི་མཐའ་ཡིན་ནོ། །མི་དགེ་བའི་ཆོས་ཀྱི་འཚོ་བ་ལྡོག་ཅིང་སྡོམ་པ་འདི་ནི་ཡང་དག་པའི་འཚོ་བ་ཡིན་ནོ། །དོན་དེ་དག་ཉིད་ཡིད་ལ་བྱེད་ཅིང་བརྩོན་འགྲུས་འཇུག་པ་གང་ཡིན་པ་འདི་ནི་ཡང་དག་པའི་རྩོལ་བ་ཡིན་ནོ། །ཆོས་ཀྱི་དོན་དེ་དག་ཉིད་ཡིད་ལ་བྱེད་ཅིང་ཇི་ལྟར་སྐྱེས་བུ་དམ་པའི་བརྗེད་པ་མེད་པ་འདི་ནི་ཡང་དག་པའི་དྲན་པ་ཡིན་ནོ། །ཆོས་ཀྱི་དོན་ཡང་དག་པ་དེ་དག་ཉིད་ཡིད་ལ་བྱེད་ཅིང་། སེམས་རྩེ་གཅིག་པ་ཉིད་དང་ངེས་པ་ཉིད་དུ་བྱེད་པ་གང་ཡིན་པ་དེ་དག་ནི་ཡང་དག་པའི་ཏིང་ངེ་འཛིན་ཡིན་ནོ། །འཕགས་པའི་ལམ་ཡན་ལག་བརྒྱད་པ་འདི་དག་ལ་དམིགས་པར་བྱེད་པ་གང་ཡིན་པ་དེ་ནི་འཆི་བའི་ཚེ། གཤིན་རྗེའི་མི་རྣམས་ཀྱི་དབང་དུ་མི་འགྱུར་རོ། །ཡང་སེམས་ཅན་དགུའི་གནས་རྒྱ་ཆེར་བལྟ་བར་བྱ་སྟེ་འདི་ལྟ་སྟེ། ཚོར་བ་དང་། འདུ་ཤེས་དང་། སེམས་པ་དང་། རེག་པ་དང་། ཡིད་ལ་བྱེད་པ་དང་། འདུན་པ་དང་། མོས་པ་དང་། དྲན་པ་དང་། ཏིང་ངེ་འཛིན་དང་དད་པ་སྟེ། ས་ཆེན་པོ་པ་ཆོས་གཙོ་བོ་བཅུ་པོ་འདི་དག་ནི་སེམས་དང་ལྷན་ཅིག་ཁོ་ན་སྐྱེ་བར་འགྱུར་རོ། །དེ་རྣམས་ཀྱི་མཚན་ཉིད་ཡོངས་སུ་ཤེས་པར་བྱ་བ་ནི་ཆོས་དེའི་མཚན་ཉིད་གང་ཡིན་པའི་མཚན་ཉིད་ནི་ཐ་དད་པ་ཡིན་ལ། ཆོས་དེ་དག་ནི་ཉི་མའི་འོད་ཟེར་ལྟར་དུས་གཅིག་ཏུ་འབྱུང་སྟེ། ཆོས་དེ་དག་གི་མཚན་ཉིད་ནི་མི་མང་མི་ཉུང་བར་སེམས་དང་ལྷན་ཅིག་འབྱུང་ངོ་། །དེ་ལ་འདུ་ཤེས་ནི་ཡང་དག་པར་
ཤེས་པར་བྱེད་པའི་མཚན་ཉིད་ཡིན་ཏེ། ཆོས་རྣམས་སོ་སོའི་ངོ་བོའི་མཚན་ཉིད་དང་ལྡན་པ་ཡང་དག་པར་ཤེས་པ་གང་ཡིན་པ་དེ་འདུ་ཤེས་ཡིན་ནོ། །སེམས་པ་ཞེས་བྱ་བ་ནི་དགེ་བ་དང་མི་དགེ་བ་དང་ལུང་དུ་མ་བསྟན་པ་རྣམ་པ་གསུམ་ལ་ཡིད་ཀྱི་གཡོ་བའོ། །ཡང་རྣམ་པ་གསུམ་སྟེ། ལུས་ལ་རྟེན་པའམ། ངག་ལ་རྟེན་པའམ། ཡིད་ལ་རྟེན་པའི་མཚན་ཉིད་ཡིན་ནོ། །གསུམ་འདུས་པ་ལས་རེག་པ་མྱོང་བར་འགྱུར་བ་གསུམ་འབྱུང་ངོ་། །མྱོང་བར་འགྱུར་བ་གསུམ་གྱི་གཙོ་བོ་ཇི་ལྟ་བུ་ཡིན་ཞེ་ན། བདེ་བ་མྱོང་བར་འགྱུར་བ་དང་། སྡུག་བསྔལ་མྱོང་བར་འགྱུར་བ་དང་། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་མྱོང་བར་འགྱུར་བའོ། །གཙོ་བོ་ཡིད་ལ་བྱེད་པ་ཞེས་བྱ་བ་ནི་ཆོས་རྣམས་ལ་འཇུག་པ་ཡིན་ནོ། །འདུན་པ་ཞེས་བྱ་བ་ནི་བྱ་བའི་བསམ་པ་གང་ཡིན་པའོ། །གཙོ་བོ་མོས་པ་ཞེས་བྱ་བ་ནི་གང་གིས་སྤོབས་པ་སྐྱེ་བར་འགྱུར་བའི་སྤོབས་པ་ཡིན་ནོ། །དད་པ་ཞེས་བྱ་བ་ནི་དད་པ་ཅན་ཉིད་དོ། །གཙོ་བོ་བརྩོན་འགྲུས་ཞེས་བྱ་བ་ནི་སྤྲོ་བའོ། །དྲན་པ་ཞེས་བྱ་བ་ནི་དམིགས་པ་མངོན་པར་མ་བརྗེད་པ་ཉིད་དེ། སེམས་རྨོངས་པ་མེད་པའོ། །གཙོ་བོ་ཏིང་ངེ་འཛིན་ཅེས་བྱ་བ་ནི་སེམས་རྩེ་གཅིག་པ་ཉིད་དོ། །ཤེས་རབ་ཅེས་བྱ་བ་ནི་ཆོས་རྣམ་པར་འབྱེད་པ་ཡིན་ཏེ། གང་གིས་ཆོས་རྣམས་རབ་ཏུ་རྣམ་པར་འབྱེད་པར་བྱེད་པའོ། །གཞན་ཡང་ས་ཆེན་པོ་པ་གཞན་བཅུ་ཡོད་ལ། ཆོས་དེ་དག་སྒྲུབ་པ་གང་ཡིན་པ་དེ་ནི་འཆི་བའི་ཚེ། གཤིན་རྗེའི་མིའི་དབང་དུ་འགྱུར་ཏེ་འདི་ལྟ་སྟེ། མ་དད་པ་དང་། འགྱོད་པ་དང་། བརྗེད་ངས་པ་དང་། སེམས་གཡེངས་པ་དང་། ཤེས་རབ་འཆལ་པ་དང་། ཚུལ་བཞིན་མ་ཡིན་པ་ཡིད་ལ་བྱེད་པ་དང་། ལོག་པར་མོས་པ་དང་། རྒོད་པ་དང་། མ་རིག་པ་དང་། བག་མེད་པའོ། །ཆོས་བཅུ་པོ་འདི་དག་ནི་ཉོན་མོངས་པའི་ས་ཆེན་པོ་རྣམས་ཡིན་ཏེ། ཉོན་མོངས་པའི་སྲིད་པ་སྐྱེད་པ་གཤིན་རྗེའི་མིས་ཐོབ་པའི་རྒྱུ་དག་ཡིན་ནོ། །ད་ནི་གཙོ་བོ་ཇི་སྐད་བཤད་པ་བསྟན་པ་འདི་རྣམས་ཀྱི་མཚན་ཉིད་བཤད་པར་བྱའོ། །དེ་ལ་མ་དད་པ་ཞེས་བྱ་བ་ནི་མོས་པ་མེད་པ་ཡིན་ཏེ། གང་གིས་ཆོས་
རྣམས་ལ་མོས་པ་མེད་པའོ། །ལེ་ལོ་ཞེས་བྱ་བ་ནི་བརྩོན་འགྲུས་གཏོང་བ་ལེ་ལོ་ཉིད་ཡིན་ནོ། །བརྗེད་ངས་པ་ཞེས་བྱ་བ་ནི་ཆོས་རྣམས་ལ་མི་དྲན་པ་གང་ཡིན་པའོ། །སེམས་གཡེངས་པ་ཞེས་བྱ་བ་ནི་དམིགས་པ་དུ་མར་འགྱུར་བའོ། །ཤེས་རབ་འཆལ་པ་ཞེས་བྱ་བ་ནི་སེམས་མི་མཁས་པའོ། །ཚུལ་བཞིན་ཡིད་ལ་མི་བྱེད་པ་ནི་ལམ་མ་ཡིན་པས་ཆོས་རྣམས་ལ་ཚུལ་བཞིན་དུ་སེམས་པར་མི་བྱེད་ཅིང་མི་གཙང་བ་ལ་གཙང་ངོ་སྙམ་དུ་སེམས་པའོ། །གཙོ་བོ་ལོག་པར་མོས་པ་ཞེས་བྱ་བ་ནི་ལོག་པར་འཛིན་པ་ལོག་པར་བཟུང་ནས་དམ་དུ་བྱེད་པའོ། །གཙོ་བོ་རྒོད་པ་ཞེས་བྱ་བ་ནི་སེམས་རྣམ་པར་མ་ཞི་བའོ། །མ་རིག་པ་ཞེས་བྱ་བ་ནི་ཁམས་གསུམ་པའི་ཆོས་མི་ཤེས་པའོ། །བག་མེད་པ་ཞེས་བྱ་བ་ནི་གང་གིས་དགེ་བའི་ཆོས་རྣམས་མི་སྒྲུབ་པ་ཡིན་ཏེ། ཉོན་མོངས་པ་དེ་རྣམས་ནི་ས་ཆེན་པོ་པའི་ཆོས་དམད་པར་བྱ་བ་ཡིན་ནོ། །ཆོས་བཅུ་པོ་གཞན་ས་ཆུང་ངུ་པ་ཞེས་བྱ་བ་གང་ཡིན་པ་འབྱུང་སྟེ། དེ་དག་གང་ཞེ་ན་འདི་ལྟ་སྟེ། ཁྲོ་བ་དང་། འཁོན་དུ་འཛིན་པ་དང་། སྟོན་པ་དང་། འཚིག་པ་དང་། སྒྱུ་དང་། གཡོ་དང་། ཕྲག་དོག་དང་། སེར་སྣ་དང་། ང་རྒྱལ་དང་། ལྷག་པའི་ང་རྒྱལ་ཡིན་ནོ། །གཙོ་བོ་ཆོས་བཅུ་པོ་འདི་དག་ནི་ས་ཆུང་ངུས་བསྡུས་པ་ཡིན་ལ་མ་འོངས་པ་དང་ལྡན་པའི་རྐྱེན་ས་ཆུང་ངུ་པ་ཡིན་ནོ། །དེ་ལ་ཁྲོ་བ་ཞེས་བྱ་བ་ནི་སེམས་འཁྲུགས་ཤིང་ཁྲོས་པ་ཉིད་ཡིན་ནོ། །འཁོན་དུ་འཛིན་པ་ཞེས་བྱ་བ་ནི་དགྲ་ལ་དམ་དུ་སེམས་པ་ཉིད་ཡིན་ནོ། །སྟོན་པ་ཞེས་བྱ་བ་ནི་སྡིག་པ་གསུམ་གྱི་འཆི་བའོ། །རབ་ཏུ་འཚིག་པ་ཞེས་བྱ་བ་ནི་ཆོས་མ་ཡིན་པ་ལ་དམ་དུ་འཛིན་པའོ། །སྒྱུ་ཞེས་བྱ་བ་ནི་སླུ་བ་ཡིན་ཏེ་གང་གིས་སླུ་བར་བྱེད་པའོ། །སྐྱེ་མཆེད་བཅུ་གཉིས་ཤེས་པར་བྱ་ཞེས་འབྱུང་བ་དེ་དག་གི་གཙོ་བོ་གང་ཡིན་ཞེ་ན། མིག་དང་། རྣ་བ་དང་། སྣ་དང་། ལྕེ་དང་། ལུས་དང་ཡིད་དེ། ནང་གི་སྐྱེ་མཆེད་རྣམས་དང་། དེ་དག་གི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་ཆོས་ཏེ་ཕྱིའི་སྐྱེ་མཆེད་རྣམས་ཡོངས་སུ་ཤེས་པར་བྱ་ཞིང་། མཚན་ཉིད་དང་། ངོ་བོ་ཉིད་དང་འབྱུང་བ་ཤས་ཆེ་བ་རྣམ་པ་གསུམ་ཡོངས་སུ་ཤེས་པར་བྱའོ། །དེ་ལ་མིག་གི་མཚན་ཉིད་ནི་འབྱུང་བ་ཆེན་པོ་དང་བ། གཟུགས་སོ་སོར་
རིག་པར་བྱེད་པ་ཡིན་ཏེ་དེའི་རྒྱུ་ནི་མིག་ཡིན་ནོ། །དེ་བཞིན་དུ་རྣ་བ་ལ་སོགས་པ་རང་གི་མཚན་ཉིད་ཡུལ་གྱི་ཕྱོགས་ཀྱིས་ཁོང་དུ་ཆུད་པར་བྱ་སྟེ། དེ་ནི་མཚན་ཉིད་ཡིན་ནོ། །གཙོ་བོའི་ངོ་བོ་ཉིད་ཇི་ལྟར་ཤེས་པར་བྱ་ཞེ་ན། ངོ་བོ་ཉིད་ཅེས་བྱ་བ་ནི་ཕྱིན་ཅི་མ་ལོག་པ་ཡིན་ཏེ། རྒྱུ་དང་རྐྱེན་ལྔ་དག་ལས་མིག་གི་རྣམ་པར་ཤེས་པ་འབྱུང་ངོ་། །གང་དག་ལས་འབྱུང་ཞེ་ན། མིག་དང་། གཟུགས་དང་། སྣང་བ་དང་། ནམ་མཁའ་དང་ཡིད་ལ་བྱེད་པ་དག་ལས་འབྱུང་ལ། རྣ་བའི་རྣམ་པར་ཤེས་པ་ནི་དེ་ལྟར་མི་འབྱུང་སྟེ། མུན་པའམ་མུན་པ་མ་ཡིན་པ་ལ་ཡང་སྒྲ་ཐོས་པར་རུང་ངོ་། །དེ་ལ་སྣང་བ་གཙོ་བོ་མ་ཡིན་ཏེ་ཅུང་ཟད་ཀྱང་བྱེད་པ་མེད་དོ། །སྣ་དང་། ལྕེ་དང་། ལུས་དང་། ཡིད་ལ་ཡང་དེ་བཞིན་དུ་སྣང་བ་གཙོ་བོ་མ་ཡིན་ཏེ་ཅུང་ཟད་ཀྱང་བྱེད་པ་མེད་དོ། །ཡིད་ཀྱི་རྣམ་པར་ཤེས་པ་ལ་ནི་སྣང་བ་འབྱུང་བར་ཡང་འགྱུར་ལ་མི་འབྱུང་བར་ཡང་འགྱུར་རོ། །ཇི་ལྟར་འབྱུང་བར་འགྱུར་ལ་ཇི་ལྟར་འབྱུང་བར་མི་འགྱུར་ཞེ་ན། མིག་གི་རྣམ་པར་ཤེས་པས་དོན་མྱོང་བའི་ཡིད་ཀྱི་རྣམ་པར་ཤེས་པ་འབྱུང་བ་གང་ཡིན་པའི་དམིགས་པ་དེ་ལ་སྣང་བ་མེད་ན་འབྱུང་བར་མི་འགྱུར་རོ། །ལྷག་མ་རྣམས་ལ་ནི་མེད་ཀྱང་འབྱུང་བར་འགྱུར་རོ། །ཡང་སྐྱེ་མཆེད་རྣམས་ལ་འབྱུང་བ་ཤས་ཆེ་བ་མེད་ན་མི་འབྱུང་བ་ཡོངས་སུ་ཤེས་པར་བྱའོ། །མེད་ན་མི་འབྱུང་བ་ཇི་ལྟར་ཤེས་པར་བྱ་ཞེ་ན། འབྱུང་བ་ཆེན་པོ་བཞི་དག་གི་ཕན་ཚུན་གནས་སུ་གྱུར་པ། མངོན་པར་འཕེལ་བ་དང་ཟད་པར་འགྱུར་རོ། །དེ་ལ་མིག་ལ་ནི་མེ་དང་སའི་ཁམས་ཀྱི་ཤས་ཆེའོ། །སྣ་དང་ལུས་ལ་ནི་རླུང་གི་ཁམས་ཀྱི་ཤས་ཆེའོ། །ལྕེ་ལ་ནི་ཆུའི་ཁམས་ཀྱི་ཤས་ཆེའོ། །རྣ་བ་ལ་ནི་ནམ་མཁའི་ཁམས་ཀྱི་ཤས་ཆེ་སྟེ། དེ་ཡང་གང་ན་མགུལ་པ་དང་བུ་གའི་ནམ་མཁའ་ཤས་ཆེ་བས་ཟིལ་གྱིས་གནོན་པར་མཐོང་ངོ་། །དེ་ལྟར་རྣ་བ་དེའི་འཛིན་པ་འབྱུང་སྟེ། དེ་ལྟར་སྐྱེ་མཆེད་རྣམས་ཀྱི་ཤས་ཆེ་བ་དང་ཆུང་བ་སོ་སོར་ཤེས་པར་བྱའོ། །ཡང་སྐྱེ་མཆེད་དེ་རྣམས་ལ་རྟོག་པར་བྱེད་དེ། ཉེ་བར་འཛིན་པ་ནི་གང་ཞིག་ཡིན། རིང་བར་འཛིན་པ་ནི་གང་ཞིག་ཡིན་ཞེ་ན། དེ་ལ་སྣ་དང་ལྕེ་
དང་ལུས་ནི་ཉེ་བར་འཛིན་པ་ཡིན་ནོ། །མིག་ནི་ཧ་ཅང་རིང་བ་ཡང་མ་ཡིན། ཧ་ཅང་ཉེ་བ་ཡང་མ་ཡིན་པར་འཛིན་པ་ཡིན་ནོ། །རྣ་བ་ནི་ཧ་ཅང་རིང་བར་འཛིན་པ་མ་ཡིན་ནོ། །སྣ་ནི་ཤིན་ཏུ་ཉེ་བར་འཛིན་པ་ཡིན་ཏེ། ཤིན་ཏུ་ཉེ་བ་ནང་ན་ཡོད་པའི་སྣ་ཆུ་དྲི་མི་ཞིམ་པ་ཇི་ལྟར་མྱོང་བ་རྣམས་ལ་སྣོམ་པར་བྱེད་དོ། །དེ་བཞིན་དུ་རྣ་བ་ཡང་ནང་དུ་ཞུགས་པའི་རླུང་གི་སྒྲ་ཐོས་སོ། །རྣམ་པར་ཤེས་པ་དེ་དག་ཐམས་ཅད་ཀྱང་རྣམ་པར་ཤེས་པ་གཉིས་ཀྱིས་ཤེས་ཏེ། མིག་གི་རྣམ་པར་ཤེས་པ་དང་ཡིད་ཀྱི་རྣམ་པར་ཤེས་པའོ། །ཡང་དག་པར་འབྲེལ་བ་དེ་དག་ཐམས་ཅད་ནི་ཇི་ལྟར་མེ་གང་ཞིག་ལ་བུད་ཤིང་ཐ་དད་པ་ལས་མེ་ཐ་དད་པར་འགྱུར་བ་དེ་ལྟར་རྣམ་པར་ཤེས་པ་རྣམས་ཀྱང་རྒྱུ་དང་རྐྱེན་ཐ་དད་པ་ལ་རྟེན་པ་ལས་རྣམ་པར་ཤེས་པ་ཐ་དད་པར་འབྱུང་ངོ་། །དེ་ལྟར་སྐྱེ་མཆེད་རྣམས་ཀྱི་གཙོ་བོ་ཤེས་པ་གང་ཡིན་པ་དེ་ནི་བག་མེད་པ་ལ་གནས་པར་མི་འགྱུར་ཞིང་། དེ་དེ་རྣམས་ལ་ཆགས་པར་མི་འགྱུར། སློང་བར་མི་འགྱུར། ཞེ་སྡང་འབྱུང་བར་མི་འགྱུར་རོ། །སྐྱེས་བུ་དམ་པ་ནི་འཆི་བའི་ཚེ། གཤིན་རྗེའི་མི་རྣམས་ཀྱིས་འཇིགས་པར་མི་འགྱུར་ཞིང་བཞིན་མི་སྡུག་པར་བསྒྱུར་བ་རྣམས་ཀྱིས་འཇིགས་པར་མི་འགྱུར། ལིག་རིས་ལག་པ་ཕྱིན་ཅི་ལོག་ཏུ་བཅིངས་པར་མི་འགྱུར། གཤིན་རྗེའི་འཇིག་རྟེན་མཐོང་བར་མི་འགྱུར། སེམས་ཅན་དམྱལ་བ་དང་ཡི་དགས་དང་དུད་འགྲོའི་ནང་དུ་སྐྱེ་བར་མི་འགྱུར་རོ། །དེ་ཤིན་ཏུ་བདེ་བ་དང་ལྡན་པར་འགྱུར་ཞིང་། མཐའ་ལས་བྱུང་བའི་ཤིན་ཏུ་བདེ་བ་མྱོང་བར་འགྱུར་ལ་བག་མེད་པས་ཕྲོགས་པར་མི་འགྱུར་རོ། །ཡང་སྐྱེ་མཆེད་དེ་དག་ཉིད་ལ་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པའི་གནས་དང་རྟེན་ཟིལ་གྱིས་གནོན་ཅིང་སོ་སོར་རྟོག་པར་བྱེད་པ་ནི་བག་མེད་པའི་དབང་དུ་མི་འགྱུར་རོ། །མིག་གི་རྣམ་པར་ཤེས་པ་བྱུང་བ་ལ་ཡང་གསོབ་གསོག་སྙིང་པོ་མེད་པ་སྒྱུ་མ་ལྟ་བུར་རྟོག་གོ །དེ་ཞིག་ནས་གཞན་རྣ་བའི་རྣམ་པར་ཤེས་པ་འབྱུང་བ་དེ་ཉིད་ལ་ཡང་། གསོབ་གསོག་སྙིང་པོ་མེད་པ་དང་། དེ་བཞིན་དུ་ནང་གི་སྐྱེ་མཆེད་དྲུག་དང་ཕྱིའི་སྐྱེ་མཆེད་དྲུག་ལ་སོ་སོར་རྟོག་པར་བྱེད་དོ། །སྐྱེ་བ་དང་འཇིག་པ་དག་ན་འཛིན་པར་བྱེད་པ། རོ་མྱང་
བ་དང་བཅས་པ་རྣམས་ལ་མི་བརྟན་པ་དང་གནོད་པ་དང་བཅས་པ་དང་རྒྱུ་དང་རྐྱེན་གཞན་དང་གཞན་དག་ལས་སྐྱེས་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་དེ་ནི་གཟུགས་རྣམས་ཀྱིས་འཕྲོགས་པར་མི་འགྱུར་རོ། །དེ་བཞིན་དུ་མྱོས་པ་མེད་པ་ནི་ལྷའི་འདོད་པ་རྣམས་ལ་སེམས་ཀུན་དུ་གཡེང་བར་མི་འགྱུར་ན། མིའི་འདོད་པ་རྣམས་ལྟ་ཞིག་ག་ལ་འགྱུར། དེ་ནས་བརྒྱ་བྱིན་གྱིས་དེའི་ཚེ། འདི་ལྟར་ཚིགས་སུ་བཅད་དེ་སྨྲས་པ། དགེ་བ་རྣམས་ལ་བགེགས་བྱེད་པ། །སྐྱེ་མཆེད་ཁམས་ལ་རྨོངས་པ་ཡིན། །ཆོས་རྣམས་ཀུན་ལ་བག་མེད་པ། །རབ་ཏུ་འཇུག་པ་ཡོད་པ་ཡིན། །ཉེས་པ་གསུམ་ལ་རྣམ་ཆགས་པ། །ངན་སོང་སྒོར་ནི་ཉེ་བ་གང་། །ཤིན་ཏུ་རྨོངས་པ་སྡིག་པའི་མཆོག །བག་མེད་རབ་ཏུ་འཇུག་པར་བྱེད། །བྱིས་པ་བག་མེད་དགའ་བ་གང་། །དེ་ནི་འཆི་བའི་ལག་ན་གནས། །བག་མེད་པ་ལ་རྟེན་པ་གང་། །དེ་དག་ཐམས་ཅད་འཇིགས་པར་བྱེད། །ཆོས་གཅིག་ལས་ནི་རྣམ་འདས་ཤིང་། །ཆོས་གཉིས་ལ་ནི་སེམས་པ་པོ། །གནས་གསུམ་མཚན་ཉིད་རིག་པ་གང་། །སྐྱེ་བོ་དེ་ནི་བདེ་སྐལ་ལྡན། །གང་ཚེ་ལྷ་རྣམས་བསོད་ནམས་ཟད། །བག་མེད་པ་ཡིས་རྣམ་པར་གཙེས། །བདེ་བས་རྨོངས་པ་ལྟུང་བ་གང་། །དེ་ཚེ་དེ་ལ་སུ་ཞིག་སྐྱོབ། །དེ་ཚེ་ཆོས་གཅིག་དགེ་བ་ནི། །བཟོད་པ་རྒྱ་ཆེར་ཡང་དག་ལྡན། །གང་ཚེ་ཀུན་ནས་འབྱུང་པོ་ལ། །བཟོད་དང་སྙིང་རྗེར་ལྡན་པ་ནི། །འདི་དག་འཆི་བའི་དུས་ཀྱི་ཚེ། །འཇིགས་པ་ཆེ་ལ་དཔུང་དུ་འགྱུར། །དེ་བས་བག་མེད་བྲལ་རྣམས་ཀྱིས། །རབ་ཏུ་བསྒྲིམས་ཏེ་བསྟེན་པར་བྱ། །མ་རིག་པ་ནི་སྤངས་ན་དགེ །།རིག་པ་རྣམས་ནི་རྟག་ཏུ་བསྲུང་། །རིག་པ་མ་རིག་རྣམ་ཤེས་པ། །མི་དེ་དེ་ཡིས་གཙེ་མི་འགྱུར། །འདི་ལྟར་སྐྱེས་བུའི་དོན་ངེས་ཏེ། །གང་ཞིག་བག་མེད་སྤོང་བ་ཡིན། །བག་ཡོད་པ་ལ་དགའ་བ་ཉིད། །དེ་ནི་སྐྱེས་བུའི་དོན་འདོད་དོ། །བག་མེད་འཆིང་བའི་ཞགས་ཡིན་ལ། །དེ་ལས་གྲོལ་བ་བག་ཡོད་པ། །དེ་དག་མཚན་ཉིད་མདོར་བསྡུ་ན། །འཆིང་བ་དང་ནི་ཐར་བར་འགྱུར། །འདི་དག་རིག་ནས་རྟག་ཏུ་ལྷ། །བག་མེད་རྣམས་
ལ་ཆགས་པ་གང་། དེ་ནི་ཕྱི་ནས་འཆི་བའི་ཚེ། །དེ་ཡི་འབྲས་བུ་དེ་ཤེས་འགྱུར། །དེ་ལྟར་བརྒྱ་བྱིན་གྱིས་སྐྱེ་མཆེད་བཅུ་གཉིས་ཀྱི་མཚན་ཉིད་བག་མེད་པར་འགྱུར་བ་རྒྱ་ཆེར་ལྷ་རྣམས་ལ་སྟོན་ཏེ། གང་སྔོན་དགེ་བའི་རྩ་བ་བསྐྱེད་པ། བག་མེད་པ་ཆུང་བ་གང་ཡིན་པ་དེ་དག་ནི་བག་མེད་པ་ལ་ཤིན་ཏུ་གནས་པར་མི་བྱེད་དེ། ཆོས་བཤད་པ་དོན་ཡོད་པར་བྱའོ་སྙམ་ནས་དེ་དག་ཉིད་ཁོང་དུ་ཆུད་པར་བྱེད་དོ། །དབང་པོ་ཡོངས་སུ་མ་སྨིན་པ་རྣམས་ནི། ཆུ་བུར་མ་སྨིན་པ་བརྟོལ་བ་དང་གཟག་པ་དང་བསྐམ་པ་དང་གསོ་བ་བཞིན་དུ་ག་ལ་ཞིག་ཁོང་དུ་ཆུད་པར་འགྱུར་ཏེ་མི་འགྱུར་རོ། །ལྷའི་རྒྱལ་པོ་བརྒྱ་བྱིན་དེས་གོང་ནས་གོང་དུ་ཚིག་གི་རིམ་པ་རེ་རེས་སྐྱེ་མཆེད་བཅུ་གཉིས་དག་གི་མཚན་ཉིད་ཇི་ལྟ་བ་བཞིན་བཤད་ཅིང་། ལྷ་དེ་རྣམས་ལ་རྫུ་འཕྲུལ་རྨད་དུ་བྱུང་བ་དེ་དག་ཀྱང་བསྟན་ནས། དེ་ནས་ཡང་རིམ་གྱིས་བྱུང་བ་དྲན་པ་དང་། འབྲེལ་པ་རྣམས་ཀྱི་མཚན་ཉིད་དང་དམིགས་པ་དང་རྒྱུ་དང་རྐྱེན་དག་བག་མེད་པ་དང་དབྲལ་བར་བྱ་བའི་དོན་དུ་ཁོང་དུ་ཆུད་པར་བྱེད་དོ། །བརྒྱ་བྱིན་དེ་སྲོག་ཆགས་གསོད་པ་སྤྲུལ་པ་བསྟན་པས་འཇིགས་ཤིང་མི་དགའ་བའི་ལྷ་དེ་དག་ཉིད་ངེས་པར་འབྱུང་བའི་ཐབས་ཀྱི་དོན་དང་། ཕན་པར་བྱ་བའི་ཕྱིར་ཡང་དང་ཡང་དུ་ཆོས་སྟོན་པར་བྱེད་དོ། །གཙོ་བོ་སེམས་ལས་བྱུང་བའི་གཡོ་ཞེས་བྱ་བ་ནི་དྲང་པོ་མ་ཡིན་པ་ཉིད་དེ། འཁོར་བར་ཤིན་ཏུ་འཆིང་བར་བྱེད་པ་མ་རུངས་པ་ཉིད་ཡིན་ནོ། །ཕྲག་དོག་ཅེས་བྱ་བ་ནི་གཞན་ལ་གནོད་པར་བྱེད་པའི་ངོ་བོ་ཉིད་ཡིན་ནོ། །གཙོ་བོ་སེར་སྣ་ཞེས་བྱ་བ་ནི་ནོར་རྫས་ཟད་དུ་དོགས་པས་འཇིགས་པ་ཉིད་དང་། སེམས་ལས་བྱུང་བ་བརྐམ་པ་ཉིད་ཡིན་ཏེ། འདི་དག་ནི་ཁམས་གསུམ་ཀུན་གྱི་ས་ལས་བྱུང་བ་ཆུང་ངུ་ཡིན་ནོ། །དེ་དག་ཀྱང་ཁམས་གསུམ་དུ་སོ་སོར་དབྱེ་ན་དུ་ཡོད་ཅེ་ན། ཁྲོ་བ་དང་འཁོན་དུ་འཛིན་པ་དང་ཕྲག་དོག་དང་སེར་སྣ་དང་སྟོན་པ་དང་སྒྱུ་དང་འཚིག་པ་ནི་འདོད་པའི་ཁམས་སུ་འཇུག་ལ། གཡོ་གཅིག་པུ་ནི། འདོད་པའི་ཁམས་དང་ཚངས་པའི་འཇིག་རྟེན་དུ་ཡང་འབྱུང་ངོ་། །ང་རྒྱལ་དང་ལྷག་པའི་ང་རྒྱལ་ནི་ཁམས་གསུམ་ཅར་དུ་འབྱུང་སྟེ། གཙོ་བོ་ཆོས་བཅུ་པོ་འདི་དག་ནི་ས་ཆུང་ངུ་ལས་བྱུང་བ་ཡིན་ནོ། །གཞན་ཡང་གཙོ་བོ་དགེ་བ་ཆོས་
བཅུ་པོ་ས་ཆེན་པོ་ལས་བྱུང་བ་ཡོད་དེ། གང་ཞེ་ན་འདི་ལྟ་སྟེ། ཆགས་པ་མེད་པ་དང་ཞེ་སྡང་མེད་པ་དང་ངོ་ཚ་ཤེས་པ་དང་ཁྲེལ་ཡོད་པ་དང་དད་པ་དང་ཤིན་ཏུ་སྦྱངས་པ་དང་བག་ཡོད་པ་དང་བརྩོན་འགྲུས་དང་བཏང་སྙོམས་དང་འཚེ་བ་མེད་པ་ཡིན་ཏེ། དགེ་བ་འདི་དག་ནི་ས་ཆེན་པོ་ལས་བྱུང་བ་ཡིན་ནོ། །དེ་ལ་འདི་དག་གི་སོ་སོའི་མཚན་ཉིད་འདི་ལྟ་སྟེ། དགེ་བའི་ཆོས་དེ་དག་ཐམས་ཅད་ཀྱི་གཞིར་གྱུར་པ་ནི་ཆགས་པ་མེད་པ་འདི་ཡིན་ཏེ། དེ་དག་ཐམས་ཅད་ཀྱི་རྩ་བར་གྱུར་པ་ཡིན་ནོ། །དེ་བཞིན་དུ་ཞེ་སྡང་མེད་པ་ཡང་ཡིན་ནོ། །ངོ་ཚ་ཤེས་པ་ཞེས་བྱ་བ་ནི་བདག་ཉིད་དབེན་པར་འདུག་ཅིང་བདག་ཉིད་འཇིགས་པར་སེམས་པའོ། །ཁྲེལ་ཡོད་པ་ཞེས་བྱ་བ་ནི་ཕ་རོལ་གྱི་ཁྲེལ་ཡོད་པའོ། །དད་པ་ཞེས་བྱ་བ་ནི་འགྲོ་བའི་དང་བའོ། །ཤིན་ཏུ་སྦྱངས་པ་ཞེས་བྱ་བ་ནི་དགེ་བའི་སེམས་དང་ལུས་ཀྱི་སེམས་ཀྱི་གནས་ངན་ལེན་སེལ་བའི་གནས་ཡིན་ཏེ། རབ་ཏུ་སིམ་པར་བྱེད་པའོ། །བག་ཡོད་པ་ཞེས་བྱ་བ་ནི་དགེ་བའི་ཆོས་རྣམས་སྒྲུབ་པའོ། །བཏང་སྙོམས་ཞེས་བྱ་བ་ནི་བྱ་བ་དང་མི་བྱ་བ་དང་རྒྱུ་དང་རྐྱེན་དག་ལ་སྙོམས་པར་འཇུག་པ་གང་ཡིན་པའོ། །གཙོ་བོ་མི་འཚེ་བ་ཞེས་བྱ་བ་ནི་སེམས་ཅན་རྣམས་ལ་གནོད་པ་མེད་པ་ཡིན་ནོ། །དགེ་བ་འདི་དག་ནི་ས་ཆེན་པོ་ལས་བྱུང་བ་ཡིན་ཏེ་དེ་དག་བཤད་པ་ཡིན་ནོ། །འདི་དག་ལ་སེམས་མི་འཇུག་པ་དེ་དག་ནི་འཆི་བའི་ཚེ། གཤིན་རྗེའི་མི་རྣམས་ཀྱི་དབང་དུ་འགྲོ་ལ། དེ་དག་འཆི་བའི་དུས་དེའི་ཚེ་ཀུན་དུ་དངང་བར་འགྱུར་རོ། །དེ་ཅིའི་ཕྱིར་ཞེ་ན། དགེ་བས་ཡང་དག་པར་མ་ཟིན་པའི་ཕྱིར་རོ། །ཇི་སྐད་བསྟན་པའི་སེམས་དང་སེམས་ལས་བྱུང་བའི་ཆོས་ས་ཆེན་པོ་ལས་བྱུང་བ་རྣམས་དང་། དགེ་བ་ས་ཆེན་པོ་ལས་བྱུང་བ་རྣམས་དང་། ཆུང་ངུ་ས་ཆེན་པོ་ལས་བྱུང་བ་རྣམས་ཀྱི་རང་གི་མཚན་ཉིད་བསྡུས་པའི་མིང་ནི་བཅུ་པ་ཞེས་བྱའོ། །ཡང་གཙོ་བོ་བཅུ་གཅིག་བསྒོམ་པ་ཞེས་བྱ་བ་གང་ཡིན་ཞེ་ན། འདི་ལ་དགེ་སློང་ལུས་དང་ལུས་ལ་རྟོག་པར་བྱེད་དོ། །བརྟགས་ནས་ཀུན་དུ་ཆགས་པར་མི་བྱེད། རྨོངས་པར་མི་བྱེད་ལ་དེ་སེམས་ལ་དམ་དུ་འཛིན་པར་མི་བྱེད་དེ། འདི་ནི་བསྒོམ་པ་དང་པོ་ཡིན་ནོ། །གཞན་ཡང་དགེ་སློང་དེ་བསྒོམ་པ་ལ་
གོམས་པར་བྱེད་དེ། སྔོན་འདོད་པ་ཉེ་བར་སྤྱད་པ་གང་ཡིན་པ་དེ་དག་ལ་སྨོད་པར་བྱེད། རོ་མྱོང་བར་མི་བྱེད། ཡིད་ལ་མི་བྱེད། འགྱོད་པར་བྱེད་སྐྱོན་དུ་འགྲང་བར་བྱེད་པ་འདི་ནི་བསྒོམ་པ་གཉིས་པ་ཡིན་ནོ། །གཞན་ཡང་དགེ་སློང་དེ་བསྒོམ་པ་གོམས་པར་བྱེད་དེ། འདི་ལྟར་བདག་བག་ཡོད་ན། ཡུལ་ཀུན་དང་ལྡན་པའི་ཡུལ་རྣམས་ཀྱིས་མི་འཕྲོགས་ལ། བག་ལ་ཉལ་གྱི་སྦྱོར་བ་ཐམས་ཅད་ཟད་པར་འགྱུར་ཏེ། དེ་ལྟར་བག་ཡོད་པ་ལ་གནས་པ་ནི། བག་ཡོད་པ་དེ་སྒོམ་པར་བྱེད་ཅིང་། གོམས་པར་བྱེད་པ་འདི་ནི་བསྒོམ་པ་གསུམ་པ་ཡིན་ནོ། །གཞན་ཡང་དགེ་སློང་དེ་བསྒོམ་པ་གོམས་པར་བྱེད་དེ། དགེ་བའི་ཆོས་རྣམས་ཡིད་ལ་བྱེད་ཅིང་དེ་དག་ཀྱང་གོམས་པར་བྱེད་པ་ནི། འདི་ལྟར་བདག་གི་དགེ་བའི་ཆོས་སྐྱེས་པ་འདི་དག་ནི་རྣམ་པར་སྨིན་པ་བདེ་བ་རྒྱུ་བདེ་བ་རྐྱེན་བདེ་བ་ཡིན་ཏེ། བདག་ལ་རྣམ་པར་སྨིན་པ་བདེ་བ་དེ་དག་འབྱུང་བར་འགྱུར་རོ་སྙམ་མོ། །དེ་བཞིན་དུ་མི་དགེ་བ་རྣམས་ལ་ཡང་རྟོག་པར་བྱེད་ལ། དེའི་བསྒོམ་པ་དེ་ནི་ཡང་དག་པར་འགྱུར་ཏེ། འདི་ནི་བསྒོམ་པ་བཞི་པ་ཡིན་ནོ། །གཞན་ཡང་དགེ་སློང་དེ་བསྒོམ་པ་གོམས་པར་བྱེད་དེ། འདི་ལྟར་བདག་ལ་ཚོར་བ་བདེ་བ་སྐྱེས་པ་དེ་ཅི་ལས་བྱུང་། རང་བཞིན་ཅི་ཡིན་རྒྱུ་ཅི་ཡིན་རྐྱེན་ཅི་ཡིན་གཞི་ཅི་ཡིན། སྐྱེས་པ་དེས་བདག་གི་སེམས་གཡེང་བར་མི་བྱེད་དམ་ཞེས། ཚོར་བ་དེ་དག་ལ་ཡང་དག་པ་ཇི་ལྟ་བ་བཞིན་གོམས་པར་བྱེད་ལ། དེ་དག་ལ་ཡང་སྙིང་པོ་མེད་པར་ལྟ་སྟེ། གསོབ་དང་གསོག་དང་སྙིང་པོ་མེད་པར་གོམས་པར་བྱེད་པ་འདི་ནི་བསྒོམ་པ་ལྔ་པ་ཡིན་ནོ། །ཡང་དགེ་སློང་དེ་བསྒོམ་པ་གོམས་པར་བྱེད་དེ། འདི་ལྟར་འདུ་བྱེད་གང་ཡིན་པ་དེ་རྣམས་ནི་མི་རྟག་པ་དང་། སྡུག་བསྔལ་བ་དང་སྟོང་པ་དང་བདག་མེད་པ་དང་གསོག་ཕན་ཚུན་གྱི་སྟོབས་ཀྱིས་བྱུང་བ་རྣམས་འབྱུང་སྟེ། སྟོབས་གཅིག་གིས་སྐྱེད་པ་མ་ཡིན་ནོ་ཞེས་དེ་ལྟར་གོམས་པར་བྱེད་དོ། །དེ་དེ་རྣམས་ལ་ཆགས་པར་མི་བྱེད་པ་འདི་ནི་བསྒོམ་པ་དྲུག་པ་ཡིན་ནོ། །གཞན་ཡང་དགེ་སློང་དེ་བསྒོམ་པ་བདུན་པ་གོམས་པར་བྱེད་དེ། འདི་ལྟར་བདག་གི་ཡིད་ལ་བྱེད་པ་དགེ་བ་དག་སྐྱེས་སོ། །དགེ་བའི་རྒྱུས་སྐྱེས་པ་དེ་ཡིད་ལ་བྱེད་པ་གཞན་གྱིས་ཉམས་ཏེ། བདག་གི་དམིགས་པ་དེ་བརྗེད་དེ།
དེ་བཞིན་དུ་བདག་གི་ཡིད་ལ་བྱེད་པ་མི་དགེ་བ་སྐྱེས་ལ། དེ་ཡང་ཡིད་ལ་བྱེད་པ་དགེ་བས་ཉམས་ཏེ། བདག་གི་དགེ་བའི་ཆོས་དེ་རྣམས་ཀྱི་བར་ཆད་བྱུང་ངོ་སྙམ་མོ། །དེ་ལྟར་རྟག་ཏུ་དམིགས་པ་ཡིད་ལ་བྱེད་པ་འདི་ནི་བསྒོམ་པ་བདུན་པ་ཡིན་ནོ། །གཞན་ཡང་དགེ་སློང་དེ་བསྒོམ་པ་བརྒྱད་པ་གོམས་པར་བྱེད་དེ། འདི་ལྟར་ཆོས་ནི་རང་གི་མཚན་ཉིད་དང་སྤྱིའི་མཚན་ཉིད་ཡིན་ལ་ཆོས་འདི་དག་རང་གི་མཚན་ཉིད་ཕྱིན་ཅི་མ་ལོག་པར་འཛིན་ཏེ། ཆོས་ཐམས་ཅད་ཀྱི་འདྲེས་པ་མེད་པ་འདི་ཉིད་ནི་ཆོས་ཉིད་དུ་གནས་པ་ཡིན་ནོ། །བདག་སྐྱེས་པ་དང་གོར་མ་ཆག་པར་འཆི་བ་ཉེ་བར་གནས་པར་འགྱུར་ཏེ། འདུས་བྱས་ཀྱི་ཆོས་ལ་གང་མཚན་ཉིད་གསུམ་མེད་པར་གྱུར་པ་གང་ཡང་མེད་དོ་སྙམ་དུ་དེ་ལྟར་སྒོམ་པ་ནི་ཆོས་ཐམས་ཅད་ཀྱི་མི་རྟག་པ་ཉིད་བསྒོམ་པ་ཡིན་ཏེ། དེ་ལྟར་བསྒོམ་པའི་དགེ་སློང་དེ་ནི་བསྒོམ་པ་བརྒྱད་པ་བསྒོམ་པ་ཡིན་ནོ། །གཞན་ཡང་དགེ་སློང་དེ་བསྒོམ་པ་དགུ་པ་གོམས་པར་བྱེད་དེ། འདི་ལྟར་ཀུན་ནས་ཉོན་མོངས་པའི་རྩ་བ་འདོད་ཆགས་དང་ཞེ་སྡང་དང་གཏི་མུག་གསུམ་གྱི་གཉེན་པོ་མི་གཙང་བ་དང་བྱམས་པ་དང་རྟེན་ཅིང་འབྲེལ་པར་འབྱུང་བ་དེ་དག་གཉེན་པོ་ཡིན་ཏེ། དེ་ལྟར་གོམས་པར་བྱེད། རྟག་ཏུ་ཡིད་ལ་བྱེད་པ་འདི་ཡང་བསྒོམ་པ་དགུ་པ་ཡིན་ནོ། །གཞན་ཡང་དགེ་སློང་དེ་བསྒོམ་པ་བཅུ་པ་གོམས་པར་བྱེད་དེ། འདི་ལྟར་སངས་རྒྱས་ཀྱི་ཡོན་ཏན་རྗེས་སུ་དྲན་པ་བསྒོམ་སྟེ། དེ་ཡང་འཇིག་རྟེན་ལ་ཕན་པ་དང་བདེ་བར་བྱ་བའི་ཕྱིར་རོ། །དེ་ལྟ་བས་ན་བདག་ཉིད་ལ་རྟག་ཏུ་ཕན་པར་འདོད་པ་རྣམས་ཀྱིས་དེ་ཉིད་བསྒོམ་པར་བྱའོ་ཞེས་ཡང་དག་པར་དྲན་པར་བྱེད་པ་ནི་བསྒོམ་པ་བཅུ་པ་ཡིན་ནོ། །གཞན་ཡང་དགེ་སློང་དེ་བསྒོམ་པ་བཅུ་གཅིག་པ་གོམས་པར་བྱེད་དེ། འདི་ལྟར་གཅིག་ནས་གཅིག་ཏུ་བརྒྱུད་དེ། ཐོས་པ་སྐད་ཅིག་རེ་རེ་ལ་གོམས་པར་བྱེད་དོ། །འདི་ལྟར་གཅིག་ནས་གཅིག་ཏུ་བརྒྱུད་པ་སྐད་ཅིག་རེ་རེ་ནི་མངལ་ནས་བྱུང་བ་དང་སྐྱེས་པ་དང་ཤི་བའི་བར་དང་མངལ་ན་གནས་པ་དང་གཞོན་ནུ་དང་ལང་ཚོ་ནས་རྒ་བའི་མཐར་ཐུག་གི་བར་དུ་དེ་ལྟར་གོམས་པར་བྱེད་པ་དགེ་སློང་དེའམ་གཞན་ཡང་རུང་སྟེ། འཆི་བའི་ཚེ་གཤིན་རྗེའི་མིའི་དབང་དུ་མི་འགྲོ་ཞིང་བཞིན་མི་སྡུག་པར་བསྒྱུར་བ་སྡིག་པ་བྱེད་པ་གཞན་དེ་དག་
ཀྱང་མཐོང་བར་མི་འགྱུར་རོ། །དྲན་པ་བཅུ་གསུམ་དང་འབྲེལ་པ་ལེགས་པར་བསྒོམ་པ་གང་ཡིན་པ་དེ་དག་ནི་ཕན་པ་དང་བདེ་བ་དང་མཐར་མྱ་ངན་ལས་འདས་པར་འགྱུར་རོ། །བཅུ་གསུམ་གང་ཞེ་ན། འདི་ལ་བག་ཡོད་པ་དྲན་པ་དང་ཉེ་བར་གནས་པ་དྲན་པ་དང་གཡེང་བ་མེད་པ་དྲན་པ་ཡིན་ཏེ། དྲན་པ་དེ་དག་ལ་ཉེ་བར་གནས་ནས་འདི་ལྟ་སྟེ། བུད་མེད་ཅེས་བྱ་བའི་ལུས་ཁ་དོག་བཟང་པོའམ་ཁ་དོག་ངན་པ་མཐོང་བ་དེའི་ནང་མི་གཙང་བ་མནམ་པའི་གཞི་དང་། མི་བརྟན་པ་ཕྱི་སའི་ཁུང་ལྟར་དྲན་པ་ཉེ་བར་གནས་པ་དང་། དྲན་པ་མི་གཡོ་བ་ནི་གྲོང་ཁྱེར་གྱི་ཕྱོགས་སམ་གྲོང་གི་ཕྱོགས་དག་ཏུ་བསོད་སྙོམས་ཀྱི་ཕྱིར་རྒྱུ་བའམ་ཡུལ་དག་ཏུ་འགྲོ་བ་ན་བུད་མེད་ཀྱི་འདུ་ཤེས་ཀྱི་དབང་དུ་མི་འགྱུར་རོ། །དེ་ཅིའི་ཕྱིར་ཞེ་ན། དྲན་པ་ཉེ་བར་གནས་པའི་ཕྱིར་ཏེ། འདི་ནི་དྲན་པ་དང་འབྲེལ་པ་དང་པོ་ཡིན་ནོ། །གཞན་ཡང་དྲན་པ་དང་འབྲེལ་པ་ནི་ཕྱི་རོལ་གྱི་ཚལ་ཉམས་དགའ་བ་དང་། ཆུ་བོ་ཉམས་དགའ་བ་དང་། ལྟེང་ཀ་ཉམས་དགའ་བ་དང་། སྐྱེད་མོས་ཚལ་ཉམས་དགའ་བ་རྣམས་མཐོང་ནས་ཀྱང་འདི་ལྟར་དྲན་པ་ཉེ་བར་འཇོག་སྟེ། ཉམས་དགའ་བའི་ངོ་བོ་གང་ཡིན་པ་དེ་དག་གིས་དུས་ནི་ཕྱིས་འབྱུང་སྟེ། བྱིས་པའི་སེམས་རབ་ཏུ་ཆགས་པར་བྱེད་པ་དེ་དག་ནི་རྙི་རྙི་པོར་འགྱུར་ལྷགས་པར་འགྱུར་མི་སྡུག་པར་འགྱུར་འདབ་མ་རྙིས་ཤིང་ལོ་མ་སིལ་སིལ་པོར་ལྷགས་པར་འགྱུར་རོ། །དེ་དག་དེ་ལྟར་གྱུར་གྱིས་ཀྱང་ཐམས་ཅད་དུ་འབྱུང་བར་ཡང་མི་འགྱུར་ལ། ཀྱེ་མ་འདི་དག་ལ་ཉམས་དགའ་བ་ཅི་ཞིག་ཡོད་སྙམ་སྟེ། དེ་ལྟར་དྲན་པ་དང་འབྲེལ་པར་བྱེད་དོ། །དེ་ལྟར་དྲན་པ་ཉེ་བར་གནས་པ་བརྐམ་པ་མེད་པ་དེ་ནི་ཕྱི་ནང་གི་ཡུལ་གྱི་གཟུགས་ཀྱིས་ཉམས་པ་མེད་ཅིང་བདུད་ཀྱིས་ཀྱང་གནོད་པ་མེད་དོ། །གཞན་ཡང་དེའི་དོན་དང་ཕན་པར་བྱ་བའི་ཕྱིར་དྲན་པ་དང་འབྲེལ་པ་གསུམ་པ་དེ་དྲན་པར་བྱེད་དོ། །ཇི་ལྟར་དྲན་པར་བྱེད་དྲན་པ་དང་འབྲེལ་པའི་དམིགས་པ་ནི་གང་ཡིན་ཞེ་ན། འདིས་སྔོན་ཟོས་པའམ་ཉལ་བའམ་དགའ་བར་བྱས་པའམ་དམིགས་པ་བསྟེན་པ་གང་ཡིན་པ་དེ་དག་དྲན་ནས་རྟོག་པར་མི་བྱེད་ཅིང་ཡིད་ལ་དམ་དུ་འཛིན་པར་མི་བྱེད་དོ། །དེ་ལྟར་དེ་བྱིས་པ་སོ་སོའི་སྐྱེ་བོ་རྣམས་ཀྱི་དབང་པོ་དག་ནི་ཚིམ་པ་མེད་དོ་སྙམ་སྟེ། དེ་ལྟར་
དྲན་པ་དང་འབྲེལ་བར་བྱེད་དོ། །གཞན་ཡང་དྲན་པ་དང་འབྲེལ་པ་བཞི་པ་དྲན་པར་བྱེད་དེ། གང་དུ་རྙེད་པ་དང་བཀུར་སྟི་དང་མལ་སྟན་དང་ན་བའི་གསོས་སྨན་གྱི་རྐྱེན་གྱི་ཡོ་བྱད་རབ་ཏུ་མང་པོ་ཐོབ་པ་དེར་དགའ་བ་དང་འབྲེལ་པར་མི་བྱེད་ཅིང་ཀུན་དུ་ཆགས་པར་མི་བྱེད་དོ། །འདི་ལྟར་རྙེད་པ་དང་བཀུར་སྟི་ལྷུར་བྱེད་པས། དགེ་སྦྱོང་ཉམས་པར་འགྱུར་ལ། གང་ཟག་དེ་ཡང་པགས་པ་རལ་ནས་ཤ་རལ་བར་འགྱུར། ཤ་རལ་ནས་ཆུ་རྒྱུས་ཆད་པར་འགྱུར། ཆུ་རྒྱུས་ཆད་ནས་རུས་པ་ཆག་པར་འགྱུར། རུས་པ་ཆག་ནས་རྐང་ཡང་ཟད་པར་འགྱུར་ཏེ། རྙེད་པ་དང་བཀུར་སྟིས་ནི་དེ་ལྟར་བྱེད་པར་འགྱུར་རོ། །རྙེད་པ་དང་བཀུར་སྟི་འདི་ནི་དགེ་བའི་ཆོས་ཐམས་ཅད་ཀྱི་བར་ཆད་བྱེད་པའི་རྒྱུ་ཡིན་ཏེ། ལེགས་པར་དྲན་པ་ཉེ་བར་གནས་པ་ནི། ཕྱོགས་གཅིག་ལ་གནས་པ་ཡིན་ནོ། །གཞན་ཡང་དྲན་པ་དང་འབྲེལ་པ་ལྔ་པ་དྲན་པར་བྱེད་དེ། གྲོང་དང་གྲོང་ཁྱེར་དང་ལྗོངས་སུ་རབ་ཏུ་རྒྱུ་བར་མི་བྱེད། གྲོང་ཁྱེར་དག་ལ་སྟེན་པར་མི་བྱེད། ཡུལ་མི་དག་དང་འབྲེལ་པའི་གཏམ་སྨྲ་བའི་ངོ་བོར་མི་བྱེད། འདུ་འཛི་དང་དགའ་བར་གནས་པར་མི་བྱེད་དོ། །འདི་ལྟར་གྲོང་དང་གྲོང་ཁྱེར་དང་ལྗོངས་སུ་གནས་པར་བྱེད་པ་གང་ཡིན་པ་དེ་དག་ནི་བློ་གཡེངས་པར་འགྱུར་ལ་རང་གི་དོན་ཀྱང་བྱེད་པར་མི་ནུས་སོ། །དེ་ལྟར་དེ་དག་གི་དོན་ཇི་ལྟ་བ་བཞིན་མཐོང་བ་ཉིད་ཀྱིས་དྲན་པ་སྐྱེ་བར་འགྱུར་རོ། །གཞན་ཡང་དྲན་པ་དང་འབྲེལ་པ་དྲུག་པ་དྲན་པར་བྱེད་དེ། དེ་ལྟར་སྐྱོན་དུ་ལྟ་བ་དེ་ནི་དུར་ཁྲོད་དང་ཤིང་དྲུང་དང་སོག་ཁྲོད་དང་རིའི་གསབ་གསེབ་དང་ཁང་སྟོང་དུ་སྟེན་པར་བྱེད་ཅིང་སུ་དང་ཡང་ལྷན་ཅིག་གནས་པར་མི་བྱེད་འདྲེ་བར་མི་བྱེད་དོ། །འདི་ལྟར་འདྲེ་བར་མི་བྱེད་པའི་དགེ་སློང་དེ་ནི་དགེ་བའི་ཆོས་རྣམས་འཐོབ་པར་འགྱུར་ལ། སྤང་བར་བྱ་བ་ཡང་སྤོང་བར་འགྱུར་རོ། །གཞན་ཡང་དྲན་པ་དང་འབྲེལ་པ་བདུན་པ་དྲན་པར་བྱེད་དེ། ལྷའི་གཏམ་རྣམས་ལ་ཡང་ཆགས་པ་མི་སྐྱེད་ལ། སེམས་ཅན་དམྱལ་བ་པའི་གཏམ་རྣམས་ལ་ཡང་ཡིད་འབྱུང་བར་མི་བྱེད་དོ། །དེ་འདི་སྙམ་དུ་དྲན་པར་བྱེད་དེ། ལྷ་རྣམས་ཀྱི་མཐའ་ནི་ལྟུང་ཞིང་གནོད་པ་དང་བཅས་ལ་གཤིན་རྗེའི་མིའི་དབང་དུ་གྱུར་པ་ཡིན་ནོ། །སེམས་ཅན་དམྱལ་བ་པ་ཡང་ལས་ཀྱིས་དྲངས་པ་ཡིན་ཏེ། རྗེས་སུ་དགའ་བར་མི་བྱ་
ཞིང་གཞན་བྱེད་པ་ཡང་ཕྱིར་བཟློག་པར་བྱའོ་སྙམ་སྟེ། དེ་མཐོ་རིས་ལ་ཡང་མི་དགའ། སེམས་ཅན་དམྱལ་བ་ལ་ཡང་འཇིགས་པ་མེད་དེ། དགའ་བ་དང་འཇིགས་པ་སྤངས་པ་དེ་ནི་དགེ་བ་དྲན་པའི་ངོ་བོར་འགྱུར་ཏེ། དྲན་པ་ཉེ་བར་གནས་པ་ཡིན་ནོ། །གཞན་ཡང་དྲན་པ་དང་འབྲེལ་པ་བརྒྱད་པ་དྲན་པར་བྱེད་དེ། བདག་གི་དྲན་པ་ཉེ་བར་གནས་པ་ནི་ལེགས་པ་ཡིན་ཏེ། མི་དགེ་བའི་ཆོས་སྣང་བ་རྣམས་ཉམས་ཤིང་ཟད་ལ་བཅོམ་ཞིང་སྤངས་པར་གྱུར་ཏོ། །གཞན་ཡང་ཡིད་ལ་མི་དགེ་བ་སྐྱེས་པ་དེས་བདག་གི་དགེ་བ་དྲན་པ་ཉམས་ཤིང་བདག་གི་ཀུན་ནས་བར་ཆད་བྱུང་སྟེ། དེ་ལ་བདག་གིས་ཡང་དགེ་བའི་དྲན་པ་ཉིད་བསྐྱེད་པར་བྱའོ་སྙམ་ནས། དེ་ལྟར་དམིགས་པ་དང་མཚན་ཉིད་དྲན་པ་དེ་གཅིག་ནས་གཅིག་ཏུ་འགྲང་བར་བྱེད་དོ། །ཡིད་ལ་གཅིག་ཏུ་གྱུར་ཅིང་གཅིག་ཏུ་འདུས་པ་ནི་དྲན་པ་ལས་སུ་རུང་བར་འགྱུར་རོ། །དེ་ནི་ཆུ་བོའི་ཤུགས་ཀྱི་རླབས་མི་བརྟན་པ། ཡུལ་ནོར་བ་དགྲ་ལྟ་བུ་དག་ལས་སེམས་འཛིན་པར་ནུས་སོ། །གཞན་ཡང་དྲན་པ་དང་འབྲེལ་པ་དགུ་པ་དྲན་པར་བྱེད་དེ། ཉིན་གཅིག་བཞིན་སངས་རྒྱས་ཀྱི་ཡོན་ཏན་རྗེས་སུ་དྲན་པར་བྱེད། དམ་པའི་ཆོས་ལ་རྟག་ཏུ་གུས་པར་བྱེད། བླ་མ་རྣམས་ལ་དད་པར་བྱེད་ཅིང་དེའི་བསྒྲུབ་པ་ལ་ཡང་གནས་པར་བྱེད། བློ་ཤིན་ཏུ་མཉམ་པར་གཞོག་པར་བྱེད། གཉའ་ཤིང་གང་ཙམ་དུ་ལྟ་བར་བྱེད། སེམས་ཅན་ཐམས་ཅད་ལ་ཕན་པར་མོས་པ་དྲན་པར་བྱེད་དེ། དེའི་དྲན་པ་དང་འབྲེལ་པ་དེ་ནི་འབྲས་བུ་དང་བཅས་པ་མཐའ་མྱ་ངན་ལས་འདས་པར་འགྱུར་རོ། །གཞན་ཡང་དྲན་པ་དང་འབྲེལ་པ་བཅུ་པ་དྲན་པར་བྱེད་དེ། བློ་གྲོས་ཤིན་ཏུ་མཉམ་པར་གཞོག་པར་བྱེད་ལ། འདི་ལྟར་འཇིགས་པ་ཆེན་པོ་བཞི་པོ་འདི་དག་འོང་སྟེ། རྒ་བ་དང་ན་བ་དང་འཆི་བ་དང་རྒུད་པ་དང་བཞིའོ། །དེ་དགྲ་ཆེན་པོ་དེ་དག་གིས་རྟག་ཏུ་རྣམ་པར་འཇིགས་ཏེ། དགའ་བར་མི་སེམས་སོ། །བཞི་ཞིག་ཀྱང་ཤིན་ཏུ་མི་བརྟན་པར་མཐོང་སྟེ། ཚེ་དང་ནད་མེད་པ་དང་ལང་ཚོ་དང་ཕུན་སུམ་ཚོགས་པ་བཞིའོ། །དེ་སྔར་བསྟན་པ་བཞི་པོ་དེ་དག་ལ་རྟག་ཏུ་འཇིགས་ཤིང་མི་བརྟན་པ་གཞན་ཡང་གོམས་པར་བྱེད་པ་ནི་ཡུལ་རྣམས་ཀྱིས་འཕྲོགས་པར་མི་འགྱུར་ཞིང་། དགའ་བའི་འདོད་ཆགས་ཀྱི་དབང་དུ་མི་འགྲོ་ལ།
དྲན་པ་ཉེ་བར་གནས་པར་འགྱུར་ཏེ། ཉོན་མོངས་པའི་རི་ཟད་པར་ནུས་སོ། །གཞན་ཡང་དྲན་པ་དང་འབྲེལ་བ་བཅུ་གཅིག་པ་དྲན་པར་བྱེད་དེ། དགེ་འདུན་ལ་གང་ཟག་གིས་འབྱེད་པར་མི་བྱེད་ལ། ལེ་ལོ་ལ་བརྩོན་ཞིང་སྤྱོད་པར་མི་བྱེད། གང་ཟག་གིས་གང་ཟག་རབ་ཏུ་འབྱེད་པར་བྱེད་པ་ནི་ཉམས་པར་འགྱུར་བས། གནོད་པར་མི་བྱེད་ལ་ཕན་པར་ཡང་མི་བྱེད་པ་དེ་ནི། དེ་ལྟར་སེམས་དང་བར་འགྱུར་ཞིང་དེའི་དྲན་པ་ཡང་ལས་སུ་རུང་བར་འགྱུར་ཏེ། གནོད་པ་མེད་པ་ལྷུར་ལེན་པར་བྱེད་དོ། །གཞན་ཡང་དྲན་པ་དང་འབྲེལ་བ་བཅུ་གཉིས་པ་དྲན་པར་བྱེད་དོ། །རྟག་ཏུ་དམ་པའི་ཆོས་ཉན་པ་ལྷུར་ལེན་པར་བྱེད་དོ། །དེ་ལྷུར་ལེན་པ་དང་ལྡན་པ་དེས་ཆོས་འཛིན་པར་བྱེད་པ་གང་ཡིན་པ་དེ་དག་ཕྱིར་ཞིང་དམ་དུ་འཛིན་པར་བྱེད་དོ། །ཁ་ན་མ་ཐོ་བ་དང་བཅས་པ་དང་ཁ་ན་མ་ཐོ་བ་མེད་པའི་ཆོས་རྣམས་རྣམ་པར་ཤེས་པར་བྱེད་དེ། དེ་མར་མེས་མུན་ནག་གི་གཟུགས་དག་མཐོང་བ་ལྟར་བཅོམ་ལྡན་འདས་ཀྱིས་གསུངས་པའི་ཆོས་ཀྱི་སྒྲོན་མས་ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དག་མཐོང་ངོ་། །དེ་ལྟར་ཤིན་ཏུ་མཉམ་པར་གཞག་པའི་དྲན་པ་འབྱུང་བ་དེ་ནི་ཉོན་མོངས་པའི་དྲ་བའི་དབང་དུ་མི་འགྲོ་ཞིང་བདུད་ཀྱི་དབང་དུ་མི་འགྲོ་སྟེ། དེ་ལྟར་དྲན་པ་དང་འབྲེལ་པ་བཅུ་གཉིས་པ་ཡང་དྲན་པར་བྱེད་དོ། །གཞན་ཡང་དྲན་པ་དང་འབྲེལ་པ་བཅུ་གསུམ་པ་དྲན་པར་བྱེད་དེ། སྐད་ཅིག་སྐད་ཅིག་ལ་ལུས་དང་སེམས་དང་ཚོར་བའི་རང་གི་མཚན་ཉིད་སྒྲུབ་པའི་དྲན་པ་འབྱུང་སྟེ། དྲན་པ་ཉེ་བར་གཞག་པ་འདི་དག་སོ་སོར་ཤེས་པར་བྱེད་ཅིང་ཡིད་ལ་ཡང་དམ་དུ་འཛིན་པར་བྱེད་དོ། །ཡིད་ལ་བྱས་པ་དེ་རྣམས་ཀྱིས་བག་མེད་པ་ལ་སྟེན་པར་མི་འགྱུར་ཞིང་། བག་ཡོད་པ་ལ་སྟེན་པར་བྱེད་པ་དེ་ནི་གཤིན་རྗེའི་མིའི་དབང་དུ་འགྲོ་བར་མི་འགྱུར་ལ་རང་དབང་དུ་འགྱུར་དྲན་པ་ཉམས་པར་མི་འགྱུར་བ་དང་། དུས་མ་ཡིན་པ་ལ་སྤྱོད་པར་མི་འགྱུར་བ་དང་། ཡུལ་མ་ཡིན་པར་སྤྱོད་པར་མི་འགྱུར་བ་དང་། སྤྱོད་ཡུལ་མ་ཡིན་པར་སྤྱོད་པར་མི་འགྱུར་ཏེ། འབྲེལ་པ་འདི་དག་ནི་དྲན་པ་ཐམས་ཅད་ཀྱི་ནང་དུ་འབྲེལ་པ་ཡིན་ནོ། །གཞན་ཡང་སེམས་ཀྱི་ཁམས་བཅུ་བཞི་བསྒོམ་པར་བྱ་ཞེས་གང་སྨྲས་པ། ལེགས་པར་བསྒོམ་ན་ཤིན་ཏུ་སྦྱང་
བ་བྱས་ཤིང་ཤིན་ཏུ་དུལ། ཤིན་ཏུ་དག་པར་འགྱུར་ལ། བག་མེད་པས་ཕྲོགས་པར་ཡང་མི་འགྱུར་རོ། །འདི་ལྟ་སྟེ། མོས་པ་དང་། བརྩོན་འགྲུས་དང་རབ་ཏུ་ཞི་བ་དང་། སློབ་དཔོན་ལ་བསྙེན་བཀུར་བ་དང་། སྡིག་པའི་གྲོགས་པོ་ཡོངས་སུ་སྤངས་པ་དང་། སངས་རྒྱས་ཀྱི་གསུང་ལ་གོམས་པ་དང་། ཚུལ་བཞིན་ཡིད་ལ་བྱེད་པ་ལ་གོམས་པ་དང་། རྒོད་པ་ཡོངས་སུ་སྤངས་པ་དང་། ཆོས་དང་ཆོས་མ་ཡིན་པའི་རྒྱུ་དང་འབྲས་བུ་ལ་དད་པ་དང་། སྔོན་གྱི་འདོད་པ་བརྗེད་པ་དང་། བུད་མེད་ལ་ལྟ་བ་ཡོངས་སུ་སྤངས་པ་དང་། གཉེན་ལ་ལྟ་ཞིང་ལྷག་པར་སྤྱོད་པ་མེད་པ་དང་། ཡུལ་ཐམས་ཅད་ཡང་དག་པར་བཟུང་བ་དང་། སྐྱེ་བ་དང་འཆི་བའི་འཇིགས་པ་ཡིན་ཏེ། བཅུ་བཞི་པོ་འདི་རྣམས་ཀྱིས་སེམས་ཡོངས་སུ་བསྒོམས་པ་དེ་ནི་ཤིན་ཏུ་ཡོངས་སུ་བསྒོམས་པ་ཡིན་ལ། རྒྱུ་འདི་རྣམས་ཀྱིས་ཤིན་ཏུ་ཡོངས་སུ་སྦྱང་བ་བྱས་པ་ནི་འཆི་བའི་ཚེ་འགྲོ་བ་ངན་པའི་ཕོ་ཉ་མི་འབྱུང་ལ། ངན་སོང་གི་སྒོ་ཡང་འབྱེ་བར་མི་འགྱུར། དམ་པའི་ཆོས་ལ་བླུན་པར་མི་འགྱུར། མི་མགུལ་དུ་ཐག་པས་བཅིངས་པ་ལྟར་གར་དགའ་དགུར་འགྲོ་བ་རྒྱུ་བ་རྣམས་སུ་ཁྲིད་པར་མི་འགྱུར། མི་ངན་པ་ཡིད་ཆེས་པའི་བྱ་མ་རྟ་ལྟ་བུའི་ལས་བྱེད་པར་མི་འགྱུར་རོ། །འདི་དག་ཐམས་ཅད་ནི་དམ་པའི་ཆོས་ཐོབ་པ་ན་འདི་ལྟ་སྟེ། སེམས་ཤིན་ཏུ་དུལ་ཞིང་ཤིན་ཏུ་སྦྱང་བ་བྱས་ལ། ཤིན་ཏུ་མཐར་ཕྱིན་པ་ནི་ལྷ་དང་མི་རྣམས་ཀྱི་ནང་དུ་ཁྲིད་པར་བྱེད་དོ། །ཕྱིས་ཀྱང་མྱ་ངན་ལས་འདས་པའི་གྲོང་ཁྱེར་གྱི་སྒོ་འབྱེད་པར་འགྱུར་རོ། །དེ་ལྟ་བས་ན་གཙོ་བོ་འདི་དག་ལ་སེམས་ཡོངས་སུ་སྦྱང་བ་བྱས་པ་དེ་ནི་ཤིན་ཏུ་སྦྱང་བ་བྱས་པ་ཡིན་ཏེ། གཤིན་རྗེའི་མིའི་དབང་དུ་འགྲོ་བར་མི་འགྱུར་རོ། །ཡང་བརྒྱ་བྱིན་དེ་ངན་སོང་གི་འཇིགས་པས་ཉེན་ཅིང་གཤིན་རྗེའི་མི་མཐོང་བས་ཉམ་ཐག་པའི་ལྷ་རྣམས་ལ་ཆོས་སྟོན་པར་བྱེད་དོ། །འདི་ལྟར་བདག་གིས་ཁྱེད་ཅག་ལ་ཆོས་གཅིག་ནས་བཟུང་སྟེ། རིམ་པ་རེ་རེ་ལས་བཅུ་བཞིའི་བར་དུ་ཆོས་བསྟན་པ་རིམ་པ་དེ་ལ་བབ་སྟེ་དངོས་པོ་བཅོ་ལྔ་བཤད་པར་བྱའོ། །བཅོམ་ལྡན་འདས་ལས་བདག་གིས་ཇི་ལྟར་ཐོས་པ་དེ་ལྟར་ཁྱེད་ཅག་ལ་ཡང་བཤད་པར་བྱའོ། །དངོས་པོ་བཅོ་ལྔ་གང་ཞེ་ན། ཁྱིམ་གྱི་གནས་ནས་བྱུང་ནས་དགེ་སྦྱོང་དུ་དམ་བཅས་པས་སྤང་བར་བྱ་ཞིང་དམད་པར་བྱ་བ་དང་། གཞན་བྱེད་པ་
ཡང་ཕྱིར་བཟློག་པར་བྱ་བ་གང་ཡིན་པ་དེ་དག་ཡིན་ནོ། །འདི་ལྟ་སྟེ། དང་པོ་ཁོ་ནར་དངོས་པོ་གོས་ངུར་སྨྲིག་ཉིད་ཡོངས་སུ་ཤེས་པར་བྱ་སྟེ། གང་རྒྱགས་པ་ཡང་དག་པར་སྐྱེད་པར་མི་བྱེད་པའི་གོས་ངུར་སྨྲིག་གི་རྣམ་པ་དེ་ལྟ་བུ་བགོ་བར་བྱའོ། །དེ་ཅིའི་ཕྱིར་ཞེ་ན། གོས་ངུར་སྨྲིག་གི་རྒྱགས་པས་མྱོས་པ་ནི་ལུང་བོང་ལྟར་སྤྱོད་ཅིང་འགྲོ་བ་འབྱེད་པར་བྱེད་པ་ཡིན་ལ། རྒྱགས་པའི་ལུས་དེ་སྒེག་པ་ལྷུར་ལེན་པར་འགྱུར་རོ། །དེ་ནི་དགེ་བའི་ཆོས་སྒྲུབ་པར་མི་བྱེད་ལ། བུད་མེད་ལ་ལྟ་བ་ལྷུར་ལེན་པར་བྱེད་དོ། །དེ་རྒོད་པ་ལ་འཇུག་པར་བྱེད་དེ། དེ་ལྟར་སེམས་ཡང་བ་གཞན་གང་ཡིན་པ་དེ་ཡང་གོས་ཀྱིས་རྒྱགས་པར་འགྱུར་རོ། །དེ་ལྟ་བས་ན་བགོ་བར་བྱ་བ་དེ་ནི་གང་གིས་དྲོ་བ་དང་གྲང་བས་འཇིགས་པར་མི་འགྱུར་ཞིང་། གང་གིས་ལུས་གཡོག་པ་ཙམ་དུ་གྱིས་ཤིག་དང་། དེ་ནི་བག་མེད་པའི་འགྲོ་བའི་དབང་དུ་མི་འགྱུར་ཞིང་། འཆི་བའི་དུས་ན་ཡང་འགྱོད་པ་ཡོད་པར་མི་འགྱུར་རོ། །དངོས་པོ་ཡོངས་སུ་ཤེས་པར་བྱ་བའི་འདི་ནི་ཡོངས་སུ་ཤེས་པར་བྱ་བ་དང་པོ་ཡིན་ནོ། །གཞན་ཡང་དངོས་པོ་གང་ཡོངས་སུ་ཤེས་པར་བྱ་བ་གཉིས་པ་ནི་དགེ་སྦྱོང་ཆོག་ཤེས་པར་གནས་པས་ཤེས་པར་བྱ་བ་ཡིན་ཏེ། བདག་ཤེས་པ་འམ། རབ་ཏུ་བྱུང་བ་གང་གིས་ཚུལ་ཁྲིམས་དང་ལྡན་པར་འགྱུར་སྙམ་ནས། དེའི་རྗེས་སུ་འཇུག་པར་བྱེད་ལ་སྦྱིན་བདག་དང་སྦྱིན་པ་པོ་ལས་མལ་སྟན་དང་། ན་བའི་གསོས་སྨན་གྱི་རྐྱེན་གྱི་ཡོ་བྱད་དང་དེ་དང་འཐུན་པ་དང་དེ་དང་འདྲ་བ་དག་ལེན་པར་མི་བྱེད་པ་དེ་ནི། དེ་ལྟར་བར་ཆད་འབྱུང་བར་མི་འགྱུར་ཏེ། འདི་ནི་ཡོངས་སུ་ཤེས་པར་བྱ་བའི་དངོས་པོ་གཉིས་པ་ཡིན་ནོ། །གཞན་ཡང་ཡོངས་སུ་ཤེས་པར་བྱ་བའི་དངོས་པོ་གསུམ་པ་ནི་དེའི་ཆགས་པས་མལ་སྟན་ཡིད་ལ་མི་བྱ་བ་དང་དགོན་པ་དང་ཚལ་དེ་དག་ན་གནས་པ་བཏང་ནས། གང་དུ་ཡོན་ཏན་དང་ལྡན་པར་འགྱུར་བ་མ་ཡིན་པ་བསོད་སྙོམས་སམ། ཐུག་པ་མང་པོ་སྦྱིན་པ་དེ་དག་འདོད་པས་གྲོང་གི་ནང་ངམ། གྲོང་ཁྱེར་གྱི་ནང་དུ་གནས་པ་དེ་ནི་དེའི་བར་ཆད་ཆེན་པོ་འབྱུང་ལ། དགེ་བའི་ཆོས་མི་སྒྲུབ་པ་དེ་དང་ཆོག་མི་ཤེས་པ་དེ་དང་ཡང་དག་ལྡན་པར་འགྱུར་རོ། །དགེ་སྦྱོང་གི་མཆོག་ནི་འདི་ཡིན་ཏེ་འདི་ལྟ་སྟེ། ཆོག་ཤེས་པ་དང་བག་ཡོད་པའོ། །ཆོག་མི་ཤེས་པ་དེ་དག་ཉིད་ལ་དགའ་བ་གང་
ཡིན་པ་དེ་ནི་བསླུས་པར་འགྱུར་ཞིང་། མི་ངན་པ་དག་ལ་བར་ཆད་འབྱུང་སྟེ་ངན་སྐྱུགས་ཟ་བ་དང་མཚུངས་སོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་བཅུ་གཉིས་པ། དེ་ནས་གཞན་ཡང་དངོས་པོ་བཞི་པ་ཡོངས་སུ་ཤེས་པར་བྱ་སྟེ། དེ་ཡང་གང་ཞེ་ན་འདི་ལྟ་སྟེ། ཁ་ཏོན་རབ་ཏུ་ཤེས་ལ། ཁ་ཏོན་འདོན་པ་དེ་དང་ཡང་དག་པར་ལྡན་པ་ཤེས་པ་དེ་ཙམ་གྱིས་ཆོག་སྟེ་ལྷག་པར་མི་བསླབ་བོ། །བདག་གིས་ལྷག་པར་སོ་སོར་ཤེས་ན། སྦྱིན་བདག་དང་སྦྱིན་པ་པོ་དག་གིས་རྣ་ལམ་དུ་ཐོས་པ་ཡིན་ནོ་སྙམ་ནས། ན་བའི་གསོས་སྨན་རྐྱེན་གྱི་ཡོ་བྱད་རྣམས་བདག་ལ་སྦྱིན་པར་བྱེད་དོ། །དེ་བདག་ལ་བར་ཆད་དང་ལྡན་པར་འགྱུར་བས། དེ་ནི་བདག་ལ་འོས་པ་མ་ཡིན་ནོ་སྙམ་པའི་བདག་ཉིད་དེ་ནི་ཆོག་ཤེས་པ་ཡིན་ཏེ། དགེ་སློང་དེ་ལྟ་བུ་ནི་ཆོག་ཤེས་པ་ཡིན་ནོ། །གཞན་ཡང་དངོས་པོ་ལྔ་པ་ཡོངས་སུ་ཤེས་པར་བྱ་བ་ནི་གང་གིས་འདོད་པ་ཆུང་བ་དང་ཆོག་ཤེས་པ་དང་བག་ཡོད་པ་ལ་གནས་པ་ཡིན་ཏེ། དངོས་པོ་དེ་གང་ཞེ་ན། འདི་ལ་དགེ་སྦྱོང་གང་ཞིག་དགེ་འདུན་གྱིས་མངགས་སམ་ནད་པའི་ཕྱིར་རམ་ནོར་རྫས་ཀྱི་ཕྱིར་མངགས་པའམ་སྦྱིན་པ་པོ་དང་སྦྱིན་བདག་གི་དྲུང་དུ་མངགས་པ་ལས་ཁྱིམ་ལ་ཉེ་བར་སྟེན་པར་བྱེད་ལ། དེ་སྦྱིན་བདག་དེ་དག་གི་དྲུང་ན་བཏུང་བ་དག་ཀྱང་འཐུང་ཞིང་འདུག་ན། དེ་ནི་དེའི་ཀུན་འབྱུང་བའི་བར་ཆད་དོན་མེད་པར་གྱུར་ལ། ལུས་ཡོངས་སུ་ངལ་བ་དོན་མེད་པ་དང་། རྩོལ་བ་དོན་མེད་པར་འགྱུར་རོ། །དེ་ཅིའི་ཕྱིར་ཞེ་ན། དེ་ཡང་དེ་མངོན་པར་འདོད་ཅིང་རོ་ལ་འཆུམས་པས་ཉམས་པ་ཁྱིམ་དེ་ཉིད་དུ་འགྲོ་སྟེ། དེ་དེར་ཡང་བ་ཉིད་ཀྱིས་འགྲོ་བར་བྱེད་དོ། །དེས་ན་བདག་ལ་ཕན་པར་མི་བྱེད་ལ། ནད་པ་ལ་ཡང་ཕན་པར་མི་བྱེད་ཅིང་། དགེ་འདུན་གྱི་བྱ་བ་ཡང་སྒྲུབ་པར་མི་བྱེད་དོ། །རྒྱུ་ཡང་བ་རྣམས་ཀྱི་ནང་ན་མཆོག་ནི་འདི་ཡིན་ཏེ་འདི་ལྟ་སྟེ། ཁྱིམ་གཅིག་ཏུ་འཇུག་ཅིང་བཟའ་བཏུང་ལ་དགའ་བ་ཉིད་དང་གང་ཆུང་ཟད་སྨྲ་བ་དང་འཆལ་པ་ཡིན་ཏེ། ཆོས་གསུམ་པོ་དེ་དག་ནི་འཇིག་རྟེན་པ་དང་འཇིག་རྟེན་ལས་འདས་པས་སྨད་པར་བྱ་བའི་གནས་ཡིན་ནོ། །དེ་ལྟ་བས་ན་དེ་དག་ནི་ཆོག་ཤེས་པ་དང་། བག་ཡོད་པ་ལ་གནས་པ་དག་གིས་ཡོངས་སུ་སྤང་བར་བྱའོ། །གཞན་ཡང་དངོས་པོ་དྲུག་པ་ཡོངས་སུ་ཤེས་པར་བྱ་བ་ནི། དགེ་སྦྱོང་འདོད་ཆེན་ཆུང་
བས་སམ། རབ་ཏུ་བྱུང་བ་བསོད་སྙོམས་ལ་ཡང་དག་པར་གནས་པས། ཇི་ཙམ་དུ་ཉིན་གཅིག་འགྲངས་པའི་བསོད་སྙོམས་དེ་ཙམ་ཞིག་བླང་བར་བྱའི། སང་དག་གི་ནི་སོ་སོར་བསགས་པར་མི་བྱའོ། །དེ་ལ་མངོན་པར་ཆགས་པར་གྱུར་ན་དེའི་སེམས་དེ་ཡང་བར་འགྱུར་ཏེ། བསམ་གཏན་དང་འདོད་པ་དག་ལ་སེམས་དང་བ་མེད་པར་འགྱུར་རོ། །བསོད་སྙོམས་འདི་དག་ཟད་པར་མ་གྱུར་ཅིག་སྙམ་ནས། དེ་ལྟར་ཆུང་ངུ་ལ་ཆགས་པ་ཡང་བར་ཆད་དུ་འགྱུར་ན། རྙེད་པ་དང་བཀུར་སྟི་དེ་དག་ལ་མངོན་པར་ཆགས་པ་ལྟ་སྨོས་ཀྱང་ཅི་དགོས་ཏེ་དངོས་པོ་ཡོངས་སུ་འཛིན་པ་གང་ཡིན་པ་དེ་དག་ནི་སྲེད་པས་ལྷག་པར་བཅིངས་པ་ཡིན་ནོ། །གཞན་ཡང་དངོས་པོ་བདུན་པ་ཡོངས་སུ་ཤེས་པར་བྱ་བ་དེ་གང་ཡིན་ཞེ་ན། འདི་ལ་མ་ཐོས་པ་དང་མ་མཐོང་བའི་ཡུལ་དང་ལྗོངས་སུ་རྒྱུ་བ་རྣམས་རྒྱུ་བ་ན། རིགས་ཆེན་པོ་ལས་རབ་ཏུ་བྱུང་བའི་དགེ་སྦྱོང་འདོད་ཆེན་ཆུང་བས་སྨྲ་བར་མི་བྱ་སྟེ། འདི་ལྟར་བདག་རིགས་ཆེ་གེ་མོ་ཞིག་ལས་རབ་ཏུ་བྱུང་ངོ་ཞེའམ། བདག་རིགས་ཆེན་པོ་ལས་རབ་ཏུ་བྱུང་ངོ་ཞེས་དེ་སྐད་བདག་ཉིད་ཀྱིས་སྨྲ་བར་མི་བྱའོ། །གཞན་ཡང་ལྷན་ཅིག་གནས་པའམ། ཉེ་གནས་ཤིག་སྨྲ་ན་ཡང་ཕྱིར་བཟློག་པར་བྱའོ། །འདི་ལྟར་དགེ་སྦྱོང་གི་དངོས་པོ་ཙམ་ཉིད་ལས་སྦྱིན་བདག་དང་སྦྱིན་པ་པོ་དག་མལ་སྟན་དང་ན་བའི་གསོས་སྨན་གྱི་རྐྱེན་གྱི་ཡོ་བྱད་རྣམས་བདག་ལ་སྦྱིན་པར་བྱེད་དེ། དེས་ནི་བདག་དངོས་པོ་ཡོངས་སུ་འཛིན་པ་དང་ལྡན་པར་འགྱུར་ལ། ཇི་སྟེ་མ་བླངས་ན་བདག་གི་ཉེ་གནས་དེའི་ཡིད་མི་དགའ་བར་འགྱུར་རོ། །དེ་གལ་ཏེ་བདག་ལ་ཡིད་མི་དགའ་བར་བྱེད་ན་དེ་དེ་དག་གི་བར་ཆད་དུ་འགྱུར་ཏེ། འཇིག་རྟེན་ཕ་རོལ་ལ་ཕན་པར་མི་འགྱུར་རོ། །དངོས་པོ་ཡོངས་སུ་བཟུང་བ་ཡང་དེ་ལྟར་ཡོངས་སུ་ཤེས་པར་བྱ་སྟེ། དགེ་སློང་དེ་ལྟ་བུ་ནི་འདོད་ཆེན་ཆུང་བར་འགྱུར། སྲིད་པས་མི་ཟིན་པར་འགྱུར། སེམས་གཡེངས་པར་མི་འགྱུར། དྲན་པ་ཉེ་བར་གནས་པར་འགྱུར། དམ་པའི་ཆོས་དང་བསམ་གཏན་ལ་གནས་པའི་ཀུན་དགའ་བ་ལ་མངོན་པར་དགའ་བར་འགྱུར། ལུས་ལ་ལུས་ཀྱི་རྗེས་སུ་ལྟ་བ་དང་། སེམས་ལ་སེམས་ཀྱི་རྗེས་སུ་ལྟ་བ་དང་། ཚོར་བ་ལ་ཚོར་བའི་རྗེས་སུ་ལྟ་བ་དང་། ཆོས་ལ་ཆོས་ཀྱི་རྗེས་སུ་ལྟ་བར་འགྱུར་ཏེ། འདོད་ཆེན་ཆུང་བ་དེ་ནི་སྲིད་པའི་བཙོན་ར་ལས་འབྲོས་པར་
ནུས་སོ། །གཞན་ཡང་འདི་ལ་དགེ་སློང་འདོད་ཆེན་ཆུང་བ་ཆོག་ཤེས་པ། རྙེད་པ་དང་བཀུར་སྟིའི་འཇིགས་པ་དང་བྲལ་བས་དངོས་པོ་བརྒྱད་པ་ཡོངས་སུ་ཤེས་པར་བྱ་སྟེ། དངོས་པོ་ཡོངས་སུ་ཤེས་པར་བྱ་བ་དེ་གང་ཞེ་ན། འདི་ལ་སྐྱེ་བོ་མང་པོ་འཛིན་པ་སྣོད་སྤྱད་དང་ཡོ་བྱད་མང་བ་ལྷན་ཅིག་གནས་པ་མང་བ། རྙེད་པ་དང་བཀུར་སྟི་ལ་མངོན་པར་དགའ་བ་མང་བ། རོ་ལ་འཆུམས་པ། སྤྱན་འདྲེན་པ་ལ་ཤིན་ཏུ་ཡིད་ཞུགས་པ། གཉེན་འདུན་ལྟ་འདོད་པའི་དགེ་སྦྱོང་གིས་ཡུལ་རྒྱུ་བའི་བྱ་བའམ་ལྷན་ཅིག་གནས་པའམ་འགྲོ་བར་མི་བྱའོ། །དེ་ཅིའི་ཕྱིར་ཞེ་ན། བག་མེད་པས་ཕྲོགས་པའི་དགེ་སློང་དེ་ཇི་ལྟར་རྙེད་པ་དང་བཀུར་སྟི་ལ་མངོན་པར་དགའ་བ་དེ་ལྟར་དེ་ཡང་སྐྱེ་བོས་ཤེས་པར་འགྱུར་ལ། དེ་ལྟར་འགྲོགས་པ་དེ་ལ་ཡང་རྙེད་པ་དང་བཀུར་སྟིས་གོས་པར་འགྱུར་རོ། །གལ་ཏེ་བླང་བ་དག་ཇི་སྟེ་ལེན་པར་མི་བྱེད་ན། སྣོད་སྤྱད་དང་ཡོ་བྱད་མང་བ་དང་། སྤྱན་འདྲེན་པ་ལ་མངོན་པར་དགའ་བ་དེའི་ཡིད་ཀྱི་འདུན་པ་ལ་མངོན་པར་གནོད་པར་འགྱུར་རོ། །སྦྱིན་བདག་དང་སྦྱིན་པ་པོ་རྣམས་ཀྱི་དྲུང་དུ་ཡང་སོང་ནས། དགེ་སློང་འདོད་ཆེན་ཆུང་བ་དེ་ལ་སྨོད་པར་བྱེད་དེ། འདི་ལྟར་དགེ་སློང་འདི་ནི་ཚུལ་འཆོས་པ། སྐྱེ་བོ་ཐམས་ཅད་སླུ་བར་བྱེད་པ་ཡིན་ལ་ནང་གི་ཡིད་ནི་སྡིག་པ་ཅན་ཡིན་ནོ་ཞེས་དེ་ལྟར་དེ་ལ་ཡང་གནོད་པར་བྱེད་ལ། བདག་ཉིད་ལ་ཡང་གནོད་པར་བྱེད་དོ། །དེ་ལྟ་བས་ན་འདོད་ཆེན་ཆུང་བའི་དགེ་སློང་དང་འདོད་ཆེན་ཆེ་བ་དང་ལྷན་ཅིག་ཡིད་ཀྱི་ཉེས་པས་གནས་པར་མི་བྱའོ། །གཞན་ཡང་འདི་ལྟར་འདོད་ཆེན་ཆུང་བའི་དགེ་སློང་འཁོར་བས་འཇིགས་ཤིང་སྐྲག་པ་རྙེད་པ་དང་བཀུར་སྟི་དང་བྲལ་བ། རྟག་ཏུ་སེམས་མཉམ་པར་བཞག་པས་དངོས་པོ་དགུ་པ་ཡོངས་སུ་ཤེས་པར་བྱའོ། །དངོས་པོ་ཡོངས་སུ་ཤེས་པར་བྱ་བ་གང་ཞེ་ན། འདི་ལྟར་ཁྱིམ་ན་གནས་པ་རིག་པའི་གནས་རྣམས་ལ་གོམས་པ་གང་ཡིན་པ་དེ་དག་རབ་ཏུ་བྱུང་བར་གྱུར་ནས། དེ་རྣམས་བསྒྲག་པར་མི་བྱ་སྟེ་འདི་ལྟ་སྟེ། སྨན་པའམ། རི་མོ་མཁན་ནམ། གར་མཁན་ནམ། གཏར་མཁན་ནམ། རྣམ་པ་དེ་ལྟ་བུ་དང་འཐུན་པའམ། རིག་པའི་གནས་གཞན་དག་ཀྱང་རུང་བསྒྲག་པར་མི་བྱའོ། །དེ་ཅིའི་ཕྱིར་ཞེ་ན། བདག་རྙེད་པ་དང་བཀུར་སྟི་ལ་མངོན་པར་དགའ་བར་སྦྱིན་བདག་དང་སྦྱིན་པ་པོས་མངོན་པར་ཤེས་པར་གྱུར་ན། དེ་ནི་བདག་གི་བར་ཆད་དུ་འགྱུར་ཞིང་དེ་
ལ་རྣམ་པར་ཆགས་ན། དགེ་བའི་ཆོས་རྣམས་སྒྲུབ་པར་མི་འགྱུར། སེམས་རྩེ་གཅིག་ཏུ་མི་འགྱུར། བསམ་གཏན་གྱི་ཟས་རྣམས་ལ་བདག་གི་སེམས་དང་བར་མི་འགྱུར། དེ་བདག་གི་བར་ཆད་དུ་འགྱུར། བདག་དང་གཞན་ལ་ཕན་པ་ཉམས་པར་འགྱུར་རོ། །ལྷན་ཅིག་གནས་པ་ལྷུར་མི་བྱ་སྟེ། ཡིད་དེ་དང་ཆགས་པ་དེ་ནི་ཕན་པར་མི་འགྱུར་བས་དེ་ལྟ་བས་ན་ཡོངས་སུ་སྤང་བར་བྱའོ། །གཞན་ཡང་དགེ་སློང་འདོད་ཆེན་ཆུང་བ་བློ་དང་ལྡན་པ་རྙེད་པ་དང་བཀུར་སྟི་སྤོང་བར་འདོད་པས། དངོས་པོ་བཅུ་པ་ཡོངས་སུ་ཤེས་པར་བྱ་སྟེ། འདི་ལྟར་གྲོང་ཁྱེར་དང་ཉེ་བ་ནའམ། གྲོང་དང་ཉེ་བ་ནའམ། རི་འོར་དང་ཉེ་བ་ནའམ། ཚོང་འདུས་དང་ཉེ་བའི་གཙུག་ལག་ཁང་ན་གནས་པ་གང་ཡིན་པ་འདི་དག་མཐོང་སྟེ། དགེ་སློང་དང་དགེ་སློང་མ་རྣམས་ཀྱིས་གང་བ་དང་། ཁ་ཟས་ཀྱིས་གང་བ་དང་། ཆང་འཐུང་བས་གང་བ་དང་། ཉོ་ཚོང་བྱེད་པས་གང་བ་དང་། སྦྱོར་བ་བྱེད་པས་གང་བ་དང་། ཁང་པ་ཆུང་ངུའི་ནང་ན་གནས་པའི་སྟེན་གྲོགས་རྣམས་དང་དགེ་སློང་དག་ལྷན་ཅིག་གནས་པ་མཐོང་ན། དགེ་སློང་འདོད་ཆེན་ཆུང་བ་ཡིད་ཞི་བ། བདུད་ཀྱི་འཆིང་བ་གཅོད་པར་འདོད་པས་གནས་པར་མི་བྱའོ། །དེ་ཅིའི་ཕྱིར་ཞེ་ན། གྲོང་ཁྱེར་པའམ། གྲོང་མིའམ། རི་བྲགས་ན་གནས་པའམ། ཚོང་འདུས་ན་གནས་པ་དེ་དག་གིས་དགེ་སློང་མི་བརྟན་པ་དེ་དག་ཚུལ་ཁྲིམས་འཆལ་པར་ཁོང་དུ་ཆུད་ཅིང་རིག་ནས། དགེ་སློང་གཅིག་པོ་དེ་ལ་རྙེད་པ་དང་བཀུར་སྟི་བྱེད་དོ། །དེ་གལ་ཏེ་སོ་སོར་བླངས་ན་ནི། འདོད་ཆེན་ཆུང་བར་མི་འགྱུར་ལ། ཇི་སྟེ་སོ་སོར་མ་བླངས་ན་ནི་སྦྱིན་པ་པོ་དེ་རྣམས་ཀྱི་བར་ཆད་དུ་འགྱུར་ཞིང་གཅིག་པོ་དེ་ལ་སྦྱིན་པ་བྱིན་པ་གང་ཡིན་པ་དེ་ལ་ཞེ་སྡང་གི་སེམས་རབ་ཏུ་ཉེས་པའི་དགེ་སློང་གཞན་གང་ཡིན་པ་དེ་དག་ལ་ཡང་བར་ཆད་དུ་འགྱུར་རོ། །སྐྱོན་དེ་དག་རྟོགས་ནས། དགེ་སློང་འདོད་ཆེན་ཆུང་བས་ཀུན་དུ་སྤྱོད་པ་དང་འདྲེས་པ་རྣམས་དང་ལྷན་ཅིག་གནས་པར་མི་བྱའོ། །གཞན་ཡང་དངོས་པོ་བཅུ་གཅིག་པ་ཡོངས་སུ་ཤེས་པར་བྱ་སྟེ། འདི་ལྟར་འཇིག་རྟེན་པའི་ཤེས་པས་ལྟས་དག་སྟོན་པའི་ཤེས་པ་གང་ཡིན་པ་དེ་ཡང་དེས་གཞན་དག་ལ་སྨྲ་བར་མི་བྱའོ། །འདི་ལྟར་དགྲ་བཅོམ་པ་ཡིན་ནོ་སྙམ་དུ་ཤེས་ནས། དེ་ལ་རྙེད་པ་དང་བཀུར་སྟིས་མཆོད་པ་བྱེད་ལ་དེ་ནི་དེའི་བར་ཆད་དུ་འགྱུར་རོ། །འདོད་ཆེན་ཆུང་བ་སེལ་བར་མི་
འགྱུར་རོ། །གཞན་ཡང་དངོས་པོ་བཅུ་གཉིས་པ་ཡོངས་སུ་ཤེས་པར་བྱ་སྟེ། འདི་ལྟར་གང་གིས་ཞིང་འདི་ལ་སྦྱིན་པ་ཆེན་པོ་སྦྱིན་པར་བྱེད་དོ་སྙམ་ནས། རྨད་དུ་བྱུང་བ་བསྟན་པའི་ཕྱིར་བཅོམ་ལྡན་འདས་ཀྱི་རིང་བསྲེལ་དག་ཁྱེར་ནས། གྲོང་ཁྱེར་ནས་གྲོང་ཁྱེར་དང་། གྲོང་ནས་གྲོང་དང་། རི་བྲགས་ནས་རི་བྲགས་དང་། ཚོང་འདུས་ནས་ཚོང་འདུས་སུ་འགྲོའོ། །དེ་ཡང་ཐོས་པ་ཉུང་བ་ཡིན་ལ། དེས་འདོད་ཆེན་ཆུང་བ་ཤིན་ཏུ་ཐོས་པ་མང་པོ་དང་ལྡན་པ་དེ་ལ་ཆེད་དུ་བརྗོད་ཅིང་གཟེངས་བསྟོད་དེ་ཡང་དག་པར་དགའ་བར་བྱས་ནས་འཇུག་པར་བྱེད་དོ། །འདི་སྙམ་དུ་སྦྱིན་བདག་དང་སྦྱིན་པ་པོ་རྣམས་ལ་ཐོས་པ་མང་པོས་ཆོས་འཆད་ལ། རིང་བསྲེལ་རྣམས་ལ་ཡང་གུས་པའི་སྦྱིན་བདག་དང་སྦྱིན་པ་པོ་དག་ཡོན་འབུལ་བར་བྱེད་དེ། ནོར་རྫས་དེ་དག་བདག་གིར་བྱའོ་སྙམ་དུ་སེམས་ན། འདོད་ཆེན་ཆུང་ཞིང་ཤིན་ཏུ་ཆོག་ཤེས་པ་དེ་དེ་དང་ལྷན་ཅིག་འགྲོགས་པར་མི་བྱ་འཁོད་པར་མི་བྱའོ། །གཞན་གྱི་སྐྱོན་དེས་ཚུལ་ཁྲིམས་འཆལ་པ་དེ་ཡང་སྦྱིན་བདག་དང་སྦྱིན་པ་པོ་དག་གིས་ཤེས་པར་འགྱུར་ཏེ་དེ་དག་གི་བར་ཆད་དུ་འགྱུར་རོ། །དེ་ལྟ་བས་ན་ཡང་དག་པ་ཡིད་ལ་བྱེད་པའམ། གཤིན་རྗེའི་གནས་ལ་འཇིགས་ཤིང་སྐྲག་པའམ། བག་མེད་པས་འཇིགས་པ་ནི་ཚུལ་ཁྲིམས་འཆལ་པ་དང་ལྷན་ཅིག་འགྲོགས་པར་མི་བྱ་གནས་པར་མི་བྱའོ། །གཞན་ཡང་དངོས་པོ་བཅུ་གསུམ་པ་ཡོངས་སུ་ཤེས་པར་བྱ་སྟེ། དགེ་སློང་འདོད་ཆེན་ཆུང་བ་བསོད་སྙོམས་སྤྱོད་པ་བག་ཡོད་པར་གནས་པ་རོ་ལ་ཆགས་པ་རྣམ་པར་སྤངས་པས་གཞན་གྱིས་དྲོད་མི་ཟིན་པར་རྟག་ཏུ་བརྟན་པ་དང་ལྡན་པར་བྱའོ། །གཞན་ཡང་དངོས་པོ་བཅུ་བཞི་པ་ཡོངས་སུ་ཤེས་པར་བྱ་སྟེ། ཕྱག་དར་ཁྲོད་ན་གནས་པའམ། ཕྱག་དར་རྣམས་ཀྱིས་ཆོག་ཤེས་པ་ནི་ཆོག་ཤེས་པར་བྱ་བའི་དོན་དུ་གོས་ཤིན་ཏུ་ཟད་པ་དག་གྱོན་པར་བྱེད་དོ། །གཞན་ཡང་དགེ་སློང་ཆོག་ཤེས་པ་བདུད་ཀྱི་སྡེ་འཇོམས་པར་བྱེད་པས། དངོས་པོ་བཅོ་ལྔ་པ་ཡོངས་སུ་ཤེས་པར་བྱ་སྟེ། བཅོ་ལྔ་གང་ཞེ་ན་འདི་ལྟ་སྟེ། སྡིག་པའི་གྲོགས་པོ་སྤངས་པ། གཅིག་པུ་གནས་ཤིང་གཅིག་པུ་གནས་པར་སྟོན་པ་ནི་ཐོག་མ་མེད་པའི་དུས་ནས་ཞུགས་པ། ཉོན་མོངས་པའི་རི་སྲ་བ་སྦྱོང་བར་བྱེད་དོ། །དེ་ལྟར་ཆོག་ཤེས་པ་ནི་ཤིན་ཏུ་བདེ་བ་དང་ལྡན་ཞིང་འཆི་བའི་ཚེ་ཡང་གཤིན་རྗེའི་མིའི་དབང་དུ་འགྲོ་བར་མི་འགྱུར། གཤིན་རྗེའི་ཕོ་ཉ་
གཟུགས་དང་བཞིན་དང་མིག་མི་སྡུག་པར་བསྒྱུར་བ་རྣམས་མཐོང་བར་མི་འགྱུར་ལ། ཤིན་ཏུ་འཇིགས་པ་མེད་པར་འགྱུར་རོ། །དེ་ནས་བརྒྱ་བྱིན་གྱིས་འདི་ལྟར་ཚིགས་སུ་བཅད་དེ་སྨྲས་པ། ཇི་ལྟ་ཇི་ལྟར་ཆོག་ཤེས་ལ། །སྡོམ་བརྩོན་རྟག་ཏུ་སྟེན་བྱེད་པ། །དེ་ལྟ་དེ་ལྟར་ཞི་བ་ཡི། དྲུང་དུ་དེ་ནི་འཇུག་པར་བྱེད། །བྱ་བ་རྣམས་ལ་བྱེད་མེད་ཅིང་། །མྱ་ངན་འདས་ལ་འབད་ལྡན་པ། །དེ་ནི་བདུད་ཀྱི་ཡུལ་དག་ལ། །ནམ་ཡང་འཇུག་པར་མི་འགྱུར་རོ། །གང་གི་ཡིད་ལ་འདོད་ཆགས་བྲལ། །རྟག་ཏུ་འབད་པ་ཉིད་དག་དང་། །ཡེ་ཤེས་ལ་ནི་རྒྱུན་དུ་བརྩོན། །དེ་ནི་སྡུག་བསྔལ་ག་ལ་འདོད། །འདས་པའི་འཇིགས་པ་ཡང་དག་དྲན། །ད་ལྟར་བྱུང་ནའང་བློ་དང་ལྡན། །མ་འོངས་ཆོག་ཤེས་ལྡན་པ་གང་། །དེ་ནི་ཉོན་མོངས་འཆིང་ལས་གྲོལ། །བག་ཡོད་པ་ལ་རྟག་ཏུ་དགའ། །སྔར་མ་དང་ནི་གཅུགས་པ་མེད། །དྲི་མེད་ཤེས་ལ་སྟེན་པ་དེ། །མྱ་ངན་འདས་པའི་མཐའ་ལ་གནས། བག་མེད་པ་ཡང་ཉམས་གྱུར་ན། །ལྷ་རྣམས་བདེ་བ་ཆེན་པོ་འཐོབ། །བག་མེད་པ་ལ་གནས་པ་གང་། །སྐྱེས་བུ་དེ་ནི་འཆི་འགྱུར་ན། །མི་གང་རྨོངས་པ་བག་མེད་པའི། །དབང་དུ་བསྟེན་པ་སྨོས་ཅི་དགོས། །གང་ཞིག་རྟག་ཏུ་ཡེ་ཤེས་ཆུས། །འཚོ་བ་རབ་ཏུ་མྱོས་པ་མེད། །བག་མེད་པ་ལས་བག་ཡོད་པ། །འདི་ནི་མཆོག་ཏུ་འདོད་པ་ཡིན། །བག་མེད་སྡུག་བསྔལ་རྩ་བ་སྟེ། །ཉེས་པ་འཆི་བ་བཞིན་དུ་སྤོངས། །དེ་ལྟར་བརྒྱ་བྱིན་གྱིས་སྤྲུལ་པའི་གཤིན་རྗེའི་མིས་འཇིགས་ཤིང་སྐྲག་པའི་ལྷ་དེ་རྣམས་ལ་ཆོས་སྟོན་པར་བྱེད་དོ། །གང་སེམས་རབ་ཏུ་དང་ཞིང་མངོན་པར་འདོད་པའི་ལྷ་དེ་རྣམས་ཀྱིས་གཤིན་རྗེའི་མི་དེ་རྣམས་དང་། དེ་རྣམས་ཀྱི་གཟུགས་མི་སྣང་བར་བློས་མངོན་སུམ་དུ་མཐོང་ནས། ལྷ་དེ་རྣམས་སེམས་རངས་པར་གྱུར་ཏོ། །དེ་ནས་ཡང་འཇིགས་ཤིང་སྐྲག་ནས་ཚལ་དང་ཉེ་བའི་ཚལ་རྣམས་སུ་གབ་པའི་ལྷ་གང་ཡིན་པ་དེ་དག་གིས་ཀྱང་བརྒྱ་བྱིན་མཐོང་ནས་ག་ལ་བ་དེར་དོང་སྟེ་ཕྱིན་པ་དང་། བརྒྱ་བྱིན་ཆོས་དེ་སྟོན་པར་བྱེད་དོ། །བརྒྱ་བྱིན་གྱིས་དེ་རྣམས་ཀྱི་སེམས་དེ་དག་རིག་ནས། ཇི་ལྟ་ཇི་ལྟར་ལྷ་དེ་རྣམས་ཀྱི་སེམས་དེ་དག་དགའ་བར་འགྱུར་བ་དེ་ལྟ་དེ་ལྟར་མཐར་གྱིས་སྤྲུལ་པ་དེ་རྣམས་མི་སྣང་བར་བྱེད་དོ། །དེ་ནས་ཡང་ཆོས་ལ་གུས་པ་སྐྱེས་པ་རྣམས་ཆོས་ཉན་པར་བྱེད་ཅིང་བརྒྱ་བྱིན་ལ་
ཡང་གསོལ་བ་འདེབས་ཏེ། འདི་ལྟར་ཆོས་ཀྱི་མཐུ་འདི་ནི་བདག་ཅག་གི་མངོན་སུམ་དུ་གྱུར་ཏོ། །ཇི་ལྟ་ཇི་ལྟར་ཁྱོད་ཀྱིས་བདག་ཅག་ལ་ཆོས་འདི་དག་སྟོན་པར་མཛད་པ་དེ་ལྟ་དེ་ལྟར་གཤིན་རྗེའི་མི་འདི་དག་འབྲོས་ཤིང་མི་སྣང་བར་བགྱིད་དོ། །བཅོམ་ལྡན་འདས་ཀྱིས་གསུངས་པའི་ཆོས་འདུལ་བའི་མཐུ་འདི་ཐོས་པ་ཙམ་གྱིས་དེ་ལྟར་བགྱིད་ན། སྒྲུབ་པ་གང་ལགས་པ་དེ་དག་ལྟ་སྨོས་ཀྱང་ཅི་འཚལ་ཏེ་འཆི་བ་མེད་པའི་གནས་སུ་མཆིའོ། །དེ་ནས་བརྒྱ་བྱིན་ཡིད་རབ་ཏུ་དགའ་ནས་བདག་གིས་ཐམས་ཅད་དུ་བྱ་བ་བྱས་པར་གྱུར་ཏོ། །བདག་གིས་ཤིན་ཏུ་བག་མེད་པ་ལ་གནས་པ་གང་ཡིན་པ་དེ་དག་བག་ཡོད་པའི་རྙི་ལ་བཙུད་དོ་སྙམ་མོ། །ཡང་ཡིད་རབ་ཏུ་དགའ་བ་འདི་རྣམས་ལ་བདག་གིས་ཆོས་ཟབ་མོ་བླ་མ་གཞན་དག་ལས་ཇི་ལྟར་ཐོས་པ་བཞིན་བཤད་པར་བྱའོ། །ཐར་པའི་གྲོང་ཁྱེར་གྱི་སྒོ་འབྱེད་པ་ནི་དབུགས་རྔུབ་པ་དང་འབྱུང་བ་དྲན་པ་ཡིན་ཏེ། དེ་ནི་བདག་གིས་སྔོན་གྱི་ལྷ་རྣམས་ལས་བརྒྱུད་དེ་ཐོས་སོ། །བཅོམ་ལྡན་འདས་ལས་ཀྱང་དེ་བཞིན་དུ་ཐོས་ཏེ། བདག་གིས་ཇི་ལྟར་ཐོས་པ་དེ་དེ་བཞིན་དུ་ལྷ་དེ་རྣམས་ལ་བཤད་པར་བྱའོ། །འཕགས་པའི་བདེན་པ་བཞིའི་གཏམ་དང་འདྲེས་པར་གྱུར་པ་རྣམས། འཕགས་པའི་བདེན་པ་རེ་རེ་ལ་རྣམ་པ་བཞི་བཞིར་ཕྱེ་སྟེ་བཤད་པ་དང་། དེ་བཞིན་དུ་ལྷ་དེ་རྣམས་ལ་ཤིན་ཏུ་ཕན་པ་བྱས་པར་འགྱུར་རོ། །ཐབས་གང་ཡིན་པ་དེས་ཆོས་བཤད་དེ། ཤིན་ཏུ་ཕན་པར་བྱས་པ་དང་འཁོར་བར་ཆུད་པའི་སེམས་ཅན་རྣམས་ཀྱི་ཡིད་ཉིད་ལ་རྟག་ཏུ་འཇོག་པར་བྱེད་དོ། །དེ་ལ་དངོས་པོ་བཅོ་ལྔ་ནི་བསྟན་ཟིན་ཏོ། །ད་ནི་དབུགས་རྔུབ་པ་དང་འབྱུང་བ་དྲན་པ་རྣམ་པ་བཅུ་དྲུག་པོ་དག་རིམ་པ་དང་འཐུན་པ་དང་སྦྱོར་བ་དང་འཕགས་པའི་བདེན་པའི་ཕྱོགས་དབྱེ་བ་དང་རང་གི་མཚན་ཉིད་དང་རྒྱུའི་མཚན་ཉིད་ཀྱིས་ལྷ་འདི་དག་ལ་བཤད་པར་བྱའོ། །དེ་ལ་རིམ་པ་ཇི་ལྟ་བུ་ཡིན་ཞེ་ན། འདི་ལ་རྣལ་འབྱོར་པ་རང་གི་ལུས་ཀྱི་ཆ་ཤས་ལ་སེམས་སྤྲེའུ་ལྟ་བུ་འདོགས་པར་བྱེད་དོ། །རྣམ་པར་ཤེས་པ་དགག་པའི་དོན་དུ་གཙོ་བོ་གང་གིས་འདོགས་པར་བྱེད་ཅེ་ན་དེ་ནི་ཡིད་རྩེ་གཅིག་པས་སོ། །དེ་ནས་ལུས་ཀྱི་མཚན་ཉིད་རིམ་གྱིས་སྤྱོད་པར་བྱེད་དེ། དེ་ཉོན་མོངས་པ་དང་ཉོན་མོངས་པ་མ་ཡིན་པ་དང་ལུང་དུ་མ་བསྟན་པའི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །བདེ་བ་དང་
སྡུག་བསྔལ་བ་དང་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་མཚན་ཉིད་དེ་དག་གི་ཚོར་བ་ལ་ཚོར་བའི་རྗེས་སུ་ལྟ་ཞིང་གནས་སོ། །དགེ་བ་དང་མི་དགེ་བ་དང་ལུང་དུ་མ་བསྟན་པའི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཏེ། དྲན་པ་ཉེ་བར་གཞག་པ་བཞི་པོ་དེ་དག་གི་རང་གི་མཚན་ཉིད་ཇི་ལྟ་བ་བཞིན་དུ་ལྟ་བར་བྱེད་དོ། །དེ་ལྟར་རྣལ་འབྱོར་པ་དེ་ཆོས་ཤེས་བྱ་བ་ལ་ཞུགས་ཏེ། ཞི་བ་དང་རྟོགས་པར་ཆུད་པ། འདུ་བྱེད་ཐམས་ཅད་ཀྱི་རང་གི་མཚན་ཉིད་ལ་ལྟ་བར་བྱེད་ཅིང་འཕགས་པའི་བདེན་པ་བཞིའི་མཚན་ཉིད་དྲན་པ་ཉེ་བར་གཞག་པ་བཞི་རྣམས་ལ་ལྟ་བར་བྱེད་དོ། །དྲན་པ་ཉེ་བར་གཞག་པ་ནི་འདི་དག་ཐམས་ཅད་ཡིན་ཏེ། འདི་ལྟ་སྟེ། སྐད་ཅིག་མ་གཅིག་ནས་གཅིག་ཏུ་འཇུག་པ་མི་རྟག་པ་དང་དབང་ཕྱུག་རྟག་པ་དང་བྲལ་བ་ཉིད་ཀྱིས་སྟོང་པ་དང་དབང་ཕྱུག་དང་བྲལ་བ་ཉིད་ཀྱིས་བདག་མེད་པ་དང་། ཉོན་མོངས་པ་འཇིག་པ་ཕ་རོལ་དུ་འགྲོ་བ་ཉིད་ཀྱིས་སྡུག་བསྔལ་བ་ཡིན་ཏེ། དེ་ལྟར་དེ་དྲན་པ་ཉེ་བར་གཞག་པ་བཞི་དག་ལ་ལྟ་བར་བྱེད་དོ། །འཕགས་པའི་བདེན་པ་བཞིའི་རང་གི་མཚན་ཉིད་ཇི་ལྟ་བ་བཞིན་མཐོང་བ་དང་དྲོ་བ་ཞེས་བྱ་བ་ཆོས་ཀྱི་བློ་སྐྱེ་སྟེ། ཇི་ལྟར་མེ་འབྱུང་བ་ན་སྔར་དུ་བ་འབྱུང་ལ་ཕྱིས་མེ་འབྱུང་བ་དང་ཇི་ལྟར་གཙུབ་ཤིང་གིས་གཙུབས་པ་ན་དྲོ་བ་སྔར་འབྱུང་ལ། ཕྱིས་མེ་འབྱུང་བར་འགྱུར་བ་དེ་ལྟར་ཉོན་མོངས་པ་དང་མི་ཤེས་པ་ཐམས་ཅད་ཀྱི་གཉེན་པོའི་རྟགས་དྲོ་བ་འབྱུང་བར་འགྱུར་རོ། །འཕགས་པའི་ཆོས་འདུལ་བ་ལ་འཕགས་པའི་བདེན་པ་བཞི་དཔྱོད་པ་རྣམ་པ་བཅུ་དྲུག་ཏུ་ཆུད་པ། དགའ་བ་དང་དང་བ་ཙམ་ཡིན་ནོ། །དྲོ་བར་གྱུར་པའི་ཆོས་དེ་ཇི་ལྟར་འབྱུང་། གཙོ་བོ་འཕགས་པའི་བདེན་པ་བཞི་ལ་ཇི་ལྟར་འབྱེད་ཅེ་ན། འདི་ལྟ་སྟེ། འཕགས་པའི་བདེན་པ་སྡུག་བསྔལ་བ་ནི་འདི་དག་ཡིན་ཏེ། རྒྱུ་དང་རྐྱེན་ཉིད་ཀྱིས་མི་རྟག་པ་དང་གནོད་པ་ཉིད་ཀྱིས་སྡུག་བསྔལ་བ་དང་སྐྱེས་བུ་དང་བྲལ་བ་ཉིད་ཀྱིས་སྟོང་པ་དང་རང་དབང་དུ་མི་འཇུག་པ་ཉིད་ཀྱིས་བདག་མེད་པ་ཡིན་ཏེ། དེ་ལྟར་རྣལ་འབྱོར་པ་དེ་འཕགས་པའི་བདེན་པ་སྡུག་བསྔལ་བ་ལ་རྣམ་པ་བཞིར་འབྱེད་དོ། །འཕགས་པའི་བདེན་པ་སྡུག་བསྔལ་བའི་འོག་ཏུ་ཀུན་འབྱུང་བ་འབྱུང་ངོ་། །ཀུན་འབྱུང་བ་དེ་ལ་ཡང་རྣམ་པ་བཞིར་འབྱེད་དེ། འདི་ལྟ་སྟེ། འདུ་བྱེད་
འབྲེལ་བར་འཇུག་པ་ཉིད་ཀྱིས་ཀུན་འབྱུང་བ་དང་དེ་འབྲས་བུ་དང་འཐུན་པ་ཉིད་ཀྱིས་རྒྱུ་དང་རབ་ཏུ་འབྱེད་པའི་རྣམ་པ་ཀུན་ཉིད་ཀྱིས་རབ་ཏུ་སྐྱེ་བ་དང་འབྲས་བུ་དང་མི་འཐུན་པར་འབྲེལ་པ་ཉིད་ཀྱིས་རྐྱེན་ཡིན་ནོ། །འགོག་པ་ལ་ཡང་རྣམ་པ་བཞིར་འབྱེད་དེ། གཙོ་བོ་རྣལ་འབྱོར་པ་དེ་ཇི་ལྟར་འབྱེད་ཅེ་ན་འདི་ལྟ་སྟེ། ཉོན་མོངས་པ་ཀུན་མེད་པ་ཉིད་ཀྱིས་འགོག་པ་དང་ཉོན་མོངས་པའི་མེ་སྤངས་པ་ཉིད་ཀྱིས་ཞི་བ་དང་ཆོས་ཀུན་གྱི་གཙོ་བོ་ཉིད་ཀྱིས་གྱ་ནོམ་པ་དང་འཁོར་བ་ལས་ངེས་པར་འབྱིན་པ་ཉིད་ཀྱིས་ངེས་པར་འབྱུང་བ་ཡིན་ནོ། །གཙོ་བོ་རྣལ་འབྱོར་པ་དེ་ལམ་ལ་ཡང་རྣམ་པ་བཞིར་འབྱེད་དེ་འདི་ལྟ་སྟེ། བྱང་གྲོལ་འཐོབ་པ་ཉིད་ཀྱིས་ལམ་དང་ཕྱིན་ཅི་མ་ལོག་པ་ཉིད་ཀྱིས་རིགས་པ་དང་འཕགས་པའི་སྐྱེ་བོ་ཐམས་ཅད་གནས་པ་ཉིད་ཀྱིས་སྒྲུབ་པ་དང་འཁོར་བའི་ཉོན་མོངས་པ་འགོག་པ་ཉིད་ཀྱིས་ངེས་པར་འབྱིན་པ་ཡིན་ནོ། །དེ་ལྟར་བདག་གིས་རྣལ་འབྱོར་རྒྱ་ཆེན་པོ་རྣམ་པ་བཅུ་དྲུག་ཁྱེད་ལ་བསྟན་པ་ཡིན་ཏེ། དྲོ་བ་ནི་དེ་ལྟ་བུ་ཡིན་ནོ། །དེས་ན་དེའི་དྲོ་བར་གྱུར་པ་ཞེས་བྱ་བའི་ཆོས་འཕེལ་བར་གྱུར་ན། སྤྱི་བོ་ཞེས་བྱ་བའི་ཆོས་སྐྱེ་བར་འགྱུར་ཏེ། ཡོན་ཏན་དང་ལྡན་པའི་དཀོན་མཆོག་གསུམ་དང་ཕུང་པོའི་ཉེས་དམིགས་ལ་མངོན་པར་དད་པའི་རྣལ་འབྱོར་པ་དེ། དེ་ལས་གཞན་པ་ཁྱད་པར་དུ་འཕགས་པ་སྤྱི་བོ་ལ་དཔྱོད་པར་བྱེད་དོ། །སྤྱི་བོར་གྱུར་པ་ཞེས་བྱ་བའི་ཆོས་དེ་མདོར་བསྡུ་ན་རིའི་སྤྱི་བོ་ལྟ་བུ་ཡིན་ནོ། །དེའི་འོག་ཏུ་གཙོ་བོའི་སྤྱི་བོ་འཕེལ་བ་དང་རྗེས་སུ་འཐུན་པའི་བཟོད་པ་ཞེས་བྱ་བ་དགེ་བའི་རྩ་བ་སྐྱེ་བར་འགྱུར་ཏེ། གསུམ་གྱི་སྐབས་བདེན་པ་དེ་བཟོད་པ་ཉིད་ཀྱིས་སྤྱི་བོའི་རྣམ་པ་དང་མི་འཐུན་པའི་བཟོད་པ་ཞེས་བྱ་བའི་ཆོས་འབྱུང་སྟེ། དེ་ནི་བཟོད་པ་ཉིད་ཀྱིས་བཟོད་པ་ཞེས་བྱ་བའི་ཆོས་འབྱུང་ངོ་། །བཟོད་པ་འཕེལ་བས་སྐད་ཅིག་གཅིག་ལ་འཇིག་རྟེན་པའི་ཆོས་ཀྱི་མཆོག་འབྱུང་སྟེ། སེམས་དང་སེམས་ལས་བྱུང་བ་དེ་དག་དུས་དེ་ལ་འབྱུང་ངོ་། །འཇིག་རྟེན་པའི་ཆོས་ཀྱི་མཆོག་ཐོབ་པ་དང་། དེའི་འོག་ཏུ་རྒྱུན་དུ་ཞུགས་པར་འགྱུར་ལ་དེར་ནི་བདག་གི་ལུས་དབང་དུ་ཡོད་དེ། དེ་ནི་གཤིན་རྗེའི་མི་རྣམས་མི་མཐོང་ཞིང་དེ་དག་ལ་འཇིགས་པ་མེད་དོ། །གཙོ་བོ་དེ་དག་ཐམས་ཅད་ནི་བག་ཡོད་པས་ཐོབ་པར་འགྱུར་ཏེ།
དེ་ལྟ་བས་ན་བག་ཡོད་པ་ལ་གོམས་པར་བྱའོ། །དེ་ནས་བརྒྱ་བྱིན་གྱིས་དེའི་ཚེ་འདི་ལྟར་ཚིགས་སུ་བཅད་དེ་སྨྲས་པ། དབུགས་འབྱུང་རྔུབ་པའི་ཆོ་ག་ཤེས། །རྣམ་པ་བཅུ་དྲུག་དེ་ཉིད་རིག །དྲོ་བར་གྱུར་པའི་ཚུལ་ཤེས་གང་། །བཟོད་པའི་དེ་ཉིད་ཚུལ་ལ་མཁས། །འཇིག་རྟེན་མཆོག་གི་ཆོས་ཤེས་པ། །དེ་ཡི་འོག་ཏུ་དེ་ཉིད་རིག །ཆོས་ཉིད་རིམ་བཞིན་རིག་པ་དེ། །ཡང་དག་ལམ་ལས་གཡོ་བ་མེད། །སྦྱོར་བ་གསུམ་ལས་ངེས་གྲོལ་ཞིང་། །འཇིགས་པ་ཉམ་ང་བརྒྱད་མེད་ལ། །བརྟན་པོ་ངན་འགྲོ་བརྒྱད་མེད་པ། །རྒྱུན་དུ་ཞུགས་ཞེས་ངེས་པར་བརྗོད། །ངེས་པར་ངན་འགྲོར་འགྲོ་བ་ཡི། །མི་དགེ་ཆོས་རྣམས་བསལ་བ་དང་། །ཐར་པའི་རྒྱུན་དུ་འགྲོ་བ་ཡི། །རྒྱུན་དུ་ཞུགས་ཞེས་བྱ་བ་ཡིན། །དེ་ལྟར་བདག་གིས་དབུགས་འབྱུང་བ་དང་རྔུབ་པ་དྲན་པ་རྣམ་པ་བཅུ་དྲུག་ཁྱེད་རྣམས་ལ་བསྟན་པ་ཡིན་གྱིས་དེ་གཟུང་བར་གྱིས་ཤིག །ལམ་དེ་དག་ནི་ཞི་ཞིང་ཐར་པའི་གྲོང་ཁྱེར་དུ་འཇུག་པར་བྱེད་ལ་འཇིགས་པ་མེད་པ་འཕགས་པའི་སྐྱེ་བོ་ཐམས་ཅད་དགྱེས་པ་ཡིན་ནོ། །དེ་ལྟ་བས་ན་ལམ་དེ་དག་ནི་ཁྱེད་རྣམས་ཀྱིས་ངེས་པར་བསྟེན་པར་བྱའོ། །འདི་ལྟར་གཤིན་རྗེའི་མི་རྣམས་ཀྱིས་འཇིགས་པ་ཁྱེད་ལ་དབུགས་འབྱུང་བ་དང་རྔུབ་པ་དྲན་པ་བཅུ་དྲུག་རིམ་བཞིན་བསྟན་པ་ཡིན་ནོ། །གཙོ་བོ་དག་གཤིན་རྗེའི་མིས་འཇིགས་ཤིང་སྐྲག་པའི་ལྷའམ་མིས་སྲིད་པ་བར་མའི་འགྲོ་བ་དང་འབྲེལ་པ་བཅུ་བདུན་སྤང་བར་བྱ་སྟེ། སྲིད་པ་བར་མ་དེ་དག་གང་ཞེ་ན་འདི་ལྟ་སྟེ། འཆི་བའི་ཚེ་གང་གཟུགས་སྣང་བར་འགྱུར་བ་དག་ཡིན་ནོ། །འདི་ལྟ་སྟེ། མི་གང་མིའི་འཇིག་རྟེན་ནས་འཆི་ལ། ལྷ་རྣམས་ཀྱི་ནང་དུ་སྐྱེ་བ་དེ་ནི་སྲིད་པ་བར་མར་མཚན་མ་སྡུག་གུ་དག་མཐོང་བར་འགྱུར་ཏེ་འདི་ལྟ་སྟེ། སྣམ་བུ་དཀར་པོའམ་སྐྱ་སྣར་ཤིན་ཏུ་སྲབ་ཅིང་འཇམ་པ་དག་འབབ་སྟེ། དེ་མ་ཐག་ཏུ་དེའི་སྙིང་རབ་ཏུ་དགའ་ཞིང་བཞིན་གྱི་མདོག་གསལ་བར་འགྱུར་རོ། །དེའི་འོག་ཏུ་དེས་གནས་ཀུན་དགའ་ར་བ་ཉམས་དགའ་བ་དང་། ལྟེང་ཀ་ཉམས་དགའ་བ་དང་། ཆུ་བོ་ཉམས་དགའ་བ་དང་། ཡུལ་དང་ཉེ་བའི་ཚལ་ཉམས་དགའ་བ་དག་མཐོང་ངོ་། །དེའི་འོག་ཏུ་དགོད་པ་དང་རྩེ་བ་དང་གླུ་དབྱངས་ཤིན་
ཏུ་ཡིད་དུ་འོང་བ་དག་ཐོས་སོ། །དེའི་འོག་ཏུ་སྔོན་མ་མྱོང་བའི་དྲི་སྐྱེ་བོ་ཐམས་ཅད་ཀྱི་ཡིད་དུ་འཐད་པ་རྫས་དུ་མ་དག་སྦྱར་བ་ལ་སྣོམ་མོ། །དེའི་འོག་ཏུ་རེག་བྱ་ཤིན་ཏུ་འཇམ་པ་དག་ལ་རེག་པར་བྱེད་དོ། །དེའི་འོག་ཏུ་ལྷ་དང་ལྷ་མོ་དག་འབྱུང་སྟེ། དེའི་ལེགས་པར་བྱས་པའི་ལས་རྣམས་ཀྱང་མངོན་དུ་འབྱུང་ངོ་། །གནད་ཆད་པར་གྱུར་པ་དང་ཕྱིས་མཚན་མ་འདི་དག་འབྱུང་བར་འགྱུར་ཏེ། དེའི་བཞིན་རབ་ཏུ་འཛུམ་ལ་བཞིན་གྱི་མདོག་རྣམ་པར་དག་པར་འགྱུར་རོ། །རང་གི་གཉེན་འདབ་དང་རྩ་ལག་ངུ་ཞིང་སྨྲེ་སྔགས་འདོན་པ་གང་ཡིན་པ་དེ་དག་མཚན་མ་དེ་རྣམས་ཀྱིས་ཕྲོགས་པས་མི་ཐོས་མི་མཐོང་ལ་དེར་ཡིད་མི་འཇུག་སྟེ། ཤིན་ཏུ་བདེ་བའི་ཆོས་ཀྱིས་ཞུགས་པ་དེ་འཆི་བའི་དུས་བྱེད་དོ། །དེའི་སྲིད་པ་བར་མར་ཤིན་ཏུ་བདེ་བ་འབྱུང་བ་དང་འཐུན་པ་ལྷའི་རིས་དང་མཚུངས་པ། སོ་སོའི་མཚན་མ་རྒྱའི་འབུར་ལྟ་བུར་འབྱུང་བར་འགྱུར་རོ། །ལྷའི་རིས་ཀྱི་གཟུགས་བརྙན་འདོད་པའི་ཁམས་ཀྱི་གནས་དྲུག་དང་མཚུངས་པ་བདེ་བ་ལ་གནས་པ་དེ་དང་འཐུན་པ་ཡུལ་དེ་དང་འཐུན་པ་རེག་བྱ་དེ་དང་འཐུན་པ་མཐོང་བ་དེ་དང་འཐུན་པ་དག་འབྱུང་ངོ་། །དེ་ཕྱིས་དེའི་འོག་ཏུ་སྲིད་པ་ལ་གནས་ལ་ལྷའི་རིས་གང་དུ་སྐྱེ་བར་འགྱུར་བ་དེ་ཤིན་ཏུ་བཟང་པོར་མཐོང་སྟེ་ཡུལ་ལ་སྲིད་པས་དེ་དག་ལེན་པར་བྱེད་དོ། །དེ་དེར་སྐྱེ་བར་འགྱུར་ཞིང་སྲིད་པ་བར་མ་དང་པོ་མཐོང་བར་འགྱུར་རོ། །ལྷ་གཙོ་བོ་དག་གཞན་ཡང་སྲིད་པ་བར་མར་གནས་པ་དེ་གང་ཡིན་ཞེ་ན། གལ་ཏེ་འཛམ་བུ་གླིང་ནས་མི་དག་འཆི་ལ། དེ་གལ་ཏེ་བྱང་གི་སྒྲ་མི་སྙན་དུ་སྐྱེ་བར་འགྱུར་ན་དེས་སྣམ་བུ་དམར་པོ་བུ་ག་དཀར་པོ་ཡོད་པ་ཡང་ཞིང་འཇམ་ལ་ཤིན་ཏུ་ཡིད་དུ་འོང་བ་མཐོང་ངོ་། །དེ་དེ་ལ་ཆགས་པར་འགྱུར་ཞིང་དེ་དེ་ལ་འཛིན་པར་བྱེད་དོ། །དེ་འཆི་བ་ན་ནམ་མཁའ་ལ་ལག་པ་གཡོབ་པར་བྱེད་དོ། །གཉེན་འདུན་དེ་དག་ན་རེ། ནམ་མཁའ་ཉིད་ལ་ཉུག་པར་བྱེད་དོ་ཞེས་བརྗོད་དོ། །དེའི་འོག་ཏུ་ཡང་རླུང་འབྱུང་ལ་འཆི་བ་གང་ཡིན་པའི་དུས་སུ་གྲང་བར་འགྱུར་ཏེ་དྲོ་བར་འདོད་པའི་འདུ་ཤེས་འབྱུང་ངོ་། །དེ་ནས་དྲོ་བ་བྱུང་བ་དང་དེའི་གྲང་བ་ལྡོག་པར་འགྱུར་རོ། །རེག་པ་དེས་དེའི་བདེ་བ་འབྱུང་ལ་དེ་སེམས་བདེ་བ་དེ་ལ་དམིགས་པའི་སེམས་ཀྱིས་འཕྲོག་པར་
བྱེད་དེ། ངུ་བ་དང་ཆོ་ངེས་འདེབས་པ་དང་སྐྲ་འབལ་བའི་སྒྲ་མི་ཐོས་སོ། །བརྒྱ་ལ་ལས་མི་བརྟན་པ་ཉིད་ཀྱིས་ཐོས་ན་ཡང་། དེ་ལས་ཀྱི་རླུང་གཞན་རྣམས་ཀྱིས་གཞན་དུ་ཁྱེར་བར་བྱེད་དེ། དེ་ལྟར་གཉེན་འདུན་དག་འཆི་བའི་དུས་སུ་བར་ཆད་བྱེད་པ་ཡིན་ནོ། །དེ་ནས་བྱང་གི་སྒྲ་མི་སྙན་དེ་ཉིད་དུ་སྐྱེ་བར་འགྱུར་རོ། །དེའི་འོག་ཏུ་དེའི་དགེ་བའི་མཚན་མ་རྣམས་འབྱུང་བར་འགྱུར་ཏེ། མཚོ་སྔོན་པོ་བྱ་ངང་པ་དང་། ཀཱ་རཎྜ་བ་དང་ངུར་པས་གང་ཞིང་མེ་ཏོག་གིས་ཡོག་པ་གཅིག་མཐོང་ནས་དེ་དེར་རྒྱུག་པར་བྱེད་དོ། །དེའི་འོག་ཏུ་དེ་སྲིད་པ་ཐ་མ་པའི་སེམས་འབྱུང་སྟེ། དེ་ཤི་ནས་མཚོ་དེ་ཉིད་མཐོང་བ་དང་། དེ་ན་པད་མའི་ཁྲོད་ཀྱི་ནང་རྣམས་ན་རྩེ་བར་བྱེད་དོ། །དེ་གང་གི་ཚེ་བྱང་གི་སྒྲ་མི་སྙན་དུ་མའི་མངལ་དུ་སྐྱེ་བར་འགྱུར་ན། དེ་མཚོ་དེ་ནས་ཐང་ལ་འབྱུང་ངོ་། །དེས་དེར་འཁྲིག་པ་མི་གཙང་བས་ཕ་མ་སྦྱོར་བར་མཐོང་བ་དང་ལོག་པར་མཐོང་སྟེ། ཕ་ནི་བྱ་ངང་པར་མཐོང་། མ་ནི་བྱ་ངང་མོར་མཐོང་ངོ་། །གལ་ཏེ་བདག་ཉིད་བུད་མེད་དུ་འགྱུར་ན་ནི་བདག་ཉིད་ངང་མོར་མཐོང་ངོ་། །ཇི་སྟེ་སྐྱེས་པར་འགྱུར་ན་ནི་བདག་ཉིད་ངང་ཕོར་མཐོང་སྟེ། དེས་ངང་པ་དེ་བསྐྲད་ནས་མ་དང་འཁྲིག་པའི་ཆོས་ཀྱིས་སྦྱོར་བར་བྱེད་དེ། དེ་ལྟར་བྱང་གི་སྒྲ་མི་སྙན་དུ་སྐྱེ་བར་འགྱུར་རོ། །སྲིད་པ་བར་མ་གཉིས་པ་ནི་དེ་ལྟ་བུ་ཡིན་ནོ། །དེ་ནས་འཛམ་བུ་གླིང་དེ་ནས་ཤི་ནས། གལ་ཏེ་ནུབ་ཀྱི་བ་ལང་སྤྱོད་ཀྱི་མི་རྣམས་ཀྱི་ནང་དུ་སྐྱེ་བར་འགྱུར་ན། དེའི་མཚན་མ་འདི་དག་འབྱུང་བར་འགྱུར་ཏེ། འདི་ལྟ་སྟེ། འཆི་བའི་ཚེ་དེའི་ཁྱིམ་ཐམས་ཅད་སེར་པོར་མཐོང་ལ། སྣམ་བུ་སེར་པོ་ཁ་དོག་བཟང་པོ་སེར་པོར་སྣང་ཞིང་ཀུན་ནས་སྤྲིན་ལྟ་བུར་མཐོང་ངོ་། །དེ་སྣམ་བུ་དེ་ཉིད་ལ་ཉུག་པར་བྱེད་པ་དང་། ནམ་མཁའ་ལ་ཉུག་པར་བྱེད་དོ་ཞེས་མ་དེ་ངུ་བར་བྱེད་དོ། །དེའི་འོག་ཏུ་དེའི་སྲིད་པ་ཐ་མ་པའི་སེམས་འབྱུང་སྟེ། དེས་བདག་ཉིད་བ་ལང་གི་གཟུགས་དང་། བ་ལང་ལོང་ལོང་པོར་འཁོད་པ་ཀུན་རྨི་ལམ་ལྟ་བུར་མཐོང་ངོ་། །དེ་གང་གི་ཚེ་ཕ་མ་དག་སྦྱོར་བར་བྱེད་པ་དང་། དེ་གལ་ཏེ་སྐྱེས་པར་འགྱུར་ན་ནི། དེ་བདག་ཉིད་ཕོ་ཁྱུ་མཆོག་བྱད་གཟུགས་ཆེན་པོ་ཁྱུ་མཆོག་གི་ཟླ་ལྟ་བུར་མཐོང་ངོ་། །
ཕ་དེ་འོང་བ་དང་དེས་བསྐྲད་ནས་དེ་དང་ལྷན་ཅིག་སྦྱོར་བར་བྱེད་དེ། དེ་ལྟར་ནུབ་ཀྱི་བ་ལང་སྤྱོད་དུ་སྐྱེ་བར་འགྱུར་རོ། །ཇི་སྟེ་བུད་མེད་དུ་འགྱུར་ན་ནི། བདག་ཉིད་བ་ལང་མོར་མཐོང་སྟེ་དེ་འདི་སྙམ་དུ་སེམས་སོ། །ཁྱུ་མཆོག་འདི་གོ་འདི་ལ་ཅིའི་ཕྱིར་ཞོན། འདི་དང་བདག་ཏུ་སྦྱོར་བར་བྱའོ་སྙམ་པ་དེ་ནི། ནུབ་ཀྱི་བ་ལང་སྤྱོད་དུ་བུད་མེད་དུ་འགྱུར་རོ། །སྲིད་པ་བར་མ་གསུམ་པ་ནི་དེ་ལྟ་བུ་ཡིན་ནོ། །གཞན་ཡང་སྲིད་པ་བར་མ་བཞི་པ་ནི་འདི་ལྟར་གལ་ཏེ་ཤར་ཕྱོགས་ཀྱི་ལུས་འཕགས་གླིང་གི་མི་རྣམས་ཀྱི་ནང་དུ་སྐྱེ་བར་འགྱུར་ན། དེ་འཆི་བའི་དུས་ན་སྲིད་པ་ཐ་མ་དང་ཉེ་བའི་སེམས་ལ་སྣམ་བུ་སྔོན་པོ་མཐོང་སྟེ། དེས་ཁྱིམ་གྱི་ནང་ན་གནས་བཞིན་དུ་ནམ་མཁའ་དེ་ལ་ཀུན་ནས་ཤིན་ཏུ་སྔོ་བར་སྣང་ཞིང་སྡུག་པ་གཅིག་པ་མཐོང་ངོ་། །དེ་དེ་ལ་ནོམ་པར་བྱེད་ཅིང་བདག་གི་སྟེང་དུ་ལྷུང་བར་མ་གྱུར་ཅིག་སྙམ་བྱེད་པ་ལ། གཉེན་འདུན་དེ་དག་ན་རེ། འདི་ལྟར་ནམ་མཁའ་ལ་རེག་པར་བྱེད་དོ་ཞེས་བརྗོད་དོ། །དེའི་འོག་ཏུ་དེའི་སྲིད་པ་ཐ་མའི་སེམས་འབྱུང་སྟེ། དེ་སྲིད་པ་བར་མ་ལ་བདག་ཉིད་རྟ་ལྟ་བུར་མཐོང་ངོ་། །དེ་ཤར་གྱི་ལུས་འཕགས་གླིང་དེ་ན་ཕ་མ་ནི་རྟ་གསེབ་དང་རྒོད་མར་སྦྱོར་བ་ལྟ་བུར་སྣང་ལ། དེ་གལ་ཏེ་སྐྱེས་པར་འགྱུར་ན་ནི་འདི་སྙམ་དུ་སེམས་ཏེ། རྒོད་མ་འདི་དང་བདག་སྦྱོར་བ་བྱའོ་སྙམ་པའི་སེམས་འབྱུང་ངོ་། །གལ་ཏེ་བུད་མེད་དུ་འགྱུར་ན་ནི་དེ་འདི་སྙམ་དུ་སེམས་ཏེ། འདི་ལྟར་གསེབ་འདི་བདག་ལ་རྒལ་དུ་གཞུག་པར་བྱའོ་སྙམ་པ་དེ་ནི་བུད་མེད་དུ་འགྱུར་ཏེ། སྲིད་པ་བར་མ་བཞི་པ་ཡིན་ནོ། །གཞན་ཡང་སྲིད་པ་བར་མ་ལྔ་པ་ནི་འདི་ལྟར་གང་གི་ཚེ་བྱང་གི་སྒྲ་མི་སྙན་དག་ནས་འཆི་བར་འགྱུར་བ་དེའི་ཚེ། དེའི་འཆི་བའི་ཡུལ་གྱི་དུས་ལ་གོང་མའི་ཆ་དང་འཐུན་པའི་མཚན་མ་ངེས་པར་རྣམ་པ་དུ་ཞིག་འབྱུང་ཞེ་ན། གཙོ་བོ་དག་དེ་གང་གི་ཚེ་འཆི་བར་འགྱུར་བ་དེའི་ཚེ། གལ་ཏེ་ལས་ཆེན་པོ་དང་སེམས་ཀྱི་དབང་གི་ལས་ཁྱད་ཆེན་པོས་ལྷའི་འཇིག་རྟེན་དེར་སྐྱེ་ན། དེའི་མཚན་མ་འདི་དག་འབྱུང་བར་འགྱུར་ཏེ་འདི་ལྟ་སྟེ། གཅིག་པུ་སེམས་རྨི་ལམ་ལྟ་བུ་ནམ་མཁའ་ལ་ཉུག་པར་བྱེད་ཅིང་རྨི་ལམ་ལྟ་བུར་ལྟ་བ། མེ་ཏོག་ཉམས་དགའ་བ་དྲི་ཤིན་ཏུ་ཞིམ་པ་མདོག་ཕུན་སུམ་ཚོགས་པ་ཤིན་ཏུ་རྒྱ་ཆེ་
བ་ཁ་དོག་སྔོན་པོ་དང་སེར་པོ་དང་དམར་པོ་དང་དཀར་པོ་འདུག་པ་ཞིག་མཐོང་ལ། དེ་དག་ལག་ཏུ་འོང་བར་མཐོང་བ་དང་དེ་དེ་རྣམས་ལ་ཆགས་པར་བྱེད་དོ། །དེ་འདི་སྙམ་དུ་སེམས་ཏེ། ད་ནི་བདག་གི་མེ་ཏོག་འདི་དག་གི་ཤིང་ལྗོན་པ་གང་ཡིན་པ་དེ་དག་བལྟ་ཞིང་འཛེག་པར་བྱའོ་སྙམ་མོ། །དེ་དེའི་འོག་ཏུ་དེ་ལ་དམིགས་པའི་སེམས་ལས་བྱུང་བ་སྲིད་པ་ཕྱི་མའི་སེམས་འབྱུང་ངོ་། །དེ་སྲིད་པ་བར་མ་ལ་ཤིང་ལྗོན་པ་སྔོན་པོ་དང་སེར་པོ་དང་དཀར་པོ་དང་མེ་ཏོག་རྣམ་པ་དུ་མ་ཡོད་པ་དེ་དག་མཐོང་བ་དང་དེ་འདི་སྙམ་དུ་སེམས་ཏེ། འདི་ལྟར་བདག་གིས་ཤིང་ལྗོན་པ་རྣམས་ལ་འཛེག་པར་བྱའོ་སྙམ་ནས། དེ་ཤིང་ལྗོན་པ་དེ་དག་ལ་འཛེག་པ་ཤེས་པའམ་གལ་ཏེ་རི་རབ་དེ་ལ་འཛེག་པར་བྱེད་དོ། །དེས་ལྷའི་འཇིག་རྟེན་མེ་ཏོག་དང་འབྲས་བུས་མཛེས་པར་བྱས་པ་སྣ་ཚོགས་དེ་དག་མཐོང་ནས་འདི་སྙམ་དུ་སེམས་སོ། །ད་ནི་བདག་འདིར་འགྲོ་བར་བྱ་སྟེ། བདག་མེ་ཏོག་དང་འབྲས་བུ་ཕུན་སུམ་ཚོགས་པའི་ཡུལ་གང་ཡིན་པ་དེ་དག་ཏུ་གནས་པར་བྱའོ་སྙམ་པ་དེ་ནི་སྐྱེ་བ་ཆུང་ངུར་འགྱུར་བ་ལྔ་པ་ཡིན་ནོ། །གཞན་ཡང་སྲིད་པ་བར་མ་འབྲིང་པོ་དྲུག་པ་ནི། བྱང་གི་སྒྲ་མི་སྙན་གྱི་མི་ཚེ་འདས་པའི་ལས་འབྲིང་པོས་དེའི་སྲིད་པ་བར་མ་པའི་མཚན་མ་འདི་དག་འབྱུང་བར་འགྱུར་རོ། །འདི་ལྟ་སྟེ། འཆི་བའི་ཚེ་འདི་ལྟར་པད་མ་ཤིན་ཏུ་ཉམས་དགའ་བ་བུང་བ་དག་གིས་མཛེས་པར་བྱས་པ་དེ་དག་ངེས་པར་མཐོང་ལ། ཀུན་ནས་ཤིན་ཏུ་དྲི་ཞིམ་པ་ལ་ཡིད་ཆགས་པར་གྱུར་པས་འཛེག་པར་བྱེད་དོ། །གང་གི་ཚེ་འཛེགས་པར་གྱུར་པ་དེའི་ཚེ། འཛེགས་མ་ཐག་ཏུ་པད་མ་དེ་ནམ་མཁའི་དཀྱིལ་དུ་འཕར་བར་བྱེད་དོ། །ཡང་ནམ་མཁའ་དེ་ཉིད་ལ་འཕར་བ་ན་རྨི་ལམ་ལྟ་བུར་ཤེས་སོ། །གཞན་ཡང་སྐྱེ་བའི་ཚེ་པད་མ་ཉམས་དགའ་བ་བུང་བས་མཛེས་པར་བྱས་པ་ཐམས་ཅད་དུ་ལྷག་པར་ཉམས་དགའ་བར་མཐོང་བ་དང་། དེ་འཛིན་པར་བྱེད་ལ་ད་ནི་བདག་གིས་གནས་འདི་དག་ཐོབ་སྟེ། པད་མ་འདི་རྣམས་བདག་གིར་གྱུར་ཅིག་སྙམ་མོ། །དེའི་སེམས་བསྐྱེད་མ་ཐག་ཉིད་དུ་སྐྱེ་བར་འགྱུར་ཏེ། སྲིད་པའི་ཡན་ལག་ནི་དེ་ལྟ་བུ་ཡིན་ནོ། །དེ་ལྟར་ལྷའི་འཇིག་རྟེན་ལྷ་རྣམས་ཀྱི་ནང་དུ་ལས་བར་མས་སྐྱེ་བ་བར་མ་འབྱུང་བར་འགྱུར་རོ། །གཞན་ཡང་སྲིད་
པ་བར་མ་པའི་འགྲོ་བ་དང་འབྲེལ་པ་བདུན་པ་ནི་འདི་ལྟ་སྟེ། གལ་ཏེ་ལས་བཟང་པོ་ཞིག་ཡིན་ན་མཐོ་རིས་སུམ་ཅུ་རྩ་གསུམ་གྱི་གནས་རྣམས་སུ་མཆོག་ཏུ་སྐྱེ་བར་འགྱུར་རོ། །དེ་བྱང་གི་སྒྲ་མི་སྙན་དག་ནས་འཆི་བ་ན། འཆི་བའི་ཡུལ་གྱི་དུས་སུ་གཞལ་མེད་ཁང་ཤིན་ཏུ་ཉམས་དགའ་བ་དང་། ཚལ་དང་ཉེ་བའི་ཚལ་སྡུག་པ་ཤིན་ཏུ་ཉམས་དགའ་བ་དག་མཐོང་བ་དང་། དེ་རང་གི་བཞིན་དུ་དེ་དེ་དག་ལ་འཛེག་པར་བྱེད་དོ། །དེ་དེ་དག་ལ་འཛེགས་ནས་ནམ་མཁའ་ལ་འཛེག་པར་བྱེད་དོ། །དེ་འཛེག་པ་ན་རྣམ་པ་ཐམས་ཅད་དུ་ཉམས་དགའ་བ་མཐོང་བ་དང་དེ་འདི་སྙམ་དུ་སེམས་ཏེ། ད་ནི་བདག་གནས་འདིར་འགྲོའོ་སྙམ་མོ། །དེས་སེམས་བསྐྱེད་མ་ཐག་ཉིད་དུ་དེར་སྐྱེ་བར་འགྱུར་རོ། །དེ་ལྟར་བྱང་གི་སྒྲ་མི་སྙན་དག་ནས་ལས་མཆོག་གིས་སྐྱེ་བར་འགྱུར་ཏེ། དེ་ནི་འགྲོ་བ་དང་འབྲེལ་བ་བདུན་པ་ཡིན་ནོ། །གཞན་ཡང་འགྲོ་བ་དང་འབྲེལ་པ་བརྒྱད་པ་ནི་གལ་ཏེ་བྱང་གི་སྒྲ་མི་སྙན་དེ་དག་ཉིད་ན་འཆི་བ་དེ་འཆི་བའི་ཡུལ་གྱི་དུས་སུ་མཚན་མ་རྣམ་པ་དུ་འབྱུང་ཞེ་ན། གཙོ་བོ་དག་དེས་སྐྱེད་མོས་ཚལ་དཀྲིགས་པ་རིན་པོ་ཆེས་མཛེས་པར་བྱས་པ་ཤིན་ཏུ་ཉམས་དགའ་བ་རྣམས་མཐོང་ངོ་། །དེ་རྣམས་དྲི་ཤིན་ཏུ་ཞིམ་པ་ལ་ཡང་སྣོམ་པར་བྱེད་དོ། །དེ་འཆི་བའི་ཡུལ་གྱི་དུས་སུ་ཚོར་བ་མི་བཟད་པ་མི་འབྱུང་སྟེ། དེའི་ཚོར་བ་ཞན་པ་ཉིད་ཀྱིས་སེམས་རྙོག་པ་ཅན་དུ་མི་འགྱུར་ལ་དེ་བློ་གསལ་བས་འཆི་བའི་དུས་བྱེད་དོ། །དེས་སྲིད་པ་ཐ་མ་ཐོབ་ནས་དེ་ནས་ཡང་དེ་བཞིན་དུ་གཞལ་མེད་ཁང་དང་ར་བ་དེ་དག་མཐོང་བ་དང་དེ་འདི་སྙམ་དུ་སེམས་ཏེ། ད་ནི་བདག་གཞལ་མེད་ཁང་འདི་དག་གི་ནང་དུ་འཇུག་པར་བྱའོ་སྙམ་ནས་དེ་དག་གི་ནང་དུ་ཞུགས་པ་དང་སྲིད་པ་བར་མ་ལ་གནས་པ་དེས་ཀུན་དུ་རྒྱུ་བའི་ལྷ་རྣམས་རྣམ་པར་རྒྱུ་བ་དང་རྒྱུག་པ་དང་རི་བོའི་གསབ་གསེབ་ཀྱི་ནང་དང་ཟོམ་དག་ལ་འཁོད་པ་དང་ཕན་ཚུན་ཕྲད་པ་དང་། གཞན་དུ་འགྲོ་བ་བདག་མཐོང་ངོ་། །དེའི་འོག་ཏུ་བདག་ཉིད་མཐོང་ངོ་། །མཐོང་བ་དང་དེ་ནས་འཇུག་པར་བྱེད་དེ། ཐམས་ཅད་ཀྱང་རྨི་ལམ་ལྟ་བུར་ཕྱོད་ཕྱོད་པོར་མཐོང་ངོ་། །དེའི་འོག་ཏུ་མཐོ་རིས་ཀྱི་ཉམས་དགའ་བ་གཞལ་མེད་ཁང་ཉམས་དགའ་བ་དུ་མ་དང་འདོད་
པ་འབྱོར་པ་དེ་དག་ཐམས་ཅད་མཐོང་ངོ་། །དེ་དག་མཐོང་བ་དང་དེ་འདི་སྙམ་དུ་སེམས་ཏེ། ད་ནི་བདག་འདིའི་ནང་དུ་འཇུག་པར་བྱའོ་སྙམ་མོ། །དེ་སེམས་བསྐྱེད་མ་ཐག་ཉིད་དུ་དེར་སྐྱེ་བར་འགྱུར་ཏེ། སྲིད་པའི་ཡན་ལག་ལ་ལེན་པའི་རྐྱེན་གྱིས་སྲིད་པ་འབྱུང་བར་འགྱུར་རོ། །དེ་ལྟར་འདི་ནི་མཆོག་དང་འབྲིང་དང་ཆུང་ངུ་དང་གསུམ་གྱིས་སྐྱེ་བར་འགྱུར་རོ། །དེ་སྐྱེ་བ་ན་ཚལ་དང་ཉེ་བའི་ཚལ་དང་། སྐྱེད་མོས་ཚལ་ཁྱད་པར་དུ་འཕགས་པ་དག་མཐོང་བ་དང་དེ་དག་ལ་འདོད་པར་བྱེད་དེ། དེ་ལྟར་བྱང་གི་སྒྲ་མི་སྙན་དག་ནས་འདིར་སྐྱེ་བར་འགྱུར་རོ། །བྱང་གི་སྒྲ་མི་སྙན་ན་གནས་པ་འདིར་སྐྱེས་པ་དེ་དག་ཐམས་ཅད་ཀྱི་རྒྱུ་འཐུན་པའི་འབྲས་བུས་བློ་འབྱུང་བ་ནི་ཤིན་ཏུ་འདོད་པ་ལ་ཆགས་པ་ཡིན་ཏེ། དེ་དག་ཡུལ་ལ་ལྷག་པར་ཆགས་པ། བྲོ་གར་དང་གླུ་དབྱངས་དང་དགོད་པ་དང་རྩེ་བ་དང་ཁ་ཟས་དང་གནས་མལ་ལ་ལྷག་པར་དགའ་བ་དང་། རིའི་རྩེ་མོ་ལ་ལྷག་པར་རྒྱུ་བ་གླུ་ལེན་པ་ལ་ལྷག་པར་དགའ་བ་ཡིད་ཤིན་ཏུ་མྱོས་པ་ཡིན་ཏེ་ཐམས་ཅད་དེ་ལྟ་བུ་ཡིན་ནོ། །དེ་ཅིའི་ཕྱིར་ཞེ་ན། དེ་ལ་གནས་པའི་ངོ་བོ་ཉིད་ཀྱིས་གོམས་པའི་མི་རྣམས་ཡང་གོམས་པར་བྱེད་པ་ན། སྲེད་པའི་སྟོབས་རབ་ཏུ་ཆེ་བ་ཡིན་ནོ། །གཙོ་བོ་དག་བྱང་གི་སྒྲ་མི་སྙན་དག་ནས་མི་འདིར་སྐྱེས་པ་རྣམས་འཆི་བའི་དུས་སུ་མཚན་མ་འབྱུང་བ་དང་བསིལ་བ་དང་གནས་ནི་དེ་ལྟ་བུ་ཡིན་ནོ། །འདི་ལྟར་ནུབ་ཀྱི་བ་ལང་སྤྱོད་ཀྱི་གླིང་ནས་མི་དག་འཆི་བ་ན་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་དང་། སྐྱེས་ནས་མྱོང་བར་འགྱུར་བས་ལྷ་རྣམས་ཀྱི་ནང་དུ་ཇི་ལྟར་སྐྱེ་བར་འགྱུར། དེ་འཆི་བ་ན་དེའི་འགྲོ་བ་བར་མ་ནི་ཇི་ལྟ་བུ་ཡིན། སྲིད་པ་ཕྱི་མར་འགྲོགས་པ་དང་མཚན་མ་ནི་ཅི་དག་འབྱུང་། སྲིད་པ་བར་མའི་མཚན་མ་རྨི་ལམ་ལྟ་བུ་ཕྱོད་ཕྱོད་པོ་དག་ཇི་ལྟར་མཐོང་ཞེ་ན། གཙོ་བོ་དག་འདི་ལ་ནུབ་ཀྱི་བ་ལང་སྤྱོད་ཀྱི་གླིང་ནས་འཆི་སྟེ། ངེས་པར་འཆི་བའི་དུས་བྱེད་ལ། ལེགས་པར་བྱས་པའི་ལས་ཀྱིས་རྐྱེན་རྣམས་ཁྱེར་བ་ན། སྒྲ་ངར་ངར་པོར་ལྷག་པར་འབྱུང་བར་མི་འགྱུར། གནད་ཀྱི་སྡུག་བསྔལ་མི་འབྱུང་། དེའི་དབང་པོ་ཡང་གསལ་བར་འགྱུར་རོ། །དེའི་འོག་ཏུ་ཆུ་ཀླུང་སྔོན་པོ་གསལ་བ་བཻ་ཌཱུརྱའི་མདོག་ལྟར་
འདུག་པ་ཞིག་མཐོང་བ་དང་དེ་དེར་གནས་པར་བྱ་བའི་ཕྱིར་འཇུག་པར་བྱེད་ཅིང་དེ་ལག་རྐྱལ་བྱེད་དོ། །ཆུ་ཀླུང་དེ་ཡང་རེག་ན་ཧ་ཅང་གྲང་བ་ཡང་མ་ཡིན་ལ་ཧ་ཅང་དྲོ་བ་ཡང་མ་ཡིན་ནོ། །དེ་ཆུ་དེས་ཁྱེར་བ་དང་ཇི་ལྟ་ཇི་ལྟར་འགྲམ་དུ་རྒྱུག་པ་དེ་ལྟ་དེ་ལྟར་སྐྱེ་བ་དང་ཉེ་བར་འགྱུར་རོ། །ཉོན་མོངས་པ་དག་གིས་སྐྱེ་བ་དེས་ཐང་ལ་བུད་མེད་ཤིན་ཏུ་བལྟ་ན་སྡུག་པ་ཆ་བྱད་དང་རྒྱན་བཏགས་པ་གླུ་ལེན་བྲོ་རྡུང་བ་རྣམས་མཐོང་ངོ་། །དེ་དག་མཐོང་ནས་འཁྲིག་པར་བྱ་བའི་བློ་འབྱུང་སྟེ། དེ་འཁྲིག་པར་བྱ་བའི་དོན་དུ་དེར་འགྲོ་བར་བྱེད་དོ། །དེ་གང་གི་ཚེ་ཞོན་པ་དང་དེའི་ཚེ་དེ་སྐྱེ་བར་འགྱུར་ཏེ། ལྷའི་བདེ་བ་རྣམས་ཀྱང་མྱོང་ངོ་། །གང་སྲིད་པ་བར་མ་རྨི་ལམ་ལྟ་བུ་ཕྱོད་ཕྱོད་པོ་རྣམ་པ་དུ་མ་ལས་སད་ནས་གཟུགས་གསལ་བར་མཐོང་བ་ལྟར་དེ་སྐྱེ་བར་འགྱུར་ཏེ། དེ་ནི་འགྲོ་བ་བར་མ་བཅུ་པ་ཡིན་ལ། ལས་བར་མ་དང་ཆུང་ངུས་སྐྱེ་བ་ནུབ་ཀྱི་བ་ལང་སྤྱོད་རྣམས་ཀྱི་སྣང་བ་གཅིག་ཡིན་ནོ། །སྲིད་པ་བར་མར་མཐོང་བ་གཅིག་དང་སྐྱེ་བ་གཅིག་གི་རིམ་པ་ནི་ཐམས་ཅད་འཐུན་ལ། བྱང་གི་སྒྲ་མི་སྙན་དག་གི་ལྟར་མི་འབྱུང་སྟེ་མཚན་ཉིད་གསུམ་ཀུན་འཐུན་ནོ། །གཙོ་བོ་དག་ཤར་གྱི་ལུས་འཕགས་གླིང་གི་མི་རྣམས་འཆི་བའི་དུས་ཀྱི་ཚེ། མཚན་མའམ་འཇིག་རྟེན་གྱི་ཁམས་སམ་འཆི་བའི་ཡུལ་གྱི་དུས་སུ་སྐྱེ་བར་འགྱུར་བ་ན། རང་གི་མཚན་མ་དག་ཇི་ལྟར་མཐོང་བར་འགྱུར་ཞེ་ན། སྲིད་པ་ཐ་མའི་སེམས་ལ་ལན་ཀན་བྲེས་པའི་གནས་དེ་ཉིད་ཉམས་དགའ་ལ། བ་དན་དང་རྒྱལ་མཚན་བསྒྲེང་བ་ཞིག་ཀྱང་མཐོང་ལ། དེ་སྲིད་པ་བར་མའི་ཁྱིམ་དེར་དགའ་བ་སྐྱེས་ནས། ཡུལ་ནས་ཡུལ་དུ་རྒྱུག་པར་བྱེད་པ་དེའི་ཚེ་སྐྱེ་བའི་སྲིད་པ་དང་ལྷན་ཅིག་ཉེ་བར་འགྱུར་རོ། །དེས་གནས་དེའི་ཕྱི་རོལ་ན་གླུ་དབྱངས་ཀྱི་སྒྲ་དང་ཡང་དག་པར་ལྡན་པའི་བུད་མེད་ཆ་བྱད་མང་པོ་ཐོགས་པ་རྟག་ཏུ་གླུ་ལེན་ཞིང་བྲོ་རྡུང་བ་རྨི་ལམ་ལྟ་བུ་ཞིག་དང་། དེ་བཞིན་དུ་སྐྱེས་པ་གླུ་ལེན་བྲོ་རྡུང་བ་ཞིག་མཐོང་བ་དང་དེ་འདི་སྙམ་དུ་སེམས་ཏེ། འདི་ལྟར་བདག་གནས་འདིར་སོང་ལ་སྐྱེས་པ་དང་བུད་མེད་དེ་དག་ལ་བལྟ་ཞིང་དེ་བཞིན་དུ་ལྷན་ཅིག་གླུ་བླང་བྲོ་བརྡུང་ངོ་། །འདི་ལྟར་སྐྱེས་པ་གླུ་ལེན་བྲོ་རྡུང་བ་འདི་དག་ནི་ཤིན་ཏུ་ཡིད་དུ་འོང་ཞིང་ཤིན་ཏུ་རྣར་སྙན་པ་ཡིན་ཏེ།
བདག་སོང་ལ་དེ་རྣམས་དང་ལྷན་ཅིག་འདྲེ་བར་བྱའོ་སྙམ་མོ། །དེས་འདི་ལྟར་བདག་འདྲེས་པར་གྱུར་ཏོ་སྙམ་དུ་ཤེས་པ་དང་ཇི་ལྟར་གཉིད་ལས་སད་པ་དེ་ལྟར་དེ་དེར་སྐྱེ་བར་འགྱུར་ལ། དེའི་སྐྱེས་པ་དེ་དག་དང་བུད་མེད་དེ་དག་ཀྱང་མི་སྣང་བར་གྱུར་ཏོ། །མཐོ་རིས་ཀྱི་ཚལ་དང་ཉེ་བའི་ཚལ་ཕུན་སུམ་ཚོགས་པར་བདག་ཉིད་སྐྱེས་པར་མཐོང་སྟེ། དེ་དེ་ལྟར་སྐྱེ་བར་འགྱུར་རོ། །གནས་གཞན་བཅུ་གཅིག་པ་ནི་དེ་ལྟ་བུ་ཡིན་ཏེ། དེ་ལྟར་མིའི་གནས་བཞི་པ་དང་གཞན་ཡང་འཇིག་རྟེན་མཐའ་ཡས་པའི་སྐྱེ་བ་འབྱུང་བར་འགྱུར་རོ། །གཙོ་བོ་དག་འགྲོ་བ་བར་མི་འབྱེད་པ་འདི་ནི་ཕྲ་བ་སྟེ། ཕྱི་རོལ་པའི་ཤེས་པ་འཇིག་རྟེན་པའི་ལྟ་བ་དང་ཡང་དག་པར་ལྡན་པ་གང་ཡང་རུང་བ་དག་གིས་དེ་དག་ཤེས་པར་མི་ནུས་སོ། །ལས་མི་དགེ་བས་ཡི་དགས་རྣམས་ཀྱི་ནང་དུ་སྐྱེས་པ་མི་དགེ་བ་དེ་ཟད་པར་འགྱུར་ལ། ཉེས་པར་བྱས་པའི་ལས་ཀྱི་མཐའ་སྤྱད་པ་དེ་ཟད་ནས་འགྲོ་བ་གཞན་དུ་སྤྱད་པ་ལེགས་པར་བྱས་པ། ལན་གྲངས་གཞན་ལ་མྱོང་བར་འགྱུར་བ། ཕ་མ་ལྟ་བུར་ཤིན་ཏུ་ཡིད་དུ་འོང་བ། སོ་སོ་ཡང་དག་པར་མྱོང་བར་འགྱུར་བས་གང་གི་ཚེ་ལྷ་རྣམས་ཀྱི་ནང་དུ་སྐྱེ་བར་འགྱུར་བ་དེའི་ཚེ། མཚན་མ་འདི་ཅི་དག་ཅིག་འབྱུང་སྲིད་པ་ཐ་མའི་སེམས་ལ་མཚན་མ་ཇི་ལྟ་བུ་དག་འབྱུང་བར་འགྱུར་ཞེ་ན། གཙོ་བོ་དག་དེ་ལ་གང་གི་ཚེ་ཡི་དགས་འཆི་ཞིང་མཐོ་རིས་སུ་སྐྱེ་བར་འགྱུར་བ་དེའི་ཚེ། དེའི་ལུས་བཀྲེས་པ་དང་སྐོམ་པས་གདུངས་པ་སེམས་རྟག་ཏུ་ཕྲག་དོག་དང་སེར་སྣས་ཉམས་པ། རྟག་ཏུ་ཁ་ཟས་ལ་བརྐམ་པར་གྱུར་པ། རྟག་ཏུ་བཏུང་བ་ལ་ཆགས་པ་གང་ཡིན་པ་དེ་བཟའ་བ་དང་བཏུང་བ་ལ་མ་གཏོགས་པར་གཞན་དུ་རྒྱུག་པ་དེ་ཉུང་བར་འགྱུར། དེའི་ལུས་བསིལ་བར་འགྱུར་ཞིང་ལྷག་པར་སྲ་བར་མི་འགྱུར་ལ། དེའི་སྤུ་ཡང་རིང་ཞིང་སྡུག་པར་མི་འགྱུར། སྲིན་བུས་གང་བ་དེ་དག་ཐམས་ཅད་ཞིགས་པར་འགྱུར། དེའི་བཞིན་གྱི་མདོག་ཀྱང་གསལ་བར་འགྱུར། དེ་ལ་རླུང་བསིལ་ཞིང་བདེ་བ་རྣམས་རེག་པར་འགྱུར་རོ། །དེའི་འོག་ཏུ་སྲིད་པ་ཐ་མ་པའི་མཚན་མ་དང་ཉེ་བར་གྱུར་ཅིང་། བཀྲེས་པ་དང་སྐོམ་པ་ཤིན་ཏུ་
ཆུང་བར་གྱུར་པ་དང་འཕྲལ་ལ་དབང་པོ་རྣམས་ཚིམ་པར་འགྱུར་ལ། བྱ་རོག་དང་འུག་པ་གང་དག་གིས་རྟག་ཏུ་མིག་རྣམས་ཟ་བར་བྱེད་པ་དེ་རྣམས་མི་སྣང་བར་གྱུར་ཏོ། །དེའི་འོག་ཏུ་སྲིད་པ་བར་མ་ལ་ཟས་དང་སྐོམ་གྱི་ཚོགས་མཐོང་བ་དང་དེའི་བློ་སྔོན་གོམས་པའི་འཕེན་པ་སྐྱེས་པས་རྒྱུག་པར་བྱེད་ཀྱང་། སེམས་ཀྱིས་མཐོང་བར་ཟད་ཀྱི། ཟ་བར་ཡང་མི་བྱེད་ལ་འཐུང་བར་ཡང་མི་བྱེད་དེ། དེ་ནི་མཐོང་བ་ཁོ་ན་ཙམ་དུ་ཟད་དོ། །ཇི་ལྟར་རྨི་ལམ་ན་དངོས་པོ་མཐོང་བ་ལ་མཁོ་བ་མེད་ལ། འཐུངས་ཀྱང་ངོམས་པ་མེད་པ་དེ་བཞིན་དུ་དེས་དེ་མཐོང་ཞིང་དེས་བལྟས་ཀྱང་དེ་ཚིམ་པར་མི་འགྱུར་ཏེ། མཐོང་བ་ཁོ་ནས་དེ་སྙིང་དགའ་བར་མཐོང་ངོ་། །ཇི་ལྟར་སད་པའི་དུས་སུ་གཟུགས་བདེན་པ་རྣམས་ཁོང་དུ་ཆུད་པ་དེ་ལྟར་མཐོ་རིས་ཀྱི་ངོ་བོ་ཤིན་ཏུ་ཉམས་དགའ་བ་རྣམས་མཐོང་བ་དང་དེ་ནས་ཡང་ཡིད་དུ་འོང་བ་དེ་རྣམས་ལ་དེ་རྒྱུག་པར་བྱེད་དོ། །དེ་ལྟར་ལེན་པ་ཡང་བྱེད་དེ་ད་ནི་བདག་གིས་ཡུལ་འདི་དག་ཐོབ་པར་བྱའོ་སྙམ་ནས་དེ་དག་ལེན་པར་བྱེད་དོ། །ཉེ་བར་བླངས་མ་ཐག་ཏུ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །འགྲོ་བ་བར་མ་བཅུ་གཉིས་པ་ནི་དེ་ལྟ་བུ་ཡིན་ནོ། །གཙོ་བོ་དག་གཞན་ཡང་གཏི་མུག་ཟད་ནས་ངོ་མཚར་ཆེ་བའི་འགྲོ་བ་བར་མ་བཅུ་གསུམ་པ་ཇི་ལྟ་བུ་ཡིན་ཞེ་ན། གཏི་མུག་ཀུན་དུ་མང་བ་དུད་འགྲོ་རྣམ་པ་དུ་མ་དག་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཚེ་རབས་འབུམ་ཕྲག་བྱེ་བ་དུ་མར། སེམས་ཅན་དམྱལ་བ་དང་ཡི་དགས་དང་དུད་འགྲོ་ཉེས་པར་བྱས་པའི་ལས་དག་ཉེ་བར་སྤྱད་ནས། འདི་ལྟར་ཡང་བསྐལ་པ་དུ་མར་ལས་ཀྱི་འཁོར་བ་མི་བཟད་པ་ཤིན་ཏུ་དཔྱད་པར་དཀའ་བ་ཐོག་མ་མེད་པའི་དུས་ནས་ཡ་ཡོར་འདུག་པ་ཕན་པར་མི་བྱེད་པས་སེམས་ཅན་རྣམས་འཁྱམ་པར་བྱེད་དོ། །དུད་འགྲོ་རྣམ་པ་དུ་མ་དག་ནི་ཟས་དུ་མ་དང་འགྲོ་བ་དུ་མ་དང་ལུས་དུ་མ་དང་གནས་དུ་མ་དང་སེམས་ཀྱི་ས་བོན་དུ་མ་དང་ལས་དུ་མ་བྱེད་པ་གང་ཡིན་པ་དེ་དག་གི་ཉེས་པར་བྱས་པའི་ལས་ཟད་པ་ནི་ཡིད་ཆེས་པར་དཀའ་སྟེ། ཇི་ལྟར་ཆུ་ཐིགས་པར་བཅུས་པས་རྒྱ་མཚོ་སྐམས་པར་འགྱུར་བ་ཡིད་ཆེས་པར་དཀའ་བ་དེ་ལྟར་ལས་ཀྱི་རྒྱ་མཚོའི་ཐིགས་པར་བཅུས་
པ་ཡང་ངོ་མཚར་ཆེ་བ་ཡིན་ནོ། །དེ་གང་གི་ཚེ་དུད་འགྲོ་དག་ལས་ཡོངས་སུ་ཐར་ན། དེ་ལྷའི་རིས་གཉིས་པོ་རྒྱལ་ཆེན་བཞི་པའམ། སུམ་ཅུ་རྩ་གསུམ་པ་གང་ཡང་རུང་བར་སྐྱེ་བར་འགྱུར་རོ། །དེ་དུད་འགྲོའི་ཉམ་ང་བ་ཆེན་པོ་ལས་འཆི་ཞིང་ཐར་བར་འགྱུར་བ་དེའི་ཚེ། བདེ་བ་ཆེན་པོ་ཉེ་བར་གནས་པའི་མཚན་མ་རྣམ་པ་དུ་མ་དང་དངོས་པོ་དུ་མ་དང་ལྡན་པའི་མཚན་མ་ལ་དམིགས་པ་བཤད་པར་མི་ནུས་སོ། །སེམས་ཅན་དམྱལ་བ་པ་མཐོ་རིས་སུ་སྐྱེ་བར་འགྱུར་བ་ནི་ངོ་མཚར་མི་ཆེའི། །ཡི་དགས་དང་དུད་འགྲོ་དག་མཐོ་རིས་སུ་སྐྱེ་བ་ནི་ངོ་མཚར་ཆེའོ། །དེ་ཅིའི་ཕྱིར་ཞེ་ན། ཡི་དགས་པས་དུད་འགྲོ་གཏི་མུག་མང་བའི་ཕྱིར་ཏེ། གཞན་ལ་ཉེས་པ་མང་པོ་བྱེད་ལ། དེ་དག་ཚེ་གཅིག་གིས་འབུམ་ཕྲག་དུ་མ་སྦྱོར་བ་དང་བསྐལ་པའམ་བསྐལ་པ་བརྒྱའམ་བསྐལ་པ་འབུམ་ཕྲག་ཏུ་སྦྱོར་བར་བྱེད་པ། ལས་ཀྱི་ལུ་གུ་རྒྱུད་ཀྱིས་ཚེ་གཅིག་ནས་གཅིག་ཏུ་བརྒྱུད་པ་དེ་དག་པས་ནི་སེམས་ཅན་དམྱལ་བར་སྐྱེས་པ་ཆེས་སླའི། ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེས་པ་ནི་མི་རུང་སྟེ། རྒྱུ་དེས་ན་སེམས་ཅན་དམྱལ་བར་སྐྱེས་པ་ཆེས་རུང་གི་དུད་འགྲོ་ནི་མི་རུང་ངོ་། །དེ་ལྟར་དེ་སྡུག་བསྔལ་ཤིན་ཏུ་མི་བཟད་པ་ལས་གལ་ཏེ་ཐར་ན། དེ་དག་གིས་འདི་དག་ཕལ་ཆེར་མཐོང་ནས་སྐྱེ་བར་འགྱུར་ཏེ་འདི་ལྟ་སྟེ། འཆི་བའི་དུས་སུ་གཏི་མུག་སྲབས་པར་འགྱུར་ཞིང་ཤེས་པ་ཆུང་ངུ་འབྱུང་བར་འགྱུར་བ་ནི། འདི་ལྟར་སྔོན་བྱུང་བ་པས་དེ་བས་ཁྱད་པར་དུ་འབྱུང་བའམ་རྣོ་བར་འབྱུང་ངོ་། །དེ་འཆི་བའི་དུས་ཀྱི་ཚེ། རི་སྣང་བར་གྱུར་པ་མཐོང་བ་དང་ལྕུག་མ་འཕྱང་བ་དང་འབབ་ཆུས་གང་བ་རྣམ་པ་སྣ་ཚོགས་དག་མཐོང་ངོ་། །ཁ་ཟས་འབྱུང་བ་གང་ཡིན་པའི་ཁ་ཟས་དེ་ཡང་རི་དེ་ལ་མཐོང་ངོ་། །ཀུན་རྫོབ་ཀྱི་ཤེས་པས་དེའི་འདོད་པ་བདེ་བ་གང་ཡིན་པ་དེ་དག་ཚལ་དེ་ནའམ་རི་དེ་ལ་མཐོང་ངོ་། །དེའི་ཚེ་དེ་ཁ་ཟས་ཀྱི་དོན་དུའམ་དེར་འགྲོ་བའམ་དེ་ལ་རྟེན་པའི་ཕྱིར་རྒྱུག་པར་བྱེད་པ་དེ་ཡང་རྨི་ལམ་ལྟ་བུར་མཐོང་སྟེ། དེ་ཇི་ལྟ་ཇི་ལྟར་རྒྱུག་པ་དེ་ལྟ་དེ་ལྟར་དེའི་སྐྱེ་བའི་སྲིད་པ་ཉེ་བར་འགྱུར་རོ། །དེ་གང་གི་ཚེ་སྐྱེ་བ་ཉེ་བར་གནས་པར་འགྱུར་བ་དེའི་ཚེ། གཟུགས་གུ་ལུ་ལུ་བྱེད་པ་
དག་མཐོང་ངོ་། །སྔོན་ཚེ་རབས་འབུམ་དུ་མ་མཐོང་བ་གང་ཡིན་པ་དེ་དག་ལ་འདི་ཅི་ཞིག་འདི་གང་ཞིག་ཡིན་སྙམ་དུ་དེའི་རྣམ་པར་ཤེས་པ་ལ་ངོ་མཚར་ཆེར་འབྱུང་སྟེ། དེ་ཅིའི་ཕྱིར་ཞེ་ན། ངོ་བོ་གཞན་པ་ཉིད་ཀྱིས་མ་གོམས་པའི་ཕྱིར་རོ། །ངོ་མཚར་དུ་གྱུར་པ་དེ་ནི་བདག་འདིར་འགྲོ་བར་བྱ་བའམ། འགྲོ་བར་མི་བྱ་སྙམ་དུ་དེ་ལ་དམིགས་པར་ཡང་བྱེད་ལ། འདི་དག་ཐམས་ཅད་བདག་དབང་བར་བྱའོ་སྙམ་དུ་ཡང་སེམས་ཏེ། ལེགས་པར་བྱས་པའི་ལས་དེ་དང་རྐྱེན་དེས་དེ་ལྟར་བློ་སྐྱེད་དོ། །སེམས་བསྐྱེད་མ་ཐག་ཉིད་དུ་ལྷའི་འཇིག་རྟེན་དེར་སྐྱེ་བར་འགྱུར་ཏེ། སྲིད་པ་བར་མར་འགྲོ་བ་དང་འབྲེལ་བ་བཅུ་གསུམ་པ་ནི་དེ་ལྟ་བུ་ཡིན་ནོ། །གར་མཁན་རྣམས་ཀྱི་ནང་ན་ཤིན་ཏུ་དཀའ་བ་ཤིན་ཏུ་རྨད་དུ་བྱུང་བ་ཤིན་ཏུ་རྣམ་པར་རིག་པར་དཀའ་བ་འདི་ཡིན་ཏེ་འདི་ལྟ་སྟེ། ལས་ཀྱི་གར་མཁན་ལས་གཞི་སྣ་ཚོགས་ཀྱི་གར་ཆེན་པོ་སེམས་ཀྱི་གར་དག་ལྟད་མོའི་གཞིའི་འཁོར་བ་ན་གར་བྱེད་དོ། །བརྒྱ་བྱིན་དེས་དེ་སྐད་སྨྲས་པ་དང་ལྷ་རྣམས་ཤིན་ཏུ་གུས་པའི་ཡིད་སྐྱེས་ནས་འདི་སྐད་སྨྲའོ། །འདི་ལྟར་བརྒྱ་བྱིན་བདག་ཅག་ལ། །འཇིག་རྟེན་འདི་དང་ཕ་རོལ་དུ། །སྐྱེ་དགུ་རྣམས་ལ་ཕན་མཛད་པ། །རྒྱལ་པོ་ཕ་དང་མ་དང་མཚུངས། །གང་གིས་བག་མེད་རྣམ་བྲལ་ཞིང་། །ཐམས་ཅད་དུ་ནི་འབྱུང་མི་འགྱུར། །མཐའ་ལས་བྱུང་བ་ཐར་བར་འགྲོ། །བདག་ཅག་ལ་ནི་ཆོས་སྟོན་མཛད། །ཁྱོད་ཀྱི་ལས་དང་འབྲས་བུར་བཅས། །མངོན་སུམ་ཡང་དག་རབ་ཏུ་བསྟན། །སྐྱེ་དང་འཆི་བའི་ངོ་བོ་དག །བརྒྱ་བྱིན་འཇིག་རྟེན་བཀའ་མཆིད་སྟོན། །ཁྱོད་ཀྱིས་དེ་ཉིད་རྣམ་པར་བསྟན། །བདག་ཅག་ལ་ནི་ལེགས་པར་མཛད། །བདག་ཅག་གང་དག་ཡིད་རྨོངས་པ། །ཡེ་ཤེས་མཁས་པ་ཉིད་དུ་མཛད། །བུད་མེད་འདོད་ཆགས་ཡིད་ཞེན་ཅིང་། །རྟག་ཏུ་འདོད་པ་ཚོལ་རྣམས་ལ། །རྒྱུ་དང་འབྲས་བུ་ཡང་དག་འབྱུང་། །དེ་ནི་ཁྱོད་ཀྱིས་རབ་ཏུ་བསྟན། །བརྒྱ་བྱིན་ལོང་བའི་མིག་དང་འདྲ། །ནད་པ་རྣམས་ལ་སྨན་པ་ལྟར། །ཁྱོད་ཀྱིས་ཆོས་ལམ་བསྟན་པ་གང་། །བདག་ཅག་ལ་ནི་སྨན་པར་མཛད། །ཇི་ལྟ་ཇི་ལྟར་བརྒྱ་བྱིན་ཁྱོད། །ཕན་པའི་ཆོས་ནི་སྟོན་མཛད་པ། །དེ་ལྟ་དེ་ལྟར་
གཤིན་རྗེའི་མི། །ཕན་མེད་མིག་ཅན་ཉམས་པར་འགྱུར། །དེ་ལྟར་བརྒྱ་བྱིན་དེས། དུད་འགྲོ་རྣམས་ཀྱི་སྲིད་པ་བར་མ་བཤད་ནས། ཡང་སྲིད་པ་བར་མར་འགྲོ་བ་དང་འབྲེལ་བ་བཅུ་བཞི་པ་སྟོན་པར་བྱེད་དོ། །འདི་ལྟར་སེམས་ཅན་དམྱལ་བ་པ་དག་རེས་འགའ་ལེགས་པར་བྱས་པའི་ལས་ཀྱི་རྐྱེན་དང་། ལེགས་པར་བྱས་པའི་ལས་ཀྱི་རྒྱུ་ལན་གྲངས་གཞན་ལ་མྱོང་བར་འགྱུར་བ། ཤིན་ཏུ་བསིལ་བ་ཤིན་ཏུ་ཕན་པར་འདོད་པ། དམའ་བ་དང་མཐོ་བར་འགྱུར་བའི་རྒྱུ་གང་གིས་གལ་ཏེ་སྡུག་བསྔལ་དཔེ་མེད་པ་ལས་གྲོལ་ནས། བདེ་བ་དཔེ་མེད་པར་ཇི་ལྟར་སྐྱེ་བར་འགྱུར། དེའི་ཡང་སོས་དང་ཐིག་ནག་དང་བསྡུས་གཞོམ་དང་ངུ་འབོད་དང་ངུ་འབོད་ཆེན་པོ་དང་ཚ་བ་ལ་སོགས་པ་སེམས་ཅན་དམྱལ་བ་ཆེན་པོ་དང་། འདི་ལྟར་སེམས་ཅན་དམྱལ་བའི་འཁོར་དུ་གཏོགས་པའི་རྣམ་པར་སྨིན་པ་ཤིན་ཏུ་ཚ་བ་སྤུ་ཤིན་ཏུ་ཟིང་ཞེས་བྱེད་པ་མེ་འབར་བ་འཁྲུགས་པ་དང་བཅས་པ་དག་ནས། སེམས་ཅན་དམྱལ་བ་པ་འཆི་བ་རྣམས་དང་འཆི་བ་དེ་དག་གི་ལས་ཟད་ནས་འཆི་བ་རྣམས་ཀྱི་མཚན་མ་ཇི་ལྟར་འབྱུང་བར་འགྱུར། སྲིད་པ་བར་མ་ནས་སྲིད་པ་བར་མར་ཇི་ལྟར་སྐྱེ་བ་དང་འཆི་བར་འགྱུར། ཇི་ལྟར་ན་ལས་ཀྱི་རྐྱེན་གྱི་དབང་གིས་ཤིན་ཏུ་སྡུག་བསྔལ་དང་ལྡན་པའམ་ཤིན་ཏུ་བདེ་བ་དང་ལྡན་པར་འགྱུར་ཞེ་ན། གཙོ་བོ་དག་སེམས་ཅན་དམྱལ་བ་པ་ངན་སོང་ཟད་པ་དེའི་འཆི་བ་ནི། དེ་གང་གི་ཚེ་རྫ་མའི་ནང་དུ་བཅུག་སྟེ་འཆི་བར་བྱེད་དོ། །དེ་བཅུག་པ་ཙམ་ཉིད་ཀྱིས་དབུ་བ་བཞིན་དུ་སོ་སོར་ཞུ་བར་བྱེད་ཀྱང་ལུས་གཞན་དུ་སྐྱེ་བར་མི་འགྱུར་རོ། །གལ་ཏེ་དེ་ལན་ཅིག་ཁོ་ནར་ཐོ་བས་གསོད་ཅིང་འཆི་བའི་དུས་བྱེད་ཀྱང་ལུས་གཞན་དུ་སྐྱེ་བར་མི་འགྱུར་རོ། །གལ་ཏེ་ལུང་བའི་ནང་དུ་འཇུག་པར་བྱེད་ལ། དེ་བཅུག་པ་ཙམ་ཉིད་ཀྱིས་སྲོག་འཇིག་པར་བྱེད་ཀྱང་ལུས་གཞན་དུ་སྐྱེ་བར་མི་འགྱུར་རོ། །གལ་ཏེ་བ་ཚྭའི་ཆུ་བོའི་ནང་དུ་འཇུག་པར་བྱེད་ལ། དེ་ལན་ཅིག་ཁོ་ནར་རབ་ཏུ་ཞུ་བར་བྱེད་ཀྱང་དེའི་ལུས་གཞན་དུ་སྐྱེ་བར་མི་འགྱུར་རོ། །གལ་ཏེ་ཕུར་བུ་རྣམས་ཀྱིས་བཏབ་ལ་དེ་ཕུར་བུ་རྣམས་ཀྱིས་བཏབ་སྟེ། ཉམས་པ་ཉིད་ཀྱིས་འཆི་བར་འགྱུར་ཡང་། དེའི་ལུས་ཡང་སྐྱེ་བར་མི་འགྱུར་རོ། །
གལ་ཏེ་བྱ་རྒོད་དམ་ཁྭ་རྣམས་ཀྱིས་བཟུང་ནས་ཟ་བར་བྱེད་ཀྱང་དེ་ཡང་འབྱུང་བར་མི་འགྱུར་རོ། །གལ་ཏེ་སེང་གེ་དང་སྟག་དང་དྲེད་དང་གུང་དང་གཟིག་རྣམས་ཀྱིས་འཛིན་པར་བྱེད་ལ། བཟུང་ནས་ཀྱང་གལ་ཏེ་ཟ་བར་བྱེད་ན་དེ་ཡང་འབྱུང་བར་མི་འགྱུར་ཏེ། དེ་ལྟར་སེམས་ཅན་དམྱལ་བ་པ་དེ་ལས་རྣམ་པར་ཟད་ནས་འཆི་བར་འགྱུར་རོ། །དེ་འཆི་བའི་དུས་ལ་བབ་པའི་ཚེ། གཤིན་རྗེའི་མི་གནོད་པར་བྱེད་པ་གང་ཡིན་པ་དེ་དག་ཐམས་ཅད་མི་སྣང་བར་འགྱུར་རོ། །སེམས་ཅན་དུ་བགྲང་བ་མ་ཡིན་པ་དེ་དག་ཇི་ལྟར་མར་དང་སྙིང་པོ་ཟད་ན་མར་མེ་མེད་པར་འགྱུར་བ་དེ་བཞིན་དུ་ལས་ཟད་ན། སེམས་ཅན་དམྱལ་བ་ལ་གནོད་པ་བྱེད་པ་གཤིན་རྗེའི་མི་རྣམས་འབྱུང་བར་མི་འགྱུར་རོ། །ཇི་ལྟར་འཛམ་བུ་གླིང་དུ་ཉི་མ་ནུབ་ན་དེའི་ཚེ་མུན་པ་ཡང་འབྱུང་བ་དེ་ལྟར་ལས་བྱས་པ་ཟད་ན། བཞིན་གྱི་མདོག་དང་མིག་མི་སྡུག་པར་བསྒྱུར་བ་གཟུགས་དེ་དག་ཐམས་ཅད་ཀྱང་མི་སྣང་བར་འགྱུར་རོ། །ཇི་ལྟར་གང་གི་ཚེ་རྩིག་པ་ཞིག་ན་དེའི་ཚེ་རི་མོ་ཡང་འཇིག་པར་འགྱུར་བ་དེ་བཞིན་དུ། གང་གི་ཚེ་ལས་ཀྱི་རྩིག་པ་ཞིག་ན། དེའི་ཚེ་སེམས་ཅན་དུ་བགྲང་བ་མ་ཡིན་པ་གཤིན་རྗེའི་མི་གཟུགས་མི་སྡུག་པར་བསྒྱུར་བ་དེ་དག་ཀྱང་འཇིག་པར་འགྱུར་རོ། །དེ་དག་ནི་བཅོམ་ལྡན་འདས་ཀྱིས་གསུངས་པ་ཡིན་ཏེ། དེ་ལྟར་སེམས་ཅན་དམྱལ་བ་དེ་དག་སེམས་ཅན་དམྱལ་བ་ཟད་ནས་ཐར་བར་འགྱུར་རོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་བཅུ་གསུམ་པ། དེ་ནས་བརྒྱ་བྱིན་གྱིས་དེའི་ཚེ་ལྷ་དེ་རྣམས་ལ་འདི་ལྟར་ཚིགས་སུ་བཅད་དེ་སྨྲས་པ། ཇི་ལྟར་མི་དག་སྲོག་གཅོད་པ། །དགྲ་རྣམས་ལས་ནི་ཐར་བ་རྣམས། །བདེ་བ་འདོད་པ་ཐབས་ཀུན་གྱིས། །མཛའ་བཤེས་མང་པོ་མངོན་དུ་འཕྲད། །དེ་ལྟར་དམྱལ་བ་སྟོབས་པོ་ཆེ། །ལས་འདི་དག་ལས་ངེས་གྲོལ་བ། །ལྷ་ཡུལ་ཞི་བར་འགྲོ་བ་ཡི། །ལས་རྣམས་ལེགས་པར་བྱས་པས་ཐོབ། །དེ་ནི་ཡོན་ཏན་དུ་མས་བརྒྱན། །ལྷ་ཡི་གནས་སུ་ཁྲིད་བྱེད་ལ། །ཇི་ལྟར་ལེགས་པར་བྱས་པའི་ལས། །དེ་མ་ཟད་པར་དགའ་བར་བྱེད། །དེ་ནི་དེ་ནས་ཟད་དང་ཕྱིར། །དབང་མེད་མི་དག་ལྟུང་བར་འགྱུར། །མར་མེའི་སྙིང་
པོ་ཟད་པ་གང་། །མར་མེ་འཆི་བར་འགྱུར་བ་ལྟར། །ལས་ཀྱི་རླུང་ལས་ཡང་དག་བྱུང་། །དེ་ནི་དམའ་དང་མཐོན་པོར་མཐོང་། །རླུང་ཞུགས་དབང་གིས་འཁྲུལ་པ་ཡི། །འཇིག་རྟེན་འདི་ནི་ཡོངས་སུ་འཁོར། །ཤེས་པའི་དབང་དུ་གྱུར་པ་གང་། །དེ་ནི་འཁོར་བར་མི་འཇུག་གོ །ཇི་ལྟར་པད་མའི་རྩ་རྒྱུད་ཀྱིས། །རི་མཆོག་རི་རབ་མི་འགུལ་ལྟར། །དེ་ནི་ལས་ཀྱི་ཞགས་པ་ཡིས། །ནམ་ཡང་འདྲེན་པར་མི་འགྱུར་རོ། །དེ་ལྟར་དེ་ནི་མགོན་བྲལ་ཞིང་། །མྱ་ངན་བྲལ་ལ་ཉོན་མོངས་བྲལ། །རི་རབ་ཀྱི་ནི་རྩེ་མོ་ལྟར། །བརྟན་པོ་དག་ཏུ་འཁོར་མི་འགྱུར། །དེ་ལྟར་བརྒྱ་བྱིན་དེས་ལྷ་དེ་རྣམས་ལ་ཚིགས་སུ་བཅད་པ་སྨྲས་ནས། སེམས་ཅན་དམྱལ་བ་པ་སེམས་ཅན་དམྱལ་བ་ལས་ཐར་བ་དེའི་སྲིད་པ་བར་མའི་མཚན་མ་སྔོན་ཆད་མ་མཐོང་བ་རྣམས་ལ་བརྟགས་ན། ནམ་མཁའ་ལ་རླུང་ཤིན་ཏུ་བསིལ་བ་ལུས་ལ་རེག་པར་བྱེད་དེ་རེག་ན་ཤིན་ཏུ་བདེ་བ་ཤིན་ཏུ་དྲི་ཞིམ་པ། བརྟེན་ན་ཤིན་ཏུ་བདེ་བ་སྒྲ་སྙན་པ་ཐོས་ཏེ་འདི་ལྟ་སྟེ། པི་བང་གི་སྒྲའམ་དེ་ལས་གཞན་པའི་རྒྱུད་ལས་བྱུང་བའི་སྒྲ་དེ་ལྟར་རླུང་དག་གི་སྒྲ་ཐོས་སོ། །དྲི་ཡང་ཤིན་ཏུ་ཡིད་དུ་འོང་བ་ལ་སྣོམ་མོ། །གཟུགས་ཀྱང་ཤིན་ཏུ་ཡིད་དུ་འོང་བ་དག་མཐོང་སྟེ། འདི་ལྟ་སྟེ། ཚལ་དང་ཉེ་བའི་ཚལ་དང་ལྟེང་ཀ་དང་འབབ་ཆུའི་དངོ་དང་པད་མའི་ཚལ་ཤིན་ཏུ་དྲི་ཞིམ་ཞིང་རྒྱ་ཆེ་བ་དག་མཐོང་ངོ་། །རྣ་བས་ཀྱང་གླུ་དབྱངས་ཀྱི་སྒྲ་ཤིན་ཏུ་ཡིད་དུ་འོང་བ་དག་ཐོས་སོ། །བདག་ཉིད་ཀྱི་བྱད་གཟུགས་ཤིན་ཏུ་ཆེ་ལ་རབ་ཏུ་གཟི་བརྗིད་དང་ལྡན་པ། ལྷག་པར་དྲི་ཞིམ་པ་ཕྲེང་བས་བརྒྱན་པ་མཐོང་ངོ་། །ཀུན་ཏུ་ཐོགས་པ་མེད་ཅིང་ནམ་མཁའ་ཤིན་ཏུ་དྲི་མ་མེད་པ་ཐམས་ཅད་ལ། གཟའ་དང་སྐར་མ་དང་རྒྱུ་སྐར་གསལ་བ་རྣམས་ཀྱིས་ཁྱབ་པར་མཐོང་ངོ་། །མཚོ་དག་ན་ཡང་བྱ་ངང་པ་དང་ཀཱ་རཎྜ་བར་འདྲེས་པའི་སྒྲ་དག་ཐོས་སོ། །དེ་ནས་ཡང་སྲིད་པ་བར་མར་ཞུགས་ཏེ། སྲིད་པ་འབྱུང་བའི་པི་བང་དང་གླིང་བུ་དང་རྔ་དང་གླུ་དབྱངས་ཀྱི་སྒྲ་དག་ཐོས་པ་དང་ལོ་བྱེ་བ་ཕྲག་དུ་མར་མ་མྱོང་བའི་དེའི་ཡིད་ལ་རབ་ཏུ་དགའ་བར་འགྱུར་བ། ཐམས་ཅད་དུ་མཚན་མ་བཟང་པོ་རྣམས་འབྱུང་བར་འགྱུར་བ་དང་། མཛའ་བཤེས་
དང་། གཉེན་འདབ་དང་། རྩ་ལག་དག་དང་ཕྲད་པ་ལྟ་བུར་བདག་ཉིད་སེམས་ལ་ཉིན་གཅིག་བཞིན་སྙིང་རབ་ཏུ་དགའ་བར་འགྱུར་རོ། །ཇི་ལྟ་ཇི་ལྟར་སྲིད་པར་སྐྱེ་བར་འགྱུར་བ་དེ་འདིའམ་གཞན་རྒྱལ་ཆེན་བཞིའི་ལྷའི་རིགས་སུ་སྐྱེས་པ་དང་ཚལ་དང་ཉེ་བའི་ཚལ་ཤིན་ཏུ་ཉམས་དགའ་བ་དང་དྲི་ཤིན་ཏུ་ཞིམ་པ་དང་ཚལ་དང་རིན་པོ་ཆེ་སྣ་བདུན་གྱི་ཚལ་དང་བུད་མེད་ཀྱང་ངོ་བོ་ཉིད་ཀྱིས་ཡིད་དུ་འོང་བ་གང་ཡིན་པ་དག་མཐོང་ངོ་། །དེ་འདི་སྙམ་དུ་སེམས་ཏེ། ད་ནི་བདག་འདིར་སྐྱེ་བར་བྱའམ་ཐོབ་པར་བྱའོ་སྙམ་མོ། །དེས་སེམས་བསྐྱེད་མ་ཐག་ཉིད་དུ་སྐྱེ་བར་འགྱུར་ལ་སྲིད་པའི་ཡན་ལག་གི་རིམ་པ་ནི་འདི་ལྟ་སྟེ། ཉེ་བར་ལེན་པའི་རྐྱེན་གྱིས་སྲིད་པ་འབྱུང་ངོ་། །དེ་ལྟར་སྲོག་ཆགས་དག་སེམས་ཅན་དམྱལ་བ་ལས་ཐར་ཅིང་ངན་པ་བྱས་པ་ལས་ཡོངས་སུ་ཐར་ནས་བདེ་བ་དཔེ་མེད་པ་ཐོབ་པར་འགྱུར་ཏེ། སྲིད་པ་བར་མའི་འགྲོ་བ་བཅུ་བཞི་པ་ནི་དེ་ལྟ་བུ་ཡིན་ནོ། །སྲིད་པ་བར་མར་འགྲོ་བ་དང་འབྲེལ་པ་བཅོ་ལྔ་པ་ཇི་ལྟར་ཤེས་པར་བྱ། །གང་གི་ཚེ་མི་དག་ལས་ཤི་ནས་གལ་ཏེ་མི་རྣམས་ཀྱི་ནང་དུ་སྐྱེ་བ་དེའི་ཚེ་མཚན་མ་ཅི་དག་འབྱུང་། མངོན་པར་འདོད་པ་དེ་ཇི་ལྟ་བུ་ཡིན་ཞེ་ན། འདི་ལ་གང་གི་ཚེ་འཆི་བའི་དུས་སུ་མི་དག་ཉིད་ལས་ཤི་ནས་གལ་ཏེ་མི་རྣམས་ཀྱི་ནང་དུ་སྐྱེ་ན། དེའི་མཚན་མ་འདི་ལྟ་བུ་དག་འབྱུང་བར་འགྱུར་ཏེ། ཇི་ལྟར་རི་བརྩེགས་པ་ཆེན་པོའི་གྲིབ་མ་རྡོ་ཐལ་གྱིས་བསྐུས་པའི་ཐང་ལ་འབབ་པ་དེ་ལྟར་གྲིབ་མ་ལྟ་བུ་ཞིག་བབ་པ་དང་འདི་སྙམ་དུ་སེམས་ཏེ། བདག་གི་སྟེང་དུ་ཐམས་ཅད་འབབ་བོ་སྙམ་ནས། དེ་ལག་པ་གཉི་གས་རི་འབབ་པ་ཕྱིར་འཕུལ་བར་བྱེད་ལ། འབབ་པ་ན་ལག་པ་གཉི་གས་འཛིན་པར་བྱེད་ཅིང་ལག་པ་གཡོབ་པར་བྱེད་པ་དང་དེའི་གཉེན་འདུན་དག་ན་རེ་འདི་ལྟར་ནམ་མཁའ་ལ་རེག་པར་བྱེད་དོ་ཞེས་བརྗོད་དོ། །དེའི་འོག་ཏུ་སྣམ་བུ་དཀར་པོ་ཞིག་མཐོང་ནས། དེའི་སྟེང་ན་ཡང་སྣམ་བུ་དམར་པོ་ཞིག་ཡོད་པར་མཐོང་ངོ་། །དེའི་འོག་ཏུ་སྲིད་པ་ཐ་མ་པའི་སེམས་ལ་ཇི་ལྟར་སྣང་བ་མཐོང་བ་དེའི་མི་གསལ་བ་དེ་དག་ལས་རྨོངས་པར་འགྱུར་ཏེ། ཇི་ལྟར་རྨི་ལམ་ན་གཟུགས་དག་ལ་བློ་རྨོངས་པ་ཇི་ལྟར་དེ་རྨོངས་པར་འགྱུར་རོ། །དེ་ཕ་མ་གཉིས་འཁྲིག་པའི་
ཆོས་དང་ལྡན་པར་གྱུར་པ་ན། གལ་ཏེ་སྐྱེས་པར་འགྱུར་ན་ནི་དེ་ལོག་པར་མཐོང་བར་འགྱུར་ཏེ། མ་ལ་ནི་ཆུང་མའི་འདུ་ཤེས་སྐྱེའོ། །ཕ་ལ་ནི་དགྲའི་འདུ་ཤེས་སྐྱེའོ། །དེ་འདི་སྙམ་དུ་སེམས་ཏེ། བདག་འདིའི་དྲུང་དུ་འགྲོའོ་སྙམ་ནས། དེ་མ་དེ་ལ་འཁྲིག་པའི་ཕྱིར་ཕྲད་པར་བྱེད་དོ། །ཇི་སྟེ་བུད་མེད་དུ་འགྱུར་ན་ནི་དེ་འདི་སྙམ་དུ་སེམས་ཏེ། བདག་གི་ཁྱིམ་ཐབ་འདི་འདིས་ཕྲོགས་སོ་སྙམ་ནས། དེ་ལ་ཞེ་སྡང་སྐྱེད་པར་བྱེད་དོ། །དེ་མ་དེ་སྐྱེས་པ་དེ་དང་འབྱེད་པར་འདོད་ཅིང་བདག་ཉིད་དེ་དང་ཕྲད་པར་བྱེད་དོ། །དེའི་ཚེ་སྲིད་པ་བར་མ་པའི་རྣམ་པར་ཤེས་པ་འགག་ཅིང་སྐྱེ་བའི་སྲིད་པའི་རྣམ་པར་ཤེས་པ་འབྱུང་སྟེ། དེ་མ་ཐག་པའི་རྐྱེན་གྱིས་རྒྱའི་འབུར་ལྟར་རྣམ་པར་ཤེས་པ་འབྱུང་བར་འགྱུར་རོ། །མི་དག་ལས་ཤི་ནས་མི་རྣམས་ཀྱི་ནང་དུ་སྐྱེ་བའི་མཚན་ཉིད་ནི་དེ་ལྟ་བུ་ཡིན་ནོ། །གཞན་ཡང་འགྲོ་བ་དང་འབྲེལ་པ་བཅུ་དྲུག་པ་ནི་འདི་ལྟར་ལྷ་དག་ཉིད་ལས་འཆི་བ་ན། གཙོ་བོ་དག་གང་གི་ཚེ་ལྷ་ལས་ཤི་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་བ་དེའི་ཚེ། དེ་ལ་འདི་ལྟར་ལྷ་གཞན་སེམས་ཅན་དམྱལ་བ་དང་ཡི་དགས་དང་། དུད་འགྲོའི་ནང་དུ་སྐྱེ་བ་རྣམས་ཀྱི་སྡུག་བསྔལ་དེ་དག་འབྱུང་བར་མི་འགྱུར་ལ། ཆུང་མས་འདོར་བའི་སྡུག་བསྔལ་མི་འབྱུང་། རྒྱན་འཕྲོག་པར་མི་བྱེད། ལྷའི་བུ་གཞན་སྟན་དེ་ལ་འདུག་པར་མི་མཐོང་སྟེ། སྡུག་བསྔལ་མི་བཟད་པ་དེ་དག་མཐོང་བར་མི་འགྱུར་རོ། །དེ་ཤི་བའི་སྟན་དེ་ལ་ལྷ་གཞན་དག་སྐྱེ་བར་འགྱུར་ལ། དེའི་འགྲོ་བ་ལྷའི་ནང་དུ་སྐྱེ་བ་ཆེས་བཟང་བར་འགྱུར་རོ། །འདི་ལྟར་གལ་ཏེ་རྒྱལ་ཆེན་བཞི་པ་དག་ལས་ཤི་ནས་སུམ་ཅུ་རྩ་གསུམ་དུ་སྐྱེ་བར་འགྱུར་བ་དེའི་མཚན་མ་ཤིན་ཏུ་ཉམས་དགའ་བ་བཟང་པོ་དག་མཐོང་བར་འགྱུར་ཏེ། འདི་ལྟར་དེས་སྔོན་གར་ཡང་མ་ཐོས་པའི་རྣམ་པ་གང་ཡིན་པའི་རྣམ་པ་དེ་ལྟ་བུའི་གླུ་དབྱངས་ཐོས་ལ། དེ་བཞིན་དུ་ཡུལ་ལྔའི་མཚན་མ་བཟང་པོ་མཐོང་ངོ་། །དེའི་འོག་ཏུ་དེའི་སྲིད་པ་ཐ་མ་པའི་སེམས་འབྱུང་སྟེ། དེས་སྲིད་པ་བར་མ་ལ་བུད་མེད་ཤིན་ཏུ་བཟང་མོ་ལྷག་པར་བལྟ་ན་སྡུག་པ། བྱད་གཟུགས་རབ་ཏུ་བཟང་བ་རྣམས་ཀྱི་ལག་ན་རོལ་མོ་རྣམ་པ་སྣ་ཚོགས་ཐོགས་པ་མཐོང་ངོ་། །འབབ་ཆུ་དང་སྐྱེད་མོས་ཚལ་ཡོན་ཏན་སྣ་ཚོགས་དང་ལྡན་ཞིང་
དེ་ལྟར་ཡིད་དུ་འོང་བ་སྔོན་གར་ཡང་མ་མཐོང་བ་སྲིད་པ་བར་མའི་གང་ཡིན་པ་དེ་དག་དེས་རྨི་ལམ་ལྟ་བུར་མཐོང་ངོ་། །དེ་གང་གི་ཚེ་སྐྱེ་བའི་སྲིད་པ་དང་ཉེ་ཞིང་ཕྲད་པར་འགྱུར་བ་དེའི་ཚེ་སད་པའི་དུས་ལྟར་འདོད་པ། ཤིན་ཏུ་ཉམས་དགའ་བ། འདོད་པའི་ཡོན་ཏན་ལྔ་འབྱོར་བ་དེས་སྔོན་ནམས་ཀྱང་མ་མཐོང་བ་དེ་རྣམས་གསལ་བར་མཐོང་ངོ་། །དེ་ནས་འདི་སྙམ་དུ་སེམས་ཏེ། ཀྱེ་ཨེ་མ་ངོ་མཚར་ཆེ་བ་རྣམ་པ་འདི་ལྟ་བུ་སྔོན་བདག་གིས་གར་ཡང་མ་མཐོང་སྟེ། ད་ནི་བདག་འདིར་འཇུག་པར་བྱའོ་སྙམ་སེམས་སོ། །དེས་སེམས་བསྐྱེད་མ་ཐག་ཉིད་དུ་དེར་སྐྱེ་བར་འགྱུར་ཏེ། སྲིད་པ་བར་མར་འགྲོ་བ་དང་འབྲེལ་པ་བཅུ་དྲུག་པ་ནི་དེ་ལྟ་བུ་ཡིན་ནོ། །གཙོ་བོ་དག་གཞན་ཡང་སྲིད་པ་བར་མར་འགྲོ་བ་དང་འབྲེལ་བ་བཅུ་བདུན་པ་ཇི་ལྟར་འབྱུང་ཞེ་ན། དེ་ལྟར་ལྷའི་རིས་གཞན་གང་དང་གང་དག་ནས་ཆེས་དམའ་བར་སྐྱེ་བར་འགྱུར་བ་དེ་ནི་ལྟེང་ཀ་དང་ཆུ་དངོ་དང་འབབ་ཆུ་ཆུང་བ་དག་མཐོང་བ་དང་། ཇི་ལྟར་དེ་ལ་འདོད་པ་དེ་ལྟར་བཀྲེས་པས་མངོན་པར་ཉམས་པར་འགྱུར་ཞིང་དེ་དེར་སྐྱེ་བར་འགྱུར་རོ། །དེ་ལྟར་ལྷ་རྣམས་ཀྱི་སྲིད་པའི་ཡན་ལག་ལ་རྣམ་པ་གཉིས་སམ། རྣམ་པ་གཅིག་ཏུ་འགྲོ་བ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །གཞན་ཡང་སྲིད་པ་བར་མར་འགྲོ་བ་དང་འབྲེལ་བ་ནི་གལ་ཏེ་ཤར་གྱི་ལུས་འཕགས་པོའི་མི་དག་ནུབ་ཀྱི་བ་ལང་སྤྱོད་རྣམས་ཀྱི་ནང་དུ་སྐྱེ་བར་འགྱུར་བ་དེའི་འཆི་བའི་དུས་གང་ཞིག་ལ་མཚན་མ་རྣམ་པ་ཇི་ལྟ་བུ་དག་འབྱུང་བར་འགྱུར། གལ་ཏེ་ནུབ་ཀྱི་བ་ལང་སྤྱོད་ཀྱི་མི་ཤར་གྱི་ལུས་འཕགས་སུ་སྐྱེ་བར་འགྱུར་ན། དེ་གཉིས་འཆི་བའི་དུས་སུ་མཚན་མ་རྣམ་པ་ཇི་ལྟ་བུ་ཞིག་འབྱུང་བར་འགྱུར་ཞེ་ན། གཙོ་བོ་དག་ཕན་ཚུན་སྐྱེ་བ་དག་གི་མཚན་མ་ནི་དེ་བཞིན་དུ་འབྱུང་སྟེ། འདི་ལྟ་སྟེ། སྲིད་པ་ཐ་མ་པའི་དུས་སུ་ཕུག་གི་སྒོ་ཆེན་པོ་རིབ་རིབ་པོར་བསྒྲིབས་པ་ཞིག་མཐོང་ལ། དེ་ནས་བ་དན་སྐར་མདའ་ལྟ་བུར་ཤིན་ཏུ་བཟང་བ། ལ་ལ་ནི་དམར་པོ། ལ་ལ་ནི་དམར་སྐྱ་དག་ཅིག་བྱུང་བ་དང་། དེ་ལག་པ་གཉིས་ཀྱིས་དེ་ལ་འཛིན་པར་བྱེད་དོ། །དེས་ཇི་ལྟ་ཇི་ལྟར་བ་དན་དེ་ལ་བཟུང་བ་དེ་ལྟ་དེ་ལྟར་མི་དེ་ཡང་ཕུག་གི་ནང་དུ་འཇུག་པར་བྱེད་ལ། སྲིད་པ་ཐ་མ་པ་བཏང་སྟེ། ཤི་ནས་སྲིད་པ་བར་མ་ལ་གནས་ཏེ། བ་དན་དེ་ཉིད་ལ་འཛིན་པར་འདོད་པ་ཀུན་དུ་
རྒྱུག་པར་བྱེད་དོ། །དེ་ཇི་ལྟ་ཇི་ལྟར་རྒྱུག་པ་དེ་ལྟ་དེ་ལྟར་དེའི་སྐྱེ་བའི་སྲིད་པའི་ཉེ་བར་གནས་པར་འགྱུར་ལ། དེས་སྔ་མ་བཞིན་དུ་ཁྱུ་མཆོག་པ་དང་ལྷན་ཅིག་འཁོད་པ་དང་། གསེབ་དང་རྒོད་མར་ལྷན་ཅིག་འཁོད་པར་མཐོང་བ་དང་། དེ་དེར་ཀུན་དུ་འདོད་ཆགས་སྐྱེད་པར་བྱེད་དོ། །གཙོ་བོ་དག་འགྲོ་བ་དང་འབྲེལ་པ་བཅུ་བདུན་པ་ནི་དེ་ལྟ་བུར་ཤེས་པར་བྱའོ། །དེ་ལྟར་ཤེས་པས་ཤིན་ཏུ་བག་ཡོད་པར་བྱའོ། །དེ་ཅིའི་ཕྱིར་ཞེ་ན། བག་མེད་པ་ནི་གང་ཡང་འཁོར་བ་ལས་འགྲོལ་བ་མེད་ལ། འཇིག་རྟེན་པའི་ལེགས་པ་གང་ཡང་འཐོབ་པར་མི་འགྱུར་རོ། །བག་མེད་པ་ནི་ལེགས་པ་ཐམས་ཅད་དོན་མེད་པར་བྱེད་པ་ཉིད་ཡིན་ཏེ། དེ་ལྟ་བས་ན་ལེགས་པ་ཐམས་ཅད་དོན་དུ་གཉེར་བའི་ལྷའམ་མི་ཤེས་རབ་དང་ལྡན་པར་གྱུར་པས་ཡོངས་སུ་སྤང་བར་བྱ་བ་བག་མེད་པ་དེ་རབ་ཏུ་འབད་པས་ཡོངས་སུ་སྤོངས་ཤིག །གཙོ་བོ་དག་དེ་ལྟར་སྲིད་པ་བར་མར་འགྲོ་བ་དང་འབྲེལ་པ་བཅུ་བདུན་པ་དག་སྲེད་པའི་ངོ་བོ་ཉིད་ལ་རྟོག་པར་འདོད་ཅིང་དེ་ཁོ་ན་ཚོལ་བར་འདོད་པའི་ལྷའམ་མིས་ཤེས་པར་བྱ། དཔྱད་པར་བྱ། བརྟག་པར་བྱའོ། །གཙོ་བོ་དག་གཞན་ཡང་རིམ་པ་བརྒྱད་བརྩིས་ནས་ཆོས་ཉི་ཤུའི་བར་དུ་བསྟན་པ་གང་ཡིན་པ་དེ་དག་གི་ནང་ནས་བཅུ་བདུན་གྱི་བར་ནི་བསྟན་ཟིན་ཏོ། །གཙོ་བོ་དག་ད་ནི་འགྲོ་བ་དང་འབྲེལ་པ་དག་ལས་གཞན་པའི་ཁམས་བཅྭ་བརྒྱད་བསྟན་པ་ཁམས་དེ་དག་གི་རིམ་པ་ལ་བབ་པས་རིམ་པ་དེ་བསྟན་པར་བྱའོ། །དེ་ལ་ཁམས་ཞེས་བསྟན་པ་གང་ཡིན་པ་དེ་གང་ཞེ་ན། དེ་ལ་མོས་པ་རྣམ་པ་དུ་མ་དག་གི་ཁམས་རྣམ་པ་དུ་མར་འགྱུར་རོ། །སྐྱོན་གསུམ་གྱིས་བསྒྲིབས་པའི་སེམས་ཅན་ནི་ཕུང་པོ་གསུམ་ལ་གནས་ལ། གསུམ་གྱིས་སོ་སོར་དབང་བསྒྱུར་ཏོ། །ཕྲ་མོ་ལ་མོས་པའི་སེམས་ཅན་བྱེད་པ་སྣ་ཚོགས། རང་བཞིན་སྣ་ཚོགས། ལས་སྣ་ཚོགས་འགྲོ་བ་སྣ་ཚོགས་བདེ་བ་དང་སྡུག་བསྔལ་མྱོང་བ་སྣ་ཚོགས། བྱད་གཟུགས་སྣ་ཚོགས། དབང་སྣ་ཚོགས་པ་དེ་དག་ཐམས་ཅད་ནི་སེམས་ཀྱི་རང་བཞིན་སེམས་ཀྱི་ཁམས་ལ་རག་ལས་པ་ཡིན་ལ། སྲིད་པའི་རིས་སུ་སྲིད་པ་སྣ་ཚོགས་ཉིད་འབྱུང་བ་ཡིན་ཏེ། དེ་ལྟར་སེམས་ཅན་རྣམས་ཀྱི་སེམས་ཀྱི་ཁམས་ནི་མཐའ་ཡས་སོ། །ལྷ་དང་མི་དང་དུད་འགྲོ་དང་ཡི་དགས་དང་སེམས་ཅན་
དམྱལ་བ་རྣམས་ཀྱི་འགྲོ་བ་རགས་རིམ་གྱིས་མདོར་བསྡུ་ན། བགྲང་བར་གཏོགས་པའི་ཁམས་བཅྭ་བརྒྱད་ནི་སེམས་ཀྱི་སྐྱོན་ལ་རག་ལས་པ་ཡིན་ཏེ། ཁམས་བཅྭ་བརྒྱད་དུ་བསྡུ་བ་དེ་དག་ཐམས་ཅད་ནི་མདོར་བསྡུས་པ་ཡིན་ནོ། །དེ་ལ་ཁམས་དང་པོ་ནི་འདོད་ཆགས་ཀྱི་ཤས་ཆེ་བའི་ཁམས་ཡིན་ནོ། །དེ་ལ་འདོད་ཆགས་ཀྱི་ཤས་ཆེ་བའི་ཁམས་དག་ནི། ལྷ་དང་མི་དང་ཡི་དགས་དང་དུད་འགྲོ་རྣམས་ཀྱི་བུད་མེད་ང་རྒྱལ་སྤྱོད་པ་ཀུན་ཡིན་ལ། དེ་དག་གི་ཞེ་སྡང་དེ་ནི་ཆུང་བ་ཡིན་ཏེ། འདི་ནི་ཁམས་དང་པོ་ཡིན་ནོ། དུད་འགྲོ་སྤྱི་རྣམས་ཀྱི་ནང་ན་རྨ་བྱ་དང་། མཆིལ་པ་དང་། ཁུ་བྱུག་དང་། ཕུག་རོན་དང་། བཱ་ན་པི་ཀ་དང་། པུ་ཤུད་དང་། བུང་བ་དང་། ཉ་དང་། ཁྱིམ་བྱ་དང་། བ་ལིན་ད་ཀ་ལ་སོགས་པའི་དུད་འགྲོར་གཏོགས་པ་ནི་འདོད་ཆགས་ཀྱི་ཁམས་ཤས་ཆེ་བ་ཡིན་ནོ། །དུད་འགྲོར་གཏོགས་པའི་འདོད་ཆགས་ཀྱི་ཁམས་འབྲིང་པོའི་ཤས་ཡོད་པ་གང་ཞེ་ན། འདི་ལྟ་སྟེ། རྟ་དང་། བྱི་ལ་དང་། སྐྱུགས་པ་ཟ་བ་དང་། བོང་བུ་དང་། མ་ཧེ་དང་། ཕག་དང་། གླང་པོ་ཆེ་དང་། རྔ་མོ་དང་། ཁྱི་དང་། ད་ར་དང་། བྱ་རོག་དང་། བྱ་ནེའུ་ལེ་དང་། འུག་པ་དང་། ཚད་པ་བྱེའུ་དང་། ཡ་ཏི་ཀ་ལ་སོགས་པ་དག་ནི་འདོད་ཆགས་འབྲིང་པོར་སྤྱོད་པ་ཡིན་ཏེ། སེམས་ཀྱི་ཁམས་གཉིས་པ་ཡིན་ནོ། །དེ་ལ་དུད་འགྲོ་དེ་དག་གི་འདོད་ཆགས་ཀྱི་ཁམས་ཆུང་བ་གང་ཞེ་ན། འདི་ལྟ་སྟེ། སེང་གེ་དང་། སྟག་དང་། དྲེད་དང་། གུང་དང་། ར་དང་། གླ་བ་དང་། བྱ་ཀ་ལན་ད་ཀ་དང་། ཝ་དང་། ས་ཀོའུ་ཤི་དང་། ས་ལི་ལེ་དང་། མཛོ་དང་། ཆུ་སྲིན་དང་། ཆུ་སྲིན་དྷུན་དྷུ་གསོད་དང་། ཙུ་ལུན་ད་ལ་སོགས་པ་དུས་སུ་འཁྲིག་པར་བྱེད་པ་དེ་དག་ནི། དུས་སུ་འཁྲིག་ཏུ་འགྲོ་བ་ཡིན་ནོ། །དུས་མ་ཡིན་པར་འདོད་ཆགས་སྤྱོད་པ་ཆུང་བ་ཡིན་ཏེ། དེ་དག་ནི་དུད་འགྲོའི་ཁམས་གསུམ་པ་ཡིན་ནོ། །དེ་དག་མ་གཏོགས་པ་གཞན་རྣམ་པ་དུ་མ། ཚེ་དུ་མ། མིང་དུ་མ་གང་ཡིན་པ་དེ་དག་ནི་བཤད་པར་མི་ནུས་ཤིང་བགྲང་བར་མི་ནུས་སོ། །ཡང་དུད་འགྲོ་དེ་དག་གི་ནང་ཉིད་ན་ཞེ་སྡང་ཆེ་བ་གང་ཡིན་ཞེ་ན། གང་ཞེ་སྡང་ལྷག་པར་ཆེ་བ་ཉིད་ཡིན་ལ་འདོད་ཆགས་ཆེ་བ་མ་ཡིན་ཏེ། འདི་ནི་ཁམས་བཞི་པ་ཡིན་ནོ། འདི་ལྟ་སྟེ། སེང་གེ་དང་། སྟག་དང་། གུང་དང་། སྦྲུལ་དང་། ནེའུ་ལེ་དང་། སྲོག་
ཆགས་རླུང་འགམ་དང་། ཀབ་ཏབ་བྱ་དང་། སྲིན་གྱི་མེ་ད་དང་། ཀ་ཀོ་ད་ར་ད་དང་། ཙི་ལིན་ད་ཀ་དང་། འོལ་བ་དང་། པྲ་རོ་ཧི་ན་དང་། ཆུ་སྲིན་ན་ཀྲ་དང་། ཆུ་སྲིན་བྱིས་པ་གསོད་དང་ཕག་ལ་སོགས་པ་ནི་ཞེ་སྡང་གི་ཁམས་ལྷག་པར་ཆེ་བ་ཡིན་ནོ། །ཁམས་ལྔ་པ་ནི་གང་ཡིན། དུད་འགྲོ་དེ་དག་ཉིད་ཀྱི་ནང་ན་ཞེ་སྡང་འབྲིང་དུ་སྤྱོད་པ་གང་ཞེ་ན། བ་ལང་དང་། ཡུ་བ་བིན་ད་ཀ་དང་། ཀ་པ་ལིང་ཀ་དང་། ས་ལིན་དྷ་ཀ་དང་། ཀཱ་ཌོ་ད་ར་དང་། ཨིད་ཏྱ་ཧ་ཀ་དང་། རྨ་བྱ་དང་། ཁྱིམ་བྱ་དང་། བྱི་ལ་དང་། བྱི་བ་ལ་སོགས་པ་ནི་ཞེ་སྡང་འབྲིང་དུ་སྤྱོད་པ་ཡིན་ནོ། །དེ་ལ་ཁམས་ལྔ་པ་དུད་འགྲོ་དེ་དག་ཉིད་ཀྱི་ནང་ན་ཞེ་སྡང་ཆུང་ངུ་སྤྱོད་པ་གང་ཡིན་ཞེ་ན། འདི་ལྟ་སྟེ། ངང་པ་དང་། ཆུ་སྐྱར་དང་། སྲོག་ཆགས་ཀད་ཏྱ་དང་། ཤ་བ་དང་། ཁུ་བྱུག་དང་། མཆིལ་པ་དང་། བཞད་དང་། བོང་བུ་དང་། རུས་སྦལ་དང་། རི་བོང་གསོད་དང་། སྲོག་ཆགས་སཱུ་ཙ་ར་དང་། ཨུ་ཙ་ཙ་ཀ་དང་། ར་ཤ་ཤ་ཀ་དང་། སྦལ་པ་ལ་སོགས་པ་ནི་ཞེ་སྡང་ཆུང་ངུ་སྤྱོད་པ་ཡིན་ནོ། །དེ་ལ་ཁམས་དྲུག་པ་གང་ཞེ་ན། ཡི་དགས་རྣམས་ཀྱི་ནང་ན་ཡི་དགས་རྫུ་འཕྲུལ་ཆེན་པོ་འདོད་ཆགས་སྤྱོད་པ་གང་ཡིན་པ་དེ་དག་ཡིན་ནོ། །ཁམས་བདུན་པ་ནི་དུད་འགྲོའི་ནང་དུ་གཏོགས་པ་ལྷ་མ་ཡིན་འདོད་ཆགས་ཀྱི་ཁམས་ལྷག་པར་ཆེ་བ་གང་ཡིན་པ་དེ་དག་ཡིན་ནོ། །ཁམས་བརྒྱད་པ་ནི་འདོད་ཆགས་འབྲིང་དུ་སྤྱོད་པ་དུད་པ་ཟ་བ་གང་ཡིན་པ་དེ་དག་ཡིན་ནོ། །ཁམས་དགུ་པ་ནི་འདོད་ཆགས་ཆུང་ངུར་སྤྱོད་པ་གཏོར་མ་ཟ་བ་གང་ཡིན་པ་དེ་དག་ཡིན་ནོ། །ཁམས་བཅུ་པ་ནི་ལྷ་རིལ་བ་སྤྱི་བླུགས་ནས་འཐུང་བ་གང་ཡིན་པ་དེ་དག་ནི་ལྷ་གཞན་དག་པས་འདོད་ཆགས་སྤྱོད་པ་ཆུང་བ་ཡིན་ལ། ཞེ་སྡང་ཆེ་བ་ཡིན་ཏེ། གཡུལ་འགྱེད་པ་ལ་བརྐམ་ཞིང་རྟག་ཏུ་བརྩོན་པ། ལྷ་མ་ཡིན་གྱི་གཡུལ་འགྱེད་པར་འདོད་པ་དེ་དག་ནི་འདོད་ཆགས་ལྷག་པར་ཆུང་བ་ཡིན་ནོ། །ཁམས་བཅུ་པ་འདི་ལྟར་ཕྲེང་ཐོགས་རྣམས་ནི་འདོད་ཆགས་འབྲིང་དུ་སྤྱོད། ཞེ་སྡང་འབྲིང་དུ་སྤྱོད་པ་ཡིན་ཏེ། ཁམས་འབྲིང་པོ་ཡིན་ནོ། །རྟག་ཏུ་མྱོས་གནས་པ་རྣམས་ནི་འདོད་ཆགས་ཀྱི་ཁམས་ལྷག་པར་ཆེ་བ་ཡིན། ཞེ་སྡང་གི་ཁམས་ཆུང་བ་ཡིན་ཏེ། ཐམས་ཅད་དུ་མངོན་པར་བརྩོན་པ་ཡིན་ནོ། །ཁམས་བཅུ་གཅིག་པ་ཀུན་དུ་རྒྱུ་བ་
དག་ནི་ཞེ་སྡང་གི་ཁམས་ལྷག་པར་ཆེ་ལ་འདོད་ཆགས་ཆུང་བ་ཡིན་ནོ། །ཁམས་བཅུ་གཉིས་པ་ནི་སུམ་ཅུ་རྩ་གསུམ་པ་འདོད་ཆགས་སྤྱོད་པ་ཀུན་ཡིན་ལ། ཞེ་སྡང་ཆུང་ངུ་སྤྱོད་པ་རྣམས་ཡིན་ནོ། །ཁམས་བཅུ་གསུམ་པ་ནི་བྱང་གི་སྒྲ་མི་སྙན་པ་འདོད་ཆགས་ཀྱི་ཁམས་ཆེ་བ་ཀུན་ཡིན་ནོ། །ཁམས་བཅུ་བཞི་པ་ནི་ནུབ་ཀྱི་བ་ལང་སྤྱོད་པ་ཞེ་སྡང་སྤྱོད་པ་ཀུན་ཡིན་ནོ། །ཁམས་བཅོ་ལྔ་པ་ནི་ཤར་གྱི་ལུས་འཕགས་པོ་རྣམས་འདོད་ཆགས་དང་ཞེ་སྡང་འདྲེས་པར་ཆེ་སྟེ། ཁམས་མཉམ་པ་ཡིན་ནོ། །ཁམས་བཅུ་དྲུག་པ་ནི་འཛམ་བུའི་གླིང་གི་མི་རང་བཞིན་སྣ་ཚོགས། སྤྱོད་པ་སྣ་ཚོགས། མོས་པ་སྣ་ཚོགས་པ་རྣམས་ཡིན་ནོ། །ཁམས་བཅུ་བདུན་པ་ནི་ལྷ་གཞན་དང་སེམས་ཅན་དམྱལ་བ་འདོད་ཆགས་སྤྱོད་པ་ཐམས་ཅད་ཡིན་ཏེ། འདི་ལྟར་དེའི་གནས་དག་ན་ཡང་སེམས་ཅན་དམྱལ་བ་པ་རྣམས་བུད་མེད་དག་ལ་མངོན་པར་འདོད་དོ། །འདི་ལྟར་ལས་བྱས་པའི་སེམས་ཅན་དམྱལ་བ་པ་རྣམས་དང་། ལྷའི་གནས་བཞི་རྣམས་ནི་འདོད་ཆགས་ལྷག་པར་ཆེ་བ་ཡིན་ནོ། །སེམས་ཅན་རྣམས་ཀྱི་རང་བཞིན་གང་ཡིན་པ་དེ་ཉིད་ཁམས་ཡིན་པ་དེ་ཉིད་གནས་ཡིན། དེ་ཉིད་མོས་པ་ཡིན་ཏེ། ཐམས་ཅད་མདོར་བསྡུ་ན། དེ་དག་ཉིད་ཁམས་བཅྭ་བརྒྱད་ཡིན་ནོ། །གང་ན་འདོད་ཆགས་དང་ཞེ་སྡང་སྤྱོད་པ་དེ་ན་གཏི་མུག་ལ་གནས་ལ། དེ་ལྟར་འདོད་ཆགས་དང་ཞེ་སྡང་དག་ནི་གཏི་མུག་ལ་རག་ལས་པ་ཡིན་ཏེ། རྨོངས་པ་མེད་ན་ཆགས་པའམ་གཡོ་བ་མེད་དོ། །གཙོ་བོ་དག་དེ་ལྟར་སྐྱོན་གསུམ་གྱི་བྱེ་བྲག་ཐ་དད་པ་བཞིའི་སྐྱོན་གྱིས་ཁམས་འབྱུང་བར་འགྱུར་རོ། །གཙོ་བོ་དག་ཡང་ཁམས་བཅྭ་བརྒྱད་ཡོད་དེ། འདི་ལྟ་སྟེ། མིག་གི་ཁམས་དང་། གཟུགས་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་དང་། རྣ་བའི་ཁམས་དང་། སྒྲའི་ཁམས་དང་། རྣ་བའི་རྣམ་པར་ཤེས་པའི་ཁམས་དང་། སྣའི་ཁམས་དང་། དྲིའི་ཁམས་དང་། སྣའི་རྣམ་པར་ཤེས་པའི་ཁམས་དང་། ལྕེའི་ཁམས་དང་། རོའི་ཁམས་དང་། ལྕེའི་རྣམ་པར་ཤེས་པའི་ཁམས་དང་། ལུས་ཀྱི་ཁམས་དང་། རེག་བྱའི་ཁམས་དང་། ལུས་ཀྱི་རྣམ་པར་ཤེས་པའི་ཁམས་དང་། ཡིད་ཀྱི་ཁམས་དང་། ཆོས་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་
ཁམས་ཏེ། གཙོ་བོ་དག་གཞན་འདི་དག་ཀྱང་ཁམས་ཡིན་ནོ། །འདི་དག་ནི་གནོད་པ་ཐམས་ཅད་ཀྱི་རྒྱུར་གྱུར་ཅིང་། བྱིས་པ་སོ་སོའི་སྐྱེ་བོ་ཐམས་ཅད་རྨོངས་པར་བྱེད་པ་ཡིན་ཏེ། ལྷའམ་མི་བག་ཡོད་པས་ཡུལ་དེ་དག་ལ་བསམས་ནས་བསྲུང་བར་བྱའོ། །གང་གཉི་ག་འཛིན་པ་བག་མེད་པའི་མི་རྣམས་ཀྱི་སྲིད་པ་བར་མ་པ་བཅུ་དགུ་ནི་འདི་ལྟ་སྟེ། བསམ་གཏན་བཞིར་ཉེ་བར་འགྲོ་བ་གནས་གཙང་མ་དང་བཅས་པ་བཅུ་དྲུག་དང་། འདོད་པའི་ཁམས་སུ་ཉེ་བར་འགྲོ་བ་གསུམ་སྟེ། འདི་ལྟ་སྟེ་སེམས་ཅན་དམྱལ་བ་དང་། དུད་འགྲོ་དང་། མི་རྣམས་སོ། །ཡི་དགས་རྣམས་ནི་དེ་དག་དང་འབྲེལ་པ་ཡིན་ཏེ། སེམས་ཅན་དམྱལ་བ་མྱོང་བར་བྱེད་པ། སྡུག་བསྔལ་མང་པོ་ལྷག་པར་མྱོང་བ་ཡིན་ནོ། །འདོད་པའི་ཁམས་ན་གནས་ཐ་དད་པ་ཉི་ཤུ་ཡོད་དེ། ཁ་ཅིག་དག་རྣམ་པ་བཅུར་ཡང་འཆད་དོ། །གཙོ་བོ་དག་དངོས་པོ་ཐ་དད་པ་དེ་དག་ཐམས་ཅད་ཁོང་དུ་ཆུད་པར་བྱའོ། །དེ་ནས་ལྷ་དེ་རྣམས་ཀྱིས་བརྒྱ་བྱིན་གྱི་ཁ་ནས་ཆོས་དེ་དག་ཐོས་ནས། ཡང་བརྒྱ་བྱིན་ལ་མངོན་པར་བསྟོད་ཅིང་འདི་ལྟར་ཚིགས་སུ་བཅད་དེ་སྨྲས་པ། ཐམས་ཅད་མཆོག་ཏུ་ཞི་བྱེད་པ། །བརྒྱ་བྱིན་ཁྱོད་ཀྱི་ཆོས་འདི་བཤད། །འཇིགས་དང་དངངས་པ་བྱུང་བའི་ཚེ། །སྒྲུབ་ལ་བདག་ཅག་གནས་པར་བགྱི། །ཆོས་གང་འཆད་པར་མཛད་པ་ནི། །གཞན་ལ་ཕན་པར་བཞེད་པ་ལགས། །མྱ་ངན་འདས་འགྲོ་སྟོན་པ་པོ། །དེ་ནི་ཕ་དང་དེ་ནི་མ། །ལེགས་པར་གསུངས་པའི་ཚིག་གཅིག་པོ། །སྟོན་པ་གང་ཞིག་སྟོན་མཛད་པ། །དེ་ནི་འགྲོ་གཞན་ལམ་ཤེས་ཤིང་། །ལུས་ཅན་རྣམས་ཀྱི་མགོན་དུ་འགྱུར། །ལེགས་པར་གསུངས་པའི་ཚིག་ལ་ནི། །བརྒྱ་བྱིན་རིན་ཐང་མ་མཆིས་ཏེ། །གང་ཞིག་ནོར་གྱིས་མི་རྙེད་པ། །ཞི་བའི་ཚིག་དེ་རྙེད་པ་ལགས། །ནོར་རྫས་ཐུན་མོང་སྤྱོད་པར་མཐོང་། །ཆོས་དག་གི་ནི་བློ་མི་འཕེལ། །མི་ཡི་ནོར་རྫས་ཟད་འགྱུར་གྱི། །ཆོས་ཀྱི་ནོར་རྫས་རྣམས་མི་ཟད། །སྐྱེ་བའི་ཚེ་རབས་སྟོང་དག་ཏུ། །ཆོས་གཅིག་རྗེས་སུ་འགྲོ་བར་བྱེད། །གོམ་པ་གཅིག་པུ་འགྲོ་བྱེད་ཀྱང་། །ནོར་ནི་རྗེས་སུ་འགྲོ་མི་འགྱུར། །རྒྱལ་པོ་ཆོམ་རྐུན་ཆུ་རྣམས་ཀྱིས། །མི་རྣམས་ཀྱི་
ནི་ནོར་རྫས་འཕྲོག །ཆོས་ཀྱི་ནོར་ནི་དེ་རྣམས་ཀྱིས། །ནམ་ཡང་དབྲོག་པར་མི་ནུས་སོ། །དེ་ལྟར་བརྒྱ་བྱིན་དེ་ལ་ལྷ་དེ་རྣམས་ཀྱིས་མངོན་པར་མཆོད་དོ། །མཆོད་ནས་ཀྱང་དེ་ནས་ཡང་བརྒྱ་བྱིན་གྱི་མདུན་དུ་འཁོད་དོ། །བརྒྱ་བྱིན་གྱིས་ཀྱང་སྙིང་གི་ལས་གྱ་ནོམ་པ་དེ་དག་བྱས་ནས། ལྷའི་བདེ་བ་དེ་དག་ཐམས་ཅད་ཀྱང་མི་རྟག་པ་དང་མི་བརྟན་པ་དང་བདག་མེད་པ་བསྟན་ཅིང་། སྤྲུལ་པ་དེ་ཡང་མི་སྣང་བར་བྱས་སོ། །དེ་ནས་ཡང་ལྷ་ཡིད་མྱ་ངན་ལས་འདས་པ་རིས་འཐུན་པར་སྤྱོད་པའི་གནས་དེ་དག་ཉིད་དུ་ཕྱིན་པ་དེ་ཐམས་ཅད་ཇི་སྲིད་དུ་འདོད་པ་སྡུག་པ། ཡིད་དུ་འོང་བ་སོ་སོ་ཡང་དག་པར་མྱོང་བ། བདེ་བ་འགྲུབ་པའི་ལས་དེ་དག་ཟད་པ་དང་སྤངས་པ་དང་གཏུགས་པར་མ་གྱུར་པ་དེ་སྲིད་དུ་དགའ་བར་བྱེད་དོ། །དེ་ཕྱིས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་སྔར་བསྟན་པ་དེ་དང་རྒྱུ་འཐུན་པར། དེ་དག་ཕལ་ཆེར་ངན་སོང་དུ་འགྲོ་བར་མི་འགྱུར་རོ། །གང་དག་མི་རྣམས་ཀྱི་ནང་དུ་སྐྱེས་པ་དེ་དག་ཆོས་བཟང་པོ་དང་ལྡན་ཞིང་ཆོས་ཀྱི་རྗེས་སུ་འཇུག་པར་འགྱུར་ལ། རྟག་ཏུ་དགོན་པར་གནས་པ་དང་རྟག་ཏུ་འཇིག་རྟེན་ཕ་རོལ་ལ་འཇིགས་པར་ལྟ་བ་ཡིན་ནོ། །དེ་དག་ཆོས་ཐོས་ནས་ཀྱང་རབ་ཏུ་འབྱུང་བར་བྱེད་དོ། །ཁ་ཅིག་ནི་རྒྱུན་དུ་ཞུགས་པར་འགྱུར་བ་ནས་དགྲ་བཅོམ་པའི་བར་དུ་འགྱུར་བར་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་འཁོར་ན་གནས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། སྐྱེས་བུ་དམ་པ་ཆོས་དང་ལྡན་ཞིང་ཆོས་ཀྱི་རྗེས་སུ་འཇུག་པ། དྲང་པོ་དྲང་པོའི་རང་བཞིན་ཅན་གཞན་ལ་གནོད་པ་མེད་པ། རྟག་ཏུ་ལས་ཀྱི་འབྲས་བུའི་དེ་ཁོ་ན་ཉིད་ལ་ལྟ་བ། ཚུལ་ཁྲིམས་ཐམས་ཅད་དུ་ཡོངས་སུ་དག་པ། རྟག་པར་ཤིན་ཏུ་དགའ་བ། གཡོ་སྒྱུ་རྣམ་པར་སྤངས་པ། གསེར་བཙོ་མ་ལྟར་ཀུན་ནས་སྐྱོན་མེད་པ། ཡང་དག་པར་ལྟ་
བ། ཡང་དག་པར་ལྟ་བས་སྔོན་འདྲེན་པ་ཚུལ་ཁྲིམས་གཙང་བ། འཇིག་རྟེན་ཕ་རོལ་ལ་འཇིགས་པར་ལྟ་བ་གང་གིས་སྦྱིན་པ་དག་བྱིན་ཞིང་བསོད་ནམས་དག་བྱས་པས་སྐྱེ་བར་འགྱུར་ཏེ། འདི་ལྟ་སྟེ། དགོན་པ་དག་ན་དགེ་སློང་མང་པོ་བདུད་ཀྱི་འཆིང་བ་རྟག་ཏུ་གཅོད་པར་འདོད་པ་རྣམས་བསམ་གཏན་བྱེད་ལ། དེ་དག་ཚ་བས་གདུངས་པར་གྱུར་ཏེ། ཚ་བས་གདུངས་པ་རྣམས་སམ་སྐོམ་གྱིས་གདུངས་པ་རྣམས་ལ་ཤ་ཁ་ར་དང་། ཆུ་བྱིན་ནམ་རྔ་མ་བྱིན་ནམ། རྔ་མའི་བསིལ་ཡབ་ཡུ་བ་ཅན་སྦྱིན་པར་བྱེད་པ་དེ་ལྟ་བུ་ནི་སྦྱིན་པ་བྱིན་པ་ཡིན་ནོ། །སྲོག་གཅོད་པ་སྤངས་པ་རྣམ་པ་གང་ཡིན་ཞེ་ན། འདི་ལ་ཁྱིམ་ལ་སྟེན་པ་གང་གིས་འབྱོར་པ་དང་ལྡན་པ་དག་གི་དོན་དུ་འདི་ལྟར་དེ་དག་རྩེད་མོ་བྱེད་པར་འགྱུར་རོ་སྙམ་ནས། སྟེན་པ་པོས་ཁུ་བྱུག་གམ་རྨ་བྱ་ཚལ་ན་འདྲིས་པ་དེ་དག་དེ་ནས་བཟུང་སྟེ། མི་མཐོང་བ་དང་འཆི་བར་འགྱུར་བའི་བྱ་དེ་དག་ཟོང་གིས་བླུས་ནས་ཐར་བར་བྱེད་ལ། དེ་དག་ཀྱང་སླར་ཚལ་གྱི་ནང་ཉིད་དུ་དོང་སྟེ། དེ་ན་གནས་ལ་དེ་ནས་ཡང་འཚོ་བར་བྱེད་ཅིང་བདེ་བ་དག་ལ་ཉེ་བར་སྤྱོད་དུ་འཇུག་པ་ཡིན་ཏེ། དེ་ལྟ་བུ་ནི་སྲོག་གཅོད་པ་སྤངས་པ་ཡིན་ནོ། །ཇི་ལྟར་ན་མ་བྱིན་པར་ལེན་པ་དག་ལས་ལྡོག་པ་ཡིན། ཇི་ལྟར་ན་མ་བྱིན་པ་ལེན་པ་ཡོངས་སུ་སྤོང་བ་ཡིན་ཞེ་ན། འདི་ལ་ལས་ཀྱི་འབྲས་བུ་ཆུང་ངུ་ལ་འཇིགས་པར་ལྟ་བ་ཡིན་ཏེ། འདི་ལྟར་དེ་ནི་རྫིང་ངམ་ལྟེང་ཀའམ་ཆུ་ཀླུང་གི་ངོགས་སམ་རྣམ་པ་དེ་ལྟ་བུ་གཞན་གང་ཡང་རུང་བ་དག་ཏུ་ཚངས་པ་མཚུངས་པར་སྤྱོད་པ་སྡོམ་བརྩོན་ཅན་གཞན་ལ་ཕན་པར་བྱ་བའི་ཕྱིར། སོ་ཤིང་ངམ་སྦྲང་རྩིའི་ཆུ་སྦྱར་བ་དེ་དག་དེས་སྤོང་བར་བྱེད་ཅིང་རྐུ་སེམས་དང་ལྡན་པར་གྱུར་ནས་ལེན་པར་མི་བྱེད་པ་ཡིན་ཏེ། རྣམ་པ་དེ་ལྟ་བུ་ནི་མ་བྱིན་པར་ལེན་པ་ལས་ལྡོག་པ་ཡིན་ནོ། །དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པ་རྣམས་ཀྱི་ནང་དུ་ལྷ་འཁོར་ན་གནས་པ་ཞེས་བྱ་བ་དེ་རྣམས་ཀྱི་ནང་དུ་སྐྱེ་བར་འགྱུར་རོ། །དེར་སྐྱེས་ནས་འདོད་པ་ཐམས་ཅད་འབྱོར་ཏེ། སིལ་སྙན་ཡན་ལག་ལྔ་དང་ལྡན་པས་ཚལ་དང་ཉེ་བའི་ཚལ་རྣམས་ཀྱི་ནང་ན། བྱ་རྣམ་པ་སྣ་ཚོགས་སྒྲ་འབྱིན་པ་རྣམས་དང་། པད་མའི་རྫིང་རྣམས་ཀྱི་ནང་ན་བུང་བའི་
ཚོགས་སྒྲ་འབྱིན་པ་རྣམས་དང་། བྱ་ཀཱ་རཎྜ་བ་དང་ངང་པ་སྒྲ་སྐད་འབྱིན་པ་རྣམས་དང་ཚལ་རྣམས་ཀྱི་ནང་ན་ཡང་རིན་པོ་ཆེ་སྣ་བདུན་གྱི་ཤིང་ལྗོན་པས་བརྒྱན་པ་རྣམས་དང་། ལྟེང་ཀ་རྣམས་ཀྱི་ནང་ན་ཡང་བཻ་ཌཱུརྱ་སྔོན་པོ་བཅག་འཕྲོ་ལྟ་བུའི་ཆུས་ཤིན་ཏུ་གང་བ་རྣམས་དང་། རིའི་རྩེ་མོ་རྣམས་ཀྱང་རིན་པོ་ཆེ་སྣ་བདུན་གྱི་རྡོ་རབ་ཏུ་གསལ་ལ་གསེར་དང་དངུལ་དང་ཤེལ་དང་ཨན་ད་རྙིལ་གྱི་རིའི་ཕུག་རྣམས་ཀྱི་ནང་དང་། བྱ་རྣམ་པ་སྣ་ཚོགས་སྒྲ་རྣམ་པར་འབྱིན་པ་རྣམས་ཀྱི་ནང་ན་རྩེ་བར་བྱེད་དོ། །དེ་དག་གི་ཁ་དོག་དང་སྒྲོ་གཤོག་ཀྱང་རིན་པོ་ཆེ་སྣ་བདུན་ལྟར་འདུག་པ་ཡིན་ཏེ། སྒྲ་རྣམ་པ་སྣ་ཚོགས་འབྱིན་ཅིང་ཉམས་དགའ་བ་རྣམས་རྣ་ཁུང་དུ་སྒྲ་འབྱིན་པ། ཕན་ཚུན་འཐུན་པ་རྣམ་པ་དུ་མ་སྙན་པར་འབྱིན་པ། དེ་དག་ཐམས་ཅད་རྣར་སྙན་པར་འབྱིན་ཏེ། གང་གིས་ཚལ་དང་ཉེ་བའི་ཚལ་དེ་དག་ཉིད་སྒྲ་འབྱིན་པ་ལྟ་བུར་འབྱིན་ཏེ། ཚལ་དང་ཉེ་བའི་ཚལ་དེ་དག་ཁ་ཅིག་ན་ཀུན་ནས་སྒྲ་དི་རི་རིར་འབྱིན་ཏེ། ཤིན་ཏུ་ཉམས་དགའ་བ་ཡང་ཡིན་ནོ། །ཚལ་དེ་རྣམས་ཀྱི་ནང་ན་ཟས་ཀྱི་ཚོགས་དང་སྐོམ་གྱི་ཚོགས་ཀུན་ལས་ཤིན་ཏུ་ཞིམ་པ་རབ་ཏུ་འབབ་སྟེ། ལྷ་དེ་རྣམས་ཀྱང་རབ་ཏུ་དགའ་བ་སྐྱེད་ན་མི་གཞན་དག་ལྟ་སྨོས་ཀྱང་ཅི་དགོས། རྣམ་པ་དེ་ལྟ་བུའི་ཚལ་དང་ཉེ་བའི་ཚལ་དེ་རྣམས་ཀྱི་ནང་ན། བྱད་གཟུགས་སྣ་ཚོགས་ཆ་བྱད་སྣ་ཚོགས་ལུས་ལ་རྒྱན་རྣམ་པ་སྣ་ཚོགས་ཐོགས་པ་རྣམས་ལན་བརྒྱའམ་སྟོང་དུ་དགའ་བར་བྱེད་དགའ་དགུར་སྤྱོད་པར་བྱེད་དོ། །དེ་དག་གི་ནང་ན་ལས་བཟང་པོ་ལེགས་པར་བྱས་པ། རང་གི་འོད་དང་གཟི་བརྗིད་མཆོག་དང་ལྡན་པ་བདེ་བ་སྣ་ཚོགས་ཀྱིས་ཡོངས་སུ་བསྐོར་བ་དགའ་བར་བྱེད་དགའ་དགུར་སྤྱོད་པར་བྱེད་ལ་འདོད་པ་རྣམ་པ་ཐམས་ཅད་མྱོང་བར་བྱེད་དོ། །དེ་བདེ་བའི་རྣམ་པ་དེ་ལྟ་བུའི་མྱོས་པས་མྱོས་པ་མངོན་པར་མཐོང་ནས། ཡིད་དུ་དགའ་བ་དེ་རྣམས་ཀྱིས་ལྷ་དེ་ཡོངས་སུ་བསྐོར་ཏེ། དགའ་བར་བྱེད་དགའ་དགུར་སྤྱོད་པར་བྱེད་དོ། །དེ་ལྟར་དེ་དག་དེ་བཞིན་དུ་དགའ་ཞིང་རྩེ་ལ་དགའ་དགུར་སྤྱོད་པ་ན། འདི་སྙམ་དུ་སེམས་ཏེ་བདག་ཅག་བཻ་ཌཱུརྱའི་ནོར་བུས་ལན་ཀན་བྲེས་པའི་ཚལ། ཀུན་ནས་ནོར་བུའི་ལྗོན་ཤིང་བཀྲ་བ་སྣ་ཚོགས་སུ་ཕྱེ་བ་རྣམས་ཀྱིས་ཡོངས་སུ་བསྐོར་བ་བྱ་སྣ་ཚོགས་སྒྲ་འབྱིན་པས་ཀུན་ཏུ་གང་བ་རྣམས་སུ་འདོང་བར་བྱའོ་སྙམ་མོ་ཚལ་དེ་ན་ལྷ་རབ་ཏུ་དགའ་བ། ལྷ་དང་ལྷ་མོའི་ཚོགས་ཀྱིས་གང་བ་རྣམས་སིལ་སྙན་ཡན་ལག་ལྔ་
དང་ལྡན་པས་དགའ་བར་བྱེད་དགའ་དགུར་སྤྱོད་པར་བྱེད་དོ། །ཚལ་དེའི་ནང་ན་ཆུ་གནས་པ་ཞེས་བྱ་བའི་རྫིང་ཡོད་དེ། ཤིན་ཏུ་ཉམས་དགའ་ལ་ཆུ་རབ་ཏུ་དང་བ་ཡིན་ཏེ། དེའི་འགྲམ་ན་ལྷ་དེ་རྣམས་རྩེ་བར་བྱེད་དགའ་བར་བྱེད་དོ། །དེ་ནས་ལྷའི་བུ་གསར་དུ་སྐྱེས་པ་དེ་ལྷ་དེ་རྣམས་དང་ལྷན་ཅིག་རྫིང་དེ་ཉིད་ཀྱི་དྲུང་དུ་འགྲོ་བར་བྱེད་དོ། །དེ་ནས་ལྷ་དེ་རྣམས་ཀྱིས་ཀྱང་དེ་རིག་ནས་དགོད་ཅིང་རྩེ་ལ་འགྲོས་འཆོས་པས་ལྷ་དེ་དག་ག་ལ་བ་དེར་འདོང་བར་བྱེད་དེ། དེའི་རྫིང་ཆུ་གནས་པ་དག་ན་ཕན་ཚུན་གྲོགས་སུ་གྱུར་པ་དག་དང་དགའ་བར་བྱེད་དགའ་དགུར་སྤྱོད་པར་བྱེད་དོ། །རྫིང་དེ་ལ་ཡང་མཐུ་འདི་ལྟ་བུ་ཡོད་དེ། ཇི་ལྟར་འདོད་པ་དང་ཆུའི་རྣམ་པ་ཇི་ཙམ་དུ་འདོད་པ་རྣམ་པ་དེ་ཙམ་དུ་དེ་འགྱུར་རོ། །གལ་ཏེ་འདོད་ན་དེ་ཆང་མདོག་དང་དྲི་དང་རོ་གསལ་ཞིང་ཤིན་ཏུ་ཞིམ་ལ་བུང་བའི་ཚོགས་དང་ལྡན་པར་འགྱུར་ཏེ། འདོད་པ་ཇི་ལྟ་བ་བཞིན་དུ་འགྱུར་ཞིང་། བདུད་རྩི་དང་འཐུན་པར་འགྱུར་རོ། །མདོག་དང་རོ་དང་དྲི་ཤིན་ཏུ་ཞིམ་པོ་དང་ལྡན་པ་ཆུ་གནས་པའི་རྫིང་དེ། བདུད་རྩི་ཤིན་ཏུ་ཞིམ་པ་ཤིན་ཏུ་འཇམ་པ་མདོག་ཟླ་བ་ལྟ་བུས་ཀུན་ཏུ་གང་བ་ཡིན་ནོ། །དེ་ནས་འདི་སྙམ་སེམས་ཏེ། འདི་ལྟར་རྫིང་འདི་ཤིང་ལྗོན་པས་གང་བར་གྱུར་ཅིག་སྙམ་ན། དེ་ཤིང་ལྗོན་པ་ཡོན་ཏན་མཆོག་དང་ལྡན་པ་དང་ཤིང་ལྗོན་པ་དྲིལ་བུ་གཡེར་ཀའི་དྲ་བས་གཏིབས་ཤིང་ལོ་མ་ལས་རོལ་མོ་འབྱུང་བ་རྣམས་ཀྱིས་དེ་བཞིན་དུ་གང་བར་འགྱུར་རོ། །རླུང་གི་ཤུགས་ཀྱིས་རབ་ཏུ་བསྐྱོད་པའི་ཤིང་ལྗོན་པ་དེ་རྣམས་ལས་སིལ་སྙན་ཡན་ལག་ལྔ་དང་ལྡན་པའི་རྣམ་པ་ཇི་སྙེད་པ། རྣམ་པ་དེ་སྙེད་ཀྱི་སྒྲ་འབྱིན་པར་འགྱུར་རོ། །དེ་ནས་ཡང་ལྷ་དེ་རྣམས་འདི་སྙམ་དུ་སེམས་ཏེ། འདི་ལྟར་བདག་ཅག་རྫིང་དེ་དག་གི་ནང་དུ་འཇུག་པར་བྱའོ་སྙམ་པ་དང་། ལྷ་དེ་དག་གིས་སེམས་བསྐྱེད་མ་ཐག་ཏུ་དེར་འཇུག་པར་བྱེད་དོ། །དེ་དག་ཞུགས་པ་དང་ནང་དུ་ཆུ་འབྱུང་བར་འགྱུར་ལ། ནང་དུ་ཞུགས་པ་རྣམས་ཀྱིས་རྫིང་དེ་ཉིད་ཀྱི་ནང་ན་ནོར་བུའི་ལན་ཀན་རྣམ་པ་སྣ་ཚོགས་ཀྱིས་བརྒྱན་ཅིང་ལོ་མ་རྣམས་ཀྱིས་ཁེབས་པའི་གཞལ་མེད་ཁང་ལ་ལ་ནི་བཻ་ཌཱུརྱ་ལས་བྱས། ལ་ལ་ནི་གསེར་ལས་བྱས། ལ་ལ་ནི་དངུལ་ལས་བྱས། ལ་ལ་ནི་ཤེལ་ལས་བྱས། ལ་ལ་ནི་ཨན་ད་རྙིལ་ལས་བྱས། ལ་ལ་ནི་འདྲེན་མར་བྱས་པ་དག་མཐོང་ངོ་། །ཁང་པ་དང་ཚལ་དེ་རྣམས་ཀྱི་ནང་ན་ཐགས་སུ་མ་བཏགས་པའི་སྟན་ཁྲ་བོ་ཤིན་ཏུ་ཡིད་དུ་འོང་བ་བསམས་
པ་བཞིན་དུ་སྡུག་པའི་མལ་སྟན་སྣ་ཚོགས་བཏིང་བའི་སྟེང་ན། ལྷ་དང་ལྷ་མོ་དང་ལྷའི་བུ་མོའི་ཚོགས་དེ་རྣམས་དང་ལྷན་ཅིག་དགའ་བར་བྱེད་དགའ་དགུར་སྤྱོད་པར་བྱེད་དོ། །དེ་རྣམས་ས་ཕྱོགས་དེར་ཡང་དགའ་ཞིང་ཤིན་ཏུ་སྡུག་པ་རྣམ་པ་དུ་མ། འདོད་པའི་ཡོན་ཏན་ངོམས་མི་མྱོང་བ་འཐབ་མོ་དང་ཕྲག་དོག་གི་སྐྱོན་རྣམས་ཀྱིས་སྐྱོ་བ་མེད་པ་ཤིན་ཏུ་སྙིང་དུ་སྡུག་ཅིང་ཡོན་ཏན་དང་ལྡན་པ་ཕན་ཚུན་གྲོགས་སུ་གྱུར་པ་རྣམས་དང་དགའ་བར་བྱེད་དགའ་དགུར་སྤྱོད་པར་བྱེད་དེ། འདོད་པའི་ཡོན་ཏན་ལྔ་རྣམས་ཀྱིས་ལྷན་ཅིག་དགའ་བར་བྱེད་དོ། །དེ་དག་ཀྱང་དེ་ནས་ལངས་ནས་ཚལ་ཤིན་ཏུ་སྡུག་པ་ཞེས་བྱ་བ་ག་ལ་བ་དེར་འདོང་བར་བྱེད་དོ། །ཚལ་དེ་ཡང་བྱ་མད་ཏ་དིན་ད་སྒྲ་སྙན་པ་མང་པོ་འབྱིན་པ། འབབ་ཆུ་དང་ཆུ་ཀླུང་དང་ལྟེང་ཀ་དང་འབབ་ཆུའི་ངོས་ཀུན་ཏུ་གང་བ་བྱ་ཁྲི་སྙེད་སྒྲ་ཅ་ཅོ་འབྱིན་པས་ཀུན་ནས་ཡོངས་སུ་གང་ཞིང་། སྒྲ་སྙན་པའི་ཅ་ཅོས་ཀུན་ཏུ་སྙན་པ་ཡིན་ནོ། །ཚལ་གང་ན་ཤིང་ལྗོན་པ་ཉི་མའི་འོད་ལྟར་རྣམ་པར་གསལ་བའི་ཚལ་ཡོན་ཏན་སྣ་ཚོགས་དང་ལྡན་པ། བྱའི་ཚོགས་ཀུན་ནས་ལང་ལོང་འཕུར་བ། འབབ་ཆུ་འབུམ་སྙེད་ཀྱིས་བརྒྱན་པ་དེ་ན། ལྷ་རང་གི་འོད་དང་ལྡན་པ་དེ་རྣམས་ལྷ་མོ་དག་དང་ལྷན་ཅིག་ལྷའི་ཡོན་ཏན་སྣ་ཚོགས་པའི་ཡུལ་རྣམས་ཀྱིས་དགའ་བར་བྱེད་དོ། །མི་ཤེས་པ་རྣམས་ཀྱི་དགའ་བའི་ནང་ན་མཆོག་འདི་ཡིན་ཏེ་འདི་ལྟ་སྟེ། བུད་མེད་ལ་དགའ་བ་ཞེས་བྱ་ལ་ཞགས་པ་དེས་བཅིངས་པའི་བྱིས་པ་སོ་སོའི་སྐྱེ་བོ་ཐམས་ཅད་ནི་འཁོར་བ་ན་དགའ་བར་བྱེད་དོ། །ལྷ་དེ་དག་དེ་རྣམས་དང་ལྷན་ཅིག་ཕན་ཚུན་དགའ་བ་རབ་ཏུ་མང་པོ་སྣ་ཚོགས་དང་ལྡན་པས་ཡུན་རིང་དུ་ཤིན་ཏུ་དགའ་བར་བྱས་ནས་རི་རབ་ཀྱི་རྩེ་མོ་མད་ཏ་ཀ་ཊ་མ་ཞེས་བྱ་བ་ག་ལ་བ་དེར། ལྷ་མོ་རང་གི་འོད་དང་ལྡན་པ་བྱད་གཟུགས་ཆེ་ཞིང་བཟང་ལ་རྒྱན་སྡུག་གུ་ཐོགས་པ་འབྲང་བ་རྣམས་དང་ལྷན་ཅིག་གཞལ་མེད་ཁང་གི་ནང་དུ་ཞུགས་ནས་ནམ་མཁའི་དཀྱིལ་ནས་འདོང་བར་བྱེད་དེ། ནམ་མཁའི་དཀྱིལ་དུ་ཞུགས་པ་གོས་རླུང་གིས་བུད་པ་དེ་རྣམས་རི་རབ་ཀྱི་རྩེ་མོ་མད་ཏ་ཀ་ཊ་མ་དེར་གཞལ་མེད་ཁང་གི་དགའ་སྤྱོད་བྱེད་དུ་འདོང་བར་བྱེད་དོ། །དེ་དག་ན་གཞལ་མེད་ཁང་གི་དབྱིབས་སྡུག་པ་ལྷའི་པད་མའི་རྫིང་དང་ལྟེང་ཀས་མཛེས་པར་བྱས་པ། རིན་པོ་ཆེ་སྣ་བདུན་གྱི་རིའི་ཟོམ་གསལ་བ། ཐགས་སུ་མ་བཏགས་པའི་རྫས་ཀྱིས་ཉེ་
བར་མཛེས་པར་བྱས་པ། ཀུན་ནས་མཆོག་ཏུ་ལེགས་པ་དང་ལྡན་པ་མད་ཏ་ཀ་ཊ་མ་དེའི་གནས་དཔེ་མེད་ཅིང་ཤིན་ཏུ་མཐོ་ལ་བརྩེགས་པ་དག་དེ་རྣམས་ཀྱིས་མཐོང་ལ། དེ་རྣམས་ཀྱི་ནང་ན་དགའ་བར་བྱེད་དགའ་དགུར་སྤྱོད་པར་བྱེད་དོ། །དེ་ལྟར་དེ་དག་རྩེ་བ་ན། རེ་ཞིག་ན་གློ་བུར་དུ་དེ་དག་ཐམས་ཅད་ཀྱི་གཟི་འབར་ལ། ཉི་མའི་མདོག་དང་འཐུན་པའི་འོད་ཀྱི་རྣམ་པ་དེ་ལྟ་བུ་ཞིག་བྱུང་སྟེ། དེ་ནས་ཡང་ཇི་ལྟར་ལྷ་རྣམས་ཤིན་ཏུ་དངངས་ལ་ཁས་བུབ་ཏུ་གྱུར། མིག་བཙུམས་ནས་ལྷུང་བ་ཡོན་ཏན་འབུམ་དང་ལྡན་པའི་འོད་དེ་ལྟ་བུ་ཞིག་བྱུང་སྟེ། འདི་ལྟར་འོད་ཀྱི་རྣམ་པ་འདི་ལྟ་བུ་སྔོན་ནམ་ཡང་མ་མཐོང་ངོ་། །འོད་དེ་ཡང་ཡུད་ཙམ་ཞིག་ཏལ་གྱིས་བྱུང་ནས་ནུབ་སྟེ། ཇི་ལྟར་འཛམ་བུ་གླིང་ན་སྐར་མདའ་ལྟུང་བ་ཡུད་ཙམ་ཞིག་ཏལ་གྱིས་བྱུང་ནས་ནུབ་པ་དང་། སེམས་ཅན་དག་ཀྱང་ཤིན་ཏུ་དངངས་པར་གྱུར་པ་དེ་ལྟར་ལྷ་དེ་རྣམས་ཀྱིས་འོད་དེ་བྱུང་བ་མཐོང་ནས། ལྷའི་ཚོགས་རྣམས་དང་ལྷན་ཅིག་དངངས་པར་གྱུར་ལ། དེ་ནས་ཡང་ཡུན་རིང་ཞིག་ལོན་པ་དང་དབུགས་བྱུང་ངོ་། །དབུགས་བྱུང་བ་དེ་དག་ཐམས་ཅད་ཡུད་ཙམ་གྱིས་ངོ་མཚར་ཆེར་སྐྱེས་ཏེ། གང་གིས་བདག་ཅག་ཐམས་ཅད་དངངས་ལ་དེ་ནས་ཡང་འོད་དེ་ཉིད་མི་སྣང་བར་གྱུར་པ་རྣམ་པ་དེ་ལྟ་བུའི་འོད་དེ་ཅི་ཞིག་ཡིན་སྙམ་མོ། །ངོ་མཚར་ཆེར་སྐྱེས་པ་དེ་དག་ལྷའི་འདུན་ས་ཆོས་བཟང་ག་ལ་བ་དེར་དོང་སྟེ་ཕྱིན་ནས་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ། ངོ་མཚར་སྐྱེས་ཤིང་དངངས་པ་དེ་དག་བརྒྱ་བྱིན་ག་ལ་གནས་པ་དེར་དོང་ནས་དེ་དག་གིས་བརྒྱ་བྱིན་མངོན་པར་མཐོང་བ་དང་མགོ་བོས་ཕྱག་འཚལ་ཏེ། ཀུན་ནས་ཡོངས་སུ་བསྐོར་ཏེ་འཁོད་དོ། །དེ་ནས་བརྒྱ་བྱིན་གྱིས་མདུན་ན་འདོན་པའི་ལྷ་གང་ཡིན་པ་དེ་རྣམས་རྩེ་བར་བྱེད་དགའ་བར་བྱེད་ཕྲེང་བ་དང་རྒྱན་དང་པད་མའི་ཕྲེང་བ་སྣ་ཚོགས་ཐོགས་པ། བཞིན་འཛུམ་ལ་ནོར་བུས་ལྟོ་སྔོ་བསངས་སུ་འདུག་པ། མདོག་གསེར་བཙོ་མའི་འོད་ལྟར་གསལ་བའི་ལྷའི་ཚོགས་དེ་དག་ཐམས་ཅད་བརྒྱ་བྱིན་གྱི་མདུན་ན་རྩེ་བར་བྱེད་དགའ་བར་བྱེད་དགའ་དགུར་སྤྱོད་པར་བྱེད་དོ། །དེ་ནས་འཁོར་ན་གནས་པའི་ལྷ་གང་ཡིན་པ་དེ་རྣམས་ནི་དགའ་བར་མི་བྱེད་དགའ་དགུར་སྤྱོད་པར་མི་བྱེད། བརྒྱ་བྱིན་ལ་མངོན་པར་སྟོད་པར་མི་བྱེད། གླུ་མི་ལེན་བྲོ་མི་རྡུང་ལྷ་གཞན་ལ་ཚིག་ཅུང་ཟད་ཀྱང་སྨྲ་བར་མི་བྱེད་དོ། །དེ་
ནས་ལྷའི་རྒྱལ་པོ་བརྒྱ་བྱིན་གྱིས་འཁོར་ན་གནས་པ་དེ་རྣམས་ལ་འདི་སྐད་སྨྲས་སོ། །ཀྱེ་གཙོ་བོ་དག་ཅི་སྟེ་གླུ་མི་ལེན་བྲོ་མི་རྡུང་དགོད་པར་མི་བྱེད། དེ་ནས་འཁོར་ན་གནས་པའི་ལྷ་རྣམས་ཀྱིས་བརྒྱ་བྱིན་ལ་འདི་སྐད་སྨྲས་སོ། །བརྒྱ་བྱིན་བདག་ཅག་གིས་གང་སྔོན་གར་ཡང་མ་མཐོང་བ་མཐོང་སྔོན་མ་ཐོས་པ་ཐོས་སོ། །དེ་ནས་བརྒྱ་བྱིན་གྱིས་དེ་དག་ལ་འདི་སྐད་སྨྲས་སོ། །འཁོར་ན་གནས་པ་རྣམས་ཀྱིས་ངོ་མཚར་ཞིག་མཐོང་བ་དེ་ཅི་ཡིན། དེ་ནས་འཁོར་ན་གནས་པའི་ལྷ་རྣམས་ཀྱིས་བརྒྱ་བྱིན་ལ་འདི་སྐད་སྨྲས་སོ། །བརྒྱ་བྱིན་འདི་ནི་བདག་ཅག་སྐྱེད་མོས་ཚལ་དུ་དགའ་སྤྱོད་བྱེད་དུ་རིའི་རྩེ་མོ་མད་ཏ་ཀ་ཊ་མར་མཆིས་པ་དང་བདག་ཅག་རྣམས་ཀྱིས་ནམ་མཁའ་ལས་ཇི་ཙམ་དུ་གང་གིས་རིའི་རྩེ་མོ་དེ་རབ་ཏུ་འབར་བ་ལྟ་བུའི་འོད་ཀྱི་རྣམ་པ་དེ་ལྟ་བུ་བྱུང་བ་ཞིག་མཐོང་སྟེ། དེ་ལ་བདག་ཅག་ངོ་མཚར་སྐྱེས་ན་བརྒྱ་བྱིན་དེ་ཅིར་འགྱུར། དེ་ནས་བརྒྱ་བྱིན་གྱིས་དེ་ཐོས་ནས་ཡུད་ཙམ་ཞིག་བསམས་ཏེ། ལྷ་དེ་རྣམས་ལ་འདི་སྐད་སྨྲས་སོ། །ལྷ་དག་རེས་འགའ་འོད་དེ་ལྟ་བུ་འབྱུང་བ་ཡོད་དེ། བདག་གིས་འདིའི་ངོ་མཚར་གཉིས་པ་དེ་ཐོས་སོ། །གང་གི་ཚེ་བདག་གིས་ངོ་མཚར་དང་པོ་དེ་ཐོས་པ་དེས། བདག་གིས་དེ་བཞིན་གཤེགས་པ་ལ་བཅོམ་ལྡན་འདས་ངོ་མཚར་བ་དེ་ཅི་ལགས་ཞེས་ཞུས་སོ། །དེ་ནས་བཅོམ་ལྡན་འདས་ལ་དེ་སྐད་ཅེས་ཞུས་པ་དང་བཀའ་སྩལ་པ། ཀཽ་ཤི་ཀ་ཁྱོད་ནི་ངན་སོང་གི་སྒོ་བཅད་པ་ཡིན་པས་འཇིགས་པར་མ་བྱེད་ཅིག །འཁོར་བར་གཏོགས་པའི་སེམས་ཅན་ཐམས་ཅད་ཀྱི་ཆོས་ཉིད་ནི་འདི་ཡིན་ཏེ་འདི་ལྟ་སྟེ། མི་རྟག་པ་ཞེས་བྱ་བ་ཡིན་ནོ། །གང་ཡིན་པ་དེ་ངས་ཁྱོད་ལ་བཤད་ཀྱིས་ཉོན་ཅིག །ལྷ་འཐབ་བྲལ་ཞེས་བྱ་བ་དག་ཡོད་དེ་དེ་དག་གི་དྲུང་ན་སུམ་ཅུ་རྩ་གསུམ་པ་རྣམས་ཀྱི་བོང་སྐྱེད་དང་མདོག་དང་དབྱིབས་དང་ལོངས་སྤྱོད་རྣམས་འབུམ་གྱི་ཆར་ཡང་མི་ཕོད་དོ། །དེ་དག་གང་གི་ཚེ་ལས་ཡོངས་སུ་ཟད་པ་དང་དེ་ནས་ལྟུང་བར་འགྱུར་ཏེ། དེ་དག་དཔག་ཚད་འབུམ་ཕྲག་དུ་མ་དག་ནས་ལྟུང་བ་ན་འོད་དེ་ཆུང་ངུར་འགྱུར་རོ། །ཇི་ལྟར་མར་མེ་ཟད་པའི་དུས་སུ་འོད་ཆུང་ཞིང་མི་གསལ་བར་འགྱུར་བ་དེ་ལྟར་དེ་ནམ་མཁའ་ལ་འཆི་བའི་དུས་ན། འོད་དེ་རྣམ་པ་དེ་ལྟ་བུར་ཆུང་བར་འགྱུར་རོ། །བརྒྱ་བྱིན་གང་གི་འོད་རབ་ཏུ་གསལ་བ་དེ་དག་ནི་བརྗོད་པར་མི་ནུས་ཤིང་། །སུམ་ཅུ་རྩ་གསུམ་པ་
རྣམས་ཀྱིས་བལྟ་བར་ཡང་མི་ནུས་སོ། །དེ་ཅིའི་ཕྱིར་ཞེ་ན། རྟོགས་པའི་ཡུལ་མ་ཡིན་པའི་ཕྱིར་འཇུག་པའི་ཡུལ་མ་ཡིན་ནོ། །ཀཽ་ཤི་ཀ་དེ་ལྟར་འཐབ་བྲལ་གྱི་ལྷའི་འོད་གང་ཡིན་པ། སུམ་ཅུ་རྩ་གསུམ་པའི་ལྷས་གང་ཡང་བལྟ་བར་ཡང་མི་ནུས་ཏེ། དེ་ནི་གཞན་གྱི་ལས་ཀྱི་འབྲས་བུ་སུམ་འགྱུར་དུ་འབྱུང་ལ། སུམ་ཅུ་རྩ་གསུམ་པ་རྣམས་ཀྱི་འབྲས་བུ་ནི་གཞན་གྱི་ཉིས་འགྱུར་དུ་འབྱུང་ངོ་། །དེ་དག་བདག་གིས་དེ་བཞིན་གཤེགས་པ་ལས་དེ་སྐད་ཐོས་པ་འདི་དག་ཁྱོད་ལ་བསྟན་པ་ཡིན་ནོ། །གཙོ་བོ་དག་དེའི་ཚེ་སྐྱོ་བ་སྐྱེས་ཏེ། ལྷ་དེ་འཆི་བ་ན་ནམ་མཁའ་དེ་དཔག་ཚད་འབུམ་ཕྲག་དུ་མ་དག་ནས་འོད་འབྱུང་བ་གང་ཡིན་པ་དེ་དག་ལྷ་ཁྱེད་ཀྱིས་མཐོང་བ་དང་། དེ་ལ་འཇིགས་པར་མ་བྱེད་ཅིག །དེ་ནས་བརྒྱ་བྱིན་གྱིས་དེའི་ཚེ་འདི་ལྟར་ཚིགས་སུ་བཅད་དེ་སྨྲས་པ། ཇི་ལྟ་ཇི་ལྟར་བདེ་ཆེན་དང་། །ཇི་ལྟ་ཇི་ལྟར་ལོངས་སྤྱོད་པ། །དེ་ལྟ་དེ་ལྟར་སྡུག་བསྔལ་ཆེ། །ངེས་པར་མཐར་ནི་ལྟུང་བར་འགྱུར། །ལས་དང་འཐུན་པར་འབྲས་བུ་ནི། །རྟག་ཏུ་དེ་བཞིན་གཤེགས་པས་གཟིགས། །ལས་ཀྱིས་ལྷག་པར་ཁྱད་འཇུག་ལ། །འབྲས་བུའང་དེ་བཞིན་ཁྱད་འཇུག་གོ །ཇི་ལྟར་གོང་ནས་གོང་དག་ཏུ། །ལས་རྣམས་ཀྱི་ནི་འབྲེལ་བ་མཐོང་། །དེ་ལྟར་གོང་ནས་གོང་དག་ཏུ། །འབྲས་བུའང་དེ་ལྟར་འབྲེལ་པ་ཡིན། །སྐྱེ་བར་འགྱུར་བ་འདི་རྣམས་ཀྱི། །ལས་ནི་ངེས་པར་གནས་པ་སྟེ། །སྐྱེ་ལས་མཆོག་ཉིད་ལུས་དང་མདོག །སྟོབས་དང་ཚེ་རྣམས་འཐོབ་པར་འགྱུར། །ལས་ཟད་ནས་ནི་ལྟུང་འགྱུར་ཏེ། །འདི་དག་ཐམས་ཅད་ངེས་པར་ལྟུང་། །ས་བོན་ངེས་པར་ཚིག་པ་ལ། །ནམ་ཡང་སྐྱེ་བ་ཡོད་མ་ཡིན། །མར་མེ་རྟག་ཏུ་སྐད་ཅིག་ལྟར། །སེམས་ཀྱང་སྐད་ཅིག་འབྲེལ་པར་མཐོང་། །རྒྱུ་སྟེ་སེམས་དང་འཐུན་པར་ནི། །ལས་ཀྱང་དེ་བཞིན་སྐད་ཅིག་གོ །མི་རྟག་ལས་ལས་གང་སྐྱེས་པ། །དེ་ནི་སྐྱེ་འཇིག་ཆོས་ཅན་ཡིན། །ཟག་དང་བཅས་པའི་བདེ་བ་དེ། །རྟག་ཏུ་སྔོན་མེད་ཕྱིས་མི་འབྱུང་། །སྐྱེ་མེད་འཇིག་མེད་བདག་ཉིད་གང་། །ཉོན་མོངས་ལས་གྲོལ་དེ་བདེའོ། །གང་ཞིག་ཐོབ་ནས་འཁོར་བ་ཡི། །ཡུལ་ལས་གནོད་མེད་ངེས་པར་འགྲོ། །གང་ཞིག་སྲིད་བྲལ་འདོད་མེད་ལ། །སྲིད་པའི་སྐྱོན་ལས་
རྣམ་གྲོལ་བ། །ལུས་ཅན་གྱི་ནི་བདེ་བ་དེ། །ཕ་རོལ་གནས་པའི་སྐྱོབ་པ་ཡིན། །ཅུང་ཟད་ཟག་བཅས་བདེ་བ་གང་། །དེ་དག་ཐམས་ཅད་སྐད་ཅིག་དགོངས། །གང་ཞིག་དེ་ལས་རྣམ་གྲོལ་བ། །དེ་དག་ཐམས་ཅད་བརྟན་པར་བདེ། །དེ་ལྟར་བརྒྱ་བྱིན་དེས། འཁོར་ན་གནས་པའི་ལྷ་དེ་རྣམས་ལ་དེ་ཁོ་ན་ཉིད་སྟོན་པར་བྱེད་དོ། །བསྟན་ནས་ཡང་དེ་རྣམས་དབུགས་ཕྱུང་སྟེ་རང་གི་གནས་སུ་གཏོང་བར་བྱེད་དོ། །ཆོས་འདི་སྐད་ཀྱང་བསྟན་ཏེ། འདི་ལྟར་དུས་ཐམས་ཅད་དུ་བག་ཡོད་པར་བྱའོ། །དེ་ནས་ལྷ་དེ་རྣམས་ཀྱང་ཁ་ཅིག་རང་གི་གནས་དེར་དོང་སྟེ། དེ་ནས་ཡང་ཡུལ་གྱི་དབང་དུ་གྱུར་པ་རྣམས། སིལ་སྙན་ཡན་ལག་ལྔ་དང་ལྡན་པས་དགའ་བར་བྱེད་དགའ་དགུར་སྤྱོད་པར་བྱེད་དོ། །སིལ་སྙན་དང་རོལ་མོའི་སྒྲ་རྣམ་པ་སྣ་ཚོགས་ཀྱིས་སྙན་པར་བྱས་པའི་ཚལ་དང་གནས་རྣམས་ན་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་ཟད་པར་མ་གྱུར་པ་དེ་སྲིད་དུ། དགའ་བར་བྱེད་དགའ་དགུར་སྤྱོད་པར་བྱེད་དོ། །དེ་ཕྱིས་ལས་དེ་ཟད་ནས། ལྷའི་འཇིག་རྟེན་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན། སེམས་ཅན་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་ཁ་ཅིག་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེ་བར་གྱུར་ན། ལས་དེ་དང་རྒྱུ་འཐུན་པར་དེ་རྟག་པར་མཆོག་ཏུ་བདེ་བ་དང་ལྡན་པར་འགྱུར་ཏེ། རྫུ་འཕྲུལ་ཆེ་བ་དང་སྐྱེ་བོ་ཐམས་ཅད་དགའ་བ་དང་ནད་མེད་པ་དང་སྡུག་བསྔལ་མེད་པ་དང་རིགས་བཙུན་ཞིང་ཆེ་བར་སྐྱེ་བ་དང་སྐྱེས་ཕན་ཆད་མཆོག་ཏུ་བདེ་ལ་བལྟ་ན་སྡུག་པར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་མཐོ་བར་སྤྱོད་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །གནས་དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། ཆོས་དང་ལྡན་ཞིང་ཆོས་ཀྱི་རྗེས་སུ་ལྟ་བ་རྟག་ཏུ་ལས་ཀྱི་འབྲས་བུ་ལ་ཡང་དག་པར་ལྟ་བ། རྟག་ཏུ་ཡང་དག་པའི་ལྟ་བར་སྔོན་དུ་འདྲེན་པ་གང་
གིས་ནོར་གྱི་སྦྱིན་པ་བྱིན་པ་དང་། བསོད་ནམས་དག་བྱས་པས་སྐྱེ་བར་འགྱུར་ཏེ། འདི་ལྟ་སྟེ། ཚུལ་ཁྲིམས་ཕྱོགས་གཅིག་བསྲུངས་ལ་ཚུལ་ཁྲིམས་ཁ་ཅིག་སྲུང་བ་དང་དེའི་འོག་ཏུ་ཚུལ་ཁྲིམས་ཐམས་ཅད་སྲུང་བའི་དགེ་འདུན་ལམ་དུ་ཞུགས་པ་དག་ལ་ལྷམ་མམ་སྣོད་སྤྱད་དག་སྦྱིན་པར་བྱེད་པ་དང་སྲོག་གཅོད་པ་དང་མ་བྱིན་པར་ལེན་པ་དག་སྤངས་པ་ཡིན་ཏེ་འདི་ལྟ་སྟེ། འགྲོ་ལྡིང་བའམ་རི་ཁྲོད་པའམ་སྐྲ་འཕྱང་བས་འབྲོག་དགོན་པ་དག་ཏུ་མི་གསད་པའི་ཕྱིར་བཟུང་བ་དེ་དག་ཐར་བར་བྱེད་པ་དང་། འབྲོག་དགོན་པ་དག་ཏུ་ཆོམ་རྐུན་པ་རྣམས་ཀྱིས་བཅོམ་པའི་ནོར་རྫས་ཁྱེར་ཏེ་འོངས་པ་དེ་དག །རྒྱལ་པོར་གྱུར་གྱིས་ཀྱང་མ་བྱིན་པར་ལེན་པའི་འཇིགས་པས་རྒྱལ་པོའི་སྐལ་བ་ལེན་པར་མི་བྱེད་པ་ཡིན་ཏེ། དེ་ལྟར་འདི་ནི་མ་བྱིན་པར་ལེན་པ་སྤོང་བ་ཡིན་ནོ། །ཇི་ལྟར་ན་སྲོག་གཅོད་པ་སྤོང་བ་ཡིན་ཞེ་ན། འདི་ནི་འདི་ལྟར་དེ་རྒྱལ་པོར་གྱུར་ལ། ཉེས་བྱེད་བྱེད་པ་གཞན་གྱིས་བཟུང་སྟེ་ཕུལ་བ་དེ་ཡང་དེ་ལས་ཀྱི་འབྲས་བུ་ལ་འཇིགས་ནས་གསོད་པར་མི་བྱེད་པ་ཡིན་ཏེ། དེ་ནི་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་མཐོ་བར་སྤྱོད་པ་ཞེས་བྱ་བར་སྐྱེ་བར་འགྱུར་རོ། །དེར་སྐྱེས་ནས་ཀྱང་དེའི་ལས་ཀྱི་མཐའ་ལེགས་པར་བྱས་ཤིང་སྤྱད་པས་ལྷ་མོ་སུམ་སྟོང་དག་དེའི་རིམ་གྲོ་བྱེད་པར་འགྱུར་ཏེ། དེ་དག་ཐམས་ཅད་ཀྱང་ཆ་བྱད་དང་རྒྱན་བཏགས་པ། ལག་ན་སིལ་སྙན་རྣམ་པ་སྣ་ཚོགས་དང་། ལག་ན་མཁོ་བ་རྣམ་པ་སྣ་ཚོགས་དང་། ལག་ན་རོལ་མོ་རྣམ་པ་སྣ་ཚོགས་ཐོགས་ལ། གླུ་དབྱངས་རྣམ་པ་སྣ་ཚོགས་ཀྱིས་བསྟོད་ཅིང་ལྷ་དེ་ག་ལ་བ་དེར་འདོང་བར་བྱེད་དོ། །དེས་ཀྱང་དེ་རྣམས་མཐོང་ནས་ལྷ་མོ་དེ་རྣམས་ག་ལ་བ་དེར་འགྲོ་བར་བྱེད་དོ། །དེ་རྣམས་ཀྱང་ཤིན་ཏུ་གུས་པས་དེའི་དྲུང་དུ་འདོང་བར་བྱེད་དོ། །དེ་ལྟར་ཕན་ཚུན་སྙིང་དུ་སྡུག་པ་དེ་དག་ཐམས་ཅད་སྐྱེད་མོས་ཚལ་རྟག་ཏུ་དགའ་བ་ཞེས་བྱ་བ་ག་ལ་བ་དེར་འདོང་བར་བྱེད་དོ། །སྐྱེད་མོས་ཚལ་རྟག་ཏུ་དགའ་བ་ཞེས་བྱ་བ་དེ་ཡང་ཀུན་ནས་བཻ་ཌཱུརྱ་དང་། དངུལ་དང་། གསེར་གྱི་ཤིང་ལྗོན་པས་ནི་བརྒྱན། འབབ་ཆུ་དང་། ལྟེང་ཀ་དང་། པད་མའི་ཚལ་གྱིས་མཛེས་པར་བྱས་ཤིང་། ཆུ་བོ་དུ་མ་བརྒྱ་སྙེད་ནི་ལེགས་པར་འབབ། དྲིལ་བུ་གཡེར་ཀའི་དྲ་བ་རྣམ་པ་སྣ་
ཚོགས་ཀྱིས་ནི་གཏིབས། ཀུན་ནས་བྱའི་རིགས་དུ་མ་ལྡིང་ཞིང་སྒྲ་སྙན་པའི་རྣམ་པ་མང་པོ་སྟོང་སྙེད་ནི་འབྱིན། སྐྱེད་མོས་ཚལ་དེ་ལྷའི་རྣམ་པ་སྣ་ཚོགས་པ་རྣམས་ཀྱིས་ནི་ཁྱབ་སྟེ། ལྷ་དེ་རྣམས་དང་ཚལ་དེ་ཕན་ཚུན་མཛེས་པ་ཡིན་ནོ། །ཚལ་དེའི་དབུས་ན་རྩེ་བའི་རི་ཞེས་བྱ་བ་རིན་པོ་ཆེ་སྣ་བདུན་གྱི་རི་ཡོད་དེ། དེ་ན་ཡང་རིན་པོ་ཆེའི་རི་དགས་རྣམ་པ་དུ་མ་ཡོད་ལ། དེ་དག་འདི་ལྟ་བུར་མཛེས་པ་ཡིན་ཏེ་འདི་ལྟ་སྟེ། རྩིབ་ལོགས་ནི་པད་མ་རཱ་གའི་མདོག་ལྟར་དམར་ལ། རྒྱབ་ནི་དངུལ་ལྟར་དཀར། ལྟོ་ནི་གསེར་ལྟར་སེར། རྐང་པ་ནི་བྱི་རུ། རྭ་ནི་ཤེལ་ལྟ་བུ་ཡིན་ལ། ཁ་ཅིག་ནི་མདོག་འཐུན་ཏེ། ལུས་ཐམས་ཅད་དངུལ་གྱི་མདོག་དང་། དེ་བཞིན་དུ་གསེར་གྱི་མདོག་ཏུ་འདུག་གོ །དེ་ལྟར་ཚལ་དེ་ན་རི་དགས་རྒྱུ་བ་རྣམས་ཀྱི་ལུས་ཀྱི་རྣམ་པ་དག་གིས་ཀུན་ནས་མཛེས་པ་ཡིན་ནོ། །ལྷའི་ཚོགས་དེ་རྣམས་དང་ལྷན་ཅིག་སྤྱོད་པར་བྱེད་ལ། རི་དགས་དེ་རྣམས་ཀྱང་ལྷ་མོ་དེ་རྣམས་དང་ལྷན་ཅིག་གླུ་ལེན་པར་བྱེད་དེ། ཇི་ལྟར་གླུ་ལེན་པ་དེ་ལྟར་ལྷ་མོ་དེ་རྣམས་ཀྱང་ཤིན་ཏུ་འཐུན་ཞིང་སྙན་ལ་མཆོག་ཏུ་ཡིད་དུ་འཐད་པའི་གླུ་ལེན་ནོ། །དེ་ནི་ལྷ་དེ་རྣམས་ཡུན་རིང་དུ་རྣམ་པ་དུ་མ་དགའ་བར་བྱས་ནས། འབབ་ཆུ་འབབ་པ་གཞན་ག་ལ་བ་དེར་ལྷན་ཅིག་རྒྱུ་བར་བྱེད་ཅིང་། རི་རབ་ཀྱི་རྩེ་མོ་ཆུ་བོ་སྨན་ལྗོངས་ཞེས་བྱ་བ་དེར་ཤིང་རྟ་རྣམ་པ་སྣ་ཚོགས་ལ་ཞོན་པ། སིལ་སྙན་ཡན་ལག་ལྔ་དང་ལྡན་པས་གླུ་དབྱངས་ཉེ་བར་ལེན་ཞིང་འདོད་པ་དམ་པ་དང་ལྡན་ལ། ཤིན་ཏུ་དགའ་བ་སྐྱེས་པ་ལེགས་པ་མཆོག་དང་ལྡན་པ་རྣམས་འདོང་བར་བྱེད་དོ། །དེར་ཕྱིན་ནས་ཀྱང་ཆུ་ཀླུང་དང་། འབབ་ཆུ་དང་། ཆུ་བོ་སྨན་ལྗོངས་ཀྱི་རི་རབ་ཀྱི་རྩེ་མོ་དེར་ཡང་དགའ་བར་བྱེད་དོ། །ཆུ་བོའི་ནང་རྣམས་དང་། འབབ་ཆུའི་ནང་རྣམས་དང་། པད་མའི་རྫིང་གི་ནང་རྣམས་ན། རོལ་མོའི་སྒྲ་རྣར་གྲག་ཅིང་ཤིན་ཏུ་རྒྱགས་པར་གནས་པ། རྟག་ཏུ་རྩེ་བ་རྟག་ཏུ་བདེ་བ་རྟག་ཏུ་རྒྱ་ཆེ་བ་ལྷ་དང་ལྷ་མོའི་ཚོགས་ཕན་ཚུན་འཐུན་པ་རྣམས་ཀྱིས་གང་བ། མེ་ཏོག་ཕྲེང་བ་དང་ཕྱེ་མ་དང་བྱུག་པས་ལུས་བསྐུས་པ། པད་མའི་ཕྲེང་བས་མགོ་དཀྲིས་པ་དག་དགའ་བར་བྱེད་དེ། ལས་ལེགས་པར་བྱས་པས་བསྒྱུར་བ་རྣམས་དེའི་སྟོབས་དང་དེ་སོ་སོར་འབྲང་བ། ལྷ་དང་འཐུན་པ་བདེ་བ་དཔེ་མེད་པས་རྩེ་བར་བྱེད་དོ། །དེར་
འདི་ནི་ཕྱོགས་གཅིག་བསྟན་པར་ཟད་ལ། ཐམས་ཅད་ནི་མི་ཀུན་གྱིས་བརྗོད་པར་མི་ནུས་ཏེ། འདི་ལྟར་ལྷའི་བདེ་བ་དེ་བརྗོད་པར་མི་ནུས་ཤིང་འདི་ལྟར་ལྷའི་བདེ་བ་དེ་ནི་གཞན་དང་མི་འདྲ་བ་དཔེ་མེད་པ་ཡིན་ནོ། །ལས་ལེགས་པར་བྱས་པའི་རྒྱུ་ལས་བྱུང་བ། རིས་འཐུན་པའི་དབང་གིས་སྟེན་པ་དག་དེ་ལྟར་བདེ་བ་དུ་མ་མྱོང་ངོ་། །འདོད་པའི་ཡོན་ཏན་ལྔ་ལ་དགའ་བ་དེ་རྣམས་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་ཟད་པ་དང་། སྤངས་པ་དང་། གཏུགས་པར་མ་གྱུར་པ་དེ་སྲིད་དུ་དེ་ན་དགའ་བར་བྱེད་དོ། །དེ་ཕྱིས་ལྷའི་རིས་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་ན་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་མཆོག་ཏུ་བདེ་བར་འགྱུར་ཞིང་དབེན་པ་ན་གནས་པ་དང་། རི་ཁྲོད་ན་གནས་པ་དང་། གཟི་ཆེ་བ་དང་། རྒྱ་ཆེ་བ་དང་། རྒྱལ་པོའམ། བློན་པོ་ཆེན་པོར་འགྱུར་བ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་ལྷ་རྣམས་ཀྱི་གནས་གཟི་བརྗིད་མཆོག་ཅེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་ཇི་ལྟར་གནས་པ་བརྟགས་ན། སེམས་ཅན་དགེ་བ། བློ་གྲོས་རྒྱ་ཆེ་བ་གང་གིས་སྦྱིན་པ་བྱིན། བསོད་ནམས་བྱས། ཚུལ་ཁྲིམས་རྣམ་པ་བདུན་ཡང་བསྲུངས། སྡིག་པའི་གྲོགས་པོ་དང་ཏོམ་ཅོལ་དུ་མི་འདྲེ། སྡིག་པ་དང་བཅས་པའི་ཚུལ་ཁྲིམས་མི་སྲུང་། བསོད་ནམས་ཀྱང་ཇི་ལྟ་བ་བཞིན་དུ་བྱེད། གཅིག་ཁོ་ནར་འབད་ཅིང་ཡིད་དྲང་བའི་རང་བཞིན་ཅན། མདོག་གསེར་སྦྱངས་པ་དང་འཐུན་པ་ཡིན་ཏེ། ཚུལ་ཁྲིམས་རྣམ་པ་དུ་བསྲུངས་ཞེ་ན་འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དག་སྤངས་པ་ཡིན་ནོ། །འདི་ལ་གཡུལ་ཆེན་པོར་ཞུགས་པ་ན། གང་དྲུང་དུ་འོངས་པའི་སྡོམ་པའི་འཛེམ་པས་དེ་སྲོག་ཀྱང་བཏང་ནས་གསོད་པར་མི་བྱེད་དོ། །དེ་ལྟར་སྲོག་
གཅོད་པ་སྤངས་པ་ཡིན་ནོ། །ཇི་ལྟར་ན་མ་བྱིན་པ་ལེན་པ་སྤངས་པ་ཡིན་ཞེ་ན། འདི་ནི་རིའི་རྩེ་མོ་ཡང་སྙིལ་བར་བྱེད་པ། ཕ་རོལ་གྱི་དཔུང་འཇོམས་ཤིང་། སེམས་ཅན་ཐམས་ཅད་གཞན་གྱི་ནོར་རྫས་འཕྲོག་པ་ན། དེ་བཀྲེས་ཤིང་སྐོམ་ལ། སྲོག་ཆད་ལ་ཐུག་གིས་ཀྱང་སྡོམ་པ་བླངས་པའི་འཛེམ་པས་མ་བྱིན་པར་ལེན་པར་མི་བྱེད་དོ། །ཇི་ལྟར་ན་སྦྱིན་པ་གཏོང་བ་ཞིང་གང་ལ་ཞེ་ན། འདི་ནི་སངས་རྒྱས་མཆོད་ཅིང་ཆོས་མཉན་པའི་དོན་དུ་སེམས་བཟང་པོ་བསྒོམས་པའི་ཡིད་ཡང་དག་པའི་ལྟ་བ་སྔོན་དུ་འགྲོ་བའི་བློས་མར་མེ་འབུལ་བར་བྱེད་ན། དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ན། གཟི་བརྗིད་མཆོག་གི་ལྷའི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་གཟི་བརྗིད་ཀྱི་ཕྲེང་བ་ཅན་བྱད་གཟུགས་ཆེ་ལ་ཤིན་ཏུ་སྡུག་པ་དེ་ལས་ལེགས་པར་བྱས་པ་དེས་རྒྱུ་དང་འཐུན་པར་འབྲས་བུ་མྱོང་བར་འགྱུར་རོ། །རྣ་བས་སིལ་སྙན་ཡན་ལག་ལྔ་དང་ལྡན་པ་ཡང་དང་ཡང་དུ་ཐོས་སོ། །སྣས་ཀྱང་མེ་ཏོག་མན་དཱ་ར་བ་དང་། པད་མ་དང་། ཨུད་པ་ལ་སྔོན་པོ་དང་། རིན་པོ་ཆེ་སྣ་བདུན་གྱི་དྲི་ཡང་དང་ཡང་དུ་སྣོམ་མོ། །ལྕེས་ཀྱང་བདུད་རྩིའི་རོ་ཞིམ་པོ་ལྷའི་ཆང་རྒྱུན་དུ་འཐུང་ངོ་། །མིག་གིས་ཀྱང་རི་སུལ་གྱི་ངོས་སྣ་ཚོགས་དང་། རིན་པོ་ཆེ་སྣ་བདུན་གྱི་གཟུགས་དག་མཐོང་ངོ་། །ལུས་ཀྱིས་ཀྱང་ལྷའི་རེག་བྱ་ཤིན་ཏུ་དྲི་ཞིམ་པའི་ཐགས་སུ་མ་བཏགས་པའི་གོས་རྣམས་གྱོན་ལ། པད་མ་དང་། ཨུད་པ་ལའི་ལོ་མ་མེ་ཏོག་ཕྲེང་བ་དང་། བྱུག་པ་སྣ་ཚོགས་དག་ལ་རེག་པར་བྱེད་དེ། དེ་ལྟར་དེ་ལས་ལེགས་པར་བྱས་པ་དག་གི་འབྲས་བུ་ལ་སྤྱོད་པར་བྱེད་དོ། །ལྷ་མོ་སྟོང་སྙེད་ཀྱིས་ཡོངས་སུ་བསྐོར་བ་དེ་གསེར་བཙོ་མ་ལྟ་བུའི་ཚལ་དང་། ནགས་ཚལ་རྣམས་དང་། དྲིལ་བུ་གཡེར་ཀའི་སྒྲ་དྲག་ཏུ་འཁྲོལ་བ་རྣམས་དང་། དངུལ་གྱི་ལྕུག་མའི་ཚོགས་རླུང་གིས་བསྐྱོད་པའི་ནང་ན་བདེ་བ་མཆོག་རྣམས་མྱོང་ངོ་། །ལྷ་དག་གླུ་དབྱངས་ལེན་པ་ན། རོལ་མོ་ཇེང་དང་། རྔ་དང་། གླིང་བུ་དང་། གླུ་སྙན་པ་དང་འབྲེལ་པ་དག་ཐོས་སོ། །ཤིན་ཏུ་བདེ་བ་དང་ལྡན་པ་ལྷའི་ཕྲེང་བ་དང་། གོས་གྱོན་པ་གསེར་རྣམ་པ་དུ་མས་གང་བའི་རི་སུལ་རྣམས་དང་། རི་རབ་དང་། རི་བོའི་རྩེ་མོ་བཻ་ཌཱུརྱ་དང་། གསེར་དང་། དངུལ་དང་།
ཨན་ད་རྙིལ་དང་། རིན་པོ་ཆེ་མཐོན་ཀ་ཆེན་པོ་དང་། ཤེལ་ལས་གྲུབ་པ་རྣམས་ཀྱང་མཐོང་ངོ་།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་བཅུ་བཞི་པ། རིའི་རྩེ་མོ་མེ་ལོང་ལྟ་བུར་གྱུར་པ་དེ་དག་ལ། གཅིག་གི་གཟུགས་བརྙན་གཅིག་གི་ནང་དུ་སྣང་ངོ་། །ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ་ཡང་རི་མེ་ལོང་ལྟ་བུ་དེ་རྣམས་ཀྱི་ནང་ན་ལན་བརྒྱའམ་སྟོང་དུ་སྣང་ངོ་། །དེ་གཟུགས་བརྙན་དེ་རྣམས་ལ་བདག་ཉིད་ལྟ་བར་བྱེད་ལ། བལྟས་ནས་ཀྱང་བརྒྱ་འགྱུར་དུ་རབ་ཏུ་དགའ་བ་སྐྱེའོ། །ལྷ་མོ་རྣམས་ཀྱང་དེ་བཞིན་དུ་དགའ་བ་སྐྱེ་སྟེ། ཀྱེ་མ་འདི་ལྟར་བདག་ཅག་བྱད་གཟུགས་ཆེ་ཞིང་བཟང་བ་དང་ལྡན་པར་རྟག་པར་ཤིན་ཏུ་བདེ་བ་རྣམས་སིལ་སྙན་ཡན་ལག་ལྔ་དང་ལྡན་པ་རྙེད་ནས་རྩེ་བར་བྱའོ། །ལྷའི་འདོད་པའི་ཡོན་ཏན་ལྔས་བསྐྱེད་པའི་བདེ་བ་ལ་ཉེ་བར་སྤྱད་པར་བྱའོ་སྙམ་མོ། །དེ་ལྟར་ཡིད་གཡེངས་པ་དེ་དག་རི་ནས་རི། རི་འོར་ནས་རི་འོར་དུ་འདོང་སྟེ། སྲེད་པའི་དུག་གིས་མྱོས་པའི་མི་ལྟར་ཡིད་རྟག་ཏུ་མ་བསྡམས་པ། བག་མེད་པས་ཉམས་པའི་ལྷ་དང་ལྷ་མོ་རྣམས་དང་ལྷན་ཅིག་རིའི་རྒྱལ་པོ་དེ་ལ་རྒྱུ་བར་བྱེད་དོ། །བཟའ་བཏུང་བདུད་རྩིའི་རྣམ་པ་སྣ་ཚོགས་ཀྱིས་མྱོས་པ་ཕན་ཚུན་དགའ་བའི་དབང་དུ་གྱུར་པ། ཕན་ཚུན་ཡིད་གཅུགས་པ། ཕན་ཚུན་སྙིང་འབྲེལ་པ་དག །ཚལ་དང་ནགས་ཚལ་བྱ་སྣ་ཚོགས་སྒྲ་དི་རི་རི་འབྱིན་པ་རྣམ་པ་དུ་མ་རྣམས་ཀྱི་ནང་ན་དགའ་བར་བྱེད་དེ། དེ་ལྟར་རྟག་པར་རྒྱུ་བ་ཆ་བྱད་དང་། ཕྲེང་བ་དང་གོས་གྱོན་པ་མགོ་ལ་མེ་ཏོག་ཕྲེང་བ་བཏགས་པ། རྒྱན་ཕྲེང་འཕྱང་བ་དེ་དག་དཔག་བསམ་གྱི་ཤིང་གི་ཚལ་ནས། དཔག་བསམ་གྱི་ཤིང་གི་ཚལ་རྣམས་ཀྱི་ནང་ན་རྒྱུ་བར་བྱེད་དོ། །དེ་ལྟར་ཡོངས་སུ་རྒྱུ་བ་ན་ཤིན་ཏུ་བདེ་བ་དང་ལྡན་པ་དེ་དག །རེས་འགའ་ཆུ་བོ་ཆང་ཆུ་ལྟར་འབབ་པ་ཞེས་བྱ་བར་ཨུད་པ་ལ་དམར་པོ་དང་། པད་མ་དང་། མེ་ཏོག་ཀུ་མུ་དས་ཁེབས་པ། བྱ་ཀཱ་རཎྜ་བ་དང་། ངང་པ་དང་ངུར་པས་མཛེས་པ་དེར་འཇུག་པར་བྱེད་ལ། ཆུ་བོའི་འགྲམ་དེ་དག་ན་ལྷ་ཕན་ཚུན་གྲོགས་སུ་གྱུར་པ་དེ་རྣམས་ཆང་འཐུང་བར་བྱེད་ཅིང་། བྱ་བལྟ་ན་སྡུག་པ་རྣམས་དང་ཡང་ལྷན་ཅིག་རྩེ་བར་བྱེད་དོ། །དེ་ནས་སྲིད་པས་མྱོས་པའི་ལྷ་དེ་རྣམས་ཀྱང་ཡང་
དང་ཡང་དུ་ཆང་འཐུང་བ་ཉིད་ཀྱིས་བརྒྱ་འགྱུར་དུ་མདངས་འབར་ཏེ། ཡུལ་ལྔའི་ཡམ་སྲེག་ཤིང་ལས་བྱུང་བའི་སྲེད་པའི་མེས་བསྲེག་པར་བྱས་ཀྱང་། འདོད་པའི་སྲེད་པས་གདུངས་པ་ངོམས་མི་མྱོང་ངོ་། །ཀུན་ནས་འདོད་པའི་ཞགས་པས་བཅིངས་པ། རྒྱལ་པོ་ལ་གནོད་པ་བྱེད་བྱེད་པའི་མི་བཙོན་རར་བཅུག་པ་ལྟ་བུ་དེ་རྣམས་ལྷའི་འཇིག་རྟེན་འབུམ་ཕྲག་དུ་མ་མཐོང་བ་ཉམས་དགའ་བ་ན་རྟག་ཏུ་རྒྱུ་བར་བྱེད་དོ། །ཆང་ཆུ་ལྟར་འབབ་པའི་ངོགས་དེ་དག་ན་རྩེ་བའི་ལྷ་དེ་རྣམས་དང་། བྱ་རྟག་པར་རབ་ཏུ་མྱོས་ཤིང་སྙིང་ཤིན་ཏུ་དགའ་བ་གང་ཡིན་པ་དེ་རྣམས། པད་མ་དང་ཨུད་པ་ལའི་ཚལ་དེ་དག་ན་དགའ་བར་བྱེད་དོ། །ཆུ་དམར་པོ་ལ་སྤྱོད་པ་ཞེས་བྱ་བ་ཕན་ཚུན་གྲོགས་སུ་གྱུར་ཅིང་། སྒྲོ་གཤོག་རིན་པོ་ཆེ་སྣ་བདུན་ལས་གྲུབ་པ་ལྟ་བུར་རང་གི་འོད་དང་ལྡན་པ་དེ་རྣམས་ཀྱིས་ལྷ་རབ་ཏུ་མྱོས་པ་དེ་རྣམས་མངོན་པར་མཐོང་ནས། འདི་ལྟར་ཚིགས་སུ་བཅད་དེ་སྨྲས་པ། ལྷ་རྣམས་རྟག་པར་རབ་ཏུ་དགའ། །བདག་ཅག་རྟག་པར་རབ་ཏུ་དགའ། །ལྷ་རྣམས་དང་ནི་བྱ་རྣམས་ཀྱི། །བྱེ་བྲག་དག་ནི་མི་དམིགས་སོ། །དེ་དག་ཆོས་སྤྱོད་མ་མཐོང་སྟེ། །ནམས་ཀྱང་ཐར་པ་སྤྱོད་པ་མེད། །གལ་ཏེ་དེར་གྱུར་ལྷ་རྣམས་དང་། །བྱ་གྱུར་དེ་རྣམས་མཚུངས་པ་ཡིན། །གང་ཞིག་བག་མེད་རྣམ་གྲོལ་ཞིང་། །གང་ཞིག་ཆོས་ལ་རྟག་ཏུ་དགའ། །འཇིག་རྟེན་ན་ནི་ལྷ་དེ་དག །བག་ཡོད་གནས་པ་དམ་པས་མཁྱེན། །གལ་ཏེ་ལྷ་རྣམས་རྩེ་དགའ་དང་། །གལ་ཏེ་བདག་ཅག་རྩེ་དགའ་ན། །ལྷ་དང་མཁའ་ལ་རྒྱུ་བ་རྣམས། །བྱེ་བྲག་ཡོད་པར་མི་འགྱུར་རོ། །ལས་རྣམས་ཀྱི་ནི་བྱེ་བྲག་གིས། །སྐྱེ་བའི་ཆོས་དག་བྱེ་བྲག་འགྱུར། །ཆོས་མ་ཡིན་པར་ལྟུང་བ་དག །གར་ཡང་སྐྱེ་བ་ལེགས་མི་འགྱུར། །གང་ཞིག་འཁོར་བ་འདི་དག་ཀུན། །མཐར་ནི་ཟད་པར་མི་རིག་པ། །ལྷ་དེ་དང་ནི་བློ་རྨོངས་པ། །བྱ་རྣམས་དང་ནི་རྟག་ཏུ་མཚུངས། །སྐྱེ་སྡུག་རྒ་བའི་སྡུག་བསྔལ་དང་། །འཆི་བ་ཉིད་ཀྱི་སྡུག་བསྔལ་དང་། །སྡུག་དང་བྲལ་བར་བཅས་པ་ཡི། །སྡུག་བསྔལ་འདི་དག་བརྒྱུད་པ་ཡིན། །དྲི་མེད་ཆོས་ཀྱི་སྤྱོད་ཡུལ་ལ། །གང་ཞིག་དེ་ལྟར་བློ་གནས་པ། །འཇིག་རྟེན་ན་ནི་ལྷ་དེ་དག །བག་ཡོད་གནས་པ་དམ་པས་མཁྱེན། །གང་ཞིག་སྐྱེ་བའི་རྒྱུ་ལས་བྱུང་། །
སྡུག་བསྔལ་ཡིན་པར་ལེགས་རིག་པ། །འདོད་པ་ཕན་མེད་བྱེད་རྣམས་ལ། །ལྷ་དེ་དག་ནི་ཆགས་མི་བྱེད། །མཛའ་བཤེས་གཉེན་འདུན་རང་གི་འཁོར། །མང་པོ་རྣམས་དང་བྲལ་བ་ན། །གང་ཞིག་འཁོར་བར་སྐྱོ་མི་བྱེད། །ལྷ་དེ་དག་ནི་བྱ་དང་མཚུངས། །བག་མེད་དེ་ཉིད་གཟིགས་པ་ཡིས། །ཆང་འཐུང་ཅུང་ཟད་ཐ་གིར་གཟིགས། །ཆང་འཐུང་བ་ནི་འཇུ་འགྱུར་གྱི། །བག་མེད་འཇུ་བར་མི་འགྱུར་རོ། །བག་མེད་ཉམས་པའི་མི་དག་ནི། །འཁོར་བ་ལྔར་ནི་འཁྱམ་པར་བྱེད། །དེ་བས་ཆང་གི་བག་མེད་ལས། །རྣམ་པ་ཀུན་གྱིས་ཁྱད་པར་ཆེ། །ཆང་ཞིམ་གྱིས་ནི་ཉིན་གཅིག་ཏུ། །ལུས་ཅན་རྣམས་ནི་བག་མེད་བྱེད། །བསྐལ་པ་བྱེ་བར་འཁྱམ་པ་ན། །བག་མེད་བྱང་བར་མི་འགྱུར་རོ། །བག་མེད་པ་དང་བྲལ་བ་གང་། །དེ་དག་འཆི་མེད་གནས་སུ་འགྲོ། །གང་ཞིག་བག་མེད་དབང་དུ་སོང་། །མི་དེ་སྲིད་པར་རྟག་ཏུ་འགྲོ། །ཕན་པར་བྱེད་པ་མི་ཡིས་ནི། །བག་མེད་པ་དག་སྤང་བར་གྱིས། །འདི་ལྟར་ཉོན་མོངས་བག་མེད་པ། །སངས་རྒྱས་ཀྱིས་ནི་མི་བཟད་བསྒྲགས། །འདི་ལྟར་སེམས་ཡང་བྱ་དག་ཀྱང་། །བག་མེད་པ་ལ་མི་དགའ་ན། །ཅི་ཕྱིར་ལྷ་རྣམས་བག་མེད་པ། །དེ་ནི་ཁྱད་པར་སྤོང་མི་བྱེད། །དེ་ལྟར་ལེགས་པར་བྱས་པས་བསྐུལ་བས། ལྷ་རྣམས་ལ་ཕན་པར་བྱ་བའི་ཕྱིར་དེ་ཁོང་དུ་ཆུད་པར་བྱ་བའི་དོན་དུ་བྱ་གང་ཡིན་པ་དེ་དག་ཕ་མ་ལྟར་འདོམས་པར་བྱེད་ཀྱང་བག་མེད་པས་སེམས་ཕྲོགས་པའི་ལྷ་དེ་རྣམས་བདག་ལ་ཕན་པར་སྟོན་པ་འཛིན་པར་མི་བྱེད་དོ། །དེ་ནས་ཡང་རྩེ་བ་ལ་གནས་པའི་ལྷ་ཤིན་ཏུ་སྐྱིད་པར་གནས་པ། རྟག་ཏུ་ཡིད་རབ་ཏུ་དགའ་བ། སིལ་སྙན་དང་། རོལ་མོའི་སྒྲ་འབྱིན་པ། ཡིད་ཆགས་སུ་རུང་བ་སྣ་ཚོགས་དང་ཆས་ཏེ། ཚལ་གཞན་མ་ཏ་ལ་ཞེས་བྱ་བ་ག་ལ་བ་དེར་འདོང་བར་བྱེད་དོ། །དེ་ནས་ཚལ་མ་ཏ་ལར་ཕྱིན་ནས་ལྷ་ཕན་ཚུན་གྲོགས་སུ་གྱུར་ལ། ཤིན་ཏུ་སྐྱིད་ཅིང་ཡིད་རབ་ཏུ་དགའ་བ་དེ་རྣམས་རིན་པོ་ཆེ་སྣ་བདུན་གྱི་ལྕུག་མ་དང་། ལོ་མ་ཕན་ཚུན་འབྲེལ་ཅིང་མེ་ཏོག་གི་སྙེ་མ་འཕྱང་ལ། བུང་བ་འབུམ་སྙེད་འཁོད་པའི་ནང་དང་། རིན་པོ་ཆེ་སྣ་བདུན་གྱི་ཚལ་རྣམས་ཀྱི་ནང་ན་རང་གི་ལྷ་མོ་རྣམ་པ་དུ་མས་གང་བ་རྣམས་དང་ལྷན་ཅིག་གླུ་དབྱངས་
ཤིན་ཏུ་སྙན་པ་གང་གི་ཚལ་དང་། ཉེ་བའི་ཚལ་ཐམས་ཅད་གླུ་ལེན་པ་ལྟ་བུའི་བྲག་ཅའི་སྒྲས་དགའ་བར་བྱེད། དགའ་དགུར་སྤྱོད་པར་བྱེད་དོ། །གླུ་དབྱངས་ལེན་པའི་སྒྲ་དང་། བུང་བ་སྒྲ་འབྱིན་པ་དང་། བྱ་རྣམས་ཀྱང་སྒྲ་འབྱིན་པ་རྣམ་པ་དེ་ལྟ་བུར་སྙན་ཅིང་འཐུན་པའི་སྒྲ་དེ་དག་ཉིད་གཅིག་ཏུ་འདུས་ཏེ་འབྱུང་བ་དེས། རི་རབ་ཤིན་ཏུ་ཉམས་དགའ་བ་དེ་ཡང་རྣས་འཐད་པའི་གླུ་དབྱངས་དང་། མཐོང་ན་དགའ་བ་དེས་ཡང་ཉིས་འགྱུར་དུ་དགའ་བར་གྱུར་ལ། དེ་ལ་ལྷ་རྣམས་ལྷ་མོའི་ཚོགས་བྱད་གཟུགས་དང་། ཆ་བྱད་དང་འཛུམ་པ་དང་གཡེར་བག་ཅན་དང་། ལྷན་ཅིག་འདོད་པའི་ཚོགས་ལ་ཉེ་བར་སྤྱོད། རྩེ་བར་བྱེད། དགའ་བར་བྱེད། དགའ་དགུར་སྤྱོད་པར་བྱེད་དོ། །དེ་རྣམས་གནས་དེ་དག་ན་ཇི་སྲིད་དུ་འདོད་པ། སྡུག་པ་ཡིད་དུ་འོང་བ་བྱས་ཤིང་བསགས་པ་སོ་སོ་ཡང་དག་པར་མྱོང་བར་འགྱུར་བའི་ལས་ཟད་པ་དང་། སྤངས་པ་དང་། གཏུགས་པར་མ་གྱུར་པ་དེ་སྲིད་དུ་དགའ་བར་བྱེད། རྩེ་བར་བྱེད་དོ། །འདི་ལྟ་སྟེ། ཟད་པར་གྱུར་ན། དེ་ཕྱིས་ལྷའི་རིས་འདོད་པ་དང་། བདེ་བའི་ཚོགས་དུ་མ་དེ་ནས་འཆི་བར་འགྱུར་ཏེ། ཤི་ནས་ཀྱང་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་མཉམ་པར་མིའི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་ཤིན་ཏུ་བདེ་བར་འགྱུར་ཏེ། ཡིད་རྩེ་བར་དགའ་བ་དག་ཐམས་ཅད་མགུ་ཞིང་རབ་ཏུ་དགའ་བ་དང་། བྱད་གཟུགས་སྡུག་པ་དང་། ཇི་ལྟར་འདུག་པ་མཐོང་ངོ་། །དེ་ནས་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་གཟི་ཕྲེང་འབར་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་ཤེས་པས་བརྟགས་ན། དགེ་ཞིང་ལེགས་པའི་སྐྱེས་བུ་གང་གིས་ལྷའི་ནང་དུ་ངེས་པར་སྐྱེ་བར་འགྱུར་བའི་བསོད་ནམས་དག་བྱས་པས་འགྱུར་ཏེ། འདི་ལྟ་སྟེ་སྐྱེས་བུ་དགེ་བ། གཡོ་སྒྱུ་མེད་པ། གཞན་ལ་གནོད་པ་མེད་པ། དམ་པའི་ཆོས་རྟོགས་པ།
སེམས་ཅན་ཐམས་ཅད་ལ་ཕན་པར་འདོད་པ་ཡང་དག་པའི་ལྟ་བས་སྔོན་དུ་འདྲེན་པ་སངས་རྒྱས་དང་ཆོས་དང་དགེ་འདུན་ལ་རྟག་ཏུ་སེམས་གུས་པར་གྱུར་པ། རྟག་ཏུ་ཡིད་བརླན་པ་གང་གིས་བསོད་ནམས་བྱས་པས་འགྱུར་རོ། །དེ་རྣམ་པ་དུ་ཞེ་ན། འདི་ནི་དགེ་འདུན་གྱི་གནས་ཁང་ངམ་མཆོད་རྟེན་ཉམས་པ་བཅོས་ཏེ། གནས་ཁང་ངམ་མཆོད་རྟེན་གང་ཡིན་པ་དེ་དག་བརྟན་པར་བྱེད་པའམ་དེ་བཞིན་དུ་རྩིག་རྨང་འཆོས་སམ། དེ་བཞིན་དུ་སངས་རྒྱས་ཀྱིའམ་མཆོད་རྟེན་གྱིའམ་དགེ་འདུན་གྱི་ནོར་རྫས་ལ་མེ་ཤོར་ན་སྲོག་ལ་མི་ལྟ་བར་མེའི་ནང་དུ་ཞུགས་ཏེ་ཞི་བར་བྱས་ནས་མེ་དེ་ལས་ཐར་བར་བྱེད་པའམ་དེ་བཞིན་དུ་མི་དག་ལ་མེས་སྲེག་པ་ན། སེམས་ཅན་ལ་བརྩེ་བའི་སྙིང་རྗེས་ཐར་བར་བྱེད་པ་རྣམ་པ་དེ་ལྟ་བུ་ནི་བསོད་ནམས་བྱེད་པ་ཡིན་ནོ། །སྲོག་གཅོད་པ་དང་མ་བྱིན་པར་ལེན་པ་དག་ལས་ལྡོག་པ་རྣམ་པ་དུ་ཞེ་ན། གང་ཞིག་ལམ་དུ་ཞུགས་པ་ན། གསེར་རམ་དངུལ་ལམ། རིན་པོ་ཆེའམ་གཞན་དེ་དང་འཐུན་པ་ལྷུང་བ་གང་ཡིན་པ་དག་ལམ་དུ་རྙེད་པ་དང་། ཀྱེ་སུའི་ཡིན། ཀྱེ་འདི་སུའི་ཡིན་ཞེས་དེ་སྒྲོགས་པར་བྱེད་ལ། དེ་གལ་ཏེ་ལ་ལ་ཞིག་གིས་འདི་ནི་བདག་གི་ཡིན་ནོ་ཞེས་སྨྲས་ཏེ། དེ་ཡང་རང་གི་ཡིན་པར་གྱུར་ན། དེ་ལ་སྦྱིན་པར་བྱེད་དོ། །ཇི་སྟེ་སུ་ཡང་འདོད་པ་མེད་ལ་སུ་ཡང་སྨྲ་བ་མེད་ན། འདི་ལྟར་འདི་ནི་བདག་གིས་ཞག་བདུན་གྱི་བར་དུ་བཅངས་ལ། དེ་ནས་ཡང་ཡུལ་ཕྱོགས་དེ་ན་འདུག་པ། རྒྱལ་པོའམ་བློན་པོ་ཆེན་པོ་དག་ལ་སྦྲན་ནས་འཕྲོག་པར་མི་བྱེད་ལ། སྒྲོགས་པར་བྱེད་དོ། །དེའི་ཚེ་ཆོས་དང་མི་ལྡན་པས་འཕྲོག་པར་བྱེད་ན། དེ་དག་ལ་སྦྲན་པར་མི་བྱ་ཞིང་ཕྱིས་སངས་རྒྱས་དང་ཆོས་དང་དགེ་འདུན་དག་ལ་དབུལ་བར་བྱ། དེ་བཞིན་དུ་བསྟབས་པར་བྱ་སྟེ། དེ་ལྟ་བུ་ནི་མ་བྱིན་པར་ལེན་པ་མི་བྱེད་པ་ཡིན་ནོ། །སྲོག་གཅོད་པ་སྤངས་པ་ཇི་ལྟ་བུ་ཡིན་ཞེ་ན། འདི་ནི་ལམ་དུ་ཞུགས་ནས་འགྲོ་བའི་ལམ་དག་ན། སྲིན་བུ་མར་ཀོ་ཏ་ཀ་དང་། སྦལ་པ་དང་སྡིག་སྦྲུལ་དག་གིས་ཁེབས་ན། སེམས་ཅན་ལ་སྙིང་བརྩེ་བས་དེ་དག་གི་སྟེང་དུ་འགྲོ་བར་མི་བྱེད་དེ། ལས་ཀྱི་འབྲས་བུའི་དེ་ཁོ་ན་ལ་ལྟ་བ། འཁོར་བའི་ཉེས་དམིགས་ཤེས་པ། སྐྱེ་བ་དང་འཆི་བ་ལ་སྤྱོད་པ་དེས། དོན་གྱི་འབྲས་བུ་མང་པོ་
དག་ཀྱང་དང་དུ་བླངས་ནས། ལམ་གཞན་ནས་བསྐོར་ཏེ་འགྲོ་བ་ཡིན་ཏེ། དེ་ལྟ་བུ་ནི་སྲོག་གཅོད་པ་སྤངས་པ་ཡིན་ནོ། །སྡོམ་པ་བླངས་པའི་མི་དེ་ནི་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་གཟི་ཕྲེང་འབར་བ་ཞེས་བྱ་བའི་ནང་དུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཤིན་ཏུ་བདེ་བ་ལ་རྟེན་ཅིང་བདེ་བ་དང་ལྡན་པ། རང་གིས་བྱས་པའི་ལས་ལ་སྤྱོད་པ་དེའི་བདེ་བ་གང་ཡིན་པ་དེ་དག་ནི་བརྗོད་པར་མི་ནུས་སོ། །ཕྱོགས་འགའ་ཞིག་བརྗོད་ན་འདི་ལྟར་གནས་དེ་ནི་ཀུན་ནས་འོད་འབར་བ་ཡིན་ཏེ། དེའི་ཁྱད་པར་ཉི་མའི་འོད་དང་འཐུན་ལ་མཐོང་བ་འཐུན་ཡང་འོད་དེ་མི་བཟོད་པ་མ་ཡིན་པ་དེ་ལྟར་དེའི་ལས་བདེ་བའི་རྒྱུར་གྱུར་པའི་མཐུས་འབར་བ་ཡིན་ནོ། །དེ་ན་རང་གི་འོད་དང་ལྡན་པ་དེ་དགའ་བར་བྱེད་དེ། ལྷ་མོ་འབུམ་སྙེད་ཀྱིས་ཡོངས་སུ་བསྐོར་བ་དེ། གསེར་དང་། བཻ་ཌཱུརྱ་དང་། ཤེལ་དང་། ཨན་ད་རྙིལ་གྱི་གཞལ་མེད་ཁང་བཟང་པོ་རྣམས་ཀྱི་ནང་ན། འདོད་པ་དུ་མ་ལ་སེམས་གཏད་པ་རྣམས་དགའ་བར་བྱེད་དེ། རྩེ་བར་བྱེད་དགའ་དགུར་སྤྱོད་པར་བྱེད་དོ། །དེ་ཤིང་ལྗོན་པ་རྟག་ཏུ་མེ་ཏོག་དང་། ལོ་མ་རྒྱས་པ་དང་། རྟག་ཏུ་བྱའི་ཚོགས་སྒྲ་སྙན་པ་འབྱིན་པས་མཛེས་པར་བྱས་པའི་ཚལ་གྱི་ནང་དག་ན། རྣ་བ་དང་། མིག་གིས་བསྟེན་པའི་ཡུལ་ཉམས་དགའ་བ་དག་མཐོང་ཞིང་ཐོས་སོ། །དེ་ལྟར་དེ་ཚལ་གྱི་ནང་མིག་བཙུམས་པ་དང་ཕྱེ་བ་ལྟ་བུ་ཞེས་བྱ་བ་ཤིང་ལྗོན་པ་དེ་དག་མིག་བཙུམས་པ་དང་ཕྱེ་བ་ལྟ་བུ་མཐོང་སྟེ། མཐུ་དང་སྟོབས་ཤིན་ཏུ་ཆེ་བ་དེས་རྣམ་པ་དེ་ལྟ་བུའི་ཚལ་གྱི་ནང་རྣམས་ན་དགའ་བར་བྱེད་དོ། །དེ་ནས་ཡང་ལྷ་དང་ལྷ་མོའི་ཚོགས་དུ་མས་ཡོངས་སུ་བསྐོར་ཅིང་། མིག་དང་སྙིང་ལྟད་མོས་གཡེངས་པ་དག་ཚལ་གླུ་དབྱངས་ལེན་པའི་ཀུན་དགའི་ར་བ་ཞེས་བྱ་བ་དེར་འགྲོ་བར་བྱེད་དོ། །དེའི་ཕྱི་བཞིན་དུ་ཡང་ལྷ་འབུམ་ཕྲག་དུ་མ་རི་རབ་ཀྱི་གཤོང་དག་ན་སིལ་སྙན་དང་སྒྲ་དབྱངས་སྣ་ཚོགས་འབྱིན་ཅིང་འདོང་བར་བྱེད་དོ། །ཕན་ཚུན་བྲག་ཅ་འབྱུང་བའི་སྒྲ་འབྱིན་པ་དེ་དག་རི་རབ་ཀྱི་ནང་གི་ཁྲོད་ནས་ཀུན་ནས་གླུ་དབྱངས་འབྱུང་བ་ལྟ་བུར་བྱེད་ཅིང་འགྲོ་བར་བྱེད་དོ། །དེ་ལྟར་དེ་འགྲོ་བ་ན་ལྷ་གཞན་ཚལ་དང་ཉེ་བའི་ཚལ་རྣམས་ཀྱི་ནང་
ན་རྩེ་ཞིང་དགའ་བར་བྱེད་པ་གང་ཡིན་པ་དེ་དག་སྒྲ་ཤིན་ཏུ་སྙན་ཞིང་ཡིད་འཕྲོག་པ་དེ་ཐོས་ནས། བརྒྱ་བྱིན་གཉིས་པ་ལྟ་བུ་གཞན་འདི་སུ་ཞིག་ཡིན་སྙམ་ནས་འགྲོ་བར་བྱེད་དོ། །ཤིན་ཏུ་མགུ་བ་དེས་དེ་མངོན་པར་མཐོང་ནས་ཡིད་ངོ་མཚར་ཆེར་སྐྱེས་པ་དེའི་དྲུང་དུ་རྒྱུག་པར་བྱེད་དོ། །ལྷ་ཕན་ཚུན་དགའ་བ་སྐྱེས་པ་དེ་རྣམས་ཀྱིས་དེ་མངོན་པར་མཐོང་ནས་ཁྱེད་ཚུར་ཤེག་ཁྱེད་ཚུར་ཤེག་འདི་ནི་བདག་ཅག་ཐམས་ཅད་པས་ལུས་ཤིན་ཏུ་ཆེ་ལ། བརྒྱ་བྱིན་ལྟ་བུ་གཞན་ཞིག་བདག་ཅག་གི་གནས་འདིར་བྱུང་ངོ་ཞེས་བརྗོད་དོ། །དེ་ནས་ལྷ་གཞན་དག་ཀྱང་རིངས་པར་ལྷ་དེ་དག་ག་ལ་བ་དེར་དོང་སྟེ། ལྷ་རྣམས་ཀྱིས་ཡོངས་སུ་བསྐོར་ནས་བཀུར་སྟི་བྱས། བྲོ་དང་གླུ་དང་། དགོད་པ་དང་སྒེག་པ་དང་རབ་ཏུ་དགའ་བའི་ཡིད་དང་། དེ་ལ་མཆོད་པ་བྱས་པའི་ཡིད་ཀྱིས་ཚལ་རབ་ཏུ་དགའ་བ་ཞེས་བྱ་བ་ག་ལ་བ་དེར་སྐྱེད་མོས་ཚལ་གྱི་དགའ་སྤྱོད་བྱེད་དུ་འདོང་བར་བྱེད་དོ། །ལྷ་དང་ལྷ་མོའི་ཚོགས་རབ་ཏུ་དགའ་བ་རྣམས། དགོད་ཅིང་བྲོ་རྡུང་བཞིན་དུ། དེ་ནས་ཡང་སྙིང་བསྙེན་བཀུར་བྱ་བ་ལ་ཞུགས་པ་དེ་དག་སླར་ལོག་སྟེ་དེ་ཉིད་ལ་ལྟ་བར་བྱེད་དོ། །དེ་ནས་དེས་ཀྱང་དེ་རྣམས་མངོན་པར་མཐོང་ནས་ཡིད་རབ་ཏུ་དགའ་བས་སྨྲས་པ། སྙིང་གཅུགས་པར་སྡུག་པ་ཁྱེད་རྣམས་ཀྱིས་བདག་དྲངས་ཏེ། ཁྱེད་ཀྱིས་བདག་གི་མདུན་དུ་དགའ་བ་འདི་ལྟ་བུ་སྦྱར་ན། ཀྱེ་བདག་ཅག་གང་དུ་འདོང་། དེ་ནས་ལྷ་དེ་རྣམས་ཀྱིས་གསར་དུ་སྐྱེས་པའི་ལྷ་དེ་ལ་འདི་ལྟར་བདག་ཅག་འདི་རྣམས་ནི་ཚལ་རབ་ཏུ་དགའ་བའི་ཀུན་དགའ་ར་བ་ཞེས་བྱ་བ་ལྷའི་མཆོག་ཏུ་ཉམས་དགའ་བའི་ཚལ་དེར་བདག་ཅག་འདོང་བར་བྱ་སྟེ། དེར་འདོད་པའི་ཡོན་ཏན་ལྔ་ལྷག་པར་སྤྱད་པར་བྱའོ། །དེ་ནས་ལྷ་དེས་སྔོན་མ་མཐོང་བའི་ཚལ་དེར་ཡང་ཡིད་ལྟད་མོ་ལ་ཞུགས་པར་ཡང་དང་ཡང་རིངས་པར་གྱུར་པའི་ཡིད་ཉིད་ཀྱིས་ཚལ་རབ་ཏུ་དགའ་བའི་ཀུན་དགའ་ར་བ་ཞེས་བྱ་བ་ག་ལ་བ་དེར་འདོང་བར་བྱེད་དོ། །དེ་ནས་ཚལ་དེ་རྒྱང་རིང་པོ་ཞིག་ན་ཉི་མའི་ཚལ་ལྟ་བུ་ཀུན་ནས་འོད་ཟེར་བཟང་པོས་རབ་ཏུ་འབར་བ་ལྟ་བུར་མཐོང་ངོ་། །དེ་ནས་ལྷ་གསར་དུ་སྐྱེས་པ་དེས་ཚལ་དེ་མངོན་པར་མཐོང་ནས་ཡང་དང་ཡང་མཆོག་ཏུ་དགའ་བ་སྐྱེས་པར་གྱུར་པའི་ཡིད་ཀྱིས་ཚལ་དེ་ག་ལ་བ་དེར་འདོང་བར་བྱེད་དོ། །དེ་ནས་དགའ་བ་རྣམ་པ་དུ་མ་ཡོད་པ་
ཚལ་བཞི་དག་དང་འཐུན་པ། ལེགས་པར་འབྱུང་བའི་ཚལ་དེར་ཕྱིན་པ་དང་བྱ་འབུམ་སྙེད་རྣམ་པར་སྒྲ་སི་ལི་ལི་འབྱིན་ཏེ། ཁ་ཅིག་ནི་སྒྲ་འབྱིན་པར་བྱེད། ཁ་ཅིག་ནི་འབོད་པར་བྱེད། ཁ་ཅིག་གིས་ནི་རྣམ་པ་དུ་མར་ཡོངས་སུ་བསྐོར་ནས་ཡིད་རབ་ཏུ་དགའ་བས་སྒྲ་འབྱིན་པར་བྱེད་དེ། དེ་ལྟར་ཚལ་དེ་རྣམས་ན་སྒྲ་འབྱིན་པར་བྱེད་དོ། །ཡང་ཕྱོགས་གཞན་ཞིག་ན་རི་སུལ་རྣམ་པ་སྣ་ཚོགས་ཡོད་པར་གསེར་གྱི་རྡོ་ལེབ་རྣམ་པ་དུ་མ་ལ་ཆུ་འབབ་པས་ཕོག་པའི་ཆུ་སྒྲ་དེ་དང་། བྱ་ངང་པ་དང་། ངུར་པ་དང་། ཀཱ་རཎྜ་བ་དག་ཆུ་འགྲམ་རྣམས་ན་སྒྲ་འབྱིན་ཏེ། ཆུ་བོ་དེ་རྣམས་ཀྱི་བྱ་དག་དེ་ལྟར་རྣམ་པ་དུ་མར་སྒྲ་འབྱིན་པ་ཐོས་སོ། །དེ་ནས་དེ་དག་གིས་ཀྱང་ཆུ་འབབ་པའི་སྒྲ་མངོན་པར་བརྟགས་ནས་ཆུ་འགྲམ་དེ་དག་ན་ལྷ་དང་ལྷ་མོའི་ཚོགས་ཀྱིས་བསྐོར་བའི་ལྷ་དེ་དག་དགའ་བར་བྱེད། རྩེ་བར་བྱེད་དགའ་དགུར་སྤྱོད་པར་བྱེད་ལ། ཚལ་དང་ཉེ་བའི་ཚལ་དག་ན་ཡང་མཆོག་ཏུ་བདེ་བ་མྱོང་བར་བྱེད་དོ། །དེ་ནས་ཡང་འདོད་པ་ལྔ་ལས་བྱུང་བའི་བདེ་བ་མྱོང་བར་བྱེད་ལ། ཡང་དཔག་བསམ་གྱི་ཤིང་གི་དྲུང་དུ་རྒྱུག་པར་བྱེད་དོ། །ཤིང་དེ་དག་ཀྱང་མངོན་པར་མཐོང་སྟེ། ཁ་ཅིག་ནི་ཟླ་བའི་འོད་ལྟར་ལྷན་པ་དང་ཁ་ཅིག་ནི་ཉི་མའི་འོད་ལྟར་གསལ་བ་ཡིན་ཏེ། ཤིང་དེ་རྣམས་ཀྱི་དྲུང་དག་ཏུ་ཡང་ལྷ་དེ་ལྷ་རྣམས་ཀྱིས་བསྐོར་ནས་དགའ་བར་བྱེད། དགའ་དགུར་སྤྱོད་པར་བྱེད་ཡུལ་ལྔའི་བདེ་བ་རྣམ་པ་དུ་མ་མྱོང་བར་བྱེད་དེ། འདོད་པའི་བདེ་བ་གང་བརྗོད་པར་ཡང་མི་ནུས་སོ། །དེ་དཔག་བསམ་གྱི་ཤིང་གི་ཚལ་དེར་ཡང་བདེ་བ་རྣམ་པ་མང་པོ་དུ་མ་མྱོང་ནས་པད་མའི་ཚལ་བྱ་ངང་པ་དང་། ངུར་པ་དང་ཀཱ་རཎྜ་བས་བརྒྱན་པ་ག་ལ་བ་དེར་བརྒྱ་བྱིན་བཞིན་དུ་མཆོག་ཏུ་དགའ་བའི་ལྷ་ཐམས་ཅད་ཀྱིས་ཡོངས་སུ་བསྐོར་བའི་ལྷ་དེ་ཡང་ཡིད་རབ་ཏུ་དགའ་བས་འདོང་བར་བྱེད་དོ། །དེ་ནས་དེར་ཡང་ལྷའི་འདོད་པའི་བདེ་བ་སྤྱད་ནས། རི་བོའི་རྩེ་མོ་མཐོ་བརྩེགས་ཞེས་བྱ་བའི་རི་བོའི་རྩེ་མོ་ག་ལ་བ་དེར་འདོང་བར་བྱེད་དོ། །གླུ་ལེན་བྲོ་རྡུང་འཛུམ་ཞིང་སྒེག་པར་ལྷ་དང་ལྷ་མོ་གྲོགས་སུ་གྱུར་པ་ཕན་ཚུན་ཡིད་གཅུགས་པ། གཅིག་ལ་གཅིག་གནོད་པ་མི་བྱེད་ཅིང་སྙིང་དུ་སྡུག་པ་རྣམས་ཤིན་ཏུ་བདེ་བ་མྱོང་བར་བྱེད་དོ། །རི་བོའི་རྩེ་མོ་མཐོ་བརྩེགས་ཞེས་བྱ་བ་རྩེ་མོ་སྣ་ཚོགས་པ་དེ་ལ་འཛེགས་ནས། ཡོན་ཏན་ཐམས་ཅད་དང་ལྡན་པ། འབབ་
ཆུ་དང་མཚེའུ་དང་ལྟེང་ཀ་སྣ་ཚོགས་ཀྱིས་བརྒྱན་པ་དང་ལྷའི་པད་མའི་ཚལ་དང་ལྡན་ཞིང་དེས་ཀྱང་བརྒྱན་པ། པད་མའི་ཚལ་དེ་ན་ཡང་པད་མ་མང་པོས་མཛེས་པར་བྱས་པ། བྱའི་ཚོགས་འབུམ་ཕྲག་དུ་མ་ལྡིང་བ། ཤིན་ཏུ་བདེ་བ་དང་ལྡན་ཞིང་ཡིད་ཤིན་ཏུ་བདེ་ལ་མཆོག་ཏུ་དགེ་སྟེ། ལེགས་པ་མཆོག་གིས་ཤིན་ཏུ་འབར་བ་རྣམས་མཐོང་ནས། ལྷ་དེ་རྣམས་དང་ལྷན་ཅིག་སྐྱེད་མོས་ཚལ་དང་། ཉེ་བའི་ཚལ་དང་། བུང་བ་སྦྲང་རྩི་འབྱུང་བའི་ཚལ་དང་དཔག་བསམ་གྱི་ཤིང་གི་ཚལ་དང་བྱ་སྣ་ཚོགས་སྒྲ་འབྱིན་པར་བྱེད་པ་རྣམས་ཀྱི་ནང་ན་དགའ་བར་བྱེད། རྩེ་བར་བྱེད་དགའ་དགུར་སྤྱོད་པར་བྱེད་དོ། །རི་བོའི་རྩེ་མོ་མཐོ་བརྩེགས་རི་ཟོམ་སྣ་ཚོགས་ཡོད་པ་དེ་ན་ལས་ལེགས་པར་བྱས་པ་དེ་དེར་ཡང་ཡུན་རིང་དུ་རྩེས་ན། དེ་ནས་ཡང་ལྷ་དེ་རྣམས་དང་ལྷན་ཅིག་སྐྱེད་མོས་ཚལ་གྱི་དགའ་སྤྱོད་བྱེད་དུ་རང་གི་གནས་དེ་ཉིད་ལ་རྟོག་པར་བྱེད་དེ། གསར་དུ་སྐྱེས་པའི་ཡིད་ལྟད་མོ་ལ་ཞུགས་པ་ལྷ་ཕྱི་བཞིན་འབྲང་བ་སྟོང་སྙེད་ཀྱིས་བསྐོར་ཅིང་། ཐམས་ཅད་དུ་ཡང་དེ་དག་ཉིད་ཀྱིས་ཡོངས་སུ་བསྐོར་བ་རྣམས་བརྒྱ་བྱིན་བལྟ་བའི་ཕྱིར་ལྷའི་འདུན་ས་ཆོས་བཟང་ག་ལ་བ་དེར་འདོང་བར་བྱེད་དོ། །དེ་ནས་རིན་པོ་ཆེ་སྣ་ཚོགས་ཀྱིས་བརྒྱན་པ། རིན་པོ་ཆེའི་ཁང་བཟངས་ལན་ཀན་སྣ་ཚོགས་ཀྱིས་བསྐོར་བ་སྔར་བསྟན་པ་དང་འཐུན་པ་ཆོས་བཟང་དུ་ཕྱིན་པ་དང་། དེ་ནས་ལྷའི་དབང་པོ་བརྒྱ་བྱིན་གྱིས། ལྷ་དེ་མངོན་པར་མཐོང་ནས་རིམ་གྲོ་བྱས་ཤིང་འདི་ལྟར་ཚིགས་སུ་བཅད་དེ་སྨྲས་པ། འདི་དག་ལེགས་བྱས་འབྲས་བུ་སྟེ། །ད་ལྟར་ལེགས་པར་གནས་པ་ཡིན། །དེ་ནི་ཟད་ནས་ལྷ་ཡུལ་ནས། །ཁྱོད་ནི་ལོག་པར་ལྟུང་བར་བྱེད། །ལས་ཀྱིས་ཉམས་ཏེ་ལྟུང་བ་དག །གང་དང་གང་དུ་སྐྱེ་འགྱུར་གང་། །དེ་ནི་ཕྱིས་ནི་གདུང་མེད་པར། །ཁྱོད་ཀྱིས་དེ་ལྟར་བྱ་བ་ཡིན། །བདེ་ལ་སེམས་ནི་ཆགས་གྱུར་ཅིང་། །བག་མེད་པ་ཡིས་ཉམས་གྱུར་ནས། །མ་བྱས་བདུད་ཀྱི་དབང་གྱུར་པ། །ལྷ་རྣམས་སེམས་ཅན་དམྱལ་བར་འགྲོ། །གཅིག་གིས་ལྟུང་བ་མཐོང་ནས་སུ། །སྐྱེ་བོ་ཇི་སྟེ་ཡིད་མི་འབྱུང་། །བདག་ཀྱང་ལྟུང་བ་འདི་དག་གིས། །རྣམ་པ་ཀུན་དུ་ལྟུང་དུ་དོགས། །གང་ཞིག་རིང་ནས་འཇིགས་མཐོང་སྟེ། །སྒྲུབ་པ་དག་ལ་འབད་བྱེད་པ། །དེ་ནི་འཆི་བའི་དུས་ཀྱི་ཚེ། །གནོད་དང་བྲལ་ཏེ་འཇིགས་པ་མེད། །གང་ཞིག་རིང་ནས་བག་མེད་པས། །
བློ་ངན་འཇིགས་པར་མི་སེམས་པ། །ཕྱི་ནས་ཉོན་མོངས་བྱུང་ཚེ་དེ། །ཕྱི་ནས་གདུང་བས་སྲེག་པར་འགྱུར། །ལྷ་ཡུལ་ནས་ནི་ངེས་པར་གོ །ཀུན་ནས་དངོས་པོ་ལྷུང་བར་འགྱུར། །འདོད་པའི་དབང་གྱུར་དེ་རིག་ན། །འདི་ལ་ནམས་ཀྱང་ལྟུང་བ་མེད། །སེམས་ཅན་འདོད་པས་བསླུས་པ་དང་། །འདོད་པས་རྣམ་པར་རྨོངས་པ་དང་། །འདོད་པའི་ཞགས་པས་དྲངས་གྱུར་པ། །དེ་དག་རྟག་ཏུ་དམྱལ་བར་ལྟུང་། །རྟག་ཏུ་ཉོན་མོངས་འདི་རིག་ནས། །བདག་ལ་ཕན་པར་བྱེད་པའི་ཡིད། །ཤིན་ཏུ་དུལ་བའི་ཡིད་ཀྱིས་ནི། །ལྷ་རྣམས་གདུང་བར་མི་འགྱུར་རོ། །ཡིད་ཀྱི་དུག་དང་འདོད་ཤུགས་ཀྱིས། །རྣམ་པ་ཀུན་དུ་ཟིན་པ་གང་། །འཆི་བདག་དབང་གྱུར་རྨོངས་པ་དེ། །སྐྱེ་བོ་འདོད་པའི་མེ་ཡིས་ཉམས། །འཆི་བའི་ཚེ་ན་གཉེན་འདབ་དང་། །མཛའ་བཤེས་རྩ་ལག་གཉེན་འདུན་དང་། །འབྲལ་བའི་སྡུག་བསྔལ་གང་བྱུང་བ། །དེ་ནི་བཤད་པར་མི་ནུས་སོ། །དེ་ནི་འཆི་བར་ཉེ་གྱུར་ཏེ། །རི་བོ་བཞིན་དུ་ལྟུང་བ་ན། །བཟློག་པར་མི་ནུས་སྟོབས་ལྡན་པ། །མི་རྣམས་ཀྱིས་ནི་འདྲེན་པར་བྱེད། །སྡུག་པ་དང་ནི་འདུ་གྱུར་ལ། །རྣམ་པ་ཀུན་དུའང་འབྲལ་བར་གྱུར། །དེ་ནི་རིག་ནས་ལྷ་མཆོག་གིས། །བག་མེད་རྣམས་ལ་ཆགས་མ་བྱེད། །དབང་པོ་རྟག་ཏུ་འདོད་རྣམས་ཀྱིས། །འདིར་ནི་ནམས་ཀྱང་ངོམས་མི་མྱོང་། །ཇི་ལྟར་མེར་ནི་མར་བླུགས་བཞིན། །སྲེད་པ་རྟག་ཏུ་འཕེལ་བར་གྱུར། །འདི་ལྟར་སྒོ་རྣམས་སྣ་ཚོགས་ཀྱིས། །སྲེད་པའི་འཇིག་རྟེན་འཇིག་བྱེད་པ། །མི་རྣམས་རྟག་ཏུ་སེམས་དམྱལ་དང་། །ཡི་དགས་དུད་འགྲོའི་ནང་དུ་འཁྱམ། །འཆི་དང་སྐྱེ་བོའི་འཕྱང་མོ་ལ། །མི་མཁས་སྐྱེ་བོ་ཉོན་མོངས་པ། །དེ་ནི་རིག་ནས་སྲེད་བྲལ་ཏེ། །འགྲོ་བ་མཆོག་ཏུ་དེ་འགྲོའོ། །བརྟན་པོ་བཅིངས་ལས་ངེས་གྲོལ་བ། །མྱ་ངན་བྲལ་ཞིང་གནོད་དང་བྲལ། །གང་ཞིག་སྲེད་པའི་དབང་མི་འགྲོ། །དེ་ནི་རྟག་ཏུ་བདེ་བར་འདུག །གང་དག་གནས་སྐབས་ཐམས་ཅད་དུ། །ཡེ་ཤེས་ལ་ནི་ཡིད་ཉེ་བ། །མཁས་པ་དེ་ནི་སྐྱེ་བ་ཡིན། །སྡུག་བསྔལ་ཞགས་པས་དེ་མི་འཆིང་། །གང་དག་ཡིད་ལ་མཚན་མ་མེད། །གང་དག་སྲེད་པས་ཡིད་བྱུང་བ། །དེ་ནི་དགོན་པའི་དྲི་མ་བྲལ། །བདེ་བ་འབྱུང་བའི་མཆོག་ཅིག་ཐོབ། །གང་དག་སྡུག་བསྔལ་མི་སྐྱོ་ཞིང་། །གང་དག་བདེ་ལ་ཆགས་མི་བྱེད། །བདེ་སྡུག་ལས་ནི་གྲོལ་བ་དེ། །མྱ་
ངན་འདས་པའི་གྲོང་ཁྱེར་འགྲོ། །བྱམས་པ་དང་ནི་སྙིང་རྗེ་ཡིས། །མི་རྣམས་རྟག་ཏུ་སེམས་ལྡན་པ། །རྒྱུ་འབྲས་དེ་ཉིད་ཤེས་པ་དེ། །སྡུག་བསྔལ་ཞགས་ལས་ངེས་པར་འབྱུང་། །གང་དག་ཀུན་ཏུ་རྟོག་པ་ལ། །ཡིད་མི་དགའ་སྟེ་སྐྱོན་སྤངས་པ། །དེ་དག་སྐྱོན་གྱི་འཇིགས་ལས་གྲོལ། །གནས་མཆོག་དམ་པར་འགྲོ་བར་འགྱུར། །འདུ་བ་དག་ལ་འབྲལ་བ་ཡོད། །ལང་ཚོ་ལ་ཡང་རྟག་ཏུ་རྒ། །འཚོ་བ་ལ་ཡང་རྟག་ཏུ་འཆི། །གཞི་འདི་དག་ནི་རྟག་ཏུ་གནས། །ལྷ་ཡུལ་ནས་ནི་ལྟུང་བ་དེ། །མི་བཟད་ཁད་ཀྱིས་མངོན་དུ་འོང་། །དེ་ནི་བསམས་ཏེ་བག་མེད་པ། །ཁྱོད་ཀྱིས་ནམས་ཀྱང་བསྟེན་མི་བྱ། །རྨོངས་པ་གང་ཞིག་ཐབས་མེད་པས། །བདེ་བ་རྟག་ཏུ་ཚོལ་བྱེད་པ། །བྱེ་མ་རྣམས་ལས་འབྲུ་མར་ལྟར། །དེ་ནི་རྟག་ཏུ་རྙེད་མི་འགྱུར། །བག་མེད་རྟག་ཏུ་དགའ་བ་གང་། །དེ་ལ་བདེ་བའི་སྐལ་བ་མེད། །སྡུག་བསྔལ་ཤིང་གི་དྲུང་གཅིག་པོ། །ཤིན་ཏུ་མི་བཟད་བག་མེད་ཡིན། །ཆོས་དང་ཆོས་མིན་ངེས་པ་ཉིད། །འདི་སྟེ་བདག་གིས་ཁྱོད་ལ་བསྟན། །ཁྱོད་ཀྱི་ཡིད་ཀྱིས་དེ་ཟུང་ཤིག །ཕྱིས་ནི་གདུང་བར་མ་བྱེད་ཅིག །རྨོངས་པ་གང་ཞིག་བླ་མའི་ཚིག །ཕན་པ་ཉིད་ནི་འཛིན་མི་བྱེད། །ཕྱིས་དེ་ཉོན་མོངས་བྱུང་བའི་ཚེ། །རང་གི་སེམས་ཀྱིས་གདུངས་པར་བྱེད། །བྱེ་བ་ཐེར་འབུམ་སྟོང་ཕྲག་དང་། །ས་ཡ་དང་ནི་དུང་ཕྱུར་དག །གྲངས་མེད་པ་ཡི་ལྷ་རྣམས་ནི། །བག་མེད་པ་ཡིས་རྣམ་པར་བསླུས། །ངེས་པར་མི་རྟག་མེ་ཡིས་སུ། །བསྐལ་མཐར་རི་མཆོག་འདི་སྲེག་ན། །དབུ་བ་ཆུ་ཤིང་ལྟ་བུ་ཡི། །ལྷ་རྣམས་གང་ཞིག་སྨོས་ཅི་དགོས། །འདུ་བྱས་སྐྱེ་དང་གཡོ་བ་གང་། །དེ་ནི་སྲེད་པར་ཅུང་ཟད་མེད། །གང་ཞིག་རྟག་པའམ་བདེ་འགྱུར་བ། །དེ་ཡི་གནས་ནི་ཡོད་མ་ཡིན། །ཇི་ལྟར་བག་མེད་པ་ཡིས་འཕྲོགས་པ་ཡི། །གསར་བྱུང་ལྷ་དེ་ལ་ནི་ཐབས་དུ་མས། །བརྒྱ་བྱིན་དེས་ནི་དེ་སྐད་ཕན་བཏགས་ཀྱང་། །དེ་ལྟར་ཚིག་གཅིག་ཙམ་ཡང་མ་ཟིན་ཏོ། །དེ་ནས་བརྒྱ་བྱིན་གྱིས་དེ་རིག་ནས་མི་སྨྲ་བར་འདུག་གོ །ལྷ་དེས་ཀྱང་བརྒྱ་བྱིན་དེ་ལ་སྤྱི་བོས་ཕྱག་འཚལ་ཏེ། སིལ་སྙན་དང་རོལ་མོའི་སྒྲ་དང་གླུ་དབྱངས་སྣ་ཚོགས་ལ་ཡིད་ཆགས་པའི་ལྷ་འབུམ་སྙེད་ཀྱིས་ཡོངས་སུ་བསྐོར་ཏེ། ལྷ་དེ་རྣམས་ཉིད་དང་ལྷན་ཅིག་རང་གི་གནས་ག་ལ་བ་དེར་འདོང་བར་བྱེད་དོ། །
ནགས་ཚལ་དང་། པད་མ་དང་། ཆུའི་ལྟེང་ཀ་དང་། པད་མའི་ཚལ་རྣམས་ཀྱིས་བརྒྱན་པ་དང་། ལྷའི་རོལ་མོའི་སྒྲ་འབྱིན་པ་ཤིན་ཏུ་ཉམས་དགའ་བ་དང་། འབབ་ཆུ་འབུམ་སྙེད་ཀྱིས་བརྒྱན་པ་དང་། བྱ་སྒྲ་འབྱིན་པ་ཤིན་ཏུ་ཡིད་དུ་འོང་བ་དག་མཐོང་ངོ་། །དེ་ལྷ་རྣམས་ཀྱིས་མཆོད་ཅིང་བདེ་བ་དུ་མ་དག་མྱོང་བ་ན། །རིའི་གསབ་གསེབ་དེ་དག་ན་རིན་པོ་ཆེའི་འོད་ཀྱི་ཕྲེང་བ་ལང་ལོང་འབར་བ། ཤིན་ཏུ་བདེ་བ་རྣམ་པ་དུ་མ་དག་མཐོང་བ་དང་སྐྱེད་མོས་ཚལ་དུ་དགའ་སྤྱོད་བྱེད་དུ་འདོང་བར་བྱེད་དོ། །བག་མེད་པ་རྣམ་པ་དུ་མས་ཡིད་ཕྲོགས་པ། འདོད་པ་ལ་སེམས་ཆགས་པ་རྣམས་འདོད་པའི་མེས་བསྲེགས་པ་ན། ཡིད་འབྱུང་བའི་རྟེན་དབང་པོ་ལྔ་ལས་བྱུང་བའི་མེ་ལྕེ་ལྔ་པོ་དེས་སྲེག་པར་བྱེད་ཀྱང་མི་རིག་སྟེ། དགྲ་ལྟར་མི་མངོན་ལ། བཤེས་གཉེན་གྱི་གཟུགས་ཅན་དགྲ་མ་རུངས་པ་དེ་དང་ཡང་ལྷན་ཅིག་དགའ་བར་བྱེད་དོ། །དེ་ལྟར་ལྷ་དེ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པ་སོ་སོ་ཡང་དག་པར་མྱོང་བར་འགྱུར་བའི་ལས་ཟད་པར་མ་གྱུར་པ་དེ་སྲིད་དུ། ལྷ་དེ་རྣམས་དང་ལྷན་ཅིག་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དེ། །དུག་གི་ཆུ་བོས་དེད་པར་བྱེད་དོ། །དེ་དག་ཟད་ནས་ལས་ཉེ་བར་འགྲོ་བ་ཇི་ལྟ་བ་བཞིན་སེམས་ཅན་དམྱལ་བ་དང་། ཡི་དགས་དང་། དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་རོ། །གལ་ཏེ་བརྒྱ་ལ་ལས་ལེགས་པར་བྱས་པ་གཞན་ཞིག་གིས་མི་རྣམས་ཀྱི་ནང་དུ་སྐྱེས་ན། དེ་ལས་དེ་དང་རྒྱུ་འཐུན་པར་རྟག་ཏུ་བདེ་བ་དང་ལྡན་པར་འགྱུར་ཞིང་བྱད་གཟུགས་བཟང་པོ་དང་ལྡན་པ་དང་། ཡོན་ཏན་དུ་མ་དང་ལྡན་པའི་རིགས་སུ་སྐྱེ་བ་དང་། སྐྱེ་བོ་ཐམས་ཅད་ཀྱིས་བཀུར་བ་དང་ཚེ་གཅིག་གི་བར་དུ་རྒྱལ་པོའི་ཡང་གནང་ཆེན་བྱེད་པར་འགྱུར་བ་མཐོང་ངོ་། །དེ་ནས་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས། །ལྷ་རྣམས་ཀྱི་གནས་ལ་རྟོག་པར་བྱེད་དེ། དེས་ཐོས་པ་ལས་བྱུང་བའི་ཤེས་པས་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་མ་འདྲེས་པ་ཞེས་བྱ་བ་ཇི་ལྟར་འདུག་པ་མཐོང་ངོ་། །དེར་སེམས་ཅན་དག་ལས་གང་གིས་སྐྱེ་བར་འགྱུར་སྙམ་ནས། དེས་ཐོས་པ་ལས་བྱུང་བའི་
ཤེས་པས་བརྟགས་ན། དགེ་བ་སེམས་བཟང་པོ་དང་ལྡན་པ་རྒྱུ་དང་འབྲས་བུ་ལ་ཤིན་ཏུ་ཡིད་ཆེས་པ་གང་གིས་ཚུལ་ཁྲིམས་རྣམ་པ་བདུན་བསྲུངས་པ། སེམས་ལ་སྙིང་རྗེས་བརླན་པའི་ཡིད་དང་ལྡན་པ། སྡིག་པའི་གྲོགས་པོ་དང་མི་འདྲེ་བ། མི་དགེ་བ་སྤྱོད་པ་དང་ལྷན་ཅིག་སྨྲ་བར་མི་བྱེད་པ། དཀོན་མཆོག་གསུམ་ལ་རྟག་ཏུ་དད་པ་དང་ལྡན་པ། ཡིད་ཞི་ཞིང་ཡིད་ཤིན་ཏུ་མཉམ་པར་བཞག་པ་བློ་མ་གཡེངས་ཤིང་མ་འདྲེས་པར་གནས་པ། ཡ་མཚན་ཅན་འདོད་ནས་རིགས་ནས་རིགས་སུ་མི་འགྲོ་བ། སེམས་ཅན་ཐམས་ཅད་ལ་སྙན་པར་སྨྲ་བ། དུས་སུ་སྨྲ་བ། བདེན་པར་སྨྲ་བ། བླ་མ་རྣམས་ལ་རིམ་གྲོར་བྱེད་པ་དང་། དམ་པའི་ཆོས་ཉན་ཅིང་ལྟ་བའི་ངང་ཚུལ་ཅན་དུ་གྱུར་པ། སྦྱིན་པ་དང་ཚུལ་ཁྲིམས་ཅི་ནུས་སུ་བསྲུང་བར་འགྱུར་ཏེ། དེ་ལམ་དུ་འགྲོ་བ་ན་གཞན་གྱི་རྩྭ་ཙམ་ཡང་རྐུ་སེམས་དག་གིས་ལེན་པར་མི་བྱེད་ལ་སྦལ་པ་དང་། སྲོག་ཆགས་དུན་དྷུ་བྷ་རྣམས་ལ་ཡང་ལྟ་ཞིང་རྟོག་པར་བྱེད་དེ། འདི་ལྟར་བདག་གིས་དེ་དག་གསད་པར་མི་བྱའོ་སྙམ་ནས་གང་གི་ཕྱིར་སྲོག་ཆགས་ཐམས་ཅད་ཀྱི་གཅེས་ཆེན་དམ་པ་ནི་སྲོག་ཡིན་ཏེ། གཞི་དེ་ཡིད་ལ་རྩེ་གཅིག་ཏུ་བྱས་ནས་སྲོག་ཆགས་རྣམས་ལ་རབ་ཏུ་འབད་དེ་སྲུང་བར་བྱེད་དོ། །ཇི་ལྟར་ན་སྲོག་གཅོད་པ་སྤངས་པ་ཡིན་ཞེ་ན། ཁ་ཟས་ཀྱི་བདེ་བར་བྱ་བའི་དོན་དུ་གལ་ཏེ་ཤའམ་ཁ་ཟས་གཞན་ཞིག་བླངས་པ་དང་གང་གིས་དེའི་སྲོག་ཆད་དེ་གཞན་དུ་འགྱུར་བ་དེ་ཡང་ཚ་བའི་རྐྱེན་ནམ། ཡུན་རིང་དུ་ལོན་པའི་རྐྱེན་གྱིས་སྲིན་བུས་གང་ལ་སྲིན་བུ་དེ་དག་དེ་ནས་ཕྱུང་ན་ནི་གོར་མ་ཆག་པར་འཆི་བར་འགྱུར་བས་བདག་ནི་ཤི་ཡང་བླའི། སྲོག་ཆགས་འདི་དག་ནི་འཆི་བར་མི་འགྱུར་ཞིང་སྲོག་ཆགས་རྣམས་ཀྱི་སྲོག་ཆད་པར་མ་གྱུར་ཅིག་སྙམ་ནས། དེ་བདག་ཉིད་ཀྱི་སྲོག་ཡོངས་སུ་གཏོང་བར་བྱེད་ཀྱི། ཁ་ཟས་དེ་དག་ལས་སྲིན་བུ་འབྱིན་པར་མི་བྱེད་དེ། དེ་ལྟར་སྐྱེས་བུ་དམ་པ་དེ་ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་ལྟ་ཞིང་རྒྱུ་ཚོལ་བ་ལྷུར་བྱེད་པ་ཡིན་ནོ། །ཇི་ལྟར་ན་མ་བྱིན་པར་ལེན་པ་སྤངས་པ་ཡིན་ཞེ་ན། དེ་ལྟར་སྐྱེས་བུ་དགེ་བ་སེམས་ཅན་ཐམས་ཅད་
ལ་ཕན་པ་ལྷུར་བྱེད་པ་དེ་གཞན་གྱི་བདག་ཉིད་ཀྱི་དོན་དུ་ཡོངས་སུ་བཟུང་བ་དེ་ལས་མ་བྱིན་པར་ལེན་པར་འགྱུར་རོ་སྙམ་ནས། ཞིང་ངམ་ཀུན་དགའ་ར་བའམ་གྲོང་རྡལ་དག་ལ་གདབ་པར་བསྡོགས་པའི་བ་ལང་གི་ལྕི་བའི་ཐལ་བ་ཙམ་ཡང་ལེན་པར་མི་བྱེད་པ་ཡིན་ཏེ། དེ་ལྟར་མ་བྱིན་པར་ལེན་པ་ཤིན་ཏུ་ཕྲ་མོ་ཡང་སྤོང་བར་བྱེད་ལ་ཚུལ་ཁྲིམས་མ་འདྲེས་པ། མ་ནོགས་པ་སྡིག་པ་མེད་པ་སྐྱོན་མེད་པ་ལ་སྤྱོད་དོ། །དེ་དེ་ལྟར་སྤྱོད་སྤྱོད་པ་ལས་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་མ་འདྲེས་པའི་གནས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་ཤིན་ཏུ་བདེ་བ་དང་ལྡན་པ། ལུས་ཉི་མ་བས་ལྷག་ལ་རང་གི་འོད་དང་ལྡན་པའི་ལྷ་དེ་ལས་ལེགས་པར་བྱས་ཤིང་བྱས་པ་བསགས་པ་སོ་སོ་ཡང་དག་པར་མྱོང་བར་འགྱུར་བའི་འབྲས་བུས་ལྷའི་བདེ་བ་དུ་མ་དག་མྱོང་བར་བྱེད་དོ། །ལྷའི་ཕྲེང་བ་དང་གོས་གྱོན་པ། ལྷ་འབུམ་སྙེད་ཀྱིས་ཡོངས་སུ་བསྐོར་བ་དེ་རིན་པོ་ཆེ་སྣ་བདུན་གྱི་ཚལ་དང་ནགས་ཚལ་བསྟེན་པར་བྱ་བ་རྣམས་ཀྱི་ནང་ན་ལྷའི་ཚོགས་དང་ལྷན་ཅིག་དགའ་བར་བྱེད་དོ། །དེ་ལྟར་ཤིན་ཏུ་བདེ་བ་དང་ལྡན་པ་ཡོངས་སུ་སྤྱོད་པ་དེ་རེས་འགའ་ཚལ་རོ་བརྒྱ་མཆོག་གིས་བསྟེན་པ་ཞེས་བྱ་བ་ག་ལ་བ་དེར་འདོང་བར་བྱེད་དོ། །དེས་དེ་མངོན་པར་མཐོང་ནས་ལྷག་པར་དགའ་བ་སྐྱེས་ཏེ། ལྷ་དེ་རྣམས་ཀྱིས་མཐོང་བ་དང་ཀྱེ་གང་གི་ཚལ་འདི་ཚལ་གཞན་དག་པས་ལྷག་པར་མཛེས་ལ། མེ་ཏོག་དང་། འབྲས་བུ་དང་། རི་སུལ་དང་། སྨན་ལྗོངས་དང་། ལྟེང་ཀ་དང་། འབབ་ཆུའི་དངོ་དང་། བྱ་སྒྲ་འབྱུང་བ་དང་། ས་རྣམ་པར་ཕྱེ་བ་དང་། རི་དགས་དང་། རི་དགས་ལས་ཁྱད་པར་འཕགས་པའི་རྒྱུ་གང་ཡིན་ཞེས་སྨྲས་སོ། །སྔོན་གྱི་ལྷ་གཞན་ཞིག་གིས་ཚིག་དེ་ཐོས་ནས་སྨྲས་པ། འདི་ལྟར་བདག་ཅག་གིས་གཞན་དང་གཞན་དག་ལས་འདི་སྐད་ཅེས་ཐོས་ཏེ། འདི་ལྟར་འཁོར་ལོས་སྒྱུར་བའི་རྒྱལ་པོ་ང་ལས་ནུ་ཞེས་བྱ་བ་གླིང་བཞི་དང་། གླིང་བར་རྣམས་སུ་ལོ་འབུམ་ཕྲག་དུ་མར་སྤྱོད་ཀྱང་འདོད་པ་རྣམས་ཀྱིས་ངོམས་པ་མེད་དོ། །འདོད་པ་རྣམས་ཀྱིས་ངོམས་པ་མེད་པ་དེ་རྒྱལ་ཆེན་བཞིའི་རིས་ཀྱི་ལམ་ན་འཁོར་
ལོས་དྲངས་ནས་ལྷའི་འཇིག་རྟེན་འདིར་འོངས་ཏེ། དེ་མིའི་བགྲང་བའི་ཚུལ་གྱིས་ལོ་འབུམ་ཕྲག་དུ་མར་ཉེ་བར་འཚོ་ཡང་འདོད་པ་རྣམས་ཀྱིས་ངོམས་པ་མེད་དོ། །དེ་གར་ཡང་འདོད་པས་ཆོག་མི་ཤེས་ནས་ལྷའི་འཇིག་རྟེན་འདིར་འོངས་ཏེ། བརྒྱ་བྱིན་གྱི་སྟན་གྱི་ཕྱེད་ལ་འདུག་ཀྱང་འདོད་པ་རྣམས་ཀྱིས་ངོམས་པ་མེད་དོ། །དེ་གང་གི་ཚེ་སྐྱེད་མོས་ཚལ་དུ་དགའ་སྤྱོད་བྱེད་དུ་འགྲོ་ལ། དེ་འདུག་པའི་དགའ་སྤྱོད་བྱེད་དུ་ཚལ་འདིར་འགྲོ་སྟེ། ཚལ་འདི་ནི་ཡོན་ཏན་དུ་མ་དང་ལྡན་ཞིང་བསྟེན་པ་དུ་མ་དང་ལྡན་པ་ཡིན་ནོ། །རྒྱུ་དེས་ན་ཡོན་ཏན་དུ་མ་དང་ལྡན་པའི་ཚལ་འདི་ནི་ད་དུང་དུ་ལྷག་པར་ཉམས་དགའ་བ་ཡིན་ནོ། །རྒྱལ་པོ་ང་ལས་ནུ་བརྒྱ་བྱིན་གྱི་སྟན་ལ་འདུག་པ་དེ་ཡང་རང་གིས་བྱས་པའི་ལས་ཟད་པ་དང་ལྷའི་གནས་དེ་ནས་ལྷུང་ངོ་ཞེས་བདག་ཅག་གིས་གཞན་དང་གཞན་དག་ལས་ཐོས་ཏེ། གཞན་དུ་ན་བདག་ཅག་གིས་ཚལ་འདི་མངོན་སུམ་དུ་མཐོང་བ་ནི་མ་ཡིན་ནོ། །དེ་ལྟར་ཚལ་འདི་ནི་ད་དུང་དུ་འདི་ལྟར་ཤིན་ཏུ་འབྱོར་པ་ཡིན་ནོ། །དེ་ནས་ལྷ་དེ་རྣམས་ཀྱིས་ཚིག་དེ་ཐོས་པ་དང་། ངོ་མཚར་དང་བྲལ་བ་རབ་ཏུ་དགའ་བའི་ཡིད་སིལ་སྙན་ཡན་ལག་ལྔ་དང་ལྡན་པས་དགའ་བར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་ལ། འདོད་པའི་ཡོན་ཏན་རྣམ་པ་ལྔ་པོ་དུ་མ་དང་ལྡན་པའི་ཡིད་ཀྱི་ཚལ་དེར་འགྲོ་བར་བྱེད་དོ། །དེ་ལྟར་འགྲོ་བ་ན་དེའི་བྱ་ཤིན་ཏུ་རྩེ་བ་ཞེས་བྱ་བ་ལས་ལེགས་པར་བྱས་པས་བསྐུལ་བ་དེས་ལྷ་དེ་ལ་འདི་ལྟར་ཚིགས་སུ་བཅད་དེ་སྨྲས་པ། དེ་ཡི་རྒྱུ་སྟེ་སྲེད་པ་ཡིས། །འདོད་པ་རྣམས་ལ་ངོམས་མི་མྱོང་། །སྲེད་པས་ངོམས་པ་སྐྱེད་བྱེད་པ། །ཡིད་ཉིད་ངོམས་པར་མི་བྱེད་དོ། །འཆི་བ་ཉེ་བར་གནས་པ་འདི། །སྐྱེ་བོ་ཀུན་གྱིས་ཤེས་པར་བྱ། །དེ་བས་དེ་ཡི་ལན་བྱ་བ། །ཐབས་རྣམས་ཀུན་གྱིས་མི་ནུས་སོ། །ཤིན་ཏུ་དུས་ནི་རིང་ནས་ཀྱང་། །བདེ་བ་དུ་མ་དག་སྤྱད་ནས། །ངེས་པར་ལྷུང་བར་འགྱུར་བས་ན། །དེ་ལྟ་བས་ན་ཆོས་ལ་འབོད། །ཆོས་གཅིག་ཁོ་ན་སྐྱབས་ཀྱི་མཆོག །ཆོས་གཅིག་ཁོ་ན་རྟེན་གྱི་མཆོག །ཆོས་ཀྱིས་སྲོག་ནི་འཚོ་འགྱུར་ལ། །ཆོས་མ་ཡིན་པས་འཆི་བར་འགྱུར། །ཆོས་སྤྱོད་ཆོས་ལ་སྤྱོད་བྱེད་ཅིང་། །ཆོས་ཉིད་ལ་
ནི་སྟེན་བྱེད་ན། །དེ་ནི་བདེ་ལས་བདེ་འགྱུར་ལ། །སྡུག་བསྔལ་རྗེས་སུ་མཐོང་མི་འགྱུར། །ཆོས་མ་ཡིན་པར་སྤྱོད་པའི་མི། །གང་ཚེ་ཆོས་མིན་སྟེན་བྱེད་ན། སེམས་ཅན་དམྱལ་བར་དེ་རྟག་ཏུ། །ཡང་དང་ཡང་དུ་སྡུག་བསྔལ་འགྱུར། །ཇི་ཙམ་གནས་རྣམས་བསྟན་པ་ནི། །དེ་ཙམ་བརྒྱ་བྱིན་ཡུལ་ཡིན་ལ། །བརྒྱ་བྱིན་གནས་ནི་གཞན་མེད་དེ། །འདི་ལྟར་དེ་དག་ངེས་པ་ཡིན། །སུམ་ཅུ་རྩ་གསུམ་ཀུན་ནས་སུ། །གང་ན་ལྷ་རྣམས་འཆི་མེད་དང་། །ལོག་པར་ལྟུང་བའི་ལས་མེད་པ། །དེ་ནི་ཕྱོགས་འགའ་ཡོད་མ་ཡིན། །རྒྱུ་རྣམས་དུ་མར་འགྲོ་བ་དང་། སྙིང་པོ་ངེས་པ་སྣ་ཚོགས་པ། །བརྒྱ་བྱིན་ཆོས་ནི་སྟོན་བྱེད་ཀྱང་། །ལྷ་རྣམས་སྟེན་པར་མི་བྱེད་དོ། །མཁས་པ་ལས་ནི་ཀཽ་ཤི་ཀ །མཛོད་ཡིན་ཕྱིར་ན་ལུས་ཡིན་ལ། །པད་མ་ལ་ནི་དགའ་བས་ན། །སྡིག་པའང་རྣམ་པར་སྤོང་བར་བྱེད། །དེ་ནི་དམ་ཆོས་རྟག་ཏུ་འཆད། །ལྷ་རྣམས་ཀྱི་ནི་ཕ་འདྲ་ཡང་། །བག་མེད་པ་ཡིས་སེམས་འཁྲུགས་ཤིང་། །རྨོངས་པ་དེ་དག་འཛིན་མི་བྱེད། །དེ་ལྟར་ལྷ་དེ་དག་དང་བྱ་རྣམས་ཀྱིས་བརྗོད་པ་ཐོས་པར་གྱུར་དུ་ཟིན་ཀྱང་། །ངོ་བོ་ཉིད་ཀྱིས་བག་མེད་པས་ཀུན་ནས་ཕྲོགས་པའི་སེམས་ཡིན་པའི་ཕྱིར་སྐྱོ་བ་སྐྱེ་བར་ཡང་མི་འགྱུར་རོ། །དེས་དེ་དག་རྣམས་ལ་བརྩི་བགྲང་ཡང་མ་བྱས་པར་སླར་ཉིད་ཀྱང་ད་ལྟར་བའི་ཡུལ་གྱི་བདེ་བ་རྣམས་ཀྱིས་དགའ་བར་བྱེད་ཀྱི། གཞན་མཐོང་བ་ནི་མ་ཡིན་ནོ། །ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པ་སོ་སོར་མྱོང་བར་འགྱུར་བའི་ལེགས་པར་བྱས་པའི་ལས་དེ་དག་རྣམས་ཟད་པར་མ་གྱུར་པའི་དུས་དེ་སྲིད་དུ། ལྷའི་རིགས་དེ་དག་རྣམས་སུ་འདོད་པའི་ཡུལ་ལྔ་ལ་དགའ་བར་བྱེད་དོ། །ཕྱི་ནས་ནི་ལྷའི་འཇིག་རྟེན་དེ་དག་ལས་འཆི་འཕོ་བར་འགྱུར་རོ། །ཤི་འཕོས་ནས་ཀྱང་ཇི་ལྟར་ལས་ཀྱི་ཉེ་བར་འགྲོ་བར་འགྱུར་བའི་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་འཐུན་པར་གྱུར་པ་མི་རྣམས་ཀྱི་ནང་དུ་སྐྱེས་པར་གྱུར་ན། དེ་རྟག་ཏུ་ཡང་མཆོག་ཏུ་སྐྱིད་པར་འགྱུར་བ་དང་མཆོག་ཏུ་དགེ་ལེགས་དང་ལྡན་པ་དང་ལོངས་སྤྱོད་མཆོག་དང་ལྡན་པ་དང་ཤིན་ཏུ་གཟུགས་བཟང་བ་དང་། སྐྱེ་བོ་རྣམས་ཐམས་ཅད་བྱམས་པར་ཡང་ལས་དེའི་རྒྱུ་འཐུན་པས་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་
པར་སྨིན་པ་ཤེས་པ་དེ་སུམ་ཅུ་རྩ་གསུམ་པའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་པ་ན། ས་གཅིག་གི་ས་ཕྱོགས་ཀྱང་རུང་སྟེ། སུམ་ཅུ་རྩ་བཞི་པར་གྱུར་པ་ནི་དེས་མཐོང་བ་མེད་དོ། །ཇི་སྲིད་དུ་ལྷ་དང་བཅས་པའི་ས་རྣམས་ནི་སུམ་ཅུ་རྩ་གསུམ་པོ་དེ་དག་ཙམ་དང་ལྡན་པ་ཡིན་གྱི་འདི་དག་རྣམས་ཀྱི་ས་གཞན་འགའ་ཞིག་ཀྱང་ཡོད་པ་ནི་མ་ཡིན་ནོ། །བརྒྱ་བྱིན་ཡང་དེ་སྙེད་ཅིག་ལ་ནུས་པ་དང་ལྡན་པ་ཡིན་ཞིང་དེ་ཙམ་ལ་སྟོབས་དང་ལྡན་པ་ཡིན་ནོ། །དེ་དག་ལས་དགའ་བར་འགྱུར་བ་གཞན་ནི་མེད་དོ། །འདིས་དང་པོར་ལྷའི་རིས་འདི་དག་རྣམས་ལ་ཀུན་དུ་ལྟ་བར་བྱེད་དེ། རྒྱུ་དང་འབྲས་བུ་ཆ་འདྲ་བར་རྗེས་སུ་འབྲེལ་བར་ལས་ཀྱི་འབྲས་བུ་མཐོང་བ་དང་ཡང་དག་པར་ལྡན་པ་དེ་ས་རྣམས་ཐམས་ཅད་སོ་སོ་སོ་སོ་ལ་ཡང་ཀུན་དུ་བལྟས་ནས། འཁོར་བ་ལ་ཀུན་ནས་ཡིད་འབྱུང་བར་འགྱུར་ཏེ། འཆི་འཕོ་དང་སྐྱེ་བ་དང་སྡུག་པ་རྣམས་དང་རྣམ་པར་འབྲལ་བ་དང་མི་འཐུན་པ་རྣམས་དང་ཀུན་དུ་ཕྲད་པ་དང་། རྒ་བ་དང་། ན་བ་དང་། འཆི་བ་རྣམས་ཀྱི་ངམ་གྲོག་ཏུ་གྱུར་པ། ཤིན་ཏུ་ཉམ་ང་བའི་འཇིགས་པ་དུ་མ་རྣམས་ལ་ངེས་པར་ཞུགས་པ་ཡིན་པར་མངོན་དུ་ལེགས་པར་མཐོང་བའི་ཕྱིར་རོ། །རྣམ་པ་གཅིག་ལ་ཡང་སྡུག་བསྔལ་གྱི་ཆུ་བོ་དུ་མ་རྣམས་ཡིན་ཞིང་སྲེག་བཞིན་པ་རྣམས་ཀུན་ནས་མངོན་པར་མཐོང་བས་ངེས་པར་སྐྱོ་བ་སྐྱེ་བ་ཡིན་ཏེ། ཀྱེ་མ་བདག་ཅག་གི་འཇིག་རྟེན་ནི་ཤིན་ཏུ་ཉམ་ཐག་པ་ལ་ཞུགས་ནས་བགྲོད་པ་ཡིན་ནོ། །འདི་ལྟ་སྟེ་སྐྱེ་བ་དང་རྒ་བ་དང་ན་བ་དང་། འཆི་བའི་འཇིགས་པའི་ངམ་གྲོག་རྣམས་སུ་བྱིང་བར་གྱུར་ཏོ། །འོན་ཀྱང་ཀུན་དུ་རྟོགས་པ་ཡང་མ་ཡིན་ནོ། །འཁོར་བ་ལས་ནི་ངེས་པར་འབྱུང་བར་བྱ་བའི་ཐབས་ཀྱང་ཡོད་པ་མ་ཡིན་ནོ། །གང་དག་བདེ་བ་དང་། རྟག་པ་དང་། བརྟན་པ་དང་། ཐེར་ཟུག་དང་། ཡོངས་སུ་མི་འགྱུར་བར་གྱུར་པ་ཡང་ཅུང་ཟད་ཀྱང་ཡོད་པ་མ་ཡིན་ལ། བྱིས་པ་རྣམས་ནི་ཕལ་ཆེར་རྨོངས་པའི་ཕྱིར་ན། ཀུན་དུ་རིག་པ་ཡང་མ་ཡིན་པས་ལུས་ཀྱི་དོན་དུ་ཉེས་པར་སྤྱད་པ་མང་པོ་རྣམས་རབ་ཏུ་འབྱིན་པར་བྱེད་དོ། །འོན་ཀྱང་ལུས་ནི་རྣམ་པར་འཇིག་པར་འགྱུར་བ་ཡིན་ནོ། །ཉེས་པར་སྤྱོད་པའི་ལས་དེ་དག་རྣམས་ནི་ཕྱི་བཞིན་ཁོ་ནར་རྗེས་སུ་འབྲེལ་བར་འགྱུར་བ་ཡིན་ནོ། །དེ་ནས་དེའི་ཚེ་ན་དགེ་སློང་དེས་ཚིགས་
སུ་བཅད་པ་བརྗོད་པ་ཇི་ལྟར། མལ་ཆ་སྟན་སོགས་བསྙེན་བཀུར་གྱིས། །མ་ལུས་བཅོམ་པར་གྱུར་པ་ཡང་། །བདག་གིར་བྱེད་མཁན་བདག་ལུས་ལས། །ནམ་ཡང་འགའ་ཞིག་གིས་བྱས་མིན། །བྱས་པ་ཆུད་གཟོན་མི་བཟད་པ། །རྟག་པར་གླགས་ནི་ཚོལ་བྱེད་པའི། །ལུས་པོ་དགྲ་བོའི་དོན་དུ་ནི། །མཁས་རྣམས་སྡིག་པ་ག་ལ་བྱེད། །ནང་གི་ཚང་དང་དོན་མེད་པ། །མང་པོ་རྣམས་ནི་རྟག་འབྱེད་ཅིང་། །མི་གཙང་ཕུང་པོར་གྱུར་པ་ལ། །ལུས་ཞེས་མངོན་པར་བརྗོད་པ་ཡིན། །འཆི་བ་ཉེ་བར་གནས་པ་བཞིན། །དེ་ཉིད་སྤྱོད་པ་པོར་རིག་བྱ། །གསོན་པ་སྐད་ཅིག་ལས་གོང་དུ། །འགྲོ་བ་མེད་ཅིང་འགག་པ་དང་། །སྐད་ཅིག་རེ་རེར་ལུས་འདི་ནི། །རྙིང་པར་འགྱུར་ཞིང་སླར་ལྡོག་མེད། །དེ་ལྟ་ན་ཡང་སེམས་མེད་པའི། །བྱིས་པ་ལང་ཚོའི་རྒྱགས་པས་བསླུས། །ནོར་སྟོང་རྒྱགས་པས་དྲེགས་པ་ཡིས། །བདག་ལ་ཕན་པ་མིན་རྣམས་བྱེད། །དེ་ནི་འཆི་བར་ཉེར་ཕྱོགས་ན། །དེ་བཞིན་དེ་ཡང་སྡིག་པས་སྲེག །གང་ལ་རྟག་པར་སྦྱིན་གཏོང་དང་། །ཉེར་ལོངས་སྤྱོད་པའི་སེམས་མེད་པའི། །ནོར་དེ་འཇུངས་པས་ཡོངས་བསྲུངས་ནས། །དེ་དག་ཆུད་ནི་འཛའ་བ་ཡིན། །གང་ཞིག་དམ་པའི་སེམས་ཀྱིས་ཟ། །བླ་མ་རྣམས་ལའང་སྦྱིན་བྱེད་པའི། །ནོར་དེ་རྣམས་ནི་མཛེས་པར་མཐོང་། །བཟློག་པ་རྣམས་ནི་རྩྭ་དང་མཚུངས། །སྦྱིན་པ་དྲི་མ་མེད་སྦྱིན་ན། །འཇིག་རྟེན་འདི་དང་ཕ་རོལ་དུའང་། །ནོར་དེ་ཉམ་ཆུང་རྣམས་ཀྱི་སྟོབས། །དམུས་ལོང་རྣམས་ལ་མིག་བཞིན་ནོ། །ཚུལ་ཁྲིམས་རྣམ་བདུན་བཟང་པོ་སྟེ། །གོ་འཕང་སླུ་བ་མེད་པ་ཡིན། །ཚུལ་ཁྲིམས་ཀྱིས་ནི་བསྲུངས་གྱུར་པའི། །སྐྱེས་བུ་ལྷ་ཡི་ནང་དུ་འགྲོ། །མཆོག་ཏུ་རྒྱ་ཆེའི་ཤེས་ལྡན་པ། །རྟག་ཏུ་ཉོན་མོངས་འཇོམས་ལ་དགའ། །དེས་ན་འཆི་བ་ཀུན་བཅད་ནས། །འཕོ་བ་མེད་པར་འགྲོ་བ་ཡིན། །སྲིད་མཚོ་ཤིན་ཏུ་འཇིགས་ཆེན་ལ། །དེ་ལྟར་ས་ཟམ་དེ་དག་མཐོང་། །བཞོན་པ་དེ་དག་ལ་ཞོན་པས། །སེམས་ལྡན་ཕ་རོལ་ཕ་རོལ་སྒྲོལ། །དེ་ལྟར་སྦྱིན་པ་དང་ཚུལ་ཁྲིམས་དང་ཤེས་རབ་རྣམས་ཀྱི་འབྲས་བུ་མངོན་པར་ཤེས་པར་འགྱུར་བ་དེ་ཁོ་ན་ཉིད་མཐོང་བ་དང་ལྡན་པ་རབ་ཏུ་འགྲོ་བར་འདོད་པའི་དགེ་སློང་དེས། དེ་དག་རྣམས་ལེགས་པར་མངོན་པར་མཐོང་བ་ཡིན་ནོ། །ཇི་ལྟར་དགེ་སློང་དེས་གཞན་བཅྭ་བརྒྱད་པ་འདི་ལ་ཀུན་དུ་གནས་ནས་འཁོར་བ་རྣམས་ཐམས་ཅད་ངེས་པར་ཡིད་འབྱུང་ངོ་། །མྱ་ངན་ལས་འདས་པ་ལ་སྤྱོད་པར་
འགྱུར་རོ། །བདུད་ཀྱི་ཡུལ་ལ་འདོད་པར་མི་འགྱུར་རོ། །གཞི་དེ་དག་རྣམས་རིག་པར་གྱུར་ནས་ཀྱང་ས་བླ་པའི་ལྷ་རྣམས་ཀྱིས་བར་སྣང་ལ་རྒྱུ་བའི་ལྷ་རྣམས་ལ་མངོན་དུ་ཤེས་པར་བྱེད་དོ། །དེ་དག་རྣམས་ཀྱིས་ཀྱང་འཇིག་རྟེན་སྐྱོང་བར་བྱེད་པ་བཞི་པོ་རྣམས་ལའོ། །དེ་དག་གིས་ཀྱང་རྒྱལ་ཆེན་རིགས་བཞི་པ་རྣམས་ལའོ། །དེ་དག་གི་རྣམས་ཀྱིས་ཀྱང་སུམ་ཅུ་རྩ་གསུམ་པ་རྣམས་ལའོ། །དེ་དག་རྣམས་ཀྱིས་ཀྱང་འཐབ་བྲལ་བ་རྣམས་ལའོ། །དེ་ལྟར་ཇི་སྲིད་དུ་འོད་གསལ་བ་རྣམས་ཀྱི་བར་དུ་ཀུན་ཏུ་རིག་པར་བྱེད་དོ། །སུམ་ཅུ་རྩ་གསུམ་པ་རྣམས་ཀྱི་ས་རྣམས་རྫོགས་སོ།། །།སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ལས་ཀྱི་འབྲས་བུ་དང་བཅས་པའི་འཐབ་བྲལ་བ་རྣམས་དང་། འཇིག་རྟེན་སྐྱོང་བ་རྣམས་གང་ཡིན་པ་དེ་ནི་རྟག་ཏུ་རྒྱུ་དང་འབྲས་བུ་ལས་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། སྤྲོ་བ་མི་ལྡོག་པའི་སུམ་ཅུ་རྩ་གསུམ་པ་རྣམས་ལ་ཀུན་དུ་ལྟ་བ་ནི་སུམ་ཅུ་རྩ་གསུམ་གྱི་ལྷ་རྣམས་ཀྱི་སྟེང་གི་ལྷ་གཟི་བརྗིད་དང་བརྩོན་འགྲུས་དང་སྤྲོ་བ་དང་འོད་དང་ཚེ་ཚད་ཀྱིས་ལྷག་པར་གནས་པ་རྣམས་སུ་ཡིན་ན། ཇི་ལྟར་སུམ་ཅུ་རྩ་གསུམ་པའི་ལྷ་རྣམས་ལས་སྔོན་གྱི་ཐབས་ཀྱིས་ཆེས་ཁྱད་པར་དུ་འཕགས་པར་གྱུར་པ་ལས་ཀྱི་ཆོས་ཀྱི་རྣམ་པར་སྨིན་པ་ཆེས་བླ་ལྷག་པ་ནི་འཐབ་བྲལ་བ་ཞེས་བྱ་བ་ཡིན་པར་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་ངོ་། །དེ་ལྟར་ཡང་ཚུལ་ཁྲིམས་རྣམ་པ་སྣ་ཚོགས་ཀྱིས་དེར་སྐྱེས་ཏེ། སྲོག་གཅོད་པ་མ་བྱིན་པར་ལེན་པ་འདོད་པ་ལོག་པར་གཡེམ་པ་རྣམ་པར་སྤངས་ཤིང་ལེགས་པར་བསྒོམས་ལ། མ་ཉམས་པ། མ་རལ་བ། མ་ཟགས་པ། བརྟན་པ། འཕགས་པའི་སྐྱེ་བོ་ཐམས་ཅད་དགྱེས་པ་རྟག་ཏུ་ཚུལ་ཁྲིམས་ཀྱི་རྣམ་པར་སྨིན་པ་དང་ལྡན་པས་དེའི་རྗེས་ཐོགས་སུ་མྱ་ངན་ལས་འདས་པའི་གྲོང་ཁྱེར་དུ་འགྲོ་བའི་རྩ་ལག་ཏུ་གྱུར་པ་འཁོར་བའི་རྒྱ་མཚོའི་ཟམ་པར་གྱུར་པའི་ཚུལ་ཁྲིམས་ཀྱི་ཟམ་པ་དེ་ལ་ཞོན་པ་སྲིད་པའི་རྒྱ་མཚོའི་ཕ་རོལ་དུ་སྒྲོལ་བའི་རྣལ་འབྱོར་པ་དེ་ཁོ་ན་ཉིད་སེམས་པ་པོ་རང་གི་ཚུལ་ཁྲིམས་རྣམ་པ་བདུན་དང་ལྡན་པའི་དམན་པ་དང་བར་མ་དང་ཁྱད་དུ་འཕགས་པ་ནི་སྔ་མ་བཞིན་ཏེ། ལས་དང་ཆོས་ཀྱི་རྣམ་པར་སྨིན་པའི་འཐབ་བྲལ་གྱི་ལྷ་རྣམས་ལ་འདི་ལྟ་སྟེ། རིའི་རྒྱལ་པོ་རི་རབ་ལྷུན་
པོའི་དྲུང་ན་འཐབ་བྲལ་གྱི་ལྷ་རྣམས་ཇི་ཙམ་གྱིས་འཕང་དུ་མཐོ་བ་དང་། དབྱིབས་ཅི་ལྟ་བུ་དང་གཟི་བརྗིད་ཅི་ལྟ་བུ་དང་མཐོ་བའི་གནས་ཀྱིས་ཁྱད་པར་ཅི་ལྟ་བུས་རབ་ཏུ་གནས་པ་དང་། འཐབ་བྲལ་གྱི་ལྷ་རྣམས་ཀྱིས་རྣམས་ཀྱང་ཅི་ཙམ་ཅིག་ཡོད་པ་ཡང་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་སྟེ་ཅི་ལྟར་སྲོག་གཅོད་པ་དང་། མ་བྱིན་པར་ལེན་པ་དང་འདོད་པས་ལོག་པར་གཡེམ་པ་རྣམ་པར་སྤོང་བ་བསྟེན་ཅིང་བསྒོམས་ལ་ལན་མང་དུ་བྱས་ཤིང་གཞན་རྣམས་ལ་ཡང་བསྟན་ཅིང་བཀོད་ལ། རང་དང་གཞན་ལ་ཕན་པ་ལ་རབ་ཏུ་ཞུགས་པའི་སེམས་ཅན་རྣམས་ཀྱིས་གནས་དེ་འཐོབ་བོ། །དེའི་འཕང་དུ་མཐོ་བ་ལ་ཀུན་དུ་ལྟ་བར་བྱེད་པ་ན་ཇི་ལྟར་དྲུག་ཅུ་རྩ་བརྒྱད་ཀྱིས་ལྷག་པའི་དཔག་ཚད་སྟོང་ཕྲག་བརྒྱར་མཐོ་བར་འཇུག་པ་ཡིན་ཏེ། འཐབ་བྲལ་ནི་ལྷུན་པོ་ལས་ཉིས་འགྱུར་གྱི་ཚད་ཀྱིས་མཐོ་བ་དེ་དག་གིས་ཇི་སྙེད་ཅིག་ཡོད་པ་དེས་ཇི་ལྟ་བ་བཞིན་དུ་ས་རྣམས་མཐོང་བ་ནི་ས་རྣམས་ཀྱང་ཉི་ཤུ་རྩ་བདུན་ཏེ། དཔག་ཚད་སྟོང་ཕྲག་ལྔར་འཐབ་བྲལ་དེ་ནམ་མཁའ་ལ་ཀུན་དུ་གནས་ཏེ་སྤྲིན་བཞིན་དུ་ཉེ་འཁོར་རླུང་གིས་འདེགས་སོ། །ཇི་ལྟར་ས་འདི་འདེགས་པ་རྩ་བ་ནས་རླུང་གིས་དང་ཆུས་ཀྱང་འཛིན་ནོ། །ཆུ་ཀླུང་གིས་འཛིན་ནོ། །དེ་ཁོ་ན་བཞིན་དུ་རླུང་འཁྲིགས་པ་ཞེས་བྱ་བས་ཕྱོགས་གཅིག་ནས་གང་གིས་འཐབ་བྲལ་གྱི་ལྷ་རྣམས་ཀྱི་ཕུང་པོ་སྤྲིན་དང་འདྲ་བར་འདེགས་པའི་ས་ཉི་ཤུ་རྩ་བདུན་དུ་འགྱུར་བ་ནི་འདི་ལྟ་སྟེ། རབ་ཀྱི་ཤུགས་ཀྱི་བདག་དང་། རྒྱུན་གནས་ན་རྣམ་པར་རྒྱུ་བ་དང་། བརྩེགས་པ་རྒྱུ་བ་དང་། ཡིད་ཀྱི་རྒྱན་དང་། རབ་ཏུ་རྣམ་པར་འདྲེས་པའི་ཁོར་ཡུག་ན་རྒྱུ་བ་དང་། རླུང་རྒྱུ་བ་དང་། རབ་ཏུ་མཐོ་བ་དང་། འབྲས་བུ་དང་ལྡན་པ་དང་། གཅིག་ཏུ་དགའ་བ་དང་། འགྲོ་བ་དང་ཡང་དག་པར་ལྡན་པ་དང་། འོད་ཟེར་བརྒྱ་འཕྲོ་བ་དང་། བསྡམས་པར་རྒྱུ་བ་དང་། རྟག་ཏུ་བདེ་བ་དང་། བདེ་བ་རབ་ཏུ་འཕེལ་བ་དང་ལྡན་པ་དང་། རིའི་ཚོགས་ན་རྒྱུ་བ་དང་། རྣམ་པ་སྣ་ཚོགས་པར་རྣམ་པར་བཀྲ་བ་དང་། ཟླ་བ་མཐོང་བར་འདོད་པའི་ཚལ་དང་། ཁོར་ཡུག་ལ་གནས་པ་དང་། བསམ་གཏན་སྒྲའི་བྱ་བས་དབེན་པ་དང་། ང་རྒྱལ་ལྡོག་པ་དང་། འཇུག་པའི་སྤྱོད་པ་དང་། ཚོགས་པ་རྒྱུ་བ་ན་རྣམ་པར་རྒྱུ་བ་དང་། རང་གི་ཡུལ་བར་རྒྱུ་བ་དང་། རང་ལུས་ཀྱི་རྒྱགས་པ་དང་། ང་རྒྱལ་རྟགས་ཀྱི་གཟི་བརྗིད་དང་། སྐྱེད་མོས་ཚལ་གྱི་མཆོག་དང་། ནགས་ཚལ་གྱི་འོད་ཟེར་ཞེས་བྱ་བ་སྟེ་ས་ཉི་ཤུ་རྩ་བདུན་པོ་དེ་དག་གོ། །།
འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་བཅུ་ལྔ་པ། དེ་རྣམས་སུ་འཐབ་བྲལ་གྱི་ལྷ་རྣམས་ཀྱི་མངའ་བདག་མུ་སུ་ལུན་དྷ་ཞེས་བྱ་བ་རྒྱལ་སྲིད་བྱེད་པ་ནི་ཇི་ལྟར་རྒྱལ་ཆེན་རིགས་བཞི་དང་སུམ་ཅུ་རྩ་གསུམ་པ་རྣམས་ཀྱི་བརྒྱ་བྱིན་ཡིན་པ་དེ་ལྟར་མུ་སུ་ལུན་དྷ་འཐབ་བྲལ་བ་རྣམས་ཀྱི་མངའ་བདག་ཡིན་ཏེ་ཆོས་ལ་ཆོས་ཀྱི་རྗེས་སུ་འཇུག་པ་བརྒྱ་བྱིན་པས་སྟོང་འགྱུར་གྱིས་ཆོས་དང་ཆེ་བ་དང་བདེ་བས་མཐོ་བ་དེའི་ལུས་ཀྱི་ཚད་ནི་དཔག་ཚད་ལྔ་པ་འོད་ཀྱི་རང་བཞིན་ནོ། །བརྒྱ་བྱིན་ནི་རྒྱང་གྲགས་གཅིག་ཡིན་པར་འདོད་དོ། །འཐབ་བྲལ་བ་རྣམས་ཀྱི་རྒྱལ་པོ་བྱེད་པ་རྒྱལ་པོ་མུ་སུ་ལུན་དྷ་ནི་ཀཽ་ཤི་ཀ་ལས་ཁྱད་པར་དུ་འཕགས་ཏེ་དེའི་ལུས་གཅིག་གི་ལུས་ཀྱི་ཡན་ལག་དེ་ཡང་བརྒྱ་བྱིན་སྟོང་གིས་ཀྱང་བསྒྲུན་དུ་མེད་དེ། རྒྱུའི་ཁྱད་པར་གྱིས་འབྲས་བུ་ཡང་ཁྱད་པར་དུ་བྱས་པའི་ཕྱིར་རོ། །དེ་ལྟར་གྱུར་པ་ཡང་འདིར་ཇི་ལྟ་བར་དགེ་སློང་གིས་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར་ཁུ་རུ་ཆུང་བའི་གྲུ། །འཕྱོ་ཞིང་གཏིང་དུ་མི་ནུབ་པ། །དེ་བཞིན་སྡིག་ཆུང་སྐྱེས་བུ་ནི། །སྟེང་ནས་གཏིང་དུ་འབྱིན་པ་མིན། །ཇི་ལྟར་ལྗོན་ཤིང་བརྟན་འགྱུར་ལྟར། །ལྷ་ཡི་འཇིག་རྟེན་འདི་ཡང་ཡིན། །དེ་ལྟར་དགེ་སློང་དེ་འཐབ་བྲལ་གྱི་ལྷ་རྣམས་ཀྱི་ལས་དང་འབྲས་བུའི་རྒྱུ་རྐྱེན་གྱིས་བདེ་བ་ཐོབ་པའི་བྱ་བ་ལ་རྣམ་པར་ལྟ་བར་བྱེད་པ་ནི་འཐབ་བྲལ་གྱི་ལྷ་རྣམས་ན་རི་ཆེན་པོ་བཞིར་ཇི་ལྟ་བར་དེས་མཐོང་སྟེ། རི་ཐམས་ཅད་ཀྱང་དཔག་ཚད་སྟོང་ཕྲག་བཅུ་པའོ། །དེ་ལ་རི་རྣམས་ཀྱི་མིང་ནི་འདི་ཡིན་ཏེ། འདི་ལྟ་སྟེ་རབ་ཏུ་གཙང་བ་དང་རབ་ཏུ་དང་བ་དང་རབ་ཏུ་དང་བ་ཆེན་པོ་དང་བར་ཡངས་པ་ཞེས་བྱ་བ་དང་སྟེ་རི་ཆེན་པོ་དེ་རྣམས་སོ། །ས་གཞན་གྱི་རི་ནི་མ་གཏོགས་པའོ། །རི་རྣམས་ཀྱང་རྣམ་པ་དུ་མར་ཁ་དོག་དང་དབྱིབས་དུ་མ་ལས་ཡོན་ཏན་དུ་མའི་བདག་ཉིད་ཆེན་པོ་འཛིན་པའི་རི་སྟོང་ཕྲག་དུ་མ་ལྷའི་མེ་ཏོག་དང་ལྡན་པ་ཉེ་འཁོར་འཐབ་བྲལ་བའི་ལྷས་ཀུན་དུ་གང་བའོ། །དེ་ལས་ཉི་ཤུ་རྩ་བདུན་པོ་རྣམས་ལ་རྣམ་པ་སྣ་ཚོགས་པའི་རིས་གང་བ་སྣ་ཚོགས་པའི་འབབ་ཆུ་དང་། ཆུ་ཀླུང་དང་རྫིང་བུ་དང་ཉེ་བའི་ནགས་དང་ཤིང་བརྒྱ་སྟོང་ཕྲག་དུ་མས་ཁྱབ་པ་
དབྱིབས་དང་དྲི་དང་ཁ་དོག་དང་རོ་དུ་མར་བྱ་བ་ཕུན་སུམ་ཚོགས་པ་ལྗོན་ཤིང་དང་པད་མའི་མཚེའུ་རྣམ་པ་དུ་མ་གང་གི་ཁྱད་པར་གྱི་སུམ་ཅུ་རྩ་གསུམ་པ་རྣམས་ཀྱི་རི་དང་ཆུ་ཀླུང་དང་། རྫིང་བུ་དང་ནགས་དང་ཉེ་བའི་ནགས་དེ་དག་དེ་བཞིན་དུ་ཆུང་ཟད་ཀྱང་ཁྱད་པར་མེད་པ་ནི་ཇི་ལྟར་མིའི་ཤིང་དང་ཆུ་ཀླུང་དང་རྫིང་བུ་དང་། ནགས་དང་ཉེ་བའི་ནགས་ཀྱི་དགའ་བ་དེ་ལྟར་སུམ་ཅུ་རྩ་གསུམ་པ་རྣམས་ཀྱི་དགའ་བ་ཡང་ཁྱད་པར་མེད་དོ། །འཐབ་བྲལ་བ་རྣམས་དང་གང་ཅུང་ཟད་ཁྱད་པར་གྱི་རྒྱུ་ནི་རྒྱུ་འབྲས་མང་བ་ཉིད་དོ། །དེ་ནི་ལེགས་པར་བྱས་པའི་བསོད་ནམས་དུ་མའི་རྒྱུ་འཐུན་པའི་ལས་དེའི་འབྲས་བུའོ། །གང་ཡང་དགེ་བའི་ལས་ཀྱི་སྤྲུལ་པ་དེ་ནི་བརྗོད་པར་ནུས་པ་མ་ཡིན་ནོ། །ལས་སྣ་ཚོགས་ཀྱི་རྒྱུ་འཐུན་པ་ལས་བྱུང་བ་རྒྱུ་གང་གིས་ངེས་པར་སྟོན་པ་ཡང་དེ་སེམས་ཅན་ཐམས་ཅད་ཀྱིས་བརྗོད་པར་ནུས་པ་ཡང་མ་ཡིན་ཏེ། །རྒྱུའི་མིང་ཡང་མེད་པའི་ལས་རྣམས་ལས་བྱུང་བ་དེ་སེམས་ཅན་ཐམས་ཅད་ཀྱིས་བརྗོད་པར་མི་ནུས་པའི་ཕྱིར་རོ། །གང་གི་ཕྱིར་ལས་རྣམས་ཀྱི་རྒྱུའི་ཚད་ཀྱི་མིང་མེད་པའི་ཕྱིར་རོ། །གང་གིས་སྐལ་བ་མཚུངས་པར་གྱུར་པ་ལྷའི་རྫས་དང་ཡང་དག་པར་རབ་ཏུ་ལྡན་པར་གྱུར་པ་དེ་རྣམས་ཀྱི་བརྒྱ་སྟོང་གི་ཕྱོགས་གཅིག་ཕལ་ཆེར་བདག་གིས་འདིར་བརྗོད་དེ། རྒྱུ་གང་གིས་ཚུལ་ཁྲིམས་མི་སླུ་བ་ཡིན་པའི་གོ་སྐབས་ཀྱི་འབྲས་བུ་དེ་ཅི་ནས་ཀྱང་བསྟན་པར་བྱ་བ་ཡིན་ཏེ། རྒྱུ་གང་གི་ཕྱིར་ན་ཚུལ་ཁྲིམས་སྤྱོད་པ་དེ་དག་རབ་ཏུ་སྤྲོ་བ་སྐྱེད་པ་ཡིན་ལ་གང་ཡང་ཡེ་ཤེས་དང་ལྡན་པ་དེ་དག་བཅུ་འགྱུར་གྱིས་རབ་ཏུ་སྤྲོ་བར་བྱེད་དེ། རྒྱུ་གང་གིས་ཚུལ་ཁྲིམས་དང་ཤེས་རབ་དག་ཁྱད་པར་ཆེན་པོ་ཡོད་པའི་ཕྱིར་ཏེ། ཚུལ་ཁྲིམས་ཀྱིས་ནི་ལྷར་སྐྱེ་ལ་ཤེས་རབ་ཀྱིས་ནི་མྱ་ངན་ལས་འདས་པ་ཐོབ་པ་ཡིན་པས། དེ་ལྟར་ཚུལ་ཁྲིམས་ཀྱི་ཡོན་ཏན་བརྗོད་ན་ཤེས་རབ་ཅན་རྣམས་འདི་སྙམ་དུ་སེམས་ཏེ། ཚུལ་ཁྲིམས་གང་ལ་རྣམ་པ་འདི་ལྟ་བུའི་འབྲས་བུ་འབྱུང་ན་ཤེས་རབ་ཀྱིས་བདག་ཅག་ལ་ཅིར་ཡང་འགྱུར་རོ་ཞེས་སོ། །གཞན་ཡང་རབ་ཏུ་སྤྲོ་བ་བསྐྱེད་པས་ཤེས་རབ་རྩོམ་པའི་རྩོལ་བ་བྱེད་ལ་བྱས་པས་ཀྱང་སྲིད་པ་ལ་ཆགས་པའི་བསྔགས་པར་མི་འགྱུར་རོ། །གཞན་ཡང་རྒྱུ་མཚན་
གཞན་གྱིས་ཀྱང་སྟེ་ཇི་ལྟར་གང་ལ་རྣམ་པ་འདི་ལྟ་བུར་ཡུན་རིང་དུ་གནས་པ་གནོད་པ་ཉུང་བ་རྣམས་ལ་ཡང་རྣམ་པར་འཇིག་པ་འབྱུང་ན། གང་ཡང་མི་རྣམས་བརྒྱལ་བའི་འདོད་པ་ནི་ཉེས་དམིགས་དང་ལྡན་པ་དང་མནོག་ཆུང་བ་གཡོ་བ་ཉེ་བར་འཚེ་བ་ཐུན་མོང་བ་རྒྱ་ཆེན་པོ་དང་། ཆོམ་རྐུན་དང་ཆུ་དང་རྒྱལ་པོའི་ཆད་པ་ལ་སོགས་པའི་རྒུད་པ་དུ་མ་ཐབས་མ་ཡིན་པའི་གཞིར་གྱུར་པ་ལ་ལྟ་སྨོས་ཀྱང་ཅི་དགོས། དེས་ན་རྒྱུ་འདིས་ཀྱང་མཐོ་རིས་ཀྱི་གཏམ་མངོན་པར་བརྗོད་དོ། །གཞན་ཡང་རྒྱུ་མཚན་འདིས་ཡིན་ཏེ་གང་དག་རྫུ་འཕྲུལ་ཆེན་པོ་དང་ལྡན་པ་རྣམས་འདི་ལྟར་རྒྱུ་གཞན་ནི་ཅི་ཡང་མེད་ཀྱིས་དབང་ཕྱུག་གིས་སྤྲུལ་པའོ་སྙམ་དུ་སེམས་པ་དེ་དག་གིས་སྤྲུལ་པ་འགག་པར་བྱ་བའི་དོན་དུ་འབྲས་བུ་བཤད་དེ། རྒྱུ་མེད་པར་སྐྱེ་བར་འགྱུར་བའི་ལས་རྣམས་ཀྱི་འབྲས་བུ་ནི་ཡོད་པ་མ་ཡིན་ནོ། །གཞན་གྱི་བཀའ་དྲིན་གྱིས་དང་རྒྱུ་འབྲས་དག་འདོད་རྒྱལ་བ་མ་ཡིན་གྱིས་འདྲ་བ་ཡིན་ནོ། །གཞན་གྱི་རྒྱུ་གཞན་དུ་འགྱུར་བ་མ་ཡིན་ནོ། །ལེགས་པར་བྱས་པའི་ལས་རྒྱུར་གྱུར་པས་དམྱལ་བར་སྐྱེ་བར་འགྱུར་བ་ནི་མེད་དོ། །མཛེས་པ་མ་ཡིན་པའི་ལས་རྒྱུར་གྱུར་པས་མཐོ་རིས་སུ་སྐྱེ་བར་འགྱུར་བ་ནི་མེད་དོ། །དེས་ན་དེ་ལྟར་རྒྱུ་འབྲས་ཀྱི་གཞིར་གྱུར་པས་ནི་སྦྱིན་པ་དང་ཚུལ་ཁྲིམས་དང་ཤེས་རབ་དང་བསྒོམ་པ་དང་ངེས་པ་ལ་གནས་པའི་ངོ་བོའི་ལས་རྣམས་ཀྱི་མཐོ་རིས་ཀྱི་གཏམ་འདི་ཡིན་ནོ། །གཉིས་དག་གི་གཏམ་བྱ་བར་མི་ནུས་ཏེ་བདེ་བ་དང་སྡུག་བསྔལ་གཉིས་ཀྱིའོ། །དམྱལ་བའི་སྡུག་བསྔལ་དང་ལྷ་རྣམས་ཀྱི་བདེ་བའོ། །དེ་ལས་འདི་ནི་དེའི་ཕྱོགས་གཅིག་གི་ལས་རྣམས་ཀྱི་དཔེ་བརྗོད་པ་ཡིན་ནོ། །གཞན་ཡང་དགེ་སློང་ལས་དང་འབྲས་བུའི་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་པ་ན། །དེས་ཐོས་པ་ལས་བྱུང་བའི་རང་བཞིན་གྱི་ཤེས་རབ་ཀྱིས་འཐབ་བྲལ་བ་རྣམས་ཀྱིས་རབ་ཀྱི་ཤུགས་ཞེས་བྱ་བ་ཇི་ལྟ་བ་བཞིན་དུ་ཡོད་པ་མཐོང་ངོ་། །དེར་ལས་གང་གིས་སེམས་ཅན་སྐྱེ་བ་ཡང་དེས་ཐོས་པ་ལས་བྱུང་བའི་རང་བཞིན་གྱི་ཤེས་རབ་ཀྱིས་མཐོང་བ་ནི་ཇི་ལྟར་སྐྱེས་བུ་དམ་པ་གང་གིས་ཚུལ་ཁྲིམས་
ལ་སྤྱོད་པ་དང་། ཁ་ན་མ་ཐོ་བ་ཅུང་ཟད་ཙམ་ལ་ཡང་འཇིགས་པར་ལྟ་བ་དང་སེམས་དྲང་བ་དང་དྲང་པོའི་རང་བཞིན་ཅན་དང་གཡོ་མེད་པ་དང་གཞན་གདུང་བར་མི་བྱེད་པ་དང་། ཡང་དག་པའི་ལྟ་བ་ཅན་ཡང་དག་པའི་ལྟ་བ་སྔོན་དུ་བཏང་བས་རྟག་ཏུ་ཡང་རྨོངས་པ་མ་ཡིན་པའི་བློས་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པར་འཇིག་རྟེན་འདི་ལ་ལྟ་བ་སངས་རྒྱས་དང་ཆོས་དང་དགེ་འདུན་རྣམས་རྗེས་སུ་དྲན་པ་ལ་ཞུགས་པ་སྲོག་གཅོད་པ་དང་མ་བྱིན་པར་ལེན་པ་སྲུང་བར་གྱུར་པ་ནི་སྔ་མ་བཞིན་ནོ། །འདོད་པ་ལོག་པར་གཡེམ་པ་ཡང་མི་སྟེན་ཏེ། ཡིད་ལས་བྱས་ནས་བྱུང་བ་ནི་ཇི་ལྟར་གཞན་དང་ལྡན་པས་ཀུན་དུ་ལྡན་ནས་འཁྲིག་པས་རྟག་ཏུ་མངོན་པར་ཞེན་ཅིང་ཀུན་ནས་རབ་ཏུ་འཇུག་པ་འདི་ནི་འདོད་པ་ལ་ལོག་པར་གཡེམ་པར་བརྗོད་དོ། །སྐྱེས་བུ་དམ་པ་དེས་དེ་ལྟར་ཐོས་ནས་གལ་ཏེ་གཞན་དང་ལྡན་པས་ཀུན་ནས་ལྡན་པ་མཐོང་ན་དེ་ལ་མི་སེམས་ཀུན་དུ་མི་རྟོག་ཡིད་ལ་མི་བྱེད་དོ། །ཡང་གང་དག་གིས་སེམས་ཤིང་ཀུན་དུ་རབ་ཏུ་རྟོག་པར་བྱེད་པ་དེ་དག་ཀྱང་རབ་ཏུ་འགོག་པར་བྱེད་ཅིང་དེ་དག་ལ་ཡང་ལས་ཀྱི་འབྲས་བུ་ཉེ་བར་སྟོན་པར་བྱེད་དེ། ཁྱོད་ཀྱང་མ་བྱེད་ཅིག་དེས་དམྱལ་བར་སྐྱེ་བར་འགྱུར་བས་མ་བྱེད་ཅིག་ཅེས། དེ་ལྟར་ལས་དང་འབྲས་བུའི་དེ་ཁོ་ན་ཉིད་སྟོན་པ་པོ་གཞན་གྱིས་མི་འཕྲོགས་པ་གཞན་གྱིས་མི་བཀྲི་བ་དེ་ནི་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་གྱི་འཐབ་བྲལ་གྱི་ལྷ་ལས་འཐབ་བྲལ་གྱི་ས་རབ་ཀྱི་ཤུགས་ཀྱི་ལྷ་རྣམས་ཀྱི་ནང་དུ་སྐྱེ་བ་ཡིན་ནོ། །དེར་སྐྱེས་པ་ནི་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་འདོད་པ་ལ་ལོག་པར་གཡེམ་པའི་འཇིགས་པས་འཇིགས་པ་རྣམས་སོ། །དེ་དེར་སྐྱེས་པ་ན་ལྷ་དང་ལྷ་མོ་བརྒྱ་སྟོང་གིས་ཡོངས་སུ་བསྐོར་ནས་སྐྱེས་པ་ཙམ་ཉིད་ན་དེ་བཞིན་དུ་གླུ་ལེན་པར་བྱེད་དེ། ཇི་ལྟར་ལེགས་པར་གཉིད་ལོག་པར་རྔས་ལེགས་པར་སློང་བར་བྱེད་པ་དེ་བཞིན་དུ་དེ་སྐྱེས་པ་ཙམ་ཉིད་ན་རྫུས་ཏེ་སྐྱེས་པ་དེ་ལྟར་གླུ་དང་རྔ་སྒྲ་ཡན་ལག་བརྒྱད་དང་ལྡན་པ་ཀུན་ནས་བསྒྲགས་པས་དྲན་པ་རྙེད་པར་འགྱུར་བ་ལ་འདི་ལྟ་སྟེ། བརྗོད་པའི་ཚད་དང་ལྡན་པ་དང་སྙན་པར་གྱུར་པ་དང་ལྡན་པ་དང་དགེ་ལེགས་དང་ལྡན་པ་དང་ཟབ་པ་དང་ལྡན་པ་དང་སྐྱེ་དགུ་ཐམས་ཅད་དགའ་བར་བྱེད་
པ་དང་། དཔག་ཚད་སྟོང་ཕྲག་བརྒྱད་ཅུར་རྣམ་པར་ཉམས་པ་མེད་པར་ཀུན་དུ་སྒྲོགས་པའི་སྒྲ་དང་ཆོས་ཀྱི་ཚིག་དང་ལྡན་པ་དང་ཀུན་ནས་མ་འདྲེས་པ་དང་སྟེ། ཤིན་ཏུ་བར་ཡང་ལེགས་པར་བྱས་པའི་ལས་སྤྱད་པ་པོ་རྣམ་པ་དེ་ལྟ་བུ་ཡན་ལག་བརྒྱད་དང་ལྡན་པའི་གླུས་སད་པར་བྱེད་དོ། །དེའི་རང་གི་ལུས་ལས་བྱུང་བའི་འོད་དཔག་ཚད་ལྔར་ཁྱབ་པའོ། །སྔོན་པོ་སེར་པོ་དམར་པོ་དཀར་པོ་འཇའ་ཚོན་གྱི་ཁ་དོག་ལྟ་བུའོ། །དེ་ལངས་པ་ཙམ་ཉིད་ན་འོད་དེ་འབྱུང་ངོ་། །དེ་ཡང་ཇི་ལྟར་རང་གི་ཆ་བྱད་ཀྱིས་ཉི་མ་དང་ཟླ་བ་ལྟར་མཛེས་ལ། དེ་ལངས་པ་ན་ལྷ་བརྒྱ་སྟོང་གིས་ཡོངས་སུ་བསྐོར་ཏེ་རབ་ཏུ་དགའ་བས་གཟི་བརྗིད་ཀྱི་ནགས་ཞེས་བྱ་བ་དེར་འགྲོའོ། །ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་འཐབ་བྲལ་བ་དེ་ལ་ཡང་མེ་ཏོག་གི་རིགས་མི་རྙིངས་པ་འདི་དག་ཡོད་དེ། འདི་ལྟ་སྟེ་མིག་གི་བདུད་རྩིའི་མེ་ཏོག་དང་དྲིའི་བདུད་རྩི་དང་ཁ་དོག་དང་དྲིར་བཅས་པ་ཐོས་ན་དགའ་བ་འདི་དག་གང་གི་ནུས་པར་འགྱུར་བ་འདི་ནི་ཡུལ་ཕྱོགས་གང་དང་གང་དུ་དེའི་མིང་གཟུང་བར་བྱས་པའི་ཡུལ་དེ་དང་དེར་མེ་ཏོག་གིས་ནམ་མཁའ་ལས་དྲི་འབྱིན་ནོ། །ཟླ་བ་ལས་ལྷག་པའི་ཁ་དོག་ཞེས་བྱ་བའི་མེ་ཏོག་དང་ཐམས་ཅད་དུ་རྒྱུ་བ་ཞེས་བྱ་བའི་མེ་ཏོག་སྟེ་དེ་དག་རྣམས་ནི་ཤིང་གི་འདབ་མ་ལ་མེ་ཏོག་དེ་རྣམས་སྐྱེའོ། །དེ་བོས་པ་ན་མེ་ཏོག་དེ་རྣམས་ཕྱི་བཞིན་ཁོ་ནར་འོང་སྟེ། གང་ལ་ལྷ་དེ་རྣམས་ཀྱི་འདོད་པས་འགྱུར་བ་ཡིན་ནོ། །ཞོན་པའི་བཞོན་པ་རྣམས་ནི་ལྗོན་ཤིང་གི་བཞོན་པ་ལ་ཞོན་ཏེ་མེ་ཏོག་གི་ཁྱིམ་ནང་ན་གནས་ནས་གང་དུ་འདོད་པ་དེར་ལྷ་རྣམས་ནམ་མཁའ་ལ་འགྲོ་བར་བྱེད་དོ། །ཇི་ལྟར་གཞལ་ཡས་ཁང་ནས་ཀུན་དུ་རྒྱུ་བའི་ལྷ་དེ་ལྟར་འཐབ་བྲལ་བའི་ལྷ་རྣམས་མེ་ཏོག་གི་ཁྱིམ་ལ་གནས་ནས་འགྲོ་སྟེ་འཇིག་རྟེན་མ་ལུས་པ་མིག་བཙུམ་ཙམ་ལ་འོད་འབར་བ་དང་བཅས་པར་གྱུར་པར་མཐོང་ངོ་། །འོན་ཀྱང་ངལ་བར་མི་འགྱུར་རོ། །བར་མེད་པར་འབྲེལ་བའི་ཁྱིམ་དགའ་བ་ཞེས་བྱ་བའི་ཤིང་གང་དག་གི་ནང་ཡང་དེ་བཞིན་དུ་དགའ་བ་ཡིན་ཏེ། གང་ལ་ནང་དུ་ལྷ་རྣམས་རྗེས་སུ་ཞུགས་ནས་དགའ་བར་བྱེད་པའི་ནགས་དང་། རྫིང་བུ་དང་ཉེ་བའི་ནགས་དེ་དག་ཐམས་ཅད་ལས་ཆེས་ཁྱད་
པར་དུ་དགའ་བར་གྱུར་པའི་ལྗོན་ཤིང་གང་དང་གང་དག་ལ་གཟི་བརྗིད་འདི་དག་ཡོད་དེ། གལ་ཏེ་ལྷ་རྣམས་འདོད་པར་གྱུར་ན་འཐབ་བྲལ་གྱི་ས་དེ་ཐམས་ཅད་ཀྱི་དཔལ་རྣམས་ཐམས་ཅད་གནས་དེར་འོང་བར་འགྱུར་རོ། །ཤིང་དེ་དག་གི་གཟི་བརྗིད་ཀྱིས་དེ་ཡང་ལྗོན་ཤིང་ལ་དགའ་སྟེ་ལྷ་དེ་རྣམས་ཡན་ལག་བརྒྱད་པའི་རྔ་སྐད་མཚུངས་པ་མེད་པས་ལྗོན་ཤིང་དེ་དག་རྣམས་ལ་དགའ་བར་བྱེད་པ་ན་ཡང་དྲི་འབྱུང་ཞེས་བྱ་བའི་ཤིང་གང་དག་ལ་མཐུ་འདི་དག་ཡོད་པ་ཡིན་ཏེ། ལྷ་རྣམས་ཀྱིས་མངོན་པར་འདོད་པར་གྱུར་པའི་དྲིའི་རྣམ་པ་དེ་སྲིད་ཁོ་ནའི་དྲི་ཅན་དུ་ཤིང་དེ་འགྱུར་རོ། །མེ་ཏོག་གི་ཁྱིམ་དགའ་བ་ཞེས་བྱ་བའི་ཤིང་གང་ལ་ནང་གི་ཁྱིམ་དང་ལྡན་པར་ལྷ་རྣམས་དང་ནགས་དང་ཉེ་བའི་ནགས་དང་རྫིང་བུར་དགའ་བར་བྱེད་ལ། དེ་ནི་སྔོན་པོ་སེར་པོ་དམར་པོའི་མདོག་དང་། རྣམ་པ་སྣ་ཚོགས་པའི་དྲི་དང་ཁ་དོག་ཕུན་སུམ་ཚོགས་པ་དེ་ལ་གང་གི་ཚེ་ལྷ་དེ་འཇུག་པར་བྱེད་པ་དེའི་ཚེ་ཤིང་དང་མེ་ཏོག་གང་དག་རྣམས་ཁ་དོག་ཐམས་ཅད་པར་འགྱུར་རོ། །ཁ་དོག་དེར་ལྷ་འགྱུར་རོ། །དེའི་ཁ་དོག་ཏུ་ལྷ་འགྱུར་རོ། །དེ་ཐམས་ཅད་མི་འགྱུར་བའི་གོས་ཅན་དུ་མི་འགྱུར་ཏེ། ཤིང་དང་མེ་ཏོག་རྣམས་ཀྱི་མཐུས་སོ། །ནམ་མཁའ་ལ་རྒྱུ་བ་ཞེས་བྱ་བའི་ཤིང་གང་གིས་མིག་བཙུམ་ཙམ་ལ་ནམ་མཁའ་ལ་དཔག་ཚད་བརྒྱ་སྟོང་དུ་འགྲོའོ། །འདོད་པས་འགྲོ་བ་ཉི་མ་དང་མཚུངས་པའི་གཟི་བརྗིད་ཅན་རྣམས་སོ། །དེ་ལྟར་གསར་དུ་སྐྱེས་པའི་ལྷ་དེ་ལྷ་དང་ལྷ་མོ་བརྒྱ་སྟོང་གིས་ཡོངས་སུ་བསྐོར་ནས་རྣམ་པ་དུ་མའི་ཕྲེང་བ་དང་། ཕྱེ་མ་དང་བྱུག་པའི་དཔལ་གྱིས་ཤིན་ཏུ་བརྒྱན་པས་ཤིང་ལ་ཀུན་དུ་འགྲོ་བར་བྱེད་དོ། །དེའི་མདུན་ན་དེའི་ཚེ་ན་ལྷ་མོ་རྣམ་པ་སྣ་ཚོགས་ཀྱི་གོས་རིན་པོ་ཆེ་རྣམ་པ་དུ་མ་འབར་བ་རབ་ཏུ་དགའ་བ་ཆེས་ལྷག་པའི་ལུས་ཅན་རྣམས་མདུན་ན་གར་དང་གཡོ་བ་དང་འགྱིང་བ་དང་གླུའི་སྒྲ་སྣ་ཚོགས་པས་དཔག་ཚད་སྟོང་ཕྲག་དུ་མ་གང་བར་བྱེད་དོ། །དེ་ཡང་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་དང་ལྡན་པས་དེ་དག་རྣམས་ཀྱི་བློ་ན་དེ་ལྟར་རྣམ་པར་སྣང་སྟེ། གང་ཡང་ཅུང་ཟད་ཙམ་གྱིས་འདྲ་བ་དང་སྔར་མཐོང་བ་རྣམས་དཔེར་བྱས་པར་
ཟད་དོ། །ཇི་ལྟར་ཟླ་བའི་ཕྱི་ན་སྐར་མ་རྣམས་འགྲོ་བ་དེ་ལྟ་བུ་ལས་བརྒྱ་སྟོང་གིས་ལྷ་འདི་མཛེས་ཏེ་རྣམ་པ་སྣ་ཚོགས་པའི་སྒྲ་འབྱིན་པ་དང་། གླུ་དང་། དགོད་པ་དང་། འགྱིང་བ་དང་། གླུ་མཁན་དང་བཅས་པས་གང་ན་ནགས་དེ་ཡོད་པ་དེར་འགྲོའོ། །ནགས་དེའི་ཉེ་འཁོར་ན་བྱ་བརྒྱ་སྟོང་གིས་ཀུན་དུ་གང་བ་འབབ་ཆུ་དང་། རྫིང་བུ་དུ་མས་ཉེ་བར་མཛེས་པར་གྱུར་པ་ཉེ་འཁོར་མཆོག་ཏུ་དགའ་བ། ཉི་མ་བརྒྱ་སྟོང་བས་ལྷག་པར་གསལ་བར་བྱེད་དོ། །གང་ལ་དེ་ལྟར་ཅུང་ཟད་ཙམ་འདྲ་བའི་སྒོ་ནས་དཔེར་བརྗོད་བྱས་ཏེ། ཇི་ལྟར་མི་རྣམས་ན་ནགས་མཆོག་ཏུ་དགའ་བར་གྱུར་པ་དང་། འབབ་ཆུ་དང་། འཇུག་ངོགས་དང་། རྫིང་བུ་འཇུག་ངོགས་མཛེས་པ་གང་ཡིན་པ་དེ་ནི་རྒྱལ་ཆེན་བཞིའི་ནགས་དང་། ཉེ་བའི་ནགས་རྣམས་ཀྱི་ཁྱད་པར་གྱི་བཅུ་དྲུག་གི་ཆར་ཡང་མི་ཕོད་དོ། །ཡང་དེ་བཞིན་དུ་གང་རྒྱལ་ཆེན་རིས་བཞིའི་ནགས་ཀྱིས་ཀྱང་གང་ཡང་སུམ་ཅུ་རྩ་གསུམ་པ་རྣམས་ཀྱི་ནགས་དང་། ཉེ་བའི་ནགས་ཀྱི་དགའ་བར་གྱུར་པ་གང་ཡིན་པ་དེའི་ཁྱད་པར་གྱི་བཅུ་དྲུག་གི་ཆར་ཡང་མི་ཕོད་དོ། །དེ་ལྟར་གོང་ནས་གོང་གི་ཁྱད་པར་གྱི་རིམ་པས་དགེ་བའི་ལས་དང་མི་དགེ་བའི་ལས་རྣམས་ལས་གོང་ནས་གོང་གི་དགའ་བ་ནི། དགེ་བ་དང་ཡང་དག་པར་རབ་ཏུ་ལྡན་པའི་སེམས་རྩེ་གཅིག་པས་ལས་གཞན་མི་བྱེད་པར་མཐོང་ཞིང་དགེ་ལ་ལེགས་པས་རིགས་པ་གྲོལ་བའི་སྤོབས་པ་དང་ལྡན་པའི་སེམས་ཅན་ཐམས་ཅད་ཀྱི་ཤེས་རབ་ཀྱིས་ཀྱང་ཕྱོགས་གཅིག་ཀྱང་བརྗོད་པར་བྱ་མི་ནུས་སོ། །དེ་ཅིའི་ཕྱིར་ཞེ་ན། མི་རྟོག་པའི་ཡུལ་གྱི་ཡུལ་རྟོགས་པ་མ་ཡིན་པ་འདི་མི་རྣམས་ཐམས་ཅད་དང་། དེ་བཞིན་དུ་དབང་པོ་དང་བཅས་པའི་སུམ་ཅུ་རྩ་གསུམ་པ་རྣམས་ཐམས་ཅད་ཀྱིས་ལོ་སྟོང་ཕྲག་བརྒྱར་ཡང་མཚེ་མའི་ལྷ་རྣམས་ཀྱི་བདེ་བའི་ཕྱོགས་གཅིག་ཙམ་ཡང་བརྗོད་པར་མི་ནུས་སོ། །དེ་ཅིའི་ཕྱིར་ཞེ་ན། འདི་དག་རྣམས་ཐམས་ཅད་ནི་སུམ་ཅུ་རྩ་གསུམ་པ་རྣམས་ཀྱི་ཡུལ་མ་ཡིན་པ་དང་མཐོང་བའི་ཡང་མ་ཡིན་པའི་ཕྱིར་ཏེ། གང་ལ་དཔེར་བརྗོད་དུ་བྱས་པ་ནི་ནམ་ཡང་མཐོང་བ་ཡང་མ་ཡིན་ལ་ཆུང་ཟད་ཀྱང་ཐོས་པ་ཡང་
མ་ཡིན་གྱི་ཕྱོགས་གཅིག་ཙམ་འདིར་བསྔགས་པ་བརྗོད་པ་ཡིན་ནོ། །དགེ་བའི་ཆོས་ལ་བརྩོན་པའི་དོན་དུ་བསྔགས་པ་བརྗོད་དེ། དགེ་བའི་ཆོས་བྱས་ཤིང་བསགས་པ་མྱོང་བར་འགྱུར་བར་ངེས་པ་བསམ་གྱིས་མི་ཁྱབ་པ་དགའ་བ་དང་བདེ་བ་ཐམས་ཅད་ཀྱི་ཡང་ཕྱོགས་གཅིག་ཙམ་མཐོང་ལ་ཕྱོགས་གཅིག་པུ་ཞིག་བསྔགས་པར་ཟད་དོ། །ཇི་ལྟར་མཁས་ཤིང་ཐམས་ཅད་ལ་བྱང་བའི་རི་མོ་མཁན་ནམ་རི་མོ་མཁན་གྱི་སློབ་མས་ཀྱང་རུང་སྟེ་ཟླ་བ་དང་མཚུངས་པའམ་ཡང་ན་ཉི་མ་བྲིས་ལ། དེས་དེའི་འོད་བྲི་བར་བྱ་མི་ནུས་ལ་ཟེར་མ་མ་ཡིན། ནམ་མཁའ་ལ་འགྲོ་བ་དང་འོང་བའི་སྤྱོད་པ་ཡང་མ་ཡིན། གཟི་བརྗིད་མ་ཡིན་ལ་འཇམ་པ་དང་གདུག་པ་ཡང་མ་ཡིན་གྱི། ཟླ་བའི་རྣམ་པ་ཙམ་འབའ་ཞིག་མངོན་པར་བྲིས་པར་ཟད་དོ། །དེ་བཞིན་དུ་འདིར་ཡང་འཐབ་བྲལ་གྱི་ལྷ་རྣམས་ཀྱི་བསྔགས་པ་ཡང་བརྗོད་པར་མི་ནུས་སོ། །དགའ་བ་ཡང་བརྗོད་པར་མི་ནུས་སོ། །མཐུ་སྟོབས་དང་ནགས་དང་ཉེ་བའི་ནགས་དང་དཔལ་མ་ཡིན་ནོ། །རིམ་ཡིན་རང་བཞིན་མ་ཡིན་ནོ། །ཡུལ་གྱི་བདེ་བ་རྣམས་ཀྱང་མ་ཡིན། འོད་དང་ཕྲེང་བ་དང་ལྷ་མོ་དང་མཉམ་པར་བགྲོད་པའི་བདེ་བ་ཡང་མ་ཡིན་གྱི་ཅུང་ཟད་མངོན་པར་བརྗོད་པ་ཙམ་ཅིག་འདིར་བྱས་སོ། །འདྲ་བ་ནི་ཅུང་ཟད་ཙམ་ཅིག་ཀྱང་མ་བྱས་སོ། །སླར་ཡང་ལྷ་དེ་སྐྱེད་མོས་ཚལ་དེ་དག་ཉིད་ཀྱི་ལྟད་མོ་རྣམ་པ་དུ་མར་དགའ་བ་འདོད་པ་དུ་མ་དང་ལྡན་པའི་ཕུན་སུམ་ཚོགས་པ་འཇུག་ངོགས་དང་། སྐྱེད་མོས་ཚལ་དུ་མ་དང་ལྡན་པའི་སའི་ཆ་རྣམས་ལ་རྗེས་སུ་ལྟར་འགྲོ་བར་བྱེད་དོ། །འདོད་པའི་ཡོན་ཏན་ལྔ་ལ་རྣམ་པར་ཆགས་པའི་ཡིད་ཅན་གནས་པ་མེད་པའི་ཤུགས་ཀྱིས་གཡོ་བའི་ཀུན་དུ་རྟོག་པའི་ཆུ་རླབས་ཀྱིས་བསྐྱོད་པའི་སྲིད་པའི་ཆུ་བོས་ཁྱེར་བར་གྱུར་པས་ཐམས་ཅད་ལས་མཐོང་ན་དགའ་བར་གྱུར་པ་ནི་ལྷའི་རིས་དེར་རྗེས་སུ་མཐོང་བ་ལ་ནགས་དེ་ནི་འདོད་པའི་ཡོན་ཏན་དུ་མ་ཕུན་སུམ་ཚོགས་པ་སྟེ་ཆུ་ཀླུང་དང་། འབབ་ཆུ་དང་ཤིང་དང་ཤིང་གེལ་བ་དང་འཁྲི་ཤིང་གི་ཁང་བུས་གང་བ་སྒྲ་དུ་མ་འབྱིན་པའི་བྱ་བརྒྱ་སྟོང་གིས་ཀུན་དུ་གང་བ་དེར་ཉེ་བར་འགྲོའོ། །ཉེ་བར་སོང་ནས་ཀྱང་ཉེ་འཁོར་དེ་ན་སྔར་མ་མཐོང་བའི་མཆོག་ཏུ་ཕུན་སུམ་ཚོགས་པ་དེ་དང་ཕྲད་ནས་ཀྱང་དེ་ལྷ་མོའི་ཚོགས་དང་བཅས་པས་ཡོངས་སུ་
བསྐོར་ནས་ཆུ་ཀླུང་གི་གླེའི་མུ་ཏིག་གི་ཕྱེ་མའི་བྱེ་མ་ལ་གསེར་དང་དངུལ་དང་ཨིན་དྲ་ནཱི་ལའི་མདོག་དང་མཚུངས་པའི་སྒྲོ་ཅན་གྱི་བྱས་གང་བ་ཆུ་ཀླུང་ཆེན་པོའི་ངོས་ན་རྣམ་པ་སྣ་ཚོགས་པའི་སྒྲ་འབྱིན་པའི་ལྗོན་ཤིང་གིས་གང་བ་ཆུ་ཀླུང་གི་འགྲམ་གྱི་གད་པ་དགའ་བ་རབ་ཀྱི་མཆོག་ཏུ་སྐྱིད་པའི་ལྷ་མོའི་ཚོགས་ཀྱིས་ཡོངས་སུ་བསྐོར་ནས་དགའ་ཞིང་རྩེ་བར་བྱེད་ལ། ཞབས་འབྲིང་དུ་མ་ཡང་བྱེད་པས་དུས་ཤིན་ཏུ་རིང་བར་དེ་དེ་ན་དགའ་བར་བྱས་ནས་གང་ན་རིན་པོ་ཆེའི་འགྲམ་ཞེས་བྱ་བའི་ནགས་ཡོད་པ་དེར་སྐྱེ་བོ་ཐམས་ཅད་ཀྱིས་ཡོངས་སུ་བསྐོར་ནས་འགྲོའོ། །དེས་ནགས་དེ་མཐོང་བ་ལས་གཞིའི་ཆ་ནི་རིན་པོ་ཆེ་བདུན་གྱི་རང་བཞིན་འོད་གསལ་བ་གང་ལ་རིན་པོ་ཆེའི་རང་བཞིན་དུ་གྱུར་པ་ཐམས་ཅད་དགའ་བའི་རིའི་རྩེ་མོ་དང་། ཆུ་ཀླུང་གི་འགྲམ་དང་འབབ་ཆུ་དང་རྫིང་བུ་དང་པད་མའི་རྫིང་བུ་དུ་མ་དགའ་བར་གྱུར་པ་ལ་བུང་བ་བརྒྱ་སྟོང་གིས་ཉེ་བར་མཛེས་པར་བྱས་པས་གཞི་ཀུན་གྱི་ཆ་ཤས་ནི་མཆོག་ཏུ་དགའ་བར་གྱུར་པ་དང་རིའི་གསེབ་དག་མཐོང་ངོ་། །དེས་ལེགས་པར་བྱས་པའི་ལས་ཀྱི་འབྲས་བུའི་དབང་པོ་དང་ལྡན་པ་དེ་རིན་པོ་ཆེའི་ཉེ་བའི་གནས་ལ་ལྷ་མོའི་ཚོགས་ཀྱིས་ཡོངས་སུ་བསྐོར་བའི་དབུས་ན་རྩེ་ཞིང་དགའ་ལ་ཀུན་དུ་སྤྱོད་དེ། འཐབ་བྲལ་བ་རྣམས་དང་རྗེས་སུ་འཐུན་པའི་བདེ་བ་དགེ་བའི་རྩ་བས་བསྐྲུན་པ་ལ་ཉེ་བར་ལོངས་སྤྱོད་པར་རྒྱུ། དགེ་བའི་རྩ་བ་དེ་དང་འཐུན་པར་དེའི་འབྲས་བུ་རྣམས་ཀྱང་རྣམ་པ་དུ་མར་དེ་བཞིན་དུ་འགྱུར་རོ། །དེ་ན་ཡང་རྣམ་པ་བརྒྱ་སྟོང་དུ་མའི་རྣམ་པར་རྟོག་པའི་བདེ་བ་ཐམས་ཅད་ལས་འཕགས་པ་ཉམས་སུ་མྱོང་ངོ་། །དེ་ལ་ཡང་འདོད་པའི་ཡོན་ཏན་ལྔ་སྤྱད་ནས་གང་ན་འཇུག་ངོགས་མེད་པ་མ་ཡིན་པ་ཞེས་བྱ་བ་འཐབ་བྲལ་བ་རྣམས་ཀྱི་སའི་ཆ་དེར་འགྲོའོ། །དེ་ན་ཡང་དགའ་བའི་ཡོན་ཏན་དུ་མ་ཕུན་སུམ་ཚོགས་པ་ཉེ་བར་བགྲོད་དོ། །དེ་ལ་ཡང་རྒྱུ་རྣམ་པ་སྣ་ཚོགས་པའི་ལྷའི་གླུ་མཁན་གྱི་གླུ་དང་ཡང་དག་པར་ལྡན་པའི་བདེ་བ་ཉམས་སུ་མྱོང་ངོ་། །གང་ཡང་བརྗོད་པར་མི་ནུས་པ་ནི་སྲེད་པ་དང་ལྡན་པའི་མེས་སྙིང་ཚིག་པ་རྣམས་ཀུན་དུ་རྟོག་པའི་ཤུགས་ཀྱིས་ཀུན་དུ་འཁྲུལ་པའི་བློ་གར་ཡང་གནས་པ་མེད་པས་ཡུལ་ལ་གདུང་བར་སྨིག་རྒྱུ་བའི་སེམས་སྤྲེའུ་ཡིས་ལྷའི་བདེ་བའི་འབྲས་བུ་
ལ་སྤྱོད་པ་བག་མེད་པས་བུད་མེད་ལྟ་བ་ལ་ཆེད་ཆེར་བྱེད་པ་དང་། རྟག་ཏུ་དགའ་བ་དུ་མའི་ཆུ་གང་དག་གིས་ཀྱང་རྟག་ཏུ་འཁོར་བར་བྱེད་པ་ཡིན་ནོ། །འཐབ་བྲལ་གྱི་ལྷའི་རིས་རྣམས་ཀྱི་ཉེ་འཁོར་དུ་རིན་པོ་ཆེའི་པད་མ་ཕུན་སུམ་ཚོགས་པ་འབྱུང་བ་ནི་ཐུན་མོང་པ་མ་ཡིན་པ་མཆོག་ཏུ་དགའ་བའི་ཡུལ་གྱི་བདེ་བ་རྣམ་པ་དུ་མ་གཞན་གྱི་མཐུ་སྟོབས་ཀྱིས་དབྲོག་ཏུ་མེད་པས་ཀྱང་དབང་པོ་རྣམས་མི་ཚིམ་མོ། །ཅི་ལྟ་ཅི་ལྟར་དགའ་བ་དེ་ལྟ་དེ་ལྟར་ཡོངས་སུ་སྨིན་ལ་དགའ་བར་གྱུར་པའི་པད་མ་གང་དག་ཁོ་ན་བསམས་པ་དེ་ལྟ་དེ་ལྟར་ཉིད་དུ་འབྱུང་སྟེ་ལེགས་པར་བྱས་པ་ལས་བྱས་པའི་ཕྱིར་རོ། །དེ་ནས་མུ་སུ་ལུན་དྷ་འདི་སྙམ་དུ་སེམས་ཏེ་མ་ལ་བདག་ལྷ་འདི་དག་རྣམས་དང་ལྷན་ཅིག་ཏུ་ནམ་མཁའ་ལ་གནས་པར་བྱའོ་སྙམ་མོ། །དེ་ནས་སེམས་བསྐྱེད་པ་ཙམ་ཉིད་ཀྱིས་འཐབ་བྲལ་བའི་ལྷའི་མངའ་བདག་མུ་སུ་ལུན་དྷ་ལྷའི་ཚོགས་ཀྱིས་ཡོངས་སུ་བསྐོར་ནས་ལྷའི་ཚོགས་ཐམས་ཅད་དང་བཅས་པ་ནམ་མཁའི་དཀྱིལ་དུ་འཕགས་སོ། །དེ་ནམ་མཁའ་ལ་དེ་ལྟར་འགྲོ་སྟེ་དེ་དང་ལྷ་དེ་རྣམས་དེ་ལྟར་ཅུང་ཟད་ཀྱང་མི་གཡོ་ཞིང་མི་བརྗོད་ལ་ལུས་ཀྱི་ཆ་འགའ་ཞིག་ཆུང་ཟད་ཀྱང་གཞན་དུ་འགྱུར་བ་ཡང་མེད་པར་རོ། །དེ་ནས་ལྷ་ཐམས་ཅད་ཀྱང་པད་མ་ལ་ཞོན་ནས་ནམ་མཁའ་ལ་འགྲོའོ། །རྔ་སྐད་ཡན་ལག་ལྔ་དང་ལྡན་པས་ཡོངས་སུ་བསྐོར་ནས་གར་དང་ལྡན་པ་དགོད་པ་དང་ལྡན་པ་ཀུན་ཏུ་སྤྱོད་པ་དང་ལྡན་པ་ལྷའི་བདེ་བས་ཡོངས་སུ་རྒྱས་པར་འདོད་པའི་ཡོན་ཏན་ལྔས་ལེགས་པར་གཏད་ཅིང་ཡང་དག་པར་ལྡན་པར་གྱུར་པ་དེ་ལྟར་སྐྱིད་པར་གྱུར་པའི་ལྷ་པད་མའི་འདབ་མ་དག་ལ་ཞོན་ནས་འགྲོ་སྟེ། ཇི་ལྟར་ཡང་དག་པའི་གནས་དེ་ལྟར་མནན་ན་ནེམ་ལ་བཏེག་ན་འཕར་བར་གྱུར་པའི་རིན་པོ་ཆེ་བདུན་གྱི་རང་བཞིན་དུ་གྱུར་པའི་པད་མའི་འདབ་མ་རྣམས་ལ་ཞོན་ནས་གོང་མ་གོང་མའི་འདབ་མ་རྣམས་ལྷུང་བ་དེ་མཛེས་པ་ནི་ཇི་ལྟར་མི་རྣམས་ཀྱི་ཡུལ་ན་ནང་ནུབ་ཀྱི་ཐུན་མཚམས་ཀྱི་དུས་ན་ཐམས་ཅད་ཟངས་བཞིན་དུ་ནམ་མཁའ་ཤིན་ཏུ་རྣམ་པར་སྣང་བ་ལ་པད་མ་དེ་ཡང་དེ་ལྟར་ཤིན་ཏུ་འབར་རོ། །ལྷ་དེ་ཐམས་ཅད་ཕན་ཚུན་དུ་བདེ་བ་དང་ལྡན་པས་གང་ན་ཀུ་བེ་རའི་ཚོགས་ཀྱི་ནགས་ཞེས་བྱ་བའི་ནགས་ན་ཤིན་ཏུ་འཇམ་ཞིང་
མཐོ་བའི་རིའི་རྩེ་མོ་དེར་དགའ་བར་རྒྱུར་འགྲོ་བར་བྱེད་དོ། །དེ་ནས་རི་དེའི་རྩེ་མོ་ལ་ལྷ་དེ་དག་གིས་སླེབས་ནས་རིན་པོ་ཆེ་བདུན་གྱི་འབབ་ཆུ་དང་ཆུ་ཀླུང་དང་རྫིང་བུ་དུ་མས་ཉེ་བར་མཛེས་པར་གྱུར་པ་པད་མའི་ནགས་ཡོངས་སུ་རྒྱས་པར་མཛེས་པར་གྱུར་པ་ནི་ཉི་མ་བརྒྱའི་འོད་ཟེར་བས་ཆེས་ལྷག་པར་གྱུར་པའི་འོད་ཀྱི་གཟི་བརྗིད་ཅན་དེ་ན། ལྷ་དང་ལྷ་མོའི་ཚོགས་ཀྱིས་གང་བ་རིན་པོ་ཆེའི་རང་བཞིན་དུ་མ་ཉི་མ་དང་མདོག་མཚུངས་པའི་ཤིང་གིས་ཉེ་བར་མཛེས་པར་འཇམ་ཞིང་མཐོ་བའི་རི་དེ་དང་པད་མ་དེར་ལྷ་དེ་དག་རྣམས་ཀྱིས་ཕྱིན་ནས་རི་དེའི་ནགས་ན་གར་བྱེད་ཅིང་ཕན་ཚུན་དུ་ཀུན་དུ་སྤྱོད་དོ། །དེ་ནས་ཡང་འདབ་མ་སྟོང་ཕྲག་བརྒྱ་པའི་པད་མ་ལའོ། །དེ་རྣམས་པད་མ་དེ་དག་རྣམས་ལ་ཀུན་དུ་ཞུགས་ནས་ཕྱིར་ཡང་འཇམ་ཞིང་མཐོ་བའི་རི་དེ་ལ་འཛེག་གོ །བདེ་བ་ལ་སྤྱད་པའི་དོན་དུ་འཐབ་བྲལ་གྱི་མངའ་བདག་མུ་སུ་ལུན་དྷ་ཡང་ལྷའི་ཚོགས་ཀྱིས་ཡོངས་སུ་བསྐོར་བ་དང་བཅས་ནས་གང་ན་ལྷ་དེ་དག་རྣམས་དགའ་དགུར་ཀུན་ཏུ་སྤྱོད་པ་དེར་འགྲོའོ། །ལྷ་དེ་དག་རྣམས་ཀྱིས་ཀྱང་དེ་མངོན་དུ་ལེགས་པར་མཐོང་ནས་ཡིད་རབ་ཏུ་དགའ་བར་གྱུར་པའི་ཡིད་དང་ལྡན་པས་གར་བྱེད་པར་གྱུར་དགོད་པར་ཡང་བྱེད་ཅིང་ཀུན་དུ་སྤྱོད་པར་ཡང་བྱེད་དོ། །འཐབ་བྲལ་གྱི་བདག་པོ་མུ་སུ་ལུན་དྷ་དེ་ཡང་དེ་ལྟར་རབ་ཀྱི་མཆོག་ཏུ་ཡིད་དགའ་སྟེ། ལྷ་རྣམས་རང་གི་ལས་དབང་པོར་གྱུར་པ་རང་གི་ལས་ཀྱི་འབྲས་བུའི་སྐྱེ་གནས་པ་དེ་ལས་དེ་དག་རྣམས་ཀྱིས་ལྷ་དམན་པ་དང་བར་མ་དང་ཁྱད་དུ་འཕགས་པ་དམན་པ་དང་བར་མར་སྐྱེད་པ་དང་། དམན་པ་དང་བར་མའི་གཟུགས་དམན་པ་དང་བར་མ་དང་ཁྱད་པར་དུ་འཕགས་པའི་བདེ་བའོ། །འཐབ་བྲལ་གྱི་ལྷ་ཐམས་ཅད་པས་དམན་པའི་བདེ་བ་གང་ཡིན་པ་དེ་ཡང་བཅུ་དྲུག་ཆར་བགྲང་བའི་རིམ་པས་ཀྱང་བརྒྱ་བྱིན་ལ་ནམ་ཡང་མི་འགྱུར་ལ། རེ་ཞིག་བརྒྱ་བྱིན་དེ་ཉིད་ཀྱི་བདེ་བ་ཡང་བརྗོད་པར་མི་ནུས་ན། ཅི་ཡང་བརྒྱ་ཕྲག་སུམ་འགྱུར་དུ་ལས་ཀྱི་མཐའ་ལ་སྤྱད་པའི་འཐབ་བྲལ་བ་རྣམས་ཀྱི་རྫོགས་པར་བརྗོད་པར་ནུས་སམ། དེ་ཉིད་ནི་དགེ་བ་ཀུན་དུ་རྒྱས་པའི་ལེགས་པར་བྱས་པའི་ལས་རྣམས་ཀྱི་ཡང་འབྲས་བུ་
དེ་འབའ་ཞིག་དེ་ལྟར་ཚུལ་ཁྲིམས་དང་ལྡན་པ་རྣམས་རབ་ཏུ་དགའ་བ་བསྐྱེད་པར་བྱ་བའི་དོན་དུ་འཐབ་བྲལ་གྱི་ལྷ་འདི་རྣམས་ཀྱི་ཕུན་སུམ་ཚོགས་པའི་དགའ་བ་རྣམ་པ་དུ་མའི་སྒོ་ནས་བསྔགས་པ་ཡིན་གྱི། སྲིད་པ་འབའ་ཞིག་མངོན་པར་ཞེན་པས་ནི་མ་ཡིན་ནོ། །གཞན་ཡང་འཐབ་བྲལ་གྱི་མངའ་བདག་མུ་སུ་ལུན་དྷ་རྣམ་པ་སྣ་ཚོགས་པ་བརྒྱ་སྟོང་དུ་མའི་རྣམ་པར་རྟོག་པ་ཡོན་ཏན་དུ་མ་དང་ལྡན་པའི་དཔེ་མེད་པའི་བདེ་བ་པད་མ་འདི་རྣམས་དང་འཇམ་ཞིང་མཐོ་བ་རིན་པོ་ཆེ་བདུན་གྱི་རང་བཞིན་གྱི་རི་དེ་ལ་རྙེད་ནས། གཞན་ཡང་འཐབ་བྲལ་གྱི་མངའ་བདག་འདི་ལྟར་རྗེས་སུ་རྣམ་པར་སེམས་པར་བྱེད་དེ། མ་ལ་བདག་གང་ཡང་པད་མ་ཆེན་པོ་འདིའི་ནང་དུ་འཇུག་པར་བྱ་བ་ཡིན་ཏེ་བདེ་བའི་མཆོག་གིས་གནས་པར་བྱ་བའི་དོན་དུ་ལྷའི་ཚོགས་ཐམས་ཅད་ཀྱི་ས་དང་བཙུན་མོའི་འཁོར་རྣམས་དང་བཅས་པ་རྣམས་ཀྱིས་སོ། །དེ་ནས་འཐབ་བྲལ་གྱི་མངའ་བདག་མུ་སུ་ལུན་དྷ་ལྟེ་བ་ལ་གནས་པ་ཙམ་ཁོ་ནས་དེའི་ལེགས་པར་བྱས་པའི་ལས་ཀྱིས་སྙིང་པོ་དེ་ཕྱིར་ཞིང་ཉིད་དུ་ཁ་བྱེའོ། །ལྟེ་བ་དེ་ཡང་གང་དེའི་ལྟེ་བ་དེ་ཐམས་ཅད་ཀྱི་ནང་དུ་འགྱུར་རོ། །དེ་ནས་ལྟེ་བ་དེའི་ཉེ་འཁོར་ཀུན་ལས་གཞན་དུ་གྱུར་པའི་བུག་པ་བྱུང་ལ་རྣམ་པ་དེ་ལྟ་བུའི་འོད་རྣམས་ཀྱང་པད་མ་ཆེན་པོ་དེའི་ལྟེ་བ་ལས་ཀུན་ནས་བྱུང་བའི་ལྷ་དེ་དག་རྣམས་ཀྱིས་རྣམ་པ་ཇི་ལྟ་བུའི་གཞན་དུ་སྔར་མ་མཐོང་བ་དང་མ་ཐོས་པ་དག་སྟེ། ཉེ་འཁོར་དུ་ཡང་དེ་དཔག་ཚད་བརྒྱ་བས་ཆེར་ལྷག་པའི་འོད་ཟེར་འབྱུང་བ་ལ་འོད་ཁ་དོག་དུ་མ་འབར་བ་ལྟ་བུར་སྣང་བའོ། །དེ་ནས་ལྷ་དེ་རྣམས་དང་འཐབ་བྲལ་གྱི་མངའ་བདག་མུ་སུ་ལུན་དྷ་ཡང་གཅིག་ཏུ་ངོ་མཚར་བའི་ཅ་ཅོའི་སྒྲ་ཀུན་ཏུ་འབྱིན་པ་ནི་འོད་འདི་དག་རྣམས་པད་མ་གང་གི་ལྟེ་བ་ལས་བྱུང་བར་གྱུར། དེ་ནས་འཐབ་བྲལ་བ་རྣམས་ཀྱི་མངའ་བདག་གིས་ལྷ་དེ་དག་རྣམས་ལ་འདི་སྐད་དུ་བགྲོས་པར་གྱུར་ཏེ། ལྷ་དག་པད་མ་ཆེན་པོ་འདིའི་འོད་ཟེར་རྣམ་པ་འདི་ལྟ་བུ་ཀུན་ནས་བྱུང་ཞིང་འཕྲོ་བ་ལ་ཇི་ལྟ་བ་བཞིན་དུ་ལྟོས་དང་། དེས་སླར་སྨྲས་པ་ཇི་ལྟ་བ་བཞིན་དུ་བདག་ཅག་གིས་མཐོང་སྟེ། འདི་དག་མཆོག་ཏུ་ངོ་མཚར་ཆེ་བའི་འོད་བྱེད་པའོ། །དེ་ནས་ཡང་འཐབ་བྲལ་
བ་རྣམས་ཀྱི་མངའ་བདག་གིས་ཡང་འགྲོ་བར་བྱེད་དེ། ཇི་ལྟར་གང་ཡང་ཉུང་ངུ་ན་བདག་ཅག་ཡུལ་ལྗོངས་དང་བཅས་པའི་སྐྱེ་བོའི་ཚོགས་ཐམས་ཅད་ཀྱིས་པད་མ་ཆེན་པོ་འདིའི་ནང་གི་ལྟེ་བ་དུས་རིང་དུ་བལྟ་བར་བྱའོ། །དེ་ནས་ལྷ་དེ་དག་རྣམས་ཐམས་ཅད་ཡིད་འཐུན་པར་གྱུར་པས་དེ་ལ་གསོལ་པ། ཇི་ལྟར་འཐབ་བྲལ་བའི་མངའ་བདག་གིས་གསུངས་པ་དེ་ལྟར་བདག་ཅག་རྣམས་ཀྱིས་བྱ་བ་ཡིན་པས་ན་དེ་ལྟར་བདག་ཅག་རྣམས་ཀྱི་འཁོར་དང་བཅས་པ་པད་མ་ཆེན་པོ་འདིའི་ནང་དུ་ལྷ་དང་ལྷ་མོའི་ཚོགས་ཀྱིས་བསྐོར་བ་འཐུན་པར་བདག་ཅག་འཐབ་བྲལ་གྱི་མངའ་བདག་དང་བཅས་པ་པད་མ་ཆེན་པོ་འདིའི་ནང་གང་ཡིན་པ་དེར་འཇུག་པར་བྱའོ། །དེ་ནས་ལྷ་དེ་དག་རྣམས་དང་མུ་སུ་ལུན་དྷ་དེ་ཡང་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་རྣམས་གང་ན་ལྟེ་བ་ཡོད་པ་དེར་ལེགས་པར་སོང་སྟེ། པད་མའི་ནང་ལྟ་བར་བྱེད་པ་ནི་ངོ་མཚར་བའི་དོན་དུའོ། །དེ་ནས་སྙིང་པོ་དེའི་བུག་པ་དེར་ཕྱིན་ནས་བུག་པ་དེ་ཉིད་དུ་ཞུགས་ཏེ། ཇི་ལྟར་བཙོ་མའི་གསེར་མཆོག་གི་མདོག་ཉི་མའི་འོད་དང་ལྷན་ཅིག་ཏུ་ཕན་ཚུན་སྤྲོས་པར་གྱུར་པ་ན་ནམ་མཁའ་ལ་ཉི་མའི་ཟླ་དང་ལྡན་པར་གྱུར་པ་དེ་བཞིན་དུ་པད་མ་ཆེན་པོ་དེའི་གཟི་བརྗིད་ཀྱི་ཁྱད་པར་མཐོང་བས་ལྷ་དེ་དག་རྣམས་ཀྱིས་འོད་ཟེར་དེ་དག་རྣམས་མ་བཟོད་ནས་མིག་ཀུན་ནས་བཙུམས་པར་གྱུར་པ་དང་། མཆོག་ཏུ་དགའ་བའི་ཡིད་ཀྱིས་ནང་དུ་ཞུགས་པར་ཡང་གྱུར་ལ། རྣམ་པ་འདི་ལྟ་བུའི་འོད་མཚུངས་པ་མེད་པ་འདི་ནི་གང་ཡང་བདག་ཅག་རྣམས་ཀྱིས་སྔར་ནམ་ཡང་མཐོང་མ་མྱོང་ངོ་ཞེས་ཅ་ཅོའི་སྒྲ་ཡང་སྒྲོགས་སོ། །དེ་ནས་ཡང་ལྷ་དེ་དག་རྣམས་ཆེས་རིངས་པར་མུ་སུ་ལུན་དྷ་དང་པོར་བྱས་ནས་རྗེས་སུ་འཇུག་པར་བྱེད་ལ། མུ་སུ་ལུན་དྷ་ཡང་མཆོག་ཏུ་རངས་པའི་ཡིད་ཀྱིས་ཡིད་ཚིམ་པ་མེད་པས་ལྷ་དེ་དག་རྣམས་དང་པད་མའི་ནང་དུ་འཇུག་གོ །དེ་ཞུགས་པ་ན་མཐོང་བ་དེའི་ནང་ན་རིན་པོ་ཆེ་བརྒྱ་སྟོང་དུ་མ་འོད་རྣམ་པ་གསལ་བར་བྱེད་པའི་སྐྱེད་མོས་ཚལ་བརྒྱ་ཕྲག་དུ་མ་དང་ལྡན་པ། འོད་དང་ལྡན་པའི་ཁང་བཟངས་བརྒྱ་སྟོང་དུ་མ་དང་འོད་འབར་བའི་ལྗོན་ཤིང་བརྒྱ་སྟོང་དུ་མ་དང་ལྡན་པ། རིན་པོ་ཆེ་བདུན་གྱི་རང་བཞིན་གྱི་སྐྱེད་ཤིང་གི་ནགས་དང་ཉེ་བའི་ནགས་བརྒྱ་སྟོང་དུ་མས་ཉེ་བར་མཛེས་པར་གྱུར་པ་མདོག་དང་དབྱིབས་དུ་
མ་དང་ལྡན་པའི་རྣམ་པར་རྟོག་པ་རྒྱ་ཆེ་བ་བརྒྱ་སྟོང་གི་བྱའི་ཚོགས་ཀྱིས་ཀྱང་གང་བ་རྩེད་མོའི་རི་བརྒྱ་ཕྲག་དུ་མ་དང་ལྡན་པ། རྫིང་བུ་བརྒྱ་ཕྲག་དུ་མ་དང་ལྡན་པ། གཞལ་མེད་ཁང་བརྒྱ་ཕྲག་དུ་མ་དང་ལྡན་པ། འབབ་ཆུ་བརྒྱ་ཕྲག་དུ་མ་དང་ལྡན་པ། ཆུ་མིག་དང་རྫིང་བུ་དང་ཆུ་ཀླུང་དང་ཚང་ཚིང་དང་ཁྲད་ཁྲོད་བརྒྱ་ཕྲག་དུ་མ་དང་ལྡན་པ། ཇི་སྐད་དུ་བརྗོད་པའི་དངོས་པོ་ཐམས་ཅད་ཀྱང་རིན་པོ་ཆེ་བདུན་གྱི་རང་བཞིན་ལས་བྱས་པའི་མདོག་དང་དབྱིབས་དང་ཚད་ཀྱི་རྣམ་པ་མངོན་པར་དགའ་བ། ཇི་ལྟར་དེ་ཡང་འཐབ་བྲལ་གྱི་བདག་པོ་མུ་སུ་ལུན་དྷས་ཀྱང་སྔར་མ་མཐོང་ན། འཐབ་བྲལ་གྱི་ལྷ་གཞན་གྱིས་ལྟ་སྨོས་ཀྱང་ཅི་དགོས། དེ་ལས་པད་མ་གང་གི་ནང་གི་མཚེའུ་རྣམས་ནི་རབ་ཏུ་དང་བའི་ལྷ་རྫས་ཀྱི་ཆུ་ཡིན་ལ་དེ་དག་གི་འགྲམ་རྣམས་ལ་ལ་ནི་ཤེལ་གྱི་རང་བཞིན་ནོ། །ལ་ལ་ནི་དངུལ་གྱི་རྡོ་དང་བྱེ་མའོ། །འགའ་ཞིག་ནི་གསེར་བཙོ་མའི་རང་བཞིན་ནོ། །ཡང་ལ་ལ་ནི་ཨིན་དྲ་ནཱི་ལའི་རང་བཞིན་ནོ། །ལ་ལ་ནི་པད་མ་རཱ་གའི་རང་བཞིན་ནོ། །འགའ་ཞིག་ནི་ཆ་རྣམ་པ་སྣ་ཚོགས་ཀྱིས་རྣམ་པར་བཀྲ་བར་བྱས་པ་རྣམས་ཏེ། དེ་བཞིན་དུ་གང་ཡང་པད་མའི་རྫིང་བུ་དེ་རྣམས་རྣམ་པ་སྣ་ཚོགས་པའི་རིན་པོ་ཆེ་སྣ་ཚོགས་པའི་རང་བཞིན་གྱི་པད་མ་རྣམས་ཀྱིས་ཉེ་བར་མཛེས་པར་གྱུར་པ་རྣམས་སོ། །འགའ་ཞིག་ནི་ཁ་དོག་གཅིག་པའི་པད་མས་ཉེ་བར་མཛེས་པར་གྱུར་པའོ། །འགའ་ཞིག་ནི་རྣམ་པ་དུ་མའི་མདོག་གི་འདབ་མའི་པད་མས་ཉེ་བར་མཛེས་པ་ལ་འདི་ལྟ་སྟེ། སྔོན་པོ་དང་སེར་པོ་དང་དམར་པོ་དང་དཀར་པོའི་མདོག་གི་མཚོ་ལས་སྐྱེས་པའི་པད་མས་ཉེ་བར་མཛེས་པར་བྱས་པའོ། །དེ་ལ་གང་འདབ་མ་སྔོན་པོ་དེ་ནི་དྲི་མ་མེད་པའི་ཨིན་དྲ་ནཱི་ལའི་རང་བཞིན་ནོ། །གང་སེར་པོ་དེ་ནི་གསེར་གྱི་རང་བཞིན་ནོ། །གང་དཀར་པོ་དེ་ནི་དངུལ་གྱི་རང་བཞིན་ནོ། །གང་དམར་པོ་དེ་ནི་པད་མ་རཱ་གའི་རང་བཞིན་རྣམས་ཏེ། དེ་ལྟར་པད་མ་ཆེན་པོ་དེའི་ནང་ན་རྣམ་པ་དུ་མའི་པད་མ་ཡོད་དོ། །དེ་ནས་ལྷ་དེ་རྣམས་རབ་ཏུ་དགའ་བའི་ཡིད་ཀྱིས་བུང་བ་བརྒྱ་སྟོང་གིས་ཡོངས་སུ་གང་བའི་པད་མ་དེར་ཉེ་བར་བཟུང་ནས་གཞན་ཡང་གང་ན་དེ་དག་དགའ་བ་ཆེན་པོར་གྱུར་པའི་ནགས་དང་ཉེ་བའི་ནགས་དེ་དང་ལེགས་པར་ལྡན་པ་གང་ཡིན་པའི་དགའ་བ་ཆེན་པོ་དེར་འགྲོའོ། །རྣམ་པ་སྣ་ཚོགས་པའི་རྔ་སྒྲ་
སྒྲོགས་པའི་གླུ་སྒྲས་རྣར་སྙན་པས་ཡིད་ཚིམ་པ་མེད་པར་རབ་ཏུ་དགའ་བའི་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་ཀུ་ཅོའི་སྒྲས་ཡིད་ཚིམ་པ་མེད་པ་དེ་རྣམས་ཀྱིས་བགྲོད་པའི་ནགས་དེ་ནི་རྣམ་པ་སྣ་ཚོགས་པའི་བྱ་བརྒྱ་སྟོང་གིས་དགའ་བར་གྱུར་པའི་སྒྲ་སྣ་ཚོགས་འབྱིན་པ་རིན་པོ་ཆེ་སྣ་བདུན་གྱིས་ཉེ་བར་མཛེས་པའི་ས་གཞིའི་ཆ་ཀུན་ཀྱང་མནན་ན་ནེམ་ཞིང་བཏེག་ན་འཕར་བ་མཆོག་ཏུ་འཇམ་པ་དེ་དག་རྣམས་ལ་ཡང་རྣམ་པར་རྒྱུ་བར་བྱེད་པ་ན། ཐམས་ཅད་ནས་ཀྱང་ཡིད་ཀུན་དུ་རངས་ཤིང་དགའ་བ་ནི་གོང་མ་གོང་མ་དེ་དག་རྣམས་མཐོང་བ་ན་དགའ་བར་འགྱུར་ཞིང་། ཕན་ཚུན་དུ་གྲོགས་ཀྱི་བྱ་བ་དང་ལྡན་པ་དང་ཕན་ཚུན་དུ་ཀུན་ནས་ཆགས་པའི་ཡིད་དང་ལྡན་པ་དག་གིས་ཀྱང་དགའ་བར་ཡང་འགྱུར་རོ། །ཉེ་བའི་ནགས་དེ་ལ་ཡང་དུས་ཤིན་ཏུ་ཡུན་རིང་དུ་བག་མེད་པར་གནས་པའི་ཕན་ཚུན་མཆོག་ཏུ་ཀུན་དགའ་བའི་བག་མེད་པར་གནས་ནས། གཞན་ཡང་གང་ན་སྐྱེད་མོས་ཚལ་གྱི་ཕྲེང་བ་ཞེས་བྱ་བའི་རིན་པོ་ཆེ་སྣ་ཚོགས་ཀྱི་རང་བཞིན་ཡོད་པ་དེར་འགྲོ་བར་བྱེད་དོ། །རྔ་སྐད་ཡན་ལག་ལྔ་དང་ལྡན་པས་སྣ་ཚོགས་པའི་རོལ་མོ་དང་གླུས་རབ་ཏུ་དགའ་བ་དང་ལྡན་པའི་ཡིད་ཅན་རྣམས་འདོད་པ་དྲུག་ལ་རྣམ་པར་ཆགས་པས་ལྟ་བ་ལ་བརྐམ་པར་གྱུར་པ་རྒྱགས་པ་ལ་དོན་གཅིག་པས་བག་མེད་པར་རྣམ་པར་སྤྱོད་པར་ཡང་བྱེད་པ་དང་རྩེ་བར་གྱུར་ཅིང་། ཀུན་དུ་སྤྱོད་པར་ཡང་གྱུར་པ་རྣམས་ཀྱིས་དེར་ཉེ་བར་ཕྱིན་ནས་ཀྱང་འོད་ཟེར་རྣམས་མཐོང་བར་གྱུར་པ་ནི་ཇི་ལྟར་ཉི་མའི་ཕྲེང་བ་རྣམས་གང་ཡིན་པ་དེ་ལྟར་འོད་རྣམས་ཡིན་པར་རྟོགས་སོ། །དེ་སྲིད་ཀྱི་འོད་ཟེར་འབར་བ་ཉིད་ཡིན་པའི་ཡུལ་ཕྱོགས་ཀྱི་ཉེ་འཁོར་ན་ཡོན་ཏན་གཞན་ཡང་ལྷ་དེ་དག་གིས་མཐོང་བ་རྣམས་ལ་འདི་ལྟ་སྟེ། སེར་པོ་དང་དམར་པོ་དང་དཀར་པོ་རྣམས་དུ་མ་ཉིད་མཐོང་བའི་ཡུལ་ཕྱོགས་དེ་དག་གི་ས་གཞིའི་ཆ་དེ་དག་རྣམས་ཀུན་ནས་དགའ་བ་དེ་རྣམས་ལ་ཡང་དེ་རྣམ་པ་དུ་མར་མངོན་པར་དགའ་བར་བྱས་ནས་གང་ན་རྩེད་མོའི་རི་ཡོད་པ་དེར་ཉེ་བར་འགྲོ་བར་བྱེད་དོ། །སླར་ཡང་ཡུལ་གྱི་བདེ་བ་ངོམས་མི་ཤེས་པས་དེ་དག་རྣམས་ཀྱང་རྩེད་མོའི་རི་རྣམས་རིན་པོ་ཆེ་བདུན་གྱི་ཁམས་ཀྱིས་རྣམ་པར་བརྒྱན་པ་ལ་གནས་དུ་མ་ཡོད་པ་རྣམས་སོ། །དེ་ན་ཡང་ལྗོན་ཤིང་བརྒྱ་ཕྲག་དུ་མ་རྣམ་པར་འགྱུར་བ་དང་ལྡན་
པ་ལ་བྱའི་ཚང་དགའ་བར་གྱུར་པ་དང་ལྡན་པ་འབབ་ཆུ་དང་ཆུ་ཀླུང་དང་རྫིང་བུ་དང་ནགས་དང་ཉེ་བའི་ནགས་དང་རི་དང་སྨན་ལྗོངས་དང་རི་ལོགས་དང་རི་རྩྭ་དང་ཀླུང་ན་རི་དགས་ཀྱི་ཚོགས་དང་། པད་མའི་མཚེ་འུས་རྣམ་པར་བརྒྱན་པའི་རྩེད་མོའི་རི་སླེབས་ནས་འཕྱོས་ཏེ་ལྷ་རྫས་ཀྱི་འདོད་པའི་ཡོན་ཏན་ལྔ་དང་བཅས་ཤིང་ལྡན་པར་གྱུར་པ་ཕན་ཚུན་ལྷན་ཅིག་ཏུ་ལྷ་རྫས་ཀྱི་ཆ་བྱད་དུ་མས་རྣམ་པར་གསལ་བ་དང་བཅས་པ། རྒྱན་དང་ཆ་བྱད་ཀྱིས་མཛེས་པའི་ལྷའི་བུ་མོས་ཡོངས་སུ་བསྐོར་བ་དེ་ལ་ཡང་དུས་ཤིན་ཏུ་ཡུན་རིང་པོར་ཡུལ་གྱི་བདེ་བ་ངོམས་མི་ཤེས་པ་རྣམས་ཀྱིས་དགའ་བར་བྱེད་དོ། །གཞན་ཡང་གང་ན་གཞལ་ཡས་ཁང་གི་ཁང་བུའི་ཕྲེང་བ་ཡོད་པ་དེར་ཉེ་བར་འགྲོའོ། །ཁྱད་པར་དུ་ངོམས་མི་ཤེས་པའི་ཡུལ་གྱི་བདེ་བ་ལ་དགའ་བར་གནས་པར་བྱ་བའི་ཕྱིར་ཏེ། ངོམས་མི་ཤེས་པའི་ལྷ་རྫས་ཀྱི་འདོད་པའི་ཡོན་ཏན་ལྔ་ལ་རྣམ་པ་དུ་མ་དང་རྣམ་པར་རྟོག་པ་དུ་མས་ལྷའི་འདོད་པ་ཀུན་དུ་གསལ་བར་བྱེད་པ་སྲེད་པའི་མེས་ལེགས་པར་གསལ་བར་བྱས་པས་རྣམ་པ་དུ་མར་དགའ་བར་བྱེད་ཅིང་། ལྷ་དང་ལྷ་མོ་རྣམས་ཀྱི་ཚོགས་ཀྱིས་རྣམ་པ་དུ་མར་རབ་ཏུ་དགའ་བར་བྱེད་པ་ནི་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་དང་བཅས་པ་དེ་དག་རྣམས་པད་མའི་ནང་ཉི་མ་བརྒྱ་སྟོང་བས་ཆེས་ལྷག་པའི་གཟི་བརྗིད་དང་ལྡན་པ་མཆོག་ཏུ་ཞི་ཞིང་གདུག་པ་དང་བྲལ་བ་དེ་ལ་ཕན་ཚུན་དུ་དགའ་བར་གྱུར་པ། མཆོག་ཏུ་བལྟ་བར་དགའ་བ་མཆོག་ཏུ་དབང་པོ་ལྔ་བདེ་བར་གནས་པར་གྱུར་པ་རྣམས་ནི་མཆོག་ཏུ་དགེ་བ། མཆོག་ཏུ་མཛེས་པ། འཕགས་པའི་སྐྱེ་བོ་རྣམས་ཤིན་ཏུ་དགྱེས་པའི་དགེ་བའི་རྩ་བ་ལེགས་པར་རྣམ་པར་དག་པའི་འབྲས་བུར་གྱུར་པ་རྣམ་པར་རྟོག་པ་དུ་མས་ཡུལ་དུ་མའི་བདེ་བ་རྣམས་ལ་ཉེ་བར་ལོངས་སྤྱོད་དོ། །ཕན་ཚུན་དུ་འདྲུལ་བར་བྱེད་པ་དང་ཕན་ཚུན་དུ་སྨྲ་བར་བྱེད་པ་ལ་ཞུགས་པའི་ཡིད་ཅན་རྣམས་ཕན་ཚུན་དུ་གུས་པར་བྱེད་པ་ལེགས་པར་སྐྱེས་པས་ངོམས་པ་མེད་པའི་སེམས་ཀྱིས་དེ་རྣམས་དེ་ལྟར་པད་མ་འདིའི་ནང་ན་དུས་ཡུན་རིང་པོར་དགའ་བར་བྱེད་དོ། །དེ་ནས་དུས་ནམ་ཞིག་ན་ཡུལ་གྱི་བདེ་བས་མ་ངོམས་པར་ཡང་ཅི་དགའ་བར་གྱུར་ནས་ཕྱིར་བྱུང་ནས། སྙིང་པོའི་སྒོ་དེ་ཉིད་ནས་ཇི་ལྟ་
བའི་ནང་དུ་རྗེས་སུ་ཞུགས་ཏེ། དེ་བཞིན་དུ་ཕྱིར་བྱུང་ནས་དེ་མངོན་པར་མཐོང་ནས་དུས་ཡུན་རིང་པོར་ཕྱིར་མི་འབྱུང་ངོ་། །ཡང་དེ་ཁོ་ན་ཉིད་མཐོང་བ་ཞེས་བྱ་བའི་བྱ་འཇམ་ཞིང་མཐོ་བའི་རི་དེའི་སྟེང་ན་གནས་པ་དེས་དེ་མཐོང་ནས་ཚིགས་སུ་བཅད་པ་སྨྲས་པ་ནི་ཇི་ལྟར། གཟུགས་རྣམས་སྐད་ཅིག་འདི་དག་གི །ན་ཚོད་དེ་བཞིན་སྐད་ཅིག་ཡིན། །དེ་བཞིན་བདེ་བ་ཟད་ཀྱང་ནི། །བློ་གྲོས་མེད་པས་གོ་བ་མིན། །དགེ་བའི་མཚན་ཉིད་དུ་མ་དེའི། །སྐྱེ་བ་འདི་དག་ཐམས་ཅད་དེ། །གང་ཚེ་དུས་ཀྱི་འཁོར་ལོ་ཡིས། །རིམ་པར་གཤེགས་ནས་རྣམ་པར་འཇིག །བརྒྱ་ཕྲག་དུ་མའི་མཚན་ཉིད་ཀྱི། །ཇི་ལྟར་སྔོན་གྱི་དེ་ཉིད་དང་། །དེ་ལྟར་སྐྱེ་བ་འདི་དག་ཀྱང་། །འཆི་བདག་རྒྱལ་པོས་ཕམ་པར་བྱེད། །རྟག་ཏུ་བདེ་བས་གནས་པ་ཡི། །བག་མེད་ཡིད་ཅན་དེ་དག་རྣམས། །འཆི་བདག་བདུད་ཀྱི་ཞགས་པ་འདིས། །རྩོམ་པས་བདེ་བ་འཇོམས་བྱེད་ཡིན། །བདེ་བ་སྣང་བ་སྟོབས་དང་ཤུགས། །འཐུན་པ་རྣམ་པར་འབྲལ་བྱེད་པོ། །འཆི་བདག་རྒྱལ་པོ་སྟོབས་ལྡན་པ། །འདི་ནི་ཉེ་བར་འདྲེན་པ་ཡིན། །གང་ཞིག་ཉེ་བར་འོང་བ་པོ། །དེ་དག་བག་མེད་ཅེས་བྱ་རྣམས། །གསོན་པ་བདེ་བ་དང་བཅས་པ། །རིངས་པར་འཇོམས་པར་བྱེད་པ་ཡིན། །བག་མེད་པས་ནི་ཕྲོགས་པའི་ལྷ། །དུས་རིང་དུ་ནི་འདི་ཉམས་པ། །བདེ་བ་དུ་མས་བསླུས་པ་ཡི། །ཡོངས་སུ་རྟོགས་པ་མ་ཡིན་ནོ། །གལ་ཏེ་ཉི་མའི་འོད་ཟེར་ལས། །དབང་པོ་བརྐམ་པར་འགྱུར་བའི་སེམས། །གཤིན་རྗེའི་འཇིག་རྟེན་འོངས་གྱུར་པ། །དེ་ཚེ་དེ་འབྲས་ཤེས་པར་འགྱུར། །ལུས་དང་སྟོབས་དག་རྙིང་བ་དང་། །དེ་བཞིན་བདེ་བའང་སྐད་ཅིག་པ། །དེ་ལྟ་ན་ཡང་ཆགས་ཡིད་ཅན། །ལེགས་པར་རྟོགས་མིན་མིག་མེད་པས། །རྟག་ཏུ་བདེ་བས་གནས་པ་ཡི། །དགའ་བ་ལས་ཀྱང་དགའ་བར་འགྲོ། །གང་ཚེ་འདི་དག་གར་འགྲོ་ཡང་། །འཆི་བདག་རྒྱལ་པོས་འཇོམས་པར་བྱེད། །རྒས་པས་འཐུང་བའི་རྒྱལ་པོ་ཡིས། །རྨོངས་པ་གང་ཡང་ལུས་པ་མེད། །ཕྱིས་དེ་འཆི་བའི་དུས་ན་ནི། །རང་སེམས་མེ་ཡིས་གདུང་བར་
བྱེད། །ཡུལ་རྣམས་ཀྱིས་ནི་དབང་པོ་རྣམས། །ཚིམ་པ་སྐྱེ་བར་འགྱུར་མ་ཡིན། །གལ་ཏེ་ཡེ་ཤེས་གསལ་བྱེད་ཀྱིས། །གང་ཕན་པ་ནི་མི་འཕེན་ན། །རྣམ་རྟོག་བརྒྱ་ཡི་དྲི་མ་ཡིས། །ཡུལ་རྣམས་ཀྱང་ནི་བསྟེན་པ་ན། །རླུང་གིས་བསྐྱོད་པའི་མེ་བཞིན་དུ། །ཀུན་དུ་གཡོ་བས་རབ་ཏུ་འཇུག །བརྩོན་པའི་ཤུགས་ཀྱིས་དེ་རྟོགས་ནས། །རྟག་ཏུ་མེ་འབར་འདོད་པ་ཡི། །ཡུལ་སྡོམ་ཤེས་རབ་ལྡན་པ་ཡི། །དེ་ཉིད་དཔྱོད་པ་པོ་ཡིས་རྟོགས། །གང་དག་རྟག་ཏུ་འཁྲུལ་པའི་ཡིད། །རྟག་ཏུ་ཡུལ་ལ་མཆོག་འཛིན་ཏེ། །བློ་བྲལ་དགའ་བ་དེ་ཐམས་ཅད། །ཐམས་ཅད་གཏི་མུག་བྱེད་པ་ཡིན། །ལོག་པའི་བློ་ཡིས་བསྟེན་འགྱུར་བས། །ཡུལ་གྱི་མེ་ནི་འཕེལ་འགྱུར་ཏེ། །ཇི་ལྟར་བུད་ཤིང་དང་ལྡན་པའི། །མེ་ནི་རླུང་གིས་བུས་པ་ལྟར། །མི་གཡོ་འདོད་ཆགས་དབང་འགྲོ་བ། །རྟག་ཏུ་འདོད་དབང་རྗེས་འགྲོ་བའི། །ལྷ་དེ་འདོད་ཆགས་ཀྱིས་བསླུས་ནས། །ལྷ་ཡི་འཇིག་རྟེན་དག་ནས་ལྷུང་། །དམ་པའི་ཡིད་ལ་ལེགས་ཡོན་ལྡན། །བདེ་གང་དང་པོར་བྱུང་བ་འདི། །རྣམ་པར་ཞིག་ནས་དེ་གར་སོང་། །གསོན་པ་སྐད་ཅིག་གཡོ་བ་སྟེ། །ཇི་ལྟར་དེ་ནི་རྣམ་འཇིག་པ། །སྲོག་ནི་གཡོ་བ་སྐད་ཅིག་པ། །གལ་ཏེ་དེ་འཇིག་གང་གི་ཕྱིར། །དེ་བཞིན་དུ་ནི་སྲོག་འདི་ལ། །དུས་ནི་རིང་པོ་མིན་པར་ཡང་། །འབྱུང་བར་འགྱུར་ཏེ་ཐེ་ཙོམ་མེད། །ཡུལ་འདི་དག་གིས་མང་དུ་དགའ། །ཡིད་ནི་དེ་ལ་རྟག་ཏུ་སོང་། །དེ་དང་བྲལ་བར་གྱུར་པ་ཡིས། །སྡུག་བསྔལ་ཡང་ནི་རིག་པ་མིན། །ལྷ་ཡི་འདོད་ཡོན་ལྡན་པ་ཡི། །གང་དེ་བདེ་བ་འདི་དག་རྣམས། །བྲལ་བར་འགྱུར་བའི་སྡུག་བསྔལ་གྱི། །བཅུ་དྲུག་ཆར་ཡང་མི་ཕོད་དོ། །དྲི་མ་གཉིས་གསུམ་བཅོམ་པའི་ཕྱིར། །ཇི་ལྟ་ཉིད་དུ་སྐྱེ་བ་མིན། །སྲིད་ལྡན་དེ་ལྟར་ཚིམ་པ་མེད། །འདོད་པ་དག་ལས་རྒྱལ་བ་མིན། །མ་དཔྱད་པ་ཡི་སེམས་ཀྱིས་ནི། །རྟག་ཏུ་འདོད་པ་རྗེས་སྟེན་པ། །དུས་རིང་རྗེས་སུ་འབྲེལ་པ་ཡི། །སྡུག་བསྔལ་ཉིད་ནི་ཞི་བ་མིན། །རྨོངས་པ་མྱུར་དུ་ཆགས་པར་བྱེད། །སྡུག་བསྔལ་ཉིད་ནི་ཤེས་པ་མིན། །ཕྱི་ནས་སྡུག་ཕོངས་གྱུར་པ་
ན། །གང་འབྲས་བུ་ཡིན་ཤེས་པར་འགྱུར། །འདོད་པ་ཡུད་ཙམ་བཟང་བ་སྟེ། །འདི་ནི་མཆོག་ཏུ་མི་བཟད་པའོ། །འདི་དག་ཕོ་ཉ་འོང་བ་སྟེ། །འོང་བས་ཕན་པ་མིན་པ་བྱེད། །གང་དེ་ལོང་བ་ཡིད་ཆེས་པ། །ཤེས་པའི་མིག་མེད་པས་བྱས་སོ། །འོབས་དང་གཡང་དང་འདྲ་བ་ཡི། །མི་དེ་དམྱལ་བར་འགྲོ་བ་ཡིན། །རྟག་ཏུ་མི་ལ་ཕན་བྱེད་པའི། །བག་ཡོད་པ་ནི་གྲོགས་ཀྱི་མཆོག །བག་མེད་པ་ནི་དགྲ་ཡི་མཆོག །དེ་ཕྱིར་གྲོགས་ཉིད་མཆོག་ཡིན་ནོ། །ཐམས་ཅད་དུ་ནི་རྗེས་འགྲོ་འདི། །དེ་ནི་མི་བཟད་དག་གི་མཆོག །ངན་འགྲོ་རྣམས་ཀྱི་ལམ་གྱི་མཆོག །འདི་ནི་བག་མེད་ཅེས་བྱར་བརྗོད། །བག་མེད་པས་ནི་བག་མེད་པའི། །ཡུལ་གང་ལ་ནི་ཆགས་བྱེད་པ། །རྨོངས་པའི་ཡིད་ཅན་མི་དེ་ནི། །རྟག་ཏུ་སྡུག་བསྔལ་སྐལ་ལྡན་ཡིན། །གང་དག་འཇིགས་སྡུག་ཡོད་མིན་ཞིང་། །ཤེས་པས་ཀུན་ལྟའང་མེད་པར་ནི། །བདེ་བ་དོན་དུ་གཉེར་བའི་ལྷ། །དེ་ནི་ཕྱུགས་དང་མཚུངས་པར་མཐོང་། །ཟས་དང་འཁྲིག་པ་ལ་དགའ་བ། །ཕྱུགས་རྣམས་ཀྱི་ནི་སྙིང་དུ་འོང་། །དགའ་བ་དེ་ཡིས་ལྷ་རྣམས་གང་། །འགྲོ་བ་དེ་ནི་ཕྱུགས་དང་མཚུངས། །སེམས་ཀྱི་ཁྱད་པར་གྱུར་པ་ཡིས། །ལས་ཀྱི་ཁྱད་པར་དེ་བཞིན་ནོ། །ལས་ཡོན་ཉམས་པ་དག་གིས་ནི། །ཁྱད་པར་དམིགས་པ་མ་ཡིན་ནོ། །རོལ་པས་རྣམ་པར་རྩེ་བ་ཡིས། །འཆི་བདག་ཁ་ན་གནས་པ་ཡིན། །འཆི་བདག་དུས་སུ་ལེགས་ཕྱིན་པས། །གདུལ་དཀས་འབྲས་བུ་ཤེས་པར་འགྱུར། །ཇི་སྲིད་འཆི་བ་མ་བྱུང་ཞིང་། །ཇི་སྲིད་བློ་ནི་མ་འཁྲུགས་པ། །བློ་ལྡན་ཡིད་རབ་བརྩོན་པས་ནི། །དེ་སྲིད་ཆོས་ལ་དགའ་བར་གྱིས། །གསོན་པ་ཐམས་ཅད་འཇིག་བྱེད་དང་། །བདེ་བ་ཐམས་ཅད་ཟད་བྱེད་ཅིང་། །སྡུག་པ་ཀུན་དང་འབྲལ་བྱེད་པའི། །འཆི་བདག་འདི་ནི་འོང་བ་ཡང་། །དེ་ཚེ་སྒྲ་ཆེན་པོས་ནས་ནི། །འཆི་བདག་མཆོག་ཏུ་མི་བཟད་ལ། །ཆོས་སྤངས་པ་ཡི་སྐྱབས་གཞན་མེད། །དེ་ཕྱིར་ཆོས་ལ་དགའ་བར་གྱིས། །བག་མེད་སྙིང་གི་ལུས་ཅན་རྣམས། །དེ་དག་འཆི་བདག་རྣམས་ཀྱིས་ཁྱེར། །བག་མེད་པས་ནི་བཅོམ་གྱུར་
པ། །སྔ་ཕྱིར་འཆི་བདག་གིས་རབ་འཇོམས། །ཆོས་ཀྱིས་འཚོ་དང་བདེ་བ་རྣམས། །དེ་ཉིད་ཡང་དག་རབ་བརྗོད་པ། །མཐོ་རིས་ལམ་ནི་རབ་སྟོན་པའི། །བག་ཡོད་པ་ཞེས་བརྗོད་པ་ཡིན། །དེ་དག་དོན་དང་དོན་མིན་དང་། །བཅིངས་དང་ཐར་པའང་དེ་བཞིན་དུ། །བག་ཡོད་བག་མེད་ཅེས་བྱ་དང་། །ཡོན་ཏན་སྐྱོན་ཞེས་ཀྱང་མཚུངས་སོ། །རྣམ་པར་རྨོངས་པའི་ཡིད་ཀྱི་ལྷས། །དེ་ལྟར་རྣམ་པར་མི་ཤེས་སོ། །དགྲ་དང་ལྷན་ཅིག་དགའ་བ་དང་། །ཤེས་རབ་ཉམས་པར་བྱེད་པ་ཡང་། །དེ་ཁོ་ན་ཉིད་མཐོང་བ་ཞེས་བྱ་བའི་བྱས་ལྷ་དེ་རྣམས་མངོན་པར་ཀུན་དུ་མཐོང་ནས། དེ་ལྟར་ཡང་དག་པ་རྣམ་པ་དུ་མའི་སྒོ་ནས་རྗེས་སུ་སྟོན་ཡང་ལེགས་པར་རྟོགས་པ་ཡང་མ་ཡིན་ཏེ། བག་མེད་པས་ཀུན་ནས་ཕྲོགས་པའི་སེམས་ཡུལ་ལ་ཆེད་ཆེར་བྱེད་པས་འདོད་པའི་ཡོན་ཏན་ལྔས་ཉེ་བར་ཕྲོགས་པའི་ཡིད་ཅན་རྣམས་ཀྱིས་ནི་དེ་ཁོ་ན་ཡང་དག་པར་མི་ཤེས་ལ། གང་དག་ཅི་ནས་ཀྱང་སྐྱེ་བོ་ཐམས་ཅད་ཀྱིས་མྱོང་བར་འགྱུར་བའི་འཆི་འཕོ་དང་སྐྱེ་བའི་འཇིགས་པ་དེ་ནི་ངེས་པ་ཁོ་ནར་རབ་ཏུ་འཇོམས་པ་ཅན་གྱི་འདུས་བྱས་ཐམས་ཅད་ལ་འབྱུང་བར་འགྱུར་རོ། །གཞན་ཡང་ལྷ་དེ་དག་རྣམས་ཉིད་དེའི་ཚེ་དེ་ཁོ་ན་ལྟར་པད་མ་དེ་ལ་གནས་ནས་འཇམ་ཞིང་མཐོ་བའི་རིའི་མཆོག་དེ་ཉིད་དང་། དེ་བཞིན་དུ་སྙིང་པོའི་འདབ་མ་དེ་ལ་མི་གཡོ་བར་ལེགས་པར་གནས་ཏེ་གང་ན་ནང་ཡངས་པ་ཞེས་བྱ་བའི་མཚོ་ཡོད་པ་དེར་ཉེ་བར་འགྲོ་སྟེ། རྣམ་པ་སྣ་ཚོགས་པའི་གླུ་དང་རྔ་སྒྲ་དང་ལྡན་པ་དང་རོལ་ཆ་འཛིན་པའི་མཁན་པོ་དང་གར་དང་དགོད་པ་དང་འགྱིང་བ་དང་གླུ་ཉེ་བར་ལེན་པ་དང་བཅས་པས་དེ་རྣམས་ནང་ཡངས་པ་ཞེས་བྱ་བའི་མཚོ་དེར་ཉེ་བར་འགྲོའོ། །མཚོ་དེའི་ཉེ་འཁོར་ན་ཡང་ཁང་བཟངས་ལྔ་བརྒྱས་ཉེ་བར་བསྐོར་བ་རིན་པོ་ཆེ་སྣ་བདུན་གྱི་ལན་ཀན་མང་པོ་ཆེས་རྣམ་པར་བཀྲ་བའི་ཡོན་ཏན་གྱིས་ཆེས་གསལ་བར་བྱེད་པ་ཉེ་འཁོར་ཡང་ཤིན་ཏུ་དགའ་བས་ལྷ་རྣམས་རྩེ་བའི་ས་དང་མངོན་པར་ལྡན་པར་གྱུར་པ། ཁང་བཟངས་རྣམ་པ་དུ་མ་ལ་ཁ་ཅིག་ནི་སྐར་ཁུང་དང་བཅས་པ་སྟེགས་བུ་དང་བཅས་པ་སྟེང་ཡོངས་སུ་རྒྱས་པ། མཆོག་ཏུ་རབ་ཏུ་དགའ་བའི་
ཟས་དང་སྐོམ་དང་སྟན་རྣམ་པ་དུ་མ་དང་བཅས་པ་རྣམས་ཕན་ཚུན་དུ་ཀུན་ནས་ཆགས་པའི་ཡིད་ཀྱིས་རྟག་པར་ཡང་ཟས་ལ་ཆེད་ཆེར་བྱེད་པའི་དགའ་བས་གནས་པ་དང་། ལྷ་དང་ལྷ་མོའི་ཚོགས་རྣམས་རྟག་ཏུ་རྔ་སྐད་ཡན་ལག་ལྔ་དང་ལྡན་པས་མང་དུ་དགའ་བ་དེ་དག་རྣམས་དེ་ལྟར་དགའ་ཞིང་བདེ་བས་གནས་པ་རྣམས་ཆགས་པའི་ཡིད་དང་ལྡན་པས་ལྷན་ཅིག་ཁོ་ནར་པད་མའི་སྙིང་པོའི་ནང་དུ་ལེགས་པར་རབ་ཏུ་གནས་ཤིང་ནམ་མཁའ་ལ་ཀུན་དུ་གནས་ཏེ། འཐབ་བྲལ་གྱི་མངའ་བདག་མུ་སུ་ལུན་དྷ་ལྷའི་ཚོགས་ཐམས་ཅད་ཀྱིས་ཡོངས་སུ་བསྐོར་ཏེ། གང་ན་ནང་ཡངས་པ་ཞེས་བྱ་བའི་མཚོ་ཡོད་པ་དེར་ཉེ་བར་འགྲོའོ། །དེར་ཉེ་བར་ཕྱིན་པ་དང་དེ་ལ་མང་དུ་དགའ་བར་བྱེད་པ་དང་། ཀུན་དུ་སྤྱོད་པར་བྱེད་པའི་ལྷ་གང་ཡིན་པ་དེ་དག་རྣམས་མངོན་པར་མཐོང་ཞིང་རྣམ་པ་སྣ་ཚོགས་པའི་རྔ་དང་རོལ་མོའི་སྒྲ་དང་ལྡན་པ་དེ་རྣམས་ཀྱིས་ཀྱང་མུ་སུ་ལུན་དྷ་དེ་མཐོང་ནས་ཤིན་ཏུ་ཡང་བཅུ་འགྱུར་གྱིས་རབ་ཏུ་དགའ་བར་གྱུར་པའི་ཡིད་ཅན་དེ་དག་རྣམས་ཁང་བཟངས་ཐམས་ཅད་ནས་དང་། ཁང་བུའི་ཕྲེང་བ་ཐམས་ཅད་ནས་དང་པད་མའི་རྫིང་བུ་ཐམས་ཅད་ནས་དང་། གནས་གཞན་ཐམས་ཅད་ནས་ཀྱང་ལྷ་དེ་དག་རྣམས་ལྷན་ཅིག་ཁོ་ནར་ལངས་ནས་སྙན་ཞིང་སྒྲ་དང་རྣམ་པར་འགྱུར་བ་དང་ལྡན་པའི་ཡིད་ཆེས་རབ་ཏུ་དགའ་བས། གང་ན་འཐབ་བྲལ་གྱི་མངའ་བདག་མུ་སུ་ལུན་དྷ་ནམ་མཁའ་ལ་རྒྱུ་བས་གནས་པ་དེར་ཐམས་ཅད་འཁོད་པར་གྱུར་ལ། ཐབས་ཅིག་ཏུ་ལེགས་པར་སྐྱེས་པའི་གུས་པ་དང་དགའ་བ་དང་ལྡན་པས་དེ་དེ་ན་དེ་ལྟར་ནམ་མཁའ་ལ་ལེགས་པར་གནས་པ་མངོན་པར་མཐོང་ནས་ཐལ་མོ་སྤྱི་བོར་སྦྱར་ནས་ལུས་ཀུན་གྱིས་ཕྱག་འཚལ་ཏེ། ལྷ་དེ་དག་རྣམས་ཐམས་ཅད་ཀྱིས་ཀྱང་མུ་སུ་ལུན་དྷ་དེ་མདུན་དུ་བྱས་ནས་གར་དང་ལྡན་པས་གང་ན་མཚོ་ནང་ཡངས་པ་ཞེས་བྱ་བ་ཡོན་ཏན་ཐམས་ཅད་ཕུན་སུམ་ཚོགས་པ་གཞལ་ཡས་ཁང་གི་ཕྲེང་བ་དུ་མ་རྣམ་པ་སྣ་ཚོགས་པས་རྣམ་པར་བརྒྱན་པ། ཆགས་པར་གྱུར་པའི་སྒྲའི་ཁྱད་པར་སྣ་ཚོགས་སྒྲོགས་པ། ལྗོན་ཤིང་བརྒྱ་སྟོང་དུ་མ་དང་ལྡན་པ་ཉི་མ་བརྒྱ་སྟོང་བས་ཆེས་ལྷག་པའི་འོད་འབར་བའི་ལྷའི་ཚོགས་ཀྱིས་
ཡོངས་སུ་བསྐོར་ཞིང་རྟག་ཏུ་སྤྲོ་བའི་འཐབ་བྲལ་བའི་ལྷ་རྣམས་ཀྱིས་ས་དེ་དག་ཏུ་སླེབ་ནས། འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་དེ་ས་གཞི་ལ་ལེགས་པར་བཞུགས་པ་ལ་རབ་ཏུ་དགའ་བ་མཆོག་དང་ལྡན་པའི་ལྷ་རྣམས་ཀྱིས་བསྟོད་པར་འགྱུར་ཞིང་། དེས་ལྷ་དེ་རྣམས་ཀྱང་ཚིག་རྣམ་པ་དུ་མས་མགུ་བར་བྱས་ནས་གང་ན་མཚོའི་འཇུག་ངོགས་ཡོད་པ་དེར་དེ་དག་རྣམས་ལེགས་པར་འགྲོའོ། །དེ་དག་རྣམས་དེར་ཉེ་བར་སོང་ནས་དེ་དག་ཀྱང་མཐོང་ན་ཡིད་འཕྲོག་པ་ཞེས་བྱ་བའི་ཁང་བཟངས་ཡོད་པ་དེར་འཇུག་གོ །དེར་ཞུགས་པ་ན་ཡང་རིན་པོ་ཆེ་སྣ་བདུན་གྱི་འོད་ཀྱི་ཕྲེང་བ་དང་ལྡན་པའི་ཆ་ཤས་རྣམ་པ་སྣ་ཚོགས་པར་རྣམ་པར་བཀྲ་བས་ཡོན་ཏན་དུ་མའི་དཔལ་སྟོང་ཕྲག་དང་ལྡན་ཞིང་ལྷ་དང་ལྷ་མོའི་ཚོགས་ཐམས་ཅད་ཀྱིས་མཚུངས་པར་མཆོད་པར་བྱེད་དེ། འཐབ་བྲལ་བ་རྣམས་ཀྱི་མངའ་བདག་དེ་དེར་ལེགས་པར་ཞུགས་པའི་ཚེ་ནི་ལྷ་རྫས་མཆོག་གི་དཔལ་མཆོག་དང་ལྡན་པའི་རིན་པོ་ཆེ་སྣ་བདུན་གྱིས་རྣམ་པར་བཀྲ་བར་བྱས་པའི་སེང་གེའི་ཁྲི་ལ་ཐམས་ཅད་ཀྱི་བདེ་བ་སྟོན་པའི་ལྷའི་རྒྱལ་པོ་དེ་ལེགས་པར་བཞུགས་ཏེ། མཆོག་ཏུ་དགའ་བས་ལྷག་པར་དགའ་བ་ཆེས་རྒན་པའི་ལྷའི་ཚོགས་ཀྱིས་ཡོངས་སུ་བསྐོར་ཞིང་མདུན་དུ་བདར་ནས་ལྷ་བརྒྱ་སྟོང་དུ་མས་ཉེ་བར་མཛེས་པར་གྱུར་པ་ན། དེ་ནས་ལྷའི་རྒྱལ་པོ་དེ་ཉིད་ཀྱིས་དེ་དག་རྣམས་ན་སོ་ཆེས་ལྷག་པས་རྒན་པའི་ལྷ་དེ་རྣམས་ལ་དྲིས་པ། བདག་ཅག་གི་བླ་མའི་མཆོག་དུས་རིང་པོ་ནས་མཇལ་བའི་འཐབ་བྲལ་གྱི་མངའ་བདག་ཅིའི་ཕྱིར་པད་མ་ལ་ལེགས་པར་ཞོན་ནས་འདིར་བྱོན། དེ་ནས་མུ་སུ་ལུན་དྷ་དེས་ལྷ་དེ་དག་ལ་འདི་སྐད་ཅེས་སྨྲས་ཏེ། ལྷ་ཁྱེད་རྣམས་ངས་ངོ་མཚར་ཆེ་བ་པད་མའི་ནང་དུ་མཐོང་ནས་ངེད་ལྷ་དང་ལྷ་མོའི་ཚོགས་ཐམས་ཅད་ཀྱིས་ཀུན་ཏུ་གང་བ་པད་མ་གང་ལ་ཞོན་ནས་འདིར་འོངས་ལ། དེར་ཡང་རྒྱ་ཆེར་འཐབ་བྲལ་གྱི་བདག་པོ་དེ་ལ་ཤིན་ཏུ་ཡོན་ཏན་ཕུན་སུམ་ཚོགས་པ་ཐམས་ཅད་རྣམ་པ་དུ་མའི་སྒོ་ནས་མཁྱེན་པར་བྱེད་དེ། རྒན་པའི་མཆོག་དེ་དག་ཐམས་ཅད་ཀྱིས་སྔར་བཞིན་ནོ། །དེ་ནས་དེ་ཐོས་པ་དང་ལྷ་གང་དག་ཆེས་ལྷག་པར་བལྟ་ན་སྡུག་ཅིང་མཐོང་བ་ནི་ཆེས་
དགེ་ལེགས་སུ་འགྱུར་བ་དེ་དག་གིས་འཐབ་བྲལ་གྱི་མངའ་བདག་མུ་སུ་ལུན་དྷ་དེ་ལ་སྐྱེས་པའི་རབས་དེ་དག་ངེས་པར་མཁྱེན་པར་བྱེད་དེ། ལྷ་ཉིད་ཀྱི་ཞལ་སྔ་ནས་ཇི་ལྟ་བ་བཞིན་དུ་གསན་ལགས་དང་། གང་གི་བདག་ཉིད་ཆེན་པོ་དེ་དང་གང་དག་གི་ཡང་གཟི་བརྗིད་ཆེན་པོ་དང་ལྡན་པ་དེའི་ནང་ཡིན་ལ། པད་མ་ཆེན་པོ་དེའི་ནང་ནི་དེ་སྲིད་ཅིག་གི་འདོད་པར་བྱ་བ་མཆོག་དང་ལྡན་པ་དང་། ཡོན་ཏན་དུ་མ་དེ་སྲིད་དང་ལྡན་པའི་རྣམ་པ་དེ་ལྟ་བུ་འཐབ་བྲལ་བ་རྣམས་ཀྱི་ལྷའི་རིས་འདི་རྣམས་ན་རྣམ་པ་དེ་ལྟ་བུ་ལས་རྫས་གཞན་ཡོད་པ་ནི་མ་ཡིན་ཏེ། ཅི་ལྟར་དེའི་ནང་དུ་འདི་ལྟར་ཐོས་ཏེ། ཇི་ལྟར་གྲགས་པ་གསེར་ཐུབ་ཞེས་བྱ་བའི་བཅོམ་ལྡན་འདས་བླ་ན་མེད་པ་སྐྱེས་བུ་འདུལ་བ། ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་འཇིག་རྟེན་དུ་བྱུང་བར་གྱུར་ལ། དེས་བསྟན་པར་གྱུར་པའི་ཆོས་ནི་དང་པོར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ་འབའ་ཞིག་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བའི་ཆོས་སྟོན་པར་མཛད་དེ། ཇི་ལྟར་འདི་ནི་གཟུགས་སོ། །འདི་ནི་གཟུགས་ཀུན་དུ་འབྱུང་བའོ། །འདི་ནི་གཟུགས་འགོག་པའོ། །འདི་ནི་གཟུགས་འགོག་པར་འགྲོ་བའི་ལམ་མོ་ཞེས་དེ་ལྟར་རྟོགས་པར་བྱེད་པའི་ཆོས་དང་པོ་དང་ཐ་མ་དང་བར་དུ་དགེ་བ་བསྟན་པར་གྱུར་ཏོ། །དེའི་གསུང་རབ་ཀྱིས་འཛམ་བུའི་གླིང་གི་ཡུལ་ལྗོངས་སྟོང་ཕྲག་བརྒྱའི་སྐྱེ་བོ་རབ་ཏུ་མང་པོ་རྣམས་ཀྱིས་བདེན་པ་མཐོང་བར་འགྱུར་ཞིང་ཁྱད་པར་དུ་འཕགས་པའི་འབྲས་བུ་རྣམས་ལ་ཉེ་བར་ལོངས་སྤྱོད་པ་དང་རིམ་གྱིས་ཇི་ལྟ་བ་བཞིན་དུ་ཕྱིར་མི་ལྡོག་པ་དང་། རྒྱུན་དུ་ཞུགས་པ་དང་དེ་བཞིན་དུ་བསམ་གཏན་བཞི་པ་ཐོབ་པ་དང་བསམ་གཏན་གསུམ་པ་ཐོབ་པ་དང་ཇི་སྲིད་དུ་བསམ་གཏན་དང་པོ་ཐོབ་པའི་བར་དུ་སྐྱེས་བུའི་མཛད་པ་དག་མཛད་ནས། སྐྱེ་བོ་ལྷག་མ་རྣམས་ཀྱང་དགེ་བའི་རྩ་བ་བཅུ་ལ་སྤྱོད་པས་ཆོས་པར་གྱུར་པའི་ཡུལ་ལྗོངས་པ་བྱེ་བ་ཕྲག་སྟོང་ནི་ལེགས་པར་བྱས་པའི་ལས་ཀྱི་མཐའ་ལ་སྤྱོད་པ་ལ་བཀོད་ནས་གཟིགས་པ་གཞན་གང་ཞིག་ནི་ངའི་གདུལ་བྱར་གྱུར་པ་ཡིན་ན། དེས་མི་ལས་ཤིན་
ཏུ་འདས་པའི་ལྷའི་མིག་གིས་གཟིགས་པ་ནི། ཇི་ལྟར་འཐབ་བྲལ་གྱི་ལྷ་རྣམས་ཀྱི་ནང་ན་ངའི་གདུལ་བྱའི་ལྷ་ཡོད་པ་ནི་དེ་དག་གི་མངའ་བདག་ཏུ་གྱུར་པ་སོའུ་མྱོའི་མིང་ཅན་དེའི་ཡང་དགེ་བ་རྣམས་ནི་ནང་དུ་ནུབ་པར་གྱུར་ཅིང་བག་མེད་པས་ཀྱང་བག་མེད་པར་གནས་པ་དེ་དང་ཉེ་བར་གནས་པའི་ལྷ་གཞན་རྣམས་ལས་ཀྱང་གང་དག་དབང་པོ་ཡོངས་སུ་སྨིན་པ་རྣམས་ཀྱང་བག་མེད་པས་བག་མེད་པར་གནས་པར་གྱུར་ལ། དེ་དག་ལ་ཐུགས་བརྩེ་བའི་ཕྱིར་བཅོམ་ལྡན་འདས་གསེར་ཐུབ་དེ་འཇིག་རྟེན་འདིར་བཞུགས་པར་གྱུར་ཏེ། ལྷ་རྣམས་ལ་ཕན་པར་བཞེད་པས་དང་འཐུན་པར་མཛད་པའི་དོན་གྱི་ཕྱིར་དང་། སྡུག་བསྔལ་ཟད་པའི་དོན་དུ་དང་། བག་མེད་པས་འདྲེ་བ་དང་བྲལ་བར་བྱ་བའི་ཕྱིར་ཏེ། ཟག་པ་ཟད་པ་སྟོང་ཕྲག་ལྔས་ཡོངས་སུ་བསྐོར་ནས་དེ་འཐབ་བྲལ་ན་གནས་པ་རྣམས་ཐམས་ཅད་བས་ཀྱང་མང་བས་ཆེས་ལྷག་པ་ཉིད་ཀྱི་འོད་ཕལ་པོ་ཆེ་ཆེས་ལྷག་པར་འཕྲོ་བར་མཛད་པར་གྱུར་ཏོ། །དེ་མངོན་པར་མཐོང་ནས་ཀྱང་ལྷ་རྣམས་གང་དག་གིས་ནམ་ཡང་ཐམས་ཅད་མཁྱེན་པ་སྔར་མ་མཐོང་བ་དེ་དག་རྣམས་ཆེས་ལྷག་པར་ཡང་ངོ་མཚར་སྐྱེས་ཏེ། སྔར་མེད་པའི་ལྷ་ཉིད་ཀྱི་གཟུགས་འདི་ནི་ཡོན་ཏན་དུ་མས་ལྷག་པའི་གཞན་རྣམས་དང་འདྲ་བ་མ་ཡིན་པའི་གཟུགས་འདིས་ནི་ལྷའི་འཇིག་རྟེན་འདི་མ་ལུས་པ་འོད་འདིས་ཀུན་དུ་བཀང་ངོ་། །དེ་དང་ཐག་ཉེ་བར་སོང་ནས་དེ་ཐོས་པས་ཀྱང་མངོན་པར་མཐོང་ནས། ལྷ་དེ་དག་རྣམས་མཆོག་ཏུ་ངོ་མཚར་བ་སྐྱེས་པར་གྱུར་ཏོ། །གང་ཡང་དེའི་ཆ་བྱད་ནི་ཇི་ལྟ་བུ་ཞིག་འཛིན་པ་ཡིན་ཞེས་ཏེ། གང་དག་རྣམས་ལྷ་འདི་དང་བསྙེན་ནས་གནས་པར་གྱུར་ཏོ། །དེ་ནས་ལྷ་དེ་དག་རྣམས་ཀྱང་རྣམ་པ་སྣ་ཚོགས་པའི་པད་མའི་རྫིང་བུ་སྤངས་ནས་གང་ན་བཅོམ་ལྡན་འདས་གསེར་ཐུབ་ཡོད་པ་དེར་བལྟ་བར་བྱ་བའི་དོན་དུ་ཉེ་བར་འགྲོའོ། །དེ་ནས་བཅོམ་ལྡན་འདས་ཀྱིས་ཀྱང་དེ་དག་མངོན་པར་གཟིགས་པ་དང་ནམ་མཁའ་ལ་འཕགས་ནས་བཞུགས་པར་གྱུར་ཏོ། །བཞུགས་ནས་ཀྱང་རྣམ་པ་སྣ་ཚོགས་པའི་རྫུ་འཕྲུལ་མངོན་པར་འདུ་མཛད་པར་གྱུར་ཏེ། ཡོན་ཏན་དུ་མའི་རྣམ་པར་རྟོག་པ་འབྱུང་བ་
རྣམས་སོ། །དེ་ཡང་ལུས་ཀྱི་སྟོད་ནས་ཆུ་འབབ་པ་རྣམས་ནི་མདོག་དང་རོ་དང་དྲི་ཕུན་སུམ་ཚོགས་པ་རྣམ་པ་དེ་སྲིད་དང་ལྡན་པའི་ཁྱད་པར་གང་དག་གིས་ལྷའི་ཆུ་གང་ཡིན་པ་རྣམས་རྣམ་པ་ཐམས་ཅད་ཀྱི་སྒོ་ནས་བཅུ་དྲུག་གི་ཆར་ཡང་མི་ཕོད་དོ། །ལུས་ཀྱི་སྟོད་ཀྱི་ཉེ་འཁོར་དག་ནས་རྣམ་པ་དུ་མར་རབ་ཏུ་འབར་བར་བྱེད་པའི་ཁ་དོག་དུ་མ་དང་ལྡན་པའི་མེས་ཁྱབ་པར་གྱུར་པ་ལ་འདི་ལྟ་སྟེ། སྔོན་པོ་དང་སེར་པོ་དང་དམར་པོ་དང་ལེ་བརྒན་གྱི་མདོག་དང་ལྡན་པ་རྣམས་སོ། །ཡང་རྫུ་འཕྲུལ་གཞན་ཡང་བཅོམ་ལྡན་འདས་དེས་མཛད་པར་གྱུར་པ་རྣམས་ལ་འདི་ལྟ་སྟེ། གཅིག་ཏུ་གྱུར་ནས་བརྒྱ་ཕྲག་རྣམས་སུ་འགྱུར་བ་དང་། བརྒྱ་སྟོང་དུ་འགྱུར་ཞིང་ལྷའི་འཇིག་རྟེན་འདི་མ་ལུས་པར་གང་བར་བྱེད་དོ། །འོད་ཟེར་རྣམས་དང་བདག་གི་དངོས་པོ་ཡང་སླར་ཡང་གཅིག་ཏུ་འགྱུར་རོ། །གཞན་ཡང་བཅོམ་ལྡན་འདས་ཀྱིས་མཆོག་ཏུ་གྱུར་པའི་རྫུ་འཕྲུལ་འདིར་མཛད་པར་གྱུར་པ་ལ་ཇི་ལྟར་ལྷའི་ས་དེ་དག་རྣམས་གང་ཡིན་པ་དེའི་ཕྱག་གཅིག་གིས་བཏེག་ནས་ལག་པའི་མཐིལ་དུ་འཇོག་གོ །ནགས་དང་ཉེ་བའི་ནགས་དང་རྫིང་བུ་དང་འབབ་ཆུ་དང་ལྡན་པའི་ལྷའི་ཚོགས་དང་བཅས་པ་ནམ་མཁའ་ལ་འཕེན་པར་བྱེད་ཅིང་། ཇི་ལྟ་ཇི་ལྟར་མིག་གི་ཡུལ་ལས་ཤིན་ཏུ་འདའ་བར་བྱེད་དེ། ཕྱིར་ཡང་དེ་ཁོ་ན་བཞིན་དུ་བཤིག་ནས་སླར་ལེགས་པར་འཇོག་གོ །གཞན་ཡང་བཅོམ་ལྡན་འདས་དེས་རྫུ་འཕྲུལ་ཆེན་པོ་དག་མཛད་པར་གྱུར་ཏེ། དེ་ཡང་རི་རྣམས་གང་དག་ལས་ཆེས་ཆེ་བའི་ཚད་དང་ལྡན་པ་དེ་རྣམས་བཅོམ་ལྡན་འདས་ཀྱིས་རྩ་བ་ནས་བཏེག་ནས་ནམ་མཁའ་ལ་རྣམ་པར་འཕེན་པར་བྱེད་དེ། ནགས་དང་ཉེ་བའི་ནགས་དང་བཅས་པ་དང་རྫིང་བུ་དང་འབབ་ཆུ་དང་སྨན་ལྗོངས་དང་ལྡན་པ་དང་ལྷའི་ཚོགས་རྣམས་ཀྱིས་ཡོངས་སུ་བསྐོར་བ་དང་བཅས་པ་རྣམས་ཀྱིས་ཇི་ལྟར་གང་དུ་ཕྱིན་པ་ཡང་མི་ཤེས་པར་བྱེད་དོ། །ཕྱིར་ཡང་དེ་ཁོ་ན་བཞིན་དུ་འབེབས་པར་བྱེད་ན་ཡང་ཅི་འདིར་རྐང་པ་ཡང་ཀུན་དུ་བསྐྱོད་པར་གྱུར་ཏམ་ཞེས་དེ་ལྟར་ཚོགས་པ་རྣམས་ཇི་ལྟ་བ་བཞིན་དུ་མི་ཤེས་པར་བྱེད་དོ། །གཞན་ཡང་བཅོམ་ལྡན་འདས་འདིས་རྫུ་འཕྲུལ་
མཛད་པར་གྱུར་ཏེ། རྣམ་པ་དུ་མ་དང་ཁ་དོག་དུ་མ་དང་རྣམ་པར་རྟོག་པ་དུ་མ་དང་ཆ་བྱད་དུ་མ་དང་ཡོན་ཏན་སྣ་ཚོགས་པ་དང་ལྡན་པའི་གཟུགས་སུ་བདག་ཉིད་ཀྱི་དངོས་པོ་བྱེད་པ་ནི་རིའི་རྩེ་མོ་རྣམས་སུ་མཐོང་ལ། ནགས་གཞན་དང་གཞན་གྱི་ནང་དུ་ཡང་མཐོང་ལ་པད་མའི་རྫིང་བུ་རྣམས་ཀྱི་ནང་དུ་ཡང་མཐོང་ངོ་། །ཁང་བཟངས་ཀྱི་ཕྲེང་བ་རྣམས་ལ་ཡང་མཐོང་ངོ་། །ལྗོན་ཤིང་གི་རྩེ་མོར་ཡང་མཐོང་ངོ་། །གཙང་པོའི་འགྲམ་དང་མཚེའུ་རྣམས་ལ་ཡང་མཐོང་ལ་སྐྱེད་མོས་ཚལ་དང་ཉེ་བའི་ནགས་སུ་ཡང་མཐོང་ཞིང་ཐམས་ཅད་དུ་བསམ་གཏན་དང་ལྡན་པར་གྱུར་པ་སྟེ། རྣམ་པ་དུ་མར་ཡང་ནམ་མཁའ་ལ་གཟིམས་ཆ་ལ་ལོངས་སྤྱོད་པར་མཛད་ཅིང་ཕྱིར་ཡང་བཞུགས་པར་མཛད་དེ། སླར་ཡང་ནམ་མཁའ་ལ་འཆག་པ་ལ་ཀུན་དུ་སྦྱོར་བ་མཛད་དོ། །ཕྱིར་ཡང་བཞུད་པར་མཛད་ཅིང་བཞུགས་པར་ཡང་མཛད་དོ། །གཞན་ཡང་བཅོམ་ལྡན་འདས་ཀྱིས་རྫུ་འཕྲུལ་འདི་མཛད་པར་གྱུར་ཏེ། གང་དག་གི་ཁྱད་པར་གྱིས་རྔ་སྐད་ཡན་ལག་ལྔ་དང་ལྡན་པ་འདི་ཇི་ལྟ་བ་བཞིན་དུ་མཛེས་པ་མ་ཡིན་པའི་རྣམ་པ་དེ་སྲིད་ཀྱི་གསུང་དབྱངས་ཀྱིས་ཆོས་རྣམས་བསྟན་པར་གྱུར་ལ་ཅི་ལྟར་མིའི་རྔ་སྒྲའི་ཁྱད་པར་གྱིས་མི་རྣམས་ཀྱི་ནང་ན་བྱ་རོག་གི་སྒྲ་མི་མཛེས་པ་དེ་ལྟར་ལྷའི་ཚོགས་ཐམས་ཅད་མི་མཛེས་པར་གྱུར་ཏོ། །དེ་ཐོས་ནས་ཀྱང་ལྷ་གང་དག་རྣམས་གླུའི་མྱོས་པས་རྒྱགས་པ་དེ་ཐམས་ཅད་ཀྱང་ལེགས་པར་མྱོས་པ་དང་བྲལ་བར་འགྱུར་རོ། །གཞན་ཡང་བཅོམ་ལྡན་འདས་ཀྱིས་རྫུ་འཕྲུལ་མཛད་པར་གྱུར་ཏེ། འདི་ལྟ་སྟེ། ནམ་མཁའ་ལ་ལྷའི་བུ་མོ་དང་ལྷ་རྣམས་རྣམ་པ་དེ་སྲིད་དག་སྤྲུལ་པ་གང་དག་གི་ཁྱད་པར་གྱིས་འཐབ་བྲལ་གྱི་ལྷ་འདི་དག་རྣམས་སྲིན་བུ་མེ་ཁྱེར་དང་འདྲ་བ་ཙམ་དུ་ཡང་མི་འགྱུར་ཏེ། ཚད་དང་ཁ་དོག་དང་དབྱིབས་དང་གཟུགས་དང་ཆ་བྱད་དང་རྒྱན་དང་ཉེ་བའི་ནགས་རྣམས་ཀྱི་བདེ་བའི་ཁྱད་པར་ཅན་གྱི་སྤྲུལ་པའི་ལྷ་དེ་རྣམས་མཐོང་ནས་བདག་ཅག་རང་རྣམས་རྩྭ་དང་འདྲ་བར་ཤེས་པར་གྱུར་ནས་སྤུ་དུ་མ་ལངས་པ་དང་། འཐབ་བྲལ་གྱི་ལྷ་རྣམས་ངོ་ཚ་བ་དང་བཅས་པར་གྱུར་ཅིང་ཁ་ཉེན་པ་དང་བཅས་པར་གྱུར་པ་དང་། གཟུགས་ལང་ཚོ་དང་འདོད་པས་རྒྱགས་པ་དང་བྲལ་བ་ལེགས་
པར་སྐྱེས་སོ། །དེ་ལྟར་འཐབ་བྲལ་གྱི་ལྷ་དེ་དག་གི། བཅོམ་ལྡན་འདས་དེས་དབང་པོ་མཆོག་དང་མཆོག་མ་ཡིན་པ་མཁྱེན་པ་དང་བསམ་པ་མཁྱེན་པ་དང་རྒྱུ་འབྲས་ཀྱི་རྣམ་པར་སྨིན་པ་མཁྱེན་པ་དང་ཆགས་པ་མེད་པར་མཁྱེན་པ་པོ་འཇིག་རྟེན་ལ་ཕན་པར་ཞུགས་པ་མཆོག་ཏུ་ཐུགས་རྗེ་ཆེན་པོ་དང་ལྡན་པས། གང་ན་སོའུ་མྱོ་ཞེས་བྱ་བ་འཐབ་བྲལ་བ་རྣམས་ཀྱི་མངའ་བདག་ཡོད་པ་དེར་ཡང་ཆོ་འཕྲུལ་དེ་དག་རྣམས་མཛད་པར་གྱུར་པ་ན། ད་ལྟར་སོའུ་མྱོ་ཞེས་བྱ་བའི་འཐབ་བྲལ་བ་རྣམས་ཀྱི་མངའ་བདག་ཀྱང་མཆོག་ཏུ་བག་མེད་པར་གྱུར་པ་རྣམས་ཇི་ལྟ་བ་བཞིན་དུ་ཐམས་ཅད་དུ་ཉེ་བར་བཅོམ་པར་འགྱུར་རོ། །དུས་དེ་དག་གི་ཚེ་ན་ཡང་འཐབ་བྲལ་གྱི་མངའ་བདག་སོའུ་མྱོ་ཞེས་བྱ་བ་དེ་དང་། ལྷའི་ཚོགས་ཐམས་ཅད་ཀྱང་པད་མ་ཆེན་པོ་འདི་ལས་བྱུང་སྟེ་གནས་པ་ནི་ཇི་ལྟར་འཐབ་བྲལ་གྱི་མངའ་བདག་མུ་སུ་ལུན་དྷ་ཁྱོད་སྐྱེད་མོས་ཚལ་གྱི་ལྟད་མོ་ལ་འགྲོ་བ་བཞིན་ནོ། །དེ་ནས་བཅོམ་ལྡན་འདས་ཀྱིས་པད་མ་ཆེན་པོ་དེའི་ནང་དུ་རྫུ་འཕྲུལ་གྱི་ཆོ་འཕྲུལ་དེ་དག་རྣམས་ཀྱིས་ནི་སོའུ་མྱོའི་རྒྱགས་པ་དང་བྲལ་བར་བྱ་བའི་དོན་དུ་ཡིན་ཞིང་། པད་མ་ཆེན་པོ་འདིའི་ནང་དུ་སྤྲུལ་པ་འདི་དག་རྣམས་གང་ཡིན་པ་འདི་དག་ཐམས་ཅད་ནི་འཐབ་བྲལ་གྱི་མངའ་བདག་ཁྱོད་ཀྱིས་སྔར་མ་མཐོང་བ་དེ་དག་རྣམས་ཡིན་ཏེ། སྐྱེད་མོས་ཚལ་དང་རྫིང་བུ་དང་ཆུ་ཀླུང་དང་རི་དང་ཁང་བཟངས་དང་སྤྱོད་ཡུལ་རྣམས་དགའ་བའི་རྣམ་པར་རྟོག་པ་དུ་མ་དང་ལྡན་པ་དེ་དག་རྣམས་ནི་སོའུ་མྱོ་དེའི་བག་མེད་པ་དང་འདྲེ་བ་བྲལ་བར་བྱ་བའི་དོན་དུའོ། །དེ་ནས་པད་མ་ཆེན་པོ་འདིའི་ནང་དུ་ཞུགས་པ་རྣམས་དང་། སྤྲུལ་པ་ཐམས་ཅད་ཀྱང་བརྗོད་ནས་གང་ན་འཐབ་བྲལ་བ་རྣམས་ཀྱི་མངའ་བདག་སོའུ་མྱོ་ཡོད་པ་དེའི་པད་མ་དེའི་སྟེང་དུ་བརྟོལ་ལོ། །བརྟོལ་ནས་སྟེང་དུ་ངེས་པར་བྱུང་བའི་པད་མའི་འདབ་མ་བྱེ་བ་ཕྲག་བརྒྱ་སྟོང་པ་ལ་གནས་པར་གྱུར་པ་ལ་དེའི་སྙིང་པོ་འདི་ལ་ནི་བཅོམ་ལྡན་འདས་ལེགས་པར་བཞུགས་སོ། །འདབ་མ་རྣམས་ལ་ཡང་ཉན་ཐོས་རྣམས་རྣམ་པ་སྣ་ཚོགས་པའི་རྫུ་འཕྲུལ་བྱེད་པ་རྣམས་དེ་དག་ལ་ལ་ནི་ནམ་མཁའི་དཀྱིལ་དུ་འཕགས་པར་བྱེད་དེ་ཕྱིར་ཡང་པད་མའི་ནང་དུ་རྗེས་སུ་ཞུགས་སོ། །
གཞན་ཡང་ཉན་ཐོས་གཞན་དག་རྣམས་ནི་གླང་པོ་ཆེ་དང་རྟའི་རྒྱབ་ཏུ་ཞོན་ནས་ནམ་མཁའི་དཀྱིལ་དུ་འཕགས་ཏེ་འབྱུང་ངོ་། །གཞན་ཡང་མཆོག་ཏུ་དྲི་ཞིམ་པ་རྣམ་པ་སྣ་ཚོགས་པའི་ཆར་གྱི་རྒྱུན་ཀུན་དུ་འབེབས་པར་བྱེད་དེ་ཉན་ཐོས་དེ་དག་རྣམས་རྫུ་འཕྲུལ་རྣམ་པ་སྣ་ཚོགས་པ་བྱེད་དོ། །དེ་ནས་འཐབ་བྲལ་བ་རྣམས་ཀྱི་མངའ་བདག་སོའུ་མྱོ་ཡིད་རབ་ཏུ་དང་བ་དང་ལྡན་པ་སྔོན་ལེགས་པར་བྱས་པའི་ལས་རྣམས་ཀྱིས་བསྐུལ་བས་འདི་སྙམ་དུ་སེམས་པར་གྱུར་ཏེ། འདི་ལྟ་བུ་འདི་དག་རྣམས་གང་གི་མཐུ་སྟོབས་ཡིན་ན། གང་དག་གི་ཁྱད་པར་གྱིས་བདག་ཅག་རྣམས་གཟུགས་དང་མཐུ་སྟོབས་ཀྱིས་ཀྱང་ཆུང་ཟད་ཀྱང་མ་ཡིན་ཞེས་སོ། །དེ་ནས་གང་དུ་ལས་བྱས་པ་ལྷའི་སྤྱན་གྱིས་ཀུན་ནས་གཟིགས་པའི་བཅོམ་ལྡན་འདས་ཀྱིས་ཉན་ཐོས་རྣམས་ལ་བཀའ་སྩལ་པ། སོའུ་མྱོ་འདི་ནི་ལྷ་དང་བཅས་པའི་འཇིག་རྟེན་རྣམས་དང་བདུད་དང་བཅས་པ་དང་དགེ་སྦྱོང་དང་བྲམ་ཟེའི་རིགས་དང་བཅས་པའི་སྐྱེ་དགུ་རྣམས་ཀྱི་དང་སྟེ། ལྷ་དང་མི་དང་ལྷ་མ་ཡིན་དུ་བཅས་པ་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཞེས་བྱ་བ་ཇི་ལྟ་བ་བཞིན་དུ་ཐམས་ཅད་མཁྱེན་པ་ཐམས་ཅད་གཟིགས་པ་འདིས་འཇིག་རྟེན་འདི་རྣམས་ཐམས་ཅད་ལ་ཆོས་སྟོན་པར་མཛད་པ་ཡིན་ཏེ། དང་པོར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་འབའ་ཞིག་པ་ཡོངས་སུ་རྫོགས་པ་ཡོངས་སུ་དག་པ་སྟོན་པར་བྱེད་པ་ནི་གཅིག་ཏུ་ངེས་པར་གནས་པའི་མྱ་ངན་ལས་འདས་པ་ཐོབ་པར་བྱེད་པ་ཡིན་ནོ། །གང་དག་ཅེ་ན། འདི་དག་ནི་གཟུགས་སོ། །འདི་དག་ནི་གཟུགས་ཀུན་འབྱུང་བ་རྣམས་སོ། །འདི་དག་ནི་གཟུགས་འགོག་པའོ། །འདི་དག་ནི་གཟུགས་འགོག་པར་འགྲོ་བའི་ལམ་རྣམས་ཡིན་ནོ། །འདི་ནི་ཁྱེད་རྣམས་ལ་སྟོན་པར་མཛད་པ་པོ་ཡིན་ཏེ་ལྷ་རྣམས་ཀྱི་ཆོས་ཀྱི་དོན་དུ་དང་། ཕན་པར་བྱ་བའི་དོན་དང་བདེ་བར་བྱ་བའི་དོན་དུ་སྐུ་འདི་འཐབ་བྲལ་གྱི་ལྷའི་རིས་སུ་བྱོན་པ་ཡིན་ནོ། །དེ་ནས་གསུངས་པ་དེ་རྣམས་ལ་ཅུང་ཟད་ཅིག་ཐོས་ནས་འཐབ་བྲལ་གྱི་མངའ་བདག་སོའུ་མྱོས་འདི་སྐད་ཅེས་གསོལ་ཏོ། །བདག་ཅག་གི་བླ་མ་བདག་གིས་ཉེ་བར་བསྟེན་པར་བགྱི་ལགས་ན་ཇི་ལྟར་འདིའི་མཆོད་པ་རྣམས་བགྱི། འདི་མཆོད་
པའི་དབང་དུ་བྱས་པའི་ལོ་རྒྱུས་རྣམས་ཀྱང་བདག་ཅག་གིས་མངོན་པར་མི་འཚལ་ལགས་སོ། །དེ་ནས་དགེ་སྦྱོང་དེས་སོའུ་མྱོ་དེ་ལ་སྨྲས་པ། དེ་བཞིན་གཤེགས་པ་ལ་ཉེ་བར་བསྟེན་པར་གྱིས་ཤིག །སོའུ་མྱོ་ཉེ་བར་བསྟེན་པ་ན་ཡང་དབུ་རྒྱན་དང་རྒྱན་རྣམས་དང་བྲལ་བ་དང་ལེགས་པར་དུལ་བའི་ཆ་བྱད་རྣམས་ཀྱིས་དང་། དབང་པོ་རྣམས་རབ་ཏུ་དང་བར་གྱུར་པ་དང་ཡིད་མཉམ་པར་བཞག་པར་གྱུར་པས། པུས་མོ་དག་གི་ལྷ་ང་ས་ལ་སོ་སོར་བཙུགས་ཏེ། མགོ་བོས་རྒྱལ་པོ་བཞིན་དུ་མངོན་པར་ཕྱག་འཚོལ་ལ་ཆོས་གོས་ཕྲག་པའི་ཕྱོགས་གཅིག་ཏུ་བྱས་ཏེ་མགོ་བོས་ཀུན་ནས་བཏུད་པས་བཅོམ་ལྡན་འདས་ཀྱི་སྤྱན་སྔར་གནས་པར་བྱའོ། །དབང་པོ་ལེགས་པར་ཁ་བྱེ་བ་དང་ལྡན་པའི་ལྷ་དེ་དག་རྣམས་ཐམས་ཅད་ཀྱིས་ལྷན་ཅིག་ཏུ་དགེ་སྦྱོང་དེའི་སྤྱན་སྔ་ནས་ཀུན་དུ་སྤྱོད་པ་ལེགས་པ་འདི་དག་རྣམས་ཀྱི་དོན་ཉེ་བར་རྙེད་ནས། འཐབ་བྲལ་བ་རྣམས་ཀྱི་མངའ་བདག་ལྷ་བརྒྱ་སྟོང་གིས་ཡོངས་སུ་བསྐོར་ཅིང་དབུ་རྒྱན་དང་བྲལ་བ་དང་རྒྱན་དང་མཛེས་པའི་ཆ་བྱད་ཀུན་ནས་སྤངས་པ་དང་། དབང་པོ་རྣམས་ཤིན་ཏུ་དུལ་ལེགས་པར་དུལ་བ་ཞི་བར་གྱུར་པའི་ཡིད་ཀྱིས། བཅོམ་ལྡན་འདས་གང་པད་མ་ཆེན་པོའི་སྙིང་པོ་ལ་ཉན་ཐོས་རྣམས་ཀྱིས་ཡོངས་སུ་བསྐོར་བར་གྱུར་པ་ནི་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བའི་ཟླ་བ་ལྟ་བུ་དང་ཐམས་ཅད་ནས་ཡོངས་སུ་བསྐོར་བར་གྱུར་པའི་རིའི་རྒྱལ་པོ་རི་རབ་ལྷུན་པོ་ལྟ་བུ་དང་། མཚོ་ཆེན་པོ་རྣམས་ཀྱིས་ཡོངས་སུ་བསྐོར་བའི་རྒྱ་མཚོ་དང་འདྲ་བའི་རྒྱལ་པོ་ཆེན་པོ་བརྒྱད་ཅུ་རྩ་བཞིས་ཡོངས་སུ་བསྐོར་བའི་འཁོར་ལོས་སྒྱུར་བ་དང་འདྲ་བ་འོད་ཟེར་རྣམས་ཀྱིས་ཡོངས་སུ་བསྐོར་བའི་ཉི་མ་དང་འདྲ་བ། དེ་ལྟ་བུར་བཅོམ་ལྡན་འདས་དེ་ཉན་ཐོས་ཀྱི་ཚོགས་རྣམས་ཀྱིས་ཡོངས་སུ་བསྐོར་ཞིང་མཆོག་ཏུ་མཚུངས་པ་མེད་པའི་གཟི་བརྗིད་དང་ལྡན་པའི་འོད་རྣམ་པར་འཕྲོ་བར་གྱུར་པས་རྣམ་པར་གསལ་བར་པད་མའི་སྙིང་པོ་ལ་བཞུགས་སོ། །དེ་ནས་སོའུ་མྱོ་འཐབ་བྲལ་བ་རྣམས་ཀྱི་མངའ་བདག་གང་ན་བཅོམ་ལྡན་འདས་བཞུགས་པ་དེར་ཐལ་མོ་སྤྱི་བོར་སྦྱར་བ་བྱས་ནས་ཕྱོགས་གཅིག་ཏུ་འདུག་གོ །དེ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏེ། བག་མེད་
པ་དང་ཇི་ལྟ་བ་བཞིན་དུ་བྲལ་བ་མཆིས་ལགས་སམ། དེ་ནས་སྟེང་ན་གནས་པའི་སོའུ་མྱོ་དེ་ལ་བཅོམ་ལྡན་འདས་གསེར་ཐུབ་ཀྱིས་ཟབ་ཅིང་རྒྱ་ཆེ་བ་དང་ལྡན་པའི་གསུང་དབྱངས་ཀྱི་ཁྱད་པར་གྱིས་འཐབ་བྲལ་གྱི་འཇིག་རྟེན་དེ་ཐམས་ཅད་ཇི་ལྟ་བར་ཡོངས་སུ་བཀང་བས་འདི་སྐད་ཅེས་བཀའ་སྩལ་ཏོ། །སོའུ་མྱོ་ངས་ཇི་ལྟ་བ་བཞིན་དུ་ཆོས་བཤད་པར་བྱ་སྟེ། དང་པོར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་འབའ་ཞིག་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་བྱང་བ་ཚངས་པར་སྤྱོད་པ་ལེགས་པར་བཤད་པར་བྱའོ། །དེ་ལེགས་པར་རབ་ཏུ་ཡིད་ལ་གྱིས་ལ་ཉོན་ཅིག་དང་ངས་བཤད་ཀྱིས་དེ་སྐད་ཅེས་གསུངས་པ་དང་། ལྷ་དེ་བཅོམ་ལྡན་འདས་ཀྱི་ལྟར་ཉན་ནོ། །བཅོམ་ལྡན་འདས་ཀྱིས་སོའུ་མྱོ་ལ་སོགས་པའི་ལྷ་དེ་དག་རྣམས་ལ་འདི་སྐད་ཅེས་གསུངས་སོ། །རྒྱུ་དགུ་དང་རྐྱེན་དགུ་དང་རྒྱུ་མཚན་དགུས་བག་མེད་པ་སྟེན་ཅིང་གོམས་པར་བྱས་ལ་ལན་མང་དུ་བྱས་པས་ནི་བྱིས་པའི་སྐྱེ་བོ་ཐམས་ཅད་འཇོམས་ཤིང་བརླག་པར་འགྱུར་ལ། ལུས་ཞིག་ནས་ཀྱང་ཐབས་མ་ཡིན་པ་ལོག་པར་ལྟུང་བ་དམྱལ་བ་དང་ཡི་དགས་དང་དུད་འགྲོར་སྐྱེ་བར་འགྱུར་བ་དང་། རྒྱུ་གང་ཡོད་པས་སྡུག་བསྔལ་ཡང་ཀུན་དུ་འཕེལ་བར་བྱེད་ཅིང་འཁོར་བའི་འཆིང་བ་ཡིན་པ་དང་མྱ་ངན་ལས་འདས་པའི་མཐར་ཐུག་པར་མི་འགྱུར་བ་དང་། འདོད་ཆགས་དང་མི་འབྲལ་བ་དང་བདེ་བ་མ་ཡིན་པ་དོན་མ་ཡིན་ནོ། །རྒྱུ་དགུས་བག་མེད་པ་གང་ཞེ་ན། འདི་ལ་བུད་མེད་རྣམས་ལ་ལྟ་བ་ལ་བསྟེན་པར་གྱུར་པ་ཡིན་ཏེ། དང་བ་མ་ཡིན་པའི་ལུས་དང་ངག་དང་ཡིད་རྣམས་ཀྱིས་དབང་པོ་མ་བསྡམས་པ་ཉེ་བར་སྟེན་པར་བྱེད་དོ། །ཡང་དག་པས་བསྐྱེད་པ་མ་ཡིན་པའི་ལུས་དང་ངག་དང་ཡིད་ཅན་གྱིས་སྤྱོད་ཡུལ་མ་ཡིན་པ་ལ་སྤྱོད་པ་དམ་པའི་ཆོས་རྣམས་ཉན་པའི་རང་བཞིན་ཅན་མ་ཡིན་པ་རྣམས་རྒོད་པ་རྣམས་ཀྱི་དབང་པོ་རྣམས་རྒོད་པས་མ་བསྡམས་པའི་རྒྱུ་གཅིག་ལས་བག་མེད་པའི་བག་མེད་པས་བག་མེད་པ་པོའི་སེམས་ཅན་རྣམས་ལུས་ཀྱིས་ལེགས་པར་སྤྱོད་པར་མི་བྱེད། ངག་གིས་ལེགས་པར་སྤྱོད་པ་མ་ཡིན། ཡིད་ཀྱིས་ལེགས་པར་སྤྱོད་པ་མ་ཡིན་ནོ། །ལུས་དང་ངག་དང་ཡིད་ཀྱིས་ལེགས་པར་སྤྱོད་པ་མ་ཡིན་པས་ལུས་དང་ངག་དང་ཡིད་ཀྱིས་ཉེས་པར་སྤྱད་པ་
སྤྱོད་ལ། བྱས་ཤིང་བསགས་པའི་ལས་ཀྱང་བྱེད་པར་འགྱུར་རོ། །བློ་གྲོས་ངན་པ་དེ་ལུས་ཞིག་པ་ན་ཐབས་མ་ཡིན་པ་ལོག་པར་ལྟུང་བ་དམྱལ་བ་དང་ཡི་དགས་དང་དུད་འགྲོར་སྐྱེ་བར་འགྱུར་ཏེ། བག་མེད་པས་རྣམ་པར་ཉམས་པའི་ཕྱིར་རོ། །དེའི་ཕྱིར་ན་སྐྱེས་བུ་དམ་པ་རྟག་ཏུ་དགེ་བ་འདོད་པ་རྣམས་ཀྱིས་བག་མེད་པ་ཡོངས་སུ་སྤང་བར་བྱ་སྟེ་འདི་ནི་བག་མེད་པའི་རྒྱུ་དང་པོའོ། །གཞན་ཡང་སོའུ་མྱོ་བག་མེད་པ་ནི་རྒྱུ་གང་གིས་བག་མེད་པ་རབ་ཏུ་འཇུག་པ་དེ་ནི་དགེ་བའི་རྩ་བའི་ཕྱོགས་འཇོམས་པར་བྱེད་པའི་མི་འཐུན་པའི་ཕྱོགས་རྣམས་ཡིན་ཏེ། དེ་བཞིན་དུ་སེམས་གཡོ་བར་གྱུར་པས་མིག་གིས་གཟུགས་རྣམས་མཐོང་ནས་ཀུན་དུ་རྟོག་པར་བྱེད་ལ། ཡིད་ཀྱིས་ཀྱང་ཡང་དང་ཡང་དུ་སེམས་པར་བྱེད་དེ། དེ་ཁོ་ན་ལ་ཆགས་པར་གྱུར་ཏེ་ཡིད་གཞན་དུ་འཇུག་པར་མི་བྱེད་དོ། །དེའི་རང་བཞིན་ཅན་དུ་ཡང་འགྱུར་ཏེ་རྟག་ཏུ་མི་དགེ་བ་སྤྱོད་པར་འགྱུར་རོ། །དྲན་པ་ཉེ་བར་མ་བཞག་པར་འགྱུར་རོ། །བློ་རྣམ་པར་གཡེང་བར་འགྱུར་རོ། །དེ་ལུས་ཞིག་པ་ན་ཐབས་མ་ཡིན་པའི་ལོག་པར་ལྟུང་བ་དམྱལ་བར་སྐྱེའོ། །བག་མེད་པའི་རྒྱུ་ལས་འདི་ནི་བག་མེད་པའི་རྒྱུ་གཉིས་པའོ། །གཞན་ཡང་བག་མེད་པའི་རྒྱུ་ནི་འདི་ལྟ་སྟེ་ཡང་དག་པ་མ་ཡིན་པ་ཀུན་དུ་འདྲེས་པ་མ་ཡིན་ཞིང་སྔོན་ཐོས་པ་ཡང་མ་ཡིན་པ་རྣམས་འབའ་ཞིག་ཡིད་ཀྱིས་ཀུན་དུ་རྟོག་པར་བྱེད་དོ། །འདོད་ཆགས་ལ་རྟེན་པའམ། ཞེ་སྡང་ལ་རྟེན་པའམ། གཏི་མུག་ལ་རྟེན་པས་ཀྱང་རུང་སྟེ། དེས་དེ་དག་རྣམས་ལ་སེམས་པར་གྱུར་པ་ན་དེ་ལ་སོང་བའི་ཡིད་ཅན་དེ་ལ་སོང་བའི་སེམས་ཀྱིས་ཆོས་གཞན་རྣམས་ལ་སེམས་པར་མི་བྱེད་དོ། །དེའི་ཡིད་རྣམ་པར་གཡེང་བར་འགྱུར་ཏེ། བག་མེད་པའི་རྒྱུ་གསུམ་པ་འདི་གང་གིས་ཀུན་ནས་བཅིངས་ནས་སེམས་ཅན་རྣམས་ཀྱི་ལུས་དང་ངག་དང་ཡིད་ཉེས་པར་སྤྱད་པ་རྣམས་ལ་སྤྱོད་པར་བྱེད་དེ། དེ་ལུས་ཞིག་པ་ན་ཐབས་མ་ཡིན་པ་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །བག་མེད་པས་རྣམ་པར་ཉམས་པར་བྱས་པ་འདི་ནི་རྒྱུ་གསུམ་པའོ། །གཞན་ཡང་བག་མེད་པའི་རྒྱུ་བཞི་པས་སེམས་ཅན་གང་དག་བག་མེད་པ་རྣམས་ནི་ལུས་ཞིག་ནས་ཐབས་མ་ཡིན་པ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །བག་མེད་པའི་
རྒྱུ་འདི་ཡང་སོའུ་མྱོ་གང་ཞེ་ན། འདི་ལྟ་སྟེ་ལྷ་མོ་རྣམས་ལ་ལྟ་བ་ལ་ཆེད་ཆེར་བྱེད་པའོ། །དེ་ཡང་ཡང་དག་པ་མ་ཡིན་པར་གྱུར་པའི་གཟུགས་མཐོང་བས་ཀྱང་དགའ་བ་དང་། སེམས་གཡོ་བར་གྱུར་པས་རབ་ཏུ་རྟོག་པར་བྱེད་དོ། །ཀུན་དུ་རྟོག་པར་བྱེད་དོ། །དེ་ཡང་གླེང་བསླངས་ལ་དགའ་བར་ཀུན་དུ་གནས་པའི་བློས་ཇི་ལྟ་བུར་ཡང་ཀུན་དུ་རྟོག་པར་བྱེད་དོ། །ལུས་དང་ངག་དང་ཡིད་རྣམས་ཀྱིས་ཀྱང་ལེགས་པར་སྤྱོད་པར་མི་བྱེད་དོ། །དེ་ལུས་ཞིག་པ་ན་ཐབས་མ་ཡིན་པ་ལོག་པར་ལྟུང་བ་དམྱལ་བར་སྐྱེ་བར་འགྱུར་ཏེ། འདི་ནི་བག་མེད་པའི་རྒྱུ་བཞི་པའོ། །གཞན་ཡང་བག་མེད་པའི་རྒྱུ་ལྔ་པ་འདི་ལྟ་སྟེ། ཚལ་རབ་ཏུ་དགའ་བའམ། རྫིང་བུ་དགའ་བའམ། ནགས་དང་ཉེ་བའི་ནགས་དགའ་བར་གྱུར་པའམ། པད་མའི་རྫིང་བུ་དགའ་བ་རྣམས་མཐོང་ནས་དེ་དག་རྣམས་ལ་དགའ་ཞིང་དགའ་བས་དེ་དག་རྣམས་ལ་ཡང་རྩེ་དགའ་ལ་མཆོག་ཏུ་བྱེད་པར་འགྱུར་རོ། །དགེ་བ་རྣམས་སེམས་པར་མི་བྱེད་དོ། །མཉམ་པར་གཞག་པའི་དྲན་པ་ཅན་དུ་མི་འགྱུར་ཏེ་བག་མེད་པ་རྣམས་ལ་སྟེན་པའོ། །བག་མེད་པས་རྣམ་པར་སད་པར་བྱས་པའི་ཕྱིར་ལུས་ཞིག་ནས་ཐབས་མ་ཡིན་པ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །གཞན་ཡང་བག་མེད་པའི་རྒྱུ་ལྔ་པ་ནི་སོའུ་མྱོ་འདི་ནི་སྡིག་པའི་གྲོགས་པོ་རྣམས་ལ་སྟེན་པར་འགྱུར་ལ་དེ་དང་བསྟེན་པས་ཀྱང་རྣམ་པ་དེ་ལྟ་བུ་ཁོ་ནའི་རང་བཞིན་ཅན་དུ་སློབ་ལ་སྤྱོད་ཡུལ་རྣམས་ལ་ལྷན་ཅིག་ཏུ་སྤྱོད་པར་འགྱུར་རོ། །ཉེས་པར་སྤྱོད་པ་རྣམས་སྤྱོད་པར་འགྱུར་རོ། །བྱ་བ་ངན་པ་རྣམས་རྗེས་སུ་སྒྲུབ་པར་བྱེད་དོ། །སྡིག་པའི་གྲོགས་པོ་རྣམས་ལ་སྟེན་པ་པོ་དེ་བག་མེད་པས་གནས་པར་གྱུར་པ་རྣམས་ནི་བག་མེད་པའི་སྐྱོན་གྱིས་ལུས་ཞིག་ནས་ཐབས་མ་ཡིན་པ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་བ་ཡིན་ནོ། །གཞན་ཡང་སོའུ་མྱོ་བག་མེད་པའི་རྒྱུ་ནི་འདི་ལྟ་སྟེ་སྤྱོད་པ་རྣམ་པ་དུ་མ་བྱེད་པར་གྱུར་ལ་བློ་མང་བ་ཡིན། ལུས་ཀྱི་ལེགས་པར་བྱ་བ་རྣམས་རྩོམ་པ་མ་ཡིན། ངེས་པ་མེད་པ་དང་བློ་གང་དུ་ཡང་གནས་པ་མེད་པ་ཡིན་ཏེ། དེས་དོན་གཅིག་ལ་ཡང་ངེས་པར་རྩོམ་པ་ཡང་མ་ཡིན་ནོ། །དེའི་ལུས་ཀྱི་ལས་རྣམས་ཐམས་ཅད་ངེས་པ་ཁོ་ནར་ལེ་ལོ་ཅན་དུ་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་ལས་ཀྱི་
མཐའ་ཐམས་ཅད་ཉམས་པར་འགྱུར་ཏེ། སྦྱིན་པ་མི་གཏོང་བསོད་ནམས་མི་བྱེད་ལེགས་པར་བསམ་པར་བྱ་བ་རྣམས་མི་སེམས་སོ། །ཚུལ་ཁྲིམས་ཉམས་པ་དེ་བག་མེད་པའི་རྐྱེན་རྣམས་ཀྱིས་ལུས་ཞིག་སྟེ་ཤི་བའི་འོག་ཏུ་དམྱལ་བ་རྣམས་སུ་སྐྱེ་བར་འགྱུར་རོ། །གཞན་ཡང་བག་མེད་པའི་རྒྱུ་དྲུག་པ་རྣམས་ནི་འདི་ལྟ་སྟེ། ཡང་དག་པའི་མཐོང་བ་འཕགས་པའི་བདེན་པ་བཞི་པོ་རྣམས་དང་འཕགས་པའི་ལམ་ཡན་ལག་བརྒྱད་པོ་རྣམས་ཀྱང་སུན་བཏོན་ནས། ཚུལ་བཞིན་མ་ཡིན་པ་ལྟ་བའི་རང་བཞིན་ཅན་དུ་འགྱུར་རོ། །དེ་བག་མེད་པ་དེས་དེའི་ཡིད་བག་མེད་པར་འགྱུར་ཞིང་རྣམ་པར་གཡེང་བས་ལུས་ཞིག་པ་ན་ཐབས་མ་ཡིན་པ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་བ་འདི་དག་ནི་བག་མེད་པའི་རྒྱུ་དྲུག་པ་ཡིན་ནོ། །གཞན་ཡང་བག་མེད་པའི་རྒྱུ་རྣམས་ཀྱིས་ཇི་ལྟར་རྟག་པ་ཁོ་ནར་ཡང་རོ་ལ་གང་དང་གང་དུ་ཡང་སྲེད་པར་གྱུར་ནས་དེ་དང་དེར་ཡང་རོས་འཆིང་བར་འགྱུར་ཞིང་། དེ་ཉིད་ལ་ཆགས་པར་ཡང་བྱེད་དོ། །ཡིད་དེ་ལ་འགྲོ་བར་འགྱུར་བ་དང་། དེའི་རང་བཞིན་ཅན་དང་། དེ་ལྟར་གྱུར་པའི་ཡིད་ཅན་དུ་འགྱུར་གྱི། དེ་གཞན་དུ་ནི་ཆུང་ཟད་ཀྱང་མི་སེམས་སོ། །ལེགས་པར་སྤྱོད་པར་མི་བྱེད་དོ། །རང་བཞིན་གྱིས་ཞི་བར་འགྱུར་བ་མ་ཡིན་ཀུན་ནས་བསྡམས་པའི་རང་བཞིན་ཅན་མ་ཡིན་ནོ། །དེ་རོ་རྣམས་ལ་མངོན་པར་སྲེད་པ་རྣམས་ཀྱིས་བསླུས་པ་དེ་ལྟར་གྱུར་པའི་གཤིས་ཅན་ལེགས་པར་བྱ་བ་མི་རྟག་པ་དང་སྡུག་བསྔལ་བ་དང་། སྟོང་པ་དང་བདག་མེད་པ་དང་བཞི་པོ་རྣམས་སྐད་ཅིག་ཙམ་ཡང་སེམས་པར་མི་བྱེད་དོ། །རང་ལ་ཕན་པ་རྣམས་མི་བྱེད་དོ། །སོའུ་མྱོ་དེ་ནི་ལུས་ཞིག་ནས་ཐབས་མ་ཡིན་པ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་ཏེ། དེ་ལྟར་ན་བག་མེད་པའི་རྒྱུར་གྱུར་པ་བདུན་པ་ཡིན་ནོ། །སོའུ་མྱོ་གཞན་ཡང་ཤིན་ཏུ་བག་མེད་པའི་རྒྱུར་གྱུར་པ་བརྒྱད་པ་ཡོད་དེ། བདེ་བ་འདི་གང་ཇི་སྲིད་དུ་ཐོབ་པར་གྱུར་པ་རྣམས་ལ་དེ་སྲིད་ཉིད་དུ་ཀུན་དུ་ཞེན་པར་བྱེད་དེ། དེ་རྟག་པ་དང་བརྟན་པ་དང་ཐེར་ཟུག་ཏུ་མཐོང་ལ་རྣམ་པར་འགྱུར་བའི་ཆོས་ཅན་དུ་དེ་མ་རྟོགས་པས་ལུས་དང་ངག་དང་ཡིད་ཀྱི་ལེགས་པར་སྤྱད་པར་སྤྱོད་པར་མི་འགྱུར་རོ། །དོན་རྣམས་དང་དོན་མ་ཡིན་པ་རྣམས་ཤེས་པ་མ་ཡིན་ནོ། །ཆོས་དང་ཆོས་མ་ཡིན་པའི་
རྒུད་པར་ལྟུང་བའི་སྡུག་བསྔལ་གྱི་དབང་དུ་བྱས་ནས་བློ་འཇུག་པར་འགྱུར་བ་མ་ཡིན་ནོ། །དམྱལ་བ་དང་ཡི་དགས་དུད་འགྲོ་རྣམས་ཀྱི་འགྲོ་བ་བརྒྱ་སྟོང་དུ་མ་རྣམས་སུ་སྡུག་བསྔལ་གྱི་རྣམ་པར་རྟོག་པ་དུ་མ་སོ་སོར་ཉམས་སུ་མྱོང་བ་ཡིད་ལ་སེམས་པར་ཡང་མི་བྱེད་དོ། །ཤིང་བཞིན་དུ་འཆི་བདག་ལས་བཟློག་པའི་ཐབས་ཀྱང་ཚོལ་བར་མི་བྱེད། འཁོར་བའི་སྐྱེ་བོ་ཐམས་ཅད་རབ་ཏུ་འཇོམས་པའི་བདེ་བ་ངན་པ་རྣམས་ལ་དེ་ལྟར་རབ་ཏུ་ཆགས་པ་རྣམས་ཕྱིས་འཆི་བདག་གི་དུས་སུ་ཕྱིན་ནས་ལོངས་སྤྱོད་ངན་པ་རྣམས་ལ་ཆགས་པའི་རྣམ་པར་བརྐམ་པ་དེ་རྗེས་ལ་འགྱོད་པའི་མེས་སྲེག་པར་བྱེད་དོ། །ལུས་ཞིག་ནས་ཀྱང་ཐབས་མ་ཡིན་པས་ངན་འགྲོ་ལོག་པར་ལྟུང་བ་དམྱལ་བར་སྐྱེའོ། །སོའུ་མྱོ་གཞན་ཡང་བག་མེད་པའི་རྒྱུ་དགུ་པ་ཡོད་དེ། ཇི་ལྟར་ལྷ་དང་མི་རྣམས་སྲེད་པ་དང་ལྡན་པས་རྣམ་པ་སྣ་ཚོགས་པའི་བདེ་བ་ལ་ཆགས་པའི་ཡིད་ཀྱིས་སངས་རྒྱས་དང་ཆོས་དང་དགེ་འདུན་རྣམས་ལ་སྒྲུབ་པར་མི་བྱེད་དེའི་རང་བཞིན་ཅན་ཡང་མ་ཡིན་ལ། དེ་དག་གི་ཚིག་རྣམས་ཉན་པར་མི་བྱེད་འཕགས་པའི་གདུལ་བྱར་རྗེས་སུ་གནས་པ་ཡང་མ་ཡིན། དོན་དང་དོན་མ་ཡིན་པ་རྣམས་མི་ཤེས་སོ། །དེ་དག་རྗེས་སུ་རྗོད་པར་བྱེད་པའི་རང་བཞིན་ཅན་མ་ཡིན་ནོ། །སྒྲུབ་པ་ལ་འཇུག་པར་འགྱུར་བ་མ་ཡིན། འཇིག་རྟེན་པ་རྣམས་ལ་མཆོག་ཏུ་འཇིགས་པར་སྟོན་པ་ཡིན། རྒུད་པའི་སྡུག་བསྔལ་རྣམས་རིག་པ་ཡང་མ་ཡིན་ལ། རང་གི་དོན་རྣམས་ལས་ནི་ཉམས་ཤིང་རང་གི་སེམས་ཀྱིས་བསླུས་པ་རྣམས་ནི་ལུས་ཞིག་པ་ན་ཐབས་མ་ཡིན་པ་ལོག་པར་ལྟུང་བ་དམྱལ་བར་སྐྱེའོ། །སོའུ་མྱོ་འདི་ནི་དབང་ཕྱུག་དང་རྟག་པ་དང་བརྟན་པ་དང་ཐེར་ཟུག་ནི་མ་ཡིན་གྱི་རྣམ་པར་འགྱུར་བའི་ཆོས་ཅན་རྣམས་ཡིན་ལ། ཇི་ལྟར་འཐབ་བྲལ་གྱི་མངའ་བདག་སོའུ་མྱོ་ཁྱོད་ཁོ་ན་བཞིན་དུ་བརྒྱ་སྟོང་ཕྲག་དུ་མ་རྣམས་བྱུང་བ་ལ་དེ་དག་རྣམས་གར་སོང་། འདིར་ཡང་རང་གིས་བྱས་པའི་ལས་རྣམས་ཀྱི་འབྲས་བུའི་བགོ་སྐལ་ལ་སྤྱོད་པས་ལེགས་པར་བྱས་པ་དང་། ཉེས་པར་བྱས་པའི་ལས་ཀྱི་ཞགས་པས་ཀུན་ནས་བཅིངས་ནས་འཁོར་བ་རྣམས་ན་འཁོར་ཏེ། ལེགས་པར་བྱས་པའི་ལས་རྣམས་ཀྱིས་ནི་ལྷ་དང་མི་རྣམས་སུ་སྐྱེའོ། །མི་དགེ་བ་རྣམས་ཀྱིས་ནི་དམྱལ་བ་དང་ཡི་དགས་དང་དུད་
འགྲོ་རྣམས་སུ་སྐྱེའོ། །དེ་ལྟ་བས་ན་སོའུ་མྱོ་བག་མེད་པ་རྣམས་ཀྱིས་གནས་པར་འགྱུར་བར་མི་བྱ་སྟེ། གལ་ཏེ་མི་ཐོབ་པར་འདོད་པ་རྣམས་ཀྱིས་སོ། །དེ་ཅིའི་ཕྱིར་ཞེ་ན། སྲོག་དང་ལོངས་སྤྱོད་དང་གསོན་པ་ཡང་མི་རྟག་པས་ན་དེ་རྣམས་བདག་ཉིད་ཀྱི་ཡིད་ལ་བྱས་ལ་བག་མེད་པས་གནས་པར་མི་བྱའོ། །བག་མེད་པའི་རྒྱུ་གང་གིས་ལྷ་བརྒྱ་སྟོང་ཕྲག་དུ་མ་རྣམས་ལོག་པར་ལྟུང་ངོ་། །དེའི་ཕྱིར་བག་མེད་པ་ཇི་ལྟ་བས་འགྲོ་བར་མི་བྱ་སྟེ། འདི་དག་རྣམས་ནི་བླུན་པོ་རྣམས་ཀྱི་ལམ་ཡིན་གྱི་སྐྱེས་བུ་དམ་པ་རྣམས་ཀྱི་ནི་མ་ཡིན་ཏེ། གང་གི་ཕྱིར་སྐྱེས་པ་ཐམས་ཅད་ནི་ངེས་པར་འཆི་བ་མདུན་ན་རྣམ་པར་གནས་པ་ཁོ་ནའོ། །དེ་བཞིན་དུ་རྒ་བ་དང་། དེ་བཞིན་དུ་ནད་རྣམས་དང་། དེ་བཞིན་དུ་སྡུག་པ་དང་བྲལ་བ་དང་། དེ་བཞིན་དུ་དགེ་བ་དང་མི་དགེ་བའི་ལས་རྣམས་ལ་ཉེ་བར་ལོངས་སྤྱོད་པ་མི་སླུ་བ་འདི་དག་རྣམས་ནི་རྟག་ཏུ་རྗེས་སུ་འབྲེལ་པའི་ཕྱིར་ན་སྲོག་ཆགས་ཐམས་ཅད་རླག་པར་བྱེད་པའོ། །དེ་ནས་དེའི་ཚེ་ལྷ་རྣམས་ལ་བཅོམ་ལྡན་འདས་ཀྱིས་ཚིགས་སུ་བཅད་པ་གསུངས་པ་འདི་ལྟར། བག་མེད་པ་ཡི་ལྗོན་ཤིང་ལ། །ཡལ་ག་རྣམ་གསུམ་རབ་ཏུ་གནས། །རྒ་ནད་དང་ནི་འཆི་བ་སྟེ། །རྟག་ཏུ་དེ་ཡི་སྟེང་ན་གནས། །སྐྱེས་བུ་སྤྱོད་པ་དམ་ལྡན་པ། །རྒས་སོགས་ཀྱིས་ནི་གནོད་པ་མེད། །བློ་ལྡན་རྟག་པར་བྱེད་གནས་ནི། །ནམ་ཡང་བག་མེད་ཀྱིས་མི་རྒ། །སྐྱོན་རྣམས་རྟག་ཏུ་འཇོམས་པ་དང་། །བག་མེད་མཆོག་འཛིན་པ་ཡང་མིན། །དེ་ནི་སྐྱོན་དང་འཇིགས་གྲོལ་ནས། །བདེ་བ་བླ་ན་མེད་པ་ཐོབ། །བག་མེད་པས་བྱས་བདེ་རྣམས་གང་། །དེ་ནི་འཇིགས་བཅས་མཐར་ལེགས་མིན། །གང་ཡང་དེ་ལས་རྣམ་གྲོལ་བ། །དེ་བདེ་རྟག་ཏུ་འགྱུར་བ་མེད། །བརྒྱ་ཕྲག་ཐེར་འབུམ་ཕྲག་ཏུ་ཡང་། །བག་མེད་པས་ནི་རྣམ་ཉམས་བྱས། །དེ་ལྟ་ན་ཡང་མི་དབང་འགྲོ། །དེ་ལ་དང་པོ་ཁོ་ནར་གནས། །ཕྱིན་ཅི་ལོག་ནི་རྣམ་བཞིའི་ཡང་། །བག་མེད་པ་ནི་སྟེང་ན་གནས། །གནས་པའི་བག་མེད་པ་དེས་ཀྱང་། །འཇིག་རྟེན་དགྲ་རྣམས་བཞི་འཇོམས་སོ། །གང་ལ་རྣམ་རྟོག་དུ་མ་ཡི། །འཇིགས་པ་དུ་མའི་
གཡང་ས་ཡི། །འཁོར་བར་འཁོར་བའི་སྡུག་བསྔལ་དེ། །བག་མེད་པ་ཡི་བྱ་བ་ཡིན། །བག་མེད་གཅིག་དང་བྲལ་བ་ཡིས། །བདེ་བ་འཕོ་བ་མེད་པ་འཐོབ། །ཆོས་རྣམས་ཀུན་དང་ཟག་མེད་པ། །བག་མེད་པ་ཡིས་རྣམ་པར་འཇོམས། །ལྷ་རྣམས་ཀྱི་ཡང་བག་མེད་པ། །གོང་ནས་གོང་དུ་འཕེལ་བ་ཡིན། །བག་མེད་པ་ཡིས་ཀུན་རྨོངས་ལྷ། །ཇི་ལྟར་མྱ་ངན་འདས་པར་འགྲོ། །དེ་ལ་དེ་དག་སོའུ་མྱོ་ཡིད། །རྣམ་རྟོག་དུ་མས་སོམས་ལ་ནི། །ཇི་ལྟར་ཕྱིན་ནས་མི་གདུང་བ། །དེ་ལྟར་བདག་ལ་ཕན་པས་གནོས། །ལྷ་གང་གི་ནི་བདེ་བ་གང་། །གཞན་ཡང་ཅུང་ཟད་གང་ཕྱིས་ནི། །དེ་ཀུན་མི་རྟག་ཤེས་བྱ་སྟེ། །འདུས་བྱས་ལ་ནི་འདི་དག་འབྱུང་། །དངོས་གང་འདུས་བྱས་ནང་འདུས་པ། །ངེས་པར་དེ་ནི་རྣམ་པར་འཇིག །འབྱུང་ཞིང་རྣམ་འཇིག་མི་རྟག་བདེ། །རྟག་ཏུ་སྡུག་བསྔལ་སྐལ་ལྡན་ཡིན། །སྐྱེས་བུ་བག་མེད་པས་ཉམས་པ། །གང་ཞིག་བློ་ལ་དེ་དག་བྱེད། །དེ་ནི་འབྲལ་བ་ཀུན་བྱུང་ནས། །སྡུག་བསྔལ་གྱིས་ནི་ཡོངས་སུ་གདུང་། །དེ་ལྟར་ཚུལ་དུ་མས་བཅོམ་ལྡན་འདས་དེས་སོའུ་མྱོ་དེ་གདུལ་བར་བྱ་བའི་དོན་དུ། འཇིག་རྟེན་གྱི་མིག་དེ་ལྷའི་ཚོགས་རྣམས་ཀྱིས་ཡོངས་སུ་བསྐོར་ནས་འདུལ་བར་མཛད། བག་མེད་པ་རྣམས་ཡང་གོ་བར་མཛད་དོ། །མི་བཟོད་པའི་འཆིང་བ་གང་གིས་ལྷ་རྣམས་རང་དབང་མེད་པར་ལྟུང་ངོ་། །དེ་ནས་ལྷའི་རྒྱལ་པོས་བཅོམ་ལྡན་འདས་དེའི་སྤྱན་སྔ་ནས་ཆོས་བསྟན་པ་དེ་རྣམས་ཉེ་བར་ཐོས་པ་དང་། ལྷ་སྟོང་ཕྲག་ཉི་ཤུ་དང་བཅས་པ་རྣམས་རྒྱུན་དུ་ཞུགས་པར་གྱུར་ཏོ། །དེ་ནས་བཅོམ་ལྡན་འདས་ངས་གདུལ་བྱའི་བྱ་བ་བྱས་ན་ལྷག་མ་གཞན་ལ་ཕན་པའི་བྱ་བར་གྱུར་པ་གཞན་ཅི་ཡོད་ཅེས་དཔྱོད་པར་མཛད་དེ། དེ་ནས་ཡང་མ་འོངས་པ་མཁྱེན་པ་དང་ལྡན་པའི་བཅོམ་ལྡན་འདས་རྣམ་པར་དཔྱོད་པར་མཛད་དེ། བདག་གིས་བསྒྲུབ་པར་བྱ་བ་སེམས་ཅན་རྣམས་ལ་ཕན་པ་དང་བདེ་བར་གྱུར་པ་དང་། སྡུག་བསྔལ་གྱི་མཐའ་མར་བྱེད་པར་གྱུར་པ་གང་ཡིན་པ་མ་འོངས་པའི་དུས་ན་གཞན་ཅི་ཞིག་ཡོད། དེ་ནས་སླར་ཡང་པད་མའི་ནང་གང་ཡིན་པ་དེར་བཅོམ་ལྡན་འདས་དེས་རྫུ་
འཕྲུལ་གྱི་དབང་གིས་སྤྲུལ་པ་རྣམས་མཛད་དོ། །དེ་ཁོ་ན་ལྟར་རྫུ་འཕྲུལ་གྱི་ཆོ་འཕྲུལ་གྱིས་བཞག་པར་གྱུར་ལ་བྱའི་ཚོགས་རྣམས་གང་ཡིན་པ་དེ་དག་གིས་ཀྱང་ཚིགས་སུ་བཅད་པ་རྣམས་འཆད་པར་བྱེད་ལ། དེ་རྣམས་དེ་ལྟར་ཀུན་ནས་རྫོགས་པར་གྱུར་པ་དང་། རྫུ་འཕྲུལ་གྱི་ཆོ་འཕྲུལ་དེ་ཉིད་ཀྱི་སྟོབས་ཀྱིས་ཇི་ལྟར་མ་འོངས་པའི་དུས་ན་སོའུ་མྱོ་འཆི་འཕོས་ནས། མུ་སུ་ལུན་དྷ་ཞེས་བྱ་བའི་གཟུགས་སུ་འཐབ་བྲལ་བའི་མངའ་བདག་འབྱུང་སྟེ། བག་མེད་པས་གནས་པ་འབྱུང་བར་འགྱུར་རོ། །དེ་སེམས་ཅན་བཟང་པོ་འབྱུང་བར་འགྱུར་ལ། དེ་ནམ་ཞིག་ན་སྐྱེད་མོས་ཚལ་གྱི་ས་རྣམས་སུ་འགྲོ་བར་འགྱུར་ཏེ། འཇམ་ཞིང་མཐོ་བའི་རི་དེའི་སྟེང་གི་པད་མ་ཆེན་པོ་དེར་འགྲོ་བར་འགྱུར་རོ། །དེ་སྙིང་པོ་ལ་ལེགས་པར་འདུག་པར་འགྱུར་རོ། །དེ་ངས་སྤྲུལ་པའི་འོད་འདི་ཡོད་པའི་ནང་དེར་འགྲོ་བར་འགྱུར་ལ། དེ་ཅ་ཅོའི་སྒྲ་དང་ལྡན་པས་ནང་འདི་ལ་ལེགས་པར་ལྟའོ། །དེ་མཆོག་ཏུ་དགའ་བར་འགྱུར་བའི་པད་མ་ཆེན་པོ་འདིའི་ནང་ནས་འབྱུང་བར་བྱེད་པར་འགྱུར་རོ། །ཕྱིར་ཡང་ཞུགས་པར་འགྱུར་རོ། །ལྷ་གཞན་རྣམས་ལ་ཡང་ལེགས་པར་གོ་བར་བྱེད་དོ། །དེ་ལ་ལྷ་གང་དག་ཐོས་པ་བརྒྱུད་པས་མངོན་པར་དགའ་བའི་ཆོས་རྣམས་སྟོན་པའི་རྣམ་པར་བཤད་པ་རྣམས་འབྱུང་བར་འགྱུར་ཏེ། དེ་ལ་གོ་བར་བྱེད་པ་ཡིན་ནོ། །དེ་རྣམས་ཐོས་པ་ཙམ་ཉིད་ཀྱིས་མུ་སུ་ལུན་དྷ་སངས་རྒྱས་བཅོམ་ལྡན་འདས་ལ་རབ་ཏུ་དང་བ་ཐོབ་པར་འགྱུར་རོ། །སངས་རྒྱས་ལ་རབ་ཏུ་དད་པ་དེས་མྱ་ངན་ལས་འདས་པ་མཐར་བྱེད་པར་འགྱུར་རོ། །གཞན་ཡང་རབ་ཏུ་དང་བ་སྐྱེས་པས་དུས་མི་རིང་བ་ན་ཤཱཀྱ་ཐུབ་པ་ཞེས་བྱ་བ་འབྱུང་བར་འགྱུར་བ་ཡིན་ཏེ། སངས་རྒྱས་བཅོམ་ལྡན་འདས་དེའི་དྲུང་དུ་ཆོས་རྣམས་ཉན་པར་འགྱུར་རོ། །དེ་ལ་མུ་སུ་ལུན་དྷ་ཐོས་པ་བརྒྱུད་པ་འདི་དག་རྣམས་ནི་བདག་ཅག་གི་སྔོན་གྱི་ལྷ་རྣམས་ཀྱི་དྲུང་དུ་འདི་དག་རྣམས་ཐོས་ལ་དེ་ཇི་ལྟ་བུ་ཁོ་ནར་བདག་ཅག་གིས་ཐོས་པ་དེ་དེ་ལྟ་བུ་ཁོ་ན་བཞིན་དུ་འདི་ཐམས་ཅད་ཤིན་ཏུ་ངོ་མཚར་བ་སྐྱེས་པར་གྱུར་ཏོ། །ངེད་རྣམས་
ཀྱིས་ལེགས་པར་བསྟན་པ་འདི་དག་རྣམས་ཁྱོད་ཀྱིས་པད་མ་ཆེན་པོའི་ནང་དུ་མཐོང་བ་ལས་ཀྱང་བཅོམ་ལྡན་འདས་འཁྲུངས་པར་གྱུར་པ་འདི་ནི་ཤཱཀྱ་ཐུབ་པ་བླ་ན་མེད་པའོ། །དེའི་ཕྱིར་ན་ཐེ་ཚོམ་མེད་པས་ཁྱོད་ཆོས་ཉོན་ཅིག་དང་། བཅོམ་ལྡན་འདས་ཀྱིས་ཇི་སྐད་གསུངས་པ་དེས་དེ་བཞིན་དུ་ཁྱོད་ངེས་པར་ལེགས་པ་འཐོབ་བོ། །ལྷ་དེ་དག་རྣམས་ཀྱི་རྩ་ནས་མུ་སུ་ལུན་དྷས་ཐོས་པས་ཡང་དག་པར་དགའ་བ་སྐྱེས་པ་དང་། གུས་པ་ལེགས་པར་སྐྱེས་ཏེ་ཇི་ལྟར་བདག་གིས་ཐོས་པ་བརྒྱུད་པ་གསེར་ཐུབ་ཀྱིས་གསུངས་པའི་མདོ་འདི་དག་གིས་ཀྱང་ལྷ་རྣམས་ཀྱི་ནང་དུ་ཡིད་རབ་ཏུ་ཚིམ་པ་སྐྱེས་ན། ཇེ་དང་པོ་དངོས་ཁོ་ནར་བཅོམ་ལྡན་འདས་ཀྱི་སྤྱན་སྔར་གང་ཆོས་ཀྱི་ཚིག་རྣམས་བདག་གིས་མཉན་ན་ལྟ་བ་དག་ལ་སྨོས་ཀྱང་ཅི་དགོས་ཞེས། དེས་དེ་ལྟར་རིག་ནས་ལྷ་སྟོང་ཕྲག་བརྒྱད་ཅུ་པོ་རྣམས་དང་གང་ན་བཱ་རཱ་ཎ་སཱི་ཞེས་བྱ་བ་ཡོད་པ་དེར་འགྲོ་བར་བྱེད་པ་ན། དེས་བཅོམ་ལྡན་འདས་བལྟ་བས་ཆོག་མི་ཤེས་པ་མཐོང་བར་གྱུར་པ་ནི་བྱང་ཆུབ་ཀྱི་ཕྱོགས་རྣམས་ཀྱི་ཆོས་སུམ་ཅུ་རྩ་བདུན་པོ་རྣམས་ཀྱིས་བརྒྱན་པའི་སྐུ་གསེར་གྱི་ཕུང་པོའི་མདོག་འདྲ་བར་འོད་འབར་བར་གྱུར་པས་འཇིག་རྟེན་གྱི་ཁམས་ཐམས་ཅད་དུ་ཕན་པར་མཛད་པ་ལ་རབ་ཏུ་ཞུགས་པ། འཇིག་རྟེན་པ་རྣམས་ཀྱི་མིག་ཏུ་གྱུར་པས་འཁོར་བརྒྱ་ཕྲག་དུ་མ་རྣམས་ལ་འཕགས་པའི་བདེན་པ་བཞིའི་གཏམ་དང་ཡང་དག་པར་ལྡན་པ་སྟོན་པར་མཛད་དོ། །དེ་ནས་མུ་སུ་ལུན་དྷ་གང་ན་བཅོམ་ལྡན་འདས་བཞུགས་པ་དེར་སོང་ངོ་། །ཕྱིན་ནས་ཀྱང་སྟོང་ཕྲག་བརྒྱད་ཅུ་དང་བཅས་པའི་ལྷ་རྣམས་ཀྱིས་ཞབས་གཉིས་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་མུ་སུ་ལུན་དྷ་དང་ཐབས་ཅིག་ཏུ་གྱུར་པ་རྣམས་ལ་འདི་སྐད་ཅེས་བཀའ་སྩལ་ཏེ། མུ་སུ་ལུན་དྷ་བདེ་བར་འོངས་སམ། གང་ཡང་བཅོམ་ལྡན་འདས་གསེར་ཐུབ་ཀྱི་ཆོས་ཀྱེ་མདོ་ཇི་ལྟ་བ་བཞིན་དུ་རྟོགས་སམ། ཇི་ལྟ་བ་བཞིན་དུ་མུ་སུ་ལུན་དྷ་སྟོང་ཕྲག་པས་ལྷག་པར་རབ་ཏུ་དང་བ་ལེགས་པར་སྐྱེས་པར་གྱུར་ནས་འདི་སྙམ་དུ་སེམས་སོ། །ཀྱེ་མའོ་ཤིན་ཏུ་ངོ་མཚར་ཏོ་ཐམས་ཅད་མཁྱེན་པའི་ཡེ་ཤེས་ཤིན་ཏུ་ཕྲ་བའི་ཡེ་ཤེས་རྟོགས་པ་ལ་ཐོགས་
པ་མི་མངའ་བའི་གང་ཞིག་བདག་ལ་བྱུང་བ་དེ་དག་རྣམས་བཅོམ་ལྡན་འདས་འདིས་ཇི་ལྟ་བ་བཞིན་དུ་ལེགས་པར་མཁྱེན་ནོ། །དེ་ནས་གཞན་ཡང་མུ་སུ་ལུན་དྷས་བཅོམ་ལྡན་འདས་ཀྱི་ཞབས་གཉིས་ལ་ཕྱག་བྱས་ནས་ལྷ་སྟོང་ཕྲག་བརྒྱད་ཅུ་པོ་རྣམས་དང་ཐབས་ཅིག་ཏུ་གྱུར་པས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏེ། མུ་སུ་ལུན་དྷས་ཆོས་བཤད་པར་བྱ་བ་རྣམས་ནི་དང་པོར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ་ཚིག་འབྲུ་བཟང་པོ་འབའ་ཞིག་པ་ཡོངས་སུ་རྫོགས་པ་ཡོངས་སུ་དག་པ། ཡོངས་སུ་བྱང་བའི་ཆོས་རྣམས་ངས་བཤད་པར་བྱ་སྟེ། འདི་ལྟ་སྟེ། ལྷའི་འགྲོ་བ་པ་རྣམས་མངོན་པར་དགའ་བ་ཞེས་བྱ་བའི་ཆོས་ཀྱི་རྣམ་གྲངས་ཡོད་དེ། དེ་ལེགས་པར་རབ་ཏུ་ཡིད་ལ་བྱས་ཏེ། ཉོན་ཅིག་དང་། ངས་བཤད་པར་བྱའོ། །དེ་སྐད་ཅེས་བཀའ་སྩལ་པ་དང་། ལྷ་རྣམས་བཅོམ་ལྡན་འདས་ཀྱི་ལྟར་ཉན་པ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དགེ་སློང་དག་ལྷའི་སྐྱེ་བོ་རྣམས་མངོན་པར་དགའ་བ་ཞེས་བྱ་བའི་ཆོས་ཀྱི་རྣམ་གྲངས་དེ་དག་རྣམས་གང་ཞེ་ན། འདི་ལྟར་བཅུ་གཉིས་པོ་འདི་དག་ནི་མུ་སུ་ལུན་དྷ་ལྷ་རྣམས་ཀྱི་ལམ་དུ་གྱུར་པ་གང་ལ་མངོན་པར་ཞུགས་ཏེ་རབ་ཏུ་གནས་པར་གྱུར་པའི་སྐྱེས་བུ་རྣམས་ནི་ལྷའི་ཡུལ་དུ་ལེགས་པར་ཕྱིན་པར་འགྱུར་རོ། །དཔེར་ན་ལམ་རྣམས་ལ་ཀུན་ནས་བརྟེན་ཅིང་ལམ་རྣམས་ཀྱི་རྒྱལ་པོས་ནི་འཇིགས་པ་དང་བྲལ་ཞིང་དོགས་པ་དང་བྲལ་བས་ཉམས་པ་མེད་པར་ལུས་དང་ངག་དང་ཡིད་སྙོམས་ཤིང་མི་ངལ་བར་སྐྱེས་བུ་རྣམས་གྲོང་ཁྱེར་དུ་ལེགས་པར་འཇུག་པར་བྱེད་པ་ཡིན་ལ། དེ་བཞིན་དུ་ལམ་བཅུ་གཉིས་པོ་འདི་རྣམས་ཀྱི་བཞོན་པ་ལ་སྐྱེས་བུ་དམ་པ་རྣམས་ལེགས་པར་ཞོན་ནས་ལྷ་རྣམས་ཀྱི་འཇིག་རྟེན་དུ་འགྲོའོ། །བཅུ་གཉིས་པོ་རྣམས་གང་ཞེ་ན། འདི་ལྟ་སྟེ། རེ་ཞིག་དང་པོ་ཁོ་ནར་བདེན་པའི་ལམ་མོ། །མུ་སུ་ལུན་དྷ་བདེན་པ་དེ་ལ་ཡང་ཡོན་ཏན་ལྔ་སྟེ་གང་གི་ཕྱིར་བདེན་པར་སྨྲ་བའི་སྐྱེས་བུ་རྣམས་ལ་ཡང་སྐྱེ་བོ་ཐམས་ཅད་ཀྱིས་ཡིད་ཆེས་པའི་གནས་སུ་
བྱེད་པར་འགྱུར་རོ། །རྟག་ཏུ་དབང་ཆེ་བར་ཡང་འགྱུར་རོ། །བཞིན་དང་མདོག་ཀྱང་རྟག་པར་རབ་ཏུ་དང་བར་འགྱུར་རོ། །ལྷ་རྣམས་ཀྱིས་ཀྱང་སྨོད་པར་མི་བྱེད་དོ། །དེ་དག་ནི་མཐོང་བའི་ཆོས་ཀྱི་འབྲས་བུ་རྣམས་ཡིན་ལ། ལུས་ཞིག་ནས་བདེ་འགྲོ་མཐོ་རིས་པ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཚིགས་སུ་བཅད་པ་ཡང་འདི་ཡིན་ཏེ། བདེན་པར་སྨྲ་བ་རྟག་ཏུ་དུལ། །ལྷ་རྣམས་ཀྱིས་ཀྱང་ཡོངས་བསྐོར་དང་། །འཇིག་རྟེན་དགའ་བར་འགྱུར་བ་དང་། །ཕྱི་ནས་ལྷ་ནི་རངས་པར་འགྱུར། །མུ་སུ་ལུན་དྷ་འདི་དག་རྣམས་ནི་མཐོ་རིས་ཀྱི་ལམ་དང་པོ་ཡིན་ནོ། །གཞན་ཡང་མུ་སུ་ལུན་དྷ་མཐོ་རིས་ཀྱི་ལམ་རྣམས་ལ་འདི་ལྟ་སྟེ། སྦྱིན་པ་མ་ཉམས་པ་དང་ཉེས་པ་ཅན་མ་ཡིན་པ་དང་སྲིད་པར་ཡོངས་སུ་འཇུག་པ་མ་ཡིན་པ་སེམས་ཀྱིས་ལེགས་པར་བསམས་པ་འདི་ནི་མཐོ་རིས་ཀྱི་ལམ་གཉིས་པ་ཡིན་པ་གང་གིས་ལྷའི་འཇིག་རྟེན་དུ་སྐྱེ་བར་འགྱུར་བ་ནི་ལེགས་པར་བྱས་པའི་ལས་ཀྱི་མཐའ་ལ་སྤྱོད་པ་རྣམས་ཡིན་ལ། མདོར་བསྡུ་ན་སྦྱིན་པའི་ཡོན་ཏན་ནི་རྣམ་པ་གསུམ་སྟེ། འདི་ལྟ་སྟེ། འཇིག་རྟེན་པ་རྣམས་འཐུན་པར་འཛིན་པར་འགྱུར་རོ། །རྟག་ཏུ་སེམས་བསྒོམས་པའི་བདག་ཉིད་ཅན་ཡིན་པའི་ཕྱིར་ན་སེམས་ཀྱི་བདེ་བ་ཉམས་སུ་མྱོང་བར་བྱེད་དེ། ཕྱི་མར་ཡང་ལོངས་སྤྱོད་ཆེན་པོ་དང་ལྡན་པར་འགྱུར་རོ། །འདི་ནི་ལྷའི་འཇིག་རྟེན་པ་རྣམས་ཀྱི་ལམ་གཉིས་པའོ། །འདི་ལ་ཡང་ཚིགས་སུ་བཅད་པ། སྦྱིན་པ་བྱིན་པས་འཐུན་གྱུར་ཞིང་། །སེམས་ཀྱི་རྒྱུད་ཀྱང་ཚིམ་པར་བྱེད། །ཕྱིས་དེ་ལོངས་སྤྱོད་ལྡན་པར་འགྱུར། །སྦྱིན་པའི་འབྲས་བུ་འདི་འདྲ་ཡིན། །གཞན་ཡང་མུ་སུ་ལུན་དྷ་མཐོ་རིས་ཀྱི་ལམ་གསུམ་པ་འདི་ལྟ་སྟེ་བཟོད་པའོ། །བཟོད་པ་དང་ལྡན་པའི་སྐྱེས་བུ་རྣམས་ལ་ནི་ཡོན་ཏན་འདི་དག་རྣམས་ཡིན་ཏེ། འདི་ལྟ་སྟེ། འཐབ་པ་དང་རྩོད་པ་དང་འགྱེད་པར་མི་འགྱུར་རོ། །འདི་ནི་ཡོན་ཏན་དང་པོ་ཡིན་ནོ། །འདིའི་ནོར་རྣམས་དབྲོག་པར་བྱར་མི་ནུས་སོ། །སྐྱེ་བོ་ཐམས་ཅད་དང་འཐུན་པར་འགྱུར་རོ། །ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེའོ། །འདི་ལ་ཡང་ཚིགས་སུ་བཅད་པ། བཟོད་པའི་སྤྱོད་
དང་ཡང་དག་ལྡན། །གྲོགས་ལྡན་ཅིས་ཀྱང་འཇིགས་པ་མེད། །འཇིག་རྟེན་འདིར་ནི་འཐུན་འགྱུར་ཞིང་། །ཕྱི་ནས་ལྷ་རྣམས་དག་ཏུ་དགའ། །གཞན་ཡང་མུ་སུ་ལུན་དྷ་མཐོ་རིས་ཀྱི་ལམ་རྣམས་ལ་བཞི་པ་འདི་ལྟ་སྟེ། ཚིག་སྙན་པའོ། །སྙན་པ་ལས་ཀྱང་ཡོན་ཏན་དྲུག་ཏུ་འགྱུར་བ་ནི་འདི་ལྟ་སྟེ། སྐྱེ་བོ་རྣམས་ཐམས་ཅད་དགའ་བར་འགྱུར་བ་དང་། བདག་ཉིད་སུ་ལ་ཡང་མི་འཇིགས་པ་དང་། རྟག་ཏུ་བདེ་བས་དགའ་བ་དང་། རབ་ཏུ་དང་བ་དང་། དོགས་པ་རྣམས་མེད་པ་དང་། ཉེ་བར་སྟེན་པར་གྱུར་པ་དང་རྣམས་ཏེ་ཡོན་ཏན་དྲུག་པོ་དེ་དག་ཡིན་ནོ། །ཚིག་སྙན་པར་གྱུར་པ་འདི་ལ་ཡང་ཚིགས་སུ་བཅད་པ། འཇིག་རྟེན་པ་འདི་དགར་གྱུར་དང་། །འདིར་ཡང་སྙན་པ་མངོན་པར་འཕེལ། །བཞིན་ནི་བལྟ་བར་འོས་འགྱུར་ཞིང་། །ལྷ་ཡི་འཇིག་རྟེན་དུ་ཡང་འགྲོ། །གཞན་ཡང་མུ་སུ་ལུན་དྷ་ལྷའི་འཇིག་རྟེན་པ་རྣམས་ཀྱི་ལམ་ལྔ་པ། འདི་ལྟ་སྟེ། ཐམས་ཅད་ལ་ཡང་དེ་སྙིང་བརྩེ་བ་དང་ལྡན་པའོ། །བརྩེ་བ་དང་ལྡན་པའི་སྐྱེས་བུ་རྣམས་ནི་མྱ་ངན་ལས་འདས་པའི་མཐར་བྱེད་པར་འགྱུར་ཏེ། དེའི་ཉི་མ་རེ་རེ་ཞིང་འཁོར་མཐའ་ཡས་པ་དང་ཡོན་ཏན་ཚད་མེད་པར་འགྱུར་རོ། །ཚིགས་སུ་བཅད་པ་ནི་འདི་ཡིན་ཏེ། འཇིག་རྟེན་སྐྱེ་བོ་ཐམས་ཅད་ཀྱི། །དེ་ནི་ཕ་འདྲ་མ་འདྲ་ཉིད། །རྟག་པར་སྙིང་རྗེ་རིན་ཆེན་ནི། །གང་དག་ཡིད་ལ་གནས་པའི་མཆོག །གཞན་ཡང་མུ་སུ་ལུན་དྷ་ལྷའི་ལམ་དྲུག་པ་གང་དག་གིས་སྐྱེས་བུ་རྣམས་ལྷའི་འཇིག་རྟེན་དུ་སྐྱེད་མོས་ཚལ་གྱི་ལྟད་མོ་བཞིན་དུ་འགྲོ་བར་འགྱུར་བ་ནི་འདི་ལྟ་སྟེ། སེམས་རབ་ཏུ་མཉམ་པར་བཞག་པའི་ཕྱིར་ན་སྐྱེས་བུ་རྣམས་ལེགས་པར་བྱ་བ་རྣམས་བྱེད་པར་འགྱུར་བ་ཡིན་ཞིང་ལེགས་པར་བསམ་པ་སེམས་པར་བྱེད་པ་ཡིན། ངག་རྣམས་ལེགས་པར་འགྱུར་བ་ཡིན་ནོ། །དེ་དག་རྣམས་ནི་མདོར་བསྡུ་ན་ལེགས་པར་སེམས་མཉམ་པར་བཞག་པ་རྣམས་ཀྱི་ཡོན་ཏན་ཡིན་ནོ། །འདི་ལ་ཡང་ཚིགས་སུ་བཅད་པ། སེམས་ནི་རབ་ཏུ་མཉམ་བཞག་པ། །རྟག་ཏུ་ཆོས་ནི་རྗེས་མཐོང་ཞིང་། །ཉེས་པའི་དབང་གིས་མི་འགྲོ་སྟེ། །ཉི་ལ་མུན་པ་སྐྱེ་མིན་
བཞིན། །མུ་སུ་ལུན་དྷ་དེ་དག་རྣམས་ནི་དགེ་བའི་ཆོས་ཐམས་ཅད་ཀྱི་རྩ་བར་གྱུར་པ་ཡིན་ཏེ། འདི་ལྟ་སྟེ། སེམས་རབ་ཏུ་མཉམ་པར་བཞག་པའོ། །གཞན་ཡང་ལྷའི་ལམ་བདུན་པ་རྣམས་གང་ལ་ཞུགས་ནས་སྐྱེས་བུ་རྣམས་ལྷའི་འཇིག་རྟེན་དུ་ཕྱིན་པར་བྱེད་པ་རྣམས་ནི་འདི་ལྟ་སྟེ། ཡང་དག་པའི་ལྟ་བ་ལ་གནས་པའི་སྐྱེས་བུ་རྣམས་མྱ་ངན་ལས་འདས་པ་ཉིད་ལ་ཡང་གནས་པར་གྱུར་ན་ལྷའི་འཇིག་རྟེན་དུ་འགྱུར་བ་ལ་ལྟ་སྨོས་ཀྱང་ཅི་དགོས། དེའི་ལུས་དང་ངག་དང་ཡིད་ཀྱི་ལས་ཀྱི་མཐའ་ཅུང་ཟད་གང་བྱེད་པ་དེ་དག་རྣམས་ཐམས་ཅད་ཀྱང་ཕན་པའི་དོན་ཁོ་ན་ཡིན་པས་མྱ་ངན་ལས་འདས་པ་རྟོགས་པའི་དོན་དུ་འགྱུར་རོ། །ལྷའི་འཇིག་རྟེན་དུ་སྐྱེ་བར་འགྱུར་རོ། །ཡང་འདི་ལ་ཚིགས་སུ་བཅད་པར་གྱུར་པ་ནི། ཡང་དག་ལྟ་བས་ཕུལ་བྱུང་བ། །གང་གི་སེམས་ལ་འབྱུང་འགྱུར་བ། །ཁྱིམ་པ་ཡིན་ཡང་འཁོར་བ་ཡི། །འཆིང་བ་ལས་གྲོལ་དེ་ཤེས་བྱ། །གཞན་ཡང་ལྷའི་ལམ་བརྒྱད་པ་རྣམས་འདི་ལྟ་སྟེ། སྡིག་པའི་གྲོགས་པོ་ཡོངས་སུ་སྤངས་པ་རྣམས་ལ་མདོར་བསྡུ་ན་སྐྱོན་གསུམ་མི་འབྱུང་སྟེ། སྐྱེས་བུ་དམ་པ་རྣམས་སྤོང་བར་མི་འགྱུར་བ་དང་། བསླབ་པ་མཚུངས་པ་ཡིན་ཞེས་བྱས་ནས་ཞལ་སྔ་ནས་ཡིད་ཆེས་པའི་གནས་སུ་ཡང་འགྱུར་རོ། །གཞན་ཡང་སྐྱོན་ཁྱད་པར་ཅན་རྣམས་འབྱུང་བར་མི་འགྱུར་བ་ཡིན་ནོ། འདི་ལ་ཡང་ཚིགས་སུ་བཅད་པ་ནི། སྡིག་པའི་གྲོགས་པོ་མི་སྟེན་པའི། །སྐྱེས་བུ་བདེ་བའི་སྐལ་ལྡན་ཡིན། །སྡིག་པའི་གྲོགས་པོ་ལེགས་བསྟེན་པས། །དོན་མིན་ཀུན་གྱི་མཆོག་ཏུ་འགྱུར། །གཞན་ཡང་མུ་སུ་ལུན་དྷ་ལམ་དགུ་པ་འདི་ལྟ་སྟེ། དམ་པའི་ཆོས་ཉན་པར་བྱེད་པའོ། །དམ་པའི་ཆོས་ལ་ཡང་མདོར་བསྡུ་ན་ཡོན་ཏན་བདུན་ཡོད་དེ། འདི་ལྟར་མ་ཐོས་པ་རྣམས་ཐོས་པར་བྱེད། ཐོས་པ་རྣམས་རྟས་པར་བྱེད། གང་ཡང་ཐ་མལ་པའི་སྡིག་པར་གྱུར་པ་དེ་དག་རྣམས་སྤོང་བར་བྱེད་དོ། །འཕགས་པ་རྣམས་ལ་ལྟ་བའི་རང་བཞིན་ཅན་དུ་འགྱུར་རོ། །སངས་རྒྱས་ལ་ཕྱིར་ཞིང་ཉིད་དུ་རབ་ཏུ་དང་བ་སྐྱེ་བར་འགྱུར་བ་ཡིན་ནོ། །འདིའི་ཚེ་དག་ཀྱང་འཕེལ་བར་འགྱུར་བ་ཡིན་
ནོ། །ལུས་ཞིག་ནས་ཀྱང་ལྷ་རྣམས་སུ་སྐྱེ་བར་འགྱུར་བ་ཡིན་ནོ། །འདི་ལྟར་ཡིན་པ་ལ་ཡང་ཚིགས་སུ་བཅད་པ། སྐྱེས་བུས་མ་ཐོས་ཐོས་པར་བྱེད། །ཐོས་པ་ཡང་ནི་བརྟན་པར་འགྱུར། །སྡིག་པ་སྤོང་བར་བྱེད་པ་ཡིན། །ཕྱི་མར་ལྷར་ནི་སྐྱེ་བ་ཡིན། །གཞན་ཡང་མུ་སུ་ལུན་དྷ་ལྷའི་ལམ་བཅུ་པ་ནི་འདི་ལྟ་སྟེ། སེམས་འཇམ་པོར་འགྱུར་བའོ། །དེ་ལ་ཡང་ཡོན་ཏན་བཞི་ནི་འདི་ལྟ་སྟེ། ཞེ་སྡང་བར་མི་བྱེད་དོ། །གལ་ཏེ་བརྒྱ་ལ་ཞིག་བྱས་ན་ཡང་དེ་བརྟན་པར་མི་བྱེད་དོ། །ཁྲོ་བས་ཤིན་ཏུ་གནོད་པར་མི་འགྱུར་རོ། །ལུས་ཞིག་ནས་ཀྱང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཚིགས་སུ་བཅད་པ་ཡང་འདི་ཡིན་ཏེ། སེམས་གང་དགེ་བ་དྲི་མེད་ལྡན། །ཞེ་སྡང་གིས་ནི་གནོད་བྱེད་མིན། །བརྣབ་སེམས་དྲི་མ་འབྱུང་མིན་ཏེ། །ལྷ་ཡི་འཇིག་རྟེན་དུ་ཡང་སྐྱེ། །གཞན་ཡང་མུ་སུ་ལུན་དྷ་ལྷའི་ལམ་རྣམས་ལས་བཅུ་གཅིག་པ་ནི་འདི་ལྟ་སྟེ། ལས་དང་འབྲས་བུ་ལ་དད་པའི་སྟོབས་བསྐྱེད་པའོ། །ལས་ཀྱི་འབྲས་བུ་རྣམས་ལ་དད་པའི་སྟོབས་སྐྱེད་པའི་སྐྱེས་བུ་རྣམས་ནི་སྡིག་པ་ཐམས་ཅད་རྣམ་པར་སྤངས་པར་འགྱུར་རོ། །ཁ་ན་མ་ཐོ་བ་ཅུང་ཟད་ཙམ་རྣམས་ལ་ཡང་འཇིགས་པར་ལྟ་བར་འགྱུར་རོ། །དེས་ལེགས་པར་བྱས་པ་དང་ཉེས་པར་བྱས་པའི་ལས་རྣམས་ཀྱི་འབྲས་བུ་ཡང་ཀུན་ནས་རིག་པར་འགྱུར་རོ། །འདི་ལྟ་སྟེ། འདུས་བྱས་རྣམས་བྱེད་པར་མི་འགྱུར་རོ། །དེ་ལེགས་པར་བྱས་པའི་ལས་ལ་གོམས་པའི་དབང་གིས་ལུས་ཞིག་ནས་བདེ་འགྲོ་མཐོ་རིས་ཀྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཚིགས་སུ་བཅད་པ་ཡང་འདི་ཡིན་ཏེ། གང་གི་ལས་འབྲས་རྣམ་སྨིན་ཤེས། །རྟག་ཏུ་ཕྲ་མོ་ལེགས་མཐོང་བ། །འདི་ནི་སྡིག་པས་གོས་མིན་ཏེ། །འདམ་གྱི་པད་མ་ཇི་བཞིན་ནོ། །གཞན་ཡང་མུ་སུ་ལུན་དྷ་མཐོ་རིས་ཀྱི་ལམ་གང་དག་ལ་མངོན་པར་ཞུགས་ནས་སྐྱེས་བུ་ལྷ་རྣམས་ཀྱི་འཇིག་རྟེན་དུ་སྐྱེ་བར་འགྱུར་བ་ནི་འདི་ལྟ་སྟེ། དཀོན་མཆོག་གསུམ་ལ་རབ་ཏུ་དང་བ་ཕྱིན་ཅི་མ་ལོག་པའོ། །དཀོན་མཆོག་གསུམ་ལ་རབ་ཏུ་དང་བའི་ཕྱིན་ཅི་མ་ལོག་པ་དེ་ནི་ཡོན་ཏན་བརྒྱ་ཕྲག་དུ་མ་དང་ལྡན་པ་ཡིན་པ་
གང་གི་ཕྱིར་ན་ཡོན་ཏན་དུ་མ་དང་ལྡན་པ་དེས་ཀྱང་ཡོན་ཏན་རྣམས་ཟིལ་གྱིས་མནན་ནས་རྣམ་པར་རྒྱལ་བས་གསལ་ཞིང་མཛེས་སོ། །འདི་ལྟ་སྟེ། སྐྱེས་བུ་དེ་དག་རྣམས་ནི་མྱ་ངན་ལས་འདས་པའི་མཐར་ཕྱིན་པར་འགྱུར་རོ། །སྔོན་དུ་ལྷ་དང་མི་རྣམས་ཀྱི་བདེ་བ་ཉམས་སུ་མྱོང་བར་འགྱུར་ཏེ། ལམ་བཅུ་གཉིས་པོ་འདིས་སྐྱེས་བུ་རྣམས་སམ། ལྷ་གང་དག་བག་མེད་པ་དང་ལྡན་པ་མ་ཡིན་པ་དེ་དག་རྣམས་ཀྱང་མཐོ་རིས་སུ་འགྲོའོ། །བག་མེད་པ་ལ་ཞུགས་པའི་སྐྱེས་བུ་རྣམས་ནི་འཇིག་རྟེན་པ་དང་། འཇིག་རྟེན་ལས་འདས་པའི་བདེ་བ་རྣམས་ཀྱང་མི་ཐོབ་པའོ། །དེ་ལྟ་བས་ན་མུ་སུ་ལུན་དྷ་ཇི་ལྟ་བུ་ཁོ་ནར་སྔོན་གྱི་དྲང་སྲོང་གསེར་ཐུབ་དེས། འཐབ་བྲལ་བ་རྣམས་ཀྱི་བདག་པོ་སོའུ་མྱོ་དེ་ལ་ཆོས་བསྟན་པའི་ཆོས་དེ་ཉིད་ཁོ་ན་དེ་བཞིན་གཤེགས་པ་རྣམས་ཐམས་ཅད་ཀྱི་ཡིན་པ་ཡང་། ཇི་ལྟ་བ་བཞིན་དུ་ཁྱོད་ཀྱི་ཚེ་ཆེས་རྒན་པ་རྣམས་ཀྱི་དྲུང་ནས་ཐོས་པ་ཡིན་ནོ། །འདི་ལ་ཡང་ཚིགས་སུ་བཅད་པར་གྱུར་པ་ནི། དཀོན་མཆོག་གསུམ་ལ་རབ་དད་པ། །འབྱུང་འགྱུར་འབྲས་བུ་དུ་མ་དང་། །མྱ་ངན་འདའ་བར་འགྱུར་བ་སྟེ། །སྔོན་དུ་ཉེ་བར་མཐོ་རིས་སྐྱེ། །ལམ་བཅུ་གཉིས་པོ་དེ་དག་རྣམས་བར་མ་ཆད་པས་དེར་རྟག་ཏུ་འགྲོ་བར་འགྱུར་གྱི་གཞན་དུ་ནི་མ་ཡིན་ནོ། །དེ་ནས་མུ་སུ་ལུན་དྷས་བཅོམ་ལྡན་འདས་ཀྱི་སྤྱན་སྔ་ནས་ཆོས་ཀྱི་རྣམ་གྲངས་འདི་ཐོས་པས། ལྷ་བརྒྱ་སྟོང་ཕྲག་བརྒྱད་ཅུ་པོ་རྣམས་དང་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །དེ་ནས་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷས། བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས། ཚིགས་སུ་བཅད་པ་འདི་དག་རྣམས་སྨྲས་ཏེ། ཇི་ལྟར། དེ་བཞིན་གཤེགས་པ་ཁྱོད་དྲིན་གྱིས། །ངན་སོང་འཇིགས་པ་ལས་བདག་གྲོལ། །ལྷ་ནི་འདི་རྣམས་ཐམས་ཅད་ཀྱང་། །མགོན་པོ་ཁྱོད་ཀྱི་ཆོས་ཀྱིས་བསྒྲལ། །སྲིད་པའི་བཙོན་ར་རྒྱ་ཆེན་ལ། །ལྷ་དང་བཅས་པ་རབ་ཞུགས་པ། །བདེར་གཤེགས་བསྟན་པ་གང་ལ་བདག །བདག་གི་སྐྱེ་བ་དེང་འབྲས་བཅས། །
དེ་སྐད་ཅེས་སྨྲས་ནས། མུ་སུ་ལུན་དྷ་བཱ་རཱ་ཎ་སཱི་ནས་འཕགས་ནས། ལྷའི་ཚོགས་དང་བཅས་པ་རྣམས་ནམ་མཁའི་དཀྱིལ་དུ་འཕགས་ཏེ། དེ་རྣམས་གང་ན་འཐབ་བྲལ་བ་རྣམས་ཀྱི་ས་རྣམས་ཡོད་པ་དེར། ལྷ་དེ་ཐམས་ཅད་ཉིད་རབ་ཏུ་ཞུགས་ནས། དེ་རྣམས་དེ་རེ་ཞིག་གི་ཚེ་དགའ་དགུར་གྱུར་པས་ཀྱང་ཀུན་ཏུ་སྤྱོད་དེ། ཇི་སྲིད་དུ་དེ་དག་རྣམས། སྐྱེ་བ་གཅིག་གི་དབང་དུ་བྱས་པའི་ཚེ་མ་ཟད་ཀྱི་བར་དུའོ། །དེ་ཟད་ནས་ཕྱིས་ཀྱང་གང་གིས་སྡིག་པའི་སྒོ་རྣམས་བཅད་པའི་མི་རྣམས་སུ་དེ་སྐྱེའོ། །སྐྱེས་ནས་ཀྱང་། མཆོག་ཏུ་གཞོན་ཤ་ཆགས་པ་དང་། གཟུགས་དང་ལང་ཚོ་ཕུལ་དུ་ཕྱིན་པ་དང་འབྱོར་ཅིང་ཡང་ཡུལ་ལྗོངས་ལ་དབང་བར་འགྱུར་རོ། །གང་དག་རྒྱུན་དུ་ཞུགས་པ་མ་ཡིན་པ་དེ་དག་རྣམས་ནི་ཚེ་འཕོས་ནས། ཇི་ལྟར་ཆོས་རྣམས་ཀྱིས་ཉེ་བར་འགྲོ་བར་འགྱུར་བ་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེའོ། །དེ་དག་རྣམས་ནས་འཕོས་ནས་གལ་ཏེ་ཡང་མི་རྣམས་དང་སྐལ་བ་མཚུངས་པར་མིར་སྐྱེས་ན་ཡང་། དེ་རྣམས་དེ་བཞིན་དུ་གཞོན་ཤ་ཅན་དུ་འགྱུར་ཞིང་རྒྱན་དང་ཆ་ལུགས་ལ་མཆོག་ཏུ་དགའ་བར་ཡང་འགྱུར་ཏེ། དེའི་རྒྱུ་འཐུན་པའི་ལས་རྣམས་ཀྱིས་སོ།། །