དོན་ཡོད་པ་ཆེན་པོ་རྣམ་པར་འཕྲུལ་པའི་དཀྱིལ་འཁོར་སྒྱུ་མ་ལྟ་བུའི་ཆོ་ག
དེ་ནས་དེའི་ཕྱིར་དོན་ཡོད་པ་ཡངས་པའི་དཀྱིལ་འཁོར་ཆེན་པོ་དོན་ཡོད་པ་ཆེན་པོའི་རྣམ་པར་འཕྲུལ་པའི་དངོས་གྲུབ་ཀྱི་སྨན་ནོར་བུ་དང་། གསང་སྔགས་རྣམས་བཤད་པར་བྱ་སྟེ། སྨན་ནོར་བུ་དང་། གསང་སྔགས་དང་། དཀྱིལ་འཁོར་དང་། ཕྱག་རྒྱའི་མཐུ་དེས་ཕྱི་མའི་དུས་ཕྱི་མའི་ཚེ་ན་རིག་སྔགས་འཆང་རྣམས་ཀྱི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་སྤྱིའི་གསང་བའི་དཀྱིལ་འཁོར་རྣམ་པ་སྣ་ཚོགས་སྒྱུ་མ་ལྟ་བུའི་ངོ་བོ་ཉིད་བསྟན་པ་ཡང་དག་པར་སྟོན་པར་མཛད། བཀླགས་པས་གྲུབ་པ། རིགས་ཀྱི་དམ་ཚིག་སྤྱིའི་གསང་བ་ཐམས་ཅད་དུ་ཉེ་བར་སྟོན་པར་མཛད་དོ། །རིག་སྔགས་འཆང་རྣམས་ཀྱི་ངལ་བ་འབྲས་བུ་མེད་པ་གཞན་དུ་འགྱུར་བ་མེད་དོ། །ངལ་བ་དང་། དུབ་པ་དང་། འབད་པའི་བཟླས་བརྗོད་ཀྱི་ཆོ་ག་འབྲས་བུ་མེད་པར་མི་འགྱུར་བར་བྱ་བའི་ཕྱིར་རང་གི་
སེམས་ཀྱི་རྒྱུད་དད་པ་དང་། གུས་པ་དང་། གསང་ཆེན་དང་། གསང་བར་བྱ་བ་གཞན་ལ་བསྟན་པར་མི་བྱ་སྟེ། དངོས་གྲུབ་མེད་པར་མི་འགྱུར་རོ། །དེ་ལྟ་བས་ན་གསང་སྔགས་སྒྲུབ་པ་ནི་ཤིན་ཏུ་གསང་བར་བྱ་ཞིང་ལེགས་པར་སྨྱུང་བ་བྱས་ལ་འབད་པར་བྱ། །ཁ་ཟས་ངན་པ་སྤང་བར་བྱ། གོས་ངན་པ་དང་། སེམས་ངན་པ་ཡང་ཡོངས་སུ་སྤང་བར་བྱ། མི་སྲུན་པ་དང་། མི་བདེན་པ་དང་། ཕྲ་མ་དང་། སེམས་ཅན་སུན་འབྱིན་པར་བྱེད་པ་དང་། གསང་སྔགས་རྐུ་བ་དང་། ཆོ་ག་ཞིབ་མོ་རྐུ་བར་བྱེད་པ་དང་། ཕྱག་རྒྱ་དང་། དཀྱིལ་འཁོར་རྐུ་བར་བྱེད་པ་དེ་དག་གི་རྟོགས་པ་ནི་གང་ན་ཡང་མེད་དེ། དུས་གསུམ་གྱི་མགོན་པོས་སྨད་ཅིང་བྱང་ཆུབ་སེམས་དཔས་ཀྱང་སྨད་ལ། མགོན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཀྱང་སྨད་པ་ཡིན་ནོ། །སེམས་ཅན་སྡོང་དུམ་བསྲེགས་པ་འདི། །གསང་བ་སུན་འབྱིན་མ་རུངས་པ། །འཇིག་རྟེན་འདི་དང་ཕ་རོལ་ཏུ། །རྟག་ཏུ་སྨད་པར་བྱ་བ་ཡིན། །ལྷ་རྣམས་ཀྱིས་ནི་ཡོངས་སུ་བཏང་། །མ་རུངས་པས་ནི་བདུད་ཀྱིས་ཟོས། །མ་རུངས་པས་ནི་བགེགས་ཀྱིས་ཟོས། །བསླབ་གཞི་ཚུལ་ཁྲིམས་ཉམས་པ་དང་། །མགོན་པོའི་བསྟན་པ་སུན་འབྱིན་པ། །དེ་ལ་དངོས་གྲུབ་ཇི་ལྟར་འབྱུང་། །དེ་ལ་སྐྱོབ་པ་གང་ཡང་མེད། །མགོན་མེད་ཀུན་ཏུ་སྨད་པ་ཡིན། །དེ་བས་དེ་ལ་དངོས་གྲུབ་ནི། །ཆུང་ངུའང་མེད་ལ་ཉེས་པ་ཡིས། །གསང་སྔགས་དང་ནི་སྨན་མི་འགྲུབ། །ཉེས་པ་དེ་དག་རང་གིས་བྱས། །གཞན་ཡང་མ་རུངས་བྱེད་པ་ཡིན། །དེ་བས་སེམས་ཅན་མཁས་ལ་སྦྱིན། །སློབ་པ་འདོད་ཅིང་ཡོན་ཏན་དགའ། །སྙིང་རྗེའི་བདག་ཉིད་བྱམས་ལ་གནས། །སེམས་ཅན་ཀུན་ལ་བརྩེ་བའི་མཆོག །དེ་ཡི་ལག་ཏུ་སྦྱིན་བྱ་སྟེ། །དེ་ཡི་དངོས་གྲུབ་བླ་ན་མེད། །གསང་བ་འདི་ནི་ཤིན་ཏུ་གསང་བ་ཡིན་ཏེ། འཇིག་རྟེན་དབང་ཕྱུག་གི་སྙིང་པོ་གསང་བ་དེ་ཡང་རིག་སྔགས་འཆང་རྣམས་ཀྱི་དེ་ཁོ་ན་ཉིད་ཀྱི་གསང་བ་དང་། གསང་སྔགས་དང་། ཕྱག་རྒྱ་སྒྲུབ་སླ་སྟེ། བཀླགས་པས་འགྲུབ་པ་དེ་བཞིན་དུ་སྨན་ནོར་བུ་འདི་ལ་རྟག་ཏུ་འཇུག་ཅིང་དངོས་གྲུབ་ཀྱི་དེ་ཁོ་ན་ཉིད་རབ་ཏུ་སྟོན་པར་བྱེད་པ་ཡིན་ནོ། །རིག་སྔགས་
འཆང་ནི་བདག་ཉིད་ཀྱིས། །མཆོག་ཏུ་གསང་བ་བསྒྲུབ་བྱ་བ། །རིག་སྔགས་འཆང་ནི་གཙང་མ་ཡིས། །ཁྲུས་བྱས་གོས་གཙང་གྱོན་བྱེད་ལ། །འདིར་ནི་ཉིན་ཞག་སྨྱུང་བ་དང་། །དད་དང་གུས་པས་མཆོད་པ་བྱ། །དོན་ཡོད་འཁོར་ལོ་སྒྲུབ་བྱེད་པས། །དངོས་གྲུབ་དཀྱིལ་འཁོར་དམ་པ་བསྒྲུབ། །སྨན་སྤྲྀ་ཀ་དང་། ཙནྡན་གྱི་ཕྱེ་མ་དང་། ཨ་ག་རུ་དང་། པདྨ་གེ་སར་དང་། པདྨ་དང་། པདྨའི་ལྡུམ་བུ་དང་། པདྨའི་འདབ་མ་དང་། དེ་བཞིན་དུ་གིའུ་ཝང་དང་། ལྡོང་རོས་དང་། ཙམ་པ་ཀ་དང་། སུ་མ་ན་སྟེ། དེ་བཞིན་ཆ་ནི་མཉམ་སྦྱར་ཏེ། །ཕྱེ་མ་དག་ཏུ་བྱས་ནས་ནི། །དེ་ནས་དོན་ཡོད་རྒྱལ་པོ་ཡིས། །ཚེས་བརྒྱད་ནས་ནི་བཅྭ་ལྔའི་བར། །བརྒྱ་རྩ་བརྒྱད་དུ་བཟླས་བརྗོད་བྱ། །ཁྲོ་བོའི་རྒྱལ་པོས་བརྒྱ་རྩ་བརྒྱད། །བཟླས་བརྗོད་བྱས་ནས་དབང་བསྐུར་རོ། །དེའི་འོག་ཏུ་ཆ་ལྔར་བྱ་སྟེ། མིག་བསྐུ་བ་དང་། རིལ་བུ་དང་། ཕྱེ་མ་དང་། ཏིལ་མར་ཚོས་པ་དང་ཁ་གདོང་བཀྲུ་ཞིང་ཁྲུས་བྱའོ། །མིག་སྨན་ནི་སོའུ་བྱི་རེ་དང་ལྷན་ཅིག་སྦྲུས་ལ་དོན་ཡོད་པའི་རྒྱལ་པོས་བརྒྱ་སྟོང་བཟླས་བརྗོད་བྱའོ། །རིལ་བུ་ནི་སྦྲང་རྩི་དཀར་པོ་དང་ལྷན་ཅིག་སྦྲུའོ། །ཕྱེ་མ་ནི་འཇིག་རྟེན་དབང་ཕྱུག་ལ་ཕུལ་བའི་མེ་ཏོག་དང་ལྷན་ཅིག་སྦྲུའོ། །ཏིལ་མར་བཙོས་པ་ནི་བྲཏྤ་ཏི་ལ་སྟེ། ཤིང་པ་ལ་ཤའི་མར་དང་ལྷན་ཅིག་སྦྲུའོ། །ཁ་གདོང་བཀྲུ་བ་ནི་ཙནྡན་དཀར་པོའི་ཆུ་དང་ལྷན་ཅིག་སྦྲུ་ཞིང་སུ་མ་ན་དང་། གུར་གུམ་དང་། སྤོས་ཆུས་ལྷན་ཅིག་སྦྲུས་ལ་སོ་སོར་བརྒྱ་རྩ་བརྒྱད་ཟླས་བརྗོད་བྱ། ཁྲོ་བོའི་རྒྱལ་པོས་ཉི་ཤུ་རྩ་གཅིག་བཟླས་བརྗོད་བྱས་ནས་དབང་བསྐུར་བར་བྱའོ། །དེ་ནས་རིག་སྔགས་འཆང་ཉིན་ཞག་གཅིག་སྨྱུང་བ་བྱས་པས་གཅིག་ཏུ་སྦྲུས་ཏེ། །དངུལ་གྱི་སྣོད་ཀྱི་ནང་དུ་བཅུག་ལ་སོ་སོར་བརྒྱ་རྩ་བརྒྱད་བཟླས་བརྗོད་བྱས་ནས་ཤར་ཕྱོགས་ཀྱི་སྒོ་ནས་དཀྱིལ་འཁོར་དུ་གཞག་པར་བྱ་སྟེ། དཀྱིལ་འཁོར་མཆོག་ལ་ཕྱག་དང་བསྐོར་བ་བྱས་ལ་དེ་ནས་སོ་སོར་དར་གྱིས་ཁ་བཅད་དེ། དཀྱིལ་འཁོར་གྱི་སྙིང་པོར་བཞག་ལ་དོན་ཡོད་པའི་རྒྱལ་པོ་བརྒྱ་རྩ་བརྒྱད་བཟླས་བརྗོད་བྱ། ཁྲོ་བོའི་རྒྱལ་པོ་བརྒྱ་རྩ་བརྒྱད་བཟླས་བརྗོད་བྱས་ནས་དབང་བསྐུར་བར་བྱ།
དབང་བསྐུར་བར་བྱས་ནས་ཀྱང་རིག་སྔགས་འཆང་གིས་དབང་བསྐུར་བར་བྱ། དེ་ནས་དཀྱིལ་འཁོར་སྙིང་པོར་ནི། །འཇིག་རྟེན་དབང་ཕྱུག་མཆོད་བྱ་སྟེ། །བདུག་སྤོས་ལྔ་དག་དབུལ་བྱ་བ། །ཨ་ག་རུ་དང་ཙནྡན་དང་། །སྤྲྀ་ཀ་གུ་གུལ་དུ་རུ་སྐ། །མཆོད་ཡོན་སྣོད་ནི་ལྔ་དབུལ་ཞིང་། །གཏོར་མ་ལྔ་ནི་དགང་བྱ་སྟེ། །རོ་ལྡན་སྣ་ཚོགས་དག་གིས་དགང་། །རོ་ལྡན་འབྲས་བུ་སྣ་ཚོགས་པའི། །གཏོར་མ་ཆ་ལྔ་དབུལ་བར་བྱ། །ཀུན་ཏུ་ཕྲེང་བ་ཉི་ཤུ་དང་། །མར་མེ་ཉི་ཤུ་ལྔ་དག་དང་། །སྤོས་ཀྱི་ཕྱི་མ་ལྔ་དག་དང་། །སྤོས་ཀྱི་ཆ་ལྔར་ཕྱེ་བས་བྱུག །འཕན་ཕྲན་ཉི་ཤུ་རྩ་ལྔ་གདགས། །ཚོན་རྩི་ལྔ་ཡིས་མཛེས་པར་བྱ། །གསེར་དང་དངུལ་གྱིས་གཡོགས་པ་ཡི། །བུམ་པ་གང་བ་ཉི་ཤུ་ལྔ། །རིན་པོ་ཆེ་ནི་ལྔ་གཞུག་གོ། །སྒོ་བཞི་གྲྭ་བཞིར་བུམ་པ་བརྒྱད། །བརྒྱ་དང་ཉི་ཤུ་རྩ་ལྔ་ཉིད། །དཀྱིལ་འཁོར་མེ་ཏོག་འབྲས་ཡོས་དང་། །ཡུངས་ཀར་ཉིད་ཀྱིས་མངོན་པར་དགྲམ། །སློབ་དཔོན་བླ་མ་མཆོད་པ་ནི། །གོས་དང་སྣོད་དང་ཡོན་གྱིས་སོ། །ཐུབ་པ་འཇིག་རྟེན་དབང་ཕྱུག་ལྟར། །སྟོན་པའི་འདུ་ཤེས་བསྐྱེད་ནས་སུ། །དཀྱིལ་འཁོར་སློབ་དཔོན་མཆོད་བྱས་ནས། །དེ་ནས་དཀྱིལ་འཁོར་གཤེགས་པར་གསོལ། །དེ་ནས་ལས་རྣམས་བྱ་བ་ནི། །ཇི་ལྟར་ཡིད་ལ་སྣ་ཚོགས་བྱ། །དོན་ཡོད་ཆེན་པོའི་གཞལ་མེད་ཁང་། །རིག་སྔགས་འཆད་གིས་རྟག་ཏུ་གསང་། །དེ་ཉིད་དངོས་གྲུབ་བསྒྲུབ་སླ་བ། །དེ་བཞིན་ནོར་བུ་སྨན་སྔགས་སོ། །དོན་འདི་ཤིན་ཏུ་བཀྲ་ཤིས་ཏེ། །མཁས་པ་མི་ཡིས་བྱ་བ་ཡིན། །ཕྲ་མའི་ཚིག་ཀྱང་མི་བསྟེན་ཏེ། །བརྫུན་ནི་ནམ་ཡང་སྨ་མི་བྱ། །འདི་ནི་བསྒྲུབ་པའི་དེ་ཉིད་དེ། །དེ་ལ་འགྲུབ་པ་ཐེ་ཙོམ་མེད། །འདིར་ནི་དཀྱིལ་འཁོར་བཤད་པར་བྱ། །ཀུན་ནས་གྲུ་བཞི་ལྷམ་པ་སྟེ། །གྲྭ་བཞི་ཆ་ནི་ལེགས་པར་དབྱེ། །ཀོ་ལའི་ཚད་དེ་ལེགས་པ་དང་། །སྣ་ཚོགས་ཚོན་གྱི་ཐིག་སྐུད་ཀྱིས། །དཀྱིལ་འཁོར་དམ་པ་ཐིག་གདབ་བོ། །དཀྱིལ་འཁོར་དབུས་ཀྱི་སྙིང་པོར་ནི། །འཁོར་ལོ་བཟང་པོ་བྲི་བར་བྱ། །དབུས་གྱི་ལྟེ་བར་པདྨ་ཡིས། །འཁོར་ལོ་གསལ་བ་བྲི་བར་བྱ། །པདྨའི་སྙིང་པོ་
གསེར་དང་ནི། །དངུལ་ལམ་ཙནྡན་ལས་བྱས་པ། །འབར་བར་འཇིག་རྟེན་དབང་ཕྱུག་བཞུགས། །འཁོར་ལོ་ཀུན་ཏུ་རྩིབས་དང་ནི། །མུ་ཁྱུད་དག་གིས་ཆ་དབྱེའོ། །དཀྱིལ་འཁོར་སྙིང་པོའི་གྲྭ་རྣམས་དེར། །ལྷ་ཡི་དབང་པོ་ཚངས་པ་དང་། །ཁྱབ་འཇུག་དབང་ཕྱུག་ཆེན་པོ་བྲི། །ཀུན་ཏུ་ཁ་ཁྱེར་རྣམ་པ་དང་། །པདྨས་ཕྲེང་བ་རྣམས་བྱའོ། །དཀྱིལ་འཁོར་ཕྱི་རོལ་ཀུན་ཏུ་ནི། །རྟགས་དང་ཕྱག་རྒྱ་རྣམས་བྲི་སྟེ། །རྡོ་རྗེ་དགྲ་སྟ་མདུང་རྩེ་གསུམ། །རལ་གྲི་ཞགས་པ་ཐོ་བ་དང་། །གཤིན་རྗེ་བེ་ཅོན་པདྨ་གདུགས། །དབྱུག་ཏོ་མདའ་པོ་ཆེ་རྣམས་སོ། །གྲྭ་རྣམས་ཀུན་ཏུ་ཕྲེང་བ་དང་། །མེ་ཏོག་རྣམ་པ་སྣ་ཚོགས་དགྲམ། །སྒོ་སྒོ་དེར་ནི་དཀྱིལ་འཁོར་གྱི། །ལྷ་སྟེ་གཤིན་རྗེ་ཆུ་ལྷ་དང་། །ལུས་ངན་དང་ནི་གཞོན་ནུ་བྲི། །དཀྱིལ་འཁོར་གྲྭ་བཞི་རྣམས་སུ་ནི། །རྒྱལ་པོ་ཆེན་པོ་བཞི་པོ་དག །གོ་ཆ་ལེགས་པར་བགོས་པ་དང་། །ཁྲོ་བར་ལྟ་བ་འཇིགས་བྱེད་བྲི། །འདི་ནི་དཀྱིལ་འཁོར་མཆོག་ཡིན་ཏེ། །དཀྱིལ་འཁོར་གྱི་ནི་དགོས་པ་རྣམས། །ལེགས་པར་ཡོངས་སུ་རྫོགས་པར་ནི། །རིག་སྔགས་ཇི་བཞིན་བསྟན་པ་ཡིན། །དེ་ནས་ལེགས་པར་ཁྲུས་བྱས་ལ། །གོས་གཙང་བགོས་པ་འཇིགས་མེད་པས། །སྨན་མཆོག་བཟུང་སྟེ་ལས་བྱའོ། །རྨོངས་པའི་དྲ་བ་སྣ་ཚོགས་དང་། །སྒྱུ་མ་ལྟ་བུའི་རྣམ་སྤྲུལ་པ། །གང་གིས་ངན་འགྲོ་ཐར་འགྱུར་བ། །སེམས་ཅན་ཀུན་ལ་བསྟན་པར་བྱ། །རྟག་ཏུ་དགའ་དང་དད་པ་དང་། །གུས་པ་དེ་ཉིད་ཐོབ་པར་འགྱུར། །རིག་སྔགས་འཆང་གིས་བསྒྲུབ་པའི་མཆོག །དངོས་གྲུབ་དེ་ཉིད་ཐོབ་པར་འགྱུར། །རིག་སྔགས་འཆང་གིས་སྔར་ཁྲུས་བྱས་ལ་རྫས་ཀྱི་དྲི་ཆབ་གཙང་མ་དོན་ཡོད་པའི་རྒྱལ་པོ་བརྒྱ་རྩ་བརྒྱད་བཟླས་བརྗོད་བྱ། ཙནྡན་གྱི་ཆུ་ལ་བརྒྱ་རྩ་བརྒྱད་བཟླས་བརྗོད་བྱས་ནས་སྐྲ་ཡན་ཆད་ཙམ་བྱུགས་ལ་ཚོད་ཟིན་པར་བསྐུས་ནས་ཁ་གདོང་བཀྲུ་བར་བྱའོ། །མིག་སྨན་ལ་བརྒྱ་རྩ་བརྒྱད་བཟླས་བརྗོད་བྱས་ནས་བསྐུས་ན་མིག་བཟང་བར་འགྱུར་རོ། །བརྒྱ་རྩ་བརྒྱད་ཚང་བར་བཟླས་བརྗོད་བྱས་ནས་བདག་ཉིད་དང་ཕྱོགས་བཅུར་གཏོར་རོ། །དེ་བཞིན་དུ་ཏིལ་མར་
བརྒྱ་རྩ་བརྒྱད་བཟླས་བརྗོད་བྱས་ནས་སྐྲ་ཡན་ཆད་བསྐུ་བ་དང་། ཚོད་ཟིན་བར་བསྐུ་བ་དང་། ལུས་རྐང་མཐིལ་ཡན་ཆད་བསྐུའོ། །ཡི་གེ་གཅིག་པོ་ཡིད་ལ་བྱ་བ་ལ་སེམས་བྱམས་པ་ཉིད་ལ་གནས་ནས་རྒྱལ་པོ་དང་། བཙུན་མོའི་སྒོ་འམ། སྐྱེ་བོའི་ནང་ངམ། འདུས་པ་ཆེན་པོའམ། དགེ་འདུན་གྱི་ནང་ངམ། ཚོགས་དང་ཕྲད་པའམ། དེ་བཞིན་དུ་གཞན་དག་ཀྱང་རུང་སྟེ། དེ་དག་ཐམས་ཅད་ཀྱིས་འཇིག་རྟེན་མགོན་པོའི་གཟུགས་དང་ཁ་དོག་ཏུ་མཐོང་ཞིག་སའི་སྟེང་ནས་རྐང་པ་ཁྲུ་གང་ཙམ་གྱིས་སྤགས་ཏེ་འདུག་ལ། ཇི་ལྟ་ཇི་ལྟར་འདུལ་བ་རྣམས་ཀྱི་དད་པ་དེ་ལྟ་དེ་ལྟར་གཟུགས་རྣམས་སྟོན་པར་བྱེད་དེ། རྒྱལ་པོའམ། འཁོར་ལོས་སྒྱུར་བའམ། མིའི་སེང་གེའམ། ཕག་གམ། སྲེད་མེད་ཀྱི་བུར་སྟོན་པའམ། ཚངས་པའམ། སུམ་ཅུ་རྩ་གསུམ་གྱི་དབང་པོའམ། དབང་ཕྱུག་ཆེན་པོ་མིག་གསུམ་པའམ། གཞོན་ནུ་འམ། ཆུ་ལྷའམ། གཤིན་རྗེའམ། རྣམ་ཐོས་ཀྱི་བུའམ། དེ་བཞིན་དུ་རྒྱལ་པོ་ཆེན་པོ་བཞིའམ། ནག་པོ་ཆེན་པོའམ། དག་འབྱེད་དབང་ཕྱུག་གམ། སེར་སྐྱའམ། གསང་བ་པའམ། ལག་ན་རྡོ་རྗེ་སྟོབས་པོ་ཆེའམ། ནོར་བུ་བཟང་པོའི་བུའམ། གང་བ་བཟང་པོའམ། སྟོབས་ཀྱི་ལྷའམ། གར་མཁན་མཆོག་གམ། རླུང་ལྷའམ། དྲང་སྲོང་ཉིད་དེ་ཇི་ལྟར་གཟུགས་རྣམ་པ་སྣ་ཚོགས་ཡིད་ལ་བྱས་པ་ཐམས་ཅད་སྟོན་པར་བྱེད་དོ། །མེ་ཏོག་དང་། འབྲས་བུ་སྣ་ཚོགས་པ་ཉིད་འབྱུང་བར་བྱེད་དོ། །དེ་བཞིན་དུ་དགེ་འདུན་གྱི་ནང་དུ་ཞུགས་ན་དེ་སངས་རྒྱས་ཀྱི་གཟུགས་དང་། གཟུགས་སྣ་ཚོགས་སུ་སྣང་ཞིང་གཞལ་མེད་ཁང་གི་རྣམ་པ་དག་ཀྱང་སྟོན་པར་བྱེད་དོ། །ཇི་ལྟར་འདོད་པར་འགྱུར་བ་ཡིད་ལ་བྱས་པ་དེ་ལྟར་གཟུགས་རྣམས་སྟོན་པར་བྱེད་དོ། །འཁོར་ཚོགས་པའམ། དགོན་པའམ། འཆག་ས་དག་ཀྱང་སྨན་ནོར་བུ་དང་། གསང་སྔགས་ཀྱི་མཐུས་གཟུགས་སྣ་ཚོགས་སུ་སྟོན་པར་བྱེད་དོ། །འགྲོན་པོ་འབྲོག་གི་ནང་དུ་ཕྱིན་པ་ཉམ་ཐག་པ། འཇིགས་པ་མི་བཟད་པ། ཆུ་མེད་པ། དགོན་པར་མགོན་མེད་པ། སྡུག་བསྔལ་དྲག་པོ་དེ་ལྟ་བུའི་ན་འདུ་ཆུད་པའི་སྐྱེ་བོ་སྡུག་པར་
གྱུར་པ། སྐྱབས་མེད་པ། མགོན་མེད་པར་གྱུར་པ། སྐྱོབ་པ་མེད་པ། དཔུང་གཉེན་མེད་པར་གྱུར་པ་ན་དེ་ལ་རིག་སྔགས་འཆང་གིས་ཕྱེ་མ་འདིས་ཕྱོགས་བཞིར་མཚམས་གཅད་པར་བྱ། ཕྱེ་མས་དཀྱིལ་འཁོར་གྱི་ཚུལ་དུ་རི་མོ་བྲིས་ལ་རིལ་བུ་ལྔ་དཀྱིལ་འཁོར་གྱི་དབུས་སུ་གཞག་གོ། །ཡུངས་ཀར་ལ་ཏིལ་མར་གྱི་རྒྱལ་པོས་བསྐུས་ལ་དོན་ཡོད་པའི་རྒྱལ་པོ་བརྒྱ་རྩ་བརྒྱད་བཟླས་བརྗོད་བྱ། ཁྲོ་བོའི་རྒྱལ་པོས་བརྒྱ་རྩ་བརྒྱད་བཟླས་བརྗོད་བྱས་ཏེ་དབང་བསྐུར་ནས་ཁྲོ་བོའི་རྒྱལ་པོ་ཧཱུྃ་ཞེས་བྱ་བས་ཕྱག་རྒྱ་བཅིངས་ལ་ས་ལ་བསྣུན་ཅིང་ཕྱོགས་བཞིར་གཏོར་བར་བྱ་བ་ཕྱག་རྒྱ་དང་ལྡན་པར་བྱས་པ་ཙམ་གྱིས་ཆུ་བཟང་པོ་རྣམ་པ་སྣ་ཚོགས་འབབ་ཅིང་རྫིང་འབྱུང་བར་འགྱུར། ཚལ་དང་། ཉེ་བའི་ཚལ་དང་། མེ་ཏོག་དང་། འབྲས་བུ་སྣ་ཚོགས་དང་ལྡན་པའི་གཞལ་མེད་ཁང་འབྱུང་བར་འགྱུར། ཕྱེ་མའི་དཀྱིལ་འཁོར་དེ་ལས་གྲོང་ཁྱེར་དང་། ཁང་བཟངས་འབྱུང་བར་འགྱུར། ཁྱིམ་གྱི་གནས་ལྔ་སྟོང་འབྱུང་བར་འགྱུར་ཞིང་བདེ་བ་དང་། ལོ་ལེགས་པ་དང་། ཉམས་དགའ་བ་དང་། སྐྱེ་བོ་དང་། མི་མང་པོས་གང་བ་འབྱུང་བར་འགྱུར། ཉོ་ཚོང་དང་། བ་ལང་དང་། མ་ཧེ་དང་། རྟ་དང་། གླང་པོའི་གནས་དག་འབྱུང་བར་འགྱུར། དགེ་སྦྱོང་དང་།བྲམ་ཟེ་དང་། ཚོང་པ་དང་། ཁྱིམ་དང་། ཁང་པ་བཟང་པོ་དག་འབྱུང་བར་འགྱུར་ཏེ། ཇི་སྲིད་དུ་བསམས་པ་དེ་སྲིད་དུ་འདུག་གོ། །ཆུ་དང་ཡུངས་ཀར་ལ་ལན་བདུན་བཟླས་བརྗོད་བྱས་ནས་ཕྱོགས་བཞིར་གཏོར་ན་མི་སྣང་བར་འགྱུར་རོ། །ཡུངས་ཀར་དེ་གཡུལ་འགྱེད་པའི་ནང་དུ་གཏོར་ན་དཔུང་གི་ཚོགས་ཡན་ལག་བཞི་དང་ལྡན་པར་འབྱུང་བར་འགྱུར་ཏེ། དེས་ཕ་རོལ་གྱི་དམག་ཚོགས་དང་། དགྲ་འཇིགས་ཤིང་འཇོམས་པར་བྱེད་པ་ལས་རྒྱལ་བར་འགྱུར་རོ། །གྲོང་ཁྱེར་གྱི་ཕྱོགས་བཞི་ཀུན་ཏུ་གཏོར་ན་གཏོར་བ་ཙམ་གྱི་མོད་ལ་འོབས་བཅད་ཅང་རབ་ཁ་ཁྱེར་གྱིས་བསྐོར་ལ་གྲོང་ཁྱེར་ཀུན་ཏུ་སྐྱེས་བུ་གོ་ཆ་བགོས་པ་དག་སྣང་བས་གྲོང་ཁྱེར་མནན་པའམ། གཙེ་བར་སུས་ཀྱང་མི་ནུས་སོ། །མཚན་མོའི་དྲིའི་ཏིལ་མར་དེ་ཉིད་ཡུངས་ཀར་ལ་བསྐུས་ཏེ། བརྒྱ་རྩ་བརྒྱད་བཟླས་བརྗོད་བྱས་ནས་ཆད་པ་གང་མེའི་ནང་དུ་
གཏོར། །ཆང་པ་གང་ཕྱོགས་བཞི་ཀུན་ཏུ་གཏོར་ན་ཀུན་ནས་མར་མེ་ཕྲེང་བ་འབྱུང་བར་འགྱུར་ལ། །ཇི་སྲིད་དགོས་པ་དེ་སྲིད་དུ་འབར་རོ། །གཙུག་ལག་ཁང་ངམ། དགོན་པའམ། རིའམ། ཕུག་གམ། འཆག་སའི་གནས་སམ། ཁྱིམ་དུ་གཏོར་ན་མར་མེའི་ཕྲེང་བ་འབྱུང་བར་འགྱུར་ལ། ཆུ་དང་ཡུངས་ཀར་གྱིས་མི་སྣང་བར་འགྱུར། གྲོང་ཁྱེར་གྱི་སྒོར་ཡུངས་ཀར་གཏོར་ན་གཏོར་བ་ཙམ་གྱི་མོད་ལ་དགྲ་ཐམས་ཅད་དང་། ཕ་རོལ་གྱི་དམག་ཚོགས་ཀྱི་གྲོང་ཁྱེར་མི་སྣང་བར་འགྱུར་རོ། །གང་ན་ཕྱིར་རྒོལ་བ་དང་། ཕ་རོལ་གྱི་དམག་ཚོགས་གནས་པའི་གྲོང་ངམ། གྲོང་ཁྱེར་རམ། ཚལ་གྱི་ནང་ངམ། དགོན་པའི་གནས་སུ་གཏོར་ན་འབྲོག་དགོན་པ་འབྱུང་བར་འགྱུར་ལ། ཐམས་ཅད་ཕན་ཚུན་ངོ་མི་ཤེས་ནས་འཇིགས་ཤིང་སྐྲག་པ་ཆེན་པོས་རབ་ཏུ་འབྲོས་པར་བྱེད་དོ། །དགྲའི་ཚོགས་ཀྱི་ནང་དུ་གཏོར་ན་མཚོན་ཆ་ཐམས་ཅད་དང་། འགྱེད་པའི་གོ་ཆ་ཐམས་ཅད་མི་སྣང་ཞིང་གཅེར་བུར་འགྱུར་རོ། །ཞལ་ཆེ་འགྱེད་པའི་ནང་དུ་གཏོར་ན་འགྱེད་ཟླ་གཙོ་བོ་དེ་གཅེར་བུར་འགྱུར་རོ། །དགྲའི་སྟེང་དུ་གཏོར་ན་མེ་འབར་བ་འབྱུང་བར་འགྱུར་ཏེ། དེ་དག་ལ་སོགས་པ་ཡིད་ལ་ཇི་ལྟར་བྱས་པའི་ལས་འབུམ་སྙེད་བྱེད་དོ། །དེ་ནས་ལས་རྒྱ་ཆེན་པོ་བྱེད་པར་འདོད་པའི་རིག་སྔགས་འཆང་གཙང་མ་ལེགས་པར་ཁྲུས་བྱས་པ་སྤོས་ཀྱིས་ལུས་བསྐུས་པ་དེས། ཡུངས་ཀར་དང་། ཏིལ་མར་གྱི་རྒྱལ་པོས་བསྐུས་པ་ལ་བརྒྱ་རྩ་བརྒྱད་བཟླས་བརྗོད་བྱས་ནས། འཕགས་པ་སྤྱན་རས་གཟིགས་དབང་ཕྱུག་ལ་གཏོར་བར་བྱ། ཁྲོ་བོའི་རྒྱལ་པོས་ལན་བདུན་དབང་བསྐུར་ནས་ཕྱག་རྒྱ་བཅས་པའི་ལག་པས་རིལ་བུ་སྤྱི་བོར་བཞག་ལ་ཕྱེ་མས་གདབ་པར་བྱ། ཏིལ་མར་གྱི་རྒྱལ་པོས་རྐང་པ་ལ་བྱུག་པར་བྱ། དོན་ཡོད་པའི་རྒྱལ་པོ་ལན་ཅིག་དྲན་པར་བྱ་སྟེ། ཡོངས་སུ་སྦྱང་བའི་ལས་ལྷན་ཅིག་བྱ་བ་ལེགས་པར་བྱས་པས་འཕགས་པ་སྤྱན་རས་གཟིགས་དབང་ཕྱུག་གི་གཟུགས་གཡོ་སྟེ་གར་དགའ་བར་འགྲོ་ལ། གཟུགས་བརྙན་གང་དུ་འགྲོ་བ་དེ་ཉིད་དུ་རང་འགྲོའོ། །ལྷའི་སྟེང་དུ་གཏོར་ན་ལྷ་ལྷའི་གནས་ནས་འཕོ་ཞིང་གར་དགའ་བ་དེར་འགྲོའོ། །ཕྱེ་མས་ལྷའི་
སྟེང་དུ་གཏོར་ལ་ཁྲོ་བོའི་རྒྱལ་པོ་ཧཱུཾ་ཞེས་བྱ་བ་མི་སྣང་བར་འགྱུར་རོ། །ཏིལ་མར་གྱི་རྒྱལ་པོ་ལ་ལན་བརྒྱ་རྩ་བརྒྱད་བཟླས་བརྗོད་བྱས་ལ་བདག་ཉིད་ཀྱི་པུས་མོ་དང་། བྱིན་པ་ལ་བསྐུས་ན་ནམ་མཁའ་ལ་འགྲོ་བར་འགྱུར་རོ། །རྐང་མཐིལ་ལ་བསྐུས་ན་སའི་སྟེང་ན་རྐང་པ་སོར་བཞི་ཙམ་མི་རེག་གོ། །རྡོའི་སྟེང་དུ་རྐང་པ་བཞག་པ་དང་། རྐང་རྗེས་བྱུང་བའི་སྟེང་དུ་རྫ་མ་དང་། བུམ་པ་དང་། བུམ་བུ་བཞག་པའི་རྐུབ་ལ་བསྐུས་ན་སོར་བཞི་ཙམ་གྱི་ཚད་དུ་ནམ་མཁའ་ལ་འདུག་གོ། །ཡུངས་ཀར་ལ་བཟླས་བརྗོད་བྱས་ནས་མེས་སྦྱིན་སྲེག་བྱས་པའི་ཐལ་བ་དེ་བླངས་ནས་ལན་བརྒྱ་རྩ་བརྒྱད་བཟླས་བརྗོད་བྱས་ལ། ཏིལ་མར་གྱིས་སྦྲུས་པ་ལ་ཁྲོ་བོའི་རྒྱལ་པོས་བརྒྱ་རྩ་བརྒྱད་དབང་བསྐུར་ནས་མིག་ལ་བསྐུས་ན་མིག་གསུམ་སྟོན་ཅིང་དབང་ཕྱུག་ཆེན་པོའི་གཟུགས་སུ་སྟོན་པར་བྱེད་དོ། །ཐལ་བས་ལུས་ལ་བྱུགས་ན་ཚངས་པའི་གཟུགས་སུ་སྟོན་ཏོ། །ཤིང་པ་ལ་ཤ་དང་པརྣ་ཤ་བསྲེས་པས་ལུས་བྱུགས་ན་སྲེད་མེད་ཀྱི་བུའི་སྟོབས་དང་། ཤུགས་དང་། གཟུགས་སུ་སྟོན་ཏོ། །ཏིལ་མར་ཆེན་པོས་ཁར་བསྐུས་ལ་ཐལ་བས་དཔྲལ་བར་ཐིག་ལེ་བྱས་ན་གཞོན་ནུའི་གཟུགས་སུ་སྟོན་ཏོ། །ཡུངས་ཀར་གྱི་འབྲུ་ཁ་དོག་སྣ་ཚོགས་ཅན་ལ་ཏིལ་མར་ཆེན་པོ་བྱུགས་པས་བསྐུས་ལ་དོན་ཡོད་པའི་རྒྱལ་པོས་བརྒྱ་རྩ་བརྒྱད་བཟླས་བརྗོད་བྱ། ཕྱག་རྒྱས་བརྒྱ་རྩ་བརྒྱད་དབང་བསྐུར་ཅིང་ཁྲོ་བོའི་རྒྱལ་པོས་བརྒྱ་རྩ་བརྒྱད་དབང་བསྐུར་ལ། དེ་ནས་དངུལ་གྱི་སྣོད་ཀྱི་ནང་དུ་གཞག །དེ་ནས་ལས་ཐམས་ཅད་བྱེད་དེ་ནམ་མཁའ་ལ་གཏོར་ན་ནོར་བུ་དང་རིན་པོ་ཆེའི་ཆར་འབབ་པར་སྟོན་ཏོ། །དེ་བཞིན་གཤེགས་པ་མཆོད་པའི་ཚེ་ནམ་མཁའ་ལ་གཏོར་ན་མེ་ཏོག་གི་ཆར་སྣ་ཚོགས་འབབ་པར་འགྱུར། འདུས་པའི་ནང་དུ་ནམ་མཁའ་ལ་གཏོར་ན་འབྲས་བུ་དང་ནོར་གྱི་རྒྱུན་སྣ་ཚོགས་པ་སྟོན་ཏོ། །ཚལ་གྱི་ནང་དུ་གཏོར་ན་མེ་ཏོག་དང་འབྲས་བུ་སྣ་ཚོགས་པ་སྟོན་ཏོ། །རི་ཕུག་ཏུ་གཏོར་ན་རྫས་དང་སྨན་སྣ་ཚོགས་སྟོན་ཏོ། །མཆོད་རྟེན་རྙིང་པའམ། གཙུག་ལག་ཁང་ངམ། ལྷའི་གནས་སུ་གཏོར་ན་ཡོ་བྱད་ཐམས་ཅད་ཀྱིས་ཡོངས་སུ་གང་ཞིང་རྫོགས་པ་ཁང་པ་བཟང་པོ་ཡངས་པ་གནས་ཀྱི་མཆོག་
སྟོན་ཏོ། །གྲོང་ཁྱེར་སྟོང་བར་གཏོར་ན་འཚོ་བའི་ཡོ་བྱད་ཐམས་ཅད་ཕུན་སུམ་ཚོགས་ཤིང་ཡོངས་སུ་རྫོགས་པ་དང་། ཡུལ་གྱི་རྒྱལ་པོ་དང་། སླས་དང་། བཀྲབས་པ་དང་། མདུན་ན་འདོན་པ་དང་། བློན་པོ་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དག་སྟོན་ཏོ། །ཡང་ཁྲོ་བོའི་རྒྱལ་པོའི་ཧཱུྃ་ཞེས་བྱ་བས་གཏོར་ན་དཔུང་གི་ཚོགས་ཡན་ལག་བཞི་པ་སྟོན་ཏོ། །དུར་ཁྲོད་ཀྱི་ནང་དུ་གཏོར་ན་ཤི་བའི་རུས་པ་གང་དང་གང་ལ་བབ་པ་དེ་དང་དེ་གང་དུ་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་ནམ། ལྷ་མ་ཡིན་ནམ། ནམ་མཁའ་ལྡིང་ངམ།དྲི་ཟའམ། མིའམ་ཅིའམ། ལྟོ་འཕྱེ་ཆེན་པོའམ། བྱའམ། ཉའམ། རུ་སྦལ་གྱི་རིགས་སུ་སྐྱེས་པའམ། ལྷའི་འཇིག་རྟེན་ནམ། སངས་རྒྱས་ཀྱི་ཞིང་དུ་སྐྱེས་པ་དེའི་རུས་པའམ། ཐོད་པ་ལ་ཚིག་འབྱུང་བར་འགྱུར་ལ་གང་དུ་སྐྱེས་པ་དེའི་གཏམ་ཡང་སྨྲའོ། །གང་དང་གང་གི་སྐྱེ་གནས་སུ་སྐྱེས་པ་དེ་ཐམས་ཅད་སྨྲ་ལ་ཐབས་ཇི་ལྟར་བྱ་བ་དེ་སྨྲའོ། །ཡུངས་ཀར་དེས་ཀྱང་རུས་གོང་འབྲེལ་པའམ། ཤི་བའི་རོའམ། རུས་པ་འཐོར་བ་ལ་བབ་ན་བབ་པ་ཙམ་གྱི་མོད་ལ་སེམས་ཅན་དམྱལ་བ་ལས་ཡོངས་སུ་ཐར་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཟོང་བཀྲམ་པའི་ནང་དུ་གཏོར་ན་ཐམས་ཅད་མི་མངོན་པར་འགྱུར་རོ། །ནམ་མཁའ་ལ་གཏོར་ན་སྐར་མ་རྣམས་མི་མཐོང་བར་འགྱུར་རོ། །སྐྱེ་བོ་མང་པོའི་ནང་དུ་གཏོར་ན་ཐམས་ཅད་གཅེར་བུར་འགྱུར་རོ། །འདུས་པའི་ནང་དུ་གཏོར་ན་ཐམས་ཅད་བྲོ་རྡུང་བར་བྱེད་དོ། །དགེ་འདུན་གྱི་ནང་དུ་གཏོར་ན་དགེ་སློང་ཐམས་ཅད་བསམ་གཏན་ཐོབ་པར་འགྱུར་རོ། །ཚོགས་ཀྱི་གཙོ་བོ་ལ་གཏོར་ན་རྣལ་འབྱོར་སྤྱོད་པར་འགྱུར་རོ། །མཁའ་འགྲོ་མའི་ཚོགས་ཀྱི་ནང་དུ་གཏོར་ན་ཐམས་ཅད་བོང་བུ་དང་། ཝ་དང་། ཁྱིའི་གཟུགས་ཅན་དུ་འགྱུར་རོ། །སྦྱོར་མའི་སྒོར་གཏོར་ན་སྦྱོར་མ་ཐམས་ཅད་འབར་ལ་མ་ཧེའི་གཟུགས་ཅན་དུ་སྣང་ངོ་། །ཤི་བའི་སྟེང་དུ་གཏོར་ན་བྲོ་རྡུང་བར་བྱེད་དོ། །ཐོད་པའི་སྟེང་དུ་གཏོར་ན་བྲོ་རྡུང་བར་བྱེད་ཅིང་རྒྱུག་ལ་ཕན་ཚུན་རྒྱུག་པར་བྱེད་དོ། །ལམ་གྱི་བཞི།
མདོར་གཏོར་ན་གནོད་སྦྱིན་དང་། སྲིན་པོ་དང་། འབྱུང་པོ་ཐམས་ཅད་རང་གི་གཟུགས་ཀྱིས་མདུན་ན་ཉེ་བར་འཁོད་ལ་ཇི་སྲིད་འཚོའི་དབང་དུ་གྱུར་ནས་འཁོད་དོ། །ཉིན་གཅིག་བཞིན་བདག་ཉིད་ལ་གཏོར་ན་མཆོད་པ་ཆེན་པོའི་གནས་སུ་འགྱུར་ཏེ། གཞན་ཡང་རང་གི་བློ་རྣམས་ཀྱིས་ལས་འབུམ་སྙེད་བྱེད་དོ། །དོན་ཡོད་པ་ཆེན་པོ་རྣམ་པར་འཕྲུལ་པའི་དཀྱིལ་འཁོར་སྒྱུ་མ་ལྟ་བུའི་ཆོ་གའོ།། །།