འཕགས་པ་འཁར་གསིལ་གྱི་མདོ།
འཕགས་པ་འཁར་གསིལ་གྱི་མདོ། །།འཕགས་པ་འཁར་གསིལ་གྱི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ཁྱོད་ཀྱིས་འཁར་གསིལ་འདི་ཡོངས་སུ་བཅང་བར་བྱ་སྟེ། དེ་ཅིའི་ཕྱིར་ཞེ་ན། འདས་པའི་སངས་རྒྱས་རྣམས་ཀྱིས་ཀྱང་འཁར་གསིལ་འདི་བསྣམས་སོ། །མ་བྱོན་པའི་སངས་རྒྱས་རྣམས་ཀྱིས་ཀྱང་འཁར་གསིལ་འདི་བསྣམས་པའི་ཕྱིར་རོ། །ད་ལྟར་གྱི་སངས་རྒྱས་རྣམས་ཀྱིས་ཀྱང་འཁར་གསིལ་འདི་བསྣམས་པ་ཡིན་ཏེ། ང་ད་ལྟར་མངོན་པར་སངས་རྒྱས་ནས་འཁར་གསིལ་བསྣམས་པ་དེ་བཞིན་དུ་འདས་པ་དང་། མ་
བྱོན་པ་དང་། ད་ལྟར་བཞུགས་པའི་སངས་རྒྱས་རྣམས་ཀྱིས་ཀྱང་ཉན་ཐོས་རྣམས་ལ་འཁར་གསིལ་བཅང་བར་བྱའོ་ཞེས་སྟོན་པར་མཛད་པས་དེང་ང་མངོན་པར་རྫོགས་པར་སངས་རྒྱས་ནས་ཀྱང་སངས་རྒྱས་རྣམས་ཀྱི་ཆོས་ཇི་ལྟ་བ་བཞིན་དུ་ཁྱེད་ལ་བསྟན་པ་ཡིན་གྱིས། ཁྱེད་ཀྱིས་ཀྱང་འཁར་གསིལ་བཅང་བར་བྱའོ། །དེ་ཅིའི་ཕྱིར་ཞེ་ན། འཁར་གསིལ་ཞེས་བྱ་བ་ནི་ཡེ་ཤེས་ཀྱི་འཁར་བ་ཞེས་ཀྱང་བྱའོ། །ཡོན་ཏན་གྱི་འཁར་བ་ཞེས་ཀྱང་བྱ་སྟེ། འཕགས་པའི་ཡེ་ཤེས་རབ་ཏུ་སྟོན་པའི་ཕྱིར་ཡེ་ཤེས་ཀྱི་འཁར་བ་ཞེས་བྱའོ། །ཡོན་ཏན་གྱི་གཞི་སྒྲུབ་པའི་ཕྱིར་ཡོན་ཏན་གྱི་འཁར་བ་ཞེས་བྱ་སྟེ། འཁར་གསིལ་འདི་ནི་འཕགས་པའི་གང་ཟག་གི་རིགས་ཅན་སྐྱེས་བུ་དམ་པར་མཚོན་པའི་ལམ་གྱི་ཆོས་ལ་ཕྱོགས་པའི་རྒྱལ་མཚན་རྗེས་སུ་དྲན་པ་རྣམ་པར་གཞག་པའི་དོན་གྱི་སྤྱོད་པ་ཡིན་པས་དེའི་ཕྱིར་ཁྱོད་ཀྱིས་ཆོས་བཞིན་དུ་བཅང་བར་བྱའོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་སྟན་ལས་ལངས་ཏེ། གོས་ཚགས་བཅོས་ནས་བླ་གོས་ཕྲག་པ་གཅིག་ཏུ་གཟར་ཏེ་ཐལ་མོ་སྦྱར་ནས་པུས་མོ་ས་ལ་བཙུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་འཁར་གསིལ་ཞེས་བགྱི། ཇི་ལྟར་ན་བཅང་བར་བགྱི། བཅོམ་ལྡན་འདས་ཀྱིས་བཤད་དུ་གསོལ། བདག་ཅག་རྣམས་ཀྱིས་ཀྱང་བཀའ་བཞིན་དུ་སྤྱོད་པར་འཚལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ལེགས་པར་ཉོན་ལ་ཡིད་ལ་ཟུང་ཤིག་དང་ངས་བཤད་པར་བྱའོ། །དེ་ལ་འཁར་གསིལ་ཞེས་བྱ་བ་ནི་ཡང་བ་ཡིན་ཏེ། གང་གིས་འཁར་བ་འདི་ལ་བརྟེན་པ་འདི་དག་ཉོན་མོངས་པ་བསལ་ནས་ཁམས་གསུམ་ལས་ངེས་པར་འབྱུང་བའི་ཕྱིར་ཡང་ཞེས་བྱའོ། །འཁར་གསིལ་ཞེས་བྱ་བ་ནི་སྣང་བར་བྱེད་པ་ཡིན་ཏེ། འཁར་གསིལ་འཛིན་པའི་གང་ཟག་གང་ཡིན་པ་དེ་དག་ཤེས་རབ་ཀྱི་སྣང་བ་ཐོབ་པར་འགྱུར་བའི་ཕྱིར་སྣང་བར་བྱེད་པ་ཞེས་བྱའོ། །འཁར་གསིལ་ཞེས་བྱ་བ་ནི་ཕྱིར་མི་ལྡོག་པར་བྱེད་པ་ཡིན་ཏེ། འཁར་གསིལ་
འཛིན་པའི་གང་ཟག་གང་ཡིན་པ་དེ་དག་སྲིད་པ་གསུམ་ལས་ངེས་པར་འབྱུང་ཞིང་ཡང་མངོན་པར་ཞེན་པ་ཉིད་དུ་མི་འགྱུར་བའི་ཕྱིར་ཕྱིར་མི་ལྡོག་པར་བྱེད་པ་ཞེས་བྱའོ། །འཁར་གསིལ་ཞེས་བྱ་བ་ནི་ཁོང་དུ་ཆུད་པར་བྱེད་པ་ཡིན་ཏེ། གང་འཁར་གསིལ་འཛིན་པར་བྱེད་པ་ཡིན་ཞེ་ན། སྡུག་བསྔལ་དང་། སྟོང་པ་དང་། ཁམས་གསུམ་གྱི་ཉོན་མོངས་པའི་ཀུན་ནས་དསྲེས་པར་ཁོང་དུ་ཆུད་པ་དང་། བདེན་པ་བཞི་དང་། རྟེན་ཅིང་འདྲེལ་པར་འབྱུང་བ་བཅུ་གཉིས་པོ་འདི་དག་གསལ་བར་རྟོགས་པར་འགྱུར་བའི་ཕྱིར་ཁོང་དུ་ཆུད་པར་བྱེད་པ་ཞེས་བྱའོ། །འཁར་གསིལ་ཞེས་བྱ་བ་ནི་ང་རྒྱལ་མེད་པར་བྱེད་པ་ཡིན་ཏེ། གང་འཁར་གསིལ་འཛིན་པ་དེ་དག་ང་རྒྱལ་གྱི་ལས་རབ་ཏུ་སྤོང་བར་འགྱུར་བའི་ཕྱིར་ང་རྒྱལ་མེད་པར་བྱེད་པ་ཞེས་བྱའོ། །འཁར་གསིལ་ཞེས་བྱ་བ་ནི་རྒྱང་བསྲིངས་པ་ཡིན་ཏེ། གང་འཁར་གསིལ་འདི་འཛིན་པའི་གང་ཟག་གང་ཡིན་པ་དེ་དག་འདོད་པ་ལྔ་ཐག་རིང་དུ་བྱེད་པས་དེ་དག་འདོད་པས་སྲེད་པའི་ཀུན་ནས་དསྲེས་པ་སྤོང་བ་དང་། ཕུང་པོ་ལྔ་པོ་རྣམས་རྣམ་པར་འཐོར་བ་དང་། སྲིད་པ་ལྔ་པོ་དག་ཡོངས་སུ་སྤོང་བ་དང་། མྱ་ངན་ལས་འདས་པ་ལ་ཕྱོགས་ཤིང་འདུ་བྱེད་ཀྱི་ལས་ཀྱང་ཐག་རིང་དུ་སྤོང་བའི་ཕྱིར་རྒྱང་བསྲིངས་པ་ཞེས་བྱའོ། །འཁར་གསིལ་ཞེས་བྱ་བ་ནི་ལེན་པར་བྱེད་པ་ཡིན་ཏེ། གང་འཁར་གསིལ་འཛིན་པར་བྱེད་པ་དེ་དག་སངས་རྒྱས་རྣམས་ཀྱི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་རིན་པོ་ཆེ་བླངས་པས་རྣམ་པར་གྲོལ་བ་ཐོབ་པར་འགྱུར་བའི་ཕྱིར་ལེན་པར་བྱེད་པ་ཞེས་བྱའོ། །འཁར་གསིལ་ཞེས་བྱ་བ་ནི་ཡོངས་སུ་གྲུབ་པར་འགྱུར་བ་ཡིན་ཏེ། གང་འཁར་གསིལ་འཛིན་པ་དག་སངས་རྒྱས་ཀྱི་ཆོས་ཀྱི་སྡེ་སྣོད་མངོན་པར་གྲུབ་པ་དང་། ཇི་ལྟར་བསྟེན་པ་བཞིན་དུ་བསྒྲུབས་པས་མ་ཉམས་པར་ཕུན་སུམ་ཚོགས་པར་འགྱུར་བའི་ཕྱིར་མངོན་པར་འགྲུབ་པར་འགྱུར་བ་ཞེས་བྱའོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འཁར་གསིལ་ཞེས་བྱ་བའི་ཡི་གེའི་དོན་རྒྱ་ཆེ་ཞིང་མང་བས་ཡོངས་སུ་རྫོགས་
པར་རྗོད་མི་ནུས་ཀྱང་ཁྱེད་ཀྱིས་རེ་ཞིག་དེ་བཞིན་དུ་ཡོངས་སུ་གཟུང་བར་བྱའོ། །བཅོམ་ལྡན་འདས་ལ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འཁར་གསིལ་ཞེས་བྱ་བའི་དོན་ནི་དེ་ལྟ་བུ་ལགས་ན། ཅིའི་སླད་དུ་ཡེ་ཤེས་ཀྱི་འཁར་བ་ཞེས་བགྱི་བ་ནས་དྲན་པ་ཉེ་བར་གཞག་པའི་དོན་གྱི་སྤྱོད་པ་ཞེས་བགྱི་བའི་བར་གྱི་དོན་གང་ལགས་པ་བཅོམ་ལྡན་འདས་ཀྱིས་བཀས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཁར་གསིལ་ཞེས་བྱ་བ་ནི་ཡེ་ཤེས་ཀྱི་སྤྱོད་པ་སྒྲུབ་པ་དང་། མང་དུ་ཐོས་པ་རྒྱ་ཆེར་སྒྲུབ་པ་དང་། འཇིག་རྟེན་དང་འཇིག་རྟེན་ལས་འདས་པའི་ཤེས་རབ་དང་། དགེ་བ་དང་། མི་དགེ་བ་དང་། འདུས་བྱས་དང་། འདུས་མ་བྱས་དང་། ཟག་པ་དང་བཅས་པ་དང་། ཟག་པ་མེད་པ་རྣམ་པར་ཐོགས་པ་མེད་པར་ཁོང་དུ་ཆུད་ཅིང་ཤེས་རབ་མངོན་པར་འགྲུབ་པར་བྱེད་པའི་ཕྱིར་ཡེ་ཤེས་ཀྱི་འཁར་བ་ཞེས་ཀྱང་བྱའོ། །ཚུལ་ཁྲིམས་དམ་པོར་སྲུང་བ་དང་། བཟོད་པ་དང་། བསམ་གཏན་ལ་སེམས་རྩེ་གཅིག་ཏུ་གཡེང་བ་མེད་པར་སྒོམ་པ་དང་། རྟག་ཏུ་བསོད་ནམས་ཀྱི་ལས་བསྒྲུབས་པས་མགོའམ་ཐོད་ལ་མེ་འབར་བ་བཞིན་དུ་སྐད་ཅིག་ཙམ་དུ་ཡང་མི་གཏོང་བའི་ཕྱིར་ཡོན་ཏན་གྱི་འཁར་བ་ཞེས་བྱའོ། །འཁར་གསིལ་འདི་ཡོངས་སུ་འདི་འཛིན་པ་གང་ཡིན་པ་དེ་དག་ནི་གང་གི་སྤྱོད་པ་རྣམ་པ་བཅུ་དྲུག་པོ་འདི་ལྟ་སྟེ། བདེན་པ་བཞི་པོ་སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་དང་། ཚད་མེད་པ་བཞི་པོ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། བསམ་གཏན་བཞི་པོ་བསམ་གཏན་དང་པོ་དང་། བསམ་གཏན་གཉིས་པ་དང་། བསམ་གཏན་གསུམ་པ་དང་། བསམ་གཏན་བཞི་པ་དང་། གཟུགས་མེད་པའི་སྙོམས་པར་འཇུག་པ་བཞི་པོ་ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་ཕུན་སུམ་ཚོགས་པ་
དང་། གཞན་ཡང་སྤྱོད་པ་སུམ་ཅུ་རྩ་བདུན་པོ་འདི་ལྟ་སྟེ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཕུན་སུམ་ཚོགས་ཤིང་ཆོས་དེ་དག་གསལ་བར་རྣམ་པར་བྱེད་པ་དང་། བདག་ཉིད་ཀྱི་ལུས་ཀྱིས་མངོན་སུམ་དུ་བྱས་པས་སྒྲའི་རྗེས་སུ་མི་འབྲང་བ་དང་། ཆོས་དེ་དག་ལ་བདག་ཉིད་རྣམ་པར་རྩེན་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་པར་ཐར་པའི་སྒོར་འཇུག་པ་ལ་རང་དབང་དུ་གྱུར་ཅིང་དགའ་བ་མེད་པ་གང་ཡིན་པ་དེ་ནི་འཕགས་པ་ཞེས་བྱ་སྟེ། ནང་ཡོན་ཏན་དེ་ལྟ་བུ་དང་ལྡན་པས་ཕྱི་རོལ་འཁར་གསིལ་འཛིན་པ་ཡིན་ཏེ། འདིས་ནི་གང་ཟག་གདོན་མི་ཟ་བར་འཕགས་པའི་ཡོན་ཏན་ཚུལ་ཁྲིམས་དང་། བཟོད་པ་དང་། བསམ་གཏན་དང་། ཤེས་རབ་དང་། རིག་པ་གསུམ་དང་། མངོན་པར་ཤེས་པ་དྲུག་དང་། རྣམ་པར་ཐར་པ་བརྒྱད་པོ་རྣམས་ཕུན་སུམ་ཚོགས་པ་ཡིན་ཏེ། གང་ཟག་དེ་འཕགས་པ་ཡིན་པར་མཚོན་པ་ཉིད་ཀྱིས་གུས་པ་སྐྱེད་པར་འགྱུར་བའི་ཕྱིར་འཕགས་པའི་གང་ཟག་གི་རྟགས་ཞེས་བྱའོ། །སྐྱེས་བུ་དམ་པར་མཚོན་པ་ཞེས་བྱ་བ་ནི་ནང་ན་ཡེ་ཤེས་ཀྱི་ངོ་བོ་ཉིད་དང་ལྡན་པས་དམ་པ་ཞེས་བྱ་སྟེ། གང་ཟག་དེ་འཕགས་པ་ཡིན་པར་མཚོན་པ་ཉིད་ཀྱིས་གུས་པ་སྐྱེད་པར་འགྱུར་བའི་ཕྱིར་འཕགས་པའི་ནང་ན་ཡེ་ཤེས་ཀྱི་ངོ་བོ་ཉིད་དང་ལྡན་པས་ཡོན་ཏན་གྱི་གཞི་སྒྲུབ་པ་དང་། ཆོས་གོང་ནས་གོང་དུ་རྩོལ་ཞིང་ལེགས་པར་སྒྲུབ་པར་བྱེད་དོ་ཞེས་སྟོན་པར་བྱེད་པའི་ཕྱིར་སྐྱེས་བུ་དམ་པར་མཚོན་པ་ཞེས་བྱའོ། །གང་ཟག་གསལ་བ་དེ་རིང་པོར་མི་ཐོགས་པར་ཤེས་རབ་ཀྱིས་མངོན་པར་གྲུབ་ནས་འདུས་མ་བྱས་ཀྱི་གནས་རབ་ཏུ་ཞི་ཞིང་དབེན་པ་མྱ་ངན་ལས་འདས་པའི་བདེ་བ་དོན་དམ་པའི་གནས་ཀྱི་ལམ་དུ་འཇུག་པར་འགྱུར་རོ་ཞེས་ཤེས་པར་བྱེད་པའི་ཕྱིར་ལམ་གྱི་ཆོས་ལ་ཕྱོགས་པའི་རྒྱལ་མཚན་ཞེས་བྱའོ། །རྗེས་སུ་དྲན་པའི་རྣམ་པར་གཞག་པའི་དོན་གྱི་སྤྱོད་པ་ཞེས་བྱ་བ་ནི་འཁར་བ་འདི་རིམ་པ་གསུམ་དང་ལྡན་པར་དུམ་བུ་གསུམ་གྱི་རིམ་པ་མཐོང་བ་ཉིད་ཀྱིས་ངན་སོང་གསུམ་གྱི་སྡུག་བསྔལ་
རྗེས་སུ་དྲན་ནས་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་སྒོམ་པར་བྱེད་པ་དང་། གནོད་པ་གསུམ་པོ་རྒ་བ་དང་། ན་བ་དང་། འཆི་བ་རྗེས་སུ་དྲན་ན་དུག་གསུམ་པོ་འདོད་ཆགས་དང་། ཞེ་སྡང་དང་། གཏི་མུག་ཡོངས་སུ་སེལ་བར་བྱེད་པ་དང་། ཁམས་གསུམ་པོ་དག་མི་རྟགས་པ་ཡིན་པ་ཉིད་དུ་རྗེས་སུ་དྲན་ནས་དཀོན་མཆོག་གསུམ་ལ་མངོན་པར་ཡིད་ཆེས་ཤིང་གུས་པ་དང་། སྲིད་པ་གསུམ་བསལ་བ་དང་། དག་པ་གཙང་བ་དང་། ལས་རྣམ་གསུམ་རྣམ་པར་སྦྱང་བ་དང་། རིག་པ་གསུམ་དང་ལྡན་པར་འདོད་པ་དང་། རྣམ་པར་ཐར་པ་གསུམ་ལ་འཇུག་པ་དང་། རྗེས་སུ་དྲན་པ་དྲུག་གི་གནས་གསུམ་ཐོབ་པ་དང་། ཡེ་ཤེས་ཐག་རིང་དུ་བྱེད་པ་གསུམ་རྟོགས་པར་འགྱུར་བའི་ཕྱིར་དུམ་བུ་གསུམ་རིམ་པར་རྣམ་པར་གཞག་པ་ཡིན་ནོ། །གཞན་ཡང་བཞི་སྒྲིལ་དུ་བྱས་པ་ནི་སྐྱེ་བ་རྣམ་པ་བཞི་ཡོངས་སུ་བཅད་པ་དང་། བདེན་པ་བཞི་རྗེས་སུ་དྲན་པར་བྱ་བ་དང་། ཚད་མེད་པ་བཞི་སྒོམ་པ་དང་། བསམ་གཏན་བཞི་ལ་འཇུག་པར་བྱ་བ་དང་། སྙོམས་པར་འཇུག་པ་བཞི་ཡོངས་སུ་དག་པར་བྱ་བ་དང་། དྲན་པ་ཉེ་བར་གཞག་པ་བཞི་རབ་ཏུ་བསྟན་པ་དང་། ཡང་དག་པའི་སྤོང་བ་བཞི་བསྟན་པར་བྱ་བ་དང་། རྫུ་འཕྲུལ་གྱི་རྐང་པ་བཞི་ཐོབ་པར་བྱ་བའི་ཕྱིར་བཞི་སྒྲིལ་དུ་རྣམ་པར་གཞག་པ་ཡིན་ནོ། །དབུས་ཀྱི་ཤིང་གཏོགས་པར་རྣམ་པ་ལྔར་གཞག་པ་ནི་ལྟ་བ་ལྔ་པོ་དག་སྤང་བ་དང་། འགྲོ་བ་ལྔ་པོ་དག་གི་འཁོར་བའི་སྡུག་བསྔལ་གྱི་འཁྲུག་པ་ཡོངས་སུ་སྤོང་བ་དང་། དབང་པོ་ལྔ་སྒོམ་པ་དང་། སྟོབས་ལྔ་དང་ལྡན་པར་བྱ་བ་དང་། སྒྲིབ་པ་ལྔ་པོ་དག་བསལ་བ་དང་། ཕུང་པོ་ལྔ་པོ་དག་རྣམ་པར་བཤིག་པ་དང་། ཆ་ལྔ་དང་ལྡན་པའི་ཆོས་ཀྱི་སྐུ་ཐོབ་པར་བྱ་བའི་ཕྱིར་རྣམ་པ་ལྔར་གཞག་པ་ཡིན་ནོ། །སིལ་སྒྲིལ་བཅུ་གཉིས་སུ་བསྟན་པ་ནི་རྟེན་ཅིང་འདྲེལ་པར་འབྱུང་བ་ཡན་ལག་བཅུ་གཉིས་སུ་དྲན་པར་བྱ་ཞིང་ཐོགས་པ་མེད་པར་བྱ་བ་དང་། སྒོ་བཅུ་གཉིས་པའི་བསམ་གཏན་བསྒོམ་པར་བྱ་བ་དང་། སེམས་ལ་སྐྱོན་མེད་པར་རྗེས་སུ་དྲན་པར་བྱའོ། །རིམ་པ་གསུམ་དང་
བཞི་སྒྲིལ་དུ་བསྡུས་ཏེ། གྲངས་བདུན་དུ་བསྟན་པ་ནི་དེ་བཞིན་གཤེགས་པའི་བྱང་ཆུབ་ཀྱི་ཡན་ལག་བདུན་གྱི་ཆོས་རྗེས་སུ་དྲན་པར་བྱ་བ་དང་། འཕགས་པའི་ནོར་བདུན་མངོན་པར་བསྒྲུབ་པར་བྱའོ། །མར་རྩེ་གཏོགས་པར་བརྒྱད་དུ་བསྟན་པ་ནི་ལམ་ཡན་ལག་བརྒྱད་པ་རྗེས་སུ་བསྟན་པར་བྱ་བ་དང་། རྣམ་པར་ཐར་པ་བརྒྱད་ཐོབ་པར་བྱ་བ་དང་། མི་ཁོམ་པ་བརྒྱད་ཡོངས་སུ་བསལ་བའི་ཕྱིར་རྣམ་པ་བརྒྱད་བསྟན་པ་ཡིན་ནོ། །འཁར་གསིལ་གྱི་དོན་མདོར་བསྟན་པ་དེ་ལྟ་བུ་ཡིན་པས་ཁྱེད་ཀྱིས་ལེགས་པར་ཡོངས་སུ་གཟུང་བར་བྱའོ། །བཅོམ་ལྡན་འདས་ལ་འོད་སྲུང་གིས་གསོལ་པ། བཅོམ་ལྡན་འདས་འཕགས་པའི་གསུང་རབ་ལ་ཇི་སྐད་བསྟན་པ་བཞིན་དུ་འཚལ་ལོ་ཞེས་གསོལ་ཏོ། །དེ་ནས་འོད་སྲུང་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དུས་གསུམ་གྱི་དེ་བཞིན་གཤེགས་པ་རྣམས་ཀྱི་ཆོས་ཀུན་མཚུངས་པ་ཞིག་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཁ་ཅིག་འཁར་བ་མཚུངས་ཀྱང་སྤྱོད་པ་མི་མཚུངས་པས་ཁ་ཅིག་གི་ཚེ་ན་ནི་བཞི་སྒྲིལ་དུ་བྱས་པའོ། །ཁ་ཅིག་གི་ཚེ་ན་ནི་གཉིས་སྒྲིལ་དུ་བྱས་པ་སྟེ། སིལ་སྒྲིལ་གྱི་གྲངས་ལ་ནི་བྱེ་བྲག་ཏུ་གྱུར་པ་མེད་དོ། །ང་ནི་དེང་འདིར་བཞི་སྒྲིལ་སིལ་སྒྲིལ་བཅུ་གཉིས་སུ་བྱས་པའི་བསྟན་པ་དེ་སྤྱོད་དོ། །གཉིས་སྒྲིལ་དུ་བྱས་པ་ནི་དེ་བཞིན་གཤེགས་པ་འོད་སྲུང་གིས་རྣམ་པར་གཞག་པ་ཡིན་ཏེ། སེམས་ཅན་རྣམས་བདེན་པ་གཉིས་པོ་ཀུན་རྫོབ་ཀྱི་བདེན་པ་དང་། དོན་དམ་པའི་བདེན་པ་རྗེས་སུ་དྲན་པར་བྱ་བའི་ཆེད་དུ་དོན་འདི་རྣམ་པར་གཞག་པ་ཡིན་ནོ། །དེའི་ཚེ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་འོད་སྲུང་ཆེན་པོ་འཁོར་སྟོང་ཉིས་བརྒྱ་དང་། འཁོར་འདུས་པ་ཆེན་པོ་རྣམས་ཤིན་ཏུ་དགའ་ཞིང་གུས་པས་མངོན་པར་བསྟོད་དོ། །འཕགས་པ་འཁར་གསིལ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།