འཕགས་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱི་སྙིང་པོ་གསང་བ་རིང་བསྲེལ་གྱི་ཟ་མ་ཏོག་ཅེས་བྱ་བའི་གཟུངས་ཐེག་པ་ཆེན་པོའི་མདོ།
རྒྱུད་འབུམ་ན་པ་བཞུགས་སོ།
རྒྱ་གར་སྐད་དུ། ཨཱཪྱ་སརྦ་ཏ་ཐཱ་ག་ཏཱ་དྷིཥྛཱ་ན་ཧྲྀ་དཱ་ཡ་གུ་ཧྱ་དྷཱ་ཏུ་ཀ་རཎྜ་ནཱ་མ་དྷཱ་ར་ཎཱི་མ་ཡཱ་ན་སཱུ་ཏྲ། བོད་སྐད་དུ། འཕགས་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱི་སྙིང་པོ་གསང་བ་རིང་བསྲེལ་གྱི་ཟ་མ་ཏོག་ཅེས་བྱ་བའི་གཟུངས་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷཱ་ན་དྲི་མ་མེད་པའི་ཀུན་དགའ་ར་བ་དང་རིན་པོ་ཆེ་སྣ་བདུན་གྱི་རྫིང་ན་བྱང་ཆུབ་སེམས་དཔའི་དགེ་འདུན་ཆེན་པོ་དང་། ཉན་ཐོས་ཀྱི་དགེ་འདུན་ཆེན་པོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་བྱེ་བ་མང་པོ་རྣམས་དང་། ཡུལ་གྱི་མི་འབུམ་ཕྲག་དུ་མ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བྱས་ནས་ཐབས་ཅིག་ཏུ་བཞུགས་སོ། །དེ་ནས་འཁོར་གྱི་ནང་དེ་ན་བྲམ་ཟེ་
ཆེན་པོ་ཤིང་སཱ་ལ་ཆེན་པོ་ལྟ་བུ་མཁས་པ། མཛངས་པ། གསལ་བ་ཡིད་གཞུངས་པ། མཐོང་ན་དགའ་བ། དགེ་བ་བཅུའི་ལས་ཀྱི་ལམ་ཡོངས་སུ་བཟུང་བ། དྲི་མེད་ལེགས་སྣང་ཞེས་བྱ་བ་ཞིག་ཡོད་དེ། དེ་ཡང་གཅིག་ཏུ་དཀོན་མཆོག་གསུམ་ལ་དད་ཅིང་གུས་ལ་ཕྱག་བྱེད་པའི་དགེ་བའི་བསམས་པ་དང་ལྡན་པ། ཞིབ་མོ་བརྟགས་པ། སེམས་ཅན་ཐམས་ཅད་དང་དགེ་བའི་དོན་ལ་བརྩོན་པ། ནོར་ཆེ་བ། ལོངས་སྤྱོད་ཆེ་བ། ཕྱུག་པ། རྫས་མང་བ། ཡོ་བྱད་ཕུན་སུམ་ཚོགས་པ་ཡིན་ནོ། །དེ་ནས་བྲམ་ཟེ་ཆེན་པོ་དྲི་མེད་ལེགས་སྣང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་ཡང་བཅོམ་ལྡན་འདས་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ལ་མེ་ཏོག་དང་། བདུག་པས་མངོན་པར་མཆོད་དོ། །ན་བཟའ་རིན་འབུམ་རི་བ་ཡང་གསོལ། བཅོམ་ལྡན་འདས་ལ་མུ་ཏིག་གི་དོ་ཤལ་འབུམ་རི་བ་ཡང་གསོལ་ནས་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་འདུག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྲས་ཚོགས་ཀྱི་འཁོར་དང་བཅས་པ། བདག་གི་སྡུམ་པར་གདུགས་ཚོད་ལ་སྤྱན་འདྲེན་ན་དེའི་སླད་དུ་བཅོམ་ལྡན་འདས་ཀྱིས་གནང་བར་མཛད་པར་ཅི་གནང་། དེ་ནས་བཅོམ་ལྡན་འདས་ཀྱིས་བྲམ་ཟེ་ཆེན་པོ་དྲི་མེད་ལེགས་སྣང་གིས་སྤྱན་དྲངས་པར་ཐུགས་སུ་ཆུད་ནས་ཅང་མི་གསུང་བར་གྱུར་པས་གནང་ངོ་། །དེ་ནས་བྲམ་ཟེ་ཆེན་པོ་དྲི་མེད་ལེགས་སྣང་བཅོམ་ལྡན་འདས་ཀྱི་སྤྱན་སྔ་ནས་ཅང་མི་གསུང་བས་གནང་བར་རིག་ནས་དེས་རིངས་པ་རིངས་པར་རང་གི་ཁྱིམ་དུ་སོང་སྟེ། དེ་ཉིད་ཀྱི་མཚན་མོ་འདས་པ་དང་། ཞལ་ཟས་དང་། ཡོ་
བྱད་དང་། ཞལ་ཟས་རོ་བརྒྱ་པ། མང་པོ་བཤམས་ནས་བཀོད་པ་ཆེན་པོས་བཀྲ་ཤིས་ཀྱི་གཞལ་མེད་ཁང་དང་། གཞལ་མེད་ཁང་ཆེན་པོ་སྣ་ཚོགས་དང་། མེ་ཏོག་དང་། བདུག་པ་ཁྱེར་ཏེ། འཁོར་མང་པོ་དང་། སིལ་སྙན་དང་། ཕེག་རྡོབ་པས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་དུས་ལ་བབ་པར་གསོལ་ཏོ། །དེ་ནས་བཅོམ་ལྡན་འདས་ལ་བྲམ་ཟེ་ཆེན་པོ་དྲི་མེད་ལེགས་སྣང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནི་གཤེགས་པའི་དུས་ལགས་ཏེ། བཅོམ་ལྡན་འདས་གཤེགས་པའི་དུས་ཀྱི་ཚོད་ལ་བབ་ན་བདག་ལ་གནང་བར་མཛད་པར་ཅི་གནང་། དེ་ནས་བཅོམ་ལྡན་འདས་ཀྱིས་བྲམ་ཟེ་ཆེན་པོ་དྲི་མེད་ལེགས་སྣང་དབུགས་ཕྱུང་ནས་ཉིད་ཀྱི་འཁོར་ལ་གཟིགས་ཏེ་བཀའ་སྩལ་པ། འཁོར་ཇི་ལྟར་ལྷགས་པ་ཐམས་ཅད་དེང་དོན་ཆེན་པོ་མཛད་པར་འགྱུར་གྱིས་ཚུར་ཤེག །དེ་ནས་བཅོམ་ལྡན་འདས་གདན་དེ་ལས་བཞེངས་ནས། བཅོམ་ལྡན་འདས་གདན་དེ་ལས་བཞེངས་མ་ཐག་ཏུ་བཅོམ་ལྡན་འདས་ཀྱི་སྐུ་ལས་འོད་ཟེར་ཐ་དད་པ་སྣ་ཚོགས་བྱུང་སྟེ། འོད་ཟེར་གྱི་སྣང་བ་དེས་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་སྣང་བར་བྱས་ནས་དེ་བཞིན་གཤེགས་པ་ཐམས་ཅད་ལ་ཡང་དག་པར་བསྐུལ་ཏེ། གཟིགས་ནས་གཤེགས་པར་ཤེས་སོ། །དེ་ནས་བྲམ་ཟེ་ཆེན་པོ་དྲི་མེད་ལེགས་སྣང་གིས་མཆོད་པ་དང་། བཀུར་སྟི་ཆེན་པོས་མཆོད་ཅིང་བཅོམ་ལྡན་འདས་ཀྱི་གཤེགས་ཤུལ་མཛེས་པ་ཆེར་བྱས་སོ། །འཁོར་མང་པོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དབང་ཕྱུག་ཆེན་པོ་དང་། སྲེད་མེད་ཀྱི་བུ་དང་། རྒྱལ་པོ་ཆེན་པོ་བཞིས་ཀྱང་གཤེགས་ཤུལ་མཛེས་པར་བྱས་སོ། །དེ་ནས་བཅོམ་ལྡན་འདས་དང་ཧ་ཅང་མི་རིང་བའི་ལམ་གྱི་བར་གྱི་ནང་ཞིག་ན་སྐྱེད་མོས་ཚལ་བདེ་བྱེད་ཅེས་བྱ་བ་ཞིག་ཡོད་དོ། །སྐྱེད་མོས་ཚལ་དེའི་ནང་ན་མཆོད་རྟེན་
རྙིང་པ་ཆེན་པོ་ཞིག་ཡོད་དེ། ཞིག་པ། ཚེར་མས་གང་བ་རྩྭ་དང་། ཤིང་དང་། གྱོ་མོས་ཀུན་ཏུ་གང་བ་ཕྱག་དར་གྱི་ཕུང་པོ་ལྟ་བུ་ཞིག་ཡོད་དོ། །དེ་ནས་བཅོམ་ལྡན་འདས་དེའི་དྲུང་དུ་གཤེགས་པ་དང་། མཆོད་རྟེན་རྙིང་པ་ཕྱག་དར་གྱི་ཕུང་པོ་ལྟ་བུ་དེ་ཡང་ཀུན་ནས་འབར་ཞིང་འོད་ཟེར་འབར་བ་ཁ་དོག་སྣ་ཚོགས་པ་དག་བྱུང་ངོ་། །ཕྱག་དར་དང་གྱོ་མོའི་ཕུང་པོ་དེ་ལས་ཀྱང་ལེགས་སོ་ཞེས་བྱ་བའི་སྒྲ་བྱུང་ངོ་། །དེ་བཞིན་གཤེགས་པ་ཤཱཀྱ་ཐུབ་པ་ལེགས་སོ་ལེགས་སོ། །དེང་ནི་གཤེགས་པའི་ལྟས་བཟང་པོའོ། ། བྲམ་ཟེ་ཆེན་པོ་དེ་བཞིན་གཤེགས་པ་སྤྱན་དྲངས་པ་ན་ཡང་ཁྱོད་ལེགས་སོ། །དེང་ཁྱོད་ལ་དོན་ཆེན་པོ་མཛད་པར་འགྱུར་རོ། །དེ་ནས་བཅོམ་ལྡན་འདས་དེ་བཞིན་གཤེགས་པས་མཆོད་རྟེན་རྙིང་པ་ཕྱག་དར་གྱི་ཕུང་པོ་ལྟ་བུ་དེ་ལ་ཡན་ལག་ལྔས་ཕྱག་མཛད་ནས་ལན་གསུམ་བསྐོར་བ་མཛད་ནས། ཉིད་ཀྱི་སྐུ་ལས་ན་བཟའ་གསིལ་ནས་མཆོད་རྟེན་རྙིང་པ་ཕྱག་དར་གྱི་ཕུང་པོ་ལྟ་བུ་དེ་ལ་གསོལ་ཏེ། བཅོམ་ལྡན་འདས་ཀྱིས་མཆི་མ་བྱུང་བ་ཆེན་པོ་ཕྱུང་བས་བཤུམས་པ་མཛད་ནས། བཅོམ་ལྡན་འདས་ཀྱིས་འཛུམ་པ་བསྟན་ཏོ། །འཛུམ་པ་བསྟན་པ་དེས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ལག་མཐིལ་ན་བཞུགས་པ་བཞིན་དུ་མཐོང་ངོ་། །དེ་བཞིན་གཤེགས་པ་དེ་དག་ཐམས་ཅད་ཀྱིས་ཀྱང་འོད་ཟེར་བཀྱེ་སྟེ། མཆོད་རྟེན་རྙིང་པའི་ཕུང་པོ་ཆེན་པོ་དེར་ཞུགས་སོ། །དེ་ནས་འཁོར་མང་པོ་འདུས་པ་དེ་དག་ཡ་མཚན་ཆེན་པོར་གྱུར་ཅིང་ཡིད་ཆེས་ཏེ་འཁོད་པར་གྱུར་ཏོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལུས་ནི་འདར། སྙིང་ནི་འགུལ། རྡོ་རྗེ་ནི་གསོར་ཞིང་རིངས་པ་རིངས་པར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཤུམས་པའི་སྔ་ལྟས་ཆེན་པོ་གདའ་བ་གང་གིས་ན་བཅོམ་ལྡན་འདས་ཀྱི་སྤྱན་མཆི་མས་གང་བར་བསྟན་པའི་སྔ་ལྟས་གདའ་བ་བཅོམ་ལྡན་འདས་ཅི་ལགས། ཅིའི་སླད་དུ་བཅོམ་ལྡན་འདས་ཀྱིས་འཁོར་
འདིའི་ནང་དུ་ཞུ་བ་འདི་སྐབས་དབྱེ་བར་ཅི་གནང་། དེ་ནས་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་རིང་བསྲེལ་གྱི་ཕུང་པོ་དེ་བཞིན་གཤེགས་པའི་མཆོད་རྟེན་དེ་བཞིན་གཤེགས་པ་བྱེ་བ་ཏིལ་གྱི་གང་བུ་སྙེད་ཐམས་ཅད་ཀྱི་སྙིང་པོའི་གཟུངས་ཀྱི་ཕྱག་རྒྱའི་མཆོད་རྟེན་གྱི་ཆོས་ཀྱི་རྣམ་གྲངས་ཡོད་དེ། ལག་ན་རྡོ་རྗེ་ཆོས་ཀྱི་རྣམ་གྲངས་འདི་གང་ན་གནས་པ་དེར། དེ་བཞིན་གཤེགས་པ་འབུམ་ཕྲག་བྱེ་བ་ཏིལ་གྱི་གང་བུ་སྙེད་གནས་ཤིང་དེ་བཞིན་གཤེགས་པ་ཁར་ཡས་ཁར་ཡས་ཞེས་བྱ་བ་སྙེད་ཀྱི་སྐུ་གདུང་རིང་བསྲེལ་རྣམས་གནས་སོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གནས་སོ། །དེ་བཞིན་གཤེགས་པ་འབུམ་ཕྲག་བྱེ་བ་ཏིལ་གྱི་གང་བུ་སྙེད་དགུ་བཅུ་རྩ་དགུའི་གཙུག་ཏོར་དང་། སྤྱི་བོ་ཡང་དེ་བཞིན་དུ་གནས་སོ། །ལག་ན་རྡོ་རྗེ་གང་ན་ཆོས་ཀྱི་རྣམ་གྲངས་འདི་གནས་པ་དེ་ནི་དེ་བཞིན་གཤེགས་པའི་མཆོད་རྟེན་དུ་ལུང་བསྟན་ཏོ། །ལག་ན་རྡོ་རྗེ་ཆོས་ཀྱི་རྣམ་གྲངས་འདི་ནི་འདི་ལྟར་ཕན་ཡོན་ཆེ་ཞིང་མཐུ་ཆེ་བ་ཡིན་ནོ། །ལག་ན་རྡོ་རྗེ་ཆོས་ཀྱི་རྣམ་གྲངས་འདི་ནི་ཕན་ཡོན་ཆེ་བ་ཡིན་ནོ། །ལག་ན་རྡོ་རྗེ་ཆོས་ཀྱི་རྣམ་གྲངས་འདི་ནི་བཀྲ་ཤིས་ཐམས་ཅད་རྫོགས་པར་བྱེད་པ་ཡིན་ནོ། །དེ་ནས་བཅོམ་ལྡན་འདས་ལས་འཁོར་མང་པོ་འདུས་པ་དེ་དག་གིས་ཆོས་ཀྱི་རྣམ་གྲངས་འདི་ཐོས་ནས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་ལ། དེ་ནས་ཉེ་བའི་ཉོན་མོངས་པ་དང་བྲལ་ལོ། །ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་ཐོབ་བོ། །ཁ་ཅིག་གིས་ནི་དགྲ་བཅོམ་པ་ཉིད་ཐོབ་བོ། །ཁ་ཅིག་གིས་ནི་རང་བྱང་ཆུབ་ཀྱི་འབྲས་བུའོ། །ཁ་ཅིག་གིས་ནི་ཕྱིར་མི་འོང་བའི་འབྲས་བུའོ། །ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུའོ། །ཁ་ཅིག་གིས་ནི་བྱང་ཆུབ་སེམས་དཔའི་ས་ལ་གནས་སོ། ། ཁ་ཅིག་གིས་ནི་བྱང་ཆུབ་ཏུ་ལུང་བསྟན་པ་ཐོབ་བོ། །ཁ་ཅིག་གིས་ནི་ས་དང་པོའོ། །ཁ་ཅིག་གིས་ནི་ས་གཉིས་པའོ། །ཁ་ཅིག་གིས་ནི་ས་གསུམ་པའོ། །ཁ་ཅིག་གིས་ནི་ས་བཞི་པའོ། །ཁ་ཅིག་གིས་ནི་ས་ལྔ་པའོ། །ཁ་ཅིག་གིས་ནི་ས་དྲུག་པའོ། །ཁ་ཅིག་གིས་ནི་
ས་བདུན་པའོ། །ཁ་ཅིག་གིས་ནི་ས་བརྒྱད་པའོ། །ཁ་ཅིག་གིས་ནི་ས་དགུ་པའོ། །ཁ་ཅིག་གིས་ནི་ས་བཅུ་པ་ལ་གནས་པར་གྱུར་ཏོ། །ཁ་ཅིག་གིས་ནི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་སོ། །བྲམ་ཟེ་ཆེན་པོ་དེ་ཡང་མངོན་པར་ཤེས་པ་ལྔ་ཐོབ་ཅིང་དྲི་མ་དང་བྲལ་བ་དང་། སེར་སྣ་དང་། ཕྲག་དོག་དང་བྲལ་བར་གྱུར་ཏོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་ཆོ་འཕྲུལ་ཆེན་པོ་འདི་ལྟ་བུ་མཐོང་ནས་ངོ་མཚར་དང་རྨད་དུ་བྱུང་བ་ཆེན་པོར་གྱུར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་ཀྱི་མཚན་ཐོས་པས་ཀྱང་ཕན་ཡོན་གྱི་ཡོན་ཏན་གྱིས་བརྒྱན་པ་འདི་ལྟ་བུ་ཐོབ་ན། བཅོམ་ལྡན་འདས་གང་གི་སླད་དུ་ཕུ་དུད་དང་། བཀུར་སྟི་ཤིན་ཏུ་མང་པོ་བགྱིད་པར་འགྱུར་བ་ལྟ་ཅི་སྨོས་ཏེ། བཅོམ་ལྡན་འདས་དེ་བསོད་ནམས་ཀྱི་ཕུང་པོ་ཇི་ལྟ་བུ་ཡང་མཐོང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཉོན་ཅིག །རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལས་ཆོས་ཀྱི་རྣམ་གྲངས་འདི་འདྲི་བར་བྱེད་ན། ལག་ན་རྡོ་རྗེ་དེས་དེ་བཞིན་གཤེགས་པ་འབུམ་ཕྲག་བྱེ་བ་ཁྲག་ཁྲིག་ཏིལ་གྱི་གང་བུ་སྙེད་དགུ་བཅུ་རྩ་དགུའི་བསོད་ནམས་ཀྱི་ཕུང་པོ་དང་། དགེ་བའི་རྩ་བ་བསྐྱེད་པ་དང་ལྡན་པར་འགྱུར་ཞིང་། དེ་བཞིན་གཤེགས་པ་དེ་རྣམས་ཀྱིས་རྗེས་སུ་བཟུང་བར་འགྱུར་རོ། །གང་ཞིག་ཀློག་པར་བྱེད་པ་དེ་དག་ཀྱང་དེ་བཞིན་གཤེགས་པ་ཐམས་ཅད་ཀྱིས་གསུངས་པའི་མདོ་སྡེ་རྣམས་བཅང་བར་འགྱུར་རོ། །གང་ཞིག་ཆོས་ཀྱི་རྣམ་གྲངས་འདི་ལྟ་བུ་འཛིན་པ་དེ་དག་ཕྱོགས་བཅུའི་དེ་བཞིན་གཤེགས་པ་འབུམ་ཕྲག་བྱེ་བ་ཁྲག་ཁྲིག་ཏིལ་གྱི་གང་བུ་སྙེད་དགུ་བཅུ་རྩ་དགུ་དང་། ཕྱོགས་རེ་རེའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གཟུང་བར་འགྱུར་ཞིང་། ཉིན་གཅིག་བཞིན་གཟིགས་པར་འགྱུར་རོ། །གང་དག་ཆོས་ཀྱི་རྣམ་གྲངས་འདི་ལ་མཆོད་པ་བྱེད་པ་དང་། ཁོང་དུ་ཆུད་པར་བྱེད་པ་དང་། མེ་ཏོག་དང་། བདུག་པ་དང་། དྲི་དང་། མེ་ཏོག་
ཕྲེང་རྒྱུད་དང་། བྱུག་པ་དང་། ན་བཟའ་དང་། ལྷབ་ལྷུབ་དང་། རྒྱན་གྱིས་མཆོད་པ་བྱེད་པའི་རིགས་ཀྱི་བུའམ། རིགས་ཀྱི་བུ་མོའམ། དགེ་བསྙེན་ནམ། དགེ་བསྙེན་མ་དེས་ཕྱོགས་བཅུ་དང་། ཕྱོགས་རེ་རེའི་དེ་བཞིན་གཤེགས་པ་འབུམ་ཕྲག་བྱེ་བ་ཁྲག་ཁྲིག་ཏིལ་གྱི་གང་བུ་སྙེད་དགུ་བཅུ་རྩ་དགུ་ལ་ལྷ་རྫས་ཀྱི་མེ་ཏོག་དང་། བདུག་པ་དང་། དྲི་དང་། མེ་ཏོག་ཕྲེང་རྒྱུད་དང་། བྱུག་པ་དང་། ན་བཟའ་དང་། ལྷབ་ལྷུབ་དང་། རྒྱན་གྱིས་མཆོད་པར་འགྱུར་རོ། །ཕྱོགས་རེ་རེའི་དེ་བཞིན་གཤེགས་པ་ལ་དེ་བཞིན་གཤེགས་པ་མཆོད་པའི་སྤྲིན་རིན་པོ་ཆེ་སྣ་བདུན་ལས་བྱས་པའི་རི་རབ་ཆེན་པོ་ཙམ་གྱི་ཕུང་པོའི་ཡོན་ཏན་བྱུང་བ་འབྱུང་བར་འགྱུར་རོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དེ་རྣམས་དང་། སེམས་ཅན་གྱི་ཚོགས་ཆེན་པོ་དེ་རྣམས་ཀྱང་ཡ་མཚན་དུ་གྱུར་ནས་གཅིག་ལ་གཅིག་འདི་སྐད་དུ་མཆོད་རྟེན་རྙིང་པ་ཕྱག་དར་དང་། གྱོ་མོའི་ཕུང་པོ་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་གྱིས་བརླབས་ནས་འདི་ནི་རྫུ་འཕྲུལ་གྱི་ཆོ་འཕྲུལ་ཆེན་པོ་སྟོན་པས་མཐུ་ཆེ་བ་ཡིན་ནོ་ཞེས་ཟེར་རོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་སུས་ཕྱག་དར་གྱི་ཕུང་པོར་བགྱིས་པ་ལས་རིན་པོ་ཆེའི་མཆོད་རྟེན་དུ་གདའ་བར་བགྱིས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་འདི་ཕྱག་དར་གྱི་ཕུང་པོ་མ་ཡིན་གྱི་འདི་ནི་རིན་པོ་ཆེ་སྣ་བདུན་ལས་བྱས་པའི་རིན་པོ་ཆེའི་མཆོད་རྟེན་ཆེན་པོ་ཡིན་ནོ། །ལག་ན་རྡོ་རྗེ་འོན་ཀྱང་སེམས་ཅན་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པ་སྟོན་པས་ནུབ་པར་གྱུར་གྱི། སངས་རྒྱས་རྣམས་ཀྱི་དེ་བཞིན་གཤེགས་པའི་རིང་བསྲེལ་གྱི་སྙིང་པོའི་མཆོད་རྟེན་རྣམས་ནི་འཇིག་པའམ། འགྱེས་པར་མི་འགྱུར་ཏེ། དེ་བཞིན་གཤེགས་པའི་རྡོ་རྗེའི་སྙིང་པོའི་སྐུ་ཇི་ལྟར་འགྱེས་པར་འགྱུར། འོན་ཀྱང་སེམས་ཅན་རྣམས་ཀྱི་ལས་ཀྱི་འབྲས་བུ་རྣམ་པར་སྨིན་པར་སྣང་བ་ལས་ཀྱང་ནུབ་པར་གྱུར་ཏོ། །ལག་ན་རྡོ་རྗེ་གཞན་
ཡང་ཕྱི་མའི་དུས་ཕྱི་མའི་ཚེ། སྡིག་པ་ཀུན་ཏུ་སྤྱོད་པ་དང་། སྡིག་པ་ཅན་དང་། དམྱལ་བ་ལ་གཞོལ་བ་ཤིན་ཏུ་ཚབས་ཆེར་འབྱུང་བར་འགྱུར། སངས་རྒྱས་མ་ཡིན། ཆོས་མ་ཡིན། དགེ་འདུན་ཚོལ་བ་མ་ཡིན་ཞིང་དགེ་བའི་རྩ་བ་དག་ཀྱང་བསྐྱེད་པར་མི་བྱེད་དེ་རྒྱུ་དེ་དང་། རྐྱེན་དེས་དམ་པའི་ཆོས་ནུབ་བོ། །ལག་ན་རྡོ་རྗེ་དེའི་ཕྱིར་ངའི་མིག་གཉིས་མཆི་མས་གང་ལ་དེ་བཞིན་གཤེགས་པ་ཐམས་ཅད་ཀྱང་མཆི་མ་བྱུང་ངོ་། །དམ་པའི་ཆོས་ཀྱི་རྣམ་གྲངས་འདི་ལྟ་བུ་ནི་ནུབ་པར་འགྱུར་གྱི། དེ་བཞིན་གཤེགས་པའི་མཆོད་རྟེན་ནི་མ་གཏོགས་ཏེ། དེ་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་རོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཞིག་ཆོས་ཀྱི་རྣམ་གྲངས་འདི་བྲིས་ཏེ་མཆོད་རྟེན་གྱི་ནང་དུ་འཇོག་ན་དགེ་བའི་རྩ་བ་ཅི་ཞིག་སྐྱེ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་གང་ཞིག་ཆོས་ཀྱི་རྣམ་གྲངས་འདི་བྲིས་ཏེ་མཆོད་རྟེན་གྱི་ནང་དུ་བཞག་པ་དེ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྙིང་པོ་རིང་བསྲེལ་གྱི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གཟུངས་ཀྱི་སྙིང་པོ་གསང་བས་བྱིན་གྱིས་བརླབས་པའི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཏིལ་གྱི་གང་བུ་སྙེད་དགུ་བཅུ་རྩ་དགུའི་མཆོད་རྟེན་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་དང་། སྤྱན་གྱི་མཆོད་རྟེན་དུ་བྱིན་གྱིས་བརླབས་པར་འགྱུར་རོ། །གང་ཞིག་སངས་རྒྱས་ཀྱི་གཟུགས་བརྙན་ནམ། མཆོད་རྟེན་ཐམས་ཅད་ཀྱི་ནང་དུ་འཇོག་པར་བྱེད་ན་དེ་བཞིན་གཤེགས་པའི་གཟུགས་བརྙན་རིན་པོ་ཆེ་སྣ་བདུན་གྱི་རང་བཞིན་དུ་བྱིན་གྱིས་བརླབས་པར་འགྱུར་རོ། །འཁོར་ལོའི་ཕྲེང་བ་དང་། དྲིལ་བུ་གཡེར་ཀའི་དྲ་བར་སྦྲེལ་བ་དང་བཅས་པ་དང་། བཀྲ་ཤིས་དང་། ཆར་ཀབ་ཀྱི་གཟུགས་དང་། དྲིལ་བུར་བཅས་པ་རིན་པོ་ཆེ་སྣ་བདུན་གྱི་རང་བཞིན་དུ་བྱིན་གྱིས་བརླབས་པར་འགྱུར་རོ། །དེ་བཞིན་གཤེགས་པ་ཐམས་ཅད་དང་། ཆོས་ཀྱི་རྣམ་གྲངས་འདིའི་མཐུ་དང་བྱིན་གྱིས་བརླབས་དང་།
བདེན་པ་དང་། དམ་ཚིག་གིས་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་བྱིན་གྱིས་བརླབས་པར་འགྱུར་རོ། །སེམས་ཅན་གང་དག་མཆོད་རྟེན་དེ་ལ་ཕུ་དུད་དང་། བསྟི་སྟང་བྱེད་པ་དེ་དག་ངེས་པར་ཕྱིར་མི་ལྡོག་པར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཕྱག་འཚལ་བ་གཅིག་དང་། བསྐོར་བ་བྱེད་པ་གཅིག་གིས་མནར་མེད་པ་ཐུག་པ་ལ་སོགས་པ་རྣམས་ལས་ཡོངས་སུ་ཐར་བར་འགྱུར་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། ། གནས་གང་ན་མཆོད་རྟེན་ནམ་གཟུགས་བརྙན་འདི་ལྟ་བུ་གནས་པའི་ས་ཕྱོགས་དེ་ཡང་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །ཕྱོགས་དེར་ཀླུ་མི་སྲུན་པས་ཀྱང་མི་ཚུགས་པར་འགྱུར། སད་དང་སེར་བས་ཀྱང་མི་ཚུགས་པར་འགྱུར། གནས་དེར་སྲོག་ཆགས་མི་སྲུན་པའམ་གདུག་པས་ཀྱང་མི་ཚུགས་པར་འགྱུར། གཅན་གཟན་གྱིས་ཀྱང་མི་ཚུགས་པར་འགྱུར། བྱ་མི་སྲུན་པ་དང་། ནེ་ཙོ་དང་། རི་སྐེགས་དང་། བྱི་བ་དང་།སྲེ་མོ་དང་། ཤ་སྦྲང་དང་། སྦྲང་བུ་དང་། བྱེ་བ་དང་། སྦྲང་མ་མཆུ་གསུམ་པ་དང་། མཆུ་རིངས་དང་། རྟ་བླའི་འཇིགས་པའང་མི་འབྱུང་བར་འགྱུར། སྦྲུལ་གདུག་པས་ཀྱང་མི་ཚུགས་པར་འགྱུར་རོ། །ཕྱོགས་དེར་ཡམས་ཀྱི་ནད་དང་། ནད་འགོ་བ་དང་། འཁྲུག་པའང་མི་འབྱུང་བར་འགྱུར། གནོད་སྦྱིན་དང་། སྲིན་པོ་དང་། འབྱུང་པོ་དང་། ཡི་དགས་དང་། འདྲེ་དང་། བརྗེད་བྱེད་ཀྱི་འཇིགས་པ་ཡང་མི་འབྱུང་བར་འགྱུར། གདོན་ཐམས་ཅད་ཀྱིས་ཀྱང་མི་ཚུགས་པར་འགྱུར། རིམས་ཐམས་ཅད་ཀྱིས་ཀྱང་མི་ཚུགས་པར་འགྱུར། ནད་ཐམས་ཅད་དང་། འབྲས་དང་། ཕོལ་མིག་དང་། ལྷོག་པ་དང་། མཚན་བར་རྡོལ་བ་དང་། རྐང་ཤུ་དང་། གཡན་པ་དང་། མཛེས་ཀྱང་མི་ཚུགས་པར་འགྱུར་ཞིང་མཆོད་རྟེན་དེ་མཐོང་བ་ཙམ་གྱིས་ཐམས་ཅད་འབྱང་བར་འགྱུར་རོ། །ཕྱོགས་དེར་བ་ལང་གི་ནད་དང་། ཕྱུགས་ནད་དང་། དུད་འགྲོའི་སྐྱེ་གནས་རྣམ་པ་མང་པོ་གཞན་དག་གི་ནད་དང་། སྐྱེས་པ་དང་། བུད་མེད་དང་། ཁྱེའུ་དང་།
བུ་མོའི་ནད་ཀྱིས་ཀྱང་ནམ་ཡང་ཚུགས་པར་མི་འགྱུར་རོ། །དུས་མ་ཡིན་པར་འཆི་བས་ཀྱང་དུས་མ་ཡིན་པར་འཆི་བར་མི་འགྱུར། དུག་གིས་མ་ཡིན། མཚོན་གྱིས་མ་ཡིན་ཞིང་མེ་དང་། ཆུས་ཀྱང་ནམ་ཡང་མི་ཚུགས་པར་འགྱུར། ཕ་རོལ་གྱི་དམག་ཚོགས་ཀྱི་འཇིགས་པས་མ་ཡིན། ལོ་ཉེས་ཀྱི་འཇིགས་པས་ཀྱང་ནམ་ཡང་མི་ཚུགས་པར་འགྱུར། རྒྱལ་པོ་ཆེན་པོའི་དམག་གི་འཇིགས་པ་ཡང་མི་འབྱུང་བར་འགྱུར་རོ། །རྒྱལ་པོ་ཆེན་པོ་བཞིའང་རྟག་ཏུ་རྒྱུན་མི་ཆད་པར་ས་ཕྱོགས་དེར་སྲུང་བར་བྱེད། ཡོངས་སུ་སྐྱོང་བར་བྱེད་དོ། །གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་པོ་དེ་དག་ཀྱང་རྟག་ཏུ་རྒྱུན་མི་ཆད་པར་སྲུང་བ་དང་། སྐྱོབ་པ་དང་། སྦེད་པ་བྱེད་པར་འགྱུར་རོ། །རྒྱུ་སྐར་ཉི་ཤུ་རྩ་བརྒྱད་དང་། ཟླ་བ་དང་། ཉི་མ་དང་། མཇུག་རིངས་ཆེན་པོའང་ཉིན་མཚན་མཐུན་པར་བྱེད་པར་འགྱུར་རོ། །ཀླུའི་རྒྱལ་པོ་ཐམས་ཅད་ཀྱང་རྟག་ཏུ་རྒྱུན་མི་འཆད་པར་མདངས་མི་འཕྲོག་ཅིང་ལེགས་པ་ཁོ་ནར་ཆར་གྱི་རྒྱུན་འབེབས་པར་འགྱུར་རོ། །ལྷ་ཐམས་ཅད་ཀྱང་མཆོད་རྟེན་ཆེན་པོ་དེ་ལ་ཕྱག་འཚལ་བ་དང་།བཀུར་སྟི་བྱ་བ་དང་། མཆོད་པ་བྱ་བའི་ཕྱིར་གནས་སུམ་ཅུ་རྩ་གཉིས་ནས་དུས་གསུམ་དུ་འོང་ངོ་། །ཡུལ་ན་གནས་པ་ཐམས་ཅད་ཀྱང་མཆོད་རྟེན་དང་། གཟུགས་བརྙན་དེའི་དྲུང་དུ་དུས་གསུམ་དུ་འོང་ངོ་། །སྟོད་པར་བྱེད། སྐོར་བ་བྱེད་པར་འགྱུར་རོ། །ལྷ་རྣམས་ཀྱི་དབང་པོ་བརྒྱ་བྱིན་ཀྱང་ལྷའི་བུ་མོ་དང་། ལྷའི་ཚོགས་རྣམས་དང་ལྷན་ཅིག་རྟག་ཏུ་རྒྱུན་མི་འཆད་པར་མཆོད་རྟེན་ནམ། གཟུགས་བརྙན་དེའི་དྲུང་དུ་ཉིན་མཚན་དུས་གསུམ་དུ་འོང་སྟེ། ཕྱག་འཚལ་བ་དང་། མཆོད་པ་ལ་འོང་ངོ་། །དེ་བཞིན་གཤེགས་པ་ཐམས་ཅད་ཀྱང་རྟག་པར་དགོངས་པ་དང་། བྱིན་གྱི་རློབ་པར་འགྱུར་རོ། །མཆོད་རྟེན་དང་། གཟུགས་བརྙན་ཇི་ལྟ་ཇི་ལྟ་བུ་ལས་བྱེད་པའི་སའིའམ། རྡོའིའམ། ཤིང་གིའམ། དངུལ་གྱིའམ། གསེར་གྱིའམ། ཟངས་ཀྱིར་བྱེད་པ་དང་། ཆོས་ཀྱི་རྣམ་གྲངས་འདི་ཡང་བྲིས་ཏེ། དེའི་ནང་དུ་བཞག་ན་བཞག་མ་ཐག་ཙམ་གྱིས་རིན་པོ་ཆེ་སྣ་བདུན་གྱི་རང་བཞིན་དུ་བྱིན་གྱིས་བརླབས་པར་འགྱུར་རོ། །འཕང་དང་། ཐེམ་
སྐས་དང་། ཁ་རན་དང་། འཁོར་ལོའི་ཕྲེང་བ་དང་། བཀྲ་ཤིས་དང་། གདུགས་དང་། དྲིལ་བུ་འཕྱང་བ་དང་། བ་དན་དང་། དྲིལ་བུ་གཡེར་ཀའི་དྲ་བ་ཐམས་ཅད་ཀྱང་རིན་པོ་ཆེ་སྣ་བདུན་གྱི་རང་བཞིན་དུ་འགྱུར་རོ། །ཕྱོགས་བཞི་ཀུན་ན་ཡང་དེ་བཞིན་གཤེགས་པའི་གཟུགས་བརྙན་གནས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པའི་མཆོད་རྟེན་རིན་པོ་ཆེ་དང་། སྐུ་གདུང་གི་སྙིང་པོའི་མཆོད་རྟེན་དང་། མཆོད་གནས་སུ་འགྱུར་རོ། །སྐུ་གཟུགས་དང་། མཆོད་རྟེན་དེ་འོག་མིན་གྱི་གནས་ཀྱི་ལྷས་ཀྱང་ཡོངས་སུ་བསྐྱང་བ་དང་། མཆོདཔས་ཡོངས་སུ་གཟུང་བར་འགྱུར་རོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ཡོན་ཏན་གྱི་ཁྱད་པར་འདི་ལྟ་བུར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཀྱིས་སྙིང་པོ་གསང་བ་རིང་བསྲེལ་གྱི་ཟ་མ་ཏོག་གི་ཕྱག་རྒྱའི་གཟུངས་ཡིན་ཏེ། ལག་ན་རྡོ་རྗེ་དེས་ན་མཐུ་འདི་ནི་ཡོན་ཏན་གྱི་ཁྱད་པར་འདི་ལྟ་བུར་བྱིན་གྱི་རླབས་ཀྱིས་བྱིན་གྱིས་བརླབས་པ་ཡིན་ནོ། །རྡོ་རྗེ་འཛིན་གྱིས་གསོལ་པ། བཅོམ་ལྡན་འདས་རིན་པོ་ཆེའི་ཟ་མ་ཏོག་གི་ཕྱག་རྒྱའི་གཟུངས་ཀྱི་ཆོས་ཀྱི་རྣམ་གྲངས་བཤད་པར་ཅི་གནང་། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཉོན་ཅིག་དེ་བཞིན་གཤེགས་པ་འདས་པ་དང་། མ་བྱོན་པ་དང་། ད་ལྟར་བྱུང་བ་དང་། གང་དག་ཡོངས་སུ་མྱ་ངན་ལས་འདས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱི་དེ་བཞིན་གཤེགས་པའི་སྐུ་ནི་གསུམ་སྟེ། ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། དེ་བཞིན་དུ་སྤྲུལ་པའི་སྐུ་སྟེ། དུས་གསུམ་པ་ཐམས་ཅད་ཀྱི་རིང་བསྲེལ་གྱི་ཟ་མ་ཏོག་གི་ཕྱག་རྒྱའི་གཟུངས་ཀྱི་ཆོས་ཀྱི་རྣམ་གྲངས་ཡིན་ནོ། །ན་མ་སྟྲཻ་ཡ་དྷཱི་ཀཱ་ནཱཾ། སརྦྦ་ཏ་ཐཱ་ག་ཏཱ་ནཱཾ། ༀ་བྷུ་བི་བྷ་བཱན་བ་རེ་བ་ཙ་ཊཽ། ཙུ་ལུ་ཙུ་ལུ། དྷ་ར་དྷ་ར། སརྦྦ་ཏ་ཐཱ་ག་ཏཱ། དྷཱ་ཏུ་དྷ་རེ། པདྨ་གརྦྷེ། ཛ་ཡ་བ་རེ། ཨ་ཙ་ལེ། སྨ་ར་ཏ་ཐཱ་ག་ཏ། དྷརྨྨ་ཙཀྲ། པྲ་བརྟ་ན། བཛྲ་བོ་དྷི་
མཎྜ་ཨ་ལཾ་ཀཱ་ར། ཨ་ལཾ་ཀྲྀ་ཏེ། སརྦྦ་ཏ་ཐཱ་ག་ཏ། ཨ་དྷིཥྛི་ཏེ། བོ་དྷ་ཡ་བོ་དྷ་ཡ། བོ་དྷ་ནི་བོ་དྷ་ནི། བུདྷྱ་བུདྡྷྱ། སྃ་བོ་དྷ་ནི་སྃ་བོ་དྷ་ཡ། ཙ་ལ་ཙ་ལ། ཙ་ལནྟུ་སརྦྦ་ཨཱ་བ་ར་ཎཱ་ནི། སརྦ་པཱ་པྃ་བི་ག་ཏེ། ཧུ་རུ་ཧུ་རུ། སརྦྦ་ཤོ་ཀ་བི་ག་ཏེ། སརྦ་ཏ་ཐཱ་ག་ཏ་ཧྲྀ་ད་ཡ། བཛྲི་ཎི། སམྦྷ་བ་སམྦྷ་བ། སརྦ་ཏ་ཐཱ་ག་ཏ་གུ་ཧྱེ། ངྷཱ་ར་ཎི་མུ་དྲེ། བུད་དྷེ། །སུ་བུད་དྷེ། སརྦ་ཏ་ཐཱ་ག་ཏ་ཨ་དྷིཥྛི་ཏེ། དྷཱ་ཏུ་གརྦྷེ་སྭཱ་ཧཱ། ས་མ་ཡ་ཨ་དྷིཥྛི་ཏེ་སྭཱ་ཧཱ། སརྦ་ཏ་ཐཱ་ག་ཏ་ཧྲྀ་ད་ཡ། དྷཱ་ཏུ་མུ་དྲེ་སྭཱ་ཧཱ། སུ་པྲ་ཏིཥྛི་ཏ་སྟཱུཔེ་ཏ་ཐཱ་ག་ཏ་ཨ་དྷིཥྛི་ཏེ། ཧཱུྃ་ཧཱུྃ་སྭཱ་ཧཱ།ༀ་སརྦ་ཏ་ཐཱ་ག་ཏ་ཨུཥྞཱི་ཥ་དྷཱ་ཏུ་མུ་དྲཱ་ཎི་སརྦ་ཏ་ཐཱ་ག་ཏ་དྷརྨ་དྷཱ་ཏུ་བི་བྷཱུ་ཥི་ཏ་ཨ་དྷིཥྛི་ཏེ་ཧུ་རུ་ཧུ་རུ། ཧཱུྃ་ཧཱུྃ་སྭཱ་ཧཱ། བཅོམ་ལྡན་འདས་ཀྱིས་རིང་བསྲེལ་གྱི་ཟ་མ་ཏོག་གི་ཕྱག་རྒྱའི་གཟུངས་འདི་བཤད་མ་ཐག་ཏུ་ཕྱོགས་བཅུ་དང་། ཕྱོགས་རེ་རེ་ཀུན་ནས་དེ་བཞིན་གཤེགས་པ་འབུམ་ཕྲག་བྱེ་བ་ཁྲག་ཁྲིག་ཏིལ་གྱི་གང་བུ་སྙེད་དགུ་བཅུ་རྩ་དགུ་གཤེགས་ནས། བཅོམ་ལྡན་འདས་ཤཱཀྱ་ཐུབ་པ་ལ་ཤཱཀྱ་ཐུབ་པས་སེམས་ཅན་ཐམས་ཅད་ཀྱི་དོན་དུ་འཛམ་བུའི་གླིང་དུ་ཆོས་ཀྱི་རྣམ་གྲངས་འདི་ལྟ་བུའི་ཆོས་ཀྱི་གཏེར་བཞག་པ་དང་། རིང་བསྲེལ་གྱི་སྙིང་པོའི་མཆོད་རྟེན་བྱིན་གྱིས་བརླབས་པ་ལེགས་སོ། །ལེགས་སོ་ཞེས་བྱ་བ་བྱིན་ནོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་དང་། བྱིན་གྱིས་བརླབས་པ་ཡིན་ནོ། །གང་ན་རིང་བསྲེལ་གྱི་ཕྱག་རྒྱའི་གཟུངས་འདི་སྟོན་པར་བྱེད་དམ། མཆོད་རྟེན་གྱི་ནང་དུ་འཇོག་གམ། གཟུགས་བརྙན་གྱི་ནང་དུ་འཇོག་པར་བྱེད་པ་དེར། དེ་བཞིན་གཤེགས་པ་རྣམས་ཀྱང་གཅིག་ཏུ་རྟག་ཏུ་རྒྱུན་མི་འཆད་པར་རྗེས་སུ་འབྲང་ཞིང་བཞུགས་པར་འགྱུར་རོ། །ཐམས་ཅད་དུ་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་གྱིས་བརླབས་པར་འགྱུར་རོ། །དེ་ནས་གཟུངས་བཤད་པ་དང་། ཇི་ཙམ་ན་མཆོད་རྟེན་རྙིང་པ་ཕྱག་དར་གྱི་ཕུང་པོ་ལྟ་བུ་དེ་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དུ་མངོན་པར་འཕགས་ཤིང་འཕང་དང་། ལེགས་པར་རྣམ་པར་འབྱེས་པ་དང་། འཁོར་ལོའི་ཕྲེང་བ་དང་། བཀྲ་ཤིས་དང་བཅས་པར་གྱུར་ཏོ། །བཅོམ་ལྡན་འདས་དགྱེས་ནས་དེ་
སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དེ་དག་དང་། ལྷ་དང་། མིར་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །འཕགས་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱི་སྙིང་པོ་གསང་བའི་རིང་བསྲེལ་གྱི་ཟ་མ་ཏོག་ཅེས་བྱ་བའི་གཟུངས་ཐེག་པ་ཆེན་པོའི་མདོ་རྫོགས་སོ།། །།པཎྜི་ཏ་བིདྱཱ་ཀ་ར་པྲ་བྷ་ཝ་དང་། ལོ་ཙྪ་བ་གཙང་དེ་ཝེནྡྲ་རཀྵིཏས་བསྒྱུར་ཅིང་ཞུས་ཏེ་གཏན་ལ་ཕབ་པ།།