དཔལ་མཁའ་འགྲོ་མ་གསང་བ་འབར་བའི་རྒྱུད་ཀྱི་རྒྱལ་པོ།
རྒྱ་གར་སྐད་དུ། ཤྲཱི་ཌཱ་ཀི་ནཱི་གུ་ཧྱ་ཛྭ་ལ་ཏནྟྲ་རཱ་ཛ། བོད་སྐད་དུ། དཔལ་མཁའ་འགྲོ་མ་གསང་བ་འབར་བའི་རྒྱུད་ཀྱི་རྒྱལ་པོ། དཔལ་བདེ་བ་ཆེན་པོ་ལ་ཕྱག་འཚལ་ལོ། །ཀྱེ་ཨ་ལ་ལ་ཧོ། ཀྱེ་ཨ་ལ་ལ་ཧོ། མཁའ་འགྲོ་གང་ལགས་མ་གང་ལགས། །གསང་དང་རྒྱུད་དང་རྒྱལ་པོ་གང་། །ཉོན་ཅིག་བྱང་ཆུབ་སེམས་དཔའ་ཁྱོད། །མཁའ་འགྲོ་བཞི་སྟེ་མ་ནི་གསུམ། །གསང་བ་དྲུག་སྟེ་རྒྱུད་བརྒྱད་དོ། །རྒྱལ་པོ་བཅུ་དགུ་དག་ཏུ་བསྟན། །དང་པོ་མཁའ་འགྲོ་དབྱེ་
བ་ཡང་། །རགས་པའི་རྟོག་པ་སྤང་བའི་ཕྱིར། །བུམ་པའི་དབང་དང་འབྲེལ་པ་ཡི། །སྐུ་མདོག་ཕྱག་མཚན་དང་པོའོ། །སྐུ་མདོག་ཕྱག་མཚན་སྤང་བའི་ཕྱིར། །གསང་བའི་དབང་དང་འབྲེལ་པ་ཡི། །རླུང་དང་རྩ་སོགས་ཙཎྜཱ་ལཱི། །འདི་དག་མཁའ་འགྲོ་གཉིས་པ་སྟེ། །དམན་པ་རྣམས་ལ་སྐུ་དང་ཕྱག །རླུང་དང་རྩ་སོགས་ཁ་དོག་དབྱིབས། །དེ་ཉིད་སྤང་བར་བྱ་བའི་ཕྱིར། །ཤེས་རབ་ཡེ་ཤེས་དང་འབྲེལ་པའི། །ལྷན་ཅིག་སྐྱེས་པ་དགའ་བའི་རོ། །འདི་དག་གསང་བའི་མཁའ་འགྲོ་སྟེ། །མཁའ་འགྲོ་འདི་རྣམས་རིམ་པ་ལས། །དམན་པ་རྣམས་ལ་ཕྲ་བའི་གཟུགས། །ལུས་སེམས་ཚོར་བ་བདེ་བ་ལས། །འདས་པའི་བདེ་བ་ཆེན་པོ་དག །སྤང་ཕྱིར་རང་རིག་ཡེ་ཤེས་ཏེ། །སེམས་ཀྱི་དེ་ཉིད་སྟོང་བའི་རོ། །དེ་ཉིད་མཁའ་འགྲོ་བཞི་པ་སྟེ། །ཤེས་བརྗོད་ཀུན་གྱི་ཡུལ་མ་ཡིན། །དེ་ཉིད་ལྔ་ལ་སོགས་པ་ཡི། །མཁའ་འགྲོ་འདི་རྣམས་རིམ་པ་ཡང་། །སྐུ་མདོག་ཕྱག་མཚན་རགས་པའི་གཉེན། །རླུང་དང་རྩ་སོགས་བུམ་དབང་སྤོང་། །བདེ་བས་རླུང་དང་རྩ་སོགས་སྤོང་། །རང་རིག་སྟོང་པས་བདེ་བ་སྤོང་། །གཟུགས་སྐུ་གཉིས་ཀྱིས་སྟོང་པ་སྤོང་། །དེ་ཕྱིར་གོང་མ་གཉེན་པོར་བཤད། །རགས་པ་ཕུང་སོགས་བུམ་དབང་རྒྱུ། བུམ་དབང་གསང་དབང་རྒྱུ་ཡིན་ཏེ། །གསང་བ་གསུམ་པའི་རྒྱུ་རུ་ངེས། །བདེ་བ་རང་རིག་སྐྱེད་པ་ཡི། །རྒྱུ་དང་འབྲས་བུ་ངེས་པ་སྟེ། །འབྲས་བུ་བཞི་དང་མི་མཐུན་བཞི། །མཁའ་འགྲོ་རྣམས་ཀྱིས་རིམ་པའོ། །མ་ནི་རྣམ་པ་གསུམ་ཡིན་ཏེ། །འདོད་ཆགས་ཆེན་པོས་བཅོམ་ལྡན་འདས། །ཞེ་སྡང་ཆེན་པོས་བཅོམ་ལྡན་འདས། །གཏི་མུག་ཆེན་པོས་བཅོམ་ལྡན་འདས། །ང་རྒྱལ་ལ་སོགས་དེ་དང་འདྲ། །ཐུན་མོང་མ་ཡིན་སྲས་འབྱུང་བས། །མ་ཞེས་གསུངས་པ་ཡིན་པར་འདོད། །སྣོད་མིན་གསང་བ་སྒྲོགས་ཐོས་པ། །སྐྲག་པ་ཐུན་མོང་མ་ཡིན་བསྐྱེད། །བསྐྱེད་པའི་ཕྱིར་ན་མ་ཞེས་བྱ། །སྐྱེ་བ་གཅིག་གིས་སངས་རྒྱས་པས། །སྲས་རྣམས་ཐུན་མོང་མ་ཡིན་སྐྱེད། །དེ་ཡི་ཕྱིར་ན་མ་ཞེས་བྱ། །ཐུན་མོང་བླ་མའི་ཞལ་ནས་ཤེས། །དེ་ནས་གསང་བ་བཤད་བྱ་སྟེ། །བདུད་རྩི་དྲུག་དག་གསང་བ་སྟེ། །གཟུགས་དང་སྒྲ་དང་དྲི་དང་རོ། །རེག་བྱ་དེ་
བཞིན་ཆོས་ཡིན་ཏེ། །རྒྱུད་ནི་དབང་བཞི་ངོ་བོ་སྟེ། །བརྗོད་བྱ་རྗོད་བྱེད་བརྒྱད་དུ་བཤད། །གསང་བ་ལྔ་ནི་རྒྱལ་པོ་ལྔ། །ལྟ་བ་སྤྱོད་པ་ཟུང་འཇུག་ལམ། །རྒྱུ་དང་འབྲས་བུ་ས་ལ་སོགས། །བཅུ་དགུ་རྒྱལ་པོ་ཡིན་པར་གསུངས། །ཀྱེ་བོ་དཔའ་བོ་འཇིགས་པ་ཆེ། །གནོད་སྦྱིན་གཟུགས་དང་སྲིན་པོ་གཟུགས། །གཞན་ཡང་བདུད་ལ་སོགས་པའི་གཟུགས། །སྣ་ཚོགས་སྟོན་ན་ཇི་ལྟར་བགྱི། །ལྷ་འམ་ཀླུ་ལ་སོགས་པའི་གཟུགས། །སྡུག་པ་སྟོན་ན་ཇི་ལྟར་བགྱི། །གནོད་སྦྱིན་སྒྲ་དང་སྲིན་པོའི་སྒྲ། །ཤིན་ཏུ་འཇིགས་པའི་སྒྲ་གྲག་ན། །དེ་ལ་བདག་གིས་ཇི་ལྟར་བགྱི། །ཚངས་པའི་སྒྲ་དང་ངང་པའི་སྒྲ། །སྒྲ་སྙན་བྱུང་ན་ཇི་ལྟར་བགྱི། །བྱ་རྒོད་དྲི་དང་གླ་རྩི་དྲི། །ངན་སྐྱུགས་ལ་སོགས་དྲི་བྱུང་ན། །དེ་ལ་བདག་གིས་ཇི་ལྟར་བགྱི། །གུར་གུམ་ཙནྡན་ག་པུར་སོགས། །དྲི་ཞིམ་བྱུང་ན་ཇི་ལྟར་བགྱི། །བདུད་རྩི་ལ་སོགས་དྲུག་ཅུ་སོགས། །བཟང་པོ་སྟོན་ན་ཇི་ལྟར་བགྱི། །ངན་སྐྱུགས་ལ་སོགས་དམན་པའི་རོ། །སྣ་ཚོགས་སྟོན་ན་ཇི་ལྟར་བགྱི། །རེག་བྱ་ལྕགས་ཀྱི་སྤུ་གྲི་སོགས། །རྩུབ་བ་བྱུང་ན་ཇི་ལྟར་བགྱི། །དར་མེན་ལ་སོགས་ལུས་ཀྱིས་རེག །འཇམ་པ་བྱུང་ན་ཇི་ལྟར་བགྱི། །འཇིག་རྟེན་ཆོས་རྣམས་སྣ་ཚོགས་དང་། །འཇིག་རྟེན་འདས་པའི་ཆོས་རྣམས་སྟོན། །དེ་ལ་བདག་གིས་ཇི་ལྟར་བགྱི། །བཅོམ་ལྡན་འདས་ཀྱིས་བཀའ་སྩལ་པ། །གཟུགས་ངན་ཁོང་ཁྲོ་མི་བསྐྱེད་ཅིང་། །གཟུགས་བཟང་འདོད་པར་མི་བྱ་སྟེ། །དེ་ལ་ལུས་ཀྱི་ཕྱག་རྒྱ་བསྟན། །ལན་བྱེད་དཔའ་བོ་མཁའ་འགྲོ་ཡི། །དངོས་གྲུབ་སྤྲུལ་པ་ཡིན་པར་ངེས། །བརྟུལ་ཞུགས་ཅན་གྱིས་དངོས་གྲུབ་བླང་། །ལན་མེད་བདུད་ཀྱི་བར་ཆད་དེ། །བདུད་བསལ་བ་ཡི་ཆོ་ག་བརྩམ། །ཀུན་ལ་མཁས་པས་སྦྱོར་བར་བྱ། །སྒྲ་སྙན་འདོད་པ་མི་བསྐྱེད་ཅིང་། །འཇིགས་པའི་སྒྲ་ལ་ཁོང་མི་ཁྲོ། །དེ་ལ་བཏང་སྙོམས་སེམས་བྱ་སྟེ། །རྡོ་རྗེ་གླུ་ཡིས་བརྟག་པར་བྱ། །དེ་བཞིན་དྲི་བཟང་མི་ཆགས་ཞིང་། །དྲི་ངན་ཁོང་ཁྲོ་མི་བྱ་བར། །མཉམ་པར་དམིགས་ལ་བརྟག་པར་བྱ། །དྲི་ཡི་ཕྱག་རྒྱ་དེ་ལ་བསྟན། །ལན་བྱེད་མཁའ་འགྲོའི་སྤྲུལ་པ་སྟེ། །ལན་མེད་བདུད་ཀྱི་སྤྲུལ་པའོ། །རོ་བཟང་བཟའ་བར་མི་བྱ་ཞིང་། །རོ་ངན་དོར་བར་མི་བྱའོ། །མཉམ་པར་
གཞག་ལ་བརྟག་པར་བྱ། །དེ་ལ་རོ་ཡི་ཕྱག་རྒྱ་བསྟན། །དེ་བཞིན་བྱེ་བྲག་ཤེས་པར་བྱ། །དེ་བཞིན་ཆོས་ལ་ཆོས་ཕྱག་རྒྱ། །བརྟགས་ཏེ་བདུད་རྣམས་བསལ་བར་བྱ། །ལུས་ལ་བྱུང་བའི་བདུད་རྣམས་ཀྱང་། །ཁ་དོག་དབྱིབས་ལ་ཤེས་པར་བྱ། །དང་པོ་དངོས་གྲུབ་བླང་བ་ཡང་། །མིག་གིས་གཟུགས་ལ་རྣ་བས་སྒྲ། །སྣ་ཡིས་དྲི་དང་ལྕེ་ཡིས་རོ། །ལུས་ཀྱིས་རེག་དང་ཡིད་ཀྱིས་ཆོས། །བརྟུལ་ཞུགས་ཅན་གྱིས་དངོས་གྲུབ་བླང་། །དེ་ནས་བདུད་ནི་བསལ་བྱ་སྟེ། །ཡང་ན་སྟོང་པའི་རྫོང་ལ་གནས། །ཡང་ན་ཕྲིན་ལས་བཞི་ཡིས་བསལ། །ཆུ་ཡིས་བདེ་བ་འཇམ་སོགས་པས། །ནང་གི་བདུད་ནི་བསལ་བའོ། །པད་མཁྲིས་སྟེང་སྒོ་འདུས་པའི་བར། །རླུང་ཅན་མགོ་ཡི་སྒོ་རུ་སྟེ། །རྒྱུད་འདི་གཏད་ཀྱིས་ལེགས་པར་ཟུང་། །དེ་ལྟར་བྱས་ན་དངོས་གྲུབ་ཐོབ། །དཔལ་མཁའ་འགྲོ་མ་གསང་བ་འབར་བའི་རྒྱུད་ཀྱི་རྒྱལ་པོ་རྫོགས་སོ།། །།རྒྱ་གར་གྱི་མཁན་པོ་ག་ཡ་དྷ་ར་དང་། བོད་ཀྱི་ལོ་ཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།།