དཔལ་ཡེ་ཤེས་བསམ་པའི་རྒྱུད་ཀྱི་རྒྱལ་པོ།
རྒྱ་གར་སྐད་དུ། ཤྲཱི་ཛྙཱ་ན་ཨཱ་ཤ་ཡ་ཏནྟྲ་རཱ་ཛ། བོད་སྐད་དུ། དཔལ་ཡེ་ཤེས་བསམ་པའི་རྒྱུད་ཀྱི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དཔའ་བོ་དང་མཁའ་འགྲོ་མའི་འཁོར་གྲངས་མེད་པ་དང་། ཡེ་ཤེས་གསང་བའི་གནས་ན་ཐབས་ཅིག་ཏུ་བཞུགས་པའི་དུས་སུ་དཔའ་བོ་ཡེ་ཤེས་མཁའ་འགྲོ་ཞེས་བྱ་བས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ། ཐལ་མོ་སྦྱར་ནས་གསོལ་པ། བཅོམ་ལྡན་ཡེ་ཤེས་མངའ་བདག་ཆེ། །ཡེ་ཤེས་ཀྱི་ནི་རང་བཞིན་དང་། །ཡེ་ཤེས་སྐྱེ་གནས་གང་དང་གང་། །རྒྱལ་པོ་ཇི་ལྟར་ལགས་པ་དང་། །གང་ལ་དབང་བྱེད་གང་གིས་འདུལ། །དེ་ཉིད་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །དཔའ་བོ་ཡེ་ཤེས་མཁའ་འགྲོ་ཉོན། །ཡེ་ཤེས་ཞེས་བྱ་རྣམ་པ་ལྔ། །དེ་ཉིད་དོན་ལ་ཤེས་པ་དང་། །ལོག་རྟོག་ཤེས་པས་མ་བསྒྲིབས་ཕྱིར། །སྤྱི་བོའི་ཡེ་ཤེས་བཤད་པའོ། །མེ་ལོང་ཡེ་ཤེས་མཉམ་ཉིད་དང་། །སོ་སོར་རྟོག་དང་བྱ་ནན་ཏན། །ཆོས་དབྱིངས་ཡེ་ཤེས་ལྔ་པའོ། །དེ་ལ་མེ་ལོང་ཡེ་ཤེས་ནི། །དཔེར་ན་གཡའ་དག་མེ་ལོང་ལ། །གཟུགས་བརྙན་གསལ་བར་སྣང་བ་བཞིན། །དེ་བཞིན་སེམས་ཀྱི་མེ་ལོང་ལ། །ཉོན་མོངས་གཡའ་ནི་དག་བྱས་ན། །ཆོས་རྣམས་གཟུགས་བརྙན་སྒྱུ་མར་མཐོང་། །སེམས་ཀྱི་མེ་ལོང་གང་ཡིན་ལ། །སྒྱུ་མ་ཙམ་དུ་སྣང་བ་དེ། །ཐ་དད་མི་ཕྱེད་མཉམ་ཡེ་ཤེས། །མཉམ་ཉིད་ཡེ་ཤེས་གང་ཡིན་པ། །ཀུན་རྫོབ་སྒྱུ་མ་ཙམ་དེ་ནི། །ལས་དང་མཚན་ཉིད་མ་འདྲེས་པ། །དེ་ཉིད་སོ་སོར་རྟོག་ཡེ་ཤེས། །དེ་ཉིད་ནན་ཏན་སྒྲུབ་བྱེད་དེ། །དེ་ཉིད་དོན་གྲུབ་ཡེ་ཤེས་ཏེ། །ཐམས་ཅད་ཆོས་དབྱིངས་གཞན་མིན་ཏེ། །དེ་ཕྱིར་ཆོས་དབྱིངས་ཡེ་ཤེས་ཡིན། །ཡེ་ཤེས་སྐྱེ་གནས་གང་ཡིན་པ། །ཁ་སྦྱོར་དབུས་ཀྱི་རྩ་བརྒྱད་དོ། །དབྱིངས་དང་ཡེ་ཤེས་གཉིས་མེད་ཚུལ། །ཤར་དང་ལྷོ་དང་ནུབ་དང་བྱང་། །ཡེ་ཤེས་བཞི་པོ་སྐྱེ་བའི་གནས། །དེ་དག་ཀུན་འདུས་ལྟེ་བ་ནི། །ཆོས་དབྱིངས་ཡེ་ཤེས་སྐྱེ་བའི་གནས། །མེ་ལོང་ཡེ་ཤེས་མཉམ་ཉིད་དང་། །སོ་སོར་རྟོག་དང་བྱ་བ་གྲུབ། །ཆོས་དབྱིངས་ཡེ་ཤེས་ལ་སོགས་པ། །བདག་
པོ་བྱེད་པའི་ཕྱིར་དང་ནི། །ཞེ་སྡང་དང་ནི་ང་རྒྱལ་དང་། །འདོད་ཆགས་དང་ནི་ཕྲག་དོག་དང་། །དེ་བཞིན་གཏི་མུག་ལ་སོགས་པའི། །ཉོན་མོངས་ཐམས་ཅད་འཇོམས་པའི་ཕྱིར། །རྒྱལ་པོ་ཞེས་ནི་བསྟན་པ་ཡིན། །ཡེ་ཤེས་མཁའ་འགྲོས་ཡང་གསོལ་པ། །བྱང་ཆུབ་སེམས་ནི་ཇི་ལྟར་ལགས། །དེ་ཉིད་དབྱེ་བ་གང་ལགས་དང་། །དེ་ཡི་གནས་དང་གཟུང་བའི་གནས། །ངེས་པར་བཟློག་པའི་ཚུལ་ཉིད་དང་། །དེ་ཉིད་ཀྱི་ནི་འབྲས་བུ་དང་། །རྟགས་དང་ཡོན་ཏན་གང་ལགས་པ། །དེ་ཉིད་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །བྱང་ཆུབ་སེམས་ནི་རང་རིག་སྟེ། །དབྱེ་བའི་དོན་ནི་གཉིས་སུ་བསྟན། །དེ་ཡི་གནས་ནི་རྩ་ཡིན་ཏེ། །གཟུང་བ་རིག་པའི་འཁོར་ལོར་ཏེ། །ངེས་པར་བཟློག་པའི་ཐབས་དག་ནི། །གོ་བཟློག་པ་ཡི་ཚུལ་ཡིན་ནོ། །དེ་ཉིད་འབྲས་བུ་གཉིས་མེད་རྟོགས། །རྟགས་ནི་ལུས་ལ་ཁྲག་བྱུང་དང་། །བ་སྤུ་ལངས་དང་འདར་བ་དང་། །ཁ་ཟས་དད་ཆུང་ལུས་ཡང་དང་། །སྐྲ་དཀར་གཉེར་མ་དེངས་པ་དང་། །ལེ་ལོ་མེད་དང་བརྩོན་འགྲུས་ལྡན། །དེ་ལ་སོགས་པའི་རྟགས་རྣམས་འགྲུབ། །དེ་ནས་ཡོན་ཏན་བཤད་པ་ནི། །རྐང་མགྱོགས་སྟེང་ས་འོག་གི། །འཇིག་རྟེན་དངོས་གྲུབ་གང་ཡིན་དང་། །འཇིག་རྟེན་ལས་འདས་ཐོབ་པར་འགྱུར། །གཉིས་མེད་བྱང་ཆུབ་སེམས་ཀྱི་གནས། །རང་རིག་འོད་གསལ་དེ་ཉིད་དོ། །ཡེ་ཤེས་རང་བཞིན་གནས་ཡིན་ཏེ། །རྟགས་ནི་འོད་གསལ་དེ་ཉིད་དོ། །འབྲས་བུ་ཆོས་སྐུ་འཆང་ཆེན་པོའི། །ས་ནི་ངེས་པར་ཐོབ་པའོ། །རྣལ་འབྱོར་སེམས་གཟུང་བསྒོམ་པ་བརྟག །ལུས་སེམས་ཚགས་སུ་བཅུག་ནས་ནི། །རང་གི་སེམས་ཀྱི་དེ་ཉིད་ལ། །དེ་ཉིད་དབྱེར་མེད་བསྒོམ་པར་བྱ། །དེ་ཡིས་ཐོབ་མེད་འབྲས་བུ་ཐོབ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཡེ་ཤེས་མཁའ་འགྲོ་ལ་སོགས་པའི་འཁོར་ཐམས་ཅད་རྗེས་སུ་ཡི་རངས་ནས་དེ་ཁོ་ན་ཉིད་བླ་ན་མེད་པའི་མཆོད་པས་མཆོད་དེ་མི་སྣང་བར་གྱུར་ཏོ། །དཔལ་འཁོར་ལོ་སྡོམ་པ་ཡེ་ཤེས་བསམ་པའི་རྒྱུད་ཀྱི་རྒྱལ་པོ་རྫོགས་སོ།། །།པཎྜི་ཏ་ག་ཡ་དྷ་ར་དང་། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། །།