འཕགས་པ་འཇམ་དཔལ་གྱིས་དམོད་བཙུགས་པ་ཞེས་བྱ་བའི་གཟུངས།
དཀོན་མཆོག་གསུམ་ལ་ཕྱག་འཚལ་ལོ། །འཇམ་པའི་མགོན་ལ་ཕྱག་འཚལ་ལོ། །དེ་ནས་ཡང་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ཐལ་མོ་སྦྱར་བ་བཏུད་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རིག་པ་མཐོང་བར་བགྱི་སྟེ། རིག་པ་དམ་པ་འདི་སྨྲས་ན་ནི་ངོ་མཚར་དུ་འགྱུར་རོ། །ཐམས་ཅད་དང་ལྡན་པའི་འཁོར་དེས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་ཀྱིས་རིག་པ་སྨྲོས་ཤིག །བདག་གིས་བཅོམ་ལྡན་འདས་ཀྱིས་གསུང་གིས་སྨྲ་བར་བགྱིའོ། །
བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གྱིས་སངས་རྒྱས་ཐམས་ཅད་ཀྱི་སྙིང་པོ་ཆོས་ཐམས་ཅད་ལ་ཕྱག་འཚལ་ཏེ་མཆོད་པ་བྱས་ནས་རིག་པ་སྨྲས་སོ། །ན་མཿསརྦ་ཏ་ཐཱ་ག་ཏེ་བྷྱཿན་མོ་མཉྫུ་ཤྲི་ཡེ། བོ་དྷི་ས་ཏྭཱ་ཡ། ཨོཾ་མཉྫ་བར་མཉྫ་གྷོ་ཥ། ཧ་ན་ཧ་ན། པ་ཙ་པ་ཙ། མ་ཏམ་ཏ། མ་ཐ་མ་ཐ། བི་དྷྭཾ་ས་ཡ་བི་དྷྭཾ་ས་ཡ། ཀ་ར་ཀ་ར། ཏྲུ་ཊ་ཏྲུ་ཊ། བྷཉྫ་བྷཉྫ། ཨ་བྷི་ས་ཨ་བྷི་ས། ཏུ་ཊ་ཏུ་ཊ། ཏྲུ་ཊ་ཏྲུ་ཊ། སྥུ་ཊ་སྥུ་ཊ། ཧྲྀ་ད་ཡ་བཾ་དྷ་ནི། ནམཿསཾ་བོ་དྷ་ནི། པྲ་བྷེ་ས། པྲ་བྷེ་ས། ལོ་ཏ་ལོ་ཏ། ཀྲྀ་ཏགྲྀ་ཏ། ཀྲི་ད་ཀྲི་ད། ཀྲི་ཊ་ཀྲི་ཊ། ཧ་ས་ཧ་ས། པྲ་བན་དྷ། པྲ་བན་དྷ། ཨཱ་བི་ཤ་ཨཱ་བི་ཤ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་སྭཱ་ཧཱ། གང་ཞིག་གིས་ནམ་ཕྱེད་ན་ལན་གསུམ་བརྗོད། ཉི་མ་ལ་ཡང་ལན་བདུན་བརྗོད་པ་བྱས་ན། རིག་པ་ཆེན་མོ་ཐོབ་པར་འགྱུར་རོ། །མི་རྣམས་ཀྱི་ཤོ་ལོ་ཀ་སུམ་བརྒྱ་འཛིན་པར་འགྱུར་རོ། །འདིའི་ཆོ་ག་ནི་ཙནྡན་གྱིས་དཀྱིལ་འཁོར་བྱས་ཏེ། ཞུན་མར་གྱིས་མར་མེས་ཀྱང་མཆོད་ནས་སྟོང་ཕྲག་བརྒྱད་བཟླས་ན་འགྲུབ་པར་འགྱུར། མ་གྲུབ་ཀྱང་ཤོ་ལོ་ཀ་བརྒྱ་ཉི་མ་རེ་རེ་ལ་འཛིན་པར་འགྱུར་རོ། །བཅོམ་ལྡན་འདས་བདག་གིས་བསྟན་པ་འདིས་མ་གྲུབ་ན་གང་ཞིག་མཚམས་མེད་པ་ལྔ་བྱས་ན་བདག་ཀྱང་དེ་དང་འདྲ་བར་མཚམས་མེད་པ་ལྔ་བྱས་པར་འགྱུར་རོ། །འཕགས་པ་འཇམ་དཔལ་གྱིས་དམོད་བཙུགས་པ་ཞེས་བྱ་བའི་གཟུངས་རྫོགས་སོ།། །།