བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཕྱག་སྟོང་སྤྱན་སྟོང་དང་ལྡན་པ་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས་ཆོ་ག་དང་བཅས་པ།
འཕགས་པ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཕྱག་སྟོང་སྤྱན་སྟོང་དང་ལྡན་པ་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་
ཤཱཀྱ་ཐུབ་པ་རི་པོ་ཊ་ལའི་སྟེང་། འཕགས་པ་སྤྱན་རས་གཟིགས་དབང་ཕྱུག་གི་གཞལ་མེད་ཁང་རིན་པོ་ཆེ་བཀོད་པའི་དཀྱིལ་འཁོར་ན་ནོར་བུ་རིན་པོ་ཆེ་རྣམ་པ་སྣ་ཚོགས་ཀྱིས་རབ་ཏུ་བརྒྱན་པའི་རིན་པོ་ཆེའི་སེང་གེའི་གདན་རིན་པོ་ཆེའི་རྒྱལ་མཚན་དང་བ་དན་དག་གིས་འཁོར་བར་བཀོད་ཅིང་དཔྱངས་པ་ལ་བཞུགས་ཏེ། དེའི་ཚེ་དེ་བཞིན་གཤེགས་པ་གདན་དེ་ལ་བཞུགས་ནས་ཀུན་འཛིན་ཅེས་བྱ་བའི་གཟུངས་སྔགས་བཤད་པར་བཞེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ་དང་ཐབས་ཅིག་ཏུ་བཞུགས་པ་ལ་འདི་ལྟ་སྟེ། བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོ་དང་། བྱང་ཆུབ་སེམས་དཔའ་རིན་པོ་ཆེའི་རྒྱལ་པོ་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དང་། བྱང་ཆུབ་སེམས་དཔའ་སྨན་མངོན་པར་འཕགས་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་པ་དང་། བྱང་ཆུབ་སེམས་དཔའ་པདྨའི་བཀོད་པ་དང་། བྱང་ཆུབ་སེམས་དཔའ་བཀོད་པ་ཆེན་པོ་དང་། བྱང་ཆུབ་སེམསདཔའ་རིན་ཆེན་སྙིང་པོ་དང་། བྱང་ཆུབ་སེམས་དཔའ་དཔལ་གྱི་སྙིང་པོ་དང་། བྱང་ཆུབ་སེམས་དཔའ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་ནམ་མཁའི་སྙིང་པོ་དང་། བྱང་ཆུབ་སེམས་དཔའ་བྱམས་པ་དང་། བྱང་ཆུབ་སེམས་དཔའ་ཀུན་དུ་བཟང་པོ་དང་། བྱང་ཆུབ་སེམས་དཔའ་འཇམ་དཔལ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྒྱལ་པོ་ཆེན་པོར་དབང་བསྐུར་བ་ཐོབ་པ་ཤ་སྟག་དང་ཐབས་ཅིག་གོ། །གཞན་ཡང་ཉན་ཐོས་ཀྱི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པའི་ས་བཅུ་སྤྱད་པ་ཚད་མེད་གྲངས་མེད་པ་དག་དང་ཐབས་ཅིག་སྟེ། ཚེ་དང་ལྡན་པ་འོད་སྲུང་ཆེན་པོ་ནི་གཙོ་བོར་གྱུར་ཏོ། །གཞན་ཡང་ཚངས་རིས་ཀྱི་ལྷ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་ཀྵཎྜ་མ་ར་ནི་གཙོ་བོར་གྱུར་ཏོ། །གཞན་ཡང་ལྷ་དང་ལྷའི་བུ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་ཀུཾ་བྷ་ཀ་ནི་གཙོ་བོར་གྱུར་ཏོ། །གཞན་ཡང་འཇིག་རྟེན་སྐྱོང་བ་དང་། རྒྱལ་ཆེན་རིས་བཞིའི་ལྷའི་རྒྱལ་པོ་
ཚད་མེད་པ་སྙེད་དང་ཐབས་ཅིག་སྟེ། ལྷའི་རྒྱལ་པོ་ཡུལ་འཁོར་སྲུང་ནི་གཙོ་བོར་གྱུར་ཏོ། །གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ལ་སོགས་པ་ཚད་མེད་པ་སྙེད་དང་ཐབས་ཅིག་སྟེ། ཀླུའི་རྒྱལ་པོ་ཆེན་པོ་རིའི་དཔལ་ནི་གཙོ་བོར་གྱུར་ཏོ། །གཞན་ཡང་འདོད་པའི་ཁམས་ཀྱི་ལྷའི་བུ་མོ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་མོ་གཞོན་ནུའི་མིག་ཅེས་བྱ་བ་ནི་གཙོ་མོར་གྱུར་ཏོ། །གཞན་ཡང་ནམ་མཁའི་ལྷ་དང་། ཆུ་བོ་དང་། རྒྱ་མཚོའི་ལྷ་དང་། ཆུ་མིག་གི་ལྷ་དང་། ཆུ་ཀླུང་གི་ལྷ་དང་། སྨན་གྱི་ལྷ་དང་། ལྗོན་ཤིང་གི་ལྷ་དང་། ནགས་ཚལ་གྱི་ལྷ་དང་། ཁང་ཁྱིམ་གྱི་ལྷ་དང་། ཆུའི་ལྷ་དང་། མེའི་ལྷ་དང་། རླུང་གི་ལྷ་དང་། སའི་ལྷ་དང་། རིའི་ལྷ་དང་། གཞལ་མེད་ཁང་ལ་སོགས་པའི་ལྷ་ཚད་མེད་པ་སྙེད་ཀྱང་སོ་སོ་ནས་འདུས་ཤིང་ལྷགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་འཁོར་མང་པོའི་ནང་དུ་གསང་སྟེ། རྫུ་འཕྲུལ་གྱིས་འོད་ཟེར་བཀྱེ་བས་ཕྱོགས་བཅུའི་འཇིག་རྟེན་གྱི་ཁམས་རྣམས་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་གསེར་གྱི་ཁ་དོག་ཅན་དུ་གྱུར་ཏོ། །ལྷའི་གཞལ་མེད་ཁང་རྣམས་དང་། ཀླུའི་ཁང་ཁྱིམ་རྣམས་དང་། ལྷའི་གཙོ་བོ་རྣམས་ཀྱི་གཞལ་མེད་ཁང་རྣམས་ཀྱང་རབ་ཏུ་གཡོས་པར་གྱུར། ཆུ་བོ་དང་། མཚོ་དང་། རྒྱ་མཚོ་ཆེན་པོ་དང་། རི་ཁོར་ཡུག་དང་། རི་རབ་ལྷུན་པོ་དང་། སའི་རི་དང་། རི་ནག་པོ་རྣམས་ཀྱང་རབ་ཏུ་གཡོས་པར་གྱུར་ཏོ། །ཉི་མ་དང་། ཟླ་བ་དང་། ནོར་བུ་དང་། མེ་དང་། རྒྱུ་སྐར་དང་། གཟའི་འོད་རྣམས་ཀྱང་ཟིལ་གྱིས་མནན་ཏེ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོས་ངོ་མཚར་རྨད་དུ་བྱུང་བའི་མཚན་མ་དེ་དག་མཐོང་བ་དང་། སྔོན་ཆད་ནམ་ཡང་དེ་ལྟ་བུ་མ་བྱུང་ངོ་ཞེས་ངོ་མཚར་དུ་གྱུར་ནས། སྟན་ལས་ལངས་ཏེ་ཐལ་མོ་སྦྱར་ནས་འདི་སྐད་ཅེས། བཅོམ་
ལྡན་འདས་རྫུ་འཕྲུལ་གྱི་མཚན་མ་འདི་ལྟ་བུ་འདི་དག་སུས་བཀྱེ་ལགས་ཞེས་གསོལ་ནས། ཚིགས་སུ་བཅད་དེ་ཞུ་བ་ཞུས་པ། དེང་ནི་སུ་ཞིག་མངོན་པར་སངས་རྒྱས་ན། །འདི་ལྟར་འོད་ཟེར་ཆེན་པོ་རབ་བཀྱེ་བས། །ཕྱོགས་བཅུའི་འཇིག་རྟེན་གསེར་གྱི་མདོག་ཏུ་གྱུར། །སྟོང་ཆེན་འཇིག་རྟེན་ཁམས་ཀྱང་དེ་བཞིན་ལགས། །དེང་ནི་སུ་ཞིག་རང་དབང་ཐོབ་གྱུར་ན། །ཡ་མཚན་རྫུ་འཕྲུལ་ཆེན་པོ་མཐུ་བཀྱེ་ནས། །མཐའ་མེད་སངས་རྒྱས་ཞིང་རྣམས་རབ་གཡོས་ཤིང་། །ལྷ་ཀླུ་གཞལ་མེད་ཁང་རྣམས་མི་བདེར་གྱུར། །སུ་ཡི་མཐུ་ལགས་རྒྱུ་རྐྱེན་མ་རྟོགས་པས། །འཁོར་མང་འདི་དག་ཐེ་ཚོམ་འཚལ་གྱུར་ན། །བཅོམ་ལྡན་འདས་ཀྱི་ཐུགས་རྗེ་ཆེན་པོ་ཡིས། །རྫུ་འཕྲུལ་འདི་ཡི་རྒྱུ་རྐྱེན་བཀས་བཤད་གསོལ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོ་ལ་བཀའ་སྩལ་པ། རིགས་ཀྱི་བུ་ཁྱེད་ཀྱིས་འདི་རིག་པར་བྱ་སྟེ། དེང་འཁོར་གྱི་དཀྱིལ་འཁོར་འདུས་པ་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱ་བ་ཞིག་ཡོད་པ་དེ་སྔོན་བསྐལ་བ་ཚད་མེད་པ་ནས་བྱམས་པ་ཆེན་པོ་དང་། སྙིང་རྗེ་ཆེན་པོ་ཕུན་སུམ་ཚོགས་པར་གྱུར་པ། གཟུངས་ཀྱི་སྒོ་ཚད་མེད་པ་སྙེད་ཤིན་ཏུ་བསྒོམས་ཤིང་མངོན་པར་བསྒྲུབས་པར་གྱུར་པས། སེམས་ཅན་རྣམས་ལ་ཕན་པ་དང་། བདེ་བར་འདོད་པའི་ཕྱིར་གསང་སྟེ་འདི་ལྟ་བུའི་རྫུ་འཕྲུལ་གྱི་མཐུ་ཆེན་པོ་བསྟན་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྟན་ལས་ལངས་ཏེ་གོས་ཚགས་བཅོས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་རྗེ་ཆེན་པོའི་སེམས་ཞེས་བགྱི་བའི་གཟུངས་སྔགས་མཆིས་ཏེ། སེམས་ཅན་མང་པོ་རྣམས་ལ་སྨན་པ་དང་བདེ་བ་འཐོབ་པར་བགྱི་བ་དང་། བྲོ་ནད་ཐམས་ཅད་བསལ་བར་བགྱི་བ་དང་། ཚེ་རིང་བར་འགྱུར་བ་དང་།ཕྱུག་ཅིང་འབྱོར་པ་དང་ལྡན་པར་བགྱི་བ་དང་། སྡིག་པ་མི་དགེ་
བའི་ལས་དང་ཁ་ན་མ་ཐོ་བ་ལྕི་བ་རྣམས་ཡོངས་སུ་སྦྱང་ཞིང་བསལ་བ་དང་། སྒྲིབ་པའི་བགེགས་རྣམས་དང་འབྲལ་བ་དང་། ཆོས་དཀར་པོའི་ཡོན་ཏན་ཐམས་ཅད་འཕེལ་བར་བགྱི་བ་དང་། །དགེ་བའི་ས་བོན་ཐམས་ཅད་ཕུན་སུམ་ཚོགས་པར་བགྱི་བ་དང་། འཇིགས་ཤིང་སྐྲག་པ་ཐམས་ཅད་ཡོངས་སུ་སྤང་བར་བགྱི་བ་དང་། རེ་བ་ཐམས་ཅད་མྱུར་དུ་ཡོངས་སུ་རྫོགས་པར་བགྱི་བའི་སླད་དུ་དེང་བཤད་པར་འཚལ་ན། བཅོམ་ལྡན་འདས་ཐུགས་བརྩེ་བར་དགོངས་ཏེ་གནང་བར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་སྙིང་རྗེ་ཆེན་པོས་སེམས་ཅན་རྣམས་ལ་ཕན་པ་དང་། བདེ་བ་འདོད་པའི་ཕྱིར་རིག་སྔགས་བཤད་པར་འདོད་པས་དེང་དུས་ལ་བབ་ཀྱིས་མྱུར་དུ་སྨྲོས་ཤིག་དང་། དེ་བཞིན་གཤེགས་པ་ང་དང་སངས་རྒྱས་བཅོམ་ལྡན་འདས་རྣམས་ཀྱང་རྗེས་སུ་ཐུགས་དགྱེས་པར་མཛད་དོ། །བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་མངོན་པར་དྲན་ལགས་ཏེ། སྔོན་བྱུང་བའི་བསྐལ་པ་འབུམ་ཕྲག་ཚད་མ་མཆིས་པ་སྙེད་འདས་པ་དེའི་ཚེ་དེའི་དུས་ན། བཅོམ་ལྡན་འདས་དེ་བཞིན་གཤེགས་པ་འོད་སྟོང་གི་རྒྱལ་པོ་ཞི་བར་གནས་པ་ཞེས་བྱ་བ་འཇིག་རྟེན་དུ་བྱུང་སྟེ། སངས་རྒྱས་བཅོམ་ལྡན་འདས་དེས་བདག་དང་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་ཐོགས་པ་མ་མཆིས་པའི་ཐུགས་རྗེ་ཆེན་པོ་རྒྱ་ཆེར་ཡོངས་སུ་རྫོགས་པ་ཞེས་བགྱི་བའི་གཟུངས་འདི་བཀའ་སྩལ་ནས། ཕྱག་གསེར་གྱི་ཁ་དོག་ཅན་གྱིས་བདག་གི་སྤྱི་བོ་ལ་བྱུགས་ཏེ་འདི་སྐད་ཅེས། རིགས་ཀྱི་བུ་ཁྱོད་ཐུགས་རྗེ་ཆེན་པོའི་རིག་སྔགས་འདི་ཟུང་ཤིག་དང་། མ་འོངས་པའི་དུས་ངན་པའི་སེམས་ཅན་ཐམས་ཅད་ལ་ཕན་པ་དང་བདེ་བ་ཆེན་པོ་བྱེད་པར་འགྱུར་རོ་ཞེས་བཀའ་སྩལ་ཏོ། །བདག་དེའི་ཚེ་གདོད་ས་དང་པོ་ལ་གནས་པ་ལས་རིག་སྔགས་འདི་ལན་ཅིག་ཐོས་པ་ཙམ་གྱིས་ས་བརྒྱད་པ་ལས་ཡང་དག་པར་འདས་པར་གྱུར་ལགས་སོ། །བདག་དེའི་ཚེ་དེའི་དུས་ན་སེམས་རབ་ཏུ་དགའ་ཞིང་མགུ་བར་གྱུར་
པའི་སླད་དུ་སྨོན་ལམ་འདི་སྐད་དུ་བཏབ་ལགས་ཏེ། གལ་ཏེ་བདག་མ་འོངས་པའི་དུས་ན་སེམས་ཅན་ཐམས་ཅད་ལ་སྨན་ཅིང་བདེ་བར་བགྱིད་པའི་འོས་སུ་འགྱུར་ཡང་དག་པ་ཞིག་ལགས་ན་དེང་བདག་གི་ལུས་འདི་ཉིད་ལས་ལག་པ་སྟོང་དང་། མིག་སྟོང་ཚང་བར་འབྱུང་བར་གྱུར་ཅིག་ཅེས་སྨོན་ལམ་བཏབ་མ་ཐག་ཏུ་ལུས་ལས་སུག་པ་སྟོང་དང་མིག་སྟོང་ཚང་བར་བྱུང་བར་གྱུར་ཏེ། ཕྱོགས་བཅུའི་ས་ཆེན་པོ་རྣམས་ཀྱང་རྣམ་པ་དྲུག་ཏུ་རབ་ཏུ་གཡོས་པར་གྱུར། ཕྱོགས་བཅུའི་སངས་རྒྱས་རྣམས་ཀྱིས་ཀྱང་འོད་ཟེར་བཀྱེ་བས་བདག་གི་ལུས་ལ་རེག་ཅིང་ཕྱོགས་བཅུའི་འཇིག་རྟེན་གྱི་ཁམས་མཐའ་མ་མཆིས་པ་རྣམས་ཀྱང་གསལ་བར་བགྱིས་པར་གྱུར་ལགས་སོ། །དེང་སླན་ཅད་སངས་རྒྱས་ཚད་མ་མཆིས་པའི་འཁོར་གྱི་དཀྱིལ་འཁོར་ཚད་མ་མཆིས་པ་དག་ཏུ་གཟུངས་འདི་ཡང་དང་ཡང་དུ་ཐོས་ཤིང་མངོན་སུམ་དུ་ཡང་དག་པར་བླངས་པ་དང་། གཞན་ཡང་དགའ་བ་དང་། མགུ་བ་དང་། རངས་པ་ཚད་མ་མཆིས་པ་བསྐྱེད་པས་བསྐལ་པ་འབུམ་ཕྲག་ཚད་མ་མཆིས་པ་སྙེད་ཀྱི་འཁོར་བ་ཕྲ་མོ་ལས་ཡང་དག་པར་འདས་པར་གྱུར་ལགས་སོ། །དེང་སླན་ཅད་གཟུངས་འདི་རྟག་པར་འདོན་ཅིང་ཡོངས་སུ་བཟུང་ནས་ནམ་དུ་ཡང་མི་བསྐྱུད་པར་བགྱིས་པའི་སླད་དུ་སྐྱེ་བ་ཐམས་ཅད་དུ་རྟག་པར་སངས་རྒྱས་རྣམས་ཀྱི་སྤྱན་སྔར་པདྨ་ལས་རྫུས་ཏེ་སྐྱེས་པས་མངལ་དུ་སྐྱེ་བའི་ལུས་བླངས་པར་མ་གྱུར་ལགས་སོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། ཁྱེའུ་འམ། བུ་མོ་གང་ལ་ལ་ཞིག་འདི་འདོན་ཅིང་ཡོངས་སུ་འཛིན་པར་འཚལ་བ་དེས་སེམས་ཅན་རྣམས་ལ་སྙིང་བརྩེ་བའི་སེམས་བསྐྱེད་ནས། དང་པོ་ཁོ་ནར་བདག་ལ་སྨོན་ལམ་འདི་སྐད་གདབ་པར་བགྱི་ལགས་སོ། །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་ཆོས་རྣམས་ཐམས་ཅད་མྱུར་དུ་རྟོགས་པར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་ཡེ་ཤེས་མིག་ནི་མྱུར་དུ་ཐོབ་པར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་སེམས་
ཅན་ཐམས་ཅད་མྱུར་དུ་སྒྲོལ་བར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་ཐབས་མཁས་པ་དག་མྱུར་དུ་ཐོབ་པར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་ཤེས་རབ་གྲུ་ཡིས་སྒྲོལ་བར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་སྡུག་བསྔལ་མཚོ་ལས་འདའ་བར་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་མྱུར་དུ་ཚུལ་ཁྲིམས་རྐང་གི་ལམ་ཐོབ་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་མྱུར་དུ་མྱ་ངན་འདའ་བའི་རི་འཛེག་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་མྱུར་དུ་འདུས་མ་བྱས་ཀྱི་ཁྱིམ་ཕྱིན་ཤོག །སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་ཆོས་ཉིད་སྐུ་དང་མཚུངས་པར་ཤོག །བདག་ནི་རལ་གྲི་རི་ལ་འཛེག །རལ་གྲི་རི་ནི་རང་རྙིལ་ཤོག །བདག་ནི་ཆུ་ཚན་ཕྲད་གྱུར་ན། །ཆུ་ཚན་མེ་མུར་རང་ཞི་ཤོག །སེམས་ཅན་དམྱལ་བར་བདག་སོང་ན། །སེམས་ཅན་དམྱལ་བ་རང་སྐམས་ཤོག །བདག་ནི་ཡི་དགས་གནས་སོང་ན། །བཀྲེས་སྐོམ་དག་ནི་འགྲངས་པར་ཤོག །བདག་ནི་ལྷ་མིན་གནས་སོང་ན། །ངན་སེམས་རང་ནི་དུལ་བར་ཤོག །བདག་ནི་དུད་འགྲོའི་གནས་ཕྱིན་ན། །རང་ཉིད་ཤེས་རབ་ཆེ་ཐོབ་ཤོག །དེ་སྐད་དུ་སྨོན་ལམ་བཏབ་ནས་སེམས་རྩེ་གཅིག་ཏུ་བདག་གི་མིང་ནས་འདོན་ཅིང་རྗེས་སུ་དྲན་པར་བགྱིའོ། །གཞན་ཡང་བདག་གི་སྟོན་པ་དེ་བཞིན་གཤེགས་པ་འོད་དཔག་མེད་རྗེས་སུ་དྲན་པར་བགྱིས་ན། དེའི་རྗེས་ལ་གཟུངས་སྔགས་འདི་མཚན་གཅིག་ལ་ལན་བདུན་ཚང་བར་འདོན་པར་བགྱིད་ན་བསྐལ་པ་འབུམ་ཕྲག་བརྒྱད་སྟོང་སྙེད་དུ་འཁོར་བར་འགྱུར་བའི་ཁ་ན་མ་ཐོ་བ་ལྕི་བ་རྣམས་ཡོངས་སུ་བསལ་ཅིང་འབྱང་བར་འགྱུར་ལགས་སོ། །བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷའམ་མི་གང་ལ་ལ་ཞིག་ཐུགས་རྗེ་ཆེན་པོའི་ཚིག་འདི་འདོན་ཅིང་
འཛིན་པར་བགྱིད་ན་འཆི་བའི་དུས་ཀྱི་ཚེ་ཕྱོགས་བཅུའི་དེ་བཞིན་གཤེགས་པ་རྣམས་དེར་གཤེགས་ནས་ཕྱག་རྐྱོང་བར་འགྱུར་བས། སངས་རྒྱས་ཀྱི་ཞིང་གང་དང་གང་དུ་སྐྱེ་བར་འཚལ་བ་ཅི་ལྟར་སྨོན་པ་བཞིན་དུ་དེ་དག་ཏུ་སྐྱེ་བར་འགྱུར་ལགས་སོ། །བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་གང་ལ་ལ་ཞིག་ཐུགས་རྗེ་ཆེན་པོའི་རིག་སྔགས་འདི་འདོན་ཅིང་ཡོངས་སུ་འཛིན་པ་དག་གལ་ཏེ་ངན་འགྲོ་གསུམ་པོ་དག་ཏུ་ལྟུང་བར་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐུགས་རྗེ་ཆེན་པོའི་རིག་སྔགས་འདོན་ཅིང་ཡོངས་སུ་འཛིན་པ་དག་གལ་ཏེ་སངས་རྒྱས་ཀྱི་ཞིང་ཁམས་རྣམས་སུ་སྐྱེ་བར་མ་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐུགས་རྗེ་ཆེན་པོའི་རིག་སྔགས་འདོན་ཅིང་ཡོངས་སུ་འཛིན་པ་དག་གལ་ཏེ་ཏིང་ངེ་འཛིན་དང་སྤོབས་པ་ཚད་མ་མཆིས་པ་སྙེད་ཐོབ་པར་མ་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐུགས་རྗེ་ཆེན་པོའི་རིག་སྔགས་འདོན་ཅིང་ཡོངས་སུ་འཛིན་པ་དག་གལ་ཏེ་ཚེ་འདི་ཉིད་ལ་སྨོན་པ་ཐམས་ཅད་ཇི་ལྟར་སྨོན་པ་བཞིན་དུ་གྲུབ་པར་མ་གྱུར་ན་སྙིང་རྗེ་ཆེན་པོའི་སེམས་ཀྱི་གཟུངས་ཞེས་མི་བགྱི་ལགས་ཏེ། མི་དགེ་བ་རྣམས་དང་སེམས་རྩེ་གཅིག་ཏུ་མ་བགྱིས་པ་ནི་མ་གཏོགས་ལགས་སོ། །བུད་མེད་གང་ལ་ལ་ཞིག་བུད་མེད་ཀྱི་ལུས་ཀྱིས་ཡོངས་སུ་སྐྱོ་ནས་སྐྱེས་པའི་ལུས་ཐོབ་པར་འཚལ་བ་གང་ལགས་པ་དེས་ཐུགས་རྗེ་ཆེན་པོའི་སེམས་ཀྱི་གཟུངས་ཀྱི་ཚིག་འདི་འདོན་ཅིང་ཡོངས་སུ་བཟུང་བས་གལ་ཏེ་བུད་མེད་ཀྱི་དངོས་པོ་ལས་ཡོངས་སུ་གྱུར་ཏེ། སྐྱེས་པའི་ལུས་ཐོབ་པར་མ་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐེ་ཚོམ་གྱི་བསམ་པ་ཅུང་ཟད་ཅིག་བསྐྱེད་པར་གྱུར་ན་གདོན་མི་འཚལ་བར་གང་སྨོན་པའི་འབྲས་བུ་དེ་མངོན་པར་འགྲུབ་པར་མི་འགྱུར་ལགས་སོ། །སེམས་ཅན་གང་ལ་ལ་ཞིག་དགེ་འདུན་གྱི་ཞལ་ཟས་དང་དཀོར་འཕྲོག་ཅིང་ཆུད་གསོན་པ་གང་ལགས་པ་དེ་དག་ནི་སངས་རྒྱས་སྟོང་འཇིག་རྟེན་དུ་བྱུང་བ་དག་ལ་འགྱོད་པས་
མཐོལ་ཞིང་བཤགས་ན་ཡང་འབྱང་ཞིང་ཚངས་པར་མི་འགྱུར་མོད་ཀྱི། འོན་ཀྱང་ཐུགས་རྗེ་ཆེན་པོའི་རིག་སྔགས་འདི་བཏོན་པ་ཙམ་གྱིས་དེ་དག་ཡོངས་སུ་འབྱང་བར་འགྱུར་བ་ལགས་ཏེ། དཀོན་མཆོག་གསུམ་གྱི་ཞལ་ཟས་དང་། དཀོན་མཆོག་གསུམ་གྱི་དཀོར་ནོར་འཕྲོག་ཅིང་ཆུད་གསོན་པ་དེ་དག་ནི་ཕྱོགས་བཅུའི་སྟོན་པ་རྣམས་མངོན་སུམ་དུ་གྱུར་པའི་སྤྱན་སྔར་བཤགས་ན་གདོད་ཡོངས་སུ་འབྱང་བར་འགྱུར་ལགས་ལ། ཐུགས་རྗེ་ཆེན་པོའི་གཟུངས་འདི་འདོན་པའི་ཚེ་ཕྱོགས་བཅུའི་སྟོན་པ་རྣམས་དེར་གཤེགས་ནས་དབང་མཛད་པར་འགྱུར་བས་ཁ་ན་མ་ཐོ་བའི་སྒྲིབ་པ་དེ་དག་ཐམས་ཅད་ཀྱང་ཡོངས་སུ་འབྱང་བར་འགྱུར། མི་དགེ་བ་བཅུ་དང་། མཚམས་མ་མཆིས་པ་ལྔ་དང་། གང་ཟག་ལ་སྐུར་པ་བཏབ་པ་དང་། ཆོས་ལ་སྐུར་པ་བཏབ་པ་དང་། གསོ་སྦྱོང་བཤིག་པ་དང་། ཚུལ་ཁྲིམས་བཤིག་པ་དང་། མཆོད་རྟེན་བཤིག་པ་དང་། གཙུག་ལག་ཁང་བཤིག་པ་ཐམས་ཅད་དང་། དགེ་འདུན་གྱི་དཀོར་བརྐུས་པ་དང་། ཡོངས་སུ་དག་པའི་ཚངས་པར་སྤྱོད་པ་སུན་པར་བགྱིས་པ་འདི་ལྟ་བུ་ལ་སོགས་པ་སྡིག་པའི་ལས་ལྕི་བ་ཐམས་ཅད་ཡོངས་སུ་འབྱང་བར་འགྱུར་ལགས་སོ། །རིག་སྔགས་འདི་ལ་ཐེ་ཚོམ་འཚལ་བའི་དངོས་པོ་གཅིག་ནི་མ་གཏོགས་ཏེ། ཐེ་ཚོམ་འཚལ་བར་གྱུར་ན་ཐ་ན་ཁ་ན་མ་ཐོ་བ་ཆུང་ངུའི་ལས་ཡང་བ་ཙམ་ཡང་ཡོངས་སུ་འབྱང་བར་མི་འགྱུར་ན་ཁ་ན་མ་ཐོ་བ་ལྕི་བ་ལྟ་སྨོས་ཀྱང་ཅི་འཚལ་ལགས། ཁ་ན་མ་ཐོ་བ་ལྕི་བ་དག་ཡོངས་སུ་འབྱང་བར་མི་འགྱུར་མོད་ཀྱི། འོན་ཀྱང་བྱང་ཆུབ་ཀྱི་རིང་བའི་རྒྱུ་ནི་བགྱིད་པར་འགྱུར་ལགས་སོ། །བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་དང་མི་གང་ལ་ལ་ཞིག་ཐུགས་རྗེ་ཆེན་པོའི་སེམས་ཀྱི་རིག་སྔགས་འདི་འདོན་ཅིང་འཛིན་པ་དེ་དག་ནི་དགེ་བའི་སྐྱེ་བ་རྣམ་པ་བཅྭ་ལྔ་འཐོབ་པར་འགྱུར་ཞིང་གཤིས་ངན་དུ་འཆི་བ་རྣམ་པ་བཅྭ་ལྔར་ལེན་པར་མི་འགྱུར་ལགས་སོ། །གཤིས་ངན་དུ་འཆི་བར་མི་འགྱུར་བ་དེ་ཡང་འདི་ལྟ་སྟེ། གང་ཟག་
དེ་བཀྲེས་པས་ཉོན་མོངས་ཏེ་འཆི་བར་མི་འགྱུར་བ་དང་། མཚོན་ཆ་དང་ལྕག་དབྱུག་གིས་འཆི་བར་མི་འགྱུར་བ་དང་། ཁོ་ན་མཆིས་པའི་དགྲའི་སུག་པར་འཆི་བར་མི་འགྱུར་བ་དང་། གཡུལ་ངོར་འཆི་བར་མི་འགྱུར་བ་དང་། སྟག་དང་སྤྱང་ཀི་དང་གཅན་གཟན་མ་རུངས་པའི་ཁར་འཆི་བར་མི་འགྱུར་བ་དང་། སྦྲུལ་གདུག་པ་དང་རྩངས་པ་དང་སྡིག་པའི་ཁར་འཆི་བར་མི་འགྱུར་བ་དང་། ཆབ་དང་ཞུགས་ཀྱི་ནང་དུ་འབྱིང་ཞིང་ཚིག་སྟེ་འཆི་བར་མི་འགྱུར་བ་དང་། དུག་གིས་འཆི་བར་མི་འགྱུར་བ་དང་། བྱད་སྟེམས་ཀྱིས་འཆི་བའི་དུས་བགྱིད་པར་མི་འགྱུར་བ་དང་། སྨྱོས་ནས་དྲན་པ་ཉམས་ཏེ་འཆི་བར་མི་འགྱུར་བ་དང་། རི་དང་། ལྗོན་ཤིང་དང་ངམ་གྲོག་དང་གཡངས་ནས་ལྷུང་སྟེ་འཆི་བར་མི་འགྱུར་བ་དང་། མི་མ་རུངས་པའི་བྱད་ཀྱིས་འཆི་བར་མི་འགྱུར་བ་དང་། ལོག་པའི་འདྲེ་གདོན་མ་རུངས་པས་གླགས་རྙེད་དེ་འཆི་བའི་དུས་བགྱིད་པར་མི་འགྱུར་བ་དང་། ནད་ངན་པས་ལུས་ལ་དཀྲིས་ཏེ་འཆི་བའི་དུས་བགྱིད་པར་མི་འགྱུར་བ་དང་། ཆ་མ་ལགས་པས་བདག་ཉིད་ལ་གནོད་པ་བགྱིས་ཏེ་འཆི་བའི་དུས་བགྱིད་པར་མི་འགྱུར་བ་དག་ལགས་ཏེ། ཐུགས་རྗེ་ཆེན་པོའི་རིག་སྔགས་འདི་འདོན་ཅིང་ཡོངས་སུ་འཛིན་པར་བགྱིད་པ་དེ་དག་ནི་གཤིས་ངན་དུ་འཆི་བ་རྣམ་པ་བཅྭ་ལྔ་པོ་འདི་དག་གིས་འཆི་བའི་དུས་བགྱིད་པར་མི་འགྱུར་ལགས་སོ། །དགེ་བའི་སྐྱེ་བ་རྣམ་པ་བཅྭ་ལྔ་པོ་ཐོབ་པར་འགྱུར་བ་འདི་ལྟ་སྟེ། སྐྱེ་བ་ཐམས་ཅད་དུ་རྒྱལ་པོ་དགེ་བ་དང་མཇལ་བར་འགྱུར་བ་དང་། རྟག་པར་ཡུལ་དགེ་བར་སྐྱེ་བར་འགྱུར་བ་དང་། རྟག་པར་དུས་བཟང་པོ་དང་མཇལ་བར་འགྱུར་བ་དང་། རྟག་པར་དགེ་བའི་བཤེས་གཉེན་དང་མཇལ་བར་འགྱུར་བ་དང་། རྟག་པར་ལུས་ཀྱི་དབང་པོ་ཚང་བར་འགྱུར་བ་དང་། ལམ་གྱི་སེམས་ལ་གོམས་པར་འགྱུར་བ་དང་། སྡོམ་པའི་ཚུལ་ཁྲིམས་ཉམས་པར་མི་བགྱིད་པ་དང་། འཁོར་རྣམས་དྲིན་གྱིས་འདྲིས་ཤིང་འདུམ་པར་འགྱུར་བ་དང་། འཚོ་བའི་ཡོ་བྱད་རྣམས་རྟག་པར་འབྱོར་ཅིང་ལྡན་པར་འགྱུར་བ་དང་། རྟག་པར་གཞན་གྱིས་བཀུར་ཞིང་རིམ་གྲོ་བགྱིད་པར་འགྱུར་བ་
དང་། ཡོ་བྱད་བདོག་པ་རྣམས་གཞན་གྱིས་འཕྲོག་པར་མི་འགྱུར་བ་དང་། ཡིད་ལ་སྨོན་པ་རྣམས་བསམ་པ་བཞིན་དུ་འགྲུབ་པར་འགྱུར་བ་དང་། ལྷ་དང་། ཀླུ་དགེ་བ་རྣམས་ཀྱིས་རྟག་ཏུ་སྲུང་ཞིང་ཡོངས་སུ་སྐྱོབ་པར་འགྱུར་བ་དང་། སྐྱེ་བ་ཐམས་ཅད་དུ་སངས་རྒྱས་མཐོང་ཞིང་ཆོས་ཐོས་པར་འགྱུར་བ་དང་། ཡང་དག་པའི་ཆོས་ཐོས་ནས་དོན་ཟབ་མོ་རྟོགས་པར་འགྱུར་བ་དག་ལགས་ཏེ། ལྷའམ་མི་གང་ལ་ལ་ཞིག་ཐུགས་རྗེ་ཆེན་པོའི་སེམས་ཀྱིས་གཟུངས་འདི་འདོན་ཅིང་ཡོངས་སུ་འཛིན་པར་བགྱིད་པ་གང་ལགས་པ་དེ་དག་ནི་དགེ་བའི་སྐྱེ་བ་རྣམ་པ་བཅྭ་ལྔ་པོ་འདི་དག་ཐོབ་པར་འགྱུར་བས། ལྷ་དང་། མི་ཐམས་ཅད་ཀྱིས་རྟག་པར་བཏོན་ནས་ཡོངས་སུ་གཟུང་བར་བགྱི་སྟེ་ལེ་ལོ་བསྐྱེད་པར་མི་བགྱིའོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་དེ་སྐད་ཅེས་སྨྲས་ནས། འཁོར་འདུས་པའི་མདུན་དུ་ཐལ་མོ་སྦྱར་ཏེ་དྲང་པོར་འདུག་ནས་སེམས་ཅན་རྣམས་ལ་སྙིང་རྗེ་ཆེན་པོའི་སེམས་བསྐྱེད་དེ། འཛུམ་པའི་མདངས་ཀྱིས་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས་ཀྱི་ཚིག་གྱ་ནོམ་པ་འདི་དག་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་པ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀ་རུ་ཎི་ཀཱ་ཡ། ཏདྱ་ཐཱ། ཨོྃ་སརྦ་བནྡྷ་ན་ཙྪེ་ད་ན་ཀ་རཱ་ཡ། སརྦ་པཱ་ཡ་ས་མུ་དྲོ་ཙྪོ་ཥ་ཎ་ཀ་རཱ་ཡ། སརྦ་བྱཱ་དྷི་པྲ་ཤ་མ་ན་ཀ་རཱ་ཡ། སརྦ་ཨི་ཏྱུ་པ་དྲ་བ་བི་ནཱ་ཤ་ན་ཀ་རཱ་ཡ། སརྦ་བྷ་ཡེ་ཥུ་ཏཱ་ར་ཎ་ཀ་རཱ་ཡ། ཏསྱ། ན་མ་སྐྲྀ་ཏྭཱ་ཨི་དཾ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། ཏ་བ་ནཱི་ལ་ཀཎྛ་ནཱ་མ་པ་ར་མ་ཧྲྀ་ད་ཡ། མཱ་བརྟ་ཡིཥྱཱ་མི། སརྦཱ་རྠ་སཱ་དྷཱནཱཾ། ཤུ་བྷ་ཙེ་ཏ་ནཱཾ། སརྦ་བྷཱ་ཏཱ་ནཱཾ། པཱ་པ་མཱ་རྒ་བི་ཤོ་དྷ་ཀཾ། །ཏདྱ་ཐཱ། ཨཱ་ལོ་ཀེ །ཨ་དྷི་པ་ཏི། ལོ་ཀ་ཨ་ཏི་ཀྲཱནྟེ། ཨེ་ཧྱེ་ཧི་མ་ཧཱ་བོ་དྷི་སཏྭ། ཧེ་བོ་དྷི་སཏྭ། ཧེ་མ་ཧཱ་བོ་དྷི་སཏྭ། ཧེ་པྲི་ཡ་བོ་དྷི་སཏྭ། ཧེ་མ་ཧཱ་ཀཱ་རུ་ཎི་ཀ་མ་ཧཱ་སྨ་ར་ཧྲྀད་ཡན། ཨེ་ཧྱེ་ཧི་ཨཱརྱཱ་བ་ལོ་ཀི་ཏེ་ཤྭ་རཱ་ཡ། པ་ར་མ་མེེ་ཏྲི་ཙིཏྟ་ཀཱ་ར་ཎི་ཀ་ཀུ་རུ་ཀུ་རུ། ཀརྨ་སཱ་དྷཱ་ཡ་སཱ་དྷ་
ཡ། བི་དྱཱ་ན་དེ་ཧི་དེ་ཧི། མེ་ཨ་རཾ་ག་མཾ་ག་མ་བི་ཧཾ་ག་མ། སིདྡྷ་ཡོ་གཱི་ཤྭ་ར་དུ་ཧུ་དུ་ཧུ་བཱིཪྱ་ནྟེ་མ་ཧཱ་བཱི་ཪྱནྟེ། དྷ་ར་དྷ་ར། དྷ་རེ་ནྡེ་ཤྭ་ར། ཙ་ལ་ཙ་ལ། བི་མ་ལ། མཱུརྟེ་ཨཱརྱཱ་བ་ལོ་ཀི་ཏེ་ཤྭ་ར། ཛི་ན་ཀྲྀཥྞ་ཛ་ཊཱ་མུ་ཀུ་ཊ། ཨ་ལཾ་ཀྲྀ་ཏ་ཤ་རཱི་ར། ལཾ་བ་པྲ་ལྃ་བ་བི་ལཾ་བ། མ་ཧཱ་སིདྡྷ་བིདྱཱ་དྷ་ར། བ་ལ་བ་ལ་མ་ཧཱ་བ་ལ། མ་ལ་མ་ལ་མ་ཧཱ་མ་ལ། ཙ་ལ་ཙ་ལ་མ་ཧཱ་ཙ་ལ། ཀྲྀཥྞ་བརྞ། ཀྲིཥྞ་བཀྵ། ཀྲྀཥྞ་པཱ་ཤ་ནིརྒཱ་ཏ་ན་ཧེ་པདྨ་ཧ་སྟ། ཙ་ར་ཙ་ར་ནིཤྩ་རེ་ཤྭ་རེ་ཀྲྀཥྞ་སརྦ་ཀྲྀ་ཏ་ཡ་ཛྙོ་པ་བཱི་ཏ། ཨེ་ཧྱེ་ཧི་མ་ཧཱ་བཱ་རཱ་ཧ་མུ་ཁ་ཏྲི་པུ་ར་ད་ཧ་ནེ་ཤྭ་ར། ནཱ་རཱ་ཡ་ཎ་བ་ལ་རཱུ་པ་བེ་ཥ་དྷ་ར། ཧེ་ནཱི་ལ་ཀཎྛ། ཨེ་ཧྱེ་ཧི། མ་ཧཱ་ཧ་ལ་ཧ་ལ། བི་ཥ་ནིརྫྫ་ཏ། ལོ་ཀ་སྱ། རཱ་ག་བི་ཥ་བི་ནཱ་ཤ་ནཾ། དྭེ་ཥ་བི་ཥ་བི་ནཱ་ཤ་ནཾ། མོ་ཧ་གི་ཥ་བི་ནཱ་ཤ་ནཾ། ནི་རྨོཀྵ་ཎ་ཧུ་ལུ་ཧུ་ལུ། མུཉྩ་མུཉྩ། མུ་ཧུ་མུ་ཧུ། རཱ་ཧུ་ལ་རཱ་ཧུ་ལ། ཧ་ལ་ཧ་ལཱ་ཧཱ་རེ་མ་ཧཱ་པདྨ་ནཱ་བྷི། ས་ར་ས་ར། སི་རི་སི་རི། སུ་རུ་སུ་རུ། བུདྡྷྱ་བུདྡྷྱ། བོ་དྷ་ཡ་བོ་དྷ་ཡ། བོ་དྷ་ཡཱ་མི་ཏ་བ་ནཱི་ལ་ཀཎྛ། ཨེ་ཧྱེ་ཧི་ནཱི་ལ་ཀཎྛ། ཨེ་ཧྱེ་ཧི་བཱ་མ་སྠི་ཏ་མ་ཧཱ་སིཾ་ཧ་མུ་ཁ། ཧ་ས་ཧ་ས། མུཉྩ་མུཉྩ། མ་ཧཱཊྚཱཊྚ་ཧཱ་སྱ། ཨེ་ཧྱེ་ཧི་བྷོ་བྷོ་མ་ཧཱ་སིདྡྷ་ཡོ་གཱི་ཤྭ་ར་བྷ་ཎ་བྷ་ཎ་བཱ་ཙ་སཱ་དྷ་ཡ་སཱ་དྷ་ཡ། བི་དྱཱཾ་སྨ་ར་སྨ་ར་ཏྭཾ། ཧེ་བྷ་ག་བནྟཱ་ལོ་ཀ་བི་ལོ་ཀ་ཏྭཾ།ཏ་ཐཱ་ག་ཏཱ་ནཱཾ། ད་དཱ་ཧི་མེ་དཪྴ་ན་ཀཱ་མ་སྱ་དརྴ་ནཱཾ། པྲ་སཱ་དྷ་ཡ་མེ་སྭཱ་ཧཱ། སིད་དྷཱ་ཡ་སྭཱ་ཧཱ། མ་ཧཱ་སིད་དྷཱ་ཡ་སྭཱ་ཧཱ། སིདྡྷ་ཡོ་གཱི་ཤྭ་རཱ་ཡ་སྭཱ་ཧཱ། ནཱི་ལ་ཀཎྵཱ་ཡ་སྭཱ་ཧཱ། བཱ་རཱ་ཧ་མུ་ཁཱ་ཡ་སྭཱ་ཧཱ། མ་ཧཱ་བཱ་རཱ་ཧ་མུ་ཁཱ་ཡ་སྭཱ་ཧཱ། ན་ར་སིཾ་ཧ་མུ་ཁཱ་ཡ་སྭཱ་ཧཱ། མ་ཧཱ་ན་ར་སིཾ་ཧ་མུ་ཁཱ་ཡ་སྭཱ་ཧཱ། བཛྲ་ཧ་སྟཱ་ཡ་སྭཱ་ཧཱ། མ་ཧཱ་བཛྲ་ཧསྟཱ་ཡ་སྭཱ་ཧཱ། སིདྡྷ་བིདྱཱ་དྷ་རཱ་ཡ་སྭཱ་ཧཱ། མ་ཧཱ་སིདྡྷ་བིདྱཱ་དྷ་རཱ་ཡ་སྭཱ་ཧཱ། པདྨ་ཧ་སྟཱ་ཡ་སྭཱ་ཧཱ། མ་ཧཱ་པདྨ་ཧ་སྟཱ་ཡ་སྭཱ་ཧཱ། ཀྲྀཥྞ་སརྦ་ཀྲྀ་ཏ་ཡ་ཛྙོ་པ་བཱི་ཏཱ་ཡ་སྭཱ་ཧཱ། མ་ཧཱ་མཱ་ལ་མུ་ཀུ་ཊ་དྷ་རཱ་ཡ་སྭཱ་ཧཱ། ཙཀྲཱ་ཡུ་དྷ་དྷ་རཱ་ཡ་སྭཱ་ཧཱ། ཤཾ་ཁ་ཤབྡ་ནི་བོ་དྷ་ནཱ་ཡ་སྭཱ་ཧཱ། བཱ་མ་སྐན་དྷ་དེ་ཤ་སྠི་ཀྲྀཥྞཱ་ཛི་ནཱ་ཡ་སྭཱ་ཧཱ། བཱ་མ་ཧ་སྟ་བྱཱ་གྷྲ་ཙར་མ་ནི་བཱ་ས་ནཱ་ཡ་སྭཱ་ཧཱ། ལོ་ཀེ་ཤྭ་རཱ་ཡ་སྭཱ་ཧཱ།
མ་ཧཱ་ལོ་ཀེ་ཤྭ་རཱ་ཡ་སྭཱ་ཧཱ། སརྦ་སིདྡྷི་ཤྭ་རཱ་ཡ་སྭཱ་ཧཱ། རཀྵ་རཀྵ་མཱཾ་སྭཱ་ཧཱ། ཀུ་རུ་རཀྵ་མུ་དྲཱ་ཎཱཾ་སྭཱ་ཧཱ། ན་མོ་བྷ་ག་བ་ཏེ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སིདྡྷྱ་ནྟུ་མེ་མནྟྲ་པཱ་དཱ་ནི་སྭཱ་ཧཱ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་རིག་སྔགས་འདི་སྨྲས་མ་ཐག་ཏུ་ས་ཆེན་པོ་ཡང་རྣམ་པ་དྲུག་ཏུ་རབ་ཏུ་གཡོས་པར་གྱུར། ལྷ་རྣམས་ཀྱིས་ཀྱང་རིན་པོ་ཆེའི་མེ་ཏོག་གི་ཆར་མངོན་པར་ཕབ་པར་གྱུར། ཕྱོགས་བཅུའི་སངས་རྒྱས་རྣམས་ཀྱིས་ཀྱང་རྗེས་སུ་ཐུགས་དགྱེས་པར་གྱུར། ལྷའི་བུའི་བདུད་དང་མུ་སྟེགས་ཅན་རྣམས་ནི་འཇིགས་ཤིང་དངངས་ནས་སྤུ་ཟིང་ཞེས་བྱེད་པར་གྱུར། འཁོར་འདུས་པ་མང་པོ་ཐམས་ཅད་ལས་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་ཐོབ་པར་གྱུར། ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ་ཐོབ་པར་གྱུར། ཁ་ཅིག་གིས་ནི་ཕྱིར་མི་འོང་བའི་འབྲས་བུ་ཐོབ་པར་གྱུར། ཁ་ཅིག་གིས་ནི་དགྲ་བཅོམ་པའི་འབྲས་བུ་ཐོབ་པར་གྱུར། ཁ་ཅིག་གིས་ནི་ས་དང་པོ་དང་ས་གཉིས་པ་དང་ས་གསུམ་པ་དང་ས་བཞི་པ་དང་ས་ལྔ་པ་ཐོབ་པ་ནས་ས་བཅུའི་བར་དུ་ཐོབ་པར་གྱུར། སེམས་ཅན་ཚད་མེད་པ་སྙེད་ནི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་ཚངས་པ་ཆེན་པོ་སྟན་ལས་ལངས་ཏེ། གོས་ཚགས་བཅོས་ནས་གུས་པར་ཐལ་མོ་སྦྱར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཆེན་པོ་ལེགས་སོ། །བདག་གིས་སྔོན་འདས་པའི་དུས་ན་དེ་བཞིན་གཤེགས་པའི་འདུས་པ་ཚད་མེད་པ་སྙེད་དག་ཏུ་ཆོས་རྣམ་པ་སྣ་ཚོགས་དང་། གཟུངས་རྣམ་པ་སྣ་ཚོགས་ཐོས་པར་གྱུར་མོད་ཀྱི། སྔོན་ཆད་ནམ་ཡང་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་ཀྱི་གཟུངས་ཆེན་མོའི་རིག་སྔགས་ཀྱི་ཚིག་གྱ་ནོམ་པ་འདི་ལྟ་བུ་ཐོས་པར་མ་གྱུར་ན། སྐྱེས་བུ་ཆེན་པོ་ཁྱོད་ཀྱིས་བདག་ལ་གཟུངས་འདིའི་དབྱིངས་ཀྱི་མཚན་ཉིད་རྒྱ་ཆེར་
བཤད་དུ་གསོལ། བདག་ཅག་འཁོར་མང་པོ་རྣམས་ཤིན་ཏུ་ཐོས་པར་མོས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཚངས་པ་ཆེན་པོ་ལ་སྨྲས་པ། ལྷའི་རྒྱལ་པོ་ཁྱོད་ཐབས་མཁས་པས་སེམས་ཅན་ཐམས་ཅད་ལ་ཕན་གདགས་པའི་ཕྱིར་དེ་སྐད་དུ་དྲིས་པ་ཡིན་པས། དེང་ཁྱོད་ལེགས་པར་ཉོན་ཅིག་དང་བདག་གིས་ཁྱོད་ལ་མདོ་ཙམ་ཞིག་བཤད་པར་བྱའོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་སྨྲས་པ། དེ་ནི་སྙིང་རྗེ་ཆེན་པོའི་སེམས་ཡིན། མཉམ་པའི་སེམས་ཡིན། འདུས་མ་བྱས་ཀྱི་སེམས་ཡིན། མངོན་པར་ཞེན་པ་མེད་པའི་སེམས་ཡིན། སྟོང་པ་ཉིད་དུ་ལྟ་བའི་སེམས་ཡིན། གུས་པའི་སེམས་ཡིན། དམ་པའི་སེམས་ཡིན། འདྲེས་པ་མེད་པའི་སེམས་ཡིན། བླ་ན་མེད་པའི་བྱང་ཆུབ་ཀྱི་སེམས་ཡིན་ཏེ། དེ་ལྟ་བུའི་སེམས་གང་ཡིན་པ་དེ་དག་ནི་གཟུངས་ཀྱི་མཚན་ཉིད་ཡིན་པར་རིག་པར་བྱ་སྟེ། ཁྱོད་ཀྱིས་འདི་ཁོ་ན་བཞིན་དུ་མངོན་པར་བསྒྲུབ་པར་བྱའོ། །ཚངས་པའི་རྒྱལ་པོ་ཆེན་པོས་སྨྲས་པ། བདག་ཅག་འཁོར་མང་པོ་རྣམས་ནི་དེང་གདོད་གཟུངས་འདིའི་མཚན་ཉིད་གང་ཡིན་པ་ཁོང་དུ་ཆུད་པར་གྱུར་པས་དེང་ཕྱིན་ཆད་ཡོངས་སུ་བཟུང་ནས་བརྗེད་པར་བགྱིད་པའི་ཐུགས་མི་ཐུབ་བོ། །འཕགས་པ་སྤྱན་རས་གཟིགས་དབང་ཕྱུག་གིས་སྨྲས་པ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་རིག་སྔགས་འདི་འདོན་ཅིང་ཡོངས་སུ་འཛིན་པ་གང་ཡིན་པ་དེས་བྱང་ཆུབ་ཀྱི་སེམས་རྒྱ་ཆེན་པོ་བསྐྱེད་ནས། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བར་ཡི་དམ་ཡང་དག་པར་བླང་བར་བྱའོ། །བདག་ཉིད་གསོ་སྦྱོང་དང་ཚུལ་ཁྲིམས་ལ་གནས་ནས་སེམས་ཅན་རྣམས་ལ་མཉམ་པའི་སེམས་བསྐྱེད་དེ། རྟག་པར་རིག་སྔགས་འདི་རྒྱུན་ཆད་པ་མེད་པར་གདོན་པར་བྱའོ། །གནས་ཁང་གཙང་མའི་ནང་དུ་འདུག་སྟེ། ཡོངས་སུ་དག་པར་ཁྲུས་བྱས་ནས་གོས་གཙང་མ་བགོས་ཏེ། བ་དན་དཔྱངས་མར་མེ་སྦར་ཏེ། སྤོས་དང་། མེ་ཏོག་དང་། ཞལ་ཟས་ཀྱི་མཆོད་པ་བྱས་ནས་སེམས་
རྩེ་གཅིག་ཏུ་གཏད་དེ། དམིགས་པ་ཐ་དད་པ་གཞན་ལ་མི་དམིགས་པར་ཆོས་བཞིན་དུ་འདོན་ཅིང་ཡོངས་སུ་འཛིན་པར་བྱེད་ན། དེའི་ཚེ་བྱང་ཆུབ་སེམས་དཔའ་ཉི་འོད་དང་། བྱང་ཆུབ་སེམས་དཔའ་ཟླ་འོད་ལྷ་དང་། དྲང་སྲོང་ཚད་མེད་པ་སྙེད་དང་དེར་ལྷགས་ནས་དབང་བྱེད་ཅིང་མངོན་རྟགས་ཀྱང་སྟོན་པར་གྱུར་ལ། བདག་ཀྱང་དེའི་ཚེ་མིག་སྟོང་གིས་དེ་ལ་ལྟ་བར་བྱེད། ལག་པ་སྟོང་གིས་ནི་དེ་ལ་ཡོངས་སུ་སྲུང་ཞིང་བྱིན་གྱིས་རློབ་པར་བྱེད་པས་འཇིག་རྟེན་པའི་གཙུག་ལག་ཇི་སྙེད་པ་དེ་དག་ཀྱང་ཡོངས་སུ་འཛིན་པར་འགྱུར། མུ་སྟེགས་ཅན་གྱི་ཆོས་ཀྱི་ཆོ་ག་དང་། སྨྲང་ཇི་སྙེད་པ་ཐམས་ཅད་ཀྱང་རྟོགས་ཤིང་ཁོང་དུ་ཆུད་པར་འགྱུར་རོ། །རིག་སྔགས་འདི་འདོན་ཅིང་ཡོངས་སུ་འཛིན་པར་བྱེད་པ་གང་ཡིན་པ་དེས་ནི་འཇིག་རྟེན་ན་གདོན་དང་ནད་རྣམ་པ་བརྒྱད་ཁྲི་བཞི་སྟོང་ཡོད་པ་དག་གསོས་ནས་འཚོ་བར་བྱེད་དོ། །འདྲེ་སྲིན་ཐམས་ཅད་ལ་དབང་བྱེད་ཅིང་ལྷའི་བུའི་བདུད་རྣམས་ཀྱང་འདུལ་བར་བྱེད། མུ་སྟེགས་ཅན་རྣམས་ཀྱང་ཚར་གཅོད་པར་བྱེད་དོ། །གལ་ཏེ་རིའམ་དགོན་པ་ན་གནས་ཏེ་མདོ་སྡེ་ཁ་ཏོན་དུ་འདོན་པ་དང་བསམ་གཏན་སྒོམ་པ་ན་རིའི་ལྷ་དང་། འདྲེ་སྲིན་གནོད་པ་བྱེད་པ་དག་ནན་གྱིས་ཀྱལ་ཀ་བྱས་ནས་སེམས་མཉམ་པར་གཞག་ཏུ་མི་རུང་བར་གྱུར་ན། རིག་སྔགས་འདི་ལན་ཅིག་བཟླས་པ་བྱས་ན་འདྲེ་སྲིན་དེ་དག་ཐམས་ཅད་འཆི་བར་འགྱུར་རོ། །གལ་ཏེ་ཆོས་བཞིན་དུ་བཟླས་བརྗོད་བྱས་ཏེ། སེམས་ཅན་རྣམས་ལ་སྙིང་བརྩེ་བའི་སེམས་བསྐྱེད་པར་གྱུར་ན། བདག་ཀྱང་དེའི་ཚེ་དགེ་བའི་ལྷ་དང་། ཀླུའི་རྒྱལ་པོ་ཐམས་ཅད་དང་། ལག་ན་རྡོ་རྗེ་གསང་བ་པ་རྣམས་ལ་རྟག་པར་དེའི་རྗེས་སུ་འབྲང་ཞིང་ཡོངས་སུ་སྲུང་བགྱིས་ཤིག །དེའི་ཉེ་འཁོར་ན་གནས་ནས་མིག་གི་འབྲས་བུ་བཞིན་དུ་ཡོངས་སུ་སྲུངས་ཤིག །རང་གི་སྲོག་གི་དབང་པོ་བཞིན་དུ་ཡོངས་སུ་སྐྱོབས་ཤིག་ཅེས་བསྒོ་བར་འགྱུར་རོ། །གང་དག་ལ་བསྒོ་བར་བྱེད་པ་བསྟན་པའི་ཕྱིར་ཚིགས་སུ་བཅད་དེ་སྨྲས་པ། བདག་གིས་གསང་བའི་བདག་
པོ་རྡོ་རྗེ་འཆང་། །བདུད་རྩི་འཁྱིལ་བ་སྨེ་བརྩེགས་ལྕགས་ཀྱུ་ཅན། །སྟོབས་ལྡན་ཤང་ཀར་དང་སྡེ་བརྒྱད་དག །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་དབང་ཕྱུག་དང་ནི་མཐུ་ཆེན་དང་། །ཀུ་བེ་ར་དང་སེར་སྐྱའི་བདག་པོ་དག །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་ནོར་སྲུང་དང་ནི་ཆུ་ལྷ་དང་། །དགེ་རྒྱས་དང་ནི་པ་རི་ཙི་ཏྲ་དག །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་ས་སར་ཙ་དང་མ་ཧཱ་ར། །ཀུ་ལན་ཏན་ཏ་དང་ནི་ལྔས་རྩེན་དག །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་པི་པ་ཀ་ལའི་རྒྱལ་པོ་དང་། །དཔལ་ལྡན་པྱི་ཏ་དང་ནི་སྭཱར་ཧཱ་རཱ། །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་ཚངས་པ་དང་ནི་སམ་བ་ར། །གནས་གཙང་སྡེ་ལྔ་དག་དང་མཚེ་མ་དག །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་བརྒྱ་བྱིན་སུམ་ཅུ་རྩ་གསུམ་ལྷ། །སྤོབསཆེན་དཔལ་ལྡན་དང་ནི་ས་ཏ་ན། །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་རྒྱལ་པོ་ཡུལ་འཁོར་སྲུང་དང་ནི། །མ་མོ་ལྷ་ལ་སོགས་པ་མཐུ་ཆེན་འཁོར། །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་རྒྱལ་པོ་འཕགས་སྐྱེས་པོ་དང་ནི། །མིག་མི་བཟང་དང་རྣམ་ཐོས་བུ་དག་ཀྱང་། །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་གསེར་མདོག་རྨ་བྱའི་རྒྱལ་པོ་དང་། །སྡེ་དཔོན་ཉི་ཤུ་བརྒྱད་དང་དྲང་སྲོང་འཁོར། །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་ནོར་བུ་བཟང་པོ་དག་དང་ནི། །སྡེ་དཔོན་ཆེན་པོ་ས་འཛིན་ཕུ་ལ་པ། །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་དགའ་བོ་དང་ནི་བསྙེན་དགའ་བོ། །ཀླུ་རྒྱལ་རྒྱ་མཚོ་དང་ནི་ཨེ་ལའི་འདབ། །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །བདག་གིས་ལྷ་མ་ཡིན་དང་དྲི་ཟ་དང་། །མཁའ་ལྡིང་མིའམ་ཅི་དང་ལྟོ་འཕྱེ་རྣམས། །བཏང་ནས་རྟག་ཏུ་གཟུངས་འཛིན་སྲུང་བར་
བྱེད། །བདག་གིས་ཆུ་དང་མེ་དང་གློག་གི་ལྷ། །གྲུལ་བུམ་བདག་པོ་དང་ནི་ཤ་ཟ་དག །བཏང་ནས་རྟག་ཏུ་གཟུངས་འཛིན་སྲུང་བར་བྱེད། །དགེ་བའི་ལྷ་དེ་དག་དང་ཀླུའི་རྒྱལ་པོ་དང་མ་མོ་ལ་སོགས་པ་དེ་དག་ཀྱང་སོ་སོ་ནས་འཁོར་ལྔ་བརྒྱ་དང་བཅས་པ་དང་། མཐུ་ཆེན་པོ་དང་ལྡན་པའི་གནོད་སྦྱིན་དག་གིས་ཀྱང་རྟག་པར་ཐུགས་རྗེ་ཆེན་པོའི་རིག་སྔགས་འདོན་ཅིང་ཡོངས་སུ་འཛིན་པ་དེ་ལ་ཡོངས་སུ་སྲུང་ཞིང་སྐྱོབ་པར་བྱེད་པས། གང་ཟག་དེ་རི་དང་དགོན་པ་ན་གཅིག་པུ་ཉལ་བར་གྱུར་ན་ཡང་དགེ་བའི་ལྷ་དེ་དག་རེས་ཀྱིས་མཚན་མོས་དེ་ལ་བསྲུངས་ནས་བགེགས་དང་བར་ཆད་ཡོངས་སུ་སེལ་བར་བྱེད་དོ། །གལ་ཏེ་གཅོང་རོང་དག་ཏུ་གནས་ཏེ་ལམ་སྟོར་བར་གྱུར་པ་ལས་རིག་སྔགས་འདི་བཟླས་པར་གྱུར་ན་དེའི་དབང་གིས་དགེ་བའི་ལྷ་དང་། ཀླུའི་རྒྱལ་པོ་དག་དགེ་བའི་མིའི་གཟུགས་སུ་མངོན་པར་སྤྲུལ་ནས་ལམ་ཡང་དག་པ་ཉིད་སྟོན་པར་འགྱུར་རོ། །གལ་ཏེ་རི་དང་ནགས་ཚལ་དང་དགོན་པ་དག་ཏུ་གནས་པ་ལས་ཆུ་དང་མེ་དག་གིས་ཕོངས་པར་གྱུར་ན་ཡང་ཀླུའི་རྒྱལ་པོ་དག་གིས་ཡོངས་སུ་བསྲུང་བའི་ཕྱིར་ཆུ་དང་མེ་དག་མངོན་པར་སྤྲུལ་བར་འགྱུར་རོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་གཞན་ཡང་གཟུངས་འདི་འདོན་ཅིང་ཡོངས་སུ་འཛིན་པ་དག་གི་ཆེད་དུ་གནོད་པ་དང་། བགེགས་ཡོངས་སུ་བསལ་བའི་ཕྱིར་ཤིན་ཏུ་བསིལ་བའི་ཚིགས་སུ་བཅད་པ་འདི་དག་སྨྲས་སོ། །གང་ཞིག་རི་དང་འབྲོག་དགོན་སོང་བ་ལས། །སྟག་དང་སྤྱང་ཀི་གཅན་གཟན་གཏུམ་པོ་དང་། །རྩངས་པ་སྦྲུལ་དང་འདྲེ་སྲིན་ཕྲད་གྱུར་ཀྱང་། །གཟུངས་འདི་འདོན་པ་ཐོས་ན་གནོད་མི་ནུས། །གང་ཞིག་ཆུ་བོ་རྒྱ་མཚོར་ཞུགས་པ་ལས། །གདུག་པའི་ཀླུ་དང་ཆུ་སྲིན་མ་རུངས་དང་། །གནོད་སྦྱིན་སྲིན་པོ་ཉ་དང་རུས་སྦལ་དང་། །གཟུངས་འདི་ཐོས་ན་སོ་སོར་འབྱེར་བར་འགྱུར། །གང་ཞིག་གཡུལ་སྤྲོད་དགྲ་ཡིས་བསྐོར་བའམ། །ཆོམ་རྐུན་མ་རུངས་ནོར་ནི་འཕྲོག་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །དེ་དག་བརྩེ་སེམས་བསྐྱེད་ནས་ལྡོག་
པར་འགྱུར། །གང་ཞིག་རྒྱལ་པོའི་གྱོད་ལ་ཐོགས་པ་དང་། །ལྕགས་སྒྲོག་ཁོང་སྒྲིལ་བཙོན་རར་ཆུད་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །རྒྱལ་པོས་བརྩེ་སེམས་ཀྱིས་ནི་གཏོང་བར་འགྱུར། །གང་ཞིག་བྱད་སྟེམས་དུག་མདའི་ཁྱིམ་ཞུགས་ཏེ། །ཟས་སྐོམ་དུག་ཅན་གྱིས་ནི་གསད་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །དུག་ཉིད་ཟིལ་དངར་ཟས་སྐོམ་ཉིད་དུ་འགྱུར། །བུད་མེད་སྦྲུམ་མ་བུ་ནི་བཙའ་བའི་ཚེ། །བདུད་ཀྱིས་བགེགས་བྱས་སྡུག་བསྔལ་མི་བཟོད་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །འདྲེ་གདོན་བྱེར་ནས་བདེ་བར་བཙའ་བར་འགྱུར། །ཀླུ་གདོན་གཏུམ་པོས་གདུག་པའི་དབུགས་བཏང་བས། །ཚ་བའི་ནད་ཀྱིས་ཉེན་ནས་འཆིར་ཉེ་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །རིམས་ནད་བསལ་ནས་ཚེ་ནི་རིང་བར་འགྱུར། །ཀླུ་གདོན་རྒྱུ་བས་གཙེས་ཏེ་སྐྲངས་པ་དང་། །ཤུ་འབྲས་མི་བཟད་རྣག་ཁྲག་འཛག་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །མཆིལ་མ་ལན་གསུམ་བྱུགས་པས་སྐྲངས་པ་ཞི། །སེམས་ཅན་རྟོག་པས་མི་དགེ་བསྐྱེད་པས་ན། །བྱད་སྟེམས་སྔགས་དང་དགྲས་ནི་གཙེས་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །སྟེམས་གནོད་དེ་ཀུན་གཏོང་བའི་མི་ལ་འདུ། །སྡིག་འཕེལ་སྙིགས་མས་དམ་ཆོས་འཇིག་པ་ན། །འདོད་པའི་མེ་ཆེན་སེམས་ནི་རྨོངས་ལོག་པས། །ཁྱོ་ཤུག་སོ་སོར་གཞན་ལ་འདོད་ཞེན་ནས། །ཉིན་མཚན་ལོག་བསམ་རྒྱུན་ནི་མི་འཆད་ཚེ། །གང་ཞིག་ཐུགས་རྗེ་ཆེན་པོའི་གཟུངས་བཟླས་ན། །འདོད་པའི་མེ་ཞི་ལོག་པའི་སེམས་བསལ་འགྱུར། །བདག་གིས་གཟུངས་འདིའི་མཐུ་སྟོབས་རྒྱས་བརྗོད་ན། །བསྐལ་པར་བརྗོད་ཀྱང་མཐར་ཐུག་ཡོད་མི་འགྱུར། །རིག་སྔགས་འདི་ལན་ལྔ་བཟླས་ཏེ་ཚོན་སྣ་ལྔའི་སྐུད་པ་ལ་མདུད་པ་ཉི་ཤུ་རྩ་བཞི་མདུད་ནས་མགུལ་དུ་གདགས་པར་བྱའོ། །གཟུངས་འདི་ནི་འདས་པའི་དེ་བཞིན་གཤེགས་པ་གང་
གཱའི་ཀླུང་གི་བྱེ་བ་ཕྲག་དགུ་བཅུ་རྩ་དགུའི་བྱེ་མ་སྙེད་ཀྱིས་གསུངས་པ་ཡིན་ཏེ། དེ་བཞིན་གཤེགས་པ་དེ་དག་གིས་རྣལ་འབྱོར་པ་གང་དག་ཕ་རོལ་ཏུ་ཕྱིན་པ་དྲུག་མངོན་པར་བསྒྲུབ་པར་ཡོངས་སུ་མ་རྫོགས་པ་དག་ཡོངས་སུ་རྫོགས་པར་བྱ་བའི་ཕྱིར་དང་། བྱང་ཆུབ་ཏུ་སེམས་མ་བསྐྱེད་པ་དག་མྱུར་དུ་བྱང་ཆུབ་ཏུ་སེམས་བསྐྱེད་པར་བྱ་བའི་ཕྱིར་དང་། ཉན་ཐོས་ཀྱི་གང་ཟག་གང་དག་འབྲས་བུ་མངོན་དུ་མ་བྱས་པ་དེ་དག་མྱུར་དུ་མངོན་དུ་བྱ་བའི་ཕྱིར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། དྲང་སྲོང་གང་དག་བླ་ན་མེད་པའི་བྱང་ཆུབ་ཏུ་སེམས་མ་བསྐྱེད་པ་དག་མྱུར་དུ་སེམས་བསྐྱེད་པར་བྱ་བའི་ཕྱིར་དང་། སེམས་ཅན་གང་དག་ཐེག་པ་ཆེན་པོ་འདི་ལ་དད་པའི་དབང་པོ་མ་ཐོབ་པ་དག་གཟུངས་འདིའི་བྱིན་གྱི་བརླབས་ཀྱི་མཐུས་ཐེག་པ་ཆེན་པོའི་ས་བོན་དང་ཆོས་ཀྱི་མྱུ་གུ་འཕེལ་བར་བྱ་བའི་ཕྱིར་གསུངས་པ་ཡིན་པས། བདག་གིས་ཐབས་མཁས་པ་དང་། བྱམས་པ་དང་། སྙིང་རྗེའི་མཐུས་དེ་དག་གིས་ཅི་དང་ཅི་འདོད་པ་ཐམས་ཅད་འབྱོར་པར་བྱེད་དོ། །གཞན་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་མུན་པ་མུན་ནག་གི་གནས་སུ་ངན་འགྲོ་གསུམ་པོའི་སེམས་ཅན་ཇི་སྙེད་གནས་པ་དག་བདག་གི་རིག་སྔགས་འདི་ཐོས་པར་གྱུར་ན་ཐམས་ཅད་སྡུག་བསྔལ་དང་བྲལ་བར་འགྱུར་རོ། །བྱང་ཆུབ་སེམས་དཔའ་གང་དག་ས་དང་པོ་མ་ཐོབ་པ་དག་ནི་མྱུར་དུ་ཐོབ་པར་འགྱུར་ལ། ས་བཅུ་པའི་བར་དུ་ཡང་མ་ཐོབ་པ་ཐོབ་པར་འགྱུར་རོ། །གཞན་ཡང་སངས་རྒྱས་ཀྱི་སའི་བར་དུ་ཡང་ཕྱིན་པར་བྱེད་པའི་ཕྱིར་མཚན་སུམ་ཅུ་རྩ་གཉིས་དང་། དཔེ་བྱད་བརྒྱད་ཅུ་ཡང་རང་གི་ངང་གིས་འཐོབ་པར་འགྱུར་རོ། །གལ་ཏེ་ཉན་ཐོས་ཀྱི་གང་ཟག་གང་དག་གཟུངས་འདི་རྣ་བར་ལན་ཅིག་ཐོས་པར་གྱུར་ཏམ། གཟུངས་འདི་སྤྱོད་ཅིང་ཡི་གེར་བྲིས་སམ། དྲང་པོའི་སེམས་ཀྱིས་ཆོས་བཞིན་དུ་གནས་པར་བྱེད་ན། དགེ་སྦྱོང་གི་འབྲས་བུ་བཞི་པོ་དག་མ་བཙལ་བར་རང་གི་ངང་གིས་ཐོབ་པར་འགྱུར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རི་དང་། ཆུ་ཀླུང་དང་། བྲག་དང་། རྒྱ་མཚོ་ཆེན་པོ་བཞིའི་ཆུ་ཇི་སྙེད་པ་དག་
ཀྱང་གཡོ་ཞིང་འཁོལ་བར་ནུས་སོ། །རི་རབ་ལྷུན་པོ་ནས་རི་ཁོར་ཡུག་གི་བར་དག་ཀྱང་གཡོ་ཞིང་རྡུལ་ཕྲན་བཞིན་དུ་འཇིག་པར་ནུས་སོ། །དེ་ན་གནས་པའི་སེམས་ཅན་ཇི་སྙེད་པ་དག་ཀྱང་ཐམས་ཅད་བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་ནུས་སོ། །སེམས་ཅན་གང་དག་ཚེ་འདི་ཉིད་ལ་སྨོན་པ་རྣམས་མངོན་པར་འགྲུབ་པར་འདོད་ན་ཞག་ཉི་ཤུ་རྩ་གཅིག་གི་བར་དུ་གསོ་སྦྱོང་དང་། ཚུལ་ཁྲིམས་ལ་གནས་ནས་གཟུངས་འདི་བཟླས་བརྗོད་བྱས་ན་གདོན་མི་ཟ་བར་སྨོན་པ་རྣམས་ཀྱང་མངོན་པར་འགྲུབ་པར་འགྱུར། འཁོར་བའི་མཐའ་ནས་འཁོར་བའི་མཐར་ཐུག་པའི་བར་དུའང་སྡིག་པའི་ལས་ཐམས་ཅད་མ་ལུས་པར་ཡོངས་སུ་འབྱང་བར་འགྱུར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ནང་དང་ཕྱི་རོལ་ན་སངས་རྒྱས་དང་། བྱང་ཆུབ་སེམས་དཔའ་ཇི་སྙེད་ཅིག་བཞུགས་པ་རྣམས་དང་། ཚངས་པ་དང་། བརྒྱ་བྱིན་དང་། རྒྱལ་པོ་ཆེན་པོ་བཞི་དང་། ལྷ་དང་། དྲང་སྲོང་དང་། ཀླུའི་རྒྱལ་པོ་ཇི་སྙེད་གནས་པ་ཐམས་ཅད་ཀྱིས་ཀྱང་མཁྱེན་ཅིང་ཤེས་པར་འགྱུར་རོ། །ལྷའམ་མི་གང་ཡང་རུང་སྟེ། གཟུངས་འདི་འདོན་ཅིང་ཡོངས་སུ་འཛིན་པ་དེ་དག་ཆུ་ཀླུང་ངམ། རྒྱ་མཚོར་ཞུགས་ཏེ་ཁྲུས་བྱས་པ་ལས་དེ་ན་གནས་པའི་སེམས་ཅན་དེ་དག་ནི་དེ་དག་གིས་ལུས་བཀྲུས་པའི་ཆུ་ལུས་ལ་རེག་པར་གྱུར་ན། སྡིག་པའི་ལས་དང་ཁ་ན་མ་ཐོ་བ་ལྕི་བ་ཐམས་ཅད་ཡོངས་སུ་བྱང་ནས་ཞིང་ཡོངས་སུ་དག་པ་དག་ཏུ་པདྨ་ལས་རྫུས་ཏེ་སྐྱེ་བར་འགྱུར་བས་མངལ་དང་། དྲོད་གཤེར་དང་། སྒོ་ང་ལས་སྐྱེ་བའི་ལུས་ལེན་པར་མི་འགྱུར་ན། ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་ལྟ་སྨོས་ཀྱང་ཅི་དགོས། གཟུངས་འདི་འདོན་ཅིང་ཡོངས་སུ་འཛིན་པ་དེ་དག་ལམ་དུ་ཞུགས་ཏེ་འགྲོ་བའི་ཚེ་རླུང་ཆེན་པོ་ལངས་ཏེ། གང་ཟག་དེའི་ལུས་དང་། སྤུ་དང་། སྐྲ་དང་། གོས་ལ་བུས་པའི་རླུང་གང་ཡིན་པ་དེ་རྫི་ཕྱོགས་སུ་སོང་བའི་སེམས་ཅན་གཞན་གྱི་ལུས་ལ་རེག་པར་གྱུར་ན། དེ་དག་གི་སྒྲིབ་པ་དང་སྡིག་པའི་ལས་ལྕི་བ་ཐམས་ཅད་མ་ལུས་པར་ཡོངས་སུ་འབྱང་བར་འགྱུར་
བས། ཡང་ངན་འགྲོ་གསུམ་པོ་དག་གི་རྣམ་པར་སྨིན་པ་མྱོང་བར་མི་འགྱུར་ཞིང་། རྟག་པར་སངས་རྒྱས་ཀྱི་སྤྱན་སྔར་སྐྱེ་བར་འགྱུར་བས་ན་ཡོངས་སུ་འཛིན་པ་དེ་དག་གི་བསོད་ནམས་དང་འབྲས་བུ་རྣམ་པར་སྨིན་པ་ནི་བསམ་གྱིས་མི་ཁྱབ་པར་རིག་པར་བྱའོ། །གཟུངས་འདི་བཟླས་བརྗོད་བྱེད་པའི་ཁ་ནས་ཇི་ཙམ་དུ་ཚིག་ཏུ་བརྗོད་པར་བྱུང་བ་དགེ་ཡང་རུང་། མི་དགེ་ཡང་རུང་སྟེ། ལྷའི་བུའི་བདུད་དང་། མུ་སྟེགས་ཅན་དང་། ལྷ་དང་། ཀླུ་དང་། འདྲེ་སྲིན་ཐམས་ཅད་ཀྱིས་ཐོས་པར་གྱུར་ན་དེ་དག་ཐམས་ཅད་རྣམ་པར་དག་པའི་ཆོས་ཀྱི་དབྱིངས་ཉིད་དུ་འགྱུར་བས། དེ་ལ་སངས་རྒྱས་ཇི་ལྟ་བ་བཞིན་དུ་གུས་པའི་སེམས་བསྐྱེད་ནས་བཀུར་སྟི་དང་། རིམ་གྲོ་བྱེད་པར་འགྱུར་རོ། །གཟུངས་འདི་འདོན་ཅིང་ཡོངས་སུ་འཛིན་པ་དེ་དག་ནི་སངས་རྒྱས་ཀྱི་སྐུའི་གཏེར་ཉིད་དུ་རིག་པར་བྱ་སྟེ། སངས་རྒྱས་གང་གཱའི་ཀླུང་གི་བྱེ་བ་ཕྲག་དགུ་བཅུ་རྩ་དགུའི་བྱེ་མ་སྙེད་རྣམས་ཀྱིས་ཕངས་ཤིང་གཅེས་པར་མཛད་པའི་ཕྱིར་རོ། །གང་ཟག་དེ་ནི་འོད་ཅན་གྱི་ལུས་ཀྱི་གཏེར་ཡིན་པར་རིག་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་འོད་ཟེར་གྱིས་སྣང་བར་མཛད་པའི་ཕྱིར་རོ། །གང་ཟག་དེ་ནི་བྱམས་པ་དང་སྙིང་རྗེའི་གཏེར་ཡིན་པར་ཡང་རིག་པར་བྱ་སྟེ། འདི་ལྟར་གཟུངས་ཀྱིས་སེམས་ཅན་ཡོངས་སུ་སྐྱོབ་པར་བྱེད་པའི་ཕྱིར་རོ། །གང་ཟག་དེ་ནི་དམ་པའི་ཆོས་ཀྱི་སྡེ་སྣོད་ཡིན་པར་རིག་པར་བྱ་སྟེ། གཟུངས་ཀྱི་སྒོ་ཐམས་ཅད་ཀུན་སྡུད་པར་བྱེད་པའི་ཕྱིར་རོ། །གང་ཟག་དེ་ནི་བསམ་གཏན་དང་། ཏིང་ངེ་འཛིན་གྱི་སྡེ་སྣོད་ཡིན་པར་རིག་པར་བྱ་སྟེ། ཏིང་ངེ་འཛིན་བརྒྱ་སྟོང་རྣམས་རྟག་པར་མངོན་སུམ་དུ་འགྱུར་བའི་ཕྱིར་རོ། །གང་ཟག་དེ་ནི་ནམ་མཁའི་མཛོད་ཡིན་པར་རིག་པར་བྱ་སྟེ། རྟག་པར་སྟོང་པ་ཉིད་ཀྱི་ཤེས་རབ་ཀྱིས་སེམས་ཅན་ལ་བལྟ་བའི་ཕྱིར་རོ། །གང་ཟག་དེ་ནི་འཇིགས་པ་མེད་པའི་མཛོད་ཡིན་པར་རིག་པར་བྱ་སྟེ། ལྷ་དང་། ཀླུ་དང་། དགེ་བའི་ལྷ་རྣམས་རྟག་པར་ཡོངས་སུ་སྲུང་བའི་ཕྱིར་རོ། །གང་ཟག་དེ་ནི་དམ་པའི་ཚིག་གི་མཛོད་ཡིན་
པར་རིག་པར་བྱ་སྟེ། ཁ་ནས་གཟུངས་ཀྱི་སྒྲ་འབྱུང་བ་ལ་རྒྱུན་ཆད་པ་མེད་པའི་ཕྱིར་རོ། །གང་ཟག་དེ་ནི་རྟག་པར་གནས་པའི་གཏེར་ཡིན་པར་རིག་པར་བྱ་སྟེ། འཇིག་པ་གསུམ་གྱི་བསྐལ་པ་དག་གིས་གཞིག་པར་མི་ནུས་པའི་ཕྱིར་རོ། །གང་ཟག་དེ་ནི་རྣམ་པར་གྲོལ་བའི་མཛོད་ཡིན་པར་རིག་པར་བྱ་སྟེ། ལྷའི་བུའི་བདུད་དང་མུ་སྟེགས་ཅན་རྣམས་ཀྱིས་གཤོལ་བར་མི་ནུས་པའི་ཕྱིར་རོ། །གང་ཟག་དེ་ནི་སྨན་གྱི་རྒྱལ་པོའི་མཛོད་ཡིན་པར་རིག་པར་བྱ་སྟེ། རྟག་པར་གཟུངས་ཀྱིས་སེམས་ཅན་ནད་པ་རྣམས་ཀྱི་ནད་གསོ་བའི་ཕྱིར་རོ། །གང་ཟག་དེ་ནི་རྫུ་འཕྲུལ་གྱི་གཏེར་ཡིན་པར་རིག་པར་བྱ་སྟེ། སངས་རྒྱས་ཀྱི་ཞིང་རྣམས་སུ་རྒྱུ་བ་ལ་རང་དབང་ཐོབ་པའི་ཕྱིར་རོ། །དེ་བས་ན་གང་ཟག་དེའི་ཡོན་ཏན་གྱི་བསྔགས་པ་བརྗོད་ན་ནམས་ཀྱང་མཐར་ཐུག་པར་མི་འགྱུར་རོ། །རིགས་ཀྱི་བུ་གང་ལ་ལ་ཞིག་འཇིག་རྟེན་པའི་སྡུག་བསྔལ་གྱིས་ཡོངས་སུ་སྐྱོ་ནས་ཚེ་རིང་བའི་སྨན་ཡོངས་སུ་ཚོལ་བར་འདོད་པས་དབེན་པའི་གནས་སུ་འདུག་ནས་མཚམས་ཡོངས་སུ་དག་པར་བཅད་དེ། གོས་ལ་སྔགས་ཀྱིས་བཏབ་ནས་བགོ་བར་བྱའོ། །ཆུ་དང་། ཟས་དང། སྤོས་དང་། སྨན་རྣམས་ལ་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ་སྤྱོད་པར་བྱེད་ན་གདོན་མི་ཟ་བར་ཚེ་རིང་བར་འགྱུར་རོ། །གལ་ཏེ་ཆོས་བཞིན་དུ་མཚམས་བཅད་དེ་ཆོས་བཞིན་དུ་ཡོངས་སུ་འཛིན་པར་བྱེད་ན་ཐམས་ཅད་མངོན་པར་འགྲུབ་པར་འགྱུར་ཏེ། དེ་ལ་མཚམས་གཅད་པའི་ཆོ་ག་ནི་རལ་གྲི་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ། ས་ལ་རི་མོ་བྲིས་ནས་མཚམས་གཅད་པར་བྱའོ། །ཡང་ན་ཆུ་གཙང་མ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་ནས་ཕྱོགས་བཞིར་གཏོར་ནས་མཚམས་གཅད་པར་བྱའོ། །ཡང་ན་ཡུངས་ཀར་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་ཕྱོགས་བཞིར་གཏོར་ནས་མཚམས་གཅད་པར་བྱའོ། །ཡང་ན་འདུ་ཤེས་ཀྱིས་གང་དུ་ཕྱིན་པ་ཚུན་ཆད་མཚམས་སུ་འགྱུར་རོ། །ཡང་ན་ཐལ་བ་གཙང་མ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་མཚམས་གཅད་པར་བྱའོ། །ཡང་ན་ཚོན་སྣ་ལྔའི་སྐུད་པ་ལ་ལན་ཉི་ཤུ་རྩ་གཅིག་
སྔགས་ཀྱིས་བཏབ་སྟེ་ཕྱོགས་བཞིར་བསྐོར་ནས་མཚམས་གཅད་པར་བྱའོ། །དེ་ལྟར་ཆོས་བཞིན་དུ་འདི་ཡོངས་སུ་འཛིན་པར་གྱུར་ན་རང་གི་ངང་གིས་འབྲས་བུ་འཐོབ་པར་འགྱུར་རོ། །གཟུངས་འདིའི་མིང་ཐོས་པ་ཙམ་གྱིས་ཀྱང་བསྐལ་པ་ཚད་མེད་པ་སྙེད་ཀྱི་འཁོར་བའི་ཁ་ན་མ་ཐོ་བའི་ལྕི་བ་རྣམས་ཡོངས་སུ་འབྱང་བར་འགྱུར་ན། འདོན་པ་དང་འཛིན་པ་ལྟ་སྨོས་ཀྱང་ཅི་དགོས། རིག་སྔགས་འདི་འདོན་པའི་གང་ཟག་གང་ཡིན་པ་དེ་དག་ནི་སངས་རྒྱས་ཚད་མེད་པ་སྙེད་པ་ལ་མཆོད་ཅིང་རིམ་གྲོ་བྱས་ནས་དགེ་བའི་རྩ་བ་རྒྱ་ཆེར་བསྐྱེད་པ་ཡིན་པར་རིག་པར་བྱའོ། །གང་དག་སེམས་ཅན་སྡུག་བསྔལ་གྱི་བགེགས་ལ་ཡོངས་སུ་འདྲེན་པའི་ཆེད་དུ་ཆོས་བཞིན་དུ་འདོན་པ་གང་ཡིན་པ་དེ་དག་ནི་སྙིང་རྗེ་ཆེན་པོ་དང་ལྡན་པ་ཡིན་པས་རིང་པོར་མི་ཐོགས་པར་མངོན་པར་རྫོགས་པར་འཚང་རྒྱ་བར་འགྱུར་བར་རིག་པར་བྱའོ། །ཅི་ཙམ་དུ་སེམས་ཅན་སྣང་ངོ་ཅོག་གི་ཆེད་དུ་བཟླས་བརྗོད་བྱས་ཏེ། དེ་དག་གི་རྣ་ལམ་དུ་གྲག་པར་བྱས་ནས་བྱང་ཆུབ་ཀྱི་རྒྱུར་འགྱུར་བར་བྱེད་ན། གང་ཟག་དེ་དག་ཡོན་ཏན་ཚད་མེད་དཔག་ཏུ་མེད་པ་དག་འཐོབ་པར་འགྱུར་བས་བརྗོད་ཀྱིས་མི་ལང་ངོ་། །གང་ལ་ལ་ཞིག་སེམས་རྩེ་གཅིག་ཏུ་སེམས་དང་ལུས་གསོ་སྦྱོང་དང་ཚུལ་ཁྲིམས་ལ་གནས་ནས། སེམས་ཅན་ཐམས་ཅད་ཀྱི་སྔོན་གྱི་ལས་ཀྱི་ཁ་ན་མ་ཐོ་བ་རྣམས་བཤགས་ནས་བདག་ཉིད་ཀྱིས་བསྐལ་པ་ཚད་མེད་པ་ནས་བྱས་པའི་སྡིག་པའི་ལས་རྣམ་པ་སྣ་ཚོགས་མཐོལ་བཤགས་ཏེ། ཁ་ནས་གཟུངས་འདི་མྱུར་དུ་བཟླས་བརྗོད་བྱས་ནས་སྒྲ་རྒྱུན་ཆད་པ་མེད་པར་བྱས་ན། དགེ་སྦྱོང་གི་འབྲས་བུ་བཞི་པོ་དེ་དག་ཚེ་འདི་ཉིད་ལ་འཐོབ་པར་འགྱུར་རོ། །དབང་པོ་རྣོན་པོ་ཤེས་རབ་དང་ལྡན་པ་སྒོམ་པའི་ཐབས་ལ་མཁས་པ་ཞིག་ཡིན་ན་ནི་ས་བཅུའི་འབྲས་བུ་ཡང་དཀའ་བ་མེད་པར་འགྱུར་ན། འཇིག་རྟེན་གྱི་བསོད་ནམས་ཀྱི་རྣམ་པར་སྨིན་པ་ཕྲན་ཚེགས་ཡོངས་སུ་གཉེར་བ་ཙམ་མངོན་པར་འགྲུབ་པར་འགྱུར་བ་ལྟ་སྨོས་ཀྱང་ཅི་དགོས་ཏེ། དེ་ཡང་བྱང་ཆུབ་སེམས་དཔའི་སྙིང་རྗེ་ཆེན་པོ་དང་སྨོན་ལམ་གྱི་མཐུ་ཤིན་ཏུ་ཟབ་པའི་ཕྱིར་དང་། གཟུངས་འདིའི་བྱིན་གྱི་བརླབས་
ཤིན་ཏུ་རྒྱ་ཆེ་བའི་ཕྱིར་རོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཡུལ་གང་དག་ན་གནོད་པ་བྱུང་བར་གྱུར་ན་དེའི་ཚེ་ཡུལ་དེའི་རྒྱལ་པོས་ཡང་དག་པའི་ཆོས་ཀྱིས་ཡུལ་འཛིན་ཅིང་། མི་རྣམས་བག་ཡངས་སུ་བཀོད་དེ། སེམས་ཅན་སྟངས་ལས་མི་གཅོད་ཅིང། ཉེས་པ་བྱུང་བ་རྣམས་ཡོངས་སུ་བསྐྱབས་ནས། ཉིན་མཚན་བདུན་གྱི་བར་དུ་ལུས་དང་སེམས་ཀྱི་བརྩོན་འགྲུས་བསྐྱེད་དེ། ཐུགས་རྗེ་ཆེན་པོའི་སེམས་ཀྱི་གཟུངས་སྔགས་འདི་འདོན་པར་བྱེད་ན། ཡུལ་དེའི་གནོད་པ་དང་། བགེགས་ཐམས་ཅད་ཡོངས་སུ་བསལ་བར་འགྱུར། འབྲུ་རྣམས་ལེགས་ཤིང་མི་མང་པོ་བདེ་བར་འགྱུར་རོ། །གཞན་ཡང་ཕས་ཀྱི་རྒོལ་བའི་དགྲ་དག་ཡང་ནས་ཡང་དུ་འོངས་ཏེ་གཙེས་པས་འབངས་མང་པོ་མི་བདེ་བར་གྱུར་ཏམ། བློན་པོ་ཆེན་པོས་རྐུ་བཤམས་ནས་ལོག་པར་གྱུར་ཏམ། རིམས་ནད་བྱུང་བར་གྱུར་ཏམ། ཐན་ཆེན་བྱུང་བར་གྱུར་ཏམ། ཉི་ཟླ་རྒྱུ་བ་ནོར་བར་གྱུར་ཏམ། དེ་ལྟ་བུ་ལ་སོགས་པའི་གནོད་པ་བྱུང་བར་གྱུར་ན། དེའི་ཚེ་སྙིང་རྗེ་ཆེན་པོ་དང་ལྡན་པའི་མིག་སྟོང་པའི་གཟུགས་བྱས་ནས་དེའི་ཕྱོགས་སུ་ཁ་བསྟན་ཏེ། སྤོས་དང་། མེ་ཏོག་དང་། རྒྱལ་མཚན་དང་། བ་དན་དང་། རིན་པོ་ཆེའི་བླ་རེ་རྣམ་པ་སྣ་ཚོགས་དང་། རོ་བརྒྱ་དང་ལྡན་པའི་ཟས་དང་སྐོམ་གྱིས་སེམས་རྩེ་གཅིག་ཏུ་མཆོད་པར་བྱའོ། །གཞན་ཡང་རྒྱལ་པོ་དེས་ཉིན་མཚན་བདུན་གྱི་བར་དུ་ལུས་དང་སེམས་ཀྱིས་བརྩོན་འགྲུས་བསྐྱེད་དེ། གཟུངས་ཀྱི་ཚིག་གྱ་ནོམ་པ་འདི་འདོན་པར་བྱེད་ན། ཕས་ཀྱི་དགྲ་རྣམས་རང་དུལ་བར་གྱུར་ནས་སླར་ལོག་སྟེ་སོ་སོ་ནས་ཚུལ་བཞིན་དུ་ཡུལ་སྐྱོང་ཞིང་ཡུལ་ཡང་འདྲེ་བར་གནས་པར་བྱམས་པའི་སེམས་ཀྱིས་ཕན་ཚུན་གཅིག་ལ་གཅིག་ལྟ་བར་འགྱུར། རྒྱལ་བུ་དང་བློན་པོ་རྣམས་ཀྱང་སྲིད་ཞུ་དང་དྲང་དཀན་སྤྱོད་པར་འགྱུར། བཙུན་མོ་དང་སྲས་རྣམས་ཀྱང་རྒྱལ་པོ་ལ་སྲི་ཞུ་དང་བསྙེན་བཀུར་བྱེད་པར་འགྱུར། ལྷ་དང་། ཀླུ་དང་། འདྲེ་སྲིན་རྣམས་ཀྱང་ཡུལ་དེ་སྲུང་ཞིང་སྐྱོང་བར་འགྱུར། ཆར་ཆུ་དུས་བཞིན་དུ་འབབ་ཅིང་འབྲུ་རྣམས་ལེགས་པས་མི་མང་
པོ་རྣམས་ཀྱང་རབ་ཏུ་དགའ་བར་འགྱུར་རོ། །གཞན་ཡང་ཁྱིམ་དུ་ནད་ཆེན་མ་རུངས་པ་དང་ཕྲད་པར་གྱུར་ཏམ། ལྟས་ངན་སྣ་ཚོགས་བྱུང་བར་གྱུར་ཏམ། འདྲེ་སྲིན་དང་ལོག་པའི་བདུད་རྣམས་ཀྱིས་ཁྱིམ་དཀྲུགས་པར་གྱུར་ཏམ། མི་མ་རུངས་པ་དག་གིས་ཀླན་སྐུར་བཏབ་ནས་རྐུ་བཤམས་ཏེ་གནོད་པ་བྱས་པར་གྱུར་ཏམ། ཁྱིམ་མི་ཆེ་ཆུང་རྣམས་ཕྱི་ནང་མི་འདུམ་པར་གྱུར་ན། སྙིང་རྗེ་ཆེན་པོ་དང་ལྡན་པའི་མིག་སྟོང་པའི་གཟུགས་བྱས་པའི་མདུན་དུ་དཀྱིལ་འཁོར་བྱས་ནས་སེམས་རྩེ་གཅིག་ཏུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཡིད་ལ་བྱས་ནས་གཟུངས་སྔགས་འདི་ལན་སྟོང་ཚང་བར་བཟླས་ན། གོང་དུ་སྨོས་པའི་དངོས་པོ་ངན་པ་དེ་དག་ཐམས་ཅད་ཡོངས་སུ་འབྱང་བར་འགྱུར་རོ། །བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་རིག་སྔགས་འདིའི་མིང་ཅི་ལགས། ཇི་ལྟར་ཡོངས་སུ་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིག་སྔགས་འདི་ལ་མིང་རྣམ་པ་སྣ་ཚོགས་ཡོད་དེ། རྒྱ་ཆེར་ཡོངས་སུ་རྫོགས་པ་ཞེས་ཀྱང་བྱའོ། །ཐོགས་པ་མེད་པའི་ཐུགས་རྗེ་ཆེན་པོ་ཞེས་ཀྱང་བྱའོ། །སྡུག་བསྔལ་རྣམས་ལས་ཡོངས་སུ་སྐྱོབ་པའི་གཟུངས་ཞེས་ཀྱང་བྱའོ། །ཚེ་བསྲིང་བའི་གཟུངས་ཞེས་ཀྱང་བྱའོ། །ངན་འགྲོ་ཡོངས་སུ་སྦྱོང་བའི་གཟུངས་ཞེས་ཀྱང་བྱའོ། །ལས་ཀྱི་སྒྲིབ་པ་རྣམ་པར་འཇོམས་པའི་གཟུངས་ཞེས་ཀྱང་བྱའོ། །སྨོན་པ་རྣམས་ཡོངས་སུ་རྫོགས་པར་བྱེད་པའི་གཟུངས་ཞེས་ཀྱང་བྱའོ། །སེམས་ཀྱི་རྗེས་སུ་རང་དབང་དུ་གྱུར་པའི་གཟུངས་ཞེས་ཀྱང་བྱའོ། །ས་གོང་མ་རྣམས་ལས་མྱུར་དུ་འདའ་བའི་གཟུངས་ཞེས་ཀྱང་བྱ་སྟེ། དེ་ལྟར་ཡོངས་སུ་གཟུང་བར་བྱའོ། །བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་འདིའི་མིང་ཅི་ལགས་ན། འདི་ལྟ་བུའི་གཟུངས་བསྟན་པ་ལ་མཁས་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་
པ། བྱང་ཆུབ་སེམས་དཔའ་འདིའི་མིང་ནི་སྤྱན་རས་གཟིགས་དབང་ཕྱུག་ཅེས་ཀྱང་བྱའོ། །དོན་ཡོད་པའི་ཞགས་པ་ཞེས་ཀྱང་བྱའོ། །འོད་སྟོང་པའི་མིག་ཅན་ཞེས་ཀྱང་བྱ་སྟེ། །རིགས་ཀྱི་བུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་འདིའི་མིང་དང་གཟི་བྱིན་དང་མཐུ་སྟོབས་ནི་བསམ་གྱིས་མི་ཁྱབ་སྟེ། འདས་པའི་བསྐལ་པ་ཚད་མེད་པའི་སྔ་རོལ་ནས་མངོན་པར་རྫོགས་པར་སངས་རྒྱས་ནས་མཚན་ཡང་དེ་བཞིན་གཤེགས་པ་ཡང་དག་པའི་ཆོས་ཀྱི་སྣང་བ་ཞེས་བྱ་བར་གྱུར་པ་ཡིན་ཡང་། ཐུགས་རྗེ་ཆེན་པོ་དང་སྨོན་ལམ་གྱི་མཐུས་སེམས་ཅན་བདེ་བར་བྱ་བའི་ཕྱིར་བྱང་ཆུབ་སེམས་དཔའི་ལུས་མངོན་དུ་བསྟན་པ་ཡིན་པས། བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་མང་པོ་ཁྱེད་དང་། ཚངས་པ་དང་། བརྒྱ་བྱིན་དང་། ལྷ་དང་། ཀླུ་རྣམས་ཀྱིས་གུས་པས་བཀུར་སྟི་བྱས་ནས་བརྙས་པར་མི་བྱའོ། །ལྷ་དང་མི་ཐམས་ཅད་ཀྱིས་རྟག་པར་མཆོད་པར་བྱས་ཏེ། སེམས་རྩེ་གཅིག་ཏུ་མིང་ནས་རྗོད་པར་བྱེད་ན་བསོད་ནམས་ཚད་མེད་པ་སྙེད་འཐོབ་པར་འགྱུར། ཁ་ན་མ་ཐོ་བ་ཚད་མེད་པ་སྙེད་ཡོངས་སུ་འབྱང་བར་འགྱུར། ཚེ་འདས་ནས་ཀྱང་དེ་བཞིན་གཤེགས་པ་འོད་དཔག་མེད་ཀྱི་ཞིང་ཁམས་སུ་སྐྱེ་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་གལ་ཏེ་རིན་པོ་ཆེ་སྣ་ཚོགས་ཕུན་སུམ་ཚོགས་ཤིང་ཕྱུག་པོར་འགྱུར་བར་འདོད་ན་ཡིད་བཞིན་གྱི་ནོར་བུའི་ལག་ལ་མཆོད་པར་བྱའོ། །མི་བདེ་བ་རྣམ་པ་སྣ་ཚོགས་ཀྱིས་གཙེས་པར་གྱུར་ན་ཞགས་པ་ཐོགས་པའི་ལག་ལ་མཆོད་དོ། །ཁོང་པར་ནད་རྣམས་ཡོད་པར་གྱུར་ན་རིན་པོ་ཆེའི་ལྷུང་བཟེད་ཐོགས་པའི་ལག་ལ་མཆོད་དོ། །འདྲེ་གདོན་ཐམས་ཅད་གདུལ་བར་འདོད་ན་རིན་པོ་ཆེའི་རལ་གྲི་ཐོགས་པའི་ལག་ལ་མཆོད་དོ། །ལྷའི་བུའི་བདུད་ཐམས་ཅད་འདུལ་བར་འདོད་ན་རྡོ་རྗེ་ཐོགས་པའི་ལག་ལ་མཆོད་དོ། །ཕས་ཀྱི་རྒོལ་བའི་དགྲ་གཞོམ་པར་འདོད་ན་རྡོ་རྗེ་ཐོ་བ་ཐོགས་པའི་ལག་ལ་མཆོད་དོ། །འཇིགས་ཤིང་བག་ཚ་བའི་གནས་ཐམས་ཅད་ལས་ཐར་བར་འདོད་ན་འཇིགས་པ་མེད་པ་
སྦྱིན་པའི་ལག་ལ་མཆོད་དོ། །མིག་མི་གསལ་ཏེ་འོད་དང་མི་ལྡན་པར་གྱུར་ན་མེ་ཤེལ་གྱི་ནོར་བུ་ཐོགས་པའི་ལག་ལ་མཆོད་དོ། །ཚ་བའི་རིམས་ཀྱིས་ཐེབས་ཏེ་བསིལ་བར་འདོད་ན་ཆུ་ཤེལ་གྱི་ནོར་བུ་ཐོགས་པའི་ལག་ལ་མཆོད་དོ། །བློན་ཐབས་མཐོན་པོར་འདོད་ན་རིན་པོ་ཆེའི་གཞུ་ཐོགས་པའི་ལག་ལ་མཆོད་དོ། །གྲོགས་པོ་མཛའ་བཤེས་དང་མྱུར་དུ་ཕྲད་པར་འདོད་ན་རིན་པོ་ཆེའི་མདའ་ཐོགས་པའི་ལག་ལ་མཆོད་དོ། །ལུས་ལ་ནད་སྣ་ཚོགས་ཀྱིས་ཐེབས་པར་གྱུར་ན་ལྕུག་མ་ཐོགས་པའི་ལག་ལ་མཆོད་དོ། །ལུས་ཀྱི་བགེགས་མ་རུངས་པ་བསལ་བར་འདོད་ན་རྔ་ཡབ་དཀར་པོ་ཐོགས་པའི་ལག་ལ་མཆོད་དོ། །ཐམས་ཅད་མཐུན་པའི་འཁོར་དུ་གྱུར་པར་འདོད་ན་བུམ་པ་ཐོགས་པའི་ལག་ལ་མཆོད་དོ། །སྟག་དང་། འཕར་སྦྱང་དང་། དོམ་དྲེད་དང་། གཅན་གཟན་མ་རུངས་པ་ཐམས་ཅད་སྤང་བར་འདོད་ན་ཕུབ་ཐོགས་པའི་ལག་ལ་མཆོད་དོ། །གནས་དང་དུས་ཐམས་ཅད་དུ་རྒྱལ་པོའི་བགེགས་ལས་ཐར་བར་འདོད་ན་དགྲ་སྟ་ཐེགས་པའི་ལག་ལ་མཆོད་དོ། །བུ་དང་། བུ་མོ་དང་། གཡོག་འཁོར་གྱི་ཕྱིར་ནི་ཤེལ་གྱི་གདུབ་འཁོར་ཐོགས་པའི་ལག་ལ་མཆོད་དོ། །ཡོན་ཏན་རྣམ་པ་སྣ་ཚོགས་ཀྱི་ཕྱིར་ནི་པདྨ་དཀར་པོ་ཐོགས་པའི་ལག་ལ་མཆོད་དོ། །ཕྱོགས་བཅུའི་ཞིང་ཡོངས་སུ་དག་པ་དག་ཏུ་སྐྱེ་བར་འདོད་ན་པདྨ་སྔོན་པོ་ཐོགས་པའི་ལག་ལ་མཆོད་དོ། །ཤེས་རབ་ཆེན་པོ་དང་ལྡན་པར་འདོད་ན་རིན་པོ་ཆེའི་མེ་ལོང་ཐོགས་པའི་ལག་ལ་མཆོད་དོ། །ཕྱོགས་བཅུའི་དེ་བཞིན་གཤེགས་པ་རྣམས་མངོན་སུམ་དུ་མཐོང་བར་འདོད་ན་པདྨ་དམར་པོ་ཐོགས་པའི་ལག་ལ་མཆོད་དོ། །སའི་གཏེར་འབྱིན་པར་འདོད་ན་རིན་པོ་ཆེའི་ཟ་མ་ཏོག་ཐོགས་པའི་ལག་ལ་མཆོད་དོ། །དྲང་སྲོང་གི་ལམ་མངོན་པར་འགྲུབ་པར་འདོད་ན་སྤྲིན་སྣ་ལྔ་ཐོགས་པའི་ལག་ལ་མཆོད་དོ། །ཚངས་པར་སྐྱེ་བར་འདོད་ན་རིལ་བ་ཐོགས་པའི་ལག་ལ་མཆོད་དོ། །ལྷའི་གཞལ་མེད་ཁང་དུ་སྐྱེ་བར་འདོད་ན་པདྨ་ལེ་བརྒན་ཐོགས་པའི་ལག་ལ་མཆོད་དོ། །ཕྱོགས་གཞན་གྱི་དགྲ་ཕྱིར་རྒོལ་
བ་བསལ་བར་འདོད་ན་རལ་གྲི་དང་མདུང་ཐོགས་པའི་ལག་ལ་མཆོད་དོ། །དགེ་བའི་ལྷ་འདྲེ་ཐམས་ཅད་དགུག་པར་འདོད་ན་རིན་པོ་ཆེའི་དུང་ཐོགས་པའི་ལག་ལ་མཆོད་དོ། །ལྷ་འདྲེ་ཐམས་ཅད་འཁོལ་བར་འདོད་ན་ཐོད་པའི་འཁར་བ་ཐོགས་པའི་ལག་ལ་མཆོད་དོ། །ཕྱོགས་བཅུའི་སངས་རྒྱས་མྱུར་དུ་གཤེགས་ནས་ཕྱག་གིས་བྱུག་པར་འདོད་ན་པ་གྲང་ཕྲེང་འཛིན་པའི་ལག་ལ་མཆོད་དོ། །ཚངས་པའི་སྒྲ་དབྱངས་མཆོག་དམ་པ་ཐམས་ཅད་མངོན་པར་འགྲུབ་པར་འདོད་ན་རིན་པོ་ཆེའི་དྲིལ་བུ་ཐོགས་པའི་ལག་ལ་མཆོད་དོ། །ཚིག་གི་སྤོབས་པ་གྱ་ནོམ་པ་དང་ལྡན་པར་འདོད་ན་རིན་པོ་ཆེའི་ཕྱག་རྒྱ་ཐོགས་པའི་ལག་ལ་མཆོད་དོ། །དགེ་བའི་ལྷ་དང་ཀླུ་རྣམས་རྟག་པར་འོངས་ཏེ་སྲུང་ཞིང་ཡོངས་སུ་སྐྱོབ་པར་འདོད་ན་ལྕགས་ཀྱུ་ཐོགས་པའི་ལག་ལ་མཆོད་དོ། །བྱམས་པ་དང་སྙིང་རྗེས་སེམས་ཅན་ཐམས་ཅད་ཡོངས་སུ་སྐྱོབ་པར་འདོད་ན་འཁར་གསིལ་ཐོགས་པའི་ལག་ལ་མཆོད་དོ། །སེམས་ཅན་ཐམས་ཅད་ཀྱིས་རྟག་པར་ཕན་ཚུན་གུས་པས་བསྙེན་བཀུར་བྱེད་ཅིང་བརྩེ་བར་སེམས་པར་འདོད་ན་ཐལ་མོ་སྦྱར་བའི་ལག་ལ་མཆོད་དོ། །སྐྱེ་བའི་སྐྱེ་གནས་ཐམས་ཅད་དུ་དེ་བཞིན་གཤེགས་པ་རྣམས་དང་མི་འབྲལ་བར་འདོད་ན་སྤྲུལ་པའི་སངས་རྒྱས་ཐོགས་པའི་ལག་ལ་མཆོད་དོ། །སྐྱེ་བའི་ཚེ་རབས་ཐམས་ཅད་དུ་རྟག་པར་དེ་བཞིན་གཤེགས་པའི་ཕོ་བྲང་དུ་གནས་ནས་མངལ་གྱི་སྙིང་པོར་སྐྱེ་བར་མི་འགྱུར་བར་འདོད་ན་སྤྲུལ་པའི་གཞལ་མེད་ཁང་ཐོགས་པའི་ལག་ལ་མཆོད་དོ། །མང་དུ་ཐོས་པའི་ཤེས་པ་རྒྱ་ཆེན་པོ་དང་ལྡན་པར་འདོད་ན་རིན་པོ་ཆེའི་མདོ་སྡེའི་གླེགས་བམ་ཐོགས་པའི་ལག་ལ་མཆོད་དོ། །ད་ལྟར་གྱི་ལུས་འདི་ནས་སངས་རྒྱས་ཀྱི་སྐུ་ལ་ཐུག་པའི་བར་དུ་རྟག་པར་བྱང་ཆུབ་ཀྱི་སེམས་ལས་ལྡོག་པར་མི་འགྱུར་བར་འདོད་ན་ཕྱིར་མི་ལྡོག་པའི་གསེར་གྱི་འཁོར་ལོ་ཐོགས་པའི་ལག་ལ་མཆོད་དོ། །ཕྱོགས་བཅུའི་དེ་བཞིན་གཤེགས་པ་རྣམས་མྱུར་དུ་གཤེགས་ནས་སྤྱི་བོ་ནས་ཕྱག་གིས་བྱུགས་ཏེ་ལུང་བསྟན་པར་འདོད་ན་སྤྱི་བོ་ན་སྤྲུལ་པའི་སངས་རྒྱས་ཐོགས་པའི་ལག་ལ་མཆོད་དོ། །ཤིང་ཐོག་དང་འབྲུ་རྣམས་གྲུབ་པར་འདོད་ན་རྒུན་འབྲུམ་ཐོགས་པའི་ལག་ལ་མཆོད་
དོ། །དེ་ལྟར་མངོན་པར་སྒྲུབ་པའི་ཆོ་ག་སྟོང་ཡོད་ཀྱང་དེང་མདོར་བསྡུས་ནས་མདོ་ཙམ་ཞིག་བསྟན་པ་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ཤིན་ཏུ་ཡོངས་སུ་དང་བའི་སེམས་ཀྱིས་གཟུངས་འདི་ཟུང་ལ་འཛམ་བུའི་གླིང་དུ་རྒྱ་ཆེར་ཡོངས་སུ་སྤེལ་ནས་རྒྱུན་མི་འཆད་པར་བྱའོ། །གཟུངས་འདི་ཁམས་གསུམ་གྱི་སེམས་ཅན་ནད་ཀྱིས་ཉོན་མོངས་པ་ཐམས་ཅད་ལ་རྒྱ་ཆེར་ཕན་འདོགས་པར་བྱེད་པས་གཟུངས་འདིས་ཡོངས་སུ་གསོས་ན་མི་འཚོ་བ་གང་ཡང་མེད་དོ། །རིག་སྔགས་ཆེན་མོ་འདིས་ཤིང་སྐམ་པོ་ལ་བཏབ་ན་ཡང་ཡལ་ག་དང་། ལོ་མ་དང་། མེ་ཏོག་དང་། འབྲས་བུ་སྐྱེ་བར་འགྱུར་ན་རྣམ་པར་ཤེས་པ་དང་བཅས་པའི་སེམས་ཅན་ལྟ་སྨོས་ཀྱང་ཅི་དགོས་ཏེ། སེམས་ཅན་ནད་ཀྱིས་ཐེབས་པ་རྣམས་གསོས་ན་མི་འཚོ་བའི་གནས་ངེས་པར་མེད་དོ། །རིགས་ཀྱི་བུ་གཟུངས་འདིའི་བྱིན་གྱི་བརླབས་དང་མཐུ་བསམ་གྱིས་མི་ཁྱབ་པའི་བསྔགས་པ་བརྗོད་ཀྱང་མཐར་ཐུག་པར་མི་འགྱུར་རོ། །སྔོན་འདས་པའི་དུས་ཡུན་རིང་པོ་ནས་དགེ་བའི་རྩ་བ་རྒྱ་ཆེར་བསྐྱེད་པ་མ་ཡིན་ན་ཐ་ན་འདིའི་མིང་ཙམ་ཡང་ཐོས་པར་མི་འགྱུར་ན་མངོན་སུམ་དུ་མཐོང་བ་ལྟ་སྨོས་ཀྱང་ཅི་དགོས། ལྷ་དང་། མི་དང་། ཀླུ་ལ་སོགས་པའི་འཁོར་མང་པོ་ཁྱེད་རྣམས་ངས་གཟུངས་འདིའི་བསྔགས་པ་བརྗོད་པ་ཐོས་ནས་ཐམས་ཅད་ཀྱིས་རྗེས་སུ་ཡི་རང་བར་བྱའོ། །གང་ལ་ལ་ཞིག་གིས་རིག་སྔགས་འདི་ལ་སྐུར་པ་བཏབ་པར་གྱུར་ན་གང་གཱའི་ཀླུང་གི་བྱེ་བ་ཕྲག་དགུ་བཅུ་རྩ་དགུའི་བྱེ་མ་སྙེད་ཀྱི་སངས་རྒྱས་དེ་དག་ལ་སྐུར་པ་བཏབ་པར་འགྱུར་རོ། །གལ་ཏེ་གཟུངས་འདི་ལ་ཐེ་ཚོམ་དང་ཡིད་མི་ཆེས་པ་སྐྱེས་པར་གྱུར་ན་གང་ཟག་དེ་ནི་ཕན་ཡོན་ཆེན་པོ་དང་གཏན་དུ་འབྲལ་བར་འགྱུར་བས་བསྐལ་པ་བརྒྱ་སྟོང་སྙེད་དུ་ངན་འགྲོར་འཁོར་ཞིང་འབྱུང་བའི་དུས་མེད་དེ། རྟག་པར་སངས་རྒྱས་ཀྱང་མི་མཐོང་། ཆོས་ཀྱང་མི་ཐོས། །དགེ་འདུན་ཡང་མཐོང་བར་མི་འགྱུར་བར་རིག་པར་བྱའོ། །འཁོར་དེར་འདུས་པའི་བྱང་ཆུབ་སེམས་དཔའ་ཆེན་པོ་དེ་དག་དང་། གསང་བ་པའི་བདག་པོ་ལག་ན་རྡོ་རྗེ་དང་། ཚངས་པ་དང་།
བརྒྱ་བྱིན་དང་། རྒྱལ་པོ་ཆེན་པོ་བཞི་དང་། ལྷ་དང་། ཀླུ་དང་། འདྲེ་སྲིན་ཐམས་ཅད་བཅོམ་ལྡན་འདས་ཀྱིས་གཟུངས་འདིའི་བསྔགས་པ་བརྗོད་པ་ཐོས་ནས། ཐམས་ཅད་ཀྱིས་རབ་ཏུ་དགའ་ཞིང་མགུ་བས་བཀའ་ཡང་དག་པར་བླངས་ནས་མངོན་པར་སྒྲུབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཉི་འོད་ཀྱིས་ཐུགས་རྗེ་ཆེན་པོའི་གཟུངས་འཛིན་པ་དག་ཡོངས་སུ་བསྲུང་བའི་ཆེད་དུ་རིག་སྔགས་ཆེན་པོ་འདི་སྨྲས་སོ། །ན་མོ་བུདྡྷ་གུ་ར་བེ། ན་མོ་དྷརྨ་མ་ཧ་ཏེ། ན་མཿསཾ་གྷ་ཊ་ཡཱ་ཎི། ཏྲི་པུ་བི་སཱ་ཏ་ཏྃ་ན་མཿ། རིག་སྔགས་འདི་བཏོན་ན་ཁ་ན་མ་ཐོ་བ་ཐམས་ཅད་ཡོངས་སུ་འབྱང་བར་འགྱུར། བདུད་སྤོང་བར་བྱེད། བགེགས་རྣམས་སེལ་བར་འགྱུར་བས་ལན་རེ་བཏོན་ནས་སངས་རྒྱས་ལ་ཕྱག་ལན་རེ་བྱའོ། །དེ་བཞིན་དུ་ཉིན་རེ་བཞིན་དུས་གསུམ་དུ་རིག་སྔགས་བཟླས་ནས་སངས་རྒྱས་ལ་ཕྱག་བྱས་ན་མ་འོངས་པའི་དུས་ན་སྐྱེ་བ་ཐམས་ཅད་དུ་ཡིད་དུ་འོང་བའི་མཚན་ཤིན་ཏུ་མཛེས་པ་རེ་རེའི་འབྲས་བུ་རྣམ་པར་སྨིན་པ་ཐོབ་པར་འགྱུར་རོ། །བྱང་ཆུབ་སེམས་དཔའ་ཟླ་འོད་ཀྱིས་ཀྱང་རྣལ་འབྱོར་པ་དག་ཡོངས་སུ་བསྲུང་བའི་ཕྱིར་གཟུངས་འདི་སྨྲས་སོ། །སིནྟི་ཏེ་དུ་སོཥྚ། ཨ་ཛྙཱ་མི་ཏེ་ཨོ་ཏུཥྚ། སི་ནི་ཁི་ཏ་པ་ལི་ཏིཥྚ། ཡ་མི་ཛྙཱ་ཏ་ཨོ་དྷུཥྚ། ཀུ་ལ་ཏི་མཥྚ། ཁིཥྚ་སྭཱ་ཧཱ། རིག་སྔགས་འདི་ལན་ལྔ་བཟླས་ནས་ཚོན་སྣ་ལྔའི་སྐུད་པ་ལ་སྔགས་མདུད་བྱས་ཏེ། གང་དུ་ན་བར་གདགས་པར་བྱའོ། །རིག་སྔགས་འདི་ནི་འདས་པའི་སངས་རྒྱས་གང་གཱའི་ཀླུང་བཞི་བཅུའི་བྱེ་མ་སྙེད་ཀྱིས་གསུངས་པ་ཡིན་པས། དེང་བདག་གིས་ཀྱང་རྣལ་འབྱོར་བ་དག་ཡོངས་སུ་བསྲུང་བའི་ཕྱིར་དང་། བགེགས་ཐམས་ཅད་ཡོངས་སུ་བསལ་བའི་ཕྱིར་དང་། ནད་མ་རུངས་པ་ཐམས་ཅད་ཡོངས་སུ་བསལ་བའི་ཕྱིར་དང་། དགེ་བའི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་དང་། འཇིགས་ཤིང་སྐྲག་པ་ཐམས་ཅད་ཡོངས་སུ་སྤང་བའི་ཕྱིར་བསྟན་པ་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་བསྟན་པའི་རིག་སྔགས་འདི་ནི་ཡང་དག་
པར་བདེན་ཏེ་མི་བདེན་པ་ཅི་ཡང་མེད་དོ། །བྱང་ཆུབ་སེམས་དཔའ་འདི་དྲུང་དུ་འོང་བར་འདོད་ན་གུ་གུལ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་བསྲེགས་ན་བྱང་ཆུབ་སེམས་དཔའ་འོང་བར་འགྱུར་རོ། །གང་ལ་ལ་ཞིག་བྱི་ལའི་གདོན་གྱིས་ཟིན་པར་གྱུར་ན་བྱི་ལའི་མགོ་རུས་བསྲེགས་པའི་ཐལ་བ་ས་གཙང་མ་དང་བསྲེས་ཏེ། འཇིམ་པ་ལ་བྱི་ལའི་གཟུགས་བྱས་ནས། མིག་སྟོང་པའི་གཟུགས་ཀྱི་མདུན་དུ་ཨུར་མོའི་གྲི་གཙང་མ་ལ་བརྒྱ་རྩ་བརྒྱད་སྔགས་ཀྱིས་བཏབ་སྟེ། དུམ་བུ་བརྒྱ་རྩ་བརྒྱད་དུ་བཅད་ནས་སྔགས་ལན་རེ་གདོན་ཅིང་དེའི་མིང་ནས་ལན་རེ་བརྗོད་ན་གཏན་དུ་འཚོ་བར་འགྱུར་རོ། །བྱད་སྟེམས་ཀྱིས་ཕོག་པར་གྱུར་ན་གུ་གུལ་དང་ག་པུར་ཆ་མཉམ་པར་བྱས་ཏེ། ཁྲོན་པའི་ཆུ་གཙང་མ་བྲེ་གང་དང་བསྲེས་ནས་བསྐོལ་ཏེ་ཕུལ་གང་ཙམ་ལུས་པ་བླངས་ནས། མིག་སྟོང་པའི་གཟུགས་ཀྱི་མདུན་དུ་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ་འཐུངས་ན་འཚོ་བར་འགྱུར་རོ། །གལ་ཏེ་སྡིག་པ་དང་སྦྲུལ་གྱིས་ཟིན་པར་གྱུར་ན་བཅའ་སྒའི་ཕྱེ་མ་ལ་ལན་བདུན་སྔགས་ཀྱིས་བཏབ་སྟེ་རྨ་ཁར་བསྐུས་ན་འཕྲལ་དུ་འཚོ་བར་འགྱུར་རོ། །གལ་ཏེ་མི་མ་རུངས་པ་དག་གིས་རྐུ་བཤམས་ནས་གནོད་པ་བྱས་པར་གྱུར་ན་ས་གཙང་མའམ། བག་ཟན་ནམ། སྤྲ་ཚིལ་ལ་ཕ་རོལ་པོའི་གཟུགས་བྱས་ཏེ་མིག་སྟོང་པའི་གཟུགས་ཀྱི་མདུན་དུ་ཨུར་མོའི་གྲིལ་ལན་བརྒྱ་རྩ་བརྒྱད་སྔགས་ལན་རེ་བརྗོད་དེ་ལན་རེ་གཏུབས་ནས་ཕ་རོལ་གྱི་མིང་ནས་བརྗོད་དེ། བསྲེགས་ཟིན་ནས་དུམ་བུ་བརྒྱ་རྩ་བརྒྱད་དུ་བྱས་ན་ཕ་རོལ་པོ་དགའ་ཞིང་ནམ་འཚོ་བའི་བར་དུ་གུས་པས་བཀུར་ཞིང་བྱམས་པར་འགྱུར་རོ། །གང་དག་མིག་ནད་ཀྱིས་བཏབ་སྟེ། མིག་གི་འབྲས་བུ་ཉམས་པར་གྱུར་ཏམ། མདོངས་པར་གྱུར་ཏམ། མི་གསལ་བར་གྱུར་ཏམ། ལིང་ཏོག་དཀར་པོ་དང་། དམར་པོ་དག་གིས་ཁེབས་ཏེ་འོད་དང་མི་ལྡན་པར་གྱུར་ན། ཨ་རུ་ར་དང་། བ་རུ་ར་དང་། སྐྱུ་རུ་ར་འབྲུམ་བུ་རེ་ཞིབ་ཏུ་བཏགས་ཏེ། འཐག་པའི་ཚེ་གཙང་སྦྲ་བྱ་དགོས་པས་བུད་མེད་གསར་དུ་བུ་བཙས་
པ་དང་ཁྱི་དང་ཕག་རྣམས་བསྙེན་པར་མི་བྱའོ། །དེ་བཞིན་གཤེགས་པའི་མཚན་ནས་བརྗོད་དེ། སྦྲང་རྩི་དཀར་པོ་དང་། མིའི་འོ་མ་དང་སྦྱར་ནས་མིག་ལ་བསྐུ་བར་བྱའོ། །འོ་མ་དེ་ཡང་བུ་ཁྱེའུ་བཙས་པའི་ནུ་ཞོ་རུང་གི་བུ་མོ་བཙས་པའི་ནུ་ཞོ་ནི་མི་རུང་ངོ་། །སྨན་དེ་སྦྱར་ཟིན་ནས་ཀྱང་མིག་སྟོང་པའི་གཟུགས་ཀྱི་མདུན་དུ་ལན་སྟོང་རྩ་བརྒྱད་སྔགས་ཀྱིས་བཏབ་སྟེ། མིག་ལ་བསྐུས་ནས་ཞག་བདུན་གྱི་བར་དུ་ཁང་པ་དབེན་པར་རླུང་བསྲུངས་ན། མིག་གི་འབྲས་བུ་སྐྱེ་བར་འགྱུར་བས་ལིང་ཏོག་སྔོན་པོ་དང་དཀར་པོ་བསལ་ཏེ་གསལ་བ་རྒྱས་པར་འགྱུར་རོ། །གང་དག་གདོན་རྣམས་ཀྱིས་བཏབ་སྟེ་མྱོས་པར་གྱུར་ན་སྟག་དང་། འཕར་བ་དང་། སྤྱང་ཀིའི་པགས་པ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་ལུས་ལ་བགོས་ན་སོས་པར་འགྱུར་རོ། །གལ་ཏེ་སྦྲུལ་གྱིས་ཟིན་པར་གྱུར་ན་གང་ཟིན་པའི་མི་དེའི་རྣ་སྤབས་བླངས་ནས་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟ་རྨ་ཁར་གླན་ན་སོས་པར་འགྱུར་རོ། །གཟེར་ཐབས་མ་རུངས་པས་སྙིང་ལ་གཟེར་ཏེ་འཆི་ལ་ཐུག་ན་ཀ་བྱི་ཏ་ལག་པ་ཙམ་ཆུ་གཙང་མ་ཕུལ་གང་དང་སྦྱར་ཏེ། བསྐོལ་ནས་ཕུལ་ཕྱེད་ལུས་པ་ལ་ལན་བདུན་སྔགས་ཀྱིས་བཏབ་སྟེ་ཅིག་ཅར་བླུད་ན་སོས་པར་འགྱུར་རོ། །སྨན་དེ་ཡང་བུད་མེད་ཀྱི་དྲུང་དུ་བསྐོལ་བར་མི་བྱའོ། །རོ་ལངས་ཀྱི་གདོན་གྱིས་བཏབ་ནས་རྒྱུན་རིང་དུ་ན་བར་གྱུར་ན་གུ་གུལ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་བསྲེགས་ཏེ་སྣར་བདུག་པར་བྱའོ། །ཡང་ན་རི་བོང་གི་རྟུག་པའི་རིལ་བུ་བདུན་བླངས་ཏེ་ལན་ཉི་ཤུ་རྩ་གཅིག་སྔགས་ཀྱིས་བཏབ་ནས་མིད་དུ་བཅུག་ན་སོས་པར་འགྱུར་ཏེ། ཤ་དང་། ཆང་དང་། དཀུ་བ་རྣམ་པ་ལྔ་དང་། ཚིག་ངན་པ་རྣམས་བསྲུང་དགོས་སོ། །ཡང་ན་བ་བླ་དང་། ཡུངས་ཀར་དང་། ལན་ཚྭ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་ནད་པའི་ཁྲིའི་དྲུང་དུ་བསྲེགས་ན། གདོན་དེའི་ལུས་འཇིག་པར་འགྱུར་བས་འདུག་པའི་ཐུགས་མི་ཐུབ་སྟེ་འབྱེར་བར་འགྱུར་རོ། །གལ་ཏེ་གཞོགས་ཕྱེད་ན་ཞིང་རྣ་བ་དང་སྣ་སུབས་པར་གྱུར་ཏམ། རྐ་ལག་སྡུད་མི་ནུས་པར་གྱུར་ན་རུ་རྟ་ཏིལ་མར་གྱི་ནང་དུ་
བསྐོལ་ཏེ་ལན་ཉི་ཤུ་རྩ་གཅིག་སྔགས་ཀྱིས་བཏབ་ནས་ལུས་ལ་བསྐུས་ན་གཏན་དུ་འཚོ་བར་འགྱུར་རོ། །ཡང་ན་བའི་མར་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་ལུས་ལ་བསྐུས་ན་ཡང་སོས་པར་འགྱུར་རོ། །གལ་ཏེ་བུ་བཙའ་དཀའ་བར་གྱུར་ན་ཏིལ་མར་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ། བུད་མེད་སྦྲུམ་མའི་ལྟེ་བ་དང་མོ་མཚན་ལ་བསྐུས་ན་མྱུར་དུ་བཙའ་བར་འགྱུར་རོ། །བུད་མེད་སྦྲུམ་མ་གང་དག་མངལ་དུ་བུ་ཤི་བར་གྱུར་ན་གིའུ་སི་སྲང་གཅིག་ཆུ་ཕུལ་དོའི་ནང་དུ་བསྐོལ་ཏེ་ཕུལ་གང་ལུས་པ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་ནས་བླུད་ན། སྡུག་བསྔལ་ཞི་ཞིང་ན་བ་མེད་པར་འབྱུང་བར་འགྱུར་རོ། །ཤ་མ་འབྱུང་དུ་མི་བཏུབ་པར་གྱུར་ན་ཡང་སྨན་འདི་འཐུངས་ན་ཕན་པར་འགྱུར་རོ། །གློ་བུར་དུ་སྙིང་གཟེར་ཏེ་མི་བཟོད་པར་གྱུར་ན་དེ་ནི་རོ་ཉུལ་གྱི་གཟེར་ཐབས་ཞེས་བྱ་བ་ཡིན་པས་ཀུན་ཏུ་རུ་དང་པོག་དཀར་པོ་མ་གྲུགས་པ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་ཅི་ཙམ་འབྱོར་པ་བྱིན་ནས་བླན་དུ་བཅུག་ན་འཚོ་བར་འགྱུར་རོ། །ཤ་ཆང་དང་། དཀུ་བ་རྣམ་པ་ལྔ་བསྲུང་དགོས་སོ། །མེས་ཚིག་པར་གྱུར་ན་བ་ལང་གི་ལྕི་བ་དྲོན་པོ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་རྨ་ཁར་བསྐུས་ན་འཚོ་བར་འགྱུར་རོ། །སྲིན་བུ་ཁོང་པར་ཞུགས་ཏེ་ན་བར་གྱུར་ན་རྟ་དཀར་པོའི་གཅིན་ཕུལ་ཕྱེད་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་བླུད་ན་འཚོ་བར་འགྱུར་རོ། །ཚབས་ཆེ་བ་ལ་ཕུལ་གང་བླུད་ན་སྲིན་བུ་ཐག་པ་གཅུས་པ་བཞིན་དུ་རང་འབྱུང་བར་འགྱུར་རོ། །ཤུ་ཆེན་བྱུང་བ་ལ་ལེང་སེའུ་ཧཱ་བརྡུངས་པའི་ཁུ་བ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་ཤུ་བའི་སྟེང་དུ་བླུགས་ན་རྩ་བར་དབྱུང་བར་འགྱུར་བས་མོད་ལ་འཚོ་བར་འགྱུར་རོ། །མིག་ཏུ་སྦྲང་མ་ཞུགས་ཏེ་ན་བར་གྱུར་ན་བོང་བུའི་རྟུག་པ་བཙིར་བའི་ཁུ་བ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་མཚན་མོ་མིག་ཏུ་བླུགས་ན་འཚོ་བར་འགྱུར་རོ། །ལྟོ་ན་བར་གྱུར་ན་ཁྲོན་པའི་ཆུ་གཙང་མའི་ནང་དུ་ལན་ཚྭ་མ་གྲུགས་པ་འབྲུམ་བུ་ཉི་ཤུ་རྩ་གཅིག་བོར་ཏེ་ལན་ཉི་ཤུ་རྩ་གཅིག་སྔགས་ཀྱིས་བཏབ་ནས་ཕུལ་ཕྱེད་
འཐུངས་ན་ཕན་པར་འགྱུར་རོ། །མིག་ཚག་པོར་གྱུར་ཏམ། མིག་ཏུ་ཤ་ལྷག་བྱུང་བར་གྱུར་ཏམ། ལིང་ཏོག་བྱུང་བར་གྱུར་ན་ཀེའུ་ཁི་ཚེའི་ཤིང་གི་ལོ་མ་བརྡུངས་ཏེ་བཙིར་བའི་ཁུ་བ་ལ་ལན་བདུན་སྔགས་ཀྱིས་བཏབ་སྟེ། དེའི་ནང་དུ་ཁར་བའི་དོང་ཚེ་གཅིག་མཚན་གཅིག་སྤངས་ནས་ཡང་ལན་བདུན་སྔགས་ཀྱིས་བཏབ་སྟེ་མིག་ཏུ་བླུགས་ན་འཚོ་བར་འགྱུར་རོ། །གལ་ཏེ་མཚན་མོ་འབྱུང་འཇུག་གི་ཚེ་འཇིགས་དངངས་ནས་མི་བདེ་བར་གྱུར་ན་སྐུད་པ་དཀར་པོ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ། མདུད་པ་ཉི་ཤུ་རྩ་གཅིག་བྱས་ནས་མགུལ་དུ་བཏགས་ན་འཇིགས་ཤིང་དངང་བ་དང་འབྲལ་བར་འགྱུར་རོ། །འཇིགས་པ་དང་བྲལ་བ་ཁོ་ནར་མ་ཟད་ཀྱི་བསོད་ནམས་ཀྱང་ཐོབ་ལ་སྡིག་པ་རྣམས་ཀྱང་འབྱང་བར་འགྱུར་རོ། །གལ་ཏེ་ཁྱིམ་འཁོར་དུ་ལྟས་ངན་བྱུང་བར་གྱུར་ན་བལ་པོ་སེའུའི་ཤིང་གི་ཡལ་ག་བླངས་ནས་དུམ་བུ་སྟོང་རྩ་བརྒྱད་དུ་གཏུབས་ཏེ། མགོ་མཇུག་གཉི་གར་མར་དང་ཞོ་བསྐུས་ནས་སྔགས་ལན་རེ་བཟླ་ཞིང་རེ་རེ་བསྲེགས་ཏེ་སྟོང་རྩ་བརྒྱད་ཚང་བར་བྱས་ན་གདོན་བགེགས་ཐམས་ཅད་རབ་ཏུ་ཞི་བར་འགྱུར་ཏེ། དེ་ཡང་སངས་རྒྱས་ཀྱི་སྤྱན་སྔར་བྱ་དགོས་སོ། །ཤུ་དག་དཀར་པོ་བླངས་ནས་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ། དཔུང་པ་གཡས་པ་ལ་བཏགས་ན་གཡུལ་ངོར་འཐབ་པ་དང་འབེལ་བའི་གཏམ་སྨྲ་བའི་གནས་ཐམས་ཅད་དུ་རྒྱལ་བར་འགྱུར་རོ། །ཀེའུ་ཁི་ཚེའི་ཤིང་གི་ལོ་མའམ་ཡལ་ག་ཡང་རུང་སྟེ་དུམ་བུར་གཏུབས་ནས་མགོ་མཇུག་གཉི་གར་བ་མར་ཡང་དག་པ་དང་། སྦྲང་རྩི་དཀར་པོ་དང་བཞོ་བསྐུས་ཏེ་སྔགས་ལན་རེ་བཟླ་ཞིང་དུམ་བུ་རེ་རེ་སྲེག་པ་སྟོང་རྩ་བརྒྱད་ཚང་བར་བྱའོ། །ཉིན་གཅིག་ལ་དུས་གསུམ་དུ་བྱ་ཞིང་དུས་གཅིག་ལ་ཡང་ལན་སྟོང་རྩ་བརྒྱད་བཟླས་ཏེ་ཞག་བདུན་ཚང་བར་གྱུར་ན་སྔགས་མཁན་དེ་རང་གིས་མངོན་པར་ཤེས་པ་ཐོབ་པར་འགྱུར་རོ། །གདོན་མཐུ་བོ་ཆེ་གདུལ་བར་འདོད་ན་ལུང་ཏང་ལ་ལན་བཞི་བཅུ་རྩ་དགུ་སྔགས་ཀྱིས་བཏབ་སྟེ། མར་དང་སྦྲང་རྩི་བསྐུས་ནས་འཕགས་པ་སྙིང་རྗེ་ཆེན་པོ་དང་ལྡན་པའི་གཟུགས་བྱས་པའི་མདུན་དུ་བསྲེག་པར་བྱའོ། །གིའུ་ཝང་སྲང་གཅིག་བེེཌཱུཪྱའི་བུམ་
པའི་ནང་དུ་བཅུག་སྟེ། འཕགས་པ་སྙིང་རྗེ་ཆེན་པོ་དང་ལྡན་པའི་གཟུགས་བྱས་པའི་མདུན་དུ་བཞག་ནས་སྔགས་ལན་སྟོང་རྩ་བརྒྱད་ཀྱིས་བཏབ་སྟེ་ལུས་ལ་བསྐུས་སམ་དཔྲལ་བར་ཐིག་ལེ་བྱས་ན། ལྷ་དང་། ཀླུ་དང་། འདྲེ་སྲིན་དང་། མི་དང་མི་མ་ཡིན་པ་ཐམས་ཅད་རབ་ཏུ་དགའ་བར་འགྱུར་རོ། །གལ་ཏེ་ལ་ལ་ཞིག་བཙོན་རར་ཆུད་པར་གྱུར་ན་ཕུག་རོན་དཀར་པོའི་རྟུག་པ་ལ་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ་ལག་པ་ལ་བསྐུས་ནས་བཙོན་ཆ་ལ་བྱུགས་ན་བཙོན་ཆ་དང་གྲོལ་བར་འགྱུར་རོ། །གལ་ཏེ་ཁྱོ་ཤུག་ཆུ་དང་མེ་བཞིན་དུ་མི་འདུམ་པར་གྱུར་ན་བྱ་ངུར་པའི་མཇུག་མ་བླངས་ཏེ། འཕགས་པ་སྙིང་རྗེ་ཆེན་པོ་དང་ལྡན་པའི་གཟུགས་བྱས་པའི་མདུན་དུ་སྔགས་ལན་སྟོང་རྩ་བརྒྱད་ཀྱིས་བཏབ་ནས་ལུས་ལ་བཏགས་ན། དེ་དག་ནམ་འཚོ་བའི་བར་དུ་གཅིག་ལ་གཅིག་དགའ་ཞིང་བྱམས་པ་དང་བཀུར་བར་འགྱུར་རོ། །ལོ་ཏོག་དང་འབྲས་བུ་རྣམས་ལ་སྲིན་བུ་ཞུགས་ཏེ་ཟ་བར་གྱུར་ན་སའམ་ཐལ་བའམ་བྱེ་མ་གཙང་མ་བླངས་ཏེ། ལན་སྟོང་རྩ་བརྒྱད་སྔགས་ཀྱིས་བཏབ་ནས་ཞིང་གི་ཕྱོགས་བཞིར་གཏོར་ན་སྲིན་བུ་རྣམས་འགྱེས་པར་འགྱུར་རོ། །ཆུ་གཙང་མ་ལ་སྔགས་ཀྱིས་བཏབ་སྟེ་འབྲས་བུའི་ལྗོན་ཤིང་ལ་གཏོར་ན་སྲིན་བུ་འབྲས་བུ་ལ་ཟ་བའི་ཐུག་མི་ཐུབ་བོ། །ན་མོ་རཏྣ་ཏྲ་ཡཱ་ཡ། ཤ་ར་མ་ཧཱ་ཤ་ར། ཏུ་ལུ་མ་ཧཱ་ཏུ་ལུ། ཨོྃ་ཀུ་མེ་ཧ་ནི་ཤ་པ། ཨོྃ་ཀུ་མེ་ཧ་ནི་ཤ་པ། བཅོམ་ལྡན་འདས་ཀྱིས་བཀའ་སྩལ་པ། གང་ལ་ལ་ཞིག་འབྲུ་དཀོན་པའི་གནས་སུ་ཕྱིན་ཏེ། མུ་གེ་བྱུང་ནས་ཟན་ཆད་པར་གྱུར་ན་ཁྱེད་ཀྱིས་མིག་བཙུམས་ནས་ལུས་དྲང་པོར་བསྲང་སྟེ། སེམས་རྩེ་གཅིག་ཏུ་གཟུངས་སྔགས་འདི་ལན་བརྒྱ་རྩ་བརྒྱད་བཟླས་ནས་མིག་ཕྱེ་ཤིག་དང་། ལྷ་རྣམས་ཀྱིས་ལྷའི་ཞལ་ཟས་རོ་བརྒྱ་དང་ལྡན་པ་སྣོད་བཀང་ནས་ཁྱེར་ཏེ་འོང་བར་འགྱུར་རོ། །གལ་ཏེ་ཁྱིམ་ན་གནས་པའི་ཚེ་དགོས་པར་གྱུར་ན་སྣོད་གཙང་མ་སྟོང་པ་མདུན་དུ་བཞག་ནས་མིག་བཙུམས་ཏེ་ཁ་ཆུས་བཀང་ནས་ལྕང་མའི་ལྕུག་མ་དང་རྔ་ཡབ་དང་ལྷུང་བཟེད་ལ་གཏོར་བར་བྱའོ། །ཆུས་གཏོར་ཟིན་ནས་མིག་བཙུམས་ཏེ་གཟུངས་འདི་ལན་བཞི་བཅུ་རྩ་དགུ་བཟླས་ན་རང་གི་
ངང་གིས་རོ་བརྒྱ་དང་ལྡན་པའི་ཟས་སྣོད་ཀུན་གང་བ་འབྱུང་བར་འགྱུར་བས་བླངས་ནས་ཞག་བདུན་གྱི་བར་དུ་བཟའ་བར་བྱ་སྟེ། དེ་ལྟར་ན་འདིའི་མཐུ་སྟོབས་ནི་བསམ་གྱིས་མི་ཁྱབ་པར་རིག་པར་བྱའོ། །ཟས་ཟོས་ཟིན་ནས་མིག་བཙུམས་ཏེ་ས་ར་ཁ་ཞེས་བརྗོད་ནས་ཟས་ཀྱི་ལྷག་མ་ཡང་སྤང་བར་བྱའོ། །ཟས་ཟོས་ཏེ་ལྟོར་མིད་ནས་ཀྱང་མྱུར་དུ་འཇུ་བར་འགྱུར་བས་སྟོབས་དང་ལྡན་ཞིང་བདེ་བ་འཐོབ་པར་འགྱུར། ཐོགས་པ་མེད་པའི་སྤོབས་པ་འཐོབ་པར་འགྱུར་རོ། །ཀུན་དགའ་བོ་ཐོས་པ་འཛིན་པར་འགྱུར་བའི་གཟུངས་ནི་འདི་ཡིན་ཏེ། ན་མོ་བུད་དྷཱ་ཡ། ན་མོ་དྷརྨཱ་ཡ། ན་མཿསཾ་གྷཱ་ཡ། ན་མཿཨཱ་དན་ནི་ཡ། ཨུག་ཙི་དུ་ཨུག་ཙི་དུ། མ་ཏི་ལ་ལི་ལ། ལ་ལུ་ཏེ་ན་མ་ནི་མི་ཏི་ན་མ་སྭཱ་ཧཱ། གཟུངས་འདི་འཛིན་པས་ཕྱོགས་བཞི་ནས་རྒྱུན་ཆད་པའི་རིའི་རྩེ་མོར་དཀྱིལ་འཁོར་བྱས་ནས་མཚམས་བཅད་དེ་ལུས་བསྲུངས་ནས། ཁར་བའི་ལྷུང་བཟེད་ཆུང་ངུ་ཅིག་ཁྲོན་པའི་ཆུ་གཙང་མས་བཀང་སྟེ་མདུན་དུ་བཞག་ནས་གཟུངས་སྔགས་བཟླས་ནས། གདོན་མི་ཟ་བར་སྐར་མ་གསལ་བ་གཅིག་འོང་བར་འགྱུར་བས། འོད་པའི་ཚེ་འཇིགས་པ་མི་བསྐྱེད་པར་སེམས་བདེ་བར་མཉམ་པར་བཞག་ནས་སེམས་རྩེ་གཅིག་ཏུ་གཟུངས་སྔགས་འདོན་པར་བྱེད་ན། དབང་པོ་རྣོ་ཞིང་ཤེས་རབ་དང་ལྡན་པར་འགྱུར་བས་མི་ཤེས་པ་ཅི་ཡང་མེད་པར་འགྱུར། འཇིག་རྟེན་པའི་ལམ་གྱི་ཆོས་ཀྱང་མི་རྟོགས་པ་ཅི་ཡང་མེད་པར་འགྱུར་རོ། །ཐོས་པ་རྒྱུད་པའི་ཚེ་སྐར་མ་མཆོག་ཏུ་གསལ་བ་གཅིག་ལྷུང་བཟེད་ཀྱི་ཆུའི་ནང་དུ་འོང་བར་འདུ་ཤེས་བསྐྱེད་པར་བྱའོ།། །།བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཐོགས་པ་མི་མངའ་བའི་ཐུགས་རྗེ་ཆེན་པོ་རྒྱ་ཆེར་ཡོངས་སུ་རྫོགས་པའི་གཟུངས།བམ་པོ་གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གུས་པས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་སྔོན་བསམ་གྱིས་མི་ཁྱབ་པའི་བསོད་ནམས་བསགས་པའི་རྒྱུ་དང་རྐྱེན་གྱིས། དེང་བཅོམ་ལྡན་འདས་ཀྱིས་བདག་ལ་ལུང་བསྟན་པར་མཛད་པ་དང་། བདག་སྙིང་རྗེ་ཆེན་པོ་བསྐྱེད་ནས་
སེམས་ཅན་ཐམས་ཅད་ལ་སྨན་པར་བགྱི་བ་དང་། བཅིང་བ་མཐའ་དག་གཅད་པ་དང་། འཇིགས་པ་ཐམས་ཅད་ཞི་བར་འགྱུར་བར་བཞེད་པ་ལགས་པས། དེང་བདག་གིས་ཡུམ་ཞེས་བགྱི་བའི་གཟུངས་བཤད་པར་འཚལ་ཏེ། དུས་ཐ་མའི་སེམས་ཅན་རྣམས་ཡུམ་ཞེས་བགྱི་བའི་གཟུངས་འདི་ཐོས་པའི་བྱིན་གྱི་བརླབས་ཀྱི་མཐུས་དེ་དག་ཐམས་ཅད་སྡུག་བསྔལ་གྱི་རྒྱུ་དང་བྲལ་ནས་བདེ་བའི་འབྲས་བུ་ཐོབ་པར་འགྱུར་ལགས་སོ། །བཅོམ་ལྡན་འདས་དུས་ལྔ་བརྒྱ་ཐ་མ་ལ་ཡུལ་ལམ། གྲོང་ངམ་གྲོང་ཁྱེར་རམ། གྲོང་རྡལ་གང་ཡང་རུང་བ་དག་ཏུ་དགེ་སློང་ངམ། དགེ་སློང་མ་འམ། རིགས་ཀྱི་བུའམ། རིགས་ཀྱི་བུ་མོ་ལ་སོགས་པས་རྟག་པར་གདུགས་མཚན་ལན་དྲུག་ཏུ་ཆོས་བཞིན་དུ་ཡུམ་ཞེས་བགྱི་བའི་གཟུངས་སྔགས་ཀྱི་ཆོས་ཀྱི་རྣམ་གྲངས་འདི་ཀློག་ཅིང་འདོན་པ་དང་། ཡོངས་སུ་འཛིན་པར་བགྱིད་ན། བདག་དེ་བཞིན་གཤེགས་པའི་བཀའ་དྲིན་རྗེས་སུ་དྲན་ཞིང་གཟོ་བའི་སླད་དུ་རྟག་པར་རྗེས་སུ་འབྲངས་ནས། གང་ཟག་དེ་དག་ཡོངས་སུ་སྲུང་བར་བགྱིད་ཅིང་སྤོང་བར་མི་བགྱིད་པས་འདྲེ་སྲིན་ཐམས་ཅད་ཀྱིས་གནོད་པར་བགྱིད་པར་མི་འགྱུར་ལགས་སོ། །གཞན་ཡང་ཚེ་རབས་ཀྱི་སྒྲིབ་པ་ལྕི་བ་ཐམས་ཅད་ཀྱང་དུས་གཅིག་ཏུ་ཡོངས་སུ་འབྱང་བར་འགྱུར། གཟུངས་སྔགས་ཀྱི་དཀྱིལ་འཁོར་དང་། ཕྱག་རྒྱའི་ཆོས་ཀྱི་སྒོ་ཐམས་ཅད་ཀྱང་མྱུར་དུ་ཡོངས་སུ་རྫོགས་པར་འགྱུར་ལགས་སོ། །བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་དུས་ལྔ་བརྒྱ་ཐ་མའི་སེམས་ཅན་རྣམས་ནི་ཕལ་ཆེར་སྡིག་པའི་དྲི་མ་ལྷུན་སྟུག་ཅིང་བསོད་ནམས་ཆུང་བས་ཡོངས་སུ་འཛིན་པར་བགྱིད་པ་ཞིག་མཆིས་ན་ཡང་འདྲེ་སྲིན་དག་གིས་གནོད་པ་བགྱིད་པས། དེང་བདག་བཅོམ་ལྡན་འདས་ཀྱི་བྱིན་གྱི་བརླབས་ཀྱིས་སེམས་ཅན་རྣམས་ལ་རྒྱ་ཆེར་སྨན་པར་བགྱི་བ་དང་། སེམས་ཅན་རྣམས་ལ་བདེ་བར་བགྱིད་པ་དང་། ལྷ་དང་ལྷ་མ་ཡིན་ལ་སོགས་པའི་ཆེད་དུ་གཟུངས་ཀྱི་ཆོས་བཤད་པར་འཚལ་ཏེ། བདག་གིས་སྔོན་འདས་པའི་བསྐལ་པ་ཚད་མ་མཆིས་པ་སྙེད་ཀྱི་བར་དུ་གཟུངས་ཀྱི་ཆོས་འདི་ལ་བསྟེན་ཅིང་མཆོད་པ་བགྱིས་ལགས་སོ། །འདས་པ་དང་། མ་བྱོན་པ་དང་། ད་ལྟར་བཞུགས་པའི་
སངས་རྒྱས་རྣམས་ཀྱི་བར་དག་ཀྱང་ཡུམ་ཞེས་བགྱི་བའི་གཟུངས་ཀྱི་ཆོས་ཀྱི་རྣམ་གྲངས་འདིའི་རྒྱུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་བར་བརྙེས་པ་ལགས་པས་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་སེམས་རྩེ་གཅིག་ཏུ་ཡུམ་ཞེས་བགྱི་བའི་གཟུངས་ཀྱི་ཆོས་ཀྱི་རྣམ་གྲངས་འདི་འདོན་ཅིང་ཀློག་པ་དང་། ཡོངས་སུ་འཛིན་པར་བགྱིད་ན་དེ་དག་ཚེ་འདི་ཉིད་ལ་ཚིག་གི་སྤོབས་པ་མྱུར་ཞིང་ཐོགས་པ་མ་མཆིས་པ་དང་། ཤེས་རབ་དང་སྤོབས་པ་མངོན་པར་རྟོགས་པར་འགྱུར་བས། ལྷ་དང་མིའི་འཁོར་མང་པོའི་ནང་ན་མཆོག་ཏུ་འགྱུར། གང་དག་ཐོས་པ་རྣམས་ཀྱང་རབ་ཏུ་དགའ་ཞིང་ཐམས་ཅད་ཀྱིས་སྤྱི་བོ་བཏུད་དེ་ཕྱག་བགྱིད་པར་འགྱུར། སྐྱེ་བ་ཐམས་ཅད་དུ་སངས་རྒྱས་དང་། ཆོས་དང་། དགེ་འདུན་མཐོང་བར་འགྱུར། གང་ཅི་སྨྲས་ཀྱང་རུང་སྟེ། ཐམས་ཅད་ཀྱིས་ཡིད་ཆེས་པས་ཉེན་པར་འགྱུར་ལགས་ཏེ། དེ་དག་ཐམས་ཅད་ཀྱང་སངས་རྒྱས་བཅོམ་ལྡན་འདས་རྣམས་ཀྱི་བྱིན་གྱི་བརླབས་ཀྱི་མཐུ་ལགས་ཏེ། རང་ཉིད་ཀྱི་མཐུ་ནི་མ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་ཁྱོད་ཀྱིས་འདི་ལྟར་ལྷ་དང་མི་དང་ལྷ་མ་ཡིན་ལ་སོགས་པ་དེ་དག་ཐམས་ཅད་ལ་ཕན་པ་དང་། བདེ་བར་བྱ་བ་དང་། ལས་ཀྱི་ལམ་ཡོངས་སུ་སྦྱང་བའི་ཆེད་དུ་སྨྲས་པ་ལེགས་སོ་ལེགས་སོ་ཞེས་བསྔགས་པ་བརྗོད་ནས། ངས་ཀྱང་དེང་ཡེ་ཤེས་ཀྱི་ཕྱག་རྒྱས་བཏབ་ནས། ཁྱོད་བྱམས་པ་ཆེན་པོ་དང་སྙིང་རྗེ་ཆེན་པོ་ལ་སོགས་པའི་སེམས་རྣམ་པ་སྣ་ཚོགས་ལས་གཏན་དུ་ལྡོག་པར་མི་འགྱུར་བར་བྱའོ་ཞེས་བཀའ་སྩལ་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་མངོན་པར་དྲན་ལགས་ཏེ། འདས་པའི་བསྐལ་པ་ཚད་མ་མཆིས་པ་ནས་ཡུམ་ཞེས་བགྱི་བའི་གཟུངས་ཀྱི་ཆོས་ཀྱི་རྣམ་གྲངས་འདི་ཡོངས་སུ་བཟུང་བས་རི་བོ་པོ་ཊ་ལ་ལ་མཆིས་པའི་ཚེ་བདུད་ཀྱི་རྒྱལ་པོས་བདུད་ཀྱི་འཁོར་མང་པོ་དང་འགྲོགས་ནས་བདག་གི་ཆོས་དཀྲུག་ཅིང་། སྔགས་ཀྱི་ཚིག་རྣམས་མངོན་པར་མི་འགྲུབ་པར་བགྱི་བར་བཤམས་པ་ལས། དེའི་ཚེ་བདག་གིས་ཡུམ་ཞེས་བགྱི་བའི་གཟུངས་འདིས་བདུད་མང་པོ་རྣམས་བཏུལ་
ནས་ཐམས་ཅད་སོ་སོར་གྱེས་པར་གྱུར་པས། གཟུངས་འདིའི་མཐུ་བསམ་གྱིས་མི་ཁྱབ་པར་རིག་པར་བགྱི་ལགས་སོ། །དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་བྱམས་པ་དང་། སྙིང་རྗེ་ཆེན་པོས་སེམས་ཅན་ཐམས་ཅད་ལ་ཕན་གདགས་ཤིང་། ལྷ་དང་མི་རྣམས་བདེ་བ་ཐོབ་པར་བྱ་བའི་ཕྱིར། བཅོམ་ལྡན་འདས་དང་འཁོར་འདུས་པ་ཆེན་པོའི་མདུན་དུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཕྱག་སྟོང་སྤྱན་སྟོང་དང་ལྡན་པའི་ཡུམ་ཞེས་བྱ་བའི་གཟུངས་ལུས་པོ་ཆེའི་སྔགས་འདི་སྨྲས་སོ། །ན་མཿསརྦ་ཏ་ཐཱ་ག་ཏཱ་ཡ། ན་མོ་རཏྣ་ཏྲ་ཡཱ་ཡ། ན་མོ྅་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ་སམྱཀྶཾ་བུདྡྷཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མ་ཧཱ་སྠཱ་མ། པྲཔྟཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་བི་པུ་ལ་བི་མ་ན་སུ་པྲ་ཏིཥྛི་ཏ་སྃ་གྷཱ་ཡ། སཱུཪྱ་ཤ་ཏ་ས་ཧ་སྲ་ཨ་ཏི་རེ་ཀ་པྲ་བྷཱ་ཨ་བ་བྷཱ་སི་ཏེ་རྨཱུརྟ་ཡེ། མ་ཧཱ་མ་ཎི་མ་ཀུ་ཊ་ཀུཎྜ་ལཱ་ལཾ་ཀཱ་ར་དྷཱ་ར་ཎཱི། བྷ་ག་བ་ཏེ་པདྨ་པཱ་ཎ་ཡེ། སརྦ་ལོ་ཀ་ཨུ་པཱ་ཤ་མ་ནཱ་ཡ། བི་བི་དྷ་མུ་ཁ་ས་མ་བེ་ཥ་བིཥྚ་སརྦ་སཏྭ་པ་རི་མོ་ཙ་ཀཱ་ཡ། ཏདྱ་ཐཱ། ཨོཾ་བྷུརྦྷུ་བ། མ་ཧཱ་ལོ་ཀ་ཀ་ར་ཎ་ནཱ་ཐ་མ་སིདྡྷེ་མི་ར་བྷ་དྲ་བི་ནཱ་ཤ་ནཱ་ཀ་རཱ་ཡ། རཱ་ག་དྭེ་ཥ་མོ་ཧ་ཛྭ་ལ་ཤ་མ་ཀ། ཤ་ས་ཀ་ས་མཱ་ཤྭཱ་ས་ན་ཀ་ར་ཀ་སརྦ་པཱ་པ་དུརྒ་ཏེ་པྲ་ཤ་མ་ན་ཀ་རཱ་ཡ། སརྦ་ཏ་ཐཱ་ག་ཏ་སམྦ་ད་ན་ཀ་ར། ཧེ་ཧེ། མ་ཧཱ་བོ་དྷི་ས་ཏྭ་བ་ར་ད་པདྨ་ལོ་ཀ་སཾ་བྷཱུ་ཏ། མ་ཧཱ་ཀཱ་རུ་ཎི་ཀ་ཛ་ཊ་མུ་ཀུ་ཊཱ་ལཾ་ཀྲྀ་ཏ་ཤ་རཱི་རཾ། མ་ཎི་ཀ་ན་ཀ་ཤ་ཏ། བཛྲ་བེེ་རཱུརྱཱ་ལཾ་ཀྲྀ་ཏ་ཤ་རཱེ་རཾ། ཨ་མི་ཏཱ་བྷ་སི་ན་ཀ་མ་ལཱ་ལཾ་ཀྲྀ་ཏ་པྲ་བྷ་ར་ཎ། ལ་རི་ཙ་ན་མ་ཧཱ་དུ་ན། ན་ར་ན་རི་ཤ་ཏ་ས་ཧ་སྲ། ཨ་བྷི་ལ་ཥཱི་ཏ་ཀཱ་ཡ། མ་ཧཱ་བོ་དྷི་ས་ཏྭཱ་ཡ། བི་དྷ་མ་བི་དྷ་མ། བི་ནཱ་ཤ་ཡ་བི་ནཱ་ཤ་ཡ། མ་ཧཱ་ཡནྟྲི་ཀླེ་ཤ་ཀ་བ་དྷ། ཨ་བ་བ་དྷ་བི་བི་དྷ་སཏྭ་སཾ་སཱ་ར་ཙཱ་ར་ཀ་པྲ་མ་ཐཱ་ན། པུ་རུ་ཥ་པདྨ་པུ་རུ་ཥ་ནཱ་ག། པུ་རུ་ཥ་སཱ་ག་ར། པུ་རུ་ཥ་སིཾ་ཧ། བཱི་ར་བཱི་རཱ་ཤཱ་ཡ། སུ་ཡནྟ་སུ་ཡནྟ།
བ་ར་བ་ར། དྷ་མ་དྷ་མ། ས་མ་ས་མ། དྷུ་རུ་དྷུ་རུ། པྲ་ཤཱ་ས་ཡ། པྲ་ཤཱ་ས་ཡ། གི་རི་གི་རི། བི་རི་བི་རི། ཙི་རི་ཙི་རི། མུ་རུ་མུ་རུ། མུ་ཡུ་མུ་ཡུ། མུ་ཡ་མུ་ཡ། མུཉྩ་མུཉྩ། དྷུ་ན་དྷུ་ན། བི་དྷུ་ན་བི་དྷུ་ན། དྷུ་རུ་དྷུ་རུ། གཱ་ཡ་གཱ་ཡ། གཱ་དྷ་ཡ་གཱ་དྷ་ཡ། ཧ་ས་ཧ་ས། པྲ་ཧ་ས་པྲ་ཧ་ས། བི་བྷི་དྷ་ཀླེ་ཤ་བཱ་ས་ན། བདག་མིང་འདི་ཞེས་བྱ་བའི། ཧ་ར་ཧ་ར། སཾ་ཧ་ར་སཾ་ཧ་ར། དུ་རུ་ཏི་དུ་རུ་ཏི། མ་ཧཱ་མནྟྲ་དུ་རུ་ཏི། ཀརྞྞ་ཤ་ཏ་པ་ར་སི་ཀ་བྷ་བ་བི་ས་ན། ཤ་མ་ཀ་མ་ཧཱ་བོ་དྷི་སཏྭ་བ་ར་ད་སྭཱ་ཧཱ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས། བཅོམ་ལྡན་འདས་ལ་པདྨ་ཆེན་པོའི་ཕྱག་རིན་པོ་ཆེའི་བཀོད་པའི་ཁར་བའི་ཡུམ་ཞེས་བྱ་བའི་གཟུངས་འདི་སྨྲས་མ་ཐག་ཏུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནས་འདུ་ཤེས་མེད་འདུ་ཤེས་མེད་མིན་གྱི་ལྷའི་གནས་ཀྱི་བར་དག་རྣམ་པ་དྲུག་ཏུ་གཡོས། རབ་ཏུ་གཡོས་པར་གྱུར་ཏོ། །ལྷ་རྣམས་ཀྱིས་ཀྱང་རིན་པོ་ཆེའི་མེ་ཏོག་གི་ཆར་མངོན་པར་ཕབ་པོ། །འོག་མིན་གྱི་ལྷ་དང་། དབང་ཕྱུག་ཆེན་པོ་རྣམས་ཀྱང་གཡོ་ཞིང་མི་བདེ་བས་ཤིན་ཏུ་འཇིགས་ཤིང་དངངས་པར་གྱུར་ཏོ། །གནོད་སྦྱིན་དང་། སྲིན་པོ་དང་། འདྲེ་གདོན་མ་རུངས་པ་ཐམས་ཅད་ཀྱང་སྡུག་བསྔལ་ཆེན་པོ་མྱོང་བའི་སྒྲ་སྐད་ཆེན་པོ་ཕྱུང་ནས་ཤར་ནུབ་ཏུ་འབྱེར་ཞིང་བྲོས་ཀྱང་གང་དུ་འགྲོ་བའི་གནས་ཀྱང་རིག་ཅིང་རྙེད་པར་མ་གྱུར་ཏོ། །དེ་ནས་སྤྲུལ་པའི་བྱང་ཆུབ་སེམས་དཔའ་འཁོར་མང་པོ་རྣམས་དང་། འདྲེ་སྲིན་མ་རུངས་པ་ཐམས་ཅད་ལ་གང་གིས་བདག་གི་རིག་སྔགས་ལས་འདའ་ཞིང་རྗེས་སུ་འབྲང་བར་མི་བྱེད་ན། དེ་དག་གི་ལུས་ཀྱི་ཡན་ལག་དང་། ཉིད་ལག་ཐམས་ཅད་རབ་ཏུ་ན་ཞིང་འཇིག་པར་འགྱུར་རོ། །རིག་སྔགས་འདིས་ནི་རི་རྣམས་འཇོམས་ཤིང་རྒྱ་མཚོ་ཆེན་པོ་སྐེམས་པར་བྱེད་དོ། །ལྷ་མ་ཡིན་གྱི་དམག་རྣམས་རྣམ་པར་བཅོམ་ནས་ཕམ་པར་བྱེད་དོ། །ཡུལ་འཁོར་རྣམས་དང། གྲོང་དང་། གྲོང་ཁྱེར་དང་། གྲོང་རྡལ་རྣམས་ཡོངས་སུ་
སྲུང་བར་བྱེད་དོ། །འདྲེ་གདོན་དང་། ནད་དང་། སྨན་གྱི་དུག་དང་། སྲིན་བུའི་དུག་དང་། ལོག་པ་དང་། མ་རུངས་པའི་མི་རྣམས་ཕམ་ཞིང་རབ་ཏུ་ཞི་བར་བྱེད་དོ། །སུམ་ཅུ་རྩ་གསུམ་པའི་ལྷ་རྣམས་བཏུལ་ནས་རབ་ཏུ་དུལ་བར་བྱེད་དོ་ཞེས་སྨྲས་པ་དང་། དེ་ནས་བཅོམ་ལྡན་འདས་རྡོ་རྗེ་ཆེན་པོའི་ཕོ་བྲང་རབ་ཏུ་དགའ་བ་ན་བཞུགས་པ་དང་། བྱང་ཆུབ་སེམས་དཔའ་མཆོག་ཏུ་བཙུན་པ་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། མིའམ་ཅི་ལ་སོགས་པའི་འཁོར་སངས་རྒྱས་ཀྱི་ཆོས་ལ་གནས་པ་ཚད་མེད་པ་ཐམས་ཅད་ཀྱིས་ཀྱང་དུས་གཅིག་ཏུ་བསྔགས་པ་བརྗོད་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་རིག་སྔགས་འདིས་ནི་སྒྲིབ་པའི་རི་བོ་ཤིན་ཏུ་རྒྱ་ཆེ་བདག་ཀྱང་རྣམ་པར་འཇོམས་པར་བགྱིད་པས་གང་ལ་ལ་ཞིག་ཉན་ཏམ། ཀློག་གམ། འདོན་ཏམ། ཡོངས་སུ་འཛིན་པར་བགྱིད་དམ། མཐོང་བར་གྱུར་ན། དེ་དག་ལ་ཉོན་མོངས་པའི་སྒྲིབ་པ་ནག་པོ་ཇི་སྙེད་ཅིག་མཆིས་པ་དེ་དག་ཐམས་ཅད་ཞུ་བྱང་བར་འགྱུར་ལགས་སོ། །གཞན་ཡང་གང་ལ་ལ་ཞིག་རྟག་པར་ནང་པར་ལངས་ནས་གུས་པའི་སེམས་ཀྱིས་ཡུམ་གྱི་གཟུངས་འདི་ལན་ཉི་ཤུ་རྩ་གཅིག་ཀློག་གམ། འདོན་པར་བགྱིད་ན། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཉིད་རྟག་པར་དེའི་རྗེས་སུ་འབྲངས་ནས་ཡོངས་སུ་བསྲུང་བ་བགྱིད་ཅིང་། ཡོངས་སུ་སྐྱོབ་པར་བགྱིད་དོ། །གང་ལ་ལ་ཞིག་སྨོན་ལམ་རྒྱ་ཆེན་པོ་དང་། ཏིང་ངེ་འཛིན་གྱི་སྒོ་ཆེན་པོ་ཐམས་ཅད་མྱུར་དུ་འགྲུབ་པར་འཚལ་ན། གཅིག་པུ་གནས་དབེན་པར་མཆིས་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཡིད་ལ་དྲན་པར་བགྱི་ཞིང་། གཞན་ཡིད་ལ་མི་བགྱི་བར་རྟག་པར་གཟུངས་འདི་ལན་བརྒྱ་རྩ་བརྒྱད་བཟླས་བརྗོད་བགྱིས་ན་སྨོན་ལམ་རྣམས་མི་འགྲུབ་པ་གང་ཡང་མ་མཆིས་ལགས་སོ། །གཞན་ཡང་སེམས་ཅན་ཐམས་
ཅད་ཀྱི་སྙིང་དྲུང་དུ་སྡུག་པར་འགྱུར། ངན་འགྲོའི་སྒོ་ཐམས་ཅད་དུ་ལྟུང་བར་མི་འགྱུར་ལགས་སོ། །མཆིས་ཀྱང་རུང་མ་མཆིས་ཀྱང་རུང་སྟེ། རྟག་པར་སངས་རྒྱས་མདུན་ན་བཞུགས་པར་འདུ་ཤེས་ཉེ་བར་བཞག་པར་གྱུར་ན། གང་ཟག་དེ་སྐྱེ་བའི་གནས་བྱེ་བ་བརྒྱ་སྟོང་ཚད་མ་མཆིས་པ་ཀུན་དུ་བསགས་པའི་སྡིག་པའི་ལས་ཅི་མཆིས་པ་དེ་དག་ཐམས་ཅད་ཞུ་བྱང་བར་འགྱུར། གང་ཟག་དེ་འཁོར་ལོས་སྒྱུར་བའི་རྒྱལ་པོ་སྟོང་གི་བསོད་ནམས་ཕུན་སུམ་ཚོགས་པ་དག་ལ་ལོངས་སྤྱོད་པར་འགྱུར། སྐྱེ་བ་ཐམས་ཅད་དུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་དུས་གཅིག་ཏུ་སྐྱེ་བར་འགྱུར། བཙུན་པ་ཁྱིམ་དག་ཏུ་སྐྱེ་བར་འགྱུར་ལགས་སོ། །གང་ལ་ལ་ཞིག་རྟག་པར་སྤོས་སམ། མེ་ཏོག་སྙིམ་པ་གང་ཙམ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་གཟུགས་ཀྱི་མདུན་དུ་མངོན་པར་གཏོར་ནས། གཟུངས་འདི་ལན་ཉི་ཤུ་རྩ་གཅིག་འདོན་པར་བགྱིད་ན། སྟོང་ཆེན་པོའི་འཇིག་རྟེན་གྱི་ཁམས་ཀྱི་ཡོན་ཏན་དང་སྙིང་རྗེ་ཆེན་པོའི་ཆོས་ཉིད་འཐོབ་པར་འགྱུར། གང་ཟག་དེ་འཇིག་རྟེན་ན་མཐར་གྱིས་མཐུ་ཆེན་པོ་མྱུར་དུ་མངོན་པར་འགྲུབ་པར་འགྱུར་ལགས་སོ། །གང་ལ་ལ་ཞིག་རྟག་པར་བྱང་ཆུབ་སེམས་དཔའི་གདོང་དང་། མིག་དང་། མཚན་དང་། དཔེ་བྱད་ལ་རྣམ་པར་བལྟས་ཏེ། གཟུངས་འདི་ལན་སྟོང་རྩ་བརྒྱད་འདོན་པར་བགྱིད་ན་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་མྱུར་དུ་ལུས་མངོན་སུམ་དུ་བསྟན་ནས་རྣལ་འབྱོར་པས་མཐོང་བར་འགྱུར་བས་དྲི་མ་དང་བྲལ་ནས་ས་དང་པོ་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་འཐོབ་པར་འགྱུར་བས་འོད་ཀྱིས་འཇིག་རྟེན་གྱི་ཁམས་གསལ་བར་བགྱིད་པར་འགྱུར། འཆི་བའི་དུས་ཀྱི་ཚེ་བསམ་གཏན་དང་ཏིང་ངེ་འཛིན་ལ་སྙོམས་པར་འཇུག་པ་བཞིན་དུ་འཆི་བར་འགྱུར་བས་ཚེ་རབས་ཐམས་ཅད་དུ་སྔོན་གྱི་གནས་རྗེས་སུ་དྲན་པའི་ཤེས་རབ་འཐོབ་པར་འགྱུར། ཁ་ན་མ་ཐོ་བའི་སྡིག་པ་ཅི་མཆིས་པ་ཐམས་ཅད་ཀྱང་ཞུ་ཞིང་བྱང་བར་འགྱུར་
ལགས་སོ། །གཟུངས་འདི་ཡོངས་སུ་འཛིན་པར་འཚལ་བ་དེས་རྟག་པར་དཔྱིད་ཟླ་ར་བ་དང་། དབྱར་ཟླ་འབྲིང་པོ་དང་། སྟོན་ཟླ་ཐ་ཆུངས་ཚེས་གཅིག་ནས་ཚེས་བཅུའི་བར་དུ་གསོ་སྦྱོང་དང་། ཚུལ་ཁྲིམས་ལ་གནས་ནས་གོས་དཀར་པོ་གཙང་མ་བགོས་ཏེ། ཟས་དཀར་གསུམ་འཚལ་ནས་རིང་བསྲེལ་དང་བཅས་པའི་མཆོད་རྟེན་ནམ། རིང་བསྲེལ་གྱི་མདུན་དུ་ཙནྡན་དཀར་པོའི་འཇིམ་པ་ལས་དཀྱིལ་འཁོར་ཁྲུ་གང་གྲུ་བཞི་པ་བགྱིས་ནས། མེ་ཏོག་དང་སྤོས་རྣམ་པ་སྣ་ཚོགས་དཀྱིལ་འཁོར་གྱི་ནང་དུ་གཏོར་ནས་དེ་བཞིན་གཤེགས་པའི་སྐུ་གཟུགས་ཀྱི་སྤྱན་སྔར་སྤོས་ཀྱིས་བདུགས་ཏེ་ཞུགས་མར་གཏམས་ནས། སངས་རྒྱས་དང་བྱང་ཆུབ་སེམས་དཔའ་རྣམས་ལ་གུས་པའི་སེམས་བསྐྱེད་དེ། རྟག་པར་གཟུངས་འདི་ལན་སྟོང་རྩ་བརྒྱད་འདོན་པར་བགྱིད་ན། ཚེས་བཅྭ་ལྔའི་ནུབ་མོ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཉིད་དཀྱིལ་འཁོར་ཀྱི་ནང་དུ་མཆི་བར་འགྱུར་བས། རྣལ་འབྱོར་བས་མཐོང་མ་ཐག་ཏུ་མཚམས་མ་མཆིས་པ་ལྔའི་ཁ་ན་མ་ཐོ་བ་ཤིན་ཏུ་ལྕི་བའི་སྒྲིབ་པ་ཅི་མཆིས་པ་ཐམས་ཅད་ཞུ་བྱང་ནས། ལུས་དང་། ངག་དང་། ཡིད་ཀྱི་ལས་ཐམས་ཅད་ཡོངས་སུ་དག་པར་འགྱུར་བས་སངས་རྒྱས་ཀྱི་ཏིང་ངེ་འཛིན་གྱི་མཐུ་དང་། དབང་བསྐུར་བའི་སའི་མཐུ་དང་། ཕ་རོལ་ཏུ་ཕྱིན་པའི་སའི་མཐུ་དང་། ཁྱད་པར་དུ་འཕགས་པའི་ཡེ་ཤེས་ཀྱིས་ཡང་འཐོབ་པར་འགྱུར་ལགས་སོ། །བཅོམ་ལྡན་འདས་གལ་ཏེ་དགུང་ཆར་དབབ་པར་འཚལ་བར་གྱུར་ན། གནམ་དུ་བལྟས་ནས་གཟུངས་འདི་སྟོང་རྩ་བརྒྱད་འདོན་པར་བགྱིད་ན་ཟིལ་དངར་གྱི་ཆར་དུས་བཞིན་དུ་འབབ་པར་འགྱུར་ལགས་སོ། །དོག་ས་ལ་བལྟས་ནས་གཟུངས་འདི་ལན་སྟོང་རྩ་བརྒྱད་ཚང་བར་འདོན་པར་བགྱིད་ན་འབྲུ་རྣམ་པ་སྣ་ཚོགས་ལེགས་པར་འགྱུར་ལགས་སོ། །གཙང་པོ་དང་། ཆབ་མིག་སྐམས་པའི་དྲུང་དུ་གཟུངས་འདི་ལན་སྟོང་རྩ་བརྒྱད་འདོན་པར་བགྱིད་ན་ཆབ་འཕེལ་ཞིང་རྒྱས་པར་འགྱུར་ལགས་སོ། །བྲོ་ནད་ཀྱིས་ཐེབས་པ་
ཐམས་ཅད་ཀྱི་མདུན་དུ་རང་གི་སུག་པ་ལག་པ་ལ་སྔགས་འདིས་ལན་བདུན་བསྔགས་ཏེ་སུག་པས་བྱབས་ན་འཚོ་བར་འགྱུར་ལགས་སོ། །གང་དྲན་པ་ཉམས་པའི་མདུན་དུ་གཟུངས་འདི་ལན་སྟོང་རྩ་བརྒྱད་བཟླས་བརྗོད་བགྱིས་ན་ཡང་དག་པའི་དྲན་པ་འཐོབ་པར་འགྱུར་ལགས་སོ། །གང་དག་བཀྲེས་སྐོམ་གྱིས་ཉེན་པའི་མདུན་དུ་དེའི་གདོང་ལ་བལྟས་ནས་གཟུངས་འདི་ལན་སྟོང་རྩ་བརྒྱད་བཟླས་བརྗོད་བགྱིས་ན་བཀྲེས་སྐོམ་གྱིས་ཉེན་པའི་འདུ་ཤེས་ངན་པ་ཐམས་ཅད་རབ་ཏུ་བསལ་བར་འགྱུར་ལགས་སོ། །གང་དག་མཚམས་དགུམ་པར་འཚལ་ན་རྫིང་ཆབ་ཀྱི་ནང་དུ་ཞུགས་ཏེ། ཆོས་བཞིན་དུ་གཟུངས་འདི་ཡོངས་སུ་རྫོགས་པར་བྲིས་ནས་རྒྱལ་མཚན་གྱི་ཁར་བཏགས་ན་དཔག་ཚད་བརྒྱ་ཚུན་ཆད་དུ་གདོན་བགེགས་ཅི་ཡང་མ་མཆིས་ཏེ། མཚམས་བཀུམ་པ་ཉིད་དུ་གྱུར་ནས་ཡོངས་སུ་བསྲུངས་པར་འགྱུར་ལགས་སོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་རྟག་པར་གདུགས་གཅིག་བཞིན་དུ་གཟུངས་འདི་ལན་སྟོང་རྩ་བརྒྱད་འདོན་པར་བགྱིད་ན། གང་ཟག་དེའི་བསོད་ནམས་བརྗོད་ཀྱིས་མི་ལང་བས་རིག་སྔགས་འཛིན་པ་དེ་དག་བཙུན་ཞིང་དབང་ཕྱུག་དང་ལྡན་པར་འགྱུར། གཞན་ཡང་སྐྱེ་བོ་མང་པོ་ཀུན་གྱིས་བྱམས་ཤིང་བསྙེན་བཀུར་བགྱིད་པར་འགྱུར། སྨོན་ལམ་རྣམས་ཡིད་བཞིན་དུ་ཡོངས་སུ་རྫོགས་པར་འགྱུར་ལགས་སོ། །གང་དག་བདུད་གདུལ་བར་འཚལ་ན་ཡུམ་གྱི་གཟུངས་འདི་བཟླས་ཏེ། གུ་གུལ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་ནས་སྔགས་འདི་ལན་རེ་བཟླས་ཤིང་ལན་ཅིག་བསྲེག་པ་ལན་བརྒྱ་རྩ་བརྒྱད་ཚང་བར་བགྱིས་ན་ཡོངས་སུ་བསལ་བར་འགྱུར་ལགས་སོ། །གལ་ཏེ་སྐྱེ་བོ་མང་པོ་ཐམས་ཅད་དགའ་བར་འཚལ་ན་རྟག་པར་ལྕང་མའི་ལྕུག་མ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ། གཡར་ཁར་བཅས་ན་ཐམས་ཅད་ཀྱིས་བྱམས་ཤིང་བཀུར་བར་འགྱུར་ལགས་སོ། །གང་དག་བདག་ཉིད་སྤོབས་པ་དང་། ཤེས་རབ་དང་ལྡན་པར་འཚལ་ན་ཤུ་དག་སྲང་གཅིག་ཕྱེ་
མར་བཏགས་ཏེ། ཆབ་མར་དང་སྦྲང་རྩི་དང་སྦྱར་ནས་རིལ་བུ་བགྱིས་ཏེ། ཡུམ་གྱི་གཟུངས་འདིས་མཚན་མ་གསུམ་པོ་འདི་ལྟ་སྟེ། དྲོད་དང་། དུད་པ་དང་། འོད་བྱུང་གི་བར་དུ་སྔགས་ཀྱིས་གདབ་པར་བགྱིའོ། །མཚན་མ་དེ་དག་ཐོབ་ནས་གདུགས་རེ་བཞིན་སྨན་གྱི་རིལ་བུ་ཙམ་བདུན་བདུན་འཚལ་ནས་སྙིང་གར་ཡང་བྱུག་པར་བགྱི་སྟེ། དེ་ལྟར་ཞག་བརྒྱའི་བར་དུ་འཚལ་ན་ཐོགས་པ་མ་མཆིས་པའི་སྤོབས་པ་འཐོབ་པར་འགྱུར་བས། བདག་ཉིད་ཀྱི་ལུས་བསྲུང་བའི་སླད་དུ་གདུགས་རེ་ཞིང་ཡུམ་གྱི་གཟུངས་འདི་ལན་བརྒྱ་རྩ་བརྒྱད་བཟླས་ནས་ཕྱག་རྒྱ་རྣམ་པ་བཅུ་གཉིས་ཀྱང་བགྱིའོ། །དེ་ལ་དང་པོ་བྱང་ཆུབ་སེམས་དཔའ་མིག་སྟོང་དང་ལྡན་པའི་ལུས་ཀུན་དུ་སྡུད་པའི་ཕྱག་རྒྱ་ནི་འདི་ལགས་ཏེ། སྔར་ལངས་ནས་འགྲེང་སྟེ། ལུས་དྲང་པོར་བསྲང་ནས་རྐང་པ་གཉིས་གཤིབས་ཏེ། རྐང་པ་གཡས་པ་ཅུང་ཟད་ཅིག་དགུག་པར་བགྱིའོ། །སྔར་སུག་པ་ལག་པ་གཡོན་པ་ཐུར་དུ་བརྐྱང་ནས་གུང་མོ་དང་སྲིན་ལག་གཉིས་བཀུག་སྟེ། ལག་མཐིལ་དུ་བཞག་ལ། མཐེའུ་ཆུང་དང་མཛུབ་མོ་དང་། མཐེ་བོང་ནི་ཡན་པར་བརྐྱང་སྟེ། ལག་མཐིལ་བཀན་ནས་གྱེན་དུ་ཕྱོགས་པར་བགྱིའོ། །དེའི་རྗེས་ལ་སུག་པ་གཡས་པ་ཡང་དེ་བཞིན་དུ་བགྱིས་ནས་གུང་མོ་བཀུག་སྟེ། ཕྲག་པ་དང་མཉམ་པར་བགྱིས་ནས་ལག་མཐིལ་མདུན་དུ་བལྟ་བར་བགྱི་སྟེ། འདི་ནི་ལུས་ཀུན་སྡུད་པའི་ཕྱག་རྒྱ་ཞེས་བགྱིའོ། །གལ་ཏེ་བདུད་དང་མུ་སྟེགས་ཅན་ལ་ལོག་པར་ལྟ་བའི་ཐིབས་པོ་བཅོམ་ནས་ཡང་དག་པའི་ལམ་དུ་གཟུད་པར་འཚལ་ན། ཕྱག་རྒྱ་འདི་བགྱིས་ནས་སྔགས་ལན་ཉི་ཤུ་རྩ་གཅིག་བཟླས་ན་གདོན་མི་འཚལ་བར་སྨོན་པ་བཞིན་འགྲུབ་པར་འགྱུར་ལགས་སོ། །གཟུངས་ནི་འདི་ལྟ་སྟེ། ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨ་བཏྟ། ཨབཏྟ། པ་རི་བཏྟེ། ཨེ་ཧི་ཨེ་ཧི་སྭཱ་ཧཱ། དེ་ལ་གཉིས་པ་བྱང་ཆུབ་སེམས་དཔའ་མིག་
སྟོང་དང་ལྡན་པའི་ཀུན་འཛིན་གྱི་གཟུངས་ཀྱི་ཕྱག་རྒྱ་ནི་འདི་ལགས་ཏེ། སྔ་མའི་ལུས་ཀུན་སྡུད་པའི་ཕྱག་རྒྱ་བཞིན་དུ་ཐལ་མོ་སྦྱར་ཏེ་སྙིང་གར་བཞག་ནས་སོར་མོ་ལྔ་བསྣོལ་མར་བཏང་སྟེ། གཡོན་པས་གཡས་པ་མནན་ནས་མཛུབ་མོ་གཉིས་དྲང་པོར་བསྒྲེང་སྟེ་རྩེ་མོ་ཕྲད་པར་བགྱིས་ལ། མཐེ་བོ་གཉིས་མཛུབ་མོ་གཉིས་ཀྱི་ཚིགས་པ་དང་པོ་ལ་མནན་ནས་ཅུང་ཟད་ཅིག་དབྱེ་བར་བགྱི་སྟེ། འདི་ནི་ཀུན་འཛིན་གྱི་གཟུངས་ཀྱི་ཕྱག་རྒྱ་ཞེས་བགྱིའོ། །ཕྱག་རྒྱ་འདི་བགྱིས་པར་གྱུར་ན་བསྐལ་པ་ཚད་མ་མཆིས་པ་ཚུན་ཆད་ཀྱི་འཁོར་བའི་སྡིག་པའི་ལས་ཅི་མཆིས་པ་ཐམས་ཅད་དུས་གཅིག་ཏུ་ཡོངས་སུ་བྱང་བར་འགྱུར། སླད་མའི་དུས་ཀྱི་ཚེ་ཕྱོགས་བཅུའི་སངས་རྒྱས་ཀྱི་ཞིང་ཡོངས་སུ་དག་པ་དག་ཏུ་སྐྱེ་བར་འགྱུར་ལགས་སོ། །བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་བྱང་ཆུབ་ཏུ་ཉེ་བའི་ཚེ་བདུད་ཀྱི་རྒྱལ་པོས་གླགས་བཙལ་བ་དང་། ཀུན་འཛིན་གྱི་གཟུངས་ཀྱི་ཕྱག་རྒྱ་འདི་མཛད་པས་ཤིན་ཏུ་བདེ་བའི་བསམ་གཏན་དང་ཏིང་ངེ་འཛིན་བརྙེས་པར་གྱུར་ཏོ། །གཟུངས་ནི་འདི་ལྟ་སྟེ། ཏདྱ་ཐཱ། སརྦ་དྷཱ་ར་ཎཱི། མཎྜ་ལ། ཨེ་ཧི་ཨེ་ཧི། པྲ་བྷཱ་ཤུདྡྷ། སཏྭཱ་ཡ་སྭཱ་ཧཱ། དེ་ལ་གསུམ་པ་བྱང་ཆུབ་སེམས་དཔའ་མིག་སྟོང་དང་ལྡན་པའི་རྣམ་པར་ཐར་པ་དང་། བསམ་གཏན་དང་། ཏིང་ངེ་འཛིན་གྱི་ཕྱག་རྒྱ་ནི་འདི་ལགས་ཏེ། སླར་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། སྤྱི་བོར་ཐལ་མོ་སྦྱར་ནས་མཛུབ་མོ་གཉིས་བཀུག་སྟེ་རྩེ་མོ་སྤྲད་ལ་མཐེ་བོ་གཉིས་མཛུབ་མོའི་ཚིགས་གཉིས་པའི་སྟེང་དུ་བཀན་པར་བགྱི་སྟེ། ཆོས་ཀྱི་ཕྱག་རྒྱ་འདི་ནི་རྣམ་པར་ཐར་པ་དང་། བསམ་གཏན་དང་། ཏིང་ངེ་འཛིན་གྱི་ཕྱག་རྒྱ་ཞེས་བགྱིའོ། །འདས་པའི་དེ་བཞིན་གཤེགས་པ་ཐམས་ཅད་ཀྱིས་ཀྱང་ཆོས་འདི་མངོན་པར་བསྒྲུབས་པས་བསམ་གཏན་དང་། ཏིང་ངེ་འཛིན་དང་། རྣམ་པར་གྲོལ་བ་བརྙེས་པ་ལགས་ཏེ། རིག་སྔགས་ནི་སྔ་མ་དང་མཐུན་ལགས་སོ། །གང་ལ་ལ་ཞིག་གདུགས་རེ་བཞིན་དུ་ཕྱག་རྒྱ་འདི་
བགྱིས་ཏེ་མཆོད་པ་བགྱིས་ན་ཕྱོགས་བཅུའི་སངས་རྒྱས་རྣམས་མྱུར་དུ་མཐོང་བར་འགྱུར་རོ། །དེ་ལ་བཞི་པ་བྱང་ཆུབ་སེམས་དཔའ་མིག་སྟོང་དང་ལྡན་པའི་ཕྱག་རྒྱ་ནི་འདི་ལགས་ཏེ། ལངས་ནས་འགྲེང་སྟེ་རྐང་པ་གཉིས་གཤིབས་ནས་སྔར་གུང་མོ་དང་། སྲིན་ལག་དང་། མཐེའུ་ཆུང་རྣམས་རྒྱབ་སྤྲད་ལ་མཛུབ་མོ་གཉིས་བསྒྲེང་སྟེ་རྩེ་མོ་སྤྲད་ནས་མཐེ་བོང་གཉིས་མཛུབ་མོའི་ཚིགས་གཉིས་པའི་སྟེང་དུ་མནན་ཏེ། ལག་པ་གཉིས་ཀྱི་བར་དུ་ཚོན་སྣ་ལྔ་ཙམ་ཕྱེ་ནས་སྨིན་མཚམས་སུ་གཞག་པར་བགྱི་སྟེ། འདི་ནི་མིག་སྟོང་དང་ལྡན་པའི་ཕྱག་རྒྱ་ཞེས་བགྱིའོ། །ཕྱག་རྒྱའི་ཆོས་ཀྱི་སྒོ་འདི་བགྱིས་པར་གྱུར་ན་སངས་རྒྱས་ཀྱི་ཞིང་ཡོངས་སུ་དག་པའི་འཇིག་རྟེན་གྱི་ཁམས་གྱ་ནོམ་པའི་བྱེ་བ་ཕྲག་བརྒྱ་སྟོང་སྙེད་མཐོང་བར་འགྱུར་ཏེ། སངས་རྒྱས་ཀྱི་ཞིང་ཁམས་རེ་རེ་ནས་ཀྱང་བྱང་ཆུབ་སེམས་དཔའ་འབུམ་ཕྲག་བཅུ་དང་བཞི་སྟོང་རྣལ་འབྱོར་པ་དེའི་གྲོགས་བགྱིད་པར་འགྱུར་ལགས་སོ། །གང་དག་དཀྱིལ་འཁོར་གྱི་ཆོས་ཀྱི་སྒོར་ལན་གསུམ་མ་ཞུགས་པ་དེ་དག་གིས་ནི་ཕྱག་རྒྱའི་ཆོས་ཀྱི་སྒོ་འདི་མཐོང་དུ་ཡང་མི་རུང་ལ་ཆོ་ག་འདི་ཡང་བགྱིར་མི་རུང་ལགས་སོ། །རྟགས་མཐོང་བའི་བྱང་ཆུབ་སེམས་དཔའ་ཆོས་དང་ཡེ་ཤེས་ཀྱི་མངོན་པར་ཤེས་པ་གསལ་བ་ཅིག་ལགས་ན་ནི་ཅི་དང་ཅི་སྨོན་པ་དེ་དག་ཐམས་ཅད་ཡོངས་སུ་རྫོགས་པར་འགྱུར་ལགས་སོ། །གཟུངས་ནི་འདི་ལྟ་སྟེ། ཨོཾ་སརྦ་ཙཀྵུཿཀ་རཱ་ཡ། དྷཱ་ར་ཎཱི། ཨིནྡྲཱ་ཡ་སྭཱ་ཧཱ། དེ་ལ་ལྔ་པ་བྱང་ཆུབ་སེམས་དཔའ་མིག་སྟོང་དང་ལྡན་པའི་ལག་སྟོང་ཀུན་སྡུད་པའི་ཕྱག་རྒྱ་ནི་འདི་ལགས་ཏེ། ལངས་ནས་སུག་པ་རྐང་པ་གཤིབས་ཏེ། སྔར་སུག་པ་ལག་པ་གཡས་པའི་ལག་མཐིལ་བཀང་ནས་སོར་མོ་ལྔ་སོ་སོར་ཕན་ཚུན་དུ་བསྙེན་ཏེ། དེའི་རྗེས་ལ་སུག་པ་ལག་པ་གཡོན་པའི་ལག་མཐིལ་གཡས་པའི་སྟེང་དུ་མནན་ནས་སྙིང་གར་འཇོག་པ་གང་ལགས་པ་འདི་ནི་ལག་སྟོང་ཀུན་སྡུད་པའི་ཕྱག་རྒྱ་ཞེས་བགྱི་སྟེ། འདིས་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་ན་བདུད་ཇི་སྙེད་མཆིས་པ་ཐམས་ཅད་སྡུད་ཅིང་འདུལ་བར་བགྱིད་ལགས་སོ། །གཟུངས་སྔགས་ནི་འདི་ལྟ་སྟེ། ཏདྱ་ཐཱ། ཨ་བ་ལོ་ཀི་ཏེ་ཤྭ་རཱ་ཡ། སརྦ་དུཥྚ་ཨོ་ཧཱ་ཡ་ནི་སྭཱ་ཧཱ། དེ་ལ་དྲུག་པ་བྱང་ཆུབ་སེམས་དཔའ་མིག་སྟོང་པས་ཏིང་ངེ་འཛིན་རྟོགས་པར་འགྱུར་བའི་ཕྱག་རྒྱ་ནི་འདི་ལགས་ཏེ། འགྲེང་སྟེ་རྟིང་པ་གཉིས་སྤྲད་ནས། སྔར་སུག་པ་ལག་པ་གཡོན་པའི་སོར་མོ་བསྒྲེང་སྟེ་གུང་མོ་བཀུག་ནས་མདུན་དུ་ཕུལ་ལ། དེའི་རྗེས་ལ་སུག་པ་ལག་པ་གཡས་པའང་དེ་བཞིན་དུ་བགྱིས་ནས་གུང་མོ་བཀུག་སྟེ་ནང་ལོགས་སུ་ཕུལ་བ་འདི་ནི་ཏིང་ངེ་འཛིན་རྟོགས་པར་འགྱུར་བའི་ཕྱག་རྒྱ་ཞེས་བགྱི་བ་ལགས་ཏེ། འདིས་ཏིང་ངེ་འཛིན་དང་། ཡེ་ཤེས་ཀྱི་ཕྱག་རྒྱའི་བཀོད་པ་དང་། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ཡང་རྟོགས་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་དུ་བགྱིད་པར་འགྱུར་ལགས་སོ། །རིག་སྔགས་ནི་སྔ་མ་ཉིད་བཟླ་བར་བགྱིའོ། །དེ་ལ་བདུན་པ་བྱང་ཆུབ་སེམས་དཔའ་མིག་སྟོང་པས་ལྷ་ཀླུ་སྡེ་བརྒྱད་དང་། འདྲེ་སྲིན་རྣམས་དགུག་ཅིང་སྡུད་པའི་ཕྱག་རྒྱ་ནི་འདི་ལགས་ཏེ། འགྲེང་ནས་རྐང་པ་གཉིས་གཤིབས་ཏེ། སྔར་སུག་པ་ལག་པ་གཡོན་པའི་སྲིན་ལག་གིས་མཐེ་བོའི་སེན་མོ་ལ་རེག་པར་བགྱིས་ནས། དེའི་རྗེས་ལ་སུག་པ་ལག་པ་གཡས་པ་ཡང་དེ་བཞིན་དུ་བགྱིས་ཏེ། མཐེའུ་ཆུང་དང་གུང་མོ་གཉིས་དྲང་པོར་བསྒྲེང་ནས་རྩེ་མོ་ཕན་ཚུན་ཕྲད་པར་བགྱིས་ལ། ལག་ངར་གྱི་ཚིགས་གཉིས་སྦྱར་ནས་མཛུབ་མོ་ནི་ཕན་ཚུན་རྒྱུ་བར་བགྱིའོ། །རིག་སྔགས་ནི་འདི་ལྟ་སྟེ། ཨོཾ་སརྦ་དེ་བ་ནཱ་ག་ཨ་ན་རི་སྭཱ་ཧཱ། དེ་ལ་བརྒྱད་པ་བྱང་ཆུབ་སེམས་དཔའ་མིག་སྟོང་པས་ཚངས་པ་ཆེན་པོ་དང་། བརྒྱ་བྱིན་ལྷའི་དབང་པོ་གཡར་དྲང་ནས་ཆོས་འདྲི་བའི་ཕྱག་རྒྱ་ནི་འདི་ལགས་ཏེ། ཕྱག་རྒྱ་སྔ་མའི་སྟེང་དུ་ལག་ངར་གྱི་ཚིགས་གཉིས་ཕྱེ་ནས། སུག་པ་ལག་པའི་ཟུར་སྤྲད་དེ། ལག་མཐིལ་བཀན་ལ་མཛུབ་མོ་ནི་ཕན་ཚུན་རྒྱུ་བར་བགྱིའོ། །རིག་སྔགས་ནི་འདི་ལྟ་སྟེ། ཨོཾ་མ་ཧཱ་བྲཧྨཱ་ཡ་
ཨེ་ཧི་ཨེ་ཧི་སྭཱ་ཧཱ། ཕྱག་རྒྱ་དང་རིག་སྔགས་འདིས་ནི་གཟུངས་ཀྱི་ཕྱག་རྒྱའི་སྒོ་མོ་ཚད་མ་མཆིས་ཤིང་གྲངས་མ་མཆིས་པ་ཐམས་ཅད་ཡང་དག་པར་སྡུད་ཅིང་འདུ་བར་བགྱིའོ། །གལ་ཏེ་ཉི་ཟླ་ལ་གཟའ་ཞུགས་པར་གྱུར་ན། ཆབ་མར་ལ་ལན་བརྒྱ་རྩ་བརྒྱད་སྔགས་ཀྱིས་གདབ་པར་བགྱིའོ། །ཡང་ན་ལན་ཉི་ཤུ་རྩ་གཅིག་སྔགས་བཟླ་བར་བགྱིའོ། །ཆབ་མར་ཕྱག་རྒྱས་བཏབ་སྟེ་འཚལ་ན་དབང་པོ་རྣོ་བར་འགྱུར་བས་གདུགས་གཅིག་ལ་ཤློ་ཀ་ཁྲི་ལོབས་པར་འགྱུར་ལགས་སོ། །ཕྱག་རྒྱའི་ཆོས་ཀྱི་སྒོ་མོ་འདི་ནི་དེ་བཞིན་གཤེགས་པ་ཉི་མའི་སྙིང་པོས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་བཀའ་སྩལ་པ་ལགས་སོ། །དེ་ལ་དགུ་པ་བྱང་ཆུབ་སེམས་དཔའ་མིག་སྟོང་པའི་རབ་ཏུ་དགའ་བའི་ཡིད་བཞིན་གྱི་ནོར་བུའི་ཕྱག་རྒྱ་ནི་འདི་ལགས་ཏེ། འགྲེང་ནས་སྙིང་གར་ཐལ་མོ་སྦྱར་ཏེ། མཐེ་བོང་གཉི་ག་ལག་མཐིལ་དུ་བཀུག་ནས་སོར་མོ་གཞན་བཞི་ནི་དྲང་པོར་བསྒྲེང་སྟ་སྙིང་གར་ཐལ་མོ་སྦྱར་ནས་རིག་སྔགས་སྔ་མ་འདོན་པར་བགྱིད་ན། གདོན་མི་འཚལ་བར་ལྷ་རྣམས་ཀྱི་གཞལ་མེད་ཁང་དག་ཏུ་འཇུག་པར་འགྱུར། ཕྱོགས་བཅུའི་སངས་རྒྱས་ཀྱི་ཞིང་རྣམས་སུ་ཀུན་ཏུ་རྒྱུ་ཞིང་རིན་པོ་ཆེ་བརྒྱད་སྟོང་བསམས་པ་བཞིན་ཐོབ་ནས་སངས་རྒྱས་རྣམས་ལ་མཆོད་པ་བགྱིད་པར་འགྱུར་ལགས་སོ། །གང་ལ་ལ་ཞིག་ཆོས་ཀྱི་སྒོ་འདི་མངོན་པར་སྒྲུབ་པ་གང་ལགས་པ་དེས་ནང་པར་སྔར་ལངས་ནས་ཁྲུས་ཡོངས་སུ་དག་པར་བགྱིས་ཏེ། ཕྱག་རྒྱ་འདི་བགྱིས་ན་ཕྱོགས་བཅུའི་སངས་རྒྱས་གང་གཱའི་ཀླུང་གི་བྱེ་མ་སྙེད་མངོན་སུམ་དུ་མཐོང་ནས། བསྐལ་པ་ཚད་མ་མཆིས་པ་སྙེད་ཀྱི་འཁོར་བའི་ལས་ངན་པའི་ཁ་ན་མ་ཐོ་བ་ལྕི་བ་རྣམས་ཡོངས་སུ་བྱང་བར་འགྱུར་བས། དེའི་སླད་དུ་ཡོན་ཏན་འདི་ལྟ་བུའི་བསྔགས་པ་བརྗོད་པར་ལགས་སོ། །དེ་ལ་བཅུ་པ་བྱང་ཆུབ་སེམས་དཔའ་མིག་སྟོང་པའི་སྨོན་པ་རྣམས་ཡིད་བཞིན་དུ་མངོན་པར་འགྲུབ་པའི་ཕྱག་རྒྱ་ནི་འདི་ལགས་ཏེ། ཕྱག་རྒྱ་སྔ་མ་བཞིན་དུ་བགྱིས་པ་ལས། མཛུབ་མོ་གཉིས་བཀུག་སྟེ་མཐེ་བོང་གཉིས་ཀྱི་སེན་མོ་
མནན་ནས་མཛུབ་མོའི་སེན་མོ་ནི་རྒྱབ་སྤྲད་པར་བགྱི་སྟེ། རིག་སྔགས་ནི་སྔ་མ་ཉིད་བཟླ་བར་བགྱིའོ། །དེ་ལྟར་བགྱིས་ན་སྨོན་པ་རྣམས་མངོན་པར་འགྲུབ་ཅིང་གདོན་མི་ཟ་བར་བྱང་ཆུབ་ཀྱི་ལམ་ལས་ལྡོག་པར་མི་འགྱུར་ལགས་སོ། །དེ་ལ་བཅུ་གཅིག་པ་བྱང་ཆུབ་སེམས་དཔའ་མིག་སྟོང་པའི་འགོག་པའི་སྙོམས་པར་འཇུག་པའི་ཏིང་ངེ་འཛིན་གྱི་ཕྱག་རྒྱ་ནི་འདི་ལགས་ཏེ། ཕྱག་རྒྱ་སྔ་མ་བཞིན་དུ་བགྱིས་པ་ལས་མཛུབ་མོ་ལྔ་དྲང་པོར་བསྒྲེང་སྟེ་ཐལ་མོ་དབྱེ་བར་བགྱིའོ། །ཕྱག་རྒྱ་འདི་ནི་བདག་སྔོན་རྒྱུའི་ས་ལ་གནས་པའི་ཚེ་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་རྣམས་ཀྱིས་བདག་ལ་སྩལ་བས། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་མངོན་སུམ་དུ་གྱུར་པ་ལགས་ཏེ། རིག་སྔགས་ནི་སྔ་མ་ཉིད་བཟླ་བར་བགྱིའོ། །དེ་ལ་བཅུ་གཉིས་པ་བྱང་ཆུབ་སེམས་དཔའ་མིག་སྟོང་དང་ལྡན་པས་སངས་རྒྱས་སྤྱན་འདྲེན་པའི་ཏིང་ངེ་འཛིན་གྱི་ཕྱག་རྒྱ་ནི་འདི་ལགས་ཏེ། ཕྱག་རྒྱ་སྔ་མ་བཞིན་དུ་སྙིང་གར་ཐལ་མོ་སྦྱར་ནས་མཛུབ་མོ་གཉིས་ཕན་ཚུན་རྒྱུ་བར་བགྱིའོ། །རིག་སྔགས་ནི་འདི་ལྟ་སྟེ། ཨོཾ་སརྦ་བུདྡྷ་ས་མ་ཡ། ཨེ་ཧི་ཨེ་ཧི། བྲཧྨ་ཤུདྡྷ་སཏྭ་སྭཱ་ཧཱ། དེ་ལ་བྱང་ཆུབ་སེམས་དཔའ་མིག་སྟོང་ལག་སྟོང་དང་ལྡན་པའི་དཀྱིལ་འཁོར་འདྲི་བའི་ཆོ་ག་ནི་འདི་ལགས་ཏེ། བཅོམ་ལྡན་འདས་རྫུ་འཕྲུལ་ཆེན་པོ་དང་ལྡན་པའི་ཡུམ་གྱི་དཀྱིལ་འཁོར་དང་། རིག་སྔགས་དང་། ཕྱག་རྒྱའི་ཆོས་འདིས་ནི་དུས་ཐ་མའི་དུས་ཀྱི་ཚེ་རིག་སྔགས་འཛིན་པ་རྣམས་དེ་བཞིན་གཤེགས་པའི་རིག་སྔགས་ཀྱི་གཟུངས་སྔགས་ཀྱི་དཀྱིལ་འཁོར་མཉམ་པའི་ཏིང་ངེ་འཛིན་ཐམས་ཅད་མྱུར་དུ་གསལ་བར་མཐོང་བར་འགྱུར་བར་བགྱིད་པས། རིག་སྔགས་འཛིན་པའི་གང་ཟག་གང་ལགས་པ་དེས་རྟག་པར་ངག་བསྡམས་ཏེ། བྲེ་མོའི་གཏམ་རྣམས་སྨྲ་བར་མི་བགྱིའོ། །གཟུངས་ལས་འབྱུང་བའི་རྫུ་འཕྲུལ་དང་། ཏིང་ངེ་འཛིན་དང་། མཚན་མ་ཡ་མཚན་ཅན་རྣམ་པ་སྣ་ཚོགས་གང་ལགས་པ་དེ་དག་མ་བརྟགས་པར་བབ་ཅོལ་དུ་བརྒྱུད་པར་མི་བགྱིའོ། །ཡོངས་སུ་དང་བའི་སེམས་ཀྱིས་དྲན་པ་ཉེ་བར་གཞག་ནས་
སྐད་ཅིག་ཙམ་དུ་ཡང་རྣམ་པར་གཡེང་བར་མི་བགྱིའོ། །གལ་ཏེ་ཁེ་ལ་གདུ་བས་སླད་རོལ་དུ་གཞན་དག་ལ་ཐ་དད་པའི་མཚན་མ་སྟོན་པར་བགྱིད་ན། སྡིག་པའི་ལས་སྦྱོང་བར་འཚལ་ཡང་དེ་དག་འགྲུབ་པར་མི་འགྱུར་ལགས་སོ། །གལ་ཏེ་ཡང་དག་པའི་ཡོངས་སུ་དང་བ་དང་། ཆོས་ཀྱི་བསམ་པ་གང་ལགས་པ་དེས་བསྒོམ་པར་མི་བགྱིད་ན། བགྱིས་པ་རྣམས་ཆབ་འཚལ་ཞིང་དོན་མ་མཆིས་པར་སྡུག་བསྔལ་སྣ་ཚོགས་མྱོང་བ་ཙམ་དུ་བས་ཀྱི། ནམས་ཀྱང་སྒྲུབ་པ་དག་མངོན་པར་འགྲུབ་པར་མི་འགྱུར་བས་རྟག་པར་ནན་ཏན་བརྩོན་འགྲུས་ཀྱིས་ཚུལ་ཁྲིམས་ཡོངས་སུ་དག་པར་བསྲུངས་ནས་དཀུ་བ་རྣམ་པ་ལྔ་དང་། ཤ་ཆང་འཚལ་བར་མི་བགྱིའོ། །གལ་ཏེ་དབྱེན་ཚིག་དང་། གཡོ་སྒྱུའི་ཚིག་དང་། ཕྲག་དོག་གི་ཚིག་སྨྲ་བར་གྱུར་ཏམ། དཀྱིལ་འཁོར་དང་། ཕྱག་རྒྱ་དང་། རིག་སྔགས་ཀྱི་ཆོ་ག་རྐུ་བའི་ནོངས་པ་འདི་དག་བྱུང་བར་གྱུར་ན། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་སྤོང་བར་མཛད་པས། འདི་སྐད་དུ་ངས་ཁྱེད་སྲངས་པ་མ་ཡིན་ཡང་གཟིགས་ཤིང་ཡོངས་སུ་བསྡུ་བའི་འོས་མ་ཡིན་ནོ་ཞེས་གསུང་བར་འགྱུར་ཏེ། བཅོམ་ལྡན་འདས་གང་ཟག་དེ་དག་ནི་དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་ཡོངས་སུ་དག་པ་བཤིག་པ་དང་། དཀོན་མཆོག་གསུམ་དང་། ཡང་དག་པའི་ཆོས་དང་། དགེ་བའི་མཚན་ཉིད་ཐམས་ཅད་ལ་སྐུར་ཅིང་འཇིག་པར་བགྱིད་པ་ལགས་པས། དེ་ལྟ་བུའི་གང་ཟག་དེ་དག་ནི་རྟག་པར་ལྷའི་བུའི་བདུད་དང་། འདྲེ་གདོན་ཐམས་ཅད་དང་། མུ་སྟེགས་ཅན་རྣམས་དང་། བྱི་ནཱ་ཡ་ཀ་རྣམས་དང་། ཁམས་གཅིག་ཏུ་བསྡུ་བ་དང། ལས་གཅིག་ལ་གནས་པ་དང་། གཏན་དུ་སྐྱབས་མ་མཆིས་པར་གྱུར་པ་ལགས་པས། འཕགས་པ་རྣམས་ཀྱིས་ཡོངས་སུ་སྐྱོབ་པར་མི་མཛད་ཅིང་། རྟག་པར་སངས་རྒྱས་དང་། བྱང་ཆུབ་སེམས་དཔའ་དང་། འཕགས་པ་དང་། ལྷ་དང་། དྲང་སྲོང་ཐམས་ཅད་ཀྱིས་དམོད་པར་འགྱུར་བར་རིག་པར་བགྱི་ལགས་སོ། །ལམ་སུན་འབྱིན་ཅིང་
ཆོས་འཇིག་པར་བགྱིད་པའི་གང་ཟག་དེ་ལྟ་བུ་དེ་དག་གདུགས་མཚན་དུ་རྟག་པར་གཟུངས་འདི་རྗེས་སུ་དྲན་པར་བགྱིད་ཀྱང་། བཅོམ་ལྡན་འདས་བདག་གིས་གང་ཟག་དེ་དག་ནམས་ཀྱང་འགྲུབ་པར་མི་འགྱུར་བར་མཐོང་ལགས་ཏེ། དེ་ལྟར་མི་འགྲུབ་པ་དེ་ཡང་བདག་གིས་ནོངས་པ་མ་ལགས་ཀྱི། དེ་དག་རང་ཉིད་ཀྱིས་ནོངས་སྐྱོན་ལགས་པས་དོན་དེའི་སླད་དུ་གཟུངས་འདིའི་ཆོ་ག་དང་། གླེགས་བམ་དེ་དག་གིས་མཐོང་ཞིང་ཐོས་པར་ཡང་མི་བགྱི། འདོན་ཅིང་འཛིན་དུ་སྩལ་བར་ཡང་མི་བགྱི་སྟེ། གང་དག་ཚངས་པར་སྤྱོད་པ་ཡོངས་སུ་དག་པ་སྲུང་བ་དང་། བྱམས་པ་དང་། སྙིང་རྗེའི་སེམས་དང་ལྡན་པ་དང་། སེམས་ཅན་ལ་སྙིང་བརྩེ་ཞིང་བྱང་ཆུབ་ཡོངས་སུ་གཉེར་བར་བགྱིད་པ་དག་གིས་ཡི་གེར་བྲིས་ནས་ཀློག་པ་དང་། འདོན་པ་དང་། ཡོངས་སུ་འཛིན་པར་གྱུར་ན། ཡུམ་གྱི་གཟུངས་ཀྱི་དཀྱིལ་འཁོར་མངོན་པར་འགྲུབ་པར་འགྱུར་བས་སོ། །ཆོས་ཀྱི་ཆོ་ག་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་མཆོག་ཏུ་གསང་བའི་སྙིང་པོ་ལགས་པའི་སླད་དུ་རིག་སྔགས་འཛིན་པས་ཡང་དག་པའི་སེམས་དང་། བརྩོན་འགྲུས་ཀྱི་སེམས་ཀྱིས་ལུས་ཀྱི་ཡན་ལག་དང་། ཉིང་ལག་དང་། རུས་པ་དང་། ཤ་དང། རྩ་རྒྱུས་དང་། རྐང་དང་། མགོ་དང་། མིག་ལ་སོགས་པ་ཡང་ཡོངས་སུ་སྤངས་ནས་གཞན་དག་ལ་སྩལ་ཏེ། ཆོས་འདི་ཡོངས་སུ་གཉེར་ནས་རྟག་པར་ནན་ཏན་བརྩོན་འགྲུས་ཀྱིས་མངོན་པར་སྒྲུབ་པར་འཚལ་ན་རིན་པོ་ཆེ་དང་། འབྲུ་དང་། དར་ཟབ་དང། གོས་དང་། མལ་ཆ་དང་། སྨན་དང་། ནོར་རྫས་རྣམ་པ་སྣ་ཚོགས་རྣམ་པར་གྲོལ་བའི་ཡུམ་གྱི་གཟུངས་དང་། དཀྱིལ་འཁོར་དང་། ཕྱག་རྒྱའི་གཟུགས་བརྙན་གྱི་ཆོས་ཀྱི་ཆེད་དུ་གཏོང་བ་ལྟ་སྨོས་ཀྱང་ཅི་འཚལ་ཏེ། སློབ་དཔོན་གྱིས་བསྟན་པ་ཇི་ལྟ་བ་བཞིན་དུ་སེམས་རྩེ་གཅིག་ཏུ་བསྒྲུབ་པར་བགྱིའོ། །དེ་ཅིའི་སླད་དུ་ཞེ་ན། རྣམ་པར་གྲོལ་བའི་གཟུངས་ཀྱི་ཆོས་འདི་ནི་སླད་མའི་དུས་ཐ་མའི་ཚེ་སེམས་ཅན་རྣམས་ལ་སངས་
རྒྱས་ཀྱི་མཛད་པ་བགྱིས་ནས། ཡང་དག་པའི་སྤྱོད་པ་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་བརྩོན་འགྲུས་དང་། ལྟ་བས་བགྲོད་པའི་ཕྱོགས་དང་། རྣམ་པར་གྲོལ་བའི་ལམ་མངོན་པར་འགྲུབ་པར་བགྱིད་ཅིང་། དེ་དག་དུས་འདི་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བའི་བར་དུ་ནམས་ཀྱང་ལྡོག་པར་མི་འགྱུར་བར་བགྱིད་པས་སོ། །དཀྱིལ་འཁོར་དེ་ཡང་གཙུག་ལག་ཁང་གི་ནང་ངམ། རིའམ། ཆབ་མིག་འབབ་པའམ། ནགས་ཚལ་གྱི་དྲུང་དུ་ཡང་རུང་སྟེ། ཉེ་འཁོར་ཀུན་དུ་ཁྲུ་གང་ཡན་ཆད་ནི་ཤིང་གི་རྩ་བ་དང་། དོག་ས་ངན་པ་དང་། གྱོ་མོ་དང་། གོར་མ་དང་། རུས་པ་ལ་སོགས་པ་ཅི་མཆིས་པ་བརྐོས་ཏེ་བསལ་ནས། དོག་ས་བཟང་པོ་ལས་རྨང་ཁྲུ་གང་ཙམ་དུ་བླངས་ཏེ་བརྡུངས་ནས་མཉམ་པོར་བགྱིས་ལ་བ་ལང་གི་ལྕི་བ་དང་། སྤོས་ཆབ་དོག་ས་སེར་པོ་དང་བསྲེས་ནས་འཇིམ་པ་བགྱིས་ཏེ་ལེགས་པར་བྱུག་ཅིང་ཞལ་ཞལ་བགྱིས་ནས་གླིང་ལྔར་བགོ་བར་བགྱིའོ། །དེ་ལ་དབུས་ཀྱི་གླིང་ནི་ཞེང་དུ་ཁྲུ་གསུམ་ཙམ་དུ་བགྱིས་ཏེ། དབུས་ཁོ་ནར་ཁྲུ་དོ་གྲུ་བཞི་ལྷམ་པར་མཆིས་པའི་རིན་པོ་ཆེའི་འཁོར་ལོ་རྩིབས་བརྒྱ་རྩ་བརྒྱད་དང་ལྡན་པ་ཅིག་བྲི་བར་བྱའོ། །གཞན་ཡང་འཁོར་ལོའི་དབུས་སུ་རིན་པོ་ཆེའི་པདྨ་ཁ་བྱེ་བ་འདབ་མ་སུམ་ཅུ་རྩ་གཉིས་མཆིས་པ་ཁྲུ་གང་བ་ཅིག་བྲི་བར་བགྱིའོ། །གཞན་ཡང་འཁོར་ལོའི་ཐ་མ་འཁོར་བར་འོད་འབར་བ་བྲི་བར་བྱའོ། །དེའི་རྗེས་ལ་གླིང་གི་གྲྭ་བཞིར་པདྨ་ཁ་བྱེ་བ་རེ་རེ་བྲི་བར་བགྱིའོ། །གཞན་ཡང་པདྨ་རེ་རེའི་སྟེང་དུ་ཡིད་བཞིན་གྱི་ནོར་བུ་རེ་རེ་བྲིས་ནས། ནོར་བུ་བཞི་པོའི་སྟེང་དུ་འོད་འབར་བ་བྲི་བར་བགྱིའོ། །གཞན་ཡང་འདབ་མ་སུམ་ཅུ་རྩ་གཉིས་དང་ལྡན་པའི་པདྨ་དེའི་སྟེང་དུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་གཟུགས་ཙནྡན་དཀར་པོ་ལས་བགྱིས་པ་ཅིག་གཞག་པར་བགྱིའོ། །དེ་ནས་གླིང་གཉིས་པ་ནི་ཞེང་དུ་ཁྲུ་གང་བར་བགྱིས་ནས། སྔར་གྲྭ་བཞིར་པདྨ་ཁ་བྱེ་བ་རེ་རེ་བྲི་བར་བགྱིའོ། །གཞན་ཡང་པདྨ་དེ་དག་རེ་རེའི་སྟེང་དུ་རི་རབ་ལྷུན་པོའི་སྟན་རིམ་
པ་གསུམ་མཆིས་པ་གསུམ་གསུམ་བྲིས་ནས་བྱང་ཤར་མཚམས་ཀྱི་སྟན་ལ་ནི་དབང་ཕྱུག་ཆེན་པོའི་ལྷ་བྲིའོ། །ཤར་ལྷོ་མཚམས་ཀྱི་སྟན་ལ་ནི་ལྷ་མཐུ་ཆེན་པོ་བྲིའོ། །ལྷོ་ནུབ་མཚམས་ཀྱི་སྟན་ལ་ནི་ཚངས་པ་ཆེན་པོ་བྲིའོ། །ནུབ་བྱང་མཚམས་ཀྱི་སྟན་ལ་ནི་བརྒྱ་བྱིན་བྲི་བར་བྱའོ། །གཞན་ཡང་ངོས་བཞིར་ནི་རིན་པོ་ཆེའི་མེ་ཏོག་དང་། ཕྲེང་བ་བཅུ་དྲུག་བྲི་བར་བགྱིའོ། །དེ་ནས་གླིང་གསུམ་པ་ནི་ཞེང་དུ་ཁྲུ་དོ་པར་བགྱིས་ཏེ་ས་གཞི་སྔོན་པོ་ལ་གསེར་གྱི་ཐིག་བཀྱེ་བ་འབའ་ཞིག་བྲི་བར་བགྱིའོ། །དེ་ནས་གླིང་བཞི་པ་ནི་ཞེང་དུ་ཁྲུ་གང་བར་བགྱིས་ཏེ། ངོས་བཞི་སྤྱི་ལ་བར་ཆད་ཉི་ཤུ་རྩ་བརྒྱད་དུ་བྱས་ནས་བར་ཆད་དུ་མ་བུ་རེ་རེའི་ནང་དུ་ཡང་པདྨ་ཁ་བྱེ་བ་རེ་རེ་བྲི་བར་བགྱིའོ། །གཞན་ཡང་གོ་རིམས་བཞིན་དུ་པདྨ་དེ་དག་རེ་རེའི་སྟེང་དུ་ཡང་རྡོ་རྗེ་ཐོ་བ་དང་། རྩེ་གསུམ་པའི་ཕྱག་རྒྱ་དང་། དགྲ་སྟའི་ཕྱག་རྒྱ་དང་། གྲིའི་ཕྱག་རྒྱ་དང་། རལ་གྲིའི་ཕྱག་རྒྱ་དང་། དུང་གི་ཕྱག་རྒྱ་དང་། ཆུ་གྲིའི་ཕྱག་རྒྱ་དང་། ཞགས་པའི་ཕྱག་རྒྱ་དང་། དབྱིག་པ་ཐོགས་པའི་ཕྱག་རྒྱ་དང་། གདུགས་ཀྱི་ཕྱག་རྒྱ་དང་། ཡིད་བཞིན་གྱི་ནོར་བུའི་ཕྱག་རྒྱ་དང་། གཤིན་རྗེའི་དབྱིག་པའི་ཕྱག་རྒྱ་དང་། བྱི་ནཱ་ཡ་ཀའི་ཕྱག་རྒྱ་དང་། མཚོན་ཆའི་ཕྱག་རྒྱ་དང་། འཁོར་ལོའི་ཕྱག་རྒྱ་དང་། སུག་པ་ལག་པ་སྣ་ཚོགས་དང་ལྡན་པའི་ཕྱག་རྒྱ་རྣམས་སོ་སོར་བྲིས་ནས། ཕྱག་རྒྱ་དེ་དག་ཀུན་ལའང་འོད་འབར་བ་དག་བྲི་བར་བགྱིའོ། །གཞན་ཡང་ལྷོ་ཕྱོགས་ཀྱི་ཆབ་སྒོར་བར་ཆད་བགྱིས་པའི་ནང་དུ་ནི་འཐབ་བྲལ་གྱི་ལྷ་བྲིའོ། །ནུབ་ཕྱོགས་ཀྱི་ཆབ་སྒོར་བར་ཆད་བགྱིས་པའི་ནང་དུ་ནི་ཆུ་ལྷ་བྲིའོ། །བྱང་ཕྱོགས་ཀྱི་ཆབ་སྒོར་བར་ཆད་བགྱིས་པའི་ནང་དུ་ནི་ཀུ་བེ་ར་བྲིའོ། །ཤར་ཕྱོགས་ཀྱི་ཆབ་སྒོར་བར་ཆད་བགྱིས་པའི་ནང་དུ་ནི་ལྷ་གཞོན་ནུ་བྲི་བར་བགྱིའོ། །དེ་ནས་གྲུ་བཞིའི་གནས་སོ་སོར་ནི་རྒྱལ་པོ་ཆེན་པོ་བཞི་ཁྲོ་གཉེར་ཅན་གཡོག་འཁོར་དང་བཅས་པ་བྲི་བར་བགྱིའོ། །དེ་ནས་གླིང་ལྔ་པ་ནི་ཁྲུ་གང་བར་བགྱིས་ཏེ། ངོས་བཞི་ཀུན་དུ་འབྲས་བུའི་ལྗོན་ཤིང་དང་། མེ་ཏོག་གི་ལྗོན་ཤིང་དང་། རིན་པོ་ཆེའི་ལྗོན་ཤིང་རྣམ་པ་སྣ་ཚོགས་
བྲི་བར་བགྱིའོ། །གཞན་ཡང་གྲྭ་བཞི་ཀུན་དུ་རིན་པོ་ཆེའི་རི་རབ་ལྷུན་པོ་རེ་རེ་བྲི་བར་བགྱིའོ། །ཆབ་སྒོ་བཞིར་ནི་རྒྱ་མཚོ་ཆེན་པོའི་ཆབ་བྲི་བར་བགྱིའོ། །དཀྱིལ་འཁོར་གྱི་སླད་ནང་གི་གླིང་རྣམས་ཀྱིས་གཞི་ནི་ཁ་དོག་སྔོན་པོར་བགྱིའོ། །གཞན་ཡང་སླད་ནང་གི་གླིང་རྣམས་ཀྱི་ནུབ་ཕྱོགས་ཀྱི་ཆབ་སྒོའི་ལྷོའི་ངོགས་ཀྱི་ཟུར་ལ་སྔགས་མཁན་འབྱུང་ཞིང་འཇུག་པའི་ཆབ་སྒོ་གཅིག་དབྱེ་བར་བགྱིའོ། །གཞན་ཡང་སྤྱན་རས་གཟིགས་དབང་ཕྱུག་མིག་སྟོང་ལག་སྟོང་དང་ལྡན་པའི་གཟུགས་བགྱིས་པ་གཅིག་དབུས་སུ་དཔྱངས་ཏེ་ཁ་ཤར་ཕྱོགས་སུ་བལྟ་བར་བགྱིའོ། །གཞན་ཡང་མིག་སྟོང་ལག་སྟོང་དང་ལྡན་པའི་མདོ་སྡེ་གླེགས་བམ་གཅིག་པདྨ་འདབ་མ་སུམ་ཅུ་རྩ་གཉིས་མཆིས་པའི་དཀྱིལ་འཁོར་གྱི་སྟེང་དུ་བཞག་ནས། གཟུགས་བགྱིས་པ་དེའི་མདུན་དུ་གཞན་ཡང་ཙནྡན་དཀར་པོའི་དྲི་ཆབ་ཞལ་བུ་བཅུ་དྲུག་དང་། ཞལ་ཟས་རྣམ་པ་སྣ་ཚོགས་དང་། ཟས་དཀར་གསུམ་དང་། ཤིང་ཏོག་ལ་སོགས་པས་བཀང་བའི་གཞོང་བུ་ཉི་ཤུ་རྩ་ལྔ་དང་། སྤོས་ཆབ་བྲེ་གང་དང་། བུམ་པ་དར་ཚོན་སྣ་ཚོགས་དང་། མེ་ཏོག་དང་། ལྗོན་ཤིང་གི་ཡལ་ག་ལ་སོགས་པས་ཁ་བརྒྱན་པ་ཉི་ཤུ་རྩ་ལྔ་དང་། མེ་ཏོག་དང་། ཕྲེང་བ་སྣ་སྣ་ནས་ཉི་ཤུ་ཉི་ཤུ་དང་། མར་མེ་ཉི་ཤུ་རྩ་བརྒྱད་དང་། བྱུག་སྤོས་དང་། སྤོས་ཀྱི་ཕྱེ་མ་དང་། དེ་ལ་སོགས་པའི་སྤོས་དེབ་ཚེ་ཉི་ཤུ་དང་། བྱང་ཆུབ་སེམས་དཔའི་གཟུགས་བྲིས་པའི་འཕན་དང་། དར་ཚོན་སྣ་ཚོགས་ལས་བགྱིས་པའི་འཕན་སྤྱིར་ཕྲེང་ཉི་ཤུ་རྩ་ལྔ་བཤམ་པར་བགྱིའོ། །འདི་ལྟར་མཆོད་པ་བགྱིད་པའི་ཞལ་སྡེར་དང་། སྣོད་སྤྱད་དང་། བུམ་པ་ལ་སོགས་པ་དེ་དག་ཐམས་ཅད་ཀྱང་གསེར་དང་། དངུལ་དང་། འཁར་བ་ལ་སོགས་པ་ལས་བགྱིས་པ་ལས་སྦྱར་བར་བགྱིའོ། །གལ་ཏེ་ཡང་དག་པར་མ་མཆིས་ན་བརྙན་མ་ཡང་རུང་ལགས་སོ། །འདི་ལྟར་ཡོ་བྱད་དེ་དག་ཐམས་ཅད་ཀྱང་སླད་ནང་གི་གླིང་རྣམས་ངོས་བཞིར་ཆོས་བཞིན་དུ་བྲི་ཞིང་དགྲམ་པར་བགྱིའོ། །གདན་དང་། མེ་ཏོག་སྣ་ཚོགས་གཟུགས་ཤིང་གཏོར་བར་བགྱིའོ། །འབྲས་
སཱ་ལུའི་མེ་ཏོག་དང་། ཡུངས་ཀར་དང་། མེ་ཏོག་རྣམ་པ་སྣ་ཚོགས་དཀྱིལ་འཁོར་གྱི་སྟེང་དུ་གཏོར་བར་བགྱིའོ། །ཞལ་ཟས་དེ་དག་ཀྱང་གདུགས་གཅིག་བཞིན་དུ་གསར་དུ་བགྱིས་པ་བཟང་པོ་ལས་མཆོད་པར་བགྱིའོ། །སྔགས་མཁན་དེ་ཡང་འབྱུང་འཇུག་གི་ཚེ་ཁྲུས་ཡོངས་སུ་དག་པར་བགྱིས་ནས་བྱུག་སྤོས་ཀྱིས་བྱུགས་ཏེ། གོས་སར་པ་གཙང་མ་བགོ་བར་བགྱིའོ། །ཟས་དཀར་གསུམ་འཚལ་ནས་ཙནྡན་དང་། ཨ་ག་རུ་དང་། ཏུརུཥྐ་དང་། ག་པུར་ལ་སོགས་པ་བསྲེས་ཏེ་གདུགས་གཅིག་ལ་དུས་གསུམ་དུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་མིག་སྟོང་ལག་སྟོང་དང་ལྡན་པའི་གཟུགས་བགྱིས་པ་ལ་མཆོད་པར་བགྱིའོ། །ནང་གི་གླིང་གསུམ་པའི་ནང་དུ་མིག་སྟོང་པའི་གཟུགས་བཞག་པའི་མདུན་དུ་རང་གིས་བྱང་ཆུབ་སེམས་དཔའི་སྡོམ་པ་གསུམ་པོ་དག་ཡང་དག་པར་བླང་བར་དམ་བཅའ་བར་བགྱིའོ། །གདུགས་མཚན་དུ་སླད་རོལ་གྱི་གླིང་གི་ནུབ་ཕྱོགས་ཀྱི་ཆབ་སྒོར་སྐྱིལ་མོ་ཀྲུང་བཅས་ཏེ། མཆིས་ནས་གདུགས་གཅིག་ལ་ཡུམ་གྱི་གཟུངས་ལན་སྟོང་རྩ་བརྒྱད་བར་ཆད་མ་མཆིས་པར་བཟླས་བརྗོད་བགྱིས་ནས་གདུགས་ཉི་ཤུ་རྩ་གཅིག་གི་བར་དུ་བསམ་པ་གཏུགས་ཏེ་མཆོད་པར་བགྱིའོ། །གཞན་ཡང་དུས་དྲུག་ཏུ་དཀྱིལ་འཁོར་གྱི་ནུབ་ངོས་ཀྱི་ཟུར་གྱི་ཆབ་སྒོ་ནས་དཀྱིལ་འཁོར་གྱི་ནང་དུ་ཞུགས་ནས། གླིང་གསུམ་པའི་ནུབ་ཕྱོགས་ཀྱི་ཆབ་སྒོར་འགྲེང་སྟེ། སྔར་བསྟན་པའི་ཕྱག་རྒྱ་དང་པོ་དང་། གཉིས་པ་དང་། གསུམ་པ་ནས་བཅུ་གཉིས་པ་སངས་རྒྱས་སྤྱན་འདྲེན་པའི་ཏིང་ངེ་འཛིན་གྱི་བར་གྱི་ཕྱག་རྒྱ་ཀུན་བགྱིས་ནས་སྔགས་ལན་བདུན་བདུན་བཟླ་བར་བགྱིའོ། །ཕྱག་རྒྱ་བཅུ་གཉིས་པའི་བར་དུ་བགྱིས་ལགས་ནས་ཀྱང་བདག་ཉིད་བྱང་ཆུབ་ཆེན་པོའི་སྨོན་ལམ་ཤིན་ཏུ་བརྟན་པ་ལས་ཕྱིར་མི་ལྡོག་པར་བགྱིའོ་ཞེས་སྨོན་ལམ་བཏབ་ནས་གཡར་འདྲེན་པར་བགྱིད་ན། ཐམས་ཅད་ཉེ་བར་མཆི་བར་འགྱུར་བས་ལུས་དྲང་པོར་བསྲང་སྟེ་མཆིས་ནས། ངེས་པའི་སེམས་ཀྱིས་ལྷ་འདྲེ་ཐམས་ཅད་བསྒྲིབ་ཅིང་མཆོད་པ་མ་མཆིས་པར་མིག་སྔར་མཆིས་སོ་སྙམ་
དུ་འདུ་ཤེས་ཉེ་བར་བཞག་སྟེ། ཐ་དད་པའི་ཡུལ་ལ་མི་དམིགས་པར་ལུས་པོ་ཆེའི་སྔགས་སྔ་མ་ལན་ཉི་ཤུ་རྩ་གཅིག་འདོན་པར་བགྱིད་ན། དེའི་མཚན་མོ་གཟུགས་བགྱིས་པ་དེ་ལས་འོད་ཟེར་ཆེན་པོ་བྱུང་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཉིད་གདོན་མི་འཚལ་བར་མངོན་སུམ་དུ་ལུས་སྟོན་པར་འགྱུར་ཏེ། ལུས་བསྟན་ནས་མཆི་བའི་ཚེ་ཀུན་དགའ་བའི་ལུས་ཀྱི་བྱད་གཟུགས་སུ་མངོན་པར་སྤྲུལ་ནས། དགའ་ཞིང་འཛུམ་པའི་བཞིན་གྱིས་རྣལ་འབྱོར་པ་དེ་ལ་ཅི་ཞིག་དགོས་གང་ཞིག་སྨོན་ཅེས་འདྲི་བར་འགྱུར་བས། དེའི་ཚེ་སྔགས་མཁན་གྱིས་འདི་སྐད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། གཟུངས་དང་། ཏིང་ངེ་འཛིན་གྱི་ཆོས་ཡོངས་སུ་གཉེར་བ་དང་། གཞན་ཡང་དཀྱིལ་འཁོར་དང་། ཕྱག་རྒྱ་དང་། སྔགས་ཀྱི་ཆོ་ག་ཐམས་ཅད་མངོན་པར་འགྲུབ་པ་དང་།འདྲེ་གདོན་ཐམས་ཅད་གདུལ་ཞིང་ངག་ཉན་པར་འགྱུར་བར་འཚལ་ལོ་ཞེས་ལན་གདབ་པར་བགྱིའོ། །དེ་ལྟར་སྨོན་པ་རྣམས་གྲུབ་ནས་ཀྱང་བདག་ཉིད་རིག་པར་བགྱིའི་གཞན་དག་ལ་བརྗོད་པར་མི་བགྱིའོ། །དཀྱིལ་འཁོར་གྱི་ཆོ་ག་འདི་ནི་བལ་རས་སམ། བཙོ་རས་ལ་རི་མོ་བྲིས་ཏེ་བགྱིས་ན་ཡང་རུང་ལགས་སོ། །སྨོན་པ་ཐམས་ཅད་འགྲུབ་པར་འཚལ་ན་ཆབ་ཀྱི་དཀྱིལ་འཁོར་གྲུ་བཞི་བ་བགྱིས་ལ། ཨ་ག་རུ་བསྲེགས་ཏེ། ལུས་པོ་ཆེའི་སྔགས་སྔ་མ་ལན་སྟོང་རྩ་བརྒྱད་བཟླས་ནས། བཅུ་པ་སྨོན་པ་རྣམས་ཡིད་བཞིན་དུ་འགྲུབ་པའི་ཕྱག་རྒྱ་སྔ་མ་བགྱིས་ན། སྨོན་པ་ཐམས་ཅད་བསམས་པ་བཞིན་དུ་འགྲུབ་ཅིང་ཡོངས་སུ་རྫོགས་པར་འགྱུར་ལགས་སོ། །གལ་ཏེ་སྐྱེ་བོ་མང་པོ་ཐམས་ཅད་དགའ་བར་འགྱུར་བར་འཚལ་ན་རབ་ཏུ་དགའ་བའི་ཡིད་བཞིན་གྱི་ནོར་བུའི་ཕྱག་རྒྱ་སྔ་མ་བགྱིས་ནས། ལུས་པོ་ཆེའི་སྔགས་ཀྱིས་ཏིལ་འབྲུ་ལ་ལན་ཉི་ཤུ་རྩ་གཅིག་གདབ་པར་བགྱིའོ། །ཡང་ན་སྔགས་ལན་རེ་བཟླས་ནས་ལན་རེ་ཞུགས་ཀྱི་ནང་དུ་དོར་བ་ལན་སྟོང་རྩ་བརྒྱད་ཚང་བར་བགྱིས་ན་ཐམས་ཅད་ཡིད་བཞིན་དུ་དགའ་
བར་འགྱུར་ལགས་སོ། །གནོད་སྦྱིན་རྣམས་དགའ་བར་འཚལ་ན་གནོད་སྦྱིན་གྱི་ཀུན་དགའ་ར་པའི་ལྗོན་ཤིང་གི་ཡལ་ག་བླངས་ཏེ། ལན་ཉི་ཤུ་རྩ་གཅིག་སྔགས་ཀྱིས་བཏབ་ནས་ཀུན་དགའ་ར་བར་བོར་ན་དགའ་བར་འགྱུར་ལགས་སོ། །མི་མ་རུངས་པ་དགྲར་གྱུར་པ་གདུལ་བར་འཚལ་ན་ཤིང་ཁོང་ལེན་འབོག་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་ནས། སྔགས་ལན་རེ་བཟླ་ཞིང་ལན་རེ་ཞུགས་སུ་དོར་བ་ལན་བརྒྱ་རྩ་བརྒྱད་ཚང་བར་བགྱིས་ན་སྐྱབས་སུ་མཆི་ཞིང་ཐུལ་བར་འགྱུར་ལགས་སོ། །འདྲེ་གདོན་གདུལ་དཀའ་བ་ཞིག་མཆིས་ན་གུ་གུལ་དང་། ཡུངས་ཀར་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ། སྔགས་ལན་རེ་བཟླ་ཞིང་ལན་རེ་ཞུགས་སུ་དོར་བ་ལན་བརྒྱ་རྩ་བརྒྱད་ཚང་བར་བགྱིས་ན་འདྲེ་གདོན་ཐམས་ཅད་རང་དུལ་བར་འགྱུར་ལགས་སོ། །ཡུལ་ཕྱོགས་སུ་རིམས་ནད་བྱུང་བར་གྱུར་ན་ཆབ་ཀྱི་དཀྱིལ་འཁོར་གྲུ་བཞི་པ་བགྱིས་ནས། བ་མར་བཟང་པོ་ལ་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ། སྔགས་ལན་རེ་བཟླ་ཞིང་ལན་རེ་ཞུགས་སུ་དོར་བ་ལན་སྟོང་རྩ་བརྒྱད་ཚང་བར་བགྱིས་ན་རིམས་ནད་ཐམས་ཅད་ཞི་བར་འགྱུར་རོ། །ཡང་ན་ཆབ་ཉུང་ཟད་ཅིག་བླངས་ཏེ་རིམས་ཀྱིས་ཐེབས་པ་འཚལ་དུ་སྩལ་ན་འཕྲལ་དུ་འཚོ་བར་འགྱུར་ལགས་སོ། །སྔོན་ཡུལ་གེ་བྱིན་ཞེས་བགྱི་བར་རིམས་ནད་བྱུང་ནས། གང་རིམས་ཀྱིས་བཏབ་པ་དེ་དག་གདུགས་ཞག་གཅིག་གམ་གཉིས་ལས་མི་འདའ་བར་འཆི་བའི་དུས་བགྱིད་པར་གྱུར་ཏོ། །དེའི་ཚེ་བྲམ་ཟེ་ཙིན་ཏི་ཞེས་བགྱི་བ་ཞིག་སྙིང་རྗེ་ཆེན་པོ་སྐྱེས་ནས། ཆོ་གའི་སྒོ་འདི་བཤམས་ནས་ཡུལ་ཁམས་གཅིག་གི་རིམས་ཀྱིས་ཐེབས་པ་ཐམས་ཅད་གསོས་པས། ཐམས་ཅད་ཞི་བར་གྱུར་ཏེ། རིམས་གཏོང་བའི་འདྲེ་གདོན་གྱི་རྒྱལ་པོའང་དེའི་ཚེ་ཡུལ་ནས་བྱུང་བར་གྱུར་པའི་སླད་དུ་སྨན་ཡོན་ཆེ་བར་རིག་པར་བགྱི་ལགས་སོ། །གལ་ཏེ་ཕ་རོལ་གྱི་དམག་ཚོགས་ཀྱིས་གཙེས་པར་གྱུར་ཏམ། ཆོམ་རྐུན་དང་། འཁྲུག་པ་འབྱུང་བར་གྱུར་ན་ལུས་ཀུན་སྡུད་པའི་ཕྱག་རྒྱ་དང་པོ་བགྱིས་ཏེ། རིག་སྔགས་ལན་བརྒྱ་རྩ་བརྒྱད་བཟླས་
བརྗོད་བགྱིས་ན་དགྲ་དང་ཆོམ་རྐུན་དེ་དག་ཐམས་ཅད་རང་གི་ངང་གིས་རབ་ཏུ་ཞི་བར་འགྱུར་ལགས་སོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ལས་ཀྱི་རྣམ་པར་སྨིན་པའི་དབང་གིས་ཚེ་རབས་སུ་ཉེ་བའི་ཚེ་འགོག་པའི་སྙོམས་པར་འཇུག་པའི་ཕྱག་རྒྱ་སྔ་མ་བགྱིས་ཏེ། གདུགས་རེ་བཞིན་དུ་མཆོད་པ་བགྱིས་ནས། ཨ་ག་རུ་བསྲེགས་ཏེ། རིག་སྔགས་ལན་སྟོང་རྩ་བརྒྱད་བཟླས་ནས། སྔགས་ལན་རེ་བཟླས་ནས་དེའི་མིང་ནས་ལན་རེ་འདོན་པར་བགྱིད་ན་ལས་ཀྱི་སྒྲིབ་པ་དེ་དག་ཡོངས་སུ་འབྱང་བར་འགྱུར་ལགས་སོ། །སྔོན་ཡུལ་བཱ་རཱ་ཎ་སཱིར་ཁྱིམ་བདག་ཅིག་གནས་པ་ལས། བུ་གཅིག་ལས་མ་མཆིས་པ་དེ་ལོ་བཅུ་དྲུག་ལས་མི་ཐུབ་པར་གྱུར་ནས། ལོ་བཅྭ་ལྔ་ལོན་པ་དང་། ཁྱིམ་བདག་ཁྱོ་ཤུག་མྱ་ངན་གྱིས་རོད་ཉམས་པར་གྱུར་ཏོ། །དེའི་ཚེ་བྲམ་ཟེ་ཞིག་སྒོ་ཀུན་དུ་རྒྱུ་ཞིང་ཟས་སློང་བ་ལས། ཁྱིམ་བདག་དེ་མཐོང་ནས་ཅིའི་ཕྱིར་མི་བདེ་བར་གྱུར་ཅེས་སྨྲས་པ་དང་། ཁྱིམ་བདག་གིས་ལོ་རྒྱུས་དེ་དག་རྒྱས་པར་བཤད་དོ། །དེ་ནས་བྲམ་ཟེས་ཁྱིམ་བདག་དེ་ལ་མྱ་ངན་མ་བྱེད་པར་བདག་གིས་བསྒོ་བ་བཞིན་དུ་བྱོས་ཤིག་དང་། ཁྱོད་ཀྱི་བུ་ཚེ་རིང་བར་འགྱུར་རོ་ཞེས་སྨྲས་ནས། དེའི་ཚེ་བྲམ་ཟེ་དེས་ཆོ་གའི་སྒོ་འདི་ཉིད་ཞག་བདུན་ཚང་བར་བགྱིས་པ་དང་། གཤིན་རྗེས་ཁྱིམ་བདག་དེ་ལ་ཁྱོད་ཀྱི་བུའི་ཚེའི་ཚད་ལོ་བཅུ་དྲུག་ལས་མི་ཐུབ་པས། ལོ་བཅྭ་ལྔ་ལོན་ཏེ་ལོ་གཅིག་ལས་མ་ལུས་པ་ལས། དེང་དགེ་བའི་རྐྱེན་དང་ཕྲད་པས་ལོ་བརྒྱ་ཐུབ་པར་འགྱུར་བའི་ཕྱིར་འདིར་ང་འོངས་ནས་བསྒོ་བ་ཡིན་ནོ་ཞེས་སྨྲས་པ་དང་། དེའི་ཚེ་ཁྱིམ་བདག་ཁྱོ་ཤུག་རབ་ཏུ་དགའ་ཞིང་མགུ་བར་གྱུར་པས། ཁྱིམ་གྱི་ནོར་ཅི་མཆིས་པ་བཏེག་སྟེ། སངས་རྒྱས་དང་། ཆོས་དང་། དགེ་འདུན་ལ་ཕུལ་བས། ཆོ་ག་འདི་ནི་བསམ་གྱིས་མི་ཁྱབ་པའི་མཐུ་ཆེན་པོ་དང་ལྡན་པར་རིག་པར་བགྱི་ལགས་སོ། །སྔར་འདུས་པ་ཆེན་པོའི་དཀྱིལ་འཁོར་དང་། རྡོ་རྗེའི་དཀྱིལ་འཁོར་ཆེན་པོར་ལན་གསུམ་ཞུགས་པ་ཞིག་ལགས་ན། དཀྱིལ་འཁོར་
མི་འཚལ་ཏེ། ཕྱག་རྒྱས་བགྱིས་ནས་རིག་སྔགས་བཟླས་བརྗོད་བགྱིས་པ་ཙམ་གྱིས་སྨོན་པ་རྣམས་མི་འགྲུབ་པ་གང་ཡང་མ་མཆིས་ལ། མྱུར་དུ་མངོན་པར་རྫོགས་པར་སངས་རྒྱས་པར་ཡང་འགྱུར་ལགས་སོ། །བུད་མེད་གང་ལ་ལ་ཞིག་བུ་བཙའ་བའི་ཚེ་སྡུག་བསྔལ་ཆེན་པོ་མྱོང་བར་གྱུར་ན། ཆབ་མར་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ་འཚལ་དུ་སྩལ་ན་ངེས་པར་བདེ་བར་འགྱུར་ཞིང་། ཁྱེའུ་དང་བུ་མོ་བཙས་པ་གང་ལགས་པ་དེ་དག་ཀྱང་མཚན་དང་དཔེ་བྱད་བཟང་པོ་དང་ལྡན་པར་འགྱུར། དགེ་བ་སྣ་ཚོགས་ཀྱིས་བརྒྱན་ནས་སྔོན་བསོད་ནམས་བསགས་པའི་མཐུས་སྐྱེ་བོ་མང་པོ་ཀུན་གྱི་སྙིང་དུ་སྡུག་པར་འགྱུར། རྟག་པར་མིའི་ནང་དུ་ལོངས་སྤྱོད་ཁྱད་པར་དུ་འཕགས་པ་དག་ལ་ལོངས་སྤྱོད་པར་འགྱུར་ལགས་སོ། །སེམས་ཅན་གང་ལ་ལ་ཞིག་མིག་ནད་ཀྱིས་ཐེབས་ཏེ་སྡུག་བསྔལ་ཞིང་མི་བདེ་བར་འགྱུར་ན། སྔགས་མཁན་གྱིས་བྱང་ཆུབ་སེམས་དཔའ་མིག་སྟོང་དང་ལྡན་པའི་ཕྱག་རྒྱ་བགྱིས་ནས། སྔགས་ལན་ཉི་ཤུ་རྩ་གཅིག་བཟླས་ཏེ་མིག་ལ་ཕྱག་རྒྱས་བཏབ་པར་གྱུར་ན་མིག་ཀྱང་འཚོ་བར་འགྱུར་ལ། རྒྱུ་དང་རྐྱེན་དེས་གང་ཟག་དེ་ལྷའི་མིག་ཐོབ་པར་འགྱུར་བས་ལྷ་རྣམས་གསལ་བར་མཐོང་ཞིང་ལོངས་སྤྱོད་མཆོག་ལ་ལོངས་སྤྱོད་པར་འགྱུར་ལགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་མིག་སྟོང་ལག་སྟོང་དང་ལྡན་པའི་གཟུགས་འདྲི་བའི་ཆོ་ག་ནི་རས་དཀར་པོ་ཁྲུ་བཅུ་དྲུག་པའམ། ཁྲུ་ཉི་ཤུ་པ་ཡང་རུང་སྟེ། བྱང་ཆུབ་སེམས་དཔའ་དེའི་ལུས་ནི་འཛམ་བུའི་ཆུ་བོའི་གསེར་གྱི་ཁ་དོག་ཅན་དུ་བགྱིས་ཏེ། གདོད་ལ་མིག་གསུམ་མཆིས་པ། སུག་པ་ལག་པ་སྟོང་དང་ལྡན་ཞིང་། སུག་པ་ལག་པ་སྟོང་པོ་དེ་དག་རེ་རེའི་མཐིལ་དུའང་མིག་རེ་རེ་བྲིའོ། །སུག་པ་ལག་པ་ཆེན་པོ་ཡང་དག་པ་ཉིད་ནི་བཅྭ་བརྒྱད་མཆིས་ཏེ། སྔར་སུག་པ་གཉིས་ཀྱིས་ནི་སྙིང་གར་ཐལ་མོ་སྦྱར་བར་བགྱིད་དོ། །སུག་པ་གཅིག་གིས་ནི་རྡོ་རྗེའི་ཐོ་བ་ཐོགས་སོ། །ཡང་གཅིག་གིས་ནི་རྩེ་གསུམ་པ་ཐོགས་སོ། །
ཡང་གཅིག་གིས་ནི་གླེགས་བམ་ཐོགས་སོ། །ཡང་གཅིག་གིས་ནི་རིན་པོ་ཆེའི་ཕྱག་རྒྱ་ཐོགས་སོ། །ཡང་གཅིག་གིས་ནི་འཁར་གསིལ་ཐོགས་སོ། །ཡང་གཅིག་གིས་ནི་རིན་པོ་ཆེའི་ནོར་བུ་ཐོགས་སོ། །ཡང་གཅིག་གིས་ནི་རིན་པོ་ཆེའི་འཁོར་ལོ་ཐོགས་སོ། །ཡང་གཅིག་གིས་ནི་པདྨ་ཁ་བྱེ་བ་ཐོགས་སོ། །ཡང་གཅིག་གིས་ནི་ཞགས་པ་ཐོགས་སོ། །ཡང་གཅིག་གིས་ནི་ལྕང་མའི་ལྕུག་མ་ཐོགས་སོ། །ཡང་གཅིག་གིས་ནི་འོད་ཟེར་ཁ་དོག་ལྔ་འབྱིན་པར་བགྱིད་དོ། །ཡང་གཅིག་གིས་ནི་བགྲང་ཕྲེང་ཐོགས་སོ། །ཡང་གཅིག་གིས་ནི་རིལ་བ་ཐོགས་སོ། །ཡང་གཅིག་གིས་ནི་ཟིལ་དངར་ཡོངས་སུ་གཏོང་བའི་ལག་ཏུ་སྟོན་ཏོ། །ཡང་གཅིག་གིས་ནི་རིན་པོ་ཆེའི་ཆར་སྣ་ཚོགས་འབེབས་ཤིང་མི་འཇིགས་པའི་ལག་ཏུ་སྟོན་ཏོ། །ཡང་གཉིས་ནི་ལྟེ་བའི་ཐད་ཀར་གཡོན་པ་གཡས་པས་མནན་ནས་མཐིལ་བཀན་ཏེ་མཆིས་སོ། །སུག་པ་ལག་པ་གཞན་དགུ་བརྒྱ་དགུ་བཅུ་རྩ་གཉིས་པོ་དེ་དག་ཐམས་ཅད་ནི་སྤྲུལ་པའི་སུག་པ་ལགས་ཏེ། སུག་པ་དེ་དག་ཀུན་ཀྱང་སོ་སོ་ནས་མཚོན་ཆ་དང་། ཕྱག་རྒྱ་རྣམ་པ་སྣ་ཚོགས་ཐོགས་པའོ། །ཁ་ཅིག་ནི་སུག་པ་ལག་པའི་ཕྱག་རྒྱ་རྒྱད་པ་ཉི་ཚེ་བ་ཡང་མཆིས་ཏེ། སོ་སོ་ནས་མི་མཐུན་པས་སྙིང་པོའི་མདོ་ལས། ཇི་སྐད་དུ་བྱང་ཆུབ་སེམས་དཔའ་དེ་ནི་ལྷའི་རིན་པོ་ཆེ་སྣ་བདུན་གྱི་མགོ་རྒྱན་ཐོགས་སོ། །ལག་ངར་ལ་ནི་གདུབ་ཀོར་རྣམ་པ་སྣ་ཚོགས་ཀྱིས་བརྒྱན་ཏོ། །ལུས་ལ་ནི་ཕྲེང་བ་ཐོགས་ཤིང་ལྷའི་རིན་པོ་ཆེའི་གོས་གྱ་ནོམ་པ་དག་བགོས་པ་ཡིན་ནོ་ཞེས་གསུངས་པ་ལྟ་བུའོ། །ཚོན་རྩི་དེ་དག་གི་ནང་དུ་ཀོ་བའི་སྦྱིན་སྩལ་བར་མི་བགྱིའོ། །ཀུན་དུ་རུའི་ཁུ་བ་དང་སྦྱར་བར་བགྱིའོ། །གང་དག་ཡུམ་གྱི་གཟུངས་ཀྱི་ཆོ་ག་བགྱིད་པར་འཚལ་ན་སྔར་དེའི་གཟུགས་རི་མོར་བྲིའོ། །གཟུགས་རི་མོར་བྲི་བར་ཡང་ངེས་པར་ཆོས་བཞིན་དུ་བགྱི་འཚལ་བས། རི་མོ་འདྲི་བའི་གནས་ཁང་ཉེན་འཁོར་ཀུན་དུ་ཙནྡན་དཀར་པོའི་ཆབ་ཀྱིས་དོག་ས་ལ་བྱུགས་ཏེ་དཀྱིལ་འཁོར་བགྱིའོ། །གཞན་ཡང་རི་
མོ་མཁན་འབྱུང་འཇུག་གི་ཚེ་ཁྲུས་བགྱིས་ནས་གོས་སར་པ་གཙང་མ་བགོས་ཏེ། ཉིན་རེ་བཞིན་སྡོམ་པ་བརྒྱད་ཡང་དག་པར་བླང་བར་བགྱིའོ། །ཆོས་བཞིན་དུ་གཟུགས་བྲིས་ལགས་ནས་ཀྱང་། རི་མོ་མཁན་ཆོས་བཞིན་དུ་མ་བགྱིས་པར་དོགས་པར་གྱུར་ན། དཀྱིལ་འཁོར་གྲུ་བཞི་པ་གཅིག་ཡིད་ལ་ཇི་ལྟར་མོས་པ་བཞིན་དུ་བགྱིས་ཏེ། བ་དན་དང་། མེ་ཏོག་དང་། ཞལ་ཟས་དང་། ཟས་དཀར་གསུམ་དང་། མེ་ཏོག་དང་། ཕྲེང་བ་དང་། སྤོས་ཆབ་དང་། མེ་ཏོག་སྣ་ཚོགས་ཀྱིས་ཀུན་དུ་ཁྱབ་པར་བཀྲམ་ནས་མཆོད་པ་རྒྱ་ཆེར་བགྱིས་ཏེ། རྣལ་འབྱོར་པ་དང་། རི་མོ་མཁན་གང་ལགས་པ་དེ་གདུགས་གཅིག་ལ་དུས་གསུམ་དུ་གཟུགས་བྲིས་པའི་མདུན་དུ་ནོངས་པ་རྣམས་མཐོལ་བཤགས་ན། ཞག་ཉི་ཤུ་རྩ་གཅིག་ཚང་བའི་མཚན་མོ་མིག་སྟོང་ལག་སྟོང་དང་ལྡན་པའི་གཟུགས་བྲིས་པ་ལས་འོད་ཟེར་ཆེན་པོ་བྱུང་ནས། ཉི་ཟླ་ཟིལ་གྱིས་མནན་ཏེ། འོད་ཀྱིས་ཕྱོགས་བཅུའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མཐའ་དང་། ཚད་མ་མཆིས་པ་ཐམས་ཅད་ཐོགས་པ་མ་མཆིས་པར་གསལ་བར་བགྱིད་པས། རྣལ་འབྱོར་པ་དང་། རི་མོ་མཁན་གང་ལགས་པ་དེ་དག་དང་། སེམས་ཅན་གང་དག་འོད་ཀྱིས་རེག་པ་དེ་དག་ཐམས་ཅད་ཤིན་ཏུ་ལྕི་བའི་ཁ་ན་མ་ཐོ་བ་ཅི་མཆིས་པ་དུས་གཅིག་ཏུ་ཞུ་བྱང་ནས་ཡོངས་སུ་དག་པར་འགྱུར་ལགས་སོ། །ཆོ་ག་འདི་སྒྲུབ་པ་གང་ལགས་པ་དེས་སེམས་རྩེ་གཅིག་ཏུ་མ་བགྱིས་པ་ནི་མ་གཏོགས་ལགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཡང་འདི་སྐད་ཅེས་གསོལ་ཏོ། །བདག་གིས་སྔོན་འདས་པའི་དུས་ཀྱི་ཚེ་དེ་བཞིན་གཤེགས་པ་རྣམ་པར་གཟིགས་ཀྱིས་ཀྱང་ལག་སྟོང་དང་སྤྱན་སྟོང་པོ་འདི་དག་བསྟན་ནས། བདུད་ཆེན་པོ་རྣམས་འདུལ་བ་མཐོང་ནས། བཅོམ་ལྡན་འདས་དེང་བདག་གིས་ཀྱང་ལག་སྟོང་དང་མིག་སྟོང་པོ་འདི་དག་བསྟན་ནས་བདུད་ཆེན་པོ་རྣམས་བཏུལ་བ་ལགས་ཏེ། སུག་པ་ལག་པ་སྟོང་པོ་དེ་དག་ཀྱང་སོ་སོ་ནས་འཁོར་ལོས་སྒྱུར་བའི་རྒྱལ་པོ་རེ་རེ་
མངོན་པར་སྤྲུལ་ནས་བསྐལ་པ་བཟང་པོ་རབས་སྟོང་གི་འཁོར་ལོས་སྒྱུར་བའི་རྒྱལ་པོ་བགྱིད་པར་འགྱུར་ལ། མིག་སྟོང་པོ་དེ་དག་ཀྱང་སོ་སོ་ནས་སངས་རྒྱས་རེ་རེ་མངོན་པར་སྤྲུལ་ནས། བསྐལ་པ་བཟང་པོའི་སངས་རྒྱས་སྟོང་དང་མཚུངས་པར་འབྱུང་བར་འགྱུར་བའི་སླད་དུ། བཅོམ་ལྡན་འདས་བྱང་ཆུབ་སེམས་དཔའ་འདིའི་ལུས་བདུད་འདུལ་བའི་ནང་ན་མཆོག་ཏུ་གྱུར་པ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། ལེགས་སོ་ལེགས་སོ། །ངས་ཀྱང་བྱིན་གྱི་བརླབས་ཀྱི་མཐུས་བསྐལ་པ་མཐར་ཐུག་པའི་བར་དུ་ཁྱོད་ཀྱི་ཡུམ་གྱི་གཟུངས་འདི་བྱིན་གྱིས་བརླབ་པར་བྱའོ།། །།བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཐོགས་པ་མི་མངའ་བའི་ཐུགས་རྗེ་ཆེན་པོ་རྒྱ་ཆེར་ཡོངས་སུ་རྫོགས་པའི་གཟུངས།བམ་པོ་གསུམ་པ། དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཀྱིས་བསྔགས་པ་བརྗོད་པ་ཐོས་ནས་རབ་ཏུ་དགའ་ཞིང་མགུ་བར་གྱུར་པས་ཐལ་མོ་སྦྱར་ཏེ། བཅོམ་ལྡན་འདས་ཀྱི་ཞལ་དུ་བལྟས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གཞན་ཡང་མིག་སྟོང་ལག་སྟོང་དང་ལྡན་པའི་གཟུངས་ཀྱི་ཕྱག་རྒྱ་མངོན་པར་སྒྲུབ་པར་བགྱིད་པ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ངས་ཀྱང་རྗེས་སུ་ཡི་རང་གིས་ཁྱོད་ཀྱིས་ཤོད་ཅིག །དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་སྨྲས་པ་དང་། ནམ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་རིག་སྔགས་འདི་སྨྲས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནས་འདུ་ཤེས་མེད་འདུ་ཤེས་མེད་མིན་གྱི་བར་གྱི་ལྷའི་གནས་ཐམས་ཅད་ཀྱང་རྣམ་པ་དྲུག་ཏུ་རབ་ཏུ་གཡོས་པར་གྱུར་ཏོ། །འོག་མིན་གྱི་ལྷ་དང་། དབང་ཕྱུག་ཆེན་པོའང་མི་བདེ་བར་ཤིན་ཏུ་སྐྲག་པར་གྱུར་ཏོ། །འདྲེ་གདོན་མ་རུངས་པ་ཐམས་ཅད་ཀྱང་སྡུག་བསྔལ་ཆེན་པོ་མྱོང་བར་གྱུར་པས། ཀུ་ཅོ་འདོན་ཅིང་ཤར་ནུབ་ཏུ་
བྱེར་ནས་འགྲོ་བའི་གནས་ཀྱང་མི་རྙེད་པར་གྱུར་ཏོ། །དེ་ནས་སྤྲུལ་པའི་ལུས་ཀྱིས་འཁོར་མང་པོ་རྣམས་དང་འདྲེ་གདོན་མ་རུངས་པ་རྣམས་ལ་ཁྱེད་གལ་ཏེ་བདག་གི་རིག་སྔགས་ཀྱི་རྗེས་སུ་མི་འབྲང་ཞིང་འགལ་བར་བྱས་པར་གྱུར་ན་མགོ་ཚལ་པར་འགས་པར་འགྱུར་རོ་ཞེས་བསྒོའོ། །བཅོམ་ལྡན་འདས་རིག་སྔགས་འདིས་ནི་རི་རྣམས་འཇོམས་པར་བགྱིད་ཅིང་རྒྱ་མཚོ་ཆེན་པོ་སྐེམས་པར་བགྱིད་དོ། །རིག་སྔགས་འདིས་ནི་ལྷ་མ་ཡིན་གྱི་དཔུང་རྣམས་བཅོམ་ནས་ཡུལ་རྣམས་བསྲུང་བར་བགྱིད་དོ། །རིག་སྔགས་འདིས་ནི་འདྲེ་གདོན་མ་རུངས་པ་ཐམས་ཅད་དང་། ནད་ཐམས་ཅད་དང། མི་མ་རུངས་པ་ཐམས་ཅད་ཚར་གཅོད་པར་བགྱིད་དོ། །རིག་སྔགས་འདིས་ནི་སུམ་ཅུ་རྩ་གསུམ་གྱི་ལྷ་རྣམས་འཇོམས་ཤིང་དུལ་བར་བགྱིད་ལགས་སོ། །རིགས་ཀྱི་བུ་གང་ལ་ལ་ཞིག་རིག་སྔགས་འདི་འདོན་ཅིང་ཡོངས་སུ་འཛིན་པར་བགྱིད་ན། གང་ཟག་དེའི་མཐུ་སྟོབས་བརྗོད་ཀྱིས་མི་ལང་ངོ་། །རིག་སྔགས་འདི་འདོན་པ་དང་། ཡོངས་སུ་འཛིན་པ་དེ་དག་བཙུན་ཞིང་དབང་ཕྱུག་དང་ལྡན་པ་དང་། ནམ་འཚོའི་བར་དུ་རྒྱལ་པོས་བྱམས་ཤིང་ཡིད་དུ་མཆི་བ་དང་སྨོན་པ་རྣམས་ཡོངས་སུ་རྫོགས་པར་བགྱིད་དོ། །གང་ལ་ལ་ཞིག་ཕྱིར་རྒོལ་བའི་བདུད་གདུལ་བར་འཚལ་ན་སྤོས་གུ་གུལ་བསྲེགས་ཏེ། བདག་གི་ལུས་པོ་ཆེའི་སྔགས་ལན་ཉི་ཤུ་རྩ་གཅིག་བཟླས་བརྗོད་བགྱིའོ། །སྐྱེ་བོ་མང་པོ་ཐམས་ཅད་ཀྱིས་བདག་ལ་བྱམས་པར་འཚལ་ན་ལྕུག་མ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ། གཡར་ཁར་བཅས་ན་བྱམས་ཤིང་བཀུར་བར་བགྱིའོ། །བདག་ཉིད་སྤོབས་པ་དང་ཤེས་རབ་དང་ལྡན་པར་འཚལ་ན་ཤུ་དག་ལ་ལན་སྟོང་རྩ་བརྒྱད་སྔགས་ཀྱིས་བཏབ་སྟེ། སྙིང་གར་བསྐུས་ན་ཐོགས་པ་མ་མཆིས་པའི་སྤོབས་པ་ཐོབ་པར་འགྱུར་ཏེ། ཡུམ་གྱི་གཟུངས་ཀྱི་སྙིང་པོའི་ཕྱག་རྒྱ་བགྱིའོ། །དེ་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་ཐོགས་པ་མ་མཆིས་པའི་སྤོབས་པའི་ཕྱག་རྒྱ་ནི་འདི་ལགས་ཏེ། སུག་པ་
ལག་པ་གཉིས་རྒྱབ་སྤྲད་དེ་སྦྱར་ནས་མཐེ་བོ་གཉིས་མདུན་དུ་བརྐྱང་བར་བགྱིའོ། །ཕྱག་རྒྱ་འདིས་ནི་བདག་ཀྱང་བསྲུང་ཞིང་གཞན་ཡང་བསྲུང་བར་བགྱིད་དོ། །ཕྱོགས་གང་དང་གང་དུ་མཆི་ཡང་རུང་སྟེ། མཚམས་དགུམ་པར་འཚལ་བས་ཆབ་གཙང་མའམ་ཐལ་བ་གཙང་མ་ལ་ལན་བདུན་སྔགས་ཀྱིས་བཏབ་སྟེ། གང་དུ་མཆིས་པའི་གནས་དེར་ཆབ་བམ། ཐལ་བ་སྙིམ་པ་གང་སྔར་རང་གི་ལུས་ལ་གཏོར་ནས། དེའི་རྗེས་ལ་ཕྱོགས་བཞིར་ཆོས་བཞིན་དུ་གཏོར་ན། དེ་ཉིད་མཚམས་སུ་འགྲུབ་པར་འགྱུར་ལགས་སོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་འདྲེ་སྲིན་མ་རུངས་པ་དང་། ལོག་པའི་གདོན་མང་པོ་རྣམས་ཀྱིས་གཙེས་པར་གྱུར་ན་བལ་པོ་སེའུའི་ཡལ་ག་དང་། གྲིབ་ལོགས་ཀྱི་ལྕང་མའི་ཡལ་ག་བླངས་ཏེ། རིག་སྔགས་འདི་བཟླས་བརྗོད་བགྱིས་ནས་ནད་པ་ལ་གཞུས་ན་ནད་གང་ཡང་རུང་སྟེ་མི་འཚོ་བ་མ་མཆིས་ལགས་སོ། །རིག་སྔགས་ནི་འདི་ལྟ་སྟེ། ན་མཿསརྦ་བུདྡྷ། དྷརྨ་སཾ་གྷཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། ན་མོ་བཛྲ་པཱ་ཎ་ཡེ། བོ་དྷི་སཏྭཱ་ཡ། ཏདྱ་ཐཱ། བི་སི་བི་སི་བི། ཀཱ་ཡ་སི་བི། པ་ལ་ཤ་པ་ལ་ནི་སྭཱ་ཧཱ།རིག་སྔགས་ཀྱི་ཕྱག་རྒྱ་འདིས་ནི་ལོག་པར་ལྟ་བའི་མུ་སྟེགས་ཅན་རྣམས་འདུལ་བར་བགྱིད་དོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་རྟག་པ་རེ་གདུགས་དང་པོ་འཆར་བའི་ཚེ་དང་། གདུགས་ཀྱི་གུང་དང་། གདུགས་པས་པའི་ཚེ་ལན་ཉི་ཤུ་རྩ་གཅིག་བཟླས་བརྗོད་བགྱིས་ན། རྣམ་པ་སྣ་ཚོགས་ཀྱིས་སངས་རྒྱས་བྱེ་བ་ཕྲག་བཅུ་ལ་མཆོད་པ་བགྱིས་པ་དང་། བྱེ་བྲག་ཏུ་གྱུར་པ་མ་མཆིས་པས་ནམ་དུའང་བུད་མེད་ཀྱི་དངོས་པོ་ལེན་པར་མི་འགྱུར། ཚེ་འདས་ནས་ཀྱང་ངན་སོང་གསུམ་པོ་དག་དང་གཏན་དུ་འབྲལ་ཞིང་། དེ་བཞིན་གཤེགས་པ་འོད་དཔག་མེད་ཀྱི་ཞིང་ཡོངས་སུ་དག་པར་སྐྱེ་བར་འགྱུར། དེ་བཞིན་གཤེགས་པ་དེའི་ཕྱག་གིས་སྤྱི་བོ་ལ་བྱུགས་ཏེ། ཁྱོད་ངའི་ཞིང་དུ་སྐྱེ་བར་འགྱུར་བས་མ་འཇིགས་ཤིག་ཅེས་
བཀའ་སྩལ་པར་འགྱུར། ཚེ་འདི་ཉིད་ལ་ཡང་གློ་བུར་དུ་འཆི་བར་མི་འགྱུར་ཞིང་། འདྲེ་གདོན་དག་གིས་ཀྱང་གླགས་རྙེད་པར་མི་འགྱུར་ལགས་སོ། །དེ་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཁ་ན་མ་ཐོ་བ་ཡོངས་སུ་སྦྱོང་བའི་ཕྱག་རྒྱ་ནི་འདི་ལགས་ཏེ། འགྲེང་ནས་འདི་ལྟར་སུག་པ་ལག་པ་གཡོན་པ་མདུན་དུ་བརྐྱང་སྟེ། སོར་མོ་ལྔ་སོ་སོར་ཕྱེ་ནས་མདུན་དུ་ཕུལ་ཏེ་སོར་མོ་ལྔ་ཆར་བསྒྲེང་ངོ་། །དེའི་རྗེས་ལ་སུག་པ་ལག་པ་གཡས་པའི་མཐེ་བོ་ལག་མཐིལ་དུ་བཀུག་སྟེ། སོར་མོ་གཞན་བཞི་ནི་ཁུ་ཚུར་དུ་བཅངས་ནས་རྣ་བ་གཡས་པའི་ཐད་ཀར་བཞག་སྟེ། ལུས་པོ་ཆེའི་སྔགས་བཟླས་ནས་མཛུབ་མོ་ནི་ཕན་ཚུན་རྒྱུ་བར་བགྱིའོ། །ཕྱག་རྒྱ་འདི་གདུགས་གཅིག་ལ་དུས་གསུམ་དུ་བགྱི་བར་འཚལ་བས། དུས་གཅིག་གི་ཚེ་ཡང་ལན་བདུན་བཟླས་བརྗོད་བགྱིས་ན་མཚམས་མ་མཆིས་པ་ལྔ་དང་། ཤིན་ཏུ་ལྕི་བ་བཞིའི་ཁ་ན་མ་ཐོ་བ་རྣམས་ཀྱང་འབྱང་བར་འགྱུར་ལགས་སོ། །སེམས་ཅན་ཐམས་ཅད་ལ་བྱམས་པ་དང་། སྙིང་རྗེ་བསྐྱེད་པར་གྱུར་ན་ཁ་ན་མ་ཐོ་བ་ཐམས་ཅད་ཀྱི་རྩ་བ་བསྲེགས་ནས། ཚེ་འདས་པའི་རྗེས་ལའང་སངས་རྒྱས་རྣམས་དང་མཇལ་བར་འགྱུར་ཞིང་། སངས་རྒྱས་ཀྱི་ཞིང་དེ་དག་ཏུའང་འཁོར་ལོས་སྒྱུར་བའི་རྒྱལ་པོ་བགྱིད་པར་འགྱུར། གཞན་ཡང་བས་པ་མ་མཆིས་པའི་གཏེར་ཞེས་བགྱི་བའི་གཟུངས་དང་། ཡེ་ཤེས་མཉམ་པ་ཞེས་བགྱི་བའི་གཟུངས་ཐོབ་པར་འགྱུར། གཞན་ཡང་མཚན་ཉི་ཤུ་རྩ་བརྒྱད་དང་ལྡན་པར་འགྱུར། གཞན་ཡང་ཚེ་འདི་ཉིད་ལ་མིག་དང་། རྣ་བ་དང་། སྣ་དང་། ལྕེ་ལ་སོགས་པ་བྲོ་འཚལ་བར་མི་འགྱུར་ཞིང་། ལུས་ཀྱི་ནད་ཐམས་ཅད་ཀྱང་ཡོངས་སུ་འབྱང་བར་འགྱུར། སྔོན་གྱི་ལས་དང་ཁ་ན་མ་ཐོ་བ་རྣམས་ཀྱང་ཞུ་བྱང་བར་འགྱུར་ལགས་སོ། །གལ་ཏེ་ཐན་པ་བྱུང་བར་གྱུར་ན་ཏིལ་འབྲུ་ཡོག་པོའི་འབྲས་བུའི་མར་དང་སྦྱར་ཏེ། རིལ་བུ་བགྱིས་ནས་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ་ཆབ་རྫིང་དུ་བོར་ན།
དགུང་ཆར་འབབ་པར་འགྱུར་ལགས་སོ། །གལ་ཏེ་ཆར་ཆེས་ན་འབྲས་སཱ་ལུ་བརྡོས་པའི་མེ་ཏོག་ཡུངས་འབྲུའི་མར་དང་སྦྱར་ཏེ། རིལ་བུ་བགྱིས་ནས་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ་ཆབ་རྫིང་བུར་བོར་ན་དགུང་ཆར་འཆད་པར་འགྱུར་ལགས་སོ། །དེ་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བདུད་རྣམས་བཏུལ་བའི་ཕྱག་རྒྱ་ནི་འདི་ལགས་ཏེ། སོར་མོ་བསྣོལ་མར་བཏང་སྟེ། གཡོན་པས་གཡས་པ་མནན་ཏེ་ཁུ་ཚུར་དམ་དུ་བཅངས་ཏེ་སྤྱི་བོར་བཞག་ནས་ལུས་པོ་ཆེའི་སྔགས་བཟླས་བརྗོད་བགྱིས་ན་འཁོན་པའི་དགྲ་ཐམས་ཅད་རང་དུལ་བར་འགྱུར་ལགས་སོ། །ཆོ་ག་འདི་བགྱིད་པ་གང་ལགས་པ་དེས་རིང་བསྲེལ་དང་བཅས་པའི་མཆོད་རྟེན་གྱི་མདུན་དུ་ཚེས་ཉི་ཤུ་དགུའི་མཚན་མོ་ཙནྡན་དཀར་པོའི་ཕྱེ་མའི་དཀྱིལ་འཁོར་བགྱིས་ཏེ། མེ་ཏོག་སྣ་ཚོགས་བཀྲམ་ནས་ཡོངས་སུ་དག་པར་ཁྲུས་བགྱིས་ཏེ། གོས་གསར་པ་གཙང་མ་བགོས་ནས་སུག་པར་པོག་ཕོར་ཐོགས་ཏེ། ཨ་ག་རུ་བསྲེགས་ལ་ཁ་ཤར་ཕྱོགས་སུ་བལྟས་ཏེ། སྐྱིལ་མོ་ཀྲུང་བཅས་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལག་སྟོང་མིག་སྟོང་དང་ལྡན་པའི་སྤྱི་བོ་ལ་མཆིས་པར་འདུ་ཤེས་ཉེ་བར་བཞག་སྟེ། ལུས་པོ་ཆེའི་སྔགས་ལན་སྟོང་རྩ་བརྒྱད་བཟླས་བརྗོད་བགྱིས་ན་འདི་དངོས་གྲུབ་ཐོབ་པར་འགྱུར་བའི་ཕན་ཡོན་དང་པོ་མཆོག་ལགས་སོ། །གཞན་ཡང་ཡུངས་ཀར་ཏིལ་གྱི་འབྲས་བུ་དང་གཅིག་ཏུ་བསྲེས་ཏེ་བརྡུངས་ནས་ཕྱེ་མར་བགྱིས་ཏེ། ཕོ་གསུམ་གྱིས་ཅུང་ཟད་ཅིག་བླངས་ནས་ལན་ཅིག་སྔགས་ཀྱིས་བཏབ་སྟེ་ཞུགས་སུ་དོར་བ་དགུང་བདུན་ཚང་བར་བགྱིས་ལ། གདུགས་རེ་ལ་ཡང་ལན་བརྒྱ་རྩ་བརྒྱད་ཚང་བར་བགྱིས་ན། སླླད་ཀྱིས་ཅིང་བགྱིའོ་འཚལ་མངོན་པར་འགྲུབ་པར་འགྱུར་ལགས་སོ། །དེ་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་འཇིགས་པ་མ་མཆིས་པ་ཆེན་པོའི་ཕྱག་རྒྱ་ནི་འདི་ལགས་ཏེ། འགྲེང་ནས་སུག་པ་རྐང་པ་གཉིས་ནད་
གཞིབས་ཏེ། སྔར་སུག་པ་ལག་པ་གཡས་པ་བཀན་ཏེ་ལག་ངར་གཡོན་པ་བཏེག་ནས་པུས་མོའི་སྟེང་དུ་བཞག་པར་བགྱིས་ཏེ། སུག་པ་ལག་པ་གཡོན་པ་ཡང་དེ་བཞིན་དུ་བགྱིས་ནས་རྟག་པར་རིང་བསྲེལ་གྱི་མདུན་དུ་ལུས་པོ་ཆེའི་སྔགས་ལན་སྟོང་རྩ་བརྒྱད་བཟླས་བརྗོད་བགྱིས་ན། མྱུར་དུ་སེམས་ཅན་ལ་མི་འཇིགས་པ་སྩལ་བའི་ཏིང་ངེ་འཛིན་གྱི་སྒོ་ཐོབ་པར་འགྱུར་ལགས་སོ། །གཞན་ཡང་ཤིང་ཀུན་དང་། ཡུངས་ཀར་དང་། ཤུ་དག་དང་། ཏ་ཏ་པའི་རིལ་བུ་བླངས་ཏེ་དངོས་པོ་འདི་དག་ཞུགས་ཀྱི་ནང་དུ་བོར་ཏེ་བསྲེག་པར་བགྱིའོ། །འདི་དག་བསྲེག་པའང་སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་རམ། དཀྱིལ་འཁོར་རམ། གནས་གཙང་མ་དག་ཏུ་བསྲེགས་ནས་ལུས་པོ་ཆེའི་སྔགས་བཟླས་ཏེ། སྔགས་ལན་རེ་བཟླ་ཞིང་ལན་རེ་བསྲེགས་པ་བརྒྱ་རྩ་བརྒྱད་ཚང་བར་བགྱིས་ནས་སྤོས་དང་མེ་ཏོག་དག་གིས་རིག་སྔགས་ལ་མཆོད་པ་བགྱིས་ན། ཅི་དང་ཅི་སྨོན་པ་རྣམས་ཡིད་བཞིན་དུ་མངོན་པར་འགྲུབ་པར་འགྱུར་ལགས་སོ། །གལ་ཏེ་རིག་སྔགས་གཞན་གྱིས་མི་ཐུབ་པ་དག་སྔགས་འདིས་བཏབ་ན་ཐམས་ཅད་ཐུབ་ཅིང་འགྲུབ་པར་འགྱུར་ལགས་སོ། །གལ་ཏེ་རྨི་ལྟས་མཐོང་བར་འཚལ་ན་སྔགས་འདི་བཟླས་ནས་ཕྱག་རྒྱ་བགྱིས་ཏེ་མིག་ལ་བཏབ་ན་ཅི་དང་ཅི་མཐོང་བར་འཚལ་བ་དེ་དག་ཐམས་ཅད་རྨི་ལམ་དུ་མཐོང་བར་འཚལ་ལགས་སོ། །བསོད་ནམས་མ་མཆིས་པ་གང་དག་ཅི་བགྱིའོ་འཚལ་ཡིད་བཞིན་དུ་གྲུབ་པར་མི་འགྱུར་ན། གདུགས་རེ་བཞིན་རིག་སྔགས་འདི་ལན་བརྒྱ་རྩ་བརྒྱད་འདོན་པ་དགུང་བདུན་དུ་ཚང་བར་གྱུར་ན་ཅི་དང་ཅི་སྨོན་པ་ཐམས་ཅད་འཐོབ་པར་འགྱུར་ལགས་སོ། །བཅོམ་ལྡན་འདས་བདག་སྔོན་ཀླུའི་རྒྱལ་པོ་རྒྱ་མཚོའི་གནས་སུ་རྒྱ་མཚོའི་ཆོས་ཀྱི་འདུས་སར་ཆོས་སྟོན་པ་ན་ཀླུ་མང་པོ་རྣམས་སྡུག་བསྔལ་ཆེན་པོ་རྣམས་མྱོང་བར་མཐོང་བ་དང་། ཀླུ་མང་པོ་རྣམས་ལ་སྙིང་བརྩེ་ནས་དེ་དག་སྡུག་བསྔལ་ལས་ཡང་དག་པར་བཟླ་བ་དང། སེམས་ཅན་མང་པོ་རྣམས་སྡུག་
བསྔལ་དང་བྲལ་ཞིང་འཁོན་པའི་དགྲ་མ་མཆིས་པར་བགྱི་བའི་སླད་དུ་ཆོས་བསྟན་པ་ལས། དེའི་ཚེ་ཀླུའི་བུ་མོས་ཆོས་འདི་གཉེར་བའི་སླད་དུ་ནོར་བུ་རིན་པོ་ཆེ་མི་མཇེད་ཀྱི་འཇིག་རྟེན་གྱི་ཁམས་རི་བ་གཅིག་ཕུལ་བ་དང་། བདག་གིས་ནི་དེ་ལ་ཡུམ་གྱི་གཟུངས་འདི་རྒྱ་ཆེར་བསྟན་པས་སྡུག་བསྔལ་གྱི་བགེགས་རྣམས་དང་བྲལ་བར་གྱུར་ལགས་སོ། །དེ་ནས་བྱང་ཆུབ་སེམས་དཔའ་ཆུ་ཤེལ་གྱིས་རིག་སྔགས་འདི་ཡོངས་སུ་འཛིན་པ་དག་ལ་ཕན་གདགས་ཤིང་བགེགས་ཡོངས་སུ་བསྲུང་བའི་ཕྱིར་སྔགས་འདི་སྨྲས་སོ། །བི་མ་ལེ། མ་ཧཱ་བི་མ་ལེ། ཨུ་ཧ་ལེ། མ་ཧཱ་ཨུ་ཧ་ལེ། ཧུ་མ་ལེ། མ་ཧཱ་ཧུ་མ་ལེ། ས་ཧཱ་ལེ། མ་ཧཱ་ས་ཧཱ་ལེ། ཙི་ལི་ཏེ་སྭཱ་ཧཱ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ཕྱོགས་གང་དུ་གནས་ཀྱང་རུང་སྟེ། བྱང་ཆུབ་སེམས་དཔའ་མིག་སྟོང་དང་ལག་སྟོང་དང་ལྡན་པའི་ཆོས་ཀྱི་ཆོ་ག་འདི་ཡོངས་སུ་འཛིན་པར་བགྱིད་ན། བདག་ཀྱང་རྟག་པར་དེ་དག་གི་རྗེས་སུ་འབྲང་སྟེ། ཡོངས་སུ་བསྲུང་བར་བགྱིད་པས་བདུད་ཀྱི་འཁོར་རྣམས་ཀྱི་བར་དག་གིས་གཙེ་བར་མི་འགྱུར་ལགས་སོ། །གང་ལ་ལ་ཞིག་བྲེལ་ཞིང་ཕོངས་པར་གྱུར་ཏམ། ཕ་རོལ་གྱི་དགྲས་གཙེས་སམ། ཆོམ་རྐུན་དག་གིས་གནོད་པ་བགྱིད་པར་འགྱུར་ན། ཚོན་སྣ་ལྔའི་སྐུད་པ་ལ་ལན་ཉི་ཤུ་རྩ་གཅིག་སྔགས་ཀྱིས་བཏབ་སྟེ། སྔགས་ལན་རེ་བཟླ་ཞིང་མདུད་པ་རེ་རེ་མདུད་ནས་དཔུང་པ་གཡོན་པ་ལ་མདུད་པར་བགྱིའོ། །གཞན་ཡང་སུག་པ་གཡོན་པའི་སྲིན་ལག་དང་། གུང་མོ་དང་། མཛུབ་མོ་རྣམས་ཁུ་ཚུར་བཅངས་ཏེ། མཐེ་བོས་སྟེང་དུ་མནན་ནས་མཐེ་ཆུང་ཆོམ་རྐུན་གྱི་ཕྱོགས་སུ་ཁ་བསྟན་ཏེ། སྔགས་འདི་ལན་བརྒྱ་རྩ་བརྒྱད་བཟླས་ན་ཐམས་ཅད་རང་གྱེས་ནས་གནོད་པ་བགྱིད་པར་མི་འགྱུར་ལགས་སོ། །སྔོན་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གངས་རི་ལ་གནས་ཏེ་ཆོས་སྟོན་པ་དང་། གནོད་སྦྱིན་དང་། སྲིན་པོའི་ཡུལ་ན་གནས་པའི་སྐྱེ་བོ་རྣམས་སེམས་ཅན་གྱི་ཤ་ཁྲག་འབའ་ཞིག་
འཚལ་ཞིང་། དགེ་བའི་སེམས་ཅི་ཡང་མ་མཆིས་པ་མཐོང་བ་དང་། དེའི་ཚེ་བྱང་ཆུབ་སེམས་དཔའ་དེ་ཐབས་ལ་མཁས་པས་ཕན་གདགས་ཤིང་སེམས་ཅན་གདུལ་བའི་ཆེད་དུ་རྫུ་འཕྲུལ་གྱི་མཐུས། དེ་མ་ཐག་ཏུ་ཡུལ་དེ་དག་ཏུ་མཆིས་ནས། མིག་སྟོང་དང་ལག་སྟོང་དང་ལྡན་པས་བདུད་འདུལ་བའི་ལུས་མངོན་པར་བསྟན་ཏེ། ཡུམ་གྱི་གཟུངས་མངོན་པར་འགྲུབ་པའི་ཕྱག་རྒྱ་བགྱིས་པ་དང་། དེའི་ཚེ་སྲིན་པོའི་ཡུལ་གྱི་རྒྱལ་པོ་བདག་གི་ཐད་དུ་མཆིས་ནས་ནོངས་པ་མཐོལ་བཤགས་ཏེ། ཕྱག་བགྱིས་པ་དང་། བདག་གིས་ཀྱང་མངོན་པར་འགྲུབ་པའི་ཕྱག་རྒྱས་བཏབ་པས། དེ་བླ་ན་མ་མཆིས་པའི་ལམ་མངོན་པར་གྲུབ་པར་གྱུར་ལགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་མངོན་པར་འགྲུབ་པའི་ཕྱག་རྒྱ་ནི་འདི་ལགས་ཏེ། འགྲེང་ནས་སུག་པ་རྐང་པ་གཉིས་གཤིབས་ཏེ། སྙིང་གར་ཐལ་མོ་སྦྱར་ཏེ། མཐེའུ་ཆུང་གཉིས་བསྣོལ་མར་བཏང་ཞིང་། གཡོན་པས་གཡས་པ་མནན་ནས་ལུས་པོ་ཆེའི་སྔགས་ལན་ཉི་ཤུ་རྩ་གཅིག་བཟླས་ནས། ཆོ་ག་རྣམ་པ་སྣ་ཚོགས་གང་བགྱིད་ཀྱང་རུང་སྟེ། ཐམས་ཅད་མངོན་པར་འགྲུབ་པར་འགྱུར་ལགས་སོ། །དེ་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་འགྲོ་བ་དྲུག་པོ་དག་སྡུག་བསྔལ་གྱི་བགེགས་ལས་ཡོངས་སུ་སྐྱོབ་པའི་འཁོར་ལོའི་ཕྱག་རྒྱ་ནི་འདི་ལགས་ཏེ། འགྲོ་བ་དྲུག་གི་སེམས་ཅན་སྡུག་བསྔལ་ལས་ཡོངས་སུ་སྐྱོབ་པར་འཚལ་ན་འཁོར་ལོའི་ཕྱག་རྒྱ་སྤྱད་པར་བགྱི་སྟེ། འདི་ལྟར་སོར་མོ་བཅུའི་རྩེ་མོ་ཕན་ཚུན་ཕྲད་པར་བགྱི་སྟེ། ལག་ངར་གྱི་ཚིགས་དང་ལག་མཐིལ་ནི་དབྱེ་བར་བགྱིའོ། །སོར་མོ་རྣམས་ཀྱི་བར་ཡང་ཚོན་གང་ཙམ་མཆིས་པར་བགྱིས་ཏེ། འདི་ནི་བྱང་ཆུབ་སེམས་དཔའ་དེ་འགྲོ་བ་དྲུག་པོ་དག་ཏུ་གནས་ནས་སྡུག་བསྔལ་གྱི་བགེགས་ལས་ཡོངས་སུ་འདས་པ་ཞེས་བགྱི་སྟེ། འདི་ལྟར་ཕྱག་རྒྱའ་འཁོར་ལོ་འདིའི་དབང་གིས་ཐམས་ཅད་སྡུག་བསྔལ་དང་བྲལ་བར་གྱུར་པས་སོ། །དེ་ལ་བྱང་
ཆུབ་སེམས་དཔའ་མིག་སྟོང་དང་ལྡན་པའི་མངོན་པར་རྫོགས་པར་བྱང་ཆུབ་པའི་ཕྱག་རྒྱ་ནི་འདི་ལགས་ཏེ། སྐྱིལ་མོ་ཀྲུང་བཅས་ནས་སྔར་སུག་པ་གཡོན་པ་བརྐྱང་སྟེ། སོར་མོ་ལྔ་ཅར་བཀན་ནས་པུས་མོ་གཡོན་པའི་སྟེང་དུ་བཞག་གོ། །དེའི་རྗེས་ལ་སུག་པ་ལག་པ་གཡས་པ་བརྐྱང་སྟེ། སོར་མོ་ལྔ་ཅར་ཁ་སྦུབ་ནས་པུས་མོ་གཡས་པའི་སྟེང་དུ་མནན་པར་བགྱིའོ། །འདི་ནི་འགོག་པའི་སྙོམས་པར་འཇུག་པའི་ཕྱག་རྒྱ་དང་འདྲ་སྟེ། འདས་པ་དང་། མ་བྱོན་པ་དང་། ད་ལྟར་བཞུགས་པའི་སངས་རྒྱས་ཐམས་ཅད་ཀྱང་མཚུངས་པར་ཕྱག་རྒྱ་འདིས་མངོན་པར་རྫོགས་པར་བྱང་ཆུབ་པར་འགྱུར་བ་ལགས་པས། ཕྱག་རྒྱ་འདིས་ནི་ལས་ཀྱི་སྒྲིབ་པ་ཐམས་ཅད་སེལ་བར་བགྱིད་དོ། །རྣལ་འབྱོར་པ་བསམ་གཏན་སྒོམ་པ་གང་དག་ཏིང་ངེ་འཛིན་མངོན་སུམ་དུ་མ་གྱུར་ནས། གདུགས་མཚན་བདུན་གྱི་བར་དུ་དགོན་པའི་གནས་སུ་མཆིས་ནས་གཟུངས་འདི་བཟླས་ཏེ་ཕྱག་རྒྱ་འདི་བགྱིས་ནས། སེམས་རྩེ་གཅིག་ཏུ་སངས་རྒྱས་རྣམས་མིག་སྔར་མངོན་སུམ་དུ་བཞུགས་པར་ཡིད་ལ་བགྱིས་ཏེ། གདུགས་མཚན་གཅིག་ལ་དུས་དྲུག་ཏུ་མཐོལ་བཤགས་བགྱིས་ན། སངས་རྒྱས་རྣམས་ཀྱང་མངོན་སུམ་དུ་འགྱུར་ཞིང་བསོད་ནམས་ཀྱི་ཕུང་པོ་ཆེན་པོ་ཚད་མ་མཆིས། དཔག་ཏུ་མ་མཆིས། བརྗོད་དུ་མ་མཆིས་པ་རྣམས་ཀྱང་འཐོབ་པར་འགྱུར་ལགས་སོ། །དེ་ལ་བྱང་ཆུབ་སེམས་དཔའ་མིག་སྟོང་དང་ལྡན་པས་སུམ་ཅུ་རྩ་གསུམ་པའི་ལྷ་རྣམས་དགུག་པའི་ཕྱག་རྒྱ་ནི་འདི་ལགས་ཏེ། སྔར་སུག་པ་ལག་པ་གཡོན་པའི་སོར་མོ་བཞི་ཁུ་ཚུར་བཅང་བར་བགྱིའོ། །དེའི་རྗེས་ལ་སུག་པ་ལག་པ་གཡས་པས་གཡོན་པའི་མཐེ་བོ་ཁུ་ཚུར་བཅངས་པ་བཞིན་བཅངས་ནས། ལག་པ་གཡོན་པའི་མཐེ་བོ་ལག་པ་གཡས་པའི་ཆང་པའི་གོང་དུ་རྩེ་མོ་ཕྱུང་ནས་སུག་པ་ལག་པ་གཡས་པའི་མཛུབ་མོ་ནི་ཕན་ཚུན་དུ་རྒྱུ་བར་བགྱིའོ། །སྔགས་ནི་འདི་ལྟ་སྟེ། ཨོྃ་ཀུ་ཙི་ཀུ་ཙི། ཀུ་ཙི་ཡ་རི། ཙ་རི་ཙ་རི། ཙ་
རི་ལེ་སྭཱ་ཧཱ། གཟུངས་ཀྱི་ཕྱག་རྒྱ་དང་སྔགས་འདི་ནི་བསམ་གྱིས་མི་ཁྱབ་པས་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་མཆིས་ཉལ་ཀར་ཕྱག་རྒྱ་འདི་བགྱིས་ཏེ། སྔགས་འདི་ལན་རེ་བཟླས་ཤིང་། སྙིང་གར་ཕྱག་རྒྱ་ལན་རེ་བགྱི་བ་ལན་བརྒྱ་རྩ་བརྒྱད་ཚང་བར་གྱུར་ན། སེམས་ལ་ཅི་དང་ཅི་འདོད་པ་རྣམས་རྨི་ལམ་དུ་རིག་ཅིང་མཐོང་བར་འགྱུར་ལགས་སོ། །གང་ལ་ལ་ཞིག་རྟག་པར་ཕྱག་རྒྱ་འདི་བགྱིས་ནས་སྔགས་འདི་བཟླས་བརྗོད་བགྱིས་ན་སྡིག་པ་ཐམས་ཅད་བྱང་ནས་བྱང་ཆུབ་ཀྱི་སེམས་སྟོང་བར་མི་འགྱུར་བས། གང་ཟག་དེ་མཚན་མོ་མཆིས་ཉལ་བའི་ཚེ་གཡར་ལམ་ན་རྒྱ་ཆེར་འཕེལ་ཞིང་བཀྲ་ཤིས་པར་འགྱུར། གཡར་ལམ་ན་དེ་བཞིན་གཤེགས་པ་བྱང་ཆུབ་ཀྱི་ཤིང་དྲུང་དུ་བཞུགས་ནས་ལུང་སྟོན་པ་དང་མངོན་པར་རྫོགས་པར་སངས་རྒྱས་པར་འགྱུར་བའི་བར་དག་ཀྱང་མཐོང་བར་འགྱུར། ཚངས་པ་དང་། བརྒྱ་བྱིན་དང་། ལྷ་རྣམས་ཀྱང་རྟག་ཏུ་ཉེ་བར་མཆིས་ནས། རིམ་གྲོ་བགྱིད་ཅིང་ཡོངས་སུ་བསྲུང་བར་འགྱུར་ལགས་སོ། །དེ་ལ་བྱང་ཆུབ་སེམས་དཔའ་མིག་སྟོང་དང་ལྡན་པས་ལྷ་དང་། ཀླུ་དང་། འདྲེ་གདོན་སྡེ་བརྒྱད་པོ་དགུག་པའི་ཕྱག་རྒྱ་ནི་འདི་ལགས་ཏེ། འགྲེང་ནས་སུག་པ་རྐང་པ་གཉིས་གཤིབས་ཏེ། སྔར་སུག་པ་ལག་པ་གཡོན་པའི་མཐེ་བོ་ལག་མཐིལ་དུ་བཀུག་ནས་སོར་མོ་བཞི་ཁུ་ཚུར་བཅངས་ཏེ་སྙིང་གར་བཞག་གོ། །དེའི་རྗེས་ལ་སུག་པ་ལག་པ་གཡས་པ་ཡང་དེ་བཞིན་དུ་བགྱིས་ཏེ། ལག་པ་གཡས་པ་རྣ་དྲུང་དུ་གཏད་ནས། མཛུབ་མོ་ཕན་ཚུན་དུ་རྒྱུ་བར་བགྱིའོ། །སྔགས་ནི་འདི་ལྟ་སྟེ། ན་མོ་ནཱི་ལ་ཀཎྛ། ན་མ་ཨཱཪྱ་ཤ་པ་ཏ་སྭཱ་ཧཱ། ན་མ་ཨཱཪྱ་ཤ་ལ་སྭཱ་ཧཱ། ཨེ་ཧི་ཨེ་ཧི་སྭཱ་ཧཱ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གཟུངས་དང་ཕྱག་རྒྱ་འདི་ལེན་ཏམ། འཛིན་ཏམ། ཀློག་གམ། འདོན་པར་བགྱིད་ན། མྱུར་དུ་ཚེ་རབས་བདུན་ཚུན་ཆད་ཀྱི་སྔོན་གྱི་གནས་ཀྱི་དངོས་པོ་རྗེས་སུ་དྲན་པར་འགྱུར། སྦྲུལ་གདུག་པས་ཟིན་པར་མི་འགྱུར།
དུག་གིས་མི་ཚུགས་པར་འགྱུར། མཚོན་གྱིས་གནོད་པ་བགྱིད་པར་མི་འགྱུར། རྒྱལ་པོས་གཤེ་བར་མི་འགྱུར། ནམས་ཀྱང་སེམས་ཅན་དམྱལ་བའི་སྡུག་བསྔལ་མྱོང་བར་མི་འགྱུར་ལགས་སོ། །གང་ལ་ལ་ཞིག་གདུགས་རེ་བཞིན་དུ་རིག་སྔགས་འདི་འདོན་པར་བགྱིད་ན་འདྲེ་སྲིན་སྡེ་བརྒྱད་པོ་རྣམས་རིག་སྔགས་འདོན་པའི་དྲུང་དུ་ཉེ་བར་མཆིས་ནས་རིག་སྔགས་འདོན་པ་ཉན་པར་བགྱིད་དོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་འདྲེ་གདོན་གྱིས་ཟིན་པར་གྱུར་ན། སྐུད་པ་དཀར་པོ་ལ་སྔགས་ཀྱིས་བཏབ་སྟེ། སྔགས་ལན་རེ་བཟླ་ཞིང་མདུད་པ་རེ་རེ་མདུད་དེ་མདུད་པ་བཞི་བཅུ་རྩ་དགུ་ཚང་བར་བགྱིས་ནས། དེའི་མགུལ་དུ་བཏགས་ན་དེའི་ནད་སེལ་བར་འགྱུར་ལགས་སོ། །གལ་ཏེ་ཡུལ་གང་དུ་ལྟས་ངན་དང་། རིམས་ནད་བྱུང་སྟེ། ཡུལ་མི་མང་དུ་གུམ་པར་གྱུར་ན། རྒྱལ་པོའི་ཀུན་དགའ་ར་བ་དང་རྫིང་དག་ཏུ་པདྨ་སྟོང་རྩ་བརྒྱད་བླངས་ཏེ། པདྨ་རེ་རེ་ལ་སྔགས་ལན་རེ་བཏབ་ནས་ཞུགས་ཀྱི་ནང་དུ་བོར་ཏེ་བས་པར་བསྲེགས་ན་རིམས་ནད་རབ་ཏུ་ཞི་བར་འགྱུར་ལགས་སོ། །དེ་ལ་བྱང་ཆུབ་སེམས་དཔའ་མིག་སྟོང་དང་ལྡན་པའི་རྣམ་པར་གྲོལ་བའི་ཕྱག་རྒྱ་ནི་འདི་ལགས་ཏེ། སྐྱིལ་མོ་ཀྲུང་བཅས་ནས་སྔར་སུག་པ་ལག་པ་གཡོན་པའི་གུང་མོ་མཐེ་བོའི་རྩེ་མོ་དང་སྦྱར་ཏེ་བཀན་ལ། སོར་མོ་གཞན་གསུམ་ནི་བརྐྱང་ནས་པུས་མོ་གཡོན་པའི་སྟེང་དུ་བཞག་པར་བགྱིའོ། །དེའི་རྗེས་ལ་སུག་པ་ལག་པ་གཡས་པ་ཡང་དེ་བཞིན་དུ་བགྱིས་ནས། སུག་པ་ལག་པ་པུས་མོ་གཡས་པའི་སྟེང་དུ་ཁ་སྦུབ་ཏུ་གཞག་པར་བགྱིའོ། །གང་ལ་ལ་ཞིག་རྟག་པར་ཕྱག་རྒྱ་འདི་བགྱིས་ནས་ལུས་པོ་ཆེའི་སྔགས་ལན་ཉི་ཤུ་རྩ་གཅིག་བཟླས་བརྗོད་བགྱིས་ན། སྨོན་ལམ་རྣམས་ཡོངས་སུ་རྫོགས་པར་འགྱུར་ཞིང་སྡུག་བསྔལ་རྣམས་ཀྱང་རྣམ་པར་གྲོལ་བར་འགྱུར་རོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་མི་དགེ་བ་བཅུ་དང་མཚམས་མ་མཆིས་པ་ལྔ་ལ་སོགས་པའི་དངོས་
སྡིག་རྣམ་པ་སྣ་ཚོགས་པ་བགྱིས་པས་འཛམ་བུའི་གླིང་གི་ས་ཅི་མཆིས་པ་དེ་དག་ཐམས་ཅད་རྡུལ་ཕྲ་རབ་ཏུ་བགྱིས་ལ། རྡུལ་ཕྲ་རབ་དེ་རེ་རེ་ཡང་བསྐལ་པ་རེ་རེ་ལ་མངོན་པར་བྱུང་བར་གྱུར་ན། གང་ཟག་དེ་དངོས་སྡིག་རྣམ་པ་སྣ་ཚོགས་བགྱིས་པའི་དབང་གིས་བསྐལ་པའི་གྲངས་དེ་སྙེད་ཀྱི་བར་དུ་སེམས་ཅན་དམྱལ་བར་ལྷུང་ནས་སྡུག་བསྔལ་མྱོང་ཞིང་གཏན་དུ་འབྱུང་བའི་དུས་མ་མཆིས་པ་ཞིག་ལགས་ན་ཡང་། རིགས་ཀྱི་བུའམ། རིགས་ཀྱི་བུ་མོ་དེ་དག་གིས་རིང་བསྲེལ་དང་བཅས་པའི་སྐུ་གཟུགས་ཀྱི་སྤྱན་སྔར་ཟླ་བ་དཀར་པོའི་ངོ་ཚེས་བཅྭ་ལྔ་ལ་གདུགས་མཚན་གཅིག་ཟས་བཀུམ་སྟེ་ཕྱག་རྒྱ་མདུད་ནས། རིག་སྔགས་སྟོང་རྩ་བརྒྱད་ཚང་བར་བཟླས་ན་གོང་དུ་བསྟན་པའི་སྡུག་བསྔལ་དེ་དག་ཐམས་ཅད་ཞུ་བྱང་བར་འགྱུར་ཏེ། གལ་ཏེ་བྱང་བར་མི་འགྱུར་རོ་ཞེ་ན། དེ་ལྟ་བུའི་གནས་མ་མཆིས་ལགས་སོ། །དེ་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་མིག་སྟོང་དང་ལྡན་པས་རྫུ་འཕྲུལ་གྱི་རྐང་པ་ལ་རང་དབང་ཐོབ་པའི་ཕྱག་རྒྱ་ནི་འདི་ལགས་ཏེ། ལངས་ནས་འགྲེང་སྟེ་སྔར་སུག་པ་གཡོན་པས་སུག་པ་རྐང་པ་གཡོན་པའི་མཐེ་བོ་ལ་བཙིར་ནས་ཁུ་ཚུར་བཅངས་པ་བཞིན་དུ་བགྱིའོ། །དེའི་རྗེས་ལ་སུག་པ་ལག་པ་གཡས་པས་གཡོན་པའི་ལག་ངར་གྱི་སྟེང་དུ་བཙིར་ནས་ལུས་པོ་ཆེའི་སྔགས་ལན་བདུན་འདོན་པར་བགྱིས་ན། དཔག་ཚད་བརྒྱ་སྟོང་དུ་མར་མཆི་འཚལ་ནའང་དཀའ་བ་མ་མཆིས་པར་འགྱུར་ལགས་སོ། །སྔགས་འདོན་པའི་ཚེ་སྒྲ་འབྱུང་བར་མི་བགྱིའོ། །དེ་ལ་བྱང་ཆུབ་སེམས་དཔའ་མིག་སྟོང་དང་ལྡན་པས་རྫུ་འཕྲུལ་ལ་རང་དབང་ཐོབ་པའི་ཕྱག་རྒྱ་ནི་འདི་ལགས་ཏེ། སྔར་སུག་པ་ལག་པ་གཡོན་པའི་མཐེ་བོས་མཐེའུ་ཆུང་གི་སེན་མོའི་སྟེང་དུ་རེག་པར་བགྱིའོ། །དེའི་རྗེས་ལ་སུག་པ་ལག་པ་གཡས་པའང་དེ་བཞིན་དུ་བགྱིས་ནས། སོར་མོ་གཞན་གསུམ་ནི་སོ་སོར་ཡན་པར་བསྒྲེང་སྟེ། ལག་ངར་གྱི་ཚིགས་སྦྱར་ནས་སྤྱི་བོའི་སྟེང་དུ་བཞག་སྟེ། ལུས་
པོ་ཆེའི་སྔགས་ལན་བརྒྱ་རྩ་བརྒྱད་འདོན་པར་བགྱིད་ན་དྲང་སྲོང་འཕུར་ཏེ་མཆི་བ་དག་དང་འདྲ་བར་རང་དབང་དུ་མཆི་བར་འགྱུར་ལགས་སོ། །དེ་ལ་བྱང་ཆུབ་སེམས་དཔའ་རྣམས་སེམས་རྩེ་གཅིག་ཏུ་སྤྱན་འདྲེན་པའི་ཕྱག་རྒྱ་ནི་འདི་ལགས་ཏེ། སུག་པ་གཉིས་ནམ་མཁའ་ལ་ཐལ་མོ་སྦྱར་ཏེ་ལག་ངར་གྱི་ཚིགས་སྦྱར་ནས་མཛུབ་མོ་གཉིས་ནི་ཕན་ཚུན་རྒྱུ་བར་བགྱིའོ། །སྔགས་ནི་འདི་ལྟ་སྟེ། ཨོྃ་ཨ་རོ་ལི་ཀ་ཏེ་ལེ། ལོ་ཀི་བི་དོ་ཡ། སརྦ་ཡ་དྲུ། པྲ་མརྡྷ་ན་ཀ་རཱ་ཡ་པུ་རུ་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཉན་ཐོས་ཆེན་པོ་དེ་དག་དང་བྱང་ཆུབ་སེམས་དཔའ་དེ་དག་དང་། ཚངས་པ་ཆེན་པོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟར་བཅས་པའི་འཇིག་རྟེན་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཕྱག་སྟོང་སྤྱན་སྟོང་དང་ལྡན་པ་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས་ཆོ་ག་དང་བཅས་པ་རྫོགས་སོ།། །།ཞུ་ཆེན་གྱི་ལོཙྪ་བ་བནྡེ་ཆོས་གྲུབ་ཀྱིས་རྒྱའི་དཔེ་ལས་བསྒྱུར་ཏེ་གཏན་ལ་ཕབ་པ།།