འཕགས་པ་སའི་དབང་པོ་ཆེན་པོ་ཞེས་བྱ་བའི་གཟུངས།
རྒྱ་གར་སྐད་དུ། ཨཱཪྱ་མ་ཧཱ་མ་ཧཱིནྡྲ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སའི་དབང་པོ་ཆེན་པོ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་ཏུ་འོད་བྲམ་ཟེ་སའི་དབང་པོ་ཆེན་པོ་ཤིང་སཱ་ལ་ཆེན་པོ་ལྟ་བུའི་གནས་ལྷ་དང་ལྡན་པ་ན་བཞུགས་ཏེ། དེ་ནས་བྲམ་ཟེ་སའི་དབང་པོ་ཤིང་སཱ་ལ་ཆེན་པོ་ལྟ་བུ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་ཏུ་འོད་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་ཏུ་འོད་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འདུག་ནས་བྲམ་ཟེ་སའི་དབང་པོ་ཤིང་སཱ་ལ་ཆེན་པོ་ལྟ་བུས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་ཏུ་འོད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ལགས་ན། གང་གིས་བདག་སྐྱེ་བ་དྲན་པར་འགྱུར། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་
བརྗེད་པར་མི་འགྱུར་བའི་ཐབས་དེ་བཅོམ་ལྡན་འདས་ཀྱིས་བདག་ལ་ལེགས་པར་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་ཏུ་འོད་ཀྱིས་བྲམ་ཟེ་སའི་དབང་པོ་ཆེན་པོ་ཤིང་སཱ་ལ་ཆེན་པོ་ལྟ་བུ་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་བུ་ཁྱོད་གལ་ཏེ་དེ་ལྟར་སྨོན་ན། དེའི་ཕྱིར་ཀུན་ཏུ་འོད་ཀྱི་རིག་སྔགས་ཀྱི་སྙིང་པོ་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །ཀུན་ཏུ་འོད་ཀྱི་རིག་སྔགས་ཀྱི་སྙིང་པོ་གང་ཞེ་ན། ཏདྱ་ཐཱ། ཨཱ་མོ་ད་ནི། པྲ་མོ་ད་ནི། བི་མོ་ད་ནི། སཾ་མོ་ད་ནི། པྲི་ཡཾ་ཀ་ར་ཎི། ཤྲཱི་ཀ་ར་ཎི། ཤྲཱ་ཀ་ར་ཎི། བོ་དྷི་ཀ་ར་ཎི། ཨ་ནུཏྟ་ར་སྱཾ་སམྱསྐཾ་བུདྡྷ་ཀ་ར་ཎི། ཨ་ནུཏྟ་ར་ཨཱཪྱ་ཀ་ར་ཎི། ཨ་ནུཏྟ་ར་པྲཛྙཱ་ཀ་ར་ཎི། ཨ་ནུཏྟ་ར་བ་ཤཱི་ཀ་ར་ཎི། ཨ་ནུཏྟ་ར་སརྦ་ཀླེ་ཤོ་པ་ཀླེ་ཤ་བི་དྷ་ར་ཎི། ཨ་བ་དྱཱ་ན་དྷ་ཀ་ར་བི་དྷ་མ་ནི། ཨ་ནུཏྟ་ར་བིདྱཱ་ཨ་ལོ་ཀོཏྤཱ་པ་ད་ནི། ཨ་ནུཏྟ་ར་ཤཻ་ཀྵ་ཤཱི་ལ་བིངྱཱ་ཙ་ར་ཎ། བི་མུཀི་གུ་ཎ་ག་ཎ། སཾ་བྷ་དྷ་ནི། ཨ་ནུཏྟ་ར་སརྦ་ཀུ་ཤ་ལ་མཱུ་ལོདྡྷ་ནི། ཨ་ནུཏྟ་ར་བྷོ་ན་མཱུ་ལ་ནི། ཨ་ནུཏྟ་ར་རཱ་ག་དོ་ཥ་མོ་ཧ་ན་མཱུ་ལ་ནི། ཨ་ནུཏྟ་རེ་ཤཻ་ཀྵ་མ་ན་ཨ་བིདྱཱ། ཨནྡྷ་ཀ་རཱ་བི་དྷ་མ་ནི། ཨ་ནུཏྟ་རཱ་སཱི་ཨ་པྲ་ཏི་ཧ་ཏ་བ་ལ་ཙཀྲ། ཨ་ནུཏྟ་རཱ་སརྦ་ལཱ་ར་བ་བི་དྲཱ་མ་ནི། ཏྭཾ་ཧི་བྷ་དྲེ། ཨ་ནུཏྟ་རཱ་བ་ལ་བྷ་དྲ། སུ་བྷ་དྲ། ཤྲཱི་བྷ་དྲ། ཨ་ནུཏྟ་ར་བྷ་དྲ། ས་མནྟ་བྷ་དྲ། ཨ་ས་མ་ས་མ་བྷ་དྲ། ཨ་ནུཏྟ་ར་མ་ཧཱ་པུ་རུ་ཥ་བྷ་དྲ། ཨ་ནུཏྟ་ར་མ་ཧཱ་པུ་རུ་ཥ་སེ་བི་ཏཱ། ཨ་ནུཏྟ་ར་མ་ཧཱ་པུ་རུ་ཥ་ཨ་ནུ་བརྟ་ནཱི། ཨ་ནུཏྟ་རེ་མ་ཧཱ་པུ་རུ་ཥ་དྷརྨ་དེ་ཤི་ཀཱ། ཨ་ནུཏྟ་ར་མ་ཧཱ་པུ་རུ་ཥ་དྷ་རྨ་ཀོ་ཥ་སཾ་བཱ་དྷི་ཀཱ། ཨ་ནུཏྟར་མ་ཧཱ་པུ་རུ་ཥ་ནི་རྦཱ་ཎ། ཨ་ནུ་ཏ་པྲ་ཏཪྵ་ཀཱ། ཏྭཾ་ཧི་བྷ་དྲེ། གང་གཱ་སི་ཏ་པཀྵུ། སམྱཀྶཾ་བུདྡྷེ། ཨཱ་སེ་བི་ཏཱ། བྷཱ་བི་ཏཱ། བ་ཧུ་ལཱི་ཀྲོ་དྷ། སྟུ་ཏ། སྟཽ་པི་ཏ་བརྞི་ཏཱ། པྲ་ཤ་སྟ། བུ་འདི་ནི་ཀུན་ཏུ་འོད་ཀྱི་རིག་སྔགས་ཀྱི་སྙིང་པོ་ཡིན་ཏེ། དེ་བས་ན་བུ་ཁྱོད་ཀྱིས་ཀུན་ཏུ་འོད་ཀྱི་རིག་སྔགས་ཀྱི་སྙིང་པོ་འདི་འགྲོ་བ་དང་། འགྲེང་བ་དང་། འདུག་པ་དང་། ཉལ་བ་ན་ཡང་ཡིད་ལ་གྱིས་ཤིག །བུ་གང་ལ་ལ་ཞིག་ཀུན་ཏུ་འོད་ཀྱི་རིག་སྔགས་ཀྱི་སྙིང་པོ་འདི་མིང་དང་། རིགས་དང་། རིགས་ཀྱི་བྱེ་བྲག་གང་ཡིད་ལ་བྱེད་དམ། སྐྱེས་པའམ། བུད་མེད་དམ། ཁྱེའུའམ། བུ་མོའམ། ལྷའམ། ལྷ་མོའམ། ཀླུའམ། ཀླུ་མོའམ། དྲི་ཟའམ། དྲི་ཟ་མོའམ། ལྷ་མ་ཡིན་ནམ། ལྷ་མ་ཡིན་མོའམ། མིའམ་ཅིའམ། མིའམ་ཅི་
མོའམ། ལྟོ་འཕྱེ་ཆེན་པོའམ། ལྟོ་འཕྱེ་ཆེན་པོ་མོའམ། ཡི་དགས་སམ། ཡི་དགས་མོའམ། ཤ་ཟའམ། ཤ་ཟ་མོའམ། གྲུལ་བུམ་མམ། གྲུལ་བུམ་མོའམ། ལུས་སྲུལ་པོའམ། ལུས་སྲུལ་པོ་མོའམ། ཀུན་ཏུ་འོད་ཀྱི་རིག་སྔགས་ཀྱི་སྙིང་པོ་འདི་འཆང་ངམ། ཀློག་གམ། ལུང་དབོག་གམ། སྟོན་ཏམ། འཆང་ན་དེ་ཚེ་རབས་བདུན་གྱི་བར་དུ་ཚེ་རབས་དྲན་པར་འགྱུར་རོ། །དེ་ཇི་སྲིད་འཁོར་གྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་མི་བརྗེད་པར་འགྱུར་རོ། །ལྷར་གྱུར་ཀྱང་རུང་། མིར་གྱུར་ཀྱང་རུང་སྟེ། དེ་མཚོན་ཆའམ། དུག་གམ། ཆུའམ། མེས་བར་མ་དོར་འཆི་བའི་དུས་བྱེད་པར་མི་འགྱུར་རོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀུན་ཏུ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་མཐའ་ཡས་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འཆི་མེད་འོད་ཆེན་པོ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་ཆེན་པོ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་ཆེན་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་མཉམ་པ་མེད་པ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་མི་མཉམ་པ་དང་མཉམ་པ་རྒྱལ་བ་འོད་སྲུང་གི་རིགས་དང་བཅས་པ་ལ་ཕྱག་འཚལ་ལོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་དྲང་སྲོང་ཆེན་པོ་འོད་སྲུང་གི་རིགས་དང་བཅས་པ་བདུན་པོ་དེ་དག་ལ་ཕྱག་འཚལ་ལོ། །ཞི་བའི་དབྱིངས་སུ་ཞུགས་པ་འཁོར་དང་བཅས་པ་རྣམས་ལ་ཕྱག་འཚལ་ལོ། །ཕྱག་འཚལ་ལོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྲམ་ཟེ་སའི་དབང་པོ་ཆེན་པོ་ཤིང་སཱ་ལ་ཆེན་པོ་ལྟ་བུ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སའི་
དབང་པོ་ཆེན་པོ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།།