དོན་ཡོད་ཡིད་བཞིན་ནོར་བུའི་ཞགས་པ་ཆེན་པོ་སྒྲུབ་པའི་ཆོ་ག
དེ་ནས་རིག་སྔགས་འཆང་ནོར་བུའི་ཞགས་པ་བསྒྲུབ་བར་འཚལ་ན། རིག་སྔགས་འཆང་དེས་ནོར་བུ་འཚལ་བར་བགྱི་སྟེ། རྡོ་རྗེའམ། བཻ་ཌཱུརྱ་འམ། ཤེལ་རང་འབྱུང་ངམ། མ་རྒད་དམ། ཨིན་དྲ་ནཱི་ལ་ལ་སོར་མོའི་ཚིགས་པས་ལྷག་ཙམ་ཤིན་ཏུ་ཕྱིས་ལ། ཤིན་ཏུ་ཡོངས་སུ་དག་པར་བགྱིས་ལ། གསེར་གྱི་མེ་ཏོག་གི་ཚུལ་དུ་བགྱིས་པ། མུ་ཏིག་གིས་དཀྲིས་པ། གེ་སར་ཁ་ཕྱེ་བ་ཙམ་པ་ཀའི་མེ་ཏོག་ཅི་ལྟ་བ་བཞིན་བགྱིས་ལ། རས་བཟང་པོའི་སྐུད་པ་ཚོན་རྩི་མཛེས་པས་ཁ་བསྒྱུར་བ། ཤིན་ཏུ་ཚད་ལ་བབ་པར་བཀལ་བ་ཁྲུ་ཉི་ཤུ་རྩ་གཅིག་པ། སོར་མོ་གུང་མོའི་ཚད་ཙམ་གྱི་ནོར་བུས་བརྒྱན་ལ། ཐོར་ཏོ་ཅིག་ཤོས་སུ་ནི་ནོར་བུ་འམ་གསེར་ལས་བགྱིས་པའི་ལྕགས་ཀྱུ་གདགས་པར་བགྱིའོ། །དེ་ནས་རིག་སྔགས་འཆང་གཙང་མས་གོས་གཙང་མ་བགོ་བར་བགྱིའོ། །ལེགས་པར་བཀྲུས་ནས་བའི་རྣམ་ལྔས་ཉེ་རེག་བགྱིའོ། །དེའི་འོག་ཏུ་རི་མོའི་གཟུགས་ཀྱི་མདུན་དུ་སྤོས་ཐམས་ཅད་ཀྱི་དཀྱིལ་འཁོར་ཚད་དང་ལྡན་པ་བགྱིས་ལ་གྲྭ་བཞིར་བུམ་པ་གང་བ་གཞག་པར་བགྱིད་ཅིང་། སྤོས་ཕོར་གྱི་སྣོད་བཤམས་ནས། ཨ་ག་རུའི་བདུག་པ་དང་། ཙན་དན་དང་། དུ་རུ་སྐའི་བདུག་པ་དབུལ་བར་བགྱིའོ། །དཀྱིལ་འཁོར་གྱི་དབུས་སུ་ཆོས་ཀྱི་སྟན་བཟང་པོ་ཚད་དང་ལྡན་པ་བཤམས་ལ། བ་དན་སྣ་ཚོགས་ཀྱིས་དཀྱིལ་འཁོར་བསྐོར་བར་བགྱིའོ། །མེ་ཏོག་སིལ་མ་དང་། དྲི་དང་རོལ་མོའི་ཆ་བྱད་དག་དགོད་པར་བགྱིའོ། །རིག་སྔགས་འཆང་གིས་ཟས་དཀར་གསུམ་འཚལ་བར་བགྱིའོ། །བཏུང་བ་ངན་པ་དང་། ཁ་ཟས་ངན་པ་དང་། གནས་ངན་པ་དང་། ལྷག་མ་དང་། སྦགས་རྣམས་རྣམ་པར་སྤང་བར་བགྱིའོ། །དོན་ཡོད་པའི་རྒྱལ་པོའི་སྙིང་པོ་ཉི་ཁྲི་ཆིག་སྟོང་བཟླས་ནས། ལག་པ་གཡས་པས་
ཆོས་ཀྱི་སྟན་གྱི་སྟེང་དུ་བཞག་པའི་ཞགས་པ་ལ་མནན་ནོ། །ལན་ཉི་ཁྲི་ཆིག་སྟོང་ཚང་བ་དང་། དེ་ནས་རིག་སྔགས་འཆང་གིས་ཁྲོ་བོའི་རྒྱལ་པོ་ལན་སྟོང་རྩ་བརྒྱད་ཚང་བར་བཟླས་ཏེ། ཡུངས་ཀར་རེ་རེ་ནས་དབང་བསྐུར་བར་བགྱིའོ། །ལན་སྟོང་རྩ་བརྒྱད་ཚང་བ་དང་། རིག་སྔགས་འཆང་གིས་འཕགས་པ་སྤྱན་རས་གཟིགས་དབང་ཕྱུག་གི་རི་མོའི་གཟུགས་ལ་མཆོད་པར་རྒྱ་ཆེར་བགྱིའོ། །བཅོམ་ལྡན་འདས་འོད་དཔག་མེད་དང་། དེ་བཞིན་གཤེགས་པ་ཤཱཀྱ་ཐུབ་པ་ལ་ཡང་མཆོད་པ་རྒྱ་ཆེར་བགྱིའོ། །དེ་ནས་རིག་སྔགས་འཆང་གིས་ཚེས་བཅྭ་ལྔའི་ཉ་ལ་ཉིན་ཞག་གཅིག་སྨྱུང་བ་བགྱིས་ནས་མཆོད་པ་རྒྱ་ཆེར་བགྱིས་ཏེ། མཆོད་པའི་ཡོ་བྱད་གང་ཅི་ཡང་རུང་བ་དེ་དག་ཐམས་ཅད་ལ་རེ་རེ་ནས་དོན་ཡོད་པའི་ཞགས་པའི་སྙིང་པོ་ལན་ཉི་ཤུ་རྩ་རེ་རེ་ནས་བཟླས་བརྗོད་བགྱིས་ནས་དབུལ་བ་བགྱིའོ། །དེ་ནས་སྐྱིལ་མོ་ཀྲུང་བཅས་ཏེ་མཆིས་ནས། ཉིན་མཚན་ཀུན་ཏུ་དོན་ཡོད་པའི་ཞགས་པའི་སྙིང་པོ་ལན་སྟོང་རྩ་བརྒྱད་བཟླས་ཏེ། ཡུངས་ཀར་རེ་རེ་ནས་བརྡེག་པར་བགྱིའོ། །ལན་སྟོང་རྩ་བརྒྱད་ཚང་བ་དང་ས་ཆེར་གཡོ་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་རི་མོའི་གཟུགས་ལས་ཀྱང་འོད་ཟེར་ཁ་དོག་སྣ་ཚོགས་དག་འབྱུང་བར་འགྱུར་རོ། །ནོར་བུའི་ཞགས་པ་དེ་ཡང་འབར་བར་འགྱུར། རིག་སྔགས་འཆང་གི་མགོ་བོ་ཡང་འབར་བར་འགྱུར་རོ། །འབར་བ་ཙམ་གྱི་མོད་ལ་རིག་སྔགས་འཆང་གི་ལག་པ་གཡས་པས་ནོར་བུའི་ཞགས་པ་བླངས་པ་ན། སྒྲ་ཆེན་པོ་ཡང་འབྱུང་བར་འགྱུར་རོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་ལྷའི་བདག་ཉིད་ཀྱི་རང་བཞིན་གྱིས་རིག་སྔགས་འཆང་གི་མདུན་ན་མཆིས་པར་འགྱུར་རོ། །དེ་བཞིན་གཤེགས་པ་འོད་དཔག་མེད་དང་། དེ་བཞིན་གཤེགས་པ་ཤཱཀྱ་ཐུབ་པ་དང་། དེ་བཞིན་གཤེགས་པ་འཕགས་པ་སྤྱན་རས་གཟིགས་འོད་ཀྱི་རྒྱལ་པོའི་སྐུ་གསེར་གྱི་ཁ་དོག་གིས། ནམ་མཁའ་ལ་རྫུ་འཕྲུལ་གྱིས་བཞུགས་ནས། རིག་སྔགས་འཆང་ལ་ལེགས་སོ་ཞེས་བགྱི་བ་སྩོལ་བར་འགྱུར། ཕྱག་དཔུང་པ་གསེར་གྱི་ཁ་དོག་འདྲ་བ་བརྐྱང་བའི་ཕྱག་གིས། རིག་སྔགས་འཆང་གི་མགོ་
བོར་བཞག་ནས། རིག་སྔགས་འཆང་ལ་དབུགས་འབྱིན་པར་མཛད་དེ། རིག་སྔགས་འཆང་ལེགས་སོ་ལེགས་སོ། །ཁྱོད་ཀྱིས་ཡིད་བཞིན་གྱི་ནོར་བུ་ཆེན་པོ་དོན་ཡོད་པའི་ཞགས་པ་རྣམ་པར་དག་པ་གྲུབ་བོ། །ཁྱོད་ཀྱིས་འཇིག་རྟེན་པ་དང་འཇིག་རྟེན་ལས་འདས་པའི་ལས་བསྒྲུབ་པའི་ཆོ་ག་བླ་ན་མེད་པ་གྲུབ་སྟེ། རིག་སྔགས་འཆང་གིས་འདོད་དགུར་བསྒྱུར་བ་ཐམས་ཅད་དེ། འཕགས་པ་སྤྱན་རས་གཟིགས་དབང་ཕྱུག་གི་དོན་ཡོད་གྲུབ་པ་ཡིད་བཞིན་གྱི་ནོར་བུ་ཆེན་པོའི་ཞགས་པ་ཐོགས་ནས། རིག་སྔགས་འཆང་གིས་འབད་མི་དགོས་པར་ཡིད་བཞིན་གྱི་ནོར་བུ་ཆེན་པོ་དོན་ཡོད་པའི་ཞགས་པ་གྲུབ་པའི་རང་བཞིན་འདིས། འཇིག་རྟེན་པ་དང་། འཇིག་རྟེན་ལས་འདས་པའི་དགོས་པ་རྣམ་པ་སྣ་ཚོགས་སྒྲུབ་པར་བྱེད་པ་ལ་ལྟོས་ཤིག །ཡིད་ལ་ཅི་ལྟར་བསམས་པ་བཞིན་རྫུ་འཕྲུལ་དང་། ཆོ་འཕྲུལ་སྣ་ཚོགས་ལ་ལྟོས་ཤིག །རིག་སྔགས་འཆང་ཁྱོད་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སོང་ཞིག །འོན་ཏེ་བདེ་བ་ཅན་བལྟ་བར་འཚལ་ལམ། ཅི་ལྟར་དེ་བཞིན་གཤེགས་པ་ལ་འོས་པའི་ལྷ་རྫས་ཀྱི་མཆོད་པར་འཚལ་ལམ། དེ་བཞིན་གཤེགས་པ་ལ་མཆོད་པའི་སྤྲིན་གྱིས་མཆོད་པར་འཚལ་ལམ། ལྷའི་མེ་ཏོག་དང་། ལྷའི་དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། དྲིལ་བུ་དང་། བ་དན་དང་། ལྷབ་ལྷུབ་དང་། རྒྱན་དང་གོས་ཀྱིས་དེ་བཞིན་གཤེགས་པ་ལ་མཆོད་པར་བགྱི་བ་འཚལ་ན། རིག་སྔགས་འཆང་དེས་སྤྱི་བོའི་གཙུག་ཏུ་དྲིའི་དཀྱིལ་འཁོར་བགྱིས་ལ་མེ་ཏོག་དང་། བདུག་པ་ཡང་དབུལ་ལོ། །ཡིད་བཞིན་གྱི་ནོར་བུ་ཆེན་པོ་དོན་ཡོད་པའི་ཞགས་པའི་མཆོག་འདི། ལག་པ་གཡོན་པས་མནན་ལ། ལག་པ་གཡས་པས་དོན་ཡོད་པ་ཡིད་བཞིན་གྱི་ནོར་བུའི་མཆོག་བཟུང་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། འདི་ལྟ་བུ་ཡིད་ལ་བགྱིད་པ་ཆེན་པོ་ཅི་ལྟ་བུའི་བསམ་པ་ཡིད་ལ་བགྱིད་པ་དེ་ལྟ་བུ་ཡང་བསམས་ནས། དོན་ཡོད་རྒྱལ་པོའི་སྙིང་པོ་ལན་བདུན་བཟླས་ཏེ་ཕྱག་བགྱིའོ། །ཡིད་བཞིན་གྱི་ནོར་བུ་རིན་པོ་ཆེ་རྒྱ་ཆེན་དོན་ཡོད་པ་འདི་བཟླས་ནས། འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་འདི་ལན་
བརྒྱ་རྩ་བརྒྱད་བཟླས་བརྗོད་བགྱིའོ། །བྱམས་པ་ཆེན་པོ་དང་སྙིང་རྗེ་ཆེན་པོས་ཡོངས་སུ་གདུངས་པའི་སྙིང་གིས་སེམས་ཅན་ཐམས་ཅད་ལ་མཆོག་ཏུ་བརྩེ་བར་བགྱིས་ནས་གསང་སྔགས་བཟླས་བརྗོད་བགྱིའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་ལྔ་པ། དུས་གསུམ་དུ་གཤེགས་ཤིང་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྒྱ་མཚོ་མཐའ་ཡས་པ་ཐམས་ཅད་ལ་ཕྱག་འཚལ་ལོ། །རང་སངས་རྒྱས་དང་། འཕགས་པ་ཉན་ཐོས་ཀྱི་དགེ་འདུན་འདས་པ་དང་། མ་བྱོན་པ་དང་། ད་ལྟར་བྱུང་བ་ཐམས་ཅད་ལ་ཕྱག་འཚལ་ལོ། །ཡང་དག་པར་སོང་བ་དང་། ཡང་དག་པར་ཞུགས་པ་ཐམས་ཅད་ལ་ཕྱག་འཚལ་ལོ། །བློ་གྲོས་ཆེན་པོ་ཤ་ར་དྭ་ཏིའི་བུ་ལ་ཕྱག་འཚལ་ལོ། །གནས་ཀྱི་མཆོག་དགའ་ལྡན་ན་གནས་པ་འཕགས་པ་བྱམས་པ་ལ་སོགས་པའི་ཚོགས་དང་བཅས་པའི་མཆོག་ལ་ཕྱག་འཚལ་ལོ། །བདེ་བ་ཅན་གྱི་དཀྱིལ་འཁོར་ན་བཞུགས་པ་དེ་བཞིན་གཤེགས་པ་འཕགས་པ་འོད་དཔག་མེད་ལ་ཕྱག་འཚལ་ལོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། དབང་ཕྱུག་ལ་སོགས་པའི་ལྷའི་བུ་གཟུགས་སྣ་ཚོགས་མངའ་བ་སྤྱན་རས་གཟིགས་ལ་ཕྱག་འཚལ་ལོ། །ཏདྱ་ཐཱ། ཨོཾ་མ་ཧཱ་པདྨ་ཙིནྟ་མ་ཎི་མ་ཎི། ཨ་མོ་གྷ་མ་ཎི་སུ་མ་ཎི། མ་ཧཱ་མ་ཎི། སརྦ་ཏ་ཐཱ་ག་ཏ། ཨ་ལཾ་ཀཱ་ར། མ་ཧཱ་ཨ་མོ་གྷ་མ་ཎི། ཙ་ར་ཙ་ར་སཉྩ་ར། ནི་ཤ་ཙ་ཙ་རེ་ཤྭ་ར་མ་ཧཱ། པདྨ་བྷུ་ཛ་བ་ར་ད། མ་ཧཱ་ཀཱ་རུ་ཎི་ཀ །མ་ཧཱ་བི་ཤྭ་རཱུ་པ་དྷ་ར། པྲ་བ་ར་མ་ཧཱ་བོ་དྷི་སཏྭ་པདྨ་དྷ་ར་པདྨཱ་ས་ན་པདྨ་མ་ཀུ་ཊ། མཱ་ལཱ་དྷ་ར། པདྨ་གཽ་ར། པདྨཱ་ལཾ་ཀྲྀ་ཏ་ཏ་ནུ། ས་ཏ་སྲ་བྷུ་ཛས་ཧ་སྲ་ནེ་ཏྲ་ནཱ་ནཱདྦྷུ་ཏ། བྲ་བ་ར་ཎ། མུ་དྲཱ་བི་བྷཱུ་ཥི་ཏཱ་ས་ཧ་སྭ་བྷུ་ཛ། ཛ་ཡ་ཛ་ཡ། ཤ་ཏ་ས་ཧ་སྲ་ར་སྨི་པྲ་ཏི་མཎྜི་ཏ་ཤ་རཱི་ར། བྷ་ར་བྷ་ར། བི་ཙི་ཏྲ། ཨཱ་བྷ་ར་ཎ་དྷ་ར། མ་ཎི་ཀ་ན་ཀ། བཛྲ་བཻ་ཌཱུརྱ། མརྐྐ་ཏ། ཨིན་དྲ་ནཱི་ལ་པདྨ་རཱ་ག་བྷྲཱུ་ཥི་ཏ་ཤ་རཱི་ར། ཙི་རི་ཙི་རི། བི་ཙི་ཏྲ།
ར་ཙ་ཎ། མ་ཧཱ་བོ་དྷི་སཏྭ་བ་ར་དཱ་བྲཧྨ། བིཥྞུ་མ་ཧེ་ཤྭ་ར་རཱུ་པ་དྷ་ར། པདྨེ་ཤྭ་ར། ལོ་ཀེ་ཤྭ་ར། ཡ་མཱནྟེ་ཤྭ་ར། བ་རུ་ཎ། ཀུ་བེ་ར། རྀ་ཥི་ག་ཎ། ཀུ་མཱ་ར། སེནཱ་བ་ཏི་བེ་ཤ་དྷ་ར། དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། མ་ཧཱ་བྷུ་ཏ་བི་ཤ་དྷ་ར། སརྦ་ཏ་ཐཱ་ག་ཏཱ་བྷི་ཥེ་ཀ་ཏ་ས་མ་ཡ་མ་ནུ་སྨར་བྷ་ག་བཱན། པུ་ར་ཡ་མེ་ཨཱ་ཏཱ་ཤཱནྟ་ཏཱ་རཱ་ཡ་པཱུ་ར་ཤཱ་ཡཱ་ཡ་ས་ཏྭ་ན། ཏརྫྫ་ཡ་དུཤྚཱཾ། བཱ་ཏ་ཡ་པིགྷཱཾ། མཱ་ར་ཡ་ཏྲི་དོ་ཥ་མཱ་ལཾ། ས་ར་ས་ར་པཱ་པཾ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། སིད་དྷྱ་སིད་དྷྱ། མ་ཧཱ་ཅིནྡཱ་མ་ཎི། ཨ་མོ་གྷ་པཱ་ཤ་དྷ་ར། སཱ་དྷ་ཡ་སཱ་དྷ་ཡ། བི་པུ་ལ་སིད་དྷི། མ་མ་ཏྲི་བྷུ་བ་ན་དི་བྱ་པྲ་ཡཙྪ། མ་ཧཱ་ཀཱ་རུ་ཎི་ཀ །བུད་དྷྱ་བུད་དྷྱ། བོ་དྷ་ཡ་བོ་དྷ་ཡ། སཾ་བྷོ་དྷ་ཡ། སཾ་བྷོ་དྷ་ཡ། མ་ཧཱ་བ་ཤུ་པ་ཏི་གེ་ཥ་དྷ་ར། ཨ་ནནྟ་བི་ཀུརྦྦ་ཎ། རྀདྡྷི་སན་དརྵ་ཡ། ཏུ་རུ་ཏུ་རུ། ཏ་ར་ཏ་ར། ག་ག་ནེ་བི་པུ་ལ་བི་མཱ་ན།སཾ་ད་ནི་ཀ །ན་མོ་སྟུ་ཏེ་བི་པུ་ལ་པུ་ཎྱ། ཀོ་ཤཱ་དྷ་ར། མ་ཧཱ་ཨ་མོ་སིད་དྷེ་ཧཱུྃ་ཧཱུྃ། ཨ་བྷི་ཥིཉྩ་ཏུ་མཱྃ། བི་པུལ་ཀཱིརྟི་ཀ་ཏེ་སྭཱ་ཧཱ། བྷུ་བ་སྭཱ་ཧཱ། བྷུར་བྷུ་བ་སྭཱ་ཧཱ། ཨ་མོ་གྷ་བི་པུ་ལེ་སྭཱ་ཧཱ། མ་ཧཱ་ཙིནྟཱ་མ་ཎི་སིདྡྷེ་སྭཱ་ཧཱ། མ་ཧཱ་ཙིནྟ་མ་ཎི་སིདྡྷི་བར་དེ་སྭཱ་ཧཱ། སརྦ་སིད་དྷི་བར་དེ་སྭཱ་ཧཱ། ཨོཾ་བི་པུ་ལེ་ཤྭ་ར། ལོ་ཀེ་ཤྭ་ར། མ་ཧཱ་ཙིནྟཱ་མ་ཎི། མ་ཧཱ་ཨ་མོ་གྷ་སིད་དྷེ་ཧཱུཾ་ཕཊ་སྭཱ་ཧཱ། དོན་ཡོད་ནོར་བུའི་ཞགས་པ་ཆེན་པོ་འདི་ལན་བརྒྱ་རྩ་བརྒྱད་བཟླས་མ་ཐག་ཏུ་རིག་སྔགས་འཆང་གི་ལུས་ཐམས་ཅད་འབར་བར་འགྱུར་རོ། །དོན་ཡོད་པའི་ཞགས་པ་ལགས་པས་མནན་ན་ནམ་མཁའི་ངོས་ལ་རྫུ་འཕྲུལ་གྱིས་མཆི་བར་འགྱུར་རོ། །སྒྱུ་མ་ལྟ་བུའི་ཏིང་ངེ་འཛིན་དང་འདྲ་བའི་རྫུ་འཕྲུལ་གྱི་ཆོ་འཕྲུལ་ཆེན་པོ་སྟོན་པར་འགྱུར་རོ། །འཇིག་རྟེན་གྱི་ཁམས་བདེ་བ་ཅན་མཐོང་བར་འགྱུར་རོ། །དེ་བཞིན་གཤེགས་པ་འོད་དཔག་མེད་ཀྱང་ཚོགས་དང་བཅས། འཁོར་དང་བཅས། བྱང་ཆུབ་སེམས་དཔའ་ཆེན་པོའི་དཀྱིལ་འཁོར་དང་། གཞལ་མེད་ཁང་མཆོག་དང་བཅས་པ་རྫུ་འཕྲུལ་གྱིས་རྣམ་པར་འཕྲུལ་པ་མཐོང་བར་འགྱུར་རོ། །བདེ་བ་ཅན་གྱི་གནས་མཐའ་དག་ཏུ་མཆོད་པའི་ཆར་སྤྲིན་གྱི་ཚོགས་ཆེན་པོ་འབྱུང་བར་འགྱུར་ཞིང་། དེ་བཞིན་གཤེགས་པ་ཚེ་དཔག་མེད་ཀྱི་མཐུས་
མཆོད་པའི་སྤྲིན་ཆེན་པོར་གནས་པར་འགྱུར་རོ། །བདེ་བ་ཅན་ན་གནས་པ་དེ་དག་ཐམས་ཅད་དེ་བཞིན་གཤེགས་པ་ཚེ་དཔག་མེད་དེས། རིག་སྔགས་འཆང་ལ་ལེགས་སོ་ཞེས་བགྱི་བ་སྩོལ་བར་འགྱུར་རོ། །རིག་སྔགས་འཆང་དེས་ཀྱང་སྒྲ་དེ་དག་ཐམས་ཅད་ཐོས་པར་འགྱུར་ཞིང་། མཆོད་པའི་ཆར་ཆེན་པོ་དེ་དག་ཡང་མཐོང་བར་འགྱུར་རོ། །གལ་ཏེ་རིག་སྔགས་འཆང་ནམ་མཁའ་ལས་ཆུ་འབེབས་པར་འཚལ་ན། དེའི་ཚེ་བསམས་པ་ཙམ་གྱིས་འབེབས་པར་འགྱུར་རོ། །འོན་ཏེ་མི་འཚལ་ན་ནམ་མཁའ་དེ་ཉིད་ན་ནམ་མཁའ་ལ་གྲུབ་པ་དང་། རིག་སྔགས་འཆང་ཐམས་ཅད་ཀྱི་མཆོག་དོན་ཡོད་རྒྱ་ཆེན་གྲུབ་པ་ཡིད་བཞིན་ནོར་བུ་ལག་པ་ཞེས་བྱ་བའི་འཁོར་ལོས་སྒྱུར་བར་འགྱུར་རོ། །དཔག་ཏུ་མ་མཆིས་པའི་འཁོར་ལོས་སྒྱུར་བའི་རིག་སྔགས་འཆང་གིས་ཡོངས་སུ་བསྐོར་བར་འགྱུར་རོ། །ཚེ་བསྐལ་བ་ཆེན་པོ་བརྒྱ་སྟོང་ཕྲག་བརྒྱད་ཅུ་རྩ་གཉིས་སུ་འགྱུར་རོ། །འོན་ཏེ་བབས་ན་ལོ་ཁྲིར་འཚོ་བར་འགྱུར་རོ། །འཇིག་རྟེན་དབང་ཕྱུག་དང་འདྲ་བར་མཆོད་པ་དང་གུས་པ་ཆེན་པོ་བགྱིད་པར་འགྱུར་རོ། །འཇིག་རྟེན་ཐམས་ཅད་ཀྱི་གཙོ་བོ་གཅིག་པུར་འགྱུར་རོ། །ལྷ་རྣམས་ཀྱང་བབས་ནས་རིག་སྔགས་འཆང་དེ་ལ་མཆོད་པའི་མཆོག་རྒྱ་ཆེན་པོ་དག་བགྱིད་པར་འགྱུར་རོ། །སེམས་ཅན་ཐམས་ཅད་ལ་བུ་གཅིག་པ་བཞིན་དུ་མངོན་པར་དགའ་བར་འགྱུར་རོ། །མཆོད་པའི་འོས་སུའང་འགྱུར་རོ། །ལྷ་ཐམས་ཅད་ཀྱིས་ཀྱང་ཀུན་ཏུ་བསྲུང་ཞིང་ཕྱག་བགྱི་བའི་འོས་སུ་འགྱུར་རོ། །ཐོས་པ་བསགས་པའི་རྒྱ་མཚོ་ཆེན་པོར་ཡང་འགྱུར་རོ། །གལ་ཏེ་རིག་སྔགས་འཆང་ཕྱོགས་བཅུ་དུས་གསུམ་ཐམས་ཅད་ཀྱི་དེ་བཞིན་གཤེགས་པ་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་དང་བཅས་པ་རང་སངས་རྒྱས་དང་། འཕགས་པ་ཉན་ཐོས་ཀྱི་དགེ་འདུན་ཐམས་ཅད་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་སངས་རྒྱས་ཀྱི་བསྟན་པ་ལ་མངོན་པར་དད་པ་དང་བཅས་པ་ལ་མཆོད་པ་བགྱིད་པར་འཚལ་བའམ། ཕྱོགས་བཅུ་དུས་གསུམ་དུ་གཏོགས་པ་ཐམས་ཅད་ཀྱི་དེ་བཞིན་གཤེགས་
པ་རྣམས་ལ་བསོད་ནམས་ཀྱི་ཕུང་པོ་ཆེན་པོ་ཡོངས་སུ་རྫོགས་པར་འཚལ་བའམ། དགེ་བའི་རྩ་བ་ཆེན་པོ་བསྐྱེད་པར་འཚལ་བའམ། ལྷའི་ཞལ་ཟས་ཀྱི་མཆོག་རོ་བྲོ་བའི་མཆོག་དང་ལྡན་པའི་བཟའ་བ་དང་། ལྷའི་བཅུད་ཀྱིས་ལེན་གྱི་མཆོག་གིས་དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ཉན་ཐོས་ཀྱི་དགེ་འདུན་ཐམས་ཅད་ལ་བསྟབས་པར་འཚལ་བའམ། སྦྱིན་པ་མང་པོ་དང་། ཆེན་པོ་གཏོང་བར་འཚལ་བའམ། ཉིན་རེ་ཞིང་མཆོད་པའི་སྤྲིན་བགྱིད་པར་འཚལ་ན། རིག་སྔགས་འཆང་དེས་ལེགས་པར་བཀྲུས་ཏེ། གཙང་མས་གོས་གཙང་མ་བགོས་ནས། ཅི་འབྱོར་པས་དཀྱིལ་འཁོར་གྲུ་བཞིར་བགྱིས་ལ། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་མེ་ཏོག་དང་། བདུག་པ་ཡང་དག་དབུལ་བར་བགྱིའོ། །པུས་མོ་བཙུགས་ཏེ་ཐལ་མོ་སྦྱར་ནས་ཞགས་པ་བཟུང་སྟེ། དེ་བཞིན་གཤེགས་པ་ཐམས་ཅད་ཡིད་ལ་བགྱིའོ། །ཡིད་བཞིན་གྱི་ནོར་བུ་ཆེན་པོ་རྒྱ་ཆེན་དོན་ཡོད་འདི་ཡང་མཆོད་པར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་ལན་བདུན་བཟླས་པར་བགྱིའོ། །ཡིད་ལ་བགྱིད་པ་ཡངས་པ་རྒྱ་ཆེན་པོ་མཆོད་པའི་སྤྲིན་ཆེན་པོ་དང་། སྦྱིན་གཏོང་ཆེན་པོ་དང་། ཁ་ཟས་དང་། བཏུང་བ་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། གོས་དང་། རྒྱན་དང་། ལྷབ་ལྷུབ་དང་། རྒྱན་འཕྱང་དང་། རོལ་མོ་དང་། སིལ་སྙན་དང་། ཕེག་རྡོབ་པ་དང་། རིན་པོ་ཆེའི་ལྗོན་ཤིང་དང་། འབྲས་བུའི་ལྗོན་ཤིང་དང་། མེ་ཏོག་གི་ལྗོན་ཤིང་དང་། མར་མེའི་ལྗོན་ཤིང་དང་། དཔག་བསམ་གྱི་ལྗོན་ཤིང་ཡིད་ལ་བགྱིས་ཏེ། གསང་སྔགས་ཀྱི་གཟུངས་བཟླས་ནས་ཇི་ལྟར་ཡིད་ལ་བསམས་ཤིང་དོན་དུ་གཉེར་བ་བཞིན་ཕྱོགས་བཅུར་འཕངས་ན། དེའི་ཚེ་ཕྱོགས་བཅུ་དུས་གསུམ་དུ་གཤེགས་པ་དཀྱིལ་འཁོར་མཐའ་དག་ཏུ་གཏོགས་པའི་འཁོར་གྱི་དཀྱིལ་འཁོར་དུ་མཁོ་བའི་ཡོ་བྱད་ཐམས་ཅད་མ་ཚང་བ་མ་མཆིས་པར་ཅི་བསམས་པ་བཞིན་དེ་བཞིན་
གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་གྱི་སྤྱན་སྔར་མཆོད་པའི་ཆར་གྱི་སྤྲིན་ཆེན་པོ་འབྱུང་བར་འགྱུར་རོ། །དེ་བཞིན་དུ་མཁོ་བའི་ཡོ་བྱད་ཐམས་ཅད་ཀྱི་མཆོད་པ་ཆེན་པོ་མ་ཚང་བ་མ་མཆིས་པར་འབྱུང་བར་འགྱུར་རོ། །དེ་བཞིན་དུ་མཐུ་ཆེན་པོའི་ནོར་བུ་རྒྱ་ཆེན་དོན་ཡོད་ལ་མཆོད་པའི་གཟུངས་བཟླས་ཤིང་། འཕགས་པ་སྤྱན་རས་གཟིགས་དབང་ཕྱུག་གི་སྙིང་པོའི་གཟུངས་འདི་ཡང་ཉིན་གཅིག་བཞིན་དུ་ཐུན་གསུམ་དུ་ལན་གསུམ་དུ་བཟླས་པར་བགྱིའོ། །དེ་ནས་རིག་སྔགས་འཆང་གིས་དུས་གསུམ་དུ་གཤེགས་པའི་འཁོར་གྱི་དཀྱིལ་འཁོར་དང་བཅས་པ་དེ་དག་མཉེས་པར་བགྱིས་པ་དང་། མཆོད་པ་བགྱིས་པ་དང་། རིམ་གྲོ་བགྱིས་པར་འགྱུར་རོ། །བསོད་ནམས་ཀྱི་ཕུང་པོའི་ཚོགས་ཆེན་པོ་དང་། དགེ་བའི་རྩ་བ་ཆེན་པོ་བསྐྱེད་པར་འགྱུར་རོ། །དུས་གསུམ་དུ་གཏོགས་པའི་དེ་བཞིན་གཤེགས་པ་འཁོར་གྱི་དཀྱིལ་འཁོར་དང་བཅས་པ་དེ་དག་ཐམས་ཅད་ཀྱིས་རིག་སྔགས་འཆང་ལ་དྲན་པ་དང་།བློ་གྲོས་དང་སྟོབས་དང་བརྩོན་འགྲུས་དང་གཟི་བརྗིད་སྩོལ་བར་འགྱུར་རོ། །ཉིན་གཅིག་བཞིན་དུ་དེ་བཞིན་གཤེགས་པ་ཐམས་ཅད་མཐོང་བར་འགྱུར་རོ། །རྟག་ཏུ་དེ་བཞིན་གཤེགས་པ་རྣམས་ཀྱིས་དགོངས་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་རྟག་ཏུ་རྗེས་སུ་འབྲང་བར་འགྱུར་རོ། །རྟག་ཏུ་མཆོག་སྦྱིན་པ་མཐོང་བར་འགྱུར་རོ། །མཐོང་བའི་ཆོས་ལ་འཁོར་བའི་སྡུག་བསྔལ་འཇིགས་པ་འཇིགས་སུ་རུང་བ་དང་། སྐྲག་པ་དང་། དངང་བ་རྣམས་ཞི་བར་འགྱུར་རོ། །ནད་ཀྱིས་ཀྱང་གནོད་པར་མི་འགྱུར་རོ། །རིམས་ཀྱིས་མ་ལགས། དུག་གིས་མ་ལགས། དུག་སྦྱར་མས་མ་ལགས། སྦྱོར་བས་མ་ལགས། མཚོན་གྱིས་མ་ལགས། མེས་མ་ལགས། ཆུས་མ་ལགས་ཏེ། ལུས་ལ་སེར་བ་འབབ་པར་མི་འགྱུར་རོ། །དགྲས་འཇིགས་པར་མི་འགྱུར་ཏེ། ཕ་རོལ་གྱི་དཔུང་གི་འཇིགས་པས་མ་ལགས། ཕ་རོལ་གྱི་སྡེའི་འཇིགས་པས་མ་ལགས། ཕས་ཀྱི་རྒོལ་བ་དང་མི་མཛའ་བའི་འཇིགས་པས་མ་ལགས། ལྷའི་འཇིགས་པས་མ་ལགས། ཀླུའི་འཇིགས་པས་མ་ལགས་ཏེ། གནོད་
སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། སྲིན་པོ་དང་། མཁའ་འགྲོ་མ་དང་། འདོད་དགུར་བསྒྱུར་བ་དང་། སྦྱོར་བ་མོའི་འཇིགས་པ་འབྱུང་བར་མི་འགྱུར་རོ། །དཔག་ཚད་གཅིག་གི་ནང་ཚུན་ཆད་གཟུང་བར་མི་ནུས་ཤིང་། རྒྱང་རིང་པོར་འབྲོས་པར་འགྱུར་ཏེ། དེ་ལ་བགེགས་བགྱིད་པར་མི་འགྱུར་རོ། །གང་དག་མནར་མེད་པར་གནས་པར་འགྱུར་བའི་སེམས་ཅན་ནམ། མཚམས་མེད་པ་ལྔ་བགྱིད་པའམ། འཕགས་པ་ལ་སྐུར་བ་འདེབས་པའམ། དམ་པའི་ཆོས་སྤོང་བའམ། བསྐལ་པ་བྱེ་བར་བསགས་པའི་ལས་ཀྱི་སྒྲིབ་པས་ལུས་ཡོངས་སུ་དཀྲིས་པ་གང་ལགས་པ་དེ་ཡང་མཐོང་བའི་ཆོས་ལ་ཐམས་ཅད་ལྷག་མ་མ་ལུས་པར་ཡོངས་སུ་གཏུགས་པར་འགྱུར། ཡོངས་སུ་གྲོལ་བར་འགྱུར་རོ། །གལ་ཏེ་ཚིག་གཞན་མི་སྨྲ་བར་ལན་སྟོང་རྩ་བརྒྱད་བཟླས་བརྗོད་བགྱིད་ཅིང་། སྨྱུང་བ་ལན་ཅིག་བགྱིས་ཏེ། བཟླས་བརྗོད་བྱས་ན་དེ་བསྐལ་པ་བྱེ་བ་ཕྲག་བརྒྱ་སྟོང་དུ་འཁོར་བར་སྐྱེ་བ་ལས་ཕྱིར་ཟློག་པར་འགྱུར་རོ། །གཟུངས་ཀྱི་བཟླས་བརྗོད་ཀྱིས་ལས་ཀྱི་སྒྲིབ་པ་སྔ་མ་རྣམས་ཀྱང་འབྱང་བར་འགྱུར་ཞིང་། བསྐལ་པ་སྟོང་དུ་བསགས་པའི་སྡིག་པ་རྣམས་ཉམས་པར་འགྱུར་རོ། །འཁོར་བའི་ཉེས་པས་ཕྱིར་ཡང་གོས་པར་མི་འགྱུར་ཏེ། སྡིག་པ་དང་སྒྲིབ་པ་ཐམས་ཅད་ཀྱིས་པདྨ་བཞིན་དུ་གོས་པར་མི་འགྱུར་རོ། །མཐོང་བའི་ཆོས་ལས་ལྔ་པ་ཐོབ་པར་འགྱུར་རོ། །བསྟེན་པ་ཙམ་མམ་ཆོ་གའི་བཟླས་བརྗོད་ལ་ངེས་པར་གནས་ན། ཕྱིར་མི་ལྡོག་པའི་གནས་ཐོབ་པར་འགྱུར་རོ། །དྲན་པ་ཙམ་གྱིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ཕ་རོལ་ཏུ་ཕྱིན་པ་བཅུའི་རྗེས་སུ་མཆི་བར་འགྱུར་རོ། །ཉིན་གཅིག་བཞིན་དུ་ལན་བརྒྱ་རྩ་བརྒྱད་བཟླས་བརྗོད་བགྱིས་ན། མཐོང་བའི་ཆོས་ལ་ཀུན་ཏུ་བཟང་པོ་ཉིད་ཐོབ་པར་འགྱུར་རོ། །གསང་སྔགས་དང་ཆོ་ག་ཞིབ་མོ་དང་། དཀྱིལ་འཁོར་དང་ཕྱག་རྒྱ་ཐམས་ཅད་ཀྱི་རྗེས་སུ་ཞུགས་པ་དང་། དམ་ཚིག་ཐམས་ཅད་ལ་ཞུགས་པར་འགྱུར་རོ། །ཡང་དག་པར་སྐྱེད་པ་ཐམས་ཅད་ཀྱི་རྗེས་སུ་འབྲང་བར་འགྱུར་རོ། །རིག་སྔགས་
འཆང་མཐོང་བ་ཙམ་གྱིས། མནར་མེད་པར་གནས་པ་རྣམས་ཀྱི་སྡིག་པ་རྣམ་པར་འཇིག་པར་འགྱུར་རོ། །ཆུང་དུ་ན་རིག་སྔགས་འཆང་དུར་ཁྲོད་དུ་ཞུགས་ནས་གུམ་པའི་རུས་པའམ། གུམ་པའི་ཤའམ། གུམ་པའི་རོ་རུལ་བའམ། ཆུང་དུ་ན་གུམ་པའི་གོས་པོར་བའམ། རྩིག་པའི་རི་མོ་ལ་རིག་སྔགས་འཆང་དེའི་གྲིབ་མས་ཕོག་པར་གྱུར་ན། སེམས་ཅན་དེ་གང་དང་གང་གིས་དམྱལ་བར་གཞོལ་བར་འགྱུར་བ་དེ་དང་དེ་ནས་མོད་ལ་ཐར་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། དེ་ལ་ཡིད་གཉིས་སམ་སོམ་ཉི་བསྐྱེད་པར་མི་བགྱིད་ན། གང་དག་ཆེས་མང་དུ་ལྟག་པར་བགྱིད་པར་འགྱུར་བ་ལྟ་སྨོས་ཀྱང་ཅི་འཚལ། གང་རིགས་ཀྱི་བུ་པོའམ། རིགས་ཀྱི་བུ་མོའམ། དགེ་སློང་ཕའམ། དགེ་སློང་མའམ། དགེ་བསྙེན་ཕའམ། དགེ་བསྙེན་མའམ། དད་པའི་རྗེས་སུ་འབྲང་བ་འགའ་ཞིག་གཟུངས་འདི་འཆང་བར་བགྱིད་དམ། བརྗོད་པར་བགྱིད། ཀློག་པར་བགྱིད། འདོན་པར་བགྱིད། སེམས་པར་བགྱིད། བསྒོམ་པར་བགྱིད། མཆོད་པར་བགྱིད། བྲི་བར་བགྱིད། འདྲིར་འཇུག་པར་བགྱིད་ན། དེ་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །མཐོང་བའི་ཆོས་ལ་ཡོན་ཏན་ཆེན་པོ་བརྒྱ་སྟོང་མང་པོ་མཐོང་བར་འགྱུར་རོ། །འདི་ཉིད་བཅངས་ན། མཐོང་བའི་ཆོས་ལ་དགེ་བའི་རྩ་བ་ཐམས་ཅད་དང་། ཕ་རོལ་ཏུ་ཕྱིན་པ་དྲུག་དང་རྗེས་སུ་མཐུན་པའི་དགེ་བའི་རྩ་བ་ཡོངས་སུ་རྫོགས་པར་འགྱུར་རོ། །གཟུངས་འདི་ཉིད་རེ་ཞིག་ཀུན་ཆུབ་པར་བགྱིས་ནས། མཁོ་བའི་ཡོ་བྱད་ཐམས་ཅད་ཡོངས་སུ་རྫོགས་པར་འགྱུར་ན། དགོས་པ་མང་པོས་གྲིམས་པར་བགྱིད་པ་ལྟ་སྨོས་ཀྱང་ཅི་འཚལ། དེ་ནས་རིག་སྔགས་འཆང་དོན་ཡོད་ཡིད་བཞིན་ནོར་བུའི་ཞགས་པ་བསྒྲུབས་ནས་ཡིད་ལ་བསམས་ཏེ། བསམས་པའི་ལས་ཐམས་ཅད་བགྱིས་ན་ཐམས་ཅད་འགྲུབ་པར་འགྱུར་རོ། །དགོས་པད་ང་བགྱི་བ་ཐམས་ཅད་འགྲུབ་པར་འགྱུར་རོ། །ཅི་ལྟར་འཕགས་པ་སྤྱན་རས་གཟིགས་དབང་ཕྱུག་མཆོག་སྦྱིན་མངོན་སུམ་དུ་མཐོང་ནས། ལུང་བསྟན་པ་བཞིན་དུ་དོན་ཡོད་པའི་ཡིད་བཞིན་གྱི་ནོར་བུའི་ཞགས་པ་འདི་དེ་བཞིན་
དུ་བལྟ་བར་བགྱི་སྟེ། འདི་ལ་ཡིད་གཉིས་མི་བགྱིའོ། །དེ་ནས་རིག་སྔགས་འཆང་གིས་ཞགས་པ་མགྲིན་པར་བཏགས་ལ། ལག་པ་གཡས་པས་ནོར་བུ་བླངས་ཏེ། ལག་པ་གཡོན་པས་ལྕགས་ཀྱུ་བླངས་ན་མི་གདའ་བར་གྱུར་ནས། གར་དགའ་བ་དེར་འཇུག་པར་འགྱུར་ཏེ། མཚན་མོ་ཡང་ནོར་བུའི་འོད་ཀྱི་སྣང་བས་ཉིན་པར་ཅི་ལྟ་བ་བཞིན་མཐོང་བར་འགྱུར་རོ། །ཐམས་ཅད་དུ་ལྷའི་གནས་སུ་འཇུག་པ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅིའི་གནས་དང་། ལྟོ་འཕྱེ་ཆེན་པོའི་གནས་དང་། རི་སུལ་གྱི་ཕུག་དང་། རི་དང་། ནགས་ཚལ་དང་། ཐང་གི་སྒོ་རྣམས་འབྱེ་བར་འགྱུར་རོ། །ཐམས་ཅད་དུ་མི་མངོན་པར་ཞུགས་ནས་སླར་ལྡོག་པར་འགྱུར་ཞིང་ཅི་འཚལ་བ་དེ་བགྱིད་པར་འགྱུར་རོ། །མི་རྣམས་ཀྱི་ནང་དུ་ལྷའི་ཚེ་ལོ་བརྒྱར་འཚོ་བར་འགྱུར་རོ། །ཉོན་མོངས་པ་དང་། ཉེས་པའི་སྐྱོན་ཐམས་ཅད་སྤངས་པར་འགྱུར་རོ། །འོན་ཏེ་རིག་སྔགས་འཆང་གིས་གྲུབ་པའི་དོན་ལ་བརྟག་པར་འཚལ་ན། ཟླ་བ་ཡར་གྱི་ངོའི་ཚེས་བརྒྱད་དམ། བཅུ་བཞི་ལ་ལེགས་པར་ཁྲུས་བགྱིའོ། །གཙང་མས་གོས་གཙང་མ་བགོ་བར་བགྱིའོ། །གཙང་མའི་གནས་སམ། ཕྱོགས་སུ་བའི་ལྕི་བ་སྟེ། བའི་རྣམ་ལྔས་ཡོངས་སུ་སྦྱང་བར་བགྱིའོ། །གནས་དེའི་ནང་ལོགས་ཀྱི་དབུས་སུ་དྲིའི་དཀྱིལ་འཁོར་བགྱིའོ། །མེ་ཏོག་གི་སིལ་མ་བཀྲམ་ཞིང་བུམ་པ་གང་བས་བརྒྱན་ཅིང་། སྤོས་སྣ་ཚོགས་ཀྱིས་བགོས་པའི་བདུག་པ་གཞག་པར་བགྱིའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་སྟན་བཟང་པོ་བཤམས་ཏེ། ཤིན་ཏུ་མཉམ་པར་གཞག་པས་ཞགས་པ་སྦྲུལ་འཁྱིལ་བའི་ཚུལ་དུ་ཟླུམ་པོར་བསྐྱིལ་ནས་གཞག་པར་བགྱིའོ། །དབུས་སུ་ནོར་བུ་གཞག་པར་བགྱིའོ། །དེ་ནས་རིག་སྔགས་འཆང་གིས་མཆོད་པར་བགྱིའོ། །དོན་ཡོད་རྒྱལ་པོའི་སྙིང་པོ་ལན་ཉི་ཤུ་རྩ་གཅིག་བཟླས་བརྗོད་བགྱིས་ནས། ཁྲོ་བོའི་རྒྱལ་པོ་ལན་ཉི་ཤུ་རྩ་གཅིག་བཟླས་བརྗོད་བགྱིའོ། །དེ་ནས་དོན་ཡོད་ཡིད་བཞིན་གྱི་ནོར་བུའི་སྙིང་པོ་ལན་བརྒྱ་རྩ་བརྒྱད་བཟླས་ནས། དེའི་འོག་ཏུ་ཙནྡན་དང་།
ཨ་ག་རུ་དང་། དུ་རུ་སྐའི་བདུག་པ་དབུལ་ཞིང་ནོར་བུ་ལ་བརྟག་པར་བགྱི་སྟེ། ཞགས་པ་དང་། དེ་ཐམས་ཅད་ནོར་བུའི་ནང་ནས་གདའ་བར་འགྱུར་རོ། །དེ་བཞིན་གཤེགས་པ་གདའ་བའམ། བྱང་ཆུབ་སེམས་དཔའ་གདའ་བའམ། ལྷ་གདའ་བའམ། ཀླུ་གདའ་བའམ། གནོད་སྦྱིན་དང་། སྲིན་པོ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་གདའ་བ་དང་། འབྱུང་པོ་དང་། ལྟོ་འཕྱེ་ཆེན་པོ་གདའ་བའམ། གཡུལ་འགྱེད་པ་གདའ་བའམ། ཚེ་རིང་བ་གདའ་བའམ། ཚེ་ཉམས་པ་གདའ་བའམ། ཚེ་འཕོ་བ་གདའ་བའམ། རྒྱལ་སྲིད་གདའ་བའམ། གྲོང་འཐོབ་པའམ། ཡུལ་འཐོབ་པའམ། གྲོང་ཁྱེར་འཐོབ་པའམ། དབྱིག་དང་། གསེར་དང་། ནོར་བུ་དང་། མུ་ཏིག་དང་། བཻ་ཌཱུརྱ་དང་། ཤང་ཀ་ཤི་ལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། གོས་དང་། ལྷབ་ལྷུབ་དང་། རྒྱན་གདའ་བའམ། ནོར་བསྒྱུར་བ་སྨྲ་བ་དང་། མིག་འཕྲུལ་སྨྲ་བའམ། ཞིང་སྨྲ་བའམ། གཏེར་སྨྲ་བའམ།འབྲུ་སྨྲ་བའམ། བུད་མེད་འཕྲོག་པའམ། ལས་བསྒྲུབ་པའམ། གསང་སྔགས་བསྒྲུབ་པའམ། དབང་དུ་བགྱི་བའམ། ངོ་མཚར་བ་དེ་དག་ཐམས་ཅད་ནོར་བུའི་ནང་ནས་གདའ་བར་འགྱུར་ཞིང་དགེ་བའམ་མི་དགེ་བ། དེ་དག་ཐམས་ཅད་ཀྱང་གདའ་བར་འགྱུར་རོ། །ལོའམ། ལོ་ཕྱེད་དམ། གནོད་པའམ། འཚེ་བའམ། ཡམས་སམ། མི་ངས་སམ། མི་ངས་ཆེན་པོའམ། ཕྱུགས་ངས་སམ། གོར་རམ། རྟ་ནད་དམ། གླང་པོ་ཆེའི་ནད་དམ། རང་གི་དཔུང་ངམ། གཞན་གྱི་དཔུང་གི་འཇིགས་པ་དང་། སྐྲག་པ་ཆེན་པོ་དེ་དག་ཐམས་ཅད་མེ་ལོང་གི་དཀྱིལ་འཁོར་ལ་ཅི་ལྟ་བ་དེ་བཞིན་དུ་གདའ་བར་འགྱུར་ལགས་སོ། །གང་བསམས་ཤིང་གང་གཉེར་བར་འགྲུབ་པའམ། མི་འགྲུབ་པའམ། དགེ་བའམ། མི་དགེ་བ་ཐམས་ཅད་གདའ་བར་འགྱུར་ཏེ། དེ་ལ་ཐེ་ཚོམ་དང་ཡིད་གཉིས་དང་སོམ་ཉི་མི་བགྱི་སྟེ། དངོས་པོ་དོན་གཞན་དུ་མི་འགྱུར་རོ། །ཆར་མི་འབབ་པའི་དུས་སུ་ཀླུའི་གནས་སུ་ནོར་བུ་བཞག་ན། ཅི་ཙམ་འཚལ་བར་ཆར་གྱི་རྒྱུན་འབབ་པར་འགྱུར་རོ། །ཧ་ཅང་
ཆར་ཆེས་ན་ནམ་མཁའ་ལ་ནོར་བུ་བསྟན་ན་ཆར་ཆེན་པོ་འཆད་པར་འགྱུར་རོ། །ཉི་མ་འཆར་ཁར་ཉི་མ་ལ་བསྟན་ན་ཉི་མ་བབས་ནས་མཆོག་ཐམས་ཅད་སྩོལ་བར་འགྱུར་རོ། །ཟླ་བ་ཚེས་པ་ལ་བསྟན་ན་ཟླ་བ་བབས་ནས་འདོད་དགུ་ཐམས་ཅད་ཀྱི་མཆོག་སྩོལ་བར་བགྱིད་དོ། །ཆུ་ཀླུང་ཆེན་པོར་བསྟན་ན་རིན་པོ་ཆེ་རྣམས་འབྱུང་བར་འགྱུར་རོ། །ནགས་ཁུང་དུ་བསྟན་ན་སྨན་གྱི་རྫས་ཐམས་ཅད་རང་གི་གཟུགས་ཀྱིས་མདུན་ན་མཆིས་ནས་གང་གཉེར་བ་དེ་ལེན་པར་འགྱུར་རོ། །རི་ཕུག་ཏུ་བསྟན་ན་སྨན་ཐམས་ཅད་འབབ་པར་འགྱུར་ཏེ། ཅི་འཚལ་བ་དེ་བླང་བར་བགྱིའོ། །འབྲུའི་ཕུང་པོ་ལ་བསྟན་ན་འབྲུ་ཐམས་ཅད་འདུ་བར་འགྱུར་ཏེ། གང་དུ་འཚལ་བ་དེར་འབྱུང་བར་འགྱུར་རོ། །མ་མོའི་གནས་སམ། ནག་པོ་ཆེན་པོ་ལ་བསྟན་ཏེ། སྤྱི་བོའི་གཙུག་ཏུ་བཞག་ན་ནག་པོ་ཆེན་པོ་མ་མོའི་ཚོགས་ཀྱི་འཁོར་དང་བཅས་པ་རང་གི་གཟུགས་ཀྱིས་མདུན་ན་མཆིས་ནས། དབང་དུ་འགྱུར་ཞིང་དགོས་པ་ཐམས་ཅད་དང་ལས་ཐམས་ཅད་བགྱིད་པར་འགྱུར་རོ། །རྒྱལ་པོའི་མངོན་སུམ་དུ་བསྟན་ན་ཡན་ལག་བཞིའི་དཔུང་དང་བཅས་པ། བློན་པོའི་ཚོགས་དང་བཅས། བཙུན་མོའི་འཁོར་དང་བཅས་པ། དབྱིག་དང་། གསེར་དང་། ནོར་བུ་དང་། མུ་ཏིག་དང་། བཻ་ཌཱུརྱ་དང་། ཤང་ཀ་ཤིལ་དང་། བྱི་རུ་དང་། ས་ལེ་སྦྲམ་དང་།དངུལ་དང་། གོས་དང་། རྒྱན་དང་། ལྷབ་ལྷུབ་དང་། རྒྱན་འཆང་བ་དང་། ཁང་པ་དང་། ངོ་མཚར་དུ་བཅས་པ་དབང་དུ་གྱུར་ནས། ཇི་སྲིད་འཚོའི་བར་དུ་བསྙེན་བཀུར་བགྱིད་པར་འགྱུར་རོ། །སྐྱེ་བོའི་ཚོགས་ཆེན་པོའི་ནང་དུ་ཞགས་པ་འཕངས་ཏེ། དོན་ཡོད་པའི་ཡིད་བཞིན་གྱི་ནོར་བུའི་གཟུངས་བཟླས་ན། ཅི་ལྟར་འཚལ་བ་ཡིད་ལ་བསམས་པ་བཞིན། མེ་ཏོག་དང་འབྲས་བུ་དང་། གཞལ་མེད་ཁང་གི་ཆར་འབབ་པར་འགྱུར་རོ། །རྒྱལ་མཚན་བསྒྲེང་བའི་རྩེ་མོར་བཞག་སྟེ། རྒྱལ་རིགས་སྤྱི་བོར་དབང་བསྐུར་བ་ཁྱིམ་གྱི་སྟེང་ངམ་ཁྱམས་སུ་བཞག་ལ། འཕགས་པའི་ལམ་ཡན་ལག་བརྒྱད་ཀྱི་བསྙེན་གནས་ཀྱིས་སེམས་ཅན་ཐམས་ཅད་ལ་མཆོག་ཏུ་བརྩེ་བར་བགྱིད་དོ། །དོན་ཡོད་རྒྱལ་པོའི་སྙིང་པོ་ལན་ཉི་ཤུ་རྩ་གཅིག་བཟླས་བརྗོད་བགྱིས་ནས། ཁྲོ་བོའི་རྒྱལ་པོ་ལན་ཉི་ཤུ་རྩ་
གཅིག་བཟླས་པར་བགྱིའོ། །དེ་ནས་དོན་ཡོད་པའི་ཡིད་བཞིན་ནོར་བུའི་གཟུངས་ལན་བརྒྱ་རྩ་བརྒྱད་གསང་བསྟོད་དེ་བཟླས་བརྗོད་བགྱིའོ། །ལན་བརྒྱ་རྩ་བརྒྱད་ཚང་ནས། ཅི་ལྟར་ཡིད་ལ་བསམས་པ་བཞིན་ཆར་དུ་འབབ་པར་འགྱུར་རོ། །ནོར་དང་། འབྲུ་དང་། གོས་དང་། ལྷབ་ལྷུབ་ལ་སོགས་པ། མེ་ཏོག་དང་འབྲས་བུའི་ཆར་འབབ་པར་འགྱུར་རོ། །འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་དང་། མུ་གེའི་དགོན་པའི་འཇིགས་པ་དང་། ཡམས་དང་། གནོད་པ་དེ་དག་ཐམས་ཅད་འཕགས་པ་སྤྱན་རས་གཟིགས་དབང་ཕྱུག་གི་མཐུས་བབས་པར་འགྱུར་རོ། །ཐམས་ཅད་རབ་ཏུ་ཞི་བར་འགྱུར་རོ། །སེམས་ཅན་ཐམས་ཅད་ལ་མི་འཇིགས་པ་སྩོལ་བར་འགྱུར་རོ། །འཇིགས་པ་དང་ཤ་ཁོ་ན་ཐམས་ཅད་ལས་ཐར་བར་འགྱུར་རོ། །གདུག་པ་ནས་གཅན་གཟན་ཁྲོ་བོ་ཐམས་ཅད་ཀྱི་བར་དུ་ཡང་བྱམས་པ་ལ་གནས་པར་འགྱུར་རོ། །སེམས་ཅན་ཐམས་ཅད་མཐུན་པར་བགྱིད་པར་འགྱུར་རོ། །ཡིད་ཀྱི་བརྣག་པ་ཐམས་ཅད་ཡོངས་སུ་རྫོགས་པར་འགྱུར་རོ། །དོན་ཡོད་ཡིད་བཞིན་ནོར་བུའི་ཞགས་པ་ཆེན་པོ་སྒྲུབ་པའི་ཆོ་གའོ།། །།