གནོད་སྦྱིན་གྱི་སྡེ་དཔོན་ཆེན་པོ་གར་མཁན་མཆོག་གི་བརྟག་པ།
རྒྱ་གར་སྐད་དུ། མ་ཧཱ་ཡཀྵ་སེ་ན་པ་ཏི་ན་ར་ཀུ་པར་ཀ་ལྤ། བོད་སྐད་དུ། གནོད་སྦྱིན་གྱི་སྡེ་དཔོན་ཆེན་པོ་གར་མཁན་མཆོག་གི་བརྟག་པ། དཀོན་མཆོག་གསུམ་ལ་ཕྱག་འཚལ་ལོ། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གནོད་སྦྱིན་བདག་
པོ་ཉི་མ་འབུམ་གྱི་གཟི། །འོད་ཟེར་དཔག་མེད་སྡང་བ་འདུལ་མཛད་པ། །ཐུགས་རྗེའི་བདག་ཉིད་འགྲོ་དོན་མ་ལུས་མཛད། །བདུད་བཞི་འཇོམས་མཛད་དེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་་ལྕང་ལོ་ཅན་གྱི་ཕོ་བྲང་ན། རྒྱལ་པོ་རྣམ་ཐོས་ཀྱི་བུའི་གནས་ན་བཞུགས་ཏེ། གྲངས་མེད་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། མཐུ་བོ་ཆེ་དང་། ལྷ་ཆེན་པོ་དང་། ནོར་བུ་བཟང་པོ་དང་། གང་བ་བཟང་པོ་དང་། སྟོབས་ཀྱི་ལྷ་དང་། སྟོབས་ཆེན་པོའི་སྟོབས་དང་། དགའ་བའི་དབང་པོ་དང་། ནག་པོ་ཆེན་པོ་དང་། བེ་ཤྭ་ར་དང་། མ་མོའི་ཚོགས་དང་། གསང་བ་ལ་གནས་པ་དང་། གྲུ་བཞིའི་རིན་གནས་པ་དང་། འབོད་སྒྲོགས་དང་། རྣམ་པར་འབོད་སྒྲོགས་དང་། རྣམ་པར་འཇིགས་བྱེད་དང་། རིན་ཆེན་གསང་བ་དང་། རབ་གནས་གསང་བ་དང་། མཐའ་ཡས་གསང་བ་དང་། རབ་མཆོག་མཆེ་བ་དང་། མཆེ་བ་འཁྱིལ་བ་དང་། མཆེ་བ་རྣོ་བ་དང་། རྔ་མོའི་རྐང་པ་ཅན་དང་། བ་ལང་གི་མགོ་བོ་ཅན་དང་། རྒྱལ་བའི་དྲང་སྲོང་དང་། ཨ་ད་བ་ཀ་དང་། རབ་ཏུ་འཇོམས་པ་དང་། འོད་བྱེད་དང་། རབ་ཏུ་གཟི་བརྗིད་ལྡན་པ་དང་། ཤིན་ཏུ་འོད་དང་། ཡང་དག་ཤེས་དང་། མིག་བཟང་དང་། རྟོག་འདོད་དང་། གསེར་གྱི་བ་སྤུ་ཅན་དང་། གསེར་གྱི་སྐྲ་ཅན་དང་། རྣམ་པར་འཁྱིལ་བ་དང་། རྣམ་པར་རྒྱལ་བ་དང་། འབར་བར་སྨྲ་བ་དང་། མིའི་ཐོད་པ་ཅན་དང་། རབ་ཏུ་གནས་པ་དང་། དབུང་བཟང་དང་། པན་ཙི་ཀ་དང་། མེ་ཏོག་མཆེ་བ་ཅན་དང་། གཙུག་ན་མེ་ཏོག་དང་། གཙུག་ན་ནོར་བུ་དང་། ནོར་གྱི་བདག་པོ་དང་། རབ་ཏུ་གསང་བ་དང་། རབ་ཏུ་ལྡན་པ་དང་། ཤུགས་དྲག་པོའི་ལུས་དང་། ཉི་མའི་གཟི་བརྗིད་དང་། ཉི་མའི་འོད་དང་། དགའ་བའི་ཉི་མ་དང་། མཆེ་བ་གཙིགས་པ་དང་། འབར་བའི་ཕྲེང་བ་དང་། འབར་བའི་འོད་དང་། དཔའ་བའི་འོད་དང་། འཇིགས་བྱེད་འོད་དང་། ཀུན་དུ་གནས་པ་དང་།
དེ་དག་ལ་སོགས་པའི་གནོད་སྦྱིན་གྱི་སྡེ་དཔོན་མཐུ་ཆེན་པོ་རྫུ་འཕྲུལ་ཆེན་པོ་གྲངས་མེད་པ་བརྒྱ་སྟོང་གིས་བསྐོར་ཏེ། བཅོམ་ལྡན་འདས་ཀྱི་སྤྱན་སྔར་ལྷགས་ནས་འཁོད་དོ། །རྡོ་རྗེ་སྙིང་པོ་ལ་སོགས་པའི་བྱང་ཆུབ་སེམས་དཔའི་འཁོར་མང་པོ་ཡང་ལྷགས་ནས་འཁོད་དོ། །གནས་བརྟན་ཆེན་པོ་ཤཱ་རིའི་བུ་ལ་སོགས་པ་ཉན་ཐོས་ཀྱི་ཚོགས་ཆེན་པོ་དང་། རིགས་འཛིན་ཆེན་པོའི་འཁོར་འཚོགས་པ་ཉེ་བར་ལྷགས་སོ། །དྲང་སྲོང་མངོན་པར་ཤེས་པ་ལྔ་དང་ལྡན་པ་གྲངས་མེད་པ་ལྷགས་སོ། །ལག་ན་རྡོ་རྗེ་གནོད་སྦྱིན་གྱི་དབང་པོ་ཡང་འཁོར་མང་པོས་བསྐོར་ཏེ་ལྷགས་སོ། །ངལ་བསོ་བའི་བུ་གར་མཁན་མཆོག་ལག་ན་རྡོ་རྗེ་གནོད་སྦྱིན་གྱི་དབང་པོ་དེ་མཐུ་བོ་ཆེའི་ཆ་ལུགས་འཛིན་ཏེ། ཆ་ལུགས་བཟང་པོ། ཞལ་བཟང་པོ། སྐུ་བཟང་པོ། ཕྱག་བཟང་པོ། ནོར་བུ་རྣམ་པ་སྣ་ཚོགས་འཁྱིལ་བ་འཆང་བ་དང་། དབུ་བཟང་པོ་དང་། སྤྱན་བཟང་པོ་སྣ་ཚོགས་པའི་མེ་ཏོག་གིས་མཉམ་པར་བརྒྱན་པའི་སྐུ་ཉི་མ་དང་ཟླ་བ་ལས་ལྷག་པའི་གཟི་བརྗིད་འཆང་བ། རྒྱན་སྣ་ཚོགས་ཀྱིས་རྣམ་པར་བརྒྱན་པའི་སྐུ། དབང་པོ་དང་། ཉེ་དགའ་བོ་ཀླུའི་རྒྱལ་པོས་སེ་རལ་དུ་བྱས་པ། ཏཀྵ་ཀ་ཀླུའི་རྒྱལ་པོས་རྐེད་ཆིངས་སུ་བཅིངས་པ། གཟུགས་བརྙན་སྣ་ཚོགས་དང་། མཚོན་ཆ་སྣ་ཚོགས་འཛིན་པ། ཟླ་བ་དང་། ཉི་མ་འཛིན་ཅིང་ཀུན་དུ་འབར་བའི་སྐུ། སྣང་བར་བྱེད་ཅིང་ཞལ་རབ་ཏུ་བཞད་ནས་བཅོམ་ལྡན་འདས་ཀྱི་སྤྱན་སྔར་སྙེམས་པའི་ཡིད་ཀྱིས་འདུག་གོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་སྟན་ལས་ལངས་ཏེ། བཅོམ་ལྡན་འདས་གང་ན་བ་དེར་འོངས་ཏེ། བཅོམ་ལྡན་འདས་ལ་རིན་པོ་ཆེ་སྣ་ཚོགས་པའི་ངོ་བོ་ཉིད་ཀྱིས་མཆོད་པ་བྱེད་པ་ནི་ཐང་ལས་སྐྱེས་པ་དང་། ཆུ་ལས་སྐྱེས་པའི་མེ་ཏོག་སྣ་ཚོགས་པད་མོ་དང་། ཀུ་མུད་དང་། བུཎྜ་རཱི་ཀ་དང་། ཨུཏྤ་ལ་མཐིང་ག་དང་། སོའུ་གན་ཏི་དང་། བར་ཤི་ཀ་དང་། །ཙམ་པ་ཀ་དང་། །མ་ན་དཱ་ར་བ་དང་། མན་དཱ་ར་བ་ལ་སོགས་པའི་མེ་ཏོག་ཐོགས་ནས་བཅོམ་ལྡན་འདས་ལ་མཆོད་དེ། བརྒྱ་ཕྲག་སྟོང་དུ་བསྐོར་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གནོད་སྦྱིན་གྲངས་མེད་པའི་
འཁོར་ཆེན་པོ་འདུས་པར་གྱུར་ཏོ། །ཤ་ཆེན་པོ་ཟ་བ་དང་། མིའི་ལུས་ཟ་བའི་གནོད་སྦྱིན་དང་། འབར་བ་དང་། སྣ་ཚོགས་ཀྱི་གཟུགས་འཛིན་པ་མང་པོ་འདུས་ཏེ། ལྷ་དང་། ཀླུ་དང་། གནོད་སྦྱིན་དང་། འབར་བ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་སྣ་ཚོགས་པ་འདུས་པར་གྱུར་ཏོ། །བཅོམ་ལྡན་འདས་རིགས་འཛིན་ཆེན་པོའི་འཁོར་དང་། དྲང་སྲོང་ཆེན་པོའི་ཚོགས་ཀྱི་འཁོར་དེ་དག་ཀྱང་འདུས་པར་གྱུར། བྱང་ཆུབ་སེམས་དཔའི་ཚོགས་མང་པོ་ཡང་ལྷགས་ཏེ། ཐོག་མའི་ངོ་མཚར་བརྗིད་པར་མཐོང་ངོ་། །བཅོམ་ལྡན་འདས་གང་རིག་པ་བཤད་པར་དགོངས་པ་དེ་བཅོམ་ལྡན་འདས་ཀྱིས་བཤད་དུ་གསོལ། བདེ་བར་གཤེགས་པ་དུས་འདིའི་ཚེ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་ངལ་བསོ་པོའི་རྒྱལ་པོ་ཆེན་པོ་ལ་དབུགས་ཕྱུང་ནས་གནོད་སྦྱིན་འདུལ་བ་ཀུན་དུ་འབར་བའི་འོད་ཟེར་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ཀྱིས་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱི་སྐུ་ལས་འོད་ཟེར་སྣ་ཚོགས་བྱུང་སྟེ། གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འོད་ཟེར་གྱིས་སྣང་བར་བྱས་ནས། འདུས་པའི་གནོད་སྦྱིན་དང་། འབར་བ་དང་། འབྱུང་པོ་དང་། ཡི་དགས་དང་། ཤ་ཟ་དང་། གཟའ་དང་། བརྗེད་བྱེད་ཐམས་ཅད་ལ་བསྐུལ་ནས་གདུག་པའི་ཀླུ་དང་ཀླུ་ཐམས་ཅད་ལ་བསྐུལ་ནས་སླར་འོངས་ཏེ། བཅོམ་ལྡན་འདས་ཀྱི་སྐུ་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱི་གཙུག་ཏུ་ཞུགས་པ་དང་། བཅོམ་ལྡན་འདས་བཞད་དེ། བཞད་པ་དེས་འོད་ཟེར་སྣ་བདུན་ཞལ་གྱི་སྒོ་ནས་བྱུང་སྟེ། རྣམ་ཐོས་ཀྱི་བུའི་སྲས་གར་མཁན་མཆོག་གི་སྤྱི་པོར་ཞུགས་སོ། །བཅོམ་ལྡན་འདས་ཀྱི་འོད་དེ་དེར་ཞུགས་མ་ཐག་ཏུ་གར་མཁན་མཆོག་གནོད་སྦྱིན་གྱི་དབང་པོ་རང་གི་གཟུགས་སྣང་བར་གྱུར་ཏེ། གནོད་སྦྱིན་རབ་ཏུ་འཇོམས་པར་བྱེད་པ། འཇིགས་པར་བྱེད་པའི་གད་མོ་ཆེར་སྟོང་པའི་སྐུ། འཇིགས་པར་བྱེད་པའི་སྒྲ་འབྱིན་པ། སྐུ་ཆེན་པོ་ཕྱག་སྟོང་པའི་རི་རབ་ལྟར་
གནས་པའི་སྐུ། ས་རབ་ཏུ་གཡོ་ཞིང་སྟོབས་ཆེན་པོ་རྣམ་པར་གནོན་པ། མཚོན་ཆ་སྣ་ཚོགས་འཛིན་ཅིང་འཇིགས་པར་བྱེད་པའི་སྒྲ་འབྱིན་པ། མིའི་ཐོད་པའི་ཕྲེང་བ་བཅིངས་ལ། མི་མགོ་ཁྲག་གིས་བཀང་བ་འཛིན་པའི་ཕྱག །སྟག་ལྤགས་ཀྱི་སྟོད་གཡོགས་བྱས་པ། སེངྒེའི་འགྲོས་ལྟར་གྲགས་པ་དེ་བཅོམ་ལྡན་འདས་གང་ན་བ་དེར་ཉེ་བར་འོངས་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་སྙིང་པོ་མཆིས་ཏེ། ལྷ་མ་ཡིན་ཀྱི་ཚོགས་ཐམས་ཅད་རབ་ཏུ་གཞོམ་པ་དང་། ལྷ་དང་། ཀླུ་དང་། གནོད་སྦྱིན་རྣམས་ཉེ་བར་དགུག་པ་དང་། ཀླུ་རྣམས་རབ་ཏུ་གཞོམ་པ་དང་། གནོད་སྦྱིན་དང་། འབྱུང་པོ་དང་། ཤ་ཟ་དང་། གཟའ་ཐམས་ཅད་རབ་ཏུ་འཇོམས་པར་བྱེད་པ་དང་། ཚངས་པ་དང་། དབང་པོ་དང་། མཐུ་བོ་ཆེས་ཕྱག་བྱས་པ། རིག་འཛིན་ཐམས་ཅད་ཀྱི་སྒྲུབ་པ་བརྗོད་པ་ཙམ་གྱིས་འགྲུབ་པ་སྟེ། དེ་བཅོམ་ལྡན་འདས་བདག་གིས་འཁོར་ཆེན་པོ་ལྷགས་པའི་མདུན་དུ་རབ་ཏུ་བརྗོད་པར་འཚལ་ན། རིག་འཛིན་ཐམས་ཅད་གྲུབ་པ་དང་། སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་པའི་ཕྱིར་ཀུན་དུ་བརྗོད་པ་ཙམ་གྱིས་འགྲུབ་པར་འགྱུར་ཞིང་། ལན་ཅིག་དྲན་པ་ཙམ་གྱིས་ཀྱང་རིག་པ་ཐམས་ཅད་ཀྱི་དངོས་གྲུབ་རབ་ཏུ་འབྱིན་པར་བྱེད་ཅིང་དཀྱིལ་འཁོར་ཐམས་ཅད་ཀྱི་རྗེས་སུ་ཞུགས་ནས་དམ་ཚིག་ཤེས་པར་འགྱུར་བ་ནི་འདི་ལྟ་སྟེ། །དེ་བཞིན་གཤེགས་པའི་རིགས་དང་། །ནོར་བུའི་རིགས་དང་། ཕན་གླང་གི་རིགས་དང་། པདྨའི་རིགས་དང་། རྡོ་རྗེའི་རིགས་དང་། དཀྱིལ་འཁོར་ཆེན་པོའི་དངོས་གྲུབ་སྟེར་བ། དམ་ཚིག་དང་། དཀྱིལ་འཁོར་ཐམས་ཅད་ཀྱི་ཕྱག་རྒྱས་ཐམས་ཅད་འཇུག་པར་བྱེད་པ། གཟུངས་ཆེན་པོའི་སྔགས་ཀྱི་ལེའུ་རྗེས་སུ་སྟེར་བ། བཅོམ་ལྡན་འདས་ཆུང་ངུ་ན་ལན་ཅིག་རྗེས་སུ་དྲན་པས་ཀྱང་། དངོས་གྲུབ་ཐམས་ཅད་རྗེས་སུ་སྟེར་བར་འགྱུར་ཏེ། བཅོམ་ལྡན་འདས་ཀྱི་རིགས་ཐམས་ཅད་ཀྱི་སྤྱི་བོར་དབང་བསྐུར་དུ་གསོལ། བཅོམ་ལྡན་འདས་བདག་ལ་བརྩེ་བར་དགོངས་ཏེ། ཕྱག་རྒྱ་ཆེན་པོའི་དཀྱིལ་འཁོར་དང་
ལེའུ་དང་སྔགས་ཀྱི་དངོས་གྲུབ་རྗེས་སུ་སྩལ་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པས་གར་མཁན་མཆོག་གནོད་སྦྱིན་གྱི་སྡེའི་བདག་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཐམས་ཅད་ཀྱི་སྤྱིའི་དཀྱིལ་འཁོར་དང་། ཕྱག་རྒྱ་དང་། གཟུངས་སྔགས་གྲུབ་པར་ངས་བྱིན་གྱིས་བརླབས་ཀྱིས། རིག་འཛིན་ཐམས་ཅད་ཀྱི་དངོས་གྲུབ་ཐོབ་པར་བྱ་བའི་ཕྱིར་གནོད་སྦྱིན་གྱི་བདག་པོ་སྒྲོགས་ཤིག །དེ་ནས་གར་མཁན་མཆོག་གནོད་སྦྱིན་གྱི་སྡེ་དཔོན་གྱིས། བཅོམ་ལྡན་འདས་གང་ན་བ་དེར་ཉེ་བར་སོང་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་སྤྱན་སྔར་འདུག་སྟེ། གསང་སྔགས་ཀྱི་ཚིག་འདི་སྨྲས་སོ། །ཨཱཪྻ་ན་རྟ་ཀུ་པེ་ར། མཱུ་ལ་མནྟྲ། ཨོཾ་ཨཱ་ཐཱ་ཏོ་ཛྭ་ལི་ཏ། ཧཱུ་ཏ་བྷ་ཧོ་ཏ་ཏ་བྷ། ཀ་ན་ཀ་མ་ཎི། ཤཱི་ལ་ཏོ་པ་ཧ་ས་ཀཱ། མ་ཎི་པྲ་ལམྦ་ཧ་ར་ཨརྡྷ་ཧ་རི། ཙིཏྟ་ཧ་རི་ཏཱ་ལ་ཙྪནྡ་ན་ཨ་ག་རུ། དུ་རུ་སྐ། ས་ཀྲྀ་ཏ་སནྣ་དྷྱ་ཤ་རཱི་རཾ། མ་ཧཱ་མེ་རུ་མཾ་དཱ་ར་དྷ་ར། ཝ་ར་གམ་བྷཱ་ར་དྷི་རདྷྱཻ་ཪྻ། ཨ་སུ་རཱ་ག་ཎ། ནི་ཡུན་དམན་དྷ་ར་ད་ཤ་དྷ་ར་ཎི། དྷ་ར་ག་མྦྷཱི་ར། དྷི་ར། ཕི་ར་ཕི་ར། མ་ཕི་ར་མ་ཕི་ར། ཨ་སུ་ར་ག་ཎ་ནི། སུ་དྷ་ན་མར་དྷ་ནཾ། ཏཛྫ་ནི། བི་ཡུ་མིག །ཨང་གར་ཨ་ཏི་ག་ཏི་ར་ཎ། བྲ་བྷཱ་ཨ་ནུ་ར་ཙི་ཏི། མཎྜ་ལ་ན། ཀ་བཱ་ལ་མཱ་ལ། ཨ་བྷ་བ་དྷྭ་ཛཱ་ཏི། ཧ་ས་ཀུ་ལན། ནི་རྨ་ལཾ། སཾ་བུ་ལཾ། སཱ་ག་ར་སུ་མཻ་རུ་བར་བ་ཏ། ཏ་རི་ཏ་རདྷ་ས་ཤི་ཁ་རདྷཱ་ཏུ་ཤེ་ལ་པ་ཏ། ན་ག་རཾ། ཨ་མོ་གྷ་ད་ཤ་ཨཱ་དི་ཏྱ། མཎྜལ་ན། ཤ་ཤི་ཀི་ར་ན་མོ་ཝི་དྷ་རཾ། ཙ་ལ་ཙི་མ་ལ། ས་ག་ལ། །ཛྱོ་ན་ཀྲི་ཏ། ཨ་བ་བྷཱ་སཾ་ཀུ་ལཾ། པྲ་མ་ཐ་ནཾ། ཨ་སུ་ར་བྷ་བ་ན། ཀུ་ལ་ནཱ་ཤ་ནཾ། བྲ་ཧྨེནྡྲ། རུ་དྲན་མ་ཀྲི་ཏཾ། ནཱཾ་ཏི་ཏྲཾ། བཱུ་ཛི་ཏཾ། སརྦ་པིདྱཱ་དྷ་ར་ན་མ་སྐྲྀ་ཏཾ། ཤི་ར་བི་སིདྡྷ་ཡ་ཤ། གན་དྷ་ར་བ་སུ་ཙི་ཏཾ། མཉཱ་མེ་རུ་མཎྜལ་ན། ཀུཎྜ་ལ་དྷརྨ། ཝ་ར་ཡད་མྱོས་ས་བི་དྭ་དྷརྨ། བྷུཉྫ་ཀ་ཏ་ཀྵ་ཀ་པཱ་སུ་ཀི །སཱ་གར། ནཾ་ཊོ་པ་ན་ཏ། ག་ལ་ཀ་བྷོ་ལ་མེ་ཁ་ལ་ལཾ་ཀྲྀ་ཏ། ག་ཏི་དྱོད་ཧྲྀ་ད་ཀ་པཱ་ལ་མཱ་ལཾ། ཨ་ལཾ་ཀྲྀ་ཏ། ཤ་རཱི་ར། ཤྲཱི་ར་པྲ་ཛྭ་ལི་ཏ་མོ་ར་ཏ་རཾ། ཨཱ་ཡུར་བྷ་པ་ན་བེ་ག་ཛ།
བ་ཀ་ཙ་ཏུ་རངྒ་ཙཀྲ་ཙ་ར་ཎཾ། ཨ་པྲ་མེ་ཡ་བ་ར། བཛྲ་མུ་སིད་དྷི་ཁད་ཏ་ཀ་ཏོ་མཱ་ར་ཡ། པ་ར་ཤུ་པཱ་ཤ་ཙཀྲ། ཨ་སི་ཏྲི་ཤཱུ་ལ། མདུ་ག་ར། བྲ་ཧ་ར་ཎན། མ་ར་ཀུ་བར་རཾ། ཝ་ར་ཀུ་པ་རཾ། སུ་རེ་དྲན། སུ་བེ་ཤམ། སུ་བཱ་ཀ་ཏྲ་ཀྲཾ། སུ་གུ་ཧྱ་ཀྲཾ། སིད་སེ་ནས་ནི། ན་ར་ཀུ་པ་ར། པ་རཾ་ཏ་ཡིཥྱཱ་མི། ཨེ་ཧྱེ་ཧི་བྷ་ག་བན། ན་ར་ཀུ་པར། ཀུ་པ་ར། ཧ་ས་ཧ་ས། ཏུ་རུ་ཏུ་རུ། ཙི་ཏི་ཙི་ཏི། བི་ཙ་ཏི་བི་ཙ་ཏི། བཛྲ་བཛྲ། ཙ་བཛྲ་བཛྲ། ཧ་ར་ཧ་ར། ཧུ་རུ་ཧུ་རུ། ཧ་ན་ཧ་ན། བིདྷཾ་ས་ཡ། བི་དྲ་བ་ཡ། ཨུ་ཏ་སཱ་ད་ཡ། ཨུ་པར་ཡ། ཨུ་པར་ཡ། ན་ར་ཀུ་པ་ར། ཝ་ར་ཀུ་པ་ར། ཤུ་པ་ཀུ་པ་ར། ཡཀྵ་ཀུ་པར། གྷུ་ཧ་ཀུ་པར། མ་དྷ་མ་དྷ། གཛྫ་གཛྫ། ཏ་ཛྫ་ཏཛྫ། ན་རྪ་ནརྪ། ཧ་རི་ཧ་རི། ཧ་རི་ལོ་ཙ་ནི། ནཱི་ལ་ལོ་ཙ་ན། ཏཱི་བྱ་ལོ་ཙྪ་ན། སུ་ཝ་ར་ཎ་ལོ་ཙ་ན། མེགྷ་གྷོ་ཥོ་ད་བྷ་བ། ཧ་ལ་ཧ་ལ། ཤཔྡ་གཎ། ཀཱ་ནཱ་བ་ཡ། ཧེ་ཧེ་ཧེ་ཧེ། ན་ར་ཀ་ཀུ་པར། ཧེ་ན་ར་ཀུ་པར་ཀུ་པར། ཝ་ར་ཀུ་པར། ཨཱ་བི་ཤ་ཨཱ་པི་ཤ། སུ་ཀུ་བ་ར་ཀུ་པར། ཝ་ཀུ་བར། ཙ་ལ་ཙ་ལ། མོ་ལི་དྷ་ཙ་ལ་ཡ་ཝརྫ། ལ་གུ་ལ་གུ། ཀུ་རུ་ཀུ་རུ། ཨ་དྭ་ཏྭ་ད་ཤ་ཀུ་ལཾ། ཀུ་ལ་ཀུ་ལ། ཀི་ལ་ཀི་ལ། ཧུ་ལུ་ཧུ་ལུ། མུཉྩ་མུཉྩ། ཤཔྡ་ཀཱུ་ལཾ། ནར་མུངྒ་ར། ཀུ་པར། བར་བར་བར། བཛྲ་དྷ་ར། པདྨ་དྷ་ར། མུ་ས་ལ་དྷ་ར། ཙཀྲ་དྷ་ར། ལངྒ་དྷ་ར། བར་ཤཱུ་དྷ་ར། ཨ་ཡོ་མུ་ས་ལ། ཏྲཱ་ས་ན་ཀ་ར། དྷ་ར་དྷ་ར། དྷ་ར་ཎི། དྷ་ར་ཙནྣ། སཱུཪྻ་མཱ་ལ་དྷ་ར། ན་ཀྴ་ཏ། ན་ཀྵ་ཏྲ་གྲ་ཧ་མཎྜ་ལ་དྲ་ཧ་ཤ་ཨ་བྱིད་ཏ་ཛྭ་ལ་ཏེ། ཛྭ་ཀ་ར། ས་གྷ་རས་ར་བི་ཤོ་ཤན་ཀ་ར་མད་སམད་ཀ་ར། ཤི་ཤུ་མར་ཁི་ཏ་བཱ་ཤ་དྷ་ར། ཨ་སུ་ར་ག་ཎ་ནཱན། མར་ད་ན་ཀ་ར། ཁུམ་བན་དྷ་ར་ཡཀྵ་ར་ཀྵ་ས། ཧྲྀ་ད་ཡོས་མཱ་ད་ན་ཁ་ར་མ། སྟཾ་བྷ་ག་ཝན། ན་ར་ཀུ་པ་ར། ཝ་ར་ཀུ་པ་ར། ན་རྪ་ན་རྪ་། ཧ་ར་ཧ་རི། ཧཱ་རི། ཧཱ་རི་ལོ་ཙ་ནཱ་སྭཱ་ཧཱ། གར་མཁན་མཆོག་གི་རིག་པ་དང་པོ་འདི་ལས་སྟོང་བྱེད་དོ། །སྤྲིན་བསྐྲད་པ་ལ་མཚོན་ཆའམ། ཀ་ར་བཱི་རའི་ལྕུག་མའམ། བལ་པོ་སེའུའི་ལྕུག་མ་འམ། ཐལ་བས་བྱའོ། །རྨ་བྱའི་ལྕུག་མས་བྱ་བ་པའི་ནང་དུ་སྤྲིན་བྱ་བ་པ་ལྟར་བྱ་བས་ཏེ། ཆར་དབབ་
པའི་དུས་ན། པོག་གིས་བདུགས་ན་ཆར་པ་འཕོ་བར་འགྱུར་རོ། །ལན་ཅིག་བཟླས་པས་འབྱུང་པོ་དང་། གནོད་སྦྱིན་དང་། གཟའ་དང་། འབར་བ་དང་། གདོན་ལ་གདབ་པ་ནི་གུ་གུལ་གྱི་དུད་པས་ལན་ཅིག་བཟླས་པས་འབབ་པར་འགྱུར། ཐམས་ཅད་སྟོན་ཅིང་གང་དྲིས་པ་དེ་སྨྲ་བར་འགྱུར་རོ། །གུ་གུལ་ལ་ལན་ཅིག་བཟླས་ཏེ་བདུག་པས་འགུལ་བར་འགྱུར། ལྷ་དང་། ཀླུ་དང་། གནོད་སྦྱིན་དང་། འབར་བ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། འབར་བ་མོ་དང་། ཤ་ཟ་མོ་ལ་སོགས་པ་ལ་གུ་གུལ་ལ་ལན་ཅིག་བཟླས་ཏེ། བདུག་པས་ཐམས་ཅད་འགུགས་ཤིང་སྨྲ་བར་འགྱུར་རོ། །ལྷག་ཆད་སྟོན་པར་བྱེད་དོ། །གུ་གུལ་ལ་ལན་ཅིག་བཟླས་ཏེ་བདུགས་ན་ཡུལ་ནས་སྐྲོད་པར་འགྱུར། མར་དང་ཡུངས་ཀར་གྱིས་ཁ་ཟས་བཅོས་པ་རྣམས་གར་འདོད་པ་དེར་འཕོ། །ཁུར་མཁན་གྱི་ཁང་པར་སྔགས་རྗེས་སུ་དྲན་པར་བྱས་ཏེ། གུ་གུལ་གྱིས་བདུགས་ན་ཁུར་བ་ཐམས་ཅད་གང་འདོད་པ་དེར་འཕོ་བར་འགྱུར་རོ། །རིམས་ནད་ཐམས་ཅད་གཞིག་པ་དང་། བདག་སྲུང་བ་ལ་ཡུངས་ཀར་དང་། ཐལ་བ་དང་། བའི་ཆུ་ལ་ལན་ཅིག་བསྔགས་ནས་གུ་གུལ་གྱིས་བདུགས་ཏེ། སྲུང་བའི་སྐུད་པ་མགུལ་བར་བཅིངས་ན་འཇིགས་པ་དང་། ནད་ཐམས་ཅད་སེལ་བར་འགྱུར་རོ། །རིམས་ནད་གཞན་ལ་གཏོང་བར་འདོད་ན་གུ་གུལ་ལ་ལན་ཅིག་བཟླས་ཏེ་བདུགས་ན་དེ་མ་ཐག་ཏུ་འགྲོ་བ་སྟོང་ཡང་རིམས་ཀྱིས་བཏབ་པར་འགྱུར་རོ། །དེ་ཉིད་ཀྱིས་སོས་པར་འགྱུར་རོ། །ཞག་བཞི་པའི་རིམས་གཏོང་བར་འདོད་ན། བ་ལང་གི་ཤ་དང་གུ་གུལ་གཅིག་ཏུ་བསྲེས་ལ་ཞག་བདུན་བཟླས་ཏེ། ལན་བདུན་བསྲེགས་ན། གང་གི་མིང་བཟུང་བ་དེ་རིམས་ཀྱིས་བཏབ་པར་འགྱུར་རོ། །གུ་གུལ་ལ་ལན་བདུན་བཟླས་ཏེ། བསྲེགས་ན་སླར་སོས་པར་འགྱུར་རོ། །གུ་གུལ་ལ་ལན་བདུན་བཟླས་ཏེ། གང་གི་མིང་དང་བཅས་པ་མེར་བཅུག་ན། གང་དང་གང་གི་མིང་བཟུང་བ་གཟའ་ཡིས་གཟུང་བར་འགྱུར་རོ། །ཐལ་བས་ཐིག་ལེ་བྱས་ཏེ་སྤྱི་གཙུག་བྱས་
པ་བཅིངས་ཏེ་བཟླས་ན་གྲོལ་བར་འགྱུར་རོ། །རིམས་ནད་ཐམས་ཅད་ཞི་བར་འདོད་ན་སྐུད་པ་ནག་པོའམ་འཇིག་མ་ལ་ལན་ཅིག་བཟླས་པས་ཞིའོ། །གང་ཅུང་ཟད་བྱ་བ་ཐམས་ཅད་ལ་གུ་གུལ་ལ་ལན་ཅིག་བཟླས་པས་བྱེད་པར་འགྱུར་རོ། །གར་མཁན་མཆོག་གི་བརྟག་པ་ལས་ལས་མང་པོའི་ལེའུ་སྟེ་དང་པོའོ།། །།ན་མོ་རཏྣ་ཏྲ་ཡཱ་ཡ། ན་མོ་བཻ་ཤྲ་མ་ཎ་སྱ། མ་ཧཱ་རཱ་ཛ་སྱ། ན་ར་ཀུ་པར་སྱ། གུ་ཧྱ་ཀཱནྟ་པ་ཏི། །མཱ་བརྟ་ཡིཥྱཱ་མི། ཨ་ནུ་རཱུ་བ་སུ་རཱུ་པ། ན་ར་ཀུ་པར་ཙནྡྲ།ཁན་ན་ཙ་ཀ་ན། ཧེ་མ་ཧཱ་ས་ཀ་ན། ན་ར་ཀུ་པ་རཾ། ཧེ་མ་ཀ་ན། ཀུ་ཧ་ཀ་ན། ཙ་ལ་ཙ་ལ། པ་ཙ་པ་ཙ། ཕུ་ལུ་ཕུ་ལུ། ཀུ་པར་སྭཱ་ཧཱ། གཅིག་ཏུ་དཔའ་བ་འབར་བ་རྣམས་འདུལ་ཞིང་ལས་ཐམས་ཅད་གདོན་མི་ཟ་བར་བྱེད་པ། དངོས་གྲུབ་ཀྱི་ལས་ཐམས་ཅད་དང་། བླ་ན་མེད་པའི་དགོས་པ་ཐམས་ཅད་བརྗོད་པ་ཙམ་གྱིས་འགྲུབ་པར་འགྱུར་རོ། །བསྐྲད་པར་བྱ་བར་འདོད་ན་སེང་ལྡེང་གི་ཕུར་བུ་སོར་བརྒྱད་པའི་ཚད་དུ་བྱས་ཏེ། ལན་ཅིག་ཡོངས་སུ་བཟླས་ནས་གང་གི་སྒོར་བཏབ་པ་དེ་དེ་མ་ཐག་ཏུ་སྐྲོད་པར་འགྱུར་རོ། །ཕུར་པ་ཕྱུང་ན་གྲོལ་བར་འགྱུར་རོ། །ཡུངས་ཀར་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ། དགྲ་བོའི་ཁྱིམ་དུ་གཏོར་ན་དེ་མ་ཐག་ཏུ་འཁྱམ་པར་འགྱུར་རོ། །གུ་གུལ་ལ་ལན་ཉི་ཤུ་རྩ་གཅིག་བཟླས་ཏེ་བདུགས་ན་གྲོལ་བར་འགྱུར་རོ། །འཁྱམ་པར་བྱ་བར་འདོད་ན་མི་རུས་ལས་ཕུར་བ་སོར་བརྒྱད་པའི་ཚད་དུ་བྱས་ཏེ། ལན་ཅིག་ཡོངས་སུ་བཟླས་ནས་གུ་གུལ་གྱིས་བདུགས་ཏེ་སྒོ་དྲུང་དུ་བཏབ་ན་ཞག་གསུམ་གྱིས་ཐམས་ཅད་དང་བཅས་ཏེ་འཁྱམ་པར་འགྱུར་རོ། །ཐོབ་བྱས་ནས་ལན་ཅིག་ཡོངས་སུ་བཟླས་ནས་གང་གི་མིང་བཟུང་སྟེ་ས་འོག་ཏུ་ཐོ་བས་བརྡེགས་ན་དེའི་ལུས་དུམ་བུ་དུམ་བུར་ཞིག་པར་འགྱུར་རོ། །ཕྱུང་ན་ཐར་རོ། །དུར་ཁྲོད་དུ་གང་གི་མིང་བཟུང་སྟེ་བཅུག་ན་འབྱུང་པོ་ཆེན་པོས་ཟིན་ཏེ་ཕྱུང་ན་ཐར་བར་འགྱུར་རོ། །ཁང་སྟོང་དུ་གང་གི་མིང་བཟུང་སྟེ། བཅུག་ན་དེ་ཤ་ཟས་ཟིན་ཏེ་ཕྱུང་ན་ཐར་རོ། །ལྷ་ཁང་དུ་ས་བརྐོས་ཏེ་བཅུག་ན་དེ་ལྷ་ཆེན་པོས་ཟིན་པར་འགྱུར་ཏེ་
ཕྱུང་ན་ཐར་རོ། །ཚལ་དུ་གང་གི་མིང་བཟུང་སྟེ་ས་བརྐོས་ཏེ་བཅུག་ན་གང་གི་གཉེན་དང་འཁོར་དང་། བུ་དང་བུ་མོ་དང་ཁྱིམ་ཐམས་ཅད་སྤངས་ནས་ཐམས་ཅད་དུ་འབྲོས་པར་འགྱུར་ཏེ་ཇི་ལྟར་རི་དགས་བཞིན་དུ་ནགས་སུ་སྤྱོད་པར་འགྱུར་ཏེ་ཕྱུང་ན་ཐར་རོ། །ཐམས་ཅད་གུ་གུལ་ལ་ལན་ཅིག་བཟླས་པས་འགྲུབ་པར་འགྱུར་རོ། །དཀྱིལ་འཁོར་གྲུ་བཞི་པ་བྱས་ཏེ་ཐོ་བ་ལ་ལན་ཅིག་བཟླས་ཏེ་གུ་གུལ་གྱིས་བདུག་ཅིང་ཐོ་བ་དཀྱིལ་འཁོར་གྱི་དབུས་སུ་བཞག་ན་གནོད་སྦྱིན་དང་། འབར་བ་དང་། འབར་བ་མོ་དང་། གནོད་སྦྱིན་ཕོ་མོ་རྣམས་ངུ་ཞིང་ཕྱོགས་ཕྱོགས་སུ་འབྲོས་པར་འགྱུར་རོ། །གནོད་སྦྱིན་གྱི་གཟུགས་བརྙན་བྱས་པའམ། ཡང་ན་བྲིས་པ་ལ་ལན་ཅིག་བཟླས་ཏེ། གུ་གུལ་གྱིས་བདུགས་ན་གནོད་སྦྱིན་དང་། འབར་བ་དང་། གནོད་སྦྱིན་ཕོ་མོ་རྣམས་གནས་ཤིང་དགོས་པ་ཐམས་ཅད་བྱེད་པར་འགྱུར་རོ། །གཏེར་ཐམས་ཅད་སྟོན་ཅིང་འགུགས་པར་ཡང་བྱེད་དོ། །ངལ་བསོ་བའི་གཟུགས་བརྙན་བྱས་པའམ། བྲིས་པ་ལ་གུ་གུལ་གྱིས་བདུགས་ཤིང་སྔགས་བརྗོད་ནས་བསྡིགས་ནས་ཐོ་བས་བརྡེགས་མ་ཐག་ཏུ་ངུ་ཞིང་འོངས་ཏེ། མཆོག་ཐམས་ཅད་དང་། འབྲུ་དང་ནོར་ཐམས་ཅད་ཇི་ལྟར་བདེ་བར་འབུལ་བར་བྱེད་དོ། །གར་མཁན་མཆོག་འདི་ལྟར་བྱས་ན་དེ་མ་ཐག་ཏུ་འཆི་བར་འགྱུར་རོ། །ངལ་བསོ་པོ་རྐང་པས་མནན་ཅིང་གུ་གུལ་གྱིས་བདུགས་ནས་སྔགས་ལན་བདུན་རྗེས་སུ་དྲན་པར་བྱས་ན། དེ་སྟེ་མྱུར་དུ་མ་འོངས་ན་མགོ་ཚལ་པ་བདུན་དུ་འགས་པར་འགྱུར་རོ། །ཡུངས་ཀར་དང་ཐལ་བ་བསྲེས་ཏེ་ལན་བདུན་ཡོངས་སུ་བཟླས་ནས་སྤྱི་བོར་བཞག་ལ་གུ་གུལ་གྱིས་བདུག་ཅིང་སྔགས་རྗེས་སུ་དྲན་པར་བྱས་ན། ངལ་བསོ་པོ་གནོད་སྦྱིན་སྟོང་དང་བཅས་པ་དེ་ནོར་དང་བཅས་པ་མདུན་དུ་འོངས་ནས་ལས་ཐམས་ཅད་བྱེད་པར་འགྱུར་ཞིང་དབང་དུ་འགྱུར་རོ། །མཐུ་བོ་ཆེ་རྐང་པས་མནན་ཏེ་གུ་གུལ་གྱིས་བདུག་ཅིང་སྔགས་བཟླས་ན་གཟུགས་གཡོ་བར་གྱུར་ཏེ། ཡུངས་ཀར་གྱིས་བརྡེགས་ན་ཚིག་སྨྲ་ཞིང་ཆོས་ཐམས་ཅད་སྦྱིན་པར་བྱེད། མདུན་དུ་བཀུག་སྟེ་བཀའ་ཐམས་ཅད་མཉན་ནས་
དགོས་པ་ཐམས་ཅད་སྒྲུབ་ཅིང་། སྤྱད་ཐམས་ཅད་ཀྱི་དངོས་གྲུབ་ཐམས་ཅད་སྦྱིན་པར་བྱེད་དོ། །མིའི་ཐོད་པ་ལ་ལན་བདུན་ཡོངས་སུ་བཟླས་པའི་ཡུངས་ཀར་ཐོད་པའི་ནང་དུ་བཅུག་སྟེ་དྲག་པོའི་སྒོར་བཅིངས་ན། ཇི་སྲིད་དྲག་པོའི་སྒོ་དེར་ཐོད་པ་གནས་ཀྱི་བར་དེ་སྲིད་དུ་དགོས་པ་ཐམས་ཅད་སྒྲུབ་ཅིང་མཆོག་ཐམས་ཅད་སྟེར་བ་ནས་བཀའ་བཞིན་བྱེད་པར་འགྱུར། གུ་གུལ་གྱིས་བདུགས་ཏེ་སྔགས་རྗེས་སུ་དྲན་པར་བྱས་ན་ཚིག་སྨྲ་ཞིང་བྱ་བ་ཐམས་ཅད་བྱེད་ཅིང་མཆོག་ཐམས་ཅད་སྟེར་བར་འགྱུར་རོ། །ཚངས་པ་རྐང་པས་མནན་ཏེ་གུ་གུལ་གྱིས་བདུགས་ནས་སྔགས་བརྗོད་དེ། འོ་མ་དང་ཞོས་བཀྲུས་ན། ཚངས་པ་རང་གི་གཟུགས་ཀྱིས་མདུན་དུ་བཀུག་སྟེ། གསང་སྔགས་ཀྱི་སྤྱད་དང་དངོས་གྲུབ་ཐམས་ཅད་རྗེས་སུ་སྟེར་བར་འགྱུར་རོ། །ཁྲུས་བྱས་པའི་འོ་མ་དེ་འབྲས་མཁར་མའི་ཟན་དང་བསྲེས་ཏེ་ཟོས་ན་ཐོས་པའི་རྒྱུད་ཐམས་ཅད་ཁ་ཏོན་ནུས་ཤིང་། སྤྱད་ཐམས་ཅད་ཀྱི་སྔགས་ཀྱི་རྗེས་འཇུག་པར་འགྱུར་རོ། །ཐོས་པ་ཐམས་ཅད་ཆུད་མ་ཟོས་པར་གྱུར་ནས་མིའམ་ཅི་དང་ཚངས་པའི་དབྱངས་ཀྱིང་རོ་དང་ལྡན་པར་གྱུར་ནས་ལུས་ཐམས་ཅད་དག་པར་རྙེད་ནས་ཚེ་ལོ་སྟོང་དུ་འགྱུར་ཞིང་། བསྐྱིལ་ཅིང་འཁྱིལ་བའི་སྐྲ་དང་ལྡན་པར་གྱུར་ནས་རྐང་པ་གཉིས་ལ་བཟུང་སྟེ་ཕྱག་བཙལ་ནས་ལས་ཐམས་ཅད་བྱེད་པར་འགྱུར་རོ། །གཟུགས་བརྙན་དུར་ཁྲོད་ཀྱི་དབུས་སུ་ས་བརྐོས་ཏེ་བཅུག་ན། འབྱུང་པོ་ཐམས་ཅད་ཀྱི་རྣམ་པར་གཙེས་པར་འགྱུར་ཞིང་ལུས་དུམ་བུར་ཞིག་པར་འགྱུར་རོ། །མིག་གི་འབྲས་བུ་རྡོལ་ཏེ་ཟླ་བ་གསུམ་ན་འཆི་བར་འགྱུར་རོ། །ཀླུའི་གཟུགས་བརྙན་བྱས་ཏེ། དཀྱིལ་འཁོར་གྱི་དབུས་སུ་བཞག་ནས་མེ་ཏོག་དང་བདུག་པ་ཐམས་ཅད་ཕུལ་ནས་ཀ་ར་པཱི་རའི་ལྕུག་མ་ལ་ཡོངས་སུ་བཟླས་ཏེ། སྔགས་རྗེས་སུ་དྲན་པར་བྱས་ཏེ་བཞུས་ན་ཀླུ་ཐམས་ཅད་འོང་སྟེ་ཆར་གྱི་རྒྱུན་ཆེན་པོ་འབེབས་པར་བྱེད་དོ། །ཀླུ་ཐམས་ཅད་ལས་བྱེད་པར་འགྱུར་རོ། །ཐམས་ཅད་ཀྱིས་བཀའ་བཞིན་བྱེད་པར་འགྱུར་རོ། །ཀླུའི་གཟུགས་བརྙན་བྱས་ཏེ། བལ་པོ་སེའུའི་ལྕུག་མས་བཞུས་ན་སེར་བ་ཐམས་ཅད་གཅོད་པར་འགྱུར་རོ། །རླུང་ཐམས་ཅད་
ཡོངས་སུ་བཅིང་བ་ལ་སྟན་འཇམ་པོ་ལ་ཡོངས་སུ་བཟླས་ཏེ། ཁང་པ་མཐོན་པོའི་ཁར་འདུག་ན། རླུང་ཐམས་ཅད་འཆིང་བར་བྱས་པར་འགྱུར་རོ། །མིའི་ཐོད་པ་བཟུང་སྟེ། །ཀར་བཱི་རའི་ལྕུག་མས་དགྲ་བོའི་མིང་བཟུང་ནས་གཞུས་ན་ལས་ཐམས་ཅད་ལ་ལན་ཅིག་བཟླས་པ་ཙམ་གྱིས་གྲུབ་པར་འགྱུར་རོ། །གནོད་སྦྱིན་གར་མཁན་མཆོག་གི་བརྟག་པ་ལས་ལས་ཐམས་ཅད་པའི་ཆོ་གའི་ལེའུ་སྟེ་གཉིས་པའོ།། །།ན་མོ་པེ་ཤྲ་མ་ཎ་སུ་ཏཱ་ལ་དི་བྱ་བི་མཱ་ན་ཙི་རི་ཏི་ཡ། ཧེ་མ་ཨ་ལ་ཀུཎྜལ་ཤ་རཱི་རཱ་ཡ། ཡཀྵ་རཀྵ། ས་བན་ཏི་དྷ་ཡ། ཏཾ་བྷ་ག་ན་ན། མཱ་བརྟ་ཡི་ཥྱུ་མི། ཏདྱ་ཐཱ། བ་ནི་བ་ནི། ཀུ་ཊ་ཀ་ཊ། ཀུཊྚ་ཀུཊྚ། ཀུ་ཀུ་ཀུ་ཀུ། པ་ར་པ་ར། ཀུ་པར་ཀུ་པར། ན་ར་ཀུ་བར། དི་བྱ་བི་མྱ་ནི་ཀུ་ཏ་ལི། ཏུ་ཏི་ཏུ་ཏི་སྭཱ་ཧཱ། དེ་ནས་གནོད་སྦྱིན་ནམ། གནོད་སྦྱིན་མོ་སྲུང་བར་འདོད་ན། ཝ་དའི་ཤིང་ལས་སྤང་ལེབ་ཏུ་བྱས་ཏེ། གནོད་སྦྱིན་མོ་བྲི་བར་བྱ་སྟེ། ཁ་དོག་སྔོ་བསངས་ལ་གདོང་ཁྲོ་གཉེར་ཅན། མཆེ་བ་འཁྱིལ་བསྟོད་གཡོགས་མེད་པ། རྒྱན་ཐམས་ཅད་ཀྱིས་རྣམ་པར་བརྒྱན་པ། ལག་པ་གཡོན་པ་ན་མིའི་ཐོད་པ་ཁྲག་གིས་བཀང་བ་ཐོགས་པ། ལག་པ་གཡས་པ་མཆོག་སྦྱིན་མ་སྟེ། དེའི་མདུན་རིག་པ་བརྒྱ་སྟོང་བཟླས་ཤིང་ཟས་དཀར་པོ་བཟའ་བར་བྱ། བརྒྱ་སྟོང་རྫོགས་པ་དང་། གནོད་སྦྱིན་མོ་མདུན་དུ་འོང་བར་འགྱུར་ཏེ། དེ་ལ་གཏོར་མ་དཀར་པོ་དང་། ཡོན་ཆུ་སྦྱིན་ནོ། །དེས་སྨྲས་པ། ཅི་བགྱི་བ་བཀའ་སྩོལ་ཅིག་ཅེས་བགྱིས་པ་དང་། རིག་པ་འཛིན་པ་སྨ་བར་བྱ་བ་ངའི་ཆུང་མའོ་ཞེས་པ་དང་། དེ་དེ་བཞིན་ནོ་ཞེས་སྨྲས་ནས་མི་སྣང་བར་འགྱུར་རོ། །དེ་ནས་རྒྱན་ཐམས་ཅད་ཀྱིས་བརྒྱན་པའི་བུད་མེད་འོངས་ནས་དེ་ནས་འདོད་པའི་ཡོན་ཏན་ལྔ་ལྷན་ཅིག་ཏུ་རོལ་ཅིང་སྤྱོད་པ་ལ་དགའ་བས་རྩེའོ། །རིག་པ་འཛིན་པ་དེ་གནོད་སྦྱིན་ཆེན་པོའི་སྟོབས་དང་ལྡན་པར་འགྱུར་ཏེ་གང་དང་གང་དུ་འདོད་པ་དེ་དང་དེར་འགྲོ་ཞིང་ནམ་མཁར་སྤྱོད་དེ། ཚེ་ལོ་ལྔ་སྟོང་ཐུབ་པར་འགྱུར་རོ། །དེ་ནས་མངོན་པར་སྤྱོད་པར་འདོད་པས་བྱེད་པ་བསླང་བ་ནི་གོས་ཆེན་པོ་བགོས་ཏེ། སྟག་གི་པགས་པས་སྨད་
དཀྲིས་ལ་དུར་ཁྲོད་ཀྱི་དབུས་སུ་ཅི་འབྱོར་བའི་ཁྲག་གི་སྦྱིན་སྲེག་ཞག་བཅུ་གཉིས་ཡོངས་སུ་རྫོགས་པའི་བར་དུ་བསྲེགས་ན། བུད་མེད་སེང་གེ་ལ་ཞོན་པ། ལག་པ་བཞི་པ། དྲིལ་བུ་དང་། དགྲ་སྟ་དང་། མུ་ས་ལ་དང་། ལག་ན་ཏྲི་ཤཱུ་ལ་ཐོགས་པས་མདུན་དུ། འོངས་ནས། དེས་སྨྲས་པ། རིག་པ་འཛིན་པ་ང་བཀྲེས་སོ་ཞེས་པ་དང་། གཏོར་མ་འདི་གར་མཁན་མཆོག་གི་བཀའ་སྟེ། ཇི་ལྟར་བདེ་བར་སྤྱོད་ཅིག་ཅེས་ནས་དེ་ནས་ཡོན་ཆབ་སྦྱིན་པར་བྱ། དེས་སྨྲས་པ། ཅི་སློང་ཞེས་པ་དང་། རིག་པ་འཛིན་པས་སྨྲ་བར་བྱ་སྟེ། ངའི་ལས་ཐམས་ཅད་བྱོས་ཤིག་ཅེས་སོ། །དེས་སྨྲས་པ། རིག་པ་འཛིན་པ་དེ་བཞིན་ནོ་ཞེས་ནས་གང་དགོས་པར་འགྱུར་བ་དེ་ཐམས་ཅད་དང་། གཏེར་ཐམས་ཅད་ཀྱང་སྟོན་ནོ། །དེ་ནས་ཨ་ཙ་ན་བསྐུ་བར་འདོད་ན་ལྡོང་རོས་དམར་པོ་མི་མགོ་གཤེར་བའི་ནང་དུ་ཁྲག་དང་བསྲེས་ནས་བཅུག་ནས་སྔགས་ལན་བརྒྱད་ཀྱིས་ཡོངས་སུ་བཟླས་ཏེ། ཀ་ར་བཱི་རའི་ལྕུག་མས་དགུག་པར་བྱའོ། །དེ་ནས་མི་མགོ་འབར་བར་འགྱུར་ཏེ། དེས་ཐེག་ལེ་བྱས་ན་ནམ་མཁའ་ལ་འགྲོ་བར་འགྱུར་ཞིང་རིག་པ་འཛིན་པ་དང་ཐབས་ཅིག་ཏུ་རོལ་བར་འགྱུར་རོ། །སྙིང་ཁར་ཐིག་ལེ་བྱས་ན་མི་སྣང་བར་འགྱུར་ཞིང་གང་དུ་འདོད་པ་དེ་དང་དེར་ཞུགས་པར་འགྱུར། མིག་ལ་བསྐུས་ན་གཏེར་ཐམས་ཅད་མཐོང་བར་འགྱུར་ཞིང་ལྷ་མ་ཡིན་གྱི་སྒོ་ཐམས་ཅད་སྒྲིབ་པ་མེད་པར་མཐོང་བར་འགྱུར་རོ། །ཀླུའི་གནས་ཐམས་ཅད་མཐོང་བ་དང་། ཀུན་དུ་འགྲོ་བ་ཐམས་ཅད་དང་རོལ་ཅིང་དགའ་བ་མྱོང་བར་འགྱུར་རོ། །ཟོས་ན་བསྐལ་པ་བརྒྱ་ཕྲག་སྟོང་དུ་འཚོ་ཞིང་རིག་པ་འཛིན་པའི་འཁོར་ལོས་སྒྱུར་བར་གྱུར་ནས། སྐྲ་འཁྱིལ་ཞིང་འཁྱིལ་བ། མིའམ་ཅི་དང་ཚངས་པའི་ང་རོའི་དབྱངས་དང་ལྡན་པར་འགྱུར་རོ། །ཉུང་རུ་མ་བྱ་བར་འདོད་ན་དུར་ཁྲོད་ཀྱི་ཐལ་བ་ལ་གཟུགས་བྱས་ཏེ། །སེང་ལྡེང་གི་ཕུར་བ་ལ་ལན་བདུན་བཟླས་ནས་སྙིང་ཁའི་གནས་སུ་བཏབ་ན་ཉུང་རུམ་དུ་འགྱུར་ཏེ་ཕྱུང་ན་ཐར་རོ། །ནག་པོའི་ཕྱོགས་ཀྱི་ཚེས་བཅུ་བཞི་ལ་དུར་ཁྲོད་དུ་ཞུགས་ནས་སྔགས་ལན་ཉི་ཤུ་རྩ་གཅིག་རྗེས་སུ་དྲན་པར་བྱས་ནས་
ཨན་ཛན་བླང་ཞིང་ས་བི་ར་དང་ལྷན་ཅིག་ཏུ་བསྲེས་ཏེ། ལན་ཉི་ཤུ་རྩ་གཅིག་ཡོངས་སུ་བཟླས་ཏེ། མིག་ལ་བསྐུས་ན་སྐལ་བའི་མཆོག་དང་གཟི་བརྗིད་དང་ལྡན་ཞིང་གང་མཐོང་བ་དེ་དབང་དུ་འགྱུར་རོ། །འཇིག་རྟེན་ཀུན་དང་མཛའ་ཞིང་ཐམས་ཅད་ཀྱིས་མཆོད་པར་འགྱུར་རོ། །གོ་རོ་ཙ་ན་ལ་ལན་ཉི་ཤུ་རྩ་གཅིག་བཟླས་ཏེ། ཐིག་ལེ་བྱས་ན་སྐལ་བ་མཆོག་དང་དགོས་པ་ཐམས་ཅད་སྒྲུབ་ཅིང་བུད་མེད་ཀུན་ལ་དབང་བར་གྱུར་ནས་འགྲོ་བ་ཐམས་ཅད་མཛའ་བར་འགྱུར་རོ། །ཟོས་ན་རྩོད་པ་ལས་རྒྱལ་བར་འགྱུར་རོ། །ལན་ཉི་ཤུ་རྩ་གཅིག་བཟླས་པའི་ཆུས་གདོང་བཀྲུས་ན་ཁྲོས་པའི་རྒྱལ་པོ་ཡང་ཞི་བར་འགྱུར་རོ། །འཇིག་རྟེན་པ་ཀུན་དང་མཛའ་ཞིང་འཛིན་པའི་ངག་ཏུ་འགྱུར་རོ། །ཐམས་ཅད་ཀྱང་གུ་གུལ་གྱི་དུདཔས་བསྒྲུབ་པར་བྱའོ། །གནོད་སྦྱིན་གར་མཁན་མཆོག་གི་བརྟག་པ་ལས་མིག་སྨན་དང་། གོ་ངོ་ཙན་དང་། གནོད་སྦྱིན་མོ་སྒྲུབ་པའི་ལེའུ་སྟེ་གསུམ་པའོ།། །།འདི་མན་ཆད་གར་མཁན་མཆོག་གནོད་སྦྱིན་ཆེན་པོའི་དཀྱིལ་འཁོར་ཆོ་ག་བཤད་པར་བྱའོ། །གྲུབ་པའི་ལྷ་ཐམས་ཅད་ཀྱིས་ཕྱག་བྱས་པ། ཚངས་པ་དང་། གཏོགས་འདོད་དང་། དབང་པོས་མཆོད་པ་དང་། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པ། བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ། དྲང་སྲོང་ཐམས་ཅད་ཀྱིས་བསྟོད་པ། གནོད་སྦྱིན་དང་འབར་བ་ཐམས་ཅད་ཀྱིས་དམ་ཚིག་ཐོབ་པ། དཔྱད་ཐམས་ཅད་དང་། རིག་པ་ཐམས་ཅད་ཐོབ་པའོ། །དེ་ནས་གནས་གཙང་མར་གྲུབ་པའི་མཚན་མ་བརྟག་གོ། །དེ་ནས་རིག་པ་འཛིན་པ་གཙང་མར་བྱས་ཏེ། རབ་ཏུ་ཁྲུས་བྱས་ནས་གོས་དཀར་པོ་གཙང་མ་བགོས་ཏེ། ཁ་ཟས་དཀར་པོ་བཟའ་ཞིང་རྟག་ཏུ་བཟླས་པལ་བརྩོན་པར་བྱའོ། །དཀར་པོའི་ཕྱོགས་ལ་སྐར་མ་དང་། གཟའ་དང་། མཇུག་རིངས་བཟང་པོ་ཡིད་དུ་འོང་བའི་ཉི་མ་དེར་བརྟགས་ཏེ། བ་ཁམ་པ་མོའི་ལྕི་བས་ལམ་ལྷུང་བས་དཀྱིལ་འཁོར་བསྐུས་ཏེ། ཁྲུ་བཅུ་གཉིས་པ་རིམ་པ་གསུམ་དུ་དཀྱིལ་འཁོར་ཡང་རབ་
ཏུ་བྱའོ། །ཀུན་དུ་ཐིག་བྲི་བ་ནི་ཤིན་ཏུ་མཉམ་པར་གཅལ་ཏེ་གྲུ་བཞི་པ་ལ་སྒོ་བཞི་པ། ཆ་མཉམ་པར་གཅལ་བར་བྱའོ། །དབུས་ཀྱི་ཁྲུ་བརྒྱད་པའི་ཚད་ལ་ཙནྡན་དཀར་པོས་ལེགས་པར་བྲི་པར་བྱའོ། །ནང་གི་ཁྲུ་བཞིའི་ཚད་ལ། གླ་རྩི་དང་། གུར་གུམ་དང་། ག་བུར་དང་བསྲེས་པས་བྲི་བར་བྱའོ། །དེའི་དབུས་སུ་གར་མཁན་མཆོག་རྒྱན་ཐམས་ཅད་ཀྱིས་བརྒྱན་པ། ལག་པ་བཅུ་དྲུག་པ། མཚན་དང་ལྡན་པ་བྲི་བར་བྱའོ། །ཕྱི་རོལ་གྱི་དཀྱིལ་འཁོར་དུ་ཚངས་པ་དང་། གཏོགས་འདོད་དང་། དབང་པོ་ཆེན་པོ་དང་། མཐུ་ཆེན་པོ་བྲི་བར་བྱའོ། །གྲྭ་བཞིར་རྒྱལ་པོ་ཆེན་པོ་བྲི་བར་བྱའོ། །ཕྱི་རོལ་གྱི་དཀྱིལ་འཁོར་གྱི་གནས་སུ་གནོད་སྦྱིན་མང་པོ་སྣ་ཚོགས་བྲི་བར་བྱའོ། །སྒོ་བཞིར་གང་བ་བཟང་པོ་དང་། ནོར་བུ་བཟང་པོ་དང་། སྟོབས་ཀྱི་ལྷ་དང་། དགའ་བའི་དབང་པོ་བྲི་བར་བྱའོ། །དབུས་ཀྱི་དཀྱིལ་འཁོར་གྱི་གནས་སུ་སངས་རྒྱས་གཅིག་པུ་དཔའ་བ་ཤཱཀྱ་མིའི་སེང་གེའི་གཟུགས་གཞུག་པར་བྱ་སྟེ། ལག་ན་རྡོ་རྗེ་དང་། བརྒྱ་བྱིན་རྔ་ཡབ་ཐོགས་ཤིང་གཡབ་པ་ལྟར་གཡས་གཡོན་དུ་གཞག་པར་བྱའོ། །བྱང་ཕྱོགས་ཀྱི་གྲྭ་ར་གང་བའི་བུམ་པ་ཉི་ཤུ་རྩ་ལྔ་དང་། དངུལ་གྱི་སྣོད་བརྒྱད་གཞག་པར་བྱའོ། །ནུབ་ཕྱོགས་སུ་པོག་ཕོར་ཉི་ཤུ་རྩ་ལྔ་དང་། དེ་བཞིན་དུ་ཤར་དང་། ལྷོ་ཕྱོགས་སུ་ཡང་གཞག་པར་བྱའོ། །གཏོར་མ་གང་བ་བརྒྱ་རྩ་བརྒྱད་དང་། གཏོར་མའི་བུམ་པ་སུམ་ཅུ་རྩ་གཉིས་དང་། འབྲུ་དང་། འབྲས་བུ་དང་། མེ་ཏོག་གི་ཕྲེང་བ་བརྒྱ་རྩ་བརྒྱད་དང་། ཁམ་ཕོར་བརྒྱ་རྩ་བརྒྱད་དང་། བར་བར་དུ་མཚོན་ཆ་སྣ་ཚོགས་པ་ཡང་གཞག་པར་བྱའོ། །ཁ་ཟས་དྲུག་ཅུ་རྩ་བཞི་དང་། བཅོ་བ་སུམ་ཅུ་དང་། བ་དན་བརྒྱ་རྩ་བརྒྱད་དང་། གསེར་གྱི་སྣོད་བཞི་དཀྱིལ་འཁོར་གྱི་དབུས་སུ་གཞག་པར་བྱའོ། །ཐོ་བ་བཞི་དང་། འཁོར་ལོ་སུམ་ཅུ་དང་། མུས་ལ་བཞི་དང་། མདའ་བཞི་དང་། བུམ་པ་བཞི་གཞག་པར་བྱའོ། །དྲི་སྣ་ཚོགས་དང་། བདུག་པ་སྣ་ཚོགས་རིམ་པ་བཞིན་དུ་དབུལ་ལོ། ཀུན་དུ་དར་གྱི་བླ་རེ་དང་། སིལ་སྙན་སྣ་ཚོགས་དང་ལྡན་པ་
རྣམས་དང་། ཕྱོགས་དང་མཚམས་སུ་བཞག་ཅིང་ཇི་ལྟར་ཆོ་ག་བཞིན་དུ་གནོད་སྦྱིན་དང་འབར་བ་རྣམས་གཏོར་མ་སྦྱིན་ནོ། །རས་ཀྱི་གཟུགས་ཞལ་ལྷོ་ཕྱོགས་སུ་བསྟན་ནས་བཞག་ལ་སྔ་དྲོ་ལན་བདུན་བཟླས་ལ་གཏོར་མ་ཡང་དབུལ་བར་བྱའོ། །གུང་དང་ཕྱི་དྲོ་དང་ཉི་མ་ནུབ་པའི་དུས་སུ་ཡང་དེ་བཞིན་དུ་བཟླས་ཏེ། དབུལ་བར་བྱའོ། །དེ་ནས་གུ་གུལ་དང་ཡུངས་ཀར་བསྲེས་ཏེ། གཟུགས་ཀྱི་སྤྱན་སྔར་ཉི་ཤུ་རྩ་གཅིག་བསྲེག་པར་བྱའོ། །དེ་ནས་གར་མཁན་མཆོག་རང་ཉིད་གཤེགས་པར་གྱུར་པ་ན། །བྱིས་པའི་གཟུགས་དང་འདྲ་བར་འོངས་ནས། སངས་རྒྱས་ལ་ཕྱག་འཚལ་ཏེ། རིག་པ་འཛིན་པ་དེ་ལ་བུ་བདེ་བར་འོངས་སམ་ཚུར་ཤོག །གྲུབ་པའི་མཆོག་སློང་ཤིག་དང་། ཅི་འདོད་པ་ཁྱོད་ལ་སྦྱིན་ནོ། །དེ་ནས་ཡོན་ཆབ་ཕུལ་ཏེ་མཆོག་བླང་བར་བྱའོ། །གང་འདོད་པའི་མཆོག་དེ་སྟེར་ཏེ། རིག་པ་འཛིན་པའམ། འཇིག་རྟེན་སྐྱོང་བའམ། འཁོར་ལོས་སྒྱུར་བའམ། དབང་པོའམ། གྲུབ་པའི་སྦྱོར་བའི་དབང་པོའམ། ངལ་བསོ་བའམ། ཁྱོད་གང་དང་གང་འདོད་པ་དེ་སྦྱིན་པར་བྱེད་ན། འཇིག་རྟེན་གྱི་ཡོ་བྱད་སྦྱིན་པ་ལྟ་ཅི་སྨོས། ཚེ་རིང་བའམ། དོན་གྲུབ་པའམ། འཇིག་རྟེན་པ་དང་མཛའ་བ་དང་། རྒྱལ་སྲིད་དང་། ཡུལ་ཐོབ་པར་རམ། ལྡོང་རོས་དམར་པོ་སྒྲུབ་པའམ། ནམ་མཁའ་ལ་འགྲོ་བའམ། མི་སྣང་བར་འགྱུར་བའམ། མིག་རྣམ་པར་དག་པའམ། རིག་པའི་ཆོ་ག་ལྷ་མ་ཡིན་གྱི་ཆོ་གས་ཕུག་ཏུ་འཇུག་པའམ། འདོད་པའི་གཟུགས་སམ། དབང་པོའི་སྤྱད་དམ། །རྒྱལ་པོ་དབང་དུ་བྱེད་པའམ། རི་དགས་དང་བྱའི་སྐད་ཤེས་པ་དང་། ཚེ་སྔ་མ་རྗེས་སུ་དྲན་པའམ། གནོད་སྦྱིན་དང་། འབར་བའི་གཟུགས་ཀྱི་ལས་འདི་དག་ཐམས་ཅད་འགྲུབ་པར་འགྱུར་རོ། །གསང་སྔགས་འདིས་གར་མཁན་མཆོག་སླར་གཤེགས་སུ་གསོལ་ལོ། །ན་མོ་བཻ་ཤྲ་མ་ཎ་སུ་ཏཱ་ཡ། ན་ར་ཀུ་པ་རཱ་ཡ། ཨོཾ་ས་རས་ར། ན་ཊ་ཊ་ན་ཊ་ཊ། གཙྪེ། སྭ་བྷ་བ་ནཱ་མ། ཡ་ཐ་སུ་ཨེ་ཏྲཾ་ཡཀྵེ་ན་དྲ་ས་ཧཱ། འདི་ལྟར་སྦྱོར་བའི་མེ་ཏོག་བླངས་
ནས་ཕུལ་ཏེ། ལན་ཅིག་བཟླས་པས་གུ་གུལ་གྱིས་བདུགས་ན་མི་སྣང་བར་འགྱུར་རོ། །གནོད་སྦྱིན་གར་མཁན་མཆོག་གི་བརྟག་པ་ལས། དཀྱིལ་འཁོར་སྒྲུབ་པའི་ཆོ་གའི་ལེའུ་སྟེ་བཞི་པའོ།། །།དེ་ནས་སྐུ་གཟུགས་ཀྱི་ཆོ་ག་བཤད་པར་བྱ་སྟེ། རས་ཁ་ཚར་མ་བཅད་པ། སྐྲ་མེད་པ་ཁྲུ་བཞིའི་ཚད་ལ་ཀུན་དུ་གྲུ་བཞི་ལྷམ་པར་བྱའོ། །གཙང་མའི་ཕོ་གར་སྤྱད་ཅིང་མ་འདྲེས་པའི་ཚོན་རྩིས་རི་མོ་མཁན་གྱི་རྗེས་སུ་མཐུན་པར་སྣོད་གཙང་མར་བྱས་ཏེ་བྲི་བར་བྱའོ། །དབུས་སུ་གར་མཁན་མཆོག་བྲི་བ་ནི་གུར་གུམ་གཞོན་ནུའི་མདོག་འདྲ་བ། ཞལ་བཞི་པ། གཡས་ཨུཏྤལ་སྔོན་པོ་འདྲ་བ། གཡོན་དུང་དང་མཚུངས་པ། རྒྱབ་ཀྱི་ཞལ་ཨིནྡྲ་ནཱི་ལའི་མདོག་ལྟ་བུ་ཞལ་མཆེ་བ་ཅུང་ཟད་གཙིགས་པའི་ཚུལ་དུ་འཛུམ་པ་དང་བཅས་པའོ། །ཕྱག་བཅུ་དྲུག་རིན་པོའི་ཆེའི་རྒྱན་གྱིས་སྤྲས་པ་སྟེ། རྡོ་རྗེ་དང་། འཁོར་ལོ་དང་། རིན་པོ་ཆེ་དང་། པདྨ་དང་། རལ་གྲི་དང་། ཞགས་པ་དང་། མདའ་དང་། དགྲ་སྟ་སྟེ་གཡས་པ་ན་རིམ་པས་སོ། །དྲིལ་བུ་དང་། རྩེ་གསུམ་པ་དང་། ནེའུ་ལེ་དང་། མེ་ཏོག་གི་ཕུར་མ་དང་། བ་དན་དང་། ཐོད་པ་དང་། གཞུ་དང་། རྔ་ཡབ་ནི་གཡོན་པའི་རིམ་པས་སོ། །གཡས་གཡོན་དུ་ཚངས་པ་དང་། གཏོགས་འདོད་དང་། དབང་ཕྱུག་ཆེན་པོ་དང་། ངལ་བསོ་པོ་བྲི་བར་བྱའོ། །ཡང་འོག་གི་ཆ་ལ་ནི་ནོར་བུ་བཟང་པོ་དང་། གང་བ་བཟང་པོ་དང་། སྟོབས་ཀྱི་ལྷ་དང་། དགའ་བའི་དབང་པོ་དང་། དབང་མོ་དང་། དབྱངས་ཅན་མ་དང་། སྟོབས་དང་། སྟོབས་ཆེན་པོ་དང་། གཞན་ཡང་གནོད་སྦྱིན་རྫུ་འཕྲུལ་ཆེ་བ་རྣམས་བྲི་བར་བྱའོ། །སྟེང་གི་ཆ་ལ་ལྷའི་བུ་དང་དྲང་སྲོང་རྫུ་འཕྲུལ་ཅན་རྣམས་བྲི་བར་བྱའོ། །འོག་ཏུ་རིག་པ་འཛིན་པ་བྲི་བར་བྱའོ། །གཞན་ཡང་ཇི་ལྟར་སྔགས་ཀྱི་ཆོ་ག་བཞིན་བྲི་སྟེ། གསང་སྔགས་ཐམས་ཅད་ལས་འབྱུང་བའི་ཆོ་ག་སྐུ་གཟུགས་ཀྱི་སྤྱན་སྔར་མཆོད་ཅིང་སྔགས་ལན་སྟོང་བཟླས་པར་བྱ། འདི་དག་སྒྲུབ་པ་བརྗོད་པ་ཙམ་གྱིས་འགྲུབ་བོ། །གནོད་སྦྱིན་གར་མཁན་མཆོག་གི་བརྟག་པ་ལས་
བླ་ན་མེད་པའི་སྐུ་གཟུགས་ཀྱི་ཆོ་གའི་ལེའུ་སྟེ་ལྔ་པའོ།། །།དེ་ནས་སྔགས་ཀྱི་ལེའུ་བཤད་པར་བྱ་སྟེ། ན་མོ་བཻ་ཤྲ་མ་ཎ་སུ་ཏཱ་ཡ། ན་ར་ཀུ་པ་རཱ་ཡ། ཨོཾ་མ་ད་ནད་ན་ཀུཉྫ་ལ་སྭཱ་ཧཱ། ལན་བདུན་ཡོངས་སུ་བཟླས་ཏེ་ཡོན་ཆབ་དབུལ་ལོ། །ན་མོ་བྷག་བ་ཏི། ན་ར་ཀུ་པ་རཱ་ཡ། བཻ་ཤྲ་མ་ཎ་སུ་ཏཱ་ཡ། སུ་པ་ཏི་ཤཾ་རཀྵ་ཏུ་པ། སུ་དེ་བོ་ཡ། མོ་ཏཀྵ་མཾ། པཥྛ་མཾ། བ་རུ་ཎ་སུ་ཏྲ། ན་ཏ་ཀུ་བེ་ར། ཤོ་ཏ་ར་ག་མཾ། ཏ་རྫོ་བ་ཏི། བི་ཏི་ཤ་བ། ཡུ་སརྦེ་གུ་ཧྱ་ས་རཀྵན་ཏུ་མཎྜལ་ན། ཏདྱ་ཐཱ། ཨ་མི་ཏི་མ་ཏི་ལི། རུ་ཏི་རུ་ཏི་དྱཱ་ན་ར་ན་ཏ་ཀུ་པ་ར། ཀུ་བར་ནས་ར་ཀུ་པ་ར། ཨཱཛྙཱ་བ་ཡ་ཏི། ཏིཥྛ་ཏིཥྛ། མ་ཏི་ཀྲ་མ་མ་མཎྜ་ལ་སྭཱ་ཧཱ། ཕྱོགས་བཅིང་བ་དང་། མཎྜལ་བཅིང་བ་དང་། མཚམས་བཅིང་བ་དང་། ཆུའམ་ཡུངས་ཀར་ལ་ལན་བདུན་བཟླས་པར་བྱའོ། །ན་མོ་བཻ་ཤྲ་མ་ཎ་སུ་ཏཱ་ཡ། ན་ར་ཀུ་བ་རཱ་ཡ། ཏེ་སམ་སྐྲཾ་ཏ། ཨོཾ་ས་རས་ར། ན་ཊ་ན་ཊ། དུ་ཏི་དུ་ཏི། ན་ད་ན་ད། ཀུ་བར་ཛྙཱ་པ་ཡ་ཏི་སྭཱ་ཧཱ། ལན་བདུན་བཟླས་ཏེ་བདུག་པ་དབུལ་ལོ། །ན་མོ་བྷ་ག་བ་ཏེ། ན་ར་ཀུ་པ་ར་ཡ། བཻ་ཤྲ་མ་ཎ་སུ་ཏཱ་ཡ། ཨོཾ་ཧ་ན་ཧ་ན། ཛྭ་ལ་ཛྭ་ལ། ཧེ་ཧེ་ན་ཏ་ཀུ་པརཱ་ཡ། སྦྱིན་སྲེག་གི་སྔགས་སོ། །ན་མོ་ན་ཏ་ཀུ་པ་རཱ་ཡ། ཨོཾ་ཀེ་ལ་ཀེ་ལེ། ཀི་ལི་ཛྭ་ལ་ནི། ཁི་ལི་ཛྭ་ལི་ནི་སྭཱ་ཧཱ། ཡུངས་ཀར་ལ་ལན་བདུན་བཟླས་ལ་ཁྲུས་བྱའོ། །ན་མོ་ན་ཏ་ཀུ་པ་རཱ་ཡ། ཨོཾ་ཧ་ཧི་ཀ་རི་བ་ཀུན་ཏི་ཡཀྵ་ཀུ་པཱར་ཡ་སྭཱ་ཧཱ། ཉེ་རེག་གི་སྔགས་ཏེ་ལན་བདུན་བཟླས་པར་བྱའོ། །ན་མོ་བ་ཤྲ་མ་ཎ་སུ་ཏཱ་ཡ། ན་ཏ་ཀུ་པ་རཱ་ཡ། ཨོཾ་ཏུ་རུ་ཏུ་རུ། པུཥྤ་ཏི། མུ་ར་མུ་ར། པཱ་ར་པཱ་ར། གུ་ཧྱ་ན་ཏ་ཀུ་པཱར་ཡ་སྭཱ་ཧཱ། མེ་ཏོག་ལ་བསྔགས་ཏེ་ལན་བདུན་བཟླས་པར་བྱའོ། །ན་མོ་ན་ཏ་ཀུ་པ་ར། བི་ཛ་ཡ། པྲ་བྷ་ར། ཀུ་བ་རཱ་ཡ། གཏོར་མའི་སྔགས་ཏེ་ལན་བདུན་བརྗོད་ལ་དབུལ་ལོ། །ན་མོ་ན་ར་ཀུ་པ་རཱ་ཡ། སརྦ་བ་ན་ཏི་ཏཱ་ཡ། ཨོཾ་ཀི་རི་ཀི་རི། ཀུ་པི་ར་ཀུ་པ་ར། ཏིཥྛ་ཏིཥྛ། ཤི་ཁི་སྭཱ་ཧཱ། སྤྱི་གཙུག་བཅིང་བའི་སྔགས་ཏེ་ལན་བདུན་བརྗོད་བར་བྱའོ། །ན་མོ་ན་ར་ཀུ་བར་སྱ། ཨོཾ་ཙུ་རུ་ཙུ་རུ། དུ་རུ་དུ་རུ། ཀུ་པ་ར་ཀཱ་མ་ཤ་རཱི་རཾ། སརྦ་ཀུ་ལུ་ཏུ་ཏི་སྭཱ་ཧཱ།
བདག་སྲུང་བ་དང་། མཆོག་སྲུང་བ་དང་། ལས་ཐམས་ཅད་བྱེད་པ་སྟེ། སྐུད་པའམ། ཆུའམ། ཡུངས་ཀར་རམ། ཐལ་བའམ། གུ་གུལ་ལ་ལན་ཉི་ཤུ་རྩ་གཅིག་བཟླས་པར་བྱའོ། །གནོད་སྦྱིན་གར་མཁན་མཆོག་གི་བརྟན་པ་ལས་མཆོག་ཏུ་གྲུབ་པའི་སྔགས་ཀྱི་ལེའུ་སྟེ་དྲུག་པའོ།། །།འདི་མན་ཆད་ཕྱག་རྒྱའི་ཆོ་ག་བཤད་པར་བྱ་སྟེ། གར་མཁན་མཆོག་གི་སྤྱད་ཆེན་པོ་བླ་ན་མེད་པའི་མཆོག་སྒྲུབ་པའོ། །ཐལ་མོ་གཉིས་མཉམ་པར་སྦྱར་ཏེ། སོར་མོའི་རྩེ་མོ་རྣམས་མཉམ་པར་གཞག་ལ་མཐེ་བོང་དང་མཐེ་ཆུང་གཉིས་ཕྲལ་ལ་གུང་མོ་གཉིས་བཀུག་པའི་རྒྱབ་ཏུ་མཛུབ་མོ་གཉིས་དཀྲི་བར་བྱ་སྟེ། ཕྱག་རྒྱ་འདི་ནི་ཕྱག་རྒྱ་ཆེན་པོ་སྟེ། གཟི་བརྗིད་ཆེན་པོ་ཕ་རོལ་གནོན་པ། དཔའ་བོ་ཆེན་པོའི་ཆོ་ག་དང་། ལས་ཐམས་ཅད་སྒྲུབ་པར་བྱེད་ཅིང་། གནོད་སྦྱིན་ཐམས་ཅད་གཟིར་བ་དང་། རྟག་ཏུ་འགུགས་པ་སྟེ། གཟའ་དབབ་པ་དང་། ལས་ཐམས་ཅད་སྒྲུབ་པ། གར་མཁན་མཆོག་གི་ཕྱག་རྒྱ་ཞེས་བརྗོད་དོ། །ལས་ཐམས་ཅད་སྒྲུབ་པའོ། །ཨོཾ་ཊ་ཀི་ཀུ་པར་སྭཱ་ཧཱ། སོར་མོ་ཐམས་ཅད་བསྣོལ་ཏེ། གུང་མོ་གཉིས་རྡོ་རྗེ་ལྟར་བསྒྲེངས་ནས། སྤྱི་བོར་བཅིང་བ་ནི་ཐོ་བའི་ཕྱག་རྒྱ་སྟེ་ལས་ཐམས་ཅད་སྒྲུབ་པར་བྱེད་པའི་མཆོག་ཏུ་བཀོད་པའོ། །ཨོཾ་ཙི་ཏི་ཙི་ཏི། བི་ཙི་ཏི་མུད་གར་ཧཱུྃ་ཧཱུྃ། དེ་ནས་རྡོ་རྗེ་ལྟ་བུས་སོར་མོ་ཀུན་བསྣོལ་ཏེ་བཀུག་ནས་མཛུབ་མོ་གཉིས་རྩེ་སྤྲད་དེ་ཟླུམ་པོར་བཀུག་པ་སྙིང་པོའི་ཕྱག་རྒྱ་སྟེ། གནོད་སྦྱིན་གྱི་བདག་པོ་ཆེན་པོའོ། །གནོད་སྦྱིན་དང་། འབར་བ་དང་། ཀླུའི་རིགས་དང་། གདུག་པ་ལ་སོགས་པ་ཐམས་ཅད་གཏན་ནས་འབྱིན་པར་བྱེད་པའོ། །ཨོཾ་རུ་ཏི་སྭཱ་ཧཱ། ཕྱག་རྒྱ་དེ་ཉིད་ལས་མཛུབ་མོ་གཉིས་ནང་དུ་བཀུག་སྟེ། མཐེ་བོང་གཉིས་རྩེ་སྤྲད་དེ་བརྐྱང་བ་དེ་ནི་ཐམས་ཅད་ཀྱི་སྙིང་པོའི་ཕྱག་རྒྱ་སྟེ། ལས་ཐམས་ཅད་ཤིན་ཏུ་སྒྲུབ་པར་བྱེད་པའོ། །ཨོཾ་ན་ར་ཏེ་ཨ་ཙ་ཧཱུྃ་ཕཊ། ཐལ་མོ་མཉམ་པར་སྦྱར་ཏེ་གུང་མོ་གཉིས་ལྷན་ཅིག་ཏུ་གཞིབས་ཏེ་ནང་དུ་གནས་པར་བྱ། གནོད་སྦྱིན་དང་། འབར་བ་ཐམས་ཅད་ཀྱི་སྙིང་པོའི་ཕྱག་རྒྱ་སྟེ། གཟའ་ཐམས་
ཅད་རྣམ་པར་གཞིག་པ་དང་། གང་དུ་བཅིངས་པ་ཙམ་གྱིས་ཐམས་ཅད་གཡོ་ཞིང་གནོད་སྦྱིན་དང་། འབར་བ་མ་རུངས་པ་མྱུར་དུ་མ་འོངས་ན་མིག་རྡོལ་ཅིང་མགོ་འགས་པར་འགྱུར་རོ། །ཨོཾ་ན་མ་སྟུ་ཏེ། ཤུད་དྷེ་ཤྭ་རཱ་ཡ། ན་ར་ཀུ་པ་ར། མ་ཏུ་མ་མ་ཏ། ག་ཎ་པ་ཏི། བཻ་ཤྲ་མ་ཎ། སཱ་དྷུ་ཧཱུྃ། བྷི་བི་དྷི་སྭཱ་ཧཱ། སོར་མོ་ཕན་ཚུན་བསྣོལ་ཏེ་ཁུ་ཚུར་བཅིངས་པ་ལ་མཐེ་བོང་གཉིས་ཕྱེ་སྟེ་སྒྲེང་། མཐེ་ཆུང་གཉིས་བརྐྱང་སྟེ་སྙིང་ཁར་བཞག་པ་ནི། ལྷ་ཐམས་ཅད་མཆོད་པའི་ཕྱག་རྒྱ་སྟེ། ལས་ཐམས་ཅད་གདོན་མི་ཟ་བར་བསྒྲུབ་པའི་ཕྱག་རྒྱའི་སྤྲུལ་པའོ། །ཨོཾ་ས་ར་མ་ཀུ་ཀུ་ཀ། ཛྭ་ལ་ཛྭ་ལ། པྲ་ལཾ་བཛྲ་ཧཱུྃ། མཐེ་ཆུང་གཉིས་ཕྲལ་ནས་བརྐྱང་སྟེ། མཛུབ་མོ་གཉིས་ཟླུམ་པོར་བཀུག་ནས་གུང་མོ་གཉིས་ལྕགས་ཀྱུ་ལྟར་བཟུང་བ་ནི་བསྐྲད་པའི་སྔགས་དང་ཕྱག་རྒྱ་སྟེ། གསང་བ་གསུམ་གྱི་སྤྱིའི་ལས་ཐམས་ཅད་བྱེད་པའོ། །རྩ་བའི་སྔགས་དེ་བརྗོད་བྱས་ན། དེ་མ་ཐག་ཏུ་ཡིད་ལ་དགོས་པ་ཐམས་ཅད་བྱེད་པར་འགྱུར་རོ། །ཐོགས་པ་མེད་པའི་གར་མཁན་མཆོག་གི་སྙིང་པོའི་ཕྱག་རྒྱ་ཞེས་བཤད་དོ། །དེས་ལྷ་དང་། ཀླུ་དང་། གནོད་སྦྱིན་དང། འབར་བ་དང་། གཟའ་མ་རུངས་པ་ཐམས་ཅད་མདུན་དུ་འདུག་ནས་བཀའ་ཉན་པར་འགྱུར་རོ། །ཨོཾ་ཧ་ར་ཧ་ར། པྲ་ཧ་ར་སྭཱ་ཧཱ། ཕྱག་རྒྱ་ལྷག་མ་འདི་དག་བཤད་པ་ནི་ལས་ཐམས་ཅད་སྒྲུབ་པར་བྱེད་པ་སྟེ། གནས་གཙང་མར་གོས་གཙང་མ་བགོས་ཏེ། ལག་པ་གཉིས་ཙནྡན་ནམ་གུ་གུལ་གྱིས་བསྐུས་ལ་དེ་ནས་ཕྱག་རྒྱ་བཅིངས་ན་སེམས་ཅན་ཐམས་ཅད་བདེ་བར་འགྱུར་རོ། །གནོད་སྦྱིན་གར་མཁན་མཆོག་གི་བརྟག་པ་ལས་ཕྱག་རྒྱའི་ལེའུ་སྟེ་བདུན་པའོ།། །།ན་མོ་རཏྣ་ཏྲ་ཡཱ་ཡ། ན་ར་ཀུ་པ་རཱ་ཡ། བཻ་ཤྲ་མ་ཎ་སུ་ཏཱ་ཡ། ཏདྱ་ཐཱ། ས་གྲཱ་སྱ། ཧི་ལི་ཧི་ལི། མིལི་སྭཱ་ཧཱ། ཨ་མུན་ཤཾ་ས་ཧི། ཧ་ར་ཎྱ་ན་སུ་ག་ཏེ་བྷྱོ་ཛཱ་བེ་ཡི་སཱ་སཱ་ལ་ཀ་ར། བ་ཤ་མ་ན་ཡེ་སྭཱ་ཧཱ། དེའི་ཞི་བ་ཉེ་བར་སྦྱོར་བ་ནི་ཞག་གསུམ་སྨྱུང་བ་བྱས་ཏེ། སྨོན་པ་ཅན་གྱི་ཤིང་ལས་ཡམ་ཤིང་བྱས་ལ།
ཡུངས་ཀར་བདག་གི་ཁྲག་ལས་སྦགས་ཏེ་བརྒྱ་རྩ་བརྒྱད་བསྲེགས་ནའོང་བར་འགྱུར་རོ། །དོན་གྲུབ་པ་དང་སླར་བཏང་སྟེ། སླར་བཏང་བའི་སྔགས་ལ། ཨ་པས་རས་ར། ཨ་པ་ར། གཙྪ་གཙྪ་སྭཱ་ཧཱ། ཡུངས་ཀར་ལ་ལན་བདུན་བཟླས་ཏེ་གདོང་བཀྲུས་ན་འགྲོ་བ་ཐམས་ཅད་མཛའ་ཞིང་གང་གིས་མཐོང་བ་དེ་དབང་དུ་འགྱུར་རོ། །མེ་ཏོག་དང་འབྲས་བུ་ལ་ལན་བདུན་བཟླས་ཏེ་གང་ལ་བྱིན་པ་དེ་དབང་དུ་འགྱུར་རོ། །ན་ལེ་ཤམ་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ་ཁར་བཅུག་ན་གང་དང་གང་སྨྲས་པ་དེ་དབང་དུ་འགྱུར་རོ། །གང་བསླངས་པ་དེ་སྟེར་རོ། །ལག་པ་ལ་ལན་ཉི་ཤུ་རྩ་གཅིག་བཟླས་ཏེ། གང་ལ་རེག་པ་དེ་དབང་དུ་གྱུར་ནས་གང་བསླངས་པ་དེ་སྟེར་རོ། །གང་བསྒོ་བ་དེ་ཡང་བྱེད་དོ། །ཡུངས་ཀར་ལ་བཟླས་ཏེ་འཇུག་བྱེད་ཀྱི་མགོར་གཏོར་ན་གྲིབ་མ་བཞིན་དུ་རྗེས་སུ་འབྲང་བར་འགྱུར་རོ། །ཤུ་དག་དང་། གསེར་ལ་བཟླས་ཏེ་ཁར་བཅུག་ན་འཐབ་པ་དང་། རྩོད་པ་ཀུན་ལས་རྒྱལ་བར་འགྱུར་རོ། །གོ་རོ་ཙན་ལ་བཟླས་ཏེ་ཐིག་ལེ་བྱས་ནས་རྒྱལ་པོའི་ཕོ་བྲང་དུ་ཞུགས་ན་རྒྱལ་པོ་དང་། རྒྱལ་པོའི་འཁོར་དང་བློན་པོ་ཐམས་ཅད་དབང་དུ་འགྱུར་རོ། །གུ་གུལ་ལ་བཟླས་ཏེ། བདག་ལ་བདུགས་ན་དགྲ་ཐམས་ཅད་ལས་རྒྱལ་བར་འགྱུར་རོ། །ལན་ཅིག་བརྗོད་པས་དགྲ་ཐམས་ཅད་ལས་རྒྱལ་བར་བྱེད་དོ། །གུ་གུལ་ལ་ལན་ཉི་ཤུ་རྩ་གཅིག་བཟླས་ཏེ། བདུགས་ན་དབང་དུ་བྱེད་པའི་མཆོག་དམ་པའོ། །གནོད་སྦྱིན་གར་མཁན་མཆོག་གི་བརྟག་པ་ལས་སྤྱད་དམ་པ་སྒྲུབ་པའི་ལེའུ་སྟེ་བརྒྱད་པའོ།། །།ན་མོ་ན་ཏ་ཀུ་པར་སྱ་ཡ་སྱ། བཻ་ཤྲ་མ་ཎཱ་ཡ་ཀུ་པ་ར། མ་ཧཱ་གུ་ཧྱ་གྲིན་ཏ་སྱ། དི་བྱི་བ་མ་ན་བ་ས་ཏ་ཡ་སྱ། ཨཏ་ཀྲོ་དོཾ་ན་ཏ་ཀུ་པར་སྱ། ཧྲྀ་ད་ཡཱ་ལ་བར་ཏྲཱི་ཤ་ཏ་མེ་ཨ་པ་ཧ་ན་ན། ས་རོབ་ནན། ར་ར་ཀ་བ་ནན། རོ་ན་པ་ནན། བརྟ་ནན། མ་མན་མན་མ། ཏྲ་ས་ནམ། ཏེ་ཛ་ནམ། སྟམ་བྷ་ནམ། ཛམ་བྷ་ནམ། མོ་ཧ་ནམ། སརྦ་མི་ཏྲ་ནན། བྲ་ཐན་མ་ནམ། ན་ཏན་ཏ་ཡུ་བ་ཡ། ན་མོ་བཻ་ཤྲ་མ་ཎཱ་ཡ། ན་མོ་བི་ཪཱུ་པཱ་ཀྵཱུ་ཡ། ན་མོ་བེ་རུ་ཌྷ་ཀཱ་ཡ། ན་མོ་དྷྲ་ཏ་ར་ཥྚཱ་ཡ།
ན་མོ་ཛྭ་ཏི་ལཱ་ཡ། ན་མོ་ཡཀྵ་གན་དྷཱ་ཡ། ན་མོ་མ་ཎི་བྷ་དྲཱ་ཡ། ན་མོ་པཱུ་ར་ཎ་བྷ་དྲཱ་ཡ། པྲ་པ་རི། སརྦ་བི་དྱཱ། མནྟྲ་པཱུ་ཛི་ཏཱ་ཡ། པྲ་ཏ་ཡ་ཛྭ་ལི་ཏ། ཧྲྀ་ད་ཡ། པྲ་ཧ་ར་པྲ་ཧ་ར། སྟ་ཡ། སུ་བི་མ་ཡ། མ་ནི་ནི་ཤ། །པྲ་བྷ་ར་ཎ། ཨ་ལང་ཀྲྀ་ཏ་ཤ་རཱི་རཱ་ཡ། སརྦ་དེ་བ་བཱུ་ཇི་ཏི། ཏདྱ་ཐཱ། ཙན་དྲཱ་ཡ། སཱུཪྻ། སྐན་དྷ་ཏཱ་རཱ་ཡ། ན་ཏ་ཀུ་པ་རཱ་ཡ། ཨེ་ཧྱེ་ཧི། བྲཧྨ་ས་དྱཱ་ན། དེ་བ་སྱ། ད་ནེ་བཱ་ཡུ་བཛྙཱི། བར་ཤི་ཤ། ཨཱི་ཤྭ་རཾ། སརྦ་དེ་མ་ཨ་མོ་གྷ་མནྟུ། ཨཱ་བེ་ཤ་ཡནྟྲ། མན་ཏྲཱ་བ་ཨིན་དུ། མཱ་ར་ཡནྟུ། ཡ་དི་ཡོཙྪ་ན། ཤན་གྷ་ཏོ་པི་ཡེ་ཏི་དྷ་རྨཱ་ལོ་ཤ་གྷ་ཏོ། ཨ་བྷཱ་བ་རུ་ཎ་ལཱ་ཡ། ཨིནྡྲ་ཡོ་ག་ག་ཏ་བྷཱ། ཐི་ཧ་གུ་ལོ་ག་ག་ཏི་བཱི་སེ་སོ་མ་ས་པཱ་ཪྻ། ལོ་ཀ་ག་ཏི། མེ་གྷ་ཏ་ཏ་བུ་ནན་ཏ་ཀུ་པ་ར། ཨཱ་ཀ་དྷ་ཡ། ཨཱ་ཀརྵ་ཡ། བྷ་ག་བ་ན། ན་ཏ་ཀུ་པར། ན་མུ་སམ་ཙ། པྲ་ཀྲ་པ་ནི་རཱ་ཛྙཱ་བ་ཡ་ཏི། སརྦ་ན་ཏ་ཤྲིང་ཨིན་ཏི་ཏ། ཀྵི་ནན་ཏི། ཤ་མ་ཡཱ་ན་རྫོ་པི་ཤི་པ་ལེ་མེ། ན་མོ་ནཱ་ག་ཨུ་ཏ་ཏ་ར་ཎེ། བེེ་ཤྲ་བ་ཎ། བརྡོ་ཡ་ཏི་ཏི་ཤ་པ་ལ། ཨ་ཧོ་ཡཱ་པ་ཡན་ཏུ་ཏི་ཏ་ཡཱཾ། བྷོ་བྷོ་དྷི་དྷ་ཀུ་པར་མ་དྷ་མ་དྷ། ཀུ་པར་ཀུ་པར། པུ་པ་ཀུ་པར། ཧྲྀ་དཀུ་པར། ཧུ་དྲ་ཧུ་དྲ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཙྪིན་ད་ཙྪིན་ད། ཧ་ཧ་ན་ཏ་ཀུ་པར། ཧི་ཧི་ན་ཏ་ཀུ་པ་ར། པཱུ་ར་ཡ་པཱུ་ར་ཡ། ན་ཏ་པཱུ་ར། དེ་བ་ཏ་ཀུ་བ་ཏ། ཨཏ་སྟཾ་བྷ་ཡ། བྷོ་གུ་ཧྱ་ག་ཎ། ན་ཏ་ན་ཏ། ཧ་ཧཱུྃ་ཧ་ཧཱུྃ། ཊི་ཏི་ཊི་ཏི། བྷི་ཙི་བྷི་ཙི། བྷི་ཙི་ཏ་བེ་སྭཱ་ཧཱ། ཉེ་བར་སྤྱོད་པའི་ཆོ་ག་ནི་གུ་གུལ་གྱིས་བདུགས་ཏེ་དྲན་པ་ཙམ་གྱིས་གཟའ་ཐམས་ཅད་འབབ་པར་འགྱུར། གུ་གུལ་ལ་ལན་ཉི་ཤུ་རྩ་གཅིག་བཟླས་ནས། དེའི་མདུན་དུ་འདུག་ནས་སྔགས་སྟོང་བཟླས་ཏེ། གཙང་ཞིང་གཙང་མའི་གོས་གོན་ནས་གཏོར་མ་དཀར་པོ་དབུལ་བར་བྱ། བཟླས་པ་སྟོང་ཡོངས་སུ་རྫོགས་པ་དང་། བྲིས་པའི་སྐུལ་ཞུགས་ནས་འགུལ་བ་དང་། འབར་བ་དང་། སྒྲ་འབྱིན་པར་འགྱུར་ཏེ། གར་མཁན་མཆོག་གི་སྤྱད་དེ་རིག་པ་འཛིན་པ་ཁྱོད་ཀྱི་དངོས་གྲུབ་ཀྱི་སྔགས་བྱོས་ཤིག་ཅེས་པ་དང་། རིག་པ་འཛིན་
པས་ཡོན་ཆབ་དབུལ་བར་བྱའོ། །འདི་དག་སྒྲུབ་པའི་ཚིག་སྟེ། ཡུངས་ཀར་ལ་ལན་བདུན་ཡོངས་སུ་བཟླས་ཏེ་གྲོང་ཁྱེར་གྱི་དབུས་སུ་ཡོངས་སུ་གཏོར་ན་གུས་པར་བྱིན་གྱིས་བརླབས་ཏེ་འབབ་པར་འགྱུར་རོ། །འཇིག་རྟེན་པ་ཕན་ཚུན་འཇིག་པར་འགྱུར། གང་གིས་ཀྱང་འཚོ་བར་མི་ནུས་སོ། །ཆུས་གཏོར་ན་ཞི་བར་འགྱུར་རོ། །རལ་གྲིས་ཡིད་ལ་དྲན་པ་ཙམ་གྱིས་འབར་བའོ། །དེ་བཞིན་དུ་རྩེ་གསུམ་པ་དང་། འཁོར་ལོ་དང་། རལ་གྲི་དང་། མུ་ས་ལ་དང་། ཐོ་བ་ལ་རེག་ཅིང་ཡིད་ལ་སྔགས་དྲན་ཅིང་གུ་གུལ་གྱིས་བདུགས་པ་ཙམ་གྱིས་འབར་བར་འགྱུར་རོ། །བུ་དོན་གྱི་གཟུགས་ལ་ཡུངས་ཀར་གྱིས་བདུགས་ན་གཟུགས་དེ་འབར་བར་འགྱུར་རོ། །དེ་བཞིན་དུ་ཚངས་པ་དང་། བརྒྱ་བྱིན་དང་། མཐུ་བོ་ཆེ་དང་། དབང་པོ་དང་། ངལ་བསོ་པོ་དང་། ནག་པོ་ཆེན་པོ་ལ་སོགས་པ་ལ་གུ་གུལ་གྱིས་བདུགས་པ་ཙམ་གྱིས་ལས་ཀུན་འབར་བར་འགྱུར་རོ། །བུམ་པ་ལ་དབབ་པར་འདོད་ན་དཀྱིལ་འཁོར་བྱས་ཏེ། བུམ་པ་ཆུས་བཀང་ལ་དཀྱིལ་འཁོར་དུ་མེ་ཏོག་གིས་གཏོར་ནས་གུ་གུལ་གྱིས་བདུག་ཅིང་སྔགས་རྗེས་སུ་དྲན་པར་བྱས་ན་བབས་ན་འབར་ཏེ། མེ་ལོང་དབབ་པར་འདོད་ན་དཀྱིལ་འཁོར་བྱས་ནས་མེ་ཏོག་གཏོར་ཏེ། གུ་གུལ་གྱིས་བདུགས་ན་འདས་པ་དང་མ་འོངས་པ་དང་། ད་ལྟར་བྱུང་བ་དང་། ཐམས་ཅད་མེ་ལོང་གི་དབུས་སུ་མཐོང་ངོ་། །ཇི་སྲིད་ལྷའི་གནས་དང་། རྒྱལ་ཆེན་བཞིའི་གནས་དང་། གཤིན་རྗེའི་གནས་དང་།ཀླུའི་གནས་དང་། གང་དང་གང་ཡིད་ཀྱིས་བསམས་པ་དེ་དང་དེ་མཐོང་བར་འགྱུར་རོ། །གང་དུ་འདོད་པ་དེའི་ཚེ་མཐར་འགྱུར་བ་ཡང་མཐོང་སྟེ། འཇིག་རྟེན་མངོན་སུམ་མཐོང་བར་འགྱུར་རོ། །དེ་བཞིན་དུ་ཐོ་བ་ལ་དབབ་པར་འདོད་ན། ཐོ་བ་ལ་རྒྱ་སྐྱེགས་ཀྱི་ཁུ་བས་བསྐུས་ནས་དཔུང་པ་ལ་ཙནྡན་དང་གུར་གུམ་གྱིས་བསྐུས་ཏེ། མེ་ལོང་ལ་བསྡིགས་ན་ཆོ་ག་འདིས་ཐམས་ཅད་མཐོང་བར་འགྱུར་རོ། །སྐྱེས་བུ་དམ་པའི་ཐོད་པ་བླངས་ནས་ཤིན་ཏུ་བཀྲུས་ནས་བྱི་དོར་བྱས་ཏེ་ཡོན་ཆུས་བཀྲུས་ནས་དྲི་རྣམ་པ་ལྔས་བཀྲུ་བར་བྱའོ། །ཐོད་པའི་
དངོས་གཞི་དྲི་ཞིམ་པོས་བཀྲུས་ལ་ཐོད་པའི་སྤྱི་བོར་དྲི་ཞིམ་པོ་དང་ཡུངས་ཀར་གྱིས་བཀྲུ་བར་བྱའོ། །དཀྱིལ་འཁོར་གྲུ་བཞི་པར་ཆུས་བཀང་བའི་བུམ་པ་བཞི་གྲྭ་བཞིར་གཞག་པར་བྱའོ། །གཏོར་མས་བཀང་བའི་སྣོད་བཞི་ཡང་བཞག་ནས། མེ་ཏོག་གིས་གཏོར་ཞིང་ཚོན་སྣ་ལྔས་བྲི། དེ་ནས་རལ་གྲི་བཞི་བཞག་སྟེ། ཁམ་ཕོར་བཞི་དང་། མེ་ཏོག་དང་། འབྲས་བུ་དང་། གཏོར་མ་དང་། ཚོན་སྣ་ལྔའི་བ་དན་གྱིས་དཀྱིལ་འཁོར་བརྒྱན་ཅིང་ཐོད་པ་ལ་ཡང་ལན་བདུན་བཟླས་ཏེ། ཐོད་པ་གསུམ་དཀྱིལ་འཁོར་གྱི་དབུས་སུ་བཞག་ནས་གུ་གུལ་གྱིས་བདུག་ཅིང་སྔགས་རྗེས་སུ་དྲན་པར་བྱས་ནས་སེང་ལྡེང་གི་ཕུར་བུས་ལན་གསུམ་བརྡེགས་ན་ཐོད་པ་འབར་བར་གྱུར་ནས་ཆུ་གཏོར་བར་འགྱུར་རོ། །དེས་ཇི་ལྟར་མེ་ལོང་ལ་སྣང་བ་དེ་བཞིན་དུ་ཐོད་པ་ལ་སྣང་བར་འགྱུར་རོ། །གར་མཁན་གྱི་གཞལ་མེད་ཁང་དང་། འཁོར་དང་ཁང་པ་དང་། གནས་སུ་བཅས་པའི་སྤྱི་བོ་རྣམས་མཐོང་སྟེ། དེ་དང་ལྷན་ཅིག་ཏུ་སྨྲ་ཞིང་མཆོག་ཀུན་ཡང་སྦྱིན་པར་བྱེད་དོ། །འགྲོ་བ་དང་འོང་བ་ཡང་མཐོང་སྟེ། བུད་མེད་དང་སྐྱེས་པ་དང་། ཁྱེའུ་དང་། བུ་མོ་ལ་སོགས་པ་མཚམས་མེད་པ་བྱེད་པ་དང་། དམ་པའི་ཆོས་ལ་དབང་ཟ་བ་དང་། བྱིས་པ་མི་ཤེས་པ་རྣམས་ཀྱིས་མི་མཐོང་ངོ་། །སྔགས་སྒྲུབ་ཀྱང་དེ་དག་གིས་མི་འགྲུབ་བོ། །འདི་ལྟར་མེ་ལོང་དང་། ཐོད་པ་དང་། ཐོ་བ་དང་། དེ་དག་ལ་དབབ་པ་ནི་མཆོག་ཏུ་བཟླས་པས་འགྲུབ་པར་འགྱུར་རོ། །དུར་ཁྲོད་དུ་ཞུགས་ནས་ཡུངས་ཀར་ལ་བཟླས་ཏེ་གུ་གུལ་གྱིས་བདུགས་ན་ཡུངས་ཀར་གྱིས་རི་མོ་ལ་བརྡེགས་ན་རོ་ལངས་ཏེ་སྤྱི་གཙུག་སྔགས་འདིས་བཅིང་བར་བྱའོ། །གཏོང་བ་ནི་སེ་གོལ་ལན་བདུན་གཏོགས་ནས་ཡིད་ཀྱིས་བསམས་པས་འགྲོ་ཞིང་ལས་ཐམས་ཅད་བྱེད་པར་འགྱུར་རོ། །གང་དྲིས་པ་དེ་ཡང་སྨྲའོ། །ཡུངས་ཀར་ལ་ཡོངས་སུ་བསྔགས་ཏེ་གཏོར་ན་གང་ལ་བྱ་བས་གཏོར་བྱས་ཐམས་ཅད་འབབ་པར་འགྱུར་རོ། །རྒྱལ་པོའི་སྒོར་བཏབ་ན་རྒྱལ་པོ་དང་རྒྱལ་པོའི་འཁོར་དུ་བཅས་པ་དབང་དུ་འགྱུར་རོ། །ནམ་ཡང་དགོས་པའི་བདག་ལ་འདོད་པའི་སྟོང་ཕྲག་བརྒྱད་ཀྱང་སྟེར་བར་འགྱུར་རོ། །
གནོད་སྦྱིན་གར་མཁན་མཆོག་གི་བརྟག་པ་ལས་གསལ་སྣང་དུས་གསུམ་བརྟག་པའི་ལེའུ་སྟེ་དགུ་པའོ།། །།འདི་མན་ཆད་ཉེ་བའི་སྙིང་པོ་བཤད་པར་བྱ་སྟེ། ན་མོ་བཻ་ཤྲ་མ་ཎ་སྱ། བརྫུ་མུ་ས་ལ་ཏྲི་ཤཱུ་ལ་གུ་ཤ་ཧ་སྟ་སྱ། ན་མཿསརྦ་དེ་བ་ཏཱ་ལ་ཡེ། བཱུ་ཇི་ཏ། ན་མ་སྟི་ཏ་སྱ། མ་ཧཱ་ཀི་ལི་ཀི་ལི་སྱ། སརྦ་ག་ག་ག་ར་ཎ། ཡཛྫ་ཡ་ཏ། བྷ་ག་ཝན། ན་དེ་ཤཱུ་བྷ་བ་རཱ་ཡ། ཡཀྵི་ཏི་བར་ཙི་ཏ། བྲཧྨ་ཎི་ཀ་ལ་ཀ་ལ། ན་ཏ་ཀུ་པར་ཀུ་ལ་ཀུ་ལ། ཀུ་པར་ཀུ་པ་ར། དུ་བྷིན་བྷན་ཀུ་པ་ར། པི་ཙི་རིམ་པ་བྷན། བྷ་ག་བ་ན། ན་ཏ་ཀུ་པ་ར། བི་ཊི་ཏི་རཏྣ། དྲ་ཧ་ཧ་བུ་ཀ་ཪྻ་ཀམ་པ་པ་རི་དྲི་ཏ་བཻ་ཤྲ་མ་ཎ། བ་བྷ་བི་མ་ན། པ་སི་ནི་ཤུ་ཏི་ཤུ་ཏི། ཀུ་པར་ཀུ་པ་ར། ན་ཏ་ཀུ་པ་ར། ན་མོ་སྟུ་ཏེ་སྭཱ་ཧཱ། ཉེ་བའི་སྙིང་པོའི་སྔགས་དང་། ཉེ་བར་ལོངས་སྤྱད་པའི་ཆོ་ག་ཡིན་ཏེ། དཔའ་པ་ལ་གུ་གུལ་གྱི་དུད་པ་བདུགས་ན་རེག་པ་དང་མ་རེག་པ་ཡང་འབབ་པར་འགྱུར་རོ། །གུ་གུལ་གྱིས་བདུགས་ན་སྔགས་རྗེས་སུ་དྲན་པ་ཙམ་གྱིས་ལྷ་མ་ཡིན་གྱི་སྒོ་དང་། འཁྲུལ་འཁོར་དང་། བརྟག་པ་ཐམས་ཅད་འཇོམས་པར་བྱེད་དོ། །གུ་གུལ་གྱིས་བདུག་ཅིང་ཡུངས་ཀར་ལ་སྔགས་ཉི་ཤུ་རྩ་གཅིག་བཟླས་ཏེ་ཀླུའི་གནས་སུ་བརྡེགས་ན་ཀླུས་མི་ཚུགས་པར་འགྱུར་རོ། །ཕུང་པོ་ལ་ཡུངས་ཀར་གྱིས་བརྡེག་ཅིང་སྔགས་ལན་བདུན་བཏབ་ཅིང་ཀླུའི་གནས་སུ་བཏབ་ན་ཀླུས་མི་ཚུགས་པར་འགྱུར་རོ། །ཕྱུང་ན་ཐར་རོ། །ལྕགས་ཀྱི་ཕུར་པ་ལ་ལན་ཉི་ཤུ་རྩ་གཅིག་བཏབ་ན་ཕ་རོལ་གྱི་འཁོར་གྱིས་མི་ཚུགས་སོ། །ངལ་བསོ་པོའི་དམག་སྡེས་མི་ཚུགས་པར་འདོད་ན་མི་རུས་ཀྱི་ཕུར་པ་ལ་ལན་ཉི་ཤུ་རྩ་གཅིག་བཟླས་ཏེ་གུ་གུལ་གྱིས་བདུགས་ན་མི་ཚུགས་པར་འགྱུར་རོ། །ཕྱུང་ན་ཐར་རོ། །གཟའ་ཐམས་ཅད་ལས་གྲོལ་བར་འདོད་ན་གུ་གུལ་གྱིས་བདུག་ཅིང་བརྡེག་གོ། །རིམས་ཐམས་ཅད་གཞིག་པ་ལ་ཚོན་སྣ་ལྔའི་སྐུད་པས་བཅིང་བར་བྱའོ། །བཅིངས་པ་གྲོལ་བར་འདོད་ན་གུ་གུལ་གྱིས་བདུག་ཅིང་བརྡེག་གོ། །སྒོ་དང་ལྕགས་སྒྲོག་འགྲོལ་བར་འདོད་ན་བརྒྱ་རྩ་བརྒྱད་དུ་བཟླས་སོ། །ཡུངས་ཀར་དང་གུ་གུལ་གྱིས་བདགས་ན་གཅེར་
བ་འཕོ་བར་བྱེད་དོ། །སྤྲིན་བསྐྲད་པ་ལ་ཡང་བ་ལ་པོ་སེའུའི་ལྕུག་མས་སོ། །སེར་བ་འཕོ་བར་བྱ་བ་ལ་ཀ་ར་བཱི་རའི་ལྕུག་མས་སོ། །ས་བོན་བདུན་པ་བསྲེགས་ནས་ཀླུས་ཅར་འབེབས་པར་བྱེད་དོ། །གནོད་སྦྱིན་བསྐྲད་པ་ལ་ཡང་འབྲས་དང་ཏིལ་བསྲེགས་པས་སོ། ཆང་འཚོང་གི་ཆང་ཉམས་པར་བྱེད་ན་ཆང་གི་སྐྱོ་བ་དང་། ཕུག་མ་བསྲེག་པར་བྱའོ། །ཏིལ་མར་གྱིས་ནི་དབང་དུ་བྱེད་པར་འགྱུར་རོ། །ཡིད་ཀྱིས་བཟླས་པས་དུག་འཕོ་བར་བྱེད་དོ། །རྨ་བྱའི་མཇུག་སྒྲོས་ལས་སྟོང་ཕྲག་བརྒྱད་བྱེད་པར་འགྱུར་རོ། །གར་མཁན་མཆོག་གི་ཉེ་བའི་སྙིང་པོ་བསྐྱེད་པ་ཙམ་གྱིས་འགྲུབ་བོ།། །།གུ་གུལ་གྱིས་བདུགས་ན་ལས་ཐམས་ཅད་འགྲུབ་པར་འགྱུར་བ་ནི་དངོས་གྲུབ་ཐམས་ཅད་བླ་ན་མེད་པ་དེས་བླང་ངོ་། །གར་མཁན་མཆོག་གི་ཉེ་བར་སྤྱད་པ་དང་། སྔགས་དང་ཕྱག་རྒྱ་སྒྲུབ་པའི་ཆོ་གའི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་ཀྱིས་ངལ་བསོ་པོའི་བུ་གར་མཁན་མཆོག་ལ་ལེགས་སོ་ཞེས་གསུངས་ཏེ། ལེགས་སོ་ལེགས་སོ། །གནོད་སྦྱིན་གྱི་དབང་པོ་ཁྱོད་ཀྱིས་སེམས་ཅན་ཐམས་ཅད་ལ་ཕན་པའི་ཕྱིར་བསྟན་པ་ལེགས་པར་བསྟན་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། འཇིག་རྟེན་སྐྱོང་བ་དང་། ཚངས་པ་དང་། ཁྱབ་འཇུག་དང་། ལྷ་ཆེན་པོ་དང་། ནོར་བུ་བཟང་པོ་དང་། གང་བ་བཟང་པོ་ལ་སོགས་པ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།གནོད་སྦྱིན་གྱི་སྡེ་དཔོན་ཆེན་པོ་གར་མཁན་མཆོག་རིག་པའི་རྒྱལ་པོ་སྤྱད་དང་དངོས་གྲུབ་སྒྲུབ་པ་བཀླགས་པས་ཐམས་ཅད་འགྲུབ་པ་བརྟག་པའི་རྒྱལ་པོ་དང་པོ་རྫོགས་སོ།། །།རྒྱ་གར་གྱི་མཁན་པོ་དྷ་ན་གུཔྟ་ཞེས་བྱ་བ་སྤྱོད་མཛད་ཆོས་ཀྱི་རྡོ་རྗེའི་སློབ་མ་དངོས་ལས་རབ་ཞི་ལོཙྪ་བས་ཐོ་ལིང་དུ་བསྒྱུར་བའོ།།