རལ་གྲི་སྒྲུབ་པའི་ཆོ་ག
དེ་ནས་རིག་སྔགས་འཆང་རལ་གྲི་དང་ཞགས་པ་བསྒྲུབ་པར་འཚལ་ན། རིག་སྔགས་འཆང་གིས་ལྕགས་ཆེན་པོ་ལས་རལ་གྲི་སོར་བཅུ་དྲུག་གི་ཚད་དུ་བགྱིས་ལ་ལག་ཟུངས་ཀྱི་ངོས་ལ་དངུལ་ལས་བགྱིས་ཏེ། གསེར་གྱིས་འབར་བར་བྲིའོ། །ཤིང་ཤུན་གྱི་སྐུད་པའམ། ཨརྐའི་སྐུད་པ་དང་། ཁ་ཆེ་དར་གྱི་སྐུད་པ་ལྷན་ཅིག་ཏུ་སྒྲིལ་ལ་ཁྲུ་བཅུ་དྲུག་བྱུང་བ་ཤིན་ཏུ་ཚད་ལ་བབ་པར་བཀུམ་པ། བསྒྲུབ་པའི་དགོས་པ་ཡོངས་སུ་རྫོགས་པ་ལ་སུམ་སྒྲིལ་དུ་བཀལ་བར་བགྱིའོ། །དེ་ནས་རིག་སྔགས་འཆང་གིས་ལེགས་པར་ཁྲུས་བགྱིས་ཏེ། གཙང་མས་གོས་གཙང་མ་བགོས་ཏེ། ཞགས་པ་དང་། རལ་གྲི་མནན་ལ། ལག་པ་གཡས་པས་དཀྱིལ་འཁོར་ལ་བཞག་སྟེ་གཟུང་བར་བགྱིའོ། །ཁྲོས་པའི་གཉེར་གྱི་བཞིན་གྱིས་སྐྱིལ་མོ་ཀྲུང་བཅས་ཏེ་མཆིས་ནས། འཕགས་པ་སྤྱན་རས་གཟིགས་དབང་ཕྱུག་གི་རི་མོའི་གཟུགས་ཀྱི་མདུན་དུ་ཁྲོ་བོའི་རྒྱལ་པོ་ལན་སྟོང་རྩ་བརྒྱད་བཟླས་པར་བགྱིའོ། །བཟླས་བརྗོད་ལན་སྟོང་རྩ་བརྒྱད་ཚང་ནས། རལ་གྲི་འབར་བར་གྱུར་ནས། རིག་
སྔགས་འཆང་ནམ་མཁའ་ལ་འཕུར་བར་འགྱུར་ཞིང་། རལ་གྲི་གྲུབ་པའི་རིག་སྔགས་འཆང་ཐམས་ཅད་ཀྱི་གཙོ་བོ་འཁོར་ལོས་སྒྱུར་བར་འགྱུར་རོ། །གཞན་གྱི་མཐུས་ཟིལ་གྱིས་ནོན་པར་མི་འགྱུར་རོ། །ལོ་ཁྲི་བརྒྱད་སྟོང་དུ་འཚོ་བར་འགྱུར་རོ། །འོན་ཏེ་ལག་པ་གཡོན་པས་ཞགས་པ་བཟུང་ལ་གཡས་པས་རལ་གྲི་བཟུང་སྟེ། ཁྲོས་པས་ཧཱུྃ་ཞེས་བགྱི་བས་མནན་ན། མི་གདའ་བར་གྱུར་ནས། མི་གདའ་བ་དང་། ཞགས་པ་དང་། རལ་གྲི་གྲུབ་པའི་རིག་སྔགས་འཆང་ཐམས་ཅད་ཀྱི་གཙོ་བོ་རྒྱལ་པོ་འཁོར་ལོས་སྒྱུར་བར་འགྱུར་རོ། །ཚེ་ལོ་ཁྲི་ཐུབ་པར་འགྱུར་རོ། །འོན་ཏེ་རིག་སྔགས་འཆང་ཁྲོས་པས་རལ་གྲི་བསྐོར་ན། བགེགས་དང་། ལོག་འདྲེན་དང་། གནོད་སྦྱིན་དང་། སྲིན་པོ་གདུག་པ་ཐམས་ཅད་དང་། འབྱུང་པོ་ཐམས་ཅད་ཀྱི་རིག་སྔགས་གཅད་པར་འགྱུར་རོ། །གཡུལ་གྱི་དབུས་སུ་ལན་ཅིག་བསྐོར་ན། གཡུལ་འགྱེད་པའི་མཚོན་ཆ་ཐམས་ཅད་བཅད་པར་འགྱུར། རེངས་པར་བགྱིས་པར་འགྱུར་ཏེ། ཐམས་ཅད་ཕྱོགས་བཅུར་འབྱེར་བར་འགྱུར་རོ། །དུར་ཁྲོད་ཀྱི་ནང་དུ་བསྐོར་ན། དུར་ཁྲོད་ན་གནས་པའི་གདུག་པ་རྒྱུ་བ་ཐམས་ཅད་ཀྱི་རིག་སྔགས་གཏུབས་པར་འགྱུར་ཞིང་། གནས་ཐམས་ཅད་སྟོངས་པར་འགྱུར་རོ། །ཕུག་གི་སྒོར་བསྐོར་ན། འཁྲུལ་འཁོར་དང་སྒོ་གླེགས་ཐམས་ཅད་དཀྲུགས་པར་འགྱུར་རོ། །སྒོ་དང་གཏན་པ་ཐམས་ཅད་གཏུབས་པར་འགྱུར་རོ། །གདུག་པའི་མི་མ་ཡིན་པ་བར་ཆད་བགྱིད་པ་ཐམས་ཅད་བཅོམ་པར་འགྱུར། ཐལ་བར་བརླག་པར་འགྱུར་རོ། །གཞན་ཡང་དགོས་པ་ཐམས་ཅད་དུ་ཅི་ལྟར་འཚལ་བ་བཞིན་དུ་བགྱིད་པར་འགྱུར་རོ། །རལ་གྲི་སྒྲུབ་པའི་ཆོ་གའོ།། །།