བདུག་པའི་དཀྱིལ་འཁོར་གྱི་ཆོ་ག
དེ་ནས་བདུག་པ་རིམ་པར་ཕྱེ་བའི་ཆོ་ག་བཤད་པར་བྱ་སྟེ། རིག་སྔགས་འཆང་ཐམས་ཅད་ཀྱི་མཆོག་ཏུ་རྨད་དུ་བྱུང་བ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་མཆོད་པའི་དོན་དང་། དེ་བཞིན་ཉིད་དུ་འཇིག་རྟེན་གསུམ་པོ་ཐམས་ཅད་འགུགས་པ་གྲུབ་པ་དང་། ལྷ་ཐམས་ཅད་སྤྱན་དྲང་བ་དང་། དབང་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་རྣམས་བསྡིགས་པར་བྱེད་པ། གནོད་སྦྱིན་དང་། སྲིན་པོ་དང་། ཤ་ཟ་དང་། གདོན་མ་རུངས་པ་དེ་རྣམས་ཐམས་ཅད་བདུག་པའི་དྲིས་འབྲོས་པར་བྱེད་པར་ཐེ་ཙོམ་མེད་དོ། །བགེགས་དང་ལོག་པར་འདྲེན་པ་ཉིད་དང་། སྡང་བ་དང་། དེ་བཞིན་དུ་བདུད་ཀྱང་རུང་སྟེ། བདུག་པའི་དྲིས་རྣམ་པར་ཞིག་པར་འགྱུར་ཞིང་། ཡན་ལག་དང་ཉིང་ལག་རྣམ་པར་འཐོར་བར་བྱེད་དོ། །རང་གི་དམག་དང་། ཕ་རོལ་གྱི་དམག་ཚོགས་དང་། ཤིན་ཏུ་འགྲས་པ་དང་། ཕྱིར་རྒོལ་བ་དང་། དེ་བཞིན་དུ་དགྲ་བོ་ཉིད་དང་། སྐྱེ་བོ་སྡང་བ་དང་། གང་དུ་འཐབ་པ་དང་། རྩོད་པ་དང་། འགྱེད་པ་དང་། གཡུལ་ཉིད་ཀྱང་བདུག་པའི་དྲིས་ཐམས་ཅད་རབ་ཏུ་ཞི་བར་འགྱུར་བར་ཐེ་ཚོམ་མེད་དོ། །གལ་ཏེ་སྐྱེས་པའམ། བུད་མེད་དམ། ཁྱེའུ་འམ། བུ་མོའམ། དགེ་སྦྱོང་ངམ། བྲམ་ཟེ་ཉིད་དང་། དེ་བཞིན་དུ་དགེ་བསྙེན་དང་། དགེ་བསྙེན་མ་དང་། དགེ་སློང་དང་། དགེ་སློང་མ་དང་། རྒྱལ་པོ་འམ། རྒྱལ་ཕྲན་དང་། དེ་བཞིན་དུ་རྒྱལ་མོ་དང་། བཙུན་མོའི་འཁོར་ཀྱང་རུང་སྟེ། ལེགས་པར་ཁྲུས་བྱས། གོས་གཙང་མ་བགོས་ནས་བདུག་སྤོས་འདིས་བདུགས་ན་གང་གིས་
བདུགས་པའི་དྲི་མནམས་པ་དང་། དེ་ལུས་ལ་རེག་པ་ཙམ་གྱིས་སྡིག་པ་ཐམས་ཅད་ལས་རྣམ་པར་གྲོལ་ལོ། །སྒྲིབ་པ་ཐམས་ཅད་རྣམ་པར་དག་པའི་བདག་ཉིད་ཐོབ་པར་འགྱུར་ཏེ། འདི་ལ་ཐེ་ཚོམ་མེད་དོ། །མཚམས་མེད་པ་ལྔའི་སྡིག་པ་རྣམས་འཕྲལ་དུ་ཐམས་ཅད་རྣམ་པར་དག་པར་འགྱུར་རོ་ཞེས་སོ། །བདུག་པ་འདི་ཙམ་གྱིས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དྲིས་ཀུན་ཏུ་འགེངས་ཏེ། སུམ་ཅུ་རྩ་གསུམ་པའི་ལྷའི་གནས་ནས་ཇི་སྲིད་ཚངས་པའི་འཇིག་རྟེན་གྱི་བར་དྲིས་ཀུན་ཏུ་འགེངས་སོ། །སྟོབས་དང་ཤུགས་ཆེན་པོས་ལྷའི་གནས་ཐམས་ཅད་འགུལ་བར་བྱེད་ཅིང་སྐྱོད་པར་བྱེད་དོ། །ཆུ་རྒྱུན་གྱི་ཀླུ་རྣམས་འགུལ་བར་བྱེད་ཅིང་། རི་རབ་ལས་གཞན་པའི་རི་གང་ཡིན་པ་འདར་ཡེད་ཡེད་བྱེད་དོ། །གསང་བར་གནས་པ་རྣམས་རྣམ་པར་སྐྲག་པར་བྱེད་དོ། །དམྱལ་བ་བཅུ་དྲུག་གི་འཇིགས་པ་རྣམས་རྣམ་པར་ཞིག་པར་བྱེད་དོ། །དེ་བཞིན་དུ། སའི་མཐའི་ཐམས་ཅད་ཀྱང་དཀར་བསིལ་དུ་སྣང་བར་འགྱུར་རོ། །དམྱལ་བ་པའི་སེམས་ཅན་རྣམས་ཤིན་ཏུ་སྦྱངས་པ་དང་། སྡུག་བསྔལ་མི་བཟད་པ་དེ་རྣམས་ཐམས་ཅད་ཡོངས་སུ་གྲོལ་ཏེ། བདེ་བ་ཅན་དུ་ཡང་འགྲོའོ། །མཐོ་རིས་ཐམས་ཅད་དུ་ཇི་ལྟ་བ་བཞིན་དུ་གནས་སོ། །དམྱལ་བ་ཐམས་ཅད་ཉམས་ཏེ། པདྨ་ཅན་དུ་རབ་ཏུ་འགྱུར་རོ། །ཉི་ཚེ་བའི་དམྱལ་བ་རྣམ་པ་སྣ་ཚོགས་པ་གཞན་རྣམས་དང་། ས་འོག་གི་ནང་དུ་སོང་བ་གང་ཡིན་པ་དང་། དགོན་པ་དང་། རི་དང་། ཚང་ཚིང་དང་། དགོན་དུང་དང་། གཡང་སར་གནས་པའི་དམྱལ་བའི་སྡུག་བསྔལ་མྱོང་བ་གང་ཡིན་པ་དེ་རྣམས་ཐམས་ཅད་བདུག་པའི་དྲིས་ཡོངས་སུ་གྲོལ་ལོ། །མི་གཙང་བ་ཟ་བའི་གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་གང་ཡིན་པ་རྣམས་དང་། བཤང་བ་དང་། གཅི་བ་ཟ་བ་གང་ཡིན་པ་རྣམས་དང་། མཆིལ་མ་དང་། སྣབས་ཟ་བ་གང་ཡིན་པ་རྣམས་དང་། འདྲེས་པ་ཟ་བ་གང་ཡིན་པ་དེ་རྣམས་ཐམས་ཅད་བདུག་པའི་དྲི་མནམས་པ་ཙམ་གྱིས་ཡོངས་སུ་གྲོལ་ནས་འཕྲལ་ཉིད་དུ་ལྷའི་འཇིག་རྟེན་དུ་སྐྱེའོ། །རྣམ་པ་སྣ་ཚོགས་པའི་རོ་བྲོ་བའི་མཆོག་དང་།
དྲི་ཞིམ་པོའི་ཁ་ཟས་རྙེད་པར་འགྱུར་རོ། །དུད་འགྲོའི་སྐྱེ་གནས་སུ་སོང་བའི་སྲོག་ཆགས་རི་དགས་དང་། བྱ་རྣམས་ཐམས་ཅད་དྲིལ་མནམས་པ་ཙམ་གྱིས་ནད་ཐམས་ཅད་ལས་ཡོངས་སུ་གྲོལ་ལོ། །བདུག་པ་མནམས་པ་ཙམ་འདིས་ནད་ཐམས་ཅད་ལས་ཡོངས་སུ་གྲོལ་ལོ། །རིམས་ཐམས་ཅད་ལས་ཡོངས་སུ་གྲོལ་ལོ། །ན་བ་ཐམས་ཅད་ལས་ཡོངས་སུ་གྲོལ་ལོ། །འབྲས་དང་། ཕོལ་མིག་དང་། ལྷོག་པ་དང་། མེ་དབལ་དང་། ཤུ་བ་དང་། མཛེ་དང་། གཡན་པ་དང་། མིག་ན་བ་དང་། མགོ་བོ་ན་བ་དང་། གཞོགས་ཕྱེད་ན་བ་དང་། རྣ་བ་ན་བ་དང་། སྣ་ན་བ་དང་། སོ་ན་བ་དང་། ཁ་ན་བ་དང་། སྦ་བ་དང་། འཇིགས་པ་དང་། སྐྲག་པ་དང་། ནད་འགོ་བ་དང་། འཁྲུག་པའི་སྡུག་བསྔལ་ཐམས་ཅད་བདུག་པའི་དྲི་བསྣམས་པ་ཙམ་གྱིས་རབ་ཏུ་ཞི་བར་བྱེད་དོ། །འཕགས་པ་སྤྱན་རས་གཟིགས་དབང་ཕྱུག་དེ་དང་། དོན་ཡོད་པའི་རྒྱལ་པོའི་སྙིང་པོའི་མཐུ་ཡིས་སྡུག་བསྔལ་མྱོང་བར་འགྱུར་བའི་ལས་ཀྱི་སྒྲིབ་པ་ཐམས་ཅད་རྣམ་པར་ཉམས་པར་བྱེད་ཅིང་། རྣམ་པར་གྲོལ་ཏེ་མི་འཇིགས་པའི་གྲོང་དུ་འགྲོ་བར་འགྱུར་རོ། །དེ་ནས་རྫས་རྣམས་ཀྱི་རང་གི་ཆ་ཤས་རྣམ་པར་ཕྱེ་བ་དང་ལྡན་པ་བཤད་པར་བྱ་སྟེ། ཙནྡན་སྲང་གསུམ་དང་། ཨ་ག་རུ་སྲང་གསུམ་དང་། དུ་རུ་སྐ་སྲང་ལྔ་དང་། གུར་གུམ་སྲང་བཅུ་དང་། སྤྲྀ་ཀ་སྲང་གཉིས་དང་། ན་ལན་ད་སྲང་གཉིས་དང་། མ་ཧེའི་མིག་སྲང་ཉི་ཤུ་དང་། སྲ་རྩི་པོ་ག་སྲང་བཅུ་དང་། བོ་ལ་སྲང་གསུམ་དང་། སལླ་ཀཱི་སྲང་བརྒྱད་དང་། རྒྱ་སྤོས་སྲང་གཉིས་དང་། སྤང་སྤོས་སྲང་གཅིག་དང་། ཤཱ་མ་ཀ་སྲང་གཅིག་དང་། གནྡྷ་པ་ཏྲ་སྲང་གཅིག་དང་། པདྨ་གེ་སར་སྲང་གཅིག་དང་། ཤྲིརཱི་མའི་མེ་ཏོག་སྲང་གཅིག་དང་། ལི་ཁ་ར་དཀར་པོ་སྲང་བཅུ་དང་། དྲིའི་པྲི་ཡང་ཀུ་སྲང་གཅིག་དང་། པུ་ཤེལ་ཙི་སྲང་ལྔ་དང་། སྟག་སེན་སྲང་གཅིག་དང་། སུག་སྨེལ་སྲང་གསུམ་དང་། བཱ་ལ་ཀ་སྲང་ལྔ་དང་། གུར་གུམ་དང་། གླ་རྩི་ཚོར་བ་སྟེ། ཐམས་ཅད་ལེགས་པར་རྣམ་པར་དབྱེ་བར་བྱས་ནས། ཕྱེ་མར་བྱས་ལ་མཐར་ཐམས་
ཅད་གཅིག་ཏུ་བསྡོམས་ཏེ། སྦྲང་རྩིས་སྦྲུ་བར་བྱའོ། །ཚེས་བཅོ་ལྔ་ལ། རྒྱུ་སྐར་དང་། ཚེས་གྲངས་ཀྱི་ལྷ་དགེ་བ་ལ། རིག་སྔགས་འཆང་གཙང་མར་གྱུར་པས་གོས་གཙང་མ་བགོས་ཏེ། ལེགས་པར་ཁྲུས་བྱས་པར་གྱུར་པས་བརྟུལ་ཞུགས་སྤྱད་པས་བདུག་པའི་མཆོག་སྦྱར་བར་བྱའོ། །དེ་ནས་བདུག་པའི་རྒྱལ་པོ་སྒྲུབ་པའི་དཀྱིལ་འཁོར་གྲུ་བཞི་པ་ཚད་ཤིན་ཏུ་རྣམ་པར་ཕྱེ་བ་བྱ་སྟེ། གཟིངས་ཀྱི་ཚད་ཀྱི་ཤིན་ཏུ་བཅགས་པ། འཇམ་ཞིང་བསྙེན་པ་ལ། ཚོན་རྣམ་པ་སྣ་ཚོགས་པས་སྒོ་བཞི་ཤིན་ཏུ་རྣམ་པར་ཕྱེ་བ། མཛེས་པར་བྲི་བར་བྱའོ། །དབུས་ཀྱི་དཀྱིལ་འཁོར་གྱི་སྙིང་པོར། པདྨའི་ཕྲེང་བ་བྲིའོ། །དབུས་ཀྱི་པདྨ་ཕྱེད་ཁ་བྱེ་བའི་ཕྲེང་བ་བྲི་སྟེ། ལག་པ་གཉིས་འཐོན་ནས་སྣ་ཚོགས་པའི་སྤྲིན་འཁྲིགས་པ་འཛིན་པར་བྱེད་པའོ། །དེའི་སྟེང་དུ་བདུག་པའི་སྣོད་བཀོད་ནས། མེའི་ཁ་དོག་ཅན་གྱི་གོས་ཀྱིས་གཡོགས་ལ། དཀྱིལ་འཁོར་གྱི་གྲྭ་བཞི་རྣམས་སུ། རླུང་གི་རྒྱལ་པོ་བྲིའོ། །སྒོ་བཞིར་ཞགས་པ་བྲིས་ནས་ཁོར་ཡུག་ཏུ་ལག་པའི་ཕྱག་རྒྱའོ། །པདྨའི་ཕྲེང་བ་ལས་ངེས་པར་འཐོན་པའོ། །བདུག་སྤོས་འཁྱིལ་པ་འཆང་བར་བྱེད་པ་དཀྱིལ་འཁོར་གྱི་སྟེང་དུ་སྤྲས་པར་བྱའོ། །ཇི་ལྟར་འབྱོར་པའི་གཏོར་མ་དང་མེ་ཏོག་དབུལ་བར་བྱ། མཆོད་ཡོན་གྱི་སྣོད་དང་། གང་བའི་བུམ་པ་དང་། བ་དན་དང་། རྒྱན་དང་། སྐུད་པ་དམར་པོས་མཚམས་བཅིང་བ་དང་། དཀྱིལ་འཁོར་ལ་དངུལ་དང་། གསེར་བཞག་ཅིང་། ཁོར་ཡུག་ཏུ་མར་མེའི་ཕྲེང་བ་དང་། དྲི་སྣ་ཚོགས་རྒྱ་ཆེན་པོའོ། །འཕགས་པ་སྤྱན་རས་གཟིགས་དབང་ཕྱུག་བཀོད་ནས་ཁ་ཤར་དུ་ཕྱོགས་ནས་པདྨའི་ཕྲེང་བ་ལ་ཉེ་བར་དགོད་པར་བྱའོ། །དེ་ནས་རིག་སྔགས་འཆང་གིས་བདུག་པའི་རྒྱལ་པོ་ལ་ཡོངས་སུ་བཟླས་པར་བྱ་སྟེ། ཉི་མ་བདུན་ལ་ཐུན་གསུམ་དུ་དོན་ཡོད་པའི་རྒྱལ་པོ་བརྒྱ་རྩ་བརྒྱད་བཟླས་ཤིང་སྙིང་པོ་བརྒྱ་རྩ་བརྒྱད་བཟླས་སོ། །དོན་ཡོད་པའི་སྙིང་པོ་ཡི་གེ་གཅིག་པའི་བཟླས་བརྗོད་འབུམ་རྫོགས་པ་སྟེ། སྟོང་ཕྲག་བརྒྱ་རྫོགས་པ་ནི་བཟླས་བརྗོད་ཀྱི་ཆོ་གའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱ་ཞིང་།
སླར་ཡང་དོན་ཡོད་པའི་རྒྱལ་པོའི་བཟླས་བརྗོད་ཉི་ཤུ་རྩ་གཅིག་དང་། ཁྲོ་བོའི་རྒྱལ་པོའི་བཟླས་བརྗོད་ཉི་ཤུ་རྩ་གཅིག་བྱའོ། །དེ་ནས་ཐོག་མར་སངས་རྒྱས་བཅོམ་ལྡན་འདས་ལ་བདུག་པ་དབུལ་བར་བྱ། དེ་ནས་འཕགས་པ་སྤྱན་རས་གཟིགས་དབང་ཕྱུག་ལ་བདུག་པ་དབུལ་ལོ། །འདི་ནི་བདུག་པ་སྒྲུབ་པའི་ཆོ་ག་གྲུབ་པར་འགྱུར་རོ། །བདུག་པའི་རྒྱལ་པོ་འདིས་བྱ་བ་དེ་སྒྲུབ་པར་འགྱུར་རོ། །གལ་ཏེ་རིག་སྔགས་འཆང་གིས་ཡུངས་ཀར་གྱི་འབྲས་བུ་གཅིག་གི་ཚད་ཙམ་གྱི་བདུག་པས་དེ་བཞིན་གཤེགས་པ་ཐམས་ཅད་མཆོད་པར་འདོད་པ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དྲི་གཅིག་གིས་རྒྱས་པར་འདོད་པ་དང་། བདུག་པའི་སྤྲིན་འཁྲིགས་པས་ཀུན་ནས་གཡོགས་པར་འདོད་པ་དང་། དྲི་སྣ་ཚོགས་པའི་ཆར་འབེབས་པར་བྱེད་པར་འདོད་པ་དེས། བདུག་པའི་རྒྱལ་པོས་བདུག་པ་དེ། རིག་སྔགས་འཆང་གིས་རྟག་ཏུ་རྒྱུན་མི་འཆད་པར་མངོན་པར་བརྩོན་པར་བྱའོ། །དེ་ནས་རིག་སྔགས་འཆང་གིས་ཉི་མ་རེ་རེ་ཞིང་སངས་རྒྱས་བཅོམ་ལྡན་འདས་དང་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་དཀྱིལ་འཁོར་བྱས་ལ་མེ་ཏོག་གཅལ་དུ་བཀྲམ་པར་བྱའོ། མཆོད་ཡོན་དང་། ཞབས་བསིལ་ཡང་གཞག་པར་བྱ། བདུག་པའི་རྒྱལ་པོ་འདིས་བདུག་པར་བྱ་ཞིང་། དོན་ཡོད་པའི་རྒྱལ་པོ་དུས་གཅིག་ཏུ་བརྗོད་པར་བྱ་སྟེ། ཕྱོགས་བཅུར་བདུག་པའི་པོག་ཕོར་དབུལ་བར་བྱའོ། །དེ་བཞིན་གཤེགས་པ་ཐམས་ཅད་ཡིད་ལ་བྱེད་པར་འགྱུར་བ་དང་། སེམས་ཅན་འབྱུང་པོ་ཐམས་ཅད་ལ་བྱམས་པ་བསྒོམ་པར་བྱ། སངས་རྒྱས་ཀྱི་ཞིང་དུ་གཏོགས་པ་ཐམས་ཅད་དྲི་མ་མེད་པའི་སེམས་ཀྱིས་ཡིད་ལ་བསྒོམ་པར་བྱ། དཀྱིལ་འཁོར་ལ་མེ་ཏོག་དང་བདུག་པ་དང་། མཆོད་ཡོན་དང་། ཞབས་བསིལ་ཕུལ་ཏེ་ཡི་གེ་གཅིག་པ་ཡིད་ལ་བརྗོད་ཅིང་། ཕྱག་རྒྱ་ཡང་ལན་ཅིག་བཅིངས་ལ་ཕྱག་བྱའོ་ཞེས་སོ། །ཕུལ་བ་ཙམ་གྱི་མོད་ལ་ཕྱོགས་རེ་རེ་ཞིང་གང་གཱའི་ཀླུང་གི་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུའི་སངས་རྒྱས་བྱེ་བ་ལ་དྲིས་ཁྱབ་པར་བྱེད་ཅིང་། བདུག་
པ་ཆེན་པོ་འཁྲིགས་པས་ནམ་མཁའི་མཐིལ་དུ་ཁྱབ་པར་འགྱུར་རོ། །དྲི་སྣ་ཚོགས་ཀྱི་ཆར་འབབ་པར་འགྱུར་ཏེ། བཅོམ་ལྡན་འདས་མཆོད་པའི་ལས་སངས་རྒྱས་ཀྱི་ཞིང་རེ་རེ་ཞིང་གང་གཱའི་ཀླུང་གི་བྱེ་མ་ཁྲག་ཁྲིག་བརྒྱ་སྟོང་ཕྲག་བྱེ་བ་དགུ་བཅུ་རྩ་དགུའི་སངས་རྒྱས་བཅོམ་ལྡན་འདས་ལ་མཆོད་པར་འགྱུར་རོ། །དེ་བཞིན་གཤེགས་པ་ཐམས་ཅད་མཆོད་པས་དེ་བཞིན་གཤེགས་པ་དེ་རྣམས་ཐམས་ཅད་རིག་སྔགས་འཆང་ལ་དུས་དུས་སུ་དོན་ཡོད་པའི་རྒྱལ་པོ་དྲན་པར་བྱེད་པ་སྲུང་བའི་དོན་དང་། ཕྱག་རྒྱ་འཆིང་བར་བྱེད་པ་དེ་སྲུང་བའི་དོན་དུ། ལེགས་སོ་ཞེས་བྱ་བའི་སྒྲ་རྗོད་པར་བྱེད་དོ། །དེ་བཞིན་གཤེགས་པ་ཐམས་ཅད་བྱམས་པ་རྒྱས་པར་བྱེད་པ་དེ་བཞིན་དུ་བྱའོ། །དོན་ཡོད་པ་ཆེན་པོའི་དངོས་གྲུབ་ཀྱང་སྦྱིན་པར་བྱེད་དོ། །དེ་བཞིན་གཤེགས་པ་དེ་རྣམས་ཀྱི་དྲུང་དུ་བསོད་ནམས་ཀྱི་ཚོགས་ཆེན་པོ་ཉེ་བར་སོག་པ་བྱེད་དོ། དེ་བཞིན་གཤེགས་པ་རེ་རེ་ཞིང་། བྱེ་བ་བརྒྱ་སྟོང་ཕྲག་གི་དྲུང་དུ་བསོད་ནམས་ཀྱི་ཕུང་པོ་དང་། དགེ་བའི་རྩ་བ་ཉེ་བར་སོགས་པར་བྱེད་དོ། །ཇི་ལྟར་རིག་སྔགས་འཆང་དེ་བཞིན་གཤེགས་པ་མཆོད་པའི་ཆོ་ག་བྱེད་བྱེད་པར་དེ་བཞིན་དུ། རྣམ་པ་དུ་མ་དེ་བཞིན་གཤེགས་པ་རེ་རེ་ཞིང་གི་སྤྱན་སྔར་རབ་ཏུ་འབྱུང་བར་འགྱུར་རོ། །རིག་སྔགས་འཆང་ཉི་མ་བདུན་དུ་རབ་ཏུ་བརྩོན་པས། དེ་བཞིན་གཤེགས་པ་དང་། བླ་མ་མཆོད་དོ། །ཕྱོགས་བཅུའི་དེ་བཞིན་གཤེགས་པ་ཐམས་ཅད་མངོན་སུམ་དུ་མཐོང་བ་སྩོལ་བར་བྱེད་དོ། །དེ་རྣམས་ཐམས་ཅད་ཀྱི་དབུགས་འབྱིན་པར་བྱེད་ལ་མཆོག་རབ་ཏུ་སྩོལ་བར་འགྱུར་རོ། །དོན་ཡོད་པའི་དངོས་གྲུབ་རྗེས་སུ་སྩོལ་བར་འགྱུར་རོ། །ཕྱིར་མི་ལྡོག་པ་ལ་རབ་ཏུ་གནས་པར་འགྱུར་རོ། །ས་བཅུ་ཡང་དག་པར་གནོན་ཏེ་མངོན་པར་ཤེས་པ་ལྔར་འགྱུར་རོ། །འཇིག་རྟེན་པའི་བདུག་པ་སྒྲུབ་པའི་ཆོ་གའོ། །དེ་བཞིན་ཉིད་དུ་འཇིག་རྟེན་ལས་འདས་པ་ལ་འཆི་འཕོ་བ་ན་དེ་བཞིན་གཤེགས་པའི་སྤྱན་སྔའི་ཞབས་དྲུང་དུ་པདྨ་ལས་རྫུས་ཏེ་སྐྱེ་བར་འགྱུར་རོ། །ཚེ་རབས་དྲན་པར་ཡང་འགྱུར་རོ། །དེ་བཞིན་གཤེགས་པའི་སངས་རྒྱས་ཀྱི་ཞིང་གང་དང་གང་དུ་འགྲོ་བར་བྱེད་པ་དེ་ཐམས་
ཅད་དུ་ཡང་། དེ་བཞིན་གཤེགས་པས་རིག་སྔགས་འཆང་ལ་ལུང་སྟོན་པར་འགྱུར་རོ། །ཕྱིས་ཀྱང་སྐྱེ་བ་གཞན་དུ་སྐྱེ་བར་མི་འགྱུར་རོ། །ལུས་འདི་ཉིད་ཀྱིས་དེ་བཞིན་གཤེགས་པ་ཐམས་ཅད་ལ་བསྙེན་བཀུར་ནས། བདེ་བ་ཅན་གྱི་འཇིག་རྟེན་གྱི་ཁམས་སུ་སོང་སྟེ། སངས་རྒྱས་བཅོམ་ལྡན་འདས་ཀྱི་ཆོས་ཀྱི་འཁོར་ལོ་བསྐོར་བར་བྱེད་དོ། །ཚེ་དཔག་ཏུ་མེད་པར་འགྱུར་རོ། །དེ་བཞིན་གཤེགས་པ་ཚེ་དཔག་ཏུ་མེད་པ་ཇི་ལྟ་བ་དེ་བཞིན་དུ། འདིའི་རྫུ་འཕྲུལ་དང་རྣམ་པར་འཕྲུལ་པའི་ཁྱད་པར་སོ་སོར་ཐོབ་བོ། །འདི་ནི་འཇིག་རྟེན་ལས་འདས་པའི་བདུག་པ་སྒྲུབ་པའི་ཁྱད་པར་འགྱུར་རོ། །དེ་ནས་འཇིག་རྟེན་པའི་བདུག་པ་སྒྲུབ་པའི་ཆོ་ག་བརྒྱ་སྟོང་ཕྲག་དུ་མ་འགྲུབ་པར་བྱེད་དོ། །ཇི་ལྟ་ཇི་ལྟར་བདུག་པ་ཉིད་ཡིད་ལ་བྱེད་པ་དེ་ལྟ་དེ་ལྟར་ཐམས་ཅད་ཡང་དག་པར་འགྲུབ་པར་འགྱུར་རོ། །ཀླུའི་གནས་སུ་བདུགས་ན། བདུགས་པ་ཙམ་གྱི་མོད་ལ། ཀླུའི་རྒྱལ་པོས་ཆར་རྒྱུན་ཆེན་པོ་འབྱིན་པར་བྱེད་དོ། །རྒྱལ་པོའི་སྒོ་རུ་བདུགས་ན། རྒྱལ་པོ་དང་། བཙུན་མོའི་འཁོར་གཡོག་དང་བཅས་པ་དབང་དུ་གྱུར་ནས་གནས་སོ། །སྐྱེ་བོ་མང་པོའི་དབུས་སུ་བདུགས་ན། རིགས་བཞིའི་འཇིག་རྟེན་དབང་དུ་གྱུར་ནས་གནས་སོ། །བདག་ཉིད་ལ་བདུགས་ན། ཐམས་ཅད་དུ་མཆོད་པའི་འོས་ཆེན་པོར་འགྱུར་རོ། །ནད་ཐམས་ཅད་ལ་བདུགས་ན། ནད་ཐམས་ཅད་ཡོངས་སུ་གྲོལ་བར་བྱེད་དོ། །དུག་ལ་བདུགས་ན་དུག་མེད་པར་འགྱུར་རོ། །མཚམས་ཀྱི་ནང་དུ་བདུགས་ན་མེ་ཏོག་དང་། འབྲས་བུ་ཐམས་ཅད་རོ་ཞིམ་པ་དང་། ལེགས་པར་བསྲུངས་པར་འགྱུར་རོ། །ལོ་ཐོག་ལ་བདུགས་ན། འབྲུའི་ཕུང་པོ་ཆེན་པོར་འགྱུར་རོ། །ཁྱིམ་མམ། གཙུག་ལག་ཁང་ངམ། གྲོང་ངམ། གྲོང་ཁྱེར་ལ་བདུགས་ན། དུག་དང་། སྦྱར་དུག་དང་། དུག་དང་བཅས་པའི་སྲོག་ཆགས་ཐམས་ཅད་ནམ་ཡང་མི་འབྱུང་ངོ་། །གཡུལ་གྱི་དབུས་སུ་བདུགས་ན་ཆེར་རྒྱལ་བར་འགྱུར་རོ། །བདག་ཉིད་དམ། གཞན་རྣམས་སམ། དོན་མཐུན་པ་རྣམས་ལ་བདུགས་ན། ལམ་དུ་འགྲོ་བ་ན་ཆོམ་རྐུན་དང་། གཡོན་ཅན་དང་།
རྐུན་མོ་དང་། གཅན་གཟན་གཏུམ་པོའི་འཇིགས་པ་ཐམས་ཅད་མི་སྣང་བར་འགྱུར་ཞིང་། བདེ་བ་དང་ལེགས་པས་རང་གི་ཁྱིམ་དུ་འོང་ངོ་། །དཔག་ཚད་སྟོང་དུ་འགྲོ་ཡང་ངལ་བ་མེད་ཅིང་། སླར་ཡང་འོང་བར་བྱེད་དོ། །དུང་ལ་བདུགས་ནས་མཐོན་པོར་བུས་ན་ཇི་སྲིད་དུང་གི་སྒྲ་ཐོས་པ་དེ་སྲིད་དུ་གནོད་པ་ཐམས་ཅད་དང་། འཇིགས་པ་ཐམས་ཅད་དང་། ནད་ཐམས་ཅད་དང་། མཚོན་ཆ་དང་། འཐབ་མོ་དང་། འཐབ་པ་དང་། རྩོད་པ་དང་། འགྱེད་པ་དང་། ཕྱིར་རྒོལ་བ་དང་། དགྲ་བོ་དང་། སྡང་བ་དང་། རབ་ཏུ་སྡང་བའི་སེམས་ཅན་ཐམས་ཅད་རྣམ་པར་ཉམས་པར་བྱེད་དོ། །ཡམས་ཐམས་ཅད་དང་། ཉེ་བར་འཚེ་བ་དང་། ནད་འགོ་བ་ཐམས་ཅད་དང་། འཁྲུགས་པ་ཐམས་ཅད་རྣམ་པར་ཉམས་པར་བྱེད་དོ། །བདེ་བ་དང་། ལོ་ལེགས་པ་དང་། དགའ་བར་འོས་པར་འགྱུར་རོ། །དགེ་བའི་རྩ་བ་ཐམས་ཅད་འདོད་པར་འགྱུར་རོ། །ནད་མེད་པ་དང་། གནོད་པ་མེད་པ་དང་། རིམས་མེད་པ་དང་། ཐང་ཆད་པ་མེད་པར་ཇི་སྲིད་འཚོའི་བར་དུ་གནས་སོ། །ཁང་པའི་སྟེང་མཐོན་པོར་ཕྱོགས་བཞིར་བདུགས་ན། རླུང་དང་། སད་དང་སྤྲིན་གྱི་སེར་བ་ཐམས་ཅད་བཅིང་བར་འགྱུར་ཏེ། ཇི་སྲིད་ཡིད་ལ་བྱེད་པ་ནར་མར་ཡོད་པ་དེ་སྲིད་དུ་མཚམས་བཅིང་བར་བྱས་པར་འགྱུར་རོ། །ཁྱིམ་གྱི་ནང་དུ་བདུགས་ན། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། བྲན་ཕོ་དང་། བྲན་མོ་ཐམས་ཅད་དང་། ཇི་སྲིད་དུ་རྐང་གཉིས་པ་དང་། རྐང་བཞི་པ་ཐམས་ཅད་བྱམས་པའི་ཡིད་དུ་འགྱུར་ཏེ་དབང་དུ་གྱུར་ནས་གནས་སོ། །ཇི་སྲིད་འཚོའི་བར་དུ་བསྙེན་བཀུར་བྱེད་དོ། །སླར་ཡང་ཡིད་གཞན་དུ་མི་འགྱུར་རོ། །འཆི་བའི་དུས་ཀྱི་ཚེ། བདུགས་ན། དྲི་མནམས་པའི་མཐུ་དེས། སངས་རྒྱས་རྗེས་སུ་དྲན་པ་སྐྱེས་ཏེ། དེ་བཞིན་གཤེགས་པ་བྱེ་བ་ཕྲག་དགུ་བཅུ་རྩ་དགུ་མངོན་སུམ་དུ་མཐོང་བ་སོ་སོར་ཐོབ་སྟེ། ཕྱིར་ཀྱང་ངན་འགྲོ་ལོག་པར་ལྟུང་བར་འགྲོ་བར་མི་འགྱུར་རོ། །དགེ་བའི་རྩ་བའི་ཚོགས་ཐམས་ཅད་ཡང་དག་པར་འཛིན་པར་འགྱུར་རོ། །འཆི་འཕོ་བ་ན་བདེ་བ་ཅན་གྱི་འཇིག་རྟེན་གྱི་
ཁམས་སམ། མངོན་པར་དགའ་བར་སྐྱེས་ཏེ་འདི་ལ་དོགས་པ་དང་། ཡིད་གཉིས་བསྐྱེད་པར་མི་བྱ་ཞིང་། ཐེ་ཚོམ་བསྐྱེད་པར་མི་བྱའོ། །ཞེས་སོ། །མ་མོའི་དཀྱིལ་འཁོར་གྱི་ཁྱིམ་ལ་བདུགས་ན། ནག་པོ་ཆེན་པོ་ལ་སོགས་པ། མ་མོའི་ཚོགས་ཀྱིས་ཡོངས་སུ་བསྐོར་བ། དབང་དུ་གྱུར་པར་འགྱུར་ཏེ། མདུན་དུ་ཉེ་བར་གནས་པར་བྱེད་དོ། ལྷ་དང་། ཀླུ་དང་། གནོད་སྦྱིན་དང་། སྲིན་པོ་ཐམས་ཅད་དང་། ནག་པོ་ཆེན་པོའི་གཟུགས་བརྙན་གྱི་སྤྱི་བོའི་གཙུག་ཏུ་འདུག་ན། བདུགས་པ་ཙམ་གྱི་མོད་ལ། ཁ་ནས་ཁྲག་སྐྱུག་གོ། །རིག་སྔགས་འཆང་གིས་དེ་བླངས་ཏེ། ཐིག་ལེ་བྱས་ནས་ནམ་མཁའ་ལ་ལྡིང་བར་བྱེད་དོ། །མིག་ལ་བྱུགས་ན་མི་སྣང་བར་འགྱུར་ཏེ། བདེ་བླག་ཏུ་འབྱུང་པོའི་བདག་པོ་ཆེན་པོར་འགྱུར་རོ། །ལྟོ་བར་ཡོངས་སུ་བྱུགས་ན། གནོད་སྦྱིན་དང་སྲིན་པོའི་དཔོན་པོའོ། །ལུས་མཐའ་དག་ལ་བྱུགས་ན། སྟོབས་དང་། བརྩོན་འགྲུས་དང་། རྩལ་ཆེན་པོ་ནག་པོ་ཆེན་པོ་དང་མཚུངས་པའི་ཤུགས་སུ་འགྱུར་ཏེ། དེ་ཉིད་ཀྱི་གཟུགས་སུ་འགྱུར་རོ། །འཁོར་གྱི་ཚོགས་ཆེན་པོར་ཡང་འགྱུར་རོ། །ཚངས་པ་ལ་བདུགས་ན། བདུགས་པ་ཙམ་གྱི་མོད་ལ། འོ་མ་འཛག་པ་བླང་བར་བྱ་སྟེ། ལུས་ལ་བྱུག་པར་བྱའོ། །ཚངས་པ་དང་འདྲ་བའི་སྟོབས་དང་ཞུགས་སུ་འགྱུར་ཏེ་ནམ་མཁའ་ལ་འགྲོ་བར་བྱེད་དོ། །ཁྱབ་འཇུག་ལ་བདུགས་ན། བདུགས་པ་ཙམ་གྱི་མོད་ལ་ལུས་ལ་པ་ལཱ་ཤའི་ཁ་དོག་གི་དྲིའི་ཆུ་འཛག་སྟེ། རིག་སྔགས་འཆང་གི་ལུས་ལ་བྱུག་པར་བྱའོ། །སྲེད་མེད་ཀྱི་བུའི་གཟུགས་དང་། སྟོབས་དང་། ཤུགས་འཆང་བར་འགྱུར་ཏེ། ལག་ན་འཁོར་ལོ་ཐོགས་པས་ནམ་མཁའ་ལ་འགྲོའོ། །དབང་ཕྱུག་ཆེན་པོ་ལ་བདུགས་ན། དབང་ཕྱུག་ཆེན་པོའི་ལུས་ལ་རྡུལ་འབྱུང་སྟེ། རིག་སྔགས་འཆང་གི་ལུས་ལ་བྱུག་པར་བྱའོ། །དབང་ཕྱུག་ཆེན་པོའི་གཟུགས་སུ་འགྱུར་ཏེ། ལག་ན་མདུང་རྩེ་གསུམ་དང་། སྟོབས་དང་། བརྩོན་འགྲུས་དང་། རྩལ་གྱིས་འབྱུང་པོའི་བདག་པོ་ཆེན་པོར་འགྱུར་ཏེ་ནམ་མཁའ་ལ་འགྲོའོ། །ཐམས་ཅད་ལ་དོན་ཡོད་རྒྱལ་པོའི་བཟླས་བརྗོད་ལན་གསུམ་གསུམ་རྣམ་པར་སྦྱིན་པར་བྱའོ། །
སྙིང་པོ་ཡི་གེ་གཅིག་པས་སྤྱི་བོར་བཟླས་བརྗོད་ལན་བདུན་དུ་བཟླས་བརྗོད་སྦྱིན་པར་བྱའོ། །སྤྲ་ཚིལ་ལས་བྱུང་བའི་ཀླུ་མགོ་བོ་དགུ་པ་སོར་བཞི་པའི་ཚད་དུ་བྱ་སྟེ་གསེར་གྱིས་གཡོག་པར་བྱ་ཞིང་དྲིའི་དཀྱིལ་འཁོར་བྱ་སྟེ། དཀྱིལ་འཁོར་གྱི་སྟེང་དུ་གཞག་པར་བྱའོ། །དོན་ཡོད་པའི་རྒྱལ་པོས་ལན་བརྒྱ་རྩ་བརྒྱད་དུ་བཟླས་སོ། །བདུག་པ་འདིས་བདུགས་པས་ཀླུ་ལྡང་བར་བྱེད་དོ། །རིག་སྔགས་འཆང་གིས་འཇིགས་པ་མེད་པར་བྱ་སྟེ། ཁྲོ་བོའི་རྒྱལ་པོ་ཡུངས་ཀར་ལ་བཟླས་ཏེ། སྤྱི་བོའི་གཙུག་ཏུ་བརྡེགས་ན། ལྡིང་བར་བྱེད་དོ། །གང་དུ་འདོད་པ་དེར་གནས་ནས། ཀླུ་ཆེན་པོའི་མཚོ་དང་། གནས་དང་། གཞལ་མེད་ཁང་རབ་ཏུ་འབྱུང་ངོ་། །ཆུ་གང་ཡིན་པ་དེ་རྣམས་ཀྱང་འཐུང་བར་བྱེད་པ་དང་། ཁྲུས་བྱེད་པའི་བུད་མེད་དང་། སྐྱེས་པ་དང་། ཁྱེའུ་དང་། བུ་མོའམ། ཐ་ན་དུད་འགྲོའི་སྐྱེ་གནས་སུ་སོང་བས་འཐུང་བ་དང་ཁྲུས་བྱེད་པ་དེ་རྣམས་ཐམས་ཅད་ཀྱང་ནད་རྣམས་དང་བྲལ་བར་འགྱུར་རོ། །སྡིག་པ་དང་། སྒྲིབ་པ་དང་བྲལ་བ་དང་། འཇིགས་པ་ཐམས་ཅད་དང་བྲལ་བར་ཡང་འགྱུར་རོ། །ཀླུ་རྣམས་ཀྱང་དུས་དུས་སུ་ཆར་གྱི་རྒྱུན་ཆེན་པོ་འབྱིན་པར་བྱེད་ཅིང་། ཆར་འབེབས་པར་བྱེད་དོ། །དུས་དུས་སུ་མེ་ཏོག་དང་། འབྲས་བུ་དང་། ལོ་ཐོག་རྣམས་རྫོགས་པར་བྱེད་དེ། རོ་ཞིམ་པོའི་རོ་མྱོང་བར་འགྱུར་རོ། །ཕྱིར་ཞིང་ལོག་པར་ལྟུང་བར་འགྲོ་བར་མི་འགྱུར་རོ། །ཕུག་དང་ཁུང་བུའི་སྒོ་རུ་འཁྲུལ་འཁོར་གྱི་སྒོ་གླེགས་ལ་བདུགས་ན་བྱེ་ཞིང་གཅོག་པར་འགྱུར་རོ། །འཁྲུག་པའི་དུས་སུ་བདུགས་ན་འཕམ་པར་འགྱུར་རོ། །ལག་མཐིལ་ལ་བདུགས་ན། གང་དང་གང་ལ་རེག་པ་ཐམས་ཅད་དུ་དབང་དུ་བྱེད་དོ། །བདུག་པའི་དཀྱིལ་འཁོར་གྱི་ཆོ་གའོ།། །།