འཕགས་པ་མདངས་ཕྱིར་འཕྲོག་པ་ཞེས་བྱ་བའི་མདོ།
རྒྱ་གར་སྐད་དུ། ཨཱཪྱ་ཨོ་ཛཿཔྲཏྱཾ་གི་ར་ཎི་སཱུ་ཏྲ། བོད་སྐད་དུ། འཕགས་པ་མདངས་ཕྱིར་འཕྲོག་པ་ཞེས་བྱ་བའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་མདངས་ཕྱིར་འཕྲོག་པའི་རིག་སྔགས་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །ཀུན་དགའ་བོ་གང་ལ་ལ་ཞིག་མདངས་ཕྱིར་འཕྲོག་པའི་རིག་སྔགས་འཆང་ངམ། སྟོན་ཏམ། ཀློག་གམ། ཀུན་ཆུབ་པར་བྱེད་ན། དེའི་མདངས་ཕྱིར་མི་འཕྲོགས་ཤིང་། འཕྲོག་པར་མི་འགྱུར་རོ། །ཕྲོགས་ན་ཡང་ཕྱིར་ཡང་དག་པར་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་གསང་སྔགས་ཀྱི་གཞི་འདི་དག་བཀའ་སྩལ་ཏོ། །ཏདྱ་ཐཱ། ཕི་ཕི་ལེ་ཕི་ལེ་མེ། ཕི་ལུ་མེཾ་གེ། ཕི་ལུ་མ་ཧི། བལྒུ་མ་ཏི། སཱ་ར་བ་ཏི། ཀྵི་ར་བ་ཏི། ཀུ་རུ་མཱ་ཏི། ཨུ་ཏ་བ་ལ་ནི། གོ་རི། གནྡྷ་རི། ཙཽ་རི། ཙཎྜ་ལི། སྟུ་རེ་སྟུ་བ་རེ། ཨིནྡྲ་མཱ་ལི་ནི། ཛ་ལ་ནི། སོ་བཱ་ཀེ་ཏྲི་ཀྵོ་ཥ་མེ་སཱ་ག་རེ། མ་ཧཱ་སཱ་ག་རེ། ཕུ་རུ་ཙེ། ཕུ་རུ་ཙུ་རེ། ས་ནེ་མ་ནེ། ད་བ་ཕེ། ད་དམ་པ་ཕེ། ཧུ་ལུ་ཧུ་ལུ་སྭཱ་ཧཱ། རིག་སྔགས་འདི་བཀའ་སྩལ་བ་ན། སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གཡོས། རབ་ཏུ་གཡོས། ཀུན་ཏུ་གཡོས། ཀུན་ཏུ་རབ་ཏུ་གཡོས་པ་ནས། འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་པའི་བར་དུ་གྱུར་ཏོ། །གནོད་སྦྱིན་རྣམས་ཀྱང་། ཀྱེ་མའོ་སྡུག་བསྔལ་ལོ། །ཀྱེ་མའོ་ཉམ་ཐག་གོ་ཞེས་ངུ་ཞིང་སྐད་ཆེན་པོ་སྒྲ་ཆེན་པོ་འབྱིན་ཅིང་འཁོད་དོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ངས་བདེན་པ་དང་། བདེན་པའི་ཚིག་གང་གིས་མདངས་ཕྱིར་འཕྲོག་པའི་རིག་སྔགས་འདི་གསུངས་པའི་བདེན་པ་དང་། བདེན་པའི་ཚིག་དེས་ངས་བསྲུང་བར་བྱའོ། །བདེ་ལེགས་སུ་འགྱུར་བའི་བར་དུའོ། །དེའི་མདངས་འཕྲོག་པར་བྱའོ། །ཕྱིར་དབྲོག་པར་བྱའོ། །ཉེ་བར་བསྒྲུབ་པར་བྱའོ། །གནོད་སྦྱིན་གྱིས་ཟིན་ཏམ།མི་དང་མི་མ་ཡིན་པས་ཟིན་ན་དུས་དེ་དང་། ཚོད་དེ་དང་། ཡུད་ཙམ་དེ་ལ་མདངས་འཕྲོག་གོ། ཕྱིར་མི་འཕྲོག་གོ། །རྣམ་པར་འཇུག་གོ། །གལ་ཏེ་འཕྲོག་ཅིང་ཕྱིར་མི་འཕྲོག་པར་མི་བྱེད་དེ། གནས་ན་འདུག་བཞིན་དུ་རྣམ་པར་མི་འཇིག་ཅིང་། ཡང་འཇོམས་པར་འདོད་དམ། འཕྲོག་པར་འདོད་པར་གྱུར་ན། དེས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཉན་ཐོས་ཀྱི་ཚོགས་དང་བཅས་པ་དེ་མི་མཉེས་པར་བྱས་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་མདངས་ཕྱིར་འཕྲོག་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།།