འཕགས་པ་མི་རྒོད་རྣམ་པར་འཇོམས་པ་ཞེས་བྱ་བའི་གཟུངས།
རྒྱ་གར་སྐད་དུ། ཨཱཪྱ་ཙཽ་ར་བི་དྷྭ་ན་ས་ན་ནཱ་མ་དྷཱ་ར་ཎཱི། བོད་སྐད་དུ། འཕགས་པ་མི་རྒོད་རྣམ་པར་འཇོམས་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཞམ་འབྲིང་བ་ཚེ་དང་ལྡན་པ་ཀུན་དགའ་བོ་དང་ཐབས་ཅིག་ཏུ་ལུས་འཕགས་རི་ལ་གཤེགས་པའི་ཚེ། ཚེ་དང་ལྡན་པ་ཀུན་དགའ་བོས་མི་རྒོད་ཕལ་པོ་ཆེ་ཞིག་རྒྱང་རིང་མོ་ནས་མཐོང་ངོ་། །མཐོང་ནས་ཀྱང་སྐྲག་སྟེ་སྤུ་ཟིང་ཞེས་བྱེད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མི་རྒོད་དག་ཅིག་གོ། །བདེ་བར་གཤེགས་པ་མི་རྒོད་དག་ཅིག་གོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་མི་རྒོད་རྣམས་ཀྱིས་འཇིགས་སམ། གསོལ་པ། བཅོམ་ལྡན་འདས་འཇིགས་ལགས་སོ། །བདེ་བར་གཤེགས་པ་འཇིགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་མི་རྒོད་རྣམས་ཀྱིས་མ་འཇིགས་ཤིག །དེ་ནས་བཅོམ་ལྡན་འདས་ཀྱིས་དེའི་ཚེ་གཏི་མུག་ཆེན་པོའི་ཚོགས་རབ་ཏུ་འཇོམས་པ་འདི་བཀའ་སྩལ་ཏོ། །ཏདྱ་ཐཱ། ཨ་ནུ་ལོ་མེ། པྲ་ཏི་ལོ་མེ། ཨ་ནུ་ལོ་མ། པྲ་ཏི་ལོ་མ། ཨ་ཏིཾ་ཀེ། པྲ་ཏིཾ་ཀེ། པྃ་ཀེ། ཨ་ཏི་པཾ་ཀེ། གཽ་རི། གནྡྷ་རི། ཙཎྜ་ལི། མ་ཏཾ་གི། པཱུཀྐ་སི། རི་མི་རི་མི། རིད་དྷི་མ་ཙི་བཥྚི་ཏི་ཙཽར་པྲ་དན་དུ། བིསྠ་ཧན་ཏུ། བྷ་མན་ཏུ། མཱ་མི་ཡན་ཏུ། ཡཱ་བདྒྲནྠི་ན་མུཉྩ་མི་སྭཱ་ཧཱ།ཀུན་དགའ་བོ་ངས་དཔག་ཚད་བཅུ་ཚུན་ཆད་ཀུན་ཏུ་བསྲུང་བ་དང་། མི་རྒོད་ཐམས་ཅད་དང་། རི་གསེབ་ཀྱི་གྲོང་མི་ཐམས་ཅད་དང་། གསེབ་ལམ་སྲུང་བ་ཐམས་ཅད་དང་། གནོད་པར་སེམས་པ་ཐམས་ཅད་ཀྱི་རྐང་པ་བཅིང་བར་བྱས་སོ། །རྨུགས་
པར་བྱས་སོ། །རེངས་པར་བྱས་སོ། །ཇི་ལྟར་རྫ་མཁན་གྱི་འཁོར་ལོ་བསྐོར་བའམ། ཇི་ལྟར་རྫ་མཁན་གྱི་འཁོར་ལོ་ཡོངས་སུ་བསྐོར་བ་ལྟར་མི་རྒོད་རྣམས་འདར་བར་གྱུར་ཅིག །རེངས་པར་གྱུར་ཅིག །མགོ་རྨོངས་པར་གྱུར་ཅིག །མདུད་པ་མ་གྲོལ་བའི་བར་དུ་མཆི་བར་མ་གྱུར་ཅིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཆོ་ག་ནི་ཤིང་ཀུན་དང་། བོང་བུའི་སྤུ་བསྲེས་ཏེ། བུ་མོ་གཙང་མས་བཀལ་བའི་སྲད་བུ་ལ་ལན་ཉི་ཤུ་རྩ་གཅིག་བཟླས་བརྗོད་བྱའོ། །ཡང་ན་གོས་ཀྱི་མཐའ་མ་ལ་མདུད་པ་བོར་ཏེ། བདེ་བར་ཕྱིན་ནས་དགྲོལ་བར་བྱའོ། །འདི་ནི་གྲུབ་པའོ། །འཕགས་པ་མི་རྒོད་རྣམ་པར་འཇོམས་པ་ཞེས་བྱ་བའི་གཟུངས་རྫོགས་སོ།། །།