མཚན་མ་བྲི་བའི་ཕྱག་རྒྱའི་དཀྱིལ་འཁོར་གྱི་ཆོ་ག
དོན་ཡོད་པའི་སྒྱུ་མ་རྣམ་པར་འཕྲུལ་པ་ཞེས་བྱ་བའི་སྒྲུབ་པའི་ཆོ་ག་ནི། དེ་ནས་དེའི་འོག་ཏུ་ཕྱག་རྒྱ་བྲི་བའི་དཀྱིལ་འཁོར་བཤད་པར་བྱ་སྟེ། རྟགས་མཚོན་ཕྱག་རྒྱའི་དེ་ཉིད་ནི། །
པདྨ་རྒྱས་དང་སྣ་ཚོགས་མཚོན། །པདྨ་ཁ་ནི་ཕྱེད་བྱེ་བ། །ཕྱག་དག་ན་ནི་རབ་ཏུ་འཛིན། །ཕྱག་གཉིས་ཕྱུང་ཞིང་བརྐྱང་ནས་ཀྱང་། །བསྐུམ་པའམ་འཛིན་སྟངས་དེ་ཉིད་ཀྱིས། །ཀུན་ནས་ཕྲེང་བ་འབར་བའི་རྟགས། །མཚོན་ཆ་ཕྱག་རྒྱ་བསྣམས་པ་ནི། །འདི་ལྟ་སྟེ། རལ་གྲི་དང་། མདུང་ཐུང་དང་། མདའ་བོ་ཆེ་དང་། མདུང་རྩེ་གསུམ་པ་དང་། ཡིད་བཞིན་གྱི་ནོར་བུ་དང་། རྒྱལ་མཚན་དང་། རྡོ་རྗེ་དང་། རྡོ་རྗེ་ཕྲེང་ཟླུམ་དང་། ལས་ཀྱི་རྡོ་རྗེ་དང་། ཟུར་གསུམ་མ་ཞེས་བྱ་བ་དང་། འཁོར་ལོ་དང་། དུང་དང་། ཐོ་བ་དང་། ཞགས་པ་དང་། དགྲ་སྟ་དང་། དབྱུག་ཐོ་དང་། མེ་ཏོག་གི་ཐུམ་པོ་དང་། བུམ་པ་གང་བ་དང་། རིན་པོ་ཆེའི་སྣོད་དང་། པདྨའི་ཕྲེང་བ་དང་། རྡོ་རྗེའི་ཕྲེང་ཟླུམ་དང་། ཨུཏྤ་ལའི་ཕྲེང་བ་དང་། མེ་ཏོག་གི་ཕྲེང་བ་དང་། པདྨ་དང་། ཨུཏྤ་ལ་དང་། ཟླ་བ་དང་། རི་རབ་དང་། མེ་ལོང་དང་། ཀླུ་དང་། མཆོད་ཕྱིར་ཐོགས་དང་། ཟླ་བ་དང་། ཉི་མའི་རྒྱལ་མཚན་དང་། གདུགས་དང་། བེ་ཅོན་དང་། གཤིན་རྗེའི་བེ་ཅོན་དང་། ཆུ་སྲིན་གྱི་ཁ་དང་། སྔགས་དེའི་ཕྲེང་བ་དང་། མདུང་རྩེ་གསུམ་པའི་ཕྲེང་ཟླུམ་དང་། བསྡིགས་པ་དང་། བསྒྱིངས་པ་དང་། དབུགས་འབྱིན་པ་དང་། མི་འཇིགས་པ་དང་། མཆོག་སྦྱིན་པ་དང་། ཐལ་མོ་སྦྱར་བ་དང་། གླེགས་བམ་བསྣམས་པ་དང་། འཁར་གསིལ་དང་། ལྷུང་བཟེད་དང་། གདུགས་དང་། དབུ་རྒྱན་དང་། ནོར་བུ་བརྒྱུས་པ་དང་། གསེར་སྐུད་དང་། མུ་ཏིག་གི་ཕྲེང་བ་དང་། གདུ་བུ་དང་། དཔུང་རྒྱན་དང་། རྣ་ཆ་དང་། མེའི་ཐབ་ཁུང་ངོ་། །ཀུན་ནས་འབར་ཕྲེང་ཕྱག་རྒྱ་དེ། །སྣ་ཚོགས་རྨད་དུ་བྱུང་བས་སྨྲས། །མཚོན་ཆ་སྣ་ཚོགས་བསྣམས་པ་ཡི། །པདྨ་འཛིན་ལ་རབ་ཏུ་གནས། །རས་ལ་བྲིས་པའམ་དཀྱིལ་འཁོར་རམ། །རྩིག་པའམ་གང་ཡང་རུང་བ་ལ། །ཚོན་རྩི་རྣམ་པ་སྣ་ཚོགས་ཀྱིས། །གང་དུ་བྲིས་པ་མཐོང་བ་དེ། །ངན་འགྲོ་སེམས་ཅན་དམྱལ་བར་ནི། །ཕྱིར་ཡང་འགྲོ་བར་མི་འགྱུར་རོ། །འཇིག་རྟེན་དབང་གིས་རྟག་མཆོག་སྦྱིན། །སྡིག་པ་ཐམས་ཅད་རྣམ་པར་སྤངས། །གང་ཞིག་ཉེས་བྱས་མི་ཟད་པ། །མཚམས་
མེད་ལྔ་པོ་བྱེད་པ་ཉིད། །མནར་མེད་པ་ཡི་གནས་དང་ནི། །དམྱལ་བ་གཞན་དུ་གཞོལ་བ་གང་། །ཕྱག་རྒྱ་དེ་དག་མཐོང་ཙམ་གྱིས། །འགྲོ་བ་ཐམས་ཅད་ཟད་པར་འགྱུར། །སྐྱེ་དང་འཆི་ལས་རྣམ་པར་གྲོལ། །འཁོར་བའི་རྒྱ་མཚོ་བརྒལ་བར་འགྱུར། །དེ་དག་སྐྱེ་བ་ཕྱི་མར་ནི། །ཕྱིར་ཡང་མངལ་གྱིས་མི་གོས་ཏེ། །ཡང་དང་ཡང་དུ་པདྨ་ལས། །རྫུས་ཏེ་སྐྱེ་བ་དག་ཏུ་འགྱུར། །རྟག་ཏུ་བདེ་བ་ཅན་དུ་འགྲོ། །གང་ན་འདྲེན་པ་ཚེ་དཔག་མེད། །བཞུགས་པའི་སྤྱན་སྔར་རྟག་ཏུ་དེར། །སྐྱེ་འགྱུར་ཐེ་ཙོམ་མི་ཟ་ཞིང་། །དོན་རྣམས་བདེ་བར་འགྲུབ་འགྱུར་ཞིང་། །རིག་སྔགས་སྣ་ཚོགས་བདེ་བར་འགྲུབ། །བདེ་བར་དཀྱིལ་འཁོར་འགྲུབ་འགྱུར་ཞིང་། །རྟག་ཏུ་མི་ལྡོགས་གནས་འགྱུར། །ཕྱག་རྒྱ་འདི་དག་མཐོང་ཙམ་གྱིས། །སངས་རྒྱས་བྱང་ཆུབ་དང་མཉམ་འགྱུར། །དུས་གསུམ་གཤེགས་པའི་སངས་རྒྱས་ལ། །བླ་མེད་དགེ་རྩ་བསྐྱེད་པར་འགྱུར། །འཇིག་རྟེན་འདི་དང་ཕ་རོལ་ཏུ། །བསོད་ནམས་ཕུང་པོ་ཆེན་པོ་འཐོབ། །དེ་ནས་དཀྱིལ་འཁོར་རབ་བཤད་པ། །དེ་ཉིད་འགྲུབ་པའི་ཕྱག་རྒྱ་རྣམས། །འཇིག་རྟེན་འདི་དང་ཕ་རོལ་ཏུ། །འདོད་པ་ཐམས་ཅད་རབ་ཏུ་སྦྱིན། །སྡིག་པ་ཐམས་ཅད་མོད་ལ་སེལ། །གང་ཞིག་མཚམས་མེད་བྱེད་པ་དག །མི་བཟད་མནར་མེད་གནས་པ་ཡི། །སྡིག་པ་ཐམས་ཅད་འཇིག་པར་འགྱུར། །དམྱལ་བའི་སྒོ་རྣམས་བཅད་ནས་ནི། །མཐོ་རིས་སྒོ་ཕྱེ་ཐེ་ཚོམ་མེད། །སྒོ་ཕྱེ་གྱུར་པ་རྣམས་ལ་ནི། །སངས་རྒྱས་ཞིང་རྣམས་སྣང་བར་འགྱུར། །དེ་བཞིན་གཤེགས་པ་ཐམས་ཅད་ཀྱི་དགོངས་པ། མགོན་པོ་འཇིག་རྟེན་དབང་ཕྱུག་གི་ཕྱག་རྒྱའི་དཀྱིལ་འཁོར་མཐོང་བ་ཙམ་གྱིས་སེམས་ཅན་ཕྱིར་མི་ལྡོག་པར་འགྱུར་རོ། །ཕྱག་རྒྱའི་དཀྱིལ་འཁོར་འདི་མཐོང་ན་ཤི་འཕོས་པའི་མོད་ལ་བདེ་བ་ཅན་དུ་སྐྱེ་བར་འགྱུར་རོ། །དཀྱིལ་འཁོར་འདི་ཞུགས་པ་ཙམ་གྱིས་གང་ན་ཐུབ་པ་འདྲེན་པ་འོད་དཔག་མེད་བཞུགས་པའི་ཕོ་བྲང་དུ་མྱུར་དུ་འཇུག་པར་འགྱུར་རོ། །དཀྱིལ་འཁོར་གྲུ་བཞི་ལྷམ་པ་ལ། །ཀུན་ནས་ཆ་ནས་མཛེས་པར་བྱ། །གྲུ་བཞི་གོ་ལའི་ཚད་ཙམ་ལ། །སྒོ་བཞི་ཐེམ་སྐས་བཞི་ཡིས་བརྒྱན། །
ཤིན་ཏུ་ལེགས་པར་བསྐུས་དང་ལྡན། །འཇམ་ཞིང་མཉེན་ལ་མཉམ་པ་ཡི། །ས་ཡི་ཆ་དང་ལྡན་པ་ལ། །དཀྱིལ་འཁོར་ཤེས་རབ་ཅན་གྱིས་དབྱེ། །དཀྱིལ་འཁོར་དེ་ཉིད་ཐིག་བཏབ་ལ། །ཕྱག་རྒྱ་བྲི་བ་རྣམ་པར་དབྱེ། །ཕྱོགས་བཞིའི་ཆ་ནི་མཉམ་པ་ཡི། །དབུས་ན་དཀྱིལ་འཁོར་སྙིང་པོ་ཡིན། །གྲུ་བཞི་པ་ལ་ཀུན་ནས་ཁ་ཁྱེར་གྱི་རྣམ་པ་དང་། མདུང་རྩེ་གསུམ་པའི་ཕྲེང་བ་རྣམ་པར་དབྱེའོ། །གྲུ་བཞི་པའི་དབུས་སུ་ཕྱག་རྒྱ་དོན་ཡོད་པའི་ཞགས་པའི་ཕྱག་རྒྱ་ཀུན་ནས་འབར་བ་བླ་ན་མེད་པ་དང་། ཕྱག་རྒྱ་རྒྱན་གྱིས་བརྒྱན་པ་ཚོན་རྩི་སྣ་ཚོགས་ཀྱིས་བྲིའོ། །དབུས་ཀྱི་དཀྱིལ་འཁོར་གྱི་ཕྱི་རོལ་གྱི་གནས་སུ་ཕྱག་རྒྱ་བྲི་བ་ཡང་ཤིན་ཏུ་འབྱེས་པར་བྱའོ། །དཀྱིལ་འཁོར་ཀུན་ནས་གོས་དང་། བ་དན་དང་། རྒྱལ་མཚན་གྱིས་བརྒྱན་ལ་ཀུན་དུ་ཡུངས་ཀར་དཀར་པོ་གཏོར་རོ། །ཕྱག་རྒྱའི་དཀྱིལ་འཁོར་ཀྱི་ཕྱི་རོལ་གྱི་གནས་སུ་ཕྱོགས་བཞི་ཀུན་དུ་བྱ་བ་ནི་བ་ལང་གི་ལྕི་བས་དང་བསྲེས་པ་ཤིན་ཏུ་ལེགས་པར་བྱུགས་པ་དང་ལྡན་པ་ལ་ཚོན་རྩིའི་ཕྱེ་མས་ཁ་ཁྱེར་གྱི་རྣམ་པ་དང་། ཀུན་ནས་པདྨའི་ཕྲེང་བ་རྒྱ་ཆེན་པོ་དང་། མཚོན་ཆ་བྲིས་ལ་འདིའི་སྒོ་བཞི་ཡང་རྣམ་པར་དབྱེས་པར་བྲིའོ། །ཇི་ལྟར་ཕྱག་རྒྱ་དང་མཐུན་པའི་རོ་སྣ་ཚོགས་ཀྱི་གཏོར་མ་གཞག་པར་བྱ་སྟེ། ཕྱག་རྒྱ་རེ་རེ་ལ་ཡང་མཆོད་ཡོན་ཕུལ་ལ། དབྱིབ་མོ་དང་། ཕྲུ་བ་དང་། བུམ་པ་དང་། ཁམ་ཕོར་དང་། རྫེའུ་གཏོར་མས་བཀང་ལ་གཞག་གོ། །ཀུན་དུ་བུམ་པ་གང་བ་དང་། །བདུག་སྤོས་ཀྱི་ནི་སྣོད་དག་དང་། །མེ་ཏོག་འབྲས་བུ་སྣ་ཚོགས་དང་། །གཏོར་མ་དཀར་པོ་དག་གིས་བཀང་། །མེ་ཏོག་རྣམ་པར་བཀྲམ་བྱས་ལ། །ཀུན་དུ་ཕྲེང་བས་གཞག་པར་བྱ། །ཕྲེང་བ་བཟང་པོ་བཞག་ནས་ཀྱང་། །དེ་བཞིན་ཀུན་དུ་བདུག་སྤོས་དབུལ། །ཨ་ག་རུ་དང་། ཙནྡན་དང་། དུ་རུ་སྐ་དང་། ས་ལ་ཀི་དང་སྤྲྀ་ཀ་དང་། གུ་གུལ་དང་། སྲ་རྩི་པོག་དང་། སྒྲོན་ཤིང་དང་། གླ་རྩི་དང་། ག་བུར་གྱི་བདུག་པ་འདི་དག་གིས་བདུགས་ལ། གཏོར་མ་དང་། མེ་ཏོག་དང་། ལྷ་བཤོས་དབུལ་ལོ། །ཕྱག་རྒྱའི་དཀྱིལ་འཁོར་དུ་འཇུག་པས་དོན་ཡོད་པའི་རྒྱལ་པོ་དྲན་པར་བྱས་ཏེ་བསྐོར་ལ་
ཕྱག་རྒྱའི་དཀྱིལ་འཁོར་ལ་ཕྱག་བྱ་ཞིང་ཕྱག་རྒྱ་ཐམས་ཅད་ལ་མེ་ཏོག་བཀྲམ་ཞིང་མེ་ཏོག་གཏོར་རོ། །གང་ཕྱག་རྒྱའི་དེ་ཁོ་ན་ཉིད་གསང་བ་འདི་དང་། ཕྱག་རྒྱའི་དཀྱིལ་འཁོར་འདི་སྒྲུབ་པ་གང་དགོས་པ་ལ་སྔར་དཀྱིལ་འཁོར་ཕྱག་རྒྱ་དང་བཅས་པ་ལ་མཆོག་ཏུ་མཛེས་པར་བྱས་ལ། ཕྱིས་ལས་ཐམས་ཅད་བྱའོ། །རིག་སྔགས་འཆང་བ་གཙང་མ་ཡིས། །གཙང་མ་ཡི་ནི་གོས་བགོས་ལ། །ཇི་ལྟར་དཀྱིལ་འཁོར་ཆོ་ག་བཞིན། །དཀྱིལ་འཁོར་དུ་ནི་གཞུག་པར་བྱ། །ཇི་ལྟར་དཀྱིལ་འཁོར་ལ་དགོས་པ། །དེ་བཞིན་དུ་ནི་ལས་བྱའོ། །ཕྱག་རྒྱའི་དཀྱིལ་འཁོར་བླ་མེད་པ། །དཀྱིལ་འཁོར་འདིར་ནི་ཞུགས་ཙམ་གྱིས། །ཐུབ་པ་སྣང་མཛད་ཀྱིས་གསུངས་པའི། །སྤྱི་ཡི་རིགས་ནི་ཐམས་ཅད་དུ། །ཕྱག་རྒྱ་དཀྲིགས་དང་གཏམས་རྣམས་ཀྱིས། །དམ་ཚིག་ཀུན་དུ་ཤེས་པར་འགྱུར། །སྤྱི་རིགས་ཀུན་གྱི་ཆོ་ག་ཡི། །དམ་ཚིག་རྗེས་ཞུགས་དེ་བཞིན་ནོ། །དཀྱིལ་འཁོར་ཀུན་ཏུ་ཞུགས་པ་དང་། །རྒྱལ་བས་ལུང་ནི་བསྟན་པར་འགྱུར། །ཀུན་གཟིགས་དེ་བཞིན་གཤེགས་པ་ཡི། །ཕྱག་ནི་སྤྱི་བོར་འཇོག་པར་མཛད། །ཆོས་ཀྱི་རོ་ནི་བདུད་རྩི་ཡི། །གཟི་བརྗིད་མོད་ལ་འཇུག་པར་འགྱུར། །རྣམ་སྣང་མཛད་གསུངས་དཀྱིལ་འཁོར་དུ། །དོན་ཡོད་དངོས་གྲུབ་སྩོལ་བར་མཛད། །ཕྱག་རྒྱའི་དཀྱིལ་འཁོར་གང་བཞུགས་པ། །ཀུན་དུ་སྤྱི་ཡི་རིགས་རྣམས་ཀྱི། །དོན་ཡོད་དངོས་གྲུབ་མཆོག་མྱུར་ཐོབ། །སངས་རྒྱས་བྱེ་བ་གང་གཱའི་ཀླུང་གི་བྱེ་མ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུའི་དེ་བཞིན་གཤེགས་པའི་དྲུང་དུ་དགེ་བའི་རྩ་བ་བསྐྱེད་པར་འགྱུར་རོ། །བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་ཏེ། ཡོན་ཏན་གྱི་ཕན་ཡོན་འདི་དག་ནི་ཚེ་འདི་ཡིན་པར་ཁོང་དུ་ཆུད་པར་བྱའོ། །བདེ་བ་ཅན་གྱི་འཇིག་རྟེན་གྱི་ཁམས་སུ་པདྨ་ལས་རྫུས་ཏེ་སྐྱེ་བར་འགྱུར་རོ། །ཚེ་རབས་སུ་ཚེ་རབས་དྲན་ཞིང་འོད་ཟེར་བྱེ་བ་འབར་བའི་ལུས་དང་ལྡན་ཞིང་། །ཚེ་བསྐལ་པ་བརྒྱ་སྟོང་དཔག་ཏུ་མེད་པར་འགྱུར་རོ། །ཡོན་ཏན་ཐམས་ཅད་དྲི་མ་མེད་པར་སྣང་བ་དོན་ཡོད་པའི་རྣམ་པར་འཕྲུལ་པ་བསྟན་པ་བཀོད་པ་ཞེས་བྱ་བའི་ཏིང་ངེ་འཛིན་
འཐོབ་སྟེ། །གང་ཏིང་ངེ་འཛིན་ཐོབ་པས་སྒྱུ་མ་ཆེན་པོ་ལྟ་བུའི་རྣམ་པར་འཕྲུལ་པའི་རྫུ་འཕྲུལ་གྱི་ཆོ་འཕྲུལ་སྟོན་པར་བྱེད་དོ། །དཀྱིལ་འཁོར་ཐམས་ཅད་ཀྱི་ལྷའི་སྤྱིའི་རིགས་དེ་བཞིན་གཤེགས་པའི་རིགས་ཀྱིས་བྱིན་གྱིས་བརླབས་ཀྱི་རྗེས་སུ་འཇུག་པར་འགྱུར་རོ། །ལྷ་དང་། ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་ཐམས་ཅད་དབང་དུ་གྱུར་ནས་རྟག་ཏུ་རྗེས་སུ་འབྲང་བར་འགྱུར་རོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱིས་དཀྱིལ་འཁོར་རྣམས་འབྱོར་པར་གཟིགས་ནས་བསྲུང་བ་དང་། བསྐྱབ་པ་དང་སྦ་བ་མཛད་པར་འགྱུར་རོ། །སེམས་ཅན་ཐམས་ཅད་ཕྱི་བཞིན་འབྲང་ཞིང་མཆོད་པ་ཆེན་པོ་བྱེད་པར་འགྱུར་རོ། །རྒྱལ་པོ་བཙུན་མོ་དང་། འཁོར་དང་བཅས་པ་རྣམས་ཀྱིས་མཆོད་པའི་འོས་ཆེན་པོར་འགྱུར་རོ། །སེམས་ཅན་ཐམས་ཅད་གཅིག་ཏུ་བླ་མར་བྱེད་པར་འགྱུར་རོ། །ནད་ཐམས་ཅད་མེད་པར་འགྱུར་རོ། །སྒྲིབ་པ་ཐམས་ཅད་རྣམ་པར་དག་པར་འགྱུར་རོ། །མཚན་མ་བྲི་བའི་ཕྱག་རྒྱའི་དཀྱིལ་འཁོར་གྱི་ཆོ་གའོ།། །།