འཕགས་མ་རི་ཁྲོད་ལོ་མ་གྱོན་པའི་གཟུངས།
རྒྱ་གར་སྐད་དུ། ཨཱརྱ་པརྞྞ་ཤ་བ་རི་དྷཱ་ར་ཎཱི། བོད་སྐད་དུ། འཕགས་མ་རི་ཁྲོད་ལོ་མ་གྱོན་པའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་ཕྱག་འཚལ་ལོ། །མིའུ་ཐུང་ཁྱོད་ལ་ཕྱག་འཚལ་ལོ། །བཅོམ་ལྡན་འདས་མ་ཤ་ཟ་བ། མིའུ་ཐུང་མ་ཤ་ཟ་མ། རི་ཁྲོད་ལོ་མ་གྱོན་མ་ཤ་ཟ་ཁྱོད་ལ་ཕྱག་འཚལ་ལོ། །ཕྱག་ན་ཞགས་པ་དང་དགྲ་སྟ་ཐོགས་མ། འཇིགས་པ་གང་དག་ཅི་བྱུང་བ་དེ་དག་ཐམས་ཅད་དང་། ཡམས་ཀྱི་ནད་གང་དག་ཅི་ཡང་རུང་བ་དང་། འཆི་བྱེད་གང་དག་ཅི་ཡང་རུང་བ་དང་།
འཆི་བྱེད་ཆེན་པོ་གང་དག་ཅི་ཡང་རུང་བ་དང་། གནོད་པ་གང་དག་ཅི་ཡང་རུང་བ་དང་། འཁྲུག་པ་གང་དག་ཅི་ཡང་རུང་བ་དང་། ཁོང་དུ་གནོད་པ་གང་དག་ཅི་ཡང་རུང་བ་ཐམས་ཅད་དང་། འགོ་བའི་ནད་དང་། འགོ་བ་དང་འབྲེལ་བ་གང་དག་ཅི་ཡང་རུང་བ་དེ་དག་ཐམས་ཅད་བྱིས་པ་ཁོ་ན་ལས་འབྱུང་གི་མཁས་པ་ལ་ནི་མ་ཡིན་ཏེ་བདེན་པ་དང་བདེན་པའི་ཚིག་དེས་སོང་ཤིག་སོང་ཤིག་དང་མཁས་པས་བྱིན་གྱིས་བརླབས་པའི་གསང་སྔགས་ཀྱི་གཞི་འདི་དག་གིས་བསྲུང་བར་གྱིས་ཤིག་བསྲུང་བར་གྱིས་ཤིག །ཡོངས་སུ་བསྐྱང་པ་དང་། ཡོངས་སུ་བསྐྱང་བ་དང་། ཡོངས་སུ་གཟུང་བ་དང་། ཞི་བ་དང་བདེ་ལེགས་སུ་འགྱུར་བ་དང་། ཆད་པ་སྤང་བ་དང་། མཚོན་ཆ་སྡང་བ་དང་། དུག་གཞིལ་བ་དང་། དུག་གསད་པ་དང་། མཚམས་གཅད་པ་དང་། ས་བཅིང་བགྱིས་ཤིག །ཏདྱ་ཐཱ། ཨོཾ་ཨ་མྲྀ་ཏེ། ཨཱ་ཤྭ་སྟེ། ཨཱ་ཤྭ་སྟ་དྒེ། མཱ་མ་ར་མཱ་མ་ར། པྲ་ཤ་མ། ཨུ་བ་ཤ་མ། དུན་ནུ་པི་དུན་ནུ། དུ་ལེ་དུ་མ་ལེ་སྭཱ་ཧཱ། ན་མ་སརྦ་ཤ་བ་རཱ་ཎཱཾ་ན་མོ་མ་ཧཱ་ཤ་པ་རཱ་ཎཱཾ། ཨོཾ་བི་ཤཱ་ཙི་བརྞྞ་ཤ་བ་རི། བི་ཤཱ་ཙེ་སྭཱ་ཧཱ། ཨོཾ་པརྞྞ་ཤ་བ་རི་ཧཱུྃ་ཕཊ་སྭཱ་ཧཱ། ཨོཾ་ཨཾ་ཀུ་རེ། མཾ་ཀུ་རེ། པརྞྞ་ཤ་བ་རི་ཡེ་སྭཱ་ཧཱ། ཨོཾ་བི་ཤཱ་ཙི་པརྞྞ་ཤ་བ་རི། སརྦ་མཱ་རི་པྲ་ཤ་མ་ནི། སརྦ་དུཥྛཱ་ནཱ་ན། བནྡྷ་མུ་ཁེ། སརྦ་མུ་ཁེ་ཧཱུྃ་ཕཊ་སྭཱ་ཧཱ། འཕགས་མ་རི་ཁྲོད་ལོ་མ་གྱོན་པའི་གཟུངས་རྫོགས་སོ།། །།