འཕགས་པ་བུ་མང་པོ་རྟོན་པ་ཞེས་བྱ་བའི་གཟུངས།
རྒྱ་གར་སྐད་དུ། ཨཱརྱ་བ་ཧུ་པུ་ཏྲ་པྲ་ཏི་ས་ར་ནཱ་མ་དྷཱ་ར་ཎཱི། བོད་སྐད་དུ། འཕགས་པ་བུ་མང་པོ་རྟོན་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེའི་ཚེ་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དེང་འདིར་རྒྱལ་པོ་གསལ་རྒྱལ་དང་འཐབ་རྩོད་མཚང་བྲུས་ཏེ་བཀྱེ་བར་གྱུར་ན། བཅོམ་ལྡན་འདས་དེ་ལ་བདག་གིས་ཇི་ལྟར་བསྒྲུབ་པར་བགྱི། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་དེའི་ཕྱིར་ཁྱོད་ཀྱིས་བུ་མང་པོ་རྟོན་པ་ཞེས་བྱ་བའི་རིག་སྔགས་འདི་ཟུང་ཤིག་ཆོངས་ཤིག་ལྷོགས་ཤིག་ཀུན་ཆུབ་པར་གྱིས་ཤིག ཏདྱ་ཐཱ། ད་ཌེ། བ་ད་ཌེ། ཨུ་པ་ད་ཌ་ད་ཌེ། ཨུ་པ་ད་ཌེ་ད་ཌ། གམ་བྷཱི་རི། ཨ་བརྟ་ནེ། ནི་བརྟ་ནེ། དྷ་ཧི་དྷ་ཧི། ཨ་བརྟ་ནི། བདག་གི། སརྦེ་ཤཱ་ན་ཀརྨི་ཀཱ་ནཱཾ། པྲ་ཏྱནྲི་ཀཱ་ནཱཾ། པྲ་ཏྱ་མོ་ཏྲི་ཎཱཾ། ཙཀྵུ་མོ་ཧཱ་ནཱཾ་ཀ་རོ་མི། ཤྲོ་ཏྲེ་མོ་ཧཱ་ནཱཾ་ཀ་རོ་མི། ཛི་ཧྭཱ་གྲཱ་ཏཱཾ་ཀ་རོ་མི། ཛ་མབྷཱ་ནཱཾ། སྟམ་བྷ་ནཱཾ། མོ་ཧཱ་ནཱཾ། པྲ་མོ་ཧཱ་ཎཱཾ། ཁྱིམ་བདག་གང་ལ་ལ་ཞིག་བུ་མང་པོ་རྟོན་པའི་གཟུངས་འདི་སྐུད་པ་དམར་པོ་ལ་ལན་བདུན་སྔགས་ཏེ། ལག་པ་གཡོན་པའི་སོར་མོ་གཅིག་ལ་བཅིངས་ན་དེའི་ལུས་ལ་དུག་དང་མཚོན་དང་ནད་དང་རིམས་ནད་དང་རིམས་དྲག་པོས་མི་ཚུགས་སོ། །འཐབ་པ་དང་། མཚང་འདྲུ་བ་དང་། རྩོད་པ་རྣམས་ཀྱི་ལན་ཐེབས་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཁྱིམ་བདག་མགོན་མེད་ཟས་སྦྱིན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བུ་མང་པོ་རྟོན་པ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།།