བཟླས་པའི་དཀྱིལ་འཁོར་ཆེན་པོའི་ཆོ་ག
འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། །བམ་པོ་བཅུ་བདུན་པ། དེ་ནས་རྟག་ཏུ་བཟླས་པའི་དཀྱིལ་འཁོར་གྱི་ཆོ་ག་བཤད་པར་བྱ་སྟེ། དཀྱིལ་འཁོར་གྱི་ཚད་ཇི་ལྟ་བ་བཞིན་དུ། ལེགས་པར་ཕྱེ་བ། གྲུ་བཞི་པ། རྒྱར་གཟིངས་ཀྱི་ཚད་ཀྱིས་ཤིན་ཏུ་རྣམ་པར་ཕྱེ་བ་བྱ་སྟེ། དྲིའི་ཚོན་རྩི་རྣམ་པར་བཀྲ་བ་ཀུན་ནས་པདྨའི་ཕྲེང་བ་དང་། རྡོ་
རྗེའི་གེ་སར་ལ་བརྟེན་པའི་དབུས་སུ་པདྨ་བྱའོ། །རྡོ་རྗེའི་ཐིག་སྐུད་ཀྱིས་ཀུན་ནས་བསྐོར་བའི་དབུས་ཀྱི་པདྨའི་གེ་སར་ལ་འཕགས་པ་སྤྱན་རས་གཟིགས་དབང་ཕྱུག་ཚངས་པའི་ཆ་བྱད་འཛིན་པ་དོག་པར་བྱའོ། །ཉི་མ་རེ་རེ་ཞིང་མེ་ཏོག་དང་བདུག་པ་དབུལ་བར་བྱ་ཞིང་ཉི་མ་རེ་རེ་ཞིང་ཨ་ག་རུའི་བདུག་པ་དང་། ཁྲུས་བྱས་གོས་གཙང་མ་བགོས་ཏེ། དོན་ཡོད་རྒྱལ་པོའི་བཟླས་བརྗོད་དང་། ཕྱག་རྒྱ་བཅིང་བར་བྱའོ། །ཡི་གེ་གཅིག་པའི་སྙིང་པོའི་བཟླས་བརྗོད་ཐུན་གསུམ་དུ་ལན་གསུམ་མམ། ལན་བདུན་ནམ། ལན་ཉི་ཤུ་རྩ་གཅིག་ཏུ་བཟླས་སོ། །ཟས་ངན་པ་བཅུ་ཡོངས་སུ་སྤང་བར་བྱ་ཞིང་། སེམས་ཅན་ངན་པ་ཡང་སྤང་བར་བྱའོ། །སྒྲུབ་ཐབས་ཀྱི་དེ་ཁོ་ན་ཉིད་ལས་ཐམས་ཅད་དུ་འཇིག་རྟེན་པའི་བྱ་བ་ཐམས་ཅད་འགྲུབ་བོ། །འཇིགས་པ་ཆེན་པོ་མི་བཟད་པ་བརྒྱད་པོ་དེ་རྣམས་ལས་གྲོལ་ལོ། །དོན་ཡོད་པའི་རྒྱལ་པོ་དྲན་པས་ནད་ཐམས་ཅད་རྣམ་པར་ཉམས་པར་བྱེད་དོ། །དུག་དང་སྦྱར་དུག་དང་། བྱད་སྟེམས་དང་། གདོན་ཐམས་ཅད་དང་། འཇིགས་པ་དང་། སྡང་བ་དང་། སྐྲག་པ་དང་། རིམས་དང་། ནད་ཐམས་ཅད་དང་། ཕོལ་མིག་དང། ལྷོག་པ་དང་། མཚན་པར་རྡོལ་བ་དང་། གཡན་པ་དང་། རྐང་ཤུ་དང་། མཛེ་དང་། མགོ་བོ་ན་བ་དང་། མིག་ན་བ་དང་། རྣ་བ་ན་བ་དང་། སྣ་ན་བ་དང་། ཁ་ན་བ་དང་། རྐན་ན་བ་དང་། མགུལ་ན་བ་དང་། སྙིང་ན་བ་དང་། ལྟོ་ན་བ་དང་། སོ་དང་མཆུ་ན་བ་དང་། ལག་པ་ན་བ་དང་། རྩིབ་ལོགས་ན་བ་དང་། ཆུ་སོན་བ་དང་། ཕོ་བའི་ནད་དང་། མ་ཞུ་བ་དང་། རྐང་པ་ན་བ་དང་། རྒྱབ་ན་བ་དང་། ཡན་ལག་དང་། ཉིང་ལག་ཐམས་ཅད་ན་བ་དང་། ཚད་པ་དང་། གཞང་ནད་དང། གཅིན་ནད་དང། གསུད་པ་དང་། འཁོགས་པ་ལ་ལན་ཅིག་བརྗོད་དེ་བྱས་པ་ཙམ་གྱིས་ཐམས་ཅད་སེལ་བར་བྱེད་དེ། མྱུར་དུ་རབ་ཏུ་ཞི་བར་བྱེད་ཅིང་སྐད་ཅིག་དེ་ཉིད་ལ་ཡང་ཡང་དག་པར་གནས་པར་བྱེད་དོ། །འཇིག་རྟེན་པའི་བྱ་བ་གཞན་ཐམས་ཅད་འགྲུབ་པར་འགྱུར་རོ། །དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་
རྩ་དགུའི་དགེ་བའི་རྩ་བ་ཉི་མ་རེ་རེ་ཞིང་བསྐྱེད་པར་འགྱུར་རོ། །བསོད་ནམས་ཆེན་པོ་དང་ལྡན་པར་འགྱུར་རོ། །ཚིག་བཙུན་བར་ཡང་འགྱུར་རོ། །འཇིག་རྟེན་ཐམས་ཅད་ཀྱི་བླ་མར་ཡང་འགྱུར་རོ། །མཆོད་པའི་འོས་ཆེན་པོར་འགྱུར་རོ། །དོན་ཆེ་ཞིང་ཆེ་བ་དག་འོང་བར་འགྱུར་རོ། །དབང་ཕྱུག་དང་། དཔོན་པོ་ལྷུན་གྱིས་གྲུབ་པ་ཉིད་དུ་རྙེད་དོ། །རྒྱལ་པོ་དང་། བཙུན་མོའི་འཁོར་དང་། གཡོག་ཏུ་བཅས་པས་གཅིག་ཏུ་མཆོད་པར་འོས་པར་འགྱུར་རོ། །ཉི་མ་རེ་རེ་ཞིང་འཕགས་པ་སྤྱན་རས་གཟིགས་དབང་ཕྱུག་མཐོང་བར་འགྱུར་རོ། །རྟག་ཏུ་ཡང་དེ་བཞིན་གཤེགས་པའི་སྐུ་མཐོང་བ་སོ་སོར་ཐོབ་བོ། །སངས་རྒྱས་ཀྱི་ཞིང་ཡང་དག་པར་བརྒྱན་པ་མཐོང་ངོ་། །ཚེས་བརྒྱད་དང་བཅོ་ལྔ་ལ་པོ་ཊ་ལ་ཀའི་རི་བོའི་གཞལ་མེད་ཁང་འཕགས་པ་སྤྱན་རས་གཟིགས་དབང་ཕྱུག་གི་གནས་ན། འཕགས་པ་སྤྱན་རས་གཟིགས་དབང་ཕྱུག་བཞུགས་ཏེ། འཁོར་ཆེན་པོ་ལ་ཆོས་སྟོན་པར་མཛད་བཞིན་པ་དང་། འོད་དཔག་མེད་བདེ་བ་ཅན་གྱི་གནས་ན་ཞུགས་པ་མཐོང་སྟེ་ཇི་སྲིད་བྱང་ཆུབ་སྙིང་པོའི་བར་དུ་མཐོང་ངོ་། །འཆི་འཕོས་པ་ན་བསམ་པ་ཉིད་ཀྱི་མོད་ལ་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་ཏེ། རྒྱན་ཐམས་ཅད་ཀྱིས་རྣམ་པར་བརྒྱན་པར་པདྨ་ལས་བརྫུས་ཏེ་སྐྱེ་བར་འགྱུར་རོ། །སྒྲིབ་པ་དང་བྲལ་ཞིང་རྣམ་པར་འཕྲུལ་པ་བྱིན་གྱིས་རློབ་པ་དོན་ཡོད་པའི་འོད་ཟེར་ཞེས་བྱ་བའི་ཏིང་ངེ་འཛིན་སོ་སོར་ཐོབ་བོ། །ཏིང་ངེ་འཛིན་གང་ཞིག་ཐོབ་པས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་སྙེད་ལས་འདས་པའི་དེ་བཞིན་གཤེགས་པ་ཐམས་ཅད་ལ་མངོན་པར་ཕྱག་བྱས་ནས། སེ་གོལ་གཏོགས་པ་ཙམ་ཉིད་ལ་སླར་ཡང་འོང་བ་དེ་ལྟ་བུའི་ཏིང་ངེ་འཛིན་སོ་སོར་ཐོབ་བོ། །ཏིང་ངེ་འཛིན་གཞན་ཁྲག་ཁྲིག་བརྒྱ་སྟོང་ཕྲག་སོ་སོར་ཐོབ་ཅིང་། །བཟླས་པའི་ཆོ་ག་གཅིག་པུས་ལས་ཐམས་ཅད་སྒྲུབ་པར་འགྱུར་རོ་ཞེས་སོ། །བཟླས་པའི་དཀྱིལ་འཁོར་ཆེན་པོའི་ཆོ་གའོ།། །།