འཕགས་པ་ཡི་གེ་དྲུག་པའི་རིག་སྔགས།
རྒྱ་གར་སྐད་དུ། ཨཱཪྱ་ཥ་ཌ་ཀྵ་ར་བིདྱཱ། བོད་སྐད་དུ། འཕགས་པ་ཡི་གེ་དྲུག་པའི་རིག་སྔགས། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཡི་གེ་དྲུག་པའི་རིག་སྔགས་གང་ཡང་དག་པར་རྫོགས་པའི་སངས་རྒྱས་དྲུག་དང་། འཇིག་རྟེན་སྐྱོང་བ་བཞི་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་ཀྱིས་བཤད་པ། ཡི་གེ་དྲུག་པའི་རིག་སྔགས་ཀྱི་རྒྱལ་མོ་འདི་ཀུན་དགའ་བོ་ཁྱོད་ཀྱིས་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །ཏདྱ་ཐཱ། དནྟི་ལེ། ཀནྟི་ལེ། དཎྜི་མ་
ཏི། མ་དྷུ་མ་ཏི། མ་རཎྜེ། ཀོ་རཎྜེ། དྲཱ་བི་ཏི། ཀོ་ཤཱ་རི། ཚ་ཊ་ཛེ། དུ་དུ་མ་ཏི། ཀེ་ཏུ་མ་ཏི། ཙུ་དུནྡྷེ། ཀོོ་ཊ་དཱནྟེ། ཏ་ཧུ་ར་རེ། ཨེ་ན་ནི་གེ། ཧུ་ཏ་བ་ཧུ་ནི། ཀུན་དགའ་བོ་འདི་ནི་ཡི་གེ་དྲུག་པའི་རིག་སྔགས་ཏེ། ཀླད་པ་ན་བ་དང་། མིག་ན་བ་དང་། རྣ་བ་ན་བ་དང་། སོ་ན་བ་དང་། སྣ་ན་བ་དང་། ལྕེ་ན་བ་དང་། སྙིང་ན་བ་དང་། ལྟོ་ན་བ་དང་། རྒྱབ་ན་བ་དང་། རྩིབ་ལོགས་ན་བ་དང་། ཆུ་སོ་ན་བ་དང་། བྱིན་པ་ན་བ་དང་། རྐང་པ་ན་བ་དང་། ཡན་ལག་ན་བ་དང་། ཉིང་ལག་ན་བ་དང་། ཟས་མ་ཞུ་བ་དང་། ལྦོས་པ་དང་། མངལ་དུ་ཐོགས་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་བ་དང་། རིམས་དྲག་པོ་དང་། ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། རིམས་ཡུད་ཙམ་པ་དང་། ཉིན་མོའི་རིམས་དང་། མཚན་མོའི་རིམས་ཀྱིས་བཏབ་པ་ལ་ཡི་གེ་དྲུག་པའི་རིག་སྔགས་འདིས་བསྲུང་བ་དང་། ཡོངས་སུ་བསྐྱབ་པ་དང་། ཡོངས་སུ་གཟུང་བ་དང། ཡོངས་སུ་བསྐྱང་བ་དང་། ཞི་བ་དང་། བདེ་ལེགས་སུ་འགྱུར་བ་དང་། ཆད་པ་སྤང་བ་དང་། མཚོན་ཆ་སྤང་བ་དང་། དུག་གཞིལ་བ་དང་། ཆུས་གཏོར་བ་དང་། སྲད་བུས་བཅིང་བ་བྱས་པ་ལས་གང་ཞིག་འགལ་བར་བྱེད་ན། དེའི་མགོ་ཨརྫ་ཀའི་དོག་པ་བཞིན་དུ་ཚལ་བ་བདུན་དུ་མི་འགས་པ་ནི། ཀུན་དགའ་བོ་ངས་ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ན་མ་མཐོང་ངོ་། །ཏདྱ་ཐཱ། ཨཎྜ་རེ། པཎྜ་རེ། ཀ་ར་ཏེ། ཀེ་ཡཱུ་རེ། བྷཱུ་ཏྃ་ག་མེ། བྷཱུ་ཏ་ག་ཧེ། བྷཱུ་ཏ་པྲ་ཀྵི་ཏེ། བྷཱུ་ཏ་ཡ་སྨ་ར་ཡ་ནི། པྲི་ཡཱ་བ་ཏི། ཏེ་ཛ་བ་ཏི། ཡ་ཤོ་བ་ཏི། གི་རཱི་ཎི་ནི། ཤ་རི་ཎི་ནི། བདག་འཇིགས་པ་ཐམས་ཅད་དང་གནོད་པ་
ཐམས་ཅད་ལས་བདེ་ལེགས་སུ་གྱུར་ཅིག་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཡི་གེ་དྲུག་པ་ཞེས་བྱ་བའི་རིག་སྔགས་རྫོགས་སོ།།