དཔལ་རྡོ་རྗེ་སྙིང་པོ་རྒྱན་གྱི་རྒྱུད་ཅེས་བྱ་བ།
རྒྱ་གར་སྐད་དུ། ཤྲཱི་བཛྲ་ཧྲྀ་ད་ཡ་ཨ་ལཾ་ཀཱ་ར་ཏནྟྲ་ནཱ་མ། བོད་སྐད་དུ། དཔལ་རྡོ་རྗེ་སྙིང་པོ་རྒྱན་གྱི་རྒྱུད་ཅེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་ཀྱི་སྙིང་པོ་བུད་མེད་བཅུའི་དཀྱིལ་ན་ཆ་ཤས་ལྔ་པའི་ཚུལ་དུ་བཞུགས་སོ། །བརྗོད་དུ་མེད་པའི་ཡང་བརྗོད་དུ་མེད་པའི་ཡང་བརྗོད་དུ་མེད་པའི་འཁོར་རྡོ་རྗེ་དང་པདྨར་སྦྱོར་བ་ལ་བཞུགས་པ་འདི་ལྟ་སྟེ། དམ་ཚིག་ཡོངས་སུ་སྤྱོད་པ་ཞེས་བྱ་བའི་རྡོ་རྗེ་མཁའ་འགྲོ་དང་། ཡེ་ཤེས་ཀྱི་ལུས་ཡོངས་སུ་འགྲུབ་པ་ཞེས་བྱ་བའི་རྡོ་རྗེ་མཁའ་འགྲོ་དང་། སྒྲ་བརྙན་ལྟ་བུའི་རྡོ་རྗེའི་གསུང་འབྱུང་བ་ཞེས་བྱ་བའི་རྡོ་རྗེ་མཁའ་འགྲོ་དང་། གཞན་གྱིས་ཤེས་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། རྩེ་གཅིག་ཏུ་འདྲིས་པ་ཞེས་བྱ་བའི་རྡོ་རྗེ་མཁའ་འགྲོ་དང་། གཞན་ལས་འཕགས་པ་ཞེས་བྱ་བའི་རྡོ་རྗེ་མཁའ་འགྲོ་དང་། རྟེན་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། རླན་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། སྨིན་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། སྐྱོད་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། གོ་འབྱེད་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། ཧཱ་ར་ནུ་པཱུ་ར་ལ་སོགས་པས་མཛེས་པ་ཞེས་བྱ་བའི་རྡོ་རྗེ་མཁའ་འགྲོ་དང་། གཱི་ཏ་མགྲིན་ལ་སོགས་པའི་གླུ་མཁན་མ་ཞེས་བྱ་བའི་རྡོ་རྗེ་མཁའ་འགྲོ་དང་། སྦྲུལ་གྱི་སྙིང་པོ་ལ་སོགས་པའི་དྲི་ལྡན་མ་ཞེས་བྱ་བའི་རྡོ་རྗེ་མཁའ་འགྲོ་དང་། ཚོད་མ་སྣ་ཚོགས་ཟ་བའི་རོ་ལྡན་མ་ཞེས་བྱ་བའི་རྡོ་རྗེ་མཁའ་འགྲོ་དང་། རྩེན་པ་སྣ་ཚོགས་ཀྱིས་འཁྱུད་མཁན་མ་ཞེས་བྱ་བའི་རྡོ་རྗེ་མཁའ་འགྲོ་དང་། གསུམ་རིག་པར་བྱེད་པ་དངོས་མེད་མ་ཞེས་བྱ་བའི་རྡོ་རྗེ་མཁའ་འགྲོ་མ་ལ་སོགས་པ་རི་རབ་ཀྱི་རྡུལ་དང་མཉམ་པའི་རྡོ་རྗེ་མཁའ་འགྲོ་ཐམས་ཅད་དང་། རྡོ་རྗེ་མཁའ་འགྲོ་ཆེན་མོ་ནམ་མཁའི་དབྱིངས་དང་མཉམ་པ་འདི་ལྟ་སྟེ། གཟུགས་ཀྱི་མཚན་ཉིད་ཞུ་བ་ཞེས་བྱ་བའི་རྡོ་རྗེ་
མཁའ་འགྲོ་ཆེན་པོ་དང་། ཚོར་བའི་མཚན་ཉིད་སིམ་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང་། འདུ་ཤེས་ཀྱི་མཚན་ཉིད་ནུབ་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང་། འདུ་བྱེད་ཀྱི་མཚན་ཉིད་ལ་རྟོག་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང་། རྣམ་པར་ཤེས་པའི་མཚན་ཉིད་བསྡུས་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་ལ་སོགས་པ་ནམ་མཁའི་དབྱིངས་དང་མཉམ་པ་རྣམས་ཀྱིས་སངས་རྒྱས་ཀྱི་ཞིང་འདི་ཏིལ་གྱི་གང་བུ་ལྟ་བུར་གང་བར་སྣང་ངོ་། །དེ་ནས་རྡོ་རྗེ་མཁའ་འགྲོ་དེ་དག་ཐམས་ཅད་གཅིག་ཏུ་འདུས་ནས་མཁའ་འགྲོ་ཆེན་པོ་རྡོ་རྗེ་འཛིན་པ་ཆེན་པོ་ལ་མཆོད་པའི་སྤྲིན་སྤྲོས་པ་དུ་མ་ཡིད་ལས་བྱུང་བ་ལྷ་དང་མིའི་མཆོད་པ་ལས་ཁྱད་པར་དུ་འཕགས་པས་མཆོད་ནས་ཕྱག་འཚལ་ཏེ། འདི་སྐད་ཅེས་གསོལ་ཏོ། །དེ་བཞིན་གཤེགས་རྣམས་ཐམས་ཅད་ཀྱི། ། གསང་གསུམ་བསྡུས་པའི་སྤྱོད་པའི་མཆོག །རྡོ་རྗེ་སྙིང་པོའི་རྒྱན་གྱི་རྒྱུད། །འདྲེན་པ་མཆོག་གིས་བཤད་དུ་གསོལ། །དེ་ནས་རྡོ་རྗེ་ཆེན་པོས་གསོལ་བ་བཏབ་པའི་ཚིག་གསན་ནས་མཁའ་འགྲོ་ཐམས་ཅད་ལ་རྣམ་པར་བལྟས་ཏེ་ཅང་མི་གསུང་བར་བཞུགས་སོ། ། དེ་ནས་བྱང་ཆུབ་སེམས་དཔའི་རྡོ་རྗེ་མཁའ་འགྲོ་དེ་དག་ཐམས་ཅད་ཀྱིས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གི་ཡོན་ཏན་ཁྱད་པར་དུ་འཕགས་པའི་རྡོ་རྗེ་མཁའ་འགྲོ་ཆེན་པོ་ལ་སོགས་པའི་འཁོར་དུ་འཆད་དུ་མི་བཞེད་པ་དེ་བདག་ཅག་ལ་མི་དགྱེས་སུ་མ་མཛད་ཅིག །དེ་ནས་དེ་བཞིན་གཤེགས་པའི་བདག་པོ་རྡོ་རྗེ་འཛིན་པ་ཆེན་པོས་འཁོར་གྱི་དཀྱིལ་འཁོར་ལ་རྣམ་པར་བལྟས་ཏེ་ཚིགས་སུ་བཅད་པ་གསུངས་པ། སེམས་དཔའ་ཆེན་པོས་ཞུས་པ་ལེགས། ། ས་འོག་མ་ཡི་སངས་རྒྱས་ཀྱང་། །འདི་ཡི་གཞུང་གིས་སེམས་རྨོངས་ན། །སེམས་དཔའ་གཞན་ནི་སྨོས་ཅི་དགོས། །སངས་རྒྱས་ཆོས་ཉིད་དག་པ་འདི། །བྱིས་པ་རྣམས་ཀྱིས་མི་རྟོགས་ཕྱིར། །བྱིན་གྱིས་བརླབས་ནས་འཆད་པ་ནི། །སྟོན་པ་རྣམས་
ཀྱི་ཆོས་ཉིད་དོ། །དེ་ནས་རྡོ་རྗེ་མཁའ་འགྲོ་དེ་དག་ཐམས་ཅད་རབ་ཏུ་དགའ་ནས་ཡང་མཆོད་པའི་ཚོགས་ཀྱིས་མཆོད་དེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་བདག་ཅག་བྱིན་གྱིས་བརླབ་པར་མཛད་དུ་གསོལ། དེ་བཞིན་གཤེགས་པ་ཐམས་ཅད་ཀྱི་གསང་བ་ཐུན་མོང་མ་ཡིན་པ་བསྟན་ཅིང་རྣམ་པ་ཐམས་ཅད་ཀྱི་དབང་ཕྱུག་གིས་བདག་ཅག་བྱིན་གྱིས་བརླབ་པར་མཛད་དུ་གསོལ། དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་རྡོ་རྗེ་མཁའ་འགྲོ་དེ་དག་གིས་གསོལ་བ་བཏབ་པ་མཁྱེན་ནས་སེམས་དཔའ་ཐམས་ཅད་བྱིན་གྱིས་རློབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་བསྡུས་པ་ཞེས་བྱ་བའི་སྙིང་པོ་འདི་རང་གི་ཐུགས་ལས་ཕྱུང་ངོ་། །ཨོཾ་ཨཱཿཧཱུྃ་ས་མ་ཡ་བཛྲ། དེ་ནས་ཕྱུང་མ་ཐག་ཏུ་དེའི་འོད་ཟེར་གྱིས་རྡོ་རྗེ་མཁའ་འགྲོའི་འཁོར་དེ་དག་ཐམས་ཅད་བསྡུས་ནས་རང་གི་སྙིང་གར་བཙུད་ནས་བུད་མེད་ཀྱི་དཀྱིལ་ན་ཐམས་ཅད་བརྒྱལ་བ་ལྟར་གནས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་དེ་བསླང་པའི་ཕྱིར་མཁའ་འགྲོ་ཐམས་ཅད་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་དེ་དག་དྲན་པ་སླར་ཐོབ་ཅིང་ཇི་ལྟ་བ་བཞིན་དུ་གནས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་འཁོར་ལོ་རྣམ་པར་དགོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྙོམས་པར་ཞུགས་མ་ཐག་ཏུ་རྡོ་རྗེ་མཁའ་འགྲོ་དེ་དག་ཐམས་ཅད་རང་རང་གི་གནས་ཇི་ལྟ་བ་བཞིན་དུ་འཁོད་པར་གྱུར་ཏོ། །དེའི་ཚེ་བཅོམ་ལྡན་འདས་རྡོ་རྗེ་འཛིན་པ་ཆེན་པོའི་བྱིན་གྱིས་བརླབས་ཀྱིས་ནམ་མཁའི་དབྱིངས་ན་གནས་པ་ཇི་སྙེད་པ་དེ་དག་ཐམས་ཅད་ཀྱང་བདེ་བ་དང་ཡིད་བདེ་བ་མྱོང་བར་
གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་རྡོ་རྗེ་སྙིང་པོ་རྒྱན་གྱི་རྒྱུད་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སེམས་ཅན་གྱི་ཁམས་ཐམས་ཅད་མཉམ་པ་ཉིད་དུ་དམིགས་ཏེ། དབུགས་རྔུབ་པར་མི་མཛད། དབྱུང་བར་མི་མཛད། ལུས་འགྱུར་བར་ཡང་མི་མཛད། ལུས་གནས་པར་ཡང་མི་མཛད། དུས་གསུམ་གྱི་དེ་བཞིན་གཤེགས་པ་ཐམས་ཅད་ལ་མི་གཟིགས་མི་དགོངས་ཉེ་བར་མི་འཇིག་གོ། །ཐབས་དང་ཤེས་རབ་སྟོང་བར་ཡང་མི་མཛད། ཤིན་ཏུ་འགལ་བ་ཅན་ཡང་དག་པར་འཛུད་པར་མི་མཛད། མཐོ་རིས་ལ་ཡང་མི་འཇོག །མ་དད་པ་རྣམས་དད་པར་ཡང་མི་མཛད། མདུལ་བ་རྣམས་དུལ་བར་ཡང་མི་མཛད། ཉེ་བར་འཚོ་བ་ཞི་བར་ཡང་མི་མཛད། མ་འགགས་པ་རྣམས་འགག་པར་ཡང་མི་མཛད། མ་བསྐུལ་བ་རྣམས་བསྐུལ་བར་ཡང་མི་མཛད། མ་རྒྱས་པ་རྣམས་རྒྱས་པར་ཡང་མི་མཛད། རྣམ་པར་རྨོངས་པ་རྣམས་རྨོངས་པ་སེལ་བར་ཡང་མི་མཛད། དགའ་བར་གྱུར་པ་རྣམས་མི་དགའ་བར་ཡང་མི་མཛད། མི་དགའ་བ་རྣམས་དགའ་བར་ཡང་མི་མཛད། མ་ཁྲོས་པ་རྣམས་ཁྲོས་པར་ཡང་མི་མཛད། མི་སྡུག་པ་རྣམས་སྡུག་པར་ཡང་མི་མཛད། དྲག་པོ་མ་རུངས་པ་ཆེན་པོ་དང་། གཏུམ་པོ་ཆེན་པོ་དང་། ལྷ་དང་ལྷ་མ་ཡིན་དང་ལོག་འདྲེན་དང་གདུག་པ་ཆེན་པོ་དང་ཡི་དགས་དང་ཤ་ཟ་དང་གནོད་སྦྱིན་དང་སྲིན་པོ་དང་ཤིན་ཏུ་གདུག་པའི་དུག་ཆེན་པོ་དང་ཚ་བའི་གདོན་དང་ནད་དང་སྦྲུལ་དང་སེམས་ཅན་ཐམས་ཅད་ལ་འཚེ་བར་བྱེད་པ་རྣམས་ཉེ་བར་ཞི་བར་ཡང་མི་མཛད་དོ། །རྣམ་པར་དུལ་བར་ཡང་མི་མཛད་དོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ཏེ་བརྗིད་པ་དང་བཅས་པར་གར་མཛད་ཅིང་ཞལ་འཛུམ་པ་དང་འདོར་བ་དང་བསྐུམ་པ་དང་། འགྱེད་པ་དང་སྤྱན་མཛེས་པས་སྨིན་རིངས་བསྐྱོད་ཅིང་བསྒྱུར་བ་དང་། པདྨའི་ཕྱག་གི་སོར་མོ་གཡས་གཡོན་གར་
གྱི་ཕྲེང་བའི་ཚུལ་གྱིས་སའི་ངོས་ལ་ཞབས་འཕེན་ཞིང་སྒྱུར་བ་དང་། འདོར་ཞིང་བསྐུལ་བ་དང་འཇོག་ཅིང་འདེགས་པའི་རྣམ་པར་གནོན་པས་ནམ་མཁའི་དབྱིངས་འདི་ཐམས་ཅད་ཀུན་དུ་ཁྱབ་པར་མཛད་དེ། རླུང་གི་ཁམས་ཆེན་པོར་ཀུན་ཏུ་ཁྱབ་པར་མཛད། དེ་ལ་ཁྱབ་ནས་མེའི་ཁམས་ཆེན་པོར་ཀུན་དུ་ཁྱབ་པར་མཛད་དེ། དེ་ནས་ཆུའི་ཁམས་ཆེན་པོར་ཀུན་དུ་ཁྱབ་པར་མཛད། དེ་ནས་སའི་ཁམས་ཆེན་པོར་ཀུན་དུ་ཁྱབ་པར་མཛད་དོ། །དེ་ཡང་ཀུན་དུ་ཁྱབ་ནས་བཅོམ་ལྡན་འདས་བྱང་ཆུབ་ཀྱི་སེམས་ལ་ཀུན་དུ་ཁྱབ་པར་མཛད་དོ། །རི་དང་སེམས་ཅན་ཐམས་ཅད་དང་། །སྣ་ཚོགས་ཕྲ་བ་སྦོམ་པོ་དང་། །བུད་མེད་གཞོན་ནུ་རྒན་པོ་དང་། །སྐྱེས་པ་དང་ནི་མ་ནིང་དང་། །ལྷ་དང་ཀླུ་དང་གནོད་སྦྱིན་དང་། །གདོན་དང་སྐར་མ་གཤིན་རྗེ་དང་། །ཆུ་བདག་བརྒྱ་བྱིན་ལ་སོགས་དང་། །འབྱུང་དང་འབྱུང་འགྱུར་ཐམས་ཅད་ལ། །བཅོམ་ལྡན་འདས་ནི་བདེ་ཆེན་པོ། །ཀུན་དུ་བཟང་པོ་རྡོ་རྗེ་འཛིན། །ཀུན་དུ་ཁྱབ་པར་བྱས་ཏེ་གནས། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྡོ་རྗེ་མཁའ་འགྲོ་བྱིན་གྱིས་རློབ་པའི་ལེའུ་སྟེ་དང་པོའོ།། །།དེ་ནས་གཞན་ཡང་བཤད་བྱ་བ། །ལས་ཀྱི་མཆོག་རྣམས་འགྲུབ་བྱེད་པའི། །གསང་སྔགས་རྣམས་ནི་བཤད་པར་བྱ། །རྩེ་གཅིག་སེམས་ཀྱིས་མཉན་པར་བྱའོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱཱ་ནུཏྤནྣ་ཏྭཱཏ། གཏོར་མའི་སྔགས་སོ། །ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨ་ཨཿ། བུད་མེད་དོ། །རྀ་རཱྀ། ལྀ་ལཱྀ། མ་ནིང་ངོ་། །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། སྐྱེས་པའིའོ། །ཡ་ར་ལ་ཝ་འབྱུང་བའིའོ། །ཤ་ཥ་ས་ཧ་འཇིགས་པ་ལ་སོགས་པའོ། །ཀྵཿཆོས་ཀྱི་དབྱིངས་ཀྱིས་བོན་ནོ། །བཛྲ་དྷྲྀཀ་ཧཱུྃ། ཛི་ན་ཛི་ཀ་བྷྲཱུྃ། རཏྣ་དྷྲྀཀ་ཨྃ། ཨཱ་རོ་ལིཀ་ཛྲཱེཾ། པྲཛྷྲ་དྷྲྀཀ་ཁྃ། མཁའ་འགྲོ་ཆེན་པོ་ལྔའིའོ། །དྭེ་ཥ་ར་ཏི་མཱྃ། མོ་ཧར་
ཏི་ལཱྃ། རཱ་ག་ར་ཏི་པཱྃ། བཛྲ་ར་ཏི་ཏཱྃ། རྡོ་རྗེ་མཁའ་འགྲོ་རྟེན་པར་བྱེད་པ་ལ་སོགས་པའིའོ། །ཀྵི་ཏི་གརྦྷ་ཀྵིཾ། བཛྲ་པཱ་ཎི་ཛྲཱི། ག་ག་ན་གརྦྷ་ཁྃ། ལོ་ཀི་ཤྭ་ར་གྃ །ནི་བ་རཎ་བིཥྐམྦྷི་ནི་ཀྃ། ས་མནྟ་བྷ་དྲ་སྃ། རྡོ་རྗེ་མཁའ་འགྲོ་དམ་ཚིག་སྤྱོད་པ་ལ་སོགས་པའིའོ། །རཱུ་པ་བཛྲ་ཛཿ། ཤབྡ་བཛྲ་ཧཱུྃ། གནྡྷེ་བཛྲ་བྃ། ར་ས་བཛྲ་ཧོཿ། སྤརྴ་བཛྲ་ཁྃ། དྷརྨ་དྷཱ་ཏུ་བཛྲ་རྃ། རྡོ་རྗེ་མཁའ་འགྲོ་མཛེས་པར་བྱེད་པ་ལ་སོགས་པའིའོ། །ཡ་མཱནྟ་ཀྲྀཏ། པྲཛྙཱནྟ་ཀྲྀཏ། པདྨཱནྟ་ཀྲྀཏ། བིགྷྣནྟ་ཀྲྀཏ། ཊཀྐི་རཱ་ཛ། ནཱི་ལ་དཎྜ། མ་ཧཱ་བ་ལ། ཨ་ཙ་ལེ་ཀ་ཎ་ཧཱུྃ། སུྃ་བྷ་ནི་ཧཱུྃ། ཙཀྲ་བརྟི་ནི་ཧཱུྃ་བྷཱུྃ། རྡོ་རྗེ་མཁའ་འགྲོ་གཤིན་རྗེའི་གཤེད་ལ་སོགས་པའིའོ། །ཝ་རི་ཛི་ན་བྷྲཱུྃ། ཏེ་ཛོ་སྐནྦྷ་བྷཱུྃ། མནྟ་ཙཀྲ་བྷཱུྃ། བར་དྷ་ན་བྷཱུྃ། བི་ས་ར་ཎ་བྷྲཱུྃ། བི་ར་ཛི་ན་བྷྲཱུྃ། ཀ་རོ་བྷ་བ་བྷྲཱུྃ། རྡོ་རྗེ་མཁའ་འགྲོ་གཙུག་ཏོར་རྒྱལ་བ་ལ་སོགས་པའིའོ། །ཧཱུྃ་ཧྲཱིཿཁ་རྡོ་རྗེ་མཁའ་འགྲོའིའོ། །ཨོཾ་མེ་དི་ནེ་བཛྲཱི་བྷ་བ་བཛྲ་བྷ་བནྦྷ་ཧཱུྃ། སའིའོ། །ཨོཾ་བཛྲ་པྲཱ་ཀཱ་ར་ཎ་ཧཱུྃ་བྃ་ཧཱུྃ། ར་བའིའོ། །ཨོཾ་བཛྲ་པཉྫ་ར་ཧཱུྃ་ཡྃ་ཧཱུྃ། དྲ་བའིའོ། །ཨོཾ་བཛྲ་བི་ཏཱ་ན་ཧཱུྃ་ཁྃ་ཧཱུྃ། གུར་གྱིའོ། །ཨོཾ་བཛྲ་ཤ་ར་ཛ་ལ་ཏྲཱྃ་སྃ་ཏྲཱྃ། མདའིའོ། །ཨོཾ་བཛྲ་ཛཱ་ལཱ་ན་ལཱརྐ་ཧཱུྃ་ཧཱུྃ་ཧཱུྃ། འོད་ཀྱིའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཏྨ་ཀོཉཧྃ། སྟོང་པ་ཉིད་ཀྱི་སྔགས་སོ། །ཨོཾ་ངྷརྨངྷ་ཏུ་སྭ་བྷ་བ་ཨཱཏྨ་ཀོཉ་ཧྃ། ཆོས་ཀྱི་དབྱིངས་ཀྱི་སྔགས་སོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀྩིཏྟ་བཛྲ་སྭ་བྷཱ་བ་ཨཱཏྨ་ཀོ྅་ཧྃ། སྐུ་ལ་སོགས་པ་བྱིན་གྱིས་བརླབ་པའིའོ། །བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུྃ། ཐིག་གདབ་པའོ། །བཛྲ་ཙི་ཏྲ་ས་མ་ཡ་ཧཱུྃ། ཚོན་དགྱེ་བའིའོ། །ཧཱུྃ་ཧྃཿཨཱ་ཛྷཻཿ དབབ་པའིའོ། །བཛྲ་ཀཱི་ལ་ཡ་མུངྒ་ར་ཨཱ་ཀོ་ཊ་ཡ་ཧཱུྃ་ཕཊ། ཕུར་བུས་བརྡུང་བའིའོ། །དེ་ལ་སོགས་པའི་མཐའ་ཡས་པ། །འཇིག་རྟེན་གསུམ་དུ་རྙེད་དཀའ་བའི། །སྔགས་ཀྱི་ཚོགས་རྣམས་ཇི་སྙེད་པ། །དེ་ཀུན་སྔོན་དུ་རྒྱས་པ་རུ། །གསང་བ་དང་ནི་འཇིགས་བྱེད་དང་། །
བདེ་མཆོག་སོགས་ལ་ང་ཡིས་ནི། །ལས་དང་བཅས་པར་རབ་བཤད་པ། །རྣལ་འབྱོར་རྟོགས་པས་ཤེས་བྱའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་སྔགས་ཀྱི་ལེའུ་སྟེ་གཉིས་པའོ། །དེ་ནས་མཁའ་འགྲོ་གྲོང་ཁྱེར་མཆོག །དཀྱིལ་འཁོར་འཇིགས་པ་བྲི་བར་བྱ། །ལས་ཀྱི་ཆོ་ག་ཤེས་པ་ཡིས། །ཅི་རིགས་པར་ནི་ལས་རྣམས་བྱ། །ཉི་ཤུ་རྩ་ལྔའི་སྲད་བུ་ནི། །སེམས་མེད་ལས་བྱུང་བྱས་ནས་སུ། །བྱིན་རླབས་མི་བསྐྱེད་རྟག་པ་རུ། །བྱས་ཏེ་ཐིག་ནི་གདབ་པའོ། །གྲུ་བཞི་པ་ལ་སྒོ་བཞི་པ། །ཏྭ་ར་ཎ་བཞིས་བརྒྱན་པ་སྟེ། །དར་དང་མེ་ཏོག་ཕྲེང་བས་བཀླུབས། །སྲད་བུ་བཞི་དང་རབ་ལྡན་པ། །ཟུར་གྱི་ཆ་ནི་ཐམས་ཅད་དུ། །ཟླ་བ་རིན་ཆེན་རྡོ་རྗེ་དགོད། །ལས་ཀྱི་བྱེ་བྲག་ཤེས་པ་ཡིས། ། བློ་དང་ལྡན་པས་ཕྱག་རྒྱ་དགོད། །ཨིནྡྲ་ནཱི་ལ་ལྟ་བུ་ཡི། །འཇིགས་བྱེད་རྡོ་རྗེ་དབུས་སུ་བྲི། །ཤར་དུ་རྩིབས་བརྒྱད་འཁོར་ལོ་དཀར། །ལྷོ་རུ་རིན་ཆེན་ཟུར་དགུ་ལྗང་། །ནུབ་ཏུ་འདབ་བརྒྱད་པདྨ་དམར། །བྱང་དུ་རལ་གྲི་སྔོན་པོ་བྲི། །མེ་ཡི་མཚམས་སུ་འཁོར་ལོ་སྔོན། །བདེན་བྲལ་ཨུཏྤལ་དམར་པོ་དང་། །རླུང་གི་མཚམས་སུ་པདྨ་དམར། །དབང་ལྡན་ཨུཏྤལ་སེར་པོ་སྟེ། །རྡོ་རྗེ་ཐོ་བ་ཤར་གྱི་སྒོ། །ལྷོ་ཡི་སྒོ་རུ་རྡོ་རྗེ་དབྱུག །པདྨའི་སྡོང་བུ་ནུབ་ཀྱི་སྒོ། །བྱང་སྒོ་རྡོ་རྗེ་ཁ་བྱེ་བ། །སྦྱོར་བ་ལྡན་པས་དགོད་པར་བྱ། །རྣམ་པ་ཉི་ཤུ་རྩ་ལྔར་ནི། །ཚོན་རྩི་དག་ཀྱང་བསྒོམ་བྱ་སྟེ། །རྡུལ་ཚོན་ལྔ་ལ་སོགས་པ་རྣམས། །རིམ་པ་བཞིན་དུ་གདབ་པར་བྱ། །དེ་ནས་བུམ་པ་གཟུང་བྱ་བ། །རྩ་བ་ནག་ནོག་མེད་པ་ཡི། །ཞབས་བརྟན་མགྲིན་རིང་མཆུ་འཕྱང་བ། ལྷ་ཡི་གྲངས་ཙམ་སྟ་གོན་གནས། །མགུལ་པར་རས་ཀྱིས་ཡང་དག་དཀྲིས། །ལྡུམ་བུ་ཡིས་ནི་ཁ་མཛེས་པ། །རིན་ཆེན་སྨན་འབྲུ་སྣ་ལྔ་དང་། །སྤོས་ཆུ་ཡིས་ནི་རབ་བཀང་ནས། །བུམ་པ་མངོན་པར་བསྔགས་པར་བྱ། རྣམ་རྒྱལ་བུམ་
པ་དཀྱིལ་འཁོར་གྱི། བདག་པོ་ལྷ་མོ་རྣམས་ཀྱི་བཞི། ལྷ་རྣམས་ཀྱི་ནི་བུམ་པ་བཞི། སྒོ་ཡི་ཕྱོགས་ཀྱི་བུམ་པ་ནི། ལས་ཀུན་བྱེད་པས་བཟླས་བྱས་ཏེ། །ཀུ་ཤའི་ཆུན་པོས་སེམས་ཅན་ཆེ། །འཇུག་པ་ཀུན་ལ་གཏོར་བར་བྱ། །ཡོན་དང་གཏོར་མ་མཆོད་ཕུལ་ནས། །དེ་དག་ཕྱི་གྲྭར་རབ་བཀོད་དེ། །གཡས་སུ་རྒྱལ་བ་སྤྱན་དྲང་ངོ་། །དེ་ནས་ལྷ་རྣམས་རབ་གནས་པའི། བསམ་པའི་སྦྱོར་བས་བསམ་བྱ་སྟེ། ཕྱག་རྒྱ་བྲལ་བའི་སྦྱོར་བ་ནི། ལུས་ཅན་བྱིན་གྱིས་མི་རློབ་པས། ། བུ་མོ་གཟུགས་བཟང་ལང་ཚོས་བརྒྱན། །དབང་ཐོབ་ལུས་རྒྱས་ཐོབ་པ་མོ། །གཡོན་མ་རྒྱན་གྱིས་རབ་བརྒྱན་ཏེ། །དེ་ཡིས་འཁོར་ལོ་སྤྲུལ་པར་བྱ། །དེ་ལ་མར་མེ་བརྒྱ་སོགས་པའི། །མཆོད་པ་ཕུལ་ནས་བསྟོད་བྱ་སྟེ། །བཤང་གཅི་ཁུ་བ་ཁྲག་རྣམས་ནི། །དུང་ཆེན་པོ་རུ་བཞག་བྱས་ཏེ། །ལྷ་རྣམས་ལ་ནི་དབུལ་བར་བྱ། །དེ་ནས་མཁའ་འགྲོ་གྲོང་མཆོག་ཏུ། །སློབ་མ་རྣམས་ནི་གཞུག་བྱ་སྟེ། །རྡོ་རྗེ་ཡེ་ཤེས་རབ་ཐོབ་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་དཀྱིལ་འཁོར་དམ་པ་འདིར། །བདག་གིས་སློབ་མ་གཞུག་པར་བྱ། །དེ་ནས་སློབ་མ་དེ་ཡིས་ཀྱང་། །མེ་ཏོག་སྔགས་འདིས་གཏོར་བའོ། །ཨོཾ་པྲ་ཏཱི་ཙྪ་བཛྲ་ཧོཿ། །དེ་ནས་ཚིག་འདིས་གདོང་གཡོགས་དགྲོལ། །དེ་རིང་དད་པའི་ཤུགས་ཀྱིས་ནི། ། དཀྱིལ་འཁོར་དེང་འདིར་བལྟ་བར་བྱ། །སངས་རྒྱས་རིགས་སུ་ཁྱོད་སྐྱེས་སོ། །སྔགས་དང་ཕྱག་རྒྱས་ཁྱོད་བྱིན་བརླབ། །དངོས་གྲུབ་ཐམས་ཅད་ཕུན་སུམ་ཚོགས། །དམ་ཚིག་མཆོག་ཏུ་འགྲུབ་པར་བྱེད། །རྡོ་རྗེ་པདྨོ་རོལ་པའི་མཆོག །སྔགས་ཀྱི་བདག་ཉིད་ཤེས་པར་བྱ། པཱ་ཤྱ་བཛྲ། གང་དག་མེ་ཏོག་གསང་བ་སྟེ། །དེ་དེ་དེ་ཡི་ལྷ་ཡང་དག །དེ་ཡི་སྦྱོར་བ་རབ་སྦྱིན་ཏེ། །དེ་ཡི་ནན་ཏན་དུ་སྒྲུབ་བོ། །དུང་ཆེན་བདུད་རྩི་ལྔ་བླུད་དེ། །དམྱལ་བའི་ཆུ་འདིས་ཁྱོད་ལ་ནི། །དམ་ཚིག་འདས་ན་
སྲེག་པར་བྱེད། །དམ་ཚིག་བསྲུངས་ན་དངོས་གྲུབ་པའི། །འཐུང་ཤིག་རྡོ་རྗེ་བདུད་རྩིའི་ཆུ། །བཛྲ་ཨུདྐ་ཋ། དེ་ནས་སངས་རྒྱས་ཐམས་ཅད་ཀྱི། །དམ་ཚིག་དང་ནི་སྡོམ་པ་རྣམས། །བླ་མས་སློབ་མ་སྡིག་བྲལ་ལ། །ཅི་ལྟ་བ་བཞིན་བསྒྲག་པར་བྱ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རི་མོའི་དཀྱིལ་འཁོར་གྱི་ལེའུ་སྟེ་གསུམ་པའོ།། །།དེ་ནས་གཞན་ཡང་བཤད་བྱ་བ། །དབང་བསྐུར་བ་ཡི་ཆོ་གའི་མཆོག །གང་གིས་ལེགས་པར་བྱེད་འགྱུར་ན། །དེ་ནི་སངས་རྒྱས་ཉིད་དུ་འགྲུབ། །སློབ་དཔོན་མཚན་ཉིད་ཐམས་ཅད་ལྡན། །ཡང་དག་ཤེས་ཤིང་རྒྱུད་ཤེས་པ། །དེ་ཉིད་བཅུ་ལ་སོགས་པ་ཡི། །གསང་རིག་ཆོ་ག་ཤེས་པ་པོས། །བསྒྲིམས་ཏེ་སློབ་མ་ཡང་དག་གཟུང་། །བླ་མ་ལ་གུས་དད་པའོ། ། དགེ་བསྒོམ་ལྷ་རྣམས་མཆོད་བྱེད་པ། །གཏོང་ཕོད་ཡོན་ཏན་ལྡན་པའོ། །དེ་ནས་སློབ་མ་དེ་ཡིས་ཀྱང་། །ལངས་ཏེ་ཞབས་ལ་མགོས་གཏུགས་ནས། །རྒྱལ་པོ་དབང་ཕྱུག་བདེ་དམ་པ། །གོས་དང་རྒྱན་གྱིས་ལེགས་པར་བགོས། །སྟེང་དུ་བླ་རེ་བྲེ་བར་བྱ། །གདུགས་དང་རྒྱལ་མཚན་བ་དན་དང་། །ལྷམ་དང་ཚངས་པའི་སྐུད་པ་དང་། །གདུ་བུ་དག་དང་སྐ་རགས་དང་། །བཀྲ་ཤིས་ཚིགས་བཅད་སྣ་ཚོགས་ཀྱིས། །སློབ་མ་སྡིག་དང་བྲལ་བ་ལ། །སློབ་དཔོན་གྱིས་ནི་དབང་བསྐུར་རོ། །དང་པོ་རྣམ་རྒྱལ་བུམ་པ་དང་། །དེ་ནས་ལྷ་མོ་བཞི་རྣམས་དང་། །ལྷ་རྣམས་ཀུན་གྱི་བཞི་པོ་ཡིས། །བཀྲ་ཤིས་ཚིགས་བཅད་གླུ་སྒྲ་དང་། །རྡོ་རྗེ་དྲིལ་བུ་གསིལ་བ་ཡིས། །སྐྱོབ་པའི་དཀྱིལ་འཁོར་མངོན་སུམ་དུ། །ཏིལ་གྱི་གང་བུ་བཞིན་གང་བའི། །རྒྱལ་བས་བུམ་པ་བཟུང་ནས་ནི། །དེ་ཉིད་ལ་ནི་དབང་བསྐུར་བར། །དཀྱིལ་འཁོར་དེ་ཉིད་རིག་པར་བསམ། །དེ་ལྟ་བུ་ནི་བསམས་ནས་ཀྱང་། །ཆོས་ཀྱི་མཚན་ཉིད་བསྟན་པར་བྱ། །དེ་ནས་ཡིད་འོང་བུ་མོ་ནི། །ལེགས་པར་གོམས་པ་དབང་ཐོབ་པ། །རྒྱན་
གྱིས་རབ་བརྒྱན་རབ་མཛེས་པ། །བཙལ་ཏེ་བླ་མ་ལ་ཕུལ་ནས། །དེ་ནས་རྒྱལ་དབང་སློབ་མ་དེ། །ནང་གི་སྦས་པ་བཏུས་པ་ཡི། །གསང་བ་མཉམ་པར་འཇུག་པ་ཡི། །སྦྱོར་དང་ལྡན་པས་དབང་བསྐུར་བྱ། །རྡོ་རྗེ་པདྨོ་ལས་དྲང་བ། །སྦོམ་པོ་མཐའ་ལྟག་རྩེ་སྦྱར་ནས། །རྐན་དུ་རྡོ་རྗེ་གཞག་པར་བྱ། །ཀྱེ་མའོ་བདེ་བ་བདེ་བ་ཆེ། །ཀྱེ་མའོ་དམ་ཚིག་བདེ་བརྗོད་ཅིང་། །ཀྱེ་མའོ་བདེ་བ་བླང་བར་བྱའོ། །འདི་ནི་གསང་བ་ཞེས་བྱ་བའི། །དེ་དབང་བསྐུར་བའི་ཐབས་མཆོག་གོ། །ཡང་ན་ཤིན་ཏུ་དད་ལྡན་པ། །གཟུགས་བཟང་སྒྲུབ་ལ་དགའ་བ་དང་། །སྦྱོར་གོམས་བླ་མ་ལ་ནི་དབུལ། །བླ་མས་བྱིན་བརླབས་ལྷ་མོ་དང་། །སྒྲུབ་པ་དེ་ལ་སྦྱིན་པར་བྱ། །དེ་ཡིས་བླངས་ནས་བརྩོན་པའི་ཚོགས། །ཅི་སྐད་གསུངས་བཞིན་རབ་བྱས་ནས། ། རང་གི་ལྷ་དང་སངས་རྒྱས་དང་། །བྱང་ཆུབ་སེམས་དཔའི་ཚོགས་རྣམས་ཀུན། །མཉེས་བྱེད་ཆོ་གས་སེམས་བརྟགས་ཏེ། །མངོན་སུམ་བདེ་བ་རང་འབྱུང་བ། །གཞན་གྱིས་གང་དུ་བསྒྲག་མི་ནུས། །གོ་བའི་ཡུལ་དེ་བདེ་བ་ཆེ། །བླ་མ་དེ་ལ་དབུལ་བར་བྱ། །བླ་མ་གཞན་ལ་དེ་བཞིན་དུ། །ཅི་དགའ་བར་ནི་ཡོན་ཡང་དབུལ། །སློབ་དཔོན་ཅུང་ཟད་ཅི་འདོད་པ། །ཡིད་ལ་བསམས་པ་དབུལ་བར་བྱ། །དམ་ཚིག་འདའ་བས་འཇིགས་པའི་ཕྱིར། །བསྒྲིམས་ཏེ་དེ་བཞིན་དབུལ་བར་བྱ། །སློབ་དཔོན་གྱི་ནི་ཡུལ་གྱི་མཆོག །རིགས་ཀྱི་ཁྱད་པར་གྱིས་ནི་ལྔ། །བུམ་པའི་དབང་སོགས་དབྱེ་བ་ཡིས། །ཡང་ན་གསུམ་དུ་འགྱུར་བ་ཡིན། །རང་གི་མ་དང་སེང་གེ་གདན། །ཡོན་གྱི་མཆོག་སྟེ་སངས་རྒྱས་རིགས། །གསེར་དང་གླང་པོ་རིན་ཆེན་དང་། ། སྲིང་མོ་བླ་མ་ལ་དབུལ་བ། །རྡོ་རྗེ་སེམས་དཔའི་རིགས་ཡིན་ཏེ། །ཡོན་དེ་ཡོན་གྱི་མཆོག་ཡིན་ནོ། །ཤིང་རྟ་རྟ་ནི་ཤིན་ཏུ་བརྒྱན། །རང་གི་ཆུང་མ་དབུལ་བྱ་སྟེ། །རིན་ཆེན་སྣ་ཚོགས་རྣམ་དག་པ། །ཡོན་དེ་རིན་པོ་ཆེ་ཡི་རིགས། །མུ་ཏིག་ཕྲེང་བ་ཤིན་
ཏུ་མཛེས། །བུ་མོ་རིན་ཆེན་འདྲ་བ་ཡིས། །བརྒྱན་ཏེ་བླ་མ་ལ་དབུལ་བ། །ཡོན་དེ་པདྨའི་རིགས་ཡིན་ནོ། །རྒྱལ་པོ་དང་ནི་དབང་ཕྱུག་དང་། །ཆུང་མ་འཕྲུལ་གྱི་བཞོན་པ་སོགས། །གླང་པོ་རྟ་ནི་ཤིན་ཏུ་བརྒྱན། །དེ་བཞིན་གཤེགས་པ་ཀུན་གྱི་རྗེ། །ནན་ཏན་བླ་མ་དབུལ་བྱ་བ། །སྣ་ཚོགས་རྡོ་རྗེའི་རིགས་ཡིན་ནོ། །དེ་རྣམས་བཞི་དང་འགྱུར་བ་དང་། །མི་འགྱུར་བ་ཡི་བྱེ་བྲག་གིས། །གསུམ་དུ་ཤེས་བྱ་བླ་མ་ལ། །བློ་ལྡན་རྡོ་རྗེ་སློབ་མ་ཡིས། །ཅི་སྟེ་བདེ་བ་ཀུན་འདོད་ན། །དད་མོས་སེམས་ཀྱིས་དབུལ་བར་བྱ། །ཡིད་ལ་གང་བསམས་མ་ཕུལ་ལམ། །ཁས་བླངས་དེ་ནི་མ་ཕུལ་ན། །ཡི་དགས་དམྱལ་བ་རྣམ་གཉིས་སུ། །ངེས་པར་སྐྱེས་ཏེ་བརླག་པར་འགྱུར། །དེ་བས་དེ་རྣམས་རབ་ཕུལ་ནས། །གསོལ་བ་དག་ནི་རབ་ཏུ་གདབ། །རྡོ་རྗེ་དཀྱིལ་འཁོར་ཆེན་པོ་ཡི། དཀྱིལ་འཁོར་དུ་ནི་བདག་ཞུགས་སོ། །སྦྱོར་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་ཞུགས་སོ། །སྦྱོར་བའི་དཀྱིལ་འཁོར་ཆེན་པོ་ཡི། དཀྱིལ་འཁོར་བདག་གིས་དི་རིང་མཐོང་། ། གསང་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་དབང་བསྐུར། །དེ་ནས་བླ་མ་དེ་ཡིས་ཀྱང་། །དེ་ལ་དབང་བསྐུར་སྦྱིན་བྱ་སྟེ། །དྲི་དང་མེ་ཏོག་ཕྲེང་བས་བརྒྱན། བསྒྲིམས་ཏེ་ཡང་དག་བརྟག་པར་བྱ། །དང་པོ་ལ་ནི་བུམ་པའི་དབང་། ། གཉིས་པ་ལ་ནི་གསང་བའི་དབང། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ཡི་ཡེ་ཤེས་ཏེ། །བླ་མ་ལས་ནི་ཐོབ་པའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཕན་ཡོན་དང་བཅས་པར་དབང་བསྐུར་བའི་ལེའུ་སྟེ་བཞི་པའོ།། །།གང་གི་ཐབས་ཀྱིས་རིགས་ལྔའི་དོན། །རང་གི་དོན་གྱུར་ཀུན་དུ་བཟང་། །འདི་དག་གཞན་ལ་རབ་བདེའི་ཕྱིར། །རྡོ་རྗེ་སེམས་དཔའི་སྒྲུབ་ཐབས་བཤད། །ཡིད་འོང་དབེན་པའི་ས་ཕྱོགས་སུ། །ཅི་བདེར་གནས་ལ་ནམ་མཁའ་ཀུན། །སེམས་ཀྱིས་ཁྱབ་པར་བྱས་ནས་
སུ། །རྣམ་བརྟགས་ཨེ་མའོ་འཇིག་རྟེན་ཀུན། །སྡུག་བསྔལ་ཆོས་ཀྱིས་ཀུན་ནས་གཙེས། །བྱང་ཆུབ་སེམས་ཉམས་སེམས་ཅན་རྣམས། །ཀུན་ལས་འབྱུང་ཞེས་དམ་བཅས་པའི། །སྔགས་པས་སྤྱི་བོར་བཞག་པ་ནི། །ཨཱཿསེམས་ཀྱི་རྡུལ་ཕྲན་ཆ་དྲུག་རྣམས། །ཕྱོགས་བཅུ་དག་ཏུ་ཕྱེ་ནས་སུ། །ཆོས་ཀྱི་དོན་རྣམས་དེས་བསལ་ནས། །ཤིན་ཏུ་དྲི་མེད་སེམས་དག་པ། །འདས་དང་མ་འོངས་པ་ཡི་སེམས། །ད་ལྟར་ཡང་ནི་དམིགས་སུ་མེད། །གཉིས་མེད་དེ་ལ་གཉིས་མེད་མེད། །ནམ་མཁའ་ཞེས་པའང་གནས་པ་མེད། །དེ་ལྟར་ཀུན་དུ་བརྟགས་ནས་སུ། །འགྲོ་བ་ཐམས་ཅད་ཤིན་ཏུ་སྟོང་། །དྲི་མེད་རྣལ་འབྱོར་ཉིད་ཀྱི་ཡིན། །དངོས་པོ་མེད་པར་རང་སེམས་བསམ། །འགྲོ་བ་འདི་ནི་དེ་ལྟ་བུའི། །དངོས་པོ་གང་དག་ཡོད་མིན་ན། །སྡུག་བསྔལ་སྣ་ཚོགས་གང་དག་ལགས། །སེམས་ཉམས་སེམས་ཅན་འབྱུང་བར་བསྒོམ། །འོན་ཀྱང་སྔོན་གྱི་སྨོན་ལམ་ཤུགས། །དབྱངས་ཡིག་སྤེལ་བའི་གླུ་ལྡན་བྱ། །རིན་ཆེན་སེམས་ནི་རྨུགས་པ་ལ། །བདེ་གཤེགས་རྣམས་ཀྱིས་བསྐུལ་བར་སྣང་། ཤཱུ་ནྱ་ཏཱ་ཏི་ཡོ་ག་པཱ་དྃ་སྭཱ་ཧཱ། པྲ་བྷ་བཱི་ཨཱ་ཀཱ་ཤ་ཏ་མཱ་པ་ག་ཏ་ས་མ་ཡ། ཨུ་པ་ཏ་པ་ཡནྟི་སུ་ག་ཏ་སུ་ག་ཏེ་ག་ཏི་ཤྲཱི་བཛྲ་སྭཱ་ཧཱ། པཱུ་པུ་སྟྃ་ཧྃ། རྣམ་རྟོག་ཀུན་སྤངས་དྲི་མེད་པའི། །རྣམ་པར་མི་རྟོག་སྒོམ་པའི་སེམས། །སྔགས་ཀྱི་དེ་ཉིད་བསྐྱོད་བྱས་ལ། ཧཱུྃ་ཞེས་པ་ཡི་གཟུགས་སུ་བརྟག །ཏིང་ངེ་འཛིན་གྱིས་དབང་འགྱུར་ན། །གང་ཕྱིར་དེ་ནི་བསྒོམས་པས་ཐོབ། །དམ་པ་ནམ་མཁའི་དབྱིངས་ལ་གནས། བྱང་ཆུབ་སེམས་ཚོགས་དེར་བཅས་ལ། །རྣལ་འབྱོར་ཡིད་ཀྱིས་ཀུན་བསམས་ནས། །རྒྱས་པར་རྣམ་པར་བརྟག་པར་བྱ། །ཡི་གེ་བྷྲཱུྃ་གྱིས་ལྷ་ཡི་གནས། །རྡོ་རྗེ་རིན་ཆེན་གྱིས་ནི་བརྒྱན། །སྒོ་ཁྱུད་རྟ་བབས་ཀ་བ་དག །དར་གྱི་ཕྲེང་བས་རྣམ་པར་བཀླུབས། །གྲུ་བཞི་པ་ལ་སྒོ་བཞི་པ། །དྲིལ་བུའི་དྲ་བ་དག་གིས་
བརྒྱན། །རྟག་པར་དོ་ཤལ་མེ་ལོང་དང་། །མེ་ཏོག་ཕྲེང་བས་རྒྱན་རྣམས་བྲེས། །དེ་ཡི་དབུས་སུ་སེང་གེའི་གདན། །སེང་གེ་བརྒྱད་ཀྱིས་རྣམ་པར་བརྒྱན། །སྨོན་ལམ་དབང་གིས་དེ་དག་ཀུན། །བྱང་ཆུབ་སེམས་དཔའ་མཐུ་བོ་ཆེ། །ཤར་ཕྱོགས་བ་གླང་ཤིན་ཏུ་རྒྱས། །ལྷོ་ཕྱོགས་རྟ་ཡི་གདན་བཟང་སྟེ། །ནུབ་ཕྱོགས་སུ་ནི་རྨ་བྱ་བཤད། །དེ་བཞིན་བྱང་ཕྱོགས་ནམ་མཁའ་ལྡིང་། །མི་བསྐྱོད་ཁྲོ་བོ་བསམ་པ་ནི། །མཐིང་ག་དཀར་པོ་དམར་པོའི་ཞལ། །རྡོ་རྗེ་ཕྱག་རྒྱ་ཐུགས་ཀ་ན། །མཐིང་ག་ཁ་དོག་གསལ་ལ་བཟང། །གཡས་ན་རིན་ཆེན་འཁོར་ལོ་སྟེ། །རལ་གྲི་པདྨ་གཡོན་པ་ན། །འཇིག་རྟེན་ཁམས་ནི་ཀུན་འཁྲུག་པའོ། །བརྟུལ་ཞུགས་ཅན་གྱིས་ཞལ་གསུམ་བསམ། །དང་པོ་ཡི་ནི་སྟོང་པ་ཉིད། ། གཉིས་པ་དེ་བཞིན་མཚན་མ་མེད། །གསུམ་པ་སྨོན་པ་མེད་པ་ཡི། །ཞལ་དུ་མཁས་པས་རིག་པར་བྱ། །ཕྱག་དྲུག་རྟག་ཏུ་འབར་བར་བསྒོམ། །མཚོན་ཆ་སྣ་ཚོགས་རྣམས་དང་ལྡན། །པདྨ་ལ་ནི་མཉམ་གཞག་ནས། །ཡེ་ཤེས་ཕྱག་རྒྱ་སྙིང་ག་ནང་། །དབུས་ཀྱི་གནས་སུ་བསམ་པ་ནི། །རྡོ་རྗེ་སྐྱིལ་མོ་ཀྲུང་དུ་གནས། །ཤར་གྱི་གནས་སུ་བསམ་པ་ནི། །སྔགས་པ་རྣམ་སྣང་ཐུབ་པ་སྟེ། །དཀར་དང་མཐིང་ག་དམར་བའི་ཞལ། །འཁོར་ལོ་ཕྱག་རྒྱ་སྙིང་ག་ན། །རྡོ་རྗེ་འབར་སོགས་འོད་གསལ་བ། །རིན་ཆེན་རྡོ་རྗེ་གཡས་པ་ན། །རལ་གྲི་པདྨ་གཡོན་པ་ན། །རྣལ་འབྱོར་ཅན་གྱིས་རྟག་པར་བསམ། །ཐོར་ཚུགས་དབུ་རྒྱན་དག་གིས་བརྒྱན། །རིན་ཆེན་མགོན་པོ་ལྷོ་ཕྱོགས་ན། །སེར་དང་མཐིང་ག་དཀར་བའི་ཞལ། ། རིན་ཆེན་ཕྱག་རྒྱ་སྙིང་ག་ནས། །མརྒད་ལྟ་བུར་སྣང་བའོ། །གཡས་ན་འཁོར་ལོ་རལ་གྲི་སྟེ། །རྡོ་རྗེ་པདྨ་གཡོན་ནའོ། །རྟག་པར་རྣལ་འབྱོར་པས་བསམ་པ། །རིན་ཆེན་ཆར་དུ་འབེབས་པའོ། །ནུབ་ཕྱོགས་གནས་སུ་དགོད་བྱ་བ། །སྣང་བ་མཐའ་ཡས་
བསམ་པ་ནི། །དམར་དང་མཐིང་ག་དཀར་བའི་ཞལ། །པདྨ་རཱ་གའི་མདོག་ལྟ་བུ། །པདྨའི་ཕྱག་རྒྱ་སྙིང་ག་ན། །རྡོ་རྗེ་རིན་ཆེན་གཡས་པ་ན། །འཁོར་ལོ་རལ་གྲི་གཡོན་པ་ན། །པདྨ་ལ་ནི་མཉམ་གཞག་བསམ། །བྱང་ཕྱོགས་གནས་སུ་དོན་གྲུབ་ནི། ། ལྗང་གུ་མཐིང་ག་དཀར་བའི་ཞལ། །རལ་གྲི་ཕྱག་རྒྱ་སྙིང་ག་ན། །འབར་བའི་ཕྲེང་བས་མཉམ་པའིའོ། །པདྨ་རྡོ་རྗེ་གཡས་པ་ན། །འཁོར་ལོ་རིན་ཆེན་གཡོན་པ་ན། །ཟླ་བའི་དཀྱིལ་འཁོར་དབུས་གནས་པ། །བྱང་གི་གནས་སུ་བསམ་པར་བྱ། །སྔགས་པས་ཕྱག་དྲུག་བསམ་པ་ནི། །སྤྱན་དེ་ཞལ་གསུམ་དཀར་མོ་ཡི། །རྣམ་པར་སྣང་མཛད་ཕྱག་རྒྱ་བཞིན། །དེ་ཡི་དོན་དུ་རྣམ་པར་བསྒོམ། མཱ་མ་ཀཱི་ཡང་བསམ་པ་ནི། །ཨུཏྤལ་དང་ནི་མཐིང་འདྲ་བ། །ཞལ་གསུམ་ཕྱག་དྲུག་ཆགས་པ་སྟེ། །མི་བསྐྱོད་ཕྱག་རྒྱ་མཆོག་འཛིན་པའོ། །ཆགས་པས་ཆགས་པ་རིགས་ཀྱི་སྔགས། །ཞལ་གསུམ་ཕྱག་དྲུག་དགེ་བ་སྟེ། །སྦྱོར་བའི་ས་ནི་དཀར་མོ་བསམ། །པདྨ་རཱ་གའི་ཕྱག་རྒྱའོ། །སྒྲོལ་མ་ཁ་དོག་སེར་མོ་སྟེ། །འཁྲིལ་བག་རྒྱན་གྱིས་རབ་ཏུ་བརྒྱན། ། ཞལ་གསུམ་ཕྱག་དྲུག་རབ་ཏུ་བསམ། །ཐོགས་མེད་རྒྱལ་པོའི་ཕྱག་རྒྱའོ། །སྒོ་བཞི་སྒོ་སྲུངས་དགོད་བྱ་བ། །སྒོ་རྣམས་སུ་ནི་ཁྲོ་བོ་བསམ། །ཁྲོ་བོ་ཆེན་པོ་གཤིན་རྗེའི་གཤེད། །གཞན་གྱིས་མི་ཐུབ་དེ་བཞིན་ཏེ། །ཐུབ་པར་དཀའ་བ་རྟ་མགྲིན་དང་། ། ཁྲོ་བོ་བདུད་རྩི་འཁྱིལ་བ་བསམ། །དེ་དག་ཀུན་ཀྱང་ཞལ་གསུམ་པ། །དྲག་ཅིང་དྲག་པོར་གནོན་པའོ། །མཐིང་ག་སེར་པོ་དེ་བཞིན་དམར། །ལྗང་གུ་དག་ནི་ཁ་དོག་ཏུའོ། །མཚོན་ཆ་སྣ་ཚོགས་འཛིན་པ་སྟེ། །ཐོད་པའི་ཕྲེང་ཐོགས་དེ་བཞིན་ནོ། ། གདོན་རྣམས་ཐམས་ཅད་སྐྲག་བྱེད་པ། །གནོད་སྦྱིན་སྲིན་པོ་ཕྲ་མེན་མ། །མ་ཧེ་སེང་གེ་སྟག་རྣམས་དང་། །བ་ལང་ཞོན་པ་རྣམས་བཞིའོ། །རྣམ་པར་འགྱུར་བའི་ཁྲོ་གཉེར་ཅན། །ཁྲོ་བོ་སྤྱན་ནི་ཀུན་ནས་བསྡུས། །སྔགས་འདི་རྣམས་ཀྱིས་
བསམ་པ་ནི། །གཤིན་རྗེའི་གཤེད་ལ་སོགས་པའོ། །སྔགས་ཀྱི་དེ་ཉིད་རྗེས་མཐུན་པར། །སྔགས་པའི་དཀྱིལ་འཁོར་བསྒྲུབས་ནས་སུ། །ས་ཡི་སྙིང་པོ་ལ་སོགས་པ། །སེམས་དཔའ་རྣམས་ནི་དེར་གནས་བསམ། ། ལུས་དང་ངག་དང་སེམས་དེ་ཉིད། །ཧཱུྃ་ཞེས་བྱ་བའི་ཡི་གེ་མཆོག །སེམས་ནི་དེ་རུ་ཞུགས་པར་བསམ། །མི་བསྐྱོད་པ་ནི་བདག་ཉིད་ཆེ། །དབང་པོའི་ལམ་དུ་བྱུང་ནས་སུ། །དང་བའི་དཀྱིལ་འཁོར་གྱིས་ནི་བརྒྱན། །བདག་ཉིད་གཅིག་ཅིང་གཅིག་འགྱུར་བ། །སྐད་ཅིག་གིས་ནི་བརྟག་པར་བྱ། །ཁྱོད་ནི་རྡོ་རྗེ་སེམས་ཞེས་བྱ། །དེ་ལ་སོགས་པས་སྟོད་པར་བྱེད། །དེ་ནས་རྣམ་སྣང་མཛད་ལ་སོགས། །རང་གི་སྙིང་གར་རབ་ཏུ་གཟུད། །གཟུགས་རྣམས་ཀྱི་ནི་རང་བཞིན་དུ། །རྣམ་པར་སྣང་མཛད་ཐུབ་པ་བཞུགས། །ཚོར་བ་རིན་ཆེན་མགོན་པོ་ཡིན། །མཐའ་ཡས་འོད་ནི་འདུ་ཤེས་སུའོ། །འདུ་བྱེད་ཀུན་དུ་གདོན་མི་ཟ། །མི་བསྐྱོད་པ་ནི་ཕུང་པོ་ལྔར། །དེ་བཞིན་གཤེགས་པ་ལྔ་རྣམས་ནི། །སྔགས་འདི་རྣམས་ཀྱིས་བཞུགས་པར་བསམ། །ས་ཡི་ཁམས་ཀྱི་རང་བཞིན་དུ། །དེ་ནས་སྤྱན་ནི་གཞུག་བྱ་སྟེ། །རྣལ་འབྱོར་ཡིད་ཀྱིས་བསམ་པ་ནི། །དེ་ཡང་སྤྲོ་བར་གནས་པར་བསམ། །མཱ་མ་ཀཱི་ཡང་ཆུ་ཡི་ཁམས། །བརླན་ཞིང་ཁྲག་ནི་རྒྱུ་བའི་ཕྱིར། །རྣལ་འབྱོར་པས་ནི་ཡིད་ཀྱིས་བསམ། །དེ་ཡི་ལུས་ནི་རྒྱས་པར་འགྱུར། །མེ་ཡི་ཁམས་ཀྱི་རང་བཞིན་དུ། །གོས་དཀར་མོ་ཡང་གཞུག་པར་བྱ། །ཀུན་དུ་ཁྱབ་པར་བཞུགས་པ་ཡི། །འོད་རྣམས་སུ་ནི་དེར་འགྱུར་རོ། །སྒྲོལ་མ་རླུང་གི་རང་བཞིན་དུ། །བཞུགས་པར་དེ་ནི་བསམ་པར་བྱ། །རླུང་ནི་རྣམ་པ་ལྔ་རུ་འགྱུར། །དེ་བཞིན་ཡིད་མགྱོགས་རྫུ་འཕྲུལ་འགྲུབ། །རྡོ་རྗེ་དབྱིངས་ཀྱི་དབང་ཕྱུག་མ། །ནམ་མཁའི་རང་བཞིན་དག་ཏུ་འཇུག །དེ་ལུས་ཁོང་སྟོང་ཉིད་ལ་ནི། །རང་སེམས་ཡོན་ཏན་བསྒོམ་པའི་སེམས། །
ནམ་མཁའི་དབྱིངས་ཀྱི་རྣལ་འབྱོར་གྱིས། །སངས་རྒྱས་སྒྱུ་མའི་སྦྱོར་བས་སུ། །དག་པའི་བདག་ཉིད་ཅི་འདོད་པར། །དེ་ནས་རི་རབ་ཕུལ་ནས་འགྲོ། །ས་ཡི་སྙིང་པོ་བདག་ཉིད་ཆེ། །སངས་རྒྱས་སྤྱན་ནི་བདག་ཉིད་དེ། །མིག་གི་ཕྱོགས་སུ་ཞུགས་ནས་ནི། །འཕྲུལ་གྱི་མིག་ཏུ་རྟག་ཏུ་འགྱུར། །ཕྱག་ན་རྡོ་རྗེ་བདག་ཉིད་ཆེ། །རྣ་བའི་རྣམ་ཤེས་སྦྱོར་བས་ན། །སྒྲ་རྣམས་ཐམས་ཅད་ཤེས་པ་དེ། །རྣ་བའི་རྣམ་ཤེས་དེ་བཞིན་འགྱུར། །ནམ་མཁའི་སྙིང་པོ་བདག་ཉིད་ཆེ། །སྣ་ཡི་རྣམ་ཤེས་སྦྱོར་བས་ན། །སངས་རྒྱས་ཤངས་ནི་བདག་ཉིད་ཤེས། །དེ་ཡང་དེ་ཡི་ངོ་བོར་འགྱུར། །འཇིག་རྟེན་དབང་པོར་རབ་ཆགས་པ། །རྡོ་རྗེ་ལྕེ་ཡི་སྦྱོར་བས་སུ། །རོ་ཡི་དངོས་པོ་མྱོང་བ་དེས། །སྐད་ཅིག་གཅིག་ལ་དེ་རུ་འགྱུར། །བློ་ལྡན་སྒྲིབ་པ་ཐམས་ཅད་ནི། །རྣམ་པར་སེལ་བའི་མིང་དང་ལྡན། །ཉོན་མོངས་ཐམས་ཅད་རྣམ་པར་སེལ། །ཉེ་བའི་ཉོན་མོངས་པ་ཡང་འཇིག །མེ་ལོང་གི་ནི་རྣམ་པ་ལྟར། །རྟེན་པའི་ཚུལ་གྱིས་འབྱུང་བ་ནི། །གཟུགས་བརྙན་གྱི་ནི་སྦྱོར་བས་སུ། ། སྐད་ཅིག་གིས་ནི་དེ་རུ་འགྱུར། །བཅོམ་ལྡན་རྡོ་རྗེ་སེམས་དཔའ་ལ། །རྣམ་པ་བཅུ་དང་དྲུག་ཏུ་ཡང་། །སྦྱོར་བ་དེ་ནི་བྱིན་བརླབས་ནས། །སྔགས་བས་དེ་ནི་སེམས་ལ་གཞུག །ཁྲོ་བོ་ལྕགས་ཀྱུ་དཔུང་པ་ཡིས། །ཞགས་པ་ལྟ་བུ་གཉིས་པའོ། ། ལུ་གུ་རྒྱུད་ཀྱི་ཁ་སྤྲད་གསུམ། །རྒྱལ་མཚན་གཞུག་པར་ཁྱབ་པར་བཞག །དེ་ལྟར་དོན་རྣམས་རབ་ཏུ་ཞུགས། །སངས་རྒྱས་ཀུན་གྱི་ངོ་བོར་བདག །རྡོ་རྗེ་ཕྱག་རྒྱ་དང་ལྡན་པ། །གཡོན་པ་དྲིལ་བསྣམས་སྟ་ཟུར་བརྟེན། །རྡོ་རྗེ་སེམས་དཔའ་དེ་གནས་འགྱུར། །རྣལ་འབྱོར་ཆེན་པོ་དཀར་བའི་གཟུགས། །དཀར་དང་མཐིང་ག་དམར་པོའི་དབུ། །སྟོང་ཉིད་ལ་སོགས་བདག་སྦྱོར་བ། །རྡོ་རྗེ་སེམས་དཔའ་ཞེས་སུ་སྨྲ། །རྡོ་རྗེ་ཕྱག་རྒྱ་རྗེས་སུ་ཆགས་པ་ལ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་
བཛྲ་སྭ་བྷཱ་བ་ཨཱཏྨ་ཀོ྅་ཧྃ། སངས་རྒྱས་མཆོད་པ་ལ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅་ཧྃ། རང་གི་དཀྱིལ་འཁོར་སྔ་མ་བཞིན། །མདུན་དུ་བསམས་ནས་ནམ་མཁའ་ལ། །ཁྱབ་པའི་སྦྱོར་བས་གཅིག་བྱས་ཏེ། ། དཀྱིལ་འཁོར་སྔ་མ་བཞིན་བསམས་བཟླས། །བཅོམ་ལྡན་མི་མཉམ་གཞུག་བཅིང་བཞུགས། །རྡོ་རྗེ་ཕྱག་རྒྱ་ཐུགས་ཀར་བསྣམས། །གཡས་པར་འཁོར་ལོ་རིན་པོ་ཆེ། །པདྨ་རལ་གྲི་གཡོན་པའོ། །དེ་ཉིད་གསུམ་གྱི་ཚུལ་གྱིས་ནི། །ཅི་ཙམ་ནུས་པར་བཟླས་པར་བྱ། །སྐྱོན་ཡིད་ཀྱིས་དྲངས་ནས་ནི། །དེ་དག་ཐམས་ཅད་སྙིང་གར་གཞུག །མཉམ་པ་ཉིད་ཀྱི་གནས་འདུག་ན། །ལུས་ཀྱིས་ཇི་ཙམ་བསྐྱོད་པ་དང་། །ཚིག་ཏུ་རབ་ཏུ་འཕྲོ་བའི་རྣམས། །དེ་དག་སྔགས་དང་ཕྱག་རྒྱར་འགྱུར། །རྟག་ཏུ་བསྒོམ་པའི་སྦྱོར་བས་ནི། །དེ་ལ་སེམས་དཔའི་གཞན་མ་ཡིན། །རྣལ་འབྱོར་ངོ་བོ་གཟུགས་ཅན་ལ། །ལྷ་མོ་རྣམས་ཀྱང་དེ་ལ་འཛིན། །དབང་པོ་ལམ་དུ་གང་གྱུར་པ། །དེ་དང་དེ་ཡི་ངོ་བོ་དག །ཤིན་ཏུ་མཉམ་གཞག་སྦྱོར་བས་སུ། །བདག་ཉིད་ལྷག་པའི་ལྷར་བྱའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ལྷའི་ལེའུ་སྟེ་ལྔ་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་སྐུ་དང་གསུང་དང་ཐུགས་རྡོ་རྗེའི་དེ་བཞིན་གཤེགས་པ་ལ་དེ་བཞིན་གཤེགས་པ་ཐམས་ཅད་དང་། །བྱང་ཆུབ་སེམས་དཔའ་ཐམས་ཅད་ཀྱིས་ཚིག་མཐུན་པར་སྒྲ་དབྱངས་གཅིག་གིས་གསོལ་བ་བཏབ་པ། བཅོམ་ལྡན་དེ་བཞིན་གཤེགས་ཀུན་གྱི། །ཡེ་ཤེས་གཅེས་པ་དྲི་མེད་པ། །བྱང་ཆུབ་སེམས་ནི་རིན་པོ་ཆེ། །བླ་ན་མེད་པ་བཤད་དུ་གསོལ། །དེ་ནས་བཅོམ་ལྡན་འདས་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པར་ཐུགས་སུ་ཆུད་ནས། བྱང་ཆུབ་སེམས་དཔའ་རྣམས་ལ་འདི་སྐད་ཅེས་བཀའ་སྩལ་ཏོ། །སེམས་ནི་ལུས་
ཀྱི་རྣམ་པ་ཡིན་ལ། ལུས་ཀྱང་སེམས་ཀྱི་རྣམ་པ་ཡིན་ཞིང་སེམས་ཀྱང་ཚིག་གིས་རབ་ཏུ་བརྗོད་པ་ཡིན་ནོ། །དེ་ནས་བྱང་ཆུབ་སེམས་དཔའ་དེ་དག་གིས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་སྦྱོར་བ་ཐོབ་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཀྱེ་མ་ཀུན་དུ་བཟང་པོ་འདི། །སྐུ་གསུང་ཐུགས་ཀྱི་རྡོ་རྗེ་ཅན། །ཆོས་རྣམས་སྐྱེ་བ་མེད་པ་སྟེ། །གཡོ་བ་མེད་ཅིང་གནས་པ་མེད། །རྟོག་པའི་དྲི་མ་སྤངས་པ་ཡིན། །བསྐྱེད་པར་བྱ་ཞེས་རབ་ཏུ་གསུངས། །དེ་ནས་བཅོམ་ལྡན་འདས་མི་འཁྲུགས་པ་དེ་བཞིན་གཤེགས་པ་གསུང་སྤྲོས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་མ་སྐྱེས་ཏེ། །ཆོས་ཅན་མེད་ཅིང་ཆོས་ཉིད་མེད། །ནམ་མཁའ་བཞིན་དུ་དམིགས་མེད་པའི། །བྱང་ཆུབ་སེམས་ནི་བརྟན་པ་ཡིན། །བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མི་འཁྲུགས་པས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་འབྱུང་གནས་ཀྱིས་དེ་བཞིན་གཤེགས་པ་ཐམས་ཅད་དམིགས་སུ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་དངོས་མེད་དེ། །ཆོས་ཀྱི་མཚན་ཉིད་སྤངས་པ་ཡིན། །བདག་མེད་ཆོས་ལས་ལེགས་བྱུང་བའི། །བྱང་ཆུབ་སེམས་ནི་བརྟན་པ་ཡིན། །ཞེས་བཅོམ་ལྡན་འདས་རིན་ཆེན་ཏོག་གིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་ཀྱིས་རྡོ་རྗེ་མེ་ལྕེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་སྐྱེ་བ་མེད་པ་སྟེ། །དངོས་པོ་ངོ་བོ་ཡོད་མིན་པས། །ནམ་མཁའི་གོ་འཕང་འཐོབ་བོ་ཞེས། །དངོས་རྣམས་རབ་ཏུ་བརྗོད་པ་ཡིན། །ཞེས་བཅོམ་ལྡན་འདས་འོད་དཔག་མེད་ཀྱིས་གསུངས་སོ། །དེ་ནས་བཅོམ་ལྡན་
འདས་དེ་བཞིན་གཤེགས་པ་དོན་ཡོད་གྲུབ་ཀྱིས་དེ་བཞིན་གཤེགས་པ་ཐམས་ཅད་ཀྱི་བླ་མའི་ཡང་བླ་མའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རང་བཞིན་འོད་གསལ་བ། །གཟོད་ནས་དག་ཅིང་རྙོག་པ་མེད། །སེམས་ཅན་མེད་ཅིང་སྲོག་ཀྱང་མེད། །སངས་རྒྱས་ཉིད་དང་བྱང་ཆུབ་མེད། །རྨི་ལམ་སྒྱུ་མ་ལྟར་སྣང་བའི། །བྱང་ཆུབ་སེམས་ནི་བརྟན་པ་ཡིན། །ཞེས་བཅོམ་ལྡན་འདས་དོན་ཡོད་གྲུབ་ཀྱིས་གསུངས་སོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགསདེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པའི་བྱང་ཆུབ་ཀྱི་སེམས་རྣམ་པར་དག་པ་ཐོབ་ནས་ངོ་མཚར་སྐྱེས་པར་གྱུར་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ཀྱེ་མའོ་སངས་རྒྱས་ཀྱེ་མའོ་དག །ཀྱེ་མའོ་ཆོས་ནི་བསྟན་པ་རྣམས། །བདག་མེད་ཆོས་ལས་ལེགས་བྱུང་བ། །བྱང་ཆུབ་སེམས་ཁྱོད་ཕྱག་འཚལ་ལོ། །བྱང་ཆུབ་སེམས་ཀྱི་བསྒོམ་པ་ཡི། །མི་གཡོ་ཡི་གེ་ལས་བྱུང་ཞིང་། །རྨི་ལམ་ལ་སོགས་མ་སྐྱེས་པ། །བྱང་ཆུབ་སེམས་ཁྱོད་ཕྱག་འཚལ་ལོ། །གནས་དང་སྟན་ནི་རྣམ་བསམས་ཏེ། །སེམས་དཔའི་སྐྱིལ་མོ་ཀྲུང་བཅས་ནས། །དང་པོར་རང་བཞིན་དག་གོ་ཞེས། །དག་པའི་ཆོས་ཀྱི་ཚུལ་ལ་གནས། ཡིད་ཀྱིས་ཧཱུྃ་བྱས་རྡོ་རྗེ་ཅན། །རྡོ་རྗེ་སེམས་མས་བྱིན་གྱིས་བརླབ། །རིན་ཆེན་ལུས་སུ་ང་རྒྱལ་བྱ། །ལག་པ་བསྟོད་དེ་བསྐོར་བ་ན། །ལྕགས་ཀྱུ་ཡིས་ནི་སྤྱན་ཡང་དྲང་། །བྱོན་ནས་དྲང་པོར་ཕྱོགས་བཅིང་སྟེ། །དམ་ཚིག་མཆོག་ཀྱང་དབུལ་བར་བྱ། ། གདན་རྣམས་སོ་སོར་ཕུལ་ནས་སུ། །མཆོད་ཡོན་འབུལ་བའི་སྦྱོར་བ་བྱ། །དབང་བསྐུར་མཚོན་ཆ་གོ་ཆ་སོགས། །སིལ་སྙན་མཆོད་སོགས་ངོ་བོ་བྱ། །རྣམ་པ་ཀུན་གྱིས་མཉེས་བྱ་བ། རྣལ་འབྱོར་བདག་ཉིད་ཅན་གྱི་བདག །རྣལ་འབྱོར་རྣམ་
གསུམ་ཤེས་བྱ་སྟེ། །བྱིན་གྱིས་བརླབས་དང་ཡོངས་བརྟགས་དང་། །གཟུགས་ཉིད་ཡོངས་སུ་རྫོགས་པ་དག །རྣལ་འབྱོར་ཡིན་ཞེས་སངས་རྒྱས་གསུངས། །སྔགས་ཀྱི་བྱིན་རླབས་ང་རྒྱལ་བསྐྱེད། །རྣལ་འབྱོར་བྱིན་རླབས་ཡིན་པར་གསུངས། ། བྱང་ཆུབ་སེམས་ནི་དག་པ་དང་། །གསང་སྔགས་ས་བོན་སྐྱེ་བ་ཆེ། །ཕྱག་རྒྱ་ཚོགས་སུ་བརྟག་པ་ཡི། །རིམ་གྱིས་གཟུགས་ཀྱིས་རྫོགས་བྱ་བ། །དེ་ནི་བརྟགས་པས་བརྗོད་པ་སྟེ། །རྣལ་འབྱོར་ཆོ་ག་ཡིན་པར་གསུངས། །བསྡུ་དང་སྤྲོ་བར་བྱ་བ་ལས། །རྣམ་པའི་མཆོག་ཀུན་ལྡན་པ་དང་། །སྐད་ཅིག་ཡེ་ཤེས་ཀྱིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །དང་པོར་དམ་ཚིག་བྱིན་བརླབས་པར། །རྣལ་འབྱོར་རིག་པ་དག་གིས་བརྟག །རབ་ཏུ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བཤད། །ཉོན་མོངས་དྲི་མར་བཅས་པའི་སེམས། །བྱང་ཆུབ་སེམས་ཀྱིས་དག་བྱ་སྟེ། །དེ་ནི་རང་བཞིན་དག་པའོ་ཞེས། །བརྗོད་ཅིང་ཐལ་མོ་གསུམ་གྱིས་སྦྱར། །དག་གྱུར་དེ་ནས་བློ་ཡིས་ནི། །སེམས་ལ་སོ་སོར་བརྟག་པར་བྱ། །སེམས་ལ་སོ་སོར་བརྟགས་ནས་ཀྱང་། །ཕྱི་རོལ་རང་བཞིན་སྟོང་བར་བྱ། །སེམས་ཙམ་ལ་ནི་གནས་ནས་སུ། །བྱང་ཆུབ་ཚོགས་ཀྱི་བག་ཆགས་དེས། །བསྒོམ་པར་བྱ་བའི་ངོ་བོ་དག །ཟླ་བའི་གཟུགས་སུ་རྣམ་པར་བརྟག །དག་པའི་པདྨ་ལ་གནས་པ། །ཨོཾ་གྱི་མྱུ་གུས་བསྐྲུན་པ་ཡི། །ཡན་ལག་ཀུན་གྱི་མཚན་ཉིད་གཟུགས། །རྡོ་རྗེ་སྐུ་ནི་བསྒོམ་པར་བྱ། ཨཱཿཞེས་བྱ་བའི་སྤྲོས་མེད་གསུང་། །སེམས་ནི་ཧཱུྃ་ཞེས་བྱ་བར་སྤྲུལ། །ཡི་གེ་གསུམ་གྱིས་བྱིན་བརླབས་ལུས། ། སྙིང་ལ་གནས་པ་ཟླ་བའི་གཟུགས། །དེ་ལ་རང་གི་ཡི་གེ་ནི། །མདོག་གཟུགས་འོད་ནི་བྱེད་བསམས་ཏེ། །ང་རྒྱལ་བསྐྱེད་ནས་དེ་ལ་ནི། །རྡོ་རྗེའི་བདག་ཉིད་བདག་ཉིད་བརྗོད། །རྒྱན་ཀུན་ཡོངས་སུ་རྫོགས་པ་དང་། །འོད་ཀྱི་དཀྱིལ་འཁོར་གྱིས་བརྒྱན་
པ། །ཆ་ཤས་ཀྱི་ནི་དྲ་བ་ཅན། །ཡེ་ཤེས་སེམས་དཔའ་རྫོགས་པར་བརྟག །དེ་འོག་ལག་པའི་ཕྱག་རྒྱ་ཡིས། །གོ་ཆ་མཚོན་ཆ་ལ་སོགས་བྱ། །རྫོགས་སངས་རྒྱས་ལྔ་དབང་བསྐུར་ཏེ། ཅོད་པན་ཕྲེང་བ་རྣམས་ཀྱིས་བཀླུབས། ། དེ་ནས་དེ་འོག་སངས་རྒྱས་ཀྱི། །སྤྲུལ་པ་མཛད་པའི་སྒྱུ་མ་འཕྲོ། །ཡན་ལག་བཞི་པ་དཔུང་ལྡན་པའི། །ཕྱོགས་བཅུར་ཁྲོ་བོ་བཅུ་དག་དང་། བསྙེགས་མ་དང་ནི་ཏོག་ལྡན་མ། །མཚོན་ཆ་མ་དང་རྩེད་མོ་ཅན། །སྒྱུ་མའི་ཆ་བྱད་རྣམ་པའོ། །རྣམ་པར་འཕྲུལ་པ་བྱིན་གྱིས་བརླབ། །ཀུན་ལ་ཁྱབ་པར་བྱེད་པ་ཡི། །སྣ་ཚོགས་དབུས་སུ་བཞག་ནས་ནི། །དེ་ཉིད་ཆེན་པོ་བདག་ཉིད་ལྔས། །ཕྱོགས་བཞི་འཁོར་ལ་ཁྱབ་བྱ་སྟེ། །དགའ་བས་དགའ་བྱེད་བཞི་ཡང་སྤྲོ། །ཏིང་འཛིན་ཀུན་གྱི་དགའ་བ་ལ། ། འོས་པར་བྱེད་པའི་སྔགས་པ་ཡི། །འཁོར་ལོ་དང་ནི་རྡོ་རྗེའི་གཟུགས། །པདྨའི་གཟུགས་ལ་དེ་དག་ནི། །འཁོར་ལོ་ཀུན་ལ་པདྨ་ཡི། །ངོ་བོ་ཡིས་ནི་རོལ་པ་དང་། །ཨེ་ཞེས་བྱ་བ་འཕྲོ་བ་ལས། །མདོག་ལྡན་བདག་ཉིད་གཟུགས་སུ་བྱ། །མཛེས་པའི་རྒྱན་རྣམས་ཀུན་ལྡན་པའི། །ཉིད་ཀྱི་གདན་ལ་བཞུགས་པར་བལྟ། །སྒེག་དང་གླུ་དང་གར་རྣམས་དང་། །རྒྱལ་མཚན་ལ་སོགས་ཚོན་དགྱེ་དང་། །སིལ་སྙན་མཆོད་པའི་རྣམ་པ་ནི། །སྣ་ཚོགས་རྣམས་ཀྱིས་མཆོད་པ་བྱ། །རྣམ་པ་ཀུན་དང་ལྡན་པར་ནི། ། བདག་ཉིད་ཀྱི་ནི་ལུས་བསྒོམས་ནས། །མྱུར་ཆེས་བྱ་བ་བུལ་བ་དང་། །མི་གསལ་གུག་སྐྱེད་ཉམས་པ་དང་། །རྟོག་པ་ངན་པ་རྣམ་པར་སྤངས། །དེ་ནས་གསང་སྔགས་བཟླས་བརྗོད་བྱ། །བཟླས་པས་སྐྱོ་ན་ལག་གཡས་ཀྱིས། །བསྒྲིམས་ནས་རྡོ་རྗེ་གསོར་ནས་སུ། །གཡོན་པས་དྲིལ་བུ་ལ་གསིལ་ཞིང་། །རྡོ་རྗེ་གླུ་ཚུལ་སྣ་ཚོགས་དང་། །བ་དན་ཚུལ་དུ་བྱས་པས་མཆོད། །བཟླས་པ་ཡིས་ནི་འཇུག་བརྟུལ་ནས། །གཤེགས་སུ་གསོལ་དང་རང་ཉིད་འགྲུབ། །ལུས་དང་ངག་དང་སེམས་བསྒོམས་ཏེ། །བརྟན་
པོར་ཅི་བདེར་འགྲོ་བར་བྱ། །བར་ཆད་དུ་ནི་གྱུར་ན་ཡང་། །ཡི་གེ་བརྒྱ་པས་བྱིན་གྱིས་བརླབ། །དེ་ལྟར་བསྒོམས་པས་སྒོམ་བྱེད་པ། །རྡོ་རྗེ་ཐེག་པས་རབ་རྫོགས་པའི། །བྱང་ཆུབ་དེ་ནི་མྱུར་ཐོབ་ནས། །ཟླ་ཉི་དཀྱིལ་འཁོར་ལྟ་བུར་སྣང་། །སྣ་ཚོགས་ལས་ཀྱི་ཐོག་འདྲེན་ཅིང་། །རིན་ཆེན་རྒྱལ་མཚན་རབ་དགའ་བྱེད། །རྒྱལ་བྱེད་པདྨའི་གདུང་བརྒྱུད་ཅན། །གནས་ཆེན་འཇིག་རྟེན་དབང་ཕྱུག་འགྱུར། །དཔལ་ལྡན་རིག་སྔགས་ཀུན་གྱི་གཙོ། །དགའ་ཆེན་འདོད་དགུར་ལྕགས་ཀྱུར་འགྱུར། །སྒྱུ་མ་བཞིན་དུ་ཀུན་ཤེས་ཤིང་། །དྲེགས་པ་འཇོམས་བྱེད་ཁྲོ་བར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བྱང་ཆུབ་ཀྱི་སེམས་བསྒོམ་པའི་ཡེ་ཤེས་བསྒྲུབ་པའི་ལེའུ་སྟེ་དྲུག་པའོ། །སྦྱིན་སྲེག་དེ་ཉིད་ལ་གནས་པའི། །མེ་ནི་ལྷ་ཡི་ཞལ་ཡིན་པས། ། སྣ་ཚོགས་ལས་རྣམས་གྲུབ་བྱེད་པའི། །སྦྱིན་སྲེག་ལས་ནི་རབ་ཏུ་བཤད། །སྦྱིན་སྲེག་གིས་ནི་ལྷ་རྣམས་ཚིམ། །ཚིམ་པར་གྱུར་ནས་དངོས་གྲུབ་སྟེར། །གསང་སྔགས་ལྷག་ཆད་གང་ཡིན་པ། །ཐམས་ཅད་སྦྱིན་སྲེག་དག་གིས་བསྐོངས། །དེ་ཕྱིར་སྐུ་གསུམ་ཆོས་མཆོག་གིས། །སྦྱིན་སྲེག་རབ་ཏུ་བསྔགས་པར་མཛད། །གཙུབ་ཤིང་ལས་ནི་བྱུང་བའི་མེ། །དགེ་བ་ཡི་ནི་ལས་རྣམས་བྱེད། །གདོལ་པའམ་དུར་ཁྲོད་བྱུང་བ་ཡི། །མེ་ནི་ལས་རྣམས་རབ་ཏུ་བསྒྲུབ། །ཐབ་ཁུང་ཟླུམ་པོ་གྲུ་བཞི་དང་། ། ཟླ་གམ་དང་ནི་ཟུར་གསུམ་དང་། །དཀྱིལ་འཁོར་གྱི་ནི་ཁ་ཁྱེར་ལ། །རྡོ་རྗེ་མཚན་མ་དག་གིས་བརྒྱན། །སྦྱིན་སྲེག་དེ་ཉིད་ཚུལ་རིག་པས། །ཐབ་ཁུང་རྣམས་ཀྱི་དབུས་སུ་ནི། །པདྨའི་སྟེང་གནས་གཙུག་ཏོར་དང་། །རྡོ་རྗེ་རིན་ཆེན་པདྨ་བཞག །ཇི་ལྟར་དམིགས་པས་བདུགས་ནས་སུ། །ལག་གཉིས་པུས་མོའི་བར་བཞག་སྟེ། །དགང་གཟར་མར་གྱིས་བཀང་ནས་ནི། །བླུགས་གཟར་བཀང་སྟེ་དེ་བཞིན་བསྲེག །སྦྱིན་སྲེག་ལ་དགོས་གཡས་སུ་བཞག །གཡོན་དུ་ཆུ་ཡི་སྣོད་དགོད་དོ། །ལས་ཀུན་
བྱེད་པས་བཟླས་ནས་སུ། །བསང་གཏོར་དང་ནི་འཐོར་འཐུང་བྱ། །ཀུ་ཤ་རྩེ་མོ་རྣོན་པོ་ཡིས། །ཐབ་ཁུང་ཁོར་ཡུག་བསྐོར་བར་བྱ། །མེ་ནི་འབར་བར་ཤེས་པ་དང་། །གཡས་པ་མི་འཇིགས་ཐོབ་སྤྱོད་ཅིང་། །གསང་སྔགས་འདིས་ནི་ཆོ་ག་བཞིན། །མེ་ཡི་ལྷ་ནི་སྤྱན་དྲང་ངོ་། །ཚུར་སྤྱོན་ཚུར་སྤྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །སྲེག་བླུགས་ཞལ་ཟས་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ཨོཾ་ཨགྣ་ཡེ་ཨཱ་དི་བྱ་ཨཱ་བཱི་ཤེ་ཨཱ་བཱི་ཤེ་མ་ཧཱ་ཤྲི་ཡེ་ཧཱ་བྱ་ཀཱ་བྱ་བཱ་ཧ་ནཱ་ཡ་སྭཱ་ཧཱ། ཕྱག་གཡོན་རྡོ་རྗེ་བསང་གཏོར་ཏེ། །མཆོད་ཡོན་མཆོད་པ་རྣམ་ལྔ་དབུལ། །མེ་ཡི་ཕྱོགས་ནས་བོང་པ་ནི། །གསུས་པོ་ཆེ་ལ་མིག་གསུམ་པ། །གདོང་བཞི་པ་ལ་ལག་བཞིར་ལྡན། །མདོག་དམར་རལ་པའི་ཐོར་ཚུགས་ཅན། ། མེ་ཡི་དཀྱིལ་འཁོར་ལ་གནས་ཤིང་། །ལས་ཀྱི་འོད་ཟེར་རྣམས་ཀྱིས་བརྒྱན། །ལག་པ་དང་པོ་མཆོག་སྦྱིན་ལ། །གཉིས་པ་ན་ནི་སྔགས་ནོར་ཕྲེང་། །གཡོན་པ་རིལ་བ་སྤྱི་བླུགས་ཏེ། །གཉིས་པ་ན་ནི་བེ་ཅོན་ཉིད། །མདོག་དམར་རྒྱན་ནི་མེད་པ་ལ། ། དྲང་སྲོང་རྣམས་ཀྱིས་ཡོངས་བསྐོར་བ། །འདི་ལྟའི་གཟུགས་ནི་བསམས་ནས་ཀྱང་། །ཐབ་ཀྱི་དབུས་སུ་བཞུགས་སུ་གསོལ། །དེ་ལ་སྦྱིན་སྲེག་ལ་དགོས་པ། །ཀུན་ལ་ལན་གསུམ་སྲེག་བླུགས་དབུལ། །དེ་ནས་འཐོར་འཐུང་བྱས་ནས་སུ། །འབར་བའི་རྣམ་པར་བསྒྱུར་བར་བྱ། །རིམ་པ་འདི་ཡི་ཚུལ་གྱིས་ནི། །མཁས་པས་ལྷ་རྣམས་ཚིམ་པར་བྱ། །ལེགས་པར་ཚིམ་བྱས་བཟོད་གསོལ་ཏེ། །འདོད་པའི་དངོས་གྲུབ་གསོལ་བ་གདབ། །བུམ་པ་རྒྱལ་མཚན་རྡོ་རྗེ་གདུགས། །པདྨའི་ལྕགས་ཀྱུའི་རྣམ་པ་དང་། །མེ་ལྕེ་མདོག་དཀར་སྣང་བ་དང་། །འཁྱིལ་པའི་མཚན་མས་མཁས་པས་བརྟག །དེས་ནི་མྱུར་དུ་འབྱུང་འགྱུར་བ། །བསྒོམ་དང་བཟླས་ལ་འབད་པར་བྱ། །ཞི་དང་རྒྱས་དང་དབང་ལ་ནི། །ཨོཾ་ཞེས་པ་དང་སྭཱ་ཧཱ་མཐར། །དབྱངས་ཀྱི་རྒྱུད་ནི་
བསྲིང་བ་ནི། །བར་ཆད་མེད་པའི་དབྱངས་ཀྱིས་སྦྱར། །ཞི་བའི་སེམས་ནི་ཞི་བ་ལ། །འབྱོར་པས་རྒྱས་པ་མངོན་པར་སྤེལ། །དྲེགས་བདེ་སྟབས་ཚུལ་བཅས་པ་དང་། །དབང་དུ་གྱུར་པས་དབང་དུ་བྱའོ། །དྲག་ཤུལ་སྤྱོད་ཚུལ་ལ་གནས་པ། །ཧཱུྃ་ཞེས་པ་དང་ཕཊ་དང་བཅས། །ལུས་ནི་མེ་ལྕེ་འབར་བ་དང་། །འཇིག་རྟེན་གསུམ་པོ་བཟར་བསམས་ནས། །བསྐུལ་བའི་ཚིག་དང་སྤེལ་བ་ཡི། །གསང་སྔགས་ཡི་གེ་ངེས་པར་སྦྱོར། སྔགས་གྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །སྣ་ཚོགས་ལས་དང་ལྡན་པ་ཡི། །ཡང་དག་ཡིན་པ་མཆོད་པར་བྱ། །སྦྱིན་སྲེག་དེ་ཉིད་ལ་བསྐུལ་ཞིང་། །དང་པོར་དགང་བླུགས་བསྲེག་ཅིང་དབུལ། །ཕྱིས་ནི་རིམ་བཞིན་རྣམ་པར་སྤེལ། །ཞི་དང་རྒྱས་དང་དབང་རྣམས་ལ། །དགེ་བའི་རྫས་རྣམས་སྦྱིན་སྲེག་བྱ། བཤང་གཅི་ཁྲག་རྐང་རུས་པ་དང་། །ཤ་ཆེན་དག་ཀྱང་སྦྱིན་སྲེག་བྱ། །ཅི་སྟེ་ཡེ་ཤེས་སེམས་དཔའི་ཞལ། །མི་གཙང་བ་ཡིས་བཀང་ན་ཀོ། །ཇི་ལྟར་སྡིག་པ་སྐྱེ་མི་འགྱུར། །གལ་ཏེ་སྡིག་འགྱུར་འབྲས་བུ་གང་། ། སེམས་ཅན་མི་ཤེས་པས་རྨོངས་པ། །ཐབས་དང་ཤེས་རབ་རྣམ་སྤངས་ཤིང་། །ཕྱི་རོལ་དངོས་ལ་མངོན་ཞེན་པ། །རྣམ་རྟོག་དྲ་བས་བླུགས་བྱས་གང་། །དེ་དག་གིས་ནི་དགེ་སྡིག་གི། །ཕུང་པོ་གཉིས་སུ་རྣམ་པར་བརྟགས། །ཆོས་འདི་རང་བཞིན་གྱིས་དག་སྟེ། །སྐྱེ་བ་མེད་ཅིང་གནས་མེད་ཀྱང་། །སེམས་ཅན་ཤེས་པ་སྤེལ་བའི་ཕྱིར། །སངས་རྒྱས་རྣམས་ཀྱིས་ཐབས་སུ་བསྟན། །དམ་པའི་དོན་དུ་དགེ་སྤངས་ནས། །བསོད་ནམས་མིན་པ་ཅི་ཞིག་སྨོས། །དཔེར་ན་མི་གང་ཆུ་ཀླུང་གི། །ཕ་རོལ་འགྲོ་བའི་སེམས་ཅན་དག །རྩྭ་དང་ཤིང་ལ་སོགས་བསྡུས་ནས། །ཆུ་ལ་རྒལ་བའི་གཟིངས་བྱས་ཏེ། །དེ་ལ་འཇུག་སྟེ་ལེགས་བརྒལ་ནས། །བོར་ཏེ་བདེ་བར་འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །ཆོས་ཀྱི་ལམ་ནི་བསྐྱེད་བྱས་ཀྱང་། །ཆོས་དང་
ཆོས་མིན་རྣམ་སྤངས་ནས། །བྱང་ཆུབ་བདེ་བ་ཐོབ་པ་ནི། །དེ་ཕྱིར་རྣམ་རྟོག་རྣམ་སྤངས་ལ། ཟབ་མོ་ཡི་ནི་ཆོས་སྤེལ་ཏེ། །དེ་བཞིན་གཤེགས་པས་གསུངས་རྣམས་ལ། །སྔགས་རིག་རྣམ་རྟོག་མ་བྱེད་ཅིག །རྣམ་རྟོག་རྨོངས་པ་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་པས། །ནམ་མཁའ་ལྟ་བུར་དྲི་མེད་པའི། །རྣམ་པར་མི་རྟོག་ཏིང་འཛིན་གནས། དབང་པོ་གཉིས་ནི་མཉམ་སྦྱར་ཏེ། །ལུས་དང་ངག་དང་སེམས་བསྡུས་ནས། །ངའོ་སྙམ་པས་གཟི་བསྐྱེད་ལུས། །རྣམ་པ་ཀུན་གྱིས་རྣམ་བརྒྱན་ན། །རྣལ་འབྱོར་ལྡན་པས་ཚེ་འདི་ལ། །ཡེ་ཤེས་རྫོགས་པ་ཉིད་དུ་འགྱུར། །ལས་ལས་བྱུང་བར་བསྟན་པ་ཡི། །སྐྱེས་པ་བུད་མེད་གཟུགས་མང་ལ། །མཉེས་པ་ཉིད་དུ་མི་བྱ་འདི། །རྡོ་རྗེ་ལུས་ཅན་དམ་ཚིག་ཡིན། །ངན་རྟོག་བཟང་རྟོག་དྲ་བ་ཡི། །སེམས་ཀྱིས་སེམས་ཅན་རྣམས་ལ་ནི། །སྣ་ཚོགས་གདུང་བས་སུན་མི་འབྱུང་། །རྡོ་རྗེ་དང་ལྡན་དམ་ཚིག་ཡིན། །སྲེད་པས་བསྐྱེད་རྩུབ་ཕྲ་མ་ཡི། །ཚིག་དག་རྣམ་པར་མི་སྨྲ་ཞིང་། །མཉན་ན་བདེ་བ་བྱེད་པ་འདི། །རྡོ་རྗེ་ངག་ཅན་དམ་ཚིག་ཡིན། །རྣམ་པར་སྣང་མཛད་ཆེན་འཁྲུག་མཆོག །ཤ་ཡི་ཁམས་ལ་གནས་པ་ཡིན། །རྐང་ལ་མི་འཁྲུགས་རྒྱས་པ་སྟེ། །ཁྲག་ལ་རིན་ཆེན་འབྱུང་བ་གཙོ། །སེམས་ཅན་རྣམས་ཀྱི་རུས་ཕུང་གི། རུས་གོང་ལ་ནི་འོད་དཔག་མེད། །རྩ་ཡི་ཚོགས་རྣམས་རྣམ་འབྲེལ་ལ། །ཐུབ་པ་སྐྱེས་མཆོག་དོན་ཡོད་ལ། །དམ་ཚིག་ཤིས་པ་རྣམས་ལ་ནི། །གསང་ཆེན་པ་ཡིས་བསྟན་པ་འདི། །བློ་ལྡན་རྡོ་རྗེ་རྣམས་ཀྱིས་ནི། །རྟག་ཏུ་བརྟེན་ཅིང་བསྒོམ་པར་བྱ། །འདོད་ཆགས་དེ་བཞིན་གཏི་མུག་རྨོངས། །སྲེད་དང་འདུ་བྱེད་རྣམ་སེལ་བའི། །ཆོས་ནི་རྣམ་པ་ལྔ་པོ་འདི། །ཐུབ་པ་སྐྱེས་མཆོག་རྣམས་ཀྱིས་གསུངས། །བཤང་གཅི་ཁུ་ཆུ་མཆིལ་མ་ཁྲག །འཛག་པ་འབྱུང་བ་བཞིས་བསྡུས་པ། །བསྒོམ་པའི་བློ་གྲོས་རྟོགས་པ་ཡིས། །དམ་
ཚིག་བརྟན་པར་བྱ་བ་སྟེ། །རྟག་ཏུ་བཟའ་ཞིང་སྦྱིན་པར་བྱ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་སྦྱིན་སྲེག་གི་ལེའུ་སྟེ་བདུན་པའོ།། །།དེ་ནས་གཞན་ཡང་བཤད་བྱ་བ། །འགྲོ་བ་མི་ཤེས་མུན་བསལ་ཕྱིར། །ཡེ་ཤེས་ཉི་མ་ཤར་བ་ལས། ། ཀེག་པུ་མུན་པ་བསལ་ཚུལ་གསུངས། །གཤིན་རྗེའི་གཤེད་ལ་སོགས་པ་ཡི། །མདོག་དང་ཕྱག་མཚན་ལ་སོགས་པ། །དེ་ཀུན་སྔོན་དུ་རྒྱས་པ་རུ། །བྱེ་བྲག་གིས་ནི་རྒྱས་པར་བསྟན། །དེ་ནི་ལས་ཀྱི་ཁྱད་པར་གྱི། །དབང་དུ་བྱས་པ་ཁྲོ་བོའི་ཚོགས། ། གཞན་དུ་མ་གསུངས་གང་ཡིན་པ། །དེ་དག་འདི་རུ་བཤད་པར་བྱ། །བྲུྃ་གྱི་ཡེ་ཤེས་ལས་བྱུང་བ། །གཙུག་ཏོར་གཟི་བརྗིད་ཕུང་པོ་སྟེ། །ཞལ་གསུམ་སེར་པོ་མདངས་དང་ལྡན། །ཕྱག་དྲུག་ཉི་མ་ལ་སོགས་པ། །འཛིན་ཅིང་སྐྱིལ་མོ་ཀྲུང་བཅས་པ། ། རལ་པའི་གཙུག་ཏོར་གྱིས་བརྒྱན་ཅིང་། །འཇིག་རྟེན་ཁམས་ཀུན་འཁྲུག་བྱེད་པའི། །གཟུགས་ཀྱི་འཕྲོས་པས་ནམ་མཁའ་གང་། །རིག་མས་སྐུ་ལ་རབ་འཁྱུད་པས། །ཆགས་ཕྱིར་སྤྲོ་བའི་རྩོལ་བ་ཅན། །འདི་འདྲ་སྒོམ་པར་བྱེད་པ་ལ། །བགེགས་ཀྱིས་གནོད་པ་ཡོང་མི་གོས། སྐྱོན་མེད་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཡང་ནི་བྲུྃ་ཀྱི་ཡེ་ཤེས་ལས། །བྱུང་བ་སྔགས་ཀྱི་འཁོར་ལོ་ཅན། །ཞལ་གསུམ་གསེར་འདྲ་མདངས་པོ་ཆེ། །ཕྱག་དྲུག་འཁོར་ལོ་ལ་སོགས་པ། །རལ་པའི་གཙུག་ཏོར་གྱིས་བརྒྱན་པ། །འཛིན་ཅིང་སྟག་གི་སྨད་གཡོགས་ཏེ། །ཐོད་པའི་ཕྲེང་བས་སྐུ་ལ་བརྒྱན། །རིག་མ་དང་ལྡན་ཆགས་པ་པོ། །འཇོལ་སྒེག་ཉམས་ཀྱི་སྦྱོར་བ་མཛད། །འདི་སྒོམ་སྤྲོ་བར་བྱེད་པ་ལ། །ཉིན་དང་མཚན་དུ་རྡོ་རྗེ་སེམས། །འཁོར་བཅས་གནས་སུ་བྱོན་ནས་སུ། །རྟག་ཏུ་སྲུང་བ་ཉིད་དུ་བྱེད། བཀའ་བཞིན་བྱེད་པས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་བཞིན་བྲུྃ་གྱི་ཡེ་ཤེས་ལས། །བྱུང་བའི་ཁྲོ་བོ་གཙུག་ཏོར་རྒྱལ། །ཞལ་གསུམ་སེར་པོ་མདངས་དང་ལྡན། །ཕྱག་དྲུག་ལྕགས་ཀྱུ་ལ་སོགས་
པ། །འཛིན་ཅིང་སྦྲུལ་གྱིས་ཡང་དག་བརྒྱན། །འོག་ཏུ་བགེགས་ཀྱི་གཙོ་མནན་ནས། །གད་མོའི་སྒྲས་ནི་འདེབས་པར་བྱེད། །རལ་པའི་གཙུག་ཏོར་གྱིས་བརྒྱན་པ། །ཁྲོ་བོ་འདི་འདྲ་སྒོམ་བྱེད་པའི། །རྣལ་འབྱོར་གང་ལ་སངས་རྒྱས་ཀྱི། ། སྤྲུལ་བའི་བགེགས་ཀྱང་རླག་བྱེད་ན། །གཞན་མ་རྣམས་ནི་སྨོས་ཅི་དགོས། །སྙིང་འགུགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བྲུྃ་ལས་ཡང་ནི་བྱུང་བ་ཡི། །གཙུག་ཏོར་དམ་ཚིག་སྤྱོད་པན་ཅན། །ཞལ་གསུམ་གསེར་ཞུན་མདངས་ལྡན་པ། །ཕྱག་དྲུག་ཀ་པཱ་ལ་སོགས་པ། །འཛིན་ཅིང་སྣ་ཚོགས་རབ་ཏུ་འབར། །རལ་པའི་གཙུག་ཏོར་གྱིས་བརྒྱན་པ། །ཞབས་རྣམས་བསྒྱུར་ཞིང་རྣམ་པར་འཕེན། །སྤྲོ་དང་བསྡུ་བའི་བློ་གྲོས་ཅན། །འདི་འདྲ་གང་ཞིག་བསྒོམ་པ་ལ། བིི་ནཱ་ཡ་ཀ་ལ་སོགས་པའི། ། བགེགས་ཀྱིས་སྐབས་ནི་མི་རྙེད་ཕྱིར། །ཇི་བཞིན་རབ་ཏུ་བསྒོམ་པར་བྱ། །གཞན་གྱིས་མི་ཐུབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བྲུྃ་གྱི་ཡི་གེ་ལས་ཀྱང་བྱུང་། །མིང་གི་གཙུག་ཏོར་རྣམ་པར་འཐོར། །ཞལ་གསུམ་གསེར་ནི་བཙོ་མ་འདྲ། །ཕྱག་དྲུག་ཏྲི་ཤཱུལ་སོགས་པ། །འཛིན་ཅིང་སྲོག་སོང་སྟེང་ན་གནས། །རོལ་པའི་སྟོབས་ཀྱིས་བགེགས་མཆུ་བཅིངས། །རལ་པའི་གཙུག་ཏོར་གྱིས་བརྒྱན་པ། །སངས་རྒྱས་སྤྲིན་ནི་སྤྲོ་བའོ། །གང་ཞིག་དེ་འདྲ་སྒོམ་བྱེད་པའི། །རྣལ་འབྱོར་དེ་ཡིས་གོ་ཆ་བགོས། ། སྲ་བའི་ངང་ཚུལ་ཅན་ཡིན་པས། །བགེགས་ལུས་གང་གིས་མི་གཡོའོ། །བགེགས་ལས་རྒྱལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བྲུྃ་གྱི་ཡེ་ཤེས་མཐུ་ལས་བྱུང་། །གཙུག་ཏོར་རྣམ་པར་འཇོམས་པའི་མཆོག །ཞལ་གསུམ་གསེར་འདྲའི་ཉི་འོད་མཚུངས། །ཕྱག་དྲུག་རྡོ་རྗེ་ལ་སོགས་པ། །འཛིན་ཅིང་ཚེམས་ཀྱིས་སྒྲོས་མནན་ཏེ། །ཆགས་ལྡན་རིག་མས་འཁྱུད་པའོ། །རལ་པའི་གཙུག་ཏོར་གྱིས་བརྒྱན་པ། །ཁྲག་ཅན་ལྗགས་ཀྱང་འདྲིལ་བ་སྟེ། །བླ་མེད་བྱང་ཆུབ་ཐོབ་འདོད་པ། །འདི་འདྲ་
སྒོམ་པར་བྱེད་པ་ལ། །བསྐལ་པ་བརྒྱད་ཅུའི་བར་དུ་ཡང་། །བགེགས་ཀྱི་གནོད་པ་ཡོང་མི་འོང་། །བགེགས་ཀྱི་སྟོང་པ་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཡང་ནི་བྲུྃ་གྱི་ཡེ་ཤེས་ལས། །ཡང་དག་བྱུང་བའི་སྐབས་དཀར་པོ། །ཞལ་གསུམ་གསེར་ཞུན་ལྟ་བུར་གནས། །ཕྱག་དྲུག་གདུགས་ལ་སོགས་འཛིན་ཅིང་། །སྐྱབས་མེད་ཕོངས་པའི་སྐྱབས་མཛད་ཅིང་། །མ་ནིང་རྣམས་དང་ཟ་མ་ལ། །བུ་ནི་སྦྱིན་པར་བྱེད་པ་པོ། །རལ་པའི་གཙུག་ཏོར་གྱིས་བརྒྱན་པ། །རིག་མ་དང་ལྡན་སྐུ་ཆེན་འདི། །རྣལ་འབྱོར་གང་གིས་སྒོམ་བྱེད་ཅིང་། །བཟླས་པ་རྩེ་གཅིག་ཏུ་བྱེད་ན། །བགེགས་ཀྱི་གནོད་པས་དེ་མི་བརྫི། །རིན་ཆེན་གྱི་སྐྱབས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །རྣལ་འབྱོར་ཁྱད་པར་ཅན་གྱིས་ནི། །འདི་རྣམས་བྱང་ཆུབ་བསྲུང་བའི་ཕྱིར། །འཁོར་ལོ་གཙོ་བོར་རབ་བསྒོམས་ན། །ནང་གི་བགེགས་ཀྱིས་ཡོང་མི་ཚུགས། །བྱང་ཆུབ་སྙིང་པོ་དོན་གཉེར་བས། །འདི་འདྲའི་འཁོར་ལོ་ཅན་བསྒོམས་ན། །བསྒྲིམས་ནས་རྣལ་འབྱོར་བསྒོམས་པ་ཡིས། །རིང་པོར་མི་ཐོགས་འདོད་པ་འཐོབ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བྱང་ཆུབ་ཀྱི་སྙིང་པོའི་རྒྱན་གཙུག་ཏོར་འབྱུང་བའི་ལེའུ་སྟེ་བརྒྱད་པའོ།། །།དེ་ནས་ཡང་རྡོ་རྗེ་མཁའ་འགྲོ་མ་ཐམས་ཅད་འདུས་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་རྡོ་རྗེ་འཛིན་པ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །འདི་ཡི་དཔལ་ནི་གང་ཞིག་ལགས། །རྡོ་རྗེ་དང་ནི་སྙིང་པོ་དང་། །དེ་བཞིན་རྒྱན་གྱི་དོན་ནི་ཅི། །ཀྱེ་ཧོ་མཆོག་དེ་བསྟན་དུ་གསོལ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་རྡོ་རྗེ་འཛིན་པས་དེ་དག་ལ་འདི་སྐད་ཅེས་བཀའ་སྩལ་ཏོ། །འདི་ནི་ཐུན་མོང་མ་ཡིན་པའི། །གསང་བའི་རྒྱུད་དུ་རབ་སྦས་པ། །ཇི་བཞིན་གནས་པའི་དེ་ཁོ་ན། །ཡང་དག་བསྟན་གྱིས་རྩེ་གཅིག་ཉོན། །ལུས་ངག་ཡིད་གསུམ་བདེ་དམ་པས། །ལྷ་མོ་ལས་ནི་བསྐྱོད་བྱ་སྟེ། །བྱང་ཆུབ་ཆེན་
པོ་བདེ་བ་ཡིས། །ཚུལ་བཞིན་དུ་ནི་སྔགས་པས་བྱ། བསྐུལ་བའི་སྙིང་པོས་འདི་སྨྲ་སྟེ། ཛྫ་ཞེས་སྐད་ཅིག་སྐད་ཅིག་ཏུ། །རང་གི་གནས་ན་གནས་པ་ཡིན། །དེ་ཉིད་ལྷ་ཉིད་བསྐྱེད་པར་བྱ། །བཅུ་དྲུག་ཆ་དང་ཡང་དག་ལྡན། །ཟླ་བ་གསང་བའི་ཐིག་ལེ་ལ། །མེ་ཏོག་དང་ནི་འདྲ་བ་ཉིད། །རླུང་གིས་ཕུལ་བས་བསྐྱོད་པར་བྱ། །དེ་བཞིན་བསྐྱོད་པས་བསྒྲུབ་པར་བྱ། །དེ་བཞིན་དུ་ཡང་བསྐུལ་བྱ་བ། །རྒྱུད་ཀྱི་ཕྲེང་ནི་འོད་གསལ་བཞིན། །སྟེང་དང་མདུན་དུ་རྩ་གཉིས་ལས། །བཅུ་དྲུག་གནས་སུ་ཡང་དག་གནས། །དེ་ལས་སྙིང་དབུས་རབ་ཞུགས་ཏེ། །རླུང་གི་སྦྱོར་བས་ཕུལ་བྱས་པས། །སྟེང་དང་མདོག་རབ་མཛེས་རྫོགས་སྐུ། །བདག་གི་དཔལ་དུ་ཤེས་པར་བྱ། །དེ་ལས་བྱུང་བའི་དངོས་གྲུབ་ཆེ། །ནོར་བུ་ལ་གནས་རྟོག་བྲལ་བ། །ཐིག་ལེ་ཡིག་མེད་བསྡུས་པའི་སྐུ། །ལྷན་ཅིག་སྐྱེས་པར་ཤེས་པར་བྱ། །དེ་ལ་དེ་ཡི་གཟུགས་ཀྱི་སྐུ། །ནམ་མཁའི་ཁམས་ཀུན་གང་བ་ཡི། །བྲལ་བའི་ཤེས་པས་དོན་བྱེད་པ། །གཞན་གྱི་དཔལ་དུ་ཤེས་པར་བྱ། །དེ་རྣམས་རྒྱུ་ལས་བྱུང་བ་ཡི། །ཡེ་ཤེས་ཤེས་རབ་ཤིན་ཏུ་གསང་། །གསང་བ་རྣམ་པར་འགྲུབ་པ་ཡི། །རྡོ་རྗེ་སྙིང་པོའི་རྒྱན་ཞེས་བྱ། །ལྷ་མོ་ལས་བྱུང་བདེ་དང་ལྡན། །འཇའ་ཚོན་ལྟར་གསལ་རྒྱུད་དག་པ། །སྣང་བའི་སྐུ་དེ་མི་ཤིགས་པ། །རྡོ་རྗེ་ང་ཡིས་ཡང་དག་བསྒྲགས། །སྣང་ཞིང་སྲིད་པའི་ཆོས་རྣམས་ཀུན། །བསྡུས་ཕྱིར་བརྩེགས་པའི་སྐུ་དམ་པ། །རྟོག་བྲལ་རྒྱུད་དུ་སིམ་གནས་པ། །འབྱུང་ཕྱིར་སྙིང་པོ་ཞེས་སུ་བསྒྲགས། །དག་དང་མ་དག་ཐམས་ཅད་ལ། །འཁོར་བ་ཇི་སྲིད་བར་སྣང་བ། །གཉིས་ཀ་མཛེས་པར་བྱེད་པས་ན། །རྒྱན་དུ་ཡང་དག་བསྒྲགས་པ་ཡི། །དཔལ་དང་རྡོ་རྗེ་སྙིང་པོ་དང་། །རྒྱན་ཞེས་བྱ་བ་བཞི་པོ་ནི། །འབྲེལ་ཅིང་གྲུབ་པར་བྱེད་པའི་ཕྱིར། །རྒྱུད་ཅེས་བྱ་བར་བཤད་པའོ། །ཆོས་ཀྱི་ཕུང་པོ་བརྒྱད་ཁྲི་དང་། །བཞི་སྟོང་གི་ནི་
གྲངས་སྙེད་ཀྱི། །མཚན་གྱི་དོན་ནི་འདི་དོན་དུ། །ཡང་དག་འདུས་པར་ངས་བཤད་དོ། །གཞན་དུ་དོན་ནི་མ་བསྒྲགས་པ། །བླ་མ་ལ་ནི་གུས་པ་ཡི། །སློབ་མ་ལ་ནི་མ་རྟོགས་པའི། །རྒྱུད་གཞན་དག་ཏུ་སྦས་པའོ། །དོན་འདི་ཡང་དག་མ་ཤེས་ན། ། ཇི་སྙེད་དོན་ནི་བསམ་ཡས་པ། །ཤེས་ཀྱང་དེ་ཡི་འབྲས་བུ་མེད། །དེ་འདོད་མཉེས་བྱས་ཡང་དག་བླང་། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཡེ་ཤེས་གསུམ་གྱི་མཚན་འབྱུང་བ་ཞེས་བྱ་བའི་ལེའུ་སྟེ་དགུ་པའོ།། །།རྟག་པར་མི་ཕྱོགས་སྨྲ་བ་དང་། ། བླ་མ་སྨོད་བྱེད་བརྩོན་པ་ལ། །དམ་ཚིག་ཕྱིར་ནི་ཡོངས་བསྒྲལ་བྱ། །དེ་ཡི་ཤ་ཁྲག་ཀླད་པ་རྣམས། །དྲངས་ཏེ་ཆོས་ཀྱི་སྟོན་མོ་བྱ། །དེ་ལྟར་མ་བྱས་སྡུག་བསྔལ་ཚོགས། །གཏི་མུག་ཅན་དེས་ཐོབ་པར་འགྱུར། །ནད་ཐམས་ཅད་དང་ཁྲོས་ཆེན་དང་། །འཇིགས་དང་ཉེ་བར་འཚེ་བ་ཡི། །བསྐལ་པ་གྲངས་མེད་བྱེ་བ་རུ། །སྡུག་བསྔལ་ཆེན་པོར་རབ་སྙེད་ཅིང་། །འོ་དོད་འབོད་པས་སྦྲུལ་གྱིས་བརྒྱན། །བསྟིར་མེད་ཆེན་པོར་རྟག་པར་འགྲོ། །དེ་བས་ལས་འདིས་རྒྱས་གདབ་པོ། །བདག་ཉིད་རྡོ་རྗེ་མཁའ་འགྲོ་ཡི། །ཁྲོ་བོ་གཟུགས་ཅན་ཉིད་གྱུར་ནས། །ཨུཏྤལ་མཐིང་ག་འདྲ་བ་ཡི། །ཞལ་གསུམ་པ་ལ་ཕྱག་དྲུག་པ། །རྡོ་རྗེ་ཏྲི་ཤཱུལ་ཕུར་བུ་དང་། །ཐོད་པ་གྲི་གུག་འཁོར་ལོ་འཛིན། །མི་སྡུག་ཁྲོས་པ་ལྕེ་ལྔ་པ། །བསམས་ནས་དེ་འོག་ནམ་མཁའ་ལ། །བསྒྲུབ་བྱ་རྒྱས་པར་དམིགས་ནས་སུ། །རྡོ་རྗེ་ཕུར་པ་ལ་སོགས་པ། །སེམས་ཅན་དཀྱིལ་འཁོར་གནས་པ་ལ། །སྒྲུབ་པོས་དེ་ཡི་ཉེས་པ་བསྒོ། །དེ་ནས་ཕྱག་མཚན་ཏྲི་ཤཱུལ་དང་། །ཕུར་བུ་དྲག་པོ་མཆོག་དག་གིས། །མགོ་དང་སྙིང་ག་ལྟེ་བ་དང་། །རྐང་པ་གཉིས་དང་ལག་པ་ཡི། །གནས་ལྔ་རབ་ཏུ་ཕུག་བྱ་སྟེ། །ལྕི་ལྔའི་འོད་ཟེར་ལྔ་པོ་ཡིས། །སྲིན་བུ་འཛའ་ལུ་ཀ་བཞིན་དུ། །ཁྲག་ཀུན་སྔགས་ཀྱིས་དྲངས་ནས་སུ། །ཐོད་པར་ཕབ་ནས་བཏུང་བར་བྱ། །དེ་བཞིན་ཤ་
རྣམས་ཡང་བསྡུས་ནས། །བཟའ་བ་རུ་ནི་རབ་ཏུ་བརྟག །རུས་པ་རྣམས་ཀྱང་འཚོས་བྱས་ནས། །ཤེས་པ་རྡོ་རྗེ་པདྨར་སྦྱར། །འདི་ནི་དོན་སྒྲུབ་རབ་བྱེད་པས། །ཟླ་བ་ཕྱེད་ནི་ཚུན་ཆད་ཀྱིས། །རྡོ་རྗེ་འཛིན་པ་ཆེན་པོ་ཡང་། །འཆི་བར་འགྱུར་བར་གདོན་མི་ཟ། །རྡོ་རྗེ་གསང་བ་འདི་ལྟ་བུ། །བསྒྲུབ་བྱ་ལེགས་པར་བསྒྲུབས་བྱས་ནས། །ལས་ངན་དག་གིས་དེ་མི་འཁོལ། །སངས་རྒྱས་སུ་ནི་སྐྱེ་བར་འགྱུར། །རྣལ་འབྱོར་དེ་ཡང་དེ་ཡི་མཐུས། །ཁྲོ་བོ་མཁའ་འགྲོ་ཞེས་འགྱུར་ཏེ། །ཁམས་གསུམ་བསད་དང་གསོ་བ་དང་། །སེམས་ཀྱི་རྡོ་རྗེ་བརྟན་བྱས་ནས། །སྐད་ཅིག་ཙམ་དུ་བྱེད་པར་འགྱུར། །གསལ་བར་ནུས་པ་གདོན་མི་ཟ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྡོ་རྗེ་མཁའ་འགྲོ་ཁྲོ་བོའི་སྦྱོར་བས་དགྲ་བསད་པའི་ལེའུ་སྟེ་བཅུ་པའོ།། །།དེ་ནས་གཞན་ཡང་བཤད་བྱ་བ། །འདོད་ཆགས་ཐབས་ཆེན་པོ་ཡི་རྒྱུད། །གང་གིས་ལེགས་པར་ཤེས་ན་ནི། །ཚེ་འདིས་དངོས་གྲུབ་སྦྱིན་པར་བཤད། །གསང་བ་འདུས་པ་སྟོང་ཕྲག་གཅིག །རྡོ་རྗེ་ཕྲེང་བ་འབུམ་ཕྲག་གསུམ། །དགོངས་པ་ལུང་སྟོན་སྟོང་ཕྲག་བཞི། །ལྷ་མོ་བཞིས་ཞུས་བརྒྱ་བདུན་ཅུ། ཨུཏྷར་ཏནྟྲ་ཉིས་བརྒྱ་བརྒྱད། །དེ་ཡི་ཉེ་བར་བཤད་པའི་རྒྱུད། །དམ་ཚིག་ཆེན་པོ་ལྔ་བཅུ་ལྔ། །རྡོ་རྗེ་ལྔ་འདུས་སྟོང་ཕྲག་གཅིག །ཀུན་ལས་བཏུས་པ་འབུམ་ཕྲག་གཅིག །མཉམ་ཉིད་རྣམ་རྒྱལ་ཉིས་བརྒྱ་བཅུ། །ཟླ་གསང་ཐིག་ལེ་སྟོང་ཕྲག་བདུན། །རྡོ་རྗེ་ས་འོག་བརྒྱ་ཉི་ཤུ། །ཅོད་པན་རྡོ་རྗེ་བདུན་བརྒྱ་ལྔ། །ཁྲོ་ཟླ་ཐིག་ལེ་འབུམ་ཕྲག་ལྔ། །རྡོ་རྗེ་རྣམ་རྒྱལ་བརྒྱ་དགུ་བརྒྱ། །མཉམ་ཉིད་གསང་བ་སྟོང་ཕྲག་ལྔ། །རྡོ་རྗེ་གསང་རྒྱན་སྟོང་ཕྲག་ལྔ། །རྡོ་རྗེ་གསང་མཛེས་སྟོང་ཕྲག་བདུན། །ནོར་བུ་གསང་ཐིག་འབུམ་ཕྲག་བཅུ། །སྣང་མཛད་རྫུ་འཕྲུལ་སྟོང་དང་བརྒྱ། །རྡོ་རྗེ་གསང་རྒྱན་སྟོང་ཕྲག་གཅིག །རྡོ་རྗེ་ཐོད་པ་ཉིས་བརྒྱ་བརྒྱ། །དེ་ཉིད་བརྒྱ་སྟོང་བརྒྱ་སྟོང་
བདུན། །དམ་ཚིག་མངོན་རྒྱན་སྟོང་ཕྲག་གསུམ། །འཇམ་དཔལ་དཔའ་བོ་འབུམ་ཕྲག་གཅིག །གསང་ཆེན་འདུས་པ་བརྒྱ་ལྔ་བཅུ། །རིན་ཆེན་སྡོང་པོ་དགུ་བརྒྱ་བདུན། །དུས་ཀྱི་ཐིག་ལེ་བརྒྱ་བརྒྱད་ཅུ། །ལྷ་མོ་བསྟན་ཆོས་ལྔ་བརྒྱ་བདུན། །འདི་རྣམས་དགོངས་པའི་བྱེ་བྲག་གིས། །ང་ཡིས་ཡང་དག་བསྟན་པར་བྱ། །འདི་ནི་གཉིས་གཉིས་འཁྱུད་པ་ཡིས། །རྒྱུད་ཀྱི་དབྱེ་བ་བསྟན་པའོ། །དེ་བཞིན་དུ་ནི་ཡན་ལག་བཅངས། །རྒོད་དང་བལྟས་པས་ཤེས་པར་བྱ། །དེ་བཞིན་ཞེ་སྡང་གཏི་མུག་གིས། །རྒྱུད་རྣམས་ཀུན་ཀྱང་ཤེས་པར་བྱ། །མཁའ་འགྲོ་མ་ཡི་རྒྱུད་ཀུན་ཡང་། །འདི་ཡི་རིམ་པས་ཤེས་པར་བྱ། །ཕྱི་ནང་དབྱེ་བར་ཤེས་པ་ཡིས། །རྒྱུད་ཀྱི་དབྱེ་བ་ཤེས་པར་བྱ། །ནང་དུ་བསྟན་པའི་བླ་མ་ལས། ཡང་དག་བླངས་ཏེ་བསྒྲུབ་པར་བྱ། །ཅི་བཞིན་གནས་པ་ལ་དགོངས་ཏེ། །བདེ་བར་གཤེགས་པས་རྒྱུད་ཀུན་བསྟན། །རྡོ་རྗེ་སྙིང་པོའི་རྒྱན་གྱི་རྒྱུད། །འདི་ཡི་རྒྱུད་ནི་མཁའ་འགྲོ་ཕ། །རྒྱུད་རྣམས་ཀུན་གྱི་ཕྱི་མོ་སྟེ། །གཞན་དུ་མ་བསྒྲགས་དོན་གང་ཞིག །འདི་རུ་ཡང་དག་བསྟན་པ་སྟེ། །རྣལ་འབྱོར་གང་ཞིག་ལེན་པའམ། །སྒོམ་པར་བྱེད་དམ་འཆད་པའམ། །ཀློག་པར་བྱེད་པ་རྣལ་འབྱོར་ཆེ། །དེ་ཡང་ང་དང་འདྲ་བར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྒྱུད་ཐམས་ཅད་དབྱེ་བའི་ལེའུ་སྟེ་བཅུ་གཅིག་པའོ།། །།དེ་ནས་གཞན་ཡང་བཤད་བྱ་བ། །སྣ་ཚོགས་མདོ་དང་རྒྱུད་རྣམས་ཀྱིས། །སྡོམ་པ་ཡང་དག་ཤེས་འགྱུར་ན། །མཁའ་འགྲོ་ཆེན་པོར་འགྱུར་བར་བཤད། །གང་གིས་ཉན་ཐོས་རབ་འབྱིན་པ། །སྤོང་བ་ལྟུང་བའི་བྱེ་བྲག་བཤད། །བསླབ་པ་དང་ནི་རྫས་གྲགས་ཀྱིས། །འདི་རུ་དེས་ཀྱང་ཡོངས་རྫོགས་བྱེད། །ཚུལ་ཁྲིམས་ཀྱིས་ནི་བསླབ་པ་གསུམ། །དགེ་བའི་ཆོས་ནི་སྡུད་པ་དང་། །སྡོམ་པ་ཉི་ཤུ་ལ་སོགས་དང་། །སེམས་ཅན་དོན་བྱེད་པའི་ཚུལ་ཁྲིམས། །བྱང་ཆུབ་སེམས་དཔའ་རབ་སྦྱིན་པ། །ལུས་ངག་
ཡིད་གསུམ་རབ་བྱུང་བའི། །སྡོམ་པ་དེས་ཀྱང་མཁའ་འགྲོ་ཡི། །རྒྱུད་རྣམས་ཡང་དག་སྦྱོར་བར་བྱེད། །ཟླ་བ་སྨྱུང་དང་གཙང་སྦྲ་བསྡམ། །གྲོང་དང་གནག་ལྷས་ཐང་ལའམ། །ལུས་དང་ངག་དང་ཡིད་ཀྱིས་ནི། །གནོད་པ་དག་ནི་ཡོང་མི་བྱེད། །དེ་བཞིན་གཤེགས་པའི་སྡོམ་པ་མཆོག །བླ་ན་མེད་པའི་བྱང་ཆུབ་སེམས། །འགྲོ་བའི་དོན་བྱེད་བྱང་ཆུབ་སེམས། །བྱང་ཆུབ་སེམས་ནི་རབ་ཏུ་བཟུང་། །རྡོ་རྗེ་མི་བསྐྱོད་རིགས་ཆེན་པོ། །རྡོ་རྗེ་ཆེ་དང་དྲིལ་བུ་དང་། །སློབ་དཔོན་ཡང་ནི་བཟུང་བྱས་ལ། །དེ་ཡི་ཡོན་ཏན་ཐོབ་པར་བྱེད། །རིན་ཆེན་ཏོག་གི་རིགས་མཐོན་པོ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །བྱིན་པས་དེ་ཡི་ཡོན་ཏན་ཐོབ། །པདྨོ་སྣང་བའི་རིགས་དག་ལ། །ཕྱི་དང་ནང་དང་གསང་བ་ཡི། །དམ་ཚིག་རབ་ཏུ་བཟུང་བ་ཡིས། །བླ་མེད་བྱང་ཆུབ་ཐོབ་པར་བྱེད། །རྔ་སྒྲ་ལས་ཀྱི་རིགས་མང་པོ། །དམ་ཚིག་དང་ནི་སྡོམ་པར་ལྡན། །བསྙེན་བཀུར་མཆོད་པ་སེམས་ཅན་དོན། །བྱས་པས་དེ་ཡི་ཡོན་ཏན་ཐོབ། །སྲོག་མི་གཅོད་ཅིང་གཡེམ་མི་བྱ། །མ་བྱིན་མི་ལེན་རྫུན་མི་སྨྲ། །ཕྲ་དང་ཀྱལ་ཚིག་རྩུབ་པོ་དང་། །སྨྲ་བ་མི་བྱ་བརྣབ་སེམས་དང་། །གནོད་སེམས་ལོག་པར་ལྟ་བ་རྣམས། །ནམ་ཡང་བྱ་བ་མ་ཡིན་ནོ། །དཀོན་མཆོག་གསུམ་ནི་ཡོང་མི་སྤང་། །ལྷ་དང་བླ་མ་དེ་བཞིན་ནོ། །ཉེས་པ་ཀུན་གྱི་རྩ་བའི་ཕྱིར། །ཆང་ཡང་རྣམ་པར་སྤང་བར་བྱ། །ཕྱག་རྒྱ་བཞོན་པ་མཚོན་ཆ་སོགས། །མཚན་མའམ་ནི་ལྷ་ཡི་གྲིབ། །འགོམ་དང་བཟའ་བར་མི་བྱ་བ། །དེ་ལ་སོགས་པ་མཐའ་ཡས་པའི། །སྡོམ་པ་གང་དེ་གསུངས་པ་རྣམས། །འདི་རུ་དང་པོའི་ལས་ཅན་ལ། །དེ་ཡིས་ཡང་དག་འཇུག་པར་བྱེད། །ཐུན་མོང་མ་ཡིན་ཕས་ཕམ་པ། །བཅུ་བཞིར་གྲགས་པ་གང་འདི་ནི། །སྔགས་པས་དོན་ཀུན་འགྲུབ་བྱེད་པས། །སྤང་ཞིང་དོར་བར་མི་བྱའོ། །སློབ་དཔོན་སྙིང་ནས་སྨོད་
པ་དང་། །བདེ་གཤེགས་བཀའ་ལས་འདའ་བྱེད་དང་། །ཞེ་སྡང་གིས་ནི་མཆེད་སུན་འབྱིན། །བྱམས་སེམས་མེད་པར་སེམས་ཅན་སྤངས། །བྱང་ཆུབ་སེམས་ཆེན་འདོར་བ་དང་། །བདག་གཞན་གྲུབ་པའི་མཐའ་སྨོད་བྱེད། །སྣོད་མི་རུང་ལ་གསང་བ་བསྟན། །རྒྱལ་བའི་བདག་ཉིད་ཕུང་པོ་སྨོད། །དག་པའི་ཆོས་ལ་སོམ་ཉི་བྱེད། །གསུམ་ལྡན་ཁྲོ་ལ་བྱམས་ལྡན་ཏེ། །སྟོང་པ་ཐལ་བྱུང་ལ་རྟོག་པ། དད་ལྡན་སེམས་ནི་སུན་འབྱིན་བྱེད། །དམ་ཚིག་དང་ལྡན་རྩེ་མི་བྱེད། །ཤེས་ལྡན་བུད་མེད་སྨོད་པར་བྱེད། །སྔགས་པས་དེ་དག་ཡོངས་སྤངས་ནས། །ངེས་པར་དངོས་གྲུབ་ཐོབ་པར་བྱེད། །དེ་ལ་སྔགས་པ་ཡོང་འདས་ནས། །ངེས་པར་བདུད་དང་ཕྲད་པར་འགྱུར། །ནད་དང་སྡུག་བསྔལ་འཕེལ་འགྱུར་ཏེ། །བསྟིར་མེད་སྤྱིའུ་ཚུགས་དམྱལ་བར་འགྲོ། །སྦོམ་པོ་ལྟུང་བྱེད་ཉེས་དམིགས་ཀྱང་། །དེ་དང་འདྲ་བར་ཤེས་པར་བྱ། །དམ་ཚིག་མི་ལྡན་རིག་མར་བསྟེན། །ཚོགས་ཀྱི་འཁོར་ལོར་རྩོད་པར་བྱེད། །གསང་བའི་ཆོས་ནི་སྟོན་པ་དང་། །དད་ལྡན་རྣམས་ལ་གཞན་དུ་སྟོན། ། ཉན་ཐོས་ནང་དུ་ཡུན་རིང་གནས། །སྣོད་མི་རུང་ལ་གསང་བ་བསྟན། །ཁ་ན་མ་ཐོ་སྦོམ་འགྱུར་ཏེ། །སྔགས་པ་དེ་ཡི་དམ་སྡོམ་ཟད། །ཟད་པས་འགྲུབ་པར་ཡོང་མི་འགྱུར། །དེ་བས་ཉིན་རེ་ལན་གསུམ་དུ། །ཁ་ཏོན་གྱིས་ཀྱང་བཀླག་པར་བྱ། །དཀྱིལ་འཁོར་མཐོང་དང་ཞུགས་པ་དང་། །དབང་བསྐུར་བ་ལ་སོགས་ཚུལ་གྱི། །རྡོ་རྗེ་མཁའ་འགྲོ་ཐོབ་པ་གཞན། །བྱང་ཆུབ་སེམས་དང་ཉན་ཐོས་དང་། །བྱ་དང་གཉིས་ཀ་རྣལ་འབྱོར་རྒྱུད། །དགོངས་གསུངས་རྣམས་ཀྱིས་དེ་ལྟ་མིན། །དེ་ལྟ་བས་ན་སྡོམ་པའི་མཆོག །ང་ཡིས་ཡང་དག་བསྟན་པར་བྱ། །དྲི་ཆེན་དྲི་ཆུ་རཀྟ་དང་། །ཤེས་དང་བྱང་ཆུབ་སེམས་རྣམས་ནི། །བཟའ་བའི་སྦྱོར་བས་ཡང་དག་བཟའ། །ལྟོ་ཡི་ཡེ་ཤེས་མིས་སྦྱངས་ཕྱིར། །ཕྱི་རོལ་ཟས་ལས་ཁྱད་པར་འགྱུར། །དེ་བཞིན་གླང་ཆེན་
རྟ་ཤ་དང་། །བ་ལང་ཁྱི་ཤ་ཤ་ཆེན་རྣམས། །ཡེ་ཤེས་ལྔ་ཡི་ངོ་བོའི་ཕྱིར། །དགའ་བའི་སེམས་ཀྱིས་བཟའ་བར་བྱ། །དེ་བཞིན་སེམས་ཅན་གསད་པར་བྱ། །མ་བྱིན་པར་ཡང་བླང་བར་བྱའོ། །བུད་མེད་ཐམས་ཅད་འདོད་པ་སྤྱོད། ། བརྫུན་ཚིག་དག་ཀྱང་སྨྲ་བར་བྱ། །དེ་ལྟར་བྱས་པས་སངས་རྒྱས་དང་། །བྱང་ཆུབ་སེམས་དཔའ་མཉེས་པར་འགྱུར། །སེམས་ཅན་རྣམས་ཀྱང་ཚིམ་ཞིང་དགའ། །དེ་བཞིན་རྣལ་འབྱོར་སྙིང་པོ་ཡིས། །སངས་རྒྱས་དང་ནི་བྱང་ཆུབ་སེམས། །རང་འདྲེན་ཉན་ཐོས་སྐུ་གཟུགས་སོགས། །རང་ཉིད་དག་པ་གསུམ་སྦྱོར་བས། །ཕྱག་བྱས་ན་ནི་མི་རུང་འགྱུར། །ཀུན་དུ་རྡོ་རྗེ་སེམས་དཔའ་ཡི། །ལུས་ངག་ཡིད་ཀྱི་དཀྱིལ་འཁོར་ལས། །རང་ཉིད་བསམ་གཏན་གསུམ་སྦྱོར་བས། །དབྱེར་མེད་བློ་ཡིས་མི་བྱའོ། །དཀྱིལ་འཁོར་དག་ཀྱང་མི་བྲིའོ། །གླེགས་བམ་དག་ཀྱང་མི་བཀླག་གོ། །མཆོད་རྟེན་ལས་ཀྱང་ཡོང་མི་བྱ། །ལག་པའི་ཕྱག་རྒྱ་རྣམས་ཀྱང་སྤང་། །ཉིན་རེ་ཞིང་ནི་དུས་བཞི་རུ། །བུ་མོ་ལེགས་པར་གོམས་པ་ལས། །ག་བུར་ཙནྡན་ཁས་བླངས་ཏེ། །ཆོ་ག་བཞིན་དུ་ལུས་འཁོར་མཆོད། །རོལ་མོའི་ཐབས་ནི་སྣ་ཚོགས་པ། །ང་ཡི་རྒྱུད་ལས་རབ་བསྟན་པས། །བཅུ་དྲུག་ཐིག་ལེ་ངལ་སོ་ལས། །སྔགས་ཀྱི་སྙིང་པོ་བརྟག་པར་བྱ། །བླ་མ་དམ་པ་ཐུགས་རྗེ་ཆེས། །ཡང་དག་བསྟན་པ་ལ་དམིགས་པས། །ཕྱིན་ཅི་ལོག་ཁུར་ཡོངས་འདོར་ཏེ། །རྡོ་རྗེ་འཛིན་པ་ང་འདྲར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་དམ་ཚིག་དང་སྡོམ་པ་དབྱེ་བའི་ལེའུ་སྟེ་བཅུ་གཉིས་པའོ།། །།དེ་ནས་རོ་ལངས་ཆེན་མོ་ཡི། །སྒྲུབ་པ་ཡང་དག་བཤད་པར་བྱ། ། སྒྲུབ་པོས་ལེགས་པར་ཤེས་གྱུར་ན། །དངོས་གྲུབ་ཐོབ་པར་འགྱུར་བའོ། །ནག་པོ་ཡི་ནི་ཚེས་བརྒྱད་དང་། །ཡང་ན་བཅུ་བཞི་གང་ཡང་རུང་། །ཤིང་གཅིག་དུར་ཁྲོད་མ་མོའམ། །ཡང་ན་མི་མེད་གྲོང་བར་དུ། །སྔོན་དུ་སྒྲུབ་པའི་བདག་ཉིད་ཅན། །ལས་
ཀུན་འགྲུབ་པར་བྱེད་པར་སྒྲུབ། །མདའ་མཁན་མ་དང་སྨེ་ཤ་ཅན། །གདོལ་བ་མོ་དང་གར་མཁན་སོགས། །མདུན་གྱི་སོ་ལ་ལྷག་ཡོད་པ། བྱད་དང་མདངས་ལྡན་རྨ་མེད་མ། །ལོ་ནི་སུམ་ཅུ་རྩ་གཉིས་བསྔགས། །ཡང་ན་ཉི་ཤུ་རྩ་ལྔའོ། །ཡང་ན་ཆུ་དང་དང་པོར་སྐྱེས། །སྦྱངས་ནས་ཤི་བ་མ་སྦགས་པ། །ཡང་དག་བླངས་ཏེ་ཕ་བོང་སྟེང་། །གཞན་ཡང་བུ་མོ་སྐྲ་བཟུང་སྟེ། །ལྷ་བཞད་དང་ནི་དབང་པོ་ལག །དཀར་པོ་དང་ནི་རི་སྒྲ་དང་། །གྲུ་གནོན་ཆུ་ཡིས་བཀྲུ་བར་བྱ། །དེ་ནས་ཙནྡན་དཀར་པོ་ཡིས། །བུ་མོ་ལུས་བྱུགས་རྒྱན་དང་གོས། །ཡང་དག་བརྒྱན་ཏེ་མདུན་བཞག་ནས། །དཀྱིལ་འཁོར་འཇིགས་པ་བྲི་བྱ་སྟེ། །རྩ་སོགས་གསང་སྔགས་རབ་ཏུ་བཟླ། །འབྱུང་པོའི་གཏོར་མ་ཡང་བྱིན་ཏེ། །ཤ་ན་ནག་པོ་མདངས་དང་ལྡན། མྱོས་བྱེད་བསྲེགས་པ་རོ་ཡི་ཁར། །མཚན་གཅིག་ཐོག་ཐག་སྦྱིན་སྲེག་བྱ། །དེ་ནས་ཐོ་རས་དུས་སུ་ཡང་། །ཁྲག་ཆེན་ཕྱོགས་བཞིར་གཏོར་བྱས་ནས། །མར་ཁུ་ཆེན་པོ་རོ་ལ་བསྐུ། །དེ་ནས་རོ་དེ་ལངས་གྱུར་ཏེ། །ཁྲོ་དང་ལྡན་པའི་ཨ་ཙར་གྱིས། །ས་གསུམ་མོ་ཡི་སྒྲས་འགེངས་བྱེད། །དེ་ཚེ་སྒྲུབ་པོ་སྐྲག་མི་བྱ། མཱ་མ་ཀཱི་ཡི་སྦྱོར་བ་སོགས། །སྲུང་བའི་འཁོར་ལོས་བསྲུང་བར་བྱ། །སྐྲག་ན་དེ་མ་ཐག་ཏུ་གསོད། །དེ་ཚེ་བསྲུང་པས་བསྲུངས་བྱས་ནས། །བདག་ཉིད་ལངས་ཏེ་དེ་ཡི་མགོར། །ཡུངས་ཀར་གྱིས་ནི་བརྡེག་པར་བྱ། །དེ་ནས་དེ་ནི་བབས་གྱུར་ཏེ། །སྒྲུབ་པ་པོ་ཡི་མདུན་གནས་ནས། །བཀའ་ནོད་འདི་སྐད་སྨྲ་བར་བྱེད། །སེམས་ཅན་ཆེན་པོ་ཁྱོད་ཅི་འདོད། །བདག་ལ་ཡང་དག་བཀའ་སྩོལ་ཅིག །རལ་གྲི་མིག་སྨན་ས་འོག་གམ། །རྐང་མགྱོགས་དེ་བཞིན་བཅུད་ཀྱིས་ལེན། །མི་སྣང་འགུགས་པ་ལས་གང་དག །བདག་གིས་གཅིག་ཅིག་སྦྱར་བར་བྱ། །དེ་ནས་སྒྲུབ་པོ་དེ་ཡིས་ཀྱང་། །གང་འདོད་སྨྲས་ནས་ཅང་ཏེའུ་བརྡུང་། །དེ་ནས་རོ་ལངས་ཁ་དེ་ནས། །དུ་བ་འཐུལ་ཞིང་མེ་འབར་
བ། །དེ་ནས་སྦྲུལ་ནག་ལྟ་བུ་རུ། །རོ་ཡི་ཁ་ནས་འབྱུང་བར་བྱེད། །དེ་དེ་སྒྲུབ་པོས་ཁ་ཡིས་བླང་། །བྱུང་སྟེ་གསེར་གྱི་རལ་གྲིར་འགྱུར། །དེ་ཐོགས་ཚངས་པའི་འཇིག་རྟེན་ཁམས། །སྟེང་དུ་ངེས་པར་འགྲོ་བར་བྱེད། །དེ་བཞིན་ཀུན་དུ་འགྲོ་བར་བྱེད། །དེ་བཞིན་རྫས་ཀུན་གང་ལ་བསྟན། །ཐམས་ཅད་གསེར་འགྱུར་རྩི་ལྟ་བུ། །དེ་བཞིན་ཐབས་སྒྲུབ་དེ་བྱ་ན། །རོ་ནི་སྔ་མཁོ་བཞིན་འགྱུར་ཏེ། །དེ་ཡིས་སྦྱིན་སྲེག་རབ་བྱས་ནས། །དཀྱིལ་འཁོར་ཡང་དག་ཚིམ་པར་བྱ། ། དེ་བས་འདི་ནི་སྒྲུབ་པའི་མཆོག །དོན་ཀུན་ཡང་དག་འགྲུབ་བྱེད་པ། །ལས་ཐམས་ཅད་ཀྱི་གཙོ་བོ་སྟེ། །བཅོམ་ལྡན་རྡོ་རྗེ་སེམས་དཔས་གསུངས། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རོ་ལངས་ཆེན་མོའི་ལེའུ་སྟེ་བཅུ་གསུམ་པའོ།། །།ད་ནི་ང་ཡིས་སྒྲུབ་པོ་ཡི། །དངོས་གྲུབ་སློབ་དཔོན་ལས་བྱུང་ཕྱིར། །རྒྱུད་རྣམས་ཀུན་ལས་གསུངས་པ་ཡི། །སློབ་དཔོན་བཀུར་བའི་ཆོ་ག་བཤད། །སློབ་དཔོན་མེད་པར་གྱུར་ན་ནི། །དངོས་གྲུབ་ཐོབ་པར་མི་འགྱུར་བས། །སློབ་དཔོན་གྲངས་དང་མཚན་ཉིད་ནི། །ཡིད་གཅིག་བསྡུས་ལ་མཉན་པར་གྱིས། །དམ་སྡོམ་གྱི་ནི་སྣོད་གཙང་ལ། །སློབ་དཔོན་མཚན་ཉིད་ཡོངས་རྫོགས་པར། །བྱེད་ཅིང་དང་པོ་ལས་འཇུག་པར། །བྱེད་པ་རྒྱུ་ཡི་སློབ་དཔོན་ནོ། །རི་བོང་འཛིན་པ་སྐུལ་བྱེད་ཅིང་། །དེ་ཡི་སྒྲུབ་པོ་ཞིང་དག་ཅིང་། །ཡེ་ཤེས་སྒྱུ་མའི་སྣོད་རུང་བྱེད། །རྐྱེན་གྱི་སློབ་དཔོན་ཆེན་པོའོ། །ལྷན་ཅིག་ཉན་པར་གང་གྱུར་པ། །དེ་ལས་དགའ་བ་ཡང་དག་ཐོབ། །ཐོབ་པས་ཡང་དག་རབ་མཐར་ཕྱིན། །ལྷན་ཅིག་བྱེད་པའི་སློབ་དཔོན་ནི། ། མི་འགྱུར་བྱམས་ལྡན་ཤེས་རབ་ཅན། །སྔགས་རྒྱུད་སྦྱོར་ཤེས་དཀྱིལ་འཁོར་མཁས། །དེ་ཉིད་བཅུ་ཤེས་ཐེག་ཆེན་དགའ་། །གསང་བ་ཟུངས་ཐུབ་སློབ་དཔོན་ཡིན། །མིག་བཟང་ཡ་སོ་བཅུ་དྲུག་པ། །ཁུ་འཕྲིག་རྟོག་པ་ཡང་དག་སྤངས། །བླ་
མ་དགའ་བ་དད་མོས་ཅན། །ཤིན་ཏུ་རྒྱན་གྱིས་རབ་བརྒྱན་པ། །དད་ལྡན་སྦྱོར་བ་ལ་གོམས་པ། །གཟུགས་བཟང་འདོད་ཆགས་ཀྱིས་མྱོས་བྱེད། །ཤིན་ཏུ་དུལ་བ་ཁྱད་པར་ཅན། །བཀུར་བའི་གནས་སུ་ཡང་དག་བླངས། །དགེ་དང་བསྒོམ་པ་ལ་དགའ་བ། །རྟག་ཏུ་བླ་མ་ལ་གུས་པའི། །སློབ་མས་བླ་མ་འདི་ལྟར་བལྟ། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང་། །དེ་བཞིན་གཤེགས་པ་རིན་ཆེན་འབྱུང་། །དེ་ནི་ཡེ་ཤེས་རྒྱ་མཚོ་ཆེ། །ཡིད་བཞིན་ནོར་བུ་རིན་ཆེན་སྦྱིན། །དེ་ཡི་ཡོན་ཏན་ཐམས་ཅད་གཟུང་། །སྐྱོན་ཀུན་སེམས་ཀྱིས་ཀྱང་མི་བསམ། །ཡོན་ཏན་བཟུང་ནས་དངོས་གྲུབ་འཐོབ། །སྐྱོན་གྱིས་དངོས་གྲུབ་ཉམས་པར་བྱེད། །མཆོད་རྟེན་བཤིག་དང་སྡིག་འདྲའི་ཕྱིར། །དེ་ཡི་གྲིབ་མའང་མི་འགོམ་སྟེ། །སྟན་དང་ལྷམ་དང་བཞོན་པ་དང་། །འགོམ་པར་བྱ་བ་སྨོས་ཅི་དགོས། །རྒྱུ་བ་དང་ནི་མི་རྒྱུ་བའི། །མཆོག་ཀུན་དེ་ཡིས་སྤངས་པར་འགྱུར། །སློབ་དཔོན་སྨོད་པར་བྱེད་པ་དེ། །རྨི་ལམ་དུ་ཡང་མཐོང་མི་བྱ། །དེ་ནི་བགེགས་དང་ལོག་འདྲེན་འཛིན། །རིམས་དང་སྤྱུག་དང་གཤིན་རྗེས་འཛིན། །འཆི་བར་རབ་ཏུ་འགྱུར་བ་སྟེ། །ངན་པ་གཏུམ་པོ་བླུན་ཆེན་ཏེ། །ཕྱོགས་བཞི་དག་ཏུ་སོང་གྱུར་ཡང་། །བློ་ལྡན་རྣམས་ཀྱིས་མི་བསྲུང་བར། །མདུང་ལ་སོགས་པའི་མཚོན་ཆ་ཡིས། ཁ་ན་མ་ཐོ་བྱེད་པ་བསད། །མདོ་སོགས་བསྟན་པའི་དམྱལ་བ་རུ། །སློབ་དཔོན་སྨོད་པར་བྱེད་པ་དེ། །གནས་པར་འགྱུར་བར་ང་ཡིས་བསྟན། །དེ་བས་བླ་མའི་ཞབས་དྲུང་དུ། །བག་མ་བཞིན་དུ་ངོ་ཚ་བསྲུང་། །གླལ་དང་དགོད་དང་ལུད་པ་སོགས། །ཁ་ལ་ལག་པས་བཀབ་ནས་སུ། །ཤིན་ཏུ་འཇམ་པར་སྨྲ་བར་བྱ། །མགོ་ཐོད་བཅིང་དང་མཚོན་བྱུག་པ། །བླ་མའི་དྲུང་དུ་མི་བྱའོ། །བྲོ་བརྡུང་བ་དང་བརྐམ་ཚིག་དག །ཐོས་པའི་ཡུལ་ནས་མི་བྱའོ། །མདུན་
འགྲོ་བ་དང་རྐང་པ་བརྐྱང་། །ཡང་དག་ཉིད་དུ་མི་བྱའོ། །ལས་ནི་གང་དག་བྱེད་པའམ། །མཉན་པ་ལ་སོགས་འདོད་པ་ལ། །གཟུང་ཕྱིར་ཐལ་མོ་མ་བཤིག་པར། །གནས་ནས་ལངས་ཏེ་མཐོང་ཡུལ་དུ། །རྒྱབ་ཀྱིས་ཕྱོགས་པར་མི་བྱ་སྟེ། །མཚན་མོ་དང་ནི་ཆུ་བརྒལ་དང་། །གཅོང་རོང་དག་ཏུ་གནས་གྱུར་ན། །བཀའ་ལུང་གཉེར་དུ་དགུམ་པའི་ཕྱིར། །མདུན་དུ་འགྲོ་བ་ཉེས་མི་འགྱུར། །དེ་བས་ཐབས་ནི་ཐམས་ཅད་ཀྱིས། །རྡོ་རྗེ་འཛིན་པ་བླ་མ་མཆོག ། རྗེས་སུ་མཐུན་པས་མཉེས་པར་བྱ། །དེ་མཉེས་སངས་རྒྱས་ཐམས་ཅད་མཉེས། །གང་གིས་སློབ་དཔོན་ཡང་དག་སྨད། །དེ་ཡིས་རྒྱུད་ཀུན་བསྒྲུབ་པའི་མཆོག །གཉིད་དང་འདུ་འཛི་རྣམ་སྤངས་ཏེ། །བསྐལ་པ་སྟོང་དུ་ལེགས་བསྒྲུབས་ཀྱང་། ། དམྱལ་སོགས་སྒྲུབ་པར་བྱེད་པའོ། །དེ་ཕྱིར་ཀུན་གྱིས་རབ་བསྒྲིམས་ཏེ། །བསམ་པ་འབྲས་བུ་སྨིན་བྱེད་པའི། །སངས་རྒྱས་འབྲས་བུ་འདོད་པ་ཡིས། །སེམས་ཅན་དད་དང་ལྡན་པས་མཆོད། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བླ་མ་བཀུར་བའི་ལེའུ་སྟེ་བཅུ་བཞི་པའོ།། །།རྡོ་རྗེ་པདྨོ་སྦྱོར་བ་ལས། །ཡང་དག་ཡེ་ཤེས་སྐྱེ་འགྱུར་བས། །སྒྱུ་མའི་མཆོག་ནི་བུད་མེད་དེ། །དེ་ཡི་མིང་དང་མཚན་ཉིད་བསྟན། །ཧ་སྟི་ནི་དང་ཤངྐི་ནི། །ཀ་མ་ལ་དང་ཙི་ཏྲ་ན། །ཐམས་ཅད་རིགས་ནི་བཞིར་འགྱུར་ཏེ། །ཧ་སྟི་རཀྟ་རོ་ཚ་བ། །སྦོམ་མོ་འདོད་ཆགས་ཡང་དག་ཆེ། །པད་ཡངས་ཁ་ནས་ཤ་རུལ་བྲོ། །དཀར་འཆང་མཐའ་ཕྲ་གོ་སྦོམ་བྱེད། །ཤངྐི་རཀྟ་རོ་སྐྱུར་བ། རྐེད་ཕྲ་སྣ་ལེགས་ཅུང་ཟད་ཁྲོ། །ཁ་ནས་དུད་བྲོ་འགྲོས་དལ་ལེགས། །དཀར་འཆང་དཔལ་གྱི་འབྲས་བུ་འདྲ། །ཀ་མའི་རཀྟའི་རོ་མངར་ཞིང་། །ཤངྐི་རཀྟ་རོ་སྐྱུར་བ། །ཕྲ་སྦོམ་རན་པ་དམར་མོ་སྟེ། །འདོད་ཆགས་མིག་ནི་མི་འཛུམས་ལྟ། །དཀར་འཆང་ཨ་རི་ཤ་འདྲ་བ། །ཙི་ཏྲ་རཀྟ་རོ་མངར་ཞིང་། །
ཐུན་རུང་ཁྲོ་བག་དང་བཅས་པ། །ཆགས་མིན་ལྟ་བྱེད་ངོ་གནག་པ། །དཀར་འཆང་གཡས་གཡོན་དགྱེ་བ་སྟེ། །འདི་རྣམས་ཡང་དག་ཕྲད་གྱུར་ན། །སྒྲུབ་པ་པོ་ལ་ཚེ་འདི་རུ། །དངོས་གྲུབ་ཡང་དག་སྟེར་བ་སྟེ། །དེ་བས་འདི་རྣམས་འབད་པས་བཙལ། །ཡང་དག་རྙེད་ནས་གང་རུང་དུ། །བ་ལང་བཟའ་ནི་མདའ་ཡི་ནང་། །བཏུང་བས་ཤེལ་ཁམས་རྣམ་པར་འཕེལ། །དེ་ནི་ཐབས་ཀྱིས་སྟེར་བ་ཡིས། །ཡང་དག་ཏུ་ནི་རང་བཞིན་བརྟག །རང་བཞིན་ནམ་མཁའ་ལྟ་བུ་སྟེ། །དངོས་པོ་ཐམས་ཅད་ཟད་པ་སྟེ། །རྣམ་པར་རྟོག་པ་ཐམས་ཅད་དང་། །བྲལ་བའི་དགའ་བ་ཡང་དག་ཟབ། །བསམ་མེད་ཟད་མེད་ཕྲ་མོ་སྟེ། །དམ་པ་ཞི་བ་རྣམ་དག་པ། །འཆི་མེད་རྡོ་རྗེ་བདུད་རྩི་བརྗོད། །གང་གི་དབུས་སུ་འདབ་བརྒྱད་པ། ། སྙིང་པོ་ལྔ་ཡིས་ཡང་དག་བརྒྱན། །དེ་དབུས་དེ་གནས་ཆ་ནས་ལྔ། །ཆ་གཉིས་པ་ནི་བརྒྱད་མཐར་དབྱུང་། །སུམ་ཅུ་བཅུ་པ་ལྔ་ཡི་ནི། །ཆ་གཉིས་ལྔ་པ་དྲུག་པ་ཡི། །ཐིག་ལེ་རུ་ནི་གཞུག་པ་སྟེ། །སྐྱེས་བུ་གང་གིས་དེ་ལ་ནི། །མིག་གི་འོད་ཟེར་གྱིས་བལྟ་བ། །དེ་ལ་ཅི་བཞིན་གནས་པ་ཡི། །ཡེ་ཤེས་སྐྱེ་བར་ཐེ་ཚོམ་མེད། །ནམ་ཞིག་འགོག་པའི་སེམས་གྱུར་ན། །སངས་རྒྱས་ཀུན་གྱི་མཆོག་འཛིན་པ། །དཔལ་ལྡན་མཁའ་འགྲོ་འདྲ་བར་འགྱུར། །དེ་རིང་ཕན་ཆད་བུ་ཁྱོད་ནི། ། དཀྱིལ་འཁོར་ཡང་དག་འདྲི་བ་དང་། །སྒྲུབ་པོ་རྒྱུད་ལ་སྦྱོར་བ་ཡི། །སློབ་དཔོན་ཆེན་པོ་ཉིད་དུ་འགྱུར། །འདི་ནི་སངས་རྒྱས་ཀུན་གྱིས་ཀྱང་། །དབང་བསྐུར་བར་ནི་རབ་བསྔགས་ཏེ། །ཐམས་ཅད་སྔགས་ནི་སྒྲུབ་འགྱུར་ཏེ། །ལས་མཆོག་ཁྱད་པར་ཅན་ཡང་འགྲུབ། །བུ་མོ་འདི་ནི་ཁྱོད་དང་མཐུན། །སེམས་ཅན་ཁྱོད་ཀྱིས་འདོད་པ་གྱིས། །ཡིད་དུ་འོང་བའི་རིག་མ་འདི། །བདེ་གཤེགས་ཀུན་གྱིས་ཁྱོད་སྤྱོད་གནས། །སྟོང་པ་ལ་ནི་སེམས་སྦྱོར་ན། །ཁྱོད་ནི་ཡང་དག་དམ་པར་འགྱུར། །
འདི་ནི་བདེ་གཤེགས་བདེ་མཛད་པ། །ཁྱོད་ནི་འདི་ལས་རབ་བྱུང་ངོ་། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་དམིགས་པ་དང་བཅས་པའི་ཤེས་རབ་ཀྱི་མཚན་ཉིད་བརྟག་པའི་ལེའུ་སྟེ་བཅྭ་ལྔ་པའོ།། །།དེ་ནས་ཡང་ནི་བཤད་བྱ་བ། །དངོས་ཀུན་ཆོ་ག་ཤེས་མེད་ན། །སྒྲུབ་པོ་དངོས་གྲུབ་འབྱུང་མི་འགྱུར། །དེ་ཕྱིར་འདིར་ནི་བརྟུལ་ཞུགས་བསྟན། །སྦྱོར་བའི་རྩོལ་བ་ཐམས་ཅད་ནི། །དེ་ཉིད་རིག་པས་སྤང་བར་བྱ། །རྡོ་རྗེ་སེམས་དང་ངེས་འདུག་པ། །སྤངས་ནས་གཞན་དུ་མི་བྱའོ། །དག་པ་དེ་ཉིད་ལ་གནས་པས། །སྦྱོར་བ་རྣམས་ཀྱང་མི་བྱ་སྟེ། །བདག་མེད་གནས་པའི་སྦྱོར་བ་ཡིས། །ཅི་སྲིད་བར་དུ་སོ་སོར་བརྟག །དངོས་མེད་གོ་འཕང་ལ་གནས་དང་། །ཐབས་བཟང་དག་དང་ལྡན་པ་ཡིས། ། རྒྱུད་ལས་གང་ཅི་འབྱུང་བ་རྣམས། །མ་བརྟགས་པས་ནི་འབྱུང་བར་འགྱུར། །སྒོམ་པའི་སྦྱོར་བའི་སྟོབས་ཀྱིས་ནི། །དངོས་གྲུབ་མཚན་ཉིད་གང་ཡང་རུང་། །དེ་ཀུན་སྐད་ཅིག་ཙམ་ལ་ནི། །རང་ཉིད་གནས་པར་གྱུར་པ་ཡིན། །དེ་བས་དགེ་སློང་དངོས་གནས་དང་། །དེ་བཞིན་རྟོག་གེ་རྒན་པོ་དང་། །རང་གི་བུ་དང་རྒྱལ་པོ་ལ། །དེ་ཉིད་ཡང་དག་བཤད་མི་བྱ། །ཇི་ལྟར་མར་མེ་བུམ་ནང་གནས། །ཕ་རོལ་དུ་ནི་འོད་མི་གསལ། བུམ་པ་དེ་ཉིད་ཆག་གྱུར་ན། དེ་འོག་མར་མེ་གསལ་བར་འགྱུར། དེ་བཞིན་རང་ལུས་བུམ་པ་ཉིད། །བླ་མའི་ཁ་ཡིས་ལེགས་བཅག་ནས། །དེ་ཉིད་མར་མེ་ཉིད་ལྟ་བུ། །སྦྱོར་བའི་དེ་ཉིད་སྟོན་པ་ཡིན། །སྦྱོར་བ་དེ་ཉིད་ལ་གནས་ན། །གང་ཚེ་བསྟན་པ་མི་རྟག་ལ། །གནས་ཤིང་འཇིག་རྟེན་པ་སྤངས་ཏེ། །སྤྱོད་པ་ཐམས་ཅད་བྱས་ན་ནི། །དེ་ལ་དེ་ཚེ་སངས་རྒྱས་གཟིགས། །ཀུན་དུ་ཐེ་ཚོམ་གཅོད་པ་ཡིས། །རིག་པས་བྱིས་པ་བཞིན་དུ་སྤྱད། །གང་ཚེ་ཆགས་མེད་རྣལ་འབྱོར་པ། །དེ་ཚེ་ཕུན་སུམ་ཚོགས་འཕེལ་འགྱུར། །སྡིག་པ་མ་ལུས་
ལྡན་པ་དང་། །གཏི་མུག་སྒྲིབ་པ་རབ་གནས་པ། །སྨྱོན་པའི་རྣལ་འབྱོར་སྦྱོར་བ་ཡིས། །ཟླ་དྲུག་གིས་ནི་དོན་ཡོད་གྲུབ། །རང་ཉིད་སངས་རྒྱས་ཀུན་མཐོང་ཞིང་། །འདོད་པ་ཀུན་གྱིས་རབ་ཏུ་འགེངས། །ཟད་མེད་གཞོམ་དུ་མེད་པ་དང་། །དང་བའི་སྐུ་ཚེ་འབྱུང་བར་འགྱུར། །བླ་ན་མེད་པའི་བྱང་ཆུབ་མཆོག །འབད་པ་མེད་པར་ཡང་དག་འཐོབ། །འདོད་པ་ཀུན་གྱི་དགའ་མོས་རྣམས། །འབད་བྲལ་བས་ནི་འགྲུབ་པར་འགྱུར། །འགྲོ་དང་འདུག་དང་གནས་པ་ན། །མཆོག་ཏུ་ཟབ་པའི་གནས་ལ་བརྟག །འོད་གསལ་ཡེ་ཤེས་ལམ་མཁན་པ། །མཚན་ཉིད་རྟོག་པའི་རྣལ་འབྱོར་པའི། །བསམ་གཏན་སྦྱོར་བ་འདི་ཡིས་ནི། །སེམས་ཀྱི་རིན་ཆེན་བརྟན་པར་འགྱུར། །སངས་རྒྱས་བྱང་ཆུབ་རབ་ཞུགས་པ། །བྱིན་གྱིས་བརླབ་པའང་མཛད་པར་འགྱུར། །དེ་ལྟར་གྱུར་པས་ཞུགས་ནས་ཀྱང་། །ཇི་སྲིད་སེམས་ནི་མི་སྐྱོ་བར། །མཉམ་གཞག་ཡིད་ནི་བཟང་པོ་ཡིས། །དེ་ལ་འབད་པས་བསྒོམ་པར་བྱ། །དེ་འོག་ལ་ནི་ཅི་དགའ་བའི། སྤྱད་པ་ཡིས་ནི་གཅིག་བྱས་ན། ། ཅུང་ཟད་སྤྱན་ཕྱེ་བ་ཡི་མཚན། །བྱང་ཆུབ་རྒྱ་ཆེན་འཐོབ་པར་འགྱུར། །དགོད་དམ་སྨྲའམ་འདུག་པའམ། །ལ་ལར་རབ་ཏུ་གར་བྱེད་པར། །ཇི་སྲིད་སྐྱོ་བར་མི་འགྱུར་བར། །བསྒོམ་པའི་སེམས་ལ་ཞེན་པར་བྱ། །དེ་ལྟའི་དམ་ཚིག་ལྡན་གྱུར་ཅིང་། ། རྣམ་པར་མི་རྟོག་སྔགས་པ་ཡིས། །དུས་ཀྱི་ངེས་པས་ཡོངས་སྤངས་ནས། །བླ་མེད་བྱང་ཆུབ་འཐོབ་པར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཤེས་བྱེད་ཀུན་དུ་སྤྱོད་པའི་ལེའུ་སྟེ་བཅུ་དྲུག་པའོ།། །།དེ་ནས་མཁའ་འགྲོ་དེ་དག་ཐམས་ཅད་གཅིག་ཏུ་འདུས་ནས་བཅོམ་ལྡན་འདས་རྡོ་རྗེ་འཛིན་པ་ལ་ཚིགས་སུ་བཅད་པས་བསྟོད་པ། སངས་རྒྱས་ཀུན་གྱི་རང་བཞིན་ལས། །བྱུང་བའི་ལྷ་སྟེ་ཁྱོད་མཆོག་པས། །སེམས་དཔའ་ཀུན་གྱི་ཕྱག་རྒྱ་ཆེ། །མཁའ་འགྲོ་ཆེན་པོ་ཕྱག་འཚལ་ལོ། །
གཏི་མུག་ཐམས་ཅད་འོད་གསལ་བ། །མཁའ་འགྲོ་སངས་རྒྱས་ཆེན་པོ་སྟེ། །གཟུགས་སྣང་ཆོས་ནི་རྣམ་དག་པ། །བདེ་གཤེགས་མཁའ་འགྲོ་ཁྱོད་ཕྱག་འཚལ། །ང་རྒྱལ་ཐམས་ཅད་འོད་གསལ་བ། །མཁའ་འགྲོ་རེ་འདོད་སྐོང་བ་སྟེ། །སིམ་སོགས་ཆོས་ནི་རྣམ་དག་པ། ། རིན་ཆེན་མཁའ་འགྲོ་ཁྱོད་ཕྱག་འཚལ། །འདོད་ཆགས་ཐམས་ཅད་འོད་གསལ་བ། །སྐྱོན་གྱིས་གོས་མེད་མཁའ་འགྲོ་ཆེ། །མཚན་མར་འཛིན་པ་རྣམ་དག་པ། །པདྨ་མཁའ་འགྲོ་ཁྱོད་ཕྱག་འཚལ། །ཕྲག་དོག་ཆོས་ནི་འོད་གསལ་བ། །མཁའ་འགྲོ་སྣ་ཚོགས་ལས་བྱེད་པ། །མངོན་པར་འདུ་བྱེད་ཆོས་ཀུན་དག །སྣ་ཚོགས་མཁའ་འགྲོ་ཕྱག་འཚལ་བསྟོད། །མཚན་མཆོག་འདི་ཡིས་ཁྱོད་བསྟོད་པས། །གང་ཟག་དེ་ཡང་བསོད་ནམས་ཚོགས། །ཡེ་ཤེས་ཚོགས་ཆེན་ཡོངས་རྫོགས་ནས། །སངས་རྒྱས་འགྱུར་བར་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་ཀུན་དུ་བཟང་པོའི་བདེ་བ་ཆེན་པོ་ནམ་མཁའི་དབྱིངས་ཐམས་ཅད་དུ་ཁྱབ་པའི་བདག་ཉིད་ཆེན་པོས། དེ་བཞིན་གཤེགས་པ་ཐམས་ཅད་ཀྱི་སྙིང་པོ་མི་ཤིགས་པའི་ཟླ་བ་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་གི་ཐུགས་ཀའི་མི་ཤིགས་པའི་ཐིག་ལེ་ལས་ཤིན་ཏུ་དགྱེས་པ་ཆེན་པོ་ཞེས་བྱ་བའི་འོད་ཟེར་གྱི་ཚོགས་ཕྱུང་སྟེ། དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོ་ཟླ་བའི་ཐིག་ལེའི་དབུས་སུ་རྒྱས་པར་བྱས་ཏེ། ནམ་མཁའི་དབྱིངས་ཐམས་ཅད་དུ་ཡང་སྣང་བར་བྱས་ནས་སྟེང་འོག་ཏུ་ཡང་བཞུགས་ཏེ། མ་ལུས་ཤིང་ལུས་པ་མེད་པའི་རི་དང་སེམས་ཅན་ཐམས་ཅད་ལ་གསལ་བར་བྱས་ནས་ཤིན་ཏུ་དགྱེས་པ་ཆེན་པོའི་བདེ་བས་མཉེས་པར་བྱས་ཏེ་སླར་ལོག་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདེ་བའི་བདག་པོའི་སྙིང་པོའི་མཆོག་གི་ཟླ་བའི་ཐིག་ལེའི་དབུས་ན་བདེ་བར་ཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འོད་ཟེར་གྱི་ཚོགས་ཀྱི་ཕྲེང་བ་མཆོག་ཏུ་བདེ་བར་གྱུར་པའི་སྙིང་པོ་དེས་བསྐུལ་བ་ན་གར་མཛད་ཅིང་རང་རང་གི་ཏིང་ངེ་འཛིན་དུ་དམིགས་ནས་བཅོམ་ལྡན་འདས་དཔལ་ཀུན་དུ་བཟང་པོའི་ཐུགས་ཀའི་ཟླ་བའི་ཐིག་ལེའི་དབུས་སུ་གསང་བའི་དགྱེས་པ་ཆེན་པོའི་
བདེ་བར་གཅིག་ཏུ་བསྡུས་པར་གྱུར་ཏེ། རང་རང་གི་སྐུ་བུད་མེད་ཀྱི་ཚུལ་དུ་བསྐྱེད་ནས་བཅོམ་ལྡན་འདས་ཀྱི་ཐུགས་ཀ་ནས་མངོན་པར་བྱུང་བར་གྱུར་ཏོ། །དེ་ནས་མཁའ་འགྲོའི་ཚོགས་དེ་དག་ཐམས་ཅད་རབ་ཏུ་དགའ་ནས་ཅ་ཅོའི་སྒྲ་ཡང་དག་པར་འབྱིན་ཅིང་དབྱངས་ཆེན་པོ་བརྗོད་པར་གྱུར་ཏོ། །ཀྱེ་མའོ་རྡོ་རྗེ་སེམས་དཔའ་ཡི། །རྡོ་རྗེ་ཤིན་ཏུ་དགྱེས་ཆེན་པོ། །ཀྱེ་མའོ་སྣ་ཚོགས་ཐབས་ནི་བདེ་བྱེད་ཆེ། །སྣ་ཚོགས་ཡེ་ཤེས་བདེ་བ་ཆེ། །ཀྱེ་མའོ་ཀུན་དུ་བཟང་པོ་ཡི། །དགེ་བའི་ཡེ་ཤེས་བདེ་བྱེད་ཆེ། །གང་བདེའི་ཕྱིར་ནི་རིག་མ་ཡི། །པདྨ་ལ་ནི་གནས་པར་མཛོད། །ཀྱེ་མའོ་རིག་པ་ཤིན་ཏུ་ཟབ། །ཤེས་རབ་ཕ་རོལ་ཕྱིན་མ་འདི། །སེམས་ཅན་ཀུན་ལ་ཤེས་རབ་ཀྱི། །མུན་པ་ཐིབས་པོ་སེལ་བར་མཛད། །ཀྱེ་མའོ་ཐམས་ཅད་ངོ་མཚར་ཆེ། །མཁའ་འགྲོ་འདྲ་བར་གར་མཛད་ཅིང་། །རྣམ་པར་སྣང་མཛད་མྱང་བ་དང་། །མཉེ་བ་དང་ནི་འཕྲོག་པ་མཆོག །ཀྱེ་མའོ་ཤིན་ཏུ་རབ་ཏུ་དགྱེས། །སྐལ་ལྡན་སྐལ་སྤྱོད་པ་དང་ནི། །སྣ་ཚོགས་སྐལ་བས་བདེ་བྱེད་ཆེ། །སྣ་ཚོགས་རྡོ་རྗེ་ཤིན་ཏུ་མཛེས། །དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོས་ཏིང་ངེ་འཛིན་ལས་བཞེངས་ཏེ་འཁོར་གྱི་དཀྱིལ་འཁོར་ལ་རྣམ་པར་བལྟས་ཏེ་འདི་སྐད་ཅེས་བཀའ་སྩལ་ཏོ། །ཨཱ་ལི་དང་ནི་ཀཱ་ལི་དང་། །དེ་བྱུང་ཟླ་བ་རྣམ་པ་གཉིས། །མེ་ལོང་ལྟ་བུའི་ཡེ་ཤེས་ཏེ། །གཅིག་ཏུ་གྱུར་པ་མཉམ་ཉིད་དོ། །ས་བོན་མཚན་མར་གྱུར་པ་ནི། །སོ་སོར་རྟོག་པར་ངས་བཤད་དོ། །དེ་བྱུང་སངས་རྒྱས་ཐམས་ཅད་ཀྱིས། །འགྲོ་དོན་བྱེད་པ་བྱ་ནན་ཏན། །གཟུགས་བརྙན་རྫོགས་པ་ཆོས་དབྱིངས་ཏེ། །ལྷ་ཡི་དབང་པོ་སངས་རྒྱས་བསྐྱེད། །དེ་ལ་བར་མས་ཁུ་བས་བསྐྱེད། །བསྐུར་བས་རང་གི་ལྷར་བསྐྱེད་ནས། །བྱིན་གྱིས་བརླབ་པ་བྱ་བ་ནི། །རྒྱུད་རྣམས་ཀྱི་ནི་ཐུན་མོང་ངོ་། །གསང་དང་གསང་ཆེན་ཤིན་ཏུ་གསང། །རྣལ་འབྱོར་རྣལ་འབྱོར་ཆེན་པོ་དང་། རྗེས་སུ་རྣལ་འབྱོར་ཞེས་བྱ་དང་། སྟོང་པ་དང་ནི་ཤིན་ཏུ་སྟོང་།ཆེན་པོ་སྟོང་པ་ཞེས་བྱ་དང་། །དགའ་དང་དགའ་བ་བར་མ་དང་། །དགའ་བྲལ་གྱི་ནི་དགའ་བ་རྣམས། །རྒྱུད་རྣམས་ཀུན་གྱི་སྤྱི་བོའོ། །ཕྱིར་བཟློག་གཉིས་ཀྱི་ཆོ་ག་དང་། །གསང་དང་ཤེས་རབ་ཡེ་ཤེས་དང་། །ཁ་སྦྱོར་
འབྱེད་པའི་ཆོ་ག་དང་། །གཏོར་མ་རྡོ་རྗེའི་བཟླས་པ་དང་། །དྲག་ཤུལ་སྒྲུབ་པའི་ཆོ་ག་དང་། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟང་སྟབས་འདུག་སྟངས་བཟླས་བརྗོད་དང་། །སྦྱིན་སྲེག་མཆོད་པ་ལས་སྦྱོར་དང་། །སླར་སྡུད་པ་ཡི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཡང་དག་དེ་ཉིད་དངོས་པོ་མི་ཤེས་པར། །གསང་སྔགས་སྨྲ་བ་པོ་ཡིན་ཞེས་བརྗོད་པ། །དེ་དག་མངོན་པའི་ང་རྒྱལ་གསང་སྔགས་ཆོ་ག་འཆད། །དེ་ནི་དམ་ཉམས་འདི་དང་ཕ་རོལ་བརླག །ཉམས་པས་བདུད་ཀྱིས་བཟུང་ནས་ཤི་ནས་དམྱལ་བར་འགྲོ། །སེམས་ཅན་རྣམས་ལ་རབ་བརྟེན་ཏོ། །བྱང་ཆུབ་དམ་པ་ཐོབ་འགྱུར་བ། །སེམས་ཅན་སླུ་བར་མི་བྱ་སྟེ། །བདེ་གཤེགས་ལས་ལ་སེམས་ཅན་སྦྱར། །གང་ཞིག་སྦྱོར་འདི་མི་བརྩོན་པས། །རྐང་ལག་མིག་སོགས་སྦྱིན་པ་དང་། །དཀའ་ཐུབ་ཅི་འདྲ་སྤྱད་བྱས་ཀྱང་། །བདུད་རྩི་རོ་ཐོབ་མི་ནུས་སོ། ། རྣལ་འབྱོར་གཅིག་ཅིག་ཤེས་བྱས་ནས། །དབེན་པར་སོང་སྟེ་རབ་འབད་ན། །སྡིག་དག་ཚེ་འདིར་སངས་རྒྱས་འགྲུབ། །ཆོས་བདག་མེད་པར་རབ་བསྒོམས་པས། །ཐམས་ཅད་མཁྱེན་པ་ཁོང་དུ་ཆུད། །ཐབས་ཤེས་གཉིས་ཀྱི་འཇོ་སྒེག་གིས། །གསང་བ་ལྔ་ཡི་བདག་ཉིད་མཆོད། །དངོས་པོ་ཐམས་ཅད་དངོས་མེད་པར། །བཞི་བཅུའི་དོན་ནི་རྟོགས་པ་དང་། །རྡོ་རྗེ་པདྨའི་དབང་བསྐུར་བས། །བདུད་རྩི་ཡིས་ནི་དགའ་བར་བྱེད། །གསང་བར་བྱ་བའི་ཆོས་གསང་བས། །གསང་ཞིང་སྦས་ཏེ་སྤྱད་པར་བྱ། །འདོད་པའི་ཡོན་ཏན་ལྔ་ལས་ནི། །རྣལ་འབྱོར་སེམས་པས་སྤྱད་བྱ་ཞིང་། དེ་བཞིན་བཟའ་དང་བཏུང་བྱས་ནས། །སེམས་ཅན་ཐམས་ཅད་དབང་དུ་བྱེད། །འདི་ལ་ཁྲུས་དང་གཙང་སྦྲ་མེད་དེ་མཆོད་ཕྱིར་ཐོགས་པའང་མེད། །དཀྱིལ་འཁོར་སྦྱིན་སྲེག་མེད་དེ་དུས་དང་གཟའ་ཚེས་མེད། །གཏོར་མ་ལ་སོགས་བྱ་བར་བྱ་བ་མེད་དེ་མཆོག་གི་རབ་མཆོག་དང་པོའོ།། །།རྡོ་རྗེ་སེམས་དཔའི་སྒྲུབ་པ་ཡང་དག་འདི་ཉིད་ཡིན་ཏེ་བརྩོན་པར་བྱ། །དེ་ནས་མཁའ་འགྲོ་དེ་དག་ཐམས་ཅད་རབ་ཏུ་དགའ་ནས། བཅོམ་ལྡན་འདས་རྡོ་རྗེ་འཛིན་པ་ཆེན་པོ་ལ་ལེགས་སོ་ཞེས་གསོལ་ཏེ། ལེགས་སོ་ལེགས་སོ་བདེ་བྱེད་ཆེ། ལེགས་སོ་ལེགས་སོ་ཡེ་ཤེས་ཆེ། ལེགས་སོ་ལེགས་སོ་བདེ་བ་ཆེ། །
ལེགས་སོ་ལེགས་སོ་སྣ་ཚོགས་ཆེ། །ལེགས་སོ་ལེགས་སོ་ཤེས་རབ་ཆེ། ལེགས་སོ་ལེགས་སོ་དགྱེས་པ་ཆེ། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས། ཐུགས་རྗེ་ཆེན་པོའི་ཐུགས་རང་གི་ཐུགས་ཡང་དག་པ་ལ་དམིགས་ནས་ཅང་མི་གསུང་བར་བཞུགས་སོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་རྣལ་འབྱོར་ཆེན་པོའི་དེ་ཁོ་ན་ཉིད་ངེས་པ་ཞེས་བྱ་བ། དཔལ་ཨཽ་ཊྱཱན་གྱི་གསང་བའི་དགོན་པ་ནས་བྱུང་བ་རྫོགས་སོ།། །།རྒྱ་གར་གྱི་མཁན་པོ་ཀ་མ་ལ་གུཔྟ་དང་། བོད་ཀྱི་ལོ་ཙྪ་བ་ཆེན་པོ་མངའ་བདག་ལྷ་ཡེ་ཤེས་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། རྒྱ་གར་སྐད་དུ། ཨཪྻ་དྭ་ཡ་སམ་ཏཱ་བི་ཛ་ཡ་ཁྱུ་བི་ཀལྤ་མ་ཧཱ་རཱ་ཛཱ། བོད་སྐད་དུ། འཕགས་པ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བའི་རྟོག་པའི་རྒྱལ་པོ་ཆེན་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གཞན་འཕྲུལ་དབང་བྱེད་ཀྱི་གནས། ལྷའི་ཁང་བཟང་ན་རིའི་རྒྱལ་པོ་རི་རབ་དགུ་བཅུ་རྩ་དགུའི་རྡུལ་ཕྲ་རབ་ཀྱི་གྲངས་དང་མཉམ་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚོགས་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་རྡོ་རྗེ་སེམས་དཔའི་གནས་ཐོབ་པ། རྡོ་རྗེའི་རྒྱལ་ཚབ་ཏུ་དབང་བསྐུར་བ་ཤ་སྟག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཁུ་ཚུར་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཉམ་པ་ཉིད་ཀྱི་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་མཛོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཀྱི་སྟོབས་ཐམས་ཅད་རབ་ཏུ་འཇོམས་པ་དང་། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རི་རབ་དགུ་བཅུ་རྩ་དགུའི་རྡུལ་ཕྲ་རབ་ཀྱི་གྲངས་དང་མཉམ་པ་དང་ཐབས་ཅིག་གོ། །དེའི་ཚེ་དེ་བཞིན་གཤེགས་པའི་མཐུ་དང་བྱིན་གྱི་
རླབས་ཀྱིས་ལྷའི་རྒྱལ་པོའི་ཁང་བཟང་དེ་ནི། ནོར་བུ་རིན་པོ་ཆེའི་ཁང་བརྩེགས་དང་། ནོར་བུ་རིན་པོ་ཆེ་ཆེན་པོའི་ཏོག་དང་། ཁ་དོག་སྣ་ཚོགས་རྣམ་པར་བཀྲ་བའི་དར་དཕྱངས་དང་། འཕན་དང་། གདུགས་དང་། རྒྱལ་མཚན་དང་། བླ་བྲེས་དང་། རིན་པོ་ཆེ་སྣ་ཚོགས་ཀྱི་རྒྱན་ཕྲེང་དང་། དྲ་བ་དང་། དྲ་བ་ཕྱེད་པ་དང་། རྔ་ཡབ་དང་། མེ་ཏོག་གི་ཆུན་པོ་དང་། དྲིལ་བུ་དང་། དར་གྱི་ལྡ་ལྡི་རླུང་གིས་བསྐྱོད་པ་ལ་སོགས་པའི་རྒྱན་བཀོད་ཕུན་སུམ་ཚོགས་པ་དང་ལྡན་ཏེ། དཔེར་ན་ཟླ་བའི་དཀྱིལ་འཁོར་ཆ་ཤས་ཡོངས་སུ་རྫོགས་པ་བཞིན་དུ་ཀུན་ནས་མཛེས་པར་གྱུར་ཏོ། །སྟོན་པ་བཅོམ་ལྡན་འདས་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་བྱིན་གྱིས་བརླབས་པའི་དམ་ཚིག་གི་ཡེ་ཤེས་རྣམ་པ་སྣ་ཚོགས་པ་ཁྱད་པར་འཕགས་པ་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་ཅོད་པན་གྱིས་ཁམས་གསུམ་གྱི་ཆོས་ཀྱི་རྒྱལ་པོར་དབང་བསྐུར་བ་བརྙེས་པ། དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་དང་ལྡན་པའི་རྣལ་འབྱོར་ཆེན་པོའི་དབང་ཕྱུག་ཡོངས་སུ་རྫོགས་པ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆོས་ཐམས་ཅད་མཉམ་པ་ཉིད་ཐུགས་སུ་ཆུད་པ། དེ་བཞིན་གཤེགས་པ་ཐམས་ཅད་ཀྱི་རྨད་དུ་བྱུང་བའི་ཕྲིན་ལས་སྣ་ཚོགས་མཛད་པ། ཐུགས་རྗེ་ཆེན་པོའི་བདག་ཉིད་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་མཉམ་པ་ཉིད་ལ་དུས་གསུམ་དུ་རྟག་པར་བཞུགས་པ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་ཅད་ཀྱི་རེ་བ་ཡོངས་སུ་སྐོང་བར་མཛད་ཅིང་། དེ་བཞིན་གཤེགས་པ་ཐམས་ཅད་ཀྱིས་བསྟོད་ཅིང་བསྔགས་པ་དང་། དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་འཁོར་ལོ་བསྐོར་བར་གསོལ་བ་བཏབ་པ་ལ་བདག་གིར་མཛད་དོ། །གཞན་ཡང་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་གངྒཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་རྣམས་དང་ཐབས་ཅིག་སྟེ། དཔེར་ན་ཏིལ་གྱི་གང་བུས་ཛམཱུའི་གླིང་ཡོངས་སུ་གང་བ་བཞིན་ནོ། །དེ་བཞིན་གཤེགས་པའི་སྐུ་རེ་རེ་ལས་ཀྱང་གཞལ་དུ་མེད་ཅིང་གྲངས་སུ་མ་མཆིས་པའི་དེ་བཞིན་གཤེགས་པའི་ཞིང་སྣང་བར་གྱུར་ཅིང་། སངས་རྒྱས་ཀྱི་ཞིང་དེ་དག་ཐམས་ཅད་ན་ཡང་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་མཆོག་ཏུ་
གསང་བའི་ཆོས་ཀྱི་སྒོ་འདི་ཉིད་སྟོན་པར་མཛད་དོ། །ཡང་དེའི་ཚེ་ན་ལག་ན་རྡོ་རྗེ་རྡོ་རྗེ་འཆང་ཆེན་པོ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་ཐུགས་ལ་རབ་ཏུ་གནས་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་པ་ཡང་དག་པར་སྒྲུབ་པར་བྱེད་པ། དེ་བཞིན་གཤེགས་པ་ཐམས་ཅད་ཀྱི་སྐུའི་ཕྲིན་ལས་རྗེས་སུ་སྐྱོང་བ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་དགོངས་པ་ཡོངས་སུ་རྫོགས་པར་བྱེད་པ་པོ་སྟེ། དེ་ལྟར་རང་གི་རིགས་ཀྱི་ཆོས་ལ་གནས་པའི་རྣལ་འབྱོར་རྗེས་སུ་འཛིན་པར་གནས་པ་ལས། འདུས་པ་ཆེན་པོའི་དབུས་སུ་རང་གི་ལུས་མི་སྣང་བར་མཛད་དོ། །དེ་ནས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་ཚོགས་ཀྱི་ནང་ན་བྱང་ཆུབ་སེམས་དཔའ་ཕྱག་ན་རྡོ་རྗེ་མི་སྣང་བར་གྱུར་པ་གཟིགས་ནས་གསུང་དབྱངས་གཅིག་གིས་ཆེད་དུ་རྗོད་པ་འདིས་ཆེད་དུ་བརྗོད་དོ། །ཨེ་མ་ལག་ན་རྡོ་རྗེ་འཆང་། །བདག་ཅག་ཡོངས་ཀྱི་བྱེད་པ་པོ། །འདུས་པའི་དབུས་ནས་མི་སྣང་བ། །མགོན་ཁྱོད་ད་ལྟ་གང་དུ་བཞུད། །ཅེས་གསུངས་ནས་ཐམས་ཅད་ཀྱང་སོ་སོའི་མི་ཤིགས་པ་རྡོ་རྗེ་རིན་པོ་ཆེ་མཆོག་གི་བྱིན་གྱིས་བརླབས་པའི་གནས་སུ་ཅང་མི་གསུང་བར་བཞུགས་སོ། །དེ་ནས་ལག་ན་རྡོ་རྗེ་རྡོ་རྗེ་འཆང་ཆེན་པོ་དེས། དེ་བཞིན་གཤེགས་པ་ཐམས་ཅད་ཀྱི་གནས་ལྔ་ལས་བྱུང་སྟེ་བཅོམ་ལྡན་འདས་རྣམ་པར་སྣང་མཛད་ཆེན་པོའི་སྐུར་བཞེངས་ལ། དེ་བཞིན་གཤེགས་པ་ཐམས་ཅད་ཀྱི་ཐུགས་ཉི་མའི་དཀྱིལ་འཁོར་ཆེན་པོར་སྣང་བ་དེ་དཔག་ཚད་སྟོང་ཕྲག་གི་ཚད་དུ་ཉི་མའི་དཀྱིལ་འཁོར་ཆེན་པོར་བྱིན་གྱིས་བརླབས་ནས། དེའི་དབུས་སུ་གནས་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་པར་གྱུར་ནས། དེ་བཞིན་གཤེགས་པ་ཐམས་ཅད་ཀྱི་རྗེ་བོ་ལ་གསོལ་བ་བཏབ་བོ།། །།རྡོ་རྗེ་ཆོས་ཕྱིར་ཁྱོད་ལེགས་སོ། །རྡོ་རྗེའི་སྤྱན་ཕྱིར་ཁྱོད་ལེགས་སོ། །རྡོ་རྗེ་ཡེ་ཤེས་ཕྱིར་ཁྱོད་ལེགས། །སངས་རྒྱས་ཡེ་ཤེས་ཕྱིར་ཁྱོད་ལེགས། །གོང་བཞིན་དུ་སྦྱར་རོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་བཅོམ་ལྡན་འདས་རྡོ་རྗེ་འཆང་ཆེན་པོ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །སངས་རྒྱས་ཀུན་ལ་ཕན་པར་མཛད། །སེམས་ཅན་མགོན་ལ་གསོལ་བ་ནི། །ཁྱབ་བདག་ཐེག་པ་ཆེན་པོའི་ཚུལ། །ཐེག་པའི་མཆོག་ནི་བསྟན་དུ་གསོལ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་
པ་རྣམས་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་དེ་སྐད་མ་ཟེར་ཅིག །སྤྲོ་བ་མཆོག་གི་དེ་ཁོ་ན་ཉིད་ཀྱི་ཚུལ་ངེས་པར་བསྟན་པར་དེ་བཞིན་གཤེགས་པ་ཐམས་ཅད་ཀྱིས་རབ་ཏུ་གསུངས་སོ། །ཅིའི་རྒྱུས་རྡོ་རྗེ་འཛིན་རབ་ཏུ་གསུང་། བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་ཀྱིས་དགོངས། དེ་ཉིད་ཀྱི་ཚེ་འཁོར་ཆེན་པོའི་དཀྱིལ་འཁོར་དུ་བྱམས་པ་ལ་སོགས་པའི་བྱང་ཆུབ་སེམས་དཔའ་ཆེན་པོ་རྣམས་ཐེག་པ་ཆེན་པོ་མཆོག་གི་དོན་གྱི་ཚུལ་ཆེན་པོ་འདི་ཐོས་ནས། རྣམ་པ་སྟོང་དུ་རྣམ་པར་བསྙིལ་བར་གྱུར་ཏོ། །དེ་བཞིན་གཤེགས་པ་ཐམས་ཅད་ལ་གསོལ་པ། ཁྱོད་ཀྱིས་ཞི་བར་བྱིན་བརླབས་པས། །སངས་རྒྱས་རྣམས་ཀྱི་རྣམ་པ་ཅན། །ཁྱབ་བདག་དེ་ཉིད་རྡོ་རྗེ་ཅན། །བྱིན་རླབས་མཉམ་པར་ཀུན་དུ་སྤྱོད། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སྤྱན་གདངས་ནས་དེ་བཞིན་གཤེགས་པ་ཐམས་ཅད་ལ་ལེགས་སོ་བྱིན་ནས། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཆེན་པོའི་འོད་ཟེར་གྱིས་བཀང་ནས། དེ་བཞིན་གཤེགས་པ་ཐམས་ཅད་ཀྱི་ཐུགས་ཡང་དག་པར་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཉི་མའི་དཀྱིལ་འཁོར་ཆེན་པོ་བཞི་རབ་ཏུ་བྱུང་བར་གྱུར་ཏེ། ཤར་གྱི་ཕྱོགས་སུ་མི་ཟད་པའི་གཟུགས་འཛིན་མ་ཞེས་བྱ་བའི་ཉི་མའི་དཀྱིལ་འཁོར་ཆེན་པོ་རབ་ཏུ་ཤིན་ཏུ་བྱུང་བར་གྱུར་ཏོ། །ལྷོ་ཕྱོགས་སུ་རིན་པོ་ཆེ་ཡིད་བཞིན་གྱི་ནོར་བུའི་རྡོ་རྗེ་ཞེས་བྱ་བའི་ཉི་མའི་དཀྱིལ་འཁོར་ཆེན་པོ་རབ་ཏུ་ཤིན་ཏུ་བྱུང་བར་གྱུར་ཏོ། །ནུབ་ཕྱོགས་སུ་འཆི་མེད་རྡོ་རྗེ་ཞེས་བྱ་བའི་ཉི་མའི་དཀྱིལ་འཁོར་ཆེན་པོ་རབ་ཏུ་ཤིན་ཏུ་བྱུང་བར་གྱུར་ཏོ། །བྱང་ཕྱོགས་སུ་དོན་ཡོད་པའི་དམ་ཚིག་གི་རྡོ་རྗེ་ཞེས་བྱ་བའི་ཉི་མའི་དཀྱིལ་འཁོར་ཆེན་པོར་རབ་ཏུ་ཤིན་ཏུ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཀྱི་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བའི་རྟོག་པའི་རྒྱལ་པོ་ཆེན་པོ་སྟོན་ཏོ། །རྡོ་རྗེའི་སྤྱོད་པ་མངོན་པར་བརྩོན་པ་ཞེས་བྱ་བའི་དེ་བཞིན་གཤེགས་པ་ཐམས་ཅད་ཀྱང་བཅོམ་ལྡན་འདས་ཕྱག་ན་རྡོ་རྗེ་དེ་ཉིད་ཀྱི་ཕྱོགས་བཅུ་རྣམས་སུ་དེ་བཞིན་ནོ། །དེ་བཞིན་དུ་ཡོན་ཏན་ཁྱད་པར་དུ་འཕགས་པའི་རྫུ་འཕྲུལ་དང་། དེ་བཞིན་དུ་ཡོན་ཏན་དང་ལྡན་པའི་འཁོར་གྱི་དཀྱིལ་འཁོར་དང་ཐབས་ཅིག་ཏུ་ཕྱོགས་བཅུར་བཞུགས་སོ། །འདི་ལྟ་སྟེ། ཡང་སྟོང་གསུམ་གྱི་སྟོང་ཆེན་
པོ་ཞེས་བྱ་བའི་འཇིག་རྟེན་གྱི་ཁམས་རྣམས་མཁའ་སྣང་གི་འོད་ཟེར་གྱིས་གཡོགས་པར་གྱུར་ཏོ། །ཉི་མའི་དཀྱིལ་འཁོར་ཐམས་ཅད་ཀྱི་འོད་ཟེར་གྱིས་ལྷན་ཅིག་པ་དང་མཐུན་པ་ཙམ་དུའང་མི་བཟོད་པའི་འོད་ཟེར་དུ་བྱས་པ་དེ་ལྟ་ཁོ་ནར་དེ་བཞིན་གཤེགས་པ་ཐམས་ཅད་ཀྱི་འོད་རྡོ་རྗེ་སེམས་དཔའི་འོད་ཀྱིས་མོག་མོག་པོར་གྱུར་ནས་ཀུན་ཏུ་གནས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཕྱག་ན་རྡོ་རྗེ་ལ་བྱང་ཆུབ་སེམས་དཔའ་དང་། དེ་བཞིན་གཤེགས་པ་ཐམས་ཅད་མཆོད་པའི་སྤྲིན་རྣམས་ཀྱིས་ཡང་དག་པར་མཆོད་དེ། ཀུན་ཏུ་བཟང་པོ་ཞེས་བྱ་བ་བསྐྱེད་དེ་ཅང་མི་གསུང་བའི་རྣམ་པར་གནས་པར་གྱུར་ཏོ། །དེ་ནས་ཀུན་ཏུ་བཟང་པོ་རྡོ་རྗེ་འཆང་ཆེན་པོ་བྱང་ཆུབ་སེམས་དཔའ་ཐམས་ཅད་ཀྱི་རང་གི་ཐུགས་ལ་བཞག་ནས་ཡེ་ཤེས་ཀྱི་རིགས་དེ་བསྐྱེད་པ་གསང་ཆེན་དང་བཅས་པ་དེ་བཞིན་གཤེགས་པ་ཐམས་ཅད་ཀྱི་གསང་བ་གསལ་བར་བྱེད་པའི་རྒྱུ་རང་གི་ཏིང་ངེ་འཛིན་ལ་སྙོམས་པར་ཞུགས་ཏེ། ཡེ་ཤེས་ཀྱི་རིགས་རང་གི་ཏིང་ངེ་འཛིན་སྟོན་ཏོ། །ལོགས་བཞི་པ་ལ་ཟུར་བཞི་པ། །རིན་ཆེན་བཞི་དང་ཡང་དག་ལྡན། །འོ་མ་ཞོ་ནི་ཀུན་བཀྲམ་པར། །བྱས་ནས་བསམ་གཏན་ཡང་དག་བརྩམ། །དེ་ཡི་དབུས་སུ་པདྨ་ཆེ། །ཤེལ་དང་ཟླ་བ་མཉམ་པའི་འོད། །གསལ་བའི་དཀྱིལ་འཁོར་ཡང་དག་ལྡན། །དཀྱིལ་འཁོར་རྒྱུན་དུ་བསྒོམ་པར་བྱ། །འབར་བ་འདུས་པ་དེ་རྣམས་སུ། །སངས་རྒྱས་གཟུགས་ནི་རྣམ་པར་བསྒོམ། །ཀུན་ནས་ཡོངས་སུ་ཟླུམ་པོ་ནི། །ཁྲུ་ནི་ཉི་ཤུ་བསམ་པར་བྱ། །ཆོ་ག་ཤེས་པས་དེ་དབུས་སུ། །རང་གཟུགས་དགེ་བ་བསྒོམ་པར་བྱ། །བདག་དང་བདག་གིར་རྣམ་རྟོག་པ། །དོར་བའི་བསམ་གཏན་ཡང་དག་བརྩམ། །ཡེ་ཤེས་རིགས་ཀྱི་ཆོ་ག་ཡིས། །གསང་སྔགས་སེམས་ལ་རྗེས་དྲན་བྱ། །ཨོཾ་སརྦ་ཏ་ཐཱ་ག་ཏཱ་ཛྙཱ་ན་ཀུ་ལ་སྭ་བྷཱ་བཨཱཏྨ་ཀོ྅ཧཾ། འདིས་ཕྱག་རྒྱ་མཉམ་པར་འདུས་པས། སྡིག་པ་ཐམས་ཅད་ཡོངས་སུ་དོར་བར་བྱའོ། །འོད་ཟེར་སྟོང་ཕྲག་བཅུ་པ་ནི། །དང་པོར་བསམ་ནས་དྲི་མ་དབྱུང་། །ཡེ་ཤེས་རིགས་ཀྱི་ཆོ་ག་ཡིས། །རིག་པའི་རྒྱལ་པོ་རྣམ་པར་བསྒོམ། །འོད་དཀར་ཕྲ་མོ་འབར་བ་ནི། །དེ་ནི་ཀུན་ཏུ་རྣམ་པར་དགོད། །ཐམས་ཅད་དེ་ཉིད་དུ་བྱ་སྟེ། བསྒོམ་པར་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དབང་བསྐུར་བའི་གསུངས་སོ། །རང་
ལུས་ཤིན་ཏུ་བརྟན་བྱས་ནས། །འོད་ཀྱི་ཚུལ་གྱི་ཆོ་ག་རྣམས། །སངས་རྒྱས་གཟུགས་ནི་འདུས་པས་ནི། །མཚོན་པས་རྡོར་སེམས་བསྐྱེད་པས་སོ། །ཆོ་ག་ཤེས་པས་རབ་བརྩམས་ན། །དེ་ཡི་དངོས་གྲུབ་རྙེད་མི་དཀའ། །རང་གི་གཟུགས་ནི་མི་གཡོ་བར། །བྱས་ནས་རྡོར་སེམས་ཆོ་ག་རྣམས། །ཇི་སྲིད་ནམ་མཁའ་དགོངས་གྱུར་པ། །ཆོ་ག་ཤེས་པས་སྤྲོ་བར་བྱ། །སངས་རྒྱས་གཟུགས་དང་རང་གཟུགས་ཤིང་། །བྱས་ནས་ཀུན་སྦྱོར་མཚན་ཉིད་ཀྱིས། །རྣལ་འབྱོར་བསམ་གཏན་དུས་སུ་ནི། །རྫོགས་བྱ་དེ་ལ་རབ་ཏུ་གཞུག །རང་གི་གཟུགས་དང་སངས་རྒྱས་གཟུགས། །ཇི་ལྟར་གནས་ལྟར་བློ་དང་ལྡན། །ཇི་ལྟར་རིགས་པར་སྦྱོར་བ་ནི། །རྡོ་རྗེ་སེམས་དཔར་བསྒོམ་པར་བྱ། །དེ་བཞིན་གཤེགས་པ་ཀུན་གྱི་རྗེ། ། བཅོམ་ལྡན་འདས་ཀྱིས་འདི་གསུངས་སོ། །འབར་བའི་ཕྲེང་བ་འཁྲུགས་པའི་འོད། །རང་ལུས་བསྒོམ་བྱ་རྣལ་འབྱོར་པ། །དེ་ཉིད་རྡོ་རྗེའི་ཚུལ་གྱིས་ནི། །རྡོ་རྗེ་དབྱེར་མེད་དེ་སྒོམ་མོ། །འོད་ལྔ་ཤིན་ཏུ་ཕྱུང་ནས་ནི། །བྱང་ཆུབ་སེམས་ནི་རྣམ་པར་བསྒོམ། །སྙིང་གར། །སངས་རྒྱས་ཀུན་ནི་མཆོད་པར་བྱ། །དེ་བཞིན་གཤེགས་པ་ཀུན་གྱི་རྗེ། །བཅོམ་ལྡན་འདས་ཀྱིས་འདི་གསུངས་སོ། །འབར་བའི་ཕྲེང་བ་འཁྲུགས་པའི་འོད། །དཀྱིལ་འཁོར་ལྔ་ནི་བསམ་པར་བྱ། ། སངས་རྒྱས་གཟུགས་ནི་འདུས་པས་ནི། །བཀང་སྟེ་སྔགས་ནི་བསྒོམས་པ་ལས། །སངས་རྒྱས་གཟུགས་བརྙན་ལྟར་བྱས་ནས། །སྒོམ་པའི་བདག་ཉིད་ཅན་བསྒོམ་བྱ། །རང་གི་གཟུགས་ནི་དེར་བསམ་བྱ། །རྟོག་པ་བསྐྱེད་པའི་ཆོ་ག་ལས། །ཐུགས་ལ་བྱང་ཆུབ་སེམས་ཀྱང་ནི། །བསྒོམ་བྱ་དེ་ལ་རྣལ་འབྱོར་སྐྱེས། །རྡོ་རྗེ་སེམས་དཔས་རྣམ་པར་བརྒྱན། །ཆོ་ག་ཤེས་པས་དབྱུང་བར་བྱ། །དེར་ཡང་རྡོ་རྗེ་སེམས་དཔའ་ལ། །སངས་རྒྱས་གཟུགས་ནི་རྣམ་བསྒོམ་བྱ། །ཆོ་ག་ཤེས་པས་སངས་རྒྱས་
གཟུགས། །ཡི་གེ་ཕྲ་མོ་རྣམ་པར་བསྒོམ། །ཡི་གེ་རྣམས་སུའང་ཐམས་ཅད་དུ། །སངས་རྒྱས་གཟུགས་ནི་རྣམ་བསྒོམ་བྱ། །དེ་རྣམས་དང་ནི་ཡི་གེ་གཉིས། །རང་གཟུགས་རྣམ་པར་མཉམ་བསྒོམ་ལ། །ཉི་མའི་དཀྱིལ་འཁོར་ཚུལ་གྱིས་ནི། །མཁས་པས་རང་གཟུགས་བསྒོམ་པར་བྱ། །ཇི་སྲིད་ནམ་མཁའ་འགོངས་གྱུར་པ། །ཞིང་འདི་ཁྱབ་པར་གཡོག་པར་བྱ། །ཉི་མའི་དཀྱིལ་འཁོར་ཚུལ་གྱིས་ནི། །རྡོ་རྗེའི་རྣལ་འབྱོར་རྣམ་བསྒོམ་བྱ། །སྦྱོར་རྣམས་སུ། །སངས་རྒྱས་གཟུགས་ནི་རྣམ་བསྒོམ་བྱ། །ཉི་མའི་དཀྱིལ་འཁོར་ཚུལ་གྱིས་ནི། །འཇིག་རྟེན་ཁམས་འདིར་སྤྲོ་བར་བྱ། །ཇི་སྲིད་ནམ་མཁའ་འགོངས་གྱུར་པའི། །ཞིང་འདི་ཁྱབ་པར་གཡོག་པར་བྱ། །ཟླ་བའི་དཀྱིལ་འཁོར་ཚུལ་གྱིས་ནི། །ཉི་མའི་དཀྱིལ་འཁོར་སྒོམ་པ་ལས། །ཉི་མའི་དཀྱིལ་འཁོར་ཚུལ་གྱིས་ནི། །སངས་རྒྱས་གཟུགས་ནི་རྣམ་བསྒོམ་པ། །སངས་རྒྱས་གཟུགས་ནི་རྣམ་བསྒོམས་པས། །ཟླ་བའི་དཀྱིལ་འཁོར་རྣམ་བསྒོམ་པ། །ཟླ་བའི་དཀྱིལ་འཁོར་ཚུལ་གྱིས་ནི། །སངས་རྒྱས་གཟུགས་ནི་རྣམ་བསྒོམ་པ། །ཆོས་ཀྱི་རྒྱལ། །པདྨའི་རྣལ་འབྱོར་ཆོ་ག་ཡིས། །སྒོམ་པ་ཐམས་ཅད་བརྟག་པར་བྱ། །སྒོམ་པ་ལ་སོགས་ཡོངས་འཛིན་ལས། །གཞན་དུ་མཆོད་བྱ་མིན་པ་ཉིད། །སངས་རྒྱས་གཟུགས་ནི་རྣམ་བསྒོམས་ནས། །ཤིན་ཏུ་བརྟན་པར་བརྟན་པའི་སེམས། །བྱང་ཆུབ་སེམས་ནི་ཡང་དག་བསྐྱེད། །རྒྱུན་དུ་བདག་ཉིད་རྣམ་བསྒོམ་བྱ། །འདི་ནི་རྡོ་རྗེའི་ཚུལ་ཞི་བ། རྣོན་པོ་བཞི་དང་མཉམ་པའི་འོད། །རྡོ་རྗེ་སེམས་དཔའ་རྣམ་བསྒོམས་པས། །ཆོ་ག་ཤེས་པས་དགང་བར་བྱ། །ཞེས་བཅོམ་ལྡན་འདས་ཀུན་ཏུ་བཟང་པོས་གསུངས་སོ། །དེ་ནས་ཀུན་ཏུ་བཟང་པོ་རྡོ་རྗེ་འཆང་ཆེན་པོ་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ལས་ཕྱུང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ནམ་
མཁའི་ཁམས་ཐམས་ཅད་བཀང་སྟེ། བྱང་ཆུབ་སེམས་དཔའ་ཐམས་ཅད་མཆོད་པའི་སྤྲིན་རྣམས་ཀྱིས་ཡང་དག་པར་མཆོད་དེ། བཅོམ་ལྡན་འདས་རྡོ་རྗེ་འཆང་ཆེན་པོ་ལ་འདུད་པ་དང་ལྡན་པར་ཀུན་ཏུ་གནས་པར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་སླར་ཡང་འདུས་པར་གྱུར་ནས་ཀུན་ཏུ་བཟང་པོ་བྱང་ཆུབ་སེམས་དཔའ་ཆེན་པོ་ལ། དེ་བཞིན་གཤེགས་པ་ཐམས་ཅད་མཆོད་པའི་སྤྲིན་ཆེན་པོ་རྣམས་ཀྱིས་ཡང་དག་པར་མཆོད་དེ་ཕྱག་འཚལ་ནས། བྱང་ཆུབ་ཀྱི་སེམས་རྡོ་རྗེ་ལ་རབ་ཏུ་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་འོད་ཟེར་ཀུན་ཏུ་གང་སྟེ། འོད་ཟེར་དེ་རྣམས་དེ་བཞིན་གཤེགས་པ་ཐམས་ཅད་ཀྱི་འབྱུང་གནས་ཡང་དག་པར་བསྐུལ་བར་གྱུར་ཏོ། །དེ་ནས་ཀུན་ཏུ་བཟང་པོ་རྡོ་རྗེ་འཆང་ཆེན་པོ་དེ་བཞིན་གཤེགས་པ་ཐམས་ཅད་བརྟན་པར་མཛད་ནས། ཡེ་ཤེས་ཀྱི་རིགས་འདི་རྒྱས་པར་བྱེད་པའི་རྒྱུ་རང་གི་གཟུགས་རྣམ་པར་སྣང་མཛད་ཀྱི་གཟུགས་སུ་བྱིན་གྱིས་བརླབས་ནས། རང་གི་གཟུགས་ཀྱི་རྣམ་པའི་འོད་ཟེར་རྣམས་ཀྱིས་ཕྱུང་སྟེ་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་སྙིང་པོ་ཡེ་ཤེས་རིགས་ཀྱི་ཏིང་ངེ་འཛིན་གྱི་ལེའུ་གསུངས་སོ། །དེ་ཉིད་ཐམས་ཅད་བྱེད་བཞིན་པའི། །བསམ་གཏན་ཀུན་སྦྱོར་མཚན་ཉིད་ཀྱིས། །ཆོ་ག་ཤེས་པས་རབ་ཏུ་བརྩམ། །འདི་ནི་དེ་ཉིད་ཚུལ་དག་པའོ། །ཉི་མའི་དཀྱིལ་འཁོར་མཆོག་གྱུར་པ། །ཁྲུ་ནི་སྟོང་ཕྲག་བསམ་པར་བྱ། །ཟླ་བའི་དཀྱིལ་འཁོར་དབུས་གནས་པར། །ཝ་ཡིག་དེ་ལ་བསྒོམ་པར་བྱ། །ཀུན་ནས་ཡོངས་སུ་ཟླུམ་པོར་ནི། །མཐེ་ཆུང་མཐོ་ཙམ་བསམ་པར་བྱ། །འབར་བ་དེ་ལ་ཆོ་ག་ཤེས། །སྣ་ཚོགས་ཁ་དོག་རྣམ་པར་བསྒོམ། །དེར་ནི་འབར་བ་ཡང་དག་སྐྱེས། །སངས་རྒྱས་གཟུགས་ནི་རྣམ་བསྒོམ་བྱ། །ཕྱོགས་རྣམས་ཀུན་ཏུ་ཨོཾ་ཡིག་ནི། །ཁ་དོག་སྣ་ཚོགས་རྣམ་བསམ་བྱ། །རྣམ་སྣང་ལ་སོགས་རྣམ་བསྒོམས་པས། ཆོ་ག་ཤེས་པས་བསྐྱེད་པར་བྱ། ཉི་མའི་དཀྱིལ་འཁོར་
དབུས་གནས་པར། ཟླ་བའི་དཀྱིལ་འཁོར་སྒོམ་པའོ། །བདག་ཉིད་དེ་ལ་བསམ་པ་ནི། དགའ་བ་བསྐྱེད་པའི་ཆོ་ག་ལས། སྙིང་གི་དབུས་སོན་ཕྲ་མོ་ནི། །དྲི་མེད་ཟླ་བའི་དཀྱིལ་འཁོར་ལ། །སྔགས་ཡིག་ཕྲ་མོའི་གཟུགས་རྣམས་ཀྱིས། །དེ་དེ་སེམས་ལ་བསམ་པར་བྱ། །ཨོཾ་ཡིག་འོད་ཟེར་ཡང་དག་སྦྱོར། །འབར་བའི་ཕྲེང་བ་མཉམ་པའི་འོད། །སངས་རྒྱས་གཟུགས་སོགས་མཚན་ཉིད་ཀྱིས། །ཆོ་ག་ཤེས་པས་དབྱུང་བར་བྱ། །སངས་རྒྱས་གཟུགས་རྣམས་ཐམས་ཅད་དུ། །ཟླ་བའི་དཀྱིལ་འཁོར་སྒོམ་པ་ནི། །སངས་རྒྱས་བསྐྱེད་པའི་ཆོ་ག་ལས། །རང་གི་གཟུགས་སུ་དེ་ལ་བྱའོ། །རྡོ་རྗེ་ཐུགས་སུ་ཆོ་ག་ལས། །ཉི་མ་ལྔ་ནི་དགོད་བྱ་བ། །སྔགས་པས་ཟླ་བའི་དཀྱིལ་འཁོར་ཅན། །དཔྲལ་བ་རུ་ནི་རྣམ་པར་བསྒོམ། །འོད་ཟེར་འབར་བ་མཉམ་པའི་འོད། །སངས་རྒྱས་གཟུགས་སུ་རྣམ་པར་བསྒོམ། །འཇིག་རྟེན་ཁམས་རྣམས་རིམ་པར་འདས། །སླར་ཡང་དེ་ལ་རབ་གཞུག་བྱ། །ཁྲུ་ཡི་ཚད་ལས་འདས་པ་ཡིས། །ཟླ་བའི་དཀྱིལ་འཁོར་བསྒོམ་པ་ནི། །རྡོ་རྗེ་སེམས་དཔའ་ཡང་དག་བསྐྱེད། ། རང་གི་གཟུགས་ཉིད་བསྒོམ་པར་བྱ། །བཅོམ་ལྡན་འདས་ཀུན་ཏུ་བཟང་པོས་དེ་སྐད་ཅེས་གསུངས་སོ། །ཡེ་ཤེས་ཀྱི་རིགས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ནོ། །ཉི་མའི་དཀྱིལ་འཁོར་དབུས་གནས་པར། །རང་གི་གཟུགས་ནི་བསྒོམ་བྱ་དགེ། ། ཟུར་དུ་རྣམ་སྣང་གཞག་བྱ་སྟེ། །རྡོ་རྗེ་སེམས་དཔའ་རྣམ་བསྒོམ་བྱ། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ཆོ་ག་ཤེས་པས་གཟུགས་བཅུ་དྲུག །ཁ་དོག་བཞིར་ནི་རྣམ་བསམ་བྱ། །སྙིང་ག་རྣམས་དང་ཐམས་ཅད་དུ། །ལྷ་རྣམས་དེ་ལ་བསྒོམ་པར་བྱ། །ཞེས་བཅོམ་ལྡན་འདས་རྡོ་རྗེ་འཆང་གིས་གསུངས་སོ། །རང་གི་གཟུགས་ལ་བགེགས་འཇོམས་པར། །སེམས་ལ་བརྟན་པར་བསྒོམ་པར་བྱ། ཧཱུྃ་ཡིག་དབུགས་ལས་ཕྱུང་ནས་ནི། །འོད་ཟེར་རྣམ་པར་རབ་ཏུ་གཞུག །ཅེས་བཅོམ་
ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསུངས་སོ། །རང་གཟུགས་ལ་སོགས་མཚུངས་པའི་འོད། །ལྷ་རུ་སྐད་ཅིག་དེ་འགྱུར་རོ། །ཡི་གེ་རྣམས་ཀྱི་ཚད་ཀྱིས་ནི། །ཝ་ཡི་གཟུགས་ནི་རྣམ་བསྒོམ་བྱ། །སྔགས་པས་དབུས་སུ་ཡི་གེ་ཉིད། བྱིན་ནས་ལས་ནི་ཀུན་ཏུ་བརྩམ། །སྔགས་པས་དཔྲལ་བའི་སྟེང་ནས་ནི། །ཇི་སྲིད་ལྟེ་བ་ཞེས་པར་དྲན། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པ་ཆེན་པོ་ལས་རྣམ་པར་འགོད་པའི་ལེའུ་དང་པོ་རྫོགས་སོ།། །།ཤིང་རྟའི་འཁོར་ལོའི་ཚད་དུ་ནི། པདྨ་ཆེན་པོ་རྣམ་བསྒོམ་བྱ། ཉི་མའི་དཀྱིལ་འཁོར་དབུས་གནས་པར། པདྨའི་ཆུ་བ་དེ་རྣམ་བསྒོམ། །ལས་ཀྱི་རྡོ་རྗེ་ཡང་དག་བསྐྱེད། །རང་གཟུགས་དེ་ལ་བསྒོམ་པར་བྱ། །ལས་ཀྱི་རྡོ་རྗེ་རབ་བསྒོམས་པས། །རྡོ་རྗེ་སེམས་དཔའ་མཉམ་པར་འགྱུར། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །འོ་མ་དང་ཞོ་བྱས་ནས་ནི། །དབུས་སུ་པདྨ་རྣམ་པར་བསྒོམ། །རང་གཟུགས་སངས་རྒྱས་ལྟར་བྱས་ནས། །མཁས་པས་རང་གཟུགས་རྣམ་བསྒོམ་བྱ། ། ནམ་མཁའི་ཁམས་ནི་ཀུན་བཀང་སྟེ། །སླར་ཡང་དེ་ཉིད་སྦྱར་བྱ་སྟེ། །འོ་མ་དང་ཞོ་མཉམ་བྱས་ནས། །སྣ་ཚོགས་ཁ་དོག་མཉམ་པའི་འོད། །ཟླ་བའི་དཀྱིལ་འཁོར་ཚུལ་གྱིས་ནི། ཉི་མའི་དཀྱིལ་འཁོར་བསྒོམ་པ་ནི། རང་གཟུགས་སངས་རྒྱས་མཚུངས་པ་ནི།ཆོ་ག་ཤེས་པས་དབྱུང་བར་བྱ། རང་གི་གཟུགས་དང་ཐམས་ཅད་དུ། ལྷ་ལ་སོགས་པ་རྣམ་སྒོམ་བྱེད། ཁྲུ་གང་ཙམ་ལས་འདས་པར་ནི། ཉི་མའི་དཀྱིལ་འཁོར་བསྒོམ་པ་ནི། །བགེགས་རྣམས་འཇོམས་པ་ལྟར་བྱས་ནས། །འཇིག་རྟེན་ཁམས་སུ་འདི་སྤྲོ་བྱ། །རང་གི་ཕྱག་རྒྱ་སྙིང་ག་རུ། །བསམས་ནས་ཉི་མའི་དཀྱིལ་འཁོར་དབུས། །སངས་རྒྱས་རྣམ་པར་ཆོ་ག་ཤེས། །འོད་ཀྱི་དཀྱིལ་འཁོར་བསྒོམ་པར་བྱ། །དེ་དབུས་ཡི་གེ་བྱིན་ནས་ནི། །འཇིག་རྟེན་ཁམས་ནི་འདིར་སྤྲོ་བྱ། །གདུལ་བ་ལ་
སོགས་ཅན་བྱས་ནས། །སླར་ཡང་དེ་ཉིད་ལ་སྦྱར་བྱ། །ཁྲུ་གང་ཙམ་ལས་འདས་པར་ནི། །ཟླ་བའི་དཀྱིལ་འཁོར་བསྒོམ་པར་བྱ། །རྡོ་རྗེ་རལ་གྲི་ཡང་དག་བསྐྱེད། །འཇིག་རྟེན་ཁམས་ནི་ཡོངས་བགྲོད་བྱ། །པདྨ་དཀར་པོའི་འོད་འབར་ཏེ། །བྱང་ཆུབ་སེམས་ཀྱིས་རྣམ་པར་བརྒྱན། །དབུས་སུ་རང་གི་ལྷ་ཡི་གཟུགས། །གཞོགས་སུ་བཙུན་མོ་དགོད་པར་བྱ། །ཆོ་ག་ཤེས་པས་དེ་ལྟར་གཟུང་། །རང་གི་རྡོ་རྗེ་དེ་ལ་གཞུག །འཇིག་རྟེན་ཁམས་ནི་ཐམས་ཅད་དུ། །སངས་རྒྱས་དེ་ཉིད་ཀྱིས་མཆོད་བྱ། །ཞེས་བཅོམ་ལྡན་འདས་ཀུན་ཏུ་བཟང་པོས་གསུངས་སོ། །ཇི་སྲིད་ཡང་དག་ཐོབ་སྦྱོར་སྐྱེས། །སྔགས་པས་སླར་ནི་བསྡུ་བར་བྱ། །མཐོ་གང་ཙམ་ལས་འདས་པར་ནི། །ཉི་མའི་དཀྱིལ་འཁོར་བསྒོམ་པ་ནི། །རང་གཟུགས་ཤིན་ཏུ་བརྟན་བྱས་ནས། །ལྷ་ལ་སོགས་པ་རྣམ་པར་བསྒོམ། །སྙིང་གར་སྔགས་ཀྱི་ཡིག་བྱིན་ནས། །སངས་རྒྱས་ཀུན་ནི་མཆོད་པར་བྱ། །མཐོ་བདུན་ཙམ་ལས་འདས་པར་ནི། །དཀྱིལ་འཁོར་བཞི་ནི་སྒོམ་པར་བྱེད། །ལྷ་ཡི་གཟུགས་ཀྱི་དབུས་གནས་པར། །སྙིང་གར་དེ་ལ་བསྒོམ་པར་བྱ། །ཞེས་བཅོམ་ལྡན་འདས་རྡོ་རྗེ་དམ་ཚིག་གིས་གསུངས་སོ། །རང་གཟུགས་སྤྱན་ཞེས་བྱ་བར་ནི། །བྱས་ནས་སངས་རྒྱས་རྣམ་པར་བསྒོམ། །ཐུགས་ཀ་ཉིད་དང་ཐམས་ཅད་དུ། །མཁས་པས་རང་གཟུགས་བསྒོམ་པར་བྱ། །དེ་རུ་སྙིང་པོའི་ཚུལ་གྱིས་ནི། །སེམས་དཔའི་རྣལ་འབྱོར་རྣམ་པར་བསྒོམ། །རྒྱང་གྲགས་ཙམ་ལས་འདས་པར་ནི། །སངས་རྒྱས་གཟུགས་ནི་རྣམ་བསྒོམ་བྱ། །གཟུགས་ཀྱིས་ནམ་མཁའ་འགོངས་པར་ནི། །སྙིང་པོ་རྣམས་ལས་ཡང་དག་བསྐྱེད། །རྒྱང་གྲགས་ཙམ་ལས་འདས་པར་ནི། །གསལ་བའི་དཀྱིལ་འཁོར་བསྒོམ་པ་ནི། །རང་གི་རྣལ་འབྱོར་ལེགས་བརྟན་བྱས། །སངས་རྒྱས་ཡང་དག་རྣལ་འབྱོར་བསྒོམ། །རྒྱང་གྲགས་ཙམ་ལས་འདས་པར་ནི། །བྱང་ཆུབ་སེམས་ནི་རྣམ་པར་བསྒོམ། །ལྷ་ནི་ཡང་དག་བསྐྱེད་ནས་ནི། །སྔགས་ཀྱི་ཡི་གེ་རྣམ་པར་
བསྒོམ། །མཐོ་གང་ཙམ་ལས་འདས་པར་ནི། །པདྨའི་ཚུལ་དུ་རྣམ་པར་བསྒོམ། །རང་ལུས་དྲི་མ་མེད་བྱས་ནས། །གསལ་བའི་དཀྱིལ་འཁོར་བསྒོམ་པའོ། །དེ་དབུས་ལེགས་པར་བརྟན་བྱས་ནས། །རང་གཟུགས་དང་ནས་དང་པོར་བསྒོམ། །འོད་དཀར་འབར་བའི་ཕྲེང་བ་སོགས། །པདྨ་ལྔ་པོ་རྣམ་བསྒོམ་བྱ། །དེ་ཡི་དབུས་སུ་རང་གཟུགས་དང་། །གཞོགས་སུ་བཙུན་མོ་དགོད་པར་བྱ། །རང་གི་ཁུ་བ་དེང་སོགས་འབྱུང་། །ཆོ་ག་ཤེས་པས་སྤྲོ་བར་བྱ། །སངས་རྒྱས་གཟུགས་ཀྱིས་ནམ་མཁའི་ཁམས། །ཀུན་ཏུ་གང་བར་བསྒོམ་པ་ནི། །རང་གཟུགས་རལ་གྲི་ལྟར་བྱས་ནས། །ཀུན་གྱི་སྙིང་གར་དགོད་པར་བྱ། །རང་གཟུགས་སངས་རྒྱས་ཡང་དག་སྦྱོར། །མཚན་ཉིད་ལ་སོགས་ཆོག་རིམ་གྱིས། །བྱང་ཆུབ་སེམས་དཔས་ནམ་མཁའི་ཁམས། །ཡང་དག་གང་བར་རྣམ་བསྒོམ་བྱ། །རང་གཟུགས་ཞགས་པ་ཡང་དག་སྦྱོར། །ཁྱབ་བདག་སངས་རྒྱས་གཟུགས་དགོད་བྱ། །ཇི་སྲིད་ནམ་མཁའི་དཀྱིལ་འཁོར་དུ། །ཆོ་ག་ཤེས་པས་དགུག་པར་བྱ། །རང་གཟུགས་སངས་རྒྱས་ཡང་དག་སྦྱོར། །བྱང་ཆུབ་སེམས་སུ་རྣམ་སྒོམ་མོ། །སྔགས་ཀྱི་ཡི་གེ་སོགས་སྦྱོར་གྱིས། །དེ་ཡི་རྣམ་པར་མྱུར་བསྒོམ་བྱ། །བྱང་ཆུབ་སེམས་ནི་ཡང་དག་བསྐྱེད། །འོད་ཟེར་འབར་བས་རྣམ་པར་བརྒྱན། །རང་གཟུགས་སངས་རྒྱས་མཚུངས་པར་ནི། ། ཆོ་ག་ཤེས་པས་དབྱུང་བར་བྱ། །རང་གཟུགས་དེ་ལ་གཟུགས་གནས་པར། །འབར་བའི་ཕྲེང་བ་མཉམ་པའི་འོད། །སྤྱན་ཞེས་བྱ་བ་ཡིད་དགའ་བ། །ཆོ་ག་ཤེས་པས་དབྱུང་བར་བྱ། །ཟླ་བའི་དཀྱིལ་འཁོར་དབུས་གནས་པར། །སྤྱན་ནི་སྙིང་གར་རྣམ་པར་དགོད། །ཆོ་ག་ཤེས་པས་འོད་རྣམ་པར། །རྡོ་རྗེ་སེམས་དཔའ་རབ་གཞུག་བྱ། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རང་གཟུགས་མྱུར་བའི་དཀྱིལ་འཁོར་དུ། །རྡོ་རྗེ་སེམས་དཔའ་ཡང་དག་བསྐྱེད། །ལྷ་ཡི་རྣམ་པར་ཡང་དག་སྦྱོར། །
བསྒོམ་བྱ་བརྩོན་པ་གཞན་མིན་ནོ། །ཉི་མའི་དཀྱིལ་འཁོར་དབུས་སུ་ནི། རྡོ་རྗེ་སེམས་དཔར་ཡང་དག་བསྐྱེད། ལྕགས་ཀྱུའི་རྣམ་པ་ཞགས་པ་སོགས། བྱས་ནས་སློབ་མ་རབ་གཞུག་བྱ། །རྡོ་རྗེ་སེམས་དཔར་ཡང་དག་བསྐྱེད། རང་གཟུགས་སྙིང་གར་རྣམ་དགོད་བྱ། །དགོད་པ་བྱས་ནས་ལག་སོགས་ཀྱིས། །དེ་ནས་གྲངས་ནི་ཡང་དག་བརྩམ། །བཟླས་པ་སོགས་སམ་བཏུང་བྱ་བ། །བློ་ལྡན་དེས་ནི་དེ་བྱའོ། །སྒྲུབ་པོ་རྣམས་ཀྱི་རྣམ་བཟླས་བྱ། །གཞན་དུ་ཡང་དག་གྲུབ་མིན་ཉིད། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གིས་དེ་སྐད་ཅེས་གསུངས་སོ། །རང་གི་གཟུགས་ནི་ཡང་དག་བསྐྱེད། །དབུས་སུ་རང་གི་རིགས་སྒོམ་མོ། །མཐར་ཡང་དགྲ་དང་བགེགས་འཇོམས་པར། སྙིང་པོ་དེ་རུ་བསྒོམ་པར་བྱ། འདི་རྣམས་ཀྱི་ནི་ཆོ་ག་ཡིས། སྒོམ་པ་ལ་སོགས་ཆོ་གའི་རིམ། ཉི་མའི་དཀྱིལ་འཁོར་ཚུལ་གྱིས་ནི། རིག་པའི་རྒྱལ་པོ་རྣམ་བསྒོམ་བྱ། །འབར་བའི་ཕྲེང་བ་འཁྲུགས་འབར་བའི། །ཁྲོ་བོའི་གཟུགས་སུ་བསྒོམ་པར་བྱ། །ཁ་དོག་གང་དེ་ཁོ་ནར་བརྗོད། །དེ་ཉིད་མཐར་ཐུག་དེ་ཉིད་བརྗོད། །དེ་ཉིད་དེ་ཡིས་བསམ་པར་བྱ། །གཞན་དུ་གྲུབ་པ་མིན་པ་ཉིད། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཀུན་ཏུ་བཟང་པོས་དེ་སྐད་ཅེས་གསུངས་སོ། །རང་གཟུགས་དཀྱིལ་འཁོར་བྱས་ནས་ནི། །དབུས་སུ་འབར་བ་མཉམ་པའི་འོད། །འཇིག་རྟེན་ཁམས་རྣམས་ཐམས་ཅད་དུ། །དེ་ཉིད་ཤེས་པས་སྙིང་གར་དགོད། །དེ་ལ་བདག་ཉིད་ཡང་དག་བསྐྱེད། །དེ་ཡི་རང་བཞིན་དེར་བརྩམ་བྱ། །རང་གཟུགས་པདྨའི་དབུས་གནས་པར། །སྣང་བྱེད་ལ་སོགས་མཉམ་པའི་འོད། །སྙིང་གར་ཡི་གེ་བྱས་ནས་ཀྱང་། །རྡོ་རྗེ་སེམས་དཔའ་རྣམ་བསྒོམ་བྱ། །རྡོ་རྗེ་སེམས་དཔའ་འདུས་པ་ལ། །སངས་རྒྱས་གཟུགས་སུ་རྣམ་བསྒོམ་བྱ། །རིག་པའི་ཚུལ་དུ་ཡང་དག་བསྐྱེད། །དངོས་གྲུབ་ཐམས་ཅད་ཀུན་ཐོབ་འགྱུར། །
དེ་ཕྱིར་སྔགས་པས་ཁྱད་པར་གྱི། །རིག་པའི་ཚུལ་ནི་མཆོག་ཏུ་འགྱུར། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སེམས་དཔས་དེ་སྐད་ཅེས་གསུངས་སོ། །ཐམས་ཅད་དེ་ཉིད་བྱ་བ་ནི། །ཉི་མའི་དཀྱིལ་འཁོར་དབུས་སུ་ནི། ། གཟུགས་ནི་རྣམ་སྣང་མཛད་བསམས་ནས། །སྙིང་གར་སྔགས་ནི་རྣམ་བསྒོམ་བྱ། །དེ་ཉིད་སྔགས་སུ་རྗེས་སུ་དྲན། །རིག་པའི་ཚུལ་གྱི་ཆོ་ག་ལས། །སློབ་དཔོན་ཡིད་ནི་དགའ་བ་རུ། །ཆོ་ག་ཤེས་པས་དབྱུང་བར་བྱ། །སྙིང་ག་རྣམས་དང་ཐམས་ཅད་དུ། ། ཟླ་བའི་དཀྱིལ་འཁོར་བསྒོམ་པའོ། །རང་གི་གཟུགས་ནི་ཡང་དག་བསྐྱེད། དེ་ལ་རལ་གྲི་ལ་སོགས་བསྒོམ། ཆོ་ག་ཤེས་པས་ཡང་དག་བསྐྱེད། འབར་བ་ལྔ་ནི་རྣམ་བསྒོམ་བྱ། །གཟུགས་དང་ཁ་དོག་རྣམ་པར་ཤེས། །འཇིག་རྟེན་ཁམས་སུ་འདི་སྤྲོ་བྱ། ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྤྱན་གྱིས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོ་ལས་ཡེ་ཤེས་རིགས་ཀྱི་ཏིང་ངེ་འཛིན་གྱི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཟླ་བའི་དཀྱིལ་འཁོར་ལ་གནས་ཏེ་རྣམ་པར་སྣང་མཛད་ཀྱི་གཟུགས་སུ་བྱིན་གྱིས་བརླབས་ནས་དེ་རྣམས་ཀྱང་དཀྱིལ་འཁོར་ཆེན་པོ་འདུས་པ་རྣམས་སུ་རང་གི་གཟུགས་སུ་གཞག་གོ། །བསྡུས་པའི་རིགས་ཀྱི་ཏིང་འཛིན་གྱིས། །ལེའུ་བཀའ་རྣམས་སྩལ་པར་མཛད། །འོ་མ་དང་ཞོར་བསམས་ནས་སུ། །འཕགས་པའི་དམ་ཚིག་བཞི་པོ་དང་། །དབུས་སུ་སྔགས་པས་ཨུཏྤལ། །བསྒོམ་བྱ་གཞན་དུ་མི་བསམ་མོ། །ཡེ་ཤེས་དཀྱིལ་འཁོར་ཡང་དག་སྦྱོར། །དེ་ཡི་སྟེང་དུ་རྣམ་བསྒོམ་བྱ། །ཁྲོ་བོའི་རྣམ་པ་ཡང་དག་བསྐྱེད། །འོད་ཟེར་ཡང་དག་སྦྱོར་བ་བསྒོམ། །དེར་ནི་འོད་ཟེར་འདུས་རྣམས་སུ། །རྡོ་རྗེ་སེམས་དཔའ་རྣམ་བསྒོམ་བྱ། །ཆོ་ག་ཤེས་པས་དེར་རང་གཟུགས། །དབུས་སུ་ཡང་དག་གཞག་བསྒོམ་བྱ། །བཅོམ་
ལྡན་འདས་དམ་ཚིག་རྡོ་རྗེས་དེ་སྐད་ཅེས་གསུངས་སོ། །ཨོཾ་སརྦ་ཏ་ཐཱ་ག་ཏ་ཛྙཱ་ན་སྭ་བྷཱ་བ་ཨཱཏྨ་ཀོ྅་ཧྃ། གསང་སྔགས་རྒྱལ་པོ་འདི་ཡིས་ནི། །རང་གི་རྣམ་རྟོག་ཡོངས་དོར་བྱ། །རང་གཟུགས་ཧཱུྃ་ཡིག་ཅེས་བརྗོད་པ། །བྱས་ན་ཀུན་ཏུ་རྣམ་བསྒོམ་བྱ། །ཆོ་ག་ཤེས་པས་དེ་རྣམས་སུའང་། །ཧ་ཡིག་མཐར་ཐུག་རྣམ་བསམ་བྱ། །རང་གཟུགས་ལ་སོགས་མཚུངས་པའི་འོད། །ལྷ་དེ་སྐད་ཅིག་དེ་ལ་འགྱུར། །གསལ་བའི་དཀྱིལ་འཁོར་ཡང་དག་སྦྱོར། །སྙིང་གར་དེ་ལ་རྣམ་བསམ་བྱ། །ཆོ་ག་ཤེས་པས་གསང་སྔགས་ཡིག །ཆོ་ག་མཐོང་བས་བསྒོམ་པར་བྱ། །བཅོམ་ལྡན་འདས་དམ་ཚིག་རྡོ་རྗེས་དེ་སྐད་ཅེས་གསུངས་སོ། །གནས་ལྔར་ཡང་དག་སྦྱར་བྱ་བ། །རྩེ་མོ་ལྔ་རུ་རྣམ་བསྒོམ་བྱ། །སྔགས་ཀྱི་ཡི་གེ་ཐམས་ཅད་དུ། །རྡོ་རྗེ་སེམས་དཔའ་རྣམ་བསྒོམ་བྱ། །སངས་རྒྱས་གཟུགས་ནི་རྣམས་བསྒོམས་པས། །ཆོ་ག་ཤེས་པས་སྤྲོ་བར་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྲས་ཀྱི་གཙོ་བོས་དེ་སྐད་ཅེས་གསུངས་སོ། །རང་གཟུགས་སེམས་དཔའི་ཚུལ་གྱིས་ནི། །སེམས་དཔའི་མཚན་མར་བསྒོམ་པར་བྱ། སངས་རྒྱས་ཞིང་རྣམས་ཀུན་ཏུ་ནི། ཆོ་ག་ཤེས་པས་སྤྲོ་བར་བྱ། རང་གཟུགས་སེམས་དཔའི་ཚུལ་གྱིས་ནི། ལྷ་ཡི་སྙིང་གར་བསྒོམ་པར་བྱ། །སངས་རྒྱས་གཟུགས་དེ་དབྱུང་བར་བྱ། །འཇིག་རྟེན་ཁམས་འདིར་སྤྲོ་བར་བྱ། །རང་གཟུགས་ཡེ་ཤེས་ཞེས་བརྗོད་པ། འབར་བའི་ཕྲེང་བས་རྣམ་པར་བརྒྱན། །བྱང་ཆུབ་སེམས་སུ་དེ་ཕྱུང་ནས། །འཇིག་རྟེན་ཁམས་སུ་འདི་སྤྲོ་བྱ། །རང་གི་གཟུགས་ཞེས་བརྗོད་པ་ནི། །འབར་བའི་ཕྲེང་བ་མཉམ་པའི་འོད། །རང་གི་གཟུགས་ཀྱི་འོད་ཟེར་གྱིས། །ཞིང་འདིར་ཁྱབ་པར་རྣམ་བསྒོམ་བྱ། །རང་གཟུགས་ལྕགས་ཀྱུར་བཅས་བྱས་ནས། །རང་གི་གཟུགས་ཀྱི་ལག་པར་དགོད། །ཆོ་ག་ཤེས་པས་བཀུག་ནས་ཀྱང་། །སངས་རྒྱས་གཟུགས་ལ་རབ་གཞུག་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྗེ་བོས་དེ་སྐད་ཅེས་
གསུངས་སོ། །རང་གཟུགས་གཟུགས་ཀྱི་ཚུལ་གྱིས་ནི། །གསང་སྔགས་ཡི་གེ་རྣམ་པར་བསྒོམ། །རྡོ་རྗེ་སེམས་དཔའ་རྣམ་བསྒོམས་པས། །ཆོ་ག་ཤེས་པས་སྤྲོ་བར་བྱ། །བྱང་ཆུབ་སེམས་སུ་རང་གཟུགས་ནི། །དེ་ཉིད་སྒོམ་པས་བསྒོམ་པར་བྱ། །བགེགས་ནི་སྔགས་ལ་ཡང་དག་བསྐྱེད། །འཇིག་རྟེན་ཁམས་སུའང་སྤྲོ་བར་བྱ། །མི་སྡུག་གཙིགས་ཤིང་འཇིགས་པ་ནི། །བགེགས་ཀྱི་དགྲ་དེ་དབྱུང་བར་བྱ། །བྱང་ཆུབ་སེམས་སུ་དེ་ཕྱུང་ནས། །འཇིག་རྟེན་ཁམས་འདིར་སྤྲོ་བར་བྱ། །རང་གཟུགས་ཉི་མའི་དབུས་གནས་པར། །རྣོན་པོ་འབར་བས་རྣམ་པར་བརྒྱན། །ལས་ཀྱི་རྡོ་རྗེ་ཤིན་ཏུ་མཛེས། །ཆོ་ག་ཤེས་པས་དབྱུང་བར་བྱ། །དང་པོའི་རྣལ་འབྱོར་ཡང་དག་བསྐྱེད། །ཤིན་ཏུ་བརྟན་པ་བརྟན་པའི་སེམས། །ཆོ་ག་ཉེ་བར་མཐོང་བ་ཡིས། །དང་པོའི་རྣལ་འབྱོར་ཡང་དག་བརྩམ། །རང་གཟུགས་ཨུཏྤལ་ར་བསམས་ནས། །སྣ་ཚོགས་འོད་ཟེར་མཉམ་པར་ལྡན། །ལྷ་ཡི་གཟུགས་སུ་ཡང་དག་སྦྱོར། །དེ་ཡི་སྟེང་དུ་རྣམ་བསྒོམ་བྱ། །ཇི་སྲིད་ནམ་མཁའི་དཀྱིལ་འཁོར་དུ། །སྔགས་པས་འཇིག་རྟེན་གསུམ་དུ་སྤྲོ། །སངས་རྒྱས་གཟུགས་ནི་ཡང་དག་བསྐྱེད། །ཁ་དོག་དཀར་པོ་ཤིན་ཏུ་མཛེས། །ཟླ་བའི་དཀྱིལ་འཁོར་དབུས་གནས་པར། །ཡིད་དགའ་བ་ནི་བསྒོམ་པར་བྱ། །ཐོ་བའི་རྣམ་པ་ཡང་དག་སྦྱོར། །ཆོ་གས་རྟག་ཏུ་བསྒོམ་པར་བྱ། །རྡོ་རྗེ་སེམས་དཔའ་སོགས་གསུངས་པས། ། ཇི་ལྟར་རིགས་པར་པི་ཊུའི་ཏ། །རང་གཟུགས་གསལ་བ་འབར་བའི་འོད། མཱ་མ་ཀཱི་སོགས་རྣམ་བརྒྱན་པས། །རྡོ་རྗེ་སེམས་དཔའ་ཡང་དག་བསྐྱེད། །འཇིག་རྟེན་གསུམ་དུ་ཡང་སྤྲོ་བྱ། །རྡོ་རྗེ་ཡེ་ཤེས་ཡང་དག་བསྐྱེད། །ཁྲོ་བོ་ཡང་དག་སྦྱོར་བསྒོམས་པས། །རང་གཟུགས་འབར་བ་མཚུངས་པ་ཡིས། །ཆོ་ག་ཤེས་པས་སྤྲོ་བར་བྱ། །ཉི་མའི་དཀྱིལ་འཁོར་དབུས་གནས་པར། །མཁས་པས་རང་གི་གཟུགས་བསྒོམ་བྱ། །རྩེ་མོ་ལྔ་ཡི་རྡོ་རྗེ་ཆེ། །འཇིག་རྟེན་ཁམས་སུ་ཡང་སྤྲོ་བྱ། །ཁྲོ་བོའི་གཟུགས་
སུ་ཡང་དག་བསྐྱེད། །རང་གི་སྔགས་ཀྱི་ཡི་གེས་བརྒྱན། །སངས་རྒྱས་གཟུགས་སུ་རྣམ་བསྒོམ་བྱ། །ཆོ་ག་ཤེས་པས་འཁོར་ལོ་ལྷའི། །འོད་ཟེར་ཚུལ་དུ་རྣམ་བསྒོམ་བྱ། །བཅོམ་ལྡན་འདས་རྡོ་རྗེའི་རང་བཞིན་གྱིས་དེ་སྐད་ཅེས་གསུངས་སོ། །རང་གཟུགས་འཁོར་ལོའི་ཚུལ་གྱིས་ནི། །འབར་བའི་ཕྲེང་བས་རྣམ་པར་བརྒྱན། །རང་གཟུགས་སངས་རྒྱས་དང་མཚུངས་པ། །ཆོ་ག་ཤེས་པས་དབྱུང་བར་བྱ། །རང་གཟུགས་འཁོར་ལོའི་ཚུལ་གྱིས་ནི། །རལ་གྲིའི་འོད་ཟེར་གྱིས་བརྒྱན་པ། །འབར་བའི་ཕྲེང་བ་འཁྲུགས་གསལ་བ། །ཀུན་ནས་རྣམ་པར་འཕྲོ་བའོ། །པདྨ་རང་སྙིང་དབུས་གནས་པར། །བྲམ་ཟེ་ཚངས་པ་རྣམ་པར་བརྒྱན། །བྱང་ཆུབ་སེམས་སུ་ཡང་དག་བསྐྱེད། །དེ་ལ་སྔགས་ཀྱི་ཡི་གེ་དགོད། །སྙིང་པོ་ཨུཏྤ་ལར་བསམས་ནས། །སྣ་ཚོགས་འོད་ཟེར་རྣམ་པར་བརྒྱན། །ཆོ་ག་ཤེས་པས་བྱང་ཆུབ་སེམས། །བསམས་ནས་སྔགས་གསུམ་རྣམ་བསྒོམ་བྱ། །སྙིང་གའི་དབུས་སོན་ཕྲ་མོ་ནི། །ཨིནྡྲ་ནཱི་ལ་མཚུངས་པའི་འོད། །ཡེ་ཤེས་སྦྱོར་བ་ཀུན་བསྐྱེད་ནས། །སངས་རྒྱས་གཟུགས་སུ་བསྒོམ་པར་བྱ། ། རང་གཟུགས་ཕྲ་མོའི་དབུས་གནས་པར། །སྣ་ཚོགས་འབར་བ་མཉམ་པའི་འོད། །སྙིང་པོར་ཡི་གེ་བསམས་ནས་ནི། །རང་གཟུགས་དེ་ལ་བསྒོམ་པར་བྱ། །བཅོམ་ལྡན་འདས་རྡོ་རྗེ་ཡེ་ཤེས་ཀྱིས་དེ་སྐད་ཅེས་གསུངས་སོ། །ཁྲུ་གང་ཙམ་ལས་འདས་པ་ཡི། །ཕྲ་མོའི་དཀྱིལ་འཁོར་བསྒོམ་པ་ནི། །རང་གཟུགས་ཡི་གེར་ཡང་བྱས་ནས། །རྡོ་རྗེ་འབར་བར་རྣམ་བསྒོམ་བྱ། །ཁྲུ་གང་ཙམ་ལས་འདས་པ་རུ། །ཡེ་ཤེས་དཀྱིལ་འཁོར་བསྒོམ་པ་ནི། །དབུས་སུ་གཟུགས་ནི་ཡང་དག་བསྐྱེད། །བསམས་ནས་བཟླས་པ་བརྩམ་པར་བྱ། །ཁྲུ་གང་ཙམ་ལས་འདས་པར་ནི། །ཉི་མའི་དཀྱིལ་འཁོར་བསྒོམ་པ་ནི། །རྡོ་རྗེ་སེམས་དཔའ་ཡང་དག་བསྐྱེད། །བསམས་ནས་བཟླས་པ་བརྩམ་པར་བྱ། །ཁྲུ་གང་ཙམ་ལས་འདས་པ་རུ། །ཆོས་ཀྱི་དཀྱིལ་འཁོར་བསྒོམ་པ་ནི། །བགེགས་
དགྲར་ཡང་དག་བསྐྱེད་བསམས་ནས། །བཟླས་པ་ཀུན་ཏུ་བརྩམ་པར་བྱ། །མཐོ་གང་ཙམ་ལས་འདས་པ་རུ། །ཡེ་ཤེས་དཀྱིལ་འཁོར་སྒོམ་པ་ནི། །རྣམ་སྣང་མཛད་ཀྱི་གཟུགས་བསམས་ནས། །འཇིག་རྟེན་ཁམས་སུ་འདི་སྤྲོ་བྱ། །མཐོ་གང་ཙམ་ལས་འདས་པ་རུ། །པདྨའི་དཀྱིལ་འཁོར་སྒོམ་པ་ནི། །དབུས་སུ་གཟུགས་ནི་ཡང་དག་བསྐྱེད། །གཞོགས་སུ་སངས་རྒྱས་ཡང་དག་བསྒོམ། །རྒྱང་གྲགས་ཙམ་ལས་འདས་པར་ནི། །ཕྲ་མོའི་དཀྱིལ་འཁོར་སྒོམ་པ་ནི། །དབུས་སུ་གཟུགས་ནི་ཡང་དག་བསྐྱེད། །འཇིག་རྟེན་ཁམས་འདིར་སྤྲོ་བར་བྱ། །བཅོམ་ལྡན་འདས་རྡོ་རྗེ་ཅན་གྱིས་དེ་སྐད་ཅེས་གསུངས་སོ། །རྒྱང་གྲགས་ཙམ་ལས་འདས་པར་ནི། །ཟླ་བའི་དཀྱིལ་འཁོར་སྒོམ་པ་ནི། །སངས་རྒྱས་གཟུགས་ནི་ཡང་དག་བསྐྱེད། །གཞོགས་སུ་བཙུན་མོ་དགོད་པར་བྱ། །བཙུན་མོ་རྣམས་ནི་ཐམས་ཅད་དུ། །འོད་ཟེར་ལྔ་ནི་རྣམ་བསྒོམ་བྱ། །མེ་ཏོག་ཡིད་དགའ་འདི་རྣམས་ཀྱིས། །ཆོ་ག་ཤེས་པས་མཆོད་པར་བྱ། །འཕྲོག་བྱེད་དྲི་ཡི་སྤྲིན་ལ་སོགས། །བསམས་ནས་སངས་རྒྱས་མཆོད་པར་བྱ། །བཅོམ་ལྡན་འདས་རྡོ་རྗེའི་སྤྱན་གྱིས་དེ་སྐད་ཅེས་གསུངས་སོ། །ཆོ་ག་ཤེས་པས་བཙུན་མོ་ནི། །སེར་པོ་ལྟ་བུར་བསམས་ནས་ནི། །སངས་རྒྱས་སྲས་པོ་འདུས་པ་ནི། །རྣལ་འབྱོར་བསྐྱེད་དེ་བསྒོམ་པར་བྱ། །དེ་དབྱུང་ཇི་ལྟ་བར་བཀོད་ལ། །རྡོ་རྗེ་སེམས་དཔའ་རྣམ་བསྒོམ་བྱ། །རྡོ་རྗེ་སེམས་དཔའ་ཡང་དག་བསྐྱེད། །རིགས་ཀྱི་དབྱེ་བ་བསྒོམ་པར་བྱ། །རྒྱང་གྲགས་ཙམ་ལས་འདས་པར་ནི། །ཡེ་ཤེས་ཕྲ་མོ་རྣམ་པར་བསྒོམ། །རང་གཟུགས་གཟུགས་ཀྱི་ཚུལ་གྱིས་ནི། །དབུས་སུ་ཡང་དག་བཞག་བསྒོམ་བྱ། །ཆོ་ག་ཤེས་པས་རྡོ་རྗེའི་རྩེར། །རྣམ་པ་ལྔ་རུ་རྣམ་བསྒོམ་བྱ། །དཀར་པོ་ཡེ་ཤེས་རིགས་རབ་བརྗོད། །ནག་པོ་བསྡུས་པའི་རིགས་སུ་དྲན། དམར་པོ་པདྨའི་རིགས་ཤེས་བྱ། སེར་པོ་འདོད་པའི་རིགས་སུ་དྲན། །མཛེས་པའི་གཟུགས་ནི་རབ་གསལ་བར། །
རིགས་ནས་སྣ་ཚོགས་རྒྱན་གྱིས་བརྒྱན། །པདྨ་རབ་ཏུ་རྒྱས་བྱས་ནས། །རང་གི་རྡོ་རྗེ་དེ་ལ་གཞུག །བཅོམ་ལྡན་འདས་རྡོ་རྗེ་སེམས་དཔས་དེ་སྐད་ཅེས་གསུངས་སོ། །དེ་ལྟར་བྱས་པས་གང་ལྡན་པ། །དེ་ལྡན་ཡེ་ཤེས་རྙེད་པར་དཀའ། །རང་གཟུགས་ཤིན་ཏུ་བརྟན་བྱས་ནས། །བསམ་གཏན་བརྩོན་པར་རབ་ཏུ་གཞུག །མཛེས་ལྡན་མ་དགའ་ལྟ་བ་ན། །གཟུགས་དང་ལྡན་པར་དེ་འགྱུར་རོ། །བཙུན་མོ་མཐོང་བ་ཙམ་གྱིས་ནི། །འཐུང་འགྱུར་འདིར་ནི་ཐེ་ཚོམ་མེད། །རྡོ་རྗེ་སེམས་དཔས་ཞིང་འདིར་ནི། །ཡོངས་སུ་གང་བར་རྣམ་བསྒོམ་བྱ། །སངས་རྒྱས་གཟུགས་ནི་བརྟན་བྱས་ནས། །རྡོ་རྗེས་རྣམ་པར་ལྟུང་བར་བྱ། །བཅོམ་ལྡན་འདས་རྡོ་རྗེ་གསུམ་དབྱེར་མི་ཕྱེད་པས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོ་ལས་རིགས་བསྡུས་པའི་ཏིང་ངེ་འཛིན་གྱི་ལེའུ་གསུམ་པ་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་ཆོས་ཀྱི་རིགས་ཀྱི་ཏིང་ངེ་འཛིན་གྱི་ལེའུ་བཀའ་སྩལ་ཏོ། །དཀྱིལ་འཁོར་ཆེན་པོའི་ཚུལ་དུ་ནི། །ཐམས་ཅད་དུ་ནི་དེ་ཉིད་བྱ། །ཆོས་ཀྱི་དཀྱིལ་འཁོར་རྣམ་བསྒོམ་པ། །ཆོ་ག་ཤེས་པས་རབ་ཏུ་བརྩམ། །ཆོས་ཀྱི་ཀུན་སྦྱོར་མཚན་ཉིད་ཀྱིས། །རྣམ་པར་རྟོག་པ་ཡོངས་དོར་བྱ། །གསང་སྔགས་དབྱེ་བ་བརྗོད་ནས་ནི། །ཐམས་ཅད་རྣལ་འབྱོར་རྣམ་བསྒོམ་བྱ། །ཨོཾ་སརྦ་ཏ་ཐཱ་ག་ཏ་དྷརྨ་ཛྙཱ་ན་སྭ་བྷཱ་བ་ཨཱཏྨ་ཀོ྅ཧྃ། དམ་ཚིག་ཆེན་པོའི་རྣལ་འབྱོར་ཉིད། །ཆོ་ག་ཤེས་པས་ཡང་དག་བརྗོད། །དངོས་པོ་ཐམས་ཅད་ཡང་དག་བསྐྱེད། །དངོས་མེད་བསྒོམ་བྱ་མིན་པ་ཉིད། །བཅོམ་ལྡན་འདས་འཇིག་རྟེན་དབང་ཕྱུག་གིས་དེ་སྐད་ཅེས་གསུངས་སོ། །བློ་གྲོས་ལྡན་པས་པདྨ་བསམ། །པདྨ་རཱ་གའི་དབང་མཚུངས་པ། །དཀྱིལ་འཁོར་དེ་ལ་བསམ་བྱ་བ། །གཟུགས་བརྙན་དབུས་སུ་རྣམ་བསྒོམ་བྱ། །རིག་པའི་རྒྱལ་པོ་ཡང་དག་བསྐྱེད། །འབར་བའི་ཕྲེང་བ་མཚུངས་པའི་འོད། །འབར་བ་འདུས་པ་དེ་རྣམས་སུ། །འཇིག་རྟེན་
དབང་ཕྱུག་རྣམ་བསྒོམ་བྱ། །བཅོམ་ལྡན་འདས་འཇིག་རྟེན་དབང་ཕྱུག་གིས་དེ་སྐད་ཅེས་གསུངས་སོ། །ནམ་མཁའི་ཁམས་ནི་ཀུན་ཏུ་དགང་། །སླར་ཡང་དེ་ཉིད་ལ་བསྡུ་བྱ། །རང་གི་གཟུགས་དང་ཟླ་དབུས་གནས། །སྣ་ཚོགས་ཁ་དོག་མཚུངས་པའི་འོད། །སྙིང་ག་རུ་ནི་རྣམ་བསྒོམས་ནས། །ལྕེ་ལ་གསང་སྔགས་བསྒོམ་པའོ། །རང་གཟུགས་དེ་ཡི་དབུས་གནས་པར། །སངས་རྒྱས་ཡེ་ཤེས་རྣམ་པར་བརྒྱན། །འཇིག་རྟེན་དབང་ཕྱུག་ཡང་དག་བསྐྱེད། །འཇིག་རྟེན་ཁམས་འདིར་སྤྲོ་བར་བྱ། ། རིག་པའི་རྒྱལ་པོ་ཡང་དག་བསྐྱེད། །པདྨའི་དཀྱིལ་འཁོར་དབུས་སུ་ནི། །འཇིག་རྟེན་དབང་ཕྱུག་རབ་བསྒོམས་ནས། །གཟུགས་ཀྱིས་ནམ་མཁའ་འགེངས་པར་བྱེད། །ཆོས་ཀྱི་དཀྱིལ་འཁོར་དབུས་སུ་ནི། །འཇིག་རྟེན་དབང་ཕྱུག་རབ་བསྒོམས་ནས། །རྡོ་རྗེ་སེམས་དཔའ་ཡང་དག་བསྐྱེད། །འཇིག་རྟེན་ཁམས་སུ་འདི་སྤྲོ་བྱ། །བཅོམ་ལྡན་འདས་ཀུན་ཏུ་བཟང་པོས་དེ་སྐད་ཅེས་གསུངས་སོ། །ཆོས་ཀྱི་དཀྱིལ་འཁོར་དབུས་སུ་ནི། །རྡོ་རྗེ་སེམས་དཔའ་ཡང་དག་བསྐྱེད། །ཇི་ལྟར་རིགས་པར་གནས་ལྔ་རུ། །ཁྱབ་བདག་འཇིག་རྟེན་དབང་ཕྱུག་དགོད། །བཅོམ་ལྡན་འདས་འཇིག་རྟེན་དབང་ཕྱུག་གིས་དེ་སྐད་ཅེས་གསུངས་སོ། །སྙིང་གའི་དབུས་སོན་ཕྲ་མོ་ནི། །ཆོས་ཀྱི་དཀྱིལ་འཁོར་མཆོག་གྱུར་པ། །ཆོས་དེར་ཡང་དག་བསྐྱེད་ནས་སུ། །འཇིག་རྟེན་ཁམས་སུ་འདི་སྤྲོ་བྱ། ། སྙིང་གའི་དབུས་སོན་ཕྲ་མོ་ནི། །ཆོས་ཀྱི་དཀྱིལ་འཁོར་དྲི་མེད་པ། །པདྨ་དེ་ལ་རྣམ་བསྒོམས་ཤིང་། །སངས་རྒྱས་གཟུགས་ནི་རྣམ་བསྒོམས་ནས། །སངས་རྒྱས་གཟུགས་རྣམས་ཐམས་ཅད་དུ། །འཇིག་རྟེན་དབང་ཕྱུག་རྣམ་བསྒོམ་པའོ། །བཅོམ་ལྡན་འདས་ཆོས་འཆང་བས་དེ་སྐད་ཅེས་གསུངས་སོ། །སྙིང་གའི་དབུས་སོན་ཕྲ་མོ་ནི། །ཆོས་ཀྱི་དཀྱིལ་འཁོར་མཆོག་གྱུར་པ། །སངས་རྒྱས་ལྔ་ནི་རྣམ་བསྒོམས་ནས། །དེར་ཡང་དེ་བཞིན་བསྒོམ་པར་བྱ། །ལྟེ་བའི་དབུས་སོན་ཕྲ་མོ་ནི། །ཆོས་ཀྱི་དཀྱིལ་
འཁོར་མཆོག་གྱུར་པ། །རང་གཟུགས་ལ་སོགས་རྣམ་བསྒོམས་པས། །ཆོ་ག་ཤེས་པས་བསྐྱེད་པར་བྱ། །མཐོ་གང་ཙམ་ལས་འདས་པར་ནི། །ཆོས་ཀྱི་དཀྱིལ་འཁོར་དབུས་སུ་ནི། །ཆོ་ག་ཤེས་པས་རིམ་པ་བཞིན། །འཇིག་རྟེན་ཁམས་སུ་མཆོད་པར་བྱེད། ། བཅོམ་ལྡན་འདས་ཆོས་འཆང་བས་དེ་སྐད་ཅེས་གསུངས་སོ། །རྒྱང་གྲགས་ཙམ་ལས་འདས་པར་ནི། །ཆོས་ཀྱི་དཀྱིལ་འཁོར་སྒོམ་པ་ནི། །འཇིག་རྟེན་དབང་རབ་བསྒོམས་པ་ཡིས། རང་གི་གཟུགས་ནི་རྣམ་བསྒོམ་བྱ། །རྒྱང་གྲགས་ཙམ་ལས་འདས་པར་ནི། །པདྨའི་དཀྱིལ་འཁོར་སྒོམ་པ་ནི། །གཞོགས་སུ་བཙུན་མོ་བྱས་ནས་སུ། །སངས་རྒྱས་གཟུགས་ནི་མཆོད་པར་བྱ། །གསལ་བའི་དཀྱིལ་འཁོར་ཚུལ་གྱིས་ནི། །ཆོས་ཀྱི་དཀྱིལ་འཁོར་སྒོམ་པ་ནི། །འཇིག་རྟེན་ཁམས་ནི་ཀུན་ནས་སུ། །ཆོ་ག་ཤེས་པས་མཆོད་པར་བྱ། །གསལ་བའི་དཀྱིལ་འཁོར་ཚུལ་གྱིས་ནི། །འཁོར་ལོའི་དཀྱིལ་འཁོར་བསྒོམ་པ་སྟེ། །ཉི་མའི་དཀྱིལ་འཁོར་མཆོག་བྱས་ནས། །རང་གི་གཟུགས་ནི་དགོད་པར་བྱ། །སྔགས་པས་སྟེང་གི་རིམ་པར་ནི། །ཇི་སྲིད་ནམ་མཁའ་འགེངས་པ་ཞེས། །པདྨ་རཱ་གའི་འོད་མཉམ་པའི། །པདྨ་ལྔ་ནི་རྣམ་བསྒོམས་ནས། །ཆོ་ག་ཤེས་པས་རང་གཟུགས་ནི། །དབུས་སུ་ཡང་དག་གནས་བསྒོམ་བྱ། །སངས་རྒྱས་གཟུགས་ནི་ཀུན་འབྱུང་བ། །ཤར་དུ་རྣམ་པར་བསྒོམ་པར་བྱ། །ལྷོར་ནི་བསྡུས་པ་ཞེས་བྱས་ནས། །རྣལ་འབྱོར་ཡང་དག་བརྩམ་པར་བྱ། །ནུབ་ཏུ་ཆོས་འཆང་བྱས་ནས་ནི། །བྱང་དུ་འདོད་པ་འབྱུང་བའོ། །འཁོར་ལོ་ཡེ་ཤེས་རིགས་ཞེས་བརྗོད། །རལ་གྲི་ཆོས་ཀྱི་རིགས་ཞེས་དགོངས། །རྡོ་རྗེ་བསྡུས་པའི་རིགས་སུ་གྲགས། ། རྩེ་གསུམ་འདོད་པའི་རིགས་སུ་བཤད། །ནམ་མཁའི་ཁམས་ནི་ཀུན་གང་བར། །བྱས་ནས་ཁྱབ་བདག་ཆོས་འཆང་བ། །ལག་ཏུ་རལ་གྲི་ཡང་དག་བསྐྱེད། ཪང་གཟུགས་ཀྱིས་ནི་གཞོམ་པར་བྱ། །འདོད་མཆོད་ཀྱིས་ནི་འཇོམས་བྱས་ནས། །ཆོས་ཀྱི་
དབྱིངས་ཀྱི་ཆོ་ག་རིག །ལག་ཏུ་མདུང་ནི་ཡང་དག་བསྐྱེད། །རང་གཟུགས་ཀྱིས་ནི་ཕྱེ་མར་བརླག །གསལ་བའི་དཀྱིལ་འཁོར་ཚུལ་གྱིས་ནི། །ཡེ་ཤེས་རིགས་ནི་ཟློག་པར་བྱེད། །ཡེ་ཤེས་དཀྱིལ་འཁོར་ཚུལ་གྱིས་ནི། །བསྡུས་པའི་རིགས་ནི་རྣམ་ལྟུང་བྱེད། །ཆོས་ཀྱི་དཀྱིལ་འཁོར་ཚུལ་གྱིས་ནི། །ཆོས་ཀྱི་རིགས་ནི་ངེས་ལྟུང་བྱེད། །ཟླ་བའི་དཀྱིལ་འཁོར་ཚུལ་གྱིས་ནི། །ཆེན་པོའི་རིགས་ནི་ངེས་ལྟུང་བྱེད། །ཉི་མའི་དཀྱིལ་འཁོར་ཚུལ་གྱིས་ནི། །རིགས་ཀུན་ངེས་པར་ལྟུང་བར་བྱེད། ། བཅོམ་ལྡན་འདས་རྡོ་རྗེ་འཆང་བས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པ་ཆེན་པོར་ཆོས་ཀྱི་དཀྱིལ་འཁོར་གྱི་ཏིང་ངེ་འཛིན་ཏེ་ལེའུ་བཞི་པ་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་པ་དེ་རྣམས་ཐམས་ཅད་རང་གི་རྡོ་རྗེ་ཆེན་པོ་ལ་བཞག་ནས་ཡེ་ཤེས་ཀྱི་རིགས་ལ་སོགས་པ་ཅན་དེ་ལ། ཡེ་ཤེས་ཀྱི་དཀྱིལ་འཁོར་ཆེན་པོའི་ཚུལ་གྱིས་རབ་ཏུ་བཅུག་ཅིང་བརྟན་པར་བྱས་ནས། དཀྱིལ་འཁོར་ཆེན་པོ་དེ་རྣམས་སུ་རང་གི་གཟུགས་ཀྱི་རྣམ་པས་ཀུན་ཏུ་གནས་པ་དང་། གཟུགས་ཆེན་པོ་ལྷ་ཆེན་པོའི་ལྷའི་རྣམ་པར་ཡང་དག་པར་སྦྱར་ནས། འདོད་པའི་རིགས་ཀྱི་ཏིང་ངེ་འཛིན་འདི་གསུངས་སོ། །དཀྱིལ་འཁོར་ཆེན་པོའི་ཚུལ་ལས་ནི། །ཐམས་ཅད་དེ་བཞིན་ཁོ་ནར་བྱ། ། ཆོ་ག་ཤེས་པས་རབ་བརྩམ་བྱ། །གཞན་དུ་བསྒོམ་བྱ་མིན་པ་ཉིད། །འདོད་པའི་རིགས་ཀྱི་ཆོ་ག་ཡིས། །གསང་སྔགས་རིག་པ་རྗེས་དྲན་བྱ། །ཨོཾ་ཀཱ་མ་ཛྙཱ་ན་སྭ་བྷཱ་བ་ཨཱཏྨ་ཀོ྅་ཧཾ། ཇི་ལྟར་རིགས་པར་བརྗོད་ནས་ནི། །རྣལ་འབྱོར་འདི་ནི་ཡང་དག་བརྩམ། ། ཀར་ནི་ཀཱ་ར་མཚུངས་པའི་འོད། །པདྨ་ཆེན་པོ་ཡང་དག་བསྐྱེད། །དེ་ཉིད་དཀྱིལ་འཁོར་བྱས་ནས་ནི། །རང་གི་གཟུགས་ནི་དགོད་པར་བྱ། །འདོད་མཆོད་གཟུགས་ནི་ཀུན་བསྐྱེད་ནས། །འཇིག་རྟེན་ཁམས་སུ་འདི་སྤྲོ་བྱ། ཪང་གཟུགས་འདོད་མཆོད་
ཚུལ་གྱིས་ནི། །གཟུགས་ཀྱིས་ནམ་མཁའ་འགེངས་པར་བྱེད། །སྣ་ཚོགས་འབར་བས་རྣམ་བརྒྱན་པའི། །ཚངས་པའི་གཟུགས་ནི་ཡང་དག་མནན། །འདོད་མཆོད་གཟུགས་ནི་ཀུན་བསྐྱེད་ནས། །འཇིག་རྟེན་ཁམས་སུ་འདི་སྤྲོ་བྱ། །ཆོ་ག་ཤེས་པས་རེ་རེ་བར། །གཟུགས་གསུམ་རྣམ་པར་བསྒོམ་པར་བྱ། །བཅོམ་ལྡན་འདས་འདོད་པའི་མཆོད་པས་དེ་སྐད་ཅེས་གསུངས་སོ། །ཁྲུ་གང་ཙམ་ལས་འདས་པར་ནི། །པདྨ་ཆེན་པོ་རྣམ་བསྒོམ་པ། །ཚངས་པའི་གཟུགས་ཀྱིས་སྲིད་པ་འདིར། །ཆོ་ག་ཤེས་པས་སྤྲོ་བར་བྱ། །ཁྲུ་ནི་བརྒྱ་ཕྲག་འདས་པར་ནི། །པདྨ་ཆེན་པོ་རྣམ་བསྒོམ་བྱ། །འདོད་མཆོད་གཟུགས་ནི་ཡང་དག་དབྱུང་། །སངས་རྒྱས་དེ་ཉིད་ལ་བསྒོམ་བྱ། །ཁྲུ་ནི་བརྒྱད་བརྒྱ་འདས་པར་ནི། །པདྨ་ཆེན་པོ་རྣམ་བསྒོམ་བྱ། །ཁྱབ་འཇུག་གཟུགས་ནི་ཡང་དག་བསྐྱེད། །སངས་རྒྱས་ལ་སོགས་དེར་བསྒོམ་བྱ། །སངས་རྒྱས་གཟུགས་ནི་ཡང་དག་བསྐྱེད། །ཚངས་པའི་གཟུགས་ཀྱིས་འདི་སྤྲོ་བྱ། །ཆོས་ཀྱི་གཟུགས་ནི་ཡང་དག་བསྐྱེད། །ཁྱབ་འཇུག་གཟུགས་ཀྱིས་འདི་སྤྲོ་བྱ། །སེམས་དཔའི་གཟུགས་སུ་བརྟན་བྱས་ནས། །འདོད་མཆོད་མཚུངས་པའི་གཟུགས་རྣམས་ཀྱིས། །འཇིག་རྟེན་ཁམས་ནི་ཀུན་ཏུ་ཡང་། །ཆོ་ག་ཤེས་པས་སྤྲོ་བར་བྱ། །ཁྲུ་གང་ཙམ་ལས་འདས་བར་ནི། །ཚངས་པའི་གཟུགས་ཀྱིས་རྣམ་བསྒོམ་པ། །སྙིང་གར་དེ་རྣམས་ཡང་དག་བསྐྱེད། །སངས་རྒྱས་གཟུགས་སུ་རྣམ་བསྒོམ་བྱ། །ཆོ་ག་ཤེས་པས་སངས་རྒྱས་གཟུགས། །གཟུགས་ལ་གཟུགས་སུ་རྣམ་བསྒོམ་བྱ། བཅོམ་ལྡན་འདས་འདོད་པའི་མཆོད་པས་དེ་སྐད་ཅེས་གསུངས་སོ། །ཁྲུ་གང་ཙམ་ལས་འདས་པར་ནི། ཁྱབ་འཇུག་གཟུགས་ནི་རྣམ་སྒོམ་པ། སྙིང་གར་དེ་རྣམས་ཀུན་བསྐྱེད་ནས། སངས་རྒྱས་གཟུགས་སུ་རྣམ་བསྒོམ་བྱ། །སངས་རྒྱས་གཟུགས་རྣམས་ཐམས་ཅད་དུ། །འདོད་པའི་མཆོད་པ་མཚུངས་པའི་གཟུགས། །སྒེག་པའི་རྒྱན་གྱིས་བརྒྱན་གྱུར་པ། །
ཆོ་ག་ཤེས་པས་དབྱུང་བར་བྱ། །ཇི་སྲིད་གཟུགས་སུ་ཡང་དག་སྦྱོར། །དེ་སྲིད་དུ་ནི་བཙུན་མོར་འགྱུར། །བཅོམ་ལྡན་འདས་འདོད་པའི་མཆོད་པས་དེ་སྐད་ཅེས་གསུངས་སོ། །རིགས་ཀྱི་དཀྱིལ་འཁོར་ཚུལ་གྱིས་ནི། །གཟུགས་སུ་བསྐྱེད་ནས་བསྒོམ་པར་བྱ། །ཆོ་ག་ཤེས་པས་དང་པོའི་སྦྱོར། །མཉམ་པར་གཞག་པས་བསྒོམ་པར་བྱ། །ནམ་མཁའི་ཁམས་ནི་ཀུན་བཀང་བར། །མཁས་པས་དེ་ལྟར་བསམས་བྱས་ནས། །བརྗོད་པའི་རྣམ་པས་གསོལ་བ་བཏབ། །མཉམ་པར་བཞག་པས་དེ་ལྟུང་བྱ། །ཆོ་ག་ཤེས་པས་ལྷའི་རྣམ་པ། །སངས་རྒྱས་འོད་དང་མཉམ་པའི་གཟུགས། །ཇི་ལྟར་རིགས་པར་སྔགས་པས་སྦྱིན། །གཞན་དུ་འགྲུབ་པར་མི་འགྱུར་རོ། །ཆོ་ག་ཤེས་པས་ལྷ་མོ་ལྷའི། །རང་གི་གཟུགས་ནི་རྣམ་བསྒོམ་བྱ། །གཞན་དུ་རྡོ་རྗེ་སེམས་དཔའ་རྣམས། །དཀར་སོགས་ཆོ་ག་འབྱུང་བ་ཡི། །སྒེག་པའི་རྒྱན་གྱིས་བརྒྱན་གྱུར་པའི། །རང་གཟུགས་རྣོན་པོའི་ཚུལ་གྱིས་ནི། །ཆོ་ག་ཤེས་པས་ལྷ་མོ་དེར། །བྱས་ནས་མཚོན་བྱ་རྣམ་བསྒོམ་བྱ། །ཆོ་ག་ཤེས་པས་རྡོར་པདྨ། །ཀུན་སྦྱོར་ཆོ་ག་འབྱུང་བ་ཡིས། །རིགས་ཀྱི་གཟུགས་ནི་ཀུན་བསྐྱེད་ནས། །ཪང་གི་ཁུ་བས་དེ་ནི་མཆོད། །རྒྱལ་བ་ཆུ་སྐྱེས་རིགས་ཀྱི་ལྷ། །གཞན་དུ་གྲུབ་པ་ཉིད་མི་འགྱུར། །ཕྱག་ན་རྡོ་རྗེའི་རིགས་བརྗོད་པའི། །ལྷ་ཉིད་གྲུབ་པ་ཉིད་མི་འགྱུར། །དང་པོ་དང་མཐར་ཐམས་ཅད་དུ། །འདི་ནི་ཐུན་མཚམས་བཞི་རུ་བྱ། །རྒྱལ་བ་ཆུ་སྐྱེས་རྡོ་རྗེ་སྐྱེས། །གཞན་དུ་འགྲུབ་པ་མིན་པ་ཉིད། །མ་མོའི་གཟུགས་ནི་ཀུན་བསྐྱེད་ནས། །འོད་ཟེར་སྣ་ཚོགས་མཉམ་པའི་འོད། །རང་གཟུགས་འདོད་མཆོད་ཚུལ་གྱིས་ནི། །ཁམས་གསུམ་པར་ཡང་སྤྲོ་བར་བྱ། །འདོད་པའི་མཆོད་པ་མཚུངས་པའི་གཟུགས། །སྲིང་མོ་བཞིར་ནི་ཡང་དག་སྦྱོར། །གཟུགས་ཀྱི་མཚན་ཉིད་ཚུལ་གྱིས་ནི། །མཉམ་པར་བཞག་པས་སྨྲ་བར་བྱ། །གེ་སར་སེར་པོ་དང་མཚུངས་པའི། །ཚངས་པའི་གཟུགས་ནི་རྣམ་བསྒོམས་
ནས། །ཆོ་ག་ཤེས་པས་སངས་རྒྱས་གཟུགས། །བྱས་ནས་དེ་ནི་རབ་བསྒོམ་བྱ། །བཅོམ་ལྡན་འདས་རྡོ་རྗེ་ཆོས་འཆང་བས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོ་ལས། འདོད་པའི་རིགས་ཀྱི་ཏིང་ངེ་འཛིན་གྱི་ལེའུ་སྟེ་ལྔ་བ་རྫོགས་སོ།། །།དེ་ནས་མཅོམ་ལྡན་འདས་ཕྱག་ན་རྡོ་རྗེས། དེ་བཞིན་གཤེགས་པ་ཐམས་ཅད་རང་གི་དཀྱིལ་འཁོར་དུ་བཞག་ནས་རང་གི་ཏིང་ངེ་འཛིན་ལ་སྙོམས་པར་ཞུགས་ཏེ། གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པ་ཆེན་པོར་དངོས་གྲུབ་ཐམས་ཅད་ཀྱི་དམ་ཚིག་གི་ཡེ་ཤེས་མཆོག་གི་ལེའུ་འདི་བཀའ་སྩལ་ཏོ། །བློ་ལྡན་འདོད་པ་ཐམས་ཅད་ལ། །རྣམ་རྟོག་བྱ་བ་མིན་པ་ཉིད། །སངས་རྒྱས་ཐམས་ཅད་འཇོམས་པ་ནི། །སེམས་ལ་སྨད་བྱ་མིན་པ་ཉིད། །དགའ་དང་རྩོད་པའི་མཚན་ཉིད་ཀྱིས། །སངས་རྒྱས་ཐམས་ཅད་བསླུ་བ་དང་། །གཞན་དུ་ང་ལ་ལྷའོ་ཞེས། །སེམས་ནི་བརྟན་བྱ་མིན་པ་ཉིད། །སངས་རྒྱས་ཀུན་གྱི་རྫས་གང་ཡིན། །སྐྱེ་བ་མེད་པའི་ཡོན་ཏན་འབྱུང་། །སེམས་ནི་ཤིན་ཏུ་བརྟན་བྱས་ལ། །བཙུན་མོ་ལ་སོགས་རྣམ་པར་བསྒོམ། །འཇིག་རྟེན་གསུམ་པའི་དབང་ཕྱུག་མ། །རིག་མ་ཆེན་མོ་སྤྱན་མར་གྲགས། །དེ་ཡང་བཙུན་མོར་བྱས་ནས་ཀྱང་། །ཀུན་ཏུ་ཉེ་བར་ལོངས་སྤྱད་དོ། །ཆོ་ག་ཤེས་པས་ཡེ་ཤེས་རིགས། །ལྷན་ཅིག་འཇོམས་པར་ཡང་དག་བརྩམ། །སྲོག་ཆགས་རྣམས་ཀྱི་དགེ་འཇོམས་པ། །བསྡུ་བའི་དོན་ནི་རྟག་ཏུ་བྱ། །ཆགས་ལ་ཆགས་པས་སྦྱོར་བྱ་བ། །ཆོས་ཀྱི་རིགས་ལ་རྟག་ཏུ་བྱ། འདོད་མཆོད་རིགས་ནི་མཚུངས་པ་ལ། །རྟག་ཏུ་བརྫུན་ཡང་སྨྲ་བར་བྱ། །ཀུན་ལ་རང་དེ་ལྟར་འདི་བྱ། །གཞན་དུ་གྲུབ་པ་མིན་པ་ཉིད། །སངས་རྒྱས་གཟུགས་ནི་རྣམ་བསྒོམས་ནས། །སྙིང་གར་དེ་ནི་རྣམ་བསྒོམ་བྱ། །ཐམས་ཅད་དེ་བཞིན་ཁོ་ནར་བྱ། །གཞན་དུ་དེ་དག་མི་འགྱུར་རོ། །ཡེ་ཤེས་རིགས་ནི་རྣམ་འཇོམས་པས། །དགའ་ལྡན་རྣམས་སུ་ཉེ་བར་སྐྱེ། ཆོས་ཀྱི་
རིགས་ནི་རྣམ་བསྒོམས་པས། བདེ་ལྡན་དུ་ནི་སྐྱེ་བར་འགྱུར། །ཆོས་ཀྱི་རིགས་སོགས་དབྱེ་བ་ཡིས། །བསྡུས་པ་ཞེས་ནི་གྲགས་པར་འགྱུར། །འདོད་མཆོད་རིགས་ནི་འཇོམས་པ་ཡིས། །ཁམས་གསུམ་པ་ལ་སོགས་པར་འབྱུང་། ། གནས་མེད་ལུས་དང་བྲལ་བ་ཡི། །ལུས་དང་ལྡན་པས་གནས་པར་འགྱུར། །དེ་ཡི་གདོང་ནི་གཟི་རྒྱས་པར། །ཆོས་རྣམས་ཀུན་ཏུ་སྐྱེ་བར་འགྱུར། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྗེ་བོས་དེ་སྐད་ཅེས་གསུངས་སོ། །སེམས་ཅན་ཁམས་ཀྱི་མཐར་ཐུག་པར། །བདག་ནི་རྡོ་རྗེ་ལྟ་བུར་བརྟན། །སྲིད་པ་སྒྲོལ་བར་ཡང་དག་སྦྱོར། སངས་རྒྱས་བཀའ་ཡིས་དགོད་པར་བྱ། ཡེ་ཤེས་དགེ་བ་ཀུན་འབྱུང་བ། །སངས་རྒྱས་ཆོས་ཚུལ་འདི་རྣམས་ཀྱིས། །སེམས་དཔའ་བསྡུས་པ་ཡང་དག་འབྱུང་། །གཞན་དུ་མཆོད་བྱ་མིན་པ་ཉིད། །ཤེས་རབ་ཕ་རོལ་ཕྱིན་པའི་ཐབས། །ཡེ་ཤེས་ཆེན་པོ་ཀུན་བཏུས་པས། །སེམས་ལ་རྟག་ཏུའང་སྦྱར་བར་བྱ། །ཆོས་བསྡུས་པ་ནི་ཐོབ་པར་འགྱུར། །བྱང་ཆུབ་སེམས་ནི་སེམས་ཆེན་པོ། །རྡོར་སོགས་མཚན་ཉིད་མིན་པ་ཉིད། །དེ་བཞིན་དུ་ནི་ཡེ་ཤེས་ཀུན། །སྙིང་པོ་ཀུན་ལས་བཏུས་པ་འདི། །ཕ་རོལ་ཕྱིན་པ་བསྡུས་པ་འདིར། །སངས་རྒྱས་རྣམས་ཀྱི་བཙུན་མོར་བསྟན། །དེ་རྣམས་སངས་རྒྱས་ཐོབ་པར་འགྱུར། །ཀུན་སྦྱོར་མཚན་ཉིད་དེ་རྣམས་ཀྱིས། །སྒྲ་དྲི་རོ་ལ་སོགས་པ་རྣམས། ། ཇི་ལྟར་ནུས་པར་འབུལ་བར་བྱེད། །རང་གཟུགས་སངས་རྒྱས་ཚུལ་གྱིས་ནི། །དེ་ལ་དབུས་སུ་རྣམ་བསྒོམ་བྱ། །འོད་ཟེར་འབར་བ་འཁྲུགས་བྱས་ནས། །སྙིང་གར་དེ་རྣམས་རབ་གཞུག་བྱ། །བཅོམ་ལྡན་འདས་ཆོས་འཆང་བས་དེ་སྐད་ཅེས་གསུངས་སོ། །བསྡུས་པ་ཞེས་རིགས་སུ་བརྗོད་པའི། །གར་མཁན་ཆེན་པོ་ཡང་དག་འབྱུང་། །དེ་ལ་ངོ་མཚར་གསོལ་བཏབ་པ། །དེ་ལ་འཇོམས་པར་བྱེད་པར་དགོངས། །ཕྱག་རྒྱ་ཆེན་པོའི་གོ་འཕང་བརྗོད། །མི་རྣམས་རིགས་ནི་བཞི་པོ་ཡང་། །བྱས་ནས་དམ་ཚིག་ཚུལ་གྱིས་ནི། །མཉམ་
པར་བཞག་པས་བསྒོམ་པར་བྱ། །སེམས་ནི་སེམས་ཅན་ཐམས་ཅད་ཀྱི། ཪང་བཞིན་ཕུལ་བྱུང་ཆེན་པོ་སྟེ། །རྣམ་རྟོག་དམ་ཚིག་ལ་གནས་པ། །སྐྱེ་བ་རྣམས་དང་དམན་པར་སྨྲ། །བསོད་ནམས་བསོད་ནམས་ཀྱིས་དེའི་ལུས། །གོས་པའམ་ཡང་ན་དེ་མིན་ཉིད། །དེ་ལྟར་ཤེས་ནས་ཅི་རིགས་པར། །གཞན་དུ་བསྒོམ་བྱ་མིན་པ་ཉིད། །པདྨ་ཨུཏྤལ་ལ་སོགས་པ། །འདམ་སྐྱེས་ཡང་དག་བྱུང་མ་སྐྱེས། །སེམས་ལ་སོགས་པའི་མཚན་ཉིད་ཀྱང་། །དེ་ཉིད་ལ་ཀུན་ཤེས་པར་བྱ། །བྱང་ཆུབ་སེམས་ནི་བརྟན་པས་ནས། །སངས་རྒྱས་རྣམས་ཀྱང་ཡོངས་སུ་གཟུང་། །རྡོ་རྗེ་དེ་ཉིད་ལས་སྐྱེས་ཏེ། །གཞན་དུ་འབྱུང་བ་མིན་པ་ཉིད། །སེམས་ཅན་གྱི་ནི་ས་རྣམས་ཀྱིས། །འགྲུབ་པར་འགྱུར་བར་གྲགས་པ་ཡིན། །དེ་བཞིན་གང་འདི་དག་པ་ཆེ། །ཡེ་ཤེས་ལྕགས་ཀྱུའི་ཚུལ་ཆེན་ནོ། ། བཅོམ་ལྡན་འདས་ཀུན་ཏུ་བཟང་པོ་ཆེན་པོས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དངོས་གྲུབ་ཐམས་ཅད་ཀྱི་དམ་ཚིག་གི་ཡེ་ཤེས་མཆོག་གི་ལེའུ་སྟེ་དྲུག་པ་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་དེ་རྣམས་ཐམས་ཅད་ངེས་པར་བྱུང་ནས་ཀྱང་སེམས་དཔའ་ཆེན་པོའི་ཟླ་བའི་དཀྱིལ་འཁོར་བྱིན་གྱིས་བརླབས་པར་ཀུན་ཏུ་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་རྡོ་རྗེ་ཐམས་ཅད་ཀྱི་དམ་ཚིག་གི་ཡེ་ཤེས་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དང་པོའི་རྣལ་འབྱོར་དམ་ཚིག་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་འདུ་བར་བྱེད་པ་སྐྱེད་པ་དང་བཅས་པའི་གསང་ཆེན་བཀའ་སྩལ་ཏོ། །སངས་རྒྱས་གཟུགས་སུ་ཡང་དག་བསྐྱེད། ། འོད་ཟེར་སྣ་ཚོགས་མཚུངས་པའི་འོད། །འོད་ཟེར་སྙིང་པོ་སོགས་ཚུལ་གྱིས། །འཁོར་ལོ་དཀར་པོ་དང་མཚུངས་པ། །ཙ་ན་ཀ་ཡི་འབྲུ་ཚད་ཀྱིས། །ཀུན་ནས་ཡོངས་སུ་ཟླུམ་པོ་རུ། །སྔགས་པའི་དཔྲལ་བའི་སྟེང་དུ་ནི། །མཉམ་པར་བཞག་པས་བསྒོམ་པར་བྱ། །
ཆོ་ག་ཤེས་པས་ཟླ་བ་གཅིག །དེ་ཡིས་དེ་ལྟར་འདི་སྤྲོ་བྱ། །ནམ་མཁའ་ལ་སོགས་རབ་འབྱམ་དུ། །ཟླ་གཉིས་ནང་དུ་རྒྱས་པར་བྱ། །ཛཱ་ཏིའི་མེ་ཏོག་སོགས་གཡོགས་པར། །དཀྱིལ་འཁོར་དེ་རུ་རྣམ་བསྒོམ་བྱ། །མཚན་མ་ཕུལ་བྱུང་བཅས་མཐོང་ནས། །མཚན་ཉིད་བརྗོད་པས་མཚོན་པར་བྱ། །འབར་བའི་ཕྲེང་བས་རྣམ་བརྒྱན་པའི། །རྡོ་རྗེ་སེམས་དཔའ་རྣམ་བསྒོམས་ནས། །གང་དུ་དཀྱིལ་འཁོར་སོགས་ཚུལ་གྱིས། །ནས་ཙམ་དུ་ནི་བསྒོམ་པར་བྱ། །རྩེ་མོ་ལྔ་པའི་རྡོ་རྗེ་ཆེ། །སྣ་ཡི་རྩེར་ནི་རྣམ་བསྒོམ་བྱ། །ཨིནྡྲ་ནཱི་ལ་སོགས་ཚུལ་གྱིས། །དེ་ཡི་ཁ་དོག་རྣམ་སྒོམ་མོ། །ཨུཏྤལ་ལ་སོགས་གཡོགས་པ་ལ། །དཀྱིལ་འཁོར་དེ་ལ་བསྒོམ་པར་བྱ། །ཀུན་ཏུ་དེ་ཉིད་བྱ་བ་ནི། །ཡེ་ཤེས་རིགས་ཀྱི་ཆོ་ག་ལས། །ཆོ་ག་ཤེས་པས་ཆོས་སེམས་དཔའ། ། བསྐྱེད་ནས་བསྒོམ་པར་བྱ་བ་འདི། །ནམ་མཁའི་ཁམས་ནི་ཀུན་བཀང་བར། །བྱས་ནས་འོད་ཟེར་ཡང་དག་བསྡུ། །རྒྱ་ཤུག་ཚི་གུའི་ཚད་ཀྱིས་ནི། །པདྨ་ཡང་དག་སྦྱར་བསྒོམ་བྱ། །པདྨ་རཱ་གའི་འོད་མཚུངས་པའི། །འདབ་མ་བརྒྱད་པ་རྣམ་བསྒོམས་ནས། ། ཇི་ལྟར་རིགས་པར་སྙིང་གར་དེ། །བསྒོམ་བྱ་གཞན་དུ་མི་བསམ་མོ། །ཐོག་མ་བར་ནི་རྣམ་སྤངས་ནས། །སྒོམ་པ་དེ་ཡི་དགོངས་པའོ། །མེ་ཏོག་པདྨ་སོགས་གཡོགས་པར། །དེ་ཕྱོགས་སུ་ནི་རྣམ་བསྒོམ་བྱ། །ཆོ་ག་ཤེས་པས་འདོད་མཆོད་པའི། ། སེམས་དཔའ་འོད་མཚུངས་བསྒོམ་པར་བྱ། །འོད་ཟེར་འབར་བས་རྣམ་བརྒྱན་པའི། །རྩེ་གསུམ་ཤིན་ཏུ་བརྟན་བྱས་ནས། །ཆོ་ག་ཤེས་བས་ནས་ཙམ་དུ། །བསམས་ནས་ལྟེ་བར་བསྒོམ་པར་བྱ། །ཀར་ནི་ཀཱར་སོགས་མེ་ཏོག་ཆེ། །སེར་པོ་འབར་བ་བསྒོམ་པར་བྱ། །བཅོམ་ལྡན་འདས་ཀུན་ཏུ་བཟང་པོས་དེ་སྐད་ཅེས་གསུངས་སོ། །ཀུན་ཏུ་རྣལ་འབྱོར་བཞི་རྣམས་སུ། །རྣམ་པ་བཞི་པོ་རྣམ་བསྒོམ་བྱ། །ཇི་སྲིད་ནམ་མཁའི་དཀྱིལ་འཁོར་དུ། །ཆོ་ག་ཤེས་པས་སྤྲོ་བར་བྱ། །གང་ཡང་སྔགས་
པས་ཟླ་གཉིས་སུ། །ཐུན་བཞིར་རྣམ་པར་བསྒོམ་པར་བྱ། །རྣམ་པར་དབེན་དང་ཡིད་འོང་དང་། །སྐྱེ་བོ་བྲལ་བར་བསྒོམ་པར་བྱ། །ཉ་དང་ཤ་སོགས་ཅན་བཟའ་ལ། །བརྟུལ་ཞུགས་ཅན་གྱིས་མར་སར་བཏུང་། བསླུས་པ་དང་ཡངས་ལ་འཇིགས། །དེ་ལྟར་གང་འདི་བརྟུལ་ཞུགས་ཅན། །ཆོ་ག་ཤེས་པས་སངས་རྒྱས་གཟུགས། །དངོས་ཉིད་དུ་དེ་ལྟ་བར་བྱེད། །རང་གཟུགས་རྣམ་ཤེས་བྱ་མིན་ཉིད། །སྒྲ་ནི་ཉན་པར་བྱེད་མིན་ཉིད། །རྣམ་པ་གཉིས་སུ་དེ་ཡི་སེམས། །སྐྱེ་བ་མིན་ཞིང་ཡང་ཡང་མིན། །གང་ཞིག་ཁོ་ནར་བསྒོམ་པར་བྱ། །གཞན་དུ་དེ་དག་མི་འགྱུར་ཉིད། །གསལ་བའི་དཀྱིལ་འཁོར་སྦྱོར་ལ་སོགས། །བསྐྱེད་ནས་དེ་ལ་བསྒོམ་པར་བྱ། །བདག་པོའི་རྣལ་འབྱོར་ཀུན་བསྐྱེད་ནས། །མཉམ་པར་བཞག་པས་བསྒོམ་པར་བྱ། འབྲས་བུའི་ཆོས་སུ་སྐྱེ་འགྱུར་ཏེ། །གཞན་དུ་བསྐྱེད་པར་འགྱུར་མིན་ཉིད། །བཅོམ་ལྡན་འདས་བྱང་ཆུབ་ཀྱི་སེམས་ཀྱིས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོ་ལས། དང་པོའི་ཡེ་ཤེས་ཀུན་ལས་བཏུས་པའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་དེ་རྣམས་ཐམས་ཅད་རང་གི་བ་སྤུའི་ཁུང་བུ་རྣམས་སུ་རབ་ཏུ་བཅུག་ནས་དམ་ཚིག་ཐམས་ཅད་ཀྱི་ཡེ་ཤེས་འབྱུང་བ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཡང་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་དེ་རྣམས་ཐམས་ཅད་རང་གི་གཟུགས་བུད་མེད་ཀྱི་གཟུགས་སུ་བྱིན་གྱིས་བརླབས་པ་ཁོ་ནར་བ་སྤུའི་ཁུང་བུ་རྣམས་ནས་མངོན་པར་བྱུང་བར་གྱུར་ཏོ། །དེ་ནས་བཙུན་མོ་དེ་རྣམས་ཐམས་ཅད་ཀྱིས་ཡེ་ཤེས་ཆེན་པོའི་རིན་པོ་ཆེ་དེ་ཡི་མཆོད་པ་ཐམས་ཅད་ཀྱི་བཀོད་པས་ཡང་དག་པར་མཆོད་དེ། ནམ་མཁའི་ཁམས་ཐམས་ཅད་ཀུན་ཏུ་བཀང་ཞིང་སྣང་བར་བྱས་ནས་སྐུ་དང་གསུང་དང་ཐུགས་རྣམས་སུ་གནས་པར་གྱུར་ཏོ། །དེ་ནས་
བཅོམ་ལྡན་འདས་ཕྱག་ན་རྡོ་རྗེ་བཙུན་མོ་ཐམས་ཅད་ཀྱི་བྷ་ག་རྣམས་སུ་རང་གི་རྡོ་རྗེ་ཡང་དག་པར་སྦྱོར་བའི་རྣམ་པས་ཡང་དག་པར་སྦྱར་ནས། རང་གི་གཟུགས་དེའི་ཚད་དུ་བྱིན་གྱིས་རློབ་པར་བྱེད་པས་བྱིན་གྱིས་བརླབས་ནས། དེ་བཞིན་གཤེགས་པ་ཐམས་ཅད་ཀྱང་དེའི་ཚེ་ཚད་དེ་ཁོ་ན་བཞིན་དུ་མཁས་པ་རྣམས་ཀྱིས་སྔ་མ་ཇི་ལྟ་བའི་ཕྱག་ན་རྡོ་རྗེ་རིགས་ཐམས་ཅད་དམ་ཚིག་གི་ཡེ་ཤེས་དེ་ཁོ་ན་ཉིད་བྱིན་གྱིས་རློབ་པ་ཞེས་བྱ་བའི་ཡེ་ཤེས་ཆེན་པོའི་དམ་ཚིག་བཀའ་སྩལ་ཏོ། །དཀྱིལ་འཁོར་བཞི་ཡི་ཚུལ་གྱིས་ནི། །དབུས་སུ་སྔགས་སུ་རྣམ་བསྒོམ་བྱ། །སྙིང་གར་དཀྱིལ་འཁོར་བྱས་ནས་ནི། །རྡོ་རྗེ་སེམས་དཔའ་བསྒོམ་པར་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྗེ་བོས་དེ་སྐད་ཅེས་གསུངས་སོ། །དཀྱིལ་འཁོར་བཞི་ཡི་ཚུལ་གྱིས་ནི། །རྣམ་སྣང་ལ་སོགས་རྣམ་བསྒོམ་པ། །དེ་ཉིད་ཀྱིས་ནི་ཀུན་བསྐྱེད་ནས། །དེ་ཉིད་མཆོད་པར་བྱེད་པར་འགྱུར། །དཀྱིལ་འཁོར་བཞི་ཡི་ཚུལ་གྱིས་ནི། །རྡོ་རྗེ་སེམས་དཔའ་བསམ་པར་བྱ། །སངས་རྒྱས་གཟུགས་ནི་ཡང་དག་བསྐྱེད། །དེ་ཡི་མཆོད་པ་བྱེད་པར་བཤད། །དཀྱིལ་འཁོར་བཞི་ཡི་ཚུལ་གྱིས་ནི། །རང་རིགས་ལ་སོགས་རྣམ་པར་བསྒོམ། །དབུས་སུ་གཟུགས་ནི་བརྟན་བྱས་ནས། །དེ་ཡི་མཆོད་པ་བྱེད་པར་བཤད། །སྣ་ཚོགས་རྒྱན་གྱིས་བརྒྱན་པ་ཡི། །སྤྱན་ནི་ཡང་དག་བསྐྱེད་ནས་སུ། །གསལ་བའི་དཀྱིལ་འཁོར་ཚུལ་གྱིས་ནི། །དམངས་རིགས་དཀར་མོ་རྣམ་བསྒོམ་བྱ། །ཀུན་སྦྱོར་ལ་སོགས་མཚན་ཉིད་ཀྱིས། །སྣ་ཚོགས་རྒྱན་དང་ཡང་དག་ལྡན། །ཨུཏྤལ་སྔོན་པོ་དང་མཚུངས་པའི། མཱ་མ་ཀཱི་ནི་རྟག་བསྒོམ་བྱ། །མེ་ཏོག་ཆུན་སོགས་ཀྱིས་དོན་བཞིན། །ཇི་ལྟར་རིགས་པར་རྣམ་བརྒྱན་པ། །རིག་མ་ཆེན་མོ་དཀར་མོར་གྲགས། །ཁྲག་དང་མཚུངས་པར་བསམ་པར་བྱ། །ཡིད་ཀྱི་ཀུན་སྦྱོར་ཕུན་ཚོགས་ཀྱིས། །བསྡུས་པ་ཡིས་ནི་རྣམ་པར་བརྒྱན། །ཨུཏྤལ་ན་མཚུངས་སྐལ་
བཟང་མོ། །སྔགས་པས་རྟག་ཏུ་བསམ་པར་བྱ། །བཅོམ་ལྡན་འདས་ཀུན་ཏུ་བཟང་པོས་དེ་སྐད་ཅེས་གསུངས་སོ། །མར་སར་ལ་སོགས་ཀུན་སྦྱོར་གྱིས། །ཡིད་དུ་འོང་བ་དེ་བསྒོམ་བྱ། །ཆང་ཉིད་ཡིད་ཀྱིས་སྦྱོར་བྱེད་པ། །གང་དེ་ཉིད་ནི་སྒོམ་བཞིན་དུ། །ཟླ་བའི་དཀྱིལ་འཁོར་དབུས་སུ་ནི། །རང་གི་སྔགས་ཀྱིས་ཡང་དག་བསྐྱེད། །སྐྲོད་པར་བྱེད་པས་ཆོ་ག་ཀུན། །འདི་ནི་བསྐྱེད་ཅིང་བསྒོམ་པར་བྱ། །ལག་པས་མགྲིན་པ་ལ་སོགས་བཟུང་། །རྐང་པ་དེ་ལ་སྦྱར་བར་བྱ། །མེ་ཏོག་གཉིས་སོགས་མཚན་ཉིད་ཀྱིས། ། རང་གི་རྡོ་རྗེ་གཞུག་བསམ་བྱ། །ཟླ་བའི་དཀྱིལ་འཁོར་ཡང་དག་སྦྱོར། །ཁུ་བ་དེ་ལ་ལྟུང་བར་བྱ། །བཅོམ་ལྡན་འདས་རྡོ་རྗེ་འཆང་གིས་དེ་སྐད་ཅེས་གསུངས་སོ། །ནམ་མཁའི་ཁམས་ནི་ཀུན་བཀང་བར། །བྱས་ནས་དེ་ཉིད་ཀྱིས་བསྒོམ་བྱ། །མེ་ཏོག་བཞི་ལ་སོགས་ཚུལ་གྱིས། །དེ་ལ་མཆོད་པར་བྱེད་ཅེས་དགོངས། །ཉེར་སྤྱོད་ལྔ་ཡི་མཆོད་པ་ཡིས། །མཆོད་བདག་ཀུན་སྦྱོར་ལས་མཆོད་བྱ། །དྲི་གཟུགས་རོ་དང་རེག་བྱ་ནི། །ཐམས་ཅད་དུ་དེ་ཉིད་ཀྱིས་སྦྱིན། །རྡོར་སེམས་རྣམས་ནི་བློ་ལྡན་གྱིས། །སངས་རྒྱས་ཀུན་གྱིས་བསྐྱེད་པ་དང་། །མཉེས་དང་མཆོད་པར་རབ་ཏུ་བརྗོད། །དགྱེས་པར་ཡང་ནི་བརྗོད་པ་ཡིན། །འདི་ཡིས་གསང་སྔགས་གྲུབ་པ་ནི། །སྒྲུབ་པ་པོ་རྣམས་རྣམ་རྒྱལ་འགྱུར། །གསལ་བྱེད་རྒྱས་པ་སྒྲུབ་དོན་དུ། སངས་རྒྱས་ཉིད་སོགས་ཡང་དག་འཐོབ། གལ་ཏེ་ཆོས་ཉིད་མི་འགྱུར་བ། འདི་ནི་སངས་རྒྱས་ཆོས་ཉིད་དོ། །སངས་རྒྱས་ཉིད་སོགས་ཡོངས་གཟུང་བ། གཞན་དུ་ཐོབ་པར་མི་འགྱུར་རོ། །སེམས་ཀྱི་མི་དགེ་བྱ་མིན་ཉིད། སྨད་བའི་ཀུན་སྤྱོད་བྱ་མིན་ཉིད། འདི་ནི་སངས་རྒྱས་ཐམས་ཅད་ཀྱི། ཆོས་ཉིད་མི་འགྱུར་ཀུན་ལས་བཏུས། །གང་གཞན་བཙུན་མོ་རྣམས་ཉིད་ནི། །འདོད་པ་ཉེ་བར་ལོངས་སྤྱོད་པའོ། །ཉི་མའི་དཀྱིལ་འཁོར་སྦྱོར་བ་ནི། །ཇི་ལྟར་འོས་པར་མཆོད་བྱ་བ། །སྦྱིན་དང་ཚུལ་
ཁྲིམས་དེ་བཞིན་བཟོད། །བརྩོན་འགྲུས་སུ་ཡང་བསྟན་པར་བརྗོད། །འདི་ནི་སྔགས་པ་མཁས་པ་ཡིས། །ཆོ་གས་ལྷག་པར་གནས་པར་བྱ། །རང་གི་སྔགས་ནི་ཡང་དག་བརྗོད། །ཟླ་བ་ལྟ་བུར་སྦྱར་བར་བྱ། །དེར་ནི་རྡོ་རྗེ་ལ་བསྡུས་པས། །སླར་ཡང་སྔགས་པས་གཞུག་པར་བྱ། །གཞོགས་སུ་རིན་ཆེན་རྣམ་བསྒོམ་པ། །ཟེའུ་འབྲུ་ཉིད་ལ་བྱ་བའོ། །དེ་རྣམས་ཁ་དོག་བསྡུས་པ་ཡིས། །རིགས་ཀྱི་དབྱེ་བ་རྟོགས་པར་བྱ། །རིགས་གསུམ་ལ་ཡང་ཐུན་མོང་དུ། །རྡོ་རྗེ་སེམས་དཔའི་ཡོན་ཏན་འབྱུང་། །དེ་ཡི་ཡི་གེ་ཡང་དག་བསྐྱེད། །གཞུག་ལ་བསམ་གཏན་ལྷུར་ལེན་པས། །ལས་ཀྱི་དབྱེ་བ་སོགས་རྣམས་ཀྱིས། །བྱ་བའི་མཚན་ཉིད་དེ་རབ་གྲགས། །ཡེ་ཤེས་རིགས་ལ་ཨུཏྤལ་སྔོ། །བསྡུས་པ་ཤེས་པ་ལ་ཡང་གྲགས། །འདོད་མཆོད་རིགས་ལ་པདྨ་དང་། །ཆོས་ཀྱི་རིགས་ལའང་དགོངས་པ་ཡིན། །ཆོ་ག་ཤེས་པས་ལོ་བཅུ་པའི། །བཙུན་མོ་ཡེ་ཤེས་རིགས་ལ་ཤེས། །བསྡུས་པ་ཞེས་ལ་བརྟག་བྱ་བ། །ཡོན་ཏན་མདངས་ལྡན་བཅུ་གཉིས་ལོ། །སྔགས་པས་རྟག་ཏུ་ཆོས་ཤེས་པར། །བཅུ་དྲུག་ལོ་མ་ཀུན་ཏུ་བརྩམ། །ཀུན་ཏུ་འདོད་མཆོད་རིགས་ལ་ནི། །ཉི་ཤུའི་ལོ་ཅན་བསྟེན་པར་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་དཀྱིལ་འཁོར་གྱིས་དེ་སྐད་ཅེས་གསུངས་སོ། །ཇི་སྲིད་ཁུ་བ་ཡང་དག་བསྡུས། །བཅུ་གཉིས་ལོ་དང་ལྡན་པར་བྱ། །མདོར་ན་གང་གང་འདོད་གྱུར་པ། །སྣ་ཚོགས་རྒྱན་དང་ཡང་དག་ལྡན། །མེ་ཏོག་ཆུན་པོ་སོགས་བརྒྱན་པ། །ཇི་ལྟར་རིགས་པར་བྱ་བ་ཡིན། །རྣམ་པར་སྣང་མཛད་སོགས་བྱས་ནས། །དེ་ནས་མཆོད་པ་ཡང་དག་བརྩམ། །རིགས་ཀྱི་དབྱེ་བས་ལས་རྣམས་ནི། །ཙནྡན་གུར་གུམ་རབ་ཏུ་བརྗོད། །བདེ་བར་བཞུགས་ཤིང་མཛེས་བྱས་པ། །དཀྱིལ་འཁོར་དེ་ཉིད་ཀྱིས་དེ་བྱ། །ཐམས་ཅད་བསྡུས་པ་དེ་བྱ་བ། །ཇི་ལྟར་དབྱེ་བ་མི་ཤེས་ན། །གལ་
ཏེ་དབྱེ་བ་དེ་ཡིས་ནི། །སངས་རྒྱས་ཀྱང་ནི་འགྲུབ་མི་འགྱུར། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱིས་དེ་སྐད་ཅེས་གསུངས་སོ། །མཚན་རྣམས་ཀུན་གྱིས་བརྒྱན་པ་ཡིས། །རྒྱན་དུ་བྱས་པའི་བུ་མོ་བདུན། །བཅུ་དྲུག་ལོ་ཡི་རྣམ་པ་དེ། །ཇི་སྲིད་བཅྭ་བརྒྱད་ལོ་ལེན་པར། །ཤིན་ཏུ་རིང་མིན་ཐུང་བ་མིན། །ཕྲ་མིན་དམན་པར་སྐྱེས་པའང་མིན། །མཚུངས་མེད་གཞོན་ནུ་མ་བསྒྲུབ་བྱ། །གཞན་དུ་འགྲུབ་པར་མི་འགྱུར་རོ། །ཆོ་ག་ཤེས་པས་དེ་བཟུང་ལ། །དེ་ཉིད་སྒྲུབ་ཐབས་ཀྱིས་བསྒྲུབ་བྱ། །འཛམ་བུའི་གླིང་དུ་དབྱངས་སོགས་ཀྱི། །མཚན་ཉིད་ཐམས་ཅད་ཀྱིས་བརྒྱན་པ། །བཅུ་དྲུག་བསྒྲུབས་ན་ཆོ་ག་ཤེས། །འགྲུབ་འགྱུར་འདིར་ནི་ཐེ་ཚོམ་མེད། །ཁྲུ་བཞི་པ་ཡི་དཀྱིལ་འཁོར་ནི། །བྲིས་ནས་རྟག་ཏུ་བསྒྲུབ་པར་བྱ། །རིག་པའི་ཚུལ་གྱི་ཆོ་ག་ཡིས། །མཁས་པས་འབུམ་ཕྲག་ལྔ་རུ་བཟླས། །མར་མེ་ལ་སོགས་ཚད་ཀྱིས་ཏེ། །གཞན་དུ་བསྒྲུབ་བྱ་མིན་པ་ཉིད། །བཅོམ་ལྡན་འདས་སངས་རྒྱས་ཐམས་ཅད་ཀུན་ཏུ་སྣང་བས་དེ་སྐད་ཅེས་གསུངས་སོ། །ཁྲུ་ཡི་ཚད་ཀྱི་དཀྱིལ་འཁོར་དུ། ། རྡོ་རྗེ་སེམས་དཔའ་ཡང་དག་བསྐྱེད། །བདུད་རྩི་ཞེས་བྱའི་ཁྲོ་བོ་ཆེ། །བྱིན་ནས་ཡང་དག་ལས་རྣམས་བརྩམ། །ཆོ་ག་ཤེས་པས་དེ་རུ་ཡང་། །མཚན་མ་བཀོད་ནས་བསྒྲུབ་པར་བྱ། །དྲི་དང་མེ་ཏོག་སོགས་མཆོད་པ། །བྱས་ནས་བསྒྲུབ་བྱ་གཞན་དུ་མིན། །མཚོ་དང་ཆུ་འགྲམ་ཡིད་འོང་དང་། །རི་བོ་དབེན་པ་རྣམས་སུ་ཡང་། །ཆོ་ག་ཤེས་པས་བསྡུས་པ་ཡིས། །རང་ཉིད་དཀྱིལ་འཁོར་བྲི་བར་བྱ། །རིན་ཆེན་ཀུན་གྱིས་མཆོད་པ་ནི། །རྡོ་རྗེ་སེམས་དཔའི་མཆོད་པ་སྟེ། །སྤྱན་རས་གཟིགས་ཀྱི་མགོན་པོ་ཡི། །མཆོད་པ་ཞེས་ནི་དེ་ལ་བཤད། །ཐུན་ཚོད་དང་པོ་ལས་འདས་པར། །གཉིས་པར་ཡང་དག་ཉེར་གནས་པས། །རྣལ་འབྱོར་པ་ཡིས་སྒྲུབ་པར་བསྒྲུབ། །དེ་ཁོ་ཉིད་ཀྱང་འགྲུབ་པར་འགྱུར། །ཐུན་ཚོད་ཕྱེད་དུ་ཡང་དག་འབྱུང་། །ལྔ་ཡི་བར་མ་ཆད་རྣམས་སུའང་། །
ཕྱག་ན་རྡོ་རྗེས་བྱིན་བརླབས་པས། །སྒྲུབ་པོ་རྟག་ཏུ་འགྲུབ་པར་འགྱུར། །རིགས་ཀྱི་བདག་པོ་ལྟར་གྱུར་ནས། །འཇིག་རྟེན་ཁམས་ནི་ཀུན་ཏུ་ཡང་། །བཙུན་མོ་གྲངས་མེད་པོ་ཊི་ཡིས། །དངོས་གྲུབ་རྟོགས་ཕྱིར་རྣམ་པར་སྤྱོད། ། དེ་ཡི་བྱ་བས་སངས་རྒྱས་ཉིད། །རི་རབ་ཀྱི་ནི་རྡུལ་ཕྲན་གྱི། །ཕྱག་ན་རྡོ་རྗེ་ཀུན་འབྱུང་བ། །སེམས་ཅན་རྣམས་ཀྱི་བྱེད་པ་ཡིན། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དམ་ཚིག་ཐམས་ཅད་ཀྱི་སྒྲུབ་ཐབས་ཆེན་པོ་གསང་བའི་མཆོད་པའི་ལེའུ་སྟེ་བརྒྱད་པ་རྫོགས་སོ།། །།དེ་ནས་དེ་བཞིན་གཤེགས་པ་ཐམས་ཅད་སླར་ཡང་ཡང་དག་འདུས་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་ཀྱི་ཡེ་ཤེས་ཁོང་དུ་ཆུད་པ་ཞེས་བྱ་བའི་གསང་སྔགས་ཆེན་པོའི་དམ་ཚིག་སྒྲུབ་པ་པོ་རྣམས་ཀྱིས་སེང་གེ་རྣམ་པར་རོལ་པའི་དམ་ཚིག་གི་ཡེ་ཤེས་བྱེད་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་བསྟན་དུ་གསོལ། དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་དེ་རྣམས་ཀྱི་ཚིག་ཉེ་བར་གསན་ནས། རྡོ་རྗེ་དེ་རང་གི་སྙིང་གར་བཞག་སྟེ། དེ་བཞིན་གཤེགས་པ་དེ་རྣམས་ལ་གསུང་འདི་སྐད་ཅེས་བཀའ་སྩལ་ཏོ། ། བཅོམ་ལྡན་འདས་དེ་བཞིན་གཤེགས་པ་རྣམས་རྒྱུ་ཅིའི་ཕྱིར་དེ་སྐད་གསུང་། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གང་ངེས་པར་བསྟན་ནུས་པ་ནི་མེད་དོ། །ཡང་བཅོམ་ལྡན་འདས་དེ་བཞིན་གཤེགས་པ་འདི་ལ་ཡེ་ཤེས་ཀྱི་འོད་ཟེར་ཡང་རྣམ་པ་སྟོང་དུ་རྣམ་པར་ཞིགས་པར་གྱུར་ཏོ། །གཞན་དུ་ནག་ལ་འགྱུར་ཞེས་སོ། །དེ་བཞིན་དུ་ནི་དེ་ལྟ་བུ་བྱས་ནས་དེ་ཉིད་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་རྣམས་ཐམས་ཅད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་དང་སྤྱི་བོར་ཟླ་
བའི་དཀྱིལ་འཁོར་གྱི་སྟེང་དུ་རང་གི་གཟུགས་སུ་གནས་པར་བྱེད་དོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཡེ་ཤེས་ཀྱི་དམ་ཚིག་ཁོང་དུ་ཆུད་པ་ཞེས་བྱ་བའི་གསང་སྔགས་ཀྱི་དམ་ཚིག་བཀའ་སྩལ་ཏོ། །གྲངས་མེད་འབྱུང་པོ་ཐམས་ཅད་ནི། །དེ་ཉིད་སྦྱར་བས་གསད་པར་བྱ། །སྐྱེ་བ་འདིར་ཉིད་སངས་རྒྱས་ཉིད། །ཐོབ་འགྱུར་འདི་ལ་ཐེ་ཚོམ་མེད། །སངས་རྒྱས་བྱེ་བ་ཡོངས་རྫོགས་པ། །ཡེ་ཤེས་སྦྱོར་བས་གསད་པར་བྱ། །སྐྱེ་བ་འདིར་ཉིད་འགྲུབ་འགྱུར་ཏེ། །རྡོ་རྗེ་སེམས་དཔའ་ཐོབ་བར་འགྱུར། །པདྨ་ཆེན་པོའི་ཚད་ཀྱིས་ནི། །སེམས་ཅན་ཕུང་པོ་རྣམས་གཞོམ་བྱ། །ཆོས་ཀྱི་དེ་ཉིད་ཏིང་འཛིན་གནས། །བཅོམ་པས་དངོས་གྲུབ་ཐོབ་པར་འགྱུར། །ཆོ་ག་ཤེས་པས་པདྨའི་ཚད། །འཇོམས་བྱེད་འདྲེན་པ་གསད་པར་བྱ། །འདོད་མཆོད་དེ་ཉིད་བསྒོམ་པ་ཡིས། །དེ་ཡིས་དངོས་གྲུབ་ཆེ་ཞེས་བྱ། །བཅོམ་ལྡན་འདས་ངོ་བོ་ཉིད་དག་པས་དེ་སྐད་ཅེས་གསུངས་སོ། །ནམ་མཁའི་ཁམས་ནི་ཀུན་བཀང་བར། །མཚན་ཉིད་དེས་ནི་གསད་པར་བྱ། །དེ་ཉིད་ཡང་འདིར་སངས་རྒྱས་ཉིད། །སྐྱེ་བ་འདི་ཉིད་ཁོ་ན་ལ། །རྣམ་པ་སྣ་ཚོགས་མཐའ་དག་འཐོབ། །སེམས་ཅན་སེམས་ནི་ཆོ་ག་ཡིས། །ཡང་དང་ཡང་དུ་སྦྱང་བར་བྱ། །གསོད་པའི་བདག་ཉིད་སོགས་འབྱུང་བ། །གཞན་དུ་འབྱོར་བར་མི་འགྱུར་ཉིད། །སེམས་ཅན་ཀུན་གྱི་སེམས་གང་ཡིན། །གསལ་བཞི་བ་འོད་གསལ་བར། །སྣ་ཚོགས་དངོས་པོས་མ་གོས་པས། །སེམས་སུ་བརྗོད་པའི་དེ་ཉིད་བསྒོམ། །ཆོ་ག་ཤེས་པས་སངས་རྒྱས་ཡུམ། །དེ་ཉིད་ཉེ་བར་ལོངས་སྤྱོད་བྱ། །གསང་སྔགས་དགེ་བ་འབྱུང་བ་ཀུན། །གཞན་དུ་གྲུབ་པ་ཉིད་མི་འགྱུར། །དེ་དེ་སྔགས་པ་མ་ལུས་པས། །མཆོག་གི་ཚོགས་ནི་ཡང་དག་དབྱུང་། །རྡོ་རྗེ་སེམས་དཔའ་དགེ་འབྱུང་བ། །གཞན་དུ་དགྱེས་པར་འགྱུར་མིན་ཉིད། །ཉེ་བར་ལོངས་སྤྱོད་བྱ་ཀུན་ཏུ། ཉེ་བར་ལོངས་སྤྱོད་ཀུན་བརྩམ་བྱ། །གཞན་དུ་གལ་ཏེ་བདག་རྨོངས་པས། །
མནར་མེད་ལྟ་བུར་འཚེད་པར་འགྱུར། །ཐམས་ཅད་བདག་ཉིད་བཟའ་བར་བྱ། །ཆང་དམ་གཟན་ཡང་རང་གིས་བཏུང་། །སངས་རྒྱས་ཀུན་གྱི་སྦྱིན་པར་འགྱུར། །མྱུར་དུ་འགྲུབ་པར་འགྱུར་བ་ཉིད། །ཤ་ཆེན་རྟག་ཏུ་བཟའ་བར་བྱ། ། ཏིལ་མར་ཡང་རུང་རང་བཏུང་བྱ། །ཆོ་ག་ཤེས་པས་བཤང་གཅིའང་རུང་། །བཟའ་བའི་བདག་ཉིད་ཅན་གྱིས་བཟའ། །རྨ་ཡི་སྒོ་ལས་བྱུང་བའང་མིན། །སངས་རྒྱས་སོགས་ལ་དབུལ་བར་བྱ། །མེ་ཏོག་དྲི་ཞིམ་སྤྲིན་ཆེན་པོ། །བྱས་ནས་ཐམས་ཅད་དོན་ཇི་བཞིན། །སྔགས་པས་རྟག་ཏུ་སྨད་པ་ཡིས། །བཏུང་བ་ཉིད་ནི་འབྱུང་བར་བྱ། །འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་བློ་ཡིས་དམ་ཚིག་བརྗོད། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་གནང་བར་བྱེད་པས་དེ་སྐད་ཅེས་གསུངས་སོ། །སྔགས་པས་རྟག་ཏུ་དཀྱིལ་འཁོར་ནི། །བཤང་དང་གཅི་བས་སོ་སོ་རུ། །ཉལ་བར་བྱེད་པ་ལ་སོགས་སམ། །བསམ་པ་ཤིན་ཏུ་སྲ་བརྟན་བྱ། །བཤང་དང་གཅི་བས་བཀང་བ་ཡི། །གྲུ་བཞི་ཀུན་ཏུ་བསྐྱེད་ནས་ནི། །རང་གཟུགས་དེ་ཡི་དབུས་སུ་ནི། །སྣ་རྩེར་ནས་ཀྱིས་དགང་བར་བྱ། །བཅོམ་ལྡན་སངས་རྒྱས་འབྱུང་བ་ནི། །དེས་ཆགས་བདག་པོ་དཀའ་བ་མིན། །གང་གཞན་གསུམ་པོ་བསྡུས་པ་ཡིས། །འདིར་གཞན་སོ་སོར་གནས་དེ་མིན། །ཆོ་ག་ཤེས་པས་ཕྱིས་འདིར་ནི། །བྱ་སྟེ་གཞན་རྣམས་དང་སྦྱར་བྱ། །ཡེ་ཤེས་འཁོར་ལོས་བསྐུལ་བ་ཡིས། །དངོས་གྲུབ་ཡངས་པ་དེར་འགྲོ་འགྱུར། །རང་ངམ་གལ་ཏེ་གཞན་ཡང་རུང་། །དེ་ཉིད་སྦྱོར་བར་མི་བྱེད་དོ། །ཇི་སྲིད་ནམ་མཁའ་ཀུན་འབྱུང་བ། །སངས་རྒྱས་ཉིད་ནི་ཐོབ་མི་བྱེད། །ང་ནི་མནར་མེད་ང་འཇིགས་རུང་། །ང་ནི་སྡུག་བསྔལ་ང་བདེ་བ། །ཞེ་སྡང་ང་ལ་དེ་བཞིན་རྨོངས། །ང་ནི་འདོད་ཆགས་སོ་སོར་གནས། །ཞེས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དེ་བཞིན་གཤེགས་པ་ཐམས་ཅད་ཀྱི་ཡེ་
ཤེས་ཁོང་དུ་ཆུད་པར་བྱེད་པ་ཞེས་བྱ་བའི་མཆོག་ཏུ་གསང་ཆེན་གྱི་ལེའུ་སྟེ་དགུ་པ་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེ་སླར་ཡང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཐོབ་པའི་འབྲས་བུ་དང་རྒྱུ་དག་གིས་རྡོ་རྗེ་སེམས་དཔའ་ཐམས་ཅད་ཀྱི་བཅུད་ཀྱི་དམ་ཚིག་གི་གསང་ཆེན་བཀའ་སྩལ་པ། དགྲ་བཅོམ་ལ་ཕྱག་བྱ་མིན་ཉིད། །དགེ་སློང་ཡང་རུང་ཕྱག་བྱ་མིན། །སངས་རྒྱས་རྣམས་ཀྱི་སངས་རྒྱས་ཉིད། །ཐོབ་པ་ཕྱག་སྟེ་ཕྱག་བྱ་མིན། །རང་གཟུགས་སུ་ནི་རང་གཟུགས་ཀྱིས། ། བསམས་ནས་དེ་ཉིད་ཆོ་ག་ལས། །སྙིང་གར་རྡོ་རྗེ་སོགས་བྱས་ནས། །ཡང་དག་མཆོད་བྱར་དེ་སྦྱར་བྱ། །གལ་ཏེ་རྡོ་རྗེ་སེམས་དཔའང་རུང་། །ཁ་ཅིག་ཕྱིས་འདི་ལས་འགོངས་ན། །རང་གི་བྱང་ཆུབ་སེམས་སྨྲས་པས། །མགོ་བོ་ཚལ་བ་བདུན་དུ་འགས། །བྷ་གར་ལིང་ག་རབ་བཞག་ནས། །གསང་སྔགས་ཡང་ནས་ཡང་དུ་བཟླ། །རྡོ་རྗེ་སེམས་དཔའ་ཡང་དག་བསྐྱེད། །རང་གཟུགས་ལ་ནི་བསྒོམ་པར་བྱ། །སངས་རྒྱས་སློབ་དཔོན་དེ་ཉིད་འདི། །རྟག་ཏུ་བསྲུང་བའི་ཁྱད་པར་ལས། །གཞན་དུ་སློབ་དཔོན་རྣམས་ཀྱིས་ནི། །སངས་རྒྱས་ཉིད་ནི་ཐོབ་མི་འགྱུར། །རང་གི་གཟུགས་སུ་རྣམ་བསྒོམས་ནས། །དེ་ཉིད་ལས་ནི་ཕྲ་མོའི་གཟུགས། །བྱང་ཆུབ་སེམས་ནི་ཡང་དག་བསྐྱེད། །སློབ་དཔོན་སངས་རྒྱས་སུ་བསྒོམ་བྱ། །སྒྲུབ་པོ་རྣམས་ཀྱི་ཡེ་ཤེས་འདི། །དེ་ཉིད་དམ་ཚིག་འབྱུང་བའོ། །དམ་ཚིག་ལ་སོགས་སྦྱོར་བ་འདིས། །སངས་རྒྱས་ཀྱིའང་འགྲུབ་མི་འགྱུར། །དམ་རྒྱ་ཤིན་ཏུ་རྣལ་འབྱོར་གྱིས། །རང་གི་སྙིང་གར་གཟུགས་བསྒོམ་བྱ། །དེ་ལ་རྡོ་རྗེ་ཡང་དག་བསྐྱེད། །ཇི་སྲིད་འདོད་པས་བརྟན་པར་བྱ། །དུས་ལ་ལྟོས་པ་ལ་སོགས་ལྡན། །འདི་ནི་དམ་ཚིག་མཆོག་ཡིན་ནོ། །ཇི་སྲིད་དངོས་གྲུབ་བསྒྲུབ་བྱ་བ། །རྟག་ཏུ་དེ་ཡིས་བསྲུང་བར་བྱ། །བཅོམ་ལྡན་འདས་བྱང་ཆུབ་ཀྱི་སེམས་ཀྱིས་དེ་སྐད་ཅེས་གསུངས་སོ། །རང་གི་གཟུགས་ནི་ཡང་དག་
བསྐྱེད། རང་གཟུགས་ལ་སོགས་མཚན་ཉིད་ཀྱིས། །སྙིང་གར་བདུད་རྩིར་བརྗོད་པ་ནི། །དེ་ཡི་སྔགས་ནི་ཡང་དག་བརྩམ། །འདི་ཡང་དམ་ཚིག་ཡེ་ཤེས་ཏེ། །ཀུན་ཏུ་དྲི་མ་བསལ་བ་ཉིད། །འདོད་པའི་དངོས་གྲུབ་བརྟན་པ་ནི། ། བརྟུལ་ཞུགས་བརྩོན་པས་བསྲུང་བར་བྱ། །སངས་རྒྱས་ཐམས་ཅད་རྣམ་བསྒོམས་ནས། །བསྒྲུབ་བྱའི་རྣམ་པར་བསམ་པར་བྱ། །རྡོ་རྗེ་སེམས་དཔའ་ཡང་དག་བསྐྱེད། །སྙིང་པོ་དེ་ལ་བསྒོམ་པར་བྱ། །ཆོ་ག་ཤེས་པས་འདི་རྟག་ཏུ། །དུས་གསུམ་དུ་ཡང་བསྒོམ་པར་བྱ། །གལ་ཏེ་གཞན་དུ་བཟླས་བྱས་སམ། །བསྒྲུབ་ན་དེ་ནི་མ་ཡིན་ཉིད། །རིག་མ་གཟུགས་དང་གཟུགས་སོགས་ཅན། །འབར་བའི་ཕྲེང་བས་རྒྱན་བྱེད་པ། །སེམས་དཔའ་རིན་ཆེན་ཡང་དག་བསྐྱེད། །དེ་ཡི་ལག་ཏུའང་རྣམ་བསྒོམ་བྱ། །བསྡུས་པ་ཡིས་ནི་བསྒོམ་བཞིན་དུ། །ཇི་སྲིད་དངོས་གྲུབ་རབ་མཐོང་བྱེད། །གཞན་དུ་གལ་ཏེ་བདག་རྨོངས་ན། །དེ་ཡི་སྦྱིན་པ་དེར་མི་འགྱུར། །ཤིན་ཏུ་རྣམ་བཀྲ་ཤིན་དྲི་མེད། །ཡེ་ཤེས་རིན་ཆེན་ཅོད་པན་དུ། །བཞག་ནས་སྒྲུབ་པ་ཡི་ནི་མཆོག །ས་སྟེངས་ལྷན་ཅིག་རྒྱུ་བར་བྱེད། །རྡོར་སེམས་བདག་ཉིད་དངོས་གྲུབ་ང་། །རྡོ་རྗེ་སེམས་དཔས་བྱིན་གྱིས་བརླབས། །རྟག་ཏུ་རྡོ་རྗེ་ཡེ་ཤེས་ཆོས། །གོ་འཕང་དུ་ནི་བསྒྲལ་བར་བགྱི། །ཡེ་ཤེས་རྡོ་རྗེས་དངོས་གྲུབ་ང་། །བདུད་རྩི་ཞེས་སོགས་བྱིན་གྱིས་བརླབས། །ནམ་མཁའ་མཆོག་ཏུ་ཕྲ་བ་ཡི། །བཟང་པོ་ང་ནི་རྣམ་དཔྱོད་བྱེད། །བཅོམ་ལྡན་འདས་རྡོ་རྗེ་འཆང་ཆེན་པོས་དེ་སྐད་ཅེས་གསུངས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡེ་ཤེས་ཀྱི་གསང་སྔགས་ཡོངས་སུ་དག་པའི་དེ་ཁོ་ན་ཉིད་བྱིན་གྱིས་རློབ་པ་ཞེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་བཀའ་སྩལ་ཏོ། །རྡོ་རྗེ་སེམས་དཔའ་སྐྱེ་སྒོམ་པ། །ཐུགས་ཀྱི་རྡོ་རྗེ་ཞེས་རབ་བརྗོད། །སེམས་ལ་དེ་ནི་བསྒོམས་ནས་ནི། །ཡེ་ཤེས་རྡོ་རྗེ་རབ་
གཞུག་བྱ། །རྡོ་རྗེ་རང་བཞིན་དག་པའི་དོན། །གསུང་གི་རྡོ་རྗེར་ཡོངས་སུ་བརྟག །དག་པའི་ཡེ་ཤེས་རྣམ་བསྒོམས་པས། །སྐུ་གསུང་དག་པར་རྣམ་བསྒོམ་བྱ། རྡོ་རྗེའི་བྱིན་རློབ་ཤིན་ཏུ་གསལ། མི་ཕྱེད་རྡོ་རྗེའི་སྐུ་ཉིད་དོ། །སངས་རྒྱས་སྐུ་ཡི་རང་བཞིན་ཉིད། །ཆོ་ག་ཤེས་པས་བྱིན་གྱིས་བརླབ། །རྡོ་རྗེ་འདི་ཡིས་བྱིན་རླབས་པ། །འདི་ཡིས་བྱང་ཆུབ་ཐོབ་པར་བྱེད། །ཆོ་ག་ཤེས་པས་ཟླ་དྲུག་གིས། །སངས་རྒྱས་ཉིད་འདིར་ཐོབ་པར་གྱིས། །ཆགས་སྐྱེས་ཆོས་ཀྱིས་མ་གོས་པའི། །རྡོ་རྗེ་དེ་རྣམས་ཐམས་ཅད་འབྱུང་། །དེ་ལྟར་དེ་ཉིད་ཆོག་བྱས་ནས། །དངོས་གྲུབ་ཐམས་ཅད་བསྡུས་པ་ཡིན། །དེ་ནས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཀུན་ཏུ་སྤྱོད་པའི་དམ་ཚིག་བཀའ་སྩལ་ཏོ། །མི་བསླུ་བ་ཡི་ཚུལ་གྱིས་ནི། །རྡོ་རྗེ་ཡེ་ཤེས་གསུམ་འབྱུང་བས། །དེ་ཀུན་ཉེ་བར་ལོངས་སྤྱོད་པ། །སངས་རྒྱས་ཀུན་སྤྱོད་ཉིད་དུ་འགྱུར། །ནམ་མཁའི་ཁམས་ནི་ཀུན་བཀང་བའི། །སངས་རྒྱས་རྣམས་ནི་གལ་ཏེ་བཅོམ། །སྐྱེ་བ་འདིར་ཉིད་སངས་རྒྱས་ཉིད། །རྡོ་རྗེ་སློབ་དཔོན་བསྡུས་པའོ། ། ཉི་མའི་དཀྱིལ་འཁོར་དབུས་སུ་ནི། །རྡོ་རྗེའི་གཟུགས་ནི་ཡང་དག་བསྐྱེད། །མཁའ་ཁམས་སངས་རྒྱས་གཟུགས་ཀྱིས་ནི། །ཡོངས་སུ་གང་བར་རྣམ་བསྒོམ་བྱ། །སྙིང་གར་སྔགས་ནི་ཡང་དག་བསྐྱེད། །མཉམ་པར་བཞག་པས་བསྐུལ་བར་བྱ། །ཀུན་ཏུ་དགྱེས་པའི་དམ་ཚིག་གང་། །རྡོ་རྗེ་སློབ་དཔོན་རྟག་བསྒོམ་བྱ། །ཉི་མའི་དཀྱིལ་འཁོར་དབུས་གནས་པར། །རང་གི་སྔགས་ནི་ཡང་དག་བསྐྱེད། །མཁའ་ཁམས་གཟུགས་ཀྱིས་ཡང་དག་བཀང་། །སྙིང་གར་ཐམས་ཅད་རྣམ་བསྒོམ་བྱ། །དེ་ཉིད་དེ་ནི་བྱེད་བཞིན་པས། །སངས་རྒྱས་བཀའ་ཉིད་གོ་འཕང་གནས། །ཟླ་བའི་དཀྱིལ་འཁོར་དབུས་གནས་པར། །རང་གི་སྔགས་ནི་ཡང་དག་བསྐྱེད། །ཆོ་ག་ཤེས་པས་གཟུགས་རྣམ་པར། །གནས་ལྔ་རྣམས་སུ་བསྒོམ་པར་བྱ། །བྱང་ཆུབ་སེམས་ནི་ཡང་དག་བསྐྱེད། །
དེ་ཀུན་བསྐུལ་བྱ་བརྟུལ་ཞུགས་ཅན། །ཆོས་ཀྱི་དཀྱིལ་འཁོར་དབུས་སུ་ནི། །རང་གི་སྔགས་ནི་ཡང་དག་བསྐྱེད། །ཅོད་པན་དུ་དེ་རྣམ་བསྒོམས་ནས། །མཆོད་པར་བྱ་ཞིང་བསྒོམ་པར་བྱ། །སངས་རྒྱས་སློབ་དཔོན་བདེ་ལྡན་གང་། །དེ་ཉིད་རྣལ་འབྱོར་པའི་བདེ་དེ། །ཀུན་དུ་སྐྲག་པ་ཀུན་སྤངས་པའི། །སྔགས་པ་སེང་གེ་བཞིན་དུ་སྤྱོད། །སྐྱེ་བ་འདིར་ཉིད་སངས་རྒྱས་ཉིད། །སྐད་ཅིག་དེ་ལ་ངེས་སྦྱོར་བྱེད། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གིས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དམ་ཚིག་གི་ལེའུ་སྟེ་བཅུ་པའོ།། །།དེ་ནས་དེ་བཞིན་གཤེགས་པ་ཐམས་ཅད་བསྡུ་བས་བྱོན་ནས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡེ་ཤེས་ཀྱི་མཆོད་པའི་སྤྲིན་གྱི་བཀོད་པས། བཅོམ་ལྡན་འདས་ཕྱག་ན་རྡོ་རྗེ་ལ་ཡང་དག་པར་མཆོད་དེ་འདི་སྐད་ཅེས་གསོལ་ཏོ། །དངོས་གྲུབ་ཐམས་ཅད་བྱེད་བསམ་གཏན། །བསམ་གཏན་དཀྱིལ་འཁོར་མཆོག་གྱུར་པ། །དཀྱིལ་འཁོར་ཆེན་པོ་མཆོག་གྱུར་པ། །དེ་ཉིད་བཅོམ་ལྡན་བཤད་དུ་གསོལ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་གསོལ་བ་འདེབས་པར་བྱེད་པའི་ཚིག་གསན་ནས། དེ་བཞིན་གཤེགས་པ་ཐམས་ཅད་ཀྱི་དམ་ཚིག་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དམ་ཚིག་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་ཀུན་དུ་སྤྱོད་པའི་ཕྱིར་དཀྱིལ་འཁོར་ཆེན་པོ་འདི་སྟོན་པར་མཛད་དོ། །དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །རྡོ་རྗེ་ཡེ་ཤེས་ལྟ་བུ་སྟེ། ། སངས་རྒྱས་བྱང་ཆུབ་རབ་གསལ་བྱེད། །འོ་མ་དང་ཞོར་བསམ་བྱ་ཞིང་། །པདྨ་ཕྲ་མོས་ཉེ་བར་མཛེས། །སྣ་ཚོགས་མེ་ཏོག་ཆུན་པོས་གང་། །རབ་ཏུ་འབད་པས་བསྒོམ་པར་བྱ། །ལོགས་བཞི་པ་དང་ཟུར་བཞི་པར། །མཁས་པས་རབ་ཏུ་བརྟག་པར་གྱིས། །
ཛམ་བུ་ནཱ་ད་ཡང་དག་བྱུང་། །དེ་ལ་དབུས་སུ་བསྒོམ་པར་བྱ། །ཁྲུ་ནི་བཅུ་དྲུག་ཏུ་བྱ་བ། སངས་རྒྱས་སློབ་དཔོན་ཆོ་ག་གནས། ཆོ་ག་ཤེས་པས་གྲྭ་རྣམས་སུ། རྩེ་མོ་ལྔ་པ་རྣམ་བསྒོམ་བྱ། ཇི་ལྟར་རིགས་པའི་གནས་ལྔ་རུ། ཟླ་བ་ཡི་ནི་དཀྱིལ་འཁོར་བརྟག ། དཀྱིལ་འཁོར་རྣམས་ནི་སྒོམ་བྱེད་པ། ལག་པ་གཅིག་ཏུ་ཡང་དག་བསྐྱེད། ཇི་ལྟར་རིགས་པར་ཤར་གྱི་ནི། མི་བསྐྱོད་ཡོངས་སུ་བརྟག་པར་བྱ། ཆོ་ག་ཤེས་པས་ལྷོ་ཡི་ནི། དེང་ནི་རིན་ཆེན་དགོད་པར་བྱ། ནུབ་ཀྱི་དཔག་མེད་ཅེས་བརྗོད་པ། བྱང་དུ་དོན་ཡོད་གྲུབ་པའོ། །ཆོ་ག་ཤེས་པས་སེར་པོའི་མདོག །དེ་ཉིད་སྒོམ་པས་བསྒོམ་པར་བྱ། དབུས་སུ་ཁྱབ་བདག་རྣམ་སྣང་མཛད། ཡང་དག་བསྐྱེད་ནས་བསྒོམ་པར་བྱ། སློབ་མའི་རྣམ་པར་ཐམས་ཅད་དུ། ཆོ་ག་ཤེས་པས་རྣམ་བསྒོམ་བྱ། རིག་པ་ཆེན་མོ་སྤྱན་ལ་སོགས། གྲྭ་རྣམས་ཉིད་དུ་རྣམ་བསྒོམ་བྱ། ཆོ་ག་ཤེས་པས་བདུད་རྩི་ཞེས། སྒོ་རྣམས་ཀུན་ཏུ་བསྒོམ་པར་བྱ། དེ་རྣམས་ཁ་དོག་བསྡུས་པ་ཡིས། སོ་སོ་སོ་སོར་རྟོགས་པར་བྱ། དེ་རྣམས་ཀུན་གྱི་གཟུགས་རྣམས་སུ། རྡོ་རྗེ་སེམས་དཔར་རྣམ་བསྒོམ་བྱ། འོད་ཟེར་ལྔ་པོ་ཡང་དག་བསྐྱེད། འདོད་ཡོན་ལྔ་རྣམས་བསྡུས་པ་ཡིས། ཁྱབ་བདག་ལ་ནི་དབུལ་བར་བྱ། སངས་རྒྱས་སློབ་དཔོན་ཆོ་ག་ལས། མཁའ་ཁམས་སངས་རྒྱས་ཀུན་གྱིས་ནི། ཡོངས་སུ་གང་བར་རྣམ་བསྒོམ་བྱ། །དེས་ནི་ཁུ་བ་ཐམས་ཅད་ཀྱིས། །མཆོད་པ་སྒོམ་པར་གྲགས་པ་ཡིན། །དམ་ཚིག་ཐམས་ཅད་ཀྱི་དངོས་གྲུབ་ཅེས་བྱ་བ་བསམ་གཏན་གྱི་དཀྱིལ་འཁོར་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་གདོན་མི་ཟ་བའི་དམ་ཚིག་ཅེས་བྱ་བའི་བསམ་གཏན་གྱི་དཀྱིལ་འཁོར་གསུངས་པ། བློ་ལྡན་སངས་རྒྱས་སློབ་དཔོན་གྱིས། །དེ་བཞིན་ཉིད་དུ་ཐམས་ཅད་བྱ། །ཕྲ་མོའི་དཀྱིལ་འཁོར་ཚུལ་གྱིས་ནི། །ཐམས་ཅད་དེར་ནི་རྣམ་བསྒོམ་བྱ། །ཤར་གྱི་ཆོས་རྣམས་ཀུན་གྱི་མཆོག །རྡོ་རྗེ་སེམས་དཔའ་དགོད་པར་བྱ། །
སྔགས་པས་ལྷོ་རུ་བརྟག་པ་ནི། །རྡོ་རྗེ་སེམས་དཔའ་དགོད་པར་བྱ། །ནུབ་ཏུ་ཡེ་ཤེས་རྫོགས་བྱང་ཆུབ། །སངས་རྒྱས་སློབ་དཔོན་དགོད་པར་བྱ། །བྱང་དུ་ཐམས་ཅད་ཀུན་སྐྲག་པ། །རྡོ་རྗེ་སེམས་དཔའ་དགོད་པར་བྱ། །དབུས་སུ་ཁམས་གསུམ་པ་མཉམ་པ། །རྡོ་རྗེ་གཟུགས་སུ་རྣམ་བསྒོམ་བྱ། །དཀར་པོའི་མདོག་ཏུ་རྣམ་བསྒོམས་ནས། །ནག་པོ་དབུས་སུ་བསྒོམ་པར་བྱ། །བཙུན་མོ་རྣམས་ནི་ཁ་ཕྱེ་ནས། །དེ་ཉིད་ལ་ནི་རྡོ་རྗེ་གཞུག །རྡོ་རྗེ་སེམས་དཔའི་དབང་ཕྱུག་མ། །གནས་བཞི་རྣམས་སུ་འབད་པས་སོ། །ཇི་ལྟར་རིགས་པར་མདོག་ཀུན་དང་། །སངས་རྒྱས་གཟུགས་སུ་རྣམ་བསྒོམ་བྱ། །ཆོ་ག་ཤེས་པས་ཐམས་ཅད་དུ། །ཁྲོ་བོའི་མཆོག་ནི་རྣམ་པར་བསམ། །སྔགས་པས་འདོད་ཡོན་ལྔ་རྣམས་ཀྱིས། །སྔགས་ཀྱི་མཆོད་པ་ཡང་དག་བརྩམ། །མཁའ་ཁམས་རྡོ་རྗེ་སེམས་དཔས་ནི། །ཡོངས་སུ་གང་བར་རྣམ་བསྒོམ་བྱ། །རྡོ་རྗེ་ཀུན་གྱི་ཁུ་སོགས་ཀྱིས། །མཆོད་པ་རུ་ནི་རྣམ་བསམ་བྱ། །གདོན་མི་ཟ་བའི་དམ་ཚིག་ཅེས་བྱ་བ་བསམ་གཏན་གྱི་དཀྱིལ་འཁོར་རྫོགས་སོ།། །། དེ་ནས་ཕྱག་ན་རྡོ་རྗེས་སླར་ཡང་དེ་བཞིན་གཤེགས་པ་ཐམས་ཅད་ཀྱི་དམ་ཚིག་འབྱུང་བ་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། འདོད་ཆགས་ཆེན་པོའི་ཆོས་ཞེས་བྱ་བ་དེ་བཞིན་གཤེགས་པའི་དཀྱིལ་འཁོར་འདི་གསུངས་པ། ཆོས་ཀྱི་དཀྱིལ་འཁོར་ཚུལ་གྱིས་ནི། །ཐམས་ཅད་དེར་ནི་རྣམ་བསམ་བྱ། །ཆོ་ག་ཤེས་པས་ཤར་གྱི་ནི། །ཆོས་འཆང་འབར་བ་དགོད་པར་བྱ། །ལྷོ་རུ་ཡེ་ཤེས་ཆོས་ནི་དེང་། །སྒོམ་པའི་བདག་ཉིད་ཅན་གྱིས་བསྒོམ། །ནུབ་ཏུ་པདྨ་ལོངས་སྤྱོད་པ། །བྱང་དུ་ཆོས་ཀྱི་དབྱིངས་ལས་སྐྱེས། །ཇི་ལྟར་རིགས་པར་བསྒོམ་བྱས་ནས། །དབུས་སུ་ཆོས་ཀྱི་དབང་ཕྱུག་དགོད། །དཀར་པོའི་མདོག་ཏུ་རྣམ་བསྒོམས་ནས། །དབུས་སུ་དམར་པོ་རྣམ་པར་བསྒོམ། །ཆོ་གས་ཆོས་ཀྱི་དབང་ཕྱུག་མ། །གྲྭ་བཞི་རུ་ནི་བསྒོམ་པར་བྱ། །ཁྲོ་
བོ་ཆེན་པོ་རྟ་ཞེས་པ། །སྒོ་རྣམས་ཉིད་དུ་རྣམ་བསམ་བྱ། །ཆོས་ཀྱི་རྣལ་འབྱོར་ཐམས་ཅད་ལ། །འདོད་ཡོན་ལྔ་ཡིས་མཆོད་པར་བྱ། །རྡོ་རྗེ་སེམས་དཔའ་ཡང་དག་བསྐྱེད། །གཞོགས་སུ་རྣམ་པར་བསྒོམ་པར་བྱ། །ཁུ་བ་ཉིད་ཀྱིས་ནམ་མཁའི་ཁམས། ། རིན་ཆེན་གང་བར་རྣམ་བསམ་བྱ། །ཇི་ལྟར་རིགས་པར་ཆོས་ཀྱི་སྐུ། །དེ་ཉིད་སྦྱོར་བས་མཆོད་པར་བྱ། །འདོད་ཆགས་ཀྱི་ཆོས་ཞེས་བྱ་བའི་བསམ་གཏན་ཆེན་པོའི་གསང་ཆེན་རྫོགས་སོ།། །།དེ་ནས་ཕྱག་ན་རྡོ་རྗེས་སླར་ཡང་དམ་ཚིག་ཐམས་ཅད་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། འདོད་ཆགས་ཐམས་ཅད་ཀྱི་ཚུལ་ཞེས་བྱ་བའི་བསམ་གཏན་གྱི་དཀྱིལ་འཁོར་ཆེན་པོ་འདི་གསུངས་སོ། །སྐུ་ཡི་དཀྱིལ་འཁོར་ཚུལ་གྱིས་ནི། །ཐམས་ཅད་དེར་ནི་རྣམ་བསམ་བྱ། །ཤར་དུ་དགྲ་རྣམས་ངེས་འཇོམས་པ། །སྣ་ཚོགས་མདོག་ཏུ་རྣམ་བསམ་བྱ། །ལྷོ་རུ་མེ་ཏོག་ཡང་དག་སྦྱོར། །ངོ་བོ་ཉིད་ཀྱིས་བསྒོམ་པར་བྱ། །ནུབ་ཏུ་ཡེ་ཤེས་ཡང་དག་དག །ཞི་བའི་གཟུགས་ནི་རྣམ་བསམ་བྱ། །བྱང་དུ་རྣམ་རྒྱལ་ཞེས་བྱ་ཡང་། །བརྩོན་པའི་བསམ་པས་བསྒོམ་པར་བྱ། །དབུས་སུ་འདོད་མཆོད་ཡང་དག་སྦྱོར། །རང་གི་གཟུགས་ཀྱི་སྒོམ་པ་ལས། །ཆོ་གས་འདོད་པའི་དབང་ཕྱུག་མར། །བསམ་བྱ་སེམས་པའི་བདག་ཉིད་ཅན། །ཆོ་ག་ཤེས་པས་པདྨའི་ཕྱག །གྲྭ་རྣམས་ཉིད་དུ་རྣམ་བསམ་བྱ། །འདོད་ཡོན་ཀུན་གྱིས་མཆོད་པ་ལ། །མཆོད་པར་བྱས་ནས་མཆོད་པར་བྱ། །རྡོ་རྗེ་སེམས་དཔའ་དེ་ཕྱུང་ནས། །གཞོགས་སུ་རྣམ་པར་བསམ་པར་བྱ། །ཁུ་བ་འདོད་མཆོད་ཚུལ་གྱིས་ནི། །བསྐྱེད་ནས་ཁྱབ་བདག་མཆོད་པར་བྱ། །འདོད་པའི་སློབ་དཔོན་གྱིས་བརྟག་བྱ། །མཆོད་པ་ལ་སོགས་ཡོངས་སུ་གཟུང་། །འདོད་ཆགས་ཐམས་ཅད་ཀྱི་དམ་ཚིག་བསམ་གཏན་གྱི་དཀྱིལ་འཁོར་ཆེན་པོ་རྫོགས་སོ།། །།འདི་ཉིད་ཀྱི་ནི་དཀྱིལ་འཁོར་དུ། །སངས་རྒྱས་སློབ་དཔོན་རྟག་ཏུ་བྱ། །ཐམས་
ཅད་དུ་ཡང་དཀྱིལ་འཁོར་དུ། །རྡོ་རྗེའི་སློབ་དཔོན་གྱིས་བསྒོམས་ནས། །འདོད་པའི་སློབ་དཔོན་ཇི་གསུངས་པས། །བྱའོ་དཀྱིལ་འཁོར་གཞན་དུ་མིན། །དེ་ནས་ཕྱག་ན་རྡོ་རྗེས་སླར་ཡང་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་གྱི་སྙིང་པོ་ཀུན་དུ་སྐུལ་བར་བྱེད་པའི་དེ་ཁོ་ན་ཉིད་བྱིན་གྱིས་རློབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གཙུག་ཏོར་ཐམས་ཅད་ཀྱི་སྙིང་པོ་སྐུལ་བ་ཞེས་བྱ་བའི་བསམ་གཏན་གྱི་དཀྱིལ་འཁོར་འདི་གསུངས་སོ། །ཞོ་རུ་བྱས་པ་བསམས་ནས་ནི། །པདྨ་མཛེས་པ་སོགས་བརྒྱན་པ། །ཤེལ་དེ་ཡི་ནི་དབུས་སུ་ནི། །ཐམས་ཅད་དུ་ནི་རྣམ་བསམ་བྱ། །ལོགས་བཞི་པ་ལ་གྲྭ་བཞི་པ། །སྒོ་བཞི་པར་ནི་རབ་ཏུ་བརྟག །ཆོས་ཀྱི་དཀྱིལ་འཁོར་རྣམ་པར་ནི། །དེ་ལ་དབུས་སུ་བསྒོམ་པར་བྱ། །སྔགས་པ་ཆོ་ག་ཤེས་པས་དབུས། །འཁོར་ལོས་སྒྱུར་བ་དགོད་པར་བྱ། །ཆོ་ག་ཤེས་པས་རྣམ་སྣང་མཛད། །ཤར་ཉིད་དུ་ནི་རྣམ་བསྒོམ་བྱ། །ཆོ་ག་ཤེས་པས་བྱང་དུ་ནི། །གྱེན་འཕགས་ཞེས་བྱ་རྣམ་བསྒོམ་བྱ། །ལྷོ་རུ་དཔག་མེད་ཞེས་བྱ་ནི། །བསམ་པ་བརྟན་པས་བསྒོམ་པར་བྱ། ། ཇི་ལྟར་རིགས་པར་ནུབ་ཏུ་ནི། །གཟི་བརྗིད་ཕུང་པོ་རྣམ་བསྒོམ་བྱ། །བཙུན་མོའི་རྣམ་པ་མཚུངས་པ་ཡི། །ཆོས་ཀྱི་གཟུགས་ནི་ཡང་དག་བསྐྱེད། །མཚན་མ་རྡོ་རྗེ་སོགས་མཚན་ཉིད། །ཆོ་ག་ཡིས་ནི་དེ་རྣམས་སྦྱིན། །རིག་མ་ཆེན་མོ་སྤྱན་ལ་སོགས། །གྲྭ་རྣམས་ཀུན་ཏུ་བསམ་པར་བྱ། །གཞན་གྱིས་མི་ཐུབ་ཁྲོ་བོ་ཆེ། །སྒོ་དང་སྒོར་ནི་རྣམ་བསྒོམ་བྱ། །རྡོ་རྗེ་སེམས་དཔའ་ཡང་དག་དབྱུང་། །དེ་ཁོ་ཉིད་གང་སྦྱར་བར་བྱ། །ཡེ་ཤེས་སྦྱོར་པས་ཐམས་ཅད་ལ། །འདོད་ཡོན་ལྔ་ཡིས་མཆོད་པར་བྱ། །ཁུ་བ་དེ་ལ་ཡང་དག་བསྐྱེད། །མཆོད་པར་བྱེད་པ་བསྐྱེད་པར་བཤད། །མཁའ་ཁམས་གཙུག་ཏོར་ཐམས་ཅད་ཀྱིས། །ཡོངས་སུ་གང་བར་རྣམ་བསྒོམ་བྱ། །གཙུག་ཏོར་གྱི་སྙིང་པོ་ཀུན་དུ་སྐུལ་བར་བྱེད་པའི་དཀྱིལ་འཁོར་རྫོགས་སོ།། །།དེ་ནས་ཕྱག་ན་རྡོ་རྗེས་སླར་ཡང་
འདོད་པའི་ཁམས་ཐམས་ཅད་དུ་མཉམ་པར་འཇུག་པ་འབྱུང་བའི་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རིགས་ཐམས་ཅད་ཀྱི་ཐུན་མོང་གི་སེང་གེ་རྣམ་པར་རོལ་པ་ཞེས་བྱ་བའི་བསམ་གཏན་གྱི་དཀྱིལ་འཁོར་ཆེན་པོ་འདི་གསུངས་པ། ཆོ་ག་ཤེས་པས་སྣ་ཚོགས་མདོག །འོ་མ་དང་ཞོར་རྣམ་བསྒོམ་བྱ། །རིན་ཆེན་བཞི་ཡི་རང་བཞིན་དབུས། །རི་བོ་དེ་ལ་བསྒོམ་པར་བྱ། །ལོགས་བཞི་བ་ལ་གྲྭ་བཞི་པ། །སྒོ་བཞི་པར་ནི་རབ་ཏུ་བརྟག །པདྨ་ཨུཏྤལ་ཀུན་དུ་བཀྲམ། ། གཞོགས་རྣམས་སུ་ནི་རྣམ་པར་བསམ། །རིན་ཆེན་ཀུན་གྱི་གདན་དང་ནི། །རྟག་ཏུ་ཟླ་བའི་དཀྱིལ་འཁོར་ཉིད། །སངས་རྒྱས་སློབ་དཔོན་ཁྱད་པར་གྱིས། །བསམ་གཏན་བརྩོན་པས་སྦྱོར་བར་བྱ། །སྔགས་པས་ཉི་མའི་དཀྱིལ་འཁོར་ཅན། །དེ་ཡི་དབུས་སུ་བསྒོམ་པར་བྱ། །མཐེ་ཆུང་མཐོ་ལས་འདས་པ་ལས། །སོར་བཞིའི་ངོས་དང་གྲྭ་རྣམས་སུ། །ངོས་རྣམས་སུ་ནི་རྟག་ཏུ་བྱ། །བདུད་རྩི་ཞེས་ནི་བསྒོམ་པར་བྱ། །འབར་བའི་ཕྲེང་བ་ལ་སོགས་གང་། །མི་སྡུག་མཆེ་གཙིགས་འཇིགས་པར་བྱེད། ། སྔགས་པ་ཟླ་བའི་དཀྱིལ་འཁོར་ཅན། །གནས་ལྔ་རྣམས་སུ་རྣམ་བསྒོམ་བྱ། །དབུས་སུ་རྡོ་རྗེ་རལ་གྲི་ནི། །ཤིན་ཏུ་རྣམ་འབྱེས་ཤིན་ཏུ་མཛེས། །འོད་ཟེར་འབར་བས་འཁྲུགས་ཤིང་འབར། །པདྨ་རཱ་ག་དབང་པོ་མཚུངས། །འོད་དཀར་འབར་བའི་ཕྲེང་བ་གསལ། །ཁ་དོག་དཀར་པོ་ཤིན་ཏུ་མཛེས། །རལ་པའི་ཅོད་པན་ཀུན་རྫོགས་པ། །སྣ་ཚོགས་རྒྱན་གྱིས་བརྒྱན་གྱུར་པ། །སངས་རྒྱས་སློབ་དཔོན་ཆོ་ག་ཡིས། །ཤར་ཕྱོགས་སུ་ནི་རྣམ་བསྒོམ་བྱ། །རྡོ་རྗེ་སེམས་དཔའ་ཡང་དག་བསྐྱེད། །སྣ་ཚོགས་རིན་ཆེན་རྣམ་བརྒྱན་པ། །འབར་བའི་ཕྲེང་བས་འཁྲུགས་ཤིང་འབར། །ཨུཏྤལ་སྔོན་པོ་དང་མཚུངས་པ། །ལྷོ་རུ་རྟག་ཏུ་སློབ་དཔོན་གྱིས། །བསྒོམ་བྱ་གཞན་དུ་མི་སྒོམ་མོ། །ཆོས་ཀྱི་རྡོ་རྗེ་ཡང་དག་བསྐྱེད། །པདྨ་རཱ་ག་མཚུངས་པའི་འོད། །མེ་ཏོག་ཆུན་པོ་
དམར་པོས་གང་། །ནུབ་ཕྱོགས་སུ་ནི་བསྒོམ་པར་བྱ། །འོད་ཟེར་འབར་བས་རྣམ་བརྒྱན་པའི། །འདོད་པའི་རྡོ་རྗེ་ཡང་དག་བསྐྱེད། །གསེར་དག་གི་ནི་ཡེ་ཤེས་རྫོགས། །བྱང་དུ་ཡང་ནི་བསྒོམ་པར་བྱ། །གྲྭ་རུ་ལྷ་མོ་རི་དབང་ཕྱུག ། ཇི་ལྟའི་གནས་སུ་རྣམ་བསམ་བྱ། །བུད་མེད་མཚན་ཉིད་ཡོངས་རྫོགས་པ། །མི་མོའི་རྒྱན་གྱིས་བརྒྱན་གྱུར་པ། །ཆགས་དང་ཆགས་བྲལ་སྐད་ཅིག་མ། །སྔགས་པས་ཡིད་འོང་བསྒོམ་པར་བྱ། །སྒོ་ཡི་ཕྱོགས་རྣམས་ཐམས་ཅད་དུ། །རིག་མ་གཞན་གྱིས་མི་ཐུབ་མ། །གཡས་བརྐྱང་ཞབས་ཀྱིས་མནན་པ་ཡི། །འཇིག་རྟེན་གསུམ་འཇིགས་འཕྲོག་པ་མོ། །དེ་རྣམས་ཐམས་ཅད་རང་གཟུགས་སུ། །རྡོ་རྗེ་སེམས་དཔའ་རྣམ་བསྒོམ་བྱ། །སངས་རྒྱས་སློབ་དཔོན་དེ་རྟག་ཏུ། །འདོད་ཡོན་ལྔ་ཡི་མཆོག་རྣམས་ཀྱིས། །འབུལ་བར་བྱེད་པ་རྟག་ཏུ་བྱ། །དེ་ལྟས་དགྱེས་འགྱུར་གཞན་དུ་མིན། །རང་གི་ཁུ་བ་ཡང་དག་བསྐྱེད། །མཆོད་པ་བསྐྱེད་པར་བཤད་པ་ཡིན། །གཟུགས་བརྙན་དེས་ནི་ནམ་མཁའི་དབྱིངས། །ཡོངས་སུ་གང་བར་རྣམ་བསྒོམ་བྱ། ། དཔག་བསམ་ལྗོན་ཤིང་རིན་ཆེན་ཆེ། །ཡིད་བཞིན་ནོར་བུ་ཤིན་ཏུ་མཛེས། །རིགས་ཀྱི་དབྱེ་བ་ཤེས་པ་ཡིས། །དེ་རྣམས་ཁ་དོག་རྣམ་བསྒོམ་བྱ། །ཇི་སྐད་གསུངས་པའི་གཟུགས་དེས་ནི། །དབང་བསྐུར་བ་ནི་གཟུང་བར་བྱ། །ཆོ་ག་ཤེས་པས་དེ་ཡི་ཚེ། ། བྱ་བ་བུམ་པ་བསམ་པར་བྱ། །སངས་རྒྱས་གཟུགས་སོགས་ཐམས་ཅད་ཀྱིས། །མཆོད་བཞིན་པར་ནི་རྣམ་པར་བསམ། །ཡང་དག་སྦྱོར་བའི་མཚན་ཉིད་འདིས། །ཤིན་ཏུ་དབང་བསྐུར་མཉམ་པ་ཅན། །སྐྱེ་བ་འདིར་ཉིད་སངས་རྒྱས་ཉིད། །ཐོབ་སྟེ་འདིར་ནི་ཐེ་ཚོམ་མེད། །རང་སྔགས་ཁྲོ་བོ་མཚུངས་པ་ཡི། །ཕན་པའི་སྦྱིན་པ་སྦྱིན་པར་བྱེད། །དེ་ནི་དུས་ཡུན་མི་རིང་བས། །དངོས་གྲུབ་སྐྱེ་བ་ལྟ་བུར་ཐོབ། །བློ་ལྡན་སངས་རྒྱས་སློབ་དཔོན་གྱིས། རྟག་ཏུ་དེ་ཡི་དམ་ཚིག་ནི། །གང་ཁོ་ན་ཡི་རིགས་འབྱུང་བ། །
འབད་པ་ཡིས་ནི་འདི་ལྟར་འོས། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པ་ཆེན་པོར་བསམ་གཏན་ཆེན་པོའི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་ནམ་མཁའི་ཁམས་ཐམས་ཅད་ཡེ་ཤེས་ཀྱི་སྣང་བས་ཡང་དག་པར་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དམ་ཚིག་ཆེན་པོའི་དེ་ཁོ་ན་ཉིད་སྐྱེད་པར་བྱེད་པའི་སྔགས་འདི་གསུངས་པ། ཨོཾ་སརྦ་ཏ་ཐཱ་ག་ཏ་ཛྭཱ་ནོད་བྷཱ་བཱ་ཡ་སྭཱ་ཧཱ། སྔགས་འདི་གསུངས་མ་ཐག་ཏུ་སངས་རྒྱས་ཀྱི་ཞིང་གྲངས་མེད་པ་བརྗོད་དུ་མེད་པའི་ཡང་བརྗོད་དུ་མེད་པ་བརྒྱ་སྟོང་ཕྲག་གཡོས་ཤིང་རབ་ཏུ་གཡོས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་ཀུན་ནས་ཀུན་ཏུ་སྣང་བའི་དམ་ཚིག་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་འདི་ལ་སྙོམས་པར་ཞུགས་ཏེ་སྔགས་འདི་གསུངས་སོ། །ཨོཾ་སྃ་གྲ་ཧ་ཛྙཱ་ནོད་བྷཱ་བཱ་ཡ་སྭཱ་ཧཱ། དེ་ཁོ་ན་ཉིད་ཀྱི་སྙིང་པོ་ཆེན་པོ་འདི་གསུངས་མ་ཐག་ཏུ། དེ་ནས་གང་ནམ་མཁའི་ཁམས་ཐམས་ཅད་འོད་ཟེར་འབར་བ་ཆེན་པོས་ཀུན་དུ་སྣང་ཞིང་ཡང་དག་པར་མཐོང་བར་གྱུར་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་རང་བཞིན་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་གསུངས་སོ། །ཨོཾ་དྷརྨ་ཛྙཱ་ནོད་བྷཱ་བཱ་ཡ་སྭཱ་ཧཱ། བཅོམ་ལྡན་འདས་ཀྱིས་འདི་གསུངས་མ་ཐག་ཏུ། སངས་རྒྱས་ཀྱི་ཞིང་གི་མཐར་ཐུག་པར་ཡེ་ཤེས་ཀྱི་རྗེས་སུ་མཐུན་པས་ཀུན་དུ་སྣང་བར་གྱུར་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་རང་བཞིན་གྱིས་དཔལ་ཀུན་འབྱུང་བ་ཡང་དག་བར་འབྱུང་བ་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་གསུངས་སོ། །ཨོཾ་ཀཱ་མ་ཛྙཱ་ནོད་བྷཱ་བཱ་ཡ་སྭཱ་ཧཱ། དེ་བཞིན་ཉིད་དུ་ཀུན་ཤེས་ཕྱིར། །དེ་ཉིད་དུ་ནི་སྦྱར་བར་བྱ། །རང་གི་གཟུགས་ཀྱིས་བཞག་ནས་ནི། །དེ་ཀུན་དེ་ལ་བསྒོམ་པར་བྱ། །བསྐྱེད་པ་ལ་སོགས་ཀུན་འབྱུང་བ། །རང་གི་སྔགས་ཉིད་ཀྱིས་
ནི་བྱ། །མང་པོ་ཕན་ཚུན་ཡང་དག་སྦྱོར། །ཕྱག་རྒྱ་དེར་ནི་རྣམ་བསྒོམ་བྱ། །བློ་ལྡན་ཡེ་ཤེས་རིགས་ལ་ནི། །སོར་མོའི་རྣམ་པ་སྦྱོར་བར་བཤད། །རྡོ་རྗེའི་རྣམ་པས་ཀུན་སྦྱར་ནས། །རིན་ཆེན་རྣམ་པས་སྦྱར་བར་བྱ། །པདྨའི་རྣམ་པས་ཀུན་སྦྱར་ནས། །འདི་ནི་ཆོས་ཀྱི་རིགས་སུ་བརྗོད། །རྩེ་གསུམ་རྣམ་པའི་དབྱེ་བ་ཡིས། །དེ་ཉིད་དུ་ནི་བཅིང་བར་བྱ། །བཅོམ་ལྡན་འདས་བྱང་ཆུབ་ཀྱི་སེམས་ཀྱིས་དེ་སྐད་ཅེས་གསུངས་སོ། །བསམ་གཏན་གྱི་དཀྱིལ་འཁོར་ཞེས་བྱ་བ་སེམས་དཔའ་ཆེན་པོ་སྐྱེད་པར་བྱེད་པའི་ལེའུ་བཅུ་གཉིས་པ་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་བསམ་པ་ཐམས་ཅད་ཡོངས་སུ་རྫོགས་པའི་དམ་ཚིག་འབྱུང་བ་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དམ་ཚིག་ཆེན་པོའི་དངོས་གྲུབ་ཀྱི་དཀྱིལ་འཁོར་ཆེན་པོ་འདི་གསུངས་སོ། །དེ་ནས་ཡང་དག་རབ་བཤད་བྱ། །དཀྱིལ་འཁོར་ཆེན་པོ་དམ་པ་འདི། །རྡོ་རྗེ་ཡེ་ཤེས་ལྟ་བུས་ཏེ། །དངོས་གྲུབ་ཆེན་པོ་ཞེས་བཤད་དོ། །སར་པ་ལེགས་པར་བཀལ་བ་ཡི། །ཚད་དང་ལྡན་པ་མཛེས་པ་ཡི། །ཐིག་གིས་མཁས་པས་ཅི་ནུས་ཀྱིས། །དཀྱིལ་འཁོར་ལ་ནི་ཐིག་གདབ་པོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་པ་དང་། །ཐིག་བཞི་དང་ནི་ཡང་དག་ལྡན། །དར་དང་མེ་ཏོག་ཆུན་པོས་བརྒྱན། །གྲྭ་ཡི་ཆ་རྣམས་ཐམས་ཅད་དང་། །སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་ཆེན་གྱིས་སྤྲས་པར། །ཕྱི་ཡི་དཀྱིལ་འཁོར་ཐིག་གདབ་བོ། །རྟག་ཏུ་བསྡུས་པའི་ཆོ་ག་ཡིས། །རིམ་པ་གསུམ་ནི་བྱ་བ་ཡིན། །ཆོ་ག་ཤེས་པས་ཤར་དུ་ནི། །ཡེ་ཤེས་ཞེས་ནི་དགོད་པར་བྱ། །ལྷོར་ནི་འབད་པས་བསྡུས་པ་ཞེས། །བརྗོད་པ་རྟག་ཏུ་བྱ་བའོ། །ཆོ་ག་ཡིས་ནི་བྱང་ཕྱོགས་སུ། །ཆོས་ཀྱི་རིགས་ནི་རྟག་ཏུ་བྱ། །སྔགས་པས་འདོད་པ་ཀུན་རིགས་ལ། །གསུམ་པ་རུ་ཡང་མཉམ་པར་བྲི། །ཤར་དུ་སངས་རྒྱས་བཅོམ་
ལྡན་འདས། །རྒྱལ་བའི་གཙུག་ཏོར་གདུགས་དཀར་དང་། །རིག་མ་ཆེན་མོ་སྤྱན་དང་ནི། །མཛོད་སྤུ་ཡང་ནི་ཉེ་བར་རོ། །རྡོ་རྗེ་འཆང་གི་ལྷོ་རུ་ནི། །བདུད་རྩི་ཞེས་དང་སྟོབས་པོ་ཆེ། །རྡོ་རྗེ་ཁུ་ཚུར་མཱ་མ་ཀཱི། །ཉེ་བ་ཉིད་དུ་གཞག་པར་བྱ། །བཅོམ་ལྡན་འདས་ཀྱི་བྱང་དུ་ནི། །པདྨ་འཆང་བ་ཞི་བ་བསྐྱེད། །ཁྲོ་གཉེར་རིམ་པར་ལྡན་པ་དང་། །རིག་མ་ཆེན་མོ་དཀར་ཞེས་དང་། །ཁྲོ་གཉེར་ཅན་མའང་མཉམ་པར་བྲི། །ཆོ་ག་ཤེས་པས་དེ་དབུས་སུ། །རིག་མ་མི་ཐུབ་ཅན་མ་བྲི། །ཕྱག་རྒྱ་ཐམས་ཅད་ཉིད་དུ་ནི། །རྩེ་མོ་ལྔ་པ་རྣམ་བསྒོམ་བྱ། །དཀྱིལ་འཁོར་གསུམ་པར་སློབ་དཔོན་གྱིས། །ཡ་དྲི་ཙྪ་ཡས་སཱུ་ཏྲཾ་བྲི་བར་བྱ། །སྒོ་རྣམས་ཐམས་ཅད་ཉིད་དུ་ནི། །རྡོ་རྗེ་ལྕགས་སྒྲོག་ལ་སོགས་བྲི། །ཇི་ལྟར་རིགས་པར་ཕྱོགས་ཀུན་དུ། །འཇིག་རྟེན་སྐྱོང་བ་དགོད་པར་བྱ། །ཤར་ཕྱོགས་དབང་པོ་ལྷ་རྒྱལ་དང་། །འདོད་པ་སྤྱོད་པའི་ལྷ་རྣམས་དང་། །གནས་གཙང་མ་ཡང་དགོད་པར་བྱ། །མེ་ཕྱོགས་ཀུན་དུ་མེ་ཡི་ལྷ། །དྲང་སྲོང་ཆེན་པོ་ལྔ་མངོན་ཤེས། །ལྷོ་ཕྱོགས་ཡི་དགས་རྣམས་ཀྱི་བདག །གཤིན་རྗེ་དང་ནི་མ་མོ་བདུན། །བདེན་བྲལ་ཕྱོགས་སུ་ཡི་དགས་ཀྱི། །དབང་པོ་དང་ནི་འབྱུང་བོ་ཀུན། །ནུབ་ཀྱི་ཕྱོགས་སུ་ཀླུ་ཡི་བདག །ཆུ་ལྷ་དང་ནི་ཀླུ་རྣམས་ཀུན། རླུང་གི་ཕྱོགས་སུ་རླུང་ལྷ་དང་། །རིག་པ་འཛིན་པ་ཐམས་ཅད་དང་། །བྱང་གི་ཕྱོགས་སུ་གནོད་སྦྱིན་བདག །ལུས་ངན་དང་ནི་གནོད་སྦྱིན་ཀུན། །དབང་ལྡན་ཕྱོགས་སུ་དབང་ཕྱུག་ནི། །འབྱུང་པོ་ཀུན་གྱི་བདག་པོ་དང་། །ཇི་སྐད་གསུངས་པའི་ཆོ་ག་ཡིས། །བུམ་པ་དགོད་དང་གདན་སོགས་བྱ། །ལྷ་རྣམས་ཀུན་གྱི་རྒྱལ་པོ་ནི། །དེར་ནི་དགོད་པར་བྱ་བ་ཡིན། །མཁས་པས་མེ་ཏོག་དྲི་སོགས་ཀྱིས། །མཆོད་པའི་ཆོ་ག་བྱས་ནས་ནི། །མཉེས་པའི་རིགས་པས་མཉེས་པར་བྱ། །དེ་ལྟར་རྒྱས་འགྱུར་གཞན་དུ་མིན། །འདིར་ནི་སྔོན་མཐར་དེ་རྣམས་ཀྱི། །ཉ་དང་ཆང་སོགས་རབ་སྦྱིན་བྱ། །ཆོ་ག་ཤེས་པས་གསང་བའི་མཆོད། །སྒོ་བཞི་
རྣམས་སུ་བརྟག་པར་བྱ། །ཁུ་བ་དེར་ནི་གཟུང་བྱས་ནས། །ཐམས་ཅད་དུ་ནི་དབུལ་བར་བྱ། །རིག་མའི་ཚུལ་གྱིས་ཆོ་ག་ཡིས། །དེ་ནི་ཡང་ཡང་དགྱེས་པར་བྱ། །མཁས་པས་དགའ་བའི་རྣམ་པ་ཡིས། །ཐོག་མར་གཏོར་མ་སྦྱིན་པར་བྱ། །ཆོ་ག་ཤེས་པས་འཕྲོག་མ་ཡི། །གཉིས་པ་རུ་ནི་ཡང་དག་གཟུང་། །སྔགས་པས་ཁྱད་པར་གསུམ་པ་རུ། །སངས་རྒྱས་རྣམས་ཀྱི་སྦྱིན་པར་བྱ། །དེ་ཉིད་བརྗོད་པ་དེ་ཡིས་ནི། །གང་གསུངས་སྦྱིན་སྲེག་ལས་རྣམས་བྱ། །དེ་ཚེ་སློབ་མ་དབང་བསྐུར་བའི། །ལས་རྣམས་སོ་སོར་བསྒྲུབ་པར་བྱ། །དེ་གཞན་བསམ་པས་བུམ་པ་རུ། །རྡོ་རྗེ་སེམས་དཔའི་རབ་སྦྱོར་གྱིས། །ལྷག་མའི་སངས་རྒྱས་ཞེས་བྱ་བར། །དེ་ཉིད་རིགས་པར་ཡང་དག་བསྐྱེད། །རྟག་ཏུ་སངས་རྒྱས་སློབ་དཔོན་གྱིས། ། དེ་ཡི་ཚུལ་འདི་སྨྲ་བར་བྱ། །སངས་རྒྱས་ཀུན་གྱི་དམ་ཚིག་གང་། །ལམ་གསུམ་ལམ་ནི་འཇུག་བྱེད་པ། །དབང་བསྐུར་ཆེན་པོ་དེ་ཡི་ནི། །ནམ་མཁའ་ཇི་སྲིད་ཡང་དག་འབྱུང་། །ཁྱད་པར་དུ་ཡང་འདིར་སྨྲས་པ། །བདག་གི་ཡང་འདི་ཡང་དག་འབྱུང་། །ཡིད་བཞིན་རིན་ཆེན་ནོར་བསྟེན་ནས། །དེ་ཉིད་འབྱུང་བས་འདིར་དབང་བསྐུར། །གཞན་ཡང་གལ་ཏེ་སེམས་ཅན་གང་། །མཐོང་བར་འགྱུར་ཞེས་བྱ་བ་ཉོན། །སྐྱེ་བ་བདུན་གྱི་ནང་དུ་ས། །ཐོབ་ཅིང་ཕྱག་འོས་མཆོག་ཏུ་འགྱུར། །སངས་རྒྱས་སློབ་དཔོན་གང་ཉིད་དུ། ། ཡེ་ཤེས་རྒྱ་མཚོ་གནས་པར་འགྱུར། །ཐུབ་ཆེན་དེ་ཉིད་ཤེས་པ་གང་། །རྟག་ཏུ་སངས་རྒྱས་མཆོད་པར་བྱེད། །སངས་རྒྱས་སློབ་དཔོན་ཇི་གསུངས་པ། །དེ་ཡིས་རང་གི་སློབ་མ་དེའི། །དམ་ཚིག་ལྔ་པོ་བྱིན་ནས་ནི། །རབ་ཏུ་འབད་པས་སྨྲ་བར་བྱ། །སངས་རྒྱས་ཀུན་གྱི་དམ་ཚིག་ཆེ། །དཀྱིལ་འཁོར་དེ་ཉིད་ཤེས་དཀྱིལ་འཁོར། །སྒྲུབ་པོ་རྣམས་ཀྱིས་ཅི་འདྲ་དེར། །ཡིད་བཞིན་ནོར་བུ་ལྟ་བུར་བླང་། །དམ་ཚིག་ཆེན་པོའི་དཀྱིལ་འཁོར་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་
ཡང་དེ་བཞིན་གཤེགས་པ་ཐམས་ཅད་ཀྱི་ཐུགས་སུ་བཞུགས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ནམ་མཁའི་ཁམས་ཐམས་ཅད་དུ་སྤྲོ་བའི་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་བཅོམ་ལྡན་འདས་དེ། བཅོམ་ལྡན་འདས་ཕྱག་ན་རྡོ་རྗེ་དེ་ཉིད་དེ་ནམ་མཁའི་ཁམས་ཐམས་ཅད་དུ་སེམས་ཀྱིས་གང་བར་བྱས་ནས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱིས་བཅོམ་ལྡན་འདས་རྣམ་པར་སྣང་མཛད་ལ་རབ་ཏུ་སྩལ་ཏོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་དམ་ཚིག་བསྒྲུབ་པའི་མཆོག་ཅེས་བྱ་བ་རིག་མའི་ཚུལ་ལ་སོགས་པའི་ལས་ཅན་གསུངས་པ། ཁྲུ་ནི་སུམ་ཅུའི་ཁྱོན་ཙམ་དུ། །ཀུན་ནས་ཡོངས་སུ་ཟླུམ་པོར་ནི། །ཨིནྡྲ་ནཱི་ལ་མཚུངས་པའི་འོད། །འོད་ཟེར་འབར་བ་དེ་ཕྱུང་ནས། །ནམ་མཁའ་རུ་ནི་འདི་བྱ་བ། །བསམ་གཏན་སྦྱོར་བས་བསམ་པར་བྱ། །འཛམ་བུའི་གླིང་ནི་ཐམས་ཅད་དུ། །འོ་མ་དང་ཞོས་ཀུན་དུ་འཁྲུགས། །ཤིང་རྟའི་འཁོར་ལོའི་ཚད་ཀྱིས་ནི། །པདྨས་གཡོགས་པར་རྣམ་བསྒོམ་བྱ། །ཁྲོ་བོ་ཆེན་པོ་གཤིན་རྗེ་གཤེད། །དྲག་ཏུ་དགོད་པ་ཆེན་པོ་སོགས། །རྟག་ཏུ་དེ་ཡི་དཀྱིལ་འཁོར་གྱི། །དེ་ཡི་གཟུགས་ནི་རྣམ་བསྒོམས་ནས། །ཁྲོ་ཆེན་ཁྲོ་གཉེར་རིམ་པར་ལྡན། །འབར་བའི་ཕྲེང་བ་འཁྲུགས་པའི་འོད། །ཇི་ལྟར་རིགས་པར་ཀུན་བསྐྱེད་ནས། །སྒོམ་པར་བྱེད་པ་དེ་དེར་བཤད། །ཁྲོ་བོ་ཆེན་པོ་དབྱུག་པ་སྔོ། །འཇིག་རྟེན་གསུམ་འཇིག་འཕྲོག་བྱེད་པ། །སངས་རྒྱས་ཀུན་གྱི་ཡེ་ཤེས་སུ། །འཇོམས་པ་པོ་ནི་རབ་ཏུ་གནས། །ཇི་སྐད་གསུངས་པའི་གཟུགས་གསུམ་གྱིས། ། ནམ་མཁའི་ཁམས་ནི་ཀུན་དུ་གང་། །ཡི་གེའི་གཟུགས་ནི་ཀུན་བསྐྱེད་ནས། །བདག་ཉིད་སྙིང་གར་རྣམ་བསམ་བྱ། །སྙིང་གའི་གཟུགས་ནི་དེ་རྣམས་སུ། །ལྷ་ཡི་རྣམ་པར་སྒོམ་པར་བྱེད། །སླར་ནི་སྔགས་པས་བསྡུ་བར་བྱ། །དེ་ཉིད་ལ་ནི་གཞུག་
པར་བྱ། །ཆོ་ག་ཤེས་པས་བསྐལ་པའི་མེར། །བསམས་ནས་བསམ་གཏན་ཡང་དག་བརྩམ། །ཟླ་འོད་ལྟ་བུར་འབར་བ་ནི། །བཙུན་མོ་རྟག་ཏུ་བསྒོམ་པར་བྱ། །ལྷ་ཉིད་ཡང་དག་བསྐྱེད་ནས་ནི། །དེ་ཡི་དབུས་སུ་རྣམ་བསྒོམ་བྱ། ། རང་གཟུགས་སྙིང་གར་བསམས་ནས་ནི། །དེ་ཡི་དབུས་སུ་རྣམ་བསྒོམ་བྱ། །རང་གཟུགས་སྙིང་གར་བསམས་ནས་ནི། །ཧ་ཡིག་ཏུ་ནི་རྣམ་བསྒོམ་བྱ། །འདི་དེ་སྔགས་རྣམས་ཐམས་ཅད་ཀྱི། །བསམ་པ་ཐམས་ཅད་ཡོངས་རྫོགས་བྱེད། །འདི་ནི་དང་པོའི་བསམ་གཏན་བརྗོད། །རབ་ཏུ་འབད་པས་བསྒོམ་པར་བྱ། །རྟག་ཏུ་རིགས་ཀྱི་བདག་པོ་ཡིས། །བསྐལ་པར་བསྲེགས་པར་རྣམ་བསྒོམས་ནས། །སྔགས་པས་དེ་ཡི་རྣམ་པ་དེར། །བསམ་གཏན་བརྩོན་པས་བསྒོམ་པར་བྱ། །སངས་རྒྱས་གཟུགས་ཀྱི་རབ་སྦྱོར་གྱིས། ཟླ་བའི་དཀྱིལ་འཁོར་སྒོམ་པ་ནི། །རང་གི་གཟུགས་ཀྱིས་ཀུན་བསྐྱེད་ནས། །བ་སྤུའི་ཁུང་བུར་འདི་སྤྲོ་བྱ། །ཇི་སྐད་གསུངས་པའི་གཟུགས་གསུམ་གྱིས། །ནམ་མཁའི་ཁམས་ནི་ཀུན་ཏུ་བཀང་། །འོད་ཟེར་ལྔ་ཡི་རབ་སྦྱོར་གྱིས། ། རང་ལུས་སུ་ནི་རབ་གཞུག་བྱ། །རིག་མའི་རྒྱལ་མོ་སོགས་སྦྱོར་བས། །དེ་རྣམས་ཐམས་ཅད་ཡོངས་བརྟག་བྱ། །སངས་རྒྱས་ཀུན་གྱི་མཁའ་ཁམས་ནི། །ཡོངས་སུ་གང་བར་རྣམ་བསྒོམ་བྱ། །རང་ལུས་སུ་ནི་རྣམ་བསྒོམས་ནས། །ཐམས་ཅད་དེར་ནི་རབ་གཞུག་བྱ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་རིག་མའི་ཚུལ་ལ་སོགས་པའི་ལས་ཅན་གྱི་ལེའུ་སྟེ་བཅུ་གསུམ་པ་རྫོགས་སོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་གསང་སྔགས་ཐམས་ཅད་ཀྱི་གསང་ཆེན་རིག་མའི་ཚུལ་གྱི་ལས་གསུངས་པ། ནམ་མཁའི་ཁམས་ཀྱི་དབུས་གནས་པར། །དཀྱིལ་འཁོར་ཆེན་པོ་མཆོག་གྱུར་པ། །དཔག་ཚད་ཀྱི་ནི་གྲངས་ཀྱི་ཁྱོན། །ཀུན་ནས་ཡོངས་སུ་ཟླུམ་པོར་ནི། །གསལ་བ་གསལ་
བར་མཚུངས་བསམས་ནས། །དབུས་སུ་བདག་ཉིད་རྣམ་བསམ་བྱ། །འབད་པས་གནས་ལྔ་རྣམས་སུ་ནི། །རྣམ་སྣང་མཛད་ཆེན་གཟུགས་བསམས་ནས། །ཉི་མའི་དཀྱིལ་འཁོར་དབུས་གནས་པར། །དེ་རྣམས་ཐམས་ཅད་ཡོངས་བརྟག་བྱ། །སྙིང་གར་རྡོ་རྗེ་སེམས་དཔའ་ནི། །ཡང་དག་བསྐྱེད་ནས་རྣམ་བསྒོམ་བྱ། །ཆོ་ག་ཤེས་པས་ཉི་རྣམ་པར། །ནམ་མཁའི་ཁམས་ནི་གང་བར་བྱེད། །ལྷ་ལ་སོགས་པའི་སྦྱོར་བ་ཡིས། །སླར་ཡང་དེ་ནི་རབ་གཞུག་བྱ། །དེ་ཉིད་ཚུལ་ནི་དགེ་བ་འདི། །རིགས་ཀྱི་དབྱེ་བས་རྟོགས་པར་བྱ། །གཞན་དུ་གསང་བའི་བསམ་གཏན་ནི། །རྣམ་པར་སྤངས་པས་འགྲུབ་མི་འགྱུར། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་རིག་མའི་ལས་ཀྱི་ལེའུ་སྟེ་བཅུ་བཞི་པ་རྫོགས་སོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ལྷ་ཐམས་ཅད་ཀྱི་དེ་ཁོ་ན་ཉིད་ཀྱི་ཚུལ་བཟླས་པའི་ཆོ་ག་སྟོན་པར་མཛད་དོ། །ནམ་མཁར་འཕྲུལ་ནི་སྟོན་པར་རམ། །གང་དུ་སེམས་ནི་རབ་དགྱེས་བྱེད། །དབང་ཆེན་དཀྱིལ་འཁོར་བསམས་ནས་ནི། །རང་གི་དཀྱིལ་འཁོར་མཆོད་བསྒོམ་བྱ། །མེ་ཏོག་བཟང་པོ་དེ་དབུས་སུ། །དེ་ཉིད་སྦྱོར་བས་བསྒོམ་པར་བྱ། །རང་གཟུགས་ཕྱག་རྒྱ་ཆེན་པོ་ནི། །བསྒོམ་བྱ་གཞན་དུ་བརྩོན་མི་བྱ། །སྙིང་གའི་དབུས་སོན་ཕྲ་མོ་ནི། །དྲི་མེད་ཡེ་ཤེས་དཀྱིལ་འཁོར་ནི། །གསལ་བ་འོད་དཀར་འབར་ལ་སོགས། །ཆུ་ཡི་རྣམ་པར་དགོད་པར་བྱ། །དེ་ལ་སྔགས་ཀྱི་ཡི་གེའི་ཚིག །དང་པོ་གསང་བ་རྣམ་བསྒོམ་བྱ། །རྩེ་མོ་ལྔ་བ་རྣམ་བསྒོམས་ནས། །སླར་ཡང་དེ་ཉིད་ལ་སྦྱར་བྱ། །བློ་དང་ལྡན་པས་གནས་ལྔ་རུ། །གཟུགས་བརྙན་ཡང་ནི་ཡང་དག་བསྐྱེད། ། དེ་ཉིད་ཡི་གེའི་ཚུལ་མཐུན་པས། །བསམ་གཏན་འབྱུང་བ་བསྒོམ་པར་བྱ། །ཆོ་ག་ཤེས་པས་ཡིག་རྣམས་ཀྱི། །ཕྲེང་བ་བསྐྱེད་ནས་བསྒོམ་པར་བྱ། །ནས་ཀྱི་ཚད་འདི་ཐམས་ཅད་དུ། །བསམ་གཏན་འབྱུང་བ་བསྒོམ་པར་བྱ། །རབ་ཏུ་འབད་པས་འོག་དེར་ནི། །
རྟག་ཏུ་ནམ་མཁའ་གང་བར་བྱ། །དེ་ཉིད་སངས་རྒྱས་ཐམས་ཅད་ཀྱི། །གང་བ་དེ་ལ་གྲགས་པ་ཡིན། །ཡི་གེ་གཅིག་གི་གསང་སྔགས་ཀྱི། །རང་གཟུགས་རྣམ་པར་བསྒོམ་པར་བྱ། །རིགས་ཀྱི་བདག་པོ་འབྱུང་བ་ནི། །ཡི་གེ་གསུམ་གྱི་རྟག་ཤེས་བྱ། །ཡི་གེ་ལྔ་ལ་སོགས་གཟུང་བས། །ཇི་སྲིད་ཡི་གེ་འབྱུང་བའོ། །འོད་དཀར་འབར་བའི་ཕྲེང་བ་སོགས་། འབར་བའི་ཕྲེང་བ་མཉམ་པའི་འོད། །རིགས་ཀྱི་དབྱེ་བས་ལས་རྣམས་ཀྱི། །ཐོག་མ་ཐ་མ་འདི་བྱའོ། །ཨུཏྤལ་སྔོན་པོའི་འདབ་རྣམ་པར། ། ཨིནྡྲ་ནཱི་ལ་མཚུངས་པའི་འོད། །འོད་ཟེར་འབར་འཁྲུགས་གཙོ་བོའི་ཡུམ། །ཡིད་ཀྱིས་བསམས་པས་འགྲུབ་པར་འགྱུར། །པདྨ་རཱ་ག་དབང་མདོག་འོད། །དམར་པོ་འབར་བ་མཚུངས་པའི་འོད། །འཇིག་རྟེན་ཁམས་ནི་ཀུན་ནས་སུ། །ཆོ་ག་ཤེས་པས་སྣང་བར་བྱ། །གེ་སར་སེར་པོ་དང་མཚུངས་པ། །སེར་པོ་འོད་ཟེར་འབར་ལ་སོགས། །སྒོམ་པའི་གོ་འཕང་གིས་བསྒོམ་བྱ། །ཐེ་ཚོམ་མེད་པར་བསྒྲུབ་པར་བྱ། །དེ་ཉིད་འབྱུང་བ་གང་གསུངས་པ། །རང་གཟུགས་ཡང་དག་བསྐྱེད་ནས་ནི། །སྙིང་གར་མེ་ཏོག་བསམས་ནས་ནི། །དཀྱིལ་འཁོར་དེ་ལ་བསྒོམ་པར་བྱ། །ཆོ་ག་ཤེས་པས་དེའི་སྟེང་དུ། །སྙིང་པོ་ཕྱག་རྒྱ་རྣམ་བསྒོམ་བྱ། །ཇི་ལྟའི་གོ་འཕང་ཀུན་བསྐྱེད་ནས། །ཡེ་ཤེས་དེ་ཉིད་རྣམ་བསྒོམ་བྱ། །བྷ་གར་ཨ་ཡིག་ངེས་ཕྱུང་ནས། །སངས་རྒྱས་མཆོད་པ་ལ་སོགས་བྱ། །འཇིག་རྟེན་ཁམས་ནི་ཀུན་ནས་སུ། །ཆོ་ག་ཤེས་པས་སྤྲོ་བར་བྱ། །ཐོག་མ་བར་དང་ཐ་མར་ནི། །སླར་ཡང་བསྡུ་བར་བསམ་པར་བྱ། །ཟླ་འོད་ལྟ་བུར་ཡང་དག་སྦྱོར། །རང་ལུས་སུ་ཡང་བསྒོམ་པར་བྱ། །འདི་ནི་དེ་ཉིད་ཚུལ་དགེ་བ། ། རིགས་གསུམ་དུ་ཡང་རྟོགས་པར་བྱ། །བྱ་དང་བྱེད་པ་ཡང་དག་སྦྱོར། །སྒོམ་པ་དེ་ནི་འགྲུབ་པར་བྱེད། །སེམས་ཀྱི་ཀུན་སྦྱོར་མཚན་ཉིད་ཀྱིས། །གལ་ཏེ་ཆགས་ལ་ཆགས་པར་འགྱུར། །བསམ་གཏན་འདུས་ལ་རབ་ཞུགས་ནས། །དེ་ལ་གཞུག་པར་བསྒོམ་
པར་བྱ། །འདི་དེ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་སྒྲུབ་པ་པོ། །སྒྲུབ་པོ་རྣམས་ཀྱི་དེ་ཉིད་འདི། དངོས་གྲུབ་བསྒྲུབ་ལ་དམ་ཚིག་མཆོག །སངས་རྒྱས་གཟུགས་སུ་རྣམ་བསྒོམས་ནས། རལ་པའི་ཅོད་པན་འཛིན་བཞིན་པ། སངས་རྒྱས་སློབ་དཔོན་ཡང་དག་བསྐྱེད། སྙིང་གར་དེ་ནི་དགོད་པར་བྱ། རང་སྔགས་མཆོག་གི་ཕྱག་རྒྱ་ནི། བསམས་ནས་དེ་ཡི་སྙིང་གར་དགོད། འཐུང་དང་ཟ་བའི་དུས་རྣམས་སུ། ཉེ་བར་ལོངས་སྤྱོད་བྱེད་རྣམས་སུའང་། དྲི་དང་གཟུགས་སོགས་བྱ་བ་རྣམས། འདི་ནི་དེ་ཁོ་ན་ཉིད་བརྗོད། ལྷ་སྦྱོར་སངས་རྒྱས་སློབ་དཔོན་གྱི། རང་གི་བདེ་བ་རྟག་ཏུ་ནི། ཆོ་ག་ཤེས་པས་དབུལ་བར་བྱ། གཞན་དུ་འགྲུབ་པར་བྱེད་མིན་ཉིད། འདི་ནི་སྔགས་རྣམས་ཐམས་ཅད་ཀྱིས། བསམ་པ་ཐམས་ཅད་ཡོངས་རྫོགས་བྱེད། ཡེ་ཤེས་རྣམས་ནི་ཀུན་གྱི་གསང་། སྔགས་ཀྱི་དངོས་གྲུབ་བྱེད་དེ་ཉིད། རང་གཞན་སེམས་ཅན་ཐམས་ཅད་ཀྱི། འཆི་བ་དེ་བཞིན་འཕྲོག་པར་བྱེད། དེ་བཞིན་རང་གཟུགས་བསམས་ལ་སོགས། བསྟེན་དང་ཡོན་རྣམས་ཀུན་དང་ལྡན། འདི་དེ་སངས་རྒྱས་ཐམས་ཅད་ཀྱི། སངས་རྒྱས་ཡེ་ཤེས་རབ་སྒྲུབ་པའོ། །རྡོ་རྗེ་སེམས་དཔའ་རབ་སྒྲུབ་པས། རྡོ་རྗེ་ཡེ་ཤེས་སྤྲུལ་པའོ། །གནས་བཞི་རྣམས་ཀྱི་ཀུན་སྦྱོར་གྱིས། ལྷ་ཡི་སྦྱོར་བ་མཚུངས་པ་ལ། ཆོ་ག་ཤེས་པས་གཟུང་བར་བྱ། རིག་པ་འཛིན་པར་དེ་བརྗོད་བྱ། འདི་དེ་སངས་རྒྱས་ཐམས་ཅད་ཀྱི། དེ་ཉིད་བྱ་བ་དྲི་མེད་བཟང་། དེ་ཡི་སྔགས་ཀྱི་སྐུ་བྱེད་པ། བསྡུས་པ་ཡིས་ནི་བསྒོམ་པར་བྱ། ཐུན་བཞིར་བསམ་གཏན་འདི་ཉིད་ནི། དེ་ཉིད་དམ་ཚིག་གར་མཁན་ནོ། །ཐམས་ཅད་དུ་ནི་རིགས་དབྱེ་བ། བསྡུས་པ་ཡིས་ནི་བསྒོམ་པར་བྱ། སངས་རྒྱས་གཟུགས་ནི་རྣམ་བསྒོམས་ནས། འཁོར་ལོ་དེ་ཡིས་རྣམ་བསྒོམ་བྱ། རང་ལག་ཏུ་ནི་ཡང་དག་བསྐྱེད། ཇི་སྲིད་སྲོག་དེ་གཏང་མི་བྱ། རྡོར་སེམས་ལ་སོགས་སྒོམ་བྱེད་པ། བསྡུས་པ་ཡིས་ནི་རིགས་གསུམ་
དུའམ། རྡོ་རྗེ་སེམས་དཔས་བྱིན་བརླབས་པས། སྒྲུབ་པོས་རྟག་ཏུ་བསྒྲུབ་པར་བྱ། འདི་དེ་སངས་རྒྱས་ཐམས་ཅད་ཀྱི། དངོས་གྲུབ་ཐམས་ཅད་རབ་སྒྲུབ་པའོ། །སྔགས་རྣམས་ཀུན་གྱི་མཉེས་པ་དང་། དངོས་གྲུབ་དམ་ཚིག་སྟོན་པ་པོ། །དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་ཡིད་བཞིན་གྱི་ནོར་བུའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་འབྱུང་བའི་རྡོ་རྗེ་ཞེས་བྱ་བའི་དཀྱིལ་འཁོར་འདི་སྟོན་པར་མཛད་དོ། །དམ་ཚིག་དཀྱིལ་འཁོར་དུ་གསུངས་པ། གང་དེ་ཐམས་ཅད་ཉིད་བྱ་དེ། ཤར་དུ་རང་གི་ཕྱག་རྒྱ་ཡིས། མི་བསྐྱོད་པ་ནི་དགོད་པར་བྱ། ལྷོ་རུ་དེ་ལ་ཆོ་ག་ལས། རིན་ཆེན་འབྱུང་ལྡན་བྲི་བར་བྱ། ཆོ་ག་ཤེས་པས་ནུབ་ཏུ་ནི། འོད་དཔག་མེད་ནི་མཉམ་པར་བྲི། ཆོ་ག་ཤེས་པས་བྱང་ཕྱོགས་སུ། དོན་ཡོད་གྲུབ་པ་མཉམ་པར་བྲི། དབུས་སུ་རྟག་ཏུ་བསྡུས་པ་ཡིས། སངས་རྒྱས་སློབ་དཔོན་ཀུན་ཏུ་བྲི། རྩེ་མོ་ལྔ་པའི་རྡོ་རྗེ་ཆེ། འབར་བའི་ཕྲེང་བས་རྣམ་བརྒྱན་པ། རྣམ་ཀུན་སངས་རྒྱས་སློབ་དཔོན་གྱིས། རབ་ཏུ་འབད་པས་བསྒྲུབ་པར་བྱ། ཕྱག་རྒྱ་རྣམས་ནི་ཐམས་ཅད་དུ། ཨུཏྤལ་སྔོན་པོ་མཚུངས་པའི་འོད། །རྩེ་མོ་བཅུ་གཅིག་ཆེན་པོ་ཡི། །རྡོ་རྗེའི་རྣམ་པར་ཀུན་ཏུ་བྲི། ཟླ་བའི་དཀྱིལ་འཁོར་དབུས་གནས་པར། ཕྱག་རྒྱ་ཐམས་ཅད་ཀུན་ཏུ་བྲི། །མཁས་པས་ཕྱག་རྒྱ་ཆེན་པོ་ནི། །འཁོར་ལོས་སྒྱུར་བ་ཞེས་བཤད་དོ། །སྙིང་པོའི་དཀྱིལ་འཁོར་གྲྭ་རྣམས་སུ། །པདྨ་དང་ནི་ཨུཏྤལ་བྲི། །རིན་ཆེན་བཞི་ཡི་ཁ་དོག་ཏུ། །དེ་རྣམས་དབུས་སུ་མཉམ་པར་བྲི། །འདོད་པས་ལྷ་རྣམས་ཐམས་ཅད་ཀྱི། །ལྷ་གཞན་དེ་ནི་ཡང་དག་འབྱུང་། །སྒོ་རུ་བདུད་རྩི་འབྱུང་བ་དང་། །མཐུན་པ་རུ་ནི་མཉམ་པར་བྲི། །དཀར་པོ་ནག་པོ་དེ་བཞིན་དམར། །སེར་པོ་ལྗང་གུ་ཉིད་དང་ཡང་། །རྟག་ཏུ་བསམ་གཏན་གདན་ལ་གནས། །དེ་ལ་དགོད་པར་བྱ་བ་ཡིན། །ཆོ་
ག་ཤེས་པས་དེ་རེ་རེར། །འཇོམས་བྱེད་བདག་ཉིད་ཅན་གྱིས་གཞོམ། །དེ་ལ་རྟག་ཏུ་གསང་བའི་མཆོད། །སྒོ་བཞི་རུ་ནི་རབ་ཏུ་བརྩམ། །སློབ་མས་མ་དང་ཆུང་མ་མཆོག །སྲིང་མོ་དང་ནི་བུ་མོ་བྲི། །ཆོ་ག་ཤེས་པས་ལོངས་སྤྱད་བྱ། །དཀྱིལ་འཁོར་དེ་ཡི་དབུས་སུ་ནི། །རྒྱལ་བྱེད་རྒྱལ་བའི་རིགས་དེ་ལ། །ཕྱག་རྒྱ་དགོད་པར་རབ་ཏུ་གྲགས། །ཛིཿརྡོ་རྗེ་ཆེན་པོའི་རིགས་མཆོག་ལ། །ཛཱཿ་ཡིག་རྣམ་པར་རྟག་ཏུ་བྱ། །ཛཿཕྱག་ན་པདྨའི་རིགས་བྱུང་ལ། ཨཱཿཡིག་དག་ནི་རྟག་ཏུ་བྱ། །ཨཱཿ་འདོད་པའི་རིགས་ཀྱི་ཆོ་ག་ལས། །ཇི་ལྟར་རིག་པའི་ཨཱཿཡིག་གོ། །ཨཱཿ་དེ་བཞིན་གཤེགས་པ་ཐམས་ཅད་འབྱུང་བའི་རྡོ་རྗེ་ཞེས་བྱ་བའི་དཀྱིལ་འཁོར་ཆེན་པོ་རྫོགས་སོ།། །།དེ་ནས་བཅོམ་ལྡན་འདས་སྒྲུབ་པ་དང་ཉེ་བའི་སྒྲུབ་པ་སྟོན་པར་མཛད་དོ། །ཉ་ཆང་བཟའ་བའི་གསང་མཆོད་སོགས། །མངོན་དགྱེས་གྱུར་ནས་གང་དུ་སེམས། །སེམས་ཅན་མི་ལྡན་གནས་པར་བྱེད། །དེ་ལ་དམ་ཚིག་ཆེན་པོ་ཡི། །རྣལ་འབྱོར་བརྩམ་པར་བྱ་བ་སྟེ། །དེ་ཡི་སངས་རྒྱས་སོགས་དངོས་གྲུབ། །ཟླ་བ་གཅིག་གིས་དེ་མཐར་ཕྱིན། །ཡེ་ཤེས་འཁོར་ལོས་བསྐུལ་བ་ཡིས། །དེ་ཚེ་དེ་བཞིན་འགྲུབ་པར་འགྱུར། །ཐོག་མར་ཟླ་བ་གསུམ་དུ་ནི། །དང་པོའི་རྣལ་འབྱོར་བརྩམ་པར་བྱ། །ཕྱག་ན་རྡོ་རྗེའི་རིགས་འབྱུང་ལ། །འདིར་ནི་སྔགས་ཆེན་བསྒྲུབ་པར་བྱ། །དེ་ནས་བཅོམ་ལྡན་འདས་ཡེ་ཤེས་ཀྱི་རིགས་ལ་སོགས་པ་རྣམས་ཀྱིས་དངོས་གྲུབ་ཀྱི་དམ་ཚིག་རིན་པོ་ཆེ་འཆིང་བར་བྱེད་པ་གསུངས་པ། རྣམ་པར་སྣང་མཛད་ཅེས་གཟུགས་སུ། །དེ་རུ་བདག་ཉིད་ཡང་དག་བསྐྱེད། །རང་སྔགས་ཙཀྲྃ་ཞེས་བརྗོད་ན། །འཁོར་ལོའི་རིག་པ་འཛིན་པར་འགྱུར། རྣམ་པར་སྣང་མཛད་ཅེས་བཤད་པར། །དེར་ནི་བདག་ཉིད་ཡང་དག་བསྐྱེད། །རང་སྔགས་ཁཌྒཾ་ཞེས་བརྗོད་ན། །རལ་གྲིའི་རིག་པ་འཛིན་པར་འགྱུར། །རང་ཉིད་རྣམ་པར་སྣང་མཛད་ཅེས། །དེར་ནི་བདག་ཉིད་ཡང་དག་བསྐྱེད། །རང་སྔགས་པདྨཾ་ཞེས་བརྗོད་ན། །པདྨའི་
རིག་པ་འཛིན་པར་འགྱུར། །རང་ཉིད་རྣམ་པར་སྣང་མཛད་ཅེས། །དེར་ནི་བདག་ཉིད་ཡང་དག་བསྐྱེད། །རང་སྔགས་ཏྲི་ཤཱུ་ལཾ་ཞེས་བརྗོད། །རྩེ་གསུམ་རིག་པ་འཛིན་པར་འགྱུར། །རྣམ་པར་སྣང་མཛད་ཅེས་བཤད་པར། །དེར་ནི་བདག་ཉིད་ཡང་དག་བསྐྱེད། །རང་སྔགས་བཛྲཾ་ཞེས་བརྗོད་ན། །རྡོ་རྗེའི་རིག་པ་འཛིན་པར་འགྱུར། །རང་ཉིད་རྣམ་པར་སྣང་མཛད་ཅེས། །དེར་ནི་བདག་ཉིད་ཡང་དག་བསྐྱེད། །རང་སྔགས་ཨཾ་ཀུ་ཤཾ་བྱས་ན། །ལྕགས་ཀྱུ་ཞེས་པར་མངོན་བརྗོད་འགྱུར། ། རང་ཉིད་རྣམ་པར་སྣང་མཛད་ཅེས། །དེར་ནི་བདག་ཉིད་ཡང་དག་བསྐྱེད། །རང་སྔགས་པཱ་ཤཾ་ཞེས་བརྗོད་ན། །ཞགས་པའི་རིག་པ་འཛིན་པར་འགྱུར། །ཕྱག་རྒྱ་ཆེ་སོགས་མཚན་ཉིད་ཀྱིས། །རང་གི་གཟུགས་ནི་ཡང་དག་བསྐྱེད། །དེ་ཉིད་ཡིད་བཞིན་ནོར་བུ་མཆོག །རིགས་གཞན་དབྱེ་བས་རྟོགས་པར་བྱ། །འདི་ནི་དམ་ཚིག་སྒྲུབ་ཐབས་ཏེ། །སྒྲུབ་པ་པོ་ཡིས་བསྒྲུབ་པར་བྱ། །སྐྱེ་བ་འདིར་ནི་གྲུབ་པར་འགྱུར། །རང་སྔགས་དྲིལ་བུའི་ཚུལ་གྱིས་ནི། །རང་ཉིད་བདག་པོ་རང་ཉིད་དུ། །ཁྲུ་གང་ཙམ་དུ་ཡང་དག་བསྐྱེད། །སངས་རྒྱས་ཀྱིས་ཀྱང་མཐོང་མི་འགྱུར། །ཆོ་ག་ཤེས་པས་གཞི་རྣམས་ཀྱིའང་། །དེ་ཉིད་སྦྱོར་བས་བསྒོམ་པར་བྱ། །གཟུགས་ཀྱི་དབུས་སུ་རྣམ་བསྒོམས་ནས། །མྱུར་དུ་འགྲུབ་འགྱུར་གཞན་དུ་མིན། །གཟུགས་སུ་སྦྱོར་བའི་མཚན་ཉིད་ཀྱིས། །དེར་ནི་བདག་ཉིད་ཡང་དག་བསྐྱེད། །རང་སྔགས་ཨུཏྤལ་ལྃ་བྱས་ནས། །ཡེ་ཤེས་རིག་པ་འཛིན་པར་འགྱུར། །ཟླ་བའི་དབུས་སུ་རྣམ་བསྒོམས་ནས། །ནམ་མཁའི་སྟེང་དུ་ཡང་དག་བརྩམ། །སྙིང་གར་རྡོ་རྗེ་ཡང་དག་བསྐྱེད། །ཡེ་ཤེས་རིག་པ་འཛིན་པར་འགྱུར། །ཟླ་བའི་གཟུགས་ནི་ཡང་དག་བསྐྱེད། །རྡོ་རྗེ་རིན་ཆེན་རྣམ་བསྒོམ་བྱ། །ཇི་སྲིད་དག་པའི་བདག་ཉིད་འདོད། །དེ་སྲིད་མཁའ་ལ་འགྲོ་བར་འགྱུར། །ཟླ་བའི་གཟུགས་སུ་ཡང་དག་བསྐྱེད། །རྡོ་རྗེ་པདྨ་ལག་པར་དགོད། །པདྨའི་སྤྱན་ནི་བསྒོམ་
པར་བྱ། །ས་བདུན་གྱི་ནི་དབང་ཕྱུག་འགྱུར། ཟླ་བའི་གཟུགས་ནི་རྣམ་བསྒོམས་ནས། འབར་བའི་ཕྲེང་འཁྲུགས་པའི་འོད། སངས་རྒྱས་གཟུགས་ནི་ཀུན་བསྐྱེད་ནས། སངས་རྒྱས་རིག་པ་འཛིན་པར་འགྱུར། རྡོ་རྗེའི་གཟུགས་སུ་རྣམ་བསྒོམས་ནས། སངས་རྒྱས་ལྔ་རུ་རྣམ་བསྒོམ་བྱ། །འོད་ཟེར་ལྔ་ཡིས་ཀུན་བཀང་ནས། །སངས་རྒྱས་སྐུ་དང་མཚུངས་པར་འགྱུར། །བི་སྟ་ར་ཤཿཉི་མའི་གཟུགས་སུ་རྣམ་བསྒོམས་ནས། །ལས་ཀྱི་རྡོ་རྗེ་སྙིང་གར་དགོད། །རང་གི་སྔགས་ནི་ཡང་དག་བསྐྱེད། །རྡོ་རྗེའི་སྐུ་དང་མཉམ་པར་འགྱུར། །ཟླ་བའི་གཟུགས་ནི་རྣམ་བསྒོམས་ནས། །བཛྲོ྅་ཧྃ་ཞེས་བསྒོམ་པར་བྱ། །སྙིང་གར་རྩེ་མོ་ལྔ་པའམ། །རྡོ་རྗེའི་སྐུ་དང་མཉམ་པར་འགྱུར། །ཟླ་བའི་གཟུགས་སུ་རབ་བསྒོམས་ནས། །རྡོ་རྗེ་འབར་བས་རྣམ་བརྒྱན་པ། །རྡོ་རྗེ་སེམས་དཔའ་རང་གི་གཟུགས། །སེམས་དཔའི་གཟུགས་ནི་འཛིན་པར་འགྱུར། །ཟླ་བའི་གཟུགས་སུ་ཡང་དག་བསྐྱེད། །འཁོར་ལོ་འབར་བས་རྣམ་བརྒྱན་པ། རང་གི་གཟུགས་ནི་སངས་རྒྱས་གཟུགས། སངས་རྒྱས་གཟུགས་ནི་འཛིན་པར་འགྱུར། ཟླ་བའི་གཟུགས་ནི་ཡང་དག་བསྐྱེད། །པདྨ་འབར་བས་རྣམ་བརྒྱན་པ། རང་གི་གཟུགས་ནི་ཆོས་ཀྱི་གཟུགས། ཆོས་ཀྱི་གཟུགས་ནི་འཛིན་པར་འགྱུར། ཟླ་བའི་གཟུགས་ནི་ཡང་དག་བསྐྱེད། །དཀར་པོ་འབར་བས་རྣམ་བརྒྱན་པ། །འདོད་པའི་མཆོད་པ་རང་གི་གཟུགས། །འདོད་མཆོད་གཟུགས་ནི་འཛིན་པར་འགྱུར། །དང་པོར་ཡི་གེ་གཅིག་པ་སོགས། །རིག་པའི་རྒྱལ་པོ་སྟོབས་པོ་ཆེ། །རིགས་ཀྱི་བདག་པོའི་ཕྱག་རྒྱ་ཡིས། །རང་གི་ཕྱག་རྒྱ་སོགས་བསྒོམས་པས། སྐུ་གསུང་ཐུགས་ཀྱི་རྡོ་རྗེ་རུ། མཆོག་ཏུ་ཕྲ་བའི་བདག་ཅན་བྱ། དེ་ཉིད་དམ་ཚིག་དབུས་སུ་ནི། རྡོ་རྗེའི་གཟུགས་ནི་སྒོམ་པའོ། །ཉི་མའི་གཟུགས་ནི་རྣམ་བསྒོམས་ནས། མུ་དྲོ྅ཧྃ་ཞེས་སྒོམ་པ་ནི། །སྙིང་གར་སྔགས་ཡིག་བྱས་ནས་ནི། བསྐྱེད་དེ་འདིར་ནི་ཐེ་ཚོམ་མེད། སྔགས་པས་ཉི་མའི་དཀྱིལ་
འཁོར་ཅན། །བསམས་ནས་དབུས་སུ་གཟུགས་བསྒོམ་བྱ། །རྡོ་རྗེའི་གཟུགས་ནི་ཡང་དག་བསྐྱེད། །བསམ་གཏན་འབྱུང་བས་བསྐྱེད་པར་འགྱུར། །ཉེ་སྒྲུབ་ཆོ་ག་བྱས་ནས་ནི། །དངོས་གྲུབ་མཆོག་ནི་བསྒྲུབ་པར་བྱ། །རྡོ་རྗེ་སེམས་དཔའི་ཆོ་ག་ལས། །དེ་ཡིས་འཇིག་རྟེན་གསུམ་སྒྲུབ་འགྱུར། །དང་པོར་རང་གནས་རི་གནས་སུ། །ཟླ་བ་དྲུག་ཏུ་བཟླས་བྱས་ནས། །སྒྲུབ་པ་པོ་ཡིས་རྟག་ཏུ་བསྒྲུབ། །རྡོ་རྗེ་སེམས་དཔའ་ལྷག་པར་གནས། །ཇི་ལྟར་ཀླུ་མོ་ལྷའི་བུ་མོ། །མི་མོའམ་ཡང་ན་ལྷ་མིན་མོ། ། ཇི་ལྟར་རིགས་པར་བཀུག་ནས་ནི། །གསང་བའི་མཆོད་པ་ཡང་དག་བརྩམ། །རྣམ་པར་དབེན་དང་ཡིད་འོང་དང་། །ནགས་དང་དགོན་པ་རྣམས་སུ་ཡང་། །དེ་རུ་བཀུག་ནས་ཉེར་ལོངས་སྤྱོད། །འདོད་ཡོན་ལྔ་ཡི་མཆོག་རྣམས་ཀྱིས། །ཡེ་ཤེས་རྡོ་རྗེ་རབ་བསྐུལ་བས། །དམ་ཚིག་མཉན་པར་བྱ་བ་ཡིན། །རྡོ་རྗེ་སེམས་དཔའ་རང་ཉིད་ཀྱང་། །ཆོ་ག་ཤེས་པས་དགུག་པར་བྱ། །རང་གི་ཕྱག་རྒྱ་དེ་རྣམས་གཟུགས། །རང་གི་བརྗོད་པ་དེ་རྣམས་སྔགས། །དེ་ཉིད་ཕྱག་རྒྱ་བཅིངས་ནས་ནི། །རང་གི་སྔགས་འདི་བཟླས་པར་བྱ། །མཚན་མོ་ཕྱེད་དུ་ཇི་ལྟར་བྱ། །ཉི་མའི་གུང་ལའང་དེ་བཞིན་བརྗོད། །ལྕགས་ཀྱུའི་སྙིང་པོ་དེ་ཉིད་ཀྱིས། །དེ་རྣམས་རབ་ཏུ་བསྒྲུབ་པར་བྱ། །བསྐལ་པ་བསྲེག་པ་ལྟར་བསམས་ནས། །རྡོ་རྗེ་མཚུངས་པས། །སྙིང་པོས་ལྕགས་ཀྱུ་སྦྱར་བྱས་ནས། །བཀུག་ལ་དབང་དུ་བྱ་བ་ཡིན། །ཁྲོ་བོ་ཆེན་པོ་གཤིན་རྗེ་གཤེད། །དེ་བཞིན་ཉིད་དུ་རྟ་མགྲིན་དང་། །རྡོ་རྗེའི་དབྱུག་དང་བཅོམ་ལྡན་འདས། །འཇིག་རྟེན་གསུམ་གྱི་བདག་པོར་བརྗོད། །ཁྲོ་བོ་ཆེན་པོ་མི་གཡོ་བ། །ཁྲོ་གཉེར་ཅན་ཡང་གང་ཞིག་འགྱུར། །ཁྲོ་བོ་ཆེན་པོ་སྟོབས་པོ་ཆེ། །ཁམས་གསུམ་པ་ཡང་དབང་དུ་བྱེད། །བདུད་རྩི་ཞེས་བྱའི་ཁྲོ་བོ་ཆེ། །སྟོབས་ཆེན་ཕ་རོལ་གནོན་པ་པོ། །རྡོ་རྗེ་མི་ཕྱེད་གསུམ་གནས་པ། །སངས་རྒྱས་ཀྱང་ནི་སྐྲོད་པར་བྱེད། །རིག་མ་ཆེན་མོ་དྲི་སོགས་ནི། །
བཅས་པའི་ཕྱག་རྡོར་སྟོབས་ཀྱིས་ནི། །རྡོ་རྗེ་སེམས་དཔའ་རང་ཉིད་ཀྱང་། །ཁམས་གསུམ་པ་ཡང་འབེབས་པར་བྱེད། །ཕོ་ཉ་ཆེན་པོ་རྡོར་སེན་མོ། །རབ་གཏུམ་ལ་སོགས་རྡོ་རྗེ་ཅན། །ནམ་མཁའི་ཁམས་ཀུན་གང་བ་ཡི། །དུག་ནི་སྐད་ཅིག་ལས་འཇོམས་བྱེད། །དེ་ནས་བཅོམ་ལྡན་འདས་རྣམ་པར་སྣང་མཛད་དམ་ཚིག་ཐམས་ཅད་རྣམ་པར་སྐྲོད་པར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་གཤིན་རྗེ་མཐར་བྱེད་ཅེས་བྱ་བའི་རྡོ་རྗེའི་སྔགས་འདི་གསུངས་སོ། །ན་མོ་བཛྲ་ཛྙཱ་ནཱ་ཡ། ས་མ་ཡ་ས་ཏྭཱ་ནཱྃ། ཀ་ར་ཀ་ར། ཀུ་རུ་ཀུ་རུ། མ་མ་ཀཱརཾྱ་བྷཉྫབྷཉྫ། སརྦ་བིགྷྣའཾ་ད་ཧ་ད་ཧ། སརྦ་བི་ནཱ་ཡ་ཀཱཾ། མཱུརྡྷ་ཌ་ཀ་ཛཱི་བི་ཏཱནྟ་ཀ་ར། མ་ཧཱ་བི་ཀྲྀ་ཏ། རཱུ་པི་ཎེ་པ་ཙ་པ་ཙ། སརྦ་དུཥྚཱཾ། མ་ཧཱ་ག་ཎ་པ་ཏི། ཛཱི་བི་ཏཱནྟ་ཀ་ར་བནྡྷ་བནྡྷ། སརྦ་གྲ་ཧཱཾ། ཥ་ཌ་མུ་ཁ་ཥཌ་བྷུ་ཛ། ཥཌ་ཙ་ར་ཎཱཾ། རུ་དྲ་མཱ་ན་ཡ། བིཥྞུ་མཱ་ན་ཡ། བྲཧྨཱ་དྱཱཾ་སརྦ་དེ་བཱ་མཱ་ན་ཡ། མཱ་བི་ལམྦ་མཱ་བི་ལ་མྦ། ལ་ཧུ་ལ་ཧུ། མཎྜ་ལམ་དྷྱེ། བྲ་བེ་ཤ་ཡ། ས་མ་ཡ། མ་ནུ་སྨ་ར། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། དེ་ནས་འདི་ནི་གསུངས་པ་ཙམ་ལ་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་ཉིད་སྣ་ཚོགས་པའི་གཟུགས་འཛིན་པར་གྱུར་ནས། ནམ་མཁའི་ཁམས་ཐམས་ཅད་ཀྱི་རྡུལ་ཕྲ་མོ་དང་མཉམ་པའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀའི་སྟེང་དུ་ཟླ་བའི་དཀྱིལ་འཁོར་དུ་གནས་པར་གྱུར་ཏོ། །རང་གི་གཟུགས་ཀྱིས་ནམ་མཁའི་ཁམས་ཀུན་ཏུ་བཀང་ནས། ཆེད་དུ་བརྗོད་པས་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱིས་ནི། །རྡོ་རྗེ་མི་ཕྱེད་བླ་ན་མེད། །དེ་བཞིན་གཤེགས་པའི་རྡོ་རྗེ་གང་། །ས་ཡི་གོང་བུར་འགྱུར་བར་བྱེད། ། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་ངོ་བོ་ཉིད་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་སྒྱུ་མར་བརྗོད་པ་ཞེས་བྱ་བའི་སྔགས་འདི་སྟོན་པར་མཛད་དོ། །ཨོཾ་བཛྲ་ཁུ་ར་བི་ཀྲྀ་ཏཱ་ན་ན་ཧཱུྃ་ཕཊ། དེ་ནས་འདི་ནི་གསུངས་
ཙམ་ལ། །བཅོམ་ལྡན་ཆོས་འཆང་དེ་ཉིད་ནི། །དེ་བཞིན་གཤེགས་ཀུན་ཀུན་སྐྲག་པའི། །ཆེད་དུ་བརྗོད་འདི་ཆེད་རྗོད་མཛད། །ཨེ་མའོ་སྔགས་རྣམས་ཐམས་ཅད་ཀྱི། །རྣམ་ཀུན་དེ་ཉིད་སྟོན་པ་པོ། །འཇོམས་བྱེད་རྡོ་རྗེ་རྒྱལ་མཚན་གྱིས། །སངས་རྒྱས་ཐམས་ཅད་བཞག་པར་གྱུར། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་ནམ་མཁའི་ཁམས་ཐམས་ཅད་ཀུན་དུ་སྣང་བར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྔགས་ཆེན་པོ་འདི་སྟོན་པར་བྱེད་དོ། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བིདྷྭནྶ་ས་ཨུ་ཙྪུཥྨ་ཀྲོ་དྷ་ཧཱུྃ་ཕཊ། དེ་ནས་འདི་གསུངས་པ་ཙམ་ལ་བཅོམ་ལྡན་འདས་རྡོ་རྗེ་འཆང་དེ་ཉིད་ནམ་མཁའི་ཁམས་ཐམས་ཅད་ཀུན་དུ་སྣང་བར་བྱས་ནས། དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་འོད་ཟེར་གྱིས་ཀུན་དུ་བཀང་ནས་ཆེད་དུ་བརྗོད་པས་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱིས་ནི། །སྔགས་ཀྱི་ཚུལ་གྱི་བདག་ཉིད་ང་། །སངས་རྒྱས་ཀུན་གྱི་སངས་རྒྱས་ཉིད། །ཟླ་བ་དྲུག་གིས་ཐོབ་པར་འགྱུར། །དེ་ནས་བཅོམ་ལྡན་འདས་སླར་ཡང་ནམ་མཁའི་ཁམས་ཐམས་ཅད་ཀྱི་ངོ་བོ་ཉིད་ཀྱི་ཚུལ་གསལ་བར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་མི་གཡོ་བ་ཞེས་བྱ་བའི་སྔགས་འདི་གསུངས་སོ། །ན་མཿས་མནྟ་བཛྲཱ་ཎཱཾ་ཨ་ཙ་ལ་ཀཱ་ན་ཧེ་ཧེ་མོ་ཧ་ཡ་མོ་ཧ་ཡ། ཧ་ས་ཧ་ས། ཏིཥྛ་ཏིཥྛ། ཨཱ་བི་ཤ་ཨཱ་བི་ཤ། མ་ཧཱ་བ་ལ་མནྟྲ་ཙ་ལ་དྷུ་ན་དྷུ་ན། ཏི་ན་ཏི་ན། ཁཱ་ད་ཁཱ་ད། བིགྷནཱཾ་མཱ་ར་ཡ་མཱ་ར་ཡ། དུཥྚཱ་ན་བྷཀྵ་ཡ་བྷ་ཀྵ་ཡ། སརྦཱཾ་ཀ་ར་ཀ་ར། ཀི་རི་ཀི་རི། མ་ཧཱ་བི་ཥ་མ་བཛྲཱ་སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཏྲི་བ་ལི་ཏ་རདྷཱ་ནརྟ་ཀཿཨཱྃ་ཧཱྃ་ཨཱྃ་ཨཱྃ་ཧཱྃ། ཨ་ཙ་ལ་ཙ་ཊ། སྥོ་ཊ་ཡ་སྥོ་ཊ་ཡ། ཧཱུྃ་ཨེ། ས་མནྟི་ཀ་ཏྲཱ་ཊ། མ་ཧཱ་བ་ལ། སཱ་ཏ་ཡ། ཏྲཱྃ་ཧཱྃ་མཱྃ་ཤུདྷྱནྟུ་ལོ་ཀ་སྟུཥྱ་སྟུ། བཛྲཱི་ན་མཤྩནྡ་པྲ་ཏི་ཧ་ཏ་བ་ལེ་བྷྱོ་ཛྭཱ་ལ་ཡ་ཏྲཱ་ཊ། ཨ་ས་ཧ་ན་མཿས་ཧཱ། དེ་ནས་མངག་གཞུག་གི་ཁྲོ་བོ་འདི་གསུངས་
པ་ཙམ་ལ། བཅོམ་ལྡན་འདས་གཟུགས་སྣ་ཚོགས་འཆང་ཆེན་པོ་དེ་ཉིད་ཐམས་ཅད་ཡང་དག་པར་བསྐྱེད་ནས། དེ་བཞིན་གཤེགས་པ་ཐམས་ཅད་ཀྱི་སྙིང་པོའི་དཀྱིལ་འཁོར་དུ་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །དེ་ཉིད་འབྱུང་བ་བསྟན་པ་ང་། །རྡོ་རྗེ་མི་ཕྱེད་རང་བཞིན་གྱིས། །ཡེ་ཤེས་རྟོག་གིས་སྐྱེད་པར་བྱེད། །དེ་ནས་བཅོམ་ལྡན་འདས་སླར་ཡང་དེ་བཞིན་གཤེགས་པ་ཐམས་ཅད་ཀུན་དུ་སྐྲག་པར་བྱེད་པའི་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་ཆེན་པོ་ཁྲོ་གཉེར་ཅན་ཞེས་བྱ་བའི་སྔགས་འདི་གསུངས་སོ། །ན་མོ་བྷ་ག་བ་ཏྱཻ་བྷྲྀ་ཀུ་ཊྱཻ། ཨོཾ་བྷྲྃ་ཀུ་ཊྀཏ་རངྒ་བཛྲྀ་མྦྷི་ཏ་བཛྲ་མ་ཧཱ་བ་ལ་ཧཱུྃ་ཕཊ། དེ་ནས་འདི་གསུངས་པ་ཙམ་ལ་འདོད་ཆགས་ཆེན་པོ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་དེ་བཞིན་གཤེགས་པ་ཀུན་གྱི་ཆོས་ཀྱིས་ཀུན་དུ་སྣང་བ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་གནས་པ་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །ཆོས་ཀྱི་འདོད་ཆགས་ཀུན་བསྡུས་པ། ། རྡོ་རྗེ་ཡེ་ཤེས་ལྟ་བུ་སྟེ། །སྔགས་ཀྱི་དངོས་གྲུབ་ཅེས་བཤད་དོ། །དེ་ནས་བཅོམ་ལྡན་འདས་སླར་ཡང་ཀུན་ནས་སྤྲོ་བའི་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་སྟོབས་པོ་ཆེ་ཞེས་བྱ་བའི་སྔགས་འདི་གསུངས་སོ། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བི་དྷཱ་ནྶ་ཡ་ཨུ་ཙྪུཥྨ་ཀྲོ་དྷ་ཧཱུྃ་ཕཊ། དེ་ནས་འདི་གསུངས་པ་ཙམ་ལ་བཅོམ་ལྡན་འདས་གསང་བ་ཆེན་པོ་འཛིན་པ་དེ་བཞིན་གཤེགས་པ་ཐམས་ཅད་ཀྱི་གསང་བ་རྣམས་ཀྱིས་དེ་བཞིན་གཤེགས་པ་ཐམས་ཅད་ཀྱིས་གསུངས་པ་གང་ཡིན་པ་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །རྡོ་རྗེའི་དབྱེ་བ་བླ་ན་མེད། །དེ་ཉིད་དམ་ཚིག་ཀུན་དུ་དག །རྡོ་རྗེ་ཡིད་བཞིན་ནོར་བུར་བཤད། །དེ་ནས་བཅོམ་ལྡན་འདས་སླར་ཡང་དེ་བཞིན་གཤེགས་པ་ཐམས་ཅད་མི་
ཕྱེད་པའི་ངོ་བོ་ཉིད་ཀྱི་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་བདུད་རྩི་ཐབ་སྦྱོར་དུ་བརྗོད་པ་ཞེས་བྱ་བའི་སྔགས་ཆེན་པོ་འདི་གསུངས་སོ། །ཨོཾ་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བྷནྦྷ་བྷནྦྷ། གྲྀཧྞ་གྲྀཧྞ། ཧ་ན་ཧ་ན། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ།ཛྭ་ལ་ཛྭ་ལ། པྲ་ཛྭཱ་ལ་པྲ་ཛྭཱ་ལ། གྲ་ས་གྲ་ས། སརྦ་བིགྷཱཾ་བི་ནཱ་ཡ་ཀཱཾ། པིདྱཱ་དྷ་རེ། ཀི་ལཱི་ཀི་ལ་ཛྭ་ལི་ཏ་ཧུ་ཏ་བ་ཧ་ཤི་ར་མ་ཧཱ། བྷཻ་ར་བེ་ནི་རྒྷོཥ། སཾ་ཙྪིནྡ་ཙྪིནྡ། མ་ཧཱ་བཛྲ་དྷཱ་ར། ཏིཥྛ་ཏིཥྛ། བནྡྷ་བནྡྷ། བདག་ཆེ་གེ་མོའི། བི་ནཱ་ཡ་ཀ་ཧྲྀ་ད་ཡཱཾ། སྥོ་ཊ་ཡ། གནྡྷ་རྦ་ཧྲྀད་ཡཱཾ། སྥོ་ཊ་ཡ། ནཱ་ག་ཧྲྀ་ད་ཡཱཾ། སྥོ་ཊ་ཡ། ཡཀྵ་ཧྲྀ་ད་ཡཱཾ། སྥོ་ཊ་ཡ། བྲཧྨ་རཱཀྵ་ས་ཧྲྀ་ད་ཡཱཾ་སྥོ་ཊ་ཡ། སརྦ་གྲ་ཧ་ཧྲྀ་ད་ཡཱཾ་སྥོ་ཊ་ཡ། སརྦ་ཛྭ་ར་ཧྲྀ་ད་ཡཱཾ་སྥོ་ཊ་ཡ། སརྦ་ཙཱ་ཏུརྠི་ཀ་ཧྲྀ་ད་ཡཱཾ་ད་ཡཱཾ་སྥོ་ཊ་ཡ། ཧཱུྃ་ཀཱ་རེ་ཕཊ་ཕཊ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། བི་ཀུརྦ་བི་ཀུརྦ། ཨཱ་བི་ཤ་ཡཱ་བི་ཤ།མ་ཧཱ་བཛྲ་དྷ་ར་ཨཱཛྙཱ་པ་ཡ་ཏི་སྭཱ་ཧཱ། དེ་ནས་འདི་གསུངས་པ་ཙམ་ལ་བཅོམ་ལྡན་འདས་རྡོ་རྗེ་འཛིན་པ་ཉིད། དེ་བཞིན་གཤེགས་པ་ཐམས་ཅད་ཀུན་དུ་དགྱེས་པ་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །དེ་ཉིད་རྡོ་རྗེ་བླ་ན་མེད། །དམ་ཚིག་ཐམས་ཅད་ཡང་དག་འབྱུང་། །དེ་ཉིད་མི་ཕྱེད་ཀུན་བསྡུས་པའོ། །དེ་ནས་བཅོམ་ལྡན་འདས་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་གཱནྡྷ་རཱི་ཆེན་མོ་འདི་གསུངས་སོ། །ཨོཾ་ཨེ་ཧྱེ་ཧི་བྷ་ག་བ་ཏི་མ་ཧཱ་བཛྲ་གཱནྡྷ་རི་ཏྲ་ཡཱ་ཎཱཾ་རཏྣ་ནཱཾ་ས་ཏྱེ་ན། ཨཱ་ཀཌྷྱ་ཨཱ་ཀཌྷྱ། བ་ལ་དེ་བཾ། མ་ཧེ་ཤྭ་རཾ། ག་རུ་ཌཾ། བིཥྞུཾ། ཀུ་མཱ་རཾ། བྲ་ཧྨ་ཎཾ། ཨིནྡྲཾ། ཙནྡྲཾ། ཨཱ་དི་ཏྱཾ། ཡ་མཾ། བ་རུ་ཎཾ། ཀུ་བེ་རཾ། དྷྲྀ་ཏ་རཱཥྚཾ། བི་རུ་ཌྷ་ཀཾ། བི་རཱུ་པཱ་ཀྵཾ། ཤངྐུ་ཀརྞཾ། གོ་ཀརྞཾ། སྠཱུ་ལ་ཀརྞཾ། ནཱནྡི་ཀེ་ཤྭ་རཾ། བྷཱྀཾ་གི་རཱི་ཊིཾ། ནཱ་ཡ་ཀཾ །བི་ནཱ་ཡ་ཀཾ །པཱཉྩི་ཀཾ །ལོ་ཧ་ཀཾ། ཥཥྛི་དེཝཱི། ཀོ་ཊ་གི་རིཾ། ཨོཾ་ཀཱ་རིཾ། དུརྒཾ་ཀཱ་ཏྱ་
ཡ་ཎཱི། ཙཎྜ་ཀཱཏྱ་ཡ་ཎཱི། མ་ཧཱ་ཀཱ་ཏྱ་ཡ་ཎཱི། ཨཻ་ཤཱ་ནཱི། ནཻ་རིཏྱཱ། ཀཱ་ལཱི། མ་ཧཱ་ཀཱ་ལཱི། བཛྲ་ཀཱ་ལཱི། ཡ་ཤ་སཱི་ནཱི། ས་ཀཱ་ལཱི། གྷ་ཏྲ་ཀཱ་ལཱི། ཨགྣེ་ཡཱ། བཱ་ཡ་བྱཱ། ཧ་ལི་ཀཱ། བིརྟཾ། ཤཀྟི། ཤ་ཏཱ་ཀྵི། ཨིནྡྲ་ཎཱི། བྲཧྨ་ཎཱི། ཀཽ་བེ་བཱི། མཱ་ཧེ་ཤཱ་རཱི། བཻཥྞ་བཱི། སུ་བྷ་གཱ། ཙཱ་མུཎྜཱ། རཽ་ཏྲི། བཱ་རཱ་ཧཱི། ཀཽ་བེ་རཱིཾ། ཡེ་ཙཱ་ནྱེ། མ་མ་ཡེ་ན། ཏིཥྛནྟི། ཏཱ་ནྱཱ་བརྟ་ཡིཥྱཱ་མི་ཤཱི་གྷྲཾ། གྲྀཧྣ་གྲྀཧྣ། ཧུ་ལུ་ཧུ་ལུ། ཙུ་ལུ་ཙུ་ལུ།མུ་ལུ་མུ་ལུ། དྷ་མ་དྷ་མ། རངྒ་རངྒ། པཱུ་ར་ཡ་པཱུ་ར་ཡ། ཨཱ་བི་ཤ་ཨཱ་བི་ཤ། བྷ་ག་བ་ཏི། མ་ཧཱ་བཛྲ་གཱནྡྷ་རི་སིདྡྷ་ཥྩཎྜ། བཛྲ་བཱ་ཎི། རཱཛྙཱ་པ་ཡ་ཏི། ཧྲཱིཿཧཿཧཿཧཿཧ༔ཧཱུྃ་ཕཊ་སྭཱ་ཧཱ། འདི་གསུངས་པ་ཙམ་ལ་དེ་བཞིན་གཤེགས་པ་ཐམས་ཅད་རྡོ་རྗེ་ཆེན་པོའི་ཚུལ་གྱིས་བསྐོར་བར་གྱུར་ཏོ། །དེ་ནི་དེ་བཞིན་གཤེགས་པ་ཐམས་ཅད་ཀྱི་རིག་མ་དེ་སྒྲོགས་པར་བྱེད་པ་འདི་ཆེད་དུ་བརྗོད་པས་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །ཀུན་གཞི་འབད་པར་བྱེད་པ་བདག །རྡོ་རྗེ་རྩེ་ཅན་གང་འདི་དྲན། །སངས་རྒྱས་ལ་སོགས་འབེབས་པར་འགྱུར། །དེ་ནས་བཅོམ་ལྡན་འདས་སླར་ཡང་ཞི་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་སེན་མོ་ཞེས་བྱ་བའི་ཕོ་ཉ་མོ་ཆེན་མོ་འདི་གསུངས་སོ། །ཨོཾ་ཨེ་ཧྱེ་ཧི་བཛྲ་ན་ཁི་བཛྲ་མུ་ཁི། ཧ་ན་ཧ་ན། པ་ཙ་པ་ཙ། རངྒ་རངྒ། ཨལྤ་ཨལྤ། ཨཱ་བི་ཤ་ཨཱ་བི་ཤ། ཧ་ཡ་གྲཱི་བཱ། པ་ཡ་ཏི་སྭཱ་ཧཱ། དེ་ནས་འདི་གསུངས་པ་ཙམ་ལ་ཇི་སྲིད་དུ་དུག་ཆེན་པོ་དེ་རྣམས་ཐམས་ཅད་དེ་རབ་ཏུ་བསྒོམས་པས་བཅོམ་པ་བཞིན་དུ་གྱུར་ཏོ། །དེ་ནས་རིག་མ་དེ་དེ་བཞིན་གཤེགས་པ་ཐམས་ཅད་ལ་རབ་ཏུ་བཏུད་ནས་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །དུག་རྣམས་ཐམས་ཅད་སེལ་བ་བདག །ཕོ་ཉའི་མཆོག་གང་དེ་བརྟེན་ནས། །སངས་རྒྱས་ཐམས་ཅད་རྣམ་པར་སྦྱངས། །དེ་ནས་བཅོམ་ལྡན་འདས་སླར་ཡང་རྡོ་རྗེ་གསུམ་མི་ཕྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ནས། རྡོ་རྗེ་གཞན་གྱིས་མི་ཐུབ་པ་ཞེས་བྱ་བའི་སྔགས་འདི་གསུངས་སོ། །ཨོཾ་ཛི་ན་རི་ཊི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ནས་འདི་གསུངས་པ་ཙམ་ལ་བཅོམ་ལྡན་འདས་རྣམ་པར་སྣང་མཛད་ཆེན་པོ་འདི་སེམས་ཅན་ཐམས་ཅད་ཀྱི་བདེ་བའི་ནོར་གྱིས་ཉེ་བར་བཀང་ནས་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །བསྐྱེད་པ་ཡང་དག་འབྱུང་བ་བདག །སངས་རྒྱས་བྱང་ཆུབ་རབ་བསྒྲུབ་དོན། །བསྐལ་པའི་རྒྱ་མཚོར་བདག་གནས་སོ། །དེ་ནས་བཅོམ་ལྡན་འདས་སླར་ཡང་ཆོས་ཀྱི་དབྱིངས་སུ་སྤྲོ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་རལ་པ་གཅིག་མ་ཞེས་བྱ་བའི་རིག་མའི་རྒྱལ་པོ་མཆོག་འདི་གསུངས་སོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་བིདྱཱ་ག་ཎེ་བྷྱཿ། ཨོཾ་ཨེ་ཧྱེ་ཧི་བྷ་ག་ཝ་ཏི། ཡཀྵི་ཎཱི་ཡེ། མཱ་པེ་ཊི་ཨི་ཊི་པ་ཊེ་ཛོ་སུ་ར་སུ་ར་པྲ་མ་ཐ་ནི། ཨེ་ཀ་ཛ་ཊི་ནི་རཀྟ་ས་ཧི་ཏ་དེ་བི་མ་བི་ཧེ་ཐ་ཡ་ནི། རི་པི་ཏི་རི་ཀ་རི། ཏ་ཡཱི་རཱི། ཀ་པཱ་ལ་ཙྪ་ཏྲ། པྲི་ཡེ་མ་ཧཱ་ཀ་པཱ་ལི། མ་ཧཱ་བ་ལ། མ་ཧཱ་ཙ་པ་ལེ། སིདྡྷི་སརྦ་ཨརྠ། སཱ་དྷ་ཡ། སརྦ་སཏྭ་བིགྷྣ་པྲ་ཤ་མ་ནི་སྭཱ་ཧཱ། དེ་ནས་འདི་གསུངས་པ་ཙམ་གྱིས་བཅོམ་ལྡན་འདས་པདྨ་འཆང་བ་དེ་ཉིད་ནམ་མཁའི་ཁམས་ཐམས་ཅད་རྣམ་པར་སྤྲོས་ནས། དེ་བཞིན་གཤེགས་པ་ཐམས་ཅད་ཀྱི་ཅོད་པན་དུ་གནས་ནས་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །སྔགས་ཀྱི་བདག་ཉིད་ཅན་འབྱུང་བ། །རྒྱལ་བ་ཀུན་གྱི་ཞི་གང་དེ། །རྣམ་པར་བསྒོམས་པས་མཆོད་པར་བྱེད། །དེ་ནས་བཅོམ་ལྡན་འདས་འཁོར་ལོ་ཐམས་ཅད་ཀུན་དུ་སྐྲག་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་ཆེན་པོ་ཁྲོ་གཉེར་ཅན་འདི་གསུངས་སོ། །ཨོཾ་བྷ་ཡ་ནཱ་ཤ་ནི་ཏྲཱ་ས་ཡ་ཏྲཱ་ས་ཡ། བྷྲྀ་ཀུ་ཊི་ཏ་ཊི་བཻ་ཏ་ཊི་ཤྭེ་ཏེ་ཛ་ཊི་ནི་སྭཱ་ཧཱ། དེ་ནས་འདི་གསུངས་པ་ཙམ་ལ་བཅོམ་ལྡན་འདས་ཞི་བ་འཆང་བ་དེ་ཉིད་དེ་བཞིན་གཤེགས་པ་
ཐམས་ཅད་ཡང་དག་པར་མཆོད་ནས་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །ཊ་གང་སངས་རྒྱས་ཡང་དག་འབྱུང་། །ཆོས་ཀྱི་ཡུམ་ནི་རབ་བསྒྲུབ་དོན། །འདི་ནི་བསྐྱེད་པར་གསུངས་པ་ཡིན། །དེ་ནས་བཅོམ་ལྡན་འདས་སླར་ཡང་ཡེ་ཤེས་འདུ་བར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རང་གི་རིགས་ཀྱི་སྙིང་པོ་འདི་གསུངས་སོ། །ཨོཾ་ཨཱ་རོ་ལིཀ །དེ་ནས་བཅོམ་ལྡན་འདས་སེམས་ཅན་ཐམས་ཅད་ཀྱི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རིགས་ཀྱི་ཡུམ་འདི་གསུངས་སོ། །ཨོཾ་རུ་རུ་སཱུ་རུ་ཛྭ་ལ་ཏིཥྛ་སིདྡྷི་ལོ་ཙ་ནེ་སརྦ་ཨརྠ་སཱ་དྷ་ནི་སྭཱ་ཧཱ། དེ་ནས་བཅོམ་ལྡན་འདས་སླར་ཡང་རང་གི་སྐུ་རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་གསུངས་སོ། །ཨོཾ་ཤངྒ་རི་ཤཱནྟི་ཀ་རེ་གྷུ་ཊ་གྷུ་ཊ་གྷུ་ཊི་ནི་གྷུ་ཊི་ནི། གྷཱ་ཏ་ཡ་གྷཱ་ཏ་ཡ། གྷུ་ཊི་ནི་ཧཱུཾ་ཕཊ་སྭཱ་ཧཱ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་བསྐྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་སྔགས་འདི་གསུངས་སོ། །ཨོཾ་ཤྭེ་ཏི་པཱ་ཎྜ་ར་བཱ་སི་ནི་ཛ་ཊཱ་མ་ཀུ་ཊ་དྷཱ་རི་ཎི་སྭཱ་ཧཱ། དེ་ནས་བཅོམ་ལྡན་འདས་སངས་རྒྱས་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པར་ཞུགས་ནས་རིག་པའི་རྒྱལ་པོ་འདི་གསུངས་སོ། །ཨོཾ་དྷཱུཿདེ་ནས་བཅོམ་ལྡན་འདས་ཀྱིས་རིག་པའི་རྒྱལ་པོ་ལ་བཀའ་སྩལ་པ། ཨོཾ་སུམྦྷ་ནི་སུམྦྷ་ཧཱུྃ། གྲྀགྣ་གྲྀཧྣ་ཧཱུྃ། གྲྀ་ཧྣ་པ་ཡ་གྲྀ་ཧྣཱ་པ་ཡ་ཧཱུྃ། ཨཱ་ན་ཡ་ཧོ་བྷ་ག་ཝཱཾ་བིདྱཱ་རཱ་ཛ་ཧཱུྃ་ཕཊ་སྭཱ་ཧཱ། དེ་ནས་བཅོམ་ལྡན་འདས་ཆོས་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་གསུངས་སོ། །ཨོཾ་ཨ་མྀ་ཏོདྦྷ་བོདྦྷ་བཱ་ཡ་སྭཱ་ཧཱ། དེ་ནས་བཅོམ་ལྡན་འདས་ཉོན་མོངས་པ་འཇོམས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཉོན་མོངས་པ་ཟ་བའི་སྔགས་འདི་གསུངས་སོ། །ཨོཾ་ཀླེ་ཤཱ་ས་ནི་བི་ཛ་ཡེ་སྭཱ་ཧཱ། དེ་ནས་བཅོམ་
ལྡན་འདས་དམ་ཚིག་ཆེན་པོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆོས་ཀྱི་འཁོར་ལོའི་གཙུག་ཏོར་འདི་གསུངས་སོ། །ཨོཾ་ཙྪིནྡ་ཙྪིནྡ། ཧ་ན་ཧ་ན། ད་ཧ་ད་ཧ། དཱིཔྟ་ཙཀྲ་ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གཟི་བརྗིད་ཀྱི་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གཟི་བརྗིད་ཕུང་པོ་འདི་གསུངས་སོ། །ཨོཾ་ཛྭ་ལ་ཛྭ་ལ། དྷ་ཀ་དྷ་ཀ། ད་ར་ད་ར། བི་ད་ར་བི་ད་ར། ཚིནྡ་ཚིནྡ། བྷིནྡ་བྷིནྡ། ཧཱུྃ་ཧཱུྃ་ཕཊ་སྭཱ་ཧཱ། དེ་ནས་བཅོམ་ལྡན་འདས་དཀར་པོ་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྒྱལ་བའི་གཙུག་ཏོར་འདི་གསུངས་སོ། །ཨོཾ་ཛ་ཡོཥྞཱི་ཥ་ཛྭ་ལ་ཛྭ་ལ། བནྡྷ་བནྡྷ། ད་མ་ད་མ། ཧཱུྃ་ཧཱུྃ་ཧཱུྃ། ཧ་ན་ཧ་ན་ཧཱུྃ་ཕཊ། དེ་ནས་བཅོམ་ལྡན་འདས་དཀར་པོ་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། གཙུག་ཏོར་གདུགས་དཀར་པོ་འདི་གསུངས་སོ། །ཨོཾ་མ་མ་མ་མ་ཧཱུྃ་ནིཿ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རིག་མ་ཆེན་མོའི་མཆོག་འདི་གསུངས་སོ། །ཨོཾ་ཏཱ་རེ་ཏུཏ་ཏཱ་རེ་ཏུ་རེ་སྭཱ་ཧཱ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངེས་པར་སྒོམ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཁྲོ་བོ་གཟེགས་མའི་སྔགས་ཆེན་པོ་འདི་གསུངས་སོ། །ཨོཾ་ཀ་ནི་དྷུ་ནི་ཧཱུྃ་ཕཊ། འཇིག་རྟེན་གསུམ་འགུགས་པར་བྱེད་པའི་སྔགས་ཤིན་ཏུ་མ་རུངས་པའི་ལས་ཏེ་ཇི་སྲིད་དུ་གདོན་གཞན་འབྱུང་བ་གང་ཡིན་པ་དེའང་དེ་ཁོ་ན་ཉིད་ཀྱི་རྣལ་འབྱོར་བསྒོམས་པས་ལས་རྣམ་པ་གསུམ་བྱེད་དོ། །མི་གཡོ་ཞེས་བྱའི་ཁྲོ་བོ་ཆེ། །གཤིན་རྗེ་མཐར་བྱེད་གསུམ་འབྱུང་བ། །ཀུན་ནས་སངས་རྒྱས་ཞིང་རྣམས་སུ། །ཁམས་གསུམ་པ་ཡང་དེས་འཇོམས་བྱེད། །ཁྲོ་བོ་ཆེན་པོ་རྟ་མགྲིན་དང་། །
ཁྲོ་གཉེར་རིམ་པར་ལྡན་གྱུར་གང་། །རྡོ་རྗེ་སེམས་དཔའ་རང་ཉིད་ཀྱང་། །ཁྲོ་བོ་འདི་ཡིས་འཇོམས་པར་བྱེད། །སྟོབས་ཆེན་བདུད་རྩི་ཞེས་གྲགས་དག །མི་ཤེས་འཇིག་ཅིང་འཕྲོག་བྱེད་པ། །ནམ་མཁའི་ཁམས་དང་མཚུངས་པ་ཡང་། །ཐེ་ཚོམ་མེད་པར་འཇོམས་པར་བྱེད། །འབུམ་དུ་བཟླས་པའི་སྦྱོར་བ་ཡིས། །ཀུན་དུ་སོན་པར་བྱེད་པ་ཡིན། །བློ་ལྡན་སངས་རྒྱས་ཉིད་ཐོབ་པའང་། །འགུགས་པར་བྱེད་པར་ཐེ་ཚོམ་མེད། །ཁྲོ་གཉེར་ཙཻ་ཀ་ཊ་རིག་མ། །འཇིགས་པ་ཡང་ནི་འཇིགས་པར་བྱེད། །ལྷ་མིན་ཆེན་པོ་སོགས་སྦྱོར་བས། །གཡུལ་དུ་རྒྱལ་བར་བྱེད་པ་ཡིན། །ཁྲོ་བོ་གཟེགས་མའི་མཆོག་རྩེར་སྐྱེས། །སྔགས་པས་འབུམ་ཕྲག་གཅིག་བཟླས་བྱ། །ཁྲོ་བའི་སེམས་ཀྱིས་སྦྱར་བྱས་ན། །ངེས་པར་སངས་རྒྱས་ཀྱང་འཇིགས་བྱེད། །ལག་པར་དེ་ནི་ཡང་དག་བསྐྱེད། །མི་སྨྲ་དེར་སོན་བསམ་པ་ཡིས། །ཕ་རོལ་དཔུང་ནི་རེངས་པར་བྱེད། །བརྒྱ་བྱིན་གྱི་ཡང་ཐེ་ཚོམ་མེད། །གཟི་བརྗིད་ཕུང་པོ་བཟླས་ནས་ནི། །འབུམ་ཕྲག་གསུམ་དུ་ལེགས་བསྐོར་ན། །བརྒྱ་བྱིན་སྡེ་ཡང་རེངས་པར་བྱེད། །འགའ་ཞིག་མིན་པར་འཇོམས་པར་བསྟན། །སྒྲོལ་མ་སྒྲོལ་ལེན་ཡང་དག་འབྱུང་། །འབར་བའི་ཡེ་ཤེས་དགེ་འབྱུང་བ། །འོག་གི་སྦྱོར་བ་བསྒོམས་པ་ཡིས། །རྡོ་རྗེའི་སྡེ་ཡང་རེངས་པར་བྱེད། །དེ་ཡི་སྙིང་པོའི་མཆོག་སྐྱེས་གང་། རིགས་དང་རིགས་དབང་རིག་པར་བྱེད། །དེ་དང་ཡང་ན་འདི་ཉིད་དུ། །སྦྱོར་བར་བསམས་ནས་བསམ་གཏན་གྱི། །ཏིང་འཛིན་བསྒོམ་པས་སེར་པོའམ། །གཞན་དུ་དམར་པོར་ངེས་སྦྱར་བྱ། །བཅོམ་ལྡན་འདས་རྣམ་པར་སྣང་མཛད་ཀྱིས་དེ་སྐད་ཅེས་གསུངས་སོ། །སྔགས་ཐམས་ཅད་ཀྱི་རྡོ་རྗེ་འབྱུང་བ་ཞེས་བྱ་བའི་ལེའུ་བཅྭ་ལྔ་པ་རྫོགས་སོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་སྔགས་ཐམས་ཅད་ཀུན་ལས་བཏུས་པའི་ལེའུ་གསུངས་སོ། །ཞི་བ་རྒྱས་པ་སོགས་ལས་ལ། །རང་གཟུགས་རྣམ་པ་བསྒོམ་པ་
ཡིས། །ཐུགས་ཀར་ཡེ་ཤེས་ཡང་དག་འབྱུང་། །ཅོད་པན་ཡེ་ཤེས་ཆོས་དབང་ཕྱུག །སངས་རྒྱས་གཟུགས་སུ་རྣམ་བསྒོམས་ནས། །རིན་ཆེན་སྣ་ཚོགས་མཚུངས་པའི་འོད། །རྣལ་འབྱོར་པས་བསྡུས་གོང་བུར་བྱ། །སངས་རྒྱས་གཟུགས་ནི་རྣམ་བསྒོམ་བྱ། །ཁྲོ་བོ་རྣམས་ཀྱི་སྟོན་པ་འདི། །རྡོ་རྗེ་འབྱུང་བ་སྒོམ་བྱེད་པ། །དེ་ཡིས་ངོ་བོ་རྣམ་བསྒོམས་པས། །རིགས་དང་རིགས་སུ་འདི་བསྟན་ནོ། །རིགས་ཀྱི་དབང་ཕྱུག་རྣམ་བསྒོམས་ནས། །ཁ་དོག་ལྔ་པ་ལེགས་མཛེས་པར། །སྒོམ་པའི་གོ་འཕང་གིས་བསྒོམ་བྱ། །སླར་ཡང་རིགས་ཀྱི་བདག་པོའི་སྔགས། །འདི་ཉིད་བསྒོམ་པར་བྱ་བ་སྟེ། །གཙུག་ཏོར་ཡང་ནི་རྣམ་བསྒོམ་བྱ། །འདི་ནི་སྔགས་རྣམས་ཐམས་ཅད་ཀྱི། །དགྱེས་དང་མགུ་བར་བྱེད་པར་བཤད། །དངོས་གྲུབ་ཐམས་ཅད་བྱེད་པར་འདོད། ། རྡོ་རྗེ་ཡེ་ཤེས་སོགས་རྫོགས་བྱེད། །རིག་མ་ལ་སོགས་ཐམས་ཅད་ཀྱིའང་། །རིག་པའི་རྒྱལ་པོ་རྣམ་འཇོམས་བྱེད། །ཕོ་ཉ་མོས་ཀྱང་ཐམས་ཅད་ཀྱི། །རྡོ་རྗེ་སེམས་དཔའ་རྣམ་སྒོམ་པ། །འདོད་འགྱུར་སྔགས་རྣམས་ཐམས་ཅད་ཀྱི། །རང་གཟུགས་རྣམ་པ་སྒོམ་པས་སོ། །འདི་ནི་སྔགས་རྣམས་ཐམས་ཅད་ཀྱི། །སྔགས་ཀྱི་དམ་ཚིག་འབྱུང་བ་སྟེ། །སངས་རྒྱས་ཀུན་གྱི་ཕན་འདོད་པས། །རྡོ་རྗེ་དཔའ་བོའི་མཆོག་གིས་གསུངས། །སྔགས་ཐམས་ཅད་ཀུན་ལས་བཏུས་པའི་ལེའུ་བཅུ་དྲུག་པ་རྫོགས་སོ།། །།དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་སྐྲོད་པར་བྱེད་པའི་ལས་འདི་གསུངས་སོ། །སྐྲོད་པ་ལ་སོགས་བྱ་བ་ལ། །སངས་རྒྱས་དེ་ཉིད་ཡེ་ཤེས་ཅན། །ཁྲོ་བོ་གསུམ་པོ་བསྡུས་པ་ཡི། །རྡོ་རྗེ་འབྱུང་བས་གྲགས་པ་ཉིད། །གཤིན་རྗེ་གཤེད་ནི་ཡེ་ཤེས་རིགས། །བསྡུས་པའི་དོན་ལ་མཆོག་རྩེར་སྐྱེས། །ཁྲོ་བོ་ཆེན་པོ་རྟ་མགྲིན་ནི། །ཆོས་ཀྱི་ཡེ་ཤེས་རིགས་སུ་བཤད། །སྟོང་ཕྲག་གམ་ནི་བརྒྱ་ཡང་རུང་། །ཐེར་འབུམ་གཅིག་ཏུ་བཟླས་ནས་ནི། །རང་ཉིད་སངས་རྒྱས་ཤེས་པ་ཡང་། །ཆོ་
ག་ཤེས་པས་སྐྲོད་པར་བྱེད། །ཐོད་པ་གསུམ་ལ་ཀུན་བཞག་ནས། །ལྷོ་ཡི་ཕྱོགས་ཀྱི་དུར་ཁྲོད་དུ། །འདོད་པ་འདི་ནི་ཡང་དག་བརྩམ། །རྡོ་དང་ཤིང་གི་སྦྱོར་བ་ཡིས། །དངོས་པོ་མེད་པས་ཡང་དག་བརྩམ། །རྡོ་དང་ཕུབ་མ་ཡང་དག་ལྡན། །བཟའ་དང་གསལ་བྱེད་རྣམ་པར་སྤངས། །ཁྲག་དང་ཕབས་སུ་ཡང་དག་ལྡན། །ནི་མ་པའི་འདབ་མས་བཟའ་བྱ་བ། །ཏ་ལའི་འདབ་མ་ལ་བྲི་བྱ། །སྔགས་པས་འཁྲུལ་འཁོར་སྨད་པར་བྱ། །ཚེར་མ་ཅན་གྱིས་བྲིས་ནས་ནི། །ནི་མ་པའི་འདབ་མ་ཁར་བཅུག་ནས། །སྦྱོར་བའི་གནས་སུ་གཞག་པར་བྱ། །ལྷ་ཆེན་པོ་ཡི་འོག་ཏུ་ནི། །དྲི་མ་མེད་པ་ཀུན་གཟུང་བྱ། །ཆོ་ག་ཤེས་པས་ལན་བདུན་དུ། །མངོན་པར་སྔགས་ཏེ་ཡང་དག་བརྩམ། །དགྲ་ཡི་སྒོའམ་ཡང་ན་གྲོང་། །གྲོང་ཁྱེར་རམ་ནི་ཀུན་འབྱུང་བའི། །གནས་འདི་རྣམས་སུ་ཕུང་པོ་ནི། །ཀུན་ནས་སྐྲོད་པར་བྱེད་པ་ཡིན། །སྙིང་པོ་དེ་ལ་མདོར་བསྡུས་པས། །བྱ་བ་ཙོག་བུའི་སྟན་ལ་འདུག །དྲི་མ་མེད་པའི་གཟུགས་བྱས་ནས། །ཁྲོ་བོ་ཁྲོ་བོའི་མཆོག་འབྱུང་བ། །ཡོན་ཏན་སྟོང་ཕྲག་ཀྱང་བསྐྱེད་ནས། །རྟག་ཏུ་སངས་རྒྱས་ཀྱང་ཐོབ་བྱེད། །ཉི་མ་བདུན་ནམ་སོ་སོར་བྱས། །གལ་ཏེ་འགའ་ཞིག་མི་འགྲོ་ན། །མགོ་བོ་ཚལ་པ་བདུན་དུ་འགས། །མི་ཕྱེད་རྡོ་རྗེ་རང་གིས་གསུངས། །དེ་བཞིན་གཤེགས་པ་ཐམས་ཅད་སྐྲོད་པའི་ལེའུ་སྟེ་བཅུ་བདུན་པ་རྫོགས་སོ།། །།དེ་ནས་བཅོམ་ལྡན་འདས་ཀྱིས་རྣམ་པར་སྣང་མཛད་ཆེན་པོ་རྡོ་རྗེ་སེམས་དཔའ་མཉེས་པར་བྱེད་པའི་ལས་འདི་གསུངས་སོ། །སངས་རྒྱས་སློབ་དཔོན་འདབ་བཟང་ཉིད། །རྡོ་རྗེའི་སྐྱིལ་ཀྲུང་དུ་གནས་ཏེ། །བྱ་དཀའི་ཉེ་བར་ལོངས་སྤྱོད་ཀྱིས། །གང་དེ་འཚོ་ཞིང་གནས་པར་བྱེད། །བརྗོད་པའི་ལྷག་མ་བསྟན་པར་བཤད། །འགྲོ་བ་དང་ནི་གར་ཉིད་དང་། །དེ་བཞིན་འབེལ་གཏམ་དུ་མི་འགྱུར། །མཐོན་པོ་མིན་ཉིད་སློབ་མ་ཡིས། །ཆོས་ཀྱི་དུས་སུའང་སྡིག་པ་སོགས། །གནས་བྱ་གལ་ཏེ་རྨོངས་པ་དེ། །མནར་མེད་
གནས་སུ་འཚེད་པར་འགྱུར། །སྔགས་ཙམ་གལ་ཏེ་ཚངས་པ་ལ། །ལག་པ་གཉིས་ཀྱིས་ཡང་དག་བརྩམ། །ཇི་སྲིད་ནམ་མཁའ་ཡང་དག་འབྱུང་། །མནར་མེད་གནས་སུ་འཚེད་པར་འགྱུར། །བུད་མེད་གསང་མིན་བརྗོད་བྱ་མིན། ། གང་ཞིག་ལ་ལ་སློབ་དཔོན་ཆེད། །བདེ་དང་ལུས་སེམས་སྡུག་བསྔལ་བ། །སྦྱོར་བ་ཇི་སྲིད་འཚོ་ཡི་བར། །གལ་ཏེ་སློབ་དཔོན་རྣམས་ཀྱི་བཀའ། །དགའ་བའི་སེམས་ཀྱིས་བྱས་གྱུར་ན། །དེ་ཚེ་བདག་ལ་སངས་རྒྱས་སོགས། །འགྲུབ་འགྱུར་འདིར་ནི་ཐེ་ཚོམ་མེད། །དེ་ལ་ཇི་སྲིད་འཚོ་ཡི་བར། །བརྡ་ཡིས་ཀུན་དུ་གནས་པར་བྱ། །དཀུ་རུ་བརྟེན་པའི་ལག་པ་སོགས། །ཇི་སྲིད་འཚོ་བར་མི་བྱའོ། །དངོས་གྲུབ་འབྲས་བུ་དོན་གཉེར་བས། །སློབ་དཔོན་མིང་ནས་སྨོས་མི་བྱ། །ཇི་སྲིད་ནམ་མཁའ་ཡང་དག་འབྱུང་། །མནར་མེད་དམྱལ་བར་འཚེད་པར་འགྱུར། །དེ་བཞིན་གཤེགས་པ་ཇི་ལྟ་བ་དེ་བཞིན་དུ་བྱའོ་ཞེས་སོ། །བཟའ་བ་ལ་ཡང་རང་སློབ་ཤེས། །སངས་རྒྱས་གཟུགས་སུ་རྣམ་བསྒོམ་བྱ། །དེ་ཡི་མིང་གི་ཡི་གེ་གང་། །ཇི་སྲིད་འཚོ་བར་བརྗོད་མི་བྱ། ། སངས་རྒྱས་གྲངས་མེད་བསད་བྱས་ན། །སྡིག་པ་འདི་ནི་ཁྱད་པར་འཕགས། །གང་ཚེ་ཁ་ཅིག་ཡོན་ཏན་འདིས། །བསྟོད་ན་བསོད་ནམས་ཡང་དག་འབྱུང་། །དེ་ཚེ་སློབ་དཔོན་རྟོག་མེད་པས། །གཞན་དུ་གལ་ཏེ་རྨོངས་པ་བདག །དེ་ཚེ་ངུ་འབོད་དུ་འཚེད་འགྱུར། །གང་ཚེ་དེ་བེ་མཱ་པཱ་ཏི། །གུས་པས་ཉན་སོགས་བསྙེན་པ་གང་། །དེ་ཚེ་སློབ་མ་སྔགས་ཞུ་དང་། །ཇི་ལྟར་ཁ་ཅིག་སློབ་དཔོན་རྣམས། །བདེ་བ་དངོས་སུ་མཐོང་བར་འགྱུར། །གང་ཞིག་ལ་ལ་སློབ་དཔོན་རྣམས། །བདག་ཉིད་ཐིག་ནག་འཚོད་ཅིང་འཚེང་། །དེ་དག་ངུ་འབོད་དུ་འཚེད་འགྱུར། །སློབ་དཔོན་གང་ཞིག་ཚོལ་བྱེད་པ། །དེ་ནི་དེ་ལ་དབུལ་བར་བྱ། །གཞན་དུ་དངོས་གྲུབ་མེད་པ་ཉིད། །སློབ་མའི་མ་བརྟག་སློབ་དཔོན་གྱི། །ཆུང་མའི་དོན་དུ་བསྒྲུབ་པར་བྱ། །ཡང་ན་སྲིང་མོ་དེ་བྱིན་ནས། །འགྲུབ་
འགྱུར་འདིར་ནི་ཐེ་ཚོམ་མེད། །སློབ་དཔོན་གང་ཞིག་སློབ་མའི་ཕྱིར། །ཕྱག་འཚལ་བ་ནི་བསྒྲུབ་པར་བྱ། །བསྐལ་པ་དྲུག་ཅུར་དེ་དམྱལ་བའི། །སྡུག་བསྔལ་མྱོང་བར་འཚེད་པར་འགྱུར། །དེ་ལྟར་ཡོན་ཏན་ཁྱད་འཕགས། །ཟླ་བ་དྲུག་གིས་ར་བ་གསལ་བྱ། ། གལ་ཏེ་གཞན་དུ་བདག་རྨོངས་ན། །མནར་མེད་ལྟ་བུར་འཚེད་པར་འགྱུར། །གང་ཉིད་སློབ་དཔོན་ཚོལ་བྱེད་པ། །དེ་ཉིད་སོ་སོར་བསྒྲུབ་པར་བྱ། །རྡོ་རྗེ་ཡེ་ཤེས་རབ་བསྐུལ་བས། །དངོས་གྲུབ་ཡངས་པར་དེར་འགྲོ་འགྱུར། །ཡོན་ཏན་འདི་རྣམས་གང་གིས་འགས། །བསོད་ནམས་འབྱུང་བར་ཤེས་པར་བྱ། །སློབ་དཔོན་འདི་ཡི་རྒྱུད་ལ་སོགས། །དེ་ལྟ་བུ་སོགས་གསལ་བྱ་མིན། །དེ་ལྟར་བདག་ཉིད་དག་པ་ཐོབ། །ཆོས་ཀྱི་དེ་ཉིད་ཆོ་གས་གནས། །དེ་ཡིས་སློབ་དཔོན་རབ་གསལ་བྱ། །མྱུར་དུ་འགྲུབ་འགྱུར་གཞན་དུ་མིན། །སངས་རྒྱས་གནས་ལ་གནས་པ་ཡིས། །གང་དེ་མགུ་ནས་རྡོར་སེམས་མཆོག །མྱུར་དུ་འགྲུབ་བྱེད་གཞན་དུ་མིན། །སངས་རྒྱས་སངས་རྒྱས་ཉིད་ཐོབ་པ། །དེ་མགུ་བྱེད་པ་མཆོག་འབྱུང་འགྱུར། །དེ་ཡིས་འཇིག་རྟེན་གསུམ་འགྲུབ་སྟེ། །སངས་རྒྱས་ཡེ་ཤེས་རང་ཉིད་ཀྱང་། །དེ་བཞིན་གཤེགས་པའི་གསང་བ་རྡོ་རྗེ་སེམས་དཔའ་མཉེས་པར་བྱེད་པའི་ལེའུ་སྟེ་བཅྭ་བརྒྱད་པ་རྫོགས་སོ།།།།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་སྔགས་ཐམས་ཅད་ཀྱི་ལེའུ་གསུངས་སོ། །སྐྱེད་མོས་ཚལ་དང་རྣམ་པར་དབེན། །ཆུ་ཀླུང་རབ་ཏུ་འབབ་པ་དང་། །རི་དང་རྣམ་པར་བཀྲ་བ་རུ། །སྒྲུབ་པའི་གོ་འཕང་གིས་བསྒྲུབ་བྱ། །ཟླ་བ་གཅིག་གིས་འགྲུབ་པར་འགྱུར། གལ་ཏེ་མིན་ན་དེ་འགྲུབ་མིན། །དབེན་དང་གཞན་པའི་ཡུལ་རྣམས་སུ། །སེམས་ནི་གང་དུ་རབ་དགྱེས་བྱེད། །གསང་སྔགས་འབར་བས་བྱིན་བརླབས་པ། །དེ་ལ་སངས་རྒྱས་ཉིད་འགྲུབ་འགྱུར། །རྒྱ་མཚོ་དང་ནི་ཆུ་ཀླུང་ཆེ། །རི་བོ་ཆེན་པོའི་རྩེ་རྣམས་སུ། །ཡན་ལག་ཐ་དད་མིན་སྔགས་བཟླས། །
ངེས་པར་ཟླ་བས་འགྲུབ་པར་བྱེད། །སྐེ་ཚེ་དུག་དང་ཡང་དག་ལྡན། །ཏིག་ཏའི་ཤིང་གི་སྦྱིན་སྲེག་གིས། །བསྙེན་པ་སོགས་ནི་དེ་བསྐྱེད་ནས། །གསང་སྔགས་སྒྲུབ་པ་ཀུན་སྤྱད་བྱ། །དེ་ལ་སྡོམ་པ་བཟུང་ནས་ནི། །ངེས་པར་འགྲུབ་བྱེད་གཞན་དུ་མིན། །གསང་སྔགས་ཆོ་ག་ཀུན་ཐོབ་ནས། སྔགས་པས་བསྙེན་པ་འགྲུབ་པར་བྱེད། དེ་ཕྱིར་སྔགས་པས་ཁྱད་པར་གྱི། །སྡོམ་པ་སོ་སོར་བསྒྲུབ་པར་བྱ། །གང་ཉིད་སྡོམ་པར་ཡང་དག་བརྗོད། །དེ་ཉིད་བརྟུལ་ཞུགས་ཅན་གྱིས་བསྲུང་། །གཞན་དུ་ནམ་མཁའ་ཇི་སྲིད་པར། །མནར་མེད་དམྱལ་བར་ཀུན་ཏུ་འབྱུང་། །ཇི་སྲིད་འཚོ་བར་ཆོ་ག་བཞིན། །སློབ་དཔོན་སྡོམ་པ་སྲུང་བ་ལ། །དེ་ཡིས་སངས་རྒྱས་ཉིད་དུ་འགྲུབ། །སྣ་ཚོགས་འཛིན་པ་ཀུན་གཞི་ཡི། །མཉམ་མེད་གསང་སྔགས་བཟླས་ནས་ནི། ། སྒྲུབ་པའི་བདག་ཉིད་ཅན་གྱིས་བསྒྲུབ། །ཟླ་བ་གཅིག་གིས་འཇིག་རྟེན་གསུམ། །དེ་ཡིས་འགྲུབ་འགྱུར་ཐེ་ཚོམ་མེད། །རྣམ་ཤེས་ལས་ཀྱང་བྱུང་བའི་སྔགས། །འབུམ་ཕྲག་དྲུག་ཏུ་བཟླས་ནས་ཀྱང་། །རྡོ་རྗེ་སེམས་དཔར་ཕྱག་བྱས་ནས། །ཟླ་བ་ཉ་ལ་དེ་འགྲུབ་འགྱུར། །སྔགས་དང་ཕྱག་རྒྱའི་རབ་དབྱེ་བས། །ངེས་པར་སངས་རྒྱས་ཀྱང་ཐོབ་བྱེད། །ཕྱག་རྒྱའི་དབྱེ་བ་རབ་བཀོད་པ། །ངེས་པར་ལྷ་རྣམས་སྤྱན་དྲངས་མེད། །ངག་བདག་གང་ཉིད་ཚོལ་བྱེད་པ། །དེ་ཉིད་རྟག་ཏུ་འབད་བྱའོ། །མཁས་པས་རབ་མཆོག་སངས་རྒྱས་ལ། །སོགས་པའི་ཕྱག་རྒྱ་བཅིང་བྱས་ནས། །དེ་རྣམས་སྔགས་ནི་བཟླས་ནས་ནི། །རྟག་ཏུ་ངེས་པར་སྦྱིན་པར་བྱ། །སྔགས་པས་རྒྱལ་པོའི་བུ་མོ་གང་། །གལ་ཏེ་སངས་རྒྱས་བུ་མོའང་རུང་། །བཟུང་ནས་ཉེ་བར་ལོངས་སྤྱད་བྱ། །ཇི་སྲིད་ཡིད་ནི་ཚིམ་པར་འགྱུར། །དུག་དང་སྐེ་ཚེ་ཡང་དག་ལྡན། །ཡུངས་ཀར་ཏིལ་མར་བསྲེས་པ་དང་། །རུས་པ་རྡོ་བར་ཡང་དག་ལྡན། །མ་ཏྲི་ཏྲཾ་དེ་ཕྱེ་མར་བྱ། །བཤང་དང་གཅི་བ་རབ་བཅུག་ནས། །བརྟུལ་ཞུགས་ཅན་གྱི་ཁྱད་པར་གྱིས། །ཟུར་གསུམ་མགྲིན་པའི་
མེ་ལ་བསྲེག །ངེས་པར་མྱུར་དུ་འགྲུབ་པར་བྱེད། །ལྷ་སྦྱིན་ཞེས་ནི་བྱས་ནས་ནི། །གང་གིས་འདི་ནི་རབ་གསལ་བྱེད། །གལ་ཏེ་འདིར་ནི་སངས་རྒྱས་རུང་། །གང་དེ་ཐལ་བར་བྱེད་པར་འགྱུར། །མཁས་པས་མཚན་མོ་ཕྱེད་ལ་ཡང་། །ཉི་མའི་གུང་ལ་སྦྱིན་སྲེག་བྱ། །བསྐལ་པ་གཅིག་གི་བར་གྱི་ཡང་། །སྦྱིན་བྱེད་གཞན་དུ་ནམ་ཡང་མིན། །གལ་ཏེ་སངས་རྒྱས་སམ་འགའ་ཞིག །རྨོངས་པའི་སེམས་ཀྱིས་འདས་ན་ནི། །མགོ་བོ་ཚལ་པ་བདུན་དུ་འགས། །བྱང་ཆུབ་སེམས་ནི་རང་གིས་གསུངས། །རེངས་དང་འབེབས་པ་དང་པོར་གྲགས། །གཉིས་པས་ཞེས་བྱ་བར་བརྗོད། །གསུམ་པ་ལྷ་ཡི་མཆོག་ཡིན་ནོ། །བཞི་པ་འཕགས་པའི་ཡུལ་དུ་ཡང་། །ཕྱག་ན་རྡོ་རྗེར་གྲགས་པ་ཡིན། སྙིང་པོ་ཀུན་གྱི་སྦྱོར་བ་ཡིས། བྱ་བ་མྱུར་དུ་འགྲུབ་པར་བྱེད། རེག་པ་སྣ་ཚོགས་སོགས་དང་གནས། །སྐྱེད་མོས་ཚལ་དང་དགའ་སྟོན་ཆེ། །དཀྱིལ་འཁོར་དེ་ལ་བྱ་བ་ནི། །བདུག་པ་བྱིན་ནས་ཡང་དག་བརྩམ། །ག་ལ་ཏེ་བརྒྱ་བྱིན་ནམ་ཚངས་པ། །སངས་རྒྱས་སམ་ཡང་བློ་གྲོས་ཆེ། །ཆོ་ག་ཤེས་པས་ཞག་བདུན་གྱིས། ། འཇོམས་འགྱུར་འདིར་ནི་ཐེ་ཚོམ་མེད། །ཆོ་ག་ཤེས་པས་ཁྲག་གིས་བྱུགས། །རང་ཉིད་རང་གི་ལུས་སུ་བྱ། །སྐྲ་གྲོལ་གཙུག་ཏོར་གྱུར་ནས་ནི། །མི་སྡུག་མ་ཆེ་གཙིགས་འཇིགས་པར་བྱེད། །དུར་ཁྲོད་ཁྱིམ་དུ་ཡང་དག་སྦྱོར། །རང་གིས་དེ་ཡི་མིང་བྲི་བྱ། ། སྟོང་ཕྲག་གཅིག་ཏུ་བཟླས་ནས་ནི། །ངེས་པར་སངས་རྒྱས་ཀྱང་འཛིན་བྱེད། །ཆོ་ག་ཤེས་པས་གཤེར་བའི་གོས། །ཁྲོ་བོའི་སེམས་ཀྱིས་རབ་ཞུགས་ནས། །ལིང་ག་རྐང་པས་མནན་ནས་ནི། །སངས་རྒྱས་ཀྱང་ནི་ངེས་པར་འཇོམས། །ཁྱབ་འཇུག་ལྷ་མིན་ལ་སོགས་ལྷ། །རྐང་པར་བྱས་ནས་བརྩམ་པར་བྱ། །ཆོ་ག་ཤེས་པས་ཉིན་བདུན་གྱིས། །ཁམས་གསུམ་པོ་ཡང་འཇོམས་པར་བྱེད། །བཅོམ་ལྡན་འདས་རྣམ་པར་སྣང་མཛད་ཆེན་པོ་སྔགས་ཐམས་ཅད་འཆད་བས་དེ་སྐད་ཅེས་གསུངས་སོ། །གསང་བ་ཆེན་པོའི་ལེའུ་
བཅུ་དགུ་པ་རྫོགས་སོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་སྒྲུབ་པ་པོ་ཐམས་ཅད་ཀྱི་སྡོམ་པའི་ལེའུ་གསུངས་སོ། །བཤང་དང་གཅི་བ་བཟའ་བར་བྱ། །སེམས་ཅན་ཀུན་ལ་བདེ་བ་སྦྱིན། །རྡོ་རྗེ་འཆང་རྒྱལ་དེ་ཉིད་ནི། །ཀུན་མཆོག་ས་ཡི་དབང་ཕྱུག་གོ། །རྨ་དགུ་ལས་ནི་ཡང་དག་བྱུང་། །འགའ་ཞིག་ཏུ་ནི་བཟའ་བར་བྱ། །རྡོ་རྗེ་འཛིན་པ་ཀུན་གྱི་རྒྱལ། །ཀུན་མཆོག་ས་ཡི་དབང་ཕྱུག་གོ། །འདོད་ཆགས་བཟའ་བར་བྱ་བ་ནི། །ཕན་དང་བདེ་བ་ཐམས་ཅད་སྦྱིན། ། དེ་ནི་རྡོ་རྗེ་འཆང་རྒྱལ་པོ། །ཀུན་མཆོག་ས་ཡི་དབང་ཕྱུག་གོ། །ཞེ་སྡང་བཟའ་བར་བྱ་བ་ནི། །རྡོ་རྗེ་ཡེ་ཤེས་རབ་རྟོགས་བྱེད། །དེ་ཉིད་རྡོ་རྗེ་འཆང་རྒྱལ་པོ། །ཀུན་མཆོག་ས་ཡི་དབང་ཕྱུག་གོ། །གཏི་མུག་བཟའ་བར་བྱ་བ་ནི། །ཡེ་ཤེས་ཐམས་ཅད་རྟོགས་པ་པོ། ། དེ་ཉིད་ཞི་བ་འཛིན་རྒྱལ་པོ། །སངས་རྒྱས་རྣམ་པར་སྣང་མཛད་གཞི། །བདེ་སྡུག་བཟའ་བར་བྱ་བ་ནི། །སློབ་དཔོན་ཇི་སྲིད་འཚོ་ཡི་བར། དེ་ཉིད་ཞི་བ་འཛིན་རྒྱལ་པོ། །སངས་རྒྱས་རྣམ་པར་སྣང་མཛད་གཞི། སློབ་དཔོན་ཇི་སྲིད་འཚོ་ཡི་བར། ཆོས་དང་ཆོས་མིན་བཟའ་བར་བྱ། དེ་ཉིད་རྡོ་རྗེ་འཆང་རྒྱལ་པོ། །ཀུན་མཆོག་དེ་ཉིད་སྟོན་པ་པོ། །ཇི་སྲིད་འཚོ་བར་འགའ་ཞིག་ཏུ། །སེམས་ཅན་ཁམས་ནི་བཟའ་བར་བྱ། །དེ་ཉིད་རྡོ་རྗེ་འཛིན་རྒྱལ་པོ། །ཀུན་མཆོག་ས་ཡི་དབང་ཕྱུག་གོ། །ཇི་སྲིད་འཚོ་བར་སྨད་པ་ཡི། ། བྱ་བ་ཐམས་ཅད་མི་བྱའོ། །དེ་ཉིད་པདྨ་འཆང་རྒྱལ་པོ། །ཀུན་མཆོག་ས་ཡི་དབང་ཕྱུག་གོ། །དེ་ནས་དེ་བཞིན་གཤེགས་པ་རྣམས་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཆོས་ཉིད་དང་ཡི་གེ་ཐོས་ནས་ངོ་མཚར་ཐོབ་ནས་རྡོ་རྗེ་འཆང་ཐམས་ཅད་ལ་འདི་སྐད་ཅེས་གསོལ་ཏོ། །རིགས་ཀྱི་བུ་འདི་ནི་ངོ་མཚར་ཏེ་གང་དུ་ཐམས་ཅད་མཁྱེན་པའི་ཡེ་ཤེས་ཀྱི་བདག་པོ་དེ་དག་གི་མིང་ཡང་ཤེས་པར་བྱ་བ་མ་ཡིན་ན། གཞན་ལྟ་ཅི་སྨོས་ཞེས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་བཅོམ་ལྡན་འདས་རྣམ་པར་
སྣང་མཛད་ཆེན་པོའི་ཐུགས་ཀར་གནས་ནས་འདི་སྐད་ཅེས་གསུངས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་སྔགས་ཡིད་བཞིན་གྱི་ནོར་བུའི་ལེའུ་བསྟན་པར་བགྱིའོ། །དེ་བཞིན་གཤེགས་པ་ཐམས་ཅད་ཀྱིས་གསོལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ནི་གཡོ་བར་བྱེད་པ་ཞེས་བྱ་བ་བསྟན་དུ་གསོལ། དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་དེ་བཞིན་གཤེགས་པ་ཐམས་ཅད་ཀྱི་གནས་ལྔར་ཡིད་བཞིན་གྱི་ནོར་བུའི་སྔགས་ཀྱི་ཏིང་ངེ་འཛིན་གྱི་ལེའུ་འདི་གསུངས་སོ། །བྱིན་རླབས་ལ་སོགས་སྔགས་སོགས་ཀྱིས། །དེ་ཉིད་སྣ་ཚོགས་རྣམ་བསྒོམ་པ། །ཆོ་ག་ཤེས་པས་དེ་སྟེང་དུ། །ཡི་གེ་བཞི་ནི་རྣམ་བསྒོམ་པ། །བདག་ཉིད་དབུས་སུ་སོན་བྱས་ནས། །རང་གི་གཟུགས་སུ་གཟུགས་མཚོན་པ། །རང་སེམས་བྱང་ཆུབ་ཡང་དག་འབྱུང་། །ཆོ་ག་ཤེས་པས་ཀུན་དགང་བྱ། །དེ་ཡིས་སངས་རྒྱས་ཉིད་འགྲུབ་འགྱུར། །སྒོམ་པ་འདི་ཉིད་རབ་སྒྲུབ་བྱེད། །ཟླ་བའི་དཀྱིལ་འཁོར་དབུས་གནས་པར། །ཤེལ་དང་ཟླ་བ་མཚུངས་པའི་འོད། །ཉི་མའི་དཀྱིལ་འཁོར་དབུས་སུ་ནི། །བཞི་ལྔའི་ཡི་གེ་རྣམ་བསྒོམས་ནས། །ཡི་གེ་ལྔ་ནི་རྣམ་བསྒོམ་བྱ། །སྔགས་པས་ལུས་ཀྱི་དབུས་སོན་པར། །ཨོཾ་ཡིག་སེར་པོ་དང་མཚུངས་པ། །འོད་ཟེར་ལྔ་པོ་ཀུན་དུ་འཁྲུགས། །དེར་སོན་བདག་ཉིད་སྔགས་པས་སྒོམ། ། དབུས་སུ་ཧཱུྃ་ཡིག་ཡང་དག་སྦྱོར། །རང་གཟུགས་དགེ་བ་བསྒོམ་པར་བྱ། །འཛམ་བུ་རཱ་ད་མཚུངས་པའི་འོད། །གཟུགས་བརྙན་ཚུལ་གྱིས་བསྐྱེད་ནས་ནི། །མཚན་ཉིད་ཐམས་ཅད་ཡོངས་རྫོགས་པ། །ཡིད་དུ་འོང་བ་བསྒོམ་པར་གྱིས། །སངས་རྒྱས་གཟུགས་བརྙན་དེ་རྣམས་སུ། །འོད་ཟེར་ལྔ་ནི་རྣམ་བསྒོམ་བྱ། །རྣམ་སྣང་མཛད་གཟུགས་འོད་ཟེར་གྱིས། །ནམ་མཁའི་ཁམས་ནི་ཀུན་བཀང་བར། །བསམས་ནས་ཆོ་ག་ཤེས་པས་དེར། །བསྡུས་ནས་དེ་ལ་ལྟུང་བར་བྱ། །ཟླ་བ་འཆར་བས་མཚན་པ་ཡི། །མཉམ་
མེད་གཟུགས་ནི་བསྐྱེད་ནས་ནི། །གསལ་བའི་རལ་པ་འཆང་ཞི་བ། །ཅོད་པན་ལྔ་ནི་འཛིན་པ་པོ། །སྣ་ཚོགས་འོད་ཟེར་མཉམ་པའི་འོད། །སངས་རྒྱས་གཟུགས་སུ་རྣམ་བསྒོམས་ནས། །དཀྱིལ་འཁོར་དུ་བཞུགས་བསམས་ནས་ནི། །དེ་ཡི་སྔགས་ནི་རྣམ་བསྒོམ་བྱ། །སངས་རྒྱས་གཟུགས་ནི་དེ་རྣམས་སུ། །རྡོ་རྗེ་སེམས་དཔའ་རྣམ་བསྒོམས་པས། །གཙུག་ཏོར་དེ་ཡི་བཟླས་པ་བྱ། །ཁྲོ་བོ་གང་གཞན་འབྱུང་བས་ཀྱང་། །རིགས་རྣམས་ཐམས་ཅད་ཉིད་ཀྱི་ཡང་། །བསྐྱེད་པའི་ཆོ་གར་འགྱུར་བ་ཡིན། །རྡོ་རྗེ་གསུམ་ཀུན་དུ་འབྱུང་བ་ཞེས་བྱ་བའི་ཏིང་ངེ་འཛིན་རྫོགས་སོ།། །།དེ་ནས་བཅོམ་ལྡན་འདས་ཀྱིས་རྡོ་རྗེ་འཆང་ཆེན་པོ་རྡོ་རྗེ་གསུམ་གྱི་ཡེ་ཤེས་ཞེས་བྱ་བའི་ཏིང་ངེ་འཛིན་གསུངས་སོ། །ཆོ་ག་ཤེས་པས་དེ་ཐམས་ཅད། །ཨོཾ་ཡིག་དབུས་སུ་རྣམ་བསྒོམ་བྱ། ། འབར་བའི་ཕྲེང་བས་རྣམ་བརྒྱན་པའི། ཧཱུྃ་ཡིག་མཐར་ནི་རྣམ་བསྒོམས་ནས། །དབུས་སུ་རྡོ་རྗེ་འཆང་བསམས་ནས། །ཨིནྡྲ་ནཱི་ལ་མཚུངས་པའི་འོད། ཞི་བ་རལ་པའི་ཅོད་པན་འཆང་། ཕྱག་ན་རྡོ་རྗེ་རྣམ་བསྒོམ་བྱ། རྣམ་པར་སྣང་མཛད་རྣམ་བསྒོམས་ནས། འོད་ཟེར་སྣ་ཚོགས་མཚུངས་པའི་འོད། བསམས་ནས་དེ་ཡི་ཐུགས་ཀ་རུ། །ཟླ་བར་སྔགས་ཀྱི་ཡི་གེ་བསྒོམ། །བཅོམ་ལྡན་འདས་རྡོ་རྗེ་སེམས་དཔའི་ཏིང་ངེ་འཛིན་རྫོགས་སོ།། །།དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་བཅོམ་ལྡན་འདས་སྤྱན་རས་གཟིགས་དབང་ཕྱུག་གི་ཏིང་ངེ་འཛིན་འདི་གསུངས་སོ། །དེ་བཞིན་ཉིད་དུ་ཀུན་བྱས་ནས། །དབུས་སུ་ཧྃ་ཡིག་སྒོམ་པ་ནི། །ངོས་སུ་རང་གི་གཟུགས་ལྟར་བྱས། །རྡོ་རྗེ་དམར་པོ་རྣམ་བསྒོམ་བྱ། །དབུས་སུ་ཆོས་འཆང་བསམས་ནས་ནི། །པདྨ་རཱ་གའི་དབང་མཚུངས་པ། །ཕྱག་ན་པདྨ་འདབ་བརྒྱད་པ། །དེ་ཡི་དབུས་སུ་རྣམ་བསྒོམ་པ། །ཐུགས་ཀར་ཟླ་བའི་དཀྱིལ་འཁོར་ནི། །བསམས་ནས་སྔགས་ནི་རྣམ་བསྒོམ་བྱ། །བཅོམ་ལྡན་འདས་ཆོས་ཀྱི་དབང་ཕྱུག་གི་ཏིང་ངེ་འཛིན་གྱི་ཆོ་ག་རྫོགས་སོ།། །།
ཆོ་ག་ཤེས་པས་གཟུགས་བྱས་ནས། །ངོས་སུ་ཧྃ་ཡིག་ཡང་དག་སྦྱར། །དབུས་སུ་རང་གི་རྣམ་པ་བསྒོམ། །འཛམ་བུ་ནཱ་ད་མཚུངས་པའི་འོད། །འདོད་མཆོད་གཟུགས་ནི་བསྐྱེད་པར་བྱ། །ལག་ཏུ་མདུང་རྩེ་གསུམ་བསྒོམས་ནས། དེ་ཡི་སྙིང་གར་དཀྱིལ་འཁོར་དགོད། ཆོས་ཀྱི་དབང་ཕྱུག་གཟུགས་བསྒོམས་ནས། །ཕྱི་ནས་བྱ་བ་ཡང་དག་བརྩམ། །སྒྲོན་མ་འབྱུང་བ་ཞེས་བྱ་བ་བཅོམ་ལྡན་འདས་འདོད་པའི་མཆོད་པའི་ཏིང་ངེ་འཛིན་རྫོགས་སོ།། །།ཡང་ན་བརྟུལ་ཞུགས་ཅན་གྱིས་ནི། །བསྡུ་བས་སངས་རྒྱས་གཟུགས་བསྒོམ་བྱ། །གཙུག་ཏོར་སྔགས་དང་ཁྲོ་བོ་དང་། །རིག་པའི་རྒྱལ་པོ་རིགས་བཅས་པས། །ལས་རྣམས་ཐམས་ཅད་པ་ཡི་སྔགས། །གོ་རིམས་བཞིན་དུ་དེ་བཟླས་བྱ། །དབུས་སུ་བདག་པོ་བསྒོམས་ནས་ནི། །ངོས་སུ་ལྷ་རྣམས་དགོད་པར་བྱ། །སྙིང་པོ་སྦྱོར་བ་དེ་རྣམས་སུ། །ཟླ་བའི་དཀྱིལ་འཁོར་བསྒོམ་པར་བྱ། །སྔགས་ཀྱི་ཡི་གེ་མཆོད་བསྒོམས་ནས། །དེ་ཡིས་ལྷ་རྣམས་རྣམ་བསྒོམ་པ།།ཐམས་ཅད་ཀྱི་ནི་ལག་པར་ནི།།རྡོ་རྗེ་འཁོར་ལོ་པདྨ་བསྒོམ། །མདུང་དང་ཡིད་བཞིན་ནོར་བུ་ཡང་། །བསྒོམས་ནས་མྱུར་དུ་སྒྲུབ་བར་བྱེད། །སྔགས་པས་རང་སྔགས་བཟླས་བྱ་སྟེ། །ཟླ་བའི་དཀྱིལ་འཁོར་བསྒོམས་པ་ཡིས། །ངོས་སུ་ཟླ་བ་ཡང་དག་སྦྱོར། །དབུས་སུ་སེར་པོ་རྣམ་བསྒོམ་བྱ། །བསྡུས་ཏེ་གོང་བུའི་ཚུལ་གྱིས་ནི། ། རང་གི་ལུས་ལ་དགོད་པར་བྱ། །སངས་རྒྱས་ཐམས་ཅད་རབ་བསྐུལ་བས། །འདི་ནི་རེངས་པར་བྱེད་པའི་མཆོག །དུས་རྣམས་ཀུན་དུ་རྣམ་བསྒོམས་ནས། །ངེས་པར་བསྐལ་པར་དེ་གནས་འགྱུར། །ཆོ་ག་ཤེས་པས་མི་བསྐྱོད་སོགས། །ཉི་མའི་དཀྱིལ་འཁོར་ལ་དགོད་བྱ། །རིགས་ཀྱི་དབང་བྱུག་རྣམ་བསྒོམས་ནས། །ཟླ་བའི་དཀྱིལ་འཁོར་དགོད་པ་ནི། །ཐོག་མ་ཐ་མར་བསམ་གཏན་འདི། །བཞི་ཡི་དབུས་སུ་བསམ་པར་བྱ། །དེ་ཡིས་སངས་རྒྱས་ཉིད་བསྒྲུབས་ན། །ཡུན་མི་རིང་བར་སངས་རྒྱས་འགྱུར། །དེ་ཡི་
རང་གི་སྔགས་ཀྱི་མཆོག །ཕྱག་རྒྱ་ཤེས་ནས་སྒྲུབ་པ་པོ། །ཆོ་ག་ཤེས་པས་བསྐྱེད་པར་བྱ། །མྱུར་དུ་འགྲུབ་བྱེད་གཞན་དུ་མིན། །ཕྱག་རྒྱ་ཆེན་པོར་རབ་བསྒོམས་ནས། །ནམ་མཁའི་ལམ་གྱི་དབུས་ལས་ནི། །དབུས་སུ་ཉི་མ་དང་མཚུངས་པའི། །དཀྱིལ་འཁོར་དགེ་བ་བསྒོམ་པར་བྱ། །སྔགས་པས་དཀྱིལ་འཁོར་ལས་ངོས་སུ། །ཟླ་བའི་དཀྱིལ་འཁོར་བསྒོམ་པར་བྱ། །བདག་པོའི་གཟུགས་ནི་ཡང་དག་བསྐྱེད། །དེ་ཡིས་མི་གཡོ་བསྒོམ་པར་བྱ། །རིན་ཆེན་བཞི་བྱུང་སྒོ་ང་རུ། །སྦྲང་རྩི་མར་གྱིས་རབ་ཏུ་དགང་། །སྔགས་ཀྱི་ཡི་གེ་རྣམ་བསྒོམས་ནས། །བསམ་པ་དེ་ཡིས་སྦྱིན་སྲེག་བྱ། །དཀྱིལ་འཁོར་ལྔ་ཡི་ཚུལ་གྱིས་ནི། །དབུས་སུ་ཧཱུྃ་གི་ཡི་གེ་འགེངས། །འབར་བའི་ཕྲེང་བ་འཐིབས་པ་ནི། །ཀུན་ནས་རྣམ་པར་འཕྲོ་བར་བྱེད། །དེ་ལ་གནས་པས་ལྷ་ཡི་གཟུགས། །ཚིམ་པའི་དམ་ཚིག་གསུམ་འབྱུང་བས། །ཆོ་ག་ཤེས་པས་གཙུག་ཏོར་གྱིས། །གཙུག་ཏོར་རྣམས་ནི་བསྒོམ་པར་བྱ། །བདག་པོའི་སྔགས་ནི་ཡང་དག་བསྐྱེད། །མཉམ་པར་བཞག་པས་བསྒོམ་པར་བྱ། །ཀུན་ནས་སོར་མོ་བཅུ་གཉིས་པའི། །ཨུཏྤལ་ཆེན་པོ་འདབ་བརྒྱད་པ། །ཆོས་ཀྱི་དཀྱིལ་འཁོར་དབུས་གནས་པར། །དེ་ཉིད་ཀྱིས་ནི་བསྒོམ་པར་བཤད། །རྩེ་མོ་ལྔ་པའི་རྡོ་རྗེ་ཆེ། །ཨུཏྤལ་སྔོན་པོ་མཚུངས་པའི་འོད། །ཨཱ་ལི་བཅུ་དྲུག་ཡང་དག་ལྡན། །རྟག་ཏུ་བསྒོམ་བྱ་འགྲུབ་པར་འགྱུར། །སྔགས་པས་སོར་མོ་ཉི་ཤུ་པའི། །རྩེ་གསུམ་སེར་པོ་དང་མཚུངས་པ། །ཆོ་ག་ཉིད་ཀྱིས་བསྒོམས་བྱས་ན། །འགྲུབ་འགྱུར་འདིར་ནི་ཐེ་ཚོམ་མེད། །པདྨ་ལས་ཀྱི་རྡོ་རྗེ་དང་། །ཡིད་བཞིན་ནོར་བུ་གསུམ་པ་ཅན། །བདག་པོའི་སྔགས་ནི་ཡང་དག་བསྐྱེད། །མྱུར་དུ་སྒྲུབ་བྱེད་གཞན་དུ་མིན། །འཁོར་ལོ་དེ་བཞིན་པད་རྡོ་རྗེ། །བསམས་ནས་རྡོ་རྗེའི་ཆོ་ག་ལས། །སྒོམ་པའི་གོ་འཕང་གིས་བསྒྲུབ་བྱ། །གཞན་དུ་འདི་ནི་འགྲུབ་མི་འགྱུར། །རྡོ་རྗེ་ཆེན་པོ་མདུང་སོགས་བཅས། །འབར་བའི་
ཕྲེང་བ་མཚུངས་པའི་འོད། །ཀུན་གྱི་ལས་ཅན་གསང་སྔགས་ཀྱི། །རྗོད་པ་རྣམས་ཀྱིས་བརྗོད་བྱས་ནས། །རལ་གྲི་འབར་བས་འཁྲུགས་པའི་སེམས། །འཕྲོ་ཞིང་འཐིབས་པ་ཀུན་དུ་འཁྲུགས། །ཁྲུ་གང་ཙམ་དུ་ཡང་དག་བསྐྱེད། །ཁྲོ་བར་བྱེད་པའི་ཁྱད་པར་བྱ། ། ཕོ་ཉ་མངག་གཞུག་སོགས་སྔགས་རྣམས། །རྡོ་རྗེའི་དཀྱིལ་འཁོར་སྒོམ་པའོ། །ཉི་མའི་དཀྱིལ་འཁོར་སྦྱོར་བ་ལས། །སྒོམ་པས་མཆོག་ཏུ་མཐོང་བར་འགྱུར། །དབྱུག་པ་ཐོ་བ་དགྲ་སྟ་དང་། །ཞགས་པ་པཊྚི་ས་སྒོམ་པའི། །ཆོ་གས་བསྒོམ་པར་བྱས་ནས་ནི། །རྡོ་རྗེ་འཆང་རྣམས་མཉེས་པར་བྱེད། །འདི་དེ་སྔགས་རྣམས་ཐམས་ཅད་ཀྱི། །སྐུ་གསུང་ཐུགས་ཀྱི་སྒོམ་པ་སྟེ། །རྡོ་རྗེ་ཡེ་ཤེས་ཅན་གྱིས་གསང། །ཡེ་ཤེས་དངོས་གྲུབ་ཅན་དུ་བརྗོད། །བཅོམ་ལྡན་འདས་རྡོ་རྗེ་སེམས་དཔས་དེ་སྐད་ཅེས་གསུངས་སོ། །གང་ཞིག་དངོས་གྲུབ་མཆོག་འདོད་ན། །ཆོ་ག་ཤེས་པས་སྦྱིན་སྲེག་བྱ། །དེ་ཉིད་གསང་བའི་ཏིང་འཛིན་གནས། །རྣམ་པ་སྣ་ཚོགས་སྦྱིན་སྲེག་བརྩམ། །དཀྱིལ་འཁོར་བཞི་ཡི་སྦྱོར་བ་ལས། །རིགས་ཀྱི་ལས་ནི་སྒྲུབ་པར་བྱེད། །ཨོཾ་ཡིག་སྔགས་ཀྱི་དབྱེ་བ་ཡིས། །སྒོམ་པས་དངོས་གྲུབ་ཐོབ་པར་འགྱུར། །ཞི་བ་ཅན་ལ་དཀྱིལ་འཁོར་ཟླུམ། །རྒྱས་པ་ཅན་ལ་ཟུར་བཞི་པ། །མངོན་སྤྱོད་ལ་ནི་གྲུ་གསུམ་མཆོག །དབང་བྱ་གཞུ་ཡི་རྣམ་པའོ། །ཞི་ལ་མེ་ཡི་དབུས་སོན་པར། ། བདུད་རྩི་ལྟ་བུར་བསྒོམ་པར་བྱ། །དེ་ཉིད་ལ་ནི་ལྷ་ཡི་གཟུགས། །རང་གི་ཚུལ་གྱིས་བསྒོམ་པར་བྱ། །བདག་ཉིད་བདག་པོའི་ཚུལ་གྱིས་ནི། །འདི་ནི་རྡོ་རྗེའི་ཚུལ་ལས་བྱུང་། །ཁ་ནི་རབ་ཏུ་གདངས་བྱས་ནས། །མེ་སྟག་འཐིབས་པས་འཁྲུགས་པ་ཡི། ། སྔགས་པས་ལྕེ་ཡི་དབུས་སོན་པར། ཧཱུྃ་ཡིག་དེ་ཡིས་བསམ་པར་བྱ། །བཅོམ་ལྡན་འདས་སྦྱིན་སྲེག་རྡོ་རྗེས་དེ་སྐད་ཅེས་གསུངས་སོ། །ཆོ་ག་ཤེས་པས་འོ་མ་སྦྲང་། །མར་ནི་ཞི་བའི་རིགས་ལ་སྤྱད། །མར་ཁུ་ཆེན་པོའི་བྱེ་བྲག་ལས། །ཡེ་ཤེས་རྡོ་རྗེའི་རིགས་
སུ་བརྗོད། །ཞི་ལ་རྡོ་རྗེ་སློབ་དཔོན་གྱི། །སྙིང་གའི་དབུས་སོན་རྣམ་བསྒོམ་བྱ། །ཡིད་བཞིན་ནོར་བུ་ལག་བསམས་ནས། །འདི་ནི་དག་པའི་ཚུལ་མཆོག་གོ། །རྣམ་པར་སྣང་མཛད་གཟུགས་བརྙན་ཆེ། །པདྨའི་ཡོན་ཏན་འབྱུང་བ་ལ། ། གཟུགས་ནི་འདོད་ཆགས་རིགས་མཆོག་གོ། །གཟུགས་ནི་འདོད་མཆོད་རྡོ་རྗེ་ཅན། །ལས་བཞིའི་རབ་ཏུ་དབྱེ་བ་ལས། །སྔགས་ཀྱི་ཡི་གེ་དགོད་བྱས་ནས། །བཅོམ་ལྡན་འདས་གསང་བའི་སྦྱིན་སྲེག་རྡོ་རྗེ་འཆང་ཆེན་པོས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དེ་བཞིན་གཤེགས་པ་ཐམས་ཅད་ཀྱི་སྔགས་ཡིད་བཞིན་ནོར་བུའི་ལེའུ་སྟེ་ཉི་ཤུ་པ་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་སྔགས་ཀུན་ལས་བཏུས་པ་ཞེས་བྱ་བའི་སྙིང་པོའི་ལེའུ་འདི་གསུངས་སོ། །སངས་རྒྱས་རྡོ་རྗེ་ཆོས་ཆེན་པོ། །འདོད་པའི་དམ་ཚིག་དགྱེས་པ་པོ། །སྔགས་རྣམས་ཐམས་ཅད་ཡང་དག་དམིགས། །དེ་ཡི་བསམ་གཏན་རབ་བསྐུལ་བྱ། །དམ་ཚིག་ཡེ་ཤེས་སངས་རྒྱས་ཀུན། །རིགས་དམིགས་དཀྱིལ་འཁོར་ཚུལ་གྱིས་ནི། །གཟུགས་ནི་སངས་རྒྱས་མཚུངས་པའི་འོད། ཨྃ་ཡིག་ཡེ་ཤེས་དབྱེ་བ་ཡིས། །འདི་ནི་རྡོ་རྗེའི་ཚུལ་བསྟན་པའོ། །རལ་པའི་ཅོད་པན་ལོངས་སྤྱོད་པ། །ཁ་དོག་དཀར་པོ་ཤིན་ཏུ་མཛེས། །ཕྱག་བཞི་པ་ལ་སྤྱན་ཡངས་པ། །མེ་སྟག་འཐིབས་པས་ཀུན་དུ་འཁྲུགས། །རྣལ་འབྱོར་མཆོད་ཕྱིར་ཐོགསམ་ལ་སོགས། །བརྒྱན་ཅིང་དཀྱིལ་འཁོར་ལ་སོགས་པ། །ཅོད་པན་དུ་ནི་རྡོ་རྗེ་སེམས། །མཛེས་པའི་གཟུགས་ནི་རྒྱལ་བའི་གཞི། །དབང་པོ་གཉིས་ཀྱི་རབ་སྦྱོར་བས། །འདི་ནི་བསམ་གཏན་ཚུལ་མཆོག་གོ། །སྐུ་ཡི་རྡོ་རྗེའི་སོགས་སྦྱོར་གྱིས། །མངོན་ཤེས་ལྔ་ཡི་རབ་སྦྱོར་ལས། །རྐང་གཉིས་མཆོག་དེ་ཉིད་ཤེས་པས། །ཐོད་པ་ཅན་གྱི་གཙོ་བོར་བརྗོད། །སངས་རྒྱས་ཀུན་
གྱི་འདི་ཡེ་ཤེས། །རིགས་ཞེས་བྱ་བའི་ཏིང་འཛིན་ནོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་རྡོ་རྗེ་འཛིན་པ་ཐམས་ཅད་ཀྱི་དམ་ཚིག་གི་དེ་ཁོ་ན་ཉིད་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཐམས་ཅད་ཀྱི་དམ་ཚིག་གི་སྙིང་པོ་འབྱུང་བ་རྡོ་རྗེ་ཞེས་བྱ་བ་འདི་གསུངས་སོ། །རྡོ་རྗེའི་དཀྱིལ་འཁོར་ཚུལ་གྱིས་ནི། །དབུས་སུ་གཟུགས་ནི་རབ་བརྟག་བྱ། །ནག་པོ་ཤིན་ཏུ་རྣམ་འགྱུར་ཁྲོས། །མ་རུངས་ཞལ་ནི་རྣམ་པར་གདངས། །མེ་སྟག་འཐིབས་པོ་འབར་བ་སྟེ། །འཇིགས་པ་ཡང་ནི་འཇིགས་པར་བྱེད། །ཕྱག་བཞི་པ་སྟེ་རབ་འབད་པས། །དབང་པོ་གཉིས་ཀྱིས་རབ་སྦྱོར་ལས། །འདི་ནི་རྡོ་རྗེའི་ཚུལ་བསྟན་པའོ། །རྡོ་རྗེ་ཐུགས་སོགས་ཡང་དག་གྲུབ། །རབ་ཏུ་གནས་པས་དེ་བསྒྲུབ་བྱ། །འདོད་ཆགས་རྡོ་རྗེ་རབ་བསྐུལ་བས། །དངོས་གྲུབ་ཐམས་ཅད་བསྒྲུབ་པར་བྱ། །རྡོ་རྗེ་དམ་ཚིག་ཅེས་བྱ་བའི་ཏིང་ངེ་འཛིན་ནོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཆོས་ཐམས་ཅད་འཆང་བའི་དམ་ཚིག་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཆོས་འཆང་བའི་དཔལ་ཞེས་བྱ་བ་འདི་གསུངས་སོ། །ཆོས་ཀྱི་དཀྱིལ་འཁོར་སྦྱོར་བ་ལས། །དབུས་སུ་གཟུགས་ནི་རྣམ་བསྒོམ་བྱ། །དམར་པོ་འདོད་ཆགས་འཛིན་པ་འབར། །སྣ་ཚོགས་རྒྱན་གྱིས་བརྒྱན་པ་ཡི། །ཕྱག་བཞི་པ་ལ་ཡིད་འོང་བར། །དབང་པོ་གཉིས་ཀྱི་རབ་སྦྱོར་བས། ། དེ་ཡི་ཆོ་ག་བསྒོམ་པ་ནི། །འདི་ནི་འདོད་ཆགས་ཚུལ་བསྟན་པའོ། །གསུང་གི་རྡོ་རྗེ་གཙོ་དངོས་གྲུབ། །རྡོ་རྗེ་ཆོས་རབ་སྦྱོར་སོགས་ཀྱིས། །སྙིང་རྗེའི་བདག་ཉིད་ཅན་གྱིས་སྒྲུབ། །སྒོམ་པ་ཡང་ནི་མྱུར་འགྲུབ་བྱེད། །ཆོས་འཆང་བའི་དམ་ཚིག་གི་དཔལ་ཞེས་བྱ་བའི་ཏིང་ངེ་འཛིན་ནོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དམ་ཚིག་གི་རྡོ་རྗེའི་རིགས་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེའི་རིགས་ཀྱི་དམ་ཚིག་གི་མཆོག་ཅེས་བྱ་བའི་ཏིང་ངེ་འཛིན་འདི་གསུངས་སོ། །འདོད་
པའི་དཀྱིལ་འཁོར་བསམ་གཏན་གྱིས། །གཟུགས་ནི་དབུས་སུ་དགོད་པར་བྱ། །ཁྱབ་བདག་ཞི་བ་སེར་པོའི་མདོག །སྤྱན་གསུམ་བརྟུལ་ཞུགས་ཅན་གྱིས་བསྒོམ། །ཀུན་དུ་དག་པའི་ཤེལ་དང་མཚུངས། །མེ་སྟག་ཚོགས་ནི་ཀུན་དུ་འཁྲུགས། །ཕྱག་བཞི་པར་ནི་ཆོ་ག་ཡིས། །བསྒོམ་བྱ་མྱུར་དུ་འགྲུབ་པར་བྱེད། །རྡོ་རྗེའི་མཐར་ཐུག་ནོར་དངོས་གྲུབ། །རབ་ཏུ་གནས་པས་དེ་བསྒྲུབ་བྱ། །འདི་དེ་སྔགས་རྣམས་ཐམས་ཅད་ཀྱི། །ཐར་པའི་ཏིང་འཛིན་སྙིང་པོ་ཅན། །སྐུ་གསུང་ཐུགས་ཀྱི་སྒོམ་པ་ནི། །རྡོ་རྗེ་སེམས་དཔས་སྤྲུལ་པ་ཡིན། །རྡོ་རྗེ་མདུང་གི་དམ་ཚིག་ཅེས་བྱ་བའི་ཏིང་ངེ་འཛིན་ནོ། །ཇི་སྲིད་གཟུགས་ནི་ཀུན་སྦྱོར་བ། །དེ་ལ་ལྷ་ཉིད་རབ་ཏུ་གྲགས། །སླར་ཡང་འདི་ཡི་ཚུལ་གྱིས་ནི། །སྐྱེད་པར་བྱེད་པའི་ཆོ་གར་འགྱུར། །བཅོམ་ལྡན་འདས་རྡོ་རྗེ་སེམས་དཔས་དེ་སྐད་ཅེས་གསུངས་སོ། །རང་གི་སྔགས་ཡིག་དབྱེ་བས་སམ། །ཡང་ན་རིགས་ཀྱི་རིག་པ་ཡིས། རིགས་ཀྱི་བདག་པོའི་སྔགས་ཀྱིས་སམ། །བརྟུལ་ཞུགས་ཅན་གྱི་རིག་རྒྱལ་པོས། །ཐམས་ཅད་ལས་ཅན་སྔགས་ཀྱིས་དང་། །གཙུག་ཏོར་སྔགས་ཀྱིས་རྣམ་བསྒོམ་བྱ། །འདི་དེ་སྔགས་རྣམས་ཐམས་ཅད་ཀྱི། །གསང་བའི་དེ་ཉིད་གསུངས་པ་ཡིན། །བཅོམ་ལྡན་འདས་ཕྱག་ན་རྡོ་རྗེས་དེ་སྐད་ཅེས་གསུངས་སོ། །ཞི་བའི་ལས་ཀྱི་རབ་དབྱེ་བས། །རིགས་ཀྱི་སྔགས་སུ་རབ་ཏུ་གྲགས། །རྒྱས་པ་ཅན་ལ་རིགས་ཀྱི་སྔགས། །སྒོམ་པས་ངེས་པར་འགྲུབ་པར་བྱེད། །དབང་དུ་བྱ་བའི་ཆོ་ག་ལས། །རིག་པའི་རྒྱལ་པོས་བསྒོམ་པར་བྱ། །ཐམས་ཅད་ལས་ཅན་སྔགས་ཀྱིས་ནི། །མངོན་སྤྱོད་རྣམ་པར་སྒོམ་པར་བྱེད། །སྐྲོད་པར་བྱེད་པའི་ཆོ་ག་ལས། །གཙུག་ཏོར་དུ་ནི་རྣམ་བསྒོམ་བྱ། །སྔགས་ཤེས་པས་ནི་ཕུར་གདབ་སོགས། །ཕོ་ཉ་ཕོ་ཉ་མོ་བསམ་བྱ། །བཅོམ་ལྡན་འདས་ཕྱག་ན་རྡོ་རྗེས་དེ་སྐད་ཅེས་གསུངས་སོ། །འོད་ཟེར་ལྔ་ཡི་ཚུལ་གྱིས་ནི། །རྟོག་པས་དེ་ལ་བསྒོམ་པར་བྱ། །གཞན་དུ་དངོས་གྲུབ་མེད་པ་
ཉིད། །སྒོམ་པ་རྣམས་སུ་ཤེས་པར་བྱ། །རིགས་ཀྱི་ལས་ཀྱི་རབ་དབྱེ་བས། །དཀྱིལ་འཁོར་རྣམས་ཀྱི་རྣམ་སྒོམ་པའོ། །སྔགས་ཀྱི་ཡི་གེའི་རབ་དབྱེ་བས། །བསྒོམ་བྱ་དངོས་གྲུབ་ཐོབ་པར་འགྱུར། །སྙིང་གའི་དབུས་སོན་ཕྲ་མོ་ནི། །དཀྱིལ་འཁོར་རྣམས་ཀྱི་རྣམ་བསྒོམ་པ། །སྔགས་ཀྱི་ཡི་གེའི་རབ་དབྱེ་བས། །བསྒོམས་པས་དངོས་གྲུབ་ཐོབ་པར་འགྱུར། །སྙིང་གའི་དབུས་སོན་ཕྲ་མོ་ནི། །དཀྱིལ་འཁོར་རྣམས་ཀྱི་རྣམ་བསྒོམ་པ། །སྟེང་དུ་བཀོད་པའི་དབྱེ་བ་ཡིས། །འདི་ནི་བསམ་གཏན་ཚུལ་མཆོག་གོ། ། དཀར་ནག་དམར་པོའི་སྦྱོར་བ་ལས། །བསམ་གཏན་ཐམས་ཅད་དུ་བརྟག་བྱ། །གཞན་དུ་དངོས་གྲུབ་མེད་པ་ཉིད། །སྔགས་རྣམས་ཀུན་ཏུ་བཟླས་པར་བྱ། ཧཱུྃ་ཡིག་ཨོཾ་ཡིག་དབྱེ་བ་ཡིས། སྭཱ་ཧཱ་ཧཱུྃ་ཡིག་གཞན་གྱི་གཟུགས། །སྐྱེད་པའི་ཆོ་ག་བྱས་ནས་ནི། །བསྙེན་པ་གང་ཞིག་ངེས་བསྒྲུབ་བྱ། །རིགས་གསུམ་ལ་ཡང་ཧཱུྃ་ཡིག་དང་། །ཨོཾ་ཡིག་ཡེ་ཤེས་རིགས་མཆོག་ཡིན། །སྔགས་ཀྱི་ཡི་གེ་ལ་སོགས་རྣམས། །དཔྲལ་བར་བཀོད་ནས་རྣམ་བསྒོམ་བྱ། །བཅོམ་ལྡན་འདས་རྡོ་རྗེ་འཆང་གིས་དེ་སྐད་ཅེས་གསུངས་སོ། །ཐུན་བཞིའི་སྦྱོར་བ་ལ་སོགས་ཀྱིས། །རྡོ་རྗེ་ཅན་ལ་བདུད་རྩིའི་གཟུགས། །སྤྲོ་བ་དང་ནི་གནས་པར་བྱ། །འདི་ནི་དངོས་གྲུབ་ཚུལ་བསྟན་པའོ། །སྒྲུབ་པར་རང་གི་ལྷ་ཡི་གཟུགས། །རྡོ་རྗེ་ཅན་ལ་བདུད་རྩིའི་གཟུགས། ། ཉེ་བར་སྒྲུབ་པ་འདུས་པ་ལ། །འདི་ནི་དངོས་གྲུབ་ཚུལ་མཆོག་གོ། །བདག་གི་སྒྲུབ་པའི་ལས་ཅན་ལ། །བདག་པོའི་གཟུགས་དང་ཡང་དག་ལྡན། །བསྙེན་པའི་དུས་སུ་རབ་བསྒྲུབ་པ། །གཙུག་ཏོར་གཟུགས་དང་ཡང་དག་ལྡན། །མེ་སྟག་འཐིབས་པས་འཁྲུགས་པ་ཡི། །རང་ལྷའི་གཟུགས་དང་ཡང་དག་ལྡན། །རྡོ་རྗེ་ཕྲ་རབ་དབྱེ་བ་ཡིས། །དུས་གསུམ་སངས་རྒྱས་བཞུགས་པའོ། །གྲགས་པར་ལྡན་པའི་དངོས་གྲུབ་ཀུན། །འདི་ཉིད་ཀྱིས་ནི་བྱང་ཆུབ་ཐོབ། །དེ་ཡི་མཆོག་ཏུ་བསྒྲུབ་པར་བྱ། །དངོས་གྲུབ་ཆེན་པོའི་
ཡོན་ཏན་འབྱུང་། །བཅོམ་ལྡན་འདས་ཀུན་དུ་བཟང་པོ་རྡོ་རྗེ་འཆང་ཆེན་པོས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་སྔགས་ཐམས་ཅད་ཀུན་ལས་བཏུས་པ་ཞེས་བྱ་བའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གཅིག་པ་རྫོགས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་པར་གྱུར་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་དགྱེས་པའི་རྡོ་རྗེའི་བཀོད་པས་ཡང་དག་པར་མཆོད་ནས་གསུང་གི་རྡོ་རྗེ་ཆོས་ཀྱི་གསུང་གི་ལམ་ངེས་པར་བསྐྱེད་པའི་རྡོ་རྗེའི་ཚུལ་འདི་སྟོན་པར་མཛད་དོ། །གསང་བ་དག་པ་དམིགས་པ་མེད། །ཡེ་ཤེས་ཡོན་ཏན་ཀུན་གྱི་གཞི། །ཀུན་ནས་ཡེ་ཤེས་བདག་མེད་པ། །གསང་བའི་ཡེ་ཤེས་ཕྱག་འཚལ་བསྟོད། །གསང་བའི་དེ་ཉིད་དོན་དང་ལྡན། །མཆོག་གི་སྤྱོད་པ་རྒྱ་མཚོ་ཆེ། ། ཀུན་ནས་འདོད་པ་ཡང་དག་འབྱུང་། །རྡོ་རྗེ་ཡེ་ཤེས་ཕྱག་འཚལ་བསྟོད། །གཙོ་བོའི་ཡེ་ཤེས་ཇི་ལྟར་གནས། །རྡོ་རྗེ་མི་ཕྱེད་གསུམ་གནས་པ། །རིགས་ཀྱི་ཕ་རོལ་ཕྱིན་པ་ཐོབ། །བྱང་ཆུབ་སྤྱོད་ལ་ཕྱག་འཚལ་བསྟོད། །སེམས་ཅན་ཀུན་སྐྱེས་ཅན་གྱི་མཆོག །སངས་རྒྱས་བྱང་ཆུབ་རབ་གཞུག་མཛད། །རང་བཞིན་དག་པ་དག་པའི་མཆོག །སེམས་ཅན་སྐྱོབ་ལ་ཕྱག་འཚལ་བསྟོད། །ཆོས་སྐུ་ཐར་པ་ཆེན་པོ་སྟེ། །ཡིད་བཞིན་ནོར་བུ་མཐོང་བ་ཆེ། །སེམས་ཅན་ཀུན་དགྱེས་བྱེད་པ་པོ། །དག་པའི་སྤྱོད་ལ་ཕྱག་འཚལ་བསྟོད། དེ་ནས་ཡང་ཡིད་བཞིན་གྱི་ནོར་བུའི་དམ་ཚིག་གི་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་ཕྱག་ན་རྡོ་རྗེ་བྱང་ཆུབ་སེམས་དཔའ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་དེའི་མཐོང་བའི་ཆོས་ཀྱི་ཡོན་ཏན་གྱི་ཁྱད་པར་སོ་སོར་འདོད་པར་བྱ་བ་གང་ཅི་ལྟར་ལགས། དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་བྱང་ཆུབ་སེམས་དཔའ་དེ་ལ་འདི་སྐད་ཅེས་བཀའ་སྩལ་ཏོ། །ཐེ་ཚོམ་མེད་པར་མཉམ་པར་ཤེས། །སངས་རྒྱས་ཆོས་སུ་འདོད་པར་བྱ། །ཐེ་ཚོམ་མེད་པར་འདུ་ཤེས་པ། །ཆོས་རྣམས་ཐམས་ཅད་འདོད་པར་བྱ། །ཐེ་ཚོམ་མེད་པར་འདུ་ཤེས་པ། །
འདུས་བྱས་ཐམས་ཅད་འདོད་པར་བྱ། །འདི་ལྟ་སྟེ། རིགས་ཀྱི་བུ་ཞེས་བྱ་བ་བྱང་ཆུབ་སེམས་དཔའི་ཆོས་ཀྱི་སྤྲིན་གྱི་ས་ལ་རབ་ཏུ་གནས་པ་སྟེ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུ་དང་། དེ་བཞིན་གཤེགས་པ་ཐམས་ཅད་ཀྱི་ལོངས་སྤྱོད་རྫོགས་པའི་སྐུ་དང་། དེ་བཞིན་གཤེགས་པ་ཐམས་ཅད་ཀྱི་སྤྲུལ་པའི་སྐུ་རྣམས་སུ་རྣམ་པར་རྟོག་པ་མེད་ཅིང་ཐེ་ཚོམ་མེད་པ་དེ་བདག་གོ་ཞེས་ཆོས་ཐམས་ཅད་ཀྱང་ནམ་མཁར་མཐོང་བར་གྱུར་ཏོ། །རིགས་ཀྱི་བུ་མདོར་བསྡུས་ན་བྱང་ཆུབ་སེམས་དཔའ་རྡོ་རྗེ་ཡེ་ཤེས་ཞེས་བརྗོད་པར་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐྱེས་བུའི་མཆོག་ལ་ཕྱག་བཙལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་སྔགས་ཀྱི་སྤྱད་པ་སྤྱོད་པར་བྱེད་པའི་བྱང་ཆུབ་སེམས་དཔའ་འདི་དོན་དམ་པའི་གསང་བ་ལ་དད་པར་ཅི་ལྟར་འགྱུར། འདི་ལྟ་སྟེ། ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཅེས་བྱ་བ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སངས་རྒྱས་བཅོམ་ལྡན་འདས་རྣམས་སུ་ཡང་དག་པར་བྱང་ཆུབ་ནས་མངོན་པར་རྫོགས་པར་འཚང་རྒྱ་བར་ཇི་ལྟར་འགྱུར། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། བཅོམ་ལྡན་འདས་དེ་བཞིན་གཤེགས་པ་གཅིག་པུ་མངོན་པར་རྫོགས་པར་འཚང་རྒྱ་བར་འགྱུར་རོ། །རྡོ་རྗེ་འཆང་བས་གསོལ་པ་ཇི་ལྟར་མངོན་པར་རྫོགས་པར་འཚང་རྒྱ་བར་འགྱུར། འདི་ལྟ་སྟེ་གཞན་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྡུལ་ཕྲ་རབ་ཀྱི་ཆ་ཤས་སུ་གྱུར་པ་གཞིའི་སེམས་ཅན་རྣམས་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཕྱག་ན་རྡོ་རྗེའི་ཚུལ་འདི་བལྟ་བར་བྱའོ་། །དེ་ནས་བྱང་ཆུབ་སེམས་དཔའ་དེ་རྣམས་ཡ་མཚན་ཐོབ་ཅིང་དགའ་ཞིང་རབ་ཏུ་མགུ་བ་ཐོབ་ནས་དེ་ལྟ་བུའི་དབྱངས་འདི་གསུངས་སོ། །ཨེ་མའོ་ཡེ་ཤེས་ཡེ་ཤེས་ཆེ། །རྡོ་རྗེ་ཆེན་པོ་རབ་ཏུ་མཐོང་། །རྨད་དུ་བྱུང་བའི་འཇིག་རྟེན་གྱིས། །ཡེ་ཤེས་མིག་ནི་རྣམ་སྦྱངས་པའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་
གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་ཐམས་ཅད་དང་གཉིས་སུ་མེད་པ་མཉམ་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱིས་གངྒའི་ཀླུང་གི་བྱེ་མ་དང་མཉམ་པའི་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྱུང་ནས་ཤར་དང་ལྷོ་ལ་སོགས་པའི་ཕྱོགས་མངོན་པར་བརྗོད་དུ་མེད་པའི་ཡང་བརྗོད་དུ་མེད་པའི་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་གི་རྡུལ་ཕྲ་རབ་དང་མཉམ་པའི་སྐུ་གསུམ་གྱི་ཡེ་ཤེས་ཀྱིས་གང་བར་མཛད་དོ། །དེ་ནས་དེ་བཞིན་གཤེགས་པ་དེ་རྣམས་བྱོན་ནས་བྱང་ཆུབ་ཀྱི་སེམས་འདི་གསུངས་སོ། །བྱང་ཆུབ་རང་བཞིན་ཡང་དག་ཐོབ། །བྱང་ཆུབ་སེམས་དཔས་སྙིང་པོ་བྱིན། །ནམ་མཁའི་ཁམས་ལ་ལོངས་སྤྱོད་པའི། །རྡོ་རྗེ་བྱང་ཆུབ་རབ་ཏུ་གནས། །མཚན་ཉིད་མེད་པའི་ཆོས་རྣམས་ལ། །སྤྲོས་པ་དག་ནི་ཡོད་མ་ཡིན། །རྡོ་རྗེའི་རང་བཞིན་ཡེ་ཤེས་ཀྱིས། །ནམ་མཁའ་ལྟ་བུར་དྲི་མ་མེད་ཅེས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཏིང་ངེ་འཛིན་ལས་བཞེངས་ནས་རྡོ་རྗེ་ཆོས་ལ་བོས་པར་གྱུར་ཏོ། །སེམས་དཔའ་ཆེན་པོ་དམ་ཚིག་གང་ཡིན་པ་དེ་མཐོང་ངམ། བཅོམ་ལྡན་འདས་མཐོང་ལགས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་སྐྱེས་བུ་ཆེན་པོ་དེའི་སྐུ་དང་གསུང་དང་ཐུགས་ཀྱི་དབྱེ་བ་རིན་པོ་ཆེ་སྒྲོམ་བུ་ངེས་པར་རིག་ནས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་རྣམས་རང་ག་ཐུགས་སུ་ཞུགས་པར་མཛད་དོ། །དེ་ཇི་ལྟ་བ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རང་གི་སྐུ་དང་གསུང་དང་ཐུགས་ནམ་མཁའ་ལྟ་བུར་སྦྱོར་བས་ཡང་དག་པར་གནས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཡོངས་སུ་དག་པའི་ངོ་བོ་ཉིད་ཀྱི་རྡོ་རྗེ་ཞེས་བྱ་བའི་ལེའུ་ཉི་ཤུ་རྩ་གཉིས་པ་རྫོགས་སོ།། །། འཕགས་པ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ།། །།མཁན་ཆེན་ཐར་པ་ལོ་ཙྪ་བའི་ཕྱག་དཔེའི་གསེབ་ནས་ཤོག་ཡར་ལྔ་བྱུང་བ་སྔར་བསྒྱུར་བ་ལས། ཕྱིས་ཉོང་སྟོང་སྨོན་འགྲོའི་གཙུག་
ལག་ཁང་ནས་རྒྱ་དཔེ་ལྷག་མ་རྣམས་རྙེད་ནས་བསྒྱུར་བར་རྩོམ་པ་ན། དཔལ་དུས་ཀྱི་འཁོར་ལོའི་ཕྱི་ནང་གཞན་གསུམ་གྱི་ཚུལ་ལ་མི་འཇིགས་པའི་སྤོབས་པ་ཐོབ་པའི་བླ་མ་ཡང་དག་པས། དགེ་བའི་བཤེས་གཉེན་ཆེན་པོ་ལེགས་པར་སྦྱར་བའི་སྐད་ཀྱི་བརྡ་སྤྲོད་པའི་ཚུལ་ལ་བློ་གྲོས་ཤིན་ཏུ་བྱང་བའི་འཇིག་རྟེན་གྱི་མིག་ཆོས་གྲགས་དཔལ་བཟང་པོའི་བཀས་བསྐུལ་ཞིང་སྦྱིན་བདག་མཛད་ནས། བུ་སྟོན་གྱིས་བསྒྱུར་བའི་ཡི་གེ་པ་ནི་དགེ་སློང་རིན་ཆེན་རྒྱལ་མཚན་པའོ། །རྒྱུད་མིན་རྒྱུད་ལྟར་བཅོས་པ་ཡི། ། ཆོས་མིན་སུན་དབྱུང་བྱ་ཕྱིར་དང་། །དམ་ཆོས་སྣང་བ་སྤེལ་བའི་ཕྱིར། །ཇི་ལྟར་ནུས་བཞིན་བསྒྱུར་བ་ལགས། །འདི་དོན་འབྱེད་པའི་འགྲེལ་པ་དང་། །རྒྱ་དཔེའི་དཔེ་དཔང་མ་རྙེད་ཅིང་། །དོན་ཟབ་སྒྲ་ནི་རྟོགས་དཀའ་ལ། །སཾ་སྐྲྀ་ཏ་ལ་མ་བྱང་བས། །སྒྲ་དོན་ཇི་བཞིན་མ་འབྱོར་བའི། །ནོངས་དེ་མཁས་རྣམས་བཟོད་མཛད་ཅིང་། །ཕྱིས་འབྱུང་སྐད་གཉིས་སྨྲ་རྣམས་ཀྱིས། །མ་དག་ཤེས་ན་བཅོས་པར་ཞུ། །རྒྱུད་ཆེན་འདི་ནི་བསྒྱུར་བ་ལས། །དགེ་བ་བདག་གིས་གང་ཐོབ་པ། །དེ་ཡིས་མཐའ་ཡས་འགྲོ་བ་ཀུན། ། རྡོ་རྗེ་འཆང་ཆེན་ཉིད་གྱུར་ཅིག །དེ་ནས་འདི་ལ་དབུ་ནས་ཤོག་ལྟོ་གཅིག་མ་ཚང་བས་རྙེད་ན་བསྒྱུར་བར་བྱའོ། །འདི་དང་ཐུན་མོང་མ་ཡིན་པའི་གསང་བ་གཅིག་ཏུ་འདོད་པ་ཡང་དག་པར་འཁྲུལ་བར་སྣང་ངོ་། །འདིས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་མྱུར་དུ་སྐེམས་པར་གྱུར་ཅིག །རྒྱུད་འདི་ལ་ཀུན་མཁྱེན་གཉིས་པ། བུ་སྟོན་ཞབས་ཀྱི་འགྱུར་མི་འདྲ་བ་གཉིས་འདུག་པ་ལས། འདི་ནི་ཕྱིས་འགྱུར་བདེ་བ་དེ་ཉིད་ལས་བྲིས་པ་ཡིན་ལ། རྒྱ་དཔེ་ཟུགས་པའི་བར་སྐབས་ནས། ཚིགས་བཅད་རྐང་པ་རེ་རེ་གཉིས་གཉིས་ཙམ་གྱི་བར་ལ། ཧོར་ཀོང་མ་ཚང་བ་རྣམས་སུ་རྒྱ་གྲམ་གྱི་མཚན་མ་བཏབ་ཡོད་པར་ཤེས་པར་བྱའོ།། །།