འཇིག་རྟེན་ལས་འདས་པའི་སྒྲུབ་ཐབས་ཀྱི་ཆོ་ག

---

^{[མ་དཔེ་གཟིགས་ན་འདིར་གནོན།]}

དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དག་ནི་སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་བདག་གི་འཇིག་རྟེན་པའི་ཆོ་ག་ལགས་སོ། །དེ་བཞིན་གཤེགས་པ་ཤཱཀྱ་ཐུབ་པས་བཀའ་སྩལ་པ། སེམས་ཅན་ཆེན་པོ་སེམས་ཅན་ཐམས་ཅད་ལ་སྙིང་བརྩེ་བའི་ཕྱིར། འཇིག་རྟེན་ལས་འདས་པའི་ཆོ་ག་དམ་པ་གསང་བའི་སྙིང་པོ་དང་། དཀྱིལ་འཁོར་དང་བློ་བརྟན་པོ་འཇིགས་པ་མེད་པ་ཐོབ་པར་འགྱུར་བ་དང་། རིག་སྔགས་འཆང་ཐམས་ཅད་ཀྱི་

---

^{[མ་དཔེ་གཟིགས་ན་འདིར་གནོན།]}

དམ་པ་སྒྲུབ་པར་བྱེད་པ་དེ་ཁོ་ན་ཉིད་གྲུབ་པར་འགྱུར་བ་དང་། བཀླགས་པ་དང་། དྲན་པ་ཙམ་དང་། སྒྲུབ་པར་བྱེད་པ་ཙམ་གྱིས་དེ་དག་ཐམས་ཅད་གྲུབ་པ་ཆེན་པོ་ཐོབ་པར་འགྱུར་བ་དང་། བསམ་པ་ཆེན་པོ་ཡོངས་སུ་རྫོགས་བར་གྲུབ་པར་འགྱུར་བ་དང་། མཆོག་གྲུབ་པ་ཆེན་པོ་སོ་སོར་ཐོབ་པར་འགྱུར་བ་དང་། རིག་སྔགས་འཆང་བའི་འདོད་པར་གཏོགས་པ་བསམ་པ་ཐམས་ཅད་ཡོངས་སུ་རྫོགས་པར་གྲུབ་པར་འགྱུར་བ་སྨོས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཀྱི་དྲུང་ནས་དབུགས་འབྱིན་པ་དང་། བསྒོ་བ་ཐོས་ནས་ཤིན་ཏུ་ཡིད་དགའ་བ་ཆེན་པོར་གྱུར་ཏེ། དེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ཏེ། མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། གོས་དང་། རྒྱན་སྣ་ཚོགས་དང་། སྤུད་པ་རྣམ་པ་སྣ་ཚོགས་ཀྱིས་བཅོམ་ལྡན་འདས་ལ་མཆོད་པ་དང་བསྙེན་བཀུར་ཆེན་པོ་བྱས་ཏེ་མཆོད་ནས་འཁོར་གྱི་དཀྱིལ་འཁོར་མང་པོར་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་དཀྱིལ་འཁོར་གྱི་ལྟར་གཏོགས་པ་དང་། གང་དག་རིག་འཛིན་གྲུབ་པ་དང་། གང་དག་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། གང་དག་དོན་ཡོད་པའི་ཞགས་པའི་རྣམ་པར་གྲོལ་བའི་དཀྱིལ་འཁོར་གྱི་དམ་ཚིག་ལ་རྗེས་སུ་ཞུགས་པ་དང་། གང་དག་རི་བོ་པོ་ཊ་ལ་ལ་གནས་པ་དེ་དག་ཐམས་ཅད་ཀྱིས་མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། གོས་དང་། རྒྱན་སྣ་ཚོགས་དང་། ཆས་དང་། སྤུད་པ་སྣ་ཚོགས་ཀྱིས་མཆོད་པ་བྱས་ཏེ་ཡིད་དགའ་བར་གྱུར་ཏོ། །འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ལ་སྟོང་ཕྲག་བརྒྱ་བསྐོར་བ་

---

^{[མ་དཔེ་གཟིགས་ན་འདིར་གནོན།]}

བྱས་འཁོར་གྱི་དཀྱིལ་འཁོར་དེ་ལ་ཡང་མཆོད་པ་བྱས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་བཏུད་ནས་བཅོམ་ལྡན་འདས་ཀྱི་སྤྱན་སྔར་མིག་མི་འཛུམས་པར་འདུག་སྟེ། བཅོམ་ལྡན་འདས་ལ་ཚིག་འཇམ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་མཆིས་པ་ནི་རྨད་དུ་བྱུང་བ་རྣམ་པར་ལྟ་བ་དོན་ཡོད་པའི་ཆོ་འཕྲུལ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྣམ་པར་གྲོལ་བའི་དཀྱིལ་འཁོར་དང་། དེ་བཞིན་གཤེགས་པ་ཐམས་ཅད་ཀྱི་རྨད་དུ་བྱུང་བ་དེ་ཁོ་ན་ཉིད་རྣམ་པར་འཕྲུལ་པ་རྣམ་པར་སྣང་མཛད་ཀྱི་བྱིན་གྱིས་བརླབས་དང་། དམ་ཚིག་ཆེན་པོའི་དཀྱིལ་འཁོར་དོན་ཡོད་པའི་རྣམ་པར་ལྟ་བའི་ཞགས་པའི་སྙིང་པོ་དང་། འཇིག་རྟེན་ལས་འདས་པའི་བཀླག་པ་དང་། སྒྲུབ་པར་བྱེད་པ་གྲུབ་པ་མཆོག་ཏུ་གྱུར་པའི་སྙིང་པོ་དང་། འཇིག་རྟེན་ལས་འདས་པའི་མཆོག་སྒྲུབ་པ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཤིང་ལུང་བསྟན་པ་ལགས་ཏེ། དེ་བདག་གིས་བཅོམ་ལྡན་འདས་ཀྱི་སྤྱན་སྔར་བཅོམ་ལྡན་འདས་ཀྱི་བྱིན་གྱིས་བརླབས་ཀྱིས་རིག་སྔགས་འཆང་ཐམས་ཅད་མཆོག་ཏུ་གྲུབ་པར་བྱ་བའི་ཕྱིར་དང་། སེམས་ཅན་ཐམས་ཅད་བསྒྲལ་བའི་ཕྱིར་དམྱལ་བ་དང་། ཡི་དགས་ཀྱི་གནས་དང་། གཤིན་རྗེའི་འཇིག་རྟེན་སེལ་བ་སྔོན་གྱི་སྒྲིབ་པ་དང་། སྡིག་པ་མི་ཟད་པ་འཇོམས་པ་ངན་སོང་ཐམས་ཅད་སེལ་བ། འཇིག་རྟེན་དང་འཇིག་རྟེན་ལས་འདས་པའི་སྡིག་པ་དང་སྒྲིབ་པ་ངེས་པར་སྲེག་པར་བྱེད་པ། ཡོངས་སུ་བསྒྲགས་པར་བགྱིའོ། །མཚམས་མེད་པ་ལྔ་དང་། སངས་རྒྱས་དང་བྱང་ཆུབ་སེམས་དཔའ་སྤོང་བ་དང་། དམ་པའི་ཆོས་སྤོང་བ་དང་། མཚམས་མེད་པ་ལ་གཞོལ་བ་དང་། འཕགས་པའི་དགེ་འདུན་ལ་འཁུ་བ་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཚོགས་ཐམས་ཅད་སྤོང་བར་བྱེད་པ་དེ་དག་གིས་མཉན་པ་དང་། མཐོང་བ་ཙམ་དང་། སྡོམ་པ་ཙམ་དང་། ལན་ཅིག་འབད་པ་དང་། འཆད་པ་ཙམ་གྱིས་ཐམས་ཅད་བྱང་བར་འགྱུར་རོ། །ང་མཐོང་བ་ཙམ་གྱིས་ཐམས་ཅད་ཟད་པར་འགྱུར། བྱང་བར་འགྱུར་རོ། །རིམས་ཐམས་ཅད་དང་། ནད་ཐམས་ཅད་དང་། དྲི་

---

^{[མ་དཔེ་གཟིགས་ན་འདིར་གནོན།]}

མ་དང་། སེར་སྣ་དང་ཕྲག་དོག་ཐམས་ཅད་དང་བྲལ་བར་འགྱུར་རོ། །ཉོན་མོངས་པ་དང་། སྒྲིབ་པ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་སྡུག་བསྔལ་སྐྱེ་བ་དང་། རྒ་བ་དང་། འཆི་བ་དང་། ནད་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་ཐམས་ཅད་དང་བྲལ་བར་འགྱུར་རོ། །འཐབ་པ་དང་། རྩོད་པ་དང་། འགྱེད་པ་དང་། ཕུང་བར་བྱེད་པ་དང་། བརྡེག་པ་དང་། བསྡིགས་པ་དང་། གསོད་པ་དང་། གཡུལ་འགྱེད་པ་དང་། ཤགས་འགྱེད་པ་དང་། བཙོན་དུ་འཛིན་པ་དང་། ལྕགས་སུ་འཇུག་པ་དང་། རྐུན་མ་དང་། ཟོལ་བ་དང་། མི་རྒོད་དང་། སེང་གེ་དང་། གླང་པོ་ཆེ་དང་། མ་ཧེ་དང་། ནད་ངན་པ་དང་། དམུ་ཆུ་དང་། ཤ་བཀྲ་དང་། མཛེ་དང་། འབྲུམ་བུ་དང་། གཡོན་ཅན་དང་། ཤུ་བ་དང་། ཤུ་བྲན་དང་། གཡན་པ་དང་། ཀླད་པན་པ་དང་།གཞོགས་ཕྱེད་ན་བ་དང་། དོམ་དང་། དྲེད་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། བརྗེད་བྱེད་དང་། སྦྲུལ་མ་རུངས་པ་དང་། ཁ་གདུག་པ་དང་། སྦྲུལ་ནག་པོ་དང་། སྲོག་ཆགས་གོ་ན་དང་། དུག་དང་བཅས་པའི་སྲོག་ཆགས་འཇིགས་པ་སྣ་ཚོགས་དང་བཅས་པ་དང་། མེ་དང་། ཆུ་དང་། དུག་དང་། མཚོན་དང་། གཡང་ས་དང་། ཁྱིམ་རྡིབ་པ་དང་། གྲང་བ་དང་། རླུང་དང་། ཉི་ཚན་དང་། བྱི་བ་ཁ་གདུག་པའི་འཇིགས་པ་ཐམས་ཅད་ནི། བཀླགས་པ་དང་། ཁ་ཏོན་བྱས་པ་དང་། མཐོང་བ་ཙམ་གྱིས་ཐམས་ཅད་རྣམ་པར་ཞིག་པར་འགྱུར། ཕུང་བར་འགྱུར། མོད་ལ་ཕྱེ་མར་བརླག་པར་འགྱུར་རོ། །ཡོངས་སུ་ཐར་བར་འགྱུར་བ་འདི་ལ་དོགས་པར་མི་བྱ། ཡིད་གཉིས་བསྐྱེད་པར་མི་བྱ། ཐེ་ཚོམ་མི་བྱ། སེམས་ཅན་གཉིས་སུ་འགྱུར་བ་བསྐྱེད་པར་མི་བྱའོ། །བཅོམ་ལྡན་འདས་བདག་རྟག་ཏུ་མངོན་དུ་དྲན་པར་བགྱི་བ་དང་། རྟག་ཏུ་ཡིད་ལ་བྱེད་པའི་བློ་འབྱུང་བར་བགྱིའོ། །དོན་ཡོད་པའི་ཞགས་པའི་སྙིང་པོ་དང་། ཁྲོ་བོའི་རྒྱལ་པོའི་སྙིང་པོ་ཡང་དང་བཟླས་པར་བགྱིའོ། །རྨད་དུ་བྱུང་བ་རྣམ་པར་ལྟ་བ། དོན་ཡོད་པ་རྣམ་པར་

---

^{[མ་དཔེ་གཟིགས་ན་འདིར་གནོན།]}

འཕྲུལ་པ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྣམ་པར་གྲོལ་བའི་དཀྱིལ་འཁོར་དེ་བཞིན་གཤེགས་པ་ཐམས་ཅད་རྨད་དུ་བྱུང་བའི་ཆོ་འཕྲུལ་རྣམ་པར་སྣང་མཛད་ཀྱི་བྱིན་གྱིས་བརླབས། དམ་ཚིག་ཆེན་པོའི་དཀྱིལ་འཁོར་དོན་ཡོད་པར་རྣམ་པར་ལྟ་བའི་ཞགས་པའི་སྙིང་པོ་ནི་རྟག་ཏུ་རྒྱུན་མི་འཆད་པར་དུས་ཐམས་ཅད་དུ་ཡིད་ལ་ཁ་ཏོན་དུ་བརྗོད་པར་བྱའོ། །རྟག་ཏུ་རྒྱུན་མི་འཆད་པར་རྗེས་སུ་དྲན་པར་བསྒོམ་པར་བྱའོ། །དེ་དག་དྲན་པ་བསྒོམས་པ་ཙམ་དང་། དྲན་པ་ཙམ་གྱིས་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་ཕུན་སུམ་ཚོགས་པ་ཐམས་ཅད་ཐོབ་པར་འགྱུར་རོ། །ཕྱིར་མི་ལྡོག་པ་ཞེས་བྱའོ། །ཕྱིར་མི་ལྡོག་པའི་གནས་ལ་རབ་ཏུ་གནས་པར་འགྱུར་རོ། །དེ་བཞིན་གཤེགས་པ་ཐམས་ཅད་དགོངས་པ་དང་། ལུང་སྟོན་པ་དང་། བྱིན་གྱིས་རློབ་པར་འགྱུར་ན། ལྟ་བ་དང་། ཀློག་པ་དང་། ཁ་ཏོན་བྱེད་པ་དང་། འཕགས་པ་སྤྱན་རས་གཟིགས་ཀྱི་དབང་ཕྱུག་མཐོང་སྟེ་ཕྱག་འཚལ་བ་དང་། མཆོད་པ་དང་། དྲན་པ་དང་། དུས་གསུམ་དུ་ཤིན་ཏུ་གསལ་བར་ཡིད་ལ་བྱེད་པ་དང་། མཆོད་ཅིང་ཕྱག་བྱེད་པ་དེ་ལྟ་སྨོས་ཀྱང་ཅི་དགོས་ཏེ། སེམས་ཅན་དེ་ནི་ང་དང་འདྲ་བ་ཡིན་པར་རིག་པར་བྱའོ། །འཇིག་རྟེན་དབང་ཕྱུག་གིས་བྱིན་གྱིས་བརླབས་པའི་ལུས་ཡིན་པར་རིག་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པ་དང་། དབང་བསྐུར་བས་དབང་བསྐུར་བ་ཡིན་པར་རིག་པར་བྱའོ། །གང་ཞིག་ལན་མང་དུ་ཤིན་ཏུ་ལྷག་པར་བྱེད་པ་ལྟ་སྨོས་ཀྱང་ཅི་དགོས་ཏེ། སེམས་ཅན་དེ་ནི་དེ་བཞིན་གཤེགས་པའི་སྙིང་པོ་ཡིན་པར་རིག་པར་བྱའོ། །བདག་ཀྱང་དུས་ཐམས་ཅད་དུ་རྟག་ཏུ་རྗེས་སུ་དྲན་པར་བགྱིའོ། །དུས་ཐམས་ཅད་དུ་མཐོང་བ་སྦྱིན་པར་བགྱིའོ། །བསམ་པ་དང་རེ་བ་ཐམས་ཅད་ཡོངས་སུ་རྫོགས་པར་བགྱིའོ། །དེའི་ཚེ་བདག་གིས་སེམས་ཅན་ཐམས་ཅད་མྱུར་བ་མྱུར་བར་བྱང་ཆུབ་ཀྱི་སྙིང་པོར་འགྲོ་བ་དང་། ཆོས་ཀྱི་འཁོར་ལོ་བསྐོར་བར་གཞག་པར་བགྱིའོ། །བཅོམ་ལྡན་འདས་བདག་ནི་གོ་ཆ་ཆེན་པོ་བརྟན་པར་ཁས་བླངས་པ་ལ་འཚོལ་བ་ལགས་པས་སེམས་ཅན་ཐམས་

---

^{[མ་དཔེ་གཟིགས་ན་འདིར་གནོན།]}

ཅད་བསྒྲལ་བའི་ཕྱིར་རེ་བའི་མཆོག་ཐམས་ཅད་ཡོངས་སུ་རྫོགས་པར་བགྱིའོ། །དེ་ནས་དེ་བཞིན་གཤེགས་པ་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །སེམས་ཅན་དག་པའི་མཆོག་ལེགས་སོ་ལེགས་སོ། །འདི་ནི་མཆོག་ཏུ་དཀོན་པ་སྟེ། འཇིག་རྟེན་ལས་འདས་པའི་ཆོ་ག་དེའི་མིང་འཛིན་པ་ཙམ་གྱིས་སེམས་ཅན་ཡོངས་སུ་གྲོལ་བར་འགྱུར་ན། ལྟ་བ་དང་། ཀློག་པ་དང་། སྒྲུབ་པ་དང་། སྨྱུང་བའི་ཆོ་ག་བྱེད་པ་དང་། སྡོམ་པ་ལ་གནས་པ་ལྷ་སྨོས་ཀྱང་ཅི་དགོས། སེམས་ཅན་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །སེམས་ཅན་དག་པ་དུས་ལ་བབ་པ་གང་ཡིན་པར་ཤེས་ན་སྨྲོས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཀྱི་ཞལ་དུ་ལྟ་ཞིང་བཞིན་འཛུམ་སྟེ། དོན་ཡོད་པ་རྣམ་པར་ལྟ་བའི་ཞགས་པའི་སྙིང་པོ་སྨྲས་སོ། །དུས་གསུམ་དུ་གཤེགས་ཤིང་བཞུགས་པའི་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །རང་སངས་རྒྱས་དང་འཕགས་པ་ཉན་ཐོས་ཀྱི་དགེ་འདུན་ཐམས་ཅད་ལ་ཕྱག་འཚལ་ལོ། །འཕགས་པ་བྱམས་པ་ལ་སོགས་པ་འཕགས་པ་བྱང་ཆུབ་སེམས་དཔའི་ཚོགས་ཀྱི་མཆོག་ལ་ཕྱག་འཚལ་ལོ། །འཕགས་པ་རྡོ་རྗེ་འཆང་བའི་དཀྱིལ་འཁོར་གྱི་ལྷ་གཤིན་རྗེ་དང་། ཆུ་ལྷ་དང་། ལུས་ངན་པོ་དང་། དྲང་སྲོང་གི་ཚོགས་ཀྱི་མཆོག་ལ་ཕྱག་འཚལ་ལོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །འདི་ལྟ་སྟེ། ཨོཾ་སརྦ་ཏ་ཐཱ་ག་ཏ། ཨ་བ་ལོ་ཀི་ཏེ་པ་ཤ་ཧྲྀ་ད་ཡེ། ཛྭ་ལ་ཛྭ་ལ། དྷརྨ་དྷཱ་ཏུ་གརྦྷེ། ཙ་ར་ཙ་ར། མ་ཧཱ་པདྨ་པདྨ་བྷུ་ཛེ། དྷ་ར་དྷ་ར། མ་ཧཱ་བཱ་ཤ་དྷ་རེ། བ་ར་བ་ར་བ་ར་ད། རཤྨི་ཤ་ཏ་ས་ཧ་སྲ། པྲ་ཏི་མཎྜི་ཏ། ཤ་རཱི་རེ། ཏ་ར་ཏ་ར། བི་བུ་ལ་ཏེ་ཛ་དྷ་རེ། བྷ་ར་བྷ་ར། ཥཊ་པཱ་ར་མི་ཏཱ་པ་རི་པཱུ་ར་ཎི། ཀ་ལ་ཀ་ལ། མ་ཧ་བྲཧྨ། བེ་ཥ་དྷ་རེ། མ་ལ་མ་ལ། སརྦ་བཱ་བ་ཨཱ་བ་ར་ཎ་མ་ལ་

---

^{[མ་དཔེ་གཟིགས་ན་འདིར་གནོན།]}

ཀིལྦི་ཥ། ནཱ་ཤ་ནི། དྷུ་རུ་དྷུ་རུ། བོ་དྷི་ས་ཏྭ། པི་ཤུད་དྷེ་བྷུ་རུ་བྷུ་རུ། མ་ཧཱ་ས་ཏྭ། བད་ས་ལེ། ཡ་མ་བ་རུ་ཎི་ཀུ་བེ་ར་ནམ་སྐྲྀ་ཏེ། ཧུ་རུ་ཧུ་རུ་བྲཧྨ། བིཋྞུ། མ་ཧེ་ཤྭ་ར། ཀུ་མཱ་ར། ནན་དི་ཀེ་ཤྭ་ར། ཨཱི་ཤྭར། མ་ཧེ་ཤྭ་ར་དེ་བ་པྲ་ཏྲ། བདྡི་ཏ། བདྡི་ཏ། ན་མ་སྐྲྀ་ཏེ། བི་བི་དྷ་མ་ཎི་མཽ་ལི་དྷ་རེ། ཨ་མི་ཏཱ་བྷཱ་ཛི་ན། མ་ཀུ་ཊ། དྷ་རེ། དི་བྱ། མ་ཎི་ཀ་ན་ཀ །བཛྲ་བཻ་ཌཱུརྱ། མ་ར་ཀ་ཏ། པདྨ་རཱ་ག །ཨིནྡྲ་ནཱི་ལ་དི་བྱ་མུ་ཀ་ཏི་ཀ །ཨ་ལཾ་ཀྲྀ་ཏ། ཤ་རཱི་ར། ཤྭེ་ཏ་ཡད་ཛྙོ་པ་བཱི་ཏ་དྷ་ར། ཛ་ཊ་མ་ཀུ་ཊ། མཎྜཱི་ཏ་ནཱ་མ། ཙནྡྲ་རཱ་ཛི་ཏ། པདྨ་དྷ་ར། པདྨ་ཨཱ་ས་ན། པདྨ་བྷུ་ཛ། ཏྲི་ལོ་ཙ་ན། ཏྲི་ཤཱུ་ལ་དྷ་ར། བཱ་ཤ་དྷ་ར། སརྦ་ཏ་ཐཱ་ག་ཏ། ཨ་བྷི་ཥེ་ཀ་ཏ། ས་ར་ས་ར། སརྦ་པཱ་པ་པྲ་ཤ་མ་ན་ཀ་ར། མ་ཧཱ་ཀཱ་རུ་ཎི་ཀ །ཏུ་རུ་ཏུ་རུ། སརྦ་བ་ར་དཱ་ཡ་ཀ །བོ་དྷི་བོ་དྷི། སརྦ་ཏ་ཐཱ་ག་ཏ་ཨ་བ་ལོ་ཀི་ཏེ། བོ་དྷི་མཎྜ། ཨ་བ་ལོ་ཀི་ཏེ། ལོ་ཀེ་ཤྭ་ར། མ་ཧེ་ཤྭ་ར། མ་ཧཱ་ཙིན་ཏཱ་མ་ཎི། དྷཱ་ར་བི་ཤྭ་རཱུ་པ། མ་ཧཱ་སཽ་མྱ་བ་ད་ན། མ་ཧཱ་ཀཱ་རུ་ཎི་ཀ །བུད་དྷ་བུད་དྷ། བོ་དྷ་ཡ་བོ་དྷ་ཡ། བྷ་ག་བཱན། སརྦ་ཏ་ཐཱ་ག་ཏ། ཨ་བ་ལོ་ཀི་ཏ་གརྦྷེ། མ་ཧཱ་པུཎྱ། ཏེ་ཛ་དྷ་ར་པྲ་བར་སིད་དྷི་ཀ་ར་སརྦ་བྱཱ་དྷི་ཧ་ར། སརྦ་སཏྭཱ་ཡ་བར་སརྦ་དུཿཁ། པྲ་མོ་ཙ་ཀ །མ་ཧཱ་ཀཱ་རུ་ཎི་ཀ་ན་མོ་སྟུ་ཏེ་སྭཱ་ཧཱ། བཅོམ་ལྡན་འདས་བདག་གི་འདི་ནི་རྨད་དུ་བྱུང་བ་རྣམ་པར་ལྟ་བའི་ཞགས་པའི་སྙིང་པོའོ། །དོན་ཡོད་པའི་ཞགས་པའི་སྙིང་པོའོ། །རྣམ་པར་གྲོལ་བའི་དཀྱིལ་འཁོར་འཇིག་རྟེན་ལས་འདས་པའི་གཟུངས་ཀྱི་སྙིང་པོའོ། །འཕགས་པ་སྤྱན་རས་གཟིགས་དབང་ཕྱུག་གི་སྙིང་པོའོ། །གཟུགས་སྣ་ཚོགས་ཆེན་པོ་སྒྱུ་མ་ལྟ་བུའི་ཏིང་ངེ་འཛིན་རྣམ་པར་འཕྲུལ་པ། ཕྱག་སྟོང་མངའ་བ། དབུ་སྟོང་མངའ་བ། སྤྱན་སྟོང་གིས་རྣམ་པར་གཟིགས་པ། ཕྱག་བརྒྱ་སྟོང་གིས་བྱིན་གྱིས་བརླབས་པ། གང་གཱའི་ཀླུང་བྱེ་བ་ཁྲག་ཁྲིག་སྟོང་ཕྲག་བཅུའི་བྱེ་མའི་རྡུལ་ཤིན་ཏུ་ཕྲ་བ་དང་མཉམ་པའི་དམ་ཚིག་གི་དཀྱིལ་འཁོར་དུ་རྗེས་སུ་ཞུགས་པ། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་གསང་བ་ལ་འཇུག་པ། སངས་རྒྱས་ཐམས་ཅད་ཀྱི་ཞིང་དུ་འཇུག་པ། བྱང་ཆུབ་ཀྱི་སྙིང་པོར་བགྲོད་པ། ཆོས་ཀྱི་འཁོར་ལོ་བསྐོར་བ། ཆོས་ཀྱི་སྒྲོན་མེ་འབར་

---

^{[མ་དཔེ་གཟིགས་ན་འདིར་གནོན།]}

བ། བདུད་ལ་སོགས་པ་མ་རུངས་པ་ཐམས་ཅད་ཀྱི་བདུད་འཇོམས་པ། ཆོས་ཀྱི་དུང་འབུད་པ། ཆོས་ཀྱི་རྒྱལ་མཚན་སྒྲེང་བ། དམྱལ་བ་ཐམས་ཅད་སེལ་བ། ཆོ་ག་ཞིབ་མོ་ཐམས་ཅད་གྲུབ་པར་མཛད་པ། ཆོ་ག་སྒྲུབ་པ་ཐམས་ཅད་ཀྱི་མཆོག་ས་བཅུ་ཆེན་པོ་ལ་སོ་སོར་འཇོག་པ། ཕྱིར་མི་ལྡོག་པའི་གནས་ལ་རྗེས་སུ་འཇུག་པ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་དང་། བྱིན་གྱི་རླབས་ཀྱིས་བྱིན་གྱིས་བརླབས་པ། དོན་ཡོད་པའི་མཆོག་ཕུན་སུམ་ཚོགས་པ་ཐོབ་པར་མཛད་པ། དོན་ཡོད་པའི་རྣམ་པར་འཕྲུལ་བའི་རྣམ་པར་སྤྲུལ་པ། དོན་ཡོད་པར་སེམས་རྒྱ་མཚོ་སྙེད་ཡང་དག་པར་འཛིན་པ། དོན་ཡོད་པར་སེམས་ཅན་ས་བོན་ལ་སོ་སོར་འཇོག་པ། དོན་ཡོད་པར་བྱང་ཆུབ་སེམས་དཔའི་རྣམ་པར་འཕྲུལ་པ་ལ་འཇུག་པ། དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ཡོངས་སུ་སྒྲོགས་པ། དོན་ཡོད་པར་དེ་བཞིན་གཤེགས་པ་ཐམས་ཅད་མཆོད་པ་དང་། བསྙེན་བཀུར་གྱི་སྤྲིན་རབ་ཏུ་བྱེད་པ། དོན་ཡོད་པར་སེམས་ཅན་ཐམས་ཅད་མི་འཇིགས་པའི་ཁྱིམ་དུ་འཛུད་པ། དོན་ཡོད་པར་སྦྱིན་པ་ཆེན་པོའི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། དོན་ཡོད་པར་ལྷ་རྫས་ཀྱི་མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། གོས་དང་། རྒྱན་དང་། ཆོས་གོས་སྣ་ཚོགས་དང་། རིན་པོ་ཆེ་བདུན་གྱི་ཆར་འབེབས་པ། དོན་ཡོད་པའི་ཚེ་ཡོངས་སུ་བརྗེས་ཏེ་སངས་རྒྱས་ཀྱི་ཞིང་ཀུན་ཏུ་བརྒྱན་པ་སྣ་ཚོགས་སུ་དེ་བཞིན་གཤེགས་པ་ཐམས་ཅད་ཡང་དག་པར་ལྟ་བ། དོན་ཡོད་པར་བསོད་ནམས་ཀྱི་ཕུང་པོ་ཆེན་པོ་རབ་ཏུ་རྫོགས་པ། དོན་ཡོད་པར་དགེ་བའི་རྩ་བ་ཆེན་པོ་སྐྱེད་པ། དོན་ཡོད་པར་དེ་བཞིན་གཤེགས་པ་ཐམས་ཅད་ཡང་དག་པར་མཐོང་བ་དང་། གྲུབ་པ་དང་། ཆོ་འཕྲུལ་གྱི་རྣམ་པར་འཕྲུལ་པ་སྟོན་པ། དོན་ཡོད་པར་དབང་ཕྱུག་སྒྲུབ་པ། དོན་ཡོད་པར་རིག་སྔགས་དང་། དཀྱིལ་འཁོར་དང་། ཕྱག་རྒྱ་དང་། རིམ་པར་ཕྱེ་བ་དང་། ཆོ་ག་ཞིབ་མོ་ཡང་དག་པར་སྟོན་པ།

---

^{[མ་དཔེ་གཟིགས་ན་འདིར་གནོན།]}

དོན་ཡོད་པར་གྲུབ་པ་མཐོང་བ། དོན་ཡོད་པར་ཆོ་ག་མཐོང་བ། དོན་ཡོད་པར་ཚེ་རབ་ཏུ་འཕེལ་བ། དོན་ཡོད་པར་སྙན་པར་གྲགས་པ་རབ་ཏུ་སྟོན་པ། དོན་ཡོད་པར་འཁོར་བ་ལས་རབ་ཏུ་སྒྲོལ་བ། དོན་ཡོད་པར་སྐྱེ་བ་དང་། རྒ་བ་དང་། འཆི་བ་ལས་ཡོངས་སུ་སྒྲོལ་བ། དོན་ཡོད་པར་མཆོག་རབ་ཏུ་སྦྱིན་པ། དོན་ཡོད་པར་བཟླས་བརྗོད་དང་ཆོ་ག་རབ་ཏུ་རྫོགས་པ། དོན་ཡོད་པར་དྲན་པའི་དགེ་བའི་རྩ་བ་རབ་ཏུ་རྫོགས་པ། དོན་ཡོད་པར་རིག་འཛིན་འཁོར་ལོས་སྒྱུར་བ་ཐོབ་པ་ཡང་དག་པར་སྟོན་པ། དོན་ཡོད་པར་ལྷའི་གནས་དང་། གཞལ་མེད་ཁང་སུམ་ཅུ་རྩ་གཉིས་ཀྱི་ལྷའི་གནས་སུ་འཇུག་བ། དོན་ཡོད་པར་འོག་མིན་གྱི་གནས་ཀྱི་བར་དུ་འཇུག་པ། དོན་ཡོད་པར་སུམ་ཅུ་རྩ་གསུམ་གྱི་གནས་སུ་བརྒྱ་བྱིན་ལྷའི་རྒྱལ་པོར་འཇུག་པ། དོན་ཡོད་པར་རི་རབ་ཆེན་པོ་ལག་པ་གཅིག་གིས་སྒུལ་བ། དོན་ཡོད་པར་རྫུ་འཕྲུལ་གྱི་སྟོབས་སྟོན་པ། དོན་ཡོད་པར་མི་སྣང་བ་སྟོན་པ། དོན་ཡོད་པར་སྟོབས་འཕེལ་བ། དོན་ཡོད་པར་གླིང་བཞི་ལ་དབང་བའི་འཁོར་ལོས་སྒྱུར་བ་སོ་སོར་འཐོབ་པ་སྟོན་པ། དོན་ཡོད་པར་ཡིད་བཞིན་གྱི་ནོར་བུ་ཆེན་པོའི་རིན་པོ་ཆེ་སྣ་ཚོགས་ཀྱི་ཆར་འབེབས་པ། དོན་ཡོད་པར་འབྲུའི་ཆར་འབེབས་པ། དོན་ཡོད་པར་གོས་ཀྱི་ཆར་འབེབས་པ། དོན་ཡོད་པར་རྒྱན་དང་། ཆོས་གོས་དང་། མུ་ཏིག་གི་ཆུན་འཕྱང་དང་། གདུབ་ཀོར་དང་། གསེར་གྱི་ཙོང་ཙོང་དང་། གདུ་བུ་དང་། དཔུང་རྒྱན་སྣ་ཚོགས་ཀྱི་ཆར་འབེབས་པ་ཡང་དག་པར་སྟོན་པ། དོན་ཡོད་པར་རོ་རྣམ་པ་སྣ་ཚོགས་རོའི་མཆོག་རོ་བརྒྱའི་ཁ་ཟས་ཀྱི་ཆར་འབེབས་པ། དོན་ཡོད་པར་སེམས་ཅན་སྣ་ཚོགས་གྲོལ་བ་སྟོན་པ། དོན་ཡོད་པར་བསྟན་བཅོས་དང་། ཚིག་ལེའུར་བྱས་པ་དང་། ཚུལ་དང་འདུལ་བ་དང་། མདོ་སྡེ་དང་། ལུང་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། གླེང་གཞི་དང་། དེ་ལྟ་བུ་བྱུང་བ་དང་། སྐྱེས་པའི་རབས་དང་། ཤིན་ཏུ་རྒྱས་པ་དང་། རྨད་དུ་བྱུང་བའི་ཆོས་ཀྱི་མན་ངག་སྣ་ཚོགས་དང་། ཆོས་མངོན་པ་དང་། ཚོགས་ཀྱི་གཏམ་ཡང་དག་པར་སྟོན་པ་དང་། དོན་ཡོད་པར་ཐེག་པ་ཆེན་པོ་རྣམ་པ་སྣ་ཚོགས་

---

^{[མ་དཔེ་གཟིགས་ན་འདིར་གནོན།]}

རྒྱ་མཚོ་ལ་འཇུག་པ་དང་རབ་ཏུ་སྟོན་པ། དོན་ཡོད་པར་གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། བརྗེད་བྱེད་དང་། བགེགས་དང་། ལོག་འདྲེན་སྣ་ཚོགས་ཉེས་པ་དང་། གསོད་པ་དང་ཤིན་ཏུ་སེལ་བ་ཡང་དག་པར་སྟོན་པ་ཡིན་ནོ། །བཅོམ་ལྡན་འདས་དེ་ལྟར་ན་ཡོན་ཏན་ཆེན་པོ་ཅན་གྱི་གཟུངས་ངན་སོང་ཐམས་ཅད་རབ་ཏུ་ཞི་བར་འགྱུར་བ། ཐམས་ཅད་དུ་མི་འཇིགས་པའི་གནས་རབ་ཏུ་སྟོན་པ། འཇིག་རྟེན་ལས་འདས་པའི་ལམ་ལེགས་པའི་ལམ་རབ་ཏུ་སྟོན་པ། མྱ་ངན་ལས་འདས་པའི་ལམ་རབ་ཏུ་སྟོན་པ། ཕྱིར་མི་ལྡོག་པའི་གནས་དང་། སངས་རྒྱས་ཉིད་སྦྱིན་པར་མཛད་པ་ལགས་ཏེ། བཅོམ་ལྡན་འདས་དོན་ཡོད་པར་རྣམ་པར་ལྟ་བའི་ཞགས་པའི་སྙིང་པོའི་གཟུངས་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་ཡོན་ཏན་ཁྱད་པར་ཡོངས་སུ་བསྒྲགས་པ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་གསང་བ་ལ་རབ་ཏུ་གནས་པ་ལགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་མཆོག་ཏུ་དཀོན་པའི་གཟུངས་འདིའི་སྙིང་པོ་འཇིག་རྟེན་ལས་འདས་པ་རྣམ་པར་འཕྲུལ་པ་བཤད་པ་དང་། དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའི་ཚོགས་ཐམས་ཅད་རྫུ་འཕྲུལ་རྣམ་པར་འཕྲུལ་བ། གསང་བའི་སྙིང་པོ་ཡོངས་སུ་བསྒྲགས་པ་ལེགས་སོ་ལེགས་སོ། །དེ་དག་ནི་སེམས་ཅན་ཐམས་ཅད་ལ་ལམ་མཆོག་ཤིན་ཏུ་མཆོག་ཏུ་གྱུར་པ། གྱ་ནོམ་པ། བླ་མ། བླ་ན་མེད་པ། མཆོག་ཏུ་དཀོན་པའི་གཟུངས་ཀྱི་སྙིང་པོ་གསང་བ་ཡོངས་སུ་བསྒྲགས་པ་སྟེ། གང་གི་འཁོར་བའི་རྒྱ་མཚོའི་ཆུ་བོ་ཆེན་པོ་དང་། སྲིད་པའི་རྒྱ་མཚོ་ལས་སེམས་ཅན་ཕ་རོལ་ཏུ་སྒྲོལ་བ་ཡིན་ནོ། །སྤྱན་རས་གཟིགས་དབང་ཕྱུག་རིགས་ཀྱི་བུ་ཕོའམ། རིགས་ཀྱི་བུ་མོའམ། དགེ་སློང་ཕའམ། དགེ་སློང་མའམ། དགེ་བསྙེན་ཕའམ། དགེ་བསྙེན་མའམ། དགེ་སྦྱོང་ངམ། བྲམ་ཟེའམ། རྒྱལ་རིགས་དང་།

---

^{[མ་དཔེ་གཟིགས་ན་འདིར་གནོན།]}

རྗེའུ་རིགས་དང་། དམངས་རིགས་གང་ལ་ལ་ཞིག་གམ། སེམས་ཅན་གཞན་གང་ཡང་རུང་བས་དོན་ཡོད་པར་རྣམ་པར་ལྟ་བའི་སྙིང་པོ་འདི་དང་། རྨད་དུ་བྱུང་བ་རྣམ་པར་ལྟ་བ་དོན་ཡོད་པའི་སྙིང་པོ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྣམ་པར་གྲོལ་བའི་དཀྱིལ་འཁོར་དེ་བཞིན་གཤེགས་པ་ཐམས་ཅད་རྨད་དུ་བྱུང་བའི་དེ་ཁོ་ན་ཉིད་རྣམ་པར་འཕྲུལ་པ། རྣམ་པར་སྣང་མཛད་ཀྱི་བྱིན་གྱིས་བརླབས་པ། དམ་ཚིག་ཆེན་པོ་དཀྱིལ་འཁོར་གྱི་མིང་འཛིན་པ་ཙམ་གྱིས་ཀྱང་དགེ་བའི་རྩ་བ་ཆེན་པོ་སོགས་པར་འགྱུར་རོ། །བསོད་ནམས་ཀྱི་ཕུང་པོ་ཆེན་པོ་དང་ལྡན་པར་ཡོངས་སུ་འཛིན་པར་ཡང་འགྱུར་རོ། །གང་གཱའི་ཀླུང་འབུམ་ཕྲག་བྱེ་བ་ཁྲག་ཁྲིག་དགུ་བཅུ་རྩ་གཉིས་ཀྱི་བྱེ་མའི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་དུ་མཐོང་བ་དང་། མངོན་དུ་ཆོས་ཐོས་པ་དང་། མངོན་དུ་དབྱངས་ཐོས་པ་དང་། མངོན་དུ་ལུང་བསྟན་པ་ཐོས་པར་འགྱུར་བའི་སེམས་ཅན་ཆེན་པོ་དེ་དག་གིས་ནི་བསོད་ནམས་ཀྱི་ཕུང་པོ་ཤིན་ཏུ་ཆེ་བ་དང་། དགེ་བའི་རྩ་བ་ཆེན་པོ་ཡོངས་སུ་གཟུང་བར་འགྱུར་རོ། །སེམས་ཅན་དེ་གཟུངས་གང་ཡིན་པ་དང་། དཀྱིལ་འཁོར་དང་། ཆོ་ག་དང་། མིང་སྣ་ཚོགས་ད་ལྟར་ཐོས་པ་དང་། ཡང་ན་ཀློག་པ་དང་། ཡང་ན་ལྟ་བ་ཙམ་མཐོང་བ་ནི་དེ་དང་མཉམ་པ་ཡིན་ཏེ། རིགས་ཀྱི་བུ་ཕོའམ། རིགས་ཀྱི་བུ་མོ་དེ་ནི་བསོད་ནམས་ཀྱི་ཕུང་པོ་ཆེན་པོའི་དགེ་བའི་རྩ་བ་དང་ལྡན་པར་འགྱུར་བ་ཡང་དེ་དང་མཉམ་པ་ཡིན་ན། དཀའ་བ་བྱེད་པ་ལྟ་སྨོས་ཀྱང་ཅི་དགོས་ཏེ། དེ་བཞིན་གཤེགས་པ་དང་མཉམ་པ་ཉིད་དུ་ཐོས་པ་དང་མཐོང་བར་འགྱུར་རོ། །གང་དག་གཟུངས་འདིའི་དཀྱིལ་འཁོར་འབད་དེ་སྟོབས་དང་བརྩོན་འགྲུས་ཕ་རོལ་གནོན་པར་བྱེད་པ་དང་། ཚོལ་བ་དང་། འདྲི་བ་དང་། ཀློག་པ་དང་། བཟླས་བརྗོད་ཀྱི་ཆོ་ག་བྱེད་པ་དང་། དཀྱིལ་འཁོར་གྱི་ཆོ་གས་སྒྲུབ་པར་བྱེད་པ་དང་། འབད་པར་བྱེད་པ་དེ་ནི་དཀའ་བ་ཆེན་པོ་ལ་ཞུགས་པ་ཡིན་ཏེ། དེ་དང་མཉམ་པ་ཡིན་ནོ། །དཀའ་བ་གང་ཞེ་ན། ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བསྐལ་པ་གྲངས་མེད་པ་གསུམ་དུ་

---

^{[མ་དཔེ་གཟིགས་ན་འདིར་གནོན།]}

དཀའ་བ་ལ་ཞུགས་པ་དང་། སངས་རྒྱས་ཏེ་ཆོས་ཀྱི་འཁོར་ལོ་བསྐོར་བའི་བར་ཡིན་ནོ། །རིགས་ཀྱི་བུ་ཕོའམ། རིགས་ཀྱི་བུ་མོའམ། དགེ་སློང་ཕའམ། དགེ་སློང་མའམ། དགེ་བསྙེན་ཕའམ་དགེ་བསྙེན་མའམ། དགེ་སྦྱོང་ངམ། བྲམ་ཟེའམ། རྒྱལ་རིགས་སམ། རྗེའུ་རིགས་དང་། དམངས་རིགས་གང་ཡིན་པའམ། སེམས་ཅན་གཞན་གང་ཡང་རུང་བས་གཟུངས་འདིའི་དཀྱིལ་འཁོར་དང་། ཆོ་ག་སྟོབས་ཆེན་པོ་དང་། ཕ་རོལ་གནོན་པའི་བརྩོན་འགྲུས་ཀྱིས་སྒྲུབ་པར་བྱེད་པ་འདི་ནི་འཇིག་རྟེན་ལས་འདས་པའི་ཆོ་ག་འཚོལ་བ་ཡིན་ནོ། །འདི་ལྟ་སྟེ། འདྲི་བ་དང་། ཀློག་པ་དང་། ཁ་ཏོན་བྱེད་པ་དང་། བཟླས་བརྗོད་དང་། ཆོ་ག་དང་། དཀྱིལ་འཁོར་ལྟ་བ་དང་། འཇུག་པ་དང་། དམ་ཚིག་དང་། ཕྱག་རྒྱ་བཅིངས་ཏེ་སྒྲུབ་པ་དང་། འདི་ལྟ་སྟེ། ཐོས་པ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། ཚུལ་བཞིན་དུ་ཡིད་ལ་བྱེད་པ་དང་། སེམས་པ་དང་། དུས་གསུམ་དུ་ལན་གསུམ་དོན་ཡོད་པའི་ཞགས་པའི་སྙིང་པོ་དྲན་པ་དང་། ཁྲོ་བོའི་རྒྱལ་པོས་དབང་བསྐུར་བ་དང་། གཟུངས་འདི་ཡང་ལན་ཉི་ཤུ་རྩ་གཅིག་ཏུ་བཟླས་བརྗོད་དང་། ཆོ་ག་དྲན་པ་དང་། བྱམས་པ་དང་། སྙིང་རྗེ་དང་། བྱམས་པས་སྙིང་བརླན་པ་དང་། སེམས་ཅན་ཐམས་ཅད་ལ་སྙིང་བརྩེ་བ་ལྷུར་བྱེད་པ་དེ་ནི་དཀའ་བ་སྤྱོད་པ་ཆེན་པོ་ལ་ཞུགས་པ་ཡིན་ནོ། །བསྐལ་པ་གྲངས་མེད་པ་གསུམ་དུ་དཀའ་བ་སྤྱོད་པ་ལ་ཞུགས་པ་དང་འདྲ་བའམ། ལྷག་པ་ཡིན་ནོ། །དེའི་ཚེ་འདི་ཉིད་ལ་འབྲས་བུ་ཆེན་པོ་ཐོབ་པར་འགྱུར་བ་དང་། འཇིག་རྟེན་ལས་འདས་པ་ཞེས་བྱ་བ་དང་། སངས་རྒྱས་ཉིད་དུ་སོ་སོར་གནས་པ་ཡིན་ནོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་གསུམ་པ། བསོད་ནམས་ཀྱི་ཕུང་པོ་ཆེན་པོའི་དགེ་བའི་རྩ་བ་བསགས་པར་འགྱུར་རོ། །རྟག་ཏུ་འཇིག་རྟེན་དབང་ཕྱུག་རྗེས་སུ་འབྲང་བར་འགྱུར་རོ། །རྟག་ཏུ་ཕྱག་གཡས་པ་བྱང་ཆུབ་སེམས་དཔའ་དེའི་སྤྱི་བོ་ལ་འཇོག་པར་འགྱུར་རོ། །རྟག་ཏུ་མཆོག་སྦྱིན་པ་མཛད་པར་འགྱུར་རོ། །རྟག་ཏུ་ཞལ་

---

^{[མ་དཔེ་གཟིགས་ན་འདིར་གནོན།]}

མཐོང་བར་འགྱུར་རོ། །དེ་ལྟར་ན་ཡོན་ཏན་ཆེན་པོ་བརྗོད་པའི་གཟུངས་དང་། དཀྱིལ་འཁོར་དང་ཕྱག་རྒྱ་དང་། ཆོ་ག་འདི་ནི་མཆོག་ཏུ་དཀོན་པ་ཡིན་ནོ། །དཀྱིལ་འཁོར་གྱི་ཆོ་ག་འདི་ཐོས་པ་ཙམ་དང་། རྣ་བའི་བུ་གར་འདིའི་སྒྲ་ལན་བདུན་ངེས་པར་ལྷུང་ན། དེ་འཆི་འཕོ་བ་ཙམ་དང་བསམས་པ་ཙམ་གྱིས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་ཏེ། འོད་དཔག་མེད་ཀྱི་སྤྱན་སྔར་ཞབས་ཀྱི་དྲུང་དུ་པདྨ་ལས་རྫུས་ཏེ་སྐྱེ་བར་འགྱུར་རོ། །རྒྱན་ཐམས་ཅད་ཀྱིས་རྣམ་པར་བརྒྱན་པ་དང་། དེ་བཞིན་གཤེགས་པ་ཐམས་ཅད་ཀྱིས་གསུངས་པའི་མདོ་སྡེ་དང་། ཆོ་ག་ཞིབ་མོ་དང་། དཀྱིལ་འཁོར་དང་། ཕྱག་རྒྱ་རྣམས་ཁ་ཏོན་དུ་ཀུན་དུ་གནས་ཤིང་ཚེ་རབས་དྲན་པར་ཡང་འགྱུར་རོ། །དབང་པོ་དྲུག་ཡོངས་སུ་དག་པ་དང་། མངོན་པར་ཤེས་པ་ལྔ་ཡང་སོ་སོར་ཐོབ་བོ། །ཙམ་ལ་རབ་ཏུ་སྐྱེ་བར་འགྱུར་རོ། །ལྷའི་གཟུགས་དང་། ཁ་དོག་དང་། རྟགས་དང་། དབྱིབས་ཡོངས་སུ་དག་པ་དེའི་ཕྱིར་སྟོབས་དང་བརྩོན་འགྲུས་ཀྱིས་སེམས་ཅན་ཐམས་ཅད་སྣ་ཚོགས་འཛིན་པ་དང་། མཉན་པར་བགྱི། བཀླག་པར་བགྱི། ཁ་ཏོན་དུ་བགྱི། སེར་སྣའི་དྲི་མ་དང་བྲལ་བ་དང་། ཕྲག་དོག་དང་བྲལ་བར་བགྱི། སེམས་ཅན་ཐམས་ཅད་བྱམས་པ་དང་། སྙིང་རྗེ་ལ་སོགས་པ་མཆོག་དང་ཡང་དག་པར་ལྡན་པས་བགྱིའོ། །གཟུངས་དང་། དཀྱིལ་འཁོར་གྱི་ཆོ་ག་འདི་མཉན་པར་བགྱི། བལྟ་བར་བགྱི། འཇུག་པར་བགྱིའོ། །ཕྱི་མའི་དུས་དང་། ཕྱི་མའི་ཚེ་མ་ཡིན་པར་ཕུལ་དུ་བྱུང་བའི་དོན་ལ་བརྩོན་པར་བགྱིའོ་ཞེས་པའོ། །འཇིག་རྟེན་ལས་འདས་པའི་སྒྲུབ་ཐབས་ཀྱི་ཆོ་ག་འདི་ནི་བླ་ན་མེད་པ་ཞེས་བགྱིའོ། །མང་དུ་སྨོས་ཅི་འཚལ་ཏེ། དེ་ལ་འགྲན་སེམས་ཀྱིས་ཀྱང་མཉན་པར་བགྱིའོ་ཞེས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་གཟུངས་འདི་གསུངས་པའི་དེ་མ་ཐག་ཏུ་སྐད་ཅིག་ཐང་ཅིག་ཡུད་ཙམ་གྱིས་པོ་ཊ་ལའི་རི་བོ་འདི་རིན་པོ་ཆེ་སྣ་བདུན་གྱི་རང་བཞིན་དུ་གྱུར་ཏོ། །མེ་ཏོག་གི་ཤིང་ལྗོན་པ་དང་། འབྲས་བུའི་ཤིང་ལྗོན་པ་གང་ཡིན་པ་རྣམས་ཀྱང་རིན་པོ་ཆེ་སྣ་བདུན་གྱི་རང་བཞིན་གྱི་ཁང་པ་

---

^{[མ་དཔེ་གཟིགས་ན་འདིར་གནོན།]}

བརྩེགས་པར་རབ་ཏུ་གྱུར་ཏོ། །གང་གཱའི་ཀླུང་གི་བྱེམ་བྱེ་བ་ཁྲག་ཁྲིག་བརྒྱ་སྟོང་ཕྲག་རྣམས་འབུམ་ཕྲག་བྱེ་བ་དགུ་བཅུ་རྩ་དགུའི་རྡུལ་ཕྲ་རབ་དང་མཉམ་པར་རབ་ཏུ་གྱུར་ཏོ། །ལྷ་རྫས་ཀྱི་མེ་ཏོག་དང་འབྲས་བུ་རྣམ་པར་བཀྲ་བ་རྣམ་པ་སྣ་ཚོགས་པ་རྣམས་ཕམ་པར་བྱས་པའི་རྒྱན་རྣམ་པར་བཀྲ་བས་རྣམ་པར་བཀྲ་ཞིང་། དྲིལ་བུ་གཡེར་ཀའི་དྲ་བ་དང་། གསེར་གྱི་དྲིལ་བུ་འཁྲོལ་བའི་བླ་རེས་དཔྱངས་པ་རྣམས་དང་། ལྷ་རྫས་ཀྱི་སེང་གེའི་ཁྲི་ཡོངས་སུ་བཤམས་པ་རྣམས་ཀྱང་རེ་རེ་ཞིང་ཁང་པ་བརྩེགས་པའི་དབུས་ན། སེང་གེའི་ཁྲི་བཤམས་པ་བརྒྱ་སྟོང་ཕྲག་དགུ་བཅུ་རྩ་དགུར་རབ་ཏུ་བྱུང་བར་གྱུར་ཏེ། སེང་གེའི་ཁྲི་ཐམས་ཅད་ལ་ཕྱོགས་བཅུ་ནས་དེ་བཞིན་གཤེགས་པ་ཡང་དག་པར་བྱོན་ཏེ་བཞུགས་སོ། །དེ་བཞིན་གཤེགས་པ་ཐམས་ཅད་ཀྱང་ཕྱག་གསེར་གྱི་ཁ་དོག་ཅན་བརྐྱང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་སྤྱི་བོའི་གཙུག་ཏུ་ཕྱག་འཇོག་པར་མཛད་ཅིང་། ལེགས་སོ་ཞེས་བྱ་བའི་སྒྲ་བརྗོད་པར་མཛད་དོ། །སྤྱན་རས་གཟིགས་དབང་ཕྱུག་ལེགས་སོ་ལེགས་སོ་མཆོག་ཏུ་ཁྱད་པར་དུ་འཕགས་པའི་འཇིག་རྟེན་ལས་འདས་པའི་ལམ་ཆེན་པོར་རབ་ཏུ་བསྟན་པས། སེམས་ཅན་ཐམས་ཅད་ཕ་རོལ་ཏུ་འགྲོ་བར་བྱེད་པ་དང་། གང་གིས་ཐོས་པ་ཙམ་གྱིས་འཇིག་རྟེན་ལས་འདས་པ་སོ་སོར་ཁྱད་པར་དུ་འཕགས་པའི་སངས་རྒྱས་ཉིད་ཀྱི་ལམ་ཚོལ་བ་ལ་རྗེས་སུ་འགྲོའོ། །འོན་ཀྱང་བཟླས་པ་དང་། འདྲི་བ་དང་། ཀློག་པ་དང་། དཀྱིལ་འཁོར་མཐོང་བ་དང་། འཇུག་པ་ཆེས་མང་པོའི་དབང་དུ་བྱས་པའི་སེམས་ཅན་རྣམས་དམ་ཚིག་ལ་རྗེས་སུ་འཇུག་པར་འགྱུར་བ་དེ། སྐྱེ་བ་འདི་ཉིད་ལ་དེ་བཞིན་གཤེགས་པའི་ལུས་སུ་རིག་པར་བྱའོ། །དེ་ནས་པོ་ཊ་ལའི་གནས་ཀྱི་རི་བོ་དང་། རྩྭ་དང་། ཤིང་གེལ་བ་དང་། སྨན་དང་། ནགས་དེ་རྣམས་ཐམས་ཅད་ལ་མི་གང་ཙམ་དུ་མཐོ་བ་ཉིད་དང་། ཤིང་རྟའི་འཁོར་ལོའི་ཚད་ཙམ་པའི་རིན་པོ་ཆེ་སྣ་བདུན་གྱི་རང་བཞིན་ཅན་གྱི་པདྨ་རྣམས་རབ་ཏུ་བྱུང་སྟེ། འདབ་མ་ཁ་དོག་སྣ་ཚོགས་པ་དང་། སྡོང་བུ་བཻ་ཌཱུརྱ་དང་། འཛམ་བུ་ཆུ་བོའི་གསེར་གྱི་ཁ་

---

^{[མ་དཔེ་གཟིགས་ན་འདིར་གནོན།]}

དོག་ལྟར་དམར་བའི་མུ་ཏིག་གི་ཟེའུ་འབྲུ་དང་། ལྷ་རྫས་ཀྱི་མུ་ཏིག་གི་གེ་སར་གྱིས་ཁོར་ཡུག་ཏུ་བསྐོར་བ་གང་ཡིན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བཞུགས་ཏེ། བྱང་ཆུབ་སེམས་དཔའ་དེ་རྣམས་ཐམས་ཅད་ཀྱང་ཆོས་ལ་གུས་པས་ཐམས་ཅད་པུས་མོ་བཙུགས་ཏེ། གཟུངས་འདིའི་དཀྱིལ་འཁོར་དང་ཕྱག་རྒྱ་མཐོང་བའི་དོན་དུ་མུ་ཏིག་གི་དོ་ཤལ་བརྒྱ་སྟོང་རིབ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་མངོན་པར་བཀབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྡོ་རྗེའི་རང་བཞིན་དུ་བྱིན་གྱིས་བརླབས་པ་འདི་ཡང་ཆེས་ཆེར་གཡོས་པར་གྱུར་ཏོ། །ལྷའི་མེ་ཏོག་གི་ཆར་ཆེན་པོ་མང་པོ་རབ་ཏུ་ཕབ་སྟེ། དེ་བཞིན་གཤེགས་པ་ཐམས་ཅད་མཆོད་པའི་དོན་དང་། བྱང་ཆུབ་སེམས་དཔའ་ཐམས་ཅད་མཆོད་པའི་དོན་དང་། གཟུངས་འདིའི་དཀྱིལ་འཁོར་དམ་པ་ལ་མཆོད་པའི་དོན་དུ་ཆར་རབ་ཏུ་ཕབ་བོ། །དེ་ནས་ཡང་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་བཞིན་འཛུམ་ཞིང་རྡོ་རྗེ་བསྐོར་བཞིན་དུ་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་ལས་འདས་པའི་གཟུངས་ཀྱི་དཀྱིལ་འཁོར་གྱི་ཆོ་ག་འདི་ནི་ཤིན་ཏུ་རྙེད་པར་དཀའ་བ་སྟེ། འདི་ལྟ་བུའི་རྫུ་འཕྲུལ་གྱི་རྣམ་པར་འཕྲུལ་པ་དང་། ཆོ་འཕྲུལ་ནི་དེ་བཞིན་གཤེགས་པ་བསྐྱེད་པ་བལྟ་བར་བགྱི། ཆོས་ཀྱི་འཁོར་ལོ་བསྐོར་བར་བལྟ་བར་བགྱི། དེ་བཞིན་གཤེགས་པ་དང་མཉམ་པ་ཉིད་དུ་བལྟ་བར་བགྱིའོ། །བཅོམ་ལྡན་འདས་མཐུ་ཆེན་པོ་འདི་འཛམ་བུའི་གླིང་ན་མཆོག་ཏུ་དཀོན་པར་བལྟ་བར་བགྱི་སྟེ། འདི་ནི་ཕྱི་མའི་དུས་ཕྱི་མའི་ཚེ་ན། དེ་བཞིན་གཤེགས་པའི་མཛད་པ་དང་། སངས་རྒྱས་ཀྱི་མཛད་པ་བྱེད་པར་འགྱུར་རོ། །གང་གིས་ཐོས་པ་ཙམ་གྱིས་འདི་ལྟ་བུའི་ཡོན་ཏན་དང་ཕན་ཡོན་སོ་སོར་ཐོབ་བོ། །ཀུན་ཏུ་སྣང་བར་བྱེད་པར་འགྱུར་བ་འདི་ཉིད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་མ་གཏོགས་

---

^{[མ་དཔེ་གཟིགས་ན་འདིར་གནོན།]}

པར་སེམས་ཅན་ཐམས་ཅད་ཀྱི་ནང་ན་གཞན་སུ་ཡང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཇི་སྐད་སྨྲས་པ་དེ་དེ་བཞིན་ནོ། །ལག་ན་རྡོ་རྗེ་འཛམ་བུའི་གླིང་པའི་སེམས་ཅན་ཐམས་ཅད་མདང་ཕར་གྱུར་པ་འདི་གཟུངས་ཀྱི་དཀྱིལ་འཁོར་འདི་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་འདི་སེམས་ཅན་ཐམས་ཅད་ཀྱི་རེ་བ་སྐོང་བ་དང་། སྐྱོབ་པ་དང་། སྐྱབས་དང་། འཇིག་རྟེན་དང་འཇིག་རྟེན་ལས་འདས་པའི་དཔུང་གཉེན་བྱེད་པ་ནས། ཇི་སྲིད་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་སེམས་ཅན་ཐམས་ཅད་སངས་རྒྱས་ཉིད་ཀྱི་བདག་ཉིད་ཀྱི་བར་ལ་རབ་ཏུ་འགོད་པར་བྱེད་དོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་སྟོབས་དང་། བརྩོན་འགྲུས་དང་། ཕ་རོལ་གནོན་པས་སྔོན་སེམས་ཅན་རྣམས་ལ་ཕན་པའི་དོན་དུ་ཞུགས་པ་ཡིན་ནོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ། ཉི་མའི་འོད་ཟེར་གྱི་སྙིང་པོ་དྲི་མ་མེད་པ་ཞེས་བྱ་བའི་ནོར་བུ་རིན་པོ་ཆེ་ཆེན་པོ་ཐོགས་ནས། བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གང་ན་བ་དེར་དོང་སྟེ་ལྷགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་ཞབས་གཉིས་ལ་མགོ་བོས་ཕྱག་འཚལ་ནས། ནོར་བུ་རིན་པོ་ཆེ་ཆེན་པོ་དེ་ཡང་མངོན་པར་དགབ་པར་ཕུལ་ལོ། །ལྷ་རྫས་ཀྱི་མེ་ཏོག་སྣ་ཚོགས་པས་གཅལ་དུ་བཀྲམ་པ། མཆོད་པའི་དོན་དུ་རབ་ཏུ་བཀོད་ནས་རང་གི་སྟན་ལ་འདུག་གོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དོན་ཡོད་པ་དྲི་མ་མེད་ཅིང་རྣམ་པར་དག་པ་རབ་ཏུ་གསལ་བའི་འོད་ཟེར་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་པ་གང་གིས་སྤྱི་བོའི་གཙུག་ཏུ་གདུགས་ཀྱི་རྣམ་པའི་ཁང་པ་བརྩེགས་པ་ཀུན་ཏུ་གནས་པར་གྱུར་ཏོ། །ཁང་པ་བརྩེགས་པ་དེ་ལས་ཀྱང་འོད་ཟེར་རྣམ་པ་སྣ་ཚོགས་པ་

---

^{[མ་དཔེ་གཟིགས་ན་འདིར་གནོན།]}

བྱུང་ངོ་། །འོད་ཟེར་སྣ་ཚོགས་པའི་སྣང་བ་དེས་ཀྱང་ནམ་མཁའི་མཐིལ་དུ་རྫུ་འཕྲུལ་གྱི་རྣམ་པར་འཕྲུལ་པ་དང་། ཆོ་འཕྲུལ་ཆེན་པོ་སྣ་ཚོགས་པ་བསྟན་ཏོ། །འོད་ཟེར་གྱི་སྣང་བ་རེ་རེས་ཀྱང་དེ་བཞིན་གཤེགས་པའི་སྐུ་གང་གཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུ་རབ་ཏུ་བསྟན་ནོ། །དེ་བཞིན་གཤེགས་པའི་སྐུ་དེ་རྣམས་ཐམས་ཅད་ཀྱིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ཏེ། སེམས་ཅན་ཆེན་པོ་མཆོག་ཏུ་རྙེད་པར་དཀའ་བའི་གཟུངས་ཀྱི་དཀྱིལ་འཁོར་དང་། ཕྱག་རྒྱ་འདི་བཤད་པ་འདི་ལེགས་སོ་ལེགས་སོ། །འཇིག་རྟེན་ལས་འདས་པ་ཤིན་ཏུ་ཁྱད་པར་དུ་འཕགས་པའི་བྱང་ཆུབ་ཀྱི་སྙིང་པོར་འགྲོ་བར་བྱེད་པའི་ལམ། ཆོས་ཀྱི་འཁོར་ལོ་སྐོར་བར་བྱེད་པའི་ལམ། ཆོས་ཀྱི་རྣམ་འཕྲུལ་འབར་བར་བྱེད་པ། ཆོས་ཀྱི་རྒྱལ་མཚན་སྒྲེང་བར་བྱེད་པ། ཆོས་ཀྱི་དུང་འབུད་པར་བྱེད་པ། བདུད་བཞིའི་དཀྱིལ་འཁོར་ལས་རྣམ་པར་རྒྱལ་བར་བྱེད་པ། དེ་བཞིན་གཤེགས་པའི་སྟོབས་བཅུས་གནོན་པར་བྱེད་པ། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་རབ་ཏུ་རྫོགས་པར་བྱེད་པ། མི་འཇིགས་པ་བཞིས་གནོན་པར་བྱེད་པ་དེ་བཞིན་ཉིད་དང་། ཡང་དག་པའི་མཐའ་ཕ་རོལ་གནོན་པར་བྱེད་པ། ཕ་རོལ་ཏུ་ཕྱིན་པ་བཅུ་རབ་ཏུ་རྫོགས་པར་བྱེད་པའོ། །འདི་ནི་འཕགས་པའི་ལམ་ཡན་ལག་བརྒྱད་སྒོམ་པར་བྱེད་པའོ། །འདི་ནི་ལམ་རབ་ཏུ་ཉམས་པ་རྣམས་ཀྱི་ལམ་དུ་འཆགས་པར་བྱེད་པ། བསམ་པ་རབ་ཏུ་ཉམས་པ་རྣམས་ཀྱི་བསམ་པ་ཡོངས་སུ་དག་པ། ངན་སོང་དུ་འགྲོ་བར་རྒྱུ་བ་རྣམས་ཀྱི་བདེ་འགྲོའི་ལམ་དུ་འགྲོ་བར་བྱེད་པ། འདི་ནི་བྱང་ཆུབ་ཆེན་པོའི་ས་བོན་དང་། འབྲས་བུ་རབ་ཏུ་སྟོན་པར་བྱེད་པའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །སེམས་ཅན་དག་པ་འཇིག་རྟེན་ལས་འདས་པ་ཁྱད་པར་དུ་འཕགས་པ་རྣམ་པར་ཐར་

---

^{[མ་དཔེ་གཟིགས་ན་འདིར་གནོན།]}

བའི་དཀྱིལ་འཁོར་དོན་ཡོད་པའི་ཞགས་པའི་རྣམ་པར་འཕྲུལ་པ་འཇིག་རྟེན་ལས་འདས་པའི་དཀྱིལ་འཁོར་གྱི་ཉེ་བར་སྤྱོད་པའི་ཆོ་ག་ཤོད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ཀྱི་སྤྱན་སྔ་ནས་བསྐུལ་བ་ཐོབ་ནས། བཅོམ་ལྡན་འདས་ཀྱི་སྤྱན་སྔར། འཇིག་རྟེན་ལས་འདས་པའི་ཆོ་ག་དང་། དཀྱིལ་འཁོར་གྱི་ཉེ་བར་སྤྱོད་པའི་ཆོ་ག་དང་། སྒྲུབ་ཐབས་གསུངས་སོ། །གནས་བཟང་ས་གཞི་དགེ་བ་དང་། །ས་གཞི་གཙང་ཞིང་ནེའུ་གསིང་ལ། །ལྗོན་ཤིང་མེ་ཏོག་འབྲས་བུས་ཁྱབ། །མེ་ཏོག་འཁྲི་ཤིང་འགྲམ་དང་ནི། །ས་གཞི་མཉེན་ལ་དག་པ་དང་། །གང་དུ་ཆུ་བོ་འབབ་པ་དང་། །གཟི་བརྗིད་ལྡན་ཞིང་ཡིད་དགའ་བ། །ས་གཞི་སེམས་ནི་དགའ་བར་འོས། །ཡིད་ཀྱི་ཤིང་རྟ་རྒྱས་བྱེད་ཅིང་། །གོ་སྐབས་ལེགས་པར་གནས་པ་དང་། །ཤིན་ཏུ་དག་ཅིང་ཐུན་ཚགས་བྲལ། །རུས་པ་གསེག་མ་གྱོ་མོ་དང་། །ཕུབ་མ་སོལ་བ་ཡོངས་སུ་སྤངས། །གཙང་ཞིང་གཙང་ལ་ལེགས་དག་པའི། །ས་གཞི་ཡོངས་སུ་ཟླུམ་པ་དེར། །མཁས་པས་རྒྱར་ནི་གཟིངས་ཚད་དུ། །གཞལ་ནས་ཤིན་ཏུ་རྣམ་འབྱེས་ཤིང་། །གཙང་ཞིང་མཉེན་ལ་འཇམ་པར་ཕྱེ། །གནས་དེར་དཀྱིལ་འཁོར་ལེགས་པར་བསྒྲུབས། །སངས་རྒྱས་བྱང་ཆུབ་བླ་ན་མེད། །འཇིག་རྟེན་ལས་འདས་ཁྱད་འཕགས་པར། །དེ་བཞིན་གཤེགས་ཀུན་གྱིས་བྱིན་བརླབས། །ས་ཡི་ཆ་ལས་དཔངས་སུ་ནི། །མི་གང་ཚད་དུ་བརྐོ་བར་བྱ། །གཟུངས་དང་དཀྱིལ་འཁོར་དམར་པོའམ། །ཡང་ན་གུར་གུམ་ཁ་དོག་དང་། །ས་རྡུལ་དཀར་པོ་སྣུམ་པ་ནི། །མར་སར་འདྲ་བ་འཇམ་པ་ཡིན། །ས་ཡི་ཁྱད་པར་དབྱེ་བ་དེ། །དེ་བཞིན་གཤེགས་པ་ཀུན་གྱིས་བསྔགས། །བྱང་ཆུབ་སྙིང་པོ་ས་དེར་མཚུངས། །རིང་བསྲེལ་བཞུགས་པའི་མཆོད་རྟེན་དང་། །དེ་ནི་མཚུངས་པར་གྱུར་པ་ཡིན། །བརྐོས་པའི་ནང་དུ་མཁས་པ་ཡིས། །སླར་ཡང་ས་དེ་དགང་བར་བྱ། །ཇི་སྲིད་དོང་བུ་མཉམ་པར་གང་། །དེ་ནི་དཀྱིལ་འཁོར་ཡང་དག་པའོ། །ཉུང་དང་ལྷག་པ་བསྔགས་པ་

---

^{[མ་དཔེ་གཟིགས་ན་འདིར་གནོན།]}

མིན། །འདིར་ནི་འགྲུབ་པ་མེད་པར་བསྟན། །ཁྲུ་ནི་སུམ་ཅུ་རྩ་གཉིས་ཚད། །མཁས་པས་དཀྱིལ་འཁོར་ཐིག་དག་གདབ། །ཡང་ན་ཁྲུ་ནི་བཅུ་དྲུག་དང་། །ཡང་ན་ཁྲུ་ནི་བཅོ་ལྔར་བྱ། །མཉམ་ཞིང་གྲྭ་བཞིར་ལེགས་པར་དབྱེ། །བ་ཡི་ལྕི་བ་དག་དང་ནི། །ས་དང་བསྲེས་ཏེ་བསྐུ་བྱ་བ། །ཤིན་ཏུ་ཞེན་པར་བསྡིག་པ་དང་། །འཇམ་ཞིང་མཉེན་པར་བྱ་བ་ཡིན། །དེ་ལ་དཀྱིལ་འཁོར་ཐིག་གདབ་པ། །སྣ་ཚོགས་ཚོན་གྱིས་ཀུན་ཏུ་དབྱེ། །སྒོ་བཞི་རྣམ་པར་འབྱེས་པ་དང་། །རྟ་བབས་བཞི་དང་ལྡན་པར་བྱ། །དཀྱིལ་འཁོར་དབུས་ཀྱི་སྙིང་པོ་ནི། །རྣམ་པར་ཕྱེ་སྟེ་གྲུ་བཞི་ཚད། །ཁྲུ་གསུམ་ཡང་ན་ཁྲུ་བཞི་ནི། །ཐིག་སྐུད་ཚོན་གྱིས་རྣམ་པར་དབྱེ། །ནང་གི་ཐིག་ནི་ཚད་དག་ཏུ། །མདུང་རྩེ་གསུམ་པ་དག་དང་ནི། །ནོར་བུ་རིན་ཆེན་སྣ་ཚོགས་བྱ། །བར་གྱི་ཐིག་གི་ཚད་དག་ཏུ། །པདྨ་དང་ནི་རྡོ་རྗེ་དག །ཀུན་ཏུ་བྲི་བར་བྱ་བ་ཡིན། །ཕྱི་ཡི་ཐིག་གི་ཚད་དག་ཏུ། །རྡོ་རྗེ་རྣམ་པའི་སྟེགས་བུ་དང་། །རིན་ཆེན་སྣ་ཚོགས་གཞལ་མེད་ཁང་། །སྟེགས་བུ་དག་ཀྱང་བྲི་བར་བྱ། །པདྨའི་དབུས་སུ་གཞལ་མེད་ཁང་། །གཞལ་ཡས་ཁང་པ་གནས་པར་བྱ། །དཀྱིལ་འཁོར་དབུས་ཀྱི་པདྨ་ལ། །རྣམ་པར་སྣང་མཛད་ཐུབ་པ་བྱ། །གཡོན་དུ་འོང་ནི་དཔག་མེད་པ། །གཡས་ཕྱོགས་སུ་ནི་དེ་བཞིན་གཤེགས། །ཤཱཀྱའི་རྒྱལ་པོ་དག་དང་ནི། །དོན་ཡོད་རྒྱལ་པོ་འཇིག་རྟེན་གྱི། །དབང་ཕྱུག་མགོན་ལ་མངོན་སུམ་དུ། །བཏུད་དེ་ཐལ་མོ་སྦྱོར་བ་ནི། །ཕྱག་བཞི་པར་ནི་བྱ་བ་ཡིན། །ཕྱག་གཉིས་ཀྱིས་ནི་སྣ་ཚོགས་པའི། །མེ་ཏོག་རྣམས་ནི་འཆང་བ་དང་། །རྒྱན་རྣམས་ཀུན་གྱིས་བརྒྱན་པར་བྱ། །འོད་དཔག་མེད་པའི་མདུན་དུ་ནི། །ཁྲོ་བོའི་རྒྱལ་བོ་ཕྱག་བཞི་བ། །བཏུད་དེ་ཐལ་མོ་སྦྱོར་བ་དང་། །ལྷ་རྫས་མེ་ཏོག་སྣ་ཚོགས་པ། །ལག་པ་གཉིས་ན་ཐོགས་པ་དང་། །སྣ་ཚོགས་རྒྱན་གྱིས་བརྒྱན་པར་བྱ། །དབུས་ཀྱི་དཀྱིལ་འཁོར་ལེགས་བརྒྱན་པ། །སྣ་ཚོགས་དར་གྱིས་མཛེས་པར་བྱ། །དོན་ཡོད་ཞགས་པའི་ཕྱག་རྒྱ་ཆེ། །པདྨ་གདན་དང་རྣམ་རྒྱན་པ། །འབར་བའི་ནང་ན་ཡོད་པར་བྱ། །གྲྭ་བཞིར་དག་ནི་

---

^{[མ་དཔེ་གཟིགས་ན་འདིར་གནོན།]}

བྱས་ན་ནི། །གཉིས་ཀྱི་བར་གྱི་ཆ་བཞི་སྟེ། །དབུས་ཀྱི་གནས་སུ་འཇིགས་མེད་པ། །ཤར་གྱི་གནས་སུ་གནས་པ་ནི། །ལྷ་མོ་སྒྲོལ་མ་རྣམ་པར་བརྒྱན། །གཡས་ཀྱི་གནས་སུ་གནས་པ་ནི། །གོས་དཀར་མོ་ནི་རྣམ་པར་བརྒྱན། །ནུབ་ཀྱི་གནས་ན་གནས་པ་ནི། །ལྷ་མོ་དཀར་མོ་རྣམ་པར་བརྒྱན། །བྱང་གི་གནས་ན་གནས་པ་ནི། །ལྷ་མོ་པདྨ་མཛེས་དགའ་བརྒྱན། །དཀྱིལ་འཁོར་ཕྱི་རིམ་གྲྭ་རྣམས་སུ། །རྒྱལ་ཆེན་བཞི་ནི་གཞག་པར་བྱ། །བར་གྱི་གནས་སུ་གཞག་པ་ནི། །རལ་པ་གཅིག་པ་གཏུམ་མོ་ཤར། །ནུབ་ཏུ་ཕོ་ཉ་བཞིན་སྒྱུར་མ། །གཡས་ཕྱོགས་སུ་ནི་བཞིན་སྒྱུར་མ། །རྡོ་རྗེ་ལྕགས་སྒྲོག་བྱ་བ་ཡིན། །བྱང་དུ་སྲིན་མོ་ཁྲོ་གཉེར་གདོང་། །ཀུན་ཀྱང་མེ་དབུས་འཇིགས་པ་མེད། །དཀྱིལ་འཁོར་དབུས་སུ་དགོད་པ་བཞིན། །ཕྱི་རོལ་ཐིག་ལེ་པདྨོའི་ཕྲེང་། །རྡོ་རྗེ་རྩེ་གསུམ་གཞག་པ་ནི། །ཀུན་ཏུ་འབར་བ་ཕྲེང་བར་བཅས། །ཕྱི་རོལ་དཀྱིལ་འཁོར་ཀུན་ཏུ་ནི། །བྲི་བྱ་རྟག་དང་ཕྱག་རྒྱ་དང་། །ལྷ་ནི་དབང་ཕྱུག་དབང་ཕྱུག་ཆེ། །ཚངས་པ་ཁྱབ་འཇུག་གཤིན་རྗེ་དང་། །ཆུ་ལྷ་དབང་པོ་ལུས་ངན་པོ། །དབང་སྒྱུར་དགའ་ལྡན་གནས་དག་གི། །ལྷ་ནས་འོག་མིན་གནས་ཀྱི་བར། །ལྷ་རྣམས་བྲི་བར་བྱ་བ་ཡིན། །སུམ་ཅུ་རྩ་གསུམ་ལྷ་རྣམས་དང་། །རྟགས་ནི་རྣམ་པ་སྣ་ཚོགས་དང་། །ཀུན་ཀྱང་པདྨོའི་གདན་ལ་གནས། །དེ་བཞིན་ཆོས་ཀྱི་འཁོར་ལོ་དང་། །རྡོ་རྗེ་རྩེ་ལྔ་རྡོ་རྗེ་དང་། །ཞགས་པ་དང་ནི་དགྲ་སྟ་དང་། །ལེགས་མཐོང་འཁོར་ལོ་དེ་བཞིན་ནོ། །མདུང་རྩེ་གསུམ་དང་པཊྚི་ས། །ངོས་ལ་དབྱུག་པ་ཐོ་བ་དང་། །རྡོ་རྗེ་དཀྱིལ་འཁོར་པདྨའི་ཕྲེང་། །འཁོར་ལོ་དུང་དང་ག་དཱ་དང་། །རལ་གྲི་དང་ནི་ཏོ་མ་རཾ། །བུམ་པ་གང་བ་དག་དང་ནི། །མི་སྣང་བ་ཡི་འབག་ཤ་དང་། །པདྨ་དང་ནི་ཨུཏྤ་ལ། །རྒྱལ་མཚན་གདུགས་དང་ནོར་བུ་དང་། །དབྱུག་པ་དང་ནི་རྡོ་རྗེ་དང་། །གྲ་བཞིར་རྡོ་རྗེས་མཚན་པ་ཡིན། །ནོར་བུ་རྡོ་རྗེ་དག་དང་ནི། །དགྲ་སྟ་རྡོ་རྗེ་དག་དང་ནི། །ཕྱག་རྒྱ་བཞི་དང་དགའ་བ་འཁྱིལ། །བྱ་མ་བུམ་དང་ཀུན་དི་དང་། །རིལ་བ་བྷྲྀང་ག་རི་དང་ནི། །རི་དགས་ཨེ་ནའི་པགས་པ་དང་། །མཆོད་ཕྱིར་

---

^{[མ་དཔེ་གཟིགས་ན་འདིར་གནོན།]}

ཐོགས་པའི་སྣམ་བུ་དང་། །སྟེང་དུ་རྒྱུ་སྐར་བཅས་པ་ཡི། །ཟླ་བ་ཉི་མ་དེ་བཞིན་ནོ། །ཀུན་ཀྱང་འབར་བའི་ནང་དུ་འདུག །སོ་སོར་ཆ་ནི་དབྱེ་བར་བྱ། །མཁས་པས་ཤར་གྱི་སྒོར་བྲི་བ། །འགྱིང་བག་མཐོང་ན་འཇིགས་སུ་རུང་། །ལག་ན་རྡོ་རྗེ་འཇིགས་པ་མེད། །རྡོ་རྗེ་འཆང་བ་འབར་བའི་ནང་། །ཀི་ལི་ཀི་ལ་གཏུམ་པོ་ཆེ། །ལྷོ་ཕྱོགས་ཀྱི་ནི་སྒོ་རུ་གཞག །ནུབ་ཏུ་རྡོ་རྗེ་པིང་ག་ལ། །མཐོང་ན་འཇིགས་སུ་རུང་བ་ཡི། །བྱང་དུ་ངེས་པར་གནོད་མཛེས་བྱ། །ཕྱི་རོལ་དཀྱིལ་འཁོར་ཀུན་ཏུ་ནི། །པདྨའི་ཕྲེང་དང་ཨུཏྤལ་ཕྲེང་། །གྲྭ་དག་དང་ནི་གྲྭ་རྣམས་སུ། །ཀླུ་ཡི་རྒྱལ་པོ་བཞི་རྣམས་བྲི། །སྒོ་སྲུང་བ་དག་བྲི་བ་ནི། །ནོར་བུ་བཟང་དང་གང་བ་བཟང་། །སྟོབས་ཀྱི་ལྷ་དང་ལྔས་རྩེན་ཡིན། །སྒོ་ཡི་གནས་ཀྱི་བར་དག་ཏུ། །ཆུ་བོ་བཞི་ནི་བྲི་བྱ་བ། །གང་གཱ་དང་ནི་སི་ཏ་དང་། །པཀྵུ་དང་ནི་སིནྡུ་ཡིན། །ཕྲེང་བའི་ནང་རོལ་ཐོག་དག་ཏུ། །དཔལ་གྱི་ལྷ་མོ་བ་སན་ཏཱི། །དཔེ་མེད་མ་དང་ས་ཡི་ལྷ། །ལོ་ཏོག་སྨན་གྱི་ལྷ་མོ་དང་། །སྒྲ་དབྱངས་མ་དང་འཇིགས་ལྡན་མ། །དེ་བཞིན་མི་ཡི་ལྷ་དག་དང་། །འཕྲོག་མ་དང་ནི་དུང་ཅན་མ། །གཏུམ་མོ་དང་ནི་མེ་ཏོག་སོ། །དེ་དག་བྲི་བར་བྱ་བ་ཡིན། །ཁྲུས་བྱས་འདྲི་མཁན་གཙང་མ་ཡིས། །གཙང་མའི་སྣོད་དུ་ཚོན་རྣམས་ནི། །ལྷག་མ་མིན་པས་ཀུན་ཏུ་བྲི། །ཟས་ནི་དཀར་གསུམ་གྲུབ་པར་བྱ། །ཁྱད་པར་འདོད་པས་ཟས་ངན་པ། །སྤང་བར་བྱ་བ་ཉ་དང་ཤ། །བཙོང་དང་སྒོག་སྐྱ་ཀེའུ་རྣམས་དང་། །འདྲེས་པ་སྤང་བར་བྱ་བ་ནི། །ལོག་འདྲེན་གླགས་ཚོལ་སྤང་ཕྱིར་རོ། །ཁྲུས་བྱས་གོས་ནི་སར་པ་བགོས། །གཙང་མས་དཀྱིལ་འཁོར་བྲི་བར་བྱ། །དཀྱིལ་འཁོར་རྣམ་པ་སྣ་ཚོགས་ཀྱིས། །ཀུན་ཏུ་བརྒྱན་བར་བྱ་བ་ནི། །བ་དན་རྣམ་པ་སྣ་ཚོགས་དང་། །རྣམ་པ་སྣ་ཚོགས་མདའ་དང་ནི། །ལྷ་རྫས་དར་ནི་དཔྱང་བ་དང་། །བ་དན་ཡང་ནི་དཔྱང་བར་བྱ། །ཚོན་སྐུད་སྣ་ལྔའི་སྲད་བུ་ཡིས། །ཀུན་ཏུ་ཡོངས་སུ་བསྐོར་བར་བྱ། །ཟངས་ལས་བྱས་པའི་པདྨའི་ཚད། །སོར་བཞི་འདབ་མ་བྱེ་བ་དེ། །མཛེས་པ་གྲྭ་བཞིར་གཟུགས་པར་བྱ། །སྙིང་པོ་དཀྱིལ་འཁོར་གྲྭ་རྣམས་སུ། །པདྨ་བརྒྱད་ནི་གཞལ་བ་དག །གསེར་

---

^{[མ་དཔེ་གཟིགས་ན་འདིར་གནོན།]}

ལས་བྱས་པ་བཞི་གཞག་ཅིང་། །དེ་བཞིན་དངུལ་ལས་བྱས་པ་བཞི། །ཀུན་ཏུ་བྱི་རུའི་ཕྲེང་བ་དང་། །མུ་ཏིག་ཕྲེང་བ་དེ་བཞིན་ནོ། །ཀུན་ཏུ་གསེར་གྱི་སྲང་བུ་དང་། །རིན་ཆེན་སྣ་ཚོགས་གཞག་པར་བྱ། །སྙིང་པོའི་དཀྱིལ་འཁོར་ཐིག་བར་དུ། །གསེར་གྱི་སྣོད་ནི་བཞི་དག་དང་། །དངུལ་གྱི་སྣོད་ནི་བཞི་གཞག་གོ། །དངུལ་གྱི་བུམ་པ་གང་བ་བཞི་ལ་དངུལ་དང་། གསེར་དང་། ཟངས་ལས་བྱས་པའི་མེ་ཏོག་སྤྲས་པའི་མགོ་ལྕོགས་ཀྱིས་སྤྲས་པ་གཞག་པར་བྱའོ། །གསེར་གྱི་བུམ་པ་བཞི་གཞག་པ་ལ་མུ་ཏིག་དང་། བྱི་རུ་དང་། པདྨ་རཱ་ག་དང་། མ་རྒད་དང་། ཨིནྡྲ་ནཱི་ལ་དང་། དངུལ་དང་། གསེར་དང་། མེ་ཏོག་གིས་སྤྲས་པའི་མགོ་ལྕོགས་གཞག་པར་བྱའོ། །གླ་རྩི་དང་། ག་པུར་དང་། གུར་གུམ་དང་། ལྷ་རྫས་ཀྱི་ཙནྡན་གྱི་ཕྱེ་མས་གསེར་གྱི་སྣོད་བཀང་བ་དང་། དངུལ་གྱི་སྣོད་ཀྱི་ནང་དུ་གསེར་གྱི་མེ་ཏོག་དང་། དངུལ་གྱི་མེ་ཏོག་དང་། ཟངས་ཀྱི་མེ་ཏོག་མུ་ཏིག་གིས་བརྒྱན་ཅིང་རིན་པོ་ཆེ་རྣམ་པ་སྣ་ཚོགས་སྤྲས་པ་གཞག་པར་བྱ། ཅོད་པན་གྱི་རྒྱལ་མཚན་བཞི་གཞག་པར་བྱ། རིན་པོ་ཆེའི་རྒྱལ་མཚན་བཞི་གཞག་པར་བྱ། ཚོན་སྣ་ཚོགས་ཅན་དང་། དར་དམར་པོ་དཔྱང་བར་བྱ། དངུལ་གྱི་པོག་པོར་བཞི་གཞག་སྟེ། ཙནྡན་དང་། གླ་རྩི་དང་། ག་བུར་དང་། གུར་གུམ་གྱི་བདུག་པས་བདུག་པར་བྱ། ས་ལས་བྱས་པའི་བུམ་པ་གསེར་གྱིས་གཡོགས་པའི་ནང་དུ་དྲི་ཆབ་རྣམ་པ་སྣ་ཚོགས་ཀྱིས་བཀང་སྟེ། རིན་པོ་ཆེ་སྣ་བདུན་དང་ལྡན་པར་བགྱིས་ལ་བཀང་བ་ལ་དར་གྱིས་བཅིངས་ལ་རྒྱན་རྣམ་པ་སྣ་ཚོགས་ཀྱིས་བརྒྱན་པའི་སྟེང་དུ་ཟངས་ལས་བྱས་པའི་མེ་ཏོག་བཞག་ནས་སྙིང་པོའི་དཀྱིལ་འཁོར་གྱི་སྟེང་དུ་པདྨའི་སྟེང་དུ་གཞག་པར་བྱའོ། །དེ་ནས་ཕྱི་རོལ་གྱི་དཀྱིལ་འཁོར་ཐོག་ཐག་ཏུ་དྲི་དང་། ཕྱེ་མ་དང་། བྱུག་པ་དང་། མེ་ཏོག་དང་། འབྲས་བུ་ལ་སོགས་པ་རྣམ་པ་སྣ་ཚོགས་དང་། མཆོད་ཡོན་གྱི་ཆབ་ཀྱིས་དངུལ་གྱི་སྣོད་དང་། ཟངས་ཀྱི་སྣོད་བཀང་བ་དྲུག་ཅུ་རྩ་བཞི་གཞག་པར་བྱའོ། །ལྕགས་ཀྱི་སྣོད་བུམ་པ་གང་བ་དྲུག་ཅུ་རྩ་བཞི་གཞག་པར་བྱའོ། །མེ་ཏོག་དང་། མགོ་ལྕོགས་དང་།

---

^{[མ་དཔེ་གཟིགས་ན་འདིར་གནོན།]}

པོར་ཕོག་བཀང་བ་དྲུག་ཅུ་རྩ་བཞི་གཞག་པར་བྱའོ། །གཞག་པར་བྱ་སྟེ་བདུག་པ་སྣ་ཚོགས་ཀྱིས་བདུག་པར་བྱའོ། །སྒོ་བཞིར་དྲི་ཆབ་ཀྱི་བུམ་པ་དར་གྱིས་བརྒྱན་ཅིང་སྤུད་པ་གཞག་པར་བྱའོ། །སྣ་མའི་མེ་ཏོག་གི་གདུ་བུའི་སྟེང་དུ་མདའ་ལ་བ་དན་བཏགས་པ་དྲུག་ཅུ་རྩ་བཞི་བཅུགས་ཏེ། ཚོན་སྣ་ཚོགས་ཀྱིས་བཀྲ་བར་བྱས་པའི་མདའ་དང་། ནོར་བུའི་ཕྲེང་བ་རྣམ་པ་སྣ་ཚོགས་ཀྱིས་དཀྱིལ་འཁོར་བརྒྱན་པར་བྱའོ། །དེ་ནས་ཕྱི་རོལ་གྱི་དཀྱིལ་འཁོར་ཐོག་ཐག་ཏུ་ས་དང་བསྲེས་པའི་བའི་ལྕི་བས་དཀྱིལ་འཁོར་བྱས་ལ་དྲི་ཆབ་ཀྱིས་བསྐུས་ཏེ། ཚོན་སྣ་ལྔའི་སྲད་བུས་ཐིག་བཏབ་ལ་སྒོ་བཞི་རྣམ་པར་ཕྱེ་སྟེ། སེང་ལྡེང་གི་ཕུར་བུ་ཚད་སོར་བཅུ་གཉིས་པ་དྲུག་ཅུ་རྩ་བཞི་གདབ་བོ། །ཚོན་སྣ་ལྔའི་སྲད་བུས་དཀྱིལ་འཁོར་ཀུན་དུ་བསྐོར་བར་བྱའོ། །བུམ་བུ་དང་། བུམ་པ་དང་། བྱམ་བུམ་དྲུག་ཅུ་རྩ་བཞི་གཏོར་མ་སྣ་ཚོགས་ཀྱིས་བཀང་པ་གཞག་གོ། །ཁོམ་ཕོར་ཟླུམ་པོ་དྲུག་ཅུ་རྩ་བཞི་གཏོར་མ་སྣ་ཚོགས་ཀྱིས་བཀང་པ་གཞག་གོ། །གཏོར་མ་ཚུལ་སྣ་ཚོགས་པ་དྲུག་ཅུ་རྩ་བཞི་སོ་སོར་གཞག་གོ། །སྣོད་ཚོན་སྣ་ལྔ་པ་དྲུག་ཅུ་རྩ་བཞི་ཁ་ཟས་རྣམ་པ་སྣ་ཚོགས་ཀྱིས་བཀང་པ་དང་། བཅའ་བ་རྣམ་པ་སྣ་ཚོགས་བླུགས་པ་དང་། གཏོར་མ་དཀར་པོ་རྣམ་པ་སྣ་ཚོགས་གཞག་གོ། །ཡོ་བྱད་ཐམས་ཅད་ཀྱིས་ཡོངས་སུ་གང་བ། རོ་རྣམ་པ་སྣ་ཚོགས་ཀྱི་གཏོར་མ་གཞག་གོ། །འབྲས་བུ་སྣ་ཚོགས་དང་། མེ་ཏོག་སྣ་ཚོགས་དགྲམ་མོ། །ཕྲེང་བ་བརྒྱ་ཉི་ཤུ་རྩ་གཅིག་དཀྱིལ་འཁོར་དུ་དཔྱང་བར་བྱ་སྟེ། བྱང་ཕྱོགས་ཀྱི་དཀྱིལ་འཁོར་ལ་དྲུག་ཅུ་རྩ་བཞི་སྙིང་པོའི་དཀྱིལ་འཁོར་ལ་སུམ་ཅུ་རྩ་གཉིས་གདགས་སོ། །མེ་མར་གྱི་སྡོང་བུ་བཞི་བུད་བར་བྱའོ། །གཏོར་མ་བརྒྱ་དྲུག་ཅུ་རྩ་བཞི་དང་དཀྱིལ་འཁོར་ཐོག་ཐག་ཏུ་མར་མེ་བུད་པར་བྱའོ། །ཆང་དང་ཤ་དང་། བེག་བཙོང་དང་། སྒོག་སྐྱ་དང་། ཀེའུ་དང་། ཚོད་སྔོན་དང་། ལ་ཕུག་སྤངས་པའི་གཏོར་མ་གཞན་རྣམ་པ་སྣ་ཚོགས་གཞག་པར་བྱའོ། །དཀྱིལ་འཁོར་གྱི་ཕྱི་རོལ་གྲྭ་བཞིར་དོན་ཡོད་པའི་ཞགས་པའི་མདོ་སྡེ་བཀླག་པར་བྱའོ། །སྒོ་རེ་རེར་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་པར་བྱའོ། །ཆོས་ཀློག་པ་ལེགས་པར་ཁྲུས་

---

^{[མ་དཔེ་གཟིགས་ན་འདིར་གནོན།]}

བྱས་ཏེ། ལྷ་རྫས་ཀྱི་གོས་ཀྱིས་དཀྲིས་ཏེ། གཙང་མ་ལ་དྲི་རྣམ་པ་སྣ་ཚོགས་ཀྱིས་བསྒོས་པའི་གོས་གཙང་མ་སར་པ་བགོས་ཏེ། ཆོས་ཀྱི་སྟན་ཤིན་ཏུ་བརྒྱན་པ་ལྷ་རྫས་ཀྱི་སྟན་ལ་འདུག་ནས་ཚིག་འཇམ་པོ་ཚིག་མཉེན་པོས་བཀླག་པར་བྱའོ། །ནུབ་ཀྱི་ཕྱོགས་ཆ་ལ་དཀྱིལ་འཁོར་མཐོན་པོ་ལ་བདེ་བ་ཅན་གྱི་བཀོད་པ་བྲིས་པ་འོད་དཔག་མེད་དང་། འཕགས་པ་སྤྱན་རས་གཟིགས་ཀྱི་དབང་ཕྱུག་དང་། མཐུ་ཆེན་ཐོབ་པའི་གཟུགས་བྲི་བའི་རས་ཀྱི་སྐུ་གཟུགས་དཀྱིལ་འཁོར་ལ་མངོན་དུ་ཕྱོགས་པར་གཞག་པར་བྱའོ། །ཤར་གྱི་ཕྱོགས་ཆ་ལ་དཀྱིལ་འཁོར་གྲྭ་བཞི་མཐོན་པོ་བྱས་ལ་རྣམ་པར་གྲོལ་བའི་དཀྱིལ་འཁོར་ལ་ཤཱཀྱ་ཐུབ་པ་དང་། འཕགས་པ་རྡོ་རྗེ་འཆང་བ་དང་། དོན་ཡོད་པའི་ཞགས་པའི་ཁྲོ་བོའི་གཟུགས་བྲིས་པ་རས་ཀྱི་སྐུ་གཟུགས་དཀྱིལ་འཁོར་ལ་མངོན་དུ་ཕྱོགས་པར་གཞག་གོ། །ལྷོའི་ཕྱོགས་ཆ་ལ་རི་འདྲ་བའི་གནས་མཐོན་པོ་བྱས་ལ་དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོ་དང་། འཇམ་དཔལ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། དོན་ཡོད་པའི་ཞགས་པ་རས་ལ་བྲིས་པའི་དཀྱིལ་འཁོར་ལ་མངོན་དུ་ཕྱོགས་པར་གཞག་གོ། །བྱང་གི་ཕྱོགས་ཆ་ལ་ཁྲོ་བོའི་རྒྱལ་པོ་དང་། དེ་བཞིན་གཤེགས་པ་རྣམ་པར་སྣང་མཛད་དང་། བྱམས་པ་དང་། སའི་སྙིང་པོ་བྲིས་པའི་རས་ཀྱི་སྐུ་གཟུགས་དཀྱིལ་འཁོར་ལ་མངོན་དུ་ཕྱོགས་པར་གཞག་གོ། །སྟེགས་བུའི་རྣམ་པར་མཐོན་པོར་བྱས་པ་ཐམས་ཅད་ལེགས་པར་བརྒྱན་པར་བྱའོ། །དར་གྱི་ཕྲེང་བས་བརྒྱན་པར་བྱའོ། །རྒྱན་ཐམས་ཅད་ཀྱིས་བརྒྱན་པ་དང་། བུམ་པ་གང་བ་གཞག་པ་དང་། དྲིས་དཀྱིལ་འཁོར་བྱ་བ་དང་། རོའི་མཆོག་རྣམ་པ་སྣ་ཚོགས་བཟའ་བའི་ངོ་བོ་རྣམ་པ་དུ་མའི་ཁ་ཟས་ཀྱི་རོ་འབུལ་བ་དང་། འབྲས་བུ་རྣམ་པ་སྣ་ཚོགས་དང་ལྡན་པའི་བསོད་སྙོམས་གཞག་པ་དང་། ཙནྡན་དང་། ཨ་ག་རུ་དང་། དུ་རུསྐ་དང་། ག་བུར་དང་། གླ་རྩི་དང་། གུར་གུམ་དང་བསྲེས་པའི་བདུག་པ་རས་ཀྱི་སྐུ་གཟུགས་ལ་དབུལ་བར་བྱའོ། །དེ་ནས་རིག་སྔགས་འཆང་བས་དུས་གསུམ་དུ་ཁྲུས་བྱ་ཞིང་། གོས་ལན་གསུམ་བརྗེས་ཏེ། དུས་

---

^{[མ་དཔེ་གཟིགས་ན་འདིར་གནོན།]}

གསུམ་དུ་བཟླས་བརྗོད་དང་ཆོ་ག་བྱའོ། །ཚེས་བརྒྱད་ནས་བརྩམས་ཏེ་ཚེས་བཅོ་ལྔ་ཚང་གི་བར་དུ་དོན་ཡོད་པའི་ཞགས་པ་ལན་ཉི་ཤུ་རྩ་གཅིག་བཟླས་བརྗོད་བྱའོ། །ཁྲོ་བོའི་རྒྱལ་པོ་ལན་ཉི་ཤུ་རྩ་གཅིག་བཟླས་བརྗོད་བྱའོ། །དོན་ཡོད་པའི་ཞགས་པའི་ལྕགས་ཀྱུ་ཉི་ཤུ་རྩ་གཅིག་དང་། དོན་ཡོད་པ་རྣམ་པར་ལྟ་བའི་ཞགས་པའི་སྙིང་པོ་དང་འཇིག་རྟེན་ལས་འདས་པ་རྣམ་པར་འཕྲུལ་པ་ལན་ཉི་ཤུ་རྩ་གཅིག་དང་། རྣམ་པར་གྲོལ་བའི་དཀྱིལ་འཁོར་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ་སྟོང་རྩ་བརྒྱད་བཟླས་བརྗོད་བྱ་བ་དང་། རྣམ་པར་གྲོལ་བའི་དཀྱིལ་འཁོར་གྱི་ཞགས་པའི་སྙིང་པོ་སྟོང་རྩ་བརྒྱད་བཟླས་བརྗོད་བྱའོ། །ཟླ་བ་ཉ་ལ་ཐུག་གི་བར་དུ་ཟས་དཀར་གསུམ་བཟའ་བར་བྱའོ། །ཚེས་བཅོ་ལྔའི་ཉིན་མཚན་ཐོག་ཐག་ཏུ་དོན་ཡོད་པའི་ཞགས་པའི་སྙིང་པོ་དཔག་ཏུ་མེད་པར་བཟླས་བརྗོད་བྱའོ། །མཚན་ཐོག་ཐག་བཟླས་བརྗོད་བྱས་ཀྱང་ངལ་བ་མེད་པ་དང་། ལུས་སྙོམ་པ་དང་བྲལ་བས་བཟླས་བརྗོད་བྱའོ། །བྱམས་པ་དང་། སྙིང་རྗེའི་ལྷག་པའི་བསམ་པའི་སེམས་སུ་བྱའོ་བཟླས་བརྗོད་ཀྱི་ཆོ་ག་ཟིན་ནས་དཀྱིལ་འཁོར་གྱི་བྱ་བ་མཚམས་བཅད་པ་དང་། ཕྱོགས་བཅིང་བ་དང་། བདག་སྲུང་བ་དང་། གཞན་སྲུང་བ་དང་དཀྱིལ་འཁོར་བསྡམ་པ་བྱས་ནས། དེ་ནས་འཁོར་རྣམས་དཀྱིལ་འཁོར་དུ་དམ་ཚིག་ལ་གཞུག་པར་བྱའོ། །དཀྱིལ་འཁོར་དུ་གཞུག་པ་དང་། དཀྱིལ་འཁོར་གྱི་ལས་ཟིན་ནས་མཆོད་པ་བརྩམ་མོ། །མཆོད་པའི་ཆོ་ག་ཟིན་པ་དང་། དེ་ནས་བཟླས་བརྗོད་བརྩམ་པར་བྱ་སྟེ། དོན་ཡོད་པའི་ཞགས་པའི་དཀྱིལ་འཁོར་གྱི་སྤྱན་སྔར་འདུག་ནས། དོན་ཡོད་པའི་ཞགས་པའི་སྙིང་པོ་བཟླས་བརྗོད་བྱས་ལ། ཁྲོ་བོའི་རྒྱལ་པོ་བརྒྱ་རྩ་བརྒྱད་ཀྱིས་དབང་བསྐུར་རོ། །བཟླས་བརྗོད་ལན་ཉི་ཤུ་རྩ་གཅིག་དང་། དབང་བསྐུར་མ་ཐག་ཏུ་རས་ཀྱི་སྐུ་གཟུགས་དང་། དཀྱིལ་འཁོར་ཐམས་ཅད་ཀུན་ཏུ་འབར་ཞིང་འོད་ཟེར་སྣ་ཚོགས་འབྱིན་ཅིང་ལེགས་སོ་ཞེས་བྱ་བའི་སྒྲ་འབྱིན་པར་འགྱུར་རོ། །རིག་སྔགས་འཆང་བའི་སྙིང་དགའ་ཞིང་ལུས་འབར་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་ཤིན་ཏུ་འབར་ཞིང་འོད་འཕྲོ་བ་ཉི་

---

^{[མ་དཔེ་གཟིགས་ན་འདིར་གནོན།]}

མ་སྟོང་བས་ལྷག་པའི་འོད་ཟེར་ཅན་དོན་ཡོད་པའི་ཞགས་པ་ཚངས་པའི་ཆ་བྱད་འཆང་བ་དཀྱིལ་འཁོར་གྱི་དབུས་ཀྱི་ནང་ནས་མངོན་དུ་གཤེགས་ཏེ། ཕྱོགས་བཅུའི་དཀྱིལ་འཁོར་ཀུན་ལ་རྣམ་པར་གཟིགས་ཤིང་རིག་སྔགས་འཆང་བ་ལེགས་སོ་ཞེས་བྱ་བའི་སྒྲ་ཕྱུང་སྟེ། ཕྱག་གཡས་པ་བརྐྱང་སྟེ་རིག་སྔགས་འཆང་བའི་སྤྱི་བོ་ལ་བཞག་སྟེ། དཀྱིལ་འཁོར་གྱི་མཆོག་ཤིན་ཏུ་བརྒྱན་ཅིང་སྤྲས་པ་འདི་ནི་ཤིན་ཏུ་བཟང་བ་ཡིན་ཏེ། ལེགས་སོ་ལེགས་སོ། །འདི་རྣམ་པར་གྲོལ་བའི་དཀྱིལ་འཁོར་དོན་ཡོད་པའི་ཞགས་པ་རྣམ་པར་འཕྲུལ་པ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ་དེ་བཞིན་གཤེགས་པ་དང་། བྱང་ཆུབ་སེམས་དཔའ་ཐམས་ཅད་ཀྱི་གསང་བ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང། ལྟོ་འཕྱེ་ཆེན་པོ་དང་། སྲིན་པོ་རྣམས་ཀྱི་དམ་ཚིག་གི་དཀྱིལ་འཁོར་བདུད་ཐམས་ཅད་ཕམ་པར་བྱེད་པའི་དཀྱིལ་འཁོར་བགེགས་དང་། རྣམ་པར་ལོག་འདྲེན་ཐམས་ཅད་འཇོམས་པ། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་དང་། རྗེའུའི་རིགས་དང་། དམངས་རིགས་དང་། ཐ་ན་བྱོལ་སོང་གི་སྐྱེ་གནས་སུ་གཏོགས་པའི་བྱའང་རུང་སྟེ། སེམས་ཅན་ཐམས་ཅད་འཁོར་བའི་གཅོང་རོང་ལས་སྒྲོལ་བ་ཡིན་ནོ། །འདི་ནི་སྡིག་པ་དང་། སྒྲིབ་པ་ཐམས་ཅད་དང་། དམྱལ་བ་དང་། སྡུག་བསྔལ་དང་། ནད་དང་། སྐྱེ་བ་དང་། རྒ་བ་དང་། འཆི་བ་ལས་ཡོངས་སུ་ཐར་བར་བྱེད་ཅིང་འཇིགས་པ་མེད་པའི་ཁྱིམ་དུ་འཇུག་པར་བྱེད་པ་ཡིན་ནོ། །འདི་ནི་རྣམ་པར་ཐར་པར་བྱེད་པ་དཀྱིལ་འཁོར་ཆེན་པོ་སྙིང་པོ་དང་། གསང་སྔགས་སུ་བཅས་པ་རྣམ་པར་གྲོལ་བའི་དཀྱིལ་འཁོར་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ་འདི་རིག་སྔགས་འཆང་བ་དེ་དང་དེས་མིང་བརྗོད་པ་དང་། གང་དྲན་པ་ཙམ་ལ་སོགས་པ་དང་། ལྟ་བ་དང་། ཉན་པ་དང་། མིང་འཛིན་པ་ཡང་འཁོར་བའི་ཕ་རོལ་ཏུ་རྒལ་

---

^{[མ་དཔེ་གཟིགས་ན་འདིར་གནོན།]}

བར་འགྱུར་རོ། །ཕྱིར་མི་ལྡོག་པ་ཉིད་དུ་ས་བཅུ་བགྲོད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཐོབ་པར་འགྱུར་རོ། །དེ་གང་ཞེ་ན། གང་ཞིག་དཀྱིལ་འཁོར་ཆེན་པོ་འདི་འདྲ་བ་མངོན་དུ་མཐོང་བ་དང་། རྣམ་པར་གྲོལ་བའི་གཟུངས་འཇིག་རྟེན་ལས་འདས་པའི་གསང་སྔགས་ཀྱི་ཚིག་བཟླས་བརྗོད་བྱེད་པ་དང་། ཀློག་པ་དང་། དྲན་པ་དང་། འཆད་པ་དང་། ལན་འགའ་སྨྱུར་བས་མཐོང་བ་དང་། ཐང་ཅིག་དང་། སྐད་ཅིག་དང་། ཡུད་ཙམ་གྱིས་མཐོང་བ་ནི་ང་དང་མཉམ་པ་དང་། མི་མཉམ་པ་ཡིན་ནོ་ཞེས་སྨྲའོ། །བདག་ནི་སེམས་ཅན་དེ་ལ་དེ་བཞིན་གཤེགས་པ་ཡིན་པར་ཡང་འཛིན་ཏེ། འཇིག་རྟེན་དང་འཇིག་རྟེན་ལས་འདས་པ་ཡིན་པས་སྤྱི་བོས་དབང་བསྐུར་བར་བགྱིའོ། །རིག་སྔགས་འཆང་བས་ཟུང་ཤིག་དང་། མཆོག་ཇི་ལྟར་འདོད་པ་དང་། ཇི་ལྟར་ཡིད་ལ་རེ་བ་དང་། བསམ་པ་ཐམས་ཅད་རྗེས་སུ་གཟུང་ཞིང་སྦྱིན་པར་མཛད་དོ། །དེའི་ཚེ་རིག་སྔགས་འཆང་བས་ཡིད་ལ་ཇི་ལྟར་བསམས་པའི་མཆོག་སྨྲས་ན། དེ་ཐམས་ཅད་སྦྱིན་པར་མཛད་ཅིང་དོན་ཡོད་པའི་ཡེ་ཤེས་བཀོད་པ་རྣམ་པར་གྲོལ་བ་དྲི་མ་མེད་པ་ཞེས་བྱ་བའི་ཏིང་ངེ་འཛིན་ཐོབ་པར་འགྱུར་རོ། །གཞན་ཡང་གང་གཱའི་ཀླུང་གི་བྱེ་མ་དང་མཉམ་པ་ཁྲག་ཁྲིག་སྟོང་ཕྲག་བཅུའི་ཏིང་ངེ་འཛིན་ཐོབ་པར་འགྱུར་རོ། །རྫུ་འཕྲུལ་གྱིས་ནམ་མཁའ་ལ་འགྲོ་བར་འགྱུར་རོ། །དཀྱིལ་འཁོར་དེའི་དམ་ཚིག་ཏུ་ཞུགས་པ་ནི་དམ་ཚིག་ཤེས་པའི་རྗེས་སུ་ཞུགས་པ་ཡིན་ཏེ། དེ་དག་ཐམས་ཅད་ས་བཅུ་ལ་རབ་ཏུ་གནས་པ་ཡིན། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་ཕྱིར་མི་ལྡོག་པ་ཐོབ་པར་འགྱུར་བ་ཡིན། ལུང་བསྟན་པ་དང་བྱིན་གྱིས་བརླབས་པར་འགྱུར་བ་ཡིན། དེ་ནི་མངལ་ན་གནས་པར་སྐྱེ་བའི་ཐ་མ་སྟེ། ཕྱིས་མང་ལན་གནས་པའི་དྲི་མས་གོས་པར་མི་འགྱུར་རོ། །ཤི་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །དེ་པདྨོའི་ནང་ནས་རྒྱན་ཐམས་ཅད་ཀྱིས་བརྒྱན་པར་རྫུས་ཏེ་སྐྱེས་པར་འགྱུར་རོ། །ཚེ་རབས་ཀུན་ཏུ་ཚེ་རབས་དྲན་པར་འགྱུར་རོ། །དོན་ཡོད་པའི་རྒྱལ་པོའི་ཕུན་སུམ་

---

^{[མ་དཔེ་གཟིགས་ན་འདིར་གནོན།]}

ཚོགས་པ་ཆོ་ག་ཞིབ་མོའི་རྒྱལ་པོ་རྣམ་པར་གྲོལ་བའི་དཀྱིལ་འཁོར་དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ཆོས་ཀྱི་འཁོར་ལོ་བསྐོར་བ། དམ་ཚིག་ཆེན་པོ་འདི་ཁ་ཏོན་བྱེད་ན་ཕྱོགས་བཅུའི་དེ་བཞིན་གཤེགས་པ་ཐམས་ཅད་སངས་རྒྱས་ཀྱི་ཞིང་ན་བྱང་ཆུབ་ཀྱི་སྙིང་པོ་ལ་བཞུགས་པ་མཐོང་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་ལེགས་སོ་ཞེས་བྱ་བ་ཐོབ་པར་འགྱུར་ཏེ། རིགས་ཀྱི་བུ་སྐྱེ་བ་བླངས་པ་ལེགས་པར་སྐྱེ་བ་ཡིན་པས་ལེགས་སོ་ལེགས་སོ། །ཕྱིར་མི་ལྡོག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གནས་པ་ཡིན་ནོ། །དེ་བཞིན་གཤེགས་པ་དེ་དག་ཐམས་ཅད་དང་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་འོད་ཟེར་འབུམ་ཕྲག་བྱེ་བས་མཛེས་པར་གྱུར་ཅིང་བསོད་ནམས་ཀྱིས་བརྒྱན་པའི་ཕྱག་གསེར་གྱི་མདོག་ཅན་བརྐྱང་ནས་སྤྱི་བོར་ཕྱག་འཇོག་ཅིང་དབུགས་འབྱིན་པར་ཡང་མཛད་དོ། །བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ཆོས་འབེལ་བའི་གཏམ་མངོན་སུམ་དུ་སྒྲོགས་པར་མཛད་དོ། །ཐ་ན་དཀྱིལ་འཁོར་ཆེན་པོ་རོལ་མོའི་སྒྲ་རྔ་བོ་ཆེ་དང་། རྔ་བྲན་དང་། དུང་དང་། རྫ་རྔ་དང་། རོལ་མོའི་སྒྲ་གང་དག་གྲག་པ་ལ་སེམས་ཅན་གང་དག་གིས་སྒྲ་དེ་ཐོས་ནས་རྣ་བའི་བུ་ག་ཙམ་དུ་སོང་བ་དེ་ཐམས་ཅད་ཕྱིར་མི་ལྡོག་པར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གནས་པར་འགྱུར་རོ། །ཐ་ན་བྱོལ་སོང་གི་སྐྱེ་གནས་སུ་གཏོགས་པར་བྱའི་རྣ་བར་སྒྲ་ཐོས་པ་དེ་དག་ཐམས་ཅད་ཀྱང་ཕྱིར་མི་ལྡོག་པར་འགྱུར་རོ། །དེ་ལྟར་ན་རྣམ་པར་འཕྲུལ་པའི་ཆོ་འཕྲུལ་ཆེན་པོ་དང་ལྡན་པ་རྣམ་པར་ཐར་བའི་དཀྱིལ་འཁོར་གྱི་ཆོ་ག་མཐུ་ཆེན་པོ་རྣམ་པར་འཕྲུལ་པ་ཡིན་ནོ། །རིགས་ཀྱི་བུ་པོའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། སེམས་ཅན་གཞན་གང་ཡང་རུང་བ་དགེ་སྦྱོང་ངམ། བྲམ་ཟེའམ། རྒྱལ་རིགས་སམ། རྗེའུའི་རིགས་སམ། དམངས་རིགས་སམ། འགའ་ཞིག་གིས་རྣམ་པར་གྲོལ་བའི་དཀྱིལ་འཁོར་གྱི་ཆོ་ག་འདི་འཁོར་མང་པོའི་ནང་དུ་ཀློག་པ་དང་

---

^{[མ་དཔེ་གཟིགས་ན་འདིར་གནོན།]}

སེམས་ཅན་གང་གིས་སྒྲ་དེ་ཐོས་ནས་སྒྲ་དབྱངས་དེ་དང་མིང་ཐོས་པ་རྣ་བའི་བུ་གར་སོང་བར་གྱུར་པ་དེ་དག་ཐམས་ཅད་སྒྲིབ་པ་དང་། སྡིག་པ་མི་ཟད་པ་ལས་བྲལ་བར་འགྱུར་རོ། །སྔོན་གྱི་སྒྲིབ་པ་དང་། སྡིག་པ་ལས་རྣམ་པར་གྲོལ་བར་འགྱུར་རོ། །ཕྱིར་མི་ལྡོག་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྲས་སུ་རིག་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་གི་སྲས་ཀྱི་ཐུ་བོ་ཡིན་ནོ། །རྟག་པར་འཕགས་པ་སྤྱན་རས་གཟིགས་ཀྱི་དབང་ཕྱུག་གྲོགས་མཛད་ཅིང་རྗེས་སུ་འབྲང་བར་འགྱུར་རོ། །རྟག་ཏུ་དབུགས་འབྱིན་པ་མཛད་པར་འགྱུར་རོ། །མཐར་བྱང་ཆུབ་ཀྱི་སྙིང་པོ་ལ་གནས་ཀྱི་བར་དུ་རྟག་ཏུ་རྗེས་སུ་སྲུང་བར་མཛད་དོ། །སེམས་ཅན་གང་ཞིག་དཀྱིལ་འཁོར་དེའི་ས་ཕྱོགས་སུ་སོང་སྟེ། ས་གཞི་སྣང་བ་ཙམ་མཐོང་བ་དེ་དག་ཐམས་ཅད་ཀྱང་ཕྱིར་མི་ལྡོག་པར་འགྱུར་རོ། །ཉོན་མོངས་པ་ཐམས་ཅད་བསྲེགས་ཤིང་སྒྲིབ་པ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །དེའི་ས་རྡུལ་རླུང་གིས་བདས་ཏེ་ལུས་ལ་ཕོག་པ་གང་ཡིན་པ་དེ་དང་། ཐ་ན་སེམས་ཅན་ངན་པ་ཡང་རུང་སྟེ། དེ་དག་ཐམས་ཅད་ཕྱིར་མི་ལྡོག་པར་འགྱུར་བའི་གནས་ལ་རབ་ཏུ་གནས་པར་འགྱུར་རོ། །སྡིག་པ་ཐམས་ཅད་ལས་ཡོངས་སུ་གྲོལ་བ་དང་། འཕགས་པ་སྤྱན་རས་གཟིགས་དབང་ཕྱུག་རྟག་ཏུ་མཐོང་བ་དང་ལྡན་པར་འགྱུར་རོ། །དེ་བཞིན་གཤེགས་པ་ཐམས་ཅད་དགོངས་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་ཀྱིས་དབུགས་ཕྱུང་བར་འགྱུར་རོ། །ལྷ་ཐམས་ཅད་ཀྱིས་བསྲུང་བར་འགྱུར་རོ། །བསོད་ནམས་ཀྱི་ཕུང་པོ་ཆེན་པོ་ཡོངས་སུ་གཟུང་བར་འགྱུར་རོ། །དགེ་བའི་རྩ་བ་ཆེན་པོ་དང་ལྡན་པར་འགྱུར་རོ། །དེ་ལྟར་ན་སྒྲ་ཐོས་པ་ཙམ་དང་། མིང་འཛིན་པ་ཙམ་གྱིས་འབྲས་བུ་ཆེན་པོ་ཐོབ་པར་འགྱུར་རོ། །དེ་ནས་རྣམ་པར་གྲོལ་བའི་དཀྱིལ་འཁོར་གྱི་སྦྱིན་སྲེག་གི་ཆོ་ག་བཤད་པར་བྱ་སྟེ། སྡིག་པ་དང་། སྒྲིབ་པ་ཐམས་ཅད་སྲེག་ཅིང་སྡུག་བསྔལ་དྲག་པོ་ལས་རྣམ་པར་གྲོལ་བར་འགྱུར་བ་དང་། ཉོན་མོངས་པ་དྲག་པོའི་རྒྱ་མཚོ་དང་། འཁོར་བ་ལས་སྒྲོལ་བ་འགྲུབ་པ་ཕྱིར་མི་ལྡོག་པའི་གནས་བླ་ན་

---

^{[མ་དཔེ་གཟིགས་ན་འདིར་གནོན།]}

མེད་པར་དབུགས་འབྱིན་པར་མཛད་པ། སངས་རྒྱས་ཐམས་ཅད་དང་བྱང་ཆུབ་སེམས་དཔའ་རྣམས་ཀྱི་འཇིག་རྟེན་ལས་འདས་པའི་ལམ་བླ་ན་མེད་པ་ཡང་དག་པར་རྫོགས་པའི་ལམ་སྟོན་པ། སངས་རྒྱས་དང་། བྱང་ཆུབ་སེམས་དཔའ་སྟོན་པ། ལྷའི་སྟེགས་སྦྱིན་སྲེག་བྱས་པ་ཙམ་གྱི་མོད་ལ་ཐེ་ཚོམ་མེད་པར་མེ་ལྷ་དང་། དབང་པོ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། དབང་ཕྱུག་དང་།གཤིན་རྗེ་དང་། ཆུ་ལྷ་དང་། ལུས་ངན་པོ་དང་། གཞོན་ནུ་རྣམས་སྦྱིན་སྲེག་བྱས་པ་འདི་ཙམ་གྱི་མོད་ལ་ཐམས་ཅད་འོང་བར་འགྱུར་རོ། །ཐེ་ཚོམ་མེད་པར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། སྲིན་པོ་དང་། ཤ་ཟ་དང་། གྲུལ་བུམ་ཐམས་ཅད་འོང་བར་འགྱུར་ཞིང་། དེའི་མོད་ལ་རིག་སྔགས་འཆང་བའི་རྐང་པ་གཉིས་ལ་རྟག་ཏུ་འདུད་པར་བྱེད་དོ། །དེ་བཞིན་དུ་ཉིན་མཚན་དུ་ཀུན་ཏུ་སྲུང་བར་འགྱུར་རོ། །རྒྱལ་པོ་ཆེན་པོ་བཞི་དང་། ཕྱག་ན་རྡོ་རྗེ་བདག་ཉིད་ཆེན་པོ་དང་། གནོད་སྦྱིན་གྱི་དབང་པོ་ཆེན་པོ་བཅུ་ཡང་ཕྱོགས་བཅུར་སྲུང་བར་བྱེད་དེ། མི་སྲུན་པ་མ་རུངས་པ་སེལ་ཅིང་དམྱལ་བ་དང་། འཇིགས་པ་མི་བཟད་པ་དང་། དུག་དྲག་པོ་དང་། སེམས་ཅན་མ་རུངས་པ་རྣམས་སེལ་བར་བྱེད་དོ། །དེ་མ་ཐག་ཏུ་བསོད་ནམས་ཆེན་པོའི་ལྷུན་པོ་དང་། བསོད་ནམས་ཆེན་པོའི་ཕུང་པོ་བླ་ན་མེད་པ་སྐྱེ་བར་འགྱུར་རོ། །ཙནྡན་སྲང་ཉི་ཤུ་དང་། ཨ་ག་རུ་སྲང་ལྔ་དང་། དུ་རུ་སྐ་སྲང་བདུན་དང་། ག་བུར་དང་། གླ་རྩི་སྲང་གཅིག་གི་བཞི་ཆ་རེ་རེ་དང་། གུར་གུམ་སྲང་གཅིག་དང་། ལྕེ་བོག་ཀུན་དུ་ར་སྲང་ལྔ་དང་། གུ་གུལ་སྲང་བདུན་དང་འདི་རྣམས་གཅིག་ཏུ་བསྲེས་ཏེ། ཕྱེ་མར་བྱས་ལ་ཁར་དཀར་པོ་དང་། སྦྲང་རྩིས་རིལ་བུ་ཞོ་རེའི་ཚད་ཙམ་དུ་བྱས་པ་སྟོང་རྩ་བརྒྱད་དང་། ཡུངས་ཀར་དང་། འབྲས་ཡོས་བསྲེས་ཏེ། རིལ་བུ་དང་བསྲེས་ནས་མར་གྱི་ནང་དུ་སྨྱུགས་ཏེ་སྦྱིན་སྲེག་བྱའོ། །ཤིང་སྲུར་བྷི་དང་། ཤིང་ཨརྐ་དང་། ཤིང་ཤ་མྱའི་ཡམ་སྲེག་ཤིང་གི་མེ་སྦར་ཏེ་སྦྱིན་སྲེག་གི་ཆོ་ག་བྱའོ། །གང་དང་གང་གི་ཚེ་སྟོང་རྩ་

---

^{[མ་དཔེ་གཟིགས་ན་འདིར་གནོན།]}

བརྒྱད་སྦྱིན་སྲེག་བྱས་ན་དེ་དང་དེའི་ཚེ་སྡིག་པ་དང་། སྒྲིབ་པ་དྲག་པོ་ཐམས་ཅད་སྲེག་པར་འགྱུར་རོ། །དེ་དང་དེའི་ཚེ་དེ་ནད་ཐམས་ཅད་ལས་ཡོངས་སུ་གྲོལ་བར་འགྱུར་རོ། །དེ་དང་དེའི་ཚེ་གཅོད་ཐམས་ཅད་ལས་ཡོངས་སུ་གྲོལ་བར་འགྱུར་རོ། །དེ་དང་དེའི་ཚེ་འཛམ་བུའི་གླིང་གི་སེམས་ཅན་བུད་མེད་དང་། སྐྱེས་པ་དང་།ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་ལ་སོགས་པ་ཐམས་ཅད་ཀྱི་སྡིག་པ་དང་། སྒྲིབ་པ་ཐམས་ཅད་བྱང་བར་འགྱུར་རོ། །སྡིག་པ་ཐམས་ཅད་དང་། བྱུར་ཐམས་ཅད་དང་། གནོད་པ་ཐམས་ཅད་དང་། འཁྲུག་པ་ཐམས་ཅད་དང་། འཐབ་པ་དང་། རྩོད་པ་དང་། གཡུལ་འགྱེད་པ་དང་། ཤགས་འགྱེད་པ་ཐམས་ཅད་དང་། རང་གི་འཁོར་དང་། གཞན་གྱི་འཁོར་གྱི་འཇིགས་པ་ཐམས་ཅད་དང་། ཕྱིར་རྒོལ་བའི་དགྲས་འཇིགས་པ་ཐམས་ཅད་དང་། སེམས་ཅན་མ་རུངས་པ་ཐམས་ཅད་དང་། རྐུན་པོ་དང་། ཟོལ་བ་དང་། མི་རྒོད་པ་དང་། གཅན་གཟན་གཏུམ་པོའི་འཇིགས་པ་ཐམས་ཅད་རབ་ཏུ་ཞི་བར་འགྱུར་རོ། །སེམས་ཅན་དེ་དག་ཐམས་ཅད་འཇིགས་པ་མེད་པར་འགྱུར་རོ། །བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་གང་དག་གིས་དེའི་དྲི་ཚོར་བ་དེ་དག་ཐམས་ཅད་ཀྱང་ཕྱིར་མི་ལྡོག་པར་འགྱུར་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གནས་པར་འགྱུར་རོ། །ཚེ་བརྗེས་ནས་ཐམས་ཅད་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་བར་འགྱུར་ཞིང་། པདྨོའི་ནང་ནས་རྫུས་ཏེ་སྐྱེ་བར་འགྱུར་རོ། །བྱོལ་སོང་གི་སྐྱེ་གནས་སུ་གཏོགས་པ་རྐང་གཉིས་པ་དང་། རྐང་བཞི་པ་རྣམས་ཀྱིས་དེའི་དྲི་ཚོར་བ་ཙམ་གྱིས་ཐམས་ཅད་ངེས་པར་ཕྱིར་མི་ལྡོག་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་སངས་རྒྱས་ཉིད་ལས་ཕྱིར་མི་ལྡོག་པར་འགྱུར་ཞིང་མངོན་པར་རྫོགས་པར་འཚང་རྒྱའོ། །རིག་སྔགས་འཆང་བ་དེ་ཇི་ལྟ་ཇི་ལྟར་སྦྱིན་སྲེག་བྱེད་པ་དེ་ལྟ་དེ་ལྟར་ངེའི་ལུས་དྲི་མ་མེད་ཅིང་ཡོངས་སུ་དག་པར་འགྱུར་རོ། །སྟོང་རྩ་

---

^{[མ་དཔེ་གཟིགས་ན་འདིར་གནོན།]}

བརྒྱད་ཚང་ན་རིག་སྔགས་འཆང་བའི་ལུས་འབར་བར་འགྱུར་རོ། །ཕྱོགས་བཅུའི་སངས་རྒྱས་མང་པོའི་སྐུ་མཐོང་བར་འགྱུར་རོ། །དེ་བཞིན་གཤེགས་པའི་སྐུ་དེ་དག་གིས་རིག་སྔགས་འཆང་བ་ལ་ལེགས་སོ་ཞེས་བྱ་བའི་སྒྲ་འབྱིན་ཏེ། རིག་སྔགས་འཆང་བ་ལེགས་སོ་ལེགས་སོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་མཆོག །རྣམ་པར་གྲོལ་བའི་དཀྱིལ་འཁོར་འཇིག་རྟེན་ལས་འདས་པའི་སྦྱིན་སྲེག་གི་ཆོ་ག་ཡིན་ནོ། །འདི་ནི་བདུད་ཐམས་ཅད་རབ་ཏུ་འཇོམས་པའི་སྦྱིན་སྲེག་ཆེན་པོའི་ཆོ་ག་ཡིན་ནོ། །འདི་ནི་གནོད་སྦྱིན་དང་། སྲིན་པོ་དང་། འབྱུང་པོ་དང་། བརྗེད་བྱེད་དང་། བགེགས་དང་། ལོག་འདྲེན་ཚར་གཅོད་པའི་སྦྱིན་སྲེག་ཆེན་པོའི་ཆོ་ག་ཡིན་ནོ། །འདི་ནི་བྱང་ཆུབ་ཀྱི་སྙིང་པོར་སོང་སྟེ། ཆོས་ཀྱི་འཁོར་ལོ་བསྐོར་བའི་སྦྱིན་སྲེག་ཆེན་པོའི་ཆོ་ག་ཡིན་ནོ། །འདི་ནི་བྱང་ཆུབ་ཀྱི་ལམ་བླ་ན་མེད་པ་ཡིན་ནོ། །དེ་ནས་དེ་བཞིན་གཤེགས་པའི་སྐུ་དེ་དག་ཐམས་ཅད་ཀྱིས་ཕྱག་གཡས་པ་གསེར་གྱི་ཁ་དོག་ལྟ་བུ་བརྐྱང་སྟེ། རིག་སྔགས་འཆང་བའི་མགོའི་སྤྱི་བོ་ལ་ཕྱག་འཇོག་པར་མཛད་དོ། །འཕགས་པ་སྤྱན་རས་གཟིགས་དབང་ཕྱུག་གི་རང་གི་ངོ་བོ་ཉིད་ཀྱི་རྒྱན་ཐམས་ཅད་ཀྱིས་བརྒྱན་པ། དོན་ཡོད་པའི་ཞགས་པ་དང་། ཚངས་པའི་ཆ་བྱད་འཆང་བ། དབུ་ལྕང་ལོ་ཅོད་པན་གྱིས་བརྒྱན་པ། པདྨ་དང་། མདུང་རྩེ་གསུམ་པ་དང་། ཞགས་པ་ཐོགས་པ། རིག་སྔགས་འཆང་བའི་མདུན་ན་བཞུགས་ཏེ་བཀའ་སྩོལ་པ། རིག་སྔགས་འཆང་བ་ཁྱོད་ཀྱིས་དོན་ཡོད་པའི་ཞགས་པའི་སྙིང་པོ་རྣམ་པར་གྲོལ་བའི་དཀྱིལ་འཁོར་འཇིག་རྟེན་ལས་འདས་པའི་སྦྱིན་སྲེག་གི་ཆོ་ག་ཆེན་པོ་གྲུབ་པ་ལེགས་སོ་ལེགས་སོ། །ཟུང་ཤིག་དང་། མཆོག་ཇི་ལྟ་བ་དང་། ཇི་ལྟར་འདོད་པ་དེ་ཐམས་ཅད་སྦྱིན་ནོ། །དེ་ནས་རིག་སྔགས་འཆང་བས་ཇི་ལྟར་འདོད་པའི་མཆོག་སྨྲས་ན་དེ་ཐམས་ཅད་ཐོབ་པར་འགྱུར་རོ། །འཕགས་པ་སྤྱན་རས་གཟིགས་ཀྱི་དབང་ཕྱུག་གིས་ཕྱག་བརྐྱང་སྟེ། རིག་སྔགས་འཆང་བའི་མགོའི་སྤྱི་བོ་ལ་ཕྱག་བཞག་པ་དང་། ཕྱག་བཞག་མ་ཐག་ཏུ་རིག་སྔགས་འཆང་ནམ་མཁའ་ལ་འགྲོ་བར་འགྱུར་རོ། །

---

^{[མ་དཔེ་གཟིགས་ན་འདིར་གནོན།]}

ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་འགྲོ་བར་འགྱུར་རོ། །དེ་བཞིན་གཤེགས་པ་ཐམས་ཅད་མངོན་སུམ་དུ་མཐོང་བ་ཐོབ་པར་འགྱུར་རོ། །ཕྱིར་མི་ལྡོག་པ་དང་། ཕྱིར་མི་ལྡོག་པའི་གནས་ཐོབ་པར་འགྱུར་རོ། །སངས་རྒྱས་ཐམས་ཅད་ཀྱི་ཞིང་དུ་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་ཐོབ་པར་འགྱུར་རོ། །སངས་རྒྱས་ཐམས་ཅད་ཀྱི་ཞིང་ལ་བསྙེན་བཀུར་བྱས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་བར་འགྱུར་རོ། །དེ་བཞིན་གཤེགས་པ་འོད་དཔག་མེད་བྱང་ཆུབ་སེམས་དཔའི་འཁོར་དང་བཅས་པ་ཆོས་འཆད་པ། བྱང་ཆུབ་ཀྱི་སྙིང་པོ་ལ་ཐུག་གི་བར་དུ་མངོན་སུམ་དུ་ཐོབ་པར་འགྱུར་རོ། །དེ་ནས་ཧོ་མ་ཁུང་བཤད་པར་བྱ་སྟེ། འཇིག་རྟེན་ལས་འདས་པའི་སྦྱིན་སྲེག་གི་གནས་བླ་ན་མེད་པའི་པདྨ་ཁ་བྱེ་བ་འདྲ་བར་བྱས་པ། ཟླུམ་པོ་ཁྲུ་གསུམ་པ་ས་དང་བའི་ལྕི་བ་བསྲེས་པ་དང་ལྡན་པར་བྱས་ཏེ། པདྨའི་སྙིང་པོ་ལ་ཧོ་མ་ཁུང་ཟ་བས་སུ་བརྐོ་བ་དང་། ཐབ་ཀ་ཀུན་ཏུ་ཁྲུ་གང་བ་བརྐོ་བར་བྱའོ། །ནང་དུ་པདྨ་བཅུ་དྲུག་པ་འབུར་དུ་བྱས་པ་བཞག་ལ། ཚོན་སྣ་ཚོགས་ཀྱིས་པདྨ་དེ་བརྒྱན་པར་བྱའོ། །པདྨའི་ཕྱི་འཁོར་དུ་དཀྱིལ་འཁོར་གྲུ་བཞིར་བྱས་ལ་དྲི་སྣ་ཚོགས་ཀྱིས་གཏོར་བ་དང་བརྒྱན་པར་བྱའོ། །དཀྱིལ་འཁོར་ཀུན་ཏུ་བུམ་པ་གང་བ་བཞི་དང་། དངུལ་གྱི་སྣོད་གང་བ་བཞི་དང་། མཆོད་ཡོན་གྱི་ཆུས་བཀང་པ་གསེར་གྱི་སྣོད་བཞི་དང་། རོ་སྣ་ཚོགས་ཀྱི་གཏོར་མ་གཞག་པ་ནི་གཏོར་མ་དཀར་གསུམ་རྣམ་པ་སྣ་ཚོགས་དང་འབྲས་བུ་རྣམ་པ་སྣ་ཚོགས་གཞག་པ་དང་། དྲི་དང་མེ་ཏོག་སྣ་ཚོགས་ཀྱིས་གཏོར་ཏེ། ཕྲེང་བ་རྣམ་པ་སྣ་ཚོགས་དཔྱངས་ལ། དཀྱིལ་འཁོར་ཀུན་དུ་ཚོན་སྣ་ལྔའི་བ་དན་གྱིས་མདའ་ལ་བརྒྱན་ཏེ་གཟུགས་པ་དང་། སྒོ་བཞི་ཆ་དབྱེ་བ་དང་། བུམ་པ་གཞག་པ་ནི་ལེགས་པར་བརྒྱན་ཅིང་དྲི་ཆུས་ཡོངས་སུ་བཀང་བར་བྱའོ། །སྒོ་བཞིར་ཆོས་སྨྲ་བ་ཤིན་ཏུ་བརྒྱན་པའི་སྟན་ལ་འདུག་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་པར་བྱའོ། །གྲྭ་བཞིར་ཆོ་ག་སྨྲ་བ་ཆོས་ཀྱི་སྟན་ལེགས་པར་བརྒྱན་པ་ལ་འདུག་ནས་དོན་ཡོད་པའི་ཞགས་པའི་མདོ་སྡེ་བཀླག་པར་བྱའོ། །གསེར་གྱི་མེ་ཏོག་དང་། དངུལ་གྱི་མེ་ཏོག་དང་། ཟངས་ཀྱི་

---

^{[མ་དཔེ་གཟིགས་ན་འདིར་གནོན།]}

མེ་ཏོག་དང་། རིན་པོ་ཆེ་སྣ་བདུན་གྱིས་མཆོད་པར་བྱའོ། །དེ་ནས་རིག་སྔགས་འཆང་བས་ཁྲུས་བྱས་གོས་གཙང་མ་བགོས་དྲི་ཞིམ་པོས་བགོས་ཏེ། གཙང་མར་བྱས་པ་ལ་རིལ་བུ་ལ་དོན་ཡོད་པའི་ཞགས་པའི་སྙིང་པོ་བརྒྱ་རྩ་བརྒྱད་བཟླས་བརྗོད་བྱའོ། །ཁྲོ་བོའི་རྒྱལ་པོ་བརྒྱ་རྩ་བརྒྱད་ཀྱིས་དབང་བསྐུར་རོ། །དོན་ཡོད་པ་རྣམ་པར་ལྟ་བའི་སྙིང་པོ་བརྒྱ་རྩ་བརྒྱད་བཟླས་བརྗོད་བྱའོ། །དེ་ནས་དོན་ཡོད་པ་རྣམ་པར་ལྟ་བའི་འབར་བ་རྣམ་པར་གྲོལ་བའི་དཀྱིལ་འཁོར་གྱི་ཞགས་པའི་སྙིང་པོས་སྟོང་རྩ་བརྒྱད་སྦྱིན་སྲེག་བྱ་བ་ནི་མི་སྨྲ་བར་བྱམས་པའི་སེམས་དང་། སྙིང་ཐག་པ་ནས་བརྩེ་བ་དང་། སྙིང་རྗེ་བར་བྱ་བ་ནི་ལས་བླ་ན་མེད་པ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །འདི་ལྟ་སྟེ། ཨོཾ་པདྨ་པཱ་ཎི། ཙ་ར་ཙ་ར་པདྨ་བྷུ་ཛེ། ཛྭ་ལ་ཛྭ་ལ་ཧཱུ་ཏཱ་ཤ་ནེ། བྷུ་རུ་བྷུ་རུ། བི་མོ་ཀྵ་བྷུ་ཛེ། ད་ཧ་ད་ཧ། སརྦ་མ་ལཱ་ན། ཨ་མོ་གྷ་པཱ་ནི་བ་ར་དེ། ཧཱུཾ་ཧཱུཾ་ནིར་ད་ཧ། པཱ་པཾ། ཤ་མ་ཤ་ནི། ལོ་ཀོཏྟཱ་ར་ཎི། ས་མནྟ་རཥྨི་བ་ར་དེ། རུ་ཏུ་རུ་ཏུ། པྲ་བ་རེ། ཨ་མོ་གྷ་སིད་དྷི། ཨོཾ་བྷུརྦྷུ་པ། ན་མོ་སྟུ་ཏེ་སྭཱ་ཧཱ། དེ་ནི་རྣམ་པར་གྲོལ་བའི་དཀྱིལ་འཁོར་འབར་བ་ཞགས་པ་ཆེན་པོའི་སྙིང་པོ་དང་། གཟུངས་ཀྱི་སྦྱིན་སྲེག་གི་ཆོ་ག་འཇིག་རྟེན་ལས་འདས་པ་བླ་ན་མེད་པ་ཡིན་ནོ། །དེ་ནས་རིག་སྔགས་འཆང་བས་ཐལ་བ་དེས་རྨད་དུ་བྱུང་བ་ཆེན་པོའི་བྱ་བ་ཐམས་ཅད་བྱའོ། །ཐལ་བ་དེས་གང་གི་ལུས་ལ་བྱུགས་པ་དེ་ནི་སྒྲིབ་པ་དང་སྡིག་པ་ཐམས་ཅད་ལས་གྲོལ་བར་འགྱུར་རོ། །དཔྲལ་བར་ཐིག་ལེ་བྱས་ན་དེ་མ་ཐག་ཏུ་ཞག་བཞི་པའི་རིམས་ལས་ཐར་བར་འགྱུར་རོ། །ཞག་གཉིས་པ་དང་། ཞག་གསུམ་པ་དང་། མཚན་མོ་པ་དང་། ཉིན་པར་པ་དང་། ནམ་ཕྱེད་པ་དང་། ཉིན་ཕྱེད་པ་དང་། ལོ་གཅིག་པ་དང་། ཟླ་བ་གཅིག་པ་དང་། ཞག་བདུན་པ་དང་། རྟག་པའི་རིམས་ལན་འགའ་ཡང་གནས་ཤིང་ཕྱིར་འོང་བར་མི་འགྱུར་རོ། །དཔག་ཚད་བརྒྱ་འདས་ཏེ་འབྲོས་པར་འགྱུར་རོ། །མཚོག་མར་ཐིག་ལེ་བྱས་ན་གདོན་སྟོང་ཕྲག་བརྒྱད་ཅུ་རྩ་བཞི་ལས་ཐར་

---

^{[མ་དཔེ་གཟིགས་ན་འདིར་གནོན།]}

བར་འགྱུར་རོ། །ཐམས་ཅད་ཀྱང་ཕྱོགས་བཅུར་དཔག་ཚད་སྟོང་དུ་འབྲོས་པར་འགྱུར་རོ། །ཐལ་བའི་རྡུལ་བྱ་རོག་གི་མཆུ་ལ་གོས་པ་ཕྱོགས་ཀྱི་གནས་གང་དུ་ལྷུང་བ་དེར་གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། ཡི་དགས་དང་། གྲུལ་བུམ་དང་། བརྗེད་བྱེད་དང་། བགེགས་དང་། ལོག་འདྲེན་ཕྱིར་གནས་པར་མི་འགྱུར་རོ། །ཐམས་ཅད་འབྲོས་སོ། །ཕྱོགས་ཀྱི་གནས་དེར་ལྷུང་ན་སླར་འོང་བར་མི་འགྱུར་རོ། །སྙིང་གར་ཐིག་ལེ་བྱས་ན་ནད་ཐམས་ཅད་ལས་ཐར་བར་འགྱུར་རོ། །ལྟེ་བའི་གནས་སུ་ཐིག་ལེ་བྱས་ན་ལྟོ་བའི་ནང་གི་ནད་ཐམས་ཅད་མོད་ལ་སོས་པར་འགྱུར་རོ། །གདུག་པས་ཟིན་པ་ལ་བསྐུས་ན་དུག་མེད་པར་འགྱུར་རོ། །དུག་གིས་མྱོས་པ་ལ་བྱིན་ན་དུག་མེད་པར་འགྱུར་རོ། །ཐལ་བས་ཁྲུས་བྱས་ན་བྱད་དང་། གཡེངས་བྱེད་དང་། སྔགས་དང་། དུག་ཐམས་ཅད་རྣམ་པར་ཞིག་པར་འགྱུར་རོ། །ཤ་བཀྲ་དང་། མཛེ་དང་། འབྲས་དང་། ཤུ་ཕྲན་མཆེད་པ་དང་། འབྲུམ་བུ་དང་། ལྷོག་པ་དང་། མེ་དབལ་དང་། འབྲུམ་ཕྲན་རྣམས་བྱུང་ན་ཆུ་དྲོན་པོ་དང་སྦྱར་ཏེ་བསྐུས་ལ་མར་ལ་ལན་བདུན་བཟླས་བརྗོད་བྱས་པས་བསྐུས་ན་མོད་ལ་ནད་ཐམས་ཅད་ལས་ཡོངས་སུ་ཐར་བར་འགྱུར་རོ། །སྤྲིན་ལོགས་སུ་གཏོར་ན་སད་དང་། སེར་བ་ཐམས་ཅད་མི་འབབ་བོ། །རླུང་ལྡང་བའི་ལོགས་སུ་གཏོར་ན་རླུང་བསྡམས་པར་འགྱུར་རོ། །ཕྱོགས་བཞིར་གཏོར་ན་མཚམས་ཆེན་པོ་བཅད་པར་འགྱུར་རོ། །ཡུལ་འཁོར་ཀུན་ཏུ་གཏོར་ན་མེ་ཏོག་དང་། འབྲས་བུ་དང་། ལོ་ཏོག་དང་། མེ་ཏོག་གི་ལྗོན་ཤིང་དང་། ཤིང་གི་ཡ་ལ་ག་དང་། ལྡུམ་ར་དང་། ཀུན་དཀར་ར་བ་དང་། རི་དང་། རྩྭ་དང་། ཤིང་གེལ་པ་དང་། སྨན་དང་། ནགས་ཚལ ཐམས་ཅད་ལེགས་པར་བསྲུངས་བར་འགྱུར་རོ། །ཡུལ་འཁོར་ལ་དཔག་ཚད་བརྒྱ་ཚུན་ཅད་ཀུན་ཏུ་མཚམས་ཆེན་པོ་གཅད་པ་བྱས་པར་འགྱུར་རོ། །གྲོང་ཁྱེར་གྱི་སྒོ་བཞིར་གཏོར་ན་དེར་འཇུག་པ་དང་། ཕྱིར་འབྱུང་བའི་སེམས་ཅན་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། བྱོལ་

---

^{[མ་དཔེ་གཟིགས་ན་འདིར་གནོན།]}

སོང་གི་སྐྱེ་གནས་སུ་གཏོགས་པ་རྐང་གཉིས་པ་དང་། རྐང་བཞི་པ་དང་། རི་དགས་དང་། བྱ་དེ་དག་ཐམས་ཅད་སྒྲིབ་པ་དང་། སྡིག་པ་དང་བྲལ་བར་འགྱུར་རོ། །དགོངས་པ་ཙམ་གྱིས་ནད་དང་སྡུག་བསྔལ་ཐམས་ཅད་ལས་གྲོལ་བར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །ཚེ་ཡོངས་སུ་བརྗེས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་ཞིང་། སངས་རྒྱས་ཉིད་དུ་གནས་ཀྱི་བར་དུ་ཕྱིར་མི་ལྡོག་པར་འགྱུར་བའི་གནས་ཐོབ་པར་འགྱུར་རོ། །དུར་ཁྲོད་དམ། ར་བསྲེགས་པའི་སྟེང་དུ་ཐལ་བས་གཏོར་ན། དམྱལ་བར་སྐྱེས་པའི་སེམས་ཅན་དེ་དག་ཐམས་ཅད་མོད་ལ་དམྱལ་བ་ནས་ཐར་ཏེ། མངོན་པར་དགའ་བའམ། བདེ་བ་ཅན་དུ་སྐྱེ་བར་འགྱུར་རོ། །གྲོང་ཁྱེར་རམ། གཙུག་ལག་ཁང་ངམ། ལྷའི་གནས་སམ། གྲོང་ངམ། ཁྱིམ་མམ། དགོན་པའི་གནས་སམ། ཡུལ་འཁོར་ཀུན་ཏུ་གཏོར་ན་མཚམས་ཆེན་པོ་བཅད་ཅིང་ཞི་བ་ཆེན་པོར་འགྱུར་རོ། །རྒྱལ་པོའི་ཕོ་བྲང་གི་སྒོར་གཏོར་ན་རྒྱལ་པོ་དང་བཙུན་མོའི་འཁོར་དགྲ་ཐམས་ཅད་ལས་ལེགས་པར་བསྲུངས་པར་འགྱུར་རོ། །སྐྱེ་བོ་མང་པོའི་ནང་དུ་གཏོར་ན་སྐྱེ་བོ་མང་པོ་དེ་དག་ཐམས་ཅད་སྒྲིབ་པ་དང་། སྡིག་པ་ཐམས་ཅད་དང་བྲལ་བར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །གཞན་ཡང་བྱེ་བ་སྟོང་ཕྲག་བརྒྱ་བྱེད་པས་རང་འདོད་པ་ལ་རང་གི་བློས་ཐམས་ཅད་དུ་སྦྱར་བར་བྱའོ། །དེ་ནས་རྣམ་པར་གྲོལ་བའི་དཀྱིལ་འཁོར་དོན་ཡོད་པའི་ཞགས་པའི་སྙིང་པོ་འཇིག་རྟེན་ལས་འདས་པའི་སྐུ་གཟུགས་རས་ལ་བྲི་བ་བཤད་པར་བྱའོ། །དར་རམ་རས་གཙང་མ་ལེགས་པར་བཏགས་པ་ཚད་ཁྲུ་དོའམ། ཁྲུ་གསུམ་མམ། ཁྲུ་བཞི་པ་དེའི་དབུས་སུ་དོན་ཡོད་པའི་ཞགས་པ། འཇིག་རྟེན་དབང་ཕྱུག །ཚངས་པའི་ཆ་བྱད་འཆང་བ། དབུ་ལྕང་ལོ་ཅོད་པན་གྱིས་བརྒྱན་པ། ཅོད་པན་རྒྱལ་བ་འོད་དཔག་མེད་དང་གཡས་སུ་ཟླ་བ་ཚེས་པ་ཅན་གྱིས་བརྒྱན་པ། ཕྱག་བཞི་པ། རྒྱན་ཐམས་ཅད་ཀྱིས་བརྒྱན་པ། སྐྱིལ་མོ་ཀྲུང་བཅས་ཏེ་བཞུགས་པ་བྲི་བ་ནི་རི་བོ་པོ་ཊ་ལ་ལྕུག་མ་མེ་ཏོག་ཅན་སྣ་ཚོགས་ཀྱིས་གང་བ། རིན་པོ་ཆེ་སྣ་ཚོགས་ཀྱི་ལྕུག་མས་གང་བ་བྱའོ། །དེའི་

---

^{[མ་དཔེ་གཟིགས་ན་འདིར་གནོན།]}

སྟེང་དུ་རྒྱན་ཐམས་ཅད་ཀྱིས་བརྒྱན་པ། སེང་གེའི་ཁྲི་བྱའོ། །སེང་གེའི་ཁྲིའི་སྟེང་དུ་པདྨའི་གདན་བྱའོ། །དེའི་སྟེང་དུ་འཕགས་པ་སྤྱན་རས་གཟིགས་དབང་ཕྱུག་བཞུགས་པར་བྱ་སྟེ། པདྨ་དང་། མདུང་རྩེ་གསུམ་པ་དང་། ཞགས་པ་ཐོགས་ཤིང་གཟུགས་དེ་ཕྱག་དབུགས་འབྱིན་པ་བྱའོ། །དབུའི་གོང་མན་ཚད་གཞལ་མེད་ཁང་ཆེན་པོ་ལྷ་རྫས་རིན་པོ་ཆེ་སྣ་ཚོགས་ཀྱིས་སྤྲས་པ། དབུས་སུ་མཐོ་བ་དང་བཅས་པ་བྱའོ། །དབུས་མཐོ་བའི་སྟེང་དུ་དེ་བཞིན་གཤེགས་པ་བདུན་ཚད་དང་མཐུན་པར་པདྨའི་གདན་ལ་བཞུགས་ཤིང་རྒྱན་ཐམས་ཅད་ཀྱིས་བརྒྱན་པའོ། །དེ་བཞིན་གཤེགས་པ་དེའི་གོང་གི་དབུས་སུ་དེ་བཞིན་གཤེགས་པ་རྣམ་པར་སྣང་མཛད་དང་། འོད་དཔག་མེད་དང་། སྤྱན་རས་གཟིགས་དབང་ཕྱུག་འོད་དང་། དེ་བཞིན་གཤེགས་པ་གསུམ་རྒྱན་ཐམས་ཅད་ཀྱིས་བརྒྱན་པ། སྐྱིལ་མོ་ཀྲུང་བཅས་ཏེ་གཞལ་མེད་ཁང་གི་ནང་ན་བཞུགས་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་གི་འོད་འདོམ་གང་ལ་འཁོར་བར་དེ་བཞིན་གཤེགས་པ་སུམ་ཅུ་རྩ་གཉིས་ཀྱིས་བརྒྱན་པར་བྱ། དེ་བཞིན་གཤེགས་པའི་ཉེ་འཁོར་ཀུན་ཏུ་འོད་ཟེར་འབར་བ་སྣ་ཚོགས་དང་། མདུང་རྩེ་གསུམ་པའི་ཕྲེང་བ་བྱའོ། །དེ་ཉིད་ཀྱི་ཉེ་འཁོར་དུ་ལྷ་སུམ་ཅུ་རྩ་གཉིས་བྱའོ། །གོང་གི་དབུས་སུ་རྡོ་རྗེ་འཆང་བ་ཁྲོ་གཉེར་ཅན་རྡོ་རྗེ་གསོར་བར་བྱའོ། །དེ་ནས་ཚངས་པ་དང་། ཁྱབ་འཇུག་དང་། དབང་ཕྱུག་དང་། དབང་ཕྱུག་ཆེན་པོ་དང་། ལྷའི་དབང་ཕྱུག་ཆེན་པོ་དང་།སུམ་ཅུ་རྩ་གསུམ་གྱི་དབང་པོ་དང་། འོག་མིན་གནས་ཀྱི་ལྷའི་བུ་དང་། དགའ་ལྡན་གྱི་ལྷའི་བུ་དང་། འཕྲུལ་དགའི་ལྷའི་བུ་དང་། ཟླ་བ་དང་། ཉི་མའི་ལྷའི་བུ་དང་། རྒྱལ་པོ་ཆེན་པོ་བཞི་དང་། གཤིན་རྗེ་དང་། ཆུ་ལྷ་དང་། ལུས་ངན་པོ་དང་། གཞོན་ནུ་དང་། མེ་ལྷ་དང་། ནག་པོ་ཆེན་པོ་དང་། དགའ་བའི་དབང་ཕྱུག་དང་། དགའ་བོ་དང་། ཉེ་དགའ་བོ་དང་། སྟོབས་ལྷ་དང་། གང་བ་བཟང་པོ་དང་། ནོར་བུ་བཟང་པོ་དང་། གནས་གཙང་མའི་རིགས་ཀྱི་ལྷ་དང་། སུམ་ཅུ་རྩ་གསུམ་པའི་ལྷ་དང་། གཞན་འཕྲུལ་དབང་བྱེད་ཀྱི་ལྷའི་བུ་རྣམས་མེ་ཏོག་སྣ་ཚོགས་དང་། ནོར་བུ་རིན་པོ་ཆེ་སྣ་ཚོགས་ལག་པ་ནས་འཕྲུལ་པ་དང་།

---

^{[མ་དཔེ་གཟིགས་ན་འདིར་གནོན།]}

མཚོན་ཆ་སྣ་ཚོགས་ཐོགས་པར་བྱ།། །།འཕགས་པ་དོན་ཡོད་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་བཞི་པ། ལྷ་རྣམས་ཀྱི་ཕྱི་རོལ་ཐོག་ཐག་ཏུ་པདྨའི་ཕྲེང་བ་རྡོ་རྗེ་དང་། མདུང་རྩེ་གསུམ་པས་སྤྲས་པའི་པདྨའི་ཕྲེང་བས་ཀུན་ཏུ་འཁོར་བར་བྱ། གཡས་ཕྱོགས་སུ་འཕགས་མ་སྒྲོལ་མ་སྐྱིལ་མོ་ཀྲུང་ཕྱེད་དུ་བཅས་ཏེ་བཞུགས་པ། ཨུཏྤ་ལ་དང་། ནོར་བུ་རིན་པོ་ཆེ་ཕྱག་ན་ཐོགས་པ། རྒྱན་ཐམས་ཅད་ཀྱིས་བརྒྱན་པ། འཕགས་པ་སྤྱན་རས་གཟིགས་དབང་ཕྱུག་གི་ཞལ་དུ་བལྟ་བར་བྱའོ། །དེའི་རྒྱབ་བུ་ཁྲོ་གཉེར་མ་མེ་ཏོག་སྣ་ཚོགས་འཆང་བ། རྒྱན་ཐམས་ཅད་ཀྱིས་བརྒྱན་པ་བྱའོ། །གཡོན་དུ་དཀར་མོ་ཞེས་བྱ་བ་ནི་སྐྱིལ་མོ་ཀྲུང་ཕྱེད་དུ་བཅས་ཏེ་བཞུགས་པ། ཀུ་མུ་ད་དང་། ནོར་བུ་རིན་པོ་ཆེ་ལག་ན་ཐོགས་པ་རྒྱན་ཐམས་ཅད་ཀྱིས་བརྒྱན་པ། འཕགས་པ་སྤྱན་རས་གཟིགས་དབང་ཕྱུག་ལ་བལྟ་བར་བྱའོ། །དཀར་མོ་དེའི་རྒྱབ་ཏུ་པདྨ་མཛེས་དགའ་མ་མེ་ཏོག་སྣ་ཚོགས་ཐོགས་པ། རྒྱན་ཐམས་ཅད་ཀྱིས་བརྒྱན་པ་བྱའོ། །ལྷ་མོ་སྒྲོལ་མ་དང་། དཀར་མོའི་འོག་ཏུ་ཕ་རོལ་ཏུ་ཕྱིན་པ་བཅུའི་ལྷ་མོ་ཐམས་ཅད་ཀྱང་དབུ་ཡིད་ཙམ་འདུད་པ། ན་བཟའ་དཀར་པོ་གསོལ་བ། རྒྱན་ཐམས་ཅད་ཀྱིས་བརྒྱན་པ་བཞེངས་པ་བྱའོ། །གཡས་ཕྱོགས་སུ་སྲིན་མོ་རལ་པ་གཅིག་མ་གཏུམ་མོ་སྐྱིལ་མོ་ཀྲུང་ཕྱེད་དུ་བཅས་ཏེ་བཞུགས་པ། ཕྱག་བཞི་ལ་ཞགས་པ་དང་། དགྲ་སྟ་དང་། རལ་གྲི་དང་། རྡོ་རྗེ་ལག་ན་ཐོགས་པ་འཕགས་པ་སྤྱན་རས་གཟིགས་དབང་ཕྱུག་ལ་བལྟ་བར་བྱའོ། །གཡོན་དུ་ཕོ་ཉ་མོ་ཞལ་མཆེ་བ་གཙིགས་པ་རྒྱན་ཐམས་ཅད་ཀྱིས་བརྒྱན་པ་ཕྱག་བཞི་ལ་རྡོ་རྗེ་དང་། དགྲ་སྟ་དང་། ཞགས་པ་དང་། མདུང་རྩེ་གསུམ་པ་ཕྱག་ན་ཐོགས་པ། སྐྱིལ་མོ་ཀྲུང་ཕྱེད་དུ་བཅས་ཏེ་བཞུགས་པ། འབར་བའི་ནང་ན་འཇིག་རྟེན་དབང་ཕྱུག་ལ་བལྟ་བར་བྱའོ། །རི་བོ་པོ་ཊ་ལའི་ངོས་ཀྱི་གསེབ་ཏུ་ཀླུའི་རྒྱལ་པོ་དགའ་བོ་དང་། ཉེ་དགའ་བོ་དང་། ཀླུའི་བུ་མོ་ཀླུའི་གནས་དང་བཅས་པ་བྱ་སྟེ། མེ་ཏོག་སྣ་ཚོགས་ཐོགས་ཤིང་། གོང་དུ་བཅོམ་ལྡན་འདས་འཇིག་རྟེན་དབང་ཕྱུག་ལ་འཐོར་བར་བྱའོ། །རིའི་སྨད་དུ་ལྷ་མོ་དཔེ་མེད་མ་དང་། ལྷ་མོ་བས་ན་ཏི་དང་། སའི་ལྷ་མོ་

---

^{[མ་དཔེ་གཟིགས་ན་འདིར་གནོན།]}

དང་། དཔལ་ལྷ་མོ་དང་། ལྷ་མོ་འཇིགས་བྱེད་མ་དང་། སྒྲ་དབྱངས་མ་དང་། ལྕགས་སྒྲོག་མ་དང་། དུང་ཅན་མ་སྟེ། རྒྱན་ཐམས་ཅད་ཀྱིས་བརྒྱན་པ། མེ་ཏོག་སྣ་ཚོགས་དང་། ནོར་བུ་རིན་པོ་ཆེ་ཐོགས་པ་བྱའོ། །གཞལ་མེད་ཁང་གི་གོང་དུ་མཆོད་རྟེན་ཆེན་པོ་བརྒྱད་ཕྲེང་བ་སྦྲེངས་ལ་མཆོད་རྟེན་གྱི་རྒྱན་ཇི་ལྟ་བར་བརྒྱན་པར་བྱའོ། །མཆོད་རྟེན་གྱི་འོག་གཡས་རོལ་དུ་བཅོམ་ལྡན་འདས་བྱང་ཆུབ་ཀྱི་སྙིང་པོར་གཤེགས་པ་ལ་འཇིག་རྟེན་དབང་ཕྱུག་མངོན་དུ་མཆོད་པ་མཛད་པ་བྱའོ། །འཕགས་པ་རྡོ་རྗེ་འཆང་བ་ཕྱག་ན་རྔ་ཡབ་ཐོགས་པ་བྱའོ། །དེའི་འོག་ཏུ་དྲང་སྲོང་དང་། ལྷའི་བུ་མེ་ཏོག་སྣ་ཚོགས་ཀྱིས་བཅོམ་ལྡན་འདས་ལ་མཆོད་པ་བྱའོ། །གཡོན་ཕྱོགས་སུ་བཅོམ་ལྡན་འདས་ཆོས་ཀྱི་འཁོར་ལོ་བསྐོར་བ་བྱ་སྟེ། ཀུན་དགའ་བོ་དང་། རྡོ་རྗེ་འཆང་བ་ལག་ན་རྔ་ཡབ་ཀྱིས་བཅོམ་ལྡན་འདས་ལ་མངོན་དུ་གཡོབ་པར་བྱའོ། །གཡས་ཕྱོགས་སུ་འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པ་བཅོམ་ལྡན་འདས་ལ་མཆོད་པ་བྱེད་པ་བྱའོ། །གཡོན་ཕྱོགས་སུ་ཁྲོ་བོའི་རྒྱལ་པོ་བཅོམ་ལྡན་འདས་ལ་མཆོད་པ་བྱེད་པ་བྱའོ། །དེའི་འོག་ཏུ་དྲང་སྲོང་དང་། ལྷའི་ཚོགས་བཅོམ་ལྡན་འདས་ལ་མཆོད་པ་བྱེད་པ་བྱའོ། །རས་ཀྱི་སྐུ་གཟུགས་ཀྱི་གཡོན་དང་གཡས་ཀྱི་ཕྱི་རོལ་ཐོག་བྲག་ཏུ་དེ་བཞིན་གཤེགས་པའི་སྐུ་གཟུགས་བརྒྱ་རྩ་བརྒྱད་པདྨོའི་གདན་ལ་ཚད་ཇི་བཞིན་དུ་སྐྱིལ་མོ་ཀྲུང་བཅས་ཏེ་བཞུགས་པ་རྒྱན་ཐམས་ཅད་ཀྱིས་བརྒྱན་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་གི་སེང་གེའི་གདན་གྱི་ཞབས་དྲུང་དུ་རིག་སྔགས་འཆང་བ་པུས་མོ་བཙུགས་ཏེ། མེ་ཏོག་དང་། པོག་ཕོར་དང་། བགྲང་ཕྲེང་ལག་ན་ཐོགས་ཏེ་འཕགས་པ་སྤྱན་རས་གཟིགས་དབང་ཕྱུག་ལ་མངོན་དུ་བལྟ་བར་བྱའོ། །རི་མོ་མཁན་ཁྲུས་བྱས་ཤིང་གོས་གཙང་མ་བགོས་ཏེ། གཙང་བར་བྱས་ལ་རོ་སྣ་ཚོགས་པའི་ཟས་དཀར་གསུམ་བཟའ་བར་བྱའོ། །སྣོད་སར་པ་གཙང་མའི་ནང་ནས་ཚོན་ལྷག་མ་མ་ཡིན་པས་བྲི་བར་བྱའོ། །འདིའང་ཁ་ཟས་མི་གཙང་བ་སྣ་ཚོགས་དང་། གོས་ངན་པ་མི་གཙང་བ་ཡོངས་སུ་སྤང་བར་བྱའོ། །ཚིག་ངན་པ་དང་། སེམས་

---

^{[མ་དཔེ་གཟིགས་ན་འདིར་གནོན།]}

ངན་པ་ཡོངས་སུ་སྤང་བར་བྱའོ། །ཆང་དང་། ཤ་དང་། བེག་བཙོང་དང་། སྒོག་སྐྱ་དང་། ཀེའུ་དང་འདྲེས་པ་ཡོངས་སུ་སྤང་བར་བྱའོ། །ཉི་མ་རེ་རེ་ཞིང་བའི་རྣམ་ལྔ་ལ་རེག་པར་བྱའོ། །དྲི་མ་དང་བྲལ་ཞིང་སེར་སྣ་དང་། ཕྲག་དོག་དང་བྲལ་བར་བྱའོ། །བྱམས་པ་དང་། སྙིང་རྗེའི་ལྷག་པའི་བསམ་པ་དང་། དཀོན་མཆོག་གསུམ་ལ་དང་བ་ལྷག་པར་བྱ་སྟེ་རས་ཀྱི་སྐུ་གཟུགས་བྲི་བར་བྱའོ། །ག་པུར་དང་། གླ་རྩིས་བསྒོས་པའི་ཚོན་སྣ་ཚོགས་ཀྱིས་བྲི་བར་བྱའོ། །དབེན་ཞིང་འདུ་འཛི་ཡོངས་སུ་སྤང་བར་བྱའོ། །རྨུགས་པ་དང་། གཉིད་ཡོངས་སུ་སྤང་བར་བྱའོ། །དེ་ལྟར་རི་མོ་བྲི་བ་ནི་ལས་ལེགས་པར་བྱས་པ་ཡིན་ནོ། །ཟླ་བ་ཡར་གྱི་ངོ་ལ་བྲི་བར་བྱའོ། །རྒྱུ་སྐར་ཤིན་ཏུ་བཀྲ་ཤིས་པ་དང་། ཚེས་གྲངས་དང་ཉི་མ་ཤིན་ཏུ་བཀྲ་ཤིས་པ་ལ་བརྩམ་པར་བྱའོ། །རྒྱུ་སྐར་རྒྱལ་ནི་བཀྲ་ཤིས་པ་ཡིན་ཏེ་དེ་བཞིན་གཤེགས་པ་ཐམས་ཅད་ཀྱིས་བསྔགས་པ། བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ། ལྷ་ཐམས་ཅད་ཀྱིས་རྗེས་སུ་བཟུང་བ་ཡིན་ནོ། །རིགས་ཀྱི་བུ་དང་།རིགས་ཀྱི་བུ་མོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་གང་ལ་ལ་ཞིག་དོན་ཡོད་པའི་ཞགས་པའི་སྙིང་པོ་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ། དེ་བཞིན་གཤེགས་པ་ཐམས་ཅད་རྣམ་པར་གཟིགས་པ། བྱང་ཆུབ་ཆེན་པོའི་དཀྱིལ་འཁོར་གསང་བ། རྣམ་པར་གྲོལ་བའི་དཀྱིལ་འཁོར་གསང་བ། རས་ཀྱི་སྐུ་གཟུགས་ཆེན་པོ་མཐོང་བ་ནི་སྐུ་གཟུགས་མཐོང་བ་ཙམ་གྱི་མོད་ལ་སྡིག་པ་དང་སྒྲིབ་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །མཚམས་མེད་པ་ལྔ་བྱེད་པ་དང་། མཚམས་མེད་པ་ལ་གཞོལ་བ་དང་། དམ་པའི་ཆོས་ཡོངས་སུ་སྤོང་བ་དང་། འཕགས་པ་ལ་སྐུར་པ་འདེབས་པ་དང་། སངས་རྒྱས་དང་། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ཐམས་ཅད་སྤོང་བར་བྱེད་པ་རྣམས་ཀྱང་མཐོང་བ་ཙམ་ལ་སོགས་

---

^{[མ་དཔེ་གཟིགས་ན་འདིར་གནོན།]}

པས་སྡིག་པ་ཐམས་ཅད་ཕྱེ་མར་རློག་གོ། །རྣམ་པར་གྲོལ་བར་འགྱུར་རོ། །སྡོམ་པ་ཆེན་པོ་ཡང་དག་པར་འཛིན་པར་འགྱུར་རོ། །གང་གཱའི་ཀླུང་གི་བྱེ་མ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་སྙེད་ཀྱི་དེ་བཞིན་གཤེགས་པ་བྱང་ཆུབ་སྙིང་པོ་ལ་མངོན་དུ་གཤེགས་པ་དང་། ཆོས་ཀྱི་འཁོར་ལོ་བསྐོར་བ་མཐོང་བ་དང་འདྲ་བར་རིག་པར་བྱའོ། །རས་ཀྱི་སྐུ་གཟུགས་འདི་མཐོང་བ་ནི་གཞལ་མེད་ཁང་དང་བཅས་པའི་རི་བོ་པོ་ཊ་ལན་འཕགས་པ་སྤྱན་རས་གཟིགས་དབང་ཕྱུག་འཁོར་གྱི་དཀྱིལ་འཁོར་དང་བཅས་ཏེ་མངོན་དུ་བཞུགས་པ་མངོན་དུ་མཐོང་བ་དང་འདྲ་སྟེ། འདི་ལ་ཐེ་ཚོམ་མི་བྱའོ། །ཡིད་གཉིས་བསྐྱེད་པར་མི་བྱའོ། །སེམས་ཀྱིས་སྐད་ཅིག་གཅིག་རབ་ཏུ་དང་བ་བྱས་ན། བསོད་ནམས་ཀྱི་ཕུང་པོ་ཆེན་པོ་ཡོངས་སུ་གཟུང་བར་འགྱུར་རོ། །དགེ་བའི་རྩ་བ་ཆེན་པོ་སོགས་པ་དང་ལྡན་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གིས་དགོངས་ཏེ་མཆོག་སྦྱིན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་གཟུང་བར་འགྱུར་རོ། །ལུས་དང་སེམས་ཡིད་ལས་བྱུང་བའི་ཡོངས་སུ་དག་པར་འགྱུར་རོ། །དབང་པོ་ཐམས་ཅད་ཡོངས་སུ་དག་པར་འགྱུར་རོ། །དྲི་མ་དང་བྲལ་ཞིང་སེར་སྣ་དང་། ཕྲག་དོག་དང་བྲལ་བར་འགྱུར་རོ། །འཇིག་རྟེན་པ་ཐམས་ཅད་དགའ་བ་དང་། བླ་མར་ལྟ་བར་འགྱུར་རོ། །ཚེ་རིང་པོར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །ཤི་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐལ་བ་མཉམ་པར་སྐྱེ་བར་འགྱུར་རོ། །ཚེ་རབས་དྲན་པར་འགྱུར་རོ། །པདྨའི་ནང་ནས་རྫུས་ཏེ་སྐྱེ་བར་འགྱུར་རོ། །མཐོང་བ་ཙམ་གྱི་མོད་ལ་ཕྱིར་མི་ལྡོག་པར་འགྱུར་རོ། །དེ་བཞིན་གཤེགས་པ་འོད་དཔག་ཏུ་མེད་པའི་སྐུ་གཟུགས་འདི་གང་གིས་མཆོད་པ་དེ་ནི་ཕྱོགས་བཅུའི་དེ་བཞིན་གཤེགས་པ་ཐམས་ཅད་མཆོད་པར་འགྱུར་རོ། །འདི་ནི་མངལ་ན་གནས་པའི་ཐ་མ་ཡིན་ཏེ། ཕྱིས་མ་རིག་པའི་མུན་པའི་ནང་དུ་ལྟུང་བར་མི་འགྱུར་རོ། །དེ་ལྟར་ན་མི་མཉམ་པ་དང་འདྲ་བ་ཡིན་ཏེ། རས་ཀྱི་སྐུ་གཟུགས་ཀྱི་ཆོ་ག་འཇིག་རྟེན་ལས་འདས་པ་སྒྲུབ་པའི་ཆོ་ག་འདི་ནི་དམ་པ་ཡིན་ནོ། །དེ་ནས་གསང་སྔགས་ཀྱི་ཆོ་ག་འཇིག་རྟེན་ལས་འདས་པ་སྒྲུབ་པ་བརྗོད་པར་བྱའོ། །གང་གིས་དྲན་པ་

---

^{[མ་དཔེ་གཟིགས་ན་འདིར་གནོན།]}

ཙམ་གྱི་མོད་ལ་དེ་བཞིན་གཤེགས་པ་ཐམས་ཅད་མངོན་སུམ་དུ་མཐོང་ནས་འདུག་པ་དང་། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་སྒོ་ཕྱེ་སྟེ་འདུག་པ་དང་། བྱང་ཆུབ་སེམས་དཔའ་ཐམས་ཅད་ཀྱིས་མངོན་དུ་མཐོང་བ་སྦྱིན་པར་མཛད་པ་དང་། དཀྱིལ་འཁོར་གྱི་ལྷ་ཐམས་ཅད་མངོན་དུ་བསྲུང་བ་དང་། སྐྱོབ་པ་དང་། སྦེད་པར་མཛད་པ་དང་། དཀྱིལ་འཁོར་དང་། ཕྱག་རྒྱ་དང་། གསང་སྔགས་དང་། སྙིང་པོ་དང་། ཆོ་ག་ཞིབ་མོ་ཐམས་ཅད་མངོན་དུ་འགྱུར་རོ། །འཇིག་རྟེན་ལས་འདས་པའི་ལུས་སུ་འགྲོ་བ་ཡོངས་སུ་དག་པར་འགྱུར་རོ། །དུས་གསུམ་དུ་གཤེགས་ཤིང་སོ་སོ་ན་བཞུགས་པའི་དེ་བཞིན་གཤེགས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོའི་འཕགས་པའི་ཚོགས་མཆོག་ཐམས་ཅད་ལ་ཕྱག་འཚལ་ལོ། །འཕགས་པ་རྡོ་རྗེ་འཆང་བ་དང་། དཀྱིལ་འཁོར་གྱི་ལྷ་ཐམས་ཅད་དང་། རིག་པའི་རྒྱལ་པོ་ལ་ཕྱག་འཚལ་ལོ། །ཨོཾ་ཨ་མོ་གྷ་ཨ་བ་ལོ་ཀི་ཏེ་མ་ཧཱ་མཎྜལ་པདྨ་སརྦ་བོ་དྷི་ས་ཏྭ་ན་མ་སྐྲྀ་ཏེ། བྷ་ར་བྷ་ར། ས་མནྟ་ཨ་བ་ལོ་ཀི་ཏེ། ཨ་མོ་གྷ་མ་ཧཱ་བྲཧྨ། བེ་ཥ་དྷ་ར། དྷ་ར་དྷ་ར། མ་ཧཱ་ཀཱ་རུ་ཎི་ཀ་བོ་དྷ་ཡ། བོ་དྷ་ཡ། མ་ཧཱ་བོ་དྷ་ནི། བོ་དྷི་བོ་དྷི། པདྨ་བི་བོ་དྷ་ནི། སརྦ་པཱ་པ་ཨན་དྷ་ཀཱ་ར། པྲ་ཤ་མ་ནི། སརྦ་དུརྒ་ཏི། བྷ་ར་ཀ །མ་ཧཱ་ཀཱ་རུ་ཎི་ཀ །བ་ཧུ་བི་བི་དྷ། བེ་ཥ་དྷ་ར། སརྦ་ཏ་ཐཱ་ག་ཏ་གརྦྷེ། ཧུ་རུ་ཧུ་རུ། ཨ་མོ་གྷ་གརྦྷེ། ཏུ་རུ་ཏུ་རུ། ཨ་མོ་གྷ་པཱ་ཤ་ཧ་སྟེ། མུ་རུ་མུ་རུ། བི་མོ་ཀྵ་བྷུ་ཛེ། ཀྵི་ཎི་ཀྵི་ཎི། སརྦ་ཨཱ་བ་ར་ཎ་བི་ཤུད་དྷེ། བྷ་ར་བྷ་ར། སརྦ་ཏ་ཐཱ་ག་ཏ། པ་རི་པཱུ་ར་ཎི། ཏ་ར་ཏ་ར། ཏཱ་ར་ཡ་མཱ་ན། ཨ་བ་ལོ་ཀཱ་ཡ། པདྨ་བྷུ་ཛེ། མ་ཎི་ཀ་ན་ཀ །བི་བྷུ་ཥི་ཏ། བཱ་ཧུ། ད་མ་ད་མ། དུར་དཱ་ན་ཏཱ་ནཱ་ན། མ་ཧཱ་བོ་དྷི་ས་ཏྭ་བ་ར་ད། མ་ཧཱ་ཀཱ་ར་ཎི་ཀ །སརྦ་དེ་བ་ག་ཎ་ན་མ་སྐྲྀ་ཏ། རྀ་ཥི་ག་ཎ། སྟ་བི་ཏ། ཤ་ཏ་ས་ཧ་སྲ་ཙནྟྲ་སཱུརྱ། ཨ་ཧི་རེ་ཀ །ར་ཤྨི། ཨ་བ་བྷཱ་སི་ཏ། མ་ཧཱ་པ་ཤུ་པ་ཏི། བེ་ཥ་དྷ་ར། པ་ར་མ། ཤུད་དྷ་སཏྭ། ཨ་བ་ལོ་ཀི་ཏེ། ལོ་ཀེ་ཤྭ་ར། མ་ཧེ་ཤྭ་ར། པ་ར་མ། ཀཱུ་རུ་ཎི་ཀ །མཎྜ་ལེ་ཤྭར། སུ་པྲ་བུད་དྷ། མ་ཧཱ་པདྨ། བྷུ་ཛེ་ཤྭ་ར། མ་ཧཱ་བིདྱཱ་དྷ་རེ་ཤྭ་ར། དྷི་རི་དྷི་རི། མ་ཧཱ་ཀཱ་རུ་ཎི་ཀ །མ་ཧཱ་ཀཱ་རུ་ཎི་ཀ །མ་ཧཱ་བི་མོ་ཀྵ།

---

^{[མ་དཔེ་གཟིགས་ན་འདིར་གནོན།]}

མཎྜ་ལ་དྷ་ར། སརྦ་ཏ་ཐཱ་ག་ཏ་གུ་ཧྱ། མུ་དྲཱ་ས་མ་ཡ་དྷ་ར། མ་ཧཱ་བ་ལ་བིདྱཱ་དྷ་ར། མ་ཧཱ་མ་ཎི། མཽ་ཁི་དྷ་ར། ཨ་མི་ཏཱ་བྷ། མུ་ཀུ་ཊ་དྷ་ར། དྷུ་རུ་དྷུ་རུ། ས་མནྟ། ཨ་བ་ལོ་ཀི་ཏ། ལོ་ཀེ་ཤྭ་ར། མ་ཧེ་ཤྭ་ར། པཱ་ཤ་དྷ་རེ་ཤྭ་ར། པ་ར་པ་ར། པ་ར་མ། མ་ཧཱ་མཻ་ཏྲི། ཨ་བ་ལོ་ཀི་ཏེ། སརྦ་སཏྭ། སནྟ་རཱ་ག །སིད་དྷི། སི་དྷཱ་ཤཱ། པ་རི་པཱུ་ར་ཀ །མ་ཧཱ་བ་ར། པྲ་མོ་ད། ན་མོ་སྟུ་ཏེ་སྭཱ་ཧཱ། འདི་ནི་ཐམས་ཅད་རྣམ་པར་གྲོལ་བའི་དཀྱིལ་འཁོར་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ། དེ་བཞིན་གཤེགས་པ་ཐམས་ཅད་ཀྱི་གསང་བ། འཕགས་པ་སྤྱན་རས་གཟིགས་དབང་ཕྱུག་གི་སྙིང་པོའི་མཆོག །གསང་བ་སྡིག་པ་དང་། སྒྲིབ་པ་ཐམས་ཅད་ཡོངས་སུ་སྦྱོང་བ། འཇིག་རྟེན་ལས་འདས་པའི་ལམ་རྣམ་པར་སྦྱོང་བ། དེ་བཞིན་གཤེགས་པ་ཐམས་ཅད་ཀྱི་རིགས་འཇུག་པ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །དུས་གསུམ་དུ་གཤེགས་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཨོཾ་བཱི་ར་བཱི་ར། མ་ཧཱ་མཎྜལ། བི་ཤྭ་རཱུ་པ་ཥ་ཊ་པཱ་ར་མི་ཏཱ། པ་རི་པཱུ་ར་ཀ །སརྦ་བོ་དྷི་ས་ཏྭ། ན་མ་སྐྲྀ་ཏ། བ་ར་མ་བི་པུ་ལ། བི་མོ་ཀྵ་དྷ་ར། མ་ཧཱ་པཱ་ཤ །བི་ལོ་ཀི་ཧ། ཨ་མོ་གྷ་པཱ་ཤ་ཛྭ་ལི་ཏ་མ་ཧཱ་ཛྭ་ལ་ཨ་བ་ལོ་ཀི་ཏཱ། མ་ཧཱ་མ་ཎི་བིཥྚ་དྷ་ར། ས་མནྟ་ཨ་བ་བྷཱ་སི་ཏ། ཛྭ་ལ་ཛྭ་ལ། མ་ཧཱ་གམ་བྷཱི་ར། བི་མོ་ཀྵ་པཱ་ཤ་དྷ་ར། བ་ལ་བོདྷྱང་ག །ཨཱ་ཀརྵ་ཀ །ཨོཾ་པྲཧྨ་རཱུ་པ། མ་ཧཱ་ཨ་མོ་གྷ་པྲ་ཤ་ཧཱུཾ་ཧཱུཾ། ཕཊ་ཕཊ། སརྦ་ས་ཏྭ། བི་ལོ་ཀི་ཏ། བ་ར་པྲ་ད། ན་མོ་སྟུ་ཏེ་སྭཱ་ཧཱ། འདི་ནི་རྣམ་པར་གྲོལ་བའི་དཀྱིལ་འཁོར་དོན་ཡོད་པའི་ཞགས་པའི་སྙིང་པོ་འཇིག་རྟེན་ལས་འདས་པའི་རྣམ་པར་འཕྲུལ་པའོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་བི་བུད་དྷྱ། བི་བུད་དྷྱ། མ་ཧཱ་ཀཱ་རུ་ཎི་ཀ །ཏ་ར་ཏ་ར་ཏཱ་ར་ཡ། མ་ཧཱ་ཨརྣ་བ་པ་ར་ན། མ་ཧཱ་བྷུ་ཛ་བི་ལོ་ཀཱ་ཡ་ཧཱུཾ་ཕཊ་སྭཱ་ཧཱ། ཉེ་བའི་སྙིང་པོའོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་

---

^{[མ་དཔེ་གཟིགས་ན་འདིར་གནོན།]}

པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་མོ་གྷ་པཱ་ཤ །མ་ཧཱ་དཱ་ན་པཱ་ར་མི་ཏཱ། པ་རི་པཱུ་ར་ཡ། ཧཱུཾ་ད་ར་ད་ར་། བི་བིདྷ། བི་ཙི་ཏྲེ། སརྦ་ས་ཏྭ་ཨུ་པ་བྷོ་ག །སརྦ་ཏ་ཐཱ་ག་ཏ། མ་ཧཱ་དཱ་ན། པཱུ་ཛཱ་མེ་གྷ། པྲ་བརྟ་ཡ། ཏ་ར་ཏ་ར། ཏཱ་ར་ཡ། མ་ཧཱ་པདྨ་པཱ་ཎི་ཧཱུཾ་ཕཊ་སྭཱ་ཧཱ། འདི་ནི་སྦྱིན་པའི་ཕ་རོལ་ཏུ་ཕྱིན་པའི་ཞགས་པ་ཆེན་པོའི་སྙིང་པོ་སྟེ། གང་གིས་ཡུངས་འབྲུ་ཙམ་ཡང་སྦྱིན་པ་བྱིན་ཏེ་དྲན་པ་ཙམ་གྱིས་ལན་བདུན་བཟླས་བརྗོད་བྱས་ན་མཆོད་སྦྱིན་སྦྱིན་པ་རྣམ་པར་འཕྲུལ་པ་ཆེན་པོ་ཤིན་ཏུ་རྒྱས་པ་ཆེན་པོའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་མོ་གྷ་ཤཱི་ལ། སཾ་བྷ་ར་སཾ་བྷ་ར། བྷ་ར་བྷ་ར། མ་ཧཱ་ཤུད་དྷ་སཏྭ། པདྨ་བི་བྷཱུ་ཥི་ཏ་བྷུ་ཛ་དྷ་ར་དྷ་ར། ས་མནྟ། ཨ་བ་ལོ་ཀི་ཏེ། ཧཱུྃ་ཕཊ་སྭཱ་ཧཱ། གཟུངས་འདི་སྨྱུང་བ་བྱས་ཏེ། གསོ་སྦྱོང་གི་ཡན་ལག་བརྒྱད་བཟུང་ནས་མི་སྨྲ་བར་ལན་ཉི་ཤུ་རྩ་གཅིག་དྲན་པར་བྱའོ། །དེ་ནས་དོན་ཡོད་པའི་ཞགས་པའི་སྙིང་པོ་བཟླས་བརྗོད་བྱའོ། །བཟླས་བརྗོད་བྱས་པ་ཙམ་གྱི་མོད་ལ་ཚུལ་ཁྲིམས་ཡོངས་སུ་དག་པ་ཆེན་པོ་དང་ལྡན་པར་འགྱུར་རོ། །ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡོངས་སུ་རྫོགས་པར་འགྱུར་རོ། །ཚུལ་ཁྲིམས་ཀྱི་དྲི་ཞིམ་པོའི་དྲི་མང་པོ་ལུས་ལས་འབྱུང་ཞིང་ཕྱོགས་བཅུའི་འཇིག་རྟེན་དུ་གྲགས་པར་འགྱུར་རོ། །གང་ཞིག་ཉི་མ་རེ་རེ་ཞིང་གཟུངས་འདི་དྲན་ན་དེ་ནི་རྟག་ཏུ་ཚུལ་ཁྲིམས་ཡོངས་སུ་དག་པར་འགྱུར་རོ། །དགེ་སློང་གང་ལ་ལ་ཞིག་ཚུལ་ཁྲིམས་ཞིག་ཅིང་ཉམས་པས་སྨྱུང་བ་བྱས་ཏེ། འདི་བཟླས་བརྗོད་བྱས་པ་ཙམ་གྱི་མོད་ལ་ཚུལ་ཁྲིམས་ཡོངས་སུ་དག་པར་འགྱུ་རོ། །ཚུལ་ཁྲིམས་མང་པོ་དང་ལྡན་པར་འགྱུར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་མ་ཧཱ་བཱིརྱ། ཨ་མོ་གྷ་བི་ལོ་ཀི་ཏེ། བ་ར་བ་ར། དྷི་ཌྷ། བཱིརྱ། མ་ཧཱ་བ་ལ།

---

^{[མ་དཔེ་གཟིགས་ན་འདིར་གནོན།]}

བ་ལ་བ་ལ། མ་ཧཱ་བོ་དྷྱངྒ་། བ་ལ་བོ་དྷ་ནི། ཧཱུཾ་ཕཊ་སྭཱ་ཧཱ། གཟུངས་འདི་དུས་རྟག་ཏུ་ཡོངས་སུ་དག་པའི་ཡིད་ཀྱིས་དྲན་པར་བྱས་ན་དྲན་པ་ཙམ་གྱི་མོད་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ནམ་ཡང་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་བྲལ་བར་མི་འགྱུར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་མོ་གྷ་ཀྵཱ་ན་ཏི། སརྦ་བོ་དྷི་ས་ཏྭ་ཀྵ་མི་ཎ། ཀྵ་ཎ་ཀྵ་ཎ། མ་ཧཱ་མཻ་ཏྲི། ཀཱ་རུ་ཎ། སརྦ་སཏྭ། བཏ་ས་ལ། མ་ཧཱ་ཀཱ་རུ་ཎི་ཀ །སརྦ་ས་ཏྭ་ཀྵ་མི་ཎ། ཧཱུྃ་ཕཊ་སྭཱ་ཧཱ། གཟུངས་འདི་སེམས་ཅན་དུ་གྱུར་པ་ཐམས་ཅད་ལ་བཟོད་པ་ཆེན་པོ་དང་། སྙིང་རྗེ་ཆེན་པོ་དང་། བརྩེ་བའི་སེམས་ཀྱིས་དམྱལ་བ་ན་གནས་པ་དང་། བྱོལ་སོང་གི་སྐྱེ་གནས་སུ་གཏོགས་པ་རི་དགས་དང་། བྱ་གང་དག་འདས་པ་གང་ཡིན་པ་དང་། གནས་པ་གང་ཡིན་པ་དང་། སྐྱེ་བ་གང་ཡིན་པ་དེ་རྣམས་ལ་སྙིང་རྗེ་བའི་ཕྱིར་གང་ཞིག་གཟུངས་ཀྱི་མཆོག་དྲན་པར་བྱེད་ན། དམྱལ་བའི་སེམས་ཅན་ལས་ཐར་བར་འགྱུར་ཞིང་སྐྱེ་བོ་མང་པོ་གནས་པ་གང་ཡིན་པ་རྣམས་གྲོལ་བར་འགྱུར་རོ། །ནམ་སངས་རྒྱས་ཀྱི་ཞིང་ལ་གནས་ཀྱི་བར་དུ་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་སརྦ་ཏཱ་ཐཱ་ག་ཏ། མ་ཧཱ་ཨ་མོ་གྷ། ཀཱ་རུ་ཎཱ། དྷྱཱན་ས་མཱ་དྷི། སརྦ་བི་མོ་ཀྵ། ཨ་པྲ་ཀམ་པྱ་ཀ །ཙུ་རུ་ཙུ་རུ་ཧཱུྃ་ཕཊ་སྭཱ་ཧཱ། གཟུངས་འདི་འཕགས་པ་སྤྱན་རས་གཟིགས་དབང་ཕྱུག་ལ་དམིགས་ནས་ཡིད་རྩེ་གཅིག་ཏུ་བྱས་ཏེ་དྲན་པར་བྱས་ན། དྲན་པ་ཙམ་གྱི་མོད་ལ་དེས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །གཞན་ཡང་ཏིང་ངེ་འཛིན་སྟོང་ཕྲག་བརྒྱ་སོ་སོར་ཐོབ་པར་འགྱུར་རོ། །སངས་རྒྱས་ཀྱི་ཞིང་ཐམས་ཅད་དུ་བཞུགས་པར་འགྱུར་རོ། །བཟླས་བརྗོད་བྱས་པ་ཙམ་གྱིས་ཏིང་ངེ་འཛིན་ཐམས་ཅད་ལ་དབང་སྒྱུར་བར་འགྱུར་

---

^{[མ་དཔེ་གཟིགས་ན་འདིར་གནོན།]}

རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་མོ་གྷ། མ་ཧཱ་པྲཛྙཱ། ཨ་བ་བྷཱ་ས། སྥ་ར་ཎ། བུད་དྷི། པྲ་ས་ར་པྲ་ས་ར། ས་མནྟ་བུད་དྷི། ཨ་བ་ལོ་ཀི་ཏ། བྷ་ག་བཱ་ན་པྲ་ཛྙཱ། ཨ་བ་ལོ་ཀི་ཏ། ཙཀྵུ་ཥེ་མ་ཧཱ་པྲཛྙཱ། བ་ར་དཱ། པཱ་ཎི། མ་ཧཱ་པྲཛྙཱ། པདྨ་དྷ་རི་ཎ། བྷུ་ཛེ་ཧཱུྃ་ཕཊ་སྭཱ་ཧཱ། གཟུངས་འདི་དྲན་པ་ཙམ་གྱི་མོད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །ཐབས་དང་ཤེས་རབ་སྣ་ཚོགས་ཀྱི་དགེ་བ་ཆེན་པོའི་བློ་འཕེལ་བར་འགྱུར་རོ། །རྟག་ཏུ་རྒྱུན་མི་འཆད་པར་ཕ་རོལ་ཏུ་ཕྱིན་པ་བཅུའི་བློ་དང་ལྡན་པར་འགྱུར་རོ། །ཕྱོགས་བཅུའི་དེ་བཞིན་གཤེགས་པ་ཐམས་ཅད་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་རྗེས་སུ་དྲན་པའི་ཤེས་རབ་དང་བློར་འགྱུར་རོ། །ལན་འགའ་ཡང་ཕ་རོལ་ཏུ་ཕྱིན་པ་དྲུག་དང་བྲལ་བར་མི་འགྱུར་རོ། །སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་བློ་ཉམས་པར་མི་འགྱུར་རོ། །བྱང་ཆུབ་ལ་ཐུག་གི་བར་དུ་རབ་ཏུ་རྨོངས་པར་མི་འགྱུར་རོ། །དོན་ཡོད་པའི་ཕྱིར་ཕ་རོལ་ཏུ་ཕྱིན་པ་དྲུག་གི་གཟུངས་ཆེན་པོ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཨ་མོ་གྷ་བི་མོ་ཀྵ། མཎྜལ་མ་ཧཱ་ད་བྷཱུ་ཏ་བི་མ་ལེ། དྷ་ར་དྷ་ར། དྷི་རི་དྷི་རི། མ་ཧཱ་ད་བྷུ་ཏ། ཨ་མི་ཏཱ་བྷ། མ་ཀུ་ཊ། དྷ་ར་ཧཱུྃ་ཕཊ་སྭཱ་ཧཱ། དཀྱིལ་འཁོར་དེར་ཡུངས་ཀར་དང་། དྲི་ཆབ་དང་ལྡན་པའི་བུམ་པ་ལ་སྔགས་བཟླས་བརྗོད་བྱས་ནས། ཆུས་ཀུན་ཏུ་ཆག་ཆག་བཏབ་ན་ཆག་ཆག་བཏབ་པ་ཙམ་གྱི་མོད་ལ་དཀྱིལ་འཁོར་ཀུན་ཏུ་དཔག་ཚད་གཅིག་གི་ནང་དུས་སྦྱངས་ཏེ་ཡོངས་སུ་དག་པར་འགྱུར་རོ། །ཇི་ལྟར་ཤེལ་གོང་དང་། རིན་པོ་ཆེ་སྣ་ཚོགས་པ་དག་པ་དྲི་མ་མེད་པ་མཛེས་པ་དེ་འདྲ་བའི་ས་གཞིར་འགྱུར་རོ། །ཤིན་ཏུ་དག་པ་དང་། ཤིན་ཏུ་དྲི་མ་མེད་པ་དང་། ཤིན་ཏུ་ཉམས་དགའ་

---

^{[མ་དཔེ་གཟིགས་ན་འདིར་གནོན།]}

པ་དང་། ཤིན་ཏུ་ཡིད་དུ་འོང་བའི་ས་གཞིར་འགྱུར་རོ། །ཤིན་ཏུ་ས་གཞི་སྤ་བར་འགྱུར་རོ། །ས་ཕྱོགས་དེའི་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་གང་དག་འཁོད་པ་དེ་དག་ཐམས་ཅད་ཕྱིར་མི་ལྡོག་པའི་ས་ལ་རབ་ཏུ་གནས་པར་འགྱུར་རོ། །དེ་དག་ཐམས་ཅད་ཕྱིར་མི་ལྡོག་པར་འགྱུར་རོ། །ཤི་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །ཚེ་རབས་དྲན་པར་འགྱུར་རོ། །ནམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའི་བར་དུ་བསོད་ནམས་ཀྱི་ཕུང་པོ་ཆེན་པོའི་དགེ་བའི་རྩ་བ་ཆེན་པོ་སོགས་པར་འགྱུར་རོ། །གང་དག་བྱོལ་སོང་གི་སྐྱེ་གནས་སུ་གཏོགས་པའི་རི་དགས་དང་། བྱ་དེ་དག་ཕྱོགས་དེར་འགྲོ་ཞིང་རབ་ཏུ་འཇུག་པ་དེ་དག་ཐམས་ཅད་ཡོངས་སུ་གྲོལ་བར་འགྱུར་རོ། །བདེ་འགྲོའི་ལམ་ལ་རབ་ཏུ་གནས་པར་འགྱུར་རོ། །གང་གིས་དེའི་ས་ལག་པར་འོངས་ཏེ་རེག་པ་དེ་དག་ཐམས་ཅད་ནད་དང་བྲལ་བ་དང་། ཉོན་མོངས་པ་དང་བྲལ་བ་དང་། རིམས་དང་བྲལ་བ་དང་། སྒྲིབ་པ་མེད་པ་དང་། སྡིག་པ་དང་བྲལ་བར་འགྱུར་རོ། །དེ་དག་ཕྱིས་ལུས་ལ་ཚོར་བའི་ནད་འབྱུང་བར་མི་འགྱུར་རོ། །རྟག་ཏུ་བདེ་བས་ཚིམ་པའི་ལུས་སུ་འགྱུར་རོ། །ས་ཡོངས་སུ་སྦྱོང་བའི་རིག་སྔགས་སོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཨ་མོ་གྷ་དྲུ་མ། ལ་ཏ་བྲྀ་ཀྵ། ཤ་ཁ་པ་ཏྲ་པུཥྤ་ཕ་ལ། བ་ཊི་པ་ཨཱ་རོ་ཧ་ན་ཧི་ཌཱ་ག །པུཤྐ་རི་ཎ། ཨུ་ཏ་ས་ཧྲྀ་ད། སུན་ད་ར་པྲ་སྲ་བ་ཎི། བི་བི་དྷ། བི་ཙི་ཏྲ། པ་རི་ཤོ་དྷ་ཡ། པདྨ་བྷུ་ཛེ། ས་མ་ས་མ། ས་མནྟེ་ན། པ་རི་མཎྜལ། པ་རི་ཤོ་དྷ་ཡ། མ་ལ་མ་ལ། བི་མ་ལ་བི་མ་ལ། ནི་རྨ་ལ་སུ་པ་རི་ཤུད་དྷ། པདྨ་ཨུཏྤ་ལི་བྷ་ཛ་ལ་མ་ལཱ་ན་བི་ཤུད་དྷ། ཤོ་དྷ་ཡ་ཤོ་དྷ་ཡ། པ་ར་མ་མ་ཧཱ་ཤུད་དྷཱ་ཡ་ས་ཏྭཱ་ཧཱུྃ་ཕཊ། ན་མོ་ཏྲི་བྷུ་བ་ནེ་ཧཱུྃ་ཕཊ་སྭཱ་ཧཱ། འདིས་ཙནྡན་དང་། པདྨ་དང་། ཆུ་དང་ཡུངས་ཀར་ལ་ཡོངས་སུ་བཟླས་ཏེ། ལྗོན་པའི་

---

^{[མ་དཔེ་གཟིགས་ན་འདིར་གནོན།]}

སྡོང་པོ་དང་། མེ་ཏོག་གི་ཤིང་དང་། འབྲས་བུའི་ཤིང་དང་། སྣ་ཚོགས་པའི་ལྕུག་མ་དང་། རྩྭ་དང་། ཤིང་གེལ་བ་དང་། སྨན་དང་། ཆུ་ཀླུང་དང་། མཚོ་བྲན་དང་། ལྟེང་ཀ་དང་། རྫིང་བུ་དང་། འབབ་ཆུ་མཛེས་པའི་སྟེང་དུ་གཏོར་བར་བྱ་སྟེ། དེ་རྣམས་ཐམས་ཅད་ལ་བདུད་རྩི་བླུག་པར་འགྱུར་རོ། །དེ་རྣམས་ཐམས་ཅད་ལ་ལྷ་རྫས་ཀྱི་མེ་ཏོག་དང་འབྲས་བུར་འགྱུར་རོ། །ཐ་ན་ལྷའི་རྩྭ་དང་། ཤིང་གེལ་བ་དང་། སྨན་དང་ནགས་ཀྱི་བདག་པོར་འགྱུར་རོ། །གང་ལ་རེག་པ་ཙམ་གྱིས་རེག་པ་དེ་ཐམས་ཅད་སེར་སྣའི་དྲི་མ་དང་བྲལ་ཞིང་། ཕྲག་དོག་སྤངས་པར་འགྱུར་རོ། །མཁྲིས་པ་དང་། བད་ཀན་དང་། མཆིལ་མ་དང་བྲལ་ཞིང་། ལུས་ཀྱི་ཕྱི་དང་ནང་གི་དྲི་མི་ཞིམ་པ་ཐམས་ཅད་ཡོངས་སུ་དག་པར་འགྱུར་རོ། །གང་ཡང་ལུས་ཀྱི་ནང་གི་ནད་དང་། གནོད་པ་སྣ་ཚོགས་པ་དེ་ཐམས་ཅད་ཡོངས་སུ་གྲོལ་བར་འགྱུར་ཞིང་། རྣམ་པར་དག་པ་དང་། རྣམ་པར་ཉམས་པ་དང་། ལེགས་པར་ཡོངས་སུ་དག་པ་དང། དྲི་མ་མེད་པར་འགྱུར་རོ་ཞེས་སོ། །དེ་ལ་ཆུས་ཁྲུས་བྱས་པ་གང་ཡིན་པ་དེ་རྣམས་ཀྱང་ལྷའི་ཆུ་དང་། བྱང་ཆུབ་ཀྱི་ཡན་ལག་གི་ཆུས་ཁྲུས་བྱས་པར་འགྱུར་རོ། །སྡིག་པ་དང་སྒྲིབ་པའི་དྲི་མ་ཐམས་ཅད་བཀྲུས་པར་འགྱུར་རོ། །ཡན་ལག་བརྒྱད་དང་ལྡན་པའི་ཆུས་བཀྲུས་པར་འགྱུར་རོ། །དེས་སོ་ཤིང་ཟོས་པ་གང་ཡིན་པ་དེ་རྣམས་ཀྱང་སངས་རྒྱས་ཀྱི་ཡེ་ཤེས་རྗེས་སུ་དྲན་པ་ཆེན་པོ་འཕེལ་བར་འགྱུར་རོ། །མྱ་ངན་ཐམས་ཅད་དང་བྲལ་བར་འགྱུར་ཞིང་ཞགས་པ་ཐམས་ཅད་ཡོངས་སུ་སྤངས་པ་དང་། རྟག་ཏུ་ཁ་ནས་ཨུཏྤ་ལའི་དྲི་བྲོ་བར་འགྱུར་རོ། །ངག་འཇམ་ཞིང་སྙན་པར་ཡང་འགྱུར་ཞིང་ངག་མཉེན་པར་ཡང་འགྱུར་རོ། །དགའ་བའི་གཏམ་བྱེད་པར་འགྱུར་ཞིང་། སྐྱེ་བོ་ཐམས་ཅད་ཡིད་དགའ་བར་ཡང་འགྱུར་རོ། །མིའམ་ཅིའི་དབྱངས་སུ་ཡང་འགྱུར་རོ། །བསྟན་བཅོས་དང་། ཆོ་ག་ཞིབ་མོ་དང་། གསང་སྔགས་དང་། ཐེག་པ་ཆེན་པོ་ཐམས་ཅད་ཐོས་པ་ཙམ་གྱིས་ཀུན་ཏུ་འཛིན་པར་བྱེད་ཅིང་ཁ་ཏོན་དུ་ཡང་གནས་པར་བྱེད་དོ། །མེ་ཏོག་དེ་ལ་མནམས་པ་དང་། ཕྲེང་བ་མགུལ་པར་འཆིང་བར་བྱེད་པ་གང་ཡིན་པ་དེ་རྣམས་ཀྱང་བྱང་ཆུབ་ཡན་ལག་གི་མེ་ཏོག་གི་ཕྲེང་བ་བཅིངས་

---

^{[མ་དཔེ་གཟིགས་ན་འདིར་གནོན།]}

པར་འགྱུར་རོ། །དེ་བཞིན་གཤེགས་པའི་དབང་གིས་མངོན་པར་དབང་བསྐུར་བར་ཡང་འགྱུར་རོ། །སྣ་ཚོགས་སུ་དག་པར་ཡང་འགྱུར་ཏེ། ལྷའི་དྲི་དང་། རེག་པ་དང་། ཡང་དག་པར་ལྡན་པར་འགྱུར་རོ། །ལྕེ་པདྨའི་འདབ་མ་དང་མཚུངས་པར་ཡོངས་སུ་དག་པར་འགྱུར་རོ། །ལྷའི་སོ་དང་མཚུངས་པའི་ཁ་དོག་ཏུ་འགྱུར། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་གང་ལ་གཏམ་སྨྲས་པ་དེ་རྟག་ཏུ་དབང་དུ་འགྱུར་རོ། །ཤི་འཕོས་ཤིང་སྐྱེ་བ་བརྗེས་ནས་བདེ་བ་ཅན་གྱིས་འཇིག་རྟེན་གྱི་ཁམས་སུ་སྐྱེ་བར་འགྱུར་ཏེ། པདྨ་ལས་རྫུས་ཏེ་སྐྱེ་བར་འགྱུར་རོ། །ཚེ་རབས་དྲན་པར་ཡང་འགྱུར་རོ་ཞེས་པའོ། །འབྲས་བུ་དང་། མེ་ཏོག་དང་། ཆུ་དང་། ནགས་ཀྱི་བདག་པོ་དང་། རྩྭ་དང་། ཤིང་གེལ་པ་དང་། སྨན་ཡོངས་སུ་སྦྱོང་བའི་སྔགས་སོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཨ་མོ་གྷ་ཨ་མ་ལེ་ཏྲི་མ་ལེ། བི་མ་ལེ། ནི་རྨ་ལེ། དི་བྱ་པ་རི་ཤུདྡྷེ་སརྦྦ་མ་ལོ་པ་ཀརྵི་ཏེ། མ་ཧཱ་བོ་དྷི་ས་ཏྭ་བ་ར་དེ་པྲ་བ་ར་པ་རི་ཤུདྡྷེ། མ་ཧཱ་མ་ཎི་རཏྟ་ཀཱ་ཡ་པ་རི་ཤུདྡྷེ་མ་ཎི་མ་ཎི་ཤོ་དྷ་ནི་མ་ཧཱ་ཨ་མོ་གྷ་ཙིནྟཱ་མ་ཎི་ཤུདྡྷེ། ཧྲྀ་ད་ཡ་ཤུདྡྷེ། ཀཱ་ཡ་ནི་རྨ་ལ་མ་ཧཱ་མ་ཎི་པ་རི་ཤུདྡྷེ། ཧུ་རུ་ཧུ་རུ་པྲ་བ་ར་པཱ་ཎི་མ་ཧཱ་བྷུ་ཛ་བ་ར་དེ། ཏུ་རུ་ཏུ་རུ། མ་ཧཱ་ས་ཏྭ་བ་ཏ་ས་ལེ་པ་རི་ཤོ་དྷ་ཡ་མཱཾ་སརྦ་པཱ་སུ་བི་ཤུདྡྷ་མ་ལེ་སྭཱ་ཧཱ། རིག་སྔགས་འདིས་རིག་སྔགས་འཆང་གི་བདག་ཉིད་ཀྱི་ལུས་ཡོངས་སུ་སྦྱང་བར་བྱ་སྟེ། ཙནྡན་གྱི་ཆུ་དང་། གུར་གུམ་པ་དང་། གླ་རྩིའི་ཆུ་དང་། ག་པུར་གྱི་ཆུ་དང་། ཡུངས་ཀར་དང་བ་བྱུང་ལྔ་བསྲེས་པས། རྫ་གསར་པའི་བུམ་པ་བཀང་སྟེ་རིག་སྔགས་འདི་སྟོང་རྩ་བརྒྱད་བཟླས་པར་བྱའོ། །རས་དཀར་པོས་བཀྲུ་བར་བྱ་ཞིང་ལན་བདུན་དུ་བཏུང་བར་བྱའོ། །ཁྲུས་བྱས་པ་ཙམ་གྱི་མོད་ལ་ཁྲོ་བོའི་རྒྱལ་པོས་བདག་ཉིད་དབང་བཀུར་བར་བྱའོ། །ཁྲུས་བྱས་པ་ཙམ་དང་། དབང་བསྐུར་བ་ཙམ་གྱིས་བདག་རང་གི་ཕྱི་ནང་ཡོངས་སུ་དག་ཅིང་དྲི་མ་མེད་པར་འགྱུར་རོ། །སྡིག་པ་དང་། སྒྲིབ་པ་དང་། དུག་དང་བྲལ་བར་འགྱུར་རོ། །ཉོན་མོངས་

---

^{[མ་དཔེ་གཟིགས་ན་འདིར་གནོན།]}

པ་དང་ནད་དང་བྲལ་བར་འགྱུར་རོ། །རྒ་བ་ལ་སོགས་པ་དང་བྲལ་བར་འགྱུར་རོ། །བགེགས་དང་། ལོག་འདྲེན་དང་། བདུད་ལ་སོགས་པ་ཐམས་ཅད་ལས་ཡོངས་སུ་ཐར་བར་འགྱུར་རོ། །གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་ལ་སོགས་པ་ཐམས་ཅད་ཡོངས་སུ་སྤངས་པར་འགྱུར་ཞིང་བར་ཆད་བྱ་བའི་ཕྱིར་རིག་སྔགས་འཆང་བའི་དྲུང་དུ་སླར་འོང་ནུས་པར་མི་འགྱུར་རོ། །རིག་སྔགས་འཆང་བདེ་བར་སྒྲུབ་པ་དང་། བདེ་བར་ཉལ་བ་དང་། བདེ་བར་སད་པ་དང་། ནམ་འཚོའི་བར་དུ་བདེ་བར་གནས་པ་དང་། དྲི་མ་ཐམས་ཅད་སྤང་བ་དང་། དེ་བཞིན་གཤེགས་པ་ཐམས་ཅད་མཐོང་བ་དང་། བྱང་ཆུབ་སེམས་དཔའ་མཐོང་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་སྟེ་ཤི་བའི་དུས་བྱེད་པར་འགྱུར་རོ། །བདེ་བ་ཅན་གྱི་འཇིག་རྟེན་གྱི་ཁམས་སུ་སྐལ་བ་མཉམ་པར་སྐྱེ་བར་འགྱུར་རོ། །པདྨོའི་ནང་ནས་རྫུས་ཏེ་སྐྱེས་ནས་དེ་བཞིན་གཤེགས་པ་འོད་དཔག་མེད་མངོན་སུམ་དུ་མཐོང་བར་འགྱུར་རོ། །རྒྱན་ཐམས་ཅད་ཀྱིས་བརྒྱན་པ་དང་། ལུས་མཚན་དང་དཔེ་བྱད་ཀྱིས་བརྒྱན་པ་དང་། ཚེ་རབས་དྲན་པར་འགྱུར་རོ། །མཐར་བྱང་ཆུབ་ལ་ཐུག་གི་བར་དུ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་རོ། །རྣམ་པར་གྲོལ་བའི་དཀྱིལ་འཁོར་དོན་ཡོད་པའི་ཞགས་པའི་སྙིང་པོ་ཆོ་ག་ཞིབ་མོ་འདི་མཐའ་དག་རྫོགས་པར་ཁ་ཏོན་བྱེད་པར་འགྱུར་རོ། །གཞན་ཡང་དེ་བཞིན་གཤེགས་པས་བཀའ་སྩལ་པའི་མདོ་སྡེ་གཞུང་སྣ་ཚོགས་རྣམ་པ་དུ་མ་ཁ་ཏོན་བྱེད་པར་འགྱུར་རོ། །བསྐལ་པ་སྟོང་ཕྲག་བརྒྱ་ཚུན་ཆད་དུ་སྐྱེ་བ་དྲན་པར་འགྱུར་རོ། །ཨོཾ་ཨ་མོ་གྷ་པདྨ། བི་མ་ལེ། པྲ་ས་ར། ས་མནྟ། མུ་ཁེ་སྭཱ་ཧཱ། དཀྱིལ་འཁོར་ཆར་ཕྱེ་སྟེ་ཐིག་གདབ་པའི་སྔགས་སོ། །ཨོཾ་ཨ་མོ་གྷ་བི་བི་དྷི། རཱུ་པ་བི་ཙི་ཏྲ། གན་དྷ་ར་སན་དྷ་ར། པྲ་བ་ར། བྷུ་ཛེ་སཱ་ཧཱ། ཚོན་རྩིའི་སྔགས་དང་། སྐུ་གཟུགས་གཞག་པ་དང་། མཚོན་ཆའི་རྟགས་བྲི་བའི་སྔགས་སོ། །ཨོཾ་ཨ་མོ་གྷ་ས་མནྟ་པ་རི་མཎྜ་ལ། བཱ་ཤ་བནྡྡེ་ཧཱུྃ། ཡུངས་ཀར་ལ་ལན་བདུན་བཟླས་བརྗོད་བྱས་པས་དཀྱིལ་འཁོར་བསྡམ་པར་བྱའོ། །ཨོཾ་ཨ་མོ་གྷ། ས་མནྟ། ད་ཤ་དིག་མ་ཧཱ་སཱི་

---

^{[མ་དཔེ་གཟིགས་ན་འདིར་གནོན།]}

མན། བན་དྷ་ཡ། དྷུ་རུ་དྷུ་རུ། ཧཱུྃ་ཕཊ་སྭཱ་ཧཱ། ཡུངས་ཀར་དང་ཆུ་ལ་ལན་བདུན་བཟླས་བརྗོད་བྱས་པས་མཚམས་གཅད་པའོ། །ཨོཾ་ཨ་མོ་གྷ་རཀྵ་ཎ། པཱ་ཤ་ཧ་སྟེ། བྷུ་རུ་བྷུ་རུ་སྭཱ་ཧཱ། ཡུངས་ཀར་དང་དྲི་ཆབ་ལ་ལན་བདུན་བཟླས་བརྗོད་བྱས་པས་བདག་བསྲུང་བའོ། །ཨོཾ་ཨ་མོ་གྷ་ཙཱུ་ཌ་མ་ཎི། ཧཱུ་རུ་ཧཱུ་རུ། ནཱ་ག་བཱ་ཤ་བ་ན་དྷེ་ཧཱུྃ་སྭཱ་ཧཱ། ལན་ཉི་ཤུ་རྩ་གཅིག་བཟླས་བརྗོད་བྱས་པས་སྤྱི་གཙུག་བཅིང་བའི་སྔགས་སོ། །ཨོཾ་ཨ་མོ་གྷ་རཀྵ། ས་མནྟེ་ན། མ་ཧཱ་པཱ་ཤེ །དྷུ་རུ་དྷུ་རུ་སྭཱ་ཧཱ། སློབ་མ་དང་གྲོགས་རྣམས་བསྲུང་བ་སྟེ་ཡུངས་ཀར་དང་། ཐལ་བ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་བསྲུང་བར་བྱའོ། །ཨོཾ་ཨ་མོ་གྷ། ཛ་ལ་བི་མ་ལེ། སུ་རུ་སུ་རུ་སྭཱ་ཧཱ། དྲི་ཆུ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་པས་ཁྲུས་བྱ་བའི་སྔགས་སོ། །ཨོཾ་ཨ་མོ་གྷ་ཨ་མྲྀ་ཏ་བིན་དུ་ཙ་ར་ཙ་ར་སྭཱ་ཧཱ། ཉེ་རེག་བྱ་བའི་སྔགས་སོ། །ཨོཾ་ཨ་མོ་གྷ་དི་པྱ་བ་སྟྲེ་ཙུ་རུ་ཙུ་རུ་སྭཱ་ཧཱ། གོས་ཀྱི་སྔགས་སོ། །ཨོཾ་ཨ་མོ་གྷ་བྷུ་ཛ་ཀ །ཀ་བ་ཙ། བ་ར་དེ། ཙི་རི་ཙི་རི་སྭཱ་ཧཱ། གོ་ཆའི་སྔགས་ཡིན་ཏེ་ཡུངས་ཀར་དང་གུར་གུམ་གྱི་ཆུས་བྱའོ། །ཨོཾ་ཨ་མོ་གྷ་བྲཧྨ་བྷུ་ཛ་པཱ་རྱ་ན་ཏེ་ན་པྲ་ས་ར་སྭཱ་ཧཱ། མཆོད་ཕྱིར་ཐོགས་ཀྱི་སྔགས་སོ། །ཨོཾ་ཨ་མོ་གྷ་ཙཱུ་ཌཱ་མ་ཎི་པདྨེ། ཨ་བྷི་ཥིཉྩ་ཡ། མ་མ་སརྦ་ཏ་ཐཱ་ག་ཏ་ཨ་བྷི་ཥེ་ཀ་མ་ཎི་མ་ཎི་སྭཱ་ཧཱ། དབང་བསྐུར་བའི་སྔགས་སོ། །ཨོཾ་ཨ་མོ་གྷ་པདྨ་བ་སུན་དྷ་ར། དྷ་ར་དྷ་ར། དྷ་ར་ཎི། མཎྜེ་ཧཱུྃ། སྟན་གྱི་གསང་སྔགས་སོ། །ཨོཾ་ཨ་མོ་གྷ་ས་མནྟ་པརྱ་ང་ཀེ །བྷུ་བི་སྭཱ་ཧཱ། སྐྱིལ་མོ་ཀྲུང་བཅའ་བའི་སྔགས་སོ། །ཨོཾ་ཨ་མོ་གྷ་སུ་ར་དྷི། པདྨ་པ་ར་པ་ར་ཧཱུྃ། མེ་ཏོག་གི་སྔགས་སོ། །ཨོཾ་ཨ་མོ་གྷ་བི་བི་དྷ། གནྡྷ། པྲ་ས་རེ། པཱུ་རྞ་བྷུ་ཛེ་སྭཱ་ཧཱ། དྲིའི་སྔགས་སོ། །ཨོཾ་ཨ་མོ་གྷ་བི་བི་དྷ་ལེ་པ་ན་པྲ་བ་རེ་པི་རི་པི་རི་སྭཱ་ཧཱ། བྱུག་པའི་སྔགས་སོ། །ཨོཾ་ཨ་མོ་གྷ་ག་གན་སྥར་ཎ། མ་ཡཻ་བྷུ་རུ་བྷུ་རུ་ཧཱུྃ། བདུག་པའི་སྔགས་སོ། །ཨོཾ་ཨ་མོ་གྷ་ཤུ་ཀླ་ས་ར་ས་ར་ས་ཨ་གྲ་དྷ་ར་བི་དྷ་ར་ཧཱུྃ། གཏོར་མའི་སྔགས་ཏེ་ཐམས་ཅད་དུ་བྱའོ། །ཨོཾ་ཨ་མོ་གྷ་པྲ་བ་ར། ནུ་པི་ལོ་ཀི་ནི། ཀི་རི་ཀི་རི་ཧཱུྃ། ཟས་དང་གཏོར་མའི་སྔགས་སོ། ཨོཾ་བི་བི་དྷ། ཨ་མོ་གྷ། ཕ་ལ། པ་ར་པ་ར་ཧཱུྃ། འབྲས་བུའི་སྔགས་

---

^{[མ་དཔེ་གཟིགས་ན་འདིར་གནོན།]}

སོ། །ཨོཾ་ཨ་མོ་གྷ་ཨ་ད་བྷུ་ཏ་གྷ་ན་དྷ་བ་རེ་ཧཱུྃ། མཆོད་ཡོན་གྱི་སྔགས་སོ། །ཨོཾ་ཨ་མོ་གྷ། བི་བི་དྷ། མ་ཎི། བྷཱུ་ཥ་ཎ། བ་རེ། ཛྭ་ལ་ཛྭ་ལ་ཧཱུྃ། རྒྱན་དང་། ཐོད་དང་། དར་དཔྱང་བ་དང་། མདའ་དང་། ཚོན་སྣ་ལྔ་དང་། ཐིག་སྐུད་ཀྱི་སྔགས་སོ། །ཨོཾ་ཨ་མོ་གྷ། བི་བི་བྷ། བྷཱ་ཛ་ནི། ཛ་ཡ་ཛ་ཡ་སྭཱ་ཧཱ། སྣོད་ཀྱི་སྔགས་ཏེ་ཐམས་ཅད་དུ་སྦྱར་རོ། །ཨོཾ་ཨ་མོ་གྷ་པྲ་བ་ར་བྷ་བ་ན་བྷུ་བེ་ཐ་ར་ཐ་ར་སྭཱ་ཧཱ། གཞུག་པའི་སྔགས་སོ། །ཨོཾ་ཨ་མོ་གྷ་ན་མ་སྐ་ར་ཎ། སརྦ་ཏ་ཐཱ་ག་ཏ། ཨོཾ་ཛ་ལེ་ཧཱུྃ། ཕྱག་འཚལ་བ་དང་ཐལ་མོ་སྦྱར་བའི་སྔགས་སོ། །ཨོཾ་ཨ་མོ་གྷ་ཙཀྲེ་དུ་རུ་དུ་རུ་པྲ་དུ་རུ་སྭཱ་ཧཱ། བསྐོར་བའི་སྔགས་སོ། །ཨོཾ་ཨ་མོ་གྷ་ས་མནྟ་བྷ་བ་ནེ་བྷ་བ་བྷ་བ་སྭཱ་ཧཱ། སྤྱན་དྲང་བའི་སྔགས་སོ། །ཨོཾ་ཨ་མོ་གྷ་ཙིནྟ་མ་ཎི་ཨ་ཀཪྵ་ཡ་དུ་རུ་དུ་རུ་སྭཱ་ཧཱ། གསོལ་བ་གདབ་པའི་སྔགས་སོ། །ཨོཾ་ཨ་མོ་གྷ་ནི་རྨནྟྲ་ཎ་བི་མོ་ཀྵ་མཎྜ་ལེ་མི་ལི་མི་ལི་སྭཱ་ཧཱ། སྙན་གསན་དབབ་པའི་སྔགས་སོ། །ཨོཾ་ཨ་མོ་གྷ་མ་ཧཱ་རཤྨི་ཛྭ་ལ་ས་ཧ་སྲ་ཛྭ་ལ་ཛྭ་ལ་ས་མནྟི་སྭཱ་ཧཱ། མ་ར་མེའི་སྔགས་སོ། །ཨོཾ་ཨ་མོ་གྷ་པྭ་པཱ་ཤ་ཧ་སྟེ་པྲ་ས་ར་གཙྪ་སྦ་བྷཱ་བ་ནཾ་བི་ས་རྫི་ཏོ་སི་ས་ར་ས་ར་ཧཱུྃ་ཕཊ་སྭཱ་ཧཱ། སླར་གཤེགས་སུ་གསོལ་བའི་སྔགས་སོ། །ཨོཾ་ཨ་མོ་གྷ་པཱ་ཤ་བ་ན་དྷ་ས་མནྟ་མ་ཧཱ་ས་མ་ཡ་དྲྀ་ཌྷེ་ཧཱུྃ་ཕཊ་སྭཱ་ཧཱ། དམ་ཚིག་གི་སྔགས་སོ། །ཨོཾ་ཨ་མོ་གྷ་ས་མནྟེ། པྲ་བ་ར། ས་ར་ས་ར། པྲ་ས་ར་མ་ཧཱ་ད་བྷུ་ཏེ་ཤྭ་ར། དྷི་རི་དྷི་རི་ཧཱུྃ་ཧཱུྃ་ཕཊ་སྭཱ་ཧཱ། གསང་སྔགས་འདིས་ལ་དུ་དང་། མོ་ད་ཀ་ར་དང་། ཟན་དང་། རྩ་བ་དང་། སྡོང་བུ་དང་། གཏོར་མ་དཀར་པོ་དང་། ཚོགས་ཆེན་པོའི་བདག་པོའི་གཏོར་མ་སྦྱིན་པ་དང་། མེ་ཏོག་དང་། བདུག་པའི་སྦྱིན་པ་བྱས་ན་ཕྱིས་བགེགས་བྱེད་ནུས་པར་མི་འགྱུར་རོ། །འཇིག་རྟེན་འདས་པའི་དཀྱིལ་འཁོར་གྱི། །ཕྱག་རྒྱ་དེ་ནས་བརྗོད་བྱ་སྟེ། །གང་གིས་གཟུང་བ་ཙམ་གྱིས་ནི། །སྡིག་པ་ཐམས་ཅད་ཞི་བར་འགྱུར། །ལས་དང་ཉོན་མོངས་སྒྲིབ་པ་དང་། །དུག་རྣམས་ཐམས་ཅད་རྣམ་པར་བཅོམ། རྣམ་གྲོལ་དཀྱིལ་འཁོར་རིགས་ཀྱི་ནི། །དམ་ཚིག་ཕྱག་རྒྱ་ཡང་དག་ཡིན། །ལག་གཉིས་པདྨ་འདྲར་བྱས་ལ། །སོར་མོ་རྣམས་ནི་མཉམ་གཞག་སྟེ། །གུང་མོ་ལྕགས་ཀྱུ་འདྲ་བར་བྱ། །ལག་གཉིས་མཉམ་པར་གཞག་པ་ཡི། །ཕྱག་རྒྱ་རྣམ་གྲོལ་དམ་ཚིག་འདི། །དོན་ཡོད་ཞགས་པར་བྱིན་གྱིས་

---

^{[མ་དཔེ་གཟིགས་ན་འདིར་གནོན།]}

བརླབས། །འཇིག་རྟེན་འདས་པ་ཁྱད་པར་གྱི། །ལམ་གྱི་འབྲས་བུ་ཐོབ་པར་བྱེད། །ཨོཾ་པདྨ་བྷུ་ཛེ་པདྨ་བི་མ་ལེ་སྭཱ་ཧཱ། དམ་ཚིག་རྩེ་མོའི་རྩེ་ཤེས་པས། །རྡོ་རྗེ་པདྨ་རྟག་ཏུ་བྱ། །གུང་མོ་ཅུང་ཟད་བསྐུམས་ནས་ནི། །ལག་གཉིས་པདྨོ་འདྲ་བར་བྱ། །གང་གིས་ཕྱག་རྒྱ་འདི་མཐོང་བ། །འཇིག་རྟེན་རྣམས་ཀྱི་དབང་ཕྱུག་དག །མཚུངས་པ་མེད་པར་འགྱུར་བ་ཡིན། །རྣམ་གྲོལ་ཕྱག་རྒྱས་དོགས་མེད་པར། །སངས་རྒྱས་མཚུངས་མེད་འགྱུར་བ་ཡིན། །བྱང་ཆུབ་སེམས་དཔའ་ཀུན་གྱིས་ནི། །ཕྱག་བྱས་པ་ཡི་ཕྱག་རྒྱ་འདི། །རྣམ་གྲོལ་དཀྱིལ་འཁོར་རྨད་དུ་བྱུང་། །ཨོཾ་པདྨེ་སུང་པདྨེ་བི་མོ་ཀྵ་མཎྜ་ལ། པདྨ་བྷུ་ཛེ་སྭཱ་ཧཱ། རྡོ་རྗེ་བཅིང་བ་མཉམ་གཞག་སྟེ། །རྡོ་རྗེ་པདྨོ་གུང་མོ་ནི། །བསྐུམས་ན་དེ་བཞིན་གཤེགས་ཀུན་གྱི། །རྣམ་གྲོལ་གསུང་བའི་ཕྱག་རྒྱ་འདི། །ཡང་དག་གྲོལ་བར་རབ་ཏུ་བསྟན། །ཕྱག་རྒྱ་འདི་ནི་བསྟན་པས་ནི། །ངན་པར་བྱས་པ་ཐམས་ཅད་འཇིག །ཨོཾ་ཨ་མོ་གྷ་བཛྲ་པདྨ་བྷུ་ཛེ་མི་ལི་མི་ལི་སྭཱ་ཧཱ། ལག་གཉིས་ཐལ་མོ་ཁོང་སྟོང་ལས། །མདོར་ན་ནོར་བུ་འདྲ་བར་བཅིང་། །ནོར་བུའི་ཕྱག་རྒྱ་རྡོ་རྗེ་འདྲ། །ཡིད་བཞིན་ནོར་བུར་བརྗོད་པ་ཡིན། །ལས་ནི་དོན་ཡོད་ཐམས་ཅད་བྱེད། །དོན་ཡོད་མཆོད་པའི་ཆར་འབེབས་ཤིང་། །དོན་ཡོད་ཕ་རོལ་ཕྱིན་དྲུག་རྫོགས། །དོན་ཡོད་སངས་རྒྱས་རྣམས་དང་ནི། །བྱང་ཆུབ་སེམས་དཔའ་མཐོང་བ་ཡིན། །དོན་ཡོད་རྣམ་གྲོལ་དཀྱིལ་འཁོར་གསང་། །མཚམས་མེད་ལྔ་པོ་སྦྱོང་བར་མཛད། །ཨོཾ་ཨ་མོ་གྷ་མ་ཎི་མ་ཎི། མ་ཧཱ་མ་ཎི་པདྨ་མ་ཎི་སྭཱ་ཧཱ། རྡོ་རྗེ་པདྨའི་ཐལ་མོ་སྦྱར། །པདྨ་ཁ་བྱེ་འདྲ་བར་རྒྱས། །གུང་མོ་ལྕགས་ཀྱུ་འདྲ་བ་ཡི། །ཕྱག་རྒྱ་འདི་ནི་མཆོག་ཏུ་བཟང་། །ཕྱག་རྒྱ་འདི་ནི་མཐོང་ཙམ་གྱིས། །འབྲས་བུ་ཆེན་པོ་རྨད་དུ་བྱུང་། །འཇིག་རྟེན་འདས་པ་ཁྱད་པར་འཕགས། །དུས་གསུམ་སངས་རྒྱས་མཐོང་བ་ཡིན། །ཨོཾ་ཨ་མོ་གྷ། བཛྲེ་མ་ཧཱ་པདྨེ། ཛ་ལེ་སུ་ཛ་ལེ་ལ་མ་ཧཱ་ཛ་ལེ་སྭཱ་ཧཱ། སྙིང་གར་རྡོ་རྗེ་པདྨ་ཉིད། །རྡོ་རྗེ་བཅིང་བ་ཕུན་སུམ་ཚོགས། །མཛུབ་མོ་ལྕགས་ཀྱུ་འདྲ་བ་ནི། །བཅིང་བར་བྱ་བ་ཕྱག་རྒྱ་འདི། །གཟི་བརྗིད་ཆེན་པོ་དག་དང་ནི། །སྟོབས་ཆེན་ཕ་རོལ་གནོན་པ་དང་། །ཐམས་ཅད་གྲུབ་པར་བྱེད་པའི་གནས། །ཐམས་ཅད་གྲུབ་པར་རབ་ཏུ་

---

^{[མ་དཔེ་གཟིགས་ན་འདིར་གནོན།]}

སྦྱིན། །འཇིག་རྟེན་འདས་པ་གྲུབ་པ་ཆེ། །སངས་རྒྱས་ཉིད་ཕྱིར་བླ་ན་མེད། །སྡིག་པ་ཐམས་ཅད་འཕྲོག་པ་གྲུབ། །གསང་སྔགས་གྲུབ་པ་བླ་ན་མེད། །ཨོཾ་ཨ་མོ་གྷ་སིད་དྷི། སརྦ་ཏ་ཐཱ་ག་ཏ་སིད་དྷི། ཨ་བ་ལོ་ཀཱ་ཡ་སིད་དྷི། །མ་ཧཱ་བི་བུ་ལ་སིད་དྷི། ཀུ་རུ་ཀུ་རུ་སྭཱ་ཧཱ། རྡོ་རྗེ་ཐལ་མོ་མཉམ་བཞག་སྟེ། །གུང་མོ་གཤིབས་ཏེ་བསྒྲེང་བ་དང་། །སྲིན་ལག་མཐེ་བོ་སོ་སོར་འགྱེད། །གུང་མོ་ཡིད་ཙམ་དགུག་ཕྱ་བ། །པདྨའི་དབང་ཕྱུག་སེམས་དཔའ་ཆེ། །འཇིག་རྟེན་དབང་ཕྱུག་བླ་མ་སྟེ། །རྟག་ཏུ་རྣམ་གྲོལ་དཀྱིལ་འཁོར་ནི། །བྱང་ཆུབ་སེམས་དཔའ་ཐམས་ཅད་ཀྱིས། །ཕྱག་རྒྱ་བྱས་པ་འདི་ཡིན་ནོ། །ཕྱག་རྒྱ་འདི་དང་དོན་ཡོད་པའི་ཞགས་པའི་སྙིང་པོའི་ཕྱག་རྒྱ་དང་། ཕྱག་རྒྱ་དེ་དག་མཐོང་བ་ནི་འཇིག་རྟེན་དབང་ཕྱུག་མཐོང་བ་དང་འདྲ་བ་ཡིན་ནོ། །ཕྱག་རྒྱ་མཆོག་འདི་མཐོང་བ་ནི་རྣམ་པར་གྲོལ་བའི་དཀྱིལ་འཁོར་མཐོང་བ་དང་འདྲ་བ་ཡིན་ཏེ། ཕྱིར་མི་ལྡོག་པ་ཐོབ་པར་འགྱུར་རོ། །ཕྱག་རྒྱ་འདི་བཅིངས་པ་ཙམ་མཐོང་བའི་མོད་ལ་དམ་ཚིག་ཐམས་ཅད་ཤེས་པར་འགྱུར་རོ། །མཐོང་བ་དང་གཟུང་བ་ཙམ་གྱི་མོད་ལ་འབྲས་བུ་ཆེན་པོ་འཐོབ་ཅིང་མོད་ལ་སངས་རྒྱས་དང་བྱང་ཆུབ་བླ་ན་མེད་པ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་བ་ལོ་ཀི་ཏ་མ་ཧཱ་ཤུད་དྷ་ས་ཏྭ་ས་ར་ས་ར། ས་མནྟ། ཨ་བ་བྷཱ་ས། ཀུཎྜ་ལ། དྷ་ལ། ཨ་མི་ཏཱ་བྷ། མ་ཀུ་ཊ་དྷ་ར། ཛ་ཊ་མ་ཀུ་ཊ། ན་བ་བཛྲེནྡྲ། མཎྜི་ཏ། ཙ་ར་ཙ་ར། སམྦྷ་ར། བྷུ་བ་ནེ་ཤྭ་ར་པདྨ་བྷུ་ཛེ་སྭཱ་ཧཱ། ཕྱག་རྒྱ་ཆེན་པོ་བདུན་པོ་དེ་དག་ནི་འཇིག་རྟེན་ལས་འདས་པའི་བྱང་ཆུབ་སྙིང་པོའི་ལམ་གྱི་འབྲས་བུ་སྟོན་པ། རྟག་ཏུ་འཇིག་རྟེན་དབང་ཕྱུག་བླ་མ། འཇིག་རྟེན་མགོན་པོའི་ཆོས་ཀྱི་འཁོར་ལོ་བསྐོར་བ་ཡིན་ནོ། །ཕྱག་རྒྱ་བདུན་ནི་ཕྱག་རྒྱ་ཆེན་པོ་བྱེ་བ་ཕྲག་བདུན་གྱིས་ཡོངས་སུ་བསྐོར་བ་ཡིན་ཏེ། ཕྱག་རྒྱ་ཆེན་པོ་བདུན་པོ་དེ་གང་དུ་བཅིངས་ཤིང་ཕྱག་རྒྱ་མཆོག་གཟུང་བ་ནི་ཕྱག་རྒྱ་ཆེན་པོ་བྱེ་བ་ཕྲག་བརྒྱ་བཅིངས་བར་འགྱུར་རོ། །གཟུང་བར་འགྱུར་རོ། །དེ་དག་ཐམས་ཅད་མཆོད་པ་དང་། བསྙེན་བཀུར་བྱས་པར་འགྱུར་རོ། །བསྟོད་པར་འགྱུར་རོ། །

---

^{[མ་དཔེ་གཟིགས་ན་འདིར་གནོན།]}

མིང་འཛིན་པ་བྱས་པར་འགྱུར་རོ། །ཕྱག་རྒྱ་བདུན་པོ་དེ་དག་ནི་གསང་སྔགས་སྒྲུབ་པ་ཐམས་ཅད་དང་། ཀུན་དུ་ལས་ཐམས་ཅད་ལ་སྦྱར་བར་བྱའོ། །ལས་ཐམས་ཅད་བྱེད་པའི་ཕྱག་རྒྱ་འཇིག་རྟེན་ལས་འདས་པའི་ལམ་བླ་ན་མེད་པ་ཡིན་ནོ། །གང་ཞིག་ཕྱག་རྒྱ་དེ་དག་བཅིངས་པ་མཐོང་ཞིང་ཁྲུས་ལེགས་པར་བྱས་ཏེ། གཙང་མས་སྒྲུབ་པར་བྱེད་པ་འདི་ནི་ངན་འགྲོར་འགྲོ་བར་མི་འགྱུར། སྔོན་གྱི་སྒྲིབ་པས་དམྱལ་བ་མཐོང་བར་མི་འགྱུར། །ཕྱག་རྒྱ་བཅིངས་པ་ཙམ་གྱི་མོད་ལ་ཡང་དག་པར་རྫོགས་པའི་སངས་རྒྱས་བྱེ་བ་ཁྲག་ཁྲིག་འབུམ་ཕྲག་བདུན་གྱི་དྲུང་དུ་དགེ་བའི་རྩ་བ་བསགས་པར་འགྱུར་རོ། །བསོད་ནམས་ཀྱི་ཕུང་པོ་ཆེན་པོ་ཀུན་དུ་གཟུང་བར་འགྱུར་རོ། །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ས་བཅུ་ལ་རབ་ཏུ་གནས་པར་འགྱུར་རོ། །ཕྱིར་མི་ལྡོག་པའི་གནས་རབ་ཏུ་ཐོབ་པར་འགྱུར་རོ། །མཚམས་མེད་པ་ལྔ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་བ་འདེབས་པ་དང་། མནར་མེད་པ་ལ་གཞོལ་བ་རྣམས་ཀྱིས་ཇི་སྟེ་ཕྱག་རྒྱ་གཟུང་བ་ཙམ་དང་། བསྟན་པ་ཙམ་གྱི་མོད་ལ་སྡིག་པ་དེ་དག་ཐམས་ཅད་རྣམ་པར་ཞིག་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཡོངས་སུ་གཟུང་བར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་ལ་སོགས་པ་རྣམས་ལས་ལེགས་པར་བསྲུངས་པར་འགྱུར་རོ། །དབང་ཕྱུག་དང་དབང་ཕྱུག་ཆེན་པོ་དང་། རྒྱལ་པོ་ཆེན་པོ་བཞི་དང་། གཤིན་རྗེ་དང་། ཆུ་ལྷ་དང་། ལུས་ངན་དང་། གཞོན་ནུ་རྣམས་རྟག་ཏུ་རྒྱུན་མི་འཆད་པར་བསྲུང་བ་དང་། བསྐྱབ་པ་དང་། སྦ་བའི་ཕྱིར་རྒྱུན་དུ་རྗེས་སུ་འབྲང་བ་བྱེད་པར་འགྱུར་རོ། །སེམས་ཅན་ཐམས་ཅད་དགའ་བ་མཐོང་བར་འགྱུར་རོ། །མཆོད་རྟེན་དུ་གྱུར་པ་ཡིན་པར་འདོད་པ་དང་། ལུས་རིང་བསྲེལ་གྱི་སྙིང་པོ་ཡིན་པར་འགྱུར་རོ། །རྡོ་རྗེ་ལྟར་མཁྲེགས་པའི་ལུས་སུ་འགྱུར་རོ། །དུག་གིས་མི་ཚུགས། མེས་མ་ཡིན། མཚོན་གྱིས་མ་ཡིན། ཆུས་མ་ཡིན། དབྱིག་དུག་གི་འཇིགས་པས་མ་ཡིན། སེང་གེས་མ་ཡིན། གཅན་གཟན་གཏུམ་པོས་མ་ཡིན། དུག་མི་བཟད་པས་མ་ཡིན། རྐུན་པོ་དང་། མི་རྒོད་ཀྱིས་མ་ཡིན། ཁྱིམ་རྡིབ་པས་

---

^{[མ་དཔེ་གཟིགས་ན་འདིར་གནོན།]}

མ་ཡིན། གནོད་སྦྱིན་དང་། སྲིན་པོའི་གདོན་ཡང་འོང་བར་མི་འགྱུར་རོ། །ནད་ཐམས་ཅད་འཇུག་པར་མི་འགྱུར། ལུས་ལ་དུག་སྦྱར་མ་དང་། བྱད་དང་སྦོད་གཏོང་གི་འཇིགས་པ་འབྱུང་བར་མི་འགྱུར་རོ། །རྟག་ཏུ་སྡིག་པ་ཅན་གྱི་རྨི་ལམ་མཐོང་བར་མི་འགྱུར་རོ། །རྟག་ཏུ་དེ་བཞིན་གཤེགས་པ་ལྟ་བ་མཐོང་བར་འགྱུར་རོ། །བྱང་ཆུབ་སེམས་ལྟ་བ་མཐོང་བར་འགྱུར་རོ། །རྟག་ཏུ་འཕགས་པ་སྤྱན་རས་གཟིགས་དབང་ཕྱུག་མཐོང་སྟེ། རྟག་ཏུ་མཆོག་སྦྱིན་པ་མཛད་པར་འགྱུར་རོ། །ལྷ་ཐམས་ཅད་ཀྱང་རྟག་ཏུ་རྒྱུན་མི་འཆད་པར་འདིས་མཐོང་བར་དགྱེས་པར་འགྱུར་རོ། །རྟག་ཏུ་ཡོན་ཏན་དང་བསོད་ནམས་འབར་རོ། །དཔལ་གྱིས་ལུས་ལ་ཤིན་ཏུ་འབར་བའི་ལུས་སུ་འགྱུར་རོ། །ཐམས་ཅད་དུ་འདི་མཆོད་པར་འོས་པ་ཆེན་པོར་འགྱུར་ཏེ། རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། བཙུན་མོའི་འཁོར་གྱིས་མཆོད་པར་འོས་པ་ཆེན་པོར་འགྱུར་རོ། །ལྷའི་གནས་སུམ་ཅུ་རྩ་གཉིས་ཀྱི་བར་དུ་ཡང་དགྱེས་པར་འགྱུར་ཏེ། མཆོད་པར་བྱེད་དོ། །ལྷ་རྣམས་ཀྱི་དབང་པོ་བརྒྱ་བྱིན་ལྷའི་བདག་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་དང་། ལུས་ངན་པོ་དང་། གཞོན་ནུ་དང་། དྲང་སྲོང་གི་ཚོགས་རྣམས་ཀྱིས་མཆོད་པར་འོས་པ་ཆེན་པོར་འགྱུར་རོ། །སེམས་ཅན་ཐམས་ཅད་ཀྱང་རྟག་ཏུ་དེ་མཐོང་བར་འདོད་པར་འགྱུར་རོ། །རྟག་ཏུ་དགྱེས་པར་སྟོན་པ་བཞེད་པར་འགྱུར་རོ། །རིག་སྔགས་འཆང་བས་ཁྲུས་བྱས་གོས་གཙང་མ་བགོས་ཏེ་གཙང་མར་བྱས་ལ་དྲི་སྣ་ཚོགས་ཀྱིས་ལུས་བསྐུ་བ་དང་། བདུག་པ་སྣ་ཚོགས་ཀྱིས་བདུག་པ་བྱས་ལ། ཙནྡན་དཀར་པོ་དང་། གུར་གུམ་གྱིས་ལག་པ་གཉིས་བསྐུས་ཏེ། ག་པུར་དང་། གླ་རྩིས་བསྒོས་པའི་ས་ཕྱོགས་གཙང་མར་རས་ཀྱི་སྐུ་གཟུགས་ཀྱི་སྤྱན་སྔ་འམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔའམ། །འཕགས་པ་སྤྱན་རས་གཟིགས་དབང་ཕྱུག་གི་སྐུ་གཟུགས་ཀྱི་སྤྱན་སྔར་སྐྱིལ་མོ་ཀྲུང་བཅས་ཏེ་འདུག་ནས་ཕྱག་རྒྱ་འདི་བཅིང་བར་བྱའོ། །མཆོད་རྟེན་རིང་བསྲེལ་ཅན་གྱི་དྲུང་དུ་ཕྱག་རྒྱ་བཅིང་བར་བྱའོ། །སངས་རྒྱས་ལ་མཆོད་པའི་ཚོགས་ཡོན་ཆབ་ལ་སོགས་པ་དབུལ་བར་བྱའོ། །བྱམས་

---

^{[མ་དཔེ་གཟིགས་ན་འདིར་གནོན།]}

པ་དང་སྙིང་རྗེའི་སེམས་སུ་བྱའོ། །སེམས་ཅན་ཐམས་ཅད་ལ་ལྷག་པར་བརྩེ་བ་དང་། སྙིང་རྗེའི་སེམས་བསྒོམ་པར་བྱའོ། །སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་ཤེས་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་ཡིད་ལ་དྲན་པར་བྱའོ། །སངས་རྒྱས་ཡིད་ལ་བྱེད་པ་དྲན་པ་བསྒོམ་པར་བྱ་སྟེ། ཕྱག་རྒྱ་ཆེན་པོ་བདུན་པོ་དེ་དག་བཅིང་བ་བྱས་ན་ཕྱག་རྒྱ་བྱེ་བ་ཕྲག་བདུན་བཅིངས་པར་འགྱུར་རོ། །དེ་ནས་མཐུ་བརྗོད་པར་བྱའོ། །མཐུ་ནི་འཇིག་རྟེན་ལས་འདས་པ་ཡང་དག་པར་མཐོང་བ་དང་། དོན་ཡོད་པའི་ཞགས་པའི་ཆོ་འཕྲུལ་དང་། རང་བཞིན་གྱི་སྐུ་མངོན་དུ་མཐོང་བ་ཡིན་ནོ། །རྒྱལ་པོའམ། བཙུན་མོའི་ནང་དུའམ། སྐྱེ་བོ་མང་པོའི་ནང་དུ་ཚོགས་པ་དང་། དགེ་སློང་གི་ཚོགས་ཀྱི་དགེ་འདུན་གྱི་ནང་དུའམ། འཁོར་དུ་བཅད་པའི་ནང་དུའམ། རིག་བྱེད་བཞི་ཚོགས་པ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། རྗེའུ་རིགས་དང་། དམངས་རིགས་དང་བཅས་པ་དེ་དག་གི་ནང་དུ་དེ་དག་དོན་ཡོད་པའི་ཞགས་པའི་ཆོ་འཕྲུལ་འཇིག་རྟེན་ལས་འདས་པ་མོད་ལ་མངོན་དུ་མཐོང་བ་དང་། འདས་པའམ། མ་འོངས་པ་དང་། ད་ལྟར་བྱུང་བའི་འཆི་བ་དང་། སྐྱེ་བ་དང་། སྐྱེས་ནས་ཡང་དག་པར་དགེ་བ་དང་། མི་དགེ་བའི་འབྲས་བུ་དང་། དགེ་བ་དང་མི་དགེ་བས་ཤི་བ་དང་། སྐྱེས་ནས་ཕྱུག་པོའམ། དབུལ་པོའམ། རྒྱལ་པོ་ཐོབ་པའམ། ལྷའི་ལོངས་སྤྱོད་དང་། ལྷའི་གནས་སུམ་ཅུ་རྩ་གཉིས་དང་། བརྒྱ་བྱིན་དང་། ཚངས་པ་དང་། ཁྱབ་འཇུག་དང་། རྟག་ཏུ་དབང་ཕྱུག་ཆེན་པོར་འགྱུར་བ་དང་། ཀླུའི་སྐྱེ་གནས་དང་། ཡི་དགས་དང་། གནོད་སྦྱིན་དང་། སྲིན་པོ་གསང་བ་པ་རྣམས་ཀྱིས་དམྱལ་བ་མི་བཟད་པར་སྐྱེ་བ་དང་། མཚམས་མེད་པ་ལ་ཐུག་གི་བར་དུ་མཐོང་བ་དང་། བྲམ་ཟེའི་རིགས་སམ། རྒྱལ་རིགས་སམ་གཞན་ཡང་རིགས་དུ་མ་སྣ་ཚོགས་པར་སྐྱེ་བར་མཐོང་བ་དག་འཇིག་རྟེན་མགོན་པོའི་མཐུས་མངོན་སུམ་དུ་མཐོང་བར་འགྱུར་རོ། །འཇིག་རྟེན་པའི་ལས་བསྒྲུབ་པར་བྱ་བ་དེ་དག་ཐམས་ཅད་བསྟན་པར་བྱ་སྟེ། རྒྱལ་བ་དང་། རྣམ་པར་རྒྱལ་བ་དང་། བདེ་བ་དང་། ལོ་ལེགས་པ་དང་། མི་ངས་

---

^{[མ་དཔེ་གཟིགས་ན་འདིར་གནོན།]}

དང་། ཡམས་ཀྱི་ནད་དང་། ཕ་རོལ་གྱི་འཁོར་རམ། རང་གི་འཁོར་ལ་གནོད་པ་དང་། དགྲ་དང་། ཕྱིར་རྒོལ་བ་དང་། འགྱེད་པ་དང་། གཡུལ་སྤྲོད་པ་དང་། ཚེ་རིང་བ་དང་། ཚེ་ཐུང་བ་དང་། ནད་འབྱུང་བ་དང་། ནད་མེད་པ་དང་། ཆར་འབབ་པ་དང་། ཤིན་ཏུ་ཆར་འབབ་པ་དང་། ཆར་མི་འབབ་པ་དང་། དུས་མ་ཡིན་པར་འབབ་པ་དང་། དར་བ་དང་། རྒུད་པ་དང་། འབྱོར་པ་དང་། མི་འབྱོར་པ་དང་། འོང་བ་དང་། འགྲོ་བ་དང་། ནོར་དང་། འབྲུ་རྙེད་པ་དང་། འཕེལ་བ་དང་། འབྲི་བ་དང་།ལོ་ཉེས་པ་མཐོང་བ་དང་། འཁོར་བ་ན་ད་ལྟར་གྱི་ལས་གང་ཅུང་ཟད་ལེགས་པར་བྱེད་པ་དང་། ཉེས་པར་བྱེད་པ་དང་། དགེ་བའམ། མི་དགེ་བའམ། འབྲི་བའམ། འཕེལ་བའམ། སྐྱེ་བ་ལེགས་པར་སྐྱེ་བའམ། ངན་པར་སྐྱེ་བ་དང་། བུ་འབྱུང་བ། བུ་ཕོའམ། བུ་མོའམ། བུ་བཟང་པོའམ། བུ་ངན་པའམ། བསོད་ནམས་ཅན་ནམ། བསོད་ནམས་མེད་པ་མངལ་ན་གནས་པ་དེ་དག་བདེན་པ་ཉིད་དུ་མཐོང་སྟེ། ལས་ཀྱི་ཆོ་ག་ལེགས་པར་བྱས་པས་ཐེ་ཚོམ་མི་བྱའོ། །ཚེས་གྲངས་དང་། རྒྱུ་སྐར་དང་། ཉིན་མཚན་བརྗོད་པར་བྱ་མི་དགོས་ཀྱི་བཟླས་བརྗོད་དང་། གཏོར་མ་དང་། གཙང་སྦྲ་དང་། བཀྲུ་བཤལ་དང་། ཤིན་ཏུ་ཁྲུས་བྱ་བ་དང་། གོས་གཙང་མ་བཅང་བ་དང་། བདེན་པར་སྨྲ་བ་དང་། བྱམས་པའི་སེམས་དང་། བླ་མ་ལ་ལེགས་པར་མཉན་པ་དེ་གཟུང་བ་ཁོ་ནར་བྱའོ། །ཟས་དང་། སྐོམ་གཙང་མ་དང་། ཆང་དང་། ཤ་དང་། བེག་བཙོང་དང་། སྒོག་སྐྱ་དང་། ཀེའུ་དང་། འདྲེས་པར་བྱས་པའི་འདྲེས་པའི་ཟས་ཡོངས་སུ་སྤང་བ་དང་། ཤིན་ཏུ་སྤགས་པ་དང་། དེ་དག་ནི་ཁྱད་པར་འདོད་པས་ཡོངས་སུ་སྤང་བར་བྱས་ན་ལས་འདི་ནི་མོད་ལ་ཐམས་ཅད་མངོན་དུ་མཐོང་བར་འགྱུར་རོ། །དཀའ་ཐུབ་སྤྱོད་པ་ལ་བརྙས་སེམས་མི་བྱ། མ་གུས་པ་མི་བྱའི་ལྐོག་ཏུའང་མི་བྱའོ། །རྗེས་སུ་བསྟན་པ་དེ་དག་ནི་མཆོག་ཡིན་ནོ། །བསྒྲུབ་པར་བྱ་བ་མཆོག་དེ་དག་ནི་འཇིག་རྟེན་དབང་ཕྱུག་མགོན་པོས་བཀའ་སྩལ་པ་ཡིན་ནོ། །དངུལ་ལས་མེ་ལོང་ཆུ་ཞེང་དུ་སོར་བཅུ་དྲུག་པ་བྱས་ལ་ཟངས་ལས་པདྨོའི་གདན་ཁྲུ་གང་གི་ཚད་སྡོང་བུ་དང་བཅས་པར་བྱའོ། །མེ་ལོང་གི་གོང་དུ་དངུལ་ལམ། གསེར་ལས་

---

^{[མ་དཔེ་གཟིགས་ན་འདིར་གནོན།]}

འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པ་བྱ་སྟེ་ཚད་སོར་བཞི་པ། གདན་པདྨོ་ཕྱག་བཞི་ལ་མདུང་རྩེག་སུམ་པ་དང་། ཞགས་པ་དང་། པདྨ་དང་། ནོར་བུའི་རིན་པོ་ཆེ་ཐོགས་པར་བྱ་བ་ནི་འཇོག་སྦྱོང་ལེགས་པར་བྱས་པ། འཇམ་པོ་འོད་ཕྱིན་པ་ཙམ་དུ་སྦྱང་བར་བྱའོ། །དེ་ནས་རིག་སྔགས་འཆང་བས་མེ་ལོང་གི་གོང་གི་འཇིག་རྟེན་དབང་ཕྱུག་གི་སྐུ་ལ་རིང་བསྲེལ་གཞག་པར་བྱའོ། །ག་པུར་དང་། གླ་རྩིས་སྐུ་ལ་མཆོད་པར་བྱའོ། །མེ་ལོང་གི་ཉེ་འཁོར་ཐོག་ཐག་ཏུ་དངུལ་གྱི་མེ་ཏོག་དང་། གསེར་གྱི་མེ་ཏོག་རིན་པོ་ཆེ་སྣ་ཚོགས་ཀྱིས་སྤྲས་པའི་ཕྲེང་བ་གདགས་པར་བྱའོ། །དབང་བསྐུར་བའི་དར་གདགས་པར་བྱའོ། །དེ་ནས་རིག་སྔགས་འཆང་བས་མེ་ལོང་དེ་ལ་ཉི་མ་རེ་རེ་ཞིང་དུས་གསུམ་དུ་དོན་ཡོད་པའི་ཞགས་པའི་སྙིང་པོ་བརྒྱ་རྩ་བརྒྱད་བཟླས་བརྗོད་བྱ་སྟེ། ཇི་ཙམ་བརྒྱ་སྟོང་ཚང་གི་བར་དུ་བྱའོ། །ཁྲོ་བོའི་རྒྱལ་པོས་དབང་བསྐུར་བར་བྱའོ། །དེ་ནས་མེ་ལོང་འབར་བར་འགྱུར་རོ། །གཅིག་ཁོ་ནར་ཁ་དོག་སྣ་ཚོགས་པར་འབར་བར་འགྱུར་རོ། །འཇིག་རྟེན་དབང་ཕྱུག་གི་སྐུ་གཟུགས་དེ་ལས་ལྷ་རྫས་ཀྱི་ཆུ་འཛག་གོ། །འོད་ཟེར་སྣ་ཚོགས་འབྱུང་ངོ་། །དེ་ནས་རིག་སྔགས་འཆང་བའི་ལུས་འབར་ཞིང་དགའ་བར་འགྱུར་རོ། །དོན་ཡོད་པར་དགའ་བ་དྲི་མ་མེད་པ་ཞེས་བྱ་བ་དོན་ཡོད་པའི་ཞགས་པའི་སྙིང་པོ་ཆོ་ག་ཞིབ་མོ་གྲུབ་པ་འཐོབ་པར་འགྱུར་རོ། །ལུས་ཤིན་ཏུ་དྲི་མ་མེད་ཅིང་ཡོངས་སུ་དག་པར་འགྱུར་རོ། །དེ་ནས་རིག་སྔགས་འཆང་བས་འཇིག་རྟེན་ཐམས་ཅད་ཀྱི་མངོན་སུམ་དོན་ཡོད་པའི་ཞགས་པ་རྣམ་པར་འཕྲུལ་པ་འགྲུབ་པ་བསྟན་པར་བྱ་དགོས་པས། དེ་ནས་རིག་སྔགས་འཆང་བས་ས་དང་བའི་ལྕི་བ་བསྲེས་པའི་དཀྱིལ་འཁོར་རྒྱར་ཁྲུ་བཞི་འཕང་དུ་ཁྲུ་དོ་པ་བྱས་ལ་ཤིན་ཏུ་མཁྲེགས་པ་ཤིན་ཏུ་འཇོམ་པར་བྱའོ། །ཐིག་སྐུད་ཀྱིས་རྣམ་པར་ཕྱེ་སྟེ། ཚོན་སྣ་ཚོགས་རྣམ་པར་དབྱེ་ཞིང་སྒོ་བཞི་རྣམ་པར་ཕྱེ་ནས་དཀྱིལ་འཁོར་གྱི་སྒོ་རྣམ་པར་ཕྱེ་སྟེ། པདྨ་འདབ་མ་བརྒྱད་ཚོན་གྱིས་གསལ་བར་བྲི་ཞིང་པདྨའི་དཀྱིལ་དུ་གེ་སར་དང་ཟེ་བ་བྱའོ། །སྟེགས་བུ་གྲུ་བཞི་ལ་རིན་པོ་ཆེ་སྣ་ཚོགས་ཀྱིས་བརྒྱན་པ་དང་། སྟེགས་བུ་གྲྭ་བཞིར་རྒྱལ་པོ་ཆེན་པོ་བཞི་གོ་ཆ་བགོས་པ་གཏུམ་པ་འཇིགས་པར་བྱེད་པའི་གཟུགས་བྲི་བར་

---

^{[མ་དཔེ་གཟིགས་ན་འདིར་གནོན།]}

བྱའོ། །སྟེགས་བུའི་དབུས་ཀྱི་གནས་པར་བར་དུ་ལྷ་དབང་ཕྱུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་དང་། གཞོན་ནུ་དང་། ལུས་ངན་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། ལྷ་དབང་ཕྱུག་དང་། ཕྱག་ན་རྡོ་རྗེ་དང་།རལ་པ་གཅིག་པ་དང་། སྒྲོལ་མ་དང་། དཀར་མོ་དང་། ཁྲོ་གཉེར་མ་དང་། རྡོ་རྗེ་ཕོ་ཉ་མོ་རྣམས་ཚོན་སྣ་ཚོགས་ཀྱིས་བྲི་ཞིང་རྒྱན་ཐམས་ཅད་ཀྱིས་བརྒྱན་པ། མེ་ཏོག་སྣ་ཚོགས་ཐོགས་པ་བྱའོ། །སྟེགས་བུའི་ཕྱི་རོལ་དུ་མདུང་རྩེ་གསུམ་པའི་ཕྲེང་བ་དང་། རྡོ་རྗེའི་ཕྲེང་བ་དང་། པདྨའི་ཕྲེང་བ་ཀུན་དུ་བྱའོ། །ཕྲེང་བའི་བར་དབུས་དང་། གྲྭའི་བར་དུ་ལྷ་མོ་བརྒྱད་དང་འཇིགས་བྱེད་མ་དང་། དཔེ་མེད་མ་དང་། བ་སན་ཏི་དང་། དཔལ་སྒྲ་དབྱངས་དང་། སའི་ལྷ་མོ་དང་། དུང་ཅན་མ་དང་། པུས་པ་དན་ཏི་རྣམས་རྒྱན་ཐམས་ཅད་ཀྱིས་བརྒྱན་པ། མེ་ཏོག་སྣ་ཚོགས་དང་རིན་པོ་ཆེའི་སྣོད་ཐོགས་པར་བྱའོ། །ཕྱི་རོལ་ཐོག་ཐག་ཏུ་ཕྲེང་བའི་བར་བར་དུ་དྲི་སྣ་ཚོགས་ཀྱིས་དཀྱིལ་འཁོར་བསྐུ་ཞིང་ཙནྡན་དཀར་པོ་དང་། གུར་གུམ་གྱིས་མཆོད་པ་སྣ་ཚོགས་བྱའོ། །ག་པུར་དང་། གླ་རྩིས་མཆོད་ཅིང་། དཀྱིལ་འཁོར་ཀུན་དུ་དར་སྣ་ཚོན་སྣ་ལྔའི་རྒྱལ་མཚན་དང་། མདའ་དང་། རྟ་བབས་ཀྱིས་བརྒྱན་པར་བྱའོ། །དངུལ་གྱི་སྣོད་བཞི་ཅུང་པེང་གིས་བཀང་སྟེ་གཞག་པར་བྱའོ། །དངུལ་གྱི་སྣོད་བཞི་གཏོར་མ་དཀར་གསུམ་གྱིས་དགང་བར་བྱའོ། །དངུལ་གྱི་སྣོད་བཞིར་མཆོད་ཡོན་གྱི་ཆུ་གཞག་པར་བྱའོ། །སྣོད་བརྒྱད་རོ་སྣ་ཚོགས་ཀྱི་གཏོར་མས་དགང་བར་བྱའོ། །འབྲས་བུ་རྣམ་པ་སྣ་ཚོགས་གཞག་པར་བྱའོ། །ཁ་ཟས་བཟའ་བ་དང་། གཏོར་མ་རྣམ་པ་སྣ་ཚོགས་གཞག་པར་བྱའོ། །དྲི་སྣ་ཚོགས་དང་། བྱུག་པས་དངུལ་གྱི་སྣོད་བཀང་སྟེ་གཞག་པར་བྱའོ། །དངུལ་གྱི་པོག་ཕོར་བརྒྱད་ཙནྡན་དང་། ཨ་ག་རུ་དང་། ཏུ་རུ་སྐ་དང་། ག་པུར་དང་། གླ་རྩི་དང་། གུར་གུམ་དང་། སྲ་རྩི་པོག་དང་། པོག་གིས་གང་བར་བྱ་ཞིང་བདུག་སྤོས་སྣ་ཚོགས་པ་སྲེག་གོ། །དངུལ་དང་། ཟངས་དང་། གསེར་གྱི་མེ་ཏོག་གི་སྙིང་པོའི་དཀྱིལ་འཁོར་དུ་གཅལ་དུ་དགྲམ་མོ། །ཕྱིའི་དཀྱིལ་འཁོར་དུ་ཇི་ལྟར་རྙེད་པའི་མེ་ཏོག་གཙལ་དུ་དགྲམ་པར་བྱ་

---

^{[མ་དཔེ་གཟིགས་ན་འདིར་གནོན།]}

སྟེ། ཕྲེང་བ་རྣམས་ཁོར་ཡུག་ཏུ་བསྐོར་ནས་བཞག་སྟེ། དེ་ལ་ཡང་མེ་ལོང་ལེགས་པར་བརྒྱན་པར་བྱས་ནས། དབུས་ཀྱི་དཀྱིལ་འཁོར་གྱི་པདྨའི་གེ་སར་དང་ཟེའུ་འབྲུ་ལ་ཤར་དུ་ཕྱོགས་པར་གཞག་པར་བྱའོ། །རིག་སྔགས་འཆང་གཙང་མ་ཁྲུས་བྱས་གོས་གཙང་མ་བགོ་བར་བྱ་སྟེ། དཀྱིལ་འཁོར་གྱི་ལས་དང་། བྱ་བ་ཐམས་ཅད་བྱས་ནས་མེ་ལོང་ལ་མངོན་དུ་ཕྱོགས་ཏེ། སྐྱིལ་མོ་ཀྲུང་དུ་འདུག་པར་གྱུར་ནས་འཕགས་པ་དོན་ཡོད་པའི་ཞགས་པའི་སྙིང་པོ་བཟླས་བརྗོད་དབུལ་བར་བྱ་སྟེ། བཟླས་བརྗོད་བརྒྱ་རྩ་བརྒྱད་རྫོགས་པ་དང་། ཁྲོ་བོའི་རྒྱལ་པོས་དབང་བསྐུར་རོ། །དབང་བསྐུར་བ་ཙམ་གྱི་མོད་ལ་འཇིག་རྟེན་ཐམས་ཅད་ཀྱི་མངོན་སུམ་དང་། འཁོར་ཆེན་པོའི་དབུས་སུ་མེ་ལོང་གི་དབུས་དེར་འཕགས་པ་སྤྱན་རས་གཟིགས་དབང་ཕྱུག་རང་གི་གཟུགས་ཀྱིས་མཐོང་སྟེ། མེ་ལོང་གི་དབུས་དེ་ནས་རིག་སྔགས་འཆང་དེ་ལ་ལེགས་སོ་ཞེས་བྱ་བ་སྦྱིན་པར་མཛད་དོ། །རིག་སྔགས་འཆང་ཆེན་པོ་ལེགས་སོ་ལེགས་སོ། །བདག་ལ་དོན་ཡོད་པའི་མེ་ལོང་ལ་འབེབས་པའི་དེ་ཁོ་ན་ཉིད་དམ་པར་གྱུར་པ་འདི་ཐམས་ཅད་ཡང་དག་པར་མཐོང་སྟེ། འཇིག་རྟེན་དང་འཇིག་རྟེན་ལས་འདས་པའི་ལས་ཀྱི་འབྲས་བུ་བླ་ན་མེད་པ་ཞེས་བྱ་བ་ཡོངས་སུ་དག་པ་ཉིད་དོ། །རིག་སྔགས་འཆང་ཁྱོད་ཀྱིས་འབྲས་བུ་ཆེན་པོའི་འཇིག་རྟེན་ལས་འདས་པའི་ལམ་མཚུངས་པ་མེད་པ་ཐོབ་བོ། །ཁྱོད་ཀྱིས་དོན་ཡོད་པའི་ཞགས་པའི་སྙིང་པོའི་འཇིག་རྟེན་དང་འཇིག་རྟེན་ལས་འདས་པའི་སྒྲུབ་པའི་ཆོ་ག་དང་། ཆོ་ག་ཞིབ་མོ་དང་། དཀྱིལ་འཁོར་དང་ཕྱག་རྒྱ་གྲུབ་བོ། །རིག་སྔགས་འཆང་འཇིག་རྟེན་དང་འཇིག་རྟེན་ལས་འདས་པའི་མཆོག་གང་འདོད་པ་སྨྲོས་ཤིག །དེ་ཐམས་ཅད་སྦྱིན་པར་བྱའོ་ཞེས་སོ། །དེ་ནས་རིག་སྔགས་འཆང་གིས་མཆོག་གང་དོན་དུ་གཉེར་བ་དེ་བླངས་ནས་ཐམས་ཅད་འཕྲལ་ཉིད་དུ་སྦྱིན་པར་བྱེད་དོ། །འཁོར་གྱི་དཀྱིལ་འཁོར་གང་ཡིན་པ་དེར། ཀུན་ནས་འོངས་པའི་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། དམངས་རིགས་དང་། རྗེའུ་རིགས་དང་། རྒྱལ་པོ་དང་། བློན་པོ་དང་། བཀྲབས་པ་དང་། མདུན་ན་འདོན་དང་། བཙུན་མོའི་འཁོར་དུ་ཀུན་འོངས་པ་དང་། བསོད་

---

^{[མ་དཔེ་གཟིགས་ན་འདིར་གནོན།]}

ནམས་དང་ལྡན་པའམ། བསོད་ནམས་དང་མི་ལྡན་པའམ། ཡོངས་སུ་དག་པའམ། ལྟ་བ་ངན་པའམ། གཞན་དམྱལ་བ་བའི་སེམས་ཅན་གཏི་མུག་གི་མུན་པ་ལྷུད་བ། མནར་མེད་པ་ལ་གཞོལ་བ། མཚམས་མེད་པ་ལྔ་བྱེད་པ། འཕགས་པ་ལ་སྐུར་པ་འདེབས་པ། དམ་པའི་ཆོས་སྤོང་བ་གང་ཡིན་པ་དེ་རྣམས་ཐམས་ཅད་ལའང་འཕགས་པ་སྤྱན་རས་གཟིགས་དབང་ཕྱུག་གི་ལུས་དེ་ལ་སྟོན་པར་བྱེད། ཐམས་ཅད་དུ་སྨྲ་བར་བྱེད། ཡང་དག་པར་དབུགས་འབྱིན་པར་བྱེད། ཐམས་ཅད་དུ་རང་གི་ལས་ལ་དགེ་བའམ། མི་དགེ་བའི་འབྲས་བུ་རྣམ་པར་སྨིན་པ་དེ་ཐམས་ཅད་སྟོན་པར་བྱེད་དོ། །རིག་སྔགས་ཀྱིས་ཆོམ་རྐུན་དང་། གདོལ་པ་དང་། རིག་སྔགས་སྤོང་ཞིང་ཉམས་པར་བྱེད་པ་དང་། རིག་སྔགས་སུན་འབྱིན་པར་བྱེད་པ་དང་། རིག་སྔགས་ལ་མ་དད་ཅིང་གུས་པས་མི་ཉན་པ་དེའི་མི་མཐོང་བ་ནི་མ་གཏོགས་ཏེ། གཞན་དུ་ན་རང་གི་ལས་ཀྱི་འབྲས་བུ་སྡུག་བསྔལ་རྣམ་པ་སྣ་ཚོགས་ངེས་པར་འབྱུང་བར་མཐོང་ངོ་། །དེ་ནས་སེམས་ཅན་དེ་རྣམས་གང་འདོད་པའི་དོན་ཡིད་ལ་བྱེད་པ་འཇུག་སྟེ། འཇིག་རྟེན་པའམ་འཇིག་རྟེན་ལས་འདས་པ་དེ་ཐམས་ཅད་འཁོར་གྱི་དཀྱིལ་འཁོར་ཆེན་པོ་རུ་རང་རང་གི་འབྲས་བུ་ངེས་པར་འབྱུང་བ་བསོད་ནམས་དང་། བསོད་ནམས་མ་ཡིན་པའི་འབྲས་བུ་མཐོང་བར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་མཐོང་ངོ་། །དེ་བཞིན་གཤེགས་པའི་སྐུ་ཆེན་པོ་དང་། ཁང་པ་བརྩེགས་པ་དང་བཅས་པའི་གཞལ་ཡས་ཁང་མཐོང་ངོ་། །པོ་ཊ་ལ་ཀའི་རི་བོའི་གཞལ་ཡས་ཁང་རྣམས་བཅོམ་ལྡན་འདས་ཀྱི་རྣམ་པར་འཕྲུལ་པ་དང་བཅས་པ་དང་། འཕགས་པ་སྤྱན་རས་གཟིགས་དབང་ཕྱུག་འཁོར་དང་བཅས་པ་གཞལ་ཡས་ཁང་ན་ལྷ་དང་ཀླུས་ཡོངས་སུ་བསྐོར་བ་མཐོང་ངོ་། །གཞན་ཇི་ལྟར་ད་ལྟར་གྱི་དགེ་བ་དང་མི་དགེ་བའམ། ལོ་ལེགས་པ་དང་། ལོ་ཉེས་པའམ། ནད་དང་། འཆི་བ་དང་། ཚེ་ཐུང་བ་དང་། ཚེ་རིང་བ་དང་། རང་གི་དམག་ཚོགས་དང་། ཕ་རོལ་གྱི་དམག་ཚོགས་དང་། གཡུལ་དང་། འཁྲུག་པ་དང་། འཇིགས་པ་དང་། རྒྱལ་བའམ། འཕམ་པའམ། རླག་པའམ། མ་བརླགས་པའམ། ཡམས་དང་། ཆར་ཆེས་པའམ། དུས་མ་ཡིན་པའི་

---

^{[མ་དཔེ་གཟིགས་ན་འདིར་གནོན།]}

ཆར་རམ། ཆར་མེད་པའམ། རླུང་ངམ། སད་དམ། ཚངས་པ་ཡང་རུང་སྟེ་དེ་དག་ཐམས་ཅད་མཐོང་ངོ་། །ནོར་དང་ལྡན་པའམ། ཉམས་པའམ། འཕེལ་བའམ། ལོ་ཐོག་གམ། མེ་ཏོག་གམ། འབྲས་བུ་འཕེལ་བ་ཡང་རུང་སྟེ། དེ་དག་ཐམས་ཅད་མཐོང་ངོ་། །ཆོམ་རྐུན་དང་། རྐུན་པོ་དང་། དུག་དང་། མཚོན་ཆའི་འཇིགས་པའམ། རྒྱལ་པོའི་འཇིགས་པའམ། གནོད་སྦྱིན་དང་། སྲིན་པོ་དང་། འབྱུང་པོ་དང་། མཁའ་འགྲོ་མ་དང་། བརྗེད་བྱེད་ཀྱི་འཇིགས་པ་དེ་ཐམས་ཅད་མཐོང་ངོ་། ནོར་ཆེན་པོའམ། ནོར་མེད་པ་དེ་ཐམས་ཅད་མཐོང་ངོ་། །འཆི་འཕོ་བ་དང་། སྐྱེ་བ་མཐོང་ངོ་། །བུ་ཐོབ་པ་དང་། གྲོང་དང་། གྲོང་ཁྱེར་དང་། ཡུལ་དང་། ལྗོངས་ཐོབ་པ་དང་། བུད་མེད་ཐོབ་པ་དེ་ཐམས་ཅད་མཐོང་སྟེ། འདི་ལ་དོགས་པ་དང་། ཡིད་གཉིས་དང་། ཐེ་ཙོམ་བསྐྱེད་པར་མི་བྱ་ཞིང་། མཆོག་ཏུ་དད་པ་དང་གུས་པས་ཤིན་ཏུ་འབད་དེ་ཆོ་ག་འདི་བསྒྱུར་བར་བྱའོ། །དོན་ཡོད་ཞགས་པའི་རྣམ་པར་ཐར་པའི་དཀྱིལ་འཁོར་དུ་འཇིག་རྟེན་ལས་འདས་པའི་སྒྲུབ་ཐབས་ཀྱི་ཆོ་ག་རྫོགས་སོ།། །།