བདུད་རྩི་འབྱུང་བ་ཞེས་བྱ་བའི་གཟུངས།
རྒྱ་གར་སྐད་དུ། ཨ་མྲྀ་ཏ་བྷ་བ་ནཱ་མ་དྷཱ་ར་ཎཱི། བོད་སྐད་དུ། བདུད་རྩི་འབྱུང་བ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱང་ཆུབ་ཀྱི་ཤིང་དྲུང་ན། འཁོར་རྣམ་བཞི་དང་། ལྷ་དང་། མི་རྣམས་ཀྱིས་བསྐོར་ནས་བཞུགས་སོ། །དེ་ནས་འཁོར་རྣམས་ཀྱི་ནང་ནས་ཁྱིམ་བདག་བཟང་སྐྱོང་གིས། བཅོམ་ལྡན་འདས་ཀྱི་འཁོར་རྣམ་པ་བཞི་དང་། རིགས་དྲུག་གི་སེམས་ཅན་ཐམས་ཅད་ལ། སྤོས་དང་། སྨན་དང་། ཞལ་ཟས་ཀྱི་མཆོད་པ་ཆེན་པོ་བཤམས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཟའ་བ་དང་། བཅའ་བ་དང་། བཏུང་བ་འདི་རྣམས་སེམས་ཅན་རྣམས་ཀྱི་དོན་དུ་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས་བདུད་རྩི་འབྱུང་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞལ་ཟས་ཀྱི་སྟེང་དུ་ཟླ་བའི་དཀྱིལ་འཁོར་གྱི་སྟེང་དུ་རྃ་དཀར་པོ་ལ་ཆོས་ཐམས་ཅད་རྡུལ་དང་བྲལ་བའོ་ཞེས་བྱ་བའི་སྒྲ་བྱུང་བས་ཞལ་ཟས་ཀྱི་དྲི་མ་དག་པར་གྱུར་ཏོ། །ཡང་ཟླ་བའི་དཀྱིལ་འཁོར་གྱི་སྟེང་དུ་ཨ་དཀར་པོ་བསམས་ཏེ། ཞལ་ཟས་ལྷའི་བདུད་རྩི་དང་། ཡོ་བྱད་དུ་གྱུར་ཏོ། །ཡང་ཟླ་བའི་དཀྱིལ་འཁོར་གྱི་སྟེང་དུ། ཨོཾ་ཞེས་པས་འཕགས་པ་དང་སེམས་ཅན་ཐམས་ཅད་མཉེས་ཤིང་ཚིམ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་
ཕྱག་རྡོ་རྗེ་ལྟར་བྱས་ཏེ་གཟུངས་འདི་གཟུངས་སོ། །ཨོཾ་སརྦ་དྷརྨ་ཏཱ་བཛྲ་སིདྡྷ་ཧཱུཾ། ཨོཾ་ཨ་མྲྀ་ཏ་ཧཱུཾ། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཨོཾ་ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་སཾ་བྷ་ར་སཾ་བྷ་ར་ཧཱུཾ། ཨོཾ་རུ་རུ་སྥུ་རུ་ཛྭཱ་ལ་ཏིཥྛ་སིདྡྷ་ལོ་ཙ་ནི་སརྦ་ཨརྠ་སཱ་དྷ་ནེ་སྭཱ་ཧཱ། ཞེས་གཟུངས་འདི་བརྗོད་མ་ཐག་ཏུ་མཆོད་པའི་ཞལ་ཟས་ཀྱིས་མཆོད་ནས། འཕགས་པ་ཐམས་ཅད་མཉེས་པ་དང་། སེམས་ཅན་ཐམས་ཅད་བདེ་བར་གྱུར་ཏོ། །དེ་ནས་ཁྱིམ་བདག་བཟང་སྐྱོང་གིས་བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ནས་འདི་སྐད་ཅེས་གསོལ་ཏོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མཐུ་དང་། ཆོས་ཀྱི་དབྱིངས་རྣམ་པར་དག་པའི་བྱིན་གྱིས་བརླབས་ཀྱི་མཐུ་དང་། བདག་གི་བསམ་པ་རྣམ་པར་དག་པའི་སྟོབས་ཀྱིས། འཕགས་པ་ཐམས་ཅད་ཀྱི་ཕོ་བྲང་དང་། སེམས་ཅན་ཐམས་ཅད་ཀྱི་གནས་དང་། སེམས་ཅན་ཐམས་ཅད་ཀྱི་རྒྱུད་ལ་ཆོས་དང་ཟང་ཟིང་གི་ལོངས་སྤྱོད་དཔག་ཏུ་མེད་ཅིང་བརྗོད་ཀྱིས་མི་ཁྱབ་པ། བརྗོད་ཀྱིས་མི་རྫོགས་པ་འབྱུང་ཞིང་རྒྱས་པར་གྱུར་ཅིག །སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། གསང་སྔགས་དང་། རིག་སྔགས་དང་། ཕྱག་རྒྱ་དང་། ཏིང་ངེ་འཛིན་གྱི་བདེན་པའི་བྱིན་གྱིས་བརླབས་ཀྱིས་ཕ་རོལ་ཏུ་ཕྱིན་པ་ལ་སོགས་ཏེ་ཆོས་ཀྱི་སྦྱིན་པ་དང་། བདག་གི་ཟང་ཟིང་གི་སྦྱིན་པ་འདིས་བདེ་བ་དང་། དགའ་བར་གྱུར་ཅིག །བཅོམ་ལྡན་འདས་ཀྱིས་ལེགས་སོ་ཞེས་བྱ་བ་བྱིན་ཏེ། ཁྱིམ་བདག་བཟང་སྐྱོང་ལེགས་སོ། །དཀའ་བའི་སྤྱོད་པ་འདི་ལྟ་བུ་བྱེད་པ་ལེགས་སོ། །ངའི་འཁོར་ལྷ་དང་མི་རྣམས་ཀྱིས་ཀྱང་འདི་ལྟར་མཆོད་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་འཁོར་དང་། ཁྱིམ་བདག་བཟང་སྐྱོང་རྗེས་སུ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དེ་དགའ་བར་གྱུར་ཏོ། །བདུད་རྩི་འབྱུང་བ་ཞེས་བྱ་བའི་གཟུངས་རྫོགས་སོ།། །།