དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ཞེས་བྱ་བ།
རྒྱ་གར་སྐད་དུ། ཤྲཱི་ཌཱ་ཀཱརྞྞ་བ་མ་ཧཱ་ཡོ་གི་ནཱི་ཏནྟྲ་རཱ་ཛ་ནཱ་མ། བོད་སྐད་དུ། དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ཞེས་བྱ་བ། ༀ་སངས་རྒྱས་དཔའ་བོ་ལ་ཕྱག་འཚལ་ལོ། །བཅོམ་ལྡན་འདས་གསུང་གི་མངའ་བདག་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དཔའ་བོ་ཆེན་པོའི་དབང་ཕྱུག །དེ་བཞིན་གཤེགས་པ་ཐམས་ཅད་ཀྱི་དཔའ་བོའི་སྐུ་དང་གསུང་དང་ཐུགས་ཀྱི་རྣལ་འབྱོར་མ་རྣམས་ཀྱི། བྷ་ག་རྣམས་སུ་རྩེན་པ་དང་ལྡན་པར་གྱུར་ཏོ། །དེར་དཔའ་བོ་ཆེན་པོའི་དབང་ཕྱུག་གིས་བཀའ་སྩལ་པ། བདེ་བ་ཆེན་པོའི་ཏིང་འཛིན་གྱིས། །དབང་པོའི་དྲ་བ་བདག་གིས་མཐོང་། །འཁོར་བ་དང་ནི་ངེས་འབྱུང་གིས། །མྱ་ངན་འདས་པ་སོ་སོར་བསྐྱེད། །དེ་ཡི་དབུས་སུ་སྐུ་ཆེན་པོ། །བདག་གི་དབང་པོ་ཡིས་རིག་གོ། །དཔའ་བོ་རང་གི་རང་བཞིན་ནི། །ཡེ་ཤེས་རྒྱ་མཚོར་མཉན་པར་བགྱི། །རྣལ་འབྱོར་མ་འཁོར་ལོ་དབུས་སུ། །ཕག་མོ་བདག་ནི་འདྲི་བའོ། །དབང་པོའི་དྲ་བ་ཅི་རུ་བཤད། །བདག་གིས་གང་དུ་བཤད་པར་བྱ། །མཐོང་བ་དང་ནི་ཆེན་པོའི་སྒྲ། །བདེ་བ་ཟ་བ་དེ་བཞིན་ཅི། །ཏིང་འཛིན་མིང་ཅི་དེ་ལ་ནི། །བྱུང་བ་ཉམས་པར་བྱས་པ་དང་། །འཁོར་བ་ཡང་དག་བྱུང་བ་ནི། །གང་དུ་ཐིམ་པར་འགྱུར་བ་ཡིན། །བཅོམ་ལྡན་མྱ་ངན་འདས་པའི་མིང་། །ཇི་ལྟར་སླར་ཡང་ཡོངས་སུ་བསྐྱེད། །སྐུ་བརྗོད་པ་ནི་གསུང་བར་མཛོད། །ཉིད་ཀྱི་དབང་པོས་རིག་པ་ནི། །བདེ་བ་ཆེན་པོར་བཞུགས་གྱུར་པའི། །བདག་གི་བདག་པོས་གསུང་བར་མཛོད། །དཔའ་བོའི་དབང་ཕྱུག་ཆེན་པོས་བཀའ་སྩལ་པ། ཕག་མོ་ལྷ་རྫས་པདྨ་ཅན། །ལྷ་མོ་རྩེ་གཅིག་ཡིད་ཀྱིས་ཉོན། །སྔོན་དུ་སྤྱོད་པའི་མཚན་ཉིད་ནི། །མདོར་བསྡུས་པ་ཡིས་བཤད་པར་བྱ། །དབང་པོ་འཇིག་རྟེན་མཆོག་ཆོས་བཤད། །དྲ་བ་དེ་ལ་ཡིད་རོལ་པའོ། །བདག་གི་ང་རྒྱལ་ཙམ་གྱིས་ནི། །དམ་ཚིག་མཆོག་གང་བྱུང་བའོ། །དེ་ཕྱིར་ཡེ་ཤེས་ཆེ་མཐོང་སྟེ། །ཐབས་ཆེན་བདེ་ལ་བཞུགས་པས་སོ། །གང་དུ་དབང་པོ་རྣམས་ཀྱིས་ཟ། །དེ་ཡིས་ང་ཡི་མིང་སྔོན་སོང་། །དེ་ཚེ་ཏིང་ངེ་འཛིན་ཙམ་དུ། །ཐུབ་པ་སྐྱེས་མཆོག་རྣམས་ཀྱིས་གསུངས། །ཡང་དག་ལྷག་རྟོགས་ཡེ་ཤེས་ནི། །
སངས་རྒྱས་རྣམས་ཀྱི་ལྷ་དབང་པོས། །དེ་རྣམས་སུ་བྱུང་བའི་སྦྱོར་བས། །མཁའ་འགྲོ་མཆོག་མང་གིས་བྱས་སོ། །བདེ་དང་མི་བདེ་གཉིས་ཉམས་ལས། །སླར་ཡང་འདིར་ནི་བྱུང་བ་སྟེ། །སྒྲ་ཡི་གཟུགས་ལས་བྱུང་ཞིང་ཐོན། །དམ་ཚིག་སྤྱོད་པའི་སྤྱོད་ཡུལ་ལོ། །སེམས་གསུམ་རྣམས་ཀྱི་དབྱེ་བ་ཡིས། །གྲུབ་མོ་ཁྱོད་ཀྱིས་ཤེས་པར་གྱིས། །འདི་ཡིས་རང་བྱུང་བཅོམ་ལྡན་འདས། །དཔའ་བོ་མཁའ་འགྲོ་དྲ་བའི་སྡོམ། །བྱུང་དང་འབྱུང་བའི་དུས་སུ་ནི། །ཡོངས་སུ་གསལ་བ་འོད་གསལ་བའོ། །དེ་ཕྱིར་འཇིག་རྟེན་འཁོར་བར་བྱེད། །དེ་ནི་འཁོར་བར་ཡོངས་སུ་བརྗོད། །འདིར་ནི་སྒྱུ་མ་སྐྱེས་དེ་བཞིན། །དེ་ནི་ཐིམ་པའི་དངོས་པོའང་མེད། །མྱང་འདས་གཞན་པའི་རྫས་ཡོད་ཡིན། །འཁོར་བ་ཡི་ནི་ཕྱི་རོལ་སོན། །སྲིད་པའི་རྩེ་མོ་གང་འཛིན་པ། །དེ་ཕྱིར་མྱ་ངན་འདས་པར་བརྗོད། །གཟུགས་ནི་སྒྱུ་མ་ལྟ་བུའི་སྐུ། །དེ་ཡི་གནས་ལ་རྣམ་པར་འཕྲོ། །བདག་ཆེན་ཡེ་ཤེས་གཟུགས་ཀྱི་ནི། །དབང་པོས་གསལ་བར་རིག་པ་སྟེ། །ལྷ་དང་སྦྱིན་བྱེད་ལ་སོགས་པས། །མི་མཐོང་མཁའ་ལ་འགྲོ་བའི་གཟུགས། །ལྷ་ཁྱོད་ཀྱིས་ནི་གསུང་རྣམས་ཀྱི། །ཡེ་ཤེས་ཆེན་པོའི་རོས་བདག་ཚིམ། །དེ་རིང་བདག་ལ་ཐེ་ཚོམ་མཆིས། །དཔའ་བོ་རྣམས་ཀྱི་རང་བཞིན་ཅི། །བཅོམ་ལྡན་འདས་ཀྱིས་བཀའ་སྩལ་པ། །དཔའ་རྣམས་ཐམས་ཅད་རང་བཞིན་ཏེ། །རང་བཞིན་དེ་རྣམས་ཆོས་ཅན་ནོ། །འདིར་ནི་འདོད་པའི་དུས་བརྗོད་དེ། །འདོད་པ་སེམས་ལས་ཡོངས་སུ་བྱུང་། །འདོད་དང་སེམས་གཉིས་དག་ལས་ནི། །བྱུང་བ་གཟུགས་ནི་གཙོ་བོའོ། །འཇིག་རྟེན་གསུམ་དུ་རྙེད་དཀའ་བ། །ཐོག་མ་དབུས་མཐར་ཡང་དག་གནས། །གང་ཞིག་མཐའ་མ་རྣམས་ཀྱི་སེམས། །སེམས་དེ་རོ་མཉམ་གྱུར་པའོ། །དཀྱིལ་འཁོར་ཆེན་པོའི་སྦྱོར་བ་ལས། །མཁའ་འགྲོ་དེ་ནི་དེ་ཕྱིར་བྱུང་། །རྡོ་རྗེ་མཁའ་འགྲོ་བདག་ཉིད་ཆེ། །ས་གསུམ་པོ་ནི་བསྒྲུབ་པར་བྱ། །གང་ཚེ་སྔོན་དུ་ཡང་དག་བྱུང་། །འགྲོ་བའི་གཙོ་བོ་ཚངས་པའོ། །གནས་དང་དེ་བཞིན་ཇི་ལྟར་སྟོང་། །མགོན་པོ་སེམས་ཅན་རྣམ་གྲོལ་བྱེད། །དེ་ཚེ་འཇིག་རྟེན་ཁམས་གཞན་གྱིས། །ཆུང་ངུ་འདིར་ནི་བསྐུལ་བའོ། །གསོན་གསོན་བྱང་ཆུབ་སྤྲོས་སོན་པའི། །སེམས་ཅན་བསྒྲལ་བའི་
སེམས་མེད་པ། །སྒྱུ་མའི་རང་བཞིན་ཁྱོད་བཞུགས་ནས། །ཁམས་གསུམ་མ་ལུས་བསྒྲལ་བར་མཛོད། །ཡོན་ཏན་དག་འདི་ཐོས་ནས་ནི། །སེམས་ཅན་གྲོལ་བྱེད་འདི་ལྟར་བསྒོམ། །དེ་བཞིན་གཤེགས་པ་ཀུན་རྣམ་པ། །འགྲོ་བའི་གཙོ་བོ་ཧེ་རུ་ཀ། །དཔལ་ནི་སྔོན་དུ་མངོན་བརྗོད་པས། །རྟེན་ལ་སོགས་པ་བསྐྱེད་པ་སྟེ། །གླུ་དང་རོལ་མོ་དྲི་ཟ་དང་། །གཞན་རྣམས་གང་རྣམས་དེ་རྣམས་དང་། །འགྲོ་བའི་སྡེ་དང་ལས་དང་ནི། །དེ་ཡི་རྒྱུན་ལས་ཡོངས་སུ་བྱུང་། །དེ་ལ་སོགས་པ་མཐའ་མེད་དང་། །སྟོང་ཕྲག་སུམ་ཅུ་རྩ་གསུམ་མོ། །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །དེ་ཉིད་རྣམ་པ་བཅུ་དྲུག་དང་། །སྐྱེ་བ་དང་ནི་ཐིམ་པའི་རྒྱུ། །རྣལ་འབྱོར་རྣལ་འབྱོར་མའི་དེ་ཉིད། །ཟླ་བའི་དབྱེ་བས་འགྲོ་བའོ། །དགའ་བ་རྟག་ཏུ་ཤེས་བྱས་ནས། །ཚེས་གཅིག་ཟླ་བ་འཕེལ་བས་སོ། །ནག་པོ་སོགས་དང་དཀར་མཐར་ཡང་། །ཐུང་ངུ་དེ་བཞིན་འདིར་ཤེས་བྱ། །འདི་སྐད་ཐོས་པ་བདག་གི་ངག །གསང་བའི་འདོད་པ་ཐམས་ཅད་སྟེར། །དེ་བཞིན་འདིར་བདག་ཐེ་ཚོམ་མཆིས། །གསང་བ་ལ་སོགས་གསུང་ནི་ཅི། །བདག་གི་བདག་པོས་གསུང་བར་མཛོད། །སེམས་ཅན་རྣམས་ཀྱི་དོན་བྱེད་པ། །ལྷ་མོ་ཆེན་མོ་བདག་དགའོ། །སེམས་ཅན་ཀུན་གྱི་དགོས་པའི་རྒྱུར། །མདོར་བསྡུས་བདག་གིས་བཤད་བྱ་སྟེ། །རྩེ་གཅིག་པ་ཡི་སེམས་ཀྱིས་ཉོན། །གསང་བ་ཁམས་ཐམས་ཅད་ཀྱི་མཐའ། །དབང་པོའི་གནས་ནི་མཆོག་ཡིན་ལ། །རྣམ་ཤེས་ཕུན་ཚོགས་དེ་རྣམས་སུ། །དགྱེས་པ་ནམ་མཁའ་ལས་བྱུང་བའོ། །ཐམས་ཅད་བདག་ཉིད་ཁམས་གསུམ་གྱི། །ཁྱབ་བྱའི་གཟུགས་སུ་ཡང་དག་སོན། །རྟག་བཞུགས་གཉིས་སུ་མེད་པའི་ཆོས། །སྒྱུ་མ་རྨི་ལམ་ལྟ་བུ་མཆོག །ཡང་ན་བདག་མེད་བཅུ་དྲུག་དང་། །ཁྱད་པར་དུ་ཡང་སྙིང་རྗེའོ། །དེ་ཡི་རྣམ་པ་ཡེ་ཤེས་ཆེ། །དེ་ཁོ་ན་ཉིད་ཀུན་དུ་སོན། །འདིར་ནི་སྐྱེ་བར་གོ་བྱ་བ། །རྣལ་འབྱོར་རྗེས་སུ་རྣལ་འབྱོར་རོ། །ཐིམ་པ་སྒྲུབ་པ་གཉིས་དང་ནི། །དེ་བཞིན་བསྙེན་པ་གཉིས་ཀྱང་ངོ་། །རྣལ་འབྱོར་ཐིག་ལེར་བཤད་པ་སྟེ། །ཕྲ་མོའི་རྣལ་འབྱོར་རྣལ་འབྱོར་མའོ། །དུས་ཀྱིས་ཕྱེད་དང་ཟླ་བ་ཡི། །རྫོགས་ལྡན་
གསུམ་གཉིས་རྩོད་དུས་སོན། །འདི་ཡི་རྡོ་རྗེའི་ཞལ་བཞི་པོ། །དགའ་བ་བརྒྱད་གཉིས་སུ་འགྱུར་ཏེ། །ཆ་ཤས་བཅུ་དྲུག་རྣམ་ལྡན་པའི། །ཕྱོགས་ཀྱི་དབྱེ་བས་འགྲོ་བའོ། །ཐུང་ངུ་ཉི་མའི་རྒྱུ་བ་ཡིས། །དེ་བཞིན་དུ་ནི་ཆ་ཤས་ཟ། །བུད་མེད་ཀུན་གྱི་སྒྱུ་མའི་རྒྱ། །གཉིས་མེད་ཡེ་ཤེས་བླ་ན་མེད། །བྱང་ཆུབ་སེམས་འོད་ཆེན་པོར་ནི། །རྣལ་འབྱོར་ཆེན་པོ་ངེས་པར་འགྲོ། །སྟོང་ཉིད་སྙིང་རྗེ་དབྱེར་མེད་དེ། །དངོས་རྣམས་ནམ་མཁའི་མེ་ཏོག་བཞིན། །སད་པ་ན་ཡང་ཉམས་པ་སྟེ། །དེ་གནས་ཀུན་དུ་གནས་མིན་པའོ། །རྨི་ལམ་ཡུལ་མེད་ལས་བྱུང་བ། །དབང་པོ་ཀུན་ལས་བྱུང་བ་མེད། །གཉིད་ལོག་པ་ཡི་སྟོབས་ཀྱིས་ནི། །ས་གསུམ་པོ་ནི་བཟའ་བར་བྱ། །གཉིད་མཐུག་སྐྱེས་པའི་དུས་དེ་ལྟར། །སད་མེད་གཉིད་མེད་རྨི་ལམ་མེད། །འདས་པའི་བདེ་བའི་དུས་རྣམས་སུ། །སངས་རྒྱས་ཉིད་ཀྱང་ལྷག་པར་གནས། །མཁའ་འགྲོ་ཀུན་དངོས་སེམས་དཔའ་ནི། །རྡོ་རྗེ་མཁའ་འགྲོ་མཆོག་ཏུ་བདེ། །ལས་ཀྱི་ཡུལ་ནི་བསྙེན་བྱས་ན། །སུམ་ཅུ་རྩ་གསུམ་དུ་ལྟུང་ངོ་། །མ་རིག་པས་བསླང་ངེས་པར་ནི། །འགྲོ་བ་དམྱལ་སོགས་འཇིགས་པ་ཆེ། །དེ་ཕྱིར་སངས་རྒྱས་ཆོས་དགེ་འདུན། །རྫུ་འཕྲུལ་ཆེ་འདིར་རྗེས་ཆགས་བྱ། །ཇི་ལྟར་བཅོམ་ལྡན་འདས་བདག་པོ། །མཁའ་འགྲོ་མ་ཀུན་གྱི་ནི་མིང་། །དེ་ནི་བདག་ལ་སེམས་པས་གསུངས། །མཁའ་འགྲོ་ཀུན་ལ་བདག་མཆོག་ཏུ། །གསང་བ་དེར་ནི་བཏུད་བྱས་ནས། །ཕག་མོ་ལྷ་རྫས་རྣལ་འབྱོར་མ། །གཉིས་མེད་ཚིག་གིས་ཇི་ལྟར་ཞེས། །དེ་བཞིན་ཡང་ནས་ཡང་དུ་དྲིས། །མཁའ་འགྲོ་མའི་བདག་པོས་བཀའ་སྩལ་པ། ཕྲ་མོའི་རྣམ་པ་ར་གསུམ་སྟེ། །རྣམ་པར་ཤེས་པ་གསུམ་གྱི་རྒྱུ། །དེ་ཕྱིར་ཕྲ་མོར་རིག་བྱ་སྟེ། །རྩ་འབྱུང་བ་ནི་བདག་ཉིད་ཆེ། །སུམ་ཅུ་རྩ་བདུན་རྣལ་འབྱོར་མ། །རེ་རེ་ལ་ནི་དེ་ཡོངས་ལྡན། །མཁའ་འགྲོ་མ་ཀུན་དེར་བཤད་དེ། །གཞན་ཡང་དེ་ལྟར་ངོ་མཚར་ཆེ། །མིང་མདོར་བསྟན་པའི་རྒྱ་མཚོ་འདིར། །དེ་ཀུན་ཇི་ལྟ་བཞིན་བཤད་བྱ། །ཟླ་བ་འོ་མ་སྣུམ་པ་མོ། །འཇམ་མ་འདོད་མ་ཀུན་སྦྱིན་མ། །མ་དང་སྲིང་མོ་བུ་མོ་དང་། །སྲིང་མོའི་བུ་མོ་ནེ་ནེ་མོ། །གཉེན་མོ་ཕ་ཡི་མ་དང་ནི། །ཞང་
པོ་ཡི་ཡང་ཆུང་མ་དང་། །པད་ཅན་དུང་ཅན་སྣ་ཚོགས་མ། །གླང་པོ་མ་དང་མྱོས་བརླབས་མ། །གཟུགས་མ་སྒྲ་མ་དྲི་མ་དང་། །རོ་མ་རེག་མ་ཡིད་མ་དང་། །ཆོས་དབྱིངས་མ་དང་ཚོགས་ཅན་མ། །གཉིད་མ་ལེ་ལོ་མ་གཞན་གནོན། །རློམ་པ་མོ་དང་སྒེག་མོ་དང་། །བཟང་ཞལ་མ་དང་དྲག་མོ་མ། །འཐུང་མ་ཟ་མ་འཇིགས་པ་མོ། །ཧ་ཧ་སྒྲོགས་མ་དུར་ཁྲོད་མ། །བཅོམ་ལྡན་དགྱེས་མར་རྟག་ཏུ་བཤད། །སུམ་ཅུ་རྩ་བདུན་རྣལ་འབྱོར་མ། །ལས་ཀྱི་ཆོ་ག་བླངས་པ་ཡིས། །གཞན་གྱི་མིང་ཡང་ཤེས་པར་བྱ། །གང་ཞིག་གང་གིར་མངོན་བརྗོད་པའི། །རྩ་དེ་འདིར་ནི་བརྗོད་པའོ། །དེ་རྣམས་སེམས་དཔའ་བདེ་རང་བཞིན། །མཐར་གྱུར་མཆོག་ཏུ་ཞི་བའོ། །རྡོ་རྗེ་མཁའ་འགྲོའི་དངོས་པོ་ཡང་། །མཆོག་ཏུ་ཟག་མེད་རྣལ་འབྱོར་ལྡན། །མདོག་དང་ཕྱག་སོགས་རྣམ་པ་རུ། །སྲིད་པའི་འཁོར་ལོར་ཡང་དག་བྱུང་། །གནས་དང་ཉེ་བའི་གནས་སོགས་འདིར། །པུལླི་ར་སོགས་དབུས་སུའོ། །གང་ཞིག་གང་གི་ལྷའི་བདག་པོ། །དེ་ནི་དེ་དང་དེས་རྒྱས་གདབ། །ཉིད་དང་བདག་ཏུ་རྩེན་གྱུར་པའི། །བདེ་བ་ཀུན་དང་ཡང་དག་ལྡན། །འདི་ཡིས་རང་བྱུང་བཅོམ་ལྡན་འདས། །གཅིག་པུ་དེ་བཞིན་དང་པོའི་ལྷ། །མཁའ་འགྲོ་མ་ཀུན་བདེ་སྟེར་བའི། །བཅོམ་ལྡན་རྡོ་རྗེས་འདི་གསུངས་སོ། །ནམ་མཁའ་ཐོག་མ་ཐ་མ་མེད། །གང་འདྲར་མཆོག་ཏུ་འདུ་ཤེས་པ། །དེ་འདྲར་བདག་ནི་རིག་པ་སྟེ། །སྣང་མེད་པར་ཡང་ཡོངས་སུ་གསལ། །དེར་ནི་འབྱུང་བའང་ཡོད་མིན་ཏེ། །འཇིག་རྟེན་པ་ཡི་ཐ་སྙད་མཆོག །ཇི་ལྟར་མཁའ་ལས་མེ་བྱུང་བ། །བླ་མེད་མེ་འདིར་དེ་བཞིན་ནོ། །རོ་བྲོ་བ་ནི་གཅིག་དངོས་ལ། །དེ་ཡི་ནང་ན་དངོས་མང་པོ། །གཅིག་དང་དུ་མའི་རང་བཞིན་འདིས། །ཐམས་ཅད་རོ་སྟེ་རོའི་ཁྱབ་བདག །ཕོ་ཉ་རྣམས་ཀྱི་བདག་པོ་ཡིས། །ས་གསུམ་པོ་ནི་མཆོག་ཏུ་ཟ། །ཐབས་དང་ཤེས་རབ་སྙིང་རྗེ་ཆེ། །ལྷ་ཡི་བདག་པོ་གཞན་མེད་དོ། །འདོད་ཆགས་མ་ཡིན་ཆགས་བྲལ་མིན། །དབུ་མར་ཡང་ནི་མི་དམིགས་སོ། །དེ་ལྟར་བརྟག་ཤེས་རྣལ་འབྱོར་པས། །འདོད་བྱ་ཀུན་ལ་ལོངས་སྤྱད་བྱ། །རྟག་ཏུ་ནང་
དུ་གྱུར་བྱས་ནས། །ཁ་དོག་རྣམས་ནི་ཞལ་ལས་བྱུང་། །རྟག་ཏུ་ལུས་ཀྱིས་སྦྱིན་པ་སྟེ། །སེམས་ལས་བྱུང་བ་སྤང་བར་བྱ། །དེ་ལྟར་འདོད་ཆགས་སྒྱུ་མཐའ་ལ། །རོལ་པ་མཆོག་གི་གོ་འཕང་ངོ་། །འདོད་ཆགས་བྲལ་བ་དགའ་བ་གསུམ། །སྤངས་པ་དབུ་མ་ཟག་པ་མེད། །གཟུང་བར་བྱ་བ་མིན་པ་སྟེ། །དངོས་པོའི་རང་བཞིན་འདོད་ཆགས་མིན། །བྲལ་བའི་དགའ་བ་ཉམས་པ་སྟེ། །དེ་ལའང་དགའ་བར་མི་བྱའོ། །དེ་གཉིས་དབུས་ན་གནས་པ་ཡིས། །ཆོས་དེ་ལ་ཡང་དགའ་དམིགས་མེད། །དབྱེ་བ་མེད་པ་ཡི་ནི་ཆོས། །རྡོ་རྗེ་ལ་ནི་དགའ་བར་གྱིས། །ལྷ་ཡི་རྣམ་པའི་རྣལ་འབྱོར་བ་དག །སྐད་ཅིག་མངོན་སུམ་བྱེད་པའོ། །ལུགས་མ་ལ་སོགས་རྣལ་འབྱོར་གྱིས། །རྣམ་པར་བྱས་པའི་དབྱིབས་སུ་འགྱུར། །སྟོང་ཉིད་རང་བཞིན་གཟུགས་རྣལ་འབྱོར། །རང་བྱིན་རླབས་པའི་མཚན་ཉིད་དོ། །བདག་བྱིན་རླབས་དང་བྲལ་རྣལ་འབྱོར། །སྦུན་སྐོགས་དུམ་བུ་བཞིན་ཤེས་བྱ། །འདི་འདྲའི་མཚན་ཉིད་མཆོག་གྱུར་པ། །སྐྱེ་བོ་ཕྱུགས་རྣམས་ཀྱིས་མི་ཤེས། །དེ་ཕྱིར་སྒྱུ་འཕྲུལ་འདི་བསྒོམས་ན། །བྱང་ཆུབ་བླ་ན་མེད་པ་འཐོབ། །སྐྱེ་བ་འདི་ལ་གླེན་པ་ཉིད། །ཤེས་རབ་སྙན་དངགས་སྐྱེས་བུར་འགྱུར། །འདི་འདྲའི་ཡོན་ཏན་ཚོགས་ལྡན་པས། །རྨི་ལམ་དང་ནི་མཉམ་པར་ལྟོས། །རྣལ་འབྱོར་རྣལ་འབྱོར་མའི་རྒྱུད་དུ། །འགྲོ་སྟེ་དེ་ཕྱིར་འཇིག་རྟེན་པའོ། །མངོན་སུམ་རང་ཉིད་སྔགས་ཀྱི་སྐུ། །འཁོར་ལོ་གསུམ་རྣམས་ཉིས་འགྱུར་རོ། །གཅིག་ལ་འཁོར་ལོ་གསུམ་བཤད་དེ། །གཉིས་པ་ཉིས་འགྱུར་དུ་ནི་འདོད། །འཁོར་ལོ་གསུམ་པོ་ཐབས་ཤེས་རབ། །སྙོམས་པར་འཇུག་པར་འཆད་པའོ། །དེ་ནི་ཉིས་འགྱུར་ཤེས་བྱ་སྟེ། །འཁོར་ལོ་ཉིས་འགྱུར་དེས་བཤད་དོ། །ཁམས་གསུམ་གྱི་ནི་གནས་ཆེན་པོ། །དཀྱིལ་འཁོར་འཁོར་ལོ་བསྒོམ་པའོ། །དཔའ་བོ་ཐམས་ཅད་མཉམ་སྦྱོར་བ། །རྡོ་རྗེ་སེམས་དཔའ་བདེ་བའི་མཆོག །དེ་བཞིན་གཤེགས་པ་དཔའ་དབང་ཆེ། །བཅོམ་ལྡན་རྡོ་རྗེས་འདི་གསུངས་སོ། །ཆོས་དང་ཆོས་མིན་གང་དུ་ནུབ། །བྱང་ཆུབ་དེར་ནི་སེམས་གཟུང་གིས། །གྲུབ་པ་ལྷ་དང་ལྷ་མ་ཡིན། །དབང་པོ་དང་ནི་ཡུལ་དང་ནི། །ཁམས་དང་སྐྱེ་མཆེད་
ཐམས་ཅད་ནི། །སྐྱེ་བ་དང་ནི་འགག་པ་སྟེ། །རྨོངས་པ་འཆིང་ཞིང་མཁས་པ་ནི། །ཡོངས་སུ་ཤེས་པས་གྲོལ་བའོ། །སེམས་འདི་རང་ཉིད་མངོན་སུམ་དུ། །ཁམས་གསུམ་དུ་ནི་རྣམ་པར་གནས། །བདག་དང་མཆོག་ཁྱོད་གཉིས་མེད་ལས། །ཚོགས་པའི་གཙོ་བོ་བྱུང་བའོ། །སྤྱོད་ལམ་ལ་སོགས་བྱེ་བྲག་ཆོས། །མདོ་སྡེ་རྣམ་ཤེས་དབུ་མ་པ། །མོས་པའི་སེམས་ཅན་རྣམས་བཤད་དེ། །བདེན་པ་མ་ཡིན་རྫུན་པ་མིན། །ཕྱག་ནི་བཅུ་གཉིས་དང་ལྡན་ཏེ། །དེ་བཞིན་ཞལ་ནི་བཞི་པའོ། །ཁ་དོག་ནམ་མཁའ་སྔོན་པོ་ལ། །སྤྱན་གསུམ་བརྐྱང་བསྐུམ་ལྡན་པ་སྟེ། །འཕྲོག་བྱེད་དཀར་མོ་མཉམ་པར་མནན། །གཞན་ནི་འབུམ་ཚོ་སྟོང་ཕྲག་གི། །གང་དང་གང་གི་རྒྱུད་ཀྱི་ནི། །ཕྱི་དང་གསང་བ་ནང་བདག་ཉིད། །དེ་དང་དེ་ཡི་གཟུགས་ངེས་པར། །ལྷ་ནི་ཧེ་རུ་ཀའི་བདག་ཉིད། །རྒྱུད་དང་རྒྱུད་ཀྱི་ནང་མཆོག་ཏུ། །དབྱེ་བ་མོས་པའི་དབང་གིས་ཏེ། །མིང་ནི་དེ་འདྲར་ཤེས་པར་བྱ། །འོན་ཀྱང་ཧེ་རུ་ཀ་བསྲེས་པའོ། །ཁ་དོག་དེ་དང་འདྲར་ཤེས་བྱ། །བཞུགས་ཚུལ་ཧེ་རུ་ཀའི་རྣམ་པ། །ས་ནི་བཅུ་གཉིས་རྣམས་ཀྱི་རྒྱུ། །དེ་ཡིས་ཧེ་རུ་ཀ་དང་འདྲ། །རྡོ་རྗེ་མཁའ་འགྲོ་དེ་བཞིན་གཤེགས། །དཔའ་བོ་ཐམས་ཅད་མཉམ་སྦྱོར་བ། །རྡོ་རྗེ་སེམས་དཔའ་བདེ་བའི་མཆོག །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། ཡེ་ཤེས་ཀྱི་རྒྱ་མཚོ་ལ་འཇུག་པ་སྟེ་འདི་ནི་ལེའུ་དང་པོའོ།། །།ཕག་མོ་ལྷ་རྫས་རྣལ་འབྱོར་མས། །སླར་ཡང་རྡོ་རྗེ་མཆོད་བྱས་ཏེ། །བཅོམ་ལྡན་བདག་པོས་བསྟན་པར་མཛོད། །ཕག་མོ་ཅི་ཡིས་ཡོངས་སུ་བྱུང་། །སྐྱེད་པ་གང་གིས་བསྐྱེད་པ་ཡིན། །རང་བཞིན་ཇི་ལྟར་དུ་ནི་འདོད། །བདག་བྱུང་བ་ཡི་རྒྱུ་མཚན་ཅི། །འདིར་ནི་དགོས་པ་ཇི་ལྟར་ཡིན། །དབང་པོ་དང་ནི་ཡུལ་ཐམས་ཅད། །ལྟེ་བའི་དཀྱིལ་འཁོར་དུ་རབ་ཞུགས། །སྤྱི་བོའི་རྡོ་རྗེ་གུར་དུ་ནི། །སྟེང་དུ་ཁ་བལྟས་རླུང་འབབ་བོ། །འདོད་ཆགས་ཉི་མའི་དབུས་སུ་ནི། །སྐད་ཅིག་གིས་ནི་སྤྲུལ་ཐིམ་གྱུར། །དེར་སྐྱེས་པ་ཡི་ཕག་མོ་ནི། །བྷ་ག་ལིངྒ་ཡིད་ལས་བྱུང་། །
བདེ་བ་ཆེན་པོའི་རང་བཞིན་ཁམས། །དེ་རྣམས་ལས་ནི་སྔོན་དུ་སྐྱེས། །རང་བཞིན་བདག་མེད་གཅིག་པུ་སྟེ། །མཁའ་མཉམ་རྣལ་འབྱོར་གཟུགས་ཅན་ནོ། །རྒྱུ་མཚན་སྐྱེ་བོ་སྒྲོལ་བ་དང་། །སྙིང་རྗེའི་གཟུགས་རང་བཞིན་དུ་བྱུང་། །འདིར་ནི་དགོས་པ་གཉིས་རིག་སྟེ། །ཕྱག་རྒྱ་སྦྱོར་བ་རབ་སྒྲུབ་པའོ། །ཁྱོད་ནི་ལྷ་མོའི་བདག་པོ་སྟེ། །ཀུན་དུ་སྤྱོད་པ་མང་སྤྱོད་པའོ། །སྔགས་ཀྱི་ཕྲེང་བ་བརྗེ་བྱས་ནས། །ཨ་ཡིག་ལ་སོགས་དེའི་ཁྱབ་བདག །ཡང་ན་ཕག་མོའི་རྩ་བ་དང་། །གོ་ཆའི་སྔགས་རྣམས་ཀྱིས་ལྡན་ཏེ། །ཡི་གེ་རེ་རེའི་སྔགས་ཀྱི་ནི། །སྤྱོད་པ་སྡོམ་པར་སོན་པའོ། །རྣལ་འབྱོར་མ་མཆོག་སྐྱེ་བ་ནི། །རྩ་ཡི་མཆོག་གི་གྲོང་དུ་སྟེ། །སྟོང་ཕྲག་བདུན་ཅུ་རྩ་གཉིས་ཀྱི། །དབུས་མ་ཨ་བ་དྷཱུ་ཏཱིའོ། །དབུ་མ་འདི་ལྟར་ཐམས་ཅད་ཀྱི། །ཁྱབ་བྱེད་དུ་ནི་རྣམ་པར་གནས། །དེ་ཕྱིར་ཕག་མོ་གཙོ་མོ་ཡི། །གོ་འཕང་མཆོག་བཞིན་ཤེས་པར་བྱ། །རྡོ་རྗེ་ལ་སོགས་མིང་ཐོག་མར། །ཨ་རྡོ་རྗེ་དང་ཀ་རྡོ་རྗེ། །སྔགས་མཐར་དེ་ལ་སོགས་པ་སྟེ། །ཡང་ན་སོ་སོ་ཐ་དད་དུའོ། །གང་གིས་དུས་སུ་སྔགས་ཟློས་པ། །དེའི་དུས་རྣམས་སུ་རྣལ་འབྱོར་ལྡན། །ལྟེ་བ་སྤྱི་བོ་སྙིང་གྱེན་དུ། །འདི་ལྟར་འགྲོ་དང་འོང་བ་མེད། །དཔའ་བོ་རྣལ་འབྱོར་མ་གཙོ་མོ། །དེ་ནི་བདག་ཉིད་རྣམ་པར་འཕྲོ། །རང་གི་འཁོར་ལྡན་རྣལ་འབྱོར་མ། །ཞིང་དང་ཞིང་རྣམས་སུ་ནི་འགྲོ། །ལྷ་མོ་ཁྱོད་ནི་བདག་པོ་སྟེ། །ང་དང་ལྷན་ཅིག་ཁ་སྦྱོར་རོ། །དུས་དང་དུས་ནི་མ་ཡིན་པར། །ནམ་མཁའི་བུ་གའི་ནང་འདུག་ནས། །དེ་བཞིན་སྐྱེ་གནས་ལམ་འཐོན་ནས། །འཆི་བ་མེད་པའི་ས་བོན་འཛག །དེར་ནི་འཕོ་མེད་ཡེ་ཤེས་བྱ། །ཧིག་ཕྱེད་ཡི་གེས་བསྒོམ་བྱ་སྟེ། །མི་མོ་སྐྱེས་བུའི་དུས་སུ་ཡང་། །མཆོག་ཏུ་ཟག་མེད་མངོན་པར་བྱ། །དེ་བྱུང་བ་ཡི་རིག་མ་ཆེ། །སྒོམ་པའི་བདག་ཉིད་ཀྱིས་བྲིའོ། །ཐོག་མར་རྣམ་སྣང་མགོན་པོ་སྟེ། །རི་མོ་གསུམ་བསྐོར་ལྟེ་འོག་གནས། །ལངས་ནས་མགྲིན་པའི་བར་དུ་འགྲོ། །ས་གསུམ་སྒྲོན་མ་ལྟ་བུར་སོན། །གཞན་པའི་སྔགས་ནི་ས་མཐའ་འདྲ། །དེ་ལས་ཟླ་འབབ་གཡོན་ནས་སོ། །སྔགས་འདི་ཐིག་ལེས་བརྒྱན་པ་སྟེ། །སྔགས་ནི་རྣལ་འབྱོར་མ་བསྐྱེད་པའོ། །
སླར་ཡང་ས་བོན་གཉིས་པ་བརྗོད། །གཡས་པ་ཉི་མ་བསྐྱེད་པ་སྟེ། །ལོགས་སུ་གཉིས་ཕྱེ་མགོར་ཐིག་ལེ། །ཡ་སྡེའི་མཐའ་ཡི་ས་བོན་ནི། །བྱང་ཆུབ་སེམས་ཆེན་འབབ་ལམ་མོ། །འདི་ནི་ཕག་མོའི་ས་བོན་ཡིན། །ཨཱ་ཡི་ཡི་གེས་མཐར་བརྒྱན་པ། །བཅུ་དྲུག་ཟླ་ཕྱེད་ཉི་མས་བརྒྱན། །ཡ་སྡེའི་དང་པོའི་ས་བོན་ནི། །སྦྱོར་བས་ས་གསུམ་རླུང་ཡོན་ཏན། །དབྱངས་ཀྱི་བཅུ་གསུམ་པས་རྒྱས་གདབ། །དཀར་པོའི་ཕྱོགས་ཀྱིས་མགོ་བོར་བརྒྱན། །ཐིག་ལེ་དང་ནི་བཅས་པ་འབར། །དགའ་བ་བཞི་པོ་དག་པའོ། །པ་སྡེའི་མཐའ་མ་བདེ་བའི་གཟུགས། །ཨོ་ཡི་ཡི་གེ་ཞོན་ལྡན་པ། །མགོ་བོར་ཟླ་ཕྱེད་ཉི་མས་མནན། །ས་ཡི་ཕ་རོལ་གཞོམ་མེད་པས། །ཉི་མ་ཡི་ནི་གདན་ལ་གནས། །དབྱངས་ཀྱི་བཞི་པ་རྣ་དྲུང་བཟུང་། །མགོ་བོར་ཟླ་ཕྱེད་ཐིག་ལེས་བརྒྱན། །འདོད་ཆགས་མཐའ་ཡི་རང་བཞིན་ནོ། །ཡེ་ཤེས་ས་བོན་ཉིས་འགྱུར་དབྱེ། །སྤྲོ་བ་དང་ནི་བསྡུ་བས་སྐྱེས། །འོག་དང་སྟེང་དུ་གནས་པ་ཡིས། །མགོན་པོ་ལོངས་སྤྱོད་རྫོགས་འཛིན་པ། །སྙིང་ག་དང་ནི་ཆུ་སྐྱེས་སུ། །དོན་གྱི་ཆོ་ག་ཡོངས་རྫོགས་པའོ། །ཡོངས་སུ་སྐྲག་བྱེད་མ་ས་བོན། །པ་མཐའི་ཡི་གེ་བཟུང་ནས་ནི། །སླར་ཡང་དེ་བཞིན་བརྗོད་པར་བྱ། །ཨོ་ཌྱན་འབར་བ་འཛིན་གྲོང་གི། །བུ་གར་གཏུམ་མོ་སྦོར་བའོ། །བྱང་ཆུབ་སེམས་ཀྱིས་ས་གསུམ་འགེངས། །དེ་ལྟར་བཤད་པའི་སྔགས་གང་ནི། །རིམ་པས་ཡི་གེ་རྣམས་མི་མཐུན། །རྣལ་འབྱོར་མ་ཡི་མིང་ལྡན་པར། །ལས་དུས་དེ་ལྟར་རྟོགས་པར་བྱ། །རེ་རེའི་ཆེ་བའི་བདག་ཉིད་ནི། །ཡི་གེ་ཡི་ནི་གྲངས་ཀྱིས་སོ། །བདག་ཉིད་ཆེན་པོ་རྣམ་པར་འཕྲོ། །བྱང་ཆུབ་ཆ་ཤས་ཆ་རྒྱུའོ། །ཐོག་མར་རྣམ་སྣང་ཕྱག་འཚལ་བ། །ཆོས་ཀྱི་དབྱིངས་ནི་བྱ་བའི་གཟུགས། །ཏ་སྡེའི་ལྔ་པའི་ཡི་གེ་ནི། །ལྔ་པ་ཡི་ནི་སྡེ་ཚན་ནོ། །རྣལ་འབྱོར་མ་གཟུགས་ནམ་མཁའ་བརྟེན། །པ་མཐའི་ས་བོན་ཨོ་དབྱངས་ལྡན། །གཏི་མུག་འཇོམས་པར་བྱེད་མ་སྟེ། །རྣལ་འབྱོར་མའི་ཚོགས་སྤྲོ་བའོ། །དེ་ཡི་བཞི་པའི་ས་བོན་ནོ། །ས་གསུམ་དུ་ནི་ཁྱབ་པ་ཡི། །རྣལ་འབྱོར་མ་ནི་སྤྲོ་བའོ། །ཐོག་མའི་སྡེ་ཡི་གསུམ་པ་སྟེ། །
འགྲོ་བ་དྲུག་པོ་ཉམས་བྱེད་པའི། །མཁའ་འགྲོ་མ་ཡི་འཁོར་ལོ་སྤྲོ། །ཡ་སྡེའི་མཐའ་མའི་ས་བོན་ནི། །བྱང་ཆུབ་སེམས་ཀྱི་རང་བཞིན་ནོ། །ལྔ་པའི་སྡེ་ཡི་ཐོག་མ་སྟེ། །དེ་བཞིན་ཉིད་ཀྱི་ས་བོན་ཏེ། །ཨི་ཡི་དབྱངས་ཀྱིས་མགོ་ལ་རེག །ཆུ་ཡི་ཡི་གེ་ཡོངས་བསྔགས་པ། །ཐམས་ཅད་བྱེད་པའི་རང་བཞིན་ནོ། །ཙ་སྡེའི་དབུས་གནས་བཟུང་ནས་ནི། །ཉི་མ་ཡི་ནི་གདན་ལྡན་པ། །ལས་ཀྱི་དུས་སུ་ཁྱད་པར་ལྡན། །ཕག་མོ་ཡི་ནི་ས་བོན་ནི། །ཨ་ཡི་ཡི་གེ་རྣ་བར་རེག །ས་གསུམ་ཡེ་ཤེས་རང་བཞིན་མཉམ། །མེ་ཡི་ས་བོན་དབྱངས་གཉིས་ལྡན། །འཁོར་བའི་ལས་ཀྱི་རང་བཞིན་ནོ། །ས་མཐའི་མགོ་ལ་ཨཱི་དབྱངས་རེག །རྟག་ཏུ་ཚངས་པའི་རང་བཞིན་བལྟ། །དབྱངས་ཀྱི་གཉིས་པ་བཟུང་ནས་ནི། །དེ་ལྟར་མཁའ་འགྲོ་མ་ཡི་གཟུགས། །སེམས་ཅན་སྒྲོལ་བར་བྱེད་པའོ། །ཡ་ཡིག་གནས་པ་ར་དང་ལྡན། །སླར་ཡང་ཨཱི་ཡི་དབྱངས་སྦྱར་རོ། །ཁམས་གསུམ་རྣལ་འབྱོར་མ་སྤྲོའོ། །དྲུག་པའི་སྡེ་ཡི་དང་པོ་ནི། །རྣལ་འབྱོར་མ་སྔགས་ཀུན་རང་བཞིན། །ར་གནས་པ་ནི་ཨ་དབྱངས་ལྡན། །སྡང་བའི་སེམས་ཅན་གསོད་བྱེད་འགྱུར། །ཛ་ཡི་ཡི་གེ་ཡོངས་བཟུང་སྟེ། །ཨི་ཡི་དབྱངས་དང་ཡང་དག་ལྡན། །སྒྱུ་མའི་རང་བཞིན་ཡོངས་ལྡན་པའོ། །སོ་ཡི་ས་བོན་རྣ་བ་ལ། །ཨི་ཡི་དབྱངས་ཀྱིས་རེག་པས་དབྱེ། །ཀླུ་ཡི་སྔགས་ནི་སྦྱར་བྱས་ཏེ། །ཏྲེ་ཡི་གེ་ས་གསུམ་ཀུན། །ཡེ་ཤེས་ཀྱི་ནི་ཁྱད་པར་སྔགས། །ལ་ཡི་ཡི་གེ་ཨོ་དང་ལྡན། །འཇིག་རྟེན་རྣམས་ཀྱི་རྟེན་ཡིན་ཏེ། །བྱང་ཆུབ་བྱེད་པའི་ཆོས་ཡིན་ནོ། །ཐོག་མའི་ཀ་ནི་ཡ་སྟན་ལྡན། །འཆི་དང་ལྷན་སྐྱེས་དབྱེ་བ་མེད། །པ་ཡི་སྡེ་ཡི་མཐའ་མ་ལ། །ཨ་ཡི་ཡི་གེའི་དབྱངས་སྦྱར་བྱ། །ས་གསུམ་གྱི་ནི་མ་རང་བཞིན། །ཏ་ཡིག་ཨེ་ཡི་ཡི་གེས་བརྒྱན། །བདེ་བ་འཛིན་པར་བྱེད་པའོ། །སླར་ཡང་པ་སྡེའི་མཐའ་མ་སྟེ། །ཚད་མེད་པ་ཡི་ལྷན་སྐྱེས་ཀྱི། །དབུས་ན་བཞུགས་པའི་རང་བཞིན་ནོ། །ས་ཡི་མཐའ་མ་ཨཱ་དང་ལྡན། །རྡོར་སེམས་ཡེ་ཤེས་གཞོམ་མེད་པའོ། །ཡ་སྡེའི་མཐའ་མ་ཨི་དབྱངས་ལྡན། །མི་ཤེས་རང་བཞིན་འཇོམས་བྱེད་པའོ། །ཏྱེ་སྔགས་ཆོས་དབྱིངས་རང་བཞིན་ཏེ། །ཐམས་ཅད་རང་བཞིན་
དུ་ཁྱབ་པའོ། །བུ་ག་རྣམས་ནས་འཛག་པ་ས། །འབབ་པའི་ས་བོན་ཉི་མ་ལྡན། །ཆུ་སྲིན་དབང་པོ་ཡི་ནི་སྔགས། །བ་སྡེ་བཞི་པའི་ས་བོན་ནི། །ཨཱུ་དབྱངས་སྟན་དང་ལྡན་པ་སྟེ། །འཁོར་བའི་འཇིགས་པ་ཉམས་བྱེད་པའོ། །ཏ་ཡི་སྔགས་ཀྱིས་དགྲ་ཉམས་བྱེད། །སླར་ཡང་པ་སྡེའི་བཞི་པ་ནི། །སྒྲ་ཆེན་པོ་ནི་སྒྲོགས་པའོ། །རླུང་གི་ས་བོན་ཨཱ་ཡིག་རེག །སྔགས་ནི་ནོར་བུར་འབབ་བཞིན་པའོ། །ཆུ་ཡི་ས་བོན་རྣར་བཟུང་བ། །སྒྱུ་མ་ཡི་ནི་རང་བཞིན་ནོ། །ས་ཡི་ཕ་རོལ་ཨེ་ཡིག་ལྡན། །ས་གསུམ་གྱི་ནི་འཁྲུལ་འཇོམས་རྒྱུ། །པ་སྡེའི་མཐའ་མ་རྐང་རང་བཞིན། །ས་ཡི་ཕ་རོལ་ཨཱ་དང་ལྡན། །ངོ་མཚར་ཆེ་བ་ཡི་ནི་ཆོས། །ཡ་ཡི་སྡེ་ཡི་མཐའ་མ་ནི། །པདྨའི་ས་བོན་མཆོག་ཡིག་གོ། །ཙ་ཡི་དབུས་མའི་ས་བོན་ནི། །ར་ནི་མགོ་ལ་གནས་པ་སྟེ། །ཨེ་ཡིག་གིས་ནི་ཕྱེ་བ་ནི། །ལྷ་དང་ལྷ་མིན་རང་བཞིན་ནོ། །དེ་ལྟར་སྔགས་ཚིག་དྲུག་པོ་སྟེ། །རྣལ་འབྱོར་མ་ཡི་ཚོགས་སྤྲོ་བ། །ལས་ཀུན་རང་བཞིན་འཁོར་ལོའོ། །སྙིང་རྗེའི་འདོད་པར་གྱུར་པ་ཡི། །དེ་ཁོ་ན་ཉིད་ཚིག་རྒྱ་ཆེ། །རྣལ་འབྱོར་ཐམས་ཅད་རབ་འགེངས་པའི། །བཅོམ་ལྡན་མཁའ་འགྲོས་འདི་གསུངས་སོ། །འཁྲུལ་འཁོར་འཁོར་ལོ་བཤད་བྱ་སྟེ། །ཁྱོད་ཀྱི་འཁྲུལ་འཁོར་ཆུང་རྒྱ་ཆེ། །ཀུན་ནས་ཡོངས་སུ་ཟླུམ་པོར་ནི། །རི་མོ་བཅུ་གསུམ་བྲི་བར་བྱ། །ལྷ་མོ་དུམ་བུ་བཅུ་གཉིས་འགྱུར། །སུམ་ཅུ་རྩ་དྲུག་རྩིབས་ཀྱིས་བརྒྱན། །རྩིབས་རེ་རེ་ལའང་ཡི་གེ་ནི། །རིམ་པས་ཡོངས་སུ་གསལ་བར་སྦྱིན། །ལྷག་མ་ཉི་ཤུ་བཞི་ཡི་གེ། །ཐམས་ཅད་ལྟེ་བའི་སྙིང་པོ་ལའོ། །དེ་རྣམས་ཀྱིས་ནི་བསྐྱེད་པའི་རྩ། །སྟོང་ཕྲག་བདུན་ཅུ་རྩ་གཉིས་སོ། །སོ་སོ་རེ་རེ་ཡི་ནི་འཁོར། །ནོར་དང་མདའ་དང་ཟླ་བའོ། །ཀུན་ལ་ལྷག་པས་དམན་པ་ནི། །ནོར་དང་རིག་བྱེད་ཚོགས་པའོ། །དེར་གནས་པ་ལ་འཁྲུལ་འཁོར་བཏུ། །ལས་གཅིག་ཇི་ལྟར་མོས་པའོ། །རྣམ་པར་ཤེས་པའི་བཞོན་པ་ནི། །རྩ་ཐམས་ཅད་དུ་འཆར་དུས་སུ། །དེར་ནི་དབང་པོ་དང་ནི་ཡུལ། །ལས་ཀྱི་དུས་སུ་གསད་པར་བྱ། །ཡིད་ཅེས་བྱ་བ་བསྐྲད་བྱ་ཞིང་། །སེམས་ནི་དབང་དུ་བྱ་བ་སྟེ། །ཁམས་དང་སྐྱེ་
མཆེད་གཞན་དེ་བཞིན། །ཞི་བ་དང་ནི་རྒྱས་པར་བྱ། །ཕུང་པོ་ཀུན་དང་དེ་བཞིན་སྲོག །དགུག་པ་དང་ནི་སྡང་བའོ། །ལུས་དང་ངག་དང་དེ་བཞིན་སེམས། །དེ་རྣམས་རེངས་པར་བྱ་བའོ། །ལས་གཞན་ཇི་ལྟར་རིགས་པ་ཡིས། །བརྒྱད་ཀྱིས་ལྷག་པའི་བརྒྱ་ཡང་ངོ་། །ཡང་ན་ས་བོན་ཅི་འདྲ་བ། །དེ་ཡི་ཚད་དང་མཉམ་ལས་སོ། །དེ་དུས་བདག་ཉིད་ཆེ་བ་ཡིས། །ཡི་གེས་བསྐྱེད་དང་འཇོམས་པའོ། །ཕག་མོ་རྡོ་རྗེ་གཙོ་མོ་ཡི། །འཁྲུལ་འཁོར་གཉིས་པ་བཤད་བྱ་སྟེ། །ཡ་སྡེའི་མཐའ་ཡི་ས་བོན་ནི། །བྱང་ཆུབ་ས་བོན་རང་བཞིན་ནོ། །ལྕེ་གཉིས་ཡི་གེ་ར་ཡིག་ལྡན། །རྣལ་འབྱོར་མ་སྔགས་ཨཱ་ཡིག་དགང་། །ས་གནས་པ་ནི་མི་གཡོ་བའོ། །ན་ཡི་ཡི་གེ་ཨེ་དང་ལྡན། །སེམས་ཅན་ཀུན་སྤྲུལ་རྒྱུ་མཚན་ནོ། །ཐོག་གནས་དབྱངས་ནི་ཐོག་མའི་མགོན། །ལྕེ་གཉིས་ཨེ་དབྱངས་མགོ་ལ་རེག །ས་གསུམ་ཁམས་ཀྱི་རང་བཞིན་ནོ། །ཏ་ཡི་ཡི་གེ་ཨེ་དང་ལྡན། །ལྔ་པ་ཡི་ནི་ཐོག་མ་སྟེ། །རྣལ་འབྱོར་མ་ཡི་རང་བཞིན་ནོ། །ཡ་སྡེའི་བཞིར་གནས་པའི་ས་བོན། །ཀུན་གྱི་གཙོ་མོའི་རང་བཞིན་ནོ། །བརྒྱད་པའི་སྡེ་ཡི་ཐོག་ས་བོན། །སྟོང་པ་ཡིས་ནི་བརྒྱན་པ་སྟེ། །ཁུ་བའི་ཁམས་ཀྱི་ངོ་བོ་ཉིད། །གཉིས་པར་གནས་པའི་ཐོག་མ་ནི། །ཀེང་རུས་ཐིག་ལེ་འཛིན་པའོ། །ཡ་སྡེའི་གཉིས་པའི་ས་བོན་ནི། །ཨི་ཡི་དབྱངས་དང་ལྡན་པ་སྟེ། །རྡོ་རྗེ་སྙིང་གནས་མགོན་པོའོ། །ཏ་མཐའ་ཨེ་ཡི་ཡི་གེས་བརྒྱན། །སྐྱེ་གནས་ལ་ནི་སྤྲས་པའོ། །ཏ་ཡིག་ཉི་མ་དང་ལྡན་པ། །རིམས་འཇོམས་པ་ཡི་རྒྱལ་པོའོ། །བྷ་ནི་ཉི་ལྡན་ཨ་ཡིག་བརྒྱན། །ལྟེ་བའི་ཐབ་ཏུ་གནས་པའོ། །པ་སྡེའི་མཐའ་མ་གནས་རང་བཞིན། །ཊ་མཐའ་ཨི་ཡིས་བརྒྱན་པ་ནི། །འགུགས་པ་ཡི་ནི་རང་བཞིན་ནོ། །བི་ཤོ་ཥ་ཥི་སྔགས་བཞི་སྟེ། །དགའ་བ་བཞི་ཡི་རང་བཞིན་གྱིས། །གཏེར་ཆེན་པོ་ཡི་ས་བོན་ནོ། །ར་ཡིག་ཨོ་ཡི་ཡི་གེས་བརྒྱན། །རྩ་དྲག་པོ་ཡི་རང་བཞིན་ནོ། །ཤ་ཡི་གཉིས་པའི་ས་བོན་ནི། །སྙིང་པོ་ཡི་ནི་གཟུགས་སུའོ། །ཎི་ཡིག་རང་བཞིན་གྱིས་བཟུང་བ། །རྣལ་འབྱོར་མ་ཡི་དེ་ཉིད་དོ། །ཀ་ཡིག་ར་ཡིག་ཨོ་ཡིག་ལྡན། །དབུ་མ་བརྐྱང་མ་རོ་རང་བཞིན། །ཏ་པའི་
བར་གནས་གཟུང་བར་བྱ། །རྣལ་འབྱོར་མ་ཡི་ཚོགས་ཀྱི་ནི། །རྐང་པ་བརྒྱད་པ་བསྒྲུབ་རང་བཞིན། །ཏ་སྡེའི་མཐའ་མ་ཨི་ཡིག་བརྒྱན། །ཐོད་པའི་དབུས་ཀྱི་རྩ་རང་བཞིན། །ཀ་རུ་མངོན་བརྗོད་གཟུང་བར་བྱ། །དེ་ཡིས་ལས་རྣམས་ཟད་པར་བྱེད། །ར་ཡིག་ཨ་ཡི་ཡི་གེས་གཟུང་། །མགོ་བོའི་དབུས་ནས་སྒྲ་ཆེན་འཛག །ས་ཡི་ས་བོན་ཨི་ཡིག་ལྡན། །གྲུ་གསུམ་གྱི་ནི་དབུས་སུའོ། །ཏ་ཡི་མཐའ་མ་ཨིས་བརྒྱན་པ། །སྤྲུལ་པའི་སྟེང་དང་འོག་ཏུའོ། །ཏ་ཡིག་ར་ཡིག་ཨཱ་ཡིག་སྦྱར། །ཆོས་ཀྱི་དབྱིངས་ནི་གྲུ་གསུམ་སྟེ། །དེ་ཕྱིར་ས་གསུམ་སྐྱེད་པའོ། །ས་གཟུང་དབུས་མ་བཅས་ས་བོན། །ན་ཡིག་ཨི་དང་ལྡན་རང་བཞིན། །པ་སྡེའི་མཐའ་མ་ཨ་ཡིས་བརྒྱན། །སྒྱུ་མའི་ངོ་བོ་པདྨའི་རྩ། །ར་གང་གནས་པ་རྣ་རང་བཞིན། །ཊ་སྡེའི་མཐའ་མ་ཨི་དང་ལྡན། །མ་ལུས་དབྱེར་མེད་སེམས་ཅན་གྱི། །ཁམས་འཛིན་པ་ཡི་མགོན་པོའོ། །དེ་ལྟར་སྔགས་ཚིག་བཅུ་བརྗོད་དེ། །དུས་བཞི་ཡི་ནི་ཚད་ཅན་ནོ། །རྣལ་འབྱོར་མ་ཀུན་ལས་ཀྱི་ནི། །འཁོར་ལོས་སྒྱུར་བ་ལོངས་སྤྱོད་པ། །དུས་ཀྱི་གཟུགས་ཀྱི་རང་བཞིན་ཅན། །བཅོམ་ལྡན་ལྷ་ཡིས་འདི་གསུངས་སོ། །མཁའ་འགྲོ་མ་གནས་འདུ་བ་ནི། །འཁོར་ལོ་འཁོར་ལོར་ཤེས་པའོ། །ཉི་ཁྲི་བརྒྱ་ཕྲག་བཅུ་དྲུག་གི། །ཡེ་ཤེས་ལས་ནི་དེ་བཞིན་བྱེད། །ཡོན་པོར་སྨྲ་བ་རྣམས་ཀྱི་ནི། །དེའི་རྡུལ་གྲངས་ལས་སྐྱེས་པར་འདོད། །བསྒྲུབ་པར་བྱ་བའི་མིང་བཟུང་ནས། །ཕྱི་ནས་བློ་ལྡན་གྱིས་སྔགས་སྦྱར། །སྔོན་དུ་པ་ལ་ར་སྟན་ནོ། །ཐོག་མ་ཡི་ནི་ཆོས་གཟུགས་སོ། །དེ་ཡི་བཞི་པར་གནས་པ་ལ། །ཨེ་ཡི་ཡི་གེས་རྣར་བརྒྱན་པ། །རྣལ་འབྱོར་མ་རྣམས་ཀྱི་སྔགས་སོ། །ཏ་སྡེའི་དབུས་གནས་ཅི་འདོད་སྟེར། །ན་ཡིག་ཨི་ཡི་ཡི་གེ་ལྡན། །སྣ་ཚོགས་སྤྲུལ་པ་བྱེད་པའོ། །པ་ཡིག་སྤྲོས་པ་དང་བཅས་པའོ། །ར་ཡི་ཡི་གེ་ཨ་དང་ལྡན། །རྣལ་འབྱོར་མ་ཡི་འཁོར་ལོས་སྒྱུར། །ཙ་སྡེའི་དབུས་གནས་ས་བོན་གཟུང་། །གང་ལྟ་དེ་ལྟའི་རང་བཞིན་ནོ། །རླུང་བསགས་པ་ནི་ཨེ་ཡིག་ལྡན། །ཨ་ཧཾ་ཡི་གེའི་རང་བཞིན་ནོ། །ཡ་ཡི་སྡེ་ཡི་མཐའ་མ་ལ། །དབྱངས་ཀྱི་གསུམ་པས་མགོ་ལ་བརྒྱན། །
སྣ་ཚོགས་ཡེ་ཤེས་སྔགས་རང་བཞིན། །ཛ་ཡི་ས་བོན་མཐའ་མེད་པར། །འབར་བར་འགྱུར་བ་ཡི་ནི་གཟུགས། །ཡི་གེ་ཡ་ནི་ཨེ་ཡིག་ལྡན། །ཐེག་པ་ཀུན་གྱི་ལྟ་བའི་གཟུགས། །ཙ་སྡེའི་གསུམ་པའི་ས་བོན་ནི། །རྣལ་འབྱོར་མ་ཡི་གཟུགས་ཞེས་བྱ། །པ་མཐའ་དེ་ཡི་བཞི་པ་ལའོ། །སྔགས་ཐམས་ཅད་ཀྱི་བླ་མའོ། །ཏ་སྡེའི་མཐའ་མ་དབྱངས་གསུམ་ལྡན། །མ་ལུས་སེམས་ཅན་འབོད་པའི་གཟུགས། །དྲོ་བའི་གསུམ་པ་ཏ་སྟན་ཅན། །འགྲོ་དང་མི་འགྲོ་བཅས་འགྲོ་སྒྲོལ། །དེ་བཞིན་མྦྷའི་ཡི་གེ་བཟུང་། །ས་ནི་བཅུ་བཞི་པའི་གཟུགས་སོ། །ནི་སྔགས་རྣལ་འབྱོར་མ་རྣམས་ཀྱི། །བརྡ་ཡིས་སུ་ནི་འཇུག་པའོ། །པ་སྡེའི་མཐའ་མ་ཨོ་ཡིག་རེག །སྣ་ཚོགས་མི་ཤེས་འཛིན་པའོ། །ས་མཐའ་རྡོར་སེམས་རང་བཞིན་ནོ། །ནི་ཡི་ཡི་གེ་ཆོས་དང་ནི། །ཆོས་མིན་སུན་འབྱིན་པ་ཡིན་ནོ། །ཡ་ཡི་སྡེ་ཡི་མཐའ་མ་ནི། །རྣལ་འབྱོར་མ་སྟེ་ནམ་མཁའི་གཟུགས། །ཛ་ཡིག་ར་ཡིག་སྟན་ཅན་ནི། །ཁུ་བའི་རང་བཞིན་ཤར་བའོ། །སླར་ཡང་རླུང་གི་མཐའ་མ་ནི། །ཨ་ཡི་ཡི་གེས་གཟི་བསྐྱེད་པ། །ཚངས་པ་པདྨ་ཡི་ནི་གཟུགས། །ར་ཡིག་ཨ་ཡིག་ཡི་གེ་ལྡན། །འགྱུར་བ་མེད་པའི་རང་བཞིན་ནོ། །ས་མཐའ་དབྱངས་གསུམ་མགོ་ལ་གནས། །རྣལ་འབྱོར་མ་རྣམས་འབབ་པའི་གཟུགས། །མ་ནི་དབུས་མ་དེ་ཉིད་གཟུགས། །ས་མཐའ་ཨ་ཡིས་བཀང་བ་སྟེ། །རྣལ་འབྱོར་མ་གཟུགས་ཀྱི་ཁར་བརྗོད། །ཡ་ཡིག་ཨོ་ཡི་ཅོད་པན་གནས། །ལྷན་ཅིག་སྐྱེས་པའི་རང་བཞིན་ནོ། །ཀ་སྡེའི་དབུས་གནས་དབྱངས་གསུམ་བརྒྱན། །དེ་ཉིད་མེད་པའི་རང་བཞིན་ནོ། །ནི་ཡི་ཡི་གེ་རང་བཞིན་མེད། །གཉིས་པ་ཡི་ནི་ཐོག་མ་ལ། །ཨ་ཡི་ཡི་གེ་གསལ་བར་བྱེད། །འདོད་པའི་ཁམས་ཀྱི་རང་བཞིན་ནོ། །པ་སྡེའི་མཐའ་མ་ཨེ་དང་ལྡན། །ཐམས་ཅད་སྒྱུ་མའི་རང་བཞིན་ནོ། །པ་ཡི་ས་བོན་མཐར་ཤ་སྟེ། །ཡ་སྡེའི་མཐའ་ཡིག་སྟན་ཅན་ནི། །ཁུ་བ་དང་ནི་རླུང་དབྱེར་མེད། །ཨི་དབྱངས་མགོར་བརྒྱན་མེ་ས་བོན། །གྲུབ་པ་སྒྱུ་མའི་རང་བཞིན་ནོ། །ཀ་ཡི་གཉིས་པའི་ས་བོན་ནི། །ནམ་མཁའ་རྣལ་འབྱོར་མ་ཡི་གཟུགས། །ས་བོན་དེ་ཡི་མཐའི་ཡི་གེ། །
ཨེ་ཡི་ཡི་གེས་རྣར་བརྒྱན་པ། །དཔའ་བོ་གཅིག་པུ་མི་བསྐྱོད་པའོ། །དེ་ལྟར་འཁོར་ལོ་མཁའ་རང་བཞིན། །དེ་ལྟར་རྐང་པ་དགུ་པོ་ནི། །རྣལ་འབྱོར་མ་ཚོགས་ཡི་གེ་སྟེ། །ཁམས་གསུམ་གྱི་ནི་སྔགས་རང་བཞིན། །སྔགས་ཀུན་སྤྱོད་པའི་སྦྱོར་བདག་ཉིད། །མཁའ་འགྲོའི་དམ་ཚིག་ལ་བཞུགས་ནས། །དངོས་གྲུབ་ཐམས་ཅད་རབ་སྩོལ་བའི། །བཅོམ་ལྡན་ལྷ་ཡིས་འདི་གསུངས་སོ། །འཁོར་ལོ་གསུམ་པའི་ནུས་པ་ཡིས། །ཇི་ལྟར་འདོད་པའི་ལས་བྱའོ། །རྣལ་འབྱོར་རྣམས་ཀྱི་ལས་དུས་སུ། །སྒྱུ་མས་ཐམས་ཅད་རྨོངས་པར་བྱ། །རྡོ་རྗེ་མ་བདག་སླར་ལངས་ནས། །འཁོར་ལོ་གཞན་གྱི་རྣལ་འབྱོར་ལྡན། །མཆོག་ཏུ་མི་འགྱུར་གཙོ་བོ་ལ། །བདག་མེད་མ་ཡིས་དམ་འཁྱུད་དོ། །ཏ་ཡི་སྔགས་ཀྱིས་གཉིས་པ་སྦྱོར། །དྱ་གནས་མེ་དང་རླུང་ས་བོན། །བདེ་བ་ཆེན་པོའི་འདོད་ཆགས་ཆེ། །དེ་ཡི་གཉིས་པའི་ས་བོན་ནི། །ཨཱ་ཡི་ཡི་གེས་དགང་བའོ། །འབྱུང་བ་ཆེན་པོ་བཞི་རང་བཞིན། །པ་ཡིག་ར་ཡིག་ཨོ་ཡིག་སྦྱར། །གསུམ་པོ་རླུང་གི་རང་བཞིན་ནོ། །ཏ་ཡི་ཡི་གེ་ཨྃ་ཡིག་ལྡན། །སླར་ཡང་རྣམ་ཤེས་ས་བོན་ནོ། །ཀ་ཡི་སྡེ་ཡི་དབུས་གནས་པ། །ཨེ་ཡི་ཡི་གེས་རྣམ་པར་བརྒྱན། །རྣལ་འབྱོར་མའི་ཕྱག་རྒྱ་རང་བཞིན། །སླར་ལ་ཡང་ནི་བརྗོད་པར་བྱའོ། །ཚིག་འདི་ཐབས་ཤེས་དབྱེར་མེད་དངོས། །ས་མཐའ་དང་ནི་ན་ཡི་སྔགས། །སླར་ལ་ཡང་ནི་བརྗོད་པར་བྱ། །སྐྱེད་ཅིང་སྡུད་པར་བྱེད་གཟུགས་སོ། །པ་ར་ཨཱ་ཡིག་ས་བོན་གཅིག །དོན་དམ་པ་ཡི་ཡི་གེའོ། །ཊ་མཐའ་ཨཱ་ཡི་ཡི་གེ་ལྡན། །གཞོམ་དུ་མེད་ལས་སྐྱེས་པའོ། །ཏ་ཡི་མཐའ་མ་ཀུན་འཇོམས་པའོ། །ཀ་ཀ་དང་ནི་ཎི་གནས་ལ། །དབྱངས་གསུམ་སྦྱར་ཞིང་ཐིག་ལེ་སྦྱིན། །རྣལ་འབྱོར་མ་ཀུན་འབོད་པའོ། །དེ་བཞིན་དུ་ནི་ཁ་ཁ་དང་། །གསུམ་པ་ཎ་རུ་གནས་པ་ཨི། །དུབ་པ་སེལ་བར་བྱེད་པའི་རྒྱུ། །དྷུ་ན་ཡི་ནི་སྔགས་ཀྱི་ཚིག །ལན་གཉིས་སུ་ནི་བརྗོད་པར་བྱ། །རྟོག་པ་ཐམས་ཅད་འཇོམས་པར་བྱེད། །ཡ་སྡེའི་མཐའ་མ་ཡི་ནི་སྔགས། །རྡོ་རྗེའི་བུ་གར་བརྒྱན་པའོ། །ཙ་སྡེའི་དབུས་གནས་ས་བོན་ནི། །ར་ཡི་སྟན་ལ་ཡོངས་སུ་གནས། །གཏི་མུག་
ཟ་བར་བྱེད་པའོ། །ས་མཐའ་གཞོམ་མེད་དབུས་མའོ། །ཤ་སྡེའི་གསུམ་པ་ཧ་སྟན་ཅན། །ཨེ་ཡི་ཡི་གེ་རྣ་བར་བརྒྱན། །སྣ་ཚོགས་མཁའ་འགྲོ་མ་ཡི་གཟུགས། །འབོད་པར་བྱེད་པ་ཡི་ནི་སྔགས། །ཤོ་ཥ་ཡ་ཡི་སྔགས་ཀྱི་ཚིག །ལན་གཉིས་སུ་ནི་བརྗོད་པར་བྱ། །ཡེ་ཤེས་ཅན་རློམ་ང་རྒྱལ་འཇོམས། །བྱང་ཆུབ་བྱང་ཆུབ་མེད་དེ་ཉིད། །དེ་ལྟར་རྐང་པ་བཅུ་གཉིས་ནི། །ས་དང་རྣལ་འབྱོར་ལས་རང་བཞིན། །བཅུ་གཉིས་ས་རྣམས་ཁྱབ་བདག་གི། །བཅོམ་ལྡན་ལྷ་ཡིས་འདི་གསུངས་སོ། །ཡི་གེ་རྣམས་ཀྱི་གནས་སོགས་ཀྱི། །བརྡ་ཡིས་དེ་ཉིད་ཕ་རོལ་འགྲོ། །བདག་ལས་སེམས་ཅན་ཐམས་ཅད་སྐྱེས། །སེམས་ཅན་ལས་ཀྱང་བདག་བྱུང་ངོ་། །བདག་དེ་རྟག་ཏུ་མེད་གྱུར་ནས། །སྒྱུ་མ་རྨི་ལམ་དེ་བཞིན་གཤེགས། །འཁྲུལ་འཁོར་འདི་ནི་སྟོབས་ཆེ་སྟེ། །ལས་རྣམས་ཇི་ལྟ་བར་ནི་བྱུང་། །རྡོ་རྗེ་མཁའ་འགྲོའི་མཚན་ཉིད་དུ། །དུས་འདིར་ཐམས་ཅད་འགྱུར་བའོ། །འཁོར་ལོ་ལྔ་པ་འདི་རྣམས་སུ། །མྱ་ངན་འདས་པའང་བརྗོད་པར་བྱ། །ལྷ་སོགས་ཐམས་ཅད་རྒྱུན་དུ་གསོད། །དེ་རྣམས་ཐམས་ཅད་རྟག་ཏུ་འགྲོལ། །བཀའ་སྩལ་པ། ཀ་ཡི་གཉིས་པའི་ས་བོན་ནི། །རྣལ་འབྱོར་མའི་ཚོགས་དེ་ཉིད་དོ། །ཊ་བཟུང་པ་མཐའི་སྟན་ཅན་ཏེ། །ཨྃ་གིས་ཅོད་པན་བརྒྱན་པར་བྱ། །དེ་ལ་ཨ་ཡི་ཡི་གེས་དགང་། །འགྲོ་བ་དྲུག་གི་རང་བཞིན་ནོ། །ཀ་སྡེའི་དབུས་གནས་ས་བོན་ནི། །དུག་གིས་རེག་པ་འཕྲོག་པར་བྱེད། །ཀ་ཡི་ས་བོན་སྟོང་རང་བཞིན། །ན་ཡི་མཐའ་མ་ཨཱ་ཡིག་ལྡན། །མེ་འབར་བ་ཡིས་དབང་ལྡན་ཏེ། །འཛིན་པ་ཡི་ནི་ས་བོན་ནི། །བསྐྱོད་པའི་ཁྱབ་བདག་ཆེན་པོའོ། །ཏ་ཡི་སྡེ་ཡི་བཞི་པ་ནི། །ཨཱ་ཡི་དབྱངས་ཀྱིས་བརྒྱན་པའོ། །སྲིད་པ་དང་བྲལ་བ་ཡི་གཟུགས། །ཉི་མ་ཨེ་ཡིག་ལྡན་རོ་ལངས། །ཏ་མཐའི་ས་བོན་གཟུང་བར་བྱ། །དབྱངས་ཀྱི་གསུམ་པས་མགོ་ལ་བརྒྱན། །ས་གསུམ་ཐམས་ཅད་གསོད་པའོ། །པ་སྡེ་མཐའ་ཡི་ས་བོན་ནི། །ཡིད་ཀྱི་སྨྲ་བ་རྟོག་མེད་བྱེད། །ས་མཐའིཨཱ་ཡི་ངག་ལྡན་པ། །ཐར་པའི་བཤེས་ནི་རྟོག་པའོ། །མ་གཉིས་ཧ་གཉིས་བརྗོད་པར་བྱ། །རྨོངས་པའི་རང་བཞིན་འཕྲོག་
ཅིང་འཕྲོག །པ་ཡི་ས་བོན་ཨི་ཡིག་བརྒྱན། །ཕ་ནགས་ཀུན་ཉམས་གཟུང་དེ་ཉིད། །ཤ་ཡི་ཡི་གེས་ཨི་དང་ལྡན། །སེང་གེ་ཟ་བ་ཡི་ནི་སྔགས། །ཏའི་སྔགས་སླར་ཡང་འཆི་མེད་སྐྱེ། །པ་མཐའ་ཨི་ཡི་ཡི་གེས་དགང་། །ཐིག་ལེས་ཅོད་པན་ལ་རེག་པའོ། །རྒྱ་ལ་འཆི་བ་རྟོག་པ་ཡིན། །ས་ཡིག་དབྱངས་གཉིས་བརྗོད་ཕྱིར་བརྒྱན། །སྔོན་དུ་འཕྲོག་པར་བྱེད་པའོ། །ཤ་གནས་ས་བོན་དུར་ཁྲོད་དེ། །ཏ་མཐའ་ཨི་དང་ལྡན་པ་ནི། །ཐམས་ཅད་རང་བཞིན་མེད་པའོ། །པ་སྡེའི་མཐའ་མ་ཨཱི་དབྱངས་ལྡན། །སྡང་བའི་ཡིད་ནི་འཛིན་ཆེན་པོ། །ན་ཡིག་ཨུ་སྟན་རྟོག་ཀུན་སེལ། །ཤ་སྡེའི་གཉིས་པའི་ས་བོན་ནི། །ཨཱ་ཡིག་མགོར་རེག་ཐིག་ལེ་གནས། །བྱང་ཆུབ་སྒྲུབ་པ་ཡི་ནི་སྔགས། །ཐུར་དུ་སེལ་བའི་རླུང་གིས་སོ། །ཏ་དང་ར་ཡི་ཡི་གེ་གཉིས། །ས་ནི་འཇིགས་པར་བྱེད་སྔགས་སོ། །པ་ར་ཨཱ་ཡི་ས་བོན་གཅིག །སུམ་ཅུ་རྩ་གསུམ་སྐྱོ་དུབ་འཇོམས། །ཡ་སྡེའི་མཐའ་མ་རི་མནན་པ། །ཡེ་ཤེས་ཀྱི་ནི་དག་བྱེད་དོ། །ཎ་ཡི་འགྲམ་གནས་ས་བོན་ནི། །ཨི་ཡིས་རྣ་བར་བརྒྱན་པའོ། །རྣལ་འབྱོར་པ་ཡི་མི་ཤེས་འཇོམས། །ས་ཡིག་ཨེ་ཡི་ཡི་གེས་དགང་། །དབུགས་འཆད་པ་ནི་ཉམས་པར་བྱེད། །ན་སྔགས་དབྱངས་གསུམ་མགོ་ལ་བརྒྱན། །ཆོས་དང་ཆོས་མིན་སྤོང་རང་བཞིན། །དྷ་ཡིག་ཡ་དང་སྦྱར་བ་སྟེ། །བསམ་གཏན་སྔགས་ཀྱི་རང་བཞིན་ནོ། །ཏ་སྡེའི་མཐའ་མ་གཟུང་བྱ་སྟེ། །གྲོང་ཁྱེར་ལྟར་སྣང་དངོས་པོ་མེད། །ཡ་སྡེའི་གཉིས་པའི་ས་བོན་ནི། །གཏི་མུག་རང་བཞིན་འབར་བའོ། །ས་ཡིག་ཨི་ཡི་ཡི་གེས་དབྱེ། །སེང་གེ་མ་ཧེ་འཇོམས་པའོ། །ཉི་མར་ཡང་ནི་གནས་པ་ནི། །རྣལ་འབྱོར་མ་ཀུན་རྒྱལ་པོའོ། །པ་སྡེའི་མཐའ་མ་ཨཱ་དབྱངས་བརྒྱན། །སྒྱུ་མར་སེམས་ཅན་ཀུན་དེས་འཛིན། །འཛིན་པའི་ས་བོན་ཨ་ཡིག་བརྒྱན། །དེ་ཁོ་ན་ཡི་ཡེ་ཤེས་ཐོབ། །དེ་ལྟར་རྐང་པ་བཅུ་བཞི་པོ། །སེམས་ཅན་ཀུན་གྱིས་མི་ཤེས་གསོད། །དམ་པའི་སྔགས་དངོས་གཟུགས་བདག་ཉིད། །འབྱིན་ཅིང་སྡུད་པར་བྱེད་པ་པོ། །འབྱུང་པོ་ཐམས་ཅད་འཇིགས་བྱེད་པ། །བཅོམ་ལྡན་ལྷ་ཡིས་འདི་གསུངས་སོ། །
འཁོར་ལོའི་རྣམ་པའི་གཟུགས་བདག་ཉིད། །ཕག་མོའི་ཐུགས་ཀར་བརྒྱན་པ་སྟེ། །སྟོང་ཉིད་སྙིང་རྗེ་དབྱེར་མེད་པས། །གསོད་པ་དང་ནི་མི་གསོད་པའོ། །ཀ་སྡེའི་དབུས་ན་ར་སྟན་ཅན། །གསུམ་དེའི་མགོ་ལ་ཐིག་ལེ་སྦྱིན། །ཐེག་པ་མཆོག་གི་ཆོས་ཅན་ནོ། །ཏ་སྡེའི་གཉིས་པའི་ཡི་གེ་ནི། །ཨི་ཡི་དབྱངས་དང་ལྡན་པའོ། །མུ་སྟེགས་རྣལ་འབྱོར་ཉམས་བྱེད་པའོ། །ཏ་ཡིག་རྟོགས་པར་བྱེད་པའོ། །ཏ་སྡེའི་བཞིར་གནས་ཨཱ་དང་ལྡན། །བྱང་ཆུབ་མཐའ་མེད་འཛིན་པའོ། །ར་གནས་པ་ལ་དབྱངས་གསུམ་བརྒྱན། །རྣལ་འབྱོར་མ་ཀུན་འཆད་པའོ། །ན་སྔགས་ཨི་ཡིག་གིས་བརྒྱན་པའོ། །རྣལ་འབྱོར་མ་རྣམས་ཀྱི་ལམ་མོ། །སུམྦྷ་ན་ཡི་ཚིག་རྐང་སྟེ། །ལན་གཉིས་སུ་ནི་བརྗོད་པར་བྱ། །ཚིག་དྲུག་རྟོགས་པའི་དེ་ཉིད་དོ། །དེ་བཞིན་དུ་ནི་སུམྦྷའི་སྔགས། །རྣལ་འབྱོར་མ་ཡི་མཆོད་རང་བཞིན། །ཧ་ནའི་སྔགས་ནི་ལན་གཉིས་བརྗོད། །སྡང་བའི་ཐེག་པ་ཉམས་པར་བྱེད། །པ་ར་ཨཱ་ཡི་ཡི་གེ་གཅིག །དབང་པོ་རང་རང་ངོ་བོ་གཞན། །ཎ་ཨ་ཨྃ་གི་ཡི་གེས་དགང་། །ས་བོན་འདི་ནི་ཡོན་ཏན་སྔགས། །ས་ཡིག་རྩ་ཀུན་འཛག་པའོ། །བ་ཡིག་ར་ཡི་ཡིག་བརྒྱན་རི། །པ་གནས་ནམ་མཁའ་ལ་འཇུག་པའོ། །ས་ཡི་ཡིག་གནས་ཀུན་གྱི་གཟུགས། །ཡ་སྡེའི་མཐའ་མ་ཨཱ་ཡིས་དགང་། །རླུང་ནི་སྲོག་གི་ཡེ་ཤེས་སོ། །ན་ཡིག་ཨཱ་ཡི་ཡི་གེས་དགང་། །བྱང་ཆུབ་གང་དུའང་མི་རྟོག་པའོ། །ཐིག་ལེ་མགོ་ལ་བལྟ་བར་བྱ། །བ་སྡེའི་མཐའ་མ་སྦྲང་ཆེན་གཟུགས། །ས་མཐའ་ཨཱ་ཡིས་དགང་བར་བྱ། །རྣལ་འབྱོར་མ་ཡི་ཚོགས་སྲོག་གོ། །པ་མཐའ་ཨ་དང་ལྡན་པ་ལ། །ཨྃ་གི་ཅོད་པན་བརྒྱན་པའོ། །ཆོས་ཀུན་གྱི་ནི་སྤྲིན་རང་བཞིན། །ས་ཡིག་དམ་ཆོས་མི་ཤེས་གསོད། །ཙྪེ་སྔགས་བྱང་ཆུབ་སེམས་དཔའོ། །སོང་བ་འཁོར་བར་སྐྱེ་བ་མེད། །ཏ་སྡེའི་དབུས་གནས་ས་བོན་ནི། །ང་ནི་དོན་མེད་པ་སྣང་བའོ། །ན་ལ་ཨི་དང་ལྡན་པ་སྟེ། །འཇིག་རྟེན་མ་ལུས་འཆིང་བ་ཉིད། །ཀྲོ་སྔགས་གནོན་པས་འཁོར་བ་གཅོད། །དྷ་ཡི་ས་བོན་འགྲོ་ཀུན་འཇོམས། །སྤྲོས་པ་མེད་པར་བྱེད་པའོ། །མཱུ་ཡི་ཡི་གེ་ས་བོན་ནི། །རྨོངས་པའི་འཇིག་རྟེན་ཀུན་གྱི་ལས། །དེ་ལྟར་
ཕྱེད་བཅས་ཚིག་བཅུ་བཞི། །རྩ་ཡི་འཁོར་ལོ་ཡི་ནི་མཐའོ། །བུམ་པ་ཅན་ལ་སོགས་པའི་ལས། །རྣལ་འབྱོར་གང་དང་གང་འདོད་བྱེད། །འཁོར་ལོ་དྲུག་གི་རབ་སྦྱོར་བས། །ཅི་འདོད་ལས་ཀྱི་རང་བཞིན་ཏེ། །བདག་པོ་སྦྱོར་བ་འགྲུབ་ནུས་ཅན། །བཅོམ་ལྡན་འདས་ཀྱིས་འདི་གསུངས་སོ། །གཙུག་ཏོར་ལ་སོགས་སྐྱེ་གནས་མཐར། །ལུས་ངག་སེམས་ཤེས་ནམ་མཁའ་ལས། །ལུགས་འབྱུང་ལུགས་ལས་བཟློག་པ་ཡིས། །དེ་ཉིད་བྱང་ཆུབ་རྣམས་ཤེས་བྱ། །འདིར་ནི་ཐབས་ཀྱི་ཆ་དང་ནི། །ཤེས་རབ་ཀྱི་ཡང་ཆ་རུ་བརྗོད། །ཡང་ན་ཡི་གེ་རེ་རེ་ཡི། །བར་བར་དུ་སྟེ་སླར་ཡང་ནི། །དྷི་སྔགས་ལྷན་སྐྱེས་རང་བཞིན་ཏེ། །འཁོར་ལོ་ཡི་ནི་ཁྱད་པར་གྱི། །ཉེ་བའི་ལས་རྣམས་བྱེད་པའོ། །དཾ་ཥྚྲ་ཀ་རཱ་ལི་ཡི་སྔགས། །འགྲོ་བ་རྣམས་ཀྱི་ལས་རང་བཞིན། །མ་སྔགས་ཧཱ་སྔགས་མུ་དྲེའི་སྔགས། །རྣ་བ་ཡི་ནི་རང་བཞིན་ནོ། །ཤྲཱི་ཧེ་རུ་ཀ་དེ་བ་སྱ་གྲ་མ་ཧི་ཥིའི། །སྔགས་ཚིག་སྣ་ཡི་རང་བཞིན་ནོ། །ས་ཧ་སྲ་ཤི་རེ་ཡི་སྔགས། །དབྱངས་ཀྱི་བདག་པོ་ཡི་ནི་གཟུགས། །ས་ཧ་སྲ་བཱ་ཧ་བེ་ཡི། །སྔགས་ཀྱི་ཡི་གེ་ལུས་ཀྱི་གཟུགས། །ཤ་ཏ་སའི་སྔགས་འཁོར་ལོ་གཅིག །མཁའ་འགྲོ་མའི་སྔགས་འཆི་བ་དང་། །སྐྱེ་བ་ཡི་ནི་རང་བཞིན་ནོ། །གཉིས་མེད་རྣམ་པའི་ཆོས་ལས་ནི། །གཉིས་སུ་སེམས་ཅན་འཛིན་པ་སྟེ། །ཤེས་རབ་ལ་ནི་བདེ་སྟེར་བ། །བཅོམ་ལྡན་བླ་མས་འདི་གསུངས་སོ། །ཉན་ཐོས་ལ་སོགས་མུ་སྟེགས་རྣམས། །མི་ཤེས་པ་ཡི་ཕྱུགས་ཐམས་ཅད། །དེ་རྣམས་ཡེ་ཤེས་འཐོབ་བྱའི་ཕྱིར། །ཚུལ་ལུགས་འདི་ནི་བསྟན་པའོ། །ཧ་སྲཱ་ན་ནེ་ཡི་ནི་སྔགས། །ཡུལ་གྱི་གཟུགས་ལ་རེག་པའོ། །ཛྭ་ལི་ཏ་ཏེ་ཛ་སེའི་སྔགས། །སྔགས་ཀྱི་ཚིག་ནི་ཡིད་ཀྱི་ཡུལ། །ཛྭ་ལ་མུ་ཁིའི་ཚིག་ལུས་ཡུལ། །པིང་ག་ལོ་ཙ་ན་ཡི་སྔགས། །མིག་གི་རྣམ་པར་ཤེས་པའོ། །བཛྲ་ཤ་རཱི་རེའི་སྔགས་ཚིག །ལུས་ཀྱི་རྣམ་པར་ཤེས་པའོ། །བཛྲཱ་ས་ནེ་ཡི་ནི་སྔགས། །སྣ་ཡི་ཡུལ་ལ་རེག་པའོ། །མི་ལི་ཏེ་ཡི་སྔགས་ཀྱི་ཚིག །སྣ་ཡི་རྣམ་པར་ཤེས་པའོ། །ཙི་ལི་ཏེ་ཡི་སྔགས་ཀྱི་ཚིག །དབྱངས་ཀྱི་
བདག་པོ་ཡི་ནི་ཡུལ། །ཧེ་སྔགས་གཉིས་བརྗོད་སྒྲ་ཡི་ཡུལ། །སྒྲ་དང་དབྱངས་གཉིས་ཀྱི་རྣམ་ཤེས། །དེ་ལྟར་སྔགས་ཚིག་ཕྱེད་བཅས་བདུན། །འཆི་དང་སྐྱེ་བ་ཀུན་གྱི་གཟུགས། །ཕག་མོ་ལ་ནི་བདེ་དགའ་བའི། །བཅོམ་ལྡན་བདག་པོས་འདི་གསུངས་ཏེ། །བོ་ལ་ཀཀྐོལ་སྦྱོར་བདག་ཉིད། །ཡུལ་དང་དབང་པོ་སོགས་གསོད་པའོ། །སེམས་ཅན་གང་དང་གང་རྣམསཀྱི། །ཡུལ་གྱི་ཆུ་སྐྱེས་ལས་སྐྱེས་ཏེ། །སེམས་ཅན་དེ་དང་དེ་རྣམས་ཀྱི། །རང་རང་ལས་རྣམས་ཀྱིས་གསོད་པའོ། །ཡུལ་ལ་སོགས་པ་འཇོམས་པས་ན། །ཤེས་རབ་འཁོར་ལོ་དེ་བཤད་དོ། །རྒྱུད་དང་རྒྱུད་རྣམས་ཀྱི་ནི་ལས། །སྒྲུབ་པའི་སྙིང་པོའི་ཡེ་ཤེས་སོ། །ས་མཐའ་དྲུག་པའི་དབྱངས་སྟན་ཅན། །ཟླ་དུམ་ཐིག་ལེས་མགོ་ལ་བརྒྱན། །ལན་གཉིས་སུ་ནི་བརྗོད་པར་བྱ། །རྡོ་རྗེ་སེམས་དཔའ་གསང་བའི་གཟུགས། །ཁ་གཉིས་དྷུ་གཉིས་མུ་རུ་གཉིས། །ལས་རྣམས་ཀྱི་ནི་དངོས་པོ་སྟེ། །སྲོག་དང་མཉམ་དུ་གནས་པའོ། །ཨ་དྭཱི་ཏེ་མ་ཧཱ་ཡོ་གི་ནཱི། །པ་ཐི་ཏ་སིདྡྷེའི་སྔགས་ཀྱི་ཚིག །དེ་ཡང་ལུས་མཐའ་ཡི་ནི་གཟུགས། །དྲེ་ངྷྃ་ཚིག་གཉིས་གྲྃ་ཚིག་གཉིས། །ཧེ་ཡི་ཚིག་གཉིས་ཧ་ཚིག་གཉིས། །ཁྲོ་བཅུའི་ཡི་གེ་གཤིན་རྗེ་ནི། །མཐར་བྱེད་ལ་སོགས་ཀྱིར་གོ་བྱ། །པ་སྡེའི་བཞི་པའི་ས་བོན་ལ། །ཨཱི་ཡིག་མགོ་ལ་རེག་པའོ། །མེ་སའི་སྔགས་ནི་ཚིག་ཀུན་ཏེ། །མཁའ་འགྲོ་མ་ཡི་རང་བཞིན་ནོ། །དེ་ལྟར་སྔགས་ཚིག་བཅུ་གཉིས་ནི། །རྟེན་འབྲེལ་བཅུ་གཉིས་སླུ་བ་སྟེ། །སྟོན་པ་དམ་ཚིག་ཆེན་པོ་གཙོ། །བཅོམ་ལྡན་འདས་ཀྱིས་འདི་གསུངས་སོ། །རྟེན་འབྲེལ་ཡན་ལག་བཅུ་གཉིས་ཀྱི། །ལས་ཀྱིས་ལྷན་ཅིག་རྨུགས་བྱེད་པའོ། །ཕོ་ཉ་རྣམས་བསྐྱེད་པའི་ཡི་གེ། །འཁོར་ལོའི་རྣམ་པའི་རང་བཞིན་ཅན། །འཁོར་ལོ་ཡི་གེ་མིན་དེ་ལྟར། །ཕོ་ཉའི་རང་བཞིན་མེད་པའོ། །རྣམ་སྨིན་དེ་ལས་རྣམ་སྐྱེས་པ། །སོ་སོའི་མིང་དུ་འདུ་ཤེས་ཏེ། །འཇམ་རྡོར་ལ་སོགས་དངོས་པོ་ཡིས། །ཨ་བ་དྷཱུ་ཏཱིའི་མཚན་ཉིད་བྱ། །ཧཱ་ས་ཧཱ་དཔའ་བོ་གཅིག་སྔགས་ཚིག །དེ་བཞིན་གཤེགས་དྲུག་ས་བོན་ཏེ། །ཡོན་ཏན་མཐའ་མེད་འཆད་པའོ། །ཧཱ་ཡི་ས་
བོན་ཡི་གེ་བཞི། །ཧོ་གཅིག་ཧོ་གཉིས་བརྗོད་པར་བྱ། །ཡི་གེ་བདུན་པོ་ལྤགས་སོགས་ཁམས། །ཏྲཻ་ལོ་ཀྱ་བི་ནཱ་ཤའི་སྔགས། །སྡང་བ་ལ་ནི་གོ་ཆའོ། །ཤ་ཏ་ས་ཧ་སྲ་ཀོ་ཊི། །ཏ་ཐཱ་ག་ཏ་པ་རི་བཱ་རེ། །ས་མཐའ་ཨཱུ་ཡི་དབྱངས་ཀྱིས་སྤྲས། །ཟླ་བའི་དུམ་བུ་ཐིག་ལེས་བརྒྱན། །དེ་ལྟར་སྔགས་ཀུན་ཉེར་སྡུད་པའོ། །ཧ་ཨཱུ་ཨཾ་སྔགས་ཀྱི་རང་བཞིན། །དེ་ལྟར་སྔགས་ཀྱི་ཚིག་ནི་བཞི། །རྣལ་འབྱོར་མ་སྐྱེད་དངོས་གྲུབ་འགྱུར། །བཀས་གནང་དངོས་གྲུབ་རབ་འཇུག་པ། །བཅོམ་ལྡན་དཔའ་བོས་འདི་གསུངས་སོ། །མཁའ་འགྲོ་སྡོམ་པ་མངོན་བརྗོད་དང་། །གཞན་ཡང་རྣལ་འབྱོར་མའི་རྒྱུད་དང་། །རྣལ་འབྱོར་རྒྱུད་རྣམས་སུ་གསུངས་པའི། །ལས་ཀྱི་ཚོགས་ཀྱི་དངོས་གྲུབ་སྟེར། །བཀས་གནང་འཁོར་ལོའི་རབ་སྦྱོར་བས། །འགྲུབ་འགྱུར་སྦྱོར་བ་གཞན་གྱིས་མིན། །སླར་ཡང་ས་མཐའ་དབྱངས་ལྔ་པའི། །དྲུང་ན་གནས་པའི་སྟན་ཅན་ལ། །ཟླ་དུམ་ཐིག་ལེས་བརྒྱན་པའོ། །ཆོ་གས་དེ་ཁོ་ནའི་ས་བོན། །པ་དྲུང་གནས་པ་རྣལ་འབྱོར་མའི། །ཚོགས་ནི་སྐྱེད་པར་བྱེད་པའོ། །ཊ་ཡིག་འབར་བར་བྱེད་པའི་སྔགས། །སིང་ཧ་རུ་པེ་ཁཿསྔགས་ཚིག །བགེགས་ཀྱི་གཙོ་བོ་རླག་བྱེད་པའོ། །ག་ཛ་རཱུ་པེ་གཿཡི་སྔགས། །སེམས་ཅན་ཀུན་གྱི་བགེགས་བྱེད་པའོ། །ཏྲཻ་ལོ་ཀྱོ་ད་རེ་ཡི་ཚིག །རབ་མཆོག་ཕོ་ཉ་ཀུན་སྐྱེད་པའོ། །ས་མུ་དྲ་མེ་ཁ་ལེ་གྲ་ཧ་གཉིས་ཀྱི་ཚིག །རྒྱ་མཚོ་ལྟ་བུའི་སྐ་རགས་སྤྲས། །དེ་ནི་སྔགས་ཀྱི་སྐ་རགས་སོགས། །ཧཱུྃ་དང་ཕཊ་ཀྱི་ཡི་གེ་ནི། །མཁའ་འགྲོ་མ་ཡི་ཁྱབ་བདག་གོ །བཱི་རཱ་དྭཱི་ཏེ་ཧཱུྃ་སྔགས་ཚིག །ཐབས་དང་ཤེས་རབ་གཉིས་མེད་ལས། །ཐ་མལ་འདུས་བྱས་སྐྱེས་པའོ། །དེ་ལྟར་རྐང་པ་བདུན་སྔགས་ཏེ། །ཡེ་ཤེས་ས་ཡི་རང་བཞིན་གྱི། །བཅོམ་ལྡན་རྡོ་རྗེས་འདི་གསུངས་ཏེ། །སེམས་ཅན་ལས་ལས་གྲུབ་པའི་མཐར། །དེ་ཡི་གོ་འཕང་མཆོག་ཏུ་འགྲོ། །སངས་རྒྱས་རྡོ་རྗེ་འཆང་བའི་མིང་། །སླར་ཡང་སྐྱེ་ཞིང་ལམ་ལ་གནས། །སྒྱུ་མའི་རྣམ་པ་སྒྱུ་མ་ཡིན། །རང་གི་བདག་ཉིད་སོ་སོར་རིག །ཧཱུྃ་ཧཱ་གཉིས་མ་ཧཱ་པ་ཤུ་མོ་ཧ་ནི། །ཚིག་ནི་འཁོར་བའི་རྨོངས་པའོ། །ཡོ་གཱི་ཤྭ་རཱི་ཏྭྃ་གི་སྔགས། །ཞི་བ་ཡི་ནི་
གཟུགས་སུའོ། །ཌཱ་ཀི་ནཱི་ལོ་ཀཱ་ནཱཾ་བན་དྷཱ་ནིའི་ཚིག །འཇིག་རྟེན་བྱང་ཆུབ་ཏུ་འཇུག་བྱེད། །ས་ཏྱ་མེ་ཧཱུྃ་ཕཊའི་སྔགས་ཀྱི་ཚིག །མཐའ་བཞི་པོ་ནི་སྟོན་པའོ། །བྷཱུ་ཏ་ཏྲཱ་ས་ནི་ཡི་ཚིག །མུ་སྟེགས་ཡེ་ཤེས་འཇོམས་པའོ། །དེ་ལྟར་སྔགས་ཚིག་བདུན་པོས་ནི། །ལས་ཀྱི་དབྱེ་བ་བྱེད་པ་སྟེ། །པད་ལྟེའི་འདབ་མ་རེ་རེ་ལ། །སྔགས་ཀྱི་ཡི་གེ་རྣམས་གནས་པའོ། །དཔའ་བོའི་སྔགས་ཀྱི་གཟུགས་གནས་པའོ། །བཅོམ་ལྡན་འདས་ཀྱིས་འདི་གསུངས་སོ། །འཁྲུལ་འཁོར་ཆེན་པོ་བཅུ་གཉིས་དེ། །བདག་གི་མཛའ་བོ་ཡིས་ནི་གསུངས། །ལས་ཐམས་ཅད་ཀྱི་འཁྲུལ་འཁོར་ནི། །བཅུ་གཉིས་རྣམས་ཀྱིས་ལྷན་ཅིག་བྱ། །འཁོར་ལོ་ཆེན་པོ་རེ་རེ་རུ། །ངེས་པར་སོ་སོའི་ལས་བྱའོ། །ཕྲད་པ་རྣམས་ནི་བཅུ་གཉིས་སུ། །བསྒྲུབ་བྱའི་མིང་གིས་བསྒྲུབ་པར་བྱ། །པ་མཐའ་ས་མཐའ་ཨཱ་དང་ལྡན། །ཡ་མཐའ་ཨཱི་ཡི་དབྱངས་དང་བཅས། །རེ་ཡིག་ན་མཐའ་ར་ཡིག་དང་། །པ་མཐའ་དང་ནི་སིདྡྷེའི་ཚིག །པིདྱེའི་ཚིག་དང་ཤྭ་རིའི་སྔགས། །པའི་དྲུང་མ་དང་ཊ་ས་བོན། །ཧཱུ་ལ་ཟླ་དུམ་ཐིག་ལེས་བརྒྱན། །བསྐྱར་ལ་ཡང་ནི་བརྗོད་པར་བྱ། །པའི་དྲུང་གནས་དང་ཊ་ཡིག་སྟེ། །ཧཱུྃ་ཕཊ་དང་ནི་སྭཱ་ཧཱ་བཅས། །སྔགས་འདིས་ལྟེ་བར་ཆོ་ག་ཡིས། །བསྒྲུབ་བྱ་མིང་དང་བཅས་པར་བརྗོད། །བཅུ་གཉིས་རྣམས་དང་ལྟེ་བཅས་པ། །དེ་བཞིན་གཤེགས་པས་འདི་གསུངས་སོ། །ས་བོན་ཡི་གེ་ཉི་ཤུ་བཞི། །པུལླཱི་ར་སོགས་བསྲེས་པའོ། །དཔལ་ཧེ་རུ་ཀ་རྡོར་ཕག་མོ། །མ་བྱུང་འབྱུང་བར་མི་འགྱུར་རོ། །སྔགས་འདི་ཡི་ནི་མཐུ་སྟོབས་ནི། །བྱེ་བ་སྟོང་ཕྲག་གསུངས་པ་ཡི། །མཐའ་མེད་གཞུང་ལས་དཔའ་བ་ཡིས། །དེ་བཞིན་སྙིང་པོ་བསྡུས་པ་ཡིན། །རྒྱུད་གཞན་དུ་ནི་གསུངས་པའི་སྔགས། །སྔགས་འདི་ཡི་ནི་སྒྲུབ་ཐབས་སོ། །བཟླས་མེད་གྲངས་མེད་ཡི་གེ་མེད། །གཟུགས་མེད་བསམ་གཏན་དེ་བཞིན་མེད། །ལྷ་དྲན་པ་ཡི་ཡེ་ཤེས་ཀྱིས། །དངོས་གྲུབ་ཐམས་ཅད་སྐྱེད་པའོ། །དབུགས་འཇུག་པ་ཡི་དུས་སུ་ནི། །ཡི་གེ་ཐམས་ཅད་གསད་པར་བྱ། །འབྱིན་པ་རྣམས་ཀྱིས་སྦྱོར་ཀུན་བྱེད། །འབྱུང་བའི་དུས་སུ་ཤེས་པར་བྱ། །གནས་དུས་རྣལ་འབྱོར་
དབང་ཕྱུག་གི། །སངས་རྒྱས་ཞིང་ནི་འདོད་མི་བྱ། །དབུགས་རྒྱུ་དེ་ལྟར་ཤེས་བྱ་སྟེ། །བྱིས་པའི་རྣལ་འབྱོར་པས་མི་རྟོགས། །གང་གི་སློབ་མ་དབང་བསྐུར་བ། །དེ་ཉིད་བཞི་རྣམས་བཅས་པས་སོ། །ཐེག་པ་ཆེན་པོར་ཡོངས་སྨིན་ལ། །ཕྱི་ནས་སྔགས་ནི་རབ་བསྟན་བྱ། །སྔོན་དུ་ཕག་མོའི་དཀྱིལ་འཁོར་ནི། །བྲི་བྱ་དེ་ནས་ཧེ་རུ་ཀའིའོ། །རྡོ་རྗེའི་བུ་མོའམ་དེ་ནས་གཞན། །དེར་ནི་ཤེས་རབ་གཞུག་པར་བྱ། །རྒྱུད་གཞན་དུ་ནི་དབང་བསྐུར་ལ། །ཚུལ་འདི་བསྟན་པར་མི་བྱའོ། །ཡེ་ཤེས་ཤེས་བྱའི་རང་བཞིན་ཅན། །ཨ་བ་དྷཱུ་ཏཱིར་དཀྱིལ་འཁོར་བྱ། །ཡེ་ཤེས་རྣམ་པ་ཕག་མོ་ཡིས། །ཤེས་བྱ་དཔལ་ཧེ་རུ་ཀར་འཁྱུད། །སྤྱན་གསུམ་དྲག་པོའི་གཟུགས་ཅན་མ། །ཞལ་བཞི་མཆེ་བ་གཙིགས་པ་སྟེ། །ཕྱག་ནི་བཅུ་གཉིས་རྣམས་དང་ལྡན། །དཀར་མོ་དང་ནི་འཇིགས་བྱེད་གནོན། །སྐུ་ལ་ཕྱག་རྒྱ་ལྔ་ལ་སོགས། །འཇིག་དུས་མེ་ལྟའི་འོད་ཟེར་ཅན། །ཕྱག་གཡས་རྡོ་རྗེ་དང་གྲི་གུག །དགྲ་སྟ་ཌཱ་རུ་དེ་བཞིན་དུ། །རྩེ་གསུམ་ལུས་མེད་པགས་པ་སྟེ། །ཕྱག་གཡོན་པས་ཀྱང་དེ་བཞིན་ནོ། །གཡོན་དུ་དྲིལ་བུ་ཐོད་པ་དང་། །ཞགས་པ་ཁ་ཊྭཱཾ་ག་དང་མགོ། །དབུ་སྐྲ་གྲོལ་ཞིང་གཅེར་བུ་མ། །མགོ་བོའི་ཕྲེང་བ་འཛིན་པ་མོ། །སྒེག་པའི་རྒྱན་རྣམས་དང་ནི་ལྡན། །དབུ་ལ་ཐོད་པའི་ཕྲེང་བ་ཅན། །འདོད་ཆགས་རྡོ་རྗེས་རྒྱས་བཏབ་སྟེ། །ཡང་ན་ཧེ་རུ་ཀ་ཡིས་སོ། །ཡན་ལག་ལྷ་རྫས་དྲིས་ཉེར་བྱུགས། །ཞབས་གདུབ་དཔུང་རྒྱན་རྣམས་དང་ལྡན། །ལྷ་རྫས་མེ་ཏོག་ཕྲེང་བས་བཀླུབས། །རྩེ་བྲན་ཟླར་གནས་རྡོ་རྗེ་ནི། །དཔྲལ་བར་རྟག་ཏུ་འཛིན་པ་མོ། །གཡས་བརྐྱང་བ་ཡི་ཞབས་དང་ལྡན། །རྣལ་འབྱོར་མ་ཡི་ཚོགས་མདུན་དུ། །སྐུ་ལས་འབར་བའི་ཕྲེང་བ་སྤྲོ། །ཧེ་རུ་ཀ་མིག་སྨན་ནག་པོ་འདྲ། །རལ་པའི་ཅོད་པན་མདུན་དུའོ། །སྟག་གི་པགས་པའི་ཤམ་ཐབས་ཅན། །ཕྱག་རྒྱ་ལྔ་ཡིས་རྣམ་པར་བཀླུབས། །དཔའ་བོ་ཐོད་པའི་ཕྲེང་བ་ཅན། །སྣ་ཚོགས་རྡོ་རྗེ་ཟླ་ཕྱེད་ལྡན། །སྤྱན་གསུམ་མཆེ་བ་གཙིགས་པ་སྟེ། །ཞལ་བཞི་པ་ལ་འཇིགས་པར་བྱེད། །ཕྱག་བཅུ་གཉིས་པར་རིག་པར་བྱ། །བརྒྱ་ཕྱེད་མགོ་བོས་བརྒྱན་པ་སྟེ། །
མཆོད་ཕྱིར་ཐོགས་དང་ཐལ་བ་དང་། །འབར་བའི་ཕྲེང་ཅན་གཙིགས་པ་པོ། །སྐྱེ་གནས་ཕྱག་རྒྱ་ཕྱག་གཉིས་ཀྱིས། །ལྷག་མ་རྡོ་རྗེ་ཕག་མོའིའོ། །གལ་ཏེ་ཧེ་རུ་ཀ་གཙོ་བོ། །དེ་ཚེ་ཕག་མོའི་ཕྱག་གཉིས་སུའོ། །གླང་པོའི་པགས་པ་འཛིན་པ་པོ། །ཐབས་དང་ཤེས་རབ་བདག་ཉིད་དེ། །ཟག་མེད་རྣལ་འབྱོར་བདེ་ཆེན་བཟང། །སྲིད་དང་མྱ་ངན་འདས་པའི་གཟུགས། །གཉིས་པོ་སྙིང་པོར་སྦྱིན་པར་བྱ། །ལྷག་མ་རྣལ་འབྱོར་མ་རྣམས་ནི། །མཁའ་འགྲོ་མ་སོགས་རིམ་ཇི་ལྟར། །ཐོད་དུམ་ལ་སོགས་སྔགས་རིག་པས། །དཔའ་བོ་ཀུན་ཀྱང་སྦྱིན་པར་བྱ། །རེ་རེ་ཡི་ཡང་དེ་ཡི་རྒྱུད། །ཇི་ལྟར་སྔོན་གྱི་རྗེས་སུའོ། །བརྐྱང་མ་དང་ནི་རོ་མའི་རྩ། །ཤེས་རབ་དང་ནི་ཐབས་འདུ་བའི། །རྟེན་ནི་ཨ་བ་དྷཱུ་ཏཱི་སྟེ། །གང་དེར་རོ་མཉམ་སོན་པའོ། །འཁོར་ལོ་གསུམ་གཉིས་འགྱུར་ཤེས་བྱ། །མཁའ་འགྲོ་མ་སོགས་རིམ་ཇི་བཞིན། །ཧེ་རུ་ཀ་དང་རྡོར་ཕག་མོ། །འབུམ་ཚོ་སྟོང་ཕྲག་ཕྱག་ཅན་ཏེ། །ཕྱག་གཉིས་ལ་སོགས་ནས་བརྩམས་ནས། །གཞན་ནི་གང་རྣམས་དེ་རྣམས་སོ། །དབང་པོའི་ཡུལ་ནི་མི་ལྟ་ཞིང་། །ཕྱག་དང་བཞུགས་ཚུལ་ལ་སོགས་མིན། །བསྒོམས་པས་སྤྲོས་པ་ཀུན་བཟུང་སྟེ། །གཏི་མུག་དེ་ནི་སྤང་བར་གྱིས། །སྐད་ཅིག་རྣམ་པའི་རྣལ་འབྱོར་བདག །སྐད་ཅིག་ལ་སོགས་དེའི་སྦྱོར་ཅན། །སྙིང་གར་ས་བོན་རྣམ་པར་དགོད། །སྤྲོ་དང་བསྡུ་བ་ལ་སོགས་བྱ། །དཀྱིལ་འཁོར་སྤྱན་དྲངས་མཆོད་པ་དང་། །སྡིག་པ་བཤགས་པ་ལ་སོགས་ཏེ། །སྟོང་ཉིད་ལ་སོགས་རི་རབ་མཐར། །ར་བ་དང་ནི་གུར་ལ་སོགས། །ས་ཡི་ཆར་ནི་རྡོ་རྗེའི་ཐིག །འཁོར་ལོ་དྲུག་ཏུ་བྲི་བའོ། །ཇི་ལྟའི་མངོན་རྟོགས་མཚན་ཉིད་ཀྱིས། །རྣམ་པ་སྣ་ཚོགས་ཐམས་ཅད་བྱ། །ཐབས་དང་མན་ངག་ཐམས་ཅད་ནི། །མཛེས་མ་བདག་གིས་ཀུན་བཤད་དོ། །དེར་ནི་གཏོར་མ་སྦྱིན་བྱ་སྟེ། །ས་སོགས་ལྔ་རྣམས་ཀྱིས་མཆོད་བྱ། །ཡི་གེ་འབར་བའི་ཡིག་རྣམས་ཀྱིས། །སྔགས་ཀྱི་བཟླས་པ་ཡང་བྱའོ། །འབར་བའི་གཉིས་འཕེལ་ཡིག་རྣམས་ཀྱིས། །སྲོག་གི་གཏུམ་མོ་སྦར་བར་བྱ། །སྟེང་དུ་ཁ་བལྟས་རྩ་བསྲེག་སྟེ། །དེ་བཞིན་ཡེ་ཤེས་མཁའ་འགྲོ་སྐྱེས། །མཁའ་འགྲོ་
མ་སོགས་མ་ལུས་དང་། །རྣམ་པར་ཤེས་ལ་སོགས་ཐིམ་པས། །བསྲེགས་པས་རི་བོང་ཅན་ཧཾ་འཛག །དཔའ་བོ་ཐམས་ཅད་མཉམ་སྦྱོར་བ། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྡོ་རྗེ་ཕག་མོ་སྐྱེད་པ་དང་གཙོ་མོ་དང་འཁྲུལ་འཁོར་གྱི་འཁོར་ལོ་དང་། དཀྱིལ་འཁོར་སྒོམ་པ་ལ་སོགས་པའི་རང་བཞིན་ཏེ། འདི་ནི་ལེའུ་གཉིས་པའོ།། །།དེ་ནས་མཁའ་འགྲོ་མ་སོགས་ཀྱི། །ཇི་ལྟར་བསྐྱེད་པ་རབ་བཤད་བྱ། །མཁའ་འགྲོ་མ་ཡི་སྦྱོར་བརྟེན་ནས། །བཅོམ་ལྡན་འདས་ནི་མཆོག་ཏུ་རྩེན། །ཕག་མོའི་གཟུགས་ནི་མཐའ་ཡས་པའང་། །སྤྲོས་པ་དྲ་བའི་སྡོམ་པའོ། །ལུས་ཀྱི་དངོས་པོའི་དབྱེ་བ་ཡིས། །མཐའ་ཡས་གཟུགས་ཅན་མཁའ་འགྲོ་མ། །ལུས་ཀྱི་བདེ་བ་ལ་བརྟེན་ནས། །འདོད་པ་རྣམ་པ་གསུམ་དུ་འགྱུར། །དགའ་བ་གསུམ་དང་རྩ་གསུམ་སྟེ། །བཞི་པ་ལྷན་ཅིག་སྐྱེས་པར་འདོད། །སངས་རྒྱས་སྐུ་ཡི་ཉམས་ཆེན་པོ། །དེའི་རང་བཞིན་ལས་སྣ་ཚོགས་འཕྲོ། །མཁའ་འགྲོ་མ་ཡི་གནས་བརྟེན་ནས། །དཀྱིལ་འཁོར་འཁོར་ལོའི་རང་བཞིན་ནོ། །འཛམ་བུ་གླིང་ནི་ཆེན་པོ་ཡི། །དུམ་བུ་བཅུ་གཉིས་ཀྱི་དབུས་སུ། །ཤར་གྱི་ཡུལ་དུ་གནས་ལྷ་མོ། །དུས་སྦྱོར་རོ་ཧི་ཏ་ཆུ་སྲིན། །རྒྱལ་དང་ཉི་མ་དགའ་སྐྱེད་དང་། །རྩ་ཡི་དངོས་པོ་སྲོག་འབབ་པའོ། །ལྷ་མོ་ཕྱི་ནང་བདག་ཉིད་དུ། །བཅོམ་ལྡན་གཟུགས་ཅན་མ་གནས་ཏེ། །ཕྱག་བཞི་མ་ལ་ཁ་དོག་གནག །སྤྱན་གསུམ་པ་ལ་ཞལ་གཅིག་མ། །མཆེ་བ་གཙིགས་ཤིང་དྲག་པ་སྟེ། །ཕྱག་རྒྱ་ལྔ་མངོན་འཛིན་པ་མོ། །རོ་ལ་ཞོན་མ་སྐྲ་གྲོལ་མ། །གཡས་བརྐྱང་ཞབས་དང་ལྡན་པ་མོ། །དྲག་མོ་ཐོད་པའི་ཕྲེང་ཅན་མ། །གཡས་པ་ཌཱ་རུ་གྲི་གུག་ཅན། །གཡོན་པར་ཐོད་པ་ཁ་ཊྭཱཾ་ག །སྤྲོ་ཞིང་སྡུད་པའི་སྐུ་ཅན་མ། །སུམ་ཅུ་རྩ་བདུན་བདག་ཉིད་ཀྱི། །དཀྱིལ་འཁོར་དབུས་སུ་གཞག་པར་བྱ། །སྙིང་པོ་ཡི་གེ་ཉི་ཤུ་གཉིས། །མཁའ་འགྲོ་མ་དང་བཅས་ཁ་སྦྱོར། །ༀ་
ཤྲཱི་ༀ་བཛྲ་བཛྲ་ཧེ་ཌཱ་ཧེ་ཀི་རུ་ནཱི་རུ་ཡེ་ཀཾ་ཧཱུྃ་ཌཱ་ཧཱུྃ་ཀི་ཕ་ནཱི་ཊ་ཛཱ་ཕ་ལ་ཊ་སཾ་སྭཱ་བ་ཧཱ་ར་ཧཱུྃ་ཧཱུྃ་ཕཊ་སྭཱ་ཧཱ། དཀྱིལ་འཁོར་པ་ཡི་ལྷ་མོ་རྣམས། །ཡི་གེ་རྡོ་རྗེ་ཅན་དུ་འདོད། །མཁའ་འགྲོ་མ་ཐོག་འཇོམས་པའི་མཐར། །རིགས་ཀྱི་རྩར་ནི་རབ་ཏུ་གྲགས། །མཁའ་འགྲོ་མའི་གནས་བསྒྲུབས་ནས་སུ། །དེར་ནི་ཕག་མོ་གནས་པར་འགྱུར། །སུམ་ཅུ་རྩ་བདུན་ལྷ་རྣམས་ནི། །རང་འདྲའི་ཐབས་དང་གཉིས་མེད་བདེ། །མིང་གི་སྦྱོར་བས་ཤེས་བྱ་བ། །དགོས་པ་རྣམ་མང་མན་ངག་གོ། །སུམ་ཅུ་རྩ་བདུན་གྱི་ནི་རྒྱུད། །བདེ་བ་ཆེ་ལས་སྐྱེད་པར་འགྱུར། །གང་ཕྱིར་བདག་པོ་མཁའ་འགྲོ་མ། །རྒྱུད་དེ་མཁའ་འགྲོ་མའི་རིགས་སོ། །བདག་པོ་ཁྱོད་ལ་བདག་འདིའོ། །ཇི་ལྟར་བདག་གིས་བསྐྱེད་འགྱུར་བ། །མཁའ་འགྲོ་མ་ལ་བདེ་སྟེར་བའི། །བཅོམ་ལྡན་འདས་ནི་མཉེས་བྱས་ནས། །ཁྱོད་བསྐྱེད་པ་ནི་བཤད་ཀྱིས་ཉོན། །རང་གི་རྒྱུད་ནི་མ་ཉམས་པ། །ཌཱ་ཡིག་གསང་བའི་བུག་བདག་ཉིད། །གཞུ་ཡི་རྣམ་པ་སྲོག་དང་ལྡན། །ལུས་ཀྱི་གཟུགས་ཅན་ཡང་དག་པ། །ཡུལ་དང་དབང་པོའི་བདག་ཉིད་ཅན། །བྱང་ཆུབ་སེམས་ཀྱི་ཐིག་ལེ་ཆེ། །རྒྱུད་ཨི་ཞེས་བྱའི་མིང་ཅན་ཏེ། །འགྲོ་དང་འོང་བའི་པད་ཆེན་དུ། །རྩ་ཡི་འཁོར་ལོ་ལ་ཁྱབ་འགྱུར། །ཀ་ཡིག་ཀ་གཟུགས་ཀྱང་དེ་བཞིན། །འོད་གསལ་སྤྲུལ་བྱ་སྤྲུལ་པའོ། །ཕྲིན་ལས་ཀྱི་ནི་ཁམས་ཀུན་གྱི། །ཞི་བའི་གཟུགས་ཀྱིས་འགྲོ་བ་ཆེ། །དགའ་བ་མེད་མཛེས་མི་འགྱུར་ཀྱང་། །བརྗོད་མིན་ལྷན་སྐྱེས་ཚོན་གྱིས་འཚེད། །མི་གཟུགས་རྟག་ཏུ་བདེ་ཆེན་པོས། །སྒྱུ་འཕྲུལ་ངེས་པར་འཕྲོ་བར་འགྱུར། །ཨཱི་ནི་འབྱུང་པོ་ཆེ་ཀུན་དང་། །དབང་ཕྱུག་ལ་སོགས་སུ་ནི་སྟོན། །ལུག་དང་དམར་སེར་ཡིད་བཟང་གིས། །དེ་ཡི་གཞི་ནི་བསྐྱེད་པར་འགྱུར། །འདི་ནི་མཁའ་འགྲོ་མ་ཡི་མིང་། །ལས་ཀྱི་དུས་བཞིན་མཚོན་པར་བྱ། །ཀླུ་རྣམས་ཡང་དག་དགུག་བྱ་དང་། །ཆར་འབེབས་གཞུག་ཕྱིར་བཞུ་བ་དང་། །ལྷ་རྣམས་དང་ནི་འབྱུང་པོ་ཀུན། །རྒྱལ་པོ་རྣམས་ཀྱིའང་འཕྲུལ་ཆེན་དང་། །དབང་དང་མངོན་སྤྱོད་རེངས་པ་དང་། །བསད་དང་བསྐྲད་པ་ལ་སོགས་པ། །མངོན་སྤྱོད་དུས་ལས་ཤེས་པར་བྱ། །
རང་རང་གླིང་དུ་བསྐྱེད་པ་སྟེ། །ཤེས་རབ་ཐབས་ཀྱི་སྙོམས་འཇུག་པས། །སྟོང་ཉིད་སྙིང་རྗེའི་བདག་ཉིད་ཀྱི། །རྣལ་འབྱོར་དབང་པོས་སེམས་ཕྲ་ཞིང་། །ཤིན་ཏུ་ཕྲ་བས་དེར་འཇུག་འགྱུར། །སེམས་ཅན་དོན་དུ་དེ་དང་དེར། །རང་བདག་སྦྱོར་བས་མཛད་པར་འགྱུར། །སྟོང་གསུམ་སྟོང་ནི་ཆེན་པོ་རུ། །གང་དུ་ཁྱབ་བདག་ཀུན་སྤྱོད་འགྱུར། །དེར་ནི་དུམ་བུ་བཅུ་གཉིས་སུ། །རང་རང་གཙོ་མོ་རྣལ་འབྱོར་མ། །ཐིམ་དང་ལོངས་སྤྱོད་སྤྱོད་རྣམས་སུ། །རྫུ་འཕྲུལ་ཆེ་རྣམས་ཀུན་སྤྱོད་འགྱུར། །ཉི་ཁྲི་བརྒྱ་ཕྲག་བཅུ་དྲུག་གི། །དབུགས་རྒྱུ་བར་ནི་ཤེས་པར་བྱ། །བརྒྱ་ཕྲག་བཅྭ་བརྒྱད་སྲོག་རྣམས་ཀྱིས། །འཕོ་བར་འདིར་ནི་བརྗོད་པར་བྱ། །བཅུ་གཉིས་རྣམས་ནི་ཉིན་ཞག་འགྱུར། །དུས་སྦྱོར་བཅུ་གཉིས་རིམ་ལས་སོ། །དུས་སྦྱོར་གསུམ་བསྒྱུར་བྱས་ནས་ཀྱང་། །དུས་ཀྱི་ཕོ་ཉ་མོ་ཀུན་སྤྱོད། །དུས་བརྒྱའི་ཕྱེད་ཀྱིས་ཕོ་ཉ་མོ། །རེ་རེ་རྣམ་པར་ཤེས་པར་བྱ། །ལྔ་བཅུ་གསུམ་གྱིས་ཡང་དག་པར། །ཉིན་ཞག་གཅིག་ལ་སྤྱོད་པའོ། །དེ་རྣམས་ཡི་གེར་ཡང་དག་བཤད། །ཨ་ཡིག་ལ་སོགས་ཀྵ་མཐའ་ཅན། །ཡོན་ཏན་འཕར་མ་ཡིན་བསྟན་པས། །གསུམ་བསྒྱུར་བརྒྱ་ཕྲག་ཕྱེད་དང་བཅས། །དེ་རྣམས་ཕོ་ཉ་མོར་ངེས་བཤད། །འདི་ནི་མཁའ་འགྲོ་མ་ཕྱག་རྒྱ། །མཁའ་སྤྱོད་མ་དང་ས་སྤྱོད་གཞན། །ས་འོག་རྣམས་ནའང་གནས་པ་མོ། །རྣལ་འབྱོར་མ་རྣམས་རྣམ་གསུམ་ནི། །ཞིང་སྔགས་ལྷན་ཅིག་སྐྱེས་རང་ངོ་། །གང་ཞིག་གང་གིས་ལྷག་གནས་པ། །དེ་ནི་དེ་ཡིར་གསལ་མཐོང་འགྱུར། །རིགས་ཀྱི་ཁྱད་པར་ལ་བརྟེན་ནས། །འདོད་པའི་སྦྱོར་སྐྱེས་གནས་པ་ཅན། །ཙ་རུའི་བཟའ་བ་དེ་རྣམས་སུ། །ཡེ་ཤེས་གཟུགས་ཅན་ཕྱུགས་ཆེན་པོ། །བཟའ་མིན་བཟའ་བྱ་དེར་ཡང་ནི། །མཚོན་མིན་གསལ་བར་མཚོན་པར་བྱ། །མཚན་ཉིད་མཚན་ཉིད་མིན་པ་སྤོང་། །དེ་ནི་སྤོང་བར་རབ་སྤོང་བའོ། །རྗེས་འཛིན་ཚར་གཅོད་ལ་ཆགས་པའང་། །གང་ཞིག་གང་གིས་རང་རང་དངོས། །སངས་རྒྱས་དང་ནི་ཆོས་གནས་པར། །བྱས་ཏེ་མངོན་སྦྱོར་སྦྱོར་བ་ཡིས། །ཨ་བ་དྷཱུ་ཏཱིའི་སྲོག་གི་རླུང་། །
བརྟན་པར་ཕག་སོགས་རྣལ་འབྱོར་མ། །མ་བརྟན་སྲོག་གི་རླུང་རྣམས་ཀྱི། །དངོས་གྲུབ་གསལ་བར་མི་འགྱུར་རོ། །ལྷ་མོ་རྣམ་སྣང་གིས་རྒྱས་གདབ། །རྡོ་རྗེ་འཛིན་བདག་མི་བསྐྱོད་པས། །ཕོ་ཉ་མོ་སྔགས་སུམ་ཅུ་དྲུག །དུས་ལས་རང་དང་རང་གི་རིགས། །ཇི་ལྟར་བདག་མོའི་རིགས་དང་ནི། །ཕྱག་དང་མཚན་མ་རིམ་ཇི་ལྟར། །ཡང་ན་ངེས་པར་བརྗོད་པ་རུ། །མངོན་རྟོགས་མཚན་ཉིད་ལས་ཤེས་བྱ། །བོལླ་ཀཀྐོ་ལ་སྦྱོར་ལས། །ལྷ་མོ་རང་ཉིད་ཞུ་བར་ཞུགས། །སྐད་ཅིག་དེ་ལ་མ་ལུས་པའི། །དཀྱིལ་འཁོར་ཐམས་ཅད་རོ་མཉམ་ལྟ། །ལྷ་མོ་ནམ་མཁའི་ནང་སྣང་བས། །འདི་ཡིས་མངའ་བདག་བསྐུལ་བར་བྱ། །མཆོག་ཏུ་བདེ་བ་ཆེན་པོའི་རྡོ་རྗེ་རོལ་ཅིག་རོལ། །ཤེས་རབ་ཐབས་ཀྱི་དགོངས་པ་རབ་ཏུ་གྲུབ་པར་མཛོད། །འཇིག་རྟེན་རྣམས་ལ་ཁྱོད་ཀྱི་ཐུགས་རྗེ་བསྒོམས་པ་ཡིས། །ཇི་ལྟར་ལྷ་དང་ལྷ་མིན་མ་ལུས་སངས་རྒྱས་མཛོད། །བྱང་ཆུབ་རྡོ་རྗེ་འཛིན་པས་བདེ་ཆེན་གྱིས་མཉེས་མཛོད། །ཁྱོད་ནི་སྟོང་ཉིད་ཏིང་ངེ་འཛིན་ལ་ཞུགས་སམ་ཅི། །རྡོ་རྗེ་པདྨ་རོལ་པས་དེང་ནི་ངེས་རྟོགས་མཛོད། །གང་གིས་ལྷན་ཅིག་སྟོང་ཉིད་ཏིང་འཛིན་ལ་ཁྱོད་བཞུགས། །མངའ་བདག་ཁྱོད་ཀྱིས་ཁམས་བཞིའི་ས་བོན་འཛག་པར་མཛོད། །ཨ་བ་དྷཱུ་ཏཱིའི་རང་བཞིན་གཏུམ་མོ་ལྡང་བར་འགྱུར། །ས་གསུམ་སྲེག་པར་བྱེད་དེ་གང་དུའང་མི་མཐོང་ངོ་། །མྱ་ངན་འདས་པའི་ངོ་བོས་འབར་ཞིང་འབར་བར་འགྱུར། །མཁའ་འགྲོ་མ་རྣམས་ལྷན་སྐྱེས་རང་བཞིན་གྱིས་དགར་མཛོད། །དགའ་བ་དང་ནི་འཆི་བར་སྣང་བ་མི་མཐོང་ངོ་། །ཐུགས་ཀྱི་རྒྱལ་བ་མགོན་པོས་འདི་དག་སད་པར་མཛོད། །སྒྱུ་མ་ཡི་ནི་སེམས་ཅན་ཁམས་ནི་བསྒྲལ་བར་མཛོད། །གླུ་ཆེན་པོ་ནི་འདི་གསན་ནས། །རྣལ་འབྱོར་འཁོར་ལོ་ཅན་རབ་སད། །སྒྱུ་མ་ལྟ་བུའི་འགྲོ་བ་ཀུན། །བརྟན་པ་ལ་སོགས་འགྲོ་བ་ནི། །མཐོང་བཞིན་རང་གི་འཁོར་ལོ་ཅན། །ནམ་མཁའ་ཐིམ་པ་སྐུ་ཆེར་འགྱུར། །ལྷན་སྐྱེས་སོགས་ཀྱིས་སྤྲུལ་པ་ཅན། །གཉིས་པོ་གཅིག་པའི་སྐུ་ཆེན་པོ། །དང་པོའི་སངས་རྒྱས་རང་བཞིན་ཅན། །ཐམས་ཅད་ཀྱི་ནི་ཆོས་ཀྱི་སྐུ། །རྣལ་འབྱོར་མ་ཡི་རྒྱུད་ཐོབ་ནས། །རྣལ་
འབྱོར་རྒྱུད་རྣམས་ལ་ཡིད་ཆེས། །སློབ་དཔོན་སེམས་ཀྱི་རྡོ་རྗེ་ཡང་། །དབུ་མའི་ཚུལ་གྱི་སྤྱོད་ཡུལ་ལོ། །དེ་ཉིད་ཕྱིར་བསྟན་ཐོབ་པ་ལས། །དབུ་མ་ཆེན་པོའི་མཚན་ཉིད་དོ། །གྲུབ་མཐའི་མན་ངག་སྤྱོད་ཡུལ་ནི། །མཁས་པ་རྣམས་ཀྱིའང་སྤྱོད་ཡུལ་མིན། །གྲུབ་མཐའ་མངོན་སུམ་ལས་ཤེས་བྱ། །མན་ངག་ཀྱང་ནི་རྗེས་དཔག་ལས། །ཤེས་བྱ་བླ་མའི་ཞལ་ལས་ཀུན། །དེ་མཁས་སངས་རྒྱས་སྤྱོད་ཡུལ་ལོ། །བྱིས་པའི་རིགས་ཀྱི་རྣམ་ཤེས་ཀྱི། །མངོན་ང་རྒྱལ་ཅན་སྤྱོད་ཡུལ་མིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་མཁའ་འགྲོ་མ་སྐྱེད་པའི་མཚན་ཉིད་དང་། བདེ་བ་ལ་ཀུན་དུ་སྤྱོད་པའི་ལས་ཀྱི་དེ་ཁོ་ན་ཉིད་ཀྱི་རྣམ་པར་གཞག་པའི་ཆོ་ག་སྟེ་འདི་ནི་ལེའུ་གསུམ་པའོ།། །།དེ་ནས་ཡང་དག་བཤད་བྱ་བ། །ལཱ་མ་ཇི་ལྟར་གནས་པ་ནི། །ཇི་ལྟར་སྔོན་གྱི་སངས་རྒྱས་ཀྱིས། །གསུངས་པ་བདག་གིས་གསལ་བྱ་ཙམ། །རྡོ་རྗེ་སྡོམ་པ་བཅོམ་ལྡན་འདས། །ཕག་མོ་རྣལ་འབྱོར་སྡོམ་པ་སྟེ། །འཁོར་ལོ་སྡོམ་པ་མཁའ་འགྲོ་མ། །དེ་བཞིན་དམ་ཚིག་སྡོམ་པ་ནི། །ལཱ་མ་ཡིས་ནི་ཡང་དག་བསྟན། །པདྨའི་སྡོམ་པར་འདོད་པ་ནི། །དུམ་སྐྱེས་མ་ཅན་གཟུགས་ཅན་མ། །རིན་ཆེན་སྡོམ་པའོ་ཁྱབ་བདག་ལ། །ལཱ་མ་རང་ཉིད་ཀྱིས་ཞུས་པ། །རྡོ་རྗེ་སྡོམ་སོགས་ཇི་ལྟ་བུ། །ངོ་མཚར་བདག་གི་བདག་པོ་ཀྱེ། །རྡོ་རྗེ་དམ་ཚིག་དེ་བཞིན་སྦྱོར། །པད་འཁོར་དེ་བཞིན་རིན་ཆེན་གྱི། །སྡོམ་པ་ཡང་ནི་ཇི་ལྟར་ལགས། །དེ་ནས་རྡོ་རྗེ་ཅན་མཆོད་ནས། །མཉེས་པ་བདག་ལ་ཡང་དག་གསུངས། །རྡོ་རྗེ་པུག་འཕོ་མེད་ཡེ་ཤེས། །རྟོགས་ནས་རྡོ་རྗེ་གསུམ་རྣམས་སུ། །སྡོམ་པ་རྡོ་རྗེ་གསུམ་རྣམས་ལ། །བསྐྱེད་པ་རྡོ་རྗེ་སྡོམ་པ་ནི། །དམ་ཚིག་རྩ་རྣམས་ཐམས་ཅད་ཀྱིར། །ཤེས་བྱ་ལམ་གྱི་རྗེས་སྐྱོབ་པའི། །སྡོམ་པའོ་འཁོར་ལོ་མཆོད་པ་ནི། །དམ་ཚིག་སྡོམ་པར་འདོད་པ་ཡིན། །རྣལ་འབྱོར་རྣམ་པ་དྲུག་པོ་ནི། །སྦྱོར་
དྲུག་ནམ་མཁའི་བུ་ག་རུ། །སྡོམ་པ་བདེན་པའི་དངོས་པོ་ཀུན། །བདག་གི་རྣལ་འབྱོར་སྡོམ་པའོ། །པདྨ་ཨ་བ་དྷཱུ་ཏཱིའི་རྩ། །འཁོར་ལོ་བཞི་ལ་གནས་པ་ནི། །སྡོམ་པའོ་འཁོར་ལོ་དེ་རྣམས་སུ། །པདྨའི་སྡོམ་པར་བརྗོད་པར་བྱ། །འཁོར་ལོ་བདེ་བར་གཤེགས་པའི་ལམ། །དབང་སོགས་རྣམས་སུ་བསྐྱེད་པ་ཡིས། །སྡོམ་པའོ་ཆོས་དེ་རྣམས་སུ་ནི། །འཁོར་ལོ་སྡོམ་པ་ཡིན་པར་བཤད། །རིན་ཆེན་རྡོ་རྗེ་མགོ་བོ་ཡི། །ནོར་བུར་འབབ་པ་འོངས་པ་ཡིས། །སྡོམ་པའོ་སྲོག་གི་ཐིག་ལེ་ཡང་། །རིན་ཆེན་སྡོམ་པ་ཡིན་པར་འདོད། །མ་བཤད་པ་ལས་དེ་རྣམས་ཀྱིས། །མཁའ་འགྲོ་བདུན་པ་ཡེ་ཤེས་མཆོག །ཁྭ་གདོང་ལ་སོགས་བརྒྱད་དང་ནི། །འདྲེན་པ་གཉིས་མེད་མཚན་ཉིད་ཕྱིར། །དེ་ལྟར་ཐམས་ཅད་མཉམ་སྦྱོར་བས། །གཅིག་ཏུ་སྡོམ་པའི་མཁའ་འགྲོ་ཡིན། །གཏུམ་མོ་འབར་མ་ལ་ནི་གཟུགས། །རྩ་སོ་སོ་དང་དབུ་མ་སྟེ། །ཡེ་ཤེས་མཁའ་འགྲོ་དེ་ལས་བསྐྱེད། །རྣམ་པ་ཀུན་རིག་སྐད་ཅིག་ལས། །བྱང་ཆུབ་སེམས་ཀྱི་དབུས་སུ་ནི། །བདུད་རྩི་གསང་བའི་གཟུགས་ཅན་གང་། །རྡོ་རྗེ་མཁའ་འགྲོ་དེ་བཤད་དོ། །ནམ་མཁར་འགྲོ་བ་ཡི་ནི་མཆོག །བློ་བུར་བྱུང་བ་བདག་མེད་པ། །སྒྱུ་འཕྲུལ་ཆེན་པོ་ཆུ་སྐྱེས་གཟུགས། །རྣལ་འབྱོར་རང་སེམས་སེམས་མེད་ཀྱང་། །རྣལ་འབྱོར་མཁའ་འགྲོའི་མཚན་ཉིད་དོ། །འཁོར་ལོ་ནང་གི་བདག་ཉིད་གཟུགས། །ཐིག་ལེ་ཀུན་ཏུ་སྦྱར་བ་ཡིས། །མཚན་ཉིད་གནད་དང་མཚམས་ལ་ནི། །ཀུན་དུ་སངས་རྒྱས་སྐྱེ་བར་འགྱུར། །འདུ་བ་ཕྱི་དང་ནང་བདག་ཉིད། །ཡེ་ཤེས་དངོས་རང་བཞིན་ལས་སོ། །དམ་ཚིག་སེམས་དཔའ་གསུམ་རིག་པ། །སྐྱེ་དང་འཆི་དང་བར་རྣམས་ཀྱི། །སྲིད་པ་ཀུན་ལས་ཤེས་པར་བྱ། །སྤོང་བས་དམ་ཚིག་མཁའ་འགྲོ་སྐྱེ། །བདག་ཉིད་ཀུན་གྱིས་མི་ཤེས་ཀྱང་། །འགྲོ་བ་མཁས་པའི་ལམ་གྱིས་འགྱུར། །འདོད་ཆགས་སྒྱུ་མ་བཅས་ནམ་མཁའ། །པདྨ་མཁའ་འགྲོ་རང་ཉིད་གཙོ། །དབྱངས་ཡིག་དེ་བཞིན་རྣལ་འབྱོར་དང་། །ཕྱག་རྒྱ་ལྷན་སྐྱེས་འདོད་རྣམས་ཀྱི། །བགྲོད་བཞིན་དུ་ནི་རྟག་ཏུ་སྐྱེ། །འབར་བ་རིན་ཆེན་དབང་མཁའ་འགྲོ། །དེ་བཞིན་ཁམས་ནི་རྣམ་པ་བདུན། །
རྣམ་ཤེས་བདུན་གྱི་མཚན་ཉིད་དོ། །ཆུ་གཏེར་རི་དང་གླིང་རྣམས་ཀྱང་། །རྒྱ་མཚོ་ཆེ་དེར་རབ་ཏུ་ཞུགས། །དེ་ཉིད་ཉི་ཤུ་ལྔ་བདག་ཉིད། །སངས་རྒྱས་རྣམས་ཀྱི་ཡེ་ཤེས་རྒྱུས། །འཁོར་ཡུག་ལ་སོགས་སྟོང་ཉིད་དང་། །རང་བཞིན་སྐྱེས་བུ་དེ་བཞིན་དུ། །འོད་གསལ་བ་དང་ཐམས་ཅད་མིང་། །ཆོས་ཀྱི་དབྱིངས་དང་རང་མཚན་ཉིད། །ཐར་དང་སངས་རྒྱས་དེ་བཞིན་དུ། །ཡེ་ཤེས་རྡོ་རྗེ་སེམས་ལམ་བདག །ཆོས་འབྱུང་དང་ནི་ཐེག་ཆེན་དང་། །གསང་བ་སྔགས་ཚུལ་ཁྱབ་བདག་དང་། །ལྷན་སྐྱེས་དང་ནི་འདུས་དེ་བཞིན། །ཐུགས་རྗེ་ཆེན་པོ་རང་ཉིད་དང་། །བདག་མེད་མ་དང་ཀུན་དེ་ཉིད། །རང་བཞིན་ཅན་སྟོང་ཡང་ནས་ཡང་། །དེ་ཕྱིར་རྒྱ་མཚོའི་མིང་དང་ཡང་། །རྒྱ་མཚོ་ཆེན་པོའི་གཟུགས་ཀྱིས་ནི། །ཨཱ་ཀུན་འཇིགས་གཟིར་སེམས་ཅན་རྣམས། །ངང་གིས་སངས་རྒྱས་ཡོན་ཏན་ལྡན། །རྞྞ།དེ་རྣམས་དགེ་བ་མངོན་འདོད་ལ། །དུབ་དང་ཡོངས་སུ་ངལ་བ་མེད། །ཝ། རྟོག་པ་ཐམས་ཅད་སྤངས་པ་ལས། །ཐོབ་པ་སྒྱུ་མའི་རང་མཚན་ཉིད། །མ། གསང་སྔགས་ཚུལ་གྱི་བདག་ཉིད་ཀུན། །ཧཱ། བསྐྱེད་པ་ཡི་ནི་གཟུགས་ཅན་ནོ། །ས། དེ་ཡི་ཆོས་ནི་མི་བདེན་ཏེ། །མུ། དངོས་པོ་སྐད་ཅིག་འཇིག་ཕྱིར་རོ། །དྲ། རྫས་དང་སྣ་ཚོགས་རང་བསྟན་ཆོས། །རྒྱ་མཚོ་ཆེན་པོའི་མཚན་ཉིད་དོ། །ལཱ་མའི་རང་གི་མཚན་ཉིད་ས། །ཇི་ལྟ་བ་བཞིན་རིམ་གྱིས་ཏེ། །རོལ་པའི་མྱོས་ལས་བསྐྱེད་པ་ནི། །རྣལ་འབྱོར་མ་ཀུན་ཤེས་པར་བྱ། །མ་སོགས་ཀུན་གྱི་འཁོར་ལོ་ཡི། །རྩ་ཡི་ལམ་ནས་རྗེས་འགྲོ་མའོ། །ཡང་ན་སྒྱུ་མ་འཛིན་པར་འགྱུར། །དེ་ནི་སྒྱུ་མ་ཆེ་རང་བཞིན། །བུམ་པའི་རཱ་སི་སྤྱོད་པ་ཡིས། །འཕོ་བའི་གྲངས་ཀྱང་གཉིས་པའོ། །རྡོ་རྗེ་ཕག་མོ་ཅན་ལྷ་མོ། །ཀུན་དུ་སྤྱོད་པ་ལཱ་མར་གནས། །ཁ་དོག་ལྗང་སྣང་ལྷ་མོ་སྟེ། །ལྷག་མ་མཁའ་འགྲོ་མ་དང་མཚུངས། །སྲེད་པ་དང་ནི་སྡང་བའི་དངོས། །ཐམས་ཅད་དེ་ཡི་སྟེང་དུ་གནས། །ཧེ་རུ་ཀ་ཡི་མདོག་དང་གཟུགས། །དེ་བཞིན་གཤེགས་པའི་རྗེས་འགྲོ་རྣམས། །ལྷག་མ་འཁོར་དྲུག་རྣལ་འབྱོར་མ། །དཔའ་བོ་རྣམས་དང་ཐམས་ཅད་འབྱུང་། །འཁོར་ལོའི་རྩིབས་ཀྱི་དབུས་སུ་སྦྱིན། །ཐུགས་སོགས་
ཁ་དོག་དྲུག་ཏུ་གྲགས། །འཁོར་ལོ་ཆ་མཉམ་ལ་བྲི་བྱ། །རྡོ་རྗེ་པདྨ་འཁོར་དེ་བཞིན། །རལ་གྲི་རིན་ཆེན་གྲི་གུག་གི། །ཕྲེང་བ་རྟག་ཏུ་རིམ་ཤེས་བྱ། །ཕྱི་རོལ་སྣ་ཚོགས་རྡོ་རྗེའི་ཕྲེང་། །མགོ་བོའི་ཕྲེང་བ་ཐམས་ཅད་དུའོ། །ལཱ་མ་བྱང་གི་སེམས་ལས་བསྐྱེད། །རྣལ་འབྱོར་མ་ཚོགས་གཙོ་མོ་སྟེ། །དུས་ཀྱི་རྗེས་མཐུན་སེམས་ཅན་དོན། །སྨོན་ལམ་གྱི་ནི་མཚན་ཉིད་དོ། །བསྐལ་པ་བཟང་པོའི་དབུས་སུ་ཡང་། །རྫོགས་ལྡན་ལ་ནི་རྣམ་གཟིགས་སོགས། །དེ་ཡི་དུས་སུ་ཤེས་བྱ་བ། །དེ་བཞིན་རྣམ་གཟིགས་བྱང་གླིང་དུའོ། །འཛམ་བུའི་གླིང་ནི་ཆུ་དུན་དུའང་། །བདག་ནི་ཤཱཀྱའི་རིགས་རྗེས་འགྲོ། །ལྷག་མའི་གླིང་ལྔ་རྣམས་སུ་ནི། །དེ་བཞིན་གཤེགས་རིགས་རིམ་པས་སོ། །དེ་ཕྱིར་ལཱ་མ་འགྲོ་བ་ཀུན། །སངས་རྒྱས་མཆོག་གི་གནས་མཐའ་ལེན། །མ་ནི་རྣལ་འབྱོར་ཐམས་ཅད་ཀྱི། །སྙིང་སྟོབས་བྱ་བ་བྱེད་པ་གསལ། །ས་ཡི་དབང་ཕྱུག་ཞག་ལ་ནི། །མཆུ་ཡི་ཟླ་བ་ཅན་དུ་འདོད། །ཐུར་སེལ་ཞེས་བྱའི་རླུང་དང་ནི། །འགྲོ་དང་ཟླ་བ་ཞེས་བྱའི་རྩ། །ཇི་སྲིད་འཆི་བའི་དུས་ཉིད་བར། །འཛིན་བཞིན་དུ་ནི་མི་ཉམས་སོ། །དེ་ལྟར་རྣལ་འབྱོར་མ་བཅུ་གཉིས། །ཟླ་བ་ཉིན་ཞག་རླུང་རྣམས་སོ། །རྩ་དང་རྩ་ནས་འབབ་པ་སྟེ། །མི་ནི་སྐྱེད་པ་རྣལ་འབྱོར་མ། །རྩ་ཡི་ཚོགས་ནི་ཐམས་ཅད་ལ། །སྐད་ཅིག་ལས་ནི་སྲོག་འཕོ་འགྱུར། །རང་བཞིན་དེ་ལ་ཤེས་བྱས་ནས། །སྡང་སོགས་ཡོན་ཏན་གྱིས་རིམ་པས། །དེས་ནི་སྣ་ཚོགས་སྤྲུལ་བདག་དང་། །ལས་ཀྱིས་གནས་ནི་མང་པོའོ། །རྣལ་འབྱོར་པ་ཡི་དངོས་གཅིག་ནི། །ལཱ་མ་མྱ་ངན་འདས་མཚན་ཉིད། །མྱ་ངན་འདས་དང་མཚོན་པ་ནའང་། །གཉིས་པོ་ཞུགས་གྱུར་མིང་མེད་པ། །ཇི་ལྟར་མི་ཤེས་དེ་ལ་ནི། །བདག་གིས་མཆོག་ཏུ་འདུ་ཤེས་སོ། །སངས་རྒྱས་བྱང་ཆུབ་སེམས་མེད་འགྱུར། །ཆོས་ཀྱི་སྐུ་སོགས་དངོས་པོའོ། །དབང་པོ་རྣམས་ཀྱི་དྲིན་གྱིས་ནི། །སྐྱེ་བ་ཅན་ཀུན་འཐོབ་པར་འགྱུར། །དབང་པོའི་དངོས་པོ་བདེན་མིན་ཡང་། །དེ་ཚེ་མི་བདེན་པས་འཐོབ་འགྱུར། །དབང་པོ་གཉིས་ཀྱི་དངོས་ཉིད་ཅི། །གྲིབ་མ་ཡི་ནི་སྐྱེས་བུ་མཚུངས། །གྲིབ་མའི་དངོས་པོ་དེ་བདེན་ཀྱང་། །སྐྱེས་
བུའི་གཟུགས་ནི་བདེན་མ་ཡིན། །དེ་བཞིན་དབང་པོ་མི་བདེན་ཀྱང་། །དེ་དངོས་བདེན་པའི་མཚན་ཉིད་དོ། །མན་ངག་རྣམ་པ་མང་པོ་གཞན། །མཆོག་ཏུ་བསྔགས་པར་ཤེས་པར་བྱ། །བཏུང་བ་ལ་སོགས་བདོག་པ་ཀུན། །བླ་མ་ལ་ནི་འབུལ་བ་བདེན། །དེ་ནི་མི་བདེན་པས་སྤྱད་བྱ། །དེ་ལ་བརྙས་པར་མི་བྱའོ། །འདི་ལ་སྔགས་ཀྱང་བཤད་བྱ་སྟེ། །ལྷ་མོ་ཀུན་གྱི་རྒྱ་མཚོ་འདིར། །ཉེ་བའི་སྙིང་པོ་སྔགས་རྣམས་ལ། །ཁ་སྦྱོར་མཛེས་པས་བརྒྱན་པའོ། །སྐུ་དང་གསུང་དང་ཐུགས་རྡོ་རྗེ། །ཉེ་སྙིང་རྣམ་པ་གསུམ་དུ་འདོད། །ལུགས་འབྱུང་ལུགས་ལ་བཟློག་པ་ཡིས། །དེ་བཞིན་དབུས་སུ་ལུགས་འབྱུང་མིན། །ༀ་ༀ་བ་ཧྲཱིཿ། ཛྲ་ཧེ་ལཱ་ཧེ་མཱ་ཧཱུྃ་ཡཻ་ཧཱུྃ་ཧཱུྃ་ཕ་ཧཱུྃ་ཊ་ཕ་ཊ་ཕ་ཧཱུྃ་ཊ་ཧཱུྃ་སྭཱ་ཧཱ་ཧཱ་ཧེ་ཧྲཱིཿༀ་ༀ་ཧཱུྃ་ཧེ་ཧཱུྃ་ཧེ་ཧྲཱིཿཕཊ་ༀ་ཞེས་བྱ་བའོ། །སུམ་ཅུ་རྩ་བདུན་རྣམས་ཀྱིས་ནི། །རྣལ་འབྱོར་དབང་ཕྱུག་མ་རིམ་ལས། །རྩ་དང་ཚིག་ནི་ཤེས་བྱ་སྟེ། །ཡི་གེ་བརྗོད་པའི་བདག་ཉིད་ཀྱི། །གཉིས་དང་གསུམ་གྱི་རྩ་བསྐྱེད་དེ། །ཡི་གེ་རེ་རེ་ཡི་ཡང་ངོ་། །ཡང་ན་ཐམས་ཅད་བསྡུས་པ་ཡིས། །བདག་ཉིད་ཆེན་པོའི་དུས་འདིའོ། །དེ་ཕྱིར་སངས་རྒྱས་ཀུན་བདག་ཉིད། །རྣལ་འབྱོར་མ་རྟག་རེ་རེ་སྐྱེ། །གལ་ཏེ་སེམས་དཔའ་ཆེ་ཁྲོས་ན། །སྤྲོས་པའི་ཁྲོ་བོ་རྣལ་འབྱོར་མ། །དེ་བཞིན་གཏི་མུག་འདོད་ཆགས་སོགས། །རྣལ་འབྱོར་མ་ནི་རྟག་ཏུ་སྤྲོས། །ཚེགས་ཆུང་བ་ཡིས་ལས་འགྲུབ་པ། །ཡུམ་མཆོག་ལཱ་མའང་འཐོབ་པར་འགྱུར། །བཅོམ་ལྡན་བདག་པོས་འདི་གསུངས་ཏེ། །ཡི་གེ་རེ་རེ་རྣལ་འབྱོར་མ། །མིང་ནི་དེ་དང་མཉམ་ཞེས་བྱ། །ཁྱོད་ལ་རྡོ་རྗེ་མཆོག་བསྲེས་པའོ། །དེ་ལྟར་དེ་ཉིད་རྟག་བརྟེན་ནས། །རྣལ་འབྱོར་ཕྱག་རྒྱ་དང་ལྷན་ཅིག །རྩེན་ཅིང་རྒྱ་ཆེར་རོལ་པར་བྱ། །སྲིད་དང་མྱ་ངན་འདས་དབུས་སུ། །དཔའ་བོ་ཐམས་ཅད་མཉམ་སྦྱོར་བ། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ལཱ་མ་བསྐྱེད་པའི་མཚན་ཉིད་དང་སྔགས་དགོད་པ་དང་། འཁོར་ལོས་
སྒྱུར་བ་དྲུག་ལ་སོགས་པའི་རང་བཞིན་དང་མྱ་ངན་ལས་འདས་པ་ལ་སོགས་པའི་རྣམ་པར་གཞག་པ་སྟེ་ལེའུ་བཞི་པའོ།། །།དེ་ནས་མཆོག་ཏུ་རབ་བཤད་བྱ། །སེམས་ཅན་རྣམས་ལ་ཕན་བརྩེ་བས། །ཁཎྜ་རོ་ཧིའི་གནས་བཞུགས་ནས། །མངའ་བདག་རྡོ་རྗེ་མཁའ་འགྲོ་དང་། །འཁོར་ལོ་བཞི་ཡི་པདྨོ་རུ། །རྩ་ནི་བརྒྱ་དང་ཉི་ཤུའོ། །དེ་རྣམས་མིང་ནི་ཅི་རིགས་པར། །དེ་ཁོ་ན་ཉིད་སྣོད་ལ་བཤད། །ཡུལ་དབུས་མ་དང་ཀ་ལིང་ཀ་མ་དང་། །ཨོ་ཊ་མ་དང་ཀརྞྞ་ཊ་མོ་མ་རུ་མོ། །སཽ་རཱཥྚ་མོ་མ་ལ་ཡམ་བིང་ག་མ། །འགྲོ་ལྡིང་མ་དང་ཏ་ལིཾ་ག་ཀ་མོ། །མཱ་ལ་བ་མོ་མ་ཧ་རཥྛི་མ། །བ་རེན་དྲ་མོ་ཀཱ་མ་རུ་པི་མ། །ཌཱ་ཧཱ་ལི་མོ་ཨ་ཊ་ལི་ཡུལ་མ། །བྷ་ཌ་རི་མོ་ལཱ་ཌཱ་དབུས་འགྱུར་མ། །ཏི་ར་ཧུ་ད་ཏི་མོ་དང་དད་ད་ར་ན་ཊ་མ་དང་བལ་ཡུལ་མ། །མཉན་ཡོད་མ་དང་རཱ་ཌྷ་མོ་དང་ཌི་ཀ་ཀ་རི་མ་དང་། །བྷང་ག་ལཱ་མོ་ཁ་ཌ་མ་དང་ཧ་རི་ཀེ་ལ་མ། །གསེར་གླིང་མ་དང་སིང་ག་ལི་མོ་དང་། །ཌ་མ་ཌ་མོ་ཀན་ཏོ་ར་ཀ་མོ། །སིན་དྷུ་ཁ་བའི་གནས་མ་ཙཱུཾ་ཌི་མོ། །ཀུ་ལུ་ཏ་མོ་ཛ་ཌ་ར་མོ་པ་ཐ་མ། །ཛ་ཛྫ་ཡུ་ཏ་མ་དང་བ་རུ་ཎ་མ་དང་། །ཨོ་ཌི་ཡཱ་ཎ་མ་དང་ལམ་པ་ཀ་མ་དང་། །ཛཱ་ལན་དྷ་ར་མ་དང་ཨར་བུ་ད་མ་དང་། །ཁ་ཆེ་མ་དང་ཀོ་ས་ལ་མོ་ཀཱཉྩི་མ། །ཛ་ཡན་ཏ་མོ་ཏྲི་ཤཀ་ཏ་མོ་ཙམ་བྷ་མ། །ལུ་ཧ་ར་མ་པུ་ར་ཧོ་རི་ཀ་མོ་དང་། །མུམྨུ་ནམ་ཀཱམ་པོ་ཛ་མ་དང་། །བྷཊྚོ་མ་ལ་གྲི་ཧ་དེ་བ་མོ། །པྲེ་ཏ་པུ་རི་མ་དང་བབ་བྷ་ར་མ་དང་། །པི་ལ་མོ་དང་ཉེ་བའི་པི་ལ་མོ། །དུར་ཁྲོད་མ་དང་ཉེ་བའི་དུར་ཁྲོད་མ། །རྒྱ་མཚོ་ཆེན་པོའི་འགྲམ་མ་ཁ་ས་མོ། །ཀླ་ཀློ་མ་དང་ཐམས་ཅད་ཡུལ་མ་སྟེ། །རིམ་པས་དྲུག་ཅུ་བཞི་ལྷ་མོ། །ལྟེ་བའི་འཁོར་ལོ་རྣལ་འབྱོར་མ། །རིགས་ཀྱི་རྩར་ནི་ཤེས་པར་བྱ། །སྙིང་གའི་འཁོར་ལོ་དེ་བཞིན་བརྒྱད། །ཕོ་ཉ་མོ་ཀུན་འགྲོ་མ་སྟེ། །པྲ་ཡ་ག་མོ་དེ་བི་ཀོ་ཊ་མ། །འཕགས་རྒྱལ་མ་དང་དཔལ་ཆེན་མོ། །འབར་བའི་གདོང་མ་གྲུབ་པ་སྲིམ་བ་ལི་མོ་དང་། །མ་ཧི་ལ་མ་ཀཽ་མ་རི་མོ་སཽ་ར་མ། །དེ་ལྟར་ཐམས་ཅད་སྙིང་གནས་སུ། །སྒྱུ་མའི་རྣམ་པར་ང་ཞིང་མའོ། །མགྲིན་པར་འཁོར་ལོའི་ལྷ་མོ་ཡང་། །གཙོ་མོ་མཆོག་ནི་བཤད་པར་བྱ། །ཆ་ཆེན་བཅུ་དྲུག་ཉིད་ཡིན་ཏེ། །ཁམས་རྣམས་བཅུ་དྲུག་
དེ་བཞིན་ནོ། །ཁྲག་དང་ཁུ་བ་རྐང་དང་ནི། །རྔུལ་དང་ཚིལ་དང་པགས་པ་དང་། །ཤ་དང་རུས་པ་རྒྱུས་པ་དང་། །རྣག་དང་རྒྱུ་མ་རང་བྱུང་དང་། །བཤང་གཅི་མཁྲིས་པ་མཆིལ་མའོ། །ར་ཧ་སྱ་སོགས་ཚིལ་གྱི་ཁམས། །དེ་རྣམས་མྱོས་བྱེད་འབབ་མའོ། །མགོ་བོ་རུ་ནི་ལྷ་མོ་ཆེ། །འཁོར་ལོ་སུམ་ཅུ་རྩ་གཉིས་རྩ། །ཞག་གི་རིམ་པ་ཐམས་ཅད་དུ། །མཚམས་ཀུན་རྨད་བྱུང་ཆེན་མོའོ། །ནག་མོ་གཙིགས་མ་འཇིགས་རུང་མ། །དགའ་མ་འདས་མ་ལོག་འདྲེན་མ། །ཙཱ་མུཎྜ་དང་དྲག་གཟུགས་མ། །ལྷ་མོ་དཀའ་ཟློག་དབྱངས་ཅན་མ། །ནག་བཟང་མོ་དང་ནག་ཆེན་མོ། །ནག་སྦོམ་མ་དང་གཞན་མི་ཐུབ། །རྒྱལ་མ་དང་ནི་རྣམ་རྒྱལ་མ། །མི་ཕམ་མ་དང་རྒྱལ་བ་མོ། །དྲག་མོ་སྡང་མ་དབང་མོ་དང་། །ཟླ་མ་ལམ་གྱི་བཞི་མདོ་མ། །གྲོང་གནས་མ་དང་དྲག་མིག་མ། །ཀམ་པོ་ཛ་མ་ཌོམ་བི་མ། །གཏུམ་མོ་དང་ནི་གདོལ་པ་མོ། །བྲམ་ཟེ་མོ་དང་དམངས་རིགས་མོ། །རྒྱལ་པོའི་བུ་མོ་འཕྲུལ་ཆེན་མོ། །ལྷ་རྫས་ཆང་གིས་འགེངས་བྱེད་མའོ། །དེ་ལྟར་རྩ་ཡི་འཁོར་ལོ་རུ། །ཁཎྜ་རོ་ཧཱི་ནང་འགྲོ་མའོ། །བདག་འདིར་འགྲོ་བ་མོ་ཡིན་ཅི། །རང་གི་བདག་པོས་བཀའ་སྩོལ་ཅིག །ལུས་རྣམས་ཐམས་ཅད་ལ་ནི་ཁམས། །མཁའ་འདྲ་དངོས་པོ་གཅིག་ཏུ་འགྱུར། །ས་གཞི་ཆ་བཞིན་ཤེས་བྱ་སྟེ། །ཡུལ་གྱིས་ཕྱེ་ཡང་ས་གཞི་གཅིག །དུམ་བུ་དུམ་བུར་གྱུར་པའི་ཁམས། །ཡང་ན་ཡུལ་དང་ཞག་དག་འགྱུར། །ཌ་ཡི་ཡི་གེ་བསྟན་དེའི་ཕྱིར། །སྒོ་ང་མངལ་གྱི་མཚན་ཉིད་ལས། །འདིར་ནི་རྣམ་ཤེས་བསྐྱེད་པར་འགྱུར། །གང་འདྲའི་གང་གི་ཁམས་རྣམས་ལ། །བཞིར་ནི་རྣམ་པར་ཤེས་བྱ་སྟེ། །ལས་ལ་དུམ་སྐྱེས་མ་རང་ཉིད། །སྡིག་པ་ཆེན་པོ་འཕྲོག་བཞིན་མ། །བསད་པ་ཁམས་ནི་ཐམས་ཅད་དོ། །དེས་ནི་སེམས་ཅན་པྲལ་དུམ་སྐྱེས། །ཤིན་ཏུ་ལས་ཀུན་མཛད་པ་མོ། །གཙོ་མོ་མཆོག་གི་རྣལ་འབྱོར་མ། །རང་གི་འཕོ་བ་ལས་བཞེངས་མཆོག །ཉ་ནི་འཆར་བའི་དུས་དང་ནི། །འདོད་དང་རྒྱུ་སྐར་གྲེ་མཆོག་དང་། །ནུབ་ཀྱི་བ་ལང་སྤྱོད་གླིང་དུ། །འདོད་ཆགས་ཆེན་པོའི་
རང་བཞིན་མ། །དངོས་མེད་བྱེད་པ་མིན་ལྷ་མོ། །གཉིས་མེད་གོ་འཕང་ལ་བརྟེན་མ། །སུམ་ཅུ་བདུན་བདག་ཉིད་དབུས་སུ། །བསྐྱེད་འགྱུར་རང་གི་སྔགས་ལས་སྐྱེ། །ༀ་བ་ས་ཛྲ་རྦ་ཁ་བུ་ཎྜ་དྡྷ་རོ་བ་ཧི་ཛྲ་ཀཱ་ཌཱ་ཡཻ་ཀེ་ཧཱུྃ་ནཱི་ཧཱུྃ་ཡེ་ཕཊ་བ་ཕཊ་རྞྞ་སྭཱ་ནཱི་ཧཱ་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ་ཧ་ཨོཾ། སྔགས་འདི་རབ་ཏུ་སྦྱོར་བར་བྱེད། །དཀྱིལ་འཁོར་འདོད་པ་ཐམས་ཅད་ལ། །ལྷ་མོ་རེ་རེ་རྣམས་ཀྱི་ནི། །དབུས་སུ་འཁོར་ལོ་བཞི་སྐྱེས་མ། །ཐབས་དང་ཤེས་རབ་བདག་ཉིད་ཅན། །ཐམས་ཅད་ཆོས་འབྱུང་དབུས་སུ་སྟེ། །སྒོ་བཞི་དང་ནི་ཡང་དག་ལྡན། །རྟ་བབས་ཀྱིས་ནི་དེ་རྣམས་བརྒྱན། །ཤ་ཆེན་པོ་ནི་ཟ་བཞིན་དུ། །འཇིགས་བྱེད་སྒྲ་ནི་བསྒྲགས་པའོ། །ལཱ་མའི་འཁོར་ལོ་བ་ལང་ཤ། །མཁའ་འགྲོ་མ་ལ་གླང་ཆེན་ཤ། །ཕག་མོ་ལ་ནི་ཤ་ཐམས་ཅད། །དམ་ཚིག་སྡོམ་པའི་སྦྱོར་བས་སོ། །གསང་སྔགས་བདེན་པར་ཤེས་བྱས་ནས། །སྔགས་ཀྱི་ཡི་གེ་བརྗོད་པ་མིན། །སེམས་ཅན་ཀུན་གྱི་ངག་གང་དེ། །སྔགས་ནི་རྣལ་འབྱོར་མ་རུ་གྲགས། །གལ་ཏེ་ཡི་གེ་པ་སྔགས་ཡིན། །གོ་ཌིའི་ཡི་གེ་པ་དང་མཚུངས། །རྩ་ཡི་བུ་ག་བུ་ག་རུ། །དབུགས་ནི་ཡི་གེར་འདུ་ཤེས་པའོ། །སྔགས་ཀྱི་བཏུང་བས་སེམས་ལ་ནི། །ཇི་སྲིད་རྐང་མཐར་འགོག་པ་ལས། །ཡུལ་དང་ཡུལ་དུ་ཀུན་དུ་སྤྱོད། །ཡུལ་དབུས་སུ་ཡང་འོངས་པ་ལས། །ཚིམ་བྱ་རང་གི་འཁྲུལ་འཁོར་དུ། །བུམ་པ་བཞིན་དུ་བཏུང་བ་འབབ། །དཀྱིལ་འཁོར་རང་གི་སྟན་གནས་ནས། །སྲོག་གི་འཁོར་ལོ་བཞིན་དུ་བསྐོར། །སེམས་དཔས་འཁོར་བཞིན་པ་རུ་ནི། །ནོར་བུའི་བུ་གར་བཙིར་བར་བྱ། །བུ་ག་དགུ་རུ་ས་བོན་ཀྱང་། །རྡོ་རྗེ་སོགས་པས་བསྒོམ་པར་བྱ། །ཡང་ན་རྩ་རྣམས་ཐམས་ཅད་དུ། །སྔགས་ཀྱི་ཡི་གེ་འདི་དགོད་བྱ། །མ་ཀ་ༀ་ཀཱ་མ་སཽ་མ་བི་དྲ་ཏ་མཱ་མ་བྷ་ཀཱ་ཌཱ་ཨ་བྷ་ལཱ་མ་ཏི་ད་ནེ་སྲཱ་རཱ་ཌི་བ་ཁཱ་ཧ་སུ་སི་ཌཱ་ཀ་སི་ཧི་ཙུ་ཀུ་ཛ་པ་ཛ་བ་ཨཽ་ལཾ་ཛཱ་ཨ་ཀཱ་ཀོ་ཀཱཾ་ཛ་ཏྲི་ཙ་ལུ་པུ་མུྃ། ཀཱཾ་བྷ་གྲི་པྲེ་བ་པི་ཨུ་སྨ་ཨུ་ཁ་མྨེ་ཞེས་བྱ་བ་ནི་ལྟེ་བར་རོ། །པྲི་དེ་ཨུ་མ་ཛྭ་སུ་མ་ཀཽ་ཞེས་བྱ་བ་ནི་སྙིང་གར་རོ། །ར་ཤུ་མ་སྭཱ་མེ་ཙ་མཱཾ་ཨ་སྣཱ་པཱུ་ཨ་སྭ་བི་མཱུ་པི་ཤླེ་ཞེས་བྱ་བ་ནི་མགྲིན་པའིའོ། །
ཀྲྀ་ཀ་བྷཱི་ནཱ་ཏི་བི་ཙཱ་གཽ་ཨོ་ས་བྷ་མ་བྷྲུ་ཨ་ཛ་བི་ཨ་ཛ་གོ་དུ་ཨི་ཙ་ཙ་གྲཱ་རཽ་ཀཱཾ་ཌཽ་ཙ་མཱ་བྲཱ་སཱུ་རཱ་ཞེས་བྱ་བ་ནི་མགོ་བོའི་འཁོར་ལོ་ལའོ། །ཡང་ན་མི་ཕྱེད་མ་ལ་སོགས་པའི་མིང་ཅན་ཏེ། དེ་རྣམས་ཀྱི་ཡང་ཡིག་དང་པོ། །ཐམས་ཅད་མགོ་བོའི་འཁོར་ལོར་སྦྱིན། །འཁྲུལ་འཁོར་འདི་ནི་བློ་ཆེན་པོ། །སྲོག་གི་རླུང་ནི་རྣམ་འཛིན་འགྱུར། །པདྨ་བཞི་ཡི་འདབ་མའི་དབྱིབས། །རེའུ་མིག་འཁོར་ལོ་རིམ་ཐིག་གདབ། །ཐམས་ཅད་ཟླུམ་པོའི་རྣམ་པར་ནི། །ཐིག་ལྔ་རྣམས་ནི་གདབ་པར་བྱ། །བརྒྱད་དང་བཅུ་དྲུག་དྲུག་ཅུ་བཞི། །སུམ་ཅུ་རྩ་གཉིས་རེའུ་མིག་འདོད། །ལྟེ་བའི་གནས་ནི་ཐོབ་ནས་སུ། །སྲོག་གི་ནུས་པ་རྣམས་ཀྱིས་འཁོར། །ཇི་སྲིད་ཨ་བ་དྷཱུ་ཏཱིའི་རླུང་། །དེ་སྲིད་འཁྲུལ་འཁོར་འདིར་བརྗོད་དོ། །གལ་ཏེ་ངག་གིས་དེ་ལྟར་བྱེད། །སྔགས་ནི་འཇམ་སྙན་གྱིས་གླུ་ལེན། །སྒྲས་ནི་སྲོག་ངེས་ཕུར་བཏབ་ནས། །རྩ་དགུ་པོ་ནི་དགག་པར་བྱ། །ནད་མེད་མི་རྒས་མཛེ་མེད་ཅིང་། །རྟག་ཏུ་བཀྲེས་དང་སྐོམ་པ་མེད། །དེ་ལྟར་ལ་སོགས་མཐའ་ཡས་པ། །ནད་དང་འཆི་བའི་མཐར་ཐུག་མེད། །དཀྱིལ་འཁོར་ལྔར་རམ་ཡང་ན་ནི། །འཁྲུལ་འཁོར་ཅན་ཀུན་འབབ་པར་བྱ། །ཁམས་དང་སྐྱེ་མཆེད་གཞན་ལ་སོགས། །བདུད་རྩིའི་རྣལ་འབྱོར་ལྡན་པས་བཟའ། །མདོག་དམར་འདུ་ཤེས་ལྷག་མ་ནི། །ལཱ་མའི་ཕྱག་དང་གཟུགས་ཅན་ནོ། །དཔའ་བོ་ཐམས་ཅད་མཉམ་སྦྱོར་བ། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་དུམ་སྐྱེས་མའི་མཚན་ཉིད་དང་སྐྱེད་པ་དང་། འཁོར་ལོ་བཞིའི་རྩའི་རྣམ་པར་གཞག་པའི་མིང་མདོར་བསྟན་པ་དང་། སྔགས་དགོད་པ་ལ་སོགས་པའི་ཆོ་ག་སྟེ་ལེའུ་ལྔ་པའོ།། །།དེ་ནས་གཞན་མཆོག་བཤད་པར་བྱ། །མདོར་བསྡུས་པ་སྟེ་རྒྱས་པར་མིན། །དཔལ་ཧེ་རུ་ཀའི་ཀུན་སྦྱོར་ལས། །གཟུགས་ཅན་མ་ཡི་མཚན་ཉིད་དགེ། །ལུས་ལྡན་དང་ནི་ལས་དང་ཚིགས། །སྔོན་དུ་གཟུགས་ཅན་མ་
ལ་བརྟེན། །ཕྱི་ནང་བདག་ཉིད་ཅན་གཟུགས་སུ། །བདེ་ལ་གནས་པས་འགྲོ་བར་འགྱུར། །འདིར་ནི་རྐང་ལག་ཐམས་ཅད་ལ། །ཚིགས་ནི་བཅུ་གཉིས་ཉིད་ཡིན་ནོ། །ལྔ་ལྔ་རུ་ནི་ཤེས་བྱ་སྟེ། །བཅུ་གཉིས་ལ་རྩ་དྲུག་ཅུའོ། །དཀྱིལ་འཁོར་རྣམས་ལའང་འབབ་པ་མོ། །འཕོ་བ་བཅུ་གཉིས་སུ་འདོད་དོ། །གཡོན་པ་དང་ནི་གཡས་པ་ལའང་། །སྔོན་དུ་ལུག་སོགས་སྔགས་རིག་པས། །ལྷག་མ་བུ་ག་བཞི་རྣམས་སོ། །ལྟེ་བ་མདོམས་དང་རྩིབ་ལོགས་གཉིས། །གྲུ་གསུམ་དེ་བཞིན་ཤེས་བྱ་སྟེ། །དེ་ཡི་སྒོ་རྣམས་རྩ་དྲུག་ཅུ། །མཚམས་ནི་རྣམ་པ་ལྔར་རབ་གསུངས། །ཉི་མ་རྒྱུ་བར་གང་འགྲོ་བ། །དེ་འགྲོ་ཟླ་བ་ཟླ་རྣམས་སུ། །དྲུག་ལྔ་སུམ་ཅུའི་ཆ་རྣམས་སུ། །སྙིང་གར་གྲགས་པ་དེ་བཞིན་གསུངས། །རྩ་དགུ་ཇི་ལྟར་འགྲོ་བའོ། །མིག་ལ་སོགས་པའི་བུག་རྣམས་སུ། །སྒོ་ལ་བརྟེན་ནས་གནས་པར་འགྱུར། །མགྲིན་པར་གང་འདྲ་བ་ཡི་ཁམས། །དེ་རུ་གྱུར་ནས་གནས་པའོ། །མི་ཕྱེད་མ་སོགས་སུམ་ཅུ་གཉིས། །རྒྱུད་མང་པོར་ནི་བསྔགས་པའོ། །དེ་ཡི་གཟུགས་སུ་གནས་ལྷ་མོ། །གཟུགས་ཅན་མ་དེའི་རྣམ་རྟོག་པས། །བཅོམ་ལྡན་འདས་ལ་བདག་འདྲིའོ། །གཟུགས་ཅན་མ་ཡི་མིང་ཅི་གསུངས། །འགྲོ་བ་ཐམས་ཅད་གཟུགས་མེད་མཛོད། །རྩ་ཡི་བདེ་སོགས་མིང་གིས་སོ། །འགྲོ་བའང་དབང་པོའི་ལམ་རྣམས་སུ། །གང་འདྲའི་གཟུགས་ཀྱི་གཟུགས་ཅན་མ། །ཕ་ལས་ཐོབ་པའི་བདེ་བ་ནི། །དབང་གཉིས་རྣམ་པའི་སྦྱོར་ལས་སོ། །གང་དང་གང་གི་རིགས་གང་ནི། །དེ་དང་དེ་ཡི་འགྲོ་བར་བཤད། །བདེན་པ་ཀུན་ལས་འདྲེན་པར་འགྱུར། །སྔགས་ཀྱི་ཚུལ་ལས་གཞན་མི་འགྲོ། །དེ་ཕྱིར་གཟུགས་ཅན་མ་འགྲོགས་ལས། །ལྷན་སྐྱེས་རྫོགས་པའི་བྱང་ཆུབ་ཚོལ། །ལྷ་མོ་ཆེན་མོ་ཁ་དོག་སེར། །ལྷག་མ་དུམ་སྐྱེས་མ་དང་མཚུངས། །འདུ་བྱེད་ཕུང་པོའི་གཟུགས་དང་ནི། །མིང་དང་བུད་མེད་སོགས་གཟུགས་ཅན། །མཉམ་མེད་སེམས་ཅན་དོན་ལས་ཕྱིར། །གླིང་འདི་རུ་ནི་སྐྱེ་འགྱུར་རོ། །ལུག་དང་བྱ་ཀུ་ལ་གནག་པའི། །ཟླ་བ་རཱ་སིའི་རང་བཞིན་ཅན། །ཐབས་དང་ཤེས་
རབ་བདེ་བས་ཀྱང་། །དཀྱིལ་འཁོར་དབུས་སུ་བཞུགས་པའོ། །ཡང་དག་སུམ་ཅུ་བདུན་བདག་ཉིད། །ཇི་ལྟའི་རིམ་པས་དཔའ་རྣལ་འབྱོར། །གསང་སྔགས་ཁ་དོག་སྦྱོར་བ་རུ། །གཟུགས་ཅན་གཙོ་མོའི་ཤེས་པར་བྱ། །ༀ་བཛྲ་གྲཾ་རཱུ་ན་པི་མཿ། ནཱི་ཧི་ཡི་ༀ་ཀེ་སྭཱ་ཧཱུྃ་ཧཱ་ཧཱུྃ་ཧུ། ཕ་ༀ་ཊ་བཽ་ཕ་ཥ་ཊ་ཊ་ཧེ་སྭཱ་ཧཱ་ཧཱུྃ་ཧཱུྃ་ཧོཿ། ༀ་ཕཊ་ཕཊ་ཧཾ། དེ་ལྟར་རང་བཞིན་ལས་ཤེས་བྱ། །སྔོན་གྱི་ཆོ་གའི་ལས་ཀྱིས་ནི། །དབུས་མའི་བུ་གར་ཕྱིན་ནས་ནི། །དབུགས་ནི་རྣམ་ཤེས་ངོ་བོ་ཅན། །སངས་རྒྱས་ཞིང་ནི་གྲངས་མེད་པ། །མ་ལུས་སྐད་ཅིག་དེ་ལ་མཐོང་། །མ་ལུས་རང་བདག་ངོ་བོ་ཅན། །བསྒོམས་དང་ཐོས་དང་མཐོང་བ་ཡང་། །བགྲོད་བཞིན་པ་ན་རྟོགས་མི་འགྱུར། །འདི་ནི་སྒྱུ་མའི་རང་མཚན་ཉིད། །གཟུགས་ཀྱི་སྐུ་ཡང་རྣམ་གསུམ་སྟེ། །སྐུ་གསུང་ཐུགས་ཀྱི་མཚན་ཉིད་དེ། །དེ་ནི་འདོད་དང་གཟུགས་གཟུགས་མེད། །མེ་ལོང་དུ་ནི་གདོད་རྫོགས་པ། །ཇི་བཞིན་ཁམས་གསུམ་ལ་གནས་ནས། །དེ་ཡི་གཟུགས་དང་གཞན་གཟུགས་ཅན། །གཟུགས་དང་གཟུགས་ལས་གཟུགས་བརྙན་ཏེ། །གྲངས་མེད་པ་ཡི་འཇིག་རྟེན་ཁམས། །གཟུགས་ཅན་སྒྱུ་མས་བུད་མེད་དང་། །ཐབས་ནི་སྐྱེས་བུའི་ལས་ཅན་གྱི། །གཉིས་མེད་བུད་མེད་སྐྱེས་བུ་གཅིག །གཅིག་མིན་གཅིག་མིན་མིན་གཟུགས་ཅན། །གཟུགས་ཀྱི་ཡུལ་ལ་སོགས་དངོས་ལ། །མཚོན་བྱེད་མཚོན་བྱ་མེད་གཟུགས་ཅན། །མཚོན་དཀའ་མཚོན་བྱའོ་མཚོན་བྱ་ལ། །མཚོན་བྱ་གཟུགས་མེད་མཚན་ཉིད་མ། །མཚོན་མེད་སྤྱོད་ཡུལ་དེ་ཡང་ནི། །མཚོན་པ་པོ་དེའི་སྤྱོད་ཡུལ་ལོ། །ཇི་ལྟར་ལ་ལར་རྨི་ལམ་མཐོང་། །རང་ཉིད་ཤི་བ་མཐོང་འགྱུར་ནའང་། །མཐོང་བཞིན་དུ་ཡང་ངུ་བར་བྱེད། །གཟུགས་དང་གཞན་གྱི་གཟུགས་ཅན་ནོ། །དེ་ལྟར་ཀུན་གྱི་རང་བཞིན་དུ། །རྡོ་རྗེ་སེམས་དཔའ་རང་གི་དང་། །སེམས་དཔའ་ཆེན་པོའི་རང་བཞིན་དང་། །དམ་ཚིག་སེམས་དཔའ་ཆེན་པོ་པ། །བྱང་ཆུབ་ཆེན་པོའི་ཚུལ་སེམས་དཔའ། །བརྟན་དང་འགྲོ་བ་སྣ་ཚོགས་སོ། །དེ་ལྟའི་གཟུགས་ནི་ཇི་ལྟར་སྔོན། །རྟོག་གེ་པ་རྣམས་ཀྱིས་
མི་ཤེས། །བྱིས་པའི་རྣལ་འབྱོར་རྟོགས་བྱ་མིན། །རྣལ་འབྱོར་མ་ཡི་མཆོག་ཐོབ་པས། །སྐྱེ་བ་འདི་ཉིད་ལ་ཤེས་འགྱུར། །སྐྱེ་བོ་ཐམས་ཅད་བྱང་ཆུབ་རང་བཞིན་ཏེ། །རྨོངས་པའི་བྱིས་པས་ཤེས་པ་མ་ཡིན་ནོ། །སེམས་ཅན་ཐམས་ཅད་རྣལ་འབྱོར་མའི་དེ་ཉིད། །མི་གང་ཡིན་པ་དེ་ནི་རྡོ་རྗེ་འཆང་། །གླུ་འདི་བླངས་པས་ཐམས་ཅད་ནི། །སྐྲག་སྟེ་ས་ལ་བརྒྱལ་བར་འགྱུར། །རྣལ་འབྱོར་མ་རྣམས་འགྱེལ་ནས་ཀྱང་། །ཆོས་ཀྱི་སྤྱོད་ཡུལ་ངོ་མཚར་ཏོ། །ཐོད་པའི་དུམ་བུ་ལ་སོགས་གཙོ། །དཔའ་བོ་རྣམས་ཀྱིས་བསྐུལ་མཛད་ནས། །གསོན་ཅིག་གསོན་ཅིག་སྲིན་མོ་ཁྱེད། །སེམས་ཅན་ཁམས་ཀྱི་རང་བཞིན་གྲོལ་བྱེད་མ། །ཁྱེད་དང་སེམས་ཅན་རྣམས་ལ་དབྱེ་བ་མེད། །དཔའ་བོ་ཐམས་ཅད་སྒྲོལ་བར་མཛད་པ་མོ། །སླར་ཡང་བཅོམ་ལྡན་འདས་ཀྱི་ནི། །སྐུ་ལ་ཐམས་ཅད་རབ་ཏུ་ཞུགས། །སླར་ཡང་སྤྲོ་བའི་སྦྱོར་བ་ཡིས། །གཙོ་བོའི་ཞལ་ནས་སྤྲོས་པར་འགྱུར། །རྣམ་སྣང་མཛད་ལ་སོགས་པའི་རྒྱུ། །སླར་ཡང་ཞལ་ནས་སྤྲོ་བར་མཛད། །བཅོམ་ལྡན་ཐམས་ཅད་བསྡུ་མཛད་ནས། །རྣལ་འབྱོར་མ་ཡི་རྒྱུད་ལ་ནི། །ཆེད་དུ་བརྗོད་པས་ཆེད་བརྗོད་མཛད། །རྣལ་འབྱོར་རྒྱུད་ཀུན་ལ་ཡང་ངོ་། །རྣམ་སྣང་མཛད་དང་རིན་ཆེན་དབང། །འདིར་ནི་འདོད་ཆགས་དོན་ཡོད་གྲུབ། །མི་བསྐྱོད་པ་དང་སྤྱན་མའི་རྒྱུད། །མཱ་མ་ཀཱི་དང་གོས་དཀར་མོ། །སྒྲོལ་མ་དང་ནི་གཟུགས་རྡོ་རྗེ། །སྒྲ་དང་དྲི་དང་རོ་དེ་བཞིན། །རེག་དང་ཆོས་དབྱིངས་སུ་གྲགས་དང་། །ས་སྙིང་ནམ་མཁའི་སྙིང་པོ་དང་། །ཕྱག་ན་རྡོ་རྗེ་འཇིག་རྟེན་དབང། །སྒྲིབ་ཀུན་སེལ་དང་བཟང་པོ་དང་། །འཇམ་དཔལ་དང་ནི་བྱམས་པ་དང་། །གཤིན་རྗེའི་དགྲ་དང་ཤེས་མཐར་མཛད། །པདྨ་མཐར་མཛད་བགེགས་མཐར་མཛད། །མི་གཡོ་བ་དང་དབྱུག་སྔོན་ཅན། །འདོད་དང་སྟོབས་ཆེན་གནོད་མཛེས་དང་། །གཙུག་ཏོར་འཁོར་ལོས་སྒྱུར་བ་དང་། །ཁྲོ་གཉེར་རི་ཁྲོད་ལོ་མ་ཅན། །ལྷག་མ་རྡོ་རྗེ་སེམས་དཔའོ། །དེ་ལྟར་རྒྱུད་ཀྱི་མིང་འདི་ནི། །ཐབས་ཀྱི་དངོས་པོའི་མཚན་ཉིད་དོ། །ཤེས་རབ་རྒྱུད་ནི་རང་བྱུང་ཉིད། །རང་གི་རང་བཞིན་རྟག་ཏུ་གནས། །བྱང་ཆུབ་ཕྱོགས་ཀྱི་ཆོས་
རྣམས་སུ། །མི་འཇིག་གོ་འཕང་རྗེས་འགྲོ་བ། །བསྐལ་པ་བསྲེག་པའི་དུས་སུ་ནི། །གཞན་དུ་སོང་ནས་ཡང་དག་གནས། །ཐོད་པའི་དུམ་ལ་སོགས་དཔའ་བོ། །མིང་ནི་མི་བསྐྱོད་ལ་སོགས་སོ། །དངོས་པོའི་དབྱེ་བའི་རྣམ་གྲངས་ཀྱིས། །རིགས་ནི་དུ་མ་འབྱུང་བའོ། །གཟུགས་ཅན་མ་ཡི་གནས་བརྟེན་ནས། །དཔའ་བོས་ལ་བསྒྱིངས་པར་འགྱུར། །གཟུགས་ནི་གཟུགས་མེད་གྱུར་པའི་གཟུགས། །བདེ་མཆོག་དང་ནི་མཉམ་པར་འཁྱེར། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་གཟུགས་ཅན་མའི་མཚན་ཉིད་ཀྱི་རང་བཞིན། རྩའི་འཁོར་ལོའི་རང་བཞིན་དང་གནས་ཀྱི་རྣམ་པར་གཞག་པ་དང་རྒྱུད་ཀྱི་མཚན་ཉིད་ཀྱི་ཆོ་ག་སྟེ་ལེའུ་དྲུག་པའོ།། །།དེ་ནས་རྣལ་འབྱོར་མཆོག་གི་ས། །ཆོ་ག་མཐོང་བའི་ལས་ཀྱིས་ཏེ། །གང་གིས་ཁྭ་གདོང་མ་བྱུང་བ། །དེ་ཡི་ཆོ་གས་ཐར་འགྲོ་མ། །ཉེ་བའི་གླིང་དུ་གནས་མ་སྟེ། །ཁྱུ་མཆོག་འཕོ་དང་བཟང་པོ་མ། །ས་གའི་ཟླ་བར་ཤེས་བྱ་སྟེ། །ས་ལྔ་པར་ནི་འདོད་པ་ཡིན། །ལྷ་མོ་སྒོ་ན་གནས་པ་མོ། །ཀཱ་ནི་ཆོས་དབྱིངས་མར་འདུ་ཤེས། །གཉིས་པ་ཆོས་ཀྱི་སྐུ་དང་ནི། །དེ་ལས་ལོངས་སྤྱོད་རྫོགས་འབྱུང་བ། །སྱཱ་ནི་སྤྲུལ་པའི་སྐུ་ཡིན་ཏེ། །ལྟེ་སྙིང་མགྲིན་པ་མགོ་བོ་ལས། །བུ་ག་བཞི་རྣམས་ཤེས་བྱ་སྟེ། །བྱ་རོག་འདྲ་བའི་སྲོག་གདོང་ཅན། །དེ་ལ་རྟག་ཏུ་མངོན་སྤྱོད་ནི། །སྲོག་ཆགས་རྣམས་ནི་སྐད་ཅིག་གསོད། །ཀླུ་རྣམས་དགུག་པར་བྱ་བ་དང་། །ཆར་དབབ་པ་དང་རེངས་པའོ། །ཆོས་ཀྱི་དབྱིངས་དང་བྱང་ཆུབ་ཆེ། །རྣལ་འབྱོར་མ་ཀུན་རང་བཞིན་མ། །ཆོས་དང་ལོངས་སྤྱོད་སྤྲུལ་པ་ལ། །བདེ་བ་འདོད་པས་འགྲོ་བ་མོ། །སྔགས་བདེན་ལས་ཀྱི་བདག་ཉིད་ཅན། །བྱ་རོག་གཙོ་མོ་དེ་ལ་བརྟེན། །རྡོ་རྗེ་ཕག་མོ་དེ་ལ་ནི། །བྱ་རོག་མ་ནི་གནས་སུ་སོན། །སུམ་ཅུ་རྩ་བདུན་རྣལ་འབྱོར་མ། །སྔགས་འདི་ལས་ནི་བྱུང་བ་ཡིན། །
ཨོཾ་བ་ན་ཛྲ་མོ་ཀཱ་བྷ་ཀཱ་ག་སྱཱ་བ་ཡ་ཏེ་ཀེ་བཱི་ཧཱུྃ་རེ་ཧཱུྃ་ཤཱ་ཕ་ཡ་ཊ་ཧཱུྃ་ཕ་ཧཱུྃ་ཊ་ཕ་སྭཱ་ཊ་ཧཱ་ཕ་ༀ་ཊ་སྭཱ་ཧཱུྃ་ཧཱ་ཧཱུྃ། འདི་ནི་རིང་ཐུང་དབྱེ་བ་ལས། །ཤེས་རབ་ཐབས་ཀྱི་རང་བཞིན་ཅན། །ཐུང་ངུ་ཐབས་ཀྱི་རང་བཞིན་དང་། །རིང་པོ་ཤེས་རབ་མངོན་པར་བརྗོད། །ཁ་དོག་ནག་མོ་དྲག་ཆེན་མོ། །ལྷག་མ་མཁའ་འགྲོ་མ་དང་མཚུངས། །གང་ཕྱིར་བྱང་ཆུབ་སེམས་ཞུ་བ། །དེ་ཚེ་བྱ་རོག་ལས་རྒྱལ་མ། །ནམ་མཁར་བྱ་རོག་བཞིན་འཁོར་བ། །བྱ་རོག་གདོང་མའི་རླུང་གིས་སོ། །གང་ཕྱིར་འཕུར་ཞིང་སྟེང་འཕུར་བ། །དེ་ཕྱིར་འོག་དང་སྟེང་དུ་ལྟ། །བྱ་རོག་བཞིན་དུ་རིང་འཕུར་ནས། །བྱ་རོག་གླིང་དུ་སླར་འོང་བའོ། །དེར་སོན་པ་ནི་བདེ་ཆེན་པོ། །ལུས་ཀྱིས་ཉམས་སུ་མྱོང་བའོ། །བསོད་ནམས་ལས་ཀྱིས་སྐྱེ་བར་འགྱུར། །རྣལ་འབྱོར་གོང་ནས་གོང་དུའོ། །བསོད་ནམས་མིན་ལྡན་དེ་བཞིན་འདིར། །དམྱལ་བ་བྱ་རོག་དུམ་བུ་ཅན། །ཕ་རོལ་ཕྱིན་ཚུལ་རྣམས་ཀྱི་ཡང་། །སྦྱིན་པའི་ཕ་རོལ་ཕྱིན་པར་འདོད། །མ་བྱིན་ལེན་པས་དམྱལ་བ་པ། །བྱ་རོག་བཞིན་དུ་རྟག་ཏུ་བཀྲེས། །དེ་ཡི་དེ་ལྟར་ལས་དུས་སུ། །མི་གང་ངང་གིས་འཆི་བར་འགྱུར། །རྣལ་འབྱོར་མ་ནི་དེ་བསྒོམས་ནས། །བདེ་ཆེན་ཉམས་སུ་མྱོང་བར་འགྱུར། །རྣལ་འབྱོར་མ་ཡི་སྤྱོད་ཀུན་ཀྱང་། །རང་གིས་རང་ནི་འཐོབ་པར་འགྱུར། །ལས་མ་བྱས་ན་གང་གི་ནི། །ལས་ཅན་མེད་ཅིང་ལས་བྱེད་མེད། །རང་སེམས་འཕོ་བ་ལས་ཡིན་ཏེ། །ལས་དེ་ལས་བྱེད་པ་ཡང་དེ། །ལུས་ཀྱི་དབྱིབས་དང་གཟུགས་བདག་ཉིད། །སེམས་མེད་པ་ནི་སེམས་དཔའ་མཆོག །ལག་པ་རྐང་པ་ཐམས་ཅད་ཀྱིས། །གང་བྱས་ལས་བྱེད་པ་རང་ངོ་། །དེ་ཀུན་གྱི་ནར་ཁྱེར་བ་ནི། །ཡང་དག་ལས་མཐའི་མཚན་ཉིད་དོ། །ལས་ཀྱང་དགེ་བ་རྒྱུ་དོན་གཉེར། །མི་དགེ་རང་གིས་སྤང་བར་བྱ། །རྣལ་འབྱོར་མ་རྣམས་ཀྱི་མཆོད་པའམ། །དེ་བཞིན་བཟའ་བ་འདུ་བ་ནི། །གྲོང་དང་གྲོང་ཁྱེར་གནས་པ་དང་། །རི་ལ་སོགས་པའི་རྩེ་ཆེན་དུ། །དམ་ཚིག་དོན་དུ་མཆོད་པར་བྱ། །རྣལ་འབྱོར་དངོས་གྲུབ་འབྲས་རབ་སྟེར། །མཁའ་འགྲོ་མ་ཡི་གཟུགས་བརྙན་ཀྱང་། །ཁྱབ་གནས་རླུང་གི་མིང་ཅན་ཏེ། །སྲོག་དང་ཐུར་སེལ་
མཉམ་གནས་དང་། །ཁྱབ་བྱེད་ཇི་ལྟའི་རིམ་གཉིས་ཀྱིས། །མཁའ་འགྲོ་དེ་བཞིན་ལཱ་མ་དང་། །དུམ་སྐྱེས་མ་དང་གཟུགས་ཅན་མ། །འུག་གདོང་ཁྱི་དང་ཕག་གདོང་མ། །རིམ་པས་ཀླུ་དང་རུས་སྦལ་རྩངས། །ལྷ་སྦྱིན་དང་ནི་ནོར་ལས་རྒྱལ། །རྟག་ཏུ་བརྟན་མ་ཕོ་ཉ་གཉིས། །དགའ་དང་སྐྱོ་བ་ཞེས་བྱ་བ། །མཆེ་མ་དང་ནི་འཇོམས་མ་མཆོག །མདོར་བསྟན་པ་ཡི་ཚིག་འདི་ཡང་། །རྒྱས་བཤད་ཀུན་ནས་བརྗོད་པར་བྱ། །ཕག་མོས་མཆོད་པ་བྱས་ནས་ནི། །རྡོ་རྗེ་སེམས་དཔའ་ལ་ཞུས་པ། །ཇི་སྲིད་སྲོག་སོགས་རླུང་རྣམས་ཀྱི། །སོ་སོ་རེ་རེའི་མིང་འདུ་ཤེས། །བདག་གི་སྟོན་པ་ངོ་མཚར་ཆེ། །དུས་ཀུན་དུ་ནི་སྐྱེ་བར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །དང་པོར་གཙོ་བོ་ཅན་འཛིན་པ། །སྟོང་པའི་ངོ་བོས་གྲོལ་བར་འགྱུར། །རྡོ་རྗེ་ལྟ་བུའི་རླུང་དགོད་བྱ། །རྟེན་ནི་སྣོད་ཀྱི་འཇིག་རྟེན་ལའོ། །གང་ཕྱིར་འཇིག་པ་ཐིམ་འགྱུར་བ། །དེ་ཡི་དབྱིབས་ཚུལ་ཀྱང་མེད་པ། །དེ་ཕྱིར་ཐུར་སེལ་ཞེས་བྱ་ཡང་། །འགྲོ་བ་དང་ནི་འོང་བར་བསྟན། །མཉམ་གནས་རིགས་སུ་སོང་ནས་ནི། །སྔོན་དུ་གང་དང་གང་རྣམས་ཀྱིས། །ངག་ཏུ་བརྗོད་པ་སྨྲ་བར་འགྱུར། །སྔོན་དུ་བག་ཆགས་མ་ལུས་པའོ། །ཁྱབ་བྱེད་འགྲོ་བ་ཐམས་ཅད་ལ། །རྒྱས་འདེབས་པས་ན་ལས་ཀྱི་རླུང་། །ཀླུ་ནི་ཁྲོ་བོའི་ངོ་བོ་ཉིད། །ཁྱབ་བྱེད་དེ་བཞིན་ཚིག་གཉིས་ཏེ། །རུས་སྦལ་སེར་སྣའི་ངོ་བོ་ནི། །སྨྲ་བ་ཡི་ནི་མཚན་ཉིད་དོ། །རྩངས་པ་འདོད་ཆགས་མཉམ་གནས་སོ། །ཐུར་སེལ་ཕྲག་དོག་ལྷ་སྦྱིན་ནོ། །ནོར་རྒྱལ་གཏི་མུག་བདག་ཉིད་དོ། །སྲོག་གི་རླུང་ནི་གྲངས་གཉིས་ལས། །དགའ་བའི་ཡེ་ཤེས་ཅན་ཤེས་བྱ། །སྐྱོ་བ་དེ་ཡི་བཏགས་པའོ། །དེ་ཕྱིར་མཁས་པས་སོ་སོར་ཤེས་པ་ཡིས། །གང་ཕྱིར་སྲོག་གི་རླུང་ནི་ཐམས་ཅད་བདག་ཉིད་སྐྱེ། །ཇི་ལྟར་ས་ནི་བཅུ་གཉིས་ལས། །ཐོག་མ་དེ་ཉིད་བཅུ་གཉིས་པའོ། །བཅུ་པོ་རྣམས་ཀྱིས་དེ་ཤེས་བྱ། །གང་ཕྱིར་ས་བཅུའི་དབང་ཕྱུག་གོ། །ས་གཅིག་རང་བཞིན་རྣམས་ཀྱིས་ནི། །རྡོ་རྗེ་འཛིན་མ་ཆེན་མོར་འདོད། །སྦྱིན་སོགས་ཕ་རོལ་ཕྱིན་པ་གང་། །ལྷན་སྐྱེས་ཡང་དག་བྱང་
ཆུབ་ཉིད། །ཐམས་ཅད་ཀྱི་ནི་ནང་སོན་པས། །རྡོ་རྗེ་དབྱིངས་དབང་ཕྱུག་མ་མཆོག །བཤད་དང་མ་བཤད་གང་ཅིའང་རུང་། །དེ་ཀུན་བྱང་ཆུབ་ཚུལ་ཅན་ནོ། །སླར་ཡང་བྱ་རོག་དབྱིབས་ལྷ་མོ། །དེ་ནས་བྱེད་པའི་གཟུགས་ཅན་མའོ། །བྱེད་པ་ཕྱོགས་ཀྱི་གནས་ལ་སྟེ། །རྩ་གནས་ཀུན་གྱི་བུ་གའོ། །ཐིམ་དང་དེ་ལས་ལངས་བསམ་གཏན། །ཁྭ་གདོང་མིང་དུ་འདུ་ཤེས་སོ། །དེ་ལྟར་རྣལ་འབྱོར་གཏེར་ཐམས་ཅད། །བླ་མའི་ཞལ་ལས་གསལ་འཐོབ་འགྱུར། །བླ་མ་གང་དེ་མི་བརྙས་ཤིང་། །སྟོན་བྱེད་དེ་ཉིད་འདོད་པར་བྱ། །འཕགས་པའི་གོ་འཕང་མ་ཐོབ་ན། །མནར་མེད་ལ་སོགས་རྣམས་སུ་འཚེད། །ཀུན་ནས་བླ་མ་གུས་པ་ལས། །བྱང་ཆུབ་རབ་ཏུ་འཐོབ་པར་འགྱུར། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཁྭ་གདོང་མ་ལ་སོགས་པའི་སྲོག་སྐྱེད་པའི་མཚན་ཉིད་ཀྱི་ཆོ་ག་སྟེ་ལེའུ་བདུན་པའོ།། །།དེ་ནས་གཞན་གྱི་མཚན་ཉིད་མཆོག །འུག་གདོང་ལ་སོགས་གང་གསལ་བ། །བྱེད་པ་ཡང་དག་བྱ་བ་དང་། །ཐམས་ཅད་མཚམས་ནི་བཤད་པར་བྱ། །འཁྲིག་པ་སྡིག་པ་སྣྲོན་རྣམས་ནི། །ཟླ་བའི་སྦྱོར་བས་རྟག་ཏུ་གནས། །འུག་གདོང་ཡེ་ཤེས་ཐོབ་ནས་ནི། །རྩ་ནི་ལམ་གསུམ་འགྲོ་བ་མོ། །ཨུ། དྲག་ཤུལ་གཟི་བརྗིད་གཙིགས་པ་མོ། །ཡེ་ཤེས་ལམ་དབང་བཟའ་བ་ལས། །ལཱུ། འདོད་ལ་དགའ་བ་སྒྱུ་འཕྲུལ་ཆེ། །ལྷ་མིན་ལ་སོགས་སྐྱེ་རྣམས་ལ། །རྐང་པའི་མཐེབ་མཐར་བཅུ་གཉིས་སུ། །ཀ། མདའ་ཡི་ཤུགས་ཀྱིས་འགྲོ་བར་འགྱུར། །འུག་གདོང་མ་ཡི་མིང་ལ་ཡང་། །ཨུ་ནི་ཨོ་ཌྱན་བུ་གར་འདོད། །ལ། པུལླཱི་ར་མ་ལ་ཡར་གྲགས། །ཨཱུ་ནི་མུམྨུ་ནི་ཞིང་ངོ་། །ཀཱ་ནི་ཀཱ་མ་རཱུ་པ་སྟེ། །དེ་བཞིན་སྱ་འདིར་ཞིང་ཀུན་འདོད། །ཞིང་ཀུན་དབུགས་སུ་གྱུར་པ་ནི། །གྲུ་གསུམ་རྣམ་པའི་བདེ་བའི་མཐའ། །གང་ཕྱིར་གནས་ལྔའི་བདག་ཉིད་ཀྱི། །མི་ཟད་ཧེ་རུ་ཀའི་གོ་
འཕང་། །ཡང་ན་བདག་གི་གདན་སོགས་སུ། །དཔལ་ཧེ་རུ་ཀ་རྡོ་རྗེ་རང་། །སྐྱེ་གནས་གནས་ལྔའི་བདག་ཉིད་དེ། །སྙིང་ལྟེ་རྐན་དང་མགོ་བོ་དང་། །གསང་བ་རུ་ཡང་རྩ་ཀུན་གྱི། །སྐྱེ་གནས་བུ་ག་ལྔའི་བདག་ཉིད། །སྒོང་སྐྱེས་དང་ནི་དྲོད་གཤེར་སྐྱེས། །མངལ་སྐྱེས་བརྫུས་ཏེ་སྐྱེས་པ་རྣམས། །སེམས་ཅན་སངས་རྒྱས་ཡོན་ཏན་བདག །རིགས་ལྔ་རབ་ཏུ་སྟོན་པའོ། །ཉེ་བའི་གླིང་དུ་གནས་མ་ཡང་། །གཙོ་མོའི་གཟུགས་ཅན་ཡང་དག་གནས། །སྔགས་ཀྱི་ཕྲེང་བ་ལས་སྐྱེས་རྣམས། །སུམ་ཅུ་རྩ་བདུན་བདག་ཉིད་སྐྱེས། །ༀ་བ་མ་ཛྲ་ཧཱ་ཨུ་ཀ་ལཱུ་ལྤ་ཀཱ་ཨ་སྱཱ་གྣི་ཡ་སཾ་ཀེ་ནི་ཧཱུྃ་བྷཱ་ཧཱུྃ་ཡ་ཕ་ཧཱུྃ་ཊ་ཧཱུྃ་ཕ་ཕ་ཊ་ཊ་སྭཱ་ཕ་ཧཱ་ཊ་ༀ་སྭཱ་ཧཱུྃ་ཧཱ། དེ་ལྟར་སྔགས་དེ་ཁོ་ནའི་བདག །ཤེས་རབ་ཐབས་ཀྱི་རང་བཞིན་ཅན། །ཁ་དོག་ལྗང་སེར་དྲག་ཆེན་མོ། །ལྷག་མ་ལཱ་མ་དང་ནི་མཚུངས། །དཀྱིལ་འཁོར་དབུས་སུ་བསྒོམས་བྱས་ནས། །དུར་ཁྲོད་གནས་དང་གཉིས་མེད་པ། །ཀུན་སྤྱོད་རྩ་རྣམས་ཐམས་ཅད་ཀྱི། །རྒྱས་པའི་དགའ་བའི་སྤྱོད་ཡུལ་ལོ། །འདི་ནི་འཚོ་བའི་ཏིང་འཛིན་དང་། །འོད་གསལ་རྣམ་པའི་ཆོས་ཉིད་དོ། །བསྐྲད་པའི་ལས་དང་རྣལ་འབྱོར་མ། །འཇིག་རྟེན་གྱི་ནི་འདྲེན་པ་མོ། །རང་བསྟན་ཆོས་ལས་གསུངས་པ་ཡི། །སྣ་ཚོགས་ལས་ཀྱང་བྱ་བའོ། །ཀུན་གྱི་རྣལ་འབྱོར་ཡོངས་རྫོགས་ནས། །རྒྱུད་འདི་ཡི་ནི་སྤྱོད་ཡུལ་ལོ། །འོན་ཀྱང་རྣལ་འབྱོར་དེ་ཀུན་ཀྱང་། །མདོར་བསྡུས་ཚུལ་ནི་ཚིག་འདི་ཡིན། །སོ་སོར་སྡུད་དང་དེ་བཞིན་དུ། །བསམ་གཏན་སྲོག་རྩོལ་འཛིན་པ་དང་། །རྗེས་སུ་དྲན་དང་ཏིང་འཛིན་ཏེ། །སྦྱོར་བའི་མཚན་ཉིད་རྣམ་དྲུག་གོ། །སོ་སོར་སྡུད་པ་ཁྭ་གདོང་མ། །འུག་གདོང་མ་ནི་བསམ་གཏན་འདོད། །སྲོག་རྩོལ་དུ་ནི་གནས་པ་ཁྱི། །འཛིན་པ་ལ་ནི་ཕག་མོའོ། །རྗེས་དྲན་གནས་པ་ཕོ་ཉ་མོ། །ཏིང་ངེ་འཛིན་ནི་བརྟན་མར་འདོད། །མཆེ་བ་མ་ནི་རྒྱས་བསྟན་ཐོབ། །འཇོམས་མ་འབྲས་བུ་ཀུན་བདག་སྐྱེས། །འཁོར་བ་ལས་ནི་གྲོལ་གྱུར་པ། །རང་གི་སྐུ་ནི་སྒྱུ་མ་མཉམ། །བདག་བྱིན་རླབས་འདི་ཕྲ་མོ་དང་། །རྡོ་རྗེ་བཟླས་རང་མཚན་ཉིད་དོ། །རྫོགས་པའི་བྱང་ཆུབ་སེམས་ཀྱི་གཏེར། །དེ་ལས་ལྷག་མ་ཟུང་འཇུག་གོ། །མྱ་
ངན་འདས་ཞེས་བྱ་བའང་འདི། །ལམ་ཐམས་ཅད་ཀྱིས་མྱ་ངན་འདས། །ཐེག་ཆེན་ཀུན་ལ་རབ་འཇུག་པ། །སྔགས་ཀྱི་ཐེག་པ་རུ་ནི་བྱེད། །བྱ་བ་བསྟན་བཅོས་དགེ་སྣ་ཚོགས། །སྙིང་རྗེ་མཉེས་གཤིན་པ་ཡིས་བྱེད། །གང་འདྲའི་དངོས་དང་དངོས་པོ་ལ། །ཡེ་ཤེས་རྣམ་པའི་རང་བྱུང་གིས། །དེ་འདྲ་བ་ཡི་སེམས་རྒྱུན་ལས། །བདག་ཉིད་རྣལ་འབྱོར་རྣམས་ཀྱིས་མཐོང་། །ལུས་ཀྱི་མཚན་ཉིད་ཡང་དག་པ། །རྩ་ཡི་གུར་ནི་བཤད་པར་བྱ། །སྤྱི་གཙུག་ནས་ནི་ནོར་བུའི་མཐར། །མཚམས་དང་མགྲིན་པ་རྣམ་གཉིས་འདོད། །རྐང་པའི་མཐེ་བོ་མཚམས་མཐའ་དང་། །སྨིན་དབུས་དེ་བཞིན་སྒྲོ་བ་སྟེ། །མཚན་མའི་རྩ་བ་དཔྲལ་བ་དག །མིག་དང་རྐང་པའི་སོར་མོ་གཉིས། །མིང་མེད་པས་ནི་པུས་མོར་ཤེས། །བྱིན་པ་རྣ་བ་གཉིས་དག་དང་། །རྐང་པའི་མཐིལ་དང་སྙིང་ག་དག །ལྟེ་བ་དང་ནི་རྒྱབ་གཞུང་དང་། །བཤང་ལམ་དང་ནི་རྐན་ཤེས་བྱ། །རྐང་པའི་ཚིགས་དང་མཆུ་དག་དང་། །མཁུར་བ་མཁུར་ཚོས་དག་དང་ནི། །མདོམས་དང་མཆན་ཁུང་གཉིས་དང་ནི། །ལག་པའི་ཚིགས་དང་རྐང་པ་དག །དཔུང་པའི་ཚིགས་དང་ནུ་མ་གཉིས། །མཇིང་པ་ཐལ་གོང་འདིར་མཚམས་སོ། །མཇུག་མ་ནོར་བུ་གཉིས་དག་དང་། །རྐེད་པའི་ཚིགས་དང་མགྲིན་པ་དང་། །དཔྲལ་བ་དང་ནི་ཚིགས་གཉིས་དག །རྣ་བུག་དག་དང་རྩ་བ་དང་། །བྲང་དག་གཉིས་ཀྱི་མཚམས་སུ་འདོད། །སྟན་དག་དང་ནི་སྨིན་ཁུགས་དང་། །ལྕེ་དང་མི་ཡི་སྣ་གང་དག །དེ་བཞིན་དུ་ནི་རྐན་དང་ལྕེ། །བོལླ་ཀཀྐོ་ལ་གཉིས་དག །དེ་ལ་སོགས་པ་དུ་མ་ནི། །རྩ་དང་ཚིགས་ཀྱི་གནད་དུ་འགྱུར། །རང་རང་སྤྱོད་པ་བཙིར་བྱ་སྟེ། །བྱང་སེམས་བདག་ཉིད་ཆེ་རྣམས་ཀྱི། །བཙན་ཐབས་སྦྱོར་བའི་ཆོ་ག་རུ། །ཤེས་བྱ་བླ་མའི་གསུང་གིས་སོ། །ཟླ་བ་ཟླ་བའི་ཚེས་གང་དུ། །ཚེས་གྲངས་དེ་ལ་རྩ་བའི་རྩ། །དཀར་པོའི་ཚེས་གཅིག་ལ་སོགས་ནས། །ཇི་སྲིད་ནག་པོའི་མཐར་ཐུག་པར། །ཤེས་བྱང་ཆུབ་འབབ་པའི་རྩ། །འུག་མོ་སྒོ་ལ་སྤྱོད་པ་མོ། །གང་དང་འདྲ་བའི་གདོང་དེ་ཡི། །དེ་འདྲའི་སོར་མོའི་ཕྱག་རྒྱ་ནི། །དབུགས་ནི་དེ་དང་འདྲ་བར་བྱ། །ཕྱི་དང་ནང་གི་བདག་ཉིད་
འདོད། །ཡང་ན་རྩ་རྣམས་ཐམས་ཅད་ནི། །བཙིར་བྱ་བཅུ་གཉིས་ཀྱིས་ལྷག་པའི། །བརྒྱ་ཡི་ཚིགས་རྣམས་ཐམས་ཅད་ནི། །ཇི་ལྟར་གདོང་གིས་རིམ་པས་སོ། །དེ་དང་དེར་ནི་ཨཱ་ལི་འབར། །དྲག་པོའི་སྒྱུ་མ་དུས་ཀུན་དུ། །དེ་ཕྱིར་ཨ་ཞེས་བྱ་བའི་སྒོ། །ཚིག་ཏུ་རྟོག་པས་བརྟགས་པའོ། །དེ་བཞིན་གཤེགས་པའི་དབུགས་དབྱུང་བར། །རྡོ་རྗེ་འཆང་ལྟར་བརྟག་པའོ། །གང་དང་གང་གིས་འཆིང་འགྱུར་བ། །རྩ་ནི་གཏི་མུག་ཆེན་པོར་འགྱུར། །དེ་ཡིས་དེ་ཡི་རང་བཞིན་གྱུར། །སྣ་ཚོགས་གཟུགས་ཀྱི་རིན་ཆེན་བཞིན། །རྨོངས་དང་མཁས་རྣམས་ཀྱི་དག་ལ། །མངའ་བདག་ཐར་པ་ཆེན་པོ་བཞུགས། །བྱེད་པ་འབྱུང་པོ་ཐམས་ཅད་ཀྱི། །དབང་ཕྱུག་སྐྱེ་བོས་སྣ་ཚོགས་རྣམས། །དེ་ཕྱིར་རྟག་ཏུ་ལས་ཉམས་པ། །སྔོན་བྱས་སྡིག་པའི་ལས་ཀྱིས་ཏེ། །ཉམས་འགྱུར་བསྟན་པ་འདི་ལ་ནི། །བགྲོད་བྱ་སངས་རྒྱས་ཉིད་འཐོབ་འགྱུར། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་འུག་གདོང་མའི་ངེས་པའི་ཚུལ་དང་ཡང་དག་པའི་ཆོ་ག་ལས་སྐྱེད་པ་དང་སྲོག་ལ་སོགས་པའི་མཚན་ཉིད་དེ་ལེའུ་བརྒྱད་པའོ།། །།དེ་ནས་གཞན་ནི་དོན་ཆེ་བ། །ཁྱི་གདོང་རྒྱུ་ཡི་དབྱེ་བཤད་བྱ། །གང་ཞིག་རྣམ་པར་ཤེས་ཙམ་གྱིས། །རྣལ་འབྱོར་རྣམས་ཀྱིས་མཆོག་འགྲུབ་འགྱུར། །ཤྭཱ། ཁྱི་ནི་རྣལ་འབྱོར་མ་དབུགས་འབྱིན། །རང་གིས་འཇུག་དང་འབྱུང་བར་འགྱུར། །དུས་ཀུན་དུ་ནི་གཉིད་ལོག་དང་། །སད་པ་བདེ་བ་ཡོན་ཏན་ཆེ། །ན། སྣ་ཚོགས་གནས་སུ་སོང་ནས་ནི། །བདག་ཉིད་ཀྱིས་ནི་བདེ་རེག་འགྱུར། །བརྒྱ་ལ་ཉི་ཤུས་ལྷག་པ་ནི། །ངེས་ཚིག་བསྟན་བྱའི་མཚན་ཉིད་དོ། །དེ་ལྟར་ཁྱི་ཡི་མིང་དུ་ནི། །བདེ་བ་སྦྱིན་པ་པོར་ཤེས་བྱ། །པདྨའི་སྐྱེ་གནས་དེ་རྣམས་སུ། །ཨཱསྱ། པདྨའི་ཁ་ནི་རབ་རྒྱས་པ། །གཏོང་ངང་ལོངས་སྤྱོད་གར་ཆེན་པོ། །གླུ་དང་རོལ་མོ་གཉིད་ལོག་དང་། །རེག་དང་གོས་དང་རྒྱན་དག་དང་། །མེ་ཏོག་
ལ་སོགས་བསུང་ཅན་འདོད། །མཐུན་པར་ལྟེ་བའི་མ་ལ་སོགས། །མཛེས་མ་རྣམས་ཀྱི་ངག་ཅན་ཏེ། །སངས་རྒྱས་མཆོད་སོགས་ཐམས་ཅད་དུ། །སུ་རའི་བཏུང་ལ་འཐུང་འགྱུར་དང་། །སྐྱེད་མོས་ཚལ་དང་རྫིང་བུའི་འགྲམ། །བསྟི་གནས་འགྲོ་བ་ལ་སོགས་ཀྱིས། །ཚིམ་དང་སྟོན་མོ་འདོད་པ་ལྟར། །བླ་མའི་གསུང་ནི་བདེ་ཆེན་པོ། །མི་དང་མི་མོའི་སྒེག་པ་དང་། །དགོད་དང་སྒེག་པའི་བྱ་བ་གང་། །མཁས་པ་རྣམས་ཀྱི་ཡིད་དམ་པ། །སྐྱེ་བོ་དབང་ཕྱུག་ཉིད་དུའོ། །སངས་རྒྱས་ཆོས་དང་དགེ་འདུན་ལ། །མཆོད་དང་ཕྱག་བྱེད་ལ་སོགས་པས། །བླ་མ་གུས་ལས་བདེ་བ་སྟེ། །ཡོན་འབུལ་བ་དང་བུད་མེད་དོ། །སྤྱོད་ལམ་ལ་སོགས་ཆོས་རྣམས་ལ། །ལས་ཐམས་ཅད་ལ་མི་འཇུག་གོ། །རྒོལ་བ་རྣམས་ནི་གཞོམ་པ་དང་། །སངས་རྒྱས་ཆོས་རྣམས་གཞག་པ་དང་། །རྣལ་འབྱོར་མ་དང་བཟའ་བཏུང་དང་། །སྒོམ་དང་དགའ་བ་བསྐྱེད་པ་དང་། །དབང་པོ་གཉིས་ཀྱི་བདག་ཉིད་སྐྱེས། །སྦྱིན་སོགས་ཕ་རོལ་ཕྱིན་རྣམས་ཀྱི། །ལས་ཀྱིས་སྐྱིད་པ་བཙལ་བྱ་དང་། །བྱམས་དང་སྙིང་རྗེ་དགའ་བ་དང་། །ཀུན་གྱི་ཐ་མར་བཏང་སྙོམས་དང་། །ཡེ་ཤེས་རྣམ་ཤེས་སྨྲ་བ་དང་། །དབུ་མའི་ཚུལ་ནི་གཞག་པ་ལས། །ཀུན་ལ་དབུགས་དབྱུང་སྦྱིན་པ་དང་། །སྐུར་པ་འདེབས་པ་དགག་པ་དང་། །དགེ་བ་བཅུ་ཡི་ལས་དང་ནི། །ཀློག་དང་ཁ་ཏོན་བྱེད་མཆོག་ལས། །བྱང་ཆུབ་ལམ་ལ་གནས་པ་ཡི། །དཔའ་བོ་གཉིས་མེད་བལྟ་བའི་ཕྱིར། །ལུས་ལ་ལྟོས་པ་མེད་པ་ཡིས། །གྲོང་དང་གྲོང་དུ་གནས་རྣམས་ཀྱི། །དེ་ལྟར་གནས་སྐབས་གཅིག་པའོ། །གཉིས་པ་སླར་ཡང་བཤད་པར་བྱ། །སངས་རྒྱས་རྣམས་ཀྱི་རྒྱུད་ལ་དགའ། །དོན་དམ་རྣམས་ལ་གསལ་བ་ཡིས། །རྣལ་འབྱོར་མ་རྣམས་ཀྱི་གནས་སུ། །དངོས་གྲུབ་གཏམ་རྣམས་བརྗོད་པ་དང་། །ཆོས་ནི་དོན་ཆེན་འདུ་ཤེས་ལ། །དུས་སུ་འདུ་ཤེས་སྒོམ་པ་པོ། །འགྲོ་དྲུག་སྤོང་བའི་འདུ་ཤེས་ནི། །དེ་ཉིད་རྟོགས་པའི་མིང་ཅན་ནོ། །དངོས་རྣམས་སྒྱུ་མའི་འདུ་ཤེས་དང་། །ཞི་སོགས་ལས་ཀྱིས་བདེ་བ་དང་། །ཕ་དང་བུ་ལས་གཅིག་མིན་དང་། །གནས་སོགས་འགྲོ་བར་སྤྲོ་བ་ཅན། །ཉོན་
མོངས་ཕུང་པོ་ཡོངས་གཏོང་དང་། །ཡེ་ཤེས་ཕུང་པོ་སྐྱེད་པ་དང་། །སླར་ཡང་འཁོར་བར་མི་འོང་དང་། །འཁོར་ལོ་སྡོམ་པའི་རྣལ་འབྱོར་ལྡན། །རྟོག་པ་པོ་ཡི་ཚིག་བཟུང་ནས། །རྟོགས་ལྡན་མིན་པའི་ཚིག་སྤང་བྱ། །དབང་པོ་རྣམས་ཀྱི་མི་མཐུན་མིན། །རང་བཞིན་གྱིས་ནི་མཛེས་པ་ཡི། །ལྷན་ཅིག་སྐྱེས་དང་ལོངས་སྤྱོད་རྫོགས། །སྤྲུལ་པ་དང་ནི་ཆོས་སྐུ་ཡང་། །འདུ་ཤེས་སད་པ་ལ་སོགས་སུ། །གང་ཕྱིར་སྲིད་མཚོར་ཀུན་སྤང་བྱ། །ལྷག་མ་དགའ་བ་བཞི་པོ་ནི། །སྨོན་ལམ་རྫོགས་ལྡན་ལ་སོགས་ལ། །རྫོགས་ལྡན་དུས་སུ་རང་བཞིན་སྐྱེ། །དགའ་བ་སངས་རྒྱས་རྫོགས་ལྡན་གང་། །སེམས་ཅན་གསུམ་ལྡན་ལ་ཕྲ་སྐྱེས། །རིག་པ་དེ་ལ་སྦོམ་པོ་སྐྱེས། །གཉིས་ལྡན་ལ་ནི་བདེ་བ་མེད། །རྩོད་དུས་ཆ་ཡི་རགས་པའོ། །ཐམས་ཅད་སངས་རྒྱས་ཡོན་ཏན་ཐོབ། །སྨོན་ལམ་གྱིས་ནི་རང་གི་འབྲས། །དེ་ལྟར་བདེ་སྐབས་རྣམས་ཀྱིས་ནི། །སུམ་ཅུ་རྩ་གཉིས་རྨད་བྱུང་ཆེ། །གནས་སྐབས་གསུམ་པའི་བདེ་བ་ལ། །དགའ་བ་བཅུ་དྲུག་རྟག་བརྟགས་པས། །ཁམས་བཅུ་དྲུག་ཏུ་ཤེས་པར་བྱ། །རང་བཞིན་སྐྱེས་པར་གྱུར་པ་གསལ། །སྨན་དང་འདྲ་བར་ཤེས་པར་བྱ། །བདུད་རྩི་ཟོས་པས་ཕ་རོལ་འགྲོ། །པད་ཅན་དུང་དང་སྣ་ཚོགས་ཅན། །གླང་པོ་མ་དང་བུང་བའི་མིང་། །འཁོར་ལོ་རྡོ་རྗེ་སྐྱ་སྣར་མ། །དུ་བ་མོ་དང་བུ་སྐྱེ་ཚེ། །ཉང་རྩི་སྤྲས་དང་ངོ་ཚ་དང་། །གློག་དང་ཙནྡན་ཉི་མ་སྐྱེས། །དམར་པོ་དེ་བཞིན་སྦྲུལ་གྱི་མིག །སྨན་མཆོག་ཏུ་ནི་ཤེས་པར་བྱ། །བདེ་བས་དགའ་བའི་དུས་སུ་ནི། །ཁབ་སོགས་བྱེད་པའི་སྐད་ཅིག་ལས། །བྱ་བ་དེ་དག་ཞར་ལ་དྲན། །སྒོམ་པའི་སྐད་ཅིག་མཐར་འགྲོ་བའོ། །གནས་སྐབས་བཞི་ལ་བཤད་པ་ནི། །ཡིད་ཅན་རྣམས་ཀྱི་གྲངས་བརྒྱད་དེ། །འགྲོ་དང་འཕོ་འགྱུར་དེ་བཞིན་དུ། །སྐྱུག་འགྱུར་གཉིད་ཡུར་འགྱུར་དེ་བཞིན། །ལྟུང་འགྱུར་འཛག་འགྱུར་དང་ནི་འདིར། །གཡོ་འགྱུར་འགྱེལ་བར་འགྱུར་བ་ཉིད། །རྣལ་འབྱོར་མ་བརྒྱད་དཀར་མོ་སོགས། །བདེ་བའི་རྒྱུ་ཡིས་གནས་སྐབས་སོ། །དེ་ལྟར་གནས་སྐབས་རྣམ་བཞི་ལ། །
ཁྱི་གདོང་མིང་གིས་འདུ་ཤེས་གྱུར། །ཡང་དག་དྲན་པའི་གོ་འཕང་འདིར། །གང་དང་སུ་ཡིར་གནས་པར་འགྱུར། །ཡང་དག་རྩོལ་བ་ལ་གནས་ནས། །ཁྱི་ནི་གཞན་གྱི་གྲོང་དུའོ། །སྔགས་བདེན་སྦྱོར་བའི་བདག་ཉིད་དེ། །དཀྱིལ་འཁོར་དབུས་སུ་སྒོམ་པའོ། །ༀ་བ་ཛ་ཛྲ་ཊཱ་ཤྭཱ་མ་ན་ཏ་ཨཱ་ཀུ་སྱཱ་ཊ་ཡ་ཨུ་ཀེ་ཏ་ཧཱུྃ་ཀ་ཧཱུྃ་ཊཱ་ཕ་ཡ་ཊ་ཧཱུྃ་ཕ་ཧཱུྃ་ཊ་ཕ་སྭཱ་ཊ་ཧཱ་ཕ་ༀ་ཊ་སྭཱ་ཧཱ། སུམ་ཅུ་རྩ་བདུན་བདག་ཉིད་སྔགས། །ཤེས་རབ་ཐབས་ཏེ་དངོས་གྲུབ་སྟེར། །ཁ་དོག་དམར་པོ་དྲག་ཆེན་མོ། །ལྷག་མ་དུམ་སྐྱེས་མ་དང་མཚུངས། །ཆུ་སྟོང་ཀརྐ་ཊ་ཡུགས་ས། །རང་གི་བདག་པོ་རབ་གནས་མ། །ཉེ་བའི་གླིང་དུ་གནས་མ་སྟེ། །སེམས་ཅན་རང་རང་བཞིན་དུ་སྐྱེས། །དབང་གི་ལས་ལ་ལྷ་མོ་སྟེ། །ལྷ་དང་ལྷ་མིན་སོགས་སྔགས་རིག །བདུད་རྩི་ལྔ་དང་སྒྲོལ་མ་ཆེ། །མཆོད་པ་ལས་རྣམས་ཐམས་ཅད་ལའོ། །སྙིང་གཞི་པདྨར་ཡོངས་བཀུག་ནས། །བདུད་རྩི་ཚིག་ཀུན་ལས་སྐྱེས་པ། །རྡོ་རྗེ་སྦུ་གུའི་རབ་སྦྱོར་བས། །སྦར་དང་བསྲོ་བ་ལ་སོགས་པས། །སྐུ་རྡོ་རྗེ་སོགས་སྔགས་ཀྱིས་ནི། །བྱིན་གྱིས་བརླབ་པར་བྱས་པ་ལའོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཁྱི་གདོང་མའི་མཚན་ཉིད་དང་བདེ་བ་ལ་སོགས་པའི་གནས་སྐབས་ཀྱི་ཆོ་ག་སྟེ་ལེའུ་དགུ་པའོ།། །།དེ་ནས་ཕག་གདོང་མ་ཡི་ནི། །ཉུང་བ་རྒྱ་ཆེར་བཤད་པར་བྱ། །དངོས་པོ་ཀུན་ལ་རབ་འཇུག་དང་། །དངོས་པོ་དེ་ལས་ལྡོག་པའོ། །ཕག་མོ་རེངས་པའི་ལས་རྣམས་ལ། །མི་ཤེས་རི་བོ་འཇོམས་མའོ། །སཱུ། ཁབ་ནི་རྡོ་རྗེའི་གདོང་དེ་ཡང་། །སྐུད་པ་བཞིན་དུ་ཀུན་འགྲོ་མ། །བྱང་ཆུབ་སེམས་ཀྱི་དགའ་ཆེན་པོ། །ཀ། ཀེང་རུས་བདུད་རྩི་འབྱིན་པའོ། །དེའི་རང་བཞིན་འདོད་ཆགས་སོགས་ཀུན། །བཞི་པ་ལས་འདས་མི་འགྱུར་མ། །དེ་ནས་ལྷ་མོ་ཆེན་མོ་བརྒྱད། །མངལ་སོགས་བསྐྱེད་པའི་མཚན་ཉིད་དེ། །ཐོག་མར་བྱ་རོག་བཞིན་ས་བོན། །མ་ཡི་པདྨ་ལ་
ལྟུང་བའོ། །ནུབ་གཅིག་གིས་ནི་ཕྱེ་བ་ཡིས། །ཕྱི་ནས་འུག་པར་གནས་དང་འདྲ། །ཟླ་བ་གཅིག་ཏུ་གནས་ནས་ནི། །ཁྱི་ཡི་དབུགས་ནི་འཕེལ་བ་ལས། །ཕག་ཏུའང་ཡན་ལག་བདག་ཉིད་ཅན། །བརྟན་མས་སྐྱེ་གནས་དྲལ་བ་ལས། །ཕོ་ཉ་བྱིས་པ་དང་འཆི་ཕྱིས། །མཆེ་བ་མོ་ནི་ལས་བཅོམ་པས། །འཇོམས་མ་བྱང་ཆུབ་ཡན་ལག་དགྱེས། །དངོས་གྲུབ་ཀུན་གྱི་འབྲས་འབྱུང་མ། །ཡང་དག་པ་ཡི་རྩོལ་བ་འདི། །གཞན་གྱི་ལྟ་བ་ཉ་སོགས་ཀྱིས། །འཇུག་པ་ཐམས་ཅད་བདེན་པ་སྟེ། །འཇུག་མེད་དེ་དངོས་སྤྱོད་ཡུལ་ལོ། །རྐང་གཉིས་རྐང་བཞི་ལ་སོགས་པའི། །རྩོལ་བའི་ཡན་ལག་འཇོམས་མའོ། །མཐོང་བ་དང་ནི་རེག་པས་ཀྱང་། །འཇུག་མེད་དེ་ཉིད་རྟག་ཏུའོ། །ཁ་དོག་སེར་མོ་དྲག་ཆེན་མོ། །ལྷག་མ་གཟུགས་ཅན་མ་དང་མཚུངས། །རྡོ་རྗེའི་དཀྱིལ་འཁོར་དབུས་སུ་ནི། །ཤེས་རབ་ཐབས་ཀྱི་རང་བཞིན་ཅན། །སེང་གེ་གྲོ་བཞིན་ཆུ་སྲིན་ལ། །ཉེ་བའི་གླིང་དུ་གནས་པ་མོ། །སྔགས་ལས་བཞེངས་པའི་ལྷ་མོ་རྣམས། །རང་རང་ཞིང་དང་ཉིད་ཞིང་མའོ། །ༀ་བ་དཾ་ཛྲ་ཥྚྲ་སཱུ་ཀ་ཀ་རཱ་རཱ་ལོ་སྱཱ་གྲ་ཡཻ་མུ་ཧཱུྃ་ཁ་ཧཱུྃ་བྷི་ཕ་ཥ་ཊ་ཎཱ་ཕ་ཡ་ཊ་ཧཱུྃ་སྭཱ་ཧཱུྃ་ཧཱ་ཕ་ༀ་ཊ་ཕཊ་སྭཱ་ཧཱ། སུམ་ཅུ་རྩ་བདུན་བདག་ཉིད་ཀྱི། །གཙོ་མོ་མཆོག་གི་རྣལ་འབྱོར་མ། །དཀྱིལ་འཁོར་ཐིག་གདབ་ལ་སོགས་ནི། །བསྒོམས་པའི་སྦྱོར་བའི་མ་ཡི་སྟེ། །ཐིག་ཆེན་གཉིས་ནི་བཏབ་ནས་སུ། །ཤར་དང་སོ་སོར་འདོད་ཐིག་དང་། །ཟུར་གྱི་ཐིག་གཉིས་བཏབ་བྱས་ནས། །ཕུར་བུ་གདབ་པར་བྱ་བ་སྟེ། །ཚངས་པའི་ཐིག་གི་ལོགས་ནས་ནི། །སུམ་ཅུ་རྩ་གཉིས་པ་གཉིས་གདབ། །སྒོ་ནི་འཁོར་ལོའི་བརྒྱད་ཆ་སྟེ། །ལྟེ་བའི་པདྨ་དེ་དང་མཉམ། །སྙིང་པོའི་འདབ་མའི་ངོས་ནས་ནི། །ཆ་གསུམ་དུ་ཡང་དེ་ཤེས་བྱ། །དེ་ཡི་ཆ་གཅིག་འཁོར་ལོ་གསུམ། །ལྷག་མ་ཚོན་གྱི་ས་གཞིའོ། །དེ་ཡི་སུམ་ཆ་ཕྲེང་བ་སྟེ། །རྡོ་རྗེ་པདྨ་དང་འཁོར་ལོ། །རྩིབས་རྣམས་འཁོར་ལོ་དབུས་མ་ལས། །དམན་ཏེ་གཉིས་གཅིག་བསྡམས་པས་སྦོམ། །ཀ་བ་རྣམས་ནི་ཀུན་དུ་སྦྱིན། །བརྒྱད་གསུམ་འཁོར་ལོ་གསུམ་དུའོ། །སྒོ་ལས་སུམ་འགྱུར་རྟ་བབས་ཏེ། །སྒོ་ཁྱུད་སྒོ་ཡི་ཆ་ཅན་ནོ། །སྟེགས་
བུ་རྣམས་ནི་དེའི་ཕྱེད་དེ། །འགྲམ་དང་ལོགས་ནི་དེ་བཞིན་ནོ། །གཟུངས་ཀྱི་སྣམ་བུ་དང་ནི་འདིར། །རིན་ཆེན་ཕྲེང་ཕྱེད་སྣམ་བུའོ། །མགོ་བོའི་ཕྲེང་བ་དེ་ཡི་ཕྱེད། །མུན་པའི་སྣམ་བུ་དེ་བཞིན་ནོ། །ཀ་བའི་རྩེ་ལས་འཐོན་རྩེ་མོ། །སྣ་ཚོགས་རྡོ་རྗེ་འོད་ཆེན་པོའོ། །དྲིལ་ཆུང་དྲ་བ་གོས་རྣམས་དང་། །བ་དན་དྲིལ་བུ་སྒྲ་སྒྲོགས་པའོ། །དེའི་ཕྱི་ཆུ་སྐྱེས་ཐམས་ཅད་དུ། །སྙིང་པོ་ལ་སོགས་ཡང་དག་བྲི། །སྣ་ཚོགས་རྡོ་རྗེའི་ཕྲེང་དང་འདིར། །ལྷག་མར་འབར་བའི་ཕྲེང་བའོ། །དེ་ཡི་ཕྱི་རོལ་ཁོར་ཡུག་ནི། །ས་གཞིའི་རིམ་པས་བྲི་བར་བྱ། །གྲི་གུག་ཕྲེང་བ་སྦྱིན་བྱ་ཞིང་། །མགོ་དང་ལག་པ་དག་དེ་བཞིན། །སྙིང་པོའི་པདྨའི་ཕྱི་རོལ་དུ། །རིན་ཆེན་ཕྲེང་བ་ཡང་དག་བྲི། །དུར་ཁྲོད་བརྒྱད་པོ་བྲི་བྱ་སྟེ། །ཀུན་ནས་གཏུམ་དྲག་ལ་སོགས་སོ། །ས་བོན་རྣམ་པར་དགོད་པར་བྱ། །ཐམས་ཅད་གྲི་གུག་ལས་བྱུང་བའོ། །ཡང་ན་སྐུ་སོགས་རྣམས་ཀྱི་ནི། །ཡི་གེ་རྣམས་ཀྱིས་དཀྱིལ་འཁོར་ཀུན། །དེ་བཞིན་སྐད་ཅིག་རྣམ་པས་ཀྱང་། །ས་བོན་རྣམས་ཀྱིས་དཀྱིལ་འཁོར་དབྱུང་། །མཚམས་ཀྱི་པདྨའི་འདབ་མ་ལ། །བདུད་རྩི་ལྔ་ཡི་ཐོད་པ་ནི། །བུམ་པའི་སྟེང་དུ་སྦྱིན་བྱ་སྟེ། །སུམ་ཅུ་རྩ་བདུན་གཞན་བྱའོ། །གནག་དང་རྩ་བ་སྤངས་པ་སྟེ། །མཆུ་ནི་འཕྱང་ཞིང་མགྲིན་པ་མཐོ། །མགྲིན་པ་རྣམས་སུ་གོས་ཟུང་སྟེ། །རིན་ཆེན་ལྔ་དང་འབྲུ་དང་སྨན། །དྲི་ཡི་ཆུ་དང་འདབ་མའི་རྩེ། །བདུད་རྩི་ལྔ་རྣམས་ཀྱིས་དགང་བྱ། །གཏོར་མ་ལས་རྣམས་ཀུན་ལ་སྟེ། །ཀུན་ནས་སྒོམ་པ་ལ་སོགས་པའོ། །རྡོ་རྗེ་ལྷ་མོ་རྣམས་དང་ནི། །ཞིང་སྐྱོང་དང་ནི་ཁྲོ་རྣམས་ལ། །བདུད་རྩི་ལྔ་སོགས་རྫས་རྣམས་འབུལ། །ཚིམ་བྱ་ཕྱི་ལ་སོགས་རྣམས་ཀྱིས། །བགེགས་མེད་ཡང་དག་འཕེལ་བར་འགྱུར། །ཕྱི་ནས་ལས་ནི་ཡང་དག་བརྩམ། །དུ་མའི་དུད་འགྲོའི་ཞལ་ལྷ་མོ། །སུམ་ཅུ་རྩ་བདུན་གཟུགས་ཅན་རྣམས། །ལས་ཀྱི་རྡོ་རྗེ་འཇོམས་བྱས་ནས། །ཏིང་འཛིན་གསུམ་གྱི་རྣལ་འབྱོར་ལྡན། །བདུན་ཅུ་གཉིས་ཕྱག་དྲག་མོ་སྟེ། །ཞབས་བཅྭ་བརྒྱད་ནི་རྣམས་ཀྱིས་ལྡན། །རྩ་བའི་ཞལ་ནི་ཕག་ཞལ་ཏེ། །ངོས་གཉིས་དག་ཏུ་དགུ་དགུའོ། །དེ་
ཡི་སྟེང་དུ་བདུན་བདུན་ཏེ། །ཕྱི་ནས་གསུམ་ནི་གཞག་པར་བྱ། །གཡས་སུ་ཁྱི་དང་ཅེ་སྤྱང་དང་། །བྱི་ལ་སྟག་དང་སེང་གེ་དང་། །འཇིགས་བྱེད་མཆེ་ཅན་རྟ་བོང་བུ། །དེ་ལྟར་ཇི་ལྟར་རིམ་པས་སོ། །གཡོན་དུ་བ་ལང་མ་ཧེ་སྤྱང་། །རུས་སྦལ་ཆུ་སྲིན་རི་བོང་དང་། །བསེ་དང་གཡག་དང་མུན་ཛ་དང་། །ཇི་ལྟའི་རིམ་པས་མཚོན་པར་བྱ། །སྦྲུལ་དང་སྲེ་མོ་རྩངས་པ་དང་། །སྲམ་དང་བྱི་བ་དང་ནི་དོམ། །མཁའ་ལྡིང་བྱ་རྒོད་བྱ་རོག་དང་། །འུག་པ་བྱ་གར་ཁྲ་དང་ནི། །སྲིན་བྱ་དང་ནི་ངུར་པ་དང་། །རྨ་བྱ་ཟངས་ཀྱི་གཙུག་པུད་ཅན། །ཕུག་རོན་འདི་རྣམས་ཐམས་ཅད་ལ། །རང་བཞིན་མདོག་ཏུ་འདོད་པར་བྱ། །དཀྱིལ་འཁོར་གྱིས་བྱ་ངེས་པར་ནི། །རང་བཞིན་གང་གི་ཁམས་ལའོ། །ཡོན་ཏན་སུམ་ཅུ་གསུམ་བདག་ནི། །རང་བཞིན་གྱིས་ནི་འཛིན་པར་འགྱུར། །དེ་ཡི་གཟུགས་བརྙན་གྱི་ནི་ཞལ། །འགྲོ་ལ་བྱང་ཆུབ་བྱེད་བདག་ཉིད། །ཞབས་རྣམས་ཀྱིས་ནི་འབྱུང་པོའི་ཚོགས། །མེ་ཡི་དབུས་སུ་སོན་པ་གནོན། །གཡས་པས་ཁྱབ་འཇུག་དྲག་པོ་དང་། །ཚངས་པ་ཉི་མ་མེ་དང་ནི། །དབང་པོ་རླུང་དང་བདེན་བྲལ་དང་། །ནོར་སྦྱིན་ཇི་ལྟའི་རིམ་པའོ། །གཡོན་པས་གཤིན་རྗེ་འདོད་པ་དང་། །ཟླ་བ་ཆུ་ལྷ་ནོར་རྒྱས་དང་། །ས་དང་ཚོགས་ཀྱི་བདག་པོ་དང་། །སྨིན་དྲུག་བུ་དང་འཁོར་སྒྱུར་ཏེ། །དེ་ལྟར་བཅྭ་བརྒྱད་དབྱིབས་རྣམས་ནི། །འདུས་པ་རྨད་བྱུང་བསྔགས་པའོ། །འཛིན་འགྱུར་རང་གི་སེམས་ཀྱིས་ནི། །ལྷ་མོའི་ཞབས་ནི་རྡོ་རྗེ་འཛིན། །གཡས་པར་མཚོན་ཆའི་ཚོགས་ཀྱང་ནི། །རྡོ་རྗེ་རལ་གྲི་མདུང་དབལ་ཅན། །དགྲ་སྟ་གྲི་གུག་མདའ་དང་ནི། །གསལ་ཤིང་ཕུབ་དང་ཐོ་བ་དང་། །འཁོར་ལོ་ཌམ་རུ་ཆུ་གྲི་དང་། །དབྱུག་པ་དང་ནི་མཚོན་རྩེ་གཅིག །དུང་དང་ཟངས་དུང་དབྱུག་གུ་དང་། །རྨ་བྱའི་མཇུག་མ་དེ་བཞིན་ཏེ། །བྱ་རོག་སྒྲོ་དང་པིར་དང་ནི། །མེ་ཡི་ཐབ་དང་རི་བོ་དང་། །དབྱུག་པ་མེ་ལོང་པི་ཝང་དང་། །རྐང་མགོ་ལག་པ་གློ་བ་དང་། །རྒྱུ་མ་སྒྲ་གཅན་ལྕགས་སྒྲོག་དང་། །གདོས་དང་སྒྲོག་དང་ཉ་རྒྱ་དང་། །མགོ་གཅད་འབར་བ་མར་ནག་དང་། །འཇིགས་བྱེད་གཟུགས་ཏེ་རིམ་པས་སོ། །གཡོན་པར་དྲིལ་བུ་
ཕུབ་རིངས་མཆེ། །ཐོ་བ་ཞགས་པ་ཐོད་པ་དང་། །གཞུ་དང་ཁ་ཊྭཱཾ་ག་པོ་ཏི། །ཕུབ་ཆུང་ཡུ་ཅན་སྡིགས་མཛུབ་དང་། །གཡེར་ཀའི་ཕྲེང་དང་ལྕགས་སྒྲོག་དང་། །བྲག་དང་དུར་ཁྲོད་རྡུལ་དང་ནི། །བྷོ་ཀཾ་ཌ་ཀ་ལྤགས་རློན་དང་། །སྐྲ་ཡི་ཐག་པ་འཕྱང་བ་དང་། །སྐུལ་བྱེད་རོ་ཡི་ཤིང་བུ་དང་། །བྲག་དང་ཕུབ་དང་མགོ་བོ་དང་། །ཀེང་རུས་ཟོར་བ་དེ་བཞིན་ཏེ། །མིག་དང་མཁལ་མ་གཉེ་མ་དང་། །སྤེན་པ་དང་ནི་ཕུར་པ་དང་། །ས་བོན་གང་དང་སོག་ལེ་དང་། །ཁབ་དང་ལུས་ཀྱི་པགས་པ་དང་། །སྤྲིན་ཆར་འབབ་དང་ཤིང་རལ་གྲི། །དེ་ལྟར་རིམ་པས་ཤེས་བྱས་པས། །བདུན་ཅུ་རྩ་གཉིས་རྒྱུད་ཀྱི་རྩའོ། །གཉིས་ལྷག་པ་ཡི་ཕྱག་གཉིས་ཀྱིས། །གླང་པོའི་པགས་པ་སྟེང་བགོས་པའོ། །ཁམས་གསུམ་གླང་པོ་ལ་བཞུགས་པ། །དྲལ་བ་བགེགས་ནི་བཅོམ་པའོ། །ཀུན་གྱི་ཁ་དོག་རང་བཞིན་ཏེ། །ཡང་ན་གཙོ་མོའི་ཁ་དོག་བཞིན། །མགོ་བོའི་ཕྲེང་སོགས་ཐམས་ཅད་དང་། །གོས་དང་རྒྱན་རྣམས་ལུས་སྐྱེས་པའོ། །དེ་ལྟར་ཡང་དག་པའི་རྩོལ་བའི། །གཟུགས་བརྙན་ཅན་མར་ཤེས་པར་བྱ། །ཡང་དག་དྲན་པའི་རང་བཞིན་གྱིས། །དངོས་དབྱེ་རྐང་གཉིས་བདག་ཉིད་དོ། །ཏིང་འཛིན་དྲ་བས་ཀུན་བཀང་ནས། །འོད་གསལ་བ་ལ་ཀུན་ཐིམ་བྱོས། །རྟོགས་ནས་སངས་རྒྱས་ཉིད་འཐོབ་འགྱུར། །སྣ་ཚོགས་དུད་འགྲོ་སོགས་སྐྱེའོ། །རང་རང་སྐད་ཀྱིས་ཆོས་ཀྱང་ནི། །རང་རིགས་སྐྱེས་ལ་སྟོན་པར་འགྱུར། །སཱུ་ཡི་ཡི་གེས་འགྲོ་ཀུན་རྒྱས་བཏབ་སྟེ། །ལྷན་སྐྱེས་རང་བཞིན་དེ་ཉིད་དྲན་པར་བྱ། །སླར་ཡང་འཁོར་བའི་སྡུག་བསྔལ་མི་འོང་ངོ་། །ཕྱུགས་གང་ཡིན་པའི་སྐྱེ་བོ་རྣམས་སངས་རྒྱས། །དཔའ་བོ་ཐམས་ཅད་མཉམ་སྦྱོར་བས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཕག་གདོང་མ་སྐྱེད་པ་དང་དཀྱིལ་འཁོར་ལ་འཇུག་པ་ལ་སོགས་པའི་ལེའུ་སྟེ་བཅུ་པའོ།། །།དེ་ནས་བརྟན་མའི་སྦྱོར་བ་འདིར། །བཤད་ཀྱིས་སྒོམ་པ་པོ་རྣམས་ཉོན། །
ཀུན་ནས་དུས་ནི་བཞི་རྣམས་སུ། །ཟླ་བ་གསུམ་གསུམ་པ་ནི་བཞི། །བགྲོད་དང་མཉམ་པས་བཅིངས་པ་ཡི། །མཚམས་དེ་རྣམས་ནི་རབ་བཤད་བྱ། །བྱང་དུ་བགྲོད་པ་ལ་སོགས་པ། །བརྟན་མ་ལ་སོགས་མཚམས་གནས་མ། །ཉེ་བའི་གླིང་དུ་གནས་པ་མོ། །མགོ་ཡི་ཟླ་བ་དང་ནི་གཞུ། །མོ་ཧི་ཏ་ནི་རྟག་ཏུ་དེའི། །ལས་གཉིས་དག་ཏུ་ཤེས་བྱ་སྟེ། །སྒོམ་པོ་རྣམས་ཀྱི་དུས་མིན་པའི། །འཆི་བ་མཆེ་བས་གཅོད་མ་གང་། །དེ་ཡིས་གཤིན་རྗེའི་མཆེར་ཤེས་བྱ། །ཐོག་མར་ཡི་གེ་གཉིས་ཅན་ནོ། །བཅོམ་ལྡན་དུས་མིན་འཆི་བ་ནི། །མི་རྣམས་ལ་ནི་ཇི་ལྟར་འབྱུང་། །གང་གི་དྲིན་གྱིས་བདག་རིག་འགྱུར། །སུ་ཞིག་བདག་ལ་སྤྲུལ་པར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །བརྟན་མ་དུས་མིན་འཆི་བ་ནི། །སེམས་ཅན་རང་རང་ལས་ཀྱིས་སོ། །སྐྱེ་བོ་ཀུན་ལ་འཚེ་བ་ཡི། །སྡིག་གང་བདག་ཉིད་ཀྱིས་བྱས་པ། །དེ་ཡིས་དེ་ནི་དུས་མིན་འཆི། །ཁམས་དང་དབུགས་ནི་འཆད་པར་འགྱུར། །གཞན་རྣམས་ཀྱིས་ནི་གཅད་པ་ཡིས། །བཟའ་བཏུང་ཕྱིན་ཅི་ལོག་ཏུ་འགྱུར། །སྦྱིན་པ་རྙེད་པ་དང་བཅས་སྦྱིན། །དུས་མིན་གྱིས་ནི་ཉམས་མི་འགྱུར། །སྦྱིན་པ་རྣམ་པ་གཉིས་སུ་བཤད། །ལུས་དང་བསམ་པ་ལས་ཀྱང་ངོ་། །གཡོན་གྱི་སྣ་ཡི་སྒོ་རུ་ནི། །ཟླ་བ་རྒྱུ་བའི་རིམ་པ་ཡིས། །བགྲོད་པའི་སྲོག་ནི་ཉི་མའི་སྟེ། །ཨ་བ་དྷཱུ་ཏཱིའི་རླུང་རིམ་པས། །དེ་ཡིས་ཡ་ཡི་ཡི་གེ་བཤད། །མ་ཡི་ཡི་གེ་དབུས་འབབ་མའོ། །དཱ་ཡིག་གཡས་སུ་སོང་ནས་ནི། །རེ་ཞིག་དབུས་མ་རྒྱུ་བར་འགྱུར། །ཨ་ཡི་ཡི་གེས་གནས་པ་འཐོབ། །སླུ་བ་ནམ་མཁར་འགྲོ་བ་མོ། །རྩ་ནི་བདེ་ཀུན་བདག་ཉིད་རྣམས། །ཌྷི་ཡི་ཡི་གེའི་མིང་དུ་ཤེས། །མདོར་བསྡུས་པ་ཡི་ཡི་གེ་ནི། །དཀྱིལ་འཁོར་ལྔ་རྣམས་སུ་ནི་བརྗོད། །དེ་རྣམས་དངོས་ལས་ཁྱོད་བསྐྱོད་དེ། །དུས་མིན་བླུ་བར་རིག་པར་བྱ། །དེ་ལྟར་བསོད་ནམས་གཅིག་ཉིད་པོ། །གནས་གནས་བགྲོད་པའི་ལུས་ཅན་ནོ། །འཆི་བ་ཞེས་འདི་རྣམ་རྟོག་སྟེ། །མཁའ་སྤྱོད་གོ་འཕང་འཁྲིད་པར་འགྱུར། །འདིར་ནི་ཁ་དོག་གཉིས་སུ་འགྱུར། །ལུས་བསྒོམ་པ་ནི་དེ་བཞིན་
ནོ། །ཇི་ལྟར་མཁའ་འགྲོ་མའི་རིམ་པས། །མཚན་མ་མཚོན་ཆ་སོགས་འགྱུར་རོ། །སྤོང་བའི་ཆོས་ཤེས་བྱ་བར་གསུངས། །དཀྱིལ་འཁོར་དབུས་ཀྱི་གཙོ་མོའོ། །རྣལ་འབྱོར་སུམ་ཅུ་བདུན་བདག་ཉིད། །སྔགས་ལས་བྱུང་བའི་བདག་ཉིད་ཀྱིས། །ༀ་ཨཱཿས་ཧཱུྃ་ཧ་བ་སྲ་ཛྲ། བྷུ་ཡ་ཛ་མ་བྷཱ་དཱ་སུ་ཌྷི་རཱ་ཀཱ་ཡ་ཡཻ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ། སྭཱ་སྭཱ་ཧཱ་ཧཱ་ཨོཾ། འདི་ནི་ཤེས་རབ་ཐབས་བདག་ཉིད། །རྣལ་འབྱོར་མ་དང་དཔའ་བོའི་གཙོ། །གཤིན་རྗེ་མཆེ་བའི་རབ་སྦྱོར་བས། །སྐྱེ་བ་མཐར་བྱེད་བཟའ་བར་བྱ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་གཤིན་རྗེ་བརྟན་མའི་རྣམ་པར་གཞག་པ་དང་སྐྱེད་པའི་མཚན་ཉིད་ཅེས་བྱ་བ་སྟེ་ལེའུ་བཅུ་གཅིག་པའོ།། །།དེ་ནས་གཤིན་རྗེ་ཕོ་ཉ་འཆད། །གང་གིས་འཆི་བ་དབང་འགྱུར་བའོ། །བྲིཤྩི་ཀ་རུ་ཡང་དག་བྱུང་། །སྨིན་དྲུག་ཅན་དང་བཟང་པོར་ལྡན། །དཔྱིད་ཀྱིས་མཉམ་པའི་དུས་ཀྱིས་ནི། །ཕོ་ཉ་མ་བསྐྱེད་མཚན་ཉིད་དོ། །གཤིན་རྗེ་གསོད་མ་དེ་ཡི་ནི། །འཆི་བ་བླུ་བའི་འཁོར་ལོ་ལ། །རྩིབས་བཅུ་གཉིས་པའི་འཁོར་ལོ་ཆེར། །ལན་གསུམ་དུ་ནི་བསྐོར་བར་བྱ། །ལྔ་རྣམས་ཉི་ཤུ་རྩ་ལྔར་ནི། །བཅུ་གསུམ་བར་དུ་བྲི་བར་བྱ། །སླར་ཡང་སུམ་ཅུ་གཉིས་རྣམས་སུ། །གསུམ་གཉིས་གཅིག་ནི་ལོ་ཡིན་ནོ། །དུས་ཚོད་མེ་དང་གཉིས་ཟླ་བ། །ཟླ་བའོ་ཚེས་ཕྱོགས་དེ་བཞིན་མདའ། །གསུམ་གཉིས་གཅིག་གི་སྐབས་སུ་ནི། །རིམ་པས་ཕྱི་ནས་ཉི་ཕྱེད་སོགས། །ཉི་མ་གཅིག་དང་ཞག་དང་གཉིས། །གསུམ་བཞི་ས་དང་ཉི་མ་ཕྱོགས། །ནོར་རོ་ཆུ་ཕྱོགས་རིམ་པས་ཏེ། །སུམ་ཅུ་བདུན་བདག་ཉིད་གསལ་བའོ། །སྲོག་གི་ནུས་པར་ཤེས་བྱ་བ། །བཅུ་དགུ་ཡི་ནི་བདག་ཉིད་དོ། །བཅུ་དགུ་སླར་ཡང་འདི་རུ་ནི། །འཇོམས་པའི་བདག་ཉིད་ནུས་ཅན་ནོ། །ཉི་མར་བདུན་པོ་མཉམ་སོན་པར། །སྐྱེ་བའི་སྐར་མ་དང་ཟླ་བ། །གཅིག་ཏུ་སྤྱོད་པར་རྟག་རྒྱུ་ལས། །རྒྱས་པའི་དུས་ནི་ཡང་དག་འཐོབ། །བར་གྱི་ཉི་
མ་རྣམས་ཉིད་ནི། །བཅུ་དྲུག་གྲངས་སུ་ཤེས་བྱས་ལ། །བདུན་ཅུ་རྩ་གཉིས་རིམ་པ་ཡིས། །ལོ་ཡི་རིམ་པས་ཡང་དག་སྦྱོར། །དེ་ཕྱིར་ཕོ་ཉའི་ལྷ་མོ་ཡང་། །དཀྱིལ་འཁོར་བདག་ཉིད་ཅན་བསྒོམ་བྱ། །གང་དུ་རྩ་ནི་སྲོག་སྤངས་པ། །དེར་ནི་འདི་དེ་འབབ་པར་བྱ། །སྟེང་དུ་ཡལ་འདབ་སྟེང་རྩ་བ། །གསང་བ་ཡིས་ནི་དབུགས་བྱ་བའོ། །དེ་ནི་མཉམ་པ་མཚམས་ཀུན་ཏེ། །མཉམ་པ་ཡ་ཡིག་གིས་འགུགས་མའོ། །དེ་ནས་གནད་བཅིངས་པས་ཉམས་པ། །མ་ཡི་ཡི་གེས་ཐམས་ཅད་བཤད། །འོག་དང་སྟེང་དུ་བསྐྱོད་བྱས་ནས། །རྣོན་པོའི་མེ་ནི་རབ་འབར་བྱ། །ནད་རྣམས་དང་ནི་སྡིག་མང་རྣམས། །ལས་ཀྱིས་རང་ཉིད་ཉམས་པར་འགྱུར། །དེར་ནི་སྦྱིན་པ་སྦྱིན་བྱ་སྟེ། །བ་ལང་མ་ཧེ་ཞོན་སོགས་སོ། །བྱང་ཆུབ་སེམས་ཀྱི་ལམ་དུ་ནི། །མཛེས་མ་རྣམས་ཀྱི་དེ་ཚེ་བཏུང་། །དེར་ཡང་རང་གི་ཡན་ལག་ལས། །བྱུང་བའི་སྣ་སྨན་གཏང་བར་བྱ། །འོ་མ་དང་མཉམ་བཟའ་བྱ་སྟེ། །གློ་བ་ལ་སོགས་མ་ཚོས་པའོ། །གཡུལ་ངོར་རང་ཉིད་འགྱེལ་བ་ཡི། །གལ་ཏེ་རྙེད་ན་ཁྲག་ཆེན་པོ། །ཐེ་ཚོམ་སྤངས་ནས་བཏུང་བྱ་ཞིང་། །དེ་ཡི་ཤ་ཡང་བཟའ་བར་བྱ། །ཡང་ན་གང་གི་ས་གནས་སུ། །འཆི་ལྟས་ཟད་ནས་སོང་བར་དུ། །བཟའ་བ་འོ་མས་བྱས་ན་བདེ། །ཡང་ན་ཤ་རྣམས་ཐམས་ཅད་དོ། །གོས་འཇམ་རྣམས་ཀྱིས་ཡོངས་གཡོགས་ནས། །བདག་ཉིད་ལ་ནི་དུས་ཀུན་དུ། །དེར་ནི་གནས་པ་བསྲོ་བྱ་ཞིང་། །མེ་དང་ལྷན་ཅིག་ངེས་གནས་བྱ། །དེར་ནི་ཆུ་དྲོན་ཀྱང་བཏུང་ཞིང་། །བཟའ་བ་ཆུང་ངུ་ཉུང་ངུའོ། །གཤིན་རྗེའི་ཕོ་ཉ་བསྒོམ་བྱ་སྟེ། །སུམ་ཅུ་རྩ་བདུན་བདག་ཉིད་རང་། །གསང་སྔགས་ཁ་སྦྱོར་བདག་ཉིད་ཅན། །སེར་དམར་གཉིས་ཀྱི་ཁ་དོག་ཅན། །སེར་པོས་འཆི་བ་རེངས་པར་བྱེད། །དམར་པོས་དབང་དུ་འགུགས་པར་བྱེད། །ལྷན་སྐྱེས་རྫོགས་བྱང་ཆུབ་དངོས་ཀྱིས། །ལྟེ་འོག་མགྲིན་པ་རྐན་འགྲོ་རྣམས། །ཟབ་པས་སྲོག་ནི་གཞན་འགྲོ་བ། །ཕན་ཚུན་ཕུག་རྣམས་སུ་འདུ་འགྱུར། །དེ་ཕྱིར་ཁ་ཊྭཱཾ་ག་བསྒོམ་སྟེ། །ཡན་ལག་ཁ་ཊྭཱཾ་སྦྱོར་བས་སོ། །སྙིང་གའི་པད་དབུས་སུ་སེམས་ཀྱིས། །དཀྱིལ་འཁོར་སྔོན་ཆའི་ཆ་ཅན་ནོ། །ལྷ་མོ་
མོའི་མདོག་ནི་སྔོན་ཅན་ཏེ། །དབྱིབས་སོགས་གཟུགས་ཅན་མ་དང་མཚུངས། །ༀ་བ་པ་ཛྲ་ར་ཡ་ཤུ་མ་པཱ་དཱུ་ཤྭ་ཏཱི་དྱ་ཡེ་ཏ་ཧཱུྃ་ཤཱུ་ཧཱུྃ་ལ་ཕཊ་ཁ་ཕཊ་ཊྭཱཾ་སྭ་ག་ཧཱ་དྷཱ་རི་ཎེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ་ༀ་ཧཱུྃ། ཤེས་རབ་ཐབས་བདག་ཉིད་དུ་སྐྱེས། །སྒྱུ་འཕྲུལ་ཆེན་མོའི་རང་བཞིན་ཅན། །རྣལ་འབྱོར་མ་ནི་འདི་རྣམས་ཀུན། །བདུད་རྩིའི་གཟུགས་སུ་བསྒོམ་པར་བྱ། །དེ་རྣམས་སྙིང་གར་དཀར་བ་ནི། །འཁོར་ལོ་ཐམས་ཅད་རྣམ་བསྒོམ་བྱ། །དེ་རྣམས་ནང་དུ་རང་མིང་ཡང་། །ཁ་དོག་དཀར་པོ་འོད་བཅས་པ། །རྩ་ཡི་བུ་ག་སོ་སོ་ཡི། །ནང་དུའང་རྣམ་པར་བསྒོམ་པར་བྱ། །རློན་དང་བཙོས་པའི་རའི་འོ་མ། །བདུད་རྩི་ལྔ་དང་རང་བྱུང་ནི། །རྡོ་རྗེའི་རྩེ་མོས་འཐུངས་པས་ཀྱང་། །དུས་སུ་འཆི་བ་ཉམས་པར་འགྱུར། །ཟག་མེད་དེ་ཉིད་ཐོབ་པས་ན། །དེ་ལ་དུས་མིན་འཆི་མིང་ཅི། །དེ་ཕྱིར་ཡང་དག་རབ་སྤོང་བའི། །ཆོས་ཉིད་གཤིན་རྗེའི་ཕོ་ཉར་ཤེས། །རྡོ་རྗེས་བཏུང་བྱས་རབ་བཤད་པ། །ལས་ཀྱིས་རྣམ་པ་གཉིས་སུ་འདོད། །གཅིག་ནི་ཕྱི་རོལ་གྱིར་བཤད་དེ། །གཉིས་པོ་ནང་གི་བདག་ཉིད་འདོད། །རྡོ་རྗེ་རྩེ་གསུམ་བསྒོམ་བྱ་བ། །རྩ་དྲུག་དུས་ནི་རྒྱུ་བ་མོ། །ངང་པའི་རྒྱུ་བར་འཛིན་པའི་སྲོག །འོག་གི་ཆུ་ནི་འཐུང་བ་ཡི། །བདུད་རྩི་ལྔ་སོགས་གང་ཅུང་ཟད། །དེ་ཡི་དབུས་སུ་རབ་ཏུ་ཞུགས། །འཐུངས་པས་རྒས་དང་འཆི་བ་འབྲོས། །རྡོ་རྗེ་འཆང་གི་གདམས་ངག་གོ། །གཤིན་རྗེའི་ཕོ་ཉ་མ་ཡི་རྣལ་འབྱོར་མ་ཁྱོད་བཞུགས། །དེ་ཡིས་སླར་ཡང་རྒས་དང་འཆི་བ་མེད་པ་འཐོབ། །འཆི་བ་སློང་བར་བྱེད་པའི་རྣལ་འབྱོར་མ་བླ་མེད། །རྣལ་འབྱོར་མ་ལ་སྡིག་དང་བསོད་ནམས་མི་ལྡན་ནོ། །དེ་ནི་མཉམ་པའོ་མཉམ་སྲོག་ལས། །གཡོན་དང་གཡས་དང་དབུ་མ་ཡི། །རྩོལ་བ་གཡོ་མེད་དངོས་པོ་ལས། །སླར་ཡང་ཡ་མའི་ཡི་གེ་འདོད། །ཕོ་ཉ་ཕྱོགས་གཉིས་ཀྱི་ངང་པ། །དབུ་མར་ཟད་པའི་གོ་འཕང་ངོ་། །དེ་ལྟར་རྣམ་པ་མང་པོ་ནི། །བརྟན་པའི་བློ་ལྡན་གྱིས་མཚོན་བྱ། །འདིར་མང་བཤད་པས་ཅི་བྱ་སྟེ། །སྦྱིན་པའི་ཕ་རོལ་ཕྱིན་སོགས་པ། །དགེ་བའི་ལས་ཀྱང་བསྙེན་བྱ་སྟེ། །ལུས་གཅིག་ལུས་མང་པོ་
ཅན་ནོ། །རྣལ་འབྱོར་མ་ལ་མཆོད་བྱ་ཞིང་། །དཔའ་བོ་རྣམས་ལ་རྗེད་པར་བྱ། །གང་ཞིག་གང་སློང་ལ་ཡང་དག །དེ་ཕྱིར་དེ་རྣམས་ལ་ངེས་སྦྱིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་གཤིན་རྗེ་ཕོ་ཉ་མོ་སྐྱེད་པ་ལ་སོགས་པའི་མཚན་ཉིད་དང་འཆི་བ་བསླུ་བའི་འཁོར་ལོ་བསྒོམ་པའི་མན་ངག་མདོར་བསྡུས་པ་སྟེ་ལེའུ་བཅུ་གཉིས་པའོ།། །།དེ་ནས་གཤིན་རྗེ་མཆེ་གཙིགས་མ། །བཤད་ཀྱིས་ད་ནི་མཉན་པར་གྱིས། །སེམས་ཅན་རྣམས་ཀྱི་བག་ཆགས་ཀྱི། །སྐྱོན་གྱིས་གུར་ལ་འབིགས་དང་བསྲེག །གང་ཞིག་གང་ལ་ལས་བྱས་པས། །དེ་ཡི་དུས་སུ་འབིགས་པར་འདོད། །བརྒྱད་ཅུ་རྩ་བཞིའི་གནད་རྣམས་ནི། །གང་དང་དེར་ནི་གནས་རྣམས་ཀྱང་། །འདི་རྣམས་དབུས་སུ་བྱ་བ་སྟེ། །དགེ་དང་དམན་པ་མཚོན་པར་བྱ། །མི་དགེ་བ་ནི་འཆིར་དོགས་པས། །གནད་དུ་ན་བས་མཚོན་པར་བྱ། །གལ་ཏེ་དུས་ནི་གཅིག་ལ་ནི། །རྐན་གསུམ་དུ་ནི་གཟེར་བ་ན། །དེ་ཚེ་ཞག་གསུམ་ན་འཆི་བར། །རིག་བྱ་འདི་ལ་ཐེ་ཚོམ་མེད། །རྐང་པའི་བྲང་བར་གཟེར་བ་དང་། །གལ་ཏེ་ལྟེ་བར་གཟེར་བ་ན། །ལྷ་མོ་ཞག་གཉིས་ན་འཆི་བར། །སྐྱེ་བོ་རྣམས་ནི་འགྱུར་བའོ། །རྐང་པ་གཉིས་ཀྱི་བྲང་མཐིལ་དང་། །གལ་ཏེ་མིག་ཏུ་གཟེར་བ་ན། །དེ་ཚེ་ཟླ་བ་གསུམ་དུ་ཡང་། །འཆི་བྱེད་ཀྱི་ནི་དབང་དུ་འགྲོ། །རྐང་པའི་མཐིལ་ནི་གཟེར་བ་དང་། །གལ་ཏེ་སྣ་ནི་གཟེར་བ་ན། །ཞག་གསུམ་ན་ནི་འཆི་འགྱུར་བར། །འདི་ལ་ཡང་ནི་ཐེ་ཚོམ་མེད། །བཤང་དང་གཅི་བའི་དུས་སུ་ནི། །གལ་ཏེ་སྦྲིད་པ་བྱུང་བ་ན། །དེ་ཡི་དེ་ལྟར་དུས་ཚོད་ཀྱི། །ལོ་ན་ངེས་པར་འཆི་བའོ། །སྔ་དྲོ་ཡི་ནི་ཉིན་ལྔ་དང་། །དབུས་མའི་གུང་ལ་བཅུ་དེ་བཞིན། །གཞན་གྱི་གུང་ལ་ཟླ་ཕྱེད་གཅིག །ནམ་ཕྱེད་ལ་ཡང་ཟླ་བ་སྟེ། །འདི་ཚེའི་དེ་ལྟར་དུས་སུ་ནི། །གལ་ཏེ་སྦྲིད་བྱུང་སྔོན་བཞིན་ཏེ། །དུས་ཀྱི་
ངེས་པར་འཆི་འགྱུར་བས། །འདི་ལ་ཐེ་ཚོམ་མེད་པའོ། །ལྟག་པ་ཡི་ནི་བདུད་ཁུང་དུ། །གཟེར་ན་ལོ་ནི་ལྔ་རྣམས་ན། །དེ་ནི་འཆི་བར་འགྱུར་བ་ནི། །ཤེས་བྱ་འདི་ལ་ཐེ་ཚོམ་མེད། །ལྷ་མོ་ལྕེ་རྩེ་མ་མཐོང་ན། །དེ་ཕྱིར་ཞག་ནི་གསུམ་ན་འཆི། །ཉན་པ་ཡི་ནི་རྩེ་མོར་གཟེར། །འཆི་བ་ཟླ་བ་བཞི་ནའོ། །མིག་གཡོན་པ་ཡི་འབྲས་བུ་ནི། །མེ་ལོང་ལ་ནི་མ་མཐོང་ན། །དེ་ཚེ་ཞག་བདུན་ན་འཆི་བར། །སྔོན་གྱི་སྐྱེ་བར་བཤད་པའོ། །དཀར་པོ་ཡི་ནི་ཚེས་གཅིག་ལ། །གལ་ཏེ་ཁུ་བ་དཀར་མིན་འགྱུར། །ཟླ་བ་དྲུག་ན་དེ་འཆི་སྟེ། །དམར་པོས་ནང་དུ་ངེས་པར་འགྱུར། །བྷ་ག་ལིང་ག་ཡོངས་སྦྱར་བའི། །མཐའ་རུ་གལ་ཏེ་སྦྲིད་པ་ནི། །བྱུང་ན་ཟླ་བ་ལྔ་ན་ནི། །དེ་ཚེ་ལྟུང་བར་འགྱུར་བའོ། །སྦྱོར་བའི་དུས་སུ་དྲིལ་བུའི་སྒྲ། །རྣ་དག་ལ་བྱུང་འཆི་གསལ་བར། །གལ་ཏེ་བརྒྱ་བྱིན་མཉམ་གྱུར་པ། །ཟླ་བ་ལྔ་ན་ཐེ་ཚོམ་མེད། །དེ་བཞིན་དུས་ནི་གཅིག་གི་ཚེ། །གལ་ཏེ་ཟླ་བ་ཉི་མ་དག །གང་གི་སེམས་ཅན་ལ་གཟེར་བ། །ཟླ་བ་གཅིག་ཏུ་འཚོ་བཅས་པའོ། །རྐང་ལག་དག་གི་ཚིགས་བཞི་དང་། །མཐེའུ་ཆུང་གི་ནི་སོར་མོ་ལ། །གང་གི་དུས་གཅིག་ལ་གཟེར་བ། །ངེས་པར་ཟླ་བ་གཅིག་ན་འཆི། །བསྣུན་པ་གསུམ་གྱིས་གཟེར་བ་ན། །གལ་ཏེ་ནུས་སྟོབས་བདག་མཉམ་པ། །རྐང་པའི་མཐེ་བོང་དག་ལས་དཔའ། །ས་གསུམ་དུ་ནི་སྐྱེ་བོ་རྣམས། །མདུད་པའི་རྒྱལ་པོ་ལྟ་བུའི་ཚུལ། །དཔེ་དེས་རྟག་ཏུ་བཤད་པའོ། །དེ་ཚེ་ཟླ་དྲུག་ན་འཆི་བར། །གལ་ཏེ་དྲག་པོ་མཉམ་ཀྱང་འགྱུར། །སྙིང་གའི་དབུས་དང་དེ་བཞིན་སྔོན། །འདིར་ཡང་མགྲིན་པའི་སྤྱོད་ཡུལ་ཏེ། །ཟླ་ཕྱེད་གསུམ་ན་འཆི་བར་ནི། །རྣམ་དཔྱད་སྤྱོད་ཡུལ་འདི་ལ་མེད། །སླར་ཡང་མགོ་བོའི་རྩེ་མོར་གཟེར། །གྲོང་ཁྱེར་གསུམ་གྱི་རྒྱ་མཚོ་བསྲེག །འཕྲལ་དུ་འཆི་བར་ཤེས་བྱ་བར། །ལུས་ཀྱི་གུར་དུ་བཤད་པའོ། །རྣ་བའི་རྩ་བར་དེ་བཞིན་གཟེར། །འཕྲལ་དུ་འཆི་བར་ངེས་པར་བཤད། །སྨིན་མའི་དབུས་སུ་དེ་བཞིན་གཟེར། །དེ་ཡི་སྐད་ཅིག་ལ་འཆི་འགྱུར། །སྣ་ཡི་རྩེ་མོར་རླུང་གྲང་མོར། །གྱུར་ན་ཡོངས་རྫོགས་
དུས་ཡིན་ནོ། །དེ་ལྟར་འཆི་བ་ཐམས་ཅད་ནི། །མཆེ་གཙིགས་གོ་འཕང་གིས་བསླུའོ། །གང་གི་དུས་སུ་འདི་འགྱུར་བ། །གཟེར་ནི་དེ་ཚེའི་དུས་འདིར་འགྱུར། །གཟེར་བའི་གནས་ནི་གསལ་མཚོན་ནས། །རྩ་བ་བཅུ་ཡིས་མཉེ་བར་བྱ། །ཁྱབ་འཇུག་ཅེས་བྱའི་མར་ཁུ་ནི། །མགོ་བོར་རྟག་ཏུ་གཟུང་བར་བྱ། །སྣ་ནས་རྣམ་སྣང་མར་ཁུ་དང་། །མར་དང་ཁྲག་ཏུ་ཡོངས་ལྡན་པའོ། །ཉི་མའི་འོད་ཀྱིས་མི་གདུང་སྟེ། །སྐྱེ་བོ་དང་བྲལ་ཁྱིམ་དྲོན་པོར། །སྦྱོར་བའི་རྒྱ་མཚོ་ཆེ་གཟུང་བས། །རྣལ་འབྱོར་མ་དེ་ཡང་བསྒོམ་བྱ། །ཡ། གང་གི་དཀྱིལ་འཁོར་ཆེན་པོར་ནི། །མ། དབུ་མའི་མཐའ་ཡི་མཚན་ཉིད་ལས། །གཡས་སུ་བགྲོད་པའི་དུས་སུ་ནི། །དཾ་ཡིག་ཚིགས་མཚམས་ཀུན་དུའོ། །བུ་ག་གཟེར་བྱེད་ཕུག་ནས་ནི། །དེའི་སྐད་ཅིག་ལ་དབྱུག་གུ་དབྱུག །ཊ། ཧྲིལ་ཧྲིལ་པོར་ནི་འགྱུར་བཞིན་པ། །ཥ། སྙིང་གའི་རྫིང་བུ་ལ་སོགས་པ། །ཤེས་བྱ་མཚམས་ཀུན་དུ་ཡང་སྟེ། །གཟེར་བའི་འཆི་བ་སླུ་བ་ལ། །ཨི། དབང་པོ་ཡིས་ནི་ཐམས་ཅད་ལའང་། །ཡིད་ནི་དེ་བཞིན་ངེས་པར་གནས། །ཥྚི་ཡི་ཡི་གེ་ཞེས་བྱ་བ། །དེ་ལྟར་ཚིགས་བཅད་གཉིས་ཀྱིས་གསུངས། །དེར་ནི་ཏིང་འཛིན་ཞེས་བྱ་བ། །དབང་པོ་སྦྱངས་པས་ཐོབ་པར་གྱིས། །པད་སྣལ་སྐུད་པས་ནོར་བུ་དང་། །སྤྱི་གཙུག་ཀྱང་ནི་གཅིག་ཏུ་བྱ། །རྣམ་ཤེས་བརྒྱད་པོ་དེར་གནས་པར། །བསྒོམ་བྱ་མྱོས་བྱེད་འབབ་པ་མོ། །ཀུན་དུ་སྐུད་པ་དེ་བཏང་བས། །གཤིན་རྗེའི་མཆེ་བ་འཇོམས་པ་མོ། །དེ་ཡིས་ནཱི་ཡི་ཡིག་བཤད་དོ། །གཟེར་བ་ཐམས་ཅད་རྣམ་འཇོམས་མའོ། །ཁ་དོག་དམར་དང་སྔོ་བ་སྟེ། །འཆི་བ་འཇོམས་མ་བྱང་ཆུབ་འགྲོ། །དེ་ཡི་མཚོན་ཆར་འགྱུར་བ་ནི། །དུམ་སྐྱེས་རྣལ་འབྱོར་མ་ཡིའོ། །རྡོ་རྗེའི་དཀྱིལ་འཁོར་དབུས་སུ་ནི། །སུམ་ཅུ་རྩ་བདུན་བདག་ཉིད་མཆོག །ༀ་བ་བྱཱ་ཛྲ་གྷྲ་ཡ་ཛི་མ་ན་དཾ་ཨ་ཥྚཱི་མྦ་ཎཱི་ར་ཡ་དྷ་ཀེ་རཱ་ཧཱུྃ་ཡ་ཧཱུྃ་ཧཱུྃ་ཕ་ཧཱུྃ་ཊ་ཕ་ཕ་ཊ་ཊ་ཕཊ་སྭཱ་སྭཱ་ཧཱ་ཧཱ་ཨོཾ། ཤེས་རབ་ཐབས་ཀྱི་རང་བཞིན་དུའང་། །སྐུད་པའི་དབུས་སུ་བསྒོམ་པར་བྱ། །ཐ་སྐར་ཟླ་བ་དེ་བཞིན་དུ། །སྲང་དང་ཁྱུ་མཆོག་རཱ་སིའིའོ། །འདིས་
ནི་བྱེད་བཞིན་པ་ཡིས་ནི། །འཆི་བ་སླུ་བ་དགེ་བའོ། །གཞན་ནི་དེ་ལ་དེ་ལྟར་བྱ། །ཕོ་ཉ་མ་ནི་གསལ་བར་བརྗོད། །གཞན་གྱི་འཆི་བ་བླུ་བ་ཡང་། །བརྒྱ་ཕྲག་འབུམ་རྣམས་ཤེས་པར་བྱ། །འོན་ཀྱང་ཀུན་སྟོང་གནས་བྱས་ནས། །བླ་མཆོག་མཉེས་པར་བྱས་པས་སོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་གཤིན་རྗེ་མཆེ་བ་མའི་རབ་ཏུ་སྦྱོར་བ་ལ་འཇུག་པ་འཆི་བ་བསླུ་བ་ལ་སོགས་པའི་ལེའུ་སྟེ་བཅུ་གསུམ་པའོ།། །།དེ་ནས་འཇོམས་མའི་འཇུག་པ་ནི། །གང་གིས་ཕ་རོལ་འགྲོ་བཤད་བྱ། །རྣལ་འབྱོར་མ་རྣམས་འདུས་བྱས་ནས། །གཞི་ལས་འདྲི་བར་བྱེད་པ་སྟེ། །འཇུག་པ་ཞེས་བྱ་ཅི་རུ་བཤད། །ཁྱབ་བདག་ཕ་རོལ་མིང་ནི་ཅི། །ཤིན་ཏུ་ངོ་མཚར་སྟོན་པས་གསུངས། །རྡོ་རྗེ་འཛིན་པ་བཀའ་དྲིན་མཛོད། །ཉོན་ཅིག་སྒྱུ་མའི་འཇུག་པ་ཡང་། །མི་བདེན་པ་ནི་བདེན་བཏགས་ཏེ། །ལྷ་མོ་དབང་པོའི་དྲ་བ་ལྟར། །འཇོམས་མ་ཡི་ཡང་འཇུག་པ་སྟེ། །མཐོང་བ་ན་ཡང་དེ་ལ་མེད། །ཆུ་ཡི་ཟླ་བ་ལྟ་བུ་མཆོག །རང་གི་རང་བཞིན་ལ་འཇུག་འགྱུར། །རྣལ་འབྱོར་དེ་ཉིད་འཛིན་རྣམས་ཀྱིའོ། །དུས་ཀྱི་འཆི་བའི་དངོས་པོ་ཡང་། །ལས་ཀྱིས་སུ་ནི་བླུ་བ་སྟེ། །འཁོར་བ་ལས་ནི་ཕ་རོལ་འགྲོ། །འཆི་མེད་བླུ་བ་ཡང་ནི་མེད། །སྟོན་གྱི་ནམ་ཉིན་མཉམ་དུས་སུ། །སྣ་ཡི་ནམ་མཁའི་དཀྱིལ་འཁོར་དུ། །རླུང་ནི་རྣམ་པར་འཛིན་བཞིན་པས། །འཆི་བའི་དུས་ནི་བླུ་བའོ། །བརྒྱ་ཕྲག་དྲུག་དང་ཉི་ཤུ་གཅིག །སྟོང་ཕྲག་རྣམས་ཀྱི་སྲོག་རྣམས་ནི། །ཨ་བ་དྷཱུ་ཏཱིར་རབ་ཞུགས་པ། །དེ་ནི་འཇོམས་མར་མངོན་བརྗོད་པའོ། །བྱིས་པའི་མཁས་པ་རྨོངས་པ་ཡིས། །བླུ་བ་བཤད་པ་དེ་མ་ཡིན། །དེ་མིན་བླུ་བ་རབ་བཤད་པ། །འདི་ནི་བདག་གི་རང་མཚན་ཉིད། །སླར་ཡང་ལྷ་མོ་དེས་གསུངས་པ། །ཡ་སོགས་དེ་ལྟར་དོན་བསྟན་པས། །གང་གང་ཏིང་འཛིན་དམིགས་ནས་ནི། །ནམ་མཁའ་མཉམ་
སོགས་འདུས་པའི་མཐའ། །རྒྱུད་ནི་དེ་བཞིན་སྲོག་ཆེན་པོ། །རྡོ་རྗེ་ལྟ་བུར་ཡང་ནི་བཤད། །དལ་གྱིས་དལ་གྱིས་འགྲོ་བདག་ཉིད། །ཚིགས་རྣམས་ཀུན་དུ་ཐིམ་པའོ། །ཞི་གནས་ལྷག་མཐོང་དག་གིས་ནི། །བྱང་ཆུབ་འཆི་བའི་སྤྱོད་ཡུལ་མིན། །རྡོ་རྗེའི་སར་ནི་འཁྲིད་པར་གྲགས། །གོ་འཕང་ཆེན་པོ་འཛིན་མཆོག་གོ། །དེ་ལྟར་ཡོན་ཏན་ཁྱད་འཕགས་པས། །མི་རྣམས་ཀྱི་ནི་མི་དགེ་འཛད། །ནོར་ཆེན་གོ་འཕང་ཐོབ་པ་ནི། །ཡང་དག་སྤོང་བའི་མཚན་ཉིད་དོ། །སྲོག་ནི་ཡང་དག་རྒྱུ་བྱས་ནས། །དུས་ཀུན་དུ་ནི་ཉེ་བར་བྱ། །རྟག་ཏུ་འཆི་ལྟས་འཆི་བ་སླུ། །རྣལ་འབྱོར་པ་རྣམས་ཀྱིས་ལྷན་ཅིག །རྣལ་འབྱོར་མ་རྣམས་དང་མཇལ་བ། །བསོད་ནམས་དབང་གིས་བརྒྱ་ལམ་འཐོབ། །དེ་རྣམས་དང་བྱས་དགའ་ཆེན་པོ། །མྱངས་པས་འཆི་བ་བསླུ་བ་ཡིན། །དེ་ཕྱིར་རྣལ་འབྱོར་མ་རྣམས་ཀྱི། །མཆོད་པ་རྣལ་འབྱོར་པ་ཡིས་བྱ། །རྡོ་རྗེ་འཆང་ཆེན་གོ་འཕང་ནི། །དེ་རྣམས་མཉེས་པས་འཐོབ་པར་འགྱུར། །རྨོངས་པ་གང་ཞིག་སྨོད་བྱེད་པ། །དེ་ཡི་དངོས་གྲུབ་མཆོག་མེད་དོ། །དེ་རྣམས་ལ་ནི་སྨད་པ་ལས། །མནར་མེད་དམྱལ་བ་ཆེན་པོར་འགྱུར། །དེ་ཡི་བསོད་ནམས་བྱས་པ་ཅི། །སྨྱུང་བར་གནས་པའམ་དཀའ་ཐུབ་ཅི། །རྣལ་འབྱོར་མ་ལ་རྟག་གུས་པ། །སྐད་ཅིག་ཡུད་ཙམ་སོགས་ཀྱིས་སོ། །ལྷ་མོ་ཁ་དོག་གཉིས་མ་སྟེ། །སྲིད་དང་མྱ་ངན་འདས་གཟུགས་ཅན། །དཀྱིལ་འཁོར་པ་རྣམས་དབུས་སུ་ནི། །བསྒོམ་བྱ་མཚན་མ་ལཱ་མ་བཞིན། །སྔགས་ཀྱི་ཡི་གེའི་སྦྱོར་བ་ཡིས། །སུམ་ཅུ་རྩ་བདུན་རྣལ་འབྱོར་མས། །བསྐྱེད་བྱ་ཐབས་དང་བཅས་པ་སྟེ། །ལྷན་སྐྱེས་སྦྱོར་བས་རྡོ་རྗེ་འཛིན། །ཨོཾ་བ་མ་ཛྲ་ཧཱ་ཡ་དྷཱུ་མ་མྲཱ་མནྡྷ་ཐ་ཀཱ་ནཱི་ར་ཡེ་བ་ཧཱུྃ་པུ་ཧཱུྃ་ཥཱ་ཕ་ཡ་ཊ་ཧཱུྃ་ཕ་ཧཱུྃ་ཊ་ཕ་སྭཱ་ཊ་ཧཱ་ཕ་ༀ་ཊ་སྭཱ་ཧཱ། དེ་ལྟར་ཡུངས་ཀར་ཙམ་གྱི་ནི། །ཐིག་ལེའི་དབུས་མ་བསྒོམ་པར་བྱ། །སྙིང་ག་ལ་སོགས་འཁོར་ལོ་རུ། །གང་དུ་ཡིད་ནི་ཡོངས་སྦྱོར་གྱིས། །བུ་མོ་རུས་སྦལ་ཟླ་བ་ཡང་། །ཁྲུམས་ཅན་ཉེ་བའི་གླིང་མའོ། །སེམས་ཅན་དོན་བྱེད་དེ་ཉིད་དུ། །ཐིམ་དང་ལོངས་སྤྱོད་སོགས་བྱེད་མ། །ཕག་མོའི་སྤྲུལ་པའི་བདག་ཉིད་དུ། །
སྐྱེས་པ་སྲིད་པ་འཇོམས་བྱེད་མའོ། །བཅོམ་ལྡན་རྡོ་རྗེའི་རྣལ་འབྱོར་ཆེས། །ལྷ་རྣམས་ཐམས་ཅད་བཞུགས་པ་དང་། །འཁོར་ལོ་སྒྱུར་ཆེན་ངོ་བོ་ལས། །ཐམས་ཅད་ཀུན་ནི་སྤྲུལ་པ་དང་། །སངས་རྒྱས་ཉིད་བདག་འདུ་ཤེས་ཀྱིས། །དེའི་བདག་ཉིད་དུ་སྡུད་པར་འགྱུར། །བསྡུ་དེ་དེ་ལྟར་ཡོད་མིན་པ། །འབྱིན་པ་རུ་ནི་ཇི་ལྟར་འགྱུར། །འདི་ཀུན་སྒྱུ་འཕྲུལ་དྲ་བ་སྟེ། །སྒྱུ་མ་མེད་ཅིང་སྟོང་ཉིད་མེད། །ངོ་བོ་ཀུན་དུ་སྦྱོར་བ་ཙམ། །སངས་རྒྱས་ཉིད་སོགས་འདུ་བཅས་པའོ། །རྫོགས་ལྡན་གསུམ་ལྡན་སོགས་དངོས་ཉིད། །རང་གི་རང་བཞིན་མཚན་ཉིད་དོ། །རྣམ་གཞག་ཙམ་དུ་གསུངས་པ་ནི། །དངོས་པོ་མ་འཁྲུལ་ངོ་བོ་ཉིད། །རྣམ་པར་རྟོག་པས་བརྟག་པར་བྱ། །རྟོག་པ་མེད་པར་གྱུར་པ་ན། །བརྟག་པ་ཉིད་དུ་མི་བྱའོ། །རྟོག་དང་རྟོག་མེད་ལས་གྲོལ་འགྱུར། །ཐམས་ཅད་གཟིགས་པ་རྣམས་ཀྱིས་བས་བསྟན། །གང་ཞིག་གང་དངོས་སྐད་ཅིག་མཐོང་། །དེ་མཐོང་རི་བོང་རྭ་བཞིན་ནོ། །འདི་ཡིས་འགོག་པ་མེད་པར་ནི། །སྐྱེ་བ་ལ་སོགས་ཡོངས་རྟོགས་བྱ། །སྣ་ཚོགས་ལུང་དང་རྒྱུད་རྣམས་ལའང་། །རིགས་པ་ཅན་འདིར་རྣམ་པར་དཔྱོད། །རྣམ་དཔྱད་གྱུར་པས་རིགས་པ་ནི། །དེ་རིགས་བདག་གི་ཆེ་བའོ། །སེམས་ནི་དེ་ཡི་གཞི་རྟོགས་པར། །རྣ་བའི་དྲུང་དུ་བརྗོད་པའོ། །སློབ་མའི་ཕྱིར་དང་བླ་མ་ལ། །གུས་ཕྱིར་འདི་ནི་གཟུང་བར་གྱིས། །དེང་སང་སྐྱེ་བོ་ཚེ་ཐུང་ལ། །རིགས་པ་གཞན་བདག་ལ་ཡོད་མིན། །གཡོ་ཅན་རྩོད་པའི་དུས་སུ་ནི། །བློ་ཆུང་བསོད་ནམས་ཤིན་ཏུ་ཆུང་། །དེ་ཕྱིར་བསོད་ནམས་ལྡན་རྣམས་ཀྱི། །ཡེ་ཤེས་སངས་རྒྱས་སྤྱོད་ཡུལ་མིན། །ཡུན་རིང་དུས་ནས་སྙིང་རྗེ་ནི། །བསྟེན་འགྱུར་རྟོག་པ་མ་བྱེད་ཅིག །བསོད་ནམས་གྲངས་མེད་མ་བྱས་པར། །སླར་ཡང་ཡེ་ཤེས་སྨྲ་བ་ཅི། །བྱང་ཆུབ་སེམས་ཅི་སངས་རྒྱས་ཅི། །འདི་ལ་ཁྱད་པར་ཡོད་མི་འགྱུར། །དངོས་པོ་རྟོགས་ཕྱིར་སངས་རྒྱས་དང་། །དེ་དངོས་བྱང་ཆུབ་སེམས་དཔའ་རང་། །དབང་པོ་རྣམས་ནི་བྱང་ཆུབ་སེམས་དཔར་བསྐྱེད། །ཡུལ་རྣམས་ཀྱིས་ནི་སངས་རྒྱས་ཉིད་དུ་གྱིས། །ཕུང་པོ་དང་ནི་སངས་རྒྱས་ལྷན་ཅིག་
ཟུང་། །ཁམས་རྣམས་རྡོ་རྗེ་འཛིན་པར་གཟུང་བར་བྱོས། །སྲིད་པར་སླར་ཡང་ལྡོག་པར་འགྱུར་བ་མ་ཡིན་ནོ། །ཐམས་ཅད་འཆི་བ་མེད་པའི་ངོ་བོར་ཟུང་། །སྙིང་རྗེ་ཡི་ནི་སྦྱོར་བས་ཁྱོད་བཞུགས་ཤིག །གང་དང་གང་གིས་གཞན་གྱི་དགོས་པ་གྱིས། །བརྗོད་མེད་ཀུན་ལའང་ནན་ཏན་བྱོས། །མཁའ་འགྲོ་མ་སོགས་འཇོམས་མཐའ་ཡི། །འཇོམས་མ་འདུས་པ་ཐམས་ཅད་དང་། །བགེགས་སོགས་འབྱུང་པོ་འདུས་པ་མ། །འཇིག་རྟེན་སྡང་བ་ཐམས་ཅད་དང་། །ཡི་དགས་སོགས་དང་དམྱལ་བའང་རུང་། །གཤིན་རྗེ་ལ་སོགས་ཁྲོ་བ་འདིར། །སྔོན་གྱི་བག་ཆགས་འཇོམས་མའོ། །དཔའ་བོ་ཐམས་ཅད་མཉམ་སྦྱོར་བས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་གཤིན་རྗེ་འཇོམས་མ་འཇུག་པ་སྐྱེད་པ་དང་དུས་སུ་འཆི་བ་བསླུ་བའི་ཆོ་གའི་མཚན་ཉིད་དང་སངས་རྒྱས་ཀྱི་གནས་སྐབས་ཀྱི་རང་བཞིན་ཏེ་ལེའུ་བཅུ་བཞི་པའོ།། །།དེ་ནས་འདི་ལས་གསང་ཆེན་བཤད། །ཡང་དག་ཏིང་འཛིན་མཚན་ཉིད་དོ། །དཔལ་ཧེ་རུ་ཀར་གནས་གང་གིས། །གུས་བཅས་ལས་གཞན་ལ་ཡོད་མིན། །འཇིགས་པ་ལ་སོགས་ཆགས་པའི་མཐར། །བསྟན་པ་སྤྲུལ་པའི་སྐུ་གསལ་བའོ། །ཆོས་དང་ལོངས་སྤྱོད་རྫོགས་སོགས་འདིར། །ཐམས་ཅད་བསྡུས་པ་བྱས་པར་འགྱུར། །ཐོག་མར་གནས་ནི་ཀུན་བསྒྲུབ་བྱ། །སྐྱེ་བོ་མེད་དང་རི་སོགས་དང་། །དུར་ཁྲོད་དུ་བྱ་དེ་རུ་ནི། །གཏོར་མ་ཞིང་སྐྱོང་རྣམས་ལའོ། །རྣལ་འབྱོར་ཁ་ཡི་གཙང་སྦྲ་སོགས། །སྔོན་སོང་མཆོད་ཡོན་ལ་སོགས་འབུལ། །བཅོམ་ལྡན་འདས་ཀྱི་སྐུར་དམིགས་ནས། །རས་བྲིས་སོགས་བསྒོམ་བཤད་ལྡན་པར། །ཡི་དགས་གདན་ཅན་དྲག་ཆེན་པོ། །བསྒོམ་པ་འགྲོ་བའི་དོན་དང་ལྡན། །ཀུན་ནས་ཀུན་དུ་སྐད་ཅིག་གིས། །ཏིང་ངེ་འཛིན་ནི་དམིགས་པར་བྱ། །ཤྲཱི་ཡིག་འབྱུང་བ་ཀུན་གྱི་དོན། །ཕྱི་དང་ནང་གི་བདག་ཉིད་འདོད། །འདི་དག་
ཀུན་རྫོབ་གཟུགས་དང་ནི། །འཇུག་མེད་བདེ་བའི་མཐའ་ཅན་གང་། །ཨེ་བྃ་ལ་སོགས་གཉིས་མེད་པའང་། །ཤྲཱི་ཞེས་བྱ་བའི་ཡིག་ངེས་བརྗོད། །ཧེ་ཡིག་སྙིང་ག་ནས་ཀུན་ཏུ། །ཧེ་རུ་ཀ་སོགས་རང་འཁོར་འགྲོ། །བསྒོམ་པ་ཀུན་གྱི་འབྱུང་གནས་ལས། །འཛིན་པ་ལ་སོགས་རྣམ་བསྐྱེད་འགྱུར། །དེ་ནི་རྒྱུ་སྟོང་བདག་ཉིད་དེ། །རྒྱུའི་བདག་ཉིད་དུ་མི་རྟོག་པའོ། །རང་བཞིན་ཆོས་བདག་མེད་པ་ཉིད། །དེ་ནི་སྟོང་པའི་རྣལ་འབྱོར་གནས། །བཀོད་པ་གང་ཟག་བདག་མེད་པ། །རྟོག་པའི་དྲ་བ་ཆེན་པོ་ནི། །རུ་ཡིག་རྐྱེན་གྱི་བདག་ཉིད་ཅན། །དེ་ནི་བདག་གི་བཀོད་བྲལ་བའོ། །སླར་བརྗོད་ཀ་ནི་མ་ལུས་པའི། །བདག་གིས་གཉིས་བྱར་མེད་ཤེས་གང་། །གང་ཕྱིར་ཅི་ལའང་མི་གནས་པ། །དེ་ཕྱིར་ཀ་ཞེས་བྱ་བར་བརྗོད། །དངོས་པོ་མངོན་སུམ་སྟོང་པ་མིན། །དངོས་པོ་ཙམ་གྱི་རང་བཞིན་ཅན། །དཔལ་ཧེ་རུ་ཀ་གནས་ལྷ་མོ། །སྔ་ནས་བསྒོམ་པ་ཀུན་འགྲོ་བའོ། །སྙིང་ལ་པདྨ་ཉི་དབུས་སུ། །ཡེ་ཤེས་ས་བོན་རང་བྱུང་ལས། །འོད་ཟེར་ཁ་དོག་སྣ་ཚོགས་པ། །ནམ་མཁའ་གང་བར་སྤྲོ་བར་བྱ། །ཡེ་ཤེས་མཁའ་འགྲོ་མ་ཡི་གཟུགས། །ལྷ་ཡི་ཚོགས་ནི་སྤྱན་དྲངས་ནས། །ནམ་མཁའི་ཁོངས་ཀྱི་དབུས་སུ་ནི། །འགྲོ་བའི་བདག་པོ་བཞག་བྱས་ལ། །ཟླ་ཉི་ཤར་བདག་ཉིད་སྐྱེས་པའི། །བདུད་རྩི་སོགས་ཀྱིས་མཆོད་བྱས་ནས། །སྡིག་པ་བཤགས་སོགས་བྱས་ནས་ནི། །སྙིང་རྗེ་ལ་སོགས་རྗེས་དྲན་བྱ། །སྟོང་ཉིད་རང་བཞིན་བདག་ཉིད་ཀྱི། །རྣལ་འབྱོར་དག་པ་རྣམ་བསྒོམ་བྱ། །ས་བོན་ལྔ་ཡི་རང་བཞིན་ལས། །ཁང་པ་བརྩེགས་པ་རྣམ་སྤྲུལ་བྱ། །རྒྱུ་ཡི་རྡོ་རྗེ་འཆང་བ་ཕྱིས། །རི་རབ་པདྨའི་སྟེང་དུ་གསལ། །སྐུ་མདོག་དཀར་པོ་ཞལ་བཞི་པ། །སྤྱན་གསུམ་ཕྱག་ནི་བཅུ་གཉིས་པ། །ཤེས་རབ་ཁ་སྦྱོར་སྦྱོར་བདག་ཉིད། །བྱིས་པའི་རྒྱན་གྱིས་བརྒྱན་པའོ། །དཀར་དང་ལྗང་གུ་དམར་བ་དང་། །སེར་པོ་གཡོན་ནས་བསྐོར་བས་སོ། །ཞལ་གྱི་རལ་པའི་ཅོད་པན་ལ། །སྣ་ཚོགས་རྡོ་རྗེ་ཟླ་ཕྱེད་འཛིན། །འཕྲོག་བྱེད་དཀར་མོ་མཉམ་པར་མནན། །གཡས་བརྐྱང་ཞབས་ཀྱིས་ཡང་དག་བཞུགས། །རྡོ་རྗེ་དྲིལ་བུ་
གླང་ཆེན་གྱི། །པགས་པ་ཅང་ཏེའུ་གྲི་གུག་དང་། །དགྲ་སྟ་རྩེ་གསུམ་དེ་བཞིན་དུ། །ཁ་ཊྭཱཾ་ག་སྣོད་ཞགས་པ་དང་། །མགོ་སྟེ་གཡོན་དང་གཡས་པར་རོ། །འདམ་སྐྱེས་ཁ་དོག་སྣ་ཚོགས་པ། །འདབ་མ་བཞི་བཅུ་རྩ་བརྒྱད་དང་། །འཁོར་ལོའང་བཅུ་གཉིས་བདག་ཉིད་ཅན། །སྒོ་ནི་བཅུ་དྲུག་བདག་ཉིད་དང་། །ཉམས་དགའ་དུར་ཁྲོད་སོ་གཉིས་ནའོ། །གྲི་གུག་རིན་ཆེན་རྡོ་རྗེ་དང་། །པདྨ་འཁོར་ལོ་རལ་གྲི་དང་། །སྣ་ཚོགས་རྡོ་རྗེ་ཐོད་པ་དང་། །མགོ་བོ་ཀེང་རུས་འདི་རྣམས་དང་། །ཞགས་པའམ་ལྕགས་ཀྱུར་ཤེས་བྱ་སྟེ། །འཁོར་ལོ་འཁོར་ལོར་ཕྲེང་བའོ། །རེ་རེར་རྩིབས་ནི་སུམ་ཅུ་དྲུག །རྡོ་རྗེ་པདྨ་ཉི་མ་ཅན། །རྒྱུ་ཡི་རྡོ་རྗེ་ཡོངས་གྱུར་པ། །ལྔ་བརྒྱ་བཞི་ཡིས་ལྷག་པ་ཡི། །དཀྱིལ་འཁོར་འཁོར་ལོ་རྫོགས་པའོ། །རྟག་ཏུ་གླུ་མའི་སྒྲ་ཡིས་སོ། །མངའ་བདག་ཉི་མ་རེ་རེར་འགྲོ་བ་མགྲོན་འབོད་ན། །ཁྱོད་ནི་ཅི་ཡི་ཕྱིར་ན་སྟོང་པ་ཉིད་དུ་ཞུགས། །བཞེངས་ཤིག་བཞེངས་ཤིག་བདག་ནི་སྙིང་རྗེའི་རང་བཞིན་ཏེ། །རྡོ་རྗེ་འཛིན་པ་བདེ་ཆེན་བདག་ལ་འདོད་པ་མཛོད། །གསོན་ཅིག་གསོན་ཅིག་གཞན་གྱི་དགོས་པ་ནུབ། །འཇིག་རྟེན་ཕྱུགས་གང་ཤི་བ་བཞིན་དུ་འགྱུར། །བདག་གི་པདྨ་རྒྱས་པ་ལ་འདོད་མཛོད། །དེ་ལྟར་འཇིག་རྟེན་ཀུན་བདེར་འགྱུར་བར་བྱོས། །རྡོ་རྗེ་འཛིན་པས་བདག་ལ་རོལ་ཅིག་རོལ། །ལྷན་སྐྱེས་རང་བཞིན་བརྗོད་དུ་མེད་པ་འཐོབ། །སེམས་ཅན་འཇིག་རྟེན་གཞན་ནི་རྨོངས་གྱུར་པས། །ཇི་ལྟར་ཁྱོད་ཀྱི་སྟོང་པ་དོན་མེད་འགྱུར། །ཁྱོད་ནི་ཆོས་རྣམས་ཀུན་གྱི་བྱེད་པ་སྟེ། །ཅི་ཕྱིར་ལྷན་སྐྱེས་རང་བཞིན་འགྲོ་མེད་བཞུགས། །བདག་ལ་མཆོག་གི་དོན་གྱིས་འདོད་པ་མཛོད། །དེ་ལྟར་ཁྱོད་ནི་འཇིག་རྟེན་རྣམས་མཐུན་བཞུད། །གླུ་འདིས་རྗེས་སུ་བསྐུལ་བ་ཡིས། །རང་ཉིད་ཧེ་རུ་ཀ་རབ་སད། །ༀ་ཨཱཿཀཱ་ཡ་བཱ་ཀ་ཙིཏྟ་བཛྲ་ཧཱུྃ་ཕཊ་ཧོཿ། གསང་སྔགས་འདི་ནི་འདོན་པ་ན། །སྐད་ཅིག་རྣམ་པའི་རྣལ་འབྱོར་ལྡན། །སྐད་ཅིག་སྔགས་ལས་བྱུང་བདག་ཉིད། །དཔའ་བོ་ཀུན་དང་རྣལ་འབྱོར་མའོ། །འཇིགས་བྱེད་མཚན་མོ་ནག་མོ་དང་། །ལྟེ་བ་ཉི་མ་
ཆེ་མཆོག་ལ། །གར་དུ་མཛད་པ་ཡི་ནི་སྐུ། །གནག་དང་ལྗང་གུ་ཕྱེད་ཕྱེད་དོ། །བདུན་ཅུ་རྩ་དྲུག་ཕྱག་དང་ནི། །ཞལ་བཅུ་བདུན་ལ་སྤྱན་གསུམ་པ། །དཔའ་བོ་རལ་པའི་ཅོད་པན་འཛིན། །སྣ་ཚོགས་རྡོ་རྗེ་ཟླ་ཕྱེད་ཅན། །མཆེ་བ་ཆེན་པོ་གཙིགས་པའི་ཞལ། །གཡས་དང་གཡོན་པ་རྟག་ཏུ་ནི། །སེར་བ་དང་ནི་ལྗང་གུ་གྲགས། །ནུབ་ནི་དམར་པོ་དེ་བཞིན་ཏེ། །ལྷག་མའི་ཞལ་ནི་བུང་བ་མཚུངས། །མཆེ་བ་གཙིགས་པ་འཇིགས་པར་བྱེད། །རིམ་པ་ཇི་ལྟའི་མཚོན་ཆའི་ཚོགས། །གཡས་དང་གཡོན་པར་ཤེས་པར་བྱ། །གླང་ཆེན་པགས་པས་ཕྱག་གཉིས་ཀྱིས། །སྐྱེ་གནས་ཕྱག་རྒྱ་དེ་བཞིན་གཞན། །རྡོ་རྗེ་རལ་གྲི་མདུང་རིངས་དང་། །རྩེ་གསུམ་ཇི་ལྟའི་རིམ་པས་གཡས། །དགྲ་སྟ་གྲི་གུག་མདའ་དང་ནི། །གསལ་ཤིང་ཕུབ་དང་ཐོ་བ་དང་། །འཁོར་ལོ་ཅང་ཏེའུ་ཆུ་གྲི་དང་། །དབྱུག་ཏོ་དང་ནི་མཚོན་རྩེ་གཅིག །དུང་དང་ཟངས་དུང་དབྱི་གུ་དང་། །རྨ་བྱའི་མཇུག་མ་དེ་བཞིན་དུ། །བྱ་རོག་སྒྲོ་དང་པིར་དང་ནི། །མེ་ཡི་ཐབ་དང་རི་བོ་དང་། །དབྱུག་པ་མེ་ལོང་པི་ཝང་དང་། །རྐང་མགོ་ལག་པ་གློ་བ་དང་། །རྒྱུ་མ་སྒྲ་གཅན་ལྕགས་སྒྲོག་དང་། །གདོས་དང་དུ་བྷུ་ས་ཉ་རྒྱ། །མགོ་མེད་འབར་བའི་མར་ནག་དང་། །འཇིགས་བྱེད་གཟུགས་ཏེ་རིམ་པས་སོ། །གཡོན་པ་དྲིལ་བུ་ཕུབ་རིངས་མཆེ། །གཏུན་ཤིང་ཞགས་པ་ཐོད་པ་དང་། །གཞུ་དང་ཁ་ཊྭཱཾ་ག་པོ་ཏི། །ཕུབ་ཆུང་ཡུ་ཅན་སྡིགས་མཛུབ་དང་། །གཡེར་ཀའི་ཕྲེང་དང་ལྕགས་སྒྲོག་དང་། །བྲག་དང་དུར་ཁྲོད་རྡུལ་དང་ནི། །བྷོ་ཀཾ་རྔ་དང་པགས་རློན་དང་། །སྐྲ་ཡི་ཐག་པ་འཕྱང་བ་དང་། །རོ་སྲེག་སྐུལ་པའི་ཤིང་བུ་དང་། །འཕོངས་དང་ཕུབ་རིངས་མགོ་བོ་དང་། །ཀེང་རུས་ཟོར་བ་དེ་བཞིན་དུ། །མིག་དང་མཁལ་མ་གཉེ་མ་དང་། །སྤེན་པ་ཡི་ནི་ཕུར་བུ་དང་། །ས་བོན་གང་བ་སོག་ལེ་དང་། །ཁབ་དང་སླུད་བཤུས་པགས་པ་དང་། །སྤྲིན་ཆར་འབབ་དང་ཤིང་ལྕགས་ཀྱུ། །ཕྱག་གི་མཚོན་ཆ་བདུན་ཅུ་གཉིས། །དེ་ལྟའི་རིམ་པས་ཤེས་པར་བྱ། །མགོ་བོ་ལྔ་ཡིས་རྒྱན་དུ་བྱས། །ཕྱག་རྒྱ་དྲུག་དང་ལྡན་པས་བཀླུབས། །དེ་བཞིན་མགོ་བརྒྱའི་
ཕྲེང་བ་དང་། །དཔུང་རྒྱན་ཞབས་གདུབ་སྒྲ་སྒྲོགས་དང་། །སྐུ་ལ་བ་སྤུའི་ཕྲེང་བར་ལྡན། །དེ་ཡི་མདུན་དུ་ལྷ་མོ་ཆེ། །རྡོ་རྗེ་ཕག་མོ་སྔར་དང་མཚུངས། །ཤེས་རབ་ཐབས་ཀྱི་བདེ་བས་བརླན། །སྐུ་ཡི་ཚིགས་སྐབས་ཀུན་ལའོ། །སྣ་ཚོགས་ཧེ་རུ་ཀ་འབར་བས། །རྣམ་པར་འཕྲོ་བཅས་རྣམ་བསྒོམ་བྱ། །དབུ་རྣམས་ཀུན་ལ་དར་དཔྱངས་ཀྱི། །ཕྲེང་བ་བརྟུལ་ཞུགས་ཅན་གྱིས་བྱ། །པདྨའི་འདབ་མར་ཤར་སོགས་ཀྱི། །བར་བར་དུ་ནི་རྣལ་འབྱོར་མ། །ཉི་ཤུ་རྩ་བཞིའི་གྲངས་ཉིད་ནི། །མཁའ་འགྲོ་མ་སོགས་དྲུག་དྲུག་གོ། །ཤར་ལ་སོགས་ནས་བྱང་གི་མཐར། །མཁའ་འགྲོ་མ་སོགས་དྲུག་དེ་བཞིན། །དང་པོ་བྱང་ནས་ནུབ་ཀྱི་མཐར། །སླར་ཡང་ལཱ་མ་ལ་སོགས་དྲུག །ནུབ་ལ་སོགས་ནས་ལྷོ་ཡི་མཐར། །དུམ་སྐྱེས་མ་ལ་སོགས་པའི་རིགས། །དང་པོ་ལྷོ་ནས་ཤར་གྱི་མཐར། །དེ་ནས་གཟུགས་ཅན་མ་སོགས་དྲུག །མཁའ་འགྲོ་མ་དང་གཟུགས་ཅན་ཉིད། །འོ་བྱེད་མ་དང་གཞན་སྒྱུར་མ། །བྱིས་བཅས་མ་དང་རྗེས་འཇུག་མ། །ཕྱེད་ནག་ཕྱེད་སྔོན་ཅན་རྣམས་སོ། །ལཱ་མ་རྣལ་འབྱོར་དབང་ཕྱུག་དང་། །བཟང་མོ་ཐོད་པ་ཅན་ནག་མོ། །རྒྱལ་མོ་སྐོར་མ་ཕྱེད་ལྗང་གུ། །གང་ཕྱིར་ཕྱེད་དམར་རིམ་པས་སོ། །དུམ་སྐྱེས་མ་དང་དུར་ཁྲོད་མ། །རྣམ་པར་ཞུ་མ་ཀུ་རུ་ཀུ་ལ་མ། །ངུ་མ་གར་མར་གྲགས་མ་རྣམས། །ཕྱེད་དམར་བ་ལ་ཕྱེད་སེར་མོ། །གཟུགས་ཅན་འཇིགས་བྱེད་གཙུག་པུད་མ། །ཐོར་ཚུགས་རལ་པ་ཅན་དྲག་མོ། །ལྷ་མོ་ཕྱེད་སེར་ཕྱེད་ནག་མའོ། །ཕྱག་མཚན་ལ་སོགས་ཕག་མོ་བཞིན། །མཚམས་ཀྱི་འདབ་མ་རྣམས་ལ་ནི། །བདུད་རྩི་ལྔ་ཡི་སྣོད་རྣམས་སོ། །གཡས་བརྐྱང་ཞབས་ཀྱིས་དེ་བཞིན་དུ། །ཐོད་པའི་ཕྲེང་བ་སོགས་འཛིན་མ། །གཡོན་སྐོར་དུ་ནི་ཤེས་བྱ་སྟེ། །རི་རབ་སྟེང་གི་ཆར་སྐྱེས་མའོ། །དེའི་རྒྱབ་རྡོ་རྗེའི་འཁོར་ལོ་ནི། །སྔོ་ནག་པ་ཡི་དབུས་སུ་ནི། །མཁའ་འགྲོ་དེ་བཞིན་ལཱ་མ་དང་། །དུམ་སྐྱེས་མ་དང་གཟུགས་ཅན་མ། །རབ་གཏུམ་མོ་དང་གཏུམ་མིག་མ། །འོད་ལྡན་མ་དང་སྣ་ཆེན་མོ། །དཔའ་བློ་མོ་དང་མིའུ་ཐུང་མ། །
ལང་ཀའི་བདག་མོ་ཤིང་གྲིབ་མ། །ས་སྲུངས་མ་དང་དེ་བཞིན་འདིར། །འཇིགས་བྱེད་ཆེན་མོ་རུ་ནི་དྲན། །རླུང་ཤུགས་མ་དང་ཆང་ཟ་མོ། །སྔོ་སངས་ལྷ་མོ་རབ་བཟང་མ། །རྟ་རྣ་མ་དང་བྱ་གདོང་མ། །འཁོར་ལོའི་ཤུགས་མ་དུམ་སྐྱེས་མ། །ཆང་འཚོང་འཁོར་ལོའི་གོ་ཆ་མ། །ཤིན་ཏུ་དཔའ་མོ་སྟོབས་ཆེན་མ། །འཁོར་ལོས་སྒྱུར་མ་བརྩོན་ཆེན་མོ། །གཤིན་རྗེ་མ་སྐྱེས་གཤིན་རྗེ་མ། །དེ་བཞིན་གཡོ་བྱེད་སྐྲག་བྱེད་མ། །གཏུམ་མོ་དང་ནི་དབྱངས་ཅན་མ། །འདོད་འགྲུབ་མ་དང་འབར་ཆེན་མོ། །ཁ་དོག་འཁོར་ལོ་ཇི་ལྟ་བའོ། །ཕྱག་བཞི་མ་ལ་ཞལ་གཅིག་མ། །ཐོད་པ་དང་ནི་ཁ་ཊྭཱཾ་འཛིན། །ཅང་ཏེའུ་གྲི་གུག་དེ་བཞིན་ནོ། །སྐྲ་གྲོལ་ཕྱོགས་ཀྱི་གོས་ཅན་མ། །སྐུ་ལ་ཕྱག་རྒྱ་ལྔ་སོགས་ཏེ། །རྡོ་རྗེའི་ཕྲེང་བས་རྣམ་པར་བརྒྱན། །ཡི་དགས་གདན་ཅན་དྲག་ཆེན་མོ། །འཁོར་ལོ་ཀུན་གྱི་རྣལ་འབྱོར་མ། །སྣ་ཚོགས་རྒྱན་དང་ལྡན་པ་དང་། །དེ་བཞིན་ཤེས་རབ་ཐབས་ལྡན་པའོ། །དེ་ལྟར་གཟུགས་མེད་ཁམས་དང་ནི། །དེ་ཡང་གནས་སུ་ངེས་པར་བརྗོད། །རབ་ཏུ་དགའ་བའི་སར་གྲགས་པའོ། །སླར་ཡང་གནས་དང་ཉེ་གནས་སོགས། །དེ་ལྟར་ས་ཡི་དབུས་སུ་ཡང་། །ས་བཅུ་གཉིས་སུ་འདོད་པ་ཡིན། །དེ་ལྟར་ཐམས་ཅད་དུ་ཤེས་བྱ། །ཁམས་གཅིག་འདིར་ནི་ཐམས་ཅད་དེ། །སུམ་ཅུ་རྩ་དྲུག་བཤད་པ་རྣམས། །གཙོ་བོ་ཡོན་ཏན་ཀུན་རང་བཞིན། །དེ་ལྟར་ཁམས་ནི་དཔའ་བོ་དང་། །རྣལ་འབྱོར་མ་རྣམས་རང་བཞིན་ཅན། །ཁོར་ཡུག་ཏུ་ནི་སེམས་ཅན་རྣམས། །རྫུས་སྐྱེས་རིགས་ཀྱི་རིམ་པས་སོ། །དེ་ཡང་སུམ་ཅུ་རྩ་དྲུག་གི། །ཡུལ་དང་ཡུལ་རིམ་པས་ཕྱེའོ། །ཞེས་བྱ་བ་ནི་རྡོ་རྗེའི་འཁོར་ལོའོ། །དེ་ནས་དེ་ཡི་ཕྱི་རོལ་འཆད། །སླར་ཡང་སྙིང་པོའི་འཁོར་ལོ་འདི། །དམར་སེར་ཁ་དོག་ལ་དེ་བཞིན། །འཁོར་ལོའི་རྩིབས་ཀྱི་དབུས་སུ་ནི། །རྡོ་རྗེ་འཆང་མ་མི་བསྐྱོད་མ། །རྣམ་སྣང་རིན་ཆེན་དབང་མོ་དང་། །པདྨ་གར་མ་དོན་ཡོད་མ། །སྤྱན་མ་དང་ནི་མཱ་མ་ཀཱི། །གོས་དཀར་སྒྲོལ་མ་གཟུགས་རྡོ་རྗེ། །སྒྲ་དང་དེ་བཞིན་དྲི་དང་རོ། །རེག་དང་ཆོས་དབྱིངས་རྡོ་རྗེ་མ། །ས་སྙིང་མ་
དང་མཁའ་སྙིང་མོ། །ཕྱག་མ་འཇིག་རྟེན་མགོན་པོ་མ། །སྒྲིབ་ཀུན་སེལ་མ་ཀུན་བཟང་མོ། །རིན་ཆེན་སྒྲོན་མེ་བདག་མེད་མ། །ཁྲོ་གཉེར་རི་ཁྲོད་ལོ་མ་ཅན། །གཤིན་མཐར་བྱེད་མ་ཤེས་མཐའ་མ། །པད་མཐའ་མ་བགེགས་མཐར་བྱེད་མ། །མི་གཡོ་མ་དང་དབྱུག་སྔོན་མ། །འདོད་རྒྱལ་མ་དང་སྟོབས་ཆེན་མོ། །གཙུག་ཏོར་མ་དང་གནོད་མཛེས་མ། །ཁ་དོག་འཁོར་ལོ་ཇི་བཞིན་ཏེ། །ཞལ་ལ་སོགས་པའི་མཚན་ཉིད་ཀུན། །ལྷག་མ་རྡོ་རྗེའི་འཁོར་ལོ་བཞིན། །ཉེ་བའི་གནས་སུ་ལྷ་མོ་རྣམས། །རང་འདྲའི་ཐབས་དང་བསམ་པར་བྱ། །གཡས་བརྐྱང་བ་ཡི་ཞབས་ཀྱིས་ཀྱང་། །གཟུགས་ཀྱི་ཁམས་དང་དྲི་མེད་དང་། །གླིང་དང་པོ་རུ་འདོད་པ་ཡིན། །འདྲེན་པར་རྣམ་པར་ཤེས་བྱ་དང་། །ཆུང་ངུའི་ཧེ་རུ་ཀར་འདོད་དང་། །གསུམ་པར་པདྨའི་ཧེ་རུ་ཀ། །བཞི་པ་ནམ་མཁའ་པར་འདོད་དང་། །ལྔ་པར་འཐོར་རླུང་ཧེ་རུ་ཀ། །དྲུག་པར་ས་ཡི་ཧེ་རུ་ཀ། །བདུན་པར་འབར་བའི་ཧེ་རུ་ཀ། །བརྒྱད་པར་གཤེར་བའི་ཧེ་རུ་ཀ། །དགུ་པར་ཡེ་ཤེས་ཧེ་རུ་ཀ། །བཅུ་པར་ཐུགས་ཀྱི་ཧེ་རུ་ཀ། །བཅུ་གཅིག་གསུང་གི་ཧེ་རུ་ཀ། །བཅུ་གཉིས་པར་ནི་སྐུ་ཡིར་འདོད། །བཅུ་གཉིས་དེ་རྣམས་རྡོ་རྗེ་ཆེ། །ཧེ་རུ་ཀ་སྟེ་རྒྱུད་གཞན་མེད། །འཁོར་ལོ་གསུམ་སྡོམ་ཧེ་རུ་ཀ། །དེ་རྣམས་དབྱིབས་ནི་ཅི་འདྲ་བ། །སྐུ་མདོག་རང་རང་འཁོར་ལོ་ལས། །བློ་ལྡན་རྣམས་ཀྱིས་མཚོན་པར་བྱ། །ཞེས་བྱ་བ་ནི་སྙིང་པོའི་འཁོར་ལོ་སྟེ་གཉིས་པའོ།། །།དེ་ནས་དེ་རྒྱབ་ཡོན་ཏན་ཀུན། །ཞེས་བྱའི་འཁོར་ལོ་དཀར་དམར་བ། །རྡོ་རྗེའི་རྩིབས་ཀྱི་དབུས་སྦྱིན་པ། །ཕོ་ཉ་མ་མཆོག་སུམ་ཅུ་དྲུག །བྲམ་ཟེ་རྒྱལ་རིགས་རྗེའུ་རིགས་མོ། །དམངས་མོ་གཏུམ་མོ་ཁྱི་འཚོང་མ། །གཡུང་མོ་གར་མ་ཐོད་པ་ཅན། །ཉ་པ་མོ་དང་སྨྱིག་དཀར་མ། །དུང་མཁན་མོ་དང་ཐ་ག་མོ། །ཁུར་བ་མཁན་མོ་ཤིང་བཟོ་མ། །ཕྲེང་མ་ཁ་མ་ཚོས་མ་དང་། །སྲིན་བལ་བྱེད་མ་ཕོ་ཉ་མོ། །བཤང་འཕྱག་མ་དང་རྩི་མཁན་མ། །ཆང་འཚོང་ལྡུམ་རའི་གཉེར་པ་མོ། །རྒྱལ་པོས་བཀྲབས་མ་ཤན་པ་མོ། །སོ་རྩི་འཚོང་བར་བྱེད་མ་དང་། །གསེར་མགར་མོ་
དང་ལྕགས་མགར་མོ། །ནོར་བུ་བརྒྱུད་མ་ནགས་པ་མོ། །ཀླ་ཀློ་ཨོ་ཌི་ཚོང་པ་མོ། །རྡོ་བཟོ་མ་དང་ཞིང་ལས་མ། །ཀོ་ལྤགས་མོ་སྟེ་རྣལ་འབྱོར་མ། །འདི་རྣམས་འཁོར་ལོའི་ཁ་དོག་གོ། །ལྷག་མ་ཐམས་ཅད་སྙིང་པོ་ཡི། །འཁོར་ལོ་ཇི་བཞིན་ཤེས་པར་བྱ། །འདིར་ནི་ཞིང་དུ་ཤེས་བྱ་སྟེ། །འདོད་ཁམས་རིགས་ཀུན་བདག་ཉིད་དང་། །གཉིས་པའི་གླིང་ཞེས་བྱ་བར་བཤད། །རང་གི་ཤེས་རབ་ཐབས་བདག་ཉིད། །འོད་བྱེད་པ་ཡི་ས་དེ་བཞིན། །བླ་མ་རང་ཉིད་མཆོད་པར་བྱ། །རང་མིང་བརྗོད་པའི་སྔགས་ལ་ནི། །ཐོག་མར་ཕྱག་འཚལ་རབ་ཏུ་གྲགས། །ཧཱུྃ་ཧཱུྃ་ཕཊ་ཀྱི་ཡི་གེ་མཐར། །དེ་ལྟར་འཁོར་ལོ་ཀུན་ལ་བྱ། །དེ་ཡི་ཕྱི་རོལ་ཟླུམ་པོར་སྦྱིན། །རི་མོ་གཉིས་ནི་གནག་དང་སྔོ། །སྒོ་དང་རྟ་བབས་ཁ་ཁྱེར་དང་། །དྲ་བ་དྲ་བ་ཕྱེད་པས་མཛེས། །ཤར་གྱི་སྒོ་ཡི་དབུས་སུ་ཡང་། །མཁའ་འགྲོ་མ་འདྲའི་ཁྭ་གདོང་མ། །བྱང་དུ་འུག་པའི་གདོང་ཅན་མ། །ནུབ་ཏུ་ཁྱི་གདོང་ཅན་མ་དང་། །ལྷོ་རུ་ཕག་གི་གདོང་ཅན་ཏེ། །ཁ་དོག་ལཱ་མ་སོགས་འདྲ་མཆོག །མེ་དང་བདེན་བྲལ་རླུང་དང་ནི། །དབང་ལྡན་མཚམས་ན་གནས་པ་མོ། །གཤིན་རྗེ་བརྟན་མ་ཕོ་ཉ་མོ། །མཆེ་གཙིགས་འཇོམས་མ་རིམ་ཇི་བཞིན། །ཁ་དོག་གཉིས་གཉིས་མཉམ་པར་བྱ། །ཞལ་ནི་རྗེས་སུ་མཐུན་རིམ་པས། །ཤར་དང་བྱང་དང་ནུབ་དང་ནི། །ལྷོ་ཡི་ས་གཞི་རྟག་པ་རུ། །གནག་དང་སྔོ་དང་ལྗང་དང་དམར། །སེར་པོ་ཡི་ནི་མདོག་ཏུ་བྱ། །ལྷན་སྐྱེས་དཀྱིལ་འཁོར་དེ་བཞིན་དུ། །གང་ཕྱིར་འཁོར་ལོ་རིམ་པ་བཞི། །ཆོས་དང་ལོངས་སྤྱོད་རྫོགས་སྤྲུལ་པ། །མཇུག་ཏུ་བྱའོ་རིམ་ཇི་བཞིན། །འཁོར་ལོ་གཉིས་པར་རི་མོ་གསུམ། །གསུམ་པ་ལ་ནི་རི་མོ་བཞི། །བཞི་པ་རི་མོ་ལྔའི་བདག་ཉིད། །དུར་ཁྲོད་ཀུན་ནས་རིམ་པས་ཏེ། །ཕྱི་རོལ་ལ་སོགས་ས་གཞི་ནི། །ཟླུམ་པོའི་དབྱིབས་སུ་བྱ་བར་འདོད། །འཁོར་ལོ་རི་མོ་ལྔའི་བདག་ཉིད། །གྲྭ་བཞི་པ་ལ་ཀུན་དུ་འབར། །དེ་ལ་ལྷན་སྐྱེས་འཁོར་ལོ་ཡི། །དུར་ཁྲོད་རྣམས་ནི་བཤད་བྱ་སྟེ། །གཏུམ་དྲག་ཚང་ཚིང་དེ་བཞིན་དུ། །འབར་བས་འཁྲིགས་པའི་ཀེང་རུས་ཅན། །
འཇིགས་སྡེ་ཤར་ལ་སོགས་པ་ཡི། །ཕྱོགས་སུ་གཡོན་སྐོར་ཡོངས་སུ་གནས། །ཨཊྚ་ཊྚར་རྒོད་དབང་ལྡན་དུ། །དཔལ་གྱི་ནགས་ནི་སྲེག་ཟར་ཏེ། །མུན་པ་དྲག་པོ་བདེན་བྲལ་དུ། །རླུང་དུ་ཀི་ལི་ཀི་ལི་སྒྲོགས། །དུར་ཁྲོད་དྲག་པོའི་གཟུགས་རྣམས་ནི། །རོ་ལངས་འབྱུང་པོ་ཅེ་སྤྱང་སྒྲ། །རིམ་པ་འདི་ཡིས་གནས་པ་སྟེ། །དུར་ཁྲོད་བརྒྱད་པོ་རྣམས་སུ་ཡང་། །ཤིང་དང་ཕྱོགས་སྐྱོང་ཀླུ་དབང་སྟེ། །ཤིར་ཤིང་ཁྱབ་ནས་ཀྃ་ཀ་ལི། །ཙུ་ཏའི་ཤིང་དང་ནྱ་གྲོ་དྷ། །དེ་བཞིན་ཀ་རཉྫ་ཀ་ཉིད། །ལ་ཏཱ་པར་ཀ་ཊི་དང་པི་ཐ་བ། །དབང་པོ་ནོར་སྦྱིན་དེ་བཞིན་དུ། །ཀླུ་དབང་དང་ནི་གཤིན་རྗེའི་བདག །དབང་ལྡན་དེ་ནས་སྲེག་ཟ་དང་། །སྲིན་པོའི་དབང་པོ་རླུང་བདག་པོ། །ནོར་རྒྱས་འཇོག་པོ་དེ་བཞིན་དུ། །སྟོབས་ཀྱི་རྒྱུ་དང་པདྨ་ཉིད། །པད་ཆེན་ཧུ་ལུ་ཧུ་ལུ་དང་། །རིགས་ལྡན་དང་ནི་དུང་སྐྱོང་ངོ་། །སྒྲོགས་པ་དང་ནི་འུར་སྒྲོགས་དང་། །དྲག་པོ་འཁྱིལ་པ་མཐུག་དེ་བཞིན། །གང་བ་ཆར་འབེབས་གཏུམ་པོ་སྟེ། །འདི་རྣམས་སྤྲིན་གྱི་བདག་པོའོ། །འདིར་ནི་དུར་ཁྲོད་ཐམས་ཅད་ལ། །རྡོ་རྗེ་ཕྲེང་བ་རྣམ་པར་སྦྱིན། །ཐམས་ཅད་ཀྱང་འདིར་དེ་བཞིན་བྱ། །ཕྱི་དང་ནང་དུ་འདོད་པ་ཡིན། །ཞེས་བྱ་བ་ནི་གསུམ་པ་ཡོན་ཏན་གྱི་འཁོར་ལོའོ།། །།དེ་ནས་ཕྱི་རོལ་ནམ་མཁའ་ཡི། །འཁོར་ལོ་འདམ་སྐྱེས་སྔོན་པོ་མཚུངས། །སུམ་ཅུ་དྲུག་རྩིབས་དབུས་སུ་ཡང་། །མཁའ་སྤྱོད་རྣལ་འབྱོར་མ་འདི་རྣམས། །མིའམ་ཅི་མོ་དྲི་ཟ་མོ། །ཧུ་ཊུ་ཀ་མ་བཱ་ཊ་བ་མ་དེ་བཞིན་དུ། །པི་ཝང་གླིང་བུ་མུ་ཀུན་ད་མ་དང་། །རྫ་རྔ་མ་དང་ངེས་པར་གག་ག་རི། །ཆ་ལང་མ་དང་ཤཱེ་ལེན་དྲི་ཀི་མ། །གླུ་མ་ཀ་ར་ཌ་དང་ཏ་མ་ཌཱ་མཆོག་དང་། །གར་མ་སྒེག་མོ་ཊཀ་ཀ་མ་དང་ནི། །ཏཱ་ལི་ཤ་ར་ཎ་མོ་རྔ་ཆེན་མ། །མཽ་དྲི་རྒྱུད་ཅན་མ་དང་མ་རུ་མ། །ན་ལ་བ་མོ་དེ་བཞིན་ཌྷམ་བ་ཀི། །ཌམ་རུ་མ་དང་ཌུན་ཌཱུ་ཀི་དེ་བཞིན། །ཟངས་དུང་མ་དང་རྭ་དུང་མ་དེ་བཞིན། །བྷུ་ཀི་མ་དང་དྲིལ་བུ་མ་དང་དྲིལ་ཆུང་མ། །གཡེར་ཁ་མ་དང་དེ་བཞིན་ཌ་ཀོ་ལིཀ་མ་དང་། །དུང་མ་དང་ནི་དབྱངས་ལྡན་མ་དེ་བཞིན། །
འཁོར་མ་མཆོག་གི་དབང་ཕྱུག་མོ། །ཁ་དོག་སྣ་ཚོགས་བཀྲ་བའམ། །ཡང་ན་འཁོར་ལོའི་ཁ་དོག་གོ། །ཉེ་བའི་ཞིང་ན་གནས་པ་མོ། །གླིང་ནི་གསུམ་པ་མོ་མཆོག་གོ། །མཁའ་ལ་སྤྱོད་མའི་རིགས་སུ་བྱོན། །གླིང་འདི་ལ་ནི་ཡང་དག་གནས། །ས་ནི་འོད་འཕྲོ་ཅན་དེ་དང་། །རང་རང་གནས་སོགས་ཞིང་མའོ། །ཡང་ན་ཌམ་རུ་ཁ་ཊྭཱཾ་ག །འདིར་ནི་སླར་ཡང་སྤངས་ནས་སུ། །རང་རང་མཚན་མ་སོ་སོའི་ཚུལ། །ཇི་ལྟར་འདོད་པར་བྱ་བའོ། །འཁོར་ལོ་ཀུན་གྱི་ཅོད་པན་ལ། །རང་གི་བདག་པོས་བྱ་བའོ། །འདིར་ནི་ཤེས་རབ་ཐབས་བདག་ཉིད། །རིགས་ལྡན་བདག་ཉིད་རིགས་ཅན་མའོ། །ཇི་ལྟར་རྒྱན་ལ་སོགས་མང་པོ། །ལྷག་མ་སྔོན་བཞིན་བྱ་བའོ། །འཁོར་ལོ་ཀུན་དུ་སྤྱན་གསུམ་དང་། །ཕྱོགས་ཀྱི་གོས་འཆང་རྗེས་འགྲོ་མའོ། །ཞེས་བྱ་བ་ནི་ནམ་མཁའི་འཁོར་ལོ་སྟེ་དང་པོའོ།། །།དེ་ནས་ཕྱི་རོལ་རླུང་འཁོར་ལོ། །སྔོན་པོ་སྣ་ཚོགས་པ་ཡི་མདོག །རྡོ་རྗེའི་རྩིབས་དབུས་སྦྱིན་བྱ་བ། །རྣལ་འབྱོར་མ་རྣམས་རིམ་ཇི་བཞིན། །ནམ་མཁའི་སྙིང་པོ་ལས་གཞན་མིང་། །བློ་དང་ལྡན་པས་ཤེས་པར་བྱ། །མཁའ་ལྡིང་ངང་མོ་བཀྲ་བ་མོ། །བྱ་རོག་བྱ་གར་སྲེག་པ་མོ། །རྨ་བྱ་ཟངས་ཀྱི་གཙུག་པུད་མ། །གུ་ད་བུ་ལི་འཇམ་པ་མོ། །ཕུག་རོན་བྱ་རོག་ཆེན་མོ་དང་། །ག་ཌི་ནི་དང་གོང་མ་སྲེག །ནེ་ཙོ་སྔགས་མ་བཞད་མོ་དང་། །བྱ་རྒོད་འུག་མ་མཆིལ་པ་མོ། །ཤིང་བྱེའུ་མོ་དང་ངུར་པ་མ། །བྲི་ཀྵ་ར་ཎཱི་ཀཀྐ་པའི། །སོ་བྱ་མོ་དང་བྱི་ལ་མོ། །ལྕུག་མའི་མགྲིན་དང་སཱ་རི་མོ། །ཁྲ་མོ་གུར་གུམ་ལྕེ་ཅན་མ། །བཱ་ཊི་རཱི་ཀཱ་ཀྃ་ཛཾ་གྷ་མོ། །ཧོར་མོ་ཀཾ་ཀ་མོ་དེ་བཞིན། །དཏྣ་རི་མོ་རི་དགས་དགྲ། །དེ་ལྟར་རྣལ་འབྱོར་མའི་འཁོར་ལོ། །འཁོར་ལོའི་ས་གཞི་གང་འདྲའི་མདོག །ཡང་ན་རང་རང་ལས་ཤེས་བྱ། །ཕྱག་སོགས་དེ་བཞིན་སྔོན་དང་མཚུངས། །ཐམས་ཅད་ཤེས་རབ་ཐབས་བདག་ཉིད། །འདུན་ས་ལ་ནི་གནས་མ་མཆོག །སྦྱོང་དཀའི་སར་ནི་ཤེས་བྱ་སྟེ། །གླིང་ནི་བཞི་པ་མར་འདོད་དོ། །འཁོར་ལོ་འདི་ནི་སྒོང་སྐྱེས་དང་། །ཡོན་ཏན་གསུམ་གྱི་དབྱེ་བ་ཅན། །གསུམ་གྱི་བདག་ཉིད་གསུམ་པ་ཡི། །
འཁོར་ལོ་དྲོད་གཤེར་སྐྱེས་གཟུགས་ཅན། །བཞི་པ་མངལ་སྐྱེས་ཞེས་བྱ་བ། །འཁོར་ལོ་གསུམ་གྱི་བདག་ཉིད་འདོད། །ཞེས་བྱ་བ་ནི་རླུང་གི་འཁོར་ལོ་སྟེ་གཉིས་པའོ།། །།དེ་ནས་ཕྱི་རོལ་གྱི་བཤད་བྱ། །འཁོར་ལོ་ས་ཡི་མིང་ཅན་མཆོག །ཁ་དོག་སེར་པོའི་རང་བཞིན་ལ། །སུམ་ཅུ་དྲུག་རྩིབས་རྣམས་ཀྱིས་སྤྲས། །རྣལ་འབྱོར་མ་ནི་སུམ་ཅུ་དྲུག །ས་སྤྱོད་མ་རྣམས་རིམ་ཇི་བཞིན། །སེང་མོ་སྟག་མོ་བྷིམྦྷ་རི་བོང་མ། །གླང་ཆེན་རི་དགས་བྱི་ལ་མོ། །བ་དང་མ་ཧེ་མོ་རྟ་མོ། །ཅེ་སྤྱང་མོ་དང་སེ་མོ་འབྲི། །བྱི་བ་བོང་མོ་བྷི་ཌི་མ། །ར་མོ་ལུག་མོ་རིམ་པ་བཞིན། །ཁྱི་མོ་ཕག་མོ་དོམ་མོ་དང་། །ཌན་ཌ་རི་མོ་མཽ་ཛྙཱ་ཀ། །དྲེད་མོ་དང་ནི་སྒེག་མོ་དང་། །ནགས་མ་དང་ནི་ཁྱི་ཆེན་མོ། །བྱ་རོག་ཆེན་མོ་ཁ་སྒོ་མ། །སྦྲུལ་མོ་སྤྲ་མོ་རྔ་མོ་དང་། །སྲེ་མོ་རྩངས་མོ་ཕུག་པ་མོ། །གྲོང་ན་གནས་པ་མ་མཆོག་གོ། །དེ་ལྟར་འཁོར་ལོའི་མདོག་བཞིན་མ། །ཡང་ན་རང་རང་ཁ་དོག་གོ། །ལྷ་མོ་ཤེས་རབ་ཐབས་བདག་ཉིད། །ཉེ་བའི་འདུན་སར་གནས་པ་མོ། །མངོན་དུ་གྱུར་པའི་ས་ཉིད་དང་། །དེ་ནི་ཤེས་རབ་ཕ་རོལ་ཕྱིན། །ལྔ་པའི་གླིང་དུ་གནས་པ་མོ། །མཚོན་ཆ་ལ་སོགས་སྔོན་བཞིན་ནོ། །ལུས་ནི་བུད་མེད་རྣམ་པའི་གཟུགས། །གདོང་པ་རང་གི་དངོས་པོར་འདོད། །ཤར་དང་བྱང་དང་ནུབ་དང་ནི། །ལྷོ་ཡི་སྒོ་རུ་ཤེས་བྱ་བ། །ཚངས་མ་དབང་ཕྱུག་ཆེན་པོ་མ། །གཞོན་ནུ་ཁྱབ་འཇུག་མ་དེ་བཞིན། །ཕག་མོ་དབང་མོ་གཏུམ་མོ་དང་། །དཔལ་ཆེན་མོ་ནི་གྲྭ་རྣམས་སུ། །སྒོ་རུ་གཟུགས་དང་མཚན་མ་ནི། །མཁའ་འགྲོ་མ་སོགས་བཞིན་དུ་གྲགས། །གྲྭ་རུ་བརྟན་མ་ལ་སོགས་བཞིར། །ཤེས་བྱ་འདིར་ནི་རི་མོ་གསུམ། །སྐུ་གསུང་ཐུགས་ཀྱི་ཆོས་རྣམས་སོ། །ཆོས་ཀྱི་འཁོར་ལོ་ཤིན་ཏུ་མཛེས། །དུར་ཁྲོད་རྣམས་ནི་བརྗོད་བྱ་སྟེ། །མེ་ཡི་འཁོར་ལོའི་དབུས་སུ་ནི། །གསོད་དང་ཀུན་དུ་སྐྲག་བྱེད་དང་། །འཇིགས་པ་ཆེ་དང་འཇིགས་བྱེད་དང་། །དྲག་པོའི་དུར་ཁྲོད་དེ་བཞིན་དུ། །གཡོན་སྐོར་དུ་ནི་རྣམ་པར་དགོད། །སྐྲོད་བྱེད་དང་ནི་སྡང་བྱེད་དང་། །ལྐུགས་བྱེད་དང་ནི་རེངས་བྱེད་སླར། །དབང་ལྡན་ལ་སོགས་གྲྭ་ལའོ། །ཤིང་ནི་
རིམ་པས་སྦྱིན་བྱ་སྟེ། །གོ་ཡུ་སྟར་ག་ནཱ་ལི་ར། །སེ་འབྲུ་བིལ་བའི་ཤིང་དེ་ནས། །སྐྱུ་རུ་བི་ཛྙཱ་རཀྴའི་ཤིང་། །རིམ་པ་ཇི་བཞིན་རྣམ་པར་དགོད། །དབང་པོ་གཤིན་རྗེ་མ་ཆུ་མོ། །གནོད་སྦྱིན་འབྱུང་མོ་དྲང་སྲོང་མ། །སྲིན་མོ་རླུང་གི་ཆུང་མ་སྟེ། །འཇིག་རྟེན་སྐྱོང་མ་སྦྱིན་པར་བྱ། །ཀླུ་མོ་སྲིན་མོ་ཐམས་ཅད་ནི། །འདིར་ནི་རྣམ་པ་ཀུན་དུ་སྦྱིན། །དེ་ལྟར་དཀྱིལ་འཁོར་འཁོར་བཤད་ལ། །ཕུན་སུམ་ཚོགས་པ་ཐམས་ཅད་སྦྱིན། །ལས་ཀྱི་རྗེས་མཐུན་སྐུ་མདོག་ཅན། །དེར་ནི་གཙོ་བོ་བསྒོམ་པར་བྱ། །ཞེས་བྱ་བ་ནི་འཁོར་ལོ་གསུམ་པ་སའི་དཀྱིལ་འཁོར་ལ་རིམ་པ་གཉིས་དང་བཅས་པའོ།། །།དེ་ནས་ཕྱི་རོལ་སླར་ཡང་འདིར། །མེ་ཡི་འཁོར་ལོ་བདག་གིས་བཤད། །ཁ་དོག་དམར་པོ་འབར་ཆེན་མོ། །སུམ་ཅུ་དྲུག་རྩིབས་རྣམས་མཆོག་ལ། །རྣལ་འབྱོར་མ་སླར་དགོད་བྱ་བ། །ལྷ་སོགས་རིགས་ལས་བྱུང་མ་སྟེ། །ལྷ་མོ་ཀླུ་མོ་གནོད་སྦྱིན་མོ། །འབྱུང་མོ་ངོ་བོ་ཙམ་པོའོ། །དེ་ཀུན་གསུངས་པ་འདི་ནི་ཅི། །ལྷ་ཡི་རིགས་བྱུང་བཤད་པར་བྱ། །མ་དང་ཆུང་མ་སྲིང་མོ་དང་། །བུ་མོ་སྲིང་མོའི་བུ་མོ་དང་། །ཕ་ཡི་སྲིང་མོ་དེ་དང་ནི། །ཞང་པོ་ཡི་ནི་ཆུང་མ་དང་། །ཆུང་མའི་སྤུན་ཟླ་མ་དང་ནི། །དེ་ཉིད་ཀྱི་ནི་ཕ་ཡི་མ། །ཆུང་མ་ཡི་ནི་ཕྱི་མོ་དང་། །མ་ཡི་མ་དང་གཉེན་མོ་དང་། །མ་ཡི་སྤུན་ཟླའི་བུ་མོ་དང་། །རང་གི་ཕྱི་མོའི་སྤུན་ཟླ་དང་། །སྤུན་ཟླའི་བུ་མོ་དེའི་བུ་མོ། །ཕ་ཡི་མ་དང་ཕྱི་མོ་དང་། །ཁུ་བོ་ཡི་ནི་ཆུང་མ་དང་། །བུ་མོའི་བུ་ཡི་ཆུང་མ་དང་། །སླར་ཡང་ཆུང་མའི་སྤུན་ཟླ་དང་། །རང་ཕའི་སྲིང་མོའི་བུ་མོ་དང་། །དེ་ཉིད་ཀྱི་ནི་རང་རིགས་སྐྱེས། །སྤུན་ཟླའི་ཆུང་མ་བུ་མོ་དང་། །བུ་ཉིད་ཀྱི་ནི་ཆུང་མ་དང་། །བུ་མོའི་ཁྱོ་ཡི་མ་ཡི་ནི། །བུ་ཉིད་ཀྱི་ནི་སྒྱུག་མོ་དང་། །བུ་མོའི་བུ་མོར་ཡང་དག་བཤད། །ཕོ་ཉ་སུམ་ཅུ་དྲུག་རྣམས་སོ། །ཁ་དོག་དམར་པོར་ཡང་དག་གྲགས། །མཚོན་ཆ་ལ་སོགས་སྔར་དང་མཚུངས། །ས་ནི་རིང་དུ་སོང་ཉིད་དང་། །དྲུག་པའི་གླིང་དུ་གནས་པ་མོ། །འདུ་བར་རྟག་ཏུ་ཤེས་བྱ་སྟེ། །ཤེས་རབ་ཐབས་བདག་ངོ་བོ་ཅན། །ནུས་པའི་འཁོར་ལོར་འདི་རྟག་ཏུ། །ཤེས་བྱ་རང་འདྲའི་མཛེས་
མའོ། །ཀུན་དུ་རྡོ་རྗེའི་ཕྲེང་ལ་སོགས། །ལུགས་འབྱུང་ལུགས་ལས་བཟློག་པ་ཡིས། །གཡོན་དང་གཡས་པའི་ལག་པ་ཡིས། །འདིར་ནི་མཆོད་པ་བྱེད་པ་ཡིན། །ཕྱུགས་རྣམས་ཀྱི་ནི་ཤ་ཐམས་ཅད། །ཀུན་དུ་སོན་པར་དབུལ་བར་བྱ། །བཏུང་བ་རྣམ་པ་སྣ་ཚོགས་དབུལ། །བལྡག་བྱ་སྣ་ཚོགས་ཉིད་དེ་བཞིན། །རང་རང་སྟན་ལས་ལངས་ནས་ནི། །བླ་མ་རྡོ་རྗེ་འཛིན་པ་མཆོད། །སླར་ཡང་འོངས་ནས་འཁོར་ལོ་ཡི། །མཆོད་པ་བཅུ་གཉིས་རྣམས་ལའོ། །ཞེས་བྱ་བ་ནི་ལོངས་སྤྱོད་རྫོགས་པའི་འཕར་མའི་མེའི་འཁོར་ལོ་དང་པོའོ།། །།དེ་ནས་དེ་ཡི་ཕྱི་རོལ་བཤད། །ཆུ་ཡི་འཁོར་ལོ་རྫུ་འཕྲུལ་ཆེ། །མདོག་དཀར་སུམ་ཅུ་དྲུག་རྩིབས་ལ། །རྣལ་འབྱོར་མ་ནི་རིམ་པས་བསྒོམ། །མ་ཀ་ར་མོ་རུས་སྦལ་ཉ། །སྦལ་མོ་རུས་སྦལ་ཆུ་སྲམ་མོ། །སྡིག་ནག་གགྒར་མ་ཤྲཱི་ལི་མ། །ཆུ་ཡི་ཕུག་མ་སྲིན་བུའི་གདོང་མ་དང་། །ཆ་ག་པ་མོ་ཀ་ཀ་རུ་མོ་སུ་ས་མོ། །ཆུ་བྱི་མོ་དང་གྲོག་མོའི་གདོང་མ་དང་། །ཆུ་ཡི་མི་མོ་དང་ནི་རྒོད་མ་དང་། །གླང་ཆེན་མོ་དང་སྟག་མོ་ཅེ་སྤྱང་མོ། །ཆུ་སྦྲུལ་མོ་དང་དུང་མོ་འགྲོན་བུ་མ། །ཉ་ཕྱིས་མ་དང་ནོར་བུ་ཛིང་གུ་ར་མ་དང་། །ལི་ས་མོ་དང་དུད་དུ་ར་མ་ཀརྞྞ་ཊཱ། །ཕ་ཊཀ་མོ་དཱ་བ་ཀ་མ་ཀྲི་མ་མོ། །ཛུ་ཥ་ཛུ་ཥཱི་མ་དང་ཤ་སྦྲང་མ་ཀ་ལཱ་མ། །ལྷ་ཡི་གཙོ་མོ་མཆོག་རྣམས་སོ། །དེ་ལྟར་ཁ་དོག་རང་བཞིན་ནི། །དཀར་མོའམ་རང་རང་རིགས་སྐྱེས་པ་མོ། །གདོང་ནི་རང་རང་གཟུགས་ཀྱིས་ཏེ། །རྣལ་འབྱོར་མའི་རིམ་ཇི་བཞིན་ནོ། །ཉེ་བའི་འདུ་བ་ཉིད་དང་ནི། །ས་ནི་མི་གཡོ་བ་མཆོག་གོ། །བདུན་པའི་གླིང་དུ་གནས་པར་ནི། །ཤེས་བྱ་མཚོན་ཆ་སྔོན་བཞིན་ནོ། །ཡང་ན་གང་བའི་རི་སོགས་ཀྱི། །མི་རྣམས་སུམ་ཅུ་དྲུག་ལྷའོ། །གནས་སོགས་རིམ་པས་དེ་རྣམས་སུ། །མི་མོ་དངོས་སུ་ཡང་དག་བྱ། །འཛམ་བུའི་གླིང་འདི་དེ་ཡིས་ནི། །དུམ་བུ་བཅུ་གཉིས་ཀྱིས་བརྒྱན་པའོ། །བ་ཚ་ཞེས་བྱའི་རྒྱ་མཚོར་ནི། །དེ་རུ་གཏོགས་པའི་སྐྱེ་བོ་རྣམས། །དྲོད་གཤེར་སྐྱེས་དང་འདུ་འཕྲོད་ལས། །སྐྱེས་པའམ་མངལ་ནས་སྐྱེས་པར་བསམ། །འཁོར་ལོ་འདི་ནི་དྲོད་གཤེར་སྐྱེས། །མེ་ཡི་འཁོར་ལོ་མངལ་སྐྱེས་
སོ། །མཚན་ཉིད་ཐམས་ཅད་ཡོངས་རྫོགས་པའི། །ཤེས་རབ་ཐབས་བདག་ཉིད་རང་ངོ་། །ཞེས་བྱ་བ་ནི་ཆུའི་འཁོར་ལོ་སྟེ་གཉིས་པའོ།། །།དེ་ནས་དེ་ཡི་ཕྱི་རོལ་འཆད། །ཀུན་ནས་ཡེ་ཤེས་འཁོར་ལོའོ། །སུམ་ཅུ་དྲུག་རྩིབས་སྣ་ཚོགས་མདོག །ལྷ་མིན་མོ་ཡི་རིགས་རིམ་པས། །ཏིལ་མཆོག་མ་དང་ཕུལ་དུ་བདེ། །ལྷ་ཡི་བུ་མོ་དགའ་ཆེན་མ། །དགའ་དང་དགར་གྲགས་པདྨ་ཅན། །དུང་ཅན་སྣ་ཚོགས་གླང་ཆེན་མ། །གཟུགས་ཆེན་མ་དང་གཟུགས་མཛེས་མ། །འོད་ཆགས་རྣམ་སྒེག་བདེ་བ་མོ། །མེ་ཏོག་འདོད་མ་ཨུཏྤལ་དཀར། །ཨུཏྤལ་སྔོ་དང་མཛེས་མ་དང་། །འདོད་ཆགས་མ་དང་འདོད་ཆགས་ཆེ། །རོལ་གྲགས་མ་དང་རོལ་ཆེན་མ། །མྱོས་མ་དང་ནི་མྱོས་དགའ་མ། །འདོད་པ་མོ་དང་འདོད་ཆེན་མ། །བདེ་ལས་བྱུང་དང་བདེ་ལྡན་མ། །མཐུན་མཆོག་མོ་དང་བྱམས་པ་མོ། །སྐལ་བཟང་ལྡན་མ་སྐལ་བཟང་མོ། །དམའ་བ་མོ་དང་ཞུམ་པ་མོ། །སྐྱེ་གཟུགས་མར་ནི་གྲགས་པ་སྟེ། །རྣལ་འབྱོར་མ་ཡི་གཙོ་མོ་མཆོག །ཐམས་ཅད་ཤེས་རབ་ཐབས་བདག་ཉིད། །རྣམ་པ་སྣ་ཚོགས་མདོག་དེ་བཞིན། །ཕྱག་དང་མཚོན་ཆ་སྔོན་བཞིན་ཤེས། །ལེགས་པའི་བློ་གྲོས་ས་དེ་བཞིན། །དུར་ཁྲོད་རིན་པོ་ཆེར་སྣང་བ། །རང་འབྱུང་བདེ་བ་བྱེད་པ་པོ། །དེ་ཕྱིར་ལོངས་སྤྱོད་རྫོགས་སྐུ་དང་། །དཀྱིལ་འཁོར་འཁོར་ལོ་གསུམ་པ་ལ། །དགའ་བ་བཞི་ནི་དག་པ་ཡིས། །ཀུན་ནས་རི་མོ་བཞི་ཅན་ནོ། །ཤར་ལ་སོགས་པའི་སྒོ་བཞི་རུ། །རྣལ་འབྱོར་མ་རྣམས་རིམ་ཇི་བཞིན། །དཀར་མོ་ཆོམ་རྐུན་རོ་ལངས་མ། །ཟ་ཕོད་མ་ཡང་རྣམ་པར་དགོད། །གྲྭ་ལ་གནས་པའི་ལྷ་མོ་བཞི། །སྦོས་མོ་རི་ཁྲོད་མ་དེ་བཞིན། །གཏུམ་མོ་དང་ནི་གཡུང་མོ་སྟེ། །རིམ་པས་སྔོན་བཞིན་རྟག་ཤེས་བྱ། །ཕྱི་རོལ་དུར་ཁྲོད་འཁོར་ལོ་ནི། །ཆུ་ཡི་དཀྱིལ་འཁོར་དབུས་སུ་སྟེ། །བྱིས་པ་འཆི་དང་ལྷག་མ་ཟ། །གཡུལ་དྲག་མོ་དང་མཆེ་བ་ཀུན། །ཤར་ལ་སོགས་པར་གཡོན་སྐོར་དུ། །དེ་ལྟར་བརྩེ་བ་ཆེན་པོས་བསམ། །དུ་བ་མུན་ནག་དང་ནི་མེ། །ཧཱ་ཧཱའི་སྒྲ་དང་སྒྲ་ཆེན་ནོ། །ཤིང་ནི་ཙནྡན་ག་པུར་དང་། །ཛཱ་ཏི་ཕ་ལ་དང་
ཨེ་ལ། །ནཱ་ག་གེ་སར་ཙམ་པ་དང་། །ཀུན་དུ་རུ་དང་ལྷའི་ཤིང་ངོ་། །ཕྱོགས་སྐྱོང་རྣམས་ནི་མཚོན་བྱ་བ། །ཉི་མ་བསིལ་བ་ས་ཡི་བུ། །རི་བོང་ཅན་སྐྱེས་བླ་མ་ཉིད། །ངན་སྤོང་ཉི་མའི་བུ་དེ་བཞིན། །ལྷ་མིན་མགོ་བོར་ཤེས་བྱ་སྟེ། །དྲག་པོའི་གདོང་རྣམས་སུ་བྱའོ། །འབར་བ་རལ་གྲི་ཆུ་གྲི་དང་། །མདུང་རིང་སྤུ་གྲི་བྲག་དེ་བཞིན། །གློག་དང་སྣ་ཚོགས་མཚོན་འབེབས་པར། །དུར་ཁྲོད་ཀྱི་ནི་དབུས་སུ་བྱ། །རལ་གྲི་མིག་སྨན་རི་ལུ་དང་། །རྐང་པ་བྱུག་དང་བཅུད་ལེན་དང་། །མཆིལ་ལྷམ་དངུལ་ཆུ་ས་འོག་གི། །དངོས་གྲུབ་སྒྲུབ་པ་མཁས་པས་བྱ། །ཞེས་བྱ་བ་ནི་ཡེ་ཤེས་ཀྱི་འཁོར་ལོ་སྟེ་ལོངས་སྤྱོད་རྫོགས་པའི་དཀྱིལ་འཁོར་འཁོར་ལོ་གསུམ་གྱི་བདག་ཉིད་དོ།། །།དེ་ནས་དེ་ཡི་ཕྱི་རོལ་འཆད། །ཐུགས་ཀྱི་འཁོར་འདི་གསལ་བའོ། །མདོག་ནག་སུམ་ཅུ་རྩ་དྲུག་རྩིབས། །ཐམས་ཅད་རང་བཞིན་སྐྱེས་པ་མཆོག །ཀླུ་མོ་གནོད་སྦྱིན་མོ་འབྱུང་མོ། །ཡི་དགས་དམྱལ་མོ་མནར་མེད་མ། །ལྟུང་བ་མོ་དང་བར་མེད་མ། །བུམ་མོ་གཤིན་རྗེ་མོ་དེ་བཞིན། །ཐིག་ནག་མ་དང་མེ་མདག་མོ། །ཚ་བ་མོ་དང་རབ་ཚ་མ། །ངུ་འབོད་མ་དང་ངུ་འབོད་ཆེ། །མར་ནག་ཏུ་འཚེད་རི་གཉིས་འཚིར། །སྡང་མ་རྨོངས་མ་ཕྲག་དོག་མ། །ཆགས་མྱོས་སེར་སྣ་སྐུད་པ་མ། །གྲངས་མ་རལ་གྲིའི་ནགས་མ་ཉིད། །དུ་མ་དང་ནི་མུ་གེ་མ། །ནད་དགོན་མ་དང་མཚོན་གྱི་དང་། །ཆུ་ཡི་དགོན་པ་མ་དང་ནི། །རལ་གྲི་སེན་མོ་རབ་མེད་མ། །སྤུ་གྲིའི་སོ་མ་འཁོར་ལོ་མ། །གྲུལ་བུམ་མོ་སྟེ་ལྷ་མོ་ཆེ། །མདོག་ནི་འཁོར་ལོ་ཅི་འདྲ་བའོ། །ཕྱག་དང་མཚོན་ཆ་སྔོན་བཞིན་དུ། །ཤེས་བྱ་རང་གི་གཟུགས་ཅན་ནོ། །དེ་ལ་ཉེ་བའི་དུར་ཁྲོད་དང་། །དེ་ནས་ས་ནི་ཆོས་ཀྱི་སྤྲིན། །སེམས་ཀྱི་རང་བཞིན་དག་པ་ཉིད། །ཀུན་འགྲོ་འཁོར་ལོ་ཅན་དུ་འདོད། །རང་བཞིན་སྤངས་པ་བདག་མེད་པ། །འཁོར་ལོ་ཅན་སར་བཞུགས་པའོ། །འཁོར་ལོ་རྣམས་ནི་རིམ་ཇི་བཞིན། །ཐམས་ཅད་དེ་ལྟར་ཤེས་པར་བྱ། །སྒོ་སྐྱོང་མ་ནི་ཐམས་ཅད་ཀྱི། །གནས་བཞི་རྣམས་ནི་བཅུ་གཉིས་སོ། །དེ་ལྟར་བཅུ་དྲུག་ཤེས་བྱ་བ། །སྟོང་པ་ཉིད་
ནི་མཁས་པ་ཡི། །ཡེ་ཤེས་རྣམ་ཤེས་ངོ་བོའི་ཕྱིར། །དུར་ཁྲོད་བཅོམ་ལྡན་འདས་རང་ཉིད། །སྤྲུལ་པའི་འཁོར་ལོ་འདི་ལ་ནི། །གསུམ་གྱི་བདག་ཉིད་མིང་གིས་སོ། །ཕྱི་ནས་གཞན་འདི་ཐམས་ཅད་ནི། །འཁོར་ལོ་གཉིས་སུ་བཤད་པར་བྱ། །ཞེས་བྱ་བ་ནི་ཐུགས་ཀྱི་འཁོར་ལོའི་དང་པོའོ།། །།དེ་ནས་ཕྱི་རོལ་དུ་གཞན་པ། །གསུང་གི་འཁོར་ལོ་དེ་བཤད་བྱ། །དམར་པོ་བཙོད་ཀྱི་ཁ་དོག་སྟེ། །སུམ་ཅུ་དྲུག་རྩིབས་བདག་ཉིད་གཙོ། །མཆོད་མ་ཟ་མ་གཉིད་མ་དང་། །ལེ་ལོ་མ་ཆོས་སེམས་སྒོམ་མོ། །ཁྱིམ་སེམས་བུད་མེད་སེམས་མ་དང་། །དོན་སེམས་མ་དང་སྦྱོར་བྲལ་མ། །བུ་སེམས་རྣམས་དང་མྱ་ངན་མ། །བསམ་གཏན་མ་དང་སྔགས་ཟློས་མ། །ངོ་ཚ་ང་རྒྱལ་གདུང་བ་མོ། །སེམས་ཅན་དོན་བྱེད་བརྩོན་མ་དང་། །རྒྱལ་པོ་སེམས་མ་གཞན་གནོད་མ། །ཡེ་ཤེས་ཐོབ་མ་དཀའ་ཐུབ་མ། །རྒས་མ་འཆི་བའི་བསམ་ཅན་མ། །བདེ་མ་སྡུག་མ་མི་དགེ་མ། །ཡོད་དང་མེད་མ་ཉིད་དང་ནི། །བླ་མ་སེམས་མ་འགྲོ་བ་མོ། །བཟོད་མ་མི་བཟོད་མ་ངལ་མ། །ངལ་སོས་མ་དང་བཀྲེས་མ་མཆོག །ལས་ནི་ཐམས་ཅད་བྱེད་ལྷ་མོ། །རང་བཞིན་འཁོར་ལོ་འདི་ཆེའོ། །ཁ་དོག་རང་གི་འཁོར་ལོར་གྲགས། །ལྷག་མ་འདི་ནི་སྔོན་བཞིན་ནོ། །ཤེས་རབ་ཐབས་བདག་ཉིད་ལྷ་མོ། །རང་བཞིན་གྱི་ནི་དཀྱིལ་འཁོར་འདི། །གདན་བཞི་པའི་རྒྱུད་སྟོང་ཕྲག་ནི། །བཅུ་གཉིས་པ་ལ་བཤད་པ་སྟེ། །ཡེ་ཤེས་མཁའ་འགྲོ་མ་སོགས་ཀྱི། །མཆོད་སོགས་ལྷ་མོར་འདོད་པ་ཡིན། །གྲོང་མཐའི་གནས་ནི་འདི་ལྟ་བུ། །ཀུན་དུ་འོད་ཀྱི་ས་ཡིན་ནོ། །དེ་ལྟར་ཡེ་ཤེས་སོགས་སྐུའི་མཐའ། །ཆུ་མེ་རླུང་དང་ནམ་མཁའ་ཡི། །བསྐོར་བའི་འཁོར་ལོ་ཞེས་བྱ་བར། །རྡོ་རྗེ་མཆོག་མ་ཤེས་པར་བྱ། །ཞེས་བྱ་བ་ནི་གསུང་གི་འཁོར་ལོའི་གཉིས་པ་སྤྲུལ་པའི་འཁོར་ལོའོ།། །།དེ་ནས་སྐུ་ཡི་འཁོར་ལོ་བཤད། །སྐུ་གསུང་ཐུགས་ཀྱི་ཁ་དོག་ཅན། །སུམ་ཅུ་རྩ་དྲུག་རྩིབས་དབུས་སུ། །རྣལ་འབྱོར་མ་ཡི་འཁོར་སྒྱུར་མའོ། །རྒྱལ་ཆེན་བཞི་ཡི་རིས་མ་དང་། །སུམ་ཅུ་རྩ་གསུམ་འཁོར་སྒྱུར་མ། །འཐབ་བྲལ་དགའ་ལྡན་འཁོར་སྒྱུར་མ། །འཕྲུལ་དགའ་
མ་དང་དེ་བཞིན་དུ། །གཞན་འཕྲུལ་དབང་བྱེད་མ་དང་ནི། །ཚངས་རིས་མ་ཡི་འཁོར་ལོ་མ། །ཚངས་པ་མདུན་འདོན་མ་དེ་བཞིན། །ཚངས་པ་ཆེན་པོའི་འཁོར་སྒྱུར་མ། །འོད་ཆུང་ཚད་མེད་འོད་མ་དང་། །འོད་གསལ་མ་དང་དགེ་ཆུང་མ། །ཚད་མེད་དགེ་བའི་འཁོར་སྒྱུར་མ། །དགེ་རྒྱས་མ་དང་སྤྲིན་མེད་མ། །བསོད་ནམས་སྐྱེས་མའི་འཁོར་ལོ་དང་། །འབྲས་བུ་ཆེ་བའི་འཁོར་སྒྱུར་མ། །མི་ཆེ་མི་གདུང་འཁོར་ལོ་མ། །ཤིན་ཏུ་མཐོང་སྣང་བཟང་སྣང་མ། །འོག་མིན་མ་ཡི་འཁོར་སྒྱུར་མ། །ནམ་མཁའ་མཐའ་ཡས་སྐྱེ་མཆེད་མ། །རྣམ་ཤེས་མཐའ་ཡས་སྐྱེ་མཆེད་མ། །ཅི་ཡང་མེད་པའི་སྐྱེ་མཆེད་མ། །འདུ་ཤེས་མེད་དང་འདུ་ཤེས་ནི། །མེད་མིན་དམྱལ་མོ་ཡི་དགས་མ། །དུད་འགྲོ་མི་མོ་ལྷ་མིན་མོ། །གཞལ་མེད་ཁང་སྤྱོད་མ་དེ་བཞིན། །ཟླ་བ་ཉི་མ་གཤིན་རྗེ་མོ། །དབང་མོ་འཁོར་སྒྱུར་མར་ཤེས་བྱ། །རང་གི་འཁོར་ལོའི་མདོག་བཞིན་བྱ། །ཕྱག་དང་མཚོན་ཆ་སྔར་བཞིན་ནོ། །ཤེས་རབ་ཐབས་ཀྱི་རང་བཞིན་ཏེ། །ཉེ་བའི་གྲོང་མཐར་ཡང་དག་གནས། །ས་ནི་མོས་པ་སྤྱོད་པ་སྟེ། །འདི་རྣམས་འཁོར་ལོ་བཅུ་གཉིས་སོ། །འཁོར་ལོ་འདི་ནི་གྲུ་བཞི་སྟེ། །སྤྲུལ་པའི་སྐུར་ནི་འདུ་ཤེས་སོ། །རི་མོ་ལྔ་ནི་མེ་ལོང་སོགས། །ཐམས་ཅད་མཚན་ཉིད་ཀྱིས་མཚན་པའོ། །བརྒྱད་གཉིས་ལྷ་མོས་བྱས་པ་ཡི། །མཆོད་པའི་དཀྱིལ་འཁོར་བཞི་ལའོ། །ཕྱི་རོལ་དུར་ཁྲོད་བརྒྱད་རྣམས་ཏེ། །སྒོ་སྐྱོང་མ་ནི་རིམ་ཇི་བཞིན། །ཤར་དུ་ཆུ་སྐྱེས་དཀར་མོ་བསྒོམ། །བྱང་དུ་གན་དྷ་རི་མའོ། །ནུབ་ཏུ་རྡོ་རྗེ་གར་མ་སྟེ། །ལྷོ་རུ་རྟ་རྒོད་མ་ཡི་ཁ། །གྲྭ་ཡི་ཆར་ནི་ལྷ་མོ་བཞི། །དབང་ལྡན་ལ་སོགས་རིམ་ཇི་བཞིན། །ལྷ་མོ་རྡོ་རྗེ་འབར་ཞལ་དང་། །རྡོ་རྗེ་ཁྲོ་གཉེར་མའི་ཞལ་དང་། །རྡོ་རྗེ་འཐུབ་མ་གཏུམ་མོ་སྟེ། །ཁ་དོག་ལ་སོགས་སྔོན་བཞིན་ནོ། །དྲག་མོ་ཆེན་མོ་གཙིགས་པའི་ཞལ། །འབར་བའི་ཕྲེང་བས་རྣམ་མཛེས་མའོ། །དཔའ་བོ་རྣམས་ཀྱི་མདོག་དང་གཟུགས། །རྣལ་འབྱོར་མ་ཀུན་ཇི་ལྟ་བའོ། །ཀུན་ལ་མགོ་བོའི་ཕྲེང་བས་བརྒྱན། །དཔའ་བོ་རྣམས་ལ་དར་ཕྲེང་ཅན། །རལ་པའི་
ཅོད་པན་དཔའ་དེ་རྣམས། །ཡན་ལག་ཀུན་ལ་ཐལ་བས་བསྐུས། །རྣལ་འབྱོར་མ་ཡི་མཐོ་ཞིང་འཕྲེང་། །ལག་གདུབ་སྤྱི་གཙུག་བརྒྱན་པ་དང་། །མཚན་ཉིད་ཐམས་ཅད་ཡང་དག་རྫོགས། །ཕག་མོའི་རིགས་ལས་བྱུང་བའོ། །དཔའ་བོ་ཀུན་གྱི་མིང་རྣམས་ནི། །ཐོག་མའི་འཁོར་ལོ་ལ་སོགས་མཆོག །རྡོ་རྗེ་མཁའ་འགྲོ་དེ་བཞིན་དུ། །སྣ་ཚོགས་པདྨ་མཁའ་འགྲོ་དང་། །རིན་ཆེན་ཐོད་པའི་དུམ་བུ་དང་། །ཀེང་རུས་ཆེན་པོའི་ཀེང་རུས་དང་། །མཆེ་བ་རྣམ་གཙིགས་ལྷ་དགྲ་དང་། །འོད་དཔག་མེད་དང་རྡོ་རྗེ་འོད། །རྡོ་རྗེ་སྐུ་དང་མྱུ་གུ་ཅན། །རྡོ་རྗེ་རལ་པ་ཅན་དེ་བཞིན། །དཔའ་ཆེན་རྡོ་རྗེ་ཧཱུྃ་མཛད་དང་། །ཤིན་ཏུ་བཟང་དང་རྡོ་རྗེ་བཟང་། །འཇིགས་བྱེད་ཆེན་པོ་མིག་མི་བཟང་། །སྟོབས་ཆེན་རིན་ཆེན་རྡོ་རྗེ་དང་། །རྟ་མགྲིན་ནམ་མཁའི་སྙིང་པོ་དང་། །ཧེ་རུ་ཀ་དང་པད་གར་ཅན། །རྣམ་སྣང་མཛད་དང་རྡོ་རྗེ་སེམས། །སྟོབས་ཆེན་ཡེ་ཤེས་མཁའ་འགྲོ་དང་། །བློ་བརྟན་ཐར་དང་ཡེ་ཤེས་དང་། །ཐབས་དང་ཐུགས་ཀྱི་རྡོ་རྗེའོ། །ལྷག་མའི་མིང་ནི་ལྷ་མོ་བཞིན། །སྐྱེས་བུའི་རྟགས་རྣམས་སུ་བྱའོ། །འཁོར་ལོ་བཅུ་གཅིག་རྣམས་ཀྱི་ནི། །སྒོ་ལ་སོགས་པའང་དེ་བཞིན་ནོ། །སྙིང་པོའི་པདྨའི་ལྷ་མོ་རྣམས། །གཙོ་བོས་བདག་པོ་བཞིན་དུ་བྱ། །འོན་ཀྱང་བདག་པོ་སོགས་འཁོར་ལོར། །ཇི་ལྟར་བསྐལ་བཟང་རྒྱལ་བ་ནི། །བཞི་ཡིས་དམན་པའི་སྟོང་ཕྲག་གཅིག །དེ་རྣམས་ཐམས་ཅད་རྣམ་བསྒོམ་བྱ། །མཚན་ནི་ཡོན་ཏན་དབྱེ་བས་ཕྱེ། །སྤྲུལ་པའི་སྐུ་ཅན་བདག་ཉིད་དོ། །གང་ཞིག་གང་གི་འཁོར་ལོ་ཡི། །རྣལ་འབྱོར་མ་ནི་ཐོག་མར་བྱུང་། །དེ་ཡིས་བཅུ་གཉིས་ཤེས་པར་བྱ། །ཀུན་སྤྱོད་གནས་དང་ཉེ་གནས་མའོ། །ལྷག་མ་ས་ནི་བཅུ་གསུམ་པ། །སྒོ་དང་གྲྭ་ལ་སོགས་གནས་མའོ། །མཆོད་དང་བསྟོད་སོགས་དུས་སུ་ནི། །ཐོག་མར་རྡོ་རྗེའི་མིང་ཤེས་བྱ། །དཔའ་བོ་རྣམས་ལའང་དེ་བཞིན་ནོ། །ཕྱི་རོལ་དུར་ཁྲོད་བཤད་བྱ་བ། །དང་པོར་ཚིག་པར་ཤེས་བྱ་སྟེ། །གཉིས་པར་ཡང་ནི་མ་ཚིག་པ། །གསུམ་པ་དུམ་བུར་གྱུར་པ་ཉིད། །བཞི་པ་ཡང་ནི་མ་གཏུགས་པ། །ལྔ་པ་འཇིགས་སུ་རུང་བར་བཤད། །དྲུག་པ་ཡང་ནི་
འཇིགས་བྱེད་པ། །བདུན་པ་གསལ་ཤིང་ཕུག་པ་སྟེ། །སྟེང་ནས་བཏགས་པས་བརྒྱད་པའོ། །དུར་ཁྲོད་བརྒྱད་པོ་རྟག་ཏུ་ནི། །དམྱལ་སྲུང་ཆེན་པོ་བརྒྱད་རྣམས་སོ། །ཤལ་མ་ལི་ཤིང་མྱ་ངན་མེད། །ཡོངས་འདུ་ཨུ་དུམ་བཱར་དེ་བཞིན། །ཌོམ་བི་ར་དང་གམ་བྷ་རི། །རྒྱ་ཤུག་དང་ནི་བ་རུ་རའོ། །སྣ་ཚོགས་རོ་ལངས་ཚོགས་དང་ནི། །རྣལ་འབྱོར་མ་དང་དཔའ་བོའི་ཚོགས། །མཁའ་སྤྱོད་མ་དང་ས་སྤྱོད་གཞན། །གང་ཡིན་དེ་ཡང་རྫུ་འཕྲུལ་ཆེ། །མགོ་མེད་རྒྱུག་དང་གཞན་ཡང་ནི། །མགོ་བོ་མེད་པ་གར་བྱེད་དང་། །ཉལ་བ་དང་ནི་རྐང་མེད་དང་། །མགོ་དང་ལུས་སོགས་གཏུབས་པ་སྟེ། །ཏིང་འཛིན་ཆེན་པོའི་རྒྱུ་ཡིས་ནི། །དེ་རྣམས་དགའ་བཅས་གར་བྱེད་པའོ། །དེ་ལྟར་དེ་བཞིན་དབུས་སུ་ནི། །རྒྱུ་སྐར་སྣ་ཚོགས་བྱ་བ་ཡིན། །ཁ་དོག་སྣ་ཚོགས་ཤེས་བྱ་སྟེ། །བཞོན་པ་གང་གི་ཡིན་པའོ། །རྫོགས་པའི་བྱང་ཆུབ་རྒྱུའི་བདག་ཉིད། །ཡོངས་རྫོགས་དཀྱིལ་འཁོར་བསྒོམ་པར་བྱ། །རྒྱུ་ཡི་རྡོ་རྗེ་ཅི་འདྲ་བ། །ཡང་ནི་དེ་འདྲ་སྤྲོ་བར་བྱ། །དུད་འགྲོའི་ཞལ་ཅན་ལྷ་མོ་ནི། །ལས་ཐམས་ཅད་མས་ཁྱེར་ནས་འོངས། །ཁྲོ་བོའི་ཚོགས་ཀྱིས་མཉམ་བཀུག་ནས། །སྔོན་དུ་བགེགས་ནི་བསལ་བར་བྱ། །སུམ་བྷས་བཀའ་བསྒོ་རྡོ་རྗེ་ཅན། །བརྟུལ་ཞུགས་ཅན་གྱིས་ཕུར་གདབ་བྱ། །ༀ་སུམྦྷ་ནི་སུམྦྷ་ཀཱ་ཡི་ཀཱཾ་ཧཱུྃ་ཧཱུྃ་ཕཊ། ༀ་གྲཱིཧྞ་གྲཱིཧྞ་བཱ་ཙི་ཀཱཾ་ཧཱུྃ་ཧཱུྃ་ཕཊ། ༀ་གྲཱིཧྞ་པ་ཡ་གྲྀཧྞ་པ་ཡ་ཙི་ཏ་སི་ཀཱཾ་ཧཱུྃ་ཧཱུྃ་ཕཊ། ༀ་ཨཱ་ན་ཡ་ཧོཿ། བྷ་ག་ཝཱན་བཛྲ་ཛྙཱ་ནི་ཀཱཾ་ཧཱུྃ་ཧཱུྃ་ཕཊ། །ཤར་ལ་སོགས་པའི་ཕྱོགས་སུ་གཞག །རྡོ་རྗེ་གུར་གྱི་དབུས་སུ་ནི། །འོག་ཏུ་རྡོ་རྗེའི་ས་གཞིར་འགྱུར། །སྟེང་དུ་མདའ་ཡི་དྲ་བ་ཅན། །རྡོ་རྗེ་ར་བ་བླ་བྲེའོ། །ཆོས་ཀྱི་འབྱུང་གནས་ནང་དུ་ཡང་། །དེ་ཡང་གསུམ་བཞི་ལྔ་དང་ནི། །གྲུ་དྲུག་པ་རུ་བསྒོམ་པར་བྱ། །འཕར་མ་བཞི་ཡི་རིམ་ཇི་བཞིན། །རིམ་པས་ཐམས་ཅད་འདིར་དགོད་བྱ། །ༀ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ་བཛྲ་དྷ་རོད་ཨཱ་ཛྙཱ་པ་ཡ་ཏི་སརྦ་བིགྷྣན་ཀཱ་ཡ་བཱ་ཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ཕུར་བུ་གདབ་པའི་
སྔགས་སོ། །ཨོཾ་བཛྲ་མུངྒ་ར་བཛྲ་ཀཱི་ལཱ་ཀོ་ཊ་ཡ་ཧཱུྃ་ཕཊ། བརྡུང་བའི་སྔགས་སོ། །དེ་ལྟར་འཁོར་ལོ་ཀུན་དཔའ་བོ། །བཅོམ་ལྡན་རྡོ་རྗེའི་རིགས་བྱུང་བའོ། །སྤྲུལ་པའི་སྐུ་ནི་མ་ལུས་པ། །རྣལ་འབྱོར་མ་ནི་བྱང་ཆུབ་སྣོད། །འདི་ནི་སྐུ་ཡི་འཁོར་ལོ་སྐུ་གསུམ་གྱི་བདག་ཉིད་དང་སྤྲུལ་པ་དང་ལྷན་ཅིག་པ་སྟེ་གསུམ་པའོ།། །།དེ་ནས་གནས་དང་ཉེ་གནས་སོགས། །ཇི་ལྟའི་རིམ་པ་རྣམས་གསུངས་པ། །གནས་ནི་གང་བའི་རི་ཉིད་དང་། །དྲ་བ་འཛིན་དང་ཨོ་ཌྱན་དང་། །ཨར་བུ་ད་ཡང་དེ་བཞིན་གནས། །གོ་དཱ་བ་རི་ཉེ་གནས་ཏེ། །དགའ་བའི་དབང་ཕྱུག་ལྷ་མོའི་མཁར། །གྱད་ཡུལ་ཡང་ནི་ཉེ་གནས་སོ། །འདོད་གཟུགས་དེ་བཞིན་ཨོ་ཌི་དང་། །ཏྲི་ཤ་ཀུ་ན་ཀོ་སལ་ཞིང་། །ཀ་ལིང་ཀ་དང་ལམ་པ་ཀ། །ཀཱཉྩི་ཁ་བའི་གནས་ཉེ་ཞིང་། །ཡི་དགས་གྲོང་དང་ཁྱིམ་ལྷ་མོ། །སཽ་རཥྚ་དང་གསེར་གླིང་ནི། །འདུན་སའོ་ཉེ་བའི་འདུན་ས་ནི། །གྲོང་ཁྱེར་སིནྡྷུ་མ་རུ་དང་། །ཀུ་ལུ་ཏཱ་ཡང་ཉེ་འདུན་ས། །འདུ་བ་ཆུ་ཀླུང་འགྲམ་དང་ནི། །སྐྱེད་ཚལ་རྒྱ་མཚོར་རབ་བཤད་དང་། །ལམ་གྱི་བཞི་མདོའོ་ཉེ་འདུ་བ། །རི་ཡི་སྤྱི་བོ་གྲོང་དབུས་དང་། །ཚོགས་ཅན་གཞོན་ནུའི་རི་དང་ནི། །རིགས་ཀྱི་ཞིང་ཡང་ཉེ་འདུ་བའོ། །དུར་ཁྲོད་མུ་མུ་ནི་ཡ་ནས། །སྤྱོད་དང་ཧ་རི་ཀེ་ལ་དང་། །སྒྱུ་མའི་གྲོང་ཁྱེར་དུར་ཁྲོད་དོ། །ཉེ་བའི་དུར་ཁྲོད་རི་མཐའ་དང་། །སྔགས་ཀྱི་ཞིང་དང་ལྷ་ཡི་གྲོང་། །ཀརྞྞ་ཊ་དང་པ་ཊ་ཡང་། །དེ་བཞིན་གྲོང་མཐར་བཤད་པའོ། །གྲོང་མཐའ་ཀོང་ཀ་ན་ཉིད་དང་། །ཁྱབ་བདག་ལས་ཀྱི་ཡུལ་ལྗོངས་དང་། །རྣལ་འབྱོར་མ་ནི་སྟུག་པོའི་གྲོང་། །དེ་བཞིན་འདིར་ནི་ཉེ་གྲོང་མཐའོ། །ཕ་ཡི་ནགས་དང་ཁྱིམ་གྱི་ལོགས། །ལྟེང་ཀ་དང་ནི་རྫིང་བུ་སྟེ། །གནས་འདི་རྣམས་སུ་བུ་མོ་གང་། །ལྷན་སྐྱེས་རང་གི་སྐྱེ་གནས་སྐྱེས། །ཡུལ་དང་ཡུལ་དུ་ཤེས་བྱ་བ། །ཡེ་ཤེས་ལྡན་དང་གཉིས་མེད་གནས། །འཁོར་ལོ་བཅུ་གཉིས་རྣམས་ཀྱིས་ནི། །མདའ་ཡི་དབྱེ་བས་གནས་སྐྱེས་རྣམས། །བཅུ་གཉིས་གནས་སོགས་རབ་བཤད་པ། །སུམ་ཅུ་དྲུག་ཁམས་རྒྱུ་ཡིས་སོ། །རེ་རེ་ཡི་ནི་ཁམས་རྣམས་ལའང་། །མིག་ལ་སོགས་པའི་སྐྱེ་མཆེད་
རྣམས། །བདེན་དོན་རྣམ་པ་བཅུ་གཉིས་སུ། །ཤེས་བྱ་ལྷན་སྐྱེས་རྣལ་འབྱོར་མའོ། །སྔོན་གྱི་ཚིགས་བཅད་འདི་ཡིས་ནི། །དབང་བསྐུར་བ་ནི་ནོད་པར་བྱ། །ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་རྣམས་ཁྲུས་གསོལ་གྱུར། །དེ་བཞིན་བདག་ལ་ཁྲུས་བྱེད་འགྱུར། །ལྷ་ཡི་ཆུ་ཡིས་དག་པར་བྱ། །རྡོ་རྗེ་དང་ནི་མཁའ་བར་དུ། །སངས་རྒྱས་ཐམས་ཅད་སོན་འདི་ནི། །ཡེ་ཤེས་འོད་ཟེར་བྱུང་དེ་རྣམས། །རང་བྱུང་བདུད་རྩིའི་རྒྱུན་གྱིས་ནི། །དབང་བསྐུར་རྡོ་རྗེ་མགོན་པོ་ཡི། །ལྷན་སྐྱེས་ཆུས་ནི་དགང་ཕྱིར་རོ། །ཨོཾ་སརྦ་ཏ་ཐཱ་ག་ཏཱ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧུྃ། དབང་བསྐུར་བའི་སྔགས་སོ། །འཁོར་ལོ་གང་དང་གང་གི་ནི། །དེ་དང་དེ་ཡི་རྒྱས་གདབ་ལ། །རྣལ་འབྱོར་མ་རྣམས་བདག་པོ་སྟེ། །ཁྱབ་བདག་གཞན་གྱིས་རྒྱས་མི་གདབ། །ཡེ་ཤེས་ཏིང་འཛིན་སེམས་དཔའ་ཡང་། །འཁོར་ལོ་ཀུན་ལ་བསྒོམ་པར་བྱ། །དེ་ལས་བྱུང་བའི་འོད་ཚོགས་ཀྱིས། །ཡེ་ཤེས་འཁོར་ལོ་དགུག་པར་བྱ། །ཛཿཧཱུྃ་བྃ་ཧོཿའི་ཡིག་རྣམས་ཀྱིས། །བླ་མའི་མན་ངག་ལས་ཤེས་བྱ། །སྣ་ཚོགས་དཔའ་བོ་རྣལ་འབྱོར་མས། །གཙོ་བོ་ལ་ནི་མཆོད་བྱེད་གཞུག །ཐིག་ལེ་དང་ནི་ཕྲ་མོ་ཆེའི། །རྣལ་འབྱོར་གཉིས་ནི་ཡོངས་དམིགས་བྱ། །འཁོར་ལོ་བཅུ་གཉིས་ཐིག་ལེ་ཡང་། །རྡོ་རྗེའི་རྣམ་པ་རྣམས་སུ་མཚོན། །ལྟེ་བའི་འོག་སྟེང་རྩ་རྣམས་ནི། །སྟོང་ཕྲག་གཅིག་ནི་ཐིག་ལེ་ཅན། །རྩེ་མོ་བཅུ་ཡི་ཐིག་ལེ་རྣམས། །ཇི་ལྟའི་རིམ་པ་རྣམས་སུ་མཚོན། །དུ་བ་ལ་སོགས་བརྒྱ་ཕྲག་གཅིག །ཐིག་ལེའི་གནས་སུ་འབབ་པར་བྱ། །དེ་ཕྱིར་ཕྲ་མོ་གང་ཅིའང་རུང་། །སངས་རྒྱས་སྤྱོད་ཡུལ་མིན་དེ་བསམ། །རྡོ་རྗེའི་སྲོག་རྣམས་ལ་བལྟས་པས། །ཕྱག་རྒྱ་ཆེ་དེ་སངས་རྒྱས་དེ། །གསང་སྔགས་བཟླས་པ་བྱ་བ་ནི། །རྐང་པ་བརྒྱད་ལྷག་རྩ་བ་ནི། །བཞི་བཅུ་ལ་སོགས་འདི་རྣམས་ཀྱིས། །མཚན་ཉིད་ཐམས་ཅད་རྫོགས་པ་དང་། །བདེ་ཆེན་སོགས་དང་བཟང་པོ་དང་། །གཉིས་ཀུན་རྣམ་པར་སྤངས་པ་དང་། །མཆོད་པ་ཁམས་གསུམ་བདག་ཉིད་ནི། །དངོས་པོ་ཀུན་འབྱུང་རྣམས་
ཀྱིས་སོ། །དཀར་མོ་སོགས་དང་འགྲོ་དྲུག་འཁོར་སྒྱུར་མ། །གཟུགས་དང་གཟུགས་མེད་གཉིས་ཀྱི་ལྷ་མོ་སྟེ། །རང་གིས་ཐམས་ཅད་རང་བཞིན་དག་གིས་ནི། །མ་ལུས་པ་ཡི་འཁོར་ལོ་མཆོད་པར་འགྱུར། །དཀྱིལ་འཁོར་བདེ་བ་ཆེན་པོ་བསྒོམ་པར་གྱིས། །རྣལ་འབྱོར་བཅུ་གཉིས་བསོད་ནམས་སྡིག་མེད་པའོ། །ཐམས་ཅད་ཟག་མེད་རང་བཞིན་མོས་པར་གྱིས། །དཀྱིལ་འཁོར་ངན་པ་དེ་ནི་བདེ་བར་ཤེས་པར་བྱོས། །དབང་པོ་འཁྲུལ་པ་བདེ་བ་ཆེན་པོ་མོས་པར་གྱིས། །སྐད་ཅིག་དེ་ལ་རང་དང་གཞན་གྱི་ངོ་བོ་མེད། །གང་གི་རྣམ་པ་སྣ་ཚོགས་གཟུགས་ཆེན་གྱིས། །ས་གསུམ་དུ་ནི་དཀྱིལ་འཁོར་འཁོར་ལོ་སྤྲོ་བར་བྱོས། །སྔགས་དང་ཕྱག་རྒྱ་སོགས་བརྒྱན་པས། །རྣལ་འབྱོར་ཆེན་པོས་གཏོར་མ་སྦྱིན། །འབུམ་བཟླས་པ་ཡི་རྗེས་ལས་ནི། །བྱེ་བ་བཟླས་པས་དངོས་གྲུབ་ཆེ། །ཇི་ལྟར་མངོན་པར་བརྗོད་པ་བཞིན། །སྣ་ཚོགས་དམ་ཚིག་ཉེར་སྤྱོད་ཚེ། །རྣལ་འབྱོར་དངོས་གྲུབ་གྱུར་དེ་ནས། །གང་རུང་དེར་ནི་གནས་པར་བྱ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། བཅོམ་ལྡན་འདས་ཡང་དག་པའི་ཏིང་ངེ་འཛིན་རྣམ་པར་གཞག་པ་དང་མན་ངག་སྣ་ཚོགས་བསྟན་པ་སྟེ་ལེའུ་བཅྭ་ལྔ་པའོ།། །།དེ་ནས་རྩ་བའི་སྔགས་ཀྱི་ནི། །བཏུ་བ་བཤད་བྱ་མཉན་པར་གྱིས། །ཆོས་འབྱུང་གི་ནི་དབུས་སུ་ནི། །དེ་ནས་འཁོར་ལོ་འདི་བྲིའོ། །དབུས་སུ་དུམ་བུ་ལྔའི་བདག་ཉིད། །དེ་ཡི་ཕྱི་རོལ་བཅུ་གཉིས་བྲི། །ཟླུམ་པོ་སྦྱིན་བྱ་སླར་ཡང་དེར། །སྒོ་དང་གྲུ་ནི་བཞི་པའོ། །རྩིབས་བརྒྱད་པ་དང་ཟུར་བཞི་པའི། །ལེའུ་ཚེར་དབྱངས་དང་སྡེ་ཚན་ནོ། །དེར་གནས་མགོན་པོ་བཏུ་བར་བྱ། །འདོད་པ་ཀུན་དང་བདེ་འབབ་པའོ། །སྡེ་ཚན་ལྔ་སོགས་ཡི་གེ་ནི། །དབུས་སུའོ་དེ་ནས་དབྱངས་བཅུ་གཉིས། །མ་ནིང་སྒོ་ནི་བཞི་རུ་སྟེ། །གྲུ་གཉིས་པར་དེ་གཉིས་གཉིས་ཅན། །ཁྱབ་བདག་སྔགས་པས་མེ་ལ་ནི། །སོགས་པར་ཤེས་
པར་བྱ་བའོ། །ཀ་དབུས་ཙ་ཤར་ཊ་ལྷོ་ཏ་ནུབ་ཏུ། །པ་བྱང་རིམ་པ་ཇི་ལྟས་སོ། །ནུབ་ཀྱི་མཐའ་མ་གཟུང་བར་བྱ། །བྱང་གི་མཐའ་མ་དེ་བཞིན་ནོ། །མེ་ཡི་གཉིས་པའི་ཡི་གེ་ནི། །གཟུང་བྱ་དབང་ལྡན་ཆུའི་ས་བོན། །ཤར་གྱི་གསུམ་པའི་ཡི་གེ་དང་། །ལྷོ་ཡི་གསུམ་པའི་དེ་བཞིན་ནོ། །དབུས་མའི་དང་པོ་གཟུང་བར་བྱ། །བྱང་གི་མཐའ་མའི་ས་བོན་ནོ། །དབང་ལྡན་གཉིས་པའི་གཟུང་བྱ་སྟེ། །དེ་ནི་དེ་ལྟར་ཐོག་མ་སླར། །བདེན་བྲལ་མེ་ཡི་ས་བོན་དང་། །དབང་ལྡན་གྱི་ནི་ཆུ་དེ་བཞིན། །སྲིན་པོའི་ར་ཡིག་བླང་བར་བྱ། །མེ་ཡི་གཉིས་པའི་ཡི་གེའོ། །འདྲེ་ཡི་མེ་ཡི་ས་བོན་གཟུང་། །མེ་ཡི་རླུང་ནི་དེ་བཞིན་ནོ། །སྔགས་ཀྱི་ཚིག་ནི་དང་པོ་སྟེ། །འདི་ཡི་དབྱངས་ནི་བརྗོད་པར་བྱ། །ཚེག་དྲག་དང་ནི་ཡོངས་ལྡན་པ། །གཉིས་པའི་ཡི་གེ་ལ་སྤྲས་པའོ། །དུམ་བུ་བཞི་པས་མནན་པ་སྟེ། །གསུམ་པར་མེ་ཡི་སྤྲས་པའོ། །ཡི་གེ་ལྔ་པར་ར་ཡིག་གིས། །འོག་གི་ཆར་ནི་བརྒྱན་པའོ། །དུམ་བུ་གཉིས་པས་བརྒྱན་པ་སྟེ། །མཁས་པས་དྲུག་པའི་ཡི་གེ་ལའོ། །དགུ་པར་དེ་ཉིད་ཀྱིས་མནན་པའོ། །བཅུ་པ་ལ་ཡང་བཞི་པས་སོ། །བཅུ་གཉིས་དེ་ཉིད་ཀྱིས་མནན་པའོ། །བཅུ་གསུམ་པ་ཡང་དེ་ཉིད་ཀྱིས། །བཅུ་བཞི་པ་ལ་ཆུ་ཡིས་ནི། །འོག་གི་ཆ་རུ་རྣམ་བརྟག་བྱ། །དུམ་བུ་གཉིས་པས་མནན་པ་ནི། །ཡི་གེ་བཅྭ་ལྔ་པ་མཆོག་ལའོ། །དེ་ལྟར་སྔགས་པ་ཆེས་ཤེས་ནས། །རྐང་པ་ཀུན་ལ་བྱེད་པའོ། །ནུབ་ཀྱི་ཐོག་མ་གཟུང་བར་བྱ། །བྱང་ཕྱོགས་ཀྱི་ནི་བཞི་པའོ། །དབང་ལྡན་གྱི་ནི་ཆུ་གཟུང་བྱ། །སླར་ཡང་ལྷོ་ཡི་ཐ་མའོ། །དབུས་མའི་ཐོག་མའི་ས་བོན་དང་། །བྱང་གི་མཐའ་མ་དེ་བཞིན་ནོ། །དབུས་མའི་ཐོག་མ་གཟུང་བར་བྱ། །བྱང་གི་མཐའ་མའི་ས་བོན་དང་། །དབང་ལྡན་གྱི་ནི་ཆུ་གཟུང་བྱ། །ལྷོ་ཡི་ཐ་མའི་ས་བོན་དང་། །མེ་ཡི་རླུང་གི་ཡི་གེ་སྟེ། །གཉིས་པ་ཡི་ནི་རྐང་པར་བཤད། །དུམ་བུ་གསུམ་པས་མནན་པ་སྟེ། །ཐོག་མ་མེ་ཡིས་འོག་གསལ་བྱས། །དུམ་བུ་ལྔ་པས་གཉིས་པ་ཡི། །ཡི་གེ་ཡི་ནི་འོག་ཏུ་བརྒྱན། །བྱང་ཕྱོགས་ཀྱི་ནི་ཐོག་མ་ཡིས། །དྲུག་པའི་འོག་ཏུ་གསལ་བྱས་པའོ། །
ཡི་གེ་བརྒྱད་པའང་དེ་དང་མཚུངས། །དུམ་བུ་གཉིས་པས་ཕྱེ་བའོ། །བཅུ་པ་དེ་ཉིད་ཀྱིས་མནན་པའོ། །དོན་མེད་ཐམས་ཅད་རྣམ་འཇོམས་བྱེད། །ཆོས་ཀྱི་འཁོར་ལོ་སྐོར་བ་དང་། །དངོས་གྲུབ་རྙོག་པ་མེད་ཀུན་ནོ། །ནུབ་ཀྱི་གསུམ་པ་གཟུང་བར་བྱ། །འདྲེ་ཡི་གཉིས་པའི་ས་བོན་དང་། །ནུབ་ཀྱི་ཐོག་མའི་ས་བོན་དང་། །སླར་ཡང་ལྷོ་ཡི་དང་པོ་དང་། །བྱང་ཕྱོགས་ཀྱི་ནི་བཞི་པ་དང་། །འདྲེ་གཉིས་པ་ཡི་ཡི་གེ་དང་། །ལྷོ་ཡི་ཐ་མ་གཟུང་བར་བྱ། །བྱང་ཕྱོགས་ཀྱི་ནི་བཞི་པ་དང་། །འདྲེ་ཡི་མེ་ཡི་ཡི་གེ་གཟུང་། །དབང་ལྡན་གྱི་ནི་ཆུ་དེ་བཞིན། །མེ་ཡི་རླུང་གི་ས་བོན་སྟེ། །སྔགས་ཀྱི་རྐང་པ་གསུམ་པའོ། །མཁས་པས་ཐོག་མའི་ཡི་གེ་ལ། །དུམ་བུ་བཅུ་གཅིག་པ་ཡིས་མནན། །དུམ་བུ་དགུ་པ་ཡིས་ཀྱང་ནི། །གཉིས་པའི་ཡི་གེའི་མགོར་བརྒྱན་ཅིང་། །ལྷོ་ཡི་ཐོག་མ་ཉིད་ལ་ནི། །མེ་ཡིས་འོག་ཏུ་བརྒྱན་པའོ། །དབུས་མ་གསུམ་པར་སྦྱིན་བྱ་བ། །འོག་གི་ཆ་རུ་བརྟག་པར་བྱའོ། །དུམ་བུ་བཞི་པས་མནན་པ་ནི། །མཁས་པས་ཡི་གེ་ལྔ་པ་ལའོ། །དུམ་བུ་བརྒྱད་པ་སྦྱིན་བྱ་བ། །ཡི་གེ་ཡི་ནི་བརྒྱད་པ་ལའོ། །བཅུ་པ་གཉིས་པས་མནན་པ་སྟེ། །སྡང་བ་རྣམས་ཀྱི་ཚར་གཅོད་མཆོག །ལྷ་དང་ལྷ་མིན་མི་རྣམས་ཀྱི། །གནས་དང་གནས་མིན་རྣམས་ཚར་གཅོད། །མེ་ཡི་གཉིས་པའི་ས་བོན་དང་། །ནུབ་ཀྱི་ཐོག་མའི་ཡི་གེ་དང་། །རླུང་གི་གཉིས་པའི་ས་བོན་དང་། །དབང་ལྡན་གྱི་ནི་གཞན་དེ་བཞིན། །རླུང་གི་གཉིས་པའི་ཡི་གེ་དང་། །ནུབ་ཀྱི་ཐ་མའི་ཡི་གེ་དང་། །སླར་ཡང་ནུབ་ཀྱི་ཐོག་མ་དང་། །མེ་ཡི་རླུང་ནི་བླང་བར་བྱ། །རྐང་པ་བཞི་པ་ཞེས་བཤད་དེ། །དངོས་པོ་ཐམས་ཅད་རབ་སྟོན་པའོ། །ཡི་གེ་ལྔ་པའི་འོག་གི་ཆར། །ར་ཡི་ཡི་གེ་བརྟག་པར་བྱ། །དྲུག་པར་བདུན་པའི་དུམ་བུ་དང་། །སླར་ཡང་བདུན་པར་མེ་ཡིས་ནི། །འོག་ཏུ་བརྒྱན་པར་གཉིས་པ་སྦྱིན། །ཀུན་མཁྱེན་གོ་འཕང་མི་ཟད་པའོ། །དབང་ལྡན་གྱི་ནི་ཆུ་གཟུང་བྱ། །སླར་ཡང་དྱ་ཡིག་རང་བྱུང་ངོ་། །ནུབ་ཀྱི་ཐོག་མའི་ས་བོན་དང་། །ཤར་ཕྱོགས་ཀྱི་ཡང་གསུམ་པ་དང་། །དབང་ལྡན་གྱི་ནི་གཞན་གཟུང་བྱ། །སླར་ཡང་མེ་ཡི་རླུང་དང་ནི། །
རྐང་པ་ལྔ་པ་དྲུག་པོ་སྟེ། །རྣལ་འབྱོར་མ་རྣམས་སད་བྱེད་པའོ། །དབུས་མའི་ཐོག་མའི་ས་བོན་དང་། །ཡང་ནི་ཡི་གེ་དེ་ཉིད་དང་། །རླུང་གི་དབང་ཆེན་གཟུང་བར་བྱ། །སླར་ཡང་བྱང་གི་ཐ་མ་དང་། །རླུང་གི་ས་ཡི་ས་བོན་དང་། །བྱང་ཕྱོགས་ཀྱི་ནི་བཞི་པ་དང་། །སྲིན་པོའི་མེ་ཡི་ས་བོན་དང་། །སླར་ཡང་ལྷོ་ཡི་ཐ་མ་དང་། །དབུས་མའི་གསུམ་པ་གཟུང་བར་བྱ། །མེ་ཡི་རླུང་ནི་དེ་བཞིན་ནོ། །ལྔ་པ་སོགས་ལ་དབྱངས་སྦྱིན་བྱ། །འབྱིན་ཅིང་སྡུད་པར་བྱེད་པའོ། །ཐོག་མའི་ཡི་གེ་ཀུན་འགྲོ་ལ། །དུམ་བུ་གསུམ་པས་མནན་པར་བྱ། །ས་བོན་བཞི་པའང་དེ་ཉིད་ཀྱིས། །མནན་པ་མཛེས་པ་ཡི་ནི་མཆོག །ལྔ་པར་དུམ་བུ་གཉིས་པས་མནན། །ཆུ་ཡི་སྟན་དུ་བྱས་པར་འདོད། །རྐང་པ་ལྔ་པ་དེ་ལ་ནི། །དགོས་པ་ཐམས་ཅད་སྦྱར་བ་ཡིན། །དང་པོའི་ཡི་གེ་བཅུ་གཅིག་པས། །མནན་པར་གྱུར་པས་མཛེས་པ་ཡིན། །དུམ་བུ་གཉིས་པས་མནན་པ་ནི། །ཡི་གེ་གཉིས་པར་བརྗོད་པར་བྱ། །བཞི་པ་ལྔ་པའི་ཡི་གེ་དག །དེ་ཉིད་ཀྱིས་ནི་ཡང་དག་མནན། །ཡི་གེ་བརྒྱད་པ་དགུ་པ་ཡི། །དུམ་བུ་ཡིས་ནི་རྣམ་པར་བརྒྱན། །བཅུ་པ་དུམ་བུ་གཉིས་པས་མནན། །མེ་ཡིས་འོག་ཏུ་ཕྱེ་བ་སྟེ། །རྐང་པ་དྲུག་པར་ཤེས་པར་བྱ། །འདོད་པ་ཐམས་ཅད་རབ་སྒྲུབ་པའོ། །དབུས་མའི་ཐོག་མ་གཟུང་བར་བྱ། །ལྷོ་ཡི་ཐོག་མ་དེ་བཞིན་དུ། །རླུང་གི་ས་ཡི་ས་བོན་དང་། །ཀ་ཥར་བཤད་པའི་སྔགས་བཏུ་བྱ། །བྱང་གི་བཞི་པ་གཟུང་བར་བྱ། །ཤར་གྱི་གསུམ་པ་དེ་བཞིན་ཏེ། །མེ་ཡི་རླུང་ནི་བཏུ་བྱས་ནས། །རྐང་པ་བདུན་པ་མི་ཟད་པའོ། །ཁྱབ་བདག་ཐོག་མའི་ཡི་གེ་ལ། །རེའུ་མིག་དགུ་པས་མནན་པའོ། །རེའུ་མིག་གསུམ་པས་དེ་བཞིན་དུ། །གཉིས་པའི་ཡི་གེ་བརྒྱན་པའོ། །དུམ་བུ་ལྔ་པའི་ཕྱི་མོ་ཡིས། །མཁས་པས་ལྔ་པའི་གདན་དུ་བྱ། །དེ་ནས་ཡི་གེ་དྲུག་པ་ལ། །དུམ་བུ་གཉིས་པས་མནན་པའོ། །ཤར་གྱི་གསུམ་པ་གཟུང་བར་བྱ། །རླུང་གི་ས་ཡི་ས་བོན་དང་། །དབང་ལྡན་གྱི་ནི་ཆུ་གཟུང་བྱ། །རླུང་གི་ས་དང་དེ་བཞིན་དུ། །ལྷོ་ཡི་གསུམ་པ་གཟུང་བར་བྱ། །སླར་ཡང་རླུང་གི་
ས་ཉིད་དང་། །དབུས་མའི་གསུམ་པ་གཟུང་བར་བྱ། །མེ་ཡི་གྲྭ་ནི་རླུང་ཉིད་དེ། །རྐང་པ་བརྒྱད་པར་ཤེས་པར་བྱ། །སྡིག་པ་ཐམས་ཅད་རྣམ་འཇོམས་པའོ། །དུམ་བུ་གཉིས་པས་མནན་པ་ནི། །ཡི་གེ་དང་པོ་ཆུ་གདན་ཅན། །མཁས་པས་ཡི་གེ་གཉིས་པ་ནི། །དུམ་བུ་གཉིས་པས་མནན་པའོ། །དུམ་བུ་བཞི་པས་གནོན་པ་ནི། །ཡི་གེ་བཞི་པར་འདུ་ཤེས་སོ། །དུམ་བུ་གཉིས་པས་གནོན་པ་ནི། །ལྷན་ཅིག་བདུན་པའི་ཡི་གེ་དང་། །ནུབ་ཀྱི་ཐ་མར་ཤེས་བྱའོ། །དགྲ་ཀུན་ཟད་པར་བྱེད་པའོ། །བྱང་གི་ཐོག་མ་གཟུང་བར་བྱ། །བདེན་བྲལ་མེ་ཡི་ས་བོན་དང་། །དེ་ཉིད་གཉིས་པའི་ས་བོན་དང་། །བྱང་གི་ཐོག་མའི་ཡི་གེ་དང་། །བདེན་བྲལ་གྱི་ནི་གཉིས་པ་གཟུང་། །དྱ་ཡིག་རྡོ་རྗེ་སེམས་དཔའོ། །ནུབ་ཀྱི་ཐོག་མའི་ས་བོན་དང་། །མེ་ཡི་གཉིས་པའི་ཡི་གེ་དང་། །རླུང་གིའང་ས་ནི་གཟུང་བར་བྱ། །མེ་ཡི་རླུང་གི་ས་བོན་ཏེ། །སྔགས་ཀྱི་རྐང་པ་དགུ་པ་ནི། །མཁའ་འགྲོ་མ་ཡི་སྙིང་ཉེད་པའོ། །ཡི་གེ་གཉིས་པ་དུམ་བུ་ལས། །ལྔ་པ་ཡིས་ནི་གདན་དུ་བརྒྱན། །ཡི་གེ་གསུམ་པའང་དེ་ཉིད་ཀྱིས། །བཞི་པ་དུམ་བུ་གཉིས་པས་མནན། །ལྔ་པ་དུམ་བུ་དགུ་པས་སོ། །བརྒྱད་པར་དུམ་བུ་དྲུག་པས་སོ། །དགུ་པ་དུམ་བུ་གཉིས་པས་མནན། །གདན་དུ་རྣམ་པར་ཤེས་བྱའོ། །དབུས་མའི་ཐོག་མའི་ས་བོན་དང་། །རླུང་གི་དབང་ཆེན་དེ་བཞིན་དང་། །ནུབ་ཀྱི་ཐོག་མའི་ས་བོན་དང་། །དེ་ཉིད་ཀྱི་ནི་བཞི་པ་དང་། །བྱང་གི་ཐ་མ་གཟུང་བར་བྱ། །དབུས་མ་ཡི་ནི་གསུམ་པ་དང་། །དབང་ལྡན་གྱི་ནི་ཆུ་གཟུང་བྱ། །བྱང་གི་ཐོག་མའི་ཡི་གེ་དང་། །བདེན་བྲལ་གཉིས་པའི་ས་བོན་དང་། །སླར་ཡང་མེ་ཡི་རླུང་དང་ནི། །དེ་བཞིན་སྔགས་ཀྱི་རྐང་པ་ནི། །བཅུ་པ་ཞེས་བྱ་སྡང་བ་གསོད། །དུམ་བུ་གཉིས་པས་མནན་པ་ཡི། །བྱང་གི་དང་པོ་ཡི་གེ་ནི། །གཉིས་པའི་གདན་དུ་ཤེས་པར་བྱ། །བཅུ་གཅིག་པས་ནི་སྤྱི་གཙུག་ལའོ། །དུམ་བུ་དྲུག་པའི་གཞི་ལ་ནི། །མཁས་པས་ཡི་གེ་བཞི་པའོ། །ཡི་གེ་ལྔ་པ་དུམ་བུ་ནི། །བཞི་པའི་མཐའ་འོག་མེ་དང་ལྡན། །དྲུག་པར་ར་ཡིག་གདན་སྦྱིན་བྱ། །བརྒྱད་པར་ལྔ་པ་ཡི་ནི་
གདན། །དགུ་པ་དུམ་བུ་གཉིས་པས་མནན། །འཇིགས་ཆེན་འཇིགས་པར་བྱེད་པའོ། །དབང་ལྡན་གྱི་ནི་ཆུ་གཟུང་བྱ། །དབུས་མའི་ཐོག་མའི་ཡི་གེ་དང་། །ལྷོ་ཡི་ཐོག་མ་གཟུང་བར་བྱ། །སླར་ཡང་བྱང་གི་ཐ་མ་དང་། །དབུས་མའི་གཉིས་པའི་ས་བོན་དང་། །དབང་ལྡན་གཉིས་པའི་ཡི་གེ་དང་། །ཡང་ནི་དེ་ཉིད་གཟུང་བར་བྱ། །བདེན་བྲལ་མེ་ཡི་ས་བོན་དང་། །དབང་ལྡན་ཆུ་ཡི་ཡི་གེ་དང་། །མེ་ཡི་རླུང་གི་ས་བོན་བསྡུ། །སྔགས་ཀྱི་རྐང་པ་བཅུ་གཅིག་པ། །བདུད་སྡེ་རྣམ་པར་འཇོམས་བྱེད་པའོ། །ཐོག་མའི་ཡི་གེ་དུམ་བུ་ནི། །གསུམ་པས་མནན་ཅིང་མཛེས་པའོ། །བཞི་པ་ཡི་ནི་ཡི་གེ་ལའང་། །དུམ་བུ་ལྔ་པས་སྟན་དུ་བྱས། །དྲུག་པ་གཉིས་པས་མནན་པ་དང་། །སླར་ཡང་བདུན་པ་དགུ་པ་ལའོ། །བྱང་གི་མཐའ་མ་གཟུང་བར་བྱ། །སླར་ཡང་ནུབ་ཀྱི་ཐོག་མ་དང་། །དབུས་མའི་གསུམ་པ་གཟུང་བར་བྱ། །ལྷོ་ཡི་མཐའ་མའི་ཡི་གེ་དང་། །བྱང་གི་ཐོག་མ་གཟུང་བར་བྱ། །བདེན་བྲལ་མེ་ཡི་ཡི་གེ་དང་། །བྱང་གི་ཐོག་མའི་ས་བོན་དང་། །འདྲེ་ཡི་མེ་ནི་དེ་བཞིན་ཏེ། །ནུབ་ཀྱི་ཐོག་མ་གཟུང་བར་བྱ། །བྱང་གི་ཐ་མའི་ཡི་གེ་དང་། །དེ་ནས་ནུབ་ཀྱི་ཐོག་མ་གཟུང་། །སླར་ཡང་མེ་ཡི་རླུང་ཡིན་ཏེ། །སྔགས་ཀྱི་ཚིག་རྐང་བཅུ་གཉིས་པ། །རྣལ་འབྱོར་མ་ཀུན་དབང་བྱེད་པའོ། །མཁས་པས་ཐོག་མའི་ཡི་གེ་ལ། །དུམ་བུ་གཉིས་པས་མནན་པའོ། །ཤར་སྒོ་མ་ཡིས་གནོན་པ་ནི། །དེ་ནས་གཉིས་པའི་གདན་དུའོ། །སླར་ཡང་ཡི་གེ་དྲུག་པ་ལ། །དུམ་བུ་གསུམ་པས་མནན་པའོ། །ཡི་གེ་བདུན་པ་དུམ་བུ་ནི། །དྲུག་པའི་གདན་གྱིས་རྫོགས་བྱས་པའོ། །ཡི་གེ་བརྒྱད་པ་དུམ་བུ་ནི། །གསུམ་པ་ཡིས་ནི་བརྒྱན་པར་བྱ། །བཅུ་པར་དུམ་བུ་བཅུ་གཅིག་པས། །མནན་ཅིང་བཅུ་གཅིག་འོག་ཉི་མ། །དུམ་བུ་གཉིས་པས་དེ་ཉིད་ལའོ། །དབང་གི་ལས་ལ་གཡོ་བ་མེད། །རླུང་གི་གཉིས་པ་གཟུང་བར་བྱ། །སླར་ཡང་དབང་ལྡན་གཉིས་པ་དང་། །ཤར་གྱི་གསུམ་པའི་ས་བོན་དང་། །རླུང་གི་གཉིས་པའི་ཡི་གེ་དང་། །ནུབ་ཀྱི་གསུམ་པའི་ས་བོན་དང་། །བདེན་བྲལ་མེ་ཡི་ཡི་གེ་དང་། །
དབང་ལྡན་གྱི་ནི་ཆུ་གཟུང་བྱ། །རླུང་གི་ས་ཡི་ས་བོན་དང་། །འོག་གི་ཆར་ནི་དེ་ཉིད་སྦྱིན། །བྱང་ཕྱོགས་ཀྱི་ནི་བཞི་པ་དང་། །དབུས་མའི་ཐོག་མ་གཟུང་བར་བྱ། །བདེན་བྲལ་མེ་ཡི་ཡི་གེ་དང་། །མེ་ཡི་རླུང་ནི་གཟུང་བར་བྱ། །སྔགས་ཀྱི་ཚིག་རྐང་བཅུ་གསུམ་པ། །ཀུན་དགའ་ཐམས་ཅད་བྱེད་པ་དང་། །རྗེས་སྐྱོབ་རྣམས་ཀྱི་བྱང་ཆུབ་ལམ། །ཡེ་ཤེས་ས་བོན་ཡང་དག་བཏུ། །ཡང་ནི་དེ་ཉིད་བཏུ་བར་བྱ། །དབུས་མའི་ཐོག་མ་གཟུང་བར་བྱ། །བདེན་བྲལ་མེ་ཡི་ཡི་གེ་དང་། །ཤར་གྱི་ཐོག་མ་གཟུང་བར་བྱ། །དེ་ནི་དེ་ལྟར་གདན་དུ་བྱ། །སྲིན་པོའི་ར་ཡི་ཡི་གེ་གཟུང་། །ལྷོ་ཡི་ཐ་མའི་ས་བོན་དང་། །བྱང་གི་ཐ་མ་བཏུ་བྱས་ནས། །དབུས་མའི་གཉིས་པའི་ཡི་གེ་དང་། །མེ་ཡིའང་རླུང་ནི་གཟུང་བར་བྱ། །ཚིག་རྐང་བཅུ་བཞི་མི་ཟད་པའོ། །སླར་ཡང་གསུམ་པའི་ཡི་གེ་ལ། །དུམ་བུ་གཉིས་པས་མནན་པ་དང་། །བཞི་པར་དགུ་པས་མནན་པ་དང་། །སླར་ཡང་ལྔ་པར་གཉིས་པས་སོ། །དུམ་བུ་ལྔ་པའི་གདན་ལྡན་པ། །བརྒྱད་པའོ་དེ་བཞིན་དགུ་པ་ལ། །དུམ་བུ་གཉིས་པས་མནན་པའོ། །ལུགས་བཟློག་བཅུ་གསུམ་པ་བཤད་བྱ། །མཁས་པས་ཡི་གེ་བཅུ་གཅིག་པ། །རེའུ་མིག་གཉིས་པས་མནན་པའོ། །དྲུག་པ་བཞི་པས་མནན་པ་དང་། །བཞི་པའི་གདན་ནི་ལྔ་པའོ། །བཅུ་གཅིག་པ་ནི་ཅོད་པན་དུ། །སྐྱེ་བོ་ཐམས་ཅད་རྣམ་འཁྲུལ་བྱེད། །བྱང་གི་ཐ་མ་གཟུང་བར་བྱ། །དབང་ལྡན་དབང་ལྡན་གཞན་དེ་བཞིན། །མེ་ཡི་གཉིས་པའི་ས་བོན་དང་། །ཡང་ནི་དེ་ཉིད་བཏུ་བར་བྱ། །ལྷོ་ཡི་ཐ་མ་གཟུང་བར་བྱ། །སླར་ཡང་བྱང་གི་དང་པོ་པ། །མེ་ཡི་རླུང་ནི་གཟུང་བར་བྱ། །ཡང་ནི་ས་བོན་དེ་ཉིད་དོ། །སྔགས་ཀྱི་ཚིག་རྐང་བཅྭ་ལྔ་པ། །སྐྲོད་པར་རྣམ་པར་བརྟག་པའོ། །གཉིས་པ་ཡི་ནི་ཡི་གེ་སྔགས། །རེའུ་མིག་གཉིས་པར་ཡང་དག་ལྡན། །གསུམ་པའི་གདན་དུ་བྱང་གི་ནི། །ཐ་མ་ཉིད་ནི་སྦྱིན་པར་བྱ། །ཁྱབ་བདག་ཡི་གེ་བཞི་པ་ནི། །རེའུ་མིག་གཉིས་པར་ཡང་དག་ལྡན། །དྲུག་པ་རེའུ་མིག་གསུམ་པས་མནན། །འོག་ཏུ་མེ་ཡིས་འབར་བྱས་པའོ། །བདུན་པ་གཉིས་པས་མནན་པ་ནི། །རྣལ་འབྱོར་
མ་ཡི་བདེན་གནས་པའོ། །རླུང་གི་གཉིས་པ་གཟུང་བར་བྱ། །སླར་ཡང་དབང་ལྡན་གྱི་ནི་ཆུ། །བྱང་ཕྱོགས་ཀྱི་ནི་བཞི་པ་དང་། །ནུབ་ཀྱི་ཐོག་མ་དེ་བཞིན་དུ། །རླུང་གི་གཉིས་པའི་ས་བོན་དང་། །སླར་ཡང་ནུབ་ཀྱི་ཐོག་མ་དང་། །རླུང་གི་གཉིས་པ་གཟུང་བར་བྱ། །ལྷོ་ཡི་ཐ་མ་ཉིད་དང་ཡང་། །དབུས་མའི་ཐོག་མའི་ས་བོན་དང་། །བདེན་བྲལ་གྱི་ནི་མེ་ཡི་བུ། །མེ་ཡི་རླུང་གི་ས་བོན་དང་། །སྔགས་ཀྱི་ཚིག་རྐང་བཅུ་དྲུག་པའོ། །གཉིས་པར་ར་ཡི་ཡི་གེས་མནན། །གསུམ་པའི་གདན་ནི་དྲུག་པ་སྟེ། །ལྔ་པའི་ཅོད་པན་བཅུ་གཅིག་པ། །དྲུག་པ་དུམ་བུ་གཉིས་པ་ལས། །གདན་ནི་མེ་ཡི་བུ་ཡིས་སོ། །བཅུ་པར་དུམ་བུ་གཉིས་པས་སོ། །བྱང་གི་ཐ་མ་གཟུང་བར་བྱ། །དབང་ལྡན་ཕྱི་མ་དེ་བཞིན་དུ། །དབུས་མའི་ཐོག་མའི་ས་བོན་དང་། །སླར་ཡང་རླུང་གི་ས་ཉིད་དང་། །བྱང་གི་ཐོག་མ་གདན་དུ་བྱ། །ནུབ་ཀྱི་ཐོག་མ་དེ་བཞིན་དུ། །དབུས་མའི་གསུམ་པ་གཟུང་བར་བྱ། །ནུབ་ཀྱི་ཐོག་མའི་ཡི་གེ་དང་། །ཤར་གྱི་གསུམ་པ་གཟུང་བར་བྱ། །སླར་ཡང་མེ་ཡི་རླུང་ཡིན་ཏེ། །ཚིག་རྐང་བཅུ་བདུན་པ་ཡི་སྔགས། །དུས་སུ་འཆི་བ་འཇོམས་བྱེད་པའོ། །སྔགས་ཀྱི་ཡི་གེ་གཉིས་པ་ལ། །རེའུ་མིག་གཉིས་པ་ཡང་དག་ལྡན། །བཞི་པའང་དེ་ཉིད་ཡང་དག་ལྡན། །ལྔ་པར་ཡང་ནི་དེ་ཡིས་སོ། །བཞི་པར་བཅུ་གཅིག་པ་ཡིས་མནན། །དྲུག་པ་ལ་ནི་གསུམ་པས་མནན། །ན་ཡི་ཡི་གེའི་སྟན་མནན་པའོ། །བདུན་པར་རེའུ་མིག་བདུན་པས་སོ། །བརྒྱད་པར་རེའུ་མིག་གཉིས་པ་སྟེ། །གསང་སྔགས་བདེ་བ་ཀུན་འབྱུང་བའོ། །ཤར་གྱི་གསུམ་པ་གཟུང་བར་བྱ། །ལྷོ་ཡི་ཐོག་མ་དེ་བཞིན་ནོ། །དབུས་མའི་ཐོག་མའི་ས་བོན་དང་། །རླུང་གི་གྲྭ་ལས་ས་དང་ནི། །བྱང་ཕྱོགས་ཀྱི་ནི་ཐོག་མ་དང་། །དེ་ཉིད་ཀྱི་མཐའི་ཡི་གེ་དང་། །དབུས་མའི་ཐོག་མའི་ས་བོན་དང་། །ལྷོ་ཡི་ཐོག་མ་དེ་བཞིན་དུ། །མེ་ཡི་རླུང་ནི་གཟུང་བྱ་སྟེ། །སྔགས་ཀྱི་ཚིག་རྐང་བཅྭ་བརྒྱད་པའོ། །གཉིས་པའི་ཡི་གེ་རེའུ་མིག་ནི། །གཉིས་པ་དང་ནི་ཡང་དག་ལྡན། །བཞི་པ་ཡང་ནི་དེ་ཉིད་ཀྱིས། །ལྔ་པ་དྲུག་པའི་ཡི་གེ་ལའོ། །བདུན་པའི་ཡི་
གེའང་དེ་ཉིད་ཀྱིས། །དེ་བཞིན་བརྒྱད་པ་དུམ་གཉིས་པས། །སྐྱེ་བོ་རྣམས་ལ་ཆོས་འཁོར་ལོ། །རབ་བསྐོར་སྔགས་པའི་སྔགས་ཚིག་གོ། །དབུས་མའི་གཉིས་པ་གཟུང་བར་བྱ། །སླར་ཡང་ལྷོ་ཡི་དང་པོ་མའོ། །དབུས་མའི་གསུམ་པ་གཟུང་བར་བྱ། །དབུས་མའི་ཐོག་མ་དེ་བཞིན་དུ། །བྱང་ཕྱོགས་ཀྱི་ནི་ཐོག་མ་དང་། །རླུང་གི་ས་ཉིད་དེ་ནས་ནི། །མེ་ཡི་གཉིས་པའི་ས་བོན་དང་། །རླུང་གི་གྲྭ་ཡི་ས་དང་ནི། །བྱང་ཕྱོགས་ཀྱི་ནི་བཞི་པ་དང་། །ནུབ་ཀྱི་ཐ་མ་དེ་བཞིན་དུ། །དེ་ཉིད་ཀྱི་ནི་བཞི་པ་དང་། །སླར་ཡང་འདྲེ་ཡི་མེ་ཡི་བུ། །ལྷོ་ཡི་ཐ་མ་གཟུང་བར་བྱ། །ཉི་ཤུར་གཅིག་གིས་མ་ཚང་ཚིག །ཡི་གེ་གཉིས་པར་ཆུ་གདན་དང་། །རེའུ་མིག་གཉིས་པར་ཡང་དག་ལྡན། །ཅོད་པན་རེའུ་མིག་བཅུ་གཅིག་པའོ། །ལྔ་པ་རེའུ་མིག་གཉིས་པར་ལྡན། །བདུན་པར་རེའུ་མིག་དྲུག་པ་དང་། །འོག་གི་ཆ་རུ་གསལ་བྱས་པའོ། །དགུ་པ་རེའུ་མིག་གསུམ་པ་ཡིས། །མགོ་བོར་བཅུ་གཅིག་པ་འདོད་དོ། །གཉིས་པས་བཅུ་གཅིག་པ་ལའོ། །གསུམ་པས་ཡི་གེ་བཅུ་གཉིས་པ། །བདུན་པས་བཅུ་གསུམ་པ་ལ་སྟེ། །གསང་སྔགས་ལྷན་ཅིག་སྐྱེས་ཆོས་ཅན། །བྱང་གི་ཐ་མ་གཟུང་བར་བྱ། །དབང་ལྡན་རེའུ་མིག་ལས་ཕྱི་མ། །རླུང་གི་གཉིས་པའི་ས་བོན་དང་། །ཡང་ནི་བྱང་གི་ཐ་མ་དང་། །ནུབ་ཀྱི་གསུམ་པ་བྱང་གི་ནི། །ཐ་མ་ཡི་ནི་ཡི་གེ་དང་། །དབུས་མ་ཡི་ནི་གཉིས་པ་དང་། །རླུང་གི་ས་ཡི་ཡི་གེ་དང་། །མེ་ཡི་རླུང་ནི་གཟུང་བྱ་སྟེ། །སྔགས་ཀྱི་ཚིག་རྐང་ཉི་ཤུ་པའོ། །མཁས་པས་ཡི་གེ་གཉིས་པ་ལ། །རེའུ་མིག་གཉིས་པ་ཡང་དག་ལྡན། །བཞི་པ་ལ་ནི་ལྔ་པའི་གདན། །ཡི་གེ་ལྔ་པར་ར་ཡིག་གིས། །བདུན་པ་ཡིས་ནི་དྲུག་པ་ལའོ། །བརྒྱད་པར་རེའུ་མིག་གཉིས་པས་སོ། །ཀུན་དུ་སྐྲག་བྱེད་ཆེན་པོ་སྟེ། །ཀླུ་རྣམས་འཇིགས་པར་བྱེད་པའོ། །དབང་ལྡན་གྱི་ཡང་ཆུ་གཟུང་བྱ། །དབུས་མའི་ཡི་གེ་བཞི་པ་དང་། །ཤར་གྱི་ཐོག་མ་གཟུང་བར་བྱ། །བདེན་བྲལ་མེ་ཡི་ས་བོན་དང་། །གདན་ནི་བྱང་གི་ཐ་མ་དང་། །དེ་ཉིད་ཀྱི་ཡིག་བཞི་པ་དང་། །བདེན་བྲལ་མེ་ནི་བཏུ་བྱས་ནས། །ནུབ་ཕྱོགས་ཀྱི་ཡང་བཞི་པ་དང་། །བདེན་བྲལ་མེ་ཡི་ས་བོན་དང་། །ལྷོ་ཡི་ཐ་མ་དེ་བཞིན་
ཏེ། །ཚིག་རྐང་ཉི་ཤུ་རྩ་གཅིག་པ། །ཀུན་དུ་སྐྲག་པ་ཐམས་ཅད་སྤངས། །རེའུ་མིག་གཉིས་པ་ཡང་དག་སྦྱར། །རླུང་གི་སྟན་ནི་དེ་བཞིན་དུ། །ཡི་གེ་ཐོག་མ་ཞེས་བྱའོ། །གཉིས་པ་དེ་ལྟར་སྟེང་གནས། །བཞི་པ་ཡི་ནི་མགོར་གནས་པ། །རེའུ་མིག་གཉིས་པ་སྦྱར་བའོ། །ཅོད་པན་བཅུ་གཅིག་པས་མནན་པ། །བདུན་པ་ལ་ནི་གཉིས་པར་ལྡན། །བརྒྱད་པ་ལ་ནི་གསུམ་པས་དང་། །དགུ་པ་ལ་ནི་མནན་པས་ཏེ། །དངོས་གྲུབ་ཀུན་གྱི་གཞི་ཡི་སྔགས། །ཕྱག་རྒྱའི་དངོས་གྲུབ་སྟེར་བ་པོའོ། །དབང་ལྡན་གྱི་ནི་ཆུ་གཟུང་བྱ། །ནུབ་ཀྱི་ཐོག་མ་དེ་བཞིན་དུ། །རླུང་གི་དབང་ཆེན་བཟུང་ནས་ནི། །དེ་ཉིད་ཀྱི་གཉིས་པའི་ཡི་གེ། །དབུས་མའི་བཞི་པའི་ས་བོན་དང་། །སླར་ཡང་བྱང་གི་ཐ་མ་དང་། །ནུབ་ཕྱོགས་ཀྱི་ནི་བཞི་པ་ལ། །ར་ཡི་ཡི་གེ་ལྡན་པར་བྱ། །ལྷོ་ཡི་ཐ་མ་བཟུང་ནས་ནི། །དབུས་མའི་ཐོག་མ་དེ་བཞིན་དུ། །སྲིན་པོའི་མེ་ནི་གཟུང་བར་བྱ། །མེ་ཡི་རླུང་གི་ས་བོན་ཏེ། །སྔགས་ཀྱི་ཚིག་རྐང་ཉི་ཤུ་གཉིས། །གསུངས་པའི་ལས་ནི་བྱེད་པའོ། །ཐོག་མའི་སྔགས་ཀྱི་ཡི་གེ་ལ། །དུམ་བུ་བདུན་པ་ཡང་དག་ལྡན། །གཉིས་པའི་ཡི་གེར་གཉིས་པ་དང་། །བཞི་པའི་ཡི་གེར་བཅུ་གཅིག་པ། །བཅུ་པར་དུམ་བུ་གཉིས་པ་སྟེ། །སེམས་དང་སེམས་བྱུང་གཉིས་མེད་བྱེད། །བྱང་གི་ཐ་མ་གཟུང་བར་བྱ། །དབང་ལྡན་གྲྭ་ནི་གཞན་པ་དང་། །དེ་ཉིད་ཀྱི་ནི་ཆུ་གཟུང་བྱ། །ཡང་ནི་དབུས་མའི་བཞི་པ་དང་། །ན་ཡིག་སྟན་དུའང་སྦྱིན་པར་བྱ། །ནུབ་ཀྱི་ཐ་མ་དེ་བཞིན་དུ། །དབང་ལྡན་གྱི་ཡང་ཆུ་གཟུང་བྱ། །སླར་ཡང་འདྲེ་ཡི་མེ་དང་ནི། །ལྷོ་ཡི་ཐ་མ་གཟུང་བར་བྱ། །ཚིག་རྐང་ཉི་ཤུ་རྩ་གསུམ་པའོ། །ཡི་གེ་གཉིས་པར་རེའུ་མིག་ནི། །གཉིས་པ་ལྡན་པས་མཛེས་པའོ། །གསུམ་པ་ལ་ནི་གསུམ་པ་དང་། །ལྔ་པ་ལ་ཡང་དེ་ཉིད་ཀྱིས། །དྲུག་པར་རེའུ་མིག་གཉིས་པ་དང་། །བདུན་པས་གསུམ་པར་དེ་བཞིན་དུ། །བརྒྱད་པར་རེའུ་མིག་བདུན་པ་སྟེ། །འཁོར་བ་དྲག་པོ་སྐྱོབ་པའོ། །མེ་ཡི་གཉིས་པའི་ས་བོན་དང་། །ནུབ་ཀྱི་ཐོག་མ་དེ་བཞིན་དུ། །ར་ཡི་ཡི་གེའང་སྟན་དུ་སྦྱིན། །ཡང་ནི་ནུབ་ཀྱི་ཐ་མ་དང་། །རླུང་གི་གཉིས་
པ་གཟུང་བར་བྱ། །བྱང་ཕྱོགས་ཀྱི་ནི་བཞི་པ་དང་། །ལྷོ་ཡི་ཐ་མའི་ས་བོན་དང་། །དབུས་མའི་ཐོག་མའི་ཡི་གེ་དང་། །བདེན་བྲལ་མེ་ཡི་ས་བོན་དང་། །སླར་ཡང་མེ་ཡི་རླུང་ཡིན་ཏེ། །སྔགས་ཀྱི་ཚིག་རྐང་ཉི་ཤུ་བཞི། །འཆི་བདག་རྣམ་པར་འཐག་པའོ། །ཡི་གེ་གཉིས་པ་རེའུ་མིག་ནི། །ལྔ་པས་སྟན་དུ་མཛེས་པའོ། །གསུམ་པ་ཡང་ནི་གསུམ་པ་ཡིས། །བཞི་པ་ལ་ནི་ལྔ་པ་ཡིས། །དེ་ཡི་མགོ་བོར་སྟོང་པས་མནན། །བརྒྱད་པ་ལ་ཡང་གཉིས་པས་སོ། །ནུབ་ཕྱོགས་ཀྱི་ནི་ཐོག་མ་ལ། །སླར་ཡང་ཉི་མ་སྟན་དུ་བྱ། །རླུང་གི་གཉིས་པའི་ས་བོན་ལའང་། །ས་ཡི་ཕ་རོལ་དབང་ལྡན་མཚམས། །རླུང་གི་གཉིས་པའི་ཡི་གེ་ལ། །ར་ཡིག་གདན་དུ་བརྒྱན་པ་དང་། །བྱང་གི་ཐ་མ་གཟུང་བར་བྱ། །དབང་ལྡན་ས་མཐའ་དེ་བཞིན་དུ། །རླུང་གི་གཉིས་པའི་ཡི་གེ་ཉིད། །དབང་ལྡན་ཕྱི་མ་སའི་ཕ་རོལ། །སླར་ཡང་རླུང་གི་གཉིས་པ་ལ། །ར་ཡིག་དང་ནི་ལྡན་པར་བྱ། །དབུས་མའི་ཐོག་མའི་ས་བོན་དང་། །བདེན་བྲལ་མེ་ཡི་ས་བོན་དང་། །བྱང་གི་ཐ་མ་གཟུང་བར་བྱ། །དབང་ལྡན་ཆུ་དང་དེ་བཞིན་དུ། །རླུང་གི་དབང་ཆེན་གཟུང་བར་བྱ། །རླུང་གི་གདན་ནི་སྦྱར་བ་དང་། །ནུབ་ཀྱི་ཐོག་མའི་ཡི་གེ་ཙམ། །སླར་ཡང་གཟུང་བྱ་དེ་བཞིན་དུ། །དབང་ལྡན་གྱི་ནི་ཆུ་གཟུང་བྱ། །ར་ཡིས་མནན་པ་སྦྱར་བར་བྱ། །བདེན་བྲལ་ར་ཡིག་གཟུང་བར་བྱ། །ནུབ་ཀྱི་དང་པོའི་སྟན་དེ་བཞིན། །ལྷོ་ཡི་ཐ་མ་གཟུང་བ་ནི། །གསང་སྔགས་ཚིག་རྐང་ཉི་ཤུ་ལྔ། །མཁས་པས་ཐོག་མའི་ཡི་གེ་ལ། །རེའུ་མིག་གསུམ་པའི་ཕྱི་མོར་ལྡན། །གཉིས་པར་རེའུ་མིག་གཉིས་པའོ། །དྲུག་པར་དེ་ཉིད་སྦྱར་བར་བྱ། །དགུ་པར་རེའུ་མིག་བདུན་པས་ཏེ། །དགུ་པར་བཅུ་གཅིག་པས་དེ་བཞིན། །བཅུ་གཉིས་པ་ལ་དུམ་གཉིས་པས། །བཅུ་བཞི་པར་ཡང་དེ་ཉིད་ཀྱིས། །བཅུ་གཅིག་པས་ནི་མགོ་བོར་མནན། །བཅུ་བདུན་པར་ནི་དུམ་གསུམ་པས། །བཅྭ་བརྒྱད་པར་ནི་བདུན་པས་ཏེ། །མཐའ་ཡས་སེམས་ཅན་དོན་བྱེད་མཆོག །སྤྲུལ་པའི་སྐུ་ཅན་ཉིད་དང་ནི། །རེ་བ་ཐམས་ཅད་སྐོང་བྱེད་པའོ། །མེ་ཡི་གཉིས་པའི་ས་བོན་གཟུང་། །ནུབ་ཀྱི་ཐོག་མ་དེ་བཞིན་དུ། །རླུང་གི་གཉིས་པ་གཟུང་བར་བྱ། །སླར་ཡང་
དབང་ལྡན་སའི་ཕ་རོལ། །རླུང་གི་གཉིས་པ་གཟུང་བར་བྱ། །བྱང་གི་ཐ་མའི་ཡི་གེ་དང་། །དབུས་མའི་གཉིས་པའི་ས་བོན་དང་། །མེ་ཡང་རླུང་གི་ཡི་གེ་སྟེ། །སྔགས་ཀྱི་ཚིག་རྐང་ཉི་ཤུ་དྲུག །མངོན་ཤེས་ཐམས་ཅད་འཇུག་བྱེད་པའོ། །ཡི་གེ་ལྔ་པ་མཆོག་ལ་ནི། །ར་ཡི་སྟན་དང་ཡང་དག་ལྡན། །ཡི་གེ་དྲུག་པའི་གདན་དུ་ནི། །རེའུ་མིག་གི་ནི་ལྔ་པ་བྱ། །བདུན་པར་དུམ་བུ་གཉིས་པས་སོ། །ཆར་འབེབས་འདོད་པ་ཐམས་ཅད་གསོལ། །ཛྙཱ་ནི་རང་བྱུང་བཏུ་བྱས་ནས། །ནུབ་ཀྱི་ཐ་མའི་ཡི་གེ་དང་། །རླུང་གི་གཉིས་པ་བཏུ་བྱ་སྟེ། །དབུས་མའི་གསུམ་པ་དེ་བཞིན་དུ། །སྲིན་པོའི་ཉི་མ་བླངས་པ་དང་། །བྱང་གི་ཐོག་མ་དེ་ནས་ནི། །ར་ཡིག་གདན་དང་མཉམ་ལྡན་བྱ། །བྱང་ཕྱོགས་ཀྱི་ནི་བཞི་པ་དང་། །མེ་ཡི་རླུང་ནི་བླང་བྱ་སྟེ། །ཚིག་རྐང་ཉི་ཤུ་རྩ་བདུན་པའོ། །གཉིས་པའི་དུམ་བུ་ཉིད་ཀྱིས་ནི། །ཡི་གེ་གསུམ་པ་མཛེས་པར་བྱས། །བདུན་པའང་དེ་ཉིད་ཀྱིས་བྱ་སྟེ། །ལྷན་སྐྱེས་རྫོགས་པའི་བྱང་ཆུབ་མཆོག །བྱང་གི་ཐ་མ་གཟུང་བར་བྱ། །དབང་ལྡན་གྲྭ་ཡི་སའི་ཕ་རོལ། །བྱང་གི་ཐོག་མ་བླང་བར་བྱ། །མེ་ཡི་གཉིས་པའི་ཡི་གེ་དང་། །ནུབ་ཀྱི་ཐོག་མ་གཟུང་བར་བྱ། །བདེན་བྲལ་གྲྭ་ཡི་ཉི་མ་དང་། །ནུབ་ཀྱི་བཞི་པའི་ས་བོན་དང་། །བདེན་བྲལ་ཉི་མའི་ས་བོན་དང་། །དབང་ལྡན་ཆུ་ཡང་གཟུང་བར་བྱ། །རླུང་གི་གཉིས་པའི་ཡི་གེ་དང་། །དབང་ལྡན་གྲྭ་ཡི་ས་མཐའ་དང་། །བདེན་བྲལ་མེ་ཡི་ས་བོན་དང་། །ལྷོ་ཡི་ཐ་མ་གཟུང་བྱ་སྟེ། །སྔགས་ཀྱི་ཚིག་རྐང་ཉི་ཤུ་བརྒྱད། །སྔགས་ཀྱི་ཡི་གེ་གཉིས་པ་ལ། །ལེའུ་ཚེ་གཉིས་པ་ཡང་དག་སྦྱར། །གསུམ་པ་ཡིས་ནི་གསུམ་པ་ལ། །བཞི་པ་ལ་ཡང་དེ་ཉིད་ཀྱིས། །དྲུག་པ་ལ་ནི་ལྔ་པ་ཡིས། །འོག་གི་ཆར་ནི་སྦྱར་བར་བྱ། །བདུན་པར་གསུམ་པ་ལྡན་པར་བྱ། །ལེའུ་ཚེ་གཉིས་པས་བཅུ་པ་ལ། །བཅུ་གཅིག་པ་ལའང་དེ་ཉིད་ཀྱིས། །སླར་ཡང་གསུམ་པས་བཅུ་གཉིས་ལའོ། །བཅུ་གསུམ་པ་ལ་དུམ་བདུན་པས། །ཐུགས་རྗེ་ཆེན་པོ་འདོད་ཉིད་དོ། །རླུང་གི་གཉིས་པའི་ས་བོན་དང་། །ར་ཡིག་ལྡན་པའི་དབང་ལྡན་ཆུ། །བྱང་གི་ཐ་མ་གཟུང་བར་བྱ། །
འདྲེ་ཡི་སྲེག་ཟ་དེ་ནས་ནི། །བྱང་ཕྱོགས་ཀྱི་ནི་གསུམ་པ་དང་། །སླར་ཡང་རླུང་གི་ས་དང་ནི། །ནུབ་ཕྱོགས་ཀྱི་ནི་བཞི་པ་ལ། །ཆུ་ཡི་གདན་ནི་སྦྱར་བའོ། །རླུང་གི་གཉིས་པའི་ས་བོན་དང་། །ཡང་ན་ནུབ་ཀྱི་ཐ་མ་སྟེ། །ཉི་ཤུ་རྩ་དགུ་པ་དེ་བཞིན། །སྔགས་ཀྱི་ཚིག་ནི་ཐམས་ཅད་བྱེད། །སྔགས་ཀྱི་ཡི་གེ་གསུམ་པ་ལ། །རེའུ་མིག་གཉིས་པར་ཡང་དག་ལྡན། །ཡི་གེ་བདུན་པའི་གནས་ལ་ནི། །བཅུ་གཅིག་པ་ཡིས་ཡང་དག་མནན། །བརྒྱད་པ་ལ་ནི་གསུམ་པ་སྦྱར། །དེ་བཞིན་དགུ་པར་བདུན་པ་སྟེ། །གསང་སྔགས་འདི་ནི་སྣ་ཚོགས་པའི། །དངོས་གྲུབ་སྙིང་རྗེར་གསུངས་པའོ། །མེ་ཡི་གཉིས་པའང་གཟུང་བར་བྱ། །ཁྱབ་བདག་ཆེན་པོ་ཉི་མར་ལྡན། །བདེན་བྲལ་གྲྭ་ཡི་གཉིས་པ་ལ། །ལྷོ་ཡི་ཐོག་མའི་གདན་ཅན་ནོ། །རླུང་གི་གཉིས་པའི་ས་བོན་དང་། །དབང་ལྡན་གྲྭ་ཡི་ས་ཕ་རོལ། །བདེན་བྲལ་ཉི་མ་གཟུང་བར་བྱ། །དབུས་མ་ཡི་ནི་ཐོག་མ་མཆོག །སྲིན་པོའི་མེ་ནི་གཟུང་བར་བྱ། །དབུས་མའི་ཐོག་མའི་ཡི་གེ་དང་། །མེ་ཡི་རླུང་ནི་གཟུང་བྱ་སྟེ། །སྔགས་ཀྱི་ཚིག་རྐང་སུམ་ཅུའོ། །མཁས་པའི་ཐོག་མའི་ཡི་གེ་ལ། །ལེའུ་ཚེ་གསུམ་པ་སྦྱོར་བ་དང་། །དེ་ཉིད་ཀྱིས་ནི་གཉིས་པ་ལ། །དྲུག་པ་བཅུ་གཅིག་པ་ཡིས་མནན། །སླར་ཡང་བཞི་པ་ལ་གཉིས་པས། །དྲུག་པ་ལ་ཡང་དེ་ཉིད་ཀྱིས། །བརྒྱད་པའང་དེ་ཡིས་དེ་བཞིན་ནོ། །དེ་ཡང་འཁྲུལ་པ་རྣམས་སྤངས་པའོ། །རླུང་གི་གཉིས་པའི་ས་བོན་དང་། །ཉི་མར་ལྡན་པའི་དབང་ལྡན་ཆུ། །ནུབ་ཀྱི་ཐ་མའི་ས་བོན་དང་། །དབུས་མ་ཡི་ཡང་གསུམ་པ་དང་། །ཕྱིར་ཞིང་ནུབ་ཀྱི་ཐ་མ་དང་། །བདེན་བྲལ་གཉིས་པའི་ཡི་གེ་དང་། །སླར་ཡང་དེ་ཉིད་དེ་ལྟར་བཏུ། །ལྷོ་ཡི་ཐ་མ་དེ་བཞིན་ཏེ། །རླུང་གི་གཉིས་པ་གཟུང་བྱས་ནས། །ནུབ་ཀྱི་དང་པོའི་སྟན་དེ་ནས། །བྱང་ཕྱོགས་ཀྱི་ཡང་བཞི་པ་དང་། །ནུབ་ཀྱི་ཐ་མ་དེ་བཞིན་དུ། །དབང་ལྡན་གྱི་ཡང་ཆུ་གཟུང་བྱ། །ནུབ་ཕྱོགས་ཀྱི་ནི་བཞི་པ་སྟེ། །དེ་ལ་ར་ཡིག་ལྡན་པར་བྱ། །དབང་ལྡན་ཆུ་ཡི་ས་བོན་དང་། །ལྷོ་ཡི་ཐ་མ་གཟུང་བར་བྱ། །མེ་ཡི་རླུང་གི་ས་བོན་ཏེ། །བཀླགས་པས་དངོས་གྲུབ་བྱེད་པའི་སྔགས། །མ་བྱུང་འབྱུང་བར་མི་
འགྱུར་རོ། །སྔགས་ཀྱི་ཡི་གེ་གསུམ་པ་ལ། །རེའུ་མིག་གཉིས་པས་མནན་པ་སྟེ། །བཞི་པའང་དེ་ཉིད་དང་སྦྱར་ཅིང་། །བཅུ་གཅིག་པ་ཡིས་བརྒྱན་པའོ། །ལྔ་པ་དུམ་བུ་གཉིས་པ་སྟེ། །དེ་བཞིན་དྲུག་པར་དགུ་པས་སོ། །དགུ་པ་ཐིག་ལེས་མནན་པ་སྟེ། །སླར་ཡང་བཅུ་གཉིས་ལ་གསུམ་པས། །བཅུ་གསུམ་པ་ལ་གཉིས་པས་ཏེ། །བཅྭ་ལྔ་པ་ལའང་དེ་ཉིད་ཀྱིས། །སྔགས་རྐང་སུམ་ཅུ་རྩ་གཅིག་པ། །བདེ་བ་ཐམས་ཅད་འབྱུང་བའོ། །ཐོག་མའི་རེའུ་མིག་བཏུ་བྱས་ནས། །ནུབ་ཀྱི་ཐོག་མ་དེ་བཞིན་དུ། །རྡོ་རྗེ་སེམས་དཔའི་གདན་སྦྱིན་བྱ། །སླར་ཡང་བྱང་གི་ཐ་མ་དང་། །རླུང་གི་ས་ནི་གཟུང་བར་བྱ། །ནུབ་ཀྱི་བཞི་པའི་ཡི་གེ་དང་། །བདེན་བྲལ་མེ་ཡི་ས་བོན་དང་། །ནུབ་ཀྱི་ཐ་མ་དེ་བཞིན་ནོ། །ཐོག་མར་བཅུ་གཅིག་པ་ཡིས་མནན། །གསུམ་པར་རེའུ་མིག་གཉིས་པས་སོ། །བཞི་དང་ལྔ་པའང་དེ་ཉིད་ཀྱིས། །ཡི་གེ་དྲུག་པར་གསུམ་པ་ཡིས། །བདུན་པར་བདུན་པ་ཉིད་ཀྱིས་ཏེ། །སྔགས་རྐང་སུམ་ཅུ་རྩ་གཉིས་པ། །འཇིགས་བྱེད་མ་རྣམས་འཇིགས་བྱེད་དང་། །རྡོ་རྗེ་སེམས་དཔའ་རྫོགས་བྱེད་པ། །རླུང་གི་གཉིས་པའི་ས་བོན་དང་། །བྱང་ཕྱོགས་ཀྱི་ནི་ཐ་མ་མཆོག །བདེན་བྲལ་རྡོ་རྗེ་སེམས་དཔའ་དང་། །དབུས་མའི་ཐོག་མའི་ཡི་གེ་དང་། །བྱང་ཕྱོགས་ཀྱི་ཡང་ཐོག་མ་དང་། །ནུབ་ཀྱི་ཐོག་མ་དེ་བཞིན་དུ། །དེ་ཉིད་ཀྱི་ནི་ཐ་མ་གཟུང་། །སླར་ཡང་དེ་ཡི་གསུམ་པ་དང་། །མེ་ཡི་རླུང་ཡང་གཟུང་བྱ་སྟེ། །ཚིག་རྐང་སུམ་ཅུ་རྩ་གསུམ་པ། །ཐོག་མ་ལ་ནི་ལྔ་པའི་གདན། །གཉིས་པ་ལ་ནི་བདུན་པས་ཏེ། །གསུམ་པའི་གདན་ནི་ལྔ་པ་ཡི། །རེའུ་མིག་པ་ཡང་བསྡུ་བའོ། །བཞི་པར་བཅུ་གཅིག་པ་ཡི་གདན། །ལྔ་པ་ལ་ཡང་དུམ་གསུམ་པས། །བདུན་པ་བརྒྱད་པ་རེའུ་མིག་ནི། །གཉིས་པ་ཡིས་ནི་རྟག་ཏུ་འབར། །གཟུང་དང་འཛིན་པ་རྣམ་པ་ཡང་། །སྤོང་བ་སྔགས་ཀྱི་འདྲེན་པའོ། །དབུས་མའི་ཐོག་མ་གཟུང་བར་བྱ། །གདན་ནི་མེ་ཡི་བུ་ཡིས་སོ། །ནུབ་ཕྱོགས་ཀྱི་ནི་བཞི་པ་དང་། །དབང་ལྡན་ཆུ་ཡི་ས་བོན་དང་། །དབུས་མ་ཡི་ནི་བཞི་པ་ནི། །ཉི་མའི་གདན་ལ་ཡང་དག་གནས། །དབང་ལྡན་གྲྭ་ཡི་ས་མཐའ་དང་། །སླར་
ཡང་ནུབ་ཀྱི་བཞི་པ་དང་། །འདྲེ་ཡི་མེ་ཡི་ས་བོན་དང་། །ལྷོ་ཡི་ཐ་མ་དེ་བཞིན་དུ། །མེ་ཡི་རླུང་ནི་གཟུང་བར་བྱ། །ཚིག་རྐང་སུམ་ཅུ་རྩ་བཞི་པའོ། །མཁས་པས་ཐོག་མའི་ཡི་གེ་ལ། །རེའུ་མིག་དགུ་པས་མནན་པ་དང་། །གསུམ་པ་ལ་ནི་གསུམ་པས་སོ། །གཉིས་པས་དྲུག་དང་བརྒྱད་ཡིག་ལའོ། །གསང་སྔགས་ངན་འགྲོ་ལས་སྒྲོལ་བའོ། །རང་འབྱུང་སྒྲ་ཡང་བསྒྲགས་པའོ། །བྱང་གི་ཐ་མ་གཟུང་བར་བྱ། །དབང་ལྡན་གྲྭ་ཡི་ས་མཐའ་དང་། །དབུས་མའི་ཐོག་མ་གཟུང་བར་བྱ། །མེ་ཡི་གཉིས་པའི་ས་བོན་དང་། །ནུབ་ཀྱི་ཐོག་མ་དེ་བཞིན་དུ། །རླུང་གི་དབང་ཆེན་དེ་བཞིན་ཏེ། །དབུས་མའི་ཐོག་མ་གཟུང་བར་བྱ། །ནུབ་ཀྱི་ཡི་གེ་དང་པོ་ལ། །བྱང་གི་ཐ་མའི་གདན་སྦྱར་བྱ། །སླར་ཡང་ནུབ་ཀྱི་ཐ་མ་སྟེ། །ཚིག་རྐང་སུམ་ཅུ་རྩ་ལྔ་པ། །ཆོས་རྣམས་ཀུན་གྱི་སྟོང་པ་ཉིད། །གཉིས་གསུམ་ཡི་གེའི་གནས་ལ་ནི། །རེའུ་མིག་གཉིས་པ་སྦྱར་བའོ། །ལྔ་པ་ལ་ནི་དུམ་གསུམ་པས། །བདུན་པ་དགུ་པར་གཉིས་བདུན་པས། །བྱང་ཕྱོགས་ཀྱི་ནི་གསུམ་པ་དང་། །ནུབ་ཀྱི་གསུམ་པ་དེ་བཞིན་ཏེ། །དེ་ཡི་བཞི་པའི་གདན་སྦྱིན་བྱ། །དབུས་མའི་ཐོག་མ་དེ་བཞིན་དུ། །ལྷོ་ཕྱོགས་ཀྱི་ནི་ཐོག་མ་དང་། །རླུང་གི་གཉིས་པའི་ས་བོན་དང་། །དབང་ལྡན་གྲྭ་ཡི་ས་མཐའ་དང་། །རླུང་གི་སླར་ཡང་གཉིས་པ་སྟེ། །དེ་ནི་ར་ཡིག་ལྡན་པར་བྱ། །ཀ་ཥར་གྲགས་པའི་སྔགས་བཏུའོ། །ལྷོ་ཡི་ཐ་མ་གཟུང་བྱ་དང་། །སླར་ཡང་ནུབ་ཀྱི་ཐ་མ་དང་། །བདེན་བྲལ་གཉིས་པའི་ས་བོན་དང་། །བྱང་གི་ཐོག་མའི་གདན་ཅན་དང་། །ནུབ་ཀྱི་གསུམ་པ་གང་ཡིན་དང་། །དེ་ཉིད་ཀྱི་མཐའི་ཡི་གེ་དང་། །མེ་ཡི་རླུང་ནི་གཟུང་བྱ་སྟེ། །སྔགས་ཀྱི་ཚིག་རྐང་སུམ་ཅུ་དྲུག །ཐོག་མར་ལྔ་པ་ཡི་ནི་གདན། །གསུམ་པ་དགུ་པས་མནན་པ་དང་། །བཞི་པ་ཡང་ནི་གསུམ་པ་ཡིས། །དུམ་བུ་གཉིས་པས་དགུ་པ་ལ། །བཅུ་པ་ལ་ནི་གསུམ་པས་ཏེ། །བཅུ་གཅིག་པ་ལ་དུམ་གཉིས་པས། །བཅུ་གསུམ་པ་ལའང་དེ་ཉིད་ཀྱི། །ཐིག་ལེའི་ཡེ་ཤེས་སྒྲ་རྣམས་ཀྱིའོ། །ཛྙཱ་ཡི་རྣམ་པ་ཡང་དག་བཏུ། །ནུབ་ཀྱི་ཐ་མའི་ཡི་གེ་དང་། །བྱང་གི་ཐ་མ་གཟུང་བར་བྱ། །ཤར་སྒོ་མ་ནི་གདན་དུ་འདོད། །ནུབ་ཕྱོགས་ཀྱི་ནི་ཐོག་
མ་དང་། །སླར་ཡང་དབང་ལྡན་གྱི་ནི་ཆུ། །བདེན་བྲལ་གཉིས་པའི་ཡི་གེ་ནི། །ར་ཡིག་གིས་ནི་མནན་པར་བྱ། །བྱང་གི་ཐོག་མའི་ས་བོན་དང་། །ལྷོ་ཡི་ཐ་མ་དེ་བཞིན་དུ། །མེ་ཡི་རླུང་ནི་གཟུང་བྱ་སྟེ། །ཚིག་རྐང་སུམ་ཅུ་རྩ་བདུན་པའོ། །ཡི་གེ་གཉིས་དྲུག་བརྒྱད་པ་ལ། །རེའུ་མིག་གཉིས་པ་སྦྱར་བའོ། །འབར་བའི་བདུད་རྩིའི་རྣལ་འབྱོར་གྱི། །གསང་སྔགས་སྐྱེ་བོ་ཀུན་ཡིད་སྤྲོ། །རླུང་གི་གཉིས་པ་གཟུང་བར་བྱ། །དབང་ལྡན་ཆུ་ནི་ར་དང་ལྡན། །དབུས་མའི་ཐོག་མའི་ས་བོན་དང་། །རང་ཡིག་ལྡན་དང་བྱང་ཐ་མ། །དེ་ཉིད་དང་ལྡན་བྱང་དང་པོ། །དབང་ལྡན་ཆུ་ཡི་ཡི་གེ་དང་། །ནུབ་ཀྱི་ཐོག་མར་ར་ཡིག་ལྡན། །དེ་ཉིད་ཐ་མ་དེ་བཞིན་དུ། །མེ་ཡི་རླུང་ནི་གཟུང་བར་བྱ། །ནུབ་ཀྱི་ཐ་མ་དེ་བཞིན་ཏེ། །གསང་སྔགས་ཚིག་རྐང་སུམ་ཅུ་བརྒྱད། །ཉོན་མོངས་ཀུན་ཉེར་ཞི་བྱེད་པའོ། །བརྒྱད་པར་དུམ་བུ་གཉིས་པ་ཡིས། །སྦྱར་བྱ་བདུན་པས་བཅུ་པ་ལའོ། །བྱང་ཕྱོགས་ཀྱི་ནི་གསུམ་པ་དང་། །ནུབ་ཕྱོགས་ཀྱི་ཡང་གསུམ་པ་དང་། །དེ་ཉིད་ཀྱི་ནི་ཐ་མ་གཟུང་། །དབུས་མའི་ཐོག་མ་དེ་བཞིན་དུ། །སྲིན་པོའི་མེ་ཡི་ས་བོན་དང་། །མེ་ཡི་རླུང་གི་ས་བོན་ཏེ། །སྔགས་ཀྱི་ཡི་གེ་ཐོག་མ་ལ། །བཅུ་གཅིག་པ་ཡིས་མནན་པ་དང་། །མཁས་པས་ཡི་གེ་ལྔ་པ་ལ། །དུམ་བུ་གཉིས་པས་སྦྱར་བའོ། །བག་ཆགས་སེམས་ཀྱི་བདག་ཉིད་ཀུན། །སྤོང་བའི་གསང་སྔགས་འབོད་པ་སྟེ། །མཁས་པའི་གསང་སྔགས་ཚིག་རྐང་ནི། །བཞི་བཅུར་གཅིག་གིས་མ་ཚང་བའོ། །རླུང་གི་གཉིས་པའི་ས་བོན་དང་། །དབང་ལྡན་ཆུ་ནི་ར་ལྡན་དང་། །སླར་ཡང་དེ་ཉིད་བཏུ་བྱས་ནས། །དབུས་མའི་ཐོག་མའི་ཡི་གེ་དང་། །རླུང་གི་གྲྭ་ཡི་ས་ལ་ནི། །སླར་ཡང་བྱང་གི་དང་པོའི་གདན། །བྱང་ཕྱོགས་ཀྱི་ནི་བཞི་པ་དང་། །ཤར་གྱི་དབུས་མའི་ཡི་གེ་དང་། །ལྷོ་ཡི་ཐ་མ་གཟུང་བར་བྱ། །དབུས་མའི་ཐོག་མ་དེ་བཞིན་དུ། །སྲིན་པོའི་མེ་ཡི་ས་བོན་དང་། །མེ་ཡི་རླུང་གི་ས་བོན་ཏེ། །སྔགས་ཀྱི་ཚིག་རྐང་བཞི་བཅུ་པ། །ཡི་གེས་ཇི་ལྟའི་དོན་བྱེད་པའོ། །སྔགས་ཀྱི་ཡི་གེ་གསུམ་པ་ལ། །རེའུ་མིག་གསུམ་པ་སྦྱར་བ་དང་། །མཁས་པས་ཡི་གེ་དྲུག་པ་ལ། །རེའུ་མིག་བཅུ་
གཅིག་པ་ཡིས་མནན། །བཅུ་པར་རེའུ་མིག་གཉིས་པ་ཡིས། །མངའ་བདག་སྣ་ཚོགས་དོན་བྱེད་པའི། །བྱང་གི་ཐ་མ་གཟུང་བར་བྱ། །ལྷོ་ཕྱོགས་ཀྱི་ནི་གསུམ་པ་དང་། །དབང་ལྡན་གྱི་ནི་ཆུ་གཟུང་བྱ། །རླུང་གི་གྲྭ་ལས་ས་དང་ནི། །ཡང་ནི་དེ་ཉིད་བཏུ་བྱས་ནས། །དབུས་མ་ཡི་ནི་གསུམ་པ་ལ། །ནུབ་ཀྱི་ཐ་མའི་གདན་ཅན་དང་། །མེ་ཡི་གཉིས་པའི་ཡི་གེ་དང་། །བདེན་བྲལ་མེ་ཡི་ས་བོན་དང་། །སླར་ཡང་དེ་ཉིད་བཏུ་བར་བྱ། །མེ་ཡི་རླུང་ནི་གཟུང་བྱ་སྟེ། །སྔགས་རྐང་བཞི་བཅུ་རྩ་གཅིག་པའོ། །ཐོག་མར་རེའུ་མིག་ལྔ་པ་ཡི། །གདན་དང་ཐིག་ལེས་མནན་པའོ། །གཉིས་པའང་རེའུ་མིག་གཉིས་པས་སོ། །བཞི་པ་ལ་ནི་བཞི་པས་སོ། །བརྒྱད་པར་ཡང་ནི་དེ་ཉིད་ཀྱིས། །དགུ་པར་དུམ་བུ་གཉིས་པས་སོ། །བྱང་ཕྱོགས་ཀྱི་ནི་ཐོག་མ་དང་། །སྲིན་པོའི་ཉི་མའི་མགོན་པོ་དང་། །དབུས་མའི་ཐོག་མ་གཟུང་བྱས་ལ། །དེ་ནས་དབང་པོའི་སྒོ་གདན་ཅན། །ནུབ་ཕྱོགས་ཀྱི་ནི་ཐོག་མ་དང་། །མེ་ཡི་རླུང་གི་ས་བོན་དང་། །ནུབ་ཀྱི་དང་པོ་གཟུང་བྱས་པ། །རྡོ་རྗེ་སེམས་དཔའ་ལ་ཞོན་པའོ། །བྱང་གི་ཐ་མ་གཟུང་བར་བྱ། །ནུབ་ཀྱི་ཐོག་མའི་ཡི་གེ་ནི། །དེ་ཉིད་ལ་ནི་ར་ཡིས་གདན། །ནུབ་ཀྱི་ཐ་མ་དེ་བཞིན་དུ། །མེ་ཡི་གཉིས་པའི་ས་བོན་དང་། །སླར་ཡང་ནུབ་ཀྱི་ཐ་མ་དང་། །མེ་ཡི་རླུང་ནི་གཟུང་བྱ་སྟེ། །ཚིག་རྐང་བཞི་བཅུ་རྩ་གཉིས་པའོ། །ལྔ་པར་བཅུ་གཅིག་པ་ཡིས་མནན། །བདུན་པ་ལ་ཡང་དེ་ཉིད་ཀྱིས། །དགུ་པར་བཅུ་གཅིག་དུམ་གཉིས་པས། །གསང་སྔགས་འཇོམས་བྱེད་ཆེན་པོར་གསུངས། །བྱང་གི་ཐ་མ་གཟུང་བར་བྱ། །དབང་ལྡན་གྲྭ་ཡི་ས་མཐའ་དང་། །འདྲེ་ཡི་གྲྭ་ཡི་ཉི་མ་དང་། །ཀ་ཥར་གྲགས་པ་རང་ཉིད་བཏུ། །དབུས་མའི་ཐོག་མའི་ས་བོན་དང་། །སྲིན་པོའི་མེ་ཡི་བུ་དང་ནི། །མེའི་ཡང་རླུང་ནི་གཟུང་བྱ་སྟེ། །ཚིག་རྐང་བཞི་བཅུ་རྩ་གསུམ་པའོ། །གཉིས་དང་བཞི་པ་དྲུག་པ་ལ། །དུམ་བུ་གཉིས་པ་སྦྱར་བའོ། །རྣལ་འབྱོར་བསྲུང་བའི་བདག་ཉིད་དུ། །ཡི་གེ་ལས་ནི་ཤེས་པར་བྱ། །ནུབ་ཕྱོགས་ཀྱི་ནི་གསུམ་པ་དང་། །སླར་ཡང་བདེན་བྲལ་གཉིས་པར་ནི། །ལྷོ་ཡི་དང་པོའི་སྟན་དུ་སྦྱིན། །ནུབ་ཀྱི་ཐ་མ་དེ་བཞིན་ཏེ། །དབང་ལྡན་གྱི་ནི་ཆུ་གཟུང་བྱ། །
སླར་ཡང་ནུབ་ཀྱི་གསུམ་པ་དང་། །རླུང་གི་གྲྭ་ཡི་ས་དང་ནི། །ནུབ་ཀྱི་ཐ་མ་དེ་བཞིན་དུ། །ཚིག་རྐང་བཞི་བཅུ་རྩ་བཞི་པ། །མཚམས་མེད་ལྔ་ནི་བྱེད་རྣམས་ཀྱིའོ། །ཁྱབ་བདག་ཐོག་མར་དུམ་བུ་ནི། །ལྔ་པའི་སྟན་གྱིས་མཛེས་པ་དང་། །གཉིས་པར་དུམ་བུ་གཉིས་པ་ཡིས། །སྦྱར་དང་སླར་ཡང་གསུམ་པ་ལ། །དུམ་གཉིས་པ་དང་ཐིག་ལེས་སོ། །གསུམ་པས་ཡི་གེ་བཞི་པ་ལའོ། །ལྔ་པ་བདུན་པ་ལ་དེ་བཞིན། །རེའུ་མིག་གཉིས་དང་བདུན་པས་སོ། །ནུབ་ཕྱོགས་ཀྱི་ནི་བཞི་པ་དང་། །བདེན་བྲལ་མེ་ཡི་ས་བོན་ནི། །བྱང་གི་ཐ་མའི་སྟན་ཅན་དང་། །ནུབ་ཕྱོགས་ཀྱི་ནི་བཞི་པ་དང་། །མེ་ཡི་རླུང་ནི་གཟུང་བར་བྱ། །དབུས་མའི་ཐོག་མའི་ཡི་གེ་དང་། །བདེན་བྲལ་མེ་ཡི་བུ་དང་ནི། །སླར་ཡང་མེ་ཡི་རླུང་ཡིན་ཏེ། །སྔགས་ཀྱི་ཡི་གེ་གཉིས་པ་ལ། །རེའུ་མིག་དགུ་པས་མནན་པ་དང་། །སླར་ཡང་ཡི་གེ་དྲུག་པ་ལ། །རེའུ་མིག་གཉིས་པས་སྦྱར་བ་ཡི། །སྔགས་ནི་ཆོས་རྣམས་ཀུན་གྱི་གཞི། །ཚིག་རྐང་བཞི་བཅུ་རྩ་ལྔ་པའོ། །དབུས་མའི་ཐོག་མ་བཟུང་ནས་ནི། །ཉི་མའི་གདན་གྱིས་གསལ་བྱས་པའོ། །ནུབ་ཕྱོགས་ཀྱི་ནི་བཞི་པ་དང་། །རླུང་གི་གཉིས་པའི་ཡི་གེ་ལ། །བྱང་གི་གཉིས་པའི་གདན་ཅན་ནོ། །བདེན་བྲལ་རྡོ་རྗེ་སེམས་དཔའ་དང་། །རླུང་གི་གཉིས་པ་གཟུང་བྱས་ལ། །བྱང་གི་གཉིས་པའི་གདན་ཅན་ནོ། །འདྲེ་ཡི་མེ་ཡི་བུ་དང་ནི། །ལྷོ་ཡི་ཐ་མ་དེ་བཞིན་དུ། །མེ་ཡི་རླུང་ནི་གཟུང་བྱ་སྟེ། །ཚིག་རྐང་བཞི་བཅུ་ཞེ་དྲུག་པའོ། །ཐོག་མའི་ཡི་གེར་རེའུ་མིག་ནི། །དགུ་པས་མནན་པར་མཛེས་པའོ། །གསུམ་པ་ལྔ་པ་བདུན་པ་ལ། །དུམ་བུ་གཉིས་པས་སྦྱར་བའོ། །རེའུ་མིག་གསུམ་པ་བཏུ་བྱས་ནས། །ནུབ་ཕྱོགས་ཀྱི་ནི་གསུམ་པ་ལ། །ཉི་མའི་གདན་ནི་ལྡན་པ་དང་། །ཤར་ཕྱོགས་ཀྱི་ནི་གསུམ་པ་དང་། །རླུང་གི་གྲྭ་ཡི་ས་དང་ནི། །དེ་ཉིད་གཉིས་པའི་ཡི་གེ་དང་། །ར་ཡིག་ལྡན་དང་དབང་ལྡན་ཆུ། །རླུང་གི་གཉིས་པའི་ཡི་གེ་དང་། །ནུབ་ཀྱི་དང་པོ་ཉིད་ལ་ནི། །དབང་ལྡན་ཆུ་ཡི་གདན་ཅན་ནོ། །ནུབ་ཕྱོགས་ཀྱི་ཡང་ཐོག་མ་ལ། །གདན་ནི་བྱང་གི་ཐ་མའོ། །ནུབ་ཀྱི་ཐ་མ་གཟུང་བྱས་པ། །ཚིག་རྐང་བཞི་
བཅུ་རྩ་བདུན་པའོ། །ཐོག་མར་བཅུ་གཅིག་པ་ཡིས་ནི། །མནན་པ་མཛེས་པའི་མཆོག་ཡིན་ནོ། །གསུམ་པ་ལ་ནི་གཉིས་པས་ཏེ། །བརྒྱད་པ་ལ་ཡང་དེ་ཉིད་ཀྱིས། །བཅུ་པར་བདུན་པ་ཉིད་ཀྱིས་ཏེ། །སྔགས་ནི་ས་ཀུན་མཉམ་པའོ། །དབུས་མ་ཡི་ནི་གསུམ་པ་ལ། །ར་ཡི་ཡི་གེ་ལྡན་པར་བྱ། །རླུང་གི་གཉིས་པའི་ས་བོན་ལ། །ནུབ་ཀྱི་དང་པོའི་གདན་དེ་ནས། །དབང་ལྡན་གྱི་ནི་ཆུ་གཟུང་བྱ། །ནུབ་ཕྱོགས་ཀྱི་ནི་གསུམ་པ་དང་། །བྱང་གི་ཐོག་མ་གཟུང་བྱས་ལ། །ཉི་མའི་གདན་གྱིས་གསལ་བར་བྱ། །དབང་ལྡན་གྱི་ནི་ཆུ་གཟུང་བྱ། །ནུབ་ཕྱོགས་ཀྱི་ནི་གསུམ་པ་དང་། །བྱང་གི་ཐ་མ་གཟུང་བར་བྱ། །དབང་ལྡན་གྲྭ་ཡི་ས་མཐའ་དང་། །བྱང་གི་ཐ་མ་གཟུང་བར་བྱ། །ནུབ་ཀྱི་ཐོག་མའི་ཡི་གེའོ། །སྔགས་ཀྱི་ཡི་གེ་གསུམ་པ་ལ། །རེའུ་མིག་གཉིས་པས་སྦྱར་བ་དང་། །དྲུག་པ་ལ་ཡང་དེ་ཉིད་སྦྱར། །དགུ་པ་ལ་ཡང་དེ་ཉིད་ཀྱིས། །བཅུ་གཅིག་པ་ལ་བདུན་པ་སྦྱར། །ཤེས་རབ་ཕ་རོལ་ཕྱིན་རང་ཉིད། །གསང་སྔགས་ཚིག་རྐང་བཞི་བཅུ་བརྒྱད། །དཔའ་བོ་ཡིས་ནི་གསུངས་པ་སྟེ། །སར་རྟོགས་འབྱུང་པོ་ཐམས་ཅད་དང་། །ལྷ་དང་ཀླུ་སོགས་སྐྲག་པར་འགྱུར། །གསང་སྔགས་འདི་ཡི་ནུས་པ་ནི། །མ་བྱུང་འབྱུང་བར་མི་འགྱུར་རོ། །སངས་རྒྱས་བྱང་ཆུབ་སེམས་དཔའ་སོགས། །གསང་སྔགས་མིང་གིས་གསུངས་པ་ནི། །འབུམ་ཕྲག་བཟླས་པའི་བདག་ཉིད་ཆེས། །མཉེས་ཤིང་དངོས་གྲུབ་གསོལ་བར་འགྱུར། །ༀ་ཡིག་དང་པོར་སྔགས་ཀུན་ལ། །ཧཱུྃ་ཧཱུྃ་ཕཊ་མཐར་དེ་བཞིན་དུ། །ཚིག་རྐང་རྣམས་ལ་སྦྱར་བ་དང་། །ཐུང་ངུ་དང་ནི་རིང་པོར་གདོན། །ལྷ་དང་འཇིག་རྟེན་སྐྱོང་བ་དང་། །གནོད་སྦྱིན་དབང་པོ་འཁོར་སྒྱུར་དང་། །སྐྱེ་གནས་བཞིར་སྐྱེས་སེམས་ཅན་རྣམས། །འདྲེན་པ་འཇམ་པའི་རྡོ་རྗེ་སེམས། །བཟླས་པ་ཙམ་གྱིས་འགྲུབ་པར་འགྱུར། །སྔགས་པས་བཀླགས་པས་འགྲུབ་པའང་ཡིན། །རྣལ་འབྱོར་མ་རྣམས་རིགས་རིམ་པས། །ཀུན་སྤྱོད་དུས་སུ་ཤེས་པར་བྱ། །ཡི་གེའི་ཐོག་མཐར་རིམ་པ་ཡིས། །ཚིག་རྐང་རེ་རེ་ལ་ཡང་ངོ་། །བགེགས་ཀུན་རྣམ་པར་གཞིག་དོན་དུ། །ཁྲི་ཕྲག་གཅིག་ནི་བཟླས་པར་བྱ། །ཨོཾ་ཨ་ཀ་ཨཱ་ཁ་ཨི་ག་ཨཱི་
གྷ་ཨུ་ང་ཨཱུ་ཙ་རཱི་ཚ་རྀུ་ཛ་ལྀ་ཛྷ་ལྀ་ཉ། ཨེ་ཊ་ཨཻ་ཋ་ཨོ་ཌ་ཨཽ་ཌྷ་ཨྃ་ཎ་ཨཿཏ་ཨཿཐ་ཨྃ་ད་ཨཽཾ་དྷ་ཨོཾ་ན། ཨེེཾ་པ་ཨེཾ་ཕ་ལཱྀཾ་བ་ལྀཾ་བྷ་རཱྀཾ་མ། རྀ་ཡ་ཨཱུྃ་ར་ཨུྃ་ལ་ཨཱིྃ་ཝ། ཨི་ཤ་ཨཱྃ་ཥ་ཨྃ་ས་ཨྃ་ཧ། ཨྃ་ཀྵ་ཧཿ ཀ་ཀཱ་ཁ་ཁཱ་ག་གཱ་གྷ་གྷཱ་ང་ངཱ་། ཙ་ཙཱ་ཚ་ཚཱ་ཛ་ཛཱ་ཛྷ་ཛྷཱ་ཉ་ཉཱ། ཊ་ཊཱ་ཋ་ཋཱ་ཌ་ཌཱ་ཌྷ་ཌྷཱ་ཎ་ཎཱ། ཏ་ཏཱ་ཐ་ཐཱ་ད་དཱ་དྷ་དྷཱ་ན་ནཱ། པ་པཱ་ཕ་ཕཱ་བ་བཱ་བྷ་བྷཱ་མ་མཱ། ཡ་ཡཱ་ར་རཱ་ལ་ལཱ་ཝ་ཝཱ། ཤ་ཤཱ་ཥ་ཥཱ་ས་སཱ་ཧ་ཧཱ། ཀྵ་ཀྵཱ་ཀྵ་ཀྵཱ་ཧཾ་ཧཱྃ་སྃ་སཱྃ་ཥྃ་ཥཱྃ ཤྃ་ཤཱྃ་ཝྃ་ཝཱྃ་ལྃ་ལཱྃ་རྃ་རཱྃ་ཡྃ་ཡཱྃ། མྃ་མཱྃ་བྷྃ་བྷཱྃ་བྃ་བཱྃ། ནྃ་ནཱྃ་ངྷྃ་དྷཱྃ་དྃ་དཱྃ་ཐྃ་ཐཱྃ་ཏྃ་ཏཱྃ། ཎྃ་ཎཱྃ་ཌྷྃཌྷཱྃ་ཌྃ་ཌཱྃ་ཋྃ་ཋཱྃཊྃ་ཊཱྃ། ཉྃ་ཉཱྃ་ཛྷྃ་ཛྷཱྃ་ཛྃ་ཛཱྃཚྃ་ཚཱྃ་ཙྃཙཱྃ། ངྃ་ངཱྃ་གྷྃ་གྷཱྃ་གཱྃ་ཁྃ་ཁཱྃ་ཀྃ་ཀཱྃ། ཀ་ཙ་ཁ་ཚ་ག་ཛ་གྷ་ཛྷ་ང་ཉ།ཀ་ཊ་ཁ་ཋ་ག་ཌ་གྷ་ཌྷ་ང་ཎ། ཀ་པ་ཁ་ཕ་ག་བ་གྷ་བྷ་ང་མ། ཡ་ཝ་ར་ལ་ས་ཧ་ཥ་ཤ་ཀྵ་ཨཿཨྃ་ཀ་ཧ་ཀ་ཧ་། ཀ་ས་ཀ་ས། ཀ་ཥ་ཀ་ཥ། ཀ་ཤ་ཀ་ཤ། ཀ་ཝ་ཀ་ཝ། ཀ་ལ་ཀ་ལ། ཀ་ར་ཀ་ར། ཀ་ཡ་ཀ་ཡ། ཀ་མ་ཀ་མ། ཀ་བྷ་ཀ་བྷ། ཀ་བ་ཀ་བ། ཀ་ཕ་ཀ་ཕ། ཀ་པ་ཀ་པ། ཀ་ན་ཀ་ན། ཀ་དྷ་ཀ་དྷ། ཀ་ད་ཀ་ད། ཀ་ཐ་ཀ་ཐ། ཀ་ཏ་ཀ་ཏ། ཀ་ཎ་ཀ་ཎ། ཀ་ཌྷ་ཀ་ཌྷ། ཀ་ཌ་ཀ་ཌ། ཀ་ཋ་ཀ་ཋ། ཀ་ཊ་ཀ་ཊ། ཀ་ཉ་ཀ་ཉ། ཀ་ཛྷ་ཀ་ཛྷ། ཀ་ཛ་ཀ་ཛ། ཀ་ཚ་ཀ་ཚ། ཀ་ཙ་ཀ་ཙ། ཀ་ང་ཀ་ང་། ཀ་གྷ་ཀ་གྷ། ཀ་ག་ཀ་ག །ཀ་ཁ་ཀ་ཁ། ཀུ་ཧུ་ཀུ་ཧུ། ཀུ་སུ་ཀུ་སུ། ཀུ་ཥུ་ཀུ་ཥུ། ཀུ་ཤུ་ཀུ་ཤུ། ཀུ་ཝུ་ཀུ་ཝུ། ཀུ་ལུ་ཀུ་ལུ། ཀུ་རུ་ཀུ་རུ། ཀུ་ཡུ་ཀུ་ཡུ། ཀུ་མུ་ཀུ་མུ། ཀུ་བྷུ་ཀུ་བྷུ། ཀུ་བུ་ཀུ་བུ། ཀུ་ཕུ་ཀུ་ཕུ། ཀུ་པུ་ཀུ་པུ། ཀུ་ནུ་ཀུ་ནུ། ཀུ་དྷུ་ཀུ་དྷུ། ཀུ་དུ་ཀུ་དུ། ཀུ་ཐུ་ཀུ་ཐུ། ཀུ་ཏུ་ཀུ་ཏུ། ཀུ་ཎུ་ཀུ་ཎུ། ཀུ་ཌྷུ་ཀུ་ཌྷུ། ཀུ་ཌུ་ཀུ་ཌུ། ཀུ་ཋུ་ཀུ་ཋུ། ཀུ་ཊུ་ཀུ་ཊུ། ཀུ་ཉུ་ཀུ་ཉུ། ཀུ་ཛྷུ་ཀུ་ཛྷུ། ཀུ་ཛུ་ཀུ་ཛུ། ཀུ་ཚུ་ཀུ་ཚུ། ཀུ་ཙུ་ཀུ་ཙུ། ཀུ་ངུ་ཀུ་ངུ་། ཀུ་གྷུ་ཀུ་གྷུ། ཀུ་གུ་ཀུ་གུ། ཀུ་ཁུ་ཀུ་ཁུ། བན་དྷ་ཡ་བན་དྷ་ཡ། བན་དྷཱ་པ་ཡ་བན་དྷཱ་པ་ཡ། གརྫྫ་གརྫྫ་གརྫྫ་ཡ་གརྫྫ་ཡ། ཤོ་ཥ་ཡ་ཤོ་ཥ་ཡ། ཏརྫྫ་ཡ་ཏརྫྫ་ཡ། སྥོ་ཊ་ཡ་སྥོ་ཊ་ཡ། བིད་དྷྭྃ་ས་ཡ་བིད་དྷྭྃ་སཡ། མོ་ཧ་ཡ་མོ་ཧ་ཡ། ཏྲཱ་ས་ཡ་ཏྲཱ་ས་ཡ། མཱ་ར་ཡ་མཱ་ར་ཡ། ཀྃ་པཱ་ཝ་ཡ་ཀྃ་པཱ་ཝ་ཡ། དུ་ར་དུ་ར། ཁུ་ར་ཁུ་ར། བྷ་ར་བྷ་ར། ཛ་ར་ཛ་ར། བི་ཥ་བི་ཥ། ཧཱུྃ་ཧཱུྃ་ཧཱུྃ་ཧཱུྃ། ད་ཧ་ད་ཧ། པ་ཙ་པ་ཙ། བྷཉྫ་བཉྫ། མརྡྡ་
ཡ་མརྡྡ་ཡ། ཧྲེཾ་ཧྲིཾ། ཙ་ལ་ཙ་ལ། མཱ་ཙ་ལ་མཱ་ཙ་ལ། ཀྲུ་ར་ཙེ་ཏ་ཡ་ཕཊ། ཤ་ཏྲཱུྃ་ནི་བཱ་རཱ་ཡ་ཧཱུྃ། མེ་གྷ་ནི་བཱ་རཱ་ཡ་ཧྲཱིཾ་མོ་ཙ་ཡ་མོ་ཙ་ཡ། སྟམྦྷ་ཡ་སྟམྦྷ་ཡ། བྷཀྵ་བྷཀྵ། དརྦྤ་ཡ་དརྦྤ་ཡ།གཱུ་ཌྷཱ་ན་ཏྲ་མཱ་ལཱ་བ་ལམ་བི་ནི་ཁེ་ཙ་རཱ་ཡ་ཧཱུྃ་བྷུ་ཙ་རཱ་ཡ་ཨཱཿཔཱ་ཏཱ་ལ་ཙ་རཱ་ཡ་ཨོཾ། ཛ་ལ་ཙ་རཱ་ཡ་བྃ། སྠ་ལ་ཙ་རཱ་ཡ་ལྃ། པརྤ་ཏ་ནི་བ་སི་ནི་ཧཱུཾཿ། ནཱ་གཱ་སཔྟ་པཱ་ཏཱ་ལ་ག་ཏགྲྀཧྞ་གྲྀཧྞ་ཛྙཽཾ་ཛྙཽཾ་རྫྙཱ་རྫྙཱ། ཀ་ར་ཀ་ར། ཀུ་རུ་ཀུ་རུ། ཁ་ར་ཁ་ར། ཁུ་རུ་ཁུ་རུ། ག་ར་ག་ར། གུ་རུ་གུ་རུ། གྷ་ར་གྷ་ར། གྷུ་རུ་གྷུ་རུ། ང་ར་ང་ར། ངུ་རུ་ངུ་རུ། ཙ་ར་ཙ་ར། ཙུ་རུ་ཙུ་རུ། ཚ་ར་ཚ་ར། ཚུ་རུ་ཚུ་རུ། ཛ་ར་ཛ་ར། ཛུ་རུ་ཛུ་རུ། ཛྷ་ར་ཛྷ་ར། ཛྷུ་རུ་ཛྷུ་རུ། ཉ་ར་ཉ་ར། ཉུ་རུ་ཉུ་རུ། ཊ་ར་ཊ་ར། ཊུ་རུ་ཊུ་རུ། ཋ་ར་ཋ་ར། ཋུ་རུ་ཋུ་རུ། ཌ་ར་ཌ་ར། ཌུ་རུ་ཌུ་རུ། ཌྷ་ར་ཌྷ་ར། ཌྷུ་རུ་ཌྷུ་རུ། ཎ་ར་ཎ་ར། ཎུ་རུ་ཎུ་རུ། ཏ་ར་ཏ་ར། ཏུ་རུ་ཏུ་རུ། ཐ་ར་ཐ་ར། ཐུ་རུ་ཐུ་རུ། ད་ར་ད་ར། དུ་རུ་དུ་རུ། དྷ་ར་དྷ་ར། དྷུ་རུ་དྷུ་རུ། ན་ར་ན་ར། ནུ་རུ་ནུ་རུ། པ་ར་པ་ར། པུ་རུ་པུ་རུ། ཕ་ར་ཕ་ར། ཕུ་རུ་ཕུ་རུ། བ་ར་བ་ར། བུ་རུ་བུ་རུ། བྷ་ར་བྷ་ར། བྷུ་རུ་བྷུ་རུ། མ་ར་མ་ར། མུ་རུ་མུ་རུ། ཡ་ར་ཡ་ར། ཡུ་རུ་ཡུ་རུ། ར་ར་ར་ར། རུ་རུ་རུ་རུ། ལ་ར་ལ་ར། ལུ་རུ་ལུ་རུ། ཝ་ར་ཝ་ར། ཝུ་རུ་ཝུ་རུ། ཤ་ར་ཤ་ར། ཤུ་རུ་ཤུ་རུ། ཥ་ར་ཥ་ར། ཥུ་རུ་ཥུ་རུ། ས་ར་ས་ར། སུ་རུ་སུ་རུ། ཧ་ར་ཧ་ར། ཧུ་རུ་ཧུ་རུ། ཀྵ་ར་ཀྵ་ར། ཀྵུ་རུ་ཀྵུ་རུ། ཧྃ་ཧཱྃ་ཧིཾ་ཧཱིཾ་ཧུྃ་ཧཱུྃ། ཧྃ་ཧེཾ་ཧྃཧྃ་ཧྃ་ཧཱྃ གརྦྷ་གརྦྷ། ཛཱ་ཏི་ཛཱ་ཏི། དེ་བཱ་ནྃ་དཱ་མ་ཡ་དཱ་མ་ཡ། སརྦ་ཤ་རཱི་རཱ་ཡ་ཧཱུྃ་ཛ་ཡ་ཛ་ཡ་ཧཱུྃ། བི་ཛ་ཡ་བི་ཛ་ཡ་ཧཱུྃ། ས་ར་ས་ར་ཧཱུྃ། བི་ས་ར་བི་ས་ར་ཧཱུྃ། ཨགྣ་ཡེ་ཧཱུྃ། བ་རུ་ཎེ་ཧཱུྃ། ཨ་ན་ལཱ་ཡ་ཧཱུྃ། བཱ་རཱ་ཡ་ཧཱུྃ། ཨཱ་ཀཱ་ཤཱ་ཡ་ཧཱུྃ། སརྦ་རོ་གོ་པ་ཧ་རཱ་ཡ་ཧཱུྃ། བི་ཥ་བྷ་ཀྵ་ཎཱ་ཡ་ཧཱུྃ། ཡན་ཏྲ་བཱ་ཧ་ནཱ་ཡ་ཧཱུྃ། ཀཱ་ལཱ་གྣ་ཡེ་ཧཱུྃ། དེ་བཱ་ཡ་ཧཱུྃ། ཡ་མཱ་ཡ་ཧཱུྃ། ཀུ་བེ་རཱ་ཡ་ཧཱུྃ། དེ་ཏྱཱ་ཡ་ཧཱུྃ། ཨིནྡྲཱ་ཡ་ཧཱུྃ། བྷཱུ་ཏཱ་ཡ་ཧཱུྃ། སརྦ་ས་ཏྭཱ་ཡ་ཧཱུྃ། བརྔྷ་ཙ་ཀྲཱ་ཡ་ཧཱུྃ། དྷརྨ་དྷ་ཏ་ཝེ་ཧཱུྃ། མུ་ཁཱ་ཡ་ཧཱུྃ།ནེ་ཏྲཱ་ཡ་ཧཱུྃ། ཀ་པཱ་ལ་མཱ་ལི་ནེ་ཧཱུྃ། བྷུ་ཛཱ་ཡ་ཧཱུྃ། ཨ་སྟྲཱ་ཡ་ཧཱུྃ། ཙ་ར་ཎཱ་ཡ་ཧཱུྃ། ཛ་ཊཱ་མུ་ཀུ་ཊཱ་ཡ་མ་ས་མ་ས། ག་ས་ག་ས། ར་ས་ར་ས། བྷ་ར་བྷ་ར། མ་ཊ་མ་ཊ། ཏྲ་ཊ་ཏྲ་ཊ། གྷ་ཊ་གྷ་ཊ། མུཉྩ་མུཉྩ། གྷོ་རཱན་
དྷ་ཀཱ་ར་པྲི་ཡཱ་ཡ་ཕིྃ་ཕིྃ། ཕུ་ད་ཕུ་ད། ར་མ་ར་མ། པ་ར་མཱརྠ་རཱུ་པི་ཎེ་ཤཱན་ཏི་ཀ་རཱ་ཡ་པུཥྚི་བརྡྷ་ནཱ་ཡ་ལོ་ཀ་པཱ་ལ་རཱུ་པི་ཎེ། སརྦ་ཤ་རཱི་ར་རཱུ་པཱ་ཡ་བྲྀ་ཀྵ་གུལྨོ་ལ་ཏཱ་ཡ་སརྦ་རཱུ་པི་ཎཱི་སརྦ་བསྟུ་ནེ་མཱ་ར་ཎཱ་ཡ་མཱ་རཱ་པ་ཎ་རཱུ་པཱ་ཡ་བྷ་ཀྵ་ཡ་བྷ་ཀྵ་ཡ་བྷ་ཀྵ་ན་རཱུ་པ་ཡ་ནི་རོ་པ་མཱ་ཡ་ནི་རོ་པ་མ་སུ་ཁ་བེ་ཧ་ས་ཧ་ས། བི་ལ་ས་བི་ལ་ས་ནྲྀ་ཏྱ་ནྲྀ་ཏྱ་ནྲྀ་ཏྱཱ་པ་ཡ་ནྲྀ་ཏྱཱ་པ་ཡ་ཏྭི་ནྡྲི་ཡ་ཡོ་གཱ་ཡ་ནི་སྭ་བྷཱ་ཝ་མ་ཧཱཏྨ་ནེ་ཤསྟྲ་དྷ་ར་ནི་ཝ་ར་ཎཱ་ཡ་ནཱ་ནཱ་བྷི་ཙ་ར་ཙྪེ་ད་ནི་ཙུམ་བ་ཙུམ་བ། ཧུ་ལུ་ཧུ་ལུ། ཙུ་ལུ་ཙུ་ལུ། ཧཱུྃ་ཧ་ཧཱུྃ་ཧཱ། ཧཱུྃ་ཧི་ཧཱུྃ་ཧཱི། ཧཱུྃ་ཧུ་ཧཱུྃ་ཧཱུ། ཧཱུྃ་ཧེ་ཧཱུྃ་ཧཻ། ཧཱུྃ་ཧོ་ཧཱུྃ་ཧཽ། ཧཱུྃ་ཧཾ་ཧཱུྃ་ཧཿ། ཧུ་ཧུྃ་ཧྲིཾི་ཧྲཱིཾ། ཛུྃ་ཛཱུྃ་ཀྲོཾ་ཀྲོོཾ་ཕི་ཕཱིཾ་ཕུྃ་ཕཱུྃ་ཕེཾ་ཕེེཾ་ཕོཾ་ཕོོཾ་ཕྃ་ཕཱྃ། ཕཿཕཱཿཀུ་ཙ་ཀུ་ཙ། ཏྲ་ཊ་ཏྲ་ཊ། མ་ཌ་མ་ཌ། ར་ཋ་ར་ཋ། ད་ཋ་ད་ཋ། ཛ་ཋ་ཛ་ཋ། མ་ད་ན་མ་ད་ན། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། རྩ་བའི་སྔགས་སོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྩ་བའི་སྔགས་བཏུ་བའི་ཆོ་གའི་མཚན་ཉིད་ཀྱི་ལེའུ་སྟེ་བཅུ་དྲུག་པའོ།། །།དེ་ནས་གཞན་ལྷུར་བཤད་བྱ་བ། །ལུས་ཅན་རྣམས་ཀྱི་གོ་ཆ་སྟེ། །རྡོ་རྗེ་སེམས་དཔའ་སྙིང་ག་རུ། །ཨཱ་ལི་དང་སྦྱོར་རྒྱས་གདབ་བྱ། །རྡོ་རྗེ་སྙིང་པོའི་ཡེ་ཤེས་དང་། །སེམས་དཔའ་ནམ་མཁའ་དང་གཅིག་པ། །སྙིང་ག་རྣམ་པར་ཤེས་ཕྲ་མོ། །ཨཱ་ལི་གཏུམ་མོ་ཡུམ་ཡིན་ཏེ། །སྦྱོར་བའང་མི་འགྱུར་ཞེས་བྱ་བ། །འདི་ལྟར་དབང་པོ་ཀུན་རྒྱས་གདབ། །དེ་ཕྱིར་སྲུང་བའང་ཨོཾ་ཧ་ཡི། །ཡིག་གང་རྟག་ཏུ་འཇོམས་མེད་པའོ། །ལྷག་མ་རྣམ་སྣང་བརྗོད་པའི་མཐར། །རྡོ་རྗེ་བསྐྱོད་པ་ལས་སྒྲའོ། །དེའི་ཕྱིར་ཇི་ལྟར་མངོན་པར་ནི། །བརྗོད་པ་ལས་ནི་བཞེངས་པའི་གཟུགས། །མི་རྣམས་ཀྱི་ནི་སྙིང་དབུས་སུ། །སུམ་ཅུ་བདུན་བདག་ཉིད་དཀྱིལ་འཁོར། །རྡོ་རྗེ་ཕག་མོས་འཁྱུད་པ་ཡང་། །ལྟེ་བའི་འཁོར་ལོར་སྲུང་བ་དེ། །ༀ་བྃ་གྱི་ནི་སྔགས་ཀྱི་གཟུགས། །དབུ་མ་མཛེས་དང་རྡོ་རྗེ་འཛིན། །ཁ་སྦྱར་འདི་ནི་སྲུང་བ་ཆེ། །མ་བྱུང་དང་པོར་ཡང་དག་བྱུང་། །འཁོར་ལོ་
ཀུན་གྱི་གསང་སྔགས་ཀྱང་། །དངོས་གྲུབ་ཀུན་གསོལ་བཤད་པར་བྱ། །ཨོཾ་ཧ་པྃ་ཧཱ་བཱྃ་ཧི་བི་ཧཱི་བཱི་ཧུ་བུ་ཧཱུ་བཱུ་ཧེ་བེ་ཧཻ་བཻ་ཧོ་བོ་ཧཽ་བཽ་ཧཾ་བྃ་ཧཿབཿཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་ཧཱ་སྭཱ་ཧཱ། ཐུང་དང་རིང་པོའི་རང་བཞིན་གྱིས། །ཐམས་ཅད་ཤེས་རབ་ཐབས་བདག་ཉིད། །གང་ཚེ་རྡོ་རྗེ་ཕག་མོ་ནི། །གཙོ་མོའི་རྣམ་པར་གནས་པ་ནི། །ཨོཾ་པྃ་ཞེས་བྱ་ལ་སོགས་པའི། །སྔགས་ཀྱི་འང་ཡི་གེ་སྦྱིན་པར་བྱ། །ཡེ་ཤེས་འཁོར་ལོ་སྐྱེ་གནས་ཏེ། །གདན་ཀྱང་གསང་བ་པར་འདོད་དོ། །ཐམས་ཅད་བདེ་བའི་རྣམ་པར་འགྱུར། །བདེ་བ་བརྟན་དང་འགྲོ་བ་དང་། །བདེ་བ་དཀར་པོ་བདེ་བ་གནག །བདེ་བ་ཀུན་དུ་སྐྱེས་དེ་བཞིན། །བདེ་བ་ཤེས་རབ་བདེ་བ་ཐབས། །རྡོ་རྗེ་སེམས་དཔའ་བདེ་བར་དྲན། །རང་བྱུང་བདེ་བ་མི་རྣམས་ལ། །རང་ཉིད་དཀྱིལ་འཁོར་རྫོགས་ལྡན་དུའོ། །རྫོགས་ལྡན་རྒྱུད་དུ་སྲུང་འདི་ནི། །རྫོགས་ལྡན་ཉིད་ནི་འབྱུང་བའོ། །འཇིག་རྟེན་སྣ་ཚོགས་རྫོགས་ལྡན་ཤེས། །སྣ་ཚོགས་ཁམས་རྫོགས་ལྡན་དེ་བཞིན། །སྣ་ཚོགས་འཇིག་རྟེན་ཁམས་རྣམས་སུ། །དེ་ལྟར་དུས་ཀུན་ཤེས་པར་བྱ། །དུས་གཅིག་ལ་ནི་རྫོགས་ལྡན་སོགས། །འཇིག་རྟེན་ཁམས་རྣམས་སུ་འབྱུང་མིན། །བཅོམ་ལྡན་འདས་ནི་བསྙེན་བྱས་པས། །ཀུན་དུ་བདེ་བས་ཁྱབ་པར་སྤྱོད། །གང་དུ་རྩོད་དུས་དེར་རྫོགས་ལྡན། །གང་དུ་རྫོགས་ལྡན་དེར་རྩོད་དུས། །དེར་ནི་གསུམ་ལྡན་དང་གཉིས་ལྡན། །རེ་རེ་ཡི་ནི་གཉིས་ལྡན་ཏེ། །རྣལ་འབྱོར་རྒྱུད་ནི་སུམ་ཅུ་དྲུག །མ་ལུས་འདུས་ལས་ཡང་བྱུང་བའོ། །དཔའ་བོ་ཐམས་ཅད་མཉམ་སྦྱོར་བས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྡོ་རྗེ་སེམས་དཔའ་དང་ཕག་མོའི་གོ་ཆ་སྐྱེད་པའི་མཚན་ཉིད་ཀྱི་ཆོ་ག་སྟེ་ལེའུ་བཅུ་བདུན་པའོ།། །།དེ་ནས་སླར་ཡང་གོ་ཆ་ཡི། །སྲུང་བ་རྣམ་སྣང་མཛད་ཀྱི་སྟེ། །མགོ་བོར་རྒྱས་གདབ་དེ་ཡི་ནི། །གསང་སྔགས་ན་མཿཧི་ཉིད་དོ། །གྱེན་དུ་འགྲོ་དུས་རྣལ་འབྱོར་ནི། །གང་གང་བདེ་ལས་བྱུང་བའི་ལས། །དེ་དེའི་དུས་སུ་ཤེས་བྱ་སྟེ། །གུས་
པས་མངོན་པར་བསྲུང་བའི་སྔགས། །དྲི་མེད་མགོ་བོར་སྦྱར་བྱ་སྟེ། །འདི་ནི་བདེ་ཆེན་འཁོར་ལོའོ། །རྣལ་འབྱོར་གདན་དུ་ཤེས་བྱ་སྟེ། །གཤིན་རྗེ་མ་ཡིས་འཁྱུད་དེ་བཞིན། །ཨོཾ་ཡྃ་སྔགས་ལས་སྐྱེས་བདག་ཉིད། །ཤེས་རབ་ཐབས་བདག་རྒྱུ་ཡིས་ནི། །ཡཱ་རོ།མཱི་ཙ། ནཱི་ནི། དེ་ལྟར་ཁམས་རྣམས་སྦྱར་བར་བྱ། །ལུས་ལ་སོགས་པ་ཀུན་ཐིམ་པ། །ཟུང་དང་ཟུང་དུ་འབྱུང་བར་འགྱུར། །དེ་ཕྱིར་གསུམ་པའི་ཡེ་ཤེས་ནི། །གཤིན་རྗེ་མ་ནི་འབྱུང་བར་འགྱུར། །འཕོ་བ་ལྟ་བུ་བདེ་བའི་ཐབས། །གསུམ་ལྡན་རྐང་པ་གཅིག་ལས་སོ། །སྣང་བ་གང་དུ་འདོད་པར་ནི། །རྣམ་པར་སྣང་མཛད་རང་ཉིད་འགྲོ། །གཙོ་བོའི་རྣམ་པ་ཡི་ནི་གཟུགས། །སླར་ཡང་སུམ་ཅུ་བདུན་དག་ཏུའོ། །སྔགས་རྣམས་ཀྱི་ཡིག་ལས་བྱུང་བ། །དཔྲལ་བའི་དབུས་སུ་ཤེས་པར་བྱ། །སྔོན་དུ་བཤད་པའི་སྔགས་ལ་འདིར། །གང་ཞིག་གང་གི་དང་པོའི་ཡིག །འདི་ཡི་སྔགས་ཀུན་རིམ་པ་ཡིས། །དེ་ནི་དེ་དང་དེའི་ཤེས་བྱ། །ལྷག་མ་ཐམས་ཅད་མཉམ་པ་སྟེ། །བསྒོམ་པ་དང་ནི་བཟླས་པ་མཆོག །ཐམས་ཅད་ཡོད་མིན་མེད་པའང་མིན། །ཀུན་འགྲོ་ཐམས་ཅད་པ་མིན་པའོ། །སྒྱུ་མ་ཡིས་ནི་ཐམས་ཅད་རྨོངས། །མཁས་པ་སྒྱུ་མ་ཉིད་ཀྱིས་གྲོལ། །ཕན་པ་སྒྱུ་མ་ཕན་ཡེ་ཤེས། །སེམས་བསྐྱེད་པ་ཡང་ཕན་པའོ། །དེ་ལྟར་ན་མཿཧིའི་དོན་ཏོ། །མཁས་པ་ལྷག་མ་བདེ་བ་སྟེ། །རྣམ་པར་སྣང་མཛད་འབར་འགྱུར་བས། །བདེ་དེ་རྣམ་པར་སྣང་མཛད་ཀྱིའོ། །གཤིན་རྗེ་གནོན་པའི་རིག་མ་སྟེ། །གཤིན་རྗེ་མ་དེ་བརྗོད་པར་འགྱུར། །གང་ཕྱིར་སྲུང་བ་འདི་དྲན་པས། །དུས་ཀུན་དུ་ནི་བྱ་བ་བྱ། །སྙིང་ག་དཔྲལ་བའི་ཡེ་ཤེས་ནི། །གཉིས་མེད་ཡེ་ཤེས་མཚན་ཉིད་དོ། །རྣལ་འབྱོར་མ་རྣམས་དོན་ཆེན་ཕྱིར། །རྒྱུད་རྣམས་ཀུན་ནི་བསྐྱེད་པའོ། །རྒྱུད་ཐམས་ཅད་དུ་གཞན་པ་ཡི། །རྣལ་འབྱོར་དག་བྱེད་ཡོད་མ་ཡིན། །རྒྱུད་འདི་ཡི་ནི་རྣལ་འབྱོར་ཆེ། །རྒྱུད་ཐམས་ཅད་དུ་དག་བྱེད་ཡིན། །དཀྱིལ་འཁོར་གཙོ་མོ་གཤིན་རྗེ་མས། །དེ་ནས་སླར་ཡང་བྱ་བ་ཡང་། །མངལ་དུ་ཞུགས་ལས་གྲོལ་བ་དང་། །སྐྱེད་པ་དང་ནི་འཕོ་བ་གཉིས། །གཤིན་རྗེ་མ་དང་རྣམ་སྣང་མཛད། །དེར་
ནི་གཟུགས་དང་གཟུགས་མེད་འགྱུར། །བདེ་དང་སྡུག་བསྔལ་ཅན་ཡེ་ཤེས། །ལྷ་རྫས་ཕྱག་རྒྱས་རོ་མཉམ་མོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། རྣམ་པར་སྣང་མཛད་ལ་སོགས་པའི་གོ་ཆ་སྲུང་བའི་ཆོ་ག་སྟེ། ལེའུ་བཅྭ་བརྒྱད་པའོ།། །།དེ་ནས་པདྨ་གར་དབང་གི། །གོ་ཆའི་སྲུང་བ་བཀའ་སྩལ་པ། །འདོད་ཆགས་མེ་ནི་གསལ་བཞིན་པ། །སྤྱི་བོར་འགྲོ་བ་སྟོབས་ཆེན་ཏེ། །སྭཱ་ཧཱ་ཧཱུྃ་གི་སྔགས་ཡིག་དང་། །ཧྲིཾ་མོཾ་རྨོངས་མའི་སྒྱུ་མ་ཡིས། །ཤེས་རབ་ཐབས་ཀྱི་རང་བཞིན་ནི། །ནམ་མཁའི་འཁོར་ལོའི་གཙོ་བོའོ། །ཁ་ཡི་པདྨར་རྨོངས་བྱེད་མའང་། །རོ་དང་རོ་མིན་ཅན་སྲུང་བ། །ལྕེ་དང་ལྕེ་ནི་འདུས་པ་ལ། །ཐིག་ལེ་དེ་མྱང་རྣལ་འབྱོར་པས། །མཆོག་ཏུ་དགའ་བ་སྐྱེས་པ་ན། །ཡེ་ཤེས་ཅན་མེད་ལྡན་པའང་མེད། །མི་དང་མི་མོ་ལ་བསྟེན་པས། །འདུལ་བ་ཞེས་བྱ་རང་སེམས་སོ། །དགའ་བའི་ངག་གི་ཚོགས་རྣམས་ནི། །ཆོས་སྒྲོགས་པ་ཡི་རྒྱུ་ཡིས་སོ། །བྱང་ཆུབ་སེམས་ཀྱི་བུ་ག་ནི། །དེ་རུ་དབུགས་ནི་རྒྱུ་བའོ། །བུ་ག་རྣམ་པ་སྣ་ཚོགས་བཤད། །དེ་རྣམས་སུ་དབུགས་མངོན་རྒྱུས་སོ། །བུ་ག་ཀུན་དུ་ཧྲིཾ་སྦྱིན་བྱ། །མི་འགྱུར་མཆོག་ཏུ་ཞི་བའོ། །རྨོཾ་ཡྃ་ཞིང་སྟེ་མགོ་བོ་ལ། །མི་འགྱུར་མཆོག་ལས་འདུ་བའོ། །རྨོངས་པ་ཡིས་ནི་སྲིད་སྦྱོར་བ། །ཡང་དག་ལམ་དུ་རབ་འཛུད་བྱེད། །དེས་ན་རྨོངས་བྱེད་མར་གྲགས་ཏེ། །སྲིད་པའི་འཁོར་ལོ་འཇོམས་མའོ། །སྲིད་མེད་སྲིད་པ་མཆོག་ཀྱང་མེད། །དེ་ནི་ཁ་སྦྱར་དུ་བརྗོད་དོ། །སྔགས་དེ་ཉིད་ཀྱི་སྦྱོར་བ་ཡིས། །དཀྱིལ་འཁོར་སུམ་ཅུ་བདུན་བདག་ཉིད། །གཙོ་བོ་དཔའ་བོའམ་ལྷ་མོ་སྟེ། །སྤྱི་གཙུག་དང་ནི་ཁའི་དབུས་སུ། །ཐམས་ཅད་དུ་ནི་སྲུང་བྱེད་དང་། །རྟོག་པ་ཙམ་ནི་འཇོམས་བྱེད་པའོ། །པདྨ་དོན་དམ་པའི་ཡེ་ཤེས། །སངས་རྒྱས་རྣམས་ཀྱི་བྱང་ཆུབ་གཟུགས། །ཀུན་རྫོབ་ཤེས་བྱེད་ཤེས་བྱ་ནི། །གར་དབང་ཕྱུག་ཏུ་བརྗོད་པ་ཉིད། །བྱང་ཆུབ་སེམས་དཔའ་རྣམས་ཀྱི་
གཟུགས། །བྱང་ཆུབ་རང་གིས་ཐམས་ཅད་རྟོགས། །སྤྲུལ་པ་ཀུན་དུ་རྨོངས་གྱུར་པས། །ལྷ་མོ་རྨོངས་བྱེད་མར་འགྱུར་རོ། །པདྨ་ཆོས་ཀྱི་འབྱུང་གནས་འགྱུར། །གར་གྱི་དབང་པོ་རྡོ་རྗེ་ཡིན། །དབང་ཕྱུག་ལྷན་སྐྱེས་ཤེས་བྱ་སྟེ། །བྱང་ཆུབ་སེམས་ནི་གཡོ་བའོ། །རང་བཞིན་མེད་དང་བདེ་རྟག་ཉིད། །དེ་ནི་ཁ་སྦྱར་དུ་བརྗོད་དོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་པདྨ་གར་གྱི་དབང་ཕྱུག་ལ་སོགས་པའི་སྲུང་བ་གོ་ཆའི་སྔགས་གཏན་ལ་དབབ་པ་སྟེ་ལེའུ་བཅུ་དགུ་པའོ།། །།དེ་ནས་ཧེ་རུ་ཀའི་སྲུང་བ། །གོ་ཆ་སླར་ཡང་བཤད་པར་བྱ། །མགྲིན་དང་དཔུང་པར་འོང་བ་སྟེ། །རྣལ་འབྱོར་མ་ནི་མགོ་བོར་རོ། །བཽ་ཥ་ཊ་ཧེ་སྔགས་མཉམ་མེད་པ། །འབྱུང་དང་འབྱུང་ལས་བྱུང་ལ་སྲུང་། །ཧྲེཾེ་ཧྲིཾ་ཀུན་དུ་བསྐྱོད་མའི་སྔགས། །དེ་ཕྱིར་ཤེས་རབ་ཐབས་བདག་ཉིད། །ཧེ་ནི་སེམས་བདག་ཉིད་རྣལ་འབྱོར། །སླར་ཡང་རུ་ནི་ངག་བདག་ཉིད། །ཀ། ལུས་ཀྱི་རང་བཞིན་ཉིད་རྣལ་འབྱོར། །ས་འོག་ས་སྟེང་མཐོ་འཇིག་རྟེན། །བདེ་བའི་ཐོག་མཐའ་དབུས་སུ་ནི། །བཽ་ཥ་ཊ་ཧེ་རྣམས་ས་བོན་ཅན། །ཧྲེཾེ་ཧྲིཾ་འོག་དང་སྟེང་ཤེས་བྱ། །སྲོག་གི་རླུང་ནི་བསྐྱོད་པ་ཡིན། །གཏོང་དང་དགའ་བ་ལ་གོམས་དང་། །བུམ་པ་ཅན་གྱི་སྦྱོར་བའི་དུས། །དེ་ཡི་དུས་སུ་འཁོར་ལོ་ནི། །སུམ་ཅུ་བདུན་བདག་ཉིད་ཤེས་བྱ། །དེ་ལྟར་དུས་ནི་བཞི་རྣམས་ཀྱི། །ཇི་ལྟའི་རིམ་པར་དེ་འདོད་དོ། །སྔགས་དེ་ཉིད་ཀྱི་རྣལ་འབྱོར་གྱིས། །མཆོད་པ་མཆོག་ཏུ་རྨད་དུ་བྱུང་། །དེ་ལྟར་རྣམ་ཤེས་བརྒྱད་རྣམས་ཀྱི། །གཅིག་དང་གཉིས་དང་གསུམ་དང་ལྔ། །ལེའུ་བཞི་ཡི་རྣལ་འབྱོར་གྱིས། །ཇི་ལྟའི་རིམ་པས་རྟོགས་པའོ། །སྤྱོད་པའི་རྒྱུད་ནི་གསུམ་པ་ཡི། །ལེའུ་རུ་ནི་བྱུང་བ་དང་། །བྱ་བ་ལེའུ་བཞི་པ་རུ། །རྒྱུད་ནི་རང་ཉིད་བསྐྱོད་པ་དང་། །དེ་ཁོ་ན་ཉིད་གདན་སྐྱེས་པ། །སླར་ཡང་གསུམ་པར་བརྗོད་པ་ཡིན། །བཞི་པ་རུ་ནི་གཞན་གྱི་གདན། །སྐྱེས་པ་ཡེ་ཤེས་ཕ་རོལ་འགྲོ། །བསྲུང་བ་
འགྲོ་བ་བཞི་རྣམས་ཀྱི། །ལྷ་དང་མི་དང་འདྲེ་དང་ནི། །ཀླུ་ཡི་འགྲོ་བར་མཁས་པ་ཡིས། །ཤེས་བྱ་ཀུན་དུ་རྒྱུ་རྣམས་ཀྱིའོ། །དེ་དེའི་རང་བཞིན་དུས་རྣམས་ནི། །བསྐལ་པ་བཟང་པོར་ཆུད་པ་ཡི། །དེ་བཞིན་གཤེགས་པ་འགྲོངས་མི་འགྱུར། །སླར་ཡང་འགྲོངས་མེད་སྐྱེ་མི་འགྱུར། །རང་བཞིན་ཤེས་པར་གྱུར་ནས་ནི། །སེམས་ཅན་རང་གི་རང་བཞིན་འགྱུར། །ལྟ་བ་བདུན་ཅུ་གཉིས་རྣམས་ནི། །ཀུན་དུ་སྐྱོད་མའི་ལས་ཀྱིས་སོ། །ཉན་ཐོས་རྣམས་ཀྱི་ལྟ་བ་ལྔ། །རང་སངས་རྒྱས་ཀྱི་ལྟ་བ་གཉིས། །རྣལ་འབྱོར་སྤྱོད་པ་པ་ཡི་བདུན། །དབུ་མ་པ་མཆོག་རྣམས་ཀྱི་བརྒྱད། །བཅུ་དྲུག་ཕ་རོལ་ཕྱིན་རྣམས་ཀྱི། །གསང་སྔགས་ཐེག་པའི་སུམ་ཅུ་དྲུག །བདུན་དང་བརྒྱད་པའི་གཉིས་ཀྱིས་དམན། །ཀུན་ཀྱང་སྔགས་ཀྱི་ཐེག་པའོ། །རྩ་ཡི་ཀུན་སྤྱོད་རྩ་བ་ཅན། །བླ་མའི་དྲིན་ལས་ཤེས་པར་བྱ། །ཧེ་རུ་ཀ་མ་རྩ་བ་མཛད། །སྲིད་དང་མྱ་ངན་འདས་དབུས་བཞུགས། །དཔའ་བོ་ཐམས་ཅད་མཉམ་སྦྱོར་བས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཧེ་རུ་ཀ་ལ་སོགས་པའི་སྲུང་བའི་གོ་ཆའི་ཆོ་གའི་ལེའུ་སྟེ་ཉི་ཤུ་པའོ།། །།དེ་ནས་རྡོ་རྗེ་ཉི་མ་ཡི། །སྲུང་བ་བཤད་པར་བྱ་བ་ནི། །ཧཱུྃ་ཧཱུྃ་ཧོ་ཡི་སྔགས་འདི་ཡིས། །མིག་གི་དབང་པོའི་དབུས་སུ་སྟེ། །ཧཱུྃ་ཡིག་གཉིས་ཀྱི་སྦྱོར་བ་ཡིས། །ལྟ་བ་ཐམས་ཅད་མཐོང་གྱུར་པའོ། །ཡེ་ཤེས་རྣམ་ཤེས་མཆི་མ་ཡིས། །འོག་དང་སྟེང་དུ་ཐིམ་པ་ལས། །ལྟ་བ་བདུན་ཅུ་རྩ་གཉིས་ནི། །དུས་གཅིག་ཏུ་ནི་མཐོང་བར་འགྱུར། །མགྲིན་པའི་བུ་ག་རུ་ནི་ལྔ། །གསང་བའི་རྡོ་རྗེ་ཅན་དུ་གཉིས། །བདུན་ནི་སྙིང་གར་ཡང་དག་བཤད། །བརྒྱད་ནི་ཀླད་པའི་རྒྱས་སུའོ། །བཅུ་དྲུག་གཙུག་ཏོར་དུ་ནི་འགྱུར། །ལྟེ་དཀྱིལ་འཁོར་དུ་སུམ་ཅུ་དྲུག །མ་ལུས་རང་གི་ལས་ཀྱིས་བསྐྱེད། །རང་གི་ལྟ་བ་འདིར་མཐོང་འགྱུར། །འདི་དེ་བདག་གི་གདན་ཡིན་ཏེ། །ས་གསུམ་ལྟ་བུར་མཐོང་བ་ཡིན། །ཧོ་ཡིག་སེམས་དཔའ་མ་ཀུན་གྱི། །མཐའ་ཡས་པ་ཡི་སངས་རྒྱས་ཞིང་། །རྡོ་རྗེ་ཉི་མས་ཁྱབ་པར་
གྱུར། །དེ་ཕྱིར་མིག་ནི་སྲུང་བྱེད་པའོ། །ཀུན་དུ་སྐྲག་བྱེད་མས་འཁྱུད་པ། །ཧཱུྃ་ཧཱུྃ་གསང་སྔགས་སྒྲ་སྒྲོགས་མ། །སྐྲག་པ་ཡི་གེ་གཉིས་ཀྱིས་ནི། །སྡིག་པ་ཐམས་ཅད་མཐར་བྱེད་པའོ། །སུམ་ཅུ་བདུན་བདག་དཀྱིལ་འཁོར་གྱི། །དབུས་སུ་གཉིས་ནི་བསྒོམ་པར་བྱ། །སྔོན་གསང་སྔགས་ཀྱི་གཟུགས་ཀྱིས་ནི། །ལྟ་རྣམས་ཀུན་དུ་འབྱུང་བར་འགྱུར། །རེ་རེ་ཡི་ནི་ལྟ་བ་ཡིས། །དེ་ལ་སྲུང་བ་བྱེད་པར་འགྱུར། །རྣལ་འབྱོར་མ་ཡིས་ནམ་མཁའ་གང་། །སླར་ཡང་ལྷན་སྐྱེས་རྫོགས་བྱང་ཆུབ། །རྣལ་འབྱོར་མ་ནི་ལྷན་སྐྱེས་གཟུགས། །ལྷན་སྐྱེས་ཡི་གེ་རྣལ་འབྱོར་མ། །རྣལ་འབྱོར་མ་ཡིས་ལྷན་སྐྱེས་ཟོས། །སླར་ཡང་རྣལ་འབྱོར་མ་ཟ་འགྱུར། །སངས་རྒྱས་གཟུགས་ནི་རྣལ་འབྱོར་མ། །རྡོ་རྗེ་འཛིན་པའི་གཟུགས་ཅན་མ། །གནས་ཀྱི་གཟུགས་ནི་རྣལ་འབྱོར་མ། །བྱས་དང་བྱེད་པོའང་དེ་ཉིད་དོ། །བསྒྲུབ་བྱ་མཐོང་བར་སྟེར་བར་འགྱུར། །གོ་ཆའི་ཡི་གེ་སྒོམ་པ་ལའོ། །སྒྲུབ་པོ་ཅི་དང་ཅི་འདོད་པ། །དེ་རྣམས་ཀྱིས་ནི་སྟེར་བར་འགྱུར། །ཚུལ་འདི་སྒོམ་པ་མེད་པ་ཡི། །སེམས་ཅན་དེ་རྣམས་རྨོངས་པར་འགྱུར། །ཡི་གེ་བཀོད་པ་ཙམ་གྱིས་ནི། །ལས་རྒྱལ་ཐམས་ཅད་བྱེད་པར་འགྱུར། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྡོ་རྗེ་ཉི་མ་ལ་སོགས་པའི་གོ་ཆའི་སྲུང་བའི་ཆོ་གའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་རྟ་མཆོག་གི་སྲུང་བ། །ཐམས་ཅད་བྱ་བ་བྱེད་དགེ་བའོ། །ཕཊ་ཧཾ་སྔགས་ཀྱི་རྣལ་འབྱོར་གྱིས། །ཀུན་ནས་མགོ་དང་རྐང་པའི་མཐར། །མཛོད་སྤུའི་དབུས་སུ་དགོད་བྱ་སྟེ། །སྤྱི་གཙུག་དབུས་སུ་རྣལ་འབྱོར་མ། །མགོ་བོར་ཀུན་སྐྲག་མ་ཤེས་ནས། །ཚིག་ཀུན་དང་ནི་མཁའ་ཞེས་བྱར། །གཏུམ་མོའི་གསང་སྔགས་ཕཊ་ཕཊ་སྟེ། །ཡེ་ཤེས་གདན་དབང་
ཕྱུག་མར་འདོད། །རྟ་མཆོག་ཏིང་འཛིན་དག་ཏུ་ཡང་། །རྣལ་འབྱོར་དངོས་གྲུབ་སྨོས་ཅི་དགོས། །རྣལ་འབྱོར་པ་ཡིས་འཁོར་བ་དྲལ། །སླར་ཡང་མྱ་ངན་འདས་བཀས་པའོ། །ཡེ་ཤེས་ཞེས་བྱའི་རྣམ་རྟོག་ཀྱང་། །སྔགས་པས་གཉིས་སུ་མེད་པས་བཀས། །ཧཾ་ཡིག་ཀུན་མཁྱེན་ཡོད་མིན་ན། །སྐྱེ་བོ་ཐམས་ཅད་སྨོས་ཅི་དགོས། །བཀུར་སྟི་བྱེད་པ་ཡོད་པ་དང་། །དབང་པོ་ཚར་གཅོད་ཡོད་པ་སྟེ། །རྣལ་འབྱོར་གཏུམ་མོའི་ཡོན་ཏན་ལྡན། །དེ་ནི་བདུད་རྩིར་མངོན་པར་བརྗོད། །བདེ་བཅས་ཐེ་ཚོམ་མེད་པར་ནི། །དབང་པོ་ཐམས་ཅད་ཟོས་པས་སོ། །དཀྱིལ་འཁོར་སྔོན་དུ་གསུངས་པ་ཡི། །དབུས་སུ་དཔའ་བོ་རྣལ་འབྱོར་མ། །སྔགས་ལ་སོགས་པ་ཐམས་ཅད་ཀྱང་། །ཀུན་གྱིས་ཀུན་དུ་བྱ་བའོ། །ལས་ཀྱི་བག་ཆགས་རང་གིས་བཟའ། །ཕྲ་མོའང་ཀུན་དུ་བཅོམ་བར་དུའོ། །ངན་པ་ཐམས་ཅད་སྦར་བྱས་ན། །རས་བལ་ལྟར་ཡང་ཕ་རོལ་འགྲོ། །དེ་ནི་གཏུམ་བྱེད་མར་ཤེས་བྱ། །ཕག་མོའི་རིགས་ལས་བྱུང་བའོ། །ཟླ་བར་བརྩི་བའི་སྐར་མ་ཡིས། །སྐར་མའི་བདག་པོ་སྙིང་རྗེས་ཞུ། །སླར་ཡང་མདོར་བསྡུས་བཤད་པ་ནི། །རྣལ་འབྱོར་མ་ནི་དྲུག་རྣམས་དང་། །དཔའ་བོ་གཉིས་སུ་བྱར་མེད་ཉིད། །དགོས་པའི་མཚན་ཉིད་བཤད་པར་བྱ། །རྣལ་འབྱོར་རྣལ་འབྱོར་མ་བཅུ་གཉིས། །རེ་རེའི་གནས་སུ་ཤེས་པར་བྱ། །དེར་ནི་གར་ཡང་བྱེད་དུ་གཞུག །ལྷན་སྐྱེས་རྫོགས་བྱང་ཆུབ་མཚན་ཉིད། །ལུས་ཅན་ཀུན་གྱི་བདེ་བ་ནི། །དབང་གཉིས་དུས་ལས་ཤེས་པར་བྱ། །བུག་དྲུག་བུམ་པ་ཅན་བྱས་པས། །དེ་དང་འདྲ་བའི་བདེ་ཐོབ་འགྱུར། །ལྟེ་བའི་འོག་གི་བུ་ག་གསུམ། །དེ་ཡི་སྟེང་དུ་གསུམ་དེ་བཞིན། །འགྲོ་དང་འོང་བ་གཉིས་གཉིས་ཏེ། །གོ་ཆ་བཅུ་གཉིས་དེར་དེ་བཞིན། །དབང་པོ་ཡུལ་གྱི་མཚན་ཉིད་ཀྱིས། །དངོས་པོའི་བདག་ཉིད་དེར་གར་བྱེད། །རྣལ་འབྱོར་བདུད་རྩི་ཉིད་འཐུང་འགྱུར། །ཟང་ཟིང་ཁམས་རྣམས་ཟ་བ་སྟེ། །སྟེང་དང་འོག་ཏུ་མཚོན་བལྟས་པས། །ལྷན་སྐྱེས་བདག་ཉིད་རྩེན་པར་བྱེད། །རྗེས་དྲན་དྲུག་གི་སྦྱོར་བ་ཡིས། །སྒྲུབ་
པ་པོ་ཡིས་བྱ་བ་ཡིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྟ་མཆོག་ལ་སོགས་པའི་གོ་ཆའི་སྲུང་བའི་ཆོ་གའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་གཏོར་མའི་དེ་ཉིད་བཤད། །མཐར་གྱིས་ཇི་ལྟ་བ་བཞིན་ནོ། །ཆོས་འབྱུང་དབུས་སུ་སོན་པར་ནི། །ཇི་ལྟའི་ཆོ་གས་གཏོར་མ་སྦྱིན། །རྣལ་འབྱོར་དབང་ཕྱུག་མཁའ་འགྲོའི་གཟུགས། །སླར་ཡང་གོ་ཆ་སོགས་པས་བསྲུང་། །དེའི་ཡང་ཏིང་ངེ་འཛིན་དམིགས་བྱ། །པདྨའི་སྣོད་ནི་གཞག་བྱ་སྟེ། །ཕྱི་དང་ནང་བདག་ཉིད་དུ་བྱ། །ཨ་བ་དྷཱུ་ཏཱིར་སྐྱེ་གནས་འདྲི། །ལྟེ་བའི་འོག་དང་སྟེང་བུ་ག །པདྨའི་སྣོད་དུ་བརྟག་པར་བྱ། །ནམ་མཁའ་ལྔ་ཡི་བདུད་རྩི་ནི། །ཐམས་ཅད་རོ་མཉམ་པར་བྱའོ། །ཕུང་པོ་གེ་ཀུ་ད་ཧ་ན། །སྐྱེ་མཆེད་རྣམས་ནི་ཤ་ཀུན་ཏེ། །སྦར་བ་བདེ་བའི་སེམས་ཀྱིས་ཏེ། །འདོད་ཆགས་མེ་ཡིས་བསྲོ་བའོ། །སྦྱང་བ་མཆོག་ནི་བདག་ཉིད་ལའོ། །སླར་ཡང་བདུད་རྩིར་བྱེད་པ་སྟེ། །བསམ་གཏན་ཕྱག་རྒྱ་རྒྱུན་དུ་དེར། །སྐུ་གསུམ་དུ་ནི་བྱིན་གྱིས་བརླབ། །སྔགས་དང་ཕྱག་རྒྱའི་སྦྱོར་བ་ཡིས། །མཁའ་འགྲོ་མ་རྣམས་སྤྱན་དྲང་བྱ། །རྩེ་མོ་མདུད་བྱས་ངེས་པར་ནི། །གུང་མོ་རྩེ་སྦྱར་མཐེབ་རྡོ་རྗེ། །བརྟན་པར་ཡང་དག་བཙིར་བྱས་ནས། །དཔྲལ་བའི་ཕྱོགས་སུ་ཡོངས་བཞག་པས། །བཟླས་ཤིང་བསྐྱར་བས་འཁོར་བར་བྱ། །རྐང་པ་མནན་ཅིང་སྟེང་དུ་བལྟ། །སྔགས་པས་དེ་བྱས་པ་མཆོག་སྟེ། །སྤྱི་བོར་ཕེ་ཡིག་སྒྲ་ཡིས་ནི། །ཕྱོགས་བཅུའི་འཇིག་རྟེན་ཁམས་བཞུགས་པའི། །དཔའ་བོ་རྣལ་འབྱོར་མ་རྣམས་དགུག །གཡོན་དང་གཡས་པའི་སྦྱོར་བ་ཡིས། །སྙིང་གར་ཕྱག་རྒྱ་སྦྱིན་པར་བྱ། །གཡོན་དང་གཡས་པའི་ལག་གཉིས་ཀྱིས། །བསྐོར་བ་མཁའ་འགྲོ་མའི་དེ་བདེ། །ཨོཾ་ཨཱ་ར་ལླི་ཧོ། ཛཿཧཱུྃ་བྃ་ཧོཿ། བཛྲ་ཌཱ་ཀ་ཌཱ་ཀི་ནྱཱ་ས་མ་ཡ་སྟྭྃ་དྲྀ་ཤྱ་ཧེཿ། རྡོ་རྗེ་ཐལ་མོ་གྱེན་ལ་ཕྱེ། །མཚན་མོ་ཕྱེད་ན་གཏོར་མ་སྦྱིན། །ཨོཾ་ཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤཱ་ཙོནྨཱ་དཱ་པ་སྨ་ར་ཌཱ་ཀ་ཌཱ་ཀི་ནྱཱ་ད་ཡ་ཨི་མྃ་བ་གྲཱི་ཧྞནྟུ་སརྦ་སིདྡྷིམྨེ་པྲ་ཡཙྪན་ཏུ་ཡ་ཐཻ་བྃ་
ཡ་ཐེ་ཥྚྃ་བྷུཉྫ་ཐ་ཛི་གྷྲ་ཐ་པཱི་བ་ཐ་མཱ་ཏི་ཀྲ་མ་ཐ་མ་མ་སརྦ་ཀརྟཱ་ཡ་སངྶུ་ཁྃ་བི་ཤུདྡྷ་ཡེ་མ་མ་སཱ་ཧཱ་ཡི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྔགས་ཀྱི་འཇུག་པ་ཇི་སྲིད་དུ། །བུམ་པ་ཅན་གྱིས་གནས་མི་འགྱུར། །རྒྱུན་མི་འཆད་པར་འཐོབ་འགྱུར་ཏེ། །དགའ་སྐྱེས་བདེ་བའང་སྨོན་ཅི་དགོས། །དཔའ་བོ་རྣམས་ཀྱི་གཏོར་སྟོན་མོ། །རྣལ་འབྱོར་མ་རྣམས་ལ་དེ་བཞིན། །དཀྱིལ་འཁོར་ཆེན་པོའི་སྦྱོར་བ་ཡིས། །བླ་མ་གཙོ་བོ་རུ་ནི་བྱ། །རྣལ་འབྱོར་མ་རྣམས་མིང་གང་གང་། །དཔའ་བོ་རྣམས་ཀྱིའང་དེ་བཞིན་དུ། །དེ་དང་དེ་ལ་ཤ་དབུལ་བ། །མྱོས་བྱེད་བདེ་ཆེན་སྟེར་བའོ། །འཁོར་ལོ་མངོན་པར་གཟུང་དུ་བྱ། །ཡང་ན་སྔགས་པར་ཟུང་དུའོ། །གདན་ནི་སྟག་གི་པགས་པ་སྟེ། །སྟོན་མོ་མི་ཡི་པགས་པར་རོ། །སྣོད་ཆེན་རྣམས་སུ་བཏུང་བ་དང་། །སྔགས་པ་སྐྲ་གྲོལ་བ་ཡིས་སོ། །སྣོད་ནི་རྣལ་འབྱོར་མས་ཤེས་བྱ། །ཡང་ན་གཞོན་ནུ་མ་ཡིས་སོ། །དེ་བཞིན་རྣལ་འབྱོར་མ་རྣམས་ཀྱི། །འཁོར་ལོ་དཔའ་བོ་རྣམས་ཀྱིས་ཏེ། །དཔའ་བོ་རྣམས་ཀྱི་གཞི་དག་ལ། །སྣོད་ནི་གཞོན་ནུ་མ་ཡིས་སོ། །དར་ཕྲེང་དབུ་རྒྱན་དག་དང་ནི། །རྣམ་པ་སྣ་ཚོགས་དྲི་དེ་བཞིན། །གླུ་ལེན་གར་བྱེད་སིལ་སྙན་དང་། །དྲུག་ལྡན་སོགས་དང་དམན་རྣམས་དང་། །གཏོར་མའི་སྣོད་རྣམས་ཐམས་ཅད་ནི། །སྔགས་པས་ཤར་གྱི་ཕྱོགས་ནས་སུ། །ཆང་ཐམས་ཅད་དང་མཆོད་པ་ཡི། །སྣོད་རྣམས་དེར་ནི་གཞག་པར་བྱ། །མཆོད་བྱ་མཆོད་པ་མཆོད་པའི་རྒྱུ། །མཆོད་པ་བྱེད་པོ་ཕན་ཚུན་དུའོ། །འཁོར་ལོ་རང་གི་སློབ་མ་བྱས། །ཡང་ན་མཉམ་གཞག་གཞན་རྣམས་སོ། །སྔགས་པས་སྐལ་མེད་ཐམས་ཅད་དང་། །མུ་སྟེགས་ལ་སོགས་སྤང་བར་བྱ། །འགྲོ་བ་ཀུན་ནི་མཆོག་ཏུ་དགའ་བའི་རང་བཞིན་ཏེ། །རྣལ་འབྱོར་མ་ཡི་འཁོར་ལོའི་རང་བཞིན་དུ་གནས་ཀྱིས། །ཨ་རེ་རེ་རེ་གཏི་མུག་ཕྱུགས་ཀྱིས་མི་ཤེས་སོ། །ལྷན་སྐྱེས་མཛེས་མ་བླངས་ནས་བདེ་བ་ཆེ་ལ་མནོས། །ཤམ་བུ། ས་གསུམ་མ་ལུས་འགྲོ་བ་སངས་རྒྱས་ཀྱི་རང་བཞིན། །སྙིང་རྗེའི་གཞོན་ནུ་མ་དང་ལྷན་ཅིག་རོལ་བར་བྱོས། །ཨ་རེ། གང་གིས་དོན་དམ་ལ་ནི་མ་བསྒོམས་པས། །དེ་ཡིས་སངས་རྒྱས་ཉིད་ནི་ཐོབ་པ་མ་ཡིན་ནོ། །ཨ་རེ། ནང་དང་ཕྱི་ནི་དབྱེ་བ་མེད་པར་ཤེས་
པར་གྱིས། །འཇིག་རྟེན་ཐམས་ཅད་བསྒྲལ་བར་ནུས་པའོ། །ཨ་རེ། དེ་ལ་སོགས་པ་ཐམས་ཅད་ནི། །གང་དང་དེར་ནི་བླངས་པའོ། །ང་ཡི་རྒྱུད་དང་རྟོགས་པ་ཡིས། །སྔགས་པའི་གནང་པས་གླུ་བླང་བྱ། །དེ་ལ་ཕྱག་ནི་བྱས་ནས་སུ། །གར་དང་གླུ་ཡང་བྱ་བ་ཡིན། །སྣོད་ནི་པདྨའི་ཕྱག་ཏུ་ནི། །རང་ཉིད་བརྟུལ་ཞུགས་ཅན་གྱིས་དབུལ། །པདྨའི་ལག་པར་གཟུང་བྱ་སྟེ། །དེ་ཉིད་ཀྱིས་ནི་སྦྱིན་པར་བྱ། །རྣལ་འབྱོར་མ་རྣམས་ཕུད་ཆང་བུ། །སོ་སོར་བསྡུ་བར་བྱ་བ་ཡིན། །ཟོས་པ་ཡི་ནི་ལྷག་མ་ཡང་། །འབྱུང་པོ་ཐམས་ཅད་ལ་སྦྱིན་བྱ། །ཇི་ལྟར་ཡང་དག་འབྱོར་པ་ཡི། །དེ་རྣམས་ལ་ནི་ཡོན་དབུལ་བ། །དེ་ལྟར་ཉི་མ་རེ་རེར་བྱ། །ཡང་ན་ཟླ་བ་ཟླ་བར་རོ། །དམ་ཚིག་བསྲུང་ཕྱིར་ལོ་གཅིག་ལ། །ཉི་མ་གཅིག་ནི་བྱ་བའོ། །དེར་ནི་སྦྱིན་པའི་ཚིགས་བཅད་བཀླག །བཀྲ་ཤིས་པ་ཡི་ངག་ཀྱང་བྱ། །མཁའ་འགྲོ་མ་རྣམས་འདུས་ལ་མཆོད་པ་དང་། །དཔའ་བོ་རྣམས་ལ་བཟའ་དང་བཏུང་བ་ཁྱོད་ཀྱིས་དྲངས། །ཁྱོད་ལ་རྟག་ཏུ་བསྲུང་དང་མཆོག་གི་འབྱོར་པ་དང་། །ཡང་ན་ཡིད་ལ་འདོད་པ་ཕུན་སུམ་ཚོགས་པར་ཤོག །སྐྱེ་བ་ཀུན་དུ་མཆོག་ཏུ་བདེ་བར་གཤེགས་པ་ཡི། །གྲུབ་པའི་འཇིག་རྟེན་དབུས་སུ་འགྲོ་བར་འགྱུར་བར་ཤོག །དཔའ་བོ་གཉིས་མེད་མཆོད་པས་སྐྱེ་བ་འདི་ལ་ནི། །སྡིག་པ་ཟད་དང་ཕྱག་རྒྱའི་དངོས་གྲུབ་འགྱུར་བར་ཤོག །དཔའ་བོ་ཐམས་ཅད་མཉམ་སྦྱོར་བས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་གཏོར་མ་དང་འཁོར་ལོ་མཆོད་པའི་ཆོ་གའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གཞན་པ་རབ་བཤད་དེ། །དཀྱིལ་འཁོར་གྱི་ནི་ཐིག་གདབ་དང་། །སྦྱིན་སྲེག་ཐབ་དང་དེ་བཞིན་དུ། །སློབ་དཔོན་རང་ཉིད་མཆོད་བཤད་བྱ། །སླར་ཡང་ས་གཞི་ཆ་མཉམ་ལ། །དཀྱིལ་འཁོར་ཁྲུ་ནི་བརྒྱད་པ་སྟེ། །རི་ཡི་སྟེང་ལ་སོགས་པ་དང་། །དག་པའི་ས་ཡི་མཐིལ་དུ་བྱ། །དེར་ནི་པུས་མོ་ཙམ་དུ་བརྐོ། །སླར་ཡང་མཐོ་གང་ཙམ་བརྐོས་ནས། །
ཆུ་ཡིས་དགང་བར་བྱ་བ་སྟེ། །ཇི་སྲིད་དུ་ནི་མ་ཟད་པར། །དེ་སྲིད་དུ་ནི་རྩ་བའི་སྔགས། །མཁས་པས་འདིར་ནི་བཟླས་པར་བྱ། །རྣལ་འབྱོར་པ་ཡི་ཁྱིམ་བྱ་སྟེ། །སྐྱེ་བ་ཐམས་ཅད་བསྲེག་པར་འགྱུར། །དེར་ནི་དཀྱིལ་འཁོར་བྲི་བྱ་སྟེ། །ཐིག་གཉིས་ཀྱང་ནི་གདབ་པར་བྱ། །ཚངས་པའི་ཐིག་གི་ལོགས་གཉིས་སུ། །སུམ་ཅུ་རྩ་གཉིས་གཉིས་གདབ་བྱ། །སླར་ཡང་དེ་ཡི་དབུས་བཏབ་པས། །ཐིག་རྣམས་དྲུག་ཅུ་རྩ་བཞིའོ། །དེ་རྣམས་དབུས་སུ་དེ་མཉམ་པ། །སླར་ཡང་དེ་རྣམས་སུ་གདབ་བྱ། །མདོར་ན་འཁོར་ལོ་བཞི་པོ་ལ། །ཉིས་བརྒྱ་ལྔ་བཅུ་རྩ་དྲུག་གོ། །ཀུན་ནས་དུམ་བུ་བཅུ་དྲུག་ལས། །ཚོན་རྩི་ཡིས་ནི་རི་མོ་བྱ། །ལྷག་མ་སྒོ་ཡི་ཚད་དུ་ནི། །དབུས་མའི་པདྨ་ལ་སོགས་བྱ། །འོན་ཀྱང་དབུས་ཀྱི་པདྨ་དེར། །སོར་ནི་བཅུ་གཉིས་བྱ་བའོ། །འཁོར་ལོ་གསུམ་ནི་བཞི་པོ་ལ། །དུམ་བུ་གསུམ་གསུམ་བྱ་བ་ཡིན། །དུམ་བུ་རེ་རེ་ལ་ནི་ཁྲུ། །གཉིས་གཉིས་མཁས་རྣམས་ཀྱིས་ཤེས་བྱ། །ཚོན་སྣ་ལྔ་ཡི་སྐུད་པ་ནི། །དེ་ཕྱིར་དཀྱིལ་འཁོར་གཉིས་འགྱུར་རོ། །སྦོམས་སུ་སྒོ་ལས་ཉི་ཤུར་ནི། །གཅིག་གིས་མ་ཚང་ཚད་ཅན་ནོ། །དྲི་ཞིམ་པོ་དང་དྲི་སྤོས་ཀྱིས། །ཡེ་ཤེས་ཐིག་སྐུད་ལ་བདུག་བྱ། །གཏོར་མ་ཆེན་པོ་བྱིན་ནས་ནི། །ཕྱི་ནས་ཐིག་ལས་འདིར་བརྗོད་ཀྱིས། །རྡོ་རྗེ་ཕུར་བུ་ས་གཞི་ལ། །མཁས་པས་སྤྲོ་བ་ཡིས་ནི་བྱ། །རང་གི་སློབ་མ་ཐིག་འཛིན་གཞུག །གཡོན་པའི་ཁུ་ཚུར་གྱིས་ལྟེ་བར། །སྔགས་པ་ཡིས་ནི་བཟུང་བྱས་ནས། །སྟེང་དུ་ཡང་ནི་གདབ་པར་བྱ། །དེ་བཞིན་དུ་ནི་གདབ་པ་ནི། །གཡོན་སྐོར་དུ་ནི་བྱ་བའོ། །འཇུག་པ་དང་ནི་འབྱུང་བ་ན། །གཏོར་མ་བྱིན་ལ་བཅག་པར་བྱ། །རྩ་བའི་སྔགས་ནི་བརྗོད་པ་ཡིས། །རི་མོ་བར་སྣང་ལ་གདེག་བྱ། །ཕྱི་དང་ནང་དུ་ཤེས་པ་ཡི། །སྔགས་པས་བདུད་རྩི་བཏུང་བར་བྱ། །ས་ནི་ནམ་མཁར་གཤེགས་བྱ་ཞིང་། །སླར་ཡང་དེ་ཉིད་དུ་དགུག་བྱ། །མེ་ཏོག་རྣམ་པ་སྣ་ཚོགས་དང་། །རྡོ་རྗེའི་གོམ་པས་གར་བྱའོ། །ལག་པས་རྡོ་རྗེ་གསོར་བྱ་ཞིང་། །མ་སོགས་རྣལ་འབྱོར་མ་དང་རོལ། །འདི་ཀུན་གྲི་གུག་
མཚན་མ་རྣམས། །དཀྱིལ་འཁོར་བ་རྣམས་ཀྱིས་བྱའོ། །མཆོད་པ་རྣམ་པ་སྣ་ཚོགས་བྱས། །སློབ་དཔོན་དྲི་ཡིས་ཁྲུས་བྱས་པ། །དྲི་མ་མེད་བཀྲུས་ལེགས་བདུགས་པའི། །གོས་ནི་ཡོངས་སུ་གྱོན་ནས་ནི། །དྲིལ་བུའི་སྒྲ་ནི་རབ་བྱ་ཞིང་། །རྣལ་འབྱོར་མ་རྣམས་གླུ་ལེན་དང་། །སྣ་ཚོགས་སིལ་སྙན་སྣོད་རྣམས་དང་། །ཅ་ཅོ་ཡི་ནི་སྒྲ་སྒྲོགས་པའོ། །དབང་བསྐུར་བ་ནི་སྦྱིན་བྱ་ཞིང་། །རང་སློབ་མ་ལ་ཕྱི་དང་གསང། །རྒྱལ་པོ་རྐུན་མོ་སོགས་སྤངས་པའི། །སྐྱེ་བོ་དང་བྲལ་ཕྱོགས་སུ་བྱ། །འདིར་ནི་ཆོ་གའི་སྐྱོན་མང་པོས། །མནར་མེད་སོགས་སུ་ལྟུང་བར་འགྱུར། །ཞི་དང་རྒྱས་པ་ལ་སོགས་པའི། །སྦྱིན་སྲེག་རྣམས་ཀྱི་ཐབ་བའོ། །ཟླུམ་པོ་ཞི་བ་ཡི་ནི་ཐབ། །གྲུ་བཞི་པ་ནི་རྒྱས་པ་ལ། །གྲུ་གསུམ་པ་ནི་དབང་ལས་ལ། །མངོན་སྤྱོད་ལ་ནི་ཟུར་དྲུག་པ། །ཟུར་བདུན་པ་ནི་བསྐྲད་པ་ལ། །སྡང་བར་བྱ་ལ་གྲུ་བརྒྱད་པ། །ཟུར་དགུ་པ་ནི་རེངས་པ་ལ། །གསད་པ་ལ་ནི་ཟུར་ལྔ་སྟེ། །ལས་ཐམས་ཅད་ལ་ཟུར་བཅུ་པ། །ཁ་དོག་རང་བདག་སྦྱོར་བས་སོ། །རང་གི་བདག་གྱུར་མཚན་མ་ནི། །ཐབ་རྣམས་ཀྱི་ནི་དབུས་སུ་བྱ། །འཁོར་པད་རྡོ་རྗེ་དང་གྲི་གུག །རལ་གྲི་རིན་ཆེན་སྣ་ཚོགས་རྡོར། །མདའ་གཞུ་དེ་བཞིན་ཐབ་ལ་ནི། །ཕྲེང་བ་དེ་རྣམས་སུ་བྱའོ། །ཁྲུ་གཅིག་པ་དང་ཁྲུ་གཉིས་པ། །ཁྲུ་ཕྱེད་དེ་ཡི་ཕྱེད་དང་ནི། །སླར་ཡང་ཁྲུ་གཉིས་གསུམ་དང་བཞི། །ལྔ་དྲུག་བདུན་དང་བརྒྱད་དང་དགུ། །ཁྲུ་བཅུ་རུ་ནི་ཡང་དག་བཤད། །ཐབ་ཀུན་ཇི་ལྟའི་རིམ་པས་སོ། །ཡམ་ཤིང་དང་ནི་རྫས་རྣམས་དང་། །སྲེག་བླུགས་མེ་ཏོག་ཐམས་ཅད་དང་། །ཕྱི་ནང་བདག་ཉིད་སྦྱོར་རྣམས་ཀྱིས། །རང་རང་གི་ནི་ལས་བྱའོ། །མངོན་པར་བརྗོད་པར་བཤད་པའི་ལས། །རྩ་བའི་སྔགས་སོགས་ཐམས་ཅད་ཅན། །དེ་ཡི་སྦྱོར་བའི་ཆོ་གའི་ལས། །རྒྱུད་རྣམས་ཀུན་དུ་ཤེས་བྱེད་དོ། །ཅུང་ཟད་འཆད་པར་འགྱུར་ཉིད་དུ། །རྒྱུད་ཐམས་ཅད་ཀྱི་བཤད་པར་བྱ། །ཟླུམ་པོ་ལྟེ་བར་སྐྱེས་པའི་ཐབ། །སྙིང་ག་རུ་ནི་གྲུ་བཞི་པ། །ནོར་བུའི་བུ་གར་གྲྭ་དྲུག་པ། །མགྲིན་པར་གྲྭ་
ནི་བདུན་པ་སྟེ། །ཟུར་བརྒྱད་པ་ནི་མགོ་བོ་ལ། །ཟུར་དགུ་རུ་ནི་སྨིན་དབུས་སུ། །གཙུག་ཏོར་དུ་ནི་ཟུར་ལྔ་པ། །ཟུར་བཅུ་པ་ནི་དབྲལ་བར་ཏེ། །རླུང་ལས་བྱུང་བའི་རྩ་བ་ཅན། །བསྲེག་རྫས་ཁམས་རྣམས་ཐམས་ཅད་ནི། །རླུང་འབབ་པ་ལ་བསྲེག་པར་བྱ། །དེ་ཉིད་དུས་སུ་ཕྱི་རོལ་གྱི། །བློ་ལྡན་གྱིས་ལས་ཆུང་ངུའོ། །ལ་ལ་ནཱ་དང་ར་ས་ནཱ། །དགང་གཟར་བླུགས་གཟར་གཉིས་དེ་བཞིན། །མར་སྣོད་ཨ་བ་དྷཱུ་ཏཱི་སྟེ། །ཐབ་ནི་དེའི་བར་བར་དག་ཏུའོ། །ལས་ཐམས་ཅད་པའི་སྦྱིན་སྲེག་ནི། །འཇིག་རྟེན་འདི་ལ་བྱ་བ་ཡིན། །དེར་ནི་རྫས་རྣམས་ཐམས་ཅད་ཀྱི། །ཐེ་ཙོམ་མེད་པར་བསྲེག་པར་བྱ། །དགང་གཟར་ཁྲུ་གང་དུ་འགྱུར་ཏེ། །རྒྱར་ནི་སོར་མོ་བཞི་པ་ལས། །དེར་ནི་སོར་མོ་གཉིས་བརྐོ་བྱ། །མཆུ་ཡི་སྤུག་མོ་སོར་མོ་ཕྱེད། །དབུས་སུ་རྡོ་རྗེ་པདྨ་དང་། །མཆུ་སྤུག་རྡོ་རྗེ་ལྡན་པ་ཅན། །རྩ་བར་རྡོ་རྗེ་སོར་དྲུག་པ། །ཡུ་བའི་སྟེང་དུ་དགང་གཟར་སོགས། །བླུགས་གཟར་ཀྱང་ནི་དེའི་ཚད་ལ། །སྟེང་དུ་པད་འདབ་ལྟ་བུ་ཡིན། །གང་གི་ཐབ་རྣམས་ཀྱི་ནི་ཚད། །ཁྲུ་གང་པའམ་ཁྲུ་དོ་པ། །དེའི་ཕྱེད་ཐུར་དུ་བརྐོ་བྱ་བ། །བཅུ་པོ་རྣམས་ལ་རབ་ཏུ་བཤད། །ཐོག་མ་དང་ནི་དབུས་དང་མཐར། །སྔགས་པས་གང་བའི་སྲེག་བླུགས་དབུལ། །མེ་ནི་དགུག་བྱ་དེ་ཡང་ནི། །ཀུ་ཤའི་བམ་པོ་ལ་གཞག་བྱ། །མཆོད་ཡོན་ཞབས་བསིལ་ཞལ་བསིལ་ནི། །སྣ་ཚོགས་མངོན་པར་བསྔགས་ནས་དབུལ། །དེར་ནི་ཉ་ཕྱིས་ཕོར་པ་གསུམ། །ལོ་མའི་སྟེང་དུ་གཞག་པར་བྱ། །འོ་མའི་སྣོད་ནི་ཡང་བཞག་ནས། །དེ་ནས་གོས་ནི་དེའི་སྟེང་དུའོ། །ས་གཞིར་དཱུར་བ་སྦྱིན་བྱ་བ། །སྔོན་དུ་ཁ་མངོན་ཕྱོགས་པར་རོ། །ཐམས་ཅད་དུ་ནི་གཡས་ཕྱོགས་སུ། །དེར་ནི་རྫས་རྣམས་གཞག་པར་བྱ། །ས་གཞི་རི་མོ་གསུམ་བྲི་སྟེ། །སྒོ་གཅིག་པ་ནི་ནུབ་ཏུའོ། །འགྲུབ་བྱའི་དངོས་ཀུན་ཐམས་ཅད་དང་། །རྒྱལ་པོ་ནས་བརྩམས་གཞུག་པར་བྱ། །ཐམས་ཅད་ཉེ་བར་བྱ་བའི་ཕྱིར། །རྡོ་རྗེ་བླ་མ་ལ་དབུལ་བ། །དྲང་སྲོང་ཕྱག་བཞི་བསམ་བྱ་བ། །དབྱུག་པ་ཐབ་དང་སྤྱི་བླུགས་དང་། །བགྲང་ཕྲེང་ལུག་ལ་ཞོན་པ་ཡི། །ཁ་དོག་དམར་པོ་རྣམ་བསམ་བྱ། །ཨོཾ་ཨེ་ཧྱེ་ཧི་ཨགྣ་ཡེ་རྃ་སརྦ་སིད་དྷིམྨེ་པྲ་ཡཙྪ་ཛྭ་ལ་ཛྭ་ལ་ཧོ། མ་ཧཱ་རཱི་ཥི་
སརྦ་དེ་བ་མུ་ཁ་པཱུ་རི་ཨ་སྨིན་སནྣི་ཧི་ཏོ་བྷ་ཝ་ཧཱུྃ། མེ་ལྷ་སྤྱན་དྲང་བའི་སྔགས་སོ། །ཨོཾ་ཨཱཿཔཱ་དྱཾ་ཧུ་ཏཱ་ས་ནཱ་ཡ་གྲི་ཧྞ་ཧཱུྃ། ཞབས་བསིལ་གྱི་སྔགས་སོ། ཨོཾ་བྃ་ཨཱ་ཙ་མ་ནྃ་རྀ་ཥ་ཡེ་པྲ་ཡཙྪ་ཧཱུྃ། ཞལ་བསིལ་གྱི་སྔགས་སོ། ཧཱུྃ་ཌཱ་ཀ་ཌཱ་ཀི་ནི་ས་མ་ཡཱ་རྒྷྃ་ད་དཱ་མི་ཧཱུྃ་ཧཱུྃ་རྃ་རྃ་སྭཱ་ཧཱ། མཆོད་ཡོན་གྱི་སྔགས་སོ། །ཨོཾ་དེ་བ་རྀ་ཥི་པར་མ་སཽ་ག་ཏ་ཀཱ་རུ་ཎི་ཀཱ་ཛཿཧཱུྃ་བྃ་ཧོཿ། ཧ་ཧ་ད་ཧ་ད་ཧ་པ་ཙ་པ་ཙ་ཛྭ་ལ་ཛྭ་ལ་ཧ་ན་ཧ་ན་ཧཱུྃ་ཧཱུྃ། མེ་དགྱེས་པར་བྱེད་པའི་སྔགས་སོ། །རྫས་ཐམས་ཅད་ལ་ཨོཾ་གྱི་ཡི་གེ་དང་ཨཱཿདང་དབུས་སུ་མིང་དང་ཡང་དག་པར་ལྡན་པ་དང་མཐར་ཧཱུྃ་ཧཱུྃ་ཕཊ་ཀྱི་ཡི་གེ་དང་སྭཱ་ཧཱ་སྦྱིན་པར་བྱའོ། །རྫས་ཐམས་ཅད་ཀྱི་སྔགས་སོ། །དཀྱིལ་འཁོར་གཙོ་བོ་དང་བཅས་པ། །དྲང་སྲོང་སྙིང་གར་བསྒོམ་པར་བྱ། །དམ་ཚིག་མེ་ནི་རྃ་ལས་རྫོགས། །ཡེ་ཤེས་མེ་ལྷ་དེ་དང་མཉམ། །ཡང་ན་འབར་བར་བསྒོམ་པ་སྟེ། །ཞི་བ་ལ་སོགས་མདོག་ཏུའོ། །མེ་ནི་དེ་རུ་ཐིམ་བསམ་བྱ། །སྔགས་པས་འོད་ཀྱི་ཁྱད་པར་ནི། །སོ་སོའི་སྣང་བའི་མེར་ཤེས་བྱ། །རྣལ་འབྱོར་མེ་ལྷའི་བདག་ཉིད་ཀྱི། །གཉིས་མེད་རྣམ་པའི་རྣལ་འབྱོར་གྱིས། །མཁས་པ་ཡིས་ནི་བྱ་བ་ཡིན། །ནང་བདག་ཉིད་ཡེ་ཤེས་གང་འདྲ། །ཕྱི་རོལ་ཡང་ནི་དེ་འདྲར་བྱ། །བསོད་ནམས་ཚོགས་ཀྱི་རྒྱུད་དོན་དང་། །ཡེ་ཤེས་ཚོགས་རྫོགས་བྱ་ཕྱིར་རོ། །དེར་ནི་ཙ་རུ་བསྒྲུབ་བྱ་སྟེ། །མེ་ལ་བཤོས་སུ་དབུལ་བྱ་ཞིང་། །ཅུང་ཟད་བདག་ཉིད་ཀྱིས་སྤྱད་དང་། །སྦྱིན་བདག་རྣམས་ལའང་སྦྱིན་པར་བྱ། །གཞོན་ནུ་མ་མཛེས་གར་བྱེད་དང་། །སྣ་ཚོགས་སིལ་སྙན་རྣམས་དཀྲོལ་བྱ། །སྣ་ཚོགས་རྒྱན་དང་ལྡན་རྣམས་ཀྱི། །སྐྱེ་བོ་ཆེན་པོ་རྩེན་བཞིན་དང་། །མེ་ཏོག་སྤོས་སོགས་ཀྱིས་སྤྲོ་བར། །འདུས་པའི་དབུས་སུ་བྱ་བའོ། །ཏམ་བུ་ལ་ཀུན་ཐམས་ཅད་ལ། །དགྱེས་བྱེད་སྦྱིན་པར་བྱ་བ་ཡིན། །ལྷག་མ་གོས་དང་སོ་རྩི་དང་། །གང་བའི་སྲེག་བླུགས་སྦྱིན་པར་བྱ། །རྡོ་ཞོ་དང་གྲལ་སོ་རྩི་དང་། །ཞལ་བསིལ་བ་ནི་མཇུག་ཏུའོ། །ཡེ་ཤེས་མེ་ནི་གཤེགས་གསོལ་ཏེ། །སྔགས་བརྗོད་པ་ཡི་བཤོས་གསོལ་བྱ། །ཨོྃཨགྣ་ཡེ་སརྦ་སན་ཏོ་ཥ་ཎྃ་ཀུ་རུ་མེ་ཡ་ཐཱ་ཀཱ་ལེ་སིདྡྷི་དཱ་གཙྪ་ཏུ་ཧཱུྃ་ཧཱུྃ་སྭཱ་ཧཱ། མེ་གཤེགས་སུ་གསོལ་བའི་སྔགས་སོ། །དམན་
དང་ཆང་སོགས་གང་ཅུང་ཟད། །དེ་ཐམས་ཅད་ནི་བཟོད་པ་མཛོད། །ཀུན་གྱི་ལྷག་མ་ཡི་ནི་འབྲུ། །ཐམས་ཅད་ཐབ་ཏུ་བསྲེག་པར་བྱ། །ཞེས་བྱ་དཀྱིལ་འཁོར་ཐིག་མདོར་བསྟན། །སྦྱིན་སྲེག་ཐབ་དང་ཆོ་ག་མཆོག །སློབ་དཔོན་མཆོད་བྱ་ཡང་དག་པར། །རྡོ་རྗེ་འཆང་དུ་བྱས་ནས་ནི། །མུ་ཏིག་གསེར་དང་རིན་ཆེན་རྣམས། །གླང་རྟ་ས་གཞི་ཡུལ་ལྗོངས་དང་། །བྲན་ཕོ་བྲན་མོ་འཁོར་རྣམས་དང་། །ཆུང་མ་ཕུན་སུམ་ཚོགས་ཀུན་དང་། །གོས་ཟུང་དུ་མ་རྣམས་དང་ནི། །དགྱེས་པའམ་ས་ལ་གང་ཅུང་ཟད། །བདག་ཏུ་ལྟ་བ་དང་བྲལ་བས། །དབུལ་བྱ་གཙོ་བོ་ཞི་བར་གྱིས། །བདག་ཉིད་དངོས་པོ་ཐམས་ཅད་ཀྱིས། །ཕྱག་བྱས་ནས་ནི་དབུལ་བར་བྱ། །མེ་ཏོག་སྤོས་སོགས་ཐམས་ཅད་རྣམས། །སྟོན་པའི་མདུན་དུ་དབུལ་བར་བྱ། །མཎྜལ་མདུན་དུ་བྱ་བ་ནི། །དེ་ནས་དགུ་ཡི་བདག་ཉིད་འདི། །དབུས་སུ་བླ་མ་རྡོ་རྗེ་སྟེ། །མདུན་དུ་ཐམས་ཅད་མཛེས་མ་སྟེ། །བྱང་དུ་དགའ་བའི་མཆོག་མ་དང་། །ནུབ་ཏུ་ཤིན་ཏུ་རྩེ་མ་དང་། །ལྷོ་རུ་རོལ་པའི་རྡོ་རྗེ་མ། །སྙིང་རྗེ་ལ་སོགས་གྲྭ་བཞིར་རོ། །ཨོཾ་བཛྲ་ས་ཏྭ་གུ་རུ་པཱ་དེ་བྷྱཿ། སརྦ་ས་ཏྭོ་པ་ཀཱ་ར་ཎཱ་ཡ་སྭཱ་ཧཱ། དཀྱིལ་འཁོར་པ་རྣམས་རང་མིང་ནི། །བརྗོད་བྱ་ཐོག་སྭཱ་ཧཱ་མཐའོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་དཀྱིལ་འཁོར་དང་སྦྱིན་སྲེག་དང་སློབ་དཔོན་མཆོད་པའི་ཆོ་ག་ཞེས་བྱ་བ་སྟེ་ལེའུ་ཉི་ཤུ་རྩ་བཞི་པའོ།། །།དེ་ནས་འཁོར་བའི་འཇིགས་པ་ནི། །སྒྲོལ་བྱེད་རབ་གནས་བཤད་པར་བྱ། །རྣལ་འབྱོར་མ་ཡི་རྒྱུད་རྒྱལ་དུ། །ཉེ་བར་མཁོ་བ་ཐམས་ཅད་རྣམས། །སློབ་དཔོན་གྱིས་ནི་རྟག་གཟུང་བྱ། །བྱ་བར་འོས་པ་གཞན་དེ་བཞིན། །འཇིག་རྟེན་སྨོད་པ་བསྲུང་ཕྱིར་ཡིན། །སླར་ཡང་རང་བཞིན་ལས་སྐྱེས་པ། །རབ་གནས་སྒྱུ་མ་ཡིས་གཟུང་བྱ། །ལུགས་མ་འམ་ནི་ཐང་ག་འམ། །རང་གིས་གཟུགས་ནི་ཕྱི་རོལ་སྤྲོ། །གང་གི་དུས་ཉིད་ལ་འབྱུང་བ། །གང་གང་ལྷ་ནི་ལྷག་གནས་པའི། །དེ་ཡི་གཟུགས་ནི་དེའི་དུས་ཀྱིའོ། །བདེ་བའི་བདག་
ཉིད་སྤྲོས་པ་སྟེ། །ས་བོན་གང་གི་དང་པོའི་ཡིག །འཆར་བ་དབུགས་རྒྱུ་བའི་བདག་ཉིད། །རླུང་དང་རྣམ་ཤེས་འདུས་ལས་སོ། །དེ་ཚེ་དུས་སུ་གང་གི་གཟུགས། །ཕུན་སུམ་ཚོགས་ཀུན་བྱེད་པ་ཡིན། །གཉིས་མེད་ཡེ་ཤེས་བྲལ་མིན་ལ། །ལུགས་མ་རབ་ཏུ་གནས་པ་མེད། །གཉིས་སུ་མེད་པའི་ཡེ་ཤེས་ལས། །འཁོར་བ་པ་ཡི་རབ་གནས་བྱ། །ཐར་བདེ་མངོན་པར་འདོད་རྣམས་ཀྱི། །འདི་ལ་བདེ་བའི་བདེ་བ་ཆེ། །རྣལ་འབྱོར་མ་ཡི་དགར་གནས་ལ། །དེ་ལས་བྱུང་བར་བྱ་བ་ཡིན། །ལུགས་མའམ་ནི་ཐང་སྐུ་ལ་འམ། །ཡང་དག་རིག་པས་རོ་རྣམས་བྱུག །བདུད་རྩི་ལྔ་ཡིས་རྫས་རྣམས་ལ། །བསྲེག་པར་གྱུར་པས་ཁྲུས་བྱའོ། །བློ་དང་ལྡན་པས་བུམ་པ་གཞག །ལྷ་ནི་དཀྱིལ་འཁོར་བ་དང་བཅས། །དམ་ཆོས་ལ་སོགས་ཐམས་ཅད་རྣམས། །ཆོས་ཀྱི་འབྱུང་གནས་ནང་དུ་སྟེ། །བཞུགས་པ་གང་གི་གནས་རྣམས་སུ། །དུས་ཐམས་ཅད་དུ་རབ་གནས་པའོ། །ཨེ་ཡི་ཡི་གེའི་གནས་བསྒྲུབས་ནས། །བྃ་ཡིག་རྡོ་རྗེ་སེམས་དཔའ་ཅན། །མ་ཡིག་རབ་ཏུ་གནས་པ་དེར། །བཞི་པ་ཐོག་མ་མེད་ཡཱར་གྲགས། །ཐོས་པ་གཅིག་པ་སྔགས་ཀྱི་དོན། །བརྡ་ཡི་ཡི་གེའི་སྔགས་ཅན་ནོ། །དུས་སུ་བཅོམ་ལྡན་འདས་རང་གིས། །རབ་བཞུགས་རབ་ཏུ་མི་གནས་པའོ། །དེ་བཞིན་གཤེགས་པ་ཐམས་ཅད་ཚིག །ཆོས་ཀྱི་དབྱིངས་དང་མཉམ་པའོ། །སྐུ་གསུང་ཐུགས་ཀྱི་ཚིག་རྣམས་ཀྱིས། །རྣལ་འབྱོར་མའི་གཙོ་གཞན་གྱི་མིན། །བྷ་ག་རྣམས་སུ་རྒྱུད་ལྔ་རྣམས། །བྱ་བ་ལ་སོགས་བླ་མེད་མཐར། །བཞུགས་པ་དེ་ལྟར་དུ་ནི་ཅི། །རབ་ཏུ་གནས་པའམ་མི་གནས་པའོ། །སེམས་ཅན་བསྒྲལ་བ་བྱས་ནས་ནི། །རབ་ཏུ་གནས་པ་རྒྱུད་ཀུན་དུའོ། །གང་ཚེ་ལྷག་མོས་རྣལ་འབྱོར་མའི། །རྒྱུད་དུ་གཉིས་མེད་རབ་ཏུ་གནས། །ལས་དང་ལས་བྱ་གཉིས་བྱས་ནས། །འོན་ཀྱང་རང་གིས་རིག་པ་ཅན། །རང་གིས་རིག་པའི་ཡེ་ཤེས་ཆེ། །རང་གིས་རིག་པའི་བདག་ཉིད་ལྷ། །རང་གིས་རིག་པའི་རང་བཞིན་ལས། །རབ་གནས་དེ་ནི་རབ་ཏུ་བསྔགས། །སྐྱེ་བོ་རྣམས་ལ་སྙིང་བརྩེ་བས། །གཞན་ཡང་དེ་བཞིན་རབ་སྨྲ་བྱ། །
ཡང་དག་ཡེ་ཤེས་དཀྱིལ་འཁོར་གྱི། །ལྷ་ཡི་རྣམ་པར་དག་པའོ། །བདུན་ཅུ་རྩ་གཉིས་ཕྱག་རྣམས་ནི། །རྒྱུད་དག་པར་ནི་རྣམ་པར་བརྗོད། །ཕྱག་བཞི་དགོད་པ་ལ་སོགས་པ། །བཞི་པོ་རྣམས་ནི་དག་པར་འདོད། །ཞལ་རྣམས་དག་པའི་དངོས་པོ་ནི། །ལྷན་སྐྱེས་རྫོགས་བྱང་ཆུབ་བཅུ་དྲུག །བཅུ་བདུན་པའི་ཞལ་ཡིད་དུ་བཤད། །སྲིད་དང་མྱ་ངན་འདས་ཞབས་གཉིས། །ཐམས་ཅད་རྒྱན་གྱི་དག་པ་ནི། །ཆོས་དང་ཆོས་པའི་སྐྱེ་རྣམས་སོ། །ལྷག་མ་འཇིག་རྟེན་ཁམས་ཀྱི་ནི། །རྣམ་དག་གསལ་དང་མི་གསལ་བའོ། །རྩ་བའི་སྔགས་སོགས་དག་པ་ཡང་། །ཐེག་པ་ཐམས་ཅད་དོན་སྟོན་པའོ། །རྡོ་རྗེ་པདྨ་སོགས་ཐམས་ཅད། །འདིར་ནི་མངལ་སྐྱེས་བརྗོད་པ་པོའོ། །དཀྱིལ་འཁོར་དག་པ་ཐམས་ཅད་ཀྱང་། །ཆོས་བསྡུས་སྟོན་པ་པོ་ཡིན་ནོ། །ཡན་ལག་བཅུ་གཉིས་རྣམ་དག་པ། །འཁོར་ལོས་སྒྱུར་བ་བཅུ་གཉིས་སོ། །ཆ་ཤས་བཅུ་དྲུག་རྣམས་ཀྱི་བར། །དུར་ཁྲོད་དག་པར་ཤེས་པར་བྱ། །རྒྱུད་གང་བདག་ལས་བྱུང་བ་དེ། །ཐམས་ཅད་དག་པར་ཤེས་པར་བྱ། །ཀུན་མཁྱེན་ཡེ་ཤེས་ཅན་ཐམས་ཅད། །དེ་ཡི་དག་པ་མངོན་བརྗོད་པའོ། །རྫས་འདུ་ཤེས་ཉིད་དང་ཡེ་ཤེས། །སོ་སོའི་ཡེ་ཤེས་སྨྲ་རྣམས་ཀྱི། །མིང་བརྗོད་པ་ཡི་དག་པ་ནི། །རྣལ་འབྱོར་རྣལ་འབྱོར་མའི་རྒྱུད་དོ། །སྒྱུ་མ་ལྟ་བུའི་སྐྱེ་འགྲོ་ཀུན། །དཀྱིལ་འཁོར་འཁོར་ལོ་སྒྱུ་མའི་ངོ་། །གསུངས་པ་རང་གིས་རིག་ཡེ་ཤེས། །གང་དང་དེར་ནི་མངོན་བརྗོད་པའོ། །སྒྱུ་མའི་གྲུབ་མཐའི་མཚན་ཉིད་ནི། །བླ་མའི་ཞལ་ལས་ཀུན་ཤེས་བྱ། །མན་ངག་གིས་ནི་བགྲོད་བཞིན་པ། །སོ་སོའི་མཚམས་ལ་བདེ་བ་ཆེ། །དེ་ཚེའི་དུས་སུ་དག་པ་གང་། །སངས་རྒྱས་སྤྱོད་ཡུལ་ལས་དེ་དག །དེ་ཕྱིར་རྩ་བའི་གསང་སྔགས་ཀྱང་། །བདེ་བ་འདོད་ལ་འབྱུང་བར་འགྱུར། །ཡི་གེ་རེ་རེར་བཏགས་པ་ལས། །དངོས་པོའི་གཟུགས་ཀྱི་དེ་དག་འགྱུར། །ཕག་མོའི་གསང་སྔགས་ཉིད་བཤད་པ། །དངོས་པོ་ཐམས་ཅད་དེའི་དག་པའོ། །དབང་པོ་དང་ཡུལ་མི་བདེན་པར། །རོ་མཉམ་དེ་ཉིད་སྦྱོར་རྣམས་ཀྱི། །ཆོས་ཀྱི་སྐུ་ཅན་དག་པར་འགྱུར། །ངག་ནི་ལོངས་སྤྱོད་རྫོགས་སྐུ་ཅན། །སེམས་ནི་སྤྲུལ་
པའི་སྐུ་ཡི་སྟེ། །ལུས་ནི་ལྷན་སྐྱེས་སྐུ་ཅན་ནོ། །དྲི་མེད་ལ་སོགས་སླར་ཡང་དེར། །བཞི་རྣམས་ཀྱི་ཡང་དག་པར་འདོད། །གོ་ཆའི་སྔགས་ཀྱི་དག་ཆེན་ནི། །རྣལ་འབྱོར་ཀུན་གྱི་སྤྱོད་པའོ། །སྙིང་པོ་དང་ནི་ཉེ་སྙིང་དུ། །ཁ་སྦྱོར་རྣལ་འབྱོར་རྣལ་འབྱོར་མའོ། །འབྱུང་དང་འབྱུང་ལས་བྱུང་འདུས་པ། །གཏོར་མའི་སྔགས་ཀྱི་དག་པར་འགྱུར། །གནོད་མཛེས་སྔགས་ཀྱི་དག་པ་གང་། །རྣམ་རྟོག་ཀུན་ལ་ཕུར་འདེབས་པའོ། །སྣ་ཚོགས་ལས་ཀྱི་དག་པ་གང་། །དེ་ཡི་དག་པ་དོན་དམ་ཅན། །ཁམས་ཐམས་ཅད་ཀྱི་ལྷ་རྣམས་ནི། །པགས་དང་ཤ་སོགས་དག་པར་འགྱུར། །འདིར་མ་སྨྲས་པས་ཅི་བྱ་སྟེ། །བདེ་བ་ཐམས་ཅད་རྣམ་དག་པའོ། །གང་གང་དབང་པོའི་ལམ་རྣམས་སུ། །གང་གང་དེ་དེའི་རང་བཞིན་གྱིས། །མཆོག་ཏུ་ཕན་པའི་རྣལ་འབྱོར་གྱིས། །ཐམས་ཅད་སངས་རྒྱས་རང་བཞིན་མནོས། །དག་པ་མཆོག་ཏུ་ཤེས་བྱ་སྟེ། །གཞན་གྱི་དག་པ་མི་སྨྲའོ། །དབང་ཕྱུག་ལ་སོགས་ལྟ་བར་ནི། །མདོར་བསྡུས་དག་པར་ཤེས་པར་བྱ། །སངས་རྒྱས་རྣལ་འབྱོར་མའི་རྒྱུད་དུ། །དེ་ནི་འགྲུབ་འགྱུར་གཞན་དུ་མིན། །བྱང་ཆུབ་ལམ་དུ་གནས་པ་གང་། །གཟུང་དང་འཛིན་པའི་དངོས་པོ་ཅན། །དེ་ཡི་མ་རིག་མངོན་སྐྱོན་གྱིས། །དབང་ཕྱུག་ལ་སོགས་སུ་བལྟའོ། །དེ་ཕྱིར་རང་གིས་རིག་རང་བཞིན། །རྣམ་དག་འདི་ནི་བཤད་པ་ཡིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། བཅོམ་ལྡན་འདས་ཞེས་བྱ་བ་ལ་སོགས་པའི་རྣམ་པར་དག་པ་དང་དེ་བཞིན་དུ་རབ་ཏུ་གནས་པའི་ཆོ་གའི་མཚན་ཉིད་ཅེས་བྱ་བའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་ཕྱག་རྒྱ་ལྷན་ཅིག་སྐྱེས། །བྱེད་རྣམས་མཚན་ཉིད་བཤད་པར་བྱ། །མི་ཕྱེད་མ་སོགས་རྩ་རྣམས་ལའང་། །བཞི་ཡིས་ལྷག་པ་བཤད་པ་ཡིན། །མི་ཕྱེད་མ་དང་ཕྲ་
གཟུགས་མ། །བཟང་མོ་གཡོན་མ་གཡོན་ཕྱོགས་མ། །རུས་སྦལ་སྐྱེས་མ་སྒོམ་པ་མོ། །དབང་མ་སྐྱོན་མ་ནོན་མ་མ། །སྤྱི་མ་དང་ནི་རྒྱུ་སྦྱིན་མ། །དངོས་མ་སུ་མ་ན་དེ་བཞིན། །ལ་ལ་ནཱ་དང་ར་ས་ནཱ། །ཨ་བ་དྷཱུ་ཏཱི་སྤྲོ་བའི་ངག །པྲ་བན་དྲོ་མ་གྲུབ་མ་དང་། །རྒན་མོ་སྐྱེ་བོ་ཀུན་མཐུན་མ། །འདར་བ་མོ་དང་སྙིང་པོ་མ། །ངང་པ་སུམ་སྐོར་འདོད་མ་ཀླུ། །གཏུམ་མོ་བདུད་ཀྱི་བུ་མོ་དང་། །ཟླ་བ་ཉི་མ་མེ་རཱ་ཧུ། །སུམ་ཅུ་རྩ་དྲུག་རྩ་རྣམས་ལ། །རེ་རེ་ལ་ནི་བཅུ་གཉིས་ཏེ། །ཐམས་ཅད་དབྱེ་བས་ཕྱེ་བ་ནི། །སླར་ཡང་ཕྱག་རྒྱ་མདོར་བསྟན་པའོ། །སོར་མོ་གཅིག་ནི་བསྟན་བྱ་སྟེ། །དེ་ཡི་སོར་མོ་གཉིས་བསྟན་བྱ། །འོག་དང་སྟེང་དུ་མཉམ་པར་གནས། །སླར་ཡང་མཐེ་བོང་བསྟན་པར་བྱ། །འདི་རྣམས་རྩ་ནི་ཐམས་ཅད་རྣམས། །འོག་དང་སྟེང་དུ་མཉམ་རེངས་པའོ། །ཐམས་ཅད་མཁྱེན་པས་འགྲོ་བྱ་མཆོག །སྣ་ཚོགས་རིམ་པས་ཤེས་པར་བྱ། །དེ་ཡི་མཐེའུ་ཆུང་རབ་བསྟན་བྱ། །དེ་དང་ཡང་དག་གནས་བྱེད་པའོ། །གང་གི་མིང་མེད་སྟོན་པ་ན། །དེ་ཡི་རབ་ཏུ་སྟོན་པ་སྟེར། །རྡོ་རྗེ་ཉི་མ་ཧེ་རུ་ཀ། བརྐྱང་མ་སྙིང་གའི་པདྨར་རོ། །གང་གི་སྡིགས་མཛུབ་སྟོན་པ་ན། གུང་མོ་རབ་ཏུ་བསྟན་པར་བྱ། །རྡོ་རྗེ་པདྨའི་རབ་སྦྱོར་བས། །བདེ་བ་སྟེང་དུ་འཕང་བར་བྱ། །གང་གི་དཔྲལ་བར་སྟོན་པ་ན། དེ་ཡི་དར་དཔྱངས་རབ་བསྟན་བྱ། །རང་གིས་རིག་པའི་བདེ་བ་དེར། །ཕྱག་རྒྱ་དང་བཅས་འཆིང་བར་འགྱུར། །གང་གི་འཁོར་ལོ་སྟོན་པ་ན། །དེ་ཡི་ས་གཞི་རབ་བསྟན་བྱ། །གཙུག་ཏོར་དང་ནི་ལྟེར་འགྲོ་བ། །ལག་པ་གཉིས་ཀྱིས་རེངས་པར་བྱ། །གང་གི་མིག་ནི་སྟོན་པ་དང་། །དེ་ཡི་མེ་ལོང་རབ་བསྟན་བྱ། །ལྷ་རྫས་དབང་པོ་རྣམས་ཀྱི་རྒྱུས། །འོད་གསལ་བ་ནི་མཐོང་བར་འགྱུར། །གང་གི་ལྟོ་བར་རྡེག་བྱེད་པ། །དེ་ཡི་ལྟེ་བར་རབ་བསྟན་བྱ། །ཆོས་ཀྱི་དབྱིངས་ཀྱི་རང་བཞིན་དུ། །རྣམ་ཤེས་བརྒྱད་པོ་སྣང་བར་འགྱུར། །གང་གི་ནམ་མཁའ་སྟོན་པ་ན། །དེ་ཡི་ཉི་མ་རབ་བསྟན་བྱ། །སྟོང་ཉིད་སྙིང་རྗེ་ཡང་དག་པར། །རྩ་ཡི་རྣལ་འབྱོར་ཉིད་ཀྱིས་མཐོང་། །གང་གི་ཁྲོ་གཉེར་སྟོན་པ་ན། །དེ་ཡི་མཚམས་ཀྱི་མཐའ་བསྟན་བྱ། །བདག་ཉིད་ཡང་དག་སྦྱོར་རོལ་ཅིང་། །རང་གིས་
རྗེས་སུ་མྱོང་བ་ཤེས། །གང་གི་ཆུ་བོ་སྟོན་པ་ན། དེ་ཡི་རྒྱ་མཚོ་རབ་བསྟན་བྱ། །ས་གཅིག་གི་ནི་རབ་སྦྱོར་བས། །ཐམས་ཅད་སར་ནི་རབ་ཏུ་བསྔགས། །གང་གི་པུས་མོ་སྟོན་པ་ན། །དེ་ཡི་རྐང་པ་རབ་བསྟན་བྱ། །བདེ་འགྲོར་འགྲོ་བའི་དུས་སུ་ནི། །དབང་པོའི་དངོས་པོ་དེ་འགྲོའོ། །གང་གི་ནུ་མ་སྟོན་པ་ན། །དེ་ཡི་གདན་ནི་རབ་བསྟན་བྱ། །བདེ་བ་ལོངས་སྤྱོད་བདག་ཉིད་སྐྱེས། །ཀུན་ནས་སྲིད་པ་འཛག་བར་དུའོ། །གང་གི་དཔུང་པ་སྟོན་པ་ན། །དེ་ཡི་ལག་པ་རབ་བསྟན་བྱ། །འབར་བ་དབྱུག་པ་བཞིན་སྣང་ལ། །བདུད་རྩི་ལྔ་རྣམས་བསྲེག་པར་བྱ། །གང་གི་བརླ་ནི་སྟོན་པ་ན། །དེ་ཡི་གསང་བ་རབ་བསྟན་བྱ། །གཞུ་ཡི་དབྱུག་པའི་རྣམ་པའི་སྲོག །དབུ་མ་རྣམས་སུའང་ཐིམ་པའོ། །གང་གི་ལྕེ་ནི་སྟོན་པ་ན། །དེ་ཡི་རྐན་ནི་རབ་བསྟན་བྱ། །གཏུམ་མོ་ཐམས་ཅད་རྩ་རུ་ནི། །བསྡུས་ནས་རྣམ་པར་གནས་པ་ཡིན། །གང་གི་མཆུ་ནི་སྟོན་པ་ན། །དེ་ཡི་ཀོས་ཀོ་རབ་བསྟན་བྱ། །ཐམས་ཅད་ཆོས་ཉིད་བརྗོད་མེད་པ། །དབང་པོ་ཀུན་གྱི་དྲན་པ་བྲལ། །གང་གི་སོར་མོའི་རྩེ་སྟོན་པ། །དེ་ཡི་སེན་མོ་རབ་བསྟན་བྱ། །སྲིད་པའི་རྩེ་མོར་བདེ་བའི་གཟུགས། །གཅོད་པར་ངེས་པར་མཐོང་བར་འགྱུར། །གང་གི་སྐྲ་ནི་སྟོན་པ་ན། །དེ་ཡི་ཕྲེང་བ་རབ་བསྟན་བྱ། །གཡོ་ཅན་སེམས་ཅན་གྱི་ནི་སྟེ། །ཡེ་ཤེས་གཟུགས་ཅན་དུ་བལྟའོ། །གང་གི་སྤྱི་གཙུག་སྟོན་པ་ན། །དེ་ཡི་རྐང་མཐེབ་རབ་བསྟན་བྱ། །ནོར་བུའི་སྐུད་པ་བཞིན་དུ་སྲོག །དབུ་མར་འོང་བ་མཐོང་བར་འགྱུར། །གང་གི་མགྲིན་པ་སྟོན་པ་ན། །དེ་ཡི་སྐྱེ་བ་རབ་བསྟན་བྱ། །སྤྱི་བླུགས་བདུད་རྩི་ཇི་ལྟ་བར། །པདྨར་སྐྱེ་འགྲོ་ཐམས་ཅད་མཐོང་། །གང་གིས་ཉི་མ་སྟོན་པ་ན། །དེ་ཡི་ནམ་མཁའ་བསྟན་པར་བྱ། །སྙིང་ག་ལས་བྱུང་འཇིག་རྟེན་ཀུན། །མཆོག་ཏུ་ཟག་མེད་ལས་ཤེས་འགྱུར། །གང་གི་ས་ནི་སྟོན་པ་ན། །རྐང་པའི་མཐིལ་ནི་རབ་བསྟན་བྱ། །པདྨའི་འདབ་འདྲའི་ཆུ་ཡིས་ནི། །བདུད་རྩིའི་མྱུ་གུ་འཛག་པར་འགྱུར། །གང་གི་མུར་གོང་སྟོན་པ་ན།དེ་ཡི་མཁུར་བ་རབ་བསྟན་བྱ། །སེམས་ཅན་ཀུན་གྱི་རྩ་རྣམས་ཀྱི། །ནུས་པས་ནམ་མཁའི་གནས་རྣམས་སུའོ། །གང་གི་ལིང་ག་སྟོན་པ་ན། །དེ་ཡི་རླིག་པ་རབ་བསྟན་བྱ། །འགྱུར་མེད་
འགྱུར་བར་འགྲོ་འགྱུར་བ། །དེ་ནི་རླིག་མཚམས་ཕྱག་རྒྱ་སྐྱེས། །གང་གི་སྤྱི་བླུགས་སྟོན་པ་ན། །རི་བོ་དེ་ཡི་རབ་བསྟན་བྱ། །རི་ལས་ཐུར་དུ་ཆུ་བོ་བཞིན། །བདུད་རྩིའི་རྒྱུན་ནི་འཛག་པར་འགྱུར། །བུད་མེད་གང་ཞིག་རྣ་བར་རེག །རྒྱབ་ཀྱི་རྒྱུད་ནི་རབ་བསྟན་བྱ། །གང་གིས་ལྷན་སྐྱེས་རྫོགས་བྱང་ཆུབ། །ཐོས་པའི་སྤྱོད་ཡུལ་དུ་འཐོབ་འགྱུར། །གང་གི་གོས་ནི་སྟོན་པ་ན། །དེ་ཡི་ཚོན་རྩི་རབ་བསྟན་བྱ། །ཆོས་ཐམས་ཅད་ཀྱི་རང་བཞིན་དུ། །སྐད་ཅིག་གིས་ནི་བདག་མེད་མཐོང་། །གང་ཞིག་སོ་ཡིས་མཆུ་འཛིན་མ། །སོ་ནི་ཀྲིག་ཀྲིག་བསྟན་པར་བྱ། །བཟའ་བ་ཐམས་ཅད་མེད་པ་ཉིད། །བག་ཆགས་སྟོབས་ཀྱིས་རྣམ་པར་འཕེལ། །གང་གི་ལྕེ་ནི་བསྐྱོད་པ་ན། །ཟ་བའི་ལག་པ་རབ་བསྟན་བྱ། །བདེ་བ་ཀུན་གྱིས་ཚིམ་པ་ནི། །དོན་ཡོད་པ་ལས་འཐོབ་པར་འགྱུར། །གང་གི་ལག་པའི་མཁྲིག་མ་སྟོན། །དེ་ཡི་ཐལ་གོང་རབ་བསྟན་བྱ། །སྲོག་གི་རླུང་རྣམས་ལ་བརྡུང་བ། །བུམ་ཅན་འཁྲུལ་འཁོར་སོགས་ཀྱིས་སོ། །གང་གི་རྩིབ་ལོགས་སྟོན་པ་ན། །དེ་ཡི་མཆན་ཁུང་རབ་བསྟན་བྱ། །ནང་དུ་ལྷན་ཅིག་སྐྱེས་པ་དང་། །སྙིང་རྗེ་ལ་ཡང་རིག་པའོ། །གང་གི་ལག་པའི་དབུས་རེག་པ། །ལག་པའི་རྒྱབ་ནི་བསྟན་པར་བྱ། །བདག་གིས་གཞན་དང་རང་གི་དུས། །མཆོག་མ་ཀྱེ་ཧེ་མི་ཤེས་པའོ། །གང་གི་རྒོད་པ་སྟོན་པ་ན། །དེ་ཡི་དུ་བ་རབ་བསྟན་བྱ། །མཆོག་ཏུ་གཉིས་མེད་ཞུགས་པ་ལས། །འདོད་ཆགས་འདོད་ཆགས་བྲལ་བའང་ཉམས། །གང་གི་གར་ནི་སྟོན་པ་ན། །དེ་ཡི་གླུ་ནི་རབ་བསྟན་བྱ། །ཁམས་གསུམ་ཐམས་ཅད་སྒྱུ་མ་རུ། །གཉིས་ཀྱི་དངོས་པོ་ལས་མཐོང་འགྱུར། །གང་གི་ཀེང་རུས་སྟོན་པ་ན། །དེ་ཡི་རྩེ་མོ་རབ་བསྟན་བྱ། །རྩ་གསུམ་པོ་ནི་འབར་བ་ཡིས། །འཆི་བ་བླུ་བར་འོང་བ་ཡིན། །དེ་ལྟར་ཕྱག་རྒྱ་སུམ་ཅུ་དྲུག །ཕྱག་རྒྱའི་ལན་ནི་དེ་བཞིན་མཆོག །སྤུན་དང་སྲིང་མོར་སྤྱོད་པར་ནི། །རྡོ་རྗེའི་འཁོར་ལོར་ཤེས་པར་བྱ། །རབ་གཏུམ་རིགས་ཀྱི་བདག་མོར་ནི། །གནས་ཀྱི་གཙོ་མོར་ཤེས་པར་བྱ། །རབ་ཏུ་གསལ་བའི་མཐར་གྱུར་གཟུགས། །སྲིད་པའི་རྒྱ་མཚོར་འབྱུང་བར་འགྱུར། །ཇི་སྲིད་གཉིས་སུ་མེད་སྤྱོད་ཡུལ། །གཡོ་བའི་ཆོས་ཀྱང་ཤེས་པར་བྱ། །མཁའ་འགྲོ་མ་ཚོགས་མ་ལུས་པ། །
ལྷན་ཅིག་སྐྱེས་པའི་རྒྱ་མཚོར་འདུས། །རབ་གཏུམ་ཡི་གེ་ཤེས་པར་བྱ། །ཐམས་ཅད་བུད་མེད་སྒྱུ་མའི་གཟུགས། །ཕྱག་རྒྱ་ཀུན་གྱིས་འདུན་པ་ཡི། །རྫུ་འཕྲུལ་རྐང་པའི་རང་བཞིན་དུ། །གསུངས་པའི་དེ་བཞིན་མ་ལུས་པ། །དེ་ནི་རྫུ་འཕྲུལ་རྐང་པར་འདོད། །ཕྱག་རྒྱའི་བརྡ་ནི་མ་ལུས་པ། །རྣལ་འབྱོར་མ་བསྐྱེད་མཚན་ཉིད་དོ། །སྔོན་བཤད་ཆུང་ངུ་བདེ་མཆོག་གི། །དཀྱིལ་འཁོར་འཁོར་ལོའི་དབུས་སུ་སྟེ། །སུམ་ཅུ་བདུན་བདག་ཉིད་དབུས་སུ། །སྔགས་འདི་ཐམས་ཅད་རྣལ་འབྱོར་མའོ། །མཁའ་འགྲོ་མ་སོགས་བཅུ་གཉིས་ཀྱི། །དུས་སྦྱོར་ཆུ་སྲིན་ལ་སོགས་ཏེ། །རབ་གཏུམ་ལ་སོགས་ཉི་ཤུ་བཞི། །དུས་དེ་རྣམས་སུ་འབྱུང་བ་ཡིན། །སྐད་ཅིག་ཡུད་ཙམ་ལ་སོགས་པས། །ཐམས་ཅད་ཀྱི་ནི་འཕོ་བ་གཅིག །ཤིན་ཏུ་ཕྲ་དང་རགས་རྣམས་ཀྱི། །སྐྱེ་བོ་རྣམས་ཀྱི་དུས་ཀྱིས་ནི། །ལོར་འགྱུར་བ་ཡི་ཚད་ཀྱིས་ནི། །རྟག་ཏུ་རྣལ་འབྱོར་མ་རྣམས་རྩིས། །ཁ་ར་སོགས་སུ་དུས་བྱས་ནས། །ལྡོག་པ་གཉིས་དག་གིས་ནི་མཚོན། །གཉིས་དག་བཅུ་ཡིས་བསྒྲེ་བྱས་པ། །ལོ་ཡི་ཆུ་ཚོད་དེ་བཞིན་ནོ། །བརྒྱད་ཅུ་རྩ་ལྔས་ལྷག་པའི་བརྒྱ། །ཆུ་ཚོད་ལྔ་ལ་ཤེས་པར་བྱ། །ཉི་མ་གཅིག་གི་ཚད་ཀྱང་ནི། །ནམ་མཁའ་མིག་དང་ལག་པ་མིག །ཟླ་བ་གཅིག་གི་ཚད་ཀྱང་ནི། །མཁའ་མཁའ་རོ་དང་དུས་ཚོད་རོ། །ལོ་གཅིག་གི་ནི་ཚད་ཀྱང་ནི། །མཁའ་སྟོང་མིག་དང་བུག་དེ་བཞིན། །བུག་པ་དང་ནི་རི་བོའོ། །མཁའ་འགྲོ་མ་ཀུན་ཤེས་པར་བྱ། །གསང་སྔགས་ཁ་སྦྱོར་བདག་ཉིད་དེ། །རྩ་བའི་སྔགས་རྣམས་ཀྱི་ནི་ཡང་། །རྐང་པ་གཉིས་གཉིས་མཉམ་པར་ནི། །རྣལ་འབྱོར་མའི་དེ་རྐང་པ་གཅིག །དེ་རྣམས་ལས་ནི་ལྷག་གྱུར་གང་། །ཧཱུྃ་ཕཊ་ལ་སོགས་སྤང་བར་བྱ། །ཨོཾ་ཏྲི་ན་བྷུ་མཿབ་ཤྲཱི་ཎ་བ་ཀྃ་ཛྲ་པ་ཌཱ་ཀྃ་ཀ་པཱ་མ་བ་ཧཱ་ཎཱ་བཱི་ཡ་ར་ཧཱུྃ་བཱི་ཧཱུྃ་རཱི་ཕཊ་ཤྭ་ཕཊ་རཱ་སྭཱ་ཡ་ཧཱ་ཧཱུྃ་ཧཱུྃ་ཕཊ་ཕཊ་སྭཱ་ཧཱ་ཨོྃ་པྲ་ཙཎྜི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱ་བ་ནི་སྔགས་སོ། །ཁ་དོག་ནག་མོ་ཕྱག་བཞི་མ། །སྐྲ་གྲོལ་འཇིགས་པར་མཛད་པ་མོ། །ལྷ་མོ་ཤེས་རབ་ཐབས་བདག་ཉིད། །ལྷག་མ་སྔོན་བཤད་མཚན་ཉིད་དོ། །ལྷ་མོ་འདི་རྣམས་
ཐམས་ཅད་ནི། །སླར་ཡང་རྟག་ཏུ་རྒྱ་མཚོ་མཉམ། །རབ་མཆོག་བདེ་བ་ཐོབ་པ་ན། །དགོས་པ་མང་པོ་ཡང་དག་རིག །ཡེ་ཤེས་ཟླ་བའི་རང་བཞིན་དུ། །འདི་ནི་འཆར་དང་ནུབ་པ་ཡིན། །ཚངས་པའི་སྒོ་ངའི་འོད་གཟུགས་གང་། །འོད་ཟེར་མཁའ་འགྲོ་མཁའ་འགྲོ་མ། །འོད་ཟེར་ཞེས་བྱ་རབ་བཅིངས་པའང་། །ཡེ་ཤེས་འབབ་པར་རབ་ཏུ་ནུས། །རི་མོའང་ནམ་མཁའི་དབུས་རྣམས་སུ། །བགྲོད་བྱ་རང་གི་མ་ལས་སྐྱེས། །དེ་ལྟར་རབ་གཏུམ་མའི་ཡོན་ཏན། །རབ་མཆོག་ལ་སོགས་སུ་མཚོན་བྱ། །དུས་ཐམས་ཅད་དུ་ཀུན་སྤྱོད་པ། །སྔགས་ལས་བྱུང་བ་ཤེས་པར་བྱ། །མཆོག་གི་དངོས་གྲུབ་རྒྱུ་ཡིས་ནི། །འདུ་བ་རྣལ་འབྱོར་མར་རབ་གསུངས། །དངོས་གྲུབ་རྨི་ལམ་དུ་སྟེར་མ། །སྟེས་ན་དུས་ཀྱིས་ཤེས་པར་བྱ། །ལས་ནི་གང་དང་གང་འདྲ་བ། །དེ་དང་དེ་འདྲའི་འབྲས་བུ་སྟེ། །རྒྱུ་དང་འབྲས་བུའི་འབྲེལ་ཉིད་པས། །རང་ཉིད་རྣལ་འབྱོར་པས་སྐྱེ་འགྱུར། །རྒྱུ་མེད་ཅིང་ནི་འབྲས་བུ་མེད། །མངོན་སུམ་མངོན་སུམ་མིན་དེ་བཞིན། །འདི་འདྲའི་བདེན་པ་སྨྲ་རྣམས་ཀྱི། །ཚད་མའི་བསྟན་བཅོས་ལས་ཤེས་བྱ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། རབ་ཏུ་གཏུམ་མོ་བདག་པོའི་དཀྱིལ་འཁོར་དུ་རྣལ་འབྱོར་མ་དང་དཔའ་བོ་རྣམས་ཀྱི་ཕྱག་རྒྱའི་བརྡ་ཡིས་གནས་པའི་མཚན་ཉིད་ཀྱི་ཆོ་ག་ཞེས་བྱ་བའི་སྤྱོད་ཡུལ་གྱི་ལེའུ་སྟེ་ཉི་ཤུ་རྩ་དྲུག་པའོ།། །།དེ་ནས་གཏུམ་མིག་མའི་ཕྱག་རྒྱ། །རྒྱུད་གཞན་ན་མེད་བཤད་པར་བྱ། །མིག་གི་བརྡར་ནི་ཤེས་བྱ་སྟེ། །འདི་ཐམས་ཅད་ཀྱང་ཁ་སྦྱར་ཡིན། །བཙུམས་པ་དང་ནི་མ་བཙུམས་པ། །གཡས་དང་གཡོན་དང་གཡས་འགྲོ་དང་། །གྱེན་དུ་བསྐྱོད་དང་སྣ་རྩེར་དང་། །སར་ལྟ་དངོས་པོའི་མིག་ཅན་དང་། །ཁྲོ་དང་ཞུམ་དང་མཐུན་བུད་མེད། །བུ་དང་གཉེན་དང་སྤུན་རྣམས་དང་། །གཏི་མུག་ཞེ་སྡང་ཆགས་
ཕྲག་དོག །སྐྱོན་དང་ང་རྒྱལ་ཆེར་རློམ་དང་། །འདོད་དང་སྙིང་རྗེ་གླེན་པ་དང་། །སྒྱུ་མར་ལྟ་དང་རིང་དུ་ལྟ། །འགྲོ་དང་བསམ་གཏན་ཕྱེད་ཕྱེད་དང་། །ཐམས་ཅད་ཕྱེ་དང་དགའ་བ་དང་། །ཚད་དང་ནད་དང་གཡུལ་ངོ་དང་། །ཆོས་དང་བཅས་པར་ལྟ་བ་མཆོག །གལ་ཏེ་སུམ་ཅུ་དྲུག་ལྟ་བ། །འདི་ཉིད་རྣལ་འབྱོར་མས་སྟེར་ན། །དེ་ཉིད་ཀྱི་ནི་ཕྱག་རྒྱའི་ལན། །རྣལ་འབྱོར་རྣམས་ཀྱིས་རྟག་སྦྱིན་པ། །མེ་ལོང་ཆུ་དང་མཆོད་པ་དང་། །རལ་གྲི་མར་མེ་མཐེ་བོང་དང་། །ནམ་མཁའ་པདྨ་ཀུ་མུ་ད། །མདའ་དང་ཟླ་བ་ཉི་མ་དང་། །ནོར་བུ་མུ་ཏིག་བྱི་རུ་དང་། །བཞུ་བའི་གསེར་དང་དྲ་བ་དང་། །འབར་བ་གྲིབ་མ་རས་བལ་དང་། །བླ་མ་རྟ་གླང་ས་ར་བྷ། །གར་དང་སྐྲག་དང་འདར་བ་དང་། །འཁྲིག་པ་རྩོད་སྨྲ་ཉེ་བར་དང་། །གཏོར་མ་རི་མོ་དཀྱིལ་འཁོར་དང་། །ཞི་དང་རྒྱས་དང་དབང་དང་ནི། །གསད་པ་དང་ནི་བསྐྲད་རྣམས་ཀྱིས། །ལྟ་བ་རུ་ནི་བཤད་གྱུར་པ། །བརྡ་ནི་སུམ་ཅུ་རྩ་དྲུག་པོ། །ཇི་ལྟའི་རིམ་པས་སྦྱིན་པར་བྱ། །འདི་ཉིད་རྣལ་འབྱོར་པའི་འབྲེལ་པ། །དེ་རྣམས་དགོས་པ་བཤད་པར་བྱ། །ཟླ་བའི་རྒྱུ་བར་སོན་པའི་སྲོག །གཡོན་པར་རྒྱུ་བ་ཡི་ནི་མཆོག །སུམ་ཅུ་རྩ་དྲུག་སེམས་འབབ་པ། །དེ་རྣམས་ངོ་བོར་ཤེས་པར་བྱ། །མིག་གི་ཕྱག་རྒྱ་གང་འདྲ་བར། །དེ་འདྲའི་སྲོག་ནི་རྒྱུ་བར་བྱ། །མགོ་ལ་སོགས་པའི་ཚིགས་ཀུན་དུ། །རྩ་རྣམས་གནས་ནི་བསྒྲུབས་བྱས་ནས། །མི་ཕྱེད་མ་སོགས་སྟེང་འོག་ཏུ། །དེར་ནི་བལྟ་བ་ཆེན་པོ་བྱ། །དེ་ལྟར་བདུན་ཅུ་གཉིས་ཤེས་བྱ། །ཕུན་སུམ་ཚོགས་ཀུན་འཐོབ་པར་འགྱུར། །གཏུམ་མིག་རྣལ་འབྱོར་མའི་བདག་མོ། །སྡང་བ་ཚར་གཅོད་མཛད་མ་ཡིན། །བྱང་ཆུབ་ཕྱོགས་ཀྱི་ཆོས་སུ་ཡང་། །རྣལ་འབྱོར་མ་ཀུན་ཤེས་འགྱུར་བ། །གཏུམ་མིག་རྣལ་འབྱོར་མ་རྟག་ཏུ། །བརྩོན་འགྲུས་རྫུ་འཕྲུལ་རྐང་པ་གཉིས། །གཏུམ་མོའི་རྣམ་པར་རྟོག་ཀུན་ལ། །མིག་གི་ལྟ་བ་ཟ་བ་ཡིན། །གཡོ་བའི་སེམས་ཀྱི་རང་བཞིན་ནི། །སེམས་གཅིག་ཏུ་ནི་འཆིང་བ་ཡིན། །ཐོ་ཅོའི་སྒྱུ་སྤྱོད་འཇིག་རྟེན་དུ། །འཇོམས་པ་ཕྱག་རྒྱ་མཁའ་འགྲོ་
སྐྱེས། །ཀུན་རྫོབ་དང་ནི་དོན་དམ་པར། །ལོང་མེད་པར་ནི་གཉིས་མེད་བྱེད། །གཉིས་མེད་མིག་ནི་འདིར་དེ་ཉིད། །སངས་རྒྱས་ཀུན་གྱིས་རབ་ཏུ་བསྔགས། །རྫུ་འཕྲུལ་གྱིས་ནི་སྣང་བ་བྱེད། །རྩ་རྣམས་ཐམས་ཅད་རབ་ཏུ་སྟོན། །དཀྱིལ་འཁོར་འཁོར་ལོའི་དབུས་སུ་ནི། །ཚུལ་འདི་བསྒོམ་པར་བྱ་བ་ཡིན། །གཏུམ་མིག་མ་ནི་ཐབས་ལྡན་པ། །སུམ་ཅུ་རྩ་བདུན་བདག་ཉིད་ཅན། །དེ་ཡི་ཚུལ་ནི་མངོན་བརྗོད་པས། །ཐམས་ཅད་བྱང་ཆུབ་རང་བཞིན་ཅན། །སྔགས་ཀྱི་ཡི་གེ་ལས་སྐྱེས་པ། །ཀུན་སྤྱོད་རྩ་ཡི་བདག་ཉིད་ཅན། །དེ་ཡི་ཇི་ལྟར་ཁ་དོག་གཟུགས། །རབ་གཏུམ་རྣལ་འབྱོར་མ་ཡིའོ། །ཨོཾ་ཤ་དཱྃ་ཏ་ཥྚྲོ་ས་ཏྐ་ཧ་ཊ་སྲ་བྷཱི་ནེ་ཥ་ཏྲཱ་ཎ་ཡ་བྷཻ་ཧཱུྃ་ར་ཧཱུྃ་བཱ་ཕ་ཡ་ཊ་ཧཱུྃ་ཕ་ཧཱུྃ་ཊ་ཕ་སྭཱ་ཊ་ཧཱ་ཕཊ་སྭཱ་ཧཱ། ཨོྃ་ཙནྜཱ་ཀྵཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། གང་བའི་རི་ཡི་གནས་སུ་ཡང་། །རབ་ཏུ་གཏུམ་མོ་དུས་ཀུན་སྐྱེས། །ཟླ་བ་ཉ་ལ་དཔྲལ་བ་རུ། །རི་བོ་ཆེན་པོར་ཟླ་བ་འཆར། །འབར་བ་འཛིན་པར་གཏུམ་མིག་མ། །རཱ་ཧུ་ཡིས་ནི་ཟས་སུ་བྱས། །ཚེས་གཅིག་ཏུ་ནི་ཡང་དག་བཤད། །ཉི་མའི་རྗེས་འགྲོར་ངེས་བཤད་པའོ། །དེ་ལྟར་རྣལ་འབྱོར་མ་རེ་རེའི། །རང་གི་ཞིང་དུ་མིང་རྒྱ་ཆེ། །རེ་རེ་ཡི་ཡང་ཉི་ཤུ་བཞི། །སླར་ཡང་གནས་དང་ཉེ་གནས་སོ། །བསམ་གཏན་སྔགས་ཀྱི་བཟླས་པའང་མེད། །ཡི་གེ་ལས་བྱུང་སྤངས་པ་ཡིན། །དུས་དང་དུས་མིན་ངོ་བོའི་བདག །ཧཱུྃ་ཕཊ་ཡི་གེས་འདོད་པར་གྱིས། །ཡི་གེ་ལས་བྱུང་བའི་གཟུགས་ཀྱི། །ཧེ་ཡི་རྡོ་རྗེའི་བདུད་རྩི་འབྱུང་། །སྤུན་གྱི་སྤྱོད་པར་ཙྪམ་པ་གང་། །འཇུག་དང་ལྡོག་པར་བྱེད་པ་མོ། །སྙིང་གའི་འཁོར་ལོར་ཤེས་བྱ་སྟེ། །མིག་གི་རང་བཞིན་ཅན་སྙིང་ག། །སྙིང་གར་གནས་རང་རྣལ་འབྱོར་མ། །གཏུམ་མོ་ལྟེ་བའི་སྟེང་ནས་འབར། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་གཏུམ་མིག་མའི་མཚན་ཉིད་ཀྱི་ཕྱག་རྒྱ་དང་བདག་པོའི་རང་བཞིན་གྱི་ཆོ་ག་ཞེས་བྱ་བ་སྟེ་ལེའུ་ཉི་ཤུ་རྩ་བདུན་པའོ།། །།
དེ་ནས་ཡང་དག་བཤད་བྱ་བ། །ཇི་ལྟའི་ཆོ་གས་བརྡའི་ཡིག་གེའོ། །རྣལ་འབྱོར་འཁོར་བའི་འཆིང་བ་ལས། །ཤེས་ནས་མྱུར་དུ་ངེས་པར་གྲོལ། །ཌཱ་དཱ་ལི་ཀ། ནཱ་མ་དང་ནཾ་པི་ཥི་ཏཾ། རཱ་ཛི་ཀཱ། བ་ཊབྦ་ཀི་པི་ཊ་ཀ། ཌཱི། ཀུན་ཏུ་རུ། ཀ་ར་པཱུ་ར། སིལླ་ཀཾ། སྭ་ཡཾ་བྷུ། ཀ་སྟུ་རི་ཀཱ། ཧ་ཧཽ་ས་མ། བོལླ། ཀཀྐོ་བཾ། ཀཱ་ལི་ཉ་ཛ་རཾ། ཤཱ་ལི་ཤཱི་རཾ་ཨ་པྱ་ཀཾ། པི་ཏྲཱི་བ་ནཾ་བྱཉྫ་ནཾ། མཱ་ལ་ཏིན་དྷ་ནཾ། རཏྣ་སམྦྷ་བཾ། གོ། ཀུ། ད། ཧ། ན། བི། མཱུ། ཤུ། ར། མ། དེ་ལྟར་རྣལ་འབྱོར་མ་རྣམས་ཀྱི། །དེ་བཞིན་དཔའ་བོ་སྤུན་རྣམས་བརྡ། །རྣལ་འབྱོར་མ་དེའི་དགོངས་པ་ནི། །ཁ་ཡིས་རྗོད་པ་བྱེད་པར་འགྱུར། །སྐྱེས་བུ། རྣལ་འབྱོར་མ། བུད་མེད། ཆང་། ཤ། ལྕེ། པ་ཌུ་བ། ཅང་ཏེའུ། བུད་མེད་ཀྱི། འཁྲིག་པ། ཁུ་བ། ཁྲག། ཤ་ལས་སྐྱེས། ཁྲག། བུད་མེད་ཀྱི་གཅིན། བཤང་བ། ལིང་ག། པདྨ། འདུས་པའམ། སྐལ་ལྡན། སྐྱེས་གཉིས་ཀྱི་ཤ། ཤི་བའི་རོ། །རྒྱལ་པོའི་སྐྱེས་བུ། །དུར་ཁྲོད། ཉའི་ཤ། བྱའི་ཤ། གཡུལ་ངོའི་ཁྲག། བ་ལང་། ཁྱི། གླང་པོ་ཆེ། རྟ། མི། བཤང་བ། གཅི་བ། ཁུ་བ། ཁྲག །རྐང་མར། དེ་ལྟར་ཡང་ནི་བརྡ་ཡི་ལན། །སྔགས་པས་རྟག་ཏུ་ཤེས་པར་བྱ། །རྣལ་འབྱོར་དངོས་པོ་ཤེས་རྣམས་ཀྱི། །དུས་རྣམས་ཀུན་ཏུ་བསྐྱེད་པ་ནི། །སྤྲུལ་པ་སེམས་ཅན་སྒྲོལ་བ་པོ། །ཞིང་དང་ཞིང་དུ་སྐྱེ་བར་འགྱུར། །བྱང་ཆུབ་སེམས་ནི་ཞུ་བའི་ཁམས། །སུམ་ཅུ་རྩ་དྲུག་གྲངས་ཀྱང་ནི། །ས་དང་ཆུ་དང་མེ་དང་རླུང་། །ནམ་མཁའ་དང་ནི་ཡེ་ཤེས་ཁམས། །དེའི་ཡང་ཁམས་ནི་དྲུག་དྲུག་འགྱུར། །མངོན་པའི་གཟུགས་སོགས་ཤེས་མཐར་རོ། །ངེས་པར་བཤད་དོན་སྨྲ་བ་པོའི། །རང་བཞིན་གྱི་ནི་བརྡར་ཤེས་བྱ། །རེ་རེའི་བར་དུ་ལྷ་མོ་ནི། །འོད་ལྡན་ཡེ་ཤེས་གཟུགས་ཅན་ནོ། །སུམ་ཅུ་རྩ་དྲུག་ཁམས་རྣམས་ཀྱི། །འཆར་བའི་དུས་མཐའ་མཁའ་སྤྱོད་མ། །ཡེ་ཤེས་འོད་ཟེར་དེ་བསྒྲུབས་ནས། །བདེ་བ་ཀུན་གྱི་གནས་ལ་བཞུགས། །གོས་ཀྱི་མཐའ་ནས་བཟུང་ནས་ནི། །གནད་དང་གནད་དུ་རྩེ་བར་བྱ། །ཡེ་ཤེས་ཀུན་རྫོབ་སྤངས་པ་ལས། །བསྒོམ་པའང་རྣམ་རྟོག་བདག་ཉིད་དོ། །རྡོ་རྗེ་ས་འོག་
སྦྱོར་བདག་ཉིད། །རྩ་ཐམས་ཅད་ནི་གཞིག་པར་བྱ། །རྣོན་པོར་སྲེག་པའི་སྦྱོར་བདག་ཉིད། །མཁས་པས་འོད་ལྡན་ཡི་གེའོ། །དཔྱོད་པའི་རྫུ་འཕྲུལ་རྐང་པ་སྟེ། །ཨཽ་ཌྱན་གནས་སུ་དེ་བཞིན་དུའོ། །དཀྱིལ་འཁོར་འཁོར་ལོའི་དབུས་སུ་ནི། །ལྷ་ཡི་བདག་མོ་མཆོག་བསྒོམ་བྱ། །གསང་སྔགས་བདེན་པའི་སྦྱོར་བདག་ཉིད། །སྣ་ཚོགས་ཡི་གེ་རྣམས་དབུས་སོན། །སུམ་ཅུ་རྩ་བདུན་ལྷ་རྣམས་ནི། །ཤེས་རབ་ཐབས་ཀྱི་བདག་ཉིད་ཉིད། །ༀ་ཀཾ་བི་ཀཱ་ད་ལ་ཡུ་མཱ་ཏ་ལཱ་ཛི་བྷ་ཧ་ར་བཱ་ཎ་ཡ་ཨུ་ཧཱུྃ་གྲཱ་ཧཱུྃ་ཡ་ཕཊ་ཧཱུྃ་ཕ་ཧཱུྃ་ཊ་ཕ་སྭཱ་ཊ་ཧཱ་ཕཊ་སྭཱ་ཧཱ། ཨོཾ་པྲ་བྷཱ་ཝ་ཏཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཁ་དོག་གཟུགས་ནི་སྔོན་བཞིན་ནོ། །རང་གི་འོད་ཀྱིས་རྣལ་འབྱོར་འགྲུབ། །ཨོཾ་ཡིག་ཕྱི་མོ་འབྱུང་བའི་བདག །སྲོག་གི་རླུང་ནི་བསྐྱོད་ཅིང་བསྐྱོད། །སྐར་མའི་བདག་པོ་ཀུན་མཁྱེན་རྣམས། །དབང་པོ་སོགས་ཀྱིའང་སྤངས་པ་ཡིན། །ཡ་ཡིག་དང་ནི་ཨ་ཡིག་གཟུགས། །རྐང་པའི་མཐའ་དང་མགོ་བོ་ཅན། །ནཱ་ད་ཙམ་ལ་ཐམས་ཅད་བརྟེན། །རང་འབྱུང་ཆོས་བརྗོད་པ་ཡིན་ནོ། །དེ་ལྟར་ཡི་གེ་བཞི་རྣམས་ནི། །ཆོས་ཀྱི་སྐུ་ལ་སོགས་པའང་ཡིན། །མི་ནི་ཡིད་དེའི་ཆའི་ཡེ་ཤེས། །དེ་ཡོད་པས་ནི་དཔྱོད་པ་སྟེ། །འཇིག་རྟེན་དབུས་དང་ས་ལ་ནི། །རྫུ་འཕྲུལ་རྐང་པས་སྤྱོད་ལམ་བྱེད། །ཡོན་ཏན་ཀུན་གྱི་འཁོར་ལོར་ཡང་། །ཐར་པའི་རྒྱུ་ཡིས་སྟེར་བར་འགྱུར། །ཡོན་ཏན་ཀུན་བདག་སྟོང་པ་ཉིད། །འཁོར་བར་འདི་ལས་ཐབས་གཞན་མེད། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་འོད་ལྡན་མའི་མཚན་ཉིད་ཀྱི་ཕྱག་རྒྱའི་ཆོ་ག་ཞེས་བྱ་བ་སྟེ་ལེའུ་ཉི་ཤུ་རྩ་བརྒྱད་པའོ།། །།དེ་ནས་རྣལ་འབྱོར་མ་མཆོག་གཙོ། །མཚོན་ཆའི་བརྡ་ནི་བཤད་བྱ་སྟེ། སྣ་ཆེན་མ་ཡི་རབ་སྦྱོར་བས། །སྲོག་དང་རྩོལ་བའི་རང་བཞིན་ཅན། །འདི་ལ་དྲིལ་བུ་ཕུབ་མཆེ་བ། །གཏུན་ཤིང་ཞགས་པ་ཐོད་པ་དང་། །གཞུ་དང་ཁ་ཊྭཱཾ་ག་པོ་ཏི། །ཕུབ་ཆུང་དང་ནི་སྡིགས་མཛུབ་དང་། །གཡེར་ཀའི་ཕྲེང་
དང་ལྕགས་ཐག་དང་། །བྲག་དང་དུར་ཁྲོད་རྡུལ་དང་ནི། །མདུང་དང་རྔ་དང་པགས་རློན་དང་། །སྐྲ་ཡི་ཐག་པ་དཔྱངས་པ་དང་། །རོ་སྲེག་སྐུལ་བའི་ཤིང་དང་ནི། །ག་ཏའི་དབྱུག་པ་ཕུབ་དང་མགོ། །ཀེང་རུས་དང་ནི་ཟོར་བ་ཉིད། །མིག་དང་མཁལ་མ་གཉེ་མ་དང་། །སྤེན་པ་ཡི་ནི་ཕུར་བུ་དང་། །ས་བོན་གར་དང་སོག་ལེ་དང་། །ཁབ་དང་སླུད་བཤུས་པགས་པ་དང་། །སྤྲིན་ཆར་འབབ་དང་ཤིང་ལྕགས་ཀྱུ། །དེ་ལྟར་རྣལ་འབྱོར་མས་སྟེར་ན། །ཕྱག་རྒྱའི་ལན་དུ་བརྗོད་བྱ་བ། །རྡོ་རྗེ་རལ་གྲི་མདུང་རིང་དང་། །རྩེ་གསུམ་དགྲ་སྟ་གྲི་གུག་མདའ། །གསལ་ཤིང་ཕུབ་དང་ཐོ་བ་དང་། །འཁོར་ལོ་ཅང་ཏེའུ་ཆུ་གྲི་དང་། །དབྱུག་པ་དང་ནི་མཚོན་རྩེ་གཅིག །དུང་དང་ཟངས་དུང་དབྱུག་གུ་གསུམ། །དེར་ནི་རྨ་བྱའི་མཇུག་མ་དང་། །བྱ་རོག་སྒྲོ་དང་པིར་དང་ནི། །མེ་ཡི་ཐབ་དང་རི་བོ་དང་། །དབྱུག་ཐུང་མེ་ལོང་པི་ཝང་དང་། །རྐང་མགོ་ལག་མགོ་གློ་བ་དང་། །རྒྱུ་མ་སྒྲ་གཅན་ལྕགས་སྒྲོག་དང་། །གདོས་དང་སྐོགས་དང་ཉ་རྒྱ་དང་། །མགོ་མེད་མར་ནག་འབར་བ་དང་། །འཇིགས་བྱེད་གཟུགས་ཅན་ཞེས་བྱ་བ། །ཕྱག་རྒྱའི་ལན་དུ་མངོན་བརྗོད་ཡིན། །རླུང་གི་རང་བཞིན་མ་ལུས་པ། །དེའི་རིགས་རྣལ་འབྱོར་མའི་ཁྱིམ་དུའོ། །གང་དག་གང་གི་ཕྱག་རྒྱའི་དབྱིབས། །དེ་དེ་རྣལ་འབྱོར་མ་ཡི་ལུས། །དེ་ཡི་རང་བཞིན་རྗེས་བཟུང་ངམ། །ཚར་གཅོད་པ་ཡང་བྱེད་པར་འགྱུར། །སྟོང་པ་ཉིད་ནི་བཅྭ་བརྒྱད་དང་། །ཁྱད་པར་དུ་ཡང་སྙིང་རྗེ་དང་། །སངས་རྒྱས་ཆོས་ནི་མ་འདྲེས་དང་། །དེ་བཞིན་དུ་ནི་ཁམས་བཅྭ་བརྒྱད། །རྣལ་འབྱོར་མ་ཡི་རྒྱ་མཚན་ཉིད། །སྐྱེ་བོ་ཐམས་ཅད་ཤེས་པར་བྱ། །སྣ་ཆེན་མ་ཡི་རབ་སྦྱོར་བར། །རང་གི་མཚན་ཉིད་གསུངས་པ་ཡིན། །འབྱུང་པོ་ཐམས་ཅད་ཀྱི་ནི་མ། །མངོན་པར་སྣ་ཚོགས་ནོར་བུ་བཞིན། །ཧཱ་ཡིག་བསྐྱོད་པའི་ནཱ་དའི་བདག །དེ་བཞིན་ཁ་འོག་བལྟས་པར་འཕྱང་། །ནཱ་དར་གནས་པའི་སྐུད་པ་ཡང་། །བདེ་གཟུགས་གཉིས་མེད་ཕྲེང་བ་ཅན། །སྒྲུབ་ཐབས་མན་ངག་སྦྱོར་བདག་ཉིད། །དབྱངས་དང་གསལ་བྱེད་ལས་སྔོན་བྱུང་། །ཆོས་དང་ལས་དང་དམ་ཚིག་དང་། །ཕྱག་རྒྱ་ཆེན་པོའི་རང་བཞིན་ཅན། །ཡི་གེ་བཞི་ཡི་རྟོག་པ་ལས། །ཕྱག་རྒྱ་བཞི་མངོན་བརྗོད་
ཉིད་དོ། །གནས་ནི་ཨ་ར་བུ་དར་ཞེས་བྱ། །སེམས་ཀྱི་རྫུ་འཕྲུལ་རྐང་དེ་བཞིན། །ལྷ་རྫས་རྣལ་འབྱོར་མ་འདུས་པ། །ནམ་མཁའི་འཁོར་ལོར་གྲགས་པ་ཡིན། །སུམ་ཅུ་བདུན་བདག་ཉིད་དེ་ཡི། །བདག་མོ་སྣ་ཆེན་མ་ཡིན་ནོ། །སྣ་ཡི་ཐོག་མ་ཐ་མར་དབུགས། །འཇུག་དང་གནས་དང་ལྡང་བ་ཅན། །དབུས་སུ་མཚོན་བྱ་མཚན་ཉིད་བྲལ། །རྣལ་འབྱོར་མ་ཀུན་རྩེ་བར་འགྱུར། །ནུ་བཾ་ལ་ནི་དབྱངས་ཅན་འགྲོ། །དབུས་སུ་གང་གང་འབབ་པ་མོ། །གཞུ་འགེངས་པ་ཡི་སྦྱོར་བ་ཡིས། །སྲོག་དང་ཐུར་སེལ་ཅན་འཛིན་པའོ། །རྣམ་ཤེས་བརྡ་རུ་ཤེས་བྱས་ནས། །མཚོན་བྱ་དེ་ཡང་གཞོམ་པར་བྱ། །གང་དུ་སེམས་ནི་གཏོང་བ་ན། །དེར་ནི་རྫུ་འཕྲུལ་གྱིས་དཔག་བྱ། །ཡེ་ཤེས་མ་ཡི་མངལ་ཉིད་དོ། །ཐམས་ཅད་དུ་ནི་རྣམ་པར་དཔྱད། །དཀྱིལ་འཁོར་འཁོར་ལོའི་དབུས་སུ་ནི། །འདིར་ནི་སླར་ཡང་བསྒོམ་པར་བྱ། །ཤེས་རབ་ཐབས་ཀྱི་རང་བཞིན་ནི། །གསང་སྔགས་ཡི་གེ་རྣམས་ལས་བྱུང་། །མདོག་དང་དབྱིབས་ནི་སྔོན་གྱི་སྟེ། །འཇིགས་བྱེད་མཚན་མོ་ནག་མོ་ཅན། །ཨོཾ་ཛ་ཀོ་བཱ་ཊི་ལཱ་ལ་བཀྵ་ལཱི་བྷུ་ཌྷ་ཛཱ་ལ་ཡ་ག་ཧཱུྃ་ནཱ་ཧཱུྃ་ཡ་ཕཊ་ཧཱུྃ་ཕཊ་ཧཱུྃ་སྭཱ་ཕཊ་ཧཱ་ཕཊ་སྭཱ་ཧཱ། ༀ་ཧོཿམ་ཧཱ་ནཱ་སེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱའི་གསང་སྔགས་ལས་རྫོགས་པ། །འདོད་པ་ཀུན་གྱི་རང་བཞིན་ཅན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་སྣ་ཆེན་མའི་མཚན་ཉིད་ཀྱི་བརྡའི་ཆོ་གའི་ངེས་པ་ཞེས་བྱ་བ་སྟེ་ལེའུ་ཉི་ཤུ་རྩ་དགུ་པའོ།། །།དེ་ནས་ལུས་ཀྱི་ཙྪོ་མ་ནི། །མཛེས་པའི་སྤྱོད་པ་བཤད་པར་བྱ། །དཔའ་བོའི་བློ་གྲོས་མའི་སྦྱོར་བས། །ལྷ་རྫས་ལུས་སྐྱེས་འཐོབ་པར་འགྱུར། །མགོ་དང་སྤྱི་གཙུག་དཔྲལ་བ་དང་། །གཡོན་དང་གཡས་པའི་རྣ་བ་དང་། །རྒྱབ་ཀྱི་རྒྱུད་དང་དཔུང་པ་གཉིས། །སྣ་དང་སྨིན་མ་མིག་དང་ཁ། །རྐན་དང་སྙིང་ག་ལག་པ་དང་། །མཆན་ཁུང་ནུ་མ་རྩིབ་ལོགས་དང་། །ལྟེ་བ་མདོམས་དང་འཕོངས་ལིང་ག །བརླ་དང་པུས་མོ་བྱིན་རྐང་པ། །སོར་མོ་མཐེབ་
ཆེན་ལོང་བུ་དང་། །རྐང་པའི་མཐིལ་དུ་ཐམས་ཅད་དུ། །རླིག་པ་ལག་པ་གླང་པོའི་པགས། །མཁྲིག་མ་དཔྲལ་བའི་ངོས་དང་ནི། །མཚམས་དང་ལྟོ་བར་ཤེས་བྱ་སྟེ། །རྟག་ཏུ་རྣལ་འབྱོར་མས་སྟེར་ན། །ཕྱག་རྒྱའི་ལན་གྱུར་རྣལ་འབྱོར་པས། །ཇི་ལྟའི་རིམ་པས་སྦྱིན་བྱ་བ། །གླིང་བུ་པི་ཝང་འཁར་རྔ་དང་། །གླུ་དང་རྫ་རྔ་རོལ་མོ་དང་། །ཕྲེང་བ་སྒེག་པ་གར་ཟངས་དུང་། །སྤོས་དང་དྲི་དང་ལྷ་བཤོས་དང་། །འབྲས་བུ་མ་ཆགས་འབྲས་དང་སྣོད། །ཞབས་བསིལ་མཆོད་ཡོན་མར་མེ་བུམ། །གོས་དང་མེ་ལོང་གདུགས་དང་ནི། །བླ་རེ་རྔ་ཡབ་དེ་བཞིན་དུ། །བ་དན་མེ་ཏོག་ཕྲེང་བ་དང་། །རྒྱལ་མཚན་དང་ནི་དྲི་གཙང་ཁང་། །མདུང་ཐུང་ཕྲེང་བ་ཕྲེང་ཕྱེད་དང་། །སླར་ཡང་དྲིལ་ཆུང་དྲ་བ་དང་། །སེང་གེ་གདན་དང་ཅོད་པན་དང་། །རིན་ཆེན་སྣ་ཚོགས་དེ་བཞིན་ནོ། །གོ་དཱ་བ་རིའི་ཉེ་གནས་གཞུག །དད་པའི་དབང་པོའི་རང་བཞིན་ཅན། །དཔའ་བློ་མ་ཡི་རབ་སྦྱོར་བས། །ཕྱག་རྒྱ་ཐམས་ཅད་རབ་ཏུ་བཤད། །ལྷན་སྐྱེས་སྐད་ཀྱིས་བཱི་ཞེས་བྱ། །སུམ་ཅུ་དྲུག་དངོས་བདག་ཉིད་ཅན། །ཕུང་པོ་ཁམས་དང་ཡུལ་དང་ནི། །དབང་པོ་ལས་དང་ལས་ཅན་ཏེ། །ཡུལ་གྱི་སྒྲ་ནི་དེ་བཞིན་འདིར། །ཀུན་ལ་དྲུག་དྲུག་རིམ་ཇི་བཞིན། །དེ་རྣམས་ནང་དུ་སོང་ཡེ་ཤེས། །ལྷན་སྐྱེས་གཞན་གྱི་དངོས་པོ་མིན། །མཚན་མོ་ཉིན་མོའི་རབ་སྦྱོར་བས། །ཤེས་རབ་ཐབས་ཀྱི་བདག་ཉིད་དོ། །ལྷན་སྐྱེས་རྣལ་འབྱོར་མ་དེ་རྣམས། །སུམ་ཅུ་རྩ་དྲུག་དབྱེ་བས་ཕྱེ། །དམ་ཚིག་ཆེན་པོ་འདུས་པ་ནི། །པདྨའི་ལྟེ་བར་རིག་པར་བྱ། །དེ་ལས་སྐྱེས་པའི་རང་ཕྱག་རྒྱ། །ཡུལ་དང་ཡུལ་དུ་རྣམ་པར་གཞག །རང་རིག་རྣལ་འབྱོར་མའི་བདེ་བ། །འདི་ནི་སངས་རྒྱས་སྤྱོད་ཡུལ་ཡིན། །འཇིག་བཞིན་པ་ནི་ཆེན་པོ་ཉིད། །བཅུ་གཉིས་མི་རྣམས་ནང་དུ་སོན། །རྡོ་རྗེའི་རླུང་ནི་རབ་ཞུགས་པའི། །དེར་ནི་ཀུན་དུར་རྣལ་འབྱོར་སྐྱེས། །འོད་ཟེར་སློང་བའི་བདེ་བ་ཡི། །འཕོ་མེད་རྣམས་ཀྱིས་བགྲོད་པར་བྱོས། །དེ་ལྟར་གོ་དཱ་བ་རི་ཤེས་བྱས་ནས། །དད་པའི་དབང་པོའི་རྡོ་རྗེ་ཅན། །དཔའ་བློ་མ་ཡི་རང་བཞིན་ཤེས། །དཀྱིལ་འཁོར་དབུས་ཀྱི་གཙོ་མོ་ཡིན། །སུམ་ཅུ་བདུན་བདག་ཉིད་རྡོ་རྗེ། །རང་མིང་གསང་སྔགས་ལྡན་པར་རོ། །སྣ་ཚོགས་
རྣམ་རྟོག་ཟས་ཅན་ནི། །ལྷན་སྐྱེས་བརྩོན་འགྲུས་མིང་གིས་སོ། །ཨོཾ་ཀ་པཱ་ལ་ར་པཱཾ་ཤུ་ཏ་པཱ་དྷཱུ་ཤོ་མྲུ་དྱ་ཨུ་ཏ་གྲ་ཤཱུ་བ་ལཱ་པུ་ཡ་ཥཱ་ཧཱུྃ་ཡ་ཧཱུྃ་ཧཱུྃ་ཕཊ་ཧཱུྃ་ཕཊ་ཕཊ་སྭཱ་ཕཊ་ཧཱ་སྭཱ་ཧཱ། ༀ་བཱི་ར་མ་ཏཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཁ་དོག་དང་དབྱིབས་སྔོན་གྱི་རུ། །རྣལ་འབྱོར་མ་ཀུན་གྱི་ནི་བྱ། །གང་ཕྱིར་བརྩོན་འགྲུས་ཡང་དག་འཕོ། །མངོན་པར་བརྗོད་པ་ཡང་དག་འབྱུང་། །ནམ་མཁའ་ལྡིང་གི་སྦྱོར་ལྡན་པས། །འདིར་ནི་ཐེ་ཙོམ་མེད་པར་བྱེད། །སྔོན་དུ་བསྟན་པའི་ཙྪོ་མ་ཀ། །མཆོག་གི་ལྕེ་རུ་ཤེས་པར་བྱ། །ཕྱག་རྒྱའི་ལན་ནི་གཞན་མེད་དེ། །ལན་གྱི་ལྕེ་ནི་དབང་གཉིས་ཀྱིའོ། །སྣ་ཚོགས་རྒྱུད་དང་ལུང་རྣམས་སུ། །ང་ཡིས་ཁྱོད་ལ་མ་བཤད་དོ། །རྒྱུད་འདི་ཡི་ནི་རབ་སྦྱོར་བ། །མ་བྱུང་འབྱུང་བར་མི་འགྱུར་རོ། །མ་རིག་པ་དང་སྡང་སེམས་དང་། །སྐྱེ་བོ་རྨོངས་གང་ཡུལ་སྤྱོད་ན། །སངས་རྒྱས་ཉིད་ནི་མི་འཐོབ་ཅིང་། །ངེས་པར་དམྱལ་བར་འཚེད་པར་འགྱུར། །དེ་ཕྱིར་གུས་པའི་སེམས་བདག་གིས། །བྱ་བ་གུས་པས་ལེགས་རིག་བྱ། །སྔོན་གྱི་རྨོངས་པ་མེད་འགྱུར་ཞིང་། །སངས་རྒྱས་ཉིད་འཐོབ་ཡུན་མི་རིང་། །མོས་པས་རྒྱུན་ཏུ་གཞོལ་གྱུར་པས། །ཚེ་དང་ནད་མེད་འཕེལ་བ་ཡིན། །རླུང་གི་འཁོར་ལོའི་རྣལ་འབྱོར་མ། །སྟོབས་ལྡན་དཔའ་བོའི་བློ་གྲོས་མ། །རྡོ་རྗེའི་རླུང་དབྱེ་རབ་ལྡན་པས། །སེམས་ཆེན་པོར་ནི་ཐིམ་པར་འགྱུར། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཕྱག་རྒྱ་དང་ཕྱག་རྒྱའི་ལན་དཔའ་བོའི་བློ་གྲོས་མའི་ཆོ་གའི་མཚན་ཉིད་ཀྱི་མིང་ཞེས་བྱ་བ་སྟེ་ལེའུ་སུམ་ཅུ་པའོ།། །།ཁམས་ཐམས་ཅད་ཀྱི་ཙྪོ་མ་ཀ། །བཅོམ་ལྡན་འདས་ཀྱིས་བསྟན་དུ་གསོལ། །གང་ཞིག་དྲི་མེད་དངོས་པོའི་བརྡ། །བཤད་ཀྱིས་སྒྲུབ་མོ་མཉན་པར་གྱིས། །སོ་ཡིས་མཆུ་ནི་ཡོངས་བཟུང་ནས། །བདེ་བས་བོལླ་འཇིབ་པར་བྱེད། །ཕྱིན་ནས་ཡེ་ཤེས་རབ་སྟོན་པའི། །འདི་སྐད་ཀྱི་ནི་ཚིག་སྨྲས་སོ། །ཕྱི་མོའི་ཡི་གེའི་སྦྱོར་བ་ཡིས། །བཅུ་པོ་གསུམ་ལ་དྲུག་ལྡན་པའི། །ཕྱག་རྒྱ་ཕྱག་རྒྱའི་
ལན་གྱིས་ནི། །འདི་ལས་དམ་ཚིག་དབྱེ་བར་བྱ། །ཀ་ཁ་ག་གྷ་ང་ཀཾ། ཙ་ཚ་ཛ་ཛྷ་ཉ་ཙཾ། ཊ་ཋ་ཌ་ཌྷ་ཎ་ཊཾ། ཏ་ཐ་ད་དྷ་ན་ཏཾ། པ་ཕ་བ་བྷ་མ་པཾ། ཡ་ར་ལ་ཝ་ཧ་ཡཾ། །ཞེས་བྱ་རྣལ་འབྱོར་མས་སྟེར་ན། །ཕྱག་རྒྱའི་ལན་ནི་སླར་ཡང་འདི། །ཀཱ་ཁཱ་གཱ་གྷཱ་ངཱ་ཀཿ། ཙཱ་ཚཱ་ཛཱ་ཛྷཱ་ཉཱ་ཙཿ། ཊཱ་ཋཱ་ཌཱ་ཌྷཱ་ཎཱ་ཊཿ། ཏཱ་ཐཱ་དཱ་དྷཱ་ནཱ་ཏཿ། པཱ་ཕཱ་བཱ་བྷཱ་མཱ་པཿ། ཡཱ་རཱ་ལཱ་ཝཱ་ཧཱ་ཡཿ། དེ་ལྟར་ཕྱག་རྒྱའི་ཁྱད་ཤེས་ནས། །ལུས་ཅན་ཀུན་གྱི་སྒོ་གླེགས་ཡིན། །བུ་ག་གཉིས་ཀྱི་རབ་སྦྱོར་བར། །ཐམས་ཅད་ཀྱང་ནི་ཡི་གེ་འདྲ། །འོག་དང་སྟེང་དུ་འདུས་བྱས་ནས། །རྣལ་འབྱོར་རྣལ་འབྱོར་མ་གཉིས་མེད། །སྐད་ཅིག་བཞི་ཡི་བདེན་རྣམས་ཀྱིས། །དེ་ཉིད་དགའ་བ་བཞི་དེ་བཞིན། །སྡེ་པ་བཞི་དང་འཁོར་ལོ་བཞི། །ཨེ་བཾ་མ་ཡཱ་སྐུ་རྣམས་ནི། །རྒྱུད་འདིར་མདོ་རུ་བསྟན་པ་སྟེ། །རྒྱས་བཤད་གཞན་དུ་རྟོགས་པར་བྱ། །མིའུ་ཐུང་མ་ཡི་རབ་སྦྱོར་བས། །ཆོ་ག་སྔགས་པས་ཤེས་པར་བྱ། །ནམ་མཁའ་དང་མཉམ་སྒོ་གླེགས་ཕྲེང་། །མཁའ་སྤྱོད་མ་རུ་སྤྱོད་པ་རང་། །ངག་ཀྱང་སྐད་ཀྱི་རང་བཞིན་བདག །འགོག་པར་ཉེ་བར་འགྲོ་བར་གྱིས། །གསང་ཆེན་སེམས་དང་སེམས་བྱུང་རྣམས། །མཐའ་མ་གསལ་བར་འཐོབ་པ་ཡིས། །རིན་ཆེན་རྡོ་རྗེ་ལས་དགའི་གཟུགས། །བལྟས་པའི་མཚམས་སུ་མཐོང་བར་འགྱུར། །ཐམས་ཅད་བདེན་པའི་སྦྱོར་བདག་ཉིད། །བཞི་པོ་བཞི་ཡི་བདག་ཉིད་ཅན། །རཱ་མེ་ཤྭ་ར་དང་དབང་པོར། །མཆོག་ཏུ་རྨད་བྱུང་ཤེས་པར་བྱ། །འདོད་ཆགས་ཆགས་བྲལ་རྣམ་བསྲེས་པ། །དེའི་སྐད་ཅིག་ལས་བྱུང་བ་མིན། །འབྱུང་བ་ལྔའི་བདག་ཅན་ཡིན་ལས། །མེ་ནི་དབུས་སུ་བདུད་རྩིའི་གནས། །དབུགས་ཀྱི་འཁོར་ལོ་རྟག་ཏུ་བདེའི། །དེ་བཞིན་གཤེགས་པ་བཟའ་བར་བྱ། །ལྷ་དང་ཀླུ་རྣམས་བུད་མེད་ལ། །མཁས་པ་ཡིས་ནི་རོལ་པ་ཡིན། །དེ་རྣམས་ཀྱིས་ནི་དུས་ཀུན་དུ། །ལུས་ཅན་ཀུན་གྱི་འཕོ་བ་ཡང་། །སྒོ་དགུའི་བདག་ཉིད་ནམ་མཁའ་ལ། །དེ་རྣམས་བཞི་འགྱུར་དུ་ཤེས་བྱ། །དེ་ལྟར་སྒོ་གླེགས་གནས་རྣམས་ནི། །རྟག་ཏུ་སུམ་ཅུ་རྩ་དྲུག་འགྱུར། །སྒོ་ཡི་དབྱེ་བ་མི་ཤེས་ལ། །སྐྱོན་དང་ཡོན་ཏན་ཇི་ལྟར་ལགས། །འཕོ་བའི་དུས་ཚོད་ཀྱི་ནི་ཚད། །ཡང་དག་རབ་ཏུ་སྦྱོར་བ་ཉོན། །
མཛེས་པའི་གནས་ནི་ལམ་བཟང་པོས། །ལམ་ངན་གྱིས་ནི་སྲིད་པའི་སྐྱོན། །ཐིག་ལེ་ལྟེ་བ་སྟེང་རྣམས་དང་། །མིག་དང་སྣ་དང་རྣ་བ་དག །བཤང་བ་དང་ནི་གཅི་བའི་སྒོ། །སྒོ་དགུ་ཡི་ནི་མཚན་ཉིད་དོ། །ལྟེ་བས་འདོད་པའི་མཐོ་རིས་དང་། །ཐིག་ལེས་གཟུགས་ཀྱི་ལུས་ཅན་རྣམས། །སྟེང་གིས་སྟེང་གི་གནས་ཀྱི་ནི། །འགྲོ་དང་འོང་བར་རབ་ཏུ་གྲགས། །གནོད་སྦྱིན་དངོས་པོ་སྣ་ལས་སོ། །རྣ་བ་དག་གིས་གྲུབ་པའི་ལྷ། །གལ་ཏེ་མི་གནས་ཡེ་ཤེས་བགྲོད། །མི་རྣམས་མི་བདག་སྒྱུར་རྣམས་འགྱུར། །སྲིད་པའི་སྒོ་ཡིས་ཡི་དགས་རྣམས། །གཅི་བས་དུད་འགྲོ་དེ་བཞིན་ནོ། །དམྱལ་བ་བརྒྱད་ཀྱི་དངོས་རྣམས་ཀྱི། །ལུས་ཅན་རྣམས་ནི་བཤང་བ་ལས། །གཞན་གྱི་སྒོ་ནི་གསུམ་གསུམ་སྟེ། །མཁས་པས་རྩ་ཡི་ཀུན་སྤྱོད་ཅན། །ཉི་ཤུ་རྩ་བདུན་རྣམས་ཀྱང་ནི། །སྨིན་དྲུག་ལ་སོགས་རྒྱུ་སྐར་རོ། །རྣམ་དག་ཡེ་ཤེས་གསུམ་པོ་ནི། །རེ་རེའི་སྒོ་མ་རྣམས་ཀྱིའོ། །བརྩོན་འགྲུས་དབང་པོའི་དངོས་རྣམས་ཀྱིས། །ཐམས་ཅད་ཉེར་སྤྱོད་མཚན་ཉིད་དོ། །སུམ་ཅུ་བདུན་བདག་ཉིད་དབུས་སུ། །སྔོན་གྱི་མདོག་ཅན་བསྒོམ་པར་བྱ། །རྡོ་རྗེ་དཀར་མོ་སོགས་ས་བོན། །སྒོ་གླེགས་གནས་སུ་གཞག་པར་བྱ། །ཤེས་རབ་ཐབས་བདག་ཉིད་ལྷ་མོ། །ས་ཡི་འཁོར་ལོའི་སྦྱོར་བས་སོ། །སྔགས་ཀྱི་ཡི་གེ་རྣམས་སུ་གྱུར་པ་ནི། །ༀ་མཱ་བི་ཏྲི་ཀ་ག་ཊ་ཎ་མུ་པ་ཁ་རི་ཧཱ་པཱུ་ཧཱ་རི་ར་ཏ་བཱ་མ་ཡནྟྲཱ་ཧཱུྃ་ཡ་ཧཱུྃ་ཧཱུྃ་ཕ་ཧཱུྃ་ཊ་ཕ་ཕཊ་ཊ་ཕ་སྭཱ་ཊ་ཧཱ་སྭཱ་ཧཱ། ༀ་ཁརྦ་རཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ལྟར་སྔགས་ལས་ཡང་དག་བྱུང་། །དོན་དམ་སྦྱོར་བ་ལས་སྐྱེས་པའོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་མིའུ་ཐུང་མའི་ཡི་གེའི་བརྡའི་མཚན་ཉིད་ཀྱི་རང་བཞིན་གྱི་ཡེ་ཤེས་ཞེས་བྱ་བ་སྟེ་ལེའུ་སུམ་ཅུ་རྩ་གཅིག་པའོ།། །།སླར་ཡང་མཆོད་པ་བྱས་ནས་ནི། །ཡང་དང་ཡང་དུ་ཞུས་པ་ཉིད། །དངོས་པོ་ཡེ་ཤེས་ཀྱིས་ཕྱག་རྒྱ། །བཅོམ་ལྡན་གཙོ་བོ་ཇི་ལྟར་ལགས། །བདག་གིས་མཚན་
ཉིད་བཤད་བྱ་ཡིས། །ཡིད་ནི་གཅིག་ཏུ་གྱུར་པས་ཉོན། །ལྷན་སྐྱེས་བདེ་དང་སྟོང་བ་དང་། །རང་གིས་རིག་དང་བདེ་བ་ཆེ། །ཆོས་ཀྱི་སྐུ་དང་ལོངས་སྤྱོད་རྫོགས། །སྤྲུལ་པ་དང་ནི་རྨད་བྱུང་ཆེ། །འོད་གསལ་སེམས་དང་བསམ་པ་དང་། །ཞི་དང་མྱང་འདས་སྦྱོར་སྐྱེས་དང་། །ཕ་རོལ་ཕྱིན་དང་གཉིས་མེད་དང་། །ཐར་པ་དང་ནི་དོན་དམ་དང་། །ཡེ་ཤེས་རྣམ་ཤེས་བྱང་ཆུབ་དང་། །ཆོས་དབྱིངས་གྲོང་ཁྱེར་དེ་བཞིན་དུ། །པདྨ་དང་ནི་ཆོས་འབྱུང་དང་། །སླར་ཡང་བདག་མེད་མཐོ་རིས་དང་། །ཞི་དང་སྒྲ་དང་བླ་མ་དང་། །རིག་དང་འཁྲུལ་མེད་རྟོག་སྤངས་དང་། །བཅུད་ལེན་དང་ནི་སྨྲ་བཤད་དེ། །མཁས་པས་ཙྪོ་མའི་རྣམ་གྲངས་སོ། །ཇི་ལྟར་དེ་ལྟར་ཡིག་དང་པོ། །ཐམས་ཅད་ལན་གྱི་ཙྪོ་མ་ཡིན། །ཇི་ལྟར་ཡི་གེ་དེ་བཞིན་དོན། །དམྱལ་བ་ལ་སྡང་ཤེས་པར་བྱ། །ལང་ཀའི་དབང་ཕྱུག་མའི་སྦྱོར་བར། །རྣལ་འབྱོར་པ་ཁྱོད་ཀྱིས་བྱའོ། །འཕྱང་བར་གྱུར་པའི་ས་བོན་གྱི། །དེར་ནི་ཙྪོ་མ་ཐམས་ཅད་དེ། །གེ་སར་ཡེ་ཤེས་ཁམས་ཀྱི་ནི། །རང་གི་རང་བཞིན་དུ་མཚན་ཉིད། །རང་ཡོད་དེ་མཉམ་རྣལ་འབྱོར་པ། །པདྨའི་སྙིང་པོ་རི་ནི་གནས། །རི་ནི་རྣམ་ཤེས་འགྲོ་བ་སྟེ། །ཡིད་ཀྱི་ཁམས་རྣམས་ཐམས་ཅད་དུའོ། །ལང་ཀར་བདག་ཉིད་སྐྱེ་བ་སྟེ། །དངོས་པོའི་ཡེ་ཤེས་རྣམས་ཀྱིས་བྱུང་། །དབང་ཕྱུག་འབྱུང་པོ་ཐམས་ཅད་ཀྱི། །ཡེ་ཤེས་མིན་པ་དངོས་ཀུན་སྐྱེས། །དེ་བི་ཀོ་ཊའི་གནས་སུ་སྟེ། །སླར་ཡང་བྱང་ཆུབ་དྲན་དབང་པོ། །གང་དུ་ཡེ་ཤེས་བསམ་མེད་པ། །དེར་ནི་བསྟན་པས་ཐོས་པར་འགྱུར། །འདོད་ཆགས་བྲལ་བས་གང་དག་གི། །བི་ནི་ཀུན་འགྲོའི་ཡེ་ཤེས་སོ། །རླུང་རྣམས་ཀྱི་ནི་མཁའ་རྣམས་སུ། །དབང་པོ་རྣམས་ཀྱི་བདེ་དེ་བཞིན། །ཊི་ནི་རྡོ་རྗེའི་ནུས་པར་གྲགས། །ཡུལ་རྣམས་ཀྱི་ནི་གྲོང་དུ་བགྲོད། །དྲན་པ་ལྷན་ཅིག་སྐྱེས་ཡེ་ཤེས། །གང་དུ་ཡིད་ནི་རབ་བརྗོད་པ། །དེར་ནི་དབང་པོའི་བྱང་ཆུབ་ཀྱང་། །ཤེས་ནས་རྡོ་རྗེའི་ཚུལ་བདག་ཉིད། །དེ་ལྟར་དེ་ཉིད་ངེས་ཤེས་ནས། །རང་གི་རང་བཞིན་དུ་གནས་བྱ། །ཆོས་དང་འཇིག་རྟེན་བཅས་པ་སྤང་། །ཅུང་ཟད་མིག་མེད་གཟུད་པར་བྱ། །ཡང་ན་དངོས་པོ་ཀུན་བདག་
ཉིད། །ཡང་ན་ཐམས་ཅད་རྣམ་པར་སྤང་། །དངོས་དང་དངོས་པོ་ཅན་ཡོད་མིན། །དངོས་པོ་མེད་པ་གསལ་མཐོང་འགྱུར། །དངོས་དང་དངོས་མེད་རྣམ་པར་གྲོལ། །ཐམས་ཅད་མི་བདེན་ལས་སྐྱེས་བལྟ། །བླ་མ་རྡོ་རྗེ་འཛིན་ཞལ་ལས། །བརྒྱུད་པའི་རིམ་པས་ཕྲད་པར་གྱིས། །མེ་ཡི་དཀྱིལ་འཁོར་དུ་ལྷ་མོ། །དེ་ཕྱིར་དེ་ཡི་རང་བཞིན་ལུས། །སུམ་ཅུ་བདུན་བདག་ཉིད་དབུས་སུ། །སྔོན་གྱི་གཟུགས་ཅན་བསྒོམ་པར་བྱ། །ཐམས་ཅད་ཐབས་དང་ལྡན་པར་འགྱུར། །སྔགས་ཀྱི་ཡི་གེ་ལས་བྱུང་བའོ། །ༀ་ཧཱུྃ་ས་ཧཱུྃ་ཧ་ཀཱ་ཛ་རོ་སུ། ཙྪནྡ་ར་རཱི་ཎ་པ་མུལླ་ཁཱ་བ་ཡ་ཀ་ཧཱུྃ་རཱ་ཧཱུྃ་ཡ་ཕཊ་ཧཱུྃ་ཕཊ་ཧཱུྃ་སྭཱ་ཕཊ་ཧཱ་ཕཊ་སྭཱ་ཧཱ། ༀ་ལངྐེ་ཤྭ་རཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ལྟར་ཤེས་བྱས་གསང་སྔགས་ཆེ། །དངོས་གྲུབ་ཡང་བས་བྱེད་པ་ཡིན། །ལས་ཐམས་ཅད་ཀྱི་རང་བཞིན་ཏེ། །བརྒྱ་ལ་ན་ཡང་གཞན་དུ་མིན། །དངོས་གྲུབ་རི་ཡི་མིང་ཅན་ནི། །ཉི་ཤུ་རྩ་བརྒྱད་སྨན་དུའོ། །སྨིན་དྲུག་དང་ནི་སྣར་མར་འགྱུར། །མགོ་བོ་དང་ནི་ལག་དེ་བཞིན། །ནབ་སོ་དང་ནི་རྒྱལ་ཉིད་དང་། །སྐག་དང་མཆུ་དང་གཞན་པ་ནི། །ཤར་གྱི་གྲེ་དང་བྱང་གི་དབོ། །མེ་བཞི་ནག་པ་ས་རི་དང་། །ས་ག་དང་ནི་ལྷ་མཚམས་དང་། །སྣྲོན་དང་སྣྲུབས་དང་ཆུ་སྟོད་དང་། །ཆུ་སྨད་དང་ནི་བྱི་བཞིན་དང་། །གྲོ་བཞིན་མོན་གྲུ་དེ་བཞིན་དུ། །མོན་གྲེ་དང་ནི་ཁྲུམས་སྟོད་དང་། །ཁྲུམས་སྨད་དང་ནི་ནམ་གྲུ་དང་། །ཐ་སྐར་དེ་བཞིན་བྲ་ཉེ་དང་། །ཟླ་བ་ཉི་མ་རཱ་ཧུ་དང་། །སའི་མ་ཉིད་དང་སྤེན་པ་རྣམས། །རང་རང་དུས་ཉིད་ཤེས་པར་བྱ། །ཐེ་ཙོམ་མེད་པས་བཟུང་བས་སོ། །ཐམས་ཅད་ཟླ་བའི་སྦྱོར་བདག་ཉིད། །ནམ་མཁའ་ལ་ནི་མཉམ་པར་གནས། །འཆད་བཞིན་པ་ཡི་རབ་སྦྱོར་བས། །སྔགས་པས་ཆོ་ག་ཤེས་པར་བྱ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ལང་ཀའི་དབང་ཕྱུག་མའི་ཕྱག་རྒྱའི་བརྡའི་མཚན་ཉིད་དང་དཀྱིལ་འཁོར་གྱི་འཁོར་ལོའི་རང་བཞིན་དང་མིང་གི་ཆོ་གའི་ཡེ་ཤེས་
ཀྱི་ལེའུ་སྟེ་སུམ་ཅུ་རྩ་གཉིས་པའོ།། །།སླར་ཡང་གཞན་པ་བཤད་བྱ་སྟེ། །དགོས་དང་བྱེད་པའི་ཕྱག་རྒྱའོ། །གང་གིས་རྣམ་པར་ཤེས་ཙམ་གྱིས། །སྒྲུབ་པོས་དངོས་གྲུབ་འཐོབ་པར་འགྱུར། །ཟླ་བ་ཉི་མ་གཟས་གཟུང་བར། །རྣལ་འབྱོར་མ་ཡི་སྔགས་མཚན་ཉིད། །པོ་ཏཾ་གི་ནི་གསང་པོར་སྨྲ་བ་སྟེ། །པྲ་ཏི་པོ་ཏཾ་གི་ནི་ལན་ཡིན་ནོ། །ག་མུ་འགྲོ་བའོ་ལུམ་པ་ནི། །འོང་ངོ་ཞེས་ནི་བྱ་བ་ཉིད། །དེ་ཧི་གྲོང་ཁྱེར་རོ་ཙ་ཊུ་ཀཾ་ཞེས་བྱ། །ཟུང་ཤིག་པའོ་ཧྲཱི་ད་ཡ་ནི་དཔའ་བོ་ཡིན། །ཀཽ་ར་བ་ནི་སོང་ཅིག་པ་ཉིད་དེ། །ཀརྞྞི་ཀ་ནི་དྲིལ་བུའོ་ཨ་ལི་བྱེད་པའོ། །ཤི་ར་འཁྱིལ་པའི་སྐྲ་ཡིན་ཏེ། །སྲ་བ་རྣ་བའོ་གཞན་པ་ནི། །མན་ཐ་ན་ནི་བདུད་རྩི་སྟེ། །ན་ར་ཕྲད་པའོ་ཏཱ་ལི་ཀ་ཡང་ནི། །མཁའ་འགྲོ་མའོ་ན་ར་ཀཾ་དཀྱིལ་འཁོར། །ཨ་མུ་ཀཾ་ནི་དུར་ཁྲོད་ཏེ། །ཀཱ་ཁི་ལ་སྒོའོ་སྭ་ས་ནཾ། །བྲམ་ཟེའོ་བ་རི་རྒྱལ་པོའི་རིགས། །བིར་ཏི་རྗེའུ་རིགས་ཀྲུ་ར་ནི། །དམངས་སོ་ཨན་ཏ་གདོལ་པ་ཅན། །ཨཱ་ལི་ཀ་ཕྱུགས་ཌཱ་ཀི་ནི། །སྲིང་མོའོ་མུ་ད་ཀ་ཚིལ། །ལྕེ་ཡིས་སོ་རེག་དེ་བཞིན་དུ། །ཟས་ཀྱིས་ལྟོགས་པར་རིག་པར་བྱ། །ཏྲེ་སྣ་དྲི་ཡིས་བསྒོས་པ་སྟེ། །ཨཱ་ག་མ་ན་ཞེས་བྱ་གནས་གང་ནས། །ཆེ་གེ་མོའོ་ཀི་ར་ཎ་མེ་ཏོག་གོ། །ལམ་པ་ལྟོ་བ་དན་ཏ་རྒོད་པ་སྟེ། །ནི་རོ་དྷེ་ཆར་རོ་བི་ཛྙ་པ་ཏི་ཚིམ་པའོ། །དྷུ་མྲ་ཞེས་བྱ་སྤྲིན་དེ་བཞིན། །དྷུ་མྲ་པྲི་ཡ་རི་བོ་སྟེ། །སཱ་ནུ་སཱ་རི་ཏ་ཆུ་ཀླུང་། །ཨང་གུ་ལྱ་ནི་ཆ་ཤས་ཏེ། །བ་ད་ན་རཱ་ཛི་ཀ་ལྕེ། །ཨ་དྷ་ར་སོ་ཡིན་པཾ་ཀ་ཏི། །རྒྱལ་མཚན་ཚན་དོ་ཕྲེང་དེ་བཞིན། །ཙ་ལ་རླུང་ངོ་མྲིག་པ་ཏི་ཕྱུགས། །མཎྜ་ལ་ནི་མཉམ་པ་སྟེ། །སྭཱ་ས་ལམ་གྱི་བཞི་མདོར་ཤེས་པར་བྱ། །སྐྱེ་བ་ཕལ་གུ་ཤམ་མོ་མ་ཧཱ་ཀྵ་རཾ་ནི། །ཕྱུགས་ཆེན་ནོ་ཙྪ་ནི་ར་སྐྱེས་སོ། །ན་ནི་མིའོ་བ་ནི་གླང་ཡིན་ནོ། །མ་ནི་མ་ཧེ་བྷ་ནི་ཟ་བ་སྟེ། །སི་ནི་སེང་གེ་བྱཱ་ནི་སྟག་དེ་བཞིན། །སྠཱ་ནི་གནས་པའོ་ཁ་ལ་རེག་པ་ཟོས་པ་ཡིན། །སོ་ལ་རེག་པ་ཚིམ་པ་ཡིན། །ཧྲི་ཀ་ངོ་ཚ་སྟོང་པ་ལ་རེག་པ། །འཁྲིག་པའོ་བརླ་ལ་རེག་པ་ནི། །དེ་ལྟར་ད་ལྟར་གྱིས་ཞེས་པར། །མཆོག་ཏུ་མཐུན་མ་ཤེས་པར་བྱ། །འདིར་ནི་དགོས་པ་སླར་བཤད་པ། །མཁས་པ་ཡིས་ནི་བསྲུབ་
པར་བྱ། །བྱེད་པ་རྣལ་འབྱོར་མར་ཤེས་བྱ། །དཔའ་བོ་ཀུན་ཏུ་དགོས་པའོ། །སྣ་ཚོགས་དངོས་པོའི་རང་བཞིན་གྱིས། །ཡེ་ཤེས་ཤེས་བྱའི་རང་བཞིན་བདག །བསྐྱེད་པ་སྲིད་པའི་སྦྱོར་བ་དང་། །སྦྱོར་བྲལ་ཀུན་རྫོབ་དེ་བཞིན་དུ། །སྒྱུ་མ་མཐུན་པ་འཁོར་བ་དང་། །བརྩེ་བ་རང་བཞིན་བརྟགས་པ་དང་། །གཞན་གྱི་དབང་དང་ཡོངས་གྲུབ་དང་། །ཏུ་རི་ཡྃ་འཁོར་ལོ་བསྒོམ་པ་དང་། །སེམས་དགའ་བྱས་དང་ཚུལ་ཁྲིམས་དང་། །གཏོང་བ་བརྟུལ་བ་དཔའ་དེ་བཞིན། །སྐར་རྩིས་མཁན་དང་སྨན་པ་ཉིད། །བཟོ་དང་ཁམས་དང་སྨྲ་བ་པོ། །ལྷག་མ་རྟེན་འབྲེལ་ཡན་ལག་ནི། །བཅུ་གཉིས་མ་རིག་སོགས་ཤེས་བྱ། །མཱ་ལ་བ་ཡི་ཉེ་གནས་སུ། །ཤིང་གྲིབ་མ་ཡི་རབ་སྦྱོར་བས། །ཏིང་འཛིན་དབང་པོའི་ཕྱོགས་རྣམས་སུ། །འཇུག་པ་མེད་དང་འཇུག་པ་མཚུངས། །དབང་པོ་འདོད་ཆགས་ཆགས་བྲལ་དག །ཡང་དག་ཕུན་སུམ་ཚོགས་བདག་པོ། །མཱ་མ་ཀཱི་རྡོ་རྗེའི་བུ་གར་ནི། །སྤྱི་གཙུག་གནས་སུ་ཡོངས་གནས་བྱ། །འཕྱང་བཞིན་པ་ཁ་འོག་ཏུ་སྟེ། །ཀམ་པོ་ཛི་ཡི་ཕྱག་རྒྱའི་ཚུལ། །བ་ནི་ཡང་དག་རིག་པའི་རྒྱུད། །རང་བཞིན་སྒྱུ་མའི་རང་མཚན་ཉིད། །དེ་ལྟར་བྱས་དང་མ་བྱས་ཀུན། །མཁས་པས་དབུ་མར་མི་སྣང་ངོ་། །ཞི་བའི་དངོས་པོའི་ཡེ་ཤེས་འདིར། །རྣལ་འབྱོར་བདུད་རྩི་སྐུ་ཅན་ཏེ། །སྨིག་རྒྱུ་དང་ནི་འདྲ་བའི་གཟུགས། །བདག་ཉིད་གཟུགས་ཅན་མཐོང་བར་འགྱུར། །ཡེ་ཤེས་ཤིན་ཏུ་བས་གཡོགས་པས། །ཀུན་འགྲོ་བ་ཡི་ལྷར་དྲན་བྱ། །གང་འདྲའི་སྙིང་རྗེ་གཉིས་བྱར་མེད། །དེ་འདྲའི་དངོས་པོར་སྐྱེ་དྲན་བྱ། །སུམ་ཅུ་བདུན་བདག་ཉིད་དབུས་སུ། །སྔོན་ཅན་གྲགས་པ་བསྒོམ་པར་བྱ། །གསང་སྔགས་བདེན་པའི་གཟུངས་བདག་ཉིད། །ཆུ་ཡི་དཀྱིལ་འཁོར་དབུས་སོན་པའོ། །ཨོཾ་སམ་རྦ་ཧཱ་བྷཱུ་ཤྨ་ཏ་ཤཱ་སྃ་ན་ཏྲཱ་པྲི་ས་ཡཱ་ན་ཡ་ཀ་ཧཱུྃ་རཱ་ཧཱུྃ་ཡ་ཕ་ཧཱུྃ་ཊ་ཧཱུྃ་ཕ་ཕ་ཊ་ཊ་སྭཱ་ཕ་ཧཱ་ཊ་སྭཱ་ཧཱ། ༀ་དྲུ་མ་ཙྪ་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ལྟར་སྔགས་གཟུགས་བདག་ཉིད་དུ། །ཀུན་དུ་འགྲོ་མ་ཅན་ཤེས་བྱ། །མཆོད་པ་རྡོ་རྗེའི་རང་བཞིན་དུ། །ལྷན་སྐྱེས་མཛེས་མ་འདུས་པའོ། །ཡེ་ཤེས་མཁའ་འགྲོ་མ་དངོས་བདག །རྣལ་འབྱོར་ནམ་
མཁའ་གཙོ་བོ་ཡིན། །དབུགས་ནི་སྦ་བ་བྱས་ནས་ནི། །སླར་ཡང་ཨོ་ཌྱན་ཀུན་དུ་འགྲོ། །ས་གསུམ་པོ་ཡི་རིས་སུ་ནི། །གཟུགས་ཀྱི་གཙོ་མོ་བསྒོམ་པར་བྱ། །ཡིད་ནི་ནང་དུ་ཆུད་པ་ཡིས། །འདོད་པའི་དངོས་གྲུབ་བསྒོམ་པར་བྱ། །སླར་ཡང་རྡོ་རྗེ་ཕག་མོ་ཡི། །རྣལ་འབྱོར་པ་ཡིས་རིགས་ལྡན་མཆོད། །ལྷ་རྫས་མི་ཡི་བདེ་བ་ནི། །བསྡུས་བྱས་པ་བས་དེ་མཆོག་གོ། །མ་མོའི་གྲོང་ཁྱེར་ཉམས་དགའ་བ། །འགྲོ་བའི་གཙོ་བོ་བསྒོམ་པར་བྱ། །འདི་འདྲའི་དུས་ཀྱིས་ཡེ་ཤེས་ནི། །མཁས་པས་ཨ་བ་དྷཱུ་ཏཱིའི་ནང་དུའོ། །རྣལ་འབྱོར་པས་བསྒོམས་སེམས་བདག་ཉིད། །སྟོང་པ་ཉིད་གཟུགས་དམིགས་པ་ཅན། །དེ་ཡིས་ཐམས་ཅད་རིག་བྱས་ནས། །སྒྱུ་འཕྲུལ་དྲ་བའི་རང་མཚན་ཉིད། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཤིང་གྲིབ་མའི་རང་གི་མཚན་ཉིད་ཀྱི་ཕྱག་རྒྱའི་བརྡའི་ཆོ་གའི་ངེས་པ་ཞེས་བྱ་བ་སྟེ་ལེའུ་སུམ་ཅུ་རྩ་གསུམ་པའོ།། །།དེ་ནས་བཅོམ་ལྡན་འདས་བདག་པོས། །རྡོ་རྗེ་མཁའ་འགྲོ་ཁྱབ་བདག་ཆེ། །ཕྱག་རྒྱ་ཡང་དག་རིག་པའི་གཟུགས། །ཇི་ལྟའི་རིགས་པས་བསྟན་དུ་གསོལ། །ཕྱག་རྒྱ་བཞི་ཡི་རབ་སྦྱོར་བས། །རེ་རེ་ལ་ནི་དགུ་དགུ་སྟེ། །ལས་དང་ཆོས་དང་དམ་ཚིག་དང་། །ཕྱག་རྒྱ་ཆེན་པོ་བཞི་པ་ཡིན། །པད་རྩ་ལྟར་དཀར་བུད་མེད་གང་། །པདྨའི་དྲི་ནི་གཏོང་བ་ཡིན། །པདྨ་དང་ནི་ཨུཏྤལ་དྲི། །ཁ་དོག་ཙམྤ་ཀ་ཡི་ཡིན། །ཛ་ཏི་དང་ནི་ཙམྤའི་དྲི། །དེ་ཡི་གཟུགས་དང་མདོག་འཛིན་མའོ། །ག་པུར་དང་ནི་ཙནྡན་དྲི། །པདྨ་དཀར་པོའི་པགས་ཅན་མའོ། །རི་དགས་ལྟེ་བ་དང་མཉམ་དྲི། །ཨུཏྤལ་སྔོན་པོའི་མདོག་ཅན་མའོ། །ཨུཏྤལ་སྔོ་འདབ་ལྗང་གུ་ལ། །དྲི་ནི་དེ་ཉིད་ཀྱིས་མཚོན་བྱ། །མལླི་ཀ་དང་ཨུཏྤལ་དྲི། །མུ་མེན་དང་ནི་མཚུངས་མའོ། །ཀེ་ཏ་ཀ་ཡི་དྲི་ཤེས་བྱ། །དམར་པོ་བན་དྷུ་ཀ་ལྟ་བུའོ། །པ་ཊ་ལི་མལླི་ཀའི་དྲི། །སླར་ཡང་ནམ་མཁའི་ཁ་དོག་གོ། །དེ་ལྟར་ལས་ཀྱི་
ཕྱག་རྒྱར་འགྱུར། །ཆོས་ཀྱི་ཕྱག་རྒྱ་བཤད་པར་བྱ། །བདེ་གཤེགས་ཚོགས་པ་ལ་དགའ་བ། །མཐར་སྐྱེས་རྣལ་འབྱོར་མ་མཆོག་ཡིན། །བསམ་གཏན་བཟླས་ལ་རྒྱུན་དུ་དགའ། །བྲམ་ཟེ་མོ་རུ་རབ་ཏུ་བཤད། །རྟག་ཏུ་ཁྲུས་དང་གཙང་སྦྲ་དགའ། །རྗེའུ་རིགས་ཀྱི་ནི་བུད་མེད་དོ། །རྣམ་རྟོག་མེད་བདག་ཉིད་ནི་མོ། །རྟུལ་ཅིང་དཔའ་བོ་ལ་རྩེ་ཞིང་། །རྒྱལ་རིགས་ཀྱི་ནི་རང་བཞིན་ཏེ། །འདི་ནི་མཆོག་ཏུ་གཏམ་དགའ་མའོ། །ལས་ལ་ཡོངས་སུ་རྩེ་བ་སྟེ། །དམངས་རིགས་ཀྱི་ནི་རྣལ་འབྱོར་མའོ། །བདེ་གཤེགས་འདུས་ལ་རྗེས་སུ་ཆགས། །མཆོག་ཏུ་མཐུན་མའི་རྣལ་འབྱོར་མའོ། །མཁས་པ་ཡི་ནི་ཕྱོགས་སུ་གཞོལ། །ཆོས་ཀྱི་གནས་སུ་ཁྲོ་མེད་མའོ། །དཔའ་བོ་ཡི་ནི་རིགས་སུ་སྐྱེས། །རྟག་པར་ཤ་ནི་ཟ་མ་ཡིན། །བདེ་བར་གཤེགས་པའི་ལམ་སྲུང་མ། །བྱང་ཆུབ་སེམས་དཔའི་བསམ་པར་བྱེད། །ཁྲོ་བ་རྣམས་ལ་མི་ཁྲོ་ཞིང་། །མཉེས་པར་བྱེད་པའི་ཁུར་ཁྱེར་མའོ། །དེ་ལྟར་ཆོས་ཀྱི་ཕྱག་རྒྱ་སྟེ། །དམ་ཚིག་ཕྱག་རྒྱ་མངོན་བརྗོད་བྱ། །གཏོར་མ་མཆོད་པ་ལ་དགའ་མ། །དམ་ཚིག་ཅན་དུ་དེ་མངོན་བརྗོད། །རབ་གནས་དཀྱིལ་འཁོར་འཁོར་ལོ་དང་། །དོན་དམ་པ་ལ་དགའ་བ་མའོ། །འགྲོ་བ་རྣམས་ལ་དབང་བསྐུར་མ། །རྣལ་འབྱོར་དམ་ཚིག་ཅན་མར་གྲགས། །ཆོས་ཀྱི་འཁོར་ལོ་རབ་བསྐོར་ཞིང་། །རྟག་ཏུ་དམ་ཚིག་སྐྱོང་མའོ། །རྣལ་འབྱོར་མ་ཡི་ཚོགས་དབུས་སུ། །མཆོག་ཏུ་རྨད་བྱུང་རྩེན་མའོ། །དུས་ཐམས་ཅད་དུ་དགའ་དང་བཅས། །རབ་ཏུ་རྒྱས་པའི་བཞིན་བྱེད་མའོ། །རྣལ་འབྱོར་པ་རྣམས་བུ་བཞིན་སྣང་། །རྡོ་རྗེ་རྣལ་འབྱོར་མར་དེ་ཤེས། །དུས་ཀུན་དུ་ནི་དུབ་མེད་མ། །མཚོན་ཆ་འབེབས་པའི་མིང་ཅན་མའོ། །མི་མོ་རྟག་ཏུ་འགྲོ་བཞིན་དུ། །དམ་ཚིག་བརྡ་ནི་སྐྱོང་མ་སྟེ། །དེ་ལྟར་དམ་ཚིག་ཕྱག་རྒྱ་ཡིན། །ཕྱག་རྒྱ་ཆེན་མོར་རབ་བཤད་བྱ། །ལྷན་སྐྱེས་ཞིང་སྐྱེས་ལྷ་མོ་དང་། །སྔགས་སྐྱེས་འཇིག་རྟེན་མགོན་པོ་དང་། །སྦྱོར་སྐྱེས་གནས་སྐྱེས་དེ་བཞིན་དུ། །དམ་ཚིག་ལྷ་རྫས་རྣལ་འབྱོར་མ། །པད་ཅན་མ་ནི་དུས་ཀུན་དུ། །ཕྱག་རྒྱ་ཆེན་པོ་རབ་བསྔགས་པའོ། །དེ་ལྟར་ཕྱག་རྒྱའི་རང་བཞིན་ཏེ། །
དེ་མངོན་ཚུལ་བདག་ཕྱག་རྒྱའི་ལན། །གང་ཞིག་གང་གི་མདོག་དང་དྲི། །དེ་ཡི་དེ་ལྟར་ཚུལ་དྲན་བྱ། །ས་སྲུང་མ་ཡི་རབ་སྦྱོར་བས། །ཀཱ་མ་རུ་པ་ཤེས་རབ་དབང། །སེམས་ཅན་ཀུན་གྱི་དགོས་པའི་ཕྱིར། །ཕྱག་རྒྱ་འདི་ནི་བསྒྲུབ་པར་བྱ། །ཨེ་ཡིག་ཡེ་ཤེས་རླུང་རྣམས་ནི། །ཟླ་བའི་དཀྱིལ་འཁོར་ལ་རབ་བཞུགས། །འདོད་ཆགས་མེ་ཡི་རང་བཞིན་བདག །ཐུགས་ཀྱི་འཁོར་ལོ་རྣལ་འབྱོར་མ། །རྡོ་རྗེ་གསང་བ་ལས་བཞེངས་རྩ། །ཁམས་ཐམས་ཅད་མ་འཕོ་མེད་མའོ། །འདས་དང་མ་བྱོན་སངས་རྒྱས་རྣམས། །དེ་དག་སེམས་ཅན་ཆ་ཅན་ནོ། །སེམས་ནི་རེ་རེ་ལ་ཡང་ནི། །སུམ་ཅུ་རྩ་དྲུག་ལས་ཅན་མའོ། །ལུས་ཅན་གཟུགས་ནི་དེས་དེ་བཞིན། །ཞིང་དུ་ཀ་ལ་སོགས་པའི་གཟུགས། །ཆེན་པོའི་སྔགས་ཀྱི་ཚུལ་བདག་ཏུ། །ས་ལ་ད་ལྟར་ཉིད་རོལ་འགྱུར། །སངས་རྒྱས་ཀུན་གྱི་རིགས་ལ་ཡང་། །གཟུགས་དང་གཟུགས་མེད་ཤེས་མི་འགྱུར། །གཞན་གྱི་གཟུགས་སུ་བྱས་ལྷ་མོ། །སངས་རྒྱས་ལམ་ནི་ཤེས་བྱེད་མའོ། །དབང་པོ་ཀུན་དུ་འགྲོ་སངས་རྒྱས། །གང་ཕྱིར་ཤེས་རབ་ཕ་རོལ་ཕྱིན། །དེ་ལྟར་དེ་ཉིད་ངེས་ཤེས་པས། །རྣལ་འབྱོར་མ་ཡི་གཟུགས་དང་མཚུངས། །ཡེ་ཤེས་འཁོར་ལོར་ལྷ་མོ་རྣམས། །བདག་མོ་འདོད་པ་ཀུན་སྦྱིན་མ། །དཀྱིལ་འཁོར་འཁོར་ལོའི་དབུས་སུ་ནི། །སྔགས་ཀྱི་གཟུགས་ཅན་དུ་བྱུང་བའོ། །ༀ་ཛ་མ་ཊཱ་ཧཱ་ཀ་ཀ་ལཱ་ལ་པ་པཱ་མུནྟཱ་ཀུ་ག་ཊཱ་ནི་ཡ་ཏེ་ཧཱུྃ་ཛཱ་ཧཱུྃ་ཡ་ཕཊ་ཧཱུྃ་ཕཊ་ཧཱུྃ་སྭཱ་ཕཊ་ཧཱ་ཕཊ་སྭཱ་ཧཱ། ༀ་ཨཻ་རཱ་བ་ཏཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱའི་སྔགས་ཀྱི་ས་བོན་དུ། །མཆོག་སྦྱིན་མ་ནི་བྱུང་བ་སྟེ། །ཁ་དོག་དབྱིབས་ནི་སྔོན་གྱི་ཅན། །ཇི་ལྟར་ཀུན་ནས་ཐམས་ཅད་དུའོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ས་སྲུང་མའི་སྐུའི་ཕྱག་རྒྱའི་མཚན་ཉིད་ཀྱི་ཆོ་ག་དང་ལྡན་པ་ཞེས་བྱ་བ་སྟེ་ལེའུ་སུམ་ཅུ་རྩ་བཞི་པའོ།། །།དེ་ནས་ལྷ་མོས་མཆོད་བྱས་ནས། །འདི་སྐད་ཀྱི་
ནི་ཚིག་སྨྲས་སོ། །གང་གིས་འབྱུང་པོ་ཐམས་ཅད་སོགས། །མཐོང་བས་ཀུན་ཏུ་སྐྲག་པ་ཡི། །ཐམས་ཅད་བདེན་པ་ཡི་ནི་བརྡ། །བཅོམ་ལྡན་མཁའ་འགྲོ་ཉིད་ཀྱིས་གསུངས། །ཕྱག་རྒྱ་ཀུན་གྱི་ནང་སོན་པ། །སྙིང་པོའི་ཕྱག་རྒྱ་དེ་ཉོན་ཅིག །རྒྱུད་གང་དུ་ཡང་མ་བཤད་པ། །དེ་ནི་ཁྱོད་ཀྱིས་བསྐུལ་བ་སྟེ། །རྡོ་རྗེ་མེ་ཡི་རབ་སྦྱོར་བས། །ཕྱག་རྒྱ་ཐམས་ཅད་རབ་ཏུ་བརྗོད། །ལྟེ་བའི་འཁོར་ལོར་ལྷ་མོ་གང་། །ཤིང་རེག་མཐའ་ཡི་སྤྱོད་ཡུལ་ཅན། །འགྲོ་དང་འོང་བའི་རིམ་པ་ནི། །སྣ་ཚོགས་རྩ་ཡི་རིམ་པས་སོ། །ཐིག་ལེ་ཉི་མར་སོན་ཕྱག་རྒྱ། །བསམ་དང་སེམས་ནི་དབྱངས་གསལ་ཏེ། །སུམ་ཅུ་རྩ་དྲུག་རིང་དང་ཐུང་། །ཕྱག་རྒྱ་དེ་ནི་མངོན་སྟེར་མ། །ཕྱག་རྒྱ་དང་ནི་ཕྱག་རྒྱའི་ལན། །ཤེས་རབ་ཐབས་ཀྱི་རང་བཞིན་ཅན། །བྱང་ཆུབ་སེམས་སོན་པ་ཡི་དབུགས། །འདི་ཀུན་སེམས་ཅན་ལ་ཐིམ་པའོ། །འཇིགས་བྱེད་ཆེན་མོའི་སྦྱོར་བ་ཡིས། །མཁས་པ་ཡིས་ནི་བསྒྲུབ་པར་བྱ། །ཕྱི་མོ་དེ་ཉམས་མྱོང་བྱས་ནས། །གང་དང་གང་གི་དག་ལས་བྱུང་། །ཧཱ་ཧཱ་རྣམས་ཀྱིས་རྒོད་ཀུན་རྣམས། །ལྗོན་ཤིང་རྩ་བ་ཅན་དུ་བྱ། །དགའ་བས་དེར་ནི་འདུ་བ་ནི། །ཁམས་དང་སྐྱེ་མཆེད་རྣམས་ཀྱང་ངོ་། །བག་ཆགས་ཐམས་ཅད་དང་བྲལ་བ། །འཇིགས་བྱེད་འཆང་བཞིན་པ་ཡིན་ནོ། །ཨོ་ཌིའི་གནས་སུ་དད་པའི་སྟོབས། །ཇི་ལྟའི་གྲངས་ཀྱི་སྤྱོད་ཡུལ་ཅན། །ཉེ་བར་འཇལ་བའི་ཁྱིམ་དབུས་སུ། །དེའི་ཕྱིར་བརྟན་དང་འགྲོ་བ་ནི། །ཐིམ་པའང་དངོས་པོ་ཀུན་གྱི་བདག །མཁས་པས་ཕྱག་རྒྱ་རྣམས་ཀྱིས་བརླན། །ནམ་མཁའ་རུ་ནི་འཕུར་བཞིན་པས། །འགྲོ་བ་ཀུན་ལས་ཡེ་ཤེས་མཆོག །དད་པའི་ཤུགས་ལས་ཤེས་བྱས་ནས། །ལུས་ཅན་ཀུན་གྱི་སྟོབས་ལྡན་ཡིན། །ཤ་ཆེན་པོ་ལ་ཟ་བཞིན་དང་། །ཡིད་ཀྱིས་ཁྲག་ནི་འཐུང་བར་བྱེད། །ཧེ་རུ་ཀ་མར་བྱེད་རིག་མ། །ལྗོན་ཤིང་དྲུང་དུ་ཡང་དག་ཞུགས། །དེ་ནི་དཀྱིལ་འཁོར་འཁོར་དབུས་སུ། །འཇིགས་བྱེད་ཆེན་མོ་རྣམ་པར་བསྒོམ། །ཐུགས་ཀྱི་འཁོར་ལོའི་དབུས་སུ་ནི། །སྔགས་རྣམས་ཡི་གེ་ལས་བྱུང་བའོ། །ཨོཾ་མ་ཁ་ཧཱ་ཊ་ས་བཱྃ་མུ་ག་དྲ་ཀ་མེ་པཱ་ཁ་ལ་ལཱ་ཤཱུ་ཡ་ལ་ཧཱུྃ་པྲི་
ཧཱུྃ་ནྣ་ཕ་དྷཱ་ཊ་རི་ཕཊ་ཎེ་སྭཱ་ཧཱུྃ་ཧཱ་ཧཱུྃ་ཕཊ་ཕཊ་སྭཱ་ཧཱ། ༀ་མ་ཧཱ་བྷཻ་ར་བཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱའི་གསང་སྔགས་སྦྱོར་ཆེན་ལས། །རྣལ་འབྱོར་མ་ཡི་སྐུ་ཐུགས་ཅན། །ཡིད་ནི་ནང་དུ་ཆུད་པ་ཡིས། །འདོད་པའི་དངོས་གྲུབ་སྟེར་བར་བྱེད། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་འཇིགས་བྱེད་ཆེན་མོའི་ནང་གི་ཕྱག་རྒྱའི་ཆོ་ག་འཆད་པའི་མཚན་ཉིད་ཀྱི་ཆོ་ག་ཞེས་བྱ་བ་སྟེ་ལེའུ་སུམ་ཅུ་རྩ་ལྔ་པའོ།། །།དེ་ནས་འདོད་མའི་རྣལ་འབྱོར་མ། །ཕྱག་རྒྱ་ཡི་ནི་བརྡ་ཡི་རྒྱུད། །སྙིང་རྗེས་བཤད་བྱ་རྣལ་འབྱོར་པའི། །མཐོང་བ་ཡིས་ནི་དངོས་གྲུབ་འགྱུར། །སྣང་བ་རྣམས་སུ་གང་ཚེ་དངོས། །དབང་པོའི་སྤྱོད་ཡུལ་དུ་མཐོང་འགྱུར། །གནག་དང་དཀར་དང་དམར་བ་དང་། །སྔོ་དང་དམར་སེར་ལྗང་གུ་དང་། །སེར་དང་སྔོ་སྐྱ་ཁྲ་བོར་སྣང་། །སྣ་ཚོགས་པ་དང་དུ་བའི་མདོག །སྔོ་དང་དམར་སེར་འདྲེས་པ་དང་། །སླར་ལ་ཡང་ནི་དཀར་ནག་མདོག །དམར་སེར་དང་ནི་ལྗང་སྔོ་སྐྱ། །སྔོ་བ་དང་ནི་དམར་བའི་མདོག །དཀར་སྔོ་དང་ནི་དམར་ལྗང་དང་། །སྤྲིན་དང་སྣ་ཚོགས་མདོག་ཅན་དང་། །སྣ་ཚོགས་དང་ནི་སེར་པོའི་མདོག །དུ་བ་དང་ནི་གསེར་མདོག་ཅན། །སེར་ལྗང་དང་ནི་ལྗང་སེར་དང་། །དམར་པོ་དང་ནི་དུང་མདོག་ཅན། །དུད་ཁ་དཀར་པོ་སྣ་ཚོགས་སྔོ། །སེར་དང་དམར་བ་བསྲེས་པ་ཅན། །དུད་ཁ་དང་ནི་སྔོ་སྐྱའི་མདོག །དཀར་དང་སྣ་ཚོགས་པའི་མདོག་ཅན། །སྐྱ་བོ་དང་ནི་དུ་བའི་མདོག །སྐྱ་དཀར་དང་ནི་དམར་སྐྱ་དང་། །སྤྲིན་དང་སྐྱ་བོ་ལྗང་སྐྱ་དང་། །སྣ་ཚོགས་པ་དང་སྐྱ་བོའི་མདོག །ཐམས་ཅད་མདོག་གི་ཁ་དོག་ཏུ། །ཁམས་བཅུ་གཉིས་ཀྱི་ཁ་དོག་ཅན། །གསེར་དང་དངུལ་དང་ཟངས་དང་ལྕགས། །འཁར་བ་དང་ནི་ར་གན་ཏེ། །ཕན་ཚུན་འདྲེས་པའི་ཁ་དོག་གིས། །བརྩེ་བ་ཆེན་པོ་དེ་བཅུ་གཉིས། །རྣལ་འབྱོར་རྣམས་ཀྱི་ཁམས་ཐམས་ཅད། །དེར་ནི་སྣང་བ་སྐྱེ་བར་འགྱུར། །དེ་ཡིས་སྣང་བའི་དུས་སུ་
ནི། །འཕྲུལ་ཆེན་མོ་ནི་འབྱུང་བར་འགྱུར། །ཕྱག་རྒྱ་གཉིས་དག་རྣམ་ཤེས་པས། །ཁ་དོག་མཐོང་བས་འགྲུབ་པར་འགྱུར། །སྔོན་དང་ཕྱིས་ནི་བསྡུས་པ་ལས། །གལ་ཏེ་ལྷན་སྐྱེས་སྦྱོར་བདག་ཉིད། །རླུང་ཤུགས་མ་ཡི་རབ་སྦྱོར་བས། །ཏྲི་ཤ་ཀུ་ནིའི་གནས་སུ་ནི། །ལྷ་མོ་བརྩོན་འགྲུས་སྟོབས་སུ་སྟེ། །དེ་ལྟར་ཡི་གེའི་དོན་རྣམས་ཀྱང་། །བ་ནི་དབུ་མར་འབབ་པ་སྟེ། །བག་ཆགས་སྟོབས་ཀྱིས་འཆི་བར་འགྱུར། །དུས་འཛོམ་ཐམས་ཅད་ཆོས་རྣམས་སུ། །སླར་ཡང་མཐོང་ལམ་བདག་ཉིད་ཡིན། །བེ་ནི་ཡུལ་དང་ལྡན་པ་ཉིད། །བདག་ཉིད་རྣམས་ཀྱི་བསྒོམ་པའི་ལམ། །དེ་ཁོ་ཉིད་མས་དམ་འཁྱུད་པ། །སྐྱོབ་པ་རྣམས་ཀྱི་གྲོལ་བའི་ལམ། །མཐོ་རིས་མི་ཡུལ་ས་འོག་གི། །འགྲོ་བ་རྣམ་པ་གསུམ་ཞེས་བྱ། །མཉམ་པའི་བདེ་བ་མཐོང་འགྱུར་བའང་། །རྡོ་རྗེ་འབར་བའི་མཚམས་ན་གནས། །བུམ་པ་ཅན་སོགས་བྱས་གང་ཕྱིར། །གཏུམ་མོ་ཕྲ་བའི་རྩ་ཅན་ནོ། །པདྨར་རྩ་ནི་ཐམས་ཅད་ཅན། །དེ་དང་འདྲ་བའི་ཡེ་ཤེས་མེད། །དེ་ཕྱིར་བརྩོན་འགྲུས་འབྱུང་བར་འགྱུར། །སྟོབས་སུ་ཡེ་ཤེས་ཡེ་ཤེས་ཅན། །དེ་ལྟར་ཤེས་བྱས་རྟག་རྣལ་འབྱོར། །འདོད་ཅན་མ་ལ་འདོད་སྤྱད་ཀྱིས། །དཀྱིལ་འཁོར་གྱི་ནི་བདག་མོ་དང་། །གསང་སྔགས་ཡི་གེར་ཡང་དག་བྱུང་། །ལྷན་སྐྱེས་རྫོགས་བྱང་ཆུབ་མཆོག་ཏུ། །ལྷ་མོ་ཆེན་མོ་སྐྱེ་བར་འགྱུར། །ཨོཾ་བེ་བྱཱ་ཏཱ་གྷྲ་ལ་ཙཱ་སྃ་རྨཱ་གྷམྦ་མ་ར་རྡྷ་དྷཱ་ཎ་རི་ཀ་ཎེ་རཱ་ཧཱུྃ་ཡ་ཧཱུྃ་ཧཱུྃ་ཕཊ་ཧཱུྃ་ཕཊ་ཕཊ་སྭཱ་ཕཊ་ཧཱ་སྭཱ་ཧཱ། ༀ་བཱ་ཡུ་བེ་གེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཁ་དོག་གཟུགས་ནི་སྔོན་ཇི་བཞིན། །སུམ་ཅུ་རྩ་བདུན་གྱི་དབུས་སུ། །ཁམས་གསུམ་སྙིང་པོའི་ཕྱག་རྒྱ་ཡིས། །གང་དེ་ནུས་པ་རྫོགས་པར་གྲགས། །གསུང་གི་འཁོར་ལོ་གསང་བ་ཆེར། །བདག་གིས་གང་ཞིག་རིམ་པ་ཡིས། །ཐམས་ཅད་བདེན་པར་ཤེས་པར་བྱ། །དེ་ཕྱིར་རྡོ་རྗེ་འཆང་དབུགས་དབྱུང་། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་
པོ་ལས་རླུང་ཤུགས་མའི་ཁ་དོག་གི་ཕྱག་རྒྱའི་ཆོ་གའི་མཚན་ཉིད་ཅེས་བྱ་བ་སྟེ་ལེའུ་སུམ་ཅུ་རྩ་དྲུག་པའོ།། །།དེ་ནས་རྡོ་རྗེ་ཕག་མོ་ཡིས། །ཇི་ལྟའི་ཆོ་གས་མཆོད་བྱས་པས། །ཉོན་ཅིག་ལྷ་མོ་བཤད་བྱ་བ། །བླ་མ་རང་གིས་ལྷའི་ཕྱག་རྒྱ། །འོ་བྱེད་དེ་བཞིན་ལཱ་མ་དང་། །མཁའ་འགྲོ་མ་དང་གཟུགས་ཅན་མ། །ཡོངས་འགྱུར་མ་དང་རྗེས་འཇུག་མ། །རྣལ་འབྱོར་ཕར་ཕྱིན་དྲུག་དེ་བཞིན། །ལག་པ་གཡོན་པ་ཡི་ནི་བརྡ། །རྣལ་འབྱོར་དབྱེ་བས་སྟོན་བྱེད་པ། །རེ་རེ་ལ་ཡང་རྣམ་གསུམ་འགྱུར། །དཔའ་བོའི་རྣམ་པ་གསུམ་ཉིད་དེ། །དེ་བཞིན་གཤེགས་དང་རྡོ་རྗེ་ཉིད། །ཨཱ་རོ་ལིཀ་དང་རྟ་མཆོག་དང་། །ཧེ་རུ་ཀ་རྣམས་ལག་གཡོན་ལའོ། །མཁས་པས་གཉིས་སྦྱར་རྣལ་འབྱོར་ཏེ། །སྤྱན་མ་དང་ནི་མཱ་མ་ཀཱི། །སྒྲོལ་མ་གོས་དཀར་བདག་མེད་མ། །དེ་བཞིན་རྡོ་རྗེ་དབྱིངས་དབང་ཕྱུག །ཕ་རོལ་ཕྱིན་དྲུག་ཏུ་ཤེས་བྱ། །དེ་ལྟར་རྣམ་གསུམ་ཤེས་བྱ་བ། །དཔའ་བོ་འགྲོ་བ་ཀུན་གྱི་བདག །ས་ཡི་སྙིང་པོ་ལ་སོགས་དེར། །དེ་བཞིན་མཁའ་འགྲོ་སོགས་གཙོ་བོ། །ལྷ་མོ་ལག་པའི་རྒྱབ་སོན་ཏེ། །སོར་མོ་རྣམས་ལ་དེ་བཞིན་གཤེགས། །དེ་བཞིན་ལྷ་མོ་དབུས་ཚིགས་སུ། །ལག་པའི་མཐིལ་དུ་དེ་བཞིན་གཤེགས། །དཔའ་བོ་དེ་བཞིན་སེན་སྐོགས་ལ། །ལག་གདུབ་གནས་སུ་རྣལ་འབྱོར་མ། །ལག་པའི་རྩེ་མོས་བརྡ་བྱ་སྟེ། །མཁས་པས་རྒྱབ་ཏུ་གཤེགས་གསོལ་བྱ། །གང་ཞིག་གང་གི་བདག་པོ་ཉིད། །དེ་ཡི་དེ་ཉིད་ཀྱིས་མཚོན་བྱ། །ཆང་འཐུང་མ་ཡི་རབ་སྦྱོར་བས། །ཀོ་ས་ལ་དང་སྣའི་རྩེ་མོ། །དྲན་པའི་སྟོབས་ཀྱི་བདག་ཉིད་ཀྱིས། །བཟའ་བ་དང་ནི་སྟོན་མོ་བྱ། །གཉིད་ལོག་དུས་ཀུན་ལས་སྐྱེས་པར། །ཕྱག་རྒྱ་ཆེན་པོ་ལེགས་པར་ཟུང་། །རཱ་ཧུ་དུས་མེ་ཉི་མ་རུ། །ཟོས་པ་སྣ་ཡི་རྩེར་དེ་བཞིན། །ཕྲ་མོ་གཉིས་སུ་མེད་གཟུགས་ལས། །ཡུལ་ཀྱང་བཟའ་བར་བྱས་ནས་ནི། །མེ་ཏོག་སེམས་ཀྱི་ས་བོན་ལས། །ཀྵི་ནི་བདུད་རྩིའི་སྐུད་པ་འཛག །དེ་ལྟར་ངེས་བྱེད་རྣལ་འབྱོར་པ། །ལྟེ་བའི་ཆང་སྔོན་སོང་ལས་སོ། །གཞུ་ཡི་དབྱུག་པར་སོན་
པའི་སེམས། །རང་གཟུགས་ཡང་དག་རིག་པ་ཙམ། །རོ་མཉམ་པ་ནི་མྱོང་བ་ཡང་། །ཐེ་ཙོམ་མེད་པར་འདིར་བྱེད་འགྱུར། །བརྐྱང་མའི་བདེ་བའི་ནུས་པ་ཡིས། །ས་བོན་ཟག་པ་མེད་པར་སོན། །དུས་དེ་ཉིད་དུ་རྟག་ཕྱག་རྒྱ། །དཔའ་བོའི་བརྡ་ཡིས་འཐོབ་པར་འགྱུར། །བྱང་ཆུབ་འཁོར་ལོ་དགའ་བཅས་སུ། །འཇུག་འགྱུར་མཆོག་གི་ཞལ་ཅན་མ། །བརྡ་དང་བྲལ་ན་འཁོར་བ་རུ། །གྲོལ་བའི་ཐབས་གཞན་ཡོད་མ་ཡིན། །རྣལ་འབྱོར་མ་ཡི་ཚོགས་བདག་མོ། །ཆང་འཐུང་གྲགས་པ་ཆེན་མོ་ཡིན། །སུམ་ཅུ་རྩ་བདུན་འཁོར་ལོ་ཆེར། །གསང་སྔགས་ལས་བྱུང་མཆོག་ཞལ་མོ། །ༀ་ཤ་མ་ཏྲཱུ་ཧཱ་ནི་བི་སུ་གྷ་མྦྷ་ན་ན་ནི་ཀ་བཱ་རཱ་རི་ཡ་ཎེ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་སྭཱ་ཧཱ་ཧཱ། ༀ་སུ་རཱ་བྷ་ཀྵཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ལྟར་སྔགས་རྒྱལ་མངོན་པར་ནི། །མ་བྱུང་འབྱུང་བར་མི་འགྱུར་རོ། །འབྱིན་དང་སྡུད་པ་དག་གིས་ནི། །གཉིས་གཉིས་ཀྱིས་ནི་རྐང་པར་གསུངས། །ཤེས་རབ་ཐབས་བདག་ཉིད་ལྷ་མོ། །ཁ་དོག་དབྱིབས་ནི་སྔོན་ཅན་ནོ། །ཀུན་མཁྱེན་བགྲོད་བྱ་ཕྱག་རྒྱའི་ལན། །མངོན་པར་ཤེས་པས་སྦྱིན་མི་བྱ། །མ་ཤེས་པ་ཡིས་རྣལ་འབྱོར་མའི། །ཕྱག་རྒྱ་ཆེན་པོ་འདི་འགྲུབ་འགྱུར། །སྦྲུལ་དང་རྐུན་སོགས་པས་བསད་ནས། །དམྱལ་བ་སོགས་སུ་འགྲོ་བ་ཡིན། །སྣ་ཚོགས་ལུང་འཛིན་དཔའ་རྣམས་ལ། །ཡང་དག་ཡིད་ཆེས་བྱ་ཕྱིར་སྟེར། །བླ་མའི་དྲིན་གྱིས་ཡོད་པ་དེར། །མཁས་པ་དེ་ཡི་རྐྱེན་གྱིས་བརྡ། །དངོས་གྲུབ་དངོས་པོ་བདག་ཉིད་ཀྱིས། །བྱེད་འགྱུར་གཞན་དུ་མ་ཡིན་ནོ། །དེ་ཡི་དྲིན་གྱིས་གྲོལ་བ་སྟེ། །མཁས་པས་ཞིང་དུ་གནས་པར་བྱ། །བླ་མའི་མན་ངག་ཞིང་ཡིན་ཏེ། །དེ་ནི་གནས་དང་བྱང་ཆུབ་ཕྱོགས། །གནས་པ་ཙྪོ་མ་ཀ་རྣམས་ཏེ། །རང་བཞིན་མེད་པ་ཙྪོ་མའི་ལན། །ཡང་ན་འདི་ཀུན་བླ་མ་འམ། །བླ་མ་ཐམས་ཅད་ཐམས་ཅད་པའོ། །མན་ངག་དང་བཅས་ཡེ་ཤེས་ཆེ། །ངག་གི་ལམ་འདས་སྤྱོད་ཡུལ་ཅན། །སྐུ་ཡི་འཁོར་ལོར་དངོས་གྲུབ་ཆེ། །ཐེག་པ་ཀུན་གྱི་བདེ་བར་བཞུགས། །བདེ་མེད་བདེ་བ་མེད་པའང་མེད། །ཐམས་ཅད་དེར་ནི་གཉིས་མེད་ཆེ། །དཔའ་བོ་ཐམས་ཅད་མཉམ་
སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཆང་འཐུང་མའི་རབ་ཏུ་སྦྱོར་བའི་བརྡའི་རང་བཞིན་གྱི་མཚན་ཉིད་ཀྱི་ཆོ་ག་ཞེས་བྱ་བ་སྟེ་ལེའུ་སུམ་ཅུ་རྩ་བདུན་པའོ།། །།དེ་ནས་ཕག་མོ་པད་བཟུང་མོའི། །ལྷ་མོས་མཆོད་པ་བྱས་ནས་ནི། །ལས་དང་རྣལ་འབྱོར་མའི་བདག་པོ། །རྡོ་རྗེ་ཆེན་པོས་བདག་ལ་གསུངས། །སེམས་ཅན་ཀུན་གྱི་དགོས་བྱེད་པ། །ལྷ་རྫས་ལས་ནི་བཤད་པར་བྱ། །གང་གིས་ཐམས་ཅད་དབང་སོགས་སུ། །ལྷ་སོགས་ཐམས་ཅད་དེ་བཞིན་འོང་། །ཐོག་མར་རྡོ་རྗེ་ཕག་མོ་ཡི། །རྩ་བའི་གསང་སྔགས་ཀྱི་ནི་ལས། །ཀ་ལིང་ག་རུ་ལྗང་ལྷ་མོའི། །མངོན་པར་བཀའ་བསྒོ་བྱེད་པར་འགྱུར། །དེ་ཡི་རིགས་རྣམས་སུ་སྐྱེས་པ། །བདག་དང་བདག་གིར་གནང་བས་སོ། །སུམ་ཅུ་བདུན་བདག་ཉིད་དབུས་སུ། །མཆོག་གི་དབང་ཕྱུག་མ་བསྒོམ་བྱ། །རྐང་པ་གཉིས་ཀྱི་རྩ་སྔགས་སུ། །ས་བོན་ཡི་གེ་ལས་སྐྱེས་པའོ། །འཇིག་རྟེན་འདི་དང་ཕ་རོལ་དུ། །དེ་དང་བྲལ་བས་དངོས་གྲུབ་མེད། །ༀ་ཤ་ཏྲི་ཏ་སཱ་ས་ཧ་ཧ་སྲ་སྲ་མ་མུ་ཧཱ་ཁཱ་ས་ཡ་ཧ་ཧཱུྃ་སྲེ་ཧཱུྃ་ཀ་ཕཊ་རོ་སྭཱ་མཱ་ཧཱ་བ་ལྱཱ་ནྟ་བརྟི་ཎེ་ཧཱུྃ་ཧཱུྃ་ཕཊ་སྭཱ་ཧཱ། ༀ་ཤྱཱ་མ་དེ་བཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དཀྱིལ་འཁོར་གྱི་ནི་མཆོག་འདི་ནི། །བསྒོམ་བྱ་བཟླས་དང་བསམ་གཏན་ནོ། །རྡོ་རྗེ་ཕག་མོ་གཉིས་བྱར་མེད། །འབད་པས་རྩ་བའི་སྔགས་རྣམས་སུའོ། །ཟླ་མཚན་གྱི་ནི་མེ་ཏོག་གིས། །བརླན་པའི་གོས་ནི་ལེགས་བསྐམས་ལ། །གརྒ་ཊ་ཡི་བྲུན་གྱིས་ནི། །དངོས་གྲུབ་འདོད་པས་བདུག་སྤོས་སྦྱིན། །སྔགས་པས་བདུག་སྤོས་འདི་ཡིས་ནི། །བཅོམ་ལྡན་འདས་མ་ཉེ་བར་བྱ། །ཕག་མོ་ཡི་ནི་སྦྱོར་ལྡན་པས། །འདི་སྐད་ཀྱི་ནི་ཚིག་སྨྲས་སོ། །མཐུན་པའི་རྩ་དང་འདུས་པ་ལས། །འགྲོ་བ་ཐམས་ཅད་གཡོན་ལས་བྱུང་། །རང་གི་རྒྱུད་ནི་མཛེས་བཞིན་པ། །ཟླ་མཚན་གྱི་ནི་རྡུལ་གོས་སོ། །བྲུན་ཀྱང་འཇིག་རྟེན་གསུམ་པོ་དང་། །ཡེ་ཤེས་བསྲེས་པས་སྤོས་སུ་འགྱུར། །བྱི་ལ་བཞིན་དུ་
བཞག་པའི་སེམས། །ཧྱཱ་ཡི་ཡི་གེར་ཚིག་འདིའོ། །ལྗང་གུའང་སྙིང་རྗེའི་སྦྱོར་བ་སྟེ། །ལྷ་མོ་དེ་བཞིན་དབུ་མའོ། །ཅི་ཞིག་བདེ་བ་རིག་པ་ཅི། །ཅི་ཞིག་དོན་དམ་པའི་སྤྱོད་ཡུལ། །གོས་བཞིན་པ་ནི་རྣལ་འབྱོར་ཆེར། །རྣམ་པར་ཤེས་པ་ལྷ་མོར་འདོད། །སྐྱེ་བོ་ཀུན་གྱི་བདག་ཉིད་ཆེས། །བགྲོད་པ་མཚམས་རྣམས་ཀུན་དུའོ། །ཐོད་པ་ཁ་སྦྱོར་བཅིང་བྱས་ནས། །སྐྲ་རྣམས་ཀྱིས་ནི་སྦྱིན་སྲེག་བརྗོད། །འདི་ནི་མེ་ཏོག་ཏུ་གྲགས་ཏེ། །དམ་ཚིག་སོ་སོར་སྐྱོང་བར་བྱེད། །རྟག་ཏུ་རྣལ་འབྱོར་མ་མཆོད་བྱ། །ཞི་བའི་བཏུང་བ་ཉིན་རེར་རོ། །དེ་ལྟར་བྱེད་པའི་སྔགས་ཤེས་པ། །དངོས་གྲུབ་ཐམས་ཅད་རབ་སྟེར་པོ། །བ་ལང་ཤ་ནི་ཆང་བཏགས་པ། །ལག་པ་གཡོན་པས་སྦྱིན་སྲེག་བྱ། །ལྷ་ཐམས་ཅད་དང་རྒྱུ་སྐར་བཅས། །ཀླུ་སོགས་སུམ་ཅུའི་གནས་པ་དང་། །སངས་རྒྱས་ཀྱང་ནི་དབང་འགྱུར་ན། །ཕྲ་མོའི་མི་ནི་སླར་ཡང་ཅི། །ལུད་པ་དང་ནི་སོ་ཤིང་དང་། །རང་ལུས་དྲིལ་ཕྱིས་དེ་བཞིན་དུ། །མིང་གིས་ཆང་བཏགས་སྦྱིན་སྲེག་གིས། །འཇིག་རྟེན་དང་བཅས་དབང་དུ་བྱེད། །ཟླ་མཚན་གྱི་ནི་ཁྲག་དང་ནི། །བཟའ་བ་ཟོས་པའི་སྐྱུགས་པ་ནི། །མི་ཡི་སྐྲ་དང་ཡོངས་ལྡན་པས། །ད་ལྟ་ཉིད་དུ་འགུགས་བྱེད་མཆོག །རང་ལུས་མར་གྱི་སྐྱུགས་པ་དང་། །རང་གི་སྐྲ་ནི་མཁས་པས་བསྲེག །ནིམ་པའི་མེ་ནི་འབར་བ་ཡིས། །མོད་ལ་སྡང་བར་བྱེད་པའི་མཆོག །བྱ་རོག་གཤོག་པས་སྦྱིན་སྲེག་བྱེད། །མཉམ་གཞག་དྷ་དུ་ར་ཡི་མེས། །མར་ནག་ཚན་དེ་ཡོངས་ལྡན་པས། །མོད་ལ་གསོད་དང་སྐྲོད་པ་ཡིན། །སྟོང་ཕྲག་དགུ་ཡི་སྲེག་བླུགས་ཀྱིས། །ཡུན་མི་རིང་པས་རྒྱལ་པོ་འཐོབ། །གང་ཞིག་བསྲེག་པའི་སྲེག་བླུགས་ནི། །མཁས་པས་བརྒྱ་ནི་ཤ་ཡིས་ཏེ། །དེ་ལ་ཟླ་བ་གསུམ་རྗེས་ལ། །སྐད་ཅིག་ལ་ནི་ཕོངས་པ་འཇོམས། །གང་གིས་རྒྱུན་དུ་དྲན་བྱེད་ན། །དེ་ནི་སྐྱེ་བོའི་མཐུན་པར་འགྱུར། །མཚན་མོ་ཉི་ཤུ་རྩ་གཅིག་གིས། །འགྲུབ་འགྱུར་འདི་ལ་ཐེ་ཚོམ་མེད། །ལུས་མེད་ཚོགས་མཆོག་བུད་མེད་རྣམས། །མྱོས་པའི་བསམ་ཅན་འགྲུབ་འགྱུར་རོ། །འདོད་པས་མྱོས་པའི་འཇིག་རྟེན་རྣམས། །
མི་འཇིགས་པ་ནི་སྦྱིན་པར་བྱེད། །བུད་མེད་བྱེ་བས་ཡོངས་བསྐོར་ནས། །གྲུབ་པ་ས་ཡི་སྟེང་དུ་རོལ། །རྡོ་རྗེ་ཕག་མོ་སྦྱོར་ལྡན་པ། །དཔལ་ཧེ་རུ་ཀའི་རྣལ་འབྱོར་མཉམ། །རྡོ་རྗེ་སློབ་དཔོན་གཞན་དང་འདིར། །དཔའ་བོ་ཀུན་གྱིས་ཕྱག་བྱེད་དེ། །དམ་ཚིག་སྤྱོད་པ་སྲུན་པ་ཡི། །འཇིག་རྟེན་གསུམ་ལ་དངོས་གྲུབ་སྟེར། །སྔོན་བཤད་རྣལ་འབྱོར་སྦྱོར་བ་ཡིས། །དེ་ལྟར་སྦྱིན་སྲེག་བྱས་པས་འགྲུབ། །རྣལ་འབྱོར་ལས་གཞན་ལས་མེད་དེ། །ལས་དང་བྲལ་བས་སྦྱོར་བ་མེད། །འཕོ་བ་བཅུ་གཉིས་རྣམས་ཀྱི་ལས། །རླུང་འབབ་པ་ནི་དེ་རྣམས་སོན། །གཉིས་ཀྱི་མཚམས་ནི་འདུས་པ་ལས། །སྦྱིན་སྲེག་ཐབ་ཀྱི་ནང་དུ་བལྟ། །ལྟེ་བ་གཉིས་ནི་འདུས་པར་ཏེ། །སླར་ཡང་མཚམས་རྣམས་ཐམས་ཅད་དུའོ། །དེ་ཡི་དུས་སུ་ཤེས་བྱ་བ། །སྔགས་ཀྱང་ཡི་གེ་ལ་འབུམ་ཕྲག །བཟླས་བྱས་བསྐུལ་བ་གསང་བ་ཡིས། །བྱས་པས་ཀུན་ནས་དངོས་གྲུབ་འགྱུར། །རྡོ་རྗེའི་འཁྲུལ་འཁོར་རབ་བྱས་ཏེ། །དེ་ནས་གཅིག་གིས་དམན་ལྔ་བཅུ། །རེའུ་མིག་ས་ལ་གཞག་པར་བྱ། །སྔགས་པས་གནོད་མཛེས་རྒྱལ་པོའི་སྔགས། །དེ་ལ་ཐོག་མར་རྣམ་སྣང་མཛད། །བདུན་པ་ལ་ཡང་སླར་དེའོ། །དགུ་པར་སུ་ཡི་གེ་སྦྱིན། །བཅུ་གསུམ་པ་ལ་གྲི་ཡིག་གོ། །བཅུ་བདུན་པ་ནི་བྷ་ཡིག་སྟེ། །སླར་ཡང་བཅུ་དགུ་པ་ལ་ཧྞ། །སུམ་ཅུ་གཅིག་པར་གྲི་ཡིག་སྦྱིན། །སུམ་ཅུ་གསུམ་པར་ནི་ཡིག་གོ། །སུམ་ཅུ་བདུན་པར་སྦྱིན་བྱ་བ། །མཁས་པས་ཧྞའི་ཡི་གེར་སྦྱར། །བཞི་བཅུ་རྩ་གཅིག་པ་འདིར་ནི། །དེ་བཞིན་སུ་ཡི་ཡི་གེ་སྦྱིན། །བཞི་བཅུ་རྩ་གསུམ་པར་དེ་བཞིན། །ཡེ་ཤེས་ས་བོན་སྦྱར་བར་བྱ། །བཞི་བཅུ་རྩ་དགུ་པར་སྦྱིན་པ། །ཐམས་ཅད་ཤེས་པས་སམྦྷའི་ཡིག །དུམ་བུ་གཉིས་པར་སྦྱིན་བྱ་བ། །རིག་བྱེད་རྣམས་ཀྱི་ཐོག་དབྱངས་སོ། །དུམ་བུ་དྲུག་པར་དེ་བཞིན་འདིར། །རླུང་ནི་དུས་ཐམས་ཅད་དུའོ། །བཅུ་པར་གྲི་ཡི་ཡི་གེ་སྦྱིན། །བཅུ་གཉིས་པ་ལ་བ་ཡིག་གོ། །བཅྭ་བརྒྱད་པ་ལ་ཧྞ་ཡིག་སྟེ། །སུམ་ཅུ་གཉིས་པར་ཡ་ཡིག་གོ། །སུམ་ཅུ་བརྒྱད་པར་ཧྞ་ཡིག་སྟེ། །བཞི་བཅུ་པ་ལ་ཡའི་ས་བོན། །བཞི་བཅུ་རྩ་བཞི་དེ་བཞིན་འདིར། །གྲི་ཡི་ཡི་གེ་སླར་སྦྱིན་བྱ། །བཞི་བཅུ་བརྒྱད་པར་སྔགས་པ་
ཡིས། །རྟག་ཏུ་ཧཱུྃ་ཡིག་གཞོམ་མེད་པའོ། །བརྒྱད་པར་དེ་བཞིན་དུ་ནི་འདིར། །སླར་ཡང་ཡི་གེ་ཀུན་དབང་ཕྱུག །བཞི་བཅུ་པ་རུ་ཛ་ཡིག་སྟེ། །བཅུ་དྲུག་པ་ལ་བྷ་ཡིག་གོ། །ཉི་ཤུ་པ་ལ་ཨཱའི་ཡི་གེ། །ཉི་ཤུ་བཞི་པར་ག་ཡིག་གོ། །ཉི་ཤུ་དྲུག་པར་ན་སླར་སྦྱིན། །སུམ་ཅུ་པ་ལ་ཝཱན་སྦྱར་བྱ། །སུམ་ཅུ་བཞི་པར་ཡ་སྦྱིན་ཏེ། །རཱ་ཡིག་སུམ་ཅུ་དྲུག་དེ་བཞིན། །བཞི་བཅུ་གཉིས་པར་ཧཱུྃ་སྦྱིན་བྱ། །རྡོ་རྗེ་འཁྲུལ་འཁོར་བསྡུས་པའོ། །དུམ་བུ་བཅུ་གཉིས་རྣམས་ལ་ནི། །བསྒྲུབ་པར་བྱ་བའི་མིང་གཞུག་བྱ། །ཧཱུྃ་ཡིག་དུམ་བུ་ཐམས་ཅད་ཀྱི། །བསྒྲུབ་བྱ་རྣམས་ཀྱི་དབུས་སུ་བྲི། །རྩ་བའི་སྔགས་ཀྱིས་ཡོངས་སུ་བསྐོར། །རྡོ་རྗེ་ཡི་ནི་ཕྲེང་བ་བྱ། །འཁོར་ལོ་ཟུང་ནི་བྲི་བྱ་སྟེ། །དབང་ལ་ཁམ་ཕོར་ས་མཐིལ་ལའོ། །འཁྲུལ་འཁོར་རྡོ་རྗེ་ལས་བྱུང་བ། །དབང་གི་རྫས་ཀྱིས་ཡང་དག་བྲི། །སངས་རྒྱས་རྡོ་རྗེ་འཆང་བ་ཡང་། །དེ་ཚེ་མྱུར་དུ་བྱོན་པར་འགྱུར། །བདུད་རྩི་ལྔ་རྣམས་ཕབ་པ་ལས། །དམ་ཚིག་དེར་ནི་བྱ་བ་ཡིན། །ནང་གི་བདག་ཉིད་སྦྱིན་སྲེག་གིས། །སྔགས་ཀྱི་གཙོ་མོ་ཤེས་པར་བྱ། །དཔའ་བོ་གཉིས་མེད་སྦྱོར་བ་ཡིས། །དེ་ལས་ལས་མཆོག་བཤད་པར་བྱ། །རྣལ་འབྱོར་རྣམས་ཀྱི་གསང་མཆོད་པ། །རྟག་ཏུ་འཁྱུད་པས་མཆོག་རབ་བྱེད། །མཚན་མོ་ཀུན་དུ་སྒྲུབ་པ་པོ། །དེ་ནས་ཕོ་ཉ་མཆོད་པར་བྱ། །ཤ་ཟའི་རྩ་བ་ཁར་བཅུག་ནས། །ཇི་སྲིད་འདོད་པའི་བར་དུ་ནི། །དེ་སྲིད་ལིང་ག་ལས་རུང་འགྱུར། །གཞན་དུ་ང་ཡིས་མ་བཤད་དོ། །ས་ཡི་ལྕུག་མ་ཏིལ་མར་དུ། །བཙོས་པས་རྐང་པ་བྱུག་པར་བྱ། །མཁས་པ་དེ་ཡི་མཚན་མ་ནི། །དུས་ཐམས་ཅད་དུ་རེངས་པ་མཁས། །པཱ་ཐ་ཀ་ཊུ་ཀ་རོ་ཧི་ནི། །རྟ་ཡི་དྲི་དང་འདི་རྣམས་ནི། །ཆ་རྣམས་མཉམ་པར་བྱ་བ་སྟེ། །བརྩེ་ཆེན་ཆོ་གའི་ལྷག་མ་ནི། །ཨརྐའི་འོ་མ་དང་བཏགས་ནས། །དེ་ཡིས་ལིང་ག་དྲིལ་ཕྱིས་བྱ། །གང་གི་ཚད་དུ་འདོད་པ་ཡི། །དེ་ཡི་ཚད་དུ་འགྱུར་ཞེས་བྱ། །མྱུར་བ་རུ་ནི་ཆུ་དྲོན་གྱིས། །བཀྲུ་བ་བྱས་ན་སྔོན་གྱི་ཚད། །པདྨ་དཀར་པོའི་ཀེ་ས་ར། །སྦྲང་དང་བཏགས་པའི་བྱུང་བ་ནི། །བྱིན་ན་ལིང་ག་བརྟན་པ་རུ། །དེ་འགྱུར་འདོད་མ་ལ་སྤྱོད་དོ། །པདྨ་དཀར་པོའི་གེ་སར་ནི། །ཏིལ་དཀར་པོ་དང་དེ་བཞིན་གཞན། །
མར་སར་དང་ནི་དཔའ་གཅིག་གི། །རྩ་བ་སྦྲང་དང་ལྷན་ཅིག་ཏུ། །བཏགས་ནས་ལྟེ་བར་བྱུག་བྱས་ན། །དེ་སྲིད་ལིང་ག་མི་ལྟུང་ངོ་། །རྡུལ་ཅན་མ་དང་ཡུང་བ་གཉིས། །ཡོངས་བཟུང་བ་ཡི་དར་བ་དང་། །བྲེ་དོ་གདུ་བར་བྱ་བ་སྟེ། །བྲེ་གང་མ་གྱུར་བར་དུའོ། །དེ་ལྟར་འཐུངས་པས་ཉིན་བདུན་ན། །བཅུད་ལེན་རྫོགས་པར་བྱེད་པ་ཡིན། །དེ་ལྟར་སྦྱོར་བ་མཆོག་གཙོ་བོ། །ཡང་དག་དཔའ་བོས་གསུངས་པའོ། །སྤྲེའུའི་མཆིན་པ་བཟུང་ནས་ནི། །ཕྱེ་མ་ཞིབ་མོ་རུ་ནི་བྱ། །རང་གི་དབང་པོ་ཡང་དག་ལྡན། །དབང་དུ་བྱེད་པ་བླ་མེད་པའོ། །གང་དང་གང་དུ་གནས་ནས་ནི། །རྡོ་རྗེ་ཕག་མོ་ཟློས་གྱུར་ནས། །ལན་ཅིག་བཟླས་པའི་སྡིགས་མཛུབ་ཀྱིས། །གཡོན་དང་གཡས་སུ་བསྐོར་བར་བྱ། །གང་གང་བསམ་པ་ཐམས་ཅད་རྣམས། །དེ་ནི་ཐམས་ཅད་རབ་སྟེར་བྱེད། །སོ་བ་གོས་དང་གསེར་དང་ནི། །བཟའ་སྟོན་ཟས་དང་བཏུང་བ་སྟེ། །དེ་ཐམས་ཅད་ནི་འཐོབ་བྱེད་དེ། །སྔགས་པས་དེ་བཟུང་ཡོངས་རྫོགས་བྱེད། །རྣམ་འགྱུར་མེད་པ་དང་ནི་ཁྲག །སྒྲུབ་པོས་གཅིག་ཏུ་བྱས་ནས་ནི། །རིག་པ་ལན་བདུན་བཟླས་པ་ཡིས། །དེ་ནས་མི་ལ་བསྐུས་པ་ཡིས། །རེག་པས་སྐྱེས་བུ་རྣམས་ཕྱེ་བར། །འགྱུར་ཏེ་ཚིག་ནི་གཞན་དུ་མིན། །འདི་ཡི་རིག་པ་ལན་ཅིག་ནི། །བཟླས་པའི་ཆུ་ཡིས་གྲོལ་བ་ཡིན། །དེ་ལྟར་གང་དང་གང་གི་ནི། །སེམས་ཅན་གྱི་ཁྲག་ཁྲག་གིས་ནི། །བསྒོས་པའི་སྐུད་པ་བཅིངས་པ་ཡིས། །བཟླས་པས་གཟུགས་ནི་འཛིན་པ་སྟེ། །འདི་རྣམས་ཐམས་ཅད་ཆུས་གྲོལ་བར། །འགྱུར་བ་འདི་ལ་ཐེ་ཙོམ་མེད། །བུད་མེད་གཟུགས་མཛེས་རྒྱལ་པོ་དང་། །ས་ཡི་བདག་པོ་ལ་བལྟས་ན། །སྒྲུབ་པོས་མ་མཐོང་བ་ཡང་ནི། །དེ་རྣམས་ཐམས་ཅད་འགུགས་པར་འགྱུར། །ལན་བདུན་མངོན་པར་བསྔགས་བྱས་ན། །དེ་ཡི་མཚན་མོ་འོང་བ་སྟེ། །ནུབ་བདུན་ནི་མདའ་ཤུགས་ཀྱིས། །འོང་བ་ལ་ནི་ཐེ་ཙོམ་མེད། །དེ་ལྟར་བྱ་དང་བྱ་མིན་པའི། །ལས་ཀུན་རྡོ་རྗེའི་ནོར་སོན་པར། །རང་གིས་རིག་པའི་སྦྱོར་བདག་ཉིད། །ཡེ་ཤེས་ཕ་རོལ་སོན་པ་འགྲུབ། །འཁྲུལ་འཁོར་ཁམས་ཀྱི་རེའུ་མིག་ཏུ། །རྩ་ནི་ཕྲ་མོའི་གཟུགས་ཅན་མ། །ཡི་གེ་རླུང་ཆེན་པོ་ཡིན་ཏེ། །ལྷ་ནི་ཀུན་དུ་འགྲོ་བའོ། །
ལྗང་གུ་གཉིས་མེད་བདག་ཆེན་མོ། །ལྷ་མོ་ཡེ་ཤེས་རྒྱ་མཚོ་ཡིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྡོ་རྗེ་ཕག་མོ་དང་གཉིས་སུ་མེད་པའི་ལྗང་ལྷ་མོའི་དབང་དུ་བྱ་བའི་སྦྱིན་སྲེག་དང་འཁྲུལ་འཁོར་གྱི་འཁོར་ལོ་དང་རྡོ་རྗེའི་དཀྱིལ་འཁོར་གྱི་ཆོ་གའི་མཚན་ཉིད་ཅེས་བྱ་བ་སྟེ་ལེའུ་སུམ་ཅུ་རྩ་བརྒྱད་པའོ།། །།དེ་ནས་བཅོམ་ལྡན་མཁའ་འགྲོ་ཡི། །བདག་པོ་ཡིས་ནི་སླར་གསུངས་པ། །ལམ་པ་ཀ་ཡིས་རབ་སྦྱོར་བས། །ཤིན་བཟང་རྣལ་འབྱོར་མའི་སྦྱོར་བ། །ཤེས་རབ་སྟོབས་སུ་ཤེས་བྱ་སྟེ། །འཁྲུལ་འཁོར་རྟ་ཡི་འགྲོས་དེ་བཞིན། །རབ་ཏུ་དགའ་བའི་སྦྱོར་བས་བཞུགས། །རྩ་སྔགས་རྣལ་འབྱོར་པ་ཡིས་སོ། །ཡེ་ཤེས་ལྡན་པ་དབུགས་རྒྱུའི་བདག །ཀུན་རྫོབ་བདེན་པ་ཀུན་ནས་འཛིན། །རྩ་ཡི་ཀུན་དུ་སྤྱོད་ལུགས་ལས། །སྟོབས་ནི་ལས་རྣམས་ཐམས་ཅད་དུའོ། །གཉིད་ལོག་པ་ཡིས་རབ་ཞུགས་པའི། །སྲོག་ཐམས་ཅད་ནི་དེའི་ནང་དུའོ། །ལས་ཆེན་པོ་ལ་ཟ་བཞིན་པ། །རྩ་བའི་སྔགས་ཀྱིས་བྱས་ནས་ནི། །བདུད་རྩི་དྲོན་མོ་བཞུ་བྱས་ནས། །དེའི་དབུས་རྩ་རྣམས་ཀྱིས་འཁོར་ལོ། །དེ་ནི་སུམ་ཅུ་བདུན་བདག་ཉིད། །འཕྱང་བཞིན་པ་ནི་བྱང་ཆུབ་སྐྱེས། །མེ་ཡི་རྣམ་པར་རྟག་ལྷ་མོ། །གཙོ་མོ་རྣམས་ཀྱིས་སྙིང་བདག་ཉིད། །ཀེང་རུས་རླུང་དང་རྣམ་ཤེས་ལ། །ཕྱིན་ནས་དུར་ཁྲོད་བདག་ཉིད་རྣམས། །དེ་ཡི་ས་བོན་ཡིག་ཤེས་ནས། །ཕོ་ཉ་རྣམས་ཀྱིས་རྟག་ཏུ་བསྐྱེད། །རེ་རེ་ཡི་ནི་ས་བོན་གྱི། །མཐའ་ནི་རྩ་བའི་གསང་སྔགས་སོ། །ༀ་མ་ཛྙཱ་ཧཱ་ན་པི་སཱ་ཤིག་ཏ་ར་རུ་པྲ་དྷི་བྷཱ་ར་ཡ་བ་ཧཱུྃ་སྭཱ་ཧཱུྃ་ཧཱ་ཕ་རི་ཊ་ཎེ་ཕ་ཧཱུྃ་ཊ་ཧཱུྃ་སྭཱ་ཕཊ་ཧཱ་ཕཊ་སྭཱ་ཧཱ། ༀ་སུ་བྷ་དྲེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ལྟར་སྔགས་ལས་ཡང་དག་བྱུང་། །ལས་ཀྱིས་ཁ་དོག་དང་ནི་གཟུགས། །རྣལ་འབྱོར་བདུད་རྩིའི་རང་བཞིན་ཅན། །གསང་བའི་དབུས་སུ་བསྒོམ་པར་བྱ། །གཏོར་མ་དང་ནི་སྦྱིན་སྲེག་བྱ། །ཕྱི་ནས་ལས་ནི་འདི་དག་བརྩམ། །སྔགས་པས་ལྷ་ཡི་སྦྱོར་བ་ཡིས། །འབུམ་ཕྲག་བཟླས་པ་བྱས་
ནས་ནི། །སེམས་ཅན་ཀུན་ལ་བདེ་འབྱུང་བའི། །འཁྲུལ་འཁོར་འཁོར་ལོ་བཤད་པར་བྱ། །འཁོར་ལོ་སྔོན་མའི་གཟུགས་ཅན་ནི། །བྱས་ནས་གསང་སྔགས་འདིར་དགོད་བྱ། །རྣམ་པར་སྣང་མཛད་ཐོག་མར་ཏེ། །གཉིས་པར་དེ་ནས་ནི་དགོད་བྱ། །གསུམ་པར་ཧཱུྃ་ཡིག་སྦྱིན་བྱ་སྟེ། །ལྔ་པར་ༀ་གྱི་ཡི་གེའོ། །དྲུག་པ་གྲི་ཡི་ཡི་གེ་སྦྱིན། །ཧཱུྃ་གི་ཡི་གེ་བདུན་པ་རུའོ། །བརྒྱད་པར་མྦྷའི་ཡི་གེ་སྦྱིན། །བཅུ་པར་སུ་ཡི་ཡི་གེའོ། །བཅུ་གཉིས་པར་ནི་ཧཱུྃ་ཡིག་སྦྱིན། །བཅུ་བཞི་པར་ནི་གྲི་ཡིག་གོ། །བཅྭ་ལྔར་མྦྷའི་ཡི་གེ་སྟེ། །བཅུ་དྲུག་དེ་བཞིན་ཧཱུྃ་ཡིག་གོ། །བཅུ་བདུན་པ་རུ་སུ་ཡིག་སྟེ། །བཅུ་དགུ་པ་རུ་ཧྞ་སྦྱར་བྱ། །ཉི་ཤུར་ཕཊ་ཡིག་སྦྱིན་པར་བྱ། །ཧྞ་ཡིག་ཉི་ཤུ་རྩ་གཅིག་པར། །ཉི་ཤུ་དགུ་པར་རྣམ་སྣང་མཛད། །སུམ་ཅུ་པ་ཡའི་ཡི་གེ་གཉིས། །སུམ་ཅུ་གཅིག་པར་སླར་དེའོ། །རིག་བྱེད་དང་པོ་སུམ་ཅུ་གསུམ། །སུམ་ཅུ་བཞི་པར་ཡ་ཡིག་སྟེ། །རཱ་ཛའི་ཡིག་དག་སུམ་ཅུ་ལྔར། །སུམ་ཅུ་དྲུག་པར་ཧྞ་ཡིག་སྦྱིན། །སུམ་ཅུ་བརྒྱད་པར་གྲི་ཡིག་གོ། །བཞི་བཅུ་པར་ནི་ཝན་སྦྱིན་བྱ། །བཞི་བཅུ་གཉིས་པར་ཨཱ་དེ་བཞིན། །བཞི་བཅུ་གསུམ་པ་རུ་ནི་ཧྞ། །བཞི་བཅུ་བཞི་པ་ཧཱུྃ་ཧཱུྃ་དག །བཞི་བཅུ་ལྔ་པ་རུ་ནི་གྲི། །བཞི་བཅུ་བདུན་པ་རུ་ན་ནི། །བཞི་བཅུ་བརྒྱད་པར་སྦྱིན་བྱ་བ། །ཧཱུྃ་ཧཱུྃ་གི་ནི་ཡིག་གཉིས་སོ། །བྷ་གའི་སྒྲ་ནི་སླར་སྦྱིན་ཏེ། །བཞི་བཅུ་རྩ་དགུ་པ་ལའོ། །ལྷག་མ་ལ་ནི་རྩ་སྔགས་བྲི། །འཁོར་ལོ་བཞི་རུ་བསྒྲུབ་བྱའོ། །ཀུན་ནས་ཡོངས་སུ་འཁོར་བར་ནི། །སྔགས་པས་རྟ་མགྲིན་བྲི་བར་བྱ། །གཉིས་པས་གཡོན་དུ་བསྐོར་བ་སྟེ། །འཁྲུལ་འཁོར་ཁ་སྦྱར་འཁྲུལ་འཁོར་བྱ། །གསང་བའི་ཡི་གེ་ལས་སྐྱེས་པར། །ཤེས་བྱ་ལྷན་སྐྱེས་རྣལ་འབྱོར་པས། །ཀླུ་དགུག་པ་དང་དབང་དང་ནི། །ལྷ་ལ་སོགས་པ་གསད་པ་ཡིན། །རྣལ་འབྱོར་བརྩེ་བདག་ཉིད་ཅན་གྱིས། །རང་སེམས་རྟག་ཏུ་གསད་པར་བྱ། །གར་ཡང་དེའི་ཡང་སྡང་བ་ནི། །དེ་ཡིས་ཐམས་ཅད་བསད་པ་ཡིན། །སྡང་སེམས་ཅན་གྱིས་གཞན་དུ་ན། །བསད་པས་དངོས་གྲུབ་རྣམས་མི་འཐོབ། །བདེ་མཆོག་ཕྱི་མའི་ལས་གང་ནི། །དེ་ཀུན་ངེས་པར་བྱེད་པར་འགྱུར། །རེ་རེ་ཡི་ནི་ལས་ཅུང་ཟད། །མདོར་བསྡུས་
འདི་ནི་བཤད་པར་བྱ། །ཀླུ་ཡི་རྒྱལ་པོ་དེ་བཞིན་བརྒྱད། །མཐའ་ཡས་རིམ་པས་བསྒོམ་པར་བྱ། །ནོར་རྒྱས་སྲོག་ཏུ་ཤེས་པར་བྱ། །ཐུར་དུ་སེལ་བ་དུང་སྐྱོང་ངོ་། །མཉམ་གནས་པདྨ་ཡི་ནི་ཀླུ། །བསམ་གཏན་པདྨ་ཆེན་པོའོ། །ཁྱབ་གནས་འཇོག་པོ་ཡི་ནི་ཀླུ། །ཀླུ་ནི་སླར་ཡང་ཧུ་ལུའོ། །རུས་སྦལ་མཐའ་ཡས་ཤེས་པར་བྱ། །རྩངས་པ་རྒྱལ་བ་ཡི་ནི་ཀླུ། །ལྷ་སྦྱིན་རྣམ་པར་རྒྱལ་བའོ། །མཐའ་ཡས་ནོར་ལས་རྒྱལ་བའོ། །འཇུག་པ་ཡིས་ནི་དགུག་པ་སྟེ། །བཏང་བ་ཡིས་ནི་གཤེགས་སུ་གསོལ། །བུམ་པ་ཅན་གྱིས་ཆར་དབབ་པ། །མཉམ་པའི་རླུང་གིས་བསལ་བའོ། །རྣམ་ཤེས་བརྒྱད་པོ་དེ་བཞིན་དུ། །འདིར་ནི་ཀླུ་མོར་ཤེས་པར་བྱ། །ཡེ་ཤེས་ནམ་མཁའ་དང་གཉིས་གཞན། །རྣམ་པར་ཤེས་པ་བཅུ་ཡི་རྒྱུ། །ཕུཿཡི་ཡི་གེ་བརྒྱད་སྦྱིན་བྱ། །ཏིང་འཛིན་སྣ་ཚོགས་དེ་བཞིན་ནོ། །ཕན་ཚུན་སྐྱེས་པས་དཀྲིས་པ་སྟེ། །ཀླུ་མོ་དེ་ཡི་མཆན་ཁུང་དུའོ། །རྡོ་རྗེ་མཁའ་འགྲོའི་གཟུགས་ཆེན་གྱིས། །ཀླུ་ཡི་དཀྱིལ་འཁོར་བསྒྲུབ་པར་བྱ། །ཇི་ལྟའི་རིམ་པས་ཁ་དོག་རྣམས། །ཐུན་མཚམས་གཉིས་ཀྱི་ཐུན་ཚོད་བརྒྱད། །རྩ་སྔགས་མངོན་པར་བརྗོད་པ་ཉིད། །ཀླུ་དང་ཀླུ་མོར་ཤེས་པར་བྱ། །དབང་པོ་ཐིམ་པར་བྱས་ནས་ནི། །ཡི་གེ་ལ་འབུམ་བཟླས་པ་ཉིད། །གང་གང་ལས་ནི་ཕྱི་རོལ་གྱི། །དེ་དེའི་ལས་ཀྱི་དབང་ཚུལ་བྱ། །གཟུགས་ནི་གང་འདོད་པར་བྱ་སྟེ། །ཁྲོ་བོའམ་ཞི་བའི་གཟུགས་དག་ཏུའོ། །སེམས་ནི་གཟུགས་སུ་ཡང་དག་གྲགས། །དེ་ཕྱིར་ཤིན་བཟང་མིང་ཅན་ནོ། །རྣལ་འབྱོར་དབང་ཕྱུག་ཀུན་གྱི་བདག །དེ་ཡིས་ལྷ་ནི་བྱེད་པར་འགྱུར། །སླར་ཡང་ཕྱི་ནང་བདག་ཉིད་ཀྱི། །གཞན་པའི་ལྷ་ནི་མ་བཤད་དོ། །དེ་ཡིས་ཐམས་ཅད་མངོན་བརྗོད་པས། །རྣལ་འབྱོར་པ་ཡིས་གང་འདོད་འགྲོ། །སེམས་ཅན་རྣམས་ཀྱི་བག་ཆགས་སྐྱོན། །ཕྱི་རོལ་དུ་ཡང་སྤྲིན་མཐོང་འགྱུར། །བག་ཆགས་ཟད་པའི་དུས་སུ་ནི། །སྤྲིན་དང་ཀླུ་རྣམས་མཐོང་མི་འགྱུར། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་
རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་བཅོམ་ལྡན་འདས་ཀྱི་རྩ་བའི་སྔགས་དང་། ཤིན་ཏུ་བཟང་མོ་གཉིས་སུ་མེད་པའི་སྦྱོར་བའི་བདག་ཉིད་ཅན་རྟའི་སྔགས་མདོར་བསྟན་པ་རིགས་ཀྱི་ཀླུའི་ལས་ཀྱི་ཆོ་གའི་མཚན་ཉིད་ཅེས་བྱ་བ་སྟེ་ལེའུ་སུམ་ཅུ་རྩ་དགུ་པའོ།། །།དེ་ནས་དེ་ཕྱིར་སླར་ལ་ཡང་། །ལྷ་མོས་མཆོད་པ་འདིར་བྱས་ཏེ། །ཕག་མོའི་འདོད་ཆགས་བཅས་པས་སོ། །མཉེས་ནས་ལྷ་ཡིས་སྟོན་པ་མཛད། །རྟ་རྣ་མ་ཡི་རབ་སྦྱོར་ནས། །དུས་ཀུན་དུ་ནི་ཀཱཉྩིར་རོ། །ཏིང་འཛིན་བྱང་ཆུབ་ཡན་ལག་དང་། །སྙིང་ག་རུ་ནི་ཡང་དག་བཞུགས། །ཧ་ཡིག་ནཱ་དང་ལུས་ཀུན་དུ། །སྙིང་གའི་དབུས་ལས་ཀྱང་ནི་ལངས། །ཡི་ཡིག་བསྐྱོད་པ་ཡི་ནི་སྲོག །རྡོ་རྗེའི་རླུང་གིས་བསྐྱོད་པ་ཡིན། །དུ་ཙམ་དེ་བདེ་དང་བཅས་པ། །སླར་ཡང་འདབ་འདབ་ལ་གསུམ་གསུམ། །སྐུ་དང་གསུང་དང་ཐུགས་ཀྱི་ཆོས། །ཉི་ཤུ་རྩ་བཞི་འདབ་མ་བརྒྱད། །བཅུ་གཉིས་ལྟེ་བའི་པདྨ་རུ། །རྣལ་འབྱོར་མ་རྟག་སུམ་ཅུ་དྲུག །དེ་ཚེ་རེ་རེའི་འདིར་རྣམས་ཀྱི། །མཚམས་ཀྱིས་རྟ་ལ་སོགས་པ་རྣམས། །ཎ་ཡིག་ལྷ་མོ་དེ་མ་ཡིན། །གསལ་དང་མི་གསལ་རང་བཞིན་ཅན། །འདོད་པའི་ཁམས་སུའང་སྐྱེས་པ་མོ། །ཐར་པའི་གཟུགས་ཀྱི་ལས་ཅན་ནོ། །ཙྱཱ་ཡིག་འཕོ་བ་ཡི་ནི་ཆོས། །ཐམས་ཅད་རིག་པའི་མཚམས་ལས་གྲོལ། །སུམ་ཅུ་བདུན་བདག་ཉིད་དབུས་སུ། །གསོད་པའི་ལས་ལ་བརྩོན་པར་བྱ། །གང་གང་གསོད་པའི་ལས་རྣམས་ཀྱིས། །བླ་མ་གསོད་ལ་བྱེད་པར་འགྱུར། །བསྟན་པ་ལ་ནི་གནོད་བྱེད་པའམ། །དེ་བཞིན་མཚམས་མེད་ལྔ་བྱེད་ལ། །དུག་དང་སྐེ་ཚེ་ལན་ཚྭ་དང་། །དྷ་དུར་དུར་ཁྲོད་སོལ་བ་དང་། །རང་གི་སྡིགས་མཛུབ་ཁྲག་གིས་ནི། །འཁོར་ལོ་འབད་པས་བྲི་བར་བྱ། །གཤིན་རྗེའི་འཁྲུལ་འཁོར་རྟག་ཏུ་དེའི། །བྱེད་འགྱུར་གཞན་དུ་མ་ཡིན་ནོ། །སྔོན་བཤད་རེའུ་མིག་ཤེས་བྱས་ནས། །གསང་སྔགས་ཕྲེང་བ་འདི་དགོད་བྱ། །ཐོག་མར་རྣམ་པར་སྣང་མཛད་དེ། །གཉིས་པར་སུ་ནི་རྣམ་པར་བརྗོད། །གསུམ་པར་མྦྷའི་ཡི་གེ་བརྗོད། །རིག་བྱེད་དང་པོ་ལྔར་དེ་བཞིན། །དྲུག་པར་གྲི་ཡིག་དེ་བཞིན་ཏེ། །སླར་ཡང་བདུན་པར་ཧྞ་ཡིག་གོ །བརྒྱད་པ་ལ་ནི་
ཧཱུྃ་ཡིག་གཉིས། །དགུ་པར་ཕཊ་ཡིག་དེ་བཞིན་ནོ། །བཅུ་པར་ནི་ཡིག་དེ་བཞིན་ཏེ། །སླར་ཡང་བཅུ་གཉིས་པར་ཧཱུྃ་ཡིག །བཅུ་གསུམ་པར་ནི་ཕཊ་ཡིག་སྟེ། །གྲི་ཡིག་བཅུ་བཞི་པར་དེའོ། །ཧཱུྃ་གི་ཡི་གེ་བཅྭ་ལྔ་པར། །མྦྷའི་ཡི་གེ་བཅུ་དྲུག་པར། །བཅུ་བདུན་པ་རུ་སུ་ཡིག་སྟེ། །ཧཱུྃ་ཡིག་བཅུ་དགུ་པ་ལའོ། །ཉི་ཤུ་པ་ལ་ཧཱུྃ་ཡིག་སྦྱིན། །ཧྞ་ཡིག་ཉི་ཤུ་རྩ་གཅིག་པར། །རྣམ་པར་སྣང་མཛད་ཉི་ཤུ་དགུར། །སུམ་ཅུ་པ་སླར་གྲི་ཡིག་གོ། །སུམ་ཅུ་གཅིག་པར་ཧྞ་ཡིག་སྟེ། །སུམ་ཅུ་གསུམ་པར་རྣམ་སྣང་མཛད། །སུམ་ཅུ་བཞི་པར་ཨཱ་ཡིག་དང་། །ན་ཡི་ཡི་གེ་དེར་སྦྱར་བྱ། །སུམ་ཅུ་ལྔ་པར་ཡའི་ས་བོན། །ཧོ་ཡིག་དེར་ནི་སྦྱིན་པར་བྱ། །སུམ་ཅུ་དྲུག་པར་ཧཱུྃ་གཉིས་སྦྱིན། །སུམ་ཅུ་བདུན་པར་ཕཊ་ཡིག་གོ། །སུམ་ཅུ་བརྒྱད་པར་པ་ཡ་གཉིས། །བཞི་བཅུར་ཧཱུྃ་གཉིས་དེ་བཞིན་ནོ། །བཞི་བཅུ་རྩ་གཅིག་པ་ལ་ཕཊ། །བཞི་བཅུ་གཉིས་པར་བྷ་ག་གཉིས། །བཞི་བཅུ་རྩ་གསུམ་པ་ལ་ནི། །པ་ཡ་གཉིས་དག་ཡི་གེའོ། །བཞི་བཅུ་རྩ་བཞི་པ་ལ་ཧྞ། །བཞི་བཅུ་ལྔ་པར་གྲི་ཡིག་གོ། །བཞི་བཅུ་རྩ་བདུན་པ་ལ་ནི། །ར་ཛའི་སྒྲ་ནི་སྦྱར་བར་བྱ། །བིདྱཱའི་སྒྲ་ནི་སླར་སྔགས་པས། །དུམ་བུ་བཞི་བཅུ་བརྒྱད་པར་རོ། །ཝཱན་ཡིག་སླར་ཡང་སྦྱིན་བྱ་བ། །བཞི་བཅུ་རྩ་དགུ་པ་ལའོ། །ལྷག་མ་རྣམས་ལ་གོ་ཆའི་སྔགས། །བསྒྲུབ་བྱའི་མིང་ནང་བཅུག་པའོ། །གཤིན་རྗེའི་གདོང་ནི་གྲྭ་ཀུན་དུ། །ལག་པ་རྐང་པ་ཕྱོགས་སུ་དགོད། །སྙིང་ག་གཤིན་རྗེའི་ས་གཞི་ནི། །དེ་ཡི་དབུས་སུ་བསྒོམ་པར་བྱ། །ཡེ་ཤེས་རྣམ་ཤེས་སྦྱོར་བདག་ཉིད། །མཁས་པས་སྔགས་ཀྱི་ཀུན་སྤྱོད་བྱ། །བླ་མ་དམ་ཚིག་ལ་བརྙས་པའང་། །རྣམ་པར་ཤེས་དང་བློ་དམན་པའོ། །བསྟན་པ་ལ་ནི་གནོད་བྱེད་པ། །མིག་ལ་སོགས་པའི་སྐྱེ་མཆེད་དོ། །མཚམས་མེད་ལྔ་པོ་བྱེད་པ་ནི། །ཕུང་པོ་ཁམས་དང་དེ་བཞིན་གཞན། །སེམས་ཅན་ཐམས་ཅད་གཅིག་པ་ཡི། །རིགས་ནི་ཕུང་པོ་སོགས་དང་ཁམས། །རྣལ་འབྱོར་དབང་ཕྱུག་རྣམས་ཀྱིས་ཏེ། །བསད་པར་སེམས་ཅན་ཁམས་བསད་པའོ། །གང་དང་གང་གི་གདོང་བལྟས་ནས། །དེ་དང་དེའི་བདག་ཉིད་གཟུགས་ཅན། །
བག་ཆགས་ཡེ་ཤེས་ཀྱིས་བསད་པར། །འགྱུར་རོ་སེམས་ཅན་གཞན་བསད་མིན། །དེ་རྣམས་གསོད་པའི་ལས་སམ་ཡང་། །བྱས་པས་བསད་པ་དེ་དང་འདྲ། །སྦྱིན་སྲེག་དུག་ལ་སོགས་རྫས་ཀྱིས། །ཡང་དག་རིག་གཟུགས་ཅན་གྱིས་བྱ། །དཀྱིལ་འཁོར་འཁོར་ལོ་དེར་དྲན་བྱ། །བསྲེག་པ་གཏུམ་མོ་ལ་ནིའོ། །ས་བོན་ཡི་གེ་ལས་སྐྱེས་པ། །དཀྱིལ་འཁོར་རྟ་རྣ་མ་ཡིའོ། །ཁ་དོག་དང་ནི་དབྱིབས་སྔོན་གྱི། །ཤེས་རབ་ཐབས་ཀྱི་མཆོད་པ་ཆེ། །ༀ་ཤྲཱི་སཥྚི་རྦ་སྃ་མཱ་ཧཱ་ར་ར་བ་ཀཱ་ལ་ར་ངྷཱྃ་ཀཱ་སི་ཡ་ནེ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་སྭཱ་ཧཱ་ཧཱ། ༀ་ཧ་ཡཱ་ཀ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འཁོར་རྣམས་ངོ་མཚར་སྐྱེས་ནས་ནི། །སྐྲག་ནས་ས་ལ་འགྱེལ་བར་འགྱུར། །ཀྱེ་མ་ཚུལ་འདི་མི་ཤེས་པའི། །འཇིག་རྟེན་རྣམས་ནི་རྨོངས་པ་ཉིད། །གང་གི་བདེ་ཀུན་ལ་གནས་ནས། །སྲོག་གིས་འདི་ལ་ཚར་གཅོད་པའོ། །མཚར་ནས་སེམས་ཅན་སར་འགྱེལ་བས། །ལག་ན་རྡོ་རྗེ་སོགས་བཞེངས་ནས། །པུས་མོའི་ལྷ་ང་སར་བཙུགས་ནས། །བདག་ཉིད་ཆེན་པོ་བདག་འདྲིའོ། །ཅི་ཡིས་བདག་དང་གང་གི་ཉིད། །དེ་རྣམས་བསད་པའམ་ལས་སམ་ཡང་། །འབྲས་བུ་དང་ནི་རྒྱུའི་རང་བཞིན། །བཅོམ་ལྡན་གང་དུ་རྣམ་པར་གཞག །གལ་ཏེ་ཉིད་ཀྱི་འབྲས་རྣམས་ཀྱིས། །གསོད་པ་དེ་དང་འདྲ་བར་གསུངས། །ཡང་ན་རྒྱུ་ནི་བཅོམ་ལྡན་ལ། །འབྲས་བུ་སྐྱེས་བུ་གསོད་པ་ཡིན། །བདག་གི་བདག་པོས་བཀའ་སྩོལ་ཅིག །ཐེ་ཙོམ་བསལ་བར་མཛད་དུ་གསོལ། །བཀའ་སྩལ་པ། རྩེ་གཅིག་པ་ཡིས་ཚིག་དེ་ལ། །རྡོ་རྗེ་ཁྱེད་ཀྱིས་མཉན་པར་གྱིས། །འབྲས་བུ་ལས་ཀྱི་རྗེས་སུ་མཐུན། །བདག་ནི་བདེ་བ་ཀུན་གྱི་གནས། །དེའི་ལས་དབང་གིས་སངས་རྒྱས་དང་། །བྱང་ཆུབ་སེམས་དཔའ་ཁྱེད་རྣམས་སོ། །རྒྱུ་དང་འབྲས་བུའི་རང་བཞིན་ནི། །གཉིས་སུ་མེད་པས་གཅིག་ཏུ་གྱུར། །དེ་ནི་དངོས་པོ་ཀུན་གྱི་རྒྱུ། །མཁས་པ་ལས་ནི་རྐྱེན་ཡིན་ནོ། །དམག་དཔུང་ལ་སོགས་ས་ཆེན་ལ། །མཁས་པ་རྣམས་ཀྱིས་མཐོང་བ་ཡིས། །ཐམས་ཅད་གཉིས་མེད་བདག་ཉིད་བྱ། །དེའི་ཕྱིར་གསོད་པ་དང་ལྡན་པའོ། །
བདག་ཉིད་བསད་པས་སངས་རྒྱས་ཉིད། །སྐྱེ་བོ་གཞན་ཀུན་གྱིས་མ་ཡིན། །དུས་ཀྱི་དབང་གིས་རྒྱལ་སྲིད་ན། །ཚེགས་ཆུང་ལས་ནི་འགྲུབ་པར་འགྱུར། །དེ་ཡི་ཕྱིར་ན་སྔོན་གྱི་ལས། །མཁས་པ་རྣམས་ཀྱིས་བརྟགས་བྱས་ནས། །ཁམས་ནི་དཔའ་བོའི་རང་བཞིན་དུ། །དེ་དང་དེར་ནི་གདགས་པར་བྱ། །དེ་ཡིས་བདག་ཉིད་བསད་པ་ཡིས། །སེམས་ཅན་ཁམས་རྣམས་དེ་ཉིད་དོ། །འབད་པས་བརྩེ་བ་བསྐྱེད་བྱས་ནས། །ངེས་པར་གསད་པར་བྱ་བ་ཡིན། །འཇིག་རྟེན་འདི་དང་ཕ་རོལ་དུ། །བརྩེ་བ་དམན་པས་འགྲུབ་མི་འགྱུར། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྟ་རྣ་མ་དང་དཔའ་བོ་གཉིས་སུ་མེད་པའི་སྦྱོར་བས་གོ་ཆ་དང་རྩ་བའི་སྔགས་ཀྱི་ཆོ་གའི་མཚན་ཉིད་ཀྱི་བསད་པ་ཞེས་བྱ་བ་སྟེ་ལེའུ་བཞི་བཅུ་པའོ།། །།དེ་ནས་སྨྱོ་བར་བྱེད་པ་ཡི། །སྦྱོར་བ་ཀུན་དུ་རྙེད་དཀའ་བ། །བྱ་གདོང་མ་ཡི་རབ་སྦྱོར་བས། །མདོར་བསྡུས་པ་ཡིས་བཤད་པར་བྱ། །བརྩོན་འགྲུས་བྱང་ཆུབ་ཡན་ལག་ཆོས། །ཧི་མཱ་ལ་ཡར་ཡང་དག་ཞུགས། །ལྟེ་བའི་དཀྱིལ་འཁོར་དབུས་སུ་ནི། །འཁོར་ལོའི་གཙོ་མོ་བསྒོམ་པར་བྱ། །མཁའ་གཟུགས་ཉིད་བདག་ཕོ་ཉ་མོ། །རྐན་དང་རྡོ་རྗེ་ཆུ་སྐྱེས་དབུས། །རྣམ་ཤེས་རླུང་དང་ལྷན་ཅིག་ཏུ། །མདའ་ཡི་ཤུགས་ཀྱིས་གྱེན་དུ་འཕངས། །ལུས་ནི་འདར་འདར་བྱ་བ་སྟེ། །དྲག་ཤུལ་སྦྱར་བས་བྱ་བ་ཡིན། །རྟག་ཏུ་བྱེད་བཞིན་རྣལ་འབྱོར་པ། །མཆོག་ཏུ་ཟག་མེད་འགྲུབ་པར་འགྱུར། །རྣལ་འབྱོར་ཇི་སྲིད་མི་འདོད་པར། །རླུང་དང་རྣམ་ཤེས་གཡོ་མི་འགྱུར། །སྣ་ཡི་བུ་གར་སོན་སྲོག་ལ། །ལྟེ་བའི་དབུས་སུ་བསྐྱོད་པར་བྱ། །ལྟེ་བ་སྣ་གཉིས་སྦྱོར་བ་ཡིས། །འཛིན་བཞིན་པ་ཡིས་གཡོ་མི་འགྱུར། །རླུང་དང་རྣམ་ཤེས་ལྷན་ཅིག་ཏུ། །དེ་ནི་སྨྱོ་བས་འཁོར་བ་ཡིན། །དེའི་དུས་སྦྱོར་བའི་བདག་ཉིད་ལའང་། །དངོས་པོ་ཐམས་ཅད་མཐོང་བ་གང་། །
དེ་དང་འདྲ་བའི་དངོས་པོར་འགྱུར། །དྷ་དུ་རའི་མེའི་སྦྱིན་སྲེག་གིས། །ཤིང་ལ་དཔྱངས་པའི་སྐྲ་དང་ནི། །ཤ་ཟའི་རྩ་བ་བསྲེག་པར་བྱ། །འདི་ཡི་ལས་ཀྱི་རབ་སྦྱོར་བས། །སངས་རྒྱས་སྐད་ཅིག་གིས་སྨྱོ་འགྱུར། །དེ་ཕྱིར་བརྩོན་འགྲུས་བྱང་ཡན་ལག །དེ་རྣམས་ལས་ནི་མངོན་པར་བྱ། །བརྩོན་འགྲུས་རྫོགས་བྱང་ཆུབ་མཐོང་བས། །རྟག་ཏུ་མྱུར་དུ་ཐོབ་པར་འགྱུར། །ཧི་ཡིག་འཕྱང་བའི་ཡེ་ཤེས་སུ། །རང་ཉིད་དཔའ་བོས་བཤད་པ་ཡིན། །མཱ་ཡིག་ཀྱང་ནི་རང་རིག་པ། །བདག་ཉིད་རྣམ་པའི་གནས་བཞུགས་དེ། །ཐིམ་དང་ལོངས་སྤྱོད་རྣམ་པའི་གཟུགས། །སངས་རྒྱས་སྐུ་ཅན་སྐྱེ་བར་འགྱུར། །རང་གིས་རིག་བདག་རིག་པ་རྣམས། །སེམས་ཅན་དོན་བྱས་ནས་གཤེགས་འགྱུར། །སུམ་ཅུ་བདུན་བདག་ཉིད་དབུས་སུ། །ལས་ཀྱི་རྣལ་འབྱོར་མ་བསྒོམ་བྱ། །མདོག་དང་གཟུགས་ནི་སྔོན་གྱི་བཞིན། །གསང་སྔགས་སྦྱོར་ལས་ཡང་དག་བྱུང་། །ༀ་ཨ་ས་ནྟྲ་རྦ་མཱ་ནཱ་ལཱ་གཱ་དྷཱ་ནཱྃ་རི་ཤོ་ཎེ་ཥ་ཧཱུྃ་ཎ་ཧཱུྃ་སྟ་ཕཊ་མྦྷ་ཕཊ་ན་སྭཱ་བི་ཧཱ་དྷྲཱ་བ་ཎཱ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་ཁ་གཱ་ན་ནེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱའི་སྔགས་ཀྱི་སྦྱོར་བདག་ཉིད། །ཤེས་རབ་ཐབས་ཀྱི་རང་བཞིན་ཅན། །ཇི་ལྟ་བ་ནི་སྔོན་གྱི་བཞིན། །འཁྲུལ་འཁོར་འཁོར་ལོ་བཤད་པར་བྱ། །ཡི་དགས་འཁོར་ལོར་རྟག་ཏུ་ནི། །སྔགས་ཀྱི་ཕྲེང་བ་འདི་དགོད་བྱ། །ཐོག་མར་རྣམ་པར་སྣང་མཛད་དེ། །གཉིས་པར་མྦྷ་སྦྱར་བར་བྱ། །གསུམ་པར་དེ་ཉིད་དེ་ལྟར་སྦྱིན། །ལྔ་པར་རིག་བྱེད་རྣམས་དང་པོ། །ཧྞ་ཡིག་དྲུག་པར་སྦྱིན་པར་བྱ། །ཧཱུྃ་གི་ཡི་གེ་བདུན་པར་དགོད། །བརྒྱད་པར་སུ་ཡི་ཡི་གེ་སྟེ། །དགུ་པར་དེ་ཉིད་སྦྱིན་པར་བྱ། །བཅུ་པར་ཧཱུྃ་གཉིས་སྦྱིན་བྱ་སྟེ། །གྲི་ཡིག་སླར་ཡང་བཅུ་གཉིས་པར། །བཅུ་གསུམ་པ་ལ་ཧྞའི་ཡི་གེ། །བཅུ་བཞི་པ་ལ་ཧཱུྃ་ཡིག་གོ། །བཅྭ་ལྔ་པ་ལ་ནི་ཡིག་སྟེ། །ཧཱུྃ་ཡིག་བཅུ་དྲུག་པ་ལ་དགོད། །བཅུ་བདུན་པ་ལ་ཕཊ་ཡིག་སྟེ། །གྲི་ཡིག་བཅུ་དགུ་པ་ལའོ། །ཧཱུྃ་ཡིག་ཉི་ཤུ་པ་ལ་སྦྱིན། །ཕཊ་ཡིག་ཉི་ཤུ་རྩ་གཅིག་ཏུ། །རྣམ་སྣང་མཛད་པ་ཉི་ཤུ་དགུར། །སུམ་ཅུར་ཧྞ་ཡིག་སླར་དགོད་བྱ། །སུམ་ཅུ་གཅིག་པར་དེ་ཉིད་
སྦྱིན། །སུམ་ཅུ་གསུམ་པར་རྣམ་སྣང་མཛད། །སུམ་ཅུ་བཞི་པར་ཡ་ཧོ་གཉིས། །སུམ་ཅུ་ལྔ་པར་རཱ་ཛ་གཉིས། །གྲི་ཡིག་སུམ་ཅུ་དྲུག་པར་སྦྱིན། །སུམ་ཅུ་བདུན་པར་དེ་ཉིད་དོ། །སུམ་ཅུ་བརྒྱད་པར་ཧཱུྃ་ཧཱུྃ་གཉིས། །བཞི་བཅུར་ཨཱ་ན་ཡ་ཡི་ཚིག །བཞི་བཅུ་རྩ་གཅིག་པ་ལ་ཝན། །ཧཱུྃ་གཉིས་བཞི་བཅུ་གཉིས་པ་ལ། །བཞི་བཅུ་གསུམ་པར་པ་ཡ་སྟེ། །བཞི་བཅུ་བཞི་པར་དེ་ཉིད་དོ། །བཞི་བཅུ་ལྔ་པར་ཧཱུྃ་དང་ཕཊ། །བྷ་ག་བཞི་བཅུ་བདུན་པར་རོ། །བཞི་བཅུ་བརྒྱད་པ་རུ་ནི་ཧཱུྃ། །བཞི་བཅུ་རྩ་དགུ་པ་ལ་ཕཊ། །སྟོང་པར་སྙིང་པོ་ཡི་ནི་སྔགས། །བསྒྲུབ་བྱའི་མིང་ནང་བཅུག་པའོ། །ཁ་ཡིས་འཁྲུལ་འཁོར་ལ་འཛིན་པའི། །ཐམས་ཅད་དུ་ནི་ཡི་དགས་བྲི། །དུར་ཁྲོད་ཀྱི་ནི་རས་ལ་ནི། །ཁ་སྦྱར་རྣམ་པར་བྱ་བ་ཡིན། །ལྟེ་བའི་གནས་སུ་འཁོར་ལོ་འདི། །མཁས་པ་ཡིས་ནི་བསྒོམ་པར་བྱ། །ཡི་དགས་ཆོས་དབྱིངས་ངོ་བོ་ཉིད། །རྟོག་པ་གསོལ་ཕྱིར་གཤིན་རྗེ་ཡིན། །རྟ་ཡང་གནས་དང་གནས་མིན་དུའོ། །སྙིང་པོའི་བྱང་ཆུབ་ཀྱིས་རྡོ་རྗེ། །ཀླུའི་འགྲོས་ཐེག་པ་ཆེ་རྣམས་ཀྱི། །རང་བཞིན་སྐྱེ་བོ་ཐམས་ཅད་ཀྱིའོ། །དགེ་དང་མི་དགེ་རོ་ལངས་ཏེ། །སེམས་ཅན་བསླུ་བས་བགྲོད་པའོ། །གཞན་ནི་ཐེག་པ་གསུམ་པོ་ཡང་། །སྔོན་གྱི་ལས་ཅན་སྟོན་པ་ཡིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་བྱ་གདོང་མ་དང་དཔའ་བོ་གཉིས་སུ་མེད་པའི་སྨྱོ་བར་བྱེད་པའི་འཁྲུལ་འཁོར་འཁོར་ལོའི་རང་བཞིན་གྱི་མཚན་ཉིད་ཀྱི་ཆོ་གའི་སྙིང་པོའི་སྔགས་དང་བཅས་པའི་ལས་ཞེས་བྱ་བ་སྟེ་ལེའུ་བཞི་བཅུ་རྩ་གཅིག་པའོ།། །།དེ་ནས་འཁོར་ཤུགས་མའི་སྦྱོར་བས། །བྲང་འགྲོའི་འཁོར་ལོ་བཤད་པར་བྱ། །པྲེ་ཏ་པུ་རིར་བྱང་ཡན་ལག །དགའ་བ་ཞེས་བྱ་མདོར་བསྡུས་པས། །སྟོབས་རྣམས་ཐམས་ཅད་རེངས་བྱེད་པ། །འཁོར་ལོས་སྒྱུར་སོགས་ལས་ཅན་ནོ། །ཡུང་བ་རྒྱ་སྐྱེགས་བསྲེས་པ་ཡིས། །འཁྲུལ་འཁོར་ཐོད་པ་ལ་བྲི་བྱ། །སྤྱོད་དོ་དུས་ནི་ཐམས་ཅད་དུ། །ལྟེ་
བ་སོགས་སུ་ཕྱེད་བཅས་གསུམ། །རོ་ལངས་ཀྱི་ནི་གཟུགས་བདག་ཉིད། །འགྲོ་དང་འོང་བ་རེངས་བྱེད་པའོ། །བུད་མེད་ཕྱག་རྒྱ་བཟང་བཅས་པས། །རིམ་གྱིས་དབུགས་ནི་དབྱུང་བར་བྱ། །ཀུན་བདག་གཙོ་བོ་རྣམ་པར་ཤེས། །བདེ་བ་རྣམས་སུ་ཐིམ་པར་འགྱུར། །དེ་ནི་གཡོ་བར་མི་འགྱུར་ཏེ། །བློ་ལྡན་དུས་རྣམས་ཐམས་ཅད་དུའོ། །འདི་ཡི་བྱ་བ་ཀུན་མེད་པ། །བྱས་པའི་བདག་ཉིད་རབ་འབྱུང་བ། །ལས་ཀྱིས་སངས་རྒྱས་ཀྱི་ནི་ཞིང་། །དེ་ཡི་གནས་ནི་དཔག་པར་བྱ། །རྣལ་འབྱོར་པས་དངོས་གང་གང་དྲན། །དེ་དེ་ད་ལྟར་རེངས་པར་བྱེད། །དེ་ཡི་ལས་ཀྱིས་སྤྱོད་པ་ཡིས། །སླར་ཡང་ལས་གཞན་དྲན་མི་བྱ། །དེ་དང་དེར་ནི་བྱང་ཆུབ་ཆེ། །སྐྱེ་བོ་ཐམས་ཅད་བྱེད་པར་འགྱུར། །སླར་ཡང་ཡོངས་སུ་མྱ་ངན་འདས་པའང་། །བྱས་ནས་བདེ་བ་ཆེ་ལས་འཇུག །རཱི་ནི་འདོད་ཆགས་རང་བཞིན་འདིར། །སྐྱེ་བོ་ཐམས་ཅད་བྱེད་པའོ། །བྱང་ཆུབ་ཡན་ལག་དགའ་ལས་སྐྱེས། །རང་བཞིན་དེར་ནི་བྱུང་བ་ཡིན། །འཁོར་ཤུགས་མ་ཡི་གནས་བཞུགས་ཏེ། །དེ་ལྟར་རེངས་པའི་ལས་བྱའོ། །ཁ་དོག་དབྱིབས་ནི་སྔོན་གྱི་སྟེ། །འཁོར་ལོའི་དབུས་སུ་བསྒོམ་པར་བྱ། །སྔགས་དང་དབྱིབས་དང་ཆོས་བདག་ཉིད། །དེ་ཡི་གནས་ལ་འབྱུང་བར་འགྱུར། །ཨོཾ་ཀྲོ་སུ་དྷ་མེ་བི་རུ་གྲ་ཀ་ཧ་མ་དྷཱ་པི་ར་ཏ་ཎཱ་ནཱ་ཡ་དཱ་ཧཱུྃ་ཡ་ཧཱུྃ་ཧཱུྃ་ཕ་ཧཱུྃ་ཊ་ཕ་ཕ་ཊ་ཊ་ཕ་སྭཱ་ཊ་ཧཱ་སྭཱ་ཧཱ། ༀ་ཙཀྲ་བེ་གེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལྷ་མོ་ཆེན་མོ་གསང་སྔགས་འདི། །མཆོག་ལས་ཤེས་རབ་ཐབས་བདག་ཉིད། །འཁོར་ལོའང་སྔོན་གྱི་བཤད་པ་སྟེ། །གཅིག་གིས་དམན་པའི་ལྔ་བཅུའི་བདག །ཐོག་མར་རྣམ་པར་སྣང་མཛད་དེ། །སུ་ཡིག་སླར་ཡང་གཉིས་པར་རོ། །གསུམ་པའི་དུམ་བུར་མྦྷ་སྦྱིན་བྱ། །ནི་ཡིག་བཞི་པར་དེ་བཞིན་ནོ། །ལྔ་པར་སུ་ཡིག་སྦྱིན་པར་བྱ། །སླར་ཡང་དྲུག་པར་མྦྷའི་ཡིག་གོ །ཧཱུྃ་ཡིག་བདུན་པར་སྦྱིན་བྱ་སྟེ། །རླུང་གི་ཡི་གེ་བརྒྱད་པར་རོ། །གྲི་ཡིག་དགུ་པར་སྦྱིན་པར་བྱ། །བཅུ་པར་ཧྞ་ཡིག་དེ་བཞིན་ནོ། །བཅུ་གཅིག་པ་རུ་པ་སྦྱིན་ཏེ། །དེ་ནས་བཅུ་གཉིས་པར་ཡ་ཡིག །ཧཱུྃ་གི་ཡི་གེ་བཅུ་གསུམ་པར། །བཅུ་བཞི་པ་རུ་ཧཱུྃ་ཡིག་གོ། །པ་ཡི་ཡི་གེ་བཅྭ་ལྔ་པར། །བྃ་ཡིག་བཅུ་
དྲུག་པར་དགོད་བྱ། །བི་ཡི་ཡི་གེ་བཅུ་བདུན་པར། །སླར་ཡང་དྱཱ་ཡིག་བཅྭ་བརྒྱད་པར། །གཅིག་གིས་དམན་པའི་ཉི་ཤུར་རཱ། །ཉི་ཤུ་པ་ལ་ཧཱུྃ་སླར་དགོད། །ཉི་ཤུ་གཅིག་པར་དེ་ཉིད་སྦྱིན། །ཧྞ་ཡིག་ཉི་ཤུ་གཉིས་པར་དགོད། །ག་ཡིག་ཉི་ཤུ་གསུམ་པར་ཏེ། །ཉི་ཤུ་བཞི་པར་ཕཊ་ཡིག་གོ། །ཉི་ཤུ་དྲུག་པར་ཛ་ཡིག་སྦྱིན། །ཧཱུྃ་ཡིག་ཉི་ཤུ་བདུན་པར་རོ། །ཉི་ཤུ་བརྒྱད་པར་ཕཊ་ཡིག་སྟེ། །གྲི་ཡིག་ཉི་ཤུ་དགུ་པ་ལའོ། །།སུམ་ཅུ་པ་ལ་བྷ་ཡིག་སྟེ། །སུམ་ཅུ་གཅིག་པར་ཧཱུྃ་ཡིག་གོ། །སུམ་ཅུ་གཉིས་པར་དེ་ཉིད་སྦྱིན། །ཧཱུྃ་ཡིག་སུམ་ཅུ་གསུམ་པར་རོ། །ཕཊ་ཡིག་སུམ་ཅུ་བཞི་པར་ཏེ། །སུམ་ཅུ་ལྔ་པར་ༀ་དགོད་བྱ། །སུམ་ཅུ་དྲུག་པར་དེ་ཉིད་སྦྱིན། །སུམ་ཅུ་བདུན་པར་ཧོ་དེ་བཞིན། །ཡ་ཡི་གསུམ་ཅུ་རྩ་བརྒྱད་པར། །སུམ་ཅུ་རྩ་དགུ་པ་ལ་ནི། །བཞི་བཅུ་པ་ལ་ཨཱ་སྦྱིན་བྱ། །བཞི་བཅུ་གཅིག་པུ་ལ་ནི་ཨོཾ། །གྲི་ཡིག་བཞི་བཅུ་གཉིས་པར་ཏེ། །བཞི་བཅུ་གསུམ་པར་ཕཊ་དགོད་བྱ། །ཧཱུྃ་ཡིག་བཞི་བཅུ་བཞི་པར་ཏེ། །བཞི་བཅུ་རྩ་ལྔ་པ་རུ་ཧཱུྃ། །བཞི་བཅུ་དྲུག་པར་ཧཱུྃ་སྦྱིན་བྱ། །བཞི་བཅུ་རྩ་བདུན་པ་ལ་ཧྞ། །གྲི་ཡིག་བཞི་བཅུ་བརྒྱད་པར་ཏེ། །གཅིག་དམན་ལྔ་བཅུ་པ་ལ་ཧྞ། །དེ་ལྟར་འཁྲུལ་འཁོར་འཁོར་ལོ་ནི། །མགྲིན་པ་ལས་སྐྱེས་རྟག་དགོད་བྱ། །རེངས་པ་ཐམས་ཅད་ལུས་ཆེན་ལས། །སྲོག་ནི་རྡོ་རྗེའི་རང་བཞིན་ཆེ། །སྦྱོར་བར་བྱས་པ་གང་དེ་ལྟར། །སེམས་ཅན་གནོད་བྱེད་རེངས་པའོ། །གྲོལ་བ་སེམས་ཅན་ཐམས་ཅད་ལ། །རྣལ་འབྱོར་པའི་ཡང་ཡིད་ཀྱིས་སོ། །ལོ་གཅིག་ཏུ་ནི་གོམས་པ་ལས། །འགྲུབ་འགྱུར་འདི་ལ་ཐེ་ཙོམ་མེད། །ཉེ་བ་ཡི་ནི་སྙིང་པོའི་སྔགས། །རེའུ་མིག་དབུས་མར་ཡང་དག་བྲི། །བསྒྲུབ་བྱའི་མིང་ནི་ནང་བཅུག་ནས། །རླུང་དང་རྣམ་ཤེས་ཐིམ་པར་བྱ། །བྲང་འགྲོ་འཁྱིལ་པར་གྲགས་པ་སྟེ། །འཁྲུལ་འཁོར་ཡང་ལུས་ཅན་རྣམས་ཀྱིའོ། །རི་བོ་ཕུང་པོར་འགྲོ་བ་སྟེ། །བྱང་ཆུབ་སེམས་ནི་ཐོད་པའོ། །དེ་ཡི་སྟེང་དུ་སྟེར་བ་ཉིད། །མཁས་པ་འཁྲུལ་འཁོར་གང་གིས་སོ། །ཡི་གེ་ཐམས་ཅད་རང་བཞིན་ཏེ། །ཉིན་ཞག་ལས་ཀྱང་ཤེས་པར་བྱ། །སེམས་ཀྱི་བྲན་པོ་ཆེན་པོ་[ཡི]། །
དབའ་རླབས་རེངས་པར་བྱ་བ་ཡིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་འཁོར་ལོའི་ཤུགས་ཅན་མའི་རེངས་པར་བྱ་བའི་ལས་དཔའ་བོ་དང་གཉིས་སུ་མེད་པའི་སྦྱོར་བའི་མཚན་ཉིད་ཀྱི་རང་བཞིན་ཞེས་བྱ་བའི་ཆོ་གའི་ལེའུ་སྟེ་བཞི་བཅུ་རྩ་གཉིས་པའོ།། །།དེ་ནས་དུམ་སྐྱེས་མའི་སྦྱོར་བས། །ཇི་ལྟའི་ལས་ནི་གསལ་བཤད་བྱ། །ལས་ཐམས་ཅད་པའི་ཐབ་བྱས་ནས། །ཇི་ལྟའི་ཆོ་གས་སྦྱིན་སྲེག་སྟེ། །ལས་ཀྱི་ཆོ་ག་རྣམས་མཐོང་བས། །བསྐྲད་པའི་ལས་ནི་བསྒྲུབ་པར་བྱ། །གྲི་ཧ་དེ་བ་ཏཱ་གནས་སུ། །ཤིན་སྦྱངས་བྱང་ཆུབ་ཡན་ལག་ཏུའོ། །ནམ་མཁའི་བུ་གའི་བྱང་སེམས་ཀྱང་། །འཛིན་པ་ཆེན་པོ་སྟེང་འཕེན་འགྱུར། །བསྐམ་བྱ་ཨཿཡི་རྣམ་པས་ཏེ། །མགོ་བོར་རྣམ་པར་གཟུང་བར་བྱ། །ཎྜ་ཡི་གེས་འགྲོ་བྱ་སྟེ། །མདའ་ཡི་ཤུགས་ཀྱིས་ཡོངས་སུ་འཁོར། །རླུང་གི་དཀྱིལ་འཁོར་ཅན་བསྒོམས་ནས། །མགོ་བོའི་དབུས་སུ་རྒྱལ་མཚན་ཏེ། །རྣམ་ཤེས་དེ་ནི་བསྐྱེད་པར་འགྱུར། །དཔག་ཚད་འབུམ་ཕྲག་སྟོང་ཕྲག་ཅན། །སངས་རྒྱས་ཉིད་མ་ལུས་པ་འཐོབ། །རྣལ་འབྱོར་པ་དེ་ས་གསུམ་དུ། །ཧཱ་ཧཱ་ཧེ་ཧེ་རྣམ་བརྒྱད་དུ། །མཁའ་འགྲོའི་སྦྱོར་བས་དགོད་པའོ། །མཁའ་སྤྱོད་འགྲོ་བའི་བྱ་བ་ཡིས། །རྣལ་འབྱོར་མ་ནི་དེར་བྱེད་དོ། །རང་གིས་ཆུང་རྟག་གྱེན་བགྲོད་ལས། །ཁྱིམ་དུ་འཆི་བར་ཤེས་པར་བྱ། །འཕྲོག་པ་སྡིག་པ་ཐམས་ཅད་དེ། །སྡང་བའི་དབང་པོའི་ཆོ་ག་ཅན། །སྦྱིན་བྱ་ཐེག་པ་ཆེན་པོ་ཀུན། །རྟག་ཏུ་སྦས་པ་མེད་རྒྱུས་སོ། །རྡོ་རྗེ་འཛིན་པའི་དབུགས་དབྱུང་བའང༌། །སེམས་ཅན་ཐམས་ཅད་ལ་སྦྱོར་བྱ། །དེ་སྲིད་རྡོ་རྗེ་རྣལ་འབྱོར་ཆེ། །ཇི་སྲིད་བསྒྲུབ་བྱར་མི་སྤྱོད་པར། །ཤིན་ཏུ་སྦྱངས་པ་ཆོས་ཀུན་དུ། །ཡེ་ཤེས་ཤེས་བྱའི་བདག་ཉིད་དུ། །བྱང་ཆུབ་ཡན་ལག་ཉིད་ཀྱིས་བལྟ། །ཡིད་དེ་ཆོས་ཅན་ཐམས་ཅད་དོ། །དེ་ལྟར་བྱེ་བྲག་ཆོས་ཤེས་པ། །སངས་རྒྱས་བྱང་ཆུབ་རབ་ཏུ་བསྟན། །ཐེག་པ་ཆེན་པོར་བསྐྲད་པ་
སྟེ། །སྦྱིན་སྲེག་འདི་ཡིས་རྫོགས་པར་བྱ། །བྱ་རོག་ཤ་གཤོག་ཆུ་རྒྱུས་དང་། །བྱ་རྒོད་ཚད་སྟན་མངོན་པར་ནི། །དེ་ཡི་སེམས་ཀྱིས་བསྲེག་པར་བྱ། །སངས་རྒྱས་རྣམས་ཀྱང་སྐྲོད་བྱེད་ན། །ས་གཞིའི་ཆུང་ངུའི་འཇིག་རྟེན་པའི། །སྐྱེ་འགྲོ་ཀུན་ལ་སྨོས་ཅི་དགོས། །སུམ་ཅུ་བདུན་བདག་ཉིད་དབུས་སུ། །སྔོན་དུ་བཤད་པ་ཅན་བསྒོམ་བྱ། །སྔགས་ཀྱི་ཡི་གེ་ལས་བྱུང་བ། །ཤེས་རབ་ཐབས་ཀྱི་རང་བཞིན་ཅན། །ཨོཾ་བུ་མ་དྷ་ཧཱ་ཀོ་ཀཱ་ཊི་ཤ་ས་ཏི་ཧ་ཡ་སྲ་ཀཱ་ཀྵ་ཏྨ་ཎཱ་ནེ་ནི་ཧཱུྃ་ཥྤཱ་ཧཱུྃ་ད་ཕཊ་ནཱ་ཕཊ་ཡ་སྭཱ་ཧཱུྃ་ཧཱ་ཧཱུྃ་ཕཊ་ཕཊ་སྭཱ་ཧཱ། ༀ་ཁཎྜ་རོ་ཧི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱའི་སྔགས་ལས་ཡང་དག་བྱུང་། །འཁྲུལ་འཁོར་སྔོན་བདག་ཉིད་དངོས་ཅན། །གཅིག་དམན་ལྔ་བཅུའི་བདག་ཉིད་ཀྱི། །རེའུ་མིག་གནོད་མཛེས་སྔགས་གནས་སུ། །རྣམ་པར་སྣང་མཛད་ཐོག་མར་ཏེ། །གཉིས་པར་དེ་ཉིད་སྦྱིན་པར་བྱ། །ཨཱ་ཡིག་གསུམ་པར་སྦྱིན་བྱ་སྟེ། །བཞི་པར་ན་ཡི་ཡི་གེའོ། །ལྔ་པ་ཡ་ཡི་ཡི་གེའོ། །དྲུག་པར་ཡ་ཡིག་སྦྱིན་བྱ་སྟེ། །བདུན་པར་སུ་ཡི་ཡི་གེའོ། །བརྒྱད་པར་ཕཊ་ཀྱི་ཡི་གེ་སྟེ། །དགུ་པར་སུ་ཡིག་དེ་བཞིན་ནོ། །བཅུ་པར་རྣམ་པར་སྣང་མཛད་དེ། །གྲི་ཡིག་བཅུ་གཅིག་པར་དགོད་བྱ། །བཅུ་གཉིས་པ་ལ་ཧྞཱ་ཡིག་གེ། །བཅུ་གསུམ་པ་ལ་མྦྷ་ཡི་ཡིག །བཅུ་བཞི་པ་ལ་ནའི་ས་བོན། །བཅྭ་ལྔར་ཧཱུྃ་གཉིས་དེ་བཞིན་ནོ། །བཅུ་དྲུག་པ་ལ་ཧཱུྃ་ཕཊ་ཏེ། །བཅུ་བདུན་པ་ལ་རྣམ་སྣང་མཛད། །བཅྭ་བརྒྱད་པ་ལ་ཧྞཱའི་ཡིག་གེ། །བཅུ་དགུ་པ་ལ་གྲི་དགོད་བྱ། །ཉི་ཤུ་པ་ལ་པ་ཡིག་སྦྱིན། །ཉི་ཤུ་གཅིག་པར་ཡ་སྦྱར་བྱ། །ཉི་ཤུ་གསུམ་པར་ཧཱུྃ་ཡིག་སྟེ། །ཉི་ཤུ་བཞི་པར་ཧཱུྃ་ཕཊ་དགོད། །ཧཱུྃ་ཡིག་ཉི་ཤུ་དྲུག་པར་སྦྱིན། །ཉི་ཤུ་བདུན་པར་ཡ་སྦྱོར་བྱ། །ཧཱུྃ་ཡིག་ཉི་ཤུ་དགུ་པར་ཏེ། །ཛ་ཡིག་དང་པོར་སྦྱིན་པར་བྱ། །སུམ་ཅུ་པ་ལ་དེ་ཉིད་སྦྱིན། །གྲི་ཡིག་སུམ་ཅུ་རྩ་གཅིག་པར། །སུམ་ཅུ་གཉིས་པར་ཧཱུྃ་ཡིག་སྟེ། །ཧྞ་ཡིག་སུམ་ཅུ་གསུམ་པར་རོ། །སུམ་ཅུ་བཞི་པར་གྲི་སྦྱིན་བྱ། །སུམ་ཅུ་ལྔ་པར་ཧོ་དགོད་བྱ། །སུམ་ཅུ་དྲུག་པར་རཱ་ཡིག་སྟེ། །སུམ་ཅུ་བདུན་པར་ཧཱུྃ་ཕཊ་གཉིས། །སུམ་ཅུ་བརྒྱད་པར་ཡ་ས་བོན། །གཅིག་དམན་བཞི་བཅུ་པ་ལ་
ཡ། །བཞི་བཅུ་པ་ལ་ཧྞ་སྦྱིན་བྱ། །བཞི་བཅུ་རྩ་གཅིག་པ་ལ་ཧཱུྃ། །བྷ་ཡིག་བཞི་བཅུ་རྩ་གཉིས་པར། །བཞི་བཅུ་རྩ་གསུམ་པ་ལ་ནི། །བཞི་བཅུ་རྩ་བཞི་པ་ལ་དྱཱ། །བཞི་བཅུ་རྩ་ལྔ་པ་ལ་བི། །བཞི་བཅུ་རྩ་བདུན་པ་ལ་ཝཱན། །བཞི་བཅུ་རྩ་བརྒྱད་པ་ལ་ག །མྦྷ་ཡིག་བཞི་བཅུ་དགུ་པར་ཏེ། །འཁྲུལ་འཁོར་རོ་ལངས་སུ་གཞུག་བྱ། །ལེའུ་ཚེ་ལྔ་རུ་བསྒྲུབ་བྱ་དང་། །རྣལ་འབྱོར་མ་དྲུག་གོ་ཆར་བཅས། །གསང་སྔགས་ནང་དུ་ཆུད་བྱ་སྟེ། །རོ་ལངས་ཁ་རུ་དགོད་པར་བྱ། །གང་དང་གང་གི་མིང་གིས་ནི། །འཁྲུལ་འཁོར་བརྩེ་ཆེན་གྱིས་བྲེ་བྱ། །དེ་དང་དེ་ཡིར་ཤེས་བྱ་སྟེ། །མཁས་པ་ཡིས་ནི་བསྐྲད་པའོ། །གསང་བ་ཆེན་པོ་མི་བསྟན་ནོ། །སྐྱེ་བ་འདི་ཉིད་ལ་འགྲུབ་པའོ། །གསང་སྔགས་བརྗོད་པ་མ་བྱས་ཤིང་། །བསྒོམ་བྲལ་རྣལ་འབྱོར་པ་ཡང་ངོ་། །བླ་མ་རྣལ་འབྱོར་མའི་གནང་བས། །ཁྱབ་བདག་ཇི་ལྟར་འདོད་པར་སྤྱོད། །དེ་ཕྱིར་བླ་མ་བསྙེན་བྱ་ཞིང་། །བདག་ཆེན་རྣམས་ཀྱིས་མཉེས་པར་བྱ། །དེ་ཡིས་དགྱེས་པས་འཐོབ་པ་སྟེ། །ལས་ཀྱིས་བྱང་ཆུབ་འབྱུང་བའོ། །འཁྲུལ་འཁོར་འཆར་བའི་དུས་སུ་ནི། །མགོ་བོར་རྣམ་པར་བསྒོམ་པར་བྱ། །དེས་མངོན་གྲུབ་པར་ཤེས་བྱ་སྟེ། །དུས་གཞན་རྣམས་སུ་འགྲུབ་པ་མིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་དུམ་སྐྱེས་མའི་རབ་ཏུ་སྦྱོར་བ་སྒོམ་པའི་འཁྲུལ་འཁོར་གྱི་འཁོར་ལོ་བསྐྲད་པའི་ལས་རྣལ་འབྱོར་མ་དྲུག་གི་གོ་ཆའི་སྔགས་ཀྱི་ཆོ་གའི་མཚན་ཉིད་ཅེས་བྱ་བ་སྟེ་ལེའུ་བཞི་བཅུ་རྩ་གསུམ་པའོ།། །།དེ་ནས་རོ་ལངས་ཟུང་གི་ནི། །སྡང་བྱེད་འཁྲུལ་འཁོར་དེ་བཞིན་དུ། །ཆང་འཚོང་མ་ཡི་རབ་སྦྱོར་བས། །མདོར་བསྡུས་པ་ཡིས་རབ་བཤད་བྱ། །སཽ་རཱཥྚ་ཡི་གནས་བསྒྲུབས་ནས། །ཡན་ལག་རབ་ཏུ་རྣམ་འབྱེད་ཆོས། །བྱང་ཆུབ་ཐེ་ཚོམ་མེད་འཐོབ་པར། །མཆོག་གི་འདོད་མ་ཤེས་པར་བྱ། །མྱོས་བྱེད་ཆེན་པོར་སྦྱོར་བྱེད་པར། །ཤཽ་
ཡི་ཡི་གེས་རབ་ཏུ་བཤད། །བཅུད་ལེན་དངོས་པོ་དམ་པ་ཡང་། །མཆོག་གི་པདྨ་དག་ཏུ་འཛིན། །སྨིན་མའི་དབུས་སུ་སྣལ་མ་གང་། །རྡོ་རྗེ་ནོར་བུའི་ནང་ཕྱིན་ནས། །སྙོམས་པར་འཇུག་ལས་སྐྱེ་བཞིན་པར། །ཎྜི་ཡིག་རང་གིས་རེག་མི་བཏུ། །རེག་མེད་དེར་ནི་རྣམ་ཤེས་ཀྱིས། །མཆོག་གི་ཆུ་མོ་བཏུང་བར་བྱ། །བདག་མེད་པ་ཡི་ནང་དུ་སྟེ། །དེ་ནི་ནཱི་ཡི་ཡི་གེས་བཤད། །ཡེ་ཤེས་འདི་འདྲ་བཏུང་བྱས་པས། །དབང་པོ་ཐམས་ཅད་རབ་མྱོས་ཏེ། །དབྱེ་བ་དེ་ཚེ་དེ་རྣམས་སུ། །ཡིད་ཀྱིས་རྩོད་པ་བྱེད་པར་འགྱུར། །བདེ་བ་ཆེན་པོ་ལ་རོལ་པ། །སཽ་ཡིཾ་ཡི་གེ་བདག་གིས་བཤད། །རོ་མ་བསྡམས་པའི་སྦྱོར་བ་ཡིས། །མ་མཆུ་འཇིབ་པར་བྱ་བ་ཡིན། །རྟ་དང་མ་ཧེའི་འཁྲུལ་འཁོར་དུ། །དབྱེ་བ་སྲོག་དང་ཐུར་སེལ་ལའོ། །ཥྚ་ཡིག་ཚིགས་པ་ཐམས་ཅད་དུ། །ཤེས་པར་བྱེད་པར་ཐེ་ཙོམ་མེད། །ཡན་ལག་རབ་ཏུ་རྣམ་འབྱེད་དེས། །ཆོས་བདག་མེད་པའི་བྱང་ཆུབ་རྟོགས། །འདི་དང་ལྡན་པའི་རྣལ་འབྱོར་གྱིས། །དབྱེ་བ་དང་ནི་གསད་པ་སྟེ། །དབང་པོ་དང་ནི་ཡུལ་ཐམས་ཅད། །མི་བསྐྱོད་པ་ཡི་འཇིག་རྟེན་སྤྱོད། །བརྩེ་བས་དེ་རྣམས་བསད་པ་ཡིས། །བདག་ཉིད་ཀྱིས་ནི་གྲོལ་རྒྱུ་ཅན། །དཀྱིལ་འཁོར་འཁོར་ལོའི་དབུས་སུ་ནི། །མཆོག་གི་གཙོ་མོ་བསྒོམ་པ་ཡིན། །སྨིན་དབུས་ཕྱོགས་སུ་གཟུགས་རྣམས་ནི། །དཀར་བའམ་དམར་དང་མཚོན་ཆ་རྣམས། །དེའི་དུས་ཉིད་དུ་ཡང་དག་བྱུང་། །སུམ་ཅུ་རྩ་བདུན་ཡིག་རྣམས་སུ། །ཤེས་རབ་ཐབས་ཀྱི་བདག་ཉིད་གཟུགས། །མཆོག་གི་གཙོ་བོ་ཤེས་པར་བྱ། །ༀ་ས་ཛྙཱ་རྦ་ནཱ་ཀ་མྲྀ་རྨ་ཏ་པྲ་བ་བཪྵཱ་རྟ་པ་ནཱ་ཎཱ་ཡ་ཡ་ནེ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་སྭཱ་ཧཱ་ཧཱ། །ༀ་ཤཽཎྜི་ནཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། བསྒོམ་བདག་ཉིད་ཅན་རྣལ་འབྱོར་ཆེས། །ཇི་ལྟར་ཡིད་འདོད་ལས་བྱ་སྟེ། །དུར་ཁྲོད་སོལ་བའི་སྣག་ཚ་ཡིས། །མི་ཡི་རུས་པས་བྲི་བར་བྱ། །སྨན་ཐམས་ཅད་ཀྱི་རྒྱུ་སྐར་ནི། །རྒྱལ་སོགས་ཁམས་རྣམས་མཉམ་པས་སོ། །འཁོར་ལོ་མངོན་དུ་བརྗོད་པ་སྟེ། །དུམ་བུའང་གཅིག་དམན་ལྔ་བཅུའོ། །ཕན་ཚུན་ཟུང་གི་གསང་སྔགས་སུ། །ཡི་གེའང་མཁས་པས་དགོད་པར་བྱ། །གྲྭ་བཞིར་རྣམ་པར་སྣང་
མཛད་དེ། །སྒོ་བཞི་རྣམས་ནི་སྟོང་པའོ། །ལྷག་མ་ཐོག་མའི་ཕྲེང་ལ་ནི། །དུམ་བཞི་རྣམས་སུ་རིམ་པས་གང་། །ཧྞ་སུམྦྷ་གྲི་དགོད་པར་བྱ། །དེ་ལ་གཉིས་པའི་དུམ་བདུན་ལ། །གྲི་ཡ་ཧོཿགྲི་བྷ་ག་པ་ཡ། །བཱ་ན་བི་ཕཊ་རིམ་བཞིན་བྲི། །གསུམ་པ་དབུས་མའི་ལོགས་སུ་ནི། །གསུམ་གསུམ་རྣམས་ནི་སྦྱིན་བྱ་སྟེ། །ཕཊ་ཧྞ་ཧཱུྃ་ཧཱུྃ་ཧྞཱ་སྦྱིན་བྱ། །བཞི་པར་དབུས་ལས་ཐམས་ཅད་དུ། །ཕྱོགས་སུ་རེ་རེ་དོར་བ་དང་། །གཡས་དང་གཡོན་གྱི་སྒོ་གཉིས་ཀྱི། །དབུས་སུ་ཡི་གེ་གཉིས་གཉིས་ཏེ། །པ་ཡ་དྱཱ་རཱ་སྦྱིན་པར་བྱ། །ཕྲེང་ལྔ་པ་ལ་དགོད་བྱ་བ། །དབུས་མའི་ལོགས་སུ་གསུམ་གསུམ་སྟེ། །ཧཱུྃ་པ་ཡ་ཧཱུྃ་ཧཱུྃ་གྲི་སུ་དགོད་དེ། །འདི་རྣམས་ཇི་ལྟའི་འདིར་རིམ་པས། །དྲུག་པའི་ཕྲེང་ལ་ཤེས་བྱ་བའོ། །ཧྞ་ཨན་ཧཱུྃ་ཧཱུྃ་ཧཱུྃ་ཕཊ་དེ་བཞིན། །ཕཊ་ཛ་ཧཱུྃ་ཕཊ་རིམ་ཇི་ལྟར། །སྔགས་ཐམས་ཅད་ནི་སྦྱིན་བྱ་བ། །དུམ་བུ་བདུན་པ་རྣམས་ལ་བཤད། །སྒོ་སྤངས་པ་ལ་རིམ་པ་ཡིས། །སྦྱིན་བྱ་ཧཱུྃ་ཧཱུྃ་མྦྷ་ཧཱུྃ། །འཁྲུལ་འཁོར་ཆེན་པོའི་ཆེན་པོའོ། །དབུས་ཀྱི་དུམ་བུ་ལྔ་རྣམས་དང་། །དེ་བཞིན་དུ་ནི་སྒོ་བཞི་རུ། །བསྒྲུབ་བྱའི་མིང་ནང་བཅུག་པ་ཡི། །རྐང་པ་བརྒྱ་པའི་སྔགས་བཅས་པའོ། །རོ་ལངས་འཐབ་པར་འགྱུར་བ་ནི། །མཁས་པ་ཡིས་ནི་གཟུང་བྱའོ། །དེ་དག་ལྟོ་བར་འཁྲུལ་འཁོར་ཏེ། །འགྲུབ་འགྱུར་འདི་ལ་ཐེ་ཚོམ་མེད། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཆང་འཚོང་མའི་རབ་ཏུ་སྦྱོར་བས་དབྱེ་བའི་མཚན་ཉིད་ཀྱི་ཆོ་གའི་འཁྲུལ་འཁོར་གྱི་འཁོར་ལོའི་རང་བཞིན་ཞེས་བྱ་བ་སྟེ་ལེའུ་བཞི་བཅུ་རྩ་བཞི་པའོ།། །།དེ་ནས་འཁོར་ལོའི་གོ་ཆ་མའི། །ཏིང་འཛིན་གསལ་བར་བཤད་བྱ་སྟེ། །འཁོར་ལོའི་གོ་ཆ་མའི་སྦྱོར་བས། །ལྐུགས་པར་བཅིང་བའི་སྦྱོར་བའོ། །གསེར་གླིང་གི་ནི་གནས་དང་ནི། །དེ་ནས་དྲན་བྱང་ཆུབ་ཡན་ལག །སྲིན་པོའི་རྣམ་པའི་འཁྲུལ་འཁོར་ཏེ། །ཆོ་ག་གཞན་དུ་རབ་འཇུག་འགྱུར། །
སྤྱི་གཙུག་མཐིལ་གྱི་ས་གཞི་ལ། །མཁས་པ་ཡིས་ནི་བྱ་བ་ཡིན། །ལྷ་དང་ལྷ་མིན་འཐབ་མོ་ཆེར། །མི་སྨྲར་གྱུར་ཏོ་མིའི་འཇུག་པ། །དེ་ཡི་དུས་སུ་གཟུགས་ཆེན་པོ། །འཁོར་ལོའི་ཏིང་ངེ་འཛིན་གྱིས་བལྟས། །ཡི་གེ་གཉིས་ཀྱིས་འཆད་པ་ནི། །གཡོ་བའི་སེམས་ནི་འཆིང་བ་སྟེ། །གནོན་པ་རྣམ་པར་ཤེས་པའི་ཆོས། །གཟུགས་ཀྱི་དབུས་སུ་ཐིམ་པར་གྱིས། །རྒྱུད་དུ་དམ་པའི་ཆོས་བསྟན་པ། །འདིར་ནི་ཕྱག་རྒྱ་གཉིས་ཀྱིས་བཤད། །དེ་བཞིན་སྔོན་གྱི་སྤྱོད་པས་ཀྱང་། །སྦྱོར་བའི་ཕྱག་རྒྱ་སྤྱོད་པར་འགྱུར། །ཐམས་ཅད་མན་ངག་ལེའུ་རུ། །དེ་ཡི་རྒྱུ་ཅན་བསྒོམས་པ་ཡིས། །རིམ་པས་འདི་ཀུན་ཟབ་མོར་ནི། །བདག་ཉིད་ཀྱིས་ནི་བསང་བྱས་ཏེ། །ནམ་མཁའ་མཁའ་མེད་ནམ་མཁའ་ཆེ། །ཤིན་ཏུ་ནམ་མཁའ་ནམ་མཁའི་མིན། །གྱེན་དུ་ཕྱོགས་པའི་རྩར་འབབ་སྟེ། །ཇི་སྲིད་རི་མོ་མི་མཐོང་བར། །དེ་སྲིད་རྒྱུན་མི་འཆད་པར་འཐོབ། །དགའ་སྐྱེས་བདེ་བའང་ཅིས་མི་འབབ། །དངོས་དང་དངོས་མེད་འདྲེས་པ་ཡིས། །སྐྱེ་བོ་ཀུན་ནས་བྱུང་བ་ཡིན། །དངོས་མེད་གཟུགས་བདག་ཉིད་མ་ཡིན། །དངོས་མེད་ཐམས་ཅད་ལས་སྐྱེས་བདེ། །ལམ་ལ་གནས་པར་འཁྱེར་འགྱུར་ཏེ། །གང་དེར་ཇི་ལྟར་དེ་བཞིན་ནོ། །ཡེ་ཤེས་ལྐུགས་པ་བཞིན་དུ་གནས། །འཆིང་བ་རང་གི་ཕྱག་རྒྱ་སྐྱེས། །འདི་ཡིས་ལྐུགས་པར་འགྲོ་བ་སྟེ། །དགྲ་བཞིན་དུ་ནི་ཀུན་ལ་འབིགས། །རྡོ་རྗེ་འཛིན་ཀྱང་ལྐུགས་ཉིད་ན། །སྐྱེ་འགྲོ་ཕྲ་མོ་སླར་ཅི་དགོས། །ཐམས་ཅད་རིག་པས་བྱེད་པོ་བྱེད། །བྱེད་པོ་གཞན་ནི་སྲིད་མ་ཡིན། །ཡིད་བཟང་མ་དང་གང་ཟག་ཉིད། །བདག་མེད་རིག་འགྱུར་སྐད་ཅིག་ལས། །རྡོ་རྗེ་ཐེག་པར་དེ་ཚེ་གནས། །རང་བཞིན་བདག་མེད་པར་འདོད་དོ། །བརྗོད་པ་བདག་མེད་བརྗོད་པ་ཡང་། །རྣལ་འབྱོར་མཐོང་བས་འབྱུང་མི་འགྱུར། །དེ་ལས་ལངས་པའི་རྣལ་འབྱོར་ཆེ། །ཧྞ་ཡིག་གཞན་དངོས་རྣམས་ཀྱིས་མིན། །གཉིས་དག་བསྲུབ་ཅིང་བསྲུབ་པ་ནི། །དང་པོ་སྤྱི་གཙུག་རྐང་མཐར་རོ། །རྣམ་གཉིས་རྗེས་སུ་སྦྱོར་བ་ཡིས། །དབུས་ཀྱི་མདའ་ནི་སྔགས་སྐྱེས་སོ། །མཚོན་བྱ་མཚོན་པས་གང་མཚོན་པ། །མཚོན་པར་བྱ་
དང་མཚོན་བྱེད་མེད། །བད་སྣལ་ལྟ་བུའི་སྐུད་པ་ནི། །རྣལ་འབྱོར་པ་ཡིས་མཐའི་གནས་ཕྱིན། །མདའ་དང་གཞུ་ནི་མི་མཐོང་སྟེ། །གང་དུ་བཏང་ཞིང་འགྲོ་བར་བྱ། །དེ་ཚེ་སྲོག་ཀུན་ལྐུགས་པར་ནི། །འགྱུར་བ་འདི་ལ་ཐེ་ཚོམ་མེད། །དཀྱིལ་འཁོར་འཁོར་ལོ་བསྒོམ་པ་སྟེ། །དེ་ཡི་དབུས་སུ་འདི་དགོད་པ། །འཁོར་ལོའི་གོ་ཆ་མ་ལྷ་མོ། །མདོག་དང་དབྱིབས་ནི་སྔོན་གྱི་ཅན། །སྔགས་ཡིག་རྣམས་ལས་བྱུང་བ་ནི། །ཤེས་རབ་ཐབས་བདག་ཉིད་ཅན་མཆོག །ཨོཾ་ས་བ་རྦ་ནྡྷ་བི་ན་ཀ་ཀ་ལ་རཱ་པ་ཡ་བྷ་ཧཱུྃ་ཉྫ་ཧཱུྃ་ན་ཕ་ཀ་ཊ་རཱ་ཕ་ཡ་ཊ་ཧཱུྃ་སྭཱ་ཧཱུྃ་ཧཱ་ཕཊ་ཕཊ་སྭཱ་ཧཱ། ༀ་ཙ་ཀྲ་བརྨི་ཎཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱ་སྔགས་རབ་སྦྱོར་བདག་ཉིད། །ལྐུགས་པའི་རྣམ་ཤེས་བསྒྲུབ་པར་བྱ། །སྔོན་གྱི་འཁྲུལ་འཁོར་བྲིས་ནས་ནི། །གསང་སྔགས་ཕྲེང་བ་འདི་དགོད་བྱ། །ཐོག་མར་རྣམ་པར་སྣང་མཛད་དེ། །གཉིས་པར་ཝན་ནི་རྣམ་པར་སྦྱིན། །བི་ཡིག་གསུམ་པར་སྦྱིན་པར་བྱ། །བཞི་པར་ཧཱུྃ་གི་ཡི་གེའོ། །ལྔ་པར་བྱ་ཡི་ཡི་གེ་སྟེ། །དུམ་བུ་དྲུག་པར་རཱ་སྦྱིན་བྱ། །བདུན་པར་གྲི་ཡི་ཡི་གེ་སྟེ། །བརྒྱད་པར་ག་ཡི་ཡི་གེའོ། །དགུ་པར་མྦྷ་ཡི་ཡིག་སྦྱིན་བྱ། །བཅུ་པར་ཧྞ་ཡིག་སླར་དགོད་དོ། །གྲི་ཡིག་བཅུ་གཅིག་པ་རུ་སྟེ། །ཧཱུྃ་ཡིག་བཅུ་གཉིས་དགོད་པར་བྱ། །བཅུ་གསུམ་པ་རུ་གྲི་ཡིག་སྟེ། །བཅུ་བཞི་པ་ལ་ཛ་ཡིག་གོ། །བཅོ་ལྔ་པ་ལ་བྷ་ཡིག་སྟེ། །པ་ཡ་གཉིས་དགོད་བཅུ་དྲུག་པར། །བཅུ་བདུན་པ་ལ་སུ་ཡིག་སྟེ། །ཕ་ཡིག་བཅྭ་བརྒྱད་པར་དགོད་བྱ། །གཅིག་ཉུང་ཉི་ཤུར་ཧཱུྃ་སྦྱིན་ནོ། །ཉི་ཤུ་པ་ལ་ཊའི་ཡི་གེ། །ཉི་ཤུ་གཅིག་པར་ཡི་གེ་ཧཱུྃ། །ཉི་ཤུ་གཉིས་པར་ཧཱུྃ་འགྱུར་རོ། །ཉི་ཤུ་གསུམ་པར་གྲི་ཡིག་སྟེ། །ཧཱུྃ་ཡིག་ཉི་ཤུ་བཞི་པར་རོ། །ཉི་ཤུ་དྲུག་པར་ཊ་ཡིག་སྦྱིན། །ཉི་ཤུ་བདུན་པར་ཕའི་ཡི་གེ། །ཧཱུྃ་ཡིག་ཉི་ཤུ་བརྒྱད་པར་ཏེ། །ཧོཿཡིག་ཉི་ཤུ་རྩ་དགུ་པར། །སུམ་ཅུ་པ་ལ་ཧྞཱ་ཡིག་སྦྱིན། །སུམ་ཅུ་གཅིག་པར་ཧྞ་དགོད་བྱ། །ཧཱུྃ་ཡིག་སུམ་ཅུ་གཉིས་པར་སྦྱིན། །སུམ་ཅུ་གསུམ་འདིར་མྦྷ་ཡིག་གོ། །སུམ་ཅུ་བཞི་པར་ཧཱུྃ་ཡིག་སྟེ། །དེ་ཉིད་སུམ་ཅུ་ལྔ་པར་རོ། །སུམ་ཅུ་དྲུག་པར་ཡི་ཡིག་སྦྱིན། །ཧྞཱ་ཡིག་སུམ་ཅུ་བདུན་
པར་ཏེ། །སུམ་ཅུ་བརྒྱད་པར་པ་ཡ་གཉིས། །གཅིག་དམན་བཞི་བཅུ་པ་ལ་ཧཱུྃ། །བཞི་བཅུ་པ་ལ་ཧཱུྃ་སྦྱིན་བྱ། །བཞི་བཅུ་གཅིག་པར་ནི་བྷ་ཡི་གེའོ། །ཧཱུྃ་ཡིག་བཞི་བཅུ་གཉིས་པར་སྦྱིན། །བཞི་བཅུ་རྩ་གསུམ་པ་ལ་ཨོཾ། །ཡ་ནའི་ཡིག་གཉིས་སྦྱིན་བྱ་བ། །དུམ་བུ་བཞི་བཅུ་བཞི་པར་རོ། །བཞི་བཅུ་ལྔ་པར་ཨཱ་ན་སྟེ། །བཞི་བཅུ་དྲུག་པར་ཕཊ་དེ་བཞིན། །བཞི་བཅུ་བདུན་པ་ལ་ནི་ཨོཾ། །བཞི་བཅུ་རྩ་བརྒྱད་པ་ལ་ཕཊ། །བཞི་བཅུ་དགུ་པར་སུ་སྦྱིན་བྱ། །ཐམས་ཅད་ཇི་ལྟའི་རིམ་པས་སོ། །དུམ་བུ་དབུས་མར་བསྒྲུབ་བྱའི་མིང་། །ཀ་ར་ཀ་ར་སོགས་ནང་བཅུག །ཐམས་ཅད་བསྡུས་ནས་ཤེས་བྱས་ནས། །ལྐུགས་པར་བཅིང་བར་བྱ་བ་ནི། །བྱི་བ་སྟེང་དུ་འགྲོ་བའི་སྒོར། །འཁྲུལ་འཁོར་གླང་རྨིག་བཅས་པར་སྦ། །ཨ་བ་དྷཱུ་ཏཱིར་ཡིག་བྱས་ནས། །དེ་ཡི་དབུས་སུ་རབ་ཏུ་གཞུག །ཕྱོགས་ཐམས་ཅད་དུ་སྲིན་པོ་ནི། །བྱས་ནས་འཁྲུལ་འཁོར་བསྒྲུབ་པའོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་འཁོར་ལོའི་གོ་ཆ་མའི་ལྐུགས་པར་བྱ་བའི་རབ་ཏུ་སྦྱོར་བའི་ཆོ་གའི་མཚན་ཉིད་དང་འཁོར་ལོ་སྒོམ་པ་དང་དཔའ་བོ་དང་གཉིས་སུ་མེད་པའི་རྣལ་འབྱོར་སྲིན་པོའི་རྣམ་པའི་འཁྲུལ་འཁོར་གྱི་འཁོར་ལོ་ཞེས་བྱ་བ་སྟེ་ལེའུ་བཞི་བཅུ་རྩ་ལྔ་པའོ།། །།དེ་ནས་ཤིན་ཏུ་དཔའ་མོའི་ལས། །ཞི་བར་བྱེད་པ་གསལ་བཤད་བྱ། །རབ་སྦྱོར་དེ་རྣམས་ཀྱིས་བྱ་སྟེ། །ན་ག་རར་ནི་ཡང་དག་བཞུགས། །བཏང་སྙོམས་བྱང་ཆུབ་ཡན་ལག་སྟེ། །ལྷ་ཡི་འཁོར་ལོ་རྫུ་འཕྲུལ་ཆེར། །དཔྲལ་བའི་གནས་སུ་ལྷ་མོ་ནི། །སྐྱེ་འགྲོའི་བདག་མོ་བསྒོམ་པར་བྱ། །དབང་གཉིས་ཡང་དག་འདུས་པ་ལས། །རྩ་ཆེན་པོ་ནི་བདེ་བས་གང་། །བཅུ་གཉིས་མཐའ་རུ་བསྐྱོད་པ་ལས། །འདིར་ནི་ས་བོན་གཡོ་བ་མེད། །དབང་པོ་ལ་སོགས་ཐམས་ཅད་ནི། །འདོད་ཆགས་བྲལ་བ་ཉིད་
འཐོབ་འགྱུར། །རྣལ་འབྱོར་ཆེན་པོ་མཉམ་པའི་བདེ། །སླར་ཡང་བདེ་བའི་རང་བཞིན་མེད། །འདོད་ཆགས་ཞེ་སྡང་མུན་དྲི་མ། །རྣམ་བྲལ་ཕ་རོལ་སོན་པ་ཆེ། །འཐོབ་བོ་དགའ་བ་དེ་ཡིས་ནི། །སྐྱེས་བུ་དང་ནི་གཉིས་མེད་རྩེ། །ཐེག་པ་གསུམ་ལས་གཞན་མེད་དེ། །དེ་རྣམས་ཀྱིས་ནི་བལྟ་དུས་ཀུན། །འགྲོ་དང་ཉལ་དང་ཟ་བ་ནི། །རྣལ་འབྱོར་བསྒྲུབ་པས་སྤངས་པ་ཡིན། །དགའ་རོལ་རྩེད་མོ་རྩེ་བ་དང་། །གླུ་ལེན་པ་ཡིས་གོས་པ་མེད། །དེ་ཕྱིར་བཏང་སྙོམས་བྱང་ཡན་ལག །གནས་སྐབས་ཀུན་རྗེས་སྤངས་པས་སོ། །དེ་ལྟར་ཞི་དོན་དུ་བྱས་པས། །དོན་ཡོད་མཐོང་བས་འགྲུབ་པར་འགྱུར། །གང་དང་གང་གི་སེམས་ཅན་ནི། །ནད་པ་ལ་སོགས་ལ་བལྟས་པས། །དེ་དང་དེ་ཡི་སེམས་ཅན་གྱི། །ཞི་བའི་ལས་ཅན་དུ་འགྱུར་རོ། །སངས་རྒྱས་ཉིད་ཀྱང་མྱུར་དུ་ན། །ཕྲ་མོའི་ལས་ནི་སྨོས་ཅི་དགོས། །རྣལ་འབྱོར་མ་ཡི་ཚོགས་དབུས་སུ། །ཤིན་ཏུ་དཔའ་མོ་བསྒོམ་པར་བྱ། །ལྷ་མོ་རྟག་ཏུ་མདོག་དཀར་མོ། །ལྷག་མ་སྔོན་མ་ལྟ་བུ་མཆོག །གསང་སྔགས་ཕྲེང་བའི་རབ་སྦྱོར་བས། །ཤེས་རབ་དང་ནི་ཐབས་བྱུང་བའོ། །གཏོར་མ་སྦྱིན་སྲེག་ཆོ་ག་ཡིས། །བློ་ལྡན་ཞི་རྫས་རྣམས་ཀྱིས་ཏེ། །ཞོ་མར་འོ་མ་ཟས་རྣམས་ཀྱི། །འདིར་ནི་དགང་བླུགས་དབུལ་བར་བྱ། །ག་པུར་ཙནྡན་ལ་སོགས་པས། །འཁྲུལ་འཁོར་སྔོན་གྱི་བྲི་བར་བྱ། །ཨོཾ་པ་མུ་ར་ཎྜཱ་ཀྲཱྀ་བ་ཏ་ལཱི་ཡ་ལ་ནྟྲ་ག་མ་ན་ནྟྲ་ཤ་ནཱ་རཱི་ཤ་རཱ་ནཱ་ཡ་ཡ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་སྭཱ་ཧཱ་ཧཱ། ༀ་སུ་བཱི་རཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱ་སྔགས་ཡིག་ས་བོན་ཏེ། །སྐྱེ་བ་དང་ནི་གནས་པའི་རྒྱུ། །ཡེ་ཤེས་ས་བོན་ཐམས་ཅད་རྣམས། །སྔགས་པས་དཔྲལ་བ་སོགས་པར་རོ། །རྣལ་འབྱོར་པ་རྣམས་རྩེ་དུས་ལས། །བསྐྱེད་པར་འགྱུར་ཞིང་འགག་པར་འགྱུར། །དུམ་བུ་བཞི་བཅུ་རྩ་དགུ་རུ། །སྔགས་ཀྱི་ཕྲེང་བ་འདི་དགོད་བྱ། །དུམ་དབུས་ཕྱི་རོལ་བརྒྱད་རྣམས་སུ། །ཕྱོགས་མཚམས་ཇི་ལྟའི་རིམ་པ་ཡིས། །རྣམ་པར་སྣང་མཛད་ས་བོན་བཞི། །ཧཱུྃ་གི་ཡི་གེ་བཞི་རྣམས་སོ། །དེ་ཕྱི་དུམ་བུ་བཅུ་དྲུག་ཏུ། །
ཕྱོགས་མཚམས་རིམ་པ་ཇི་བཞིན་པས། །ཧཱུྃ་ཡིག་བརྒྱད་ནི་དགོད་བྱ་ཞིང་། །དེ་ནས་གྲིཧྞ་གྲིཧྞའི་ཚིག །སུམྦྷ་ནི་སུའོ་དུམ་ལྷག་མ། །དེ་ཡི་ཕྱི་རོལ་ཉི་ཤུ་བཞིར། །མྦྷ་གྲི་ཧྞཱ་པ་ཡ་གྲི་ཧྞཱ་པ་ཡ། །འདིར་ནི་བྲི་བར་བྱ་བ་སྟེ། །ཨཱ་ན་ཡ་ཨཱ་ན་ཡ་ཧོཿའི་ཚིག །བྷ་ག་བཱན་བིདྱཱ་རཱ་ཛ་དང་། །ཕཊ་ཡིག་དེ་ནས་བྲི་བར་བྱ། །དབུས་མའི་དུམ་བུར་བསྒྲུབ་བྱ་ནི། །གནོད་མཛེས་སྔགས་ཀྱི་ནང་བཅུག་པའོ། །ལྷ་ཡི་གཟུགས་ཀྱི་ཁར་བྲི་བྱ། །དེ་ལྟར་ལྷ་ཡི་འཁྲུལ་འཁོར་ནི། །ལིང་གའི་གནས་སུ་གཞག་པར་བྱ། །ཀུན་ཏུ་སྤྱོད་ཀུན་ཤེས་པར་བྱ། །གཞན་གྱི་དུས་སུ་མི་འགྲུབ་བོ། །ཐིག་ལེ་སྒྲ་ཡི་དུས་སུ་ནི། །རླུང་གི་དབྱིབས་ནི་བརྟན་པ་ཡིས། །སངས་རྒྱས་བྱང་ཆུབ་སེམས་རྣམས་ཀྱི། །ཞི་བ་མྱ་ངན་འདས་འགྲོ་ན། །སླར་ཡང་ས་གཞིའི་འཇིག་རྟེན་པའི། །ཞི་བའི་དགོས་བྱེད་སྨོས་ཅི་དགོས། །དེ་བྱེད་རྣལ་འབྱོར་དབང་ཕྱུག་ནི། །ལྷ་དང་ལྷ་མིན་རྣམས་ཀྱིས་མཆོད། །དེ་ཡང་སངས་རྒྱས་ཉིད་འཐོབ་ན། །དེ་ཞབས་འབྲིང་བྱེད་སྨོས་ཅི་དགོས། །འཇིག་རྟེན་སངས་རྒྱས་སོགས་ཆེན་པོས། །དེ་ནི་ཕྱག་འོས་མཆོད་འོས་སོ། །བསམ་གཏན་སྔགས་ཀྱི་བཟླས་པ་དང་། །སྦྱིན་སྲེག་ཡ་ག་སོགས་མཆོག་ཏུ། །ཞི་དང་བྱང་ཆུབ་ཀྱི་ནི་སེམས། །འགྲུབ་འགྱུར་འདི་ལ་ཐེ་ཚོམ་མེད། །རྩ་བའི་སྔགས་ནི་བཟླས་པ་ཡིས། །ལས་རྣམས་ཐམས་ཅད་འགྲུབ་པར་འགྱུར། །རྐང་པ་བཞི་བཅུ་རྩ་བརྒྱད་པས། །ཀུན་མཁྱེན་སྐྱེ་བ་འདི་ལའོ། །དཔལ་ཧེ་རུ་ཀ་གཉིས་མེད་པའི། །རྡོ་རྗེ་ཕག་མོ་མཐོང་བར་འགྱུར། །དེ་ཡི་མཆོག་ནི་སྟེར་བྱེད་དེ། །རང་གི་འཁོར་ལོས་སྒྱུར་ཐིམ་པའོ། །དེ་རྣམས་ཕྱག་རྒྱའི་གྲུབ་བྱེད་པར། །མཆོག་ཏུ་རྨད་དུ་བྱུང་བར་འགྲོ། །མཁའ་འགྲོ་མ་རྣམས་དང་གནས་པ། །གནས་དང་གནས་རྣམས་སུ་འཐོབ་བོ། །ཧེ་རུ་ཀ་སྔགས་འཁྲུལ་འཁོར་དང་། །ལས་ཐམས་ཅད་ནི་མ་ཤེས་ན། །དེ་ནི་དོན་མེད་ཡོངས་ངལ་ཏེ། །འགྲོ་བ་དྲུག་ཏུ་འཁྱམ་འགྱུར་ཞིང་། །སྐྱེ་བ་བྱེ་བ་བརྒྱ་ཕྲག་ཏུ། །འཇིག་རྟེན་འགྲོ་ཀུན་གྲོལ་བ་མིན། །དཔལ་ཧེ་རུ་ཀའི་གོ་འཕང་གནས། །སྔགས་ཀྱི་ནུས་པས་གྲོལ་
བའོ། །བརྩེ་བ་ཆེན་པོས་ཕག་མོ་སོགས། །རྣལ་འབྱོར་མ་བསྙེན་ཤེས་པར་བྱ། །གཉིས་སྦྱོར་བདེ་བའི་རྣམ་པ་ནི། །བུད་མེད་སྐྱེས་པ་མ་ནིང་མིན། །དངོས་པོ་ཙམ་དུ་སེམས་ཅན་ལ། །དེ་བཞིན་གཤེགས་པ་རྣམས་ཀྱིས་བསྟན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་ཤིན་ཏུ་དཔའ་མོའི་ཞི་བའི་ལས་ཀྱི་རབ་ཏུ་སྦྱོར་བའི་ཆོ་གའི་མཚན་ཉིད་ཀྱི་འཁྲུལ་འཁོར་འཁོར་ལོ་སྒོམ་པ་དང་གནོད་མཛེས་ཀྱི་སྔགས་ཀྱི་ལས་ཀྱི་ཚོགས་ཞེས་བྱ་བ་སྟེ་ལེའུ་བཞི་བཅུ་རྩ་དྲུག་པའོ།། །།དེ་ནས་ལྷ་མོས་མཆོད་བྱས་ནས། །འདི་སྐད་ཀྱི་ནི་ཚིག་དྲིས་སོ། །ཐམས་ཅད་བསྲུང་བའི་ལས་ཆེན་པོ། །ཁྱབ་བདག་བདག་གིས་མི་འཚལ་ལོ། །ཕག་མོ་ལྷ་རྫས་པད་ཅན་གྱི། །ལྷ་མོ་ཉོན་ཅིག་རབ་བཤད་བྱ། །སྟོབས་ཆེན་མ་ཡི་རབ་སྦྱོར་བས། །སིན་དྷུ་ཡི་ནི་གནས་བསྒྲུབས་ཏེ། །ཡང་དག་ལྟ་བའི་རང་བཞིན་དུ། །མཆོག་གི་མ་མོ་ཤེས་པར་བྱ། །དེ་ལྟར་དེ་ཉིད་ངེས་པར་བྱ། །མཆོག་གི་བསྒོམ་པར་འཇུག་པར་བྱ། །མ་མོའི་འཁོར་ལོའི་གྲོང་ཉམས་དགར། །དཔའ་བོའི་གཙོ་མོ་བསྒོམ་པར་བྱ། །ལྷན་སྐྱེས་བྱང་ཆུབ་རིགས་པ་ཡིས། །དེའི་བདག་ཉིད་དུ་གང་མཚོན་བྱ། །སྔོན་དུ་ཧཱ་སྟེ་བགྲོད་པ་བཞིན། །དྲག་ཤུལ་སྦྱོར་བའི་མཚན་ཉིད་དོ། །རྣལ་འབྱོར་ཐམས་ཅད་ཡོངས་དམིགས་ནས། །ཕུང་པོའི་རྩ་བ་ལས་གཞོན་ཅན། །སྤྱི་བོ་ཡི་ནི་ཐོད་པར་བཟུང་། །ཨོ་ཌྱན་བུ་གར་སོན་པ་སྟེ། །ལྟེ་བ་ཡི་ནི་གནས་ཐོབ་ནས། །བྱང་ཆུབ་ས་བོན་རྣམས་ཀྱིས་འཛིན། །མཚན་མོ་ཡིས་ནི་གཟུང་བར་ནི། །ཁམས་ཐམས་ཅད་ཀྱིས་གང་བར་བྱས། །ལ་ལ་ནཱ་ཡི་ལམ་སོན་ནས། །སྔོན་གྱི་གནས་སུ་ཡང་དག་རིག །མེ་ཡིས་བཞུ་བའི་ཁམས་ཀྱིས་ནི། །རྩ་སྦུབས་ཐམས་ཅད་དགང་བར་བྱ། །འཇིག་རྟེན་ཁམས་ནི་ཐམས་ཅད་དུ། །སྐད་ཅིག་ལ་ནི་ལྟ་ཞིང་མཐོང་། །ཟླ་བ་འགྲོ་བའི་དབུས་
སུ་ནི། །སྒོར་འཕྱང་བ་ནི་བལྟ་བར་བྱ། །སྦྱོར་མཆོག་ཤེས་བྱས་བསྒྲུབས་བྱས་ལ། །དེ་ཡི་རང་བཞིན་ཅན་བསམ་བྱ། །མཛོད་སྤུར་སོན་པའི་བུ་ག་རུ། །རླུང་གི་ལྕེ་ནི་གཞུག་པར་བྱ། །རྣལ་འབྱོར་རྣམས་ཀྱི་བསྒོམ་རིམ་པས། །ཡང་དག་ལྟ་བར་ཤེས་པར་བྱ། །སུམ་ཅུ་རྩ་བདུན་བདག་ཉིད་མཆོག །ཤེས་རབ་རྣལ་འབྱོར་མ་བསྒོམ་བྱ། །སྔགས་ཀྱི་ཡི་གེ་ལས་བྱུང་བ། །ཤེས་རབ་ཐབས་བདག་ཉིད་མཆོག་གོ། །ཨོཾ་དུ་མ་ཥ་ཧཱ་ཊཱ་ར་ནཱཾ་ཀྵཱ་བི་ཀ་དཱ་རཱ་ལ་ཡ་ནེ་ཧཱུྃ་ཧཱུྃ་ཧཱུྃ་ཧཱུྃ་ཕ་ཕ་ཊ་ཊ་ཕ་ཕ་ཊ་ཊ་སྭཱ་སྭཱ་ཧཱ་ཧཱ་ཛཿཧཱུྃ་བཾ་ཧོཿ། ༀ་མ་ཧཱ་བ་ལེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བྱའི་སྔགས་ལས་ལྷ་མོ་ཆེ། །ཡེ་ཤེས་སྐུ་ནི་ཡང་དག་བྱུང་། །གྲུ་བཞི་ཟླུམ་པོ་དང་བཅས་པའི། །བྱང་ཆུབ་འཁྲུལ་འཁོར་རྟག་བྲི་སྟེ། །དུམ་བུ་བཞི་བཅུ་རྩ་དགུ་ལ། །གསང་སྔགས་བཞི་པོ་ཡང་དག་པར། །དུམ་བུ་རེ་རེར་བྲི་བར་བྱ། །དུམ་བུ་ལྔ་རུ་སྒྲུབ་པོ་སྟེ། །གྷ་གྷ་ལ་སོགས་ནང་བཅུག་པ། །བྱང་ཆུབ་སེམས་དཔའི་ཕྱག་ཏུ་ནི། །གི་ཝང་འམ་ནི་ཡང་ན་ནི། །གི་ཝང་ཆེན་པོས་བྲི་བྱ་བ། །གྲོ་གར་འཁྲུལ་འཁོར་ཐམས་ཅད་ནི། །ལས་ཀྱི་ཁྱད་པར་གྱིས་བྲི་སྟེ། །གཡུལ་ངོ་ཆེན་པོའི་རས་ལ་ནི། །ལས་ཐམས་ཅད་པ་བྱ་བ་ཡིན། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་སྟོབས་ཆེན་མའི་སྦྱོར་བས་སྲུང་བ་ཆེན་པོ་ཕུར་བུའི་སྔགས་ཀྱི་ལས་བྱང་ཆུབ་སེམས་དཔའི་འཁྲུལ་འཁོར་སྒོམ་པའི་མན་ངག་གི་ཆོ་གའི་མཚན་ཉིད་ཅེས་བྱ་བ་སྟེ་ལེའུ་བཞི་བཅུ་རྩ་བདུན་པའོ།། །།དེ་ནས་ལས་མཆོག་ཐམས་ཅད་ནི། །སེམས་ཅན་ཀུན་ལ་འབྱུང་བཤད་བྱ། །འཁོར་ལོས་སྒྱུར་མའི་རབ་སྦྱོར་བར། །མ་རུའི་གནས་སུ་བསྒྲུབ་པར་བྱ། །ཡང་དག་རྟོག་པ་བྱང་ཆུབ་ཀྱི། །ཕྱོགས་སུ་གནས་བཞིན་པར་བྱའོ། །རྒྱས་པ་བསྒྲུབ་བྱ་ཕྱི་ནས་ནི། །མཁས་པས་ལས་ནི་བྱ་བ་ཡིན། །གཏུམ་མོ་ལྟེ་བར་སྦར་
བ་ཡིས། །ཚིགས་ཐམས་ཅད་ནི་སྲེག་པ་སྟེ། །མིག་ལ་སོགས་པ་བསྲེགས་ནས་ནི། །བསྲེགས་པས་རྐན་ལས་ཐིག་ལེ་འཛག །འགྲོའོ་དེ་ནི་མཚམས་ཀུན་དུ། །པད་སྣལ་སྐུད་པའི་དྲ་བའོ། །འབིགས་ཤིང་འགྲོ་བས་རོ་མྱང་སྟེ། །སྟོང་ཕྲག་བདུན་ཅུ་རྩ་གཉིས་ལའོ། །འཐོམ་དང་རྨུགས་པའི་ཡེ་ཤེས་ནི། །འགྲོ་བ་མེད་ཀྱང་འོང་བར་འགྱུར། །ཕྱག་རྒྱ་འདི་ཡི་རྣལ་འབྱོར་པ། །ལོ་ཡི་སྦྱོར་བས་དེ་འགྲུབ་འགྱུར། །དེ་དང་འདི་ཡིས་ཡང་དག་ལྡན། །ལས་རྣམས་ཐམས་ཅད་བྱེད་པར་འགྱུར། །དགའ་བ་འཇིག་རྟེན་ཐམས་ཅད་དུ། །ཞེས་བྱ་འགྲོ་འགྱུར་དེའི་བདག་ཉིད། །རྣམ་པར་རྟོག་པ་དེ་འཁྱེར་ཏེ། །གོམ་པ་གཅིག་ནི་འགྲོ་མི་འགྱུར། །ཚིགས་ཀུན་ངོ་བོར་གྱུར་ནས་ནི། །བདག་གི་གདན་ནི་དེ་མཐོང་འགྱུར། །འཆི་བས་མི་འཇིགས་འདི་ཡི་ཕྱིར། །གཞན་གྱི་གདན་དུ་ཡང་དག་གནས། །གང་གང་ལས་ལ་བལྟས་རྣམས་ཀྱིས། །དེ་དེ་ཐམས་ཅད་དུ་བྱེད་དོ། །འཆི་བའི་དུས་ལས་ཤེས་བྱས་པ། །དེ་ནི་རྣལ་འབྱོར་གདན་དུ་འདོད། །ཀུན་མཁྱེན་ཐམས་ཅད་ལས་ཅན་ནི། །གང་ཕྱིར་གསང་བའི་གདན་མཆོག་ཡིན། །ཡང་དག་རྟོག་པའི་སྦྱོར་བདག་ཉིད། །བྱང་ཆུབ་ཕྱོགས་སུ་འགྲོ་བར་འགྱུར། །བ་ལང་རྟ་དང་མི་དང་ཁྱི། །གླང་པོ་མ་ཧེ་བོང་བུ་དང་། །རྔ་མོ་བྱི་ཆུང་བྱི་ལ་དང་། །ཕག་པ་དང་ནི་སྤྲེའུ་རྣམས་ཀྱི། །ཤ་ནི་སྐྱུར་པོ་ལ་བཏགས་པ། །དངོས་གྲུབ་འདོད་པས་སྦྱིན་སྲེག་བྱ། །རང་བཞིན་དངོས་གྲུབ་འཐོབ་འགྱུར་ན། །དངོས་གྲུབ་བརྒྱད་པོ་སླར་ཅིས་མིན། །རལ་གྲི་མིག་སྨན་རྐང་བྱུག་དང་། །རི་ལུ་དངུལ་ཆུ་མཆིལ་ལྷམ་དང་། །བཅུད་ལེན་དང་ནི་ས་འོག་དང་། །དགུག་པ་ཡང་ནི་འགྲུབ་པའོ། །རོ་ལངས་བསླང་བའི་དངོས་གྲུབ་ནི། །ཁྱི་ནག་མོ་ཡི་འོ་མ་དང་། །མཱ་ཥ་ནག་པོའི་ཐུག་པ་ཡིས། །ཡི་དགས་བཅུ་བཞིའི་མཚན་མོའམ། །སྔགས་པས་ཚེས་བརྒྱད་ལ་རོ་ཡི། །ཁ་རུ་སྦྱིན་སྲེག་བྱ་དེ་བཞིན། །དུར་ཁྲོད་ཀྱི་ནི་ཡུངས་ཀར་མར། །མར་ཁུ་འབད་པས་བཟུང་ནས་ནི། །དེས་ཀྱང་དཔའ་བོ་བྱུག་བྱ་སྟེ། །དེ་ཚེའི་ནུབ་མོར་རྣམ་པར་བརྗོད། །ཡི་དགས་ཆེན་པོ་དེ་ལངས་
ནས། །དབང་ཆེན་མཐིལ་ལ་ཕྱེ་མར་བྱེད། །དེས་རྟག་འཇིགས་པར་མི་བྱ་སྟེ། །རང་རྐྱེན་སྦྱོར་བས་བསྐྱེད་པ་ཡིན། །ཏིལ་ལམ་ཏིལ་མར་གཞན་ཡང་ནི། །གང་རུང་ཅི་རུང་བཟུང་བྱས་ནས། །རྣལ་འབྱོར་རྣམས་ཀྱིས་སེམས་ཅན་རྒྱུར། །བྱིན་པས་ཐམས་ཅད་དུ་འགྲོའོ། །སྒྲོལ་མ་ཙུན་དཱ་འོད་ཟེར་ཅན། །ཁྲོ་གཉེར་རི་ཁྲོད་ལོ་མ་དང་། །གཤིན་མཐར་བཅས་སོགས་ཁྲོ་བོ་ཆེ། །སྒོམ་དང་སྔགས་ཀྱི་བཟླས་པ་ནི། །འབུམ་ཕྲག་གཅིག་གིས་སྡིག་འཇོམས་ཏེ། །བྱེ་བས་འཇལ་བ་འཐོབ་པར་བྱེད། །དངོས་གྲུབ་ཅི་འདྲ་བ་འདོད་པ། །སྩལ་ནས་རྒྱུན་དུ་ཞུགས་པ་ཡིན། །ཡང་ན་སྙན་དངགས་རིག་པ་སྟེ། །ལུང་གི་དོན་ནི་འཆད་པའིའོ། །ཀུན་ཤེས་གང་ཐམས་ཅད་ཀྱི་སྐད། །མ་མཐོང་བ་རྣམས་ཤེས་པར་འགྱུར། །ཚར་གཅད་རྗེས་གཟུང་ཐམས་ཅད་ནི། །ཆོས་བྱ་ཆོས་ཅན་ཐམས་ཅད་བྱེད། །སྒྲོལ་སོགས་རྣལ་འབྱོར་མ་མཆོག་རྣམས། །རང་བདག་གཟུགས་གཞན་ཤེས་བྱ་ཉིད། །འདི་རྣམས་ཀུན་བསྡུས་གཟུགས་ཉིད་པས། །འཁོར་ལོས་སྒྱུར་མ་བསྒོམ་པར་གྱིས། །སྣ་ཚོགས་པ་ཡི་གཟུགས་འཛིན་ཏེ། །དེ་རྣམས་ཀྱིས་ནི་འཁོར་སྒྱུར་མའོ། །ༀ་ཏཱ་རེ་ཏུཏྟྭ་རེ་ཏུ་རེ་སྭཱ་ཧཱ། ༀ་ཙུནྡེ་སྭཱ་ཧཱ། ༀ་མཱ་རི་ཙྱཻ་སྭཱ་ཧཱ། ༀ་བྷྲཱི་ཀུ་ཊཱི་སྭཱ་ཧཱ། ༀ་པརྞྞ་ཤ་བ་རཱི་སྭཱ་ཧཱ། དེ་ལྟར་ཀུན་གྱི་འཁྲུལ་འཁོར་ཀྱང་། །སྔགས་ཀྱི་ཡི་གེ་རྣམས་ཀྱིས་བྱ། །བསྐྱེད་པ་དང་ནི་གནས་པའི་རྒྱུར། །ཇི་ལྟའི་རིགས་པས་བསྒྲུབ་པར་བྱ། །འོད་ཟེར་ཕྲེང་བས་ཀུན་འཁྲིགས་པ། །སྙིང་གའི་འཁོར་ལོར་གཟུང་བར་བྱ། །འདི་ཡིས་འཆི་བའི་འཇིགས་འཇོམས་ཏེ། །རྒས་དང་འཆི་བ་མེད་འཐོབ་བྱེད། །འཁོར་ལོས་སྒྱུར་མའི་ལྷ་མོ་ནི། །ཤེས་རབ་ཐབས་ཀྱི་བདག་ཉིད་མཆོག །མདོག་དང་དབྱིབས་ནི་རང་གི་སྟེ། །སྔགས་ཡིག་རྣམས་ལས་ཡང་དག་བྱུང་། །ༀ་ཀྲོ་དྷ་དྷརྨོ་སྥཱ་དྷ་ར་ཡ་སྥཱ་ཀ་ར་རཱ་ཎཱ་ཡ་ཡ་ཧཱུྃ་ཧཱུྃ་ཧཱུྃ་ཧཱུྃ་ཕ་ཕ་ཊ་ཊ་ཕ་ཕ་ཊ་ཊ་སྭཱ་སྭཱ་ཧཱ་ཧཱ།ༀ་ཙཀྲ་བརྟྟི་ནཱི་ཡེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ལྟར་སྔགས་ལས་ཡང་དག་བྱུང་། །མཁའ་འགྲོ་མ་ཡི་འཁོར་ལོ་སྒྱུར། །ལྷ་མིན་འཁྲུལ་འཁོར་བྲི་བྱ་སྟེ། །གཅིག་དམན་ལྔ་བཅུའི་དུམ་བུ་ལ། །ཇི་ལྟར་ལྷ་རྣམས་ཀྱི་
ནི་སྔགས། །བསྒྲུབ་བྱའི་མིང་ནང་བཅུག་པ་ཡི། །ཕག་མོ་ཡི་ནི་སྙིང་པོ་ཡང་། །དུམ་བུ་སོ་སོ་ལ་བྲིའོ། །ཕྱི་རོལ་དུ་ནི་སྔགས་ཀུན་གྱིས། །འདིར་ནི་རྟག་ཏུ་བསྐོར་བར་བྱ། །གཡུལ་ངོ་ཡི་ནི་རས་ལ་ནི། །རྫས་ཀུན་གྱིས་ནི་ཡོངས་བྲིས་ནས། །འཁྲུལ་འཁོར་ལས་ནི་ཐམས་ཅད་པ། །ལྷ་མ་ཡིན་གྱི་ཁར་སྦྱིན་བྱ། །ལོ་ཡི་ཉིན་ཞག་སྦྱོར་བ་ཅན། །ཐུན་མཚམས་སོ་སོར་བསྒོམ་པར་བྱ། །གཤིན་དགྲའི་འཁྲུལ་འཁོར་བྲི་བྱ་སྟེ། །དུམ་བུ་བཅུ་བདུན་པ་ལ་ནི། །ཕྱི་རོལ་བཅུ་དྲུག་སྦྱིན་བྱ་བ། །ཧྲཱིཿ་སྔགས་འདི་དགོད་པར་བྱ། །ཡ་མ་མེ་ད་ཀྵེ་རཱ་ཛཱ་ས་དོ། །རུ་ཎ་ཡོ་ནི་རཱ་ཡ་ཙྪ་ནི། །དེ་ལྟར་སྔགས་ཆེན་བྲིས་ནས་ནི། །ལས་ཐམས་ཅད་ནི་བསྒྲུབ་པར་བྱ། །ཡི་གེ་རེ་རེའི་གཙོ་བོ་ཡིས། །ལས་རྣམས་ཀྱང་ནི་བཅུ་བདུན་ནོ། །བསྒྲུབ་བྱའི་མིང་ནི་ནང་བཅུག་ནས། །གཤིན་རྗེའི་སྙིང་པོའི་སྔགས་རྣམས་ནི། །ལུགས་བཟློག་ཡི་གེ་ཕྱི་རོལ་དུ། །མཁས་པ་རྣམས་ཀྱིས་བྲི་བར་བྱ། །འཇིགས་དང་རྒྱལ་པོའི་རིགས་དང་ནི། །དགྲ་ཐམས་ཅད་ནི་རྣམ་པར་འཇོམས། །གཞན་ཡང་རྫ་རྔ་བཅིང་བ་ཡི། །ཁྱབ་བདག་རང་གི་སྔགས་བཏུ་པ། །ས་གཞི་ཆ་མཉམ་ཉམས་དགའ་བར། །ཙནྡན་ལ་སོགས་བྱུགས་པ་རུ། །སྒྲུབ་པ་པོ་ཡིས་ཡང་བྱ་སྟེ། །རི་མོ་དགུ་པ་ལེགས་ཟླུམ་པོར། །གཅིག་དམན་ལྔ་བཅུའི་དུམ་བུ་ལ། །གཅིག་གཉིས་གསུམ་དང་བཞི་ཡི་ཁར། །ལུགས་འབྱུང་ལུགས་ལས་བཟློག་པ་ཡིས། །སྔགས་ཀྱི་ཡི་གེ་རྣམས་གཞག་བྱ། །གནོད་མཛེས་རྒྱལ་པོ་ཡི་ནི་སྔགས། །སྔགས་པས་དེ་ནས་ཡང་དག་བཏུ། །དེ་ནི་ཚིགས་ཀུན་དེ་ཤེས་བྱ། །རྒྱུད་གཞན་དུ་ནི་མ་བཤད་དོ། །དེ་ཡི་ཡི་གེ་རྩ་རྣམས་སུ། །རེ་རེ་ཡི་ནི་ཚིགས་མཚམས་ནི། །གཅིག་དམན་ལྔ་བཅུ་ཡི་ནི་མཚམས། །མཁའ་དུས་མེ་ཡི་ཚོགས་ཅན་ནོ། །གང་གང་ཆོས་སུ་ཡོངས་བཤད་པ། །མཉམ་པར་གཞག་པས་དེ་དེའི་ཚིགས། །གང་དུ་ཡི་གེ་གཅིག་བླངས་ནས། །དེར་ནི་ཡི་གེ་ཐམས་ཅད་དེ། །རྩིས་ཀྱི་རིམ་རྣམས་ཀྱིས་བཏུ་བར། །བདེ་མཆོག་འབུམ་པར་གསུངས་པ་ཡིན། །ཕྱི་དང་ནང་བདག་ཉིད་འཁྲུལ་འཁོར། །
རྣལ་འབྱོར་རྣམས་ཀྱིས་ཀུན་སྒྲུབ་པའོ། །གསང་སྔགས་བདེ་བས་བསྒྲུབ་པར་བྱ། །ཁྱད་པར་དུ་ཡང་འཁྲུལ་འཁོར་རོ། །དེ་ཡིས་དངོས་གྲུབ་འཐོབ་འགྱུར་བར། །འདིར་ནི་སོམ་ཉིད་སྲིད་མ་ཡིན། །རྟེན་དང་བརྟེན་པའི་གཟུགས་ཅན་ཏེ། །ཇི་ལྟའི་རིམ་པར་མིང་དང་གནས། །གནས་ནི་རྟེན་གྱི་གཟུགས་སུ་སྟེ། །རྟེན་པའི་མིང་ནི་རྣལ་འབྱོར་མ། །འདི་དག་མཉམ་པར་སྙོམས་འཇུག་པ། །ལས་ཐམས་ཅད་པར་མངོན་པར་བརྗོད། །དེ་ཡིས་རྣལ་འབྱོར་མ་རྒྱུད་ནི། །རྟེན་པ་ཐབས་ཀྱི་སྤྱོད་ཡུལ་ལོ། །གང་ཕྱིར་ས་གཞི་རྟེན་ཡིན་པས། །དེའི་ཕྱིར་ཐབས་ནི་རྣལ་འབྱོར་མ། །ཡང་ན་ཐམས་ཅད་ཐབས་ཡིན་ལ། །ཡང་ན་ཐམས་ཅད་ཤེས་རབ་བོ། །ཤེས་རབ་ཐབས་བྲལ་དེ་རྣམས་ཀྱིས། །སངས་རྒྱས་སྐུ་ནི་མྱ་ངན་འདས། །ཐེག་པ་མཆོག་འདི་ཤེས་རབ་དང་། །བྲལ་བས་ཐམས་ཅད་སྲིད་པར་འགྲོ། །སྲིད་དང་མྱ་ངན་འདས་གང་ཆོས། །དེ་རྣམས་སྤངས་པས་ཆོས་མེད་དོ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་འཁོར་ལོས་སྒྱུར་མའི་རབ་ཏུ་སྦྱོར་བ་ལ་སོགས་པ་ལས་སྣ་ཚོགས་བསྒྲུབ་པའི་འཁྲུལ་འཁོར་འཁོར་ལོ་སྒོམ་པའི་ལམ་དང་རྫ་རྔའི་སྔགས་མདོར་བསྟན་པའི་ཆོ་གའི་མཚན་ཉིད་ཅེས་བྱ་བ་སྟེ་ལེའུ་བཞི་བཅུ་རྩ་བརྒྱད་པའོ།། །།དེ་ནས་གཞན་པ་མཆོག་གཙོ་བོ། །འཁོར་ལོས་སྒྱུར་སོགས་རྒྱས་པ་ནི། །ཕན་པ་ཐམས་ཅད་སྟེར་བའི་ལས། །མདོར་བསྡུས་པ་ཡིས་བཤད་པར་བྱ། །བརྩོན་ཆེན་མ་ཡི་རབ་སྦྱོར་བས། །ཀུ་ལུ་ཏཱར་ནི་ཡོངས་སུ་བཞུགས། །བྱང་ཆུབ་ཕྱོགས་ནི་ཡང་དག་ངག །འཁྲུལ་འཁོར་མི་ཡི་གཟུགས་ཅན་ནོ། །འཕྱང་བ་ལ་ནི་ཡོངས་བརྟེན་ནས། །བསམ་མེད་བྱང་ཆུབ་འཐོབ་པར་བྱེད། །དེ་ནི་ལས་ཀུན་གཙོ་བོ་སྟེ། །རང་བྱུང་ཕྱག་རྒྱ་ཆེན་པོའོ། །ཁམས་ཐམས་ཅད་ལས་ཡང་དག་བྱུང་། །དེ་ནི་འཕྱང་བར་
མངོན་པར་བརྗོད། །དཔའ་བོ་ཉི་ཤུ་བཞི་རྣམས་ལ། །རེ་རེ་ལ་ནི་རྣམ་པ་བརྒྱད། །ཁམས་ཐམས་ཅད་ལའང་ཤེས་བྱ་བ། །མིག་དང་བུ་ག་ཟླ་བའོ། །དཔའ་བོ་ཐམས་ཅད་སོ་སོ་ཡི། །རེ་རེའི་མིང་དུའང་བརྗོད་པར་འགྱུར། །དཀྱིལ་འཁོར་སུམ་ཅུ་རྩ་བདུན་དུ། །དཔའ་བོ་རེ་རེ་བསྒོམ་པར་བྱ། །ཁམས་བརྒྱད་པོ་ནི་ཐམས་ཅད་དུ། །རྣམ་པ་གསུམ་དུའང་མཚོན་པར་བྱ། །ཐོད་པའི་དུམ་བུ་ལ་སོགས་ཀྱི། །རབ་སྦྱོར་མིང་མདོར་བསྟན་པས་ཏེ། །ཕག་མོ་སོགས་སུ་ཡོངས་གནས་པའི། །བརྩོན་ཆེན་མིང་ནང་ཤེས་པར་བྱ། །དལ་གྱིས་ཁམས་ལ་བསྣུན་པ་ཡིས། །གཉིད་ལོག་པ་ལས་སད་པར་བྱ། །དཔའ་བོའི་རལ་གྲི་གང་འདྲ་བས། །སྟོབས་པོ་ཆེ་ལ་འབིགས་པར་འགྱུར། །དེ་འདྲའི་འཕྱང་བའི་རལ་གྲི་ནི། །ཁམས་ཐམས་ཅད་ལ་འབིགས་པར་འགྱུར། །ཧཱ་ཡི་མདོར་བསྟན་ཤེས་བྱས་ནས། །ཚིགས་མཚམས་ཀུན་དུ་གནས་པར་གྱིས། །དེ་ལས་བསྐྱེད་པའི་དཔའ་བོ་རྣམས། །བྱེ་བ་འབུམ་ཚོ་སྟོང་ཕྲག་གོ། །བྱང་ཆུབ་ས་བོན་རང་བཞིན་ཅན། །རྣལ་འབྱོར་མ་ནི་དེའི་རིགས་གྲགས། །ཁམས་ཐམས་ཅད་དུ་རྒྱས་འདེབས་པ། །ངེས་འབྱུང་དུས་སུ་ཡང་དག་བྱུང་། །འཕྱང་བཞིན་པར་ནི་དེ་ཤེས་བྱ། །རང་གཞན་ཡང་དག་རིག་པ་སྤངས། །རིགས་ནི་ཁམས་རྣམས་ཐམས་ཅད་དེ། །རྣལ་འབྱོར་མ་ནི་རིགས་ཅན་ཡིན། །གཉིས་པོ་ཡང་དག་སྦྱོར་བ་རུ། །འཕྱང་བ་ལྟོ་བར་རབ་ཞུགས་བྱ། །ཁམས་ཐམས་ཅད་ཀྱི་རོའི་བར་དུ། །དེ་ནི་ཆད་པ་ཉིད་དུ་འགྱུར། །བཅུད་ཀྱིས་ལེན་ནི་བསྒྲུབས་པ་ཡིས། །སྐྱེ་བོ་ཀུན་ལ་རྒྱས་པ་ཡིན། །དེ་རྣམས་ཀུན་དུ་གནས་པ་མེད། །མཁའ་སྤྱོད་ཉིད་དུ་ཉེ་བར་འགྲོ། །སངས་རྒྱས་བྱང་ཆུབ་སེམས་རྣམས་ནི། །དབུས་སུ་ཟག་པ་མེད་པར་བཞུགས། །དེ་ལྟར་ཡོན་ཏན་གཏེར་ཐམས་ཅད། །ཡང་དག་ངག་གི་གོ་འཕང་གནས། །བརྗོད་མིན་པ་ཡི་སྔགས་ཆེན་པོ། །བསྣམས་ཞིང་སྐྱེ་བོ་ཀུན་ལ་སྒྲོགས། །གཞོམ་དུ་མེད་པར་དེ་ཤེས་བྱ། །ས་ནི་རྡོ་རྗེ་འཛིན་མ་རང་། །ཁམས་རྣམས་ཀྱི་
དངོས་མ་ལུས་པ། །མིང་གིས་དཔའ་བོར་ཡང་དག་གནས། །ཐོད་པའི་དུམ་བུ་ཡི་ནི་ཁམས། །རང་ཉིད་སོ་སོར་བཤད་པར་བྱ། །སེན་མོ་དང་ནི་སོ་འབབ་པ། །རེ་རེའི་བརྒྱད་དུ་ཕྱེ་བ་ཅན། །ས་ལ་སོགས་པའི་ཁམས་བཞི་དང་། །དེ་བཞིན་དངོས་པོ་བཞི་དག་གོ། །དེ་ལྟར་གནས་ནི་གསུམ་གསུམ་དུ། །དཔའ་བོ་ཐམས་ཅད་སྦྱར་བར་བྱ། །སྐྲ་དང་བ་སྤུ་འབབ་པ་དང་། །པགས་པ་དང་ནི་དྲི་མ་འབབ། །ཤ་དང་ཤ་རེད་འབབ་པ་དང་། །ཆུ་རྒྱུས་དང་ནི་རྩ་འབབ་དང་། །རུས་པ་དང་ནི་པགས་འབབ་དང་། །མཁལ་མ་དང་ནི་སྟོབས་འབབ་དང་། །སྙིང་དང་དྲ་བ་འབབ་པ་དང་། །མིག་དང་ཆུ་སེར་འབབ་པ་དང་། །མཁྲིས་པ་དང་ནི་རླུང་འབབ་དང་། །གློ་བ་དང་ནི་རྩ་འབབ་དང་། །དེར་འབབ་པ་ཡི་དངོས་པོ་ནི། །གཉེ་མ་དང་ནི་མཆིན་པ་འབབ། །ལྟོ་བ་དང་ནི་དབུགས་འབབ་དང་། །བཤང་དང་གཅི་བ་འབབ་པ་དང་། །མཚམས་ཀྱི་མཐའ་དང་དྲི་མ་འབབ། །རྒྱུ་ཤུན་དང་ནི་མཆིལ་མ་འབབ། །རྣག་དང་ཆུ་སེར་འབབ་པ་དང་། །ཁྲག་དང་མེ་ཏོག་འབབ་པ་དང་། །རྡུལ་དང་རླངས་པ་འབབ་པ་དང་། །ཚིལ་དང་ལྟོ་ཚིལ་འབབ་པ་དང་། །མཆི་མ་དང་ནི་ཁུ་བ་འབབ། །ལུད་པ་དང་ནི་རིམས་མེད་འབབ། །སྣབས་དང་རྐང་མར་འབབ་པ་སྟེ། །དཔའ་རྣམས་ཁམས་ཀྱི་མཚན་ཉིད་དོ། །དེ་ལྟར་དུམ་བུ་དུམ་བུ་ཉིད། །ཁམས་ནི་གཞན་དུ་འཇུག་པར་འགྱུར། །རེ་རེ་ཡི་ཡང་རང་བཞིན་ཀྱང་། །ཟད་པའི་རླུང་གིས་ཐོད་པ་ཅན། །བདེ་བ་ཀུན་གྱི་ནང་ཐིམ་པར། །ཀེང་རུས་ཆེན་པོ་འགྲོ་བ་ཡིན། །སེམས་དང་བསམ་པ་དེ་ཡི་ཕྱིར། །ཀེང་རུས་ཀུན་དུ་སྟོང་པ་ཉིད། །མཆེ་བ་རྣམ་པར་གཙིགས་པ་ཡིས། །ཐམས་ཅད་གཉིས་མེད་ལྷན་སྐྱེས་གསལ། །ལྷ་ཡི་དགྲ་ནི་ཆེན་པོའི་གཟུགས། །རྣམ་ཤེས་ལྷ་དང་ལྷ་ཅན་ནོ། །འོད་དཔག་མེད་ནི་ཚིག་མེད་པ། །རྡོ་རྗེའི་འོད་ཟེར་རང་བཞིན་ཅན། །རྡོ་རྗེའི་རང་བཞིན་གྱི་ནི་སྐུ། །རྡོ་རྗེའི་སྐུ་ནི་དེར་ཤེས་བྱ། །མྱུ་གུ་ཅན་ནི་དངོས་པོ་ཀུན། །མཐོང་བ་ཙམ་གྱིས་དགའ་བྱེད་པའོ། །རྣམ་
ཤེས་བེམས་པོར་འཆིང་བར་ནི། །རྡོ་རྗེ་རལ་པ་ཅན་འགྲོའོ། །ས་གསུམ་ཟས་ཀྱི་མཆོག་ཏུ་ནི། །དཔའ་བོ་ཆེན་པོའི་བགྲོད་པས་བྱས། །མཁའ་འགྲོ་མ་དང་བཅས་སྡོད་པར། །རྡོ་རྗེ་ཧཱུྃ་མཛད་འགྲོ་བའོ། །ཤིན་ཏུ་བཟང་པོ་ཐོབ་མེད་པ། །འཇིག་རྟེན་འཇིག་རྟེན་པ་སྤངས་པའོ། །སྐྱེ་འགྲོ་ཀུན་དུ་རང་བྱུང་བ། །རྡོ་རྗེ་བཟང་པོ་དེ་གྲགས་པའོ། །འཇིགས་བྱེད་ཆེན་པོའི་གོ་འཕང་གིས། །ལས་ཀྱི་བག་ཆགས་ཐལ་བས་བསྒོས། །མིག་མི་བཟང་གིས་མ་བལྟས་ཀྱང་། །ཐམས་ཅད་མཚན་ཉིད་མཐོང་བར་འགྱུར། །སྟོབས་པོ་ཆེ་ནི་སྔགས་ཐམས་ཅད། །རྣམ་པ་གསུམ་གྱི་བདག་ཉིད་དོ། །རིན་ཆེན་རྡོ་རྗེ་སྨྲ་བཅད་ཆེ། །ཟག་མེད་ཁམས་ནི་ཐམས་ཅད་དུའོ། །རྟ་མགྲིན་ས་གཞི་ཆེན་པོ་ལ། །སྲོག་སོན་ཀུན་ལ་སྦྱར་བར་བྱ། །སྲོག་ཀུན་དགང་བར་བྱ་བ་སྟེ། །དེ་ཡིས་ནམ་མཁའི་སྙིང་པོར་བཤད། །དཔལ་ཧེ་རུ་ཀ་རྟག་ཏུ་སྟོང་། །སྐུ་བཞི་ཡི་ནི་རང་བཞིན་ཅན། །པདྨ་གར་དབང་ཕྱུག་དང་གཟུགས། །གཟུགས་མེད་རྣལ་འབྱོར་དུ་འགྲོ་བའོ། །བདེ་བ་ཆེན་པོས་སྣང་བྱེད་པས། །རྣམ་སྣང་མཛད་དུ་མངོན་པར་བརྗོད། །རྡོ་རྗེ་སེམས་དཔའ་བསྒྱིངས་བྱས་པ། །མཆོག་ཏུ་བདེ་བར་བརྗོད་པ་ཡིན། །དཔའ་བོ་ཐམས་ཅད་མཉམ་སྦྱོར་བ། །ཁམས་ཐམས་ཅད་ཀྱི་ནང་དུའོ། །སྐད་ཅིག་ཡུད་ཙམ་ཐང་ཅིག་ཏུ། །རོ་མྱང་མཚན་ཉིད་ཤེས་པར་བྱ། །ཁམས་འདི་རྣམས་ནི་ཐམས་ཅད་ཀྱི། །ཟད་ཉིད་མཆོག་ཏུ་ངོ་མཚར་ཆེ། །རང་བཞིན་ཁམས་ཀྱི་གྲངས་རྣམས་ནི། །དུས་ཚོད་དང་ནི་ཀླུ་དང་མདའ། །དེ་རྣམས་རྣལ་འབྱོར་མར་ཡོངས་གྲགས། །བརྒྱུད་པའི་རིམ་པ་ལས་འོངས་པའོ། །ཁམས་ཀྱང་རྣམ་པར་དཔྱད་བཞིན་པས། །ཐམས་ཅད་བདག་ཉིད་ཀྱིས་འབྱུང་མིན། །རྣམ་ཤེས་མ་ཡིན་ཡེ་ཤེས་མིན། །ཐམས་ཅད་སྟོང་པའོ་ཡོད་པ་མིན། །གསེར་འགྱུར་རྩི་ནི་མ་རིག་པས། །མཆོག་ཏུ་བདེ་བ་རིག་པ་མིན། །རང་གིས་དགོས་པ་བྱེད་པ་ནི། །སྤར་ཤའི་རིགས་ལྷའི་མཚན་ཉིད་དོ། །བརྩོན་འགྲུས་ཆེན་པོར་མངོན་བརྗོད་པའི། །དེ་ཕྱིར་རྣལ་འབྱོར་མ་བསྒོམ་བྱ། །ཁམས་
ཐམས་ཅད་དུ་རྒྱས་འདེབས་པ། །རྣལ་འབྱོར་གདན་དུ་ཡང་དག་བྱུང་། །གང་ཞིག་ཀུན་ནས་ཀུན་དུ་ནི། །དེ་ནི་དེ་བཞིན་གཤེགས་པར་མཐོང་། །མཁའ་འགྲོ་དང་ནི་སྡོམ་རྒྱུད་དང་། །ངེས་པར་བརྗོད་པ་ཕྱི་མ་དང་། །ཀུན་སྤྱོད་འབྱུང་བའི་རྒྱུད་རྣམས་སུ། །དངོས་པོ་ལས་ནི་རབ་ཏུ་བསྟན། །དེ་ཡིས་རྒྱུད་ནི་ཆེན་པོ་འདི། །ཐུབ་པ་སྐྱེས་བུ་མཆོག་གིས་གསུངས། །དུམ་བུ་དུམ་བུར་ཡོངས་གནས་པའི། །ལས་ཆེན་པོ་ནི་དེར་དྲང་བྱ། །ཕྲ་མོའི་བྱ་བ་མངོན་བརྗོད་པ། །ཁམས་རྣམས་ཀྱི་ནི་གནས་ལའོ། །ཇི་ལྟའི་རིམ་པས་ཁམས་བླང་སྟེ། །ཡོངས་བསྡུས་སྤྱོད་ཡུལ་བར་དུའོ། །ཚིགས་བཅད་ཐོག་མ་སོགས་པས་ཀྱང་། །ཇི་སྲིད་རྫོགས་པའི་སྤྱོད་ཡུལ་དུ། །རྒྱུད་འདི་རྣལ་འབྱོར་གཙོ་བོ་སྟེ། །ལས་རྣམས་རྒྱ་ཆེ་བ་མིན་ནོ། །ཡང་ན་རྣལ་འབྱོར་ཐམས་ཅད་ནི། །ལས་ཀྱི་ཚོགས་སུ་འདོད་པར་བྱ། །བདག་གི་དེ་ཉིད་རྟག་ཏུ་ལས། །བྱས་པའམ་གལ་ཏེ་མ་བྱས་པའོ། །རྣལ་འབྱོར་རྣམས་ཀྱི་སྦྱོར་མཚན་ཉིད། །རང་བཞིན་ལས་སུ་ཡང་དག་བཤད། །དེ་ལྟར་རྒྱུད་རྣམས་ཐམས་ཅད་དུ། །སྔགས་པས་མཆོག་ཏུ་ཤེས་པར་བྱ། །ཡང་ན་གང་དང་འདྲའི་རྣལ་འབྱོར། །དེ་དང་འདྲ་བར་ཁམས་གནས་ཏེ། །བཅུད་ཀྱིས་ལེན་གྱི་རྫས་རྣམས་ནི། །སྨན་ཆེན་ཉི་ཤུ་རྩ་བཞི་པོར། །སྦྱར་བྱས་དཔའ་བོ་ཉིད་རྣམས་ཀྱིས། །གྲོལ་བར་བགྲོད་པ་གསུངས་པ་ཡིན། །གསང་བ་མཆོག་ཏུ་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །བཅུ་དྲུག་དེ་རྣམས་རྫས་ཆེན་ཏེ། །བརྒྱད་གཉིས་ཚིགས་བཅད་ཕྱེད་ཀྱིས་སོ། །སྒྲ་དང་གཟུགས་སུ་ཡང་དག་བྱུང་། །འཇིག་རྟེན་གསུམ་དུ་རྙེད་པ་དཀའ། །སྲུབ་དང་བསྲུབ་པའི་ཀུན་སྦྱོར་བའི། །དབུས་མ་བླ་ན་མེད་པའི་གཟུགས། །རིལ་བུ་རྟག་ཏུ་མཆོད་བྱ་སྟེ། །ཕོ་ཉ་ལྷན་ཅིག་སྐྱེས་བདག་ཉིད། །ཡིད་ནི་ནང་དུ་སོན་པ་ཡིས། །རང་ཁུའི་སངས་རྒྱས་ཐིག་ལེ་ཅན། །སྦྲང་རྩི་ཁྲག་དང་ག་བུར་བཅས། །ཚོགས་ཀྱི་དབུས་སུ་རབ་ཏུ་ཞུགས། །མིང་མེད་མཐེ་བོ་དག་གིས་ཁར། །ཟླ་བའི་བཏུང་བ་མྱང་བར་གྱིས། །བདུད་རྩི་
ལྔར་གྱུར་འདི་རྣམས་ཀྱིས། །མཆོད་པ་བཞི་ནི་དེ་བཞིན་བྱ། །ལྷ་དང་མི་རྣམས་བདེ་བ་པས། །བཅུ་དྲུག་ཆ་ཤས་རིན་ཆེའོ། །དེ་ལྟར་ཚིགས་བཅད་འདི་ཀུན་གྱིས། །ཁམས་ལྔ་རབ་ཏུ་བཤད་པར་འགྱུར། །ར་ཡི་ཡི་གེས་ཁྲག་གི་ཁམས། །ཧཱ་ཡིག་རི་སྐྱེས་སུ་འདོད་དེ། །སྱ་ཡིག་དྲི་ཡི་ལོ་མ་སྟེ། །པ་ཡིག་པགས་པ་རུ་ནི་འདོད། །ར་ཡིག་གྷན་དྷ་ཀར་རབ་བཤད། །མེ་ཡིག་མེ་ཏོག་ཏུ་དྲན་བྱ། །ར་ཡིག་རཱ་བི་ཎ་དེ་བཞིན། །སླར་ཡང་མེ་ཡི་ཡི་གེ་ཤ །ས་ཡིག་ཀུན་ཏུ་རུ་ལས་སྐྱེས། །རྦཱ་ཡི་ཡི་གེ་རྩར་འདོད་དོ། །ཏྨ་ཡི་ཡི་གེ་སྦུག་སྐྱེས་བཤད། །ན་ཡིག་དྲི་ཡི་མར་ཁུའོ། །ས་ཡི་ཡི་གེ་སོ་ཡི་རྡུལ། །དཱ་ཡི་ཡི་གེ་རྒྱ་མཚོ་སྐྱེས། །སྠི་ཡིག་བ་མོ་དེ་བཞིན་དུ། །ཏ་ཡིག་སྙིང་པོའི་ག་པུར་རོ། །སྒྲ་དང་གཟུགས་སུ་ཡོངས་བྱུང་བ། །ཁྲག་ཁུ་ནོར་བུའི་བར་དག་ཏུའོ། །འཇིག་རྟེན་གསུམ་དུ་རྙེད་དཀའ་བ། །རང་རིག་པདྨ་ར་སོན་པའོ། །སྲུབ་དང་བསྲུབ་པའི་སྦྱོར་རྣམས་ཀྱིས། །རང་འབྱུང་གིས་ནི་རྣམ་བསྲེས་པའོ། །དབུས་མའི་མཆོག་གི་དབུགས་ཀྱང་ནི། །སྐད་ཅིག་དབུ་མར་བཟུང་བའོ། །རིལ་བུ་རྟག་ཏུ་མཆོད་པ་ནི། །བདུད་རྩི་གསང་བའི་ཆུ་ཡིན་ནོ། །ཕོ་ཉ་ལྷན་སྐྱེས་བདག་ཉིད་ནི། །དབང་གཉིས་སྦྱོར་ལས་རྩེ་བའོ། །ཡིད་ནི་ནང་དུ་སོང་བ་ནི། །ཁམས་རྣམས་ཀྱང་ནི་ཞུ་བའོ། །རང་ཁུ་ཐིག་ལེ་སངས་རྒྱས་རྣམས། །ཞུ་གང་སྦྱོར་བ་ལས་བྱུང་བའོ། །སྦྲང་རྩི་ཁྲག་དང་ག་བུར་བཅས། །བཅུ་དྲུག་འདོད་མ་ལས་བྱུང་བའོ། །ཚོགས་དབུས་རབ་ཏུ་བཞུགས་རྣམས་ཀྱིས། །འདི་ཀུན་ལྷན་སྐྱེས་ལ་སྦྱར་བའོ། །མིང་མེད་མཐེ་བོས་ཁར་གཞུག་པ། །སྙོམས་པར་འཇུག་ལས་ཁྲག་བྱུང་བའོ། །ཞི་བའི་བཏུང་བ་མྱང་བ་ནི། །འཕོ་བའི་དུས་ལས་མ་ལུས་གང་། །འདི་རྣམས་བདུད་རྩི་ལྔར་འགྱུར་བ། །འཕོས་ལས་བྱུང་བའི་མིའི་མར་ཁུ། །མཆོད་བཞི་དེ་བཞིན་བྱ་བ་ནི། །བཞི་མཉམ་ག་བུར་བཅས་པའོ། །ལྷ་དང་མི་རྣམས་བདེ་བ་ནི། །དགའ་བ་ཀུན་ལས་གང་བྱུང་བའོ། །བཅུ་དྲུག་ཆ་ཤས་རིན་ཆེ་བ། །ཐམས་ཅད་བདེ་བའི་རང་བཞིན་ཅན། །དེ་ལྟར་དཔའ་བོ་ཐམས་ཅད་ནི། །
ཁམས་ཀྱི་རྫས་རྣམས་སུ་སྦྱར་བྱ། །བཅུད་ལེན་དེ་ལས་བྱུང་བ་སྟེ། །གཙོ་བོ་ཡེ་ཤེས་མེ་རླུང་གིས། །འཛད་པ་དང་ནི་བསད་བྱས་ནས། །འཕོ་བ་དང་ནི་གཟག་དེ་བཞིན། །འཛད་པ་བྱང་ཆུབ་འཛག་པ་སྟེ། །བསད་པ་ཡིས་ཀྱང་འཕོ་མེད་འགྱུར། །འཕོ་བ་རྩ་རྣམས་ཀུན་དུ་སྟེ། །གཟག་པ་ལྟེ་བའི་པདྨར་རོ། །དེ་རྣམས་བཅིང་བ་བྱས་པ་ཡིས། །ཁམས་ཐམས་ཅད་དུ་གཟག་པར་བྱ། །བསད་པ་དངོས་པོ་གཞོམ་པ་སྟེ། །རྒྱས་པ་འཇིག་རྟེན་ཁམས་རྣམས་སུ། །སྦྱིན་སྲེག་ཆོ་ག་དེར་ཤེས་ནས། །འཁོར་ལོས་སྒྱུར་ཉིད་འཐོབ་པར་གྱིས། །ཐབ་ཏུ་བདུད་རྩི་བསྲེག་བྱ་སྟེ། །འཇམ་པའི་རྡོ་རྗེ་མངོན་སུམ་དུ། །རྣལ་འབྱོར་ལྡན་པས་མཐོང་བར་འགྱུར། །ས་ཐམས་ཅད་ལ་འཁྱེར་བར་བྱེད། །སྲོག་ནི་གང་གི་ཆོས་ཅན་ཆེ། །ཆོས་ནི་ཀུན་དུ་འགྲོ་བར་འགྱུར། །དེ་ཡི་རང་བཞིན་བརྩོན་ཆེན་མ། །སུམ་ཅུ་བདུན་བདག་ཉིད་མཆོག་ཏུ། །དཀྱིལ་འཁོར་སྔགས་ལས་དེས་རྫོགས་པ། །ཤེས་རབ་ཐབས་ཀྱི་བདག་ཉིད་མཆོག །ལྷ་མོ་ཆེན་མོ་ཁ་དོག་དཀར། །ཀུན་མཁྱེན་ཡེ་ཤེས་ལས་བྱུང་མ། །སེམས་ཅན་ཐམས་ཅད་དབང་འགྱུར་དང་། །འཁོར་ལོས་སྒྱུར་བ་འཐོབ་པར་འགྱུར། །ཨོཾ་ག་ཨི་ར་ནྡྲ་ས་ཛཱ་ཏ་ལ་བཱ་ས་ད་རྦ་པྲ་ས་བཱ་ཏྭཱ་ད་ཏྨ་མ་ནེ་ཧཱ་ཧཱུྃ་མ་ཧཱུྃ་ཏེ་ཕཊ་ཧཱུྃ་ཕཊ་ཧཱུྃ་སྭཱ་ཕཊ་ཧཱ་ཕཊ་སྭཱ་ཧཱ། ༀ་མ་ཧཱ་བིརྱཱ་ཡེེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ལྟར་སྔགས་ཀྱི་དེ་ཉིད་བདག །ལྷ་ཐམས་ཅད་ཀྱིས་བོན་ནོ། །འཁྲུལ་འཁོར་འཁོར་ལོ་དེ་ཚེ་ནི། །རེའུ་མིག་གཅིག་དམན་ལྔ་བཅུ་སྟེ། །ཁ་ཆེས་ཡང་དག་བྲི་བྱས་ནས། །གསང་སྔགས་ཕྲེང་བ་འདི་དགོད་བྱ། །ལུགས་ལས་བཟློག་པས་གནོད་མཛེས་སྔགས། །ཇི་ལྟའི་རིམ་པས་དགོད་པར་བྱ། །དེ་ཚེ་མི་ཡི་གཟུགས་བྱས་ནས། །སླར་ཡང་ཟླུམ་པོ་སྦྱིན་པར་བྱ། །དེ་ལ་རྩ་བའི་སྔགས་བྲིས་ནས། །བསྒྲུབ་བྱའི་མིང་ནི་ནང་བཅུག་པའོ། །དབུས་ཀྱི་དུམ་བུ་བསྒྲུབ་བྱ་ནི། །དེ་ཡི་སྔགས་ཀྱི་ནང་བཅུག་པའོ། །གྲོ་ག་སོགས་སུ་སྔགས་པས་བྲི། །ཕྱི་དང་གསང་བར་མཚོན་པར་བྱ། །དེ་ལྟའི་འཁྲུལ་འཁོར་རབ་སྦྱར་བས། །ས་གསུམ་པོ་ལ་
བསྒོམ་པར་བྱ། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་བརྩོན་འགྲུས་ཆེན་མོའི་རབ་ཏུ་སྦྱོར་བའི་ཆོ་གའི་མཚན་ཉིད་གསང་བའི་བཅུད་ལེན་ལ་སོགས་པ་དང་རྒྱས་པའི་ལས་དཔལ་ཡང་དག་པའི་ཏིང་ངེ་འཛིན་ཧེ་རུ་ཀའི་རྩ་བའི་སྔགས་ཀྱི་ཆོ་ག་ཞེས་བྱ་བ་སྟེ་ལེའུ་བཞི་བཅུ་རྩ་དགུ་པའོ།། །།དེ་ནས་དཔའ་བོ་ཕྱག་རྡོར་སོགས། །སྔགས་པ་ཐམས་ཅད་བཞེངས་རྣམས་ཀྱིས། །བསྟོད་དང་མཆོད་དང་ཕྱག་བཅས་པས། །ཕག་མོ་རབ་ཏུ་སད་པར་བྱེད། །བདག་གི་མ་ཡི་ལྷ་མོ་ཀྱེ། །ལྷ་མོ་ཀུན་གྱིས་རབ་མཆོད་མ། །ཁྱོད་ནི་འདི་རྣམས་ཀུན་གྱི་མ། །ཡེ་ཤེས་སྙིང་མོ་ཕྱག་འཚལ་འདུད། །སེམས་ཅན་ཀུན་ལ་སྙིང་རྗེ་ཡི། །གཟུགས་སུ་རང་གིས་སྤྲུལ་པ་མོ། །བདག་ལ་ཀུན་དུ་ཐུགས་རྗེ་ཡི། །བཀའ་དྲིན་ཆེན་པོ་མཛད་པར་རིགས། །བདེ་བ་ཆེན་པོ་ཡོངས་བཞུགས་པའི། །བཅོམ་ལྡན་བདག་པོ་ལ་འདྲིའོ། །རྒྱུད་ཐམས་ཅད་ཀྱི་ལས་ཚོགས་ཀྱི། །སྒྲུབ་པའི་ཐབས་ནི་མི་འཚལ་ཏོ། །གལ་ཏེ་ཇི་སྲིད་རྒྱུད་རྒྱུད་དུ། །ལས་ཐམས་ཅད་ནི་བསྟན་པ་ནི། །རྣམ་དག་ཡེ་ཤེས་ཐོབ་རྣམས་ཀྱི། །དེ་ཚེ་དེར་འདི་ཅི་ཕྱིར་གསུངས། །རྒྱུད་འདི་ཉིད་དུ་འཇུག་འགྱུར་བར། །སྐྱེ་བོ་ཐམས་ཅད་མི་རིགས་སོ། །སླར་ཡང་བཤད་པ་སྐྱོན་དང་བཅས། །བདག་གིས་མ་ཤེས་ཐེ་ཚོམ་མཆིས། །ཕག་མོ་ཅི་ཡང་མི་གསུང་བས། །བཅོམ་ལྡན་འདས་ཀྱི་ཞལ་ཞུགས་ནས། །དེ་ཡི་ཡེ་ཤེས་སུ་འགྱུར་ཏེ། །དེ་ཡིས་ལེན་ནི་གསུང་བར་མཛད། །བཅོམ་ལྡན་ཆོས་ཀུན་བདག་ཉིད་ཀྱི། །ཏིང་ངེ་འཛིན་གྱི་ཡིད་དུ་ནི། །བྱས་ནས་གསུང་ནི་རྗོད་བྱེད་པ། །ཕག་མོའི་རིས་ཐམས་ཅད་ཀྱིས་སོ། །ཀྱེ་ཀྱེ་དཔའ་བོ་ཐམས་ཅད་རྣམས། །ཡེ་ཤེས་ཤེས་བྱ་གཉིས་འདྲེས་པའི། །ཁྱེད་ཀྱིས་ཡེ་ཤེས་གང་མཐོང་བ། །དེ་ནི་དེ་དང་དེ་རུ་ཐིམ། །འོན་ཀྱང་
སོ་སོར་འཇུག་བྱེད་པ། །སེམས་ཅན་སྣ་ཚོགས་བསམ་པས་སོ། །དབྱེ་བ་མེད་ཉིད་རྒྱུད་ཆེན་པོར། །རྡོ་རྗེ་མཁའ་འགྲོ་སྡོམ་པ་དང་། །གཞན་ཡང་རྣལ་འབྱོར་རྒྱུད་རྣམས་ནི། །འདུས་པ་ལ་སོགས་དོན་ཆེན་པོ། །དེ་རྣམས་ཀྱིས་ནི་རྒྱུད་འདི་ཡི། །སྣ་ཚོགས་དོན་ནི་མངོན་བརྗོད་པ། །དེ་ཐམས་ཅད་ཀྱིས་ལས་ཀྱི་ཚོགས། །ལྡན་པས་རབ་ཏུ་གསལ་བར་བྱེད། །རྒྱུད་དུ་བརྗོད་བྱ་རྗོད་པ་པོར། །དེ་ཡིས་ཕྲ་མོར་འཇུག་པར་བྱེད། །རེ་རེའི་མཚན་ཉིད་བདག་ཉིད་ཅན། །ཐོད་པའི་དུམ་བུ་ལ་སོགས་ལྡན། །དེ་ལ་རྣམ་པར་ཤེས་པའི་ཆོས། །ཐོད་པ་ཡི་ནི་དུམ་བུར་བཤད། །སེམས་ཅན་ཀུན་གྱི་ལས་དང་ནི། །ཉོན་མོངས་བདེ་བར་ཤེས་པར་བྱ། །གཞན་དུ་ཀུན་མཁྱེན་རྒྱུད་ལ་ནི། །ཡི་གེ་སྐྱེ་བར་མི་འགྱུར་རོ། །ལོ་གཅིག་གི་ནི་བར་གྱི་ནི། །ཟླ་བ་བཅུ་གཉིས་དེ་ཤེས་བྱ། །དུས་ཚོད་དྲུག་གི་འཁོར་ལོས་སྒྱུར། །སེམས་ཅན་རྨི་ལམ་ལྟ་བུ་མཆོག །མི་ཤེས་དྲི་མས་བསྒོས་པ་ཡིས། །དེ་རྣམས་ཀྱིས་ནི་བདེ་མི་རིག །ཧཱ་ར་དོ་ལའི་རིམ་པ་ཡིས། །རྣམ་པར་ཤེས་པ་ཤེས་བཞིན་པར། །ཁྲི་ཕྲག་གཉིས་ལ་སྟོང་དང་ནི། །དྲུག་བརྒྱ་ཡིས་ནི་ལྷག་པའོ། །དབུགས་ཀྱི་ཆུ་ཚོད་དྲུག་ཅུ་ལ། །ཞག་གཅིག་ཏུ་ནི་རབ་ཏུ་གྲགས། །ཧཱ་ར་དོ་ལའི་དབུགས་རྣམས་ཀྱིས། །བསྒྱུར་བས་དོ་ལ་ལ་མཚན་པའོ། །གཉིས་ཀྱི་དབུགས་ནི་བློ་ལྡན་གྱིས། །ཕྱིར་འབྱུང་ནང་འཇུག་ཐིམ་པར་འགྱུར། །རྣལ་འབྱོར་པ་ཡིས་དགོངས་འགྱུར་ཏེ། །ཀུན་མཁྱེན་ཉིད་དུ་ཉེར་འོང་མིན། །ཕྲ་ཞིང་ཕྲ་བའི་རྣལ་འབྱོར་དུ། །གནས་ནས་ཐམས་ཅད་རྣམ་པར་སྤྱད། །དེ་ཡི་ཨང་ཀ་ཕྱི་རོལ་དུ། །ས་ལ་བཅུ་གཉིས་གཞག་པར་བྱ། །ཇི་ལྟར་ཉི་མའི་དབྱེ་བཤད་པ། །ཡན་ལག་བཅུ་གཉིས་ཀྱང་དེ་བཞིན། །རྒྱུ་སྐར་དང་ནི་གཟའ་རྣམས་ཀྱི། །འཆར་བ་དུས་ཐམས་ཅད་དུའོ། །རེ་རེ་ཡི་ནི་ཁམས་ཀྱི་ནི། །རང་གི་དུས་སུའང་འཆར་བར་འགྱུར། །དུས་སུ་འཆི་དང་དེ་བཞིན་གཞན། །རིམ་པ་འདི་ཡིས་འཆད་པར་འགྱུར། །དཱ་ཏྟྱཱ་ལ་སོགས་སྦྱོར་ཤེས་པས། །འདི་ནི་སྦྱོར་བ་ཕྱི་མོ་ལའོ། །ཉི་མ་བྱང་དུ་
བགྲོད་པ་ཡི། །རྒྱལ་གྱི་ཟླ་བ་སོགས་བརྩམས་ནས། །ཟླ་བ་བཅུ་གཉིས་དེ་ལྟར་དུ། །རིམ་པ་རིམ་པས་གཞག་པར་བྱ། །ཤར་ལ་སོགས་པའི་ཕྱོགས་བརྩམས་ནས། །སྔ་དྲོ་ནས་བརྩི་བློ་ལྡན་གྱིས། །གསུམ་པ་བཅུ་གསུམ་དེ་བཞིན་ཏེ། །བཞི་པ་ཡང་ནི་བཅུ་བཞི་པ། །ལྔ་པ་བཅྭ་ལྔ་པ་རུ་ནི། །བཤད་པར་བྱ་ཡིས་ད་ལྟ་ཉོན། །འདི་རྣམས་མཉམ་ཞིང་མཉམ་ལྡན་པར། །སྒྲུབ་པོས་མཐུན་པར་བྱ་བ་ཡིན། །དེ་ལ་མ་རིག་འདུ་བྱེད་དང་། །རྣམ་པར་ཤེས་དང་མིང་དང་གཟུགས། །སྐྱེ་མཆེད་དྲུག་དང་རེག་པ་དང་། །ཚོར་བ་དང་ནི་སྲེད་དེ་བཞིན། །ཉེ་བར་ལེན་དང་སྲིད་པ་དང་། །སྐྱེ་བ་དང་ནི་རྒ་ཤིའོ། །དེ་བཞིན་རོ་ཧི་ཏ་སོགས་ཀྱིས། །ཆུ་སྲིན་ལ་སོགས་རཱ་སི་རྣམས། །བཅུ་གཉིས་ཉིད་དུ་འདོད་པར་བྱ། །ཐོག་མར་མ་རིག་ཆུ་སྲིན་དང་། །རོ་ཧི་ཏའོ་དེ་བཞིན་གཞན། །གཉིས་པར་མོ་ཧི་ཏ་བུམ་པ། །འདུ་བྱེད་དུ་ནི་གསལ་བར་འགྲོ། །གསུམ་པར་བཟང་པོ་དང་ནི་ཉ། །རྣམ་པར་ཤེས་པར་དེ་རིག་བྱ། །བཞི་པར་ཁྱུ་མཆོག་དང་ནི་ལུག །མིང་དང་གཟུགས་སུ་འདོད་པར་བྱ། །ལྔ་པ་རུ་ནི་རུས་སྦལ་ཏེ། །བྲི་ཥ་སྐྱེ་མཆེད་དྲུག་ཆོག་གོ། །དྲུག་པར་ཆུ་སྲིན་དང་འཁྲིག་པ། །རྟག་ཏུ་རེག་པ་རུ་ནི་འགྲོ། །བདུན་པར་རཎྜ་ཀ། །དེ་བཞིན་དུ་ནི་ཚོར་བ་མཆོག །བརྒྱད་པར་མི་ཀི་ར་སེང་གེ། །མཆོག་ཏུ་མཐུན་མ་སྲེད་པའོ། །དགུ་པར་བི་དྲི་དང་བུ་མོ། །ཉེ་བར་ལེན་པ་རུ་ནི་འདོད། །བཅུ་པར་སེམས་གཡེངས་པ་དང་སྲང་། །སྲིད་པ་རུ་ནི་རབ་ཏུ་བརྗོད། །བཅུ་གཅིག་པ་རུ་རྨི་ལམ་དང་། །བྲི་ཀ་དང་སྐྱེ་དེ་བཞིན། །བཅུ་གཉིས་པ་རུ་སའི་དབང་ཕྱུག །གཞུ་དང་རྒས་ཤིང་ཤི་བའོ། །དེ་ལྟར་སའི་དབང་ཕྱུག་སོགས་དང་། །རྨི་ལམ་ལ་སོགས་དེ་བཞིན་གཞན། །གཡེང་སོགས་བྷི་དྲི་ཀ་ལ་སོགས། །དེ་བཞིན་མི་ཀི་ར་སོགས་དང་། །རཎྜ་སོགས་དང་ཆུ་སྲིན་སོགས། །རུས་སྦལ་སོགས་དང་ཁྱུ་མཆོག་སོགས། །བཟང་པོ་སོགས་དང་རྨོངས་པ་སོགས། །དེ་ཕྱིར་ཟླ་བ་རྣམས་བཅུ་གཉིས། །འདི་རྣམས་ཉི་མར་གང་སྐྱེས་པ། །དེ་ཡི་མཚན་ཉིད་དུ་ནི་འདོད། །སྐད་ཅིག་ཐང་ཅིག་ཡུད་ཙམ་
དུ། །ཚད་པའི་ཤིང་དུ་མཚོན་པར་བྱ། །མིག་ཕྱེ་བཙུམས་པར་སོན་པས་ཀྱང་། །ཤིན་ཏུ་ཕྲ་བའི་དུས་ལས་སོ། །གལ་ཏེ་སེམས་ནི་ཏིང་འཛིན་གནས། །རིམ་གྱིས་ས་བཅུ་གཉིས་པར་རོ། །ཡང་ན་ཏིང་འཛིན་མི་གནས་པ། །བར་མ་ཡི་ནི་འགྲོ་བར་འདོད། །དམན་པས་དམྱལ་བ་ལ་སོགས་པའི། །སྐྱེ་བོ་ཐམས་ཅད་འགྲོ་བའོ། །འདྲེན་མ་རྣམས་ཀྱི་བདེ་སྡུག་བསྔལ། །ལས་ཀྱིས་ཀུན་དུ་ལོངས་སྤྱོད་དོ། །གཉིས་སུ་མེད་པའི་དུས་ཅན་གྱིས། །ཐམས་ཅད་རང་བཞིན་ས་ལ་སྐྱེ། །དེ་ལྟ་ཡིན་ཀྱང་དེར་སྐྱེས་པའི། །རང་གི་ལས་ཀྱིས་འབྲས་བུ་ཟ། །དེ་ལྟར་རྣམ་པར་གཟུང་ཙམ་གྱིས། །ཐོད་པའི་དུམ་བུའི་རྣལ་འབྱོར་ལྡན། །སྔོན་དུ་བཤད་པའི་རིགས་པ་ཡིས། །ཁམས་ཀྱི་དབུས་སུ་འབབ་པའོ། །རླུང་གི་ཀུན་སྤྱོད་དུས་སུ་ནི། །རྣལ་འབྱོར་པ་ནི་སྐྱེ་བར་འགྱུར། །ཉི་མ་དགུ་དང་ཟླ་བ་དང་། །ལོ་ན་མཁས་པས་འཆི་ཤེས་བྱ། །དེ་ལ་རྒྱལ་སྲིད་རྩོམ་པར་འགྱུར། །དེ་ལྟ་ཉིད་དུ་ཐེ་ཚོམ་མེད། །རོ་ཧི་ཏ་ཡི་ཉ་མ་སྐྱེས། །ས་ཡི་དབང་ཕྱུག་ལ་འཆི་འགྱུར། །ས་ཡི་ཀུན་སྤྱོད་དུས་སྐྱེས་པ། །ཉི་མ་བརྒྱད་དང་ཟླ་བ་དང་། །ལོ་གཅིག་ན་ནི་མ་ཤི་ན། །བྱང་ཆུབ་སེམས་དཔར་ཐེ་ཚོམ་མེད། །རྨི་ལམ་ཀུན་སྤྱོད་དུས་སུ་ནི། །དཔའ་ཞིང་རྟུལ་ཕོད་ཕ་རོལ་གནོན། །བསོད་ནམས་དང་ནི་སྡིག་ཉིད་འདྲེས། །ལྔ་བཅུ་རྩ་བཞི་ན་འཆིའོ། །སེམས་གཡེང་བ་ལ་དགྲ་ཡིས་གསོད། །དེ་ཡི་ཉི་མར་སྐྱེས་པ་པོ། །དྲུག་ཅུ་རྩ་བཞིའོ་ཟླ་བཅུ་ན། །གལ་ཏེ་ཤི་བར་མ་གྱུར་ན། །དེ་ནི་འབྱོར་ཆུང་ཕྱི་ནས་ནི། །ཕུན་སུམ་ཚོགས་པར་འགྱུར་བ་སྟེ། །བྷི་ཏྲིའི་ཉིན་མོ་འཆི་བ་ཡིན། །དེའི་ཚེའི་ཉི་མ་ལ་སྐྱེས་པ། །ལྔ་པ་གཉིས་དང་གསུམ་གཅིག་གི། །ལོ་ན་ཤི་བར་མ་གྱུར་ན། །དེ་ལ་འདོད་དོན་ཀུན་དམན་ཞིང་། །ཕ་དང་མ་ནི་གསོད་པ་སྟེ། །དཀའ་ཐུབ་དང་ནི་འདྲེས་པ་ཡིས། །མི་ཀི་ར་ལ་རང་ཁྱིམ་འཆི། །གང་ཞིག་དེ་ཉིན་འདིར་སྐྱེས་པ། །གཉིས་ལྔ་གསུམ་དགུའི་ལོ་ན་ནི། །དེ་ལྟར་གལ་ཏེ་མ་ཤི་ན། །དེ་ནི་ཐམས་ཅད་མཁྱེན་པ་མཉམ། །ཡུགས་ས་མོ་ལ་ཆུར་འཆིའོ། །གང་ཞིག་དེའི་ཚེ་ཉི་མར་སྐྱེས། །གཉིས་དང་གསུམ་གྱི་ལོ་ན་
ནི། །མ་ཤི་ན་ནི་བློ་ལྡན་ཏེ། །སྡིག་པ་བྱེད་པོ་ནད་དང་ལྡན། །མི་དང་མི་མོ་རྣམས་སྐལ་བཟང། །ཆུ་སྲིན་ལ་འཆི་དེ་ཉིད་ལ། །སྐྱེས་པ་བཅུ་ལྔ་གསུམ་ལྔ་ཡི། །ཉི་མ་ཟླ་བ་ལོ་རྣམས་ལ། །མ་ཤི་ན་ནི་མདོར་ན་ཡང་། །ཡོན་ཏན་ཐམས་ཅད་ཡོངས་རྫོགས་ཏེ། །མཐའ་སྐྱོང་བ་ཡི་རྒྱལ་པོར་འགྲོ། །རུས་སྦལ་དང་ནི་འཁྲིག་པར་འཆི། །དེའི་ཚེ་ཉི་མ་ལ་སྐྱེས་པ། །གཉིས་བརྒྱད་དགུ་ཡི་ལོ་ན་འཆི། །དེ་ནི་ཤི་བར་མ་གྱུར་ན། །ཐ་མལ་སེམས་ཅན་དུ་ཤེས་བྱ། །དམན་དང་གཙོ་བོར་འགྲོ་བའོ། །ཁྱུ་མཆོག་ལ་ནི་རང་ཁྱིམ་འཆི། །དེ་ཡི་ཉི་མ་ལ་སྐྱེས་པ། །གཉིས་དང་བརྒྱད་དང་དགུ་ཡི་ནི། །ལོ་ན་མཁས་པས་མ་ཤི་ན། །དབང་ཕྱུག་ཐམས་ཅད་ཕུན་ཚོགས་ཤིང་། །ཁྲོ་སོགས་དང་ནི་ལྟ་བ་ངན། །བཟང་པོ་ལ་ནི་བསད་ནས་འཆི། །དེ་ཉིད་ཉི་མ་ལ་སྐྱེས་པ། །ལྔ་དང་དགུ་དང་བཅུ་ན་ནི། །སྐྱེ་བོ་འདིར་ནི་མ་ཤི་ན། །ཕོངས་ཤིང་ཆོས་ནི་ཕུན་སུམ་ཚོགས། །ཐམས་ཅད་ཀྱིས་ནི་བརྒྱན་པ་སྟེ། །གཏི་མུག་ལ་ནི་ཆུར་འཕོའོ། །དེ་ཡི་ཉི་མ་ལ་སྐྱེས་པ། །གཉིས་དགུའི་ཟླ་བ་དང་པོ་ལ། །གལ་ཏེ་དེ་ཚེ་མ་ཤི་ན། །ཐམས་ཅད་དམན་ཞིང་དམྱལ་བར་ཏེ། །བསམ་ངན་སྡིག་པའི་བདག་ཉིད་ཅན། །རྐུན་མོ་ལ་སོགས་པས་བསད་ནས། །རོ་ཧི་ཏ་ཡི་ཉི་མར་འཆི། །དེ་ལྟར་མདོར་བསྡུས་ཤེས་བྱ་སྟེ། །གལ་ཏེ་ཏིང་འཛིན་མ་ཐོབ་ནའོ། །སྐྱེ་རྣམས་མངོན་སུམ་བྱེད་པ་ཡི། །ལས་རྣམས་གཞན་དུ་འཐོབ་པ་ཡིན། །དེ་ཉིད་ཉེ་བར་གང་ཞིག་ན། །དེ་ནི་ལེགས་པར་བསྲུང་བྱ་སྟེ། །བཤད་པའི་རིམ་པའི་ཉི་མ་ལ། །འགྲོལ་བར་འདི་ལ་ཐེ་ཚོམ་མེད། །ཐོད་པའི་དུམ་བུ་རང་ཉིད་ནི། །འདི་རྣམས་ཤིས་བྱེད་བསྒོམ་པར་བྱ། །མཁའ་འགྲོར་བགྲོད་པའི་གང་ཞིག་རྩ། །དེའི་དབུས་བདག་ཉིད་སྤྱོད་པར་བྱེད། །དེ་ནི་སྒོ་ངའི་རིགས་ཤེས་བྱ། །གཏོར་བ་བསྐྱོད་པས་བསྲུང་བར་བྱ། །རྣལ་འབྱོར་པ་ལུས་འཛིན་པར་འགྱུར། །འདིར་ནི་མཐེའུ་ཆུང་བསྐྱོད་པར་བྱ། །རྐང་མཐིལ་དང་ནི་སྤྱི་བོའི་སྒོ། །མཚམས་རྣམས་ཀུན་དུ་བསྲུང་བར་བྱ། །ཨཱ་ལི་ཀཱ་ལི་མཉམ་བྱས་ནས། །ཁམས་རྣམས་ལ་ནི་ཐིམ་པར་བྱ། །རྣམ་པར་ཤེས་པ་མི་གཡོ་སྟེ། །ཐམས་ཅད་
དེའི་རང་བཞིན་དུ་བྱ། །མགོ་བོའི་དབུས་ལས་ངེས་པར་ཡང་། །འོག་ཏུ་ཁ་བལྟས་འབབ་འགྱུར་འགྲོ། །དེའི་དབུས་ཕྱོགས་སུ་ཕུན་ཚོགས་པ། །རྣལ་འབྱོར་པ་དེ་སྲིད་མཐར་འགྲོ། །ཨ་བ་དྷཱུ་ཏཱི་དུས་གྲངས་སུ། །ཇི་ལྟར་གསལ་བར་བཤད་པར་འགྱུར། །ཟླ་ཕྱེད་ལོ་གསུམ་ཤེས་བྱ་བ། །སྐྱེ་བོའི་དུས་སུ་འཆི་བ་ཡིན། །ལོ་བརྒྱ་རྣམས་ཀྱི་གང་ཞིག་ཚད། །དེ་རྣམས་དབུས་སུ་བརྟག་པར་བྱ། །རོ་མ་རྐྱང་མ་གཉིས་དག་གིའང་། །སྐྱེ་བའི་ཟླ་བ་ཉིད་མཚོན་བྱ། །ཟླ་བ་ཟླ་བར་འཇོམས་འགྱུར་བ། །ཉི་ཤུ་རྩ་བཞིའི་ཆ་ཅན་ནོ། །དབུགས་ནི་གཅིག་གི་གྲངས་ཀྱང་ནི། །དེ་ཕྱིར་ལོ་གཉིས་ལས་གཉིས་འགྱུར། །སུམ་འགྱུར་སོགས་པས་ཐམས་ཅད་རྣམས། །དེ་ནས་ཉི་ཤུ་རྩ་བཞིའི་འགྱུར། །མཁའ་བུག་མིག་ཏུ་ཤེས་པར་བྱ། །ཕྱི་ནས་ཆུ་ཚོད་རྣམས་སུ་འགྲོ། །ལོ་ནི་བཅུ་གཉིས་བར་དུ་ནི། །ལྔ་ལྔ་ཡི་ཡང་ཆུ་ཚོད་དོ། །དྲུག་ཅུའི་ལོ་ནས་ཉི་མ་འཕེལ། །སུམ་ཅུ་རྩ་བདུན་ཟླ་ཕྱེད་གསུམ། །ལྔ་ལྔ་རུ་ནི་འཕེལ་བ་རྣམས། །ཉིན་མོའི་ཆུ་ཚོད་ཨང་ཀ་བྱ། །སྐྱེ་བོ་ཀུན་གྱི་འཆི་བ་ནི། །ཟླ་ཕྱེད་གསུམ་དང་ལོ་ན་ཤེས། །ཉི་ཤུ་རྩ་བཞིའི་ལོ་རྣམས་ཀྱིས། །གང་ཕྱིར་མི་རྣམས་དཔྱོད་ལྡན་འགྲོ། །ས་ཡི་ཁྱིམ་དུ་ཞུགས་ནས་ནི། །ཡིད་ཀྱིས་འཆི་བ་བླུ་བ་སྟེ། །དཔལ་ཧེ་རུ་ཀ་གནས་ཞུགས་པའི། །ཐོད་པའི་དུམ་བུ་བསམ་པར་བྱ། །བགྲང་བའི་རིམ་པའི་རྣལ་འབྱོར་གྱིས། །ཉིན་ཞག་ཆུ་ཚོད་མཚོན་པར་བྱ། །ཇི་ལྟའི་དུས་སུ་མཚན་པ་ཡིས། །རིམ་གྱིས་རིམ་གྱིས་བྱ་བ་ཡིན། །བྱང་དུ་བགྲོད་པའི་དུས་ཚོད་དུ། །ལྷ་མོ་རྒྱལ་སོགས་རིམ་པའོ། །བཅུ་ལ་གཉིས་ཀྱིས་བསྒྱུར་དང་བཞི། །མཁས་པས་ཉི་མའི་ཆུ་ཚོད་དོ། །མཉམ་པའི་དུས་སུ་ཤེས་བྱ་བ། །རང་གི་དུས་སྦྱོར་དུ་འཆད་འགྱུར། །བཅུ་པོ་གསུམ་དང་དྲུག་པོ་སྟེ། །མཚན་མོའི་ཆུ་ཚོད་རྩོམ་པར་བྱེད། །བརྒྱ་ལ་དུས་ཀྱི་བྱེ་བྲག་གིས། །དེ་ཡི་དབུས་ལས་ཤེས་པར་བྱ། །བཅུ་ལ་གཉིས་ཀྱིས་བསྒྱུར་དང་དྲུག །ཉིན་རྣམས་ཆུ་ཚོད་ཨང་ཀ་བྱ། །བཅུ་ལ་གསུམ་གྱིས་བསྒྱུར་དང་བཞི། །མཚན་མོའི་ཆུ་ཚོད་དུ་ནི་བརྟག །བཅུ་ལ་གཉིས་ཀྱིས་བསྒྱུར་དང་བརྒྱད། །ཉི་མ་
རྣམས་ཀྱི་ཆུ་ཚོད་བཞིན། །བཅུ་ལ་གསུམ་བསྒྱུར་གཉིས་གཅིག་པུ། །མཚན་མོའི་ཆུ་ཚོད་དུ་ནི་བརྟག །མཉམ་དུས་དབུས་སུ་གཉིས་སྦྱར་ནས། །སུམ་ཅུ་གཅིག་པུར་རབ་ཏུ་བརྟག །སུམ་ཅུ་རྣམ་པ་གཉིས་རྣམས་ཀྱིས། །ཉིན་རེ་དག་གི་ཆུ་ཚོད་འབྱེད། །བཅུ་པོ་རྣམ་གསུམ་གཉིས་གཅིག་པུ། །ཉིན་མོ་རྣམས་ཀྱི་ཉི་མར་བརྟག །བཅུ་པོ་གཉིས་རྣམས་དང་ནི་བརྒྱད། །མཚན་མོ་ཡི་ནི་ཨང་ཀ་བྱ། །བཅུ་པོ་རྣམ་གསུམ་ཨང་ཀ་ལ། །བཞི་དང་ཡང་དག་ལྡན་པའོ། །བཅུ་ལ་གཉིས་ཀྱིས་བསྒྱུར་དང་དྲུག །མཚན་མོའི་ཆུ་ཚོད་ཨང་ཀ་བྱ། །བཅུ་ལ་གསུམ་གྱིས་བསྒྱུར་དང་དྲུག །ཉིན་དག་ཡེ་ཤེས་ཅན་གྱིའང་ཉིན། །བཅུ་ལ་གཉིས་ཀྱིས་བསྒྱུར་དང་བཞི། །རྡུལ་ཅན་རྣམས་ཀྱི་ཆུ་ཚོད་གྲགས། །ལྷོ་རུ་བགྲོད་པར་རབ་བཤད་དེ། །ནམ་ཟླའི་དུས་ཀྱིས་ཤེས་པར་འགྱུར། །བཅུ་ལ་གསུམ་གྱིས་བསྒྱུར་དང་བཞི། །ཉིན་ཕྱེད་ཆུ་ཚོད་ཡོངས་སུ་བཤད། །བཅུ་ལ་གཉིས་ཀྱིས་བསྒྱུར་དང་དྲུག །མཚན་མོའི་དེ་བཞིན་མཚོན་པར་བྱ། །བཅུ་ལ་གསུམ་བསྒྱུར་གཉིས་གཅིག་པུ། །ཉིན་རྣམས་ཆུ་ཚོད་དེ་བཞིན་ནོ། །བཅུ་ལ་གཉིས་ཀྱིས་བསྒྱུར་དང་དྲུག །མཚན་མོའི་ཆུ་ཚོད་དུ་ནི་གྲགས། །བཅུ་ལ་གསུམ་བསྒྱུར་པས་མཚོན་པ། །མཉམ་སོགས་ཆུ་ཚོད་དེ་བཞིན་ཏེ། །བཅུ་ལ་གསུམ་བསྒྱུར་མཚན་རྣམས་ཀྱི། །བི་ཤུའི་དབུས་སུ་གཉིས་དེ་བཞིན། །བཅུ་ལ་གཉིས་ཀྱིས་བསྒྱུར་དང་བརྒྱད། །ཉིན་རྣམས་ཀྱི་ནི་ཉིན་མོར་སེམས། །བཅུ་པོ་སུམ་འགྱུར་གཉིས་གཅིག་པུ། །རྡུལ་ཅན་ཆུ་ཚོད་དུ་བརྟགས་སོ། །བཅུ་པོ་གཉིས་འགྱུར་དང་ནི་དྲུག །ཉིན་རྣམས་ཆུ་ཚོད་རིམ་པས་སོ། །བཅུ་པོ་སུམ་འགྱུར་དང་ནི་བཞི། །རྡུལ་ཅན་ཆུ་ཚོད་རྣམས་དེ་བཞིན། །སུམ་བརྒྱ་དེ་བཞིན་དྲུག་ཅུ་ནི། །ཆུ་ཚོད་རྣམས་ཀྱི་དབུགས་བཀང་ངོ་། །ཆུ་ཚོད་གྲངས་ནི་དྲུག་ཅུ་ནི། །ཞག་གཅིག་ཏུ་ནི་རྣམ་པར་བརྗོད། །ཟླ་རྣམས་རིམ་པ་ཇི་ལྟ་བས། །དེ་བཞིན་རིམ་རྣམས་ཀྱིས་མཚན་ནོ། །ཆུ་ཚོད་དབུགས་སོགས་ཡོངས་རྫོགས་པ། །རིམ་པས་འཕེལ་དང་འཆད་པ་སྟེ། །ལས་དང་ལས་མིན་ཁྱད་པར་གྱིས། །དབུགས་ནི་རིམ་པས་ཡོངས་
སུ་གཟུང་། །དེ་ལྟར་མཁའ་མཁའ་རོ་དེ་བཞིན། །ཟླ་མིག་ཆུ་ཚོད་དེ་བཞིན་དུ། །ལོ་གཅིག་གིར་ནི་ཤེས་པར་བྱ། །ཞག་རྣམས་ཆུ་ཚོད་མཚོན་པས་སོ། །དེ་ལྟར་བྱས་པས་རྣལ་འབྱོར་པ། །དུས་ཀྱི་འཆི་བ་བླུ་བར་འགྱུར། །ལྟེ་བའི་དབུས་སུ་པདྨ་ཆེ། །ཇི་ལྟར་རྡོ་རྗེ་ཕག་མོའོ། །མཚམས་ཀུན་སོན་པའི་པདྨ་ལ། །བ་མོ་དང་འདྲ་འཛག་པར་བྱ། །ལྟེ་བའི་དབུས་མཐའ་བཅུ་གཉིས་སུ། །འགྲོ་བ་འོང་བ་བྱེད་པ་ཉིད། །སྲོག་གི་ཐིག་ལེ་དེ་བགྲོད་པའང་། །མཚམས་ཀུན་དུ་ནི་འབབ་པ་ཅན། །བློ་ལྡན་ལོ་གཅིག་སྦྱོར་བ་ཡིས། །དེ་ཉིད་དུ་ནི་ཐིམ་པར་བྱ། །ཏིལ་མར་མེ་ནི་འབར་བ་ཡི། །གཟུགས་ཅན་ཁ་ནི་འོག་ཏུ་བལྟས། །ཆུ་ཤིང་མེ་ཏོག་དང་འདྲ་བ། །མཁས་པ་ཡིས་ནི་འཕྱང་བཞིན་པའོ། །ལྟེ་བར་ཨ་ཡི་རྣམ་པའི་གཟུགས། །ཐུང་ངུ་རིང་པོ་འཕར་མའི་བདག །ཕྱག་རྒྱ་ལྷན་ཅིག་སྐྱེས་པའི་གཟུགས། །དབྱངས་དང་ཕྱི་མོ་གཉིས་མེད་གནས། །བསྒོམ་དང་སྒྲུབ་པ་མོ་བཤད་པ། །རྟུལ་པོ་བར་མ་རྣོན་པོ་དང་། །ལྷག་པར་རྣོ་དང་ཤིན་ལྷག་རྣོ། །ཐམས་ཅད་དེ་རྣམས་སུ་བརྟགས་སོ། །གང་ཕྱིར་རང་བདག་ཉིད་ཀྱིས་བསྒྲུབ། །དེ་ཕྱིར་གཞན་གྱིས་ཀྱང་བསྒྲུབ་བྱ། །ནུས་མཐུ་འཇིག་རྟེན་འདི་ཉིད་ལ། །སྐྱེ་བོ་ཀུན་ལ་ཡིད་ཆེས་བྱེད། །ཕྱི་ནས་གདུལ་བྱར་འགྲོ་བ་ཡིན། །རང་གཞན་དོན་གྱིས་སེམས་བརླན་པས། །དབྱངས་བཅུ་གཉིས་ནི་ཐོབ་བྱས་ནས། །དགེ་དང་མི་དགེ་བཤད་པར་བྱ། །འཁོར་ལོ་བཅུ་གཉིས་རྣམས་སུ་ནི། །དབྱངས་ཀྱི་བདག་པོ་མཚོན་པར་བྱ། །ཨ་ཡིག་གིས་ནི་ཡེ་ཤེས་དང་། །མཁས་པ་ཆོས་དོན་ཐམས་ཅད་འཐོབ། །ཨཱ་ཡི་ཡི་གེས་འཚིར་བ་དང་། །རྒས་དང་འཆི་བར་རྣམ་ངེས་བཤད། །སྲིད་པའི་འཇིགས་པ་མ་ལུས་པ། །མཐོང་འགྱུར་ལམ་ལས་ཉམས་པར་འགྱུར། །ཨི་ཡི་ཡི་གེ་ཡོངས་ཐོབ་པས། །ས་ཡི་དབང་ཕྱུག་ཏུ་ནི་འགྲོ། །ཨཱི་ཡི་ཡི་གེ་ཡང་དག་འཐོབ། །མྱུར་བ་ཉིད་དུ་འཆི་བར་འགྱུར། །ཨུ་ཡི་ཡི་གེ་ཐོབ་པ་ཡིས། །སྐྱེ་བ་དྲན་པར་འགྱུར་འགྲོ་བའོ། །ཨཱུ་ཡི་ཡི་གེ་གལ་ཏེ་འཐོབ། །ཡུལ་ལ་ཞེན་པ་ཅན་དུ་འགྲོ། །ཨི་ཡི་ཡི་གེ་ཡང་དག་འཐོབ། །
བྱང་ཆུབ་སེམས་དཔའ་ཉིད་དུ་འགྲོ། །ཨཻ་ཡི་ཡི་གེ་སེམས་རྨོངས་ཞིང་། །འགྲོ་བ་དྲུག་སོགས་འཇིགས་པར་འགྱུར། །ཨོ་ཡིག་ཕ་རོལ་ཕྱིན་པ་ཡི། །དེར་ནི་ས་འཐོབ་རྣམ་དེས་སྟོན། །ཨཽ་ཡི་ཨང་ཀ་ཐོབ་པ་ཡིས། །དམ་ཚིག་ཉམས་པར་འགྲོ་བ་ཡིན། །ཨཾ་ཡིག་བྱང་ཆུབ་སེམས་དཔའ་རྣམས། །མཐོང་བས་སྐད་ཅིག་ལ་གྲོལ་འགྱུར། །ཨཿཡིག་ཡང་དག་ཐོབ་པ་ཡིས། །ཕུང་པོ་ཁམས་ལ་ཐེ་ཚོམ་ཟ། །དེ་ལ་སོགས་པ་མ་ལུས་པ། །མ་གསུངས་ཀྱང་ནི་བསྒྲུབ་པར་བྱ། །བླ་མ་བསྟན་བཅོས་རང་ཉིད་དེ། །རྣམ་གསུམ་ཆོས་ཀྱིས་ཡིད་ཆེས་བྱ། །ཞེས་བྱ་བ་ནི་ཐོད་པའི་དུམ་བུ་ཅན་གྱི་རྣལ་འབྱོར་གྱི་མཚན་ཉིད་ཀྱི་སྒྲུབ་པའི་ཐབས་དང་དཀྱིལ་འཁོར་གྱི་འཁོར་ལོའི་སྒྲུབ་ཐབས་ཀྱི་མིང་ཅན་ཏེ་ཐོག་མའི་ཚིག་གོ། །རབ་ཏུ་བྱེད་པ་དང་པོའོ།། །།དེ་ནས་ཀེང་རུས་ཆེན་པོ་ཡི། །མཚན་ཉིད་བདག་གིས་བཤད་བྱ་སྟེ། །བོང་འདྲའི་རྣལ་འབྱོར་བདག་ཉིད་ཀྱིས། །ཡིད་ཀྱི་ཤུགས་ནི་འཇུག་མེད་བྱ། །ཁམས་མཉམ་པ་ཡི་རི་བོ་ནི། །སྤྱི་བོའི་གནས་སུ་བསྒོམས་པ་ཉིད། །པད་སྣལ་སྐུད་པ་ཁ་འོག་བལྟས། །གློག་ནི་ཀུན་དུ་འགྲོ་བ་མོ། །དེ་ཡི་དབུས་སུ་དཔའ་མོ་ཆེ། །བོང་བུའི་དབྱིབས་ཅན་བསྒོམ་པར་བྱ། །དཀྱིལ་འཁོར་ཐམས་ཅད་ཡང་དག་རྫོགས། །མཆོད་པ་ཆེན་པོ་བསམ་པར་བྱ། །དེ་ཡི་དབུས་སུ་དཔའ་ཆེན་པོ། །ཀེང་རུས་ཆེན་པོའི་སྦྱོར་བས་སོ། །སྐུད་པ་རྣམས་ཀྱིས་ལྟེ་དབུས་སུ། །སྲུབ་དང་བསྲུབ་པའི་སྦྱོར་བ་དག་ཉིད། །ཧཱ་ཡིག་རྣམ་པ་ཡི་ནི་གཟུགས། །མགོ་ལས་སྐུད་པ་གཅིག་པོ་སྟེ། །མེ་ལོང་རྣམ་པའི་སེམས་ཀྱིས་ནི། །ཐོད་པའི་དབུས་སུ་ངལ་བསོ་བྱ། །བུམ་པའི་བདུད་རྩིའི་རྒྱུན་རྣམས་ཀྱིས། །ཁུང་བུའི་དབུས་སུའང་འཛག་པར་འགྱུར། །ཐིམ་དང་ལོངས་སྤྱོད་སོགས་དངོས་པོས། །སེམས་ཀྱི་བགྲོད་པ་བསྟན་པར་བྱ། །ཁུང་དེར་བོང་བུའི་རྣལ་འབྱོར་གྱིས། །སྐྱེ་བ་བདུན་ཡང་མཐོང་བར་འགྱུར། །མ་ལས་བྱུང་བའི་དབྱིབས་གསུམ་དང་། །ཕ་ལས་བྱུང་བ་གསུམ་དེ་བཞིན། །ཁམས་ཐམས་ཅད་དང་བདུན་པོ་དེ། །རྣལ་འབྱོར་བསྒོམས་པས་མཐོང་བར་འགྱུར། །
བདེ་བའི་རང་བཞིན་ཁམས་ཀུན་གྱིས། །ཀེང་རུས་ཆེན་པོ་ཡང་དག་བྱུང་། །ལཱ་མ་ལ་སོགས་བསྒོམས་པ་ཡིས། །དེ་ལ་གནས་པའི་གཟུགས་མཐོང་འགྱུར། །བོང་བུའི་རྣམ་པའི་རྣལ་འབྱོར་དུ། །ཁྲག་གི་ཞལ་ཅན་རྩེ་གསུམ་ཅན། །ཚེ་སོན་པ་ཡང་རྣམ་པར་ཤེས། །ཚེ་རིང་བ་ཡང་མཐོང་བར་འགྱུར། །སྔ་མར་གླང་པོ་ཆེ་སོགས་པ། །དཔའ་རང་བདག་ཉིད་ཀྱིས་དེ་མཐོང་། །ཆེན་པོའི་རྩ་རྣམས་ཐམས་ཅད་དུ། །ཀེང་རུས་སྲོག་ནི་ཡོངས་འགྲོ་བྱ། །དེ་བསྐྱོད་བོང་བུ་ཤེས་བྱ་སྟེ། །སྣ་ཚོགས་རང་བཞིན་དེ་མཐོང་འགྱུར། །སཱ་ལུ་ལ་སོགས་བཟའ་བའི་དངོས། །དེ་དང་འདྲ་བར་དངོས་པོ་ཀུན། །མཐོང་སྟེ་དེ་ན་ཡོད་པ་མིན། །ཁམས་ཐམས་ཅད་ཀྱང་འཁྲུལ་པའོ། །ཇི་ལྟར་སྐྱེས་བུར་དུས་རྣམས་ཀྱིས། །གླང་ཆེན་ཁམས་ཀྱིས་ཤེས་པར་བྱ། །དེ་བཞིན་ཀེང་རུས་ཆེ་རྣམས་ཀྱིས། །སཱ་ལི་ལ་སོགས་ཁམས་རྐྱེན་གྱིས། །རང་བཞིན་འཇིག་རྟེན་པ་དམིགས་པས། །རང་བདག་ཉིད་ཀྱི་གཟུགས་དེ་མཐོང་། །རྣམ་པ་སྣ་ཚོགས་རིགས་དེ་རྣམས། །རྣལ་འབྱོར་འཛིན་རྣམས་ཀྱིས་ཤེས་བྱ། །མ་རིག་སོགས་ཉིན་སོ་སོ་ལ། །དེ་རྣམས་ཀྱིས་ནི་ནད་དུ་གྲགས། །རིམས་ལ་སོགས་པའི་ནད་ཙམ་གྱིས། །ནད་ཆེན་རྣམ་པར་མཚོན་པར་བྱ། །དེ་ལ་མ་རིག་ཉི་མའི་ནད། །ལེགས་པ་རྣམས་ཀྱིས་དེ་བསྲུང་བྱ། །འཕོ་བ་བཅྭ་ལྔ་པ་ལ་ནི། །འཆི་འམ་ལས་ནི་དགེ་མི་དགེ། །ཡེ་ཤེས་མེ་ཡི་བདག་ཉིད་ཆེས། །ནུབ་ལྔ་རྣམས་ན་གྲོལ་བར་འགྱུར། །རྒ་ཤི་ཡི་ནི་དུས་སུ་ནི། །འཕོ་བ་གསུམ་ན་འཆི་བ་སྟེ། །ཡང་ན་དགེ་དང་མི་དགེ་བའི། །ལས་ཀྱི་བག་ཆགས་མཐོང་བར་འགྱུར། །རང་རིག་བདེ་བ་གཟུང་བ་ཡིས། །ནུབ་བདུན་ན་ནི་གྲོལ་བར་འགྱུར། །སྐྱེ་བའི་ཉི་མའི་འཆི་བ་ནི། །འཕོ་བ་གསུམ་པ་ན་ཡང་སྟེ། །ལས་ནི་དགེ་མི་དགེར་འགྲོ་བ། །ནུབ་བདུན་ན་ནི་གྲོལ་བར་འགྱུར། །སྲིད་པ་ཡི་ནི་འཕོ་གསུམ་ནི། །འཆི་བར་འགྱུར་རོ་མཚན་མོ་ནི། །ལྔ་ན་དེ་རྣམས་གྲོལ་བར་འགྱུར། །ཡང་ན་དེ་ནི་མི་གྲོལ་ཏེ། །འདས་པ་བཞི་པའི་དུས་རྣམས་སུ། །བདེ་བ་དེ་ཀུན་རྟོགས་པར་གྱིས། །དེ་
ལྟའི་རིགས་འགྱུར་དེ་རྣམས་སུ། །ཇི་ལྟའི་རིམ་པས་ཤེས་པར་བྱ། །ལན་པའི་འཆི་བའི་འཕོ་བ་ནི། །གསུམ་པ་དང་ནི་བཞི་པ་ནའོ། །གལ་ཏེ་ལས་ནི་དགེ་མི་དགེས། །མཚན་མོ་བཅུ་ན་གྲོལ་བར་འགྱུར། །བསོད་ནམས་ཕུན་སུམ་ཚོགས་ཀུན་དང་། །བློ་དང་ལྡན་པས་འཕོ་མེད་བསྒྲུབ། །སྲེད་པའི་འཕོ་བ་གསུམ་ན་འཆི། །ལས་ནི་དགེ་དང་མི་དགེ་སྟེ། །ནོར་བུའི་ནང་སོན་ལ་བལྟ་བྱ། །མཚན་མོ་བདུན་ན་ངེས་གྲོལ་ཏེ། །ང་ཡི་ངག་ལ་ཐེ་ཚོམ་མེད། །ཚོར་བའི་འཕོ་བ་ལྔ་ན་ནི། །འཆི་འགྱུར་ལས་ཀྱང་ངོ་དེ་བཞིན། །དགུ་དང་བཅུ་དག་ན་གྲོལ་ཏེ། །རྡོ་རྗེ་པད་དབུས་སོན་པས་སོ། །རེག་པའི་ཉིན་མོའི་འཕོ་བ་ནི། །བརྒྱད་ན་འཆི་བར་ཤེས་པར་བྱ། །དེ་ལྟར་ལས་དགེ་མི་དགེ་སྲིད། །ཡན་ལག་དྲུག་གིས་ཐིམ་པར་བྱ། །གཅིག་དམན་ཉི་ཤུའི་ཉི་མ་ན། །གྲོལ་བའམ་ཡང་ན་མི་གྲོལ་ལོ། །སྐྱེ་མཆེད་དྲུག་གི་འཆི་བ་ནི། །ལས་དགེ་མི་དགེས་བལྟ་བྱ་སྟེ། །འཕོ་བ་བརྒྱད་ནི་ཤེས་པར་བྱ། །ཁམས་ཀྱི་ནད་རྣམས་དེ་མཐོང་འགྱུར། །ནུབ་བཅུ་ན་ནི་གྲོལ་འགྱུར་ཏེ། །འཁོར་ལོ་བཞི་རུ་ཐིམ་པར་བྱ། །མིང་དང་གཟུགས་ལ་འཆི་བའི་ལས། །གསུམ་པའམ་ནི་ལྔ་པ་ཡི། །འཕོ་བ་དག་ནི་ཤེས་པར་བྱ། །མཚན་མོ་བརྒྱད་ན་འགྲོལ་བའོ། །སེམས་ནི་ཐིག་ལེའི་གནས་སོན་པར། །བརྟེན་པར་འགྱུར་བའི་ཆོ་ག་བྱ། །རྣམ་པར་ཤེས་པའི་འཆི་བའི་ལས། །སླར་ཡང་བརྒྱད་དང་བཅུ་པ་ཡི། །འཕོ་བར་ས་ལ་ཤེས་པར་བྱ། །ཡང་ན་དེ་ཉིད་ལ་འགྲོལ་ཏེ། །བཅུ་དྲུག་ཕྱེད་ཕྱེད་ཀྱི་གཟུགས་ཅན། །ཡེ་ཤེས་རླུང་གིས་གཟུང་བར་བྱ། །འདུ་བྱེད་ཀྱི་ནི་འཆི་བའི་ལས། །གསུམ་དང་བདུན་གྱི་དེ་བཞིན་དུ། །བལྟས་པར་གྱུར་པས་འཕོ་བ་ཡིན། །དེ་ཡི་ལྟ་བས་གྲོལ་བར་འགྱུར། །ཐིག་ལེ་གཉིས་ནི་ཤེས་བྱས་ནས། །སྟེང་དུ་འགྲོ་བས་ཐིམ་པར་བྱ། །འདི་ཡིས་ནད་དང་འཆི་མེད་འགྱུར། །དེ་ཕྱིར་སངས་རྒྱས་རྡོ་རྗེ་འཆང་། །སུམ་ཅུ་བདུན་བདག་ཉིད་དགེ་བ། །སླར་ཡང་དཀྱིལ་འཁོར་བསྒོམ་པར་བྱ། །ཀེང་རུས་ཆེན་པོའི་གཙོ་བོ་ཡི། །རྣལ་འབྱོར་པ་ཡིས་ཐམས་ཅད་མཐོང་། །
ཞེས་བྱ་བ་ནི་བོང་བུའི་རྣལ་འབྱོར་ལ་ཀེང་རུས་ཆེན་པོ་སྒོམ་པ་པོའི་མན་ངག་དེ་ཁོ་ན་ཉིད་དང་ལྡན་པ་སྟེ་རབ་ཏུ་བྱེད་པ་གཉིས་པའོ།། །།དེ་ནས་ཀེང་རུས་ཀྱི་སྦྱོར་བས། །ཡུལ་ཡུལ་རང་གི་སྐྱེ་གནས་སྐྱེས། །རྣལ་འབྱོར་མ་དང་དཔའ་གཙོ་མོ། །ཡེ་ཤེས་ལྡན་པས་ཤེས་པར་བྱ། །ཨ་ཊྚར་དགོད་པར་རྡུལ་ལྷ་མོ། །རྣལ་འབྱོར་མ་ནི་ཀུན་གྱི་གཙོ། །དེ་ཡི་གནས་སུ་གནས་ལྷ་མོ། །ཀ་དམ་ཤིང་ལ་དྲིལ་ཆེན་མ། །ལྷ་མོ་དེ་ཡི་རྟག་པའོ། །ཞིང་སྐྱོང་ཞལ་ཆེན་པོ་ཡིན་ནོ། །ཀེང་རུས་བདེ་བའི་སྒྱུ་མ་ཡིན། །བདག་ཉིད་ཆེ་ལས་ངེས་འབྱུང་འགྱུར། །དེ་རྣམས་ཀེང་རུས་ཀྱིས་རྒྱས་བཏབ། །ཨོ་ཌྱན་བུ་ག་ལས་སྟེང་སོན། །རང་ཁམས་ལས་བཞེངས་རྣམ་པར་ཤེས། །རིམ་གྱིས་ཡུལ་ཐམས་ཅད་དུ་འགྲོ། །ཀོ་ལླའི་རི་དང་བ་རུ་ཎྱ། །དེ་བི་ཀོ་ཊ་བིར་ཛ་ཀྃ། །ཨེ་རུ་ཎྱ་དང་དེ་ནས་གྲོང་། །ཨཻ་ལའི་གྲོང་དང་ཁ་ཆེ་དང་། །མ་རུའི་གྲོང་དང་དེ་བཞིན་དུ། །པུཎྜ་བ་དྷ་ན་ཡི་ཞིང་། །ཛ་ཡནྟི་དང་པྲྀཥྚའི་གྲོང་། །སཽ་པ་རེ་དང་སྤྱོད་དེ་བཞིན། །ཨོ་ཌྱན་དང་ནི་འབར་བ་འཛིན། །ཀྵེ་རེ་ཀེ་དང་སྒྱུ་མའི་གྲོང་། །ཨཾ་བུ་ཀེ་དང་རྒྱལ་པོའི་ཁབ། །བོད་ཀྱི་ཡུལ་དང་དེ་བཞིན་དུ། །མཱ་ལ་བ་དང་པུ་ལིར་སོགས། །ཉི་ཤུ་རྩ་བཞིའི་གནས་ཡིན་ནོ། །རི་ཡི་རྩེ་དང་ཏཱ་ལའི་ཤིང་། །པ་ཊ་ཨ་མྲ་གསེར་དེ་བཞིན། །རལ་པའི་ཤིང་དང་གཞན་གནོན་དང་། །རི་ཡི་རྩེ་མོར་ཡང་དག་རྟེན། །ཐང་ཆེན་པོ་དང་རྩ་ཁུང་དང་། །ཨ་ཤྭད་ཐ་དང་ཁང་པ་བརྩེགས། །ཨུ་དུམ་བཱ་ར་ཤལ་མ་ལི། །ཀ་རཉྫ་མྱ་ངན་མེད་ལ་བརྟེན། །གསེར་ཤིང་དང་ནི་སཱ་ལ་དང་། །ཙུ་ཏ་དྷཱ་ཏུ་དིལ་ལ་ཀི། །བྲག་བརྩེགས་པ་དང་སྦྲང་རྩིའི་ཤིང་། །སྔོན་དུ་ཡང་དག་བརྟེན་པའོ། །རྡུལ་གྱི་སྐྱེ་གནས་ཆོལ་པའི་ལུས། །སྟོབས་ཆེན་དང་ནི་རྣལ་འབྱོར་གནས། །ཐོད་པ་ལས་དང་རྡུལ་རབ་གཏུམ། །སྐྱེ་གནས་དཔའ་བོ་ཆོལ་པའི་ལུས། །སྟོབས་ཆེན་རྣམས་དང་ཁྲག་དེ་བཞིན། །དཔའ་བོའི་སྐྱེ་གནས་ནུས་ལས་བྱུང་། །སྐྱེ་གནས་ཟླ་བ་ལས་བྱུང་དང་། །སྟོབས་ཆེན་རིགས་ལས་བྱུང་བ་དང་། །འཇིགས་བྱེད་ཁྲག་ལས་བྱུང་དེ་བཞིན། །ཚིལ་དང་གཡུལ་ངོ་ཆེ་ལས་སྐྱེས། །
མེ་ཏོག་སྐྱེ་གནས་གཉིས་དེ་བཞིན། །སླར་ཡང་དེ་ཉིད་ཚིག་དྲན་བྱ། །འདི་རྣམས་རིགས་ལས་བྱུང་ལྷ་མོ། །ལྷན་ཅིག་སྐྱེས་གཟུགས་བུ་མོ་ཡིན། །དཔལ་ཆེན་མོ་དང་མེ་ཡི་ཁ། །ཞིང་སྐྱོང་མཆོག་གི་ཞལ་ཅན་ཏེ། །མེ་ཡི་གདོང་ཅན་ཞེས་གྲགས་པ། །ཀེང་རུས་བདེ་བ་རིག་པ་པོའོ། །དེ་ཡི་འཕོ་བ་འཛིན་པ་ནི། །རྣལ་འབྱོར་མ་གཉིས་སྤྲོ་བར་བྱེད། །དེ་ཡིས་དེ་འདོད་སྦྱོར་བ་ཡིས། །དཔའ་བོ་གཉིས་མེད་ཡང་དག་བརྟེན། །སེམས་ཅན་རྣམས་ལ་ཕན་དོན་དུ། །རྡོ་རྗེའི་དཀྱིལ་འཁོར་དུ་གནས་ཏེ། །ཀུན་ཏུ་སྤྱོད་པའི་བགྲོད་གཟུགས་ཀྱིས། །ཡུལ་ཐམས་ཅད་དུ་འགྲོ་བ་ཡིན། །ལང་དབང་ཕྱུག་མ་གྱེན་བརྫེས་སྐྲ། །ཞིང་སྐྱོང་གཙིགས་པ་ཆེན་པོ་སྟེ། །གྱེན་བརྫེས་སྐྲ་ཞེས་བཤད་པ་ནི། །ཀེང་རུས་བདེ་བའི་རྒྱུ་ཅན་ཏེ། །རྣལ་འབྱོར་མ་མཆོག་ཁྱད་པར་ནི། །ལྷག་མ་སྔོན་གསུངས་བཞིན་ཤེས་བྱ། །རྣ་བ་གཅུས་དང་དྲག་མོ་སྟེ། །ཞིང་སྐྱོང་བ་ནི་ལུས་ཆེན་ནོ། །དེ་ནས་ཡང་ན་རྒྱུ་ཅན་དང་། །མཆོག་དབང་ཕྱུག་མ་དྲག་ཆེན་པོ། །ཀེང་རུས་བདེ་བའི་སྟོང་པ་ཡིས། །གོ་འཕང་མཆོག་ཏུ་ཤེས་པར་བྱ། །ཞི་བའི་གཟུགས་དང་མེ་དང་ནི། །ཞིང་སྐྱོང་ཨ་ཊྚར་དགོད་པའོ། །མེ་དང་འཁྲུལ་ཆེན་དག་དང་ནི། །སྒྲ་ཆེན་པོར་ཡང་ཤེས་པར་བྱ། །ཀེང་རུས་ཀྱི་ནི་གཏུམ་མོ་ནི། །འབར་བའི་དབུས་སུ་བདེ་བ་ཆེ། །མེ་ཡི་གདོང་དང་བརྩོན་ཆེན་མ། །ཞིང་སྐྱོང་བ་ནི་དྲིལ་བུའི་སྒྲ། །བརྩོན་འགྲུས་ཆེན་མོ་ཞེས་གྲགས་པ། །ཀེང་རུས་བདེ་བའི་འབྱུང་གནས་ཡིན། །དམར་སེར་གྲགས་དང་འཇིགས་མིག་མ། །ཞིང་སྐྱོང་བྱིན་པ་ཆེན་པོ་སྟེ། །འཇིགས་བྱེད་མ་དང་སྤྱན་མ་འམ། །ཀེང་རུས་བདེ་བའི་འགེངས་བྱེད་པའོ། །འཇིགས་ཆེན་མ་དང་སྟོབས་ཆེན་མ། །ཞིང་སྐྱོང་གླང་པོ་ཆེན་པོ་སྟེ། །ཡང་ན་གླང་པོའི་རྣ་མ་དང་། །ཞིང་སྐྱོང་གླང་པོའི་རྣ་ཅན་ཏེ། །ཀེང་རུས་བདེ་བ་ལ་ཞོན་པ། །རྩ་ཐམས་ཅད་དུ་དེའི་རང་བཞིན། །བ་ལང་རྣ་མ་རིའི་རྩེ་མ། །ཞིང་སྐྱོང་འཇིགས་བྱེད་ཆེན་པོ་སྟེ། །དེ་ནས་སླར་ཡང་སྦུག་མའི་བྱིན། །ཀེང་རུས་བདེ་བ་ལ་ཐིམ་པའོ། །བགྲོད་པ་མོ་དང་འཇིགས་ཞལ་མ། །ཞིང་སྐྱོང་བ་ནི་གཙིགས་པ་སྟེ། །རྨོངས་པར་བྱེད་མ་
ཞལ་ཆེན་པོ། །ཀེང་རུས་བདེ་བ་ལ་ཆགས་པའོ། །རོ་ལངས་མ་དང་བཞིན་བཟང་མོ། །ཞིང་སྐྱོང་བ་སྤུའི་བྱིན་པ་ཅན། །ཡང་ན་གྱེན་གཙིགས་ཆེན་པོ་སྟེ། །ཀེང་རུས་བདེ་བ་ལ་ཟའོ། །ཙཱ་མུཎྜ་དང་ལྷ་ཆེན་མོ། །ཞིང་སྐྱོང་བུམ་པའི་རླིག་པ་ཅན། །ཡང་ན་ལྷ་མོ་ཆེན་མོ་དང་། །ཞིང་སྐྱོང་བུམ་པའི་གྲུལ་ཅན་ཏེ། །ཡང་ན་ལྷ་ཆེན་པོ་ཡིན་ནོ། །ཀེང་རུས་བདེ་བར་གར་བྱེད་པའོ། །རབ་གུས་མ་དང་རལ་གསུམ་མ། །ཞིང་སྐྱོང་གཙིགས་པ་ཆེན་པོ་སྟེ། །ཡང་ན་རལ་པ་གསུམ་ཤེས་བྱ། །ཀེང་རུས་བདེ་བའི་ཕ་རོལ་ཕྱིན། །གློག་གི་གདོང་མ་དྲིལ་སྒྲ་མ། །ཞིང་སྐྱོང་འུག་པའི་གདོང་ཅན་ཏེ། །དྲིལ་བུའི་སྒྲ་རུ་ངེས་གྲགས་པ། །འདིར་ནི་ཀེང་རུས་བདེ་ཟ་བའོ། །མེ་ཞལ་མ་དང་ལྷ་ཆེན་མོ། །ཞིང་སྐྱོང་འཇིགས་པར་བྱེད་པ་སྟེ། །ཡང་ན་ལྷ་ཆེན་པོར་ཤེས་བྱ། །ཀེང་རུས་བདེ་བའི་གཟི་ཅན་ནོ། །ཀ་རཉྫ་གནས་མ་དེ་བཞིན། །གཞན་ཡང་དྲིལ་བུ་ཆེན་མོར་གྲགས། །ཞིང་སྐྱོང་བ་ནི་སྟོབས་ཆེན་ཏེ། །ཀེང་རུས་བདེ་བས་མཛེས་པ་ཡིན། །གསང་གྲགས་མ་དང་ལྷ་ཆེན་མོ། །དྲག་གཟུགས་མ་དང་སྟོབས་ཆེན་མ། །ཞིང་སྐྱོང་སྒྲ་ཆེན་པོ་དང་ནི། །དྲག་པོའི་གཟུགས་དང་སྟོབས་ཆེན་ཏེ། །ཀེང་རུས་བདེ་ལས་ཡོངས་བྱུང་བའི། །མཆོག་ཏུ་མི་འགྱུར་རྣལ་འབྱོར་ལྡན། །གཏུམ་མོ་དང་ནི་དྲག་མོ་དང་། །ཞིང་སྐྱོང་བ་ནི་འབར་བར་གྲགས། །དེ་ནས་ཡང་ན་དྲག་པོའི་གཟུགས། །ཀེང་རུས་བདེ་བའི་ཆ་ལུགས་ཅན། །འཇིག་རྟེན་གྱི་མ་གྱེན་སྐྲ་མོ། །ཞིང་སྐྱོང་རི་རབ་ཆེན་པོ་སྟེ། །དེ་ནས་ཡང་ན་གྱེན་བརྫེས་སྐྲ། །ཀེང་རུས་བདེ་བ་སྒོམ་པ་པོའོ། །འཇིགས་པ་མོ་དང་སྟོབས་ཆེན་མ། །ཞིང་སྐྱོང་འཇིགས་པ་དེ་བཞིན་ཏེ། །སྟོབས་པོ་ཆེ་དང་འཇིགས་གཟུགས་མ། །ཀེང་རུས་བདེ་བའི་སྙིང་པོ་ཅན། །སྲུལ་མོ་དང་ནི་ལྷ་ཆེན་མོ། །ཞིང་སྐྱོང་བརྟུལ་ཞུགས་ཆེན་པོ་སྟེ། །ཀེང་རུས་བདེ་བའི་ནུས་པ་ཡིས། །དེ་ཕྱིར་དབང་པོ་ཀུན་བདེ་བའོ། །བི་པན་ས་མ་དྲིལ་ལི་སྒྲ། །ཞིང་སྐྱོང་རྣ་བ་ཆེན་པོ་ཅན། །ཡང་ན་དྲིལ་ལི་སྒྲོགས་པ་སྟེ། །ཀེང་རུས་བདེ་བ་འཛག་པའོ། །ལྷན་སྐྱེས་གྲགས་མ་འབྱོར་གྲགས་མ། །དཔའ་བོ་ཆེན་པོ་དེ་བཞིན་མཆོག །ཞིང་སྐྱོང་ཤིན་ཏུ་ཐུབ་དཀའ་སྟེ། །ཀེང་རུས་བདེ་བ་
དཔོག་བྱེད་པའོ། །དབང་བསྐུར་མཉམ་མ་སྐྱེས་དབང་ཕྱུག །ཞིང་སྐྱོང་སྣ་ཚོགས་དབང་ཕྱུག་སྟེ། །ཀེང་རུས་བདེ་བ་ལ་གནས་པས། །རང་ཉིད་འདོད་པའི་བདེ་བར་འགྱུར། །རྡོ་རྗེ་མགོ་བོ་རྩེ་གསུམ་དང་། །དར་དང་རྡོ་རྗེ་མདུང་ཐུང་དང་། །གཏུན་ཤིང་ཞགས་པ་དེ་བཞིན་དུ། །རྡོ་རྗེའི་ལྕགས་སྒྲོག་ལྕགས་ཀྱུ་དང་། །ཞགས་པ་གཤོལ་དང་ཁ་ཊྭཱཾ་ག །རྡོ་རྗེ་ལྕགས་སྒྲོག་ཕྱག་ཅན་དང་། །དབྱུག་པ་མདུང་ཐུང་གྲི་གུག་དང་། །མདུང་ཐུང་རྡོ་རྗེ་ལྕགས་སྒྲོག་ཅན། །གྲི་གུག་རལ་གྲི་དེ་བཞིན་དུ། །རྡོ་རྗེ་དང་ནི་མདུང་ཐུང་གཤོལ། །ག་ད་རྡོ་རྗེ་ཀྱོ་དེ་བཞིན། །ཆུ་སྲིན་རྒྱལ་མཚན་ཐོ་བའོ། །ཞི་བའི་ཞལ་དུ་ཤེས་བྱ་དང་། །གཙིགས་མ་དང་ནི་རབ་འཇིགས་མ། །ཆོས་ཀྱི་དབང་ཕྱུག་རབ་སྟེར་མ། །རྣལ་འབྱོར་དབང་ཕྱུག་ཀུན་མཆོག་མ། །འདོད་པའི་དབང་ཕྱུག་རབ་སྟེར་མ། །ཡང་དག་རྨོངས་པའི་ཞིང་སྟེར་མ། །གཙིགས་མ་རྨོངས་པའི་ཞིང་མ་དང་། །འཇིགས་ཆེན་མ་དང་དེ་བཞིན་གཞན། །གཏུམ་ཞལ་མ་དང་དགྲ་འཇོམས་མ། །རྨོངས་པའི་ཞིང་གི་འཇིགས་བྱེད་མ། །དཔའ་བོ་ཀུན་ལ་མཆོག་སྟེར་མ། །ལོངས་སྤྱོད་གྲོལ་བ་སྡིག་འཇོམས་མ། །བདེ་བ་ཀུན་གྱི་མཆོག་སྟེར་མ། །བསམ་པ་ཐམས་ཅད་རྫོགས་བྱེད་མ། །གཙིགས་མ་དྲག་ཅིང་འཇིགས་པ་མོ། །ཤ་ཡི་གདན་ཅན་མ་དང་གཞན། །བདེ་བའི་དབང་ཕྱུག་མཆོག་སྟེར་མ། །མཛེས་ཤིང་ཐམས་ཅད་དགོས་མ་དང་། །འཇིག་རྟེན་དངོས་གྲུབ་སྟེར་བ་མོ། །ལྷ་མོ་གཙིགས་མ་འཇིགས་པར་བྱེད། །ཤིན་ཏུ་དྲག་མོ་གཟུགས་བཟང་མོ། །དབང་ཕྱུག་ཐམས་ཅད་རབ་སྟེར་མ། །དངོས་གྲུབ་ཐམས་ཅད་རབ་སྟེར་མ། །འཇིགས་མ་སྒྲུབ་མ་གྲགས་སྟེར་མ། །ནག་པོའི་གཟུགས་དང་དྲག་ཆེན་པོ། །དགྲ་ཐམས་ཅད་ཀྱི་འཇིགས་པ་ཞོན། །ཐམས་ཅད་དབང་དུ་བྱེད་མ་དང་། །སེམས་ཅན་ཐམས་ཅད་འཇིགས་བྱེད་མ། །འཁོར་ལོ་ཀུན་རྒྱལ་མ་ཉིད་དང་། །འཇིགས་པར་བྱེད་དང་དེ་བཞིན་གཞན། །ཞི་བའི་ཞལ་མ་གཟུགས་བཟང་མ། །སྒྲུབ་པོ་རྣམས་ལ་མཐུན་བྱེད་མ། །སྙན་གྲགས་མ་དང་རབ་སྟོད་མ། །དེ་ལྟར་ཐམས་ཅད་རིམ་བཞིན་ནོ། །ཨཊྚར་དགོད་པའི་
འཁོར་ལོར་བཞུགས། །ཀོ་ལའི་རིར་ནི་རོ་ལ་བཞུགས། །བ་རུ་ཎྱེ་སིདྡྷ་སིཾ་པ་ཌིར། །ལྷ་མོའི་མཁར་དུ་ཡི་དགས་གནས། །བི་ར་ཛ་རུ་ཤིང་ལེབ་བཞུགས། །ཨེ་ར་ནྱ་རུ་ཕག་ལ་བཞུགས། །དེ་ནས་གྲོང་དུ་ཡི་དགས་བཞུགས། །ཨེ་ལེའི་གྲོང་དུ་བོང་བུར་གནས། །ཁ་ཆེར་ནོར་སྦྱིན་ལ་ནི་གནས། །མ་རུའི་ཡུལ་དུ་མ་ཧེར་གནས། །གྲོང་དུ་མགོ་ཡི་རྒྱབ་ཏུ་སྟེ། །པུཎྜ་བ་དྷར་རོ་ལ་གནས། །ཛ་ཡན་ཏྱ་རུ་ཀེང་རུས་གནས། །པྲིཥྚིའི་གྲོང་དུ་བརྩེགས་པར་གནས། །སོ་པཱ་རེད་པར་ཏ་ལ་གནས། །ཀ་རཉྫར་གནས་ཙ་རི་ཏྲཱེར། །ཨོ་ཌྱན་དུ་ནི་བདུད་ལ་བཞུགས། །འབར་བ་འཛིན་པར་རོ་ལགནས། །ཀྵི་རི་ཀར་ནི་མེ་ལ་གནས། །སྒྱུ་ཡི་གྲོང་དུ་རེ་ཡི་སྟེང་། །ཨཾ་བུ་ཀེ་རུ་སེང་གེར་གནས། །རྒྱལ་པོའི་ཁབ་ཏུ་འཁོར་ལོར་གནས། །བོད་ཀྱི་ཡུལ་དུ་ཡི་དགས་གནས། །རོར་གནས་མ་ལ་བར་དེ་བཞིན། །ཀེང་རུས་ཀྱི་ནི་རབ་སྦྱོར་བས། །དེ་ལྟའི་ཞིང་དུ་དངོས་གྲུབ་འགྱུར། །ཀེང་རུས་ལས་བྱུང་བདེ་བ་ནི། །རྩ་ཡི་རྩ་བ་ལས་ཡོངས་ལངས། །མཚམས་རྣམས་ཀུན་དུ་ཁྱབ་པར་ནི། །ཡེ་ཤེས་ཁུ་བ་དེ་མཐོང་འགྱུར། །མགོ་མེད་ལས་བྱུང་བའི་ངག་འདི། །ཁམས་དེ་ཉིད་ནི་ཟ་བའོ། །དབང་པོ་གཉིས་ཀྱི་མཁའ་གནས་ལས། །དེ་ཡིས་བདེ་བ་མཐོང་བར་འགྱུར། །ཐམས་ཅད་དཔའ་བོ་རྣལ་འབྱོར་མ། །མཁས་རྣམས་ཅུང་ཟད་མེད་པར་འགྱུར། །དེའི་རང་བཞིན་འགྲོ་སྒྱུ་མར་ནི། །ལྟོ་བ་བསྡུས་པ་མཐོང་བར་འགྱུར། །འཕྱང་བ་ཡིས་ནི་ཐམས་ཅད་དུ། །བདུད་རྩི་དེ་ནི་འགྲོ་དང་འོང་། །འཛག་བཞིན་པ་ཡིས་རྣལ་འབྱོར་མ། །རང་གི་ཞིང་སྐྱེས་རྣམ་པར་སྤྲོ། །ཕྱི་ནང་བདག་ཉིད་གསང་བ་ཡི། །དེ་རྣམས་ལ་ནི་མཆོད་ཆེན་བྱ། །མི་ཤེས་རི་བོ་གཅོད་པ་ཡིས། །དངོས་གྲུབ་ཐམས་ཅད་འགྲུབ་པར་འགྱུར། །སྔོན་བཤད་དཀྱིལ་འཁོར་དབུས་སུ་ནི། །དེ་ནས་ཀེང་རུས་བསྒོམ་པར་བྱ། །སྐྱེ་འགྲོའི་གཙོ་བོའི་དཔའ་བོ་ཡང་། །ཤེས་རབ་ཐབས་ཀྱི་རང་བཞིན་ཅན། །གསུངས་པའི་ཡུལ་དུ་རྣལ་འབྱོར་མ། །དེ་ནས་རབ་གཏུམ་སོགས་མིང་སྟེ། །སྒྲུབ་པ་པོས་ནི་དངོས་གྲུབ་རྒྱུར། །དེར་ནི་འདུ་བ་
ཡང་བྱའོ། །བཟའ་དང་བཏུང་སོགས་ཡང་དག་བརྩམ། །ཉེར་སྤྱོད་ལྔ་སོགས་མཆོད་པ་དང་། །ཉེར་སྤྱད་གཏོར་མའི་སྣོད་རྣམས་ནི། །རློན་པའི་ཤ་དང་ཉ་ལ་སོགས། །བཟའ་དང་རྫས་རྣམས་ཐམས་ཅད་དང་། །བདུད་རྩི་ལྔ་དང་དེ་བཞིན་གཞན། །གཡོན་པར་སྣོད་རྣམས་བཞག་བྱས་ནས། །གཡས་སུ་ཁྲོ་བོ་བསྟན་པར་བྱ། །ཤིང་གཅིག་དང་ནི་དུར་ཁྲོད་དམ། །རི་དང་ཁྲོད་དང་ཁྱིམ་དང་ནི། །གྲོང་དང་གྲོང་ཁྱེར་ངོས་རྣམས་དང་། །ཁང་སྟོང་ལམ་གྱི་བཞི་མདོ་དང་། །ཆུ་ལ་འགྲོ་དང་ཐང་ལ་རྒྱུ། །ས་དང་མ་མོའི་ཁྱིམ་དང་འགྲམ། །ནག་མོ་དྲག་མོ་དྲག་ཆེན་མོ། །ལྷ་སྦྱིན་ཡང་དག་རྟེན་མ་དང་། །ནག་མོ་གཙིགས་དང་འཇིགས་བྱེད་དང་། །དགའ་ལས་འདས་དང་ལོག་འདྲེན་དང་། །ཙཱ་མུཎྜི་དང་དྲག་གཟུགས་མ། །ལྷ་མོ་དབུ་མ་དང་ནི་མ། །རྒྱལ་མ་རྣམ་པར་རྒྱལ་མ་དང་། །མི་ཐུབ་མ་དང་གཞན་མི་ཐུབ། །བཟང་ནག་མོ་དང་ནག་ཆེན་མོ། །སྦོམ་ནག་མོ་དང་རྣལ་འབྱོར་མ། །དབང་མོ་ཟླ་བ་མོ་དྲག་མོ། །སྡང་མ་འཕྱང་མ་སུམ་ཅུའི་དབང། །ཀམ་པོ་ཛམ་མེ་མ་འཇིབ་མ། །གྲོང་དུ་གནས་པའི་རྣལ་འབྱོར་མ། །དྲག་གཟུགས་མ་དང་གཟུགས་ཆེན་མ། །མཆེ་མ་དྲག་མོ་གཙིགས་པ་མོ། །ལྷ་མོ་ཐོད་པའི་ཕྲེང་ཅན་དང་། །ཁ་ཊྭཱཾ་ག་ནི་འཛིན་མ་དང་། །མིའུ་ཐུང་མ་དང་དགྲ་སྟའི་ཕྱག །རྡོ་རྗེའི་ཕྱག་ཅན་དེ་བཞིན་གཞུ། །མཁའ་འགྲོ་མ་ལྔ་དེ་ཉིད་ཆེ། །ལས་རྣམས་ཐམས་ཅད་རབ་སྒྲུབ་མ། །སྦྱོར་བའི་དཀྱིལ་འཁོར་རྒྱལ་མོ་དང་། །རྡོར་དབང་ཕྱུག་མ་གཙོ་དེ་བཞིན། །དེ་བཞིན་གཤེགས་པའི་སྐུ་ཆེན་པོ། །རྡུལ་མེད་རྣལ་འབྱོར་སྟོང་པ་ཉིད། །རྡོ་རྗེའི་དབང་ཕྱུག་བཀའ་ཡིས་ནི། །ཀུན་ནས་འདིར་ནི་སྤྱན་འདྲེན་ནོ། །ༀ་ཀ་ཀྐ་ཀཌྜྷ་ན་བ་བྦ་བནྡྷ་ན་ཁ་ཁྑ་ཁཱ་ད་ན་སརྦ་དུཥྚཱ་ན་ཧ་ན་ཧ་ན་གྷཱ་ཏ་ཡ་གྷཱ་ཏ་ཡ་ཆེ་གེ་མོའི་དགོས་པ་མཛོད་ཅིག །ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཛཿསྭཱ་ཧཱ། བདུད་རྩིའི་ཁ་ནི་ཡོངས་བཀང་ནས། །ལྷ་ཐམས་ཅད་ནི་མཉེས་པར་བྱ། །རྣལ་འབྱོར་རྣལ་འབྱོར་མ་བསྒོམ་བྱ། །ལས་རྣམས་ཐམས་ཅད་འགྲུབ་པར་འགྱུར། །ཨོཾ་བྷ་ཀྵ་སརྦ་ཡོ་གི་ཤྭ་རཱི་ཧཱུྃ་ཧཱུྃ་ཛཿསྭཱ་ཧཱ། ཇི་
ལྟའི་ལས་སོགས་ཡོངས་སྤྱོར་བ། །གཏོར་མའི་ལས་སོགས་ཡོངས་སྦྱར་བྱ། །ཞི་དང་རྒྱས་དང་དབང་དང་ནི། །དགུག་དང་གསད་དང་དབྱེ་བ་དང་། །རེངས་པ་གཏོར་མའི་དེ་ཉིད་ཀྱིས། །རྣལ་འབྱོར་རྣམས་ཀྱི་ལས་རྣམས་ཀུན། །བསྒྲུབ་བྱའོ་ཡེ་ཤེས་ལྕགས་ཀྱུ་ཡིས། །རང་གི་འདོད་པའི་ལྷ་ཚིམ་བྱ། །ཞིང་དང་གནས་དང་དེ་བཞིན་གྲོང་། །གྲོང་ཁྱེར་རམ་ནི་རི་བོ་རུ། །འབྱུང་པོ་མང་པོ་རབ་ཏུ་བསྡུ། །དེ་ཡི་ཚོགས་ནི་འདུ་བའོ། །རྩ་ཐམས་ཅད་ཀྱི་ཀུན་སྤྱོད་ཀྱིས། །དེ་ཡི་སྲོག་ཀྱང་བསྡུ་བའོ། །རང་གི་མདུད་པའི་གནས་འདུས་པ། །དེ་ནས་ལྟེ་བ་སྙིང་གར་འདོད། །རྣལ་འབྱོར་མ་ལ་གུས་འདུད་པས། །སྒྲུབ་པ་པོས་ནི་མཆོག་འཐོབ་འགྱུར། །རྟག་ཏུ་གནས་དང་ཉེ་གནས་སུ། །སྡོད་ལ་ལྷ་ཡིས་མཆོག་སྟེར་འགྱུར། །གནས་དེར་ཉམས་པ་དང་ལྡན་པ། །སྔོན་གྱི་ཆོ་གས་བསྒྲུབ་པར་བྱ། །བུག་རྡོལ་དང་ནི་རྒས་པ་དང་། །ཤུ་བ་མཛེ་སོགས་སྤང་བ་ནི། །འབྱུང་པོའི་ཉི་མ་ཐོབ་བྱས་ནས། །དེ་ལྟར་ལེགས་མཉམ་བཞག་པས་བསྒྲུབ། །ལྷ་ཡི་ཆུ་ཡིས་ཁྲུས་བྱས་ཏེ། །ཁྱད་པར་དུ་ཡང་བདུད་རྩི་ལྔས། །ཡན་ལག་མར་ནག་ཆེན་པོས་བྱུག །དེ་ཉིད་ཀྱི་ནི་བདུག་སྤོས་སྦྱིན། །ངེས་པར་གྲུ་བཞི་གྲུ་གསུམ་པའི། །དབུས་སུ་འབད་པས་བྱ་བ་ཡིན། །ཇི་ལྟ་བར་ནི་སྔོན་བཞིན་དུ། །སངས་རྒྱས་ཐམས་ཅད་གསན་དུ་གཞུག །གད་མོ་རྣམ་པ་བརྒྱད་བྱ་སྟེ། །ཧཱ་ཧཱ་ཧཱི་ཧཱི་ཧཱུ་ཧཱུ་ཧེ་ཧཻ། །ཞེས་བྱ་སྒྲུབ་པ་པོ་ཡིས་སོ། །མེ་ཡི་ས་བོན་ཡང་དག་ཞོན། །རླུང་གིས་སུ་ནི་ཕྱེ་བ་ཡི། །སྤྱི་བོའི་གཙུག་ཏུ་སྦྱར་བྱས་ནས། །ས་ཡི་མཐིལ་དུ་མཆོད་བྱས་ནས། །སྐྱེ་གནས་དབུས་སུ་དགོད་བྱ་སྟེ། །འབད་པས་ཞུ་བ་བལྟ་བར་བྱ། །སྐྱེ་གནས་དབུས་སུ་རིམ་ཇི་བཞིན། །བདག་ཉིད་བསམ་བྱ་རྣལ་འབྱོར་པས། །ཕོ་ཉའི་འོད་ཟེར་ཀུན་ནས་འཁྲིགས། །འབར་བའི་ཕྲེང་བ་རྒྱ་མཚོ་བལྟ། །དེ་ལྟར་རྣམ་པར་བསམ་གྱུར་པས། །རྣལ་འབྱོར་ཐམས་ཅད་བདེ་བའི་གནས། །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་ཀེང་རུས་ཀྱི་ཆོ་ག་སྟེ་རབ་ཏུ་བྱེད་པ་གསུམ་པའོ།། །།དེ་ནས་མཆེ་བ་རྣམ་གཙིགས་
པའི། །ཏིང་འཛིན་སྦྱོར་གནས་བཤད་བྱ་སྟེ། །གཞུ་འགེངས་རིམ་པ་འོང་བ་ནི། །རྡོ་རྗེ་རྣལ་འབྱོར་པས་ཡོད་དེ། །སྲོག་གི་ཐིག་ལེ་སོན་བསམ་པ། །མཚམས་ཐམས་ཅད་དུ་དེ་བརྒྱུད་དེ། །གཞུ་དབྱུག་མཚན་མར་བསམ་པར་བྱ། །སྒྲ་ཐམས་ཅད་ནི་སྐུལ་བ་ཡིས། །ཀུན་ནས་འགེངས་བཞིན་པ་ཡི་མདའ། །དབུས་མའི་ལྟེ་བར་འཛོམ་པ་ཡིས། །རྣམ་པར་ཤེས་པའི་འབེན་གཞོམ་བྱ། །འབྱུང་གནས་ཐམས་ཅད་གསད་པ་ཡིན། །བགྲོད་བཞིན་པ་ཡི་བདེ་བ་ཆེར། །དེར་རིག་པ་ཡིས་གཞན་དུ་འགྲོ། །མཆེ་བ་རྣམ་པར་གཙིགས་པ་ཡི། །རབ་སྦྱོར་རྣམས་ཀྱིས་ངེས་འབྱུང་འགྱུར། །མཚོན་བྱ་ཟད་པ་མེད་འཇོམས་པ། །སྐྱེ་བོ་རྣམས་ལ་འཇུག་པར་འགྱུར། །མྱ་ངན་འདས་པའི་སྤྱོད་ཡུལ་ལས། །གཞན་གྱི་གྲོང་རྣམས་སུ་འཇུག་པའོ། །སྔོན་གྱི་སྤྲུལ་པའི་བག་ཆགས་ནི། །དེ་ལ་རྒྱུན་དུ་འཇོམས་པར་བྱེད། །རྣམ་པར་ཞུ་བའི་བདག་ཉིད་ཆེ། །ཞི་བའི་གཟུགས་སུ་སྟེར་བར་འགྱུར། །ཥྚི་ཞེས་རྐང་པའི་མཐིལ་བར་དུ། །ནོར་བུའི་སྐུད་པ་བཞིན་དུ་བགྲོད། །ན་དེ་མཚམས་ཀྱི་དོན་དམ་པར། །ས་གསུམ་པོ་ལ་ལྟ་བར་འགྱུར། །དེ་ཕྱིར་སྐྱེ་བོ་ཐམས་ཅད་ལ། །མཚོན་བྱ་མཚན་ཉིད་ཀྱིས་འབྱེད་དོ། །དབང་པོ་དེ་རྣམས་ཐམས་ཅད་ལ། །བདག་ཉིད་ཀྱིས་འབུགས་སླར་ཅི་སྨོས། །འགྲོ་བ་གཞན་དུ་རབ་འཇུག་པར། །མཆོག་ཏུ་རྨད་བྱུང་འགྲོ་བར་འགྱུར། །སྒྱུ་འཕྲུལ་དྲ་བར་ཡང་དག་གནས། །སྐྱེ་བ་ཀུན་ལ་རྣམ་པར་བལྟ། །མིག་སོགས་རྣམ་པར་ཤེས་པ་ནི། །ནང་རྣམས་སུ་ནི་བསྐྱོད་པར་བྱོས། །མཁའ་འགྲོའི་རྣམ་པར་དེ་ཤེས་བྱ། །མཁའ་འགྲོ་མ་ཡི་གཟུགས་ཀྱི་གཙོ། །དཀྱིལ་འཁོར་སྔོན་དུ་སྤྲུལ་པར་ནི། །མཆེ་གཙིགས་ལ་སོགས་བསྒོམ་པར་བྱ། །རང་གི་ཁམས་ནི་བདེ་བའི་གཟུགས། །རང་རང་གཙོ་བོར་བྱ་བ་ཡིན། །དེ་ལས་སྐྱེས་པའི་མཁའ་འགྲོ་ཆེ། །མཁའ་འགྲོ་མ་དང་བཅས་པའི་གཟུགས། །ཐམས་ཅད་ཆོས་འབྱུང་སྣ་ཚོགས་པའི། །སྙིང་པོར་གཞོམ་དུ་མེད་ཞི་བ། །ཆོས་ཀུན་གཅིག་ཏུ་ཡོངས་བསྡུས་པ། །སྔགས་པས་ཆོ་ག་བཞིན་དུ་བྲི། །
ཨཱ་ལི་ཀཱ་ལི་མཉམ་བྱས་ནས། །སྡེ་ཚན་རྣམས་ཀྱིས་ཡོངས་བརྗེས་པ། །འདོད་དོན་ཐམས་ཅད་སྒྲུབ་བྱེད་པ། །དེར་གནས་དཔའ་བོས་ཡང་དག་བཏུ། །ཡེ་ཤེས་ལྷ་སོགས་སྐུ་བཞི་པོ། །ཞེས་བྱ་འཐོབ་འགྱུར་ཐེ་ཚོམ་མེད། །སྟེང་འོག་རྟག་ཏུ་དངོས་གྲུབ་སྟེར། །བདག་ཉིད་ཕོ་ཉ་ཀུན་འགྲོས་སོ། །ཡི་གེ་ལྔ་བཅུ་སྡེ་ཚན་བརྒྱད། །དེ་ཉིད་མཁའ་འགྲོ་མཆོག་རྨད་བྱུང་། །སྡོམ་པའི་དཀྱིལ་འཁོར་ཡང་ན་ནི། །ཆུང་ངུའི་རྒྱུད་དང་འདྲ་བ་མཆོག །ཡི་གེ་ཐམས་ཅད་ཀྱི་ནི་ཚད། །སྡོམ་པ་སོགས་སུ་མཚོན་པར་བྱ། །ཡི་གེ་རྣམས་དང་མིང་རྣམས་དང་། །སྡོམ་པ་རྣམས་སུ་དེ་བརྗོད་དོ། །དཀྱིལ་འཁོར་རྣམས་དང་རྒྱུད་རྣམས་དང་། །ལེའུ་རྣམས་དང་དེ་བཞིན་དུ། །ལས་ཚོགས་རྣམས་ནི་ཐམས་ཅད་དེ། །ཉིས་འགྱུར་ཐུང་ངུ་རིང་བའོ། །དེ་ཉིད་དུ་ནི་ཀུན་ངེས་རྒྱལ། །འབྱིན་ཅིང་སྡུད་པར་བྱེད་པ་པོ། །སེམས་ཅན་རིགས་ཞེས་འདིར་དེ་བཤད། །རེ་རེ་ཡི་ནི་མཚན་ཉིད་དོ། །རེ་རེ་ཡི་ནི་བསྒོམ་པ་ནི། །ཇི་ལྟའི་རིམ་པས་ཤེས་པར་བྱ། །ཡི་གེ་ཡི་ནི་མིང་དང་གཟུགས། །དེ་ནི་སེམས་ཅན་གཟུགས་སུ་འདོད། །གསང་སྔགས་དེ་ནི་ཟློས་བཞིན་པ། །དེ་ཉིད་དུ་ནི་རབ་གཞུག་བྱ། །ཨ་ཡིག་ཐིག་ལེ་དང་བྲལ་བ། །དམར་པོ་ཕྱི་མོ་རྣམ་པར་སྤངས། །ཨ་ཡིག་ཐིག་ལེ་དང་བཅས་པ། །དེ་ཕྱིར་མཚལ་གྱི་རིགས་ཅན་ནོ། །གུཉྫའི་མེ་ཏོག་དང་མཉམ་པར། །ཨི་ཡིག་ལ་ནི་བརྒྱན་པར་འདོད། །ཨཱི་ཡིག་སིནྡྷུ་ར་ཡི་མདོག །བཟང་པོ་ལྔ་པར་ཤེས་པར་བྱ། །ཨུ་ཡིག་དབང་པོའི་གཞུ་ཡི་འོད། །ཨཱུ་ཡི་ཡི་གེ་དྲུག་པ་ཉིད། །གློག་གཉིས་དང་ནི་འདྲ་བའོ། །རྀ་ཡིག་དུ་བའི་ཁ་དོག་སྟེ། །ཕྲ་མོ་ལུས་ནི་སྤངས་པའོ། །རཱྀ་ཡི་ཡི་གེ་མུན་པའི་གཟུགས། །ལྀ་ནི་བྱ་རོག་གཤོག་པ་མཚུངས། །ལཱྀ་ཡི་གེ་མཚལ་གྱི་མདོག །ཨི་ཡི་ཡི་གེ་དམར་སྐྱ་སྟེ། །ཨཻ་སིནྡྷུ་ར་དམར་མདོག་མ། །ཨོ་ཡི་ཡི་གེ་ཉི་མ་འདྲ། །འོད་ཟེར་སྟོང་ཕྲག་གྱེན་དུ་འབར། །ཨཽ་ཡི་ཡི་གེ་རྟག་འབར་བ། །ཉི་མ་བྱེ་བ་དང་མཉམ་འོད། །ཟླ་ཕྱེད་དེ་བཞིན་དུ་ཐིག་ལེ། །ཨཾ་ཡིག་སྔོན་དུ་བཤད་པ་ཅན། །ཟླ་བ་གཉིས་དང་ཚེག་དྲག་
སྟེ། །ཨཿཡིག་རྒྱལ་པོ་དེ་བཞིན་ནོ། །དེ་ལྟར་སྟོང་པ་ཉིད་བཅུ་དྲུག །ལས་རྣམས་ཀྱི་ནི་དག་པའི་རྒྱུ། །མྱོས་དང་བརླབ་གདོལ་རྨོངས་པ་དང་། །སེམས་བྲལ་དང་པོའི་སྟོང་ཉིད་དོ། །རྨོངས་པ་དང་འཁྲུགས་དབང་དང་ནི། །མྱུར་དུ་ཐམས་ཅད་སྟེར་བའོ། །བསམ་བྲལ་བ་དང་མྱོས་པ་དང་། །བརླབ་གདོན་དུ་ནི་བསལ་བའོ། །སྟོང་པ་ཉིད་ཀྱི་ལས་བསྒོམས་པས། །དེ་ནི་རྨུགས་དང་དབང་དུ་འོང་། །ཡང་དག་རྨོངས་དང་རྣམ་རྨོངས་འགྱུར། །ལུས་བརླན་པ་དང་སེམས་པ་བྲལ། །དབང་དུ་འོད་དང་དགུག་པ་དང་། །ཡེ་ཤེས་ཤེས་བྱ་ཅན་མཆོག་གོ། །བསྐྲད་པ་དང་ནི་བཞུ་བའི་ལས། །རྣམ་པ་བདུན་དུ་འདོད་པ་ཡིན། །ས་ཡི་ཟིལ་གནོན་འཛིན་བཞིན་དང་། །བསྔགས་མིན་པ་དང་རྨོངས་པའི་སེམས། །སྐྱེ་བ་འདི་ལ་ནམ་དུ་ཡང་། །དེ་ཡི་སླར་ཡང་འོང་མིན་པའོ། །རྣམ་པར་སྡང་དང་ཐམས་ཅད་ཀྱི། །འཇིག་རྟེན་གྱིས་ནི་སྨོད་པའོ། །འཇིག་རྟེན་ཀུན་དང་མཐུན་མེད་ལ། །སྐད་ཅིག་གནས་པ་སྤངས་པའོ། །ཡིད་ཀྱི་ལས་ནི་ཐམས་ཅད་རྣམས། །དེ་ཕྱིར་འཇིག་རྟེན་གསུམ་གང་འགྱུར། །བདེ་བ་ཁ་ཡིས་བཀུག་བྱས་ནས། །དབུགས་མེད་རི་མོ་འཛག་པ་ནུབ། །ཕྱི་མོའི་ཡལ་ག་རྣམས་ཀྱིས་བྱ། །དམ་ཚིག་དབང་ཕྱུག་མའི་གནས་ཀྱིས། །ཕྱག་རྒྱ་ཆེན་པོའི་རང་བཞིན་ནི། །གཉིས་སྟོང་མཆོག་ཏུ་ཟག་པ་མེད། །སངས་རྒྱས་རི་མོ་སྟེང་འོག་ཏུ། །པདྨའི་སྣལ་ཅན་རབ་ཏུ་གནས། །ཨཱ་ལི་ཀཱ་ལི་མདོར་བསྡུས་པ། །བཅུད་ལེན་ཁམས་ཀྱི་ལུས་ལས་སོ། །རྡོ་རྗེ་སེམས་དཔའ་ལ་སོགས་ལྷ། །ཞལ་དུ་ཡོངས་སུ་འགྱུར་བའོ། །དེ་ཡི་འོག་དང་གང་གཞན་དུ། །ཡི་གེ་ཐམས་ཅད་ངེས་པར་གནས། །སོ་སོར་སྣང་བ་མ་བྱུང་བར། །སྲུང་བ་གྱིས་ཞེས་བདག་གིས་བཤད། །སེམས་ནི་རྗེས་མཐུན་དབྱངས་སུ་འགྱུར། །སེམས་ནི་སྟོང་པའི་རང་བཞིན་ཅན། །ཟླ་གཉིས་ཡང་དག་སྦྱོར་བ་ནི། །ཕྱག་རྒྱ་མཆོག་ཏུ་མི་འགྱུར་བའོ། །དེ་ལྟར་ཁམས་ཀྱི་རང་བཞིན་ཀྱང་། །ཇི་ལྟར་འདོད་པའི་ལས་བྱའོ། །སླར་ཡང་ཐམས་ཅད་བྱེད་པ་ཡི། །སྟོང་པ་ཉིད་ནི་སོ་སོར་དགོད། །ཐོག་མ་གཉིས་ནི་
རྐང་གཉིས་དགོད། །བརླ་དང་གསང་བ་རྐེད་པ་དང་། །ལྟེ་བ་སྙིང་ག་སྟེང་དང་ནི། །མགྲིན་པ་དང་ནི་རྐན་དེ་བཞིན། །ཁ་དང་སྣ་དང་རྣ་དག་དང་། །དཔྲལ་བ་མགོ་བོ་རྒྱབ་ཏུ་སྟེ། །རང་གི་ཁམས་མིང་འདུ་ཤེས་ཀྱིས། །དབང་ལ་སོགས་པའི་ལས་བྱེད་དོ། །སླར་ཡང་རེ་རེ་ཡི་ཡང་ནི། །ལས་ནི་ཉི་ཤུ་ལྔའི་བདག་ཉིད། །སྟོང་ཉིད་དེ་ཉིད་རིག་བྱེད་པ། །རྒྱུན་དུ་ནང་དུ་བསྒོམ་པར་བྱ། །ཀ་ཡིག་ལ་སོགས་མ་ཡིག་མཐར། །ལྷ་མོ་བདག་ཉིད་ཆེན་མོས་ཉོན། །གང་གིས་ས་གསུམ་གྱི་ནི་ལྷ། །ཐམས་ཅད་ལྷ་མ་ཡིན་དང་མི། །སྒྲུབ་པོའི་ལེགས་པར་ངེས་པར་ནི། །དེ་རྣམས་ཐམས་ཅད་དབང་དུ་འགྱུར། །དེ་ཉིད་ཉི་ཤུ་རྩ་ལྔ་ནི། །ཀ་ཡིག་སོགས་སུ་འདུ་ཤེས་སོ། །བདག་དང་དཀྱིལ་འཁོར་ལུས་དང་ནི། །ལྷ་དང་བླ་མ་དང་ནི་སྔགས། །རྣམ་ཤེས་ཡེ་ཤེས་སྙིང་པོ་དང་། །དུས་དང་རྒྱུ་དང་འབྲས་དེ་བཞིན། །དབུགས་དང་བཅུད་ལེན་ལས་དང་ནི། །གཏོར་མ་ས་དང་ཕྱག་རྒྱ་གཞན། །དབང་པོ་དབུ་མ་སྒྱུ་མ་དང་། །མཚམས་དང་རིགས་རུས་དེ་བཞིན་ཏེ། །ལུང་ནི་རྗེས་སུ་རིག་པ་དང་། །མིག་འཕྲུལ་འདྲ་བ་རིམ་ཇི་ལྟར། །དེ་ལྟར་དེ་ཉིད་ལས་མཛེས་པ། །ཤེས་རབ་ཆེན་པོས་ཤེས་པར་བྱ། །རང་བཞིན་གྱིས་ནི་བརྗོད་པའི་ལས། །དུས་ཀྱི་མེ་ཡི་མདོག་ཅན་ནོ། །ཇི་ལྟར་དབང་ལ་སོགས་པའི་ལས། །ལྔ་ལྔ་རུ་ནི་གསལ་བ་ཡིན། །དམར་དང་གནག་དང་དེ་བཞིན་དཀར། །སེར་དང་ལྗང་གུ་དེ་བཞིན་ནོ། །སྒྲུབ་པོའི་བསྒྲུབ་བྱའི་འདོད་པ་ནི། །དེ་རྣམས་དེ་ཉིད་འགྱུར་གྱིས་འོང་། །ཡ་ཡིག་ལ་སོགས་དགུ་རྣམས་ཀྱི། །ཇི་ལྟའི་ཆོ་གས་ཡི་གེ་རྣམས། །ཕུང་པོ་ཁམས་ཀྱི་རིགས་རྣམས་དང་། །ཡན་ལག་དགུ་རྣམས་བརྗོད་པའོ། །ཇི་ལྟའི་རིམ་པས་བློ་ལྡན་གྱིས། །དགུ་དགུ་རུ་ནི་ཤེས་པར་བྱ། །ལས་ནི་དེ་རྣམས་ཤེས་བྱ་སྟེ། །འདུས་པ་བདེ་མཆོག་བླ་མ་དང་། །བདེ་མཆོག་རྡོ་རྗེ་མཁའ་འགྲོ་དང་། །འབྱུང་བ་དེ་ཉིད་འདུས་པ་དང་། །རྡོ་རྗེ་འཇིགས་བྱེད་སཾ་བུ་ཊ། །ཇི་ལྟའི་ཆོ་གས་གཞན་དུ་ཡང་། །དེ་ལྟར་ངེས་བརྗོད་འབུམ་གསུམ་ལས། །ཕྱུང་བ་བདེ་མཆོག་ཆུང་ངུ་སྟེ། །ཨ་ཡིག་ལ་སོགས་ཀྵཿཡིག་
མཐར། །ལེའུ་རྣམས་ཇི་ལྟའི་རིམ་པ་ཡིས། །དེ་ཁོ་ན་ཉིད་ལྡན་པར་སྦྱར། །སྡོམ་པ་རྒྱ་མཚོ་མཁའ་འགྲོ་སྐྱེས། །མཁའ་མཉམ་ནང་དུ་རབ་བཤད་པའི། །དེ་ཡི་སྒྲུབ་ཐབས་བཤད་པར་བྱ། །ཇི་ལྟར་དབུས་མའི་པདྨར་ནི། །སངས་རྒྱས་གཟུགས་ནི་གསལ་བར་བསྒོམ། །སྐུ་ཡི་རྒྱ་མཚོ་སེར་སྣ་རྒྱ་མཚོ་དང་། །འདོད་ཆགས་རྒྱ་མཚོ་ཕྲག་དོག་རྒྱ་མཚོ་སྟེ། །ཕྱོགས་བཞི་པོར་ནི་བསྒོམ་པར་བྱ། །པད་འདབ་རྣམས་སུ་རྣལ་འབྱོར་མ། །རྡོ་རྗེ་རྒྱ་མཚོ་རིན་ཆེན་རྒྱ་མཚོ་མ། །པདྨ་རྒྱ་མཚོ་སྣ་ཚོགས་རྒྱ་མཚོ་མ། །གཡོན་སྐོར་དུ་ནི་བསྒོམ་བྱ་སྟེ། །འདབ་མ་བཞི་ལ་ཐོད་པ་ནི། །རྒྱ་མཚོ་བཞི་པོ་ཡི་ནི་གཟུགས། །དངོས་ཀུན་བདུད་རྩིར་སོན་པའོ། །སླར་ཡང་གྲྭ་བཞི་པོ་རྣམས་སུ། །ཇི་ལྟའི་རིམ་པས་དགོད་བྱ་བ། །རྣལ་འབྱོར་ཡེ་ཤེས་དེ་ཁོ་ན། །ཐར་པའི་རྒྱ་མཚོ་གཡོན་སྐོར་དུའོ། །གཟུགས་དང་སྒྲ་དང་དྲི་དང་རོ། །རེག་དང་ཆོས་དང་ཡིད་དང་སེམས། །ཀུན་ཀྱང་རྒྱ་མཚོར་ཤེས་བྱ་སྟེ། །གཡོན་དང་གཡས་ཀྱིས་ད་གོད་པར་བྱ། །ས་དང་ནམ་མཁའ་ལྕེ་དང་ནི། །རྣ་བ་ཐམས་ཅད་རྒྱ་མཚོ་སྟེ། །ཡེ་ཤེས་ཤེས་བྱའི་རྒྱ་མཚོ་དག །སྔོན་གྱི་རིམ་པས་དགོད་པར་བྱ། །སྒོ་སྐྱོང་མ་ཡི་ལྷ་མོ་ཆེ། །གཡོན་སྐོར་དུ་ནི་དགོད་བྱ་བ། །གླང་པོ་རྒྱ་མཚོ་རྟ་རྒྱ་མཚོ། །སེང་གེ་རྒྱ་མཚོ་མ་ཧེ་མཚོ། །གྲྭ་ལ་གནས་པའི་ལྷ་མོ་ནི། །སྒྱུ་མ་རྒྱ་མཚོ་རྨི་ལམ་རྒྱ་མཚོ་མ། །གསང་སྣང་རྒྱ་མཚོ་སྣང་བའི་རྒྱ་མཚོ་མ། །ཁ་དོག་འཁོར་ལོ་གཞན་གྱི་བཞིན། །བྱང་ཆུབ་ཆུང་ངུ་བདག་ཉིད་ཆེའི། །དཀྱིལ་འཁོར་དེ་ཡིར་ཤེས་པར་བྱ། །དུར་ཁྲོད་བརྒྱད་ཀྱི་རིམ་པས་ནི། །སྒྲུབ་ཐབས་རིམ་པས་བསྒོམ་པར་བྱ། །སངས་རྒྱས་གཟུགས་ཀྱི་ཞལ་ནས་ནི། །པདྨའི་ཡུ་བ་ངེས་པར་འཐོན། །ཁ་དོག་དཀར་པོ་འབར་ཆེན་པོ། །པདྨ་འདབ་མ་སྟོང་ཕྲག་ཅན། །དེ་ཡི་དབུས་སུ་བསྒོམ་བྱ་བ། །མཁའ་འགྲོ་རྒྱ་མཚོ་བདེ་མཆོག་སྟེ། །ཕྱག་སྟོང་པ་ནི་རྣམ་པར་བསྒོམ། །ཞལ་ནི་སུམ་ཅུ་རྩ་བདུན་ནོ། །ཞབས་བཅྭ་བརྒྱད་ཀྱིས་གར་དུ་མཛད། །སྤྱན་གསུམ་པ་ལ་སྣ་ཚོགས་མདོག །རལ་པའི་ཅོད་པན་ཅན་གྱིས་གཟུགས། །སྣ་ཚོགས་རྡོ་རྗེ་ཟླ་ཕྱེད་ཅན། །རྒྱབ་ཏུ་
དབང་ཕྱུག་ཆེན་པོ་འཛིན། །ལྷག་མར་དཔའ་བོ་དཔའ་དབང་མོ། །བཅུ་གཉིས་བདག་ཉིད་ཅན་འཁོར་ལོར། །ཇི་ལྟར་བདག་གིས་སྔོན་བཤད་པའོ། །ཤེས་རབ་ཕྱག་གཡོན་དུ་བཤད་ཏེ། །གཡས་པར་རྒྱུན་དུ་ཐབས་ཡིན་ནོ། །ཁྱབ་འཇུག་དྲག་པོ་དེ་བཞིན་ཚངས། །གཤིན་རྗེ་དང་ནི་ལོག་འདྲེན་དང་། །བདེན་བྲལ་དང་ནི་ཐགས་བཟངས་རིས། །དབང་པོ་ཚོགས་བདག་ཀར་ཏི་ཀ །དགྲ་གཅན་ཟླ་བ་ཉི་མ་དང་། །བླ་མ་སྐྱོབ་པ་བླ་དེ་བཞིན། །ནོར་རྒྱས་དང་ནི་སྐྱེས་བུ་མེ། །མྱོས་པ་ཞབས་ཀྱིས་གནོན་པ་སྟེ། །རང་རང་ཁྱིམ་ཐབ་ཡང་དག་ལྡན། །མདོག་དང་མཚོན་ཆ་ཡང་བྱའོ། །ཕག་མོ་ཡིས་ནི་འཁྱུད་པ་སྟེ། །དེའི་གཟུགས་ཅན་ནམ་ཕྱག་གཉིས་སྐྱེས། །སྣ་ཚོགས་གཟུགས་འཛིན་རབ་མྱུར་མ། །སླར་ཡང་རང་འདྲའི་གཟུགས་ཅན་མའོ། །འདབ་མ་སྟོང་དུ་བསྒོམ་བྱ་བ། །རང་བཞིན་རྣལ་འབྱོར་མ་ཀུན་ཏེ། །བཅོམ་ལྡན་ཁ་དོག་གང་འདྲ་བ། །དེ་འདྲར་དེ་རྣམས་མཚོན་པར་བྱ། །ཐུང་ངུ་རིང་པོ་ཡོན་ཏན་འཕར། །ཨ་ཡིག་ལ་སོགས་སྡེ་བརྒྱད་དེ། །ཕྱི་མོ་བཅུ་གཉིས་ཀྱིས་ཕྱེ་བ། །སྟོང་ཕྲག་རྣལ་འབྱོར་མའི་ཡང་ངོ་། །ཀ་རྡོ་རྗེ་སོགས་ཤེས་བྱ་སྟེ། །ཁམས་ཀྱི་རྐྱེན་གྱི་ཡིད་ཀྱིས་སོ། །འཁོར་ལོ་དྲུག་བདག་རྣལ་འབྱོར་ཅན། །དེ་ཐམས་ཅད་ནི་གར་དུ་མཛད། །ཐམས་ཅད་ཀྱིས་ནི་རོ་ལ་གནོན། །ཕྱག་གཉིས་པའམ་མཁའ་འགྲོའི་བདག །ཐོད་པ་ཁ་ཊྭཱཾ་ག་འཛིན་མ། །བདེ་ཆེན་རྣམ་པའི་གཟུགས་ཅན་མའོ། །སངས་རྒྱས་ཐུགས་ཀ་ནས་སྤྲོ་བ། །འཁོར་ལོ་གསུམ་སྤྲོ་འོད་ཟེར་ཕྲེང་། །སྲོག་ནི་འོག་དང་སྟེང་ལྟ་བས། །སྡོམ་པ་རྒྱ་མཚོ་དགུག་པར་བྱ། །སླར་ཡང་དབུགས་ཀྱིས་དབྱུང་བ་ནི། །མཁའ་འགྲོ་རྒྱ་མཚོ་གཉིས་མེད་བདག །ཐམས་ཅད་སྡོམ་པའི་སྒྲུབ་ཐབས་སུ། །ཇི་ལྟའི་རྣལ་འབྱོར་གཞན་བྱའོ། །དེ་ལྟར་བྱེད་བཞིན་པ་ཉིད་ཀྱིས། །ཕྱག་རྒྱའི་དངོས་གྲུབ་སྐྱེ་བར་འགྱུར། །གཞུང་ཐམས་ཅད་ནི་བལྟ་བར་བྱ། །གཞན་པའི་རྣལ་འབྱོར་དམིགས་མི་བྱ། །དམ་ཚིག་གི་ནི་སྤྱོད་པ་ཅན། །སྡོམ་པ་ཆུང་ངུར་རབ་ཏུ་བཤད། །ཐམས་ཅད་སོག་མ་བཞིན་དོར་ལ། །ཐམས་ཅད་སྡོམ་པ་གཟུང་བར་གྱིས། །མཆེ་བ་རྣམས་
གཙིགས་རབ་སྦྱོར་བས། །གཞུ་འགེངས་རིམ་པས་འོང་བར་གྱིས། །དེ་ཡི་དཀྱིལ་འཁོར་འཁོར་ལོ་ཡང་། །སྔོན་གྱི་སྦྱོར་བས་བསྒོམ་པར་བྱ། །འོག་དང་སྟེང་གཉིས་མཆེ་བ་གཉིས། །བདེ་མཆོག་མཁའ་འགྲོ་རྒྱ་མཚོ་དག །རང་མིང་བརྗོད་པའི་གསང་སྔགས་ལ། །ཧཱུྃ་ཕཊ་ཡི་གེ་མཐར་སྦྱོར་གྱིས། །ཡང་དག་ཏིང་འཛིན་རྡོ་རྗེ་ཡི། །གསང་སྔགས་ཐམས་ཅད་ལ་བྱའོ། །ཐམས་ཅད་རྒྱན་ནི་རབ་བཤད་པའང་། །སྔགས་རིག་པ་ཡིས་སྔོན་བཞིན་ནོ། །བདག་གི་བདག་པོས་རྒྱུད་འདི་ནི། །གསུངས་པས་ཡང་དག་དགའ་བར་འགྱུར། །ཉིད་དང་ལྷན་ཅིག་བྱ་བ་བྱས། །ཕྱག་རྒྱ་འོག་སྟེ་ཇི་ལྟར་ལགས། །ཁྱོད་ཀྱིས་འོག་དང་སྟེང་ཕྱག་རྒྱ། །རབ་བཤད་བྱ་ཡིས་ལྷ་མོ་ཉོན། །མཁའ་འགྲོ་རྒྱ་མཚོ་ཤེས་རབ་ཆེ། །ཐབས་ནི་སྡོམ་པ་རྒྱ་མཚོའོ། །འོག་དང་སྟེང་དུ་སྙོམས་འཇུག་པས། །དེ་ནི་ཕྱག་རྒྱ་མངོན་བརྗོད་འགྱུར། །ཞལ་ལས་ངེས་པར་འཐོན་ཡུ་བ། །ངག་གིས་བསྒོས་པའི་བདག་ཉིད་དོ། །དེ་ནི་མཁའ་འགྲོ་སྤྱོད་དེ་ཡང་། །རྣམ་པར་ཤེས་དང་ཐམས་ཅད་འོང་། །ཞུ་བའི་གཟུགས་ནི་སྙིང་ག་རུ། །འོད་ཀྱིས་ཐམས་ཅད་སྡོམ་པར་གྱིས། །དེ་ནི་ཐེག་པ་ཆེར་སྡོམ་པ། །བདག་ཉིད་ཆེན་པོ་ཡེ་ཤེས་གཟུགས། །དེ་ལྟར་གཉིས་སུ་བྱར་མེད་གཟུགས། །དེ་ནི་ཕྱག་རྒྱར་མངོན་པར་བརྗོད། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་རྒྱ་མཚོ་ཆེ། །བཅོམ་ལྡན་བདག་པོས་འདི་གསུངས་སོ། །ཞེས་བྱ་བ་ནི་མཆེ་བ་རྣམ་པར་གཙིགས་པའི་ཆོ་ག་སྟེ་རབ་ཏུ་བྱེད་པ་བཞི་པའོ།། །།དེ་ནས་ལྷ་མོས་མཆོད་བྱས་ནས། །ཕྱག་བྱས་ནས་ནི་འདི་སྐད་གསོལ། །སེམས་ཅན་རྣམས་ཀྱི་སྡོམ་བྱུང་བ། །བཅོམ་ལྡན་བདག་པོ་ཉིད་ཀྱིས་གསུངས། །ལྷ་དགྲ་ཡི་ནི་རབ་སྦྱོར་བས། །རབ་བཤད་བྱ་ཡིས་ལྷ་མོ་ཉོན། །བྱང་ཆུབ་སེམས་ཀྱི་ཆ་ཅན་གྱི། །བདེ་བ་འོངས་བ་གང་ཞིག་རྩ། །སྡོམ་པ་སེམས་ཅན་སྨིན་བྱེད་པའི། །རྣལ་འབྱོར་དེར་ནི་རྣམ་པར་སྤྲོ། །འདོད་ཆགས་ཆགས་བྲལ་རྣམ་འདྲེས་པ། །སྡོམ་པ་སྐྱ་འགྲོའི་གཟུགས་ཅན་ནོ། །གང་ཕྱིར་དེ་ཉིད་ཀྱིས་སྡོམ་པ། །སྔོན་གྱི་
སྤྱོད་པའི་སྡོམ་པའོ། །བཻ་ཡི་ནམ་མཁའ་ནམ་མཁར་ཏེ། །སྐུ་གསུམ་རྣམས་ཀྱི་ཡང་དག་བཞུགས། །ཆོས་དང་ལོངས་སྤྱོད་རྫོགས་སྤྲུལ་པ། །འཐོབ་འགྱུར་འདི་ལ་ཐེ་ཚོམ་མེད། །གང་ཚེ་སེམས་ནི་འགྲོ་བཞིན་པ། །གཟུགས་ཀྱི་དབུས་སུ་ཐིམ་པར་གྱིས། །རང་རིག་བདག་ཉིད་བྱང་ཆུབ་ལྡན། །ལྷན་ཅིག་སྐྱེས་པའི་སྐུ་འཐོབ་འགྱུར། །ཏིང་འཛིན་སྐད་ཅིག་རིག་མེད་པ། །གང་གི་སྲིད་གསུམ་ལ་ཐིམ་གྱིས། །དེ་ནི་འབྱུང་བར་ཤེས་བྱ་སྟེ། །ལུས་ཅན་གཞན་རྣམས་ཀྱི་སྡོམ་མ་མིན། །རྣལ་འབྱོར་རྣམས་ཀྱི་གསང་སྡོམ་པ། །དེ་ལྟར་དེ་ཉིད་ངེས་ཤེས་བྱ། །ནང་གི་བདག་ཉིད་ཉིན་ཞག་གིའང་། །དེ་ཡིས་སྡོམ་པར་བཤད་པར་འགྱུར། །མཚན་ཉིད་ཐམས་ཅད་ཡོངས་ལྡན་པའི། །ཨཱ་ལི་ཀཱ་ལི་སོགས་སྡེ་ཚན། །དང་པོའི་ཡི་གེའི་ཆ་ལ་སོགས། །གང་དུ་མིང་ནི་ངེས་པར་མཐོང་། །རིགས་ནི་དེ་རུ་ཤེས་བྱ་སྟེ། །ཨང་ཀའང་སེམས་ཅན་ཡང་དག་ལྡན། །མཐའ་ཡས་ལ་སོགས་ཀླུ་གང་དང་། །ཉི་མ་ལ་སོགས་གཟའ་དེ་བཞིན། །མཁའ་འགྲོ་མའི་མིང་ཐོག་བྱས་ནས། །མ་མོ་དེ་རྣམས་སུ་རབ་གྲགས། །ལྷ་རྣམས་ཀུན་གྱིས་བསྐྱེད་པ་དང་། །སྔགས་རྣམས་ཀྱི་དང་རྒྱུད་ཉིད་ཀྱིའང་། །འཇིག་རྟེན་ཀུན་གྱི་མ་ཡིན་ཏེ། །དེ་ཡིས་མ་ལ་ཡང་དག་བརྟེན། །རྩ་ནི་དགུ་པོ་འགོག་པ་ལས། །སྲོག་རྒྱུ་རྣམས་སུ་ཤེས་པར་བྱ། །ཨ་ཨཱ་ཀ་ཙ་ཊ་ཏ་པ་དང་། །ཡ་ཤའི་སྡེ་ཚན་ཡི་གེ་དགུ། །ཨི་ཨཱི་ཁ་ཚ་ཋ་ཐ་ཕ། །ར་ཥ་གཉིས་པར་བརྗོད་པའོ། །ཨུ་ཨཱུ་ག་ཛ་ཌ་ད་བ། །ལ་ས་སྡེ་ཚན་གསུམ་པའོ། །ཨེ་ཨཻ་གྷ་ཛྷ་ཌྷ་དྷ་བྷ། །ཝ་ཧ་སྡེ་ཚན་བཞི་པའོ། །ཨོ་ཨཽ་ཨཾ་ཨཿང་ཉ་ཎ། །ན་མ་དེ་ལྟར་དགུའི་བདག་ཉིད། །བཞི་པོ་ཡོངས་སུ་གྲགས་པ་སྟེ། །ཉི་ཅན་ལྔ་རྣམས་ཀྱིས་དེ་བཞིན། །དེ་ལྟར་འཇིག་རྟེན་ཀུན་གྱི་དེ། །སྡུད་པ་དང་ནི་འབྱིན་པར་གནས། །སྒྱུ་ཆེན་བཅུ་གཉིས་དེ་རྣམས་ཀྱིས། །ས་བོན་གཟུགས་ཀྱི་ཚོགས་དྲན་བྱ། །དེ་རྣམས་རཱ་སིར་ཡང་དག་གྲགས། །རྒྱུ་སྐར་ཀུན་དང་ཡང་དག་ལྡན། །ཟླ་བ་དང་ནི་ཉི་མའི་ཆས། །འོག་དང་སྟེང་གི་ཁ་དེ་བཞིན། །བརྟན་པ་དང་ནི་གཡོ་བ་གཉིས། །རྒྱུ་སྐར་དང་ནི་རཱ་སིར་བཤད། །སྲོག་ཟུང་ངུ་ནི་དེ་བཞིན་གྲགས། །རིང་དང་ཐུང་ངུ་རྒྱལ་དང་ཕམ། །
སྟེང་དུ་དེ་ཡི་རྒྱལ་བར་བཤད། །འོག་ཏུ་འཆི་བ་མཉམ་མི་མཉམ། །ཉི་མའི་རྒྱུ་བར་སོན་པ་ཀུན། །རྒྱུ་སྐར་རཱ་སི་གཟའ་དེ་བཞིན། །རཱ་སི་རྣམ་གསུམ་སྤྱོད་གང་ཕྱིར། །ཉི་མར་གནས་པར་འཆར་བར་འགྱུར། །སྲོག་འཆར་བ་དང་ཡང་དག་ལྡན། །རཱ་སི་ཀུན་གྱིས་ཤེས་པར་བྱ། །ཀངྐ་ཊ་སེང་བུ་མོ་དང་། །བུམ་པ་རིགས་དྲུག་ཡང་དག་ལྡན། །འཆར་བར་འགྱུར་དང་ཤར་བ་ཡང་། །ཇི་ལྟའི་རིམ་དག་གཟའ་ཀུན་གྱིས། །བྲིཤྩི་ཀ་དང་རྟ་ཉིད་དང་། །རི་དགས་བུམ་པར་ཡང་དག་ལྡན། །ཆ་ཤས་ལྔ་ཡི་ཚད་ཀྱིས་ནི། །གཟའ་ཤར་བ་ཡིས་འཆར་བར་འགྱུར། །རི་བོང་ལུག་དེ་བཞིན་ཉིད་དང་། །སྐན་ད་རུ་ནི་སོན་དེ་བཞིན། །ཆ་ཤས་ཀྱང་ནི་བཞི་པ་ཉིད། །འཆར་བ་འོང་བར་འཆར་བར་འགྱུར། །ཞག་གི་འཆར་བ་མ་ལུས་པའང་། །འབྲས་བུའི་མིང་དང་ཡང་དག་ལྡན། །ནག་མོ་སོགས་ནས་འཇིབ་མའི་མཐར། །ཡོངས་སུ་རིམ་པས་ཉི་ཤུ་བཞི། །གང་དང་འདྲ་བའི་མིང་དེ་འདྲའོ། །དེ་རྣམས་འབྲས་བུར་ཤེས་པར་བྱ། །ཉིས་འགྱུར་ལོངས་སྤྱོད་བྲིས་པ་དང་། །དབང་པོ་རྣམས་ཀྱི་ཆ་དང་ལྡན། །ཐོབ་པ་ཞག་ཏུ་ཤེས་བྱ་སྟེ། །བདག་གི་རྟག་ཏུ་ཞག་ལྷ་མོ། །བདག་ཉིད་ཀྱིས་ནི་དགོས་ཀུན་དང་། །གཞན་རྣམས་ལ་ཡང་དེ་ལྟར་སྦྱར། །དེ་ཕྱིར་ཕྱི་དང་ནང་རྣམས་སུ། །དགེ་དང་མི་དགེའི་ལས་ཤེས་བྱ། །སྡོམ་པ་འབྱུང་བའི་དུས་སུ་ནི། །རྣམ་རྟོག་མེད་པས་མཚོན་པར་བྱ། །གཟའ་གང་དེ་རྣམས་དབྱངས་ཤེས་བྱ། །དབྱངས་གང་དེ་རྣམས་རཱ་སིའོ། །དབྱངས་དང་རཱ་སི་དེ་བཞིན་སྐར། །རང་གི་གཟུགས་རྣམས་ཀྱང་བལྟའོ། །དངོས་གྲུབ་འབྲས་བུ་སྟེར་བ་པོ། །ཡང་དག་སྦྱོར་དང་བྲལ་ན་མེད། །གཡོ་བའི་འཆར་བས་གཡོ་བའི་ལས། །ངེས་པར་བརྟན་པས་གཡོ་མེད་འགྱུར། །འདྲེན་མ་ཡིས་ནི་འདྲེན་མར་འགྱུར། །སེམས་ཅན་རྣམས་ཀྱི་བསོད་ནམས་རྒྱུས། །ལྷ་རྣམས་གྲོལ་བའི་རྒྱུ་ཉིད་པས། །ལྷ་ཡིས་དགྲ་ནི་བསྒོམ་པར་བྱ། །སུམ་ཅུ་བདུན་བདག་ཉིད་འཁོར་ལོ། །རྣལ་འབྱོར་དངོས་གྲུབ་བྱེད་པའི་གཙོ། །ཁ་དོག་དང་ནི་མཚན་ཉིད་དབྱིབས། །ལས་རྗེས་འབྲངས་པས་བསྒོམ་པར་བྱ། །ལྷ་འམ་ལྷ་མིན་སྦྱིན་བྱེད་ཀྱི། །དགྲ་ནི་འཁོར་
ལོ་སྡོམ་པའོ། །དཔའ་བོ་ཐམས་ཅད་སྙོམས་འཇུག་པས། །རྡོ་རྗེ་མཁའ་འགྲོ་བདེ་བའི་མཆོག །རྡོ་རྗེ་མཁའ་འགྲོ་ལྷ་ཡི་དགྲ། །བཅོམ་ལྡན་འདས་ཀྱིས་འདི་གསུངས་སོ། །ཞེས་བྱ་བ་ནི་ལྷ་དགྲ་ཡི་ཆོ་ག་སྟེ་རབ་ཏུ་བྱེད་པ་ལྔ་པའོ།། །།དེ་ནས་རྣལ་འབྱོར་མ་ཐམས་ཅད། །འདུས་པར་བྱས་ནས་འདྲི་བ་ནི། །ལྷ་དང་སྦྱིན་བྱེད་སེམས་ཅན་གྱི། །སྡུག་བསྔལ་སྟེར་པོ་ཇི་ལྟར་ལགས། །གལ་ཏེ་ཀུན་རང་བཞིན་སྟོན་པ། །དགེ་དང་མི་དགེ་དེ་འདྲི་བ། །དེ་ནས་བཅོམ་ལྡན་ལྷ་ལ་སོགས། །སེམས་ཅན་ཀུན་སྟེར་པོ་ཅི་ལགས། །འདི་ལ་བདག་ནི་ཐེ་ཚོམ་མཆིས། །གཙོ་བོ་གསལ་བར་མཛོད་ཅིག་ཀྱེ། །ཕག་མོ་ལ་སོགས་མང་པོ་ཡི། །ལྷ་མོ་སྒྱུ་མ་ཆེན་མོ་ཉོན། །རང་རང་ལས་ཀྱི་རྗེས་འབྲངས་པས། །ལྷ་དང་སྦྱིན་བྱེད་སེམས་ཅན་གྱི། །བདག་གི་རང་བཞིན་དུ་ནི་མེད། །བྱང་ཆུབ་ཆེན་པོར་ཞུ་ལས་ཡོད། །རང་གི་རང་བཞིན་ཡོན་ཏན་ཉིད། །བདག་གི་ལས་ཀྱིས་ཡང་དག་འབྱུང་། །དེ་ཕྱིར་དགེ་དང་མི་དགེ་བལྟ། །སྣ་ཚོགས་ཀུན་རྟོག་འཐོབ་པར་བྱེད། །དེ་ཡིས་ལྷ་དང་སྦྱིན་བྱེད་རྣམས། །གཟའ་དང་རཱ་སི་རྒྱུ་སྐར་ཅན། །རང་གི་ལས་འབྲས་ལ་ཟ་བ། །སྟེར་རོ་གཞན་དུ་ཅི་ཡང་མེད། །སྟོན་པ་ཇི་ལྟར་གྲོལ་བར་འགྱུར། །གླུ་འདི་ཡིས་ནི་དགྱེས་པར་བྱེད། །ཨ་མི་ཏཱ་བྷ་ཛ་ནི་ཏཱ་མ་ས་མཱ་དྷྱ་མཱ་ག་མཱ་ག་མཱ་དྷཱ་ཉ། མ་པཱ་ཉ་རཱི་སཱ་མཱ་ཉ་རི་ག་མཱ་སཱ་ཉ་མཱ་རཱི་གི་མ་བྷཱུ་ཡ་ཏེ། ས་རཱི་རེ་སཱ་རཱི་རེ་ས་རཱི་རཱི་སཱ་ནཱི་སཱ་ཉ་ཤྲུ་ཏ་ནི་སཱ་མཱ་ཉ་སཱ་ནཱི། ཤཱི་རཱི་བྷ་ག་མཱ་དྷཱ་མྨཱ་དྷ་མྨཱ་སཱ་ཉ་པཱ་ཡཱ་མ་པཱ་པཱ་མ་ད་མི་ཏེ། འོད་དཔག་མེད་ཀྱི་རབ་སྦྱོར་བས། །འདི་འདྲའི་གྲོལ་བ་བསྒྲུབ་པར་བྱ། །ཨ་བ་དྷཱུ་ཏཱིའི་དབུས་སུ་ནི། །རྣམ་ཤེས་གྲོལ་བ་ལ་མཚོན་བྱ། །སྲོག་ལ་སོགས་པའི་རླུང་ཐམས་ཅད། །རྣམ་འགྱུར་བྱས་པའི་བར་ཐིམ་བྱ། །རྣམ་པར་ཤེས་པ་འདྲེས་གྱུར་པའང་། །ཁམས་ཐམས་ཅད་ཀྱི་བཅུད་ལེན་ཏེ། །འཐུངས་པས་དངོས་གྲུབ་ཐོབ་པར་འགྱུར། །དབང་པོ་རྣམ་བགྲོད་མཚན་ཉིད་ལས། །རྐན་གྱི་ཕྱོགས་སུ་གནས་པའི་ལྕེ། །ཨ་བ་དྷཱུ་ཏཱིར་དེ་རབ་བཤད། །ཆ་ཤས་ཅན་གྱི་ཐ་མ་ཡི། །བདུད་རྩིའི་རྒྱུན་ནི་འཛག་པར་འགྱུར། །རྩ་ཐམས་ཅད་དུ་བཀང་བ་
སྟེ། །ཡང་དག་རིག་པའི་གཟུགས་སུ་ཐིམ། །མདོར་བསྡུས་པས་ནི་ཁམས་ལྔ་སྟེ། །གཞན་གྱི་དངོས་པོ་འདིར་མ་བརྗོད། །དབང་ཆེན་ལ་ནི་མེ་ཡིས་བསྲེག །ཆུ་ཡི་དབུས་སུ་རབ་ཏུ་ཐིམ། །མྱུར་དུ་ཞུ་ནས་འགྲོ་བར་འགྱུར། །རླུང་གི་ནམ་མཁའ་ལ་གནས་སོ། །ཆུ་ཡི་ཚོགས་ནི་བསྐམས་བྱས་པས། །དེ་ཉིད་དུ་ནི་ཐིམ་ནས་འགྲོ། །སེམས་ནི་སྟོང་ཉིད་ལ་སོན་བྱ། །སྟོང་ཉིད་ནམ་མཁའི་ཁམས་ལའོ། །ནམ་མཁའ་ཡེ་ཤེས་ལ་འཇུག་བྱ། །ཡེ་ཤེས་སྒྱུ་མའི་རང་མཚན་ཉིད། །མཁས་པས་ཡེ་ཤེས་ཤེས་བྱའི་བདག །དེ་ལྟར་འོད་དཔག་མེད་པ་བསྒོམ། །རྩིབས་བརྒྱད་ལེགས་པར་བརྒྱན་པ་ཡི། །ཤེས་བྱའི་འཁོར་ལོ་འདི་བསྒོམ་བྱ། །བུ་མེད་བྲི་བ་མི་ཨུ་ཀུ། །དྷ་སི་མེར་རོ་མ་ག་འདྲེར། །རླུང་དུ་ཏུ་ཀ་བི་མི་ཏེ། །དབང་ལྡན་དུ་ནི་རཱ་སིའོ། །དེ་རྣམས་འཁོར་ལོ་རིམ་ཇི་བཞིན། །དེ་བཞིན་འདི་ལ་འདི་རྣམས་དགོད། །ཨ་ཨི་ཨུ་ཨེ་ཨོའི་ས་བོན། །བཀྲ་ཤིས་ལ་སོགས་གཟའ་ལྔ་ནི། །ཤར་ལ་སོགས་པར་དགོད་པར་བྱ། །རིང་པོ་དེ་ཉིད་དུ་དགོད་བྱ། །ཨཾ་ཨཿ་ཉི་མ་ཟླར་ཤེས་བྱ། །ཉི་མ་ཟླ་བ་འདིར་གྲོལ་བ། །ཀུ་ལི་རེ་ལ་ཉི་མ་སྟེ། །གཟའ་ལྷག་གདོང་ལྔ་པ་འདིར་གནས། །མཐར་ནི་གང་ཞིག་ལྷག་མ་ཡི། །སོ་སོའི་ཆོ་གས་ཟ་བར་འགྱུར། །རཱ་སི་རྣམས་ཀྱིས་བརྒྱན་པ་ཡི། །འགྲོ་ཀུན་ལ་ཕན་འཁོར་ལོ་དེ། །དེ་ལྟར་དོ་ལའི་འཁོར་ལོར་འགྱུར། །རྒྱུ་སྐར་རཱ་སི་དུས་དང་ཞག །ལུག་རྣམས་རོ་ཧི་ཏི་སོགས་དང་། །ཟླ་བ་དང་ནི་ཉི་མ་རྣམས། །འཆི་བའི་མཚན་ཉིད་མཚོན་པ་ནི། །མདོར་བསྡུས་པ་ཡིས་བཤད་པར་བྱ། །རྒྱུ་སྐར་དུས་ཚོད་ཡང་དག་ལྡན། །གཟའ་དང་ནད་ནི་དེ་བཞིན་ཏེ། །དོ་ལ་རཱ་སིའི་ཚད་ཀྱིས་ནི། །སྐྱེ་བའི་ལས་སུ་བརྗོད་པ་ཡིན། །ཀཱརྟི་ཀ་དང་བཟང་པོའི་ཚེ། །མིག་དམར་དེ་བཞིན་སྨིན་དྲུག་སྟེ། །དེ་ལ་འཆི་བར་ཤེས་པར་བྱ། །གལ་ཏེ་རྣལ་འབྱོར་པ་མེད་ནའོ། །མྲྀ་ག་ཤིཪྵ་མགོ་དང་ནི། །གཟའ་ལྷག་ཉི་མ་ལ་སྨྱོ་བ། །མགུལ་པའི་ནད་ཀྱིས་ཉིན་བཞི་ན། །ཁྱུ་མཆོག་ལ་ནི་རྟག་ཏུ་འཆི། །རྒྱལ་དང་མྲི་གའི་རྒྱུ་སྐར་དང་། །གཟའ་ལྷག་འཁྲིག་པ་ལ་འཆིའོ། །ཀུ་ལི་ར་མཆུའི་ཚེས་བརྒྱད་ཀྱི། །ཐོ་རངས་པ་སངས་ལ་འཆིའོ། །གྲེ་དང་མཆུ་ཡི་རྒྱུ་སྐར་དང་། །ཚེས་བཅུ་སྤེན་
པ་སེང་གེ་ལ། །ནུབ་མོ་འཆི་བར་ཤེས་བྱ་སྟེ། །གལ་ཏེ་བརྒྱ་བྱིན་མཉམ་གྱུར་ཀྱང་། །བུ་མོ་ཉི་མར་གུལ་མས་འཆི། །ས་ག་དང་ནི་བཅུ་བཞི་དང་། །གཞུ་དང་ཕུར་བུའི་རེ་མོ་དང་། །གལ་ཏེ་སངས་རྒྱས་མཉམ་གྱུར་པ། །སྲང་ལ་འཆི་བར་ཤེས་པར་བྱ། །སྣྲོན་དང་བཅུ་གཅིག་ནག་པ་དང་། །ཕུར་བུ་སྡིག་པ་ལ་འཆིའོ། །ཆུ་སྟོད་ཆུ་སྨད་ཚེས་དགུ་དང་། །གྲོ་བཞིན་གཞུ་དང་པ་སངས་འཆི། །གྲོ་བཞིན་ཚེས་བདུན་ཟླ་བ་དང་། །རྒྱལ་དང་ཆུ་སྲིན་ལག་ནོར་མེད། །ཁྲུམས་སྟོད་ཁྲུམས་སྨད་བཅུ་གསུམ་པ། །ཟླ་བ་མོན་གྲེ་བུམ་པས་འཛད། །ཐ་སྐར་བརྒྱད་པ་ནམ་གྲུ་དང་། །སྤེན་པ་དང་ནི་ཉ་ལ་འཆི། །སེམས་ཅན་ཀུན་གྱི་སྐྱེ་བའི་རྩིས། །དུས་སྨྲ་བས་ནི་ཤེས་པར་བྱ། །ས་བོན་གཅིག་ལས་སྐྱེས་ཡོན་ཏན། །གཉིས་པ་སྐྱེ་བའི་དུས་ཀྱིས་སོ། །རིགས་གཉིས་སུ་ནི་ཤེས་བྱས་ནས། །དེའི་དུས་སྐྱེ་རྩིས་བརྩམ་པར་བྱ། །སྔོན་ལས་རྣམ་པ་སྣ་ཚོགས་ཀྱིས། །མཁས་པས་དེའི་རིགས་སུ་སྐྱེའོ། །དེ་ཡི་འབྲས་བུ་ཤེས་བྱ་སྟེ། །མཚན་ཉིད་ཀྱིས་ནི་རྗེས་སུ་གནས། །རཱ་སི་སོགས་འཁོར་འབྲེལ་པ་དེ། །རྣམ་ཤེས་ཀུན་གྱི་མཚན་ཉིད་དོ། །འོད་དཔག་མེད་ཀྱི་རབ་སྦྱོར་བས། །དཀྱིལ་འཁོར་གསལ་བར་བསྒོམ་པར་བྱ། །དབུས་སུ་འོད་དཔག་མེད་མགོན་པོ། །ལྷག་མར་མཁའ་འགྲོ་མ་སོགས་སོ། །དེ་ནི་རྣམ་ཤེས་སྐྱེ་གསལ་བར། །ལས་ཀྱི་འབྲས་བུ་དེ་དྲན་བྱ། །ཐམས་ཅད་བདེ་བ་ཀུན་སྦྱོར་ལས། །དེ་ཚེ་གཉིས་མེད་ལ་བརྟེན་པའི། །འོད་དཔག་མེད་ཀྱི་སྦྱོར་ལྡན་པ། །བཅོམ་ལྡན་སྟོན་པས་འདི་གསུངས་སོ། །ཞེས་བྱ་བ་ནི་འོད་དཔག་མེད་ཀྱི་ཆོ་ག་སྟེ་རབ་ཏུ་བྱེད་པ་དྲུག་པའོ།། །།རྡོ་རྗེ་འོད་ཀྱི་རབ་སྦྱོར་བས། །ཡེ་ཤེས་དེ་ཁོ་ཉིད་བཤད་བྱ། །ལྷ་མོས་སླར་ཡང་མཆོད་བྱས་ནས། །དེ་ཁོ་ན་ཉིད་ཡེ་ཤེས་ཞུས། །སེམས་ཅན་རྣམས་ཀྱི་རྣམ་ངེས་པས། །འཆི་བའི་མཚན་ཉིད་གང་འདྲ་བ། །དེ་འདྲ་བདག་གིས་བཤད་བྱ་ཡིས། །རྩེ་གཅིག་པ་ཡི་ཡིད་ཀྱིས་ཉོན། །ལུས་ལ་རྩ་རྣམས་མཚན་མ་ནི། །དེ་རྣམས་ཇི་ལྟར་གསལ་བར་དབྱེ། །རྩ་ཆེན་སུམ་ཅུ་རྩ་གཉིས་ཏེ། །དེ་རྣམས་ཀྱི་ནི་གཙོ་བོ་མཆོག །བཅུ་གཉིས་དེ་བཞིན་དུ་ལྷ་མོ། །དབྱངས་
རྣམས་བགྲོད་པའི་མཚན་ཉིད་དེ། །དཀར་པོ་ནག་པོའི་ཕྱོགས་ཀྱིས་ནི། །ཉི་ཤུ་རྩ་བཞི་རུ་ནི་བརྗོད། །དེར་ནི་སྙིང་པོ་དགུ་པོ་མཆོག །ལུས་ཀྱི་མཚན་མའི་མཚན་ཉིད་དོ། །གང་གིས་ཤེས་པ་ཙམ་གྱིས་ནི། །འཆི་བའི་དུས་ལྟ་བུར་གནས་སོ། །དབུགས་ནི་རྣམ་པར་སྤྲོས་ཙམ་གྱིས། །ལུས་ཅན་འཕོ་བ་དྲུག་གཉིས་ན། །སྔ་དྲོ་རོ་ཧི་ཏ་ཡི་ཆར། །དེ་ཡི་རྟགས་ནི་མཚོན་པར་བྱ། །སྣ་དང་མིག་གི་ཕྱོགས་དང་ནི། །འགྲམ་པ་དང་ནི་རྣ་བའི་རྩར། །ལྕེ་དང་མཆེ་བའི་མཚམས་དང་ནི། །མགྲིན་པ་རྩིབ་ལོགས་དེ་བཞིན་དུ། །སྙིང་གི་གུར་དང་ལྟེ་བ་དང་། །བརླ་དང་བྱིན་པ་དེ་བཞིན་གཞན། །མདོམས་དང་ལིང་ག་དག་དེ་བཞིན། །མགོ་བོ་དང་ནི་སྤྱི་བོའི་ཕྱོགས། །མཚམས་ནི་དེ་རྣམས་ཐམས་ཅད་དུ། །དབུགས་ནི་འཆད་ཅིང་འཆད་པའོ། །ལུས་ཀྱི་མཚན་མ་དགུ་རྣམས་ཏེ། །འཆི་བའི་དུས་ནི་བསྟན་པ་ཡིན། །ཉི་མའི་ཚད་ཀྱི་གྲངས་རྣམས་ནི། །འཁོར་ལོ་དུས་བདག་ཉིད་ཅན་དགའ། །གང་ཚེ་ཉི་མ་དྲུག་རྣམས་ཞོན། །གཅིག་བརྗོད་པ་ནི་བརྒྱན་པ་ཡིན། །དེར་ནི་ལོ་གསུམ་འགྱུར་ཅན་ཏེ། །སུམ་བརྒྱ་དྲུག་ཅུ་རྣམས་དེ་བཞིན། །ཆ་ཤས་དེ་ལྟར་གྱི་ནི་ཚད། །མདོར་བསྡུས་པ་ཡིས་བཤད་པར་བྱ། །ཉི་མ་བདུན་ནི་ཡོངས་ཐོབ་ནས། །གང་ཚེ་རླུང་ནི་འབབ་པ་ན། །ལོ་གཉིས་ཡང་དག་བརྗོད་པ་དང་། །དུས་ཀྱི་གྲངས་ཅན་ཟླ་བ་དང་། །ཉི་མ་རྣམས་ནི་བཅྭ་བརྒྱད་ཀྱི། །གང་ཞིག་ཚད་དུ་ཡང་དག་བརྗོད། །ཞག་བརྒྱད་རྣམས་སུ་ཡོངས་གཏོང་པས། །རླུང་ནི་གང་ཚེ་འབབ་པ་ན། །ལོ་གཉིས་སུ་ནི་ཡོངས་བཤད་པར། །དེ་ཡི་འཚོ་བ་ཡི་ནི་གྲངས། །ངེས་པར་དེ་ཚེ་འཆི་བ་ནི། །དེ་ཡི་ཟླ་བ་རིག་བྱེད་གྲངས། །ཉི་མ་ཉི་ཤུ་རྩ་བཞིར་བཤད། །འཚོ་བ་ཡི་ནི་དུས་གྲངས་སོ། །ལྷ་མོ་ཉི་མ་དགུར་འབབ་ན། །ལོ་གཉིས་སུ་ནི་དེ་འཚོ་སྟེ། །ཟླ་གཉིས་ཉི་མ་ཉི་མ་ཡི། །ཚད་ནི་སྦྱོར་བའི་ལུས་ཅན་ནོ། །ལྷ་མོ་ཉི་མ་བཅུ་རྣམས་ཀྱིས། །ལོ་གཉིས་སུ་ནི་དེ་འཚོའོ། །ཉི་མ་བཅུ་གཅིག་དེ་བཞིན་དུ། །གང་ཚེ་རྩ་ནི་རབ་འཇུག་ན། །ལོ་གཅིག་གི་ནི་ལམ་བཅས་པས། །ཟླ་བ་ཡང་ནི་དགུའི་གྲངས་ཀྱིས། །ཉི་མ་བཅྭ་
བརྒྱད་རབ་ཏུ་བཤད། །ཐེ་ཚོམ་མེད་པར་བཤད་པའོ། །ཞག་ནི་བཅུ་གཉིས་རབ་འབབ་པས། །ལོ་གཅིག་ཏུ་ནི་རབ་ཏུ་གྲགས། །ཟླ་བ་ཡང་ནི་ལོའི་གྲངས་ཅན། །ཉི་མ་རྣམས་ནི་དུས་ཀྱིས་མཛེས། །བཅུ་གསུམ་དུ་ནི་གང་ཚེ་རྩ། །གཡས་སུ་བགྲོད་པ་འབབ་པ་ན། །ལོར་ནི་ཡང་དག་བཤད་པ་སྟེ། །ཟླ་བ་ཡང་ནི་རིག་བྱེད་གྲངས། །ཉི་མ་རྣམས་ནི་དགུའི་གྲངས་ན། །འཆི་བའི་མཚན་ཉིད་བཤད་པའོ། །ལྷ་མོ་གང་ཚེ་བདུན་གཉིས་སུ། །རྟག་ཏུ་རླུང་ནི་འབབ་པ་ན། །ལོ་ནི་ཚེ་རུ་ཡང་དག་བཤད། །ཟླ་བའི་ཚེར་ནི་ཡང་དག་གྲགས། །ཉི་མ་རྣམས་ནི་བཅུ་གཉིས་ཏེ། །དེ་ཡི་འཚོ་བའི་ཚད་ཡིན་ནོ། །གང་ཚེ་ལྔ་བཅུ་ཉི་མར་ནི། །རླུང་ནི་དེ་བཞིན་འབབ་པ་ན། །དེ་ཚེ་འཆི་བར་ཤེས་བྱ་བ། །ལོ་གཅིག་ན་ནི་ཐེ་ཚོམ་མེད། །ཉི་མ་མཆོག་ནི་ཕན་པ་ཡི། །གང་ཚེ་བརྒྱད་གཉིས་སུ་འབབ་ན། །འཚོ་བ་ཟླ་བ་བཅུ་དང་ནི། །ཉི་མ་རྣམས་ནི་མཆོག་གྲངས་ཀྱི། །ཉི་ཤུ་རྩ་བཞིའི་ཉི་རྣམས་ཀྱི། །ཚད་དུ་བདག་གིས་བཤད་པའོ། །ཉི་མ་རྣམས་ནི་བཅུ་བདུན་དུ། །ངེས་པར་གང་ཚེ་རླུང་འབབ་ན། །དེ་ཚེ་དེ་ཡི་ཚད་ཀྱིས་ནི། །ཟླ་བ་རྣམས་ནི་དགུ་དང་ནི། །ཉི་མ་བཅྭ་བརྒྱད་ན་དེ་བཞིན། །འཆི་བའི་དུས་ལ་ཐེ་ཚོམ་མེད། །ཉི་མ་བཅྭ་བརྒྱད་རྒྱུ་བ་ཡིས། །ཟླ་བ་ཡང་ནི་བརྒྱད་ན་ཡང་། །ཉི་མ་རྣམས་ཀྱང་ཉི་མའི་གྲངས། །དུས་ཀྱི་གྲངས་ནི་བཤད་པའོ། །གང་ཚེ་གཅིག་དམན་ཉི་ཤུར་ནི། །དྲི་ལ་ཞོན་པ་སྤྱོད་པ་ན། །ཉི་མ་ཡང་དག་བཤད་བྱ་བ། །འཚོ་བ་ཟླ་བ་བདུན་དང་ནི། །ཉི་མ་རྣམས་ནི་དུས་གྲངས་བཤད། །དུས་འདི་རྣམས་ཀྱིས་མཆོག་གདོང་ཅན། །གང་ཚེ་ཉི་ཤུ་རུ་ནི་སྤྱོད། །ཟླ་བ་དྲུག་ན་ཚེ་དང་འབྲལ། །ཉི་མ་ཉི་ཤུ་གཅིག་རྣམས་སུ། །གང་ཚེ་ཉི་མ་རབ་འབབ་ན། །ཟླ་བ་ལྔ་རུ་ཡོངས་འཚོ་སྟེ། །ཉི་མ་རྣམས་ནི་ཉི་མའི་གྲངས། །ཉི་ཤུ་རྩ་གཉིས་གང་ཚེ་འབབ། །ཟླ་བའི་རིག་བྱེད་ན་ཚེ་འགྲོ། །ཉི་མ་རྣམས་ནི་ཉི་ཤུ་བཞི། །ཟླ་བ་རིག་བྱེད་དུ་བཤད་དོ། །ལྷ་མོ་གང་ཚེ་ཉི་ཤུ་གསུམ། །རླུང་ནི་རྒྱུན་དུ་འབབ་པ་ནི། །དེ་ནི་ཟླ་བ་བཞིར་འཚོ་སྟེ། །ཉི་མ་དུས་རྣམས་སུ་དྲན་བྱ། །ཉི་ཤུ་རྩ་བཞིར་རབ་འབབ་པས། །ཟླ་བ་གསུམ་དུ་བཤད་པ་སྟེ། །ཉིན་བཅུ་གཅིག་
ན་དེ་བཞིན་དུ། །འཆི་བའི་དུས་སུ་རྣམ་པར་བརྗོད། །དུས་ཀྱི་གྲངས་ནི་མདོར་བསྡུས་ནས། །གོང་དུ་སྔོན་དུ་བཤད་དེའི་ཕྱིར། །བར་གྱི་ཉི་མ་མ་བཤད་གང་། །བཅུ་གཉིས་ཉིད་ཀྱི་གྲངས་ཀྱིས་ནི། །ཆ་ཡི་རིམ་པས་དེ་སྦྱངས་ནས། །བར་ནི་གསལ་བར་བྱེད་པ་ཡིན། །བློ་དམན་རྣམས་ཀྱིས་རྟོགས་དོན་དུ། །དུས་འདི་རྣམས་ནི་རབ་ཏུ་བསྟན། །རྣལ་འབྱོར་མ་རྣམས་ཤིན་ཕྲ་མོའི། །མཐུན་མ་དུས་ནི་བདག་གིས་བཤད། །ལྷ་མོ་དེ་རྣམས་ཀྱིས་ཡིད་ཆེས། །ཁམས་ནི་མཉམ་པ་ཅན་དུ་འགྲོ། །སྣ་ཡི་ཤ་ནི་རྣམ་ཆད་ཅིང་། །སྟེང་བལྟས་མ་ནི་དེ་བཞིན་འབབ། །དེ་ཡི་འཚོ་བར་ཤེས་བྱ་བ། །ཉི་མ་བདུན་ན་ཐེ་ཚོམ་མེད། །མིག་གིས་གོས་ནི་ཡང་དག་ཆད། །གྱེན་ཁ་བལྟས་མ་མཆོག་དེ་བཞིན། །ཆ་ཤས་དགུ་ལ་ཡང་དག་ཞོན། །ལྔས་ལྷག་པ་ན་འཆད་དེ་བཞིན། །གོ་དཱ་བ་རྱ་མཁུར་བ་ཡི། །ངོས་སུ་སྟེང་དུ་འགྲོ་བ་མོ། །ཉི་མ་བཅུ་རུ་ཤེས་བྱ་སྟེ། །ནུབ་གཅིག་གིས་ལྷག་དེ་བཞིན་ནོ། །རྣ་བ་གཡས་ལ་ཡོངས་བརྟེན་ནས། །བཟང་མོ་སྟེང་དུ་ཡང་དག་བརྟེན། །བཅུ་གཅིག་ཆ་ཤས་ལ་ཞོན་ཏེ། །འཆད་པ་བཅྭ་བརྒྱད་ན་དེ་བཞིན། །བཅུ་གཉིས་དེ་བཞིན་དུ་ལྷ་མོ། །ལྕེ་ལ་རི་མོ་ནག་པོ་ཅན། །ལུས་ཅན་ཀུན་གྱི་འཆི་བ་ནི། །ནམ་ཟླའི་མཚན་མོས་ཤེས་པར་བྱ། །བཅུ་གསུམ་སོ་ཡི་བར་དུ་ནི། །གདོང་ནག་མོ་ནི་རེག་དེ་བཞིན། །ནམ་ཟླའི་གྲངས་ཀྱི་ཉི་རྣམས་ཀྱིས། །འབྱུང་པོ་རྣམས་ཀྱི་བགྲོད་པ་ཡིན། །རྒྱུན་དུ་མཆི་མ་འབབ་གང་རྩ། །སྟེང་བལྟས་མར་ནི་རབ་ཏུ་གྲགས། །བཅུ་བཞི་པ་ཡི་དབྱངས་ལ་ཞོན། །བཅུ་ཕྱེད་ཀྱིས་ནི་ཐེ་ཚོམ་མེད། །སྙིང་གའི་གཟེབ་ནི་ཞོམ་པ་དང་། །སྟེང་དུ་ལྟ་མ་དེ་མཆོག་མ། །གསུམ་དང་ལྔ་རུ་མཛེས་ལྷ་མོ། །ཟླ་བ་ཕྱེད་དུ་ཐེ་ཚོམ་མེད། །ལྟེ་བའི་དབུས་སུ་སོན་ལྷ་མོ། །བཅུ་དྲུག་ཆ་བདག་ཅན་ཡོངས་རྫོགས། །སེན་མོའི་ཁྲག་མེད་དེ་བཞིན་ཞག །ཉིན་རྣམས་བཅུ་རུ་ཐེ་ཚོམ་ཟ། །བཅུ་བདུན་པ་ཡི་རྩ་ཡང་ནི། །བརླ་ཡི་སྟེང་དུ་སྐམས་པ་ནི། །ཉི་ཤུ་རྩ་བཞིར་ཡང་དག་གྲགས། །ཉིན་གཞན་ཉིན་ལ་ཐེ་ཚོམ་མེད། །བྱིན་པ་ཟུང་གི་གང་ཞིག་རྩ། །སྟེང་དུ་བལྟས་མ་དེ་བཞིན་མཆོག །བཅྭ་བརྒྱད་
པ་རུ་ཤེས་བྱ་སྟེ། །ཉི་མ་རྣམས་ཀྱང་ཉི་གྲངས་ཀྱིས། །གཅིག་གིས་དམན་པའི་ཉི་ཤུ་འདོམས། །འཆི་བའོ་སྟེང་དུ་ཁ་བལྟས་མཆོག །མཉམ་པས་འཆད་པར་འགྱུར་བ་ལ། །འདི་ཡིས་འཚོ་བར་ཐེ་ཚོམ་མེད། །མཚན་མར་རོལ་ལྡན་མར་གྲགས་མ། །སྟེང་བགྲོད་མཆོག་གི་དབང་ཕྱུག་མ། །བཅུ་གཉིས་སུ་ནི་ཡང་དག་གྲགས། །ཉིན་རྣམས་དུས་ཚོད་ཐེ་ཚོམ་ཟ། །བར་གྱི་ཉི་མ་གང་བཤད་པ། །བཅུ་གཉིས་ཉིད་ལ་ཐེ་ཚོམ་མེད། །ལོ་ཡི་རིམ་པས་དེ་སྦྱངས་ནས། །བདུན་ཅུ་རྩ་གཉིས་རིམ་པ་ཡིས། །དྲུག་དང་སུམ་ཅུ་བཅྭ་བརྒྱད་བཅུ། །འདི་ནི་ཟླ་བས་རིམ་ཇི་ལྟར། །ཤེས་བྱ་དེ་ལྟར་ལྷ་ཆེན་མོ། །རིམ་གྱིས་རིམ་གྱིས་དབྱེ་བའོ། །ལྷག་མ་ཉིད་ནི་བསྡུས་འགྱུར་བར། །འཚོ་བ་ཡིར་ནི་ཤེས་པར་བྱ། །ཡང་དག་ཆོ་ག་འདི་རྣམས་ཀྱིས། །རྡོ་རྗེ་འོད་ནི་བསྒོམ་པར་བྱ། །རབ་ཏུ་སྦྱོར་བས་སྲོག་བཀང་པས། །སངས་རྒྱས་ལུས་ལ་འཆི་ཅི་སྨོས། །རབ་ཏུ་སྦྱོར་བ་འདི་བརྟེན་ནས། །མདོར་བསྡུས་པ་ཡིས་འཆད་པར་འགྱུར། །རྡོ་རྗེའི་ལམ་ནས་སོན་པའི་སྲོག །སྣལ་མ་བཅུ་གཉིས་མཐའ་བར་དུའོ། །སངས་རྒྱས་རྗེས་སུ་དྲན་སྦྱོར་བས། །འདོད་པ་ལྔ་ཅན་ལ་ཟ་འགྱུར། །གསང་སྔགས་ཆེན་པོའི་འོད་ལ་ནི། །གནས་ནས་ཀུན་དུ་བགྲོད་པར་བྱ། །སྒྱུ་མའི་བདག་ཉིད་འཆི་མེད་འགྱུར། །རྣམ་པ་དྲི་ཟའི་རིས་ཅན་ནོ། །རྩྭ་ཡིས་ཀུན་ནས་འགེངས་བཞིན་པ། །དངོས་པོ་ཀུན་ལ་གནས་པ་ཡིན། །སྐྱེ་བོ་ཀུན་གྱི་ཁམས་རྣམས་ནི། །ཡེ་ཤེས་རྣམ་པར་འཐོབ་པར་བྱེད། །ཆོས་བདག་མེད་པ་འཛག་པར་འགྱུར། །གང་ཟག་རྣམས་ལ་དགོད་པར་འགྱུར། །གཉིས་ཀ་སྒྱུ་མ་ཆེན་མོ་སྟེ། །སྙིང་རྗེའི་དབང་གིས་བཞུགས་པ་ཡིན། །མཐར་ཐུག་པ་ཡི་སྦྱོར་བས་སེམས། །མཚམས་རྣམས་ཀུན་དུ་འཆི་བ་ཡིན། །འཆི་བ་ཆེན་པོ་སངས་རྒྱས་གཟུགས། །རྣལ་འབྱོར་རྣམས་ལ་བདེ་སྟེར་བྱེད། །དཀྱིལ་འཁོར་ཐམས་ཅད་གཟུང་བ་ཡི། །ཐམས་ཅད་བདེ་བའི་བདག་ཉིད་འགྱུར། །འཁོར་ལོའི་རིམ་པའི་རབ་སྦྱོར་བས། །བདེ་བ་དམ་པ་ཡང་དག་མྱོང་། །རྡོ་རྗེ་འོད་ནི་བསྒོམ་པར་བྱ། །བཅོམ་ལྡན་འདས་ཀྱི་གཟུགས་མཚུངས་མ། །ལྷ་ནི་མངོན་
རྟོགས་གཟུགས་ཅན་ཏེ། །ཤེས་རབ་ཐབས་ཀྱི་བདག་ཉིད་ཅན། །སྲོག་ཀུན་ཡང་དག་སྦྱོར་བ་ལས། །མཆོག་ཏུ་ཟག་མེད་བཞུགས་ལྡན་པ། །དེ་བཞིན་གཤེགས་པ་དུས་འཁོར་གྲགས། །བཅོམ་ལྡན་འདས་ཀྱིས་འདི་གསུངས་སོ། །ཞེས་བྱ་བ་ནི་རྡོ་རྗེ་འོད་ཀྱི་ཆོ་ག་སྟེ་རབ་ཏུ་བྱེད་པ་བདུན་པའོ།། །།དེ་ནས་ཕྱག་ན་རྡོ་རྗེ་སོགས། །བྱང་སེམས་དེ་བཞིན་གཤེགས་རྣམས་ཀྱིས། །མཆོད་པ་བྱས་ཤིང་ཕྱག་བྱས་ནས། །འདི་སྐད་དུ་ནི་གསོལ་བའོ། །གཙོ་བོ་ལྷ་རྣམས་སྒྲུབ་ཐབས་དང་། །དེ་རྣམས་རང་སྔགས་བདག་ལ་གསུངས། །གང་གིས་ཐམས་ཅད་དབང་གྱུར་པ། །གང་གིས་རབ་སྦྱོར་ཉིད་ཀྱིས་ལགས། །ལྷ་ལ་སོགས་པའི་སྒྲུབ་པའི་ཐབས། །རྡོ་རྗེ་སྐུ་ཡི་རྒྱལ་པོ་ཉོན། །གང་གིས་ཡང་དག་ཆོ་ག་ཡིས། །མྱུར་དུ་དངོས་གྲུབ་རབ་ཏུ་འཇུག །དཀྱིལ་འཁོར་བྲི་བ་བྱས་ནས་ནི། །སྐུ་བསྒོམ་བྱ་བ་འདིར་བཤད་དེ། །དེ་ལ་མ་མོ་ལྷ་རྣམས་དང་། །ཕོ་ཉ་འབྱུང་པོ་གཟའ་དེ་བཞིན། །ལུས་སྲུལ་པོ་ནི་ཆེན་པོ་དང་། །རིག་པའི་གསང་སྔགས་འདིར་བརྗོད་བྱ། །དབུས་མ་ཡི་ནི་ནང་གནས་པ། །སྲིད་པ་དག་པས་བསྒྲུབས་པ་ཡིན། །དུས་ཐམས་ཅད་དུ་བསྐྱེད་པ་ནི། །དཀྱིལ་འཁོར་དུ་ནི་རབ་འབབ་ཅན། །མ་མོ་དབང་ཆེན་བསྒྲུབ་བྱ་དང་། །ལྷ་ནི་ཆུ་ཡི་དཀྱིལ་འཁོར་དུ། །འབྱུང་པོ་མེ་ལ་བསྒྲུབ་བྱ་བ། །གཟའ་ནི་རླུང་གི་དཀྱིལ་འཁོར་ལ། །ལུས་སྲུལ་པོ་ནི་ནམ་མཁའ་སྟེ། །རྡོ་རྗེའི་སྐུ་ཡི་རབ་སྦྱོར་བར། །ཡེ་ཤེས་དཀྱིལ་འཁོར་ཆ་ཡིས་ནི། །ཨ་བ་དྷཱུ་ཏཱིར་འབབ་པ་ཡིན། །དཀྱིལ་འཁོར་ལྔ་རྣམས་ཀྱི་ཐ་མ། །དེ་ཡི་དུས་སུ་ཤེས་པར་བྱ། །དེ་བལྟས་ནས་ནི་ཕྱི་རོལ་དུ། །རས་བྲིས་ལ་སོགས་དཀྱིལ་འཁོར་དགོད། །ནག་པའི་བརྒྱད་དང་བཅུ་བཞི་ལ། །འབྱུང་པོའི་དཀྱིལ་འཁོར་བསྒྲུབ་པར་བྱ། །འབུམ་ཕྲག་བཟླས་པས་དེ་ནས་ནི། །སྟེར་འགྱུར་མདུན་དུ་མངོན་སུམ་དུའོ། །ཚངས་མ་ཞི་བ་མོ་དེ་བཞིན། །གཞོན་ནུ་མ་དང་ཕག་མོ་དང་། །དབང་མོ་ཉིད་དང་ཙ་མུཎྜི། །ཚོགས་ཀྱི་དབང་མོ་མེ་གདན་མོ། །གཉིས་པའི་དུམ་བུར་དབང་པོ་དང་། །གཤིན་རྗེ་ཆུ་ལྷ་ལུས་ངན་དང་། །
ཡི་དགས་དབང་དང་མི་སྟན་ཅན། །བདེན་བྲལ་དང་ནི་རླུང་དེ་བཞིན། །དུམ་བུ་གསུམ་པར་དགོད་བྱ་བ། །ཉི་མ་ཟླ་བ་མིག་དམར་དང་། །གཟའ་ལག་ཕུར་བུ་པ་སངས་དང་། །སྤེན་པ་དང་ནི་རཱ་ཧུའོ། །བཞི་པར་ཚངས་ཁྱབ་འཇུག་དེ་བཞིན། །དྲག་པོ་གཞོན་ནུ་ངེས་པར་བསྐོར། །ས་དང་ཆུ་དང་མེ་དང་རླུང་། །འབྱུང་བ་ཆེན་པོའི་ཁམས་རྣམས་དང་། །མཁའ་འགྲོ་མར་མེ་འཇིབ་མ་དང་། །ཀམ་པོ་ཛཱི་ཁྱབ་བདག་དེ་བཞིན། །འབྱུང་པོ་འབྱུང་པོའི་གཟུགས་ཀྱིས་ནི། །རྟག་ཏུ་ཆོ་ག་བཞིན་བསྒྲུབ་བྱ། །དཀྱིལ་འཁོར་ཆེན་པོའི་སྦྱོར་བ་ཡིས། །ཀུན་ནས་ཕྱི་ཡི་དཀྱིལ་འཁོར་བྲི། །རི་མོ་སུམ་སྐོར་དབུས་བྱིན་པས། །བརྟུལ་ཞུགས་ཅན་གྱིས་མཛེས་པར་བྱ། །པདྨ་འདབ་བརྒྱད་བྲི་བར་བྱ། །ལྟེ་བ་ཟབ་པའི་སྤྱོད་ཡུལ་ཅན། །དེ་ཡི་དབུས་སུ་རྡོ་རྗེའི་སྐུ། །ཞལ་གཅིག་པ་ལ་ཕྱག་བཞི་པ། །ཅུང་ཟད་མཆེ་བ་གཙིགས་པའི་ཞལ། །བཞད་པའི་ཞལ་ལ་ཁྲོ་དང་བཅས། །ཁ་དོག་སྔོན་པོ་དྲག་ཆེན་པོ། །ཐོད་པའི་ཕྲེང་བས་རྣམ་པར་བརྒྱན། །ཉི་མར་གར་མཛད་རོ་ལ་བཞུགས། །སུམ་ཅུ་པ་རྣམས་འཇིགས་པར་མཛད། །སྟག་གི་པགས་པའི་ན་བཟའ་འཛིན། །བཟང་པོའི་གཟུགས་ཅན་སྤྱན་གསུམ་པ། །ཐོད་པ་དང་ནི་ཁ་ཊྭཱཾ་འཛིན། །ཅང་ཏེའུ་གྲི་གུག་གིས་ནི་བརྒྱན། །ཤར་དང་ལྷོ་དང་ནུབ་དང་ནི། །བྱང་དུ་རིམ་པ་ཇི་ལྟ་བས། །མཁའ་འགྲོ་ཀམ་པོ་ཛཱི་ཉིད་མ། །འཇིབ་མ་དང་ནི་མར་མེ་མའོ། །དེ་ལྟར་རྡོ་རྗེ་སྐུ་ཡི་དོན། །མདོར་བསྡུས་པ་ཡིས་བརྗོད་པར་བྱ། །ལྟེ་བར་རྡོ་རྗེའི་རྣམ་པར་འགྱུར། །ཕོ་ཉ་རྐང་པ་དྲུག་བགྲོད་མའི། །སྙིང་ག་གསང་བ་མགྲིན་པ་རུ། །དེ་ཉིད་རྣམ་པར་སླར་དགོད་བྱ། །དེ་ནས་སྲོག་ནི་འཛིན་བཞིན་པས། །བསམ་གཏན་སེམས་ཏེ་གཞན་གྱིས་མིན། །ལྷ་རྫས་འོད་ཟེར་བསྐྱེད་པར་འགྱུར། །དཀྱིལ་འཁོར་པ་རྣམས་རང་ལུས་སྐྱེས། །ལས་དང་པོ་ཡི་སྦྱོར་བ་ཡིས། །ཕྱོགས་བཅུར་རྣམ་པར་སྤྲོ་བར་འགྱུར། །ཧྲཱིཿཡིག་ལས་བྱུང་བའི་ལྷ་མོ། །ཕག་མོ་ཕྱག་ནི་བཞི་མ་སྟེ། །གཞུ་དང་མདའ་ཉིད་དེ་བཞིན་དུ། །རྒྱལ་མཚན་དང་ནི་ཐོད་པ་ཉིད། །ཁ་དོག་སྔོན་མོ་དྲག་ཆེན་མོ། །ཕག་གི་གདོང་ཅན་འཇིགས་རུང་མའོ། །ཕེཾ་ཡིག་གིས་
བྲིས་ཞི་བ་མོ། །ཁ་དོག་དམར་མོ་འོད་ཆེན་མོ། །ཐོད་པ་དང་ནི་ལྕགས་ཀྱུ་ཉིད། །ཁ་ཊྭཱཾ་ཌ་མ་རུ་དེ་བཞིན། །ཧྲཱིཿཡི་ཡི་གེས་གཞོན་ནུ་མ། །ཁ་དོག་སེར་མོ་ཕྱག་བཞི་མ། །རྩེ་གསུམ་པ་དང་བ་དན་གསུམ། །གཞུ་དང་མདའ་ཉིད་དེ་བཞིན་ནོ། །ཧོཿཡི་ཡི་གེ་ས་ཙ་མུཎྜི། །ཁ་དོག་ནག་མོ་ཕྱག་བཞི་མ། །ཁ་ཊྭཱཾ་ག་ཉིད་ཐོད་པ་དང་། །ཅང་ཏེའུ་ཆང་སྣོད་དེ་བཞིན་ནོ། །ༀ་ཡིག་ལས་ནི་ཚངས་པ་མོ། །ཁ་དོག་དཀར་མོ་ཕྱག་བཞི་མ། །པདྨ་ཉིད་དང་ཐོད་པ་དང་། །གཞུ་དང་མདའ་ནི་དེ་བཞིན་མཆོག །གཾ་ཡིག་ལས་ནི་ཚོགས་དབང་མོ། །ཁ་དོག་ལྗང་གུ་ཕྱག་བཞི་མ། །རྩེ་གསུམ་པོ་དང་ཐོད་པ་དང་། །བགྲང་ཕྲེང་དང་ནི་ལ་དུའོ། །བི་ཡིག་ལས་ནི་ཁྱབ་འཇུག་མ། །ཁ་དོག་སྔོན་མོ་ཕྱག་བཞི་མ། །འཁོར་ལོ་དང་ནི་ཐོད་པ་དང་། །ཞགས་པ་རལ་གྲི་དེ་བཞིན་མཆོག །ཨཱི་ཡིག་ལས་བྱུང་བ་དབང་མོ། །ཁ་དོག་སེར་མོ་ཕྱག་བཞི་མ། །རྡོ་རྗེ་མདུང་ཐུང་ཐོད་པ་དང་། །སྡིགས་མཛུབ་བཅས་ཞགས་དེ་བཞིན་ནོ། །ཐམས་ཅད་འབར་བཞིན་གྱེན་བརྫེས་སྐྲ། །སྣ་ཚོགས་རྒྱན་གྱིས་རྣམ་པར་བཀླུབས། །རོ་ལ་ཞོན་མ་སྤྱན་གསུམ་མ། །རྐེད་པར་སྟག་གི་པགས་པ་དཀྲིས། །ཤར་སྒོར་ཚངས་པ་བྲི་བྱ་བ། །ཁ་དོག་དཀར་པོ་ཕྱག་བཞི་པ། །ཐོད་པ་དང་ནི་བགྲང་ཕྲེང་དང་། །སྤྱི་བླུགས་པདྨ་དེ་བཞིན་ནོ། །བྱང་དུ་དེ་བཞིན་ཁྱབ་འཇུག་ནི། །ཁ་དོག་ནག་པོ་ཕྱག་བཞི་པ། །རལ་གྲི་དེ་བཞིན་འཁོར་ལོ་དང་། །ཐོད་པ་དབྱུག་པ་དེ་བཞིན་ནོ། །ལྷོ་རུ་དྲག་པོ་བྲི་བྱ་སྟེ། །དུ་བའི་མདོག་ཅན་ཕྱག་བཞི་པ། །རྩེ་གསུམ་ཐོད་པ་དེ་བཞིན་དུ། །ཞགས་པ་ཕྲེང་བ་འཛིན་དེ་བཞིན། །ནུབ་ཏུ་གཞོན་ནུ་བྲི་བར་བྱ། །ཁ་དོག་སེར་པོ་ཕྱག་བཞི་པ། །དཔའ་བོ་མདུང་ཐུང་དབྱུག་པ་འཛིན། །ཐོད་པ་བགྲང་ཕྲེང་འཛིན་དེ་བཞིན། །དབང་ལྡན་ཁྱུ་མཆོག་ལ་ཞོན་པ། །ཁ་དོག་དཀར་པོ་ཕྱག་བཞི་སྟེ། །ཐོད་པ་དང་ནི་རྩེ་གསུམ་འཛིན། །ཕྱག་གཞན་ཐལ་མོ་སྦྱར་བའོ། །དབང་པོ་གླང་པོ་ལ་ཞོན་པ། །ཁ་དོག་སེར་པོ་ཕྱག་བཞི་སྟེ། །རྡོ་རྗེ་དང་ནི་ཐོད་པ་དང་། །ཐལ་མོ་སྦྱར་བ་བྱས་པ་མཆོག །མེ་རུ་ལུག་ལ་ཞོན་པ་ནི། །ཁ་དོག་དམར་པོ་ཕྱག་བཞི་
པ། །མེ་ཡི་ཐབ་དང་ཐོད་པ་དང་། །སྐྲག་ནས་དེ་བཞིན་ལག་ཐལ་སྦྱར། །གཤིན་རྗེར་མ་ཧེ་ལ་ཞོན་པ། །ཁ་དོག་ནག་པོ་ཕྱག་བཞི་པ། །དབྱུག་པ་དེ་བཞིན་ཐོད་པ་དང་། །ཀུན་དུ་སྐྲག་ནས་ཐལ་སྦྱར་འཛིན། །བདེན་བྲལ་མི་ལ་ཞོན་པ་སྟེ། །ཁ་དོག་སྔོ་སྐྱ་ཕྱག་བཞི་པ། །རལ་གྲི་དང་ནི་ཐོད་པ་འཛིན། །ཀུན་ནས་སྐྲག་པས་ཐལ་སྦྱར་མཆོག །ཆུ་ལྷར་ཆུ་སྲིན་ལ་ཞོན་པ། །ཁ་དོག་དཀར་པོ་ཕྱག་བཞི་སྟེ། །ཞགས་པ་དེ་བཞིན་ཐོད་པ་དང་། །ཐལ་མོ་སྦྱར་བ་དེ་བཞིན་གཞན། །རླུང་ལྷ་རི་དགས་ལ་ཞོན་པ། །དུ་བའི་མདོག་ཅན་ཕྱག་བཞི་སྟེ། །བ་དན་དང་ནི་ཐོད་པ་དང་། །དེ་བཞིན་ཐལ་སྦྱར་འཛིན་པ་མཆོག །ལུས་ངན་དུ་ནི་གཏེར་ལ་ཞོན། །ཁ་དོག་སེར་པོ་ཕྱག་བཞི་པ། །རིན་པོ་ཆེ་དང་ཐོད་པ་འཛིན། །ཐལ་སྦྱར་བྱས་པའོ་དེ་བཞིན་གཞན། །ཐམས་ཅད་རྒྱུ་སྐར་དང་ནི་གཟའ། །རང་དཀྱིལ་འཁོར་ལ་གནས་པ་བསྒོམ། །རང་གི་དམ་ཚིག་ལས་བྱུང་བ། །དེ་རྣམས་རྫུ་འཕྲུལ་ལྡན་སྟོབས་ཆེ། །མ་མོ་རྣམས་དང་ཀུན་གྱི་མ། །འབྱུང་པོ་རིག་མ་དེ་བཞིན་གཞན། །དེ་ལྟའི་ཆོ་གའི་བྱ་བ་ཡིས། །དེ་ཕྱིར་རེ་རེ་བསྒོམ་པར་བྱ། །དུར་ཁྲོད་ལ་སོགས་གནས་རྣམས་སུ། །སྣ་ཚོགས་དམ་ཚིག་ཟ་རྣམས་ཀྱིས། །རྣལ་འབྱོར་ལོངས་སྤྱོད་རྟག་དགའ་ལ། །ཕོ་ཉའི་ལས་ནི་ཡང་དག་བརྩམ། །ཟླ་བ་རྡོ་རྗེའི་གོ་ཆ་ཡིས། །རྡོ་རྗེ་སེམས་དཔའ་འབྱུང་བཞིན་ནོ། །སྔགས་ཀྱི་རྒྱལ་པོས་བསྐུལ་བ་ཡིས། །དེ་ཐམས་ཅད་ནི་བྲན་བཞིན་བྱེད། །གནས་སོགས་ཉི་ཤུ་རྩ་བཞི་རུ། །དེ་ཕྱིར་རིམ་པས་མཆོད་པར་བྱ། །དེ་ནས་དྲི་སོགས་དབུལ་བྱ་ཞིང་། །སྔགས་ཀྱི་བཟླས་པ་ཡང་བྱ་སྟེ། །རང་མིང་བརྗོད་པའི་གསང་སྔགས་ལ། །ༀ་ཧཱུྃ་ཕཊ་སོགས་ནང་བཅུག་པའོ། །དབུས་སུ་བཅོམ་ལྡན་འདས་བརྗེས་ནས། །དེར་ནི་ཐམས་ཅད་བསྒྲུབ་པར་བྱ། །དེ་ནས་གཞན་བརྗེས་པའི་ནང་དུ། །བཅོམ་ལྡན་གཞན་གྱི་གཟུགས་ཅན་ཏེ། །བ་དན་གསུམ་པ་འབར་བ་དང་། །རྡོ་རྗེ་ཐོད་པ་རྡུལ་ཅན་མཆོག །གཞུ་དང་མདའ་ནི་འཛིན་པ་ཉིད། །གཡས་དང་གཡོན་པའི་ཕྱག་གིས་འཕྱར། །ལྷག་མ་སྔོན་གྱི་གཟུགས་ཅན་ཏེ། །ལུས་དང་ཞལ་སོགས་སྔོན་གྱི་དོན། །
ངེས་པར་དབུས་མའི་རྣལ་འབྱོར་གྱིས། །འགྲུབ་འགྱུར་འདི་ལ་ཐེ་ཚོམ་མེད། །སྐུ་གསུང་ཐུགས་ཀྱི་རྡོ་རྗེའི་བདག །ཐམས་ཅད་ལུས་ཀྱི་རང་བཞིན་ཅན། །གཟུགས་ཐམས་ཅད་ཀྱི་ནང་བཞུགས་པ། །བཅོམ་ལྡན་གཟུགས་ཀྱིས་འདི་གསུངས་སོ། །ཞེས་བྱ་བ་ནི་རྡོ་རྗེ་སྐུའི་ཆོ་ག་སྟེ་རབ་ཏུ་བྱེད་པ་བརྒྱད་པའོ།། །།དེ་ནས་འདིར་ནི་བདེ་རྒྱལ་པོ། །རྣལ་འབྱོར་མ་ཡིས་སད་མཛད་ནས། །ངག་འདི་ཡིས་ནི་འདྲི་བར་མཛད། །བློ་གྲོས་ཆེན་པོ་དུས་ཅི་ལགས། །ཀྱེ་རྣལ་འབྱོར་མ་རྣམས་ཁྱེད་ཉིད་དུས། །མྱུ་གུ་ཅན་གྱིས་སྐྱེས་པའོ། །སྣ་ཚོགས་ས་བོན་སེམས་ཆེན་པོ། །མྱུ་གུ་ཅན་གྱི་སྦྱོར་བས་བཤད། །གཟའ་དང་རྒྱུ་སྐར་ཚེས་གྲངས་ནི། །སེམས་ཀྱི་དུས་སུ་མངོན་པར་བརྗོད། །གཟུགས་མེད་གྲངས་ནི་དེ་ཡི་དུས། །རྣལ་འབྱོར་རྣམས་ཀྱི་བདེ་བའི་རྒྱུ། །འཇིག་རྟེན་གྱི་ནི་དུས་ཙམ་དུ། །ཐུབ་པ་སྐྱེས་མཆོག་རྣམས་ཀྱིས་གསུངས། །དེ་ཚེ་མྱུ་གུ་ཅན་བསྒོམ་པ། །ས་བོན་ས་བོན་གྱི་མཚན་ཉིད། །མྱུ་གུ་སེམས་ཀྱི་གཟུགས་ཅན་ཏེ། །སེམས་ལས་བྱུང་བ་མྱུ་གུ་ཅན། །རྒྱུ་སྐར་རཱ་སི་གཟའ་སོགས་པས། །གང་ཞིག་ཏུ་ནི་མྱུ་གུ་སྐྱེས། །དེ་ཡིས་མྱུ་གུ་ཅན་ངེས་བྱ། །རང་བཞིན་རང་བཞིན་དུ་སྦྱང་བྱ། །དགེ་བའམ་ནི་མི་དགེ་ཀུན། །ཚེས་གྲངས་རྒྱུ་སྐར་གཟའ་འཆར་བ། །དེ་རྣམས་ཐམས་ཅད་དུས་རྣམས་སུ། །ཐམས་ཅད་བདེ་བདག་ཉིད་སྐྱེས་སྒོམ། །རོ་ཀྲྀ་མ་ནི་རྙེད་བྱེད་པའོ། །མ་བྷ་མ་ནད་འཇོམས་པས་སྤོང་། །ཀུ་སྭ་ཨཱ་དུས་བྱེད་གཟུགས་སུ་སྟེ། །ཚེས་གྲངས་དེ་ནི་ཡོངས་སུ་སྤང་། །མོ་བུ་མོ་བཟང་དང་བཀྲ་ཤིས་སོ། །ར་བུ་ཨཱ་འཇོམས་པར་བྱེད་པའོ། །བྷུ་བུ་བྷ་དུས་ཀྱི་གཟུགས་ཀྱིས་སོ། །བྷ་པཱུ་གུ་རྙེད་པ་བྱེད་པའོ། །མི་གུ་དྷ་ནོར་ལ་སོགས་པར་འཛད། །ཏྲ་གུ་ཨ་དུས་ཀྱི་གཟུགས་ཅན་ནོ། །བྲྀ་ཤུ་པཱུ་དགེ་བ་རྣམས་བྱེད་དོ། །བྷི་ཤུ་པཱུ་ནད་དང་འཇོམས་པ་ཡིན། །བྷུ་བྷ་ཤུ་གཤིན་རྗེའི་མཆེ་ཅན་ནོ། །ཀཱུ་མ་ཀྲི་གྲགས་དང་བསོད་ནམས་འཐོབ། །བྱཱ་མ་ཨཱ་གདུང་བ་བྱེད་པའོ། །པཱུ་ར་མ་འཆི་བའི་དུས་ཅན་ནོ། །མེའི་གདན་ཅན་དུ་མི་ཀི་ར། །སླར་ཡང་གཤིན་རྗེར་རཎྜ་སྤང་། །སྲིན་པོར་བཅུ་ལྔ་པ་ཉིད་དང་། །ཁྱུ་མཆོག་ཆུ་
ལྷར་སྤང་བར་བྱ། །སེམས་གཡེངས་རབ་ཏུ་འཇོམས་ཉིད་དུ། །གཏེར་དུ་རྨི་ལམ་ཅན་དེ་བཞིན། །བཟང་པོ་མིག་གསུམ་པ་ཉིད་དུ། །འབྱུང་པོའི་ཉི་མ་ཤར་དེ་བཞིན། །ཟླ་བ་དང་ནི་ཉི་སོགས་ཚེས། །དེ་རྣམས་རེས་མོ་རབ་བཤད་བྱ། །བཟང་པོ་ཡུགས་ས་མོ་དེ་བཞིན། །སེམས་གཡེངས་འབྱུང་པོའི་ཉི་མར་གནས། །སྐྱེ་བོ་ཀུན་གྱི་ཉི་མ་ཡི། །ཆ་ཡི་རྒྱུ་བར་ཤེས་པར་བྱ། །ཁྱུ་མཆོག་མི་ཀི་ར་ཉིད་དང་། །རྨི་ལམ་བཅྭ་ལྔ་པ་དེ་བཞིན། །ཟླ་བའི་རྒྱུ་བར་ཡང་དག་གྲགས། །རིམ་པ་འདི་རྣམས་རྣམ་པར་བརྗོད། །ཉི་ལ་མེ་རུ་ཡང་དག་གནས། །སྟོང་ལ་རླུང་གི་གནས་སུའོ། །དེ་ལྟར་དེ་དབུས་གནས་པ་ནི། །ཕྱོགས་སུ་གདུང་བྱེད་ཡང་དག་གནས། །ཟླ་བ་ཉི་ལས་བྱུང་རི་མོ། །མཉམ་པར་ལྟ་བས་མཉམ་པར་འགྲོ། །ཞི་དང་སྡིག་པ་བལྟས་པ་ཡིས། །ཤེས་རབ་ཅན་གྱིས་དེས་དེ་སྤངས། །མཆེ་བ་དང་ཕྲད་མ་བལྟས་པས། །བདེན་པར་འཆི་བར་བྱེད་པ་ཡིན། །དུས་སྨྲ་བ་ནི་མདོར་བསྡུས་པ། །རཱ་ཧུའི་རྒྱུ་བར་གྲགས་པ་ཡིན། །དཀར་དང་ཅིག་ཤོས་ཆོ་ག་ཡིས། །བློ་གྲོས་མཐར་ཐུག་པས་ཤེས་འགྱུར། །རྒྱུ་སྐར་སོགས་དང་མི་མཐུན་པར། །རྨོངས་པ་གང་ཞིག་སྨྲ་བར་བྱེད། །སྐྱེ་བོ་རང་གིས་བྱས་པ་ཡིས། །ལས་འདི་ཤེས་པར་མ་གྱུར་ཏོ། །ལས་དེ་ཡིས་ནི་དུས་རྣམས་ནི། །ཐེ་ཚོམ་མེད་པར་འབྱུང་བར་འགྱུར། །ལུས་ཀྱི་ཚོགས་པ་ཇི་སྲིད་པ། །དེ་སྲིད་དུ་ནི་དུས་རབ་འཇུག །རྣལ་འབྱོར་པ་རྣམས་ཉམས་སུ་མྱོང་། །ཡང་དག་བྱང་ཆུབ་གནས་འཐོབ་འགྱུར། །དེ་ནི་མྱུ་གུ་ཅན་དུ་གྲགས། །ཁ་དོག་དམར་པོ་འོད་ཆེན་པོ། །མྱུ་གུ་མྱུ་གུའི་གཟུགས་ཅན་ནི། །ལྟེ་བའི་རྩ་བར་གནས་པར་བསྒོམ། །འབར་བའི་འཁོར་ལོའི་ནང་སོན་པ། །གཟུགས་དེ་ལྷ་རྫས་ཀྱི་ནི་གཟུགས། །ཡེ་ཤེས་མྱུ་གུ་རྣམ་བསྒོམས་པས། །ལས་རྣམས་ཐམས་ཅད་མཐོང་མི་འགྱུར། །ཐམས་ཅད་བདག་ཉིད་སྦྱོར་ཆེན་ལས། །སྔོན་ལས་རྣམ་པར་འཇོམས་མཛད་པ། །རྒྱུ་རྣམས་སུ་ནི་རྟག་བཞུགས་པའི། །རྡོ་རྗེ་རྒྱུ་ཡིས་འདི་གསུངས་སོ། །ཞེས་བྱ་བ་ནི་རྡོ་རྗེ་མྱུ་གུ་ཅན་གྱི་ཆོ་ག་སྟེ་རབ་ཏུ་བྱེད་པ་དགུ་པའོ།། །།དེ་ནས་
རྡོ་རྗེའི་གར་བྱས་ནས། །རྣལ་འབྱོར་མས་ནི་འདི་དྲིས་སོ། །ཇི་ལྟར་སྟོན་པ་སེམས་དཔའ་ཆེ། །ལས་དང་འབྲེལ་པས་འབྱུང་བར་འགྱུར། །སྔོན་གྱི་ལས་ནི་རྣམ་ཉམས་པས། །རྒྱུན་ཉམས་པས་ནི་འོང་མེད་པ། །འདི་ལ་བདག་ནི་ཐེ་ཚོམ་མཆིས། །སྙིང་རྗེ་མཉེས་གཤིན་པས་བཀའ་སྩལ། །སེམས་ཅན་ཆེན་པོའི་འབྱུང་བ་ཡང་། །སྔོན་གྱི་སངས་རྒྱས་རྣམས་གསུངས་པ། །མདོར་བསྡུས་པ་ཡིས་བཤད་བྱ་ཡིས། །ཁྱོད་ནི་ཡིད་གཅིག་པ་ཡིས་ཉོན། །རྡོ་རྗེ་རལ་པ་ཅན་སྦྱོར་བས། །ལས་ཀྱི་ནང་དུ་བསྒྲུབ་པར་འགྱུར། །རེ་རེ་ཡི་ནི་སྦྱོར་བ་ཡི། །དེ་ནི་རང་འབྱུང་དུ་གནས་སོ། །ཤིན་ཏུ་དད་པ་ལ་གནས་པས། །དབང་པོ་ཐམས་ཅད་འདུ་བར་བྱ། །དེ་ཡི་རལ་པས་རྟག་འཇིག་རྟེན། །རལ་པའི་མིང་གིས་འཆིང་བ་ཡིན། །དགའ་བ་ཀུན་ལས་ཁྱད་འབྱེད་པའོ། །རྡོ་རྗེའི་སྐུ་ཁྱོད་འཐོབ་པར་འགྱུར། །དེ་ཕྱིར་བག་ཆགས་ཐམས་ཅད་དང་། །དགེ་བའི་ལས་ལས་ཟད་པར་འགྱུར། །སྐྱེ་བོ་ཆེན་པོ་དེ་འབྱུང་བ། །གཅིག་ཉིད་ལམ་གྱིས་འཐོབ་པར་འགྱུར། །རྟོག་པ་མེད་ལས་རྟོག་པར་འགྱུར། །རྟོག་པ་ཡིས་ནི་རྟོག་མེད་འགྱུར། །དྲིལ་བུའི་སྒྲ་ནི་ཐོབ་བྱས་ནས། །དེ་རྣམས་མཚན་ཉིད་བཤད་པར་བྱ། །རྩེ་དགུ་རྩེ་མོ་གཅིག་པ་དང་། །རྩེ་ལྔ་རྩེ་མོ་གསུམ་པ་ཅན། །དེ་ལྟར་ལ་སོགས་དྲིལ་བུ་ཆེ། །རྩེ་མོ་སྟོང་གི་བར་དུའོ། །སྒྲ་བརྗོད་པ་ཡི་དངོས་པོ་ཡིས། །སྤྲོས་པ་མེད་ཅིང་ཡི་གེ་མེད། །རྣལ་འབྱོར་པ་ཡིས་མཁའ་འགྲོ་རྒྱ་མཚོ་དག །དེ་ཡི་སྒྲ་ལས་རྟོག་པ་ཡང་དག་བྱུང་། །དེ་ཉིད་ཀྱིས་ནི་རྟོག་པ་མེད་པའི་བདག །གནས་རྣམས་གང་ལ་ངེས་པར་ཞུགས་པ་ཡིན། །སྔོན་བཤད་རྩེ་ཅན་དེ་རྡོ་རྗེ། །གང་དུ་ཡིད་ནི་རྣམ་འཕྲོ་བ། །ཆོས་དང་སྤྲུལ་པའི་རིས་སྐུ་ཅན། །དེ་ཉིད་དུ་ནི་གསོར་བར་བྱ། །ཕྱི་ཡི་དྲིལ་བུའི་མཚན་ཉིད་ནི། །དཔའ་བོས་གསུངས་པ་བཤད་པར་བྱ། །རིལ་བུ་རྟག་ཏུ་ཆ་གསུམ་ཅན། །ལྷ་ཡིས་ཡང་དག་བརྒྱན་པར་བྱ། །རེ་རེ་ཡི་ནི་ལྷའི་བདག་པོ། །ཏིང་འཛིན་དཀྱིལ་འཁོར་དུ་ཇི་ལྟར། །རྣལ་འབྱོར་རྣམས་ཀྱིས་ལྷག་མོས་པས། །དེ་བཞིན་ཐམས་ཅད་ཞལ་བྱའོ། །ལྷ་མོ་དེ་རྣམས་ཀྱི་ནི་གདན། །དྲིལ་བུ་དེ་ལ་པད་སོགས་བྱ། །ཇི་ལྟར་
དེ་རྣམས་ཀྱིས་ནི་བརྒྱན། །དེ་བཞིན་དྲིལ་བུའི་སྐ་རགས་སོ། །ལྷ་ནི་སྒོ་དང་གྲྭ་རྣམས་སུ། །ཕྱོགས་བརྒྱད་རྣམས་སུ་བྱ་བ་ཉིད། །ཇི་ལྟར་རྣལ་འབྱོར་པའི་མཚོན་བྱ། །དེ་རྣམས་ཞལ་ནས་རྩེ་མོ་འཐོན། །བུམ་པ་སོགས་དང་ཞལ་གཉིས་ལའང་། །སྟེང་དུ་རང་རིགས་མཚན་མ་ཅན། །འདི་འདྲ་བ་ཡི་དྲིལ་བུ་ཆེ། །ཚད་ནི་གཞན་དུ་བཤད་པ་ཡིན། །དེ་ནི་ནང་གི་གཟུགས་ཅན་དག །དེ་ཕྱིར་སྒྲ་ནི་རྣམ་མཚོན་བྱ། །ཐིག་ལེའི་གཟུགས་ནི་ཁྱབ་བདག་ཆེ། །རྡོ་རྗེའང་དེ་དང་མཉམ་པར་བྱ། །དེ་ལྟར་རལ་པའི་སྦྱོར་བ་ལས། །སེམས་ཅན་ཐམས་ཅད་བསྒྲུབ་པར་བྱ། །རལ་ཅན་དྲིལ་བུར་ཡང་དག་གྲགས། །རྡོ་རྗེ་རྡོ་རྗེར་བརྗོད་པར་འགྱུར། །རྡོ་རྗེ་རལ་ཅན་བདག་ཉིད་ཀྱིས། །དཀྱིལ་འཁོར་དུ་ཡང་བསྒོམ་པར་བྱ། །རྣལ་འབྱོར་མ་དང་མཁའ་འགྲོ་ཀུན། །དེ་ཚེ་ནང་དུ་མངོན་པར་གཞུག །ཐམས་ཅད་གཉིས་པ་ཡོངས་སྦྱོར་ལས། །རྡོ་རྗེ་རལ་པ་ཅན་བྱུང་བ། །རྡོ་རྗེ་དྲིལ་བུར་ཡང་དག་བརྟེན། །བཅོམ་ལྡན་དཔའ་བོས་འདི་གསུངས་སོ། །ཞེས་བྱ་བ་ནི་རྡོ་རྗེ་རལ་པ་ཅན་གྱི་ཆོ་ག་སྟེ་རབ་ཏུ་བྱེད་པ་བཅུ་པའོ།། །།དེ་ནས་གཞན་གྱི་སྦྱོར་བ་ཆེ། །དཔའ་བོ་ཆེན་པོའི་རབ་སྦྱོར་བས། །བདག་གིས་མངོན་སུམ་དུ་བཤད་ཀྱིས། །རྣལ་འབྱོར་མ་ཀུན་མཉན་པར་གྱིས། །ལུས་ཅན་ཀུན་གྱི་ལུས་གང་ལ། །གནད་ནི་སྟོང་ཕྲག་གནས་པ་སྟེ། །དེ་རྣམས་ལ་ཡིག་དགོད་པ་ནི། །ཀ་སོགས་ཧ་ཡིག་མཐར་དེ་བཞིན། །ཡོན་ཏན་ལ་སོགས་དབྱངས་རྣམས་ཡིག །ཁམས་རེ་རེ་ལ་ཡི་གེ་རྣམས། །སླར་ཡང་ཕྱི་མོ་བཅུ་གཉིས་ཀྱིས། །མཁས་པ་རྣམས་ཀྱིས་དབྱེ་བར་བྱ། །གཏུམ་མོ་སྟོང་ཕྲག་བདག་ཉིད་ཅན། །མཚམས་ཀུན་དུ་ནི་གནས་པ་འབར། །ཁམས་ཐམས་ཅད་ཀྱི་བདེ་གནས་ལས། །དཔའ་བོའི་ལོངས་སྤྱོད་འཐོབ་པར་འགྱུར། །འོད་ཟེར་དེ་རྣམས་ཀྱིས་བཀུག་པ། །བྱང་ཆུབ་སེམས་དཔའི་རིགས་ཆེན་པོ། །བདག་མེད་པ་ཡིས་བདག་ཏུ་གཞག །གཉིས་མེད་ཆོས་འབྱུང་ནང་དུའོ། །དེ་ལྟར་སྟོང་ཕྲག་གི་ནི་ལྕེ། །དཔའ་བོ་ཆེན་པོའི་གོ་འཕང་གནས། །སྨན་ཐམས་ཅད་དང་ཉེ་བ་ཡིན། །སྦས་པའི་བཅུད་ལེན་གསུངས་པའོ། །ཕྱི་རོལ་རྣམས་
ཀྱི་འང་ཡི་གེའི་བདག །དེའི་མིང་ཉིད་དུ་ཤེས་པར་བྱ། །མེ་ཏོག་འབྲས་སོགས་སྡེ་ཚན་གྱི། །དང་པོའི་མིང་ནི་སྟོང་ཕྲག་ཅན། །དེ་རྣམས་ཀྱིས་ནི་བཅུད་ལེན་བསྒྲུབ། །གཞན་དུ་འབྲས་བུ་མེད་པར་འགྱུར། །ཇི་ལྟའི་རིམ་པས་རིགས་སོགས་ཀྱི། །ཀ་སོགས་ཐམས་ཅད་སྨན་ཆེན་ཏེ། །ལས་སྨྲ་བ་ཡི་རྒྱུད་གཞན་དུ། །དེར་ནི་ངེས་པར་གསལ་རིག་བྱ། །དང་པོའི་མགོན་པོ་རྣམ་བསྒོམས་ནས། །རྟགས་རྣམས་ཐོབ་པར་བྱ་བ་ཡིན། །ཡང་ན་གྲུབ་རྣལ་འབྱོར་རྣམས་ཀྱིས། །བཅུད་ཀྱིས་ལེན་ནི་གང་མཐོང་བ། །དེས་ཀྱང་མཐོང་བ་ཙམ་གྱིས་ནི། །བླ་མེད་དངོས་གྲུབ་འཐོབ་པར་འགྱུར། །སྡེ་ཚན་རྣམ་པས་ཡོངས་སྦྱོར་ལས། །བདུད་རྩིའི་ཚིགས་མཚམས་གཟུགས་རྣམ་པའི། །གྲུབ་པའི་སྨན་རྣམས་རང་བཞིན་ཅན། །བཅོམ་ལྡན་འདས་ཀྱིས་འདི་གསུངས་སོ། །ཞེས་བྱ་བ་ནི་དཔའ་བོ་ཆེན་པོའི་ཆོ་ག་སྟེ་རབ་ཏུ་བྱེད་པ་བཅུ་གཅིག་པའོ།། །།དེ་ནས་རྣལ་འབྱོར་མ་དཔའ་མོ། །འདྲེས་པས་མཆོད་པ་བྱས་ནས་ནི། །གྲོང་ཁྱེར་གསུམ་གྱི་ནང་བྱུང་བ། །སྟོན་པ་རྡོ་རྗེ་ཆེ་ཅི་ལགས། །གང་གི་གཟུགས་ཀྱིས་བྱོན་པ་ལགས། །སྤྲུལ་པ་གང་དུ་བཞུད་པ་ལགས། །ཆོས་ཉན་པ་ཡི་དུས་སུ་ཡང་། །ཅི་ཞིག་གིས་ནི་བརྟན་པར་བྱ། །ལྷ་དང་ལྷ་མ་ཡིན་དང་མི། །ཅི་ཡི་ངག་གིས་འགྲོ་དང་འོང་། །མངོན་པར་ཚིགས་མཚམས་མཚན་ཉིད་ནི། །སྔོན་གྱི་ཇི་བཞིན་བཤད་དུ་གསོལ། །མངོན་པར་ཚིགས་མཚམས་མཚན་ཉིད་ནི། །ཇི་ལྟའི་རིམ་པས་བཤད་ཀྱིས་ཉོན། །ཤིན་ཏུ་ཟབ་མོའི་དོན་ཆེན་པོ། །སངས་རྒྱས་འཇིག་རྟེན་གྱིས་མ་ཤེས། །སེམས་ཅན་རྣམས་ཀྱི་རང་སྣང་ཅན། །བདག་གིས་ངེས་པར་མདོར་བསྡུས་པས། །རྡོ་རྗེ་སེམས་འོད་གཞན་ཉིད་དུ། །ཁམས་དང་མཚན་མར་གནས་མིན་ཅན། །ལུས་དང་ངག་སེམས་དག་པ་ཡི། །གྲོང་ཁྱེར་གསུམ་རྣམས་སུ་བྱུང་བའོ། །སྔོན་གྱི་དངོས་པོར་ཁྱེར་ནས་འོང་། །ངེས་པར་ལས་ཆུང་བར་འགྲོའོ། །ཡང་ན་དུས་རྣམས་ཐམས་ཅད་དུ། །ཇི་ལྟར་མེ་ལོང་ལ་བཞིན་མཐོང་། །སྔོན་དུ་ཉན་པ་ཐོབ་བྱས་ནས། །སེམས་ཀྱང་དེ་ཡི་གནས་ལའོ། །རྡོ་རྗེ་ལ་སོགས་ཏིང་འཛིན་གྱིས། །ལྷ་
ལ་སོགས་པ་དེ་རྣམས་རྨོངས། །དེ་ཡིས་རྡོ་རྗེ་ཧཱུྃ་མཛད་ཀྱི། །རབ་ཏུ་སྦྱོར་བས་རྟག་ཏུ་སྤྲུལ། །རྡོ་རྗེའི་རྩེ་མོར་འཇིག་རྟེན་སྤྲུལ། །འོད་ཟེར་ལྕགས་ཀྱུ་སྤྲོ་བ་སྟེ། །ཧཱུྃ་གི་ཡི་གེའི་སྒྲ་ཡིས་ནི། །སྟོན་པས་འཁོར་ལོ་ཅན་མཆོག་བྱས། །ཆོས་འབྱུང་ཁང་པ་བརྩེགས་པ་རུ། །ཉི་ཤུའི་ལྷན་ཅིག་སྐྱེས་གདན་དུ། །ངག་གི་སྤྱོད་པས་མཉན་པར་བྱེད། །དེར་སོང་ནས་ནི་དེ་ལ་ཐིམ། །དེ་ལྟར་རྣལ་འབྱོར་དབང་པོ་ཡི། །སློབ་དཔོན་ཁྱབ་བདག་ཆེས་ཤེས་བྱ། །རྡོ་རྗེ་ལ་སོགས་དེའི་མིང་ཉིད། །དེ་ཡི་མཚན་ཉིད་བཤད་པར་བྱ། །སེམས་ཅན་ཀུན་ལ་ཕན་བདག་ཉིད། །མི་འཇིགས་པ་ནི་སྟེར་ཉིད་དང་། །སྔགས་དང་རྒྱུད་ཀྱི་སྦྱོར་བ་ཤེས། །སྦྱོར་བ་བཟོ་དང་སྒྱུ་རྩལ་སོགས། །མཐུན་པའི་ངག་དང་ཐམས་ཅད་ལ། །བུ་གཅིག་པ་ལྟར་མཐུན་པ་དང་། །གཏོང་བ་སོགས་ལ་རྟག་ཏུ་དགའ། །བསམ་གཏན་ཏིང་འཛིན་དེ་མཆོག་གཞོལ། །ཇི་ལྟར་སྨྲས་པ་དེ་བཞིན་བྱེད། །འཚེ་བ་མེད་ཅིང་བདེན་པའི་ངག །སེམས་ཅན་ཀུན་ལ་ཐུགས་བརྩེ་དང་། །ལམ་དུ་འཛུད་པ་དེ་མཐར་ཕྱིན། །ཀུན་མཁྱེན་ཡོན་ཏན་དང་མཉམ་དང་། །བསྟན་བཅོས་ཀུན་གྱི་ཕ་རོལ་སོན། །མགོན་མེད་རྣམས་ཀྱི་ཕ་དང་མ། །ཕྱག་རྒྱ་བརྡ་ནི་བྱེད་པ་པོ། །དེ་སོགས་ཡོན་ཏན་རྣམས་ཀྱིས་གང་། །སྐྱེ་བ་འདི་ལ་དེ་བཞིན་གཤེགས། །རྣལ་འབྱོར་མ་འཁོར་ལོ་དབུས་སུ། །རྡོ་རྗེ་ཧཱུྃ་མཛད་བསྒོམ་པ་ཡིན། །དཀྱིལ་འཁོར་བྱང་ཆུབ་སེམས་ཀྱི་སྟེ། །བདེ་བའི་རྒྱལ་པོ་རྣལ་འབྱོར་མ། །སྒྲ་རྣམས་སུ་ནི་སྒྲའི་ཡེ་ཤེས། །རྡོ་རྗེ་ཧཱུྃ་མཛད་ཅན་ཁྱབ་བདག །འཕོས་པའི་ལྷག་མ་འགྱུར་ཡེ་ཤེས། །དང་པོའི་མགོན་པོའི་རྒྱུ་ཡིན་ནོ། །སེམས་ཀྱི་ཉམས་སུ་མྱོང་བ་ནི། །དེ་ཕྱིར་ཕྲ་མོའི་རང་བཞིན་ཅན། །སྤར་ཤའི་ཁམས་སུ་ཡང་དག་གྲགས། །དེ་ཉིད་ཀྱིས་ནི་ཁྱེར་ནས་འོངས། །མཁའ་འགྲོ་རྒྱ་མཚོར་རྟག་ངེས་པར། །ས་གསུམ་དེ་ཡི་རང་བཞིན་བྱས། །དེ་ལྟར་སྦྱོར་བ་མཆོག་གཙོ་བོ། །ཤིང་སྲིན་གཞན་ནི་སོག་མ་བཞིན། །འདི་ཡི་བགྲོད་པ་མ་ཤེས་པས། །བྱིས་པ་མི་ཤེས་པ་ཡིས་བཅིངས། །མཐའ་ཡི་བདེ་བ་གསུང་བ་པོ། །བསྟན་བྱ་སྟོན་པ་རྡོ་རྗེ་འཆང་། །ལྷན་ཅིག་སྐྱེས་གཟུགས་སྟོན་པ་པ་པོ། །བཅོམ་ལྡན་
ཡེ་ཤེས་ཀྱིས་འདི་གསུངས། །ཞེས་བྱ་བ་ནི་རྡོ་རྗེ་ཧཱུྃ་མཛད་ཀྱི་ཆོ་ག་སྟེ་རབ་ཏུ་བྱེད་པ་བཅུ་གཉིས་པའོ།། །།དེ་ནས་གང་གིས་སྒྲུབ་པ་པོ། །འགྲུབ་པའི་བསམ་མེད་སྦྱོར་བཤད་བྱ། །དེ་ནི་ཤིན་བཟང་རབ་སྦྱོར་བས། །སྤྱོད་དང་བརྟུལ་ཞུགས་བཤད་པར་བྱ། །ལྷུན་གྱིས་གྲུབ་འགྱུར་དེའི་སྤྱོད་པ། །དངོས་གྲུབ་འདོད་རྣམས་ཀྱིས་ཤེས་བྱ། །ཕྱི་རོལ་གཉིས་མེད་སྦྱོར་བདག་ཉིད། །སྤྱོད་པ་དེ་ནི་རབ་ཏུ་བསྔགས། །ཀུན་གྱི་བདག་ཉིད་ཡིད་བཟང་ལ། །དབང་པོའི་གྲོང་ཁྱེར་ཡང་དག་བརྟེན། །གྲོང་དེ་རྣམས་སུ་སྤྱོད་པ་དང་། །ཡིད་ཀྱིས་བརྟུལ་ཞུགས་བསྟན་པར་བྱ། །སྲིང་དང་ཞི་བའི་གཟུགས་རྣམས་ཀྱིས། །གང་དེར་བདག་ཉིད་ཀྱིས་འགྲོ་བྱ། །བདག་ཉིད་གཟུགས་ཀྱི་རང་བཞིན་ཅན། །ཡང་དག་མེ་ལོང་ལ་མཐོང་འགྱུར། །ཞུ་བའི་སེམས་ལ་བརྟེན་བྱས་ནས། །ལུས་ནི་ལུས་ལ་ཐིམ་པར་གྱིས། །སྡོམ་པར་བདག་ཉིད་ཀྱིས་བསྡམས་ནས། །ཕྱག་རྒྱ་ཆེན་པོར་ཡང་དག་གྲགས། །ཕྱག་རྒྱ་ལྔ་སོགས་ལུས་ལ་གནས། །ཐོད་པ་དང་ནི་ཁ་ཊྭཱཾ་འཛིན། །བདུད་རྩི་ལྔ་ལ་སོགས་པ་ཟ། །ལྷན་ཅིག་རྣལ་འབྱོར་མ་རོལ་ལྡན། །ཆགས་པའི་སེམས་ཀྱིས་བསྒོམ་པ་སྟེ། །མི་འདོད་ཀྱང་ནི་དེ་ཕྱིར་འགྲོ། །གཟུང་དང་འཛིན་པའི་དངོས་པོ་ཡིས། །ཡིད་འདི་ལ་ནི་གོས་པ་མེད། །འཇིགས་མེད་རྣམ་པའི་སེམས་ཀྱིས་ནི། །མཚན་མོ་དུར་ཁྲོད་སོགས་པར་འགྲོ། །ས་བཞི་གང་དུ་སྤྱོད་པ་ན། །རྣམ་ཤེས་བརྒྱད་དུ་ཤེས་པར་བྱ། །ལྔ་ལྡན་སྤྱོད་དང་བརྟུལ་ཞུགས་ནི། །བདེ་བ་ཅན་དུ་དེ་རྩེན་ཏོ། །དང་པོའི་སྦྱོར་བར་ཡོངས་བརྟེན་ནས། །ཕྱི་ནས་ཡིད་ཀྱིས་རབ་ཏུ་བཤད། །སྲོག་ཐམས་ཅད་ནི་མཉམ་སྦྱོར་བས། །དབང་པོའི་གྲོང་ཁྱེར་བདེ་བ་ཡི། །ཡེ་ཤེས་སྦྱོང་བའི་བརྟུལ་ཞུགས་འཛིན། །བཅོམ་ལྡན་འདས་ཀྱིས་འདི་གསུངས་སོ། །ཞེས་བྱ་བ་ནི་ཤིན་ཏུ་བཟང་པོའི་ཆོ་ག་སྟེ་རབ་ཏུ་བྱེད་པ་བཅུ་གསུམ་པའོ།། །།དེ་ནས་སྐྱེ་བོའི་རིགས་ཀྱི་ནི། །ཁྱད་པར་བཤད་ཀྱིས་མཉན་པར་གྱིས། །རྡོ་རྗེ་བཟང་པོའི་རབ་སྦྱོར་བས། །དེ་རིགས་འདིར་ནི་ཉམས་པར་འགྱུར། །དེ་ལ་དང་པོར་ལྔ་དང་བདུན། །བརྒྱད་དང་བཅུ་གསུམ་བཅྭ་ལྔ་
དང་། །བཅུ་བདུན་དང་ནི་ཉི་ཤུ་གཉིས། །ཉི་ཤུ་རྩ་བདུན་དེ་བཞིན་མཆོག །ཐ་སྐར་ལ་སོགས་ཤེས་བྱ་སྟེ། །ལྷ་རྣམས་ཚོགས་སུ་དྲན་པར་བྱ། །བཞི་པ་དང་ནི་ཤར་བ་གསུམ། །གཉིས་པ་དང་ནི་དྲུག་དེ་བཞིན། །བྱང་ཕྱོགས་པ་རྣམས་དེ་བཞིན་གསུམ། །མི་ཡི་ཚོགས་སུ་དྲན་པར་བྱ། །གསུམ་པ་དང་ནི་བཅུ་ཉིད་དང་། །དགུ་པ་དང་ནི་ཉི་ཤུ་གསུམ། །བཅུ་བཞི་པ་དང་བཅུ་དྲུག་པ། །བཅྭ་བརྒྱད་པ་དང་བཅུ་དགུ་པ། །ཉི་ཤུ་རྩ་བཞི་དེ་གྲགས་པ། །སྲིན་པོའི་རིགས་སུ་དྲན་པར་བྱ། །རའི་རིགས་གསུམ་པ་དང་བརྒྱད་པ། །ཀླུ་ནི་བཞི་དང་ལྔ་པའོ། །དྲུག་པ་ཉི་ཤུ་རྩ་དགུ་པ། །ཁྱི་ཡི་དངོས་པོར་བཤད་པའོ། །བཅུ་དང་བཅུ་གཅིག་བྱི་བ་སྟེ། །བྱི་ལ་དེ་བཞིན་དགུ་པའོ། །བཅུ་བཞི་པ་དང་བཅུ་དྲུག་པ། །རྟག་ཏུ་དེ་ལྟར་བརྗོད་པའོ། །བཅུ་གཉིས་པ་དང་ཉི་ཤུ་ལྔ། །ཁྱུ་མཆོག་གི་ནི་རིགས་འཐོབ་བོ། །ཐོག་མ་ཐ་མ་བོང་བུ་ཡིན། །རིགས་སུ་དེ་རྣམས་རབ་ཏུ་གྲགས། །བཅུ་གསུམ་པ་དང་བཅྭ་ལྔ་པ། །དེ་ནི་མ་ཧེར་མངོན་པར་བརྗོད། །ཐོག་མ་དང་ནི་ཉི་ཤུ་དྲུག །རྟ་ཡི་རིགས་སུ་རབ་ཏུ་བརྗོད། །ཉི་ཤུ་པ་དང་ཉི་ཤུ་གཉིས། །སྤྲེའུ་ཞེས་བྱ་བར་བརྗོད་པའོ། །གཉིས་པ་དང་ནི་མཐའ་དེ་བཞིན། །གླང་པོ་ཡི་ནི་རིགས་སུ་འགྲོ། །ཉི་ཤུ་གསུམ་དང་ཉི་ཤུ་བཞི། །མི་སྟེ་སྟོབས་ནི་ཆེ་བ་ཡིན། །ཉི་ཤུ་གཅིག་པ་སྲེ་མོ་སྟེ། །མདོར་བསྡུས་པ་ཡིས་རབ་ཏུ་བཤད། །སྟོབས་དང་བདག་བྱེད་པའི་རྒྱུ་སྐར། །བཤད་ཀྱིས་ད་ལྟར་མཉན་པར་གྱིས། །མི་རྣམས་སྲོག་ནི་རྒྱུ་སྐར་ཏེ། །གཞན་དུ་རབ་ཏུ་འཐོབ་པ་མིན། །སྐར་མར་དུས་ཀྱི་རྩ་སོན་པར། །འཛིན་པ་པོ་ནི་ངེས་པར་འཆི། །ལུག་དང་སྲང་དང་ཀརྐ་ཊ། །ཆུ་སྲིན་མཐོན་པོ་ལ་དྲན་བྱ། །ཀཱི་ཊ་བུམ་སེང་ཁྱུ་མཆོག་ནི། །བརྟན་པའི་བྱ་བར་རབ་ཏུ་བསྟན། །ཉ་དང་འཁྲིག་པ་དེ་བཞིན་འདིར། །གཞུ་དང་བུ་མོ་འདྲེན་མ་ལའོ། །བླ་མ་ཉི་མ་སའི་སྐྱེས་བུ། །ངན་སྤོང་རཱ་ཧུ་ཟླ་བུད་མེད། །གཟའ་ལྷག་བཀྲ་ཤིས་མ་ནིང་སྟེ། །མཁའ་དཀྱིལ་འཁོར་ལ་གཟའ་གང་ཡིན། །དེ་ལྟར་རིགས་རྣམས་སོ་གཞན་དུ། །བྱང་ཆུབ་སྲས་པོ་མི་འགྱུར་རོ། །རྡོ་རྗེ་བཟང་པོར་དེ་བཤད་དེ། །རབ་སྦྱོར་རྣམ་པའི་སེམས་ཀྱིས་ནི། །གཡོན་
པའི་རྩ་རུ་སོན་པའི་སེམས། །དབུ་མའི་ཐ་མའི་སྦྱོར་བར་ལྡན། །བྱང་ཆུབ་ས་བོན་རྣམས་འབབ་ལ། །བྱང་ཆུབ་སེམས་རྣམས་ཀྱི་རིགས་སོ། །སྙིང་རྗེར་སོན་པའི་ཡིད་ཀྱིས་ནི། །ལས་ཀྱི་ཉི་མ་འཛག་པ་ཡིན། །ཡང་དག་རབ་སྟེར་རྟག་ཏུ་ལྡན། །རིགས་མེད་རིགས་ཅན་ཀྱང་མེད་དོ། །སྲིད་པར་རྩེད་མོ་ཙམ་དུ་ནི། །བསམ་གཏན་རྣམ་པའི་ལུས་སོན་པ། །མེ་ལོང་གི་ནི་ཡུལ་ལ་གཟུགས། །གང་འདྲ་མཐོང་སྟེ་དེ་མེད་དོ། །དེ་འདྲར་བྱང་ཆུབ་སེམས་དཔའ་རྣམས། །བསམ་གཏན་སྦྱོར་བའི་གཟུགས་ཅན་ནོ། །དེ་ཡི་ནང་དུ་ཞུ་བའི་སེམས། །དེ་དང་མཉམ་པ་གཞན་ཡོད་མིན། །ངེས་པར་དཀྱིལ་འཁོར་རྣམས་དབུས་སུ། །རྡོ་རྗེ་བཟང་པོ་བསྒོམ་པར་བྱ། །ཤེས་རབ་ཐབས་ཀྱི་ཆོ་ག་ཡིས། །གསང་སྔགས་མཆོད་པ་སྔོན་གྱི་ཅན། །དུས་དང་དུས་མིན་ཆའི་བདག་ཉིད། །དངོས་མེད་མ་ཡིན་བྱེད་པོར་བཞུགས། །བྱང་ཆུབ་གཟུགས་ཀྱི་བདག་ཉིད་ཆེ། །བཅོམ་ལྡན་སེམས་དཔས་འདི་གསུངས་སོ། །ཞེས་བྱ་བ་ནི་རྡོ་རྗེ་བཟང་པོའི་ཆོ་ག་སྟེ་རབ་ཏུ་བྱེད་པ་བཅུ་བཞི་པའོ།། །།དེ་ནས་གསང་བའི་སྦྱོར་གང་གིས། །བདེ་ཀུན་བདག་ཉིད་དུ་སྐྱེ་བཤད། །དོན་དམ་པ་ཡི་སྦྱོར་བ་ཡིས། །དེ་བཞིན་ཉིད་དུ་རབ་འཇུག་བྱ། །འཇིགས་བྱེད་ཆེན་པོའི་རྣལ་འབྱོར་གྱིས། །སྔགས་ཀྱི་ཕྲེང་བར་རང་ཉིད་བྱོན། །བཞི་བཅུ་རྩ་བརྒྱད་པ་ཉིད་ནི། །ས་རྣམས་ལ་ནི་རབ་ཏུ་བཤད། །འཁོར་ལོ་དྲུག་དབྱིབས་རི་མོ་ནི། །ས་ཡི་དབུས་སུ་བྱ་བ་ཡིན། །ཐམས་ཅད་དུ་ནི་གསང་སྔགས་ཚིག །བཞི་བཅུ་རྩ་བརྒྱད་བྲི་བར་བྱ། །དེ་རྣམས་སྔགས་ཀྱི་གཟུགས་རྣམས་ནི། །སྲོག་ནི་ཡི་གེའི་རྣམ་པ་ཅན། །ཡི་གེའི་ཆ་རྣམས་བཟང་པོ་ནི། །སྤངས་ནས་དབུས་མར་གནས་པ་ཡིན། །སྟོང་པར་ངེས་པར་ཐིམ་བྱས་ནས། །འོག་དང་སྟེང་དུ་བལྟ་བར་བྱ། །རྐང་པའི་མཐའ་ནས་མགོ་བོ་རུ། །རྣལ་འབྱོར་དབང་ཕྱུག་དེ་སྲིད་བྱེད། །ཁམས་ཀུན་རབ་ཏུ་ཞུགས་པ་ལ། །སེམས་ཀྱི་སྤྱོད་པ་ཅན་ཅི་སྨོས། །དེ་ལྟར་གསང་བ་གྱེན་གནོན་པ། །དཔའ་བོ་ཆེན་པོའི་དོན་ཅན་ནོ། །དབུས་མར་རབ་ཏུ་ཞུགས་པ་ཡི། །བསྣུན་དང་བསྒྲུབ་པ་ལ་སོགས་སྤངས། །འཐོར་རླུང་འཛིན་བཞིན་
པ་ཡིས་ནི། །ཉི་མ་དང་པོ་ཟད་མེད་ཅན། །རྡོ་རྗེའི་ལམ་ནི་ལངས་པའི་སེམས། །གང་ཕྱིར་བརྒྱུད་པའི་རིམ་པས་སོ། །དེ་ལྟར་སྒྱུ་མའི་བཟླས་པ་འདིར། །རྩ་བའི་སྔགས་སོགས་རེའུ་མིག་ཅན། །དཔའ་བོ་ཀུན་གྱི་རེའུ་མིག་རྣམས། །སྔགས་ཀྱི་འཁོར་ལོར་དགོད་པར་བྱ། །ཏིང་འཛིན་མགོན་པོའི་དཔའ་བོ་རྣམས། །བཅུ་གཉིས་རྣམས་ཀྱིའང་འཁོར་ལོར་སོན། །གང་ཞིག་གང་གི་མིང་སྔོན་གྱིས། །དེ་དང་དེ་ཡི་གནས་སུ་བྲི། །གཞན་གྱི་སྔགས་ཀུན་འདི་རྣམས་ལ། །དཀྱིལ་འཁོར་འདིར་ནི་འབྱུང་བར་འགྱུར། །སྐུ་ལ་སོགས་པའི་བཟླས་ཀུན་དང་། །དེ་བཞིན་ངག་སོགས་བཟླས་པ་ཅན། །སེམས་སོགས་བཟླས་པ་ཐམས་ཅད་དང་། །དེ་བཞིན་ཡེ་ཤེས་སོགས་བཟླས་ཅན། །སྔགས་ཀྱི་རྒྱལ་པོས་བསྐུལ་པ་ཡིས། །དེ་ནས་དཔའ་བོ་འབྱུང་བར་འགྱུར། །འཇིགས་བྱེད་ཆེན་པོ་དབུས་རྣམས་སུ། །མེ་ཡི་གཟུགས་ཅན་བསྒོམ་པར་བྱ། །ཤེས་རབ་རིགས་ཀྱི་ནུས་པ་ཡིས། །འབྱུང་པོའི་ཚོགས་དེ་ཀུན་སྤྱོད་བྱ། །ཞི་བ་དང་ནི་རྒྱས་དང་དབང། །དྲག་པོ་རེངས་པར་བྱེད་ཡི་གེ། །ལས་དང་རྗེས་མཐུན་གཟུགས་བསྒོམས་ཏེ། །འབར་བའི་རྣམ་པ་སོགས་དགོད་བྱ། །འཆི་བ་སླུ་ཞིང་དེ་ཉིད་ཀྱིས། །རྣལ་འབྱོར་དང་ནི་ལྡན་པར་འགྲོ། །ནཱ་ད་ནཱ་དར་འཛོམ་བྱ་ཞིང་། །ཐིག་ལེ་ཐིག་ལེར་ཐིམ་པར་བྱ། །དེ་ལྟར་ཆོ་གའི་བྱ་བ་ཡིས། །གསང་སྔགས་བཟླས་ནས་ཕུར་བུ་གདབ། །འདི་རྣམས་སྔགས་ཀྱི་གཙོ་བོ་ཡིས། །རྐང་པ་བཞི་བཅུ་རྩ་བརྒྱད་དེ། ༀ་ཧཱུྃ་ཧཱུྃ་ཕཊ་ཀྱི་ཡི་གེ་མཐའ། །ཇི་ལྟའི་རིམ་པས་འདི་ཀུན་ལའོ། །ན་མཿཤྲཱི་བཛྲ་ཌཱ་ཀ་མ་ཧཱ་བཱི་ར་བཱི་རཱི་ཤྭ་རཱ་ཡ། ཏྲི་བྷུ་ཝ་ཎ་ཀམྤ་ཀམྤཱ་བ་ཎཱ་ཡ། དཾཥྚྲོཏྐ་ཊ་བྷཱི་ཥ་ཎ་བྷེ་རེ་བཱ་ཡ། ཤ་ཏ་ས་ཧ་སྲ་ནེ་ཏྲཱ་ཡ། བི་ངྱུ་ཏ་ཛི་ཧྭཱ་ཡ། ཀཾ་ཀཱ་ལ་མཱ་ལཱ་བྷ་ར་ཎོ་གྲཱ་ཡ། ཀོ་ཊི་ལ་ཀྵ་བཱུ་ཛཱ་ཡ། ཛྭཱ་ལཱ་བ་ལཱི་ཌྷ་ལག་ནཱ་ཡ། པར་ཤུ་པཱ་ཤོ་དྱ་ཏ་ཤཱུ་ལཱ་ཡ། ཀལྤཱཾ་ཏ་ངྷཱུ་མྲཱུ་གྲ་པུཥཱ་ཡ། བི་ཀ་ཊ་མུ་ཁ་ཧཱ་ཧཱ་ར་བཱ་ཡ། མཱ་ཏྲྀ་ག་ཎ་པ་རི་པཱུ་རི་ཏ་མན་ཏྲཱ་ཡ། ས་ཧ་ཛ་སུན་དྷ་རི་བལླ་བྷ་ཀ་རཱ་ཡ། ཧཱུྃ་ཧཱུྃ་ཀཱ་རོ་ཙྪ་ར་ཎ་མུ་ཁཱ་ཡ། མ་ཧཱ་ཤྨ་ཤཱ་ན་པྲི་ཡཱ་ཡ། སརྦ་བྷཱུ་ཏ་སཾ་ཏྲཱ་ས་ན་ཀ་རཱ་ཡ། མ་ཧཱ་ཀལྤཱན་
ཏཱ་གྣི་ཏེ་ཛཱ་ཡ། ཛ་ཊཱ་ཀ་ལཱ་པ་མུ་ཀུ་ཊཱ་ཡ། ཁ་ཊྭཱཾ་ག་ཀ་པཱ་ལ་ཤཱུ་ལ་བྷིན་ན་དྷཱ་རི་ཎེ། མ་ཧཱ་ས་མུ་དྲ་མེ་ཁ་ལཱ་ཡ། བྱཱ་གྷྲ་ཙ་རྨཱཾ་བྷ་ར་དྷཱ་རི་ཎེ། བེ་ཏཱ་ལ་སཾ་གྷ་མ་རྡྷ་ཎ་ཀ་རཱ་ཡ། མ་ཧཱ་བིགྷྣ་ནི་བཱ་རི་ཎེ། ཤ་ཏྲུ་ནི་སུཾ་བྷ་ན་ཀ་རཱ་ཡ། ཏྲི་སཱ་ཧཱ་སྲ་མ་ཧཱ་ས་ཧ་སྲེ་ཀ་རོ་མཱ་བ་ལཱནྟ་བརྟི་ཎེ། ཤ་ཏ་ས་ཧ་སྲ་མུ་ཁཱ་ཡ། ཛྙཱ་ན་སཱ་ག་ར་པྲ་བྷཱ་ཡ། མ་ཧཱ་པི་ཤི་ཏ་རུ་དྷི་ར་བ་སཱ་ཧཱ་རི་ཎེ། སརྦ་མཱ་ར་བ་ལ་དྷྭཾ་སི་ནེ། ཤྲིཥྚི་སཾ་ཧཱ་ར་ཀཱ་ར་ཀཱ་ཡ། སརྦ་ནཱ་གཱ་ནཱཾ་ཥོ་ཥ་ན་སྟཾ་བྷ་ན་བི་དྷྲཱ་བ་ཎཱ་ཡ། ཨན་ཏྲ་མཱ་ལཱ་དྷཱ་རི་ནེ། སུ་མེ་རུ་ཀཾ་པི་ཏ་ནཱ་དཱ་ཡ། ཀྲོ་དྷ་བི་གྷྲ་ཧ་དྷཱ་ར་ཎཱ་ཡ། མ་ཧཱ་ཀཱ་ཤ་ཏི་ལ་ཀཱ་ཏྨ་ནེ། བུད་དྷ་ཀོ་ཊི་ས་ཧ་སྲ་ཀྵ་ཎཱ་ནི་ཥྦཱ་ད་ནཱ་ཡ། ཛྙཱ་ནཱ་མྲྀ་ཏ་བཪྵ་པ་ཎཱ་ཡ། སརྦ་ཀརྨ་པྲ་བརྟྟ་ནཱ་ཡ་ནེ། བཾ་ད་ན་ཀ་རཱ་ཡ། སརྦ་བི་ཀལྤ་བྷཾ་ཛ་ཎ་ཀ་རཱ་ཡ། མུཾ་ཌཱ་བ་ལི་ལགྣ་ཤ་རཱི་རཱ་ཡ། པ་ར་ཀྲྀ་ཏ་ཡཾ་ཏྲ་མཾ་ཏྲ་ནཱ་ཤ་ནཱ་ཡ། མ་ཧཱ་རཀྵཱ་ཀ་རཱ་ཡ། དུཥྚཱ་ནཱཾ་བི་དཱ་ལ་ནེ། དྷརྨོ་དྷ་ཡ་ཀ་རཱ་ཡ། ཀྲོ་དྷ་སྥཱ་ར་སྥཱ་ར་ཎཱ་ཡ། ཨིཾ་དྲ་ཛཱ་ལ་སརྦ་སཏྭཱཏྨ་ནེ། གྲསྟ་བཱ་ད་པྲ་བཱ་ད་མ་ཧཱ་མ་ཏེ། །དེ་ལྟར་ལ་སོགས་གསང་སྔགས་གང་། །རབ་ཏུ་མང་བ་རྒྱ་ཆེའོ། །སྣ་ཚོགས་རྣམ་པ་དུ་མའི་མིང་། །སེམས་ཅན་མིང་གིས་ཤེས་པར་བྱ། །སྔགས་རྣམས་ཐམས་ཅད་མཉམ་སྦྱོར་བས། །ཁམས་གསུམ་རྣམས་སུ་ཡོངས་བཞུགས་པའི། །དེ་བཞིན་གཤེགས་པ་ཀུན་གྱི་གཙོ། །བཅོམ་ལྡན་སྔགས་པས་འདི་གསུངས་སོ། །ཞེས་བྱ་བ་ནི་འཇིགས་བྱེད་ཆེན་པོའི་ཆོ་ག་སྟེ་རབ་ཏུ་བྱེད་པ་བཅྭ་ལྔ་པའོ།། །།དེ་ནས་མིག་ལ་སོགས་དབང་པོ། །ཀུན་གྱི་མངོན་ཤེས་ཆོ་ག་བཤད། །མིག་མི་བཟང་གི་རབ་སྦྱོར་བས། །རྡོ་རྗེ་གསུམ་ནི་རབ་བསྒྲུབ་བྱ། །གང་དུ་བྱང་ཆུབ་སེམས་གནས་པས། །དེར་ནི་མིག་གིས་ངེས་པར་བལྟ། །རྣལ་འབྱོར་རྣམས་ཀྱི་ཟག་མེད་མཆོག །སེམས་ནི་མིག་ཏུ་ཤེས་པར་བྱ། །རྩ་རྣམས་ཀྱི་ནི་རབ་སྦྱོར་བས། །སོ་སོར་རླུང་ནི་དབབ་པར་བྱ། །གང་ཉིད་དུ་ནི་སྐྱེས་དུས་སུ། །དེ་ཡི་དུས་སུ་ཐིམ་ནས་འགྲོ། །དེ་ནི་མངོན་ཤེས་མིག་རྣམས་ཀྱི། །སེམས་འདི་ཡིས་ནི་འགྲོ་བར་འགྱུར། །སྐྱེ་འགྲོའི་ནང་དུ་སོན་པའི་གཟུགས། །ཡིད་ཀྱིས་སྒྲ་ནི་ཉན་པར་འགྱུར། །འགྲོ་དང་འོང་བའི་ཆོ་ག་ནི། །
ལྷ་རྫས་དྲི་རུ་རྗེས་མཚོན་བྱ། །ལྷ་རྫས་རོ་ཡི་རབ་སྦྱོར་བས། །ལྕེ་ནི་དགའ་བ་དང་བཅས་ཀྱིས། །ལྕེ་ཡི་མངོན་ཤེས་ལ་བརྟེན་ནས། །དབུ་མའི་ཕོ་ཉ་སྐྱེས་པ་ཡིན། །ལུས་ཀྱི་རེག་པའི་རྣམ་པ་ཡིས། །མཆོག་ཏུ་ཟག་མེད་དེ་བསྒྲུབ་བྱ། །སྔོན་གྱི་བག་ཆགས་དྲན་པ་ལ། །དེ་ཉིད་རྣལ་འབྱོར་ལྡན་པར་འགྲོ། །ཉིན་ཞག་མཚན་མོ་མཉམ་བྱས་ནས། །ཆུ་ཚོད་དྲུག་ཅུ་ཉིད་དང་ནི། །ཆུའི་སྲང་དྲུག་ཅུ་ཐམ་པ་དང་། །གྷ་ཊི་ཀར་ཡང་སྦྱར་བར་བྱ། །རྒྱར་ནི་སོར་མོ་བཅུ་གཉིས་ལ། །དཔང་ས་སུ་སོར་བརྒྱད་ཉིད་ཡིན་ཏེ། །གུཉྫ་དྲུག་ཅུའི་ཚད་ལ་ནི། །སོར་བཅུ་གཉིས་པའི་ཐུར་མའོ། །སྐད་ཅིག་ཐང་ཅིག་ཡུད་ཙམ་དང་། །ཀཱཥྚི་མིག་བཙུམས་ཕྱེ་བ་དང་། །སེ་གོལ་གཏོགས་པར་ཤེས་བྱ་སྟེ། །དབུགས་རྒྱུའི་མངོན་པར་ཤེས་པས་སོ། །ཕ་རོལ་ཕྱིན་དྲུག་ཚུལ་དག་གིས། །ཆོས་ཀྱི་དབྱིངས་ནི་མཚོན་པར་བྱ། །དུས་དང་དུས་མིན་སེལ་བ་པོ། །མིག་མི་བཟང་བ་བསྒོམ་པར་བྱ། །མཚོན་བྱ་མཚན་ཉིད་རྣལ་འབྱོར་མའི། །དཀྱིལ་འཁོར་ནང་དུ་བྱས་པ་ཉིད། །སེམས་འདི་སྣ་ཚོགས་གཟུགས་ཅན་ཏེ། །སྲོག་ཆགས་རྣམས་ཀྱིས་གར་བགྲོད་པ། །བདག་མེད་རང་བཞིན་འཐོབ་པར་འགྱུར། །མདུད་པ་རྣམས་ཀྱི་ཕྲད་པས་གནས། །གཟུགས་སུ་བྱེད་འགྱུར་དེའི་དངོས་པོ། །མཆོག་གི་དང་པོ་བྲལ་མཐའ་ཅན། །ཆོས་ཀྱི་འབྱུང་གནས་གང་གནས་པ། །རྡོ་རྗེ་མཁའ་འགྲོར་དེ་ཤེས་བྱ། །ཐུར་སེལ་ལམ་ལ་རྟག་བརྟེན་ནས། །སླར་ཡང་རེ་རེའི་ནང་དུ་སྟེ། །སྲོག་ལ་སོགས་པའི་རླུང་ལྔ་ཡིས། །མིག་ནི་ལྔ་རུ་ཤེས་པར་བྱ། །འཛག་པ་མེད་པའི་ས་བོན་འཛག །ཡེ་ཤེས་མཁའ་འགྲོ་མའི་སྦྱོར་ལྡན། །ས་བོན་ལྔ་རྣམས་ཐིག་ལེ་ཡི། །མངོན་ཤེས་བྱེད་པོ་སོགས་ལྔ་པ། །དེ་ལྟའི་རྣལ་འབྱོར་མཆོག་ཡོངས་རྫོགས། །རྣལ་འབྱོར་ཀུན་གྱིའང་མཆོག་ཡིན་ནོ། །དངོས་པོའི་ཡེ་ཤེས་ཅན་མ་ལུས། །རིང་དུ་ཡོངས་སུ་སྤངས་པ་ཡིན། །ཐམས་ཅད་ལུས་སུ་མཉམ་སྦྱོར་ལས། །ལྷན་ཅིག་སྐྱེས་པའི་སྤྱན་འཇུག་པ། །དངོས་ཀུན་དངོས་པོ་མེད་མཛད་པ། །བཅོམ་ལྡན་མིག་གིས་འདི་གསུངས་སོ། །ཞེས་བྱ་བ་ནི་མིག་མི་བཟང་
གི་ཆོ་ག་སྟེ་རབ་ཏུ་བྱེད་པ་བཅུ་དྲུག་པའོ།། །།དེ་ནས་ལྷ་མོས་ཕྱག་བྱས་ནས། །དེ་བཞིན་མཆོད་པ་ཆེན་པོ་བྱས། །སྟོབས་པོ་ཆེ་ཡི་སྦྱིན་སྲེག་ནི། །བདག་པོ་ཆེན་པོས་བསྟན་དུ་གསོལ། །མཁས་པས་རྒྱུན་དུ་ནང་བདག་གི། །སྦྱིན་སྲེག་བཤད་ཀྱིས་མཉན་པར་གྱིས། །སྟོབས་པོ་ཆེ་ཡི་རབ་སྦྱོར་བས། །ཁམས་རྣམས་ཀུན་གྱིས་དགང་བླུགས་ཏེ། །བདེ་བ་ཐབ་ཏུ་ཡང་དག་འཐོབ། །ཉི་ཟླ་དགང་གཟར་བླུགས་གཟར་རོ། །སློབ་དཔོན་གཉིས་མེད་དེ་དེ་ལ། །ཡང་དག་རིགས་པའི་གཟུགས་སུ་བསྲེག །སྣ་ཚོགས་མཁའ་འགྲོ་རྣམས་འདི་མེ། །གསང་སྔགས་རང་བཞིན་མཚན་ཉིད་དོ། །ཡམ་ཤིང་རྩ་རུ་ཡང་དག་གྲགས། །གང་ཕྱིར་སཱ་ལི་ལས་སྐྱེས་འབྲས། །ཚིལ་ནི་རྟག་ཏུ་ཞོ་ཟན་ཡིན། །འདི་རུ་མར་ནི་བྱང་ཆུབ་སེམས། །ཁྲག་ནི་སྦྲང་རྩིར་ཤེས་པར་བྱ། །སྲོག་སོགས་རླུང་རྣམས་དཱུར་བའོ། །གཅིན་དང་བཤང་བ་དག་དེ་ལྟར། །ཙནྡན་དང་ནི་གླ་རྩིའོ། །མེ་ཏོག་རྟག་ཏུ་ཁྲག་ཏུ་གྲགས། །མཆིལ་མ་ལུད་པ་འབྲས་ཐུག་ཡིན། །བུད་ཤིང་སོ་སེན་རུས་པའོ། །མདོར་བསྡུས་པ་ཡིས་པགས་པ་གོས། །མེ་ཡི་ཐབ་ཀྱི་དབུས་སུ་ནི། །སྐྲ་དང་བ་སྤུ་ལྷ་རུ་འགྱུར། །སྣ་ཚོགས་ཕྲ་མོའི་ཁམས་གཞན་ནི། །སྣ་ཚོགས་འབྲུ་སྟེ་དེ་ལ་བསྲེག །རིམ་གྱིས་མཁའ་འགྲོ་རྫོགས་སོན་པ། །གང་བའི་སྲེག་བླུགས་སུ་ཤེས་བྱ། །དབང་པོ་ཐམས་ཅད་གར་བྱེད་དེ། །དེ་ཡི་བག་ཆགས་གླུ་ལེན་ནོ། །སྣ་ཚོགས་སྒྲ་ཆེན་པོས་རོལ་མོ། །སྙིང་རྗེ་སོགས་པས་སྟོན་མོ་ཡིན། །སྲོག་རྣམས་ཀུན་གྱི་བདག་པོ་ཡི། །སྟོབས་པོ་ཆེ་ནི་བསྒོམ་པར་བྱ། །ལས་ཐམས་ཅད་པས་སྦྱིན་སྲེག་ནི། །དེས་མཉེས་པ་ཡི་དངོས་གྲུབ་འགྱུར། །འཇིག་རྟེན་མཆོག་གི་ཁམས་ཀུན་དུ། །ཡིད་ནི་དེ་རུ་ཡང་དག་རོལ། །གང་ཚེའི་དུས་སུ་བདེ་གྱུར་པ། །དེ་ཚེའི་དུས་སུ་རབ་ཏུ་གནས། །སྦྱིན་སྲེག་རང་བདག་ཉིད་མཐོང་བས། །སྨོད་དང་རྗེས་འཛིན་བྱེད་པ་ཡིན། །འཇིག་རྟེན་འཇིག་རྟེན་འདས་ཡེ་ཤེས། །དེ་རྣམས་དབུས་མར་འཐོབ་པར་
བྱ། །མཚམས་རྣམས་ཀུན་དུ་ཁོང་ཁྲོ་བ། །སེམས་ཆེན་པོ་ནི་གསོད་པར་འགྱུར། །རྟོག་པས་སྤྲུལ་པའི་སངས་རྒྱས་ནི། །དེ་ལས་བྱུང་བ་བཟའ་བར་བྱ། །མཚོན་བྱ་མཚོན་བྱེད་རབ་བཅོམ་པས། །གཉིས་དག་ཤེས་པར་འོས་པ་ཡིན། །སྒྱུ་མའི་བདག་ཉིད་མཚན་ཉིད་ནི། །དེ་ལ་ཐིམ་པར་བྱེད་པར་འགྱུར། །ཁམས་ཀུན་ཡང་དག་སྦྱོར་བ་ལས། །ཡེ་ཤེས་གཉིས་བྱར་མེད་མཚན་ཉིད། །མེ་ཡི་གཟུགས་སུ་རྟག་བཞུགས་པའི། །བཅོམ་ལྡན་ཐབ་ཁུང་གིས་འདི་གསུངས། །ཞེས་བྱ་བ་ནི་སྟོབས་པོ་ཆེའི་ཆོ་ག་སྟེ་རབ་ཏུ་བྱེད་པ་བཅུ་བདུན་པའོ།། །།དེ་ནས་རྡོ་རྗེ་པད་འདུ་བ། །ཇི་བཞིན་བཤད་ཀྱིས་མཉན་པར་གྱིས། །རིན་ཆེན་རྡོ་རྗེའི་རབ་སྦྱོར་བས། །ཨ་བ་དྷཱུ་ཏཱི་ཅན་དངོས་གྲུབ། །རྣལ་འབྱོར་མ་ནི་ཡང་དག་རོལ། །དོན་དམ་པ་ཡི་ཉམས་ལ་གནས། །དེ་ཡི་སྦྱོར་བས་གྲོལ་བར་ནི། །གཉིས་མེད་རྒྱུ་རྣམས་ཀྱིས་འགྱུར་རོ། །ལུས་ཀྱི་ཉམས་སུ་མྱོང་བཞིན་པ། །བྱིས་པ་རྣམས་ཀྱི་བྱང་ཆུབ་འོད། །ཧ་ཡིག་དྲུག་པ་དང་ལྡན་པའི། །ས་བོན་རྡོ་རྗེའི་ནོར་བུར་དགོད། །ཨ་བ་དྷཱུ་ཏཱིའི་རྩར་འབབ་སྟེ། །སྟེང་དུ་ཁ་བལྟས་དཔྲལ་བར་སོན། །སྲུང་བའི་དུས་སུ་བློ་ལྡན་གྱིས། །རང་གི་ལག་པས་རྡོ་རྗེ་གཟུང་། །བྱང་ཆུབ་སེམས་ལ་རྩེན་བྱེད་ལ། །རྒས་དང་འཆི་བ་རིང་བ་ཡིན། །སྲིད་པའི་སྐྱོན་ལས་འགོམས་པ་ཡིས། །སྲིད་གསུམ་དེ་ཡི་རང་བཞིན་འགྱུར། །ལས་ཀྱི་ཕྱག་རྒྱའི་རབ་སྦྱོར་བས། །ཉི་མ་རེ་རེ་བསྒྲུབ་པར་བྱ། །དེ་ཡི་དུས་སུ་གང་མཐོང་བ། །དངོས་པོ་ཀུན་ལ་ལྟུང་བར་བྱ། །འདོད་ཆགས་ཆེན་པོའི་ཚུལ་བདག་ཉིད། །རྟག་ཏུ་བདག་ཉིད་ལ་འབྱུང་འགྱུར། །རྣལ་འབྱོར་རྒྱུད་ཀྱི་རྒྱུའི་དོན་དུ། །བསྟན་བྱ་སྟོན་པ་པོར་འགྱུར་རོ། །རྣལ་འབྱོར་མ་ཡི་རྒྱུད་ཀྱི་ནི། །སེམས་ཅན་དོན་ནི་ངེས་པར་བྱས། །སྐུ་བཞི་པོ་ཡི་རྣལ་འབྱོར་གྱིས། །བདེན་མིན་བདག་གིས་བཤད་མི་བྱ། །རིན་ཆེན་རྡོ་རྗེའི་རང་བཞིན་ཅན། །སྦྱོར་སྐྱེས་ཡེ་ཤེས་གྱེན་དུ་བགྲོད། །ཕོ་ཉ་རྣམས་ཀྱི་གཙོ་ཉིད་བྱ། །འདོད་ཆགས་
མེ་ཡིས་དགྱེས་པར་བྱ། །བྱང་ཆུབ་སེམས་ནི་རྟག་གཟུང་བ། །ལྕེ་ཡིས་བྱ་ཡི་ལག་པས་མིན། །ལྷན་སྐྱེས་འཕོས་པའི་མཚན་ཉིད་ནི། །མཁའ་ལྡིང་ཕྱག་རྒྱ་ཉིད་ཀྱིས་གཟུང་། །ཕྱག་རྒྱའི་ཁ་ཉིད་དུ་སྦྱིན་ཏེ། །དེ་ནས་བཏུང་བར་བྱ་བ་ཡིན། །སྟོབས་ཐམས་ཅད་ཀྱི་བཟའ་བར་བྱ། །སཱ་ལི་སྐྱེས་སོགས་འབད་པས་སོ། །སྦྱིན་སྲེག་ཀུན་ཀྱང་དེ་ཉིད་ཀྱིས། །དབང་ལ་སོགས་པ་གང་གང་བྱེད། །དེ་དེའི་ཐོད་པར་བྱ་བ་སྟེ། །དེ་ནས་ས་བོན་གདབ་པར་བྱ། །དེ་རྣམས་རྫས་ཀྱིས་སྤང་བ་དང་། །གཏོར་མ་དང་ནི་བསྲུང་བར་བྱ། །དེ་ཡིས་བཅིངས་པ་ཙམ་གྱིས་ནི། །དེ་དང་འདྲ་བའི་གཟུངས་འཇུག་འགྱུར། །རིལ་བུ་འམ་ནི་སྐུད་པ་ནི། །དཔའ་བོ་རང་ཉིད་ཀྱིས་གསུངས་པའོ། །བྷ་གའི་དབུས་རྣམས་སུ་བསྒོམ་པ། །རིན་ཆེན་རྡོ་རྗེ་ཅན་དེ་སྨན། །དཀྱིལ་འཁོར་ཁམས་རྣམས་ཀུན་གྱི་སྟེ། །སྤངས་པ་རབ་ཏུ་བསྟན་པ་ཡིན། །གང་དང་གང་གི་ལས་ཀྱི་ནི། །དེ་དང་དེའི་མིང་ཅན་སྔགས་སོ། །ས་བོན་ཀུན་གྱི་ཡོངས་སྦྱོར་ལས། །དེ་ནི་རྟག་ཏུ་སྨན་རྣམས་ཏེ། །བཅོམ་ལྡན་འདས་ཀྱི་ཕྱག་རྒྱ་ནི། །རྟག་ཏུ་འཆིང་བས་འདི་གསུངས་སོ། །ཞེས་བྱ་བ་ནི་རིན་ཆེན་རྡོ་རྗེའི་ཆོ་ག་སྟེ་རབ་ཏུ་བྱེད་པ་བཅྭ་བརྒྱད་པའོ།། །།དེ་ནས་འཁོར་བའི་མཐར་གནས་པའི། །མཁའ་འགྲོའི་མཚན་ཉིད་བཤད་པར་བྱ། །རྟ་མགྲིན་གྱི་ནི་རབ་སྦྱོར་བས། །ཕོ་ཉའི་མཚན་ཉིད་བསྒྲུབ་པར་བྱ། །ཧ་ཡིག་སྐྱེ་གནས་དབུས་སུ་སྟེ། །ཡ་ཡིག་མགོ་བོར་གནས་པའོ། །བྷྱི་ཡིག་དབུས་མའི་པདྨར་ཏེ། །བ་ཡི་ཡི་གེ་སྙིང་ག་རུ། །རྣལ་འབྱོར་ཆེ་ལ་འཛིན་བཞིན་པ། །དབྱངས་ཅན་མ་དང་འདྲ་བར་བྱེད། །རྨོངས་པ་ཉིད་ནི་ཐམས་ཅད་འཕྲོག །གང་ཕྱིར་གཞུང་ནི་རྗེས་འཇུག་འགྱུར། །མགྲིན་པར་རྟག་ཏུ་ཚིགས་བཅད་ནི། །མགྲིན་པར་དག་ཏུ་གནས་པ་ཉིད། །འཚོ་བ་རྟ་ཡི་དབྱིབས་འདིར་ནི། །གནས་པ་རྣལ་འབྱོར་ལྷག་མ་ཡིན། །དེ་ཡི་སྦྱོར་བས་འགྲོ་འགྱུར་བ། །སྔོན་དུ་ཉི་མའི་གདན་དུའོ། །ཉི་དེ་རྡོ་རྗེ་སེམས་དཔའ་སྟེ། །ཁམས་གསུམ་པོར་ནི་བསྐོར་བར་འགྱུར། །ནམ་མཁར་ཉི་མས་མཛེས་བྱས་ནས། །བྱང་ཆུབ་ཡིད་ཀྱིས་འགྲོ་བར་
འགྱུར། །ཕྱོགས་ཀྱི་འཁོར་ལོ་མ་ལུས་རྟོགས། །རྣལ་འབྱོར་མ་ཡི་ཆུ་སྐྱེས་མཆོག །སེམས་ཅན་ཀུན་གྱི་རྨོངས་ཉིད་དང་། །ལམ་མཐོང་བ་ནི་ཐམས་ཅད་ལ། །དེ་ཉིད་ཉི་མ་རྟག་སྣང་བར། །མཚན་མོ་མུན་པ་དྲག་པོ་འཕྲོག །རྣལ་འབྱོར་མ་འཁོར་དབུས་སོན་པར། །རྟ་ཡི་མགོན་པོ་བསྒོམས་པ་ཡིན། །གང་གི་སངས་རྒྱས་སུ་འགྲོ་བ། །སྒྲུབ་ཐབས་ཡན་ལག་འཆར་བར་འགྱུར། །བགེགས་རྣམས་རྣམ་པར་ཉམས་འགྱུར་ཏེ། །སྤྲིན་ལ་སོགས་པ་ཉམས་པར་འགྱུར། །ཀུན་གྱི་སྡིག་པའང་འཕྲོག་པར་བྱེད། །རང་གི་དགའ་བ་ཤར་མཚན་ཉིད། །མཆོད་སྦྱིན་དུས་ཀྱིས་འཇིག་རྟེན་དུ། །ཐམས་ཅད་སྐད་ཅིག་ལ་སྒྲུབ་འགྱུར། །ཁམས་བདུན་རྣམ་པར་བཟུང་བ་ཡིས། །དེ་ཚེས་འོག་དངོས་གྲུབ་འགྱུར། །བདག་མེད་འདི་རྣམས་དེ་ལྷ་མོ། །ཡན་ལག་གཅིག་གི་རོལ་པར་བྱེད། །སྔགས་ཀྱི་བཟླས་པ་མི་བྱ་སྟེ། །སྦྱིན་སྲེག་ཨཱ་ག་སོགས་དེ་བཞིན། །ཇི་ལྟར་བདེ་བས་རྟོགས་བྱ་སྟེ། །རྡོ་རྗེ་འཛིན་པ་ཉིད་འཐོབ་འགྱུར། །འདོད་ཆགས་ཀྱིས་ནི་འདོད་ཆགས་སྒོ། །མེ་ཡིས་ཚིག་ལ་གདུང་བར་བྱ། །དེ་བཞིན་འདོད་ཆགས་ཀྱིས་འདོད་ཆགས། །བསྟེན་པར་གྱུར་པས་མི་འཆིང་ངོ་། །དེ་ཉིད་ཐབས་སོ་ཡིད་ཀྱི་ལས། །དགེ་བའི་མཚན་ཉིད་ཅན་བྱའོ། །ནང་དུ་བྱེད་པ་མ་ཡིན་ཏེ། །གུས་པ་ཡིད་ཀྱིས་དབུ་མར་གནས། །ཕྱི་རོལ་ཡེ་ཤེས་ཅན་རྣམས་ཀྱིས་ཡེ་ཤེས། །དེ་ཉིད་སངས་རྒྱས་རྡོ་རྗེ་འཆང་བ་སོགས། །སེམས་ཅན་འཇིག་རྟེན་སོགས་འབྱུང་བ། །དེ་རྣམས་སྤངས་པས་སངས་རྒྱས་མེད། །མུ་སྟེགས་ཅན་དང་སངས་རྒྱས་པར། །ཀུན་དུ་དབྱེ་བ་ཡོད་མ་ཡིན། །ལུང་ཐམས་ཅད་ནི་འགལ་བ་སྟེ། །ཚད་མ་པ་རྣམས་ཐོ་ཆོ་ཅན། །ཐམས་ཅད་ཚིག་ནི་རྣམ་ཤེས་པས། །ཡེ་ཤེས་ཅན་རྣམས་དེའི་ཕྱིར་ཤེས། །མཁའ་འགྲོ་ཐམས་ཅད་མཉམ་སྦྱོར་ལས། །ནམ་མཁའ་རྣམས་སུ་བཞུགས་པ་ཡིན། །བཅོམ་ལྡན་འཇིག་རྟེན་འཇིག་རྟེན་པར། །རྟག་ཏུ་བཞུགས་པས་འདི་གསུངས་སོ། །ཞེས་བྱ་བ་ནི་རྟ་མགྲིན་གྱི་ཆོ་ག་སྟེ་རབ་ཏུ་བྱེད་པ་བཅུ་དགུ་
པའོ།། །།དེ་ནས་རབ་ཏུ་འཇོམས་ཡོན་ཏན། །བཤད་ཀྱིས་སྒྲུབ་པ་པོ་རྣམས་ཉོན། །ནམ་མཁའི་སྙིང་པོའི་སྦྱོར་བ་ཡིས། །རྡོ་རྗེ་རླུང་གི་མཚན་ཉིད་དེ། །འཆགས་པ་དང་ནི་འཇིག་རྣམས་སུ། །གང་ཞིག་སྟོང་པ་དེ་སྲོག་ཆགས། །ཁམས་རྣམས་དེ་འདྲར་ཤེས་བྱ་སྟེ། །དུལ་བའི་སྦྱོར་བར་ཡང་དག་གནས། །ཟླ་བའི་གཟུགས་སུ་ཡོངས་གྲགས་པའི། །རང་གི་རང་བཞིན་ལས་སྐྱེས་འཛག །རྣལ་འབྱོར་ལྷག་མའི་ཡེ་ཤེས་ཀྱང་། །དེ་ནི་རབ་འཇོམས་ལ་བརྗོད་དོ། །དུས་ཐམས་ཅད་དུ་གཡོ་བ་མེད། །གཡོ་བའམ་འདིར་ནི་མི་མཐོང་ངོ་། །དེ་ནི་ཐམས་ཅད་བདག་ཉིད་རླུང་། །བསམ་པ་ཐམས་ཅད་རབ་འཇུག་པའོ། །དོ་ལཱ་ཧཱ་ར་སོགས་སྦྱར་བས། །རྣལ་འབྱོར་རྣམས་ཀྱི་ཐར་སྟེར་པོ། །སྒྲ་དང་ཐིག་ལེར་དེ་ཤེས་བྱ། །འོད་གསལ་བ་དང་སྣང་བ་གསུམ། །དེ་ཕྱིར་ནམ་མཁའི་སྙིང་པོ་ཡང་། །མཁའ་འགྲོའི་སྦྱོར་རྣམས་ཀྱིས་ཤེས་བྱ། །ནང་གི་དབུ་མའི་སྦྱོར་བ་ཡིས། །སྲོག་དེའང་རབ་ཏུ་བསྔགས་པ་ཡིན། །དེ་ཡང་ཀུན་གཞི་ཤེས་བྱ་སྟེ། །མེ་ལོང་དུ་ཡང་རབ་ཏུ་བཤད། །ཆོས་ཀྱི་སྐུ་ལ་སོགས་པའང་དེ། །དམྱལ་སོགས་འགྲོ་བ་དེ་བཞིན་ཏེ། །སངས་རྒྱས་བྱང་ཆུབ་སེམས་རྣམས་ཀྱི། །གནས་ནི་རྡོ་རྗེའི་དཀྱིལ་འཁོར་རོ། །ཟླ་བའི་ལམ་དུ་གང་ཚེ་མཁའ། །རྣལ་འབྱོར་རྣམས་ཀྱི་ལྷག་མེད་འཕོ། །དེའི་དུས་རྣམ་པར་གཞག་མེད་འགྱུར། །རྣལ་འབྱོར་བྱིས་པས་བགྲོད་བྱ་མིན། །ནམ་མཁའི་ཁམས་རྣམས་ཐམས་ཅད་ཀྱི། །དེ་ཡི་སྙིང་པོར་རབ་ཏུ་བསྟན། །དེ་དག་ཤེས་རབ་ཐབས་གཉིས་སོ། །གནས་སྐབས་ཀྱང་ནི་གཉིས་ཉིད་དོ། །སྲིད་པ་རྣམ་པར་འཕྲོ་བ་ཉིད། །དབང་པོའི་དབུས་སུ་སྦྱར་བར་བྱ། །སངས་རྒྱས་འཇིག་རྟེན་མཐའ་ཡས་རྣམས། །ས་ཡི་ནང་དུ་རྩེན་པར་འགྱུར། །དེ་ལྟར་རྣམ་བཅས་དེ་ཉིད་དང་། །རྣམ་པ་མེད་པའི་གོ་འཕང་བཞུགས། །སེམས་དང་རྣམ་པར་ཤེས་པའི་རྒྱུན། །གཉིས་པོ་ཉིད་ནི་
གཉིས་མེད་འགྱུར། །དབུ་མར་ལྟ་རྣམས་ཀྱིས་འགྲུབ་སྟེ། །ཡེ་ཤེས་དེར་འདི་རྫོགས་པའོ། །གལ་ཏེ་སངས་རྒྱས་རྗེས་ཆགས་ཡོད། །ཆོས་དགེ་འདུན་ལ་དེ་བཞིན་མཆོག །གལ་ཏེ་མུ་སྟེགས་མཁས་པ་ཡི། །ཚུལ་ཆེན་ཆོས་དེ་འདོད་པ་དང་། །གལ་ཏེ་ཤེས་རབ་ཐབས་རྣལ་འབྱོར། །སྟོང་ཉིད་སྙིང་རྗེའི་བདག་ཉིད་ཅན། །གལ་ཏེ་ཐམས་ཅད་མི་རྟག་བདག །ཚུལ་འདི་བསྒོམ་པར་བྱ་བ་ཡིན། །འདིར་མང་སྨྲས་པས་ཅི་བྱ་སྟེ། །ཆོས་དབྱིངས་གལ་ཏེ་འདོད་ཀྱང་ངོ་། །ནམ་མཁའི་སྙིང་པོའི་གཟུགས་ཅན་གྱི། །སངས་རྒྱས་སྤྲུལ་པ་བསྒོམ་པར་བྱ། །ཤན་པ་སྨྱིག་མ་མཁན་ལ་སོགས། །གསོད་པའི་དོན་ལ་ཡོངས་གནས་པ། །དེ་ཀུན་དེའི་གནས་ཉམས་དགའ་བར། །ལམ་རྗེས་སྐྱོབ་རྣམས་ཀྱི་གྲོལ་འཐོབ། །ངེས་པར་དཀྱིལ་འཁོར་དབུས་རྣམས་སུ། །གཟུགས་སུ་སྡོམ་པ་བསྒོམ་པར་བྱ། །འཇིག་རྟེན་འདི་དང་ཕ་རོལ་དུ། །རྨོངས་པའི་བདག་ཉིད་དངོས་གྲུབ་འཐོབ། །རྣམ་ཤེས་ཀུན་གྱི་སྦྱོར་བདག་ཉིད། །སྟོང་ཉིད་སྙིང་པོ་གཅིག་པུ་པ། །བཅོམ་ལྡན་རབ་འཇོམས་རྣམ་པ་ཡི། །རྣལ་འབྱོར་ལ་བཞུགས་པས་འདི་གསུངས། །ཞེས་བྱ་བ་ནི་ནམ་མཁའི་སྙིང་པོའི་ཆོ་ག་སྟེ་རབ་ཏུ་བྱེད་པ་ཉི་ཤུ་པའོ།། །།དེ་ནས་ལྷ་མོས་མཆོད་བྱས་ཏེ། །ཕྱག་བྱས་ནས་ནི་འདི་གསོལ་ཏོ། །རང་གིས་རིག་པའི་མཚན་ཉིད་ནི། །བཅོམ་ལྡན་རྡོ་རྗེས་གསུང་བར་མཛོད། །རང་རིག་ཡེ་ཤེས་ལས་བྱུང་བ། །ཇི་ལྟའི་རིགས་པས་བཤད་པར་བྱ། །དཔལ་ཧེ་རུ་ཀའི་རབ་སྦྱོར་བས། །རྣལ་འབྱོར་ཟླ་བའི་བགྲོད་པ་དང་། །དཀར་པོའི་ཚེས་གཅིག་ལ་སོགས་ནས། །ཡེ་ཤེས་རྒྱ་མཚོ་འཕེལ་བར་འགྱུར། །ཐོག་མར་ཡེ་ཤེས་སྐྱེ་བར་འགྱུར། །གཉིས་པར་ནམ་མཁར་འགྲོ་བའི་གཟུགས། །གསུམ་པར་མདའ་ཡི་དབྱིབས་དང་འདྲ། །བཞི་པར་འབེན་གྱི་གཟུགས་ཅན་ནོ། །ལྔ་པར་རྩེ་མོ་ལྔའི་བདག་ཉིད། །དྲུག་པར་
ཁམས་དྲུག་འབྱུང་བ་ཡིན། །བདུན་པར་རྒྱ་མཚོ་ཡི་ནི་གཟུགས། །བརྒྱད་པར་པདྨར་བརྗོད་པ་ཡིན། །དགུ་པ་རུ་ནི་བཅུད་ལེན་ཏེ། །བཅུ་པར་ལྷན་སྐྱེས་གཟུགས་ཀྱིས་སོ། །བཅུ་གཅིག་པ་ལ་ཞི་བའི་གཟུགས། །བཅུ་གཉིས་པ་ལ་འཁོར་ལོའི་གཟུགས། །བཅུ་གསུམ་པ་ལ་ཉི་མ་སྟེ། །བཅུ་བཞིར་ཟླ་བ་དེ་བཞིན་ནོ། །བཅྭ་ལྔ་པ་ཉིད་རཱ་ཧུ་སྟེ། །ཐིག་ལེ་ཞེས་བྱས་བཅུ་དྲུག་པའོ། །རྣམ་པ་བཅུ་དྲུག་མཚན་ཉིད་ནི། །རང་གིས་རིག་པར་ཤེས་པར་བྱ། །དཔལ་ཧེ་རུ་ཀའི་སྦྱོར་བ་ཡིས། །འཁོར་ལོ་བཞི་རྣམས་སུ་བསྒྲུབ་བྱ། །རྒས་པ་མེད་ཅིང་འཆི་བ་མེད། །ནད་དང་མཛེ་སོགས་སྤངས་པ་ཡིན། །ལྟེ་བར་ཤྲཱི་ཡི་ཡི་གེར་གྱུར། །ཧེ་ཡིག་སྙིང་གར་དགོད་པར་བྱ། །རུ་ཡིག་མགྲིན་པའི་འཁོར་ལོར་ཏེ། །ཐོད་པར་ཀ་ཡི་ཡི་གེའོ། །ཐིག་ལེ་བཞི་ཡི་རབ་སྦྱོར་བས། །རང་གིས་རིག་པར་འགྲུབ་པར་འགྱུར། །དེ་ཉིད་རྣམ་པ་བཅུ་དྲུག་ནི། །རྣལ་འབྱོར་རྣམས་ཀྱི་མཆོག་ཟག་མེད། །གནས་དང་གནས་སུ་འཕོ་བ་ཉིད། །དབུ་མའི་ནང་དུ་རབ་ཏུ་གཞུག །འཁོར་ལོ་བཞི་ཡི་འདབ་སོན་ནས། །རང་གིས་རིག་པ་མཐའ་ཡས་མཆོག །རིགས་དེ་རྣལ་འབྱོར་མ་རྣམས་ཀྱི། །བྱུང་བར་རྣམ་པར་ཤེས་པར་བྱ། །སེམས་ཅན་པོ་ནི་སད་བཞིན་པས། །དོན་ཡོད་མཐོང་བ་ཐོབ་པར་འགྱུར། །རྟག་ཏུ་རྨི་ལམ་དུ་འགྱུར་ཏེ། །དུས་ཐམས་ཅད་དུ་ངེས་པར་གནས། །ལོངས་སྤྱོད་སྤྲུལ་པའི་མཚན་ཉིད་དུ། །གཉིད་ལོག་པ་ཡིས་དེ་ཚེ་མཐོང་། །བཞི་པ་རབ་མང་བདག་མེད་དེ། །དེ་ཕྱིར་དེ་རྣམས་མཐའི་ལོངས་སྤྱོད། །དེ་ལྟར་འཁོར་ལོ་བཞིར་གནས་ནས། །ངེས་པར་ལམ་དུ་འགྲོ་བར་འགྱུར། །ཤེས་རབ་དེ་ཉིད་རྟོགས་བྱས་ནས། །ཉི་མས་ཐབས་ཀྱི་དེ་ཉིད་ཅན། །རྡུལ་གྱི་སྦྱོར་བ་འབྱུང་བ་སྟེ། །ནག་པོའི་ཕྱོགས་སུ་གང་འདིར་ཡང་། །བཅུ་དྲུག་རྣམས་ཀྱི་ཆ་རྣམས་ཀྱི། །ཉི་མ་ཉིད་ནི་བར་དུའོ། །སྟོང་ཉིད་སྙིང་རྗེའི་སྦྱོར་བ་ལས། །རྡོ་རྗེ་འབར་བ་འབར་ཞིང་འབར། །དཀྱིལ་འཁོར་འཁོར་ལོའི་དབུས་རྣམས་སུ། །དཔལ་ཧེ་རུ་ཀ་བསམ་པར་བྱ། །མཚན་ཉིད་ཐམས་ཅད་ཡང་དག་ལྡན། །རྡོ་རྗེའི་དགའ་བར་འགྲོ་
བར་འགྱུར། །གནས་སྐབས་ཐམས་ཅད་ཡང་དག་སྦྱོར། །གཙོ་བོ་རང་རིག་བདག་ཉིད་ཅན། །བཅོམ་ལྡན་འདས་པའི་བཞི་པའི་མཐར། །རྟག་ཏུ་བཞུགས་པས་འདི་གསུངས་སོ། །ཞེས་བྱ་བ་ནི་དཔལ་ཧེ་རུ་ཀའི་ཆོ་ག་སྟེ་རབ་ཏུ་བྱེད་པ་ཉི་ཤུ་རྩ་གཅིག་པའོ།། །།དེ་ནས་ལུས་སོགས་ལྷ་རྣམས་ཀྱི། །སྟོན་མོ་མངོན་པར་བཤད་པར་བྱ། །པདྨ་གར་དབང་ཕྱུག་ཉིད་ཀྱི། །རབ་ཏུ་སྦྱོར་བའི་དེ་བྱུང་ངོ་། །རྩ་ནི་པདྨར་ཡང་དག་གྲགས། །སྲོག་གི་རླུང་གིས་གར་བྱེད་དོ། །བྱང་ཆུབ་སེམས་ཀྱིས་དབང་ཕྱུག་སྟེ། །དེ་རྣམས་ཀྱི་ནི་ནང་དུ་བཞུགས། །རང་གིས་རིག་པ་བཟའ་བར་བྱ། །སྙིང་རྗེའི་ཁ་ཡིས་བཏུང་བར་བྱ། །གཉིས་མེད་རྣལ་འབྱོར་མ་དང་རོལ། །སྒྱུ་མའི་རྗེས་སུ་འགྲོ་རྣམས་འགྲུབ། །ཐམས་ཅད་དེ་ཡི་རང་བཞིན་དུ། །བཟའ་བ་བཟའ་བ་མེད་པར་བྱ། །པདྨ་གར་དབང་བསྒོམ་པར་བྱ། །ཇི་ལྟའི་རིམ་པས་མཚོན་པར་བྱ། །པ་ཡིག་གཞན་གྱི་གྲོང་དུ་འགྲོ། །བརྟན་པ་ཐམས་ཅད་ཏྨ་ཡི་ཡིག །ན་ཡིག་གཡོ་བའི་རྣལ་འབྱོར་ཏེ། །རྟེ་ཡིག་བདེ་བའི་ལྷ་ཅན་ཡིན། །ཤྭ་ཡིག་ཏ་ལ་སོགས་པའི་སྟོབས། །ར་ཡིག་དགའ་རོལ་རྒྱུ་ཅན་ཡིན། །སྲིད་དང་མྱ་ངན་འདས་ཀུན་ལ། །དེ་ཡི་རབ་ཏུ་སྦྱོར་བར་བྱ། །མཚམས་ཀྱི་སྐད་ནི་འདི་རྣམས་ཀུན། །བདེ་མཆོག་ཕྱི་མར་ཤེས་པར་བྱ། །བགྲོད་པ་འདི་རྣམས་ལ་བརྟེན་ནས། །པདྨ་གར་གྱི་དབང་ཕྱུག་རང་། །ཧེ་རུ་ཀ་དང་བདེ་མཆོག་ཉིད། །རྡོ་རྗེ་སེམས་དཔའ་སོགས་གཙོ་བོ། །པདྨ་གར་དབང་ཕྱུག་དེ་ཡང་། །སྦྱོར་བ་ཀུན་ལ་ཤེས་པར་བྱ། །པདྨ་ཡེ་ཤེས་ཡང་དག་གྲགས། །གར་གྱི་དབང་ཕྱུག་རྣམ་ཤེས་ཅན། །གཉིས་པོ་གཉིས་མེད་ཡང་དག་བྱུང་། །ལྷ་ཀུན་འདིར་ནི་བྱུང་བ་ཡིན། །ཤེས་པོ་ཐམས་ཅད་དེ་ལ་གནས། །ཁམས་གསུམ་དུ་ནི་གར་དབང་ཕྱུག །གར་བྱེད་པ་ཡི་སྐུ་ཆེན་ལ། །དེ་ནས་རྟགས་ནི་མཚོན་པར་བྱ། །ནམ་མཁར་ཞེན་པའི་སྦྱོར་བ་ཡིས། །མཆོག་ཏུ་རྨད་དུ་བྱུང་བར་འགྲོ། །རྣལ་འབྱོར་མའི་འཁོར་ལོ་དབུས་སུ། །ལྷན་སྐྱེས་གཟུགས་ཀྱིས་རོལ་པར་གྱིས། །འདི་ཡིས་རྟག་ཏུ་དབང་གི་ལས། །དེ་རྣམས་ཀྱིས་ནི་དགའ་བ་བྱེད། །གང་དག་གང་གི་ལས་རྣམས་ལ། །དེ་དང་དེ་ཡིར་བསྒོམ་པར་བྱ། །སྒྲུབ་པོ་རྣམས་
ཀྱི་བྱང་ཆུབ་རྩར། །སངས་རྒྱས་ཐམས་ཅད་དབང་དུ་འོང་། །དེ་ནས་བདུད་ནི་བཅོམ་བྱས་ནས། །གར་བྱེད་བཞིན་པས་པདྨ་འཛིན། །སྡིག་པ་ཐམས་ཅད་རབ་འཇོམས་ཤིང་། །ཆེ་སོན་པ་རྣམས་གནས་པར་བྱེད། །འདོད་པ་ཐམས་ཅད་འགྲུབ་འགྱུར་ཞིང་། །རྣལ་འབྱོར་རྣམས་ཀྱི་སྲིད་ལ་སྦྱོང་། །རང་གི་སེམས་ཀྱིས་དངོས་གྲུབ་འཐོབ། །རྣམ་རྟོག་ཉིད་དུ་མི་བྱའོ། །གཞན་དུ་སྲིད་པའི་སྦྱོར་བདག་ཉིད། །སེམས་ཐམས་ཅད་ནི་རབ་འཇུག་པ། །འཁྲུལ་ཞིང་ཆུད་ཟོས་མུ་སྟེགས་རྣམས། །བསྟན་པ་རྣམས་ལ་རབ་འཇུག་བྱ། །བག་ཆགས་ངན་པ་ཡོངས་སྤངས་ནས། །ཕྱི་ནས་རང་བཞིན་བསྟན་པར་བྱ། །བཟའ་བ་ཐམས་ཅད་མཉམ་སྦྱོར་ལས། །བཟའ་བ་མེད་པར་རྟག་ཏུ་གནས། །བཅོམ་ལྡན་པདྨ་གར་མཛད་པའི། །དེ་བཞིན་གཤེགས་པས་འདི་གསུངས་སོ། །ཞེས་བྱ་བ་ནི་པདྨ་གར་དབང་གི་ཆོ་ག་སྟེ་རབ་ཏུ་བྱེད་པ་ཉི་ཤུ་རྩ་གཉིས་པའོ།། །།དེ་ནས་རྣམ་པར་སྣང་མཛད་ཀྱི། །མཚན་ཉིད་བཤད་ཀྱིས་ལྷ་མོ་ཉོན། །གཟུགས་ལས་འདས་པའི་ཡེ་ཤེས་གང་། །དེ་ནི་ཡེ་ཤེས་ཆེན་པོར་བརྗོད། །རྣམ་པར་སྣང་བཞིན་པ་དེ་བཞིན། །སེམས་དཔའ་ཆེན་པོའི་མིང་ཅན་ནོ། །སྤུ་ཁུང་རྩེ་མོ་ཐམས་ཅད་ལས། །དེ་རྣམས་ངེས་འཐོན་སྟོབས་ཆེན་པོ། །དེ་རྣམས་བུ་གར་རབ་ཞུགས་པ། །འཁོར་ལོ་བཞི་ཡི་མཚོ་སྐྱེས་སོན། །ཇི་ལྟར་མར་ལ་མར་ཞུགས་པ། །དེ་བཞིན་དུ་ནི་ཁམས་ལ་ཞུགས། །གཡོ་བ་འགོག་པར་བྱས་པ་ཡིས། །དེ་འདྲར་ཐམས་ཅད་མཐོང་བར་འགྱུར། །གང་མཐོང་བ་ནི་དེ་མཐོང་ཉིད། །གདོང་གིས་གདོང་ནི་བལྟ་བར་གྱིས། །མི་དང་མི་མོ་ལྷ་སོགས་ཀྱི། །གཟུགས་ནི་པདྨའི་འདབ་ཆུ་བཞིན། །སྲོག་ཆེན་པོ་དེར་ཤེས་བྱ་སྟེ། །ཤི་བའི་ལུས་ལས་ངེས་པར་འཐོན། །ༀ་གྱི་ཡི་གེ་ཡིད་ལ་བྱ། །དབུགས་རྒྱུ་བ་ཡིས་མཚོན་པར་བྱ། །བདག་ཉིད་ཀྱིས་ནི་ཧཱུྃ་ཡིག་སྤྲོ། །གསོར་བ་ཡི་ནི་རྣལ་འབྱོར་ལྡན། །སེམས་ལ་ༀ་གྱི་ཡི་གེར་འགྱུར། །ལུས་ལ་གནས་པར་མཚོན་པར་བྱ། །ཧཾ་ཡིག་མཆོག་གི་དང་པོ་ཡིས། །ཡེ་ཤེས་དངོས་པོ་རྣམས་སུ་སྤྲུལ། །ཆོས་ཀྱི་དབྱིངས་རྣམས་ཀྱི་དབུས་སུ། །རྣམ་སྣང་མཛད་ཀྱི་བསྒོམ་པའོ། །བདུད་རྩིའི་རྒྱུན་འཛག་པ་རྣམས་ཀྱིས། །སྔགས་པ་
ལ་ནི་འབར་བར་བྱ། །བྱེ་བ་སྟོང་ཕྲག་གྲངས་ཀྱི་ནི། །རྣལ་འབྱོར་མ་ལ་འདོད་སྤྱོད་འགྱུར། །འདོད་པ་རྣམས་ཀྱིས་མི་འཕོ་སྟེ། །འདོད་ན་བདེ་བ་རྣམ་པར་སྤྲོ། །དེ་ཚེ་རྣལ་འབྱོར་མ་མཉེས་ནས། །དངོས་གྲུབ་ཐམས་ཅད་སྟེར་བར་བྱེད། །སྡུག་དང་མི་སྡུག་རྣམ་དཔྱོད་པ། །རྣལ་འབྱོར་མ་ལ་མི་བྱའོ། །མྱུར་བར་སྟོང་ཕྲག་རྣམས་ཀྱི་གཟུགས། །རྣམ་པར་སྣང་མཛད་དུ་བསྒྲུབ་བྱ། །སྣ་ཚོགས་དུ་མའི་སྐད་ཀྱིས་ཆོས། །དེ་རྣམས་ལུས་རིས་ཅན་གྱིས་ཉན། །རྣམ་སྣང་མཛད་དང་མི་བསྐྱོད་དང་། །རིན་ཆེན་དབང་དང་ཨཱ་རོ་ལིཀ། །དོན་ཡོད་རྡོ་རྗེ་སེམས་དཔའ་དང་། །རྒྱུ་ཡི་རྡོ་རྗེ་འཆང་ལ་སོགས། །ཤེས་རབ་ཕ་རོལ་ཕྱིན་སོགས་ཀྱང་། །དེ་རྣམས་རྣལ་འབྱོར་མ་ལས་རིག །འགྲོ་དྲུག་གྲོལ་བར་བྱེད་ཉིད་དང་། །བདེ་འགྲོ་རྣམས་སུ་འཇུག་པ་པོ། །བློ་ལྡན་སོ་སོར་སེམས་ཅན་དོན། །གཉིས་མེད་དངོས་པོར་བྱེད་པར་འགྱུར། །མི་ཤེས་ཉོན་མོངས་གཞོམ་དོན་དུ། །ཚུལ་འདི་ཡང་ནི་བསྒོམ་པར་བྱ། །ཁམས་ཐམས་ཅད་ཀྱི་ཏིལ་མར་ནི། །དོགས་པ་མེད་པས་བྱ་བ་ཡིན། །རྣམ་སྣང་སྦྱོར་བས་བཏུང་བྱ་འམ། །བྱུག་པ་ཡང་དེ་ཉིད་ཀྱིས་བྱའོ། །དེ་ཡིས་སྣ་ནས་སྦྱིན་པར་བྱ། །རྡོ་རྗེའི་ལམ་དུ་རྟག་ཏུའོ། །རྡོ་རྗེ་འཆང་གི་གཟུགས་སུ་འགྱུར། །རྣལ་འབྱོར་མ་རྣམས་ཀྱི་ཡིད་འོང་། །གཉིས་པ་ཐམས་ཅད་ཀུན་སྦྱོར་ལས། །རྣལ་འབྱོར་མས་འདོད་ཐར་པ་སྩོལ། །བཅོམ་ལྡན་ཐམས་ཅད་དག་པའི་སྐུ། །རབ་གྲོལ་མཛད་པས་འདི་གསུངས་སོ། །ཞེས་བྱ་བ་ནི་རྣམ་པར་སྣང་མཛད་ཀྱི་ཆོ་ག་སྟེ་རབ་ཏུ་བྱེད་པ་ཉི་ཤུ་རྩ་གསུམ་པའོ།། །།དེ་ནས་གསང་ཆེན་བཤད་བྱ་སྟེ། །མདོར་བསྡུས་པ་ཡིས་རྒྱས་པར་མིན། །རྡོ་རྗེ་སེམས་དཔའི་རབ་སྦྱོར་བས། །གནས་ཐམས་ཅད་དུ་ཡང་དག་བཞུགས། །རྡོ་རྗེ་མི་ཕྱེད་ཡེ་ཤེས་ཏེ། །སེམས་དཔའ་སྙིང་པོ་སྟོན་པའོ། །སྟོང་ཉིད་སྙིང་རྗེ་དབྱེར་མེད་པ། །རྡོ་རྗེ་སེམས་དཔར་རབ་ཏུ་གྲགས། །ཟླ་བ་རྡོ་རྗེའི་རབ་སྦྱོར་བས། །གནས་རྣམས་བགྲོད་པ་བསྟན་པར་བྱ། །པུལླཱི་ར་ལས་ལྟེ་བར་འབབ། །ཛཱ་ལན་དྷ་རར་ཡང་དག་གནས། །ཨོ་ཌྱན་དུ་ནི་ཀུན་དུ་སྤྱོད་པ་འགྲུབ། །ཨར་བུ་དར་ནི་བཟའ་དང་བཏུང་ཅན་ནོ། །
གོ་དཱ་བ་རའི་གནས་སུ་རོལ་བ་སྟེ། །རཱ་མེ་ཤྭ་རིར་རྒྱལ་དང་ཕམ་པའོ། །དེ་བཱི་ཀོ་ཊིར་རྗེས་སུ་འཛིན་པ་སྟེ། །མཱ་ལ་ཝ་རུ་རྣལ་འབྱོར་མ་ཡི་གཙོ། །ཀཱ་མ་རཱུ་པར་ཚིག་ནི་འགྲུབ་པའོ། །ཨོ་ཌིར་མངོན་སུམ་དངོས་གྲུབ་སྟེར་བ་སྟེ། །ཏྲི་ཤ་ཀུ་ནར་དབང་པོ་རྣམས་ཀྱི་ནི། །མྱུར་དུ་དངོས་གྲུབ་རབ་ཏུ་འཇུག་པའོ། །ཀོ་ས་ལ་རུ་རྣལ་འབྱོར་དངོས་གྲུབ་སྟེ། །ཀ་ལིང་ཀ་རུ་ཕྲ་མོའི་དངོས་གྲུབ་སྐྱེ། །ལམ་པ་ཀ་རུ་རྟག་པར་འགྲུབ་པར་འགྱུར། །ཀཱཉྩི་རུ་ནི་བསད་པའི་དངོས་གྲུབ་བོ། །ཧི་མ་ལ་ཡར་མཐུན་པར་འགྲུབ་པ་སྟེ། །པྲེ་ཏ་པུ་རིར་རང་གི་ལྟ་བའོ། །གྲི་ཧ་དེ་བ་ཏཱར་ནི་བཀས་གནང་བ། །ལྷན་སྐྱེས་འཕོ་མེད་སོོ་རཱ་ཥྚ་རུ། །གསེར་གླིང་དུ་ནི་རང་གི་དོན་འགྲུབ་བོ། །ནཱ་ག་རར་ནི་གནས་ཀྱི་དངོས་གྲུབ་སྟེར། །སིན་དྷུ་ར་རུ་སྟོབས་འགྲུབ་དེ་བཞིན་དུ། །མ་རུལ་འཆི་བ་མེད་པའི་དངོས་གྲུབ་བོ། །ཀུ་ལུ་ཏར་ནི་རང་བཞིན་དངོས་གྲུབ་ཏུ། །དེ་ཉིད་རྣལ་འབྱོར་རྣམས་ལ་སྐྱེ་བའོ། །རྡོ་རྗེ་སེམས་དཔའ་རྟག་བསྒོམས་ནས། །ཐམས་ཅད་དངོས་གྲུབ་འགྲོ་བར་བྱོས། །གནས་སོགས་རྣལ་འབྱོར་མ་དབུས་སུ། །ཁམས་སུ་གྱུར་པའི་རོ་ཆེན་པོ། །གསང་བའི་ཚིག་ཏུ་ཤེས་པར་བྱ། །མཆོག་ནི་ལྷན་ཅིག་སྐྱེས་པར་དྲན། །དགྱེས་པ་ཡེ་ཤེས་ཤེས་བྱ་སྟེ། །ཐམས་ཅད་བདག་ཉིད་ཡོན་ཏན་གནས། །རྟག་བཞུགས་གཉིས་མེད་རྣམ་པ་སྟེ། །སེམས་ཅན་འཇིག་རྟེན་ལས་ལ་ནི། །རྣལ་འབྱོར་ལྡན་པ་རྣམས་ཀྱི་ཡང་། །རྡོ་རྗེ་སེམས་དཔའ་བདག་ཉིད་ཀྱིས། །ནཱ་དའི་དབུས་ལས་ཡང་དག་བྱུང་། །དེ་ཉིད་དུ་ནི་ཐིམ་ནས་འགྲོ། །གནས་པར་དེ་ནི་མངོན་པར་བརྗོད། །དེ་ལྟར་ཐམས་ཅད་ཆོ་ག་བཞིན། །དཔའ་བོ་མཆོག་རྣམས་ཀྱིས་ཤེས་བྱ། །དེ་ཉིད་ཉི་ཤུ་རྩ་བཞིའི་བདག །དེ་ནི་ནུས་པར་རབ་ཏུ་བཤད། །སྐྱེས་པ་དང་ནི་སྐྱེ་བཞིན་པའི། །ནུས་པ་ཐམས་ཅད་རབ་འཇུག་གིས། །དངོས་མེད་མ་ཡིན་པའི་གཟུགས་ཀྱིས། །དབྱངས་དང་ཕྱི་མོ་གསུམ་སྤངས་པ། །ཐིག་ལེའི་གཟུགས་ནི་སེམས་དཔའ་ཆེ། །རྡོ་རྗེ་སེམས་དཔར་རབ་ཏུ་གྲགས། །དཔའ་བོ་ཐམས་ཅད་མཉམ་སྦྱོར་ལས། །རྣལ་འབྱོར་མ་རྣམས་ཀུན་གྱི་གཙོ། །སྒྱུ་མའི་གནས་ཀྱི་དངོས་གྲུབ་ནི། །འཇུག་མཛད་བཅོམ་ལྡན་གྱིས་འདི་གསུངས། །ཞེས་བྱ་བ་ནི་གནས་ཐམས་ཅད་ཀྱི་བདག་ཉིད་ཅན་གྱི་རབ་ཏུ་བྱེད་པ་སྟེ་ཉི་ཤུ་
རྩ་བཞི་པའོ།། །།དེ་ལྟར་དཔའ་བོ་གཙོ་བོ་ཡི། །ལས་ཀྱི་ཚོགས་རྣམས་ཤེས་པར་བྱ། །ཉི་ཤུ་བཞི་བདག་ཉིད་ཉམས་དགའ། །ཐམས་ཅད་གསང་ཆེན་གྱིས་གནས་སུ། །གསང་ཆེན་རྒྱས་པར་བཤད་པ་ཅན། །ཀུན་སྤྱོད་ཆོ་ག་བཤད་པར་བྱ། །སྔོན་བཤད་ཁམས་ཀྱི་འདུ་ཤེས་ནི། །གསུམ་གསུམ་དུ་ནི་བཤད་པ་ཡིན། །ཉི་ཤུ་རྩ་བཞི་གསུམ་རྣམས་ཅན། །དེ་རྣམས་བརྒྱད་བརྒྱད་ཤེས་པར་བྱ། །དཔའ་བོ་ཉི་ཤུ་བཞི་རྣམས་ཀྱི། །རེ་རེའི་ཉི་ཤུ་རྩ་བཞི་སྟེ། །ཟླུམ་པའི་རྣམ་པའི་རྣལ་འབྱོར་དུ། །ཐིག་ལེ་ཉིད་ནི་གཞག་པར་བྱ། །དེ་རྣམས་དཀྱིལ་འཁོར་ཕྱི་རོལ་དུ། །བསྐོར་བས་ཏིང་འཛིན་རྡོ་རྗེར་འགྱུར། །ཤར་ལ་སོགས་པ་རིམ་བཞིན་དུ། །རྡོ་རྗེ་འཁོར་ལོ་སོགས་པར་འཕྲོ། །དཀྱིལ་འཁོར་དུ་ནི་ལྷ་ཐམས་ཅད། །རྣལ་འབྱོར་མ་ཀུན་ཤེས་པར་བྱ། །བདུན་ཅུ་དྲུག་ལྷག་པའི་ལྔ་བརྒྱ། །ཉིན་ཞག་རྣམས་སུ་ཡོངས་འཕོ་བྱ། །རེ་རེ་ཡི་ནི་སྲོག་འགྱུར་བ། །སུམ་ཅུ་རྩ་བདུན་ཕྱེད་བཅས་པའོ། །ཉི་ཁྲི་བརྒྱ་ཕྲག་བཅུ་དྲུག་ནི། །ཉིན་ཞག་ལ་ནི་ཤེས་པར་བྱ། །ལུས་ཅན་ཀུན་གྱི་རང་བསམ་པ། །དེ་རྣམས་ཀྱི་དུས་རབ་ཏུ་འཇུག །རྣལ་འབྱོར་དེ་དངོས་བསྒོམ་རྣམས་ལ། །སངས་རྒྱས་བསམ་པ་རབ་ཏུ་བསྐོར། །འདི་རྣམས་ཀུན་ཉིད་དཔའ་བོ་རྣམས། །གནས་སོགས་ཉི་ཤུ་བཞི་ཅན་ལ། །ཐིམ་དང་ལོངས་སྤྱོད་བདག་བྱེད་པས། །དུས་དང་དུས་ཚོད་ཟ་བར་བྱེད། །འདི་ལྟའི་ཆོ་གའི་བྱ་བ་ཡིས། །ཀུན་དུ་གནས་པ་བདག་མ་ཡིན། །རྣལ་འབྱོར་མ་ཚོགས་དང་དཔའ་བོ། །དེ་ནི་བདག་དང་བདག་གི་རིམ་བཞིན་ནོ། །སངས་རྒྱས་འཇིག་རྟེན་ཐམས་ཅད་དུ། །བདག་དང་བདག་གི་སྤྱོད་ཡུལ་མེད། །ཡིད་ཆེས་ཙམ་དུ་མྱང་འདས་པ། །གཞུང་སྨྲ་བ་ལ་བསྟན་པའོ། །དེ་ཁོ་ན་ཉིད་མ་རིག་པ་ཡིས་འཇིག་རྟེན་རྨོངས། །དེ་ཁོ་ན་ཉིད་རྣམ་པར་སྤངས་པས་དངོས་གྲུབ་མིན། །རྣལ་འབྱོར་རྣམས་ལ་རྒྱུད་རྒྱལ་དུ། །དེ་དང་དེ་ཡི་མཆོག་ཡེ་ཤེས། །འོད་གསལ་སྒྱུ་མ་བདག་གིས་ནི། །སྒྱུ་མའི་འཇིག་རྟེན་ལ་བཤད་དོ། །ཀྱེ་ལྷན་ཅིག་སྐྱེས་པའི་རང་བཞིན་གཅིག་པུར་བསྟན། །ལྷ་དང་ལྷ་མིན་ས་གསུམ་འཇོམས་ལ་འདུད། །དབང་པོ་དང་ནི་འཇིག་རྟེན་པ་ཡིས་མི་ཤེས་ཏེ། །མཆོག་ཏུ་བདེ་བ་ཆེན་པོའི་གླུ་ཡིས་མཆོད་པར་གྱིས། །ལས་ཐམས་ཅད་པའི་གཟུགས་སུ་བསྒོམ་པར་བྱོས། །སྲིད་དང་མྱ་ངན་འདས་པར་
སྟོན་པ་ཅི། །སྒྱུ་མ་གཏི་མུག་གིས་ནི་རི་མོར་གནས། །སེམས་ཅན་ཐེག་པ་ད་དུང་ཉམས་བྱེད་ཅི། །དེ་ལྟར་ཡོངས་སུ་དགྱེས་པའི་མགུར། །བཅོམ་ལྡན་རང་ཉིད་ཀྱིས་གསུངས་སོ། །དེ་ཉིད་དཀྱིལ་འཁོར་རྣམས་དང་ནི། །བྱང་ཆུབ་དུས་སུ་བླང་བར་གྱིས། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །འདི་ནི་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་དེ་ཁོ་ན་ཉིད་ཉི་ཤུ་རྩ་ལྔའི་བདག་ཉིད་རྒྱུད་ཐམས་ཅད་ཀྱི་དོན་སྟོན་པ་པོ་གསང་ཆེན་ཐམས་ཅད་པ་ཞེས་བྱ་བའི་ལེའུ་སྟེ་ལྔ་བཅུ་པའོ།། །།དེ་ནས་རྣལ་འབྱོར་མ་དཔའ་བོ། །རྣམ་པ་དུ་མའི་འཁོར་གྱིས་ཀྱང་། །རྡོ་རྗེ་མཁའ་འགྲོ་ཁྱབ་པའི་བདག །བཅོམ་ལྡན་བདག་པོ་ལ་བསྟོད་པ། །ཁྱོད་ནི་འདོད་ཆགས་ཆེན་པོའི་ཚུལ། །དངོས་དང་དངོས་མེད་རང་བཞིན་ཅན། །དག་པའི་རང་བཞིན་གྱི་ནི་གཟུགས། །ཆོས་རྣམས་བསྟན་པས་ཚིམ་པར་འགྱུར། །ཆོས་དང་ཆོས་མིན་པ་ཡི་གཟུགས། །ཆོས་དང་ཆོས་པ་ཁྱོད་གཉིས་མེད། །བདག་གིས་སྤྲུལ་པའི་དངོས་པོ་ཡིས། །འཇིག་རྟེན་ཀུན་གྱིའང་དོན་ཅན་ཏེ། །བདག་ཉིད་ཆེན་པོ་སྟེར་བ་པོ། །སངས་རྒྱས་འཇིག་རྟེན་འཇུག་བྱེད་པ། །ཁྱོད་ཀྱིས་དམ་ཚིག་བསྟན་པ་སྟེ། །གཞན་མིན་དམ་ཚིག་ཉིད་ལས་བྱུང་། །བདག་གིས་བསོད་ནམས་རྗེས་བསྒོམས་པས། །བྱང་ཆུབ་མཆོག་ཏུ་ཡིད་བསྒྲུབས་སོ། །སྟོན་པ་མཆོག་ཏུ་བདེ་ལ་བཞུགས། །དེ་ཡིས་སེམས་ཅན་དོན་མཛད་པའོ། །ཧཱུྃ་གི་ཡི་གེའི་སྒྲ་སྒྲོགས་པས། །ང་རྒྱལ་ཅན་གྱི་བགེགས་སྐྲག་འགྱུར། །ཁྱོད་ཀྱིས་ཉེ་བར་བསྟེན་པས་ནི། །དེ་རྣམས་ལ་ནི་སྐྱེ་འཆི་མེད། །བདེ་བའི་རྒྱལ་པོ་ཉིད་དུ་རྩེན། །བྱང་ཆུབ་ཀྱི་ནི་ཡིད་དུ་བགྲོད། །ཁྱོད་དང་ཐབས་ཅིག་འདྲེས་པར་འགྱུར། །གོང་བུ་གཅིག་པུ་གཉིས་མེད་བཞུགས། །དེ་ལྟར་བསྟོད་པས་རྡོ་རྗེ་ཆེ། །མཆོད་པ་བཞི་ནི་རབ་སྟོན་མཛད། །དཀྱིལ་འཁོར་བདག་དང་གཉིས་མེད་ཉིད། །མཆོད་པ་རྣམས་ནི་གཉིས་མེད་བྱེད། །ཕྱི་དང་ནང་བདག་ཉིད་ཅན་རྫས། །གཉིས་པ་ཡི་ནི་མཆོད་པར་དྲན། །བཟའ་དང་བཏུང་སོགས་ལ་རོལ་པ། །གཉིས་མེད་མཆོད་པ་གསུམ་པའོ། །བཞི་པ་ཆོས་དང་རྣལ་འབྱོར་དག །འཛིན་པ་ཡི་ནི་མཆོད་པའོ། །དེ་ལྟའི་མཆོད་པ་ལ་བརྟེན་ནས། །ཐམས་ཅད་བྱས་པས་ལས་རྒྱལ་
པོར། །འགྱུར་རོ་རྡོ་རྗེ་མཁའ་འགྲོ་ནི། །གྲུ་གསུམ་དུ་ནི་མཉེས་བྱ་སྟེ། །སྔོན་དུ་དཀྱིལ་འཁོར་བྱས་ནས་ནི། །ལག་པ་གཡོན་པས་ཐམས་ཅད་དུ། །པདྨ་ཡི་ནི་བསྐོར་ནས་སྣོད། །སྔགས་པ་རྣམས་ཀྱིས་གཟུང་བར་བྱ། །སྔོན་དུ་རྣལ་འབྱོར་མ་ལ་ནི། །སྐྲ་གྲོལ་བ་ཡིས་གཏོར་མ་སྦྱིན། །རྣལ་འབྱོར་མ་ཀུན་ཆུ་སྐྱེས་ནི། །ཁ་ཡིས་བཟུང་ནས་དཀྲུག་པར་བྱ། །དེ་ཡི་ལག་པར་སོན་པའི་དཔལ། །གང་སུ་ཡིས་ཀྱང་དབྲོག་མི་ནུས། །ཇི་ལྟར་བདེ་བས་བདེ་བ་གཟུང་། །རྫོགས་པའི་སངས་རྒྱས་མཆོག་མཉེས་བྱ། །རྟག་ཏུ་དམ་ཚིག་བསྐྱང་བར་བྱ། །སྤུན་གྱི་སྤྱོད་པའང་བསྟེན་པར་བྱ། །སྙིང་རྗེའི་མཆོག་དབང་གྱུར་བྱ་ཞིང་། །དབང་པོ་རྣམས་ནི་མི་རྟག་པར། །བསྒོམ་བྱ་སྣང་བ་མེད་པ་ཡི། །རང་བཞིན་དབང་དུ་གྱུར་པར་གནས། །རྡོ་རྗེ་པདྨ་སྙོམས་འཇུག་པས། །ཕྱག་རྒྱ་ནང་གི་བདག་ཉིད་མཆོག །སྟོང་ཉིད་གཉིས་མེད་རྣལ་འབྱོར་པས། །དངོས་པོ་ཐམས་ཅད་སྤང་བར་བྱ། །དོན་དམ་ཅན་དེ་ཉིད་འདིར་བྱ། །རྟག་ཏུ་བྱང་ཆུབ་སེམས་དྲན་བྱ། །མན་ངག་གཅིག་ནི་བསྒོམས་པ་ཡིས། །མན་ངག་ཐམས་ཅད་མཚོན་པར་བྱ། །ཇི་ལྟར་ས་གཅིག་ཐོབ་པ་ཡིས། །ས་ཐམས་ཅད་ནི་འཐོབ་པར་འགྱུར། །དེ་བཞིན་མན་ངག་ཐམས་ཅད་ཀྱང་། །མན་ངག་གཅིག་གིས་འཐོབ་པར་འགྱུར། །བྱིས་པ་རྣམས་དང་རྒན་པོ་དང་། །རྣལ་འབྱོར་མ་རྣམས་ཐམས་ཅད་དུ། །མཉམ་པའི་མཆོད་པའི་ཆོ་ག་ཡིས། །མཁས་པ་ཡིས་ནི་བྱ་བ་ཡིན། །མི་མཉམ་པ་ཡིས་དངོས་གྲུབ་འཇོམས། །དམྱལ་བ་སོགས་པར་ལྟུང་བར་འགྱུར། །རྒན་པོ་ཡོན་ཏན་ཀུན་གནས་པ། །དེ་རྣམས་མཉེས་པས་བྱང་ཆུབ་སྟེར། །ཁྱད་པར་མཆོད་པ་ཉིད་ནི་འདིར། །བྱིས་པ་རྣམས་དང་དེ་བཞིན་ཡང་། །གཉིས་བཅས་རྣལ་འབྱོར་པ་རྣམས་ཀྱིས། །མེ་ཏོག་བསྐོར་བ་ལ་སོགས་བྱ། །ཀུན་དུ་སྨོད་པའི་ངག་མི་བྱ། །འདོད་དང་འདོད་མིན་སྦྱོར་བྲལ་བྱ། །མ་བྱིན་པར་ཡང་བླང་བྱ་ཞིང་། །རྟག་ཏུ་སྲོག་ཆགས་གསད་པར་བྱ། །སེམས་ཅན་རྣམས་ལ་བརྫུན་སྨྲ་ཞིང་། །མ་སོགས་རྣལ་འབྱོར་མ་ལ་བགྲོད། །འཁོར་ལོ་མཆོད་པ་རྒྱུན་དུ་བྱ། །བཟའ་བྱ་ལྔ་ལ་སོགས་པ་སྦྱིན། །དེ་ཡི་བསོད་ནམས་ཀྱིས་འཐོབ་པ། །དུས་ཐམས་ཅད་དུ་བགེགས་མེད་དང་། །གྲུབ་པའི་རྣལ་འབྱོར་མ་མཐོང་བས། །བསམ་པ་གཞན་ནི་རབ་ཏུ་འཇུག །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་
པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་བསྟོད་པ་དང་མཆོད་པ་བཞི་ལ་སོགས་པ་གཉིས་སུ་མེད་པའི་དམ་ཚིག་བསྟན་པའི་ལེའུ་ཞེས་བྱ་བ་སྟེ་ལྔ་བཅུ་རྩ་གཅིག་པའོ།། །།རྒྱུད་འདི་རབ་ཏུ་བྱུང་བ་ནི། །མ་བྱུང་འབྱུང་བར་མི་འགྱུར་རོ། །མཚན་ཉིད་ཐམས་ཅད་ཡོངས་སུ་རྫོགས། །མཚན་ཉིད་མེད་པ་ཐམས་ཅད་སྤངས། །སུམ་ཅུ་བདུན་བདག་ཉིད་རྣལ་འབྱོར། །གཉིས་མེད་མཁའ་འགྲོ་རྒྱ་མཚོ་དང་། །གཉིས་མེད་རྩ་རྒྱུད་རྒྱུད་ཆེན་པོ། །འདུས་པའི་རྣམ་པའི་གཟུགས་ཅན་ཏེ། །སངས་རྒྱས་བྱང་ཆུབ་སེམས་རྣམས་ཀྱི། །དུས་ཐམས་ཅད་དུ་ཞལ་ན་གནས། །ཡི་གེ་ཀུན་གྱི་ཟ་མ་ཏོག །འབུམ་ཕྲག་སུམ་ཅུ་དྲུག་དང་པོ། །མཁའ་འགྲོ་རྒྱ་མཚོ་རབ་བཤད་དེ། །ཆེན་པོ་ཆུང་ངུར་གསུངས་པའོ། །རི་རབ་ཀྱི་ནི་རྡུལ་ཚད་ཀྱི། །མཁའ་འགྲོ་ཐམས་ཅད་ཀྱིས་གསུངས་སོ། །མཐའ་ཡས་ཤིང་ནི་མུ་མེད་ཉིད། །རྩོད་པའི་དུས་ཀྱི་སའི་ནང་དུ། །བཅོམ་ལྡན་མཐའ་ཡས་པས་འདི་གསུངས། །ཤཱཀྱ་སེང་གེས་གསུངས་པའི་རྒྱུད། །རྣལ་འབྱོར་ཕ་རོལ་སོན་པའོ། །ཉན་པ་སྟོན་པ་རང་ཉིད་དེ། །འཆད་པོ་སྐྱེ་བོ་གཞན་ཀྱང་ངོ་། །ལེགས་པར་གསུངས་དང་འཆད་འགྱུར་བ། །དེའི་རང་བཞིན་དུའང་བགྲོད་པར་འགྱུར། །བསྡུ་བ་མཛད་པ་སོགས་རྣམས་ཀྱིས། །བདག་ལས་བགྲོད་པ་དེ་ཐོབ་བོ། །མ་མོ་ཐམས་ཅད་འདུས་རྣམས་ཀྱིས། །རྡོ་རྗེའི་གནས་རྣམས་སུ་བསྡུས་སོ། །གཅིག་ལ་གཅིག་གིས་བཞེད་པ་ནི། །གསོལ་བ་འདེབས་ཤིང་གསོལ་འདེབས་མཛད། །བཅོམ་ལྡན་འདས་ཀྱིས་གསུངས་པ་ཡི། །ཚིག་འདི་ལ་ནི་མངོན་པར་དགའ། །སྡིག་པ་རྣམས་ལས་གྲོལ་བར་འགྲོ། །སྲིད་པ་ལས་ནི་འགྲོ་བར་བྱོས། །དཔའ་བོ་ཐམས་ཅད་མཉམ་སྦྱོར་ལས། །རྡོ་རྗེ་སེམས་དཔའ་བདེ་བའི་མཆོག །རྡོ་རྗེ་མཁའ་འགྲོ་དེ་བཞིན་གཤེགས། །བཅོམ་ལྡན་བདག་པོས་འདི་གསུངས་སོ། །དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས་རྒྱ་མཚོ་དྲུག་ལ་སོགས་པ་ལ་རྣལ་འབྱོར་དང་ཡེ་ཤེས་དང་སྡོམ་པ་དང་བྱ་བ་དང་དེ་ཁོ་ན་ཉིད་རྒྱ་མཚོར་གྱུར་པ་དང་མཁའ་འགྲོ་རྒྱ་མཚོ་
ལས་འདི་རྣམས་དང་མི་མཉམ་པའི་རྒྱུད་ཀྱི་རྒྱལ་པོ་ཆེན་པོ་ཞེས་བྱ་བ་རྫོགས་སོ།། །།དཔལ་བལ་ཡུལ་གྲུབ་པའི་གནས་མཆོག་ཆེན་པོ་ཡུ་ཏུང་ལྷུན་གྱིས་གྲུབ་པའི་གཙུག་ལག་ཁང་ཆེན་པོར་རྒྱ་གར་གྱི་པཎྜི་ཏ་ཆེན་པོ་རྡོ་རྗེ་སློབ་དཔོན་རྟོག་གེ་པ་རྣམས་ཀྱི་གཙུག་གི་ནོར་བུ་དུས་དེང་སང་འགྲན་ཟླ་མེད་པ། སྙིང་རྗེ་ཆེན་པོས་ཐུགས་བརླན་པའི་ངང་ཚུལ་ཅན། ཕྱོགས་སྣ་ཚོགས་ནས་འདུས་པའི་སྐྱེ་འགྲོ་རྣམས་ལ་ཆོས་དང་ཟང་ཟིང་གི་ཆར་གྱིས་ཚིམ་པར་མཛད་པ། དཔལ་རྡོ་རྗེ་ཕག་མོའི་ཞབས་ཀྱི་ཆུ་སྐྱེས་ཀྱི་རྡུལ་ལ་རེག་པ་ཤཱཀྱའི་སྲས་པོ་རྒྱལ་བའི་སྡེའི་ཞལ་སྔ་ནས་དང་། བོད་ཀྱི་ལོ་ཙྪ་བ་ཤཱཀྱའི་དགེ་སློང་དྷརྨ་ཡོན་ཏན་གྱིས་མཉན་ཅིང་བསྒྱུར་བའོ།། །།ཕྱིས་གང་ཟག་ཆོས་ཀྱི་སྤྱན་ཅན་དཔལ་མཆོག་དང་པོའི་རྡོ་རྗེའི་བཀའི་ཚུལ་དང་ཡང་བསྟུན་ཏེ་ཞུ་གཏུགས་ལེགས་པར་བྱས་སོ། །མཁའ་མཉམ་བདེ་རྫོགས་སྣ་ཚོགས་སྤྲུལ་པ་སངས་རྒྱས་རྣམས་ཀྱི་སྐུ། །དེས་གསུངས་དྲི་མེད་སྣ་ཚོགས་གདུལ་བྱའི་བསམ་དབང་གིས། །གསུང་གཅིག་གིས་ཀྱང་སྣ་ཚོགས་དོན་མང་སྟོན་པས་དཔྱད་པ་དཀའ། །དེ་ལྟར་ཡིན་ཡང་ཇི་ལྟར་མི་བདག་ཤིང་རྟ་ཆེར་ཞུགས་ནས། །གཡུལ་ངོར་འཇུག་དུས་རྐང་གིས་བགྲོད་རྣམས་འཐབ་པར་མི་བརྩོན་ནམ། །དེ་བཞིན་སྔོན་གྱི་མཁས་པ་ཆེན་པོ་རྣམས་ཀྱི་རྗེས་འབྲངས་པས། །ཁོ་བོས་གཞན་དོན་ནུས་པ་མིན་ནའང་ཕན་པའི་བསམ་པས་བསྒྱུར། །འདི་ལ་གཞུང་དང་བླ་མའི་མ་ཡིན་རང་གི་བློ་གྲོས་སྐྱོན་གྱིས་ནི། །སྒྲ་དོན་འགལ་བར་གྱུར་པ་བཅོམ་ལྡན་དཔའ་བོ་རྣལ་འབྱོར་མ་རྣམས་དང་། །མཁའ་འགྲོའི་ཚོགས་དང་བསྟན་དགའི་ལྷ་རྣམས་མཁས་པ་རྣམས་ཀྱིས་བཟོད་པར་རིགས། །འདི་ལས་ཐོབ་པའི་དགེ་བ་དྲི་མེད་ཅུང་ཟད་དེས། །འགྲོ་ཀུན་རྡོ་རྗེ་འཆང་གི་གོ་འཕང་ཐོབ་གྱུར་ཅིག །བདག་གིས་སྲོལ་བཏོད་ཙམ་འདི་ལ། །སྒྲ་དོན་འཇུག་པ་མཁྱེན་རྣམས་ཀྱི། །སྐད་གཉིས་སྨྲ་བས་གཟིགས་པ་ན། །སྐྱོན་དུ་གྱུར་སྣང་བཅོས་པར་ཞུ། །ཕྲག་དོག་སྒོ་ནས་མི་འཕྱ་ཞིང་། །རྗེས་སུ་ཡི་རང་བ་ཡང་མཛོད། །རྫོགས་སོ།། །།