འཕགས་པ་རིག་པའི་རྒྱལ་མོ་སོ་སོར་འབྲང་བ་ཆེན་མོ།
རྒྱ་གར་སྐད་དུ། ཨཱཪྱ་མ་ཧཱ་པྲ་ཏི་ས་རཱ་བིདྱཱརཱཛཱི། བོད་སྐད་དུ། འཕགས་པ་རིག་པའི་རྒྱལ་མོ་སོ་སོར་འབྲང་བ་ཆེན་མོ་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྡོ་རྗེའི་ལྷུན་པོ་ཆེན་པོའི་ཟོམ་ན། ཁང་པ་བརྩེགས་པ་རྡོ་རྗེ་ཆེན་པོའི་ཏིང་ངེ་འཛིན་གྱི་སའི་གནས། རྡོ་རྗེ་ཆེན་པོའི་དཔག་བསམ་གྱི་ཤིང་ལྗོན་པས་ལེགས་པར་བརྒྱན་པ། རྡོ་རྗེ་ཆེན་པོའི་རྫིང་གི་རིན་པོ་ཆེ་དང་། པདྨའི་འོད་ཀྱིས་སྣང་བར་བྱས་པ། ས་ཕྱོགས་རྡོ་རྗེ་ཆེན་པོའི་བྱེ་མ་བདལ་བ། རྡོ་རྗེ་ཆེན་པོར་བྱིན་གྱིས་བརླབས་པ། འཁོར་གྱི་ཁྱམས་རྡོ་རྗེ་ཆེན་པོ་ལས་བྱས་པ། ལྷའི་དབང་པོ་བརྒྱ་བྱིན་གྱི་རྡོ་རྗེའི་སེང་གེའི་ཁྲི་ཆེན་པོ་བྱེ་བ་ཁྲག་ཁྲིག་བརྒྱ་སྟོང་གིས་རྣམ་པར་མཛེས་པ། ཆོས་བསྟན་པ་དང་། ཆོ་འཕྲུལ་ཅན་སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱི་བྱིན་གྱིས་བརླབས་པ། ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པ། ཐམས་ཅད་མཁྱེན་པ་ཉིད་ཀྱིས་ངེས་པར་འབྱུང་བ་ན། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་
ཕྲག་བརྒྱད་ཅུ་རྩ་བཞི་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། མཐུ་ཆེན་པོ་ཐོབ་པ། རྡོ་རྗེ་ཆེན་པོའི་རྣམ་པར་ཐར་པ་དང་། ཏིང་ངེ་འཛིན་གྱིས་སངས་རྒྱས་ཀྱི་ཞིང་དུ་མར་རྣམ་པར་འཕྲུལ་པ་དང་། ཆོ་འཕྲུལ་ཆེན་པོ་ཀུན་ཏུ་སྟོན་པ། སེམས་ཀྱི་སྐད་ཅིག་ཐང་ཅིག་ཡུད་ཙམ་ཅིག་ལ་སེམས་ཅན་ཐམས་ཅད་ཀྱི་སེམས་དང་། སྤྱོད་པའི་རྗེས་སུ་འཇུག་པའི་ཆོས་སྟོན་པ་སྣ་ཚོགས་སྙན་ཅིང་རྒྱ་ཆེ་ལ་ཟབ་ཅིང་ཡངས་པ་དང་། སྤོབས་པ་དང་། ཆོ་འཕྲུལ་དང་ལྡན་པ། སངས་རྒྱས་ཀྱི་ཞིང་དུ་མར་དེ་བཞིན་གཤེགས་པ་ལ་མཆོད་པ་ཆེན་པོའི་སྤྲིན་གྱིས་མཆོད་པ་དང་། རྣམ་པར་ཐར་པའི་སྒོ་དང་། གཟུངས་དང་། ཏིང་ངེ་འཛིན་དང་། དབང་པོ་དང་། མངོན་པར་ཤེས་པ་དང་། མ་འདྲེས་པ་དང་། བྱང་ཆུབ་ཀྱི་ཡན་ལག་དང་། ལམ་དང་། ས་དང་། ཕ་རོལ་ཏུ་ཕྱིན་པ་དང་། ཐབས་ལ་མཁས་པ་དང་། བསྡུ་བའི་དངོས་པོ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། བྱམས་པའི་སྟོབས་དང་བདེན་པ་དང་། ཡོངས་སུ་བྱང་བའི་སེམས་ཀྱི་རྒྱུན་དང་ལྡན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་།རྡོ་རྗེའི་ལུས་དང་། རྡོ་རྗེའི་བློ་གྲོས་དང་། ལག་ན་རྡོ་རྗེ་དང་། རྡོ་རྗེ་འདུས་པ་དང་། རྡོ་རྗེ་མཐུ་བོ་ཆེ་དང་། རྡོ་རྗེ་རྣམ་པར་འཕྲུལ་པ་དང་། རྡོ་རྗེ་བརྩེགས་པ་དང་། རྡོ་རྗེ་ཕུང་པོ་དང་། རྡོ་རྗེ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་ཏོག་དང་། དེ་དག་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞི་དང་། ཉན་ཐོས་ཆེན་པོ་རབ་ཏུ་མང་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། སྲིད་པར་ཀུན་ཏུ་སྦྱོར་བ། ཡོངས་སུ་ཆད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། རྫུ་འཕྲུལ་གྱི་སྟོབས་དང་། ཆོ་འཕྲུལ་བསམ་གྱིས་མི་ཁྱབ་པས་རྣམ་པར་འཕྲུལ་པའི་མཐུ་ཆེན་པོ་ཐོབ་པ། ལྟ་བ་ཆགས་པ་མེད་པ། ཐམས་ཅད་ཀྱང་དྲི་མ་དང་བྲལ་བ་ཐོབ་པ། ཀུན་ནས་ཉོན་མོངས་པའི་བག་ཆགས་ཀྱི་ས་བོན་ངེས་པར་བསྲེགས་པ་ཤ་སྟག་ལ་འདི་ལྟ་སྟེ།
ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་ཀ་པི་ན་དང་། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་སྐུལ་བྱེད་དང་། ཚེ་དང་ལྡན་པ་དགའ་བྱེད་དང་། ཚེ་དང་ལྡན་པ་འོད་སྲུང་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ལྟེང་རྒྱས་འོད་སྲུང་དང་། དེ་དག་ལ་སོགས་པ་ཉན་ཐོས་ཆེན་པོ་རབ་ཏུ་མང་པོ་དང་། ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་གྲངས་མེད་དཔག་ཏུ་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་དག་དང་། མི་མཇེད་ཀྱི་བདག་པོ་ཚངས་པ་ལ་སོགས་པ་ཚངས་རིས་ཀྱི་ལྷའི་བུ་རྣམས་དང་། ལྷའི་བུ་རབ་འཐབ་བྲལ་གཡོག་འཐབ་བྲལ་གྱི་རིས་ཀྱི་ལྷའི་བུ་དང་བཅས་པ་དང་། ཡོངས་སུ་དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ལྷའི་དབང་པོ་བརྒྱ་བྱིན་ལྷའི་བུ་ཐམས་ཅད་ཀྱི་འཁོར་ཅན་དང་། ལྷ་མ་ཡིན་གྱི་དབང་པོ་ཐགས་བཟངས་རིས་དང་། སྟོབས་ཅན་དང་། རབ་སིམ་དང་། སྒྲ་གཅན་དང་། རྣམ་པར་སྣང་བྱེད་དང་། དེ་དག་ལ་སོགས་པ་ལྷ་མ་ཡིན་གྱི་དབང་པོ་ཚད་མེད། གྲངས་མེད། དཔག་ཏུ་མེད་པ་རྣམས་དང་། ཀླུའི་རྒྱལ་པོ་རྒྱ་མཚོ་དང་། འཇོག་པོ་དང་། ནོར་རྒྱས་ཀྱི་བུ་དང་། དུང་སྐྱོང་དང་། སྟོབས་ཀྱི་རྒྱུ་དང་། པདྨ་དང་། པདྨ་ཆེན་པོ་དང་། དེ་དག་ལ་སོགས་པ་ཀླུའི་རྒྱལ་པོ་ཚད་མེད་གྲངས་མེད་དཔག་ཏུ་མེད་པ་རྣམས་དང་། མི་འམ་ཅིའི་རྒྱལ་པོ་ལྗོན་པ་མི་འམ་ཅིའི་རྒྱལ་པོ་གཡོག་དུ་མ་ཅན་དང་། དྲི་ཟའི་རྒྱལ་པོ་ཟུར་ཕུད་ལྔ་པ་དྲི་ཟའི་རྒྱལ་པོ་གཡོག་དུ་མ་ཅན་དང་། རིག་སྔགས་འཆང་གི་རྒྱལ་པོ་དོན་ཐམས་ཅད་གྲུབ་པ་རིག་སྔགས་འཆང་གི་རྒྱལ་པོ་གཡོག་དུ་མ་ཅན་དང་། ནམ་མཁའ་ལྡིང་གི་རྒྱལ་པོ་གསེར་མིག་ནམ་མཁའ་ལྡིང་གི་རྒྱལ་པོ་གཡོག་དུ་མ་ཅན་དང་། གནོད་སྦྱིན་གྱི་རྒྱལ་པོ་རྣམ་ཐོས་ཀྱི་བུ་དང་། ནོར་བུ་བཟང་དང་། གང་བ་བཟང་དང་། ལྔས་རྩེན་གནོད་སྦྱིན་གྱི་རྒྱལ་པོ་གཡོག་དུ་མ་ཅན་དང་། འཕྲོག་མ་བུ་ལྔ་བརྒྱའི་གཡོག་དུ་མ་ཅན་དང་། འཇིག་རྟེན་གྱི་མ་བདུན་དང་། སྲིན་མོ་ཆེན་མོ་བདུན་དང་། དྲང་སྲོང་གི་མཆོག་ཆེན་པོ་བདུན་དང་།
བར་སྣང་ལ་རྒྱུ་བའི་རྒྱུ་སྐར་དང་། གཟའ་ཐམས་ཅད་ཀྱི་ལྷ་རྣམས་དང་། ཕྱོགས་ཀྱི་ལྷ་རྣམས་དང་། ཕྱོགས་མཚམས་ཀྱི་ལྷ་རྣམས་དང་། སའི་ལྷ་དང་། དབྱངས་ཅན་དང་། འབྱུང་པོ་རྣམས་དང་། བགེགས་རྣམས་དང་། ལོག་འདྲེན་རྣམས་དང་། ཡི་དགས་རྣམས་དང་། འབྱུང་པོ་རྫུ་འཕྲུལ་ཆེན་པོ་རྣམས་དང་། རིའི་རྒྱལ་པོ་ཐམས་ཅད་དང་། འཇིག་རྟེན་སྐྱོང་བ་ཆུ་ལྷ་གཡོག་རྒྱ་མཚོའི་ལྷ་ཐམས་ཅད་དང་བཅས་པ་དང་། འཕགས་སྐྱེས་པོ་དང་། མིག་མི་བཟད་དང་། ལག་ན་བེ་ཅོན་དང་། བདེན་བྲལ་དང་། མེའི་ལྷ་དང་། རླུང་གི་ལྷ་ཆེན་པོ་བདུན་དང་། དབང་བདག་ཆུང་མ་དང་བཅས་པ་གཡོག་བྱེ་བ་ཁྲག་ཁྲིག་འབུམ་ཕྲག་དུ་མ་ཅན་དང་། སྲེད་མེད་ཀྱི་བུ་གཡོག་དང་བཅས་པ་དང་། བྱིན་པ་པོ་དང་། ཕྲེང་བ་ཅན་དང་། ཟླ་བ་ཅན་དང་། ལྕགས་ཅན་དང་། ཚོགས་ཀྱི་བདག་པོ་ཆེན་པོ་དང་། སྤྲིན་ཏ་ལ་ལ་དང་། ལོག་འདྲེན་གྱི་དབང་པོ་བགེགས་ལོག་འདྲེན་གྱི་དབང་པོ་གཡོག་དུ་མ་ཅན་དང་། ཤིང་གསེབ་ཀྱི་ལྷ་དྲུག་ཅུ་དང་། སྲིང་མོ་བཞི་མིང་པོ་དང་བཅས་པ་དང་། རྡོ་རྗེའི་ལུ་གུ་རྒྱུད་དང་། རྡོ་རྗེའི་ཕོ་ཉ་མོ་དྲུག་ཅུ་རྩ་བཞི་དང་། རྡོ་རྗེའི་སྡེ་དང་། ལག་བཟང་དང་། གཙུག་གིས་འགྲོ་རྡོ་རྗེའི་རིས་ཀྱི་འཁོར་དུ་མ་དང་བཅས་པ་དང་། དེ་ལས་གཞན་པ་སངས་རྒྱས་དང་། ཆོས་དང་། དགེ་འདུན་ལ་མངོན་པར་དད་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། འབྱུང་པོ་དང་། ཡི་དགས་དང་། ཤ་ཟ་དང་། གྲིབ་གནོན་དང་། སྨྱོ་བྱེད་དང་། བརྗེད་བྱེད་དང་། སྐེམ་བྱེད་དང་། སྒྲུབ་པ་དང་། སྦྲུལ་འཛིན་བཅས་པ་དང་། གནོན་པོ་ཚད་མེད་གྲངས་མེད་དཔག་ཏུ་མེད་པ་དག་དང་། ལྷའི་བུ་ཉི་མ་དང་། ལྷའི་བུ་ཟླ་བ་དང་། ནུབ་ཀའི་ལྷ་དང་། ནང་བར་གྱི་ལྷ་དང་། དུས་ཀྱི་ལྷ་ཐམས་ཅད་དང་། སའི་ལྷ་དང་ཐབས་ཅིག་ཏུ་བཞུགས་ཏེ། བཅོམ་ལྡན་འདས་དེས་ཆོས་ཀྱི་འཁོར་ལོ་ནི་ཤིན་ཏུ་བསྐོར། སངས་རྒྱས་ཀྱི་མཛད་པ་ནི་ཤིན་ཏུ་ཡོངས་སུ་མཐར་ཕྱིན། བསོད་ནམས་དང་ཡེ་ཤེས་ཀྱི་ཚོགས་ནི་ཤིན་ཏུ་ཡོངས་སུ་
རྫོགས། ཐམས་ཅད་མཁྱེན་པ་ནི་ཤིན་ཏུ་ཡོངས་སུ་བཟུང་། བྱང་ཆུབ་ཆེན་པོའི་ཕྱིར་ཕ་རོལ་ཏུ་ཕྱིན་པ་དང་ས་ནི་བརྙེས། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པའི་སྐུ་ནི་རབ་ཏུ་འབར། ཡན་ལག་དང་ཉིང་ལག་ཐམས་ཅད་ནི་དཔེ་བྱད་བཟང་པོ་བརྒྱད་ཅུས་རྣམ་པར་སྤྲས། དབུའི་གཙུག་ནི་སེམས་ཅན་ཐམས་ཅད་ཀྱིས་བལྟར་མི་མཐོང་། བདུད་ཀྱི་ལས་ཐམས་ཅད་ལ་ནི་མཁས། སེམས་ཅན་ཐམས་ཅད་ཀྱི་སེམས་དང་སྤྱོད་པ་ནི་ཤེས། སྤྱན་རྣམ་པ་ལྔ་ནི་མངའ། རྣམ་པ་ཐམས་ཅད་ཀྱི་མཆོག་དང་ནི་ལྡན། ཐམས་ཅད་མཁྱེན་པའི་ཡེ་ཤེས་དང་ནི་ལྡན། སངས་རྒྱས་ཀྱི་ཆོས་ཐམས་ཅད་དང་ནི་ལྡན། བདུད་དང་ཕས་ཀྱི་རྒོལ་བའི་ཚོགས་ཐམས་ཅད་ནི་བཅོམ། གྲགས་པ་དང་། སྒྲ་དང་། ཚིགས་སུ་བཅད་པས་ནི་འཕགས། ཁྱུ་མཆོག་དང་། སེང་གེའི་སྒྲ་ནི་སྒྲོགས། མ་རིག་པའི་མུན་པ་ནི་ཀུན་ཏུ་བསལ། བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མེད་དཔག་ཏུ་མེད་པར་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྟོབས་དང་། སྨོན་ལམ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་དང་། བྱ་དཀའ་བའི་སྤྱོད་པ་ལས་ནི་ཕྱིར་མ་ལོག །སྐུ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་ཏེ། རབ་ཏུ་མཛེས་ཤིང་རྡོ་རྗེ་རིན་པོ་ཆེའི་པདྨའི་སྙིང་པོའི་སེང་གེའི་ཁྲི་ཆེན་པོ་རྡོ་རྗེ་རིན་པོ་ཆེ་དང་། མུ་ཏིག་དང་། དྲིལ་བུ་གཡེར་ཀའི་དྲ་བ་དུ་མ་སྒྲ་འབྱུང་བ། རྩ་བའི་དྲུང་ན་རྡོ་རྗེ་རིན་པོ་ཆེའི་སྟེགས་བུ་དུ་མ་ཤིན་ཏུ་བརྟན་པར་གནས་པ། རྡོ་རྗེ་རིན་པོ་ཆེའི་ཆུ་སྲིན་དུ་མའི་ཁ་ནས་བྱུང་བའི་མུ་ཏིག་དམར་པོའི་ཕྲེང་བ་བྲེས་པའི་ཕང་བཤམས་པ། རིན་པོ་ཆེ་དུ་མ་པདྨའི་སྙིང་པོ་ལ་ཆགས་པ་རིན་པོ་ཆེ་ཀེ་ཀེ་རུ་དང་། ཀེ་ཀེ་རུ་ཆེན་པོ་དང་། ཨན་ད་རྙིལ་དང་། ཨན་ད་རྙིལ་ཆེན་པོ་དང་། དུན་ལས་ཀྱི་འོད་ཟེར་ཆེན་པོ་འཚེར་བས་སྣང་བར་བྱས་ཏེ་ཀུན་ནས་མཛེས་པ། གདུགས་རྩ་བ་དང་བཅས་པ། རྡོ་རྗེ་རིན་པོ་ཆེའི་ཤར་བུ་དུ་མས་རྣམ་པར་བརྒྱན་པ། བྱེ་བ་ཁྲག་ཁྲིག་འབུམ་ཕྲག་དུ་མས་རྣམ་པར་བརྒྱན་པ། བྱེ་བ་ཁྲག་ཁྲིག་འབུམ་ཕྲག་དུ་མས་ཀུན་ནས་
བསྐྱབས་པ། དཔག་བསམ་གྱི་ཤིང་དུ་མས་རྒྱས་པར་མཛེས་པར་བྱས་པ། རྡོ་རྗེ་རིན་པོ་ཆེའི་ཁྲི་རི་རབ་ཙམ་ལ་བཞུགས་ཏེ། གསེར་གྱི་རི་བོའི་རྒྱལ་པོ་ལྟར་དཔལ་ནི་རབ་ཏུ་འབར། ས་ཕྱོགས་ནི་ཉི་མ་སྟོང་བས་ལྷག་པའི་འོད་ཀྱི་དཀྱིལ་འཁོར་གྱིས་རྣམ་པར་བརྒྱན། ཟླ་བ་ཉ་བ་ལྟར་འཇིག་རྟེན་ཐམས་ཅད་ལ་སྡུག་པར་ནི་སྣང་། དཔག་བསམ་གྱི་ཤིང་ལྗོན་པ་ཆེན་པོ་ལྟར། སངས་རྒྱས་ཀྱི་ཆོས་རྣམས་ནི་ཤིན་ཏུ་རྒྱས་ཤིང་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ།དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཡང་དག་པར་རབ་ཏུ་སྟོན་ཏོ། །དེ་ནས་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུ་ནས་འོད་ཟེར་གྱི་དྲ་བ་སངས་རྒྱས་ཐམས་ཅད་ཀྱི་ཞིང་ཀུན་ཏུ་སྟོན་པ་ཞེས་བྱ་བ་བཀྱེ་སྟེ། འོད་ཟེར་གྱི་དྲ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བས་ཁྱབ་པར་བྱས་པར་གྱུར་ཏོ། །སངས་རྒྱས་ཀྱི་ཞིང་གང་དག་ན་སངས་རྒྱས་བཅོམ་ལྡན་འདས་དག་སེང་གེའི་ཁྲི་བཀོད་པ་དུ་མའི་ཁང་པ་བརྩེགས་པའི་གཞལ་མེད་ཁང་ན་ཉན་ཐོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་ཐམས་ཅད་དང་ཐབས་ཅིག་ཏུ་ཆོས་སྟོན་པའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དང་མཉམ་པ་དེ་དག་ཐམས་ཅད་ཀྱང་སྣང་བ་དེས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་འཁོར་ཕལ་པོ་ཆེ་ལ་བཀའ་སྩལ་པ། སེམས་ཅན་ཀུན་ལ་སྙིང་བརྩེའི་ཕྱིར། །ཉེས་པར་བྱས་དང་གནོད་པ་ཀུན། །རབ་འཇོམས་སོ་སོར་འབྲང་བ་ཡི། །གཟུངས་འདི་རབ་ཏུ་བཤད་པར་བྱ། །འདི་ནི་ཐོས་པ་ཙམ་གྱིས་ཀྱང་། །སྡིག་པ་ཀུན་ནི་ཟད་པར་འགྱུར། །སེམས་ཅན་ཀུན་ལ་བདེ་བ་སྦྱིན། །ནད་དོ་ཅོག་ལས་གྲོལ་བར་བྱེད། །སེམས་ཅན་ཀུན་ལ་སྙིང་བརྩེ་བས། །ལུས་ཅན་ངན་འགྲོར་འགྲོ་བ་རྣམས། །
དེ་དག་ཐམས་ཅད་བསྐྱབ་པའི་ཕྱིར། །འཇིག་རྟེན་དག་གི་མགོན་པོས་གསུངས། །འདི་ཡིས་བསྲུང་བ་བྱས་ན་ནི། །ལྷ་མ་ཡིན་གྱི་གནས་སུ་འཇུག །དེ་བཞིན་ལྕང་ལོ་ཅན་དང་ནི། །སྲིན་པོའི་གནས་ཀྱི་སར་ཡང་འགྲོ། །འབྱུང་པོ་ཀླུ་དང་ཤ་ཟ་རྣམས། །མི་བཟད་འཇིགས་པའི་གཡུལ་འགྱེད་པར། །འབྱུང་པོ་ཚོགས་རྣམས་ཐམས་ཅད་དང་། །དགྲ་བོ་ཅོག་གིས་མི་ཚུགས་སོ། །མིང་ཙམ་བཟུང་སྟེ་བརྗོད་བྱས་ཀྱང་། །སྐེམ་བྱེད་སྨྱོ་བྱེད་བརྗེད་བྱེད་དང་། །མཁའ་འགྲོ་མ་དང་ཤ་ཟ་དང་། །གདོན་རྣམས་རབ་ཏུ་བརླག་པར་འགྱུར། ། སོ་སོར་འབྲང་བའི་གཟི་བརྗིད་ཀྱིས། །གཟི་ཆེན་མདངས་རྣམས་ཟ་བ་དང་། །མི་ཡི་སྐྱེ་དགུ་རྣམས་འཚེ་བ། །དེ་དག་ཐམས་ཅད་རེངས་བྱེད་འགྱུར། །བྱད་སྟེམས་མི་བཟད་གང་ཡིན་དང་། །ཕ་རོལ་དམག་ཚོགས་ཕུང་བར་བྱེད། །སྔགས་ཀྱི་ལས་ཀྱིས་གནོད་མི་འགྱུར། །རྩ་བའི་ལས་ལས་རྣམ་པར་གྲོལ། །དུག་དང་དུག་སྦྱར་མེས་མི་ཚུགས། །མཚོན་དང་ཆུས་ཀྱང་ཚུགས་མི་འགྱུར། །ལྕེ་འབབ་གློག་གིས་མི་ཚུགས་ཏེ། །དུས་ཀྱི་རླུང་གིས་གནོད་མི་འགྱུར། །རིག་པའི་རྒྱལ་མོའི་གཟི་བརྗིད་ཀྱིས། །དགྲ་ཀུན་རབ་ཏུ་འཇོམས་པར་འགྱུར། །དེ་ཡིས་དོན་རྣམས་ཐམས་ཅད་འགྲུབ། །རྟག་ཏུ་རྒྱལ་བ་ཐོབ་པར་འགྱུར། །གང་གིས་རྟག་ཏུ་མགུལ་པའམ། །ལག་པར་རིག་པ་བཏགས་ན་ནི། །དེ་ཡི་དགོས་པ་ཡོད་དོ་ཅོག །འགྲུབ་འགྱུར་འདི་ལ་ཐེ་ཙོམ་མེད། །བྱང་ཆུབ་སེམས་དཔའ་ཆེན་པོ་དང་། །སངས་རྒྱས་རྣམས་དང་རང་འདྲེན་དང་། །དེ་བཞིན་ཀླུ་ཡི་རྒྱལ་པོ་དང་། །ལྷ་དབང་རྣམས་ནི་རྟག་ཏུ་བསྲུང་། །སོ་སོར་འབྲང་བའི་གཟུངས་འཛིན་ལ། །ཉན་ཐོས་སངས་རྒྱས་ཐམས་ཅད་དང་། །རིག་པའི་ལྷ་མོ་རྫུ་འཕྲུལ་ཆེ། །རྟག་ཏུ་སྲུང་བ་བྱེད་པར་འགྱུར། ། ལག་ན་རྡོ་རྗེ་གནོད་སྦྱིན་དབང་། །དེ་བཞིན་རྒྱལ་པོ་བཞི་རྣམས་ཀྱང་། །དེ་ལ་ཉིན་དང་མཚན་རྣམས་སུ། །སྲུང་བར་བྱེད་དེ་ཐེ་ཙོམ་མེད། །བརྒྱ་བྱིན་ལྷ་དང་བཅས་པ་དང་། །ཚངས་པ་ཁྱབ་འཇུག་དབང་ཆེན་དང་། །དགའ་བའི་དབང་པོ་ནག་པོ་ཆེ། །སྨིན་དྲུག་བུ་དང་ཚོགས་ཀྱི་དབང་། །
མ་མོའི་ཚོགས་རྣམས་ཐམས་ཅད་དང་། །དེ་བཞིན་བདུད་རིས་གཞན་རྣམས་དང་། །དྲང་སྲོང་གཟི་བརྗིད་ཆེ་རྣམས་དང་། །རྫུ་འཕྲུལ་ཆེན་པོའི་ལྷ་རྣམས་དང་། །དེ་ཀུན་སོ་སོར་འབྲང་བ་ཡི། །གཟུངས་འཛིན་དེ་ལ་སྲུང་བར་བྱེད། །སངས་རྒྱས་བདག་ཉིད་ཆེ་རྣམས་དང་། །རིག་པའི་ལྷ་མོ་སྟོབས་ཆེན་དང་། །བདག་གི་མ་དང་ཁྲོ་གཉེར་དང་། །ལྷ་མོ་སྒྲོལ་མ་ལྕགས་ཀྱུ་དང་། །རྡོ་རྗེ་ལུ་གུ་རྒྱུད་དང་དཀར། །དེ་བཞིན་དཀར་མོ་ཆེན་མོ་དང་། །ནག་མོ་ཆེ་དང་ཕོ་ཉ་དང་། །དེ་བཞིན་རྡོ་རྗེ་ཕོ་ཉ་གཞན། །ཞགས་པ་བཟང་དང་རྡོ་རྗེ་ཞགས། །ལག་ན་རྡོ་རྗེ་སྟོབས་པོ་ཆེ། །རིག་པ་ལྷ་མོ་རྡོ་རྗེ་ཕྲེང་། །བདུད་རྩི་ཐབ་སྦྱོར་བྱེད་པ་དང་། །གཞན་གྱིས་མི་ཐུབ་ལྷ་མོ་ཆེ། །རྣ་བ་ནག་མོ་སྟོབས་ཆེན་མོ། །དཔལ་ཡོན་ལྡན་པ་སྐལ་ཆེན་དང་། །རྣ་ཆ་གདུབ་ཀོར་པདྨ་འདྲ། །མེ་ཏོག་སོ་ཅན་ནོར་བུ་གཙུག །སྐྲ་མདོག་མཛེས་དང་ཁམ་པ་མོ། །ལྷ་མོ་གཟི་བརྗིད་ཆེན་མོ་དང་། །དཔལ་ཡོན་ལྡན་པ་གློག་ཕྲེང་ཅན། །སྲིན་མོ་རལ་པ་གཅིག་པ་དང་། །སངས་རྒྱས་བསྲུངས་ཞེས་བྱ་བ་དང་། །སྐལ་བ་ཆེན་པོ་མི་ཐོད་ཅན། །ལང་ཀའི་བདག་པོ་དཔལ་ཡོན་ཅན། ། གཞན་ཡང་ལྷ་མོ་མང་པོ་རྣམས། །སེམས་ཅན་རྗེས་སུ་འཛིན་བྱེད་དག །རིག་པ་གང་གི་ལག་ན་གནས། །དེ་ལ་སྲུང་བ་བྱེད་པར་འགྱུར། །འཕྲོག་མ་དང་ནི་ལྔས་རྩེན་དང་། །དུང་ཅན་དང་ནི་སོ་བརྩེགས་མ། །དཔལ་གྱི་ལྷ་མོ་དབྱངས་ཅན་ཡང་། །དེ་ཡི་རྗེས་འགྲོ་རྟག་ཏུ་བསྲུང་། །སོ་སོར་འབྲང་བ་ཆེན་མོ་འདི། །བུད་མེད་གང་ཞིག་རྟག་འཆང་ན། །དེ་ཡི་ཐམས་ཅད་འགྲུབ་པར་འགྱུར། །རྟག་པར་མངལ་ན་བུ་ཕོ་ཆགས། །མངལ་རྣམས་ན་ཡང་བདེ་བར་སྐྱེ། །སྦྲུམ་མ་དག་ཀྱང་བདེ་བར་འགྱུར། །ནད་དང་སྡིག་པ་ཐམས་ཅད་ཀྱང་། ། འཇིག་པར་འགྱུར་ཏེ་ཐེ་ཙོམ་མེད། །བསོད་ནམས་ལྡན་ཞིང་སྟོབས་དང་ལྡན། །ནོར་དང་འབྲུ་ཡང་རྟག་ཏུ་འཕེལ། །ཚིག་ཀྱང་གཟུང་དུ་འོས་པ་དང་། །མཆོད་པའི་འོས་སུ་འགྱུར་བ་ཡིན། །བུད་མེད་དང་ནི་སྐྱེས་པའང་རུང་། །གཙང་མ་གང་ཞིག་འཆང་བསྲེལ་ན། །དེ་ནི་སེམས་
ཅན་ཐམས་ཅད་དག །ཐར་བར་བྱ་ཕྱིར་བརྩོན་པར་འགྱུར། །རྟག་ཏུ་བདེ་བར་འགྱུར་བ་ཡིན། །ནད་དོ་ཅོག་ཀྱང་རྣམ་པར་སྤངས། །སླས་དང་སྐྱེ་བོ་མང་བཅས་པའི། །རྒྱལ་པོའང་དེ་ཡི་དབང་དུ་འགྱུར། །ཕུན་སུམ་ཚོགས་པ་རྟག་ཏུ་འབར། །བསོད་ནམས་ཕུང་པོ་རྣམ་པར་འཕེལ། །དེ་ཡི་བསམ་པ་ཐམས་ཅད་འགྲུབ། །དཀྱིལ་འཁོར་ཀུན་ཏུ་ཞུགས་པ་ཡིན། །རྒྱལ་བ་རྣམས་ཀྱི་བཀའ་བཞིན་དུ། །དེ་ནི་ཀུན་ཏུ་དམ་ཚིག་ཤེས། །རྨི་ལམ་ངན་པ་རྨི་མི་འགྱུར། །སྡིག་པ་ཐམས་ཅད་འཕྲོག་པའི་མཆོག །སྡིག་པ་རྣམས་དང་དེ་བཞིན་དུ། ། དགྲ་ཡང་རབ་ཏུ་ཕུང་བར་བྱེད། །གཟའ་ཀུན་རྣམ་པར་གཞིག་པའི་ཕྱིར། །ཡེ་ཤེས་དབང་ཕྱུག་ཆེན་པོས་གསུངས། །འདོད་པ་ཐམས་ཅད་སྦྱིན་པར་བྱེད། །དེ་ཕྱིར་རྟག་ཏུ་བཅང་བར་བྱ། །འབྱུང་པོའི་ཚོགས་རྣམས་ང་ལ་ཉོན། །ད་ནི་རབ་ཏུ་འདི་བརྗོད་དོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། སངས་རྒྱས་དང་། ཆོས་དང་། དགེ་འདུན་ལ་ཕྱག་འཚལ་ལོ། །ཏདྱ་ཐཱ། ༀ་བི་པུ་ལ་བི་པུ་ལ་གརྦྷེ། བི་པུ་ལ་བི་མ་ལེ། བི་པུ་ལ་གརྦྷེ། བི་མ་ལེ། ཛ་ཡ་གརྦྷེ། བཛྲ་ཛྭཱ་ལཱ་གརྦྷེ། ག་ཏི་ག་ཧ་ནེ། ག་ག་ན་བི་ཤོ་དྷ་ནེ། སརྦ་པཱ་པ་བི་ཤོ་དྷ་ནེ། ༀ་གུ་ཎ་པ་ཏི། ག་ག་ན། པི་ཙཱ་རི་ཎི། ག་ག་རི་ཎི། གི་གི་གི་རི། གི་རི་ཎི་གི་རི་ཎི། ག་མ་རི། ག་མ་རི། ག་ཧ་ག་ཧ། གརྒ་རི་གརྒ་རི། ག་ག་རི། ག་ག་རི། གཾ་བྷ་རི། གཾ་བྷ་རི། ག་བྷི་ག་བྷི། ག་ཧི་ག་ཧི། ག་མ་ནི། ག་མ་ནི། ག་རི་ག་རི། གུ་བྷ་གུ་བྷ། གུ་ཧ་གུ་ཧ། གུ་རུ་གུ་རུ་གུ་རུ་ཎི། ཙ་ལེ་གུ་ཧ་ཎི། གུ་ཧ་ཎི། གུ་རུ་ཎི། ཙུ་ལུ་ཙུ་ལུ། ཙ་ལེ་ཙ་ལེ། མུ་ཙེ་ལེ་མུ་ཙེ་ལེ། ཛ་ཡེ་བི་ཛ་ཡེ། སརྦ་བྷ་ཡ་བི་ག་ཏེ། སཏྭ་སརྦ་གརྦྷ་སཾ་རཀྵ་ཎི། སི་རི་སི་རི། བྷི་རི་བྷི་རི། མི་རི་མི་རི། མི་རི་མི་རི། གི་རི་གི་རི། གྷི་རི་གྷི་རི། གྷི་རི་གྷི་རི། ས་མནྟ་པརྵ་ཎི། བཅོམ་ལྡན་འདས་མ་སེམས་ཅན་འདྲེན་མ། ཀུན་ནས་འདྲེན་མ། དགྲ་ཐམས་ཅད་འཇོམས་པར་མཛད་མ། བདག་འཇིགས་པ་ཐམས་ཅད་དང་། གནོད་པ་ཐམས་ཅད་དང་། ནད་འགོ་བ་ཐམས་ཅད་དང་།
ནད་ཐམས་ཅད་ལས་བསྲུང་དུ་གསོལ། བསྲུང་དུ་གསོལ། ཙི་རི་ཙི་རི། བི་རི་བི་རི། དྷི་རི་དྷི་རི། བི་ག་ཏ། ཨཱ་བ་ར་ཎེ། བི་ཤོ་དྷ་ནེ། བི་བི་དྷ། ཨཱ་པ་ར་ཎ། བི་ནཱ་ཤ་ནི། མུ་རི་མུ་རི། མུ་ཙི་མུ་ཙི། མུ་ལི་མུ་ལི། ཙི་ལི་ཙི་ལི། ཀི་ལི་ཀི་ལི། མི་ལི་མི་ལི། ཀ་མ་ལེ། བི་མ་ལེ། ཛ་ཡེ་བི་ཛ་ཡེ། བི་ཛ་ཡཱ། བ་ཧེ་ཛ་ཡ་བ་ཏི། བི་ཤེ་ཥ་བ་ཏི། བཅོམ་ལྡན་འདས་མ་རིག་པ་ཆེན་པོའི་ཅོད་པན་དང་། ཕྲེང་བ་མངའ་བ་ཆ་བྱད་རྣམ་པ་སྣ་ཚོགས་མང་པོ་མངའ་བ། བཅོམ་ལྡན་འདས་མ་རིག་པའི་ལྷ་མོ་ཆེན་མོ། སྡིག་པ་ཐམས་ཅད་རྣམ་པར་སྦྱོང་བ། བདག་ལ་ཐམས་ཅད་དུ་ཀུན་ནས་བསྲུང་དུ་གསོལ། བསྲུང་དུ་གསོལ། ཧུ་རུ་ཧུ་རུ། མུ་རུ་མུ་རུ། རཀྵ་རཀྵ་མ་མ། མགོན་མ་མཆིས་པ། སྐྱབས་མ་མཆིས་པ། དཔུང་གཉེན་མ་མཆིས་པ། བདག་ལ་བསྲུང་དུ་གསོལ། བསྲུང་དུ་གསོལ། བདག་སྡུག་བསྔལ་ཐམས་ཅད་ལས་ཐར་བར་མཛད་དུ་གསོལ། ཙཎྜེ་ཙཎྜེ། ཙཎྜེ་ཙཎྜེ། ཙཎྜེ་ཎི། ཙཎྜེ་ཎི། བེ་ག་བ་ཏི། སརྦ་དུཥྚ་ནི་བཱ་ར་ཎི། བི་ཛ་ཡ། བཱ་ཧི་ནི། ཧུ་རུ་ཧུ་རུ། མུ་རུ་མུ་རུ། ཙུ་རུ་ཙུ་རུ། ཏུ་རུ་ཏུ་རུ། ཨཱ་ཡུཿཔཱ་ལི་ནི། སུ་ར་བ་ར་པྲ་མ་ཐ་ནི། སརྦ་དེ་བ་ག་ཎ་པཱུ་ཛི་ཏེ། ཙི་རི་ཙི་རི། དྷི་རི་དྷི་རི། ས་མནྟ་ཨ་བ་ལོ་ཀི་ཏེ། པྲ་བྷེ་པྲ་བྷེ། སུ་པྲ་བྷེ། སུ་པྲ་བྷ། བི་ཤུད་དྷེ། སརྦ་པཱ་པ་བི་ཤུདྡྷེ། སརྦ་པཱ་པ་བི་ཤོ་དྷ་ནེ། དྷུ་རུ་དྷུ་རུ། དྷ་ར་ནི། དྷ་རེ་དྷ་རེ། དྷ་ར། སུ་མུ་སུ་མུ། སུ་མུ་སུ་མུ། མུ་སུ་མུ་སུ། རུ་རུ་ཙ་ལེ། ཙཱ་ལ་ཡ། དཔལ་གྱི་སྐུ་མངའ་བ། བདག་ལ་གནོད་པར་སེམས་པ་ལས་བསྐྱབ་ཏུ་གསོལ། བདག་གི་བསམ་པ་རྫོགས་པར་མཛད་དུ་གསོལ། ཛ་ཡ་ཀ་མ་ལེ། ཀྵི་ནི་ཀྵི་ནི། པ་ར་ད། ཨཾ་ཀུ་ཤེ །ༀ་པདྨ་བི་ཤུད་དྷེ། ཤོ་དྷ་ཡ་ཤོ་དྷ་ཡ། ཤུད་དྷེ་ཤུད་དྷེ། བྷ་ར་བྷ་ར། བྷི་རི་བྷི་རི། བྷུ་རུ་བྷུ་རུ། མངྒ་ལ་བི་ཤུད་དྷེ། པ་བི་ཏྲ་མུ་ཁི། ཁཌྒེ་ནི་ཁཌྒེ་ནི། ཁ་ར་ཁ་ར། ཛྭ་ལི་ཏ། ཤི་ཁ་རེ། ས་མནྟ་ཨ་བ་ལོ་ཀི་ཏ་པྲ་བྷེ། སུ་པྲ་བྷ་བི་ཤུད་དྷེ། ས་མནྟ་པྲ་སཱ་རི་ཏ། ཨཱ་བཱ་བྷ་སི་ཏ་ཤུད་དྷ། ཛྭ་ལ་ཛྭ་ལ། སརྦ་དྷེ་བ་ག་ཎ། གྲ་ཧ་ན་ཀྵ་ཏྲ། ས་མ་ཨཱ་ཀརྵ་ནི། ས་ཏྱ་པྲ་ཏི། ༀ་ཧྲཱི་ཏྲཾ་ཏ་ར་ཏ་ར། ཏཱ་ར་ཡ་ཏཱ་ར་ཡ།
གླང་པོ་ཆེའི་ལྟ་སྟངས་ཀྱིས་གཟིགས་མ། བདག་མིའི་གནོད་པ་ལས་བསྒྲལ་དུ་གསོལ། ལ་ཧུ་ལ་ཧུ། ཧུ་ལུ་ཧུ་ལུ། ཧུ་དུ་ཧུ་དུ། ཏུ་རུ་ཏུ་རུ། ཀི་ཎི་ཀི་ཎི། ཀྵི་ཎི་ཀྵི་ཎི། ཧུ་ཎི་ཧུ་ཎི། སརྦ་གྲ་ཧ་བྷ་ཀྵ་ཎི། པིཾ་ག་ལི། པིཾ་ག་ལི། མུ་ཙུ་མུ་ཙུ། ཙུ་མུ་ཙུ་མུ། སུ་བི་ཙ་རེ། ཏ་ར་ཏ་ར། བཅོམ་ལྡན་འདས་མ་གླང་པོ་ཆེའི་ལྟ་སྟངས་ཀྱིས་གཟིགས་མ། ཐམས་ཅད་དུ་ཀུན་ནས་ཕྱོགས་ཐམས་ཅད་བཅིང་བ་དང་། རྡོ་རྗེའི་ར་བ་དང་། རྡོ་རྗེའི་ཞགས་པའི་བཅིང་བས་བདག་འཇིགས་པ་ཆེན་པོ་བརྒྱད་ལས་བསྒྲལ་དུ་གསོལ། བཛྲ་ཛྭཱ་ལཱ་བི་ཤུད་དྷེ། བྷུ་རི་བྷུ་རི། དྷ་ར་དྷ་ར། ཏི་རི་ཏི་རི། ཏུ་རུ་ཏུ་རུ། བྷ་ག་བ་ཏི། གརྦྷ་བི་ཤུད་དྷེ། གརྦྷ་སཾ་ཤོ་དྷ་ནི། ཀུ་ཀྵི་སམ་པཱུ་ར་ཎི། ཛྭ་ལ་ཛྭ་ལ། ཙ་ལ་ཙ་ལ། ཛྭཱ་ལི་ནི། ལྷའི་ཆུས་ཀུན་ཏུ་ཆར་དབབ་ཏུ་གསོལ། ཨ་མྲྀ་ཏ་བརྵ་ཎི་དེ་བ་ཏ། ཨ་བ་ཏཱ་ར་ཎི། བདེ་བར་གཤེགས་པའི་གསུང་རབ་བདུད་རྩི་མཆོག་གི་སྐུ་དང་ལྡན་པ་བདག་ལ་དབང་བསྐུར་དུ་གསོལ། འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་དང་། རྨི་ལམ་ངན་པ་དང་། ལྟས་ངན་པ་དང་། བཀྲ་མི་ཤིས་པ་དང་། སྡིག་པ་ཐམས་ཅད་རྣམ་པར་སྦྱོང་བ། གནོད་སྦྱིན་དང་། སྲིན་པོ་དང་། ཀླུ་ཐམས་ཅད་འཇོམས་པ། གནོད་པས་འཇིགས་སྐྲག་པ། བདག་འཇིགས་པ་ཐམས་ཅད་དང་། གནོད་པ་ཐམས་ཅད་དང་། ནད་འགོ་བ་ཐམས་ཅད་དང་། ནད་ཐམས་ཅད་ལས་ཐམས་ཅད་དུ་རྟག་པར་བསྲུང་དུ་གསོལ། བསྲུང་དུ་གསོལ། བ་ལ་བ་ལ། བ་ལ་བ་ཏི། ཛ་ཡ་ཛ་ཡ། བི་ཛ་ཡ། བི་ཛ་ཡ། ཐམས་ཅད་དུ་དུས་ཀུན་ཏུ་བདག་རྒྱལ་བར་མཛད་དུ་གསོལ། བདག་ལ་རིག་པ་ཆེན་མོ་འདི་གྲུབ་པར་མཛད་དུ་གསོལ། དཀྱིལ་འཁོར་ཆེན་པོ་བསྒྲུབ་ཏུ་གསོལ། གསང་སྔགས་རྣམས་བསྒྲུབ་ཏུ་གསོལ། བགེགས་རྣམས་གཞོམ་དུ་གསོལ། ཛ་ཡ་ཛ་ཡ། སིད་དྷི་སིད་དྷི། སིདྡྷྱ་སིདྡྷྱ། བུདྡྷྱ་བུདྡྷྱ། སཱུ་ཙ་ཡ་སཱུ་ཙ་ཡ། པཱུ་ར་ཡ་པཱུ་ར་ཡ། པཱུ་ར་ཎི་པཱུ་ར་ཎི། བདག་གི་བསམ་པ་རྫོགས་པར་མཛད་དུ་གསོལ། རིག་པ་ཐམས་ཅད་ལས་བྱུང་བའི་སྐུ་ཅན། རྒྱལ་བ་ལྷག་པར་རྒྱལ་བ་ཅན། དེ་བཞིན་
གཤེགས་པའི་སྙིང་པོ་རྣམ་པར་དག་པ་བཅོམ་ལྡན་འདས་མ་བཞུགས་སུ་གསོལ། བཞུགས་སུ་གསོལ། དམ་ཚིག་བསྐྱང་དུ་གསོལ། འཇིགས་པ་མི་བཟད་པ་ཆེན་པོ་བརྒྱད་ལས་བདག་ལ་གཟིགས་སུ་གསོལ། ས་ར་ས་ར། པྲ་ས་ར་པྲ་ས་ར། སརྦ་ཨཱ་བ་ར་ཎ་བི་ཤོ་དྷ་ནི། ས་མནྟ་ཨཱ་ཀ་ར་མཎྜ་ལ་བི་ཤུད་དྷེ། བི་ག་ཏེ་བི་ག་ཏི། བི་ག་ཏ་མ་ལེ། སརྦ་མ་ལ་བི་ཤོ་དྷ་ནི། ཀྵི་ཎི་ཀྵི་ཎི། སརྦ་པཱ་པ་བི་ཤུད་དྷེ། མ་ལ་བི་ག་ཏི། ཛ་ཡ་བ་ཏི། ཏེ་ཛོ་ཏེ་ཛོ་བ་ཏི། བཛྲ་བཛྲ་བ་ཏི་སྭཱ་ཧཱ། འཇིག་རྟེན་གསུམ་དུ་བྱིན་གྱིས་བརླབས་པ་ལ་སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱིས་སྤྱི་བོ་ནས་དབང་བསྐུར་བ་ལ་སྭཱ་ཧཱ། བྱང་ཆུབ་སེམས་དཔའ་ཐམས་ཅད་ཀྱིས་དབང་བསྐུར་བ་ལ་སྭཱ་ཧཱ། ལྷ་ཐམས་ཅད་ཀྱིས་དབང་བསྐུར་བ་ལ་སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱི་སྙིང་པོས་བྱིན་གྱིས་བརླབས་པ་ལ་སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱིས་དམ་ཚིག་གྲུབ་པ་ལ་སྭཱ་ཧཱ། དབང་པོ་དང་ལྡན་པ་དབང་པོས་རྣམ་པར་བལྟས་པ་ལ་སྭཱ་ཧཱ། ཚངས་པ་དང་ཚངས་པ་ལ་གནས་པ་ལ་སྭཱ་ཧཱ། ཁྱབ་འཇུག་གིས་ཕྱག་བྱས་པ་ལ་སྭཱ་ཧཱ། དབང་ཕྱུག་ཆེན་པོས་ཕྱག་འཚལ་ཞིང་མཆོད་པ་ལ་སྭཱ་ཧཱ། རྡོ་རྗེ་འཛིན་ལག་ན་རྡོ་རྗེའི་སྟོབས་དང་བརྩོན་འགྲུས་ཀྱིས་བྱིན་གྱིས་བརླབས་པ་ལ་སྭཱ་ཧཱ། ཡུལ་འཁོར་སྲུང་ལ་སྭཱ་ཧཱ། འཕགས་སྐྱེས་པོ་ལ་སྭཱ་ཧཱ། མིག་མི་བཟང་ལ་སྭཱ་ཧཱ། རྣམ་ཐོས་ཀྱི་བུ་ལ་སྭཱ་ཧཱ། རྒྱལ་པོ་ཆེན་པོ་བཞིས་ཕྱག་བྱས་པ་ལ་སྭཱ་ཧཱ། གཤིན་རྗེ་ལ་སྭཱ་ཧཱ། གཤིན་རྗེས་མཆོད་ཅིང་ཕྱག་བྱས་པ་ལ་སྭཱ་ཧཱ། ཆུ་ལྷ་ལ་སྭཱ་ཧཱ། རླུང་ལྷ་ལ་སྭཱ་ཧཱ། རླུང་ལྷ་ཆེན་པོ་ལ་སྭཱ་ཧཱ། མེ་ལྷ་ལ་སྭཱ་ཧཱ། ཀླུས་རྣམ་པར་བལྟས་པ་ལ་སྭཱ་ཧཱ། ལྷའི་ཚོགས་རྣམས་ལ་སྭཱ་ཧཱ། ཀླུའི་ཚོགས་རྣམས་ལ་སྭཱ་ཧཱ། གནོད་སྦྱིན་གྱི་ཚོགས་རྣམས་ལ་སྭཱ་ཧཱ། གཤིན་རྗེའི་ཚོགས་རྣམས་ལ་སྭཱ་ཧཱ། སྲིན་པོའི་ཚོགས་རྣམས་ལ་སྭཱ་ཧཱ། དྲི་ཟའི་ཚོགས་རྣམས་ལ་སྭཱ་ཧཱ། ལྷ་མ་ཡིན་གྱི་ཚོགས་རྣམས་ལ་སྭཱ་ཧཱ། ནམ་མཁའ་ལྡིང་གི་ཚོགས་རྣམས་ལ་སྭཱ་ཧཱ། མི་འམ་ཅིའི་ཚོགས་རྣམས་ལ་སྭཱ་ཧཱ། ལྟོ་འཕྱེ་ཆེན་པོའི་ཚོགས་རྣམས་ལ་སྭཱ་ཧཱ། མི་རྣམས་ལ་སྭཱ་ཧཱ།
མི་མ་ཡིན་པ་རྣམས་ལ་སྭཱ་ཧཱ། གདོན་ཐམས་ཅད་ལ་སྭཱ་ཧཱ། འབྱུང་པོ་ཐམས་ཅད་ལ་སྭཱ་ཧཱ། ཡི་དགས་ལ་སྭཱ་ཧཱ། ཤ་ཟ་ལ་སྭཱ་ཧཱ། བརྗེད་བྱེད་ལ་སྭཱ་ཧཱ། གནོད་བྱེད་ལ་སྭཱ་ཧཱ། གྲུལ་བུམ་ལ་སྭཱ་ཧཱ། ༀ་དྷུ་རུ་དྷུ་རུ་སྭཱ་ཧཱ།ཏུ་རུ་ཏུ་རུ་སྭཱ་ཧཱ། མུ་རུ་མུ་རུ་སྭཱ་ཧཱ། ཧ་ན་ཧ་ན་སརྦ་ཤ་ཏྲཱུཾ་སྭཱ་ཧཱ། ད་ཧ་ད་ཧ་སརྦ་དུཥྚཱ་ནཱཾ་སྭཱ་ཧཱ། པ་ཙ་པ་ཙ་སརྦ་པྲ་ཏྱརྠི་ཀཱ་པྲ་ཏྱེ་མི་ཧྲཱ་ནཱཾ་སྭཱ་ཧཱ། གང་དག་བདག་ལ་མི་ཕན་པར་འདོད་པ་དེ་དག་ཐམས་ཅད་ཀྱི་ལུས་ཛྭ་ལ་ཡ་སརྦ་དུཥྚཾ་ཙི་ཏྲཱ་ནཱཾ་སྭཱ་ཧཱ། འབར་བ་ལ་སྭཱ་ཧཱ། རབ་ཏུ་འབར་བ་ལ་སྭཱ་ཧཱ། རྡོ་རྗེ་འབར་བ་ལ་སྭཱ་ཧཱ། མེ་ལྕེ་འབར་བ་ལ་སྭཱ་ཧཱ། ཀུན་ཏུ་འབར་བ་ལ་སྭཱ་ཧཱ། ནོར་བུ་བཟང་ལ་སྭཱ་ཧཱ། གང་བ་བཟང་པོ་ལ་སྭཱ་ཧཱ། ནག་པོ་ཆེན་པོ་ལ་སྭཱ་ཧཱ། མ་མོའི་ཚོགས་ལ་སྭཱ་ཧཱ། གནོད་སྦྱིན་མོ་རྣམས་ལ་སྭཱ་ཧཱ། སྲིན་མོ་རྣམས་ལ་སྭཱ་ཧཱ། ནམ་མཁའི་མ་མོ་རྣམས་ལ་སྭཱ་ཧཱ། རྒྱ་མཚོ་ན་གནས་པ་རྣམས་ལ་སྭཱ་ཧཱ། མཚན་མོ་རྒྱུ་བ་རྣམས་ལ་སྭཱ་ཧཱ། ཉིན་མོ་རྒྱུ་བ་རྣམས་ལ་སྭཱ་ཧཱ། དུས་གསུམ་དུ་རྒྱུ་བ་རྣམས་ལ་སྭཱ་ཧཱ། དུས་སུ་རྒྱུ་བ་རྣམས་ལ་སྭཱ་ཧཱ། དུས་མ་ཡིན་པར་རྒྱུ་བ་རྣམས་ལ་སྭཱ་ཧཱ། ཟས་སུ་མངལ་ཟ་བ་རྣམས་ལ་སྭཱ་ཧཱ། མངལ་འཛིན་པ་ལ་སྭཱ་ཧཱ། ཧུ་ལུ་ཧུ་ལུ་སྭཱ་ཧཱ། ༀ་སྭཱ་ཧཱ། སྭཿསྭཱ་ཧཱ། བྷུཿསྭཱ་ཧཱ། བྷུ་བཿསྭཱ་ཧཱ། བྷུར་བྷཱུ་བཿསྭཱ་ཧཱ། ཙི་ཊི་ཙི་ཙི་ཊི་སྭཱ་ཧཱ། བི་ཊི་བ་ཊི་སྭཱ་ཧཱ། དྷཱ་ར་ཎི་སྭཱ་ཧཱ། དྷཱ་ར་ཎི་སྭཱ་ཧཱ། ཨགྣི་སྭཱ་ཧཱ། ཏེ་ཛོ་བ་ཡུ་སྭཱ་ཧཱ། ཙི་ལི་ཙི་ལི་སྭཱ་ཧཱ། མི་ལི་མི་ལི་སྭཱ་ཧཱ། སི་ལི་སི་ལི་སྭཱ་ཧཱ། བུདྡྷྱ་བུདྡྷྱ་སྭཱ་ཧཱ། སིདྡྷྱ་སིདྡྷྱ་སྭཱ་ཧཱ། མཎྜ་ལ་བན་དྷེ་སྭཱ་ཧཱ། སཱི་མཱ་བན་དྷེ་སྭཱ་ཧཱ། དྷ་ར་ཎི་བྷན་དྷེ་སྭཱ་ཧཱ། སརྦ་ཤ་ཏྲུཾ་ཎཱཾ་བྷཉྫ་ཡ་སྭཱ་ཧཱ། ཛམྦྷ་ཡ་ཛམྦྷ་ཡ་སྭཱ་ཧཱ། སྟམྦྷ་ཡ་སྟམྦྷ་ཡ་སྭཱ་ཧཱ། ཙྪིནྡ་ཙྪིནྡ་སྭཱ་ཧཱ། བྷིནྡ་བྷིནྡ་སྭཱ་ཧཱ། བྷཉྫ་བྷཉྫ་སྭཱ་ཧཱ། བནྡྷ་བནྡྷ་སྭཱ་ཧཱ། མོ་ཧ་ཡ་མོ་ཧ་ཡ་སྭཱ་ཧཱ། མ་ཎི་བི་ཤུད་དྷེ་སྭཱ་ཧཱ། སཱུརྱེ་སྭཱ་ཧཱ། སཱུཪྱ་བི་ཤུད་དྷེ་སྭཱ་ཧཱ། ཤོ་དྷ་ནི་སྭཱ་ཧཱ། བི་ཤོ་དྷ་ནི་སྭཱ་ཧཱ། ཙཎྜེ་ཙཎྜེ་པ་རི་པཱུ་ར་ཎ་ཙ་སྭཱ་ཧཱ། གྲ་ཧེ་བྷྱཿསྭཱ་ཧཱ། ནཀྵ་ཏྲེ་བྷྱཿསྭཱ་ཧཱ། ཤི་བི་བྷྱཿསྭཱ་ཧཱ། ཤཱནྟི་བྷྱཿསྭཱ་ཧཱ། པུཥྚི་བྷྱཿསྭཱ་ཧཱ། སྭ་སྟི་ཡ་ནེ་བྷྱཿསྭཱ་ཧཱ། གརྦྷ་དྷ་རེ་སྭཱ་ཧཱ། ཤི་བཾ་ཀ་རི་སྭཱ་ཧཱ། ཤཾ་ཀ་རི་སྭཱ་ཧཱ། ཤཱནྟིཾ་ཀ་རི་སྭཱ་ཧཱ། པུཥྚིཾ་ཀ་རི་སྭཱ་ཧཱ། བ་ལ་བརྡྷ་ནི་སྭཱ་ཧཱ། བ་ལ་བརྡྷི་ནི་ཀ་རི་
སྭཱ་ཧཱ། ཤྲཱི་ཀ་རི་སྭཱ་ཧཱ། ཤྲཱི་བརྡྷི་ནི་སྭཱ་ཧཱ། ཤྲཱི་ཛྭཱ་ལི་ནི་སྭཱ་ཧཱ། མུ་ཙི་སྭཱ་ཧཱ། ན་མུ་ཙི་སྭཱ་ཧཱ། མ་རུ་ཙི་སྭཱ་ཧཱ། བེ་ག་བ་ཏི་སྭཱ་ཧཱ། ༀ་བཅོམ་ལྡན་འདས་མ་དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་དྲི་མ་དང་བྲལ་བ། བདག་གི་སྡིག་པ་ཐམས་ཅད་ཞི་བར་མཛད་དུ་གསོལ། བདག་བདེ་ལེགས་སུ་གྱུར་ཅིག །ༀ་མུ་ནི་མུ་ནི། བི་མུ་ནི་བི་མུ་ནི། དྷ་རི་ཙ་ལ་ཙ་ལ་ནི། བྷ་ག་བ་ཏི། བྷ་ཡ་བི་ག་ཏེ། བྷ་ཡ་ཧ་རི་ཎི། བོ་དྷི་བོ་དྷི། བོ་དྷ་ཡ་བོ་དྷ་ཡ། བུད་དྷི་ལི་བུད་དྷི་ལི། ཙུམྦུ་ལི་ཙུམྦུ་ལི་སྭཱ་ཧཱ། སརྦ་ཏ་ཐཱ་ག་ཏ་ཧྲི་ད་ཡ་ཛུཥྚེ་སྭཱ་ཧཱ། ༀ་མུ་ནི་མུ་ནི་མུ་ནི་བ་རེ། དེ་བཞིན་གཤེགས་པ་ཐམས་ཅད་ཀྱི་རིག་པའི་དབང་བསྐུར་བ། རྡོ་རྗེའི་གོ་ཆ་ཆེན་པོའི་ཕྱག་རྒྱས་བཏབ་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། སརྦ་ཏ་ཐཱ་ག་ཏ་ཧྲྀ་ད་ཡ། ཨ་དྷིཥྛཱ་ན། ཨ་དྷི་ཏི་བཛྲེ་སྭཱ་ཧཱ། བྲམ་ཟེ་ཆེན་པོ་རིག་པའི་རྒྱལ་མོ་སོ་སོར་འབྲང་བ་ཆེན་མོ། ཀུན་ནས་མེ་ལྕེའི་ཕྲེང་བ་རྣམ་པར་དག་པས་རྒྱས་པ་ཡིད་བཞིན་གྱི་ནོར་བུ་ཕྱག་རྒྱ་དང་། སྙིང་པོ་གཞན་གྱིས་མི་ཐུབ་པའི་གཟུངས་འདི་རིགས་ཀྱི་བུ་འམ། རིགས་ཀྱི་བུ་མོས་ཐོས་མ་ཐག་ཏུ་སྡིག་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །བྲམ་ཟེ་ཆེན་པོ་རིག་པ་འདི་གང་གི་སྙིང་ལ་གནས་པར་གྱུར་པ་དེའི་ལུས་རྡོ་རྗེར་རིག་པར་བྱའོ། །དེའི་ལུས་ལ་མེས་མི་ཚུགས་སོ། །ཅི་མངོན་ཞེ་ན། གང་གི་ཚེ་གྲོང་ཁྱེར་ཆེན་པོ་སེར་སྐྱའི་གནས་ན། གཞོན་ནུ་སྒྲ་གཅན་ཟིན་བཟང་པོ་མངལ་དུ་ཞུགས་པ་དེའི་ཚེ་ཤཱཀྱའི་བུ་མོ་ས་འཚོ་མ་བདག་ཉིད་མེའི་ནང་དུ་མཆོངས་པ་དང་། དེར་པདྨ་དག་བྱུང་སྟེ། དེའི་ཚེ་གཞོན་ནུ་སྒྲ་གཅན་ཟིན་བཟང་པོ་མངལ་ན་གནས་བཞིན་དུ་རིག་པ་འདི་ཡིད་ལ་བྱས་སོ། །རིག་པ་འདི་རྗེས་སུ་དྲན་པ་ཙམ་གྱིས་མེ་དེ་སྐད་ཅིག་དེ་ཉིད་ལ་བསིལ་བར་གྱུར་ཏོ། །དེ་ནས་ཤཱཀྱའི་བུ་མོ་ས་འཚོ་མའི་ལུས་ལ་མེས་མ་རེག་གོ ། དེ་ཅིའི་ཕྱིར་ཞེ་ན། རིག་པ་འདི་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའོ། །བྲམ་ཟེ་ཆེན་པོ་རྒྱུ་དེས་ན་མེས་མི་ཚིག་གོ། །དུག་གིས་ཀྱང་སྲོག་དང་འབྲལ་བར་མི་ནུས་སོ། །དེ་ཅི་ལྟ་ཞེ་ན། བྲམ་ཟེ་ཆེན་པོ་གང་གི་ཚེ་གྲོང་ཁྱེར་ཆེན་པོ་བདེ་བར་ཕ་རོལ་ཏུ་
འགྲོ་བ་ཞེས་བྱ་བ་ན། ཚོང་དཔོན་མཛོད་སྟོབས་ཅན་གྱི་བུ་རིག་པ་སྨྲ་བར་གྱུར་ཏོ། །དེའི་རིག་པའི་སྟོབས་དེས་ཀླུའི་རྒྱལ་པོ་འཇོག་པོ་བཀུག་གོ། །བཀུག་ནས་ཀྱང་བག་མེད་པའི་དབང་གིས་མ་བཅིངས་པས་དེས་ཁྲོས་ནས་དེ་ལ་བཟུང་བ་དང་། དེ་ཚོར་བ་མི་བཟད་པ་མྱོང་ནས་ཇི་ལྟར་ཡང་བདག་ནི་སྲོག་དང་བྲལ་ལོ་སྙམ་དུ་ཤེས་སོ། །དེ་ནས་སྨྲ་བ་ཅན་མང་པོ་བོས་ཀྱང་འགའ་ཙམ་གྱིས་ཀྱང་དུག་ལས་གསོ་བར་མ་ནུས་སོ། །དེ་ནས་གྲོང་ཁྱེར་ཆེན་པོ་བདེ་བར་ཕ་རོལ་ཏུ་འགྲོ་བ་ན་དགེ་བསྙེན་མ་དྲི་མ་མེད་པར་དག་པ་ཞེས་བྱ་བ་སྙིང་རྗེ་ཆེན་པོ་དང་ལྡན་པ་ཞིག་གནས་པ་དེས་རིག་པའི་རྒྱལ་མོ་ཆེན་མོ་འདི་ཁ་ཏོན་དུ་ཤེས་སོ། །དེ་དེའི་གནས་སུ་སོང་སྟེ་ཕྱིན་པ་དང་། རིག་པ་ཆེན་མོ་འདི་བརྫོད་དོ། །དེས་དེ་ལ་ལན་ཅིག་བརྗོད་པ་ཙམ་གྱིས་དེ་དུག་མེད་པར་བྱས་ཤིང་དེ་དྲན་པ་རྙེད་པར་བྱས་ཏེ། སྡུག་བསྔལ་ཆེན་པོ་དེ་ལས་ཡོངས་སུ་ཐར་བར་བྱས་ནས་རིག་པ་ཆེན་མོའི་སྙིང་པོ་འདི་ཆོ་ག་ཅི་ལྟར་བཀའ་སྩལ་པ་བཞིན་དུ་ཚོང་དཔོན་གྱི་བུ་དེའི་སྙིང་ལ་གནས་པར་བྱས་སོ། །བྲམ་ཟེ་ཆེན་པོ་གཞན་ཡང་ཅི་ལྟར་ཡོངས་སུ་ཤེས་ཞེ་ན། རྒྱལ་པོ་ཚངས་པས་བྱིན་ཞེས་བྱ་བའི་གྲངས་སུ་ཆུད་པ་ཞིག་གྲོང་ཁྱེར་ཆེན་པོ་བ་རཱ་རཱ་ཎ་སཱི་ན་སྔོན་ཡོངས་སུ་རྒྱུ་བའི་ཚེ། དེའི་ཤར་ཕྱོགས་ཀྱི་མཚམས་ཀྱི་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དེས་དཔུང་གི་ཚོགས་ཡན་ལག་བཞི་པ་གོ་བསྐོན་ཏེ། གྲོང་ཁྱེར་ཆེན་པོ་བ་རཱ་རཱ་ཎ་སཱི་ཀུན་ནས་བསྐོར་ཏེ། གཞོམ་པར་བཤམས་སོ། །དེ་ནས་རྒྱལ་པོ་ཚངས་པས་བྱིན་དེ་ལ་བློན་པོ་རྣམས་ཀྱིས་སྨྲས་པ། ལྷ་ཕ་རོལ་གྱི་དམག་ཚོགས་ཀྱིས་གྲོང་ཁྱེར་འཕྲོག་ལ་ཐུག་ན་ཐབས་གང་གིས་ཕ་རོལ་གྱི་དམག་ཚོགས་གཞོམ་པར་བགྱི། བཀའ་སྩལ་དུ་གསོལ་ཞེས་བྱས་པ་དང་རྒྱལ་པོས་ཁྱེད་འཚེར་འགྲིབ་ཆུང་ངུར་གྱིས་ཤིག །རིག་པའི་རྒྱལ་མོ་སོ་སོར་འབྲང་བ་ཆེན་མོ་ཞེས་བྱ་བ་ཡོད་དེ། ངས་དེས་དཔུང་གི་ཚོགས་ཡན་ལག་བཞི་པ་འདི་ཕམ་པར་བྱའོ། །ཐལ་བ་བཞིན་དུ་བྱའོ་ཞེས་བསྒོ་བ་དང་། བློན་པོ་རྣམས་ཀྱིས་མགོ་བཏུད་དེ་རྒྱལ་པོ་ཆེན་པོ་སྔོན་བདག་ཅག་གིས་ནམ་ཡང་མ་ཐོས་པ་འདི་ཅི་ཞིག་ལགས་ཞེས་སྨྲས་པ་དང་། རྒྱལ་པོས་
ངས་དེ་མངོན་སུམ་དུ་བྱའོ་ཞེས་བསྒོའོ། །དེ་ནས་རྒྱལ་པོ་ཚངས་པས་བྱིན་སྤོས་ཆུ་སྣ་ཚོགས་ཀྱིས་མགོ་བཀྲུས་ཏེ། གོས་གཙང་མ་བགོས་ནས་རིག་པའི་རྒྱལ་མོ་ཆེན་མོ་འདི་ཆོ་ག་བཞིན་དུ་བྲིས་ཏེ། མགོའི་གཙུག་གི་སྐྲའི་ནང་དུ་བཞག་ནས་རིག་པའི་རྒྱལ་མོ་ཆེན་མོ་འདི་ཉིད་ཀྱིས་གོ་ཆ་བྱས་ཏེ། གཡུལ་གྱི་ནང་དུ་ཞུགས་པ་དང་། གཅིག་པུས་དཔུང་གི་ཚོགས་ཡན་ལག་བཞི་པ་ཐམས་ཅད་ཕམ་པར་བྱས་ཏེ། ཇི་སྲིད་སྐྱབས་སུ་དོང་བ་དེ་སྲིད་དུ་འདིས་ཚར་བཅད་ནས་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དེ་གཅིག་པུ་བཏང་ངོ་། །བྲམ་ཟེ་ཆེན་པོ་དེ་ལྟར་ན་རིག་པའི་རྒྱལ་མོ་ཆེན་མོ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་། ཕྱག་རྒྱས་བྱིན་གྱིས་བརླབས་པ། མཐུ་ཆེན་པོ་འདི་མངོན་སུམ་དུ་གྱུར་པ་ཡིན་ཏེ། མངོན་སུམ་དུ་གྱུར་ཏོ་སྙམ་དུ་གཟུང་བར་བྱའོ། །དེ་བཞིན་གཤེགས་པ་ཐམས་ཅད་དང་མཚུངས་པ་ཉིད་དུ་བལྟ་བར་བྱའོ། །ཕྱི་མའི་ཚེ་ཕྱི་མའི་དུས་ན་སེམས་ཅན་ཚེ་ཐུང་བ་རྣམས་དང་། བསོད་ནམས་ཆུང་བ་རྣམས་དང་། ལོངས་སྤྱོད་ཆུང་བ་རྣམས་ལ་ཕན་པར་འགྱུར་བར་བལྟའོ། །བྲམ་ཟེ་ཆེན་པོ་གང་ལ་ལ་ཞིག་རིག་པའི་རྒྱལ་མོ་སོ་སོར་འབྲང་བ་ཆེན་མོ་འདི་ཆོ་ག་བཞིན་དུ་བྲིས་ཏེ་ལག་པའམ། མགུལ་དུ་བཏགས་ན་དེ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་སྐུར་རིག་པར་བྱའོ། །རྡོ་རྗེའི་ལུས་ཡིན་པར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་རིང་བསྲེལ་གྱི་སྙིང་པོ་ཅན་ཡིན་པར་རིག་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་སྤྱན་ཡིན་པར་རིག་པར་བྱའོ། །དེ་རྡོ་རྗེ་ཆེན་པོའི་ལུས་སུ་རིག་པར་བྱའོ། །དེ་འབར་བ་འོད་འཕྲོ་བའི་ལུས་དང་ལྡན་པར་རིག་པར་བྱའོ། །དེ་མི་ཤིགས་པའི་གོ་ཆ་ཅན་དུ་རིག་པར་བྱའོ། །དེ་དགྲ་ཐམས་ཅད་རབ་ཏུ་འཇོམས་པར་རིག་པར་བྱའོ། །དེ་སྒྲིབ་པ་དང་སྡིག་པ་ཐམས་ཅད་འཇོམས་པར་རིག་པར་བྱའོ། །དེ་སེམས་ཅན་དམྱལ་བའི་འགྲོ་བ་རྣམས་སྦྱོང་བར་རིག་པར་བྱའོ། །དེ་ཅིའི་ཕྱིར་ཞེ་ན། སྔོན་ཡོངས་སུ་ཤེས་པ་ཡིན་ཏེ། བྲམ་ཟེ་ཆེན་པོ་ཕྱོགས་གཞན་ཞིག་ན་དགེ་
སློང་མ་དད་པ། དེ་བཞིན་གཤེགས་པའི་རིགས་ལ་བསླབ་པ་འདྲལ་བ། མ་བྱིན་པར་ལེན་པ། བཟའ་བ་འདུ་བའི་སྒོ་འཕྲོག་པ། དགེ་འདུན་གྱི་དང་། ཕྱོགས་བཞི་དང་། ཚོགས་ཀྱི་རྫས་སུ་གྱུར་པ་དེ་ཐམས་ཅད་གང་དག་གིར་བྱིན་གྱིས་བརླབས་ཏེ་ཟ་བ་ཞིག་དུས་གཞན་ཞིག་ན་ནད་ཚབས་ཆེན་པོས་བཏབ་པ་དང་། སྡུག་བསྔལ་ཆེན་པོའི་ཚོར་བ་མྱོང་ངོ་། །ཉོན་མོངས་ཏེ་སྐྱབས་མེད་དཔུང་གཉེན་མེད་ནས་ཀུ་ཅོའི་སྒྲ་ཆེན་པོ་འབྱིན་ཏོ། །བྲམ་ཟེ་ཆེན་པོ་དེ་ནས་ཕྱོགས་དེ་ན་དགེ་བསྙེན་ཞིག་གནས་པ་དེས་སྒྲ་དེ་ཐོས་སོ། །ཐོས་ནས་ཀྱང་དགེ་སློང་དེ་ག་ལ་བ་དེར་སོང་སྟེ་ཕྱིན་ནས་རིག་པའི་རྒྱལ་མོ་སོ་སོར་འབྲང་བ་ཆེན་མོ་འདི་བྲིས་ཏེ། དགེ་སློང་དེའི་མགུལ་དུ་བཏགས་སོ། །རིག་པའི་རྒྱལ་མོ་སོ་སོར་འབྲང་བ་ཆེན་མོ་དགེ་སློང་དེའི་མགུལ་དུ་བཏགས་མ་ཐག་ཏུ་ཚོར་བ་ཐམས་ཅད་ནི་རབ་ཏུ་ཞི། ནད་ཐམས་ཅད་ལས་ནི་ཡོངས་སུ་ཐར་ཏེ། སོས་པར་གྱུར་ནས་དེའི་མཚན་མོ་ཟད་པ་དང་། དྲན་པ་ཤིན་ཏུ་ཉེ་བར་བཞག་སྟེ་འཆི་བའི་དུས་བྱས་སོ། །ལུས་དེ་བོར་བ་དང་། སེམས་ཅན་དམྱལ་བ་ཆེན་པོ་མནར་མེད་པར་སྐྱེས་སོ། །དེའི་རོ་དེ་ཡང་དགེ་སློང་དག་གི་སྒང་བུ་ཞིག་ལ་བཞག་གོ། །རིག་པ་ཆེན་མོ་སོ་སོར་འབྲང་བ་ཆེན་མོ་དེ་ཡང་དེའི་མགུལ་དུ་བཏགས་པ་བཞིན་དུ་གནས་སོ། །དགེ་སློང་དེ་མནར་མེད་པ་དེར་སྐྱེས་མ་ཐག་ཏུ་སེམས་ཅན་དམྱལ་བའི་སེམས་ཅན་དེ་དག་གི་སྡུག་བསྔལ་གྱི་ཚོར་བ་ཐམས་ཅད་རབ་ཏུ་ཞི་ནས་སེམས་ཅན་དམྱལ་བའི་སེམས་ཅན་དེ་དག་ཐམས་ཅད་བདེ་བ་ཐམས་ཅད་ཀྱིས་ཚིམ་པར་གྱུར་ཏོ། །མཚམས་མེད་པའི་མེའི་ཕུང་པོ་ཆེན་པོ་གང་ཡིན་པ་དེ་དག་ཐམས་ཅད་ཀྱང་ཡོངས་སུ་ཞི་བར་གྱུར་ཏོ། །དེ་ནས་གཤིན་རྗེའི་མི་དེ་དག་ཐམས་ཅད་ངོ་མཚར་སྐྱེས་ནས་ཆོས་ཀྱི་རྒྱལ་པོ་གཤིན་རྗེ་ལ་ངེས་པའི་ཚིག་འདི་དག་རྒྱས་པར་བརྗོད་དོ། ། སེམས་ཅན་ལས་ལས་སྐྱེས་པ་ཡི། །སྡུག་བསྔལ་མི་བཟད་རབ་ཏུ་ཞི། །ཤིན་ཏུ་ངོ་མཚར་འདི་ནི་ལྷ། །སེམས་དམྱལ་ཉམ་ང་རྣམས་ན་གདའ། །ལུས་ཅན་ལུས་ལ་རྟག་གནས་པའི། །མེ་མ་མུར་དེ་རབ་ཏུ་ཞི། །སོག་ལེ་རྣམས་ཀྱིས་གཤེགས་མ་མཆིས། །སྤུ་གྲིའི་སོས་
ཡང་གཅོད་མི་བགྱིད། །ལྕགས་སྡོང་ཤལ་མ་རི་ཡང་ཆག །ལྕགས་ཟངས་ཐམས་ཅད་རབ་ཏུ་ཞི། །རལ་གྲི་ལོ་མ་ཅན་ནགས་ན། །ལས་སྐྱེས་ལོ་མ་གནོད་མི་འགྱུར། །ཆོས་ཀྱི་རྒྱལ་པོ་གཤིན་རྗེ་ཁྱོད། །མི་རྣམས་ལ་ནི་ཆོས་ཀྱི་སྟོན། །རྒྱུ་འདི་མི་ཆུང་བདག་ཅག་ལ། །ཁྱོད་ཀྱིས་བརྗོད་པར་མཛད་པའི་རིགས། །དེ་ནས་ཆོས་ཀྱི་བདག་ཉིད་ཅན། །ཆོས་ངེས་ཆོས་ཀྱི་རྒྱལ་པོ་དེས། །སྙིང་རྗེའི་བསམ་པ་ཉམས་རྣམས་ཀྱི། །འདི་འདྲའི་ཚིག་དེ་ཐོས་གྱུར་ནས། །མྱུར་དུ་འདི་ནི་ཅི་ཡིན་སྨྲོས། །འདི་ནི་ཅི་འདྲ་ཡང་སྨྲོས་ཤིག ། དེ་ནས་མི་བཟད་གཤིན་རྗེའི་མི། །གནོད་པའི་རྒྱུན་ཅན་དེ་དག་གིས། །ཆོས་ཀྱི་རྒྱལ་པོ་གཤིན་རྗེ་ལ། །འདི་སྐད་ཀྱི་ནི་ཚིག་སྨྲས་སོ། །མནར་མེད་རབ་ཏུ་ཉམ་ང་བར། །སེམས་ཅན་ཆེན་པོ་འདི་སྐྱེས་ལྷ། །གང་གི་མིང་ནི་མནར་མེད་པ། །དེས་ན་དེ་ནི་ཉམ་ངར་བརྗོད། ། གང་གིས་སེམས་ཅན་བདེ་བགྱིས་པ། །རྣམ་པ་སྣ་ཚོགས་ལས་ལ་གཟིགས། །འདི་ནི་ཀུན་ཏུ་བདེ་གྱུར་ནས། །སླར་ཡང་ལྷ་ཡི་གནས་སུ་མཆིས། །ཆོས་ཀྱི་རྒྱལ་པོ་གཤིན་རྗེས་ཀྱང་། །མཐོང་ནས་ངོ་མཚར་སྨྲས་པ་ནི། །འདི་ནི་རྫུ་འཕྲུལ་ཆེ་བ་སྟེ། །འདི་ནི་ཚེ་རབས་སྔ་ལུས་ཚེ། །ཅི་ལྟར་སྐུ་གདུང་བརྒྱ་མང་པོས། །སྟོན་པའི་མཆོད་རྟེན་མཛེས་པ་ལྟར། །སོ་སོར་འབྲང་བ་མགུལ་བཏགས་པས། །དེ་ཡི་ལུས་ནི་དེ་བཞིན་མཛེས། །དེ་ནས་སེམས་ཅན་དམྱལ་བའི་སྲུང་མ་གནོད་སྦྱིན་དེ་དག་གིས་ཆོས་ཀྱི་རྒྱལ་པོ་གཤིན་རྗེ་ལ་འདི་སྐད་ཅེས་སྨྲས་སོ། །ལྷ་ཅི་ལྟར་ན་འདི་སོ་སོར་འབྲང་བ་ཞེས་བགྱི། ཆོས་ཀྱི་རྒྱལ་པོས་སྨྲས་པ། གང་གི་ཚིག་རྣམས་སོ་སོར་དྲན། །དེ་ནི་ངན་འགྲོར་འགྲོ་མི་འགྱུར། །སོ་སོར་འབྲང་བ་བསྒོམས་པ་ཡི། །ཤེས་རབ་ཅན་དེ་བདེ་འགྲོར་འགྲོ། །སེམས་ཅན་དམྱལ་བའི་སྲུང་མ་ཁྱེད། ། རབ་ཏུ་རྒྱས་དང་ལྡན་པར་དོང་། །དེར་ནི་སྒང་བུ་མཐོན་པོ་ལ། །ལྷ་རྣམས་ཀྱིས་ནི་བསྐོར་བ་ལྟོས། །དེ་མཐོང་སེམས་ཅན་ཐམས་ཅད་ལ། །བྱམས་པའི་སེམས་སུ་འགྱུར་བར་གྱིས། །དེ་ནས་གཤིན་རྗེའི་མི་དེ་དག་དེ་ཉིད་ཀྱི་ནུབ་མོ་རྒྱས་པ་དང་ལྡན་པར་དོང་ངོ་། །དེ་ཚེ་དེར་ནི་དེ་དག་གིས། །
རྒྱལ་པོའི་ཕོ་བྲང་ཉེ་བ་ན། །སྒང་བུ་དེ་ཡི་ཁོར་ཡུག་ན། །འབར་བ་གཅིག་གིས་གང་བར་མཐོང་། །མི་རོ་ཞིག་གི་མགུལ་པ་ན། སོ་སོར་འབྲང་བ་བཏགས་པའང་མཐོང་། །ལྷ་དང་ཀླུ་དང་དྲི་ཟ་དང་། །གནོད་སྦྱིན་སྲིན་པོ་མི་འམ་ཅིས། །ཀུན་ནས་འཁོར་བར་བསྐོར་ནས་ནི། །བླ་ན་མེད་པའི་མཆོད་པ་བྱེད། །དེ་ལ་གནོད་སྦྱིན་དེ་དག་གིས། །སོ་སོར་འབྲང་བའི་སྒང་ཞེས་བཏགས། །དེ་ནས་གནོད་སྦྱིན་དེ་དག་གིས་ཆོས་ཀྱི་རྒྱལ་པོ་གཤིན་རྗེའི་ངེས་པ་དེ་རྟོགས་ཏེ་སླར་ལོག་ནས་ལྷ་ཁྱོད་ཀྱིས་བཀའ་སྩལ་པ་བཞིན་ནོ་ཞེས་རྒྱས་པར་བརྗོད་དོ། །དེ་སྐད་ཅེས་སྨྲས་མ་ཐག་ཏུ་ཚིག་དེ་སྨྲས་པའི་ཐ་མ་ལ་སེམས་ཅན་ཆེན་པོ་དེ་སེམས་ཅན་དམྱལ་བའི་ལུས་དེ་བོར་ནས་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེས་སོ། །རྒྱུ་དེས་ན་སྔོན་སོ་སོར་འབྲང་བའི་ལྷའི་བུ་ཞེས་བྱའོ། །བྲམ་ཟེ་ཆེན་པོ་དེས་ན་སྔོན་ཆད་ཡོངས་སུ་ཤེས་སོ། །དེའི་ཕྱིར་སོ་སོར་འབྲང་བ་ཆེན་མོ་འདི་གདོན་མི་ཟ་བར་གཟུང་བར་བྱའོ། །ཡི་གེར་བྲི་བར་བྱ། བཀླག་པར་བྱའོ། །ཆོ་ག་བཞིན་དུ་རྟག་ཏུ་ལུས་ལ་བཏགས་ནས་བཅང་བར་བྱ་སྟེ། དེ་རྟག་ཏུ་སྡུག་བསྔལ་ཞིང་ཉམ་ཐག་པ་ཐམས་ཅད་ལས་ཡོངས་སུ་ཐར་བར་འགྱུར། ངན་འགྲོའི་འཇིགས་སྐྲག་པ་ཐམས་ཅད་ལས་རྒལ་བར་འགྱུར་རོ། །གློག་གིས་འགྱེལ་བར་བྱེད་མི་ནུས་སོ། །གློག་གིས་ཅི་ལྟར་མི་ནུས་ཞེ་ན། བྲམ་ཟེ་ཆེན་པོ་སྔོན་ཡོངས་སུ་ཤེས་ཏེ། གྲོང་ཁྱེར་ཆེན་པོའི་མཆོག་ཤིང་ཀུན་རྫིབ་ན། ཚོང་དཔོན་ཆེན་པོ་དྲི་མེད་དུང་ཞེས་བྱ་བ་ནོར་མང་བ། གསེར་ཤིན་ཏུ་འབྱོར་པ། མཛོད་དང་། བང་བ་ཀུན་ཏུ་གང་ཞིང་ཕུན་སུམ་ཚོགས་པ་ཞིག་གནས་ཏེ། དེད་དཔོན་ཞེས་བྱ་བར་གྲགས་སོ། །དེ་ནས་དེད་དཔོན་ཆེན་པོ་དེས་གྲུ་བོ་ཆེ་དེ་རྙེད་ནས། རྒྱ་མཚོ་ཆེན་པོར་ཞུགས་པ་དང་། ཉ་མིད་རྣམས་ཀྱིས་དེའི་གྲུ་དེ་བཟུང་ནས། རྣམ་པར་གཞིག་པར་འདོད་པའི་ཀླུ་རྣམས་ཀྱང་འཁྲུགས་ཏེ། འབྲུག་སྒྲ་ཆེན་པོ་སྒྲོག་གོ། །གློག་དང་སྐར་མདའ་ཡང་གཏོང་ངོ་། །རྡོ་རྗེའི་ལྕེ་འབེབས་པར་ཡང་བཤམས་སོ། །དེ་ནས་ཚོང་པ་དེ་དག་སྡུག་བསྔལ་ཆེན་པོས་སེམས་ནོན་ཏོ། །ཀླུ་འཁྲུགས་པ་ཆེན་པོ་དེ་དང་། གློག་
དང་སྐར་མདའ་དང་། རྡོ་རྗེའི་ལྕེ་འབེབས་པ་དང་། ཉ་མིད་དེ་དག་གིས་ཀྱང་གྲུ་བོ་ཆེ་བཟུང་བར་མཐོང་ནས་ཀུ་ཅོའི་སྒྲ་ཆེན་པོ་བཏོན་ཏེ། དེ་དག་ལྷ་ཁྱད་པར་ཅན་རྣམས་ལ་གསོལ་བ་བཏབ་ཀྱང་འགའ་ཙམ་ཡང་དེ་དག་གི་དཔུང་གཉེན་དུ་མ་གྱུར་ཏོ། །དེ་ནས་དེ་དག་ཚོང་དཔོན་སེམས་རབ་ཏུ་བརྟན་པའི་གན་དུ་སོང་ནས། དེ་དག་གིས་སྙིང་རྗེ་རྗེ་སྐད་དུ་ཚིག་འདི་སྐད་སྨྲས་སོ། །སེམས་ཅན་ཆེན་པོ་ཁྱོད་ཀྱིས་བདག་ཅག་བསྐྱབ་ཅིང་འཇིགས་པ་ཆེན་པོ་ལས་ཐར་བར་མཛད་དུ་གསོལ། དེ་ནས་དེད་དཔོན་ཆེན་པོ་སེམས་བརྟན་པ་བློ་གྲོས་ཆེན་པོ་དེས་ཚོང་པ་འཁྲུགས་པར་གྱུར་པ་རྣམས་ལ་ཚིག་འདི་སྐད་སྨྲས་སོ། །མ་འཇིགས་མ་འཇིགས་ཚོང་པ་རྣམས། །ཁྱེད་ཅག་བརྟན་པར་དེངས་ཤིག་དང་། །ཁྱེད་རྣམས་སྡུག་བསྔལ་ཆེན་པོ་ཡི། །རྒྱ་མཚོ་ཆེ་ལས་ངས་བསྒྲལ་ལོ། །དེ་ནས་ཡིད་ནི་བརྟན་གྱུར་ནས། །ཚོང་པ་རྣམས་ཀྱིས་ཚིག་འདི་སྨྲས། །སེམས་ཅན་ཆེན་པོ་འདི་ཅི་ལགས། །བགེགས་བྲལ་མྱུར་དུ་བཀའ་སྩོལ་ཅིག །བློ་གྲོས་ཆེན་པོ་ཁྱོད་ཀྱི་མཐུས། །བདག་ཅག་ཇི་སྲིད་འཚོ་བའི་ཚེ། །ཡེ་ཤེས་ཆེ་བའི་བདག་ཉིད་གསུངས། །སླད་ན་ཁྱོད་ཀྱིས་ཅི་ཞིག་བགྱི། །དེ་ནས་འགྲོན་མང་བདག་པོ་ཡིས། །དེ་དག་ལ་ནི་ཚིག་འདི་བརྗོད། །ང་ལ་སོ་སོར་འབྲང་བ་ཡི། །རིག་པ་ཆེན་པོར་གྲགས་པ་ཡོད། །གནོད་བྱེད་ཐམས་ཅད་སེལ་བར་བྱེད། །སྟོབས་ཆེན་ཕ་རོལ་གནོན་བྱེད་པ། །དེས་ནི་རབ་ཏུ་སྡུག་བསྔལ་བའི། །འཇིགས་པ་ཆེ་ལས་ངས་བསྒྲལ་ལོ། །དེ་ནས་དེད་དཔོན་ཆེན་པོ་དེའི་ཚེ་རིག་པའི་རྒྱལ་མོ་ཆེན་མོ་འདི་བྲིས་ནས་རྒྱལ་མཚན་གྱི་རྩེ་མོ་ལ་བཏགས་པ་དང་། རིག་པའི་རྒྱལ་མོ་ཆེན་མོ་སོ་སོར་འབྲང་བ་ཆེན་མོ་རྒྱལ་མཚན་གྱི་རྩེ་མོ་ལ་བཏགས་མ་ཐག་ཏུ་ཉ་མིད་དེ་དག་ཐམས་ཅད་ཀྱིས་གྲུ་བོ་ཆེ་དེ་མེ་ལྕེ་གཅིག་ཏུ་གྱུར་པ་མཐོང་ངོ་། །དེ་ནས་ཀླུ་དེ་དག་བྱམས་པའི་ཡིད་ཀྱིས་དེ་དག་གི་དྲུང་དུ་ལྷགས་ནས་མཆོད་པ་བྱ་བར་བཤམས་སོ། །ཉ་མིད་དེ་དག་ཀྱང་རིག་པའི་རྒྱལ་མོ་སོ་སོར་འབྲང་བ་ཆེན་མོ་འདི་ཉིད་ཀྱི་མཐུས་ཚིག་ནས་བྱེར་ཏེ་ཞི་བར་གྱུར་ཏོ། །འགྲོན་པོ་ཕལ་པོ་ཆེ་དེ་དག་ཀྱང་ཀླུ་ཆེན་པོ་དེ་དག་གིས་རིན་པོ་ཆེའི་
གླིང་ཆེན་པོར་ཕྱིན་པར་བྱས་སོ། །དེ་ལྟར་ན་ཡེ་ཤེས་དང་ལྡན་པ་རིག་པ་ཆེན་མོ་སོ་སོར་འབྲང་བ་ཆེན་མོ་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་སྟེ། བྲམ་ཟེ་ཆེན་པོ་རྒྱུ་དེས་ན་འདི་རིག་པ་ཆེན་མོ་ཞེས་གྲགས་སོ། །འདི་ནི་ངེས་པར་རྒྱལ་མཚན་གྱི་རྩེ་མོ་ལ་བཏགས་ཏེ་བཅང་བར་བྱའོ། །རླུང་དང་། གྲང་བ་དང་། དུས་མ་ཡིན་པའི་སྤྲིན་དང་། གློག་དང་། ལྕེ་འབབ་པ་ཐམས་ཅད་རབ་ཏུ་ཞི་བར་བྱེད་དོ། །ལྷ་དང་། མི་དང་། ལྷ་མ་ཡིན་གྱི་འཐབ་པ་དང་། རྩོད་པ་ལས་ཡོངས་སུ་ཐར་བར་བྱེད་དོ། །སྦྲང་བུ་མཆུ་རིངས་དང་། ཤ་སྦྲང་དང་། བྱི་བ་དང་། སྲོག་ཆགས་ཀྱི་རིགས་གཟུགས་རྣམ་པ་སྣ་ཚོགས་ལོ་ཏོག་མ་རུང་བར་བྱེད་པ་ཐམས་ཅད་མཐུ་མེད་ཅིང་རབ་ཏུ་ཞི་བར་འགྱུར་རོ། །རི་དགས་དང་། བྱ་དང་། གཅན་གཟན་གནོད་པར་སེམས་པ་ཐམས་ཅད་རྣམ་པར་འཇིག་པར་འགྱུར་རོ། །མེ་ཏོག་དང་། འབྲས་བུ་དང་། ལོ་མ་དང་། ནགས་ཚལ་དང་། སྨན་དང་། ལོ་ཏོག་ལ་སོགས་པ་ཐམས་ཅད་འཕེལ་བར་འགྱུར་ཏེ། རབ་ཏུ་བྲོ་ཞིང་ཞིམ་པ་དང་འཇམ་པར་འགྱུར་རོ། །ལེགས་པར་ཡོངས་སུ་སྨིན་པར་འགྱུར་རོ། །ཧ་ཅང་ཆར་ཆེ་བ་དང་། ཆར་དཀོན་པའི་ཉེས་པ་རྣམས་ཡོངས་སུ་མི་འབྱུང་ངོ་། ། ཆར་དུས་སུ་འབབ་ཅིང་། དུས་མ་ཡིན་པར་མི་འབབ་པར་འགྱུར་རོ། །ཡུལ་དེའི་ཀླུ་ཆེན་པོ་གང་ཡིན་པ་དེ་དག་ཀྱང་དུས་དུས་སུ་ཆར་གྱི་རྒྱུན་ལེགས་པར་འབེབས་སོ། །ཡུལ་གང་ན་རིག་པའི་རྒྱལ་མོ་སོ་སོར་འབྲང་བ་ཆེན་མོ་ཞེས་བྱ་བ་འདི་སྤྱོད་པའི་ཡུལ་དེར་སེམས་ཅན་དེ་དག་གིས་ཤེས་པར་བྱ་སྟེ། སྤོས་སྣ་ཚོགས་དང་། བདུག་པ་སྣ་ཚོགས་དང་། མེ་ཏོག་སྣ་ཚོགས་ཀྱིས་མཆོད་ཅིང་བསྟི་སྟང་བྱས་ལ། ཚོན་སྣ་ཚོགས་ཀྱིས་དཀྲིས་ཏེ་རྒྱལ་མཚན་གྱི་རྩེ་མོ་ལ་བཏགས་ནས་གླུ་དབྱངས་དང་། རོལ་མོ་སིལ་སྙན་བྱས་ཏེ། བསྐོར་བ་བྱས་ནས་ལྷ་རྣམས་དང་། བརྒྱ་བྱིན་དང་། ཚངས་པ་ལ་སོགས་པས་སེམས་ཅན་ཆེན་པོ་དེ་དག་གི་བསམ་པ་ཇི་ལྟ་བ་བཞིན་དུ། རེ་བ་ཡོངས་སུ་རྫོགས་པར་བྱེད་པར་འགྱུར་རོ། །ཆོ་ག་ཅི་ལྟ་བ་བཞིན་དུ་དེ་ལྟ་དེ་ལྟ་བུར་འགྲུབ་སྟེ། བུ་ཕོ་འདོད་ནའང་ཁྱེའུར་འགྲུབ། །མངལ་ན་འཛིན་པ་དམ་པར་འགྱུར། །མངལ་
ན་བདེ་བར་སྐྱེ་བ་དང་། །མངལ་ནས་བདེ་བར་བཙས་པར་འགྱུར། །མངལ་ན་དུས་བཞིན་སྐྱེ་བ་དང་། །དུས་བཞིན་རབ་ཏུ་བཙས་པར་འགྱུར། །ཅིས་མངོན་ཞེ་ན། བྲམ་ཟེ་ཆེན་པོ་སྔ་མ་བཞིན་དུ་དེ་ཉོན་ཅིག །ཡུལ་མ་ག་དྷཱ་འདི་ཉིད་ན། རྒྱལ་པོ་ལག་བརྐྱང་ཞེས་བྱ་བ་དེ་བུ་མེད་པར་གྱུར་ཏོ། །ཅིའི་ཕྱིར་ལག་བརྐྱང་ཞེས་བྱ་ཞེ་ན། རྒྱལ་པོ་དེ་བཙས་མ་ཐག་ཏུ་ལག་པ་བརྐྱང་ནས་མའི་ནུ་ཞོ་ལ་བཟུང་སྟེ། ནུ་ཞོ་ངོམས་ངོམས་སུ་འཐུངས་སོ། །ནུ་མ་དེ་གཉིས་ལ་རེག་མ་ཐག་ཏུ་གསེར་གྱི་ཁ་དོག་ཏུ་གྱུར་ཏོ། །དུས་ཀུན་ཏུ་ནུ་ཞོ་འཕེལ་བར་གྱུར་ཏོ། །རྒྱུ་དེས་ན་རྒྱལ་པོ་ལག་བརྐྱང་ཞེས་བྱ་བར་བཏགས་པར་གྱུར་ཏོ། །གཞན་ཡང་གང་གི་ཚེ་རྒྱལ་པོའི་གན་དུ་སྐྱེ་བོ་སློང་མོ་པ་འོངས་པ་དེའི་ཚེ་རྒྱལ་པོ་དེ་ལག་པ་གཡས་པ་བར་སྣང་ལ་བརྐྱང་བ་དང་། རྒྱལ་པོ་བྱང་ཆུབ་སེམས་དཔའ་དེ་རྒྱུ་དེས་སངས་རྒྱས་ལ་མངོན་པར་དད་པའི་ལྷ་རྣམས་ཀྱིས་ལྷའི་རིན་པོ་ཆེ་ཁྱད་པར་དུ་འཕགས་པ་གསེར་དང་། ནོར་བུ་རྣམས་ཀྱིས་ལག་པ་གང་བར་བྱེད་དོ། །རྒྱལ་པོ་དེས་ཀྱང་སྐྱེ་བོ་སློང་མོ་པ་ལྷགས་པ་རྣམས་ལ་རབ་ཏུ་བྱིན་ནོ། །བསམས་པ་ཙམ་གྱིས་སློང་མོ་པ་ཐམས་ཅད་ལ་འདོད་པ་བཞིན་དུ་བདེ་བ་ཕུན་སུམ་ཚོགས་པ་ཐམས་ཅད་བྱིན་ནོ། །བུ་ཕོ་འདོད་པའི་ཕྱིར་ལྷ་རྣམས་ལ་མཆོད་པ་དང་། བསྟི་སྟང་ཆེར་བྱས་ཀྱང་བུ་ཕོ་མ་རྙེད་ནས་དེ་སྔོན་གྱི་དེ་བཞིན་གཤེགས་པ་དག་གི་མཆོད་རྟེན་རྣམས་ཀྱི་མདུན་དུ་བསྟི་སྟང་བྱ་བར་བརྩམས་ཏེ་མཆོད་པ་དང་། བསྟི་སྟང་ཆེན་པོ་བྱས་སོ། ། སྦྱིན་པ་ཡང་བྱིན་ཏོ། །བསྙེན་གནས་ལ་ཡང་ཉེ་བར་གནས་སོ། །བསོད་ནམས་ཆེན་པོ་བྱས་སོ། །སྦྱིན་པ་ཆེན་པོ་དེ་དག་ཀྱང་མི་ཟད་པར་བྱིན་ནོ། །དེ་ཅིའི་ཕྱིར་ཞེ་ན། བྲམ་ཟེ་ཆེན་པོ་སྔོན་བྱུང་བ་ཡུལ་མ་ག་དྷཱ་འདི་ཉིད་ན། གྱད་ཡུལ་ཞེས་བྱ་བའི་གྲོང་ཁྱེར་ཀུ་ཤའི་ཚོང་དུས་ཆེན་པོའི་མཆོག་ན་བཅོམ་ལྡན་འདས་རིན་ཆེན་མང་གི་བསྟན་པ་ལ་ཞུགས་པ་ཚོང་དཔོན་ཆོས་ཀྱི་བློ་གྲོས་ཞེས་བྱ་བ་ཆོས་ལ་སེམས་པའི་སེམས་ཅན་ཆེན་པོ་ཞིག་གནས་པ་དེ་སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་ཉེ་བར་གཞག་ནས་རིག་པ་ཆེན་པོ་སོ་སོར་འབྲང་བ་འདི་ཉིད་ལས་
བརྩམས་ཏེ་ཆོས་སྟོན་ཏོ། །དེ་ནས་མི་དབུལ་པོ་ཞིག་གིས་ཆོས་དེ་ཐོས་ནས་ཚོང་དཔོན་ཆེན་པོ་དེ་ལ་ཚིག་འདི་སྐད་ཅེས་བདག་ཇོ་བོའི་ཁབ་ཏུ་གླ་བགྱིའོ། །ཆོས་ཀྱང་ཉན་ཏོ། །གང་གི་ཚེ་བདག་གིས་ཅུང་ཟད་རྙེད་པར་གྱུར་པ་དེའི་ཚེ་བདག་ཆོས་ལ་མཆོད་པ་བགྱིད་དོ། །ཞེས་སྨྲས་ནས། དེའི་ཁྱིམ་ན་ལས་བྱེད་ཅིང་ཆོས་ཀྱང་ཉན་ཏོ། །དུས་གཞན་ཞིག་ན་དེ་ལ་ཚོང་དཔོན་དེས་དི་ན་ར་ཅིག་བྱིན་པ་དང་། དེས་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་བྱང་ཆུབ་ཀྱི་སེམས་བསྐྱེད་ནས། སེམས་ཅན་ཐམས་ཅད་དང་ཐུན་མོང་དུ་བྱས་ནས་རིན་པོ་ཆེ་སྙིམ་པས་སོ་སོར་འབྲང་བ་ཆེན་མོ་ལ་ཕུལ་ནས་སྦྱིན་པའི་འབྲས་བུ་ཆེན་པོ་འདིས་བདག་དང་སེམས་ཅན་ཐམས་ཅད་ཀྱི་དབུལ་བ་ཀུན་ཏུ་གཅོད་པར་གྱུར་ཅིག་ཅེས་སྨོན་ལམ་དེ་སྐད་ཀྱང་བཏབ་བོ། །རྒྱུ་དེས་ན་སྦྱིན་པ་དེ་ཡོངས་སུ་མི་ཟད་པར་གྱུར་ཏོ། །དེ་ལྟར་བསོད་ནམས་མངོན་པར་འདུ་བྱ་བ་རྣམ་པ་མང་པོ་རྣམ་པ་དུ་མ་བྱས་ཏེ། ལྷ་རྣམས་ཀྱང་མཆོད་པ་ནས་སངས་རྒྱས་བཅོམ་ལྡན་འདས་ཀྱི་བར་དུ་མཆོད་པ་དང་། དེའི་ཚེ་གནས་གཙང་མའི་རིས་ཀྱི་ལྷ་རྣམས་ཀྱིས་རྨི་ལྟས་སུ་བསྟན་ཏེ། འདི་སྐད་དུ། ཀྱེ་རྒྱལ་པོ་ཆེན་པོ་སོ་སོར་འབྲང་བ་ཆེན་མོ་ཞེས་བྱ་བ་ཀུན་ནས་མེ་ལྕེའི་ཕྲེང་བ་རྣམ་པར་དག་པས་རྒྱས་པ་ཡིད་བཞིན་གྱི་ནོར་བུ་ཕྱག་རྒྱ་དང་། སྙིང་པོ་གཞན་གྱིས་མི་ཐུབ་པའི་གཟུངས་ཆེན་མོ་རིག་པའི་རྒྱལ་མོ་ཆོ་ག་ལས་ཇི་སྐད་འབྱུང་བ་བཞིན་དུ་ཆོ་ག་བཞིན་བྲིས་ལ་བཙུན་མོ་དམ་པ་སྨྱུང་བ་བྱས་ལ། ཆོ་ག་བཞིན་དུ་ལུས་ལ་བཏགས་ན་ཁྱོད་བུ་ཕོ་ཡོད་པར་འགྱུར་རོ་ཞེས་བསྒོའོ། ། དེ་ནས་རྒྱལ་པོ་དེ་སད་དེ་མཚན་མོ་ཟད་ནས་རྩིས་དང་། ཡི་གེའི་འབྲུ་དང་། རྒྱུ་སྐར་དང་། གཟའ་རྣམ་པར་འབྱེད་པའི་བྲམ་ཟེ་རྣམས་བསོགས་ནས་ཆོ་ག་ལས་འབྱུང་བ་བཞིན་དུ་རྒྱུ་སྐར་གྱི་རྒྱལ་པོ་རྒྱལ་གྱི་ཉིན་པར་བཙུན་མོ་དམ་པ་ལུས་ཤིན་ཏུ་ལེགས་པར་བཀྲུས་ཏེ། སྨྱུང་བ་བྱས་ནས་རིག་པའི་རྒྱལ་མོ་ཆེན་མོ་སོ་སོར་འབྲང་བ་འདི་ཡང་ཆོ་ག་བཞིན་དུ་བྲིས་ཏེ་བཙུན་མོ་དམ་པའི་མགུལ་དུ་བཏགས་སོ། །སངས་རྒྱས་ཀྱི་མཆོད་རྟེན་རྣམས་ལ་མཆོད་པ་ཆེན་པོ་བྱས་སོ། །རིན་པོ་ཆེ་ཁྱད་པར་ཅན་དུ་མ་ཡང་སེམས་ཅན་རྣམས་ལ་སྦྱིན་པ་བྱིན་ནོ། །དེ་ནས་ཟླ་བ་དགུ་ལོན་པ་དང་
བུ་ཕོ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བཙས་སོ། །བྲམ་ཟེ་ཆེན་པོ་དེ་ལྟར་ཤེས་ནས་རིག་པའི་རྒྱལ་མོ་ཆེན་མོ་དེ་བཞིན་གཤེགས་པ་ཐམས་ཅད་ཀྱིས་མཆོད་པ། འདོད་པ་ཐམས་ཅད་དུ་འགྲོ་བ། གཞན་གྱིས་མི་ཐུབ་པ་སོ་སོར་འབྲང་བ་ཆེན་མོ་དཀོན་མཆོག་ཅེས་གྲགས་སོ། །འདི་ནི་རྟག་ཏུ་བརྒྱ་བྱིན་གྱི་གཙུག་གི་ནོར་བུ་ཡིན་ནོ། །གང་གི་ཚེ་ལྷའི་དབང་པོ་བརྒྱ་བྱིན་ལྷ་མ་ཡིན་རྣམས་དང་། གཡུལ་ཆེན་པོ་འགྱེད་པར་འདོད་པ་དེའི་ཚེ་འདི་ཉིད་ཀྱིས་གོ་ཆ་བྱས་ནས་སྤྱི་གཙུག་ཏུ་བཏགས་ཏེ། ལྷ་མ་ཡིན་ཐམས་ཅད་ཕམ་པར་བྱས། ཕ་རོལ་ཕམ་པར་བྱས་ནས་དགེ་བ་དང་། བདེ་བས་བདེ་བར་ལྷའི་གྲོང་ཁྱེར་དུ་འཇུག་སྟེ། ལྷ་མ་ཡིན་ཐམས་ཅད་ཀྱིས་མི་ཚུགས་པ་ཡིན་ནོ། །བྲམ་ཟེ་ཆེན་པོ་དེ་ལྟར་ན་སེམས་དང་པོ་བསྐྱེད་པ་ནས་བཟུང་སྟེ། རིག་པའི་རྒྱལ་མོ་ཆེན་མོ་སོ་སོར་འབྲང་བ་ཆེན་མོ་འདི་འཆང་བའི་བྱང་ཆུབ་སེམས་དཔའ་ལ་བདུད་ཐམས་ཅད་ཀྱིས་མི་ཚུགས་སོ། །འདི་གང་གིས་ལུས་ལ་བཏགས་སམ། མགུལ་དུ་བཏགས་པ་དེ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དེ་ལ་བྱང་ཆུབ་སེམས་དཔའ་ཐམས་ཅད་ཡང་དག་པར་བསྲུང་བར་འགྱུར་རོ། །ལྷ་དང་། མི་དང་། རྒྱལ་པོ་དང་། རྒྱལ་པོའི་བློན་པོ་དང་། བྲམ་ཟེ་དང་། ཁྱིམ་བདག་ཐམས་ཅད་ཀྱིས་ཀྱང་རྟག་པར་རྒྱུན་དུ་ཕྱག་བྱ་ཞིང་མཆོད་པ་དང་། རིམ་གྲོ་བྱེད་པར་འགྱུར་རོ། །ལྷ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོས་རྗེད་ཅིང་མཆོད་པར་འགྱུར་རོ། །བཅོམ་ལྡན་འདས་བདུད་ཀྱི་དཔུང་རབ་ཏུ་འཇོམས་པས་ཀྱང་དེ་ལ་སེམས་ཅན་ཆེན་པོ་ཞེས་གསུངས་སོ། །ནད་ཐམས་ཅད་དང་བྲལ་བར་འགྱུར་རོ། །དེ་ལ་ཡམས་ཀྱི་ནད་དང་། གནོད་པ་ཐམས་ཅད་དང་། ནད་འགོ་བ་ཐམས་ཅད་རབ་ཏུ་ཞི་བར་འགྱུར་རོ། །སེམས་ཅན་ཆེན་པོ་དེ་མྱ་ངན་ཐམས་ཅད་དང་བྲལ་བར་འགྱུར་རོ། །དེ་ལ་ལྷ་ཐམས་ཅད་ཀྱང་རྟག་པར་རྒྱུན་དུ་སྲུང་བ་དང་། སྐྱོབ་པ་དང་སྦེད་པར་བྱེད་པར་འགྱུར་རོ། །དེས་གཞན་གྱིས་མི་ཐུབ་པའི་
གསང་སྔགས་ཆེན་པོའི་སྙིང་པོ་འདི་དག་བྲིས་ཏེ། རྟག་པར་རྒྱུན་དུ་ལུས་ལ་གདགས་ཤིང་བཅང་བར་བྱ། རྟག་པར་རྒྱུན་དུ་ཡིད་ལ་བྱའོ། །ཁ་ཏོན་དུ་བྱའོ། །བསམ་པ་ཐག་པ་ནས་བསྒོམ་པར་བྱའོ། །སྡུག་བསྔལ་བ་དང་། རྨི་ལམ་ངན་པ་དང་། ལྟས་ངན་པ་དང་། བཀྲ་མི་ཤིས་པའི་དངོས་པོ་ཐམས་ཅད་རྣམ་པར་འཇོམས་པར་འགྱུར་རོ། །བདེ་བ་ཕུན་སུམ་ཚོགས་པ་ཐམས་ཅད་འབྱུང་བར་འགྱུར་རོ། །འདི་ནི་གསང་སྔགས་ཀྱི་གཞི་ལས་ཐམས་ཅད་བྱེད་པ་དགེ་བ་རྣམས་གྲུབ་པའོ། །ཏདྱ་ཐཱ། ༀ་ཨ་མྲྀ་ཏེ། ཨ་མྲྀ་ཏ་བ་རེ། བ་རེ་བ་རེ། པྲ་བ་རེ་བི་ཤུད་དྷེ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་ཨ་མྲྀ་ཏ་བི་ལོ་ཀི་ནི་གརྦྷེ་སཾ་རཀྵ་ཎི། ཨཱ་ཀརྵ་ཎི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། གཞན་གྱིས་མི་ཐུབ་པའི་སྙིང་པོའོ། །ༀ་བི་མ་ལེ་བི་པུ་ལེ། ཛ་ཡ་བ་རེ། ཛ་ཡ་བཱ་ཧི་ནི། ཨ་མྲྀ་ཏེ། བི་ར་ཛེ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་བྷ་ར་བྷ་ར། སཾ་བྷ་ར་སཾ་བྷ་ར། ཨིནྡྲི་ཡ་བ་ལ་བི་ཤོ་དྷ་ནི། རུ་རུ་ཙ་ལེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཉེ་བའི་སྙིང་པོའི་རིག་པའོ། །ༀ་མ་ཎི་དྷ་རི། བཛྲི་ཎི་མ་ཧཱ་པྲ་ཏི་ས་རེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། རབ་ཏུ་གསང་བའི་སྙིང་པོའོ། །སངས་རྒྱས་དང་བྱང་ཆུབ་སེམས་དཔའ་མ་ལུས་པ་ཐམས་ཅད་ཐབས་ཅིག་ཏུ་འདུས་ནས་སྒྲ་དབྱངས་གཅིག་ཏུ་གཟུངས་ཀྱི་གསང་སྔགས་ཀྱི་གཞི་འདི་དག་གསུངས་སོ། །གསང་སྔགས་འདི་དག་ནི་རིག་པའི་རྒྱལ་མོ་ཆེན་མོ་སོ་སོར་འབྲང་བ་ཆེན་མོའི་སྙིང་པོ་དང་གོ་ཆའོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱས་བཏབ་པའོ། ། འདི་ཐོས་པར་ཡང་རབ་ཏུ་དཀའ་ན་ཡི་གེར་བྲི་བ་དང་། ཚིག་ཏུ་འདོན་པ་དང་། ཀློག་པ་དང་། འཆང་བ་དང་། གཞན་ལ་ཡང་སྟོན་པ་ལྟ་ཅི་སྨོས་ཏེ། དེ་ནི་སངས་རྒྱས་ལ་བྱ་བ་བྱས་པར་རིག་པར་བྱའོ། །འདི་ནི་དེ་བཞིན་གཤེགས་པ་ཐམས་ཅད་ཀྱིས་རབ་ཏུ་བསྔགས་སོ། །རྗེས་སུ་ཡི་རང་ངོ་། །ལུང་བསྟན་ཏོ། །སོ་སོར་འབྲང་བ་ཆེན་མོ་གཞན་གྱིས་མི་ཐུབ་པའི་གཟུངས་འདི་མཆོག་ཏུ་དཀོན་པའོ། །སོ་སོར་འབྲང་བ་ཆེན་མོ་འདིའི་མིང་ཐོས་པར་ཡང་ཤིན་ཏུ་དཀའ་སྟེ། གཟུངས་ཆེན་མོ་འདི་ནི་སྡིག་པ་ཐམས་ཅད་བྱང་བར་བྱེད་པ། སྟོབས་ཆེ་བ། ཕ་རོལ་
གནོད་པ། གཟི་བརྗིད་ཆེ་བ། འོད་ཆེ་བ། ཡོན་ཏན་བརྗོད་པར་ཆེ་བ། མཐུ་ཆེ་བ། བདུད་ཀྱི་རིས་ཀྱི་ལྷ་ཐམས་ཅད་རྣམ་པར་འཇོམས་པར་བྱེད་པ། བག་ཆགས་ཀྱི་མཚམས་སྦྱོར་བའི་བདུད་ཀྱི་ཞགས་པ་གཅོད་པ། ཕ་རོལ་གྱི་སྔགས་དང་། ཕྱག་རྒྱ་དང་། དུག་དང་། བྱད་དང་། གཡེངས་བྱེད་ཀྱི་སྦྱོར་བ་དང་། གནོད་པར་བྱ་བ་དང་། དྲག་ཤུལ་དུ་སྤྱོད་པ་གནོད་པའི་སེམས་དང་ལྡན་པ་རྣམས་རྣམ་པར་སྦྱོང་བར་བྱེད་པ། སངས་རྒྱས་དང་། བྱང་ཆུབ་སེམས་དཔའ་དང་། འཕགས་པའི་ཚོགས་ཐམས་ཅད་ལ་མཆོད་པ་དམ་པ་བྱེད་པར་མངོན་པར་དགའ་བ་རྣམས་ལ་ཡོངས་སུ་སྐྱོང་བར་བྱེད་པ། ཐེག་པ་ཆེན་པོ་འཛིན་པ་དང་། ཡི་གེར་འདྲི་བ་དང་། ཀློག་པ་དང་། ཚིག་ཏུ་འདོན་པ་དང་། ཁ་ཏོན་བྱེད་པ་དང་། ཉན་པ་དང་། འཆང་བར་མངོན་པར་བརྩོན་པ་རྣམས་ལ་ཡོངས་སུ་སྐྱོང་བའོ། །བྲམ་ཟེ་ཆེན་པོ་སོ་སོར་འབྲང་བ་ཆེན་མོ་རིག་པའི་རྒྱལ་མོ་འདི་ནི་སངས་རྒྱས་ཀྱི་བྱང་ཆུབ་ཀྱི་བར་དུ་ཡོངས་སུ་རྫོགས་པར་བྱེད་པ་སྟེ། གང་དུ་ཡང་ཐོགས་པ་མེད་དོ། །སྟོན་པ་དགྲ་ལས་རྒྱལ་བ་ང་ཅི་ལྟ་བ་བཞིན་དུ་ཐམས་ཅད་དུ་ཡང་མཆོད་པ་ཆེན་པོ་ཐོབ་པར་འགྱུར་རོ། །ཅིས་མངོན་ཞེ་ན། རིག་པ་ཆེན་མོ་བགེགས་དང་ལོག་འདྲེན་ཐམས་ཅད་རྣམ་པར་འཇོམས་པར་བྱེད་པ་འདི་ནི་སྔོན་ཡོངས་སུ་ཤེས་ཏེ། གང་གི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་ཆེར་རབ་ཏུ་བཞད་པའི་ཞལ་ནོར་བུ་དང་། གསེར་དང་། རིན་པོ་ཆེ་འབར་བའི་འོད་ཟེར་སྣང་བ་མངོན་པར་འཕགས་པའི་རྒྱལ་པོ་དང་པོ་མངོན་པར་སངས་རྒྱས་ནས་བྱང་ཆུབ་ཀྱི་སྙིང་པོ་ག་ལ་བ་དེར་གཤེགས་ཏེ། སངས་རྒྱས་ཐམས་ཅད་ཀྱིས་བསྔགས་པའི་ཆོས་ཀྱི་འཁོར་ལོ་རབ་ཏུ་བསྐོར་བར་བཞེད་པ་དེའི་ཚེ། བཅོམ་ལྡན་འདས་དེ་ལ་བདུད་གཡོག་དང་བཅས་པ་བདུད་བྱེ་བ་ཁྲག་ཁྲིག་བརྒྱ་སྟོང་དུ་མས་བསྐོར་བ་གཟུགས་སྣ་ཚོགས་མི་སྡུག་པ། འཇིགས་འཇིགས་ལྟར་འདུག་པ། སྒྲ་མི་སྙན་པ། བདུད་ཀྱི་ཡུལ་རྣམ་པ་སྣ་ཚོགས་རྣམ་པར་འཕྲུལ་པར་བྱིན་གྱིས་རློབ་པ། མཚོན་ཆ་རྣམ་པ་སྣ་ཚོགས་ཀྱི་ཆར་འབེབ་པ། མངོན་
པར་སྤྲུལ་ནས་ལྷགས་ཏེ། ཕྱོགས་བཞི་ནས་བསྐོར་ནས་བར་ཆད་བྱ་བར་བརྩམས་པ་དང་། དེ་ནས་བཅོམ་ལྡན་འདས་རྒྱ་ཆེར་རབ་ཏུ་བཞད་པའི་ཞལ་ནོར་བུ་དང་། གསེར་དང་། རིན་པོ་ཆེ་འབར་བའི་འོད་ཟེར་སྣང་བ་མངོན་པར་འཕགས་པའི་རྒྱལ་པོ་ཡུད་ཙམ་ཞིག་ཅང་མི་གསུང་བར་བཞུགས་ནས་རིག་པའི་རྒྱལ་མོ་སོ་སོར་འབྲང་བ་ཆེན་མོ་འདི་ཡིད་ཀྱིས་ལན་བདུན་བརྗོད་དོ། །རིག་པའི་རྒྱལ་མོ་ཆེན་མོ་སོ་སོར་འབྲང་བ་ཆེན་མོ་འདི་བརྗོད་མ་ཐག་ཏུ་སྐད་ཅིག་དེ་ཉིད་ལ་བདུད་སྡིག་ཅན་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་བ་སྤུའི་བུ་ག་རེ་རེ་ནས་སྐྱེས་བུ་གོ་ཆ་གྱོན་པ་བྱེ་བ་ཁྲག་ཁྲིག་བརྒྱ་སྟོང་དུ་མ་རལ་གྲི་དང་། དགྲ་སྟ་དང་། ཞགས་པ་དང་། ཐོ་བ་དང་། རྩེ་གསུམ་པ་འབར་བ་ལག་ན་ཐོགས་པ་ཤ་སྟག་ཚིག་འདི་སྐད་དུ་གང་དག་བཅོམ་ལྡན་འདས་ལ་གནོད་པར་བྱེད་པ། བདུད་གནོད་སེམས་ཅན་རྣམས་ཟུང་ཤིག་ཟུང་ཤིག །ཆིངས་ཤིག་ཆིངས་ཤིག །གནོད་པར་སེམས་པ་ཐམས་ཅད་རབ་ཏུ་ཆོམས་ཤིག །གནོད་སེམས་ཅན་དང་། གཟའ་དང་། བགེགས་དང་། ལོག་འདྲེན་ཐམས་ཅད་ཀྱི་སྲོག་ཕྱེ་མར་གྱིས་ཤིག །ཅེས་འཛེར་ཅིང་འཐོན་པ་མཐོང་ངོ་། །དེ་ནས་བདུད་དེ་དག་ཐམས་ཅད་བྱམས་པའི་རལ་གྲིས་མངོན་པར་བཏུལ་ནས། ལ་ལས་ནི་བསླབ་པའི་གཞི་རྣམས་བཟུང་བ་ནས། ལ་ལས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་བར་དུའོ། །དེ་ལ་མཐུ་ཆེ་བ་གཞན་དག་ནི་དེ་བཞིན་གཤེགས་པའི་བ་སྤུའི་བུ་ག་ནས་འཐོན་པའི་སྐྱེས་བུ་ཆེན་པོ་དེ་དག་མཐོང་ནས། གྲོང་ཁྱེར་དེ་ཉིད་དུ་སྤ་གོང་བར་གྱུར། རྫུ་འཕྲུལ་ཡོངས་སུ་ཉམས་ཤིང་སྤོབས་པ་དང་། སྟོབས་དང་རྩལ་མེད་པར་གྱུར་ཅིང་། མདའ་གཞུ་དག་ཀྱང་ཆག་ནས་བྱེར་རོ། །དེ་ནས་བཅོམ་ལྡན་འདས་ཀྱིས་བགེགས་དང་། ལོག་འདྲེན་དང་། བདུད་སྡིག་ཅན་ཐམས་ཅད་རབ་ཏུ་བཅོམ་ནས་སངས་རྒྱས་གཞན་དག་ཇི་ལྟ་བ་བཞིན་དུ་ཆོས་ཀྱི་འཁོར་ལོ་རབ་ཏུ་བསྐོར་ཏོ། །བརྒལ་ཏོ་ཕ་རོལ་ཏུ་རབ་ཏུ་གཤེགས་སོ། །བྲམ་ཟེ་ཆེན་པོ་དེ་ལྟར་ན་རིག་པའི་རྒྱལ་མོ་སོ་སོར་འབྲང་བ་ཆེན་མོ་སྟོབས་ཀྱི་དྲག་ཤུལ་ཆེ་བ། རྫུ་འཕྲུལ་གྱི་ཕ་རོལ་ཏུ་ཕྱིན་པ་འདི་
དྲན་པ་ཙམ་གྱིས་སེམས་ཅན་བསམ་པ་ཡོངས་སུ་དག་པ་རྣམས་དང་། གཞན་གནོད་སེམས་ཅན་རྣམས་ཀྱང་སྡུག་བསྔལ་བ་དང་། འཇིགས་སྐྲག་པ་ཐམས་ཅད་ལས་ཡོངས་སུ་ཐར་བར་བྱེད་དོ། །བྲམ་ཟེ་ཆེན་པོ་དེ་ལྟ་བས་ན་རྟག་པར་རྗེས་སུ་དྲན་པའི་ཡིད་ལ་བྱེད་པས་ཡིད་ལ་བྱའོ། །ཡི་གེར་བྲིས་ཏེ་རྟག་ཏུ་ལུས་ལ་གདགས་ཤིང་བཅང་བར་བྱའོ། །ཅིས་མངོན་ཞེ་ན། སྔ་མ་བཞིན་དུ་ཉོན་ཅིག་རྒྱལ་པོ་ཚངས་པས་བྱིན་གྱི་ཡུལ་ན་གྲོང་ཁྱེར་ཆེན་པོ་འཕགས་རྒྱལ་དུ་མི་ཞིག་ལ་ཉེས་པ་བྱུང་ནས་རྒྱལ་པོ་ཚངས་པས་བྱིན་གྱིས་གཤེད་མའི་མི་རྣམས་ལ་ཁྱེད་ཀྱིས་མི་འདི་སོད་ཅིག་ཅེས་བསྒོའོ། །དེ་ནས་གཤེད་མའི་མི་དེ་དག་གིས་རྒྱལ་པོས་བསྒོ་བ་བཞིན་དུ་མི་དེ་ཁྲིད་དེ་རི་སུལ་ཞིག་ཏུ་ཕྱིན་ནས། རལ་གྲི་ཤུབས་ནས་ཕྱུང་སྟེ་བསད་པར་བཤམས་པ་དང་། དེའི་ཚེ་མི་དེས་རིག་པའི་རྒྱལ་མོ་སོ་སོར་འབྲང་བ་ཆེན་མོ་འདི་ཡིད་ལ་དྲན་ནོ། ། ཡི་གེར་བྲིས་ནས་ལག་པ་གཡས་པ་ལ་བཏགས་ཤིང་འདུག་གོ། །སེམས་ཅན་ཆེན་པོ་དེའི་རིག་པ་འདིའི་མཐུས། རལ་གྲི་མེ་ལྕེ་གཅིག་ཏུ་གྱུར་ནས་རྡུལ་གཏོར་བ་བཞིན་དུ་དུམ་བུ་དུམ་བུར་གྱུར་ཏོ། །དེ་ནས་གཤེད་མའི་མི་དེ་དག་གིས་ངེས་པ་འདི་རྒྱལ་པོ་ལ་ཞིབ་ཏུ་བསྙད་དོ། ། དེ་ནས་རྒྱལ་པོ་དེ་རབ་ཏུ་འཁྲུགས་ནས། ཀྱེ་མི་འདི་དག་ས་ཕྱོགས་ཞིག་ན་གནོད་སྦྱིན་གྱི་ཕུག་ཡོད་དེ། དེ་ན་གནོད་སྦྱིན་བརྒྱ་སྟོང་མང་པོ་ཤ་རྗེན་ཟ་བ་གནས་ཀྱིས། དེར་ཁྲིད་དེ་འོར་ཅིག་ཅེས་བསྒོའོ། །དེ་ནས་མི་དེ་གཤེད་མ་མི་དེ་དག་གིས་གནོད་སྦྱིན་གྱི་ཕུག་དེར་བོར་རོ། ། གནོད་སྦྱིན་གྱི་ཕུག་དེར་བོར་མ་ཐག་ཏུ་དེ་ནས་གནོད་སྦྱིན་དེ་དག་ཐམས་ཅད་ཡིད་དགའ་སྟེ། མི་ཤ་བཟའོ་སྙམ་དུ་བརྒྱུགས་པ་དང་། དེ་དག་གིས་སོ་སོར་འབྲང་བ་འདིའི་མཐུས་མི་དེ་ལ་མེ་ལྕེ་གཅིག་ཏུ་གྱུར་པའི་འོད་འཕྲོ་བར་རབ་ཏུ་འབར་བར་མཐོང་ངོ་། །མཐོང་ནས་ཀྱང་ཐམས་ཅད་དངངས་ནས་རང་རང་གི་ལུས་ཚིག་པར་ཡང་མཐོང་ངོ་། །དེ་ནས་གནོད་སྦྱིན་དེ་དག་ངོ་མཚར་སྐྱེས་ནས་མི་དེ་ཁྲིད་དེ་སྒོའི་ཕྱི་རོལ་དུ་བཞག་ནས་བསྐོར་བ་བྱ་བར་བརྩམས་པ་ནས་གཤེད་མའི་མི་དེ་དག་གིས་རྒྱལ་པོ་ལ་ཞིབ་ཏུ་བསྙད་པའི་བར་དུ་སྔ་མ་བཞིན་ནོ། །དེ་ནས་རྒྱལ་པོ་ཆེར་
འཁྲུགས་ཏེ་རྔམས་ནས་གལ་ཏེ་དེ་ལྟར་ན་ཁྱེད་ཅག་དེང་ལ་མི་འདི་ཆིངས་ཏེ། ཆུར་བོར་ཅིག་ཅེས་བསྒོ་བ་དང་། གཤེད་མའི་མི་དེ་དག་གིས་ཁྲིད་དེ་ཆུར་བོར་རོ། །མི་དེ་ཆུ་བོར་མ་ཐག་ཏུ་མི་དེ་ཇི་ལྟར་ཐང་ལ་འདུག་པ་བཞིན་དུ་ཆུ་མེད་པར་གྱུར་ཏོ། །ཆིངས་མ་དེ་དག་ཀྱང་དུམ་བུར་ཆད་དོ། ། རྒྱལ་པོས་དེ་སྐད་ཐོས་པ་དང་། དེ་ནས་རྒྱལ་པོ་ངོ་མཚར་དུ་གྱུར་ནས་མིག་ཚུགས་སུ་བལྟས་ཏེ། །ཨེ་མའོ་མི་འདི་ངོ་མཚར་ཏོ། །འདི་ལ་རྒྱུ་ཅི་ཞིག་ཡོད་སྙམ་དུ་རྣམ་པར་རྟོག་པར་གྱུར་ཏོ། །ཞེས་སྨྲས་སོ། །དེ་ནས་རྒྱལ་པོ་དེས་མི་དེ་བཀུག་སྟེ། ཀྱེ་མི་ཁྱོད་ཅི་ཞིག་ཤེས་ཞེས་དེ་སྐད་སྨྲས་སོ། །མི་དེས་སྨྲས་པ་རྒྱལ་པོ་ཆེན་པོ་རིག་པ་ཆེན་མོ་སོ་སོར་འབྲང་བ་ཆེན་མོ་འཆང་བ་ལས་གཞན་ནི་ཅི་ཡང་མ་འཚལ་ཏེ། ལྷ་དེ་ནི་དེའི་མཐུ་ལགས་སོ། །རྒྱལ་པོས་སྨྲས་པ་ངོ་མཚར་ཆེའོ། །རིག་པ་ཆེན་མོ་དགེ་བར་གསུངས། །འཆི་བདག་ནན་ཏུར་རྨོངས་བྱེད་པ། །སངས་རྒྱས་ཀུན་གྱིས་བྱིན་གྱིས་བརླབས། །སེམས་ཅན་ཐམས་ཅད་རབ་ཏུ་སྒྲོལ། །ནད་དང་སྡུག་བསྔལ་ཐར་བར་བྱེད། །རིག་པ་ཆེན་མོ་གཟི་བརྗིད་ཆེ། །དུས་མིན་འཆི་ལས་རབ་ཏུ་སྒྲོལ། །ནད་ཆེན་རྣམས་ནི་ཟློག་བྱེད་པ། །མགོན་པོ་ཐུགས་རྗེ་ཅན་གྱིས་གསུངས། །དེ་ནས་རྒྱལ་པོ་རབ་ཏུ་དགའ་བའི་ཡིད་ཀྱིས་རིག་པའི་རྒྱལ་མོ་ཆེན་མོ་སོ་སོར་འབྲང་བ་ཆེན་མོ་ལ་མཆོད་ནས་མངོན་པར་བསྟོད་དོ། །མི་དེ་ཡང་བློན་ཐབས་བྱིན་ཏེ། རང་གི་གཉེན་གྱི་མདུན་དུ་གྲོང་ཁྱེར་གྱི་གཙོ་བོར་དབང་བསྐུར་ཏོ། །བྲམ་ཟེ་ཆེན་པོ་དེ་ལྟར་ན་རིག་པའི་རྒྱལ་མོ་སོ་སོར་འབྲང་བ་ཆེན་མོ་འདིས་ཐམས་ཅད་དུ་ཡང་མཆོད་པ་ཆེན་པོ་རྙེད་དོ། །སེམས་ཅན་གནོད་སེམས་ཅན་ཐམས་ཅད་ཀྱིས་ཀྱང་འགལ་བར་མི་བྱའོ། །དེ་ལྟར་ན་རིག་པའི་རྒྱལ་མོ་ཆེན་མོ་འདི་ཡོངས་སུ་ཤེས་ཏེ། གང་དུ་ཡང་ཐོགས་པ་མེད་དོ། །དེ་ལྟ་བས་ན་གདོན་མི་ཟ་བར་རྟག་ཏུ་ལུས་ལ་གདགས་ཤིང་བཅང་བར་བྱའོ། །བྲམ་ཟེ་ཆེན་པོ་སྐར་མ་བཟང་པོ་ལ་ཆོ་ག་ལེགས་པར་བྱས་ཏེ། རིག་པའི་རྒྱལ་མོ་འདི་བྲི་བར་བྱའོ། །དེ་ནས་བྲམ་ཟེ་ཆེན་པོ་དེ་ཡིད་རབ་ཏུ་དགའ་ནས་བཅོམ་ལྡན་འདས་ལ་ཡན་ལག་ལྔས་ཕྱག་འཚལ་ཏེ་ཞུས་པ། བཙུན་པ་བཅོམ་ལྡན་
འདས་རིག་པའི་རྒྱལ་མོ་ཆེན་མོ་འདིའི་ཆོ་ག་ནི་ཇི་ལྟར་བགྱིས་ཏེ་བྲི་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ་ཁྱོད་ཉོན་ཅིག །སེམས་ཅན་ཀུན་ལ་སྙིང་བརྩེའི་ཕྱིར། །ངས་ནི་ཁྱོད་ལ་བཤད་པར་བྱ། །གང་གིས་སེམས་ཅན་བདེ་བྱེད་ཅིང་། ། ཉམ་ང་བ་ཡི་ལས་ལས་འགྲོལ། །ནད་རྣམས་ལས་ཀྱང་ཐར་བྱ་དང་། །བུད་མེད་སྦྲུམ་མར་འགྱུར་བ་དང་། །སེམས་ཅན་རྣམས་ཀྱི་དབུལ་བ་ཡི། །རྨ་རྣམས་གསོ་བར་བྱ་ཕྱིར་རོ། །བསྙེན་གནས་དག་ལ་གནས་གྱུར་ནས། །རྒྱུ་སྐར་རྒྱལ་དུ་ཤེས་པ་ལ། །སངས་རྒྱས་མཆོད་ལ་བརྩོན་བྱས་ཏེ། །བྱང་ཆུབ་ཕྱིར་ནི་སེམས་ཀྱང་བསྐྱེད། །སྙིང་རྗེས་ཀུན་ཏུ་བརླན་སེམས་དང་། །བྱམས་པ་དང་ཡང་ལྡན་གྱུར་ནས། །རྟག་ཏུ་སེམས་ཅན་ཐམས་ཅད་ལ། །ཕན་པ་བསྐྱེད་པ་བརྩོན་པར་བྱ། །ཙནྡན་དང་ནི་གུར་གུམ་དང་། །གླ་རྩིར་བསྲེས་པའི་ཆུས་བཀྲུས་ཏེ། །བདུག་པ་རྣམས་ཀྱིས་བདུགས་པ་ཡི། །གོས་གཙང་རྣམས་ནི་བགོ་བར་བྱ། །ས་དང་ལྕི་བ་བསྲེས་པ་ཡིས། །དེ་ཡི་འོག་ཏུ་དཀྱིལ་འཁོར་བྱ། །བུམ་པ་གང་བ་བཞི་བཞག་སྟེ། །ལྔ་པ་དཀྱིལ་འཁོར་དབུས་སུ་གཞག །དེ་ལ་རིན་ཐང་ཆེན་པོ་ཡི། །མེ་ཏོག་བདུག་པ་སྤོས་རྣམས་གསོལ། །ཙནྡན་སྤྲྀ་ཀ་དེ་བཞིན་དུ། །ཨ་ཀ་རུ་དང་དུ་རུསྐ། །ཤ་ཁ་ར་དང་ལྔ་སྦྱར་བའི། །བདུག་པ་ཆོ་ག་བཞིན་དུ་འབུལ། །ཆོ་ག་ཅི་བཞིན་དུས་བཞིན་བྱ། །ལོ་ཏོག་རྣམ་པ་སྣ་ཚོགས་རྣམས། །མེ་ཏོག་འབྲས་བུ་ས་བོན་དང་། །སྤོས་རྣམས་ཀུན་གྱིས་ལེགས་པར་བརྒྱན། །མར་དང་སྦྲང་རྩི་འོ་མ་དང་། །ནས་ཐུག་འོ་ཐུག་ལ་སོགས་པས། །གཏོར་མའི་བུམ་པ་དགང་བར་བྱ། །མཚན་མ་ཤིན་ཏུ་བཀྲ་ཤིས་པ། །ཕྱོགས་བཞི་རྣམས་སུ་གཞག་པར་བྱ། །ལྔ་པ་དཀྱིལ་འཁོར་དབུས་སུ་གཞག །སྤོས་ཀྱིས་བཀང་བའི་ཕོར་པ་རྣམས། །གྲྭ་བཞི་དག་ཏུ་གཞག་པར་བྱ། །དཀྱིལ་འཁོར་གྱི་ནི་འགྲམ་ལོགས་སུ། །སེང་ལྡེང་ཕུར་བུ་བཞི་བཙུགས་ལ། །ཚོན་སྐུད་ཁ་དོག་སྣ་ལྔ་ཡིས། །འཁོར་བར་དམ་དུ་དཀྲི་བར་བྱ། །གལ་ཏེ་བདག་
འགྲུབ་འདོད་ན་ནི། །བྲམ་ཟེ་དེ་ལྟར་བྱས་ནས་བྲི། །ཁ་ཟས་དཀར་པོ་ཟོས་ནས་སུ། །ཕན་པར་འདོད་པས་བྲི་བར་བྱ། །དར་རམ་རས་སམ་གྲོ་ག་འམ། །ཅི་ཡང་རུང་བ་གཞན་ལ་བྲི། །བུད་མེད་དག་ལ་བུ་འདོད་ན། །གིའུ་ཝང་གིས་ནི་ལེགས་པར་བྲི། །དབུས་སུ་ཁྱེའུ་ཞིག་བྲིས་ནས་ནི། །རྒྱན་རྣམས་ཀུན་གྱིས་རྣམ་པར་བརྒྱན། །དེ་བཞིན་རིན་ཆེན་གང་བའི་སྣོད། །ལག་པ་གཡོན་ན་ཐོགས་པར་བྱ། །པདྨ་རབ་ཏུ་རྒྱས་གྱུར་ཅིང་། །བརྒྱན་པ་ལ་ནི་དེ་འདུག་བྱ། །ནོར་བུ་དོ་ཤལ་གསེར་དག་དང་། །རིན་ཆེན་སྣ་ཚོགས་རྣམས་ཀྱིས་བརྒྱན། །གདུལ་བར་ཤིན་ཏུ་དཀའ་བ་བྲི། །གྲྭ་བཞི་དག་ཏུ་རི་བོ་བྲི། །གལ་ཏེ་བདེ་བར་འཚོ་འདོད་ན། །རབ་ཏུ་བསྒྲིམས་ཏེ་དེ་ལྟར་བྲི། །བྱེ་བྲག་ཏུ་ནི་སྐྱེས་པ་རྣམས། །གུར་གུམ་གྱིས་ནི་བྲི་བར་བྱ། །དེ་ཡི་དགོས་པ་འདོད་པ་རྣམས། །འགྲུབ་འགྱུར་འདི་ལ་ཐེ་ཙོམ་མེད། །པདྨ་གཉིས་སམ་ཡང་ན་གསུམ། །བཞི་འམ་ཡང་ན་ལྔ་བྲིས་ཏེ། །པདྨ་ལ་ནི་ཕྱག་རྒྱའི་མཚན། །རྣམ་པ་སྣ་ཚོགས་གཟུགས་སུ་བྲི། །དེ་བཞིན་དུ་ནི་པདྨ་རྣམས། །ཟེ་བས་ཀུན་ཏུ་འཁོར་བར་བྲི། །པདྨ་འདབ་མ་རབ་རྒྱས་ལ། ། སྡོང་བུ་དར་གྱིས་བཅིངས་པར་བྲི། །པདྨ་ལ་ནི་རྩེ་གསུམ་པ། །ཟུར་བརྒྱད་ལ་ནི་དར་དཔྱངས་བྲི། །དེ་བཞིན་པདྨ་དགྲ་སྟར་བཅས། །འདབ་མ་བརྒྱད་དང་ལྡན་པར་བྲི། །པདྨ་བཅས་པའི་རལ་གྲི་བྲི། །པདྨ་དེ་ནི་དཀར་པོར་བྱ། །པདྨའི་སྟེང་དུ་དུང་ཡང་བྲི། །ཐམས་ཅད་དུ་ཡང་རྒྱས་པར་བྱ། །ཀུན་ཏུ་ཆོ་གའི་མཚན་མ་རྣམས། །མཁས་པ་དག་གིས་བྲི་བར་བྱ། །གང་ལ་གནོད་པའི་སེམས་འབྱུང་བ། །བྱིས་པའི་གཟུགས་རྣམས་མི་བྲིའོ། །སྣ་ཚོགས་རྒྱན་གྱིས་བརྒྱན་པ་ཡི། །ལྷ་ཡི་གཟུགས་ནི་བྲི་བར་བྱ། །དགེ་སློང་ཕྱིར་ནི་རྡོ་རྗེ་འཆང་། །གནོད་སྦྱིན་བསྡིགས་པར་བརྩོན་པར་བྲི། །རྒྱལ་པོ་ཆེན་པོ་བཞི་རྣམས་ཀྱང་། །ངོས་བཞི་རྣམས་སུ་བྲི་བར་བྱ། །བྲམ་ཟེའི་ཕྱིར་ནི་དབང་ལྡན་ནོ། །རྒྱལ་རིགས་ལ་ནི་དབང་ཕྱུག་ཆེ། །དམངས་རིགས་ཕྱིར་ནི་རྟག་ཞི་བ། །ཁྱབ་འཇུག་ལེགས་པར་བྲི་བར་བྱ། །
རྗེའུ་རིགས་ཕྱིར་ནི་རྣམ་ཐོས་བུ། །ལྷ་ཡི་དབང་ཕྱུག་དབང་པོ་བྲི། །ཁྱེའུ་ཡི་ཕྱིར་ནི་སྐྱེ་དགུའི་བདག །བློ་གྲོས་ཆེན་པོ་བྲི་བར་བྱ། །སྔོ་བསངས་མདོག་ནི་གང་ཡིན་པ། །དེ་ཡི་ཆེད་དུ་ཁྲོས་པ་བྲི། །དཀར་མོའི་ཕྱིར་ནི་གྲགས་ལྡན་པ། །ཕུན་སུམ་ཚོགས་པའི་གཟུགས་སུ་བྲི། །སྦོམ་མོའི་ཕྱིར་ནི་ནོར་བུ་བཟང་། །རབ་ཏུ་བསྒྲིམས་ཏེ་བྲི་བར་བྱ། །སྐེམ་མོའི་ཕྱིར་ནི་གང་བ་བཟང་། །རང་འབྱུང་ང་ཡིས་བསྟན་པར་བྲི། །སྦྲུམ་མའི་ཕྱིར་ནི་ནག་མོ་ཆེ། །ཚངས་ལྷ་རྣམས་ཀྱང་བྲི་བར་བྱ། །གཞན་ཡང་ཅི་ལྟར་ཆོ་ག་ལས། །གོང་དུ་བཤད་པ་བཞིན་དུ་བྲི། །ལས་ཀྱི་ཆོ་ག་མཐོང་ནས་ནི། །རབ་ཏུ་བསྒྲིམས་ཏེ་དེ་བཞིན་བྲི། །རྟག་ཏུ་མགུལ་དུ་བཏགས་ན་ནི། །དེ་ནི་བདེ་བར་འགྱུར་བ་ཡིན། །རྒྱལ་མཚན་རྩེ་མོའི་པདྨ་ལ། །ཡིད་བཞིན་ནོར་བུ་འབར་བ་བྲི། །པདྨའི་སྙིང་པོར་ཞགས་པ་དང་། །དེ་བཞིན་འཁོར་ལོའང་བྲི་བར་བྱ། །པདྨའི་སྟེང་དུ་རྡོ་རྗེ་དང་། །པདྨའི་སྙིང་པོ་ཐོ་བ་བྲི། །ཆོ་ག་ལས་ནི་འབྱུང་བ་བཞིན། །པདྨའི་སྟེང་དུ་མདུང་ཐུང་བྲི། །ཆོ་ག་ལས་ནི་བརྗོད་པ་བཞིན། །ནོར་བུ་ཐམས་ཅད་རྩེ་མོ་འབར། །འོད་ཟེར་འཕྲོ་བས་རྒྱས་པ་དང་། །དར་གྱིས་བཅིངས་པ་བྲི་བར་བྱ། །ཀླུ་མགོ་གདེངས་ཀ་དགུ་ཡོད་ལ། །ནོར་བུ་རབ་ཏུ་འབར་བ་དང་། །དེ་དག་ཀུན་གྱི་སྙིང་གར་ཡང་། །རྡོ་རྗེ་གནས་པར་བསྒྲིམས་ཏེ་བྲི། །རྒྱལ་པོ་རྣམས་ཕྱིར་སྟོབས་ཅན་དང་། །དེད་དཔོན་མཁས་པས་རྟག་ཏུ་བྲི། །རིག་པ་འཛིན་པ་ཐམས་ཅད་ཀྱི། ། རིག་པའི་ལྷ་མོ་རྣམས་ཀྱང་བྲི། །ཟླ་བ་ཉི་མ་རྒྱུ་སྐར་བཅས། །སྒྲ་གཅན་མཇུག་རིངས་གཟའ་བརྒྱད་བྲི། །ཆོ་ག་བཞིན་དུ་ངེས་བྲིས་ལ། །བློ་གྲོས་ལྡན་པའི་མིས་བསྲེལ་ན། །ཟ་མ་དང་ནི་མ་ནིང་ཡང་། །བུ་ཕོ་རྙེད་པར་འགྱུར་བ་ཡིན། །འདིས་ནི་ཐམས་ཅད་འགྲུབ་པར་བྱེད། ། ཤིས་ཤིང་སྡིག་པ་ཞི་བར་བྱེད། །རང་བྱུང་གི་ནི་བཀའ་བཞིན་དུ། །གནས་ཀྱི་དམ་པ་ཐོབ་པར་འགྱུར། །འཇིག་རྟེན་འདི་ནའང་མཆོག་ཏུ་བདེ། །འཇིག་རྟེན་ཕ་རོལ་ཤིན་ཏུ་བདེ། །སུམ་ཅུ་རྩ་གསུམ་གནས་ལ་སོགས། །ལྷ་གནས་དེ་ཡི་གནས་སུ་འགྱུར། །འཛམ་
གླིང་བཟང་ཞིང་ཉམས་དགའ་བར། །ཁྱད་པར་ཅན་རིགས་གྲགས་པ་དང་། །རྒྱལ་རིགས་ཁྱད་པར་འཕགས་པ་དང་། །བྲམ་ཟེ་ཁྱད་པར་འཕགས་རྣམས་སུ། །བདག་ཉིད་ཆེན་པོ་དེ་སྐྱེས་ཏེ། །རྟག་ཏུ་རིག་དང་བདེ་བར་འགྱུར། །སོ་སོར་འབྲང་བ་འཆང་བའི་མིས། །བསོད་ནམས་ཐོབ་པ་གང་ཡིན་པ། །སངས་རྒྱས་དག་ནི་ཐམས་ཅད་ཀྱིས། །བསོད་ནམས་ཕུང་པོ་བརྗོད་མི་ནུས། །སེམས་ཅན་དམྱལ་བའི་སྒོ་རྣམས་བཅད། །མཐོ་རིས་སྒོ་རྣམས་རབ་ཏུ་ཕྱེ། །བདེ་བ་ཕུན་སུམ་ཚོགས་པ་དང་། །བློ་གྲོས་ཆེན་པོར་འགྱུར་བ་ཡིན། །སངས་རྒྱས་བྱང་ཆུབ་སེམས་དཔས་ཀྱང་། །རྟག་ཏུ་དབུགས་ནི་འབྱིན་པར་འགྱུར། །ལུས་ཀྱི་བདེ་བ་ཕུན་སུམ་ཚོགས། །སྟོབས་ཀྱང་ཆེ་བར་འགྱུར་བ་ཡིན། །རྒྱལ་བས་ཇི་སྐད་གསུངས་པ་ལྟར། །འཁོར་ལོས་སྒྱུར་བར་འགྱུར་བ་ཡིན། །མི་དང་ལྷ་རྣམས་དབུགས་འབྱིན་ཏེ། །གནོད་པར་སེམས་པ་སྐྲག་པར་བྱེད། །གང་ཕྱིར་རིག་པ་ལེགས་བཤད་པ། །དེ་ནི་རིང་པོར་མི་ཐོགས་སོ། །དེ་ནི་མཚོན་གྱིས་མི་ཚུགས་ཏེ། །དུག་དང་མེས་ཀྱང་ཚུགས་མི་འགྱུར། །དུས་མིན་འཆི་བའི་སྡིག་པ་ཡང་། །དེ་ལས་ཐག་ནི་རིང་དུ་འགྲོ། །རྣམ་པ་ཀུན་ཏུ་ཉན་པ་འམ། །མཐོང་བ་དང་ནི་རེག་པའང་རུང་། །འབྱུང་པོ་གདོན་དང་རྩོད་པ་དང་། །ཆུ་དང་མེ་ཡིས་འཇིགས་པ་དང་། །གཅན་གཟན་སྦྲུལ་དང་སེང་གེ་དང་། །ཀླུ་དང་ནད་ནི་མི་བཟད་རྣམས། །གང་ལ་རིག་པ་ལེགས་བཤད་པ། །དེ་ལ་དེ་དག་ཀུན་མི་འབྱུང་། ། དེ་དག་སེམས་ཅན་ཀུན་མཆོག་འགྱུར། །བདུད་རྣམས་ཀུན་གྱིས་ཐམས་ཅད་དུ། །མཆོད་པར་འགྱུར་བའི་འོས་ཡིན་ཏེ། །ཡང་དག་བཤད་ཀྱིས་མཉན་པར་བྱོས། །རིག་པའི་རྒྱལ་མོ་སོ་སོར་འབྲང་བ་ཆེན་མོའི་ཆོ་ག་རྫོགས་སོ།། །།དེ་ནས་སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་རིག་སྔགས་འཆང་བ་བསྲུང་བའི་ཚུལ་གྱི་ཆོ་ག་བཤད་པར་བྱའོ། །བསྲུང་བའི་ཆོ་ག་གང་ཞིག་གིས། །དངོས་གྲུབ་ཆེན་པོ་འགྲུབ་འགྱུར་བ། །གང་དང་གང་དུ་བསྲུང་བྱས་ན། །དོན་ཡོད་འགྱུར་ཏེ་ཐེ་ཚོམ་མེད། །འཇིགས་མེད་རིམས་ཀྱིས་མི་བཏབ་སྟེ། །
གཟའ་རྣམས་ཐམས་ཅད་ཟློག་པར་བྱེད། །རྒྱུ་སྐར་རྣམས་ཀྱང་མཐུན་པར་འགྱུར། །ལས་ཀྱི་ལུ་གུ་རྒྱུད་ཀྱང་གཅོད། །བཟའ་ཉེས་པ་དང་སྒོམ་ཉེས་དང་། །དགྲ་ཚོགས་ཀུན་གྱིས་བྱས་པ་དང་། །གནོད་པར་བལྟས་དང་བྲི་ཉེས་དང་། །བྱད་དང་གང་ཡང་མི་བཟད་དང་། །ཕྱེ་མ་སྔགས་ཀྱིས་བཏབ་པ་དང་། །དུག་འཐུང་བ་དང་སྦྱར་བའི་དུག །གང་ཞིག་བསྲུང་བ་འཆང་དེ་ལ། །དེ་དག་ཐམས་ཅད་ཞི་བར་འགྱུར། །གང་ཞིག་རིག་ལས་འགལ་བྱེད་པ། །ཡན་ལག་རྣམས་ལ་རྣམ་པར་སྨིན། །སོ་སོར་འབྲང་བའི་དམོད་བསྡིགས་ན། །ཕ་རོལ་འཁོར་ནི་མི་བཟད་དང་། །འཇིགས་པ་ཆེན་པོ་དགྲ་ཡི་རྣམས། །དེ་དག་ཐམས་ཅད་རབ་ཏུ་འབྲོས། །སངས་རྒྱས་ཐམས་ཅད་མཁྱེན་པ་དང་། །བྱང་ཆུབ་སེམས་དཔའ་དེས་པས་བསྲུང་། །ཉན་ཐོས་དཀའ་ཐུབ་ཆེན་པོ་དང་། །རང་སངས་རྒྱས་ཀྱིས་བསྲུང་བར་འགྱུར། །གཞན་ཡང་རྣམ་པ་མང་པོ་ཡི། །ལྷ་ཀླུ་རྫུ་འཕྲུལ་ཆེན་པོ་རྣམས། །འདི་ལ་རྟག་ཏུ་བརྩོན་བྱེད་པ། །དེ་ལ་སྲུང་བ་བྱེད་པར་འགྱུར། །རིག་པ་ཡི་ནི་རྒྱལ་མོ་འདི། །ཐོས་པ་ཙམ་གྱིས་མི་མཆོག་རྣམས། །ཀུན་ཏུ་འཇིགས་པ་མེད་འགྱུར་ཞེས། །ཐུབ་པ་ཡིས་ནི་དེ་སྐད་གསུངས། །རྨི་ལམ་ངན་དང་ངན་བྱས་དང་། །གང་ཡང་ནད་འགོ་མི་བཟད་དང་། །ནད་ཀྱིས་བཏབ་དང་ནད་ཆེན་གྱིས། །གང་དག་ཟིན་ཅིང་ཁྲག་སྐྱུགས་དང་། །གཞན་ཡང་རྣམ་པ་མང་པོའི་ནད། ། འབྲས་དང་ཤུ་བ་སྐེམ་པོ་དང་། །གང་ཡང་གནོད་པ་མི་བཟད་པས། །མི་ཡི་སྐྱེ་དགུ་ཟིན་པ་དང་། །མི་རྣམས་མ་རུངས་བྱ་བའི་ཕྱིར། །མཆོག་ཏུ་མི་བཟད་གནོད་བྱེད་རྣམས། །བསྲུང་བ་སྟོབས་ཆེན་ག་ལ་བར། །དེ་དག་ཐམས་ཅད་མི་འབྱུང་ངོ་། །འདི་ལས་བསྲུང་བ་བྱས་ནས་ནི། །བཅིངས་པ་དག་ཀྱང་གྲོལ་བར་འགྱུར། །སོ་སོར་འབྲང་བ་བྲིས་པས་ཀྱང་། །གལ་ཏེ་དུས་ཀྱི་ཞགས་པ་ཡིས། །བཟུང་ནས་གཤིན་རྗེའི་གནས་ཁྲིད་པ། །དེ་ཡི་ཚེ་ནི་རྣམ་པར་འཕེལ། །གང་ཞིག་ཚེ་ནི་ཟད་གྱུར་ཏམ། །ཞག་བདུན་ནི་འཆི་འགྱུར་བ། །
ཡི་གེ་བྲིས་པའི་བར་ཙམ་གྱིས། །འཚོ་བར་འགྱུར་ཏེ་ཐེ་ཚོམ་མེད། །ཆོ་ག་བཞིན་དུ་བསྲུང་བྱས་པའམ། །ཡང་ན་ཐོས་པ་ཙམ་གྱིས་ཀྱང་། །ཀུན་ཏུ་དགེ་བ་ཐོབ་པར་འགྱུར། །འདོད་པ་བཞིན་དུ་བདེ་བར་འཚོ། །གང་དག་སུམ་ཅུ་རྩ་གསུམ་ལྷ། །སྟོང་ཕྲག་དྲུག་ཅུ་རྩ་བརྒྱད་དང་། །བྱེ་བ་ཁྲག་ཁྲིག་ཕྲག་བརྒྱ་དང་། །བརྒྱ་བྱིན་མདུན་ནས་འགྲོ་བ་ཀུན། །སེམས་ཅན་དེ་ལ་བསྲུང་བའི་ཕྱིར། །ཕྱི་བཞིན་འབྲང་ཞིང་གནས་པར་བྱེད། །འཇིག་རྟེན་སྐྱོང་བ་བཞི་པོ་དང་། །ལག་ན་རྡོ་རྗེ་སྟོབས་ཆེན་ཡང་། །རིག་པའི་རིགས་ནི་བརྒྱ་དག་དང་། ། ལྷན་ཅིག་རྟག་ཏུ་སྲུང་བར་བྱེད། །ཟླ་བ་ཡིད་བཟང་ཉི་མ་དང་། །ཚངས་པ་ཁྱབ་འཇུག་དབང་ཕྱུག་ཆེ། །ནོར་བུ་བཟང་དང་གཤིན་རྗེ་དང་། །སྟོབས་ཀྱི་ལྷ་ནི་སྟོབས་ཆེན་དང་། །གང་བ་བཟང་པོ་དཔལ་ཆེན་དང་། །འཕྲོག་མ་བུ་དང་བཅས་པ་དང་། །ལྔ་འཛིན་པ་དང་ལྔས་རྩེན་དང་། །སྨིན་དྲུག་བུ་དང་ཚོགས་དབང་དང་། །ལྷ་མོ་ཆེན་མོ་དཔལ་ཅན་དང་། །རྣམ་ཐོས་བུ་དང་དབྱངས་ཅན་དང་། །དུང་ཅན་དང་ནི་མེ་ཏོག་གོ། །དེ་བཞིན་རལ་པ་གཅིག་པ་དང་། །གནོད་སྦྱིན་ཆེན་པོ་དཔལ་ཡོན་ཅན། །རྟག་ཏུ་སྲུང་བ་བྱེད་པར་འགྱུར། །ཟ་མ་རྣམས་ཀྱི་བུ་ཡང་སྐྱེད། །མངལ་ན་གནས་པ་བདེ་བར་བྱེད། །དེ་ནི་ཇི་སྲིད་འཚོ་བའི་བར། །འདི་ནི་བསྲུང་བ་ཆེན་པོར་འགྱུར། །འཇིགས་མེད་འཐབ་མོའི་གཡུལ་འགྱེད་པར། །དཔའ་བོ་རྣམས་ལ་རྟག་རྒྱལ་སྦྱིན། །ཆོས་ལ་ངེས་པའི་ལྷ་རྣམས་ལ། །འདིས་ནི་སྣང་བ་སྦྱིན་པར་བྱེད། །སྡིག་པ་རྣམ་པར་གཞིག་པའི་ཕྱིར། །གུས་པར་བྱེད་དེ་བྲིས་ན་ནི། །དེ་བཞིན་གཤེགས་དང་དེ་བཞིན་དུ། །བྱང་ཆུབ་སེམས་དཔའ་འང་བལྟ་བར་འགྱུར། །དེ་ཡི་གྲགས་པ་རྣམ་པར་འཕེལ། །བསོད་ནམས་དང་ནི་ཚེ་ཡང་འཕེལ། །ནོར་རྣམས་དང་ནི་འབྲུ་དག་ཀྱང་། །འབྱོར་པར་འགྱུར་ཏེ་ཐེ་ཚོམ་མེད། །བདེ་བར་གཉིད་ཀྱིས་ལོག་པ་དང་། །བདེ་བར་རབ་ཏུ་སད་པར་འགྱུར། །འབྱུང་པོའི་ཚོགས་རྣམས་ཐམས་ཅད་དང་། །དགྲ་ཀུན་གྱིས་ཀྱང་མི་རྫིའོ། །གཡུལ་འགྱེད་པ་ཡི་ཚེ་ན་ཡང་། །རིག་པ་སྒྲུབ་པ་བྱས་ན་ནི། །
བསྲུང་བ་བླ་ན་མེད་པ་འདིས། །རྟག་ཏུ་རྒྱལ་བར་འགྱུར་བར་བྱེད། །བདེ་བར་རིག་པ་སྒྲུབ་བྱེད་ཅིང་། །དེ་ལ་བགེགས་ནི་འབྱུང་མི་འགྱུར། །དེ་ཡིས་བསམ་པ་ཐམས་ཅད་འགྲུབ། །དཀྱིལ་འཁོར་ཀུན་ཏུ་ཞུགས་པ་ཡིན། །སྐྱེ་བ་དག་ནི་ཐམས་ཅད་དུ། ། དེ་ནི་མྱུར་དུ་དམ་ཚིག་ཤེས། །རྒྱལ་བའི་ཡོན་ཏན་འཛིན་པའི་ཕྱིར། །དེ་ནི་ཡིད་བརྟན་འོས་ཡིན་ནོ། །བཀྲ་ཤིས་ཐམས་ཅད་རབ་ཏུ་རྫོགས། །བསམ་པ་ཐམས་ཅད་གྲུབ་པར་བྱེད། །འདི་ནི་བྲིས་པ་ཙམ་གྱིས་ཀྱང་། །བདེ་བ་ཐམས་ཅད་འབྱོར་པར་འགྱུར། །བདེ་བར་འཆི་བའི་དུས་བྱས་ནས། །མཐོ་རིས་སུ་ནི་འགྲོ་བར་འགྱུར། །འཐབ་པ་དང་ནི་རྩོད་པ་དང་། །འགྱེད་པ་མཆོག་ཏུ་མི་བཟད་པར། །འཇིགས་པ་ཀུན་ལས་གྲོལ་འགྱུར་ཏེ། །རྒྱལ་བས་ཇི་སྐད་གསུངས་བཞིན་ནོ། །སྐྱེ་བ་རྣམས་སུ་སྐྱེ་བ་ན། །རྟག་ཏུ་སྐྱེ་དྲན་ཐེ་ཚོམ་མེད། །རྒྱལ་པོ་བཙུན་མོ་འཁོར་བཅས་པ། །འདི་ཡི་དབང་དུ་འགྱུར་བ་ཡིན། །འཇིག་རྟེན་དགེ་བར་གྲགས་པ་ཡིན། །རྟག་ཏུ་ཐུན་མོང་འགྱུར་བ་ཡིན། །དེ་ནི་ཀུན་ལ་སྡུག་པར་འགྱུར། །ལྷ་དང་མི་ནི་གང་ཡང་རུང་། །ཉིན་དང་མཚན་རྣམས་རྟག་པར་ཡང་། ། དེ་ལ་སྲུང་བ་བྱེད་པར་འགྱུར། །ཡང་དག་རྫོགས་པའི་སངས་རྒྱས་གསུངས། །སྔགས་ཚིག་འདི་དག་འདིར་འགྲུབ་བོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐུགས་རྗེ་ཆེན་པོ་དང་ལྡན་པ་ཤཱཀྱ་ཐུབ་པ་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་ཐམས་ཅད་ལ་ཕྱག་འཚལ་ལོ། །སངས་རྒྱས་བསྟན་པ་འཕེལ་བྱའི་ཕྱིར། །དེ་ལ་གུས་པས་ཕྱག་འཚལ་ནས། ། སེམས་ཅན་ཀུན་ལ་སྙིང་བརྩེའི་ཕྱིར། །ད་ནི་ང་ཡིས་བརྗོད་པར་བྱ། །རིག་པ་གཟི་བརྗིད་ཆེན་པོ་འདི། །སྟོབས་ཆེན་ཕ་རོལ་གནོན་པ་སྟེ། །རྡོ་རྗེ་གདན་ལ་ཐུག་པ་ཡིས། །འདི་ནི་གསུངས་མ་ཐག་ཏུ་ཡང་། །བདུད་དང་བདུད་ཀྱི་རིས་རྣམས་དང་། །གཟའ་དང་ལོག་
པར་འདྲེན་པ་དང་། །བགེགས་རྣམས་ཇི་སྙེད་གང་ཡོད་པ། །ཐམས་ཅད་དེ་ཡི་མོད་ལ་འབྱེར། །ཏདྱ་ཐཱ། ༀ་གི་རི་གི་རི། གི་རི་ཎི་གི་རི་ཎི། གི་རི་བ་ཏི། གུཎ་བ་ཏི། ཨཱ་ཀཱ་ཤ་བ་ཏི། ཨཱ་ཀཱ་ཤ་བི་ཤུད་དྷེ། སརྦ་པཱ་པ་བི་ག་ཏེ། ཨཱ་ཀཱ་ཤ །ག་ག་ན་ཏ་ལེ། ཨཱ་ཀཱ་ཤ་བི་ཙཱ་རི་ཎི། ཛྭཱ་ལི་ཏ་ཤི་ཁ་རེ། །མ་ཎི་མུཀྟི་ཀ །ཁ་ཙི་ཏ་མཽ་ལི་དྷ་རེ། སུ་ཀེ་ཤེ །མེ་ཀེ་ཤེ་སུ་ཥ་སུ་བཀྟྲེ །སུ་ནེ་ཏྲེ། སུ་བརྞྞེ། སུ་བརྞྞ་གཽ་རི། ཨ་ཏཱི་ཏེ། ཨ་ནུངྤནྣེ། ཨ་ནཱ་ག་ཏེ། པྲཏྱུཏྤནྣེ་ན་མ། ན་མཿསརྦེ་ཥཱན། བུདྡྷཱ་ནཱན་ཛྭ་ལི་ཏ། ཏེ་ཛ་སཱ་ན། བུདྡྷེ། སུ་བུདྡྷེ། བྷ་ག་བ་ཏི། སུ་རཀྵ་ཎི། སུ་ཀྵ་མེ། སུ་པྲ་བྷེ། སུ་ད་མེ། སུ་དཱནྟེ། བ་རེ་བརྟེ། བྷ་ག་བ་ཏི། བྷ་དྲ་བ་ཏི། བྷ་དྲེ་སུ་བྷ་དྲེ། བི་མ་ལེ། ཛ་ཡ་བྷ་དྲེ། པྲ་ཙཎྜེ། ཙཎྜེ། པྲ་ཙཎྜེ། པྲ་ཙཎྜེ། བཛྲ་ཙཎྜེ། མ་ཧཱ་ཙཎྜེ། མ་ཧཱ་ཙཎྜེ། གཽ་རི། གནྡྷཱརི། གཽ་རི། ཙཽ་རི། ཙཎྜ་ལི། མཱ་ཏཱཾ་གི། བརྩ་སི། པུཀྐ་སི། སུ་མ་ཏི། ཤ་བ་རི། ཤཱ་བ་རི། ཤཾ་ཀ་རི། དྲ་མི་ཌི། དྲཱ་མི་ཌི། རཽ་ཏྲི་ཎི། སརྦ་གྲ་ཧ་བི་དཱ་རི་ཎི། ཨརྠ་སཱ་དྷ་ནི། ཧ་ན་ཧ་ན། སརྦ་ཤ་ཏྲཱུ་ཎཱཾ། ད་ཧ་ད་ཧ། སརྦ་དུཥྚཱན། པྲེ་ཏ་བི་ཤཱ་ཙ་ཌཱ་ཀི་ནཱི་ནཱཾ། མ་ནུ་ཥྱཱ། ཨ་མ་ནུ་ཥྱཱ་ནཱཉྩ། པ་ཙ་པ་ཙ་། ཧྲྀ་ད་ཡན། གདོན་མ་རུངས་པ་རྣམས་ཀྱི་སྲོག་གཞོམ་དུ་གསོལ། བཅོམ་ལྡན་འདས་མ་བདག་གི་སྡིག་པ་ཐམས་ཅད་གཞིག་ཏུ་གསོལ། གཞིག་ཏུ་གསོལ། ཐམས་ཅད་དུ་འཇིགས་པ་དང་། གནོད་པ་ཐམས་ཅད་ལས་བདག་ལ་བསྲུང་དུ་གསོལ། བསྲུང་དུ་གསོལ། མ་རུངས་པ་ཐམས་ཅད་བཅིང་དུ་གསོལ། སརྦ་ཀིལྤི་ཥ་ནཱ་ཤ་ནི། མཱརྟཎྜ། མྲྀ་ཏྱུ་དཎྜ་ནི་བཱ་ར་ཎི་མཱ་ན་ན། དཎྜ་མཱ་ན་ནི། མ་ཧཱ་མཱ་ནི་ནི། མ་ཧཱ་བི་ཎི་ཊི་ཙ་ལེ་ཙ་ལེ། ཙི་ཊི་ཙི་ཊི། བི་ཊི་བི་ཊི། ནི་ཊི་ནི་ཊི། ཏི་ཊི་ཏི་ཊི། ན་ཏུ་ཊི། གཽ་རི་ནི། བཱི་རི་ཎཱི། པྲ་བ་ར་ས་མ་རེ། ཙཎྜཱ་ལི། མཱ་ཏཾ་གི། རུནྡྷ་སི། ས་ར་སི། བརྩ་སི། སུ་མ་ཏི། པུཀྐ་སི། ཤ་བ་རི། ཤཱ་བ་རི། ཤཾ་ཀ་རི། དྲ་མི་ཌི། དྲཱ་མི་ཌི། ད་ཧ་ནི་པ་ཙ་ནི། མ་ཐ་ནི། མརྡ་ནི། ས་ར་ལི། ས་ར་ལེ། ས་ར་བཾ་བྷེ། ཧཱི་ན་མངྷྱོད་ཀྲིཥྚ། བི་དྷཱ་ར་ཎི། བི་དྷཱ་རི་ཎི། མ་ཧི་ལེ། མ་ཧི་ལེ། མ་ཧཱ་མ་ཧི་ལེ། ནི་ག་ཌེ། ནི་ག་ཌ། བྷཉྫེ། མཏྟི། མཏྟི་ནི། དཱནྟི།
ཙཀྲེ། ཙཀྲ་བཱ་ཀི་ནི། ཛྭ་ལེ་ཛྭ་ལེ། ཛྭཱ་ལེ་ཛྭཱ་ལེ། ཛྭཱ་ལ་ནི། ཤ་བ་རི་ཤ་བ་རི། ཤཱ་བ་རི་ཤཱ་བ་རི། སརྦ་བྱཱ་དྷི་ཧ་ར་ནི། ཙཱུ་ཌི་ཙཱུ་ཌི། ཙཱུ་ཌ་ནི་ཙཱུ་ཌ་ནི། མ་ཧཱ་ཙཱུ་ཌི་ནི། ནི་མི་ནི་མི། ནི་མིནྡྷ་རི། ཏྲི་ལོ་ཀ །ད་ཧ་ནི། ཏྲི་ལོ་ཀ་ཨཱ་ལོ་ཀ་ཀཱ་རི། ཏྲཻ་དྷཱ་ཏུ་ཀ་བྱཱ་བ་ལོ་ཀི་ནི། བཛྲེ། པ་ར་ཤུ། པཱ་ཤ །མུངྒ་ར། ཁཌྒ། ཤཾ་ཁ། ཙ་ཀྲ །ཏྲི་ཤཱུ་ལ། ཙིན་ཏཱ་མ་ཎི། མ་ཧཱ་བིདྱཱ་དྷ་རི་ཎི། བདག་ཐམས་ཅད་དུ་གནས་ཐམས་ཅད་ན་གནས་པ་ན་མ་རུངས་པ་ཐམས་ཅད་དང་། མི་དང་མི་མ་ཡིན་པའི་འཇིགས་པ་ཐམས་ཅད་དང་། ནད་ཐམས་ཅད་དང་།འཇིགས་པ་ཐམས་ཅད་ལས་བསྲུང་དུ་གསོལ་བསྲུང་དུ་གསོལ། བཛྲེ་བཛྲེ་བཛྲ་པ་ཏི། བཛྲ་པཱ་ཎི་དྷ་རེ། ཧི་ལི་ཧི་ལི། མི་ལི་མི་ལི། ཀི་ལི་ཀི་ལི། ཙི་ལི་ཙི་ལི། བི་ལི་བི་ལི། སི་ལི་སི་ལི། བ་ར་བ་ར། བ་ར་དེ། སརྦ་ཏྲ། ཛ་ཡ་ལ་བ་དྷེ་སྭཱ་ཧཱ། སརྦ་པཱ་པ། བི་དཱ་རི་ཎི་སྭཱ་ཧཱ། སརྦ་ཏྲ། སརྦ་བྱཱ་དྷི་ཧ་ར་ཎི་སྭཱ་ཧཱ། སརྦ་ཏྲ། སརྦ་ཤ་ཏྲུཾ་བྷ་ཡ་ཧ་ར་ཎི་སྭཱ་ཧཱ། སརྦ་བྷ་ར་ཎི་སྭཱ་ཧཱ། སྭ་སྟིར་བྷ་བ་ཏུ་མཱཾ་སྭཱ་ཧཱ། ཤཱནྟིཾ་ཀ་རི་སྭཱ་ཧཱ། པུཥྚིཾ་ཀ་རི་སྭཱ་ཧཱ། བ་ལ་བར་དྷ་རི་ཎི་སྭཱ་ཧཱ། ཛ་ཡ་ཏུ། ཛ་ཡེ་ཛ་ཡེ། ཛ་ཡ་བྷ་ཏི། ཀ་མ་ལེ། བི་མ་ལེ། བི་པུ་ལེ་སྭཱ་ཧཱ། སརྦ་ཏ་ཐཱ་ག་ཏ་མུ་སྭཱ་ཧཱ། ༀ་བྷུ་རི་མ་ཧཱ་ཤཱནྟི་སྭཱ་ཧཱ། ༀ་བྷུ་རི་བྷུ་རི། བཛྲ་བ་ཏི། སརྦ་ཏ་ཐཱ་ག་ཏ་ཧྲྀ་ད་ཡ། པཱུ་ར་ཎི། ཨཱ་ཡུཿསན་དྷཱ་ར་ཎི། བ་ལ་བ་ལ། བ་ལ་བ་ཏི། ཛ་ཡ་བི་ཛྱེ། ཧཱུྃ་ཧཱུྃ། ཕཊ་ཕཊ་སྭཱ་ཧཱ། བྲམ་ཟེ་ཆེན་པོ་གང་ལ་ལ་ཞིག་གིས་དེ་བཞིན་གཤེགས་པའི་སྐུ་རིག་པའི་གསང་སྔགས་ཀྱི་གཞིའི་གཟུངས་འདིས་ཡོངས་སུ་བསྲུང་བ་བྱས་ཤིང་ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་བདེ་ལེགས་སུ་འགྱུར་བ་དང་། དབྱུག་པ་སྤང་བ་དང་། མཚོན་ཆ་སྤང་བ་བྱས་ན། དེ་ཚེ་ཡོངས་སུ་ཟད་པ་ལས་ཀྱང་རྣམ་པར་འཕེལ་ཏེ་རིང་དུ་བདེ་བར་འཚོ་བར་འགྱུར་རོ། །དྲན་པ་ཕུན་སུམ་ཚོགས་པར་འགྱུར་རོ། །བསྐྲད་པ་ཙམ་དང་། རྡོ་རྗེས་བྱབས་པ་ཙམ་གྱིས་དུས་མ་ཡིན་པར་འཆི་བ་དང་། ནད་ཆེན་པོ་ལས་ཡོངས་སུ་ཐར་བར་འགྱུར་རོ། །དེའི་ནད་ཐམས་
ཅད་ཀྱང་རབ་ཏུ་ཞི་བར་འགྱུར་རོ། །རྒྱུན་རིང་དུ་ན་བ་ལ་ཡང་བྱབས་པ་ཙམ་གྱིས་རབ་ཏུ་ཞི་བར་འགྱུར་རོ། །ཉིན་གཅིག་བཞིན་དུ་ཁ་ཏོན་དུ་བཏོན་ན་ཤེས་རབ་ཆེན་པོར་འགྱུར་རོ། །གཟི་བརྗིད་དང་། སྟོབས་དང་། བརྩོན་འགྲུས་དང་། སྤོབས་པ་ཕུན་སུམ་ཚོགས་པར་འགྱུར་རོ། །དེའི་སྡིག་པ་དང་ལས་ཀྱི་སྒྲིབ་པ་གདོན་མི་ཟ་བར་མྱོང་བར་འགྱུར་བ་ཐམས་ཅད་ཀྱང་མ་ལུས་པར་ཡོངས་སུ་ཟད་པར་འགྱུར་རོ། །སངས་རྒྱས་དང་། བྱང་ཆུབ་སེམས་དཔའ་དང་། ལྷ་དང་། ཀླུ་དང་། གནོད་སྦྱིན་ལ་སོགས་པ་ཐམས་ཅད་ཀྱང་དེའི་ལུས་ལ་གཟི་བརྗིད་དང་། སྟོབས་དང་། བརྩོན་འགྲུས་སྣོན་པར་འགྱུར་རོ། །དགའ་བ་ཆེན་པོ་མང་བར་འགྱུར་རོ། །བྲམ་ཟེ་ཆེན་པོ་ཐ་ན་རིག་པ་ཆེན་མོའི་གསང་སྔགས་ཀྱི་གཞི་འདི་དུད་འགྲོའི་སྐྱེ་གནས་སུ་སོང་བ་རི་དགས་དང་། བྱའི་རྣ་ལམ་དུ་ཐོས་ན་ཡང་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ན། སོ་སོར་འབྲང་བ་ཆེན་མོའི་གཟུངས་འདི་ལ་དད་པའི་རིགས་ཀྱི་བུ་འམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། རྒྱལ་པོའམ། རྒྱལ་པོའི་བློན་པོ་འམ། བྲམ་ཟེའམ། རྒྱལ་རིགས་སམ། དེ་ལས་གཞན་པ་འགའ་ཞིག་གིས་ལན་ཅིག་ཐོས་ཏེ། ཐོས་ནས་ཀྱང་དད་པ་ཆེན་པོ་དང་། གུས་པ་དང་། ལྷག་པའི་བསམ་པས་ཡི་གེར་འདྲི་འམ། ཡི་གེར་འདྲིར་འཇུག་གམ། འཆང་ངམ། ཀློག་གམ། ཡིད་དྲག་པོས་སྒོམ་པ་འམ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་ལྟ་ཅི་སྨོས་ཏེ། བྲམ་ཟེ་ཆེན་པོ་དེ་ལ་དུས་མ་ཡིན་པར་འཆི་བ་བརྒྱད་རྣམ་པ་ཐམས་ཅད་དུ་འབྱུང་དུ་མ་དོགས་ཤིག །དེའི་ལུས་ལ་ནད་ཆེན་པོ་རྣམས་འབྱུང་བར་མི་འགྱུར་རོ། །དེའི་ལུས་ལ་མེས་མི་ཚུགས། དུག་གིས་མ་ཡིན། མཚོན་གྱིས་མ་ཡིན། དུག་སྦྱར་མས་མ་ཡིན། བྱད་ཀྱིས་མ་ཡིན། གཡེངས་བྱེད་ཀྱིས་མ་ཡིན། སྔགས་ཀྱི་ལས་ཀྱིས་མ་ཡིན། ཕྱེ་མའི་སྦྱོར་བས་མ་ཡིན། ཡན་ལག་ན་བར་མི་འགྱུར། རིམས་ཀྱིས་བཏབ་པར་མི་འགྱུར། ཀླད་པ་ན་བ་དང་། ཉིན་གཅིག་པ་དང་།
ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། ཉིན་བདུན་པའི་རིམས་རྣམས་དེའི་ལུས་ལ་འབྱུང་བར་མི་འགྱུར་རོ། །དྲན་བཞིན་དུ་བདེ་བར་གཉིད་ལོག་ཅིང་དྲན་བཞིན་དུ་བདེ་བར་སད་པར་འགྱུར་རོ། །ཡོངས་སུ་མྱ་ངན་ལས་འདས་པ་ཆེན་པོ་ཡང་འཐོབ་པར་འགྱུར་རོ། །ལན་ཅིག་གིས་ཆོས་དང་ལྡན་པའི་དབང་ཕྱུག་ཆེན་པོ་ཐོབ་པར་འགྱུར་རོ། །དེ་གང་དང་གང་དུ་སྐྱེ་བའི་སྐྱེ་བ་དེ་དང་དེར་སྐྱེ་བ་དྲན་པར་འགྱུར་རོ། །སེམས་ཅན་ཐམས་ཅད་ཀྱང་བྱམས་པར་འགྱུར་རོ། །ཕྱག་བྱ་བའི་གནས་སུ་འགྱུར་རོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་ཀྱི་འགྲོ་བ་ཐིབས་པོ་ཀུན་དང་། ཡི་དགས་སུ་སྐྱེ་བ་རྣམས་ལས་ཡོངས་སུ་ཐར་བར་འགྱུར་རོ། །ཇི་ལྟར་ཉི་མའི་དཀྱིལ་འཁོར་སེམས་ཅན་ཐམས་ཅད་ལ་སྣང་བར་བྱེད་པ་དེ་བཞིན་དུ་འོད་ཟེར་གྱིས་སྣང་བ་བྱེད་པར་འགྱུར་རོ། །ཇི་ལྟར་ཟླ་བའི་དཀྱིལ་འཁོར་བདུད་རྩིའི་མཐུས་སེམས་ཅན་ཐམས་ཅད་ཀྱི་ལུས་སིམ་པར་བྱེད་པ་དེ་བཞིན་དུ། ཆོས་ཀྱི་བདུད་རྩིས་སེམས་ཅན་ཐམས་ཅད་ཀྱི་རྒྱུད་སིམ་པར་བྱེད་པར་འགྱུར་རོ། །རིག་པའི་རྒྱལ་མོ་ཆེན་མོ་སོ་སོར་འབྲང་བ་ཆེན་མོའི་མཐུས་དེ་ལ་གནོད་སྦྱིན་དང་། སྲིན་པོ་དང་། འབྱུང་པོ་དང་། ཡི་དགས་དང་། ཤ་ཟ་དང་། སྐེམ་བྱེད་དང་། བརྗེད་བྱེད་དང་། མཁའ་འགྲོ་མ་དང་། གདོན་མ་རུངས་པ་ཐམས་ཅད་དང་། བགེགས་དང་། ལོག་འདྲེན་ལ་སོགས་པ་ཐམས་ཅད་ཀྱིས་གཙེ་བར་མི་ནུས་སོ། །དེ་དག་འོངས་ན་ཡང་རིག་པའི་རྒྱལ་མོ་ཆེན་མོ་འདི་དྲན་པར་བྱའོ། །འོན་ཀྱང་འདི་ལྟ་སྟེ། རིག་པའི་རྒྱལ་མོ་ཆེན་མོ་སོ་སོར་འབྲང་བ་ཆེན་མོ་འདི་ཉིད་ཀྱི་མཐུས་མ་རུངས་པ་དེ་དག་ཐམས་ཅད་རིག་པ་འཛིན་པའི་དབང་དུ་འགྱུར་ཏེ། བསྒོ་བ་བཞིན་དུ་ངག་ཉན་པར་འགྱུར་རོ། །དེ་ལ་དགྲའི་འཇིགས་པ་མི་འབྱུང་ངོ་། །དགྲའི་ཚོགས་ཐམས་ཅད་དང་། རྒྱལ་པོ་དང་། རྒྱལ་པོའི་བློན་པོ་ཆེན་པོ་དང་། བྲམ་ཟེ་དང་། ཁྱིམ་བདག་རྣམས་ཀྱང་འགལ་བར་བྱེད་པར་མི་འགྱུར་རོ། །ཐ་ན་གསད་པར་འོས་པ་ཞིག་ལ་གཤེད་མ་མི་རྣམས་ཀྱིས་མཚོན་གདབ་པར་གཟས་ན་ཡང་མཚོན་རྣམས་རྡུལ་བཞིན་དུམ་བུ་དུམ་
བུར་ཆག་པར་འགྱུར་རོ། །དེ་ཉིད་ཀྱི་དུས་ན་དེ་ལ་ཆོས་ཐམས་ཅད་མངོན་སུམ་དུ་འགྱུར་རོ། །དེའི་དྲན་པའི་སྟོབས་ཀྱང་ཆེར་འགྱུར་རོ། །འདི་ནི་སྲིན་པོ་འཇོམས་པའི་མཆོག །གཙང་ཞིང་སྡིག་པ་འཇིག་པར་བྱེད། །དཔལ་དུ་བྱེད་ཅིང་བློ་ཡང་བྱེད། །ཡོན་ཏན་ཐམས་ཅད་རྣམ་པར་འཕེལ། །འདི་ནི་བཀྲ་ཤིས་ཐམས་ཅད་བྱེད། །བཀྲ་ཤིས་མ་ཡིན་རྣམ་པར་འཇིག །རྨི་ལམ་བཟང་པོ་རྨི་བར་བྱེད། །རྨི་ལམ་ངན་པ་རྣམ་པར་འཇིག །རིག་པ་མཐུ་སྟོབས་ཆེན་མོ་འདི། །སྐྱེས་པ་བུད་མེད་བསྲུང་བའི་མཆོག །འབྲོག་དགོན་དང་ནི་མྱ་ངན་ལས། །རྟག་ཏུ་དེ་ཡི་མོད་ལ་ཐར། །རྫོགས་པའི་སངས་རྒྱས་བཀའ་བཞིན་དུ། །འདོད་པ་དག་ནི་ཀུན་ཀྱང་རྙེད། །ལམ་ལས་ལམ་གོལ་ཞུགས་ན་ཡང་། །རིག་པ་འདི་ནི་རྗེས་དྲན་ན། །མྱུར་དུ་ལམ་དང་བཟའ་བ་དང་། །བཏུང་བ་མཆོག་ཀྱང་རྙེད་པར་འགྱུར། །ལུས་དང་ངག་དང་ཡིད་རྣམས་ཀྱིས། །མི་དགེ་མང་པོ་གང་ཡང་རུང་། །ཚེ་རབས་སྔ་མར་ཅི་བྱས་པ། །དེ་དག་ཐམས་ཅད་བྱང་བར་འགྱུར། །དྲན་པ་དང་ནི་འཆང་བ་དང་། །འཛིན་དང་ཡི་གེར་འདྲི་བ་དང་། །ཚིག་ཏུ་འདོན་ཏམ་ཀློག་པ་དང་། །བཟླས་བརྗོད་བྱེད་དམ་གཞན་སྟོན་ན། །དེ་ནི་རིང་པོར་མི་ཐོགས་པར། །ཆོས་ཀུན་རྟོགས་པར་ཁོང་དུ་ཆུད། །དེ་ལྟར་ཆོས་ཀྱི་རོ་རྙེད་ན། །སྡིག་པ་རྣམས་ནི་ཟད་པར་འགྱུར། །ཡིད་ཀྱིས་ཅི་དང་ཅི་འདོད་པ། །དགོས་པ་ཐམས་ཅད་གྲུབ་པར་བྱེད། །འཆི་བའི་འཇིགས་པ་ཐམས་ཅད་དང་། །རྒྱལ་པོ་དང་ནི་མེ་དང་ཆུ། །གློག་དང་དེ་བཞིན་ཀུན་འཇོམས་ལས། །འདི་ནི་དེ་ལས་སྐྱོབ་པར་འགྱུར། །རིག་པ་འབུམ་དུ་བཟླས་ན་ནི། །གཡུལ་འགྱེད་པ་དང་རྩོད་པ་དང་། །གང་ཡང་གཅན་གཟན་མ་རུངས་པ། །དེ་དག་ཐམས་ཅད་འབྲོས་པར་འགྱུར། །སངས་རྒྱས་ཀུན་གྱིས་གསུངས་པ་ཡི། །དངོས་གྲུབ་མཆོག་གི་རིག་པ་འདི། །བརྗོད་ན་སྒྱིད་ལུག་མི་འགྱུར་བར། །བྱང་ཆུབ་ཚོགས་རྣམས་རྫོགས་པར་བྱེད། །བདག་དང་གཞན་གྱི་དོན་བསྒྲུབས་ཕྱིར། །གནས་ཀྱི་རྣམ་པ་ཐམས་ཅད་དུ། །རིག་པ་འདི་ལ་
སྦྱོར་ན་ནི། །འདོད་པའི་ལས་རྣམས་གང་ཡིན་པ། །བསྒྲིམ་མི་དགོས་པར་རིག་འདི་ལས། །འགྲུབ་འགྱུར་འདི་ལ་ཐེ་ཚོམ་མེད། །ནད་པ་རྣམས་ནི་གསོ་བྱ་བ། །ད་ནི་རབ་ཏུ་བཤད་པར་བྱ། །ས་དང་ལྕི་བ་བསྲེས་པ་ཡིས། །དཀྱིལ་འཁོར་གྲུ་བཞི་ལྷམ་པར་བྱ། །ཚོན་གྱི་ཕྱེ་མ་སྣ་ལྔ་ཡིས། །དཀྱིལ་འཁོར་སྡུག་གུར་བྲི་བར་བྱ། །མཁས་པ་རྣམས་ཀྱིས་ཆོ་ག་བཞིན། །བུམ་པ་གང་བ་བཞི་ཡང་བཞག །དེ་ལ་མེ་ཏོག་སིལ་མས་གཏོར། །བདུག་པ་མཆོག་གིས་བདུག་པར་བྱ། །སེམས་ཅན་ཆེན་པོ་གདུལ་བའི་ཕྱིར། ། གཏོར་མ་ཡི་ནི་ལས་ཀྱང་བྱ། །སྔ་མ་བཞིན་དུ་མེ་ཏོག་སྤོས། །ཆོ་ག་བཞིན་དུ་འདི་ལ་མཆོད། །དར་གྱིས་བཅིངས་པའི་མདའ་བཞི་ཡང་། །དཀྱིལ་འཁོར་གྲྭ་བཞིར་གཟུགས་པར་བྱ། །དེ་ཡི་འོག་ཏུ་ནད་པ་ཡང་། །དྲི་ཞིམ་སྤོས་ཀྱིས་ལུས་བསྐུས་ཏེ། །གཙང་མའི་གོས་རྣམས་བསྐོན་ནས་ནི། །དཀྱིལ་འཁོར་དབུས་སུ་གཞག་པར་བྱ། །དེ་ནས་ཤར་ཕྱོགས་ཁ་བསྟན་ཏེ། །རིག་པ་འདི་ནི་བརྗོད་པར་བྱ། །ལན་བདུན་བཟླས་བརྗོད་བྱས་ནས་སུ། །མཁས་པས་དེ་ལ་བསྲུང་བར་བྱ། །དེ་ནས་ནད་པའི་དོན་གྱི་ཕྱིར། །ལན་གྲངས་ཉི་ཤུ་རྩ་གཅིག་ཏུ། །རིག་པ་འདི་ནི་བརྗོད་བྱས་ན། །དེས་ནི་ནད་ཀུན་ཞི་བར་འགྱུར། །དེ་ནས་གཏོར་མའི་བུམ་པ་ལ། །ལན་བདུན་ལེགས་པར་སྔགས་ཀྱིས་གདབ། །དེ་ནས་བཤོས་ཀྱང་སྔགས་གདབ་སྟེ། །གཏོར་མ་མེ་ཏོག་ཆོ་ག་བཞིན། །དེ་ལྟར་ལྷོ་ཕྱོགས་ངོས་སུ་ནི། །ལན་བདུན་ཁོ་ནར་གཏོར་བར་བྱ། །ནུབ་ཕྱོགས་སུ་ཡང་བདུན་ཉིད་དེ། །བྱང་ཕྱོགས་སུ་ཡང་དེ་བཞིན་ནོ། །འོག་དང་སྟེང་དུའང་ལན་བདུན་ཏེ། །བསྲུང་བ་བྱས་པར་འགྱུར་བ་ཡིན། །བྲམ་ཟེ་དམ་པ་དེ་ལྟ་བུར། །བྱས་ན་སྡུག་བསྔལ་ཀུན་ལས་གྲོལ། །སྐྱོབ་པ་ཤཱཀྱ་སེང་གེ་ཡིས། །བསྲུང་བ་འདི་ནི་ཡང་དག་བཤད། །འདི་མ་གཏོགས་པར་ཁམས་གསུམ་ན། །བསྲུང་བའི་རིག་པ་གཞན་མེད་དོ། །དེ་ནི་མི་འཆི་མི་རྒས་ཏེ། །ནད་ཀྱིས་མི་བཏབ་མི་སྡུག་མིན། །སྡུག་པ་དང་ནི་འབྲལ་མི་འགྱུར། །རིག་པ་འདི་ནི་བདག་གི་ལུས། །ཤིན་ཏུ་བསྒོམ་པ་བྱས་ན་ནི། །
དེ་ལ་འཆི་བདག་ཚོགས་ཀྱིས་མཆོད། །ཆོས་ཀྱི་རྒྱལ་པོ་དམ་པ་གཤིན་རྗེ་ཡང་། །གུས་དང་བཅས་པས་དེ་ལ་མཆོད་པར་འགྱུར། །སྐད་ཅིག་ང་ཡི་སེམས་དམྱལ་འདི་བྱོས་ལ། །ལྷ་ཡི་གྲོང་ཁྱེར་སོང་ཞེས་སྨྲ་བར་འགྱུར། །དེ་ནས་གཞལ་མེད་ཁང་པ་རྣམ་མང་པོས། ། རྫུ་འཕྲུལ་ཆེན་པོ་ལྷ་གནས་བཟང་པོར་འགྲོ། །དེ་ལྟར་དེར་ནི་ལྷ་མི་གནོད་སྦྱིན་དང་། །སྲིན་པོ་རྣམས་ཀྱིས་དེ་ལ་རྟག་མཆོད་འགྱུར། །ལག་ན་རྡོ་རྗེ་གནོད་སྦྱིན་དབང་། །བདེ་སོགས་བདག་པོ་དབང་པོ་དང་། །འཕྲོག་མ་དང་ནི་ལྔས་རྩེན་དང་། །འཇིག་རྟེན་སྐྱོང་བ་འཕྲུལ་ཆེན་དང་། །ཟླ་བ་ཉི་མ་རྒྱུ་སྐར་བཅས། །མཆོག་ཏུ་མི་བཟད་གཟའ་རྣམས་དང་། །གང་ཡང་ཀླུ་ཆེན་ཐམས་ཅད་དང་། །ལྷ་དང་དེ་བཞིན་དྲང་སྲོང་དང་། །ལྷ་མིན་མཁའ་ལྡིང་དྲི་ཟ་དང་། །མི་འམ་ཅི་དང་ལྟོ་འཕྱེ་ཆེ། །བསྲུང་ཕྱིར་རྟག་ཏུ་འབྲང་བར་བྱེད། །གང་གིས་རིག་པ་སྟོབས་ཆེན་མོ། །རྫུ་འཕྲུལ་ཆེན་མོ་བྲིས་ནས་ནི། །ཤེས་རབ་ཅན་གྱི་ལག་ལ་གདགས། །མཆོད་པ་ཆེན་པོ་འཐོབ་པར་འགྱུར། །རྟག་ཏུ་ཕུན་སུམ་ཚོགས་པར་འོང་། །འཕགས་པ་རིག་པའི་རྒྱལ་མོ་སོ་སོར་འབྲང་བ་ཆེན་མོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ། །སླར་ཡང་ལོ་ཙཱ་བ་གཞོན་ནུ་དཔལ་གྱིས་ཆོས་རྗེ་ཆག་ལོའི་རྒྱ་དཔེ་དང་བསྟུན་ནས་ཞུས་དག་པར་བགྱིས་སོ།། །།