བཅོམ་ལྡན་འདས་ཀྱིས་འཇམ་དཔལ་རྣོན་པོ་ལ་བསྟོད་པ།
ཐམས་ཅད་མཁྱེན་པ་ལ་ཕྱག་འཚལ་ལོ། །བཅོམ་ལྡན་འདས་ཀྱིས་འཇམ་དཔལ་རྣོན་པོ་ལ་བསྟོད་པ། མཐིང་ནག་མཛེས་པས་འཇམ་པར་འཚེར་བའི་དབུ། །ལྕང་ལོ་རྫིངས་བསྐྱོད་མཐིང་གི་མཚོ་ལྟར་གཡོ། །དགེ་བའི་སྤྱི་གཙུག་མཚན་མཆོག་གཡས་སུ་འཁྱིལ། །གཙུག་ཏོར་འཕགས་པས་སྐྱེ་བོས་བལྟར་མི་མཐོང་། །སྲིད་པའི་སྡུག་བསྔལ་མ་ལུས་གཞོམ་པ་དང་། །མཐུ་ཆེན་བྱིན་གྱིས་རྒོལ་བ་གཞོམ་པའི་ཕྱིར། །དབུ་རྒྱན་ཅོད་པན་རྒྱལ་བའི་མཆོག་གསང་ཞིང་། །ཆོས་ཀྱི་རྒྱལ་ཐབས་དབང་གི་ཕ་རོལ་ཕྱིན། །རིན་ཆེན་སྤུག་དང་ཨུཏྤལ་འདྲ་བ་ཡི། །ཤིན་ཏུ་དངས་པར་དཀར་ནག་ཕྱེད་པའི་སྤྱན། །སྨིན་ཚུགས་མཛེས་པས་ཟླ་བ་ཚེས་ལྟར་འཁྱུག །མིག་འཛུམས་ཟུར་གྱིས་ལྟ་བས་བྱམས་པའི་རྟགས། །སིལ་སྙན་རྣམ་དག་མཚན་རབ་འབྲུ་ཆགས་པ། །རིན་ཆེན་མ་ལུས་རྣམ་པ་དུ་མས་སྤྲས། །རྒྱལ་བས་ཞིང་མང་རྣམ་པ་སྣ་ཚོགས་སུ། །རྣམ་ཐར་དཔག་ཡས་ཆོས་སྒོ་གྲངས་མེད་གནས། །ཤངས་ཀྱི་དབྱིབས་ལེགས་སྐྱེ་བོ་ཡོངས་ལས་འཕགས། །མཐོ་ལ་ཡིད་ཙམ་ཟུར་ལ་ལེགས་པའི་མཚན། །དྲང་ལ་ཆུ་ཕྲན་འདྲ་བར་མཛེས་པའི་
ཚུལ། །བཟང་ལེགས་བསྐལ་པ་བརྒྱར་ཡང་བལྟར་མི་ངོམས། །པདྨ་ལེ་བརྒན་ཚོན་ལྟར་དམར་བའི་སྒྲོས། །ཡིད་གཞུངས་སེལ་བ་འཁྱིལ་བ་བཟང་ལེགས་སྐུ། །མདོག་སྡུག་ཚུ་སྐྱེས་སྣང་བ་མཚོ་ལོ་བཞིན། །ཤིན་ཏུ་དང་པའི་ཡིད་ཀྱིས་འཛུམ་པ་མཛད། །ཞལ་རས་ཟླ་འདྲ་གསེར་གྱི་མདོག་གིས་རྒྱས། །འོད་ཀྱི་དཀྱིལ་འཁོར་གསེར་ཕྲེང་དུ་མས་སྤྲས། །གསལ་བའི་འོད་ཕུང་ཉི་མ་བརྒྱ་བས་ལྷག །འོད་ཟེར་སྣ་ཚོགས་སྤྲིན་ཕུང་བཞིན་དུ་འཕྲོ། །ཆོས་དབྱིངས་འཇམ་པའི་དབྱངས་ཀྱིས་སྒྲ་སྒྲོགས་པ། །ཀ་ལ་པིང་ཀ་ལྟ་བུར་ཡིད་འཕྲོག་མཛད། །སང་སང་དབྱངས་རབ་གསུང་དབྱངས་རབ་བསྒྲགས་པ། །སེང་གེའི་ང་རོ་གསེར་གྱི་དྲིལ་ལྟར་འཁྲོལ། །སྐྱེས་མཆོག་མཛད་པ་རྒམ་པར་མཛད་པའི་སྐུ། །ཆ་ལུགས་བཞིན་འཆང་གཟི་བརྗིད་འཕགས་པའི་སྐྲུ། །གཞོན་ནུའི་ཚུལ་ཆགས་ཤིན་ཏུ་གཞོན་པར་གདའ། ། གདུལ་བྱའི་སྐྱེ་བོ་གཞོན་ནུའི་གཟུགས་ཀྱིས་གདུལ། །དབུ་རྒྱན་རིན་ཆེན་རྣམ་པ་སྣ་ཚོགས་དང་། །མུ་ཏིག་དོ་ཤལ་གསེར་གྱི་རྒྱན་དུ་བཀོད། །པདྨ་ལྷ་ཡི་ན་བཟའ་སིལ་མ་བསྣམས། །གཡས་ན་མཚོན་མཆོག་བསྣམས་པ་ཐབས་ཀྱིས་འདུལ། །དཔེ་མེད་རྣོ་བ་ཤེས་རབ་ཉིད་དུ་ངེས། །ཆོས་དབྱིངས་ཚུལ་ཉིད་ཡང་དག་བརྗོད་པ་དང་། །མི་ཤིགས་རྡོ་རྗེ་གཏན་ནས་འབིགས་པའི་ཚུལ། །གཡོན་པ་ཤེས་རབ་ཕ་རོལ་ཕྱིན་པ་དང་། །བླང་དོར་གཉིས་མེད་བསམ་གྱིས་མི་ཁྱབ་དབྱིངས། །ཟབ་མོའི་ཆོས་ཉིད་ཐུགས་སུ་ཆུད་པའི་དོན། ། བཅོམ་ལྡན་འདས་ཀྱིས་འཇམ་དཔལ་རྣོན་པོ་ལ་བསྟོད་པ་རྫོགས་སོ།། །།འཇམ་དཔལ་ངག་གི་དབང་ཕྱུག་ལ་བུ་མོ་བརྒྱད་ཀྱིས་བསྟོད་པ། གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་བརྒྱན་ཞིང་། །འཇིག་རྟེན་གཏི་མུག་མུན་སེལ་བ། །འཇམ་པའི་དབྱངས་ལ་ཕྱག་འཚལ་ལོ། །ཉིད་ཀྱི་མདངས་བཟང་ཚོགས་ཀྱིས་ནི། །ཟླ་བ་རྒྱས་པ་ཟིལ་གནོན་ཞིང་། །མ་རིག་རྣམ་པར་བསལ་གྱུར་པ། །འཇམ་པའི་དཔལ་ལ་ཕྱག་འཚལ་ལོ། །མ་བགྱིས་ཟུར་ཕུད་གསལ་བ་ལ། །ནོར་བུ་འབར་བའི་སྐུ་མངའ་ཞིང་། །
ཉིད་ནི་ཀུན་དུ་དགའ་བའི་སྐུ། །འཇམ་དཔལ་ཁྱོད་ལ་ཕྱག་འཚལ་ལོ། །བདུད་རྩི་འདྲ་ཞིང་འཇམ་ལ་ཟབ། །ཡིད་འོང་གསུང་གི་སྒྲ་སྒྲོགས་པ། །དམ་པ་ཆོས་ཀྱི་རིན་ཆེན་མཛོད། །འཇམ་དཔལ་ཁྱོད་ལ་ཕྱག་འཚལ་བསྟོད། །གང་གཱའི་ཆུ་ཐིགས་ལྟར་གྲངས་མེད། །འཇིག་རྟེན་ཁམས་ཀུན་མ་ལུས་པར། །ཉོན་མོངས་དྲི་མ་རབ་སྤངས་པའི། །འཇམ་དཔལ་ཁྱོད་ལ་ཕྱག་འཚལ་བསྟོད། །མཆེ་བ་གཙིགས་ཤིང་བསྒྱིངས་པ་ཡི། །འཇིགས་པའི་སྐུ་ཡི་ཚུལ་གྱིས་ནི། །གཤིན་རྗེའི་དྲེགས་པ་འཇོམས་མཛད་པ། །འཇམ་དཔལ་ཁྱོད་ལ་ཕྱག་འཚལ་བསྟོད། །རང་གི་སྤྱན་དང་མདངས་འདྲ་བའི། །ཨུཏྤལ་སྔོན་པོས་རབ་མཛེས་པ། །ལྷུང་བཟེད་ཕྱག་ན་བསྣམས་པ་ཡི། །འཇམ་དཔལ་ཁྱོད་ལ་ཕྱག་འཚལ་ལོ། །ཕྱོགས་བཅུར་བཞུགས་པའི་སངས་རྒྱས་ལ། །རྒྱ་ཆེར་མཆོད་དང་བསྟོད་པ་ཡིས། །གྲོལ་བའི་ལམ་ནི་སྟོན་པ་པོ། །འཇམ་དཔལ་ཁྱོད་ལ་ཕྱག་འཚལ་ལོ། །བུ་མོ་བརྒྱད་ཀྱིས་བསྟོད་པ་རྫོགས་སོ།།