འཕགས་པ་འཇམ་དཔལ་གྱི་མཚན་བརྒྱ་རྩ་བརྒྱད་པ་ཞེས་བྱ་བ།
རྒྱ་གར་སྐད་དུ། ཨཱཪྱ་མཉྫུ་ཤྲཱི་ནཱ་མ་ཨཥྚ་ཤ་ཏ་ཀན། བོད་སྐད་དུ། འཕགས་པ་འཇམ་དཔལ་གྱི་མཚན་བརྒྱ་རྩ་བརྒྱད་པ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཤིན་ཏུ་དང་བའི་སེམས་ཀྱིས་སུ། །ཐུབ་ལ་མགོ་བོས་ཕྱག་འཚལ་ཏེ། །སངས་རྒྱས་རྣམས་ཀྱིས་བསྔགས་པ་ཡི། །མཚན་རྣམས་འདིར་ནི་བརྗོད་པར་བགྱི། །གཟུགས་མཛེས་གཟུགས་དང་ལྡན་པ་སྟེ། །གཟུགས་རྣམས་ཀུན་གྱི་བླ་ན་མེད། །མཚན་རྣམས་ཐམས་ཅད་ཀུན་ཏུ་རྫོགས། །འཇམ་དཔལ་དཔལ་གྱི་དམ་པ་
ལགས། །བསམ་གྱིས་མི་ཁྱབ་བསམ་དང་བྲལ། །མཐུ་རྩལ་བསམ་ཡས་རྨད་དུ་བྱུང་། །སྐུ་གསུང་ཕྲིན་ལས་བསམ་མི་ཁྱབ། །དེ་བཞིན་ཐུགས་ཀྱང་བསམ་མི་ཁྱབ། །སྟོང་ཉིད་བསྒོམས་པའི་བདག་ཉིད་ཅན། །སྟོང་པའི་ཆོས་དང་ཡང་དག་ལྡན། །སྟོང་པ་ཉིད་ལ་ལྷག་པར་མོས། །སྲིད་པ་གསུམ་པོ་སྟོང་པར་སྟོན། །ཐམས་ཅད་མཁྱེན་ཅིང་ཐམས་ཅད་གཟིགས། །ས་རྣམས་ཀུན་གྱི་བདག་དང་ལྡན། །སེམས་ཅན་ཀུན་གྱི་མཆོག་ཏུ་གྱུར། །སེམས་ཅན་ཀུན་གྱིས་ཕྱག་བགྱིས་པ། །ངན་འགྲོ་ཀུན་དང་དེ་བཞིན་དུ། །མུ་སྟེགས་ཅན་རྣམས་ཐམས་ཅད་འཇོམས། །ཕས་ཀྱི་རྒོ་ལ་བ་ཚར་གཅོད་པ། །སྨྲ་བའི་སེང་གེ་མི་ཡི་མཆོག །དུལ་ཞིང་ཉོན་མོངས་རྣམས་དང་བྲལ། །སྒྲིབ་པ་དྲི་མ་ཀུན་མི་མངའ། །སེམས་ཅན་ཐམས་ཅད་ཡོངས་སུ་སྐྱོབ། །གྲོལ་ཞིང་འཇིག་རྟེན་གྲོལ་མཛད་པ། །རལ་པ་མུན་ཛ་བརྟུལ་ཞུགས་ཅན། །ཚངས་པ་ཚངས་པའི་གནས་ན་བཞུགས། །བགྲང་ནོར་ཐོགས་ཤིང་ཕྱག་མཁར་བསྣམས། །དག་ཅིང་དག་ལ་རྣམས་དང་ལྡན། །འཇམ་པའི་དབྱངས་ཅན་མངའ་དབང་མཛད། །པདྨ་ལས་འཁྲུངས་པདྨའི་སྤྱན། །པདྨའི་ཟེ་བའི་ཁ་དོག་འདྲ། །བཞུགས་པའི་གདན་ཁྲི་པདྨ་ལགས། །གཙང་མ་ཨུཏྤལ་སྔོན་པོ་བསྣམས། །བསམ་དག་ཞི་བའི་ཐུགས་དང་ལྡན། །ཁྱོད་ནི་སངས་རྒྱས་རང་སངས་རྒྱས། །ཁྱོད་ནི་དང་པོའི་སངས་རྒྱས་ལགས། །རྫུ་འཕྲུལ་ལྡན་ཞིང་མངའ་དབང་བརྙེས། །བདེན་པ་བཞི་དག་སྟོན་པ་པོ། །འཇིག་རྟེན་སྐྱོང་བ་སྤྱན་སྟོང་མངའ། །ཁྱོད་ནི་དབང་ཕྱུག་སྐྱེ་དགུའི་བདག །ཁྱོད་ནི་ཞི་བའི་སེམས་ཅན་རྣམས། །ཀུན་གྱི་མངའ་བདག་ཡོན་ཏན་གཙོ། །ཁྱོད་ནི་ཁྱུ་མཆོག་སྐྱེ་དགུའི་གཙོ། །ཐུ་བོ་དེ་བཞིན་ཚེ་རབས་དགོངས། །རྣམ་པར་འདྲེན་དང་འདུལ་མཛད་པ། །རྒྱལ་སྲས་རྒྱལ་བ་ཉིད་ལས་འཁྲུངས། །འོད་ཟེར་སྟོང་ལྡན་ཉི་མ་ཁྱོད། །ཟླ་བ་དང་ནི་ཕུར་བུའང་ཁྱོད། །རྣམ་ཐོས་བུ་དང་ཆུ་ལྷའང་ལགས། །དབང་ཕྱུག་ཆེ་ཁྱོད་ཁྱབ་འཇུག་ཁྱོད། །ཀླུ་ཡི་རྒྱལ་པོ་མཐའ་ཡས་ཁྱོད། །
དེ་བཞིན་སྡེ་དཔོན་སྐེམས་བྱེད་ལགས། །ལྷ་མིན་དབང་པོ་ཐགས་ཟངས་རིས། །མིག་དམར་གཟའ་ལག་པ་བ་སངས། །སྤེན་པ་དཔའ་བོ་ལྷ་ཀུན་ལགས། །ལྷ་རྣམས་ཀུན་གྱིས་ཕྱག་བགྱིས་པ། །འཇིག་རྟེན་ཆོས་ཀྱི་དྲི་མ་བྲལ། །ཁྱོད་ནི་འཇིག་རྟེན་གང་ཟག་མཆོག །འཇིག་རྟེན་མཁྱེན་པ་འཇིག་རྟེན་རིག །ཡེ་ཤེས་ཅན་གྱི་དམ་མཆོག་པ། །དམ་པ་སྦྱིན་དང་གནས་དང་སྐྱབས། །བདུད་ཀྱི་ལས་ཀྱིས་ཡོངས་མི་རྫི། །ཁ་ན་མ་ཐོ་མི་མངའ་ཟབ། །དགེ་བའི་བཤེས་གཉེན་ཀུན་ཏུ་གྲགས། །ཁྱོད་ནི་སྨན་པ་ཟུག་རྔུ་འབྱིན། །མི་འདུལ་ཁ་ལོ་སྒྱུར་བའི་མཆོག །བློ་གྲོས་ལྡན་ཞིང་རྟོགས་དང་ལྡན། །བློ་དང་ལྡན་ཞིང་མཁས་པ་ལགས། །ཁྱོད་ནི་བསོད་ནམས་དཔག་བསམ་ཤིང་། །བྱང་ཆུབ་ཡན་ལག་མེ་ཏོག་བརྒྱན། །རྣམ་གྲོལ་འབྲས་བུ་ཕུན་སུམ་ཚོགས། །ལུས་ཅན་ཀུན་གྱི་མཆོག་ཏུ་གྱུར། །ཡིད་དུ་འོང་ཞིང་ཡིད་འཕྲོག་པ། །སྡིག་པ་མི་མངའ་ཚངས་པར་སྤྱོད། །ཁྱོད་ནི་མཇུག་རིངས་གཟའ་མཆོག་ལགས། །ཁྱོད་ནི་དྲང་སྲོང་ཐུབ་པ་མཆོག །ཁྱོད་ནི་རྒྱལ་ཚབ་དབང་བསྐུར་བ། །ས་བཅུའི་མངའ་བདག་གཙོ་བོ་ལགས། །དེད་དཔོན་འགྲོ་བ་རྣམས་ཀྱི་གཙོ། །མྱ་ངན་འདས་པ་མཆོག་སྟོན་བཞིན། །ཁྱོད་ནི་ནམ་མཁའ་ས་ཆུ་བཞིན། །ཁྱོད་ནི་མེ་དང་རླུང་ལྟ་བུ། །ཁྱོད་ནི་ཡིད་བཞིན་ནོར་བུ་ལྟར། །སེམས་ཅན་རེ་བ་ཀུན་རྫོགས་མཛད། །འབྱུང་པོ་ཀུན་གྱིས་ཕྱག་བགྱིས་པ། །རིན་ཆེན་ཁྱོད་ལ་ཕྱག་འཚལ་ལོ། །འཇམ་དཔལ་གྱིས་ནི་བཀའ་སྩལ་པ། །ཨོཾ་བཱ་ཀྱེ་དྃ་ན་མཿསྭཱ་ཧཱ། ཇི་སྐད་སྨོས་པའི་མཚན་རྣམས་དང་། །རིག་སྔགས་བཅས་པར་འཛིན་ན་ནི། །སྡིག་འགྱུར་རྣམ་དག་རབ་ཏུ་ཐོབ། །བརྒྱ་ལས་རྩ་བརྒྱད་ལྷག་པའི་མཚན། །སྐྱེས་བུ་དུས་གསུམ་སུ་ཀློག་པ། །དེ་འདོད་བསམ་དགུ་ཡིད་བཞིན་དུ། །གདོན་མི་ཟ་བར་འགྲུབ་པར་འགྱུར། །བཟང་པོའི་མཚན་རྣམས་དྲན་ན་ནི། །མཚམས་མེད་སྐལ་བ་མཉམ་པ་ཡི། །ལས་རྣམས་མི་བཟད་གང་བྱས་པ། །དེ་དག་ཐམས་ཅད་མྱུར་དུ་བྱང་། །
འཇིག་རྟེན་ཕ་རོལ་འཕོ་བ་དང་། །འཇིགས་པ་ཆེན་པོ་འབྱུང་བའི་ཚེ། །སེམས་ཅན་དག་པས་དྲན་བྱས་ན། །འཇམ་པའི་དབྱངས་ཀྱང་ཐོབ་པར་འགྱུར། །བློ་དང་ལྡན་པས་དྲན་བྱས་ཏེ། །ངེས་པར་གནས་ནས་སུ་ཀློག་པ། །སངས་རྒྱས་ཉིད་ནི་འདོད་ན་ཡང་། །ཐོབ་འགྱུར་འདི་ལ་ཐེ་ཚོམ་མེད། །འཕགས་པ་འཇམ་དཔལ་གྱི་མཚན་བརྒྱ་རྩ་བརྒྱད་པ་རྫོགས་སོ།།