འཕགས་པ་བར་དུ་གཅོད་པ་ཐམས་ཅད་རྣམ་པར་སྦྱོང་བ་ཞེས་བྱ་བའི་གཟུངས།
རྒྱ་གར་སྐད་དུ། ཨཱཪྱ་སརྦ་ཨནྟ་རཱ་ཡ་ཀི་བི་ཤོ་དྷ་ནི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་བར་དུ་གཅོད་པ་ཐམས་ཅད་རྣམ་པར་སྦྱོང་བ་ཞེས་བྱ་བའི་གཟུངས། སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ཀྱི་ཤར་ཕྱོགས་བྲམ་ཟེའི་གྲོང་ཤིང་ཨ་མྲའི་གནས་ཞེས་བྱ་བ་དེའི་བྱང་ཕྱོགས་ན་ལུས་འཕགས་རིལ་དབང་པོའི་བྲག་ཕུག་ན་བཞུགས་སོ། །དེ་ནས་ལྷའི་དབང་པོ་བརྒྱ་བྱིན་ལ་འཆི་འཕོའི་ཆོས་སུ་གྱུར་ཏེ། ཚེའི་འདུ་བྱེད་ཀྱི་ལྷག་མ་ལུས་པའི་སྔ་ལྟས་ཁོང་དུ་ཆུད་ནས་སྐྲག་པ་སྐྱེས་ཏེ། བཙུན་མོའི་འཁོར་དང་། གཡོག་དང་བཅས་པར་བཅོམ་ལྡན་འདས་ཀྱི་གན་དུ་སོང་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་སྟེ། ཡང་ཚེ་དོན་དུ་གཉེར་བ་དང་། བཅོམ་ལྡན་འདས་ཀྱིས་དེ་ལ་བཀའ་སྩལ་པ། ཀོོ་ཤི་ཀ་དེའི་ཕྱིར་ཁྱོད་ཀྱི་རིག་པའི་གསང་སྔགས་གཞི་གང་
དག་གིས་བདུད་ཐམས་ཅད་དང་། ཕྱིར་རྒོལ་བ་ཐམས་ཅད་དང་། ཕས་ཀྱི་རྒོལ་བ་ཐམས་ཅད་ཤིན་ཏུ་ཚར་གཅད་པར་འགྱུར་བ། བར་དུ་གཅོད་པ་ཐམས་ཅད་རྣམ་པར་སྦྱོད་པ་ཞེས་བྱ་བའི་རིག་པའི་གསང་སྔགས་གཞི་འདི་རྣམས་ཉོན་ཅིག །ཏདྱ་ཐཱ། ཨ་བྷ་ཡེ། བྷ་ཡ་བི་ག་ཏེ། བྷ་ཡ་པ་རི་ཤྭ་དྷ་ནེ། ཨ་བྷ་ཡེ། ཨ་བྷ་ཡཾ་ད་དེ། ནི་རུ་བ་ཀླིཥྚི། ཨ་ན་ཀུ་ལེ། ཨ་ཀུ་ལ་བ་རི་ཤོ་དྷ་ནེ། ཨ་གྲ་ཏེ། ཨ་བི་ཀལྤེ། ཨ་བི་ཀལྤ་ནེ། ཨཙྱུ་ཏེ། ཤུ་བྷེ་ཤུ་བྷེ། ཏེ་ཛ་སྟེ་ཛོ་བ་ཏི། ཤ་མེ་ཨུ་པ་ཤ་མེ། མ་ཧོ་པ་ཤ་མེ། མེེ་ཏྲི་མེེ་ཏྲྱུདྡྷི་ཏེ་ཏོ་ཥེ། ཏོ་ཥ་ཡ་ཎེ་ས་ཏྱེ། ས་ཏྱ་དརྵི། ཨ་བི་རུདྡྷེ། ས་ཧི་ཏེ། སི་ཧི་ཏ་ཏྭེ། ཨཪྠེ་ཨཪྠ་སིདྡྷེ། ཨ་མྲྀ་ཏེ། ཨ་མྲྀ་ཏ་པ་ཏེ། ཨབྷཱི་ཏེ། བཛྲ་སཏྱེ། ཨཀྵ་ཡེ། ཨཀྵ་ཡ་པྲ་བྷེ། དྲནྟྲ་བ་རེ། ཤུདྡྷེ་ཤུདྡྷེ། པྲ་བྷེ། ཨ་བ་བྷཱ་སེ། ཨ་བ་བྷཱ་ས་བ་ཏི། ཨུ་པ་ཡོ་གེ། ཨ་ནུཏྟ་རེ། ས་མ་ཙིཏྟེ། བུདྡྷ། ཨ་དྷིཥྛཱ་ནེ། ཤཱི་ལེ་བི་ཤོ་དྷ་ནེ། ཨ་སཾ་ཧརྱེ། སུ་ནི་གྲྀ་ཧཱི་ཏཾ་མ་ར་བ་ལཱ་ནཱཾ། པ་ར་ཛ་ཡོ་དྲྀཥྚི་ག་ཏྲཱ་ཎཱྃ། ཛྭ་ལ་ནཾ་དྷརྨོལྐཱ་ཡེེ། ཨུཏྒྷ་ཊཱ་ནཱཾ། དྷརྨ་ནི་དྷ་ན་སྱ། སྃ་གྲ་ཧཱ་ཎཱཾ། དྷརྨ་ཀོ་ཥ་སྱ། ཀོོ་ཤི་ཀ་ཁྱོད་ཀྱི་རིག་པའི་གསང་སྔགས་གཞི་ངག་ནི་ཁྱོད་ཀྱི་རིག་པའི་གསང་སྔགས་གཞི་གང་དག་གིས་བདུད་ཐམས་ཅད་དང་། ཕྱིར་རྒོལ་བ་ཐམས་ཅད་དང་། ཕས་ཀྱི་རྒོལ་བ་ཐམས་ཅད་ཤིན་ཏུ་ཚར་བཅད་པར་འགྱུར་བ་དག་གོ། །འདི་བཟླས་བརྗོད་བྱས་ན་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་བར་དུ་གཅོད་པ་ཐམས་ཅད་རྣམ་པར་དག་པར་འགྱུར། དོན་ཐམས་ཅད་ཀྱང་འགྲུབ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ལྷའི་དབང་པོ་བརྒྱ་བྱིན་ཡི་རངས་ཏེ། དེའི་ཚེ་འདི་སྐད་དུ། ཁོ་བོ་ལྷ་ལས་མ་གྱུར་ལ། །འདི་ཉིད་ན་ནི་འདུག་བཞིན་དུ། །ཁོ་བོས་ཚེ་ཡང་ཐོབ་ཟིན་གྱིས། །གྲོགས་དག་དེ་ལྟར་ཤེས་པར་གྱིས། །ཞེས་ཆེད་དུ་བརྗོད་པ་ཆེད་དུ་བརྗོད་དོ། །འདིའི་མཐུ་ཐམས་
ཅད་ཀྱིས་བདག་གི་བར་དུ་གཅོད་པ་དང་། བགེགས་དང་། ལོག་འདྲེན་ཐམས་ཅད་ནི་མེད་པར་གྱུར་ཅིག །ཕུན་སུམ་ཚོགས་པ་ཐམས་ཅད་ནི་གྲུབ་པར་གྱུར་ཅིག །ན་མོ་ཨ་ཀེ་ཏུ་ལེན་གེ་ཙཎྜ་ན་ཡེ་སྭཱ་ཧཱ། སརྦ་ཨརྠ་སཱ་དྷ་ནི་ཡེ་སྭཱ་ཧཱ། དྷརྨརྠ་སཱ་དྷ་ནི་ཡེ་སྭཱ་ཧཱ། སརྦཱ་ཨནྟ་རཱ་ཡི་བི་ཤོ་དྷ་ནི་ཡེ་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ལྷ་རྣམས་ཀྱི་དབང་པོ་བརྒྱ་བྱིན་བཙུན་མོའི་འཁོར་དང་བཅས་ཤིང་འཁོར་དང་བཅས་པ་དང་། ཐམས་ཅད་དང་ལྡན་པའི་འཁོར་དེ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བར་དུ་གཅོད་པ་ཐམས་ཅད་རྣམ་པར་སྦྱོང་བ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།།