འཕགས་པ་འཇིགས་པ་ཆེན་པོ་བརྒྱད་ལས་སྒྲོལ་པ་ཞེས་བྱ་བའི་གཟུངས།
རྒྱ་གར་སྐད་དུ། ཨཱརྱཱ་ཥྚ་མ་ཧཱ་བྷ་ཡ་ཏཱ་ར་ཎཱི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་འཇིགས་པ་ཆེན་པོ་བརྒྱད་ལས་སྒྲོལ་པ་ཞེས་བྱ་བའི་གཟུངས། སངས་
རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་བཞིན་གཤེགས་པ་ཡོན་ཏན་འབྱུང་གནས་ལ་ཕྱག་འཚལ་ལོ། །དེ་བཞིན་གཤེགས་པ་ཀུན་ནས་སྤོས་དྲི་ལ་ཕྱག་འཚལ་ལོ། །དེ་བཞིན་གཤེགས་པ་གཞན་གྱིས་མི་ཐུབ་པའི་རྩལ་དང་ལྡན་པ་ལ་ཕྱག་འཚལ་ལོ། །དེ་བཞིན་གཤེགས་པ་སྒྲིབ་པ་ཐམས་ཅད་རྣམ་པར་སེལ་བ་ལ་ཕྱག་འཚལ་ལོ། །དེ་བཞིན་གཤེགས་པ་ཟླ་བ་མཆོག་ལ་ཕྱག་འཚལ་ལོ། །དེ་བཞིན་གཤེགས་པ་ཞི་བའི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཟླ་བའི་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་འཇིགས་པ་མེད་པར་བྱེད་པ་ལ་ཕྱག་འཚལ་ལོ། །ཏདྱ་ཐཱ། དྷ་རེ་དྷ་རེ། དྷཱ་རེ་དྷཱ་ར་ཎཱི། རཏྣ་ཀོ་ཊེ། ཨ་བྷ་ཡ་ཀལྦེ། ཀལྦེ་ནི། ག་ཎེ་ཨ་ནནྟ་ཀལྦེ། ཨ་མྲྀ་ཏ་ཀལྦེ། ཧུ་ཏཱ་ཤ་རེ། ཨ་ནནྟ་མུ་ཁེ། ཨ་ནནྟ་ཙཀྵུ་ས་མུཏྒ་ཏེ། ཨོྃ་བྷ་སྭཱ་ཧཱ། རིགས་ཀྱི་བུ་གཟུངས་ཀྱི་གསང་སྔགས་འདི་དག་ནི་སེམས་ཅན་ངན་སོང་དུ་འགྲོ་བ་རྣམས་ཀྱི་དོན་གྱི་ཕྱིར། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་གིས་གསུངས་པ་དང་། བྱིན་གྱིས་བརླབས་པ་དང་། རྗེས་སུ་ཡི་རང་བ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་གང་ལ་ལ་གཟུངས་འདི་འཛིན་པར་བྱེད་པ་དེ་འཇིགས་པ་བརྒྱད་པོ་སེམས་ཅན་དམྱལ་བའི་འཇིགས་པ་མཐའ་ཡས་པ་དང་། དུད་འགྲོའི་སྐྱེ་གནས་ཀྱི་འཇིགས་པ་མཐའ་ཡས་པ་དང་། གཤིན་རྗེའི་འཇིག་རྟེན་གྱི་འཇིགས་པ་མཐའ་ཡས་པ་དང་། ཡི་དགས་ཀྱི་འཇིགས་པ་མཐའ་ཡས་པ་དང་། བགྲོད་དཀའ་བའི་འཇིགས་པ་མཐའ་ཡས་པ་དང་། སྐྱེ་བའི་འཇིགས་པ་མཐའ་ཡས་པ་དང་། ནད་ཀྱི་འཇིགས་པ་མཐའ་ཡས་པ་དང་། འཆི་བའི་འཇིགས་པ་མཐའ་ཡས་པ་དག་ལས་ཡང་དག་པར་འདའ་བར་འགྱུར་རོ། །ཕྱོགས་བཅུའི་སངས་རྒྱས་བཅོམ་ལྡན་འདས་
རྣམས་ཀྱིས་དགོངས་པར་འགྱུར་རོ། །སེམས་རྣམ་པར་གཡེང་བ་མེད་པར་འཆི་བའི་དུས་བྱེད་ཅིང་། སངས་རྒྱས་རྣམས་ཀྱི་སྤྱན་སྔར་སྐྱེ་བར་འགྱུར། ཟད་མི་ཤེས་པའི་ལུས་ཐོབ་པར་འགྱུར། སྤྲུལ་པའི་ལུས་ཀྱང་ཐོབ་པར་འགྱུར་རོ། །ན་མཿསརྦ་བིདྱཱ། སིདྡྷྱ་ནྟུ་མེ་མནྟྲ་པཱ་ད་སྭཱ་ཧཱ། འཕགས་པ་འཇིགས་པ་ཆེན་པོ་བརྒྱད་ལས་སྒྲོལ་བ་ཞེས་བྱ་བའི་གཟུངས་རྫོགས་སྷོ།།