ཞགས་པ་དང་རི་མོ་བསྒྲུབ་པའི་ཆོ་ག
དེ་ནས་གཞན་ཡང་ཞགས་པ་དང་རྗེས་སུ་མཐུན་པའི་རི་མོའི་ཆོ་ག་དེ་ཁོ་ན་ཉིད་སྒྲུབ་པའི་ཆོ་ག་བླ་ན་མེད་པ་བརྗོད་པར་བགྱི་སྟེ། འཇིག་རྟེན་མགོན་པོས་སྣ་ཚོགས་པའི། །རྣམ་པའི་ཁ་དོག་གཟུགས་བསྟན་པ། །སྒྱུ་མ་ལྟ་བུའི་ཏིང་འཛིན་གྱིས། །ཆོ་འཕྲུལ་སྣ་ཚོགས་གཟུགས་བསྟན་ཏེ། །ལག་པ་སྟོང་དང་མིག་སྟོང་དང་། །མཐའ་ཡས་པ་ཡི་ཕྱག་རྒྱ་བསྟན། །རྣམ་པ་སྣ་ཚོགས་པ་ཡི་གཟུགས། །ཁམས་གསུམ་དག་ཏུ་བསྟན་པ་ནི། །གདུལ་བྱ་གདུལ་ཕྱིར་གཟུགས་བསྟན་ཏོ། །གསང་བ་འདི་ཡི་གཟུགས་བསྟན་པ། །སེམས་ཅན་ཀུན་ལ་ཕན་པའི་ཕྱིར། །རིག་སྔགས་སྒྲུབ་པ་བླ་ན་མེད། །དེ་ཉིད་ཞགས་པ་བསྒྲུབས་ཕྱིར་རོ། །དེ་བས་རིག་འཛིན་ཤེས་རབ་ཅན། །འཇིག་རྟེན་ཕ་རོལ་རྗེས་མཐུན་པ། །སངས་རྒྱས་ཉིད་དོན་གཉེར་བ་དང་། །དེ་བཞིན་གཤེགས་ཀུན་ལྟ་བ་དང་། །བདེ་ཅན་བལྟ་བར་འཚལ་བ་དང་། །དེ་ཉིད་འཇིག་རྟེན་འདས་པ་ཡི། །འཇིག་དབང་མགོན་པོ་མཐོང་འཚལ་བ། །མཆོག་ཏུ་གུས་པར་བགྱི་བ་ཡི། །ཆོ་གའི་རྒྱལ་པོ་འདི་བརྗོད་ཀྱིས། །དེ་ཉིད་གུས་པར་དང་བ་དང་། །ཤིན་ཏུ་དང་བ་ཉིད་དུ་བགྱི། །གྲོལ་བ་སྣ་ཚོགས་འཚལ་བ་ལ། །སྣ་ཚོགས་པ་ཡི་གཟུགས་བསྟན་ཏེ། །སྣ་ཚོགས་ཐབས་ཀྱིས་གྲོལ་བར་འགྱུར་རོ། །དོན་ཡོད་རྒྱལ་པོ་ཆོ་གའི་མཆོག །དོན་ཡོད་གྲུབ་པའི་འཇིག་རྟེན་འདས། །དོན་ཡོད་འབྲས་བུ་དམ་པ་པོ། །དོན་ཡོད་ཀུན་དུ་གྲུབ་པ་འཐོབ། །སངས་རྒྱས་ཀུན་གྱིས་བྱིན་གྱིས་བརླབས། །དོན་ཡོད་འཇིག་རྟེན་འཇིག་རྟེན་མགོན། །འཇིག་རྟེན་དབང་ཕྱུག་མཆོད་སྦྱིན་པ། །དོན་ཡོད་འཇིག་རྟེན་ཅི་འཚལ་བ། །མཆོག་འཚལ་བ་ནི་གྲུབ་པར་འགྱུར། །དོན་ཡོད་རྒྱ་ཆེན་རྫུ་འཕྲུལ་གྱི། །ཆོ་འཕྲུལ་རྣམ་འཕྲུལ་རྒྱུན་མི་འཆད། །དེ་ལྟ་བས་ན་ཀུན་བསྒྲིམས་ཏེ། །བདག་ཉིད་ཡོངས་
སུ་དག་བགྱིས་ནས། །ཇི་ལྟར་ཆོ་ག་བཀོད་པ་བཞིན། །རྗེས་སུ་མཐུན་པར་རི་མོའི་གཟུགས། །རྟག་ཏུ་རི་མོའི་གཟུགས་བལྟ་ཞིང་། །ཞགས་པའི་གཟུགས་ནི་སྣ་ཚོགས་དང་། །དེ་བཞིན་ཁྲོ་བོའི་རྒྱལ་པོ་དང་། །རིག་སྔགས་རྒྱལ་པོ་དེ་བཞིན་དུ། །དཀྱིལ་འཁོར་ལྷ་དང་མེ་ལྷ་དང་། །སྦྱིན་སྲེག་རླུང་ལྷ་ཆུ་ལྷ་དང་། །ཁྲོ་བོའི་གཟུགས་དང་ཞི་བ་དང་། །ལྷ་དང་ཀླུ་དང་སྟོན་པ་དང་། །གནོད་སྦྱིན་སྲིན་པོའི་གཟུགས་དང་ནི། །འབྱུང་པོ་ལྷ་མིན་དྲི་ཟ་དང་། །ནམ་མཁའ་ལྡིང་དང་མིའམ་ཅི། །ལྟོ་འཕྱེ་ཆེན་པོའི་གཟུགས་ཀུན་དུ། །འཇིག་རྟེན་མགོན་པོ་མཆོག་སྦྱིན་བསྟན། །གཤིན་རྗེ་དང་ནི་ལུས་ངན་དང་། །ཚངས་པ་ཁྱབ་འཇུག་དབང་ཕྱུག་ཆེ། །གཞོན་ནུ་དབང་ཕྱུག་ལྷ་དང་ནི། །དབང་ཕྱུག་ཆེན་པོ་ཉི་མ་དང་། །ཟླ་གཟུགས་རྒྱུ་སྐར་ཚེས་གྲངས་ལྷ། །འདི་དག་རྣམ་པ་སྣ་ཚོགས་པའི། །གཟུགས་སུ་འཇིག་རྟེན་མགོན་པོས་བསྟན། །སེམས་ཅན་རྣམས་ལ་ཕན་འཚལ་བས། །གདུལ་བའི་དོན་དུ་གྲོལ་བའི་ལམ། །སེམས་ཅན་རྣམས་ལ་བསྟན་པས་ན། །དེ་བས་སོམ་ཉི་ཉིད་མི་བགྱི། །མཆོག་ཏུ་དང་བར་བགྱི་བ་ལགས། །ཅི་ལྟར་མཐུན་པའི་དགོས་པ་རྣམས། །ཅི་ལྟར་མཐུན་པ་བཞིན་དུ་འགྲུབ། །ཅི་ལྟར་མཐུན་པ་རི་མོའི་གཟུགས། །ཅི་ལྟར་མཐུན་པའི་ཞགས་པ་སྒྲུབ། །གནས་འདི་གང་དུ་འོས་པ་དང་། །གང་དུ་སེམས་ནི་དགའ་བར་འགྱུར། །གོམས་པ་གང་གི་ཕྱག་རྒྱ་དང་། །གང་གི་དཀྱིལ་འཁོར་ཆར་དབྱེ་བ། །འཕགས་པ་སྤྱན་རས་གཟིགས་དབང་མགོན། །ཀུན་དུ་སྒྲོལ་བ་འདྲེན་པའི་གཙོ། །དོན་ཡོད་འབྲས་བུ་སྩོལ་བའོ། །དོན་ཡོད་པ་ཡི་གྲུབ་པ་ཐོབ། །དོན་ཡོད་དགོས་པ་ཐམས་ཅད་དང་། །གྲུབ་པའི་ཆོས་ཀྱི་འཁོར་ལོ་ནི། །མཆོག་ཉིད་ལ་ཡང་རེག་པར་འགྱུར། །ཞགས་པ་དང་རི་མོ་བསྒྲུབ་པའི་ཆོ་གའོ།། །།