དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་ཞེས་བྱ་བ།
རྒྱ་གར་སྐད་དུ། །སརྦ་དུརྒ་ཏི་པ་རི་ཤོདྷ་ན་ཏེ་ཛོརཱ་ཛ་སྱ་ཏ་ཐཱ་ག་ཏ་སྱཱ་རྷ་ཏེ་སཾ་མྱ་ཀྶཾ་བུདྡྷ་སྱ་ཀ་ལྦཻ་ཀ་དེ་ཤ་ནཱ་མ། །བོད་སྐད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་ཞེས་བྱ་བ། བཅོམ་ལྡན་འདས་དཔལ་ཤཱཀྱ་སེང་གེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྷ་ཐམས་ཅད་ཀྱི་མཆོག་དགའ་བའི་ཚལ་ན་བཞུགས་ཏེ། ནོར་བུ་དང་གསེར་གྱི་ཤིང་ལོ་མ་དང་། ཡལ་ག་དང་། ལྕུག་མར་བཅས་པའི་སྡོང་པོ་དང་། ཤིང་གེལ་པ་དང་། སྨན་དང་། མེ་ཏོག་ཀ་མལ་དང་། མེ་ཏོག་ཨུཏྤ་ལ་དང་། མེ་ཏོག་ཀརྞི་ཀཱ་དང་། མེ་ཏོག་བཀྐུལ་དང་། མེ་ཏོག་ཏི་ལ་ཀ་དང་། མེ་ཏོག་ཨ་ཤོ་ཀ་དང་། མེ་ཏོག་མནྡཱ་ར་བ་དང་། མེ་ཏོག་མནྡཱ་ར་བ་ཆེན་པོ་ལ་སོགས་པ་མེ་ཏོག་རྣམ་པ་སྣ་ཚོགས་པས་ཉེ་བར་མཛེས་པ། དཔག་བསམ་གྱི་ཤིང་རྣམས་ཀྱིས་ཡང་དག་པར་བརྒྱན་པ། རྒྱན་སྣ་ཚོགས་ཀྱིས་རྣམ་པར་སྤྲས་པ། བྱའི་ཚོགས་སྣ་ཚོགས་སྐད་སྙན་པ་འབྱིན་པ། རྔ་དང་། རྔ་མུ་ཀུནྡ་དང་། གླིང་བུ་དང་། རྔ་བྷི་རི་ལ་སོགས་པའི་སྒྲ་སྒྲོགས་པ། བརྒྱ་བྱིན་དང་། ཚངས་པ་ལ་སོགས་པ་དང་། ལྷའི་བུ་རྣམ་པ་སྣ་ཚོགས་པ་རྣམས་རྣམ་པར་རྩེ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ་ནའོ། །བརྒྱ་བྱིན་དང་ཚངས་པ་ལ་སོགས་པའི་ལྷ་ཐམས་ཅད་དང་། རིག་པ་འཛིན་པ་དང་། ལྷའི་བུ་མོ་འཁོར་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱ་སྟོང་རྣམས་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། །མི་འམ་ཅི་དང་། ལྟོ་འཕྱེ་ཆེན་པོ་དང་། ཀླུ་ལ་སོགས་པ་འཁོར་རྣམ་པ་སྣ་ཚོགས་པ་དུ་མ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་རྣམས་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་སྤོབས་པ་དང་། བློ་གྲོས་མི་གཡོ་བ་དང་། བློ་གྲོས་ཡངས་པ་དང་། ཀུན་དུ་བློ་གྲོས་དང་། བློ་གྲོས་མཐའ་ཡས་པ་དང་། ཀུན་ནས་ལེགས་པའི་བློ་གྲོས་དང་། བློ་གྲོས་ཀ་མ་ལ་དང་། བློ་གྲོས་ཆེན་པོ་དང་། །བློ་གྲོས་ལྷ་རྫས་དང་། །བློ་གྲོས་སྣ་ཚོགས་པ་དང་། བློ་གྲོས་མ་ལུས་པ་དང་། ཀུན་དུ་བཟང་པོ་སྟེ། དེ་དག་ལ་སོགས་པ་ཕྱིར་མི་ལྡོག་པའི་བྱང་ཆུབ་
སེམས་དཔའ་སེམས་དཔའ་ཆེན་པོའི་དགེ་འདུན་མཐའ་ཡས་ཤིང་མུ་མེད་པ་རྣམས་ཀྱིས་བསྟི་སྟང་དུ་བྱས། བླ་མར་བྱས། མཆོད་ཅིང་རྗེད་པར་བྱས། ཤིན་ཏུ་ཕུལ་དུ་བྱུང་བར་བྱས་ཏེ། འཁོར་གྱི་ཚོགས་ཆེན་པོའི་དབུས་སུ་ཚངས་པ་ཆེན་པོ་པདྨའི་གདན་ལ་བཞུགས་ཤིང་ངན་སོང་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་མ་ཐག་ཉིད་དུ་ངན་སོང་གསུམ་གྱི་རྒྱུད་རྣམ་པར་གྲོལ་བར་བྱེད་པ་ཞེས་བྱ་བ་བྱང་ཆུབ་སེམས་དཔའ་ཆེན་པོའི་འོད་ཟེར་འཕྲོ་བ་དང་སྡུད་པ་དུ་མའི་ཕྲེང་བ་རང་གི་མཛོད་སྤུ་ནས་ཕྱུང་སྟེ། དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་དུ་སྣང་བར་བྱས་སོ། །ཀུན་དུ་སྣང་བར་བྱས་པ་དེས་སེམས་ཅན་ཐམས་ཅད་ཀྱི་སེམས་ཉོན་མོངས་པའི་འཆིང་བ་ལས་བཀྲོལ་ཏེ། ཡང་དག་པ་སོ་སོ་སོ་སོར་ཐོབ་པར་བྱས་ཤིང་དགའ་བའི་ཚལ་ཡང་ཀུན་དུ་སྣང་བར་བྱས་ཏེ། མཆོད་པའི་སྤྲིན་སྣ་ཚོགས་པ་རྣམས་ཀྱིས་མངོན་པར་མཆོད་ནས་ལན་བརྒྱ་ཕྲག་སྟོང་དུ་བསྐོར་བ་བྱས་ཏེ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔར་ནོར་བུ་དྲི་མ་མེད་པའི་སྟེང་དུ་འཁོད་དེ་འདི་སྐད་ཅེས་གསོལ་ཏོ། །ཨེ་མ་ཧོ་སངས་རྒྱས་ཨེ་མ་ཧོ་སངས་རྒྱས་ཆོས། །ཨེ་མ་ཧོ་སངས་རྒྱས་མཛད་པ་ཤིན་ཏུ་ལེགས། །གང་ཕྱིར་བདག་ཅག་ངན་སོང་ཡོངས་སུ་སྦྱངས། །བྱང་ཆུབ་སྤྱོད་པ་ཉིད་ལ་རབ་ཏུ་བཞག །དེ་ནས་ལྷའི་དབང་པོས་བཅོམ་ལྡན་འདས་ལ་ལན་བརྒྱ་ཕྲག་སྟོང་དུ་བསྐོར་བ་བྱས་ཏེ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་སངས་རྒྱས་ཀྱི་འོད་ཟེར་ཀུན་དུ་སྣང་བས་ངན་སོང་ཀུན་ལས་རྣམ་པར་བཀྲོལ་ནས་རྣམ་པར་གྲོལ་བའི་ལམ་ལ་རབ་ཏུ་བཞག་པ་ནི་བཅོམ་ལྡན་འདས་ངོ་མཚར་ཆེའོ། །བདེ་བར་གཤེགས་པ་ངོ་མཚར་ཆེའོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་འདི་ནི་ངོ་མཚར་མི་ཆེ་སྟེ།སངས་རྒྱས་བཅོམ་ལྡན་འདས་རྣམས་ནི་ཚད་མེད་པའི་བསོད་ནམས་ཀྱི་ཚོགས་རྣམས་ལེགས་པར་བསགས་པའོ། །ལྷའི་དབང་པོ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཡོན་ཏན་རིན་པོ་ཆེའི་འབྱུང་གནས་སུ་གྱུར་པའོ། །ལྷའི་དབང་པོ་ཡང་དག་པར་རྫོགས་པའི་སངས་རྒྱས་རྣམས་ནི་ཚད་མེད་པའི་ཐབས་ཡོངས་སུ་རྫོགས་པའོ། །ལྷའི་དབང་པོ་
སངས་རྒྱས་བཅོམ་ལྡན་འདས་ནི་ཤེས་རབ་དཔག་ཏུ་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་སྤྱོད་པ་ཚད་མེད་པའོ། །སངས་རྒྱས་བཅོམ་ལྡན་འདས་ཀྱིས་གདུལ་བྱའི་སྐྱེ་བོ་ཚད་མེད་པ་རྣམས་སྣོད་དུ་གྱུར་པར་མཛད་པའོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་ཡེ་ཤེས་གང་ཡིན་པའོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་རྫུ་འཕྲུལ་དང་ཡང་དག་པར་ལྡན་པའོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་སྨོན་ལམ་དང་ཡང་དག་པར་ལྡན་པའོ། །ལྷའི་དབང་པོ་དེའི་ཕྱིར་སངས་རྒྱས་བཅོམ་ལྡན་འདས་རྣམས་ཀྱིས་སྣོད་ཇི་ལྟ་བ་དེ་ལྟར་སེམས་ཅན་རྣམས་ཀྱི་དོན་མཛད་པ་དང་། གདུལ་བྱ་ཇི་ལྟ་བ་དེ་ལྟར་སེམས་ཅན་རྣམས་ཀྱི་དོན་མཛད་པ་དང་། མོས་པ་ཇི་ལྟ་བ་བཞིན་དུ་སེམས་ཅན་རྣམས་ཀྱི་དོན་མཛད་པ་ཡིན་ནོ། །ཞེས་ཤེས་པར་བྱ་བ་འདི་ལ་འདིར་ཐེ་ཚོམ་དང་སོམ་ཉི་དང་ཡིད་གཉིས་མི་བྱའོ། །གང་དེ་བཞིན་གཤེགས་པ་རྣམས་ཀྱིས་གདུལ་བར་མི་འགྱུར་བ་འདི་ནི་གནས་མ་ཡིན་ནོ། །དེ་ནས་ལྷའི་དབང་པོ་རང་གི་སྟན་ལས་ལངས་ནས་སླར་ཡང་བཅོམ་ལྡན་འདས་ལ་མཆོད་པ་རྒྱ་ཆེ་ཞིང་ཆེ་བ་བྱས་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་། རྗེས་སུ་བརྩེ་བར་བྱ་བའི་ཕྱིར་དང་། སྙིང་རྗེ་དང་བཅས་པར་བྱ་བའི་ཕྱིར་དང་། བརྩེ་བ་ཆེན་པོ་དང་བཅས་པར་བྱ་བའི་ཕྱིར་དང་། བསམ་པ་ཐམས་ཅད་ཡོངས་སུ་རྫོགས་པར་བགྱི་བའི་ཕྱིར་བཅོམ་ལྡན་འདས་བདག་སྤོབས་པ་བསྐྱེད་དུ་གསོལ། བདེ་བར་གཤེགས་པ་བདག་སྤོབས་པ་བསྐྱེད་དུ་གསོལ། བཅོམ་ལྡན་འདས་སུམ་ཅུ་རྩ་གསུམ་པའི་ལྷའི་རིགས་འདི་ནས་ལྷའི་བུ་ནོར་བུ་དྲི་མ་མེད་པའི་འོད་ཅེས་བགྱི་བ་ཞིག་ཤི་འཕོས་ཤིང་དུས་ལས་འདས་ནས་དགུང་བདུན་ལོན་ལགས་ན། བཅོམ་ལྡན་འདས་དེ་གང་དུ་སྐྱེས་ཤིང་། བདེ་བའམ་སྡུག་བསྔལ་གང་མྱོང་བར་འགྱུར་བ་དེ་བཅོམ་ལྡན་འདས་ལུང་བསྟན་དུ་གསོལ། བདེ་བར་གཤེགས་པ་ལུང་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་དེའི་དུས་དང་སྐབས་སུ་བབ་པར་ཤེས་ན་ཉོན་ཅིག །ལྷའི་དབང་པོས་གསོལ་པ།
བཅོམ་ལྡན་འདས་འདི་ནི་དུས་ལགས་སོ། །བདེ་བར་གཤེགས་པ་འདི་ནི་སྐབས་སུ་བབ་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་དེ་འདི་ནས་ཤི་འཕོས་ནས་མནར་མེད་པའི་སེམས་ཅན་དམྱལ་བ་ཆེན་པོར་སྐྱེས་ཏེ། དེར་ལོ་སྟོང་ཕྲག་བཅུ་གཉིས་སུ་སྡུག་བསྔལ་དྲག་ཅིང་མི་བཟོད་པ་མྱོང་བར་འགྱུར་རོ། །སླར་ཡང་དམྱལ་བ་ཆུང་ངུ་རྣམས་སུ་ལོ་སྟོང་ཕྲག་བཅུར་སྡུག་བསྔལ་མྱོང་བར་འགྱུར་རོ། །སླར་ཡང་བྱོལ་སོང་དང་ཡི་དགས་རྣམས་སུ་སྐྱེས་ཏེ་ལོ་སྟོང་ཕྲག་བཅུར་སྡུག་བསྔལ་མྱོང་བར་འགྱུར་རོ། ། སླར་ཡང་མཐའ་འཁོབ་ཀྱི་སྐྱེ་བོའི་གནས་སུ་སྐྱེས་ནས། འོན་པ་དང་། དིག་པ་དང་། ལྐུགས་པའི་རང་བཞིན་ཅན་རྣམས་སུ་ལོ་སྟོང་ཕྲག་དྲུག་ཅུ་སྡུག་བསྔལ་མྱོང་བར་འགྱུར་རོ། །སླར་ཡང་ལོ་སྟོང་ཕྲག་བརྒྱད་ཅུ་རྩ་བཞིར་ནད་རྣག་ཁྲག་འཛག་པ་དང་། མཛེ་དང་ཕོལ་མིག་གིས་གཟིར་བ་དང་། སྐྱེ་བོ་མང་པོས་སྨད་པ་དང་། ཡོངས་ཀྱིས་སྤངས་པ་དང་། རིགས་དམན་པར་འགྱུར་ཞིང་སྡུག་བསྔལ་ནས་སྡུག་བསྔལ་དུ་བརྒྱུད་པ་རྒྱུན་མི་འཆད་པར་འགྱུར་ཏེ། གཞན་རྣམས་ལ་ཡང་གནོད་པ་བྱེད་ཅིང་ལས་ཀྱི་སྒྲིབ་པ་སྣ་ཚོགས་པ་ཡང་རྒྱུན་མི་འཆད་པར་བྱེད་པར་འགྱུར་རོ། །སླར་ཡང་སྡུག་བསྔལ་རྒྱུད་པ་གཞན་དང་གཞན་མྱོང་བར་འགྱུར་རོ། །དེ་ནས་བརྒྱ་བྱིན་ལ་སོགས་པ་ལྷའི་བུ་རྣམས་དེ་ཐོས་ནས་དངངས་ཤིང་སྐྲག་སྟེ་སྐྱོ་ནས་ཁ་བུབ་ཏུ་འགྱེལ་ཏོ། །ཡང་ལངས་ནས་འདི་སྐད་ཅེསགསོལ་ཏོ། །བཅོམ་ལྡན་འདས་སྡུག་བསྔལ་བརྒྱུད་མ་དེ་ལས་ཇི་ལྟར་ཐར་བར་འགྱུར། བདེ་བར་གཤེགས་པ་ཇི་ལྟར་ཐར་བར་འགྱུར། བཅོམ་ལྡན་འདས་ཐབས་གང་གིས་སྡུག་བསྔལ་གྱི་ཕུང་པོ་ཆེན་པོ་དེ་ལས་གྲོལ་བར་འགྱུར་བ་དེས་ཡོངས་སུ་སྐྱོབས་མཛོད། །བདེ་བར་གཤེགས་པ་ཡོངས་སུ་སྐྱོབས་མཛོད། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་སངས་རྒྱས་བྱེ་བ་ཕྲག་བརྒྱད་ཅུ་རྩ་བཞིས་བཤད་པ་འདི་ངས་ཀྱང་བཤད་ཀྱིས་ཉོན་ཅིག །དེ་ནས་ལྷའི་དབང་པོས་སླར་ཡང་བཅོམ་ལྡན་འདས་ལ་མེ་ཏོག་མནྡཱ་ར་བ་དང་། །མནྡཱར་བ་ཆེན་པོ་དང་། མེ་ཏོག་རྣམ་པ་སྣ་ཚོགས་པ་དང་། རིན་པོ་ཆེའི་དབུ་རྒྱན་དང་། ཕྱག་གདུབ་དང་། དཔུང་རྒྱན་དང་། སྙན་རྒྱན་དང་། དོ་ཤལ་
དང་། དོ་ཤལ་ཕྱེད་པ་ལ་སོགས་པ་རྒྱན་གྱི་ཁྱད་པར་དུ་མས་མངོན་པར་མཆོད་དེ། ལན་བརྒྱ་སྟོང་ཕྲག་དུ་མར་བསྐོར་བ་བྱས་ཤིང་ཕྱག་འཚལ་ནས། བཅོམ་ལྡན་འདས་ལེགས་སོ། །བདེ་བར་གཤེགས་པ་ལེགས་སོ་ཞེས་བྱ་བ་ལེགས་སོའི་ཚིག་གིས་མཉེས་པར་བྱས་ནས། བཅོམ་ལྡན་འདས་ལྷ་དང་བཅས་པའི་འཇིག་རྟེན་ལ་ཕན་པ་དང་བདེ་བར་བགྱིད་བ་དང་། མ་འོངས་པའི་སེམས་ཅན་རྣམས་ངན་སོང་གསུམ་གྱི་རྒྱུད་ལས་རྣམ་པར་ཐར་བར་བགྱི་བའི་སླད་དུ་ལེགས་པར་བཤད་པའི་དོན་དུ་གསོལ་བ་འདེབས་ལགས་སོ། །དེ་ནས་སླར་ཚངས་པ་ལ་སོགས་པའི་ལྷའི་ཚོགས་རྣམས་ཀྱིས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ། །བདེ་བར་གཤེགས་པ་ལེགས་སོ། །གང་གིས་མ་འོངས་པའི་སེམས་ཅན་རྣམས་ཀྱིས་མཚན་ཙམ་ཡང་ཐོས་པ་དང་ལྡན་ན་ངན་སོང་གསུམ་གྱི་ལམ་ལས་རྣམ་པར་གྲོལ་ཞིང་མཐོ་རིས་ལྷའི་འཇིག་རྟེན་ནམ། མིའི་འཇིག་རྟེན་དུ་སྐྱེས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བགྱི་བའི་སླད་དུ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་ཚངས་པ་ལ་སོགས་པ་ལྷའི་བུ་དེ་རྣམས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདིས་བྱིན་གྱིས་བརླབ་པའི་དོན་དུ་དོན་ཡོད་རྡོ་རྗེའི་བྱིན་རླབས་ཞེས་བྱཱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཨོྃ་བཛྲཱ་དྷཥྜཱི་ན་ཛྙཱ་ན་ས་མ་ཡེ་ཧཱུྃ། དེ་ལྟར་ཏིང་ངེ་འཛིན་ལ་སྙོམས་པར་ཞུགས་ནས་ཟིལ་གྱིས་མི་ནོན་པ་རྡོ་རྗེའི་བྱིན་གྱིས་རླབས་ཀྱི་བྱིན་གྱིས་བརླབས་ནས། ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཞེས་བྱ་བ་དེ་བཞིན་གཤེགས་པའི་སྙིང་པོ་འདི་ཕྱུང་ངོ་། །ཨོྃ་ཤོ་དྷ་ནེ་ཤོ་དྷ་ནེ་སརྦ་པཱ་པྃ་བི་ཤོ་དྷ་ནེ་ཤུདྡྷེ་བི་ཤུདྡྷེ་སརྦ་ཀརྨཱ་བ་ར་ཎ་བི་ཤུདྡྷེ་སྭཱ་ཧཱ། རིག་པ་འདི་གསུངས་མ་ཐག་ཉིད་དུ་སེམས་ཅན་ཐམས་ཅད་ངན་སོང་དུ་མི་ལྟུང་བར་བྱས་ཤིང་དམྱལ་བ་དང་། བྱོལ་སོང་དང་། ཡི་དགས་ཀྱི་འགྲོ་བ་ཐམས་ཅད་སྦྱངས་ཏེ། སྡུག་བསྔལ་མི་བཟད་པ་རྣམ་པར་རབ་ཏུ་ཞི་ཞིང་སྐྱེ་བོ་མང་པོ་རྣམས་བདེ་བ་དང་ལྡན་པར་གྱུར་ཏོ། །དེ་ནས་གཞན་ཡང་སྲུང་བའི་སྙིང་པོ་འདི་གསུངས་སོ། །ཨོྃ་ཤོ་དྷ་ནེ་ཤོདྷ་ཡ་སརྦ་ཨ་པཱ་ཡན་སརྦ་སཏྭེ་བྷྱོ་ཧཱུྃ། ལྷའི་དབང་པོ་གཞན་ཡང་འདི་ནི་དེ་བཞིན་
གཤེགས་པ་ཐམས་ཅད་ཀྱི་སྙིང་པོའོ། །ཨོྃ་སརྦ་ཨ་པཱ་ཡ་བི་ཤོ་དྷ་ནེ་ཧཱུྃ་ཕཊ། ལྷའི་དབང་པོ་གཞན་ཡང་འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་ཉེ་བའི་སྙིང་པོའོ། །ཨོྃ་ཏྲཱ་ཊ། ལྷའི་དབང་པོ་གཞན་ཡང་འདི་ནི་ངན་སོང་ཐམས་ཅད་ཡོངས་སུ་སྦྱོང་བའི་སྙིང་པོའོ། །ཧཱུྃ། ལྷའི་དབང་པོ་གཞན་ཡང་མདོར་ན་དྲན་པ་ཙམ་གྱིས་ཀྱང་བསོད་ནམས་ཆུང་བའི་སེམས་ཅན་རྣམས་ངན་སོང་གི་རྒྱུད་ཐམས་ཅད་ལས་བདེ་བླག་ཏུ་རྣམ་པར་གྲོལ་བར་བྱེད་པ་འདི་ཡིན་ཏེ། ན་མོ་བྷ་ག་བ་ཏེ་སརྦ་དུརྒ་ཏི་པ་རི་ཤོདྷ་ནི་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀྶྃ་བུངྷཱ་ཡ། ཏདྱ་ཐཱ། ཨོྃ་ཤོདྷ་ནཱེ་ཤོབྷ་ནེ། བི་ཤོ་དྷ་ནེ་བི་ཤོ་དྷ་ནེ། སརྦ་པཱ་བཾ་བི་ཤོ་དྷ་ནེ་ཤུདྡྷེ་བི་ཤུདྡྷེ། སརྦ་ཀརྨ་ཨཱ་བར་ཎ་བི་ཤུདྡྷེ་སྭཱ་ཧཱ། རྩ་བའི་རིག་པའོ། །ཨོྃ་སརྦ་བིཏྶ་རྦཱ་བར་ཎ་བི་ཤོ་དྷ་ཡ་ཧ་ན་ཧཱུྃ་ཕཊ། ཨོྃ་སརྦ་བིདྱ་སྭ་ཧཱུྃ། ཨོྃ་སརྦ་བིད་ཧྲཱི་ཕཊ། ཨོྃ་སརྦ་བིད་ཨཱ། ཨོྃ་སརྦ་བིད་ཏྲཊ། ཨོྃ་སརྦ་བདི་ཨོྃ། ཨོྃ་སརྦ་བདི་ཧཱུྃ། ཨོྃ་སརྦ་བིད་ཀྲིཾ་ཏྲཊ། ཨོྃ་སརྦ་པདྨི་ཧཱ་བཛྲོ་དྦྷ་བ་དཱ་ན་པཱ་ར་མི་ཏཱ་པཱུ་ཛེ་ཧཱུྃ། སྒེག་མོའི་སྔགས་སོ། །ཨོྃ་སརྦ་པིདྨ་ཧཱ་བཛྲོདྦྷ་བ་ཤཱི་ལ་པཱ་ར་མི་ཏཱ་པཱུ་ཛེ་ཏྲཱྃ། ཕྲེང་བ་མའི་སྔགས་སོ། །ཨོྃ་སརྦ་བིདྨ་ཧཱ་བཛྲོདྷྦ་བ་ཀྵཱ་ན་ཏི་པཱ་ར་མི་ཏཱ་པཱུ་ཛེ་ཧྲཱི། གླུ་མའི་སྔགས་སོ། ། ཨོྃ་སརྦ་བདྨི་ཧཱ་བཛྲོ་དྦྷ་བ་བཱིརྱ་པཱ་ར་མི་ཏཱ་པཱུ་ཛེ་ཨཿ། གར་མའི་སྔགས་སོ། །ཨོྃ་སརྦ་བདྶི་རྦཱ་པཱ་ཡ་བི་ཤོ་དྷ་ནི་དྷ་མ་དྷ་མ་དྷུ་པ་ཡ་དྷྱན་པཱ་ར་མི་ཏཱ་བཱུ་ཛེ་ཧཱུྃ་ཧཱུྃ་ཕཊ། བདུག་པ་མའི་སྔགས་སོ། །ཨོྃ་སརྦ་བིདྶ་རྦ་དུརྒ་ཏི་པ་རི་ཤོ་དྷ་ནི་ཀླེ་ཤོ་བ་ཀླེ་ཤཙྪེ་ནི་བུཥྤ་བི་ལོ་ཀི་ནཱི་པྲཛྙཱ་པཱ་ར་མི་ཏཱ་པཱུ་ཛེ་ཏྲཱྃ་ཧཱུྃ་ཕཊ། མེ་ཏོག་མའི་སྔགས་སོ། ། ཨོྃ་སརྦ་བདྶི་རྦཱ་པཱ་ཡ་བི་ཤོདྷ་ནེ་ཛྲྦ་ནཱ་ལོ་ཀ་ཀཱ་རི་པྲ་ཎི་དྷཱ་ཎ་པཱ་ར་མི་ཏཱ་པཱུ་ཛེ་ཧྲཱིཿཧཱུྃ་ཕཊ། མར་མེ་མའི་སྔགས་སོ། །ཨོྃ་སརྦ་བིདྶ་རྦཱ་པཱ་ཡ་གནྡྷ་བི་ནཱ་ཤ་ནི། བཛྲ་གནྡྷོ་པཱ་ཡ་པཱ་ར་མི་ཏཱ་བཱུ་ཛེ་ཨཿཧཱུྃ་ཕཊ། དྲི་ཆབ་མའི་སྔགས་སོ། །ཨོྃ་སརྦ་བིདྶ་རྦ་ན་ར་ཀ་ག་ཏི་མྦ་ཀརྵ་ཎི་ཧཱུྃ་ཛཿལ་ཕཊ། རྡོ་རྗེ་ལྕགས་ཀྱུའི་སྔགས་སོ། །ཨོྃ་སརྦ་བིདྶ་ན་ར་ཀོདྡྷ་ར་ཎཱི་ཧཱུྃ་ཧཱུྃ་ཕཊ། རྡོ་རྗེ་ཞགས་པའི་སྔགས་སོ། །ཨོྃ་སརྦ་བིདྱཱ་སརྦཱ་པཱ་ཡ་བྷནྡྷ་མོ་ཙ་ནི་ཧཱུྃ་བཾ་ཕཊ། རྡོ་རྗེ་ལྕགས་སྒྲོག་གི་སྔགས་སོ། །ཨོྃ་སརྦ་བྷིདྶ་རྦཱ་པཱ་ཡ་ག་ཏི་ག་ཧ་ན་བི་ཤོ་དྷ་ནེ་ཧཱུྃ་ཧོཿཕཊ། རྡོ་རྗེ་འབེབས་པའི་སྔགས་སོ། །ཨོྃ་མཻ་ཏྲཱི་ཧ་ར་ཎཱ་ཡ་སྭཱ་ཧཱ། བྱམས་པའིའོ། །ཨོྃ་ཨ་མོ་
གྷཱ་མོ་གྷ་དརྴ་ནིཧཱུྃ། མཐོང་བ་དོན་ཡོད་ཀྱིའོ། །ཨོྃ་སརྦཱ་པཱ་ཡཾ་ཛཧ་སརྦཱ་པཱ་ཡ་བི་ཤོ་དྷ་ནི་ཧཱུྃ། ངན་སོང་ཀུན་འདྲེན་གྱིའོ། །ཨོྃ་སརྦ་ཤོ་ཀ་ཏམོ་ནི་རྒྷཱ་ཏ་ན་མ་ཏི་ཧཱུྃ། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་ཀྱིའོ། །ཨོྃ་གནྡྷ་ཧ་སྟི་ནི་ཧཱུྃ། སྦོས་ཀྱི་གླང་པོའིའོ། །ཨོྃ་ཤཱུ་རཾ་ག་མེ་ཧཱུྃ། དཔའ་བར་འགྲོ་བའིའོ། །ཨོྃ་ག་ག་ནེ་ག་ག་ན་ལོ་ཙ་ནེ་ཧཱུྃ། ནམ་མཁའ་མཛོད་ཀྱིའོ། །ཨོྃ་ཛྙཱ་ན་ཀེ་ཏུ་ཛྙཱ་ན་བ་ཏི་ཧཱུྃ། ཡེ་ཤེས་ཏོག་གིའོ། །ཨོྃ་ཨ་མི་ཏ་པྲ་བྷེ་ཨ་མི་ཏ་བ་ཏི་ཧཱུྃ། འོད་དཔག་མེད་ཀྱིའོ། །ཨོྃ་ཙནྡྲ་སྠེ་ཙནྡྲ་བྱཱ་བ་ལོ་ཀི་ནི་ཧཱུྃ་སྭཱ་ཧཱ། ཟླ་འོད་ཀྱིའོ། །ཨོྃ་བྷ་དྲ་བ་ཏི་བྷ་དྲ་པཱ་ལེ་སྭཱ་ཧཱ། བཟང་སྐྱོང་གིའོ། །ཨོྃ་ཛཱ་ལི་མ་ཧཱ་ཛཱ་ལི་ནི་ཧཱུྃ། དྲ་བ་ཅན་གྱི་འོད་ཀྱིའོ། །ཨོྃ་བཛྲ་གརྦྷེ་ཧཱུྃ། རྡོ་རྗེ་སྙིང་པོའིའོ། །ཨོྃ་ཨཀྵ་ཡེ་ཧཱུྃ་ཧཱུྃ། ཨཀྵ་ཡ་ཀརྨཱ་བར་ཎ་བི་ཤོ་དྷ་ནེ་སྭཱ་ཧཱ། །བློ་གྲོས་མི་ཟད་པའིའོ། །ཨོྃ་པྲ་ཏི་བྷཱ་ནེ་པྲ་ཏི་བྷཱ་ན་ཀཱུ་ཊེ་སྭཱ་ཧཱ། སྤོབས་པ་བརྩེགས་པའིའོ། །ཨོྃ་ས་མནྟ་བྷ་དྲེ་ཧཱུྃ། ཀུན་དུ་བཟང་པོའིའོ། །བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོའི་སྔགས་འདི་དག་རིམ་པ་བཞིན་དུ་བརྗོད་དོ། །འདི་དག་གིས་རྒྱུད་དུ་ཇི་སྐད་གསུངས་པའི་རྗེས་སུ་འབྲང་བའི་ཆོ་གའི་རིམ་པས་ཉིན་རེ་ཞིང་སྔ་བའི་དུས་སུ་སྐྱེད་པའི་རིམ་པ་བསྒོམ་བཞིན་པས་ལྷའི་རྣལ་འབྱོར་ཏིང་ངེ་འཛིན་གསུམ་མཆོག་འབད་པས་བསྒོམས་ཏེ། ངན་སོང་ཡོངས་སུ་སྦྱོང་བར་གྲུབ་པར་འགྱུར་རོ། །ལྷའི་དབང་པོ་གཞན་ཡང་དེ་བཞིན་གཤེགས་པ་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོའི་གསང་བའི་སྙིང་པོ་འདི་རིགས་ཀྱི་བུའམ། རིགས་ཀྱི་བུ་མོའམ། གང་འགའ་ཞིག་མིང་ཙམ་ཉན་པ་དང་། འཆང་བ་དང་། ཀློག་པའམ། བྲིས་ནས་ཀྱང་མགོའམ། གཙུག་ཕུད་དམ། དཔུང་པའམ། མགུལ་བར་བཏགས་ཏེ་འཆང་བར་བྱེད་ན་དེའི་ཚེ་འདི་ཉིད་ལ་དུས་མ་ཡིན་པར་འཆི་བ་བརྒྱད་དང་། འཆི་བ་དང་འབྲེལ་པའི་རྨི་ལམ་འབྱུང་བའམ། ངན་སོང་དང་འབྲེལ་པའི་མཚན་མ་དེ་དག་ཐམས་ཅད་རྨི་ལམ་ཙམ་དུ་ཡང་མི་འབྱུང་ངོ་། །གང་འགའ་ཞིག་དཀྱིལ་འཁོར་དུ་ཡང་ཇི་ལྟ་བ་བཞིན་དུ་ཞུགས་ནས་དབང་བསྐུར་ཏེ་སྙིང་པོ་ཡང་ཟློས་ཤིང་སྔགས་ཀྱི་དོན་སྒོམ་པར་བྱེད་ན་ལྟ་སྨོས་ཀྱང་ཅི་དགོས་ཏེ། དེ་དག་ལ་སྡིག་པ་གང་ཅུང་ཟད་ཀྱང་ཉེ་བར་མི་འགྱུར་ཞིང་
ངན་སོང་དུ་འགྲོ་བར་མི་འགྱུར་རོ། །སྐྱེས་པ་དང་། བུད་མེད་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། བྱོལ་སོང་དང་། ཡི་དགས་དང་། དམྱལ་བ་ལ་སོགས་པ་གང་ཡང་རུང་བ་ཤི་བའི་ལུས་རྣམས་དཀྱིལ་འཁོར་དུ་བཅུག་སྟེ་དབང་བསྐུར་ན་དེ་དམྱལ་བར་སྐྱེས་ན་ཡང་དེ་མ་ཐག་ཉིད་དུ་རྣམ་པར་ཐར་ནས་ལྷའི་རིགས་སུ་སྐྱེ་བར་འགྱུར་རོ། །ལྷའི་རིགས་དེར་སྐྱེས་པར་གྱུར་ནས་དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་མངོན་སུམ་དུ་བྱེད་ཅིང་ཕྱིར་མི་ལྡོག་པར་ཡང་འགྱུར་རོ། །རྒྱུད་ངེས་པ་ཅན་དུ་ཡང་འགྱུར་ཞིང་དེ་བཞིན་གཤེགས་པ་ཐམས་ཅད་ཀྱི་རིགས་སུ་རབ་ཏུ་སྐྱེ་བར་འགྱུར་རོ། །སྒྲིབ་པ་རྣམས་རབ་ཏུ་སྤངས་ནས་དེ་བཞིན་གཤེགས་པ་ཐམས་ཅད་ཀྱི་རིགས་སམ། ལྷའི་རིགས་སམ། གཞན་དུ་ཡང་བདེ་བ་མྱོང་བར་འགྱུར་རོ། །ལྷའི་དབང་པོ་མདོར་ན་འཇིག་རྟེན་དང་འཇིག་རྟེན་ལས་འདས་པའི་ཕན་པ་དང་།བདེ་བ་ཐམས་ཅད་མྱོང་བར་འགྱུར་རོ། །དེ་ནས་ལྷའི་དབང་པོས་བཅོམ་ལྡན་འདས་ལ་སྔ་མ་བཞིན་དུ་བསྐོར་བ་བྱས་ཏེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ངན་སོང་ཐམས་ཅད་ཀྱི་དབང་དུ་གྱུར་པ་རྣམས་ལ་ཕན་པ་དང་བདེ་བར་བགྱི་བ་དང་། ཇི་ལྟར་སེམས་ཅན་རྣམས་ངན་སོང་ཐམས་ཅད་ལ་རྒྱབ་ཀྱིས་ཕྱོགས་པར་བགྱི་བ་དང་། བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་བདེ་བླག་ཏུ་རྟོགས་པར་བགྱི་བའི་སླད་དུ་ཆོས་བཤད་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པས་ངན་སོང་ཐམས་ཅད་ཡོངས་སུ་སྦྱོང་བའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱིས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་ཞེས་བྱ་བའི་དཀྱིལ་འཁོར་ཆེན་པོ་གསུངས་ཏེ། དེ་མགོན་པོ་ཤཱཀྱ་ཐུབ་པ་ཉིད་ཀྱིས་གསུངས་པ་ནི། དང་པོ་རེ་ཞིག་རྣལ་འབྱོར་པས་སྐྱེ་བོས་དབེན་པའི་ཡིད་དང་རྗེས་སུ་མཐུན་པའི་ས་ཕྱོགས་སུ། འཇམ་ཞིང་ཤིན་ཏུ་འབོལ་བའི་གདན་ལ་འདུག་སྟེ། དྲི་བཟང་པོས་མཎྜལ་བྱས་ནས་ཉེ་བར་སྤྱོད་པ་ལྔའི་མཆོད་པ་བྱའོ། །དེ་ནས་ཆོས་ཐམས་ཅད་བདག་མེད་པར་བསྒོམས་ལ། བདག་ཉིད་ཡི་གེ་ཧཱུྃ་གིས་རྡོ་རྗེ་འབར་བ་མེ་ཉི་མར་བསྒོམས་ཏེ། དེའི་མགྲིན་པར་ཡི་གེ་ཧྲཱི་ལས་པདྨ་དང་དེའི་སྟེང་དུ་
འདབ་མའི་རྩེ་མོར་ཡི་གེ་ཨ་ལས་ཟླ་བའི་དཀྱིལ་འཁོར་དང་། དེའི་སྟེང་དུ་ཡི་གེ་ཧཱུྃ་ལས་རྡོ་རྗེ་རྩེ་ལྔ་པ་དང་། རྡོ་རྗེ་དེ་ལྕེ་ལ་ཐིམ་པར་བྱ་ཞིང་བཛྲ་ཛི་ཧྭ་ཞེས་བྱའོ། །དེས་རྡོ་རྗེའི་ལྕེར་འགྱུར་ཞིང་སྔགས་ཟློས་པ་ནུས་པར་འགྱུར་རོ། །ལག་པ་གཉིས་ཀྱི་དབུས་སུ་ཡི་གེ་ཨ་དཀར་པོ་ལས་ཟླ་བའི་དཀྱིལ་འཁོར་དང་དེའི་སྟེང་དུ་ཡི་གེ་ཧཱུྃ་ལས་རྡོ་རྗེ་རྩེ་ལྔ་པ་དང་དེ་གཉིས་ལག་པའི་མཐིལ་དུ་ཐིམ་པར་བྱ་སྟེ་རྡོ་རྗེའི་ལག་པར་འགྱུར་ཞིང་ཕྱག་རྒྱ་འཆིང་བར་ནུས་པར་འགྱུར་རོ། །དེ་ནས་བསྲུང་བའི་འཁོར་ལོ་བསྒོམ་པར་བྱ་སྟེ། ཨོྃ་གྲྀཧྞ་བཛྲ་ས་མ་ཡ་ཧཱུྃ་བྃ་ཞེས་བརྗོད་ཅིང་ཁྲོ་བོ་ཏི་རིན་ཏི་རི་བཅིང་བར་བྱ་སྟེ། རྡོ་རྗེ་བསྡམས་པ་ནང་བྱས་ནས། །མཐེ་བོང་རྡོ་རྗེ་དམ་པོ་ཡིས། །ཁྲོ་བོའི་ཡིད་ཀྱིས་དགབ་བྱ་བ། །ཁྲོ་བོ་ཏི་རིན་ཏི་རི་བཅིང་། །དེ་ནས་རྡོ་རྗེ་ཕྱེད་པའི་གདན་གྱིས་འདུག་པས་རྡོ་རྗེ་ཏི་རིན་ཏི་རི་བཅིངས་ལ་རྡོ་རྗེ་ཕྲེང་བའི་དབང་བསྐུར་བ་གཟུང་བར་བྱ་སྟེ། ཨོྃ་བཛྲ་ཛྲ་ལཱ་ན་ལཱ་རྐ་ཧཱུྃ་ཨ་བྷི་ཥིནྩ་ཏུ་མཱྃ་ཞེས་པས་སོ། །རྡོ་རྗེ་བསྡམས་པ་ལས། མཐེ་བོང་གཉིས་གཤིབས་ཏེ་བསྒྲེང་བ་རྡོ་རྗེ་བསྡམས་པའི་སྟེང་དུ་དགབ་པའི་ཚུལ་དུ་གཟུང་བ་ནི་རྡོ་རྗེ་ཏི་རིན་ཏི་རིའོ། །ཨོྃ་ཊུཾ་ཞེས་བྱ་བའི་ཡི་གེ་གཉིས་པོ་འདིའི་གོ་ཆས་གོ་ཆ་བགོས་ནས། ཨོྃ་བཛྲ་ཛྭ་ལཱ་ན་ལཱ་རྐ་ཧཱུྃ་ཞེས་བྱ་བ་སྒྲོགས་ཤིང་གཡོན་པའི་རྡོ་རྗེ་ཁུ་ཚུར་སྙིང་གར་བྱ་སྟེ། གཡས་པའི་རྡོ་རྗེ་ཁུ་ཚུར་གསོར་ཞིང་བགེགས་ཐམས་ཅད་ལ་བསྣུན་ནོ། །དེ་ནས་རྡོ་རྗེ་མེའི་ཕྱག་རྒྱ་དང་བཅས་པས་བགེགས་བསྲེག་པར་བྱ་སྟེ། ཨོྃ་བཛྲ་ཛྭཱ་ལཱ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུྃ་ཕཊ། ཞེས་བརྗོད་ཅིང་རྡོ་རྗེ་བསྡམས་པ་ནང་དུ་བཅིངས་ལ་སོར་མོ་རྣམས་ནང་དུ་འབར་བ་ལ་མཐེ་བོ་རྡོ་རྗེ་བསྒྲེང་བ་འདི་ནི་རྡོ་རྗེ་མེའི་ཕྱག་རྒྱའོ། །དེའི་རྗེས་ལ་བཛྲ་ནེ་ཏྲཱི་བནྡྷ་སརྦ་བི་གྷྣ་དི་ན་ཞེས་པའི་ཕྱག་རྒྱ་དང་ལྡན་པས་བགེགས་ཐམས་ཅད་བཅིང་བར་བྱའོ། །རྡོ་རྗེ་བསྡམས་པ་བཅིངས་ལ་མཐེ་བོ་གཉིས་བརྐྱང་སྟེ་མཉམ་ལ་བཟུང་བ་ནི་རྡོ་རྗེ་སྤྱན་གྱི་ཕྱག་རྒྱའོ། །རྡོ་རྗེ་བསྡམས་པ་བརྐྱང་བ་ས་ལ་བཞག་སྟེ་འོག་བཅིང་བར་བྱའོ། །ཨོྃ་བཛྲ་དྲྀ་ཌྷོ་མེ་བྷ་བ་རཀྵ་སརྦཱྃ་སྭཱ་ཧཱ་ཞེས་བྱའོ། །རྡོ་རྗེ་འཇིགས་བྱེད་སྤྱན་གྱི་ཕྱག་རྒྱ་དང་བཅས་པས་སྟེང་བཅིང་བར་བྱ་སྟེ། ཨོྃ་ཧུ་ལུ་ཧུ་ལུ་ཧཱུྃ་ཕཊ་ཅེས་པ་དང་། རྡོ་རྗེ་ཁུ་ཚུར་གཉིས་བཅིངས་ལ་མགལ་མེའི་འཁོར་ལོ་ལྟར་བསྐོར་ནས་མགོ་བོའི་སྟེང་དུ་
བཟུང་བ་ནི་རྡོ་རྗེ་འཇིགས་བྱེད་སྤྱན་གྱི་ཕྱག་རྒྱའོ། །དེའི་འོག་ཏུ་རྡོ་རྗེ་གནོད་སྦྱིན་གྱི་ཕྱག་རྒྱ་དང་བཅས་པས་སླར་སྟེང་བཅིང་བར་བྱ་སྟེ། །ཨོྃ་བཛྲ་ཡཀྵ་ཧཱུྃ་ཞེས་པ་འདི་དང་རྡོ་རྗེ་ཐལ་མོ་མཐེ་བོ་གཉིས་བརྐྱང་ལ་མཛུབ་མོ་གཉིས་མཆེ་བ་ལྟ་བུར་བྱས་པ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །རྡོ་རྗེ་གཙུག་ཏོར་གྱི་ཕྱག་རྒྱ་དང་བཅས་པས་ཤར་ཕྱོགས་བཅིང་བར་བྱ་སྟེ། །ཨོྃ་དྲུྃ་བྷནྡྷ་ཧྃ་ཞེས་པའོ། །དྲུྃ་ཞེས་པ་ཡང་ངོ་། །རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་ལུ་གུ་རྒྱུད་དུ་སྦྲེལ་ལ་མཛུབ་མོ་གཉིས་རྩེ་སྦྱར་ལ་བཟློག་ནས་སྤྱི་བོར་བཞག་པ་ནི་རྡོ་རྗེ་གཙུག་ཏོར་གྱི་ཕྱག་རྒྱའོ། ། ཡང་རྡོ་རྗེ་ཞགས་པས་ཤར་དེ་ཉིད་བཅིང་བར་བྱ་སྟེ། ཨོྃ་བཛྲ་པཱ་ཤ་ཧྲཱིཿཞེས་པ་དང་། རྡོ་རྗེ་ཁུ་ཚུར་གཉིས་ཀྱིས་མཁྲིག་མ་མདུད་པ་བྱས་པ་ནི་རྡོ་རྗེ་ཞགས་པའི་ཕྱག་རྒྱའོ། །རྡོ་རྗེ་བ་དན་གྱིས་ནུབ་ཕྱོགས་བཅིང་བར་བྱ་སྟེ། །ཨོྃ་བཛྲ་པཱ་ཏཱཾ་ཀེ་པ་ཏཱཾ་གི་ནི་ར་ཊ་ཞེས་པ་དང་། རྡོ་རྗེ་བསྡམས་པ་ལས་མཐེ་བོང་གཉིས་སེམས་དཔའི་སྐྱིལ་ཀྲུང་བྱས་ལ་མཛུབ་མོ་གཉིས་མཉམ་པོར་གཤིབས་ཏེ་ཕྱེ་ལ་མཐེའུ་ཆུང་བ་དན་ལྟར་བྱས་པ་ནི་རྡོ་རྗེ་བ་དན་གྱིའོ། །ཕྱོགས་དང་མཚམས་དང་སྟེང་དང་འོག་གི་བགེགས་རྣམས་ཚར་གཅད་པར་བྱའོ། །རྡོ་རྗེ་དུས་ཀྱིས་བྱང་ཕྱོགས་བཅིངས་ཏེ་ཧྲཱིཿ་བཛྲ་ཀཱ་ལི་རུ་ཊ་མ་ཊ་ཞེས་པ་དང་། རྡོ་རྗེ་གནོད་སྦྱིན་གྱི་ཕྱག་རྒྱ་སྙིང་གར་བསྟན་པར་བྱས་པ་ནི་རྡོ་རྗེ་དུས་ཀྱིའོ། །རྡོ་རྗེ་རྩེ་མོས་ལྷོ་བཅིངས་ཏེ། ཨོྃ་བཛྲ་ཤི་ཁ་རེ་རུ་ཊ་མ་ཊ་ཞེས་པ་དང་། རྡོ་རྗེ་ཁུ་ཚུར་གཉིས་ཀྱིས་རི་བོ་འདེགས་པའི་ཚུལ་ནི་རྡོ་རྗེ་རྩེ་མོའིའོ། །རྡོ་རྗེ་ལས་ཀྱིས་དཀྱིལ་འཁོར་བཅིང་བར་བྱས་ལ་ར་བ་བྱའོ། ། ཧཱུྃ་བཛྲ་ཀརྨ་ཞེས་པའོ། །ཡང་རྡོ་རྗེ་ཧཱུྃ་མཛད་ཀྱིས་ནང་དུ་རབ་བྱ་སྟེ་ཧཱུྃ་ཞེས་པ་དང་། རྡོ་རྗེ་ཁུ་ཚུར་གཉིས་བཅིངས་ལ་རྡོ་རྗེ་མཁྲིག་མ་གཉིས་བསྣོལ་ཏེ་མཐེའུ་ཆུང་གཉིས་ལྕགས་ཀྱུར་སྦྲེལ་ལ་མཛུབ་མོ་གཉིས་སྡིགས་མཛུབ་ཏུ་སྒྲེང་བ་ནི་འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བ་རྡོ་རྗེ་ཧཱུྃ་མཛད་ཀྱིའོ། །འདི་ཉིད་ལས་མཛུབ་མོ་དང་གུང་མོ་གཉིས་རྡོ་རྗེ་ལྟར་བྱས་པ་ནི་རྡོ་རྗེ་ལས་ཀྱིའོ། །རྡོ་རྗེ་བསྡམས་པས་རྡོ་རྗེའི་གུར་སྦྱིན་པར་བྱ་སྟེ། བཛྲ་བནྡྷ་པྃ་ཞེས་པ་འདིས་སོ། །དེ་ནས་རྡོ་རྗེ་འཁོར་ལོའི་ཕྱག་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་མདུན་དུ་རྫོགས་པར་བྱ་སྟེ། ཨོྃ་བཛྲ་
བིརྦ་ཛྲ་ཙཀྲ་ཧཱུྃ་ཞེས་བྱའོ། །རྡོ་རྗེ་ཁུ་ཚུར་གཉིས་བཅིངས་ནས། །མཛུབ་མོ་མཐེའུ་ཆུང་རྡོ་རྗེ་བཅིང་། །རྡོ་རྗེ་འཁོར་ལོ་ཞེས་གྲགས་པ། །དཀྱིལ་འཁོར་ཐམས་ཅད་སྒྲུབ་བྱེད་ཡིན། །འདིས་ཕྱོགས་ཐམས་ཅད་དུ་གཡས་སྐོར་ཉིད་ཀྱིས་བསྐོར་བ་ལས་དཀྱིལ་འཁོར་ཐམས་ཅད་སྤྲུལ་པར་འགྱུར་རོ། ། འདི་ཉིད་ཁར་བཞག་ནས་ངེས་པར་བལྟ་བཞིན་དུ་རྡོ་རྗེ་འཁོར་ལོའི་སྔགས་ལན་བརྒྱད་བཟླས་སོ། །དེ་ཡིས་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །དེ་ནས་མངོན་སུམ་ལྟ་བུར་བློས་དམིགས་ལ་མེ་ཏོག་ལ་སོགས་པས་ཡང་དག་པར་མཆོད་དེ། ཕྱོགས་ཐམས་ཅད་དུ་ཡན་ལག་ལྔ་པ་དང་། འདིས་ཕྱག་བྱའོ། །ཨོྃ་སརྦ་བིདྱ་ཀཱ་ཡ་བཱ་ཀྩིཏྟ་པྲ་ཎ་མེ་ན་བཛྲ་བནྡ་ནཾ་ཀ་རོ་མི་ཞེས་པའོ། །དེ་ནས་ཕྱག་བཞི་བྱ་བ་སྟེ་འདི་ལྟར་ལུས་ཐམས་ཅད་ཀྱིས་དང་། རྡོ་རྗེ་ཐལ་མོ་བརྐྱང་བས་ཤར་ཕྱོགས་སུ་ཕྱག་བྱས་ཏེ། ཨོྃ་སརྦ་བིཏྦཱུ་ཛོ་པ་སྠཱ་ནཱ་ཡཱ་ཏྨཱ་ནཾ་ནིཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ས་ཏྭ་ཨ་དྷི་ཏིཥྛ་མཱྃ་ཞཻས་པ་འདིས་སོ། །དེ་ནས་དེ་བཞིན་དུ་ལངས་ལ་རྡོ་རྗེ་ཐལ་མོ་སྙིང་གར་བྱས་ཏེ། ལྷོ་ཕྱོགས་སུ་དཔྲལ་བ་ས་ལ་རེག་ཅིང་ཕྱག་བྱ་སྟེ། ཨོྃ་སརྦ་བིདྦ་ཛྲཱ་བྷཱི་ཥེ་ཀཱ་ཡ། ཨཱ་ཏྨཱ་ནཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣཱ་བྷི་ཥིཉྩ་མཱྃ་ཞེས་པ་འདིས་སོ། །དེ་ནས་དེ་བཞིན་དུ་ལངས་ལ། རྡོ་རྗེ་ཐལ་མོ་སྤྱི་བོར་བཞག་སྟེ། ནུབ་ཕྱོགས་སུ་ཁས་ལ་རེག་ཅིང་ཕྱག་བྱ་སྟེ། ཨོྃ་སརྦ་བིཏྤཱུ་ཛཱ་པྲ་བརྟ་ནཱ་ནཾ་ནི་ཪྱཱ་ཏཱ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨ་པྲ་བརྟ་ཡ་མཱྃ་ཞེས་བྱ་བ་འདིས་སོ། །དེ་ནས་དེ་བཞིན་དུ་ལངས་ལ་རྡོ་རྗེ་ཐལ་མོ་སྤྱི་བོ་ནས་ཕབ་སྟེ། སྙིང་གར་བྱས་ལ་བྱང་ཕྱོགས་སུ་སྤྱི་བོ་ས་ལ་རེག་ཅིང་ཕྱག་བྱ་སྟེ། ཨོྃ་སརྦ་བིཏྤཱུ་ཛཱ་ཀརྨ་ཎེ་ཨཱཏྨཱ་ནཾ། །ནིཪྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཱྃ་ཞེས་པ་འདིས་སོ། །དེ་ནས་པུས་མོའི་ལྷ་ང་གཉིས་ས་ལ་བཙུགས་ཏེ། རྡོ་རྗེ་ཐལ་མོ་སྙིང་གར་བྱས་ལ་སྡིག་པ་ཐམས་ཅད་སོ་སོར་བཤགས་པར་བྱ་སྟེ། ཕྱོགས་བཅུ་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། ནོར་བུ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། སྔགས་དང་། རིག་པ་དང་། ལྷ་ཐམས་ཅད་བདག་ལ་དགོངས་སུ་གསོལ། བདག་
ཆེ་གེ་མོ་ཞེས་བྱ་བ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔ་དང་། དེ་བཞིན་གཤེགས་པ་དང་། རྡོ་རྗེ་དང་། ནོར་བུ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། སྔགས་དང་། རིག་པ་དང་། སྔགས་ཀྱི་ལྷ་ཐམས་ཅད་ཀྱི་ཡང་སྤྱན་སྔར་སྡིག་པ་ཐམས་ཅད་སོ་སོར་བཤགས་པར་བགྱིའོ། །ཕྱོགས་བཅུ་ན་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་དང་། འཕགས་པ་ཉན་ཐོས་ཡང་དག་པར་སོང་བ་དང་། ཡང་དག་པར་ཞུགས་པ་རྣམས་དང་། སེམས་ཅན་གྱི་རིགས་ཐམས་ཅད་ཀྱི་བསོད་ནམས་ཐམས་ཅད་ལ་རྒྱ་ཆེར་རྗེས་སུ་ཡི་རང་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཆོས་ཀྱི་འཁོར་ལོ་མི་བསྐོར་བ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བྱ་བའི་ཕྱིར་བསྐུལ་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་ཐམསཅད་ལ་མྱ་ངན་ལས་མི་འདའ་བར་གསོལ་བ་འདེབས་སོ། །དེ་ནས་མེ་ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དོ། །ཨོྃ་སརྦ་བིཏྦུ་ཥྤ་པཱུ་ཛཱ་མེ་གྷ་ས་མུ་དྲསྥ་ར་ཎ་ས་མ་ཡེ་ཧཱུྃ་ཞེས་པའོ། །བདུག་པའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། ཨོྃ་སརྦ་བིདྡྷཱུ་པ་པཱུ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུྃ་ཞེས་པའོ། །མར་མེའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། །ཨོྃ་སརྦ་བི་དཱ་ལོ་ཀེ་པཱུ་ཛཱ་མེ་གྷ་ས་མུ་དྲ་སྦར་ཎ་ས་མ་ཡེ་ཧཱུྃ་ཞེས་པའོ། །དྲིའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། །ཨོྃ་སརྦ་བིངྒ་ནྡྷ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པའོ། །ཐལ་མོ་སྙིམ་པ་ཁོང་སྟོང་དུ་སྦྱར་བ་བཅིངས་ལ་འདི་སྐད་ཅེས་བརྗོད་དེ། །ཨོྃ་སརྦ་བིདཱོ་དྷྱྃ་ག་ར་ཏྣཱ་ལང་ཀཱ་ར་པཱུ་ཛཱ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུྃ་ཞེས་པའོ། །ཨོྃ་བིདྡྷཱ་སྱ་ལཱ་སྱ་ར་ཏི་ཀྲཱི་ཌཱ་སཽ་ཁྱ་ཨ་ནུཏྟ་ར་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པ་དང་། ཨོྃ་སརྦ་བི་ད་ནུ་ཏྟ་ར་བོ་དྷྱ་ལང་ཀཱ་ར་ཝསྟྲ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པའོ། །དེ་ནས་འཁོར་བའི་སྡུག་བསྔལ་ཐམས་ཅད་རྗེས་སུ་དྲན་པར་བྱས་ནས། བཅོམ་ལྡན་
འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ལ། སྙིང་རྗེའི་དབང་གིས་སེམས་ཅན་ཐམས་ཅད་བསྒྲལ་བའི་ཕྱིར་བྱང་ཆུབ་ཀྱི་སེམས་བསྐྱེད་པར་བྱ་སྟེ། མ་བསྒྲལ་བ་རྣམས་བསྒྲལ་བའི་ཕྱིར་དང་། མ་གྲོལ་བ་རྣམས་གྲོལ་བར་བྱ་བའི་ཕྱིར་དང་། དབུགས་མ་ཕྱིན་པ་རྣམས་དབུགས་དབྱུང་བའི་ཕྱིར་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བྱ་བའི་ཕྱིར་དང་། སེམས་ཅན་གྱི་ཁམས་མ་ལུས་པ་འཁོར་བའི་རྒྱ་མཚོ་ལས་ཡང་དག་པར་བསྒྲལ་བའི་ཕྱིར་བྱང་ཆུབ་ཏུ་སེམས་བསྐྱེད་པར་བགྱིའོ། །ཨོྃ་སརྦ་བིདྱཱ་བཛྲ་བོ་དྷི་ཙིཏྟ་པཱུ་ཛཱ་མེ་གྷ་ས་མུ་དྲ་སྥར་ཎས་མ་ཡེ་ཧཱུྃ་ཞེས་པའོ། །དེ་ནས་སྒེག་མོའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་ཡོ་བྱད་ཐམས་ཅད་དང་ཡང་དག་པར་ལྡན་ཞིང་ཕུན་སུམ་ཚོགས་པ་རྣམས་འདོད་པ་ཙམ་ལ་སོ་སོར་འབྱོར་པར་གྱུར་ཅིག །ཨོྃ་སརྦ་བིདྨ་ཧཱ་བཛྲོདྡྷ་བ་དཱ་ན་པཱ་ར་མི་ཏཱ་པཱུ་ཛཱ་མེ་གྷ་ས་མུ་དྲསྥ་ར་ཎ་ས་མ་ཡེ་ཧཱུྃ། ཕྲེང་བ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་མི་དགེ་བའི་ལུས་དང་། ངག་དང་། ཡིད་ཀྱི་ལས་ཀྱི་མཐའ་ཐམས་ཅད་དང་བྲལ་བར་གྱུར་ཅིག །དགེ་བའི་ལུས་དང་། ངག་དང་། ཡིད་ཀྱི་ལས་ཀྱི་མཐའ་ཐམས་ཅད་དང་ཡང་དག་པར་ལྡན་པར་གྱུར་ཅིག །ཨོྃ་སརྦ་བི་ད་ནུཏྟ་ར་མ་ཧཱ་བོ་དྷྱ་ཧཱ་ར་ཤཱི་ལ་པཱ་ར་མི་ཏཱ་པུ་ཛ་མེ་གྷ་ས་མུ་དྲསྥ་ར་ཎ་ས་མ་ཡེ་ཧཱུྃ། གླུ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་མཚན་དང་དཔེ་བྱད་ཀྱིས་ཡང་དག་པར་བརྒྱན་པའི་ལུས་དང་ལྡན་པ་དང་། རྟག་ཏུ་ཕན་ཚུན་འཇིགས་པ་མེད་པ་དང་། ཞེ་འགྲས་པ་མེད་པར་ཞུགས་ཤིང་སྙིང་དང་མིག་མངོན་པར་དགའ་བ་དང་། ཆོས་ཟབ་མོ་ལ་བཟོད་པ་དང་ལྡན་པར་གྱུར་ཅིག །ཨོྃ་སརྦ་བི་ད་ནུཏྟ་ར་མ་ཧཱ་དྷ་རྨཱ་བ་བོ་དྷི་ཀྵཱ་ནྟི་པཱ་རཱ་མི་ཏཱ་པཱུ་ཛཱ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུྃ་ཞེས་པའོ། །གར་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་བྱང་ཆུབ་ཀྱི་སྤྱོད་པ་དང་མངོན་པར་ལྡན་ཞིང་སངས་རྒྱས་ཉིད་ལ་མཆོག་ཏུ་གཞོལ་ཞིང་འཁོར་བ་ཡོངས་སུ་སྤོང་བའི་བརྩོན་འགྲུས་དང་ལྡན་པར་གྱུར་ཅིག །ཨོྃ་སརྦ་བིཏྶཾ་སཱ་ར་པ་རི་དྱཱ་གཱ་ནུ་ཏྟ་ར་བཱིརྱ་པཱ་ར་མི་ཏཱ་པཱུ་ཛཱ་མེ་གྷ་ས་
མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པའོ། །མེ་ཏོག་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་དང་བྲལ་ཞིང་བསམ་གཏན་དང་། རྣམ་པར་ཐར་བ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་དང་། རིག་པ་དང་། དབང་ཏམས་ཅད་ཕུན་སམ་ཚོགས་པར་འགྱུར་ཅིག །ཨོྃ་སརྦ་བི་ད་ནུཏྟ་ར་སཽ་ཁྱ་བི་ཧཱ་ར་དྷྱཱ་ན་པཱ་ར་མི་ཏཱ་པཱུ་ཛཱ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ་ཞེས་པའོ། །བདུག་པ་མའི་རྒྱ་བཅིངས་ལ་འདི་སྐད་ཅེས་བརྗོད་དེ། །སེམས་ཅན་ཐམས་ཅད་འཇིགས་རྟེན་དང་འཇིག་རྟེན་ལས་འདས་པའི་ཤེས་རབ་དང་། ཡེ་ཤེས་དང་ཡང་དག་པར་ལྡན་པར་གྱུར་ཅིག །སོ་སོ་ཡང་དག་པར་རིག་པ་བཞི་ཡང་དག་པར་ཐོབ་སྟེ་བཟོ་དང་བསྟན་བཅོས་ཐམས་ཅད་ཤེས་ཤིང་སྒྱུ་རྩལ་དང་། སྦྱོར་བ་དང་། ཆོ་ག་ཤེས་པ་དང་། དེ་ཁོ་ན་ཉིད་མཐོང་བ་དང་། ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་ཡང་དག་པར་གཅོད་པའི་ཡེ་ཤེས་ཐོབ་པར་གྱུར་ཅིག །ཨོྃ་སརྦ་བི་ད་ནུ་ཏྟ་ར་ཀླེ་ཤཙྪེ་ད་སརྦ་དྷ་རྨ་ས་མནྟ་ཛྙཱ་ན་མ་ཧཱ་པྲ་ཛྙ་པཱ་ར་མི་ཏཱ་པཱུ་ཛཱ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུྃ་ཞེས་པའོ། །མར་མེ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་ལོག་པར་ལྟུང་བ་ཐམས་ཅད་དང་བྲལ་བར་གྱུར་ཅིག །ཨོྃ་སརྦ་བི་ཏྶ་རྦཱ་པཱ་ཡ་བི་ཤོ་དྷ་ནི་ཛྙཱ་ནཱ་ལོ་ཀ་པྲ་ཎི་དྷཱ་ན་པཱ་ར་མ་ཏཱ་པཱུ་ཛཱ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ་ཞེས་པའོ། །དྲི་ཆབ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་མི་ཤེས་པ་དང་བྲལ་བར་གྱུར་ཅིག །ཨོྃ་སརྦ་བིཏྶ་རྦཱ་ཡ་གནྡྷ་བི་ནཱ་ས་ནི་བཛྲ་གནྡྷོ་པཱ་ཡ་པཱ་ར་མི་ཏཱ་པཱུ་ཛཱ་མེ་གྷ་ས་མུ་དྲ་སྤྲ་ཎ་ས་མ་ཡེ་ཧཱུྃ་ཞེས་པའོ། །ལུས་ཀྱི་བསྙེན་བཀུར་བྱ་བའི་ཕྱིར་བདག་ཉིད་ཕྱོགས་བཅུའི་འཇིག་རྟེན་གྱི་ཁམས་མ་ལུས་པའི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པར་ལྷག་པར་མོས་པ་བྱས་ལ། །ཨོྃ་སརྦ་བིདྐཱ་ཡ་ནི་ཪྱཱ་ཏ་ན་པཱུ་ཛཱ་མེ་གྷ་ས་མུ་དྲ་ས་ར་ཎ་ས་མ་ཡེ་ཧཱུྃ་ཞེས་བྱའོ། །ཐམས་ཅད་དུ་ལྕེ་བརྒྱ་པའི་ཁ་ཡིས་མཉམ་མེད་མི་གཡོ་ཞེས་བྱ་བ་ལ་སོགས་པའི་བསྟོད་པ་ཉེ་བར་སྤྱོད་པ་ལྷག་པར་མོས་པ་བྱས་ལ། །ཨོྃ་སརྦ་བིདྦཱ་གྣིཪྱཱ་ཏ་ན་པཱུ་ཛཱ་མེ་གྷ་ས་མུ་དྲ་སྨ་ར་ཎ་ས་མ་ཡེ་ཧཱུྃ་
ཞེས་བྱའོ། །བྱང་ཆུབ་སེམས་དཔའ་ཐམས་ཅད་དགོངས་པ་གཅིག་པའི་སྦྱོར་བ་ཉིད་ཀྱིས་ཆོས་མཉམ་པ་ཉིད་དུ་ལྷག་པར་མོས་པ་བྱ་སྟེ། །ཨོྃ་སརྦ་བིདྩི་ཏྟ་ནི་རྱཱ་ཏ་ན་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་བྱའོ། །ཆོས་ཐམས་ཅད་ནི་དངོས་པོ་མེད་པའི་ངོ་བོ་ཉིད་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་པའོ་ཞེས་ལྷག་པར་མོས་པ་བྱས་ལ། །ཨོྃ་སརྦ་བིངྒུ་ཧྱ་པཱུ་ཛཱ་མེ་གྷ་སམུ་དྲསྥ་ར་ཎ་སམ་ཡེ་ཧཱུྃ་ཞེས་བྱའོ། །དེ་ལྟར་མཆོད་པ་རྣམ་པ་ཉི་ཤུས་དེ་བཞིན་གཤེགས་པ་ཐམས་ཅད་ཡང་དག་པར་མཆོད་ལ། བདག་ཉིད་དབུལ་བར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་དབུལ་བར་བགྱིའོ། །བདག་དུས་ཐམས་ཅད་དང་རྣམ་པ་ཐམས་ཅད་དུ་སོ་སོར་བཞེས་སུ་གསོལ་ལོ། །ཐུགས་རྗེ་ཆེན་པོ་དང་ལྡན་པའི་མགོན་པོ་ཁྱེད་རྣམས་ཀྱིས་དམ་ཚིག་ཆེན་པོའི་དངོས་གྲུབ་བདག་ལ་སྩལ་དུ་གསོལ་ཞེས་བྱའོ། །དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱ་སྟེ། དགེ་བའི་རྩ་བ་འདི་དག་གིས་བདག་དང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་དང་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་དང་ཡང་དག་པར་ལྡན་པར་གྱུར་ཅིག །བདེ་བ་དང་ཡིད་བདེ་བ་ཉིད་ཀྱིས་མི་ཡི་མཆོག་སངས་རྒྱས་སུ་ཚེ་འདི་ཉིད་ལ་གྱུར་ཅིག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་སྒྲོལ། །ཞེས་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ལ། སྡོམ་པ་གཟུང་བར་བྱ་སྟེ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་བསླབ་པ་རྣམ་པ་གསུམ། །དགེ་བ་དང་ནི་ཆོས་སྡུད་དང་། སེམས་ཅན་དོན་བྱེད་ཚུལ་ཁྲིམས་ནི། །བདག་གིས་སོ་སོར་བརྟན་པོར་གཟུང་། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་མཆོག་
བླ་མེད་པ། །སྡོམ་པ་སངས་རྒྱས་རྣལ་འབྱོར་བྱུང་། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་ཆེན་པོའི་རིགས་བསྡུས་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །དེ་ཉིད་ཀྱིས་ནི་རབ་ཏུ་གཟུང་། །སློབ་དཔོན་དག་ཀྱང་གཟུང་བར་བགྱི། །རིན་ཆེན་ཆེན་པོའི་རིགས་མཆོག་གིས། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རབ་ཏུ་སྦྱིན། །པདྨ་ཆེན་པོའི་རིགས་དག་པ། །བྱང་ཆུབ་ཆེན་པོ་འབྱུང་བ་ལ། །ཕྱི་དང་གསང་བ་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཆེན་རིགས་ནི་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །མཆོད་པའི་ལས་ནི་ཅི་ནུས་བཞིན། །ཀུན་ནས་སོ་སོར་གཟུང་བར་བགྱི། །སེམས་ཅན་ཀུན་གྱི་དོན་བགྱིད་ཕྱིར། །བྱང་ཆུབ་སེམས་ནི་བླ་མེད་པ། །དམ་པ་ཡང་དག་བསྐྱེད་བགྱིས་ཤིང་། །སྡོམ་པ་མ་ལུས་གཟུང་བགྱིས་ནས། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་བགྱི། སེམས་ཅན་མྱ་ངན་འདས་ལ་དགོད། །ཅེས་བྱའོ། །དེ་ནས་ནམ་མཁའི་དཀྱིལ་འཁོར་ལ་ལྷ་ལ་སོགས་པ་རྣམས་ཀྱིས་མཆོད་པར་ལྷག་པར་མོས་ཏེ། ཉེ་བར་སྤྱོད་པ་ལྔ་ལ་སོགས་པས་མཆོད་པར་བྱའོ། །ཡང་དག་པར་མཆོད་ནས་ནི་བཅོམ་ལྡན་འདས་ཀྱི་ཡོན་ཏན་བསྔགས་པར་བྱེད་དེ། ཨེ་མའོ་སངས་རྒྱས་ཨེ་སངས་རྒྱས། །སངས་རྒྱས་མཛད་པ་མཆོག་ལེགས་སོ། །ངན་སོང་ཐམས་ཅད་ལེགས་སྦྱངས་ནས། །སེམས་ཅན་བྱང་ཆུབ་ཐོབ་མཛད་ཕྱིར། །ཞེས་པའོ། ། དེ་ནས་བཛྲ་ཨཉྫ་ལི་ཞེས་པ་དང་། རྡོ་རྗེ་བསྡམས་པ་སྙིང་གར་དྲལ་བར་བྱ་སྟེ། །ཨོྃ་སརྦ་བིད་བཛྲ་བནྡྷ་ཏྲཱཊ་ཞེས་བརྗོད་ཅིང་། རྡོ་རྗེ་འབེབས་པའི་ཕྱག་རྒྱ་བཅིངས་ལ། །ཨོྃ་ཏིཥྵ་བཛྲ་དྲྀ་ཌྷོ་མེ་བྷ་བ་ཤཱ་ཤྭ་ཏོ་མེ་བྷ་བ་ཧྲྀ་ད་ཡྃ་མེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ་ཧཱུྃ་ཧ་ཧ་ཧ་ཧ་ཧོཿཞེས་བྱའོ། །ཨོྃ་བཛྲ་མུཥྚི་བྃ། སེམས་མ་རྡོ་རྗེ་བཅིངས་ནས། །ཨོྃ་སརྦ་བིཏ་ཤོ་དྷ་ནེ་ཤོ་དྷ་ནེ་སརྦ་པཱ་བ་མ་བ་ན་ཡ་ཧཱུྃ། རྡོ་རྗེ་བསྡམས་པ་བརྟན་བཅིངས་ནས། །རྡོ་རྗེའི་ཕྱག་རྒྱ་གཉིས་པར་ནས། །མྱུར་དུ་གྱེན་དུ་ལེགས་འཕེན་ལ། །ལྟུང་བ་སློང་བར་བྱེད་པའི་མཆོག །ཅེས་པའོ། །ཨོྃ་སརྦ་
བིཏ་སརྦཱ་པཱ་ཡ་བི་ཤོ་དྷ་ནེ་ཧཱུྃ་ཕཊ། སྡིག་པ་ཐམས་ཅད་རྣམ་པར་སྦྱོང་བའི་སྔགས་སོ། །རྡོ་རྗེ་བསྡམས་པ་བརྟན་བྱས་ནས། །གུང་མོ་དག་ནི་ཁ་སྦྱར་ཏེ། །མཐའ་མ་བཞི་པོ་ཁ་སྤྲད་པ། །མྱུར་དུ་སྡིག་པ་དྲལ་བར་འགྱུར། །ཨོྃ་སརྦ་བི་ཏ་ཏཱཊ་ཧཱུྃ། སེམས་མ་རྡོ་རྗེ་བཅིངས་ལ།ཨོྃ ཨོྃ་སརྦ་བིཏ་སརྦཱ་བ་ར་ཎ་བི་ཤོ་དྷ་ནི་མུ་ནེ་ཧཱུྃ་ཕཊ། འདོན་པའི་མཚན་ཉིད་དོ། །དེ་ནས་དེའི་རྗེས་ལ་རྣལ་འབྱོར་པས་སྙིང་གའི་དབུས་སུ་ཡི་གེ་ཨ་ལས་ཟླ་བའི་དཀྱིལ་འཁོར་དང་དེའི་སྟེང་དུ་ཨོྃ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཨོྃ་ནམཿསརྦ་དུརྒ་ཏི་ཤོ་དྷ་ནེ་ཤོ་དྷ་ནེ་སརྦ་པཱ་པྃ་བི་ཤོ་དྷ་ནེ་ཤུདྡྷེ་བི་ཤུདྡྷེ་སརྦ་ཀརྨཱ་བར་ཎ་བི་ཤུདྡྷེ་སྭཱ་ཧཱ། དེ་དག་གིས་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་ཡོངས་སུ་རྫོགས་པར་འགྱུར་རོ། །དེ་ནས་རྡོ་རྗེ་ལྕགས་ཀྱུ་ལ་སོགས་པས་བཀུག་ནས་བཅུག་སྟེ་བཅིངས་ནས་དབང་དུ་བྱས་ལ། ནམ་མཁའི་དཀྱིལ་འཁོར་ལ་གཞུགསྟེ་དཀྱིལ་འཁོར་གཉིས་ཀྱིས་དཀྱིལ་འཁོར་གཅིག་ཏུ་འགྱུར་རོ། །རྫོགས་པའི་རྣལ་འབྱོར་དུ་གྱུར་པ་ལས་དམ་ཚིག་གི་དཀྱིལ་འཁོར་གྱི་ལྷ་ཡོངས་སུ་རྫོགས་པར་འགྱུར་རོ། །དེ་ལ་དཀྱིལ་འཁོར་གྱི་དབུས་སུ་བདག་ཉིད་ཀྱི་དངོས་པོ་འཁོར་ལོས་སྒྱུར་བའི་གཟུགས་ཤཱཀྱ་སེང་གེར་བསྒོམ་མོ། །དེ་ནས་ཤཱཀྱ་ཐུབ་པའི་ཐུགས་ཀར་ཡི་གེ་ཨ་ལས་ཟླ་བའི་དཀྱིལ་འཁོར་བསྒོམ་ཞིང་ཟླ་བའི་དཀྱིལ་འཁོར་གྱི་དབུས་སུ། ཨོྃ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། །དེ་ནས་རྡོ་རྗེ་རྒྱུའི་ལས་ཀྱི་ཕྱག་རྒྱས་དཀྱིལ་འཁོར་སྤྲུལ་ཏེ། །ཨོྃ་སརྦ་བིད་བཛྲ་ཙཀྲ་ཧཱུྃ་ཞེས་པས་སོ། །སེམས་མ་རྡོ་རྗེ་བཅིངས་ནས་དེ་ཉིད་ཀྱི་སོར་མོ་དབུས་མ་གཉིས་ཀྱིས་ཕྲེང་བ་ཐོགས་ལ་ས་མ་ཡ་ཧཱུྃ་ཞེས་པ་འདིས་ཡིད་ཀྱིས་འཇུག་གོ། །ཕྲེང་བ་དེ་ཡང་རང་གི་མགོ་བོར་བཞག་སྟེ། པྲ་ཏཱིཙྪ་བཛྲ་ཧོཿཞེས་པ་འདིས་སོ། །དེ་ནས་རང་གི་མགོ་བོར་བཅིངས་ཏེ། །ཨོྃ་པྲ་ཏི་གྲྀཧྞ་སྟྭ་མི་མྃ་ས་ཏྭ་མ་ཧཱ་བ་ལ་ཞེས་པ་འདིས་སོ། །གདོང་པ་བཅིངས་ལ་ཡང་འདིས་དགྲོལ་ལོ། །ཨོྃ་རྡོ་རྗེ་སེམས་དཔའ་རང་ཉིད་དེ། །ཁྱེད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་ན་མེད། །ཐམས་ཅད་མིག་ནི་བྱེ་བར་འགྱུར། །ཞེས་པ་དང་། ཧེ་བཛྲ་པཱ་ཤྱ་ཞེས་པའོ། །དེ་ནས་དཀྱིལ་འཁོར་ཆེན་པོར་ཇི་སྲིད་བཅོམ་ལྡན་འདས་ཤཱཀྱ་ཐུབ་པ་དེ་སྲིད་དུ་བལྟའོ། །ཡང་
སེམས་མ་རྡོ་རྗེ་བཅིངས་ལ་ཐུགས་ཀར་དགྲོལ་ཞིང་རྡོ་རྗེར་བྱིན་གྱིས་བརླབས་པའི་བུམ་པ་ནས་དབང་བསྐུར་བ་རྡོ་རྗེ་ཁུ་ཚུར་གྱིས་སྦྱིན་པའོ། །ཨོྃ་སརྦ་བིདྱཱ་བཛྲ་ཨ་བྷི་ཥིཉྩ་ཞེས་པའོ། །ཡང་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་ཕྱག་རྒྱས་རྒྱས་གདབ་སྟེ། །ཨོྃ་སརྦ་བིདྱཱ་བཛྲ་དྷ་ར་ཏིཥྛ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། ཨོྃ་སརྦ་བིདྱཱ་བཛྲ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། ཨོྃ་སརྦ་བིདྱཱ་རཏྣ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། །ཨོྃ་སརྦ་བིདྱཱ་དྷརྨ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། ཨོྃ་སརྦ་བིདྱཱ་ཀརྨ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། ཨོྃ་ཊུྃ་བཛྲ་ཏུ་ཥྱ་ཧོཿཡི་གེ་གཉིས་ཀྱི་གོ་ཆས་གོ་བགོས་ལ། དེ་ནས་རང་ཉིད་རྡོ་རྗེའི་དབང་བསྐུར་བ་གཟུང་བར་བྱ་སྟེ། སངས་རྒྱས་རྣམས་ཀྱི་རྡོ་རྗེ་ཡི། །དབང་གིས་དེ་རིང་ཁྱོད་དབང་བསྐུར། །འདི་དེ་སངས་རྒྱས་ཐམས་ཅད་ཉིད། །རྡོ་རྗེ་རབ་ཏུ་གྲུབ་ཕྱིར་གཟུང་། །ཨོྃ་བཛྲ་ཨ་དྷི་པ་ཏི་སྟྭམ་བྷི་ཥིཉྩ་མི་ཏིཥྛ་བཛྲ་ས་མ་ཡ་སྟྭཾ། བཛྲ་ནཱ་མཱ་བྷི་ཥེ་ཀ་ཏ། །ཨོྃ་བཛྲ་ས་ཏྭ་སྟ་མ་བྷི་ཥིཉྩ་མཱྃ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་གཟུང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོྃ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭྃ་དྷཱ་ར་ཡཱ་མི་བཛྲ་ས་ཏྭ་ཧི་ཧི་ཧི་ཧི་ཧཱུྃ་ཞེས་པའོ། །ཨོྃ་སརྦ་བིདྱཱ་བཛྲཱ་དྷིཥྛཱ་ན་ས་མ་ཡེ་ཧཱུྃ། བདག་ཉིད་བྱིན་གྱིས་བརླབ་པའི་སྔགས་སོ། །རྡོ་རྗེ་ཁུ་ཚུར་གཉིས་བཅིངས་ནས་མཐེ་བོང་དང་གུང་མོ་དང་མཐེའུ་ཆུང་གྱེན་དུ་བསྒྲེང་སྟེ་ཁ་སྦྱར་ནས་མཛུབ་མོ་དང་མིང་མེད་སེམས་དཔའི་སྐྱིལ་ཀྲུང་བྱས་པ་ནི་རྡོ་རྗེའི་ཕྱག་རྒྱ་སྟེ། སྙིང་ག་དང་། མགྲིན་པ་དང་། དཔྲལ་བ་དང་། མཛོད་སྤུ་དང་། སྨིན་མཚམས་དང་། སྣ་དང་། རྣ་བ་དང་། དཀུ་དང་། པུས་མོ་དང་། རྐང་པ་དག་དང་། བྱིན་པ་དང་། མིག་གཉིས་དང་། གསང་བར་བྱིན་གྱིས་བརླབ་པ་ཡང་བྱའོ། །དེ་ནས་རང་གི་ལུས་ལ་ས་མ་ཡ་ཨཿཡི་གེ་ཨ་ལས་ཟླ་བའི་དཀྱིལ་འཁོར་ས་བོན་ལས་བྱུང་བའི་མཚན་མ་ཐམས་ཅད་ཀྱི་སྙིང་པོའི་ང་རྒྱལ་བསྐྱེད་ཅིང་ཨོྃ་སརྦ་བིདྱཱ་དྲྀ་ཤྱ་ཛཿཧཱུྃ་བྃ་ཧོཿས་མ་ཡ་སྟྭྃ་ས་མ་ཡ་ཧོ། །ཨོྃ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ་ཞེས་ལན་གསུམ་བརྗོད་པར་བྱའོ། །ཐུན་མོང་བ་ཡང་ངོ་། །དེ་ནས་རང་གི་ལུས་ལ་རྡོ་རྗེ་བསྡུ་བའི་ཕྱག་རྒྱ་བཅིངས་ཏེ། ཛཿཧཱུྃ་བྃ་ཧོཿ
བརྗོད་ཅིང་གནས་ཇི་ལྟ་བ་རྣམས་སུ་བཀུག་ནས་བཅུག་སྟེ་བཅིངས་ལ་དབང་དུ་བྱའོ། །རང་གི་ཐུགས་ཀར་ཧཱུྃ་ཡིག་ནི། །སྦྱོར་བས་རྡོ་རྗེ་རྩེ་ལྔ་པ། །ཤཱཀྱ་སེང་གེའི་དམ་ཚིག་གི། །ཕྱག་རྒྱ་རབ་ཏུ་བཤད་པར་བྱ། །དབུས་སུ་ཏིང་འཛིན་མཆོག་གིས་ནི། །བཞུགས་པ་དམ་ཚིག་ཕྱག་རྒྱར་བཤད། །རྡོ་རྗེ་བཅིང་བ་དམ་བྱས་ལ། །གུང་མོ་གཉིས་ཀྱི་རྩེ་མོ་སྦྱར། །རྡོ་རྗེ་ཕྱག་རྒྱ་དམ་བཅས་པ། །རྡོ་རྗེ་གཙུག་ཏོར་ཕྱག་རྒྱའོ། །དེ་ཉིད་གུང་མོ་རིན་ཆེན་དང་། །གུང་མོ་པདྨའི་རྣམ་པ་དང་། །དེ་ཉིད་གུང་མོ་རྡོ་རྗེ་ལས། །སོར་མོ་ལྷག་མ་འབར་བྱས་ཉིད། །སོར་མོ་དེ་ཉིད་འབར་བྱས་པ། །གཙུག་ཏོར་གཟི་བརྗིད་ཕྱག་རྒྱའོ། །དེ་ཉིད་ལས་ནི་སྲིན་ལག་དང་། །མཐེའུ་གཉིས་ནི་མཉམ་སྟེ་བསྒྲེང་། །མཛུབ་མོ་པདྨའི་འདབ་མ་ལས། །གུང་མོ་རྡོ་རྗེ་བསྒྲེང་བ་དང་། །དེ་ཉིད་མདུན་དུ་བཞག་ནས་ནི། །རྡོ་རྗེ་དྲ་བའི་ཚུལ་དུ་བྱ། །སྙིང་གར་ཡང་ནི་མཐེ་བོ་མཉམ། །རབ་ཏུ་བརྐྱང་བ་ཕྲེང་བ་མ། །ཐལ་མོ་སྦྱར་བ་ཁ་ནས་དབྱུང་། །གར་བྱེད་སྤྱི་བོར་ཐལ་མོ་སྦྱར། །རྡོ་རྗེ་བསྡམས་པ་ཐུར་དུ་སྦྱིན། །ཐལ་མོ་ལེགས་སྦྱར་གྱེན་དུ་གཏོར། །མཐེ་བོ་མཉམ་སྟེ་རབ་ཏུ་བསྡམ། །རབ་ཏུ་བརྐྱང་བ་བྱུག་པའོ། །རྡོ་རྗེ་ཁུ་ཚུར་གཉིས་བཅིངས་ནས། ། མཛུབ་མོ་མཐེ་བོང་གུང་མོ་རྣམས། །རེ་རེ་ཞིང་ཡང་ཕན་ཚུན་དུ། །མངོན་དུ་ཕྱོགས་པ་གཟུང་བར་བྱ། །མཛུབ་མོ་གཅིག་ནི་ཅུང་ཟད་བཀུག །མཐེ་བོ་གཉིས་ནི་མདུད་པ་བཅིང་། །མཐེ་བོ་མཛུབ་མོ་བསྣོལ་བ་བཅིང་། །རྡོ་རྗེ་ཁུ་ཚུར་རྩེ་མོ་བསྡམ། །མགྲིན་པར་པད་ཟླའི་དཀྱིལ་འཁོར་དུ། །ཆོས་ཀྱི་ཕྱག་རྒྱ་རྣམ་པར་བསྒོམ། །སྔར་གྱི་འབྱིན་པའི་སྔགས་ཀྱིས་ནི། །ཆོས་ཀྱི་ཕྱག་རྒྱ་ཡིན་པར་བཤད། །ཐུགས་ཀར་སྣ་ཚོགས་རྡོ་རྗེ་ནི། །བསམས་ཏེ་ལས་ཀྱི་ཕྱག་རྒྱ་བྱ། །ཇི་སྐད་བཤད་པའི་ཆོས་འཁོར་ལོ། །ཤཱཀྱའི་རྒྱལ་པོའི་ཕྱག་རྒྱའོ། །ས་གནོན་མཆོག་སྦྱིན་ཏིང་འཛིན་དང་། །མི་འཇིགས་སྦྱིན་སོགས་རིམ་པ་བཞིན། །ཏིང་འཛིན་མཆོག་ཏུ་གནས་པ་ནི། །གཙུག་ཏོར་གཟི་བརྗིད་ཕྱག་རྒྱའོ། །གཡས་པའི་ལག་ངར་དབྱུག་པ་དང་། །གཡོན་པ་སྙིང་གར་རལ་གྲི་འཕྱར། །གཡོན་པ་སྡིགས་མཛུབ་བསྒྲེང་བྱ་སྟེ། །གཡས་པ་བཏེག་སྟེ་བརྐྱང་བར་བྱ། །ལུག་པ་
གཉིས་ཀ་གར་བསྡོམས་ནས། །གདུགས་ཀྱི་རྣམ་པར་གཞག་པར་བྱ། །ཆོས་ཀྱི་ཕྱག་རྒྱའི་ཆོ་ག་གང་། །རྫོགས་སངས་རྒྱས་སྐྱོབ་མིན་པའི་ཡང་། །རྡོ་རྗེ་བསྒྱིངས་པའི་སྦྱོར་བ་ཡིས། །བཏགས་པའི་བསམ་པས་འདུད་པར་བྱ། །ཕྲེང་བ་བཅིང་དང་ཁ་ནས་དབྱུང་། །གར་གྱིས་ཡོངས་སུ་བསྐོར་བ་ཉིད། །རྡོ་རྗེ་ཁུ་ཚུར་སྦྱོར་བ་ཡིས། །བདུག་པ་ལ་སོགས་དེ་བཞིན་སྦྱར། །མཛུབ་མོ་ལྕགས་ཀྱུ་བཅིང་བ་ཡིས། །མཐེ་ཆུང་ལ་ནི་ལྕགས་སྒྲོག་ཆེ། །མཁྲིག་མ་མདུད་ཅིང་མཛུབ་གཉིས་བསྣོལ། །རྒྱབ་དག་ཀྱང་ནི་ངེས་པར་བསྡམ། །དེ་ནས་དེ་ཕྱིར་གོ་རིམས་བཞིན། །བྱང་ཆུབ་སེམས་དཔའ་བདག་ཉིད་ཆེའི། །ལས་ཀྱི་ཕྱག་རྒྱ་འཆང་བ་ཡི། །མཚན་ཉིད་ཡང་དག་རབ་ཏུ་བཤད། །རྡོ་རྗེ་ཁུ་ཚུར་གཉིས་བཅིངས་ནས། །ཕན་ཚུན་ལྷན་ཅིག་གཤིབས་ནས་ནི། །མཛུབ་མོ་དང་ནི་གུང་མོ་དགུག །མེ་ཏོག་རྣམ་པར་གཟུང་བར་བྱ། །བྱམས་པ་ཡི་ནི་ཕྱག་རྒྱའོ། །གཡོན་པ་ཁུ་ཚུར་དཀུར་བཞག་ལ། །གཡས་པའི་དཔུང་པའི་ཐད་ཀར་ནི། །མཛུབ་མོ་གུང་མོ་བརྐྱང་ནས་ནི། །མིག་གི་ཚུལ་དུ་གཞག་པར་བྱ། །མཐོང་བ་དོན་ཡོད་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ནས། ། མཛུབ་མོ་དག་ནི་བརྐྱང་ནས་སུ། །གཡས་པ་ལྕགས་ཀྱུ་ལེགས་བཞག་པ། །ངན་སོང་ཐམས་ཅད་སྤོང་བའི་ཡིན། །གཡོན་པ་ཁུ་ཚུར་དཀུར་བཞག་ལ། །གཡས་པའི་དབྱིག་པ་ལྟ་བུར་ནི། །གྱེན་དུ་བསྒྲེང་ནས་གཞག་པར་བྱ། །མྱ་ངན་མུན་པ་ཀུན་འཇོམས་ཀྱིའོ། །གཡོན་པ་ཁུ་ཚུར་ལྟེ་བར་གཞག །ལག་པ་གཡས་པ་གླང་པོ་ཆེའི། །སྣ་ཡི་ཚུལ་དུ་བཞག་པ་ནི། །སྤོས་ཀྱི་གླང་པོའི་ཕྱག་རྒྱའོ། །གཡོན་པ་ཁུ་ཚུར་དཀུར་བཞག་སྟེ། །གཡས་པ་རལ་གྲི་ཐོགས་པ་ཡི། །ཚུལ་དུ་འཇོག་པར་བྱེད་པ་ནི། །དཔའ་བར་འགྲོ་བའི་ཕྱག་རྒྱ་ཡིན། །གཡོན་པ་ཁུ་ཚུར་སྙིང་གར་གཞག །གཡས་པ་སྟེང་སྐོར་མཁའ་མཛོད་ཀྱི། །རྡོ་རྗེ་ཁུ་ཚུར་གཉིས་བཅིངས་པ། །རྒྱལ་མཚན་འཛིན་པ་ལྟ་བུར་ནི། །གཡས་ཀྱི་ལོགས་སུ་འཇོག་བྱེད་པ། །ཡེ་ཤེས་ཏོག་གི་ཕྱག་རྒྱའོ། །ལག་པ་གཉིས་ཀྱིས་བུམ་འཛིན་ལྟར། །བཞག་པ་འོད་དཔག་
མེད་པའིའོ། །གཡོན་པའི་ཁུ་ཚུར་བརླ་སྟེང་གཞག །གཡས་པའི་ཁུ་ཚུར་གཞོགས་སུ་ནི། །མཐེ་བོ་མཐེ་ཆུང་བརྐྱང་བྱས་ལ། །ཟླ་ཚེས་རྣམ་པ་ཟླ་འོད་ཀྱིའོ། །ལག་པ་གཉིས་ནི་སྙིང་ག་རུ། །པདྨའི་རྣམ་པར་རྣམ་ཕྱེ་ལ། །རྩེ་མོ་ཕན་ཚུན་སྦྱར་བ་ནི། །བཟང་སྐྱོང་གི་ནི་ཕྱག་རྒྱ་ཡིན། །རྡོ་རྗེ་ཁུ་ཚུར་གཉིས་བཅིངས་ལ། །གོ་ཆ་འཛིན་པ་ལྟ་བུར་ནི། །ནུ་མ་གཉིས་སུ་ལེགས་བཞག་པ། །དྲ་བ་ཅན་འོད་ཕྱག་རྒྱ་ཡིན། །གཡོན་པའི་ཁུ་ཚུར་དཀུར་གཞག་ལ། །གཡས་པ་སྙིང་ཀར་བཞག་ནས་ནི། །སོར་མོ་དབུས་མ་བསྒྲེང་བྱས་ལ། །རྡོ་རྗེ་སྙིང་པོའི་ཕྱག་རྒྱ་ཡིན། ། གཡོན་པ་ཁུ་ཚུར་སྙིང་གར་གཞག །གཡས་པ་མི་འཇིགས་སྦྱིན་རྣམས་ལ། །བློ་གྲོས་མི་ཟད་པ་ཡིའོ། །གཡོན་པའི་ཁུ་ཚུར་ལྟེ་བར་གཞག །གཡས་པ་སེ་གོལ་གཏོགས་པ་ནི། །སྤོབས་པ་བརྩེགས་པའི་ཕྱག་རྒྱ་ཡིན། །གཡོན་པའི་ཁུ་ཚུར་དཀུར་བཞག་སྟེ། །གཡས་པ་རིན་ཆེན་ཁུ་ཚུར་བྱ། །ཀུན་ཏུ་བཟང་པོའི་ཕྱག་རྒྱ་ཡིན། །མཚན་མ་དང་བྲལ་ཆོ་ག་ཡིས། །ལས་ཀྱི་ཕྱག་རྒྱར་བཤད་པ་ཡིན། །སྙིང་གར་རྡོ་རྗེ་རྩེ་ལྔ་པའི། །གཟུགས་ཅན་ཡང་དག་གཟུང་བྱ་ཞིང་། །འབྱིན་པ་རྣམས་སུ་ཇི་ལྟར་གཟུང་། །ཕྱག་རྒྱ་མཚན་མ་བསྣམས་པ་དག ། རྡོ་རྗེ་དྲིལ་བུ་བཟུང་ནས་ནི། །ཐུགས་ཀར་རྡོ་རྗེ་འཛིན་པ་ནི། །ཕྱག་རྒྱ་ཆེ་ཞེས་བྱང་ཆུབ་གང་། །བྱང་ཆུབ་སེམས་དཔའ་བདག་ཉིད་ཆེའི། །འབྱིན་པ་རྣམས་སུ་ཇི་ལྟར་གཟུང་། །ཕྱག་རྒྱ་མཚོན་ཆ་བསྣམས་པ་རྣམས། །བདག་ཉིད་ཆེན་པོ་གང་གང་གིས། །ཕྱག་རྒྱ་གང་དང་གང་བཅིངས་ནས། །སྙིང་པོ་དོན་གྱི་བཟླས་པ་དང་། །རང་གི་བདག་ཉིད་བསྒོམ་པར་བྱ། །ཕྱག་རྒྱ་བཞི་རྣམས་སྒྲུབ་བྱེད་པ། །ལྷ་རྣམས་ཐམས་ཅད་རྒྱས་བཏབ་དང་། །ཀུན་མཁྱེན་ཡོན་ཏན་རྫོགས་པ་དང་། །སེམས་ཅན་ཀུན་གྱི་དོན་བྱའི་ཕྱིར། །ངན་སོང་ཐམས་ཅད་ལེགས་སྦྱངས་ནས། །སེམས་ཅན་བྱང་ཆུབ་ཐོབ་བྱའི་ཕྱིར། །དེ་ནས་སྔགས་རབ་བཤད་བྱ་སྟེ། །ངན་སོང་ཀུན་སྦྱོང་དཀྱིལ་འཁོར་དུ། །ཕྱག་རྒྱ་སྔགས་ཀྱི་རབ་སྦྱོར་གྱིས། །བྱ་བ་ཐམས་ཅད་ནུས་པར་འགྱུར། །སོ་སོ་སོ་སོར་རྡོ་རྗེ་གར། །བྱས་ནས་སྔགས་རྣམས་བརྗོད་པར་བྱ། །ཨོྃ་ན་མོ་བྷ་ག་བ་
ཏེ། སརྦ་དུརྒ་ཏི་པ་རི་ཤོ་དྷ་ན་རཱ་ཛཱ་ཡ། ཏ་ཐཱ་ག་ཏཱ་ཡ། །ཨརྷ་ཏེ་སཾ་མྱ་ཀྶྃ་བུདྡྷཱ་ཡ། ཏདྱ་ཐཱ། ཨོྃ་ཤོ་དྷ་ནེ་ཤོ་དྷ་ནེ། སརྦ་པཱ་པྃ་བི་ཤོ་དྷ་ནེ། ཤུདྡྷེ་བི་ཤུདྡྷེ་སརྦ་ཀརྨཱ་བར་ཎ་བི་ཤུདྡྷེ་སྭཱ་ཧཱ། །གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་དྲིལ་བུ་བླངས་ལ་ལག་པ་གཡས་པས་རྡོ་རྗེ་འགྱིང་བ་དང་བཅས་པས་རྡོ་རྗེ་གསོར་ཞིང་འདི་སྐད་ཅེས་བརྗོད་དོ། །བཛྲ་བཱ་ཙ་ན་ཊཀྐི་ཧཱུྃ་ཛཿཛཿཛཿརང་གི་སྙིང་གར་བསྒྲེང་སྟེ་གསལ་བའི་སྦྱོར་བས་གཟུང་ཞིང་ཊཀྐི་ཛཿཧོཿཞེས་བརྗོད་དོ། །དེ་ནས་ཡི་གེ་བརྒྱ་པས་བརྟན་པར་བྱ་སྟེ། དེ་དག་གིས་བྱང་ཆུབ་སེམས་དཔའ་ས་བཅུ་པའི་དབང་ཕྱུག་དང་འདྲ་བར་འགྱུར་རོ། །དེ་རྣམས་བལྟས་ལ་མཆོད་པ་ཐམས་ཅད་ཀྱིས་རབ་ཏུ་མཆོད་དོ། །དེ་ནས་དེ་རྣམས་ཀྱི་བསྟོད་པ་རྣམས་ཀྱིས་ཡང་དག་པར་མཆོད་པར་བྱ་སྟེ། ཆོས་ཀྱི་འཁོར་ལོ་བསྐོར་མཛད་པ། །ཁམས་གསུམ་པ་ཡི་འགྲོ་ཀུན་གྱི། །ངན་སོང་ཐམས་ཅད་སྦྱོང་མཛད་པ། ། ཤཱཀྱ་སེང་གེ་ཁྱོད་ཕྱག་འཚལ། །ཆོས་ཀྱི་དབྱིངས་ཀྱི་རང་བཞིན་ལས། །སེམས་ཅན་ཀུན་ལ་ཕན་པའི་ཕྱིར། །རང་གི་དེ་ཉིད་སྟོན་མཛད་པ། །རྡོ་རྗེ་གཙུག་ཏོར་ཁྱོད་ཕྱག་འཚལ། །མཉམ་ཉིད་དེ་ཉིད་བསྒོམས་པ་ཡིས། །ཁམས་གསུམ་ལ་གནས་ཐམས་ཅད་ལ། །དབང་བསྐུར་རབ་ཏུ་གསོལ་མཛད་པ། །རིན་ཆེན་གཙུག་ཏོར་ཁྱོད་ཕྱག་འཚལ། །སོ་སོར་ཀུན་རྟོག་རང་བཞིན་ཅན། །ཆོས་ཀྱི་བདུད་རྩིའི་ཆར་འབེབས་པས། །སེམས་ཅན་དབུགས་འབྱིན་མཛད་པ་པོ། །པདྨའི་གཙུག་ཏོར་ཁྱོད་ཕྱག་འཚལ། །སེམས་ཅན་སྡུག་བསྔལ་ཞི་བྱའི་ཕྱིར། །བྱ་བ་རྗེས་སྒྲུབ་རང་བཞིན་ཅན། །ཕྲིན་ལས་སྣ་ཚོགས་མཛད་པ་པོ། །སྣ་ཚོགས་གཙུག་ཏོར་ཁྱོད་ཕྱག་འཚལ། །ཁམས་གསུམ་འོད་ཀྱིས་གསལ་མཛད་ནས། །སེམས་ཅན་ཀུན་གྱིས་འཕགས་པ་ཡི། །བདེན་པ་མཐོང་བར་མཛད་པ་པོ། །གཙུག་ཏོར་གཟི་བརྗིད་ཁྱོད་ཕྱག་འཚལ། །ཡིད་བཞིན་ནོར་བུའི་རྒྱལ་མཚན་བསྣམས། །སྦྱིན་པས་སེམས་ཅན་ཐམས་ཅད་ཀྱི། །བསམ་པ་ཐམས་ཅད་རྫོགས་མཛད་པ། །གཙུག་ཏོར་རྒྱལ་མཚན་ཁྱོད་ཕྱག་འཚལ། །ཉོན་མོངས་ཉེ་བའི་ཉོན་མོངས་དག །གཅོད་ཅིང་བདུད་བཞིའི་སྟོབས་བཅོམ་ནས། །སེམས་ཅན་བྱང་ཆུབ་ཐོབ་མཛད་པ། །གཙུག་
ཏོར་རྣོན་པོ་ཁྱོད་ཕྱག་འཚལ། །ཁམས་གསུམ་འགྲོ་བ་ཐམས་ཅད་ཀྱིས། །གདུགས་དཀར་གྱིས་ནི་བརྒྱན་པ་ཡི། །ཆོས་ཀྱིི་རྒྱལ་པོ་ཐོབ་མཛད་པ། །གཙུག་ཏོར་གདུགས་དཀར་ཁྱོད་ཕྱག་འཚལ། །སྒེག་མོ་ཕྲེང་བ་དེ་བཞིན་གླུ། །གར་མཁན་ལྷ་མོ་བཞི་པོ་དང་། །སྤོས་དང་མེ་ཏོག་མར་མེ་མ། །དྲི་ཡི་ལྷ་མོ་ཁྱོད་ཕྱག་འཚལ། །དད་སོགས་ངོ་བོ་ལས་བྱུང་བ། །སྒོ་བཞིའི་དབུས་ན་གང་བཞུགས་པ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །སྒོ་སྐྱོང་ཁྱེད་རྣམས་ལ་ཕྱག་འཚལ། །སྒོ་བཞི་ཡི་ནི་ལོགས་དག་ན། །ཁྱམས་རྣམས་སུ་ནི་བཞུགས་མཛད་པ། ། རབ་དགའ་ལ་སོགས་བཅུ་གཉིས་གནས། །བྱང་ཆུབ་སེམས་དཔའ་ཁྱེད་ཕྱག་འཚལ། །ཚངས་དབང་དྲག་པོ་ཟླ་བ་སོགས། །ཕྱོགས་བཞིར་འཇིག་རྟེན་སྐྱོང་བ་རྣམས། །མེ་དང་སྲིན་པོ་རླུང་ལྷ་དང་། །འབྱུང་པོའི་བདག་པོ་ཁྱེད་ཕྱག་འཚལ། །བསྟོད་པའི་རྒྱལ་པོ་འདི་ཡིས་ནི། །དཀྱིལ་འཁོར་མདུན་དུ་ཀུན་བསྟོད་ནས། །སྔགས་པ་རྡོ་རྗེ་དྲིལ་འཆང་བས། །བསྟོད་པ་འདི་དག་ཡང་དག་བརྗོད། །ཕྱི་ནས་རང་གི་ལུས་ལ་ནི། །བདག་ཉིད་དཀྱིལ་འཁོར་རབ་ཏུ་གཞུག །དེ་ལྟར་ངེས་པར་བསྒོམ་བཞིན་པའི། །དཀྱིལ་འཁོར་དང་པོ་སྦྱོར་བ་ཞེས་བྱ་བའི་ཏིང་ངེ་འཛིན་ཏོ། །དེ་ནས་དཀྱིལ་འཁོར་རྒྱལ་མཆོག་ཅེས་བྱ་བ་རབ་ཏུ་བཤད་པར་བྱ་སྟེ། །ཨོྃ་ཨ་ཀཱ་རོ་མུ་ཁྃ་སརྦ་དྷ་རྨཱ་ཎཱ་མཱ་དྱ་ཏྤནྣ་ཏཱཏ། དེའི་དོན་ནི་རྣམ་པར་ཐར་པ་ལས་ཕྱོགས་བཅུའི་འཇིགས་རྟེན་གྱི་ཁམས་ཐམས་ཅད་སྟོང་པ་ཉིད་བཅུ་དྲུག་ཏུ་ལྷག་པར་མོས་པ་བྱ་སྟེ། ངར་འཛིན་པའི་བདག་ཉིད་སྟོང་པ་ཉིད་དུ་བལྟའོ། །དེ་ནས་ཡི་གེ་ཧཱུྃ་ལས་རྫོགས་པའི་རྡོ་རྗེས་རླུང་གི་དཀྱིལ་འཁོར་དང་། དེའི་སྟེང་དུ་ཡི་གེ་རྃ་གྱིས་མེའི་དཀྱིལ་འཁོར་དང་། དེའི་སྟེང་དུ་ཡི་གེ་བྃ་ལས་ཆུ་གཏེར་ཆེན་པོ་དང་། དེའི་སྟེང་དུ་ཡི་གེ་ཀྃ་ལས་གསེར་གྱི་དཀྱིལ་འཁོར་དང་། དེའི་སྟེང་དུ་དབུས་སུ་ཧཱུྃ་སུྃ་ཧཱུྃ་ཞེས་བྱ་བ་སྟེ། དེ་ལས་རི་རབ་གྲུ་བཞི་པ་རིན་པོ་ཆེའི་རང་བཞིན་རིན་པོ་ཆེ་ཐམས་ཅད་ཀྱིས་བརྒྱན་པ་བསྐྱེད་ལ། །ཨོྃ་བཛྲ་དྲྀ་ཌྷོ་ཞེས་པ་ལ་སོགས་པ་དང་རྡོ་རྗེ་བསྡམས་པས་བྱིན་གྱིས་བརླབ་བོ། །དེའི་སྟེང་དུ་རྡོ་རྗེའི་རྒྱུའི་ལས་ཀྱི་ཕྱག་རྒྱས་ཡི་གེ་བྷྲུྃ་དཀར་པོ་ལས་བྱུང་བའི་རྡོ་རྗེ་དང་ནོར་བུ་དང་རིན་པོ་ཆེའི་རྩེ་མོ་ཅན་གྱི་གཞལ་ཡས་ཁང་གྲུ་བཞི་
བ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །གྲྭ་བཞི་རྣམས་ནི་ཐམས་ཅད་དུ། །སྒོ་དང་སྒོ་ཁྱུད་མཚམས་རྣམས་སུ། །ཟླ་བ་མཚན་མ་རྡོ་རྗེས་སྤྲས། །དྲ་བ་དྲ་ཕྱེད་ཀྱིས་བརྒྱན་ཅིང་། །ཐིག་ལེ་དང་ནི་ཡང་དག་ལྡན། །དར་དང་མེ་ཏོག་ཕྲེང་བས་བརྒྱན། ། ནང་གི་དཀྱིལ་འཁོར་ནི་འཁོར་ལོ་རྩིབས་བརྒྱད་པ་རྡོ་རྗེ་ཕྲེང་བས་ཡོངས་སུ་བསྐོར་བའོ། །དེའི་ལྟེ་བའི་སྟེང་དུ་སེང་གེའི་གདན་ནོ། །དེའི་སྟེང་དུ་ཟླ་བའི་དཀྱིལ་འཁོར་རོ། །འཁོར་ལོ་རྩིབས་བརྒྱད་པའི་ནང་རྣམས་སུ་ཟླ་བའི་དཀྱིལ་འཁོར་ཏེ་ལྷ་རྣམས་ཀྱི་གནས་སོ། །ཕྱིའི་དཀྱིལ་འཁོར་གྱི་ལྷ་རྣམས་ཀྱི་གནས་ནི་སྣམ་བུ་རྣམས་ལ། ཟླ་བའི་དཀྱིལ་འཁོར་ཉི་ཤུ་རྩ་བརྒྱད་བལྟའོ། །སེང་གེའི་གདན་གྱི་སྟེང་གི་ཟླ་བའི་དཀྱིལ་འཁོར་ཡི་གེ་ཨ་ལ་སོགས་པ་དང་། ཡི་གེ་ཀ་ལ་སོགས་པ་ཤེས་རབ་དང་ཐབས་ཀྱི་ཡི་གེ་ཞུ་བར་གྱུར་པ་མཁའ་ཁྱབ་ཀྱི་ཏིང་ངེ་འཛིན་ལ་སྙོམས་པར་ཞུགས་པ་བྱང་ཆུབ་ཀྱི་སེམས་ཀྱི་རང་བཞིན་གྱིས་སེམས་ཅན་གྱི་དོན་གྱི་རྒྱུ་རྫོགས་པའི་སྔགས་ཀྱི་གཟུགས་སུ་གྱུར་ཏེ། །ཨོྃ་མུ་ནེ་མུ་ནེ་མ་ཧཱ་མུན་ཡེ་སྭཱ་ཧཱ། སྔགས་འདིས་དཔལ་ཤཱཀྱའི་རྒྱལ་པོ་རྫོགས་པར་འགྱུར་ཏེ། སྒྲིབ་པ་ཐམས་ཅད་སེལ་བའི་ཏིང་ངེ་འཛིན་ལ་སྙོམས་པར་ཞུགས་པའོ། །དེ་ནས་ཏིང་ངེ་འཛིན་ལ་སྙོམས་པར་ཞུགས་པའི་སངས་རྒྱས་བཅོམ་ལྡན་འདས་དེའི་ཕྱག་རྒྱ་དང་སྔགས་བཤད་པར་བྱ་སྟེ། རྡོ་རྗེ་ཁུ་ཚུར་གཉིས་བཅིངས་ནས། །རིམ་གྱིས་རྣམ་པར་དབྱེ་བར་བྱ། །ཆོས་ཀྱི་འཁོར་ལོའི་ཕྱག་རྒྱ་ནི། །འཁོར་བ་ཐམས་ཅད་གཅོད་བྱེད་ཡིན། །དེ་ཡི་དཔེ་ནི་འདི་ལྟ་སྟེ། །ཇི་ལྟར་པདྨ་ལ་ཆགས་པའི། །བུང་བ་ལ་སོགས་བསྡམས་པ་རྣམས། །པདྨའི་འདབ་མ་ཁ་ཕྱེ་ན། །བཅིངས་པའི་སྡུག་བསྔལ་ལས་ཐར་བྱེད། །དེ་བཞིན་འཁོར་བའི་སྡུག་བསྔལ་གྱི། །སྲིད་གསུམ་འཁོར་བར་བཅིངས་པ་འདི། །ཐུགས་རྗེའི་བདག་ཉིད་ཤཱཀྱ་ཡི། །སེང་གེས་བཅིངས་པ་ལས་གྲོལ་མཛད། ། དེ་ནས་དཔལ་ཤཱཀྱ་ཐུབ་པའི་ཐུགས་ཀར་ཡི་གེ་ཨ་ལས་ཟླ་བའི་དཀྱིལ་འཁོར་རོ། །དེ་ནས་ཟླ་བའི་དཀྱིལ་འཁོར་ལ་སྔགས་ཐམས་ཅད་ཀྱིས་བསྐྱེད་པར་བྱ་སྟེ། རྡོ་རྗེ་གཙུག་ཏོར་ནས་བརྩམས་ཏེ་ཇི་སྲིད་རྡོ་རྗེ་འབེབས་པའི་མཐར་ཐུག་པ་འབྱུང་བ་ཡིན་ནོ། །དེ་ནས་སྔགས་རྣམས་འབྱུང་སྟེ། །ཨོྃ་ན་མོ་བྷ་
ག་བ་ཏེ་སརྦ་དུརྒ་ཏི་པ་རི་ཤོ་དྷ་ན་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀྶྃ་བུདྡྷ་ཡ། ཏདྱ་ཐཱ། །ཨོྃ་ཤོ་དྷ་ནི་ཤོ་དྷ་ནི། སརྦ་པཱ་པྃ་བི་ཤོ་དྷ་ནེ། ཤུདྡྷེ་བི་ཤུདྡྷེ་སརྦ་ཀརྨཱ་བ་ར་ཎ་བི་ཤུདྡྷེ་སྭཱ་ཧཱ། སྔགས་འདི་ངེས་པར་བརྗོད་དོ། །དེ་ནས་དེའི་ཕྱིར་གོ་རིམས་ནི། །རིམ་བཞིན་ཡང་དག་རབ་བཤད་བྱ། ཨོྃ་བཛྲ་ཧཱུྃ་ཕཊ། །བ་ཡི་སྒོ་ནས་ཕྱུང་ནས་ནི། །ཀུན་ནས་འོད་ཟེར་ལྔ་པར་འཐོན། །ཀུན་ནས་ཕྱོགས་བཅུར་སྣང་བྱས་ནས། །སེམས་ཅན་རྣམས་ནི་ཐམས་ཅད་ཀྱི། །སྡུག་བསྔལ་རྣམས་ནི་ཐར་མཛད་དེ། །འོད་ཟེར་རྣམས་ནི་སླར་ལོག་ནས། །ཐུགས་ཀར་ཞུགས་ཏེ་དེ་རྗེས་ལ། །སྔགས་དང་འོད་ཟེར་གཉིས་འདྲེས་པ། །ལས་བྱུང་སྐུ་ནི་ཡོངས་རྫོགས་པ། །ནང་གི་དཀྱིལ་འཁོར་འཁོར་ལོའི་རྩིབས། །ཤར་ཕྱོགས་པདྨ་ཟླ་བར་བཞུགས། །རྡོ་རྗེ་གཙུག་ཏོར་དེ་བཞིན་གཤེགས། །སེམས་ཅན་ཀུན་ལ་ཕན་དོན་དུ། །ཐུགས་ཀ་ལས་བྱུང་བཞུགས་པ་ནི། །སྐུ་མདོག་དཀར་ཞིང་འོད་ཟེར་འབར། །ས་གནོན་ཕྱག་རྒྱ་ཡང་དག་བཞུགས། །དེ་ལྟར་འོད་ཟེར་སྤྲོ་བསྡུ་ནི། །སྔར་བཤད་པ་ཡི་ཐམས་ཅད་ཀྱང་། །སྤྲོ་དང་བསྡུ་བའི་སྦྱོར་བ་ཡིས། །སྔགས་དང་འོད་ཟེར་ལེགས་འདྲེས་དང་། །སྐུ་ནི་བསྐྱེད་ཅིང་ཡང་དག་རྫོགས། །ཇི་བཞིན་གནས་སུ་བཞུགས་པར་བྱ། །ཨོྃ་རཏྣོ་ཏྣ་མ་ཏྲཱྃ་ཞེས་བྱ་བས་དབྱུང་བར་བྱའོ། །ལྷོ་ཡི་རྩིབས་སུ་ཡང་དག་བཞུགས། །པདྨ་ཟླ་བའི་དབུས་སུ་ནི། །རིན་ཆེན་གཙུག་ཏོར་དེ་བཞིན་གཤེགས། །ཐུགས་ཀ་ནས་ནི་དེས་བཏོན་ནས། །སངས་རྒྱས་མཚན་གྱིས་ཡང་དག་བརྒྱན། །སྐུ་མདོག་སྔོ་ཞིང་ཤིན་ཏུ་མཛེས། །འདི་ཡི་ཕྱག་རྒྱ་མཆོག་སྦྱིན་ཉིད། །ཁམས་གསུམ་པ་ནི་མ་ལུས་པའི། །སེམས་ཅན་ཀུན་ལ་དབང་སྐུར་མཛོད། །སྔར་བཞིན་སྤྲོ་དང་བསྡུ་བ་དང་། །གཟུགས་བསྐྱེད་པ་ཡི་རིམ་པ་ཡིས། །ཨོྃ་པདྨོ་ཏྟ་མ་ཧྲཱིཿཞེས་དབྱུང་བར་བྱའོ། །དེ་ནས་ནུབ་ཀྱི་རྩིབས་གནས་པའི། །པད་སྟེངས་ཟླ་བའི་དཀྱིལ་འཁོར་ལ། །ས་བོན་འོད་ཟེར་གྱིས་རྫོགས་པའི། །པདྨ་གཙུག་ཏོར་དེ་བཞིན་གཤེགས། །ཐུགས་ཀ་ལས་ནི་ཕྱུང་གྱུར་ནས། །རྗེས་སུ་སྟོན་མཛད་བཞུགས་པ་ནི། །པདྨ་རཱ་གའི་འོད་འབར་བ། །བསམ་གཏན་ཕྱག་རྒྱས་རྣམ་པར་བཞུགས། །ཨོྃ་བི་ཤྭོཏྟ་མ་ཨཿཞེས་དབྱུང་ངོ་། །བྱང་ཕྱོགས་རྩིབས་
གནས་པདྨ་ཡི། །སྟེང་དུ་ཟླ་བའི་དཀྱིལ་འཁོར་ལ། །ཐུགས་ཀ་ནས་བཏོན་སངས་རྒྱས་ནི། །སྣ་ཚོགས་གཙུག་ཏོར་དེ་བཞིན་གཤེགས། །སྐུ་མདོག་ལྗང་གུ་འོད་འབར་བ། །འདི་ཡི་ཕྱག་རྒྱས་མི་འཇིགས་སྦྱིན། །ཕྱག་རྒྱས་ཕྲིན་ལས་སྣ་ཚོགས་མཛད། ། སེམས་ཅན་འཁོར་བ་ལས་སྒྲོལ་བའོ། །ཡི་གེ་ཨོྃ་གྱིས་སངས་རྒྱས་དབྱུང་། །གཙུག་ཏོར་གཟི་བརྗིད་དེ་བཞིན་གཤེགས། །མེ་ཡི་མཚམས་གནས་པདྨར་གནས། །ཡང་དག་ཟླ་བའི་དཀྱིལ་འཁོར་ལ། །གཡས་པས་ཉི་མ་ཡང་དག་བསྣམས། །ཕྱག་གཡོན་པ་ནི་དཀུ་ལ་གནས། །སྐུ་མདོག་དཀར་དམར་འོད་ཀྱིས་ནི། །ཁམས་གསུམ་པོ་ནི་སྣང་བར་མཛད། །ཧཱུྃ་གི་ས་བོན་ལས་བྱུང་བ། །གཙུག་ཏོར་རྒྱལ་མཚན་དེ་བཞིན་གཤེགས། །ཐུགས་ཀ་ལས་བྱུང་ཕྱུང་ནས་ནི། །བདེན་བྲལ་རྩིབས་ལ་བཞུགས་ནས་ནི། །བདག་ནས་ཟླ་བའི་གཟུགས་ལ་ཡང་། །སྐུ་མདོག་དམར་ཞིང་གནག་པ་ལ། །ཡིད་བཞིན་ནོར་བུའི་རྒྱལ་མཚན་བསྣམས། །སེམས་ཅན་སེར་སྣ་སྦྱོང་མཛད་པ། །དྷཱིཿ་ཡིག་ས་བོན་ལས་རྫོགས་པའི། །གཙུག་ཏོར་རྣོན་པོ་དེ་བཞིན་གཤེགས། །ཉོན་མོངས་ཉེ་བའི་ཉོན་མོངས་རྣམས། །གཅོད་མཛད་རླུང་གི་རྩིབས་སུ་ཕྱུང་། །པདྨ་ཟླ་བ་ལ་བཞུགས་ཤིང་། །འདི་ཡི་ཕྱག་མཚན་གཡས་རལ་གྲི། །གཡོན་ན་གླེགས་བམ་བསྣམས་པ་ནི། །སྐུ་མདོག་མཁའ་ལྟར་སྔོ་བའོ། །པདྨ་ལ་གནས་ཟླ་བར་བཞུགས། །ཏྲཱྃ་ཡིག་ས་བོན་ལས་བྱུང་བའི། །གཙུག་ཏོར་གདུགས་དཀར་དེ་བཞིན་གཤེགས། །སེམས་ཅན་རྣམས་ཀྱི་ཆོས་ཀྱི་རྗེ། །དབང་ལྡན་རྩིབས་སུ་དབྱུང་བར་བྱ། །ཀུནྡ་ལྟ་བུའི་མདོག་ལྟ་བུ། །འདི་ཡི་ཕྱག་མཚན་གདུགས་བསྣམས་པ། །དེ་ཀུན་སྣ་ཚོགས་པདྨར་གནས། །ཟླ་བའི་དཀྱིལ་འཁོར་ལ་བཞུགས་པའི། །ཨོྃ་ཏྲཱྃ་ཧྲཱིཿཨཿ། སྔགས་དེ་རྣམས་སུ་བརྗོད་ནས་སུ། །ཐུགས་ཀ་ནས་ཀྱང་དབྱུང་བ་དང་། །མཚམས་ཀྱི་གནས་ནི་བཞི་པོ་རུ། །པདྨ་ཟླ་བའི་དཀྱིལ་འཁོར་ལ། །སྒེག་མོ་ལ་སོགས་ལྷ་མོ་བཞི། །རིགས་ཀྱི་སྐུ་མདོག་འཛིན་པ་སྟེ། །དཀར་སེར་དམར་པོ་སྣ་ཚོགས་མདོག །དེ་ནས་ཕྱག་རྒྱ་བཅིང་བ་ནི། །སྔར་བཤད་ཇི་སྐད་བཤད་བཞིན་དུ། །སྔགས་དེ་ཉིད་ནི་
བརྗོད་ནས་སུ། །ཐུགས་ཀ་ནས་ཀྱང་དབྱུང་བྱ་སྟེ། །བདུག་པ་ལ་སོགས་ལྷ་མོ་བཞི། །པདྨ་ལ་གནས་ཟླ་བ་ཡི། །དཀྱིལ་འཁོར་དུ་ནི་མཚམས་བཞི་པོ། །ཐམས་ཅད་དུ་ཡང་སྐུ་མདོག་ནི། །རིགས་ཀྱི་རིམ་པ་ཉིད་ཀྱིས་སོ། །ཨོྃ་སརྦ་སྃ་སྐཱ་ར་པ་རི་ཤུདྡྷ་དྷརྨ་ཏེ་ག་ག་ན་ས་མུཏྒ་ཏེ་སྭ་བྷཱ་བ་བི་ཤུདྡྷེ་མ་ཧཱ་ན་ཡ་པ་རི་བཱ་རེ་སྭཱ་ཧཱ། །སྔགས་ཀྱིས་དབྱུང་སྟེ་ཤར་གྱི་སྒོའི། །གཞོགས་གཉིས་དག་ཏུ་གནས་པ་ནི། །བྱམས་པ་ལ་སོགས་གནས་བཞི་པོ། །པད་གནས་ཟླ་བའི་དཀྱིལ་འཁོར་ལ། །ཐམས་ཅད་སེམས་དཔའི་སྐྱིལ་ཀྲུང་ཅན། །ཕྱག་རྒྱ་སྐུ་མདོག་རིམ་པ་ཡང་། །བྱམས་པ་ཐུགས་ནི་རྣམ་དག་པ། །སྐུ་མདོག་སེར་པོ་འོད་ཟེར་བཟང། །གཡས་པ་ཀླུ་ཤིང་མེ་ཏོག་ཅན། །གཡོན་པས་སྤྱི་བླུགས་བསྣམས་པའོ། །གཉིས་པ་མཐོང་བ་དོན་ཡོད་ནི། །སྐུ་མདོག་སེར་པོ་འོད་ཟེར་འབར། །ཕྱག་གཡས་པདྨ་སྤྱན་ཅན་ཏེ། །གཡོན་པའི་ཕྱག་ནི་དཀུར་བཞག་པའོ། །བྱང་ཆུབ་སེམས་དཔའ་གསུམ་པ་ཡང་། །མཚན་ནི་ངན་སོང་སྤོང་འཇོམས་པ། །སྐུ་མདོག་དཀར་པོ་འོད་འབར་ཞིང་། །ཕྱག་རྒྱ་ལྕགས་ཀྱུ་བསྣམས་པ་ཅན། །བཞི་པ་མྱ་ངན་མུན་པ་ཀུན། །ངེས་འཇོམས་བློ་གྲོས་དེ་བཞིན་ཏེ། །དཀར་སེར་འདྲེས་པའི་མདོག་ཏུ་སྣང་། །དེ་ཡི་ཕྱག་རྒྱ་དབྱུག་བ་བསྣམས། །གཡོན་པ་ཁུ་ཚུར་དཀུར་བཞག་ཅིང་། །སེམས་དཔའི་སྐྱིལ་མོ་ཀྲུང་དུ་བཞུགས། །བྱང་ཆུབ་སེམས་དཔའ་བཞི་རྣམས་ཀྱང་། །ལྷོ་སྒོར་རབ་ཏུ་བཞུགས་པའོ། །དང་པོ་སྤོས་ཀྱི་གླང་པོ་ཡང་། །དཀར་པོ་སྔོ་བའི་སྐུ་མདོག་ཅན། །འདི་ཡི་ཕྱག་རྒྱ་ཕྱག་གཡས་ན། །དྲི་ཡིས་དུང་ནི་རབ་ཏུ་བཀང་། །གཡོན་པ་ཁུ་ཚུར་དཀུར་བཞག་ལ། །སྒྲིབ་པ་ཐམས་ཅད་རྣམ་པར་སྦྱོང་། །གཉིས་པ་དཔའ་བར་འགྲོ་བ་མཚོན། །ཉོན་མོངས་ཐམས་ཅད་རབ་གྲོལ་མཛད། །ཤེལ་གྱི་མདོག་ཅན་འོད་བཟང་བ། །འདི་ཡི་ཕྱག་རྒྱ་རལ་གྲི་བསྣམས། །གཡོན་པའི་ཕྱག་ནི་དཀུར་བཞག་ནས། །སེམས་ཅན་སྡུག་བསྔལ་ཞི་མཛད་པའོ། །གསུམ་པ་ནམ་མཁའ་མཛོད་ཉིད་དེ། །རྒྱན་ནི་ཐམས་ཅད་ཀྱིས་བརྒྱན་པ། །དཀར་སེར་བསྲེས་པའི་སྐུ་མདོག་འོད། །སྒྲིབ་པ་ཐམས་ཅད་རྣམ་པར་སྤངས། །འདི་ཡི་ཕྱག་རྒྱ་ཕྱག་གཡས་ན། །པདྨ་ལ་གནས་ཆོས་ཀྱི་མཛོད། །
གཡོན་པའི་ཕྱག་ནི་དཀུར་བཞག་ལ། །ནམ་མཁའ་ནོར་ཀུན་འཆང་བ་པོ། །བཞི་པ་ཡང་ནི་ཡེ་ཤེས་ཏོག །བསམ་པ་ཐམས་ཅད་ཡོངས་རྫོགས་མཛད། །སྔོན་པོའི་མདོག་ཅན་ཡང་དག་གསལ། །ཡིད་སྦྱིན་ནོར་བུའི་རྒྱལ་མཚན་བསྣམས། །གཡོན་པའི་ཁུ་ཚུར་དཀུར་འཇོག་ཅིང་། །དབུལ་བའི་སྡུག་བསྔལ་དགྲོལ་བར་མཛད། །ནུབ་སྒོའི་དྲུང་དུ་པདྨ་ལ། །གནས་པའི་ཟླ་བའི་དཀྱིལ་འཁོར་དུ། །དང་པོ་བདུད་རྩི་འོད་ཅེས་བྱ། །ཟླ་བའི་མདོག་གིས་རྣམ་པར་མཛེས། །བདུད་རྩིའི་བུམ་པ་ལེགས་པར་བསྣམས། །ཅོད་པན་རིན་ཆེན་ཕྱག་གིས་སོ། །གཡོན་པ་ཁུ་ཚུར་དཀུར་འཇོག་ཅིང་། །རྒྱ་ཆེན་ཚེ་ནི་སྩོལ་བ་པོ། །གཉིས་པའི་མཚན་ནི་ཟླ་བའི་འོད། །མི་ཤེས་པ་ཡི་མུན་པ་བསལ། །སྐུ་མདོག་དཀར་པོ་མཛེས་པ་ནི། །ཕྱག་རྒྱ་གཡས་པའི་ཕྱག་ཉིད་ཀྱིས། །པདྨར་གནས་པའི་ཟླ་བའི་གཟུགས། ། གཡོན་པ་ཁུ་ཚུར་དཀུར་བཞག་པའོ། །གསུམ་པ་བཟང་སྐྱོང་ཞེས་བྱ་བ། །དཀར་ཞིང་དམར་བའི་མདོག་ཅན་ཉིད། །ཆོས་རྣམས་ཐམས་ཅད་རབ་གསལ་མཛད། །ཕྱག་རྒྱ་ཕྱག་ནི་གཡས་པ་ཡིས། །རིན་ཆེན་འབར་བ་ཡང་དག་བསྣམས། །གཡོན་པ་ཁུ་ཚུར་དཀུར་གནས་པའོ། ། བྱང་ཆུབ་སེམས་དཔའ་བཞི་པ་ཡང་། །དྲ་བ་ཅན་གྱི་འོད་མཚན་ཅན། །སྐུ་མདོག་དམར་པོ་འོད་འབར་བ། །རྡོ་རྗེའི་གུར་ནི་བསྣམས་པ་ཅན། །བྱང་སྒོའི་རྩ་བར་པདྨ་ལ། །གནས་པའི་ཟླ་བའི་དཀྱིལ་འཁོར་དུ། །སངས་རྒྱས་སྲས་པོ་དང་པོ་ཉིད། །མཚན་ནི་རྡོ་རྗེ་སྙིང་པོ་ཞེས། །དཀར་ཞིང་སྔོ་བའི་མདོག་དང་ལྡན། །ཕྱག་རྒྱ་ཕྱག་ནི་གཡས་པ་ཡིས། །ཨུཏྤ་ལ་ནི་རྡོ་རྗེར་ལྡན། །གཡོན་པ་ཁུ་ཚུར་དཀུར་གནས་པའོ། །གཉིས་པ་བློ་གྲོས་ཞེས་པ་ཡི། །མི་ཟད་པ་ཐར་ཡང་དག་ལྡན། །ཀུན་དུ་ཟླ་བའི་མདོག་ལྟར་གསལ། །ཕྱག་རྒྱ་ཕྱག་ནི་གཉིས་པ་ཡིས། །ཡེ་ཤེས་བུམ་པ་ཡང་དག་བསྣམས། །སེམས་ཅན་ཐམས་ཅད་རབ་ཚིམ་མཛད། །སངས་རྒྱས་སྲས་པོ་གསུམ་པ་ཡང་། །སྤོབས་པ་བརྩེགས་པའི་ཐ་སྙད་ཅན། །སྐུ་མདོག་དམར་ཞིང་འོད་འབར་བ། །ཕྱག་རྒྱ་ཕྱག་གཡས་པདྨ་ལ། །གནས་པའི་རིན་ཆེན་ཕུང་པོ་ཉིད། །གཡོན་པ་ཁུ་ཚུར་དཀུར་གནས་པའོ། །
རྒྱལ་བའི་སྲས་པོ་བཞི་པ་ནི། །ཀུན་དུ་བཟང་པོ་ཞེས་བྱ་སྟེ། །སྐུ་མདོག་སེར་ཞིང་འོད་འབར་བ། །གཡས་པའི་ཕྱག་གི་ཕྱག་རྒྱ་ནི། །རིན་ཆེན་སྙེ་མ་བསྣམས་པ་ལ། །གཡོན་པ་ཁུ་ཚུར་དཀུར་བརྟེན་པའོ། །དེ་ལྟའི་གཟུགས་དང་ཡང་དག་ལྡན། །བྱང་ཆུབ་སེམས་དཔའ་བརྩེ་བདག་ཉིད། །དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །ཨོྃ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། །ན་མ་སཿསརྦ་དུརྒ་ཏི་པ་རི་ཤོ་དྷ་ན་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾམྱ་ཀྶྃ་བུདྡྷཱ་ཡ། ཏདྱ་ཐཱ། ཨོྃ་ཤོ་དྷ་ནེ་ཤོ་དྷ་ནེ། སརྦ་པཱ་པྃ་བི་ཤོ་དྷ་ནེ། ཤུདྡྷེ་བི་ཤུདྡྷེ་སརྦ་ཀརྨཱ་བ་ར་ཎ་བི་ཤུདྡྷེ་སྭཱ་ཧཱ། །སྔགས་འདིས་ཤཱཀྱའི་རྒྱལ་པོ་ལ་སོགས་པ་ལྷ་སུམ་ཅུ་རྩ་བདུན་ཡོངས་སུ་རྫོགས་པར་བསྒོམ་མོ། །དེ་ནས་དེའི་རྗེས་ལ་ཡེ་ཤེས་ཀྱི་དཀྱིལ་འཁོར་སྤྱན་དྲང་བར་བྱའོ། །སྔགས་དང་ཕྱག་རྒྱ་མཉམ་ལྡན་པས། །སྒོ་ནི་དབྱེ་བར་བྱས་ནས་སུ། །རྡོ་རྗེ་ཁུ་ཚུར་གཉིས་བཅིངས་ལ། ། མཛུབ་མོ་གཉིས་ནི་རབ་ཏུ་བརྐྱང་། །མཐེ་ཆུང་ལུ་གུ་རྒྱུད་བྱས་ལ། །སྒོ་དབྱེ་བ་ཡི་ཕྱག་རྒྱ་ཡིས། ཨོྃ་སརྦ་བིདྡྭཱ་རོདྒྷཱ་ཊ་ཡ་ཧཱུྃ། སྒོ་དབྱེ་བའི་སྔགས་དང་ཕྱག་རྒྱས་སྒོ་དབྱེའོ། །རྡོ་རྗེ་འཁོར་ལོའི་ཕྱག་རྒྱས་དཀྱིལ་འཁོར་ཡོངས་སུ་བཏེག་སྟེ། །ཨོྃ་སརྦ་བིདྦ་ཛྲ་ཙཀྲ་ཧཱུྃ། ལག་ངར་དག་ནི་རྡོ་རྗེར་བཅིངས། །རྡོ་རྗེ་སེ་གོལ་རྣམ་གྲོལ་བས། །ཤཱཀྱའི་རྒྱལ་པོ་སྦྱོར་བདག་དཔལ། །སངས་རྒྱས་ཐམས་ཅད་བསྡུ་བར་བྱ། །གཡོན་པ་སེ་གོལ་བརྡབས་པ་ཡིས། །མཉམ་པར་བརྡབས་པར་གྲུབ་པར་འགྱུར། །གཡས་པ་ཡིས་ཀྱང་བརྡབ་པར་གསུངས། །གཉིས་ཀ་ཡང་ནི་སྡུད་པ་ཡིན། །ཨོྃ་བཛྲ་ས་མཱ་ཛཿཛཿཧཱུྃ་བྃ་ཧོཿ། བཀའ་བསྒོ་བ་འདི་བསྒྲགས་ཙམ་གྱིས། །འཁོར་དང་བཅས་པའི་འཁོར་ལོའི་ཚོགས། །སངས་རྒྱས་ཐམས་ཅད་བྱོན་འགྱུར་ན། །གཞན་རྣམས་རབ་འཇུག་ལྟ་ཅི་སྨོས། །དེ་ནས་མདུན་གྱི་ནམ་མཁའ་དཀྱིལ་འཁོར་གྱི་འཁོར་ལོ་བལྟས་ལ། རྡོ་རྗེ་གནོད་སྦྱིན་གྱི་སྔགས་ཀྱིས་མཆོད་ཡོན་གྱི་སྣོད་ན་གནས་པའི་དྲིའི་ཆུ་ཡིས་ཡང་དག་པར་བསངས་ཏེ། ཞལ་བསིལ་དབུལ་ལོ། །དེ་ནས་མཆོད་ཡོན་གྱི་ཕྱག་རྒྱས་མཆོད་ཡོན་དབུལ་ལོ། །དེ་ནས་ཞབས་བསིལ་གྱི་ཕྱག་རྒྱས་ཞབས་བསིལ་དབུལ་ལོ། །དེ་ནས་བཛྲ་བུཥྤེ་ཧཱུྃ། བཛྲདྷཱུ་པེ་
ཧཱུྃ། བཛྲ་དཱི་པེ་ཧཱུྃ། བཛྲ་གནྡྷེ་ཧཱུྃ། རྡོ་རྗེ་གནོད་སྦྱིན་གྱི་ཕྱག་རྒྱས་བགེགས་བསྐྲད་ལ། དཀྱིལ་འཁོར་དུ་གཞུག་གོ། །དེ་ནས་ཡང་ཕྱག་རྒྱ་དང་པོར་སྔར་བཤད་པའི་ཕྱག་རྒྱའི་ཚོགས་དམ་ཚིག་གི་ཕྱག་རྒྱ་རྣམས་བཅིང་ངོ་། །དེ་ནས་སྔར་བཤད་པའི་སྔགས་ཀྱིས་ཆོས་ཀྱི་ཕྱག་རྒྱའི་ཆོ་ག་བྱའོ། །དེ་ནས་ལས་ཀྱི་ཕྱག་རྒྱའི་སྔགས་ཀྱིས་ལས་ཀྱི་ཕྱག་རྒྱ་བཅིང་ངོ་། །དེ་ནས་ཕྱག་རྒྱ་ཆེན་པོའི་སྔགས་ཀྱིས་ཕྱག་རྒྱ་ཆེན་པོ་བསྒྲུབ་པར་བྱའོ། །དེ་ནས་རྡོ་རྗེ་གཙུག་ཏོར་ལ་སོགས་པའི་དེ་བཞིན་གཤེགས་པ་རྣམས་ཀྱིས་སེམས་མ་རྡོ་རྗེ་མ་དང་། རིན་ཆེན་རྡོ་རྗེ་མ་དང་། ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་རྣམས་སྤྲོས་ཏེ་དཀྱིལ་འཁོར་དང་བཅས་པའི་ལྷ་དཔལ་ཤཱཀྱའི་རྒྱལ་པོ་ནས་བརྩམས་པའི་རྡོ་རྗེ་འབེབས་པའི་མཐར་ཐུག་པ་ལ་དབང་བསྐུར་བ་སྦྱིན་པར་བྱ་སྟེ། དབང་བསྐུར་བ་ལྔ་དང་། བདག་པོ་སྟེ་ས་བཅུའི་མཐར་ཐུག་པ་སྦྱིན་ནོ། །དབང་བསྐུར་མ་ཐག་ཏུ། །ཨོྃ་སརྦ་ཏ་ཐཱ་ག་ཏ་དྷཱུ་པེ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་སརྦ་ཏ་ཐཱ་ག་ཏ་པུཥྤ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་སརྦ་ཏ་ཐཱ་ག་ཏ་དཱི་པ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་སརྦ་ཏ་ཐཱ་ག་ཏགནྡྷེ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་སྒེག་མོ་ལ་སོགས་པ་བཞི་ཡིས་མཆོད་དོ། །རྡོ་རྗེ་གསོར་ཞིང་རྡོ་རྗེའི་ཚིག་ཡི་གེ་བརྒྱ་པ་སྔོན་དུ་འགྲོ་བས་སྔར་བཞིན་བསྟོད་པ་བྱའོ། །དེ་ནས། མཉམ་མེད་མི་གཡོ་མཉམ་མེད་སྙིང་པོའི་ཆོས་ཅན་ནི། །ཐུགས་རྗེའི་བདག་ཉིད་ཅན་ཉིད་འགྲོ་བའི་སྡུག་བསྔལ་སེལ། །ཡོན་ཏན་དངོས་གྲུབ་ཐམས་ཅད་མཐའ་ཡས་སྦྱིན་མཛད་པ། དྲི་མེད་མི་གཡོ་མཉམ་མེད་མཆོག་རབ་ཆོས་ཅན་རྣམས། །ཡོན་ཏན་མཆོག་ནི་ཕྲ་མོའི་ཆ་ལའང་མཚམས་མེད་དོ། །ནམ་མཁའ་དང་མཉམ་དཔེར་གྱུར་པ་ཉིད་ཡོད་མ་ཡིན། །སེམས་ཅན་ཁམས་ལ་གྲུབ་མཆོག་སྩོལ་བ་རྣམས་ལ་གསོལ། །དངོས་གྲུབ་མཐའ་ཡས་རྣམས་ལ་དཔེ་དང་རྣམ་པར་བྲལ། །དྲི་མེད་ཐུགས་རྗེ་བརྒྱ་པ་ཉིད་ཀྱི་ཤུགས་ལས་བྱུང་། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་སྒྲུབ་ལྷུར་མཛད་མཐའ་ཡས་མངའ་བ་ཅན། །ཐུགས་རྗེ་ཆེན་པོའི་བདག་ཉིད་རྟག་ཏུ་
རྣམ་པར་སྣང་། །འགག་མེད་ཉིད་ཀྱི་ཐུགས་རྗེའི་སྤྱོད་པ་མི་གཡོ་བ། །འཇིག་རྟེན་གསུམ་ལ་མཆོག་གི་དངོས་གྲུབ་སྩོལ་བ་འཇུག །དཔག་མེད་དཔག་བྲལ་རྣམས་ལ་ཤིན་ཏུ་རྫོགས་ཉིད་རྫོགས། །བདེ་བའི་གནས་སུ་གཤེགས་ཀྱང་ཨེ་མའོ་ཆོས་ཉིད་བཟང། རྟག་ཏུ་མཆོག་སྦྱིན་ཉིད་དེ་བདེ་འགྲོ་ཉིད་དུ་གཤེགས། །མཐའ་དག་འཇིག་གསུམ་ལ་གྲུབ་མཆོག་ནི་སྩལ་བ་པོ། །བདེ་གཤེགས་དུས་གསུམ་བསྒྲོད་ཉིད་སྒྲིབ་པ་མི་མངའ་ཉིད། དམ་ཚིག་གསུམ་མཆོག་དངོས་གྲུབ་མཆོག་སྦྱིན་བདག་ལ་སྩོལ། །ཅེས་པ་དང་། ཐམས་ཅད་ལ་ལྕེ་བརྒྱ་པའི་ཁ་ཡིས་བསྟོད་པ་ཉེ་བར་སྤྱོད་པར་མོས་ཏེ་རྡོ་རྗེ་དང་དྲིལ་བུ་འཛིན་པས་བསྟོད་པར་བྱའོ། །དེ་ནས་ཕྱོགས་བཅུར་དེ་བཞིན་གཤེགས་པ་དང་བྱང་ཆུབ་སེམས་དཔའ་ཐམས་ཅད་དང་འཇིག་རྟེན་དང་འཇིག་རྟེན་ལས་འདས་པའི་ཕྱི་རོལ་གྱི་ལྷ་རྣམས་ལ་མཆོད་པ་ཐམས་ཅད་དང་གཏོར་མའི་ཆོ་ག་ཉེ་བར་མཁོ་བ་དང་བཅས་པའི་གཏོར་མ་དབུལ་ལོ། །དཔུང་པ་བཟང་པོའི་ཚིགས་བཅད་བརྗོད་དོ། །དང་པོར་སེ་གོལ་ལ་སོགས་སྒྲས། །ཁམས་གསུམ་རྣམ་རྒྱལ་ཕྱག་རྒྱ་ཡིས། །སྡིག་པའི་ཕུང་པོ་དགུག་བྱ་ཞིང་། །ཡི་གེ་གསུམ་སོགས་ཡང་དག་ལྡན། །འཇིག་རྟེན་ཁམས་ནི་མ་ལུས་པའི། །སྡིག་པ་ཐམས་ཅད་མཉམ་པོར་སྤོང་། །དགུག་དང་གདོན་དང་བཅིང་བ་རྣམ་པར་གཞོམ། །སྔགས་བཞི་པོ་རྣམས་ལེགས་པར་སྦྱར་བ་ནི། །བདག་སོགས་བསྔགས་ཏེ་ཡུངས་ཀར་དང་པོ་བརྡེག །ཤི་བའི་རུས་པ་གོས་ལ་རབ་བཀྲུ་བ། །ཨོྃ་ཤོ་དྷ་ནེ་ཞེས་སོགས་སྔགས་ཀྱིས་ནི། །སྲིད་གསུམ་དྲི་མ་ཆུ་ཡིས་བཀྲུ་བར་བྱ། །ཨོྃ་ཀྃ་ཀ་ནི་ཞེས་སོགས་སྔགས་ཀྱིས་ནི། །བ་ཡི་རྣམ་པ་ལྔ་ཡིས་བཀྲུ་བར་བྱ། །ཨོྃ་རཏྣེ་རཏྣེ་ཞེས་སོགས་སྔགས་ཀྱིས་ནི། །དྲི་བཟངས་རྣམས་ནི་ཀུན་གྱིས་བཀྲུ་བར་བྱ། །ཨོྃ་ཨ་མོ་གྷ་ཨཱ་བ་ར་ཎ་སོགས། །སྔགས་ཀྱིས་བ་ཡི་འོ་མས་བཀྲུ་བར་བྱ། །ཨོྃ་ཨ་མི་ཏེ་ཨ་མི་ཏེ་ཞེས་སོགས། །སྔགས་ཀྱིས་ཆང་མཆོག་གིས་ཀྱང་བཀྲུ་པར་བྱ། །ཨོྃ་པུ་ཎྱེ་སོགས་པའི་སྔགས་ཀྱིས་ནི། །བར་དང་བར་དུ་ཆུ་ཡིས་བཀྲུ་བར་བྱ། །ཡང་བཀྲ་ཤིས་ཀྱི་གླུ་བླང་ཞིང་དབང་བསྐུར་ཏེ། ལམ་སྦྱང་བ་བྱའོ། །བདུག་པ་ལ་སོགས་ལྷ་མོ་བཞིའི་སྔགས་སོ། །དེ་
ནས་འདི་ཡི་ཐབ་ཁུང་ནི། །ཁྲུ་གང་ཙམ་ལ་སྦྱིན་སྲེག་བྱ། །ངན་འགྲོ་ཀུན་དུ་གནས་པ་ཡི། །སེམས་ཅན་དེ་རྗེས་དྲན་བྱས་ནས། །དགེ་བའི་རྒྱུད་ཕྱིར་སྡིག་པ་དང་། །སྒྲིབ་པ་ཞི་ཕྱིར་བསྲེག་བྱ་སྟེ། །མར་དང་འོ་མ་སྦྲང་རྩི་དང་། །འབྲས་ཡོས་ཉུངས་ཀར་བསྲེས་པ་དང་། །ཏིལ་དང་འབྲུ་དང་འབྲས་ལ་སོགས། །བུད་ཤིང་རྣམས་སུ་ལག་གཉིས་ཀྱིས། །ལས་རྣམས་གཞན་དང་གཞན་དག་ཀྱང་། །སྔ་མ་ཇི་ལྟར་དེ་ལྟར་གྱིས། །དེ་ཡིས་མྱུར་དུ་སེམས་ཅན་རྣམས། །བདེ་བ་ཕུན་སུམ་ཚོགས་པ་འཐོབ། །ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །དེ་དག་ཀྱང་སེམས་ཅན་དེ་ལ་བྱས་པ་དེ་ནས་དེ་དམྱལ་བའི་སྡུག་བསྔལ་ལས་རྣམ་པར་གྲོལ་བར་འགྱུར་ཏེ། དགའ་ལྡན་གྱི་གནས་སུ་སེམས་ཅན་ཐམས་ཅད་ལ་ཕན་པར་མཛད་པ་བདེ་བར་གཤེགས་པ་དང་ལྡན་པར་སྐྱེས་སོ། །དེ་ནས་དབང་པོ་དང་བཅས་པའི་ལྷ་རྣམས་སྙན་གྲགས་དང་བཅས་པས་གར་བྱེད་ཅིང་། སྔགས་ཀྱི་མཆོད་པའི་སྤྲིན་མཐའ་ཡས་པས་སྐྱེ་བ་འདི་ཉིད་ལ་དེ་བཞིན་གཤེགས་པ་ལ་མཆོད་པའི་ཕྱིར་ལྷའི་ཚོགས་རྣམས་མདུན་དུ་བྱ་སྟེ། བྱང་ཆུབ་ཀྱི་སེམས་བསྐྱེད་ནས་ལྷ་རྫས་ཀྱི་མེ་ཏོག་དང་། བདུག་པ་དང་། མར་མེ་དང་། དྲི་དང་། གདུགས་དང་། རྒྱལ་མཚན་དང་། བ་དན་ལ་སོགས་པ་སྣ་ཚོགས་པ་དང་། རྒྱན་དུ་མ་རྣམས་ཀྱིས་ཀྱང་མཛེས་ཤིང་ན་བཟའ་དང་རིན་པོ་ཆེའི་ཆར་ལ་སོགས་པས་ཀྱང་དགའ་བའི་ཚལ་ཡོངས་སུ་གང་བར་བྱས་སོ། །དེ་ནས་ངོ་མཚར་ཆེ་བར་གྱུར་ཏོ། །ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་ལས་བརྟག་པ་དང་པོའོ།། །།དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ཀྱིས་བྱིན་གྱིས་བརླབས་ཀྱིས་སྔགས་ཀྱི་བརྟག་པའི་རྒྱལ་པོ་བརྟག་པ་ཕྱི་མ་གསུངས་ཏེ། དཔའ་བོ་གདན་ལས་བཞེངས་ནས་ནི། དགྱེས་པས་རྡོ་རྗེ་གསོར་ཞིང་ཤཱཀྱའི་བདག་པོ་དགྱེས་པ་ཐུབ་པའི་དབང་ཕྱུག་ལ་ཕྱག་འཚལ་ནས་སྒྲིབ་པ་ཐམས་ཅད་རྣམ་པར་སྦྱོང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ངན་སོང་ཐམས་ཅད་ཡོངས་
སུ་སྦྱོང་བ་ཞེས་བྱ་བའི་སྙིང་པོ་འདི་ཉིད་རང་གི་ཐུགས་ཀ་ནས་ཕྱུང་ངོ་། །ཨོྃ་སརྦ་པཱ་པྃ་ད་ཧ་ན་བཛྲ་ཧཱུྃ་ཕཊ། ཨོྃ་སརྦ་པ་ཡ་བི་ཤོ་དྷ་ན་བཛྲ་ཧཱུྃ་ཕཊ། ཨོྃ་སརྦ་ཀརྨ་བར་ཎ་ནི་བྷ་སྨཱི་ཀུ་རུ་ཧཱུྃ་ཕཊ། །ཨོྃ་བྲུྃ་བི་ནཱ་ཤ་ཡ་སརྦཱ་བར་ཎཱ་ནཱི་བཛྲ་ཧཱུྃ་ཕཊ། ཨོྃ་དྲུྃ་བི་ཤོ་དྷ་ཡ་སརྦ་བར་ཎ་ནི་ཧཱུྃ་ཕཊ། ཨོྃ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་སརྦཱ་བར་ཎཱ་ནི་ཧཱུྃ་ཕཊ། ཨོྃ་སྲུྃ་ས་རས་ར་པྲ་ས་ར་པྲ་ས་ར་སརྦཱ་བ་ར་ཎཱ་ནི་ཧཱུྃ་ཕཊ། ཨོྃ་ཧཱུྃ་ཧ་ར་ཧ་ར་སརྦཱ་བ་ར་ཎཱ་ནི་ཧཱུཾ་ཕཊ།ཨོྃ་ཧཱུྃ་ཕཊ་སརྦཱ་བ་ར་ཎཱ་ནི་ཧཱུྃ་ཕཊ། ཨོྃ་བྲྀ་ཏ་བྲྀ་ཏ་སརྦཱ་བ་ར་ཎཱ་ནི་ཧཱུྃ་ཕཊ། ཨོྃ་ཏྲ་ཊ་ཏྲ་ཊ་སརྦཱ་བར་ཎཱ་ནི་ཧཱུྃ་ཕཊ། ཨོྃ་ཙྪིནྡ་ཙྪིནྡ་སརྦཱ་བར་ཎཱ་ནི་ཧཱུྃ་ཕཊ། ཨོྃ་ད་ཧ་ད་ཧ་སརྦ་ན་ར་ཀ་ག་ཏི་ཧེ་ཏུྃ་ཧཱུྃ་ཕཊ། ཨོྃ་པ་ཙ་པ་ཙ་སརྦ་བྲེ་ཏ་ག་ཏི་ཧེ་ཏུྃ་ཧཱུྃ་ཕཊ། ཨོྃ་མ་ཐ་མ་ཐ་སརྦ་ཏིར་ཡ་ཀ་ག་ཏི་ཧེ་ཏུྃ་ཧཱུྃ་ཕཊ། དེ་ནས་དེ་དག་གི་ཉེ་བར་མཁོ་བ་རྣམས་སྤྱད་དེ། ཨོྃ་སརྦ་པཱ་པྃ་བི་ཤོ་དྷ་ནེ་དྷ་མ་དྷ་མ་དྷཱུ་པ་ཡ་ཧཱུྃ་ཕཊ། ཨོྃ་སརྦ་དུརྒ་ཏི་བི་ཤོ་དྷ་ནེ་པུཥྤ་བི་ལོ་ཀི་ནི་ཧཱུྃ་ཕཊ། ཨོྃ་སརྦཱ་པཱ་ཡ་བི་ཤོ་དྷ་ནི་ཛྙཱ་ནཱ་ལོ་ཀ་ཀ་རི་ཧཱུྃ་ཕཊ། ཨོྃ་སརྦཱ་པཱ་ཡ་ག་ཏི་གནྡྷ་ནཱ་ཤ་ནི་གནྡྷ་བ་ཏི་ཧཱུྃ་ཕཊ། ཨོྃ་སརྦ་ན་ར་ཀ་ག་ཏི་ཨཱ་ཀཪྵ་ནི་ཧཱུྃ་ཛཿཕཊ། ཨོྃ་སརྦ་ན་ར་ཀེདྡྷཱ་ར་ཎི་ཧཱུྃ་ཧཱུྃ་ཕཊ། ཨོྃ་སརྦ་པ་ཡ་བྷནྡྷ་ན་བི་མོ་ཙ་ནི་ཧཱུྃ་བྃ་ཕཊ། ཨོྃ་སརྦ་པ་ཡ་ག་ཏི་ག་ཧ་ན་བི་ནཱ་ས་ནི་ཧཱུྃ་ཧོཿཕཊ། དེ་ནས་དཀྱིལ་འཁོར་བཤད་པར་བྱ་སྟེ། ནང་གི་དཀྱིལ་འཁོར་འཁོར་ལོ་ནི། །རྩིབས་བརྒྱད་པ་ཡིས་ཤིན་ཏུ་མཛེས། །ལྟེ་བ་མུ་ཁྱུད་ཡང་དག་ལྡན། །ནང་གི་རིམ་པ་བྲིས་ནས་ནི། །ལྟེ་བར་ཤཱཀྱའི་དབང་པོ་ཡི། །བདག་པོ་ཐུབ་པ་བྲི་བར་བྱ། །ཕྱག་ན་རྡོ་རྗེ་སྟོབས་ཆེན་ནི། །དཔའ་བོ་དེ་ཡི་སྤྱན་སྔར་བྲི། །རྒྱབ་ཏུ་འཁོར་ལོས་སྒྱུར་བ་ཡང་། །ལེགས་པར་མངོན་པར་བྲི་བར་བྱ། །གཡས་སུ་རྒྱལ་བའི་གཙུག་ཏོར་བྲི། །གཡོན་དུ་རྣམ་པར་རྒྱལ་བ་བྲི། །གཟི་བརྗིད་ཕུང་པོ་ཡང་ནི་མེར། །དབང་ལྡན་དུ་ནི་གདུགས་དཀར་པོ། །རྣམ་པར་འཐོར་བ་རླུང་ཉིད་དུ། །རྣམ་པར་འཇོམས་པ་བདེན་བྲལ་བྲི། །དེ་ནས་ཕྱི་རོལ་ཡང་དག་བྲི། །གྲུ་བཞི་པ་ལ་སྒོ་བཞི་པ། །རྟ་བབས་བཞི་པ་ཤིན་ཏུ་མཛེས། །དཔའ་བོ་ལྕགས་ཀྱུ་ཞགས་པ་དང་། །ལྕགས་སྒྲོག་དྲིལ་བུ་སྙན་རྣམས་བཞག །གྲྭ་ཡི་ཕྱོགས་ནི་ཐམས་ཅད་དུ། །བདུག་པ་ལ་སོགས་བྲི་བར་བྱ། །དེ་ནས་མེ་ཏོག་
ཕྲེང་བ་དང་། །དྲི་སོགས་རང་གི་ལུས་ལ་བྱུག །སློབ་དཔོན་འཇུག་པར་བྱ་བ་སྟེ། །ཛཿཧཱུྃ་བྃ་ཧོཿབྷ་ག་བཱན། ཨེ་ཧྱེ་ཧི་མ་ཧཱ་ཀཱ་རུ་ཎི་ཀཱ་དྲྀ་ཤྱ་ཧོཿ། ཞེས་བྱ་བས་ལྷ་ཐམས་ཅད་སྤྱན་དྲང་ངོ་། །དེ་བཞིན་དུ་བཅུག་སྟེ་དབང་བསྐུར་ན་ངན་སོང་ཐམས་ཅད་ལས་རྣ་པར་གྲོལ་ཏེ་བདེ་འགྲོ་མཐོ་རིས་ཀྱི་འཇིག་རྟེན་དང་ས་གོང་མ་རྣམས་སུ་སྐྱེ་བར་འགྱུར་རོ། །དངོས་གྲུབ་ཐམས་ཅད་ཀྱང་འགྲུབ་པར་འགྱུར་རོ། །ཡང་དག་པར་རྫོགས་པའི་སངས་རྒྱས་ཀྱང་གདོན་མི་ཟ་བར་ཐོབ་པར་འགྱུར་རོ། །སྔ་མ་བཞིན་དུ་ལས་ཐམས་ཅད་ཀྱང་བྱེད་ཅིང་ཐམས་ཅད་ལ་ཐོགས་པ་མེད་པར་འགྱུར་རོ། །བྱབ་པ་བྱས་པས་རིམས་ཐམས་ཅད་དང་གདོན་ལ་སོགས་པ་རྣམས་ལས་ཐར་བར་འགྱུར་རོ། །ཕྱག་ན་རྡོ་རྗེའི་ཧཱུྃ་ཞེས་བྱ་བས་ལས་ཐམས་ཅད་བྱེད་དོ། །བརྟག་པ་གཞན་གྱི་ཆོ་གས་ཀྱང་ལས་ཐམས་ཅད་འགྲུབ་པར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། སྲིན་པོ་ལ་སོགས་པ་ངན་སོང་གི་དབང་དུ་གྱུར་པ་རྣམས་འགྲོ་བ་ཐམས་ཅད་ཀྱི་གཟུགས་བརྙན་ལ་སོགས་པ་མངོན་པར་བྲིས་པ་ལས་བཟླས་པ་དང་སྦྱིན་སྲེག་དང་དབང་བསྐུར་བ་རྣམས་ཀྱིས་ངན་སོང་ཐམས་ཅད་ལས་ཡོངས་སུ་གྲོལ་བར་འགྱུར་རོ། །དེ་ནས་བཅོམ་ལྡན་འདས་རྡོ་རྗེ་འཛིན་པས་སེང་གེའི་ལྟ་སྟངས་ཀྱིས་ཞལ་དུ་བལྟས་ཏེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱག་རྒྱ་མཆོག་གི་མཚན་ཉིད་དམ་པ་བཤད་པར་བྱ་སྟེ། ཐུགས་རྗེའི་གདུང་བའི་དབང་དུ་གྱུར་པའི་སེམས་ཀྱི་རྒྱལ་བ་ཐམས་ཅད་ཀྱི་བྱིན་གྱིས་བརླབ་པར་བྱའོ། །ཏིང་ངེ་འཛིན་དུ་གནས་པས་དཔྲལ་བར་ཐལ་མོ་སྦྱར་ཏེ་ཕྱག་འཚལ་ལོ། །སངས་རྒྱས་རྣམས་ཀྱི་ཕྱག་འཚལ་བའི་ཕྱག་རྒྱའོ། །རྣལ་འབྱོར་རིག་པས་མགྲིན་པའི་ཕྱོགས་སུ་ཐལ་མོ་ཁ་ཕྱེ་བ་པདྨའི་རྣམ་པར་བྱའོ། །ཐུགས་ཀར་རྡོ་རྗེ་ཐལ་མོ་བྱས་སོར་མོ་དབུས་མ་རྩེ་མོ་སྦྱར་བ་འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱའོ། ། ལག་པ་གཡོན་པ་གན་རྐྱལ་དུ་པང་པར་བཞག་ལ་དེའི་སྟེང་དུ་གཡས་པ་བཟློག་སྟེ་བཞག་ལ་མཐེ་བོང་གཉིས་སྦྱར་ཏེ་ཞི་བའི་ལྟ་བས་བལྟའོ། །འདི་ནི་དེ་བཞིན་གཤེགས་པའི་རིགས་ཀྱི་དམ་ཚིག་གི་ཏིང་ངེ་འཛིན་གྱི་ཕྱག་རྒྱའོ། །དེ་ཉིད་ཡོངས་སུ་བསྐོར་ཏེ་ཕན་ཚུན་སྦྱར་ཏེ་མཐེའུ་ཆུང་དག་དང་
མཐེ་བོང་དག་ལུ་གུ་རྒྱུད་ཀྱི་རྣམ་པར་བཅིངས་ལ་སྙིང་གར་གཞག་གོ། །འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱའོ། །ཐལ་མོ་གང་བར་སྦྱར་ནས་མཐེའུ་ཆུང་དང་མཐེ་བོང་སྦྱར་ཏེ་བཟུང་ཞིང་ལྷག་མ་རྣམས་རབ་ཏུ་བརྐྱང་བའོ། །འདི་ནི་པདྨ་རིགས་ཀྱི་པདྨའི་ཕྱག་རྒྱའོ། །རྡོ་རྗེ་བསྡམས་པར་བརྟན་པར་བྱས་ནས། གུང་མོ་གཉིས་རྡོ་རྗེ་རྩེ་མོར་བྱས་ལ། མཐེའུ་ཆུང་དང་མཐེ་བོ་རབ་ཏུ་བརྐྱང་བའོ། །འདི་ནི་ཕྱག་ན་རྡོ་རྗེའི་ཕྱག་རྒྱའོ། །དེ་ཉིད་ཀྱིས་མཐེའུ་ཆུང་དང་མཐེ་བོང་གཉིས་དེ་བཞིན་དུ་བྱས་ལ། མཛུབ་མོ་དང་མིང་མེད་པདྨའི་འདབ་མའི་རྣམ་པར་བྱའོ། །འདི་ནི་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོའི་ཕྱག་རྒྱའོ། །དེ་ཉིད་ཀྱི་མཛུབ་མོ་དང་མིང་མེད་དག་རིན་པོ་ཆེའི་རྣམ་པར་བྱའོ། །འདི་ནི་དབང་བསྐུར་བའི་ཕྱག་རྒྱའོ། །མཐེའུ་ཆུང་དང་མཐེ་བོང་སོ་སོ་སོ་སོར་སྦྱར་ནས་ལྷག་མ་རྣམས་རབ་ཏུ་བརྐྱང་བ་ནི་མཚོན་ཆ་ཐམས་ཅད་ཀྱི་ཕྱག་རྒྱའོ། །ལག་པ་གཡོན་པ་དེ་ཁོ་ན་བཞིན་དུ་རབ་ཏུ་འཇུག་པ་ནི་ལས་ཐམས་ཅད་པའི་ཕྱག་རྒྱའོ། །སྙིམ་པ་གྱེན་དུ་འཐོར་བ་ནི་བདུག་སྤོས་ཀྱི་ཕྱག་རྒྱའོ། །དེ་ཉིད་འོག་ནས་འཐོར་བ་ནི་མེ་ཏོག་གི་ཕྱག་རྒྱའོ། །དེ་ཉིད་མཐེ་བོང་གཉིས་གྱེན་དུ་བསྙམས་ལ་འཛིན་པ་ནི་མར་མེའི་ཕྱག་རྒྱའོ། །དེ་ཉིད་དུང་འདྲ་བར་བྱས་པ་ནི་དྲིའི་ཕྱག་རྒྱའོ། །དེ་ཉིད་རབ་ཏུ་བརྐྱང་སྟེ་འཛིན་པ་ནི་གཏོར་མའི་ཕྱག་རྒྱའོ། །དེ་ཉིད་གུང་མོ་རྣམས་ནང་དུ་བཅུག་པ་ནི་ཨརྒྷའི་ཕྱག་རྒྱའོ། །རྡོ་རྗེ་བཅིངས་པ་ལས་གུང་མོ་གཉིས་བསྙམས་ཏེ་ཚིགས་བར་མ་བཅག་ནས་སོར་མོ་ཐམས་ཅད་བརྐྱང་བ་འདི་ནི་རྣམ་པར་འཐོར་བའི་ཕྱག་རྒྱའོ། །དེ་ཉིད་མཐེ་བོ་དང་མཐེ་ཆུང་གཉིས་བཀུག་པ་ནི་རྣམ་པར་འཇོམས་པའི་ཕྱག་རྒྱའོ། །དེ་ཉིད་ཀྱི་སྙིམ་པ་འོད་ཟེར་གྱི་རྣམ་པ་ནི་གཟི་བརྗིད་ཕུང་པོའི་ཕྱག་རྒྱའོ། །དེ་ཉིད་སྤྱི་བོའི་གནས་སུ་བསྐོར་བ་ནི་གདུགས་དཀར་པོའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་མཐེ་བོང་དང་མཐེའུ་ཆུང་གཉིས་ལུ་གུ་རྒྱུད་དུ་བཅིངས་ལ་བསྐོར་བ་འདི་ནི་འཁོར་ལོའི་ཕྱག་རྒྱའོ། །རྡོ་རྗེ་བསྡམས་པ་ལས་གུང་མོ་གཉིས་རྡོ་རྗེར་བྱས་ལ་མཛུབ་མོ་གཉིས་རིན་པོ་ཆེ་ལྟར་བྱ་སྟེ། ལྷག་མ་འོད་ཟེར་འདྲ་བར་བྱས་པ་ནི་རྒྱལ་བའི་གཙུག་ཏོར་གྱི་ཕྱག་རྒྱའོ། །དེ་བཞིན་དུ་མཛུབ་མོ་གཉིས་རྡོ་རྗེར་བྱས་ལ་སོར་མོ་ལྷག་མ་རྣམས་བསྡམས་
ནས་རྡོ་རྗེ་འདྲ་བར་བྱས་པ་ནི་རྣམ་པར་རྒྱལ་བའི་ཕྱག་རྒྱའོ། །གཡས་པ་མཆོག་སྦྱིན་དང་གཡོན་པ་མི་འཇིགས་པ་སྦྱིན་པ་ནི་དེ་བཞིན་གཤེགས་པའི་ཡིན་ནོ། །རྡོ་རྗེ་བསྡམས་པ་ལས་མཛུབ་མོ་གཉིས་རྡོ་རྗེ་འདྲ་བར་བྱས་པ་ནི་རྡོ་རྗེའི་ཕྱག་རྒྱའོ། །དེ་ཉིད་ལས་མཛུབ་མོ་གཡས་པ་བཀུག་པ་ནི་ལྕགས་ཀྱུའི་ཕྱག་རྒྱའོ། །དེ་ཉིད་ལས་མདའ་འདྲ་བར་བྱས་པ་ནི་མདའི་ཕྱག་རྒྱའོ། །དེ་ཉིད་ཀྱི་ཕྱག་རྒྱ་དང་མཐེ་བོང་རྩེ་སྤྲད་པ་ནི་བློ་གྲོས་ལེགས་པའིའོ། །དེ་ཉིད་ཀྱི་ཚིགས་བར་མ་བཅག་པ་ནི་རིན་པོ་ཆེའིའོ། །དེ་ཉིད་སོར་མོ་རྣམས་འོད་ཟེར་འདྲ་བ་ནི་གཟི་བརྗིད་ཀྱིའོ། ། དེ་ཉིད་སྤྱི་བོར་བཞག་པ་ནི་རྒྱལ་མཚན་གྱི་ཕྱག་རྒྱའོ། །དེ་ཉིད་མདུན་དུ་བཞག་པ་ནི་བཞདཔའིའོ། །དེ་ཉིད་པདྨ་འདྲ་བར་བྱས་པ་ནི་པདྨའོ། །དེ་ཉིད་གུང་མོ་དང་མཛུབ་མོ་བཀུག་པ་ནི་རལ་གྲིའོ། །དེ་ཉིད་གདུ་བུ་འདྲ་བར་བྱས་པ་ནི་འཁོར་ལོའིའོ། །དེ་ཉིད་པདྨའི་འདབ་མ་འདྲ་བར་བྱས་པ་ནི་ལྕེའིའོ། །དེ་ཉིད་རྩེ་མོ་ཡིད་ཙམ་བསྐྱེད་པ་ནི་སྣ་ཚོགས་ཀྱིའོ། །དེ་ཉིད་ཤིན་ཏུ་བསྐྱེད་པ་ནི་བསྲུང་བའིའོ། །དེ་ཉིད་རྩེ་མོ་གཉིས་སླར་བཀུག་པ་ནི་གནོད་སྦྱིན་གྱིའོ། །དེ་ཉིད་དམ་དུ་བཀུག་པ་ནི་བསྡམས་པའིའོ། །དེ་ཉིད་མཛུབ་མོ་གཉིས་བཀུག་པ་ནི་ལྕགས་ཀྱུའོ། །དེ་ཉིད་རྩེ་མོ་གཉིས་སྤྲད་པ་ནི་ཞགས་པའིའོ། །དེ་ཉིད་ཕན་ཚུན་མདུད་པ་ནི་ལྕགས་སྒྲོག་གིའོ། །དེ་ཉིད་བསྐྱོད་པ་ནི་དྲིལ་བུའིའོ། །དེ་ནས་ཚངས་པ་དང་བརྒྱ་བྱིན་ལ་སོགས་པ་ལྷའི་བུ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚེ་ཐུང་བ་དང་། སྐལ་བ་ཆུང་བ་རྣམས་ཀྱི་དོན་དང་། ཕན་པ་དང་། བདེ་བ་དང་། ཚེ་བསྲིང་བའི་སླད་དུ་བཤད་དུ་གསོལ། །བདག་ལ་གསང་བའི་བདག་པོ་བཤད་དུ་གསོལ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་བརྒྱ་བྱིན་དང་ཚངས་པ་ལ་སོགས་པ་འཁོར་གྱི་དཀྱིལ་འཁོར་ཆེན་པོ་དེ་དག་ལ་གཟིགས་ནས་ལེགས་སོ་ཞེས་བྱ་བས་མགུ་བར་བྱ་སྟེ། བརྒྱ་བྱིན་ལ་སོགས་པ་ལྷའི་བུ་རྣམས་གང་ཁྱེད་ལ་འདི་ལྟ་བུའི་སྤོབས་པ་ཡང་དག་པར་སྐྱེས་པ་དེ་ནི་ལེགས་སོ་ལེགས་སོ། །ལེགས་པར་སྒྲུབས་ཤིག་དང་བཤད་པར་བྱའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཐམས་ཅད་ཚེ་དཔག་
ཏུ་མེད་པར་ཁྱབ་པར་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཚེ་དང་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་འཕེལ་བ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་། ཨོྃ་པུ་ཎྱེ་པུ་ཎྱེ། མ་ཧཱ་པུ་ཎྱེ་ཨ་པ་ར་མི་ཏཱ་ཡུཿཔུ་ཎྱེཛྙཱ་ན་སྃ་བྷ་རོ་པ་ཙི་ཏེ་ཀ་རི་ཎི་སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱི་སྙིང་པོའི་གཟུངས་འདི་བཤད་པ་ཙམ་གྱིས་ངན་སོང་ཐམས་ཅད་རབ་ཏུ་ཞི་སྟེ། སེམས་ཅན་དམྱལ་བ་དང་། ཡི་དགས་དང་བྱོལ་སོང་གི་འགྲོ་བ་རྣམས་སུ་སྐྱེས་པའི་སེམས་ཅན་ཐམས་ཅད་གྲོལ་བར་བདག་ཉིད་ཀྱིས་རབ་ཏུ་ཤེས་སོ། །འཇིག་རྟེན་གྱི་ཁམས་ཐམས་ཅད་སྣང་བར་བྱས་ཤིང་སྣང་བར་བྱས་ནས་ཀྱང་སངས་རྒྱས་ཀྱི་མཛད་པ་བཅུ་གཉིས་བྱས་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་ཆོས་ཀྱི་ཡི་གེ་དེ་ཉིད་དུ་ཞུགས་པར་གྱུར་ཏོ། །དེ་ནས་སླར་ཡང་བཅོམ་ལྡན་འདས་ཀྱིས་ཚེ་དཔག་ཏུ་མེད་པའི་རྡོ་རྗེ་འོད་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་ཚེ་དཔག་ཏུ་མེད་པའི་རྡོ་རྗེ་ཞེས་བྱ་བའི་སྙིང་པོའི་གཟུངས་འདི་བཤད་དོ། །ཨོྃ་ཨ་མི་ཏེ་ཨ་མི་ཏཱ། ཨ་མི་ཏོདྡྷ་བེ། ཨ་མི་ཏ་སྃ་བྷ་བེ། ཨ་མི་ཏ་བི་ཀྲཱནྟེ། ཨ་མི་ཏེ་བི་ཀྲྭནྟ་གཱ་མི་ནི་སརྦ་ཀརྨ་ཀླེ་ཤ་ཀྵ་ཡྃ་ཀ་རི་སྭཱ་ཧཱ། དེ་ནས་འདི་བཤད་པ་ཙམ་གྱིས་དེ་བཞིན་དུ་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་རབ་ཏུ་ཞིའོ། །དེ་ནས་སླར་ཡང་བཅོམ་ལྡན་འདས་ཀྱིས་གདོན་མི་ཟ་བར་སྒྲིབ་པ་ཐམས་ཅད་རྣམ་པར་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྒྲིབ་པ་གཅོད་པ་ཞེས་བྱ་བའི་སྙིང་པོའི་གཟུངས་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་ཀྃ་ཀ་ནི་ཀྃ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན་སརྦ་ཀརྨ་པ་རྃ་པ་རཱ་ཎི་མེ་སརྦ་བཏྲྭཱ་ནཱཉྩ་སྭཱ་ཧཱ། འདི་བཤད་པ་ཙམ་གྱིས་ཐམས་ཅད་དེ་ཁོ་ན་བཞིན་ད་འགྱུར་རོ། །དེ་ནས་སླར་ཡང་བཅོམ་ལྡན་འདས་ཀྱིས་སྒྲིབ་པ་ཐམས་ཅད་དྲི་མ་མེད་ཅིང་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལས་སྙོམས་པར་ཞུགས་ནས། དེ་བཞིན་
གཤེགས་པ་ཐམས་ཅད་གྱི་སྒྲིབ་པ་མ་ལུས་པ་རྣམ་པར་འཇོམས་པ་ཞེས་བྱ་བའི་སྙིང་པོའི་གཟུངས་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་རཏྣེ་རཏྣེ། མ་ཧཱ་རཏྣེ། རཏྣ་སཾ་བྷ་བེ། རཏྣ་ཀི་རཏྣེ། རཏྣ་མཱ་ལཱ་བི་ཤུདྡྷེ། ཤོདྷ་ཡ། སརྦ་པཱ་པཾ་ཧཱུྃ་ཏྲཊ། དེ་ནས་འདི་བཤད་མ་ཐག་ཏུ་བདུད་ཀྱི་གནས་ཐམས་ཅད་བཅོམ་ཞིང་རྣམ་པར་བཅོམ་པར་གྱུར་ཏོ། །དེ་ནས་སླར་ཡང་བཅོམ་ལྡན་འདས་ཀྱིས་གདོན་མི་ཟ་བར་མི་ཆོམས་པར་སྒྲིབ་པ་ཐམས་ཅད་རྣམ་པར་འཇོསམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་གཟུངས་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་ཨ་མོ་གྷ་ཨ་པྲ་ཏི་ཧ་ཏ་སརྦཱ་བ་ར་ཎ་བི་ཤོ་དྷ་ནི་ཧ་ར་ཧ་ར་ཧཱུྃ་ཕཊ། འདི་བཤད་མ་ཐག་ཏུ་འཇིག་རྟེན་གྱི་ཁམས་འདི་ཐམས་ཅད་གཡོས་རབ་ཏུ་གཡོས་ཡང་དག་པར་རབ་ཏུ་གཡོས། བསྐྱོད་རབ་ཏུ་བསྐྱོད་ཡང་དག་པར་རབ་ཏུ་བསྐྱོད། བསྒུལ་རབ་ཏུ་བསྒུལ་ཡང་དག་པར་རབ་ཏུ་བསྒུལ་ཞིང་ངོ་མཚར་ཆེ་ཞིང་རྨད་དུ་བྱུང་བ་དུ་མ་འཇིག་རྟེན་དུ་སྣང་བར་འགྱུར་རོ། །དེ་ནས་དེ་དག་གི་དཀྱིལ་འཁོར་ནི་འདི་ཡིན་ཏེ། གྲུ་བཞི་པ་ལ་སྒོ་བཞི་པ། །ལོགས་བཞི་དང་ཡང་ཡང་དག་ལྡན། །རྟ་བབས་བཞི་དང་ཀུན་དུ་ལྡན། །ཁ་ཁྱེར་དང་ནི་སྒོ་ཁྱུད་བཅས། །དེ་ཡི་དབུས་སུ་འཁོར་ལོ་ཡི། །དཀྱིལ་འཁོར་དམ་པ་བྲི་བར་བྱ། །རྩིབས་བཞི་དང་ནི་ཡང་དག་ལྡན། །ལྟེ་བའི་དཀྱིལ་འཁོར་མཆོག་ཡིན་ནོ། །དེ་ཡི་དབུས་སུ་མགོན་པོ་ནི། །ཕྱག་ན་རྡོ་རྗེ་སྟོབས་ཆེན་པོ། །ཕྱག་ན་རྡོ་རྗེ་དྲིལ་བུ་ཅན། །ཟླ་བ་རྒྱས་ཞལ་འཛུམ་པ་བྲི། །ཤར་གྱི་རྩིབས་ཀྱི་དབུས་ཀྱི་ཆར། །གཙོ་བོ་མི་བསྐྱོད་པ་ཉིད་བྲི། །ལྷོར་ནི་རིན་ཆེན་བྲི་བྱ་ཞིང་། །ནུབ་ཏུ་ཆུ་སྐྱེས་པདྨ་སྟེ། །བྱང་དུ་གདོན་མི་ཟ་ཞེས་གྲགས། །དཔའ་བོ་སྟོབས་ཆེན་བྲི་བར་བྱ། །དེ་བཞིན་གཤེགས་པ་ཐམས་ཅད་ནི། །འཁོར་ལོས་སྒྱུར་བའི་ཆ་ལུགས་མཛད། །ཟླ་བའི་དཀྱིལ་འཁོར་མདོག་འདྲ་ཞིང་། །རྒྱན་རྣམས་ཀུན་གྱིས་བརྒྱན་པ་རྣམས། །ཕྱག་ནི་མཆོག་སྦྱིན་མི་འཇིགས་པ། །རྡོ་རྗེ་སྐྱིལ་ཀྲུང་བཞུགས་པ་བྲི། །གྲྭ་ཡི་ཆ་རྣམས་ཐམས་ཅད་དུ། །དེ་བཞིན་བདུག་པ་ལ་སོགས་བྲི། །སྒོ་སྐྱོང་རྣམས་ཀྱང་ཁྲོ་བོ་དང་། །མཆོག་
ཏུ་ཁྲོ་བར་གཞོལ་བ་བྲི། །དེ་ནས་རྣལ་འབྱོར་རང་ཉིད་ཞུགས། །སྔགས་ཀྱི་ལྷ་རྣམས་སྤྱན་དྲངས་ཏེ། །ཛཿཧཱུྃ་བྃ་ཧོཿབྷ་ག་བཱན། བཛྲ་ཨེ་ཧྱེ་ཧི་ས་མ་ཡ་སྟྭྃ། དེ་ནས་མགོན་པོ་བྱོན་པ་ལ། །མདོར་ན་མཆོད་པ་བྱས་ནས་ནི། །འཆི་བདག་ཉིད་དང་སྦྲུལ་འཇིགས་པའི། །འཆི་བདག་གཞོམ་ཕྱིར་གཞུག་པར་བྱ། །ཨོྃ་བཛྲ་ས་མ་ཡེ་ཧཱུྃ། རྡོ་རྗེ་ཏི་རིནྟི་རི་བཅིང་། །ལག་ན་རིན་ཆེན་ཐོགས་པ་གཞུག །ཡང་ན་མེ་ཏོག་ཕྲེང་ལྡན་པ། །དེ་དག་དཀྱིལ་འཁོར་ཉིད་དུ་དོར། །ཨོྃ་པྲ་ཏཱི་ཙྪ་བཛྲ་ཧཱུྃ། དེ་ནས་དམ་ཚིག་སྦྱིན་ཏེ། ཨོྃ་བཛྲ་ས་མ་ཡ་ཧཱུྃ། དེ་ནས་འདིས་གདོང་གཡོགས་དགྲོལ་བར་བྱའོ། །ཨོྃ་བཛྲ་ཧཱ་སྱོ་ཏྒྷ་ཊཱ་ཡ་ཧཱུྃ། དེ་ནས་འདིས་དཀྱིལ་འཁོར་བསྟན་པར་བྱའོ། །ཨོྃ་བཛྲ་དྲྀ་ཤྱ་ཧོ། །དེ་ནས་དབང་བསྐུར་བ་སྦྱིན་ཏེ། ཨོྃ་བཛྲཱ་བྷི་ཥིཉྩ་ཧཱུྃ། ཨོྃ་བུདྡྷཱ་བྱི་ཥིཉྩ་ཨོྃ། ཨོྃ་རཏྣ་བྷི་ཥིཉྩ་ཏྲཱྃ། ཨོྃ་པདྨ་བྷི་ཥིཉྩ་ཧྲཱིཿ། ཨོྃ་ཀརྨ་བྷི་ཥིཉྩ་ཨཿ། དེ་ནས་བུམ་པའི་དབང་བསྐུར་སྦྱིན་ཏེ། ཨོྃ་བཛྲ་ཀ་ལ་ཤཱ་བྷི་ཥིཉྩ་ཧཱུྃ། ཨོྃ་བུདྡྷ་ཀ་ལ་ཤ་བྷི་ཥིཉྩ་ཨོྃ། ཨོྃ་རཏྣ་ཀ་ལ་ཤཱ་བྷི་ཥིཉྩ་ཏྲཱྃ། ཨོྃ་པདྨ་ཀ་ལ་ཤཱ་བྷི་ཥིཉྩཱ་ཧྲཱིཿ། ཨོྃ་ཀརྨ་ཀ་ལ་ཤཱ་བྷི་ཥིཉྩྀ་ཨཿ། དེ་ནས་ཕྲེང་བའི་དབང་བསྐུར་བར་བྱའོ། །ཨོྃ་རཏྣ་མཱ་ལཱ་བྷི་ཥིཉྩ་ཏྲཱྃ་ཏྲཱྃ་ཏྲཱྃ་ཏྲཱྃ་ཏྲཱྃ་ཨོྃ་བཛྲ་པཊྚཱ་བ་ལྃ་བ་ནཱ་བྷི་ཥིཉྩ་ཏྲཱྃ། ཨོྃ་བཛྲ་མུ་དྲཱ་བྷི་ཥིཉྩ་ཧཱུྃ། ཨོྃ་བུདྡྷ་མུ་དྲཱ་བྷི་ཥིཉྩ་ཨོྃ། ཨོྃ་རཏྣ་མུ་དྲཱ་བྷི་ཥིཉྩ་ཏྲཱྃ། ཨོྃ་པདྨ་མུ་དྲཱ་བྷི་ཥིཉྩ་ཧྲཱིཿ། ཨོྃ་ཀརྨ་མུ་དྲཱ་བྷི་ཥིཉྩ་ཨཿ། ཨོྃ་བཛྲ་ནཱ་མཱ་བྷི་ཥིཉྩ་ཧཱུྃ། ཨོྃ་ཧཱུྃ་ཏྲཱྃ་ཧྲཱིཿཨཿ། ཨོྃ་བཛྲ་ཀརྨཱ་བྷི་ཥིཉྩ་ཧཱུྃ་ཨཿ། ཨོྃ་བཛྲ་ཙཀྲཱ་བྷི་ཥིཉྩ་ཧཱུཾ་བྷྲུཾ། ཨོྃ་བཛྲ་ཙཀྲཱ་དྷི་པ་དྷི་སྟྭ་མ་བྷི་ཥིཉྩ་ཧཱུྃ་ཧཱུྃ་ཧཱུྃ། ཨོྃ་ཨོྃ་ཨོྃ། ཏྲཱྃ་ཏྲཱྃ་ཏྲཱྃ། ཧྲཱིཿཧྲཱིཿཧྲཱིཿ། ཨཿ།ཨཿ།ཨཿ། ཨོྃ་བཛྲ་དྷཱ་ར་ཎྱ་བྷི་ཥཉྩི་ཧཱུྃ། ཨོྃ་ཏ་ཐཱ་ག་ཏ་དྷཱ་ར་ཎྱ་བྷི་ཥིཉྩ་ཨོྃ། ཨོྃ་རཏྣ་དྷ་ར་ཎྱ་བྷི་ཥིཉྩ་ཏྲཱྃ། ཨོྃ་པདྨ་དྷཱ་ར་ཎྱ་བྷི་ཥིཉྩ་ཧྲཱིཿ། ཨོྃ་ཀརྨ་དྷཱ་ར་ཎྱ་བྷི་ཥིཉྩ་ཨཿ། ཨོྃ་སརྦ་ཏ་ཐཱ་ག་ཏ་གུ་ཧྱཱ་བྷི་ཥིཉྩ་ཨོྃ། ཨོྃ་བཛྲ་གུ་ཧྱཱ་བྷི་ཥིཉྩ་ཧཱུཾ། ཨོྃ་རཏྣ་གུ་ཧྱཱ་བྷི་ཥིཉྩ་ཏྲཱཾ། ཨོྃ་པདྨ་གུ་ཧྱཱ་བྷིཥིཉྩ་ཧྲཱིཿ། ཨོྃ་ཀརྨ་གུ་ཧྱཱ་བྷི་ཥིཉྩ་ཨཿ། ཨོྃ་པྲ་ཛྙོ་པཱ་ཡ་ས་མ་ཡོ་གཱ་བྷི་ཥིཉྩ་ཧཱུྃ་ཨཿ། དེ་ལྟར་དབང་བསྐུར་ནས་ཚེ་འཕེལ་བའི་རིག་པ་འདི་སྦྱིན་ནོ།།ཨོྃ་བྷྲུྃ་བཛྲ་ཨཱ་ཡུ་ཥེ་ཧཱུྃ་ཨཿ། འདིའི་སྒྲུབ་པ་ནི་འདི་ཡིན་ཏེ། བཅོམ་ལྡན་འདས་
རྡོ་རྗེ་ཚེ་དཔག་མེད་ཟླ་བའི་འོད་ཅན་ཟླ་བའི་དཀྱིལ་འཁོར་ལ་བཞུགས་ཤིང་རྒྱན་ཐམས་ཅད་ཀྱིས་བརྒྱན་པ། ཕྱག་གཉིས་མི་འཇིགས་པ་དང་མཆོག་སྦྱིན་མཛད་པ་ལས་བདུད་རྩི་འཛག་པ་བྲིའོ། །དེའི་འོག་ཏུ་སྒྲུབ་པ་པོ་ལག་པ་ཐལ་མོ་སྦྱར་བ་བརྐྱང་བ་གདོང་གྱེན་དུ་བཅོམ་ལྡན་འདས་ལ་བལྟ་བ་བྲིས་ལ་མཆོད་པ་རྣམ་པ་ལྔས་མཆོད་པ་བྱ་སྟེ་དེའི་སྤྱན་སྔར་སྟོང་ཕྲག་བརྒྱ་བཟླས་སོ། །དེ་ནས་ཟླ་བ་ཉ་ལ་མཆོད་པ་ཆེན་པོ་བྱས་ལ་བ་དམར་སེར་གྱི་མར་སྣོད་སར་པར་བཅུག་ལ་གཡོན་པའི་རྡོ་རྗེས་མནན་ཏེ། བཅོམ་ལྡན་འདས་ལ་རབ་ཏུ་སེམས་ཤིང་མཚན་ཐོག་ཐག་བཟླས་པ་བྱའོ། །དེ་ནས་དྲི་མནམ་ཞིང་སྔོན་མ་བྱུང་བའི་དྲིའི་ངད་ཀྱང་ལྡང་ངོ་། །དྲོ་བ་དང་དུ་བ་དང་མེ་ཡང་འབྱུང་ངོ་། །འོད་ཟེར་གྱི་སྣང་བ་རབ་ཏུ་འཕྲོས་ཏེ་དེ་ལ་སོགས་པའི་མཚན་མ་བྱུང་ན་མར་དེའམ་མར་གསར་པའམ། ཏིལ་མར་རམ། ཆུའམ། འོ་མའམ། ཞོའམ། ཆང་ངམ། ཁྲག་གམ། ཞག་གམ། ཀླད་པའམ། ཤའམ། གང་ཡང་རུང་བ་དང་ལྷན་ཅིག་ཏུ་རབ་ཏུ་བསྒྲུབས་ཏེ་ནང་པར་སྔར་སྲུང་བ་ལ་སོགས་པ་བྱས་ནས་བདག་ཉིད་སྦྱངས་ཏེ་འཐུངས་སམ་ཟོས་ན་མཚན་མ་ཇི་ལྟ་བ་བཞིན་དུ་བྱུང་ན་ནི་ནམ་ཟླ་བ་དང་ཉི་མ་ཇི་སྲིད་པའི་ཚེར་འགྱུར་ཞིང་རྡོ་རྗེ་སེམས་དཔའི་ཚེར་ཡང་འགྱུར་རོ། །ཐ་མས་ནི་དངོས་གྲུབ་ཐ་མར་འགྱུར་ཏེ་འདི་ལ་ཐེ་ཚོམ་མེད་དོ། །མཚན་མ་མ་བྱུང་ན་ཡང་འཇིག་རྟེན་ན་ནད་མེད་པ་དང་ཡིད་གཞུངས་པ་དང་ལྡན་ཞིང་སྐྲ་དཀར་དང་གཉེར་མ་མེད་པ་དང་ལུས་བརྟན་ཞིང་ཚེ་ལོ་བརྒྱ་ཐུབ་པར་འགྱུར་རོ། ། གཞན་ཡང་བཟླས་པ་བྱས་པ་ཙམ་གྱིས་ཞི་བ་དང་རྒྱས་པ་དང་དབང་ལ་སོགས་པའི་ལས་རྣམས་བརྟག་མི་དགོས་པར་འགྲུབ་སྟེ་ཐེ་ཚོམ་མེད་དོ། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་སེམས་ཅན་ཐམས་ཅད་ཀྱི་དོན་དང་ཕན་པ་དང་བདེ་བའི་སླད་དུ་རང་རང་གི་སྙིང་པོ་བཤད་པར་འཚལ་གྱིས། བཅོམ་ལྡན་འདས་ཀྱིས་བཀའ་གནང་བར་ཞུ། རྡོ་རྗེ་འཛིན་པས་བཀའ་གནང་བར་ཞུ། རྒྱལ་པོ་ཆེན་པོ་དག་ལེགས་སོ་ལེགས་སོ་ཤོད་ཅིག་དང་། ངས་རྗེས་སུ་ཡི་
རང་ཞིང་རང་གི་དམ་ཚིག་བྱིན་གྱིས་བརླབ་པར་བྱའོ། །དེ་ནས་གནོད་སྦྱིན་གྱི་རྒྱལ་པོ་རྣམ་ཐོས་ཀྱི་བུ་ངལ་བསོ་པོས། བཅོམ་ལྡན་འདས་ཀྱིས་གནང་ཞིང་རྗེས་སུ་ཡི་རངས་ཏེ་བྱིན་གྱིས་བརླབས་པས་རང་གི་སྙིང་པོ་རང་གི་སྙིང་གནས་ཕྱུང་ལ། ཨོྃ་བཻ། དེ་ནས་དྲི་ཟའི་རྒྱལ་པོ་ཆེན་པོ་ཡུལ་འཁོར་སྲུང་གིས་དེ་ཁོ་ན་བཞིན་རང་གི་སྙིང་པོ་བཤད་པ། །ཨོྃ་ཌྷྲྀ། དེ་ནས་གྲུལ་བུམ་གྱི་རྒྱལ་པོ་ཆེན་པོ་འཕགས་སྐྱེས་པོས་དེ་ཁོ་ན་བཞིན་དུ་རང་གི་སྙིང་པོ་བཤད་པ། ཨོྃ་བྷི། དེ་ནས་ཀླུའི་རྒྱལ་པོ་ཆེན་པོ་མིག་མི་བཟང་གིས་དེ་ཁོ་ན་བཞིན་དུ་རང་གི་སྙིང་པོ་བཤད་པ། ཨོྃ་ཀྵ། དེ་ནས་དེ་དག་གིས་དཀྱིལ་འཁོར་བཤད་དེ། གྲུ་བཞི་པ་ལ་སྒོ་བཞི་པ། །དཀྱིལ་འཁོར་ལྔས་ནི་བརྒྱན་པ་སྟེ། །དེ་ཡི་དབུས་སུ་མགོན་པོ་ནི། །ཕྱག་ན་རྡོ་རྗེ་འགྱིང་བཅས་བྲི། །དེ་ཡི་གཡོན་པའི་ལོགས་སུ་ནི། །ངལ་བསོ་རྣམ་ཐོས་བུ་དགེ་ཡི། །ལག་ན་བེ་ཅོན་ནེའུ་ལེ། །རིན་པོ་ཆེ་ཡི་རྒྱན་གྱིས་བརྒྱན། །སྦོམ་ཞིང་སེང་གེའི་གདན་ལ་བཞུགས། །གསེར་མདོག་གཟི་བརྗིད་ལྡན་པ་བྲི། །མཁས་པས་བུམ་པ་བཟང་ལ་སོགས། །རིན་ཆེན་ཚོགས་ཆར་འབབ་པ་བྲི། །མདུན་དུ་ཡུལ་འཁོར་སྐྱོང་ཉིད་ནི། །པི་ཝང་སྒྲོགས་པར་ཡང་དག་བརྩོན། །མཛེས་ཤིང་ཁ་དོག་ལྗང་གུ་ཉིད། །རྒྱན་རྣམས་ཀུན་གྱིས་བརྒྱན་པ་བྲི། །གཡས་སུ་དཔའ་བོ་ལུས་འཕགས་པོ། །རལ་གྲི་ཕྱག་ན་བསྣམས་པ་བྲི། །ནུབ་ཏུ་ཡང་ནི་མིག་མི་བཟང། །རྡོ་རྗེ་ཞགས་པ་འཛིན་ཅིང་མཆོག །སྦྲུལ་མགོ་བདུན་གྱིས་ཡོངས་སུ་བསྐོར། །མིག་ནི་དམར་ཞིང་ཤིན་ཏུ་འབུར། །སྒོ་ཡི་ཕྱོགས་ནི་ཐམས་ཅད་དུ། །སྒོ་སྐྱོང་རྣམས་ཀྱང་དེ་བཞིན་ནོ། །དེ་ནས་སྔགས་པ་རང་ཉིད་འཇུག །འཁོར་ལོའི་ཕྱག་རྒྱ་ཞེས་གྲགས་པའི། །བཅོམ་ལྡན་འདས་ཉིད་སྤྱན་དྲང་ཞིང་། །དེ་ནས་རྒྱལ་པོ་སྤྱན་དྲང་ངོ་། ། སྤྱན་དྲངས་ནས་ནི་མཁས་པས་མཆོད། །མཆོད་ཡོན་ཞབས་བསིལ་ཆོ་ག་བཞིན། །དེ་ནས་སློབ་མ་རྒྱལ་རིགས་སམ། །རྗེ་རིགས་བྲམ་ཟེ་ལ་སོགས་ཀྱང་། །མེ་ཏོག་ཕྲེང་བས་རྣམ་བརྒྱན་པ། །སྔགས་ཤེས་པ་ཡི་སྔགས་འདི་དང་། །རྡོ་རྗེ་འཛིན་མའི་ཕྱག་རྒྱས་གཞུག །
ཨོྃ་བཛྲ་ས་མ་ཡེ་ཧཱུྃ། དེ་ནས་མེ་ཏོག་གམ་རིན་པོ་ཆེ་འདིས་ཀྱང་དོར་བར་བྱའོ། །ཨོྃ་བཛྲ་པྲ་ཏཱིཙྪ་དྷཱྃ་མ་ཧོ་ཏྟ་མ། གང་ལ་ལྷུང་བའི་རྒྱལ་པོ་དེ། །འདི་ཡིས་འགྲུབ་འགྱུར་གཞན་དུ་མིན། །དེ་ནས་གྲྭ་ན་གནས་པ་ཡི། །བུམ་པ་བཞིས་ཀྱང་དབང་བསྐུར་ཏེ། ། ལྔ་པ་ཕྱག་ན་རྡོ་རྗེའིའོ། །ཕྱག་རྒྱ་ཉིད་ཀྱིས་དབང་བསྐུར་བྱ། །དེ་ལ་སོགས་པའི་གོ་རིམས་བཞིན། །དཀྱིལ་འཁོར་བྲིས་ནས་དབང་བསྐུར་བས། །རྒྱལ་པོ་མ་ཡིན་རྒྱལ་པོར་འགྱུར། །རྒྱལ་པོ་ཡིན་ན་ཆེན་པོར་འགྱུར། །འཛམ་བུ་གླིང་དབང་དཔལ་དང་ལྡན། །གླིང་བཞི་པོ་ཡི་བདག་པོ་མཆོག །ལན་བཞིར་དབང་ནི་བསྐུར་བ་དང་། །ལན་བཞིར་རབ་ཏུ་ཞུགས་ན་ནི། །དེ་ལ་རྡོ་རྗེ་འཛིན་རྒྱལ་བདག །རང་གི་བུ་བཞིན་བསྲུང་བར་བྱ། །བདག་ཅག་རྒྱལ་ཆེན་བཞི་པོས་ཀྱང་། །འབངས་དང་འཁོར་དུ་བཅས་པ་དང་། །ཡུལ་འཁོར་ཕོ་བྲང་བཅས་པ་ཡི། །རྒྱལ་པོས་རྟག་ཏུ་བསྐྱང་བགྱི་སྟེ། །དེ་ཡི་མ་རུངས་པ་རྣམས་དང་། །དེ་ཡི་ཕ་རོལ་སྡེ་དང་ནང་། །འཆི་བདག་འཇིགས་པ་མུ་གེ་དང་། །ཡམས་དང་ཉེར་འཚེ་གཞོམ་པར་བགྱི། །ངལ་བསོ་པོས་ནི་རྒྱས་པར་བགྱིད། །ཡུལ་འཁོར་སྲུང་གིས་ཞི་བ་ཉིད། ། ཕྱུགས་དང་གཉེན་བཅས་དུས་མིན་པའི། །འཆི་བདག་ལུས་འཕགས་པོ་ཡིས་འཇོམས། །མིག་མི་བཟང་གིས་བདེ་བར་བྱེད། །མུ་གེ་ལ་སོགས་རྣམ་པར་འཇོམས། །མདོར་ན་བདག་གིས་དེ་ཡི་ནི། །རེ་བ་ཀུན་དང་བསམ་པ་ཀུན། །བགྱི་སྟེ་གལ་ཏེ་མ་ངེས་ན། །ཕྱག་ན་རྡོ་རྗེ་བསླུས་པ་ཡིན། །དེ་ནས་ཕྱོགས་སྐྱོང་བཅུས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་སླད་དུ་རང་རང་གི་སྙིང་པོ་རབ་ཏུ་དབུལ་ལོ། །འཇིག་རྟེན་སྐྱོང་བ་རྣམས་ལེགས་སོ་ལེགས་སོ། །དེ་ལེགས་པར་སྨྲོས་ཤིག །དེ་ནས་འབྱུང་པོའི་བདག་པོ་དབང་ལྡན་ལ་སོགས་པས་རང་རང་གི་སྙིང་པོ་རྣམས་ཕུལ་བ། ཨོྃ་ཨཱི། ཨོྃ་ཨིཾ། ཨོྃ་ཨ། ཨོྃ་ཡ། ཨོྃ་རྀ། ཨོྃ་བཾ། ཨོྃ་ཡཾ། ཨོྃ་ཀུ། ཨོྃཨཾ། ཨོྃ་བཱ། དེ་ནས་དེ་དག་གི་དཀྱིལ་འཁོར་བཤད་དེ།
དཀྱིལ་འཁོར་སྔ་མ་བཞིན་བྲིས་ལ། །མགོན་པོ་དབུས་སུ་དེ་བཞིན་གཞག །ཕྱོགས་སྐྱོང་རང་གི་ཕྱོགས་ཀྱི་ཆར། །གཞག་བྱ་སྤྱན་སྔར་རྣམ་པ་གཉིས། །ཉི་མ་དང་ནི་ཕག་གི་གཟུགས། །སྒོ་སྐྱོང་རྣམས་ཀྱང་དེ་བཞིན་ནོ། །དེ་ནས་དེ་ཀུན་སྤྱན་དྲངས་ལ། །མཆོད་པ་ཀུན་གྱིས་མཆོད་པར་བྱ། །དེ་ནས་རང་ཉིད་ཞུགས་ནས་ཀྱང་། །སློབ་མ་རྣམས་ནི་གཞུག་བྱ་ཞིང་། །ཕྱོགས་སྐྱོང་ལ་སོགས་སྔགས་བཟླས་པའི། །བུམ་པ་རྣམས་ཀྱིས་དབང་བསྐུར་རོ། །དེ་ནས་ཕན་པར་འདོད་པ་ཡིས། །སྒྲུབ་ཕྱིར་སྙིང་པོ་སྦྱིན་པར་བྱ། །ཕྱོགས་སྐྱོང་རང་གི་ཕྱོགས་གནས་རྣམས། །བརྟག་མི་དགོས་པར་འགྲུབ་པར་འགྱུར། །དེ་ནས་དེ་དག་མགུ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་སུ་ཞིག་རྒྱལ་པོ་རྒྱལ་རིགས་སྤྱི་བོར་དབང་བསྐུར་བས་དཀྱིལ་འཁོར་འདིར་ཞུགས་ཏེ་དབང་བསྐུར་བ་འཛིན་པ་དང་། གཞན་ཡང་རིགས་ཀྱི་བུའམ་རིགས་ཀྱི་བུ་མོ་དད་པ་དེ་དག་བཅོམ་ལྡན་འདས་བདག་ཅག་གིས་ཀུན་ནས་བསྲུང་བ་དང་། བསྐྱབ་པ་དང་། སྦ་བར་བགྱིའོ། །ཕ་རོལ་གྱི་སྡེ་རྣམས་གཞོམ་པར་བགྱིའོ། །དུས་དང་དུས་སུ་ཆར་དབབ་པར་བགྱིའོ། །འབྲུ་དང་། མེ་ཏོག་དང་། འབྲས་བུ་རྣམས་བསྐྱེད་པར་བགྱིའོ། །དེ་ནས་ཆོས་ཀྱི་རྒྱལ་པོ་གཤིན་རྗེས། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་ཆེན་པོ་དེའི་ཚེ་བསྲིང་བར་བགྱིའོ། །དུས་མ་ཡིན་པའི་འཆི་བ་བརྒྱད་པོ་སོ་སོར་དགག་པར་བགྱིའོ། །སྲིན་པོ་རྣམས་ཀྱི་བདག་པོ་ཆེན་པོ་བདེན་བྲལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་ཆེན་པོ་དེ་དང་། རྒྱལ་པོ་ཆེན་པོའི་བུ་དང་། བྲམ་ཟེའམ། རྗེ་རིགས་སམ། མི་གཞན་གང་ཡང་རུང་བ་དག་ལ་ནད་མེད་པ་དང་། ཡི་དགས་དང་། འདྲེས་འཇིགས་པ་མེད་པ་དང་། སྲིན་པོ་ལ་སོགས་པའི་འཇིགས་པ་མེད་པ་དང་། དུས་མ་ཡིན་པར་འཆི་བའི་འཇིགས་པ་མེད་པར་བགྱིའོ། །དུས་ཐམས་ཅད་དུ་བསྲུང་བ་དང་། བསྐྱབ་པ་དང་། སྦ་བར་བགྱིའོ། །དེ་ནས་ཀླུའི་རྒྱལ་པོ་ཆེན་པོ་ཆུ་བདག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དུས་ཐམས་ཅད་དུ་རྒྱལ་པོ་
དེ་དང་། ཡུལ་ཐམས་ཅད་ཀུན་ནས་སོ་སོར་བསྲུང་བར་བགྱིའོ། །ཀུན་དུ་བསྲུང་བར་བགྱིའོ། །འབྲུ་རྣམས་ཀྱང་བསྐྱེད་པར་བགྱིའོ། །ཀླུའི་ཉེས་པ་རྣམས་པ་མི་འབྱུང་བར་བགྱིའོ། །དུག་དང་ཐོག་ཀྱང་མི་འབྱུང་བར་བགྱིའོ། །མེ་ཏོག་དང་འབྲས་བུ་ཐམས་ཅད་ཀྱང་ཡོངས་སུ་རྫོགས་པར་བགྱིའོ། །འཇིགས་པ་ཐམས་ཅད་ཀྱང་སོ་སོར་དགག་པར་བགྱིའོ། །དེ་ནས་རླུང་གི་བདག་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་སེམས་ཅན་ཆེན་པོ་དེ་ལ་དུས་ཐམས་ཅད་དུ་རླུང་གི་འཇིགས་པ་མི་འབྱུང་བར་བགྱི། དུས་མ་ལགས་པའི་རླུང་མི་འབྱུང་བར་བགྱི། འབྲུ་དང་མེ་ཏོག་དང་འབྲས་བུ་ཐམས་ཅད་ཀྱང་ཡོངས་སུ་བསྐྱེད་པར་བགྱིའོ། །དེ་ནས་གནོད་སྦྱིན་གྱི་རྒྱལ་པོ་ཆེན་པོ་ལུས་ངན་པོས། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་གནོད་སྦྱིན་གྱི་སྡེ་དཔོན་ཆེན་པོ་བརྒྱད་ཅུ་དང་ལྷན་ཅིག་ཏུ་མཆིས་ཏེ། སྟོབས་དང་ལྡན་པས་སེམས་ཅན་ཆེན་པོ་དེ་ལ་དུས་ཐམས་ཅད་དུ་འཇིགས་པ་ཐམས་ཅད་སོ་སོར་དགག་པར་བགྱིའོ། །ནོར་དང་འབྲུ་ཐམས་ཅད་ལེགས་པར་འབྱོར་པར་བགྱིའོ། །རང་གི་སྐྱེ་བོ་དང་། ཡོངས་ཀྱི་སྐྱེ་བོ་དང་། ཡུལ་དང་། གནས་དང་། བྲན་དང་། སྣག་གི་གཉེན་དང་། གྲོགས་དང་། བུ་དང་། བུ་མོ་དང་། ཆུང་མ་ལ་སོགས་པ་ཡང་བསྲུང་བར་བགྱིའོ། །གླང་དང་། བ་དང་། བོང་བུ་དང་། རྔ་མོ་དང་། ལུག་དང་། མ་ཧེ་དང་། གླང་པོ་ཆེ་དང་། རྟ་དང་། ར་ལ་སོགས་པ་ཡང་བསྲུང་བར་བགྱིའོ། །དེ་ནས་འབྱུང་པོ་ཐམས་ཅད་ཀྱི་བདག་པོ་དབང་ལྡན་གྱིས་ཀྱང་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་དེ་དང་། རྒྱལ་པོའི་བུ་དང་། རྒྱལ་རིགས་དང་། བྲམ་ཟེ་རྣམས་འདི་དང་ཕ་རོལ་དུ་ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་། བཀྲ་ཤིས་པ་དང་། ཆད་པ་ཡོངས་སུ་སྤང་བ་དང་། དུག་གཞིལ་བ་དང་། དུག་གཞོམ་པ་དང་། མཚམས་བཅིང་བ་དང་། ས་གཞི་
བཅིང་བ་དང་། ཕྱོགས་བཅིང་བ་དང་། རྡོ་རྗེའི་ར་བ་དང་། རྡོ་རྗེའི་ཕུར་བུས་གདབ་པ་དང་། རྡོ་རྗེའི་གུར་ཡང་བགྱིའོ། །དགོས་པ་ཐམས་ཅད་ལ་ཉེ་བར་གནས་པར་བགྱིའོ། །བྱ་བ་དང་བྱ་བ་མ་ཡིན་པ་རྣམས་ཀྱི་མཚན་མ་ཉེ་བར་བསྟན་པར་བགྱིའོ། །དགེ་བ་དང་མི་དགེ་བ་མ་ཡིན་པ་ཐམས་ཅད་རྨི་ལམ་དུ་ཡང་བསྒོ་བར་བགྱིའོ། །བསྒྲུབ་པ་ཐམས་ཅད་ལ་བགེགས་མ་མཆིས་པར་དངོས་གྲུབ་ཐམས་ཅད་ཀྱང་སྩལ་བར་བགྱིའོ། །དེ་ནས་ཡང་ནམ་མཁའ་ལ་སྤྱོད་ཅིང་ནམ་མཁའ་ལ་འགྲོ་བའི་བདག་པོས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དུས་ཐམས་ཅད་དུ་རྒྱལ་པོ་དང་། རྒྱལ་པོའི་བུ་དང་། རྒྱལ་པོའི་བློན་པོ་དང་། བྲམ་ཟེའམ། རྒྱལ་རིགས་ལམ་ལ་གནས་པ་ཐམས་ཅད་ལ་བདག་ཉིད་འཁོར་ཐམས་ཅད་དང་བཅས་པ་མཆིས་ཏེ། བསྲུང་བ་དང་། བསྐྱབ་པ་དང་། སྦ་བ་ཀུན་ནས་བསྒྲུབ་པར་བགྱིའོ། །བགེགས་ཀྱི་གནས་ཐམས་ཅད་སོ་སོར་བཟློག་པར་བགྱིའོ། །ནད་ཐམས་ཅད་བསལ་བར་བགྱིའོ། །དུས་ཐམས་ཅད་དུ་ཕྱི་བཞིན་དུ་འབྲང་བར་བགྱིའོ། །དེ་ནས་སའི་འོག་གི་བདག་པོ་ཕག་ཆེན་པོས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་མིའི་བདག་པོ་དང་། རྗེ་རིགས་དང་། བྲམ་ཟེ་དང་། དམངས་རིགས་སམ། །གཞན་ཡང་རིགས་ཀྱི་བུ་དང་། །རིགས་ཀྱི་བུ་མོ་དང་པ་རྣམས་ཀྱི་དུས་ཐམས་ཅད་དུ་དོན་བསྒྲུབ་པར་བགྱིའོ། ། འཇིགས་པ་ཐམས་ཅད་ལས་ཀྱང་བསྲུང་བར་བགྱིའོ། །གཞན་ཡང་ཡོངས་སུ་བསྐྱབ་པར་བགྱིའོ། །དེ་ནས་གཟའ་ཆེན་པོ་བརྒྱད་འཁོར་རྒྱུ་སྐར་དང་བཅས་པ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་འཁོར་དང་བཅས་པ་རྣམས་ཀྱིས་ཀྱང་རང་རང་གི་སྙིང་པོ་རྣམས་འབུལ་བར་འཚལ་ན་དེ་ལ་བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། ལེགས་སོ་ལེགས་སོ། །ངས་བྱིན་གྱིས་བརླབས་ཀྱིས་གཟའ་ཆེན་པོ་རྣམས་ཤོད་ཅིག །དེ་ནས་ཉི་མ་ལ་སོགས་པའི་གཟའ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་སྨྲས་པ།
ཨོྃ་ཨཱ། ཨོྃ་སོ། ཨོྃ་ཨཾ། ཨོྃ་བུ། ཨོྃ་བྲྀ། ཨོྃ་ཤུ། ཨོྃ་ས། ཨོྃ་རཱ། དེ་ནས་དེ་དག་གི་དཀྱིལ་འཁོར་འབྱུང་སྟེ། དབུས་སུ་བཅོམ་ལྡན་འདས་ཕྱག་ན་རྡོ་རྗེ་ཉིད་འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་སུ་བྲིའོ། །མཐའ་རྣམས་སུ་ནི་རྒྱ་མཚོ་ཆེན་པོ་བཞི་བྲིའོ། །དེ་ཡི་མདུན་དུ་པ་བ་སངས། །ཟླ་བ་རྒྱབ་ཏུ་བྲི་བར་བྱ། །གཡས་སུ་ཕུར་བུ་བྲི་བྱ་ཞིང་། །གཡོན་དུ་ལྷག་པ་བྲི་བར་བྱ། །མེ་ཡི་གནས་སུ་མིག་དམར་ཉིད། །རླུང་གི་ཕྱོགས་སུ་ཉི་མ་སྟེ། །དབང་ལྡན་དུ་ནི་སྤེན་པ་ཉིད། །སྲིན་པོའི་ཕྱོགས་སུ་སྒྲ་གཅན་བྲི། ། དཀྱིལ་འཁོར་ཕྱི་རོལ་ཁོར་ཡུག་ཏུ། །རྒྱུ་སྐར་ཐམས་ཅད་བྲི་བར་བྱ། །སྒོ་སྒོར་དེ་བཞིན་སྒོ་བ་རྣམས། །ཁྲོས་པའི་ཡིད་དུ་བྲི་བར་བྱ། །རྡོ་རྗེ་འཛིན་པས་འཇུག་བྱ་སྟེ། །རྡོ་རྗེ་ལྕགས་ཀྱུ་ལ་སོགས་པས། །ཐམས་ཅད་ཀྱང་ནི་སྤྱན་དྲང་ངོ་། །དེ་ནས་སློབ་མ་རྣམས་གཞུག་སྟེ། ། ཨོྃ་བཛྲ་ཧ་ན་ཧཱུྃ་ཕཊ། ཨོྃ་བཛྲ་གྲ་ཧེ་ས་མ་ཡེ་ཧཱུྃ། ཨོྃ་བཛྲ་གྲ་ཧ་པྲ་ཏཱིཙྪ་ཧཱུྃ། དེ་ནས་གཟའ་བརྒྱད་སྔགས་ནི་སྔགས་པ་ཡིས། བུམ་པ་བརྒྱད་པོ་རྣམས་ཀྱིས་དབང་བསྐུར་རོ། །དེ་ནས་རྡོ་རྗེ་ཕྱག་རྒྱས་དབང་བསྐུར་ཏེ། དེ་ནས་གཟའ་རྣམས་ཐམས་ཅད་བསྒྲུབ་པར་བྱའོ། །དེ་ནས་གཟའ་ཆེན་པོ་དག་གིས། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གཟའ་ཆེན་པོ་བརྒྱད་ཀྱིས་རྒྱལ་པོ་ཆེན་པོ་དེ་དང་། རྒྱལ་པོའི་བུ་ལ་ཀུན་དུ་དུས་ཐམས་ཅད་དུ་དེ་ཁོ་ན་བཞིན་དུ་ཐམས་ཅད་བགྱིའོ། །དེ་ནས་རྒྱུ་སྐར་དང་། སྐད་ཅིག་དང་། ཐང་ཅིག་དང་། ཡུད་ཙམ་རྣམས་སོ། །ཚེས་དང་། སྦྱོར་བ་དང་། ཁྱིམ་དང་། དུས་སྦྱོར་དང་། འཇུག་ཕོད་ལ་སོགས་པའི་དཀྱིལ་འཁོར་གྱི་ལྷ་རྣམས་ཀྱིས་དེ་བཞིན་དུ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་དུས་ཐམས་ཅད་དུ་སེམས་ཅན་ཆེན་པོའི་བཀའ་མི་བཅག་ཅིང་དཔོན་པོ་བཞིན་དུ་བསྐྱང་བར་བགྱིའོ། །གྲོང་ཁྱེར་དང་། གྲོང་རྡལ་དང་།ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་གི་གནས་ཐམས་ཅད་སོ་སོར་བསྐྱབ་པར་བགྱིའོ། །འཇིགས་པ་ཆེན་པོ་འབྱུང་བའི་
ཚེ་ན་ཡང་དེས་བདག་ཅག་མཆོད་ན་གདོན་མི་འཚལ་བར་འཇིགས་པ་དེ་མི་འབྱུང་ངོ་། །དེ་ནས་ཀླུ་ཆེན་པོ་བརྒྱད་ཀྱིས་ཕུད་ཅེས་བྱ་བའི་སྒྲས་བཅོམ་ལྡན་འདས་མཉེས་པར་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་གསང་བའི་སྙིང་པོ་རྣམས་འབུལ་ལོ། །ཀླུ་ཆེན་པོ་རྣམས་ལེགས་སོ་ལེགས་སོ། །གསང་བའི་སྙིང་པོ་རྣམས་ཕུལ་ཅིག །དེ་ནས་དེ་དག་མགུ་ནས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །ཨོྃ་ཕུཿ། ཨོྃ་ཕུཿ། ཨོྃ་ཕྃ། ཨོྃ་ཕུཿ། ཨོྃ་ཕཱི། ཨོྃ་ཕཻ། ཨོྃ་ཕོ། ཨོྃ་ཕཽ། ། དེ་ནས་དེ་དག་གི་དཀྱིལ་འཁོར་བཤད་དེ། པདྨ་ཆེན་པོ་འདབ་བརྒྱད་པ། །ཁ་དོག་དཀར་པོ་ལེགས་པར་བྲི། །དཀྱིལ་འཁོར་དེ་ཡི་དབུས་བཞུགས་པ། །ཕྱག་ན་རྡོ་རྗེ་རབ་ཏུ་ནག །སྦྲུལ་མགོ་མཐའ་ཡས་གདེངས་ཀ་བདུན། །ལྟོས་འགྲོ་ཆེན་པོ་སྡིགས་པ་བྲི། །མཐའ་ཡས་འཇོག་པ་དེ་བཞིན་དུ། །སྟོབས་ཀྱི་རྒྱུ་དང་རིགས་ལྡན་དང་། །ནོར་རྒྱས་བུ་དང་དུང་སྐྱོང་དང་། །པདྨ་ཆུ་བདག་དེ་བཞིན་དུ། །མདོར་ན་འདབ་མ་རེ་རེ་ལ། །དེ་དག་སྦྲུལ་མགོ་འབར་བ་བྲི། །སྦྲུལ་མགོ་བདུན་བདུན་ཆུང་མ་ཡི། །མགུལ་ནས་འཁྱུད་དང་བཅས་པ་བྲི། །བུམ་པ་བརྒྱད་རྣམས་གཞག་བྱ་སྟེ། །གཏོར་མ་ལྷ་བཤོས་མཛེས་པ་དང་། །མར་དང་འོ་མ་སྦྲང་རྩིར་བཅས། །བཅོས་པའི་དབྱེ་བ་རྣམས་ཀྱང་ངོ་། །རྡོ་རྗེའི་བདག་ཉིད་བཞུགས་པ་ནི། །སྦྲུལ་མགོས་སྦྲུལ་མགོ་ཅན་རྣམས་དགུག །ཕུད་ཅེས་བྱ་བ་ལྷན་ཅིག་སྟེ། །ཛཿཧཱུྃ་བྃ་ཧོཿཞེས་བརྗོད་དོ། ། དེ་ནས་རྒྱལ་པོའམ་རྒྱལ་རིགས་ནི། །དེ་དག་ཐམས་ཅད་བཅུག་ནས་སུ། །དུག་གི་ཉེས་སྐྱོན་བསལ་བའི་ཕྱིར། །ཕུད་ཅེས་བྱ་བས་དབང་བསྐུར་རོ། །དེ་ནས་མིང་ཙམ་བཟུང་བས་ཀྱང་། །ཀླུ་རྣམས་དེ་དག་ཐམས་ཅད་འགྲུབ། །དེ་ནས་དེ་དག་ཀུན་མགུ་ནས། །བཅོམ་ལྡན་འདས་ལ་ཕྱག་འཚལ་ཏེ། །སྤྱན་སྔར་ཐལ་མོ་སྦྱར་འཁོད་ནས། །སྨོན་ལམ་རབ་ཏུ་འདེབས་པར་འགྱུར། །བཅོམ་ལྡན་འདས་བདག་ཅག་གིས་བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བ་གང་དག་དཀྱིལ་འཁོར་འདིར་ཞུགས་པ་དེ་དག་བསླུས་པར་གྱུར་ན་དེའི་ཚེ་བཅོམ་ལྡན་འདས་འདི་ཉིད་
ལ་བསླུས་པར་གྱུར་ཅིག །དེའི་ཚེ་བདག་བྱེ་ཚན་གྱིས་སྲེགས་པར་གྱུར་ཅིག །རྡོ་རྗེ་ཀུན་དུ་འབར་བས་བདག་ཅག་གི་མགོ་འགེམས་པར་གྱུར་ཅིག །རྟག་པར་དུས་ཐམས་ཅད་དུ་སེམས་ཅན་ཆེན་པོ་དེ་བསྲུང་བ་དང་། བསྐྱབ་པ་དང་། སྦ་བར་བགྱིའོ། །གཟི་བྱིན་ཆེན་པོ་དང་། སྟོབས་དང་། བརྩོན་འགྲུས་བསྐྱེད་པར་བགྱིའོ། །དེའི་དུག་རྣམས་དུག་མ་མཆིས་པར་བགྱིའོ། །དུས་དང་དུས་སུ་ཆར་དབབ་པར་བགྱིའོ། །མེ་ཏོག་ཐམས་ཅད་ཡོངས་སུ་རྫོགས་པར་བགྱིའོ། །ཕ་རོལ་གྱི་གཡུལ་ཐམས་ཅད་ལ་དུས་དང་དུས་མ་ཡིན་པའི་ཆར་དབབ་པར་བགྱིའོ། །འཇིག་རྟེན་པ་ཐམས་ཅད་བསྐྱེད་པར་བགྱིའོ། །རྒྱལ་བའི་བཀའ་དང་རྡོ་རྗེ་འཛིན་པའི་བཀའ་རབ་ཏུ་བསྒྲུབ་པར་བགྱིའོ། །དེ་ནས་སྒྲུབ་པ་བཤད་དེ། ལྷ་རྫས་འོད་འཕྲོ་དཀར་པོ་ཅན། །ཀླུ་རྣམས་འདུད་པས་གནས་པ་ཡི། །རྡོ་རྗེ་འཛིན་གཙོ་བསམས་ནས་ནི། །ཕུད་ཅེས་བྱ་བ་འབུམ་དུ་བཟླས། །དེ་ནས་དུག་གིས་ཟིན་པ་ལ། །ཕུད་ཅེས་བྱ་བའི་དཀྱིལ་འཁོར་ནི། །ལྷ་རྫས་འོད་ཟེར་ཕྲེང་བ་འཁྲིགས། །བསམས་ནས་དེ་ལ་ཕུད་ཡིག་བསམ། །ལག་པ་སྦྲུལ་མགོ་ཞགས་འདྲ་དང་། །ཕུད་ཀྱི་རླུང་གིས་པགས་པ་ཤ། །རུས་གནས་ཕུད་ཀྱི་རྣམ་པའི་དུག །མཐའ་དག་དྲངས་ཏེ་གསོ་བར་བྱ། །དེ་ནས་ལས་རྣམས་ཀུན་བྱེད་ཅིང་། །དུག་རིམས་དུག་སྦྱར་ལ་སོགས་པ། །ཁུ་ཚུར་གྱིས་ཀྱང་ཀུན་སེལ་ན། །སྦྲུལ་མགོའི་ཕྱག་རྒྱས་སྨོས་ཅི་དགོས། །དེ་ནས་ལྟོ་འཕྱེ་ཆེན་པོའི་བདག་པོ་འཇིགས་བྱེད་ཆེན་པོའི་མ་མོ་ཆེན་མོ་བརྒྱད་ཀྱིས་བསྐོར་བས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་འཇིགས་པ་དང་མ་མོ་རྣམས་ཀྱིས་འཇིགས་པས་ལྷ་དང་ཀླུ་ལ་སོགས་པ་ཀུན་དུ་སྐྲག་རྣམ་པར་སྐྲག་སྟེ་ཁ་བུབ་ཏུ་འགྱེལ་ནས་གོས་དང་བྲལ་ཏེ་སེམས་སྟོར་ནས་ཀུན་དུ་འཕྱན་པ་དག་ལ་ཕན་གདགས་པའི་སླད་དུ་བདག་ཅག་གི་སྙིང་པོ་འབུལ་བར་འཚལ་གྱིས་བཅོམ་ལྡན་འདས་ཀྱིས་དེ་ལེགས་པར་བྱིན་གྱིས་བརླབ་ཏུ་གསོལ། འཇིགས་བྱེད་ཆེན་པོ་ལེགས་སོ་ལེགས་སོ། །རབ་ཏུ་འཇིགས་པར་བྱེད་
པས་རང་ཉིད་དང་ལྷའི་བུ་མོ་ཐམས་ཅད་ཀྱི་སྙིང་པོ་རྣམས་ཤོད་ཅིག །དེ་ནས་འཇིགས་བྱེད་ཆེན་པོས་འཇིགས་པར་བྱེད་པའི་སྒྲ་ཕྱུང་ནས་འདི་སྐད་ཅེས་གསོལ་ཏོ། །ཨོྃ་བྷཻ་ར་བ་བྷཻ་ར་སྭཱ་ཧཱ། ཨོྃ་བྷ་སྭཱ་ཧཱ། ཨོྃ་བྷི་སྭཱ་ཧཱ། ཨོྃ་བྷུ་སྭཱ་ཧཱ། ཨོྃ་བྷེ་སྭཱ་ཧཱ། ཨོྃ་བྷཻ་སྭཱ་ཧཱ། ཨོྃ་བྷཽ་སྭཱ་ཧཱ།ཨོྃ །ཨོྃ་བྷཱྃ་སྭཱ་ཧཱ། ཨོྃ་བྷཿསྭཱ་ཧཱ། །བཅོམ་ལྡན་འཇིགས་བྱེད་ཆེན་པོ་ནི། །བརྒྱད་པོ་དེ་དག་གདམས་ངག་ཉན། །དེ་ནས་དེ་དག་དཀྱིལ་འཁོར་བཤད། །འཁོར་ལོ་ཆེན་པོ་རྩིབས་བརྒྱད་བྲི། །དབུས་སུ་ཕྱག་ན་རྡོ་རྗེ་ནི། །ཁྲོ་བོ་ཆེན་པོ་འཇིག་རྟེན་གསུམ། །རྣམ་པར་རྒྱལ་བ་ཞེས་བྱ་གཞག །དེ་ཡི་ཞབས་འོག་མ་རུངས་པ། །འཇིགས་བྱེད་རྣམས་ཀྱི་བདག་པོ་ཆེ། །འཇིགས་བྱེད་མ་དང་བཅས་པ་བྲི། །རྩིབས་ཀྱི་ནང་རྣམས་ཐམས་ཅད་དུ། །གཞན་ཡང་འཇིགས་བྱེད་བརྒྱད་པོ་ནི། །མ་མོ་རྣམས་དང་ལྡན་པ་ནི། །ཁྲོས་པའི་བཞིན་དང་ཡིད་ཁྲོས་པར། ། ཅི་བདེ་བར་ནི་བྲི་བར་བྱ། །འདིར་ནི་སྒོ་སྒོར་དེ་བཞིན་དུ། །སྒོ་བ་ཤིན་ཏུ་ཁྲོས་ལྡན་བྲི། །དེ་ནས་ལྕགས་ཀྱུ་ལ་སོགས་པས། །བཀུག་སྟེ་མགོ་བོའི་ཐོད་པ་ནི། །ཁྲག་གིས་གང་བས་མཆོད་ནས་སུ། །ཤ་ཆང་གཏོར་མ་བཟང་པོ་དང་། །སྣོད་རྣམས་ཁྲག་གིས་བཀང་བ་དང་། ། མགོ་ཐོད་མགོ་ཡི་དུམ་བུ་དང་། །ཁྲག་གམ་ཆང་བཀང་བུམ་པ་བརྒྱད། །དཀྱིལ་འཁོར་འདིར་ནི་གཞག་པར་བྱ། །དེ་ནས་འཇིག་རྟེན་གསུམ་རྣམ་རྒྱལ། །མཆོག་གིས་སློབ་མ་རྣམ་གཞུག་བྱ། །ཐོད་པ་དང་ནི་བུམ་པ་ཡང་། །བརྒྱད་པོ་རྣམས་ཀྱིས་དབང་བསྐུར་རོ། །དེ་ནས་ལས་རྣམས་སྦྱིན་པར་བྱ། །མ་མོའི་ཁྱིམ་མམ་མཚན་གཅིག་པར། །འཇིག་རྟེན་གསུམ་ནི་འདུལ་བའི་མཆོག །ཚུལ་བཞིན་དུ་ནི་མཆོད་བྱས་ནས། །འབུམ་ཕྲག་བཞིར་ནི་བཟླས་པར་བྱ། །དེ་ནས་འཇིགས་པར་བྱེད་པའི་སྒྲས། །བདག་ཉིད་ཆེན་པོས་ཐོས་གྱུར་ཏེ། །མི་འཇིགས་པ་ནི་ཐོད་པ་རུ། །ཁྲག་མཆོག་བཀང་བའི་ཨརྒྷ་དབུལ། །དེ་ནས་ཁྲོ་བོ་འཇིགས་བྱེད་པ། །མ་རུངས་ཡིད་ཅན་མ་མོ་ནི། །ཚོགས་ཀྱིས་བསྐོར་ཅིང་འཇིགས་བྱེད་ནི། །བརྒྱད་ཀྱིས་བསྐོར་བ་མཐོང་བར་འགྱུར། །དེ་མཐོང་འཇིགས་པ་མེད་བྱས་ལ། །ཧཱུྃ་ཞེས་བྱ་བ་
དྲན་བྱེད་ཅིང་། །ཤའམ་ཡང་ན་ཆང་མཆོག་གིས། །ཐོད་པ་བཀང་སྟེ་དབུལ་བར་བྱ། །དེ་ནས་འཇིགས་བྱེད་མ་རུངས་འཇོམས། །མགུ་ཞིང་རབ་ཏུ་འགྲུབ་གྱུར་ནས། །ཅི་འདོད་སྨྲོས་ཤིག་ཅེས་བྱ་བ། །མགུ་བའི་ཡིད་ཀྱིས་དེ་སྦྱིན་བྱེད། །ས་རྣམས་སྦྱིན་པ་མ་གཏོགས་པར། །རོ་དང་བཅུད་ལེན་རྫས་དང་ནི། །རལ་གྲི་འཁོར་ལོ་རྩེ་གསུམ་དང་། །མཐོ་རིས་ས་སྟེངས་ས་འོག་དང་། །གླིང་དང་གླིང་བཞིའི་རྒྱལ་སྲིད་དང་། །བརྒྱ་བྱིན་ཉིད་དང་གནོད་སྦྱིན་དབང། །སྲིན་པོ་ཉིད་དང་རིག་འཛིན་ཉིད། །རིག་འཛིན་འཁོར་ལོས་སྒྱུར་བ་ཉིད། །འཇིག་རྟེན་གསུམ་གྱི་བདག་པོ་ཉིད། །བཀའ་ཉན་ཉིད་ཀྱང་རང་ཉིད་དམ། །མ་མོའི་ཚོགས་རྣམས་སྟེར་བར་འགྱུར། །དངོས་གྲུབ་གང་ཡང་རུང་བ་ནི། །ཇི་ལྟར་འདོད་པ་བླང་བར་བྱ། །ཧཱུྃ་གི་རྣམ་པར་མངོན་ཕྱོགས་ཤིང་། །བྱིན་ནས་དགོད་ཅིང་འགྲོ་བར་བྱེད། །སྐྲག་ན་དེ་མ་ཐག་ཏུ་གསོད། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་བཅོམ་ལྡན་འདས་ཀྱིས་བཀའ་གནང་ན་རང་གི་རྟོགས་པ་བཤད་པར་འཚལ་གྱིས། དེ་ནས་བཅོམ་ལྡན་འདས་ཀྱིས་ཐུགས་བརྩེ་བར་དགོངས་ཏེ་བྱིན་གྱིས་བརླབ་པར་གསོལ། དེ་ནས་ཚངས་པ་ལ་སོགས་པ་ལྷ་རྣམས་ཀྱིས་རང་རང་གི་སྙིང་པོ་རྣམས་བཤད་དོ། །ཨོྃ་ཨཱྃ། ཨོྃ་བི། ཨོྃ་རུ། ཨོྃ་ཨི། ཨོྃ་ཀྃ། ཨོྃ་ག ཨོྃ་བྲྀ། ཨོྃ་ཀ །དེ་ནས་དེ་དག་གི་དཀྱིལ་འཁོར་བཤད་དེ། དཀྱིལ་འཁོར་སྔ་མ་བཞིན་བྲིས་ལ། །དབུས་སུ་འཇིག་རྟེན་གསུམ་འདུལ་བ། །དེ་ཡི་མདུན་དུ་དཔའ་བོ་ནི། །དབང་ཕྱུག་ལག་ན་རྩེ་གསུམ་བྲི། །རྒྱབ་ཏུ་ཚངས་པའི་རྣམ་པར་བྲི། །གཡོན་དུ་ལག་ན་འཁོར་ལོ་ཅན། །གཡས་ན་དབང་པོ་རང་ཉིད་ཀྱི། ། ཕྱག་རྒྱའི་མཚན་མ་ལག་ཐོགས་བྲི། །སྒོ་སྐྱོང་རང་བཞིན་འདིར་དེ་རྣམས། །ཆུང་མ་རང་གི་དཀྱིལ་འཁོར་དུ། །བུམ་པ་བུམ་པ་བཀང་བ་ཡང་། །ཕྱི་རོལ་དཀྱིལ་འཁོར་དུ་ནི་གཞག །སྟོབས་བཟང་ལ་སོགས་མཐུ་ཆེན་ཡང་། །དེ་ནས་འཇུག་བྱ་ལྷ་རྣམས་ཡིན། །མཁས་
པས་ཀུན་ནས་སྤྱན་དྲང་ཞིང་། །ཛཿཧཱུྃ་བྃ་ཧོས་ལྷ་ཐམས་ཅད། །ཕོ་བྲང་དམ་པར་འཇུག་པར་མཛོད། །དེ་ནས་དེ་རྣམས་གཤེགས་བལྟས་ནས། །དགའ་བ་ཆེན་པོ་མཆོད་པར་བྱ། །དེ་ནས་རྡོ་རྗེ་འཛིན་པ་ཡིས། །ཕྱག་རྒྱ་སློབ་མ་རྣམས་གཞུག་སྟེ། ཨོྃ་པྲ་ཏཱིཙྪ་དྷཱྃ་མ་ཧཱ་ས་ཏྭྃ་བཛྲ་དྷ་རཱ་ཛྙཱ་པ་ཡ་ཧཱུྃ་ཧ་ཧ་ཧ་ཧ་ཧོ། མེ་ཏོག་ཇི་ལྟ་བཞིན་དུ་དོར། །མིག་ཕྱེ་ནས་ནི་བསྟན་པར་བྱ། །དེ་ནས་མངོན་པར་བསྔགས་པ་ཡི། །བུམ་པའི་ཆུ་ཡིས་དབང་བསྐུར་རོ། །དེ་ནས་ལྷ་རྣམས་གང་འདོད་པའི། །དངོས་གྲུབ་རབ་ཏུ་སྦྱིན་པར་བྱ། །འབུམ་ཕྲག་གཅིག་གམ་འབུམ་ཕྲག་གཉིས། །སྔོན་དུ་བསྙེན་པ་བྱས་ནས་ནི། །དབང་ཕྱུག་ལ་སོགས་ལྷ་མཆོག་ནི། །དེ་རྣམས་སྒྲུབ་པ་པོ་ཡིས་འགྲུབ། །མཚན་མ་གཅིག་པ་ལ་སོགས་སུའམ། །ཡང་ན་ཕྱག་ན་རྡོ་རྗེའི་གནས། །དེ་བཞིན་གཤེགས་པའི་ཕོ་བྲང་ངམ། །རིང་བསྲེལ་ལྡན་པའི་མཆོད་རྟེན་དུ། ། ལྷ་རྣམས་ཐམས་ཅད་ཆོ་ག་བཞིན། །སྒྲུབ་པ་པོ་ཡིས་རྟག་ཏུ་བསྒྲུབ། །དེ་ནས་ནམ་ཕྱེད་ན་ནི་ལྷ། །འོངས་ནས་ཁྱོད་ཀྱི་འདོད་པ་ཅི། །ཇི་ལྟར་བདེ་ཞིང་ཕན་པ་ནི། །སྦྱིན་ཞེས་ངེས་པར་གོ་བར་བྱེད། །བཟང་པོ་མྱུར་དུ་སོམས་ཏེ་སྨྲོས། །གང་ཕྱིར་མཆོག་ནི་ཁྱོད་ལ་སྦྱིན། །དེ་ནས་སྔགས་ཤེས་དངོས་གྲུབ་དང་། །མཆོག་གི་ལྷ་ལ་གསོལ་བ་གདབ། །ལྷ་རྫས་བཅུད་དང་བཅུད་ལེན་དང་། །མི་སྣང་བ་དང་མཁའ་འགྲོ་དང་། །རིལ་བུ་རྒྱལ་སྲིད་རྫས་ལ་སོགས། །ཡིད་འདོད་ཚད་མེད་གསོལ་བ་གདབ། །དེ་ནས་དབང་ཕྱུག་ཆེན་པོ་ལ་སོགས་པས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་དུ་ཞུགས་པ་བདེ་དག་གིས་བཅོམ་ལྡན་འདས་བདག་ཅག་ལྷ་རྣམས་ཀྱི་སྒྲིབ་པ་ཐམས་ཅད་རྣམ་པར་སྦྱང་ངོ་། །མཐོ་རིས་ཀྱི་ལམ་བསྟན་པར་བགྱིའོ། །བདེ་འགྲོའི་ལམ་བསྟན་པར་བགྱིའོ། །དམ་པའི་ཆོས་ཀྱི་ལམ་བསྟན་པར་བགྱིའོ། །སྒྲིབ་པ་མ་མཆིས་པའི་ལམ་བསྟན་པར་བགྱིའོ། །རྣམ་པར་འབྱེད་པའི་ལམ་བསྟན་པར་བགྱིའོ། །ངེས་པར་འབྱུང་བའི་ལམ་བསྟན་པར་བགྱིའོ། །མྱ་ངན་འདས་པའི་ལམ་བསྟན་པར་
བགྱིའོ། །སྤོང་བའི་ལམ་བསྟན་པར་བགྱིའོ། །ཉོན་མོངས་པ་མེད་པའི་ལམ་བསྟན་པར་བགྱིའོ། །སངས་རྒྱས་ཉིད་དུ་འགྲུབ་པའི་ལམ་བསྟན་པར་བགྱིའོ། །བྱང་ཆུབ་སེམས་དཔའ་ཉིད་དུ་འགྲུབ་པའི་ལམ་བསྟན་པར་བགྱིའོ། །རྡོ་རྗེ་འཛིན་པ་ཉིད་དུ་འགྲུབ་པའི་ལམ་བསྟན་པར་བགྱིའོ། །དུས་ཐམས་ཅད་དུ་འཇིགས་པ་ཐམས་ཅད་ལས་བསྲུང་བ་དང་བསྐྱབ་པ་དང་སྦ་བར་བགྱིའོ། །གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་བསྲུང་བར་བགྱིའོ། །ཡུལ་དང་ཕྱོགས་དང་གྲོང་འཁོར་རྣམས་ཀྱང་བསྲུང་བར་བགྱིའོ། །རྒྱལ་པོ་ཡང་སྩལ་བར་བགྱིའོ། །རྒྱལ་པོ་ཐོབ་པའི་རྒྱལ་པོ་ཆེ་བར་བགྱིའོ། གླིང་གཅིག་དང་གླིང་གཉིས་དང་གླིང་གསུམ་དང་། གླིང་བཞི་པ་དང་། བདེ་འགྲོ་དང་། ས་སྟེངས་དང་། ས་འོག་གི་འཁོར་ལོས་སྒྱུར་བའི་རྒྱལ་པོ་རྣམས་སྩལ་བར་བགྱིའོ། །མདོར་ན་བརྒྱ་བྱིན་ཉིད་དང་། ཚངས་པ་ཉིད་དང་། ཁྱབ་འཇུག་ཉིད་དང་། དབང་ཕྱུག་ཆེན་པོ་ཉིད་ཀྱང་སྩལ་བར་བགྱིའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་ཉིད་ཀྱི་དཀྱིལ་འཁོར་ལ་གཟིགས་ནས་འཛུམ་པ་མཛད་དོ། ། དེ་ནས་འཁོར་གྱི་དཀྱིལ་འཁོར་དེ་དག་གཡོས། རབ་ཏུ་གཡོས་ཡང་དག་པར་རབ་ཏུ་གཡོས། འགུལ་རབ་ཏུ་འགུལ། ཡང་དག་པར་རབ་ཏུ་འགུལ། འབར་རབ་ཏུ་འབར། ཡང་དག་པར་རབ་ཏུ་འབར། དགའ་རབ་ཏུ་དགའ། ཡང་དག་པར་རབ་ཏུ་དགའ། རྩེ་རབ་ཏུ་རྩེ། ཡང་དག་པར་རབ་ཏུ་རྩེ་ཞིང་ངོ་མཚར་རྨད་དུ་བྱུང་བ་དུ་མ་ཡང་འཇིག་རྟེན་དུ་ཡང་དག་པར་རབ་ཏུ་མཐོང་ངོ་། །དེ་ནས་ཚངས་པ་ལ་སོགས་པའི་ལྷ་རྣམས་ཤིན་ཏུ་ཡ་མཚན་སྐྱེས་ནས། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཛུམ་པ་མཛད་པ་འདིའི་རྒྱུ་གང་ལགས། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་རྣམས་ནི་རྒྱུ་མ་མཆིས་པར་འཛུམ་པ་མི་མཛད་དོ། །བཅོམ་ལྡན་འདས་དེའི་ཕྱིར་འཛུམ་པ་མཛད་པའི་རྒྱུ་ལུང་བསྟན་དུ་གསོལ། དེ་ནས་བཅོམ་ལྡན་འདས་ཕྱག་ན་རྡོ་རྗེས་ལྷ་རྣམས་ཀྱིས་གསོལ་བའི་ཚིག་
གསན་ནས་འདི་སྐད་ཅེས་བཀའ་སྩལ་ཏོ། །ཚངས་པ་ལ་སོགས་པ་ལྷ་རྣམས་གང་སྔོན་སངས་རྒྱས་ཐམས་ཅད་ཀྱིས་བཤད་པ་འཆི་བདག་གཞི་བར་བྱེད་པའི་རིག་པ་དང་། དུས་མ་ཡིན་པར་འཆི་བ་འཇོམས་པར་བྱེད་པའི་རིག་པའི་སྔགས་གཟི་བརྗིད་ཆེན་པོ་ཉོན་ཅིག །དེ་ནས་བཅོམ་ལྡན་འདས་ཕྱག་ན་རྡོ་རྗེ་ལ་ཚངས་པ་ལ་སོགས་པའི་ལྷ་རྣམས་ཀུན་དུ་དགའ་ཞིང་བ་སྤུ་ལངས་ཤིང་ཕྱག་བཙལ་ནས་ལེགས་སོ་ཞེས་བྱ་བ་རབ་ཏུ་ཕུལ་ཏེ། བཅོམ་ལྡན་འདས་ལེགས་སོ་ལེགས་སོ། །རྡོ་རྗེ་འཛིན་པ་ལེགས་སོ་ལེགས་སོ། །གང་གིས་ཚེ་ཐུང་བའི་སེམས་ཅན་རྣམས་ཚེ་རིང་བར་འགྱུར་བ་དང་། དུས་མ་ཡིན་པའི་འཆི་བདག་གིས་ཟིན་པ་རྣམས་དུས་མ་ཡིན་པར་འཆི་བ་ལས་རྣམ་པར་གྲོལ་བ་དང་། ངན་སོང་དུ་སྐྱེས་པའི་སེམས་ཅན་རྣམས་ངན་སོང་ལས་ཇི་ལྟར་གྲོལ་བ་དང་། འཁོར་བའི་འཇིགས་པས་སྐྲག་པའི་སེམས་ཅན་རྣམས་བདེ་བའི་ཐབས་ཀྱིས་འཁོར་བ་ལ་རྒྱབ་ཀྱིས་ཕྱོགས་པར་འགྱུར་ཞིང་མྱུར་བ་ཉིད་དུ་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་གཟི་བརྗིད་ཆེ་ཞིང་སྟོབས་ཆེ་བ་ཕ་རོལ་གནོན་པའི་རིག་པ་བཤད་དུ་གསོལ། དེ་ནས་བཅོམ་ལྡན་འདས་ཕྱག་ན་རྡོ་རྗེས་ཚངས་པ་ལ་སོགས་པ་ལྷ་རྣམས་ཀྱིས་གསོལ་བ་འདེབས་པའི་ཚིག་གསན་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རིག་པ་འདི་རང་གི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོྃ་པུ་ཎྱེ་པུ་ཎྱེ་མ་ཧཱ་པུ་ཎྱེ་ཨ་བ་རི་མི་ཧཱ་ཡུཿཔུ་ཎྱེ་ཛྙཱ་ན་སཾ་བྷཱ་རོ་པ་ཙི་ཏེ་སྭཱ་ཧཱ། སྙིང་པོའི་རིག་པའོ། །ཨོྃ་བཛྲིཾ་སྭཱ་ཧཱ། ཉེ་བའི་སྙིང་པོའི་རིག་པའོ། །ཨོྃ་བྷྲཱུྃ་སྭཱ་ཧཱ། སྙིང་པོའི་ཉེ་བའི་སྙིང་པོའི་རིག་པའོ། །ཨོྃ་ཀྲཱྃ་སྭཱ་ཧཱ། སྙིང་པོ་ཡང་དག་པར་བསྐུལ་བའི་རིག་པའོ། །ཏྲཱྃ་སྭཱ་ཧཱ། སྙིང་པོ་དམ་པའོ། །ཨོྃ་ཧྲཱིཿསྭཱ་ཧཱ། གསང་བའི་སྙིང་བོའོ། །དེ་ནས་དེ་དག་གི་དཀྱིལ་འཁོར་བཤད་དེ། །དཀྱིལ་འཁོར་རྩིབས་བཞི་པར་བྱས་ལ་དེའི་དབུས་སུ་དེ་བཞིན་གཤེགས་པ་ཚེ་དང་བསོད་ནམས་དང་། ཡེ་ཤེས་ཀྱི་ཚོགས་དཔག་ཏུ་མེད་པ་གཟི་བརྗིད་ཀྱི་རྒྱལ་པོ་ཞེས་བྱ་བ་བཞག་སྟེ། བྷྲཱུྃ་ཞེས་བྱ་བའི་སྙིང་པོའོ། །དེའི་སྤྱན་སྔར་ཕྱག་ན་རྡོ་རྗེ་སྟེ། བཛྲིཾ་ཞེས་བྱ་བའི་སྙིང་བོའོ། །གཡོན་དུ་ནི་ཁྲོ་བོ་སྟེ། །
ཀྲཱྃ་ཞེས་བྱ་བའི་སྙིང་པོའོ། །གཡས་སུ་ནམ་མཁའི་སྙིང་པོ་སྟེ། ཏྲཱཾ་ཞེས་བྱ་བའི་སྙིང་པོའོ། །རྒྱབ་ཏུ་འཕགས་པ་སྤྱན་རས་གཟིགས་དབང་ཕྱུག་མི་འཇིགས་པ་སྦྱིན་པ་ཞེས་བྱ་བ་སྟེ། ཧྲཱིཿཞེས་བྱ་བའི་སྙིང་པོའོ། །དེ་བཞིན་གཤེགས་པའི་འོད་ཀྱི་དཀྱིལ་འཁོར་ལ་རེག་པར་བྲིའོ། །བུམ་པ་ལྔ་དང་བརྒྱད་འཁོར་ལོས་སྒྱུར་བའི་སྔགས་ཀྱིས་བཏབ་ལ་གཞག་གོ། །ལས་ཐམས་ཅད་པས་མངོན་པར་བསྔགས་པ་ཡང་ངོ་། བདུག་པ་ལ་སོགས་གཞག་གོ། །མཆོད་པའི་དང་པོ་ཅན་སྒོ་སྐྱོང་ཐམས་ཅད་ཉིད་ཀྱང་ངོ་། །དེ་ནས་སྔགས་པ་ཡང་དག་པར་འཇུག་པའི་ཕྱིར་བདེ་བར་གཤེགས་པ་དམ་པ་སྲས་དང་བཅས་པ་འཁོར་གྱི་ཚོགས་ཀྱིས་བསྐོར་བ་རིག་པ་དང་ལྷན་ཅིག་སྤྱན་དྲང་ངོ་། །རིག་པ་ཡང་བདེ་བར་གཤེགས་པའི་གཡོན་གྱི་ལོགས་སུ་བྲིའོ། །དེ་ནས་བདག་ཉིད་དབང་བསྐུར་ཏེ། སྐྱིལ་མོ་ཀྲུང་གིས་འདུག་ལ་སྟོང་ཕྲག་བརྒྱར་བཟླས་སོ། །དེ་ནས་དེ་བཞིན་གཤེགས་པ་མངོན་སུམ་དུ་མཐོང་བར་འགྱུར་ཞིང་རྡོ་རྗེ་འཛིན་པའམ། འཕགས་པ་སྤྱན་རས་གཟིགས་དབང་ཕྱུག་གམ། ཇི་ལྟར་འདོད་པའི་མཆོག་སོ་སོར་འཐོབ་བོ། །གང་གི་ཚེ་མཉམ་པར་གཞག་པ་དེའི་ཚེ་ཡིད་ཀྱིས་ལས་ཐམས་ཅད་ནུས་པར་འགྱུར་རོ། །དེ་ནས་སློབ་མ་རྣམས་གཞུག་སྟེ་རྡོ་རྗེ་འཛིན་པའི་ཕྱག་རྒྱས་ང་རྒྱལ་འདི་བསྐྱེད་པར་བྱ་སྟེ།ཨོྃ ཨོྃ་བཛྲ་དྷ་ར། རཏྣ་དྷ་ར། པདྨ་དྷ་ར། བི་ཤྭ་དྷ་ར། ཏ་ཐཱ་ག་ཏ་ས་མ་ཡ་མཱ་ཏི་ཀྲམ། ཏ་ཐཱ་ག་ཏ་ས་མ་ཡ་དྷཱ་རཱ་ཏྨ་ཀོ྅་ཧྃ་ཞེས་པའོ། །དེ་ནས་འདིས་མེ་ཏོག་དོར་བར་བྱའོ། །ཨོྃ་སརྦ་ཏ་ཐཱ་ག་ཏ་པྲ་ཏཱིཙྪ་ཧོ་ས་མ་ཡ་སྟྭྃ དེ་ནས་ཕྲེང་བ་དེ་མགོ་ལ་བཅིངས་ལ་དབང་བསྐུར། ཨོྃ་སརྦ་ཏ་ཐཱ་ག་ཏཱ་བྷི་ཥིཉྩ་དྷཱ་རཱ་ཛྙཱ་པ་ཡ་ཧཱུྃ་བྷཱུྃ། ཨོྃ་བཛྲཱ་བྷི་ཥིཉྩ་ཧཱུྃ་བྷཱུྃ། ཨོྃ་རཏྣ་བྷི་ཥིཉྩ་ཧཱུྃ་ཏྲཱྃ། ཨོྃ་པདྨ་བྷི་ཥིཉྩ་ཧཱུྃ་ཧྲཱིཿ། ཨོྃ་ཀརྨ་བྷི་ཥིཉྩ་ཧཱུྃ་ཨཿ། དེ་ནས་དམ་ཚིག་དང་བཀའི་དབང་བསྐུར་བ་སྦྱིན་ནོ། །དེ་ལ་དམ་ཚིག་ནི། དཀོན་མཆོག་གསུམ་དང་བྱང་ཆུབ་སེམས། །བླ་མ་དམ་པ་ཡོང་མི་སྤོང་། །སྲོག་ཆགས་རྣམས་ནི་གསད་མི་བྱ། །མ་བྱིན་པར་ཡང་མི་བླང་ཉིད། །བརྫུན་ཡང་སྨྲ་བར་མི་བྱའོ། །ཕ་རོལ་བུད་མེད་སྤྱད་མི་བྱ། །བླ་མ་སྨད་པར་མི་བྱ་ཞིང་། །གྲིབ་མའང་འགོམ་པར་
མི་བྱའོ། །སློབ་དཔོན་མ་ཡིན་མི་གཟུང་ཞིང་། །མཚན་མ་སློབ་དཔོན་སྤངས་པ་ཡང་། །སྔགས་དང་ཕྱག་རྒྱ་མི་སྨད་དེ། །ལྷ་རྣམས་ལ་ཡང་ག་ལ་ཞིག །གལ་ཏེ་རྨོངས་པས་སྨད་ན་ནི། །ནད་ཀྱིས་ངེས་པར་འཆི་བར་འགྱུར། །མཆོད་རྙིང་ལྷ་ཡི་གྲིབ་མ་དང་། །འཇིག་རྟེན་འཇིག་རྟེན་ལས་འདས་པའི། །ཕྱག་རྒྱ་ཡི་གེ་མཚན་མ་ཡང་། །གོམ་པས་བགོམ་པར་མི་བྱའོ། །བླུན་པོ་དཀོན་མཆོག་གསུམ་སོགས་དང་། །སངས་རྒྱས་བསྟན་ལ་གནོད་བྱེད་དང་། །བླ་མ་སྨོད་ལ་བརྩོན་པ་རྣམས། །མཁས་པས་བསྒྲིམས་ཏེ་གསད་པར་བྱ། །ཆོས་མི་ལྡན་དང་བསྲེག་པ་དག །རྟག་ཏུ་སེམས་ཅན་གནོད་བརྩོན་དང་། །དམ་ཚིག་སྡང་རྣམས་སྙིང་བརྩེ་བས། །སྔགས་པས་སྔགས་ཀྱིས་གཞོམ་པར་བྱ། །འཇུངས་པའི་ནོར་ཡང་ཡང་དག་བླང་། །སེམས་ཅན་སྡུག་བསྔལ་ཅན་ལ་སྦྱིན། །བླ་མ་མཆོད་པའི་རྒྱུ་མཚན་དང་། །དེ་བཞིན་དམ་ཚིག་སྒྲུབ་པ་དང་། །དཀྱིལ་འཁོར་དོན་དང་རྒྱལ་སྲས་ལ། །མཆོད་པའི་དོན་ཕྱིར་བསམས་པ་ཡིས། །ནོར་འཕྲོག་འཇུངས་པའི་ནོར་ཡང་འོང་། །སེམས་ཅན་རྣམས་ལ་ཕན་དགའ་བས། །དམ་ཚིག་དང་ནི་བླ་མའི་རྫས། །སེམས་ཅན་རྣམས་ཀྱི་སྲོག་བསྲུང་ཕྱིར། །རྟག་ཏུ་བརྫུན་ནི་སྨྲ་བར་བྱ། །སངས་རྒྱས་རྣམས་ནི་མཉེས་བྱ་དང་། །དམ་ཚིག་རྣམས་ནི་བསྲུང་བ་དང་། །སྔགས་རིག་པ་ཡི་བསྒྲུབ་པའི་ཕྱིར། །གཞན་གྱི་བུད་མེད་ཀྱང་བསྟེན་བྱ། །རྡོ་རྗེ་སེམས་དཔའི་གནས་འདུག་པས། །ཐམས་ཅད་སྤྱོད་ཅིང་ཀུན་བྱས་ཀྱང་། །འགྲུབ་འགྱུར་ཉེས་པར་མི་འགྱུར་ན། །སྙིང་རྗེ་ལྡན་པས་སྨོས་ཅི་དགོས། །དེ་ནས་འདིས་བཀའི་དབང་བསྐུར་རོ། །ཨོྃ་སརྦ་ཏ་ཐཱ་ག་ཏཱ་ཛྙཱ་ཏེ་དཱ་སྱཱ་མི་གྲྀཧྞ་བཛྲ་སུ་སིདྡྷ་ཡེ། ཨོྃ་བཛྲ་ཏིཥྵ་ཧཱུྃ། འདིས་རྡོ་རྗེ་ལག་ཏུ་བྱིན་ལ་ཕྲིན་ལས་ཀྱི་དབང་བསྐུར་སྦྱིན་ནོ། །ཨོྃ་སརྦ་ཀརྨ་ཎི་ཀུ་རུ་བུ་དྡྷཱ་ནཱཾ་ཧཱུྃ། དེ་ནས་བླ་མ་བླ་མར་བྱ་བའི་ཕྱིར། །ཁྱོད་ཀྱི་ལུས་མཆོག་སྦྱིན་པར་བྱ། །རྫས་དང་ནོར་དང་འབྲུ་རྣམས་དང་། །རྟ་དང་བཞོན་པ་ཉིད་དང་ནི། །བྲན་གྱི་མཆོག་དང་ཁང་པ་དང་། །རྒྱལ་སྲིད་དབང་ཕྱུག་དེ་བཞིན་ཏེ། །བུ་དང་བུ་མོ་ཆུང་མ་དང་། །མ་དང་སྲིང་མོ་ཚ་མོ་དང་། །གཞན་ཡང་ཅི་བཞེད་ཐམས་ཅད་ནི། །ཕན་པའི་བསམ་
པས་བླ་མར་དབུལ། །དེ་ནས་དངོས་གྲུབ་སངས་རྒྱས་དང་། །བྱང་ཆུབ་སྒྲུབ་དང་གཞན་ཡང་ནི། །འཇིག་རྟེན་པ་ཡི་མཐུ་ཆེན་རྣམས། །ཇི་ལྟར་འདོད་པས་གསོལ་བ་གདབ། །དེ་ནས་བུ་ལ་ཕན་པའི་ཕྱིར། །སྔགས་རིག་སེར་སྣ་མེད་སེམས་དང་། །དད་པས་དད་པའི་སེམས་ལྡན་ལ། །དངོས་གྲུབ་རྣམས་ནི་སྦྱིན་པར་བྱ། །ཆོས་རྣམས་རང་བཞིན་མེད་པར་ནི། །སེམས་ཀྱིས་བསྒོམ་པར་བྱས་ནས་ཀྱང་། །ཨ་ལས་ཟླ་བའི་དཀྱིལ་འཁོར་བསམ། །རང་གིས་བོན་དེ་དབུས་སུ། །བསམས་ནས་དམ་ཚིག་ཕྱག་རྒྱ་ཡང་། །བསམ་བཞིན་དེ་བཞིན་དེ་ཉིད་ཀྱང་། །ལྷ་ཡི་རྣམ་པའི་རྣལ་འབྱོར་དུ། །སྒྲུབ་པ་པོ་ཡིས་ཡོངས་སུ་བསྒྱུར། །དེ་ནས་རང་གིས་བོན་དང་། །ཕྱག་རྒྱས་ཕྱག་རྒྱ་དེ་བྱིན་བརླབ། །གོང་འོག་གོ་རིམས་ཇི་བཞིན་དུ། །སངས་རྒྱས་རྣམས་ཀྱིས་དབང་བསྐུར་རོ། །དེ་ལྟར་ང་རྒྱལ་བསྐྱེད་ནས་ནི། །མཁས་པ་ཡིས་ནི་བསྒྲུབ་བྱ་སྟེ། །དེ་བཞིན་གཤེགས་ཀྱང་འགྲུབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོ་དང་། རྒྱལ་པོའི་བུ་དང་། རྒྱལ་པོའི་བློན་པོ་དང་། རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་དང་། གཞན་ཡང་དམན་པ་ཕྱག་དར་པ་དང་། མཐའ་འཁོབ་ཀྱི་སྐྱེ་བོའི་གནས་དང་། སྐྱེ་བོའི་གནས་ཀྱི་རིགས་སུ་སྐྱེས་པ་དཀྱིལ་འཁོར་གྱི་རྒྱལ་པོ་འདིར་ཞུགས་པ་དེ་དག་གི་རྣམ་པར་སྨིན་པ་ཇི་ལྟ་བུར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཚངས་པ་ལ་སོགས་པ་ལྷའི་ཚོགས་རྣམས་གང་མ་འོངས་པའི་སེམས་ཅན་རྣམས་ལ་ཕན་པའི་ཕྱིར་ཞུས་པ་ནི་ལེགས་སོ་ལེགས་སོ། །ལྷའི་ཚོགས་རྣམས་དཀྱིལ་འཁོར་གྱི་རྒྱལ་པོ་འདིར་ཞུགས་ཤིང་དབང་བསྐུར་བ་དང་། བྲིས་པ་དང་། འདྲིར་བཅུག་པ་དང་། རྗེས་སུ་ཡི་རང་བ་དང་། ཕྱག་བྱས་པ་དང་། མཆོད་པ་བྱས་པའི་འབྲས་བུ་རྣམ་པར་སྨིན་པ་ཉོན་ཅིག །ལྷའི་བུ་རྣམས་མདོར་ན་ངལ་ཡང་དེའི་ཕན་ཡོན་བཤད་པར་སྤྲོ་བ་མེད་དེ། གང་ང་ལ་བསོད་ནམས་ཀྱི་ཕུང་པོ་དེ་བརྒྱ་ཕྲག་སྟོང་དུ་མར་བསྒྱུར་ཡང་
གྲངས་སུ་ཡང་། བགྲང་བར་ཡང་། དཔེར་ཡང་མི་བཟོད་དེ། དེ་བཞིན་གཤེགས་པ་ཐམས་ཅད་ལ་བསོད་ནམས་ཀྱི་ཕུང་པོའི་བར་གྱིས་ཀྱང་མི་བཟོད་དོ། །གང་དཀྱིལ་འཁོར་དུ་ཞུགས་པའི་སེམས་ཅན་རྣམས་ཀྱི་འབྲས་བུ་རྣམ་པར་སྨིན་པ་འདི་ནི་བཅོམ་ལྡན་འདས་ངོ་མཚར་ཆེའོ། ། རྡོ་རྗེ་འཛིན་པ་ངོ་མཚར་ཆེའོ། །བཅོམ་ལྡན་འདས་བདག་ཅག་རྡོ་རྗེ་འཛིན་པའི་དཀྱིལ་འཁོར་ལ་སོགས་པར་ཞུགས་པ་སྤྲོའོ། །བཅོམ་ལྡན་འདས་རྡོ་རྗེ་འཛིན་པ་སྤྲོའོ། །དེ་ནས་ལྷ་དེ་དག་གིས་དེ་བཞིན་དུ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཛམ་བུའི་གླིང་པའི་སེམས་ཅན་རྣམས་བསོད་ནམས་ཆུང་ཞིང་ཚེ་ཐུང་བ་དང་། ངན་སོང་གི་རྒྱུད་དང་ལྡན་པ་དང་། དམྱལ་བ་དང་། ཡི་དགས་དང་། བྱོལ་སོང་རྣམས་སུ་སྐྱེས་པ་དག་ཀྱང་མཆིས་ན། །བཅོམ་ལྡན་འདས་དེ་དག་ལ་བདག་གིས་ཇི་ལྟར་བསྒྲུབ་པར་བྱ། ཀྱེ་ལྷའི་བུ་དག་དེ་དག་ནི་དཀྱིལ་འཁོར་འདི་ཉིད་དུ་ཆུག་ཅིག །བཅུག་ནས་ཀྱང་དབང་སྐུར་ཅིག །ཆོས་ཀྱི་ཡི་གེ་ཡང་ཟློས་སུ་ཆུག་ཅིག །དེ་ནས་སེམས་ཅན་དེ་དག་ཚེ་རིང་བར་འགྱུར། བསོད་ནམས་དང་བྲལ་བ་བསོད་ནམས་དང་ལྡན་པར་འགྱུར། ངན་སོང་ལས་རྣམ་པར་གྲོལ་བར་འགྱུར་རོ། །ལྷའི་བུ་རྣམས་གང་ངན་སོང་དུ་སྐྱེས་པ་དེ་དག་གི་མིང་ལ་དབང་བསྐུར་བ་མཛོད་ཅིག །གཟུགས་བརྙན་ལ་ཡང་དབང་བསྐུར་བར་བྱོས་ཤིག །རང་གི་ལྷའི་སྐུ་ལ་ཡང་དབང་བསྐུར་བར་བྱོས་ཤིག །ཐ་ན་དེ་དང་རིགས་མཐུན་པ་དང་། དེའི་བུ་དང་དེ་དང་རུས་མཐུན་པ་དང་། དེའི་མིང་འཛིན་པ་དང་། བྲན་ལ་ཡང་དབང་སྐུར་ཅིག །ཞག་བདུན་ལན་བདུན་དཀྱིལ་འཁོར་དུ་བཅུག་སྟེ་དབང་བསྐུར་བས། ངེས་པར་ངན་སོང་གི་སྒྲིབ་པ་ལས་རྣམ་པར་གྲོལ་བར་འགྱུར་རོ། །ལྷའི་བུ་རྣམས་དེའི་མིང་ནས་སྨོས་ཏེ། འབུམ་ཕྲག་གཉིས་དང་། འབུམ་ཕྲག་གསུམ་དང་། འབུམ་ཕྲག་བཞི་དང་། འབུམ་ཕྲག་བརྒྱ་སྟོང་གི་བར་དུ་བཟླས་ན། མཚམས་མེད་པ་ལྔ་བྱས་པ་ཡང་རྣམ་པར་གྲོལ་བར་འགྱུར་ན། སྡིག་པ་ཆུང་ངུ་བྱས་པ་རྣམས་ལྟ་ཅི་སྨོས། ལྷའི་བུ་རྣམས་ཞི་བའི་ཐབ་ཁུང་ཟླུམ་པོ་ཐ་མ་དང་བར་མ་དང་མཆོག་ཁྲུ་གང་དང་ཁྲུ་དོའམ། ཁྲུ་བཞི་པ་བྱས་ནས་དེའི་མིང་གིས་ཡུངས་ཀར་དཀར་
པོ་རྣམས་བརྒྱ་ཕྲག་སྟོང་དུ་བསྲེགས་ན་ངན་སོང་ཀུན་ལས་ཐར་བར་འགྱུར་རོ། །དེའི་ཤ་དང་། རུས་པ་དང་། སྐྲ་དང་། ཐལ་བ་ལ་སོགས་པ་ལ་ཆོ་ག་དེ་བཞིན་ཉིད་ཀྱིས་སྡིག་པ་ཀུན་ལས་རྣམ་པར་གྲོལ་བར་འགྱུར་རོ། །དེ་ཡི་དབུས་སུ་འཁོར་ལོ་ནི། །རྩིབས་བརྒྱད་དཀར་པོ་འོད་ཟེར་འབར། །ཁོར་ཡུག་རྡོ་རྗེ་རྩེ་ལྔ་པ། །འོད་ཟེར་དཀར་པོ་དང་ལྡན་བྲི། །དེ་ནས་སྣ་ཚོགས་རྡོ་རྗེ་བྱ། །རྡོ་རྗེ་རིན་ཆེན་ཆུ་སྐྱེས་མཆོག །དེ་ནས་སྡིག་པ་གཞོམ་པའི་ཕྱིར། །ཕྱག་རྒྱ་རྣམ་པ་སྣ་ཚོགས་བྱ། །ཕྱི་རོལ་རྡོ་རྗེ་རིགས་རྣམས་ཀྱི། །ཕྱག་རྒྱ་རྣམས་ནི་ཕྱི་རོལ་བྲི། །གཟའ་དང་སྐར་མའི་མཚན་མ་དང་། །དེ་ལྟར་འཇིག་རྟེན་འཁོར་རྣམས་ཀྱང་། །གཙོ་བོའི་རི་མོ་ལུགས་མ་དང་། །རྡོ་རྗེ་ཅན་དང་ལྷན་ཅིག་གཞག །བུམ་པ་བུམ་པ་གང་བ་དང་། །གཏོར་མ་ལྷ་བཤོས་ཤིན་ཏུ་དཀར། །མདོར་ན་ཐིག་ནི་བཏབ་ནས་ཀྱང་། །ཆོ་ག་བཞིན་དུ་བྲི་བར་བྱ། །དཀར་པོའི་གོས་ནི་གྱོན་ནས་སུ། །སངས་རྒྱས་གཟུགས་ཅན་མི་འཇིགས་པས། །ངན་སོང་འགྲོ་བར་གནས་པ་ཡི། །སེམས་ཅན་དེ་རྗེས་དྲན་བྱེད་ཅིང་། །སྡིག་པ་སྒྲིབ་པ་ཞི་བའི་ཕྱིར། །རྒྱུད་དག་པ་ཡི་སྦྱིན་སྲེག་ནི། །མར་དང་འོ་མ་སྦྲང་རྩིར་བཅས། །འབྲས་ཡོས་ཡུངས་ཀར་བསྲེས་པ་དང་། །དེ་ཡི་རུས་པ་ཤ་ལ་སོགས། །ཡང་ན་མིང་ཙམ་གྱིས་ཀྱང་བྱ། །དེ་ནས་བདེ་འགྲོར་སྐྱེས་ནས་སུ། །མཁས་པས་རྒྱས་པར་བྱ་བ་ནི། །ཁྲུ་དོ་པའམ་ཁྲུ་བཞི་པ། །དེ་བཞིན་མཆོག་ནི་ཁྲུ་བརྒྱད་པར། །བྱས་ནས་ཐབ་ཁུང་ཁྲུ་བཞི་པ། །ཀུན་དུ་མུ་རན་དང་ལྡན་པ། ། དེ་དབུས་པདྨ་རིན་ཆེན་ཅན། །འོད་ཟེར་སེར་པོ་ཅན་བྲི་ཞིང་། །ཁོར་ཡུག་ཏུ་ནི་རིན་ཆེན་དང་། །མུ་རན་ལ་ནི་ཆུ་སྐྱེས་བྲི། །ཕྱི་རོལ་དུ་ནི་རིགས་ལྔ་ཡི། །དབྱེ་བས་ཕྱག་རྒྱ་བྲི་བར་བྱ། །དེ་བཞིན་ཕྱི་ཡི་ལྷ་རྣམས་དང་། །ལྕགས་ཀྱུ་ལ་སོགས་བྲི་བར་བྱ། །ན་བཟའ་སེར་པོར་གྱོན་བྱས་ནས། ། མཐོ་རིས་གནས་པ་རྗེས་དྲན་ཞིང་། །དེ་ལ་ཕན་ཕྱིར་རྒྱས་པ་ཡི། །དོན་དུ་རྒྱས་པའི་ལས་བྱས་ན། །ལུས་ཅན་དེ་ཡི་ཚེ་དང་དཔལ། །གཟི་བརྗིད་སྐལ་བ་བཟང་པོ་འཕེལ། །དེ་ནས་དེ་ལ་ཕན་པ་ཡི། །དབང་དུ་བྱ་བའི་ལས་བྱ་སྟེ། །ཐབ་ཁུང་གཞུ་ཡི་དབྱིབས་འདྲ་བ། །ཁྲུ་གང་བའམ་
ཁྲུ་དོ་པ། །ཁྲུ་བཞི་བྱས་ལ་དེ་དབུས་སུ། །ཆུ་སྐྱེས་དམར་པོ་ཡང་དག་བྲི། །དེ་ཡི་དབུས་སུ་མདར་བཅས་པའི། །གཞུ་ཉིད་ཀྱང་ནི་བྲི་བར་བྱ། །ཁོར་ཡུག་ཏུ་ནི་མདར་བཅས་པའི། །གཞུ་ནི་ཁ་དོག་དམར་པོ་བྲི། །སྔགས་འཛིན་པ་ཡིས་རྟག་པར་ཡང་། །ཕྱི་རོལ་དེ་ཡི་ལྷ་ཡི་བྱ། །སེམས་ཅན་དེ་ནི་དྲན་བྱས་ལ། །ན་བཟའ་དམར་པོ་གྱོན་པ་ཡི། །མེ་ཏོག་དམར་ཞིང་པདྨ་ཡང་། །འབྲས་བུ་དམར་དང་ཁམས་བཅས་པ། །མར་དང་གུར་གུམ་བསྲེས་པ་དང་། །ཙནྡན་དམར་པོའི་ཕྱེ་མ་དང་། །སྦྱིན་སྲེག་བྱས་ནས་ལྷ་ལ་སོགས། །ཐམས་ཅད་དེ་ཡི་དབང་དུ་འགྱུར། །དེ་ཡི་གདོན་རྣམས་རྣམ་གཞོམ་ཕྱིར། །མངོན་སྤྱོད་ཡང་དག་བརྩམ་པར་བྱ། །ཁྲུ་དོ་ཕྱེད་བཅས་ཁྲུ་གསུམ་མམ། །དེ་བཞིན་མཆོག་ནི་ཁྲུ་དགུ་པ། །ཟུར་གསུམ་དང་ནི་ལྡན་པར་བྱ། །དབུས་སུ་རྡོ་རྗེ་རྩེ་དགུ་པ། །རྩེ་གསུམ་པ་ཡིས་མུ་རན་བྱ། ། སྣ་ཚོགས་རྡོ་རྗེ་ཡང་བྱས་ལ། །དབྱུག་པ་མགོ་དང་རྩེ་གསུམ་རྣམས། །རྡོ་རྗེ་དགྲ་སྟ་རྩེ་གཅིག་གིས། །ཕྱི་རོལ་དུ་ཡང་མཚན་པར་བྱ། །རིག་པ་གསུམ་པ་སྔར་བཞིན་བརྒྱན། །བུམ་པ་གཏོར་མ་བུམ་པ་ཡང་། །ཞལ་ཟས་མང་པོ་གཞག་པར་བྱ། །ཤ་དང་ཁྲག་གིས་བཀང་བ་ཡི། ། ཐོད་པ་རྣམས་ཀྱང་ཀུན་དུ་ཡང་། །དེ་ནས་གོས་ནག་བགོས་ཤིང་ཁྲོས། །རང་ཉིད་འཇིག་རྟེན་གསུམ་རྣམ་རྒྱལ། །ལུས་ཅན་དེ་ཡི་སྡིག་ལས་སོགས། །དེ་ནས་དེ་ཡི་སྡིག་བཅོམ་ཞིང་། །བགེགས་དང་བྲལ་ཏེ་ཅི་བདེ་བར། །མཐོ་རིས་འཇིག་རྟེན་མི་རྣམས་ཉིད། །ཇི་སྙེད་ཁམས་གསུམ་འཇིག་རྟེན་སྤྱོད། །མྱུར་དུ་གོ་རིམས་འདི་ཉིད་ཀྱིས། །ཚེ་འདིར་གནས་པ་རྣམས་ལ་བྱ། །དེ་ནས་གང་གི་ཕྱིར་བྱས་པ། །དེ་ཡི་ཕྱིར་ནི་དེ་བཞིན་འགྱུར། །གཞན་དག་ཀྱང་ནི་ལས་རྣམས་ཀྱང་། །སྔ་མ་ཇི་བཞིན་དེ་བཞིན་བྱ། །དེས་ནི་སེམས་ཅན་རྣམས་ལ་ཡང་། །མྱུར་དུ་བདེ་སྐྱིད་འགྲུབ་པར་འགྱུར། །དེ་ནས་ཚངས་པ་ལ་སོགས་པའི་ལྷ་རྣམས་ཡང་དག་པར་དགའ་བས་བཅོམ་ལྡན་འདས་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ངན་སོང་དུ་སྐྱེས་པའི་སེམས་ཅན་རྣམས་ཀྱི་དོན་དང་ཕན་ཡོན་དང་བདེ་བའི་སླད་དུ་བརྟག་པའི་རྒྱལ་
པོ་འདི་འདྲི་བ་དང་འདྲིར་འཇུག་པའི་རིགས་ཀྱི་བུའམ་རིགས་ཀྱི་བུ་མོ་དེ་བདག་ཅག་ཚངས་པ་ལ་སོགས་པ་ལྷ་རྣམས་ཀྱིས་བུ་བཞིན་དུ་ཡོངས་སུ་བསྐྱང་བར་བགྱི་སྟེ། ཡང་ཇི་ལྟར་བཤད་པ་མ་ཚང་བ་མེད་པར་བགྱིད་པ་ལྟ་ཅི་སྨོས། གང་ཡང་རྒྱལ་པོ་དང་རྒྱལ་པོའི་བུ་དང་རྒྱལ་པོའི་བློན་པོ་ཇི་ལྟར་གསུངས་པའི་སྔགས་རྗེས་སུ་སློབ་པ་དེའི་རྒྱལ་སྲིད་འཕེལ་བར་བགྱིའོ། །ཡུལ་དང་། ཕྱོགས་དང་། སྐྱེ་བོའི་གནས་དང་། འཁོར་གྱི་སྐྱེ་བོའི་ལོ་ཐོག་ལ་སོགས་པ་ཡང་བསྲུང་བར་བགྱིའོ། །ནོར་དང་འབྲུ་རྣམས་མང་དུ་འབྱོར་བར་བགྱིའོ། །བུད་མེད་དང་། སྐྱེས་པ་དང་། ཁྱེའུ་དང་། བུ་མོ་རྣམས་ཕུན་སུམ་ཚོགས་པར་ཡང་བགྱིའོ། །འབྱོར་པ་དང་། རྒྱས་པ་དང་། ལོ་ལེགས་པ་དང་། བདེ་བར་བགྱིའོ། །གང་ཞིག་བརྟག་པའི་རྒྱལ་པོ་འདི་ལ་དད་པས་རྒྱལ་མཚན་གྱི་རྩེ་མོ་ལ་བཏགས་ཏེ་གྲོང་དང་གྲོང་ཁྱེར་ལ་སོགས་པར་འཇུག་པ་བདག་ཉིད་ཀྱིས་བསྡུ་བར་ཡང་བགྱིའོ། །གླང་པོ་ཆེའི་སྟེང་དུ་བཞག་ལ་གྲོང་དང་གྲོང་ཁྱེར་ལ་སོགས་པ་ཐམས་ཅད་དུ་བསྐོར་བར་བྱ་སྟེ། དུས་མ་ཡིན་པར་འཆི་བ་དང་ཉེ་བར་འཚེ་བ་ཐམས་ཅད་ཞི་བར་འགྱུར་རོ། །སེམས་ཅན་ཆེན་པོ་དེའི་དྲུང་ན་བདག་ཅག་བྲན་གྱི་ཚུལ་ལམ་བུའི་ཚུལ་དུ་གནས་པར་ཤེས་པར་བགྱིའོ། །གང་ན་འདི་རབ་ཏུ་སྤྱོད་པ་དེ་ན་བཅོམ་ལྡན་འདས་ཕྱག་ན་རྡོ་རྗེ་རང་ཉིད་ལོངས་སྤྱོད་རྫོགས་པའི་སྐུས་རྡོ་རྗེ་སེམས་དཔའི་སྐུར་བཞུགས་པར་འཚལ་བར་བགྱིའོ། །བཅོམ་ལྡན་འདས་རྡོ་རྗེ་སེམས་དཔའ་ཀུན་དུ་བཟང་པོ་རེ་བ་ཐམས་ཅད་ཡོངས་སུ་སྐོང་བ་དེ་ཉིད་བརྟག་པའི་རྒྱལ་པོའི་གཟུགས་སུ་བཞུགས་པར་འཚལ་བར་བགྱིའོ། །ས་ཕྱོགས་དེ་ཡང་མཆོད་རྟེན་དུ་གྱུར་པར་འཚལ་བར་བགྱི་སྟེ། མཆོད་པར་བགྱི། ཕྱག་འཚལ་བར་བགྱིའོ། །ཀུན་དུ་བསྲུང་བར་བགྱིའོ། །གང་ཡང་བརྟག་པའི་རྒྱལ་པོ་འདིར་རབ་ཏ་སྤྱོད་པའི་རྡོ་རྗེ་སློབ་དཔོན་དཀའ་ཐུབ་ཆེན་པོ་དེའི་བདག་ཅག་ཚངས་པ་ལ་སོགས་པའི་ལྷ་རྣམས་ཀྱིས་གཡོག་བགྱིའོ། །བྲན་གྱི་ཚུལ་དུ་གནས་པར་བགྱིའོ། །མངག་གཞུག་པ་ཉིད་དུ་གནས་པར་བགྱིའོ། །བསྒོ་བ་ཐམས་ཅད་མཉན་པར་བགྱིའོ། །ཕན་པ་དང་བདེ་བ་ཐམས་ཅད་བགྱིའོ། །དངོས་གྲུབ་ཐམས་ཅད་སྩལ་བར་བགྱི་སྟེ། བཅོམ་ལྡན་འདས་མདོར་
ན་དེའི་རྐང་པའི་རྡུལ་མགོ་བོས་གཟུང་བར་བགྱིའོ། །བཅོམ་ལྡན་འདས་ཕྱག་འཚལ་བར་བགྱིའོ། །དེའི་ཕྱི་བཞིན་དུ་རྗེས་སུ་འབྲང་བར་བགྱིའོ། །བཅོམ་ལྡན་འདས་གང་དཀྱིལ་འཁོར་དུ་ཞུགས་ཏེ་དབང་བསྐུར་བ་དེ་ཁོ་བོ་ཅག་གིས་མངའ་བདག་ཏུ་འཚལ་བར་བགྱིའོ། །ཕྱག་ན་རྡོ་རྗེར་འཚལ་བར་བགྱིའོ། །རྡོ་རྗེ་སེམས་དཔའ་ལགས་པར་འཚལ་བར་བགྱིའོ། །བདེ་བ་ཆེན་པོ་ཀུན་དུ་བཟང་པོ་ལགས་པར་འཚལ་བར་བགྱིའོ། །དེ་བཞིན་གཤེགས་པ་ལགས་པར་འཚལ་བར་བགྱིའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཚངས་པ་ལ་སོགས་པའི་ལྷ་རྣམས་ལ་འདི་སྐད་ཅེས་བཀའ་སྩལ་ཏོ། །ཚངས་པ་ལ་སོགས་པ་ལྷ་རྣམས་གང་ཆོས་ལ་རིམ་གྲོ་གཅིག་གཉིས་བྱས་པས་དེ་ལྟར་ཡང་དག་པའི་དམ་བཅའ་ནི་ལེགས་སོ་ལེགས་པར་སྒྲུབས་ཤིག །དེ་ནས་བཅོམ་ལྡན་འདས་ཕྱག་ན་རྡོ་རྗེས་སྔགས་དང་རིག་པ་དང་། སྙིང་པོ་ཐམས་ཅད་བརྟན་པར་བྱ་བའི་ཕྱིར་རང་གི་སྙིང་པོ་འདི་བཤད་དོ། །ཨོྃ་བྷྲཱུྃ་དྲུྃ་བཛྲ་པཱ་ཎི་དྲྀ་ཌྷི་ཏིཥྛ་ཧཱུྃ། ཨོྃ་ཧཱུྃ་ཕཊ། ཨོྃ་བཛྲ་ཧཱུྃ་ཕཊ། ཨོྃ་དྲྀ་ཌྷ་བཛྲ་ཧཱུྃ། ཨོྃ་བཛྲ་ཧཱུྃ་ས། ཨོྃ་བཛྲ་ཧཱུྃ་ཨཿ། དེ་ནས་དེ་དག་གི་དཀྱིལ་འཁོར་བཤད་དེ། དཀྱིལ་འཁོར་སྔ་མ་བཞིན་བྲིས་ལ། །དབུས་སུ་རྡོ་རྗེ་བྲི་བར་བྱ། །ཡང་ན་རྡོ་རྗེ་སེམས་དཔའ་འམ། །ཀུན་ཏུ་བཟང་པོ་བདེ་བ་ཆེ། །སྤྱན་སྔར་ཕྱག་ན་རྡོ་རྗེ་ཉིད། །གཡས་སུ་ཕྱག་ན་རིན་ཆེན་སྤྱན། །ཕྱག་ན་པདྨ་ནུབ་ཕྱོགས་བྲི། །བྱང་དུ་ཕྱག་ན་སྣ་ཚོགས་བྲི། །ཕྱི་རོལ་དུ་ནི་ཟླུམ་པོར་བསྐོར། །སངས་རྒྱས་ཐམས་ཅད་དགོད་པར་བྱ། །དེ་ཡི་ཕྱི་རོལ་སེམས་དཔའ་རྣམས། ། གོ་རིམས་བཞིན་དུ་བྲི་བར་བྱ། །དེ་ཡི་ཕྱི་རོལ་སེམས་དཔའ་ཡང་། །བྱམས་པ་ལ་སོགས་མཆོག་ཆེན་བྲི། །དེ་ཕྱིར་དེ་བཞིན་དགེ་སློང་ནི། །ཀུན་དགའ་བོ་སོགས་ཐུབ་པ་བྲི། །རང་གི་ཆུང་མ་བུས་བསྐོར་བའི། །ཚངས་པ་ལ་སོགས་ཕྱི་རོལ་བྲི། །གཟའ་དང་རྒྱུ་སྐར་ཉི་ཟླ་དང་། །རྒྱལ་པོ་བཞི་པོ་རྣམས་དང་ནི། །ཕྱོགས་སྐྱོང་འཇིག་རྟེན་སྐྱོང་བ་རྣམས། །དཀྱིལ་འཁོར་འདིར་ནི་ཡང་དག་བྲི། །ཕྱི་རོལ་དུ་ནི་དམྱལ་བ་སོགས། །ཀླུ་ལ་སོགས་པ་དུད་འགྲོའི་དཔེ། །སྒོ་དང་སྒོར་ནི་དེ་བཞིན་དུ། །སྒོ་སྐྱོང་སྟོབས་ཀྱི་དམ་པ་རྣམས། །དཀར་པོ་འདོད་པའི་ཉི་མ་ལ། །རབ་ཏུ་འབད་
པས་དཀྱིལ་འཁོར་བྲི། །གང་བསྔགས་ནག་པོའི་ཕྱོགས་ལ་ཡང་། །དཀྱིལ་འཁོར་འགལ་བ་མ་ཡིན་ནོ། །ལྔ་པ་དེ་རྗེས་བདུན་པ་དང་། །ཉ་གང་བ་ནི་ཁྱད་པར་དུ། །བསྔགས་ཏེ་ཕྱག་ན་པདྨ་ཡི། །དཀྱིལ་འཁོར་བྱ་བའི་ཆོ་ག་ལའོ། །གང་ཡང་དྲག་པོའི་ལས་རྣམས་ལ། ། དེ་ནི་ནག་པོ་ལ་ཡང་བྲི། །ཁྲོ་བོ་རྣམས་ཀྱི་དཀྱིལ་འཁོར་ཡང་། །ཟླ་བ་ཉ་བ་ཁྱད་པར་དུ། །རྒྱལ་པོ་རྣམས་ཀྱིས་དཀྱིལ་འཁོར་བསྔགས། །གཞན་ཡང་རང་གིས་འདུས་བྱས་པའི། །དཀྱིལ་འཁོར་ལ་བརྩོན་གདབ་བྱ་ཞིང་། །ཤར་ནས་འཆར་བའི་དབང་བྱ་སྟེ། །ཕྱོགས་ཀྱི་ཆ་ནི་བརྟག་པར་བྱ། །དེ་ནས་དཀྱིལ་འཁོར་དགོད་པ་ནི། །ཡིད་ཀྱིས་ཡོངས་སུ་བརྟག་པར་བྱ། །སྔགས་དང་རྒྱུད་ནི་དང་པོར་བྱས། །འཇམ་ཞིང་སྔགས་གཟུགས་དགེ་ཞིང་ཞི། །རྗེས་མཐུན་རང་གི་སློབ་ཉིད་ཀྱི། །སློབ་མ་ལྷན་ཅིག་ཙམ་གྱིས་སྤྱད། །དེ་ནས་ནང་པར་རབ་སྔར་ལངས། ། ལེགས་བཀྲུས་གོས་དཀར་འཆང་ཞིང་གཙང་། །བློ་ལྡན་བླ་མ་སློབ་མར་བཅས། །དཀྱིལ་འཁོར་དྲུང་དུ་ཀུན་ནས་འགྲོ། །དཀྱིལ་འཁོར་ཕྱོགས་ཉིད་ཤིན་ཏུ་ཡང་། །ཉེ་བར་བྱུགས་ཤིང་ལེགས་པར་མཉེས། །ཁྲོ་བོ་ཆེན་པོ་བཟླས་པ་ཡི། །དྲི་ཡི་ཆུ་ཡིས་བསངས་པ་ཡི། །དབུས་སུ་རིགས་རྣམས་སྙིང་པོ་ཡིས། །ལྷག་པར་གནས་པར་བྱ་བ་ཉིད། །དཀྱིལ་འཁོར་གྱི་ནི་གཙོ་བོ་ཡི། །སྔགས་ཀྱི་ལས་རྣམས་ཐམས་ཅད་བྱ། །ས་ལ་སོར་ནི་བཅུ་གཉིས་པའི། །དཀྱིལ་འཁོར་དྲི་ཡིས་བྱས་ནས་སུ། །དཀྱིལ་འཁོར་རིག་པས་ལན་བདུན་དུ། །ལྷག་པ་དེ་ནས་བཟླས་པར་བྱ། །དེ་རྗེས་ལྷ་རྣམས་ཉིད་ཀྱི་ཡང་། །བྱང་ཆུབ་ཆེན་པོ་ཞེས་བྱ་བའི། །སྙིང་པོས་སྐལ་བ་ཇི་ལྟ་བ། །དྲི་དང་མེ་ཏོག་སོགས་མཆོད་པ། །བྱས་ནས་གཏོར་མ་དབུལ་བྱ་ཞིང་། །མངོན་པར་བསྔགས་པའི་སྤོས་ཀྱང་ངོ་། །དེ་ནས་ཙནྡན་ལ་སོགས་པ། །བསྲེས་པའི་ཆུ་ལ་མངོན་པར་བསྔགས། །དེ་ལ་དབུལ་བའི་མེ་ཏོག་དང་། །བདུག་པ་ལ་ཡང་ཆོ་ག་བཞིན། །སོ་ཤིང་ཨུ་དུམ་བཱ་ར་དང་། །ཨ་ཤྭཏྠ་སོགས་རྨ་མེད་ཅིང་། །ཤིན་ཏུ་ཕྲ་མིན་སྦོམ་པ་མིན། །སོར་མོ་བཅུ་གཉིས་ཚད་ཙམ་ནི། །དྲི་ཡི་ཆུ་ཡིས་རབ་བཀྲུས་ཤིང་། །མེ་ཏོག་ཕྲེང་བ་ཡིས་ཀྱང་
བཅིང་། །དྲི་བཟངས་ལ་སོགས་བྱུགས་ཤིང་བདུག །ལག་པས་རེག་ན་སྙིང་པོ་ནི། །མང་པོ་ཡང་ནི་བཟླས་བྱ་ཞིང་། །རིགས་ཉིད་ཀྱིས་ནི་ལན་བདུན་ནམ། །སློབ་མ་རྣམས་ཀྱིས་ཚད་གཞལ་བས། །སོ་ཤིང་ལ་སོགས་ཡང་དག་གཟུང་། །གཅིག་ལ་སོགས་པས་གོ་རིམས་བཞིན། །རྩེ་མོ་ཉིད་ནས་བཅའ་བར་བྱ། །དེ་ནས་མཁས་པས་བདག་ཉིད་ཀྱིས། །སློབ་མ་སྲུང་བ་བརྟན་བྱས་ནས། །སྦྱིན་སྲེག་ལས་ནི་མར་བྱུགས་པའི། །ཡམ་ཤིང་རྣམས་ནི་མར་དང་བཅས། །སྦྲང་རྩི་མར་དང་བསྲེས་པ་དང་། །མར་གྱི་སྲེག་བླུགས་བསྲེག་བྱ་ཞིང་། །ཞོ་ཟན་གྱི་ཡང་སྦྱིན་སྲེག་བྱ། །དང་པོར་བགེགས་ནི་ཞི་བྱའི་ཕྱིར། །དེ་ནས་ཐུགས་ཀྱིས་རྗེས་འཛིན་ཕྱིར། །དེ་ནས་ཞི་བའི་སྦྱིན་སྲེག་ཅིང་། །སྡིག་པ་ཞི་བར་བྱ་ཕྱིར་རམ། །དེ་ནས་སློབ་མ་རྣམ་བརྟགས་ནས། །ཆོ་ག་ཡི་ནི་ལྷག་གནས་བྱ། །དེ་ཡིས་ཇི་ལྟར་ནུས་པ་ཡིས། །དེ་བཞིན་སྡོམ་པ་གཟུང་བར་བྱ། །དེ་རྣམས་ཆོ་ག་འདི་ཡིན་ཏེ། །གཙང་ཞིང་དཀར་བའི་གོས་ཅན་ནི། །མདུན་དུ་བལྟས་ཏེ་འདུག་པ་ལ། །ལྷག་པར་གནས་པར་བརྩམ་པར་བྱ། །བླ་མས་དང་པོར་སྐྱབས་གསུམ་སྦྱིན། །དེ་ཡི་རྗེས་ལ་བྱང་ཆུབ་སེམས། །མ་བསྐྱེད་པ་ནི་བསྐྱེད་བྱ་ཞིང་། །བསྐྱེད་པ་སླར་ཡང་རྗེས་དྲན་བྱ། །དེ་ནས་ཁྲོ་བོ་མངོན་བཟླས་པའི། །ཆུ་ཡིས་སྤྱི་བོར་བསང་གཏོར་བྱ། །མགོ་བོར་ཀུན་ཏུ་རེག་ནས་ནི། །མཉམ་པར་གཞག་པར་ལན་བདུན་བཟླས། །རིག་པའི་རྒྱལ་པོའི་སྙིང་པོ་ནི། །ལག་པས་དྲི་བཟངས་སྦགས་པ་ལ། །འཇིགས་པ་བཟློག་ལ་མཁས་པ་ཡིས། ། ལན་བདུན་རྟག་ཏུ་བཟླས་པར་བྱ། །འཁོར་ལོས་སྒྱུར་བའི་རྒྱལ་པོ་ཡིས། །རིག་པའི་རྒྱལ་པོ་ཡི་གེ་གཅིག །རྟ་མགྲིན་ཆུ་སྐྱེས་རིགས་ལ་ནི། །རིག་པའི་རྒྱལ་པོའི་ཡི་གེ་བཅུ། །སུམྦྷ་ཞེས་བྱ་རྡོ་རྗེའི་རིགས། །རིག་པའི་རྒྱལ་པོ་རྫུ་འཕྲུལ་ཆེ། །ཡི་གེ་ཧཱུྃ་བཞི་རྣམས་དང་ལྡན། །ལས་ཀུན་རབ་ཏུ་སྤྲོས་པ་ལའོ། །རིགས་གསུམ་རྣམས་ལ་ཐུན་མོང་བ། །ཁྲོ་བོ་བདུད་རྩི་འཁྱིལ་པ་ཉིད། །བགེགས་ཀུན་རྣམ་པར་གཞོམ་པའི་ཕྱིར། །གསང་བ་པ་ཡི་བདག་པོས་གསུངས། །ལས་ནི་ཐམས་ཅད་པ་ཡི་སྔགས། །སྤྱི་བོར་རེག་ཅིང་བཟླས་དེ་ནས། །
བསང་གཏོར་ཡང་བྱ་དེ་ཉིད་ཀྱིས། །བདུག་པ་ཡིས་ཀྱང་བདུག་པར་བྱ། །དབང་བསྐུར་བ་ནི་བུམ་པ་བཅས། །འབྲུ་ལ་སོགས་པ་ཐམས་ཅད་ལྡན། །ཅུང་ཟད་ཅུང་ཟད་གང་དུ་བླུགས། །རིག་པའི་རྒྱལ་པོས་མངོན་པར་བསྔགས། །ཆོ་ག་བཞིན་དུ་ལྷག་གནས་བྱ། ། དྲི་ཡི་ཆུ་ཡིས་མཆོད་ཡོན་སྦྱིན། །མེ་ཏོག་ཀྱང་ནི་གཞུག་པར་བྱ། །བདུག་པ་ཡིས་ཀྱང་བདུག་པར་བྱ། །དབང་བསྐུར་བ་ནི་བུམ་པ་བཅས། །མཁས་པས་ཡང་དག་ཡོངས་སུ་བཟླས། །དེ་ཡིས་དབང་བསྐུར་བྱ་བ་ཡིན། །སླར་ཡང་བཟླས་པ་དཀྱིལ་འཁོར་དུ། །སློབ་མ་དམ་ཚིག་ཅན་རྣམས་ནི། །ཐལ་མོ་སྦྱར་ཞིང་མངོན་ཕྱོགས་ལ། །དེ་ནས་སོ་ཤིང་སྦྱིན་པར་བྱ། །སློབ་མ་རྣམས་ནི་གོ་རིམས་བཞིན། །གཟུང་ཞིང་ཤར་དུ་ཁ་བལྟས་ཏེ། །ཕྱི་རོལ་ཉིད་དུ་སོ་ཤིང་བཅའ། །མ་གས་པར་ནི་འཆོས་ནས་སུ། །ལོགས་མ་ཡིན་པར་འདོར་བྱ་སྟེ། །སོ་ཤིང་མདུན་དུ་དོར་བྱས་པ། །གང་ཚེ་མདུན་དུ་རྩེ་མོ་ལྷུང་། །དེ་ཚེ་དངོས་གྲུབ་མཆོག་ཤེས་བྱ། །གང་ཞིག་སྟེང་དུ་བལྟས་པ་ཡང་། །དེ་བཞིན་ཤར་དུ་རྩེ་མོ་བསྟན། །དངོས་གྲུབ་འབྲིང་དུ་ཡོངས་སུ་གྲགས། །བྱང་དུ་བསྟན་ན་ཐད་ཀ་ཉིད། །རིག་པའི་དངོས་གྲུབ་འཇིག་རྟེན་པ། ། སོ་ཤིང་དོར་བ་བརྒྱ་ལམ་ན། །གང་ཚེ་འོག་ཏུ་ཁ་བལྟས་པ། །དེ་ཚེས་འོག་དངོས་གྲུབ་ནི། །འབྱུང་བ་འདི་ལ་ཐེ་ཚོམ་མེད། །སློབ་མ་ཉེ་བར་རེག་པ་ནི། །སྔ་མ་བཞིན་དུ་གཟུང་བྱས་ལ། །ཐམས་ཅད་ལས་བྱེད་སྔགས་ཀྱིས་ནི། །བླ་མས་དྲི་བཟངས་ཆུ་སྦྱིན་ནོ། །རེ་རེ་ལ་ཡང་བཏུང་བའི་ཕྱིར། །ཁྱོར་བ་གསུམ་ནི་སྦྱིན་པར་བྱ། །དེ་ནས་བློ་ལྡན་ལངས་ནས་སུ། །འདི་དག་ཀུན་དུ་སྤྱད་པར་བྱ། །དེ་ནས་མཆོད་པ་ཡང་བྱས་ནས། །ལག་པས་སྤོས་ནི་བཏེག་ནས་སུ། །བློ་ལྡན་གུས་པས་ལྷ་རྣམས་ལ། །གསོལ་བ་གདབ་ཅིང་གུས་གནས་བྱ། །དང་པོར་སྔགས་ནི་སྙན་གསན་དབབ། །དེ་ཡི་དཀྱིལ་འཁོར་གང་ཡིན་པ། །དེ་ཡི་རིམ་པའི་སྦྱོར་བ་ཡིས། །ལྷ་རྣམས་སྤྱན་འདྲེན་པ་ཡིན་ནོ། །བཅོམ་ལྡན་ཆེ་གེ་མོ་ཞེས་བྱ། །རིག་པའི་རྒྱལ་པོ་ཁྱོད་ལ་འདུད། །སློབ་མ་རྣམས་ལ་བརྩེ་ཕྱིར་དང་། །ཁྱེད་རྣམས་ལ་ཡང་མཆོད་པའི་ཕྱིར། །ཉིད་ཀྱི་དཀྱིལ་
འཁོར་ཐུགས་རྗེ་ཡི། །བདག་ཉིད་ཀྱང་ནི་བྲི་བར་འཚལ། །བཅོམ་ལྡན་དེ་ནི་བདག་གུས་ལ། །བཀའ་དྲིན་མཛད་པར་རིགས་ལགས་སོ། །འཇིག་རྟེན་མགོན་པོ་བརྩེ་བ་ཅན། །སངས་རྒྱས་བྱང་ཆུབ་སེམས་དཔའ་དང་། །དགྲ་བཅོམ་གང་གཞན་སྔགས་ཀྱི་ལྷ། །ལྷ་དང་འཇིག་རྟེན་སྐྱོང་རྣམས་དང་། །འབྱུང་པོ་རྫུ་འཕྲུལ་ཆེ་གང་དང་། །སངས་རྒྱས་བསྟན་ལ་མངོན་དགའ་རྣམས། །བདག་ལ་ཡང་དག་དགོངས་སུ་གསོལ། །ཆེ་གེ་མོ་ཞེས་བྱ་བ་དང་། །ཆེ་གེ་མོ་ཡི་དཀྱིལ་འཁོར་ནི། །རང་ཉིད་འབྱུང་བ་བགྱིད་པར་འཚལ། །ཇི་ལྟར་གུས་པའི་ཉེར་སྤྱོད་ཀྱིས། །སློབ་མ་དང་བཅས་བདག་ལ་ནི། །རྗེས་སུ་བརྩེ་བ་ཉེར་བཟུང་ནས། །དཀྱིལ་འཁོར་དང་བཅས་ཐམས་ཅད་ནི། །ཉེ་བར་བྱོན་པར་མཛད་པར་རིགས། །དེ་སྐད་སྨྲས་ཏེ་ཚིག་གང་ཞིག །བཅོམ་ལྡན་འདས་ལ་ཕྱག་འཚལ་ནས། །བསྟོད་པའི་ཉེར་སྤྱོད་ཀྱང་བྱས་ནས། ། དེ་དག་གཤེགས་སུ་གསོལ་བར་བྱ། །ཆགས་བྲལ་སོ་སོར་ལྡན་པ་ཡི། །སློབ་མ་རྣམས་ལ་ཆོས་བཤད་བྱ། །བློ་ལྡན་ཤར་དུ་མགོ་བསྟན་ཏེ། །དགེ་བའི་གཉིད་ཀྱིས་ཉལ་དུ་གཞུག །དེ་ནས་སྔ་དྲོ་ཉིད་དུ་ནི། །མཚན་མོའི་རྨི་ལམ་མཐོང་བ་དྲི། །གང་ཚེ་དགེ་བའམ་མི་དགེ་བ། ། དོགས་མེད་ཉིན་པར་ཐོས་ནས་སུ། །སངས་རྒྱས་རྡོ་རྗེ་འཛིན་པས་ནི། །རིགས་བདུན་རྣམས་ཀྱི་དམ་ཚིག་བསྐྱང་། །དེ་ནས་བུ་ཁྱོད་དམ་ཚིག་དང་། །སྡོམ་པ་རྒྱལ་བ་ཡིས་གསུངས་པ། །དད་པས་བླ་མའི་བཀའ་ཡང་བསྐྱང་། །ཁྱེད་ཀྱིས་སྲོག་ཆགས་གསད་མི་བྱ། །མ་བྱིན་མི་བླང་འདོད་ལོག་དང་། །དངོས་གྲུབ་འདོད་པས་མི་བྱའོ། །ཆང་མི་བཏུང་ཞིང་ཤ་ལ་སོགས། །བཟའ་བ་ནམ་ཡང་མ་ཡིན་ཉིད། །སེམས་ཅན་ཀུན་ལ་གནོད་མི་བྱ། །དཀོན་མཆོག་གསུམ་ཡང་མི་སྤང་ཞིང་། །དུས་རྣམས་ཀུན་དུ་བྱང་ཆུབ་སེམས། །སྙིང་པོ་སྔགས་དང་ཕྱག་རྒྱ་དང་། །བླ་མ་ལྷ་རྣམས་དེ་བཞིན་ཉིད། །བླ་མའི་བཀའ་ལས་འདའ་མི་བྱ། །གང་ལས་སྡིག་འགྱུར་དེ་ལས་འདའ། །དེ་ལ་ཕུལ་བའི་རྙིང་པ་དང་། །གྲིབ་མ་ལ་ཡང་འགོམ་མི་བྱ། །ཕྱག་རྒྱའི་རྣམ་པའང་དེ་བཞིན་ཉིད། །སྔགས་དང་ལྷ་ལ་མི་སྨད་ཅིང་། །གདོན་གྱི་ལས་རྣམས་མི་བྱའོ། །
མུ་སྟེགས་པ་ཡང་སྨད་མི་བྱ། །མདོར་ན་བདག་ཉིད་ཐེ་ཚོམ་དང་། །སོམ་ཉི་ཡིད་གཉིས་མི་བྱ་སྟེ། །རྒྱུད་དང་ལྷ་སོགས་ལ་དེ་བཞིན། །དད་པ་བརྟན་པས་དམ་བཅས་ནས། །སརྦ་བིད་ཀྱིས་དབང་དེ་བཞིན། །བུམ་པ་ལ་སོགས་མཆོག་རྣམས་ཀྱིས། །དབང་བསྐུར་བཅུ་པོ་འདོད་ཇི་བཞིན། །དེ་ནས་ལག་ཏུ་རྡོ་རྗེ་དང་། །དྲིལ་བུ་སྦྱིན་བྱ་དེ་རྗེས་ལ། །འཁོར་ལོ་ལ་སོགས་རིན་ཆེན་བདུན། །བཟུང་ནས་འཁོར་ལོས་སྒྱུར་བ་ཡི། །རྒྱལ་པོ་དབང་ཕྱུག་ཐོབ་ཕྱིར་དང་། །སྡིག་པ་གཞོམ་ཕྱིར་དབང་བསྐུར་ཞིང་། །སྔགས་བསྒྲུབ་འདོད་པའི་སློབ་མ་ལ། །རྗེས་སུ་གནང་བ་ཉན་དུ་གཞུག །དེ་ནས་བསྟོད་པས་མགོ་བོ་ཡིས། །ཕྱག་འཚལ་ཇི་ལྟར་འདོད་པའི་རྫས། །བླ་མ་ལ་ནི་དབུལ་བྱ་སྟེ། །རིན་ཆེན་གཏེར་དང་འབྲུ་དང་དབྱིག །གསེར་དང་བཞོན་པ་ཁྱིམ་དང་གདན། །བུ་དང་བུ་མོ་སྐྱེས་པ་དང་། །བུད་མེད་རྣམས་ནི་དབུལ་བྱ་ཞིང་། །གྲོང་དང་གྲང་ཁྱེར་ཅི་བཞེད་རྣམས། །རང་གི་སེམས་ནི་རབ་དང་བས། །ཡོན་རྣམས་ངེས་པར་དབུལ་བྱ་ཞིང་། །དངོས་གྲུབ་མྱུར་ཕྱིར་བླ་མ་ལ། །མདོར་ན་བདག་ཉིད་ཀྱང་འབུལ་བྱ། །ཚེ་འདིའི་བདེ་བ་མ་ལུས་དང་། །འཇིག་རྟེན་ཕ་རོལ་བདེ་བའི་མཆོག །སངས་རྒྱས་ཉིད་ཀྱང་འཐོབ་འགྱུར་ཏེ། །ལྷ་ཡི་བདེ་བ་ལྟ་ཅི་སྨས། །བླ་མ་སངས་རྒྱས་ཀུན་དང་མཉམ། །རྡོ་རྗེ་སློབ་དཔོན་སྨོད་པ་གང་། །དེ་ཡིས་རྟག་ཏུ་སྡུག་བསྔལ་འཐོབ། །དེ་ཕྱིར་སློབ་དཔོན་སྨད་མི་བྱ། །རྡོ་རྗེ་སྤུན་དང་སྲིང་མོ་དང་། །གང་ཡང་སྨད་པར་མི་བྱ་ཞིང་། །ཁོན་པར་ཡང་ནི་མི་བྱའོ། །དཀོན་མཆོག་གསུམ་ལ་གནོད་བྱེད་དང་། །བླ་མ་སྨོད་བྱེད་མ་རུངས་རྣམས། །དམ་ཚིག་འདས་ལ་བཟོད་མི་བྱ། །དེ་ལྟ་བུ་སོགས་གནོད་བྱེད་ལའང་། །དེ་ལྟ་ཉིད་དོ་དེ་བྱས་ན། །ཀུན་རིག་གིས་གསུངས་དངོས་གྲུབ་འཐོབ། །སེམས་ཅན་ཀུན་ལ་རྗེས་བརྩེ་བས། །དངོས་གྲུབ་མྱུར་དུ་འབྱུང་བ་འཐོབ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་དང་། ལྷ་དང་བཅས་པའི་འཇིག་རྟེན་ལ་ཕན་པ་དང་བདེ་བའི་དོན་དུ་སྒྲུབ་པའི་ཆོ་ག་གསུངས་ཏེ། །བྲི་གཞི་ལ་བཅོམ་ལྡན་འདས་ཐམས་ཅད་རིག་པ་དེ་ཁོ་ན་བཞིན་དུ་བྲི་ཞིང་གཡས་སུ་དེ་བཞིན་གཤེགས་པ་ངན་
སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་དང་། གཡོན་དུ་ཤཱཀྱ་ཐུབ་པ་དང་། ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོའི་འོག་ཏུ་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་ཟླ་བ་ལྟ་བུ་ཕྱག་ན་པདྨ་ཅན་དང་། ཤཱཀྱ་ཐུབ་པའི་འོག་ན་ཕྱག་ན་རྡོ་རྗེ་དང་། དེ་དག་གི་དབུས་སུ་སྨན་པའི་རྒྱལ་པོ་ཕྱག་གཅིག་གིས་ཨ་རུ་རའི་འབྲས་བུ་བསྣམས་ཤིང་དེ་ལས་གཞན་ནི་མཆོག་སྦྱིན་དུ་བྱའོ། །རྟ་མགྲིན་དང་འཇིག་རྟེན་གསུམ་ལས་རྣམ་པར་རྒྱལ་བ་མ་རུངས་པ་འཇོམས་པ་ལ་བརྩོན་པ་དག་ནི་རང་གི་ལྷ་ལ་མངོན་པར་ཕྱོགས་པར་བྲི་ཞིང་དེ་དག་གི་དབུས་སུ་ལོ་ཙ་ནཱ་དང་། །མཱ་མ་ཀཱི་དང་། གོས་དཀར་མོ་དང་། སྒྲོལ་མ་དག་ཕྱག་ན་རང་གི་མཚན་མ་ཅན་བྲིའོ། །དེ་རྣམས་ཀྱི་འོག་ཏུ་རྫིང་བུ་ཆུ་སྲིན་དང་། ཉ་དང་། རུས་སྦལ་དང་། སྦལ་པ་དཀར་པོ་ལ་སོགས་པ་དང་བཅས་པ་དང་ཆུ་ལས་སྐྱེས་པའི་མེ་ཏོག་དུ་མས་ཡོངས་སུ་གང་བར་བྲི་ཞིང་བདུག་པ་དང་། མར་མེ་དང་། དྲི་དང་། ཕྲེང་བ་དང་། ཞལ་ཟས་དང་། མེ་ཏོག་དང་། འབྲས་བུ་རྣམ་པ་སྣ་ཚོགས་པ་བྲི་བར་བྱའོ། །འོག་ཉིད་དུ་སྒྲུབ་པ་པོ་ཐལ་མོ་སྦྱར་ཏེ་རབ་ཏུ་འདུག་ཅིང་འདུད་པར་བྲིའོ། །དེ་ནས་དེ་རྫོགས་པ་ལ་བྱིན་གྱིས་བརླབ་པ་དམིགས་པར་བྱ་སྟེ། སྤྱན་དབྱེ་བ་བྱས་ནས་མཆོད་པས་མཆོད་པར་བྱའོ། །དེ་ནས་གལ་ཏེ་མཚན་མ་མཐོང་ན་མྱུར་དུ་འགྲུབ་བོ། །གལ་ཏེ་མ་མཐོང་ན་རིང་མོ་ཞིག་ན་འགྲུབ་པའོ། །བཞད་པ་དང་ནི་རྔ་སྒྲ་དང་། །དྲིལ་བུའི་སྒྲ་དང་འབྲུག་སྒྲ་ཉིད། །དགེ་སློང་བྲམ་ཟེ་བུ་མོ་དང་། །འབྲས་བུ་མཐོང་ན་དངོས་གྲུབ་ནི། །མཆོག་འབྲིང་ཐ་མ་མྱུར་དུ་འགྲུབ། །དེ་ནས་སྐུ་གཟུགས་ཕྱག་རྒྱ་དང་། །སྔགས་རྣམས་ཀྱིས་ནི་བྱིན་གྱིས་བརླབ། །ཇི་ལྟར་བསྐྱེད་པས་ཐོབ་བྱ་ཞིང་། །འཇིག་རྟེན་གསུམ་ནི་རྣམ་རྒྱལ་གྱིས། །བདག་བསྲུང་ལ་སོགས་བྱས་ནས་སུ། །བདག་གི་དེ་ཉིད་ཀྱང་བསྒོམས་ནས། །ཇི་སྲིད་དངོས་གྲུབ་རྟགས་འབྱུང་བ། །འབུམ་ཕྲག་གསུམ་མམ་དྲུག་འབུམ་བཟླས། །དེ་ནས་དབེན་པའི་གནས་སུ་ནི། །སྔགས་ཀྱང་ཆད་ལྷག་བསྐང་བྱ་སྟེ། །བརྒྱ་ཕྲག་བརྒྱད་རྣམས་བཟླས་པར་བྱ། །དེ་ནས་བཟླས་པ་དེ་ཡི་མཐར། །དཀྱིལ་འཁོར་སྔ་མ་བཞིན་བསམས་ལ། །མཆོད་པ་རྒྱ་ཆེན་ཡང་བྱས་ནས། །
མཚན་མོ་གཅིག་ནི་བཟླས་པར་བྱ། །དེ་ནས་གལ་ཏེ་གཙོ་བོ་འམ། སྲས་སམ་ལྷ་རྣམས་མཐོང་གྱུར་ན། །དེ་ཚེ་སྣོད་འདོད་ཇི་ལྟ་བར། །དངོས་གྲུབ་མཆོག་ནི་གསོལ་བ་གདབ། །ལྷ་རྣམས་རྟག་ཏུ་དགྱེས་པ་ཡིས། །དངོས་གྲུབ་འབྲས་བུ་དེ་ལ་སྩོལ། །ཕྱག་བྱས་ནས་ནི་དངོས་གྲུབ་ནི། །མཆོག་ལ་སོགས་པ་བླང་བར་བྱ། །བླ་མ་དཀོན་མཆོག་གསུམ་པོ་ལ། །རང་རང་སྐལ་བ་ཕུལ་ནས་སུ། །དེ་ནས་རྟག་ཏུ་བདག་ཉིད་སྤྱད། །དེ་རྣམས་མེད་ན་ཤེས་རབ་ཅན། །བླངས་ནས་རང་ཉིད་སྤྱད་པར་བྱ། །སེམས་ཅན་ཀུན་ལ་ཕན་བརྩོན་ཞིང་། །བསྐལ་པ་དུ་མར་གནས་པར་འགྱུར། །ལེགས་པར་བསྒྲུབས་ན་ཐམས་ཅད་བྱེད། །གནོད་སྦྱིན་རྒྱུ་སྐར་གདོང་ལ་སོགས། །ཚིག་ཙམ་གྱིས་ནི་བྲན་བཞིན་དུ། །ཞི་བའི་ལས་ལ་སོགས་པ་ནི། །ཐམས་ཅད་བྱེད་པར་འགྱུར་བ་ཡིན། །དེ་ནས་བཅོམ་ལྡན་འདས་ལ་ལྷའི་དབང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་སྡིག་པ་བགྱིས་པ་དམྱལ་བ་ལ་སོགས་པའི་དབང་དུ་གྱུར་པ་རྣམས་ཀྱིས་དམྱལ་བ་ལ་སོགས་པའི་སྡུག་བསྔལ་རབ་ཏུ་སྤང་བའི་ཕྱིར་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་དམྱལ་བ་ལ་སོགས་པའི་དབང་དུ་གྱུར་པའི་སེམས་ཅན་སྡིག་པ་ཆེན་པོ་བྱེད་པ་དེ་རྣམས་དམྱལ་བ་ལ་སོགས་པའི་སྡུག་བསྔལ་རྣམས་ལས་ཚེགས་མེད་པར་གྲོལ་བར་འགྱུར་བ་དེ་བཞིན་དུ་ཉོན་ཅིག །དེ་བཞིན་དཀྱིལ་འཁོར་བྲིས་ནས་ནི། །བརྒྱ་རྩ་བརྒྱད་ནི་བཟླས་པ་ཡི། །བུམ་པ་རྣམས་ཀྱིས་སྔ་མ་བཞིན། ། དབང་བསྐུར་བ་ནི་བརྟག་པར་བྱ། །དེ་ནས་སྔོན་གྱི་སྡིག་བྱང་ཞིང་། །དམྱལ་བ་ལ་སོགས་སྡུག་བསྔལ་ནི། །ཀུན་ལས་མྱུར་དུ་རྣམ་གྲོལ་འགྱུར། །སྡིག་ལས་རྣམ་གྲོལ་བདག་ཉིད་ཆེ། །དེ་ཡང་གནས་གཙང་ལྷར་སྐྱེས་ནས། །རྟག་ཏུ་སངས་རྒྱས་ཆོས་བགྲོ་ཐོས། །ཕྱིར་མི་བཟློག་པའི་ས་ལ་གནས། །རིམ་གྱིས་བྱང་ཆུབ་མངོན་སུམ་བྱེད། །དེ་ཡི་གཟུགས་བརྙན་དང་ནི་མིང་། །གུར་གུམ་གྱིས་ནི་བྲིས་ནས་སུ། །ངན་སོང་གསུམ་གྱི་འཇིག་ཆེན་ལས། །སེམས་ཅན་རྣམས་ནི་ཐར་བའི་ཕྱིར། །སྔགས་པ་གཞན་ལ་ཕན་བརྩོན་ཞིང་། །བརྩེ་བས་མངོན་པར་
དབང་བསྐུར་རོ། །དེ་ནས་རྣལ་འབྱོར་ཅན་གྱིས་ནི། །སྔགས་དང་ཕྱག་རྒྱས་དབང་བསྐུར་ཏེ། །ལྷ་ཡི་གཟུགས་སུ་བརྟགས་ནས་སུ། །མཆོད་རྟེན་དབུས་སུ་གཞག་པར་བྱ། །རང་གཞན་ལྷ་ཡི་སྙིང་པོ་ནི། །སྙིང་ག་དེ་ཡི་ཕྱོགས་བྲིས་ནས། །ལྷ་མཉམ་པར་ནི་སེམས་བསྐྱེད་དེ། །ཁྱིམ་དུ་ཡང་ནི་གཞག་པར་བྱ། །དེ་ཡི་མིང་དང་སྤེལ་བའི་སྔགས། །གུར་གུམ་བཟང་པོས་བྲིས་ནས་ནི། །འབུམ་ནི་ཡོངས་སུ་རྫོགས་པར་བྱ། །མཆོད་རྟེན་ལས་ནི་རབ་ཏུ་བྱ། །སྡིག་ཆེན་སྡིག་ནི་ཟད་བྱའི་ཕྱིར། །བྱེ་བ་ཡང་ནི་རྫོགས་པར་བྱ། །དེ་ལྟར་བྱས་ན་དེ་ངེས་པར། །དམྱལ་བ་ལས་ནི་གྲོལ་བར་འགྱུར། །དེ་བཞིན་ཡི་དགས་བྱོལ་སོང་ལས། །གྲོལ་ཏེ་ལྷ་རིགས་རྣམས་སུ་སྐྱེས། །དེ་ཡི་མིང་དང་སྤེལ་ནས་ནི། །ཇི་ལྟར་གསུངས་པའི་སྔགས་སྟོང་བཟླས། །གལ་ཏེ་བརྒྱ་ཕྲག་སྟོང་ཡང་ཚང་། །བྱེ་བའི་བར་དུ་རྫོགས་པར་བྱ། །ལྷ་རིགས་རྣམས་སུ་སྐྱེ་བར་འགྱུར། །དེ་ཡི་མིང་ནས་སྤེལ་བ་ཡི། །མཁས་པས་འབུམ་ཕྲག་བརྒྱའམ་ནི། །ཡང་ན་བརྒྱ་ཕྲག་སྟོང་སྙེད་དུ། །སྦྱིན་སྲེག་བྱས་ན་དམྱལ་བ་ནི། །ཆེན་པོའི་སྡིག་པ་ལས་གྲོལ་འགྱུར། །ཇི་སྲིད་མཚན་མ་འབར་བ་ཡི། །གནས་སུ་ཡང་དག་སྐྱེ་བར་འགྱུར། །ཡུངས་ཀར་དཀར་པོའི་ཏིལ་དང་འབྲས། །ར་ཡི་འོ་མ་ཡང་དག་ལྡན། །དེ་བསྐུས་ཡམ་ཤིང་དེ་སྲིད་དུ། །ཆོ་གི་ཇི་བཞིན་སྦྱིན་སྲེག་བྱ། །དེ་ནས་དེ་ནི་ངེས་པར་ཡང་། །ལྷ་རིགས་རྣམས་སུ་སྐྱེས་པ་ཡི། །མཚན་མ་ཉེ་བར་མཐོང་བར་འགྱུར། ། གལ་ཏེ་ལྷ་ཡི་མཆོག་སྐྱེས་དང་། །ཡང་ན་ཐབ་ཁུང་ནང་དུ་ནི། །དཀར་པོ་གཡས་བསྐོར་འབར་བ་དང་། །གྱེན་དུ་འགྲེང་ཞིང་དྲི་མ་མེད། །འཕྲོ་བ་བསྡོམས་བཞིན་འབར་བ་དང་། །གློག་བཞིན་དྲི་མ་མེད་འོད་བརྟན། །མེ་རྟགས་འདི་རྣམས་མཐོང་བར་འགྱུར། །ཡང་ན་མེ་ལྷ་བདག་ཉིད་ནི། །དེ་བཞིན་ཁོ་ནར་སྟོན་འགྱུར་ཏེ། །ཟླ་བ་བཞིན་དུ་དྲི་མ་མེད། །དཀར་པོ་བཞིན་དུ་འབར་བའོ། །མཚན་མ་འདི་དག་མཐོང་བ་ལ། །དེ་ནས་དམྱལ་སོགས་རྣམ་གྲོལ་ཞིང་། །སྡིག་པ་བཅོམ་ནས་བདེ་འགྲོར་ནི། །སྐྱེས་པ་ཡིན་པར་ཤེས་པར་བྱ། །ཁྲུ་བཞི་པ་ཡི་ཚད་
དུ་ནི། །ཆོ་ག་ཇི་བཞིན་ཐབ་ཁུང་རྐོ། །རྡོ་རྗེས་མཐའ་མ་བསྐོར་བ་ཡི། །འཁོར་ལོ་དབུས་སུ་བྲི་བར་བྱ། །རིགས་ལྔ་ཡི་ནི་ཕྱག་རྒྱ་རྣམས། །ཇི་བཞིན་རང་གི་ཕྱོགས་སུ་བྲི། །ཇི་བཞིན་སེམས་དཔའ་རྣམས་དང་ནི། །འཇིག་རྟེན་ལ་སོགས་ཕྱི་ནས་བྲི། །དེ་ནས་བུམ་པ་གང་བ་དང་། །གཏོར་མས་སྣོད་རྣམས་བཀང་བ་ནི། །བརྒྱད་དམ་བཅུ་དྲུག་དག་ཏུ་གཞག །བཟའ་དང་བཅའ་བ་ཞལ་ཟས་དང་། །མེ་ཏོག་ཕྲེང་སོགས་དེ་བཞིན་ཏེ། །བླ་རེ་རྒྱལ་མཚན་དར་ལ་སོགས། །གདུགས་མཆོག་རྣམས་ཀྱིས་ལེགས་པར་བརྒྱན། །དེ་ལྟར་སྦྱིན་སྲེག་ཐབ་ཁུང་ནི། །མཆོག་ཏུ་ཡང་དག་སྦྱིན་སྲེག་བྱ། །ཆོ་ག་ཤེས་པས་དེ་བྲིས་ནས། །ལྷ་ཡི་ཚོགས་ནི་སྤྱན་དྲངས་ཏེ། །སྔགས་ཤེས་པས་སྔགས་ཕྱག་རྒྱ་ཡིས། །ཨརྒྷ་ལ་སོགས་ཕུལ་ནས་ནི། །མདོར་བསྡུས་མཆོད་པ་བྱས་ནས་སུ། ། ལྷ་ཡི་སྦྱོར་བས་རབ་གནས་ལ། །ག་པུར་གུར་གུམ་ལ་སོགས་པས། །མར་དང་འོ་མ་ཏིལ་བསྒོས་ལ། །ཏིལ་དང་ཡུངས་ཀར་འབྲས་རྣམས་དང་། །དྲི་ཡི་ཆུས་ནི་ལེགས་བཀང་སྟེ། །འབྲས་ཆན་སྤོས་དང་ལ་དུ་དང་། །སྦྲང་རྩི་ཤ་ཀ་རར་ལྡན་ལ། །བརྒྱ་ཕྲག་དུ་མར་ཡོངས་སུ་བཟླས། །ཡམ་ཤིང་ལ་ཡང་དེ་བཞིན་ཏེ། །རང་གིས་སྔགས་ཀྱིས་བཏབ་པའི་ཤིང་། །ཁུང་བུའི་ནང་དུ་གཞག་པར་བྱ། །ལྷ་དང་ཀླུ་དང་གནོད་སྦྱིན་དང་། །དྲི་ཟ་ལ་སོགས་སུ་གནས་པའི། །རོ་ལ་སྔགས་ཀྱིས་བཏབ་ནས་སུ། །ཆུ་མཆོག་གིས་ནི་བཀྲུས་ནས་ནི། །སྔགས་བཟླས་དྲི་ཡིས་བྱུག་པར་བྱ། །གོས་དང་རྒྱན་གྱིས་བརྒྱན་བྱ་ཞིང་། །སྔགས་ཀྱིས་བཏབ་པའི་བདུག་པས་བདུག །མེ་ཏོག་ཕྲེང་བ་ལ་སོགས་མཆོད། །གཙུག་ཕུད་དཔུང་པར་དེ་བཞིན་དུ། །སྔགས་བྲིས་ནས་ནི་གདགས་པར་བྱ། །སྙིང་ག་མགྲིན་པ་ཁ་ཕྱོགས་སུ། །སརྦ་བིདྱཱས་བྱིན་གྱིས་བརླབས། །དཔྲལ་བ་མཛོད་སྤུ་རྣ་བ་གཉིས། །མགོ་བོ་སྤྱི་གཙུག་དཔུང་པ་གཉིས། །རྣ་བ་དཀུ་དང་པུས་མོ་བོལ། །སྣ་ཡི་རྩེ་མོ་ལོང་བུ་དང་། །མིག་གཉིས་དང་ནི་གསང་བ་ཡི། །དབང་པོ་རྣམས་ཀྱི་གནས་དང་ནི། །དེ་ལྟར་གཞན་དུའང་གནས་ཡི་གེ། །མཆོག་ཏུ་དགེ་བ་དེ་དག་གཞག །དེ་དག་ངན་སོང་ཡོངས་སྦྱང་ཕྱིར། །སྟན་དང་བཅས་ཏེ་ཐེབ་དབུས་གཞག །དེ་ནས་སྔགས་པས་
སྔགས་ཀྱིས་ནི། །མངོན་པར་བསྔགས་པའི་གོས་ཀྱིས་གཡོགས། །དེ་ནས་བྱིན་ཟ་ཡང་དག་རབ་སྦར་ལ། །མེ་ལྕེ་སྟོང་གིས་དཀྲིགས་ཤིང་འབར་བའི་ལུས། །ཟླ་བ་ཀུནྡ་བཞིན་དུ་ཞི་བའི་ཡིད། །དཔག་མེད་ཀུན་ལ་མཆོད་ཡོན་ཡོངས་སུ་བརྟག །དེ་བཞིན་ཇི་ལྟར་གསུངས་བའི་མཆོད་པ་བྱ། །དེ་ནས་དང་བོ་དེ་ཡི་སྤྱིན་སྲེག་ནི། །རྫོགས་པར་བྱས་ཤིང་འབར་བ་ཉིད་ལ་ནི། །ཡོངས་བརྟགས་ནས་ནི་རྒྱལ་བ་ལས། །སོགས་པ་རྣམས་ཀྱི་བརྒྱད་ནི་ལྷག་པ་དང་། །བཅས་པའི་བརྒྱ་ནི་ཡོངས་སུ་བརྟག་པར་བྱ། །དེ་ནས་སྦྱོང་བའི་སྔགས་ཀྱི་རྒྱལ་པོ་ཡི། །བསྲེག་བྱ་ཉི་ཤུ་རྩ་གཅིག་ཡོངས་སུ་བརྟག །དེ་ནས་ཞལ་རས་དཀར་པོ་སྤྱན་དྲངས་ལ། ། ཡོ་བྱད་རྣམས་སམ་མཆོད་ཡོན་སོགས་གསུམ་མཆོད། །ཕྱག་ན་རྡོ་རྗེ་པདྨ་ཞགས་པ་བསྣམས། །རྒྱན་རྣམས་ཐམས་ཅད་ཀྱིས་ནི་རབ་བརྒྱན་ཅིང་། །རྫོགས་པའི་སངས་རྒྱས་ཉིད་ཀྱི་དབུ་རྒྱན་ཅན། །བསམ་པར་བྱ་ཞིང་ཡང་དག་བྲི་བར་བྱ། །དེ་ཡི་སྙིང་པོ་བརྒྱ་ཕྲག་སྟོང་ངམ་ནི། ། ཇི་སྲིད་བྱེ་བའི་བར་དུ་སྦྱིན་སྲེག་བྱ། །ཡང་ན་མཚན་མ་ཡང་དག་བྱུང་ན་ནི། །དེ་བཞིན་སྡིག་རྒྱུན་སྤངས་པར་ཤེས་པར་བྱ། །དེ་ནས་ཐལ་བར་འགྱུར་བ་ཆོ་ག་བཞིན། །རྡོ་རྗེ་བསྡུ་བས་ཐལ་བ་རུས་པ་བསྡུ། །རྡོ་རྗེ་བདུད་རྩིའི་དྲི་ཆུ་དང་། །བ་ཡི་རྣམ་ལྔ་དང་བཅས་ལ། །སྦྱོང་བའི་སྔགས་ནི་འབུམ་བཟླས་ཏེ། །གོང་བུ་བྱས་ནས་ག་པུར་དྲིར། །ས་དང་ལེགས་པར་བསྲེས་བྱས་ལ། །སྐུ་གཟུགས་མཆོད་རྟེན་ལྷར་བསམ་ཞིང་། །ལན་གཅིག་གཉིས་གསུམ་བཞི་ལྔའམ། །ཡང་ན་ལན་གྲངས་བརྒྱ་རྩ་བརྒྱད། །སྔགས་དང་ཕྱག་རྒྱས་བྱིན་བརླབས་ལ། །འབུམ་ཕྲག་གཉསི་ནི་བཟླས་པར་བྱ། །དེ་ནས་མཆོད་རྟེན་འབར་གྱུར་ཏམ། །ཡང་ན་སྐུ་གཟུགས་ཞལ་འཛུམ་མམ། །དྲི་སྤོས་ངད་ལྡན་འོད་སྣང་ངམ། །ལྷ་ལ་སོགས་པ་སྣ་ཚོགས་པ། །རྫུ་འཕྲུལ་རྣམ་པར་འཕྲུལ་པ་དང་། །མེ་ཏོག་ལ་སོགས་འདོར་བ་དང་། །དུང་དང་རྔ་དང་གླིང་བུ་དང་། །པི་བང་ལ་སོགས་སྒྲ་ཐོས་འགྱུར། །གལ་ཏེ་ལྷ་ཡི་མཚན་མ་དེ། །སྡིག་མང་ཉིད་ཀྱིས་མ་མཐོང་པ། །དེ་ཚེ་འབུམ་ཕྲག་བརྒྱ་སྟོང་བཟླས། །ཇི་སྲིད་མཚན་མ་བྱུང་བར་དུ། །དེ་བཞིན་གཤེགས་པ་མཆོད་ནས་ནི། །མཉམ་པར་གཞག་པས་བཟླས་པར་བྱ། །དེ་མཐར་ཆོ་ག་ཤེས་པ་ཡིས། །མཚན་གཅིག་
ཐོག་ཐག་མི་ཉལ་བཟླས། །དེ་ནས་དེ་ཡི་སྡིག་པ་ནི། །རྣམ་དག་བདག་ཉིད་ངེས་པར་མཐོང་། །ལྷ་ཡི་ལུས་ཀྱིས་གཟུགས་དང་ནི། །དེ་ཡི་རྒྱུད་དུ་ངོ་ཤེས་འགྱུར། །མཚན་མ་འདི་དག་ཤེས་ནས་སུ། །རྣམ་པར་མི་རྟོག་སེམས་ཀྱིས་ནི། །བྱམས་དང་སྙིང་རྗེ་ལྡན་པ་ཡིས། །ལས་རྣམས་ཐམས་ཅད་རབ་ཏུ་བྱ། །གལ་ཏེ་དེ་ཡང་མེད་གྱུར་ན། །དེ་ཚེ་བཟླས་བསྒོམ་ཚུལ་གྱིས་བྱ། །དེ་ཡི་མིང་ཙམ་བྲིས་ནས་སུ། །མཆོད་རྟེན་ཕྲེང་བ་བྱ་བ་དང་། །སྐུ་གཟུགས་ཀྱང་ནི་བྱས་ནས་སུ། །སྦྱིན་སྲེག་དབང་བསྐུར་བྱས་གྱུར་ན། །གདོན་མི་ཟ་བར་བདེ་འགྲོར་སྐྱེ། །ཐལ་བ་ཡུངས་ཀར་བྱེ་མ་སོགས། །མིང་སྤེལ་སྔགས་ནི་མངོན་བཏབ་ནས། །རྒྱ་མཚོར་འབབ་པའི་ཆུ་ཀླུང་དོར། །དེ་ལྟར་བྱས་ན་སྡིག་པ་ཅན། །ཡིན་ཡང་ངན་སོང་རྣམས་ལས་ནི། །རྣམ་པར་ཐར་བར་གྱུར་ནས་ཀྱང་། །དགེ་བ་མཆོག་གི་ས་བོན་ནི། ། བསྐྱེད་དང་ལྡན་པས་སངས་རྒྱས་ཉིད། །འབྲས་བུར་ཡང་དག་ལྡན་པ་ཡི། །སྦྱིན་པ་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་ཤེས་རབ་རྒྱུ། །རབ་ཏུ་བསྒོམས་པའི་བསོད་ནམས་ལྡན། །འཇིག་རྟེན་ངན་སོང་བཅོམ་པ་ནི། །འདི་ལྟར་ལྷ་ཡང་ཅི་ཞིག་སྨོས། །འདི་ལ་ཐེ་ཚོམ་མེད་པ་ཡིན། །གང་ཡང་དགེ་བའི་རྩ་བ་མ་བསྐྱེད་པ་དང་། གང་ཡང་མེད་པའི་ལྟ་བ་ཅན་དང་། གང་བྱང་ཆུབ་ཀྱི་ལམ་ལས་རྣམ་པར་འདས་པས་བསྟན་པ་ལ་ཞེ་སྡང་གི་གནོད་པ་བྱེད་པ་དང་། སྡིག་པའི་རང་བཞིན་མི་ཤེས་པ་ཕ་དང་མ་ལ་སེམས་མི་བརྩེ་བ་དང་། བྱང་ཆུབ་ཀྱི་སེམས་ལ་མི་བརྟེན་པ་དང་། །འདོད་ཆགས་དང་བྲལ་བ་བསད་པ་དང་། ལྷ་དང་། སངས་རྒྱས་དང་། ཆོས་དང་། དགེ་འདུན་དང་། སྔགས་དང་། ཕྱག་རྒྱའི་ཚོགས་ལ་སོགས་པ་རྣམས་ལ་མེད་པ་ཉིད་དུ་ལྟ་བ་ལ་སོགས་པའི་སྡིག་པ་ཅན་རྣམས་ལ་དེ་ལྟ་བུའི་ཤེས་རབ་དང་ཐབས་མེད་ན་གྲོལ་བ་མེད་དོ་ཞེས་པ། བདེ་བར་གཤེགས་པ་རྒྱལ་བ་རྣམས་ཀྱིས་གསུངས་སོ། །དེ་ནས་བརྒྱ་བྱིན་ལ་སོགས་པ་སྤྱན་པདྨ་རྒྱས་པ་རྣམས་ལེགས་སོ་ཞེས་བྱ་བས་མཉེས་པར་མཛད་དོ། །མཉེས་པར་མཛད་ནས་མཆོད་པ་མཛད་དོ། །བརྒྱ་བྱིན་གཞན་ལ་ཕན་པར་བརྩོན་པས་ཀྱང་ཇི་ལྟར་བཀའ་སྩལ་པ་
བཞིན་དུ་བྱས་སོ། །འབྲས་བུ་དེ་བཞིན་དུ་ཐོབ་པར་གྱུར་ཏོ། །དབང་ལྡན་དུ་མགྲིན་པ་སྔོན་པོ་གླང་ཁྱུ་མཆོག་ལ་ཞོན་པ། སྐུ་མདོག་དཀར་པོ་ཕྱག་བཞི་པ། གཡས་པའི་དང་པོ་དང་གཉིས་པ་རྡོ་རྗེ་རྩེ་གསུམ་པ་དང་མཆོག་སྦྱིན་དུ་བཅས་པ། གཡོན་པའི་གཅིག་གིས་རྩེ་གསུམ་པ་འཛིན་ཅིང་གཉིས་པས་རལ་གྲི་འཛིན་པ་སྦྲུལ་གྱི་མཆོད་ཕྱིར་ཐོགས་པ་ཅན་བྲིས་ཏེ། ཨོྃ་པ་ཤུ་པ་ཏི་ནཱི་ལ་ཀཎྜ་ཨུ་མཱ་པྲཱི་ཡ་སྭཱ་ཧཱ་ཞེས་པ་འདིས་སོ། །དེ་ནས་ཕྱག་རྒྱ་འདི་ཡིན་ཏེ། ལག་པ་རྡོ་རྗེ་ཁུ་ཚུར་བྱས་ལ་མཐེའུ་ཆུང་མཐེ་བོང་གིས་མནན་ཏེ་སོར་མོ་ལྷག་མ་རྣམས་རྡོ་རྗེའི་མཚན་ཉིད་དུ་བྱས་ཤིང་མིང་མེད་དང་མཛུབ་མོའང་རྡོ་རྗེའི་རྣམ་པར་ཅུང་ཟད་འདུད་པར་བྱའོ། །འདི་ནི་ཕྱུགས་བདག་གི་ཕྱག་རྒྱའོ། །ཁྱབ་འཇུག་ཁྱུང་ལ་ཞོན་པ། མདོག་ནག་པོ་ཕྱག་བཞི་པ། ཕྱག་གཡས་པ་དག་ན་དབྱུག་ཏོ་དང་རྡོ་རྗེ་འཛིན་ཅིང་། གཡོན་པ་དག་ན་དུང་དང་འཁོར་ལོ་འཛིན་པའོ། །གསེར་གྱི་རྡོ་རྗེ་མ་ཁྱབ་འཇུག་ལྟ་བུ་གསེར་གྱི་མདོག་ཅན་དུ་ཤེས་པར་བྱའོ། །རྡོ་རྗེ་དྲིལ་བུ་མ་རྨ་བྱ་ལ་ཞོན་པ། ཞལ་དྲུག་པ། དམར་པོ་གཡས་པ་དག་ན་ཤཀྟི་དང་རྡོ་རྗེ། གཡོན་པ་དག་ན་ཁྱིམ་བྱ་དང་དྲིལ་བུ་འཛིན་པའོ། །རྡོ་རྗེ་གཞོན་ནུ་མ་རྡོ་རྗེ་དྲིལ་བུ་ལྟ་བུར་ཤེས་པར་བྱའོ། །མི་སྨྲ་བ་རྡོ་རྗེ་དང་པ་ལ་ལ་ཞོན་པ། གསེར་མདོག་ཅན་ཞལ་བཞི་པ། ཕྱག་བཞི་པ་ཕྱག་གཡས་པ་དག་ན་རྡོ་རྗེ་དང་བགྲང་ཕྲེང་འཛིན་ཅིང་། གཡོན་པ་དག་ན་དབྱུག་ཐོ་དང་སྤྱི་བླུགས་འཛིན་པའོ། །རྡོ་རྗེ་ཞི་བ་མ་ཚངས་པ་ལྟ་བུར་ཤེས་པར་བྱའོ། །རྡོ་རྗེ་མཚོན་ཆ་གླང་པོ་ཆེ་དཀར་པོ་ལ་ཞོན་པ། ཕྱག་གཡོན་པས་རང་གི་རྡོ་རྗེ་འཛིན་ཅིང་གཡས་པས་འཇིག་རྟེན་ལས་འདས་པའི་རྡོ་རྗེ་འཛིན་པའོ། །རྡོ་རྗེ་ཁུ་ཚུར་རྡོ་རྗེ་མཚོན་ཆ་ལྟར་ཤེས་པར་བྱའོ། །རྡོ་རྗེ་འཁྱིལ་བ་ཁྲོ་བོ་ཡང་ཤིང་རྟ་ལ་ཞོན་པ། མདོག་དམར་པོ། གཡས་པ་དང་གཡོན་པ་ན་པདྨ་དང་། ཉི་མའི་དཀྱིལ་འཁོར་འཛིན་པའོ། ། རྡོ་རྗེ་བདུད་རྩི་མ་དང་རྡོ་རྗེ་འཁྱིལ་པ་ཁྲོ་བོ་ལྟ་བུ་ཉིད་དོ། །རྡོ་རྗེ་འོད་ཟེར་ཁྲོ་བོ་དཀར་པོ་ངང་པ་ལ་ཞོན་པ་གཡས་པས་རྡོ་རྗེ་འཛིན་ཅིང་། གཡོན་པས་པདྨ་དང་ཟླ་བ་འཛིན་པའོ། །རྡོ་རྗེ་འོད་ཟེར་མ་རྡོ་རྗེ་ཁྲོ་བོ་ལྟ་བུའོ། །རྡོ་རྗེ་དབྱུག་པ་ཁྲོ་བོ་རུས་སྦལ་ལ་ཞོན་པ་མདོག་སྔོན་པོ་ཕྱག་གཡས་ན་རྡོ་རྗེ་འཛིན་
ཅིང་། གཡོན་པས་དབྱུག་པ་འཛིན་པའོ། །དབྱུག་པ་རྡོ་རྗེ་མཆོག་མ་རྡོ་རྗེ་དབྱུག་པ་ཁྲོ་བོ་ལྟ་བུའོ། །རྡོ་རྗེ་དམར་སེར་ཁྲོ་བོ་གླང་པོ་ཆེ་ལ་ཞོན་པ་མདོག་དམར་པོ། ཕྱག་གཡས་ན་རྡོ་རྗེ་འཛིན་ཅིང་། གཡོན་པས་མི་བཟུང་ནས་ཟ་ཞིང་གནས་པའོ། ། རྡོ་རྗེ་སྐ་རགས་མ་རྡོ་རྗེ་དམར་སེར་ཁྲོ་བོ་ལྟ་བུའོ། །རྡོ་རྗེ་ཚོགས་བདག་གླང་སྣ་གླང་པོ་ཆེ་ལ་ཞོན་པ་ཅན། ཕྱག་གཡས་པས་རྡོ་རྗེ་འཛིན་ཅིང་། གཡོན་པས་གཤོལ་འཛིན་ཅིང་གནས་པ་མདོག་དཀར་པོའོ། །རྡོ་རྗེ་འདུལ་བ་མ་རྡོ་རྗེ་གླང་སྣ་ལྟ་བུའོ། །འདི་ནི་ཁྱད་པར་ཏེ་གང་ཞེ་ན། ཕྱག་གཡོན་གྱིས་ཁ་ཊྭཱྃ་ག་འཛིན་པའོ། །རྡོ་རྗེ་ཕྲེང་བ་ཚོགས་ཀྱི་བདག་པོ་མདོག་ལྗང་གུ། བྱ་ཀུ་ལི་ཀའི་ཤིང་རྟ་ལ་ཞོན་པ། ཕྱག་གཡས་ཀྱིས་རྡོ་རྗེ་འཛིན་པ། གཡོན་པས་མེ་ཏོག་གི་ཕྲེང་བ་འཛིན་པའོ། །རྡོ་རྗེ་གདན་མ་རྡོ་རྗེ་ཕྲེང་བ་ལྟ་བུའོ། །འདི་ནི་ཁྱད་པར་ཏེ་གང་ཞེ་ན། ཕྱག་གཡོན་གྱིས་ཤཀྟི་འཛིན་པའོ། །རྡོ་རྗེ་དབང་ཅན་ནེ་ཙོའི་ཤིང་རྟ་ལ་ཞོན་པ་མདོག་དཀར་སེར། ཕྱག་གཡས་པས་རྡོ་རྗེ་འཛིན་པ། གཡོན་པས་ཆུ་སྲིན་གྱི་རྒྱལ་མཚན་བསྣམས་པའོ། །རྡོ་རྗེ་དབང་ཅན་མ་རྡོ་རྗེ་དབང་ཅན་ལྟ་བུ་སྟེ་འདི་ནི་ཁྱད་པར་རོ། །གང་ཞེ་ན། མདོག་དམར་པོའོ། །རྣམ་རྒྱལ་རྡོ་རྗེ་ཚོགས་ཀྱི་བདག་པོ་སྦལ་པ་ལ་ཞོན་པ། མདོག་དཀར་པོའོ། །ཕྱག་གཡས་པས་རྡོ་རྗེ་འཛིན་པ། གཡོན་པས་རལ་གྲི་འཛིན་པའོ། །རྡོ་རྗེ་གདེངས་པ་མ་རྣམ་རྒྱལ་རྡོ་རྗེ་ལྟ་བུའོ། །རྡོ་རྗེ་གཏུན་ཤིང་ཕོ་ཉ་མོ་མེ་ཏོག་གི་ཤིང་རྟའི་ཁར་བུ་ཞོན་པ་མདོག་དཀར་སེར། ཕྱག་གཡས་པས་རྡོ་རྗེ་འཛིན་པ། གཡོན་པས་གཏུན་ཤིང་འཛིན་པའོ། །རྡོ་རྗེ་གཏུན་ཤིང་ཕོ་ཉ་མོ་རྡོ་རྗེ་གཏུན་ཤིང་ལྟ་བུ་སྟེ་འདི་ནི་ཁྱད་པར་རོ། །གང་ཞེ་ན། གཡོན་གྱིས་ཁ་ཊྭཱྃ་ག་འཛིན་པའོ། །རྡོ་རྗེ་རླུང་གི་ཕོ་ཉ་མདོག་སྔོན་པོ་རི་དགས་ལ་ཞོན་པ་ཕྱག་གཡས་པས་རྡོ་རྗེ་འཛིན་པ། གཡོན་པས་དར་འཛིན་པའོ། །མགྱོགས་པའི་རྡོ་རྗེ་མ་རྡོ་རྗེ་རླུང་གི་ཕོ་ཉ་ལྟ་བུའོ། །རྡོ་རྗེ་མེའི་ཕོ་ཉ་མོར་སྐྱེས་ལ་ཞོན་པ་མདོག་དམར་པོ་གྱེན་དུ་འབར་བའི་འོད་རྩེ་གསུམ་པ་འབར་བའི་ཕྱག་གཡས་དག་ན་རྡོ་རྗེ་དང་གོ་ཆ་འཛིན་པ། གཡོན་པ་དག་ན་དབྱུག་པ་
དང་སྤྱི་བླུགས་འཛིན་པའོ། །རྡོ་རྗེ་འབར་མ་རྡོ་རྗེ་མེ་ལྟ་བུའོ། །རྡོ་རྗེ་འཇིགས་བྱེད་ཕོ་ཉ་མ་སྔོན་པོ་རོ་ལངས་ལ་ཞོན་པ་ཕྱག་གཡས་པས་རྡོ་རྗེ་འཛིན་པ། གཡོན་པས་རྩེ་གསུམ་འཛིན་པའོ། །རྡོ་རྗེ་གཙིགས་པ་ཕོ་ཉ་མོ་རྡོ་རྗེ་འཇིགས་བྱེད་ལྟ་བུ་སྟེ། འདི་ནི་ཁྱད་པར་རོ། །གང་ཞེ་ན། གཡོན་པས་ཞགས་པ་འཛིན་པའོ། །རྡོ་རྗེ་ལྕགས་ཀྱུ་བྲན་ཀླུ་ལྷག་པ་ལ་ཞོན་པ། སྔོན་པོ་ཕག་གི་གདོང་པ་ཅན། གཡས་པས་རྡོ་རྗེ་འཛིན་པ། གཡོན་པས་ལྕགས་ཀྱུ་འཛིན་པའོ། །རྡོ་རྗེ་ནག་མོ་བྲན་མོ་རོ་ལངས་ཀྱི་བཞོན་པ་ཅན། ཕྱག་གཡོན་གྱིས་ཁ་ཊྭཱྃ་ག་འཛིན་པ། ཕྱག་གཡས་ཀྱིས་རྡོ་རྗེ་འཛིན་པ་མདོག་ནག་མོའོ། །རྡོ་རྗེ་ལོག་འདྲེན་ཕྲན་བྲ་བ་བྱི་བ་ཞོན་པ། མདོག་དཀར་པོ། གླང་པོ་ཆེའི་གདོང་པ་ཅན། ཕྱག་གཡས་དག་ན་རྡོ་རྗེ་དང་དགྲ་སྟ་འཛིན་པ། གཡོན་དག་ན་རྩེ་གསུམ་དང་ནི་དབྱུག་པ་འཛིན་པ། སྦྲུལ་གྱི་མཆོད་ཕྱིར་ཐོགས་པའོ། །རྡོ་རྗེ་སྲུལ་མོ་བྲན་མོ་མདོག་སྔོན་མོ་གཡས་ན་རྡོ་རྗེ་འཛིན་པ་གཡོན་པ་ཕྱགས་མ་འཛིན་པ་བྲ་བ་བྱི་བ་ཞོན་པའོ། །ཀླུ་རྡོ་རྗེའི་ཆུ་སྲིན་ཞོན་པ་གདེངས་ཀ་བརྒྱད་པ། མདོག་དཀར་པོ་གཡས་པས་རྡོ་རྗེ་འཛིན་པ། གཡོན་པས་ཀླུའི་ཞགས་པ་འཛིན་པའོ། །རྡོ་རྗེ་ཆུ་སྲིན་མ་བྲན་མོ་ཆུ་སྲིན་ལ་ཞོན་པ། མདོག་དཀར་མོ། གདེངས་ཀ་བརྒྱད་མ། གཡས་པས་རྡོ་རྗེ་འཛིན་པ། གཡོན་པས་རྡོ་རྗེས་མཚན་པའི་ཆུ་སྲིན་འཛིན་པའོ། །འཇིགས་མདོག་མ་ལྗང་གུ་གཡས་པས་རྡོ་རྗེ་འཛིན་ཅིང་། གཡོན་པས་རལ་གྲི་ཕེ་ཊ་ཀ་འཛིན་པའོ། །དཔལ་མོ་མདོག་དཀར་སེར་གཡས་པས་རྡོ་རྗེ་འཛིན་ཅིང་། གཡོན་པས་པདྨ་འཛིན་པའོ། །དབྱངས་ཅན་མ་མདོག་དཀར་མོ། ཕྱག་གཡོན་པས་པི་བང་གཡས་པས་རྡོ་རྗེ་མའོ། །བགྲོད་ཀ་མདོག་ལྗང་གུ་སེང་གེ་ལ་ཞོན་པ། ཕྱག་གཡས་པ་དག་ན་རྡོ་རྗེ་དང་འཁོར་ལོ་འཛིན་པ། གཡོན་པ་དག་ན་ལྡེ་མེན་དང་རལ་གྲི་འཛིན་པའོ། །མ་མོ་ཐམས་ཅད་དང་། དྲག་པོ་ལ་སོགས་པ་དང་། ཆུ་བདག་གི་མཐར་ཐུག་པ་རྣམས་ཀྱི་དང་། གང་ཕྱག་གཡས་སུ་རྡོ་རྗེ་གསུངས་པ་དེ་ནི་རྡོ་རྗེ་རྩེ་གསུམ་པར་ཤེས་པར་བྱའོ། །འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་
ཅད་རྣམ་པར་སྣང་མཛད་ལ་མངོན་དུ་བལྟས་པའོ། །དེ་ནས་ཐུན་མཚམས་ཀྱི་དུས་སུ་རྡོ་རྗེ་ཏི་རིནྟི་རིས་དག་པར་བཅིངས་ཏེ་མེ་ཏོག་སྔོན་པོའི་ཕྲེང་བ་བཟུང་ལ་དཀྱིལ་འཁོར་དུ་འཇུག་གོ། །ཡི་གེ་ཧཱུྃ་བཞི་པ་བརྗོད་ཅིང་རྡོ་རྗེ་རྣམ་པར་སྣང་མཛད་ལ་བསྐོར་བ་བདུན་དང་དུང་དང་དྲིལ་བུའི་སྒྲ་བསྒྲག་པར་བྱའོ། །དཀྱིལ་འཁོར་ཐམས་ཅད་ཀྱི་ཡང་ལྷག་པ་དང་ཆད་པའི་ཉེས་པ་ཞི་བར་བྱ་བའི་ངེས་པར་བལྟས་ཏེ་ཕྲེང་བ་བཅོམ་ལྡན་འདས་ལ་ཕུལ་ནས་རྡོ་རྗེའི་གར་བྱས་ལ་བླངས་ཏེ་ཡི་གེ་ཧཱུྃ་བཞི་པ་ཉིད་ཀྱིས་རང་གི་མགོ་བོར་བཅིང་ངོ་། །ཇི་ལྟར་ཆོ་ག་བཞིན་དུ་ཡང་། །གང་ཞིག་ཆད་པ་ཡོངས་སུ་བསྐང་། །མཁས་པས་ལྷག་པ་རྣམས་སྤང་ཕྱིར། །རྡོ་རྗེ་དྲིལ་བུ་ཀུན་རྟོག་བྱ། །འགྲུབ་འགྱུར་ཉེས་པ་སྤང་མི་བྱ། །ཞེས་གསུངས་སོ། །དེ་ནས་འདུག་པར་གྱུར་པ་ཡི། །རྡོ་རྗེ་སློབ་དཔོན་མཉམ་གཞག་པས། །རྡོ་རྗེ་སྒོ་ནི་བཞི་པོ་རྣམས། །ཡིད་ཀྱིས་དབྱེ་བར་བྱ་བ་ཉིད། །ཨོྃ་བཛྲོ་ཏྒྷ་ཊ་ཡ་ས་མ་ཡ་པྲ་བེ་ཤ་ཧཱུྃ་ཞེས་བྱའོ། །ཕྱག་རྒྱ་ཡང་འདི་ཡིན་ཏེ། རྡོ་རྗེ་ཁུ་ཚུར་གཉིས་གཤིབས་ཏེ། །མཛུབ་མོ་གན་རྐྱལ་ཡང་དག་གཟུང་། །ལེགས་པར་དྲག་ཏུ་རྣམ་པར་དབྱེ། །སྒོ་དབྱེ་བ་ཡི་ཆོ་ག་ཡི། །ཞེས་པའོ། །དེ་ནས་ལྕགས་ཀྱུ་ལ་སོགས་པས་ལས་རྣམས་བྱས་ལ་རིན་པོ་ཆེ་བདུན་ལས་བྱས་པའམ་ས་ལས་བྱས་པའི་བུམ་པ་ནག་པོ་ལ་སོགས་པ་མེད་པ། མགྲིན་པ་རིང་བ། མཆུ་འཕྱང་བ། ལྟོ་བ་ཆེ་བ། ལྷ་རྫས་ཀྱི་དྲིའི་ཆུ་དང་། རིན་པོ་ཆེ་དང་། སྨན་ཐམས་ཅད་དང་། འབྲུ་ཐམས་ཅད་ཀྱིས་ཡོངས་སུ་རྫོགས་པ། ཡལ་འདབ་དང་བཅས་པ། མགྲིན་པ་ལ་གོས་དམ་པས་ལེགས་པར་བཅིངས་ལ་བསྲུང་བ་བྱས་པ། ཕྱི་རོལ་ཀུན་དུ་ལྷ་རྫས་ཀྱི་དྲི་རྗེས་སུ་བྱུགས་པ་མེ་ཏོག་གི་ཕྲེང་བ་བཏགས་པའི་རྡོ་རྗེས་སྟེང་དུ་མཚན་པ། རྡོ་རྗེ་ཆེན་པོའི་བྱིན་གྱིས་བརླབས་པ། ཁྲོ་བོ་ཏི་རིནྟི་རིས་ཡོངས་སུ་བཟུང་བའི་རྡོ་རྗེ་དང་མེ་ཏོག་གི་ཡལ་འདབ་ཀྱིས། །ཨོྃ་བཛྲོ་ད་ཀ་ཧཱུྃ་ཞེས་བྱ་བ་འདི་སྟོང་རྩ་བརྒྱད་མངོན་པར་བསྔགས་པའི་ཡི་གེ་ཧཱུྃ་བཞི་པ་བརྒྱ་རྩ་བརྒྱད་མངོན་པར་བསྔགས་པ་བྱས་ལ། བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་སྤྱན་སྔར་
ལེགས་པར་བཞག་གོ། །འཇུག་པའི་སྒོ་ལ་མངོན་པར་ཕྱོགས་པའི་ཕྱི་རོལ་དུ་བུམ་པ་གཉིས་པ་ལ་ཡི་གེ་ཧཱུྃ་བཞི་པ་བརྒྱ་རྩ་བརྒྱད་བཟླས་པ་བཞག་གོ། །དེའི་ཆུས་བདག་ཉིད་དང་སློབ་མ་དབང་བསྐུར་བ་བྱ་སྟེ་གཞུག་པའི་ཕྱག་རྒྱ་བཅིངས་ནས་སམ་མ་བཅིངས་པ་ཡང་ངོ་། །བྱི་རུ་དེ་བཞིན་ས་ལེ་སྦྲམ། །དུང་དང་དེ་བཞིན་ནོར་བུ་ནི། །རིན་ཆེན་ཀུན་ཏེ་སིང་གྷྲི་དང་། །བྱཱ་གྷྲི་གི་རི་བེ་བེ་རེ། །སྨན་ཀུན་ཏིལ་ནས་སྲན་མ་ཤ། །འབྲས་དང་གྲོ་ནི་ལྔ་པ་སྟེ། །སྨན་ལྔ་འབྲུ་ཀུན་སྒྲས་མཚོན་པའོ། །དེའི་རྗེས་ལ་ཕྱག་བཞི་ལ་སོགས་པ་སྔོན་དུ་འགྲོ་བའི་སྡོམ་པ་འཛིན་དུ་བཅུག་ནས་རྡོ་རྗེ་གནོད་སྦྱིན་གྱི་གོས་སྔོན་པོ་ལ་ཡང་ཡོངས་སུ་བཟླས་ཏེ་སེམས་དཔའི་གཙུག་ཏོར་གྱིས་གཙུག་ཏོར་བཅིང་བ་དང་། སྒོ་སྐྱོང་གིས་གདོང་བཅིང་བ་དང་། རྡོ་རྗེ་གོ་ཆས་སྟོད་གཡོགས་དང་། གཙུག་ཏོར་ལ་སོགས་པ་ཅན་གྱིས་སློབ་དཔོན་གྱིས་ཁྲོ་བོ་ཏི་རིནྟི་རིས་མེ་ཏོག་སྔོན་པོའི་ཕྲེང་བ་བཟུང་ནས། ཨོྃ་བཛྲ་ས་མ་ཡ་པྲ་བེ་ཤཱ་མི་ཞེས་བརྗོད་ཅིང་ཞུགས་ལ། །དེ་བཞིན་གཤེགས་པ་ཐམས་ཅད་ལ་གསོལ་བ་གདབ་སྟེ། བཅོམ་ལྡན་འདས་ཞེས་བྱ་བ་ལ་སོགས་པས་སོ། །དེ་ནས་རྡོ་རྗེའི་ཆུ་འཐུངས་ནས་བདག་ཉིད་འཇུག་པར་བྱས་ལ། ཕྲེང་བ་དེ་དཀྱིལ་འཁོར་ཆེན་པོར་དོར་ལ་རང་རང་གི་མགོ་ལ་བཅིངས་ཏེ་གདོང་བཅིངས་པ་བཀྲོལ་ལ། ཇི་ལྟ་བ་བཞིན་དུ་དཀྱིལ་འཁོར་ལ་བལྟས་ཏེ། །ཏིཥྛ་བཛྲ་ཞེས་པ་ལ་སོགས་པས་གཞུག་པའི་ཕྱག་རྒྱ་དགྲོལ་བ་ཡང་བྱས་ལ་ཆུའི་དབང་བསྐུར་བ་དང་། སངས་རྒྱས་ལྔའི་ཅོད་པན་དང་དར་དཔྱངས་དང་། རྡོ་རྗེ་དང་། ཕྲེང་བ་དང་། བདག་པོ་ལ་སོགས་པས་དབང་བསྐུར་བ་དགུ་བཅོམ་ལྡན་འདས་ཀྱི་སྤྱན་སྔ་ནས་བཅོམ་ལྡན་འདས་ལ་ཕྱག་འཚལ་ནས་བླངས་པ་དེ་ཁོ་ན་ཉིད་དང་། ཆོས་དང་། དམ་ཚིག་དང་། དངོས་གྲུབ་དང་། རྡོ་རྗེ་བརྟུལ་ཞུགས་ཀྱང་བཟུང་ལ། མེ་ཏོག་ལ་སོགས་པས་ཀྱང་བདག་ཉིད་ལེགས་པར་མཆོད་དེ་ཚིགས་སུ་བཅད་པ་ལྔ་པས་རྗེས་སུ་གནང་བ་དང་། ཡི་གེ་ཧཱུྃ་གིས་གཟེངས་བསྟོད་པ་དང་། ལུང་བསྟན་པ་ཡང་སྨོས་ལ། སླར་ཡང་བྱིན་གྱིས་བརླབ་པ་ལ་སོགས་པ་བྱས་ལ་ཇི་ལྟར་མངོན་པར་འདོད་པའི་བཟླས་པ་ཡང་སྟེ། ཧཱུྃ་ཀཱ་ར་
བཛྲ་ཧྃ་ཞེས་པའོ། །རང་གི་མཚན་བརྗོད་པར་བྱ་ཞིང་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ལ་དེའི་སྔགས་ཨཿའི་རྣམ་པའི་མཐའ་ཅན་གྱི་རྣམ་པར་སྣང་མཛད་ཀྱི་གནས་སུ་དེ་བཞིན་གཤེགས་པ་རྡོ་རྗེའི་བདག་ཉིད་དབབ་བོ། །བཛྲོ་ཧྃ་ཞེས་བྱ་བ་ཡིས་རྡོ་རྗེའི་ང་རྒྱལ་རྣམ་པར་བསྒོམས་ལ་དེ་རྡོ་རྗེ་རྣམ་པར་སྣང་མཛད་དུ་བསྒོམས་ཏེ། བཛྲ་དྷཱ་ཏུ་ཨ་ཧྃ་ཞེས་པའོ། །དེ་ལྟར་རྡོ་རྗེ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་ལ་བྱང་གི་སྒོར་དེའི་སྔགས་ཨཿའི་རྣམ་པའི་མཐའ་ཅན་གྱི་རྡོ་རྗེ་རྡོ་རྗེ་དྲིལ་བུའི་བདག་ཉིད་དབབ་པའོ། ། བཛྲ་གྷ་ཎྜོ་ཧྃ་ཞེས་པའི་ང་རྒྱལ་བསྐྱེད་ལ་དེ་བཛྲ་ཨཱ་བེ་ཤ་ཀྲོ་དྷོ་ཧྃ་ཞེས་བསྒོམ་མོ། །དེ་ལྟ་བུས་རྡོ་རྗེ་རེ་བསྒྲུབ་པ་ཡིན་ནོ། །དེ་ནས་ཡང་རྡོ་རྗེ་སློབ་དཔོན་གྱིས་སེམས་དཔའ་རྡོ་རྗེ་ལྕགས་ཀྱུས་བཅིངས་ལ་སེ་གོལ་ལེགས་པར་གཏོགས་པར་བྱེད་ཅིང་སངས་རྒྱས་ཐམས་ཅད་འདུས་པར་བྱ་སྟེ། །ཨོྃ་བཛྲ་ས་མཱ་ཡ་ཛཿ། ཛཿཧཱུྃ་བྃ་ཧོཿཞེས་པ་ལན་ཉི་ཤུ་རྩ་གཅིག་རབ་ཏུ་བརྗོད་དོ། །དེ་ནས་མྱུར་དུ་ཕྱག་རྒྱ་ཆེན་པོ་དང་། རྡོ་རྗེ་ཁྲོ་བོའི་དམ་ཚིག་བརྗོད་དོ། །དེ་མ་ཐག་ཏུ་མཚན་བརྒྱ་རྩ་བརྒྱད་པ་མཆོག་གོ། །དེ་ནས་རྡོ་རྗེ་ལྕགས་ཀྱུ་ལ་སོགས་པས་རང་གི་སྒོ་ནས་སྤྱན་དྲངས་ལ་བཅུག་སྟེ། བཅིངས་ནས་དབང་དུ་བྱས་ལ་ཇི་ལྟ་བ་བཞིན་དུ་ཡི་གེ་ཧཱུྃ་བཞི་པས་མཆོད་ཡོན་ཕུལ་ཏེ་དཔལ་རྣམ་པར་སྣང་མཛད་ལ་སོགས་པའི་དམ་ཚིག་གི་ཕྱག་རྒྱ་རྣམས་དང་། བསྐལ་བ་བཟང་པོའི་མཐར་ཐུག་པ་རྣམས་བསྒྲུབས་ཏེ་རང་གི་སྔགས་བརྗོད་པ་ཇི་ལྟ་བུར་བརྗོད་ཅིང་ཛཿཧཱུྃ་བཾ་ཧོཿས་མ་ཡ་སྟྭྃ་ཨ་ཧྃ། དེ་ནས་རང་གི་སྔགས་བརྗོད་དོ། །དེ་ལྟ་བུས་འགྲུབ་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་རྣམས་དབྱུང་སྟེ། རྡོ་རྗེ་ལས་གསང་དམ་པ་བྱུང་། །དམ་ཚིག་མཆོག་རྣམས་ཉིད་དུ་གྲགས། །ཁྲོ་བོའི་བཅིང་བ་བླ་མེད་པ། །དེ་རྣམས་བཅིང་བར་རབ་བཤད་བྱ། ། ལག་ངར་རྡོ་རྗེ་ཀུན་དུ་བསྣོལ། །མཐེ་ཆུང་ལྕགས་ཀྱུ་བཅིང་བ་ཉིད། །མཛུབ་མོ་དག་ནི་རབ་ཏུ་བརྐྱང་། །འཇིག་རྟེན་གསུམ་པོ་རྣམ་རྒྱལ་ཞེས། །དེ་བཞིན་མཛུབ་མོ་ཁ་སྤྲད་ཅིང་། །ནོར་བུ་ཉིད་ནི་བར་མ་བསྐུམ། །བསྙམས་ལ་དབུ་མ་པདྨ་ཉིད། །གུང་མོ་མཛུབ་མོ་གཉིས་
སྡིགས་མཛུབ། །སྡིགས་མཛུབ་གཉིས་ནི་རྡོ་རྗེ་ཡང་། །གཡས་པ་བཀུག་པ་ལྕགས་ཀྱུའོ། །དེ་དག་ཉིད་སྦྱར་ཡི་གེ་ཧཱུྃ། ལེགས་པའི་རྣམ་པ་དེ་བཞིན་ཡང་། །མཛུབ་གཉིས་ལོགས་གནས་ཁྲོ་གཉེར་དུ། །སྙིང་གར་ཉི་མ་མཛུབ་གཉིས་ཟླུམ། །ལག་པ་མགོ་བོར་རབ་ཏུ་བརྐྱང་། །མཛུབ་མོ་ཁ་རུ་དགོད་པ་ཅན། །མཛུབ་མོ་སེན་མོ་ཀུན་དུ་རིག །གཡས་པ་མཛོད་ཀྱི་ཁུ་ཚུར་ཡང་། །གུང་མོའི་མགོ་བཅས་འཁོར་ལོ་ཉིད། །ཁ་ལས་རབ་མཆོག་ཐོན་པ་ཡི། །མཛུབ་མོ་དབུ་མ་རྡོ་རྗེ་ཡང་། །མཛུབ་མོ་མགྲིན་པ་བསྐོར་བ་དང་། ། མཛུབ་མོ་ལྷག་མ་མཆེ་བ་ཆེ། །རྡོ་རྗེ་ཁུ་ཚུར་མཐེ་བོང་བསྡམ། །སྒེག་མོ་ལ་སོགས་པ་རྣམས་ནི་རྡོ་རྗེ་དབྱིངས་སུ་བཤད་པ་བཞིན་དུ་བྱ་བ་འདི་ལྟ་སྟེ། །རྡོ་རྗེ་བསྡམས་པ་བཅིངས་ནས་སུ། །སྙིང་གར་ཡང་ན་མཐེ་བོང་མཉམ། །ལེགས་པར་རབ་བརྐྱང་ཕྲེང་བ་མ། །ཐལ་མོ་སྦྱར་མཆོག་ཁ་ནས་དབྱུང་། །གར་ལས་སྤྱི་བོར་ཐལ་མོ་སྦྱར། །རྡོ་རྗེ་བསྡམས་པ་ཐུར་དུ་སྦྱིན། །ཐལ་མོ་ལེགས་སྦྱར་གྱེན་དུ་གཏོར། །མཐེ་བོང་བསྙམས་ཏེ་ངེས་པར་བསྡམས། །རབ་ཏུ་བརྐྱང་བ་བྱུག་པ་ཡི། །མཛུབ་མོ་གཅིག་ནི་བཀུག་པ་དང་། །མཐེ་བོང་གཉིས་ནི་མདུད་པ་བཅིངས། །མཐེ་བོང་མཛུབ་མོ་བསྣོལ་བ་བཅིང་། །རྡོ་རྗེ་ཁུ་ཚུར་མཆོག་བསྡམས་ཉིད། །ཅེས་པའོ། །སྙིང་པོའི་དཀྱིལ་འཁོར་ལ་རྡོ་རྗེ་རྩེ་ལྔ་པ་རྣམ་པར་བསམས་ལ་ཧཱུྃ་གི་རྣམ་པ་ཉིད་བརྗོད་ཅིང་ཕྱག་རྒྱ་ཐམས་ཅད་བཅིང་བར་བྱའོ། །དེ་ནས་ཕྱག་རྒྱའི་ངེས་པར་འབྱུང་བ་སྟེ། རྡོ་རྗེ་ཧཱུྃ་མཛད་ཀྱི་ཕྱག་རྒྱ་ནི། རྣམ་པར་སྣང་མཛད། རྡོ་རྗེ་ཧཱུྃ་མཛད་རིན་ཆེན་ཧཱུྃ་མཛད། ཆོས་ཀྱི་ཧཱུྃ་མཛད། ལས་ཀྱི་ཧཱུྃ་མཛད་ཀྱི་གནས་སུ་ཡང་ངོ་། །དེ་ནས་རིན་ཆེན་ཧཱུྃ་མཛད་ལ་སོགས་པ་རྣམས་ཀྱི་སྔགས་རྣམས་འབྱུང་སྟེ། །ཨོྃ་བཛྲ་བྷྲྀ་ཀུ་ཊི་ཀྲོ་དྷཱ་ན་ཡ་སརྦ་རཏྣཱ་ནི་ཧྲཱིཿ་ཧཱུྃ་ཕཊ། ཨོྃ་བཛྲ་ཏྭཱིཿཋྚཱིཿཀྲོ་དྷ་དུཥྚ་མཱ་ར་ཡ་ཧཱུྃ་ཕཊ། ཨོྃ་བཛྲ་བི་ཤྭ་ཀྲོ་དྷ་ཀུ་རུ་སརྦ་བི་ཤྭ་རཱུ་པཱ་ཡ་སཱ་དྷ་ཡ་ཧཱུྃ་ཕཊ། ཕྱག་རྒྱ་གཞན་རྣམས་ནི་སེམས་དཔའ་རྡོ་རྗེ་མ་ནས་བརྩམས་པར་བལྟའོ། །དེ་ཉིད་ཀྱི་ཕྱིར་རིག་པ་ཐམས་ཅད་ཀྱི་མཆོག་རྣམས་ཀྱིས་རྣམ་པར་རྒྱལ་བའི་སྔགས་སུ་བཤད་དོ། །རྡོ་རྗེ་ཧཱུྃ་
མཛད་དང་བཅས་པའི་ཕྱག་རྒྱ་བསྡུ་བས་ཡང་བཅོམ་ལྡན་འདས་རྡོ་རྗེ་ཧཱུྃ་མཛད་བཀླག་པར་བྱའོ། །གཞན་རྣམས་རྡོ་རྗེ་ཧཱུྃ་མཛད་དུ་འགྱུར་བ་རིགས་པ་ཡང་མ་ཡིན་ཏེ། རྒྱུད་ཐམས་ཅད་དུ་ཧཱུྃ་མཛད་ངེས་པར་བསྟན་པར་ཡང་མ་ཡིན་ནོ། །དེའི་རྗེས་སུ་དེ་ཁོ་ན་བཞིན་ལྕེ་ལ་རྡོ་རྗེ་བཀོད་དེ་རིམ་པ་བཞིན་དུ་སངས་རྒྱས་རྡོ་རྗེ་འཆང་ལ་སོགས་པའི་ཆོས་ཀྱི་ཡི་གེ་རྣམས་དགོད་དོ། །དེ་རྣམས་ཀྱང་ཧཱུྃ་ཡིག་སངས་རྒྱས་རྡོ་རྗེ་ཅན། ཏྲྭྃ་ཡིག་རྡོ་རྗེའི་སྙིང་པོ་ཡི། །ཧྲཱིཿ་ཡི་རྣམ་པར་རྡོ་རྗེའི་སྡེའི། །ཨཿཡིག་རྡོ་རྗེ་སྣ་ཚོགས་ཀྱི། །ཧཱུྃ་སེམས་དཔའ་རྡོ་རྗེ་མ་ཡི། ། ཏྭཱྃ་རིན་ཆེན་རྡོ་རྗེ་མ་ཡི། །ཧྲཱིཿཆོས་ཀྱི་རྡོ་རྗེ་མ་ཡི། །ཨཿལས་ཀྱི་རྡོ་རྗེ་མ་ཡི། །ཧཱུྃ་ཧཱུྃ། ཏྲཱྃ་ཏྲཱྃ། ཧྲཱིཿཧྲཱིཿ། ཨཿཨཿཞེས་བྱའོ། །རྡོ་རྗེ་སེམས་དཔའ་ལ་སོགས་པ་དགའ་བ་ཆེན་པོ་ལ་ཧཱུྃ། གཟུགས་མཛེས་པ་ལ་ཧཱུྃ། མཆོད་པ་ཐམས་ཅད་ལ་ཧཱུྃ། རབ་ཏུ་དགའ་བ་ལ་ཧཱུྃ། དབུས་སུ་བགྲོད་པ་ལ་ཧཱུྃ། ལེགས་པར་གཟི་མཆོག་ལ་ཧཱུྃ། དྲི་བཟངས་མཆོག་ལ་ཧཱུྃ། ཨཱ་ཡཱ་ཧི་ཛ་ཧཱུྃ། ཨཱ་ཧི་ཧཱུྃ་ཧཱུྃ་ཧཱུྃ་ཧི་སྤོ་ཊ་བཾ་ཧཱུྃ་གྷ་ཎྚ་ཨ་ཨཿཧཱུྃ། རྡོ་རྗེ་སྒེག་མོ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པ་རྣམས་ཀྱིའོ། །དེ་མ་ཐག་ཏུ་ཨའི་ཡི་གེ་ལས་སྙིང་གར་སྣ་ཚོགས་རྡོ་རྗེ་བསྐྱེད་པ་ལས་ཀྱི་ཕྱག་རྒྱ་བཅིང་ངོ་། །དེ་ལ་ཁྲོ་བོའི་ཁུ་ཚུར་རྣམ་པ་གཉིས་བྱས་ལ་གཡོན་པའི་རྡོ་རྗེ་སོར་མོ་གཡས་པས་བཟུང་ཞིང་བསྒྲེང་བ་བྱང་ཆུབ་མཆོག་ཅེས་བྱ་བའི་ཕྱག་རྒྱ་འདི་ནི་སངས་རྒྱས་ཀྱི་བྱང་ཆུབ་རབ་ཏུ་སྟེར་རོ། །གཉིས་པོ་དེ་དག་གིས་འགྱིང་བ་དང་བཅས་པས་གསལ་བར་བྱེད་པ་ནི་རྡོ་རྗེ་ཧཱུྃ་མཛད་དང་རྡོ་རྗེ་སེམས་དཔའ་དང་སེམས་དཔའ་རྡོ་རྗེ་མ་རྣམས་ཀྱིའོ། །ལྕགས་ཀྱུ་འཛིན་པར་ཡང་དག་གནས། །མདའ་གསོར་བ་ཡི་སྦྱོར་བ་དང་། །ལེགས་སོ་ཞེས་བྱ་སྙིང་གར་གནས། །རྡོ་རྗེ་གཉིས་ཉིད་དབང་བསྐུར་བ། །རིན་ཆེན་ཧཱུྃ་མཛད་དང་། རྡོ་རྗེ་ཁྲོ་གཉེར་དང་། ཁྲོ་བོ་དང་། རིན་ཆེན་རྡོ་རྗེ་མ་རྣམས་ཀྱིའོ། །སྙིང་གར་ཉི་མ་རབ་ཏུ་བལྟ། །གཡོན་གནས་ལག་ངར་དབྱུག་པ་དང་། །དེ་བཞིན་འདི་ནི་ཡོངས་སུ་བཟློག །གཡས་དང་གཡས་མིན་རྣམ་པར་བསྣོལ། །ཆོས་ཀྱི་ཧཱུྃ་མཛད་དང་། རྡོ་རྗེ་
ཆོས་དང་། ཆོས་ཀྱི་རྡོ་རྗེ་མ་རྣམས་ཀྱིའོ། །སྙིང་གར་ཉི་མ་ལ་རལ་གྲིའོ། །མགལ་མེའི་འཁོར་ལོ་བསྐོར་བ་ཉིད། །རྡོ་རྗེ་གཉིས་ནི་ཁར་གནས་ཤིང་། །རྡོ་རྗེའི་གར་ནི་བཀྲོལ་བས་ནི། །འགྲམ་པ་སྤྱི་གཙུག་ཡང་དག་གནས། །ལས་ཀྱི་ཧཱུྃ་མཛད་དང་། རྡོ་རྗེ་ལས་དང་། ལས་ཀྱི་རྡོ་རྗེ་མ་རྣམས་ཀྱིའོ། །གོ་ཆ་མཐེ་ཆུང་མཆེ་བ་མཆོག །ཁུ་ཚུར་གཉིས་ནི་ངེས་པར་བཅིང་། །རྡོ་རྗེ་བགྱིངས་པའི་རབ་སྦྱོར་བས། །བསམ་པ་གཡོས་པས་འདུད་པར་བྱ། །ཕྲེང་བ་བཅིངས་ཏེ་ཁ་ནས་དབྱུང་། །གར་ལས་སྤྱི་བོར་ཐལ་མོ་སྦྱར། ། འོག་ཏུ་འཕྱང་དང་གྱེན་དུ་འཐོར། །མཐེ་བོ་བསྙམས་ཏེ་ངེས་པར་གཤིབས། །དྲི་བྱུག་པ་ཡི་སྦྱོར་བ་ལས། །མཆོད་པའི་ཕྱག་རྒྱ་རབ་ཏུ་གྲགས། །མཛུབ་མོ་ལྕགས་ཀྱུ་བཅིངས་པ་ཡིས། །མཐེ་ཆུང་ལས་ནི་ལྕགས་ཀྱུ་ཆེ། །མཁྲིག་མ་མདུད་པ་མཆོག་དག་བསྣོལ། ། རྒྱབ་དག་ཀྱང་ནི་ངེས་པར་གཤིབས། །ཞེས་སྒོ་སྐྱོང་རྣམས་ཀྱི་ཕྱག་རྒྱའོ། །ལས་ཀྱི་ཕྱག་རྒྱ་ཐམས་ཅད་ཀྱང་གར་ལས་འབྱུང་བ་ཡིན་ནོ། །དེ་ནས་རྣམ་པར་སྣང་མཛད་ལ་སོགས་པ་རྣམས་ཀྱི་བཅིང་བར་བྱའོ། །རྡོ་རྗེ་སེམས་མ་དང་། རིན་ཆེན་དང་། ཆོས་དང་། ལས་ཀྱི་རྡོ་རྗེ་མ་རྣམས་ཀྱི་ཡང་སྟེ་རྡོ་རྗེ་དང་པོ་དང་། །མཐར་གནས་པ་ཡི་སྐྱེས་པ་དང་། བུད་མེད་ཀྱི་གཟུགས་འཛིན་པ་དེ་རྣམས་ཀྱི་བདག་ཉིད་ཆེན་པོ་གང་དང་གང་གི་ཕྱག་རྒྱ་གང་དང་གང་ཡིན་པ་རྣམས་བཅིང་ངོ་། །ཐམས་ཅད་ཀྱི་ཕྱག་རྒྱ་དམ་ཚིག་ཕྱག་རྒྱ་ཡང་ཡིན་ཏེ། གཡོན་པ་དེ་བཞིན་གཤེགས་པའི་ཁུ་ཚུར་གན་རྐྱལ་དུ་བྱས་ལ་ལག་པ་གཡས་པའི་མཛུབ་མོ་དང་མཐེ་བོང་དག་དང་མཐེ་ཆུང་ནས་བརྩམས་ཏེ་ཁ་ཕྱེ་བའི་ཐལ་མོ་ཁ་སྦྱར་བའོ། །འདི་ནི་བྱམས་པའི་དམ་ཚིག་གི་ཕྱག་རྒྱའོ། །དེ་རྣམས་ཀྱི་རིག་པ་ནི་སྔར་བཤད་པ་ཉིད་དེ། དེ་རྣམས་ཀྱི་རིག་པ་ལྗགས་རྣམས་ལ་དགོད་དོ། །འདི་ནི་དེ་རྣམས་ཀྱི་ཆོས་ཀྱི་ཕྱག་རྒྱའོ། །ཡི་གེ་ཨ་ལས་རང་གི་ཐུགས་ཀར་སྣ་ཚོགས་རྡོ་རྗེ་བསྐྱེད་ལ་དེ་རྣམས་འདྲི་བྱའི་རྗེས་སུ་འབྲངས་ནས་ཕྱག་རྒྱ་ཆེན་པོ་བཅིངས་པ་ནི་ལས་ཀྱི་ཕྱག་རྒྱར་འགྱུར་རོ། །རང་གི་ཐུགས་ཀར་རྡོ་རྗེ་རྩེ་ལྔ་པ་བསམས་ལ་བྲི་བྱའི་རྗེས་སུ་
འབྲངས་པ་ཉིད་ལས་དེ་རྣམས་ཀྱི་ཕྱག་རྒྱ་ཆེན་པོ་བཅིང་ངོ་། །དེ་ཉིད་ཀྱིས་ཡང་རིག་པའི་ཐུན་མོང་བའོ། །མཐེའུ་ཆུང་དང་། མཐེ་བོང་བཅིངས་ནས་ཀྱང་གཡོན་པའི་སོར་མོ་དབུས་མ་གསུམ་པོ་རྩེ་གསུམ་པ་ལ་དབུས་མ་རྩེ་མོ་ཡང་རྡོ་རྗེའི་ཕྱག་རྒྱ་ཡོངས་སུ་བཟུང་ཞིང་རྡོ་རྗེའི་རིག་པ་མཆོག་འདི་ནི་རྡོ་རྗེའི་དཔལ་ཞེས་གྲགས་སོ། །དེ་ལས་གཞན་ནི་རབ་བཤད་བྱ། །སྒྱུ་མ་རྡོ་རྗེ་སོགས་མིང་ཅན། །རྡོ་རྗེ་བསྡམས་པ་བརྟན་བྱས་ལ། །གཡོན་པ་རྡོ་རྗེ་ཡང་བཅིང་བྱ། །རྡོ་རྗེ་ཁུ་ཚུར་ཞེས་གྲགས་པ། །རྡོ་རྗེའི་རིགས་རྣམས་ཀུན་ལ་འདི། །རྡོ་རྗེ་རྣམ་གཉིས་དང་ཡང་བྱས། །མཚན་མ་ཐམས་ཅད་བཀོད་པ་ནི། །རྡོ་རྗེའི་རིགས་ནི་ཐམས་ཅད་ཀྱི། །ཕྱག་རྒྱ་རྣམས་སུའང་དགོད་པར་བྱ། །མདུན་དང་རྒྱབ་གནས་རབ་ཏུ་བརྐྱང་། །མཐེ་བོང་རྒན་པོ་འཛིན་པ་ཆོས། །ཨོྃ་གྱི་རྣམ་པ་སྤྱི་བོར་གནས། །རྡོ་རྗེ་ཤུགས་ཀྱི་རབ་ཏུ་གནས། །རིག་པའི་རྒྱལ་པོའམ་ཕྱག་རྒྱ་ཆེན་པོའི་ཚོགས་སོ། །ལག་པའི་མདུན་ཉིད་རབ་ཏུ་བརྐྱང་། །ལག་པའི་མདུན་ཡང་དེ་བཞིན་དུ། །ལག་པ་གཉིས་ཀྱང་ཁུ་ཚུར་གནས། །ཁ་ལས་ཡོངས་སུ་བསྐོར་བ་ཉིད། །རྡོ་རྗེ་ཁྲོ་བོའི་ཕྱག་རྒྱའི་ཚོགས་སོ། །གཡོན་པའི་མཐེ་བོ་ལེགས་གནས་ཀྱང་། ། ཕྲེང་བ་འཛིན་པ་ངེས་རྒྱལ་ཉིད། །གཡས་པས་ནོར་ནི་སྦྱིན་པ་དང་། །རལ་གྲིའི་ཕྱག་རྒྱ་ཁུ་ཚུར་སོན། །ཚོགས་ཀྱི་བདག་པོ་ཆེན་པོའི་ཕྱག་རྒྱའི་ཚོགས་སོ། །གཡས་པ་གཤོལ་ནི་གཟུང་བ་དང་། །དེ་བཞིན་ལག་པ་རབ་ཏུ་བརྐྱང་། །གཡས་པས་འབར་བ་ཀུན་དུ་སྟོན། །རྡོ་རྗེ་ཁུ་ཚུར་རབ་ཏུ་འདར། །ཕོ་ཉ་ཆེན་པོའི་ཕྱག་རྒྱའི་ཚོགས་སོ། །བསྙེམས་བཅས་ཁ་དང་མཆེ་བ་རྩེ། །བྱུགས་པས་འཇོམས་པ་རབ་ཏུ་སྦྱོར། །ལག་པ་བསྐུམ་པ་སྦྱར་བ་དང་། །རྡོ་རྗེ་གཡས་པ་འཕྲོག་པའོ། །བྲན་གྱི་ཕྱག་རྒྱའི་ཚོགས་སོ། །དེ་ནས་ཨུ་མ་ལ་སོགས་པ་མ་མོའི་ཚོགས་ཀྱི་ཕྱག་རྒྱ་འབྱུང་སྟེ། གཡོན་པ་རྡོ་རྗེ་བསྡམས་པ་ཡིས། །རྩེ་གསུམ་མཚན་མ་བཅིང་བར་བྱ། །འདི་བཅིང་བ་ཡི་ཡང་དག་པའི། །དངོས་གྲུབ་རིག་པ་མཆོག་རང་ཉིད། །རྡོ་རྗེའི་རིགས་རྣམས་ཐམས་ཅད་ཀྱི། །གཡོན་པ་རྡོ་རྗེ་མཆོག་བསྲུངས་པ། །ཆོ་ག་ཇི་བཞིན་དམ་ཚིག་
གི། །ཕྱག་རྒྱ་བཅིང་བར་རབ་བཤད་བྱ། །འཁོར་ལོ་ཐམས་ཅད་མཆོག་ཀུན་བསྡམ། །དེ་བཞིན་བུ་ཡི་ཕྱག་རྒྱ་དང་། །ཨོྃ་ཡིག་ཕྱག་རྒྱའང་དེ་བཞིན་ཉིད། །ཡི་གེ་རྣ་ཅན་ཡོངས་སུ་གཟུང་། །ཕྱག་རྒྱ་མཛེས་པ་ཅན་དང་ནི། །འབར་བ་ཡོངས་སུ་གཟུང་བ་ཉིད། །འོད་ཟེར་བསྡུས་པ་ཁོ་ན་ཡང་། །དབྱུག་པ་ཁུ་ཚུར་གཟུང་བ་ཉིད། །ཁ་ལས་ཡོངས་སུ་བསྐོར་བ་དང་། །ཁྲོ་བོའི་དམ་ཚིག་གདེངས་ཀ་ཡིས། །ཕྱག་རྒྱ་ཕྲེང་བ་རྡོ་རྗེ་བཅིངས། །མིང་མེད་སྤྱི་བོར་གནས་པ་ཉིད། །རྩིབས་ཅན་དཀྱིལ་འཁོར་བཞིན་དུ་བཟའ། །འོད་ཅན་རྩིབས་ཅན་དམ་ཚིག་རྣམས། ། ལག་ངར་བསྐུམ་ཞིང་ཁ་ཕྱོགས་དང་། །རྒྱབ་ནས་ཡོངས་སུ་བསྐོར་བ་ཉིད། །འོད་ཟེར་འབར་བ་གྲོལ་བ་དང་། །མདུན་དུ་དུལ་བར་གནས་པ་ཉིད། །ཕོ་ཉའི་དམ་ཚིག་རྣམས་སོ། །གཉིས་མཐར་ཞུགས་པ་རྩེ་མོ་སྦྱར། །བཅིངས་པ་ཉིད་དང་རབ་ལྟུང་བྱེད། །ལག་ངར་བསྣོལ་དང་མ་བསྣོལ་དང་། །དེ་བཞིན་སྟོབས་ནི་འཕྲོག་པའོ། །བྲན་མོ་རྣམས་ཀྱི་དམ་ཚིག་ཡིན་ནོ། །དེ་ནས་ལྷ་ཆེན་པོ་ལ་སོགས་པའི་ལྗགས་རྣམས་ལ་སྔགས་བཀོད་ལ་ཡི་གེ་ཨ་ལས་རང་གི་སྙིང་གར་དེ་བཞིན་དུ་རྡོ་རྗེ་བསྐྱེད་ལ་དེ་རྣམས་ཀྱི་ཕྱག་རྒྱ་བཅིངས་ཏེ་ལས་ཀྱི་ཕྱག་རྒྱར་འགྱུར་རོ། །རང་གི་སྙིང་གར་རྡོ་རྗེ་རྩེ་ལྔ་པ་བསྒོམས་ལ་ཕྱག་རྒྱ་ཆེན་པོ་བྲི་བྱའི་རྗེས་སུ་འབྲངས་ཏེ་བཅིང་བར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་དང་། བསྐལ་པ་བཟང་པོ་པ་དང་ཕྱི་རོལ་རྡོ་རྗེའི་རིགས་རྣམས་ལ་རྡོ་རྗེ་རིན་པོ་ཆེའི་དབང་བསྐུར་མ་དཔལ་རྡོ་རྗེ་ཧཱུྃ་མཛད་ལ་སོགས་སངས་རྒྱས་ལྔའི་ཅོད་པན་དང་ཕྲེང་བ་དང་། དར་དཔྱངས་ཀྱི་དབང་བསྐུར་བས་དབང་བསྐུར་རོ། །དེ་ནས་མཆོད་ཡོན་ཕུལ་ལ་མཆོད་པ་བྱའོ། །དེ་ནས་རིན་པོ་ཆེའི་རང་བཞིན་གྱི་བུམ་པ་སྔར་བཤད་པའི་མཚན་ཉིད་ཅན་རྡོ་རྗེ་ལ་སོགས་རང་གི་མཚན་མས་མཚན་པ་རྣམ་པར་སྣང་མཛད་ལ་སོགས་པའི་སྔགས་བརྒྱ་རྩ་བརྒྱད་བཟླས་པ་རྣམས་ཕྱིའི་དཀྱིལ་འཁོར་གྱི་ཕྱི་རོལ་དུ་དགོད་པར་བྱའོ། །བུམ་པ་གང་བ་རྣམས་དང་། གོས་ཟུང་འབུམ་དང་། སྟོང་ཕྲག་བཅུ་དང་། སྟོང་དང་། བརྒྱའམ། རེ་རེ་ལ་རེ་རེའམ། ཐུན་མོང་བའམ། རྣམ་པ་སྣ་ཚོགས་པའི་བླ་རེ་དང་། ཟུར་བཞིར་རྣམ་པར་བཀྲ་བའི་བ་དན་
བཅིངས་པའི་གདུགས་དང་། རྒྱལ་མཚན་དང་། བ་དན་རྣམས་ཀྱང་ཡི་གེ་ཨོྃ་དང་། དཔལ་རྡོ་རྗེ་ཧཱུྃ་མཛད་ཡོངས་སུ་བཟླས་ལ། བཛྲ་སྥ་ར་ཎ་ཁྃ་ཞེས་པ་འདིས་ལྷ་ཐམས་ཅད་ལ་ངེས་པར་དབུལ་ལོ། །མེ་ཏོག་གི་ཤིང་བརྒྱ་དང་། བཞིའམ་ལྗོན་ཤིང་རྣམས་དང་མེ་ཏོག་ཐམས་ཅད་ལ་རྡོ་རྗེ་མེའི་ཕྱག་རྒྱ་དང་བཅས་པ་དང་། །ཨོྃ་བཛྲ་པུཥྤེ་ཧཱུྃ། ཞེས་པས་མེ་ཏོག་གི་ཕྱག་རྒྱ་མངོན་པར་བསྔགས་སོ། །དྲི་ཐམས་ཅད་དང་། ངད་ཞིམ་པ་རྣམས་དང་། དྲི་མ་མེད་པའི་དྲི་བཟང་པོ་རྣམས་ལ་དེ་ཁོ་ན་བཞིན་དུ་རྡོ་རྗེ་མེ་དང་། །ཨོྃ་བཛྲ་གནྡྷེ་ཧཱུྃ། ཞེས་པ་འདི་དྲིའི་ཕྱག་རྒྱ་དང་བཅས་པ་ཡིས་སོ། །ག་བུར་དང་། ཨ་ཀ་རུ་དང་། དུ་རུ་སྐ་དང་། ཙནྡན་ལ་སོགས་པ་ལེགས་པར་བསྲེས་ལ། དེ་ཁོ་ན་བཞིན་དུ་རྡོ་རྗེ་མེ་དང་། །ཨོྃ་བཛྲ་དྷཱུ་བེ་ཧཱུྃ། ཞེས་པ་འདིས་བདུག་པའི་ཕྱག་རྒྱ་དང་བཅས་པས་སྤོས་ཕོར་འབུམ་དང་། སྟོང་ཕྲག་བཅུ་དང་སྟོང་དང་བརྒྱའམ། ཇི་ལྟར་རྙེད་པ་ལའོ། །སྒྲོན་མ་འབུམ་དང་། སྟོང་ཕྲག་བཅུ་དང་། སྟོང་དང་། བརྒྱའམ། སྒྲོན་མ་ཐམས་ཅད་སྒྲོན་མའི་སྡོང་བུ་འབར་བ་དང་ལྡན་པའི་ཀོང་བུ་སྟོང་དང་། བཅུའམ་བཅུ་གཅིག་ལ་དེ་ཁོ་ན་བཞིན་དུ་རྡོ་རྗེ་མེ་དང་། །ཨོྃ་བཛྲ་ཨཱ་ལོ་ཀེ་ཧཱུྃ་ཞེས་པ་འདི་མར་མེའི་ཕྱག་རྒྱ་དང་ལྡན་པས་ཡོངས་སུ་བཟླས་ལ། །ཨོྃ་སྥཱ་ར་ཎ་ཁྃ་ཞེས་པ་བརྗོད་ཅིང་དབུལ་བར་བྱའོ། །གཏོར་མའི་ཉེ་བར་སྤྱོད་པ་འབུམ་དང་། སྟོང་ཕྲག་བཅུ་དང་། སྟོང་དང་། བརྒྱའམ། །བཅུའི་གྲངས་སམ། བཀྲ་ཤིས་ཅན་དང་པོར་བྱ་སྟེ། རྣམ་པ་སྣ་ཚོགས་པའི་བཟའ་བ་རྣམས་ལ་དེ་བཞིན་དུ་རྡོ་རྗེ་མེ་ཡོངས་སུ་བཟླས་ཏེ། ཨ་ཀཱ་རོ་མུ་ཁྃ་སརྦ་དྷ་རྨཱ་ཎཱ་མཱ་དྱ་ནུ་ཏྤ་ནྣ་ཏྭཱ་ཏ་ཞེས་པ་བརྗོད་ཅིང་དབུལ་བར་བྱའོ། །རོལ་མོ་བཅུ་དང་། བརྒྱ་དང་། སྟོང་དང་། སྟོང་ཕྲག་བཅུ་དང་། རོལ་མོ་འབུམ་དང་གང་ཡང་རུང་བ་ལ་ཡི་གེ་ཧཱུྃ་དང་། རོལ་མོའི་ཕྱག་རྒྱ་རྡོ་རྗེ་ཁུ་ཚུར་དག་གི་ལག་པའི་སོར་མོ་རྣམས་ཀྱིས་རོལ་མོའི་སྟང་སྟབས་རྣམ་པ་བཅུ་བཞི་འདི་ལྟ་སྟེ། པི་བང་དང་། གླིང་བུ་དང་། རྔ་མུ་ར་ཛ་དང་། རྔ་མུ་ཀུནྡ་དང་། འཁར་རྔ་དང་། རྔ་བྷི་རི་དང་། རྔ་པ་ཊ་ཧ་དང་། རྔ་ཀུན་ཛཱ་དང་། རྔ་ཏི་མི་ལ་ཡི་སྟང་སྟབས་སོ། །རོལ་མོ་དང་། ཟློས་གར་དང་།
གར་དང་། རྣ་རྒྱན་དང་། ཅོད་པན་ལ་སོགས་པའི་མཆོད་པ་རྣམས་ཀྱང་ཡི་གེ་ཨོྃ་གྱིས་མངོན་པར་བསྔགས་ཏེའོ། །དེ་བཞིན་དུ་དར་དཔྱངས་འཕྱང་བར་བྱ་ཞིང་མེ་ཏོག་གི་ཕྲེང་བ་དང་། རྔ་ཡབ་ཀྱིས་རྣམ་པར་བརྒྱན་པ་དང་། དྲ་བ་དང་དྲ་བ་ཕྱེད་པས་སྤྲས་པ་དང་། ཟླ་བ་ཕྱེད་པས་ཉེ་བར་མཛེས་པ་དང་། རྟ་དང་གླང་པོ་ཆེ་དང་། བ་ལང་དང་། ཤིང་རྟ་རྣམས་འབུལ་ཏེ། བརྟགས་པ་དང་བཅས་པ་ཡང་ངོ་། །རྟ་བབས་ཉམས་དགའ་བའི་དྲིལ་བུ་དང་། བཅས་པ་རྣམས་ཀྱང་བཛྲ་སྥ་ར་ཎ་ཁྃ་ཞེས་པ་འདིས་སོ། །ཨོྃ་བཛྲ་ས་ཏྭ་སུ་སྃ་གྲ་ཧཱ་ཏ་དང་། བཛྲ་རཏྣམ་ནུཏྟ་རྃ། བཛྲ་དྷརྨ་གཱ་ཡ་ནཻཿ། བཛྲ་ཀརྨ་ཀ་རོདྦྷ་བེ་ཞེས་བརྗོད་ཅིང་གར་བྱས་ལ། རྡོ་རྗེ་སྒེག་མོ་ལ་སོགས་པ་མཆོད་པ་རྣམ་པ་བརྒྱད་པོ་རྣམས་ཀྱིས་ཁྲོ་བོའི་ཁུ་ཚུར་གཉིས་དང་ལྡན་པའི་ལས་ཀྱི་ཕྱག་རྒྱ་རྣམས་ཀྱིས་དཀྱིལ་འཁོར་ཐམས་ཅད་མཆོད་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ནས། མཛུབ་མོ་གཉིས་རབ་ཏུ་བརྐྱང་བ་ཁྲོ་བོའི་ཁུ་ཚུར་གཉིས་ཡིན་ནོ། །སླར་རྡོ་རྗེ་རིགས་ཀྱི་དཀྱིལ་འཁོར་དུ་བཤད་པའི་ལས་ཀྱི་ཕྱག་རྒྱ་བཅུ་དྲུག་པ་རྣམས་ཀྱིས་ཀྱང་ལེགས་པར་མཆོད་ལ། །ཁྲོ་བོའི་རིགས་ཐམས་ཅད་ལ་གསོལ་བ་གདབ་པར་བྱ་སྟེ། སེམས་ཅན་ཐམས་ཅད་ཀྱི་དོན་དུ་དངོས་གྲུབ་ཐམས་ཅད་འགྲུབ་པར་མཛད་དུ་གསོལ་ཞེས་པའོ། །དེ་ནས་ཕྱི་རོལ་གྱི་མཆོད་པ་དབུལ་ཏེ། སྒྲུབ་པའི་གྲོགས་མཆོག་དཀྱིལ་འཁོར་དུ་བཞག་ལ། །འབྲས་ཡོས་བཅས་ཤིང་ཏིལ་དང་བཅས། །ཆུ་བཅས་ཟས་བཅས་མེ་ཏོག་བཅས། །སྲན་ཆན་བཅས་ཤིང་སྣུམ་ཁུ་ཚུར་ལ། །སོགས་པའི་བཟའ་བ་རྣམས་ལ་ནི། །ཡང་ཨ་ཀཱ་རོ་མུ་ཁྃ་ཞེས་པ་ལ་སོགས་བཟླས་ནས་ཤར་ཕྱོགས་ཀྱི་ཆ་ནས་བརྩམས་ཏེ་གསུམ་གསུམ་གཏོར་བར་བྱས་ཏེ། དྲི་དང་། མེ་ཏོག་དང་། བདུག་པ་དང་། མར་མེ་དང་། མཆོད་ཡོན་རྣམས་ཀྱང་ཐོག་མ་དང་ཐ་མར་དབུལ་བར་བྱའོ། །དེ་ལ་དང་པོ་རེ་ཞིག་མཎྜལ་རྣམས་བྱེད་དུ་གཞུག་པར་བྱའོ། །དེ་ནས་སྤྱན་དྲང་ངོ་། །དེ་ནས་དམ་ཚིག་བསྟན་ནོ། །དེ་ནས་མཆོད་ཡོན་ཡང་ཕུལ་ཏེ་དྲི་ལ་སོགས་པས་ལེགས་པར་མཆོད་ལ། གཏོར་མ་དབུལ་ལོ། །དེ་ནས་གཤེགས་སུ་གསོལ་ལོ། །
དེ་ལ་སྔགས་དང་ཕྱག་རྒྱ་ནི་འདི་ཡིན་ཏེ། ཤར་ཕྱོགས་སུ་ཁ་བལྟས་ཏེ་གཡས་བརྐྱང་གི་གོམ་པས་འདུག་ཅིང་། ལག་པ་གཡོན་པས་རྡོ་རྗེ་བསྟན་ལ། གཡས་པ་དཀུའི་ཕྱོགས་སུ་བཞག་སྟེ། གཡས་པའི་མཛུབ་མོ་ལྕགས་ཀྱུས་སྤྱན་དྲང་ངོ་། །དེའི་མཛུབ་མོ་ལྕགས་ཀྱུ་དང་བྲལ་བ་ནི་བརྒྱ་བྱིན་གྱི་དམ་ཚིག་གི་ཕྱག་རྒྱའོ། །གཡོན་བརྐྱང་གི་གོམ་པས་འདུག་ལ་སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །དེ་ནས་དེའི་སྔགས་ནི། ན་མོ་བཛྲ་སྱ་དི་ཤི་དི་ཤི་བཛྲ་པཱ་ཎི་རོཀྵ་རཀྵ་སྭཱ་ཧཱ། མེའི་ཕྱོགས་སུ་བལྟས་ཏེ་ལག་པ་གཡས་པའི་མཛུབ་མོ་ཟླུམ་པོའི་རྣམ་པར་བཀུག་སྟེ་གུང་མོ་བསྒྲེང་བའི་ཚིགས་གསུམ་པར་བཙུགས་ལ་མཐེ་བོང་ལག་མཐིལ་དུ་བཞག་པ་ནི་མེ་ལྷ་སྤྱན་དྲང་བའི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཐེ་བོང་མཛུབ་མོའི་གཞོགས་ལ་བསྟན་པ་ནི་མེ་ལྷའི་དམ་ཚིག་གི་ཕྱག་རྒྱའོ། །ཕྱག་རྒྱ་དེ་ཉིད་ལག་པའི་དབུས་སུ་མངོན་དུ་ཕྱོགས་ཏེ། གཅིག་ཏུ་སྦྱར་བ་ནི་གཤེགས་སུ་གསོལ་བའི་ཕྱག་རྒྱའོ། །དེའི་སྔགས་ནི་ཨགྣ་ཨེ་ཧི་ཨེ་ཧྱོ་ཧི་ཀ་པི་ལ་ཛྭ་ལ་ཛྭ་ལ་ད་ཧ་ད་ཧ་ཤི་ཁི་ཏོ་ལི་བི་རཱུ་པཱ་ཀྵ་སྭཱ་ཧཱ། གཤིན་རྗེར་བལྟས་ཏེ་ལག་པ་མདུན་དུ་ཕྱོགས་པར་བྱས་ལ་ནང་དུ་རྡོ་རྗེ་བསྡམས་པའི་དབུས་སུ་མཐེ་བོང་གཉིས་དང་ཕྱི་རུ་མིང་མེད་གཉིས་སྦྱར་ཞིང་བསྒྲེང་སྟེ་སླར་ནང་དུ་བཟུང་བ་ནི་གཤིན་རྗེ་སྤྱན་དྲང་བའི་ཕྱག་རྒྱའོ། །སྲིན་ལག་གཉིས་ཡང་ཕྱི་རོལ་དུ་གཤིབས་ཏེ་བསྒྲེང་བ་སྙིང་གར་བཟུང་བ་ནི་དམ་ཚིག་གི་ཕྱག་རྒྱའོ། །དེ་ཉིད་ལས་སྲིན་ལག་སྦྱར་བ་ནི་གཤེགས་སུ་གསོལ་བའི་ཕྱག་རྒྱའོ། །དེའི་སྔགས་ནི་ཡ་མཱ་ཡ་སྭཱ་ཧཱ། བདེན་བྲལ་དུ་བལྟས་ཏེ་མཉམ་པའི་གོམ་པས་འདུག་ལ་ལག་པ་གཡས་པའི་ཁུ་ཚུར་བཅངས་པ་མཛུབ་མོ་དང་གུང་མོ་བཀུག་སྟེ་བཟུང་ཞིང་དྲིའི་རྣམ་པར་བཞག་ལ། ལག་པ་གཡོན་པ་སྟ་ཟུར་ཕྱོགས་སུ་གཡོན་པའི་མཛུབ་མོ་བཀུག་ནས་གཞག་པ་ནི་བདེན་བྲལ་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་ལག་པ་གཡོན་པ་སྟ་ཟུར་ཕྱོགས་སུ་གནས་པར་རལ་གྲིའི་ཕྱག་རྒྱ་ནི་བདེན་བྲལ་གྱི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་བ་ནི་གཤེགས་སུ་གསོལ་བའི་
ཕྱག་རྒྱའོ། །དེའི་སྔགས་ནི་སརྦ་བྷཱུ་ཏ་བྷ་ཡཾ་ཀ་ར་ཀུ་རུ་ཀུ་རུ་སྭཱ་ཧཱ། ཆུ་ལྷའི་ཕྱོགས་སུ་མཉམ་པའི་གོམ་པས་འདུག་ལ་ལག་པ་གཡས་པའི་ཁུ་ཚུར་བཅངས་ནས་མཐེ་བོང་དང་མཛུབ་མོ་གཅིག་ཏུ་སྦྱར་ཏེ་གཡོན་པའི་ཁུ་ཚུར་སྙིང་གར་བཞག་ལ་གཡོན་པའི་མཛུབ་མོ་ལྕགས་ཀྱུས་སྤྱན་དྲང་བ་ནི་ཆུ་བདག་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་གཡོན་པའི་མཛུབ་མོ་ཁུ་ཚུར་ལ་སྦྱར་ཏེ་བཟུང་བ་ཞགས་པའི་ཕྱག་རྒྱ་ཆུ་བདག་གི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །དེའི་སྔགས་ནི་ཏྲྀ་ཏྲྀ་ཕུ་ཊ་ཏྲྀ་ཏྲྀ་ཤི་ཁི་ཏོ་ལི་བི་རཱུ་པཱ་ཀྵ་སྭཱ་ཧཱ། རླུང་ལྷའི་ཕྱོགས་སུ་བལྟས་ཏེ་འདུག་པ་གཡོན་པའི་ཁུ་ཚུར་བཅངས་ཏེ་གུང་མོ་བསྒྲེང་བའི་ཚིགས་གསུམ་བར་མཛུབ་མོ་བཀུག་པའི་རྩེ་མོ་བཙུགས་ལ་མངོན་དུ་ཕྱོགས་ཏེ་བརྐྱང་ངོ་། །ལག་པ་གཡས་པ་ཡང་དེ་བཞིན་དུ་བྱས་ཏེ་སྟ་ཟུར་ལོགས་སུ་བཞག་ཅིང་མཐེ་བོས་བསྐུལ་བ་ནི་རླུང་ལྷ་སྤྱན་དྲང་བའི་ཕྱག་རྒྱའོ། །དེ་ཉིད་མཐེ་བོང་སྔ་མ་བཞིན་དུ་བཞག་པ་ནི་རླུང་ལྷའི་དམ་ཚིག་གི་ཕྱག་རྒྱའོ།ཨོྃ །སྤྱན་དྲང་བའི་ཕྱག་རྒྱ་ལས་མཐེ་བོང་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །སྔགས་ནི་ཨོྃ་སྭཱ་ས་ཁཱ་ཁ་ཁ་ཁ་སྭཱ་ཧཱ། ཀུ་བེ་རལ་མངོན་དུ་བལྟས་ཏེ་འདུག་ནས་ལག་པ་གཉིས་ཁ་སྦྱར་ལ་རྡོ་རྗེ་བཅིང་བ་ནང་དུ་བྱས་ལ་མཐེ་ཆུང་གཉིས་གཤིབས་ཏེ་བརྐྱང་། དེའི་རྒྱབ་ཏུ་སྲིན་ལག་གཉིས་སོ་སོར་བཞག་ནས་གུང་མོ་དག་བསྒྲེང་བ་རྡོ་རྗེའི་མདུད་པ་བྱ་བ་ནི་ཀུ་བེ་ར་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་ཀྱིས་གུང་མོ་གཉིས་ནང་དུ་རྡོ་རྗེ་གུང་མོ་བཅིང་བའི་སྦྱོར་བས་གཞག་པ་ནི་ཀུ་བེ་རའི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་གུང་མོ་གཉིས་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །དེའི་སྔགས་ནི་ཨོྃ་ཀུ་བེ་རཱ་ཡ་སྭཱ་ཧཱ། དབང་ལྡན་གྱི་ཕྱོགས་སུ་བལྟས་ཏེ་འདུག་ལ་ལག་པ་དག་གཅིག་ཏུ་སྦྱར་ཏེ་ཐལ་མོ་སྦྱར་བ་བྱ་སྟེ་སྲིན་ལག་དང་མཐེའུ་ཆུང་ལག་མཐིལ་དུ་རྡོ་རྗེ་བཅིང་བ་བྱས་ཏེ་མཐེ་བོ་ཟུང་དག་གཞན་ལ་བརྟེན་ཅིང་ནང་དུ་བཀུག་སྟེ་བསྣོལ་ལ་གུང་མོ་གཤིབས་ཏེ་བསྒྲེང་བའི་རྒྱབ་ཏུ་མཛུབ་མོ་གཉིས་རྡོ་རྗེའི་རྣམ་པར་གཞག་ལ་དེ་ཉིད་བཀུག་སྟེ་སྟེང་དུ་ཕན་ཚུན་སེན་མོ་སྤྲད་པར་བྱ་བ་ནི་དབང་ལྡན་
སྤྱན་དང་པའི་ཕྱག་རྒྱའོ། །དེ་ཉིད་ཀྱི་མཛུབ་མོ་སྔར་བཞིན་རྡོ་རྗེའི་རྣམ་པར་བཟུང་བ་ནི་དབང་ལྡན་གྱི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་གཉིས་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །སྔགས་ནི་ཛུཾ་ཛུཾ་ཤི་བ་སྭཱ་ཧཱ། གཡོན་བརྒྱད་བའི་གནས་པས་འདུག་ལ་ལག་པ་ཐལ་མོ་ཁོང་སྟོང་དུ་སྦྱར་ཏེ་བཞག་ལ་སྟེང་དུ་བལྟས་ཏེ་མཛུབ་མོ་གཉིས་ཀྱི་ལྕགས་ཀྱུ་ནི་ཚངས་པ་ལ་སོགས་པ་སྤྱན་དྲག་བའི་ཕྱག་རྒྱའོ། །དེ་ཉིད་ཀྱི་མཛུབ་མོ་གཉིས་སྔ་མ་ལྟར་གཞག་པ་ནི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་གཉིས་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །དེ་རྣམས་ཀྱི་སྔགས་ནི་ཨོྃ་ཨཱུརྡྷཱཾ་བྲཧྨ་ཎེ་སྭཱ་ཧཱ། སཱུཪྻ་གྲ་ཧཱ་དྷི་པ་ཏ་ཡེ་སྭཱ་ཧཱ། ཨོྃ་ཙནྡྲ་ནཀྵ་ཏྲཱ་དྷི་པ་ཏ་ཡེ་སྭཱ་ཧཱ། མཉམ་པའི་གོམ་པའི་གནས་པས་འདུག་ལ་ལག་པ་གཉིས་གཅིག་ཏུ་སྦྱར་བ་སྟེ་སོར་མོའི་རྩེ་མོ་རྣམས་བར་མཚམས་མེད་པར་ཕན་ཚུན་སྦྱར་ཏེ། མཐེ་བོང་ཟླུམ་པོ་བྱས་ལ་འོག་ཏུ་བལྟས་ཏེ་སའི་ལྷ་མོ་ལ་སོགས་པ་མཛུབ་མོ་ལྕགས་ཀྱུས་སྤྱན་དྲང་བ་ནི་འོག་གི་ལྷ་མོ་སྤྱན་དྲང་བའི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་སྔར་བཞིན་དུ་མཛུབ་མོ་དག་གཞག་པ་ནི་དམ་ཚིག་གི་ཕྱག་རྒྱའོ། །མཛུབ་མོ་དག་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །སྔགས་རྣམས་ནི་ཨ་དྷོ་པྲྀ་ཐི་བྱེ་སྭཱ་ཧཱ། ཨ་སུ་རེ་བྷྱཿསྭཱ་ཧཱ། ནཱ་གེ་བྷྱཿསྭཱ་ཧཱ། དེ་ནས་རང་གི་སྔགས་ཀྱིས་ཐམས་ཅད་ལ་འཐོར་འཐུང་ཕུལ་ལ། བདག་དང་སློབ་མའི་ཚོགས་སུ་བཅས་པ་ལ་བགེགས་མེད་པར་མཛོད་ཅིག །ལས་ཀྱི་དངོས་གྲུབ་ཀྱང་བདག་ལ་སྩོལ་ཅིག་ཅེས་བརྗོད་ལ། ཐམས་ཅད་གཤེགས་སུ་གསོལ་ལོ། །ཡང་ན་དཔུང་བཟང་གི་ཆེད་དུ་གསུངས་པའི་ཚིགས་བཅད་རྣམས་ཀྱིས་གཏོར་མ་དབུལ་ཏེ། ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའི་ལྡིང་དང་འདབ་བཟང་ལུས་སྲུལ་པོ། ། དྲི་ཟ་སྲིན་པོ་གདོན་གྱི་ཚོགས་རྣམས་དང་། །གང་སུ་ས་ལ་གནས་པའི་རྫུ་འཕྲུལ་ཅན། །བུ་སྨད་བཅས་ཤིང་གཡོག་འཁོར་བཅས་པ་ལ། །བདག་གི་པུས་མོས་སྟེངས་འདིར་བཙུགས་ནས། །ཐལ་མོ་སྦྱར་ནས་ཁྱེད་ལ་གསོལ་འདེབས་ཀྱིས། །གསན་ནས་ཕན་གདགས་སླད
དུ་འདིར་སྤྱོན་ཅིག །འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་གནས་དང་། །རི་བོ་ཀུན་ལ་གང་དག་གནས་པ་དང་། །ཆུ་བོ་ཀུན་དང་ཆུ་བོའི་མདོ་རྣམས་དང་། །རིན་ཆེན་གནས་ན་ལྷག་པར་གནས་པ་དང་། །མཚོ་དང་རྫིང་བུ་ལྟེང་ཀ་ཆུ་ངོགས་དང་། །གཡའ་ཆུ་སིལ་མ་ཅན་དང་ཁྲོན་པར་གནས། །གྲོང་དང་ཕྱུགས་ལྷས་གྲོང་ཁྱེར་སྟོང་པ་དང་། །ཁང་སྟོང་དང་ནི་ལྷ་ཡི་ཁང་པར་ཡང་། །གཙུག་ལག་ཁང་དང་མཆོད་རྟེན་གནས་དག་དང་། །དཀའ་ཐུབ་གནས་དང་གླང་ཆེན་བྲེས་དང་ནི། །རྒྱལ་པོའི་དཀོར་ཁང་དག་ན་གང་གནས་དང་། །ལམ་སྲང་བཞི་མདོ་དག་དང་སུམ་མདོ་དང་། །གང་དག་ལམ་པོ་ཆེ་དང་ཤིང་གཅིག་དྲུང་། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །སེང་གེ་དྲེད་དང་གཅན་གཟན་གནས་དག་དང་། །འབྲོག་ཆེན་འཇིགས་སུ་རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ན་གང་གནས་རྣམས། །དགྱེས་ཤིང་མགུ་བས་ཕྲེང་བ་བྱུག་པ་དྲི། །བདུག་པ་གཏོར་མ་མར་མེ་བསྟོད་པ་འདིས། །གུས་འབུལ་སྣོམས་མཛོད་གསོལ་མཛོད་འཐུང་མཛོད་ཅིག ། ལས་འདི་རྣམས་ཀྱི་འབྲས་བུ་མཆིས་པར་མཛོད། །དེ་ལྟར་གདོན་ལ་མཆོད་པ་བྱས་ནས་ནི། །རྩེ་གཅིག་ཡིད་ཀྱིས་ཕྱོགས་སྐྱོང་མཆོད་པར་བྱ། །དབང་པོ་རྡོ་རྗེ་ཅན་གྱི་ལྷ་ཚོགས་འཁོར་དང་བཅས། །གཏོར་མ་ཁྱད་འཕགས་འདི་དག་བཞེས་སུ་གསོལ། །མེ་དང་གཤིན་རྗེ་བདེན་བྲལ་སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་དང་། །དབང་ལྡན་ལྷ་སྟེ་འབྱུང་པོའི་བདག་པོ་དང་། །སྟེང་གི་ཉི་ཟླ་ཚངས་པ་ཆེན་པོ་དང་། །ལྷ་རྣམས་ཀུན་དང་ས་ཡི་ཀླུ་རྣམས་དང་། །རི་ཡི་ལྷ་དང་གསང་བའི་ཚོགས་འདུས་རྣམས། །དཔུང་བཅས་སྡེ་བཅས་བུ་དང་བཤེས་གཉེན་བཅས། །རང་གི་སྐྱེ་བོའི་ཚོགས་ཤིང་མཉེས་པ་རྣམས། །སོ་སོར་སོ་སོའི་ཐུགས་དགོངས་གཅིག་མཛད་ནས། །རང་རང་ཕྱོགས་སུ་ལེགས་པར་བྱོན་ནས་ནི། །རང་གི་བུ་སྨད་མཛའ་བཤེས་གཉེན་འདུན་དང་། །ནང་མི་དམག་དང་དཔུང་བཅས་ཐབས་ཅིག་ཏུ། །མེ་
ཏོག་དྲི་དང་བྱུག་པ་མར་མེ་དང་། །ཞལ་ཟས་གཏོར་མ་འདི་དག་བཞེས་ནས་ཀྱང་། །གསོལ་མཛོད་སྣོམས་མཛོད་ལེགས་པར་འཐུང་མཛོད་ཅིག །ལས་འདི་རྣམས་ཀྱི་འབྲས་བུ་མཆིས་པར་མཛོད། །དེ་ལ་འདི་ནི་ཕྱི་དང་ནང་ཐམས་ཅད་དུ་གཏོར་མ་རབ་ཏུ་དབུལ་བའི་སྔགས་ཏེ། ཨ་ཀཱ་རོ་མུ་ཁྃ་ས་རྦ་དྷ་རྨཱ་ཆཱ་མཱ་དྱ་ནུ་ཏྭན་ཏྭཱ་ཏ་ཞེས་པའོ། །དེ་ནས་ཉེ་རེག་བྱ་སྟེ་ཤར་སྒོར་མངོན་པར་ཕྱོགས་ཏེ་གནས་པ་ལ། ལས་ཐམས་ཅད་པའི་ཐབ་ཁུང་གི་དབུས་སུ་དཔལ་འཇིག་རྟེན་གསུམ་རྣམ་པར་རྒྱལ་བའི་དཀྱིལ་འཁོར་གྱི་ལྷ་ཐམས་ཅད་ཀྱི་སྔགས་བརྗོད་ཅིང་མེ་ཏོག་དམར་པོས་ངེས་པར་བཀོད་ལ་སྦྱིན་སྲེག་གི་ཚོགས་དཔལ་རྡོ་རྗེ་ཧཱུྃ་མཛད་ཀྱི་སྔགས་ཀྱིས་བའི་མར་གྱིས་སྲེག་བླུགས་བརྒྱ་རྩ་བརྒྱད་དབུལ་ལོ། །དཔལ་རྣམ་པར་སྣང་མཛད་ལ་སོགས་པའི་སྔགས་ནས་རྡོ་རྗེ་འབེབས་པ་ཁྲོ་བོའི་མཐར་ཐུག་པར་ཀྱང་སྲེག་བླུགས་བདུན་བདུན་སླར་ཡང་ངོ་། །དེ་ནས་ཇི་ལྟ་བ་བཞིན་དུ་ཐབ་ཁུང་གི་རྣམ་པར་སྣང་མཛད་ལ་སོགས་པ་རྣམས་མེ་ཏོག་ཁོ་ནས་སྤྱན་དྲངས་ལ་རྣམ་པར་སྣང་མཛད་ལ་སོགས་པའི་སྔགས་ཀྱིས་བྲིས་པའི་དཀྱིལ་འཁོར་གྱི་རང་གི་གནས་སུ་དགོད་དོ། །དེ་ནས་དེ་བཞིན་གཤེགས་པ་ཐམས་ཅད་ལ་ཕྱག་བྱས་ལ་བདག་མིང་ཆེ་གེ་ཞེས་བགྱི་བའི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །འདིར་ཡང་དཀྱིལ་འཁོར་ཆེན་པོར་འཇུག་པ་ལ་སྣོད་དང་སྣོད་མ་ཡིན་པ་བརྟག་པར་མི་བྱ་སྟེ། དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་སེམས་ཅན་ཁ་ཅིག་ནི་སྡིག་པ་ཆེན་པོ་བགྱིད་པ་དེ་རྡོ་རྗེ་ཧཱུྃ་མཛད་ཀྱི་དཀྱིལ་འཁོར་ཆེན་པོ་འདི་མཐོང་སྟེ་ཞུགས་ནས་ངན་སོང་ཐམས་ཅད་དང་བྲལ་བར་འགྱུར་རོ། །བཅོམ་ལྡན་འདས་ནོར་དང་བཟའ་བ་དང་། བཏུང་བ་དང་། འདོད་པའི་ཡོན་ཏན་ཐམས་ཅད་ལ་ཆགས་པ་དང་། དམ་ཚིག་ལ་མི་འདའ་བ་དང་། སྔགས་སྤྱོད་པ་ལ་སོགས་པ་འདོད་ཅིང་མི་ནུས་པའི་སེམས་ཅན་དག་མཆིས་ཏེ། དེ་དག་ཀྱང་འདིར་ཇི་ལྟར་བྱ་བར་འདོད་པ་བྱ་བའི་ཕྱིར་ཞུགས་པ་རྣམས་ཀྱི་བསམ་པ་ཐམས་ཅད་རྫོགས་པར་འགྱུར་རོ། །བཅོམ་ལྡན་འདས་སེམས་ཅན་ཁ་ཅིག་ནི་གར་དང་།
གླུ་དང་། གད་མོ་དང་། རྩེད་མོ་དང་། ཁ་ཟས་ལ་སྤྱོད་པ་ལ་དགའ་བ་ཉིད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་ཆོས་ཉིད་ཁོང་དུ་མ་ཆུད་པས་ལྷའི་རིགས་དང་དཀྱིལ་འཁོར་གཞན་དུ་འཇུག་པར་འགྱུར་གྱི། དེ་བཞིན་དུ་རིགས་ཐམས་ཅད་ཀྱི་དཀྱིལ་འཁོར་རེ་བ་ཐམས་ཅད་ཡང་དག་པར་རྫོགས་པར་འགྱུར་བ་བླ་ན་མེད་པའི་དགའ་བ་དང་། མགུ་བ་དང་། རངས་པ་རྣམས་འབྱུང་བར་མཛད་པ་དེར་ནི་བསླབ་པའི་གནས་ལ་འཇིགས་ཤིང་སྐྲག་ནས་མི་འཇུག་པ་དག་ཀྱང་མཆིས་ཏེ། ངན་སོང་གི་དཀྱིལ་འཁོར་གྱི་ལམ་དུ་ཇི་ལྟར་གནས་པའི་བདེ་བའི་བདག་ཉིད་ཀྱི་གནས་སྐབས་ཅན་དེ་དག་ཀྱང་དགའ་བ་དང་། མགུ་བ་དམ་པ་དང་། བདེ་བ་དང་། ཡིད་བདེ་བ་མྱོང་བར་བགྱི་བ་དང་། ངན་སོང་གི་རྒྱུད་ཐམས་ཅད་དུ་འཇུག་པར་ཁ་བལྟས་པའི་ལམ་ལས་བཟློག་པར་བགྱི་བའི་སླད་དུ་རྡོ་རྗེ་ཧཱུྃ་མཛད་ཀྱི་དཀྱིལ་འཁོར་དུ་འཇུག་ཏུ་རུང་ངོ་། ། བཅོམ་ལྡན་འདས་ཆོས་ལྡན་གྱི་སེམས་ཅན་དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དམ་པ་འགྲུབ་པའི་ཐབས་ཀྱིས་སངས་རྒྱས་ཀྱི་བྱང་ཆུབ་འཚོལ་བ་ན། བསམ་གཏན་དང་རྣམ་པར་ཐར་པ་ལ་སོགས་པ་དང་། ས་རྣམས་ལ་འབད་པས་ཉོན་མོངས་པར་འགྱུར་བདག་ཀྱང་མཆིས་ཏེ། དེ་དག་ཀྱང་རྡོ་རྗེ་ཧཱུྃ་མཛད་ཀྱི་དཀྱིལ་འཁོར་འདི་ཉིད་དུ་ཞུགས་མ་ཐག་ཏུ་དེ་བཞིན་གཤེགས་པ་ཉིད་ཐམས་ཅད་ཀྱང་རྙེད་པར་དཀའ་བ་ཡང་མ་ལགས་ན། དངོས་གྲུབ་གཞན་ལྟ་སྨོས་ཀྱང་ཅི་འཚལ་ཞེས་གསོལ་བར་བྱའོ། །དེ་ནས་སློབ་མ་གཞུག་པར་བྱ་སྟེ། དེ་ལ་བསླབ་པའི་གཞི་ལྔ་ཡོངས་སུ་བཟུང་བའི་དགེ་བསྙེན་ནམ། དགེ་སློང་ངམ་དགེ་སློང་གི་སྡོམ་པ་ཡོངས་སུ་གཟུང་ཞིང་སློབ་དཔོན་དུ་དབང་བསྐུར་བར་འོས་པ། སློབ་དཔོན་གྱི་ཞབས་དག་ལ་ཕྱག་བྱས་ཏེ། འདི་སྐད་ཅེས་བརྗོད་དེ། བདག་གི་སྟོན་པ་དགའ་ཆེན་ཁྱོད། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སྐྱབས་གསུམ་དག་ཀྱང་བདག་ལ་སྩོལ། །ཞེས་པའོ། །དེ་ནས་སློབ་མ་ལ་རྡོ་རྗེ་གནོད་སྦྱིན་ཡོངས་སུ་བཟླས་པའི་གོས་དམར་པོའི་སྟོད་
གཡོགས་སྨད་གཡོགས་དང་། རྡོ་རྗེ་ལྕགས་ཀྱུ་ལ་སོགས་པའི་སྒོ་སྐྱོང་བཞི་བཟླས་པའི་གདོང་གཡོགས་བཅིང་བར་བྱས་ལ་ཕྱག་བཞི་བྱེད་དུ་གཞུག་གོ། །ཡང་ལག་ན་མེ་ཏོག་ཐོགས་པའི་སློབ་མས་སློབ་དཔོན་ལ་ཕྱག་བྱས་ལ་ལག་ན་མེ་ཏོག་ཐོགས་པ་ཉིད་ཀྱིས་བཤགས་པ་དང་། རྗེས་སུ་ཡི་རང་བ་དང་། བསྐུལ་བ་དང་། གསོལ་བ་གདབ་པ་བྱས་ལ་འདི་སྐད་ཅེས་བརྗོད་དོ། །གཙོ་བོ་བདག་ལ་སྡོམ་པ་སྩོལ། །ཐུབ་པ་ཉི་མ་མ་ལུས་པའི། །སངས་རྒྱས་རྣམས་ནི་བདག་ལ་དགོངས། །བདག་མིང་ཆེ་གེ་ཞེས་བགྱི་བ། །སློབ་དཔོན་དབང་དུ་གནས་པ་ལ། །སངས་རྒྱས་རོལ་མོ་འབྱུང་བ་ཡི། །ཕྱིར་མི་ལྡོག་པའི་དགེ་འདུན་ཅན། །ཐར་པ་ཆེན་པོའི་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱིའོ། །གསང་བ་ཐམས་ཅད་རིགས་བསྡུས་པ། །སློབ་དཔོན་ཆེན་པོ་བདག་འཇུག་མཛོད། །ཕྱིར་མི་ལྡོག་པའི་དབང་བསྐུར་བ། །སྐལ་བ་ཆེན་པོ་བདག་ལ་སྩོལ། །མཚན་རྣམས་རྗེས་སུ་གསོལ་བཏབ་པ། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་བ་ནི་རྨད་བྱུང་ཆེ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་འགྱུར། །སློབ་དཔོན་ཆེན་པོ་བདག་ལ་གསོལ། །དེ་ནས་སློབ་དཔོན་གྱི་རིགས་ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་མོ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ། །གསང་བ་ཡིས་ནི་འཁོར་ལོ་འདིར། །འཇུག་ཅིང་བྱང་ཆུབ་སྡོམ་པ་འཚལ། ། དེ་ནས་སློབ་དཔོན་གྱིས་འདི་སྐད་ཅེས་བརྗོད་དོ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་སྡོམ་པ་བརྟན་པོར་གྱུར། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་གྲོས་ཆེན་པོ་ཁྱོད་ཀྱིས་ཟུང་། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །སློབ་དཔོན་དག་ཀྱང་གཟུང་བར་གྱིས། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །རིན་ཆེན་རིགས་ནི་བསྡུས་པ་ནི། །ཉིན་མོ་གསུམ་དང་མཚན་མོ་
གསུམ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རབ་སྦྱིན་བྱ། །ཕྱི་དང་གསང་བ་ཐེག་པ་གསུམ། །དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །ལས་ཆེན་རིགས་ནི་བསྡུས་པ་ལ། ། སྡོམ་པ་གསུམ་པོ་ཡང་དག་ལྡན། །མཆོད་པའི་ལས་ཀྱང་ཅི་ནུས་བཞིན། །ཡང་དག་ཉིད་དུ་ངེས་གཟུང་གྱིས། །དེ་ལས་གཞན་པ་བཞི་པོ་ཡང་། །འདི་དག་ཕས་ཕམ་པར་ནི་བཤད། །མི་སྤང་དོར་བར་ཡང་མི་བྱ། །རྩ་བའི་ལྟུང་བར་འདི་བཤད་དོ། །ཉིན་མོ་གསུམ་དང་མཚན་གསུམ་དུ། ཉིན་རེ་ཞིང་ནི་བརྗོད་པར་བྱ། །གང་ཚེ་ཉམས་ན་རྣལ་འབྱོར་པ། །ལྟུང་བ་སྦོམ་པོ་དག་ཏུ་འགྱུར། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱད་ཅིང་། །བརྫུན་ཡང་སྨྲ་བར་མི་བྱའོ། །ཕུང་ཁྲོལ་ཀུན་གྱི་རྩ་བ་ཡི། །ཆང་ནི་བཏུང་བ་རྣམ་པར་སྤང་། །སེམས་ཅན་གདུལ་ཕྱིར་མ་གཏོགས་པ། །བྱ་བ་མ་ཡིན་ཐམས་ཅད་སྤང་། །དམ་པའི་དྲུང་དུ་གནས་བྱ་ཞིང་། །རྣལ་འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་པ་གསུམ། །ངག་གི་རྣམ་པ་བཞི་རྣམས་དང་། །ཡིད་ཀྱི་རྣམ་པ་གསུམ་དག་ནི། །ཅི་ནུས་པས་ནི་རྗེས་སུ་བསྐྱང་། །ཐེག་པ་དམན་ལ་དགའ་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ཀྱང་ཡོངས་མི་སྤང་། །རྟག་ཏུ་མྱ་ངན་འདས་མི་ཆགས། །ལྷ་དང་ལྷ་མིན་གསང་བ་པ། །ཁྱེད་ཀྱིས་བརྙས་པ་མི་བྱ་ཞིང་། །ཕྱག་རྒྱ་བཞོན་པ་མཚོན་ཆ་དང་། །མཚན་མ་འགོམ་པ་ཡང་མི་བྱ། །འདི་དག་དམ་ཚིག་ཞེས་བཤད་དོ། །དེ་དག་ནི། །བློ་གྲོས་ཁྱེད་ཀྱིས་བསྲུང་བར་བྱ། །དེས་ཀྱང་འདི་སྐད་བརྗོད་པར་བྱ། །སློབ་དཔོན་ཁྱོད་ནི་བདག་ལ་གསོན། །གཙོ་བོ་ཇི་ལྟར་བཀའ་བསྒོ་བ། །དེ་ལྟར་བདག་ནི་བགྱིད་པར་འཚལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །ཞེས་པ་ནས་སེམས་ཅན་མྱ་ངན་འདས་ལ་དགོད་ཅེས་བྱ་བའི་བར་དུ་བརྗོད་པར་བྱའོ། །གང་ཞིག་སྡོམ་པ་མི་འཛིན་པ་དེ་ལ་ནི་གཞུག་པ་ཙམ་སྦྱིན་པར་བྱ་ཞིང་དེང་ཁྱོད་བྱ་བ་ལ་སོགས་པ་བརྗོད་པར་མི་
བྱ་སྟེ། སློབ་དཔོན་དུ་དབང་བསྐུར་བ་ཡང་མི་བྱའོ། །དེ་ནས་ཨོྃ་སརྦ་ཡོ་ག་ཙི་ཏ་མུཏྤཱ་ད་ཡཱ་མི་ཞེས་པ་འདིས། བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །དེ་ཡི་སྙིང་གར་སྙིང་པོས་ནི། །རྡོ་རྗེ་རབ་ཏུ་གཞག་པར་བྱ། །སུ་ར་ཏ་ས་མ་ཡ་སྟྭྃ་ཧོཿབཛྲ་སིདྡྷི་ཡ་ཐཱ་སུ་ཁྃ་ཞེས་པ་འདིས་སོ། །དེ་ནས་རྡོ་རྗེ་ཧཱུྃ་མཛད་དུ་བྱིན་གྱིས་བརླབས་ལ་དྲི་དང་མེ་ཏོག་ལ་སོགས་པས་མཆོད་དེ་མེ་ཏོག་གི་ཕྲེང་བ་གདགས་ཤིང་། གདོང་དྲི་ཞིམ་པོས་བྱུགས་ལ་ཡོན་གྱི་མཆོག་བཟུང་སྟེ། ཕྱི་རོལ་ན་གནས་པ་ལ་བུམ་པའི་ཆུས་དབང་བསྐུར་ལ། ཨོྃ་གྲྀཧྞ་བཛྲ་ས་མ་ཡ་ཧཱུྃ་བྃ་ཞེས་པ་འདིས་ཁྲོ་ཏི་རིནྟི་རི་རང་ཉིད་བཅིངས་ལ་སློབ་མ་འཆིང་དུ་གཞུག་གོ། །རྡོ་རྗེ་བསྡམས་པ་ན་ང་བྱས་ལ། །མཐེ་བོང་རྡོ་རྗེ་དམ་པོ་ཡིས། །ཡིད་ཀྱི་ཁྲོ་བས་དགའ་བྱ་བས། །ཁྲོ་བོ་ཏི་རིནྟི་རི་དྲན། །དེ་ནས་དེ་ཉིད་ཀྱི་མཐེ་བོང་དག་གིས་མེ་ཏོག་གི་ཕྲེང་བ་འཛིན་དུ་བཅུག་ལ་སྙིང་པོ་འདིས་གཞུག་པར་བྱ་སྟེ། བཛྲས་མ་ཡྃ་བྲ་ཏི་ཤྱཱ་མི་ཞེས་པའོ། །ཤར་གྱི་སྒོར་ཡང་རྡོ་རྗེ་ལྕགས་ཀྱུས་དེ་དགུག་ཅིང་ལྷོར་ཞགས་པས་གཞུག་གོ། །ནུབ་ཏུ་ལྕགས་སྒྲོག་གིས་བཅིང་ཞིང་། བྱང་དུ་རྡོ་རྗེ་འབེབས་པས་དབབ་བོ། །ཡང་ཤར་གྱི་སྒོ་ནས་དེ་བཞིན་དུ་བཅུག་ལ་འདི་སྐད་ཅེས་བརྗོད་དོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་ཀྱིས་དེང་ནས་ངས་ཁྱོད་ལ་རྡོ་རྗེའི་ཡེ་ཤེས་བསྐྱེད་པར་བྱའི། ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་རྣམས་ལྟ་ཅི་སྨོས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱའོ། །ཁྱོད་དམ་ཚིག་ཉམས་པར་འགྱུར་ཏ་རེ། དེ་ནས་རྡོ་རྗེ་སློབ་དཔོན་རང་ཉིད་ཁྲོ་བོ་ཏི་རིནྟི་རི་ཁ་གྱེན་དུ་བལྟ་བ་དང་བཅས་པས་བཅིངས་ལ། རྡོ་རྗེ་སློབ་མའི་སྤྱི་བོར་བཞག་སྟེ་འདི་སྐད་ཅེས་སྨྲས་ཏེ། འདི་ནི་ཁྱོད་ཀྱི་དམ་ཚིག་གི་རྡོ་རྗེ་ཡིན་ཏེ། གལ་ཏེ་ཁྱེད་འགའ་ཞིག་ལ་སྨྲས་ན་སྤྱི་བོ་འགེམས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་། མནའི་སྙིང་པོ་ལན་ཅིག་བཟླས་པའི་ཆུ་རྡོ་རྗེ་སློབ་མ་དེ་འཐུང་དུ་གཞུག་གོ། །དེ་ལ་མནའི་སྙིང་པོ་འདི་ཡིན་ཏེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛོད། །
གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །བཛྲ་ཨུངྐ་ཋཿཞེས་བྱའོ། །དེ་ནས་སློབ་མ་ལ་འདི་སྐད་ཅེས་སྨྲའོ། །དེང་ནས་བརྩམས་ནས་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱི། ངས་འདི་གྱིས་ཤིག་ཅེས་གང་བསྒོ་བ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །ཁྱོད་ཡ་ང་བ་མ་སྤངས་པར་ཚེའི་དུས་བྱས་ནས་དམྱལ་བར་ལྟུང་བར་འགྱུར་ཏ་རེ་ཞེས་པའོ། །དེའི་རྗེས་ལ་རང་གི་སྙིང་གར་ཡི་གེ་ཨ་རྡོ་རྗེའི་འོད་ཟེར་གྱི་ཕྲེང་བ་དང་ལྡན་པར་བསམ་མོ། །དེ་ནས་སློབ་མའི་སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་ཟླ་བའི་དཀྱིལ་འཁོར་ལ་གནས་པའི་རྡོ་རྗེ་རྩེ་ལྔ་པ་འབར་བ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་བསམས་ཏེ། ཧཱུྃ་ཏྲཱྃ་ཧྲཱིཿཨཿཞེས་པ་འདི་དག་གི་གོ་རིམས་བཞིན་དུའོ། །སྒོ་དབྱེ་བའི་ཕྱག་རྒྱས་རང་དང་སློབ་མའི་སྙིང་གར་ཕྱེ་ལ་རང་གི་སྙིང་གར་ཡི་གེ་ཡྃ་ལས་ཡི་གེ་ཕྱུང་ལ་སློབ་མའི་སྙིང་གར་གནས་པའི་རྡོ་རྗེ་དབུས་སུ་བློས་བཅུག་ལ་ལུས་ཐམས་ཅད་གང་བར་བསམ་མོ། །འདི་སྐད་ཅེས་བརྗོད་དོ། །དེ་བཞིན་གཤེགས་པ་ཐམས་ཅད་ཀྱིས་ཀྱང་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་འབབ་ཏུ་གསོལ་ཞེས་སྨྲོས་ཤིག །དེ་ནས་མྱུར་དུ་རྡོ་རྗེ་སློབ་དཔོན་གྱིས་ཁྲོ་བོ་ཏི་རིནྟི་རི་བཅིངས་ལ་འདི་སྐད་བརྗོད་པར་བྱ་སྟེ། འདི་དེ་དམ་ཚིག་རྡོ་རྗེ་ཡིན། །རྡོ་རྗེ་སེམས་དཔའ་ཞེས་བྱར་གྲགས། །རྡོ་རྗེ་ཡེ་ཤེས་བླ་ན་མེད། །ཁྱོད་ལ་དེ་ཉིད་འབབ་གྱུར་ཅིག །བཛྲ་ཨཱ་བེ་ཤ་ཨཱཿཞེས་པ་བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། དྲུག་ཅུ་དང་། བདུན་ཅུ་དང་། བརྒྱད་ཅུ་དང་།དགུ་བཅུ་དང་། ལན་བརྒྱར་བརྗོད་དེ་ངེས་པར་འབབ་པར་འགྱུར་རོ། །དེ་ནས་རྡོ་རྗེའི་ཁུ་ཚུར་བཅིངས་ལ་སེམས་མ་རྡོ་རྗེ་མའི་ཕྱག་རྒྱ་དྲལ་བར་བྱ་ཞིང་འདི་དག་བརྗོད་དེ། ཨོྃ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀ་ཧྞཱ་པ་ཡ་གྲྀཧྞཱ་བ་ཡ་ཧཱུྃ། ཨཱ་ན་ཡ་ཧོ་བྷ་ག་བཱ་ན་བཛྲ་བི་དྱཱ་རཱ་ཛ་ཧཱུྃ་ཕཊ། ཨཿཨཿཨཿཨཿཨཿ། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། དྲུག་ཅུ་དང་། བདུན་ཅུ་དང་། བརྒྱད་ཅུ་དང་། དགུ་བཅུ་དང་། ལན་བརྒྱར་བརྗོད་པར་བྱའོ། །བཅོམ་ལྡན་འདས་ཀྱིས་ཀྱང་རྡོ་རྗེ་རླུང་
གི་དཀྱིལ་འཁོར་ལ་རྡོ་རྗེ་ཧཱུྃ་གི་རྣམ་པའི་འོད་ཟེར་གྱི་མདོག་དམར་པོ་འབར་བ་གང་བཞིན་པར་བསམ་མོ། །སླར་ཡང་གལ་ཏེ་འབབ་པར་མ་གྱུར་ན། དེའི་ཚེ་དྲིལ་བུ་དང་བཅས་པས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ་རྐང་པ་གཡོན་པས་དེའི་རྐང་པ་མནན་ལ་སྟེང་གི་ནམ་མཁའི་ཕྱོགས་སུ་རྣམ་པར་སྣང་མཛད་དཔལ་རྡོ་རྗེ་ཧཱུྃ་མཛད་ཀྱི་སྟེང་དུ་དེ་ཉིད་ལ་དབབ་པའི་ཕྱིར་ཁྲོ་བོ་ཧཱུྃ་གི་རྣམ་པའི་འོད་ཟེར་གྱི་ཚོགས་ཀྱིས་མནན་བཞིན་པ་དང་། འོག་ནས་ཀྱང་རྡོ་རྗེ་རླུང་གི་དཀྱིལ་འཁོར་དང་། ཧཱུྃ་གི་རྣམ་པས་བརྡེག་བཞིན་པ་དང་། དེ་བཞིན་དུ་ཤར་ལ་སོགས་པའི་ཕྱོགས་སུ་བཞུགས་པའི་མི་བསྐྱོད་པ་ལ་སོགས་པ་རྣམས་ཀྱིས་ཧཱུྃ་ཏྲཱྃ་ཧྲཱིཿཨཿཞེས་བྱ་བ་རང་གི་ས་བོན་གྱི་འོད་ཟེར་གྱི་ཚོགས་ཀྱིས་ཡང་དག་པར་འབེབས་པར་མཛད་པར་བསམ་ཞིང་དེ་ལ་དབབ་སྟེ། ཧཱུྃ་བཛྲ་ཨཱ་བེ་ཤ་ཡ་ཨཿཞེས་རྣམ་པ་བརྒྱར་བརྗོད་པར་བྱའོ། །གལ་ཏེ་སྡིག་པ་མང་བ་ཉིད་ཀྱིས་འབབ་པར་མ་གྱུར་ན་དེའི་ཚེ་སྡིག་པ་དྲལ་བའི་ཕྱག་རྒྱས་དེའི་སྡིག་པ་རྣམས་ཡང་དང་ཡང་དུ་དྲལ་བར་བྱའོ། །ཡམ་ཤིང་འཇག་མ་རྣམས་ཀྱི་མེ། །རབ་འབར་རྡོ་རྗེ་ཁྲོ་བོ་ཡི། །མཉམ་པར་བཞག་པས་དབུལ་བ་ཡིས། །དེ་ཡི་སྡིག་པ་ཐམས་ཅད་ནི། ། ཏིལ་གྱི་སྦྱིན་སྲེག་དེས་ངེས་བསྲེག །ཨོྃ་སརྦ་པཱ་པྃ་ད་ཧ་ན་བཛྲཱ་ཡ་སྭཱ་ཧཱ་ཞེས་བྱ་བ་དང་། ལག་པ་གཡས་པའི་མཐིལ་དུ་ཏིལ་ནག་པོ་ལས་སྡིག་པའི་གཟུགས་བརྙན་བྱས་ལ། ཡི་གེ་ཧཱུྃ་དབུས་སུ་བསམས་ཏེ། མཛུབ་མོ་དང་མཐེ་བོང་དག་གིས་སྦྱིན་སྲེག་བྱའོ། །དེ་ནས་སྦྱིན་སྲེག་གི་ཐབ་ཁུང་ལས་འབྱུང་བའི་འབར་བའི་ཕྲེང་བ་ཀུན་དུ་འཁྲུགས་པའི་རྡོ་རྗེ་རྣམས་ཀྱིས་དེའི་ལུས་ཀྱི་སྡིག་པ་སྲེག་བཞིན་པར་བསམས་ལ་དེ་ནས་ཡང་རྡོ་རྗེ་བབས་པ་དེ་ཁོ་ན་བཞིན་དུ་བཅིངས་ལ་དབབ་པར་བྱ་སྟེ། ངེས་པར་འབེབས་པར་འགྱུར། དེ་ལྟ་བུས་ཀྱང་གང་ལ་བབ་པར་མ་གྱུར་པ་དེ་ལ་དབང་བསྐུར་བར་མི་བྱའོ། །བབས་ན་སྐད་ཅིག་མ་དེ་ཉིད་དེའི་མངོན་པར་ཤེས་པ་ལྔ་ལ་སོགས་པ་རྫོགས་པར་འགྱུར་རོ། །དེ་ནས་ཡང་དག་པར་བབས་པར་ཤེས་ནས་ཡང་ཨོྃ་བཛྲ་ས་ཏྭ་སུ་སྃ་གྲ་ཧཱ་ཏ་ཞེས་པ་ལ་སོགས་པའི་གླུ་བརྗོད་ལ། ཁྲོ་བོའི་ཁུ་ཚུར་དང་དེ་བཞིན་གཤེགས་པ་རྡོ་རྗེ་
མེའི་ཕྱག་རྒྱ་དྲལ་བར་བྱའོ། །དེ་ཕེབས་ན་རྡོ་རྗེ་སེམས་དཔའ་ཁྲོ་བོའི་ཕྱག་རྒྱ་བཅིང་བར་བྱའོ། །དེའི་ཚེ་སློབ་དཔོན་གྱིས་རྡོ་རྗེ་ཁུ་ཚུར་ཁྲོ་བོའི་ཕྱག་རྒྱས་བཅིང་བར་བྱའོ། །དེ་བཞིན་དུ་ཇི་སྲིད་དུ་གྱུར་ན་དེའི་ཚེ་རྡོ་རྗེ་བཞདཔའི་ཕྱག་རྒྱ་བཅིང་ངོ་། །དེའི་ཚེ་རྡོ་རྗེ་ཆོས་ཁྲོ་བོའི་ཕྱག་རྒྱ་བཅིང་ངོ་། །དེ་ལྟ་བུས་ཉེ་བར་བྱོན་ཅིང་དགོངས་པར་འགྱུར་རོ། །དེ་ནས་དེའི་ལྕེ་ལ་རྡོ་རྗེ་བསམས་ལ་བྲུ་ཧི་བཛྲ་ཞེས་པ་བརྗོད་དོ། །དེ་ནས་ཐམས་ཅད་སྨྲ་བར་འགྱུར། དེ་ནས་ཕྲེང་བ་དེ་དཀྱིལ་འཁོར་ཆེན་པོར་དོར་ཏེ། །བྲ་ཏཱི་ཙྪ་ཧོཿཞེས་བྱའོ། །དེ་ནས་གང་དུ་བབས་པ་དེ་འདིས་འགྲུབ་བོ། །དེ་ནས་ཨོྃ་པྲ་ཏི་གྲྀཧྞ་ཏྭྃ་ཨི་མྃ་ས་ཏྭ་མ་ཧཱ་བ་ལ་ཞེས་བྱ་བས་ཕྲེང་བ་དེ་ཉིད་ཀྱི་མགོ་བོར་བཅིང་ངོ་། །དེ་ནས་ཨོྃ་དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་ན་མེད། །ཐམས་ཅད་མིག་ནི་བྱེ་བར་འགྱུར། །ཧེ་བཛྲ་པཱ་ཤྱ་ཞེས་པ་འདིས་གདོང་གཡོགས་དགྲོལ་ལོ། །དེ་ནས་དཀྱིལ་འཁོར་ཆེན་པོའི་རྡོ་རྗེ་ལྕགས་ཀྱུ་ནས་བརྩམས་ཏེ་ཇི་སྲིད་རྣམ་པར་སྣང་མཛད་ཀྱི་མཐར་ཐུག་པར་བསྟན་ནོ། །དེ་ནས་ཏིཥྛ་བཛྲ་ཞེས་པ་ལ་སོགས་པས་སློབ་མ་སྙིང་གར་གཞུག་པའི་ཕྱག་རྒྱ་དགྲོལ་ལོ། །དེ་ནས་ཕྱི་རོལ་གྱི་དཀྱིལ་འཁོར་དུའམ། ཕྱི་རོལ་དུ་ཟླ་བའི་དཀྱིལ་འཁོར་ཤར་སྒོ་ལ་མངོན་པར་ཕྱོགས་པ་ལེགས་པར་བྲིས་ལ་སློབ་མ་དཔལ་རྡོ་རྗེ་ཧཱུྃ་མཛད་ཀྱི་ཕྱག་རྒྱ་སེམས་མ་རྡོ་རྗེ་ལ་སོགས་པས་ཀྱང་བྱིན་གྱིས་བརླབས་ལ། ཕྱག་རྒྱ་ཆེན་པོ་དེ་ལ་བཞག་སྟེ་དབང་བསྐུར་རོ། །དྲི་དང་མེ་ཏོག་ལ་སོགས་པས་མཆོད་དེ། མཆོད་ཡོན་དབུལ། གདུགས་དང་། རྒྱལ་མཚན་དང་། བ་དན་ལ་སོགས་པ་དང་། དུང་དང་རོལ་མོ་ལ་སོགས་པའི་སྒྲ་བསྒྲག་པ་དང་། དེ་ནས་བཀྲ་ཤིས་ཀྱི་ཚིགས་བཅད་རྣམས་ཀྱིས་མངོན་པར་དགའ་བས་དང་པོ་རེ་ཞིག་ཆུའི་དབང་བསྐུར་བ་དང་། ཅོད་པན་དང་། དར་དཔྱངས་དང་། རྡོ་རྗེ་དང་། བདག་པོ་དང་། མིང་གིས་དབང་བསྐུར་བདག་གིས་དབང་བསྐུར་ལ་ཡང་མེ་ཏོག་ལ་སོགས་པ་དང་སྒེག་མོ་ལ་སོགས་པ་མཆོད་པ་རྣམ་པ་བརྒྱད་ཀྱིས་མཆོད་དོ། །སློབ་མ་རྣམས་ཀྱིས་རྡོ་རྗེ་ཐལ་མོ་སྦྱར་བས་སློབ་དཔོན་ལ་རབ་ཏུ་བཏུད་ལ་ཡོན་གྱི་མཆོག་ཕུལ་ལ་མེ་ཏོག་ལ་སོགས་པའི་དབང་བསྐུར་བ་ཡང་གཟུང་བར་བྱའོ། །སློབ་དཔོན་གྱིས་དབང་བསྐུར་བ་ནི་དཔལ་རྡོ་རྗེ་ཧཱུྃ་མཛད་ཀྱི་ཕྱག་རྒྱས་དེ་ཁོ་ན་བཞིན་དུ་ཇི་ལྟར་ངེས་པར་བསྟན་པའི་གནས་སུ་བཞག་ལ་དེ་ཚིག་གི་ཕྱག་རྒྱ་རྣམས་ཀྱིས་དེའི་ལུས་
ལ་དཔལ་རྡོ་རྗེ་ཧཱུྃ་མཛད་ལ་སོགས་པ་བཀོད་དེ་སླར་ཡང་། ཨོྃ་བཛྲ་ཨ་དྷི་པ་ཏི་སྟྭྃ་ཨ་བྷི་ཥིཉྩཱ་མི་དྲྀ་ཌྷོ་མེ་བྷྱ་བ་ཛཿཧཱུྃ་བྃ་ཧོཿཧཱུྃ་ཕཊ་ཞེས་པ་འདི་རྣམ་པར་རྒྱལ་བའི་བུམ་པ་ལ་བརྒྱ་རྩ་བརྒྱད་དམ་སྟོང་ཡོངས་སུ་བཟླས་པ་བྱས་ལ། དེ་ནས་ཨོྃ་བཛྲ་ཨ་བྷི་ཥིཉྩ་ཞེས་པ་འདི་བརྗོད་ཅིང་རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ནས་ཆུ་བླངས་ལ་ཆུའི་དབང་བསྐུར་བ་བྱིན་ནོ། །འདི་ཡང་བརྗོད་དེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུས་འགྲུབ་བོ། །རྡོ་རྗེ་དྲིལ་བུའི་ཕྱག་རྒྱ་ཡང་། །དཀྱིལ་འཁོར་ཅན་མིན་ན་མི་སྨྲ། །སྐྱེ་བོ་འདུས་པ་གནས་པ་ནི། །དགོད་དང་མ་དད་པ་ལ་མིན། །དེ་ནས་ཆོ་ག་ཐམས་ཅད་ཉམས་སུ་བླངས་ལ་མཚན་བརྒྱ་རྩ་བརྒྱད་པས་ལེགས་པར་བསྟོད་དེ་ཚིགས་བཅད་ལྔས་རྗེས་སུ་གནང་བ་བྱིན་ནས་གཟེངས་བསྟོད་པ་དང་ལུང་བསྟན་པས་སློབ་མ་ཐམས་ཅད་ལུང་བསྟན་ནོ། །དེ་ནས་གསང་བའི་དབང་བསྐུར་བ་འབྱུང་སྟེ། སློབ་དཔོན་དུ་དབང་བསྐུར་བར་འོས་པ་དཀྱིལ་འཁོར་ཐམས་ཅད་དུ་བཅུག་པ་དེ་ལྟར་མཛོད་ཅིག་ཅེས་བྱའོ། །འདི་ཡི་ལས་ཀྱི་དངོས་གྲུབ་ནི། །ཇི་ལྟར་འདོད་པའི་དངོས་གྲུབ་ཀྱང་། །ཐ་མ་འབྲིང་དང་མཆོག་རྣམས་ནི། །མ་ལུས་ངེས་པར་འཐོབ་པར་འགྱུར། །མཆོག་གི་ས་རྣམས་བགེགས་མེད་འགྲུབ། །དངོས་གྲུབ་ཕྲན་ཚེགས་སླར་ཅི་ཞིག །སངས་རྒྱས་ཉིད་ཀྱང་སེམས་ཅན་ཉིད། །རྡོ་རྗེ་སེམས་ཉིད་རྙེད་མི་དཀའ། །གང་ལ་དངོས་གྲུབ་ངེས་འབྱུང་དང་། །གང་ལ་སྡིག་པ་གདོན་ཆེན་དང་། །བགེགས་དང་ལོག་འདྲེན་རྣམས་དང་ཡང་། །འཆི་བདག་དང་ནི་བདུད་སྡེ་རྣམས། །འཇིགས་པ་སྣ་ཚོགས་བསྟན་བཅོས་རྣོ། །དངོས་གྲུབ་ལས་འཇོམས་དེ་དག་ནི། །བདག་ཉིད་ཆེན་པོ་དེ་ལ་ནི། །མི་འབྱུང་སྐྱེ་བར་མི་འགྱུར་རོ། །སྦྱིན་སྲེག་ལས་ཀྱི་ཆོ་ག་ཡིས། །ངེས་པར་དངོས་གྲུབ་མྱུར་རབ་འབྱུང་། །ལྷ་རྣམས་ཀྱང་ནི་ཆེར་མཉེས་ཤིང་། །སྐད་ཅིག་གིས་ཀྱང་རབ་རྙེད་འགྱུར། །ཡམས་དང་ཉེར་འཚེ་སྐྱོན་ལ་སོགས། །ཆེས་ལྕི་ངེས་པར་རིང་དུ་འགྱུར། །དེ་ཡི་ཡུལ་དུ་ནད་དང་གདོན། །རིམས་ལ་སོགས་པ་མི་འབྱུང་ཞིང་། །མུ་གེ་ཅ་ཅོ་ཆེ་རྣམས་དང་། །ཕ་རོལ་དམག་ཚོགས་ཉམས་པར་འགྱུར། །ལྷ་དང་ཀླུ་རྣམས་སྤྲོ་ཆེན་གྱིས། །བདེ་བར་ཡང་ནི་སྐྱོང་བར་འགྱུར། །རྒྱལ་པོ་ཆེན་པོ་བཞི་རྣམས་དང་། །འཇིག་རྟེན་སྐྱོང་བ་རྒྱུ་སྐར་བཅས། །གནོད་སྦྱིན་རྣམས་དང་གཟའ་ལ་སོགས། །རྫུ་འཕྲུལ་ཆེན་པོ་རྣམས་ཀྱིས་སྐྱོང་། །དེ་ནས་བརྒྱ་
བྱིན་ལ་སོགས་ལྷས། །ཡང་དང་ཡང་དུ་ཕྱག་བཙལ་ནས། །རིན་ཆེན་གདུགས་སོགས་མཆོག་རྣམས་ནི། །རྣམ་པ་སྣ་ཚོགས་མཆོད་བྱས་ཏེ། །ཕྱག་ན་རྡོ་རྗེ་རྒྱལ་དབང་ལ། །དག་པའི་བསམ་པས་ཡང་དག་བསྟོད། །སངས་རྒྱས་ཀུན་པས་སྔར་སངས་རྒྱས། །མི་ཤེས་དྲི་མ་ཀུན་བཅོམ་པ། །རྡོ་རྗེ་རྡོ་རྗེ་འཛིན་རྒྱལ་པོ། །རྡོ་རྗེ་རྡོ་རྗེ་རྡོ་རྗེ་འཛིན། །རྡོ་རྗེའི་སྐུ་སྟེ་སྐུ་ཆེ་བ། །ཕྱག་ན་རྡོ་རྗེ་ཕྱག་འཚལ་འདུད། །རྡོ་རྗེ་ཡན་ལག་རྡོ་རྗེ་མཆོག །རྡོ་རྗེ་འབར་བ་ཆེར་འབར་བ། །རྡོ་རྗེ་ཤུགས་ཏེ་ཤུགས་ཆེ་བ། །རྡོ་རྗེ་མཚོན་ཆ་མཚོན་ཆ་ཆེ། །ཕྱག་ན་རྡོ་རྗེ་ཕྱག་ཆེན་པོ། །རྡོ་རྗེ་མདའ་སྟེ་རབ་འབིགས་པ། །རྡོ་རྗེ་རྣོན་པོ་རྣོན་པོ་ཆེ། །ཆེ་བའི་ཆེ་བ་རྒྱ་མཚོ་ཆེ། །རྡོ་རྗེ་པདྨ་བྱང་ཆུབ་ཆེ། །བྱང་ཆུབ་སངས་རྒྱས་རང་བྱུང་བ། །རྡོ་རྗེ་རྒྱ་ཆེན་རྒྱ་ཆེན་ཆེ། །རྡོ་རྗེ་སྒྱུ་མ་རྣམ་སྦྱོང་བ། །རྡོ་རྗེ་རྒྱུ་སྟེ་གནོད་སྦྱིན་ཆེ། །རྡོ་རྗེ་པདྨ་རྣམ་སྦྱོང་བ། །རྡོ་རྗེ་ཁྲོ་བོ་གཏུམ་པོ་ཆེ། །རྡོ་རྗེ་དགྲ་སྡང་འཇོམས་པའི་གཙོ། །རྡོ་རྗེ་འཇིགས་བྱེད་སྲུང་བ་ཆེ། །རྡོ་རྗེ་ལྕགས་ཀྱུ་དོན་ཡོད་བྱེད། །རྡོ་རྗེ་རོ་ལངས་རོ་ལངས་ཆེ། །རྡོ་རྗེ་སྲིན་པོ་ཟ་བ་པོ། །རྡོ་རྗེ་གནོད་སྦྱིན་གནོད་སྦྱིན་ཆེ། །རྡོ་རྗེ་གདོན་ཏེ་གདོན་གྱི་མཆོག །འཇིགས་རུང་སྐྲག་བྱེད་མ་རུངས་པ། །དྲག་པོ་འཇིགས་བྱེད་རྔམ་བྱེད་པ། །བསྒྲུབ་དཀའ་སྒྲུབ་པ་ལེགས་པ་སྟེ། །རྡོ་རྗེ་ལེགས་པ་དགྱེས་མཛད་པ། །རྡོ་རྗེ་དགའ་བ་དགའ་བ་ཆེ། །དགའ་བའི་རྡོ་རྗེ་དབང་བྱེད་པ། །རྡོ་རྗེ་གཟི་བརྗིད་གཟི་བརྗིད་ཆེ། །འབར་འོད་གཤིན་རྗེ་མཐར་བྱེད་པ། །རྡོ་རྗེ་དྲག་པོ་དྲག་པོ་ཆེ། །འོད་མཐུག་པ་ནི་མཐུག་པ་ཆེ། །ནམ་མཁའ་དང་ནི་མཉམ་པ་ཡི། །རེ་བ་ཐམས་ཅད་རྫོགས་མཛད་པ། །རྡོ་རྗེ་དབང་བསྐུར་རིན་ཆེན་མཆོག །རྡོ་རྗེ་རྒྱལ་མཚན་ཡོན་ཏན་མཚོ། །རྡོ་རྗེ་ཡེ་ཤེས་ཡེ་ཤེས་ཆེ། །རིག་པ་བྱེ་བའི་ཚོགས་ཀྱིས་མཆོད། །ཧ་ལ་ཧ་ལ་ནག་པོ་ཆེ། །སྒྲ་ཆེན་རྣམ་པར་སྒེག་པ་པོ། ། རྡོ་རྗེ་འདོད་པ་འདོད་པ་ཆེ། །སྙིགས་མའི་རྙོག་མ་འཇོམས་པ་པོ། །དུས་ཀྱི་གཡོ་བ་གཅོད་པའི་མཆོག །ཞལ་ནི་ལྗགས་ཀྱི་གློག་འཕྲོ་མ། །རྡོ་རྗེ་མེ་སྟེ་རབ་ཏུ་གཏུམ། །གཏུམ་པའི་རབ་སྣང་འཇོམས་པ་པོ། །ཉི་མ་སྟོང་གི་འོད་ཟེར་ཞལ། །སྤྱན་དམར་འཇིགས་པར་མཛད་པ་པོ། །ཁྲོ་བོ་དུ་མའི་འོད་འཕྲོ་བ། །ཕྱག་ནི་དུ་མའི་མཚོན་ཆ་བརྒྱ། །དུ་མའི་ཞལ་ཏེ་སྐུ་ཡང་སྟོང་། །འཁྱིལ་ཞིང་སྐུ་ཡང་འཁྱིལ་པ་ལགས། །ཐུགས་ཆོས་བདག་ཉིད་སྐུ་མི་མངའ། །རྣམ་པར་རྟོག་པ་མ་ལུས་སྤངས། །མ་རིག་འཇོམས་པ་ཚངས་པ་སྟེ། །འདོད་ཆགས་ཞེ་སྡང་དྲི་མཐར་མཛད། །སྒྱུ་མ་ཁྱབ་འཇུག་རྡོ་རྗེ་ཅན། །མདུང་ཅན་རྩེ་གསུམ་འཆང་འཕྲོག་བྱེད། །འདོད་ཆགས་ཞེ་སྡང་གཏི་མུག་ཆེ། །སྲིད་དང་སྲིད་མིན་
རྣམ་སྦྱོང་བ། །ཞི་ཞིང་དུལ་ལ་དག་པ་ཆེ། །སངས་རྒྱས་སངས་རྒྱས་རབ་རྟོགས་མཛད། །སངས་རྒྱས་བདག་ཉིད་སངས་རྒྱས་སྐུ། །རྡོ་རྗེ་ལེགས་སྐྱེས་རྡོ་རྗེ་སེམས། །ཀུན་དུ་བཟང་པོ་ཆེར་བཟང་བ། །མཚན་རྣམས་ཀུན་གྱིས་མཚན་པ་པོ། །ཁམས་ཀུན་བདག་ཉིད་ཁྱབ་པ་པོ། །ཐམས་ཅད་རྡོ་རྗེའི་བདག་ཉིད་གཙང་། ། གང་གིས་འདི་བྲིས་ཀློག་པ་དང་། །རྟག་ཏུ་དོན་ནི་འཆང་བྱེད་དམ། །དྲན་ནམ་ཉན་པར་བྱེད་ཀྱང་རུང་། །ཕྱག་ན་རྡོ་རྗེ་མཉམ་པར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བརྒྱ་བྱིན་དང་ཚངས་པ་ལ་སོགས་པ་ལྷའི་འཁོར་དང་བཅས་པའི་ལྷ་དང་མི་དང་། ལྷ་མ་ཡིན་དང་། དྲི་ཟ་དང་། གནོད་སྦྱིན་དང་། སྲིན་པོ་ལ་སོགས་པ་ཕན་པ་དང་བདེ་བ་ཐོབ་པའི་ཕྱིར་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་རྫོགས་སོ།། །།རྒྱ་གར་གྱི་མཁན་པོ་བླ་མ་རྗེ་བཙུན་ཆེན་པོ་དེ་བེནྡྲ་དེ་བའི་ཞབས་དང་། བླ་མ་པཎ་ཆེན་སྐྱེས་བུ་ཆེན་པོ་མཱ་ཎི་ཀ་ཤྲཱི་ཛྙཱ་ནའི་ཞལ་སྔ་ནས་གུས་པར་མཉན་ཏེ་ཆག་ལོ་ཙཱ་བ་ཤཱཀྱའི་དགེ་སློང་ཆོས་རྗེ་དཔལ་གྱིས་བསྒྱུར་ཞིང་ཞུས་ཏེ་གཏན་ལ་ཕབ་པ།། །།སྤྲེའུ་ལོ་དབྱུག་གུ་ཟླ་བའི་མར་ངོའི་ཚེས་བཅུ་གསུམ་ལ། གཙུག་ལག་ཁང་ཆེན་པོ་དཔལ་ཐང་པོ་ཆེར་དབུ་བཙུགས་ནས། སྨིན་དྲུག་ཟླ་བའི་ཡར་ངོའི་ཚེས་བཅུ་གཉིས་ཀྱི་སྔ་དྲོའི་བར་ཞག་བཅོ་ལྔར་འགྲོ་བའི་ཚེ་དཔལ་འདྲེན་གྱི་ལྷའི་གདིངས་སུ་ཚར་བར་བགྱིས་སོ། །དཔལ་ལྡན་རྒྱུད་རྒྱལ་ངན་སོང་སྦྱོང་བ་ཡི། །བརྟག་པ་ཕྱོགས་གཅིག་སྔར་གྲགས་ཁ་ཆེ་ནས། །ཆོས་རྒྱལ་སྐུ་དྲིན་པཎ་ཆེན་སྒྲ་བསྒྱུར་མཆོག །སྐྱེས་ཆེན་རྣམས་ཀྱིས་ལེགས་པར་དར་བར་མཛད། །འདི་ནི་དཔལ་ལྡན་ཀུན་དགའ་སྙིང་པོ་དང་། རྗེ་བཙུན་འཇིགས་མེད་འབྱུང་གནས་སྦས་པ་ཡི། །མན་ངག་ལ་བརྟེན་རྒྱ་གར་བལ་པོ་ན། །ཡོངས་གྲགས་བླ་མའི་དྲིན་ལས་ཁོ་བོས་བསྒྱུར། །སྒྲ་གཞུང་བླ་མའི་གསུང་བཞིན་དུ། །གུས་བསྒྱུར་ནོངས་པ་མཁས་ཆེན་རྣམས། །བཟོད་མཛད་དེ་དགེས་འགྲོ་བ་ཀུན། །འགྲོ་མགོན་ཐུབ་ཆེན་ཉིད་གྱུར་ཅིག། །།