གསང་བའི་སྙིང་པོ་དེ་ཁོ་ན་ཉིད་ངེས་པ།
བོད་སྐད་དུ། གསང་བའི་སྙིང་པོ་དེ་ཁོ་ན་ཉིད་ངེས་པ། བཅོམ་ལྡན་འདས་དཔལ་ཀུན་དུ་བཟང་པོ་ལ་ཕྱག་འཚལ་ལོ། །འདི་སྐད་བཤད་པའི་དུས་གཅིག་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་ཉིད་མ་ལུས་མི་ལུས་ལུས་པ་མེད་པ་ཐམས་ཅད་དང་སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཏེ། །འོག་མིན་གྱི་གནས་མཐའ་དང་དབུས་མེད་པ་ན་གཞི་ཚད་མེད་པའི་ཡེ་ཤེས་ཀྱི་འཁོར་ལོ་ཁྱབ་པར་གསལ་བ་ལ་ཡེ་ཤེས་རིན་པོ་ཆེ་སྣ་ཚོགས་འབར་བའི་གཞལ་ཡས་ཁང་། རྒྱ་ཕྱོགས་བཅུར་ཡོངས་སུ་མ་ཆད་པ། ཡོན་ཏན་དཔག་ཏུ་མེད་པར་རྒྱས་པའི་ཕྱིར་གྲུ་བཞིར་གྱུར་པ། ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་དུ་འཁྱིལ་པ། ཡེ་ཤེས་བསམ་གྱིས་མི་ཁྱབ་པའི་རིན་པོ་ཆེ་དབྱིབས་དང་ཁ་དོག་ལ་སོགས་ཏེ། །རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པའི་ཚད་དཔག་ཏུ་མེད་པ། ཡེ་ཤེས་རིན་པོ་ཆེ་སྣ་ཚོགས་ཀྱི་ཕྲེང་བ་དང་། ཆུན་འཕྱང་དང་། ཤར་བུའི་རྒྱན་དང་། གཟུགས་སྣ་ཚོགས་དང་། སྒྲ་སྣ་ཚོགས་དང་། དྲི་སྣ་ཚོགས་དང་། རོ་སྣ་ཚོགས་དང་། རེག་བྱ་སྣ་ཚོགས་ཀྱིས་ཕྱོགས་བཅུར་འཁྲིགས་པར་རང་བྱུང་ལ། མི་སྒྲིབ་པར་གསལ་བའི་རྒྱན་བསམ་གྱིས་མི་ཁྱབ་པས་བཀླུབས་པ། རྣམ་པར་ཐར་པ་བཞིའི་སྒོ་ནས་འཇུག་པའི་སྒོ་ཁྱུད་ཅན། རྣམ་པར་ཐར་བ་བརྒྱད་ཀྱི་རྟ་བབས་དང་ལྡན་པའི་ཕྱི་དང་ནང་མེད་པར་ཀུན་དུ་ཡང་ནང་དུ་གྱུར་པ་ན་མི་འཇིགས་པ་སེང་གེའི་ཁྲི་དང་། སྟོབས་ཀྱི་གླང་པོའི་ཁྲི་དང་། རྫུ་འཕྲུལ་གྱི་རྟའི་ཁྲི་དང་། དབང་གི་རྨ་བྱའི་ཁྲི་དང་། ཐོགས་པ་མེད་པ་ནམ་མཁའ་ལྡིང་གི་ཁྲི་དང་། རང་བཞིན་གྱིས་འོད་གསལ་བ་ཉི་ཟླའི་དཀྱིལ་འཁོར་དང་། །
གོས་པ་མེད་པ་པདྨ་རིན་པོ་ཆེའི་གདན་ལ་སྐུ་མདུན་དང་རྒྱབ་མེད་པ་ཐམས་ཅད་དུ་ཡང་ཞལ་ཐལ་ལེ་བར་གསལ་ཞིང་། མཚན་དང་དཔེ་བྱད་དུ་ལྡན་པ། བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པར་ཀུན་དུ་སྣང་བ། ལྷུན་གྱིས་གྲུབ་པའི་སྐུ་གསུང་ཐུགས་ཆེན་པོ་ལས་ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་ཀྱི་སྐྱིལ་མོ་ཀྲུང་དུ་བཞུགས་པ། ཡེ་ཤེས་དྲུག་གི་ཕྱག །ཡེ་ཤེས་རིན་པོ་ཆེའི་ཕྱག་འབར་བ་ཅན། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ་འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་དང་། དེ་བཞིན་གཤེགས་པ་ཚོར་བའི་རྒྱལ་པོ་དང་། དེ་བཞིན་གཤེགས་པ་འདུ་ཤེས་ཀྱི་རྒྱལ་པོ་དང་། དེ་བཞིན་གཤེགས་པ་འདུ་བྱེད་ཀྱི་རྒྱལ་པོ་དང་། དེ་དག་ཀུན་ཀྱང་མཐིང་ག་དང་། དཀར་པོ་དང་། སེར་པོ་དང་། ལེ་བརྒན་དང་། ལྗང་གུའི་མདོག་ཏུ་འཚེར་བ། བཙུན་མོ་དམ་པའི་སྣང་བའི་དབྱིངས་དང་། སྲ་བའི་དབྱིངས་དང་། མཉེན་པའི་དབྱིངས་དང་། དྲོ་བའི་དབྱིངས་དང་། བསྐྱོད་པའི་དབྱིངས་ལ་སོགས་པ། བཙུན་མོའི་ཚོགས་དང་གཉིས་སུ་མེད་པའི་ཆོས་ཀྱིས་དབྱིངས་ཀུན་དུ་མཐའ་ཡས་པར་ཁྱབ་པ་ནི་འདི་ལྟ་སྟེ། དཔེར་ན་ཏིལ་གྱི་གང་བུ་བཞིན་དུ་གང་ནས་ཁྱབ་པར་བཞུགས་སོ། །དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། བྱང་ཆུབ་ཆེན་པོ་རྡོ་རྗེ་ཐོས་པ་དང་། །བྱང་ཆུབ་ཆེན་པོ་རྡོ་རྗེ་སྣོམ་པ་དང་། བྱང་ཆུབ་ཆེན་པོ་རྡོ་རྗེ་མྱོང་བ་དང་། བཙུན་མོ་མཐོང་བར་བྱ་བ་དང་། མཉན་པར་བྱ་བ་དང་། བསྣམ་པར་བྱ་བ་དང་། མྱང་བར་བྱ་བའི་ཚོགས་དང་། བྱང་ཆུབ་ཆེན་པོ་རྡོ་རྗེ་མཐོང་བྱེད་དང་། བྱང་ཆུབ་ཆེན་པོ་རྡོ་རྗེ་ཐོས་བྱེད་དང་། བྱང་ཆུབ་ཆེན་པོ་རྡོ་རྗེ་སྣོམ་བྱེད་དང་། བྱང་ཆུབ་ཆེན་པོ་རྡོ་རྗེ་མྱོང་བྱེད་དང་། བཙུན་མོ་འདས་པ་དང་། ད་ལྟར་འབྱུང་བ་དང་། མ་བྱོན་པའི་ཚོགས་དང་། འཇོམས་པ་ཆེན་མོ་རེག་པ་དང་། འཇོམས་པ་ཆེན་མོ་རེག་བྱེད་དང་། འཇོམས་པ་ཆེན་མོ་རེག་ཤེས་དང་། བཙུན་མོ་
རྟག་པར་མ་ཡིན་པ་དང་། ཆད་པར་མ་ཡིན་པ་དང་། བདག་ཏུ་མ་ཡིན་པ་དང་། མཚན་མར་མ་ཡིན་པ་ལ་སོགས་པ་དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་དང་། གསུང་དང་། ཐུགས་དང་། ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨེ། ཨེ། ཨེ་མའོ། །དེ་བཞིན་ཉིད་ཀྱི་དབྱིངས་ཉིད་དང་། དབང་སྒྱུར་ཡེ་ཤེས་དཀྱིལ་འཁོར་ཐུགས་དང་རང་སྣང་བ་ཉིད་ཏིང་ངེ་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི་སྐུ་དང་གསུང་དང་ཐུགས་ཡོན་ཏན་ཕྲིན་ལས་སེལ་མེད་པའི་ཡིད་བཞིན་ནོར་བུ་རིན་པོ་ཆེ་མི་ཟད་པར་ལྡན་པ་རྒྱན་གྱི་འཁོར་ལོ་རྡོ་རྗེ་མཆོག་གི་གནས་ཉིད་དོ་ཞེས་རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་དུ་བཟང་པོ་ཐམས་ཅད་མ་ལུས་པའི་རང་བཞིན་གྱི་ཚུལ་རྡོ་རྗེས་བཙུན་མོ་ཆོས་བྱ་བ་མོ་ཀུན་དུ་བཟང་མོ་ལ་འཇུག་པར་གྱུར་ཏེ་ཆེད་དུ་བརྗོད་པ་འདི་བརྗོད་དོ། །ཨོྃ་ཆོས་ཀྱི་ཆོས་ཉིད་ཤེས་བྱའི་དབྱིངས། །ཀུན་དུ་བཟང་མོ་བདེ་བའི་ཡུམ། །མ་གཡོས་རང་བཞིན་དཀྱིལ་འཁོར་ནི། །བདག་ཡིན་བདག་གི་སྤྱོད་ཡུལ་བ། །ཕྱག་རྒྱ་སྣ་ཚོགས་སོ་སོར་གསལ། །ནུབ་ཕྱོགས་འོག་མིན་གནས་མཆོག་ཏུ། །མ་ཆགས་པདྨའི་གདན་བཏིང་བ། །དུས་གསུམ་རྒྱལ་བ་བཞུགས་པའི་གནས། །རྣམ་པར་ཐར་པའི་སྒོ་བཞི་ལ། །ཕྱག་རྒྱ་བཞི་དང་ཡང་དག་ལྡན། །དབང་དང་སྐལ་མིན་གསལ་བའི་ཕྱིར། །ནང་དང་ཕྱི་རིམ་ལྕགས་དང་ལྡན། །རྒྱལ་བ་ཡོངས་ཀྱིསྦས་པ་ཡི། །སུས་ཀྱང་གཏིང་དཔག་དཀའ་བ་དེ། །ཀུན་དུ་བཟང་པོ་ཉིད་ཀྱིས་གཟིགས། །ཞེས་བརྗོད་པས་བཙུན་མོ་བྱ་བ་མོ་ཆོས་ཀུན་དུ་བཟང་མོ་ལ་འཇུག་པར་གྱུར་ཏོ། །ཞུགས་ནས་བཙུན་མོ་བྱ་བ་མོ་ཆོས་ཀུན་དུ་བཟང་མོས་བཅོམ་ལྡན་འདས་ཡིད་ཀུན་དུ་བཟང་པོ་དང་།
གཉིས་སུ་མེད་པའི་ལོངས་སྤྱོད་བདེ་བ་ལ་མཉམ་པར་གནས་ཏེ་ཆེད་དུ་བརྗོད་པ་བརྗོད་དོ། །སེམས་ཀྱི་སེམས་ཉིད་བྱེད་པའི་གཙོ། །ཀུན་དུ་བཟང་པོ་རྡོ་རྗེ་ཡིད། །ཡེ་ཤེས་དྲུག་གི་རང་བཞིན་ཏེ། །ཤར་ཕྱོགས་མངོན་དགའི་བསམ་ཡས་ན། །ནཱི་ལ་ལྟ་བུའི་གཏེར་འབྱིན་པ། །གསང་འདུས་འཕྲུལ་གྱི་ལྡེ་མིག་གིས། །རྣམ་པར་ཐར་པའི་སྒོ་ཕྱེ་ནས། །བྱང་ཆུབ་མཆོག་གིས་ནང་གཏན་དགྲོལ། །མཉམ་སྦྱོར་པདྨའི་གདན་ལ་བཞུགས། །འགྲོ་དོན་བྱང་ཆུབ་སེམས་བསྐྱེད་ནས། །འགྲོ་ལྔ་སྐྱེ་བཞི་དབང་དུ་བསྡུས། །སྐུ་གསུང་ཐུགས་གནས་དབང་བསྐུར་ཏོ། །ཞེས་བརྗོད་པས་ཐམས་ཅད་མཉམ་པ་ཆེན་པོའི་ཚུལ་རྡོ་རྗེ་ཉིད་དུ་གསལ་བར་གྱུར་ཏོ། །ཞུགས་པས་ཕྱོགས་བཅུའི་དེ་བཞིན་གཤེགས་པ་མ་ལུས་པ་ཐམས་ཅད་གཅིག་གི་རང་བཞིན་དབྱེར་མེད་པས་དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་ཆེད་དུ་བརྗོད་པ་འདི་བརྗོད་དོ། །ཨེ་མའོ་རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཤིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་པ་མིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་རྙེད་དོ། །ཞེས་བརྗོད་པས་དེ་བཞིན་གཤེགས་པ་ཐམས་ཅད་མཉེས་པར་གྱུར་ཏོ། །དེ་ནས་བཙུན་མོ་བྱ་བ་མོ་ཆོས་ཀུན་དུ་བཟང་མོས་བཅོམ་ལྡན་འདས་ཡིད་ཀུན་དུ་བཟང་པོ་དང་གཉིས་སུ་མེད་པར་གྱུར་ནས་ཆེད་དུ་བརྗོད་པ་འདི་བརྗོད་དོ། །ཨེ་མའོ་ཕྱོགས་བཅུའི་སྟོང་ཁམས་ཡེ་ཤེས་དཔེན། །སྲིད་པ་གསུམ་ཉིད་དག་པའི་ཞིང་། །སྙིགས་མ་ལྔ་ཉིད་བདེ་ལྡན་ནས། །ཕུང་པོ་ལྔ་ཉིད་མངོན་སངས་རྒྱས། །ཐམས་ཅད་མཆོག་གི་སྙིང་པོ་བས། །གཞན་དུ་རྒྱལ་བས་ཆོས་མི་འཚལ། །ཉིད་ལས་གཞན་ཞེས་བྱ་བའི་ཆོས། །བཙལ་ཀྱང་རྒྱལ་བས་མི་རྙེད་དོ། །
ཞེས་བརྗོད་པས་ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་གླེང་བསླང་བའི་ལེའུ་སྟེ་གཉིས་པའོ།། །།དེ་ནས་གཉིས་སུ་མེད་པའི་བདག་ཉིད་ཆེན་པོས་ཡེ་ཤེས་སངས་རྒྱས་པའི་སེམས་ཡེ་ཤེས་སུ་བསྐྱེད་པ་འདི་གསུངས་སོ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །ཅེས་བརྗོད་པས་དེ་བཞིན་གཤེགས་པ་ཐམས་ཅད་དང་བཙུན་མོའི་ཚོགས་ཐམས་ཅད་མཉེས་པས་ཁྱབ་པར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་བཙུན་མོའི་ཚོགས་དང་བཅས་པས་ཆེད་དུ་བརྗོད་པ་འདི་བརྗོད་དོ། །ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ཡང་ཤིན་ཏུ་གསང་། །ཞེས་བརྗོད་པས་དེ་བཞིན་གཤེགས་པ་ཐམས་ཅད་ཡེ་ནས་སངས་རྒྱས་པའི་ངོ་བོ་ཉིད་དུ་གཅིག་པའི་མཚན་ཉིད་ཡིན་པས་དབྱེར་མེད་ན། འགྲོ་བའི་རྣམ་པར་རྟོག་པ་མ་རིག་པ་ལ་འགྲོ་བ་ལྔའི་རིགས་བསམ་གྱིས་མི་ཁྱབ་པར་སྨིན་པ་ལ་ཐུགས་རྗེ་ཆེན་པོའི་སངས་རྒྱས་ཀྱི་ཡེ་ཤེས་ཆེན་པོ་སྐྱེས་ནས་ཆེད་དུ་བརྗོད་པ་འདི་བརྗོད་དོ། །ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །
གནས་དང་སྡུག་བསྔལ་ལ་སོགས་པ། །བདག་དང་བདག་གིས་སོ་སོར་འཛིན། །སུས་ཀྱང་མི་འཆིང་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིན། །ནན་གྱིས་མཁའ་ལ་མདུད་པ་འདོར། །བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་དེ་བཞིན་གཤེགས་པ་ཉིད་ལ་ཆེད་དུ་གླེང་ངོ་། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དོན་དམ་པ་དང་ཀུན་རྫོབ་ཀྱི་བྱང་ཆུབ་ཀྱི་སེམས་ཡེ་ཤེས་སུ་བསྐྱེད་པའི་ལེའུ་སྟེ་གསུམ་པའོ།། །།དེ་ནས་དེ་བཞིན་གཤེགས་པ་ཐམས་ཅད་ལས་ཐུགས་རྗེ་ཆེན་པོ་བྱིན་གྱིས་བརླབས་ཞེས་བྱ་བའི་རིག་པའི་སྐྱེས་བུ་ཐུབ་པ་དྲུག་དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་བཏོན་ཏོ། །བཏོན་ནས་ཀྱང་ལས་ཀྱི་དབང་གིས་སྣྲེལ་ཞི་དང་། ཡན་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར་ཐུབ་པ་ཆེན་པོ་བཅོམ་ལྡན་འདས་རེ་རེས་འདུལ་བ་རྣམ་བཞིས་འགྲོ་བ་ལྔའི་དོན་མཛད་དེ་བལྟམས་པ་དང་། རབ་ཏུ་འབྱུང་བ་དང་། དཀའ་ཐུབ་མཛད་པ་དང་། སངས་རྒྱས་པ་དང་། བདུད་བཏུལ་བ་དང་། ཆོས་ཀྱི་འཁོར་ལོ་བསྐོར་བ་དང་། ཆོ་འཕྲུལ་ཆེན་པོ་སྟོན་པ་དང་། མྱ་ངན་ལས་འདས་པ་ལ་སོགས་པ་སྟོན་པའི་ཐུབ་པ་དུས་བཞི་ཀུན་དུ་མཁྱེན་པ་དང་། ཐམས་ཅད་ཀྱི་སེམས་ཀྱི་རྒྱུད་དུ་ཀུན་དུ་མཁྱེན་པ་དང་། རྫུ་འཕྲུལ་གྱི་སྤྱན་གྱིས་ཀུན་དུ་གཟིགས་པ་དང་། རྫུ་འཕྲུལ་གྱི་སྙན་གྱིས་ཀུན་དུ་གསན་པ་དང་། རྫུ་འཕྲུལ་གྱི་ཆོ་གས་ཀུན་དུ་དོན་སྤྱོད་པ་དང་། ཟག་པ་མེད་པས་ཀུན་དུ་བཟང་པོའི་སྤྱོད་པ་རྫོགས་པའི་མངོན་པར་ཤེས་པ་དྲུག་དང་། །ཀུན་དུ་སྐུ་བསམ་གྱིས་མི་ཁྱབ་པ་དང་། ཀུན་དུ་ཐུགས་བསམ་གྱིས་མི་ཁྱབ་པ་དང་། ཀུན་དུ་ཞལ་བསམ་གྱིས་མི་ཁྱབ་པ་དང་། ཀུན་དུ་གསུང་བསམ་གྱིས་མི་ཁྱབ་པ་དང་ལྡན་པ་དང་། བསམ་གྱིས་མི་ཁྱབ་པ་གྲངས་མེད་པར་ཡང་ཕྱོགས་བཅུར་སྣང་བར་གྱུར་ཏོ། །དེ་ལྟར་སྣང་
བར་གྱུར་ནས་ཇི་སྙེད་པའི་ཐུབ་པ་ཆེན་པོ་སྙིང་རྗེའི་གོ་འཕང་ཆེན་པོ་ཐམས་ཅད་ཀྱང་འདི་ལྟ་སྟེ། འདུལ་བའི་དབང་གིས་ལྷ་དང་མིའི་ཐེག་པ་དང་། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་དང་། བླ་ན་མེད་པའི་ཐེག་པས་མ་རིག་པའི་རྣམ་པར་རྟོག་པ་ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། །གསུང་བར་འགྱུར་རོ། །དེ་དག་ཐམས་ཅད་ཀྱང་གཟུང་བ་དང་འཛིན་པའི་ཕྱི་ནང་གི་རྟེན་ཅིང་འབྲེལ་པར་འབྱུང་བ་འཛིན་པ་འཁྲུལ་པ་ལ་དགོས་པ་དང་། ལས་དང་ལས་ཀྱི་འབྲས་བུ་ཆུད་མི་ཟ་བ་དང་། ལས་དང་ལས་ཀྱི་འབྲས་བུས་མི་གོས་གོས་པར་མི་འགྱུར་བ་དང་། གོས་པ་མེད་པའི་སྟོན་པའི་མཐར་ཐུག་གོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས། །འཁོར་བའི་སྐྱོན་དང་། མྱ་ངན་ལས་འདས་པའི་ཡོན་ཏན་བསྟན་པའི་ཕྱིར་དེ་བཞིན་གཤེགས་པ་ཉིད་ལ་ཆེད་དུ་བརྗོད་པ་འདི་བརྗོད་དོ། །ཨེ་མའོ་དཀྱིལ་འཁོར་བསམ་ཡས་པར། །སྙིང་པོ་བླ་མེད་ཇི་སྙེདཔའི། །གཞན་གྱིས་མི་འཕྲོགས་རང་བཞིན་རྒྱལ། །མཐའ་དང་བྲལ་བས་བདག་མེད་པའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་ཆེད་དུ་བརྗོད་པ་འདི་བརྗོད་དོ། །ཨེ་མའོ་ཇི་སྙེད་འཇིག་རྟེན་འཁྲུལ་པའི་ཆོས། །མ་རིག་རྟོག་པའི་གཟུང་འཛིན་གྱིས། །སྟོང་གི་འཇིག་རྟེན་བསམ་ཡས་པར། །ཕྱི་ནང་རྟེན་འབྲེལ་གཉིས་སུ་འཁོར། །རྟོག་པའི་བག་ཆགས་སྟུག་པོ་ཡིན། །མི་མཐུན་བདེ་སྡུག་མྱོང་བར་འགྱུར། །དེ་ཉིད་ཇི་བཞིན་དབྱིངས་ཉིད་དང་། །རང་བཞིན་བདག་མེད་ཚུལ་གཅིག་སྟེ། །རང་བཞིན་ཉིད་ལ་ཉམས་པ་མེད། །ཡང་དག་སྒྱུ་མའི་ཚུལ་གཉིས་སུ། །བདག་དང་བདག་གི་གཞན་མེད་དེ། །དེ་ཉིད་ངོ་བོ་ཉིད་དབྱིངས་པས། །རྣམ་དག་དབྱིངས་ཉིད་ཚུལ་གཅིག་གོ། །བདག་དང་བདག་གི་གཞན་རྣམས་ནི། །ལོག་པར་རྟོག་པ་ཙམ་ཉིད་ལས། །ཕྲ་ཞིང་ཟབ་པ་ཡོད་མ་ཡིན། །ལོག་རྟོག་ཉིད་ལ་ཉིད་སྤྱོད་དེ། །གཞན་དུ་གཡོ་བ་ཅི་ཡང་མེད། །ལོག་རྟོག་རྒྱུ་འབྲས་རྒྱུན་
ཉིད་ཀྱང་། །གཞི་རྩ་མེད་དེ་སྐད་ཅིག་མ། །རྣམ་པར་དག་པའི་དབྱིངས་ཉིད་ཚུལ། །ཉིད་ལ་དབང་སྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །ཐེག་པ་བཞི་ཡིས་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཡང་དག་རྟོགས་པས་རབ་བརྟགས་ན། །རང་བཞིན་མེད་ལ་ཅིར་ཡང་འགྲུབ། །སངས་རྒྱས་མྱ་ངན་ཡོང་མི་འདའ། །ཆོས་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་གདུལ་བའི་ཕྱིར། །འབྱུང་གནས་མྱ་ངན་འདའ་བར་སྟོན། །འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཇི་སྙེད་འཇིག་རྟེན་མཐའ་ཀླས་པར། །ཕྱོགས་བཅུར་ཀུན་དུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །སྟོན་པའི་ཐུབ་པ་བསམ་ཡས་པ། །འབྱུང་གནས་གཏན་ལ་ངེས་པར་འབེབས། །ཆོས་རྣམས་མིང་དུ་བཏགས་པ་ཙམ། །སྟོན་པའི་དོན་དང་མཐུན་ཕྱོགས་སུ། །མིང་ཉིད་ཚིག་ཏུ་བཏགས་ནས་བསྟན། །སྟོན་མིང་ཚིག་ལ་དངོས་པོ་མེད། །ཅེས་བརྗོད་པས་ཆོས་ཐམས་ཅད་ངོ་བོ་ཉིད་ཀྱིས་ལྷུན་གྱིས་གྲུབ་པ་ཆེན་པོར་གསལ་བར་གྱུར་ཏོ། །དེ་ནས་དེ་བཞིན་གཤེགས་པ་ལྷུན་གྱིས་གྲུབ་པ་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་གསུང་ཐུགས་དང་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨའོ་སྲིད་རྩེའི་ཉེས་དམིགས་བདག་ཏུ་རྟོག་ལས་འཕྲོས། །རྒྱུད་དྲུག་སྐྱེ་འགག་ལུས་དང་ལོངས་སྤྱོད་དང་། །གནས་དང་སྡུག་བསྔལ་འཁྲུལ་འཁོར་ལ་སོགས་པ། །ལོག་རྟོག་ཉིད་ལས་གཞན་དུ་ཅི་ཡང་མེད། །སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་མེད་མེད་པར་དྲན་དབང་སྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ལ། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་རྡོ་རྗེ་གསང་བའི་ཚིག་ཏུའོ། །ཐུབ་པ་དྲུག་གིས་སྤྲུལ་པ་གྲངས་མེད་པ་དང་། དེ་བཞིན་གཤེགས་པ་ཐམས་ཅད་ཀྱིས་གསུངས་པ་ཡང་དེ་དག་
ཏུ་འདུས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཆོས་ཐམས་ཅད་གཏན་ལ་ཕབ་པའི་ལེའུ་སྟེ་བཞི་པའོ།། །།དེ་ནས་དེ་བཞིན་གཤེགས་པ་བཅོམ་ལྡན་འདས་དགྱེས་པ་ཆེན་པོས་འགྲོ་བ་ཐམས་ཅད་ཀྱི་རང་བཞིན་གྱི་དཀྱིལ་འཁོར་ཡོད་པར་བསྟན་པ་དང་། རིགས་རྒྱུད་དྲུག་ཏུ་ཡང་བཤད། དེ་ལ་ཆོས་ཉིད་ཀྱི་རིགས་ནི་ཐམས་ཅད་ཀུན་ལ་ཡང་ཡོད་དོ། །ནམ་མཁའ་ཀྱང་ཀུན་ལ་ཁྱབ་པར་གནས་སོ། །དེ་ལྟར་ཆོས་ཀྱི་དབྱིངས་དང་། ནམ་མཁས་ཀུན་ལ་ཁྱབ་ཀྱང་རྣམ་པར་ཐར་བའི་དོན་མ་རྟོགས་ན་མེ་ལོང་གཡས་གཡོགས་པ་དང་འདྲ་སྟེ་གཟུགས་བརྙན་སྣང་བའི་བྱ་བ་བྱེད་མི་ནུས་སོ་ཞེས་གསུངས་ནས་ཡང་འདི་སྐད་རྡོ་རྗེ་འཆང་གིས་གསུངས་སོ། །མཉམ་ཉིད་དོན་རྟོགས་རང་རིག་རྒྱལ་པོ་དང་། །རྒྱ་མཚོ་ཆེན་པོར་ཆུ་ཀླུང་འབབ་པ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་པའི་ཐེག་པ་བསམ་ཡས་མ་ལུས་འདུས། །ཨ་ཧོ། །བདག་མེད་གཉིས་རྟོགས་ཕ་རོལ་ཕྱིན་རྫོགས་པ། །ས་བཅུ་རིམ་གྱིས་བསྒོམས་པའི་རྣལ་འབྱོར་པ། །སངས་རྒྱས་སར་འགྲོ་གོ་འཕང་ཐོབ་པའི་ལམ། །བདེན་པ་གཉིས་ཀྱིས་རབ་ཏུ་ཐོབ་པར་འགྱུར། །ཕྱི་ནང་རྟེན་འབྲེལ་སྒྱུ་མ་མིག་ཡོར་ཚུལ་ཤེས་པའི། །དངོས་པོ་གཟུགས་ལ་ཐོགས་མེད་རབ་ཏུ་འཇུག །དགེ་བཤེས་མི་སློབ་རང་གི་རིག་པས་རྟོགས། །བྱང་ཆུབ་སར་འགྲོ་ཡིད་བཞིན་བདེ་བའི་མཆོག །བདེན་བཞི་དོན་རྟོགས་རབ་ཏུ་སྤོང་བ་ཡི། །ཡེ་ཤེས་བཅུ་དྲུག་ཆ་སྦྱངས་རབ་ཞི་བའི། །རྒྱུན་ཞུགས་ལ་སོགས་རིམ་པར་སྦྱངས་ནས་ནི། །ཉོན་མོངས་དགྲ་རྣམས་རབ་ཏུ་ཞི་བའི་ས་རུ་འགྲོ། །ཐེག་པ་གང་དུ་བསྟན་པ་མ་ངེས་པའི། །ཡང་ན་ཀུན་ལ་མཐུན་ནས་འབྱམ་པར་འཇུག །ཡང་ན་ངེས་མེད་འདི་ཞེས་བརྟག་ཏུ་མེད། །འདི་ནི་མ་ངེས་རྡོ་རྗེ་འཆང་གིས་གསུངས། །དགེ་བཅུ་སྤྱོད་ཅིང་མི་དགེ་སྤོང་བྱེད་པ། །འདོད་ཁམས་ལྷ་དང་མི་རུ་སྐྱེ་བའི་རྒྱུ། །ཚད་མེད་བཞི་སྤྱོད་མི་གཡོ་སྒོམ་བྱེད་པ། །ཚངས་གནས་ལྷ་སོགས་སྐྱེ་བའི་རྒྱུ་ཡིན་ནོ། །ཆོས་ཀྱི་དབྱིངས་ཀྱིས་ཀུན་ལ་ཁྱབ་གྱུར་
ཀྱང་། །རང་རིག་རྟོགས་པའི་སྐལ་དང་མི་ལྡན་ན། །ཇི་ལྟར་དམུས་ལོང་མདུན་དུ་མདོག་བསྟན་བཞིན། །འདི་ནི་སྐལ་མེད་རིགས་ཆད་ས་ཡིན་ནོ། །ཆོས་ཀྱི་དབྱིངས་ཀྱིས་ཀུན་ལ་ཁྱབ་པ་ཡིས། །བླ་མེད་ཐེག་པ་བསམ་ཡས་གསུངས་པ་ཡང་། །སོ་སོ་རང་རིག་བློ་ལ་སྣང་བར་ཟད། །ངན་སོང་འགྲོ་དྲུག་སྣ་ཚོགས་རྒྱུ་བ་ཡང་། །འཁྲུལ་བའི་བློ་ལོག་རྟོག་པ་ཉིད་སྣང་སྟེ། །དེ་བཞིན་ཉིད་ཀྱི་དབྱིངས་ལ་འགྱུར་བ་མེད། །མི་དམིགས་རང་རིག་གོམས་བྱས་བླ་ན་མེད་པའི་མཆོག །ལོག་རྟོག་བདག་དང་བདག་གིར་འཛིན་གྱུར་ན། །དངོས་མེད་མི་སྡུག་སྣ་ཚོགས་སྣང་བར་འགྱུར། །ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ནི། །ངན་སོང་གནས་ཉིད་འོག་མིན་དགའ་ལྡན་གནས། །ནམ་མཁའི་དབྱིངས་ནི་དེ་ཉིད་བསམ་ཡས་པར། །ཉི་ཟླ་གཟའ་སྐར་མཚན་མ་གློག་འགྱུ་དང་། །འཇའ་ཚོན་སྤྲིན་མང་སྣ་ཚོགས་འཁྲུགས་གྱུར་ཀྱང་། །ནམ་མཁའི་དབྱིངས་ལ་གྱུར་ཅིང་ཉམས་པ་མེད། །མི་དམིགས་ཆོས་ཀྱི་དབྱིངས་ནི་བསམ་ཡས་པར། །སྐུ་གསུང་ཡོན་ཏན་ཕྲིན་ལས་རྨད་འབྱུང་དང་། །འཇིག་རྟོག་གཙོ་མཆོག་མ་ལུས་ཐམས་ཅད་དང་། །འཁྲུལ་འཁོར་སྡུག་བསྔལ་སྣ་ཚོགས་རྣམ་མང་ཡང་། །དེ་བཞིན་ཉིད་ལ་འཕེལ་ཞིང་བྲི་བ་མེད། །ཅེས་རྡོ་རྗེ་གསང་བའི་ཚིག་ཏུའོ། །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ཐམས་ཅད་ལ་ཆོས་ཉིད་ཀྱི་རྒྱུ་ཡོད་པ་དང་རིགས་རྒྱུད་ཆད་པ་དང་རིགས་བརྒྱད་སོ་སོར་དབྱེ་བའི་མདོར་བཤད་པའི་ལེའུ་སྟེ་ལྔ་པའོ།། །།དེ་ནས་དེ་བཞིན་གཤེགས་པ་ཐམས་ཅད་དགོངས་པ་གཅིག་ཏུ་གྱུར་ནས་མཉམ་པ་ཆེན་པོའི་ཚུལ་རྡོ་རྗེའི་དབྱིངས་སུ་ཆོས་ཐམས་ཅད་ཡེ་ནས་སངས་རྒྱས་པའི་ཏིང་ངེ་འཛིན་ལས་མི་གཡོ་བར་ཆོས་ཐམས་ཅད་མིང་ཙམ་དུ་གནས་པའི་ཡི་གེ་ཕྲེང་བ་འཁོར་ལོ་ཞེས་བྱ་བ་འདི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨ་རབ་ཏུ་བརྟན་འགྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །
ཕྱོགས་ཀུན་གང་པར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟེན་འབྱུང་ཡེ་ཤེས་རྒྱུ་ཡིན་ནོ། །ཨ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ཝ་ར་ལ། ཤ་ཥ་ས་ཧ། ཀྵ། ཨི་ཨཱི། ཨུ་ཨཱ། ཨེ་ཨཻ། ཨོ་ཨཽ། །འདི་དག་ཕྱུང་བས་འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་རྣམ་པ་དྲུག་ཏུ་གཡོས། །རབ་ཏུ་གཡོས་ཀུན་དུ་གཡོས་ནས་ཆོས་ཐམས་ཅད་མིང་གི་མཚན་ཉིད་དུ་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་ཆེད་དུ་བརྗོད་པ་འདི་བརྗོད་དོ། །ཨ་ནི་སྟོང་དང་མི་སྟོང་གི། །དབུ་མ་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེ་ཕྲེང་བ་ཉིད་ལ་གནས། །ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཨེ་མའོ་ངོ་མཚར་ཡ་མཚན་གྱི། །འཕྲུལ་ཆེན་བཞི་བཅུ་རྩ་ལྔའི་མིང་། །ཚིག་རྣམས་མ་ལུས་འཛིན་པའི་གནས། །སྣ་ཚོགས་དོན་ཀུན་སྨྲ་ཞིང་སྟོན། །དངོས་མེད་ཡི་གེ་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །དབྱིབས་དང་ཁ་དོག་མིང་ཚོགས་ཀྱིས། །རོལ་པ་ཅིར་ཡང་སྤྲུལ་ཅིང་སྟོན། །ཕྱོགས་བཅུ་དུས་བཞི་གཤེགས་པ་ཡི། །ཡེ་ཤེས་སེམས་དཔའི་སྐུ་གསུང་ཐུགས། །དཀྱིལ་འཁོར་བཞི་བཅུ་རྩ་ལྔ་ཉིད། །ཡི་གེ་མགོ་ནས་ཀྵ་ལ་རྫོགས། །སེམས་ནི་རང་བཞིན་ཡི་གེ་སྟེ། །ཡི་གེ་དངོས་པོ་ཡོད་མ་ཡིན། །དམིགས་མེད་དེ་ཉིད་སྣ་ཚོགས་པའི། །སྐུ་གསུང་ཐུགས་ཀྱི་འཁོར་ལོ་ཆེ། །སྐུ་གསུང་ཐུགས་ནི་ངོ་མཚར་གྱི། །ཡ་མཚན་འཕྲུལ་ཆེན་རབ་འགུགས་པ། །དབྱིངས་ལ་དབྱིངས་ཀྱིས་བྲིས་པ་སྟེ། །ཡི་གེ་ཞེས་ནི་དེ་ཕྱིར་བརྗོད། །མགོ་ནི་མ་ནོར་ལམ་ཡིན་ཏེ། །ཚིག་ནི་ཤེས་རབ་མིང་དུ་སྨྲས། །ཤད་ནི་ཐབས་ཆེན་ཚིགས་སུ་གཅོད། །ཨ་ནི་སྐྱེ་མེད་དེ་བཞིན་ཉིད། །ཋ་ནི་སྒྱུ་འཕྲུལ་
རྡོ་རྗེ་ཉིད། །ཊ་ནི་སྣང་བའི་སྒྱུ་འཕྲུལ་ཉིད། །ཌ་ནི་སྒྱུ་འཕྲུལ་ཡིད་བཞིན་ཉིད། །ཌྷ་ནི་སྒྱུ་འཕྲུལ་རྣམ་དག་ཉིད། །ཎ་ནི་ཀུན་དུ་སྒྱུ་འཕྲུལ་ཉིད། །ཐ་ནི་དྲ་བས་མངོན་རྫོགས་ཉིད། །ཏ་ནི་དྲ་བས་བརྟན་པ་ཉིད། །ད་ནི་དྲ་བས་ལྷམ་མེ་ཉིད། །དྷ་ནི་དྲ་བས་འཁྱིལ་པ་ཉིད། །ན་ནི་དྲ་བས་ཀུན་དུ་འགྱུར། །ཀ་ནི་སྤྱན་གྱི་ཐུགས་ཀྱི་མཆོག །ཁ་ནི་སྙན་གྱི་ཐུགས་ཀྱི་མཆོག །ག་ནི་ཤངས་ཀྱི་ཐུགས་ཀྱི་མཆོག །གྷ་ནི་ལྗགས་ཀྱི་ཐུགས་ཀྱི་མཆོག །ང་ནི་ཐུགས་ཀྱང་འཇིག་བྱེད་པའོ། །ཙ་ནི་སྤྱན་གྱི་སྐུ་ཡི་མཆོག །ཚ་ནི་སྙན་གྱི་སྐུ་ཡི་མཆོག །ཛ་ནི་ཤངས་ཀྱི་སྐུ་ཡི་མཆོག །ཛྷ་ནི་ལྗགས་ཀྱི་སྐུ་ཡི་མཆོག །ཉ་ནི་སྐུ་ཡང་འཇིག་བྱེད་པའོ། །པ་ནི་སྤྱན་གྱི་གསུང་གི་མཆོག །ཕ་ནི་སྙན་གྱི་གསུང་མཆོག་སྟེ། །བ་ནི་ཤངས་ཀྱི་གསུང་མཆོག་ཡིན། །བྷ་ནི་ལྗགས་ཀྱི་གསུང་གི་མཆོག །མ་ནི་གསུང་ཡང་འཇིག་པར་བྱེད། །ཡ་ནི་སྐྱེ་བ་རྣམ་པར་དག །ཝ་ནི་གནས་པ་དག་པ་ཡིན། །ར་ནི་འཇིག་པ་དག་པ་སྟེ། །ལ་ནི་སྟོང་པ་དག་པའོ། །ཤ་ནི་རྟག་མེད་དག་པ་སྟེ། །ཥ་ནི་ཆད་པའང་ཡོད་མ་ཡིན། །ས་ནི་མཐའ་བྲལ་བདག་མེད་པ། །ཧ་ནི་མཚན་མ་མེད་པ་ཉིད། །ཀྵ་ནི་ཡེ་ཤེས་ཐུགས་ཀྱི་ཐུགས། །ཨི་ནི་རྡུལ་སྙེད་ལྷ་རྣམས་སུ། །ཨཱི་ནི་རྡུལ་སྙེད་ལྷ་མ་ཡིན། །ཨུ་ནི་རྡུལ་སྙེད་མི་རྣམས་སུ། །ཨཱུ་ནི་རྡུལ་སྙེད་བྱོལ་སོང་རྣམས། །ཨེ་ནི་རྡུལ་སྙེད་ཡི་དགས་སུ། །ཨཻ་ནི་རྡུལ་སྙེད་དམྱལ་བ་རྣམས། །ཨོ་ནི་ཐམས་ཅད་འཇིག་པར་བྱེད། །ཨཽ་ནི་ཐམས་ཅད་ཞིག་པ་ཡིན། །ཡི་གེ་འཁོར་ལོ་ཚོགས་ཆེན་འདིས། །སྐུ་གསུང་ཐུགས་ཀྱི་ཕྲེང་བ་བསྡུས། །ཨ་ཧོ། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་གསུང་ཐུགས་དང་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨ་ཧོ། །ཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །འབྲས་བུ་རྒྱལ་བའི་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་
འཁོར་འབྱིན་པའི་དམ། །འདའ་བར་མི་མཛད་དབང་མེད་རྒྱུ་རྐྱེན་ཚོགས་པའི་མཐུ་ཆེན་ཡིན། །ཨ་ཧོ། །རྡོ་རྗེ་གསང་བའི་ཚིག་ཏུའོ་ཞེས་བརྗོད་པས་དེ་བཞིན་གཤེགས་པ་ཐམས་ཅད་ཡི་གེ་འཁོར་ལོར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཡི་གེ་ཕྲེང་བ་འཁོར་ལོ་བཀོད་པའི་ལེའུ་སྟེ་དྲུག་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ཤིན་ཏུ་གསང་བའི་ཕྱིར་གསང་སྔགས་ཀྱི་རྒྱུད་དེའི་ཕྱི་པ་དང་། ནང་པ་ཐབས་ཀྱི་རྒྱུད་གཞན་ལ་ཁམས་བཅྭ་བརྒྱད་དུ་བསྟན། གཙུག་ལག་ཐམས་ཅད་ལ་ཡང་ཁམས་བཅྭ་བརྒྱད་དུ་བསྟན་པ་ཡིན། ལུང་གི་སྤྱི་འདི་ནི་ཤིན་ཏུ་ཟབ་པའི་ཕྱིར་ཁམས་ཉི་ཤུ་རྩ་གཅིག་ཏུ་བསྟན་ཏེ། ལུང་གི་སྤྱི་ཡང་རྒྱུད་དང་གསུང་རབ་ཐམས་ཅད་འབྱུང་བའི་གནས་ཡིན། །གསང་བའི་དབང་པོ་དང་གསང་བའི་ཡུལ་གཉིས་ཀ་ཡང་། སྐྱེ་མཆེད་དང་ཁམས་ཐམས་ཅད་འབྱུང་བའི་གཞི་ཡིན་པའི་ཕྱིར་ཤིན་ཏུ་གསང་བར་གསུངས་སོ། །དཀྱིལ་འཁོར་དེ་དག་ཤིན་ཏུ་གསལ་བར་བསྟན་པའི་ཕྱིར་ཉིད་ལ་ཉིད་ཆེད་དུ་བརྗོད་པ་འདི་བརྗོད་དོ། །ཨེ་མའོ་ཡེ་ནས་གསང་བའི་ཆོས། །ཐམས་ཅད་ཀུན་ལ་རང་བཞིན་གནས། །ངང་གིས་དག་མཉམ་མ་རྟོགས་པས། །ཀུན་ལ་ཡོད་ཅིང་རང་བཞིན་གསང་། །གཞན་དུ་མིན་ལ་ཤིན་ཏུ་གསང་། །དོན་ཉིད་ཀྱིས་ནི་གསང་བའི་རྒྱུ། །མཉམ་པའི་རྡོ་རྗེ་ཅན་གྱིས་གསུང་། །འདི་ནི་བྱང་ཆུབ་སྙིང་པོ་མཆོག །ཨ་ཧོ། །རྡོ་རྗེ་གསང་བའི་ཚིག་ཏུའོ། །དབང་པོ་ཡུལ་དུ་སྣང་བའི་རྣམས། །བྱང་ཆུབ་སེམས་དཔའི་དཀྱིལ་འཁོར་ཉིད། །ཕུང་པོ་ལྔ་དང་འབྱུང་བ་ལྔ། །རིགས་ལྔ་ཡབ་ཡུམ་བཅུ་རུ་འབྱོར། །སྐྱེ་མཆེད་ཁམས་རྣམས་བཅྭ་བརྒྱད་པོ། །སེམས་དཔའ་སེམས་མའི་དཀྱིལ་འཁོར་ཉིད། །ཐམས་ཅད་བྱང་ཆུབ་སེམས་མ་ཡི། །རྡོ་རྗེ་གསང་བའི་དབང་པོར་འདུས། །རྡོ་རྗེ་དབང་པོ་གསང་བའི་ཐབས། །དབང་པོ་ཡུལ་ཉིད་ཤེས་རབ་དབྱིངས། །དབང་པོའི་ཐུགས་ནི་རྡོ་རྗེ་སེམས། །ཐམས་ཅད་འབྱུང་བའི་གཏེར་ཉིད་དང་། །ཐམས་ཅད་འགྲོ་
བའི་གནས་ཉིད་དེ། །དེ་ཡིས་མ་བསྐྱེད་གང་ཡང་མེད། །འཁོར་དང་མྱ་ངན་འདས་པའི་རྒྱུ། །དེ་ལས་ཐམས་ཅད་སྐྱེ་ཞིང་འབྱུང་། །ཀུན་གྱི་ཕྱག་རྒྱའི་རྒྱུ་ཡིན་ཏེ། །བདེ་བ་བྱང་ཆུབ་སྒྲུབ་པའི་རྫས། །དེ་ལས་བསྐྱེད་ཅིང་དེ་ལས་སྤྲོ། །དངོས་གྲུབ་ཐམས་ཅད་སྒྲུབ་པའི་གནས། །དབང་པོ་རྡོ་རྗེ་པདྨོར་ལྡན། །གཉིས་མེད་བྱང་ཆུབ་སེམས་འཕྲོ་ན། །མི་དམིགས་བདེ་དང་ལོངས་སྤྱོད་འཕྲོ། །སྐུ་གསུང་ཐུགས་དང་ཡེ་ཤེས་ལྔ། །གསང་བའི་ལྷ་མོ་བཞི་རྣམས་དང་། །མཆོད་པའི་ལྷ་མོ་རྫོགས་ལྡན་བཞི། །འཇུག་དང་ལྡང་དང་གནས་དང་སྨོན་པའི་བྱང་ཆུབ་སེམས། །གཡོ་དང་བསྐྱོད་དང་ལྡང་དང་གནས། །འགུག་དང་འཛིན་དང་དེ་བཞིན་ཏེ། །བསྡུས་དང་འཁྲིལ་བའི་དོན་བསྒྲུབ་ཕྱིར། །བསྡམས་དང་མི་གཏོང་དབང་སྒྱུར་ཏེ། །བདེ་བ་སྒྲ་སྙན་ཕྱོགས་བཅུར་སྒྲོགས། །ཤིན་ཏུ་སྒེག་པའི་གཟི་བརྗིད་འབར། །ཡིད་བཞིན་རིན་ཆེན་ཕྲེང་བ་ར་འབར། །དབྱངས་སྙན་ཡིད་འཕྲོག་གཟི་ལྡན་འབར། །གཟུགས་མཛེས་བསྐྱོད་པས་ཕྱོགས་བཅུར་གཡོ། །ཀུན་དུ་ཚིམ་བྱེད་བྲོ་བསུང་ཐིམ། །ལྷ་མཛེས་རིན་ཆེན་ཕུང་པོ་འཕྲོ། །འོད་གསལ་འཕྲོ་བས་ཀུན་དུ་འབར། །བདུད་རྩི་བསིལ་དྲོ་འཇམ་པའི་དབྱིངས། །ཨ་ལ་ལ་ཧོ། །གསང་བའི་དབང་པོ་པདྨར་ལྡན་གྱུར་ནས། །ཆགས་པ་མེད་པའི་ཚུལ་གྱིས་སུ། །ཕ་རོལ་ཕྱིན་བཅུ་རྒྱུ་འབྲས་རྫོགས། །ས་བཅུ་རིམ་གྱིས་བཀོད་མེད་རྫོགས། །ཀུན་དུ་འོད་གསལ་པདྨ་སྤྱན་ཡང་རྫོགས། །ཡི་གེ་ཕྲེང་བ་འཁོར་ལོ་བསམ་གྱིས་མི་ཁྱབ་པ། །ཡང་དག་རྫོགས་ཆེན་ཐབས་དང་ལྡན། །ཐབས་དང་ཤེས་རབ་བླ་མེད་ས་ཡང་རྫོགས། །བསོད་ནམས་ཡེ་ཤེས་ཚོགས་ཆེན་རྫོགས་པར་རོལ། །ཨ་ལ་ལ་ཧོ། །དེ་བཞིན་ཉིད་ཀྱི་གསང་མཆོག་ལས། །ཁམས་ནི་ཉི་ཤུ་རྩ་གཅིག་སྟེ། །བཅྭ་བརྒྱད་པོ་ནི་རྒྱུད་གཞན་བཞིན། །གསུམ་ནི་དེ་བཞིན་ཀུན་གྱི་བདག །བཅྭ་བརྒྱད་འབྱུང་བའི་གནས་ཡིན་ཏེ། །བྱང་ཆུབ་འགྲུབ་པའི་ཞིང་ཡང་ཡིན། །བདེ་བ་འབྱིན་པའི་རྒྱུ་ཡང་ཡིན། །གསང་བའི་མཚན་ཉིད་བརྗོད་པ་ནི། །དབང་པོ་རྡོ་
རྗེ་གསང་བའི་རྒྱལ། །ཡུལ་ནི་པདྨ་བདེ་མཆོག་དབྱིངས། །སེམས་ནི་བྱང་ཆུབ་འབྱུང་བའི་གཏེར། །དབང་པོ་ཡུལ་སེམས་ལྡན་གྱུར་ནས། །གསང་བ་མཆོག་གི་འཕྲུལ་ཆེན་སྤྲོ། །དཀྱིལ་འཁོར་རྡུལ་སྙེད་གྲངས་མེད་དང་། །ཕུན་སུམ་ཚོགས་པའི་ལྷུན་གྲུབ་རྣམས། །གསང་བ་མཆོག་གིས་འབྱིན་པར་བྱེད། །འདི་ནི་རྩེ་གཅིག་ཡིན་པར་གསུངས། །གསང་བའི་དོན་མཆོག་འདི་དག་ནི། །ལྟ་བ་དམན་ལ་བཤད་བྱས་ན། །དུས་མིན་པར་ནི་སྲོག་ཟད་ནས། །མགོ་འགས་སྙིང་ཡང་ཚིག་པར་འགྱུར། །ཁབ་ལེན་གྱིས་ནི་ལྕགས་སྡུད་ལྟར། །མི་འདོད་བཞིན་དུ་དབང་མེད་པར། །ངན་སོང་མི་ཁོམ་བསྐལ་པར་བརྒྱུད་པར་འགྱུར། །དེ་བས་འདི་ནི་ཤིན་ཏུ་གསང་བར་བྱ། །ཤེས་རབ་རྒྱ་ཆེན་བློ་ཟབ་ཡངས་པ་ཡིས། །བློ་བརྟན་སྙིང་རྗེ་ཆེ་དང་དད་ལྡན་ངང་ཚུལ་བཟང་ལ་བརྟན། །གཞན་དུ་ནམས་ཀྱང་སྦྱིན་མི་བྱ་ཞེས་ཉིད་ལ་ཡང་ཉིད་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁམས་ཉི་ཤུ་རྩ་གཅིག་ཏུ་བསྡུས་ནས། །ཐམས་ཅད་མ་ལུས་པར་དབྱིངས་སུ་བཀོད་པའི་ལེའུ་སྟེ་བདུན་པའོ།། །།དེ་ནས་ཡི་གེའི་དཀྱིལ་འཁོར་གྱི་སྤྲིན་བཀོད་པ་ལས་སྒྱུ་འཕྲུལ་རྣམ་པར་སྤྲོས་པ་འདི་ཆེད་དུ་བརྗོད་དོ། །རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་གྲུབ་པར་འགྱུར། །བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞི་ནད་སེལ་ཅིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བར་འགྲུབ། །ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་གཏོར་བ་དང་། །ཐམས་ཅད་སྟོངས་ཤིང་ལྷུང་བར་འགྱུར། །དགུག་དང་བཏང་དང་བཅིང་དང་དགྲོལ། །གསོ་དང་བསད་དང་
ཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། །དེ་ཉིད་ཡེ་ཤེས་རང་སྣང་བའི། །མིང་ཚིག་གཟུགས་ཚོགས་ཡིད་བཞིན་གྱིས། །མུན་ལ་སྣང་བྱུང་ཇི་བཞིན་དུ། །འགྱུར་བས་གསེར་འགྱུར་སྨན་གྱི་ཚུལ། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འགྲུབ་འགྱུར་མི་ལྡན་དོན་མེད་བརླག །དུས་གསུམ་རྒྱལ་བས་ཐུགས་ཆུད་པའི། །དངོས་གྲུབ་མཆོག་གི་སྙིང་པོ་ནི། །ཟད་པའི་དུས་མེད་ཡིད་བཞིན་མཛོད། །འཕེལ་འགྲིབ་མེད་པར་འབྱུང་བ་སྟེ། །དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །དངོས་རྣམས་ཉིད་ན་དངོས་མེད་པར། །རྟོགས་པའི་དབང་སྒྱུར་ཏིང་འཛིན་ཡིན། །གང་གིས་དམིགས་མེད་མི་ཤེས་པ། །དེ་ཡིས་ཆོས་ཀྱི་དབྱིངས་མི་ཤེས། །དེ་ཕྱིར་དངོས་དང་དངོས་མེད་པ། །འཇིགས་པས་དམིགས་མེད་ཤེས་པར་གྱིས། །གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་རྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཐབས་ལས་ཐབས་བྱུང་ཐབས་བསམ་ཡས། །ཐ་དད་མིན་ལ་ཐ་དད་པའི། །ནད་དང་ནང་གི་ཕྱི་རོལ་པ། །དཀྱིལ་འཁོར་བསམ་ཡས་ཡེ་ཤེས་རོལ། །འཇིགས་མེད་ཀུན་བཟང་ཕྱག་རྒྱ་མཆོག །གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱས་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་བརྗོད་པས་དེ་བཞིན་གཤེགས་པ་ཉིད་གཟིགས་མོས་མཉེས་པར་གྱུར་ཏོ། །དེ་ནས་དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་གསང་བའི་ཚིག་འདི་ཕྱུང་ངོ་། །ཨེ་མའོ་སྙིང་པོར་ལམ་བཅས་པས། །འཇིགས་མེད་དབྱིངས་ཉིད་ཀུན་བཟང་ཕྱག་རྒྱ་མཆོག །རང་བཞིན་སྐུ་གསུང་ཐུགས་ཆེན་པོ། །བྱང་ཆུབ་ལྷུན་གྲུབ་བདལ་བའི་ངང་། །སྙིང་པོ་ཉིད་ནི་སྙིང་
པོར་ཀུན་བཅས་ཀུན་དུ་གནས། །དེ་ཉིད་རྫོགས་པའི་ངང་ལས་དངོས་གྲུབ་ཀུན་ཤར་ཀུན་དུ་གནས། །ཨ་ཧོ་རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་སྒྱུ་འཕྲུལ་སྒྲུབ་པའི་ལེའུ་སྟེ་བརྒྱད་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་རང་བཞིན་གྱི་དཀྱིལ་འཁོར་ལས་ལྷག་པའི་དཀྱིལ་འཁོར་གྱིས་སྔགས་འཆང་རྣམས་ལྷར་སྒྲུབ་པའི་དཀྱིལ་འཁོར་འདི་དོན་ཡོད་པར་བྱ་བའི་ཕྱིར་ཆེད་དུ་བརྗོད་པ་འདི་བརྗོད་དོ། །ཨེ་མའོ་ཡེ་ནས་རྣམ་དག་པའི། །ཐབས་དང་ཤེས་རབ་ལྡན་པར་གནས། །བྱང་ཆུབ་མཆོག་ཏུ་ཉི་ཟླ་ཤར། །དེ་ཉིད་བཞུགས་གནས་ཡིན་པར་གསུངས། །ཆོས་རྣམས་ཐམས་ཅད་བདག་མེད་པའི། །དབྱིངས་སུ་ཐིམ་པའི་འོད་ཟེར་གསལ། །གཅིག་དང་སྤྲོས་པ་ཐམས་ཅད་མེད། །དཀྱིལ་འཁོར་སྤྲོས་མེད་ཟླུམ་པོའི་ཚུལ། །ཡེ་ནས་མྱ་ངན་འདས་པའི་ཆོས། །ཡེ་ཤེས་རྒྱུ་དང་འབྲས་བུ་ལྡན། །ཐམས་ཅད་མཁྱེན་པའི་ཡེ་ཤེས་སྐུ། །ཆོས་ཀྱི་འཁོར་ལོ་ཡོངས་ཀྱིས་བསྐོར། །ཐུགས་རྗེ་བྱིན་བརླབས་འཕྲོས་པ་ཡིས། །ཡེ་ཤེས་བཞི་ཡི་དཀྱིལ་འཁོར་སྤྲོ། །ཡེ་ཤེས་ལྔ་དང་སྐུ་གསུང་ཐུགས། །བྱིན་བརླབས་ཡ་མཚན་བསམ་མི་ཁྱབ། །རང་སྣང་བ་ཡི་ཐབས་ལས་འབྱུང་། །བསོད་ནམས་ཡེ་ཤེས་ཚོགས་རྫོགས་པའི། །ཐུགས་རྗེ་རྒྱས་པའི་གཞལ་ཡས་ཁང་། །དབུས་མཐའ་མེད་པར་རྒྱས་པར་གནས། །སྟོང་སྨོན་མཚན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་བཤད། །དེར་འགྲོ་ལམ་སྟེགས་བརྒྱད་དང་ལྡན། །རང་བཞིན་ཡེ་ནས་འོད་གསལ་ཕྱིར། །ཉི་ཟླ་བརྩེགས་པའི་གདན་ཁྲི་འབར། །ཡེ་ནས་རྣམ་པར་དག་པའི་ཕྱིར། །མ་ཆགས་པདྨོ་འབར་བའི་གདན། །ཟད་མེད་ཡེ་ཤེས་གཏེར་གྱུར་པས། །ཡིད་བཞིན་རིན་ཆེན་འབར་བའི་གདན། །ཡེ་ནས་མཉམ་ཉིད་མི་འདའི་ཕྱིར། །ཏ་ལའི་ལྗོན་ཤིང་རང་བཞིན་གནས། །རེ་བ་ཡིད་བཞིན་སྐོང་བའི་ཕྱིར། །དཔག་བསམ་ཤིང་གི་རིན་ཆེན་འབར། །ཡིད་བཞིན་རིན་ཆེན་རྒྱན་
གྱིས་བསྐོར། །ཐམས་ཅད་ལ་ནི་དབང་སྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །གསང་བ་དེ་ཉིད་ངེས་པ་ལས། །འཕྲུལ་ཆེན་བཞི་བཅུ་རྩ་གཉིས་ཀྱིས། །ཐམས་ཅད་ལྷ་ཉིད་རྟག་ཏུ་སྦྱོར། །ཐམས་ཅད་མ་ལུས་དཀྱིལ་འཁོར་མཆོག །འདི་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་དཀྱིལ་འཁོར་གསུམ། །ཏིང་འཛིན་ལྷག་པའི་དཀྱིལ་འཁོར་དང་། །བྱང་ཆུབ་སེམས་དང་ཚོགས་མཆོག་བརྟེན། །ཞེས་ཉིད་ལ་ཉིད་བཤད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཤིན་ཏུ་གསང་བའི་དཀྱིལ་འཁོར་བསྡུས་ནས། །ལྷག་པའི་གཟུགས་བརྙན་བསྟན་པའི་ལེའུ་སྟེ་དགུ་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་རང་བཞིན་གཅིག་དང་དུ་མ་མེད་པ་བདག་ཉིད་ཐམས་ཅད་ཀྱིས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ལ་ཉིད་ཀྱི་ཆེ་བའི་དཀྱིལ་འཁོར་འབྱུང་བར་བཞེད་ནས་ཆེད་དུ་བརྗོད་པ་འདི་བརྗོད་དོ། །ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་བས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞེས་བརྒྱན་བར་ཁྱམས་དང་། །ཀུན་དུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་མནམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་མནམ་བྱེད་མྱོང་བྱེད་རྣམས། །བཙུན་མོ་དག་དང་བཅས་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བདག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །
པདྨ་རལ་གྲི་དྲིལ་བུ་འབར། །ཨུཏྤལ་ཀླུ་ཤིང་ལ་སོགས་མཚན། །མཛེས་ཚུལ་མཉེས་པའི་ཡོ་བྱད་འཛིན། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྟུག་གཟི་བྱིན་ཅན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྱིལ་པ་སྟེ། །དབུས་མཐའ་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །སྐུ་ཡི་ཕྱག་རྒྱ་ཆེ་མཆོག་ནི། །དེ་བཞིན་དབྱིངས་ལས་མ་གཡོས་ཀྱང་། །ཡང་དག་ཐར་བའི་གཟུགས་སྐུ་དང་། །འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །སྟོན་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །མ་གཡོས་བཞིན་དུ་སྣ་ཚོགས་པའི། །དེའི་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ཀྱིས་མ་བཅོས་ཀྱང་། །ལས་འཕྲོ་དབང་གིས་སོ་སོར་སྣང་། །དཔེར་ན་མེ་ལོང་ཆུ་ཟླ་བཞིན། །དེ་ཚེ་འགྲོ་དྲུག་ཐམས་ཅད་ལ། །སྡིག་སྤོང་གཟུགས་སུ་རྣམ་པར་བསྟན། །དགེ་ཚུལ་རྣམས་ལ་དགྲ་བཅོམ་གཟུགས། །རང་རྒྱལ་རྣམས་ལ་བསེ་རུའི་ཚུལ། །གཞན་ཡང་ཐེག་མཆོག་རིམ་པ་བཞིན། །འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །དེ་ནས་ས་བཅུ་རིམ་གྱིས་འབྱུང་། །བླ་མེད་བྱང་ཆུབ་ཡང་དག་འཐོབ། །ཆོས་སྐུ་དཔག་མེད་བརྗོད་དུ་མེད། །ལོངས་སྤྱོད་ཟད་མེད་རིན་ཆེན་གཏེར། །སྤྲུལ་པ་བྱེ་བ་བསམ་མི་ཁྱབ། །མཚན་དང་དཔེ་བྱད་ཐམས་ཅད་རྫོགས། །སྤྱོད་ཡུལ་ཀུན་དུ་མཎྜ་ལ། །ཚོགས་ཆེན་གཉིས་ཀྱང་རྫོགས་པར་རོལ། །ཐབས་དང་ཤེས་རབ་ས་ཡི་མཆོག །དེ་ལ་སོགས་ཏེ་བསམ་ཡས་མཆོག །སྐྱེ་ཤི་མེད་
པའི་གཡུང་དྲུང་སྐུ། །ཉོན་མོངས་ཀུན་གྱི་ཞིང་དུ་གནས། །ཟད་མི་ཤེས་ཀྱི་གཏེར་དུ་གྱུར། །རྡོ་རྗེ་རིག་པ་འཛིན་གྱི་སྐུ། །ཐམས་ཅད་དབྱེར་མེད་མཉམ་པའི་སྐུ། །ཐམས་ཅད་མཁྱེན་པའི་ཡེ་ཤེས་སྐུ། །དེ་ཚེ་སྐུ་ལྔ་ཀུན་ཀྱང་རྫོགས། །ཞེས་བརྗོད་པས་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པ་ཐམས་ཅད་དུ་དཀྱིལ་འཁོར་བརྗོད་ཀྱིས་མི་ལང་བ་ཞིང་གི་རྡུལ་སྙེད་དུ་གསལ་བར་གྱུར་ཏོ། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་ཡོན་ཏན་ཆེན་པོའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་གསུང་ཐུགས་དང་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨ་ཧོ། །དམིགས་བྱ་དམིགས་མེད་མི་དམིགས་དཔག་མེད་བསམ་མི་ཁྱབ། །ཡེ་ཤེས་རང་རིག་དཀྱིལ་འཁོར་སྣ་ཚོགས་བརྗོད་མི་ལང་། །མཉམ་དང་མི་མཉམ་ཀུན་ཁྱབ་ཁྱབ་མེད་ཁྱབ་པའི་དབྱིངས། །ཡེ་ནས་ཀུན་གསལ་དཀྱིལ་འཁོར་རྣམས་སྤྲོ་སྤྲོས་པ་མེད། །ཡེ་ནས་ཀུན་ཁྱབ་དཀྱིལ་འཁོར་བསམ་ཡས་ཞིང་གི་རྡུལ་སྙེད་དུ། །ཡེ་ནས་རྣམ་སྤྲོས་སྙིང་པོ་ཀུན་གནས་གནས་པ་མེད། །རྡོ་རྗེ་གསང་བའི་ཚིག་ཏུའོ། །ཨའོ་ཞེས་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དཀྱིལ་འཁོར་སྤྲོས་པའི་ལེའུ་སྟེ་བཅུ་པའོ།། །།དེ་ནས་དེ་བཞིན་གཤེགས་པ་ཐམས་ཅད་མཉམ་པ་ཉིད་ལ་བཞུགས་ནས་འཁོར་བསམ་གྱིས་མི་ཁྱབ་པ་ཐམས་ཅད་ཀྱང་། །ཉིད་ལ་ཉིད་མཉེས་པར་མཆོད་ཅིང་། །ཀུན་དུ་བཟང་པོ་དགྱེས་ཏེ། ཕྱོགས་བཅུ་དུས་བཞི་མ་ལུས་པ་ཐམས་ཅད་ཀྱི་བཞུགས་གནས་ཐམས་ཅད་གཞལ་ཡས་ཁང་རིན་པོ་ཆེ་སྣ་ཚོགས་བསམ་གྱིས་མི་ཁྱབ་པ། ཚད་དཔག་ཏུ་མེད་པ། རྒྱས་པ། མཐའ་དབུས་མེད་པར་ཁྱབ་ཅིང་འོད་ཟེར་སྒྲིབ་པ་མེད་པ་རང་བྱུང་བ་ལ་བཞུགས་ནས་ཆེད་དུ་བརྗོད་པ་འདི་བརྗོད་དོ། །ཉིད་ཀྱི་དབྱིངས་ཉིད་འཕྲོ་བ་དཔག་ཚད་མེད། །ཀུན་ནས་དཀྱིལ་འཁོར་ཡོངས་སུ་མ་ཆད་པའི། །སྲིད་གསུམ་ཡང་དག་མཉམ་སྦྱོར་སྤྱོད་ཡུལ་ཏེ། །མཚན་འཛིན་འདས་པ་མཆོག་གི་རྒྱུ་ལས་བྱུང་། །དབང་སྒྱུར་ཤིན་ཏུ་རྣམ་པར་དག་པ་
ཡི། །དེ་བཞིན་གཤེགས་པ་འོག་མིན་གནས་བཞུགས་ནས། །གཟུང་འཛིན་བྲལ་བའི་བླ་མེད་རྗེས་འདོད་དང་། །འཇིག་རྟེན་འཁོར་གྱི་གཙོས་བཀུར་དབང་ཕྱུག་དང་། །གཞན་དང་འཇིག་རྟེན་ཕྱོགས་བཅུ་ཁམས་གནས་པ། །བདུད་རྩི་རོ་ཡིས་དགའ་བ་བདེ་ཆེན་འགྲུབ། །དུག་གསུམ་དྲི་བྲལ་བདུད་སྡེ་ཚར་བཅད་པའི། །འདས་དང་མ་བྱོན་དེ་བཞིན་ཉིད་དུ་སྦྱོར། །ཤེས་རབ་ཐབས་ལྡན་ངེས་པའི་དོན་ཕྱུང་བ། །རིག་པའི་ཐབས་ཆེན་དབང་སྒྱུར་ཉིད་དུ་བསྒོམ། །སྟོང་སྨོན་མཚན་མེད་རང་བཞིན་འོད་གསལ་བའི། །ཟད་མེད་བསོད་ནམས་ཚོགས་ཀྱིས་བརྒྱན་པར་འགྱུར། །བྷྲུྃ། རང་བྱུང་ཉི་ཟླ་པདྨ་རིན་ཆེན་རྒྱས་ལ་བཞུགས། །རྡོ་རྗེ་མཉམ་ཉིད་ཐུགས་སུ་ཆུད་པ་ཡི། །མཉམ་རྫོགས་ཆེན་པོ་ལྷུན་ལ་རོལ་པ་མཛད། །བདེ་གཤེགས་དབྱིངས་ཉིད་དེ་བཞིན་ཉིད་གནས་པ། །དུས་བཞི་རྒྱལ་བ་ཀུན་དང་མཉམ་པར་འུབ། །ཐམས་ཅད་འོད་གསལ་དཀྱིལ་འཁོར་ཐུགས་ཆུད་པའི། །སྐུ་གསུང་ཐུགས་ཀྱི་རྡོ་རྗེ་འཆང་ལས་འབྱུང་། །སྤྱོད་ཡུལ་འཕྲོག་མེད་བརྗོད་ཀྱིས་མི་ལང་བའི། །དུས་བཞི་མཉམ་ཉིད་ངེས་པའི་དོན་ཉིད་ཉོན། །ཐུགས་རྗེ་དབང་གིས་འགྲོ་དྲུག་དུས་གནས་བཞུགས། །ང་དང་བདག་མེད་མཉམ་པའི་དབྱིངས་མཁྱེན་པ། །མཉམ་པའི་དོན་གྲུབ་རྡོ་རྗེ་ཅན་གྱིས་བྱ། །རྣམ་པར་རྟོག་མེད་བྱང་ཆུབ་རྡོ་རྗེ་ཅན་གྱི་སྐུ། །ཤེས་རབ་མཆོག་གིས་མ་ལུས་ཡོངས་བསྡུས་པ། །བདེ་གཤེགས་མི་གནས་མཉམ་ཉིད་ངང་དུ་བྱོན། །ཐབས་ཆེན་མ་འདྲེས་རྣམ་པར་སྦས་པ་ཡི། །དམིགས་མེད་བདེ་གཤེགས་ཉིད་དབྱིངས་ཐུགས་ཆུད་པ། །ཐབས་དང་ཤེས་རབ་དབྱིངས་ཉིད་དམ་པའི་མཆོག །ཕྱོགས་བཅུ་དུས་བཞི་དབྱིངས་གནས་མཐས་གཏུགས་པ། །ཤེས་རབ་མཆོག་ལྡན་གསལ་བའི་ངང་འཆང་བ། །ཐུགས་རྗེ་བྱིན་བརླབས་སྣ་ཚོགས་འཕྲོ་བ་ཡི། །བདེ་གཤེགས་མ་ལུས་ཐམས་ཅད་འབྱུང་བའི་གནས། །ཡིད་བཞིན་རིན་ཆེན་མི་ཟད་པར་ལྡན་འཕྲོ། །རང་རིག་རྒྱལ་པོ་ཆེ་ཡིས་རྟོགས་པར་འགྱུར། །ཞེས་ཉིད་ལ་ཉིད་དུ་ཆེད་དུ་བརྗོད་དེ་རྡོ་རྗེ་གསང་བའི་
ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་གཞལ་ཡས་ཁང་དབུབ་པ་ཐབས་དྲ་བའི་ལེའུ་སྟེ་བཅུ་གཅིག་པའོ།། །།དེ་ནས་དེ་བཞིན་གཤེགས་པ་བཙུན་མོའི་ཚོགས་དང་བཅས་པ་ཐམས་ཅད་ཀྱི་སྐུ་དང་གསུང་དང་། ཐུགས་རྡོ་རྗེ་ལས་འདི་དག་ཕྱུང་ངོ་། །བྷྲུྃ་བི་ཤྭ་བི་ཤུད་དྷེ། ཧཱུྃ་བཛྲ་བྷྲཱྀཀ། ཨོྃ་ཛཱི་ན་ཛཱི་ཀ། སྭཱ་རཏྣ་ངྷྲཱྀཀ། ཨཱྃ་ཨཱ་རོ་ལཱི་ཀ། ཧཱྃ་བྲཛྙཱ་ངྷྲཱྀཀ། མཱྃདྷཱ་ཏྭཱ་ཤྭ་རི། ལཱྃ་དྭེ་ཥ་ར་ཏི། མཱྃ་མོ་ཧ་ར་ཏི། པཱྃ་རཱ་ག་ར་ཏི། ཏཱྃ་བཛྲ་ར་ཏི། ཀྵཱིཾ་ཧི་རཱ་ཛཱ་ཡ། ཏྲྃ་ཨཱ་ཀ་ཤ་གརྦྷཱ་ཡ། ཧྲཱི་ཧ་ཧཱུྃ་བ་ད་མ། ཛྲི་ཀུ་རུ་པཱ་ཎ་ཧྲཱི། ཧཱུྃ་ལཱ་སྱེ་ས་མ་ཡ་སྟྭྃ། ཏྲྃ་མཱ་ལྱེ་ས་མ་ཡ་ཧོཿ ཧྲཱི་གཱི་ཏི་རཱ་གོ྅ཧྃ། ཨ་ནྲྀ་དྱ་རཱ་ག་ཡ་མཱི། མཻ་དྷཱ་ར་ཎི་སྭཱ་ཧཱ། བླྷཱིཾ་ནི་སྶ་ར་མ་བཱ་ཡ་སྭཱ་ཧཱ། ཧཱུྃ་སྭ་རཱ་ཛཱ་ཡ་སྭཱ་ཧཱ། མུྃ་ཤྲཱི་ཨ་རྃ་གཱ་ཡ་སྭཱ་ཧཱ། ཛཿདྷཱུ་པ་པྲ་བི་ཤ། ཧཱུྃ་པུཥྤ་ཨ་བི་ཤ། བྃ་དཱི་པ་སུ་ཁི་ནི། ཧོ་གན་དྷེ་ཙིཏྟཾ། ཧཱུྃ་ཡ་མཱནྟ་ཀྲིཏ་ཕཊ། པྲཛྙཱནྟ་ཀྲིཏ་ཕཊ། ཧཱུྃ་བིགྷྣཱནྟ་ཀྲིཏ་ཕཊ། ཧཱུྃ་པདྨཱ་ནྟ་ཀྲིཏ་ཕཊ། ཨོྃ་མ་ཧཱ་བཛྲ་དྟ་ར་མ་ཧཱ་ཀྲོ་དྷེ་ཤྭ་རི་ཛྭ་ལ་ནཱི་ཕཊ། ཨོྃ་མ་ཧཱ་རཏྣ་དྷ་ར་མཧཱ་ཀྲོ་དྟེ་ཤྭ་རི་ཛྭ་ལ་ནི་ཕཊ། ཨོྃ་མ་ཧཱ་རནྟ་དྷ་ར་མཧཱ་ཀྲོ་དྟེ་ཤྭ་རི་ཛྭ་ལ་ནཱི་ཕཊ། ཨོྃ་མ་ཧཱ་པདྨ་དྷ་ར་མ་ཧཱ་ཀྲོ་དྷེ་ཤྭ་རི་ཛྭ་ལ་ནཱི་ཕཊ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ཧཱུྃ། ཨ་ཨ་ཨ་བཛྲ་བྟ་དྲ་ས་མནྟ་ཨ། ཨོྃ་མུ་ནེ་ཀྲཱིཾ་སྭཱ་ཧཱ། ཨོྃ་མུ་ནེ་ཏྲུྃ་སྭཱ་ཧཱ། ཨོྃ་མུ་ནེ་སྤུྃ་སྭཱ་ཧཱ། ཨོྃ་མུ་ནེ་བྲྃ་སྭཱ་ཧཱ། ཨོྃ་མུ་ནེ་ཀྵ་སྭཱ་ཧཱ། ཨོྃ་མུ་ནེ་ཡེ་སྭཱ་ཧཱ། ཨེ་ཧྱེ་ཧི། བྷ་ག་བཱ་ན། མ་ཧཱ་ཀཱ་རུ་ནི་ཀ། ཏྲི་ཤྱ་ཧོ། ས་མ་ཡ་སྟྃ། ཛཿཧཱུྃ་བྃ་ཧོཿ ཨོྃ་ཨཱཿཧཱུྃ་སྭཱ་ཧཱ། བ་བ་བ་བ་བ། ཛྲ་ཛྲ་ཛྲ་ཛྲ་ཛྲ། ས་ས་ས་ས་ས། མ་མ་མ་མ་མ། ཡ་ཡ་ཡ་ཡ་ཡ། ཨོྃ་ཨཱཿཧཱུྃ་སྭཱ་ཧཱ། ཨོྃ་ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་གྱུར་ཅིག །ཨོྃ་བཛྲ་ས་མ་ཡ་ཧཱུྃ། ཨོྃ་བཛྲ་ས་མ་ཡ་སྟྭྃ། ཨོྃ་བཛྲ་ས་མ་ཡ་ཧོ་ཞེས་བརྗོད་པས། །གསུང་གི་དཀྱིལ་འཁོར་འདི་དག་གིས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཁྱབ་པར་གྲགས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་གསང་སྔགས་ཀྱི་ལེའུ་
སྟེ་བཅུ་གཉིས་པའོ།། །།དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་དང་། བྱ་བ་མོ་རྡོ་རྗེ་གཉིས་སུ་མེད་པའི་དཀྱིལ་འཁོར་ལ་ཐིམ་པར་མཛད་དོ། །དེ་ནས་ཕྱོགས་བཅུ་དུས་གསུམ་གྱི་དེ་བཞིན་གཤེགས་པའི་བདག་ཉིད་ཆེན་པོ། །ཡེ་ཤེས་དང་བྱིན་བསྡུ་བ་ཞེས་བྱ་བ་འདི་སྐུ་གསུང་ཐུགས་རྡོ་རྗེའི་སྒྱུ་འཕྲུལ་དྲ་བ་ལས་ཕྱུང་ངོ་། །ཨོྃ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་མ་ཧཱ་ཨཱ་དརྴ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་མ་ཧཱ་པྲ་ཏྱ་བེཀྵེ་ཎཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་མ་ཧཱ་ས་མནྟ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་མ་ཧྲ་ཀྲྀ་ཏྱ་ཨ་ནུཥྛཱ་ན་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧྃ།ཨོྃ་སརྦ་ཏ་ཐཱ་ག་ཏ་མ་ཧཱ་བཱ་ཀ་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཞེས་བརྗོད་པས་ཐིམ་པར་གྱུར་ཏོ། །གསལ་བར་གྱུར་ཏོ། །འབར་བར་གྱུར་ཏོ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྒྲ་དང་མིང་ཚིག་ཀུན་ལས་འདས། །སྣ་ཚོགས་སྒྲ་རྣམས་གསལ་བར་འབྱུང་། །གསུང་གཅིག་དཀྱིལ་འཁོར་ཡན་ལག་ནི། །བསམ་གྱིས་མི་ཁྱབ་ཀུན་དུ་ཁྱབ། །སྒྲ་དང་མིང་ཚིག་སོ་སོར་གྲགས། །ཐམས་ཅད་གསུང་གི་ཕྱག་རྒྱ་མཆོག །རྒྱུད་མཆོག་རྒྱུད་ཆེན་དྲ་བ་ལས། །བདེ་ལྡན་གསུང་གི་དོན་འབྱུང་བའང་། །ཐམས་ཅད་པདྨའི་ངང་གྱུར་ན། །གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཐེག་པ་མཐོ་དམན་ཐམས་ཅད་དང་། །ལོག་འགྲོ་མ་ལུས་ཐམས་ཅད་སྐད། །བྱང་ཆུབ་རྡོ་རྗེ་གསུང་དུ་བསྡུས། །བསྡུས་ཉིད་ཕྱོགས་བཅུར་རྣམ་པར་གྲགས། །སྒྲ་ཉིད་མ་ཆགས་ངང་དུ་གསུངས། །གསུངས་པ་ཉིད་ན་བརྗོད་དུ་མེད། །བརྗོད་མེད་དེ་ཉིད་སྣ་ཚོགས་སྒྲ། །ཀུན་ལ་གྲགས་ཤིང་སོ་སོར་འཇལ། །དཔེར་ན་དེ་བཞིན་སྦྲིད་སངས་བཞིན། །གསུང་གཅིག་སྒྲ་ཡིས་ཐམས་ཅད་གོ། །
འདི་ནི་གསུང་མཆོག་རྒྱལ་པོ་ཡིན། །ཐེག་པ་མཐོ་དམན་བསམ་ཡས་ཀྱང་། །དེ་བཞིན་ཉིད་ལས་མ་གསུངས་ཏེ། །གདུལ་པའི་ཐབས་སུ་སོ་སོར་ཐོས། །ཇི་ལྟར་གསུང་རབ་ཀུན་བརྗོད་ཀྱང་། །དེ་བཞིན་ཉིད་ཀྱིས་གསུངས་པ་མེད། །ཡི་གེ་མེད་དང་རིག་པའི་གསུང་། །ལྗགས་ཀྱི་རྩེ་མོར་མ་ཕྱུང་ཡང་། །ཐུགས་རྗེ་གསུང་གི་བྱིན་བརླབས་ཀྱིས། །འགྲོ་དོན་སྣ་ཚོགས་སོ་སོར་གསལ། །གསལ་ཉིད་གསུང་གི་རྡོ་རྗེ་མཆོག །དེ་བཞིན་གསུང་གིས་འགྲོ་དོན་རྣམས། །དེ་བཞིན་ངང་ལས་མ་གཡོས་ཀྱང་། །དཔེར་ན་བྲག་ཅའི་སྒྲ་བཞིན་ནོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དཀྱིལ་འཁོར་བསྡུ་བ་དང་གསང་སྔགས་ཀྱི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པས་ཉིད་ཀྱི་ཕྱག་རྒྱ་སྟོན་པའི་སྙིང་པོ་ཞེས་བྱ་བ་འདི་ཆེད་དུ་བརྗོད་པ་འདི་བརྗོད་དོ། །ཨོྃ་ཧཱུྃ་བཛྲ་སཏྭ་ཧཱུྃ། བཛྲ་པྲ་བྷཱ་ན་ཧཱུྃ། མཱུྃ་བཛྲ་གན་དྷ་ཧཱུྃ། ཨོྃ་ཙཀྲ་མཎྜ་ལ་ཧཱུྃ་ཨཱྃ། ལཱྃ་བཛྲ་གན་བྷཱ་ཥ་ལཱྃ། སྭཱ་རཏྣ་པྲ་བྷཱ་ན་སྭཱྃ། ཨོྃ་བཛྲ་གན་དྷ་བྷཱ་ཥ་ཨཱྃ། ཨོྃ་པདྨ་པྲ་བྷཱ་ན་ཨཱྃ། པྃ་བཛྲ་གནྡྷ་པྲ་བྷཱ་ན་པཱྃ། ཧཱྃ་བཛྲ་ག་ཏཱིཀྵྞཔྲ་བྷཱ་ན་ཧྃ། ཏྃ་བཛྲ་ག་ན་དྷ་བྷཱ་ཥ་པྲ་བྷཱ་ན་ཏྃ། ཤཱི་རཏྣ་པྲ་བྷཱ་ན་ཤཱི་ཧཱུྃ། བཛྲ་གན་དྷ་པྲ་བྷཱ་ན་གྷོ་ཥ་ཧཱུྃ། ཏྲཱྃ་ཁཌྒ་པྲ་བྷཱ་ན་ཏྲཱྃ། ཏྲཱྃ་བཛྲ་གན་དྷ་བྷཱ་ཥ་པྲ་བྷཱ་ན་ཏྲི། ཧྲཱིཿ པདྨ་པྲ་བྷཱ་ན་ཧྲཱིཿ། བཛྲ་གན་དྷ་བྷཱ་ཥ་པྲ་བྷཱ་ན་ཧྲཱིཿ ཧ་བཛྲ་གནྡྷ་བྷཱ་ཥ་པྲ་བྷཱ་ན་ཧྃ། ཨ་བཛྲ་གན་དྷ་བྷཱ་ཥ་པྲ་བྷཱ་ན་ཨཱཿ མེ་ཀཱ་ལ་པྲ་བྷཱ་ན་མེ། ཧཱུྃ་བཛྲ་གན་དྷ་པྲ་བྷཱ་ན་བྷཱ་ཥ་ཧཱུྃ། ཐཱྃ་པྲ་བྷཱ་ན་མཎྜ་ལ་ཐཱྃ། སྭཱྃ་བཛྲ་གན་དྷ་བྷཱ་ཥ་ཧྃ་པྲ་བྷཱ་ན་སྭཱྃ། ཧཱུྃ་རཏྣ་སྭྃ་སཱ་དྷ་བྷ་དྲ་པྲ་བྷཱ་ན་སྭཱ་ཧྲཱིཿ བཛྲ་གན་དྷ་བྷཱ་ཥ་པྲ་བྷཱ་ན་ཧྲཱིཿ མུ་ཨུཏྤ་ལ་ནཱི་ལ་བྲ་བྷཱ་ན་མུ། ཨཱ་བཛྲ་གན་དྷ་བྷཱ་ཥ་པྲ་བྷཱ་ན་ཨཱཿ། ཕཊ་བཛྲ་ཨ་མཿ མུཏྒ་ར་པྲ་བྷཱ་ན་ཕཊ་ཕཊ། ཨོྃ་བཛྲ་གནྡྷ་བྷཱ་ཥ་པྲ་བྷཱ་ན་ཨོྃ་ཨོྃ། ཕཊ་མ་ཧཱ་བཛྲ་པྲ་བྷཱ་ན་ཕཊ་ཕཊ། ཧཱུྃ་མ་ཧཱ་རཏྣ་བཛྲ་ག་ན་དྷ་བྷཱ་ཥ་པྲ་བྷཱ་ན་ཧཱུྃ་ཧཱུྃ། ཕཊ་ཧྲིཿ པདྨ་མུཏྒ་ར་པྲ་བྷཱ་ན་ཧྲཱི་ཧྲཱིཿ། ཨོྃ་མ་ཧཱ་བཛྲ་པདྨ་བཛྲ་གན་དྷ་བྷཱ་ཥ་པྲ་བྷཱ་ན་ཧྲཱིཿཧྲཱིཿ། ཨ་ཀརྨ་མུཏྒ་ར་བཛྲ་པྲ་བྷཱ་ན་ཕཊ་ཕཊ། ཨ་ཀརྨ་བཛྲ་
གན་དྷ་བྷཱ་ཥ་པྲ་བྷཱ་ན་ཧཱུྃ། ཨ་ཨ་ཨ་ཞེས་བརྗོད་པས་ཕྱག་རྒྱ་གསུང་གི་དཀྱིལ་འཁོར་ཀུན་དུ་གསལ་བར་གྱུར་ཏོ། །འབར་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དོན་དམ་པ་དང་། ཀུན་རྫོབ་ཀྱི་བྱང་ཆུབ་ཀྱི་སེམས་ལས་ཕྱག་རྒྱ་གསུང་གི་དཀྱིལ་འཁོར་རྫོགས་པའི་ལེའུ་སྟེ་བཅུ་བཞི་པའོ།། །།དེ་ནས་དེ་བཞིན་གཤེགས་པས་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་བསྟན་པ་ལས། ཆོས་ཐམས་ཅད་ནམ་མཁའ་དང་ཡུམ་གྱི་དབྱིངས་སུ་འདུས་པར་བསྟན་ནས་ཆེད་དུ་བརྗོད་པ་འདི་བརྗོད་དོ། །ཡང་དག་དོན་གྱི་གསང་མཆོག་ནི། །བདེ་བ་ཐུགས་ཀྱི་དཀྱིལ་འཁོར་ལ། །ངེས་པའི་དོན་ཆེན་བཞི་བཅུ་གཉིས། །ཡིད་བཞིན་རིན་ཆེན་གསལ་འབར་ཐིམ། །ཐམས་ཅད་མ་ལུས་ཐིག་ལེའི་དབྱིངས། །སྐུ་ལྔའི་འོད་ཟེར་མང་པོ་ཀུན། །ཐམས་ཅད་ཡུམ་འགྱུར་དབྱིངས་སུ་ཐིམ། །གསལ་འབར་སྤྲིན་གྱི་བདག་པོར་འགྱུར། །བྱང་ཆུབ་སེམས་ཀྱི་ཐིགས་པ་ནི། །ཀུན་ལ་ཁྱབ་ཅིང་མི་གནས་པ། །ཁ་དོག་གནས་དང་དབྱིབས་མ་ཡིན། །ཡོན་ཏན་མཆོག་གི་སྙིང་པོ་ནི། །རྟོག་གེ་སྤྱོད་ཡུལ་ཡོང་མ་ཡིན། །ཟབ་ཅིང་རྒྱ་ཆེན་རབ་སྦྱངས་པའི། །གསལ་ལྡན་བརྟན་པའི་སྤྱོད་ཡུལ་ཏེ། །གཞན་ནས་བཙལ་ཞིང་བརྟག་ཏུ་མེད། །ཐམས་ཅད་ནམ་མཁའི་མཚན་ཉིད་དེ། །སྣ་ཚོགས་འཇིག་རྟེན་བརྟན་གཡོ་དང་། །རྒྱལ་བ་མངོན་བྱུང་ཐམས་ཅད་ཀུན། །ནམ་མཁའི་དབྱིངས་སུ་མ་གྱུར་པ། །དུས་བཞི་ཕྱོགས་བཅུ་གང་ན་མེད། །དུས་གསུམ་བདེ་གཤེགས་ཉིད་ཀྱི་མངའ། །སྔོན་གྱི་བདེ་གཤེགས་ཐུགས་ཆུད་པའི། །ནམ་མཁའི་དབྱིངས་སུ་ཐམས་ཅད་ཐིམ། །ཐམས་ཅད་ཤེས་རབ་དབྱིངས་ཉིད་དེ། །དབྱིངས་ལ་དབྱིངས་ནི་རྣམ་པར་སྦྱོར། །ཤེས་རབ་དབྱིངས་ཉིད་འབྱོར་པ་ཡིས། །བྱང་ཆུབ་རྡོ་རྗེ་ཐིག་ལེ་ཡིན། །དཀྱིལ་འཁོར་གཞལ་ཡས་ལྷུན་གྲུབ་དང་། །རྒྱ་དང་བྲལ་བའི་བསམ་ཡས་ཀྱིས། །ཀུན་ལ་ཁྱབ་ཅིང་མི་གནས་པ། །ཡོན་ཏན་མཆོག་གི་གནས་ཡིན་ཏེ། །མ་བཅོས་རྒྱུན་གྱི་སྐད་ཅིག་མ། །དེ་ཡིས་མ་ཟིན་གང་ཡང་མེད། །རང་གི་རྣམ་རྟོག་མ་ཡིན་པ། །ཡང་
དག་གཤེགས་དང་ལོག་རྟོག་དང་། །གཞན་ཡང་སྤྲུལ་པ་མང་པོའི་ཚོགས། །ཕྱོགས་བཅུ་མ་ལུས་ཐམས་ཅད་ཀུན། །དེ་ལ་གསད་ཅིང་གཟུང་དུ་མེད། །ཁ་དོག་དབྱིབས་དང་གནས་མ་ཡིན། །སྐྱེས་བུ་དམ་པ་མཆོག་འདོད་པས། །དེ་ལ་རྟག་འགྲུས་གསལ་བར་གྱིས། །དེ་ཡི་འབྲས་བུ་མཐར་ཕྱིན་ནི། །རྒྱུ་འབྲས་མེད་པའི་དུས་གཅིག་སྟེ། །ཐམས་ཅད་མིང་གི་མཚན་ཉིད་དུ། །ཡི་གེ་འབྲུ་གསུམ་རྫོགས་པར་གྱུར། །མི་ཟད་རྒྱན་གྱི་འཁོར་ལོས་བསྡུས། །ཚོགས་ཆེན་གཉིས་ཀྱང་རྫོགས་པར་རོལ། །སྐྱེ་འཇིག་མེད་པའི་དབྱིངས་ལ་ཞུགས། །འཇིག་རྟེན་འདས་དང་འཇིག་རྟེན་པའི། །མཐའ་ཡས་འཇིག་རྟེན་བསམ་ཡས་ཀུན། །རྒྱལ་བ་ཡུམ་གྱི་དབྱིངས་སུ་ཐིམ། །ཐམས་ཅད་མ་ལུས་ཆོས་སྐུར་འདུས། །ཧོ། ཆོས་ཐམས་ཅད་མིང་གི་མཚན་ཉིད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཐམས་ཅད་ཡུམ་གྱི་དབྱིངས་སུ་འདུས་པ་ཤིན་ཏུ་གསང་བའི་ལེའུ་སྟེ་བཅོ་ལྔ་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱིས། ཡན་ལག་ཐམས་ཅད་དཀྱིལ་འཁོར་དུ་ལྷུན་གྱིས་གྲུབ་པར་བྱིན་གྱིས་རློབ་པ་ཞེས་བྱ་བ་ཆེད་དུ་བརྗོད་པ་འདི་བརྗོད་དོ། །སྒྱུ་འཕྲུལ་དྲ་བས་མངོན་རྫོགས་པས། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡི། །སྙིང་པོ་ཕྱག་རྒྱ་འདའ་བར་དཀའ། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་སྤྲོས་པ་ལས། །སྦྱར་བ་ཕྱག་རྒྱ་འབྱུང་བའི་རྒྱུ། །ཨོྃ་དང་མཱུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེར་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཧཱུྃ་བསྒྲེང་རྩེ་མོར་རྡོ་རྗེར་འབར། །ཟླ་བ་རྟུལ་འབྲུ་སྦས་དྲིལ་གསིལ་ཞིང་། །འཁྲིལ་པའི་ཚུལ་གྱིས་ཆོས་ལ་བརྟན། །འབྲུ་བཞི་སྦས་ནས་ཐུགས་ཀར་བཀན། །མཱུྃ་གྱི་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཨོྃ་བསྒྲེང་རྩེ་
མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟན། །འབྲུ་བཞི་སྦས་ནས་ཐུགས་ཀར་བཀན། །ལཱྃ་གྱི་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །སྭཱྃ་རྩེར་འབར་བ་རིན་པོ་ཆེ། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་པའི་ཚུལ་གྱིས་ཆོས་ལ་བརྟན། །འབྲུ་བཞི་སྦས་ནས་ཐུགས་ཀར་བཀན། །མཱྃ་གྱི་རྩེ་མོར་དྲིལ་གསིལ་འབར། །ཉི་མ་འབྲུ་ལྔས་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཨཱྃཿ གྱི་རྩེར་པདྨ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟན། །འབྲུ་བཞི་སྦས་ནས་ཐུགས་ཀར་བཀན། །པཱྃ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཧཱྃ་གྱི་རྩེ་མོར་རལ་གྲི་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་པའི་ཚུལ་གྱིས་ཆོས་ལ་བརྟན། །འབྲུ་བཞི་སྦས་ནས་ཐུགས་ཀར་བཀན། །ཏཱྃ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔས་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ཨུཏྤལ་ལ་སོགས་ཀླུ་ཤིང་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་ཏེ། །གཟུགས་མཛེས་རིན་ཆེན་ཕྲེང་བ་དང་། །བི་བང་གར་མཁན་མཆོག་ཉིད་དེ། །མེ་ཏོག་ཕྲེང་བ་སྤོས་མཆོད་མ། །མར་མེ་བྱུག་ལ་སོགས་པ་ཡིས། །ལས་ལ་འཁྲིལ་ཅིང་ཆོས་ལ་བརྟན། །དབུ་རྣམས་བྱོན་ནས་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་ཐིམ། །སྒོ་བཞི་ཕྱག་རྒྱ་ཆེན་པོ་ནི། །ནྲྀ་མགོ་གདེངས་དང་རྡོ་རྗེས་གནོན། །ཐོད་ཕྲེང་ཆེན་པོས་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་སྥོ་ཊ་ཧོཿ། །སྒོ་བཞིར་གནས་པ་དེ་དག་ཀྱང་། །འདུད་ཚུལ་
འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཡིན་ནོ། །གསེག་པར་དང་ནི་པི་བང་དང་། །གོ་ཆ་པོ་ཏི་རིན་ཆེན་སྒྲོམ། །མེ་དང་ཆུ་རུ་རབ་ཏུ་བསྟན། །ཡུམ་ནི་གཉིས་མེད་ཆོས་ཀྱི་དབྱིངས། །ཀུན་བཟང་མཉམ་བཞག་ཡེ་ཤེས་འཕྲོ། །ཡུམ་འགྱུར་མཉམ་རྫོགས་པདྨའི་དཀྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དེ། །ཡང་ན་རྡོ་རྗེ་ཐལ་མོ་ཉིད། །ཕྱག་རྒྱ་ཆེན་པོ་ཚོགས་མཆོག་ནི། །ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྒུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་སུ་མ་འཕྲོར་འབར། །དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱ་མཆོག་དེ་བཞིན་དུ། །བཅུ་གཉིས་དྲུག་གི་འོད་འཕྲོ་འབར། །དེ་ལ་སོགས་ཏེ་བསམ་མི་ཁྱབ། །ཕྱོགས་བཅུ་དུས་བཞི་བསམ་ཡས་སུ། །འདུལ་བའི་དོན་རྣམས་སོ་སོར་སྟོན། །ཐེག་པ་མཐོ་དམན་ཐམས་ཅད་དང་། །ཕྱིན་ཅི་ལོག་རྣམས་བསམ་ཡས་དང་། །ཞི་ཁྲོ་ཚོགས་ཆེན་ཐམས་ཅད་ལ། །སོ་སོར་མཐུན་བྱས་ཀུན་དུ་སྣང་། །དཔེར་ན་གར་མཁན་ཉིད་འདྲ་བ། །ལུས་ལས་མ་དགོད་སྣ་ཚོགས་སྟོན། །མདོར་ན་ཕྱག་རྒྱ་ཐམས་ཅད་ནི། །འདི་ཞེས་གཅིག་ཅེས་བརྗོད་དུ་མེད། །གཉིས་དང་གསུམ་དུ་རྣམ་པར་འཕྲོ། །བསྐྱོད་དང་སྤྲོ་བ་དེ་བཞིན་ཉིད། །མདོར་ན་བསྐྱོད་འགུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །གནས་ཉིད་མི་གནས་གནས་པའང་མིན། །དེ་སྐད་དག་མཆོག་ཉིད་ཀྱིས་བཤད། །མཐེ་བོ་མཛུབ་མོ་རྡོ་རྗེ་འཛིན། །མཐེ་བོ་གུང་མོ་རྒྱལ་བ་འཛིན། །སྲིན་ལག་མཐེ་བོ་ཆགས་པ་ཆེ། །མཐེའུ་ཆུང་མཐེ་བོ་ལེགས་པ་མཆོག །ཧཱུྃ་ཧོཿ། མཛུབ་མོ་གཉིས་སྦྱར་རིན་ཆེན་མཆོག །གུང་མོ་གཉིས་སྦྱར་གཟི་བརྗིད་དོན། །སྲིན་ལག་གཉིས་སྦྱར་རྒྱལ་བའི་ཏོག །བཞད་པའི་སྒྲས་ནི་མཐེའུ་ཆུང་སྤྲད། །ཏྲྃ་ཏེ་རུ་ཧ། མཛུབ་མོ་སྟེང་འོག་ཆོས་ཀྱི་མཆོག །གུང་མོ་སྟེང་འོག་འཇམ་དཔལ་མཆོག །སྲིན་ལག་སྟེང་འོག་འཁོར་
ལོ་མཆོག །མཐེའུ་ཆུང་སྟེང་འོག་སྨྲ་གསུང་ཡིན། །ཧྲཱིཿ པྷྃ་ཊཱྃ་ཧྃ། མཛུབ་མོ་རྒྱ་གྲམ་ལས་ཀྱི་མཆོག །གུང་མོ་རྒྱ་གྲམ་བསྲུང་བར་བྱོས། །སྲིན་ལག་རྒྱ་གྲམ་གནོད་སྦྱིན་མཆོག །མཐེའུ་ཆུང་རྒྱ་གྲམ་གནས་པར་བཤད། །ཧ་ཏྲུྃ་ཨ་བྷྃ། །ཕྱག་རྒྱ་བརྡ་ཚིག་ཆེན་པོ་འདིས། །སངས་རྒྱས་དཀྱིལ་འཁོར་མཛེས་པར་སྣང་། །རང་བཞིན་དཀྱིལ་འཁོར་ཕུན་སུམ་ཚོགས། །གླུ་གཉིས་ཕྱག་རྒྱ་ལྡན་པ་ཡིས། །ས་ལེར་གསལ་བའི་དཀྱིལ་འཁོར་འབེབས། །ཕྱག་རྒྱ་སྤྲོས་པ་ཆེན་པོས་ནི། །གཟུང་དང་འཛིན་པ་རྣམ་གཉིས་པ། །དག་པར་གསལ་བས་ཕྱག་རྒྱ་ཡིན། །ཡི་གེ་སོ་སོ་གསལ་བ་ཡིས། །གར་དུ་བསྒྱུར་བས་མྱ་ངན་འདས། །ཛཿདང་ཧོཿལ་སོགས་པ་ཡིས། །གར་དུ་བསྒྱུར་བས་རྡོ་རྗེར་འཆིང་། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཕྱག་རྒྱ་སྤྲོས་པའི་ལེའུ་སྟེ་བཅུ་དྲུག་པའོ།། །།དེ་ནས་བཅོམ་ལྡན་འདས་དཔལ་ཀུན་དུ་བཟང་པོས་མཚོན་ཆ་དམ་ཚིག་ཅེས་བྱ་བའི་གླུ་འདི་བླངས་སོ། །ཧཱུྃ་ལུས་ངག་ཡིད་གསུམ་རྡོ་རྗེ་ནི། །སྐུ་གསུང་ཐུགས་ཀྱི་ཡེ་ཤེས་ཏེ། །སྐུ་གསུང་ཐུགས་ཀྱི་ཡེ་ཤེས་ནི། །རྡོ་རྗེ་སེམས་དཔའ་རང་གནས་པས། །ཡེ་ཤེས་རྡོ་རྗེ་གསོར་ཞིང་སྤྲོ། །ཨེ་མའོ་རྡོ་རྗེ་ཆེ་མཆོག་ནི། །ཉིད་ཀྱི་མཚན་དུ་གསོལ་བ་ནི། །ཅིས་ཀྱང་མི་ཤིགས་མི་ཕྱེད་ལ། །ཅིས་ཀྱང་མ་གཡོས་མ་འདྲེས་པས། །བདེ་ཆེན་མཆོག་ཏུ་གྱུར་པས་ན། །ཀུན་ཀྱང་ཕྱག་རྒྱ་བཞི་རྒྱས་གདབ། །རྒྱལ་བ་རྣམས་ཀྱི་ཐུགས་ཉིད་ལ། །རྡོ་རྗེ་འཆང་རྒྱལ་ཐམས་ཅད་ཀྱི། །རང་གི་རྟགས་སུ་བསྟན་པའི་ཕྱིར། །མི་ཕྱེད་རྡོ་རྗེ་འཆང་ཞེས་བྱ། །ཧཱུྃ། །ཇི་ལྟར་རྒྱལ་པོ་རང་གི་རྒྱས། །རྒྱལ་པོ་གཙིགས་ལ་བཏབ་པ་ལྟར། །བདེ་ཆེན་སྙིང་ལ་གནས་པ་དང་། །དབང་ཆེན་དུས་ལ་བརྩོན་པ་ཡིས། །ཐམས་ཅད་ཀུན་ལ་དེ་ལྟར་འདེབས། །འདའ་དཀའ་ཇི་བཞིན་མི་ཤིགས་པས། །རྒྱལ་པོ་ཕྱག་རྒྱ་མཆོག་གི་གནས། །བདག་ཉིད་ཆེན་པོ་མཚན་མའི་གཟུགས། །ཧཱུྃ། ཕྱག་རྒྱ་ཞེས་ནི་བསྒྲགས་པ་ཡིན། །ཉིད་ཀྱི་ལུས་ནི་བརྟན་ཕྱིར་རོ། །རྡོ་རྗེ་རྡོ་རྗེ་དྲག་ཆེན་དང་། །རང་ཉིད་ཆེ་བའི་བདག་
ཉིད་དང་། །འདུལ་བ་ཐབས་ཀྱི་རྒྱལ་པོ་ཡིས། །ཕྱེ་ཞིང་བཤིག་དང་བཅོམ་ལ་སོགས། །དཀྲུགས་ཤིང་ཐལ་བ་རྡུལ་ཕྲན་བཞིན། །བཙན་ཞིང་འབར་བའི་འཕྲོ་འདུ་འདིས། །ཐམས་ཅད་རྡོ་རྗེ་ཉིད་པས་ན། །ནམ་མཁའི་ཁམས་ཀུན་བཀང་བ་ཡིན། །དེ་ལས་རྡོ་རྗེ་གསུང་འབྱུང་བའོ། །ཨོྃ་བཛྲ་ཛྭ་ལཱ་ན་ལཱ་རྐ་ཧཱུྃ་ཕཊ། ཨོྃ། ལུས་ངག་ཡིད་གསུམ་འཁོར་ལོ་ནི། །སྐུ་གསུང་ཐུགས་ཀྱི་ཡེ་ཤེས་ཏེ། །སྣང་མཛད་འཁོར་ལོ་དཔའ་བོ་ཡིན། །སྣང་མཛད་འཁོར་ལོ་རང་གནས་པས། །ཡེ་ཤེས་འཁོར་ལོ་གསོར་ཞིང་སྤྲོ། །ཨེ་མའོ་འཁོར་ལོ་ཆེ་མཆོག་གི། །ཉིད་ཀྱི་མཚན་དུ་གསོལ་པ་ནི། །ཅིས་ཀྱང་མི་ཤིགས་མི་ཕྱེད་པས། །ཅིས་ཀྱང་མ་གཡོས་མ་འདྲེས་པས། །བདེ་ཆེན་མཆོག་ཏུ་གྱུར་པས་ན། །ཀུན་ཀྱང་ཕྱག་རྒྱ་བཞི་རྒྱས་གདབ། །རྒྱལ་བ་རྣམས་ཀྱི་ཐུགས་ཉིད་ལས། །འཁོར་ལོ་འཆང་རྒྱལ་ཐམས་ཅད་ཀྱི། །རང་གི་རྟགས་སུ་བསྟན་པའི་ཕྱིར། །མི་ཕྱེད་འཁོར་ལོ་འཆང་ཞེས་བྱ། །ཧཱུྃ། ཇི་ལྟར་རྒྱལ་པོ་རང་གི་རྒྱས། །རྒྱལ་པོའི་གཙིགས་ནི་བཏབ་པ་ལྟར། །བདེ་ཆེན་སྙིང་ལ་གནས་པ་དང་། །དབང་ཆེན་དུས་ལ་བརྩོན་པ་ཡིས། །ཐམས་ཅད་ཀུན་ལ་དེ་ལྟར་འདེབས། །འདའ་དཀའ་ཇི་བཞིན་མི་ཤིགས་པས། །རྒྱལ་པོ་ཕྱག་རྒྱ་མཆོག་གི་གནས། །བདག་ཉིད་ཆེན་པོ་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཉིད་ཀྱི་ལུས་ནི་བརྟན་ཕྱིར་རོ། །ཨོྃ། འཁོར་ལོ་འཁོར་ལོ་དྲག་ཆེན་དང་། །རང་ཉིད་ཆེ་བའི་བདག་ཉིད་དང་། །འདུལ་བའི་ཐབས་ཀྱི་རྒྱལ་པོ་ཡིས། །ཕྱེ་ཞིང་གཞིག་དང་བཅོམ་ལ་སོགས། །དཀྲུགས་ཤིང་ཐལ་བ་རྡུལ་ཕྲན་བཞིན། །ཧཱུྃ། བཙན་ཞིང་འབར་བའི་འཕྲོ་འདུ་འདིས། །ཐམས་ཅད་འཁོར་ལོ་ཉིད་པས་ན། །ནམ་མཁའི་ཁམས་ཀུན་བཀང་བ་ཡིན། །དེ་ལས་འཁོར་ལོ་གསུང་འབྱུང་བ། །ཨོྃ་ཙཀྲ་ཛྭ་ལཱ་ན་ལཱ་རྐ་ཧཱུྃ་ཕཊ། །ཨོྃ། ལུས་ངག་ཡིད་གསུམ་པདྨ་ནི། །སྐུ་གསུང་ཐུགས་ཀྱི་ཡེ་ཤེས་ཏེ། །སྐུ་གསུང་ཐུགས་ཀྱི་ཡེ་ཤེས་ནི། །པདྨ་སེམས་དཔའ་དཔའ་བོ་ཡིན། །པདྨ་སེམས་དཔར་རང་གནས་
པས། །པདྨ་དགྲ་སྟ་གསོར་ཞིང་སྤྲོ། །ཨེ་མའོ་པདྨ་ཆེ་མཆོག་གི། །ཉིད་ཀྱི་མཚན་དུ་གསོལ་བ་ནི། །ཅིས་ཀྱང་མི་ཤིགས་མི་ཕྱེད་ལ། །ཅིས་ཀྱང་མ་གཡོས་མ་འདྲེས་པས། །བདེ་ཆེན་མཆོག་ཏུ་གྱུར་པས་ན། །ཀུན་ཀྱང་ཕྱག་རྒྱ་བཞི་རྒྱས་བཏབ། །རྒྱལ་བ་རྣམས་ཀྱི་ཐུགས་ཉིད་ལས། །པདྨ་འཆང་རྒྱལ་ཐམས་ཅད་ཀྱིས། །རང་གི་རྟགས་སུ་བསྟན་པའི་ཕྱིར། །མི་ཕྱེད་པདྨ་འཆང་ཞེས་བྱ། །ཨོྃ་ཇི་ལྟར་རྒྱལ་པོ་རང་གི་རྒྱས། །རྒྱལ་པོ་གཙིགས་ནི་བཏབ་པ་ལྟར། །བདེ་ཆེན་སྙིང་ལ་གནས་པ་དང་། །དབང་ཆེན་དུས་ལ་བརྩོན་པ་ཡིས། །ཐམས་ཅད་ཀུན་ལ་དེ་ལྟར་འབེབས། །འདའ་དཀའ་ཇི་བཞིན་མི་ཤིགས་པ། །རྒྱལ་པོ་ཕྱག་རྒྱ་མཆོག་གི་གནས། །ཧཱུྃ། བདག་ཉིད་ཆེན་པོ་མཚན་མ་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཉིད་ཀྱི་ལུས་ནི་བརྟན་ཕྱིར་རོ། །པདྨ་དགྲ་སྟ་དྲག་ཆེན་དང་། །རང་ཉིད་ཆེ་བའི་བདག་ཉིད་དང་། །འདུལ་བ་ཐབས་ཀྱི་རྒྱལ་པོ་ཡིས། །ཕྱེ་ཞིང་བཤིག་དང་བཅོམ་ལ་སོགས། །དཀྲུགས་ཤིང་ཐལ་བ་རྡུལ་ཕྲན་བཞིན། །བཙན་ཞིང་འབར་བའི་འཕྲོ་འདུ་ཡིས། །ཐམས་ཅད་པདྨ་ཉིད་པས་ནི། །ནམ་མཁའ་ཁམས་ཀུན་བཀང་བ་ཡིན། །དེ་ལས་པདྨའི་གསུང་ཕྱུང་བ། །ཨོྃ་པདྨ་ཛྭ་ལཱ་ན་ལཱ་རྐ་ཧཱུྃ་ཕཊ། །སྭཱྃ། ལུས་ངག་ཡིད་གསུམ་རིན་ཆེན་ནི། །སྐུ་གསུང་ཐུགས་ཀྱི་ཡེ་ཤེས་ཏེ། །སྐུ་གསུང་ཐུགས་ཀྱི་ཡེ་ཤེས་ནི། །ཡོན་ཏན་ཆེན་པོ་དཔའ་བོ་ཡིན། །རིན་ཆེན་སེམས་དཔའ་རང་གནས་པ། །ཡེ་ཤེས་དབྱུག་པ་གསོར་ཞིང་སྤྲོ། །ཨེ་མའོ་རྡོ་རྗེ་རིན་ཆེན་ཆེ་མཆོག་གི། །ཉིད་ཀྱི་མཚན་དུ་གསོལ་བ་ནི། །ཅིས་ཀྱང་མི་ཤིགས་མི་ཕྱེད་ལ། །ཅིས་ཀྱང་མ་གཡོས་མ་འདྲེས་པས། །བདེ་ཆེན་མཆོག་ཏུ་གྱུར་བས་ན། །ཀུན་ཀྱང་ཕྱག་རྒྱ་བཞི་རྒྱས་གདབ། །སྭཱྃ། རྒྱལ་བ་རྣམས་ཀྱི་ཐུགས་ཉིད་ལ། །རིན་ཆེན་འཆང་རྒྱལ་ཐམས་ཅད་ཀྱི། །རང་གི་རྟགས་སུ་བསྟན་པའི་ཕྱིར། །མི་ཕྱེད་རིན་ཆེན་འཆང་ཞེས་བྱ། །སྭཱྃ། ཇི་ལྟར་རྒྱལ་པོ་རང་གི་རྒྱས། །རྒྱལ་པོའི་གཙིགས་ནི་བཏབ་པ་ལྟར། །བདེ་ཆེན་སྙིང་ལ་གནས་པ་དང་། །དབང་ཆེན་དུས་ལ་བརྩོན་པ་ཡིས། །ཐམས་ཅད་ཀུན་
ལ་དེ་ལྟར་འདེབས། །འདའ་དཀའ་ཇི་བཞིན་མི་ཤིགས་པས། །རྒྱལ་པོ་ཕྱག་རྒྱ་མཆོག་གི་གནས། །བདག་ཉིད་ཆེན་པོ་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཉིད་ཀྱི་ལུས་ནི་བརྟན་ཕྱིར་རོ། །རིན་ཆེན་དབྱུག་པ་དྲག་ཆེན་དང་། །རང་ཉིད་ཆེ་བའི་བདག་ཉིད་དང་། །འདུལ་བ་ཐབས་ཀྱི་རྒྱལ་པོ་ཡིས། །ཕྱེ་ཞིང་བཤིག་དང་བཅོམ་ལ་སོགས། །དཀྲུགས་ཤིང་ཐལ་བ་རྡུལ་ཕྲན་བཞིན། །བཙན་ཞིང་འབར་བའི་འཕྲོ་འདུ་ཡིས། །ཐམས་ཅད་རིན་ཆེན་ཉིད་པས་ན། །ནམ་མཁའ་ཁམས་ཀུན་བཀང་བ་ཡིན། །དེ་ལས་རིན་ཆེན་གསུང་འབྱུང་བ། །སྭཱྃ་རཏྣ་ཛྭ་ལཱ་ན་ལཱ་རྐ་སྭཱྃ་ཕཊ། །ཧཱུྃ། ལུས་ངག་ཡིད་གསུམ་ཕྲིན་ལས་ནི། །སྐུ་གསུང་ཐུགས་ཀྱི་ཡེ་ཤེས་ཏེ། །སྐུ་གསུང་ཐུགས་ཀྱི་ཡེ་ཤེས་ནི། །ལས་ཀྱི་སེམས་དཔའ་དཔའ་བོ་ཡིན། །ལས་ཀྱི་སེམས་དང་རང་གནས་པས། །ཡེ་ཤེས་རལ་གྲི་འདེབ་ཤིང་སྤྲོ། །ཨེ་མའོ་ལས་ཀྱི་ཆེ་མཆོག་གི། །ཉིད་ཀྱི་མཚན་དུ་གསོལ་བ་ནི། །ཅིས་ཀྱང་མི་ཤིག་མི་ཕྱེད་ལ། །ཅིས་ཀྱང་མ་གཡིས་མ་འདྲེས་པས། །བདེ་ཆེན་མཆོག་ཏུ་གྱུར་པས་ན། །ཀུན་ཀྱང་ཕྱག་རྒྱ་བཞི་རྒྱས་བཏབ། །ཧཱུྃ། རྒྱལ་བ་རྣམས་ཀྱི་ཐུགས་ཉིད་ལས། །རལ་གྲི་འཆང་རྒྱལ་ཐམས་ཅད་ཀྱི། །རང་གི་རྟགས་སུ་བསྟན་པའི་ཕྱིར། །མི་ཕྱེད་རལ་གྲི་འཆང་ཞེས་བྱ། །ཧཱྃ། ཇི་ལྟར་རྒྱལ་པོ་རང་གི་རྒྱས། །རྒྱལ་པོའི་གཙིགས་ནི་བཏབ་པ་བཞིན། །བདེ་ཆེན་སྙིང་ལ་གནས་པ་དང་། །དབང་ཆེན་དུས་ལ་བརྩོན་པ་ཡིས། །ཐམས་ཅད་ཀུན་ལ་དེ་ལྟར་འདེབས། །འདའ་དཀའ་ཇི་བཞིན་མི་ཤིགས་པས། །རྒྱལ་པོ་ཕྱག་རྒྱ་མཆོག་གི་གནས། །བདག་ཉིད་ཆེན་པོའི་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཉིད་ཀྱི་ལུས་ནི་བརྟན་ཕྱིར་རོ། །ཧྃ་རལ་གྲི་རལ་གྲི་དྲག་ཆེན་དང་། །རང་ཉིད་ཆེ་བའི་བདག་ཉིད་དང་། །འདུལ་བ་ཐབས་ཀྱི་རྒྱལ་པོ་ཡིས། །ཕྱེ་ཞིང་བཤིག་དང་བཅོམ་ལ་སོགས། །དཀྲུགས་ཤིང་ཐལ་བ་རྡུལ་ཕྲན་བཞིན། །བཙན་ཞིང་འབར་བའི་འདུ་འཕྲོ་འདིས། །ཐམས་
ཅད་རལ་གྲི་ཉིད་པས་ན། །ནམ་མཁའ་ཁམས་ཀུན་བཀང་བ་ཡིན། །དེ་ལས་ཕྲིན་ལས་གསུང་བྱུང་བའོ། །ཧཱྃ་ཀརྨ་ཛྭ་ལཱ་ན་ལཱ་རྐ་ཧཱུྃ་ཕཊ། མཱུྃ་ལུས་ངག་ཡིད་གསུམ་དྲིལ་བུ་ལས། །སྐུ་གསུང་ཐུགས་ཉིད་གཏུམ་པོར་འགྱུར། །བསྐོར་ཐབས་ཆེ་བའི་མཆོག་ཚུལ་དུ། །རྡོ་རྗེ་ལན་གསུམ་གསོར་བ་ཡིས། །ལྷ་མོ་ཀླུ་མོ་རིགས་ངན་མོ། །དམ་ཅན་རྣལ་འབྱོར་དབང་དུ་འགྱུར། །རྣལ་འབྱོར་ཕོ་མོ་གང་སྣང་བའི། །ཐམས་ཅད་གཅིག་ཏུ་འདུས་པར་ནི། །ཡུལ་ལ་མངོན་དུ་སྣང་བར་འགྱུར། །མི་བསྐྱོད་རྡོ་རྗེ་ཐབས་ལྡན་པས། །ཨོྃ་དང་ཧྃནི་མ་ཐལ་བར། །ལན་གསུམ་གསོར་ཆེན་གུར་དཀར་བསྒོམ། །ལྷན་ནེའི་དཀྱིལ་འཁོར་མཆོག་ཏུ་འགྱུར། །ཨོྃ་དང་ཧྃ་ནི་ཐལ་ཙམ་དུ། །ཀུན་དུ་གྲུ་བཞིར་བདག་གནས་ཏེ། །ལན་གསུམ་གསོར་ལ་གང་བརྩོན་པ། །ཚེ་དང་སྐལ་པ་འཕེལ་བར་འགྱུར། །ལོངས་སྤྱོད་ཅི་འདོད་གྲུབ་པར་འགྱུར། །དེ་ནས་ཟླ་གམ་མདོག་དམར་ཤམ། །འབྲེལ་པ་མཉམ་པར་ལན་གསུམ་གྱིས། །ཁྲོས་པས་གསོར་ལ་གང་བརྩོན་པས། །ཡིན་ལ་དམིགས་དང་ལས་ཐམས་ཅད། །དབང་ཆེན་དཀྱིལ་འཁོར་ཉིད་དུ་འགྱུར། །དེ་ལས་གཏུམ་པའི་མདོག་གནས་ཏེ། །དྲག་ཏུ་ཕཊ་ཅེས་བརྗོད་པས་ནི། །ཁ་དོག་ནག་པོར་བདག་གནས་ཤིང་། །བསྐལ་པ་འབར་བའི་དབུས་གནས་པ། །ཁྲོས་ཏེ་དགུག་པ་ཉིད་དག་ཏུ། །རྒྱང་ནི་རིང་དུ་འཕངས་པ་ན། །ཅི་འདོད་ལས་རྣམས་འགྲུབ་པར་ངེས། །ཨོྃ་བཛྲ་ད་ཧ་ཛྭ་ལ་ཧ་ན་བཛྲ་པ་ཙ་ཛྭ་ལ་བཛྲ་ཧཱུྃ་ཕཊ། ཆོས་ལ་བརྟན་པ་ཕྱག་བསྣམས་པ། །སྦུབས་ནི་དྲིལ་བུ་ཆོས་ཁམས་ཏེ། །ཤེས་རབ་ཡུམ་གྱི་ཚོགས་སུ་བརྟག །སྐད་ནི་གསུང་བསྙན་བདེ་བ་མོ། །ལྕེ་ནི་གར་མཁན་མྱ་ངན་འདས། །ཆོས་སྐུ་ཐུགས་ཀྱི་ཐུགས་ཉིད་ལས། །རབ་ཏུ་གསོར་ལ་གང་བརྩོན་པས། །མཱུྃ་ལ་སོགས་པའི་ཡི་གེ་བསྒོམ། །རྡོ་རྗེ་འཁོར་ལོ་པདྨ་འབར། །མུྃ་གྱི་ཚོགས་ཀྱི་དཀྱིལ་འཁོར་ནི། །ཀུན་དུ་དབང་སྒྱུར་ཡིད་འོང་བའི། །འདོད་པ་བཞིན་དུ་མཐུན་པས་འགྲུབ། །ཨོྃ་བཛྲ་གྷཎྜ་པཱ་ཤ་དྷ་རྨ་དྷཱ་ར། ཧཱུྃ་ཧཱུྃ་ཧཱུྃ་ཞེས་བརྗོད་པས་དེ་བཞིན་
གཤེགས་པ་ཉིད་དེ་བཞིན་གཤེགས་པ་ཉིད་ལ་དགྱེས་པར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་སྒྱུ་འཕྲུལ་ཆེན་པོ་ཐབས་དང་ཤེས་རབ་ཏུ་འབྱུང་བ་ཕྱག་འཚལ་གྱི་ལེའུ་སྟེ་བཅུ་བདུན་པའོ།། །།དེ་ནས་དེ་བཞིན་གཤེགས་པ་དགྱེས་པ་ཆེན་པོ་རྡོ་རྗེ་གསང་བའི་དམ་ཚིག་བཀོད་པ་ལ་སྙོམས་པར་ཞུགས་ནས། ཆེད་དུ་བརྗོད་པ་འདི་བརྗོད་དོ། །ཤིན་ཏུ་ཕྲ་བའི་དམ་ཚིག་མཆོག །ཕྱག་རྒྱ་ཆེན་པོའི་ཕྱག་མཐིལ་དུ། །ཐུགས་ཀྱི་དཀྱིལ་འཁོར་དམ་པ་དེ། །སོར་ནི་བཞི་ཡི་ཚད་དུ་བྱ། །འབྲུ་ལྔ་སྤོས་ལྔ་རིན་ཆེན་ལྔ། །སྙིང་པོ་ལྔ་དང་སྨན་ལྔ་དང་། །བདུད་རྩི་ལྔ་ཡིས་རབ་མཉམ་ལ། །རིག་པས་ཐིག་ནི་གདབ་པར་བྱ། །ལྟེ་བ་རྩིབས་དང་ལྡན་པ་ཡི། །རྩེ་བཞི་འཁོར་ལོ་མུ་ཁྱུད་བཅས། །གྲུ་ཆད་བཞི་དང་གྲུ་བཞི་ཡི། །བར་ཁྱམས་སྒོ་ཁྱུད་ལྡན་པར་བྱ། །སེན་ཟླུམ་ཙམ་གྱི་ཉི་ཟླ་ལ། །ཙ་ན་འབྲུ་ཙམ་པདྨོ་གདན། །ཡུངས་འབྲུ་ཙམ་གྱི་ཡི་གེ་ལས། །ཕྱག་རྒྱ་ཏིལ་འབྲུ་ཙམ་དུ་བྲི། །བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་དུང་དང་བྲོ་བས་བསྐོར། །གླུ་ཚིག་བྲོ་གར་རོལ་མོ་ཡི། །སྤྲིན་ཕུང་ཚོགས་ཀྱིས་རབ་ཏུ་མཆོད། །ཡུམ་དང་འཇོ་མ་སེམས་མ་དང་། །ཇི་ལྟར་འདོད་པའི་ལས་བཞིན་མཆོད། །དབྱིབས་དང་ཁ་དོག་མཚན་ལྡན་པའི། །ཞལ་དུ་གྱུར་པའི་མེ་བོས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞི་མཆོད་པ་རབ་ཏུ་སྤྱིན། །ཁྲོ་བོའི་དཀྱིལ་འཁོར་དེ་བཞིན་ཏེ། །ཤིན་ཏུ་ཕྲ་ལ་སྦྱངས་པ་ཡིས། །བསམ་ཡས་དག་ལ་དེ་བཞིན་བྱ། །རིག་པས་དཔག་པ་ཙམ་དུའོ། །མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲིས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོ་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་
རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པས་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱི། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་དབུལ། །སྐལ་ལྡན་གསལ་བའི་ཁྱབ་བར་གྱིས། །རིམ་གྱིས་ཡང་ན་ཅིག་ཆར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེནན་པོ་བསྒོམ། །གསལ་ལྡན་མའམ་བྱིན་བརླབས་ལ། །སྟོང་གསུམ་ཡུངས་འབྲུར་འཇུག་ཚུལ་དུ། །དབྱིངས་ནས་དཀྱིལ་འཁོར་སྤྱན་དྲངས་མཆོད། །མཉེས་ནས་འགྲུབ་པའི་དམ་ཚིག་མཆོག །བདག་ཉིད་ཆེན་པོ་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་བ་མ་ལུས་ལ། །དགའ་བ་ཆེན་པོས་ཁྱབ་པར་གྱུར། །སྒྱུ་འཕྲུལ་དྲ་བ་བརྟན་པ་ཡིས། །ཕྱོགས་བཅུ་དུས་བཞིར་གཤེགས་པ་ཡི། །སངས་རྒྱས་དཀྱིལ་འཁོར་མ་ལུས་དང་། །ཁམས་གསུམ་འགྲོ་རྣམས་མངོན་དུ་གྱུར། །ལུས་ངག་སེམས་དང་ཆོས་ཐམས་ཅད། །གང་ན་མི་གནས་མི་དམིགས་པ། །རང་བཞིན་མཉམ་པའི་ཆོས་ཉིད་ལ། །མིག་ཡོར་ཚུལ་དུ་སྤྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །གོམས་པའི་དཀྱིལ་འཁོར་ཆེན་པོ་ལ། །ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །དེ་ནས་རིགས་ཀྱི་བུ་མཆོག་དེས། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་དབུལ། །དབང་ཕྱུག་ལོངས་སྤྱོད་ལྔས་མཆོད་ནས། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཉེས་པ་ཐམས་ཅད་དག་པར་འགྱུར། །དད་བརྩོན་བརྟུལ་ཞུགས་རབ་རྟོགས་ནས། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་གཟུང་། །ཡང་ན་ཐལ་མོ་རབ་བསྣོལ་ནས། །ཕྱག་ཆེན་པོ་ཡི་འཕང་དུ་ནི། །དཀྱིལ་འཁོར་མཛུབ་གང་ཚད་དུ་བྱ། །མཁས་པས་ཆོ་ག་བཞིན་དུ་བྱ། །ཡང་ན་ས་གཞི་མཉམ་པ་ལ། །དཀྱིལ་འཁོར་ཁྲུ་གང་ཚད་
དུ་བྱ། །ཡང་ན་ལུས་གང་ཚད་དུ་སྟེ། །ཡང་ན་ལུས་ནི་གསུམ་གྱི་ཚད། །ཕུར་བུ་སྲང་བུ་ཚེན་ཕྱེ་དང་། །གོས་རྒྱན་མཛེས་མ་ཡིད་འོང་གྲོགས། །ཐིག་གདབ་ཆོ་ག་ཕུན་སུམ་ཚོགས། །མཁས་ལྡན་ཆེན་པོས་བསྒྲིམས་ཏེ་བྱ། །ཡང་ན་ཁྲུ་ནི་བཅུ་དྲུག་དང་། །ཉི་ཤུའམ་ཉི་ཤུ་རྩ་ལྔར་བྱ། །རིགས་ཀྱི་དཀྱིལ་འཁོར་ལྔ་རྣམས་བསྒོམ། །སྐུ་གསུང་ཐུགས་ལྡན་གཟུགས་ཀྱང་དགོད། །ཡང་ན་རྒྱང་གྲགས་དཔག་ཚད་དམ། །ནམ་མཁའི་དབྱིངས་ནི་བསམ་ཡས་པར། །སངས་རྒྱས་དཀྱིལ་འཁོར་སྣ་ཚོགས་བསྒོམ། །མ་མཐོང་རྨོངས་པ་སྟོན་ཕྱིར་ཚོན། །ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱིས་བྲི་བར་བྱ། །འདུལ་བའི་ཆོ་ག་བཞིན་དུ་དགྱེ། །ཏིང་འཛིན་རོལ་མོ་མཐའ་ཡས་མཆོག །ཡི་གེའམ་གདན་ནམ་སྙིང་པོ་འམ། །ཕྱག་རྒྱའམ་སྐུ་གསུང་ཐུགས་ལྡན་པར། །བྱིན་བརླབས་ཡ་མཚན་རྨད་པོ་ཆེ། །འགྲུབ་འགྱུར་སངས་རྒྱས་ཀུན་གྱི་དམ། །ས་ལ་སོགས་པ་ཕྱག་རྒྱར་བྱས། །རྣམ་གྲོལ་རིམ་པར་ཐོབ་པར་འགྱུར། །དག་པའི་ཡེ་ཤེས་ཀྱིས་བྱས་པ། །སྨོས་ཅི་དགོས་ཏེ་དེ་ཉིད་ཡིན། །ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བ། །ཕྱོགས་དུས་ཀུན་ནས་གཤེགས་པ་ཡི། །སྐུ་གསུང་ཐུགས་ཀྱི་ཡེ་ཤེས་ནི། །ཀུན་དུ་བཟང་མོ་མི་བསྙེངས་ཡིན། །ཀུན་དུ་བཟང་མོ་རང་གནས་པས། །ཡེ་ཤེས་དྲིལ་བུ་གསིལ་ཞིང་སྤྲོ། །ཨེ་མའོ་སངས་རྒྱས་ཡུམ་ཆེན་གྱི། །ཉིད་ཀྱི་མཚན་དུ་གསོལ་བ་ནི། །ཅིས་ཀྱང་མི་ཤིགས་མི་ཕྱེད་ལ། །ཅིས་ཀྱང་མ་གཡོས་མ་འདྲེས་པས། །བདེ་ཆེན་ཡུམ་དུ་གྱུར་པས་ན། །ཀུན་ཀྱང་ཕྱག་རྒྱ་ཡུམ་ལྔས་བཏབ། །མཱུྃ། ཀུན་དུ་བཟང་མོའི་ཐུས་ཉིད་ལས། །རྡོ་རྗེ་ཡུམ་ཆེན་ཐམས་ཅད་ཀྱི། །རང་གི་རྟགས་སུ་བསྟན་པའི་ཕྱིར། །མི་ཕྱེད་དྲིལ་བུ་འཆང་ཞེས་བྱ། །མཱུྃ་ཇི་ལྟར་རྒྱལ་པོའི་གནས་བཤམས་ཏེ། །རྒྱལ་པོས་གཙིགས་ཆེན་འགྱེད་པ་ལྟར། །བདེ་ཆེན་ཡུམ་དུ་
གནས་བ་དང་། །དབང་ཆེན་དུས་ལ་བརྩོན་བ་ཡིས། །ཐམས་ཅད་ཀུན་ལ་དེ་ལྟར་འདེབས། །འདའ་དཀའ་ཇི་བཞིན་མི་ཤིགས་པས། །རྒྱལ་པོ་ཕྱག་རྒྱ་མཆོག་གི་གནས། །བདག་ཉིད་ཡུམ་ཆེན་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཉིད་ཀྱི་ལུས་ནི་བརྟན་ཕྱིར་རོ། །མཱུྃ་དྲིལ་བུ་དྲིལ་བུ་གྲགས་སྙན་དང་། །ཡུམ་ཉིད་ཆེ་བའི་བདག་ཉིད་དང་། །འདུལ་བ་ཐབས་ཀྱི་རྒྱལ་མོ་ཡིས། །ཕྱེ་ཞིང་བཤིག་དང་བཅོམ་ལ་སོགས། །དཀྲུགས་ཤིང་ཐལ་བ་རྡུལ་ཕྲན་བཞིན། །བཙན་ཞིང་འབར་བའི་འཕྲོ་འདུ་འདིས། །ཐམས་ཅད་དྲིལ་བུ་ཉིད་པས་ན། །ནམ་མཁའ་ཁམས་ཀུན་བཀང་བ་ཡིན། །དེ་ལས་ཆོས་སྐུ་གསུང་འབྱུང་བ། །མཱུྃ་གྷ་ཛྭ་ལཱ་ན་ལཱ་རྐ་མཱུྃ་ཞེས་བརྗོད་པས་ཕྱག་རྒྱའི་ཚོགས་སུ་སྣང་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཚོན་ཆ་དམ་ཚིག་ཕྱག་རྒྱ་གླུའི་ལེའུ་སྟེ་བཅྭ་བརྒྱད་པའོ།། །།དེ་ནས་བཅོམ་ལྡན་འདས་དཔལ་ཀུན་དུ་བཟང་པོས་ཐབས་དང་། །ཤེས་རབ་འབྱུང་བ་ཞེས་བྱ་བ་འདི་ཆེད་དུ་བརྗོད་པ་འདི་བརྗོད་དོ། །དེ་ནས་ཡིད་དང་ཆོས་མཐུན་པར། །ཐུགས་ཀྱི་ཕྱག་རྒྱ་རྡོ་རྗེ་འཆང་། །ཤེས་རབ་དྲིལ་བུ་ཆོས་ལ་བརྟན། །ཧཱུྃ་དང་མཱུྃ་གྱི་སྙིང་པོ་འབར། །དེ་ལས་རྡོ་རྗེ་རྩེ་བཅུར་འབར། །ཨོཾ་དང་མཱུྃ་གྱི་མཆོག་ཏུ་བརྟག །ཤེས་རབ་ཉི་ཟེར་ཟླ་རྒྱས་ཐབས། །འབར་བའི་ཕུང་པོས་ཆོས་ལ་བརྟེན། །དེ་ལས་གཟུང་ཐབས་གཉིས་ཀྱིས་ནི། །འབྲུ་ལྔ་ཕྱག་རྒྱ་ཉིད་དུ་སྟེ། །དེ་ལས་རྡོ་རྗེ་ཕྱག་བསྣམས་གསོར། །དེ་ལས་འཁོར་ལོ་ཕྱག་བསྣམས་གསོར། །དེ་ལས་ནོར་བུ་ཕྱག་བསྣམས་པ། །དེ་ལས་པདྨ་ཕྱག་བསྣམས་འཛིན། །དེ་ལས་རལ་གྲི་ཕྱག་བསྣམས་གཅོད། །དེ་ཉིད་རྡོ་རྗེ་ཕྱག་བསྣམས་པ། །ཐབས་ཆེན་དྲུག་ཏུ་ཡང་དག་གསོར། །དེ་ལས་རྡོ་རྗེ་གཟུང་ཐབས་གཉིས། །ཨོྃ་དང་མཱུྃ་གྱི་མཚོན་བཞིན་དུ། །རྡོ་རྗེ་རྩེ་བཅུ་ཐབས་ཆེན་པོ། །ཐུགས་ཀར་བརྟན་པའི་ཚུལ་དུ་འབར། །སངས་རྒྱས་རྡོ་རྗེ་སེམས་དཔའ་ཡི། །ཕྱག་ན་མི་འཇིགས་ཐུགས་ཀར་འཛིན། །མཱུྃ་ལས་ཕྱག་རྒྱ་ཆེན་པོ་ནི། །དྲིལ་གསིལ་འབར་བས་སངས་རྒྱས་ཡུམ། །མཆོད་
གནས་ཆོས་ལ་བརྟེན་པར་འཛིན། །ཐམས་ཅད་ཀུན་དུ་ཕྱག་རྒྱ་ཡི། །ཐབས་དང་ཤེས་རབ་རྡོ་རྗེ་འཆང་། །སྐུ་གསུང་ཐུགས་ནི་ཐམས་ཅད་པ། །ཡོན་ཏན་ཕྲིན་ལས་ཀུན་དུ་རྫོགས། །སྒྱུ་འཕྲུལ་དྲ་བས་བྱང་ཆུབ་པའི། །སངས་རྒྱས་རྡོ་རྗེ་འཆང་དུ་དམིགས། །དེ་ལས་རྡོ་རྗེ་མཆོག་བསྣམས་པ། །དེ་ལས་མི་བསྐྱོད་ཉི་མའི་ལམ། །སྐུ་གསུང་ཐུགས་ཀྱི་ཡོན་ཏན་ལས། །ཨོྃ་ཧཱུྃ་སྭཱྃ་གྱི་རྩེར་འཛིན་པ། །ཉིད་ལས་ཡང་དག་བསྐྱེད་ཚུལ་དུ། །ཤེས་རབ་ཡུམ་དུ་ཤིན་ཏུ་བརྟགས། །རྡོ་རྗེ་འབར་བས་རབ་བརྟེན་པ། །ཐབས་ཆེན་ཡིད་ནི་སངས་རྒྱས་ཡབ། །གཅིག་དང་དུམ་ཡོངས་ཀྱིས་མེད། །དེ་ལས་འགྲོ་དོན་ཕྲིན་ལས་འཆར། །ཡིད་དང་ཆོས་སུ་རབ་བརྟགས་པའི། །རྡོ་རྗེ་འཆང་རྒྱལ་ཚུལ་ཆེན་ལས། །རྡོ་རྗེ་དྲག་པོར་ལན་གསུམ་གསོར། །གཏུམ་པའི་སྔགས་བརྗོད་དེ་བསྐྱེད་པས། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །དཔག་བསམ་ཤིང་དང་ཡིད་བཞིན་གྱི། །རིན་ཆེན་དབྱིག་དང་འབྱུང་བ་ཀུན། །དེ་དག་རྫས་ཡོད་མ་ཡིན་ཏེ། །རང་སེམས་བསོད་བརྟན་པ་ཡིན། །ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཡེ་ཤེས་ལ་ནི་ཡེ་ཤེས་རོལ། །ཡེ་ཤེས་རོལ་པ་ཉིད་གང་གསོག །རྒྱལ་བ་མངོན་བྱུང་སྐྱོབ་པ་དང་། །བྱིན་བརླབས་སྟོན་པའང་དེ་བཞིན་ཏེ། །བྱ་བྱེད་ནུས་མཐུའི་གཟི་བྱིན་གྱིས། །སྒྱུ་མ་རྡོ་རྗེ་བཙན་པོ་མཆོག །ཆོ་ག་ལྔ་ནི་རྫོགས་བྱས་ཤིང་། །ཡོ་བྱང་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །མ་ཉམས་འཇུག་ལ་རབ་བརྩོན་པ། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་
མཆོག །ཕྱོགས་བཅུ་དུས་བཞི་མངོན་རྫོགས་པའི། །ཞིང་ཁམས་རྣམ་དག་བསམ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོ་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བར་མཉེས་པ་དང་། །རྒྱ་ཆེན་གསུང་ལས་དོན་བྱུང་བ། །མཐུན་པའི་ཡེ་ཤེས་རང་སྣང་ངོ་། །གཅིག་དང་དུ་མར་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཉིད་ཀྱིས་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་པས་ན། །འགྲོ་དྲུག་དུས་གནས་མ་ལུས་སྣང་། །བདེ་བ་ཆེན་མོའི་དཀྱིལ་འཁོར་ནི། །སྟངས་དབྱལ་གཉིས་སམ་ཡང་ན་ལྔ། །བྱས་ཏེ་དད་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །སྐལ་བ་མཉམ་པའི་ཡེ་ཤེས་དེ། །གཉེར་ན་ཉེ་བར་མཉམ་པ་ཡི། །ཡ་མཚན་ཆེན་པོ་འབྱུང་བར་ངེས། །དད་མེད་ཉམས་ན་ཕུང་པར་འགྱུར། །ཞེས་ཆེད་དུ་བརྗོད་དོ། །རྡོ་རྗེ་བཀོད་པ་གསང་བ་དམ་ཚིག་གི་ལེའུ་སྟེ་བཅུ་དགུ་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ལྷག་པའི་གཟུགས་བརྙན་གྱི་དཀྱིལ་འཁོར་གྱི་དངོས་གྲུབ་བླང་བའི་ཐབས་འདི་གསུངས་སོ། །ཡེ་ནས་མཉམ་ཉིད་དཀྱིལ་འཁོར་ལ། །ཐབས་དང་ཤེས་རབ་ལྡན་བྱས་ཏེ། །རང་རིག་ཡེ་ཤེས་རྒྱལ་པོ་ཡིས། །ཐམས་ཅད་མ་ལུས་མཎྜ་ལ། །དེ་བཞིན་ཉིད་ཀྱི་གཞལ་ཡས་ལ། །རིག་པར་བྱུང་གྱུར་པ་ཡིས། །མཉམ་པར་མཉམ་ལ་མི་གནས་པའི། །ཆོས་སྐུའི་ཕྱག་རྒྱ་ཆེན་པོར་བསྒོམ། །འཇིག་རྟེན་བརྟན་གཡོ་ཐམས་ཅད་ལ། །རང་བཞིན་དཀྱིལ་འཁོར་གནས་མོད་ཀྱི། །གཟུང་འཛིན་རྣམ་རྟོག་ཞགས་པ་ཡིས། །རང་རིག་བསྒྲིབས་ཤིང་བདག་ཏུ་བཅིངས། །ཀུན་གྱིས་ཡང་དག་རྟོགས་བྱའི་ཕྱིར། །དེ་བཞིན་ཆོས་སྐུའི་གཟུགས་བརྙན་བསྟན། །རྟོག་དག་མི་རྟོག་རང་རིག་དང་། །ཡང་དག་ཐབས་ཆེན་རྫོགས་པའི་དོན། །རིན་ཆེན་སྣ་ཚོགས་ལ་སོགས་དང་། །
འབྱུང་བ་བཞི་ལས་གྱུར་རྣམས་ཀུན། །ཐམས་ཅད་བྱང་ཆུབ་མཆོག་གི་རྒྱུ། །གཟུགས་སོགས་རི་མོར་བྲིས་པ་དག །ཡེ་ཤེས་ཆེན་པོ་རབ་འབྱམ་གྱིས། །དོན་དུ་མི་འགྱུར་ཡོང་མ་གསུངས། །དེ་བཞིན་ཏིང་འཛིན་དཀྱིལ་འཁོར་གྱིས། །ཐམས་ཅད་དབྱིངས་སུ་བསྡུས་ནས་ནི། །ཉིད་ཀྱི་ཐུགས་ལ་བསྟིམ་བྱས་ཏེ། །ཐམས་ཅད་ཆོས་སྐུའི་ཕྱག་རྒྱ་ཆེ། །དཀྱིལ་འཁོར་རྣམ་གསུམ་དག་བྱས་པས། །ནམ་མཁའི་དབྱིངས་ཀྱི་དཀྱིལ་འཁོར་དུ། །རང་རིག་ཡེ་ཤེས་འདུ་འཕྲོ་ཡིས། །ཐམས་ཅད་ཆོས་སྐུ་ཕྱག་རྒྱ་ཆེ། །ཡང་དག་རྟོགས་པའི་ཁྱད་པར་གྱིས། །ཏིང་འཛིན་དོན་རྣམས་གསལ་བསྒོམས་ཏེ། །མཱ་མ་ཀཱི་ཡི་རྒྱུན་ཆགས་ལ། །ཡང་དག་ཆོས་སྐུ་ཕྱག་རྒྱ་ཆེ། །དེ་བཞིན་ཏིང་འཛིན་གསལ་བསྒོམས་ནས། །དོན་མཆོག་མ་ལུས་རྫོགས་པའི་ཕྱིར། །མཁའ་ལ་འཕྲོ་བའི་དཀྱིལ་འཁོར་དུ། །དྲི་མེད་ཆོས་སྐུ་ཕྱག་རྒྱ་གསལ། །དབྱིངས་དང་དེ་བཞིན་ཉིད་མེད་པར། །ཏིང་ངེ་འཛིན་གྱིས་དབང་བསྒྱུར་ནས། །ཁ་དོག་དབྱིབས་དང་གཟུགས་སུ་བསྒྱུར། །སྣ་ཚོགས་ཕྲིན་ལས་རྣམ་པར་རོལ། །དོན་གྱི་སྙིང་པོ་མཆོག་རྣམས་ཀྱང་། །བྱང་ཆུབ་ཕྱོགས་རྣམས་རབ་ཏུ་རྫོགས། །འཇིག་རྟེན་གཙོ་མཆོག་རྣམས་ཀྱིས་བསྐོར། །ཨ་ཧོཿཆོས་སྐུ་ཕྱག་རྒྱ་དེ་དག་ལས། །ལས་ལྔའི་དཀྱིལ་འཁོར་རབ་ཏུ་བསྒྲུབ། །ཏིང་ངེ་འཛིན་གྱིས་དབང་བསྒྱུར་ན། །ཇི་ལྟར་དམིགས་པ་བཞིན་དུ་འགྲུབ། །དྲག་པོ་གཏུམ་པོ་གདུལ་བའི་ཕྱིར། །བདག་ཉིད་དྲག་པོ་བསྒོམས་ནས་ནི། །ཆོས་སྐུ་ནག་པོ་འོད་འབར་གྱིས། །བགེགས་ཀྱི་ལིངྒ་མནན་པར་བྱ། །གཏུམ་པོ་རྔམ་པོའང་བརླག་པར་འགྱུར། །མི་མཐུན་ཕྱོགས་ཀྱང་རྡུལ་དུ་རློག །འདི་དང་འགྲོ་བ་ཐམས་ཅད་དུ། །ཤིན་ཏུ་སྟོབས་དྲག་ཆེ་ལྡན་འགྱུར། །ཐམས་ཅད་གཉིས་མེད་དབྱིངས་བསྡུའི་ཕྱིར། །བདག་ཉིད་ཧ་ཡ་གྲཱི་བར་བསྒོམ། །དམར་པོའི་ཆོས་སྐུ་གསལ་བསྒོམས་ཏེ། །མི་མཐུན་ཕྱོགས་རྣམས་གདན་དུ་གདེང་། །ཏིང་འཛིན་གསལ་བས་བྱིན་བརླབས་ན། །ཐམས་ཅད་མ་ལུས་དབང་དུ་བསྡུ། །མཐུ་ཆེན་དག་ཀྱང་ཕྱི་བཞིན་
འབྲང་། །ཅི་འདོད་ལས་རྣམས་བྱེད་པར་འགྱུར། །ཐམས་ཅད་ཡོན་ཏན་འཕེལ་བྱའི་ཕྱིར། །བདག་ཉིད་རྒྱལ་བའི་ཁྱུ་མཆོག་སྟེ། །གསེར་གྱི་མདོག་འདྲ་ཕྱག་རྒྱར་བསྒོམ། །གང་འཕེལ་ཆོས་སྐུ་གདན་དུ་གཞག །དེ་ལྟར་དག་པས་བྱིན་བརླབས་ན། །ཡོན་ཏན་ནམ་མཁའི་མཐའ་དང་མཉམ། །ཚེ་དང་ལོངས་སྤྱོད་འཕེལ་བ་དང་། །ཇི་ལྟར་དམིགས་པ་བཞིན་དུ་འགྲུབ། །ཐུགས་རྗེ་ཆེན་པོའི་བྱིན་བརླབས་ཀྱིས། །གཏུམ་ཁྲོ་མ་ལུས་ཞི་བྱའི་ཕྱིར། །དཀར་ཞིང་འཚེར་བའི་ཆོས་སྐུ་བསྒོམ། །གང་ཞིག་གཏུམ་ཁྲོ་ཞི་བའི་གདན། །དེ་བཞིན་ཏིང་འཛིན་བྱིན་བརླབས་ན། །གཏུམ་པོ་རྔམ་པོའང་ཞི་བར་འགྱུར། །གཞན་ཡང་ཇི་ལྟར་དམིགས་པ་བཞིན། །ཞི་ཞིང་དུལ་བ་ཉིད་དུ་འགྱུར། །ཐམས་ཅད་མཁྱེན་པའི་ཡེ་ཤེས་ཀྱིས། །རྣམ་བཞི་དཀྱིལ་འཁོར་དབྱིངས་སུ་བསྡུས། །བྱ་བྱེད་མེད་པར་དཀྱིལ་འཁོར་སྤྱོད། །ལྷུན་གྲུབ་དཀྱིལ་འཁོར་ཡེ་ནས་རྫོགས། །ཨ་ཧོཿ། ཆོས་སྐུ་ཕྱག་རྒྱ་ཆེན་པོ་ནི། །དངོས་གྲུབ་གང་འདོད་སྦྱིན་པར་ངེས། །ཉེ་བའི་ལྷ་ནི་གང་བསྒྲུབ་པ། །ཕྱག་རྒྱའི་སྙིང་པོ་བྲིས་བཅུག་ན། །གང་བསྒོམས་ཐེ་ཚོམ་མེད་པར་འགྲུབ། །དེ་ནི་རྒྱལ་བ་ཀུན་དང་མཉམ། །ཐེ་ཚོམ་མེད་དེ་ངེས་འགྲུབ་འགྱུར། །འཇིག་རྟེན་པ་ཡི་ལྷ་སྒྲུབ་ན། །ལྷ་ཡི་སྙིང་པོ་གང་ཡང་རུང་། །བྲིས་ཏེ་དཀྱིལ་འཁོར་ནང་བཅུག་ན། །ལྷ་དེ་ཉེ་བར་འགྲུབ་པར་འགྱུར། །ཆོས་ཉིད་རྟེན་ཅིང་འབྲེལ་བྲིས་ན། ཆོས་ཀྱི་དོན་རྣམས་རྟོགས་འགྱུར་ཏེ། །རང་དང་སྤྱི་ཡི་དོན་རྟོགས་ནས། །སྐྱེ་རྒ་ན་འཆི་མེད་པར་རྟོགས། །ཕྱག་རྒྱ་ཆེན་པོ་དེ་དག་ལ། །ཉོན་མོངས་ལས་རྣམས་སྦྱོང་བྱེད་པའི། །སྙིང་པོ་མ་ནོར་དོན་བྲིས་ན། །ངན་སོང་སྡུག་བསྔལ་མེད་པར་འགྱུར། །གཞན་ཡང་དཀྱིལ་འཁོར་བསམ་ཡས་དང་། །དབག་ཚད་མེད་པའི་ཕྱག་རྒྱ་ཆེ། །སྐུ་གསུང་ཐུགས་ནི་རྒྱུན་མི་ཆད། །ཞིང་ཁམས་བྱེ་བ་རྡུལ་དང་མཉམ། །ཨ་ཧོ། །རྡོ་རྗེ་གསང་བའི་ཚིག་ཏུའོ། །སྒྱུ་འཕྲུལ་དྲ་བ་ལས་ལྷག་པའི་གཟུགས་བརྙན་གྱིས་དངོས་གྲུབ་ལེན་པའི་ཐབས་ཏེ་མཆོད་རྟེན་གདབ་པའི་ལེའུ་སྟེ་ཉི་ཤུ་པའོ།། །།དེ་ནས་
བཅོམ་ལྡན་འདས་དགྱེས་པ་ཆེན་པོ་རྒྱལ་པོ་དབང་སྦྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །ཤེས་རབ་ཐབས་ཀྱི་ཕྱག་རྒྱ་ལས། །བདེ་བའི་འབྲུ་ཚོགས་གསལ་བའི་རྒྱུན། །རྡོ་རྗེ་ལམ་ལས་པདྨོར་དཀྱིལ། །རྩེ་ནས་བསྟིམ་ཞིང་དཀྱིལ་འཁོར་སྒྱུར། །ཉན་བྱེད་འཁོར་ལོའི་གཞལ་ཡས་སུ། །གསལ་བའི་ཐིག་ལེ་ངོ་བོ་ཉིད། །ཏྲྃ་གི་ཕྱག་རྒྱའི་ཚོགས་མཆོག་ལས། །རིན་ཆེན་དཀྱིལ་འཁོར་གསལ་སྤྲོ་བསྟིམ། །ཏྲྃ་གསང་བའི་གསང་ཆེན་གསང་མཆོག་དང་། །གསང་བ་ཀུན་ལ་མཉམ་པར་བྱ། །གསང་བའི་དོན་ཉིད་རྟོགས་པ་ལས། །གཞན་དུ་སྨྲ་བར་བྱ་བ་མིན། །གསལ་བའི་འཁོར་ལོ་གཞལ་ཡས་སུ། །གསལ་བའི་ཐིག་ལེ་ངོ་བོ་ཉིད། །ཡི་གེ་ཕྲེང་བའི་ཚོགས་མཆོག་ལས། །རིགས་ཀྱི་དཀྱིལ་འཁོར་གསལ་སྤྲོ་ཐིམ། །ཨོྃ་དུས་གསུམ་རྒྱལ་བའི་སྲས་ཆེན་པོ། །སྐུ་གསུང་ཐུགས་ཀྱི་རྡོ་རྗེ་ཟུང་། །རྒྱལ་བ་ཐམས་ཅད་མཉེས་མཆོད་ལ། །རྒྱལ་བ་ཀུན་དང་མཉམ་པར་སྦྱོར། །ལག་པའི་འཁོར་ལོ་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཧཱུྃ་གི་ཕྱག་རྒྱའི་ཚོགས་མཆོག་ལས། །ལས་ཀྱི་དཀྱིལ་འཁོར་གསལ་སྤྲོ་ཐིམ། །ཨོྃ་ཁྱོད་ནི་རྡོ་རྗེ་ལས་ཡིན་པས། །ལས་རྣམས་མ་ལུས་ཀུན་བྱོས་ཤིག །ཕོ་ཉ་འདུ་འཕྲོ་མང་པོ་ཀུན། །ཁྱོད་ཀྱི་དགོས་པ་བྱེད་པ་ཡིན། །སྨྲ་བྱེད་འཁོར་ལོའི་གཞལ་ཡས་སུ། །གསང་བའི་ཐིག་ལེ་ངོ་བོ་ཉིད། །ཧྲཱིཿ ཡི་ཕྱག་རྒྱ་ཚོགས་མཆོག་ལས། །ཆོས་ཀྱི་འཁོར་ལོ་གསལ་སྤྲོ་ཐིམ། །ཨོཾ་ཆོས་ཀྱི་བདུད་རྩི་བླ་མེད་ཀྱིས། །དད་ལྡན་སྐྱེས་བུ་ངོམས་པར་བྱོས། །རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲགས་གཞན་དུ་མིན། །བསྐྱོད་ཆེན་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཧཱུྃ་ཨོྃ་སྭྃ་ཨྃ་ཧྃ་རྣམས་ལས། །དཀྱིལ་འཁོར་ལྔ་དང་ཁྲོ་ཕྲེང་བསྒོམ། །ཕྱོགས་བཅུ་དུས་བཞི་ཐམས་ཅད་ཀྱིས། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྦྱིན་པ་སྤྱོད། །
སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡིས་དབང་བསྐུར་ན། །དུས་འདི་ཕན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །གཉེན་པོར་གྱུར་པའི་རྩལ་འཆང་བས། །ཚེ་རིང་བདེ་བ་ཕུན་སུམ་ཚོགས། །ཀུན་དུ་བཟང་པོ་ལ་སོགས་མཚན། །མཐོ་རིས་ཐར་པའི་དབང་པོར་འགྱུར། །ལུས་དང་ཕུང་པོར་བཅས་པའི་ས། །རིག་འཛིན་ས་ལ་གནས་པ་ཡིན། །རིག་འཛིན་ས་ལ་གནས་པའི་ས། །བླ་མེད་ཀུན་དུ་བཟང་པོར་འགྱུར། །ཡུམ་དང་སྒེག་མོ་ལ་སོགས་ལ། །དེ་ཉིད་བྱིན་གྱིས་རློབ་པར་འགྱུར། །ཕོ་ཉ་འདུ་འཕྲོ་མང་པོ་རྣམས། །སངས་རྒྱས་བཀའ་ལས་མི་འདའ་ཞིང་། །དེ་ཡི་དགོས་པ་བྱེད་པ་དང་། །སྒྲོ་དང་སྐུར་པ་ལ་སོགས་པ། །དེ་ནི་མྱུར་དུ་བརླག་པར་འགྱུར། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་ཆེད་དུ་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དབང་སྦྱིན་པའི་ལེའུ་སྟེ་ཉི་ཤུ་གཅིག་པའོ། །དེ་ནས་དེ་བཞིན་གཤེགས་པ་དགྱེས་པ་ཆེན་པོ་མཉམ་པ་ཉིད་ལ་བཞུགས་ནས་ལྷག་པའི་ཏིང་ངེ་འཛིན་གྱིས་དངོས་གྲུབ་མྱུར་བར་ལེན་པའི་ཐབས་འདི་གསུངས་སོ། །དེ་བཞིན་ཉིད་དང་མཉམ་སྦྱོར་ཕྱིར། །དམ་པའི་དོན་གྱིས་བསྒོམ་པར་བྱ། །བྱང་ཆུབ་ཕྱོགས་ལ་གཟུང་བར་གནས། །མཆོག་ཏུ་བདེ་བའི་ཞིང་གནས་པས། །མཉམ་རྫོགས་ཆེན་པོ་ལྷུན་བསྒོམ་ཞིང་། །བྱང་ཆུབ་སེམས་སུ་བརྟན་པར་གཟུང་། །བྱ་བ་མེད་ལས་བྱ་བྱེད་བྱ། །མི་གནས་གནས་ལ་གནས་པར་བསྒོམ། །བྷ་གའི་དཀྱིལ་དུ་ལིངྒ་ཨ། །ཤིན་ཏུ་འཚེར་ཞིང་གསལ་བསྒོམས་ནས། །འོད་འཕྲོ་འབར་བས་ཐམས་ཅད་ཁྱབ། །དུས་གསུམ་ངན་སོང་གནས་བསྲེགས་ནས། །བྷ་གའི་དཀྱིལ་དུ་འོད་འཕྲོ་ཐིམ། །ཐིམ་འགྱུར་དབྱིངས་ནས་འོད་འཕྲོ་
འབར། །ཨ་མ་ལས་ནི་ཟླ་ཉི་འབར། །ཕྱོགས་བཅུར་འཐོམས་པའི་མུན་སེལ་ཞིང་། །ཉོན་མོངས་སྡུག་བསྔལ་བསིལ་བའི་སྨན། །ཐུགས་རྗེའི་བྱིན་བརླབས་བསམ་མི་ཁྱབ། །རོལ་པའི་ཕྱག་རྒྱ་བསམ་མི་ཁྱབ། །མཁའ་ལ་འཇའ་ཚོན་སྤྲིན་མང་ཡང་། །ནམ་མཁའི་དབྱིངས་སུ་ཐམས་ཅད་བསྡུས། །ཐམས་ཅད་མཁྱེན་ཉིད་བསམ་ཡས་ཀྱང་། །ཆོས་ཀྱི་དབྱིངས་སུ་ཐམས་ཅད་འདུས། །ཐམས་ཅད་ཡི་གེ་ཧཱུྃ་དུ་གྱུར། །ཧཱུྃ་ཉིད་གསང་བའི་ཐུགས་རྗེའི་དཀྱིལ། །འོད་ཟེར་འཕྲོས་པས་འབྲུ་གསུམ་སྟེ། །ཡང་ན་འོད་ཟེར་འབྲུ་ལྔ་ཡི། །ལྔ་པའི་དོན་སྤྲོས་བཞི་བཅུ་ལྔའི། །གཞན་ཡང་དཀྱིལ་འཁོར་བསམ་ཡས་མཆོག །མ་བཅོས་ངང་གིས་གནས་པ་ལ། །ཡེ་ཤེས་ལྷག་པའི་དཀྱིལ་འཁོར་བསྒོམ། །སེན་ཟླུམ་ཟླ་བ་གང་བ་ཡི། །ཐུགས་ཀྱི་དཀྱིལ་དུ་གནས་པར་བྱ། །ཉི་མའི་དཀྱིལ་འཁོར་གང་བ་ཡི། །གཞལ་ཡས་འོད་ཟེར་འབར་བའི་ཁང་། །པདྨའི་གདན་དང་རིན་པོ་ཆེ། །དེ་དཀྱིལ་ཡི་གེ་ཧཱུྃ་གནས་པ། །ཤིན་ཏུ་ཕྲ་ཞིང་ཡུངས་འབྲུ་འབར། །གནས་གཅིག་དང་ནི་གནས་གསུམ་དང་། །གནས་ལྔ་དག་ཏུ་རབ་ཏུ་བསྒོམ། །ཤེས་རབ་སྤྱན་ལ་འདྲིས་པ་དང་། །ནྲྀ་ཡི་མིག་གིས་བལྟར་ཡོད་པར། །ཤིན་ཏུ་ཕྲ་ཞིང་གསལ་བར་བསྒོམ། །ཤིན་ཏུ་བློ་གསལ་འདྲིས་གྱུར་ནས། །ཕྱོགས་བཅུའི་སྟོང་ཁམས་རྡུལ་སྙེད་དུ། །ཐུགས་རྗེའི་བྱིན་བརླབས་བསམ་ཡས་སྤྲོ། །སྤྲོས་ཀྱང་ཧཱུྃ་ལས་ཉམས་པ་མེད། །བསྡུས་ཀྱང་ཕྱོགས་བཅུ་བྲི་བ་མེད། །སྤྲོ་མེད་བསྡུ་མེད་དེ་བཞིན་ལས། །ཡི་གེ་མུྃ་དུ་ཐིམ་པར་གྱུར། །ཐིམ་འགྱུར་དབྱིངས་ནས་ཕྱག་རྒྱ་འབར། །ཤིན་ཏུ་གསལ་ཞིང་འདྲེས་པ་དང་། །ཕྱག་རྒྱའི་སྐུ་ཉིད་གསལ་བར་བསྒོམ། །སྐུ་དེ་ཚོན་གང་འོད་འབར་ནས། །ཐབས་དང་ཤེས་རབ་ལྡན་པའི་རྒྱ། །འོད་འཕྲོ་འབར་ཞིང་དོན་བྱེད་བསྒོམས། །ཡང་ན་ཕྱག་རྒྱ་ཆེན་པོ་སྟེ། །བདག་ཉིད་ཞལ་གཅིག་ཕྱག་གཉིས་བསམ། །ཞལ་གསུམ་ཕྱག་དྲུག་རྟག་ཏུ་བསྒོམ། །གཞལ་ཡས་ཁང་དང་གདན་ཁྲི་རྣམས། །ཕྲ་བའི་ཚུལ་དེ་
སྔ་མ་བཞིན། །མཚན་དང་དཔེ་བྱད་ཐམས་ཅད་ལྡན། །དབུ་རྒྱན་ཡི་གེ་ལྔ་དང་ལྡན། །རྡོ་རྗེ་འཁོར་ལོ་རལ་གྲི་འབར། །རིན་ཆེན་པདྨ་དྲིལ་བུ་འབར། །ཕྱག་རྒྱ་ཆེན་པོ་དེ་དག་ལས། །ཕྱོགས་བཅུ་མ་ལུས་གཞལ་ཡས་ཁང་། །ཉི་ཟླ་གཟའ་སྐར་དཀྱིལ་འཁོར་གདན་དང་རྒྱན། །བདེ་གཤེགས་དཀྱིལ་འཁོར་མ་ལུས་བསྒོམ། །ཐུགས་རྗེ་བྱིན་བརླབས་འགྲོ་དོན་མཛད། །ཞི་བ་ཕྱོགས་གཅིག་ཤེས་བྱ་སྤྲོ། །ས་བཅུ་མཉམ་པར་སྦྱོང་བྱེད་ཅིང་། །བདེ་གཤེགས་འཁོར་ཡང་དག་པར་བྱེད། །དེ་ལྟར་སྒྲུབ་པའི་རིགས་མཆོག་དེ། །འབྲས་བུ་མངོན་དུ་མ་སྨིན་ཀྱང་། །སྡུག་བསྔལ་ཐམས་ཅད་ཡོང་མི་འབྱུང་། །ལྷ་མི་མཚན་རྫོགས་ཡོངས་སུ་འགྲུབ། །ཐེག་པ་དམན་པར་ཡོང་མི་སྐྱེ། །བདེ་གཤེགས་འབྱུང་དང་སྐོལ་མི་འགྱུར། །བྱང་ཆུབ་གཟུངས་ལ་ཞུགས་པ་ཡིན། །ཞེས་ཉིད་ལ་ཉིད་གསུངས་སོ། །རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་རྡོ་རྗེ་སེམས་དཔའ་སྒྲུབ་པའི་ལེའུ་སྟེ་ཉི་ཤུ་གཉིས་པའོ།། །།དེ་ནས་དེ་བཞིན་གཤེགས་པ་དགྱེས་པ་ཆེན་པོ་སྒྱུ་འཕྲུལ་དྲ་བའི་རྒྱལ་པོ་སྒྱུར་བ་ཞེས་བྱ་བ་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །རྒྱུ་གཅིག་དང་ནི་ཡིག་འབྲུ་ཚུལ། །བྱིན་གྱི་བརླབས་དང་མངོན་སུམ་པར། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཡན་ལག་དབང་པོ་རྣམ་ཤེས་ཀུན། །རྣམ་སྨིན་ཨོཾ་དུ་ཤེས་པར་བྱ། །རྫོགས་པའི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོས་པའི་དཀྱིལ་འཁོར་བསྒོམ། །གཟུགས་སྒྲ་དྲི་རོ་རེག་ལ་སོགས། །རྣམ་སྨིན་མུྃ་དུ་ཤེས་པར་བྱ། །ཡུམ་གྱི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་མོའི་དཀྱིལ་འཁོར་བསྒོམ། །གོས་རྒྱན་བཟའ་བཏུང་གླུ་དང་ཚིག །བྲོ་གར་ཚོགས་ཀྱི་སྤྲིན་ཕུང་ལ། །ཧཱུྃ་དུ་ཤེས་པས་རབ་སྤྱད་ན། །ངོ་མཚར་རྨད་དུ་བྱུང་བ་ཡི། །དཀྱིལ་འཁོར་མ་ལུས་མཉེས་པར་འགྱུར། །ལྷ་མོ་ཀླུ་མོ་རིགས་ངན་མོ། །དབྱེ་བའམ་ཡང་ན་མི་དབྱེ་བར། །བསྙེན་པ་དང་ནི་ཉེ་བསྙེན་པའི། །སྒྲུབ་པ་དང་ནི་སྒྲུབ་ཆེན་པོ། །ཡུམ་གྱི་
པདྨའི་དཀྱིལ་འཁོར་དུ། །བདེ་བའི་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །གྲུབ་པའི་ཉི་ཟླ་སྙིང་པོ་དེ། །འགྲོ་དྲུག་དུས་གནས་དེ་དག་ཉིད། །མཆོད་པ་ཆེན་པོར་མཉེས་སྦྱར་ཞིང་། །དཀྱིལ་འཁོར་རྡོ་རྗེ་རྩེ་ཡིས་བླང་། །མཁའ་འགྲོ་གསལ་འབར་ཚེ་ལ་སོགས། །ཡིད་བཞིན་སྤྲིན་གྱི་བདག་པོར་འགྱུར། །ཞིང་འགྱུར་མཆོག་དང་མཆོག་ཕྲན་རྣམས། །ཉི་ཟླའི་དཀྱིལ་དུ་མཁས་པས་གཞག །ང་རྒྱལ་ལག་གིས་འདུ་བྱེད་བསྒོམ། །ཧཱུྃ་དུ་གྱུར་པས་རྣམ་པར་དག །དབྱིངས་སུ་ཐིམ་ནས་ཕྱག་རྒྱར་འབར། །སྐུར་འགྱུར་འོད་ཟེར་འཕྲོ་བས་བརྗིད། །གཙུག་ཏོར་རྣམ་པར་རྒྱལ་བ་བསྒོམ། །ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མ་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་ཉིད་ལྷག་པའི་མཉམ་ཉིད་ཀྱིས། །དཀྱིལ་འཁོར་ཀུན་དུ་བཟང་པོའི་ཞིང་། །བྱེད་སྤྱོད་ཚོགས་ཆེན་གཉིས་གྱུར་ནས། །ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡི། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །ལྔ་ཞིང་ལྔ་དང་སྦྱོར་བ་ཡི། །ཚོམ་བུ་ལྔ་ཡི་ལྷ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ། །འཁོར་ལོའི་ཚུལ་དུ་རྣམ་པར་སྒོམ། །དེ་བཞིན་གཤེགས་དང་རྡོ་རྗེའི་རིགས། །པདྨའི་རིགས་དང་སྐུ་གསུང་ཐུགས། །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གསུམ་གྱི་ལྷ་རྣམས་བསྒོམ། །རིགས་ཀྱི་རིགས་ཏེ་རིགས་ཀྱི་གཙོ། །ཐུགས་ཀྱི་ཐུགས་ཏེ་ཐུགས་ཀྱི་མཆོག །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གཅིག་གི་ལྷ་རྣམས་བསྒོམ། །ཁྲོ་བོ་ཁྲོ་མོ་ཚོགས་ཆེན་དང་། །ཕོ་ཉ་ཕྱག་བརྙན་བཀའ་ཉན་ཚོགས། །ཅི་བགྱི་ལ་སོགས་པ་རྣམས་ཀྱིས། །དངོས་གྲུབ་ལས་རྣམས་རྫོགས་པར་བྱེད། །རྣལ་འབྱོར་སྔགས་འཆང་དངོས་གྲུབ་ནི། །མཉམ་རྫོགས་ལྷུན་གྲུབ་ངང་གནས་
ཤིང་། །སྤྱོད་པ་ཅི་ལའང་ཐོགས་མེད་པའི། །ཐམས་ཅད་ཡེ་ནས་དབྱེར་མེད་པའི། །རྡོ་རྗེའི་རིགས་སུ་ཐམས་ཅད་དཀྱིལ། །འོད་འཕྲོ་འབར་བ་རབ་ཏུ་བསྒོམ། །ཆགས་མེད་ཚུལ་གྱིས་བསྟིམ་པར་བྱ། །གཉིས་མེད་གྱུར་ནས་ཕྱག་རྒྱ་ཆེ། །ཡང་ན་སྐུ་གསུང་ཐུགས་ཉིད་དེ། །ཐམས་ཅད་མ་ལུས་སྐུ་གསུང་ཐུགས། །ཏིང་འཛིན་གསལ་བར་འོད་ཟེར་འཕྲོ། །གཉིས་མེད་དབྱིངས་ཀྱི་ངང་དུ་ཐིམ། །རིག་འཛིན་དངོས་གྲུབ་མཆོག་ཐོབ་འགྱུར། །དཀྱིལ་འཁོར་མ་ལུས་འབར་བ་འགྲུབ། །ཉོན་མོངས་སྡུག་བསྔལ་སེལ་བར་བྱེད། །རྡོ་རྗེ་རིགས་སུ་བསྐྱེད་པའི་གནས། །སྔགས་འཆང་དངོས་གྲུབ་ཡང་དག་ནི། །ཐབས་དང་ཤེས་རབ་ཐམས་ཅད་ཀྱིས། །དཀྱིལ་འཁོར་ལྔ་དང་ཁྲོ་ཕྲེང་བསྒོམ། །ཆགས་པ་མེད་པའི་ཚུལ་གྱིས་ནི། །འོད་ཟེར་རྣམ་པ་མང་པོ་སྤྲོ། །གཉིས་སུ་མེད་པར་བསྟིམ་པར་བྱ། །དངོས་གྲུབ་མཆོག་གི་སྙིང་པོ་འགྲུབ། །རྣལ་འབྱོར་ཐབས་དང་ཤེས་རབ་ཀྱིས། །དེ་བཞིན་གཤེགས་དང་ཡུམ་དུ་བསྒོམ། །སེམས་དཔའ་སེམས་མ་ཉིད་དུ་བསྒོམ། །སོ་སོ་སྔགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ། །གནས་དང་ལོངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོ་དམ་མནོས་བཞིན་དུ་བྱ། །ལེ་ལོ་སྒྱིད་སྙོམ་མེད་པ་ཡིས། །ཐེ་ཚོམ་མེད་པར་བསྒྲུབ་བྱས་ན། །དཀྱིལ་འཁོར་ཐམས་ཅད་འགྲུབ་པར་འགྱུར། །རྡོ་རྗེ་གསང་མཆོག་དམ་པ་ཐོབ། །སྒྲུབ་པའི་ཞག་དང་ཚེས་གྲངས་ནི། །རྒྱུད་ལས་སྨོས་པ་བཞིན་དུ་བྱ། །རྡོ་རྗེ་གསང་བའི་ཚིག་ཏུའོ། །ཞེས་དེ་བཞིན་གཤེགས་པ་ཉིད་ལ་དེ་བཞིན་གཤེགས་པ་ཉིད་ཆེད་དུ་བརྗོད་པ་འདི་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཚོགས་ཀྱི་དཀྱིལ་འཁོར་གྱི་ལེའུ་སྟེ་ཉི་ཤུ་གསུམ་པའོ།། །།དེ་ནས་དེ་བཞིན་གཤེགས་པ་དགྱེས་པ་ཆེན་པོ་རོལ་མོའི་སྤྲིན་རྣམ་པར་སྤྲོས་ཏེ། །རྒྱན་བཀོད་པའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །སྒྱུ་འཕྲུལ་དྲ་བས་མངོན་
རྫོགས་པའི། །དཀྱིལ་འཁོར་བརྟེན་པའི་ཏིང་ངེ་འཛིན། །བྲོ་གར་ཕྱག་རྒྱའི་འདུ་འཕྲོ་ཡིས། །འཛུལ་ལམ་ནམ་མཁའ་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐོགས་མེད་འགྲུབ། །བཟའ་དང་བཏུང་བའི་ཕྱག་རྒྱས་ནི། །ཡིད་བཞིན་སྐུ་དང་བདུད་རྩིར་འགྲུབ། །ཨཱ་ལི་ཀཱ་ལིའི་ཕྱག་རྒྱ་ཡིས། །སྐུ་གསུང་མཆོག་གི་ཐུགས་ལྡན་པས། །ཐམས་ཅད་ཐམས་ཅད་འགྲུབ་པར་འགྱུར། །ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱི། །ཁྱད་པར་ས་ལ་གནས་གྱུར་ཡིན། །ཕ་རོལ་ཕྱིན་པ་ཀུན་དུ་རྫོགས། །ཐབས་དང་ཤེས་རབ་མཆོག་གི་མཆོག་གྱུར་པའི། །ས་ཡི་ཁྱད་པར་བཅུ་དང་གསུམ། །རྒྱུ་འབྲས་ཁྱད་པར་ལྷུན་གྱིས་རྫོགས། །མཁའ་དབྱིངས་དང་བའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟངས་དཔྱལ་སྒོམ། །རྒྱལ་བའི་དཀྱིལ་འཁོར་ཐམས་ཅད་ཀུན། །མ་ལུས་པར་ནི་བསྒོམས་པར་འགྱུར། །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །དཀྱིལ་འཁོར་ཀུན་དུ་རབ་སྦྱོར་བས། །དཀྱིལ་འཁོར་ཐམས་ཅད་གྲུབ་པར་འགྱུར། །ཆོ་ག་ལྷག་གམ་མ་ཚང་ན། །སྐྱོན་ཉིད་དག་སྟེ་ཉེས་པ་མེད། །ཅེས་ཆེད་དུ་བརྗོད་པས་རོལ་མོའི་སྤྲིན་གྱིས་མཉེས་པར་གྱུར་ཏོ། །རོལ་མོའི་སྤྲིན་གྱིས་མཉེས་པར་གྱུར་ཏེ། སྐུ་གསུང་ཐུགས་དང་ཡོན་ཏན་ཕྲིན་ལས་རྡོ་རྗེ་ལས་རྡོ་རྗེ་གསང་བའི་ཚིག་འདི་ཕྱུང་ངོ་། །ཨ་ཧོཿ། །མ་མཐོང་རྨོངས་ལ་ཆགས་པ་ཡིས། །ཆོས་རྣམས་མིང་དུ་བཏགས་པ་ཙམ། །འགྲོ་དྲུག་དུས་གནས་མིང་ཚོགས་ཁྱད་པར་རབ་སྣང་བའི། །ཟབ་ཆེན་སྤྱོད་ཡུལ་ལོག་པར་རྟོགས་བཏགས་མིང་ཙམ་པ། །ཨཱ་ལི་ཀཱ་ལི་ལ་སོགས་འདོད་པའི་
སྙིང་པོ་ཉིད། །ཕྱག་རྒྱ་གླུ་ཚིག་སྐུ་གསུང་ཐུགས། །ཐུགས་ཀྱི་ཐུགས་ཆེན་ཡོན་ཏན་རྫོགས་པའི་སངས་རྒྱས་ནི། །ཉིད་དེ་མཉམ་པའི་ཐུགས་སུ་རབ་ཏུ་གསལ། །མཉམ་ཉིད་ཁྱབ་པའི་སྟངས་དཔྱལ་ཡོན་ཏན་མཆོག་སྟེ་སྔགས་ཀྱི་ཕྲིན་ལས་རྫོགས། །རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཚོགས་སྒྲུབ་པའི་ལེའུ་སྟེ་ཉི་ཤུ་བཞི་པའོ།། །།དེ་ནས་དེ་བཞིན་གཤེགས་པ་ཕྱོགས་བཅུ་དུས་བཞིའི་སྐུ་གསུང་ཐུགས་རྡོ་རྗེའི་དཀྱིལ་འཁོར་ཐམས་ཅད་གཅིག་ཏུ་འདུས་ནས་དགྱེས་པ་ཆེན་པོས་ཆོས་ཐམས་ཅད་ཡེ་ནས་རྫོགས་པ་ཆེན་པོར་ལྷུན་གྱིས་གྲུབ་པའི་དམ་ཚིག་ཤིན་ཏུ་གསང་བའི་སྙིང་པོའི་སྤྲིན་བཀོད་པའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཡི་གེ་སྒྲོ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེ་ཐུགས་ལ་གནས། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་ཐིག་ལེ་དཀྱིལ་འཁོར་དབྱིངས། །སྐུ་གསུང་ཐུགས་རིག་ཀུན་མངའ་བའི། །བདེར་གཤེགས་ཀུན་གྱི་སྙིང་པོ་རྫོགས། །འབྱུང་བ་ཞེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་ཏེ། །བྱང་ཆུབ་སེམས་ནི་རྡོ་རྗེ་ཚོགས། །དབང་པོ་ཡུལ་དུས་རིག་པའི་རྣམས། །ཀུན་དུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྷག་པ་ཡི། །ཐུགས་ཀྱི་ཡེ་ཤེས་ལྔས་ལྟ་ཞིང་། །སྙིང་པོ་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཉེས་པར་དབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མ་རང་སྣང་བ། །རོལ་མོའི་དཀྱིལ་འཁོར་
མཐའ་ཡས་མཆོག །གསང་བའི་ཐིག་ལེ་ཉིད་ཀྱི་དབྱིངས། །དེ་ནི་སངས་རྒྱས་ཀུན་གྱི་དངོས། །ཕྱོགས་ཅུ་དུས་བཞི་མངོན་རྫོགས་པའི། །སྐུ་གསུང་ཡོན་ཏན་ཕྲིན་ལས་ཐུགས། །མ་ལུས་བདག་ཉིད་ཞལ་མཐོང་བ། །དབང་སྒྱུར་མཆོག་ཉིད་དམ་པ་ཡིན། །དཀྱིལ་འཁོར་ལ་གནས་དཀྱིལ་འཁོར་ཉིད། །རྫོགས་པའི་དཀྱིལ་འཁོར་ལྷུན་གྱིས་གྲུབ། །རྒྱུན་དུ་དཀྱིལ་འཁོར་མ་ལུས་ཐོགས། །རྫོགས་པའི་དཀྱིལ་འཁོར་མཉམ་སྦྱོར་ལས། །ཐུགས་ཀྱི་དཀྱིལ་འཁོར་ཡོངས་ཀྱིས་འབྱུང་། །ཕྱོགས་དུས་དཀྱིལ་འཁོར་འདུལ་བའི་མགོན། །སྒྱུ་མའི་དཀྱིལ་འཁོར་སྒྲོལ་བ་ཡིས། །བྱ་བྱེད་མེད་པར་དཀྱིལ་འཁོར་སྤྱོད། །ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་བསྒོམ་པའི་མཉམ་སྦྱོར་གྱིས། །རང་བྱུང་ཀུན་ནས་ལྷུན་གྱིས་གྲུབ། །འདི་ནི་སངས་རྒྱས་ཐམས་ཅད་ཀྱིས། །འདའ་བར་མི་མཛད་དམ་ཚིག་མཆོག །གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡིས། །ཉེ་བའི་སྲས་སུ་དགོངས་པར་འགྱུར། །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །འཇིག་རྟེན་དྲུག་གི་ཕྱོགས་བཅུ་ན། །འདས་དང་ད་ལྟར་བྱུང་བ་ཡི། །རྒྱལ་བའི་དཀྱིལ་འཁོར་མ་ལུས་པས། །བརྙེས་པས་སྐུ་ལྔ་ལྷུན་གྱིས་རྫོགས། །འབྱུང་དང་མ་འོངས་ཐམས་ཅད་ཀུན། །འདི་ཡིས་ལྷུན་གྱིས་གྲུབ་པར་འགྱུར། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ཡིས་གསང་བའི་ངེས་དོན་མེད། །བཙལ་ཀྱང་རྒྱལ་བས་མི་རྙེད་དོ། །ཀུན་གྱི་ཕྱག་རྒྱ་ཆེན་པོ་མཆོག །ཐོས་བསམས་བསྒོམས་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་གཟུང་། །སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་
སྦྱིན། །གཞན་དུ་ནམ་ཡང་སྦྱིན་མི་བྱ། །རྨོངས་ལ་འཕྱར་བས་གལ་ཏེ་སྦྱིན། །དུས་མིན་པར་ནི་སྲོག་ཟད་ནས། །བསྲེགས་དང་སྦྲེབས་པར་ཡུན་རིང་གནས། །ཞེས་དེ་བཞིན་གཤེགས་པ་ཉིད་ལ་ཆེད་དུ་བརྗོད་དོ། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཤིན་ཏུ་གསང་བ་མན་ངག་གི་སྙིང་པོའི་ལེའུ་སྟེ་ཉི་ཤུ་ལྔ་པའོ།། །།དེ་ནས་བཅོམ་ལྡན་འདས་དཔལ་ཀུན་དུ་བཟང་པོས་དགྱེས་པ་ཆེན་པོའི་ངང་ལས་གསང་བ་འབྱུང་བ་བྱ་བ་འདི་ཆེད་དུ་བརྗོད་པ་འདི་བརྗོད་དོ། །ཨེ་མའོ་ཐམས་ཅད་མ་ལུས་དུས་གསུམ་བདེར་གཤེགས་མཆོག །གདོད་ནས་མ་སྐྱེས་རྣམ་དག་བྱང་ཆུབ་སེམས། །རང་བཞིན་དབྱེར་མེད་གདོད་མཐའ་མི་འབྱེད་ཅིང་། །ཡེ་ནས་མཉམ་པས་རྒྱལ་བ་རྒྱ་མཚོ་ཡིན། །འགྲོ་འོང་མེད་པར་དུས་གསུམ་ཅིག་ཆར་རྫོགས། །དབྱེ་བསལ་མེད་ཕྱིར་བཟང་ངན་བླང་དོར་མེད། །རྣམ་རྟོག་ཉིད་ན་ཡེ་ཤེས་རང་བཞིན་ཏེ། །རྣམ་རྟོག་མི་སྐྱེད་ཡེ་ཤེས་བརྗོད་དུ་མེད། །བདག་ཏུ་མེད་པའི་སྐྱེས་མཆོག་སྔོན་སྦྱངས་པ། །ཁྲི་ལ་འགའ་ཙམ་གལ་ཏེ་འབྱུང་འགྱུར་ཞིང་། །སྔ་རབས་ཕྱིས་འབྱུང་དག་དང་དབྱེར་མེད་པའི། །མངོན་སུམ་སངས་རྒྱས་སྐྱེས་མཆོག་དེ་དག་ལ། །བསྐལ་པ་འགའ་ནས་ཤེས་རབ་བློ་སྦྱངས་པ། །དད་ལྡན་འགའ་ཡིས་འཚམ་པར་ཅི་ཐེག་གི། །བདག་ཉིད་མ་མཐོང་ཤེས་རྒྱུད་མ་འབྱོངས་པ། །གཞན་དུ་ཚོལ་ཞིང་རྨོངས་པའི་སེམས་ཅན་གྱིས། །བསྟན་ཀྱང་མ་ཐོས་མཚོན་ཀྱང་མ་མཐོང་བ། །བདག་ཅག་གཞན་དུ་ཚོལ་བས་སངས་མི་རྒྱས། །དེ་དང་མ་བྲལ་སྟོན་པ་མི་མཐོང་ཞིང་། །བགྲོད་པར་འདོད་པས་ཕྱིན་པར་མི་ནུས་ཏེ། །ཤེས་རྒྱུད་ཅི་ཡིན་གང་གིས་ངོ་ཤེས་ཤིང་། །བྱ་བྱེད་ལས་འཕགས་གྱིན་ད་འདུག་བྱེད་པ། །གང་ཞིག་བློ་ལ་དཔྱོད་པ་བྱང་ཆུབ་ཐོབ། །མ་སྤངས་མཚན་མ་ཀུན་བྲལ་ཡོད་མེད་པས། །དྲན་བྱེད་མི་སྤོང་འཁོར་རྒྱུན་མི་འབྱེད་
དེ། །མ་སྙིགས་མི་འབྱེད་མངོན་སུམ་སངས་རྒྱས་ལ། །བློ་ཡི་རིག་པས་དཔྱོད་ཅིང་ནན་ཏན་དང་། །མཆོད་ཅིང་བསྟེན་པས་བྱང་ཆུབ་ཐོབ་མངོན་ཏེ། །ནམ་མཁའ་གཟུང་བས་སྤྲིན་གྱིས་ཁེབས་པར་འགྱུར། །ནམ་མཁའ་མེད་པར་གང་གིས་ཤེས་པ་ན། །སྤྲིན་ཞིག་འབྱུང་ཞིང་ཁེབས་པར་མི་སྲིད་དོ། །རྣམ་པར་རྟོག་པའི་གཡུང་དྲུང་སངས་རྒྱས་ལ། །ཐམས་ཅད་ཡེ་ནས་མཉམ་གནས་རྣམ་དག་ཅིང་། །མི་རྟོག་ས་ལེར་གནས་ལ་རྟོག་པ་མཛད། །བསྙད་དུ་མེད་པས་སྣ་ཚོགས་འབྱུང་བ་ཡིན། །བདག་མེད་བདག་ཆེན་ཐམས་ཅད་འབྱུང་བའི་གཏེར། །མ་བཀག་པ་ལས་རྒྱུ་ཞིང་འབྱུང་མེད་པའི། །ཐམས་ཅད་སེམས་ཀྱི་ངང་སྟེ་སེམས་ཞེས་གདགས་སུ་མེད། །མ་བཅོས་ལྷུན་གནས་ཡེ་ནས་བྱང་ཆུབ་ཅིང་། །ཐོབ་རྒྱུ་མེད་པས་ཡེ་ནས་བདེར་གཤེགས་ཡིན། །ཞེས་བརྗོད་པས་ཆོས་དང་ཡེ་ཤེས་ཀྱི་ཁམས་ཐམས་ཅད་རང་བཞིན་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །མཁྱེན་ནས་ཇི་བཞིན་པའི་བདག་ཉིད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་སྒྱུ་འཕྲུལ་དྲ་བ་ལས་རྡོ་རྗེ་གསང་བའི་ཚིག་འདི་ཕྱུང་ངོ་། །ཨེ་མའོ་མ་བསྒྲུབས་གྲུབ་ཆེན་པོ། །གྲུབ་པ་ཆེན་པོ་ཡེ་ཤེས་ཆེ། །བླང་དོར་མེད་པའི་ས་ཆེན་པོ། །མི་གཡོ་འདུ་འབྲལ་མེད་པའི་གཟུངས། །རྟོག་པའི་ཡེ་ཤེས་ཡིད་བཞིན་གཏེར། །ཐམས་ཅད་ལ་ཡང་མེ་ལོང་བཞིན། །བལྟས་ཀྱང་གཟུགས་བརྙན་མི་སྣང་ངོ་། །གང་ན་གསང་ཆེན་འདི་ཡོད་པར། །མེ་མ་མུར་གྱི་དོང་འབོགས་ལ། །སྤུ་གྲི་སོ་ནི་གཏམས་པ་ལ། །འཛེགས་ནས་བུ་དག་འགྲོ་བར་བྱོས། །ཁོང་ན་གནས་པའི་ཡང་ཁོང་དུ། །ལྕགས་ཀྱི་སྒྲོམ་བུ་ཁ་བསྡམ་མོ། །དབྱིངས་ཉིད་ལ་ནི་ཉིད་སྤྱོད་ཕྱིར། །དབྱིངས་ཉིད་མཆོག་གི་གནས་ལ་སྤྱོད། །དེ་ཉིད་མི་གནས་མྱ་ངན་འདས། །རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་གསང་བ་ཆེན་པོ་མན་ངག་གཏན་ལ་ཕབ་པའི་ལེའུ་སྟེ་ཉི་ཤུ་དྲུག་པའོ།། །།དེ་ནས་དེ་བཞིན་གཤེགས་པ་དགྱེས་པ་ཆེན་པོས་མཉམ་པའི་
དཀྱིལ་འཁོར་ལ་བཞུགས་ནས་ཉིད་ཀྱི་སྐུ་ལ་ཐམས་ཅད་མ་ལུས་པར་སྟོན་ཏེ་ཆེད་དུ་བརྗོད་པ་འདི་བརྗོད་དོ། །འདས་དང་ད་ལྟར་མ་འོངས་དང་། །འབྱུང་བར་མ་ངེས་དུས་འདི་དག །སྔ་ཕྱི་མེད་པར་མཉམ་ཡིན་པར། །ངེས་པ་མེད་པར་ཡང་དག་གསུངས། །འཇིག་རྟེན་འདས་དང་འཇིག་རྟེན་པའི། །རང་དང་སྤྱི་རུ་བསྟན་པ་དང་། །ཇི་སྙེད་བརྟན་གཡོ་ལ་སོགས་པ། །སྒྱུ་མ་མིག་ཡོར་ཚུལ་ཡིན་ཏེ། །སྐྱེས་བུ་བློ་རྩལ་རབ་ལྡན་པས། །དེ་ལ་རྟག་ཏུ་མཉམ་སྦྱོར་ཞིང་། །སེམས་ཅན་ཀུན་གྱི་ཞིང་གྱུར་པ། །དེ་དག་གཉིས་མེད་དབྱིངས་སུ་སྦྱོར། །ཐམས་ཅད་ཐབས་ཀྱི་མཚན་ཉིད་དེ། །ཐབས་ལ་ཐབས་ནི་རྣམ་པར་སྦྱོར། །ཐབས་དང་ཐབས་ལས་བྱུང་བ་ཡི། །དེ་ནི་བྱང་ཆུབ་རྡོ་རྗེ་མཆོག །ཇི་སྙེད་བརྗོད་པའི་ཁ་བརྒྱུད་ཀྱང་། །ཡང་དག་དོན་གྱི་སྙིང་པོ་ནི། །གང་ནས་བཙལ་ཀྱང་མི་རྙེད་དེ། །རང་རིག་སྒྲིབ་མེད་དག་པ་ཡིན། །དེ་ལ་རྟག་འགྲུས་གོམས་པ་ནི། །བསྙེན་པའི་དམ་པ་དེ་ཡིན་ཏེ། །དེ་ནི་མ་ནོར་ལམ་ཡིན་པར། །ཨ་ཡིས་བྷོ་དྷི་རབ་ཏུ་བསྡུས། །དེ་བཞིན་ཉིད་ཀྱི་དབྱིངས་ཉིད་ནི། །གཅིག་གམ་འདི་ཞེས་བརྗོད་དུ་མེད། །གསུམ་དུ་སྣ་ཚོགས་འབྱུང་ཞིང་འཕྲོ། །བྱིན་བརླབས་བསམ་ཡས་མཐའ་ཡས་མཆོག །དོན་བསྡུས་གསུང་རབ་བཞིན་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པའི་འཁྲུལ་པ་ཡིན། །ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཚད་བཞིན་ཕབ་པའི་དོན་ཡིན་ཏེ། །དག་པ་རྣམ་གསུམ་ཚུལ་བསྒོམ་ཞིང་། །འབྲུ་ལྔར་བསྡུས་པ་ཐབས་ཆེན་ཏེ། །འགྲོ་བ་ཀུན་ལ་རང་རིིག་གནས། །བྱ་བ་མེད་ལ་བྱས་པ་མེད། །ཟད་པའི་དུས་མེད་ཡིད་བཞིན་གཏེར། །བུམ་པ་བཟང་དང་ཡིད་བཞིན་མཛོད། །ཟ་མ་ཏོག་དང་ཡིད་བཞིན་རྒྱལ། །གཞན་ནས་ཡོད་འོང་མ་ཡིན་ཏེ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བསྙེན་པའི་ལེའུ་སྟེ་ཉི་ཤུ་བདུན་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་པོ་སངས་རྒྱས་
ཐམས་ཅད་ཀྱི་ངོ་བོ་ཉིད་ཀྱིས་ཁྲོ་བོའི་དཀྱིལ་འཁོར་དུ་མངོན་པར་འདུ་མཛད་དེ། དེ་ཅིའི་ཕྱིར་ཞེ་ན། བདག་ཏུ་རྨོངས་པའི་རྟོགས་པས་བརྟགས་པ་ལ་མངོན་པར་ཞེན་པ་དང་ཡང་དག་པའི་ལམ་དང་བྲལ་བ་དག་གབ་པའི་གསང་བ་མ་རྟོགས་པར་སྦས་པའི་གསང་བ་ལ་མངོན་པར་འཆེལ་ནས་རྒྱུ་དང་འབྲས་བུ་ལ་རྨོངས་པས། སྲིད་པའི་ས་བོན་རྩུབ་མོས་འཕངས་ནས་མཚམས་མེད་པའི་རབ་ཏུ་ཚ་བའི་དམྱལ་བར་སྐྱེས་སོ། །དེ་རབ་ཏུ་ཚ་བའི་སྡུག་བསྔལ་དྲག་པོས་གདུངས་པ་དང་འདོད་པས་གདུངས་ནས་འདི་བས་ཤིན་ཏུ་གྲང་ཡང་ཅི་མ་རུང་སྙམ་པའི་མོད་ལ་རབ་ཏུ་སྦྲེབས་པ་པདྨ་ལྟར་གས་པའི་སྡུག་བསྔལ་དྲག་པོ་དག་གིས་རབ་ཏུ་ཉེན་པ་དེ་ལྟ་བུའི་སྡུག་བསྔལ་རབ་ཏུ་ཚ་བ་ལ་སོགས་པ་བརྒྱད་དང་། ཤིན་ཏུ་གྲང་བ་ལ་སོགས་པ་བརྒྱད་པོ་དག་ཏུ་འཇིག་རྟེན་གྱི་ཁམས་བརྒྱུད་ཅིང་བསྐལ་པ་ཆེན་པོ་སྟོང་ཕྲག་བཅུ་གཉིས་སུ་མྱོང་ངོ་། །དེ་ནས་རྣམ་པར་སྨིན་པ་དེ་ཟད་པ་དང་ཡི་དགས་ལྟོགས་པ་དང་སྐོམ་པའི་སྡུག་བསྔལ་གྱིས་ཉེན་པ་དང་། འདོད་པའི་དངོས་པོ་རྣམས་ཡིད་དུ་མི་འོང་བ་དང་། གདུག་ཅིང་རྩུབ་པའི་དངོས་པོ་སྣ་ཚོགས་སུ་འགྱུར་བ་དང་། ཡོང་མེད་པར་ཡང་འགྱུར་ཞིང་ཤིན་ཏུ་རིད་ཅིང་སྐམས་པ་དང་། ལུས་དང་ཡན་ལག་དང་དབང་པོ་མི་འཚམ་པར་གྱུར་པ་དང་། བསྐལ་པ་ཆེན་པོ་དྲུག་ཏུ་སྐྱེས་སོ། །དེ་ནས་ལས་ཀྱི་སྒྲིབ་པ་རྩུབ་མོའི་རྣམ་པར་སྨིན་པ་དེ་ཁད་ཀྱིས་བསྲབས་པ་དང་སྔོན་གྱི་སྲིད་པས་མཚམས་སྦྱར་ནས་ཡི་དགས་སྲིན་པོ་ཆེན་པོ་རབ་ཏུ་གདུག་པ་གཏུམ་པོ་ལུས་གཅིག་ལ་མགོ་བརྒྱ་པ་དང་། མགོ་སྣ་ཚོགས་པ་དང་། ལུས་བརྒྱ་མགོ་གཅིག་པ་དང་། ལུས་སྣ་ཚོགས་པ་དང་། ཡན་ལག་མང་པོ་དང་། ཡན་ལག་སྣ་ཚོགས་དང་། གདུག་པའི་ལག་ཆ་སྣ་ཚོགས་པ་ཐོགས་པ་འཁོར་རབ་ཏུ་མང་པོ་དང་། འཇིགས་པའི་གཟུགས་སྣ་ཚོགས་དང་། འཇིགས་པའི་ང་རོ་སྣ་ཚོགས་སྒྲོགས་པ། གཟུགས་དང་། རོ་དང་། དྲི་དང་། ཁ་རླངས་ཀྱིས་ཐམས་ཅད་སྐྱི་བུང་ཞེས་བྱེད་པ། རབ་ཏུ་འཇིགས་པའི་རླུང་གྲང་བ་དང་ཚ་བའི་དབུགས་
ཀྱིས་ཕྱོགས་ཀུན་དུ་ཁམས་འཁྲུགས་པར་བྱེད་པ། ནད་བཞི་བརྒྱ་རྩ་བཞིས་འདེབས་པར་བྱེད་པ། མྱོས་ཤིང་ཉམས་པར་བྱེད་པའི་མཐུས་ཀླུའི་རིས་དང་། ལྷ་མ་ཡིན་གྱི་རིས་དང་། ལྷའི་རིས་དང་།ཚངས་པའི་རིས་དང་། འོད་གསལ་དང་། དགེ་རྒྱས་དང་། འབྲས་བུ་ཆེ་མན་ཅད་དབང་དུ་བསྡུས་སོ། །དེ་སྔོན་གྱི་རྟེན་པའི་སྟོབས་དང་ཐམས་ཅད་མཁྱེན་པས་གཟིགས་ནས་ཐུགས་རྗེས་འདུལ་བར་གྱུར་ཏེ་ཐམས་ཅད་ཀྱིས་མཚན་ཉིད་བསྟན་པའི་གླུ་འདི་བླངས་སོ། །ཨེ་མའོ་འགྲོ་བ་ཡོངས་ནི་བདེར་གཤེགས་ལ་མ་ཡིན་ཏེ། །སྡུག་བསྔལ་སྲེག་མཛད་སྒྱུ་མའི་སྤྲུལ་པར་སྣང་། །ཡོན་ཏན་རྨད་འབྱུང་ཆེ་བའི་རང་བཞིན་འདི། །སྡུག་བསྔལ་ཀུན་ལ་བཤེས་གཉེན་མགོན་པོ་ཡིན། །རྨོངས་དང་འཁྲུལ་པ་རབ་སེལ་ཞེ་སྡང་འཇོམས། །ཀུན་འབྱུང་བདེ་བ་རྡོ་རྗེ་སྐུ་མཆོག་སྟེ། །རྫོགས་ལྡན་མཛད་པའི་ཕྲིན་ལས་བསམ་ཡས་པས། །ཐུགས་རྗེ་ཆེན་པོའི་དབང་གིས་བདུད་རྣམས་འཇོམས། །སྐུ་མདོག་སྣ་ཚོགས་ཐབས་མཁས་བསམ་ཡས་ལ། །རོལ་པའི་རྩེད་མོར་འགྲོ་བའི་དོན་མཛད་ཅིང་། །བྱང་ཆུབ་སེམས་ཀྱིས་ལམ་ལ་གནས་པར་མཛད། །འགྲོ་བ་ཀུན་ལས་བདེ་བ་གཅིག་པུ་པ། །ཨ་ཧོཿ དགྱེས་པའི་མཉེས་པ་ཉིད་ལ་གནས་པར་མཛད། །བྱིན་བརླབས་ཀུན་གྱིས་བདེ་བ་ཉིད་ལ་སྣང་། །ཞེས་བརྗོད་པས་དེ་བཞིན་གཤེགས་པ་ཉིད་ལ་ཀུན་ལས་རྣམ་པར་རྒྱལ་བ་ཉིད་དུ་མཁྱེན་ནས་མཉེས་པར་གྱུར་ཏོ། །དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པའི་སྒྱུ་འཕྲུལ་དྲ་བ་ལས་འཇིག་རྟེན་དྲུག་གི་ཕྱོགས་བཅུའི་སྲིད་པ་གསུམ་གྱི་བདག་པོ་འདུལ་བའི་ང་རྒྱལ་ཆེན་པོ་གཟི་བརྗིད་སྟོན་པའི་ཕྱིར་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་པོ་བཅོམ་ལྡན་འདས་དགྱེས་པ་ཆེན་པོ་ཁྲོ་བོའི་རྒྱལ་པོའི་དཀྱིལ་འཁོར་གྱི་སྤྲིན་ཆེན་པོ་རྣམ་པར་འཕྲོ་བའི་སྒྱུ་འཕྲུལ་དྲ་བའི་རྒྱལ་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་ཉིད་ཀྱི་དབྱིངས་ནས་ཁྲོ་མོའི་དབང་ཕྱུག་ཆེན་མོ་མངོན་དུ་ཕྱུང་སྟེ་ཧི་ཧི་ཞེས་དགྱེས་པའི་གཟི་མདངས་ཀྱིས་པདྨ་རྒྱས་པར་མཛད་ནས་གཉིས་སུ་མེད་པར་
འཁྱིལ་པའི་དགྱེས་པས་ཐིམ་ནས་བྱང་ཆུབ་སེམས་ཀྱི་སྤྲིན་ལས། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་ན་མཎྜ་ལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུྃ་ཞེས་བརྗོད་པས་འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ཐམས་ཅད་ཁྱབ་པར་ཁྲོ་བོའི་དཀྱིལ་འཁོར་གྱི་ཚོགས་སྟོང་གསུམ་གྱི་འཇིག་རྟེན་ཙམ་ཕྱོགས་བཅུའི་རྡུལ་ཕྲ་མོ་སྙེད་འཐོན་པར་གྱུར་པས། འཇིག་རྟེན་དྲུག་གི་ཕྱོགས་བཅུ་ཐམས་ཅད་གཡོས། རབ་ཏུ་གཡོས་ཀུན་དུ་རབ་ཏུ་གཡོས། །འུར་འུར་རབ་ཏུ་འུར་འུར། །ཀུན་དུ་རབ་ཏུ་འུར་འུར། ཆེམ་ཆེམ་རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ་མོ། །ཤིག་ཤིག་རབ་ཏུ་ཤིག་ཤིག །ཀུན་དུ་ཤིག་ཤིག་གོ། །གཏོར་གཏོར་རབ་ཏུ་གཏོར་གཏོར། ཀུན་དུ་གཏོར་གཏོར་རོ། །འཇིག་རྟེན་དྲུག་གི་ཕྱོགས་བཅུའི་སྟོང་ཁམས་ཐམས་ཅད་ན་གནས་པའི་དབང་ཆེ་བ་དང་མཐུ་ཆེ་བའི་དབང་ཕྱུག་ཆེན་པོ་ལ་སོགས་པ་ཐམས་ཅད་བརྒྱལ་རབ་ཏུ་བརྒྱལ་བར་གྱུར་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཉིད་འཇིགས་བྱེད་ཆེན་པོ་ཤིན་ཏུ་རྔམ་པའི་སྐྱི་བུང་ཞེས་བྱེད་པའི་འབར་བ་ཆེན་པོ་ཁྲག་འཐུང་སྐུ་སྨུག་གནག་ཅིར་ཡང་འགྱུར་བ་དབུ་དང་ཕྱག་དང་ཞབས་སྟོང་ཁམས་ཀྱི་རྡུལ་སྙེད་མཚོན་ཆ་སྣ་ཚོགས་འཛིན་པ་དེ་དབུ་གསུམ་ཕྱག་དྲུག་ཞབས་བཞིར་གྱུར་ཏེ། དུར་ཁྲོད་ཆེན་པོར་དགྱེས་ནས་ཁྲག་གི་རྒྱ་མཚོའི་དཀྱིལ་ན་ཀེང་རུས་ཆེན་པོ་རི་རབ་ཀྱི་སྟེང་གི་འབར་བ་ཆེན་པོའི་ཀློང་གི་འཁོར་ལོའི་དཀྱིལ་ན་དབང་ཕྱུག་ཆེན་པོ་དང་དུར་ཁྲོད་ཀྱི་བདག་པོ་དྲེགས་པ་ཆེན་པོ་ཁྱོ་ཤུགས་གི་གདན་ལ་བརྐྱང་བསྐུམ་དུ་བཞུགས་སོ། །ཁྲོ་བོའི་དཀྱིལ་འཁོར་གྱི་སྤྲིན་ཕུང་དེ་དག་ཀྱང་ལ་ལ་ནི་དཔལ་ཁྲག་འཐུང་ཆེན་པོ་རྡོ་རྗེར་གྱུར་ཏེ་ཤར་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་རིན་པོ་ཆེར་གྱུར་ཏེ་ལྷོ་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་པདྨར་གྱུར་ཏེ་ནུབ་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་ཀུན་དུ་ལས་སུ་གྱུར་ཏེ་བྱང་ཕྱོགས་སུ་བཞུགས་སོ། །དེ་དག་ཀུན་ཀྱང་འཇིགས་བྱེད་ཆེན་པོའི་ཆ་ལུགས་དང་། རྔམ་པའི་ང་རོ་
དང་། འབར་བའི་ཀློང་ན་དབུ་གསུམ་ཕྱག་དྲུག་ཞབས་བཞིས་དྲི་ཟ་དང་། གནོད་སྦྱིན་དང་། གཤིན་རྗེ་ལ་སོགས་པ་ཁྱོ་ཤུག་གིས་གདན་དུ་བྱས་པ་ལ་བཞུགས་སོ། །བཙུན་མོ་ཁྲག་འཐུང་ཆེན་མོ་རྣམས་ཀྱང་སོ་སོའི་སྐུ་ལ་འཁྲིལ་བའི་ཚུལ་གྱིས་བཞུགས་སོ། །རིགས་ལྔའི་ཧེ་རུ་ཀ་ལས་གཅིག་ཏུ་བསྟིམས་ཏེ་བསྡུས་ནས་གཅིག་གིས་མང་པོ་འདུལ་བའི་ངོ་མཚར་བསྟན་ནས་དྲེགས་པ་ཆེན་པོ་ལ་སོགས་པ་གཏུམ་པའི་སེམས་ཀྱིས་གདུག་པའི་རྫུ་འཕྲུལ་སྣ་ཚོགས་བསྟན་ནས་མགྲིན་གཅིག་ཏུ་འདུག་པའི་ང་རོས་བརླང་པོའི་གཏུམ་ཚིག་ཏུ་སྨྲས་པ། ཐོང་ཐོང་སྙིང་རྗེའི་བདག་པོ་ཅི་དེ་ལྟར་བྱེད་དམ་ཞེས་འཛེར་ཞིང་ཤིན་ཏུ་གཏུམ་སེམས་ཀྱིས་རྔམ་ནས་ཁྲོས་སོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཐམས་ཅད་ཀྱི་བདག་ཉིད་དེས་དབུ་དགུ་ཕྱག་བཅྭ་བརྒྱད་ཞབས་བརྒྱད་དུ་གནས་ནས་རྔམ་པའི་སྐད་ཀྱིས་ཐུགས་རྗེས་འདུལ་བའི་ཐབས་ཀྱིས་ཤིན་ཏུ་ཁྲོས་ནས། ཧཱུྃ་ཧཱུྃ་ཧཱུྃ། ཧ་ཧ་ཧ། ཁཱ་ཧི་ཁཱ་ཧི་ཞེས་བརྗོད་ནས་དབང་ཕྱུག་ཆེན་པོ་ལ་སོགས་པ་གདུག་པ་ཆེན་པོའི་ཚོགས་དེ་དག་གི་སྙིང་དང་དབང་པོ་ཀུན་ཕྱུང་། ནང་གྲོལ་ཀུན་དྲངས། ཡན་ལག་ཀུན་བཅད་གཏུབས་ནས་ཁྲག་ཀུན་འཐུངས། །རུས་པ་ཀུན་འཆོས་སོ། །དེ་ནས་ཧཱུྃ་ཧཱུྃ་ཧཱུྃ་ཨེ་ཨཱ་ར་ལི་ཛཿཛཿཞེས་བརྗོད་པས་ཕྱོགས་བཅུའི་འཇིག་རྟེན་གྱི་ཁམས་ནམ་མཁའ་དང་བཅས་པར་ཡུངས་འབྲུ་གཅིག་ཙམ་དུ་ཆུད་པར་བསྡུས་སོ། །དེ་ནས་འབྱུང་བོ་མ་ལུས་པའི་རྒྱལ་པོའང་རྒྱལ་པོ་དྲེགས་པ་ཆེན་པོ་ལ་སོགས་པའི་ཆུང་མ། འབྱུང་པོ་ཐམས་ཅད་ཀྱི་ཆུང་མ། འབྱུང་མོ་ཐམས་ཅད་ཀྱི་རྗེ་མོའི་ཡང་རྗེ་མོ། །སྲིན་མོ་ཆེན་མོ་མིའི་སྲིན་མོ་དང་། ཚངས་མ་དང་། འཁྲུག་མོ་དང་། དབང་མོ་དང་། འཇུག་སྲེད་མོ་དང་། གཞོན་ནུ་མོ་དང་། དམར་མོ་དང་། བདུད་རྩི་མོ་དང་། ཞི་བ་མོ་དང་། བེ་ཅོན་མོ་དང་། སྲིན་མོ་དང་། ཟ་བ་མོ་དང་། དགའ་བ་མོ་དང་། ར་རོ་ཁྲག་འཐུང་མྱོས་བྱེད་དང་། གཅིག་སྤྱོད་མོ་དང་། ཡིད་འཕྲོག་མ་དང་། གྲུབ་མོ་དང་། རླུང་མོ་དང་། གསོད་བྱེད་མོ་དང་། མེ་མོ་དང་། ཕག་མོ་དང་། རྒན་བྱེད་མོ་དང་།
སྣ་ཆད་མོ་དང་། ཆུ་ལྷ་མོ་དང་། ནག་མོ་ཆེན་མོ་དང་། ར་མགོ་དམར་སེར་ཆེན་མོ་དང་། བུམ་རྣ་སྔོ་གནག་ཆེན་མོ་དང་། གསུས་འཛིན་སེར་ནག་ཆེན་མོ་ལ་སོགས་པ། བྲན་དང་ཡང་བྲན་གཡོག་དང་ཡང་གཡོག་འཁོར་ཞིང་གི་རྡུལ་སྙེད་ཀྱང་བསྡུས་སོ། །དེ་ནས་བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོའི་འདུལ་བའི་ཐབས་ཀྱིས་ཡང་རིགས་ལྔའི་འཇིགས་བྱེད་སྣང་བར་བྱས་ནས་དེ་དག་ཀུན་དགྱེས་པ་རོལ་པའི་དཀྱིལ་འཁོར་གྱི་སྤྲིན་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་དང་གསུང་དང་ཐུགས་རྡོ་རྗེ་ལས་འདི་དག་ཕྱུང་ངོ་། །ཨོྃ་ཧཱུྃ་ཨྃ་བཛྲ་པྲ་བེ་ཤ་ཨ་ལ་ལ་ཧོཿཞེས་བརྗོད་པས་འབྱུང་པོའི་རྒྱལ་མོ་རྣམས་ཤིན་ཏུ་ཆགས་པའི་ཡིད་གཡོས་ནས་པདྨའི་དཀྱིལ་འཁོར་སྡུད་ཅིང་རྒྱས་པར་གྱུར་ནས། དཔེར་ན་ཁབ་ལེན་ལ་ལྕགས་འདུ་བའི་ཚུལ་དུ་བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་རྡོ་རྗེའི་སྐུ་ལ་སྲིན་མོ་ཆེན་མོ་མི་སྲུན་མོ་དང་། དམར་མོ་དང་། དགའ་མོ་དང་། གསོད་བྱེད་མོ་དང་། ནག་མོ་ཆེན་མོ་དང་། དམར་སེར་ཆེན་མོ་དང་། སྔོ་གནག་ཆེན་མོ་དང་། སེར་ནག་ཆེན་མོ་རྣམས་འཁྲིལ་ཏོ། །བཅོམ་ལྡན་འདས་དཔལ་ཁྲག་འཐུང་ཆེན་པོའི་སྐུ་ལ་ཚངས་མ་དང་། འཁྲུག་མོ་དང་། དབང་མོ་དང་། འཇུག་སྲེད་མོ་དང་། གཞོན་ནུ་མོ་རྣམས་འཁྲིལ་ཏོ། །བཅོམ་ལྡན་འདས་དཔལ་ཁྲག་འཐུང་རིན་པོ་ཆེའི་སྐུ་ལ་བདུད་རྩི་མོ་དང་། ཞི་བ་མོ་དང་། བེ་ཅོན་མོ་དང་། ཟ་བ་མོ་དང་། སྲིན་མོ་རྣམས་འཁྲིལ་ཏོ། །བཅོམ་ལྡན་འདས་དཔལ་ཁྲག་འཐུང་པདྨ་ཆེན་པོའི་སྐུ་ལ་ཁྲག་གིས་མྱོས་པ་དང་། གཅིག་པུ་སྤྱོད་པ་དང་། ཡིད་འཕྲོག་མ་དང་། གྲུ་མོ་དང་། རླུང་མོ་རྣམས་འཁྲིལ་ཏོ། །བཅོམ་ལྡན་འདས་དཔལ་ཁྲག་འཐུང་ཆེན་པོའི་ཀུན་དུ་ལས་ཀྱི་སྐུ་ལ་མེ་མོ་དང་། ཕག་མོ་དང་། རྒན་བྱེད་མོ་དང་། སྣ་ཆད་མོ་དང་། ཆུ་ལྷ་མོ་རྣམས་འཁྲིལ་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོའི་ཁྲོ་བོའི་དཀྱིལ་འཁོར་དེ་དག་གིས་ཧཱུྃ་ཧཱུྃ་ཞེས་བརྗོད་པས་པདྨའི་དཀྱིལ་འཁོར་གྱི་ཚོགས་བསྡུས་ནས་ཤིན་
ཏུ་བཅུམ་པར་གྱུར་ཏོ། །དེ་ནས་དགྱེས་ཏེ་ཧེ་ཞེས་བརྗོད་པས་བྱང་ཆུབ་སེམས་ཀྱི་སྤྲིན་ལས་དཀར་མོའི་ཚོགས་དང་། རྐུན་མོའི་ཚོགས་དང་། རྨོངས་མོའི་ཚོགས་དང་། ཐལ་བྱེད་མའི་ཚོགས་དང་། སྦོས་མོའི་ཚོགས་དང་། གཏུམ་མོའི་ཚོགས་དང་། སྨེ་ཤ་ཅན་གྱི་ཚོགས་དང་། མ་མོའི་ཚོགས་རྣམས་རང་གི་ལག་ཆ་དང་ངོ་མཚར་དང་ཆས་ནས་འཐོན་ཏོ། །འཐོན་ནས་ཀྱང་འབར་བ་ཆེན་པོ་འཁོར་ལོའི་མཚན་ཤར་ཕྱོགས་ནས་འཁོར་བར་འཇིགས་པའི་གཟུགས་དང་རང་གི་ལག་ཆས་ཆགས་ནས་འཁོད་དོ། །དེ་ནས་ཤིན་ཏུ་དགྱེས་ནས་ཧེ་ཞེས་བརྗོད་པས་སེང་གདོང་ཆེན་མོའི་ཚོགས་དང་། སྟག་གདོང་ཆེན་མོའི་ཚོགས་དང་། ཝ་གདོང་ཆེན་མོའི་ཚོགས་དང་། ཁྱི་གདོང་ཆེན་མོའི་ཚོགས་དང་། བཞད་གདོང་ཆེན་མོའི་ཚོགས་དང་། ཀཱངྐ་གདོང་ཆེན་མོའི་ཚོགས་དང་། དུར་བྱ་གདོང་ཆེན་མོའི་ཚོགས་དང་། འུག་གདོང་ཆེན་མོའི་ཚོགས་རྣམས་རང་གི་ལག་ཆ་དང་ངོ་མཚར་དུ་ཆས་ནས་འཐོན་པར་གྱུར་ཏོ། །འཐོན་ནས་ཀྱང་འབར་བ་ཆེན་པོའི་འཁོར་ལོའི་མཚན་ཤར་ཕྱོགས་ཀྱི་ཕྱི་རོལ་ནས་འཁོར་བའི་རྔམ་པའི་མདངས་ཀྱིས་འཁོད་དོ། །དེ་ནས་ཤིན་ཏུ་དགྱེས་པས་ཕྱོགས་བཅུའི་ཞིང་དུ་མ་ལུས་པར་ཁྱབ་ནས་ཕཊ་ཅེས་བརྗོད་པས་རྡོ་རྗེ་བསྲིངས་འགྲོ་མའི་ཚོགས་དང་། རྡོ་རྗེ་གདོང་མོའི་ཚོགས་དང་། རྡོ་རྗེ་འཇིག་རྟེན་མའི་ཚོགས་དང་། རྡོ་རྗེ་རོ་ལངས་མའི་ཚོགས་རྣམས་རང་གི་ལག་ཆ་དང་ངོ་མཚར་དུ་ཆས་ནས་འཐོན་པར་གྱུར་ཏོ། །འཐོན་ནས་ཀྱང་འབར་བའི་དཀྱིལ་འཁོར་གྱི་སྒོར་ཤིན་ཏུ་གཏུམ་པའི་གཟུགས་ཀྱིས་གནས་སོ། །དེ་ནས་དགྱེས་པ་ཆེན་པོའི་སྤྲིན་ལས་ཕྱོགས་བཅུ་ནས་ཕཊ་ཅེས་བསྒྲགས་པས་ཐམས་ཅད་ཁྲོས་ནས་མ་མོ་ཐམས་ཅད་ཀྱང་རང་རང་གི་གནས་ག་ལ་བར་ཡུད་ཙམ་གྱིས་བགྱིའོ། །དེ་ནས་བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོ་དེ་དག་ཀུན་ཐུགས་རྗེ་ཆེན་པོའི་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་དང་གསུང་དང་ཐུགས་རྡོ་རྗེ་ལས་འདི་དག་ཕྱུང་ངོ་། །
ཨོྃ་བཛྲ་མ་ཧཱ་ཨ་མྲྀ་ཏ་མ་ཧཱ་ཀྲོ་དྷེ་ཨྃ་ཨྃ་ཨྃ་ཞེས་བརྗོད་པས་དབང་ཕྱུག་ཆེན་པོ་ལ་སོགས་པ་ཐམས་ཅད་བཅོམ་ལྡན་འདས་ཁྲོ་བོ་ཆེན་པོ་དེ་དག་གི་སྣ་ནས་འཐོན་ཏོ། །མི་གཙང་བའི་འདམ་གྱི་རྒྱ་མཚོར་བཙུད་པ་ལས་གནམ་ནས་ཨུཙྪུཥྨ་ཀྲོ་དྷ་ཕྱུང་བས་འདམ་ཀུན་འཐུངས་ཏེ། དྲན་པ་སླར་རྙེད་ནས་ཁྲོ་བོའི་དཀྱིལ་འཁོར་གྱི་ཚོགས་དེ་དག་ཐམས་ཅད་ཀྱང་དབུ་དགུ་བརྒྱ། ཕྱག་སྟོང་བརྒྱད་བརྒྱ་ཞབས་བརྒྱད་བརྒྱ། སྐུ་འབར་བ་ཆེན་པོའི་དཀྱིལ་ན་བཞུགས་པར་མཐོང་ངོ་། །དེའི་དུས་སུ་འཇིག་རྟེན་དྲུག་གི་ཕྱོགས་བཅུའི་སྲིད་པ་ཀུན་དུ་དྲེགས་པའི་དབང་ཕྱུག་ཐམས་ཅད་འདུལ་བ་ཐབས་སྣ་ཚོགས་བསམ་གྱིས་མི་ཁྱབ་པར་སོ་སོར་སྣང་བས་དུས་གཅིག་ཏུ་བཏུལ་ཏོ། །དེ་ནས་དེ་དག་ཤིན་ཏུ་འདར་ཞིང་བྲེད་པས་རབ་ཏུ་ཞུམ་པའི་ང་རོས་འབངས་སུ་མཆི་འབངས་སུ་མཆི། འབངས་སུ་ནན་ཏན་མ་བགྱིས་ན། མགོ་དང་ལུས་ནི་བརྒྱར་འགས་ཤིང་། །སྙིང་ཡང་འགས་ཤིང་གཏུབས་གྱུར་ཅིག །རུལ་མྱགས་ཚིག་ནས་བརླག་པ་དང་། །དམྱལ་བར་ལྷུང་ནས་འབོད་པར་ཤོག །ཅེས་འབངས་སུ་མཆི་བར་མནའ་བོར་ནས་དཀྱིལ་འཁོར་གྱི་གདན་ལ་བཞག་གོ། །ཐམས་ཅད་ཀྱིས་མགྲིན་གཅིག་ཏུ་ཡང་སྨྲས་པ། བདག་ཅག་རྣམས་ཀྱི་མཆིས་བྲང་དང་། །མ་དང་སྲིང་མོ་བུ་མོ་རྣམས། །དཀྱིལ་འཁོར་ཆེན་པོར་བཞེས་སུ་གསོལ། །དཔའ་བོ་ལྷ་རྗེ་བཞེས་སུ་གསོལ། །བདག་ཅག་སོ་སོའི་འཁོར་བཅས་ཀྱིས། །ཚོགས་ཀྱི་དཀྱིལ་འཁོར་ཆེན་པོ་འདིར། །མིང་ཙམ་འཛིན་པར་བྱེད་པ་ཡང་། །གཙུག་གི་ནོར་བུ་འབར་བ་ལྟར། །གཡོ་སྒྱུ་མེད་ཅིང་གུས་ལྡན་པའི། །སེམས་ཀྱིས་བླངས་ནས་སྤྱི་བོ་ཡི། །གཙུག་ཏུ་བཞག་སྟེ་བཀུར་བར་བགྱི། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་སྒྲུབ། །གལ་ཏེ་དཔའ་བོའི་སྤྱན་སྔ་འདིར། །སྨྲས་པ་བཞིན་དུ་མ་བསྒྲུབས་ན། །བདག་ཅག་རྣམས་ཀྱི་མགོ་ལུས་སྙིང་། །གས་གཏུབས་དུམ་བུར་རལ་བར་མཆི། །ཞེས་སྨྲས་སོ། །དེ་ནས་དེའི་ཆུང་མའི་ཚོགས་དང་
སྲིང་མོ་དང་བུ་མོའི་ཚོགས་ཐམས་ཅད་ཡུད་ཙམ་གྱིས་འོངས་ནས་ཐམས་ཅད་ཀྱིས་མགྲིན་གཅིག་ཏུ་སྨྲས་པ། །བདག་ཅག་འཁོར་ཚོགས་ཐམས་ཅད་ཀུན། །དཔའ་བོ་ཆེན་པོའི་འབངས་སུ་མཆི། །དཔའ་བོ་ཆེན་པོས་བདག་ཅག་རྣམས། །ལས་ཀྱི་དངོས་གྲུབ་སྩལ་དུ་སྩོལ། །ཞེས་སྨྲས་སོ། །དེ་ནས་བཅོམ་ལྡན་འདས་དགྱེས་པ་ཆེན་པོས་ལག་ཏུ་རྡོ་རྗེ་བྱིན་ནས་མིང་གི་དབང་བསྐུར་ཏེ་དཀྱིལ་འཁོར་གྱི་ཕྱི་རོལ་དུ་བཀོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲ་བོའི་རང་བཞིན་གྱི་དཀྱིལ་འཁོར་གྱི་སྤྲིན་རྣམ་པར་སྤྲོས་པའི་ལེའུ་སྟེ་ཉི་ཤུ་བརྒྱད་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་དཀྱིལ་འཁོར་ཚོགས་ཆེན་པོ་འདི་དག་དམ་ཚིག་གིས་གྲུབ་པར་བྱ་བའི་ཕྱིར། དེ་བཞིན་གཤེགས་པའི་ཁྲོ་བོ་ཁྲག་འཐུང་ཆེན་པོ་བཙུན་མོ་དང་བཅས་པའི་ཚོགས་དེ་དག་གི་སྐུ་དང་གསུང་ཐུགས་རྡོ་རྗེ་རྔམ་པ་ལས་གསུང་གི་དཀྱིལ་འཁོར་འདི་དག་ཕྱུང་ངོ་། །ཨོཾ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱྃ་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ཨོཾ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱྃ་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ཨོྃ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་ཙརྦ་དུཥྚཱྃ་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ཨོྃ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱྃ་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ཨོྃ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱྃ་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ཨོྃ་ཏ་ཐཱ་ག་ཏ་མ་ཧཱ་ཀྲོ་དྷེ་ཤྭ་རི་ཛྭ་ལ་ནཱི་སརྦ་དུཥྚཱྃ་ཧཱུྃ་ཕཊ། ཨོྃ་མ་ཧཱ་བཛྲ་དྷཱ་ར་མ་ཧཱ་ཀྲོ་དྷེ་ཤྭ་རི་ཛྭ་ལ་ནཱི་ཧཱུྃ་ཕཊ། ཨོྃ་མ་ཧཱ་སཱུརྱ་རཏྣ་མ་ཧཱ་ཀྲོ་དྷེ་ཤྭ་རི་བི་དྷ་མ་ཧཱུྃ་ཕཊ། ཨོྃ་ཧྲིཿམེ་ཧཱ་སཱ་ར་སྭ་ཏ་མ་ཧཱ་པདྨ་ཀྲོ་དྷེ་ཤྭ་རི་ཁཱ་ཧི་ཧཱུྃ་ཕཊ། ཨོྃ་སརྦ་ཨ་མོ་གྷ་མ་ཧཱ་ཀྲོ་དྷེ་ཤྭ་རི་བི་ཤྭ་ཧཱུྃ་ཕཊ། བཛྲ་གཽ་རཱི་ཧཿ། བཛྲ་ཙཽ་རཱི་ཧཿ། བཛྲ་པྲ་མོ་ཧེ་ཧཿ། བཛྲ་བེ་ཏཱ་ལཱི་ཧཿ། བཛྲ་ཙཎྜ་ལཱི་ཧཿ། བཛྲ་པུཀྐ་སཱི་ཧཿ། བཛྲ་གྷསྨ་རཱི་ཧཿ། བཛྲ་སྨ་ཤཱ་ནཱི་ཧཿ། བཛྲ་སིཾ་ཧ་མུ་ཁཱི་ཧེ། བཛྲ་བྱཱ་གྷྲ་མུ་ཁཱི་ཧེ། བཛྲ་སྲྀ་གླ་མུ་ཁཱི་ཧེ། བཛྲ་ཤྭ་ནཱ་མུ་ཁཱི་ཧེ། བཛྲ་གྷྲྀ་ཌྷ་མུ་ཁཱི་ཧེ། བཛྲ་ཀཱདྷ་མུ་ཁཱི་ཧེ། བཛྲ་ཁ་ག་མུ་ཁཱི་ཧེ། བཛྲ་ཨུ་ལཱུ་ཀ་མུ་ཁཱི་ཧེ། བཛྲ་ཨཱརྱ་ཏེ་ཛ་ཏེ་དཱ་ཛཾཿ བཛྲ་ཨ་མ་ཀ་ཧཱུྃ། བཛྲ་
ལོ་ཀཱ་བྃ། བཛྲ་བྷ་ཤྨི་པ་ལ་ཡ་བ་ཏོ་ཧོཿ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། བྷྱོ་བྷྱོ། རུ་ལུ་རུ་ལུ་ཧཱུྃ། ཨེ་ཧྱེ་ཧི་ཨཱ་ན་ཡ་ཛཿཧཱུྃ་བྃ་ཧོཿརཱྃ། ཨོྃ་བཛྲ་ཀྲོ་དྷ་ས་མ་ཡ་ཧཱུྃ། ཨོྃ་བཛྲ་ཀྲོ་དྷ་ས་མ་ཡ་ཕཊ། །ཨོྃ་ཁྲོ་ལ་ཁྲོས་པས་ཞི་མཛད་པ། །ཐུགས་རྗེས་ཁྲོས་དཔལ་རྔམ་པའི་ཚོགས། །འབར་བའི་བྱིན་བརླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ཨོྃ་བཛྲ་ཀྲོ་དྷ་ས་མ་ཡ་སྟྭྃ། ཨོྃ་བཛྲ་ཀྲོ་དྷ་ས་མ་ཡ་ཧོ། ཨ་ལི་ཨུ་ལེ། ཏ་ལི་ཏ་པ་ཏི། དཾཥྚྃ། གོ་ནཱ་རོ། ཏྲི་ཁ་རྃ་ཡོ་གི་ནཱི་ཁཱ་ཧི་ཧོཿ། ཧཱུྃ་ཧ་ཧེ་ཕཊ་ཅེས་བརྗོད་པས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཚིག་རབ་ཏུ་ཚིག་རབ་ཏུ་ཚིག་ཀུན་དུ་ཚིག་གོ། །འབར་རབ་ཏུ་འབར་ཀུན་དུ་འབར་རོ། །ཐམས་ཅད་དུ་འབར་བའི་དཀྱིལ་འཁོར་གྱི་ཚོགས་ཀྱིས་གང་རབ་ཏུ་གང་ཀུན་དུ་རབ་ཏུ་གང་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོའི་ཚོགས་ཆེན་པོ་གསུང་གི་དཀྱིལ་འཁོར་སྤྲོས་པའི་ལེའུ་སྟེ་ཉི་ཤུ་དགུ་པའོ།། །།དེ་ནས་དེ་བཞིན་གཤེགས་པ་ཁྲོ་བོ་ཆེན་པོའི་བྱིན་བརླབས་ཕྱག་རྒྱ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །དབང་པོའི་ཡུལ་དེ་རིག་པའི་རྣམས། །ཐབས་དང་ཤེས་རབ་ལྡན་གྱུར་ཅིང་། །མཉམ་པའི་ངང་ཉིད་རྟོགས་གསལ་ན། །ཐམས་ཅད་བདེ་བ་ཆེན་པོའི་རྒྱ། །བསྐྱོད་ཆེན་འཁོར་ལོའི་གཞལ་ཡས་སུ། །ཁྲོ་བོ་ཁྲོ་མོ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །ཟླ་མེད་ཆེན་པོས་དེ་སྐད་གསུངས། །ཡན་ལག་སྙིང་པོ་རྩེ་ལྔ་རྩེ་དགུ་བཅུ་གཅིག་ཏུ། །ལས་རྣམས་སོ་སོར་རབ་ཏུ་བསྒོམ། །ཐབས་དང་ཤེས་རབ་ལྡན་པའི་ཞབས། །རྟག་ཏུ་རྡོ་རྗེ་འབར་བར་འགྱུར། །ཐབས་ཆེན་རེ་རེ་བསྐྱོང་ན་ནི། །པདྨ་ཆགས་མེད་རེ་རེ་འབྱུང་། །རྡོ་རྗེ་པདྨ་དེ་འབྱོར་ན། །སེམས་ཅན་ཐམས་ཅད་བླ་ན་མེད། །བྱང་ཆུབ་ཞིང་དུ་སྐྱེ་བར་འགྱུར། །རང་བཞིན་དཀྱིལ་འཁོར་ལྷ་རྣམས་ཀྱང་། །ཁྲོ་བོའི་དཀྱིལ་འཁོར་
བསྒོམ་བྱས་ཏེ། །དབུ་ཡི་དཀྱིལ་འཁོར་བསྒུལ་བསྐྱོད་ན། །སངས་རྒྱས་དཀྱིལ་འཁོར་ཐམས་ཅད་གཡོ། །ལག་གི་འདུ་བྱེད་བསྐྱོད་བྱས་ན། །རིག་འཛིན་ཞིང་ཁམས་ཐམས་ཅད་གཡོ། །རྐང་པའི་སྟབས་ཆེན་གནན་མཆོངས་ན། །སྡུག་བསྔལ་མི་བཟད་ཐམས་ཅད་དང་། །བདུད་དང་ལོག་འདྲེན་ཐམས་ཅད་གནོན། །ཡན་ལག་ཐམས་ཅད་བསྒུལ་བསིག་ན། །བ་སྤུ་བུ་ག་རེ་རེ་ནས། །ཁྲོ་བོ་གྲངས་མེད་རྡུལ་སྙེད་འཕྲོ། །དེ་དག་སྤྲུལ་པ་གྲངས་མེད་ཀྱིས། །ཕྱོགས་བཅུ་ཁམས་མང་རྡུལ་སྙེད་དུ། །ཁྲོ་བོའི་དོན་རྣམས་རྡུལ་ཕྲན་སྙེད། །ཐུགས་རྗེས་གདུལ་ཞིང་དབྱིངས་སུ་བསྟིམ། །ཐམས་ཅད་ཁྲོ་བོའི་དཀྱིལ་འཁོར་དང་། །ཁྲོ་མོའི་དཀྱིལ་འཁོར་རབ་ཏུ་འདུས། །ཐམས་ཅད་རྡོ་རྗེའི་བྲག་སྟེངས་དང་། །མེ་རིའི་དཀྱིལ་འཁོར་རབ་ཏུ་འབར། །འདི་ནི་སྤྱི་རྒྱ་ཆེན་པོ་ཡིན། །སྟེང་གི་བགེགས་རྣམས་འདུལ་བའི་ཕྱིར། །རྡོ་རྗེ་འཁོར་ལོ་ནྲྀ་མགོ་གདེངས། །འོག་གི་འཇིག་རྟེན་བགེགས་འདུལ་བའི། །རྡོ་རྗེ་ཐོང་གཤོལ་ནྲི་སྤར་དང་། །རྡོ་རྗེ་གཏུན་ཆེན་དྲིལ་བུའོ། །ཤར་གྱི་བགེགས་རྣམས་འདུལ་བ་ནི། །རྡོ་རྗེ་རབ་ཏུ་འབར་བ་དང་། །སྟི་ར་ཆེན་པོའི་དབྱུག་པའོ། །ལྷོ་ཡི་བགེགས་རྣམས་འདུལ་བ་ནི། །རིན་ཆེན་མི་མགོའི་དབྱུག་པ་དང་། །གཤིན་རྗེ་ཆེན་པོའི་རྐང་བཟུང་བའོ། །ནུབ་ཀྱི་བགེགས་རྣམས་འདུལ་བ་ནི། །སྦྲུལ་དང་སྟི་རའི་དབྱུག་པ་དང་། །ཁྱུང་ཆེན་གཤོག་གིས་རབ་ཏུ་རྡེབས། །རྒྱ་མཚོ་ཆེ་རྣམས་རྐེད་པར་གཏུབ། །བྱང་གི་བགེགས་རྣམས་འདུལ་བ་ནི། །རིན་པོ་ཆེ་ཡི་དབྱུག་ཏོ་དང་། །ནྲྀ་མགོ་གསུམ་པའི་དབྱུག་ཏོ་ཅན། །གནོད་སྦྱིན་གདོན་རྣམས་ཚར་གཅོད་པའོ། །མཚམས་བཞིའི་བགེགས་རྣམས་འདུལ་བ་ནི། །ཕྱོགས་བཞི་དག་གིས་གདུལ་བར་འགྱུར། །གལ་ཏེ་དེ་ཡིས་མ་དུལ་ན། །བྱང་ཤར་མཚམས་ཀྱི་བགེགས་འདུལ་བ། །རྡོ་རྗེ་རྩེ་གསུམ་ནྲྀ་མགོ་གདེངས། །ཨི་ཤ་ཉིད་ཀྱང་ཕྱག་ན་བསྣམས། །འབྱུང་པོ་དེ་ཀུན་རབ་ཏུ་བཏུལ། །ཤར་ལྷོ་མཚམས་ཀྱི་བགེགས་འདུལ་བ། །རྡོ་རྗེ་ཡེ་
ཤེས་མེ་ལྕེ་འབར། །མེ་དེ་ཉིད་ཀྱང་འཚིག་པར་བྱེད། །དྲང་སྲོང་ཉིད་ཀྱང་ཕྱག་རྒྱར་བསྣམས། །མེ་ལྷ་གདོན་འཁོར་དབང་དུ་བསྡུས། །ལྷོ་ནུབ་མཚམས་ཀྱི་བགེགས་འདུལ་བ། །རྡོ་རྗེ་དང་ནི་སྲིན་པོའི་མགོ། །རབ་ཏུ་རྣོ་བའི་རལ་གྲི་འབར། །བདེན་བྲལ་ཉིད་ཀྱང་ཕྱག་ན་བསྣམས། །སྲིན་པོའི་ཚོགས་རྣམས་དབང་དུ་བསྡུས། །ནུབ་བྱང་མཚམས་ཀྱི་བགེགས་འདུལ་བ། །རླུང་གི་བ་དན་ནྲྀ་མགོ་གདེངས། །ཤིན་ཏུ་དྲག་པོ་གླང་པོའི་བརྗིད། །ཚིག་སྲུང་ཉིད་ཀྱང་ཕྱག་ན་བསྣམས། །གཡེང་བ་ཐམས་ཅད་དབང་དུ་བསྡུས། །འོག་ཏུ་འཇིག་རྟེན་བགེགས་འདུལ་ཕྱིར། །ཕྱག་རྒྱ་རི་རབ་ཆེན་པོ་སྟེ། །ཕག་ཆེན་པོ་ནི་ཕྱག་ན་བསྣམས། །འོག་གི་བགེགས་རྣམས་འདུལ་བའོ། །གཞན་ཡང་ཉི་ཟླའི་དཀྱིལ་འཁོར་གྱིས། །ཚ་དང་གྲང་བའི་སྡུག་བསྔལ་སེལ། །མེ་ཡི་དཀྱིལ་འཁོར་ཆེན་པོ་ཡིས། །ཐམས་ཅད་མ་ལུས་སྲེག་པར་བྱེད། །ཆུ་ཡི་དཀྱིལ་འཁོར་ཆེན་པོ་ཡིས། །ཐམས་ཅད་མ་ལུས་འཁྲུ་བར་བྱེད། །རླུང་གི་དཀྱིལ་འཁོར་ཆེན་པོ་ཡིས། །ཐམས་ཅད་མ་ལུས་གཏོར་བར་བྱེད། །གཞན་ཡང་རལ་གྲི་འཁོར་ལོར་བཅས། །མདའ་གཞུ་ཐོ་ཆེན་གྲི་ཆེན་དང་། །རྡོ་རྗེ་མདུང་ཆེན་དགྲ་སྟར་བཅས། །མཆེ་གཙིགས་སྤུ་གྲི་སོ་དང་ནི། །མདའ་དང་མདུང་དང་སྟི་ར་དང་། །གཞན་ཡང་ཕྱག་རྒྱ་སྣ་ཚོགས་སོ། །དབུས་ཀྱི་ཧེ་རུའི་ཕྱག་རྒྱ་ནི། །སྟི་ར་དབྱུག་ཏོ་ཆེན་པོ་དང་། །འཁོར་ལོ་ཆེན་པོ་རབ་ཏུ་འབར། །དུང་ཆེན་དམར་གྱིས་གང་བ་ལ། །རྡོ་རྗེས་དཀྲུག་ཅིང་རབ་ཏུ་གསོལ། །ཤར་གྱི་ཁྲོ་བོའི་ཕྱག་རྒྱ་ནི། །སྟི་ར་ཆེན་པོའི་དབྱུག་པ་དང་། །རྡོ་རྗེ་ཆེན་པོ་རབ་ཏུ་འབར། །ནྲྀ་མགོ་དམར་ཆེན་བཀང་བ་གསོལ། །ལྷོ་ཡི་ཕྱག་རྒྱ་ཆེན་པོ་ནི། །སྟི་ར་ཆེན་པོའི་དབྱུག་པ་དང་། །ཡིད་བཞིན་ནོར་བུའི་གཞལ་ཡས་སུ། །དམར་གྱི་ཨརྒྷ་རབ་ཏུ་གསོལ། །ནུབ་ཀྱི་ཁྲོ་བོའི་ཕྱག་རྒྱ་ནི། །སྟི་ར་ཆེན་པོའི་དབྱུག་པ་དང་། །པདྨ་ཆགས་མེད་རབ་ཏུ་འབར། །དུང་ཆེན་དམར་གྱིས་བཀང་བ་གསོལ། །བྱང་གི་ཁྲོ་བོའི་ཕྱག་རྒྱ་ནི། །སྟི་ར་ཆེན་པོའི་དབྱུག་པ་དང་། །རྡོ་རྗེ་རྒྱ་གྲམ་རབ་ཏུ་འབར། །དུང་ཆེན་དམར་གྱིས་
བཀང་བ་གསོལ། །ཁྲོ་མོ་རྣམས་ཀྱང་ཁྲོ་དང་མཐུན། །གནས་དང་ཡུལ་གྱི་ཕྱག་རྒྱ་ནི། །རྒྱུད་གཞན་དག་དང་མཐུན་པར་བཤད། །མ་མོ་རྣམས་ཀྱི་ཕྱག་རྒྱ་ནི། །འཇིག་རྟེན་འདས་མདོ་ཆེ་ལས་བཤད། །གསང་བའི་སྙིང་པོ་དེ་ཁོ་ན་ཉིད་ངེས་པ་སྒྱུ་འཕྲུལ་དྲ་བ་ལས་ཕྱག་རྒྱ་སྤྲོས་པའི་ལེའུ་སྟེ་སུམ་ཅུ་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་དེ་དག་གི་དཀྱིལ་འཁོར་བསྟན་པའི་ཕྱིར་ཆེད་དུ་བརྗོད་པ་འདི་བརྗོད་དོ། །འབར་བའི་དཀྱིལ་འཁོར་རྩིབས་བཞི་པ། །གྲུ་ཆད་བཞི་ཡིས་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྤྲུལ་སྣ་ཚོགས་ཉི་མས་བརྗིད། །འབར་བའི་འཕྲོ་བ་མང་པོ་འཁྲུག །ཁྱུ་མཆོག་མ་ཧེ་གཟིག་དང་སྟག །གཏུམ་པའི་དོམ་གྱིས་སྦར་བས་ནི། །དབང་ཕྱུག་ལྷ་ཆེན་ལ་སོགས་བཟུང་། །སྨུག་གནག་སྔོ་གནག་སེར་གནག་དང་། །དམར་གནག་ལྗང་གནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞི་བགྲད། །ཀོ་རློན་གོས་ནི་སྣ་ཚོགས་གྱོན། །རྔམ་པའི་སྒྲ་ཆེན་འཇིགས་པར་སྒྲོགས། །སྦྲུལ་དང་ཐོད་ཕྲེང་ཉི་ཟླར་བཅས། །སྟེང་གི་འཇིག་རྟེན་ཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟ་གཤོལ་ལ་སོགས། །རང་གི་ལག་ཆ་སྣ་ཚོགས་བསྣམས། །བཙུན་མོ་འཛིན་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞི་ཕྱག་རྒྱར་རབ་མཛེས་ཤིང་། །སླས་དང་བྱི་མོ་ཚོགས་ཀྱི་གཙོ། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ཏེ་ཆས་ཏེ་གནས། །ཞེས་བརྗོད་པས་འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ་འབར་བའི་དཀྱིལ་འཁོར་ཀུན་དུ་གསལ་བར་གྱུར་ཏོ། །དེ་ནས་དགྱེས་པ་ཆེན་པོ་བཅོམ་ལྡན་འདས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་སྒྱུ་འཕྲུལ་དྲ་བ་ལས་རྡོ་རྗེ་གསང་བའི་ཚིག་འདི་ཕྱུང་ངོ་། །ཨ་ཧོ། །བསྐལ་པར་བཅས་ཤིང་དུག་ཚོགས་འབར་བ་ཡི། །ཉོན་མོངས་ཀུན་གཡོ་དཀྱིལ་འཁོར་འཁོར་ལོ་བརྗོད་དཀའ་བའི། །ཇི་སྙེད་འཇིག་རྟེན་རྒྱན་
གྱིས་རྡུལ་སྙེད་བསམ་ཡས་པ། །རོ་ཚོགས་ཁྲག་ལ་བརྐམ་པ་དཔུང་གཉེན་ཀུན་བཀྱེ་ནས། །ཞེན་པའི་གདུག་མོ་ཤིན་ཏུ་གསལ་བ་དཀའ་བ་ཡི། །མི་མངོན་དབྱིངས་ནས་གཟུགས་ཀྱི་ཆོ་འཕྲུལ་བསམ་ཡས་ཀྱིས། །སྙིགས་མར་བཅས་ཤིང་མཚམས་སྦྱོར་ཀུན་ངམ་ཟིལ་གྱིས་གནོན། །རབ་ཏུ་གནོན་པའི་འཇིགས་བྱེད་བསམ་མི་ཁྱབ། །དེ་བཞིན་དེ་ཉིད་གཉེན་པོར་ཀུན་བྱུང་ཀུན་དུ་གསལ། །ཧོ། ཆོས་རྣམས་ཇི་སྙེད་འགྲོ་དྲུག་སྨིན་བྱེད་བརྗོད་མི་ལང་། །དུས་མཐའ་རྨོངས་ལ་གནས་པ་བརྗོད་མི་ལང་། །འདོད་པས་ཞེན་པའི་ལས་ཀྱང་ཇི་སྙེད་ཇི་སྲིད་པར། །དྲག་པོ་བདོ་བའི་རླུང་ཆེན་བསམ་མི་ཁྱབ། །བདེ་བར་བཅས་པ་གཞན་དུ་མེད་པར་བརྗོད་མི་ལང་། །བསྐལ་པར་བསགས་པའི་དུག་ཆེན་རབ་རྟོག་ཀུན་དུ་རྟོག །དེ་རྣམས་ཟིལ་གནོན་ཁྲག་འཐུང་སྐུ་གསུང་འཇིགས་བྱེད་པར། །རྐྱེན་དུ་བཅས་ནས་སྦུ་བུས་འབྲས་བུ་སྨིན་པ་རབ་སྨིན་ལྟར། །དགྱེས་པ་ཆེན་པོ་བཅོམ་ལྡན་འདས་ནི་མང་པོའི་ཚོགས། །དཔག་མེད་བསམ་ཡས་ལྷུན་གྲུབ་པས། །རབ་ཏུ་འདུལ་བར་ཤིན་ཏུ་གསལ། །ཧོ། །ཁྲོ་བོའི་རང་བཞིན་གདུག་བར་འཇིགས་པ་མ་ཡིན་ཞིང་། །ཞི་བ་མཛེས་པ་ཀུན་གྱི་ཡིད་དང་འཐད་པར་གནས་རྒྱུད་ཡོང་མ་ཡིན །དེ་ཉིད་གཉིས་སུ་མི་པའི་ཆོ་འཕྲུལ་བསམ་ཡས་ཐམས་ཅད་ཀུན་དུ་ཁྱབ། །རིགས་ལྔ་ཁྲག་འཐུང་འཇིགས་པའི་རོལ་པ་རྡུལ་སྙེད་རབ་སྟོན་པའི། །རྣམ་དག་བྱང་ཆུབ་མཆོག་གི་དབྱིངས་ཏེ་གསང་བའི་སྙིང་པོར་རབ་བསྟན་ངེས་པ་ཉིད་དེ་ཤིན་ཏུ་གནས་པར་གསལ། །ཧོ། རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོའི་དཀྱིལ་འཁོར་བསྟན་པའི་ལེའུ་སྟེ་སུམ་ཅུ་གཅིག་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་ཉིད་ཀྱི་བྱིན་བརླབས་དང་ཡོན་ཏན་སྟོན་པ་ཞེས་བྱ་བ་འདི་ཆེད་དུ་བརྗོད་པ་འདི་བརྗོད་དོ། །ཨོཾ་སངས་རྒྱས་རྣལ་འབྱོར་ཆེན་པོ་ནི། །དུས་གསུམ་སངས་རྒྱས་ཐམས་ཅད་ཀྱི། །ཡེ་ཤེས་སྙིང་པོའི་མཆོག་ཉིད་དེ། །སངས་རྒྱས་ཀུན་དུ་བཟང་པོ་ཉིད། །འདི་
ཡིན་གཞན་ན་མེད་པ་སྟེ། །རོལ་པ་ཀུན་ལ་མངའ་བརྙེས་ཤིང་། །སྲིད་པ་འཇིག་རྟེན་ཐམས་ཅད་ཀུན། །སངས་རྒྱས་ཉིད་དེ་དུས་གསུམ་དུ། །མ་གཡོས་ལྷུན་གནས་སྙིང་པོ་སྟེ། །རང་བཞིན་ཆེ་བའི་ཡོན་ཏན་ལས། །མ་རྟོགས་རྨོངས་པའི་འགྲོ་བ་ལ། །སྒྱུ་འཕྲུལ་དྲ་བས་མངོན་རྫོགས་པ། །སྙིང་རྗེ་ཆགས་པའི་དམ་ཚིག་གིས། །ང་རྒྱལ་ཉིད་ཀྱི་སྐུ་ཆེན་བསྟན། །གདུག་གཅིང་གཏུམ་པའི་ཁམས་གསུམ་ན། །འདུལ་བའི་ཞིང་དུ་རབ་སྦྱོར་ཞིང་། །ཕྲིན་ལས་རྣམ་བཞི་རྫོགས་པར་མཛད། །ཡེ་ཤེས་ངོ་མཚར་ཚམ་ངམ་གྱིས། །ཆོས་བཞི་རྣམ་དག་ཆེ་བའི་ལྟ། །ཡེ་ཤེས་སྐུ་སྟེ་ཁྱད་པར་ཆེ། །ཆགས་པའི་ཚོགས་ཀྱིས་མཚན་མ་ནི། །འདོད་ཆགས་ཆེན་པོ་ཉིད་ཀྱི་སྐུ། །གཏུམ་རྔམ་གདུག་པས་མཚན་པས་ན། །ཞེ་སྡང་ཆེན་པོ་ཉིད་ཀྱི་སྐུ། །གདུལ་བྱ་ཞིང་དུ་རབ་སྦྱོང་ཞིང་། །ཆོས་ཉིད་མཉམ་ལས་བཞེངས་པས་ན། །གཏི་མུག་ཆེན་པོ་ཉིད་ཀྱི་སྐུ། །སྣོད་བཅུད་དག་པའི་སྤྱོད་ཡུལ་བ། །ཐུགས་སྐུ་གསུང་ལས་འཕྲོས་པ་དང་། །རྒྱལ་བ་ང་ཡིས་མཚན་པས་ན། །ང་རྒྱལ་ཆེན་པོ་ཉིད་ཀྱི་སྐུ། །གསང་བའི་སྙིང་པོ་བཞི་བཅུ་གཉིས། །ཐིག་ལེ་ཐུགས་སུ་བསྡུས་པ་ཉིད། །གཞན་དུ་མེ་གཏོང་མཚན་བས་ན། །དེ་ཉིད་ཕྲག་དོག་ཉིད་སྐུ་རྫོགས། །སྟོང་གསུམ་སྟོང་གི་སྟོང་ཆེན་པོ། །འཇིག་རྟེན་ཁམས་མང་སྣ་ཚོགས་པ། །རྡུལ་དང་བྱེ་བ་ལ་སོགས་པའི། །བགྲང་བ་ལས་ནི་རབ་འདས་མཚན། །དེ་ཉིད་སྣང་ཞིང་སྲིད་པ་ཉིད། །འཇིགས་བྱེད་སྐུ་གསུང་ཐུགས་ཀྱི་དབྱིངས། །ཆོས་སྐུ་ཡེ་ཤེས་རང་བཞིན་ལ། །སྒྱུ་འཕྲུལ་དྲ་བའི་ཐིག་ལེ་མཆོག །སྙིང་པོ་ཐིག་ལེ་བསམ་ཡས་ཉིད། །འཇིགས་བྱེད་དབུ་དགུ་བཅྭ་བརྒྱད་ཕྱག །སྒྱུ་མས་མཚན་པའི་དྲ་བ་ཡིན། །དེ་ཉིད་ཚོགས་དང་དཀྱིལ་འཁོར་སྔགས། །གཅིག་ལ་གསུམ་དུ་མཆོག་ཏུ་སྔགས། །ཡུལ་དང་འབྱུང་བ་དེ་ཉིད་དོ། །བདག་རིག་གཞན་དོན་སྙིང་པོ་ཉིད། །ཐབས་དང་ཤེས་རབ་ཕྱག་མཚན་པ། །གཉིས་མེད་རིག་པའི་ཡེ་ཤེས་ཆེ། །མིང་དང་གཟུགས་དང་དབུར་གྱུར་པ། །ཕྱག་དང་ཞབས་སུ་རྣམ་པར་བརྟགས། །བརྟགས་པ་ལས་ནི་འཕྲོས་པའི་སྐུ། །ཅི་
ཡང་མེད་ལས་ཅིང་ཡང་སྣང་། །སྐལ་བཟང་མཆོག་གི་སྒྱུ་འཕྲུལ་བ། །དྲ་བའི་དཀྱིལ་འཁོར་རབ་ཏུ་རྫོགས། །བརྟགས་པ་ཟིག་གནོན་ཆོས་ཉིད་སྤྱན། །སྤྱན་ནི་ཆོས་ཉིད་མཉམ་པ་ཉིད། །ཇི་བཞིན་དབྱིངས་ཀྱི་ཡུལ་ལ་སྦྱོར། །རོལ་པའི་རྩེད་མོར་སྡང་མིག་པ། །གཞན་དུ་མི་གཟིགས་ཡུལ་ལ་གཟིགས། །པདྨ་འཁྱིལ་པ་ཉིད་སྐུ་གསུང་། །མཚན་མར་འཛིན་པའི་དངོས་པོ་འཇིག །ཡེ་ཤེས་ཆེན་པོའི་སྤྱན་བགྲད་ལས། །ཁྲོ་གཉེར་གློག་སྟོང་འགྱུར་བ་ཡི། །མེ་ཡི་ཚོགས་ཀྱི་གཞན་ཕུག་གློག །བདུད་རྩི་ཞིང་དུ་སྦྱོར་བས་ན། །བདུད་རྩི་མཆོག་གི་ཁྲོ་བོ་ཡིན། །སྐུ་ཉིད་མཉམ་པ་རྫོགས་པ་ལས། །སྣ་ཚོགས་འཆར་བར་རབ་སྟོན་པ། །ཡེ་ཤེས་སྒྱུ་འཕྲུལ་སྟོབས་ཆེན་པོ། །མི་གཡོ་མཆོག་གི་འདུ་འཕྲོ་ལས། །གཤོག་པ་རྡོ་རྗེ་གཏམས་པ་ནི། །ཤེས་རབ་ཚོགས་ལ་འཕྲུལ་པ་དང་། །ཐུགས་རྗེ་དྲ་བའི་བྱིན་བརླབས་ཀྱིས། །འཁོར་ཡུག་ཇི་སྙེད་མཐའ་ཀླས་པ། །དབྱིངས་ཉིད་བདེ་ལ་སྐྱོད་པ་སྟེ། །འཕྲོས་ནས་དབང་དུ་བྱེད་པའི་དོན། །རྟ་ཡི་གར་ཐབས་རྫུ་འཕྲུལ་གྱིས། །གཅིག་ཀྱང་ཡལ་བ་མ་ཡིན་པའོ། །ཆོས་དབྱིངས་མཉམ་དང་མི་མཉམ་པའི། །སྒྱུ་འཕྲུལ་དཀྱིལ་འཁོར་མཐས་ཀླས་པར། །རྩེད་མོ་མཆོག་གི་ཕྱག་རྒྱ་ནི། །བརྐྱང་དང་བསྐུམ་པ་ཞབས་ཚུལ་ཏེ། །ཐབས་དང་ཤེས་རབ་རོལ་པའི་དོན། །རང་དབང་ཐབས་ཆེན་རྒྱལ་པོ་ཡིས། །སངས་རྒྱས་ཀུན་གྱི་སྐུ་གསུང་བ། །ཐིག་ལེ་མཆོག་གི་གནས་ལ་རྫོགས། །དབང་ཕྱུག་ལྷ་ཆེན་ལ་སོགས་ལ། །ཟིལ་གནོན་ཁྲོས་པའི་ཕྱག་མཚན་པ། །སྣ་ཚོགས་མཚོན་རྣོན་མང་པོ་བསྣམས། །ང་རྒྱལ་གདུག་པའི་ཞེ་སྡང་གཅོད། །གཏི་མུག་ཆོས་སྐུ་སྒྱུ་འཕྲུལ་བ། །དྲ་བའི་ཐུགས་རྗེ་མཐའ་དག་ནི། །ཁྲོས་པའི་དམ་ཚིག་སྙིང་རྗེ་ཡིས། །མཉམ་པའི་ཐིག་ལེར་དགོད་པ་ནི། །གཤིན་རྗེ་གཤེད་པོར་གདུག་པའི་རྒྱལ། །གདུག་པའི་ཚོགས་རྣམས་མཆོག་སྒྲོལ་བདེན། །འགྲོ་ལ་མགོན་དུ་གྱུར་པས་ན། །དུག་དང་བདུད་རྩི་ཁྱད་མེད་པའི། །ཆོས་སྐུ་གདུག་པས་བརྒྱན་པའི་
སྦྲུལ། །དབང་རྟགས་ཡེ་ཤེས་རྒྱན་དུ་བཞག །དུར་ཁྲོད་རྫས་དང་ཁྲག་འཐུང་བའི། །གཡང་གཞི་སྟག་གི་པགས་ཆེན་བགོས། །འཇིགས་བྱེད་སྙིང་རྗེའི་དམ་ཚིག་ནི། །སྐྱེ་ཤི་རྩ་བ་གཅོད་མཛད་པ། །མི་གཡོ་མགོན་ཞེས་མཆོག་ཏུ་བསྒྲགས། །ང་རྒྱལ་ལག་གིས་འདུ་བྱེད་པ། །ང་རྒྱལ་འཕྲོག་པའི་དམ་ཚིག་སྟེ། །ཀུན་དུ་བཟང་པོའི་སྤྱོད་ཡུལ་ལ། །སྔགས་ཀྱི་སྙིང་པོ་དེ་ཉིད་པ། །ཧཱུྃ་ཧཱུྃ་ཧཱུྃ་གིས་སྡུད་ཟ་འཐུང་། །རྡོ་རྗེ་ཐུགས་ཀྱི་བྱིན་བརླབས་ཀྱིས། ཧཱུྃ་མཛད་ཆེས་ནི་རྣམ་པར་བསྒྲགས། །མི་མཆེད་གཏི་མུག་ཆེན་པོ་ནི། །ཉོན་མོངས་རྒྱ་མཚོ་རྔུབ་པའི་ཕྱིར། །བྷན་དྷ་ཀློང་ཆེན་འཐུང་བར་སྣང་། །འཇིག་རྟེན་འབར་བའི་སྤྲིན་ཆེན་པོ། །བསྐལ་པ་ལས་ཀྱི་ཟིལ་གནོན་པ། །རྡོ་རྗེ་མེ་ཡི་འབར་བ་འབྱུང་། །ཉོན་མོངས་རྒྱ་མཚོ་སྐེམས་པར་བྱེད། །འཇིགས་བྱེད་ཐབས་ཀྱི་དམ་ཚིག་གིས། །བསམ་ཡས་འཇིག་རྟེན་འཁོར་ཡུག་བཅས། །རང་གི་སྐུ་ཡི་གཞལ་མེད་བསྡུས། །སྒྱུ་འཕྲུལ་དྲ་བའི་ཡེ་ཤེས་ནི། །ཟིལ་གྱིས་གནོན་པ་དུར་ཁྲོད་གླིང་། །ཚོམ་བུ་གཉིས་ཀྱི་ལྷ་ཆེན་པོ། །རྡོ་རྗེ་སྐུ་ཡི་བྱིན་བརླབས་ཀྱིས། །ཐིག་ལེ་མི་གཡོ་བདེ་བ་ལས། །རང་བཞིན་རོལ་པ་ཆེན་པོས་ནི། །རྡོ་རྗེ་ཕྲ་མེན་ཕོ་ཉའི་ཚོགས། །ཁམས་གསུམ་འདུལ་བར་ཡང་དག་མཛོད། །ཧ་ནི་ཐིག་ལེ་ཞི་བ་ཉིད། །ཧ་ནི་ཐིག་ལེ་ཞི་ཁྲོ་སྙོམས། །ཧ་ནི་ཐིག་ལེ་དབང་ཆེན་ཡིན། །ཧ་ནི་ཐིག་ལེ་དྲག་པོ་ཉིད། །ཧ་ནི་ཐིག་ལེ་རོལ་པ་ཉིད། །ཧ་ནི་ཐིག་ལེས་ཕྲིན་ལས་ཉིད། །ཧ་ནི་ཐིག་ལེས་ཆགས་དབང་འདུལ། །ཧ་ནི་ཐིག་ལེ་ལས་ཀུན་རྫོགས། །ཧེ་ནི་ཐིག་ལེ་ཡེ་ཤེས་ཐུགས། །ཧེ་ནི་ཐིག་ལེས་གསུང་སྙན་པ། །ཧེ་ནི་ཐིག་ལེས་ཚམ་ངམ་ལྕེ། །ཧེ་ནི་ཐིག་ལེ་རོལ་པ་ཉིད། །ཧེ་ནི་ཐིག་ལེ་དབང་རྟགས་ཡིན། །ཧེ་ནི་ཐིག་ལེས་དྲག་ཤུལ་བ། །ཧེ་ནི་ཐིག་ལེས་ཐུགས་ཆེན་རྫོགས། །ཧེ་ནི་ཐིག་ལེས་དཀྱིལ་འཁོར་བ། །འཇིགས་བྱེད་མཆོག་གི་སྒྱུ་འཕྲུལ་ཏེ། །དྲ་བས་ཟིལ་གནོན་ལམ་འགོག་གོ། །ཧཱུྃ་ནི་ཡེ་ཤེས་ཐུགས་ཀྱི་ཐུགས། །ཧཱུྃ་ནི་ཡེ་ཤེས་ཐུགས་སྐུ་ཉིད། །ཧཱུྃ་ནི་ཡེ་ཤེས་ཐུགས་སྐུ་གསུང་། །ཧཱུྃ་ནི་ཡེ་ཤེས་ཡིད་བཞིན་
ལས། །ཧཱུྃ་ནི་ཐིག་ལེ་ཡེ་ཤེས་སོ། །ཕཊ་ནི་སྐུ་ཡི་ཐུགས་ཀྱི་ཐུགས། །ཕཊ་ནི་གསུང་གི་གསུང་གི་ཐུགས། །ཕཊ་ནི་ཐུགས་ཀྱི་ཐུགས་ཀྱི་ཐུགས། །ཕཊ་ནི་ཆོས་སྐུའི་ཐུགས་ཀྱི་ཐུགས། །ཕཊ་ནི་ཆོས་སྐུའི་གསུང་གི་ཐུགས། །ཕཊ་ནི་ཆོས་ཐུགས་ཐུགས་ཀྱི་ཐུགས། །སྒྱུ་འཕྲུལ་དྲ་བས་དགྱེས་པ་ཧོ། །དབང་ཕྱུག་ཆགས་པས་དགྱེས་པ་ཧོ། །གར་ཐབས་རོལ་པས་དགྱེས་པ་ཧོ། །སྐུ་གསུང་ཐུགས་ལྡན་དགྱེས་པ་ཧོ། །ཡོན་ཏན་ལས་ཀྱིས་དགྱེས་པ་ཧོ། །ཕོ་ཉ་འདུ་འཕྲོས་དགྱེས་པ་ཧོ། །ཀུན་ལ་སྣང་བས་དགྱེས་པ་ཧོ། །བྱིན་གྱི་བརླབས་ཀྱིས་དགྱེས་པ་ཧོ། །ཆོས་ཀྱི་སྐུ་ལ་དགྱེས་པ་ཧོ། །ཡེ་ཤེས་རོལ་པ་དགྱེས་པ་ཧོ། །ཅི་ཡང་མིན་པས་དགྱེས་པ་ཧོ། །གནོད་པ་སྡུད་པས་དགྱེས་པ་ཧོ། །ཆོས་ཀྱི་དབྱིངས་ཉིད་དགྱེས་པ་ཧོ། །དེས་དགྱེས་པ་ཆེན་པོ་ཉིད་ལ་ཉིད་ཤིན་ཏུ་དགྱེས་པར་གྱུར་ཏེ། ཆོས་ཐམས་ཅད་གཅིག་གི་རང་བཞིན་དུ་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་སྟོང་ཕྲག་བརྒྱ་ལས་དགྱེས་པ་ཆེན་པོའི་བྱིན་བརླབས་དང་ཡོན་ཏན་མཆོག་སྟོན་པའི་ལེའུ་སྟེ་སུམ་ཅུ་གཉིས་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་འཇིགས་བྱེད་ཀྱི་བསོད་ནམས་སྦྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཆེད་དུ་བརྗོད་པ་འདི་བརྗོད་དོ། །འཁོར་ལོ་བར་ཁྱམས་སྒོ་རྣམས་སུ། །འཇིགས་བྱེད་འཁོར་ལོ་རིགས་ཀྱི་གཙོ། །བཙུན་མོ་ཚོགས་དང་ལྡན་པར་བསྒོམ། །ཞི་དང་དྲག་པོ་དབང་དང་རྒྱས། །འཇིགས་པའི་ཚོགས་ཆེན་དེ་དབུས་སུ། །བདག་ཉིད་དྲག་པོ་བཅོས་ཚུལ་དུ། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །འཁོར་ལོ་བར་ཁྱམས་སྒོ་རྣམས་སུ། །འཇིགས་བྱེད་རིན་ཆེན་རིགས་ཀྱི་གཙོ། །བཙུན་མོའཛིན་པའི་ཚོགས་དང་བཅས། །ཁྲོ་མོའི་ཚོགས་དང་ལྡན་པར་བསྒོམ། །ཞི་དང་དྲག་པོ་དབང་དང་རྒྱས། །འཇིགས་པའི་ཚོགས་ཆེན་དེ་དབུས་སུ། །ལུས་དང་ངག་ཡིད་བྱིན་བརླབས་ནས། །བདག་ཉིད་དྲག་པོ་བཅོས་ཚུལ་དུ། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །འཁོར་ལོ་བར་ཁྱམས་སྒོ་རྣམས་སུ། །འཇིགས་བྱེད་རིན་ཆེན་རིགས་
ཀྱི་གཙོ། །བཙུན་མོ་འཛིན་པའི་ཚོགས་དང་བཅས། །ཁྲོ་མོའི་ཚོགས་དང་ལྡན་པར་བསྒོམ། །ཞི་དང་དྲག་པོ་དབང་དང་རྒྱས། །འཇིགས་པའི་ཚོགས་ཆེན་དེ་དབུས་སུ། །ལུས་དང་ངག་ཡིད་བྱིན་བརླབས་ནས། །བདག་ཉིད་དྲག་པོ་བཅོས་ཚུལ་དུ། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །ཡང་ན་རིགས་དབང་དཀྱིལ་འཁོར་རོ། །འཁོར་ལོ་བར་ཁྱམས་སྒོ་རྣམས་སུ། །འཇིགས་པའི་ཕྲིན་ལས་རིགས་ཀྱི་གཙོ། །བཙུན་མོ་འཛིན་པའི་ཚོགས་དང་བཅས། །ཁྲོ་མོའི་ཚོགས་དང་ལྡན་པར་བསྒོམ། །ཞི་དང་དྲག་པོ་དབང་དང་རྒྱས། །ལས་བཞི་དཀྱིལ་འཁོར་རྫོགས་པར་དགོད། །འཇིགས་པའི་ཚོགས་ཆེན་དེ་དབུས་སུ། །ལུས་དང་ངག་ཡིད་བྱིན་བརླབས་ནས། །བདག་ཉིད་དྲག་པོར་རབ་གནས་ནས། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །འཇིགས་བྱེད་ལྔ་རྫོགས་དཀྱིལ་འཁོར་ནི། །ཉི་ཤུ་རྩ་ལྔ་སྐུ་གསུང་ཐུགས། །ཡོན་ཏན་ཕྲིན་ལས་རྫོགས་པར་བསྒོམ། །རྒྱན་དང་ཆ་ལུགས་ལ་སོགས་པ། །འཇིགས་པའི་ཚོགས་ནི་ཇི་བཞིན་པར། །ཚམ་ངམ་ཆེན་པོའི་ཆ་ལུགས་བསྒོམ། །གླུ་དང་གར་དང་ཕྱག་རྒྱ་དང་། །ཤེས་རབ་ཐབས་སུ་ཤེས་པ་དང་། །བྱང་ཆུབ་སེམས་ཀྱི་མཆོད་པ་དང་། །བརྡ་ལ་སོགས་པའི་ཡོན་ཏན་དང་། །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ཀྱི། །མདོར་ན་ཚོགས་རྣམས་མངོན་དུ་བསྒྲུབ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་འཇིགས་བྱེད་ཆེན་པོའི་བསོད་ནམས་སྦྱིན་པ་དམ་ཚིག་གི་ལེའུ་སྟེ་སུམ་ཅུ་གསུམ་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་ཆོ་ག་དང་དཀྱིལ་འཁོར་ཡོངས་སུ་ཤེས་པར་བྱ་བའི་ཕྱིར་ཆེད་དུ་བརྗོད་པ་འདི་བརྗོད་དོ། །དེ་བཞིན་གཤེགས་པའི་སྐུ་གསུང་ཐུགས། །ཆོས་དབྱིངས་རྣམ་དག་དཀྱིལ་འཁོར་རོ། །གསང་སྔགས་སྤྱི་ཡི་དཀྱིལ་འཁོར་ལས། །ཤེས་འཇུག་ཡུམ་གྱི་དཀྱིལ་འཁོར་བསྒོམ། །རྒྱང་གྲགས་དཔག་ཚད་ལ་སོགས་དང་། །ལུས་གང་ལུས་དོ་གསུམ་གྱི་ཚད། །རང་གི་རིག་པས་ཅི་ནུས་པར། །སྒྱུ་འཕྲུལ་དྲ་བའི་དཀྱིལ་འཁོར་བསྒོམ། །གནོད་བསྐྲད་ས་གནོན་བྱིན་གྱིས་བརླབ། །
ལྗོན་པ་ལྕུག་ཕྲན་སྡོང་གཅིག་དང་། །མ་རིག་ཚོན་གྱིས་ཇི་བཞིན་དུ། །གོམས་པར་བྱ་བའི་ཏིང་འཛིན་དབབ། །འཇིགས་བྱེད་སྐུ་གསུང་དཀྱིལ་འཁོར་བཟླ་ས། །གནས་དང་ཟླ་དང་རྫས་རྣམས་ནི། །ཚོགས་ཀྱི་མཆོག་ཏུ་དམིགས་པས་གཞག །དང་པོར་མཆོད་སྦྱིན་དམ་པས་མཆོད། །གཟུགས་དང་ལུགས་ཆེན་དུང་མཆོག་ནི། །ཅི་འདོད་སྣང་བར་བདག་གིས་དགོད། །འཇིགས་བྱེད་དབང་དུ་བདག་ཞུགས་ནས། །ཁྲོ་མོ་ཇི་སྙེད་འཁོར་དུ་བྱ། །བར་ཆད་ཏིང་འཛིན་མཆོག་གིས་ཟློག །གསང་བའི་སྙིང་པོར་ཉིད་བཤམས་ཏེ། །འདས་པ་བདག་ཏུ་མཉམ་སྦྱར་ཞིང་། །ཐུགས་ཀྱི་སྔགས་ཀྱིས་སྤྱན་དྲངས་ནས། །བདག་གི་ལུས་ལ་ཞུགས་ཚུལ་དུ། །དེ་ཡི་གཟུགས་གཟུང་མཆོག་ཏུ་བསྟིམ། །ཛཿཞེས་ལན་གསུམ་བརྗོད་པས་ན། །དེ་ཉིད་བསོད་ནམས་ལུས་ཐོབ་ཅིང་། །ཡེ་ཤེས་ལྔ་ཡི་དངོས་གྲུབ་སྦྱིན། །ཕོ་ཉ་འདུ་འཕྲོ་མང་པོ་རྣམས། །དེ་ཡི་དགོས་པ་བྱེད་པར་འགྱུར། །ཡང་ན་ས་གཞི་རབ་མཉམ་ལ། །ཕྱག་རྒྱ་གཟུགས་དང་སྙིང་པོ་རྣམས། །ལྔ་ཡི་ཚོན་གྱིས་བྲི་བར་བྱ། །དཀར་རྩི་དམར་རྩི་དྲི་ཤ་ཆེན། །རྡོ་རྗེ་དུང་ཆེན་དམར་རྩིས་དགང་། །དུང་དང་སྲོག་ཤིང་གསར་རྙིང་དང་། །ཞིང་འགྱུར་མཆོག་དང་མཆོག་ཕྲན་དང་། །ཇི་སྙེད་པ་ཡི་རྫས་རྣམས་ཀུན། །འཇིགས་བྱེད་ཆེན་པོའི་ཏིང་འཛིན་དང་། །ཉམས་པ་མེད་པའི་སེམས་ཀྱིས་སྤྱད། །སྒྱུ་འཕྲུལ་དྲ་བའི་དཀྱིལ་འཁོར་ལ། །རྡེང་དང་བཅས་པའི་བསམ་པ་ཡིས། །རེ་བ་མེད་པར་རབ་ཏུ་བསྒྲུབ། །བསྙེན་པ་དང་ནི་ཉེ་བསྙེན་པ། །སྒྲུབ་པ་དང་ནི་སྒྲུབ་ཆེན་པོས། །ཞག་ནི་ཚང་ཞིང་རྟགས་བྱུང་ན། །དཀྱིལ་འཁོར་མཐུན་པ་ཉིད་དུ་སྦྱར། །ཞག་ནི་སུམ་ཅུ་ཕྲག་དྲུག་གམ། །དྲུག་ཅུ་དགུ་བཅུ་རྩ་དྲུག་ཏུ། །འཇིགས་བྱེད་ཆེན་པོའི་དཀྱིལ་འཁོར་བསྒོམ། །འཇིགས་བྱེད་ཚོགས་ལ་བདག་ལུས་དབུལ། །དེ་ཉིད་དཀྱིལ་འཁོར་ཉིད་དུ་བརྟག །འདའ་བར་མི་མཛད་དམ་ཚིག་ལས། །ནམས་ཀྱང་འདའ་བར་མི་མཛད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དགྱེས་པ་ཆེན་པོའི་དཀྱིལ་འཁོར་དམ་ཚིག་གི་ལེའུ་སྟེ་སུམ་ཅུ་བཞི་པའོ།། །།དེ་ནས་བཅོམ་
ལྡན་འདས་དགྱེས་པ་ཆེན་པོས་སྔགས་ཀྱི་སྙིང་པོ་འདི་ཆེད་དུ་བརྗོད་དོ། །ཨ་ཀི་དུ་ན་ཛྭ་ལ་མཎྜ་ལ་ཕཊ་ཕཊ་ཕཊ། ཨོྃ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཀྲོ་དྷེ་ཤྭ་རི་ཧཱུྃ་ཕཊ། རུ་ལུ་མ་ཧཱ་ས་མ་ཡ་ཧཱུྃ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨོྃ་མ་ཧཱ་བཛྲ་ཤྲཱིཧེ་རུ་ཀ་བཛྲ་ཀྲོ་དྷེ་ཤྭ་རི་སརྦ་དུ་ཥྚཱན་ཧཱུྃ་ཕཊ། རུ་ལུ་མ་ཧཱ་ས་མ་ཡ་ཧཱུྃ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨོྃ་རཏྣ་མ་ཧཱ་ཤྲཱི་ཧེ་རུ་ཀ་རཏྣ་མ་ཧཱ་ཀྲོ་དྷེ་ཤྭ་རི་བིངྷ་མུ་ཁ་ཧཱུྃ་ཕཊ། རུ་ལུ་རུ་ལུ་མ་ཧཱ་ས་མ་ཡ་ཧཱུྃ་བྷྱོ་ཧཱུྃ། ཨོྃ་ཧྲཱིཿཔདྨ་མ་ཧཱ་ཤྲཱི་ཧེ་རུ་ཀ་པདྨ་མ་ཧཱ་ཀྲོ་དྷེ་ཤྭ་རི་ཁཱ་ཧི་ཧཱུྃ་ཕཊ། རུ་ལུ་མ་ཧཱ་ས་མ་ཡ་ཧཱུྃ་རུ་ལུ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨོྃ་ཀརྨ་མ་ཧཱ་ཤྲཱི་ཧེ་རུ་ཀ་སརྦ་ཨ་ག་མ་ཧཱ་ཀྲོ་དྷེ་ཤྭ་རི་བི་ཤྭ་རཱུ་བེ་ཧཱུྃ་ཕཊ། རུ་ལུ་མ་ཧཱ་ས་མ་ཡ་ཧཱུྃ། རུ་ལུ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨོྃ་མ་ཧཱ་སརྦ་ཏ་ཐཱ་ག་ཏ་བཛྲ་རཏྣ་པདྨ་ཨ་མོ་གྷ་མ་ཧཱ་བཛྲ་ཤྲཱི་ཧེ་རུ་ཀ །མ་ཧཱ་ས་མ་ཡ་ཧ་ཧེ་ཧཱུྃ་ཕཊ། རུ་ལུ་རུ་ལུ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨོྃ་སརྦ་ཏ་ཐཱ་ག་ཏ་མ་ཧཱ་པདྨ་ཤྲཱི་ཧེ་རུ་ཀ་མནྟྲ་ཛྭ་ལ་མ་ཧཱ་མཎྜལ་ཀཱ་ཡ་བཱ་ཀཙིཏྟ། ཨོཾ་ཨོཾ་ཨོཾ་ཧཱུྃ་ཧཱུྃ་ཧཱུྃ། སྭཱྃ་སྭཱྃ་སྭཱྃ། ཨཱྃ་ཨཱྃ་ཨཱྃ། ཧཱྃ་ཧཱྃ་ཧཱྃ། བཛྲ་མ་ཧཱ་ཀ་པཱ་ལ་ཁངྒ་དཎྜེ་ན་ཛྭ་ལ་སིད་དྷ། མ་ཧཱ་ཤྲཱི་ཧེ་རུ་ཀ་ཨ་མེ་དུ་མེ་སིད་དྷོད་བྷཱ་བེ། སྃ་ཧ་ར་ཎ། ཧཱུྃ་ཧཱུྃ་ཧཱུྃ། མ་ཧཱ་ཡོ་ག་ཨད་དྷ་མ་ཧཱ་ས་མ་ཡ། རུ་ལུ་རུ་ལུ། ཨ་ལ་ལ་ཧོཿ། ཧོ་སེམས་ཉིད་ཐིག་ལེར་རབ་གནས་པའི། །དཀྱིལ་འཁོར་བཞི་བཅུ་གཉིས་ཉིད་རྫོགས། །སངས་རྒྱས་རྡོ་རྗེ་ཧེ་རུ་ཀ །ཚོམ་བུ་དཀྱིལ་འཁོར་བསམ་ཡས། །སྐུ་གསུང་ཐུགས་སུ་བདག་སྦྱོར་ཅིག །ཨོྃ་བཛྲ་ཀྲོ་དྷ་ས་མ་ཡ་ཧོཿ། ཨོྃ་བཛྲ་ཀྲོ་དྷ་ས་མ་ཡ་སྟྭྃ། ཨོྃ་ཨྃ་ཧཱུྃ་སུར་སྟྭྃ། ཀ་མ་ལ་མ་ཧཱ་སུ་ཁ་མཱ་ལེེ་མ་ནུ་ས་མན་ཛྭ་ལ་ནི་དྷ་ན་ཨ་བ་ཡོ་ག་ཁཱ་ཧི་ཨ་ལ་ཨ་ལ་ཧོཿ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་འཇིགས་བྱེད་ཆེན་པོ་སྔགས་ཀྱི་བཟླས་པ་སྙིང་པོ་འབྱུང་བ་ཞེས་བྱ་བའི་ལེའུ་སྟེ་སུམ་ཅུ་ལྔ་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོའི་དམ་ཚིག་ཆེན་པོས་ཕུང་པོ་དང་། ཁམས་དང་སྐྱེ་མཆེད་སྦྱིན་པའི་ཏིང་ངེ་འཛིན་ལ་ཞུགས་ཏེ་གདུག་པའི་ཚོགས་བྱིན་གྱིས་རློབ་པ་ཞེས་བྱ་བ་འདི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་སརྦ་ཏ་ཐཱ་ག་ཏ་པདྨ་སམ་ཡོ་གི་ནཱི་ཛཿ། ཞེས་བརྗོད་པས་འཇིག་རྟེན་དྲུག་གི་ཕྱོགས་བཅུ་ཐམས་
ཅད་དེ་བཞིན་གཤེགས་པའི་སྐུ་གསུང་ཐུགས་ཀྱི་སྙིང་པོ་ཀུན་དུ་པདྨར་གྱུར་ཏེ། དབུ་དགུ་ཕྱག་བཅྭ་བརྒྱད་པ་ལས་དབུ་དང་ཕྱག་དང་ཞབས་སྟོང་ཁམས་ཀྱི་རྡུལ་སྙེད་དུ་སྲིད་པའི་རྩེ་མོར་ཐུག་པར་གནས་པར་གྱུར་ཏོ། །དེ་ནས་ཡང་དཀྱིལ་འཁོར་ཆེན་པོ་རྫོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རི་རབ་ཆེན་པོ་བརྐྱང་བསྐུམ་གྱི་ཚུལ་གྱིས་འདྲིལ་ཞིང་། ཨོྃ་ཨ་བྷི་ཙ་ར་བ་ཤཱིན་ཞེས་བརྗོད་པས་ལྷའི་ཚོགས་དང་། ཀླུའི་ཚོགས་དང་། གནོད་སྦྱིན་ཆེན་པོ་དང་། སྲིན་པོ་དང་། མི་དང་། མི་མ་ཡིན་པ་ཇི་སྙེད་པ་ཐམས་ཅད་རང་དབང་མེད་པར་ཞབས་འདྲིལ་བའི་འོག་ཏུ་གནས་པར་གྱུར་ཏོ། །དེ་ནས་ཡང་ཧ་ཧ་ཨ་བི་ར་ཙ་ཏིཥྛ་ཞེས་བརྗོད་པས་ལ་ལ་ནི་ལུས་ཤིན་ཏུ་ཏེ་རི་རབ་ཆེན་པོའི་འོག་ཏུ་གནས་པར་གྱུར་ཏེ། ལ་ལ་ནི་མངོན་སུམ་གཅན་མར་རི་རབ་ཆེན་པོའི་འོག་ཏུ་གནས་པར་གྱུར་ཏོ། །དེ་ནས་ཡངས་འཛིན་གྱི་རྒྱལ་པོ་ཞེས་བྱ་བ་གདུག་ཅིང་ཞེ་སྡང་ཆེ་བ་དད་པ་མེད་ཅིང་རྡོ་རྗེ་ཐེག་པ་སྨོད་པ་ཞིག་ཡོངས་ཀྱི་འཇིག་རྟེན་ན་གནས་པར་མཁྱེན་ཏོ། །མཁྱེན་ནས་ཏིང་ངེ་འཛིན་དེ་ལས་བཞེངས་ནས། ཨོྃ་པདྨ་ས་མ་ཡོ་གི་ནི་རུ་ལུ་རུ་ལུ་རུ་ལུ་ཧཱུྃ་ཞེས་བརྗོད་པས་ཀུན་དུ་སྐུ་ཆགས་པའི་བདག་ཉིད་དང་། ཀུན་དུ་གསུང་ཆགས་པའི་ཆ་ལུགས་དང་། ཀུན་དུ་ཐུགས་ཆགས་པར་གྱུར་པ་དང་། ཀུན་དུ་རིན་པོ་ཆེ་ཆགས་པ་ཆེན་པོ་དང་། ཀུན་དུ་ཕྲིན་ལས་ཆགས་པ་ཆེན་པོར་གྱུར་ཏེ། ཤར་དང་། ལྷོ་དང་། ནུབ་དང་། བྱང་དང་། དབུས་ཆེན་པོར་ཁྲག་གི་དཔའ་ཀློང་ཀེང་རུས་ཆེན་པོའི་རི་རབ་ཆེན་པོ་ན་དུས་ཀུན་དང་དེ་ཉིད་སྣང་བར་གྱུར་ཏོ། །དེ་ཡང་ཀུན་དུ་སྐུ་ལྔ་འཇིགས་པའི་གཟུགས་བསམ་གྱིས་མི་ཁྱབ་པ་དང་། ཀུན་དུ་གསུང་ལྔའི་ང་རོ་བསམ་གྱིས་མི་ཁྱབ་པ་དང་། འཇིགས་བྱེད་བསམ་གྱིས་མི་ཁྱབ་པ་དང་། ཀུན་དུ་ཐུགས་ལྔའི་རོལ་པ་དང་། ཞལ་བསམ་གྱིས་མི་ཁྱབ་པས་འཇིགས་པ་དང་། རིགས་ལྔ་ཚོམ་བུ་ཆེན་པོའི་སྟེང་དུ་གནས་པར་གྱུར་ཏོ། །དེ་ལས་མཆོག་གི་སྙིང་པོ་ཆེན་པོ་མ་ཧཱ་རཏྣ་ཏི་ལ་ཀའི་དབུར་གྱུར་ལས་རབ་ཏུ་སྐུ་གསུང་ཐུགས་སྤྲས་པའི་གཞལ་མེད་ཁང་ན་འཇིགས་བྱེད་ཆེན་པོའི་
ཐིག་ལེ་སྙིང་པོ་ཉིད་དབུ་གསུམ་ཕྱག་དྲུག་ཏུ་གནས་ཏེ་གཉིས་སུ་མེད་པར་བཞུགས་སོ། །དེ་ནས་དེ་ཉིད་དུ་སྐུ་དང་། དབུ་དང་། ཕྱག་དང་། ཞབས་དང་། འཁོར་སྟོང་ཁམས་ཀྱི་རྡུལ་སྙེད་དུ་འཇིགས་བྱེད་ཆེན་པོ་བསམ་གྱིས་མི་ཁྱབ་པར་ཁེབས་པར་མཐོང་ངོ་། །དེ་ནས་ཡང་བདུད་ཆེན་པོ་ས་འཛིན་གྱི་རྒྱལ་པོས་སྐྱེས་བུ་ཆེན་པོ་ས་འཛིན་གྱི་བདག་པོ། །ཐོང་ཐོང་ཇི་དེ་ལྟ་བུ་བྱེད་དམ་ཞེས་པ་ལས་དེ་ནས་ཡང་དགྱེས་པ་ཆེན་པོའི་བདག་ཉིད་ཀྱིས། །ཨོྃ་ཨ་བྷི་ཙར་བ་ཤཱི་ན་ཧཱུྃ་ཧཱུྃ་ཧཱུྃ་ཞེས་བརྗོད་པས་དམ་པའི་བསྟན་པས་དམ་པའི་བསྟན་པ་རྡོ་རྗེ་ཐེག་པ་སྨོད་ཅིང་འགྲོ་བའི་རྣལ་འབྱོར་པ་ལ་གནོད་པའི་ཚོགས་འཁོར་བསམ་གྱིས་མི་ཁྱབ་པ་དང་། གཡོག་དང་ཡང་གཡོག་ཏུ་བཅས་པའི་བདུད་ཆེན་པོ་དེ་དག་ཉིད་ཀྱི་ཡིད་ཀྱིས་གདུངས་ཏེ་རབ་ཏུ་བརྒྱལ་ནས་མ་མཐོང་བར་རྨོངས་པའི་གནས་ནས་རང་དབང་མེད་ཅིང་དྲན་པ་མེད་པར་ཀེང་རུས་ཀྱི་རི་རབ་ཆེན་པོའི་འོག་ཞབས་ཀྱི་གནས་སུ་ཕྱིན་པར་གྱུར་ཏོ། །དེ་ནས་འཇིགས་བྱེད་ཆེན་པོས་ཏིཥྛ་བཛྲ་ཨྃ་ཨྃ་ཞེས་བརྗོད་པས་གདུག་པའི་བློ་དང་ཕྲལ། མི་མཐུན་པའི་ལུས་བརྫེས་ཏེ་ལྷ་ཆེན་པོའི་ཚོགས་འདུལ་བའི་འཁོར་ལོས་སྒྱུར་བའི་རྒྱལ་པོ་ཆེན་པོར་གནས་པར་གྱུར་ཏོ། །དེ་ནས་དགྱེས་པ་ཆེན་པོ་དཔལ་འཇིགས་བྱེད་ཆེན་པོས་དེ་དག་གི་དཀྱིལ་འཁོར་སྒྱུ་འཕྲུལ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་ལས་ཐུགས་ཀྱི་དཀྱིལ་འཁོར་ཐིག་ལེ་ཆེན་པོ་ཞེས་བྱ་བ་འདི་ཉིད་ཀྱི་རྡོ་རྗེ་ཐིག་ལེ་ཆེན་པོའི་དམ་ཚིག་སྒྱུ་འཕྲུལ་དྲ་བ་ལས་ཕྱུང་ངོ་། །ཨོྃ་ཁྲག་མངས་དབའ་ཀློང་འཁྱིལ་བ་ཡི། །ཀེང་རུས་ཚོགས་ཀྱི་རི་རབ་འབུམ། །འདུས་པའི་ཚོམ་བུ་ལྔ་ཡི་རི། །འཁོར་ལོ་རྩིབས་བཞི་འབར་བའི་ཁང་། །གྲུ་ཆད་བཞིས་བརྒྱན་རབ་བརྗིད་པའི། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྦྲུལ་སྣ་ཚོགས་ཉི་ཟླས་བརྗིད། །སྟན་མང་པོ་ལྷ་ཆེན་བརྟེན། །དགྱེས་པ་ཆེན་པོ་ཀུན་དུ་བཟང་། །ཕྱག་དང་ཞབས་ནི་བརྒྱད་པ་ཡི། །ཐོད་སྦྲུལ་སྣ་ཚོགས་ཉི་ཟླས་
བརྗིད། །འཇིགས་བྱེད་ཆེན་པོ་ཁྲག་འཐུང་བའི། །རྡོ་རྗེ་སྙིང་པོ་ཐིག་ལེ་ཐུགས། །དབུ་གསུམ་ཕྱག་དྲུག་ཞབས་བཞི་བགྲད། །ཁྲོ་མོ་བཞིས་མཆོད་ངོས་བཞིར་ནི། །དགྱེས་པ་ཆེན་པོའི་ཚུལ་འཆང་བ། །ཕྱོགས་བཞི་གྲྭ་དང་བཅས་པར་ནི། །སྤྲུལ་པའི་རྣལ་འབྱོར་ཕྲ་མེན་རྣམས། །རི་རབ་ཞིང་ཆེན་སྟེང་ན་གནས། །འབར་བས་ཕྱག་བསྣམས་ཆེན་པོ་ནི། །རྡོ་རྗེ་དུང་ཆེན་གང་བ་དང་། །པདྨའི་གཞལ་མེད་རྡེའུ་ཆུང་བརྡུང་། །ཞིང་གི་ཞགས་པས་འཆིང་བ་དང་། །ཁ་ཊྭཱཾ་འཕེན་ཅིང་འཁྲིལ་བ་སྟེ། །བཙུན་མོ་འཛིན་པའི་ཚོགས་དང་བཅས། །གནས་དང་ཡུལ་གྱི་ཕྱག་རྒྱ་དང་། །སྒོ་བཞི་ཕྱག་རྒྱ་རབ་མཛེས་པར། །བྲན་མོའི་ཚོགས་ཆེན་མང་པོ་རྣམས། །འཇིགས་པའི་གཟུགས་ཀྱིས་གནས་པར་བྱེད། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གདུག་པའི་ཚོགས་བྱིན་གྱིས་རློབ་པ་ཞེས་བྱ་བའི་ལེའུ་སྟེ་སུམ་ཅུ་དྲུག་པའོ།། །།དེ་ནས་དེ་བཞིན་གཤེགས་པ་ཐམས་ཅད་དགོངས་པ་གཅིག་ཏུ་གྱུར་ནས། དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་ཆེད་དུ་བརྗོད་པ་འདི་བརྗོད་དོ། །བྱེད་པ་རྡོ་རྗེ་མཆོག་ཉིད་ཀྱི། །སྒྱུ་འཕྲུལ་ལམ་གྱི་དཀྱིལ་འཁོར་ལས། །དྲ་བའི་དཀྱིལ་འཁོར་མངོན་རྫོགས་པར། །འཇུག་པའི་ཡིད་ཀྱི་དགོངས་པ་ཡིན། །ཤིན་ཏུ་ཕྲ་ལ་སྦྱངས་པ་ནི། །དཀྱིལ་འཁོར་བཞི་བཅུ་གཉིས་ཀྱིས་མཛེས། །ཚོམ་བུ་གཉིས་ཀྱི་བྱེ་བྲག་ཏུ། །སྤྲོ་ཞིང་བསྡུ་བའང་དེ་བཞིན་ནོ། །ཡིད་དུ་འོང་བའི་ས་གཞིར་ནི། །རྐང་མཐིལ་ཐིག་གདབ་དཀྱིལ་འཁོར་བྲི། །ཨོྃ་དང་མཱུྃ་གྱི་དཀྱིལ་འཁོར་བསྒོམ། །དེ་ལས་ཕྲ་མོ་རྡོ་རྗེས་དགང་། །ཕྲ་བར་ས་བསྡུས་མཐིལ་དུ་གཟུང་། །ཡུམ་གྱི་ཚོགས་སུ་ཤེས་པས་བརྟགས། །གང་གི་ཡུལ་ཡང་དབང་དུ་གྱུར། །མི་མཐུན་གཟུགས་སུ་བརྟགས་པ་ནི། །དྲ་བའི་འདུ་འཕྲོས་དེ་ལུས་བཞིན། །ལུགས་ཀ་བཞིན་དུ་ཧྃ་དུ་བརྟག །དེ་ལས་འོད་བཞིན་མཐིལ་དུ་གཟུང་། །གསང་ནས་ངག་ལམ་ཧྃ་དུ་བྱ། །རླུང་ཟླའི་སྟེང་དུ་མཁས་པས་གཞག །དྲག་པོ་ལྕེ་ཡི་སྦྱོར་བ་ཡིས། །གླིང་ཁམས་གཞན་དུ་ཤིན་ཏུ་གཏང་། །
བདག་ཉིད་ཧཱུྃ་གི་ཚོགས་བཅས་པ། །མ་སྐྱེས་པ་ཡི་ཡི་གེ་བསྒོམ། །བྱ་བ་ཆོས་ཁམས་དེ་ཡི་ཚོགས། །མཱུྃ་དུ་བྱིན་བརླབས་ཡི་གེར་བསྟིམ། །བརྟན་པ་ཨ་ཡི་འཕྲོ་འདུ་ཡིས། །ནམ་མཁའ་བཞིན་དུ་ཤིན་ཏུ་བསྒོམ། །བརྟན་འགྱུར་ཨ་ཡི་སྙིང་པོ་བཟླས། །ཉམས་སུ་ལོན་པར་མ་གྱུར་ཚེ། །འཇུག་པའི་ཡིད་དང་ཉམས་སུ་སྦྱོར། །དང་པོའི་གནས་སུ་ཤེས་པ་དང་། །རྣམ་པ་མང་པོར་མཉམ་དུའོ། །དེ་ལས་མི་སྣང་གཟུགས་ཞི་བ། །རབ་ཏུ་བློ་ཡི་ཐིག་གནས་ནི། །གཞན་དུ་ནམས་ཀྱང་མི་བསྟན་ཅིང་། །གཞོན་དང་སྤྱད་དང་འཚོང་ལ་སོགས། །ལོངས་སྤྱོད་རྣམ་པར་སྦྱོར་བ་དང་། །རྫས་ཀྱི་ནོར་ཕྱིར་མ་ཡིན་ནོ། །རྨོངས་ལ་འཕར་དང་བརྩོན་འགྲུས་ཞན། །ནམས་ཀྱང་སྦྱིན་པར་མ་གསུངས་ཏེ། །སྨད་པ་བམ་གྱི་གཏེར་བཞིན་དུ། །སུས་ཀྱང་ཕྱིན་པར་མ་གསུངས་ལ། །སྲོག་ཆགས་ཁྭ་ཡི་གཏམ་བཞིན་དུ། །ནམས་ཀྱང་སྨྲ་བར་མི་བྱའོ། །བྱེད་པ་རྡོ་རྗེ་གཤའ་ཡི་ཚོགས། །བཞི་བཅུ་རྩ་བཞི་གླིང་བཞིའི་ལམ། །ཀུན་དུ་བཟང་པོ་ཐབས་ཚུལ་བ། །ཚོམ་བུ་གསུམ་གྱི་ལྷ་རྣམས་བསྒོམ། །ཆོས་ཁམས་བྱ་བ་ཨ་ཡི་ཚོགས། །བཞི་བཅུ་རྩ་གཉིས་གླེང་སློང་བ། །ཀུན་དུ་བཟང་མོ་ཤེས་རབ་ཚུལ། །གཤའ་ལ་ཡེ་ཤེས་ཐུགས་ཀྱི་ཐུགས། །ཚོམ་བུ་གསུམ་གྱི་ལྷ་རྣམས་བསྒོམ། །དེ་ནི་ཆོས་ཁམས་ཨ་ལ་བསྟིམ། །ཆོས་ཀྱི་ཆོས་བྱ་བ་ཡི་དབྱིངས། །ཀུན་དུ་བཟང་མོ་བདེ་བའི་ཡུམ། །དེ་ཡི་ངང་དུ་ཚོགས་ཀུན་བརྟགས། །ས་ཆུ་མེ་ཡི་འབྱུང་བ་རྣམས། །དེ་ཡི་དབྱིངས་ནས་འབྱུང་བར་ནི། །འདོད་པའི་བདག་ལ་ཤིན་ཏུ་བརྟག །མི་གནས་ནམ་མཁའི་མཐའ་ཀླས་པར། །གོམས་པར་འདོད་པ་ཐོད་པ་དང་། །ཆུ་ལས་ས་བཞིན་འགྲོ་བ་དང་། །བསྲེག་བྱ་འབར་བའི་དབུས་གནས་དང་། །ཚ་བ་རླུང་གིས་བཏེག་ནས་ཀྱང་། །ཕྱོགས་བཅུ་ཀུན་དུ་ཕྱིན་པར་འགྱུར། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་རྡོ་རྗེ་སྙིང་པོ་ལས་ཐམས་ཅད་ཀྱི་ལེའུ་སྟེ་སུམ་ཅུ་བདུན་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་གསང་བའི་སྙིང་པོ་འདི་བརྟན་པར་འཛིན་པའི་དོན་ཆེད་དུ་བརྗོད་པ་འདི་བརྗོད་དོ། །
དེ་ཉིད་ཆོས་དབྱིངས་མཉམ་སྦྱོར་བས། །སངས་རྒྱས་ཀུན་བདག་བྱིན་གྱིས་བརླབ། །ཀྵ་ལམ་ཨ་ཡི་ཚོན་བཞིན་དུ། །སྒྱུ་འཕྲུལ་དྲ་བའི་དཀྱིལ་འཁོར་བསྒོམ། །ལུགས་སུ་བླུགས་པ་བཞིན་དུ་ནི། །དེ་ཉིད་ཡིད་ལམ་མཆོག་གྲུབ་པའོ། །དེ་ཉིད་གསལ་བར་མཉམ་སྦྱོར་ལས། །སངས་རྒྱས་ཀུན་བདག་བྱིན་གྱིས་བརླབ། །ཨོཾ་ལཱྃ་ཨ་ཡི་ཚོན་བཞིན་དུ། །སྒྱུ་འཕྲུལ་དྲ་བའི་དཀྱིལ་འཁོར་བསྒོམ། །ལུགས་སུ་བླུགས་པ་བཞིན་དུ་ནི། །དེ་ཉིད་གཟུགས་ལམ་མཆོག་གྲུབ་པའོ། །དེ་ཉིད་མཉམ་ཉིད་མཉམ་སྦྱོར་ལས། །སངས་རྒྱས་ཀུན་བདག་བྱིན་གྱིས་བརླབ། །སྭཱྃ་ལྃ་ཨ་ཡི་ཚོན་བཞིན་དུ། །སྒྱུ་འཕྲུལ་དྲ་བའི་དཀྱིལ་འཁོར་བསྒོམ། །ལུགས་སུ་བླུགས་པ་བཞིན་དུ་ནི། །དེ་ཉིད་ཁྱད་པར་ལམ་མཆོག་གོ། །ཆོས་དབྱིངས་རྟོགས་པ་མཉམ་སྦྱོར་ལས། །སངས་རྒྱས་ཀུན་བདག་བྱིན་གྱིས་བརླབ། །ཨོྃ་ལྃ་ཨ་ཡི་ཚོན་བཞིན་དུ། །སྒྱུ་འཕྲུལ་དྲ་བའི་དཀྱིལ་འཁོར་བསྒོམ། །ལུགས་སུ་བླུགས་པ་བཞིན་དུ་ནི། །དེ་ཉིད་གསུམ་ལམ་མཆོག་གྲུབ་པའོ། །ཆོས་དབྱིངས་བྱ་བ་མཉམ་སྦྱོར་བས། །སངས་རྒྱས་ཀུན་བདག་བྱིན་གྱིས་བརླབ། །ཧཱྃ་ལྃ་ཨ་ཡི་ཚོགས་བཞིན་དུ། །སྒྱུ་འཕྲུལ་དྲ་བའི་དཀྱིལ་འཁོར་བསྒོམ། །ལུགས་སུ་བླུགས་པ་བཞིན་དུ་ནི། །དེ་ནི་ཕྲིན་ལས་ཡེ་ཤེས་སོ། །དེ་ལས་ཏིང་འཛིན་སྒྱུ་འཕྲུལ་བསྒོམ། །དྲ་བའི་དཀྱིལ་འཁོར་མཆོག་ཉིད་ནི། །རྩེ་བཅུ་རིགས་ཀྱི་ཕྱག་རྒྱ་བསྒོམ། །དེ་ཉིད་ཧ་དང་ཀྵཿཉིད་དེ། །མཱུྃ་གྱི་ཚོགས་ཀྱི་ལྷ་རྣམས་བསྒོམ། །སངས་རྒྱས་སྒྱུ་འཕྲུལ་མཆོག་ཉིད་ལས། །དྲ་བའི་དཀྱིལ་འཁོར་མངོན་རྫོགས་པ། །དེ་ཉིད་ཧཱུྃ་ལམ་ཕྱག་བསྣམས་པ། །རྩེ་བཅུ་རྒྱན་གྱིས་རྣམ་པར་བརྒྱན། །ཡང་ན་རྩེ་ལྔ་ཐུགས་ཀྱི་ཐུགས། །དབུས་ནས་ཧཱུྃ་གི་ལོ་ཙ་ན། །ལྕགས་ཀྱུ་འཛིན་པར་རྒྱ་བཅིངས་ཤིང་། །ཧཱུྃ་ཧཱུྃ་ཧཱུྃ་གིས་ལན་གསུམ་དུ། །རང་ལུས་ངག་ཡིད་བྱིན་གྱིས་བརླབ། །མཱུྃ་གྱི་ཚོགས་ཀྱི་ལྷ་རྣམས་བསྐུལ། །འབྲུ་ལྔ་རྒྱ་བཅིངས་བྱིན་གྱིས་བརླབ། །བསྐྱེད་པ་རྫོགས་པར་གསོར་བ་ཡིས། །བཞི་བཅུ་རྩ་གཉིས་དཀྱིལ་འཁོར་བྲི། །ཞི་བ་རྒྱས་པ་ལན་
གསུམ་གྱིས། །དེ་འདོད་ལས་རྣམས་གྲུབ་པར་འགྱུར། །བཅུ་པ་དྲག་པོ་མཐིང་གནག་དབུང་། །འགྱིང་བའི་གར་གྱིས་གསོར་བ་ཡིས། །གསུང་སྙན་སྒྲ་ཡི་བྲོ་རྡེབས་པའི། །ཕྱག་རྒྱ་བརྒྱད་དུ་སྦྱོར་བས་ན། །ཕཊ་ཕཊ་ཧཱུྃ་གིས་གསོར་བ་ཡིས། །སྙིང་པོ་ཐུགས་རྟགས་ཕྱག་བསྣམས་པ། །སྐུ་གསུང་ཐུགས་ཀྱི་རྒྱལ་པོ་ལས། །བསོད་ནམས་ལུས་འཇིག་དབང་དུ་འགྱུར། །ཅི་འདོད་རེ་བ་ཐོབ་པར་མཛད། །བརྒྱན་པ་སྒེགས་པ་ཕོ་ཉ་དང་། །ཚངས་པ་དབང་པོ་འདོད་དབང་དང་། །མདོར་ན་བཅུ་གཉིས་གླིང་གི་བདག །དྲག་ཤུལ་མཐུ་ཡི་དྲེགས་པ་ཅན། །སྔགས་ཤིང་བརྒྱལ་ཏེ་བློ་སྟོར་ནས། །བུམ་པ་བཟང་པོ་འབུལ་བར་འགྱུར། །ལྷ་མོ་ཀླུ་མོ་བརྒྱན་པ་དང་། །རྟ་དང་གླང་པོ་བཞོན་པ་དང་། །གནས་དང་རྟེན་དང་བགོ་བ་དང་། །གཙུག་ན་ནོར་བུ་ཡོད་པ་དང་། །ཅི་འདོད་ཡིད་ལ་བསམ་པ་འབུལ། །དེ་ལ་བྲན་བཞིན་བྱེད་པར་འགྱུར། །དེ་ཡི་དགོས་པ་ཐམས་ཅད་ནི། །མ་ལུས་ཀུན་རྫོགས་འགྲུབ་པར་འགྱུར། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་སྒྱུ་འཕྲུལ་ཆེན་པོ་བརྟན་པར་གཟུང་བ་བདུད་རྩི་འབྱུང་བའི་ལེའུ་སྟེ་སུམ་ཅུ་བརྒྱད་པའོ།། །།དེ་ནས་དེ་བཞིན་གཤེགས་པ་སྒྱུ་འཕྲུལ་དྲ་བ་ལས་ཐུགས་རྗེས་འགྲོ་བ་འདུལ་བ་བདུད་རྩི་འབྱུང་བ་ཞེས་བྱ་བ་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །ཨེ་མའོ་ཡེ་ནས་དག་ཆོས་ལ། །ལོག་རྟོག་རྣམ་པ་གཉིས་སུ་འགྲུབ། །ཐམས་ཅད་འབྱུང་བ་ལྔ་ལས་སྐྱེས། །ཐམས་ཅད་གཙང་ཞིང་དྲི་མེད་ལས། །རྣམ་རྟོག་མི་མཐུན་སོ་སོར་གྱུར། །ལ་ལའི་སྨན་ལ་ལ་ལའི་དུག །སྨན་དུ་མ་གྱུར་གང་ཡང་མེད། །ཐམས་ཅད་མ་ལུས་རྒྱུ་གཅིག་ལས། །མི་མཐུན་ཁྱད་པར་སོ་སོར་སྣང་། །སུས་ཀྱང་མ་བྱས་སུ་བྱེད་ཡོད། །རྣམ་རྟོག་ཞགས་པས་སོ་སོར་བཅིང་། །སྡུག་བསྔལ་མ་ལུས་འཁྲུལ་འཁོར་དང་། །ཁམས་གསུམ་ཕྱིན་ཅི་ལོག་བཞི་དང་། །དུས་གསུམ་འགྲོ་ལྔ་ཐམས་ཅད་དང་། །ཉོན་མོངས་སྡུག་བསྔལ་ཐམས་ཅད་སྦྱོང་། །རྣམ་པར་ཐར་པ་ལྟ་རྫོགས་བྱེད། །ས་བཅུ་རྫོགས་ཤིང་སངས་རྒྱས་ས་ཡང་རྫོགས། །དེ་ཕྱིར་སྨན་འདི་བསྒྲུབ་པར་བྱ། །ཀུན་ལ་ཕན་པའི་སྨན་ཡིན་པས། །
དེ་ཕྱིར་ང་དང་བདག་མ་འཛིན། །གཙང་དང་སྨེ་བའི་བློ་རྟོག་བོར། །ཐམས་ཅད་མཉམ་པ་ཉིད་དུ་སྤྱོད། །རྩ་བ་བྱང་ཆུབ་སེམས་ཉིད་རྟོགས། །ཐབས་ཀྱིས་ཕ་རོལ་ཕྱིན་པ་སྤྱོད། །སྙིང་རྗེས་ཆུད་མ་ཟོས་པར་གྱིས། །བདུད་རྩི་མཆོག་ནི་མཉམ་པའི་དབྱིངས། །བདུད་རྩིའི་དོན་ནི་སྐྱེ་ཤི་མེད། །བདུད་རྩི་གནས་ནི་བྱང་ཆུབ་སེམས། །བདུད་རྩི་ལས་ནི་རྣམ་རྟོག་སྦྱོང་། །བདག་དཔལ་ཚོགས་ཤིང་འགྲོ་དོན་མཛད། །སྨན་གྱི་བྱིན་བརླབས་བསམ་མི་ཁྱབ། །ངན་སོང་སྦྱོང་ཞིང་མཐོ་རིས་འགྲུབ། །གསེར་འགྱུར་སྨན་དང་མུན་སེལ་བཞིན། །གཞན་ཡང་དགོས་པ་སྣ་ཚོགས་འགྲུབ། །རྐྱེན་ལས་བྱུང་བའི་དུག་རྣམས་དང་། །རྩ་བའི་དུག་དང་སྦྱར་བའི་དུག །ཀླུ་དུག་སྦོད་གཏོང་དུག་ལ་སོགས། །ཐུགས་རྗེ་ཆེན་པོའི་བྱིན་བརླབས་ཀྱིས། །དུག་རྣམས་ཐམས་ཅད་གདུལ་བའི་ཕྱིར། །དཀྱིལ་འཁོར་མ་ལུས་ཚང་བར་བསྒོམ། །གནས་ལྔ་དག་ཏུ་འབྲུ་ལྔ་བསྟིམ། །ཨོྃ་ཧཱུྃ་ཏྲཱྃ་ཧྲཱིཿཨ། །ཡང་ན་ཡི་གེ་ཨཱྃ་གྱིས་བྱ། །ཡང་ན་ཡི་གེ་ཧྲཱིཿལས་གཏང་། །དུག་རྣམས་བདུད་རྩིར་བསྒྱུར་བར་བྱ། །མཉམ་པའི་དབྱིངས་སུ་ཐིམ་པར་བྱ། །ཨ་ཧོཿརྡོ་རྗེ་གསང་བའི་ཚིག་ཏུའོ། །ཧཱུྃ་བདག་ཉིད་ཞེ་སྡང་རྡོ་རྗེ་སྟེ། །ཐུགས་རྗེས་རྟོག་བདག་འདུལ་བར་བྱེད། །ང་དང་བདག་མེད་དབྱིངས་སྦྱོར་ཞིང་། །བྱམས་པའི་ཐུགས་དང་ལྡན་པའོ། །ཨོྃ་བདག་ཉིད་གཏི་མུག་ཆེན་པོ་སྟེ། །ཡེ་ཤེས་འོད་ཟེར་གསལ་བའི་ངང་། །ཐམས་ཅད་འབྱུང་བའི་འཁོར་ལོ་ཡི། །ཏྲཱྃ་བདག་ཉིད་ང་རྒྱལ་ཡོན་ཏན་ཏེ། །སྙིང་རྗེས་འགྲོ་དོན་འཕེལ་བར་བྱེད། །ཞི་བའི་བློ་ཆེན་དབྱིངས་སུ་སྦྱོར། །ཡོན་ཏན་རྒྱ་མཚོ་དཔག་མེད་པའོ། །ཧྲཱིཿབདག་ཉིད་འདོད་ཆགས་གསུང་མཆོག་སྟེ། །ཉོན་མོངས་ལས་རྣམས་དག་པར་བྱེད། །ཉོན་མོངས་སྡུག་བསྔལ་རྣམ་པར་དག །ཆགས་མེད་སེམས་ནི་བྱང་ཆུབ་པའོ། །ཨཱ་བདག་ཉིད་ལས་ཀྱི་སེམས་དཔའ་སྟེ། །དོན་རྣམས་མ་ལུས་གྲུབ་པར་བྱེད། །ལོག་རྟོག་མ་ལུས་འདུལ་བའི་མཆོག །ཕྱོགས་བཅུ་དུས་བཞི་འཕྲོ་བའི། །མཱུྃ་བདག་ཉིད་ཤེས་རབ་འོད་གསལ་ཏེ། །ལེ་ལོ་ག་ཡིང་བ་
སེལ་བར་བྱེད། །ཐུགས་རྗེ་མྱུར་བ་ལས་བྱུང་བ། །རྒྱལ་བ་ཀུན་དུ་ཐོགས་མེད་པའོ། །ཉོན་མོངས་ལས་རྣམས་དག་བྱེད་ཅིང་། །དབུགས་ཆེན་དག་ཀྱང་འབྱིན་པར་བྱེད། །དུག་རྣམས་སྦྱོང་བ་སྐུ་གསུམ་སྟེ། །ལམ་ལྔ་སྦྱོང་བ་ཡེ་ཤེས་ལྔ། །འཁོར་བའི་རྩད་གཅོད་ཤེས་རབ་མཚོན། །ཧཱུྃ་དུ་བསྡུས་ཤིང་ཧོཿཡིས་གཡེང་། །རྃ་གྱིས་བསྲེགས་ཤིང་ཕཊ་ཀྱིས་འཕང་། །ཐབས་དང་ཤེས་རབ་འབྲེལ་པ་ཡི། །ཐིག་ལེའི་དབྱིངས་སུ་ཐིམ་པར་བྱ། །དེ་ནས་གཉིས་མེད་དབྱིངས་གྱུར་ནས། །ཡེ་ཤེས་སེམས་དཔའི་སྐུ་རུ་བསྒོམ། །འབྲུ་གཅིག་འབྲུ་གསུམ་འབྲུ་ལྔ་བསྒོམ། །བཞི་བཅུ་རྩ་གཉིས་མ་ལུས་དང་། །སངས་རྒྱས་དཀྱིལ་འཁོར་ཚང་བར་བསྒོམ། །ང་མེད་བདག་མེད་ཕྱག་རྒྱར་གསོལ། །དེ་ནས་ལོངས་སྤྱོད་ལྔ་ཀུན་དང་། །ཡེ་ཤེས་ལྔ་དང་རིགས་ལྔ་དང་། །ལྷ་མོ་ལྔ་དང་སྨན་ལྔར་བསྒོམ། །ཨོྃ་ཧཱུྃ་ཏྲཱྃ་ཧྲཱིཿཨཿ ཨོྃ་བཛྲ་ཨ་མྲྀ་ཏེ་ཀུཎྜ་ལི་ཧ་ན་ཧ་ན་ཧཱུྃ་ཕཊ། །ཨོྃ་བི་ཤུད་དྷེ་ཨ་མྲྀ་ཏེ་ཧཱུྃ་ཕཊ། ཨོྃ་དྷརྨ་ཨ་མྲྀ་ཏེ་ཧཱུྃ་ཕཊ། ཨོྃ་ཨཱཿཧཱུྃ་ཞེས་བརྗོད་པས་ཐམས་ཅད་དག་པར་གྱུར། །བདུད་རྩིར་གྱུར། ས་ཆུ་མེ་རླུང་ནམ་མཁའ་རྣམས། །རང་བཞིན་མེད་པར་གཞིག་པའི་ཕྱིར། །གཅིག་ལ་ལྔ་ལྔར་དབྱེ་བྱ་ཞིང་། །མཱུྃ་གྱི་དབྱིངས་སུ་བསྟིམ་པར་བྱ། །འབྱུང་བ་ཆེ་རྣམ་དེ་དག་ལ། །ལྷག་པའི་ཏིང་འཛིན་བསྐྱེད་པར་བྱ། །རིགས་པ་ཐབས་ཀྱི་ཕྱག་རྒྱ་སྟེ། །དེ་བཞིན་གཤེགས་པ་ལྔར་བསྒོམ་ཞིང་། །འབྱུང་བ་སོ་སོའི་མཚན་ཉིད་དེ། །ཡུམ་ལྔ་དག་ཏུ་བསྒོམ་པར་བྱ། །དེ་རིགས་ཡེ་ཤེས་ལྔ་ཉིད་དོ། །རྒྱུར་བྱས་གཟུགས་སོགས་བཞི་བཅུ་གཉིས། །ཕྱི་ནང་སྣོད་བཅུད་ཐམས་ཅད་ཀུན། །དེ་བཞིན་ཉིད་ཀྱི་དབྱིངས་ཉིད་ན། །དེ་ལྟར་གྱུར་ཅིང་སྐྱེས་པ་ཀུན། །སྨོས་ཅི་དགོས་ཏེ་དེ་ཉིད་ཡིན། །ཨ་ཧོཿཨེ་མའོ་ལྷག་པའི་བྱིན་བརླབས་ཀྱིས། །བདག་ལ་ལྷ་རྣམས་བསྡུ་བར་བསྒོམ། །དེ་ནས་ལྷ་དང་གཉིས་མེད་ནས། །བདག་ཉིད་ཡི་གེ་ཨོྃ་དང་མཱུྃ། །གཉིས་དང་བདག་དང་དབྱིངས་སུ་ཐིམ། །བདག་ཉིད་བདུད་རྩི་འཁྱིལ་པར་བསྒོམ། །སྐུ་མདོག་གངས་ལ་ཉི་ཤར་འདྲ། །ཟླ་བ་པདྨ་གདན་ཁྲི་ལ། །ཉི་མ་སྟོང་གི་གདན་
ཁྲི་ལྡན། །ལྷ་དང་ལྷ་མོའི་ཚོགས་ཀྱིས་བསྐོར། །ཁྲོ་བོ་ཁྲོ་མོའི་དཀྱིལ་འཁོར་བཅས། །གནས་དང་ཡུལ་གྱི་ཕྱག་རྒྱས་མཛེས། །སླས་དང་བྱི་མོ་ཚོགས་ཀྱིས་བསྐོར། །ཨ་ཧོ་འཁོར་ལོ་རྩིབས་བཞི་མུ་ཁྱུད་བཅས། །དབུས་སུ་བདུད་རྩི་འཁྱིལ་པ་སྟེ། །ཤར་གྱི་རྩེ་ལ་རྡོ་རྗེའོ། །ལྷོ་ཡི་རྩེ་ལ་རིན་པོ་ཆེ། །ནུབ་ཀྱི་རྩེ་ལ་སྣང་མཐའ་ཡས། །བྱང་གི་རྩེ་ལ་དོན་ཡོད་གྲུབ། །ཐབས་དང་ཤེས་རབ་ལྡན་པར་བསྒོམ། །ཕྱག་རྒྱ་རྣམས་ཀྱང་གསལ་བར་བསྒོམ། །སྙིང་པོ་འབྲུ་ཚིག་གསལ་བར་བཟླས། །དེ་ལ་བདུད་རྩིའི་ཕྱག་རྒྱ་ནི། །བུམ་པ་གང་བ་ཡིད་བཞིན་འབར། །རེ་བ་ཡིད་བཞིན་སྐོང་བར་བྱེད། །ཉོན་མོངས་སྡུག་བསྔལ་སེལ་བར་བྱེད། །འདོད་ལྔ་ཡོན་ཏན་ལྡན་པར་བྱེད། །དངོས་གྲུབ་ཆེན་པོ་བླ་མེད་པའོ། །བདུད་རྩི་ཆར་བཞིན་འབེབས་པར་བྱེད། །སྒོ་བཞི་ཕྱག་རྒྱ་ལྡན་པ་དང་། །ཨ་མྲྀ་ཏ་ཡི་རྒྱུ་ཉིད་ནི། །བྱང་ཆུབ་སེམས་དང་ཤ་ཆེན་དང་། །དྲི་ཆུ་དྲི་ཆེན་མྃ་སར་བཅས། །པདྨ་རཀྟ་ལ་སོགས་དང་། །གཞན་ཡང་དོན་ཡོད་སྣ་ཚོགས་རྣམས། །དབྱེ་འམ་ཡང་ན་མི་དབྱེ་བར། །བདུད་རྩི་ཉིད་དུ་བྱིན་གྱིས་བརླབ། །རྟོག་པའི་བག་ཆགས་སྦྱང་བའི་ཕྱིར། །གཙང་སྨེ་མེད་པར་དག་པར་བྱ། །དབྱིངས་སུ་ཡང་ནི་བསྟིམ་པར་བྱ། །ཕྱག་རྒྱ་འོད་ཟེར་འབར་བར་བསྒོམ། །བཞི་བརྒྱ་རྩ་བཞིའི་ནད་སེལ་ཞིང་། །དུག་གསུམ་སྡུག་བསྔལ་མེད་པ་དང་། །བསྐལ་པ་ཡུན་རིང་གནས་པ་དང་། །དངོས་གྲུབ་ཆེན་པོ་འཐོབ་འགྱུར་ཏེ། །ཚོགས་གཉིས་རྫོགས་པར་ཡང་དག་གསུང་། །བདག་ཉིད་ཡི་གེ་ཧཱུྃ་གྱུར་ནས། །ལོངས་སྤྱོད་ལྔ་ལྡན་ཐམས་ཅད་ལ། །ཨོཾ་ཨཱཿ་ཧཱུྃ་དུ་གྱུར་པར་བསྒོམ། །འོད་འཕྲོ་འབར་ཞིང་ཕྱོགས་བཅུར་སྤྲོ། །སླར་འདུས་འོད་འཕྲོ་བདུད་རྩིར་འབར། །ཤིན་ཏུ་གསལ་ཞིང་རྩེ་གཅིག་བསྒོམ། །གཞན་ཡང་ཡི་གེའི་ཚོགས་པས་གདབ། །འཐུངས་ན་ངན་སོང་སྒྲིབ་པར་བྱང་། །ཏྲ་ཏ། རྟག་བསྟེན་དངོས་གྲུབ་མཆོག་ཀྱང་འགྲུབ། །བཞི་བརྒྱ་རྩ་བཞི་ནད་སེལ་ཅིང་། །ལྷ་ལ་རྟག་ཏུ་མཆོད་བྱས་ན། །བདག་དང་གཉིས་སུ་མེད་པར་འགྱུར། །མི་མཐུན་ཕྱོགས་ལ་གཏོར་བྱས་ན། །དྲག་པོ་གཏུམ་པོའང་
ལྷན་ནེར་འགྱུར། །གཞན་ཡང་དངོས་གྲུབ་ཐམས་ཅད་ཀྱི། །ཇི་ལྟར་དམིགས་པ་བཞིན་དུ་འགྲུབ། །སངས་རྒྱས་གོ་འཕང་ཐོབ་འགྱུར་ན། །ལྷ་སྲིན་ལ་སོགས་སྨོས་ཅི་དགོས། །ཐེ་ཚོམ་མེད་པར་བསྒྲུབ་པར་གྱིས། །རྟག་ཏུ་སྤྱོད་ཅིང་དབྱིངས་སུ་ཐིམ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་སྨན་སྒྲུབ་པའི་ལེའུ་སྟེ་སུམ་ཅུ་དགུ་པའོ།། །།དེ་ནས་དགྱེས་པ་ཆེན་པོས་དེ་དག་གི་བྱིན་གྱི་བརླབས་འབྱུང་བ་ཞེས་བྱ་བ་འདི་ཆེད་དུ་བརྗོད་པ་འདི་བརྗོད་དོ། །དེ་ལ་མཆོད་སྦྱིན་དམ་པ་ནི། །འཕྲུལ་ཆེན་བཞི་བཅུ་རྩ་ལྔ་ཉིད། །ཁམས་དང་འབྱུང་བ་ཉིད་ལ་གནས། །དེ་ཉིད་སྒྱུ་འཕྲུལ་ཐབས་མཁས་པ། །དྲ་བས་མངོན་རྫོགས་སྐུ་གསུང་ཐུགས། །ཐམས་ཅད་མ་ལུས་ཕྱག་རྒྱ་ཉིད། །ཆོས་སྐུ་མཆོག་གི་རྟེན་གྱུར་པ། །ཕྱོགས་བཅུ་གང་བར་གསལ་བར་བསྒོམ། །དེ་ཉིད་ངག་ལམ་ཀུན་ཁེངས་པར། །ཧཱུྃ་གི་ཚོགས་སུ་རྣམ་པར་བསྒོམ། །ལུས་ཉིད་ཧཱ་ཡི་ཚོགས་ལ་བསྟིམ། །གང་ལ་བྱ་བའི་གཟུགས་བཟུང་བས། །ཁ་དོག་ནག་པོའི་ཚོན་ཕྱེ་ཡིས། །དེ་ཡི་སྙིང་ནང་བདག་ཞུགས་ལ། །ཛཿཞེས་བྱ་བའི་སྔགས་བཟླས་ནས། །མགྱོགས་སུ་འགྲོ་བར་ལྕགས་ཀྱིས་སྤང་། །དྲི་རྣོ་སྔ་བས་མགྱོགས་པ་དང་། །གང་དུ་བྱ་བ་བྱིན་པར་བྱེད། །དེ་ཡི་ལུས་ལས་འབྱུང་འདོད་ན། །ཞི་བས་བདག་གི་གཟུགས་བཟུང་ལ། །དལ་བུས་ཧཱུྃ་ཞེས་བསྡུས་པ་ཡིས། །བདག་གི་ལུས་ལ་ཆུད་པར་འགྱུར། །ཐམས་ཅད་མ་ལུས་ཕྱག་རྒྱ་ཉིད། །ཆོས་སྐུ་མཆོག་གི་རྟེན་གྱུར་པ། །ཕྱོགས་བཅུ་གང་བར་གསལ་བར་བསྒོམ། །དེ་ཉིད་ངག་ལམ་ལུས་ཁེངས་པར། །ཨོྃ་གྱི་ཚོགས་སུ་ཤིན་ཏུ་བསྒོམ། །ལུས་ཉིད་ཨཿཡི་ཚོགས་ལ་བསྟིམ། །གང་ལ་བྱ་བའི་གཟུགས་བཟུང་ནས། །ཁ་དོག་དཀར་པོའི་ཚོན་ཕྱེ་ཡིས། །དེ་ཡི་སྙིང་ནང་བདག་ཞུགས་ལ། །ཧཱུྃ་ཞེས་བྱ་བའི་སྔགས་བཟླས་ནས། །མང་པོས་བཀུར་བ་རྒྱལ་ཆེན་པོ། །བློ་རྣོ་ཡིད་མཛངས་བཞིན་བཟངས་དང་། སྔ་བས་ལོངས་སྤྱོད་འདུ་བ་དང་། །གནས་པར་དགའ་བ་བཞིན་དུ་འགྱུར། །དེ་ཡི་ལུས་ལས་འབྱུང་འདོད་ན། །ཞི་
བས་བདག་གི་གཟུགས་བཟུང་ལ། །དལ་བུས་ཨོྃ་ཞེས་བསྡུས་པ་ཡིས། །བདག་གི་ལུས་ལ་གཟུད་པར་འགྱུར། །ཐམས་ཅད་མ་ལུས་ཕྱག་རྒྱ་ཉིད། །ཆོས་སྐུ་མཆོག་གི་རྟེན་གྱུར་པ། །ཕྱོགས་ཀུན་གང་བར་གསལ་བར་བསྒོམ། །དེ་ཉིད་ངག་ལམ་ཀུན་ཁེངས་པར། །སྭཱྃ་གྱི་ཚོགས་སུ་རབ་ཏུ་བསྒོམ། །ལུས་ཉིད་སྭཱྃ་གྱི་ཚོགས་ལ་བསྟིམ། །གང་ལ་བྱ་བའི་གཟུགས་བཟུང་ནས། །ཁ་དོག་སེར་པོའི་ཚོན་ཕྱེ་ཡིས། །དེ་ཡི་སྙིང་ནང་བདག་ཞུགས་ལ། །སྭཱྃ་ཞེས་བྱ་བའི་སྔགས་བཟླས་ནས། །ནོར་མང་བློན་པོ་ཡིད་མཛངས་ལ། །བློ་རྣོ་སྔ་བས་ལོངས་སྤྱོད་འདུད། །དེ་ཡི་འཁོར་ལ་ལོངས་སྤྱོད་ཅིང་། །གནས་པར་དགའ་བ་བཞིན་དུ་འགྱུར། །དེ་ཡི་ལུས་ལས་འབྱུང་འདོད་ན། །རྒྱས་བས་བདག་གི་གཟུགས་བཟུང་ལ། །དལ་བུས་སྭཱྃ་ཞེས་བརྗོད་པ་ཡིས། །བདག་གི་ལུས་ལ་ཚུད་པར་འགྱུར། །ཐམས་ཅད་མ་ལུས་ཕྱག་རྒྱ་ཉིད། །ཆོས་སྐུ་མཆོག་གི་རྟེན་གྱུར་པ། །ཕྱོགས་བཅུ་གང་བས་གསལ་འབར་བསྒོམ། །དེ་ཉིད་དག་ལ་ལུས་ཁེངས་པར། །ཨཱྃཿགྱི་ཚོགས་སུ་ཤིན་ཏུ་བསྒོམ། །ལུས་ཉིད་ཨཱྃཿགྱི་ཚོགས་ལ་བསྟིམ། །གང་ལ་བྱ་བའི་གཟུགས་བཟུང་ནས། །ཁ་དོག་དམར་པོའི་ཚོན་ཕྱེ་ཡིས། །དེ་ཡི་སྙིང་ནང་བདག་ཞུགས་ལ། །ཨཱྃཿཞེས་བྱ་བའི་སྔགས་བཟླས་ནས། །རྒྱལ་མོ་ཞང་བློན་དབང་ཆེན་དང་། །ཅི་འདོད་ཡིད་བཞིན་དབང་དུ་འགྱུར། །དེ་ཡི་འཁོར་ལ་ལོངས་སྤྱོད་ཅིང་། །གནས་པར་དགའ་བ་བཞིན་དུ་འགྱུར། །དེ་ཡི་གཟུགས་ལས་འབྱུང་འདོད་ན། །དབང་གིས་བདག་གི་གཟུགས་བཟུང་ལ། །དལ་བུས་ཨཱྃཿཞེས་བརྗོད་པ་ཡིན། །བདག་གི་ལུས་ལ་ཚུད་པར་འགྱུར། །ཐམས་ཅད་མ་ལུས་ཕྱག་རྒྱ་ཉིད། །ཆོས་སྐུ་མཆོག་གི་རྟེན་གྱུར་པ། །ཕྱོགས་ཀུན་གང་བར་གསལ་བར་བསྒོམ། །དེ་ཉིད་ངག་ལམ་ལུས་ཁེངས་པར། །ཧཱྃ་གྱི་ཚོགས་སུ་ཤིན་ཏུ་བསྒོམ། །ལུས་ཉིད་ཧཱྃ་ཡི་ཚོགས་ལ་བསྟིམ། །གང་ལ་བྱ་བའི་གཟུགས་བཟུང་ནས། །ཁ་དོག་ལྗང་གུའི་ཚོན་ཕྱེ་ཡིས། །དེ་ཡི་སྙིང་ནང་བདག་ཞུགས་ལ། །ཧཱྃ་ཞེས་བྱ་བའི་སྔགས་བཟླས་ནས། །ལས་ཀྱི་རིགས་ཆེན་གང་
འདོད་གཟུགས། །དམག་མང་མཐུ་དཔུང་གོ་མཚོན་བཟང་། །ཞེ་སྡང་ཅན་རྣམས་འདུལ་བར་འགྱུར། །འདོད་ཆགས་ཅན་རྣམས་འདུ་བ་དང་། །ང་རྒྱལ་ཆེན་པོ་འདུད་པར་འགྱུར། །དེ་ཡི་བསྟན་པ་འཛིན་པར་བྱེད། །དེ་ཡི་འཁོར་ལ་ལོགས་སྤྱོད་ཅིང་། །གནས་པར་དགའ་བ་བཞིན་དུ་འགྱུར། །དེ་ཡི་ལུས་ལས་འབྱུང་འདོད་ན། །སྙོམས་པས་ཁྲོ་ཡི་གཟུགས་བཟུང་ལ། །དལ་བུས་ཧྃ་ཞེས་བརྗོད་པ་ཡིས། །མི་སྣང་བ་ཡི་གཟུགས་སུ་འཆར། །བདག་གི་ལུས་ལ་ཆུད་པར་འགྱུར། །གླིང་ངམ་དུར་ཁྲོད་གནས་རྣམས་སུ། །ང་ཡི་འདོད་པ་ཆོས་དབང་གིས། །སྒྱུ་འཕྲུལ་དཀྱིལ་འཁོར་མཆོག་འཛིན་ལ། །དྲ་བའི་དཀྱིལ་འཁོར་ཡོངས་ཀྱིས་འབྱུང་། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་འབྱུང་བའི་ལེའུ་སྟེ་བཞི་བཅུ་པའོ།། །།དེ་ནས་བཅོམ་ལྡན་འདས་དཔལ་ཀུན་དུ་བཟང་པོས་ཉིད་ཀྱི་ཆེ་བའི་ཡོན་ཏན་སྟོན་པའི་ཕྱིར་འགྲོ་བའི་སེམས་ཅན་གྱི་དོན་ཆེད་དུ་དེ་བཞིན་ཉིད་ཀྱི་དབྱིངས་འདི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །དཔལ་ཉིད་ཀྱི་མཆོག་རིགས་ཀྱི་ཡུམ། །དབབ་པར་བྱ་བའི་གཟུགས་བརྙན་ལ། །སྤྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་མཱུྃ་དུ་བརྟགས། །དེ་ཉིད་གོམས་ལས་གསང་མཚན་པ། །མཱུྃ་གྱི་ཚོགས་ཀྱི་ལྷ་རྣམས་བསྒོམ། །དེ་ཉིད་མཐའ་བྲལ་མི་དམིགས་ལས། །དེ་ཟླའི་ངང་ཚུལ་དེ་བཟུང་ནས། །སངས་རྒྱས་རྡོ་རྗེ་ཙ་ན་ཀ །ཤེས་རབ་ཡུམ་དང་ལྡན་པར་བསྒོམ། །ལམ་དུ་ཞུགས་ལ་དེ་ལུས་དགང་། །དེ་གོམས་བློ་བདེ་གསལ་སྤྲོ་ཐིམ། །དེ་བཞིན་རིགས་རྣམས་ཨོྃ་དུ་བསྒོམ། །སྣོད་གནས་བདེ་ལྡན་ཁེངས་གྱུར་པ། །ཡུམ་གྱི་ཚོགས་ཀྱང་གསལ་བར་གནས། །ཕྱག་རྒྱ་སྙིང་པོ་གཟུགས་ལ་སོགས། །རིགས་དང་མཐུན་པར་རྣམ་པར་བསམ། །བརྟན་པ་ཨཱཿཡི་འཕྲོ་འདུ་ལྟར། །རྣམ་ཤེས་བྱིན་བརླབས་ངང་དུ་བརྟགས། །གཞི་རྩ་མེད་པའི་སེམས་ཉིད་ལས། །ཡིད་བཞིན་ཡི་གེའི་སྤྲིན་ཚོགས་བསྒོམ། །ཕྱག་རྒྱ་ཤིན་ཏུ་གསལ་བ་ན། །ཉེ་བའི་བསྙེན་པ་ཡིན་པར་བསྒྲགས། །འཕྲོ་འདུ་རིགས་དང་
མཐུན་པའི་གྲངས། །བསྒོམས་ནས་བཟླས་དང་མངོན་སུམ་ན། །ལྕགས་ཀྱུ་མཆོག་གི་ཕྱག་རྒྱ་བཅིང་། །དེས་ནི་འདོད་པ་བཞིན་དུ་འགྱུར། །རང་བཞིན་སྐུ་གསུང་འདུས་མ་བྱས། །གཞན་དབང་མ་ཡིན་རྡོ་རྗེ་རིགས། །དཔལ་ལྡན་རྡོ་རྗེ་སྒྱུ་འཕྲུལ་ཡུམ། །ཤིན་ཏུ་ཆོས་ཀྱིས་བསྒྲགས་པ་ལ། །གསལ་བར་འདོད་པ་སྨྲ་བྱ་བ། །སྤྱི་གཙུག་ཁ་དང་སྙིང་ག་མཚན། །འབྲུ་ལྔར་བྱིན་བརླབས་ལཱྃ་དུ་བརྟགས། །དེ་ཉིད་གོམས་ལས་གསང་མཚན་པ། །ལཱྃ་གྱི་ཚོགས་ཀྱི་ལྷ་རྣམས་བསྒོམས། །སངས་རྒྱས་སྤྱན་གྱི་སྦྱོར་བ་ལས། །རྒྱལ་བ་ཐམས་ཅད་བྱིན་གྱིས་རློབ། །དེ་ཉིད་མཐའ་བྲལ་མི་དམིགས་ལས། །རང་བཞིན་མཆོག་གི་གཟུགས་བཅས་ནས། །སངས་རྒྱས་རྡོ་རྗེ་ཙ་ན་ཀ། །ཤེ་རབ་ཡུམ་དང་ལྡན་པར་བསྒོམ། །དེ་ལས་རྡོ་རྗེར་བྱིན་བརླབས་ཏེ། །པདྨ་གསང་ནས་འཛུམ་ཐབས་ཡིན། །སྦུབས་ནས་ཞུགས་ལ་དེ་ལུས་དགང་། །དེ་གོམས་བློ་བདེ་གསལ་སྤྲོ་ཐིམ། །རྡོ་རྗེ་རིགས་རྣམས་ཧཱུྃ་དུ་བསྒོམ། །སྣོད་གནས་བདེ་ལྡན་ཁེངས་གྱུར་པར། །ཡུམ་གྱི་ཚོགས་ཀྱང་གསལ་བར་གནས། །ཕྱག་རྒྱ་སྙིང་པོ་གཟུགས་ལ་སོགས། །རིགས་དང་མཐུན་པར་ཤིན་ཏུ་བསམ། །བརྟན་བ་ཧཱ་ཡི་འཕྲོ་འདུ་ལྟར། །རྣམ་ཤེས་བྱིན་བརླབས་ངང་དུ་བརྟགས། །གཞི་རྩ་མེད་པའི་སེམས་ཉིད་ལས། །ཡིད་བཞིན་ཡི་གེ་སྤྲིན་ཚོགས་བསྒོམ། །ཕྱག་བྱ་གསལ་བ་ཉེ་བསྙེན་པ། །འཕྲོ་འདུ་རིགས་དང་མཐུན་པའི་གྲགས། །སྒོམ་དང་བཟླས་དང་མངོན་སུམ་ན། །ལྕགས་ཀྱུའི་སྟངས་ཀྱིས་བསྐུལ་བར་གསུངས། །རྗེས་སུ་ཆགས་པའི་ཕྱག་རྒྱ་ཡིས། །རིགས་དང་མཐུན་པའི་འཕྲོ་འདུ་བསྒོམ། །ཡོན་ཏོན་སྐུ་གསུང་ཡིད་བཞིན་གཏེར། །དཔལ་ལྡན་སྒྱུ་འཕྲུལ་མཆོག་ཆེན་མོ། །ཆས་ཤིང་བསྒྲེགས་པའི་གཟུགས་བརྙན་ནི། །ལྗོན་པ་ལྕུག་ཕྲན་ལ་སོགས་ལ། །དབབ་པ་མཆོག་གི་ལས་བྱ་བ། །སྦྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་ཨོཾ་དུ་བརྟགས། །དེ་ཉིད་གོམས་ལས་གསང་མཚན་པ། །ཨོཾ་གྱི་ཚོགས་ཀྱི་ལྷ་རྣམས་བསྒོམ། །སངས་རྒྱས་མེ་ཡི་སྦྱོར་བ་ལས། །
རྒྱལ་པ་ཐམས་ཅད་བྱིན་གྱིས་རློབ། །དེ་ཉིད་མཐའ་བྲལ་མི་དགྱེས་ལས། །ཡོན་ཏན་གཏེར་གྱི་གཟུགས་བཅས་ན། །སངས་རྒྱས་རིན་ཆེན་ཙ་ན་ཀ། །ཤེས་རབ་ཡུམ་དང་ལྡན་པར་བསྒོམ། །དེ་ལས་རྡོ་རྗེར་བྱིན་བརླབས་ཏེ། །པདྨ་གསང་ནས་འཛུམ་ཐབས་ཡིན། །སྦུབས་སུ་ཞུགས་ལ་དེ་ལུས་དགང་། །དེ་གོམས་བློ་བདེ་གསལ་སྤྲོ་ཐིམ། །རིན་ཆེན་རིགས་རྣམས་སྭཱྃ་དུ་བསྒོམ། སྣོད་གནས་བདེ་ལྡན་ཁེངས་གྱུར་པ། །ཡུམ་གྱི་ཚོགས་ཀྱང་གསལ་བར་གནས། །ཕྱག་རྒྱ་སྙིང་པོ་གཟུགས་ལ་སོགས། །རིགས་དང་མཐུན་པར་ཤིན་ཏུ་བསམ། །བརྟན་པ་སྭཱྃ་གྱི་འཕྲོ་འདུ་ལྟར། །རྣམ་ཤེས་བྱིན་བརླབས་ངང་དུ་བརྟགས། །གཞི་རྩ་མེད་པའི་སེམས་ཉིད་ལས། །ཡིད་བཞིན་ཡི་གེ་སྤྲིན་ཚོགས་བསྒོམ། །ཕྱག་རྒྱ་གསལ་བ་ཉེ་བསྙེན་པ། །འཕྲོ་འདུ་རིགས་དང་མཐུན་པ་ནི། །བསྒོམས་ནས་བཟླས་དང་མངོན་སུམ་ན། །དམ་ཚིག་ཞགས་པ་མཆོག་གིས་བཅིང་། །རྗེས་སུ་ཆགས་པའི་ཕྱག་རྒྱ་བཞི། །རིགས་དང་འདུ་འཕྲོ་མཐུན་པར་བསྒོམ། །གསོ་དང་གསད་དང་ཕམ་དང་རྒྱལ། །གཞན་དུ་འགྲོ་དང་འདུག་པ་དང་། །ཅི་འདོད་འོང་དང་སྨྲ་ཡང་རུང་། །མཚོན་དང་འཇིགས་པ་མང་བ་དང་། །བཅིངས་པའི་ལས་དང་མཚོན་ལས་ཐར། །དཔལ་ལྡན་པདྨ་མཆོག་གི་ཡུམ། །བདེ་ཆེན་གར་དབང་གཟུགས་འཛིན་པ། །དབབ་པར་བྱ་བའི་གཟུགས་བརྙན་ནི། །ལྗོན་པའི་ལྕུགས་ཕྲན་ལ་སོགས་ལ། །དང་པོར་གནས་ལྔ་བྱིན་གྱིས་རློབ། །དེ་ནས་གནས་ལྔ་ཤེས་རབ་བསྒོམ། །སྤྱི་གཙུག་ཁ་དང་སྙིང་ག་མཚན། །ལས་བཞི་འབྲུ་བའི་བྃ་དུ་བརྟགས། །དེ་ཉིད་གོམས་ལས་གསང་མཚན་པ། །བྃ་གྱི་ཚོགས་ཀྱི་ལྷ་རྣམས་བསྒོམ། །སངས་རྒྱས་ཆུ་ཡི་སྦྱོར་བ་ལས། །རྡོ་རྗེ་གསུང་རྣམས་བྱིན་གྱིས་རློབ། །དེ་ཉིད་མཐའ་བྲལ་མི་དམིགས་ལས། །རྡོ་རྗེ་གསུང་གི་གཟུགས་བཅས་ནས། །སངས་རྒྱས་གསུང་ཆེན་ཙ་ན་ཀ། །ཤེས་རབ་ཡུམ་དང་ལྡན་པར་བསྒོམ། །དེ་ལས་རྡོ་རྗེར་བྱིན་བརླབས་ཏེ། །པདྨ་གསང་ནས་འཛུལ་ཐབས་ཡིན། །སྦུབས་སུ་ཞུགས་ལ་དེ་ལུས་དགང་། །
དེ་གོ་མས་བློ་བདེ་གསལ་སྤྲོ་ཐིམ། །མིང་དང་སྙིང་པོ་བཅས་པས་དགུག །རྡོ་རྗེ་གསུང་རྣམས་ཨོྃ་དུ་བསྒོམ། །སྣོད་གནས་བདེ་ལྡན་ཁེངས་གྱུར་པར། །ཡུམ་གྱི་ཚོགས་ཀྱང་གསལ་བར་གནས། །ཕྱག་རྒྱ་སྙིང་པོ་གཟུགས་ལ་སོགས། །རིགས་དང་མཐུན་པར་ཤིན་ཏུ་བསམ། །བརྟན་པ་ཨོྃ་གྱི་འཕྲོ་འདུ་ལྟར། །རྣམ་ཤེས་བྱིན་བརླབས་དང་དུ་བརྟགས། །གཞི་རྩ་མེད་པའི་སེམས་ཉིད་ལས། །ཆོས་དབང་ཡི་གེ་སྤྲིན་ཚོགས་བསྒོམ། །ཕྱག་རྒྱ་གསལ་བར་ཉེ་བསྙེན་པ། །འཕྲོ་འདུ་རིགས་དང་མཐུན་པར་ནི། །བསྒོམས་ནས་བཟླས་དང་མངོམ་སུམ་ན། །ཆགས་པའི་ལྕགས་སྒྲོག་མཆོག་གིས་བཅིང་། །ཆགས་པ་ཆེན་པོའི་ཕྱག་རྒྱ་བཞིས། །རིགས་དང་མཐུན་པ་ཉིད་དུ་བསྒོམ། །ཞི་བ་དབང་དང་དྲག་པོ་རྒྱས། །ཅི་འདོད་པར་ནི་རབ་ཏུ་བསྔགས། །དཔལ་ལྡན་འགྲུབ་པ་སྒྱུ་འཕྲུལ་པ། །དབབ་པར་བྱ་བའི་གཟུགས་བརྙན་ནི། །ལྗོན་པ་མཆོག་དང་འབྲིང་རྣམས་ལ། །སྤྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་ཧཱྃ་དུ་བརྟགས། །དེ་ནི་ཨེ་ཡི་ཚོགས་ཡིན་ཏེ། །དེ་ཉིད་གོམས་ལས་གསང་མཚན་པ། །མེ་ཡི་ཚོགས་ཀྱི་ལྷ་རྣམས་བསྒོམས། །དེ་ཉིད་སྟེང་གི་ལྷ་རྣམས་ཏེ། །བདག་མེད་མཐའ་བྲལ་མི་དམིགས་ལས། །དོན་ཡོད་དང་ཚུལ་དེ་བཟུང་ནས། །དོན་ཡོན་མཆོག་གི་ཙ་ན་ཀ། །ཤེས་རབ་ཡུམ་དང་ལྡན་པར་བསྒོམ། །དེ་ལས་རྒྱ་གྲམ་བྱིན་བརླབས་ཏེ། །པདྨ་གསང་ནས་འཛུལ་ཐབས་ཡིན། །སྦུབས་སུ་ཞུགས་ལ་དེ་ལུས་དགང་། །རྒྱ་གྲམ་ཚོན་གྱིས་ཁེངས་པ་དང་། །སོ་སོའི་སྙིང་པོས་མིང་ཡང་དགུག །དེ་གོམས་བློ་བདེ་གསལ་སྤྲོ་ཐིམ། །རྡོ་རྗེ་ལ་ལ་རྣམས་ཧཱྃ་བསྒོམ། །སྣོད་གནས་བདེ་ལྡན་ཁེངས་གྱུར་པར། །ཡུམ་གྱི་ཚོགས་ཀྱང་གསལ་བར་གནས། །ཕྱག་རྒྱ་སྙིང་པོ་གཟུགས་ལ་སོགས། །རིགས་དང་མཐུན་པ་ཉིད་དུ་བསྒོམ། །བརྟན་པ་ཧཱྃ་གྱི་འཕྲོ་འདུ་ལྟར། །རྣམ་ཤེས་བྱིན་བརླབས་ངང་དུ་བརྟགས། །གཞི་རྩ་མེད་པའི་སེམས་ཉིད་ལས། །གྲུབ་པ་སྒྱུ་འཕྲུལ་སྤྲིན་ཚོགས་བསྒོམ། །ཕྱག་རྒྱ་གསལ་བ་ཉེ་བསྙེན་པ། །འཕྲོ་འདུ་རིགས་དང་མཐུན་
པར་ནི། །བསྒོམས་ནས་བཟླས་དང་མངོན་སུམ་ནི། །དགྱེས་པ་གཪ་གྱི་གསུང་སྙན་ཅིང་། །རྗེས་སུ་ཆགས་པའི་ཕྱག་རྒྱ་བཞིས། །རིགས་དང་མཐུན་པ་ཉིད་དུ་བསྒོམ། །ཕྱོགས་སུ་འགྲོ་དང་དཔྲོག་པ་དང་། །ཚེ་བསྟུང་བ་དང་ལས་རྣམས་དང་། །མངོན་སུམ་ཅི་འདོད་སྨྲ་བའི་མཆོག །རིགས་ཀྱི་ཡུམ་དང་རྩེན་པར་འགྱུར། །སྲིད་པ་ལས་འཕགས་མྱ་ངན་འདས། །ཏིང་འཛིན་འདི་ཡིས་བྱེད་པར་འགྱུར། །ཞེས་བརྗོད་པས་རྣམ་པར་སྨིན་པའི་ཚོགས་དེ་བཞིན་གཤེགས་པའི་ཆེ་བའི་ཡོན་ཏན་ཉིད་དུ་མཁྱེན་ཏོ། །མཁྱེན་ནས་དེ་བཞིན་ཉིད་ཀྱི་དབྱིངས་སྐུ་དང་གསུང་དང་ཐུགས་རྡོ་རྗེ་ལས་རྡོ་རྗེ་གསང་བའི་ཚིག་འདི་ཕྱུང་ངོ་། །ཨ་ཧོཿབསམ་བྱ་བསམ་པར་ཟིན་པ་ཡི། །བསམ་པས་མི་ཟིན་བསམ་མི་ཁྱབ། །བསམ་ཡས་ལྷུན་གནས་མི་གཡོ་དཔག་མེད་བསམ་མི་ཁྱབ། །རྒྱུ་དང་འབྲེལ་པའི་རྐྱེན་དུ་ཤེས་པའི་དབྱིངས་ཉིད་ཟད་མི་ཤེས། །ངོ་མཚར་སྲིད་ལམ་མཐའ་བྲལ་དམིགས་མེད་པ། །དེ་ཉིད་ཡོན་ཏན་མཆོག་གི་འཁོར་ལོ་ལམ་མཆོག་ཡིན། །ཨ་ཧོཿ། རྡོ་རྗེ་གསང་བའི་ཚིག་ཏུའོ། །བཅོམ་ལྡན་འདས་དཔལ་ཀུན་དུ་བཟང་པོ་དེ་བཞིན་ཉིད་ཀྱི་དབྱིངས་ནས་ཆེ་བའི་ཡོན་ཏན་སྟོན་པ་ཞེས་བྱ་བའི་ལེའུ་སྟེ་བཞི་བཅུ་གཅིག་པའོ།། །།དེ་ནས་བཅོམ་ལྡན་འདས་དཔལ་ཀུན་དུ་བཟང་པོས་ཆེ་བའི་ཡོན་ཏན་སྟོན་པའི་སྒྱུ་འཕྲུལ་ཆེན་པོ་གསུང་གི་དཀྱིལ་འཁོར་བྱིན་གྱིས་རློབ་པ་ཞེས་བྱ་བ་ཆོ་ག་དང་བཅས་པ་འདི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །དབབ་པ་མཆོག་གི་དཀྱིལ་འཁོར་རྣམས། །ཁ་དོག་གྲངས་བཅས་མ་བརླམས་པས། །ཤེས་པ་བློ་ཆེ་ཁོངས་ཡངས་ལ། །ཟབ་པར་སྤྱོད་ལ་མི་སྐྱོ་བར། །ཟས་སྲུང་གོས་རྗེས་དམ་ཟས་སྦྱིན། །དུང་ཆེན་སྣོད་དུ་ཆུ་ཡིས་བསིང་། །རྟེན་དུ་རུང་བར་ཏིང་འཛིན་དང་། །དབང་དང་སྒྲུབ་པ་མཆོག་ཀྱང་བསྟན། །མི་སྨྲ་གསང་བའི་དམ་ཚིག་དབོག །ཨོྃ་དང་མཱུྃ་གྱི་བློ་བསྟན་ནས། །གསང་བས་མཚན་མ་ལྔ་ནས་སྦྱང་། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །ཕུང་པོ་ཁམས་དང་སྐྱེ་མཆེད་སྦྱར། །ལོངས་སྤྱོད་ལྔ་ལྡན་
མཆོད་སྦྱིན་བྱ། །རྡོ་རྗེ་ངག་ལམ་གསུང་ཆེན་བཟླས། །ཨོཾ་སརྦ་ཏ་ཐཱ་ག་ཏ་ཛཱི་ན་ཨོཾ་། ཨོཾ་བཛྲ་ཀུ་ལ་ཧཱུྃ་བཛྲ། ཨོཾ་སརྦ་ཏ་ཐཱ་ག་ཏ་སྭཱྃ་རཏྣ་སྭཱྃ། ཨོཾ་པདྨ་ཏ་ཐཱ་ཧྲྀ་ད་ཡ་ཨཱ་རོ་ལིཀ །ཧཱ་པྲཛྙཱ་ཧཱྃ། དྷཱ་ཏྭཱི་ཤྭ་རི་མཱུྃ། དྭེ་ཥ་ར་ཏི་ལཱྃ། མོ་ཧ་ར་ཏི་ཨཱྃ། རཱ་ག་ར་ཏི་པཱྃ། བཛྲ་ར་ཏི་ཏཱྃ། མཱུྃ་མཱུྃ་མཱུྃ། ལཱྃ་ལཱྃ་ལཱྃ། ཨཱྃཿཨཱྃཿཨཱྃཿ། པཱྃ་པཱྃ་པཱྃ། ཏཱྃ་ཏཱྃ་ཏཱྃ། ཨེ་བྃ་མ་ཡ། བ་བ་བ་བ་བ། ཛྲ་ཛྲ་ཛྲ་ཛྲ་ཛྲ། ས་ས་ས་ས་ས། མ་མ་མ་མ་མ། ཡ་ཡ་ཡ་ཡ་ཡ། སྟྭྃ་ཧོཿཞེས་བརྗོད་པས་འཇིག་རྟེན་དྲུག་གི་ཕྱོགས་བཅུ་མཐའ་ཡས་པར་དམ་ཚིག་ཐམས་ཅད་ཀྱི་མཆོག །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྗེའི་བདག་ཉིད་དབྱིངས་ཀྱི་དབང་ཕྱུག་མ་ཆེན་མོ་དང་། །སྤྱན་ཆེན་མོ་དང་། མཱ་མ་ཀཱི་ཆེན་མོ་དང་། །གོས་དཀར་མོ་ཆེན་མོ་དང་། དམ་ཚིག་འཕགས་མ་སྒྲོལ་མ་ཆེན་པོའི་རང་བཞིན་ཉིད་དུ་ཀུན་དུ་སྣང་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད་དབབ་པའི་གསུང་གི་འཁོར་ལོ་ཞེས་བྱ་བའི་ལེའུ་སྟེ་བཞི་བཅི་བཅུ་གཉིས་པའོ།། །།དེ་ནས་བཅོམ་ལྡན་འདས་དཔལ་ཀུན་དུ་བཟང་པོས་སྒྱུ་འཕྲུལ་ཆེན་པོའི་བྱིན་བསྡུ་བ་ཞེས་བྱ་བའི་དམ་ཚིག་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་སྒྱུ་འཕྲུལ་དྲ་བ་ལས་ཕྱུང་ངོ་། །སྒེག་མོ་མཆོད་པ་བྱིན་བསྡུ་བ། །གཟུགས་སྟོན་དབབ་པར་བྱ་བ་ནི། །རིགས་དང་མཐུན་པའི་གཟུགས་བརྙན་ལ། །སྤྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་ཡ་ཉིད་སྦྱིན། །དེ་ཉིད་པདྨའི་དཀྱིལ་འཁོར་ཡིན། །དེ་ཉིད་གོམས་ལ་གསང་མཚན་པ། །ཡ་ཡི་ཚོགས་ཀྱི་ལྷ་རྣམས་བསྒོམ། །དེ་ཉིད་ཧཱུྃ་གི་ལྷ་རྣམས་ཏེ། །བདག་མེད་མཐའ་བྲལ་མི་དམིགས་ལས། །རང་གི་ངང་ཚུལ་དེ་བཟུང་ནས། །སངས་རྒྱས་རྡོ་རྗེ་ཙ་ན་ཀ། །ཤེས་རབ་ཡུམ་དང་ལྡན་པར་བསྒོམ། །དེ་ལས་རྡོ་རྗེར་བྱིན་བརླབས་ཏེ། །པདྨ་གསག་ནས་འཛུལ་ཐབས་ཡིན། །སྦུབས་སུ་ཞུགས་ལ་དེ་ལུས་དགང་། །རྡོ་རྗེ་ཚོན་གྱིས་ཁེངས་པ་དང་། །
སོ་སོའི་སྙིང་པོ་མིང་ཡང་བོད། །དེ་གོམས་བློ་བདེ་གསལ་སྤྲོ་ཐིམ། །མིང་ཡང་སྙིང་པོ་བཅས་པས་དགུག །རྡོ་རྗེ་ལྷ་རྣམས་ཧཱུྃ་དུ་བསྒོམ། །སྣོད་ནས་སྒེག་མོ་ཁེངས་གྱུར་པར། །ཡུམ་གྱི་ཆོགས་ཀྱང་གསལ་བར་གནས། །ཕྱག་རྒྱ་སྙིང་པོ་གཟུགས་ལ་སོགས། །རིགས་དང་མཐུན་པ་ཉིད་དུ་བསམ། །བརྟན་པ་ཧཱ་ཡི་འཕྲོ་འདུ་ལྟར། །རྣམ་ཤེས་བྱིན་བརླབས་ངང་དུ་བརྟགས། །གཞི་རྩ་མེད་པའི་སེམས་ཉིད་ལས། །སངས་རྒྱས་རྡོ་རྗེའི་སྤྲིན་ཚོགས་བསྒོམ། །ཕྱག་རྒྱ་གསལ་བ་ཉེ་བསྙེན་པ། །འཕྲོ་འདུ་རིགས་དང་མཐུན་པར་ནི། །བསྒོམས་ནས་བཟླས་དང་མངོན་སུམ་ན། །སྒོམ་བཞི་ཡི་ཕྱག་རྒྱ་བཅིང་། །རྗེས་སུ་ཆགས་པའི་ཕྱག་རྒྱ་བཞིས། །རིགས་དང་མཐུན་པ་ཉིད་དུ་བསྒོམ། །རིན་ཆེན་ཕྲེང་བའི་བྱིན་བསྡུ་བ། །གཟུགས་སྟོན་དབབ་པར་བྱ་བ་ནི། །རིགས་དང་མཐུན་པའི་གཟུགས་བརྙན་ལ། །སྤྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་ཨེ་ཉིད་སྦྱིན། །དེ་ཉིད་པདྨའི་དཀྱིལ་འཁོར་ཡིན། །དེ་ཉིད་གོམས་ནས་གསང་མཚན་པ། །ཨེ་ཡི་ཚོགས་ཀྱི་ལྷ་རྣམས་བསྒོམ། །དེ་ཉིད་སྭཱྃ་གྱི་ལྷ་རྣམས་ཏེ། །བདག་མེད་མཐའ་བྲལ་མི་དམིགས་ལས། །རང་གི་ངང་ཚུལ་དེ་བཟུང་ནས། །སངས་རྒྱས་རིན་ཆེན་ཙ་ན་ཀ། །ཤེས་རབ་ཡུམ་དང་ལྡན་པར་བསྒོམ། །དེ་ལས་རྡོ་རྗེ་བྱིན་བརླབས་ཏེ། །པདྨ་གསང་ནས་འཛུལ་ཐབས་ཡིན། །སྦུབས་སུ་ཞུགས་ལ་དེ་ལུས་དགང་། །རིན་ཆེན་ཚོན་གྱིས་ཁེངས་པ་དང་། །སོ་སོའི་སྙིང་པོས་མི་ཡང་དགུག །དེ་གོམས་བློ་བདེ་གསལ་སྤྲོ་ཐིམ། །རིན་ཆེན་ལྷ་རྣམས་སྭཱྃ་དུ་བསྒོམ། །སྣོད་གནས་ཕྲེང་བ་ཁེངས་གྱུར་པར། །ཡུམ་གྱི་ཚོགས་ཀྱང་གསལ་བར་གནས། །ཕྱག་རྒྱ་སྙིག་པོ་གཟུགས་ལ་སོགས། །རིགས་དང་མཐུན་པ་ཉིད་དུ་བསམ། །བརྟན་པ་སྭཱྃ་གྱི་འཕྲོ་འདུ་ལྟར། །རྣམ་ཤེས་བྱིན་བརླབས་ངང་དུ་བརྟགས །གཞི་རྩ་མེད་པའི་སེམས་ཉིད་ལས། །སངས་རྒྱས་རིན་ཆེན་སྤྲིན་ཚོགས་བསྒོམ། །ཕྱག་རྒྱ་གསལ་བ་ཉེ་བསྙེན་པ། །འཕྲོ་འདུ་རིགས་དང་མཐུན་པར་ནི། །བསྒོམས་ནས་བཟླས་དང་མངོན་སུམ་ན། །སྒོ་མ་བཞི་ཡི་ཕྱག་རྒྱ་བཅིང་། །རྗེས་སུ་
ཆགས་པའི་ཕྱག་བཞིས། །རིགས་དང་མཐུན་པ་ཉིད་དུ་བསྒོམ། །པདྨའི་དབྱིངས་ཀྱི་བྱིན་བསྡུ་བ། །གཟུགས་སྟོན་དབབ་པར་བྱ་བ་ནི། །རིགས་དང་མཐུན་པའི་གཟུགས་བཪྙན་ལ། །སྤྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་བྃ་དུ་བརྟགས། །དེ་ཉིད་པདྨའི་དཀྱིལ་འཁོར་བསྒོམ། །དེ་ཉིད་གོམས་ལ་གསང་མཚན་པ། །བྃ་གྱི་ཚོགས་ཀྱི་ལྷ་རྣམས་བསྒོམ། །དེ་ཉིད་ཨོཾ་གྱི་ལྷ་རྣམས་ཏེ། །བདག་མེད་མཐའ་བྲལ་མི་དམིགས་ལས། །རང་གི་(དང་ཚུལ,ངང་ཚུལ)་དེ་བཟུང་ནས། །སངས་རྒྱ་པདྨ་ཙ་ན་ཀ། །ཤེས་རབ་ཡུམ་དང་ལྡན་པར་བསྒོམ། །དེ་ལས་རྡོ་རྗེར་བྱིན་བརླབས་ཏེ། །པདྨ་གསང་ནས་འཛུལ་ཐབས་ཡིན། །སྦུབས་སུ་ཞུགས་ལ་དེ་ལུས་དགང་། པདྨའི་ཚོགས་ཀྱི་ཁེངས་པ་དང་། །སོ་སོའི་སྙིང་པོས་མི་ཡང་དགུག །དེ་གོམས་བློ་བདེ་གསལ་སྤྲོ་ཐིམ། །པདྨའི་ལྷ་རྣམས་ཨོྃ་དུ་བསྒོམ། །སྣོད་གནས་དབྱངས་མ་ཁེངས་གྱུར་བར། །ཡུམ་གྱི་ཚོགས་ཀྱང་གསལ་བར་གནས། །ཕྱག་རྒྱ་སྙིག་པོ་གཟུགས་ལ་སོགས། །རིགས་དང་མཐུན་པ་ཉིད་དུ་བསྒོམ། །བརྟན་པ་ཧཱྃ་གྱི་འཕྲོ་འདུ་ལྟར། །རྣམ་ཤེས་བྱིན་བརླབས་ངང་དུ་བརྟགས །གཞི་རྩ་མེད་པའི་སེམས་ཉིད་ལས། །སངས་རྒྱས་རིན་ཆེན་སྤྲིན་ཚོགས་བསྒོམ། །ཕྱག་རྒྱ་གསལ་བ་ཉེ་བསྙེན་པ། །འཕྲོ་འདུ་རིགས་དང་མཐུན་པར་ནི། །བསྒོམས་ནས་བཟླས་དང་མངོན་སུམ་ན། །སྒོ་མ་བཞི་ཡི་ཕྱག་རྒྱ་བཅིང་། །རྗེས་སུ་ཆགས་པའི་ཕྱག་བཞིས། །རིགས་དང་མཐུན་པ་ཉིད་དུ་བསྒོམ། །གར་མཁན་ལས་ཀྱི་བྱིན་བསྡུ་བ། །གཟུགས་སྟོན་དབབ་པར་བྱ་བ་ནི། །རིགས་དང་མཐུན་པའི་གཟུགས་བཪྙན་ལ། །སྤྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་མ་ཉིད་སྦྱིན། །དེ་ཉིད་པདྨའི་དཀྱིལ་འཁོར་བསྒོམ། །དེ་ཉིད་གོམས་ལ་གསང་མཚན་པ། །མ་ཡི་ཚོགས་ཀྱི་ལྷ་རྣམས་བསྒོམ། །དེ་ཉིད་ཧཱྃ་གྱི་ལྷ་རྣམས་ཏེ། །བདག་མེད་མཐའ་བྲལ་མི་དམིགས་ལས། །རང་གི་དང་ཚུལ་དེ་བཟུང་ནས། །སངས་རྒྱ་པདྨ་ཙ་ན་ཀ། །ཤེས་རབ་ཡུམ་དང་ལྡན་པར་བསྒོམ། །དེ་ལས་
རྡོ་རྗེ་བྱིན་བརླབས་ཏེ། །པདྨ་གསང་ནས་འཛུལ་ཐབས་ཡིན། །སྦུབས་སུ་ཞུགས་ལ་དེ་ལུས་དགང་། །ལས་ཀྱི་ཚོགས་ཀྱིས་ཁེངས་པ་དང་། །སོ་སོའི་སྙིང་པོས་མི་ཡང་དགུག །དེ་གོམས་བློ་བདེ་གསལ་སྤྲོ་ཐིམ། །ལས་ཀྱི་ལྷ་རྣམས་ཧཱྃ་དུ་བསྒོམ། །སྣོད་གནས་གར་མཁན་ཁེངས་གྱུར་པར། །ཡུམ་གྱི་ཚོགས་ཀྱང་གསལ་བར་གནས། །ཕྱག་རྒྱ་སྙིང་པོ་གཟུགས་ལ་སོགས། །རིགས་དང་མཐུན་པ་ཉིད་དུ་བསྒོམ། །བརྟན་པ་ཧཱྃ་གྱི་འཕྲོ་འདུ་ལྟར། །རྣམ་ཤེས་བྱིན་བརླབས་ངང་དུ་བརྟགས། །གཞི་རྩ་མེད་པའི་སེམས་ཉིད་ལས། །སངས་རྒྱས་ལས་ཀྱི་སྤྲིན་ཚོགས་བསྒོམ། །ཕྱག་རྒྱ་གསལ་བ་ཉེ་བསྙེན་པ། །འཕྲོ་འདུ་རིགས་དང་མཐུན་པར་ནི། །བསྒོམས་ནས་བཟླས་དང་མངོན་སུམ་ན། །སྒོ་མ་བཞི་ཡི་ཕྱག་རྒྱ་བཅིང་། །རྗེས་སུ་ཆགས་པའི་ཕྱག་རྒྱ་བཞིས། །རིགས་དང་མཐུན་པ་ཉིད་དུ་བསྒོམ། །དཀྱིལ་འཁོར་བཞི་བཅུ་རྩ་གཉིས་ཀྱི་། །ལྷ་རྣམས་མངོན་དུ་སྣང་བ་དང་། །སྒོ་བ་སྒོ་མ་མང་པོ་དང་། །དུས་བཞིའི་ལྷ་མོ་མཆོག་དབབ་དང་། །ལྷ་དང་ཀླུ་ཡི་ཚོགས་བཅས་ལས། །མངོན་དུ་སྨྲ་བར་བྱ་བར་མཐུན། །རྒྱལ་སྲིད་དང་ནི་འཁོར་འཕྲོག་དང་། །བསྡུ་དང་དབང་དུ་བྱ་བ་དང་། །གསད་དང་བསྐྲད་པའི་ཚོགས་བཅས་དང་། །བདག་འགྲོ་མྱུར་དུ་ཕྱིན་པ་དང་། །ནོར་འདོད་པ་དང་ཅི་བྱ་བ། །ཏིང་འཛིན་འདི་ཡིས་བྱེད་པར་འགྱུར། །དུས་མེད་པར་ནི་མཆོད་དང་ཕྲད། །ཅེས་བརྗོད་པས་འཇིག་རྟེན་དྲུག་གི་ཕྱོགས་བཅུ་ཐམས་ཅད་བྱིན་བསྡུ་བའི་མཆོད་པ་ཆེན་པོར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བྱིན་བསྡུ་བ་དང་དམ་ཚིག་དབབ་པའི་སྒྱུ་འཕྲུལ་དྲ་བའི་ཐུགས་རྗེ་ཞེས་བྱ་བའི་ལེའུ་སྟེ་བཞི་བཅུ་གསུམ་པའོ།། །།དེ་ནས་དགྱེས་པ་ཆེན་པོས་ལོངས་སྤྱོད་ཆེན་པོ་རྡོ་རྗེ་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྒྱུ་འཕྲུལ་ཆེན་པོའི་དམ་ཚིག་མཆོད་པའི་ལོངས་སྤྱོད་ཅེས་བྱ་བ་འདི་དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་སྒྱུ་འཕྲུལ་དྲ་བ་ལས་ཕྱུང་ངོ་། །རབ་འབྲིང་ཐ་མའི་བློ་རྣམས་ཀྱིས། །ངེས་པར་བསྒོམ་པར་བྱ་བ་ནི། །རྒྱལ་པོའི་ས་འཛིན་མཆོག་འདོད་པས། །གཟུགས་སུ་བྲིའམ་
རྟེན་བཅས་ལ། །སྤྱི་གཙུག་ཁ་དང་སྙིང་ག་མཚན། །གོམས་པར་ཛཿཉིད་མདོག་དམར་བསྒོམ། །དེ་གོམས་གསང་ནས་ཁོང་བསྡུས་ཏེ། །རང་ལུས་མདོག་དམར་དང་ཚུལ་འཛིན། །སྤྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་བྃ་དུ་བརྟགས། །དེ་གོམས་གར་གྱི་དཀྱིལ་འཁོར་བསྒོམ། །ཛཿཞེས་རྒྱ་བཅིངས་དྲང་བྱ་ཞིང་། །གོམས་པར་གསང་ནས་ཞུགས་ཚུལ་དུ། །ལམ་ནས་ངག་གི་དབང་པོར་བསྡུ། །ཨོྃ་ལས་སངས་རྒྱས་ཙ་ན་ཀ། །སྣོད་གནས་དཀྱིལ་འཁོར་ཁེངས་པར་བསྒོམ། །མིང་དང་སྙིང་པོ་གོམས་པས་དགུག །མངོན་སུམ་གསལ་བར་གྱུར་པ་ན། །ལྕགས་ཀྱུ་ལ་སོགས་མཚན་པ་ཡི། །རྗེས་སུ་ཆགས་པའི་མཆོད་པས་བཤམ། །ཡིད་ལ་གོམས་པ་གསལ་པ་ནི། །གང་ལ་བྱ་བ་དབང་དུ་འགྱུར། །བློན་པོའི་ས་འཛིན་མཆོད་པ་བཤམ། །ཡིད་ལ་གོམས་པ་གསལ་བ་ན། །གང་ལ་བྱ་བ་ཁ་དང་སྙིང་ག་མཚན། །གོམས་པར་ཛཿཉིད་མདོག་དམར་བསྒོམ། །དེ་གོམས་གསང་གནས་ཁོང་བསྡུས་ཏེ། །རང་ལུས་མདོག་དམར་དང་ཚུལ་འཛིན། །སྤྱི་གཙུག་ཁ་དང་སྙིང་ག་མཚན། །འབྲུ་ལྔས་བྱིན་བརླབས་བྃ་དུ་བརྟགས། །དེ་གོམས་གར་གྱི་དཀྱིལ་འཁོར་བསྒོམ། །ཛཿཞེས་རྒྱ་བཅིངས་དྲང་བྱ་ཞིང་། །གོམས་པར་གསང་གནས་ཞུགས་ཚུལ་དུ། །ལམ་ནས་ངག་གི་མཆོག་ཏུ་བསྡུ། །ཨཱྃཿནས་སངས་རྒྱས་ཙ་ན་ཀ། །སྣོད་གནས་དཀྱིལ་འཁོར་ཁེངས་པར་བསྒོམ། །མིང་དང་སྙིང་བོ་གོམས་པར་དགུག །མངོན་སུམ་གསལ་བར་གྱུར་པ་ན། །ལྕགས་ཀྱུ་ལ་སོགས་མཚན་པ་ཡི། །རྗེས་སུ་ཆགས་པའི་མཆོད་པར་བཤམ། །དེ་ལ་ལས་སུ་སྩལ་པ་ན། །གང་ལ་བྱ་བ་དབང་དུ་འགྱུར། །ལྷ་མོ་ཀླུ་མོ་རིགས་ངན་མོ། །ཡུད་ཙམ་རྟག་པར་འདོད་བསྒྲུབ་རྣམས། །ཏིང་འཛིན་འདི་ཡིས་བྱེད་པར་འགྱུར། །དབང་ཕྱུག་ལྷ་ཆེན་ལྷ་དབང་པོ། །རྒྱལ་ཆེན་ཕྱོགས་སྐྱོང་མང་པོ་ལ། །ཆུང་མ་བུ་མོ་ལ་སོགས་མཚན། །འདོད་སྤྱོད་དབང་བར་བློ་འཆང་རྣམས། །ཏིང་འཛིན་འདི་ཡིས་བྱེད་པར་འགྱུར། །དེ་ཡི་དགོས་པ་ཐམས་ཅད་བ། །མ་ལུས་ཀུན་རྫོགས་འགྲུབ་པར་འགྱུར། །ཅེས་བརྗོད་པས་
འཇིག་རྟེན་དྲུག་གི་ཕྱོགས་བཅུ་ཐམས་ཅད་རབ་ཏུ་གཡོས་ཀུན་དུ་གསལ་བར་གྱུར་ནས་དེ་བཞིན་གཤེགས་པའི་ལོངས་སྤྱོད་ཆེན་པོ་ཀུན་དུ་སྣང་བར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་སྒྱུ་འཕྲུལ་ཆེན་པོ་དམ་ཚིག་གི་མཆོད་པའི་ལོངས་སྤྱོད་ཅེས་བྱ་བའི་ལེའུ་སྟེ་བཞི་བཅུ་བཞི་པའོ།། །།དེ་ནས་ཐུབ་པ་ཆེན་པོ་བཅོམ་ལྡན་འདས་ཀྱིས་ཀླུའི་ཚོགས་བསམ་གྱིས་མི་ཁྱབ་པ་ལ་རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ཉིད་དུ་སྣང་བར་གྱུར་ཏོ། །གདུག་པའི་ལས་ཀླུའི་ཚོགས་འདུལ་བར་གྱུར་ནས་སྒྲུབ་པ་ཆེན་པོ་ལ་མོས་པའི་ཆེད་དུ་བརྗོད་པ་འདི་བརྗོད་དོ། །ཀླུའི་ཚོགས་རིགས་གཉིས་པ་དང་། །རིགས་གསུམ་པ་དང་། རིགས་ཐ་དད་པ་དང་། ཕྱོགས་གཉིས་པ་ལས་འཁོར་དུ་བྱས་པ་བསམ་གྱིས་མི་ཁྱབ་པས་ཁེངས་པའི་གནས་སུ་ཉིད་ཀྱི་བསྙེན་པ་ཆེ་ཆུང་ལ་མ་གཏོགས་པ་ཡིད་ལ་དགའ་བ་ཅི་བྱས་ཀྱང་མི་འགྲུབ་ཅིང་བར་ཆད་བྱེད་པར་འགྱུར་བའི་ཕྱིར་གེགས་བསལ་བ་ལྔ་པ་ཞེས་བྱ་བ་འདི་འཐོན་པར་གྱུར་པ་འདི་ཆེད་དུ་གསུངས་སོ། །སྒྲུབ་ལ་འདུག་པ་མི་གནས་དང་། །ས་གཞི་བདག་ཏུ་དབང་བ་དང་། །སྒྲུབ་པའི་རྫས་རྣམས་ཅི་ཡོད་པ། །གདུག་པའི་སྦྲུལ་རྣམས་བསལ་བ་དང་། །འཁོར་དུ་གཏོགས་པ་མང་ཉུང་ལ། །གདུག་པས་ཟིན་པར་མི་འགྱུར་ཅིང་། །ལྗོན་པ་ལྕུག་ཕྲན་ལ་སོགས་ལ། །གདུག་པས་གནས་པར་མི་འགྱུར་ཕྱིར། །ལྔ་པ་ཞེས་ནི་རབ་ཏུ་བསྔགས། །བདག་གིས་གདུག་པར་མཆོད་པའི་ཕྱིར། །སྒྱུ་འཕྲུལ་དྲ་བའི་ཏིང་འཛིན་ལས། །བདག་ཉིད་གདུག་པའི་མཐིང་གནག་མདོག །ལག་ན་ཞགས་པ་ཨུཏྤལ་འཛིན། །མགོ་ལ་གདེངས་ཀ་སྦྲུལ་ཆེན་བཅུ། །ཉི་ཤུ་བརྒྱ་འམ་སྟོང་དང་ཁྲི། །བསམ་ཡས་དག་གི་སྦྲུལ་ཆེན་པོ། །ཁ་དོག་ནག་པོ་ལྕེ་གསུམ་འབར། །གདུག་པ་ཀླུ་ཡི་ཚོགས་མངས་པས། །འཁོར་མང་འཇིགས་བརྗོད་སྐྱི་བུང་བས། །མཆོག་ཏུ་ཕྱག་རྒྱ་འདི་བཅའ་བྱ། །མི་བསྐྱོད་རིན་ཆེན་ཡིག་འབྲུ་རྣམས། །ཕྲལ་ཏེ་གོ་རན་བྱས་པ་ན། །གདུག་པ་སྦྲུལ་གྱིས་འོག་ཏུ་གདིང་། །ནཱ་ག་པུ་ཀ་ལ་ནཱ་ག་ཕཊ་ཅེས་བརྗོད། །
འདི་ལ་གོམས་པར་གང་བརྩོམ་པས། །ང་ཡི་ཆ་ལུགས་འདི་བཟུང་ན། །མེ་ལྕེའི་ཚོགས་ལ་ཕུང་པོ་བཞིན། །རྒྱལ་པོ་ཆེན་པོའི་རྒྱལ་ཆེན་པོར། །ཀུན་ལ་སྣང་བར་གསལ་གྱུར་ནས། །རང་དབང་མེད་པར་འབྲོས་པ་དང་། །དེ་ལ་བྲན་བཞིན་བྱེད་པར་འགྱུར། །ས་ལ་བདག་ཏུ་བྱ་བ་ནི། །ཐོག་མར་ས་གཞི་རབ་མཉམ་སྟེ། །ཨོྃ་དང་མུྃ་གྱི་ཚོགས་ཀྱིས་དགང་། །རིན་ཆེན་ཕོ་བྲང་དཀྱིལ་འཁོར་ལས། །འཇུག་པའི་ལྷ་ཚོགས་དཀྱིལ་འཁོར་བསྒོམ། །དེ་ལ་གཤོག་པ་རབ་བརྐྱང་སྟེ། །རྡོ་རྗེ་ཐལ་མོ་དྲག་ཏུ་རྡབ། །ཨོྃ་བཛྲ་ཀྲོ་དྷ་དུ་ན་མུ་ནེ་དུ་ནཱ་གཙྪ། དེ་ནས་ཡིག་འབྲུ་ཤིན་ཏུ་གཤིག །དེ་ནས་ཡིག་འབྲུ་ཐ་མ་བསྒྲེང་། །དེ་ནས་ཡིག་འབྲུ་འཕྲུལ་བསྐྱེད་པ། །ང་ཡི་ཆ་ལུགས་འདི་བཟུང་སྟེ། །ས་གཞི་མཉམ་པའི་དཀྱིལ་འཁོར་བསྒོམ། །དེ་ལ་ཤིན་ཏུ་དངངས་འགྱུར་ཏེ། །ཕྱོགས་བཅུ་ཀུན་དུ་འབྲོས་པར་འགྱུར། །དེ་ལ་བྲན་བཞིན་བྱེད་པར་འགྱུར། །འཁོར་དུ་གཏོགས་པ་ང་ཡི་འཁོར། །འཁོར་མང་ཇི་སྙེད་མཆོག་བྱེད་པ། །གདུག་པ་མང་པོས་གནོད་བསྒྲུབ་ཕྱིར། །རྫས་ལ་མེས་ནི་རབ་སྦར་ནས། །ང་ཡི་སྙིང་པོས་བརྗོད་ནས་འབྱུང་། །དེ་ལ་ཡིག་འབྲུ་དྲུག་བརྗོད་ན། །དེ་ལ་གནོད་པར་མི་ནུས་ཤིང་། །གདུག་པས་མཆོད་ཅིང་བཀུར་བར་འགྱུར། །དེ་ཡི་ནད་རྣམས་སོས་པར་འགྱུར། །མངོན་སུམ་སྣང་བའི་གཟུགས་བརྙན་དང་། །མཆོག་དང་ཐ་མ་འབྲིང་རྣམས་ལ། །གདུག་པའི་ཚོགས་ཀྱིས་ཞེན་པ་ནི། །སྙིང་གར་ཨྃ་གྱི་འབྲུ་རྣམས་ཏེ། །ཁ་དོག་དམར་པོ་འབར་བའི་ནང་། །གཟུགས་སུ་སྣང་བ་ཀུན་བཞུགས་ཏེ། །ཐུབ་པའི་ངང་ཚུལ་དེ་བསྒོམས་ནས། །རིན་ཆེན་ཡིག་འབྲུ་ཡི་གེ་བསམ། །དེ་ལ་རབ་ཏུ་འཇིགས་པར་བརྐྱང་། །ཡི་གེ་དང་པོ་ཐ་མ་མིག །ཨྃ་གྱི་ཚོགས་སུ་འབར་བ་གཞན། །མི་བསྐྱོད་ཉིད་མས་བེ་ཅོན་འཆང་། །ཐོད་པའི་དབྱིག་པར་ཆས་ནས་ནི། །ལྕེ་ལ་སྔགས་ནི་དྲན་པ་ཡིས། །རྒྱལ་བ་ཀུན་གྱིས་དབང་བསྐུར་ཞིང་། །གདུག་པའི་ཀླུ་རྣམས་འདུལ་འགྱུར་ཏེ། །ཕྱོགས་བཅུ་ཀུན་དུ་འབྲོས་པར་འགྱུར། །དེ་ལ་མཆོད་དང་བྲན་དུ་འགྱུར། །ཨོྃ་མུ་ནེ་པདྨ་ས་མ་ཡོ་གི་ཧཱུྃ་ཧཱུྃ་ཛ་ཛ། འདི་ལ་གོམས་པར་གང་བརྩོན་པས། །ང་ཡི་ཆ་ལུགས་འདི་བཟུང་ནས། །བཀུར་གནས་
མཆོད་པ་བྱེད་པ་དང་། །སྒྲུབ་པ་ཐམས་ཅད་མྱུར་བར་འགྱུར། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཐུབ་པ་ཆེན་པོ་བཅོམ་ལྡན་འདས་ཀྱིས་ཀླུའི་ཚོགས་ཀྱི་གདུག་པའི་ལས་འདུལ་བའི་ལེའུ་སྟེ་བཞི་བཅུ་ལྔ་པའོ།། །།དེ་ནས་བཅོམ་ལྡན་འདས་དཔལ་ཀུན་དུ་བཟང་པོས་འབྱུང་པོའི་ཚོགས་ཟིལ་གྱིས་གནོན་པ་ཞེས་བྱ་བ་འདིའི་ཆེད་དུ་བརྗོད་པ་འདི་བརྗོད་དོ། །སྒྱུ་འཕྲུལ་དྲ་བའི་དཀྱིལ་འཁོར་ལས། །ཚོམ་བུ་གཉིས་ཀྱི་ལྷ་རྣམས་བསྒོམ། །ང་ཉིད་འདུག་པའི་གནས་བཤམས་ཏེ། །ལོ་དང་ཟླ་བ་གསུམ་དང་ལྔར། །རྡོ་རྗེ་དུང་ཆེན་གང་བ་དང་། །རྡོ་རྗེ་ཕྱག་བསྣམས་དྲིལ་བུ་ལ། །སྔགས་བཟླས་ཏིང་འཛིན་གོམས་པར་བསྙེན། །རྫས་ལ་ཚོན་གྱིས་མདོག་བསྒྱུར་བཞིན། །རྟགས་དང་མངོན་དུ་གྱུར་པར་རོ། །སངས་རྒྱས་རྡོ་རྗེ་ཕྱག་བསྣམས་ནས། །ཁྲོ་བོ་ཆེན་པོ་རྣམ་པར་རྒྱལ། །རང་གི་རང་བཞིན་དེར་བསྒྱུར་ནས། །སྤྱན་བགྲད་མཆེ་གཙིགས་སྡང་མིག་འབར། །བརྐྱང་བསྐུམ་རྔམ་པས་ཞིང་སྟེངས་བསྒོམ། །ཤིག་ཤིག་དྲག་ཏུ་གྱུར་པ་ན། །དེ་ཡི་སྙིང་པོ་བཟླས་ནས་ནི། །དེ་བསྙེན་ཉམས་སུ་ལོན་པ་ཡིན། །དེ་ལྟར་འགྲུབ་པའི་རྟགས་རྣམས་ནི། །གང་ལ་དམིགས་པའི་མདུན་དག་ཏུ། །བཞིན་བཟློག་མིག་གིས་བལྟས་ནས་ནི། །ལྕེ་ལ་དྲག་ཏུ་ཕཊ་ཅེས་བརྗོད། །བརྒྱལ་འགྱུར་ཨྃ་ནས་དམར་རྩི་དབབ། །དེ་ལས་ཧཱུྃ་ཞེས་བྱ་བ་ཡིད། །དང་པོའི་གནས་སུ་འདུས་པ་ན། །མཆོངས་པར་འདོད་ན་ལངས་པར་འགྱུར། །སྒྱུ་འཕྲུལ་དྲ་བའི་དཀྱིལ་འཁོར་ལས། །ཚོམ་བུ་གཉིས་ཀྱི་ལྷ་རྣམས་བསྒོམ། །ང་ཉིད་འདུག་པའི་གནས་བཤམས་ཏེ། །ལོ་དང་ཟླ་བ་གསུམ་ལྔ་བདུན། །དེ་ཡི་དུང་ཆེན་གང་བ་དང་། །རྡོ་རྗེ་ཕྱག་བསྣམས་དྲིལ་བུ་ལ། །སྔགས་བཟླས་ཏིང་འཛིན་གོམས་པར་བསྙེན། །རྫས་ལ་ཚོན་གྱིས་མདོག་བསྒྱུར་བཞིན། །རྟགས་དང་མངོན་དུ་གྱུར་པར་རོ། །སངས་རྒྱས་རྡོ་རྗེ་ཕྱག་བསྣམས་ནས། །ཁྲོ་བོ་ཆེན་པོ་གཤིན་རྗེ་རྒྱལ། །གཤིན་རྗེ་ཁྲོས་པའི་རྒྱལ་མོར་སྦྱོར། །རང་གི་རང་བཞིན་དེར་བསྒྱུར་ནས། །སྤྱན་བགྲད་མཆེ་གཙིགས་སྡང་མིག་པར། །བརྐྱང་བསྐུམ་རྔམ་པས་ཞིང་སྟེངས་བསྒོམ། །ཤིག་ཤིག་དྲག་ཏུ་གྱུར་པ་ན། །དེ་
ཡི་སྙིང་པོ་བཟླས་ནས་ཀྱང་། །ཨོྃ་ཞེས་པས་ནི་རྐེད་པར་གཅད། །དེས་ནི་དབང་དུ་གྱུར་པར་བསྒོམ། །ས་ལས་གསེར་དང་ཆུ་ལས་ས། །ཡིད་དང་འཐད་པ་ཉིད་དུ་ནི། །ཇི་བཞིན་ཇི་བཞིན་འགྲུབ་པར་འགྱུར། །དེ་ལས་འདོད་པ་བཞིན་དུ་ངེས། །དེ་བསྙེན་ཉམས་སུ་ལོན་པ་ཡིན། །དེ་ལྟར་ངེས་པའི་རྟགས་རྣམས་ནི། །མིང་དང་གཟུགས་དང་མངོན་སུམ་ན། །དབུ་གསིགས་སྡང་མིག་དྲག་པོས་བལྟ། །ཨོྃ་གྱི་རྩེ་མོར་ཕཊ་ཅེས་བརྗོད། །བརྒྱལ་འགྱུར་ཨོྃ་ལས་དམར་རྩི་དབབ། །ངག་ལས་ཨྃ་ཞེས་བྱ་བས་ནི། །བཟླས་བརྗོད་བཅས་དེ་བདག་ཉིད་བསྟིམ། །དེ་ནས་འདོད་པ་བཞིན་དུ་ངེས། །དེ་བསྙེན་ཉམས་སུ་ལེན་པ་ཡིན། །དེ་ལྟར་ངེས་པའི་རྟགས་རྣམས་ནི། །མིང་དང་གཟུགས་དང་མངོན་སུམ་ལ། །བཞིན་བཟློག་མིག་གིས་བལྟས་ནས་ནི། །ཨོྃ་ལས་དྲག་ཏུ་ཕཊ་ཅེས་པས། །བརྒྱལ་འགྱུར་ཨྃ་ལས་དམར་རྩི་དབབ། །དེ་ལས་ཧཱུྃ་ཞེས་བྱ་བ་ཡིན། །དང་པོའི་གནས་སུ་བསྡུས་པ་ན། །འཚོ་བར་འདོད་ན་ལངས་པར་འགྱུར། །སྒྱུ་འཕྲུལ་དྲ་བའི་མངོན་རྫོགས་པ། །བྱང་ཆུབ་མཆོག་གི་ཀུན་ངོ་བོ། །ཕྱག་རྒྱ་བཞུགས་ཡུན་ལ་སོགས་པ། །གཅིག་པུ་ཆ་ཡི་ཏིང་ངེ་འཛིན། །རྡོ་རྗེ་དུང་ཆེན་གང་བ་དང་། །རྡོ་རྗེ་ཕྱག་བསྣམས་དྲིལ་བུ་ལ། །སྔགས་བཟླས་ཏིང་འཛིན་གོམས་པར་བསྙེན། །རྫས་ལ་ཚོན་གྱིས་མདོག་བསྒྱུར་བཞིན། །རྟགས་དང་མངོན་དུ་གྱུར་པར་རོ། །སངས་རྒྱས་རྡོ་རྗེ་ཕྱག་བསྣམས་ནས། །ཁྲོ་བོ་ཆེན་པོ་རྟ་མཆོག་དཔལ། །རང་གི་རང་བཞིན་དེར་བསྒྱུར་ནས། །སྤྱན་བགྲད་མཆེ་གཙིགས་སྡང་མིག་པར། །བརྐྱང་བསྐུམ་རྔམ་པས་ཞིང་སྟེངས་བསྒོམ། །ཤིག་ཤིག་དྲག་ཏུ་གྱུར་པ་ན། །དེ་ཡི་སྙིང་པོ་བཟླས་ནས་ཀྱང་། །ཨོྃ་ཞེས་བྱ་བས་རྐེད་པར་གཅད། །དེས་ནི་དབང་དུ་གྱུར་པར་བསྒོམ། །ས་ལས་གསེར་དང་ཆུ་ལས་ས། །ཡིད་དང་འཐད་པ་ཇི་ལྟ་བ། །ཇི་བཞིན་ཇི་བཞིན་གྲུབ་པར་ངེས། །དེ་ལ་འདོད་པ་བཞིན་དུ་འགྱུར། །དེ་བསྙེན་ཉམས་སུ་ལོན་པ་ཡིན། །དེ་ཡི་གྲུབ་པའི་རྟགས་རྣམས་ནི། །མིང་དང་གཟུགས་དང་མངོན་སུམ་ན། །དབུ་གསིགས་སྡང་མིག་དྲག་པོས་བལྟ། །ཨྃ་
ལས་དྲག་ཏུ་ཕཊ་ཅེས་པས། །བརྒྱ་ལ་འགྱུར་ཨོྃ་ལས་དམར་རྩི་དབབ། །དེ་ལས་ཧཱུྃ་ཞེས་བྱ་བ་ཡིད། །དང་པོའི་གནས་སུ་བསྡུས་པ་ན། །མཆོངས་པར་འདོད་ན་ལངས་པར་འགྱུར། །སྒྱུ་འཕྲུལ་ཆེན་པོ་དེ་ཉིད་ལས། །སངས་རྒྱས་རྡོ་རྗེ་ཕྱག་བསྣམས་པ། །ཁྲོ་བོ་ཆེན་པོ་བདུད་རྩི་འཁྱིལ། །བདག་ཉིད་རང་བཞིན་དེར་བསྒྱུར་ནས། །སྤྱན་བགྲད་མཆེ་གཙིགས་སྡང་མིག་པར། །བརྐྱང་བསྐུམ་རྔམ་པས་ཞིང་སྟེངས་བསྒོམ། །ཤིག་ཤིག་དྲག་ཏུ་གྱུར་པ་ལས། །མགྱོགས་པར་ཕྱོགས་སུ་སོང་བ་ན། །དེ་ཡི་སྙིང་པོ་མཆོག་བཟླས་ནས། །ཧཱུྃ་ཞེས་པས་ནི་བསྐུལ་བ་ཡིས། །དང་པོའི་གནས་སུ་ཕྱིན་པར་བྱེད། །དེས་ནི་དབང་དུ་གྱུར་པར་བསྒོམ། །དེ་ལས་སྣ་ཚོགས་ཅི་འདོད་པར། །ཐམས་ཅད་ཐམས་ཅད་གྲུབ་པར་འགྱུར། །དེ་བསྙེན་ཉམས་སུ་ལོན་པ་ཡིན། །ཨོྃ་ལ་དྲག་ཏུ་ཕཊ་ཅེས་པས། །གང་ལ་བྱ་བ་མངོན་བསམ་ནས། །སེ་གོལ་སྣོལ་མར་གཏོགས་པ་ཡིས། །བརྒྱལ་འགྱུར་ཨོྃ་ལས་དམར་རྩི་དབབ། །ཡིད་ལ་བསྒོམས་པས་ལངས་པར་འགྱུར། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་སྒྱུ་འཕྲུལ་ཆེན་པོ་རབ་ཏུ་རྒྱལ་བར་བྱེད་པ་དམ་ཚིག་མཆོད་བཀོད་པའི་ལེའུ་སྟེ་བཞི་བཅུ་དྲུག་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོའི་སྤྱན་སྔར་དྲེགས་པ་ཆེན་པོ་དང་། དབང་ཕྱུག་ཆེན་པོ་དང་། རྒྱལ་པོ་ཆེན་པོ་བཞི་དང་། ཕྱོགས་སྐྱོང་པར་གྱུར་པ་སྡེ་དཔོན་དང་ཆུང་མར་བཅས། བྲན་དང་གཡོག་དང་ཡང་གཡོག་གི་རབ་ཏུ་འཇིགས་པ་དང་བཅས་པའི་སེམས་ཀྱིས་གུས་པར་དམ་བཅས་ཤིང་། །རང་རང་གི་དཀྱིལ་འཁོར་དང་། སྙིང་པོ་ཞེས་བྱ་བ་འདི་མགྲིན་གཅིག་ཏུ་ཡང་སྨྲས་སོ། །དྲེགས་པ་འཁོར་བཅས་དཀྱིལ་འཁོར་དང་། །ལུས་དང་ངག་ཡིད་དབུལ་བ་ནི། །འཁོར་གཡོག་བྱེ་བ་དྲུག་ཅུ་རྣམས། །ཀེང་རུས་གསར་རྙིང་གནས་སུ་གྱུར། །རློན་པ་ཤ་ཁྲག་ཚོགས་ལ་སྤྱོད། །ཐོད་པར་འཐུང་ཟ་མེད་པའི་ནང་། །མདུང་ཐུང་རལ་གྲི་དགྲ་སྟ་དང་། །ཞགས་པ་དབྱིག་པ་ཟོར་བ་དང་། །རྔ་དང་ལྡ་ལྡི་ཁྲག་འཐོར་ཞིང་། །གདུག་པའི་ཚོགས་རྣམས་ཀུན་གྱིས་བསྐོར། །དགྱེས་པའི་དཀྱིལ་འཁོར་འདི་རྣམས་ལ། །མིང་ཙམ་འཛིན་
པར་བྱེད་པ་ཡིས། །ཞབས་ཀྱི་མཐིལ་དུ་འདི་བསྒོམས་ཏེ། །རང་གི་སྙིང་པོ་འདི་བརྗོད་ན། །དེ་བྲན་བཞིན་དུ་བདག་ཅག་བགྱིད། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་བསྒྲུབ། །འདུག་ནས་སྙིང་པོ་འདི་བཞིན་དབུལ། །ཨོྃ་ཁྃ་དྷུ་ཧ་སྭཱ་ཧཱ། དབང་ཕྱུག་ལྷ་ཆེན་དཀྱིལ་འཁོར་དང་། །ལུས་དང་ངག་ཡིད་དབུལ་བ་ནི། །འཁོར་གཡོག་བྱེ་བ་བརྒྱད་ཅུ་སྟོང་། །མེ་ཏོག་སིལ་མ་བཀྲམ་པ་དང་། །རས་སྟན་འཕར་མ་མང་པོ་དང་། །རིན་ཆེན་བཅལ་དང་བརྡུང་བ་དང་། །རོལ་མོ་གླུ་གར་རབ་ཏུ་སྙན། །རིན་ཆེན་ཁང་པའི་གནས་སུ་ནི། །ལྷ་མོ་མང་པོར་བདག་སྤྱོད་ཅིང་། །རིན་ཆེན་སྣོད་དུ་བདག་ཅག་འཐུང་། །གདུགས་ཀྱིས་རྒྱས་པར་སྟེང་ནས་གཡོགས། །གཟུགས་མཛེས་པས་ནི་གདའ་བར་བགྱིད། །རིན་ཆེན་མེ་ཏོག་ལ་སོགས་དང་། །ལྷ་ཡི་མེ་ཏོག་ཕྱོགས་སུ་འཐོར། །ལྷ་ཡི་ཚོགས་མང་ཀུན་གྱིས་བསྐོར། །དགྱེས་པའི་དཀྱིལ་འཁོར་འདི་རྣམས་ལ། །མིང་ཙམ་འཛིན་པར་བྱེད་པ་ཡིས། །ཞབས་ཀྱི་མཐིལ་དུ་འདི་བྲིས་ཏེ། །རང་གི་སྙིང་པོ་འདི་བརྗོད་ན། །དེ་ལ་བྲན་བཞིན་བདག་ཅག་བགྱིད། །གཙུག་ཏུ་བཞག་ནས་བཀུར་བ་དང་། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་བསྒྲུབ། །དེ་གཟུགས་སྟོན་ཅིང་གདའ་བར་བགྱིད། །ཨོྃ་སརྦ་དེ་བཱ་མ་ཧཱ་ཨུ་པ་ཧ། །རྒྱལ་པོ་རྣམ་ཐོས་ཡུལ་འཁོར་སྲུང་། །འཁོར་ཚོགས་སྟོང་ཕྲག་མང་པོ་ཡི། །ལུས་དང་ངག་ཡིད་འབུལ་བ་ནི། །འཁོར་གཡོག་སྟོང་ཕྲག་བྱེ་བ་བརྒྱ། །མེ་ཏོག་སིལ་མར་བཀྲམ་པ་དང་། །རྒྱན་མང་བྱུག་པ་གཅལ་བཀྲམ་པ། །སྡེ་དཔོན་ཉི་ཤུ་བྱེ་བ་རྣམས། །ཅི་ལེགས་པར་ནི་རབ་ཏུ་སྨྲ། །རིམ་པ་ཆེ་ཞིང་སྲི་ཞུ་གུས། །མཆོད་པར་བྱེད་ཅིང་ལུགས་མཆིས་པའི། །བདག་གི་འཁོར་དང་བཅས་པ་ལགས། །རིན་ཆེན་བཅལ་དང་འཐུང་བ་དང་། །རོལ་མོ་གླུ་གར་སྙན་པས་བརྒྱན། །རིན་ཆེན་ཁང་པར་བདག་མཆིས་ཤིང་། །བཞོན་པ་དམག་མངས་འཁོར་བར་མཆིས། །རིན་ཆེན་སྣོད་དུ་ཆང་འཐུང་བ། །གདུགས་ཀྱིས་བརྒྱན་པར་སྟེང་ནས་གཡོགས། །གཟུགས་མཛེས་པས་ནི་གདའ་བར་བགྱིད། །རིན་ཆེན་མེ་ཏོག་
ཕྱོགས་སུ་འཐོར། །རྒྱལ་པོའི་ཚོགས་མང་ཀུན་གྱིས་བསྐོར། །དྲི་ཟ་མེད་པའི་བདག་པོ་དང་། །དབང་ལྡན་རླུང་གི་བདག་པོ་རྣམས། །འདི་བཞིན་གུས་པར་བདག་ཅག་བགྱིད། །དགྱེས་པའི་དཀྱིལ་འཁོར་འདི་རྣམས་ལ། །མིང་ཙམ་འཛིན་པར་བྱེད་པ་ཡིས། །ཞབས་ཀྱི་མཐིལ་དུ་བྲིས་ནས་ཀྱང་། །རང་གི་སྙིང་པོ་འདི་བརྗོད་ན། །དེ་ལ་བྲན་བཞིན་བདག་ཅག་བགྱིད། །གཙུག་ཏུ་བཞག་ནས་བཀུར་བ་དང་། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་བསྒྲུབ། །དེ་ལ་གཟུགས་སྟོན་གདའ་བར་བགྱིད། །ཨོྃ་སིད་དྷ་དྷི་དྷི་དྷུ་ཧོ་སྭཱ་ཧཱ། རྒྱལ་པོ་མིག་མི་བཟང་དང་འཕགས་སྐྱེས་པོ། །འཁོར་ཚོགས་ཁྲི་ཕྲག་མང་པོ་ཡིས། །ལུས་དང་ངག་ཡིད་དབུལ་བ་ནི། །འཁོར་ཚོགས་ཁྲི་ཕྲག་བྱེ་བ་བརྒྱ། །མེ་ཏོག་སིལ་མ་བཀྲམ་པ་དང་། །རྒྱན་མང་བྱུག་པ་གཅལ་བཀྲམ་པ། །སྡེ་དཔོན་ཉི་ཤུ་བྱེ་བ་རྣམས། །ཅི་ལེགས་པར་ནི་རབ་ཏུ་སྨྲ། །རིམ་པ་ཆེ་ཞིང་སྲི་ཞུ་གུས། །མཆོད་པར་བྱེད་ཅིང་ལུགས་མཆིས་པར། །བདག་གི་འཁོར་དང་བཅས་པ་ལགས། །རིན་ཆེན་བཅལ་དང་བཏུང་བ་དང་། །རོལ་མོ་གླུ་གར་སྙན་པས་བརྒྱན། །རིན་ཆེན་ཁང་པར་བདག་མཆིས་ཤིང་། །བཞོན་པ་དམག་མངས་འཁོར་བར་མཆིས། །རིན་ཆེན་སྣོད་དུ་ཆང་འཐུང་བ། །གདུགས་ཀྱིས་རྒྱས་པར་སྟེང་ནས་གཡོགས། །གཟུགས་མཛེས་པ་ནི་གདའ་བར་བགྱིད། །རིན་ཆེན་མེ་ཏོག་ཕྱོགས་སུ་འཐོར། །རྒྱལ་པོའི་ཚོགས་མང་ཀུན་གྱིས་བསྐོར། །གནོད་སྦྱིན་སྲིན་པོའི་ཚོགས་རྣམས་དང་། །ཆུ་བདག་གཤིན་རྗེའི་འཁོར་མང་རྣམས། །དེ་བཞིན་གུས་པས་བདག་ཅག་བགྱིད། །དགྱེས་པའི་དཀྱིལ་འཁོར་ཆེན་པོ་འདི། །མིང་ཙམ་འཛིན་པར་བྱེད་པ་ཡིས། །ཞབས་ཀྱི་མཐིལ་དུ་བྲིས་ནས་ཀྱང་། །རང་གི་སྙིང་པོ་འདི་བརྫོད་ན། །དེ་ལ་བྲན་བཞིན་བདག་ཅག་བགྱིད། །གཙུག་ཏུ་བཞག་ནས་བཀུར་བ་དང་། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་བགྱིད། །དེ་ལ་གཟུགས་སྟོན་གདའ་བར་བགྱིད། །ཨོྃ་དྷ་ཀ་བྷི་དུ་བྷ་བི་ཤུ་པ་ཤེ་ཨོྃ་ཧཱུྃ། ཞེས་མགྲིན་གཅིག་
ཏུ་སྨྲས་པས། སྲིད་པ་ཇི་སྲིད་པ་རྣམས་ཐུགས་ཀྱི་དཀྱིལ་འཁོར་ཆེན་པོ་འདིས་འདུལ་བར་གྱུར་ནས། །བཅོམ་ལྡན་འདས་དགྱེས་པ་ཆེན་པོས་སྐུ་དང་གསུང་དང་ཐུགས་ཡོན་ཏན་ཕྲིན་ལས་རྡོ་རྗེ་ལས་རྡོ་རྗེ་གསང་བའི་ཚིག་འདི་ཕྱུང་ངོ་། །ཨ་ཧོ། དེ་བཞིན་གཤེགས་པ་བསམ་ཡས་སྙིང་པོ་བསམ་ཡས་པར། །འབྲུ་གཏོར་བསྡུ་བ་ལས་ནི་འདས་བཞིན་བསྙགས་དཀའ་བའི། །མ་ནོར་ལས་ཆེན་གཅིག་གིས་རབ་ཏུ་འདུལ་འགྱུར་ཞིང་། །དེ་ཡི་བསྔགས་པའི་བཀའ་ལས་འདའ་བར་ངས་མི་ནུས། །ཐུགས་ཀྱི་ཐུགས་རྗེས་ཇི་སྲིད་མ་ནོར་ལམ་ཉིད་ལ། །གསང་བའི་སྙིང་པོ་ངེས་པ་སྒྱུ་འཕྲུལ་མཆོག་ཉིད་པ། །ང་ཉིད་འདུད་འགྱུར་གཞན་ལྟ་སྨོས་ཅི་དགོས། །དེ་ཉིད་ཐུགས་ལས་སྤྲུལ་པའི་ཐུགས་ཉིད་དོ། །ཧོ་རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཤིན་ཏུ་འདུལ་བར་གྱུར་པ་གནས་དང་། སྙིང་པོ་དབུལ་བའི་ལེའུ་སྟེ་བཞི་བཅུ་བདུན་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོའི་བདག་ཉིད་དཔལ་ཁྲག་འཐུང་ཆེན་པོའི་སྤྱན་སྔར་དྲེགས་པ་ཆེན་པོ་དང་། དབང་ཕྱུག་ཆེན་པོ་ལ་སོགས་པ་འཇིག་རྟེན་པའི་ཚོགས་ཀྱིས། དེ་བཞིན་གཤེགས་པའི་བྱིན་གྱིས་བརླབས་ཀྱིས་སེམས་འདུན་པ་ཆེན་པོར་གྱུར་ཏེ། ཆེད་དུ་བསྟོད་པའི་གླུ་འདི་མགྲིན་གཅིག་ཏུ་སྨྲས་སོ། །ཨེ་མའོ་ཡ་མཚན་འཕྲུལ་ཆེན་གྱི། །སངས་རྒྱས་རྡོ་རྗེའི་རང་བཞིན་དཔལ། །དུག་དང་བདུད་རྩི་ཁྱད་མེད་པར། །དག་པའི་རང་བཞིན་རྣལ་འབྱོར་ཐུགས། །ཀུན་དུ་བཟང་པོ་རྡོ་རྗེའི་སྐུ། །ཡེ་ཤེས་ལྔ་ཡི་ཁྲོ་རྒྱལ་གཙོ། །ཁྲག་འཐུང་འཇིགས་བྱེད་ཧེ་རུ་ཀ། །སངས་རྒྱས་མཐའ་ཡས་འགྲོ་བ་རྒྱ་མཚོ་འདུལ། །ཐུགས་རྗེ་བསམ་ཡས་ཁྲོ་རྒྱལ་ཀུན་གྱི་གཙོ། །ཁྲག་འཐུང་ཀུན་ལས་ཆེས་འཕགས་ཡིད་བཞིན་མཛོད། །སེར་གནག་མཐིང་གནག་ལྗང་གནག་དམར་གནག་དང་། །སྔོ་གནག་རི་རབ་ལྟ་བུར་བརྗིད་པའི་སྐུ། །བསྐལ་པར་བཅས་པའི་མེ་རིའི་དབུས་གནས་པའི། །རོ་ཚོགས་མང་པོའི་དཀྱིལ་ནས་ཞལ་རྔམ་པའི། །བསོད་ནམས་ལུས་བསྡུས་རྡོ་རྗེ་མི་ཟད་པའི། །སྐར་ཚོགས་མང་ལ་ཉི་ཟླའི་
འོད་བཞིན་དུ། །ཆེ་བཙན་དྲེགས་པས་འཇིགས་པའི་ཚོགས་ཀུན་འཇོམས། །མཚུངས་མེད་ཆོ་འཕྲུལ་ཁྱད་པར་རབ་སྟོན་ཅིང་། །འདོད་པའི་དབང་ཕྱུག་གར་གྱི་ཚུལ་དུ་བཞུགས། །ཟ་བྱེད་བརྐམ་པས་ཐུགས་སྐུ་གསུང་གི་ཞལ། །ཁྲག་མཚོ་མཐའ་མེད་སྐེམས་ཤིང་སྒལ་ཚིགས་འཇོམས། །ཁྲོ་གཉེར་སྙིང་འདྲེན་འཇིགས་བྱེད་གློག་ལྟར་འགྱུ། །དུར་ཁྲོད་འབུམ་གྱི་དབུ་སྨུག་འཇིགས་པར་བརྗིད། །འཁོར་བའི་རྟོག་པ་འཇིག་མཛད་ཐོད་རློན་ཕྲེང་བས་བསྒེགས། །རོལ་ཕྱིར་རྩེ་མོར་སྣང་བས་ཨ་ཨ་ཧ་ལས་བཞད། །རང་ཉིད་ཆེ་བས་དབང་རྫོགས་རྒྱལ་བས་དབུ་ལ་བརྒྱན། །སྨིན་རིས་ཁྲོ་གཉེར་གློག་བཞིན་རབ་འགྱུ་བས། །ཕྱོགས་དང་མཐུན་པའི་ཁྲག་འཐུང་འགྱེད་ཅིང་སྡུད། །སྤྲུལ་པ་དེ་ལྟ་བུས་ནི་ཟིལ་གནོན་པ། །འཇིགས་པས་མུན་པའི་ཚོགས་ཆེན་རབ་བཤམས་ཀྱང་། །སྡང་མིག་སྤྱན་ནི་ཉི་ཟླ་རྒྱས་འབར་བས། །འཇིགས་པའི་ཚོགས་ཕུང་སྡུག་བསྔལ་གཏན་ནས་སྦྱོང་། །ཁྲོས་པས་ཞལ་གདངས་སོ་ཆེན་གཙིགས་འབར་བས། །སྲིད་པའི་རྩེ་ནས་དམྱལ་ཁམས་སྙེགས་པ་ལྟར། །འཇིག་རྟེན་དུས་གཅིག་མིད་མཛད་ལམ་དྲུག་གཏན་ནས་གཅོད། །ཡེ་ཤེས་ཕྱག་བསྣམས་ཕྱག་མཚན་འབར་བ་ཡིས། །སྲིད་གསུམ་མ་ལུས་རྡུལ་ཕྲན་སྟོངས་པར་མཛད། །རྐན་སྒྲས་རོལ་པས་འགྲོ་ལ་ཕེག་བརྡབས་བཞིན། །ཁམས་གསུམ་ཀུན་ལ་ཆོས་སྟོན་རྒྱས་པར་མཛད། །ཟས་སུ་ཁྲག་འཐུང་རྡོ་རྗེ་ཆེ་མཆོག་གསོལ། །འཇིག་ཚོགས་སད་པའི་ཀོ་རློན་གཡང་གཞི་བསྣམས། །ཀླུ་འདུལ་ཡོན་ཏན་སྦྲུལ་ནག་སྟོང་གིས་བཀླུབས། །འཇིགས་བཅས་ཀླུ་ཡི་ཚོགས་ཀྱང་ཞབས་འོག་མནན། །འདོད་ཆགས་འདུལ་བ་འདོད་ཆགས་ཀུན་གྱི་གཙོ། །འདོད་ཆགས་ཆེན་པོ་འདོད་ཆགས་ཉིད་ཀྱི་སྐུ། །མང་པོའི་འཁོར་བཅས་འཇིགས་པའི་འཁོར་དུ་བྱས། །ཞེ་སྡང་འདུལ་བ་ཞེ་སྡང་ཀུན་གྱི་གཙོ། །ཞེ་སྡང་གདུག་པ་ཞེ་སྡང་ཀུན་གྱི་སྐུ། །འཇིགས་པའི་ཚོགས་རྣམས་ཟེར་གྱིས་ཀུན་བཞུ་བའི། །རབ་ཏུ་བརྗིད་པ་འཇིགས་པས་འཇིགས་པའི་གཟུགས། །གཏི་མུག་འདུལ་བ་གཏི་མུག་ཀུན་གྱི་གཙོ། །གཏི་མུག་བློ་སེལ་གཏི་མུག་ཆེན་པོའི་
སྐུ། །མི་འབྱེད་ཁྲག་འཐུང་སྲན་ཆེན་རི་རབ་བརྟན། །ང་རྒྱལ་འདུལ་བ་ང་རྒྱལ་ཀུན་གྱི་གཙོ། །འཇིགས་ཚོགས་སད་ནས་རོ་ཚོགས་མང་གི་གནས། །ཞབས་བགྲད་མཆེ་གཙིགས་ཆོག་པའི་དུས་མཐའ་མེད། །འཇིགས་པས་ཕེབས་པར་དགའ་ཞིང་ཤིན་ཏུ་སྡང་། །ཕྲག་དོག་འདུལ་བ་ཕྲག་དོག་ཀུན་གྱི་གཙོ། །ཕྲག་དོག་ཆེ་མཆོག་ཕྲག་དོག་ཆེན་པོའི་སྐུ། །བུད་མེད་ཀུན་བསྡུས་དཀྱིལ་འཁོར་དབུས་གནས་ཤིང་། །ལམ་ནོར་གདུག་པར་བཅས་པ་ཕཊ་ཀྱིས་གསོད། །ཞིང་གི་ཤམ་ཐབས་གདུག་པ་འདུལ་བར་བསྣམས། །སྐུ་འདྲ་འཇིགས་ཚོགས་གཟུགས་ཀྱིས་སྐུ་ལ་བརྒྱན། །ཞབས་དང་ཕྱག་ཏུ་གྱུར་པ་བསམ་ཐག་ཆད། །ཞབས་ཆེན་གཡོན་མང་བརྐྱང་བས་ལྷ་གནོན་བདུད་ལ་ཁྱབ། །ཞབས་གཡས་ཐབས་ཆེན་མང་པོས་དབང་སྡུད་འདོར་ཞིང་བསྐུམ། །རྡོ་རྗེ་སེ་གོལ་ཕྱར་བརྡབས་གཉིད་ཆེར་རབ་སེལ་མཛད། །འོད་ཆེན་དབུས་ནས་གློག་ཆེན་རབ་འགྱུ་བའི། །འཇིགས་པར་གོང་ན་མེད་པའི་དཔའ་བོ་ཁྱོད། །ཟས་ངན་བདུད་རྩི་སྦྱོར་བའི་སྨན་ཆེན་བདག །འཇིགས་བྱེད་ཁྱོད་ལྟ་བུ་ནི་རབ་ཏུ་དཀོན། །བསྐལ་པར་བཀྲུས་ཀྱང་སླར་སྐྱེ་དྲི་མ་ལ། །ཡེ་ཤེས་ཉི་ཟེར་འོད་ཀྱི་བྱིན་བརླབས་དང་། །ཐུགས་རྗེ་དག་པའི་ཆར་གྱི་ཆོ་འཕྲུལ་གྱིས། །བརྡ་ཙམ་ཡུད་ལ་རྨོངས་འཁྲུགས་ལས་སྦྱོང་ཞིང་། །ཤི་བའི་ལམ་འགོག་ཤེས་རབ་དཀྱིལ་འཁོར་དུ། །སྐྱེ་བ་གཏན་ནས་སྦྱོང་བའི་ཐུགས་རྗེ་འཆར། །བྱམས་སྡང་མི་མངའ་བཀའ་དྲིན་ཆེན་པོའི་གཏེར། །ཁྲག་འཐུང་སྐུ་གསུང་ཐུགས་ལ་ཕྱག་འཚལ་ལོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བཀའ་དྲིན་དྲན་པའི་གླུ་ཞེས་བྱ་བའི་ལེའུ་ཞེས་བྱ་སྟེ་བཞི་བཅུ་བརྒྱད་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས། གསང་སྔགས་ཀྱི་རྒྱལ་པོ་འདི་བརྟན་ཞིང་མི་འགྱུར་བ་དང་། འཇིག་རྟེན་གྱི་ཁམས་སུ་གནས་པར་བྱ་བའི་ཆེད་དུ་འབྱུང་པོ་རྣམས་ཀྱི། ཇོ་མོའི་ཡང་ཇོ་མོ། །མི་སྲིན་མོ་ཆེན་མོ། །མི་སྲིན་མོ་དང་། ཚངས་མ་དང་། འཁྲུག་མོ་དང་། དབང་མོ་དང་། འཇུག་སྲེད་མ་དང་། གཞོན་ནུ་མ་དང་། དམར་མོ་དང་། བདུད་རྩི་མོ་
དང་། ཞི་བ་མོ་དང་། བེ་ཅོན་མོ་དང་། སྲིན་མོ་དང་། ཟ་བ་མོ་དང་། དགའ་བ་མོ་དང་། ར་རོ་ཁྲག་འཐུང་མྱོས་དང་། གཅིག་པུ་སྤྱོད་དང་། ཡིད་འཕྲོག་མ་དང་། གྲུབ་མོ་དང་། ཀླུང་མོ་དང་། གསོད་བྱེད་མོ་དང་།མི་མོ་དང་། ཕག་མོ་དང་། རྒན་བྱད་མོ་དང་། སྣ་ཆད་མོ་དང་། ཆུ་ལྷ་མོ་དང་། ནག་མོ་ཆེན་མོ་དང་། ར་མགོ་དམར་སེར་ཆེན་མོ་དང་། བུམ་རྣ་སྔོ་གནག་ཆེན་མོ་དང་། གསུས་འཛིན་སེར་གནག་ཆེན་མོ་དང་། རྒྱལ་མོ་དང་། བློན་མོ་དང་། སྡེ་དཔོན་མོ་དང་། གཡོག་དང་ཡང་གཡོག་དང་། བྲན་དང་། ཡང་བྲན་ལ་སོགས་པ། སླས་དང་བྱི་མོ་དང་། བྲན་མོ་རྣམས་ལ་ཆེད་དུ་བརྗོད་པ་འདི་བརྗོད་དོ། །གསང་བའི་སྙིང་པོ་ངེས་པ་འདི། །གསང་སྔགས་ཀུན་གྱི་རྒྱལ་པོ་ཡིན། །ཐབས་ཆེན་མཚོན་པའི་ཤེས་རབ་ནི། །སྒྱུ་འཕྲུལ་དྲ་བའི་སྙིང་པོ་དང་། །གསང་བ་རྒྱུད་ནི་མང་པོ་རྣམས། །ང་ཡི་ཐུགས་ལས་སྤྲུལ་པ་ཡིན། །ཚངས་པ་དང་ནི་བརྒྱ་བྱིན་དང་། །དབང་ཕྱུག་ཆེན་པོ་ལ་སོགས་པ། །སྡེ་དཔོན་འཕྲོག་མའི་ཡུལ་རྣམས་དང་། །ལུས་འཕགས་པ་ལང་སྤྱོད་པ་དང་། །སྒྲ་མི་སྙན་དང་འཛམ་གླིང་དུ། །ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་དུ་སྤེལ་བ་དང་། །དེ་ཡི་གཟུགས་ལ་གཏད་པ་ནི། །ཡིད་བཞིན་མཛོད་འབྱོར་བཀའ་ཡི་གནས། །ཕྱི་ནང་ཐེག་པ་བསྟན་བཅོས་དང་། །སྟོང་ཕྲག་བརྒྱད་ཅུ་རྩ་བཞི་རྣམས། །སྤྱོད་དང་བསྒོམ་དང་བཟླས་པ་དང་། །སྡོམ་པ་ཀུན་ལ་མཁས་པ་ཡིས། །བསྒོམ་པ་སྲན་དང་ཆོས་ཕྱོགས་དང་། །བསྟན་པ་འཛིན་པར་ནུས་པ་ཡི། །གསང་བའི་སྙིང་པོ་མཆོག་ཏུ་གཏད། །གཞན་ལ་བསྙད་པར་མ་ཡིན་ནོ། །མི་འཁྲུག་བློ་ཟབ་རྐྱེན་ཐུབ་ཅིང་། །ཡིད་བཞིན་སྦྱོར་བར་མོས་པ་ལ། །རྩ་བ་ཡན་ལག་དམ་ཚིག་བསྟན། །ཟླ་དང་བཅས་པས་དམ་ཚིག་ཆེ། །སྦྱོར་བ་གཉི་ག་མཁས་པ་དང་། །ལུང་དང་ཚད་དུ་ལྡན་ཐུབ་དང་། །གཞན་ལ་བསྙད་པར་མི་བྱེད་ཅིང་། །བསྟན་པ་མཆོད་པར་བྱེད་པའོ། །ཉེ་བ་བསྙེན་པ་དམ་ཚིག་ལ། །བསྒྲུབ་པ་བསྙེན་པ་ཉེ་བསྙེན་པ། ཅི་ནུས་པར་ནི་ཤིན་ཏུ་བརྩོན། །སེམས་ཅན་ངང་ཚུལ་ཀུན་བོར་ནས། །གང་གི་ཡིད་
ཀྱང་མི་འཁྲུགས་ཤིང་། །མཆོད་པ་ཚོགས་ལ་སྟོབས་ལ་རུབ། །བུད་མེད་འགུགས་པས་གཙོ་ལ་དབུལ། །ཟུང་ཐུབ་གསང་ལ་མཁས་པ་ཡིས། །ངེས་པ་ཅན་ལ་ཤིན་ཏུ་གཏད། །གཞན་དུ་བསྟན་པར་མི་བྱའོ། །ཐོགས་མེད་ཕྱལ་བར་འདོད་པ་སྤྱོད། །བུད་མེད་ཡོན་ཏན་ཀུན་ཡོད་ཅིང་། །འདོད་ཆགས་ཀུན་དང་མཐུན་སྤྱོད་ལ། །རྩ་བ་དང་དུ་བླང་བ་དང་། །འཚམ་པར་ལྷ་ཡི་སྐུ་བསྟན་ཏེ། །ཉེ་བསྙེན་གསང་བའི་མན་ངག་རྣམས། །ནམས་ཀྱང་སྦྱིན་པར་མི་བྱའོ། །དེ་ལ་སྦྱོར་སྟངས་དེ་བསྟན་ནས། །གཞན་ནི་བསྟན་པར་མ་གསུངས་སོ། །དད་ལྡན་སྲུན་ཅིང་བློ་རྣོ་བ། །དད་པ་ཆེ་ཞིང་ཆོས་ལ་གུས། །ཆགས་པར་རན་པ་བཀའ་ཉན་ཅིང་། །གནས་པ་དགའ་ཞིང་ལུང་ཉན་པ། །རྩ་བ་ཡན་ལག་དམ་ཚིག་སྒྲུབ། །མཆོད་པའི་གནས་ཤོམ་སྡོམ་པ་སྲུང་། །བསྙེན་པ་ལ་ནི་བྱིན་ཕབ་ནས། །གསང་སྔགས་ཚོགས་ཀྱི་མཆོད་གནས་སུ། །ང་ཡི་གསང་བ་བྱིན་ཕབ་སྟེ། །ཐོགས་པ་མེད་པར་མངོན་སུམ་ལ། །སྦྱོར་བའི་ཐབས་ལྡན་མཉམ་སྦྱོར་བ། །དཀྱིལ་འཁོར་བཞི་བཅུ་རྩ་གཉིས་ཀྱི། །བདག་ཉིད་མཉེས་པའི་མཉམ་སྦྱོར་ཞིང་། །མཉམ་པའི་གྲུབ་པས་ཚོགས་ལ་མཆོད། །དམ་ཚིག་མི་ལྡན་སྤྱོད་རྩིང་དང་། །གཏིང་ནས་བསྟན་པ་མི་འཛིན་ལ། །འདོད་ཆགས་སྤེལ་བར་མི་བྱེད་ཅིང་། །གསང་བའི་སྙིང་པོ་དེ་ཁོ་ན། །ངེས་པའི་དོན་ནི་མི་སྟོན་ལ། །ང་ཡི་དབང་དང་བསླབ་པ་རྣམས། །རིམ་པ་བཞིན་དུ་རབ་ཏུ་སྦྱིན། །རིགས་ངན་ཕོ་མོ་འདོད་སྤྱོད་ནི། །སྤྲོ་ཐུང་འདོད་ཆགས་རབ་ཏུ་ཆེ། །བློ་ཞན་ཕྲག་དོག་སྒྲོ་སྐུར་ཅན། །གཉིད་ཆེ་ཆང་དད་བརྩོན་འགྲུས་ཆུང་། །སློབ་ལ་མི་གུས་ནན་ཏན་མེད། །སློབ་དཔོན་མི་དྲན་སྤུན་སེམས་ཆུང་། །གལ་ཏེ་དམ་ལ་གནས་ན་ཡང་། །ང་ཡི་གསང་བ་འཛིན་པ་ལ། །མངོན་དུ་དགའ་བར་མི་ནུས་ཏེ། །ལྟ་ཞན་བཀའ་ལས་འདས་པ་དང་། །གྲོལ་བ་དཀའ་ཞིང་ནུས་མཐུ་ཞན། །མུན་དང་ལྐོག་དང་སྐྱེ་བོ་ལ། །གར་དབེན་ཕྲད་པར་འདོད་སྤྱོད་ཅིང་། །འདོད་ཆགས་འགའ་ལམ་དེ་དག་ལ། །ཚིག་རྣམས་གསང་བ་སྨྲ་བྱེད་པ། །དངོས་ཀྱི་དོན་དང་
མཐུན་པ་ལས། །གསང་བའི་སྙིང་པོ་སྦྱིན་མི་བྱ། །བསྐལ་བའི་འཇིག་རྟེན་བར་དུ་ཡང་། །ཐུགས་ཀྱི་བདེ་བ་མི་སྤྲོ་ཞིང་། །ནམས་ཀྱང་བསྟན་པར་མི་བྱའོ། །འཇིག་རྟེན་འདོད་པ་དགའ་རྣམས་ཕྱིར། །གལ་ཏེ་རྨོངས་པས་བྱིན་པ་ནི། །རིམས་དང་ནད་ཀྱིས་སྲོག་བཅད་དེ། །རྩ་བ་ཡན་ལག་སྤངས་པ་ཡིན། །བསྲེགས་དང་སྦྲེབས་པར་ཡུན་རིང་གནས། །ཞེས་བརྗོད་པས་སྲིད་པ་མཐའ་དག་གི་བུད་མེད་ཀྱི་ཚོགས་རྣམས་དམ་ཚིག་འདིས་འདུལ་བར་གྱུར་ཏེ། །དེ་ནས་བཅོམ་ལྡན་འདས་དགྱེས་པ་ཆེན་པོ་སྐུ་གསུང་ཐུགས་དང་ཡོན་ཏན་ཕྲིན་ལས་རྡོ་རྗེ་ལས་རྡོ་རྗེ་གསང་བའི་ཚིག་འདི་ཕྱུང་ངོ་། །ཨེ་ཨེ་མ། ཨེ་མའོ་ཆོས་རྣམས་སྒྱུ་མ་ཡི། །ངང་ཉིད་བུད་མེད་གསང་བ་སྔགས་པ་ཡི། །ལྔ་དྲུག་དུས་བཏབ་སྣང་སྲིད་འབྱུང་བའི་གཏེར། །ཡང་དག་ལམ་རྙེད་མངོན་པར་ཀུན་གནས་ཀུན་དུ་གནས། །ཆོས་མང་ཆོས་ཉིད་མཉམ་པའི་ཕྱག་རྒྱ་ཇི་སྙེད་ལས། །ལས་ངན་དགེ་བའི་ཆོ་འཕྲུལ་ལམ་ཆེན་འདི། །ཀུན་གྱི་ཁྱད་པར་ཉིད་ནི་བུད་མེད་བདེ་བ་གཅིག་པུ་ཡིན། །ཆོས་ཀུན་དེ་ཉིད་ཡིན་ཕྱིར་དམན་པས་མི་སྨད་འཚམ་པར་བསྟན། །སྒྱུ་མ་འབྱོར་པ་ཉིད་ནི་བདེར་གཤེགས་ཉིད་ཡིན་རབ་ཏུ་གསལ། །རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དམ་ཚིག་ཆེན་པོས་བུད་མེད་བཏུལ་བའི་ལེའུ་སྟེ་བཞི་བཅུ་དགུ་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་མཉེས་པའི་མཆོད་པ་འདི་ཆེད་དུ་བརྗོད་དོ། །དེ་ལ་མཆོད་སྦྱིན་ཆེན་པོ་ནི། །ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་འབུལ། །བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ནི་དཀྱིལ་འཁོར་ཐིམ། །ཕྱོགས་བཅུ་དུས་བཞི་གཤེགས་པ་ཡི། །བདེར་གཤེགས་ཡོན་ཏན་རྨད་པོ་ཆེ། །གཞན་ན་
ཡོད་པ་མ་ཡིན་ན། །ལྷ་སྲིད་ལ་སོགས་སྨོས་ཅི་དགོས། །རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་གྱུར་ཅིང་། །གསལ་བའི་ཡིད་གཉིས་མེད་པ་ནི། །དཀྱིལ་འཁོར་ཆེན་པོ་འབར་བར་འགྱུར། །ཞེས་བརྗོད་པས། མཉེས་པ་ཆེན་པོས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཁྱབ་པར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཆོད་སྦྱིན་གྱི་ལེའུ་སྟེ་ལྔ་བཅུ་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་དོན་ཡོད་པར་བྱ་བའི་ཕྱིར། །དམ་ཚིག་ཆེན་པོ་ཆེད་དུ་བརྗོད་དོ། །བླ་མེད་ཐེག་པར་ངེས་གྱུར་པས། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་སོགས་ཚོགས་གྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །བླ་མེད་མཆོག་གི་དམ་ཚིག་ཏུ། །འདུལ་བའི་དབང་དུ་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཡོད་མེད་དབུ་མའང་མི་དམིགས་ཤིང་། །སྒྱུ་མ་མིག་ཡོར་ལྟ་བུའི་ཚུལ། །སྲོག་མེད་སྲོག་གཅད་གཅད་དུ་མེད། །སྲོག་དང་སྐྱེས་བུ་ལོག་རྟོགས་ཙམ། །བདེན་པ་གཉི་གར་དབྱེར་མེད་པས། །འཕྲུལ་དགའི་ཚུལ་ཏེ་ཐ་དད་མིན། །གཞན་དང་མ་བྱིན་མེད་པའི་ཕྱིར། །བླངས་མེད་ཐམས་ཅད་ཉིད་ཀྱི་དབྱིངས། །ཆོས་རྣམས་སྒྱུ་མ་ལྟ་བུ་དང་། །མིང་དང་ཚིག་ཏུ་བཏགས་པ་བརྫུན། །བརྫུན་ཉིད་ལ་ནི་བརྫུན་སྤྱོད་པ། །བརྫུན་ཞེས་བཏགས་ཙམ་ཡོད་མ་ཡིན། །མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཆགས་མེད་པ། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་དུ་མི་དོར་རོ། །ཡན་ལག་བཅུ་ཡི་དམ་ཚིག་མཆོག །ཡེ་ནས་དག་མཉམ་རྟོག་པས་སྤྱད། །བསྲུང་ཞིང་བསྒྲུབ་པའི་དམ་ཚིག་ལྔ། །རྩ་བ་ཡིན་ཏེ་རིགས་མེད་
འགྱུར། །མི་སྤང་མི་དོར་ལྔ་གཉིས་ནི། །ཡན་ལག་དམ་ཚིག་འདའ་དཀའ་བའོ། །མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །འདས་ན་སངས་རྒྱས་མ་ཡིན་ནོ། །རྩ་བ་ཉམས་པའི་ཕྱལ་པ་དག །གསོ་ལ་ཉེ་བར་མི་བརྩོན་དང་། །སྐད་ཅིག་ཡུད་ཙམ་སྨྲ་མ་བྱེད། །ཉམས་འགྱུར་ཉེས་པ་བརྗོད་མི་ལང་། །རྩ་བའི་དམ་ཚིག་ཉམས་གྱུར་ན། །བསྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་འགྲོར་ལྟུང་། །དམ་ཚིག་རྣམས་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་གཉིས་ལ། །གཅིག་ལ་བཅུ་ཕྲག་གཉིས་སུ་དབྱེ། །དམ་ཚིག་འདི་ནི་རྨད་པོ་ཆེ། །འཇིག་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཇི་སྙེད་པའི། །རྟོག་འདུལ་དམ་ཚིག་དེ་སྙེད་སྤྲོ། །གཞན་ཡང་རྒྱལ་མཆོག་ཀུན་བཟང་གི། །ཐམས་ཅད་མ་ལུས་ཕྱག་རྒྱ་ཡི། །བསྒྲུབ་མེད་དམ་པ་མ་ལུས་འགྲུབ། །དེ་ལ་སོགས་པ་མཐའ་ཡས་མཆོག །རྒྱལ་བའི་རིགས་མཆོག་འཛིན་པ་སྟེ། །འཇིག་རྟེན་གཙོ་དང་འཁོར་གྱིས་བཀུར། །དམ་པའི་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབ། །བདེར་གཤེགས་ཉིད་ཀྱི་ཡུལ་ལ་བཞུགས། །འཇིགས་མེད་ཀུན་དུ་བཟང་པོར་སྦྱོར། །ཇི་བཞིན་ཉིད་དང་འདུལ་བའི་ཐབས། །ཇི་སྙེད་སྡོམ་པ་བསམ་ཡས་པ། །མ་ལུས་རྣམ་དག་ལྷུན་གྱིས་འགྲུབ། །ཉམས་ན་བསྐངས་པས་རྫོགས་པ་དང་། །དེ་ལ་སོགས་པ་བསམ་ཡས་མཆོག །ཅེས་བརྗོད་པས དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་འདུལ་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དམ་ཚིག་གི་ལེའུ་སྟེ་ལྔ་བཅུ་གཅིག་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས། སྔགས་འཆང་རྣམས་
དོན་ཡོད་པར་བྱ་བའི་ཕྱིར། །དམ་ཚིག་སུམ་བརྒྱ་བའི་རྩ་བ་མདོར་བསྡུས་ནས། །སྔགས་འཆང་རྣམས་ཀྱི་དོན་ཆེད་དུ་བརྗོད་པ་འདི་བརྗོད་དོ། །ཕྱོགས་བཅུའི་འཇིག་རྟེན་རྡུལ་སྙེད་དུ། །ལོག་རྟོགས་མི་བཟད་རྡུལ་ཕྲན་སྙེད། །རྟོག་འདུལ་གཉེན་པོ་བསམ་མི་ཁྱབ། །འདུལ་བ་སྡོམ་པ་བསམ་ཡས་དང་། །རྡོ་རྗེ་ཐེག་མཆོག་མང་པོ་ཀུན། །ཉིད་ལས་གཡོས་ཤིང་སྤྲོས་མེད་ཀྱང་། །རང་རིག་འཁྲུལ་པའི་རྟོག་པ་ཡིས། །ལྟ་བ་མཐོ་དམན་བསམ་མི་ཁྱབ། །དེ་འདུལ་དོན་ཕྱིར་འཚམ་པར་བསྟན། །ཡང་དག་ཉིད་དང་ལོག་རྟོགས་གཉིས། །ངོ་བོ་ཉིད་ཀྱིས་གནས་གྱུར་ནས། །དེ་ལ་བཅོས་ཤིང་བསྒྱུར་དུ་མེད། །ཡེ་ནས་ངོ་བོ་ཉིད་མེད་ན། །ཉོན་མོངས་སྤངས་ཤིང་དོན་བསྒྲུབ་མེད། །ཐམས་ཅད་མ་ལུས་རོ་གཅིག་འགྱུར། །ཀུན་རྫོབ་ཆུ་ཟླ་ལྟར་ཡིན་པས། །ཅིར་ཡང་འགྱུར་ཞིང་ཅིར་ཡང་འགྲུབ། །རྣལ་འབྱོར་དེ་ཉིད་རྟོགས་པ་ཡིས། །དོན་དམ་སྐྱེ་འགག་མེད་པ་སྟེ། །ཀུན་རྫོབ་སྒྱུ་མ་ཅིར་ཡང་འགྲུབ། །ཅེས་རྡོ་རྗེ་གསང་བའི་ཚིག་ཏུའོ། །སྒྱུ་འཕྲུལ་དྲ་བ་ལས་དམ་ཚིག་སུམ་བརྒྱ་དྲུག་ཅུ་པའི་རྩ་བ་བཅོ་ལྔ་པ་མདོར་བཤད་པའི་ལེའུ་སྟེ་ལྔ་བཅུ་གཉིས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པས། ཐུགས་རྡོ་རྗེ་རོལ་པའི་ཏིང་ངེ་འཛིན་ལ་སྙོམས་པར་ཞུགས་ནས། ཆེད་དུ་བརྗོད་པ་འདི་བརྗོད་དོ། །ནམ་མཁའི་མཁའ་དཀྱིལ་དང་བ་ཡི། །ཡིད་བཞིན་སྤྲིན་ཚོགས་རྣམ་པ་འབྱུང་། །སྣ་ཚོགས་འབྱུང་ཞིང་འོད་འཕྲོ་འབར། །རྃ། སྲིད་གསུམ་སྲེག་པའི་མེ་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །ཧྃ། དབང་པོ་དང་བའི་དཀྱིལ་འཁོར་དུ། །སྤྱོད་ཡུལ་རྫས་རྣམས་བསྡུས་ནས་ནི། །ལྷན་ནེ་ལྷང་ངེར་འོད་དུ་ཞི། །ཨ། ཞི་འགྱུར་དབྱིངས་ནས་ཕྱག་རྒྱ་འབར། །ཐུགས་རྗེ་བྱིན་བརླབས་རྨད་པོ་ཆེ། །ཧཱུྃ། འགྲོ་བ་སྣ་ཚོགས་དོན་བྱེད་པ། །འདི་ནི་བྱང་ཆུབ་མཆོག་ཏུ་གསུངས། །ཧོ། བཞི་པོ་འཇོམས་ཤིང་ངན་སོང་སྦྱོང་། །ཏྲཱཾ་ཏ། སྨན་བཅུད་ལེན་གྱིས་དུག་སྦྱོང་བཞིན། །ཕྱི་དང་ནང་གི་དྲི་མ་དག །བདག་མེད་གཉིས་ཀྱིས་དག་པར་བྱེད། །ཧྲི། གསལ་ཞིང་
དག་གིས་གནས་ཐམས་ཅད་རབ་ཏུ་གཡོ་ཞིང་བསྐྱོད་པར་མཛད་པས། དེ་དག་གི་སྡེ་དཔོན་དང་བཅས་འཁོར་དང་གཡོག་ཏུ་བཅས་པ་རྣམས། རླུང་གི་ཤུགས་ཀྱིས་བསྐྱོད་པ་བཞིན་དུ་ལྷགས་པ་ནི་འདི་ལྟ་སྟེ། གཤིན་རྗེ་ཚེ་བདག་ནག་པོ་ཆེན་པོ་ཡུམ་དང་བཅས་པ་དང་། བདུད་ནག་པོ་ཆེན་པོ་མེའི་ཁ་རླངས་ཅན་དང་། ཡུམ་བདུད་མོ་ནག་མོ་ཁྲག་འཛག་མ་དང་། སྲིན་པོའི་རྒྱལ་པོ་གསོད་བྱེད་ནག་པོ་ཡུམ་དང་བཅས་པ་དང་། གནོད་སྦྱིན་ཆེན་པོ་གང་བ་བཟང་པོ་དང་། ཡུམ་གནོད་སྦྱིན་མོ་ཤ་ཟ་རལ་གཅིག་མ་དང་། ལྷའི་རྒྱལ་པོ་དབང་ཕྱུག་ཆེན་པོ་དང་། རུ་ཏྲའི་བདག་པོ་ཐར་པ་ནག་པོ་དང་། རྨུ་རྗེ་བཙན་པ་རྒྱལ་པོ་ཆེན་པོ་དང་། ཕྱི་རོལ་ལྷའི་བདག་པོ་ཀཱ་ལ་ནག་པོ་དང་། ཁྱབ་འཇུག་ཆེན་པོ་ཀུན་དུ་རྒྱུ་བ་དང་། ཀླུའི་བདག་པོ་གཞོན་ནུ་གཏུམ་པོ་དང་། ལྷའི་རྒྱལ་པོ་ལི་ཕྱིན་ཆེན་པོ་དང་། གནོད་སྦྱིན་ཆེན་པོ་ལག་རྒྱུ་བ་དང་། བདག་ཉིད་ཆེན་པོ་རྡོ་རྗེ་མཛེས་པ་དང་། ཀླུ་བདུད་ཆེན་པོ་ཡམ་ཤུད་དམར་པོ་དང་། གཞན་ཡང་ལྷ་དང་། ཀླུ་དང་། ལྷ་མ་ཡིན་དང་། ཟ་བྱེད་དང་། ཡི་དགས་དང་། འབྱུང་པོའི་ཚོགས་དང་། ཕོ་ཉའི་ཚོགས་འཇིགས་པར་བྱེད་པ་བསམ་གྱིས་མི་ཁྱབ་པ་རབ་ཏུ་འདུས་སོ། །དེ་ནས་བཅོམ་ལྡན་འདས་ཀྱིས་གདུག་བྱེད་ཆེན་པོའི་འཁོར་དེ་དག་རབ་ཏུ་འདུལ་བར་མཁྱེན་ནས། དུར་ཁྲོད་ཆེན་པོའི་དཀྱིལ་འཁོར་མངོན་པར་སྤྲུལ་པར་མཛད་དེ། ནམ་མཁའི་དབྱིངས་ཀྱི་དཀྱིལ་འཁོར་དག །གཟུགས་སུ་བརྙན་པ་རབ་ཏུ་འཇིགས། །སྒྲ་ནི་མི་སྙན་དྲག་ཅིང་གཏུམ། །དྲི་ནི་མི་ཞིམ་རུལ་མྱགས་བསུང་། །རོ་ནི་ཁ་སྐྱུར་ཚ་བར་བྲོ། །རེག་བྱ་ཚ་རྩུབ་མི་གདུག་སྤྱོད། །ཞེ་སྡང་ཆེན་པོའི་མེ་འབར་ཞིང་། །ང་རྒྱལ་ཀེང་རུས་བྲག་ཏུ་གཏམས། །གཏི་མུག་མུན་ནག་རབ་ཏུ་འཐིབས། །འདོད་ཆགས་ཁྲག་གི་ཆུ་ཆེན་འབྲུག །ཕྲག་དོག་རླུང་ནི་རབ་ཏུ་འཁྲུགས། །སྟི་ར་ཆེན་པོའི་ལོངས་སྤྱོད་ལ། །སྟག་གཟིག་གཅན་གཟན་ཅེ་སྤྱང་དང་། །ཀཱང་ཀ་དུར་བྱ་འདབ་ཆགས་ཚོགས། །ཤ་ཟ་ཁྲག་འཐུང་རུས་པ་འཇོམས། །བམ་དང་རུལ་དང་མྱགས་པ་དང་། །བྱེ་དང་
སྐད་གདངས་དང་། །སྐད་དང་ང་རོ་དྲག་ཏུ་འདོན། །ཧཱུྃ་ཧེ་ཧེ་ཕཊ་བྷྱོ་རུ་ལུ། །ཁྲོ་བོ་ཆེན་པོ་ཚོགས་པ་ཡི། །དཀྱིལ་འཁོར་ཆེན་པོའི་ཞལ་འབར་བ། །བདག་ཉིད་གཉིས་སུ་མེད་པར་བསྒོམ། །སོ་སོའི་རང་སྔགས་བཟླས་ནས་སུ། །རྒྱུད་དྲུག་སེམས་ཅན་ཐམས་ཅད་ལས། །མ་རུངས་གདུག་པ་ཐམས་ཅད་དུ། །ཛཿཧཱུྃ་བྃ་ཧོཿས་བཀུག་ནས་ནི། །ལན་གསུམ་ལན་བདུན་ཞལ་དུ་བསྟིམ། །ལྷ་ཡང་རུང་སྟེ་བརླག་པར་འགྱུར། །ཧོཿ། གཞན་ཡང་མཆོད་པའི་ཞལ་ཟས་ནི། །འབྱོར་བ་རྣམ་པ་ཀུན་གྱིས་མཆོད། །ནྲྀ་ཡི་ཚིལ་དང་ཚ་བའི་མར། །དམར་གྱི་ཨརྒྷ་རྒྱུན་དུ་དབུལ། །ཨ་ཧོཿ། ཡང་ན་ལན་གསུམ་བརྒྱ་རྩ་བརྒྱད། །སྟོང་ངམ་འབུམ་དུ་དབུལ་བར་བགྱི། །ནག་པོའི་ཚེར་མ་དུག་ཤིང་ངམ། །གཞན་ཡང་བསྲེག་རྫས་གདུག་གསུམ་དང་། །གནོན་པའི་ཆོ་ག་ཀུན་གྱིས་བྱ། །སྒྱུ་འཕྲུལ་དྲ་བ་ལས་ཐུགས་རྗེ་རོལ་པའི་དཀྱིལ་འཁོར་སྤྱིར་བསྟན་པའི་ཧོཾཿ། ཨོྃ་ཧཱུྃ་ཧྲཱྃ་ཧྲཱིཿཨཱཿ། གསང་བའི་སྙིང་པོ་དེ་ཁོ་ན་ཉིད་ངེས་པ་ལསཧོཾཿ ཐམས་ཅད་མ་ལུས་པར་འདིར་འདུས་པའི་ལེའུ་སྟེ་ལྔ་བཅུ་བཞི་པའོ།། །།དེ་ནས་དེ་བཞིན་གཤེགས་པ་ཁྲོས་པའི་རྒྱལ་པོས་སྒྱུ་འཕྲུལ་དྲ་བ་བསྟན་པ་ལས་ཁྲོ་བོ་རྔམ་པའི་ཚོགས་སུ་བསྒོམས་ནས་ཆེད་དུ་བརྗོད་པ་འདི་བརྗོད་དོ། །བྱང་ཆུབ་མཆོག་གི་སྙིང་པོ་ནི། །མཚན་མས་བཙལ་བ་མ་ཡིན་གྱི། །དག་པ་རྣམ་གསུམ་མ་ནོར་ཞིང་། །རང་རིག་རྒྱལ་པོ་གོམས་པ་ཡིས། །བྱང་ཆུབ་མཆོག་འདི་རྙེད་པར་འགྱུར། །དྲག་པོ་གཏུམ་པོ་བསྒྲུབས་པ་ནི། །བྷ་ག་ལ་ནི་ལིངྒ་བཞག །མཚན་མ་མིང་དུ་བཅས་པར་བྱ། །ཁྲོ་བོའི་ཞལ་ནི་གང་ཡང་རུང་། །ལན་གསུམ་ལན་བདུན་རྟག་བསྒོམས་ཤིང་། །མངོན་དུ་བྱུང་བའི་ཞལ་འབར་ཏེ། །བདག་ཉིད་དཀྱིལ་འཁོར་ལྷར་གྱུར་ནས། །ལིངྒ་ཡང་ནས་ཡང་བསྡུས་ཏེ། །དབྱིངས་ཀྱི་དཀྱིལ་དུ་བསྟིམ་པར་བྱ། །ཧཱུྃ་གིས་བསྡུ་ཞིང་ཕཊ་ཀྱིས་འཕང་། །ཞལ་གྱིས་རང་སྔགས་ཁྲི་འབུམ་དུ། །རྣམ་གསུམ་ཚུལ་གྱིས་བཟླས་ནས་སུ། །ཡང་ནས་ཡང་དུ་གསོལ་བར་བྱ། །འགྲོ་ལྔ་སེམས་ཅན་ཐམས་ཅད་ཀུན། །
དབང་མེད་ཞལ་དུ་ཐིམ་པར་འགྱུར། །ཡ་མ་ཡང་ལྷག་པར་མཛེས། །སྐུ་མདོག་དུང་ཀ་ལ་སོགས་དང་། །མཆེ་གཙིགས་ཁྲོ་གཉེར་གཙིགས་པ་དང་། །ཞལ་བགྲད་ཕྱག་རྒྱ་འབར་བ་དང་། །གང་ལ་སོགས་པ་བསྒོམ་པར་བྱ། །བདག་ཉིད་འཛིན་པའི་ཕྱག་རྒྱ་སྟེ། །མཚན་མ་བཟུང་ནས་རང་སྔགས་དོན། །མངོན་པར་དབང་པོས་བལྟར་ཡོད་པར། །རིལ་བུ་བསྡུས་ནས་དབྱིངས་སུ་མཆོད། །ཐེ་ཚོམ་མེད་པར་འགྲུབ་པར་ངེས། །དམ་པའི་ཆོས་འཇིག་མ་རུངས་པ། །དཔའ་བོས་དགོས་པ་ཡོད་པའི་ཕྱིར། །ཀུན་ལ་ཕན་པ་དེ་གྱིས་ཤིག །ཧོཿཧཱུྃ་ཛཿདང་ཕཊ་དང་སྤོ་ལ་སོགས། །འདྲེན་པའི་མཆོག་ཏུ་དེས་གསུངས་སོ། །མཚན་མ་མིང་རུ་བསྡུས་པ་ཡང་། །ཇི་ལྟར་སྔོན་གྱི་དེ་བཞིན་དུ། །སྨོན་པ་བྱང་ཆུབ་ལམ་དུ་གཞུག །མཚན་མའི་བག་ཆགས་མེད་པར་བྱ། །དབྱིངས་ནས་སྤྲོ་ཞིང་ཨ་ལ་བསྟིམ། །ཨ་ཧོ། །ཐུགས་ཉིད་ལ་ནི་ཐུགས་བརྗོད་དོ། །སྒྱུ་འཕྲུལ་དྲ་བ་ལས་ཤིན་ཏུ་གསང་བའི་ཁྲོ་བོ་ཉེ་བར་བསྟན་པའི་ལེའུ་སྟེ་ལྔ་བཅུ་ལྔ་པའོ།། །།དེ་ནས་དེ་བཞིན་གཤེགས་པ་ཁྲོ་བོའི་རྒྱལ་པོ་ལས་ཐམས་ཅད་རྡོ་རྗེར་བསྡུས་ནས་ཆེད་དུ་བརྗོད་པ་འདི་བརྗོད་དོ། །དག་པ་རྣམ་གསུམ་ཚུལ་བསྒོམས་ཤིང་། །སྒྱུ་འཕྲུལ་དྲ་བ་བསྟན་པར་གནས། །ཐམས་ཅད་ཧཱུྃ་དུ་བསྡུས་ནས་ནི། །དཀྱིལ་འཁོར་གྲུ་གསུམ་འབར་བར་བསྒོམ། །མེ་དཔུང་འབར་བའི་ཚོགས་ཆེན་དུ། །མེ་ལྷ་ཨགྣེ་ཛཿས་བཀུག་ནས། །རྃ་ཞེས་བྱ་བའི་མེ་སྦར་ཏེ། །ཁྲོ་བོའི་དཀྱིལ་འཁོར་མ་ལུས་ཀུན། །ཞེ་སྡང་རྡོ་རྗེར་བསྒོམ་པར་བྱ། །ཧཱུྃ་གཏུམ་པོའི་ཚོགས་ཆེན་རབ་ཏུ་འབར། །དུད་ཀ་ནག་པོའི་མདོག་འདྲ་ལ། །འབར་བའི་འོད་ཟེར་མང་པོར་འཁྲུགས། །ཉི་མའི་ཐོད་སྦྲུལ་མང་པོས་བརྒྱན། །སེང་གེ་གླང་ཆེན་སྟག་རྔམ་དང་། །ཕྱག་རྒྱ་སྣ་ཚོགས་འབར་བ་བསྣམས། །ཕཊ་དང་ཧཱུྃ་དང་ཧ་ལ་སྒྲ། །སྐད་དྲག་ཕྱོགས་བཅུར་ནམ་མཁའ་འཁྲུག །ཕཊ། ཁྲོ་བོ་ཁྲོ་མོའི་ཚོགས་ཀྱིས་བསྐོར། །ཡུལ་དང་གནས་ཀྱི་ཕྱག་རྒྱས་མཛེས། །ཧ་ཧེ། སླས་དང་བྱི་མོ་བྲན་མོ་དང་། །བྷྱོ། ཅི་བགྱི་ལ་སོགས་ཚོགས་ཀྱིས་བསྐོར། །སོ་སོའི་སྟན་དང་ལག་ཆ་དང་། །རྔམ་པའི་
ང་རོ་རང་སྔགས་སྒྲོགས། །མི་སྡུག་གཏུམ་པའི་གཟུགས་ཅན་དང་། །ཤིན་ཏུ་ཁྲོ་བར་བསྒོམ་པར་བྱ། །བདག་ཉིད་ཕཊ་ཀྱི་ངང་ཉིད་དུ། །གསལ་འདྲིས་བློ་གོམས་རྟག་ཏུ་བསྒོམ། །ཛཿཧཱུྃ་བྃ་ཧོས་བསྡུས་ནས་སུ། །རྒྱུད་དྲུག་སེམས་ཅན་ཀུན་བསྡུས་ནས། །ཁྲོ་བོའི་ཚོགས་ལ་དབུལ་བར་བྱ། །ལྷ་ཡང་རུང་སྟེ་བརླག་པར་འགྱུར། །ཡོ་བྱད་གཞན་ནི་སྤྱི་དང་མཐུན། །གཟིར་བའི་ཐབས་ཀྱང་གོང་མ་བཞིན། །མཆོད་པའི་གྲངས་ཀྱང་སྤྱི་དང་མཐུན། །ཨཱཿ། གཞན་ཡང་དཀྱིལ་འཁོར་བསམ་ཡས་ཀྱི། །ཧཱུྃ། ཞལ་གདངས་སྤྱན་བགྲད་ཁྲོ་ཞལ་བསྒོམ། །རྡོ་རྗེ་གཏན་པ་གདེངས་པ་དང་། །ཐོད་པ་ལྕགས་ཀྱུ་རྣམས་ཀྱིས་བསྐོར། །ཧཱུྃ་སྒྲ་དྲུག་པོའི་ཚོགས་ཀྱིས་འབར། །འཛིན་པའི་ཕྱག་རྒྱས་བཀུག་ནས་སུ། །ཞལ་དུ་བསྟིམས་ན་ལྷག་པར་འགྲུབ། །རྡུལ་ཆ་ཙམ་ཡང་མེད་པར་བྱེད། །འཁོར་གྱི་ཚོགས་ཀྱང་སྔ་མ་བཞིན། །བསྐང་བའི་ཚུལ་དུ་སྦོད་གཏོང་བྱ། །ཧཱུྃ། གཏུམ་པོ་དམར་པོ་མཆུ་རིངས་པོ། །འབར་བ་རྡོ་རྗེ་ཕྲེང་བས་བསྐོར། །འོད་ཆེན་འབར་བ་འཕྲོ་བ་ཡིས། །འཇིག་རྟེན་ཁམས་རྣམས་དུས་གཅིག་བརྡུབས། །ཧཱུྃ། ཁྲོ་བོའི་ཚོགས་ཀྱིས་སྔགས་རྣམས་དང་། །གནས་དང་ཡུལ་གྱི་ཕྱག་རྒྱ་དང་། །སླས་དང་བྱི་མོ་བྲན་མོའི་ཚོགས། །སོ་སོའི་རང་སྔགས་རྫོགས་པར་འདོན། །ཧ་ཧེ་བྷྱོ། གཞན་ཡང་བསྟོད་ཚིག་འདི་དག་གིས། །ཧཱུྃ་རྡོ་རྗེ་ཐུགས་རྗེ་བྱིན་བརླབས་ཀྱིས། །འཇིག་རྟེན་ཁམས་ནི་ཀུན་བཀང་སྟེ། །གཏུམ་འཁྲུག་མ་ལུས་ཐམས་ཅད་ཀུན། །རྡོ་རྗེ་མཐུ་ཡིས་བཏུལ་བར་གྱུར། །ཧཱུྃ་རྡོ་རྗེ་ཞེ་སྡང་འཁོར་བཅས་པས། །འཇིག་རྟེན་ཁམས་ནི་རབ་འབྱམ་ཀུན། །སྐད་ཅིག་ཡུད་ལ་རླག་མཛད་དེ། །བརླག་པར་མ་གྱུར་གང་ཡང་མེད། །སྒྱུ་འཕྲུལ་དྲ་བ་ལས་དྲག་པོ་ཧོམ་གྱི་ལེའུ་སྟེ་ལྔ་བཅུ་དྲུག་པའོ།། །།དེ་ནས་དེ་བཞིན་གཤེགས་པ་ཁྲོ་བོའི་རྒྱལ་པོ་པདྨ་སྡུད་པ་ཞེས་བྱ་བས། །འགྲོ་བ་མང་པོའི་དོན་གྱི་ཕྱིར། །ཆེད་དུ་བརྗོད་པ་འདི་བརྗོད་དོ། །ཤེས་རབ་ཐབས་སུ་སྦྱོར་བ་ཡིས། །ཐམས་ཅད་མ་ལུས་དབྱིངས་སུ་བསྡུས། །དབྱིངས་ནས་ཡེ་ཤེས་འོད་འཕྲོ་
འབར། །ཐམས་ཅད་མ་ལུས་དབྱིངས་སུ་སྦྱོར། །ཧྲཱིཿ། དཀྱིལ་འཁོར་ཟླ་གམ་གདེངས་པ་ལས། །འོད་ཟེར་མང་པོ་རབ་འབར་དང་། །རྡོ་རྗེ་ལྕགས་སྒྲོག་བསྡམས་པས་བསྐོར། །གཞན་ཡང་རྒྱན་གྱི་དམ་པ་མཆོག །ཀུན་གྱིས་དེ་ལ་བརྒྱན་ཅིང་བསྐོར། །མེ་ལྷ་སྤྱན་དྲངས་སྔ་མ་བཞིན། །ཁྲོ་བོའི་དཀྱིལ་འཁོར་མ་ལུས་ཀུན། །པདྨ་རིགས་ཀྱི་ཁྲོ་བོར་བསྒོམ། །དམར་སྨུག་དྲག་པོའི་མདོག་དང་ནི། །གཞན་ཡང་སྤྲུལ་པ་མང་པོ་ཡི། །ཕྱོགས་བཞི་མཚམས་བཞི་སྟེང་འོག་བསྐོར། །རྔམ་པ་རང་སྔགས་དྲག་ཏུ་སྒྲོགས། །ཧྲཱིཿ། བདག་ཉིད་མ་ཆགས་རྡོ་རྗེ་སྟེ། །དཀྱིལ་འཁོར་གོང་མ་གསལ་བསྒོམས་ནས། །ཕྱོགས་བཅུར་འགྲོ་བ་ཐམས་ཅད་དང་། །གདུག་པ་ཡིད་ཅན་མ་ལུས་ཀུན། །ཛཿཧཱུྃ་བྃ་ཧོཿ། སྥོ་ཊས་བཀུག་ནས་སུ། །དཀྱིལ་འཁོར་ལ་ནི་དབུལ་བར་བྱ། །དགོངས་པ་གྲུབ་ཅིང་ངན་སོང་སྦྱོང་། །ཧྲཱིཿ། གཞལ་ཡས་དཀྱིལ་འཁོར་མང་བོའི་ཚོགས། །དཀྱིལ་འཁོར་པདྨའི་ཞལ་འདྲ་ལ། །ཐ་མ་པདྨ་ལྗོན་ཤིང་དང་། །པདྨ་རྡོ་རྗེ་འོད་འབར་བསྒོམ། །གཞན་ཡང་རྒྱན་མཆོག་མཛེས་པ་ཡིས། །དཀྱིལ་འཁོར་ཀུན་ལ་མཛེས་པར་བརྒྱན། །བདག་ཉིད་པདྨའི་ལྷར་གྱུར་པས། །མཆོད་པ་ལྷ་རྫས་སྣ་ཚོགས་དང་། །ཞལ་ཟས་བཟའ་བཏུང་མཆོག་རྣམས་དང་། །དམར་པོའི་ཤིང་དང་དྲི་ཞིམ་པ། །ལན་གྲངས་གོང་དུ་སྨོས་པ་བཞིན། །རྟག་ཏུ་མཆོད་པ་བྱས་ན་ནི། །འཇིག་རྟེན་འདི་དང་འདས་པ་ཡི། །ཅི་འདོད་ལས་དེ་གྲུབ་པར་འགྱུར། །སྔགས་ནི་ཡི་གེ་རྃ་དང་ཧྲཱིཿ། མདོག་ནི་དམར་སྨུག་འོད་པོ་ཆེ། །ཕྱོགས་བཅུ་ཁྱབ་ཅིང་ཧྲཱི་ལ་བསྡུ། །དགྱེས་པའི་གླུ་དང་གར་གྱིས་མཆོད། །ཧྲཱིཿ། རྡོ་རྗེ་པདྨ་འབར་བ་ཡིས། །ཕྱོགས་བཅུ་མཐའ་ཀླས་རབ་འབྱམ་ཀུན། །དཔལ་དང་གཟི་བྱིན་ཚེ་ལ་སོགས། །པདྨ་འབར་བ་དེ་བསྡུས་ནས། །སངས་རྒྱས་སྐུ་དང་མཉམ་པ་དང་། །གཞན་ཡང་ལོངས་སྤྱོད་མཆོག་ལ་སོགས། །ཅི་འདོད་ལས་རྣམས་དབང་དུ་འགྱུར། །ལྷ་སྲིན་ལ་སོགས་སྨོས་ཅི་དགོས། །ཧྲཱིཿ། འདོད་ཆགས་རྡོ་རྗེ་འཁོར་བཅས་པས། །འཇིག་རྟེན་ཁམས་ནི་རབ་འབྱམ་ཀུན། །སྐད་ཅིག་ཡུད་ལ་དབང་དུ་བསྡུས། །དབང་དུ་མ་གྱུར་
གང་ཡང་མེད། །ཧྲཱིཿ། སྒྱུ་འཕྲུལ་དྲ་བ་ལས་ཐམས་ཅད་མ་ལུས་པར་དབང་དུ་བསྡུས་ཏེ། དབང་གི་ཧོམ་གྱི་ལེའུ་སྟེ་ལྔ་བཅུ་བདུན་པའོ།། །།དེ་ནས་དེ་བཞིན་གཤེགས་པ་ཁྲོ་བོའི་རྒྱལ་པོ་རྣམ་པར་འཕྲོ་བ་ཞེས་བྱ་བའི་དཀྱིལ་འཁོར་འདི་དག་ཉིད་ཀྱི་དབྱིངས་ནས་ཕྱུང་ནས་ཆེད་དུ་བརྗོད་པ་འདི་བརྗོད་དོ། །བདེ་བ་ཆེན་པོའི་དཀྱིལ་འཁོར་འབར། །འོད་ཟེར་འཕྲོ་བ་མང་པོ་འཁྲུག །བསོད་ནམས་ཞིང་འགྱུར་མཆོག་ཏུ་འབར། །ཕྱོགས་བཅུ་ནམ་མཁའ་གང་བར་བསྒོམ། །རྡོ་རྗེ་རིན་པོ་ཆེ་ཡིས་བསྐོར། །རྒྱལ་བའི་ཡོན་ཏན་མཁའ་དང་མཉམ།།ཏྲཱྃ། ཡེ་ཤེས་ཕྱོགས་བཞི་དབུས་འོད་འབར། །དཀྱིལ་འཁོར་ཞགས་པ་རིན་ཆེན་བསྐོར། །གཞན་ཡང་ཕྱག་རྒྱ་སྣ་ཚོགས་དང་། །ཁྲོ་བོ་ཀུན་ཀྱང་དགའ་འཕྲོ་སྟེ། །འོད་ཆེན་དཀར་པོ་འབར་བ་དང་། །ཕྱག་རྒྱ་སྣ་ཚོགས་ཅིར་ཡང་སྒྱུར། །ལྷ་དང་ལྷ་མོ་རྣམས་ཀྱིས་བསྐོར། །མཆོད་པའི་ཡོ་བྱད་སྣ་ཚོགས་དང་། །དཀར་ལ་དྲི་ཞིམ་ཤིང་རྣམས་དང་། །གཞན་ཡང་མཆོད་ཡོན་ཐམས་ཅད་ཀྱིས། །དཀྱིལ་འཁོར་ལ་ནི་རྒྱས་པར་དབུལ། །བདག་ཉིད་རིན་ཆེན་རབ་འབར་ནས། །ཏྲཱྃ། དཀར་ལ་ཡི་གེ་འོད་དུ་འབར། །ཁྲོ་བོ་ཀུན་ཀྱང་དེ་བཞིན་ཏེ། །མངོན་དུ་གྱུར་པའི་དཀྱིལ་འཁོར་དུ། །པཱ་ཤ་ཧོཿདང་ཛཿཧཱུྃ་གིས། །ཕྱོགས་བཅུའི་ལམ་ལྔ་ཀུན་བཀུག་སྟེ། །དབྱིངས་སུ་ཐིམ་པར་འོད་འཕྲོ་བསྒོམ། །ཐམས་ཅད་སངས་རྒྱས་ཞིང་དང་མཉམ། །གཞན་ནས་ཡོད་པའང་མ་ཡིན་ཏེ། །སྒྱུ་མའི་ཡེ་ཤེས་བརྟན་པ་ཡིན། །གཞན་ཡང་དཀྱིལ་འཁོར་བསམ་ཡས་ནི། །རིན་ཆེན་དབྱིངས་ལ་རྡོ་རྗེ་འབར། །དཀྱིལ་འཁོར་རྒྱན་གྱིས་འཁོར་བར་བསྐོར། །གཞན་ཡང་ལྷ་དང་ལྷ་མོ་ཡིས། །ཕྱོགས་བཅུ་ཁྱབ་པར་མཆོད་ཅིང་དབུལ། །ཡོན་ཏན་རྒྱལ་བའི་ཞིང་དང་མཉམ། །ཏྲཱྃ། གླུ་དང་གར་གྱིས་མཆོད་པར་བྱ། །སངས་རྒྱས་ཞིང་ཁམས་མ་ལུས་ཀུན། །མཆོད་ཡོན་རིན་ཆེན་དཔལ་འཕེལ་གྱིས། །ཕྱོགས་བཅུ་གང་བར་རྒྱས་ཕུལ་ནས། །རྡོ་རྗེ་དབྱིངས་ཀྱིས་རྒྱས་པར་རོལ། །ཧོཿཏྲཱྃ། ང་རྒྱལ་རྡོ་རྗེ་འཁོར་བཅས་པས། །འཇིག་རྟེན་
ཁམས་འདི་རབ་འབྱམ་ཀུན། །སྐད་ཅིག་ཡུད་ལ་རྒྱས་མཛད་དེ། །རྒྱས་པར་མ་གྱུར་གང་ཡང་མེད། །སྒྱུ་འཕྲུལ་དྲ་བ་ལས་རྒྱལ་པོ་རྒྱས་མཛད་ཀྱི་རྒྱས་པ་ཧོམ་གྱི་ལེའུ་སྟེ་ལྔ་བཅུ་བརྒྱད་པའོ།། །།དེ་ནས་དེ་བཞིན་གཤེགས་པ་སྣང་མཛད་ཁྲོ་བོ་ཆེན་པོས་ཐམས་ཅད་ཀྱི་དཀྱིལ་འཁོར་འབར་བ་ཆེན་པོར་བསྒྱུར་ནས་ཆེད་དུ་བརྗོད་པ་འདི་བརྗོད་དོ། །ཡེ་ཤེས་དཀྱིལ་འཁོར་དབུས་མཐའ་མེད། །བསམ་ཡས་ལྷུན་གྱིས་གྲུབ་པ་ཡིན། །རྒྱལ་བའི་དཀྱིལ་འཁོར་མ་ལུས་ཀུན། །བདེ་གཤེགས་ཉིད་ལ་མི་ཞེན་ཤར། །ཨོྃ། དཀྱིལ་འཁོར་ཟླུམ་པོར་འབར་བ་ལས། །འཁོར་ལོ་འབར་བས་རབ་བསྐོར་ཞིང་། །འོད་ནི་སེར་པོར་རབ་ཏུ་འབར། །རྨད་དུ་བྱུང་བའི་སྐུ་ལ་སོགས། །བདག་ཉིད་ཆེན་པོས་བསྒོམ་པར་བྱ། །དཀྱིལ་འཁོར་ཐམས་ཅད་འགྲུབ་པར་འགྱུར། །ས་བོན་ཡི་གེ་ཨོཾ་སེར་ཏེ། །མེ་ལྷ་སྤྱན་དྲང་སྔ་མ་བཞིན། །ཁྲོ་བོའི་དཀྱིལ་འཁོར་མ་ལུས་རྣམས། །ཀུན་ཀྱང་གཏི་མུག་རྡོ་རྗེ་སྟེ། །འོད་ཟེར་སྣ་ཚོགས་འཕྲོ་བ་དང་། །འཁོར་ལོ་ཕྱག་རྒྱ་འབར་བ་དང་། །ལྷ་དང་ལྷ་མོའི་ཚོགས་ཀྱིས་བརྒྱན། །གདན་དང་གནས་དང་དབྱིངས་ཉིད་དེ། །རྒྱལ་བའི་དཀྱིལ་འཁོར་དེ་དག་ཏུ། །ཕྱོགས་བཅུ་གནས་པ་དེ་དག་ཏུ། །ཙཀྲ་ལྕགས་ཀྱུས་བཀུག་ནས་སུ། །དཀྱིལ་འཁོར་དབྱིངས་སུ་བསྟིམ་བྱས་ནས། །གཏུམ་འཁྲུག་གདུག་པ་མ་རུངས་པ། །ལྷན་ནེ་ལྷང་ངེ་ཞི་བར་འགྱུར། །ཨོྃ་གཞན་ཡང་དཀྱིལ་འཁོར་བསམ་ཡས་ཏེ། །དཀྱིལ་འཁོར་འཁོར་ལོ་འབར་བ་ཡི། །ཨོྃ་དང་སེང་གེ་མགོས་བསྐོར་ཏེ། །བརྒྱན་པའི་རྡོ་རྗེ་ཕྱག་རྒྱ་ཀུན། །རྫོགས་ལྡན་ཞི་བས་བསྐོར་བར་བྱ། །རྒྱལ་པོ་ལུས་མཛེས་འཁོར་ལོ་འབར། །རྒྱན་རྣམས་ཞི་ལ་དཀར་བ་དང་། །བྱང་ཆུབ་མཆོག་འབར་ལྷན་ནེར་བསྒོམ། །མཁའ་ལ་རྒྱུ་དང་བར་སྣང་འཕྱོ། །གཞན་ཡང་འགྲོ་དྲུག་མ་ལུས་ཀུན། །ཞིར་འགྱུར་འདི་ལ་ཐེ་ཚོམ་མེད། །གར་དང་གླུ་ཡིས་མཆོད་བྱས་ཏེ། །ཕྱོགས་བཅུའི་གདུག་པ་མ་ལུས་པ། །གདུག་པའི་ཡིད་ནི་རྣམ་བོར་ནས། །ལྷ་དཀར་པོ་ཡི་འོད་དུ་འགྱུར། །བདེ་ལྡན་བྱང་ཆུབ་འོད་འཕྲོ་འབར། །གཏི་མུག་རྡོ་རྗེ་འཁོར་
བཅས་པས། །འཇིག་རྟེན་ཁམས་ནི་རབ་འབྱམ་ཀུན། །སྐད་ཅིག་ཡུད་ལ་ཞི་མཛད་དེ། །ཞི་བར་མ་གྱུར་གང་ཡང་མེད། །སྒྱུ་འཕྲུལ་དྲ་བ་ལས་ཐམས་ཅད་མ་ལུས་པར་ཞི་བར་གྱུར་ནས་ཞི་བའི་ཧོམ་གྱི་ལེའུ་སྟེ་ལྔ་བཅུ་དགུ་པའོ།། །།དེ་ནས་དེ་བཞིན་གཤེགས་པ་བཅོམ་ལྡན་འདས་དགྱེས་པ་ཆེན་པོས་ལྷུན་གྱིས་གྲུབ་པའི་དམ་ཚིག་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །ཨེ་ཡི་ཚོགས་ཀྱི་དཀྱིལ་འཁོར་མཆོག །འབར་བ་གཏུམ་ཆེན་རྔམ་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔ་འམ་ཟས་ལྔ་ལ། །མཚན་མ་མིང་དུ་བཅས་པར་བྱ། །བཀུག་ནས་རྡོ་རྗེ་ཕུར་པས་བཏབ། །རྡུལ་དུ་བྱས་ནས་ཚོགས་ལ་དབུལ། །ཨེ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །བཅིངས་འགྱུར་བསྐྱོད་ན་ཕྱོགས་བཅུར་གཡོ། །མྱོས་ནས་གལ་ཏེ་ཚིག་པར་འགྱུར། །བྃ་གྱི་ཚོགས་ཀྱི་དཀྱིལ་འཁོར་མཆོག །འབར་བ་གཟི་བརྗིད་ལྷུན་ཆེན་ལ། །ཆགས་པ་ཡིད་ཀྱིས་མཆོད་སྦྱིན་བྱ། །རྡོ་རྗེ་གསུང་ཡང་དབང་དུ་འགྱུར། །བདུད་རྩི་ལྔ་འམ་ཟས་ལྔ་ལ། །མཚན་མ་མིང་དུ་བཅས་པར་བྱ། །རྡོ་རྗེ་ཆགས་པའི་ཕུར་པས་གདབ། །ཆགས་པའི་ཚོགས་ལ་ཐིམ་པར་དབུལ། །བྃ་གྱི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་ནས་བསྡམས། །འགུགས་འགྱུར་ཅི་ཡང་ཕྱི་བཞིན་འབྲང་། །ཅི་འདོད་དེ་བཞིན་འོང་བར་འགྱུར། །མ་ཡི་ཚོགས་ཀྱི་དཀྱིལ་འཁོར་མཆོག །འབར་བ་འདུ་འཕྲོ་གཟི་ཆེན་ལ། །དགའ་བའི་ཡིད་ཀྱིས་མཆོད་སྦྱིན་བྱ། །ཡོན་ཏན་ནམ་མཁའི་མཐའ་དང་མཉམ། །བདུད་རྩི་ལྔ་འམ་ཟས་ལྔ་ལ། །ཡོན་ཏན་ཡིད་བཞིན་གཏེར་དུ་བརྟགས། །ང་རྒྱལ་དགའ་འཕྲོའི་ཕུར་པས་གདབ། །རྡོ་རྗེ་གཟི་བརྗིད་འཕེལ་བར་དབུལ། །མ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ན། །གཟི་བརྗིད་འབར་བའི་འཕྲུལ་ཆེན་སྤྲོ། །ཡིད་བཞིན་ནམ་མཁའ་གང་བར་འགྱུར། །ཡ་ཡི་ཚོགས་ཀྱི་དཀྱིལ་འཁོར་མཆོག །གསལ་བའི་གཟི་
བརྗིད་འཚེར་བ་ལ། །དང་བའི་ཡིད་ཀྱིས་མཆོད་སྦྱིན་བྱ། །གཏུམ་ཆེན་རྔམ་པོའང་ལྷན་ནེར་འགྱུར། །བདུད་རྩི་ལྔ་འམ་ཟས་ལྔ་ལ། །གཏུམ་རྔམ་འཁྲུགས་པའི་ངོ་བོར་བརྟག །ལྷན་ནེ་གསལ་བའི་ཕུར་བས་གདབ། །འབར་བ་ལྷན་ནེའི་ཚོགས་ལ་དབུལ། །ཡ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་ནས་བསྡམས། །འབར་བ་ལྷན་ནེར་བྱིན་གྱིས་བརླབས། །ཐམས་ཅད་གཡོ་བ་མེད་པར་འགྱུར། །སླས་དང་བྱི་མོ་བྲན་མོའི་ཚོགས། །ལྷག་མའི་མཆོད་སྦྱིན་འདོད་པ་སྦྱིན། །གང་གི་དམ་ཚིག་རབ་བསྒྲགས་ནས། །གང་འདོད་ལས་དེ་བྱེད་པར་བསྒོམ། །སྔོན་ཚེ་དཔལ་ཆེན་ཧེ་རུ་ཀ། །ཤིན་ཏུ་གདུག་ཅིང་གཏུམ་བག་ཅན། །ཐམས་ཅད་མ་ལུས་འདུལ་མཛད་པའི། །དབང་དང་བྱིན་བརླབས་རྨད་པོ་ཆེ། །ལྷ་ཆེན་ལ་སོགས་དབང་བསྡུས་ནས། །འཁོར་རྣམས་དབང་ཕྱུག་སླས་སུ་བྱས། །སོ་སོའི་ལས་རྣམས་བསྐོས་པ་དེ། །ཇི་ལྟར་ཁས་བླངས་དམ་བཅས་པའི། །མ་ཐོགས་མྱུར་དུ་མངོན་པར་ཕྱུང་། །དམ་བཅས་བཞིན་དུ་མ་བྱས་ན། །ཇི་ལྟར་རང་གིས་མནའ་བོར་བའི། །སྡོམ་བཅས་དེ་ལས་འདའ་མ་བྱེད། །དམ་ཚིག་དེ་ལས་འདས་གྱུར་ན། །མགོ་ལུས་སྙིང་ཡང་ཚལ་བ་བདུན། །ཡཀྵ་ཁྲོ་བོས་གཏུབས་པར་འགྱུར། །དེ་བས་རྣལ་འབྱོར་སྔགས་འཆང་གིས། །ཇི་ལྟར་བཅོལ་བ་བཞིན་དུ་བྱོས། །ལས་དེ་མངོན་དུ་མ་བྱས་ན། །རང་གིས་མནའ་བོར་ཁས་བླངས་བཞིན། །རུལ་མྱགས་ཚིག་ནས་དམྱལ་བར་འགྲོ། །རྣལ་འབྱོར་དམ་ལ་གནས་གྱུར་པའི། །ལས་རྣམས་ཡོངས་སུ་བྱ་བ་དང་། །འཁོར་རྣམས་བུ་གཅིག་བཞིན་དུ་སྐྱོངས། །ཕྲ་མེན་མ་ཡང་དངོས་གྲུབ་འཐོབ། །བཅོལ་བའི་ལས་རྣམས་མངོན་དུ་བྱོས། །ཞེས་བསྒོའོ། །ཁྲོ་བོ་བསྒྲུབ་པའི་ལས་ཀྱི་གཙོ་བོ་ནི་འདི་ཡིན་ནོ། །ཁྲག་འཐུང་ཆེན་པོ་ལ་སོགས་པའི། །བྲོ་གར་གླུ་ཚིག་ཆེན་པོས་ནི། །ཐམས་ཅད་ཐམས་ཅད་བྱེད་པ་ཡིན། །མཛོད་ལྡན་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །འདུ་བར་འདོད་ན་འདུ་བར་བྱེད། །འཕེལ་བར་འདོད་ན་འཕེལ་བར་བྱེད། །སྦོས་མོ་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ལྷན་ནེར་
འདོད་ན་ཐིམ་པར་བྱེད། །རྨུགས་པར་འདོད་ན་མྱོས་པར་བྱེད། །སེང་གདོང་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་དུ་ཟ་བར་བྱེད། །རྡུལ་ཆ་ཙམ་ཡང་མེད་པར་བྱེད། །བཞད་གདོང་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་དུ་ཟ་བར་བྱེད། །ཀུན་ལ་རབ་ཏུ་ཉམས་པར་བྱེད། །སླས་དང་བྱི་མོ་བྲན་མོ་ཡི། །བྲོ་གར་གླུ་ཚིག་ཆེན་མོས་ནི། །སྤོད་ཅིང་གཏོང་བར་བྱེད་པ་སྟེ། །ཐམས་ཅད་ཐམས་ཅད་བྱེད་པ་ཡིན། ལྗོན་པ་དང་ནི་ལྕུག་ཕྲན་ཚལ། །སྡོང་གཅིག་དང་ནི་མེ་རེག་ཏུ། །དང་བ་དགའ་བ་ཆགས་པ་དང་། །ཁྲོས་པས་ཀ་ལི་རབ་ཏུ་བྱ། །ཞེས་བརྗོད་པས་དེ་བཞིན་གཤེགས་པ་ཉིད་ལ་དེ་བཞིན་གཤེགས་པ་ཉིད་སྦྱོང་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ལྷུན་གྱིས་གྲུབ་པའི་ཕྲིན་ལས་བྱིན་གྱིས་རློབ་པ་ཞེས་བྱ་བའི་ལེའུ་སྟེ་དྲུག་ཅུ་པའོ།། །།དེ་ནས་དེ་བཞིན་གཤེགས་པའི་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ཆོས་ཐམས་ཅད་ཡིད་དང་། ཆོས་སུ་འདུས་པར་བསྟན་པ་དང་། ཤེས་རབ་ཐམས་ཅད་ནི་ཡུམ་བཞིར་འདུས། ཡུམ་བཞི་ཡང་གཅིག་ཏུ་འདུས་སོ། །ཐབས་ཐམས་ཅད་ནི་རིགས་བཞིར་འདུས། རིགས་བཞི་ཡང་གཅིག་ཏུ་འདུས་ཏེ། ཐམས་ཅད་དབྱིངས་དང་། དབྱིངས་ཀྱི་ཡེ་ཤེས་སུ་འདུས་པར་བསྟན་ནས། ཚིག་མགོ་མཇུག་གི་དོན་བསྡུས་ནས་ཡང་འདི་སྐད་བརྗོད་དེ། དོན་གྱི་རྩ་བའི་མཆོག་ཡིན་ནོ། །ཐམས་ཅད་མ་ལུས་མི་ལུས་ཤིང་། །མི་དམིགས་མ་ཆགས་ཆོས་ཉིད་དེ། །དེ་བཞིན་དབྱིངས་ཉིད་མང་པོ་སྣ་ཚོགས་ཐབས་སུ་སྣང་། །ཐབས་ཉིད་སྒྱུ་མ་མིག་ཡོར་ཆུ་ཟླ་གཟུགས་བརྙན་ཡིན། །དེ་ཉིད་རང་རིག་ཡེ་ཤེས་ཆགས་མེད་སྣ་ཚོགས་སྣང་། །ཐབས་དང་ཤེས་རབ་ལྡན་པས་མཆོག་གི་གནས་གྱུར་པས། །ཇི་ལྟར་སྤྱད་ཀྱང་ཟད་མེད་གཉིས་མེད་སྒྲིབ་མི་འགྱུར། །ཤེས་རབ་ཐབས་ཆེན་མཆོག་ལ་ཡེ་ནས་རོལ་པ་ཡིན། །དེ་ཉིད་ཕྱག་རྒྱ་སྣ་ཚོགས་སྤྲུལ་པ་རང་རིག་སྟེ། །རྒྱུ་འབྲས་ཡེ་ནས་དབྱེར་མེད་སྔ་ཕྱི་མ་ཡིན་པས། །འབྲས་བུ་ལམ་དུ་གྱུར་ནས་དུས་གཅིག་མཉམ་
པར་སྦྱོར། །འདི་ནི་ཡིད་བཞིན་རིན་ཆེན་ཐམས་ཅད་འབྱུང་བའི་གནས། །ཐམས་ཅད་འདུ་བའི་གཏེར་དང་ཡིད་བཞིན་མཛོད། །གཉིས་བྲལ་མཉམ་དང་མི་མཉམ་ཐམས་ཅད་ཉིད་ཀྱི་དབྱིངས། །ང་དང་བདག་མེད་མཚན་མ་སྣ་ཚོགས་དབྱེར་མེད་པ། སྟོང་དང་མི་སྟོང་མི་གནས་དེ་བཞིན་ཉིད་དུ་འདུས། །རང་བྱུང་རྡོ་རྗེའི་དཀྱིལ་འཁོར་ཟད་མེད་དཀྱིལ་འཁོར་སྤྲོ། །འདས་དང་མ་འདས་དཀྱིལ་འཁོར་བསམ་ཡས་ལྷུན་གྲུབ་དང་། །མི་ཟད་པར་ལྡན་རྒྱན་གྱི་འཁོར་ལོ་དྲུག་རྫོགས་པ། །སྐྱེ་མེད་དབྱིངས་ཀྱི་རང་བྱུང་འོད་གསལ་ཕྲེང་ལྡན་མཆོག །ཡེ་ནས་མ་བཅོས་མ་བྱས་རང་རིག་ངང་གིས་གསལ། །ཐམས་ཅད་འབྱུང་འཇུག་རང་རིག་གཏེར་ཆེན་ངང་དུ་བསྡུས། །ཕྱོགས་བཅུ་མ་ལུས་མི་ལུས་ཐམས་ཅད་ཀུན་འདུས་དང་། །ཞིང་ཁམས་གཞལ་ཡས་བསམ་ཡས་རིན་ཆེན་མཆོག་ཆེན་ཀུན། །སྐྱེ་མེད་དབྱིངས་དང་རང་གི་གཉིས་སུ་ཡང་དག་འུབ། །མོས་སྤྱོད་སྟོང་ཉིད་རྒྱུ་འབྲས་ཡང་ནས་ཡང་སྦྱངས་མི་དམིགས་པ། །ཡེ་ནས་འོད་གསལ་ཆགས་མེད་མ་ཆགས་དཀོན་མཆོག་གནས། །མིང་ཙམ་མཆོག་རོལ་ཐབས་དང་ཤེས་རབ་མཆོག་གིས་རྫོགས། །ལམ་སྟེགས་ཉིད་དུ་ཕ་རོལ་ཕྱིན་བཅུ་རྫོགས་པར་རྒྱུ་འབྲས་སྤྱོད། །མཉམ་ཉིད་པ་ཡི་རྡོ་རྗེ་ཐབས་ཆེན་ཡང་དག་ལྡན། །འགྲོ་མེད་འོང་མེད་མི་གནས་ཀུན་ཁྱབ་ཁྱབ་མེད་ཉིད་ཀྱིས་བཤད། །ཨ་ཧོ། །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ཕ་རོལ་ཏུ་ཕྱིན་པ་དང་། ས་བཅུ་གཉིས་དང་། ཐབས་ཀྱིས་མཆོག་དང་། སངས་རྒྱས་ཀྱི་ཞིང་མ་ལུས་པར་ཡིད་དང་། ཆོས་སུ་འདུས་པར་བསྟན་པའི་ལེའུ་སྟེ་དྲུག་ཅུ་གཅིག་པའོ།། །།དེ་ནས་དེ་བཞིན་གཤེགས་པ་ཡེ་ཤེས་ལྔའི་དཀྱིལ་འཁོར་ལ་མཉམ་པར་བཞུགས་ནས། ཆེད་དུ་བརྗོད་པ་འདི་བརྗོད་དོ། །ལྔ་ཕུང་ཡན་ལག་ཐམས་ཅད་ཀྱང་། །འབྲུ་ལྔ་གནས་པའི་བྱང་ཆུབ་སྟེ། །ཨོྃ་དང་མཱུྃ་དུ་འབྲེལ་པ་ཡི། །བྱང་ཆུབ་རྡོ་རྗེ་ཉིད་ལས་བྱུང་། །སྤྱིར་ན་བརྗོད་པ་ཐམས་ཅད་ཀྱང་། །ཀུན་ཀྱང་མིང་ཙམ་ཡི་གེ་ཨ། །སྐྱེ་འཇིག་ཉིད་ཀྱང་ཡི་གེ་ལྔ། །དེ་ནི་བྱང་ཆུབ་སེམས་ཡིན་ཏེ། །དམིགས་མེད་བྱང་ཆུབ་མཆོག་འབྱུང་བ། །
གསུམ་ཤར་ལྔ་འབར་བཅུ་འབྱོར་པ། །ཟད་མེད་རིན་ཆེན་གཏེར་ཡིན་ཏེ། །མངོན་ཤེས་དྲུག་ལྡན་མཚན་བཟང་སྤགས། །ཨེ་ལས་འཕྲོ་ཞིང་ཨར་འདུས་པ། །གསང་བའི་ཐིག་ལེ་ཉིད་ཀྱི་དབྱིངས། །ནམ་མཁའི་དབྱིངས་ནས་སྤྲིན་བྱུང་བ། །ཀུན་ལ་ཁྱབ་ཅིང་སྣ་ཚོགས་སྤྲིན། །བཞི་བཅུ་རྩ་ལྔའི་ཁོང་ནས་བསམ་མི་ཁྱབ། །བྱིན་བརླབས་ཡ་མཚན་རྨད་པོ་ཆེ། །ཡོན་ཏན་མི་ཟད་གཏེར་དུ་གྱུར། །ཧོ། ཡེ་ནས་མཉམ་ཉིད་གསང་བའི་དཀྱིལ་འཁོར་དབྱིངས། །དབྱིངས་ལས་མི་གཞན་ཡེ་ནས་ཐིག་ལེའི་ངང་། །ཡེ་ཤེས་དབྱིངས་ཉིད་གཟུགས་བརྙན་སྒྱུ་མའི་ཚུལ། །སྣང་བྱེད་ཉིད་ན་བྱ་བྱེད་མེད་པར་གནས། །ཡེ་ཤེས་འཕྲུལ་ཆེན་བཞི་བཅུ་རྩ་ལྔའི་དོན། །དཀྱིལ་འཁོར་བསམ་ཡས་ལྷུན་གྲུབ་དམ་པ་ནི། །ཐབས་དང་ཤེས་རབ་གཉིས་མེད་མཉམ་པར་གནས། །དག་མཉམ་རྣམ་གསུམ་དོན་རྟོགས་བསྒོམ་བྱས་ཤིང་། །མཉམ་པ་རྣམ་བཞིས་དོན་རྟོགས་མཆོག་གི་གནས། །རྒྱུ་འབྲས་ལྷུན་གྲུབ་ཕུན་སུམ་ཚོགས་བཞིར་འདུས། །ཡེ་ཤེས་ལྔ་རྫོགས་སྐུ་གསུང་ཐུགས་ཀྱིས་བསྡུས། །ཆགས་མེད་ཞི་བའི་ལམ་ནས་ཐིག་ལེར་འཇུག །ཡེ་ཤེས་ལྔ་རྫོགས་སྤྱོད་ཡུལ་མི་འདའ་ལ། །མ་ཆགས་འོད་གསལ་དཀྱིལ་འཁོར་རྫོགས་པར་ལྡན། །ཐམས་ཅད་མ་ལུས་རང་རིག་རྒྱལ་པོ་ཡིས། །དཀྱིལ་འཁོར་དག་མཉམ་ཁྲོ་བོ་ཁྲོ་མོར་སྦྱོར། །ཆོས་རྣམས་རང་བཞིན་ཉིད་ཀྱིས་སྟོང་། །ནང་དང་ནང་གི་ཕྱི་རོལ་གྱི། །རྣམ་རྟོག་སྣ་ཚོགས་འཛིན་པ་ཡང་། །དངོས་པོ་མེད་དབྱིངས་སྐད་ཅིག་མ། །དེ་ཉིད་རྣམ་པར་དག་པའི་ལམ། །ཕྱིན་ཅི་ལོག་ཉིད་ཡང་དག་སྟེ། །མ་རིག་པ་ནི་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཐམས་ཅད་ཡོན་ཏན་མཆོག་གི་གནས། །ཨ་ཧོ། །ཕྱོགས་བཅུའི་རྒྱལ་བའི་དཀྱིལ་འཁོར་མ་ལུས་ཀུན། །ངེས་པའི་དོན་དགྲོལ་བཞི་བཅུ་རྩ་ལྔར་འདུས། །བསྡུས་པའི་དོན་ཉིད་ཡི་གེ་འབྲུ་ལྔར་བསྡུས། །ལྔ་པོའི་དོན་ཉིད་འབྲུ་གསུམ་ནང་དུ་འདུས། །གསུམ་པོ་དེ་ཉིད་ཡི་གེ་ཨར་འདུས་ཏེ། །ཨ་ཉིད་མ་སྐྱེས་མཉམ་རྫོགས་དབྱིངས་སུ་ཐིམ། །ཨ་ཧོ། མི་དམིགས་སྟོང་པ་ཉིད་ཀྱང་
བརྫོད་མི་ལང་། །མི་དམིགས་དེ་བཞིན་གཤེགས་ཀྱང་བསམ་མི་ཁྱབ། །མ་སྐྱེས་མཆོག་གི་དབྱིངས་ཀྱང་བསམ་མི་ཁྱབ། །མ་འགགས་བྱང་ཆུབ་སེམས་ནི་སྐྱེ་འཇིག་མེད། །འགྲོ་མེད་ཡོང་མེད་མི་གནས་པའི། །ཐུགས་རྗེ་བྱིན་བརླབས་རྣམ་པར་འཕྲོ། །ཞེས་ཉིད་ལ་ཉིད་གསུང་ངོ་། །དབྱིངས་ལས་དབྱིངས་བྱུང་ཐབས་ཀྱི་ཕྱག་རྒྱར་གསལ། །ཐབས་ལས་དབྱིངས་བྱུང་ཡུམ་གྱི་ཕྱག་རྒྱར་གསལ། །དབྱིངས་སུ་དབྱིངས་ཀྱིས་ཡེ་ཤེས་འབྱོར་པས་ན། །བྱང་ཆུབ་སེམས་ཚོགས་དཀྱིལ་འཁོར་བརྗོད་མི་ལང་། །དེ་བཞིན་གཤེགས་པའི་དཀྱིལ་འཁོར་ངེས་པའི་དོན་མ་ལུས་པར་མཚན་ཉིད་མེད་པའི་ཕྱག་རྒྱར་ཐིམ་པའི་ལེའུ་སྟེ་དྲུག་ཅུ་གཉིས་པའོ།། །།དེ་ནས་དེ་བཞིན་གཤེགས་པས་རྒྱལ་པོ་ཚེ་མཐའ་ཡས་སུ་སྤྲུལ་ནས་ཆེད་དུ་བརྗོད་པ་འདི་བརྗོད་དོ། །སྒྱུ་འཕྲུལ་དྲ་བ་བསྟན་བསྡུས་ཏེ། བྷྲུྃ་དང་བི་ཤྭའི་དཀྱིལ་འཁོར་དུ། །མ་དང་ཨ་ཡི་དཀྱིལ་འཁོར་ལ། །རྡོ་རྗེ་འཁོར་ལོ་རབ་བསྒོམས་ནས། །བཞི་བཅུ་རྩ་ལྔའི་དོན་བསྒོམས་ཏེ། །དེ་ཡིས་ཕྱོགས་བཅུར་གང་བར་བསྒོམ། །བྷྲུྃ་དང་ཛཿཧཱུྃ་བྃ་ཧོས་དགུག །སྐུ་གསུང་ཐུགས་ཀྱི་སྙིང་པོ་མཆོག །ལུས་ངག་སེམས་ལ་ཐིམ་པར་བྱ། །ནྲྀ་ཉིད་དངོས་སམ་ཡིད་བཞིན་མཛོད། །བུམ་པ་མཆོག་ནི་བཟང་པོ་ཡི། །ཚེ་གཞག་གནས་ནི་འདི་ཡིན་ཏེ། །ཡང་ནས་ཡང་དུ་དགུག་བྱ་སྟེ། །མངོན་སུམ་སྨིན་པར་གྱུར་པ་དང་། །དབྱིངས་སུ་ཡང་ནི་སྤ་བར་བྱ། །རྡོ་རྗེ་གོ་ཆ་བསྲུང་བ་ཡིས། །བརྟན་ཞིང་འཁོར་ལོས་དགག་པར་བྱ། །སྙིང་པོ་འབྲུ་ལྔའི་ནང་དུ་བསྟིམ། །སངས་རྒྱས་ཐམས་ཅད་མ་ལུས་ཀུན། །རྒྱལ་པོ་ཚེ་དཔག་མེད་པ་བསྒོམ། །སྐུ་མདོག་གངས་རི་འཚེར་བ་ལ། །རྒྱན་ཕྲེང་སྣ་ཚོགས་རྣམས་ཀྱིས་བརྒྱན། །ཡིད་བཞིན་རིན་ཆེན་ཕྲེང་བ་དང་། །ཡིད་བཞིན་རིན་ཆེན་ཟ་མ་ཏོག །རིན་ཆེན་རྒྱན་དང་བུམ་པ་བཟང་། །གཞན་ཡང་འགྲོ་བའི་དོན་བྱ་བ། །བསམ་གྱིས་མི་ཁྱབ་མཐའ་ཡས་མཆོག །བགེགས་ཀྱིས་ནྲྀ་རྣམས་མི་སྟེར་ན། །ཚེ་དཔག་མེད་དང་ཁྲོ་བོ་སྟེ། །ཕྱོགས་བཅུ་ནམ་མཁའི་ཁམས་བཀང་ནས། །སྒྲ་སྐད་དྲག་པོ་བཏོན་ནས་ནི། །ཐམས་ཅད་མ་ལུས་ཐུལ་བར་བྱ། །དབང་དུ་ཚེ་དཔག་མེད་པ་བསྐུར། །
ཚེ་བསྙེན་དང་ནི་ཉེ་བསྙེན་དང་། །ཚེ་སྒྲུབ་དང་ནི་སྒྲུབ་ཆེན་དང་། །ཐབས་དང་ཤེས་རབ་འབྱོར་པ་ཡིས། །ཅི་འདོད་ལས་རྣམས་གྲུབ་པར་བྱེད། །ཚེ་དབང་མོ་ནི་རྒྱུད་འཕེལ་མ། །དཀར་མོའི་མདོག་ལ་འོད་འཕྲོ་འབར། །ཕྱག་ན་རིན་ཆེན་གང་བ་ཡི། །ཕྱག་རྒྱ་སྣ་ཚོགས་ཅིར་ཡང་བསྒྱུར། །འཇིག་རྟེན་དྲུག་གི་ཕྱོགས་བཅུ་ན། །གནས་པའི་འགྲོ་དྲུག་མ་ལུས་ལ། །ཕན་པའི་ཚེ་དབང་འདི་སྦྱིན་ནོ། །དེ་ལས་ལྷག་པའི་རྒྱུད་འཕེལ་མེད། །ཡི་གེ་བཟླས་པ་འཕྲུལ་ཆེན་འདི། །རྣམ་གསུམ་ཚུལ་གྱིས་མ་འཁྲུལ་བར། །སྔགས་བཟླས་ཆོ་ག་བར་མ་གཅོད། །འདྲིས་གསལ་བརྟན་པ་མཆོག་གིས་བྱ། །ཨོྃ་ཨོྃ་ཨོྃ་ཨོྃ་ཨོྃ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། སྭཱྃ་སྭཱྃ་སྭཱྃ་སྭཱྃ་སྭཱྃ། ཨཱྃཿཨཱྃཿཨཱྃཿཨཱྃཿཨཱྃཿ། ཧཱྃ་ཧཱྃ་ཧཱྃ་ཧཱྃ་ཧཱྃ། བྲཱུྃ་བྲཱུྃ་བྲཱུྃ་བྲཱུྃ་བྲཱུྃ། བཱ་བཱ་བཱ་བཱ་བཱ། ཛྲ་ཛྲ་ཛྲ་ཛྲ་ཛྲ། ཨཱ་ཨཱ་ཨཱ་ཨཱ་ཨཱ། ཡུ་ཡུ་ཡུ་ཡུ་ཡུ། (ཤྵེ་ཤྵེ་ཤྵེ་ཤྵེ་ཤྵེ།)ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཨ་ཨ་ཨ་ཨ་ཨ། ཨོ། ཚེ་རྣམས་དབང་དུ་མ་གྱུར་ན། །བདེར་གཤེགས་ལ་ཡང་ཚེ་དཔག་མེད། །སྐུ་གསུང་ཐུགས་ཀྱི་གཟུགས་ཀྱིས་ནི། །ཕྱོགས་བཅུ་ནམ་མཁའི་ཁམས་བཀང་ནས། །ཕྱག་རྒྱ་མཚོན་ཆ་སྣ་ཚོགས་ཀྱིས། །འཇིག་རྟེན་ཕྱོགས་བཅུའི་བདུད་བཅོམ་ནས། །འགྲོ་ལྔ་ཚེ་རྣམས་དབང་དུ་བསྡུ། །ཕྱག་རྒྱ་གཤོལ་ལ་སོགས་པ་ཡིས། །འོག་གི་འཇིག་རྟེན་ཁམས་དཀྲུགས་ནས། །གཤིན་རྗེའི་གནས་ནས་ཚེ་བཀུག་སྟེ། །སྙིང་པོ་ལྔ་ལ་བསྟིམ་པར་བྱ། །ཕྱག་རྒྱ་འཁོར་ལོ་ཆེན་པོ་ཡིས། །སྟེང་གི་འཇིག་རྟེན་ཁམས་དཀྲུགས་ཏེ། །དབང་ཕྱུག་ལྷ་ཆེན་ལ་སོགས་དང་། །བར་སྣང་བགེགས་རྣམས་རྒྱུ་བ་ལས། །ནྲྀ་ཚེ་རབ་ཏུ་དགུག་པར་བྱ། །འཁོར་ལོའི་འབྲུ་ལ་བསྟིམ་ནས་ནི། །དེ་ནས་ཡི་གེ་འབྲུ་ལྔ་དེ། །ནྲྀ་ཡི་གནས་ལྔར་བསྟིམ་པར་བྱ། །ཨོྃ་ཨོྃ་བཛྲ་ཀ་པ་ཙ་བཛྲ་རཀྵ་ཧཱུྃ། ཨོྃ་སརྦ་ཏ་ཐཱ་ག་ཏ་བཛྲ་ཨ་དྷི་ཏིཥྛ་བཛྲ་སྭཱ་ཧཱ། ཕྱག་རྒྱ་བསྲུང་བའི་ཆོ་ག་སྟེ། །འབྲུ་ལྔའི་ཡི་གེ་འབྲུ་གཅིག་སྟེ། །འབྲུ་གཅིག་མི་དམིགས་དབྱིངས་སུ་ཐིམ། །ཨོཾ། ཡིད་བཞིན་བུམ་པའི་རིན་པོ་ཆེ། །རྒྱན་དང་རིན་ཆེན་ཕྲེང་བས་བརྒྱན། །རིན་ཆེན་ལྔ་དང་སྨན་ལྔ་དང་། །འབྲུ་ལྔ་སྤོས་ལྔ་ཡུངས་ཀར་ལྔ། །སྔགས་
མཁན་རབ་བརྟན་བློ་ལྡན་པས། །ཡན་ལག་མ་ཉམས་སྔགས་བཟླས་བསྒོམ། །རྒྱན་ཆས་ལྔ་དང་ལྡན་བྱས་ནས། །དཀྱིལ་འཁོར་ཐམས་ཅད་འགྲུབ་པར་འགྱུར། །དེ་ནས་རིགས་ཀྱི་བུ་དེ་ཡིས། །ཡོ་བྱད་མ་ལུས་ལྡན་བྱས་ནས། །མཆོད་ཡོན་རྣམ་པ་སྣ་ཚོགས་ཀྱིས། །མཉེས་མཆོད་དངོས་གྲུབ་ཐོབ་པར་འགྱུར། །སྒྱུ་འཕྲུལ་དྲ་བ་ལས་ཚེའི་ཆོ་ག་དབང་དམ་པ་ཤིན་ཏུ་གསང་བའི་ལེའུ་སྟེ་དྲུག་ཅུ་གསུམ་པའོ།། །།དེ་ནས་དེ་བཞིན་གཤེགས་པ་རྡོ་རྗེ་སྡུད་པ་པོས་འགྲོ་བ་ལྔ་དབང་མེད་པར་སྨྲ་ཞེས་བྱ་བར་ཡང་བསྡུས་ནས་ཆེད་དུ་བརྗོད་པ་འདི་བརྗོད་དོ། །གསང་བའི་དཀྱིལ་འཁོར་ཉིད་ཀྱི་དབྱིངས། །ཀུན་དུ་བཟང་པོ་ཐུགས་རྗེའི་ངང་། །སྐུ་གསུང་ཐུགས་ལྡན་ཡོན་ཏན་རྫོགས། །མཉམ་པའི་ཞིང་དུ་སྦྱར་བར་བྱ། །རྡོ་རྗེ་རབ་ཏུ་གསང་བ་ཡིས། །རྡོ་རྗེ་རབ་ཏུ་ཀུན་སྦྱར་ཏེ། །ཨོྃ་དང་མཱུྃ་དུ་འབྱོར་པར་བསྒོམ། །ཐམས་ཅད་དབྱིངས་སུ་ཐིམ་པར་བསྒོམ། །གསང་བའི་དཀྱིལ་འཁོར་དམ་པ་དང་། །ཐིག་ལེ་མནྟྲ་དེ་དག་ཏུ། །ནྲྀ་ཐལ་མནྟ་བཟང་པོའི་ཐིག །རྟ་བབས་སྒོ་ཁྱུད་བཟང་པོ་དང་། །རྡོ་རྗེ་རྩེ་གཅིག་འོད་འབར་དང་། །འགུགས་པའི་ལྕགས་ཀྱུ་དམ་པ་ཡིས། །རྡོ་རྗེ་རྩེ་གཅིག་རྩེ་གསུམ་བྲི། །དཀྱིལ་འཁོར་རྒྱུ་དང་ལྡན་པར་བྱ། །མཆོད་ཡོན་སྣ་ཚོགས་མཆོད་པར་དབུལ། །ཡྃ། དུད་ཀའི་ཡེ་ཤེས་འོད་འཕྲོས་ནས། །ཨ་ལས་ཟླ་བའི་དཀྱིལ་འཁོར་དུ། །ཛཿལས་ལྕགས་ཀྱུ་གྲངས་མེད་པས། །དེ་ཡིས་སྙིང་དུ་ཞུགས་པར་བྱ། །མ་ལས་ཉི་མའི་དཀྱིལ་འཁོར་དུ། །ཛཿལས་ལྕགས་ཀྱུ་མང་པོ་ཡིས། །གང་དགུག་དེ་ཡི་སྙིང་ག་ནས། །དྲངས་ཏེ་དེ་ཡི་ཁར་གཞུག་བྱ། །མ་ལས་ཉི་མའི་དཀྱིལ་འཁོར་དུ། །ཛཿལས་ལྕགས་ཀྱུ་མང་པོ་ཡིས། །གང་དགུག་དེ་ཡི་སྙིང་ག་ནས། །དྲངས་ཏེ་དེ་ཡི་ཁར་གཞུག་བྱ། །སྔགས་འདི་རབ་ཏུ་བརྗོད་པར་བྱ། །ཨོྃ་ཛཿཧཱུྃ་བྃ་ཧོ། ཨ་ནྲྀ་པྲ་དུ། མིང་པྲ་བེ་ཤ། ཅི་འདོད་ལས་དེ་བཟླས་པར་བྱ། །ལག་གཉིས་སོར་མོ་སྤྱིར་བསྣོལ་ཏེ། །ཁུ་ཚུར་དམ་དུ་བཅངས་ནས་ནི། །སྲིན་ལག་མཐེའུ་ཆུང་མཐེ་བོ་གཉིས། །བར་དུ་མཐེ་བོ་དེ་དྲངས་ཏེ། །ཨོྃ་མིང་པྲ་བེ་ཤ་
ཨཱ་ཨཱ། །ཐལ་བ་ཡུངས་ཀར་དྲག་ཏུ་རྡེག །མིང་དེ་ཁོང་དུ་ཞུགས་པར་བྱ། །བབས་ནས་རྡོ་རྗེ་ལྕགས་སྒྲོག་ཞགས་པས་བཅིང་། །གང་ཡིན་ཞེས་ནི་དྲིས་ནས་ནི། །ལྷ་འདྲེ་ལ་སོགས་གང་ཡིན་པ། །ལྷ་ཞིག་ན་ནི་མཆོད་པར་བྱ། །གདོན་ཞིག་ན་ནི་ཙནྡན་གུར་གུམ་བསྲེས་ནས་ནི། །དེ་བླུད་སྔགས་འདི་རབ་ཏུ་བརྗོད་པར་བྱ། །ཨོྃ་བཛྲ་དྷ་ཀ་ཀྲོ་དྷ་ས་མ་ཡ་ཧཱུྃ་ཕཊ། གལ་ཏེ་སྨྲ་རུ་མི་བཏུབ་ན། །ལག་གཉིས་སོར་མོ་ཕྱིར་བསྣོལ་ཏེ། །ཁུ་ཚུར་བཅངས་ནས་མཐེའུ་ཆུང་སྦྱར། །གྱེན་བསྒྲེང་དབབ་པའི་ཁ་རུ་གཏུག །སྔགས་ཨོྃ་བཛྲ་བྷཱ་ཥ་བི་ཛེ་པྲ་བེ་ཤ་ཧཱུྃ་ཧཱུྃ་ཞེས་ལན་མང་དུ་བཟླས་པས། །ཡེ་ཤེས་ཐོགས་མེད་སྒྲིབ་མི་མངའ། །བདེན་པའི་ཚིག་དེར་ཞུགས་པར་བསམ། །ལྕེ་ཡི་ཐོར་ཏོ་ཨ་དཀར་པོ། །ཟླ་བའི་དཀྱིལ་འཁོར་དེ་སྟེང་དུ། །ཨོྃ་ཛཿདྷཱིཿདམར་པོ་བསྒོམ་བྱས་ན། །གདོན་མི་ཟ་བར་སྨྲ་བར་འགྱུར། །བདག་ཉིད་ཊཱཀྐི་ཧཱུྃ་བསྒོམས་ལ། །ཨ་དང་ནྲྀ་ལ་སོགས་པ་ཡི། །ལམ་ལྔའི་སེམས་ཅན་གང་ཡང་རུང་། །ཨོྃ་ཊཱཀྐི་ཧཱུྃ་དང་རང་སྔགས་ཀྱིས། །ལན་འབུམ་བཟླས་ཤིང་དགུག་པར་བྱ། །པྲ་བེ་ཤས་ཀྱང་བཟླས་པར་བྱ། །གཞན་ཡང་ཛཿཧཱུྃ་བྃ་ཧོཿསྟེ། །གཞག་ཅིང་དབབ་པའི་ས་དེ་ནི། །བྱིས་པ་ལོ་གྲངས་བཅུ་གཉིས་པ། །གཅིག་དང་ལྔ་ལ་དབབ་པར་བྱ། །ཐིག་ལེ་བུམ་པ་མེ་ལོང་འབར། །གཞན་ཡང་གནས་རྣམས་ཐམས་ཅད་ནི། །སྨྲ་བའི་ཆོ་ག་ཕུན་སུམ་ཚོགས། །ཕྱག་རྒྱ་རྡོ་རྗེ་སྤར་མོ་སྡེར། །དགུག་པའི་ཕྱག་རྒྱ་ཀུན་གྱིས་དགུག །ཛཿཧཱུྃ། དབང་ཕྱུག་ལྷ་ཆེན་ལ་སོགས་བསྡུ། །བཅོལ་ཅིང་བྱ་བ་དེ་བཞིན་ནོ། །ཊཱཀྐི་ཧཱུྃ་ཛཿས་མི་བཏུབ་ན། །ཧ་ཡ་གྲཱི་བ་གནས་དང་ཡུལ། །ཟུར་ཕྱིན་མགོ་མཇུག་མནན་ནས་ནི། །དྲག་ཏུ་བཟླས་ཤིང་ལྕགས་ཀྱུས་དགུག །སྲོག་གི་སྙིང་པོ་མ་ནོར་བར། །གཟིར་ཅིང་དྲག་ཏུ་དྲང་བར་བྱ། །འཇིག་རྟེན་འདས་དང་འཇིག་རྟེན་པའི། །དགུག་པའི་ཐབས་ཡོད་ཅི་ཡང་རུང་། །ནེམ་ནུར་མེད་པར་དགུག་པར་བྱ། །བྱ་བ་སྣ་ཚོགས་ལས་ཟིན་ན། །སྔར་བྱས་བུམ་པ་ལྔ་པོ་ལ། །སྨན་ལྔ་འབྲུ་ལྔ་རིན་ཆེན་ལྔ། །རིགས་ཀྱི་ཡུམ་དང་བདུད་རྩི་འཁྱིལ། །ཅི་འདོད་ལས་རྣམས་ཐམས་ཅད་དང་། །གཞན་ཡང་དགོས་པ་ཅི་ཡང་རུང་། །
ཨོྃ་བཛྲ་ཨ་མྲྀ་ཏ་ཨ་ཨ་ཨ། ཨོྃ་མ་ཧཱ་བཛྲ་ཨ་མྲྀ་ཏེ་ཕཊ། ཛ་གད་ཛ་གད་ཙ་ཞེས་ཀྱང་བརྗོད་དོ། །ཨོྃ་བུད་དྷ་ལོ་ཙ་ནི་སྭཱ་ཧཱ་ཞེས་བཟླས། །གསང་བའི་དཀྱིལ་འཁོར་དམ་པ་དེར། །ཡེ་ཤེས་ལྔ་རྫོགས་ཉིད་ལ་བརྗོད། །ཡེ་ཤེས་སྙིང་པོ་ཁྱོད་ཉོན་ཅིག །ཡང་ནས་ཡང་དུ་མངོན་གསལ་དུ། །བྱང་ཆུབ་མཆོག་གིས་རྟག་སྒོམས་ཤིག །དེ་ལྟར་བྱས་པའི་དངོས་གྲུབ་ནི། །འཇིག་རྟེན་འདས་དང་འཇིག་རྟེན་པའི། །བརྡ་ཕྲད་སྐད་ཀྱིས་དངོས་གྲུབ་ཐོབ། །ཅེས་རྡོ་རྗེ་གསང་བའི་ཚིག་ཏུའོ། །འགྲོ་བའི་དོན་གྱི་ཕྱིར་ཡང་ཆེད་དུ་བརྗོད་དོ། །པྲ་དབབ་པའི་ལེའུ་སྟེ་དྲུག་ཅུ་བཞི་པའོ།། །།དཔལ་ཤྲཱི་ཧེ་རུ་ཀས་ཡུམ་ཀྲོ་དྷཱི་ཤྭ་རི་དང་གཉིས་སུ་མེད་པར་འདུ་བ་མཛད་ནས། བྱང་ཆུབ་སེམས་ཀྱི་རྡོ་རྗེ་ལས་ཁྲོ་བོའི་དཀྱིལ་འཁོར་མང་པོ་སྤྲོས་ནས། །འཇིག་རྟེན་པའི་དབང་མོ་ཆེན་པོ་དང་། དབང་པོ་དང་། རྒྱལ་པོ་དང་། རྒྱལ་པོའི་ཡང་རྒྱལ་པོ་དང་། བློན་པོ་དང་། སྡེ་དཔོན་དང་། འཁོར་འབུམ་ཕྲག་བསམ་གྱིས་མི་ཁྱབ་པ་ལ་སོགས་པ་ཐམས་ཅད་མ་ལུས་པར་དབང་དུ་བསྡུས་ཏེ། འཇིགས་བྱེད་ཆེན་མོ་རྣམས་ད་ལྟར་དང་། དུས་ཕྱི་མའི་དུས་སུ་ལ་ལ་ནི་ཚེ་འཕེལ་བའི་ལས་སུ་བསྐོས། ལ་ལ་ནི་ལོངས་སྤྱོད་འཕེལ་བར་བསྐོས། ལ་ལ་ནི་འབྱུང་བ་ཆེན་མོ་ལ་ཐོགས་པ་མེད་པར་འགྲོ་བར་བསྐོས། ལ་ལ་ནི་གཟུགས་མི་སྣང་བར་འགྲོ་བར་བསྐོས། ལ་ལ་ནི་གཟུགས་སྣ་ཚོགས་ཅིར་ཡང་འགྱུར་བར་བསྐོས། ལ་ལ་ནི་མི་མཐུན་པའི་ཕྱོགས་དབང་དུ་སྡུད་པར་བསྐོས། ལ་ལ་ནི་ཉམས་ཤིང་རྨོངས་པར་བསྐོས། ལ་ལ་ནི་བསྐམས་ཤིང་འཕྲོ་བར་བསྐོས། གཞན་ཡང་བྱ་བ་སྣ་ཚོགས་པ་ཅི་འདོད་པར་བསྐོས་ནས། ཆེད་དུ་བརྗོད་པ་འདི་བརྗོད་དོ། །མཉམ་ཉིད་རིག་པའི་རྡོ་རྗེ་ཡིས། །འཇིག་རྟེན་གཙོ་མཆོག་དབང་དུ་སྡུད། །ཐུགས་རྗེ་ཆེན་པོའི་བྱིན་བརླབས་ཀྱིས། །འགྲོ་བའི་དོན་རྣམས་སྣ་ཚོགས་བསྟན། །ཐབས་དང་ཤེས་རབ་ལྡན་གྱུར་པས། །ཇི་ལྟར་དམིགས་པ་བཞིན་དུ་འགྲུབ། །འདི་ནི་རང་བྱུང་ལྷ་ཡི་ལྷ། །བྱམས་དང་སྙིང་རྗེ་ལྡན་པར་རོལ། །ཐུགས་རྗེ་ཆེན་པོ་ཐབས་མཁས་པས། །ཐམས་ཅད་ཀུན་ལ་སྦྱོར་འགྱུར་
ཡང་། །བག་ཆགས་སོགས་པར་མི་འགྱུར་ཏེ། །བསོད་ནམས་ཡེ་ཤེས་ཚོགས་འགྱུར་རྫོགས། །ཐབས་མཁས་སྤྱོད་པ་མ་གཏོགས་པར། །གཟུང་འཛིན་འཁྲུལ་རྟོག་རྡུལ་ཙམ་མེད། །དེ་བཞིན་ཉིད་དང་དབྱེར་མེད་ཕྱིར། །རྟག་ཏུ་རང་བཞིན་འོད་གསལ་གནས། །དེ་ནས་བདག་ཉིད་རྒྱུད་དོན་གོང་ནས་འབྱུང་བ་བཞིན་ལྷ་ཁྲོ་བོ་དང་ཞི་བ་དེ་དག་གང་ལ་གོམས་པར་བསྒོམ། ཏིང་ངེ་འཛིན་ལས་སུ་རུང་བ་ལྷ་གསལ་བར་གྱུར་པ་དང་། རང་གི་ལྷའི་བཟླས་པ་འབུམ་འབུམ་གདོན་ཏོ། །ལྷ་ཆེན་པོ་ནི་དགུག་པའི་ཕྱིར་ལྕགས་ཀྱུ་ཞགས་པ་སྥོ་ཊ་བྃ། མ་ཧཱ་དེ་བཱ་ཧཱུྃ་ཛཿཛཿཧཱུྃ་བྃ་ཧོཿ། ལྷ་ཡི་དབང་པོའི་སྙིང་གནས། །ཡང་ནས་ཡང་དུ་རྣམ་པར་དྲང་། །མ་མ་ཏྲག་ཤ་མ་ཧཱ་དེ་བ་གྲྀཧྞ་གྲྀཧྞ་ཧཱུྃ་ཧཱུྃ། ལྷའི་གཟུགས་མདོག་ནི་འཚེར་ལ་དཀར། །ལུས་ནི་རིན་ཆེན་ཀུན་གྱིས་བརྒྱན། །གཙུག་ན་ཡིད་བཞིན་རིན་ཆེན་འབར། །ལག་པ་གཡས་ན་ཐོགས་པ་ནི། །ཡིད་བཞིན་རིན་ཆེན་བུམ་ཆུ་གསོལ། །ཡོན་ཏན་རིན་ཆེན་སྣ་ལྔ་སྟེ། །ལྷ་རྣམས་ཀུན་གྱི་རེ་བ་སྐོང་། །བཙུན་མོ་ཨུཏྨ་ཏ་གནས་པ། །རྟག་ཏུ་འདོད་ཡོན་ལྔ་དང་ལྡན། །བདག་ཉིད་སྣང་མཛད་གཞལ་ཡས་ཁང་། །ལྷ་ཡི་གཟུགས་ནི་སྔ་མའི་ཚུལ། །ལྷ་ཡི་ས་བོན་འབུམ་ཕྲག་ཏུ། །སྲོག་དང་ལྡན་པར་བཟླས་བརྗོད་བྱ། །མདུན་ནས་ཛཿཧཱུྃ་བྃ་ཧོཿས་དྲང་། །རྒྱབ་ནས་རྡོ་རྗེ་ཅན་གྱིས་ཕུལ། །ཇེ་ཉེ་ཇེ་ཉེ་གཉིས་མེད་པར། །ལྷ་ཆེན་པོ་ནི་གསལ་གྱུར་ནས། །ཅི་འདོད་ལས་དེ་བྱེད་དུ་གཞུག །ལྷ་ཆེན་འཁོར་བཅས་ཐམས་ཅད་ཀྱང་། །དེ་གྲུབ་དབང་བྱེད་འདུ་བར་འགྱུར། །གང་འདོད་ལས་རྣམས་བྱེད་པར་འགྱུར། །དེ་ནས་རྒྱལ་པོ་ཆེན་པོ་སྡེ་བཞི་བསྒྲུབ་པའི་ལས་འདི་གསུངས་སོ། །བྱང་ཆུབ་སེམས་མཆོག་ཏིང་འཛིན་གྱིས། །ཕྱོགས་བཞི་མ་ལུས་ཐམས་ཅད་ཀུན། །རིགས་སྔགས་འཆང་གི་དངོས་གྲུབ་ཏུ། །རྒྱལ་ཆེན་བཞི་ཡང་དབང་དུ་བསྡུས། །བདག་ཉིད་རིགས་བཞིའི་ཧེ་རུ་ཀ། །གོང་དོན་བྱུང་བ་བཞིན་དུ་བསྒོམ། །ལྷ་ཉིད་རྟག་ཏུ་གསལ་གྱུར་ཅིང་། །ལྷ་ཡི་གཟུགས་ཚུལ་གསལ་བར་བསྒོམ། །བདག་ཉིད་ལྷ་དང་གཉིས་མེད་པར། །ཡང་
དག་དོན་དུ་གསལ་བར་བསྒོམ། །དེ་ནས་རྒྱལ་པོ་ཡུལ་འཁོར་སྲུང་། །གཟུགས་ནི་གངས་རི་ཉི་ཤར་འདྲ། །མཆོད་སྦྱིན་འོད་ཟེར་བརྒྱ་དང་ལྡན། །ལག་གཡས་རྡོ་རྗེ་ཏྲི་ཤཱུལ་ལ། །ལག་གཡོན་བདུད་རྩི་བུམ་པ་གསོལ། །ཨིན་ཏྲ་སཱ་ཡ་སྭཱ་ཧཱ། ཛཿཧཱུྃ་བྃ་ཧོཿ། ཏྲ་མི་ཏ་ཧཱུྃ་ཧཱུྃ་སུ་ར་ཏ་བགྷྲ་ཛཱཿཛཱ་ཛཱ་ཧཱུྃ་ཧཱུྃ། ཞེས་ལན་འབུམ་བཟླས་ནས། བདག་ཉིད་རྡོ་རྗེ་ཧེ་རུ་ཀ། འདྲེན་པའི་ཕྱག་རྒྱ་དེ་དག་གིས། །ལྷ་ཡི་དབང་པོའི་སྙིང་ནས་དྲང་། །རྒྱབ་ནས་རྡོ་རྗེ་ཅན་གྱིས་ཕུལ། །དེ་ཉིད་ལྷ་ཡི་དབང་གྱུར་ནས། །ལས་གང་འདོད་པ་བྱེད་དུ་གཞུག །ཐམས་ཅད་ཐམས་ཅད་གྲུབ་པར་བྱེད། །ཀུན་ལ་འབྱིན་ཅིང་ཀུན་ལ་ཟ། །ལྷ་ཡི་འཁོར་རྣམས་ཐམས་ཅད་ཀུན། །མ་ལུས་པར་ནི་ཡང་དག་འདུ། །བྲན་བཞིན་དུ་ནི་ཐམས་ཅད་འབྲང་། །རྒྱལ་པོ་འཕགས་སྐྱེས་བསྒྲུབ་པ་ནི། །བདག་ཉིད་རིན་ཆེན་ཧེ་རུ་ཀ། །སྐུ་མདོག་རྒྱུད་ནས་འབྱུང་བ་བཞིན། །ཕྱག་རྒྱ་རྣམས་ཀྱང་དེ་བཞིན་ཏེ། །འོད་ཀྱི་འཕྲོ་འདུ་བྱིན་བརླབས་ཀྱིས། །འཕགས་སྐྱེས་པོ་ནི་དབང་དུ་བསྡུས། །དྷྲྀ་ཏ་དྷྲྀ་ཏ་སྭཱ་ཧཱ། ཛཿཧཱུྃ་བྃ་ཧོཿ། གྲྀཧྞ་གྲྀཧྞ་དུ་རྠིད་སྭཱ་ཧཱ། ཧྃ་ཧྃ་ཧྃ། རཏྣ་ཛཿཧཱུྃ་བྃ་ཧོཿ། ཞེས་སྙིང་པོ་ལན་འབུམ་དུ་བཟླས་ཏེ། །སྲོག་དང་ལྡན་པར་ཏིང་འཛིན་བྱ། །བདག་ཉིད་རཏྣ་ཧེ་རུ་ཀ། །འཕགས་སྐྱེས་པོ་ཡི་སྙིང་གནས། །ཛཿཡིས་རབ་ཏུ་བཟུང་ནས་ནི། །བདག་གིས་མདུན་དུ་དགུག་པར་བྱ། །རྒྱབ་ནས་རྡོ་རྗེ་ཅན་གྱིས་ཕུལ། །དེ་ནས་མངོན་སུམ་གྱུར་པ་དང་། །གང་འདོད་ལས་དེ་བྱེད་དུ་གཞུག །མདོག་ནི་གསེར་གྱི་མདོག་ཏུ་འབར། །འཁོར་རྣམས་ཐམས་ཅད་བདག་ལ་བསྡུ། །ཡིད་བཞིན་རིན་ཆེན་གཞལ་ཡས་འགྲུབ། །རྒྱལ་པོ་མིག་ངན་བསྒྲུབ་པ་ནི། །བདག་ཉིད་པདྨ་ཧེ་རུ་ཀ། །སྐུ་མདོག་གོང་གི་སྔ་མ་བཞིན། །ཕྱག་རྒྱའི་ཚུལ་ཡང་དེ་བཞིན་ཏེ། །སྙིང་པོ་འབུམ་ཕྲག་གསལ་བཟླས་ནས། །ཏིང་འཛིན་ཕྱག་རྒྱ་བསྒྱུར་རུང་ཞིང་། །ལྷ་ཉིད་དུ་ནི་གསལ་གྱུར་ནས། །རྒྱལ་པོ་དེ་ཡི་གཟུགས་མདོག་ནི། །ཤིན་ཏུ་དམར་ཞིང་འཚེར་བ་སྟེ། །ལག་གཡས་བདུད་རྩི་བུམ་པ་གསོལ། །ལག་གཡོན་བདུད་རྩི་ལྔ་ཡི་ཚུལ། །ནུབ་ཕྱོགས་ཀླུ་རྣམས་རེ་བ་སྐོང་། །སྦྲུལ་མགོ་དགུ་ཡི་གདེངས་
ཀ་ཅན། །དེ་ནི་རབ་ཏུ་དབང་བསྡུ་ཕྱིར། །བི་རཱུ་ཌྷ་ཀ་སྭཱ་ཧཱ། ཛཿཧཱུྃ་བྃ་ཧོཿ། ནཱ་ག་ཤི་ནི་བི་ཡ་ཕག་ཤ་ཕག་ཛཿཧཱུྃ་བྃ་ཧོཿ། འབུམ་ཕྲག་དུ་མ་བཟླས་ནས་ནི། །དེ་ནི་བདག་གི་དབང་དུ་བསྡུ། །བདག་ཉིད་ལྷ་རུ་གསལ་བསྒོམས་ནས། །མིག་མི་བཟང་གི་སྙིང་གནས། །ཛ་ཡིས་རབ་ཏུ་བཟུང་ནས་དྲང་། །རྒྱབ་ནས་རྡོ་རྗེ་ཅན་གྱིས་ཕུལ། །དེ་ནས་བདག་དང་གཉིས་མེད་པའི། །དབྱེར་མེད་པར་ནི་གྱུར་པ་དང་། །ཅི་འདོད་ལས་དེ་བྱེད་དུ་གཞུག །མིག་ངན་འཁོར་རྣམས་མ་ལུས་པར། །དབང་གི་ལས་རྣམས་གྲུབ་པར་བྱེད། །རྒྱལ་པོ་རྣམ་ཐོས་བསྒྲུབ་པ་ནི། །བདག་ཉིད་ཁྲོ་བོ་བདུད་རྩི་འཁྱིལ། །སྐུ་མདོག་ཕྱག་མཚན་སྔ་མ་བཞིན། །གསལ་ཞིང་འོད་འཕྲོ་རབ་བསྒོམས་ཤིང་། །རང་སྔགས་སྙིང་པོ་འབུམ་ཕྲག་བཟླས། །ཏིང་འཛིན་བསྒྱུར་དུ་རུང་བ་དང་། །རྣམ་ཐོས་དག་ནི་རབ་ཏུ་འགྲུབ། །གཟུགས་ནི་རིན་ཆེན་བཻ་ཌཱུརྱ། །ཡང་ན་མདོག་ནི་སྔོ་ཞིང་འཚེར། །ཕྱག་གཡས་རིན་ཆེན་དབྱིག་ཏོ་ཐོགས། །གཡོན་ན་འདོད་ཡོན་བུམ་པ་གསོལ། །དབུ་ལ་རིན་ཆེན་སྣ་ཚོགས་མཛེས། །བཻ་ཤྲང་ཎ་ཡེ་སྭཱ་ཧཱ། ཛཿཧཱུྃ་བྃ་ཧོཿ། ཀུ་བེར། ཀང་ཀང་། ཡང་ཡང་། ཛཿཧཱུྃ་བྃ་ཧོཿ། འབུམ་དུ་བཟླས་ཤིང་སྲོག་ཡོད་པར། །ཡང་དང་ཡང་དུ་བཟླས་པར་བྱ། །བདག་ཉིད་བདུད་རྩི་ཧེ་རུ་ཀ། །ཛ་ཡིས་རྣམ་ཐོས་སྙིང་ནས་དྲངས། །དབང་དུ་ཡང་དག་བསྡུ་བར་བྱ། །རྒྱབ་ནས་རྡོ་རྗེ་ཅན་གྱིས་ཕུལ། །ཡིད་བཞིན་རིན་ཆེན་དབང་དུ་འགྱུར། །གནོད་སྦྱིན་འཁོར་རྣམས་བྲན་བཞིན་བསྡུ། །རིན་ཆེན་སྤྲོས་ཤིང་ལས་རྣམས་བསྒྲུབས། །ཅི་འདོད་ལས་རྣམས་བྱེད་པར་འགྱུར། །སྒྱུ་འཕྲུལ་དྲ་བ་ལས་ལྷ་ཆེན་པོ་བསྒྲུབ་པ་དང་། །རྒྱལ་པོ་ཆེན་པོ་བཞི་པོ་དཀྱིལ་འཁོར་བཀོད་ཅིང་བསྒྲུབ་པའི་ལེའུ་སྟེ་དྲུག་ཅུ་ལྔ་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་ཚོགས་ཀྱི་དཀྱིལ་འཁོར་ལ་ཤིན་ཏུ་རྔམ་པའི་གདངས་ཀྱིས་གླུ་འདི་བླངས་སོ། །ཧཱུྃ། གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟང་ཡག་ཟ་བྱེད་ཆེ་ཧོ། །ཧཱུྃ། རྔམ་པའི་ང་རོ་འབྲུག་སྟོང་ལྡིར། །ཐུག་ཆེམ་རི་རབ་འབུམ་བསྙིལ་སྐད། །
ཨ་ཨ་ཧ་ལའི་གད་རྒྱངས་ཆེ། །དབྱུག་པའི་འཐོར་རླུང་གཡེང་བ་ཆེ་ཧོ། །ཧཱུྃ། ཁྲོས་པའི་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་དུ་གསལ། །འབར་བའི་ཡེ་ཤེས་ཀུན་དུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ་ཧོ། །ཧཱུྃ། ཁྲོས་པའི་རྒྱལ་པོ་སྤྲིན་ཆེན་པོ། །ཁྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ་ཧོ། །ཧཱུྃ། བདུད་ཀུན་གྱི་ནི་བདུད་ཆེན་པོ། །བདུད་ཀྱི་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ་ཧོ། །ཧཱུྃ། རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་བོ་སྡུད་པ་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོ། །ཞེས་ཆེད་དུ་བླངས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཉེས་པའི་ལེའུ་སྟེ་དྲུག་ཅུ་དྲུག་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་དེ་བཞིན་གཤེགས་པ་ཉིད་ལ་གསང་སྔགས་ཀྱི་རྒྱལ་པོ། །དེ་ནས་དེ་བཞིན་གཤེགས་པ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བདག་དང་རྡོ་རྗེ་སེམས་དཔར་དབྱེར་མེད་པར་ཡང་ཡང་དག་པའི་དབྱིངས་སུ་འདུས་ཤིང་བདག་གིས་རྡོ་རྗེ་སེམས་དཔའི་ཞལ་མངོན་སུམ་དུ་མཐོང་བའི་དོན་བསྟན་པའི་ཕྱིར་ཆེད་དུ་བརྗོད་པ་འདི་གསུངས་སོ། །ཀུན་རྫོབ་སྒྱུ་མར་ཞལ་མཐོང་བའི། །ཐམས་ཅད་མིག་ཡོར་སྒྱུ་མའི་ཚུལ། །སྣང་སྲིད་མ་ལུས་ཐམས་ཅད་ཀུན། །ཆུ་ཟླའི་ཚུལ་དུ་འདྲར་ཤེས་ཤིང་། །ཡུལ་དང་རྟོག་པ་གཉིས་མེད་པར། །གང་གིས་དེ་ལྟར་རིག་པ་དེ། །གཞི་རྩ་མེད་དབྱིངས་སྐད་ཅིག་མ། །སྔ་ཕྱི་མེད་དབྱིངས་དེ་བཞིན་ཉིད། །ཅིས་ཀྱང་མི་ཚུགས་རྡོ་རྗེ་ཡིན། །རྡོ་རྗེ་སེམས་དཔའ་དེ་ལ་གནས། །ལྷ་སྤྱོད་མཐུན་པས་ཞལ་མཐོང་ཡིན། །རང་བཞིན་དཀྱིལ་འཁོར་ཡང་དག་ནི། །ཆོས་དབྱིངས་བདག་དང་དབྱེར་མེད་པའི། །མཉམ་པར་སྦྱོར་ཞིང་དག་པའོ། །ཐམས་ཅད་བྱང་ཆུབ་ལྷུན་གྲུབ་པའི། །དེ་ལྟར་གང་གིས་རྟོགས་འགྱུར་བ། །དེ་ནི་ཡེ་ཤེས་གཉིས་ཅན་ཏེ། །དེ་ཡིས་ཡང་དག་སྙིང་པོ་མཐོང་། །དེ་ཉིད་ཅིས་ཀྱང་མི་ཚུགས་པ། །ཤིན་ཏུ་སྲ་ཞིང་བརྟན་པ་ཡིན། །རང་བཞིན་
དབྱིངས་ནས་འོད་གསལ་བ། །སེམས་དཔའ་མཆོག་ཏུ་ཡང་དག་གསུངས། །དེ་ལྟར་རྟོགས་ན་ཞལ་མཐོང་ཡིན། །དེ་བཞིན་མཉམ་རྫོགས་ལྷུན་གྲུབ་ཡིན། །དེ་བཞིན་གཤེགས་དང་ཡེ་ཤེས་ལྔ། །རང་བྱུང་ཆེན་པོའི་དཀྱིལ་འཁོར་བསྒོམ། །རྟོགས་ཉིད་བྲལ་བའི་ཐབས་མཁས་ཀྱིས། །ལྷ་གསལ་དངོས་པོ་མེད་བསྒོམས་ན། །མཐོང་ཐོས་ལ་སོགས་མེད་པའི་ཚུལ། །རང་གི་ཡེ་ཤེས་གསལ་བསྒོམས་ན། །རང་བཞིན་མེད་ལ་ཅི་ཡང་འགྲུབ། །འགྲུབ་འགྱུར་ཉིད་ན་དངོས་པོ་མེད། །ཇི་ལྟར་བཅོམ་ལྡན་དེ་བཞིན་གྱིས། །བདུད་དཔུང་དཀྱིལ་དུ་ཏ་ལ་བཙུགས། །ཐམས་ཅད་བྱང་ཆུབ་ཤིང་བསྡུས་ཏེ། །གདུག་པ་ངང་གིས་མི་དགའ་ནས། །ཏ་ལ་བཅད་སྐམས་ཡོང་མི་གཅོད། །རྡོ་རྗེ་སེམས་དཔའ་དེ་ཉིད་ཡིན། །བདག་དང་ཏིང་འཛིན་མཐོང་གྱུར་པ། །དེ་ཉིད་རྡོ་རྗེ་ཞལ་མཐོང་ཡིན། །རྡོ་རྗེ་སེམས་དཔའ་ཉིད་བསྒོམས་ཏེ། །ཏིང་འཛིན་ཤིན་ཏུ་འདྲིས་གསལ་ན། །ཐམས་ཅད་རྡོ་རྗེ་ཉིད་དུ་འགྱུར། །ཀུན་ལ་དབང་སྒྱུར་ཅིས་མི་ཚུགས། །བདག་དང་སེམས་དཔའ་དབྱེར་མེད་དེ། །ལས་མཐུན་ཇི་ལྟར་སྣང་བ་བཞིན། །བདག་དང་སེམས་དཔའ་ལྟ་སྤྱོད་གཅིག །དེ་ཉིད་རྡོ་རྗེ་ཞལ་མཐོང་ཡིན། །གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རགས་པ་ཐབས་ཀྱིས་རྟོགས། །སོ་སོའི་མཚན་འཛིན་ཤེས་རབ་རྟོག །གཉིས་མེད་འབྲེལ་པ་ཐབས་ཆེན་ཡིན། །ཀུན་ཀྱང་ཤེས་རབ་ངང་དུ་གནས། །སྣང་དང་གནས་པ་ཐམས་ཅད་ཀུན། །དེ་བཞིན་ཉིད་ལས་མ་གཡོས་ཕྱིར། །གཡོ་དང་མེད་པ་གཉི་ག་མེད། །གནས་དང་མི་གནས་དབྱེ་རུ་མེད། །མཉམ་པའི་དབྱིངས་སུ་ཐམས་ཅད་འདུས། །འདུས་ཉིད་གནས་སུ་ཐིབས་པ་ཡི། །ཐམས་ཅད་དེ་ལྟ་བུ་ཡི་ངང་། །མཉམ་གཉིས་དབྱེར་མེད་སུས་མི་ཚུགས། །དེ་ཉིད་སེམས་དཔའ་བཞུགས་གནས་ཡིན། །དེ་ལྟར་རྟོགས་པའི་རིགས་མཆོག་དེ། །སེམས་དཔའི་ཉིད་དང་རིགས་མཐུན་པས། །དེ་ཉིད་རྡོ་རྗེ་ཞལ་མཐོང་ཡིན། །རྒྱུར་བྱས་ཕུང་པོ་ཁམས་རྣམས་ལ། །གཞི་རྩ་དེ་བཞིན་ཉིད་དུ་གཅིག །སྒྱུ་མར་སྣང་བ་གཟུགས་བརྙན་ཚུལ། །སྣང་བ་
ཉིད་ནི་དངོས་པོ་མེད། །དངོས་ཉིད་དེ་ཉིད་སྣ་ཚོགས་སྟོན། །ཕུང་པོ་ལྔ་ཉིད་དེ་བཞིན་གཤེགས། །དབང་པོ་རྣམས་སེམས་བྱང་ཆུབ་སེམས། །ཡུལ་དུས་པོ་དེ་ཆེན་པོ་ཡིན། །བདག་རྟོག་རྣམ་པ་ཁྲོ་བོ་ཡིན། །རྟག་ཆད་མུ་བཞི་ཁྲོ་མོ་ཡིན། །དེ་སེམས་རང་རིག་ཉིད་ཅེས་བྱ། །ཐམས་ཅད་དབྱིངས་འགྱུར་ཀུན་དུ་བཟང་། །དེ་ཉིད་རྡོ་རྗེ་སེམས་དཔའ་ཡིན། །གང་གིས་དེ་ལྟར་རྟོགས་གྱུར་ན། །སེམས་དཔའ་ཉིད་དང་དགོངས་མཐུན་པས། །དེ་ཉིད་རྡོ་རྗེ་ཞལ་མཐོང་ཡིན། །ཆོས་རྣམས་མ་ལུས་ཐམས་ཅད་ཀུན། །མིང་དང་ཚིག་དང་ཡི་གེ་དང་། །སྒྲ་ཡིས་མཚོན་ནས་དོན་བསྟན་པ། །ཀུན་ཀྱང་ཡི་གེ་མིང་གཅིག་བཞིན། །གང་ཡང་དངོས་པོ་མ་ཡིན་ཏེ། །དངོས་མེད་དེ་ཉིད་སྣ་ཚོགས་སྣང་། སྣང་བ་ཉིད་ན་གང་ཡང་མེད། །བྱ་བྱེད་སྣ་ཚོགས་ཀུན་བྱེད་ཀྱང་། །དངོས་པོ་མེད་དེ་ཡང་དག་ཉིད། །དེ་ནི་ཅིས་ཀྱང་མི་ཚུགས་པའི། །ས་རྡོ་དྲན་མེད་མ་ཡིན་ཏེ། །དེ་ཉིད་ཤིན་ཏུ་འོད་གསལ་ཡིན། །རྡོ་རྗེ་སེམས་དཔའ་དེ་ལྟར་གནས། །གང་གིས་དེ་ལྟར་རྟོགས་པ་ནི། །རིགས་མཆོག་དམ་པ་རྒྱུ་ཡིན་ཏེ། །རྡོ་རྗེའི་རིགས་དང་དབྱེར་མེད་ཕྱིར། །དེ་ཉིད་རྡོ་རྗེ་ཞལ་མཐོང་ཡིན། །སྐྱེས་བུ་བློ་རྩལ་རབ་ལྡན་པས། །ཀུན་དང་དབྱེར་མེད་དོན་རྟོགས་ཏེ། །འབྲས་བུ་མངོན་དུ་མ་གྱུར་ཀྱང་། །བྱང་ཆུབ་སེམས་ལ་གནས་བཅས་པས། །དཔེར་ན་མངལ་དང་སྒོ་ང་ཡིས། །མངོན་དུ་མ་གྱུར་བསྒྲིབས་གྱུར་ཀྱང་། །རྩལ་ཆེན་འདུས་པ་འབྱུང་བ་བཞིན། །རྣམ་རྟོག་གཟུགས་ནི་བོར་མ་ཐག །ཐམས་ཅད་ཀུན་ལ་དབང་སྒྱུར་ཞིང་། །རིགས་མཆོག་དམ་པ་འཛིན་པར་འགྱུར། །རྡོ་རྗེ་སེམས་དང་མཉམ་པ་ཡི། །དངོས་གྲུབ་མཆོག་རྣམས་ཡོངས་སུ་རྫོགས། །བདེ་བ་ཅན་གྱི་ཞིང་ཡང་ཐོབ། །བྱང་ཆུབ་མཆོག་ལ་རོལ་བར་འགྱུར། །ལྷ་མི་རྣམས་ཀྱི་སྟོན་པ་པོ། །ལུས་ངག་སེམས་ལ་དབང་ཐོབ་ནས། །ཇི་ལྟར་དམིགས་པ་བཞིན་དུ་འགྲུབ། །ཚད་མེད་བཞི་ལ་དབང་བྱེད་འགྱུར། །བདེ་བའི་རོ་མཆོག་ཀུན་ལ་སྤྱོད། །ཐ་མར་སྐྱེ་རྒ་ན་འཆི་ལ་སོགས་པའི། །སྡུག་བསྔལ་ཟད་པའི་གོ་འཕང་ཐོབ། །རྡོ་རྗེ་རིགས་མཆོག་འཛིན་
འགྱུར་ཏེ། །ཐུགས་རྗེ་ཆེན་པོའི་བྱིན་བརླབས་ཀྱིས། །འགྲོ་བ་མ་ལུས་ཐམས་ཅད་ཀུན། །རྡོ་རྗེ་རིགས་སུ་འདྲེན་པར་བྱེད། །བདུད་སྡེ་ཚར་གཅོད་ཉོན་མོངས་འདུལ། །ཆོས་ཀྱི་འཁོར་ལོ་ཡང་དག་བསྐོར། །འགྲོ་བ་མ་ལུས་ཐམས་ཅད་ལ། །མི་རྟག་པ་ཡི་ཚུལ་ཡང་སྟོན། །ཉན་ཐོས་རྣམས་ལ་དགྲ་བཅོམ་ཚུལ། །བྱང་ཆུབ་རྣམས་ལ་རང་བྱུང་ཚུལ། །བླ་མེད་ཐེག་པ་སངས་རྒྱས་ཚུལ། །ལྷུན་གྲུབ་རྣམས་ལ་རྡོ་རྗེ་དབྱིངས། །ཀུན་ལ་མཐུན་པའི་ཚུལ་ཡང་སྟོན། །རང་བཞིན་དབྱིངས་ལས་གཡོས་པ་མེད། །མ་གཡོས་བཞིན་དུ་ཀུན་དུ་སྟོན། །ཆོས་རྣམས་མ་ལུས་ཐམས་ཅད་ཀུན། །དེ་ལྟ་བུ་ཡི་ངང་དུ་གནས། །ཞེས་རྡོ་རྗེ་གསང་བའི་ཚིག་ཏུའོ། །ཉིད་ལ་ཉིད་དེ་སྐད་ཅེས་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་སྐྱེས་བུ་དམ་པ་བློ་རྩལ་རབ་གཅིག་གིས་རྡོ་རྗེ་སེམས་དཔའི་ཞལ་མཐོང་བའི་ལེའུ་སྟེ་དྲུག་ཅུ་བདུན་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་སྔགས་འཆང་རྣམས་དོན་ཡོད་པར་བྱ་བའི་ཕྱིར། དམ་ཚིག་སུམ་བརྒྱའི་རྩ་བ་མདོར་བསྡུས་ནས་སྔགས་འཆང་རྣམས་ཀྱི་དོན་དུ་ཆེད་དུ་བརྗོད་པ་འདི་བརྗོད་དོ། །ཕྱོགས་བཅུའི་འཇིག་རྟེན་རྡུལ་སྙེད་དུ། །ལོག་རྟོག་མི་བཟད་རྡུལ་ཕྲན་སྙེད། །རྟོག་འདུལ་གཉེན་པོ་བསམ་མི་ཁྱབ། །འདུལ་བ་སྡོམ་པ་བསམ་ཡས་དང་། །རྡོ་རྗེ་ཐེག་མཆོག་མང་པོ་ཀུན། །ཉིད་ལས་གཡོས་ཤིང་སྤྲོས་མེད་ཀྱང་། །རང་རིག་འཁྲུལ་པའི་རྟོག་པ་ཡིས། །ལྟ་བ་མཐོ་དམན་བསམ་མི་ཁྱབ། །དེ་འདུལ་དོན་ཕྱིར་འཚམ་པར་བསྟན། །ཡང་དག་ཉིད་དང་ལོག་རྟོགས་ཉིད། །ངོ་བོ་ཉིད་ཀྱིས་གནས་གྱུར་ན། །དེ་ལ་བཅོས་ཤིང་བསྒྱུར་དུ་མེད། །ཡེ་ནས་ངོ་བོ་ཡོད་ཡིན་ན། །ཉོན་མོངས་སྤངས་ཤིང་བྱང་བསྒྲུབ་མེད། །ཐམས་ཅད་མ་ལུས་རོ་གཅིག་འགྱུར། །ཀུན་རྫོབ་ཆུ་ཟླ་ལྟ་ཡིན་པས། །ཅིར་ཡང་འགྱུར་ཞིང་ཅིར་ཡང་འགྲུབ། །རྣལ་འབྱོར་དེ་ཉིད་རྟོགས་པ་ཡིས། །དོན་དམ་སྐྱེ་འགག་མེད་པ་སྟེ། །ཀུན་རྫོབ་སྒྱུ་མ་ཅིར་ཡང་འགྲུབ། །གནས་ངན་དུས་ན་ལོག་རྟོགས་ཉིད། །གཟུང་
འཛིན་བྲལ་བ་ཉིད་རྟོགས་ན། །བདག་མེད་ཡེ་ཤེས་རང་བཞིན་ཉིད། །སྙིང་རྗེ་ཐབས་མཁས་ཏིང་འཛིན་གྱིས། །ཅིར་ཡང་དམིགས་པ་བཞིན་དུ་འགྲུབ། །སོ་སོ་རང་བཞིན་ངེས་ཞེ་ན། །ཡང་དག་ལམ་ཉིད་བཅོས་སུ་མེད། །དེ་བས་ཡང་དག་བློ་ཆེན་གྱིས། །ཐམས་ཅད་དངོས་པོ་མེད་པར་བཤད། །དཔེར་ན་དུག་གི་རིགས་ཤེས་པས། །དུག་གིས་མི་ཚུགས་བཞིན་དུ་སྣང་། །ཧ་ལ་ཧ་ལའི་དུག་རྣམས་ཀྱང་། །བསྒྲུབ་ན་རས་ཡ་ནའི་སྨན། །བདུད་རྩིར་འགྱུར་ལ་ཚེ་རིང་འགྲུབ། །ཉོན་མོངས་རང་དང་སྤྱི་བསྟན་པ། །མཚན་ཉིད་མ་ནོར་རྟོགས་པས་ན། །རྣམ་པར་བྱང་བའི་ལམ་དུ་འགྱུར། །སྐུ་གསུང་ཐུགས་ཀྱི་དངོས་གྲུབ་ཀྱང་། །གང་ན་མེད་དེ་དེ་ཡིན་ཏེ། །ནང་གི་ཆེན་པོ་ལྔ་ཉིད་ཀྱང་། །རང་དང་སྤྱི་ཡི་དོན་བརྟགས་ན། །མཚན་ཉིད་མེད་པས་རྣམ་པར་དག །སོ་སོའི་རྩལ་རྣམས་འཛིན་གྱུར་པས། །ཐབས་ཆེན་དུ་ནི་རྣམ་པར་སྤྲོ། །མཚན་རྣམས་རང་བཞིན་མི་གནས་པས། །ཤེས་རབ་དབྱིངས་སུ་རྣམ་པར་སྦྱོར། །གཏི་མུག་ཅེས་ནི་བརྗོད་པ་ནི། །མ་རིག་མིང་གི་རྣམ་གྲངས་ཏེ། །གཉིས་མེད་དོན་གཅིག་ཡིན་པར་བཤད། །རང་གི་མཚན་ཉིད་བརྗོད་པ་ནི། །ཆོས་དང་བདག་དང་དངོས་པོ་རྣམས། །ངོ་བོ་ཉིད་ལ་སོགས་བརྟགས་པ། །རྟོག་ཉིད་སྒྱུ་མ་ཀླུང་གྱུར་ཏེ། །ལོག་རྟོགས་སྤྲོས་པའི་རྒྱུན་ཡིན་ལ། །ཐམས་ཅད་ཆོས་དབྱིངས་རོ་གཅིག་སྟེ། །བཟོད་པའི་ཆོས་ཉིད་མིག་གཅིག་ཡིན། །སྤྱི་ཡི་མཚན་ཉིད་བརྗོད་པ་ནི། །མི་རྟག་སྡུག་བསྔལ་སྟོང་བདག་མེད། །མ་རིག་པ་ནི་སྤང་དུ་མེད། །རིག་པ་ཡང་དག་བསྒྲུབ་ཏུ་མེད། །ཐམས་ཅད་དབྱིངས་སུ་རོ་གཅིག་ཐིམ། །སྒྱུ་མ་དངོས་པོར་རྟོག་པ་ནི། །སྒྱུ་མ་རྟོག་ཉིད་མི་དམིགས་པ། །མི་དམིགས་དེ་ཉིད་སྣ་ཚོགས་སྣང་། །སྐྱེས་པ་ཉིད་ན་ཆོས་ཉིད་གཅིག །དབྱིངས་ཉིད་མི་དམིགས་དེ་བཞིན་ཉིད། །དེ་ཉིད་ཆོས་སྐུ་ཕྱག་རྒྱ་ཆེ། །མི་དམིགས་སྒྱུ་མར་དངོས་པོ་ལ། །རྟོག་པའི་ཡུལ་གྱི་དངོས་ཉིད་ཀྱང་། །ཆོས་ཉིད་མི་དམིགས་ཡེ་ནས་དག །སྒྱུ་མ་མི་དམིགས་དབྱེར་མེད་ཕྱིར། །ཡོད་མེད་གཉིས་ག་དབྱེར་མེད་པས། །ཏིང་ངེ་འཛིན་གྱིས་དབང་བསྒྱུར་ན། །ཐུགས་
ཀྱི་ཕྱག་རྒྱ་ཆེན་པོ་ཡིན། །ཆོས་ཉིད་དམིགས་སུ་མེད་པ་སྟེ། །མི་དམིགས་བཞིན་དུ་སྒྱུ་མར་སྤྲོས། །གདུལ་བྱའི་བྱ་བ་བསམ་མི་ཁྱབ། །གསུང་གི་ཕྱག་རྒྱ་ཆེན་པོའོ། །དེ་ལྟར་གཏི་མུག་སྤང་དུ་མེད། །རྣམ་པར་སྣང་མཛད་རྒྱ་ཆེན་ཡིན། །ཞེ་སྡང་རང་དང་སྤྱིར་བསྟན་པ། །ཀུན་ནས་མནར་སེམས་རྟོག་པ་ཡི། །སྒྱུ་མའི་དངོས་པོ་ཐམས་ཅད་ཀུན། །འཇིག་པར་མོས་པའི་རང་བཞིན་ཅན། །སྤྱི་ཡི་མཚན་ཉིད་བརྗོད་པ་ནི། །མི་རྟག་སྡུག་བསྔལ་སྟོང་བདག་མེད། །ཞེ་སྡང་སྙིང་རྗེ་སྤངས་བསྒྲུབ་མེད། །ཆོས་ཀྱི་དབྱིངས་སུ་རོ་གཅིག་ཕྱིར། །སྒྱུ་མ་རང་བཞིན་མནར་སེམས་པ། །དངོས་པོ་ཐམས་ཅད་འཇིག་རྟོགས་ན། །སྒྱུ་མར་སྣང་བ་ཐམས་ཅད་ཀྱང་། །ཆོས་ཀྱི་དབྱིངས་ལས་མི་གཞན་ཏེ། །མི་དམིགས་པ་ཉིད་སྒྱུ་མར་སྐྱེས། །ཆོས་རྣམས་ཐམས་ཅད་རང་བཞིན་ནི། །བདག་སྲོག་གསོ་བའི་རང་བཞིན་མེད། །སྣང་བ་ཐམས་ཅད་ཆོས་ཀྱི་དབྱིངས། །མནར་སེམས་སྒྱུ་མ་ཆོས་ཉིད་དོ། །ཐམས་ཅད་མི་དམིགས་དེ་བཞིན་ཡིན། །ཀུན་ཀྱང་དབྱེར་མེད་ཆོས་ཕྱག་རྒྱ། །མི་དམིགས་སྒྱུ་མ་ཀུན་ནས་མནར། །རྟོག་པ་ཀུན་ནས་མནར་སེམས་ཏེ། །ཆོས་ཉིད་སྒྱུ་མ་མི་དམིགས་ཏེ། །ཆོས་ཉིད་སྒྱུ་མ་མི་དམིགས་ཕྱིར། །དོན་དམ་ཀུན་རྫོབ་རོ་གཅིག་སྟེ། །ཏིང་ངེ་འཛིན་གྱིས་དབང་བསྒྱུར་ན། །ཐུགས་ཀྱི་ཕྱག་རྒྱ་ཆེན་པོ་ཡིན། །མི་དམིགས་ཀུན་ནས་མནར་སེམས་པ། །འདུལ་བའི་བྱ་བ་བསམ་མི་ཁྱབ། །གསུང་གི་ཕྱག་རྒྱ་ཆེན་པོའོ། །ཞེ་སྡང་སྤྱི་ཡི་མཚན་ཉིད་ནི། །ཡང་དག་ཉིད་ཀྱིས་རབ་བརྟགས་ན། །རྣམ་པར་བྱང་བའི་མཚན་ཉིད་དེ། །གཉིས་མེད་ཞེ་སྡང་སྤང་དུ་མེད། །ང་རྒྱལ་མཚན་ཉིད་བཤད་པ་ནི། །ཁོང་ནས་འགྱིང་ཞིང་ཁེངས་སེམས་པ། །ཕ་རོལ་ཟིལ་གྱིས་གནོན་པར་བྱེད། །སྤྱི་ཡི་མཚན་ཉིད་བཤད་པ་ནི། །མི་རྟག་སྡུག་བསྔལ་སྟོང་བདག་མེད། །ང་རྒྱལ་སྤངས་ནས་ཞི་བསྒྲུབ་མེད། །ཆོས་ཀྱི་དབྱིངས་སུ་རོ་གཅིག་པས། །ཀུན་རྫོབ་སྒྱུ་མར་ཁོང་འགྱིང་ཉིད། །དེ་བཞིན་ཉིད་ལས་མི་གཞན་ཏེ། །ཆོས་ཉིད་མི་དམིགས་འགྱིང་བར་སྐྱེས། །སྐྱེ་འགྱིང་ཉིད་ན་
ཆོས་ཉིད་དེ། །འགྱིང་བའི་རང་བཞིན་མི་དམིགས་དག །འགྱིང་དང་མི་འགྱིང་དབྱེར་མེད་ཕྱིར། །ཆོས་སྐུ་ཕྱག་རྒྱ་ཆེན་པོ་ཡིན། །མི་དམིགས་པ་ཉིད་སྒྱུ་མ་འགྱིང་། །འགྱིང་བས་ཟིལ་གྱིས་གནོན་པ་ཉིད། །ཆོས་ཀྱི་དབྱིངས་ལས་མི་གཞན་ཏེ། །སྒྱུ་མ་ཆོས་ཉིད་དབྱེར་མེད་ཕྱིར། །དོན་དམ་ཀུན་རྫོབ་གཉི་ག་གཅིག །ཏིང་ངེ་འཛིན་གྱིས་དབང་སྒྱུར་ན། །ཐུགས་ཀྱི་ཕྱག་རྒྱ་ཆེན་པོ་ཡིན། །མི་དམིགས་སྒྱུ་མར་འགྱིང་བ་ནི། །ང་རྒྱལ་འདུལ་བ་བསམ་མི་ཁྱབ། །གསུང་གི་ཕྱག་རྒྱ་ཆེན་པོ་ཡིན། །ང་རྒྱལ་རང་སྤྱིའི་མཚན་ཉིད་ནི། །རྣམ་པར་བྱང་བའི་མཚན་ཉིད་ཡིན། །ཞི་བ་སྒྲུབ་ང་རྒྱལ་སྤང་དུ་མེད། །འདོད་ཆགས་རང་སྤྱིའི་མཚན་ཉིད་ནི། །སྲིད་པ་ཀུན་ལ་ཞེན་པ་སྟེ། །སྤྱི་ཡི་མཚན་ཉིད་བཤད་པ་ནི། །མི་རྟག་སྡུག་བསྔལ་སྟོང་བདག་མེད། །ཆགས་སྤངས་མ་ཆགས་བསྒྲུབ་ཏུ་མེད། །ཆོས་ཀྱི་དབྱིངས་སུ་རོ་གཅིག་ཕྱིར། །ཀུན་རྫོབ་སྒྱུ་མའི་རང་བཞིན་དུ། །འདོད་ཅིང་ཆགས་པ་སྒྱུ་མ་སྲེད། །མི་དམིགས་པ་ལས་མི་གཞན་ཕྱིར། །མི་དམིགས་དེ་ཉིད་སྒྱུ་མར་སྐྱེས། །ཆོས་རྣམས་བདག་ལས་མི་གཞན་ཕྱིར། །མི་དམིགས་དེ་ཉིད་སྒྱུ་མར་སྐྱེས། །སྤྱོད་པ་སྒྱུ་མ་རོ་གཅིག་ཕྱིར། །ཆོས་ཉིད་ཆོས་ཅན་དམིགས་སུ་མེད། །རྒྱལ་བ་ཀུན་དང་དབྱེར་མེད་པའི། །ཆོས་ཀྱི་སྐུ་ཡི་ཕྱག་རྒྱ་ཡིན། །མི་དམིགས་སྒྱུ་མར་འདོད་ཅིང་ཆགས། །འདོད་ཆགས་ཆོས་ཉིད་མི་དམིགས་ཏེ། །སྒྱུ་མ་མི་དམིགས་དབྱེར་མེད་ཕྱིར། །བདེན་པ་གཉི་གར་དབྱེར་མེད་གཅིག །ཏིང་ངེ་འཛིན་གྱིས་དབང་བསྒྱུར་ན། །ཐུགས་ཀྱི་ཕྱག་རྒྱ་ཆེན་པོ་ཡིན། །མི་དམིགས་དབྱིངས་ཉིད་འདོད་ཆགས་སྤྲོས་པ་ནི། །འདུལ་བ་བསམ་གྱིས་མི་ཁྱབ་སྟེ། །གསུང་གི་ཕྱག་རྒྱ་ཆེན་པོ་ཡིན། །འདོད་ཆགས་རང་དང་སྤྱི་ཡི་མཚན། །རྣམ་པར་བྱང་བའི་མཚན་ཉིད་ཡིན། །ཆགས་དང་མ་ཆགས་གཉིས་མེད་པས། །འདོད་ཆགས་མཚན་ཉིད་སྤང་དུ་མེད། །ཕྲག་དོག་ཀུན་གྱི་མཚན་ཉིད་ནི། །གཞན་གྱི་ཕུན་སུམ་ཚོགས་པ་ལ། །སེམས་དོག་རྟོག་པ་སྒྱུ་མ་གཞན། །ཐབས་ཀྱིས་སྦྱོར་བ་སྒྱུ་མའི་རང་བཞིན་ཅན། །
ཕྲག་དོག་སྤྱི་མཚན་བཤད་པ་ནི། །མི་རྟག་སྡུག་བསྔལ་སྟོང་བདག་མེད། །ཕྲག་དོག་སྤང་ཞིང་ཡངས་བསྒྲུབ་མེད། །ཆོས་ཉིད་དུ་ནི་རོ་གཅིག་ཕྱིར། །ཀུན་རྫོབ་སྒྱུ་མ་གཞན་གྱི་ཕུན་སུམ་ལ། །ཕྲག་དོག་རྟོག་པ་སྒྱུ་མའི་རང་བཞིན་ཉིད། །མི་དམིགས་པ་ལས་མི་གཞན་ཏེ། །མི་དམིགས་པ་ཉིད་སྒྱུ་མར་སྐྱེས། །ཕུན་སུམ་ཚོགས་པའི་ལྷག་པར་སྦྱོར་བ་ཡི། །ཐབས་ཀྱི་རྟོགས་པ་སྒྱུ་མའི་ཆོས་ཉིད་དེ། །དུས་གསུམ་རྒྱལ་བ་ཀུན་དང་དབྱེར་མེད་པས། །ཆོས་སྐུ་ཕྱག་རྒྱ་ཆེན་པོ་ཡིན། །མི་དམིགས་སྒྱུ་མ་གཞན་གྱི་ཕུན་སུམ་ལ། །ཕྲག་དོག་རྟོག་པར་འཛིན་པ་དང་། །རྟོག་དང་ཕྲག་དོག་མི་དམིགས་ཏེ། །སྒྱུ་མ་མི་དམིགས་དབྱེར་མེད་པའི། །བདེན་པ་གཉི་གར་རོ་གཅིག་པས། །ཏིང་ངེ་འཛིན་གྱི་དབང་བསྒྱུར་ན། །ཐུགས་ཀྱི་ཕྱག་རྒྱ་ཆེན་པོ་ཡིན། །མི་དམིགས་གཞན་གྱི་ཕུན་སུམ་ལ། །ཕྲག་དོག་རྣམ་པར་སྤྲོས་པ་ནི། །གདུལ་བའི་བྱ་བ་བསམ་མི་ཁྱབ། །གསུང་གི་ཕྱག་རྒྱ་ཆེན་པོ་ཡིན། །ཕྲག་དོག་རང་དང་སྤྱི་བསྟན་པ། །རྣམ་པར་བྱང་བའི་མཚན་ཉིད་ཡིན། །དོག་པ་སྤང་ཞིང་ཡངས་བསྒྲུབ་མེད། །སེམས་ཅན་རྣམ་པ་མང་པོ་ཀུན། །ནང་གི་ཆེན་པོ་ལྔ་སོགས་བསྟན། །རང་སྤྱིའི་མཚན་ཉིད་བཤད་པར་བྱ། །ཐབས་དང་ཤེས་རབ་མ་རྟོགས་པས། །མ་གྲོལ་ཁམས་གསུམ་འཁོར་བ་ཡིན། །དེ་ལྟར་ངེས་པར་ཅི་མཐོང་ན། །སྔགས་ཀྱིས་ཡོངས་སུ་ཟིན་པའི་ནད། །ཀུན་ལ་གནོད་པར་བྱེད་མི་ནུས། །དེ་བཞིན་ཐབས་དང་ཤེས་རབ་རྟོགས། །དུག་གསུམ་སྡུག་བསྔལ་གནོད་མི་འགྱུར། །ཐབས་ལ་མཁས་པས་མ་ཟིན་ན། །ལམ་གྱི་དགེ་སྤྱད་སྟེགས་བཅས་ཀྱང་། །མཐོ་རིས་ལྷ་དང་མི་རུ་སྐྱེས། །སྐྱེ་ཤི་མེད་པའི་ས་མི་ཐོབ། །ཐབས་མཁས་སྙིང་རྗེས་ཟིན་པ་ནི། །མཚམས་མེད་སེམས་ཅན་མ་ལུས་ཀུན། །བྱང་ཆུབ་སེམས་དཔའི་སྙིང་རྗེས་བསད། །བསོད་ནམས་དཔག་ཏུ་མེད་པ་ཐོབ། །མ་བསད་ན་ཡང་སེམས་ཅན་ཡལ་བོར་ཏེ། །སྙིང་རྗེ་མེད་དེ་སྡིག་ཡོད་འགྱུར། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་ཆེན་པོ་དག །གང་ཕྱིར་བྱང་ཆུབ་
སེམས་དེ་ནི། །རྡོ་རྗེ་དེ་བཞིན་གཤེགས་པར་གསལ། །ཉོན་མོངས་པ་ཉིད་དེ་བཞིན་གཤེགས། །ངོ་བོ་ཡིན་པར་གསལ་པོར་གསུངས། །ཆོས་ཀུན་རང་བཞིན་དག་པའི་ཕྱིར། །འཁོར་བ་ཡོངས་སུ་དག་པར་འགྱུར། །ཐབས་དང་ཤེས་རབ་ལྡན་པ་ལ། །ཉོན་མོངས་ཐམས་ཅད་བྱང་ཆུབ་རྒྱུ། །འཁོར་བའི་རང་བཞིན་བདག་མེད་པས། །དེ་ཕྱིར་དེ་བཞིན་གཤེགས་བསམ་ཡས། །ཐབས་དང་ཤེས་རབ་ལྡན་གྱུར་པས། །ཕྱིན་ཅི་ལོག་ཉིད་བྱང་ཆུབ་ལམ། །འཁོར་བའི་རང་བཞིན་མི་དམིགས་ཕྱིར། །མྱ་ངན་འདས་པ་ཡོད་མ་ཡིན། །གསང་སྔགས་བླ་ན་མེད་པ་ཡི། །ཐབས་ཀྱིས་ཇི་ལྟར་ཟིན་བཞིན་འགྲུབ། །བསམ་གྱིས་མི་ཁྱབ་ངེས་པ་མེད། །དོན་དམ་ཅིར་ཡང་མ་གྲུབ་ལ། །སྒྱུ་མའི་སྤྲུལ་པ་བསམ་མི་ཁྱབ། །ཐབས་ཆེན་དག་གིས་ཟིན་པ་ནི། །ཉོན་མོངས་ལམ་ཡང་རྣམ་པར་གྲོལ། །ཐབས་ཆེན་དག་གིས་མ་ཟིན་ན། །དགེ་བ་སྤྱད་ཀྱང་གྲོལ་མི་འགྱུར། །རྣལ་འབྱོར་དོན་དམ་ལྡན་པ་ཡིས། །ཉོན་མོངས་འཆིང་བའི་ཆོས་སྤྱད་ཀྱང་། །རྣམ་པར་གྲོལ་བར་འགྱུར་བ་ཡིན། །འཁོར་བ་དང་ནི་མྱ་ངན་འདས། །གཉི་ག་ཡོད་པ་མ་ཡིན་པས། །འཁོར་བ་ཡོངས་སུ་ཤེས་པས་ན། །དེ་ནི་མྱ་ངན་འདས་པའི་མཐའ། །ཉོན་མོངས་ཕྱིན་ཅི་ལོག་རྣམས་དག །ཐབས་ལ་མཁས་པས་ཟིན་འགྱུར་ཡང་། །གྲོལ་ལ་ཐར་བར་མི་འགྱུར་ན། །བྱང་ཆུབ་སེམས་དཔའ་རྣམས་ཀྱིས་ནི། །འདུལ་བའི་དབང་གིས་བྱ་བྱེད་ཀུན། །རྔོན་དང་སྨད་འཚོང་སྟོན་པའང་ལྟུང་། །བྱང་ཆུབ་སེམས་དཔའི་སྤྱོད་ཚུལ་བཟང་། །ཕལ་ལ་མེད་པས་མི་རུང་ན། །སྔགས་མཆོག་ཤིན་ཏུ་ཟབ་པ་ཡི། །སྐྱེ་བོ་ཀུན་གྱིས་བྱ་བར་འབྱུང་། །བདུད་རྩི་དང་དུ་བླང་བར་གསུངས། །མཉམ་དང་མི་མཉམ་དབྱེར་མེད་ན། །སྐུ་གསུང་རྡོ་རྗེ་དབང་ཐོབ་འགྱུར། །གྲུབ་པའི་རྫས་སུ་དེ་ཕྱིར་གསུངས། །ཤེས་རབ་མཉམ་པ་མ་རྟོགས་ན། །བྱོལ་སོང་ལ་ལ་ཆོས་དང་ལྡན་འགྱུར་ཡང་། །དྲང་སྲོང་འཚོ་དང་རྟག་མཐུན་དང་། །ཇི་སྲིད་འཚོ་ཡི་བར་དུ་འདོད་པ་སྤོང་བྱེད་པ། །དེ་དག་གྲོལ་བར་ངས་མ་བཤད། །ཆོས་རྣམས་ཐམས་ཅད་ཡོངས་སུ་
དག་པ་ཡི། །རྣམ་བཞི་ཚུལ་གྱིས་དོན་རྟོགས་མངོན། །རྒྱུ་རྣམས་རང་བཞིན་དག་པ་དང་། །འབྲས་བུ་ཡོངས་སུ་དག་འགྱུར་ཏེ། །རྒྱུ་ཡི་མཚན་ཉིད་རྣམ་པར་དག །ཕྱི་རོལ་ཆེན་པོ་ལྔ་རྣམས་ཏེ། །སེམས་ཉིད་གཟུང་འཛིན་གཉིས་སྣང་བ། །གཟུང་བའི་ཡུལ་ཉིད་འབྱུང་བ་ཆེ། །རྒྱུད་ཉིད་རང་གི་སེམས་ཡིན་པས། །འབྱུང་བ་ཆེན་པོ་རྒྱུ་ལས་དག །འབྲས་བུ་ཡོངས་སུ་དག་པ་ནི། །སེམས་ཅན་ཀུན་གྱི་རུས་པ་སྟེ། །རྡོ་རྗེ་བྱང་ཆུབ་སེམས་ཡིན་ཏེ། །ཤ་ནི་པདྨ་རཀྟ་ཡིན། །དྲི་ཆེན་དྲི་ཆུ་གུར་གུམ་ཆུ། །སོ་སོའི་ལུས་ལ་གནས་པས་དག །དོན་དམ་དམིགས་མེད་དག་པས་ནི། །ཕྱི་ནང་ཆོས་རྣམས་ཐམས་ཅད་ཀྱང་། །གང་གི་ངོ་བོ་མ་ཡིན་ཏེ། །སྐྱེ་འགག་མེད་པས་ཡེ་ནས་དག །ཀུན་རྫོབ་ཡེ་ནས་དག་པ་ནི། །སྒྱུ་མའི་རང་བཞིན་ཐམས་ཅད་སྣང་། །ཆུ་ཟླའི་ཚུལ་དུ་མི་དམིགས་གནས། །མི་དམིགས་པ་ཉིད་སྣ་ཚོགས་སྣང་། །དེ་བཞིན་གཤེགས་པར་ཡེ་ནས་མཉམ། །དེ་བས་གཙང་སྨེ་མེད་པར་སྤྱོད། །སེམས་ཅན་རྟོག་པ་བཟློག་ཕྱིར་སྨན། །གཙོ་རུ་དང་དུ་བླང་བར་བྱ། །དེ་བས་སེམས་ཅན་ཕྱིན་ཅི་ལོག །ཆོས་རྣམས་ཐམས་ཅད་དག་པར་མ་ཤེས་ཏེ། །ཐབས་དང་ཤེས་རབ་དོན་མ་རྟོགས། །ཁ་ཅིག་གིས་ནི་འཚོ་བའི་བར་དུ་ཟོས། །ཁ་ཅིག་གིས་ནི་དྲང་སྲོང་ཇི་བཞིན་དུ། །ཤ་སྤངས་རྩྭ་དང་ཆུ་ལ་ཟོས། །ཟོས་ཀྱང་མ་གྲུབ་དོན་མ་རྟོགས། །རྣལ་འབྱོར་ཐབས་ལྡན་རྣམས་ཀྱིས་ནི། །རང་བཞིན་ཡོངས་ཀྱིས་དག་པའི་ཕྱིར། །མཉམ་པའི་དབྱིངས་ཀྱིས་རབ་རྟོགས་པས། །ཐབས་དང་ཤེས་རབ་འབྲེལ་པ་ཡི། །ཐེ་ཚོམ་མེད་པར་འགྲུབ་པར་འགྱུར། །དངོས་དང་དངོས་མེད་རྟོགས་པ་མཚན། །གཙང་དང་མི་གཙང་རྟོགས་པ་མཚན། །མཚན་མ་ཉིད་ཀྱང་རྣམ་སྤངས་ཏེ། །མཁྱེན་པས་དབུལ་ལ་གནས་མི་འགྱུར། །བསྒྲུབ་པའི་རྫས་སུ་ཡང་དག་གསུངས། །བྱང་ཆུབ་སེམས་དང་ཤ་ཆེན་དང་། །དྲི་ཆེན་དྲི་ཆུ་རཀྟ་དག །སྒྲུབ་པ་པོས་ནི་ནན་ཏན་བྱ། །དངོས་གྲུབ་ཡ་མཚན་ཆེན་པོ་འགྲུབ། །ཚེ་ལ་དབང་དང་རིག་པ་འཛིན། །
མཁའ་ལ་འཕྱོ་དང་ཐོགས་མེད་འགྲུབ། །མཐར་ནི་སྐྱེ་མེད་རྡོ་རྗེ་ཡིས། །གཞན་ཡང་ཇི་ལྟར་དམིགས་པ་བཞིན། །འགྲུབ་འགྱུར་འདི་ལ་ཐེ་ཚོམ་མེད། །གསང་བའི་སྙིང་པོའི་དོན་ཉིད་ཀྱིས། །ཡི་དམ་མི་སྤང་རྟག་བསྒོམ་ཞིང་། །ཡེ་ནས་ལྷ་ཡི་མཚན་ཉིད་ནི། །དུས་གསུམ་གཤེགས་པ་ཐམས་ཅད་ཀྱི། །ལྷ་སྤངས་དགེ་སྤྱད་དོན་མེད་འགྱུར། །ལྷ་ནི་མི་སྤང་དོན་ཉིད་ནི། །ལྷུན་གྲུབ་ཡེ་ཤེས་ཐམས་ཅད་ཀྱི། །བདག་དང་གཉིས་མེད་སོ་སོ་མ་ཡིན་པའི། །དུས་གསུམ་བདེར་གཤེགས་དཀྱིལ་འཁོར་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་བདག་པོ་སྟེ། །ཡོངས་སུ་རྫོགས་པར་བསྒོམ་པའི་དོན། །དཀོན་མཆོག་གསུམ་སྤངས་ཚངས་པར་སྤྱད་པའི་དོན་མེད་འགྱུར། །བདག་ཉིད་ལྷ་དང་མཉམ་སྦྱོར་ན། །ཡོན་ཏན་ཆུང་ཡང་འགྲུབ་པར་འགྱུར། །ཡེ་ནས་མཉམ་ཉིད་སྦྱོར་ནས་སུ། །ལྷ་ཉིད་དུ་ནི་རྟག་ཏུ་བསྒོམ། །བདེར་གཤེགས་ཀུན་དང་མཉམ་པར་འགྱུར། །སྐུ་གསུང་ཡེ་ཤེས་ལྔ་རྫོགས་གྲུབ། །རྡོ་རྗེ་སློབ་དཔོན་སྨད་མི་བྱ། །བྱང་ཆུབ་སྟོན་པ་འདྲེན་པ་པོ། །ལོང་བ་དམིགས་བུ་འདྲེན་དང་འདྲ། །ཉོན་མོངས་སྡུག་བསྔལ་མཚོ་སྐེམས་ཡིན། །སློབ་དཔོན་དེ་ལ་སྨོད་པ་ནི། །དཔེན་ན་མུན་ཁུང་སྒྲོན་བསད་ན། །མཐོང་བའི་དོན་ནི་མི་རྟོགས་བཞིན། །སྡུག་བསྔལ་ཉམ་ཐག་ཡུན་རིངས་སུ། །བསྐལ་པ་མང་པོར་མྱོང་བར་མངོན། །དེ་བས་དེ་ལ་གུས་པ་རྟག་ཏུ་གྱིས། །ལུས་ལ་དབང་བའི་རྒྱལ་པོ་བས། །ཤིན་ཏུ་གཙོ་བོར་བླང་བར་བྱ། །དྲིན་ཆགས་བསྐྱེད་པའི་ཕ་མ་བས། །ཤིན་ཏུ་ལྷག་པའི་རི་མོ་བྱ། །རྡོ་རྗེ་མཆེད་དང་ལྕམ་དྲལ་ནི། །བླ་མེད་བྱང་ཆུབ་ཞིང་འགྲོ་བའི། །ཆོས་ཉིད་དམ་ཚིག་སྨོན་ལམ་མཐུས། །བྱང་ཆུབ་རིན་ཆེན་སར་ངེས་པས། །དེ་ལ་ལྡོག་ཅིང་འཁུ་བ་ནི། །རང་ལ་རང་གིས་མཚོན་བཏབ་ན། །རང་སྲོག་ཚེ་རབས་ལྔ་བརྒྱའི་བར། །རང་གིས་སྲོག་གཅོད་ཕུང་བར་འགྱུར། །ཚེ་འདི་མི་བདེ་སྣ་ཚོགས་པ། །མི་བདེ་བཞིན་དུ་འབྱུང་བར་འགྱུར། །འཇིག་རྟེན་ཕ་རོལ་དག་ཏུ་ཡང་། །ངན་སོང་གསུམ་དང་མི་ཁོམ་པའི། །སྡུག་བསྔལ་ཁ་
བརྒྱུད་མྱོང་བར་འགྱུར། །ཡུན་རིང་རྟག་ཏུ་མི་ཐར་བའི། །ཤིན་ཏུ་ཉམ་ཐག་མྱོང་བར་འགྱུར། །གྲུབ་པ་གཅིག་བཞིན་ལྷན་ཅིག་སྤྱོད། །གཉིས་མེད་དད་པས་རྗེས་སྤྱོད་སྤུན། །བདེར་གཤེགས་དཀྱིལ་འཁོར་བླ་མེད་ཡིན། །ཤེས་རབ་གསལ་བས་རྟག་ཏུ་གདུང་། །ཞེས་གསུངས། གསང་བ་གཞན་ལ་མི་བསྒྲགས་ཤིང་། །སྐུ་གསུང་ཐུགས་ཀྱི་དམ་ཚིག་རྣམས། །རྣལ་འབྱོར་མཉམ་པ་རྣམ་གཉིས་ཀྱིས། །ཐབས་དང་ཤེས་རབ་འབྲེལ་རྟོགས་ནས། །མཉམ་པའི་སྤྱོད་པས་ལ་དོར་ཏེ། །ཕུལ་དང་མི་འདྲ་ཡང་དག་རྟོགས། །མ་རྟོགས་པ་ཡི་ཕྱོགས་རྣམས་དང་། །སྐྱེ་བོ་ཀུན་ལ་རབ་ཏུ་གསང་། །གསང་བའི་བརྡ་ངག་སྣ་ཚོགས་གསུངས། །ཐབས་ལ་མཁས་པས་བྱས་པ་ཡིན། །གསང་སྔགས་སྐྱོན་ཡོད་མ་ཡིན་ཏེ། །ཐུགས་རྗེ་ཆེན་པོ་ཐབས་མཁས་ཀྱིས། །སྣོད་མ་ཡིན་དང་བློ་རྟུལ་རྣམས། །ལས་འཕྲོ་ངན་པའི་དོན་ཕྱིར་གསང་། །བརྒྱ་ལ་གང་ཞིག་གསང་དོན་འདི། །ལས་འཕྲོ་ངན་ལ་བསྒྲགས་འགྱུར་ན། །དཔེར་ན་གཙུབ་ཤིང་མེས་གཙུབས་ནས། །གཙུབ་ཤིང་ཉིད་ཀྱང་འཚིག་པར་སྣང་། །གཞན་ཡང་ཚིག་པར་གྱུར་པ་བཞིན། །ཆོས་དོན་བཟང་པོ་མེ་དང་འདྲ། །སྐལ་བ་ཆུང་ཞིང་ཤེས་རབ་དམན། །བློ་ངན་རྒྱུ་འབྲས་རྨོངས་པ་རྣམས། །མཉམ་པ་ཉིད་ལ་སྐུར་འདེབས་པས། །ངན་སོང་གསུམ་དུ་འཕངས་པར་འགྱུར། །གསང་དོན་མ་རྟོགས་སྡུག་བསྔལ་རྨྱོང་འགྱུར་ན། །གསང་བ་འཕེལ་བར་བྱེད་པ་ཡང་། །སྨྲ་བྱེད་ལྕེ་ལ་ཞིང་རྨོ་ཞིང་། །སྡུག་བསྔལ་ཆེན་པོ་མྱོང་བར་འགྱུར། །དེ་ཕྱིར་སེམས་ཅན་དོན་ཕྱིར་གསང་། །རླུང་ཕྱོགས་ཙམ་དུའང་བརྗོད་མི་བྱ། །སྔགས་དང་ཕྱག་རྒྱ་རྒྱུན་མི་གཅད། །སྔགས་ཞེས་རབ་ཏུ་བསྒྲགས་པ་ནི། །དོན་དམ་ཀུན་རྫོབ་དབྱེར་མེད་པའི། །མཉམ་པ་ཆེན་པོའི་དཀྱིལ་འཁོར་ཆེན་པོ་རུ། །སྐུ་གསུང་ཐུགས་ཀྱི་ཡི་གེ་ཨོྃ། །དེ་ལ་སོགས་པ་བཞི་བཅུ་གཉིས། །ཕྱག་རྒྱ་ཆེན་པོའི་མཚན་ཉིད་ནི། །ཕྱོགས་བཅུ་དུས་བཞི་གཤེགས་པ་ཡི། །སྐུ་གསུང་ཐུགས་དང་ཡེ་ཤེས་ལྔ། །བདག་དང་དབྱེར་མེད་ཕྱག་རྒྱ་
ཆེ། །གསལ་ལ་བརྩོན་པའི་ཡོན་ཏན་ལྡན། །ཡིད་བཞིན་མ་ཆགས་དབང་བསྐུར་ཏེ། །གོམས་ཤིང་བརྟན་པར་བྱ་བ་ཡིན། །དེ་བས་བར་ཆད་བརྩོན་མེད་ན། །དཔེར་ན་ས་བོན་ཚིག་པ་ལས། །འབྲས་བུ་འདོད་པ་དང་འདྲ་སྟེ། །བསྒྲུབ་པ་འབྲས་བུ་མེད་པར་འགྱུར། །མི་ཁོམ་འཁོར་བར་གནས་འགྱུར་ཏེ། །རྣལ་འབྱོར་ཆེན་པོ་ལ་ཞུགས་པས། །ཕྱི་ནང་ཆོས་རྣམས་ཐམས་ཅད་ལ། །དམིགས་མེད་གཅིག་དང་དུ་མར་བྲལ། །མཐའ་དབུས་གང་ཡང་མ་ཡིན་པའི། །ངོ་བོ་ཉིད་མེད་མཚན་ཉིད་མེད། །མཉམ་པའི་ཕྱག་རྒྱ་ཆེན་པོ་ཡིས། །ཕྱོགས་བཅུ་དུས་བཞི་ཐམས་ཅད་དང་། །འཇིག་རྟེན་འདས་དང་འཇིག་རྟེན་པའི། །ཡོན་ཏན་སྐྱོན་རྣམས་སྐྱེ་འགག་མེད། །གང་གི་ངོ་བོར་མ་གྲུབ་མཉམ། །ཀུན་རྫོབ་ཆོས་རྣམས་སྐྱེ་འགག་མེད། །མི་དམིགས་གང་གི་ངོ་བོ་མིན། །ཆུ་ཟླའི་ཚུལ་དུ་སྣ་ཚོགས་པར། །སྣང་ཞིང་བྱ་བ་བྱེད་ནུས་པའི། །ཕྱག་རྒྱ་ཆེན་པོའི་ཕྱོགས་བཅུ་དང་། །དུས་གསུམ་ཁམས་གསུམ་ཐམས་ཅད་དང་། །འཇིག་རྟེན་པ་དང་འཇིག་རྟེན་འདས། །ཡོན་ཏན་སྐྱོན་རྣམས་ཐམས་ཅད་དང་། །སྒྱུ་མར་མཉམ་པར་ཡེ་ནས་གནས། །སྔགས་འཆང་རྒྱལ་པོར་རྟོགས་བྱས་ནས། །བདག་ཉིད་ཆོས་ཉིད་སྐྱེ་འགག་མེད། །དང་ལས་མ་གཡོས་པར་གནས་ན། །ཕྱག་རྒྱ་ཆེན་པོ་ཐམས་ཅད་ཀྱང་། །རྫོགས་པར་ཕྱོགས་བཅུ་དུས་གསུམ་གྱི། །དེ་བཞིན་གཤེགས་པའི་སྐུ་གསུང་ཐུགས། །ཐམས་ཅད་དབྱེར་མེད་ཡེ་མཉམ་ལ། །མ་འདྲེས་རྒྱ་ཡོངས་མ་ཆད་པའི། །གཞལ་ཡས་ཁང་དང་ཉི་ཟླ་ཡི། །དཀྱིལ་འཁོར་བསམ་ཡས་ལྷུན་གྲུབ་ནི། །སྐུ་གསུང་ཐུགས་ཀྱི་ཡོན་ཏན་བསམ་མི་ཁྱབ། །མཉམ་པའི་དབྱིངས་ཆེན་རྫོགས་པར་བསྒོམ། །དེ་ལྟར་དམ་ཚིག་འདི་གསུམ་སྟེ། །དེ་ལ་གནས་ན་འགྲུབ་པར་འགྱུར། །ཡན་ལག་མ་ཉམས་སྔགས་བཟླས་ཤིང་། །འདོད་པ་ཀུན་ལ་ལོངས་སྤྱོད་བྱ། །ལུས་དང་ངག་སེམས་བརྟན་འགྱུར་ན། །བྱང་ཆུབ་རབ་འབྱམ་ཐོབ་པར་འགྱུར། །དམ་ཚིག་ཆེན་པོ་ལས་འདས་ན། །ཉེན་ནི་ཤིན་ཏུ་ཆེ་བར་གསུངས། །སངས་རྒྱས་བྱང་ཆུབ་སེམས་དཔའ་དང་། །
སྔགས་ཀྱི་སྤྱོད་པ་དོན་བསྒྲུབ་པ། །རྨོངས་པས་གལ་ཏེ་འདས་བྱས་ན། །དེ་མི་སྲོག་ཀྱང་དེར་ཟད་འགྱུར། །དམ་ཚིག་བསྲུངས་དང་སྔགས་བཟླས་དང་། །ཕྱག་རྒྱ་རྒྱུན་མི་གཅད་པ་བཞི། །བརྩོན་འགྲུས་ཆེ་ཞིང་བརྟན་པས་གཟུང་། །རྣལ་འབྱོར་བརྩོན་འགྲུས་ཆུང་འགྱུར་ན། །མི་འགྲུབ་ཉེན་ཡང་ཆེ་བར་གསུངས། །ཇི་ལྟར་རལ་གྱི་སོ་ལ་ནན་ཏན་དུ། །སྐྱེས་བུས་མྱུར་དུ་མ་བཟུང་ན། །ལག་པ་ངེས་པར་ཆོད་པར་འགྱུར། །དེ་བཞིན་ནན་ཏན་མེད་པའི་གསང་སྔགས་པ། །འཆི་འམ་ཡང་ན་འབྲས་བུ་མེད་པར་འགྱུར། །རྣལ་འབྱོར་དམ་པ་རྣམས་ཀྱིས་ནི། །སྔགས་ཀྱི་ཡན་ལག་མ་ཉམས་གསལ། །དོན་དམ་མ་ཉམས་དག་བྱས་ཤིང་། །བརྩོན་འགྲུས་ཆེར་བསྐྱེད་མྱུར་བར་འགྲུབ། །སྔགས་བསྒོམ་མ་ཉམས་ཕྱག་རྒྱ་གསལ། །ཆོ་ག་ཡོ་བྱད་གཙོར་མ་གསུངས། །ཚོགས་ན་ཡང་ནི་ཉེས་པ་མེད། །མ་ཚོགས་ན་ཡང་ཉེས་པ་མེད། །མ་ཚོགས་ན་ཡང་འགྲུབ་པར་འགྱུར། །བདག་ཉིད་རང་གི་ལྷར་སྦྱོར་བས། །དངོས་གྲུབ་ཐམས་ཅད་འགྲུབ་པར་འགྱུར། །ཆོ་ག་ལྷག་གམ་མ་ཚང་ནའང་། །འགྲུབ་པར་འགྱུར་ཏེ་ཉེས་སྐྱོན་མེད། །ཅེས་གསང་བའི་ཚིག་ཏུའོ། །དམ་ཚིག་སུམ་བརྒྱ་པ་རྩ་བ་བཅོ་ལྔ་མདོ་བཤད་པའི་ལེའུ་སྟེ་དྲུག་ཅུ་བརྒྱད་པའོ།། །།དེ་ནས་དེ་བཞིན་གཤེགས་པ་དགྱེས་པ་ཆེན་པོས་བཞུགས་གནས་དང་། སྤྱོད་ལམ་དང་། ལྟ་སྟངས་བསྟན་པ། ཐེག་པ་ཆེན་པོ་ལྷུན་གྲུབ་དོན་འདོད་ན། །རྒྱ་ཆེན་ཟབ་ཡངས་ཤེས་རབ་མྱུར། །ཟབ་པའི་དོན་རྟོགས་མི་ལྡོག་བདེ། །ང་དང་བདག་མེད་ཡངས་པ་བདེ། །གནས་སུ་ཆོས་དབྱིངས་གཉིས་མེད་བསྟན། །ཐབས་ཆེན་ཀུན་མཛད་འོད་གསལ་བྱམས། །ཐམས་ཅད་དགྱེས་མཛད་དབྱིངས་མ་གཏུམ། །ཆེ་ཆུང་བྱང་ཆུབ་སེམས་དཔའི་འཁོར། །གཡོག་འཁོར་ལྷ་སྲིན་སྡེ་མང་གཙོ། །བདག་གི་མཚན་གཟུགས་ཤིན་ཏུ་སྤགས། །ཆོས་དབྱིངས་མཁའ་དཀྱིལ་ཡངས་པ་ལ། །ཤེས་རབ་མྱུར་དུ་དོན་འགྲོ་བ། །འགྲོ་མེད་འོང་མེད་མི་གནས་པ། །བྱང་ཆུབ་སེམས་མཆོག་ཨ་རེ་
བདེ། །ཤེས་རབ་ཟད་མེད་དཀྱིལ་འཁོར་ལ། །ཐུགས་རྗེ་རོལ་པའི་ཡེ་ཤེས་འཕྱོ། །གཉིས་མེད་དབྱིངས་སྦྱོར་ཨ་རེ་བདེ། །མ་རིག་འཁྲུལ་པའི་འདམ་དབྱིངས་སུ། །ཡེ་ཤེས་སྒྲོན་མའི་མདའ་འཕངས་ནས། །གཏི་མུག་མུན་པ་རྣམ་བསལ་ཏེ། །རང་བཞིན་འོད་གསལ་བདེ་བའི་མཆོག །དགེ་དང་མི་དགེ་གཉིས་སུ་མེད། །རྣམ་རྟོག་མཚན་མ་ཡོང་མི་འཛིན། །རང་བཞིན་ཡེ་ནས་འོད་གསལ་བའི། །དགེ་སྡིག་མེད་པས་ཤིན་ཏུ་བདེ། །བདེ་དང་མི་བདེ་གཉིས་མེད་པས། །ཡེ་ཤེས་ཆགས་མེད་རྣམ་པར་དག །ཐམས་ཅད་དབྱེར་མེད་ཡེ་ཤེས་ཡིན། །སེམས་ཉིད་དང་བས་ཨ་རེ་བདེ། །རྒྱན་དུ་དཀྱིལ་འཁོར་ཐམས་ཅད་མཛེས། །ཡེ་ཤེས་རྒྱུ་ལས་གྲུབ་པ་ཡི། །ཕྱི་ནང་སྒྲིབ་མེད་གསལ་བའི་ངང་། །ཡེ་ཤེས་བློ་བརྟན་ཤིན་ཏུ་བདེ། །ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་སྨེ་བའི་བློ་མི་འཛིན། །ཐམས་ཅད་ཆོས་ཉིད་རོ་གཅིག་པས། །གཉིས་མེད་པས་ནི་ཤིན་ཏུ་བདེ། །ཤེས་རབ་ཆུང་ཆེན་ཏིང་འཛིན་གྱིས། །ཐམས་ཅད་མ་ནོར་གཞུང་ལུགས་བཞིན། །འཁོར་བ་མ་སྤངས་སྡུག་བསྔལ་མེད། །གཉིས་མེད་ཚིམ་པས་ཨ་རེ་བདེ། །ཐམས་ཅད་མ་ལུས་གཅིག་པའི་ངང་། །ལྟ་དང་ལྟ་བ་གཉི་ག་མེད། །ཡེ་ཤེས་སྒྲོན་མ་བསྒྲེང་བར་ནི། །ཕྱོགས་བཅུའི་ཞིང་ཁམས་ཐམས་ཅད་མཐོང་། །འདི་དང་ཕ་རོལ་གཉིས་མེད་ཕྱིར། །འགྲོ་དང་འགྲོ་བར་བྱ་བ་མིན། །ཡན་ལག་སྟབས་ཆེན་མ་མཆོངས་པར། །ཕྱོགས་བཅུ་སྟོང་ཁམས་ཐམས་ཅད་ན། །ཐུབ་མཆོག་སྟོན་པའི་སྤྱོད་ཡུལ་ནི། །ཇི་ལྟར་དམིགས་པ་བཞིན་དུ་འགྲུབ། །ཆོས་རྣམས་ཐམས་ཅད་དམིགས་སུ་མེད། །ཆོས་ཉིད་སྒྱུ་མ་ཅིར་ཡང་འགྲུབ། །ཟག་མེད་ཟབ་པས་དོན་བརྟགས་ན། །དག་པར་མ་གྱུར་གང་ཡང་མེད། །ཡེ་ཤེས་མ་བཅོས་ཀུན་དུ་གསལ། །རང་བཞིན་རྣམ་པར་དག་པའོ། །ཡེ་ནས་དེ་ལྟར་གནས་མོད་ཀྱང་། །མ་རིག་རྨོངས་པའི་ལིང་ཏོག་གིས། །གསལ་བའི་སྒྲོན་མ་བསྒྲིབས་གྱུར་ཏེ། །ཁམས་གསུམ་མུན་ནག་རྒྱུན་དུ་འཁོར། །རྣམ་རྟོག་མཚན་མར་འཛིན་པ་ཡིས། །ལུས་དང་ལོངས་སྤྱོད་གནས་དང་ནི། །
བདེ་དང་སྡུག་བསྔལ་སྣ་ཚོགས་མྱོང་། །དེ་ལ་སུ་ཞིག་བྱེད་པ་ཡོད། །ཡང་དག་མཐུ་ཆེན་སུས་མ་བྱས། །རང་ལ་རང་གིས་བཅིངས་པར་ཟད། །ཐམས་ཅད་མ་ལུས་ཆོས་སོ་ཅོག །སྙིང་པོ་ཡོད་པ་མ་ཡིན་ཏེ། །སྒྱུ་མ་མིག་ཡོར་སྤྲུལ་པ་དང་། །སྨིག་རྒྱུ་འཇའ་ཚོན་ཆུ་ཟླའི་ཚུལ། །དེ་ལྟར་གང་གིས་རབ་རྟོགས་པ། །དེ་ཉིད་སངས་རྒྱས་ཡིན་པར་བཤད། །སངས་རྒྱས་ས་ལ་གནས་པ་ཡིན། །སྐྱེ་མེད་ཕུན་སུམ་ཚོགས་ཡིན་ཏེ། །བྱེད་མེད་པ་ཡི་མཆོག་ཀྱང་རྫོགས། །ཞེས་ཉིད་ལ་ཉིད་བརྗོད་དོ། །སྒྱུ་འཕྲུལ་དྲ་བ་ལས་བཞུགས་གནས་ཁང་པ་བསྟན་པའི་ལེའུ་སྟེ་དྲུག་ཅུ་དགུ་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱིས་མི་འཆི་བའི་རྡོ་རྗེ་བསྒྲུབ་པ་འདི་གསུངས་སོ། །རྡོ་རྗེ་ཞིང་ཆེན་བསྒྲུབ་འདོད་པས། །ཐམས་ཅད་སྐྱེ་ཤི་མེད་པའི་ཚུལ། །མཉམ་ཉིད་དག་པ་ཉིད་དུ་བསྒོམ། །ཁྲོ་བོ་བདུད་རྩི་འཁྱིལ་པ་ཡི། །ཛཿཧཱུྃ་བྃ་ཧོས་དགུག་པར་བྱ། །བདག་དང་ཁྲོ་བོ་གཉིས་མེད་པར། །ཡང་ནས་ཡང་དུ་བསྒྲུབ་པར་བྱ། །སྐུ་རྣམས་གསལ་བར་གྱུར་པ་དང་། །ཞིང་ཆེན་འོག་ཏུ་གཞུག་པར་བྱ། །དཀྱིལ་འཁོར་མ་ལུས་དེར་བཀོད་ནས། །ཁྲོ་བོ་ཁྲོ་མོའི་དཀྱིལ་འཁོར་བསྒོམ། །མངག་པའི་ཕོ་ཉ་ཕྱོགས་བཅུར་གཏོང་། །ཐམས་ཅད་མ་ལུས་དབང་དུ་སྡུད། །བསྒྲུབ་པ་གཅིག་གམ་ཡང་ན་གཉིས། །གསུམ་དང་ལྔ་རུ་བསྒོམ་པར་བྱ། །ཕོ་ཉ་མང་པོས་ནྲྀ་བཀུག་ནས། །ཞིང་ལ་ཡང་ནས་ཡང་དུ་གཞུག །སྣར་དང་སེར་དང་མདོག་སྣུམ་འབྱུང་། །དེ་ནས་བདུད་རྩིའི་ཏིང་འཛིན་གྱིས། །ལན་གྲངས་འབུམ་ཕྲག་མང་པོར་ནི། །བཟླས་པའི་ཚུལ་ཡང་རྣམ་གསུམ་དག །རྡོ་རྗེ་སྔགས་བཟླས་རྩེ་མོ་གསུམ། །དེ་ཡི་བར་ནས་བཟླས་པ་འབྱུང་། །འོད་ཟེར་ལྔ་དང་ལྡན་པར་བྱ། །ཞིང་དེ་ལྡེམ་ལྡེམ་པོར་གྱུར་དང་། །བདུད་རྩི་ལྔ་ཡིས་བསྐུལ་བར་བྱ། །དེ་ནས་ཡི་གེ་འབྲུ་ལྔ་དགོད། །གསལ་ཞིང་འཚེར་བར་བསྒོམ་པར་བྱ། །དབང་པོ་ལྔ་དང་དབང་པོའི་ཚུལ། །ཡན་ལག་ལྔ་ལ་རིགས་ལྔའི་ཚུལ། །རྡོ་རྗེ་ཏིང་འཛིན་དེ་ཡིས་བསྒོམ། །དེ་ནས་ཞིང་དེ་འགུལ་འགྱུར་ནས། །ཞིང་དེ་དྲག་ཏུ་འགུལ་བ་དང་། །ཤིན་
ཏུ་ཞགས་པས་བསྡམ་པར་བྱ། །ཡན་ལག་རྣམས་ཀྱང་གཞུམ་པར་བྱ། །ཕྱོགས་བཞི་དག་ཏུ་ཐོད་པ་བསྟན། །ཧ་ཡ་གྲཱི་བའི་སྐུར་བསྒོམས་ཤིང་། །སྔགས་ནི་འབུམ་ཕྲག་མང་དུ་བཟླས། །ཕྱོགས་བཅུར་སྤྲོ་ཞིང་ཞིང་ལ་བསྟིམ། །དེ་ནས་ཞིང་དེ་དྲག་འགུལ་ནས། །རྡོ་རྗེ་ཏིང་འཛིན་དེ་ཡིས་ནི། །བརྟན་པ་ཉིད་དུ་བསྒོམ་པར་བྱ། །དེ་ནས་པར་པར་བྱེད་པ་དང་། །ཨ་ནྲྀ་བྲི་དུ་གང་ཡིན་པ། །རྡོ་རྗེ་དྲག་ཏུ་བདེག་ཅིང་དབབ། །ཐོད་པའི་ཁ་ནས་ནྲྀ་ཕྱུང་ནས། །རྡོ་རྗེ་ཏིང་འཛིན་སོ་ཡིས་གཅད། །རྡོ་རྗེ་སྔགས་ཟོས་ཁོང་དུ་བསྟིམ། །གཉིས་སུ་མེད་པར་བསྒོམ་པར་བྱ། །དེ་ནས་ཞིང་དེ་ལངས་པ་དང་། །རྡོ་རྗེ་དབྱིངས་ནས་དབང་ཡང་བསྐུར། །བདུད་རྩི་ཆུ་ཡང་བླུད་པར་བྱ། །ལས་རྣམས་ཐམས་ཅད་བྱེད་དུ་གཞུག །ཞིང་དེས་རབ་ཏུ་སྨྲས་པའི་ཚིག །དཔའ་བོ་ཅི་བགྱི་མི་རྒས་སྐྱེ་མེད་ཆོས་རྣམས་དང་། །ལས་རྣམས་མ་ལུས་ཀུན་བགྱིད་དོ། །དེ་ལྟར་བསྒྲུབ་པའི་རིགས་མཆོག་གིས། །ཐལ་བ་ཐམས་ཅད་སོས་པར་འགྱུར། །བསྒྲུབ་པའི་ས་ནི་དུར་ཁྲོད་དང་། །རི་བྲགས་གཉེན་པོ་བགེགས་གནས་དང་། །ནགས་ཁྲོད་སྟོང་པ་ཚེར་མ་ཅན། །རི་བོས་བསྐོར་བའི་ལྕུག་མ་ཅན། །རབ་ཏུ་རྣམ་པར་དབེན་པ་དང་། །གནོད་སྦྱིན་སྲིན་པོ་འབྱུང་བའི་གནས། །དེ་དག་ཏུ་ནི་བསྒྲུབ་པར་བྱ། །དགུ་དང་བཅུ་གཉིས་བཅུ་གསུམ་དང་། །བཅུ་དྲུག་མན་ཆད་བསྒྲུབ་པར་བྱ། །ཐེ་ཚོམ་མེད་པར་འགྲུབ་པར་འགྱུར། །ཕྱི་ནང་འཚོ་བའི་ཡོ་བྱད་རྣམས། །ལམ་ལྔའི་ཞིང་དང་སྨན་ལྔར་བཅས། །འབྲུ་རྣམས་ཐམས་ཅད་བཅང་བར་བྱ། །རྟག་ཏུ་ཚོགས་ཆེན་མཆོད་པར་བྱ། །གསུམ་དང་ལྔ་རུ་བར་མི་གཅད། །ཁ་ཟས་རྣམས་ཀྱང་ཐོད་པར་བཟའ། །བཏུང་བ་དག་ཀྱང་དེ་བཞིན་ཏེ། །མར་མེ་རྟག་པར་གཏང་བར་བྱ། །རྒྱུ་ནི་ནྲྀ་ཡི་མར་ལས་བྱ། །ཡན་ལག་བསྐུ་བའང་དེ་བཞིན་ཏོ། །སྡོང་བུ་པདྨའི་རྒྱུ་ལས་བྱ། །སྣོད་ནི་དུང་ཆེན་སྲུབས་མེད་པ། །ལྕང་ལོ་ཡོད་དང་མེད་ཀྱང་རུང་། །དེ་བྱི་པུ་ཏྲ་མ་བྱུང་བ། །མདོག་ནི་བན་ལང་ཅན་ལ་ཡོད། །རྡོ་རྗེ་བསྒྲུབ་པ་བར་གཅོད་ཕྱིར། །རྟག་ཏུ་མཚམས་ནི་གཅད་པར་བྱ། །ནྲྀ་ཡི་རྐང་པ་གཡས་གཡོན་ནས། །སྦོམ་པོ་མ་
ཡིན་ཕྲ་བ་ཉིད། །དེ་ལ་ཀི་ལ་ཡ་བྱས་ནས། །ཕུར་བུའི་སྔགས་དང་ཁྲོ་སྔགས་ཀྱིས། །ལན་འབུམ་དུ་ནི་བཟླས་པར་བྱ། །ལག་པ་གཡས་གཡོན་ཐལ་སོར་ལ། །ཁྲོ་བོ་བཅུ་དང་ཁྲོ་མོ་བཅུ། །འོད་འབར་གཟུངས་ཀྱི་སྐུ་རུ་བསྒོམ། །དེ་ནས་གཉིས་མེད་སྦྱོར་ཚུལ་དུ། །སྒྲུབ་པོ་རྡོ་རྗེ་བསྒོམ་པར་བྱ། །སྒྲུབ་པ་དངོས་ལ་མ་གཏོགས་པ། །ཕྱོགས་བཅུ་རྣམས་སུ་མཚམས་ཀྱང་གཅད། །དངོས་གྲུབ་མ་ཐོབ་བར་དུ་ནི། །བསྒོམ་དང་བཟླས་དང་ཕྱག་རྒྱ་གསུམ། །བག་ཡོད་མགོ་ལ་མེ་འབར་བཞིན། །བར་མཚམས་མེད་པར་བསྒྲུབ་པར་བྱ། །དེ་ལྟར་སྒྲུབ་པའི་རིགས་མཆོག་གིས། །ལྷ་མ་སྲིན་རྣམས་བྲན་བཞིན་འཁོལ། །འཇིག་རྟེན་དབང་ཕྱུག་དབང་དུ་སྡུད། །རྡོ་རྗེ་རིགས་མཆོག་འཁོར་རྐྱེན་རྣམས། །ཡིད་བཞིན་དུ་ནི་འབྱུང་བར་འགྱུར། །རྫུ་འཕྲུལ་ཆེན་པོ་འདི་དག་ནི། །ལུས་སྦེད་ནུས་ནས་མངོན་དུ་དབྱུང་། །དེ་མ་ཡིན་པར་ཤིན་ཏུ་གསང་། །སྐུའི་སྒྲུབ་པ་ངེས་པའི་དོན་དུ་བཀའ་སྩལ་ཏོ། །རོ་ལངས་བསྒྲུབ་པའི་ལེའུ་སྟེ་བདུན་ཅུ་པའོ།། །།གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བྲོ་གར་རྩེ་འཇོ་བྲོ་གར་གྱི་དམ་ཚིག་ཅེས་བྱ་བ་ངེས་པར་ཆེད་དུ་བརྗོད་པ་འདི་བརྗོད་དོ། །ཕྱོགས་བཅུ་མཐའ་ཡས་དུས་བཞི་ཡི། །ཐམས་ཅད་དབྱེར་མེད་མཎྜ་ལའི། །ཉི་ཟླ་ཤར་བའི་གཞལ་ཡས་ལ། །པདྨ་ཆགས་མེད་གདན་བཏིང་ནས། །རིན་ཆེན་ཟད་མེད་ཕོ་བྲང་ས། །ཆེ་ཆུང་དཔག་ཏུ་མེད་པ་ཡི། །བྱང་ཆུབ་བདེ་ལྡན་དཀྱིལ་འཁོར་ལ། །བདེ་ལྡན་བྱང་ཆུབ་རབ་བཀོད་ནས། །མ་ལུས་ཀུན་བསྡུས་དབྱིངས་བསྡུས་ཏེ། །ལུས་བསྐྱོད་ཡན་ལག་བསྐུལ་བསིགས་དང་། །དབང་པོ་ལྔ་ཡི་ལྟ་སྤྱོད་ཀུན། །ཕྱག་རྒྱ་ཆེན་པོ་ཡིན་པར་བཤད། །གོང་གི་དཀྱིལ་འཁོར་ཚད་ཉི་ཟླ། །མི་འཁྲུགས་པ་ཡི་ས་གཞི་ལ། །པདྨ་མ་ཆགས་གདན་བཏིང་ནས། །ཐབས་དང་ཤེས་རབ་ཆགས་མེད་ཚུལ། །ཡན་ལག་དབང་པོ་ཐམས་ཅད་ཀུན། །རང་བཞིན་ཡོངས་སུ་དག་པ་དང་། །ཏིང་འཛིན་དེ་བཞིན་གཤེགས་ལྔའོ། །ཡེ་ནས་མ་བཅིངས་ཡོངས་ཀྱིས་ཏེ། །ལྷག་པའི་ཏིང་འཛིན་དཀྱིལ་འཁོར་གྱིས། །
དབུ་ལ་དེ་བཞིན་གཤེགས་པའི་འཁོར། །ཡན་ལག་བཞི་ལ་རིགས་བཞི་འཁོར། །ཁ་དོག་དབྱིབས་དང་ཕྱག་རྒྱ་དང་། །ཐབས་དང་ཤེས་རབ་གསལ་བསྒོམས་ཏེ། །ཕྱོགས་བཅུར་སྤྲོ་ཞིང་ངན་སོང་སྦྱོང་། །གནས་སུ་བསྡུ་ཞིང་དཀྱིལ་འཁོར་སྤྲོ། །འདས་དང་མ་འདས་ཐམས་ཅད་ཀུན། །བདེར་གཤེགས་ཞིང་དུ་རྣམ་པར་སྦྱོར། །ཡན་ལག་ཆེན་པོ་ལྔ་བསྐྱོད་ན། །རིགས་ལྔའི་དཀྱིལ་འཁོར་མ་ལུས་གཡོ། །འགྲོ་ལྔ་བྱང་ཆུབ་ལམ་དུ་མཛད། །སྙིགས་མ་ལྔ་ཡང་རྣམ་པར་དག །བཟང་མཛེས་ལེགས་པའི་གོས་བགོས་ན། །འོད་ཟེར་སྣ་ཚོགས་འཕྲོ་བར་འགྱུར། །དེ་ནས་མཐར་ཐུག་མེད་པའི་བར། །ཡེ་ཤེས་ལྔ་ཡིས་བརྒྱན་པར་འགྱུར། །སྐྱེས་བུ་བློ་རྩལ་རབ་ལྡན་པས། །རྟག་ཏུ་དཀྱིལ་འཁོར་དེ་ལྟར་བསྒོམ། །ཚིག་ཙམ་མ་ཡིན་བློ་གཏིང་དུ། །བདག་དང་དབྱེར་མེད་ཉིད་དུའོ། །ཐབས་དང་ཤེས་རབ་ལྡན་གྱུར་ནས། །ཤར་གྱི་ཕྱོགས་སུ་ཁ་བསྟན་ཏེ། །སེང་གེའི་སྟབས་ཆེན་མཆོང་བར་བྱ། །ལྗགས་ཀྱི་ཡི་གེ་ཏྲྃ་བསྒོམས་ལ། །ལྕེ་ནི་འབུམ་ཕྲག་བསམ་ཡས་དང་། །ཧྲི་ཡང་བསམ་གྱིས་མི་ཁྱབ་སྤྲོ། །ཕྱོགས་བཅུ་དུས་བཞི་བསམ་ཡས་སུ། །གསུང་གི་དཀྱིལ་འཁོར་འོད་འབར་བ། །གསུང་གཅིག་དཀྱིལ་འཁོར་ཡན་ལག་ནི། །བསམ་གྱིས་མི་ཁྱབ་ཀུན་དུ་གྲགས། །སྒྲ་དང་མིང་ཚིག་སོ་སོར་གསལ། །ལྗགས་ཀྱི་དབང་པོ་བཀྲམ་ནས་གསུངས། །ཐར་དང་མ་ཐར་གཉི་ག་བརྗོད། །ངེས་པ་ཁོ་ན་ཡང་དག་ཏུ། །དེ་བཞིན་ཉིད་ཀྱིས་ཡོང་མ་གསུངས། །སྣ་ཡི་དབང་པོའི་དཀྱིལ་འཁོར་དུ། །ཏྲྃ་གི་ཡིག་འབྲུ་གསལ་བསྒོམས་ནས། །དཀྱིལ་འཁོར་ཕྱོགས་བཅུ་དུས་བཞི་ཡི། །མཐའ་ཡས་བསམ་གྱིས་མི་ཁྱབ་སྟེ། །ཏྲྃ་ཡང་བསམས་པས་འོད་འཕྲོ་འབར། །ཕྱོགས་དུས་དཀྱིལ་འཁོར་མ་ལུས་ཐོས། །འགྲོ་དྲུག་འཁོར་བའི་གནས་ཀྱང་ཐོས། །སྒྲ་དང་ཐོས་པ་གཉིས་མེད་པའོ། །དེ་བཞིན་དྲི་དང་རོ་རེག་རྣམས། །སོ་སོའི་མཚན་ཉིད་གསལ་བསྒོམས་ནས། །ཡིག་འབྲུའི་སྙིང་པོ་དེ་བཞིན་དགོད། །སངས་རྒྱས་དཀྱིལ་འཁོར་མ་ལུས་དང་། །འགྲོ་དྲུག་མ་
ལུས་ཐམས་ཅད་ཀུན། །ཆགས་པ་མེད་པའི་ཚུལ་གྱིས་རོལ། །དྲི་ལ་སོགས་པ་བདེ་མཆོག་གིས། །ཀུན་ལ་ཚིམ་པར་ཡང་དག་མཆོད། །འགྲོ་དྲུག་མ་ལུས་ཐམས་ཅད་ལ། །ཇི་ལྟར་འཚམ་པའི་དོན་ཡང་བྱེད། །ཐབས་མཁས་ཐུགས་རྗེས་དེ་ལྟར་སྟོན། །དེ་བཞིན་རིགས་དང་རྡོ་རྗེའི་རིགས། །མ་ཆགས་ལ་སོགས་ཤེས་རབ་ལྡན། །གཙོ་བོ་ལྔ་དང་གཙོ་མོ་ལྔ། །ཐབས་དང་ཤེས་རབ་ལྡན་བསྒོམས་ཏེ། །ཚོམ་བུ་གཅིག་གམ་ཡང་ན་གསུམ། །ལྔ་ཡི་དཀྱིལ་འཁོར་རབ་བསྒོམས་ཏེ། །ཐབས་དང་ཤེས་རབ་ཕན་ཚུན་དུ། །ལྷ་གསལ་འོད་འཕྲོ་བསྟིམ་བྱས་ཏེ། །དཀྱིལ་འཁོར་འོད་ཟེར་འབར་བར་བསྒོམ། །ཏིང་འཛིན་ཤིན་ཏུ་གསལ་གྱུར་ནས། །བདག་དང་ཕྱོགས་བཅུ་དབྱེར་མེད་པར། །གཉིས་སུ་མེད་པར་བསྒོམ་པར་བྱའོ། །དེ་ནས་ཐབས་དང་ཤེས་རབ་གཉིས། །ལྟ་སྤྱོད་ཡ་ཆར་མ་གྱུར་པར། །དཀྱིལ་འཁོར་དག་ལ་གསལ་བསྒོམས་ན། །དབུས་ནས་ཤར་ཕྱོགས་ཁ་བསྟན་ནས། །རྐང་པའི་སྟབས་ཆེན་བསྐྱོད་བྱས་ཤིང་། །ལག་གི་འདུ་བྱེད་ཀུན་བསྐྱོད་ནས། །བྲོ་དང་གར་གྱི་ཕྱག་རྒྱར་བྱ། །དཀྱིལ་འཁོར་འོད་ཟེར་དཀར་འཕྲོ་བ། །བྱང་ཆུབ་སེམས་དཔའ་རྣམ་པར་དག །ཤིན་ཏུ་གསལ་དང་འོད་ཟེར་འབར། །ཐབས་དང་ཤེས་རབ་དེ་གྲུབ་ཤོག །ཅིས་ཀྱང་མི་ཚུགས་རྡོ་རྗེ་ཡིས། །བདུད་བཞི་དག་ནི་འཇོམས་པར་བྱེད། །ཐེག་མཆོག་རྡོ་རྗེའི་རིག་འཛིན་པ། །ཐབས་དང་ཤེས་རབ་དེ་གྲུབ་ཤོག །བདག་ཉིད་རིགས་པའི་རྡོ་རྗེ་ཡིས། །ཉོན་མོངས་སྡུག་བསྔལ་མེད་པར་ཤོག །མེ་ལོང་ལྟ་བུའི་ཡེ་ཤེས་ཀྱིས། །ཐབས་དང་ཤེས་རབ་གསལ་འགྱུར་ཤོག །ཉོན་མོངས་སྡུག་བསྔལ་རྩད་བཅད་ནས། །མ་རིག་མུན་པ་མེད་པར་བྱེད། །ཐུགས་རྗེའི་འོད་ཟེར་ཉི་ཤར་བས། །ཐབས་དང་ཤེས་རབ་འོད་འབར་ཤོག །ཤིན་ཏུ་སྲ་ཞིང་སྐྱེ་ཤི་མེད། །རྡོ་རྗེའི་ཐུགས་རྗེ་རོལ་སྟོན་པ། །འགྲོ་ལ་ཐུགས་རྗེ་ཡོངས་ཀྱིས་འབྱུང་། །ཐབས་དང་ཤེས་རབ་བྱམས་ལྡན་ཤོག །ཐབས་དང་ཤེས་རབ་ལྡན་གྱུར་པས། །ཡོན་ཏན་ཕྱོགས་སུ་ཁ་བསྟན་ཏེ། །ལུས་བསྐྱོད་
ཡན་ལག་བསྒུལ་བསིགས་ནས། །སྟོབས་ཆེན་དག་ཀྱང་བརྡུང་བར་བྱ། །དཀྱིལ་འཁོར་མ་ལུས་འབྱུང་བའི་གཏེར། །ཟད་མེད་ནོར་བུ་རིན་པོ་ཆེ། །མ་ལུས་ཀུན་གྱི་རེ་བ་སྐོང་། །ཐབས་དང་ཤེས་རབ་དེ་གྲུབ་ཤོག །ནམ་མཁའི་དཀྱིལ་གྱི་མདོག་བསྟན་པ། །ཡང་ན་ཐམས་ཅད་གསེར་བཙོ་མ། །དཀྱིལ་འཁོར་བསམ་ཡས་ཟད་མི་ཤེས། །ཐབས་དང་ཤེས་རབ་མྱུར་གྲུབ་ཤོག །ཡོན་ཏན་རིན་ཆེན་བསམ་ཡས་ཀྱང་། །ཐམས་ཅད་མཉམ་པའི་ངང་གནས་ནས། །དེ་བཞིན་མཉམ་ཉིད་ཡེ་ཤེས་ཏེ། །ཐབས་དང་ཤེས་རབ་མཉམ་འགྱུར་ཤོག །བདེར་གཤེགས་ཡོན་ཏན་རྨད་པོ་ཆེ། །ཡེ་ནས་ཆགས་མེད་བྱང་ཆུབ་ཞིང་། །ཡང་དག་ཉིད་དུ་ཐམས་ཅད་གནས། །ཐབས་དང་ཤེས་རབ་མྱུར་གྲུབ་ཤོག །ཐབས་དང་ཤེས་རབ་ལྡན་གྱུར་པས། །ནུབ་ཕྱོགས་སུ་ནི་ཁ་བལྟས་ནས། །ཡན་ལག་དང་པོ་བསྐྱོད་བྱས་ཏེ། །གར་རྣམས་ཤིན་ཏུ་གསལ་བྱས་ནས། །སྟོབས་ཆེན་དག་ཀྱང་བརྡུང་བར་བྱ། །ཆོས་རྣམས་མ་ལུས་ཀུན་སྤྱོད་ཀྱང་། །པདྨ་ལ་ནི་འདམ་བཞིན་ནོ། །ཆགས་པ་མེད་པའི་ཚུལ་གྱིས་གནས། །ཐབས་དང་ཤེས་རབ་དེ་གྲུབ་ཤོག །ལས་དང་ཉོན་མོངས་ནུབ་འགྱུར་བའི། །བག་ཆགས་མཚན་མ་རྡུལ་ཙམ་མེད། །ཐབས་དང་ཤེས་རབ་མྱུར་གྲུབ་ཤོག །བྱང་ཆུབ་ཆགས་མེད་དཀྱིལ་འཁོར་ནི། །གང་ནས་མ་འོངས་ཉིད་ཀྱི་དབྱིངས། །མི་གནས་ཚུལ་གྱིས་དབྱིངས་ན་བཞུགས། །ཐབས་དང་ཤེས་རབ་མྱུར་གྲུབ་ཤོག །ཐབས་དང་ཤེས་རབ་ལྡན་གྱུར་པས། །བྱང་ཕྱོགས་སུ་ནི་ཁ་བལྟས་ཏེ། །ལུས་བསྐྱོད་ཡན་ལག་གར་བྱེད་ཅིང་། །ཕྱག་རྒྱ་སོ་སོར་གསལ་གྱུར་ནས། །རྐང་པའི་སྟབས་ཆེན་བརྡུང་བར་བྱ། །ཡང་དག་རྟོགས་པའི་ཤེས་རབ་ཀྱིས། །བསྐལ་པ་བསམ་གྱིས་མི་ཁྱབ་པའི། །སྒྲིབ་པ་ཐམས་ཅད་བྱང་བྱས་ཏེ། །ཐབས་དང་ཤེས་རབ་མྱུར་གྲུབ་ཤོག །སྐུ་གསུང་ཐུགས་ཀྱི་བྱིན་བརླབས་ཀྱིས། །བདུད་བཞི་བཅོམ་ནས་མི་མཐུན་བསལ། །བྱ་བྱེད་མེད་ལ་དོན་རྣམས་གྲུབ། །ཐབས་དང་ཤེས་རབ་མྱུར་གྲུབ་ཤོག །
ཐམས་ཅད་མ་ལུས་རྫོགས་བྱེད་པ། །སྣ་ཚོགས་ཀུན་དུ་འགྱུར་བའོ། །ལྗང་གུའི་ཚུལ་དུ་མདོག་བསྟན་པ། །ཐབས་དང་ཤེས་རབ་མྱུར་གྲུབ་ཤོག །ཐམས་ཅད་མ་ལུས་དོན་གྲུབ་པ། །ལས་རྣམས་མ་ལུས་རྫོགས་པར་བྱེད། །ནན་ཏན་ཆེན་པོ་བྱ་བ་རྫོགས། །ཐབས་དང་ཤེས་རབ་མྱུར་གྲུབ་ཤོག །སྡུག་བསྔལ་དྲ་བ་ཚར་བཅད་དེ། །དཀྱིལ་འཁོར་མ་ལུས་ཀུན་བྱས་ཀྱང་། །གང་ནས་མ་འོངས་གར་མི་འགྲོ། །ཐབས་དང་ཤེས་རབ་མྱུར་གྲུབ་ཤོག །བདེར་གཤེགས་མ་ལུས་ཐམས་ཅད་ཀུན། །ཕྱོགས་དུས་ཀུན་དུ་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་དུ། །མ་ལུས་ཀུན་འདུས་རྣམ་པར་དག །ཐབས་ཆེན་དཀྱིལ་འཁོར་ཡང་དག་པས། །བདེར་གཤེགས་ཀུན་ལ་རྣམ་པར་འཕྲོ། །ཐབས་དང་ཤེས་རབ་ལྡན་པ་ཡི། །བདེ་བའི་དཀྱིལ་འཁོར་མཁས་པས་བསྡུ། །ཐམས་ཅད་མ་ལུས་རིགས་བཞི་ཡི། །ནང་དུ་མ་འདུས་གང་ཡང་མེད། །དེ་ཉིད་བདེར་གཤེགས་དཀྱིལ་འཁོར་ཉིད། །ཐབས་དང་ཤེས་རབ་བདེ་གྲུབ་ཤོག །རིགས་ལྔའི་དཀྱིལ་འཁོར་དབུར་བསྡུ་ཞིང་། །ཡེ་ཤེས་ལྔ་ཡི་འོད་ཟེར་འཕྲོ། །ཕྱོགས་བཅུ་གསལ་བར་གང་གྱུར་ནས། །ཐབས་དང་ཤེས་རབ་འོད་འབར་ཤོག །དེ་བཞིན་རིགས་མཆོག་འཛིན་པ་ཡི། །ཐམས་ཅད་མ་ལུས་དབྱིངས་བསྡུས་ཏེ། །ཐམས་ཅད་ཀུན་དུ་བཟང་པོར་སྟོན། །ཐབས་དང་ཤེས་རབ་གཙོར་གྲུབ་ཤོག །ཐུགས་རྗེ་ཆེན་པོའི་བྱིན་བརླབས་ཀྱིས། །ཕྱོགས་དུས་གནས་པ་མ་ལུས་ལ། །ཆོས་ཀྱི་འཁོར་ལོ་ཆེན་པོ་བསྐོར། །ཐབས་དང་ཤེས་རབ་མཆོག་འགྲུབ་ཤོག །འགྲོ་བ་མ་ལུས་ཐམས་ཅད་ལ། །དེ་བཞིན་ཉིད་ཀྱི་སྐུ་ཡོད་པས། །མ་མཐོང་རྨོངས་ལ་ནམ་མཁའི་མདོག །ཐབས་དང་ཤེས་རབ་དབྱིངས་གྲུབ་ཤོག །སྐུ་ནི་སྣ་ཚོགས་ཅིར་ཡང་སྣང་། །ཐབས་ཆེན་རྣམས་ལ་མཉམ་པའི་ཚུལ། །ཉན་ཐོས་རྣམས་ལ་དགྲ་བཅོམ་ཚུལ། །རང་རྒྱལ་རྣམས་ལ་བསེ་རུའི་ཚུལ། །ཕ་རོལ་ཕྱིན་རྫོགས་ཤཱཀྱའི་ཚུལ། །ལྷ་མི་རྣམས་ལ་དགེ་བཅུ་ཚུལ། །དུད་འགྲོ་རྣམས་
ལ་ཨེ་ན་ཡ། །གཞན་ཡང་འགྲོ་བ་ཐམས་ཅད་ལ། །ཇི་ལྟར་འདུལ་བ་བཞིན་དུ་སྟོན། །དེ་ལྟ་བུ་ཡི་སྐུ་སྟོན་པ། །ཐབས་དང་ཤེས་རབ་སྐུ་གྲུབ་ཤོག །ཐབས་དང་ཤེས་རབ་ལྡན་བསྒོམས་ནས། །རྒྱན་ལྔ་ཡིས་ནི་རྣམ་པར་བརྒྱན། །ཡན་ལག་ལྔ་ལ་དཀྱིལ་འཁོར་བཀོད། །ཡེ་ཤེས་རྒྱན་གྱིས་ཕོ་བྲང་བརྡུང་། །གཉིས་མེད་དཀྱིལ་འཁོར་ཟླུམ་པོའི་ཚུལ། །མཐའ་དབུས་མེད་པའི་དཀྱིལ་འཁོར་དུ། །ལྷུན་གྲུབ་ཚོགས་ཆེན་བྱང་ཆུབ་ཏུ། །ཐབས་དང་ཤེས་རབ་མྱུར་གྲུབ་ཤོག །ཆོས་དབྱིངས་དམ་པ་བདག་མེད་པ། །མི་དམིགས་དབྱིངས་སུ་མ་ལུས་འདུས། །མཉམ་དང་མི་མཉམ་དབྱེར་མེད་པས། །ཐབས་དང་ཤེས་རབ་དབྱིངས་གྲུབ་ཤོག །བདེར་གཤེགས་དཀྱིལ་འཁོར་དབུ་བསྐྱོད་ན། །སངས་རྒྱས་ཞིང་ཁམས་མ་ལུས་གཡོ། །ལག་གི་འདུ་བྱེད་བསྐུལ་བསྐྱོད་ན། །རིག་འཛིན་ཞིང་ཁམས་དག་པར་བྱེད། །རྐང་ཆེན་དག་གིས་སྟབས་མཆོངས་ན། །འགྲོ་དྲུག་གནས་རྣམས་སྟོངས་པར་བྱེད། །སྤྱན་གྱིས་ཕྱོགས་བཅུ་བལྟ་བྱས་ན། །བདུད་བཞི་དཔུང་རྣམས་ཕམ་པར་བྱེད། །ཐབས་དང་ཤེས་རབ་མ་ལུས་ཀུན། །དེ་ལྟ་བུ་ཡི་དོན་གྲུབ་ཤོག །ཐམས་ཅད་མ་ལུས་དེ་བཞིན་ཏེ། །དེ་ནི་གང་ཡང་མི་དམིགས་ལ། །སྐྱེ་དང་འགག་དང་གནས་པ་དང་། །འོང་དང་འགྲོ་བའི་དངོས་པོ་མེད། །རྣལ་འབྱོར་བྲོ་གར་རྩེ་འཇོ་ཡི། །སྣ་ཚོགས་བྱེད་ལ་བྱས་པ་མེད། །དེ་ཉིད་རྣམ་པ་སྣ་ཚོགས་པ། །རྣལ་འབྱོར་ལས་རྣམས་གྲུབ་པར་ཤོག །ཐབས་དང་ཤེས་རབ་ཐམས་ཅད་ཀྱིས། །དེ་ལྟ་བུ་ཡིས་ལོངས་སྤྱོད་ན། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་རྣམས་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །ལུས་མ་སྤངས་པར་རིག་འཛིན་ས། །ཡུན་རིངས་ཆོས་ཀྱི་བདེ་སྤྱད་ནས། །བླ་མེད་རྡོ་རྗེ་སེམས་དཔའ་ཡིས། །དཔེ་བྱད་མཚན་གྱིས་རྣམ་པར་བརྒྱན། །མངོན་ཤེས་དྲུག་ལྡན་ཐམས་ཅད་མཁྱེན། །ཚོགས་ཆེན་གཉིས་ཀྱང་རྫོགས་པར་རོལ། །སངས་རྒྱས་ཞིང་ལ་དབང་སྒྱུར་ཏེ། །སྤྱོད་ཡུལ་ཀུན་དུ་མཎྜ་ལ། །ཇི་ལྟར་དམིགས་པ་བཞིན་དུ་འགྲུབ། །རྣལ་འབྱོར་ལས་སུ་
རུང་རྣམས་ཀྱིས། །འདི་ལྟ་བུ་ཡི་ལས་རྣམས་བྱ། །འབྲས་བུ་མངོན་དུ་མ་གྱུར་ཀྱང་། །ལུས་ངག་ཡིད་ལ་དབང་ཐོབ་ནས། །སངས་རྒྱས་འབྱུང་དང་སྐར་མི་འགྱུར། །ཐེག་པ་དམན་པར་ཡོང་མི་སྐྱེ། །ངན་སོང་གསུམ་དུ་ཡོང་མི་ལྟུང་། །གནས་ངན་ལོངས་སྤྱོད་མི་བདེ་བའི། །ངན་པའི་ས་རུ་ཡོང་མི་ལྟུང་། །རྡོ་རྗེ་ཐེག་མཆོག་བརྗེད་མི་འགྱུར། །ཚེ་རིང་བདེ་བ་ཕུན་སུམ་ཚོགས། །ལུས་བྱད་བཟང་ཞིང་ཡན་ལག་རྫོགས། །དབང་པོ་ཚང་ཞིང་ལྷག་ཆད་མེད། །སྐད་གདངས་སྙན་ཅིང་འགྲོ་དོན་བྱེད། །བདག་གི་ལོངས་སྤྱོད་ཐམས་ཅད་ཀུན། །གཞན་ལ་གནོད་པ་མེད་པར་འགྲུབ། །ཚན་པོ་ཆེ་ཡི་མཐུ་སྟོབས་ལྡན། །འགྲོ་བའི་དོན་དུ་ཡང་དག་བྱེད། །གཞན་ལ་གནོད་པ་ཡོང་མི་བྱེད། །སྙིང་རྗེ་ཆེ་ཞིང་ཤེས་རབ་ལྡན། །མཐུ་སྟོབས་ཆེ་ཞིང་ཐབས་ལྡན་པ། །བདག་དང་གཞན་དོན་རྫོགས་པར་སྤྱོད། །མཐར་ནི་སྐྱེ་ཤི་མེད་པའི་ས། །སངས་རྒྱས་ཡོན་ཏན་རིན་པོ་ཆེ། །བཀོད་པའི་གཞལ་ཡས་ཐམས་ཅད་ལ། །དབང་སྒྱུར་སྤྱོད་པའི་དངོས་གྲུབ་ཐོབ། །རྣལ་འབྱོར་གང་ཞིག་འདི་འདྲའི་དོན། །ལྗགས་ཀྱི་དབང་པོ་བཀྲམ་ནས་ནི། །གསང་དོན་ངེས་པའི་དོན་སྟོན་པ། །བླ་མེད་མཆོག་ཏུ་གྲུབ་པར་ཤོག །དབྱེར་མེད་བྱང་ཆུབ་ཐོར་ཚུགས་ཅན། །ཤིན་ཏུ་བསྟན་པའི་རི་བོ་གནས། །མུ་སྟེགས་རླུང་གིས་ཚུགས་མི་འགྱུར། །ཐེག་མཆོག་རྡོ་རྗེ་དེ་ལྟ་བུ། །དཀྱིལ་འཁོར་མི་ཟད་འབྱུང་བའི་གཏེར། །ཡིད་བཞིན་ནོར་བུ་རིན་པོ་ཆེ། །བྱི་དོར་མ་བྱས་ཤིན་ཏུ་གསལ། །བསྐལ་པ་གྲངས་མེད་གནས་བཅས་ཀྱང་། །སྐུ་ནི་ཤིན་ཏུ་གཞོན་པའི་ཚུལ། །སྐྱེ་ཤི་མེད་པ་རྡོ་རྗེ་ཡི། །ཐམས་ཅད་འབྱུང་བའི་གཏེར་ཡིན་ཏེ། །ཡོན་ཏན་ཕུན་སུམ་ཚོགས་དང་ལྡན། །བླ་མེད་བྱང་ཆུབ་འགྲུབ་གྱུར་ནས། །ཡེ་ཤེས་རྡོ་རྗེ་ལྷུན་གྲུབ་ཤོག །ཚོགས་ཆེན་གཉིས་ཀྱང་རྫོགས་གྱུར་ཅིག །ཐམས་ཅད་ཀུན་གྱི་སྟོན་པ་པོ། །ཐམས་ཅད་མཁྱེན་པའི་གོ་འཕང་བརྙེས། །སངས་རྒྱས་ཞིང་ལ་དབང་བྱེད་ཤོག །དེ་རྟོགས་ཀུན་ཀྱང་རྡོ་རྗེའི་རིགས། །སྐུ་གསུང་ཐུགས་ཀྱང་གྲུབ་པར་ཤོག །རྣལ་འབྱོར་པ་
ཐབས་དང་ཤེས་རབ་དང་ལྡན་པ་རྣམས་ཀྱིས། དུས་ཐམས་ཅད་འདོད་ཡོན་ལྔ་སྤྱོད་ཅིང་བྲོ་ཐབས་བྱའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བྲོ་གར་རྩེ་འཇོའི་ལེའུ་སྟེ་བདུན་ཅུ་གཅིག་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་སྐུའི་དཀྱིལ་འཁོར་མངོན་དུ་ཕྱུང་སྟེ་འདི་སྐད་ཅེས་གསུངས་སོ། །དེ་བཞིན་ཉིད་ཀྱི་དབྱིངས་ལྡན་ལས། །སྒྱུ་དང་དྲ་བ་འབྲེལ་འགྱུར་ནས། །སྐུ་མཆོག་རྡོ་རྗེ་འོད་སྣང་བས། །མཐུན་པའི་རྡོ་རྗེ་རང་སྣང་ངོ་། །རྒྱུད་དྲུག་འཁོར་བའི་ལུས་སྣང་བ། །རྣམ་རྟོག་མཐུན་པའི་ལས་སྣང་ངོ་། །དེ་བཞིན་སྐུ་མཆོག་དྲི་བྲལ་དང་། །བདེ་གཤེགས་སྐུ་ལྔར་མདོར་བསྡུས་ཏེ། །བཅོམ་ལྡན་འདས་དང་བྱང་ཆུབ་གཟུགས། །བླ་མེད་གཟུགས་དང་རྡོ་རྗེ་སྐུ། །དེ་ལ་སོགས་ཏེ་སྐུ་བསམ་ཡས། །ཕྱོགས་བཅུ་དུས་བཞི་སྐུ་སྟོན་པ། །ཐབས་ཀྱིས་འགྲོ་འདུལ་སྐུ་སྟོན་ཏེ། །བྱང་ཆུབ་མཆོག་གི་རྡོ་རྗེ་སྐུ། །ཆགས་མེད་ཞིང་དུ་སྐུ་སྟོན་ཅིང་། །དབྱིངས་ལས་མ་གཡོས་བཞིན་དུ་སྣང་། །སྐུ་སྣང་དེ་བཞིན་ཉིད་ཀྱི་དབྱིངས། །རྣམ་དག་སྐུ་སྟོན་མ་ཡིན་ཏེ། །ལོག་འགྲོ་རྟོག་པ་ཐམས་ཅད་ལ། །སོ་སོར་འདུལ་བའི་སྐུར་ཡང་སྟོན། །དེ་ཚེ་སྐྱེ་ཤི་མེད་པའི་སྐུ། །ལས་དང་མ་ཆགས་པདྨའི་སྐུ། །ཐར་དང་མ་ཐར་སྣ་ཚོགས་ཀྱང་། །སྣ་ཚོགས་སྣང་ལ་གནས་པ་མེད། །སྣང་དང་མི་སྣང་གཉི་ག་མེད། །དེ་ལྟར་རྟོགས་པའི་རིགས་མཆོག་ནི། །བཛྲ་ཞེས་ནི་གདགས་པ་ཡིན། །ཇི་སྙེད་སྐུ་སྟོན་བསམ་ཡས་པ། །ཐམས་ཅད་མ་ལུས་རྡོ་རྗེར་བསྡུས། །འཁོར་ལོ་ཞེས་ཀྱང་བརྗོད་པ་ནི། །དེ་ལ་སོགས་ཏེ་སྐུ་བསམ་ཡས། །བྱང་ཆུབ་ཐབས་ཀྱི་དཀྱིལ་ནས་བྱུང་། །སྐུ་ནི་སྣ་ཚོགས་ཐམས་ཅད་ཀྱང་། །འཇའ་ཚོན་ཆུ་ཟླ་འདྲ་ཤེས་ན། །དབྱིངས་ཉིད་ལས་ནི་དབྱིངས་སྣང་ཟད། །ཐུགས་ཉིད་གསུང་གི་དཀྱིལ་འཁོར་སྣང་། །གསུང་ཉིད་སྐུ་ཡི་དཀྱིལ་འཁོར་ཏེ། །དབྱེར་མེད་དེ་བཞིན་ཡོང་གིས་སོ། །དཀྱིལ་འཁོར་བཟང་པོ་འགྲུབ་འདོད་པས། །རྟག་ཏུ་དུས་གསུམ་ཐམས་ཅད་དུ། །བདག་དང་བདག་གི་དབྱེར་མེད་པས། །ཡེ་ནས་དཀྱིལ་འཁོར་ཡིན་པར་བརྟག །འདི་ནི་
དངོས་གྲུབ་མཆོག་ཡིན་པར། །ཀུན་དུ་རྒྱལ་གྱིས་དེ་སྐད་བཤད། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་སྐུའི་དཀྱིལ་འཁོར་མངོན་དུ་ཕྱུང་བ་ཞེས་བྱ་བ། ལེའུ་སྐུའི་དཀྱིལ་འཁོར་ཟབ་ཏུ་ནི་རྒྱུད་ཀྱི་རྒྱལ་པོ་ཕྱི་མ་ལས་བཤད་དེ། བོད་ལ་མ་འགྱུར་ཞེས་འབྱུང་ངོ་། །རང་བཞིན་སྐུའི་དཀྱིལ་འཁོར་དུ་བསྡུ་བའི་ལེའུ་སྟེ་བདུན་ཅུ་གཉིས་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་ཏིང་ངེ་འཛིན་གྱི་རིམ་པར་སྦྱོར་ཞིང་དངོས་གྲུབ་མྱུར་དུ་ལེན་པའི་ཐབས་དྲ་བ་ལས་འདི་སྐད་ཅེས་གསུངས་སོ། །དཀྱིལ་འཁོར་བསམ་ཡས་དངོས་གྲུབ་ནི། །མི་དམིགས་དབྱིངས་ནས་དོན་འབྱིན་ཏེ། །མ་བཅོས་ཇི་བཞིན་ངང་བཞག་དང་། །ལྷུན་གྱིས་གྲུབ་པའི་དཀྱིལ་འཁོར་འབྱུང་། །མི་དམིགས་ཐུགས་ཀྱི་དཀྱིལ་འཁོར་ལས། །ཏིང་ངེ་འཛིན་གྱིས་དབང་བསྒྱུར་ན། །ཡེ་ཤེས་སྤྲུལ་པ་སྣ་ཚོགས་འགྲུབ། །སྤྱོད་ཡུལ་ཐམས་ཅད་མཎྜ་ལ། །ཡེ་ཤེས་དཀྱིལ་འཁོར་ཐར་བྱེད་སྐྱོང་། །ལོངས་སྤྱོད་སྐུ་དང་སངས་རྒྱས་ཞིང་། །ཇི་ལྟར་འདོད་པ་སྨོན་པས་འགྲུབ། །ཡངས་ཤིང་རྒྱ་ཆེ་ལྷུན་གྲུབ་ནི། །ཕྱི་ནང་སྣོད་བཅུད་ཡེ་ནས་དག །དག་རྟོགས་ཉིད་ཀྱང་དབྱིངས་ཉིད་ཡིན། །དེ་ནས་རྡོ་རྗེ་མཉམ་ཡིན་ནོ། །དངོས་གྲུབ་མྱུར་དུ་འགྲུབ་འདོད་ན། །ཤིན་ཏུ་ཕྲ་ཞིང་ཟབ་པར་བསྒོམ། །བདག་དང་བདག་གི་གཞན་རྣམས་ནི། །ཤིན་ཏུ་མི་དམིགས་དབྱིངས་སུ་བསྒོམ། །ཏིང་འཛིན་དེ་ནི་གོམས་པ་དང་། །ཐམས་ཅད་སྒྱུ་མ་མིག་ཡོར་དང་། །སྤྲུལ་པའི་ཚུལ་དེ་ཤེས་པར་བྱ། །དེ་བཞིན་ཡང་ནས་ཡང་གོམས་ནས། །དེ་ནས་ཕྲ་མོའི་ཏིང་འཛིན་བསྒོམ། །ཕྱི་ནང་སྣོད་བཅུད་ཧཱུྃ་དུ་བསྡུ། །གང་བསྒྲུབ་ཡི་གེ་སོ་སོ་སྟེ། །སྤྱིར་ནི་གང་བསྒོམ་ཀུན་དུ་འདྲ། །རྡོ་རྗེ་སེམས་དཔའ་ཉིད་དུ་འདུ། །ཡན་ལག་ལྔ་དང་རྣམ་ཤེས་ཉིད། །ཡི་གེ་ཧཱུྃ་དུ་ཤིན་ཏུ་བསྡུ། །ནྲྀ་ཡི་མིག་གིས་བལྟར་ཡོད་པར། །ཡང་ནས་ཡང་དུ་འདྲིས་པ་དང་། །འོད་ཟེར་མང་པོ་འཕྲོ་བར་བྱ། །ཕྱོགས་བཅུ་དུས་བཞི་གང་བ་དང་། །སླར་ཡང་ཧཱུྃ་ལ་བསྟིམ་པར་བྱ། །ཧཱུྃ་ཉིད་མི་
དམིགས་དབྱིངས་སུ་ཐིམ། །ཐིམ་འགྱུར་དབྱིངས་ནས་ཨ་དཀར་འབར། །ཤིན་ཏུ་འཚེར་བར་གསལ་བསྒོམས་ལ། །ཐམས་ཅད་ཨ་རུ་གྱུར་པར་བསྒོམ། །དེ་བཞིན་ཉིད་དུ་འདྲིས་འགྱུར་ནས། །ཨ་ལས་ཉི་མའི་དཀྱིལ་འཁོར་སྤྲོ། །ཨེ་མ་གསལ་བར་འབྱོར་འགྱུར་ནས། །ཉི་ཟླ་གང་བའི་ཉི་ཟླར་བསྒོམ། །ཧྲཱི་གསལ་པདྨ་ཆགས་མེད་བསྒོམ། །རིན་ཆེན་འབར་བའི་གཞལ་ཡས་བསྒོམ། །ཉི་ཟླ་གདན་དང་གཞལ་ཡས་ཁང་། །ཐམས་ཅད་བསྡུ་ཞིང་ཕྲ་བར་བསྒོམ། །དེ་བཞིན་ཡི་གེ་ཧཱུྃ་གནས་པས། །མཐིང་ག་འཚེར་ལ་གནས་པ་ཡི། །འོད་ཟེར་འཕྲོ་བ་རྣམ་པར་བསྒོམ། །འོད་འཕྲོ་དབྱིངས་སུ་སླར་བསྡུས་ནས། །ཤིན་ཏུ་རྡོ་རྗེ་འོད་ཟེར་འཕྲོ་བར་བསྒོམ། །རྡོ་རྗེ་འོད་འཕྲོ་གསལ་འབར་ནས། །དབྱིངས་སུ་ཡང་ནི་བསྟིམ་པར་བྱ། །དེ་ཉིད་སེམས་དཔའི་སྐུར་གྱུར་ནས། །ཤིན་ཏུ་ཕྲ་ཞིང་འདུས་པར་བསྒོམ། །དེ་བཞིན་གཉིས་མེད་གསལ་འགྱུར་ནས། །སྐུ་གཅིག་རྡོ་རྗེ་དྲིལ་བུར་བསྒོམ། །དེ་བཞིན་ཉིད་དུ་གྱུར་པ་དང་། །དབུ་གསུམ་ཕྱག་དྲུག་ཉིད་དུ་བསྒོམ། །གཞན་ཡང་ཁྲོ་འདུལ་སྣ་ཚོགས་བསྒོམ། །བློ་ཡི་ཤེས་རབ་ཆེ་ཆུང་ལས། །རིམ་པ་བཞིན་དུ་བསྒོམ་པར་བྱ། །ཡང་ན་ཅིག་ཅར་བསྒོམ་པར་བྱ། །ཉི་ཟླ་གཟའ་སྐར་དུས་གཅིག་ཏུ། །ཆུ་དཀྱིལ་དངས་པར་གསལ་བ་བཞིན། །དེ་ལྟར་གོམས་རྟོགས་རིགས་མཆོག་དེས། །ཇི་ལྟར་དབང་བསྒྱུར་བཞིན་དུ་འགྲུབ། །མཁའ་ལ་འཕྱོ་ངང་རིག་འཛིན་གནས། །ཆུ་རྒྱུན་བཟློག་དང་རླུང་མི་འགུལ། །རི་བྲགས་ལ་སོགས་ཐོགས་མེད་འཛུལ། །ཆུ་ལ་མི་འབྱིང་མེས་མི་འཚིག །དུག་དང་མཚོན་གྱིས་འཇིགས་མི་འགྱུར། །མི་སྣང་བ་དང་མང་པོར་སྤྲུལ། །གཞན་ཡང་ཇི་ལྟར་འདོད་པ་བཞིན། །ལྷ་སྲིན་རྣམས་ལ་དབང་སྒྱུར་ཞིང་། །ཚེ་དང་དུས་ལ་བསྲིང་བསྟུང་དང་། །སྟོང་གསུམ་ཡུངས་འབྲུར་བསྐྱེད་པ་དང་། །ཇི་ལྟར་དམིགས་པ་བཞིན་དུ་འགྲུབ། །སྦྲུལ་དང་གཅན་གཟན་གདུག་པ་རྣམས། །ཁྱི་བཞིན་ཕྱི་བཞིན་འབྲང་བར་འགྱུར། །བདུད་དང་གདུག་པ་ལ་སོགས་པས། །ཚུགས་པར་མི་འགྱུར་བྲན་བཞིན་འགྱུར། །ལུས་
མ་སྤངས་པར་རིག་འཛིན་ས། །ཡེ་ཤེས་བསོད་ནམས་ལོངས་སྤྱོད་ཀྱིས། །ཡི་གེ་འཁོར་ལོ་ཚོགས་མཆོག་བརྙེས། །ཐུགས་རྗེ་སྤྲུལ་པའི་བྱིན་བརླབས་ཀྱིས། །སོ་སོར་ཐར་པའི་ལམ་ཡང་སྟོན། །འགྲོ་བ་མ་ལུས་དོན་ཡང་བྱེད། །ལས་རྣམས་ཐམས་ཅད་ཀུན་བྱས་ནས། །སྐྱེ་འཆི་མེད་པའི་གཡུང་དྲུང་ཐོབ། །མཚན་དང་དཔེ་བྱད་ཀུན་གྱིས་བརྒྱན། །བསོད་ནམས་ཡེ་ཤེས་ཚོགས་ཆེན་ལྡན། །མཐར་ཕྱིན་བྱ་བ་མེད་པ་འགྲུབ། །བསྒྲུབ་མེད་སྤངས་མེད་ཆོས་ཀྱི་དབྱིངས། །འགྲོ་མེད་འོང་མེད་དེ་བཞིན་ཉིད། །དེ་ལྟར་བསྒྲུབས་ཏེ་བསྒོམས་བྱས་ན། །འབྲས་བུ་མངོན་དུ་མ་གྱུར་ཀྱང་། །ཚེ་རབས་སྐྱེ་བ་ཐམས་ཅད་དུ། །ལས་ངན་ཀུན་དུ་སྐྱེ་མི་འགྱུར། །ཐེག་པ་དམན་པར་ཡོང་མི་འགྱུར། །རྡོ་རྗེ་རིགས་མཆོག་འཛིན་པར་འགྱུར། །ཞེས་རྡོ་རྗེ་གསང་བའི་ཚིག་ཏུའོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་ཤིན་ཏུ་གསང་བར་བྱ་བརྒྱུད་དངོས་གྲུབ་ཐོབ་པར་བྱ་བའི་ལེའུ་སྟེ་བདུན་ཅུ་གསུམ་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ཧོམ་རྣམས་ཀྱི་ཕྲིན་ལས་འདི་གསུངས་སོ། །དང་པོར་དེ་བཞིན་ཉིད་དུ་གསལ་ཞིང་འདྲིས་པར་བསྒོམ། །དེ་ནས་བདག་གི་སྙིང་གར་ཨ་གསལ་ཞིང་འཚེར་བ་གཅིག་བསྒོམ་མོ། །ཨ་དེ་ཤིན་ཏུ་གསལ་བར་གྱུར་པ་དང་། ཕྱོགས་བཅུར་འོད་དུ་འཕྲོས་པར་བསྒོམ། འོད་དེ་སླར་ཨ་ལ་བསྡུ་ཞིང་བསྟིམ། མ་དང་ཨ་ལས་ཉི་མ་དང་ཟླ་བའི་དཀྱིལ་འཁོར་བསྟིམ་ཞིང་འཚེར་ལ་གསལ་བར་བསྒོམ། ཧྲཱི་ལས་པདྨའི་དཀྱིལ་འཁོར་གསལ་བར་བསྒོམ། ཧཱུྃ་ཤིན་ཏུ་འོད་འབར་བར་བསྒོམ། སྙིང་གི་དཀྱིལ་འཁོར་དུ་རྡོ་རྗེ་སེམས་དཔའ་མཚོན་གང་བ་གཅིག་ཕྱག་རྒྱ་དང་བཅས་པར་བསྒོམ། བཞི་བཅུ་རྩ་གཉིས་ཀྱི་སྔགས་དང་། ཡིག་འབྲུ་དང་། ཕྱག་རྒྱ་ཡང་གསལ་བར་བཟླས། འབྲུ་གསུམ་དང་འབྲུ་ལྔ་ཡང་བཟླས། འདུག་འབྲུ་བཞིས་མཚམས་གཅད། རྟག་ཏུ་ཧོམ་བྱ། ཚོགས་དང་མཆོད་པ་ཡང་བྱ། མང་པོ་མི་ནུས་པའི་དོན་དུ་ཧོམ་གང་བགྱི་ཡང་རུང་།
དཀྱིལ་འཁོར་གྱི་དབུས་ཀྱི་གཙོ་བོར་སྤྱི་ནི་རྡོ་རྗེ་སེམས་དཔའ། དྲག་པོ་ཡང་རྡོ་རྗེ། དབང་པདྨ་ཧེ་རུ་ཀ། རྒྱས་པ་རཏྣ་ཧེ་རུ་ཀ། ཞི་བ་བུདྡྷ་ཧེ་རུ་ཀ། སྤྱན་དྲང་བ་ནི་ཨེ་ཧྱེ་ཧི་མ་ཧཱ་ཀཱ་རུ་ཎཱི་ཀ་ཞེས་ཧོམ་གང་བྱེད་པའི་ལྷ་གཙོ་བོ་ནས་སྤྱན་དྲང་། མཆོད་པ་དང་ཨརྒྷ་དབུལ་བ་ནི་དྲག་པོའི་མགོར་ནི། སྔགས་རིལ་ཧཱུྃ། ཞི་བ་ལ་མགོར་རིལ་ཨྃ། བར་མ་རྣམས་ལ་ཡང་དེ་བཞིན་སྦྱར། །སྦྱན་དྲང་བ་ནི་གང་མཛད་པའི་གཙོ་བོ་ནས་ཞི་ལ་ཤཱནྟིཾ་བསྣན། སྤྱི་ནི་ལ་སོ་སོ་རང་སྔགས་རྫོགས། དྲག་པོ་ལྷོ། དབང་ནུབ། རྒྱས་པ་བྱང་། ཞི་བ་ཤར། སྤྱི་གང་ཡང་རུང་གྲུ་གསུམ་དང་ཐོད་པ་ཁ་གདངས་སོ། །ཟླ་གམ་དང་། པདྨ་དང་། ཆགས་མེད་དེ། ཕྱག་རྒྱ་རྣམ་པ་བདུན་ལ་ཕྱག་རྒྱ་ཆེན་པོ་དང་། ཆོས་ཉིད་ཀྱི་ཕྱག་རྒྱ་དང་། དམ་ཚིག་གི་ཕྱག་རྒྱ་དང་། ལས་ཀྱི་ཕྱག་རྒྱ་དང་། ཐབས་དང་། ཤེས་རབ་ཀྱི་ཕྱག་རྒྱ་དང་། ཏིང་ངེ་འཛིན་གྱི་ཕྱག་རྒྱ་དང་། ལྷག་པའི་ཏིང་ངེ་འཛིན་གྱི་ཕྱག་རྒྱའོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་ཧོམ་རྣམ་བཞིའི་ལེའུ་སྟེ་བདུན་ཅུ་བཞི་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས། རྨད་དུ་བྱུང་བའི་དམ་ཚིག་བཅོ་ལྔ་མདོ་འདི་ལྟར་ཡང་བཤད་དེ། ཐམས་ཅད་མཁྱེན་པའི་ཡེ་ཤེས་ཀྱིས། །ཐམས་ཅད་མཉམ་པའི་ངང་ཉིད་དུ། །དབྱིངས་སུ་རོ་གཅིག་དེ་བསྡུས་ཏེ། །དོན་དུ་མི་འགྱུར་ཡོང་མ་གསུངས། །ཡོན་ཏན་མཆོག་གི་འདོད་པ་ནི། །སྣང་སྲིད་མ་ལུས་ཐམས་ཅད་ཀུན། །མཉམ་པའི་ཞིང་དུ་སྦྱོར་བས་ན། །ཆགས་པ་མེད་པའི་ཚུལ་དུ་སྤྱོད། །འདི་ནི་རྣམ་དག་ལེགས་པའི་ལམ། །བྱང་ཆུབ་མཆོག་ཏུ་འགྲོ་བའི་གནས། །བདེ་ཆེན་མི་ཟད་གཏེར་དུ་འགྱུར། །ཅིས་ཀྱང་མི་ཚུགས་རྡོ་རྗེའི་སྐུ། །ཉོན་མོངས་སྡུག་བསྔལ་འདོད་ཆགས་ནི། །ལུས་དང་ཟས་ཀྱིས་བསྒྲིབས་འགྱུར་ཏེ། །ཡི་དགས་གནས་ནས་གནས་སུ་འགྲོ། །སྐོམ་དང་བཀྲེས་པས་ཉོན་མོངས་འགྱུར། །རྣག་ཁྲག་ངན་སྐྱུགས་རྟག་ཏུ་མཐོང་། །བདེ་ལ་སྤྱོད་པའི་དབང་ཡང་མེད། །རྩུབ་ཅིང་གདུག་པས་བསྲུང་བར་འགྱུར། །ཐུགས་རྗེ་ཆེན་པོའི་ཞེ་སྡང་
ནི། །འཁོར་བའི་མྱ་ངན་སྒོ་བཅད་ཅིང་། །བདེར་གཤེགས་ལམ་དུ་འཛུད་པར་བྱེད། །ཡང་དག་དོན་དང་ལྡན་པར་འགྱུར། །ཐུགས་རྗེ་ཚུལ་གྱིས་ཁྲོ་སྟོན་ཞིང་། །ཤིན་ཏུ་མཉམ་པའི་ངང་དུ་འཇོག །རྡོ་རྗེ་སེམས་དཔའི་ཞི་བ་ཡིས། །ཡང་དག་མཆོག་གི་བདེ་བ་འགྲུབ། །ཡེ་ཤེས་གསལ་བའི་བདེ་བ་ནི། །བདག་དང་བདག་གི་དབྱེར་མེད་དེ། །རང་བཞིན་མེད་པའི་དབྱིངས་སུ་རོལ། །ཐམས་ཅད་བརྗོད་དུ་མེད་པའི་ངང་། །ཀུན་དུ་ཁྱབ་པའི་སྐུ་མངའ་བ། །ཤིན་ཏུ་འོད་གསལ་རྣམ་དག་ལམ། །བྱང་ཆུབ་སེམས་དཔའི་སྒྲིབ་པ་སྦྱོང་། །སེམས་ཅན་ཉོན་མོངས་དུག་སེལ་འགྱུར། །ཐམས་ཅད་ཞིང་སྦྱོང་ང་རྒྱལ་ནི། །ཡོན་ཏན་བསྐྱེད་པའི་མཛོད་ཡིན་ཏེ། །ང་མེད་བདག་མེད་མི་དམིགས་ལ། །སུ་ཞིག་དེ་ལ་ང་རྒྱལ་སྐྱེད། །དཔུང་བཞིའི་ཚོགས་ཀྱིས་མི་ཐུབ་པའི། །ཤིན་ཏུ་རྒྱལ་བའི་ཁྱུ་མཆོག་འགྲུབ། །ལྷ་སྲིན་བདུད་སྡེ་ཚར་བཅད་པའི། །དཔའ་བར་འགྲོ་བའི་ཏིང་འཛིན་ཐོབ། །ཕྲག་དོག་ཡངས་པའི་དོན་སྦྱོར་བ། །ང་དང་བདག་མེད་དོན་རྟོགས་ན། །དོག་དང་ཡངས་པ་གཉིས་མེད་དེ། །བདེ་མཆོག་དཀྱིལ་འཁོར་ཡངས་པ་འགྲུབ། །ཕྲག་དོག་དངོས་པོ་མི་ཤེས་ཤིང་། །ང་དང་བདག་ཏུ་འཛིན་འགྱུར་ན། །ལྷ་མ་ཡིན་གྱི་གནས་སུ་སྐྱེ། །དེ་ནས་ཡི་དགས་གནས་སུ་འགྲོ། །གལ་ཏེ་ཡུལ་ས་རྙེད་གྱུར་ན། །ཤིན་ཏུ་མི་བདེ་དོག་པར་འགྱུར། །གཞན་ཡང་ལོངས་སྤྱོད་ཐམས་ཅད་ལ། །དབང་བྱར་མེད་ཅིང་གཞན་དབང་འགྱུར། །མདོར་ན་ཉོན་མོངས་སྡུག་བསྔལ་འགྲུབ། །ཕྲག་དོག་ཡང་དག་རྟོགས་པ་ནི། །ང་དང་བདག་ཏུ་འཛིན་པ་དང་། །ཕྱིན་ཅི་ལོག་ལ་ཕྲག་དོག་སྟེ། །ཐམས་ཅད་གཉིས་སུ་མེད་པར་སྦྱོར། །བདེ་བ་མཆོག་ཀྱང་འགྲུབ་པར་འགྱུར། །གཉིས་མེད་དོན་ཡང་རྟོགས་པར་འགྲུབ། །ང་མེད་བདག་མེད་དབྱིངས་སུ་ཐིམ། །ལྷུན་གྲུབ་དོན་མཆོག་འགྲུབ་པར་འགྱུར། །ཡིད་ལ་ལྷ་ནི་རྟག་བསྒོམས་ན། །རྒྱུ་འབྲས་ལྷུན་གྱིས་གྲུབ་པ་ཡི། །བདག་གིས་ཀུན་དུ་དབང་བསྒྱུར་ཏེ། །རིག་འཛིན་གནས་སུ་སྐྱེ་བར་འགྱུར། །རྡོ་རྗེའི་རིགས་ཀྱིས་
བསྒྲུབ་བྱ་བ། །སྒྲོལ་དང་སྦྱོར་བས་མཐར་ཕྱིན་འགྱུར། །སྦྱོར་བ་ཉིད་ནི་སྒྲོལ་བ་ཡིན། །རང་བཞིན་གྱིས་ནི་སྦྱོར་སྒྲོལ་དང་། །སྒྲོལ་བ་ཉིད་ན་སྦྱོར་བ་ཡིན། །ཏིང་ངེ་འཛིན་གྱིས་སྦྱོར་སྒྲོལ་དང་། །དབང་པོའི་ཡུལ་དུས་སྦྱོར་སྒྲོལ་དང་། །ཐབས་ཆེན་དག་གི་སྦྱོར་སྒྲོལ་དང་། །མངོན་དུ་ཕྱུང་བའི་སྦྱོར་སྒྲོལ་ལོ། །ཡང་ན་སྦྱོར་སྒྲོལ་བདག་ལ་སོགས། །ཤེས་རབ་དབྱིངས་དང་བདག་ཏུ་སྦྱོར། །ཐབས་ཆེན་སྤྲུལ་པ་བསམ་མི་ཁྱབ། །དབྱིངས་དང་དབྱིངས་སུ་ཐམས་ཅད་སྒྲོལ། །རོལ་པའི་ཕྲིན་ལས་བསམ་མི་ཁྱབ། །ཐུགས་རྗེ་སྤྲུལ་པ་བསམ་མི་ཁྱབ། །སྦྱོར་སྒྲོལ་ཕྲིན་ལས་བདག་ལ་རྫོགས། །བྱང་ཆུབ་སེམས་སྤྲུལ་ཕྱོགས་བཅུར་འཕྲོ། །ངན་སོང་གནས་རྣམས་སྟོངས་པར་བྱེད། །རིག་འཛིན་བདེ་ལྡན་ཐོབ་པར་བྱེད། །བླ་མེད་ཞིང་རྣམས་དག་པར་བྱེད། །སྐུ་གསུང་ལྷུན་གྲུབ་ཕྱོགས་བཅུར་འདུལ། །རྡོ་རྗེ་ཞེས་ནི་མཚན་བསྒྲགས་ཏེ། །ཐེག་དམན་རྣམས་ཀྱང་རྡོ་རྗེར་དགོད། །ཟད་མི་ཤེས་པའི་གཏེར་ཡང་འགྲུབ། །རྡོ་རྗེ་རིག་པ་འཛིན་པའི་སྐུ། །ཐམས་ཅད་དབྱེར་མེད་མཉམ་པའི་སྐུ། །ཐམས་ཅད་མཁྱེན་པའི་ཡེ་ཤེས་མཆོག །ཐུགས་རྗེ་སྤྲུལ་པ་དཔག་མེད་ཀྱིས། །འགྲོ་དྲུག་དུས་གནས་མ་ལུས་མཁྱེན། །འགྲོ་བ་ཉིད་ན་ཉིད་ཀྱི་སྐུ། །ཉོན་མོངས་བྱང་ཆུབ་ལམ་དུ་མཁྱེན། །འཁོར་བ་ཉིད་ནི་བདེ་གནས་སོ། །ཆོས་ཀྱི་དབྱིངས་དང་སེམས་ཅན་མཐའ། །དབྱེར་མེད་ཡང་དག་ཉིད་དུའོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་རྨད་དུ་བྱུང་བའི་དམ་ཚིག་བཅོ་ལྔ་འདི་ལྟར་ཡང་བཤད་པའི་ལེའུ་སྟེ་བདུན་ཅུ་ལྔ་པའོ།། །།དེ་ནས་དེ་བཞིན་གཤེགས་པ་རྒྱུད་ཀྱི་རྒྱལ་པོ། སྒྱུ་འཕྲུལ་དྲ་བ་ལས་དམ་ཚིག་རྣམ་པར་སྤྲོས་པ་འདི་ཉིད་ལ་ཉིད་ཆེད་དུ་བརྗོད་པ་འདི་བརྗོད་དོ། །སྤྲོས་པ་རྡོ་རྗེ་ཞེས་བྱ་བའི་དམ་ཚིག་ནི། ཞེ་སྡང་རྡོ་རྗེའི་ཐུགས་རྗེའི་ངང་། །དམྱལ་བའི་གནས་རྣམས་ཚར་གཅོད་པའི། །བརྒྱད་གཉིས་བཅུ་དྲུག་ཞིང་དུ་སྦྱོར། །ཚ་བ་རྣམས་ལ་བསིལ་བའི་སྨན། །གྲང་བ་རྣམས་ལ་དྲོ་བའི་སྨན། །བསིལ་དྲོ་འཇམ་རྩུབ་ཆ་སྙོམས་པ། །ཐུགས་རྗེའི་བྱིན་རླབས་དེ་ལྟར་སྟོན། །བྱིན་རླབས་ཡ་
མཚན་རྨད་པོ་ཆེ། །ཆགས་པའི་ཡེ་ཤེས་ཞེས་བྱ་བའི་དམ་ཚིག་ནི། ཆགས་པ་མེད་པའི་ཚུལ་གྱིས་ནི། །འདོད་པ་ཀུན་ལ་ལོངས་སྤྱོད་བྱ། །ཇི་ལྟར་བདེ་བའི་རོ་མྱོང་ཞིང་། །མྱོང་ཚོར་ཉིད་ན་རང་བཞིན་མེད། །ཆགས་པ་མེད་པའི་ཡེ་ཤེས་ཀྱིས། །ཡི་དགས་གནས་རྣམས་ཚར་གཅོད་ཅིང་། །ལུས་དང་ཟས་ཀྱིས་བསྒྲིབས་པ་ཡི། །ཉོན་མོངས་གཉི་ག་མེད་པར་སྟོན། །གཏི་མུག་ཅེས་བྱ་བའི་དམ་ཚིག་ནི། ང་དང་བདག་མེད་གཉིས་མེད་པའི། །ཤེས་རབ་ཆེན་པོའི་འོད་གསལ་གྱིས། །དྲན་སྨྲ་མེད་པའི་སྡུག་བསྔལ་བསལ། །རྨོངས་མེད་སྒྲིབ་པ་དག་པར་བྱས། །ཡེ་ཤེས་གསལ་བའི་ཐུགས་རྗེ་ཡིས། །བྱ་བྱེད་མེད་པར་ཉོན་མོངས་སྒྲོལ། །བྱོལ་སོང་གནས་ནི་སྟོངས་བྱེད་ཅིང་། །ཐུགས་རྗེའི་སྒྲོན་མ་དེ་ལྟར་སྒྲོན། །ཕྲག་དོག་ཅེས་བྱ་བའི་དམ་ཚིག་ནི། ཡངས་པ་ཆེན་པོའི་ཡེ་ཤེས་ཀྱིས། །ང་དང་བདག་འཛིན་རྣམས་ལ་ནི། །ཐུགས་རྗེས་གཉིས་མེད་མཉམ་སྦྱོར་ཞིང་། །དོག་དང་ཡངས་པ་གཉི་ག་མེད། །རྒྱ་ཆེན་ཡངས་པའི་བློ་ལྡན་པས། །འདི་ལ་མི་ཆུད་གང་ཡང་མེད། །ཐམས་ཅད་ཡངས་པ་ཉིད་དུ་སྦྱོར། །ལྷ་མ་ཡིན་རྣམས་སྟོངས་པར་བྱེད། །ང་རྒྱལ་བདེ་མཆོག་ཅེས་བྱ་བའི་དམ་ཚིག་ནི། ཡེ་ནས་ཆོས་ཉིད་མཉམ་པ་ལ། །ང་དང་ཁྱོད་ཅེས་བྱ་བ་མེད། །ཐམས་ཅད་དབྱིངས་སུ་རོ་གཅིག་སྟེ། །གཉིས་མེད་མཚན་ཉིད་བསྣན་དུ་མེད། །ཆེ་ཆུང་མེད་པའི་ངང་ཡིན་པས། །བྱ་བ་དག་ནི་མེད་པར་བསྟན། །ང་རྒྱལ་བདག་མེད་རྟོགས་པ་ཡིས། །དྲེགས་པའི་གནས་རྣམས་སྟོངས་པར་བྱེད། །རང་བཞིན་གྱིས་འོད་གསལ་བ་ཞེས་བྱ་བའི་དམ་ཚིག་ནི། འཇིག་རྟེན་འདི་ན་ཅི་ཡོད་པ། །མིང་དང་ཐ་སྙད་འཛིན་པ་དག །སོ་སོའི་མཚན་ཉིད་གཞིག་བྱས་ན། །རང་བཞིན་མེད་དེ་ཡང་དག་ཉིད། །རང་བྱུང་ཆེན་པོའི་ཡེ་ཤེས་ཀྱིས། །ཐམས་ཅད་སངས་རྒྱས་ཞིང་དུ་སྦྱོར། །མ་བཅོས་མ་བྱས་ངང་གིས་གསལ། །ཡེ་ནས་འོད་གསལ་སངས་རྒྱས་ཞིང་། །ཉིད་ཀྱི་དཀྱིལ་འཁོར་ཞེས་བྱ་བའི་དམ་ཚིག་ནི། རང་བཞིན་ཉིད་ལ་གནས་པ་ཡི། །སུས་ཀྱང་མ་བྱས་རང་བྱུང་སྟེ། །ཐམས་ཅད་དེ་བཞིན་ཉིད་དུ་
སྦྱོར། །གཉིས་མེད་དབྱིངས་ཀྱི་ངང་དུ་ཐིམ། །རང་བྱུང་ཡེ་ཤེས་དཀྱིལ་འཁོར་གྱིས། །མ་ལུས་དེ་བཞིན་ཉིད་དུ་སྡུད། །སྡུད་དང་མི་སྡུད་གཉི་ག་མེད། །ཡང་དག་ཁོ་ན་ཉིད་དུའོ། །བདེ་བའི་ངང་ཉིད་ཅེས་བྱ་བའི་དམ་ཚིག་ནི། ཐམས་ཅད་མ་ལུས་རྣམ་པར་དག །ཉིད་ཀྱི་དབྱིངས་ལས་མི་གཞན་ཕྱིར། །བདེ་དང་མི་བདེ་གཉིས་ཀ་མེད། །ཐམས་ཅད་དབྱིངས་སུ་རོ་གཅིག་སྟེ། །ཇི་བཞིན་ཉིད་ཀྱི་ངང་བཙན་པར། །ཡང་དག་ཉིད་ཀྱིས་དེ་སྐད་གསུངས། །བཤད་དང་ཉན་པའང་གཉི་ག་མེད། །དེ་བཞིན་ཉིད་དུ་གཉི་ག་འདུ། །དུས་བཞི་རྒྱལ་མཆོག་ཅེས་བྱ་བའི་དམ་ཚིག་ནི། གོང་ན་མེད་པའི་ཡེ་ཤེས་མཆོག །ཐམས་ཅད་ཀུན་ལ་དབང་བསྒྱུར་ཏེ། །ཐམས་ཅད་མཉམ་པ་ཉིད་དུ་སྦྱོར། །འདས་དང་མ་འདས་ཐམས་ཅད་དང་། །འབྱུང་དང་འབྱུང་བར་མ་ངེས་པའི། །ཡེ་ཤེས་རྟོགས་པའི་ཁྱད་པར་གྱིས། །དུས་བཞི་སྔ་ཕྱི་མེད་པ་ཡི། །མཉམ་པ་ཉིད་དུ་ལྷན་ནེར་སྦྱོར། །ལྷུན་གྲུབ་ཅེས་བྱ་བའི་དམ་ཚིག་ནི། འཇིག་རྟེན་འདས་དང་འཇིག་རྟེན་པའི། །ཐམས་ཅད་དབྱེར་མེད་བྱང་ཆུབ་སྟེ། །ཡེ་ནས་རྣམ་པར་དག་པའི་ཆོས། །མ་བཅོས་ལྷུན་གྱིས་གྲུབ་པ་ཡི། །བྱང་ཆུབ་ལམ་ཆེན་འདི་ཡིན་ཏེ། །ཐམས་ཅད་དབྱེར་མེད་ཉིད་དུ་འདུས། །བྱང་ཆུབ་དོན་སྒྲུབ་ཡེ་ནས་རྫོགས། །མཉམ་པའི་ཞིང་དུ་ཐམས་ཅད་ཐིམ། །རྡོ་རྗེ་སྐྱེ་གནས་ཞེས་བྱ་བའི་དམ་ཚིག་ནི། ཐེག་པ་ཆེ་མཆོག་རིགས་སུ་ངེས། །རིགས་ཏེ་བྱང་ཆུབ་བསྟན་པས་གཟུང་། །ཐམས་ཅད་མཉམ་པའི་དབྱིངས་ཤེས་ན། །རིགས་མཆོག་ཀུན་གྱི་སྐྱེ་གནས་ཡིན། །སྐྱེས་པ་ཉིད་ན་སྐྱེས་པ་མེད། །ལས་དང་ལས་ཀྱི་བག་ཆགས་མེད། །ཅིས་ཀྱང་མ་གོས་ཐམས་ཅད་འཇོམས། །སྐྱེ་ཤི་མེད་པའི་ས་ཡང་ཡིན། །བྱང་ཆུབ་ཀྱི་ཞིང་བཀོད་པའི་དམ་ཚིག་ཅེས་བྱ་བ་ནི། ཕྱོགས་བཅུ་མཐའ་ཡས་མུ་མེད་པའི། །སྣང་གྲགས་བསམ་གྱིས་མི་ཁྱབ་པའི། །ཕྱི་དང་ནང་གི་གནས་པ་དག །དེ་བཞིན་ཉིད་ཀྱི་དབྱིངས་སུ་ཐིམ། །མདོར་ན་ཞིང་ཁམས་མ་ལུས་པར། །ཡོན་ཏན་རིན་ཆེན་བཀོད་པ་ཡི། །ཡེ་ཤེས་རྒྱན་གྱིས་སྤྲོས་པ་རྣམས། །ཞིང་དེ་ཡོན་ཏན་བསམ་མི་ཁྱབ། །
ཡེ་ཤེས་བཞུགས་གནས་ཞེས་བྱ་བའི་དམ་ཚིག་ནི། གཟུང་འཛིན་བྲལ་བའི་ཡེ་ཤེས་ནི། །དེ་བཞིན་གཤེགས་པ་ཀུན་གྱི་གནས། །གསང་སྔགས་ཆེན་པོ་གྲུབ་འདོད་པས། །གཟུང་འཛིན་བྲལ་བའི་ཡེ་ཤེས་ཐོབ། །ཆོས་ཀྱི་དབྱིངས་དང་སེམས་ཅན་ནི། །གཉིས་མེད་དེ་བཞིན་ཉིད་དུ་གཅིག །དེ་ལྟར་རྟོགས་པའི་སྐྱེས་བུ་ནི། །རྡོ་རྗེ་བཞུགས་གནས་ཡིན་པར་བཤད། །མི་འཇིགས་པའི་རྒྱལ་མཆོག་ཅེས་བྱ་བའི་དམ་ཚིག་ནི། །རྣམ་པར་བྱང་དང་ཉོན་མོངས་གཉིས། །སོ་སོ་ཡོད་པ་མ་ཡིན་ཏེ། །ཉོན་མོངས་གཉེན་པོས་བཅོས་སུ་མེད། །ཐམས་ཅད་དབྱིངས་སུ་རོ་གཅིག་པས། །དེ་ལ་འཇིགས་པའི་གཉེན་པོ་མེད། །ཅིས་ཀྱང་མི་ཚུགས་གོང་ན་མེད། །མཆོག་ཏུ་བདེ་བའི་ཞིང་ཡང་ཡིན། །ང་མེད་བདག་མེད་རྒྱལ་བའི་མཆོག །གཞལ་ཡས་ཁང་བརྟན་ཞེས་བྱ་བའི་དམ་ཚིག་ནི། ཕྱོགས་བཅུ་དུས་བཞི་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བ་ནི། །དོག་ཡངས་ཚད་ཀྱང་དཔག་ཏུ་མེད། །སངས་རྒྱས་སྤྱི་གཙུག་ལྟ་བུའི་མཚན། །ཡེ་ཤེས་རྒྱུ་ལས་གྲུབ་པའོ། །ཇི་ལྟར་དམིགས་པ་བཞིན་དུ་འགྲུབ། །ཟག་པ་ཟད་ལས་གྲུབ་པ་ཡི། །ནམས་ཀྱང་འཇིགས་མེད་ཆོས་ཀྱི་དབྱིངས། །སྣ་ཚོགས་ཀུན་སྦྱོར་ཞེས་བྱ་བའི་དམ་ཚིག་ནི། གདོལ་པ་ཅན་གྱི་ཆོས་མིན་པས། །ཅི་ལྟར་བསམས་པ་བཞིན་དུ་འགྲུབ། །རིག་པ་རང་དབང་གྱུར་པས་ན། །སྟོང་པར་བྱ་འམ་མི་སྟོང་བྱ། །ཐམས་ཅད་དབྱེར་མེད་ངང་ཡིན་པས། །ཁ་དོག་དབྱིབས་དང་རིན་པོ་ཆེ། །ཐམས་ཅད་ཁྱབ་པར་ཡུངས་འབྲུའི་ཚུལ། །བསམ་ཡས་མཐའ་དབུས་མེད་པའོ། །འདྲེན་བྱེད་གནས་སྟོབས་ཞེས་བྱ་བའི་དམ་ཚིག་ནི། མ་རིག་ལོག་རྟོག་བསམ་ཡས་ཀྱིས། །འཇིག་རྟེན་ཁམས་རྣམས་བསམ་ཡས་པ། །འཁོར་བའི་རྒྱུ་དང་འབྲས་བུ་གཉིས། །གཞི་རྩ་མེད་པའི་སྐད་ཅིག་མ། །ཡང་དག་བྱང་ཆུབ་སེམས་རིག་ན། །མ་རིག་རྒྱུ་འབྲས་རྣམ་པར་དག །ཉོན་མོངས་པ་ཉིད་བྱང་ཆུབ་སྟེ། །ཐམས་ཅད་མ་ལུས་བདེ་གནས་སོ། །ལམ་ལྔ་སྟོན་བྱེད་ཅེས་བྱ་བའི་དམ་
ཚིག་ནི། ཏིང་འཛིན་རྣམ་གསུམ་བསྒོམ་བྱས་ཏེ། །ཉོན་མོངས་ལམ་ལྔའི་སྒོ་བཀག་ནས། །ལམ་ལྔར་སྣང་བ་རྣམ་རྟོག་ཡིན། །རྟོག་དང་མི་རྟོག་གཉི་ག་མེད། །གཉིས་མེད་དེ་ནི་ཡང་དག་ལམ། །ཐབས་དང་ཤེས་རབ་ངང་ཉིད་དུ། །ཤིན་ཏུ་མཉམ་བཞག་རྟོགས་བྱ་ཞིང་། །བླ་ན་མེད་པ་སྟོན་པར་བྱ། །ཡང་དག་དོན་སྟོན་ཞེས་བྱ་བའི་དམ་ཚིག་ནི། ཐེག་པ་བསམ་ཡས་སྟོན་པ་ཡང་། །དེ་བཞིན་ཉིད་ཀྱིས་མ་བརྗོད་ཀྱང་། །སེམས་ཅན་བློ་ཡི་རིམ་པ་བཞིན། །སོ་སོར་འཚམ་པར་ཀུན་ལ་གསལ། །འདི་ནི་རྡོ་རྗེ་ཐེག་མཆོག་སྟེ། །རྒྱ་མཚོ་ཀླུང་དུ་ཆུ་འབབ་བཞིན། །ཐམས་ཅད་ཆུ་ཡི་ངོ་བོ་ཉིད། །ཐེག་པ་ཐམས་ཅད་རྡོ་རྗེའི་ས། །རབ་ཏུ་རྟོགས་བྱེད་ཅེས་བྱ་བའི་དམ་ཚིག་ནི། ཤེས་རབ་བློ་ཆེན་རབ་ལྡན་པས། །དོན་དུ་མི་འགྱུར་ཡོང་མ་གསུངས། །སྲིད་གསུམ་འགྲོ་བ་བསམ་ཡས་སུ། །ཐུགས་རྗེ་སྙོམས་པ་བསམ་མི་ཁྱབ། །དོན་དང་མཐུན་པ་འབའ་ཞིག་སྟོན། །མི་མཐུན་ཞགས་པ་འཁོར་བ་གཅོད། །བདེར་གཤེགས་ཞིང་རྣམས་དག་པར་བྱེད། །ཐམས་ཅད་དབྱིངས་སུ་དག་པར་འདུས། །སྒྱུར་བྱེད་བྱང་ཆུབ་ཅེས་བྱ་བའི་དམ་ཚིག་ནི། རང་རིག་ཡེ་ཤེས་དབང་ཐོབ་ནས། །དཀར་པོ་ཚོན་གྱིས་མདོག་སྒྱུར་བཞིན། །དུག་ཀྱང་སྨན་དུ་འགྱུར་བ་དང་། །དེ་བཞིན་བྱང་ཆུབ་དུག་གསུམ་སྟེ། །འགྲོ་ལྔ་བྱང་ཆུབ་ལམ་དུ་སྦྱོར། །ཉོན་མོངས་སྡུག་བསྔལ་ཐར་བྱེད་ལམ། །ཐར་དང་མ་ཐར་གཉིས་མེད་ན། །ཐམས་ཅད་མ་ལུས་བྱང་ཆུབ་རྒྱུ། །མཉམ་རྫོགས་ལྷུན་གྲུབ་ཅེས་བྱ་བའི་དམ་ཚིག་ནི། ཡེ་ཤེས་སྒྱུ་མར་སྣང་བ་དང་། །ལོག་རྟོག་སྒྱུ་མར་སྣང་བ་གཉིས། །སྒྱུ་མ་ཡིན་པས་རང་བཞིན་མཉམ། །མཉམ་པ་ཉིད་ན་མི་གནས་པའི། །བསོད་ནམས་ཡེ་ཤེས་ཚོགས་རྫོགས་ཏེ། །ཡེ་ཤེས་གཉིས་ཀྱི་དཀྱིལ་འཁོར་ལ། །ཐེག་མཆོག་རྡོ་རྗེ་མ་ལུས་རྫོགས། །དཔེ་བྱད་བཟང་པོ་དཔག་ཏུ་མེད། །ཐམས་ཅད་དབང་སྒྱུར་ཞེས་བྱ་བའི་དམ་ཚིག་ནི། ཤིན་ཏུ་རྟོགས་པའི་ཁྱད་པར་གྱིས། །སྤྱོད་ཡུལ་ཐམས་ཅད་སྨོན་ན་མཁྱེན། །དེ་བཞིན་ཉིད་དང་ཀུན་རྟོག་ལ། །གཉིས་
སུ་མེད་པས་དབང་བསྒྱུར་ཏེ། །མ་ལུས་ཐམས་ཅད་བདེ་ལྡན་ཞིང་། །ཐམས་ཅད་བྱང་ཆུབ་མཆོག་ཏུ་འགྱུར། །ཡེ་ནས་དངོས་པོ་མེད་པ་ལ། །ཇི་ལྟར་དམིགས་པ་བཞིན་དུ་འགྲུབ། །རིག་འཛིན་གནས་སྟོབས་ཞེས་བྱ་བའི་དམ་ཚིག་ནི། ཤེས་རབ་རྣམ་གསུམ་གོམས་བྱས་ནས། །ཏིང་འཛིན་མཉམ་པའི་དོན་རྟོགས་ཏེ། །རྟག་ཏུ་ཡངས་པ་ཆེན་པོ་བསྒོམ། །རྒྱུ་འབྲས་དུས་གཅིག་རྫོགས་པ་ཡི། །རང་རིག་ཉིད་ལ་དབང་ཐོབ་སྟེ། །ཚེ་ནི་བཅུ་དང་དྲུག་པ་ཡིན། །བརྒྱ་བརྒྱ་དག་ཏུ་བསྣུར་ཞིང་གནས། །ལུས་མ་བོར་བར་སངས་རྒྱས་པའོ། །ཟད་མེད་གཏེར་ལྡན་ཞེས་བྱ་བའི་དམ་ཚིག་ནི། ཤེས་རབ་ཆེན་པོ་རྣམ་དག་པས། །སྤྱོད་ཡུལ་ཐམས་ཅད་དག་པར་འགྱུར། །ཤེས་དང་སྤྱོད་ཡུལ་གཉིས་སུ་མེད། །དེ་བཞིན་ཉིད་དུ་རོ་གཅིག་སྟེ། །ཐམས་ཅད་རྒྱལ་བའི་ཞིང་སྦྱོར་བས། །ཟད་མེད་རིན་ཆེན་གཏེར་དུ་འགྱུར། །མི་ཟད་པར་ལྡན་དམ་ཚིག་མཆོག །འོག་མིན་མཐའ་དབུས་བསམ་མི་ཁྱབ། །བསྒྲུབ་མེད་མཉམ་རྫོགས་ཞེས་བྱ་བའི་དམ་ཚིག་ནི། ཐམས་ཅད་མཉམ་པའི་དཀྱིལ་འཁོར་ལ། །རང་བྱུང་ཡེ་ཤེས་འཕྱོ་བ་ཡི། །དབྱིངས་དང་རིག་པ་གཉིས་མེད་པའི། །དེ་བཞིན་ཉིད་དེ་རྡོ་རྗེའི་རིགས། །ཐམས་ཅད་གཉིས་སུ་མེད་པ་ལ། །བསྒྲུབ་དང་སྒྲུབ་པ་ཡོད་མ་ཡིན། །ཡེ་ནས་ལྷུན་གྱིས་གྲུབ་པ་ལ། །དེ་ལ་ལམ་གྱིས་བཅོས་སུ་མེད། །ཐམས་ཅད་བྱིན་གྱིས་རློབ་པ་ཞེས་བྱ་བའི་དམ་ཚིག་ནི། ཆོས་རྣམས་ཡེ་དག་གྱུར་པ་ཡང་། །ཕྱིན་ཅི་ལོག་གི་བློ་ལོག་ནས། །ལོག་རྟོག་གནས་ན་ལོངས་སྤྱོད་པ། །མ་རིག་འཁྲུལ་འཁོར་བསམ་མི་ཁྱབ། །འཁྲུལ་རྟོག་ངན་པ་བཟློག་པའི་ཕྱིར། །ཐུགས་རྗེ་ཆེན་པོ་ཐབས་མཁས་པས། །ཉོན་མོངས་འདྲེན་ཅིང་མཐོ་རིས་གནས། །བྱང་ཆུབ་ལམ་ཆེན་རྟོགས་པར་སྟོན། །གསུང་མཆོག་མཐའ་ཡས་ཞེས་བྱ་བའི་དམ་ཚིག་ནི། ཆོས་རྣམས་མ་ལུས་ཐམས་ཅད་ཀུན། །མིང་དང་ཚིག་ཏུ་བརྟགས་ནས་སྟོན། །ཇི་སྙེད་མང་པོའི་དོན་བརྗོད་ཀྱང་། །རྡོ་རྗེ་གསུང་ལ་སྤྲོས་པ་མེད། །སྤྲོས་མེད་དེ་ནི་སྣ་ཚོགས་པའི། །ཀུན་དུ་བརྡ་འཇལ་
ཡེ་ཤེས་གསུང་། །སྒྲ་དང་མིང་ཚིག་ཀུན་ལས་འདས། །ཐམས་ཅད་པདྨ་ཆགས་མེད་པའོ། །བསྒྱུར་བ་ཟད་མེད་ཅེས་བྱ་བའི་དམ་ཚིག་ནི། ཐམས་ཅད་མཁྱེན་པའི་ཡེ་ཤེས་ཀྱིས། །སྣང་སྲིད་མ་ལུས་ཐམས་ཅད་ཀུན། །དེ་བཞིན་ཉིད་ཀྱིས་དབང་བསྒྱུར་ཏེ། །ཐམས་ཅད་ཡེ་ཤེས་དབྱིངས་སུ་བསྟིམ། །ཟད་མེད་ཡེ་ཤེས་གཏེར་ལྡན་པས། །ཐུགས་རྗེ་བྱིན་བརླབས་བསམ་མི་ཁྱབ། །འཇིག་རྟེན་འདས་དང་འཇིག་རྟེན་པའི། །སོ་སོར་དོན་རྟོགས་རྣམ་པར་དག །ཐམས་ཅད་སྐད་འཇལ་ཞེས་བྱ་བའི་དམ་ཚིག་ནི། ཐར་པའི་དཀྱིལ་འཁོར་འབུམ་ཕྲག་དང་། །འགྲོ་དྲུག་དུས་གནས་མ་ལུས་ལ། །གསུང་གཅིག་ཚིག་ཏུ་མ་བརྗོད་ཀྱང་། །སྔོན་གྱི་ཐུགས་རྗེ་བྱིན་བརླབས་ཀྱིས། །ཐར་དང་མ་ཐར་གཉི་ག་ལ། །སོ་སོ་ཇི་ལྟར་འདོད་པ་བཞིན། །ཆོས་ཀྱི་གསུང་མཆོག་དམ་པ་ཡིས། །ཐར་པ་བསྐུལ་ཞིང་ངན་སོང་སྦྱོང་། །རང་རིག་དབང་སྒྱུར་ཞེས་བྱ་བའི་དམ་ཚིག་ནི། ཕྱོགས་དུས་བསམ་གྱིས་མི་ཁྱབ་པ། །དེ་ན་ཇི་སྙེད་ཡོད་པ་ཡི། །མཚན་མ་སྣ་ཚོགས་བརྟགས་པ་ཡང་། །རང་རིག་རྣམ་པར་རྟོག་པ་ཉིད། །སངས་རྒྱས་ཞིང་ཁམས་རབ་འབྱམ་ན། །དེ་བཞིན་གཤེགས་པའི་དཀྱིལ་འཁོར་དང་། །སྤྲུལ་པ་བསམ་ཡས་འབྱུང་བ་ཡང་། །ཡེ་ཤེས་སྤྲུལ་པར་དག་པའི་ཡུལ། །ཡི་གེ་མེད་འཇལ་ཞེས་བྱ་བའི་དམ་ཚིག་ནི། ཡི་གེ་ཚིག་དང་སྒྲ་སྤངས་པའི། །བརྗོད་མེད་ངང་དུ་གནས་པ་ནི། །གསུང་ཉིད་རང་བཞིན་མེད་པ་ཡི། །ཆོས་རྣམས་ཐམས་ཅད་ཡེ་ནས་དག །ཐམས་ཅད་ཐུགས་སུ་གྱུར་པས་ན། །སྒྲ་དང་ཚིག་ལ་གནས་པ་མིན། །ཐུགས་ལ་ཐུགས་ནི་མི་གནས་པའོ། །བདུད་སྡེ་ཚར་གཅོད་ཅེས་བྱ་བའི་དམ་ཚིག་ནི། ཉོན་མོངས་པ་ཉིད་རྣམ་པར་དག །ཕུང་པོ་ལྔ་ཉིད་མངོན་སངས་རྒྱས། །བདག་ཉིད་ལྷ་ཡི་དཀྱིལ་འཁོར་ཏེ། །སྐྱེ་ཤི་མེད་པའི་གཡུང་དྲུང་གནས། །བདུད་བཞི་བཅོམ་པའི་སྐྱེས་མཆོག་གིས། །དྲེགས་པ་ཆེན་པོ་ཐམས་ཅད་བཅོམ། །མ་རིག་ལོག་འདྲེན་འདུལ་བཅད་དེ། །ཆོས་ཀྱི་དབྱིངས་སུ་ཐམས་ཅད་ཐིམ། །སྟོང་གསུམ་ཀུན་གྲགས་ཞེས་བྱ་བའི་དམ་ཚིག་ནི།
ཐུགས་རྗེ་ཆེན་པོའི་བྱིན་བརླབས་ཀྱིས། །ཕྱོགས་བཅུའི་འཇིག་རྟེན་རྡུལ་སྙེད་དུ། །འགྲོ་བའི་ཕྲིན་ལས་བསམ་མི་ཁྱབ། །སྐུ་གསུང་ཐུགས་དང་ཡོན་ཏན་དང་། །ལྷུན་གྱིས་གྲུབ་པའི་ཡེ་ཤེས་ཀྱི། །ཐམས་ཅད་གདུལ་བྱ་ཆུད་མ་ཟོས། །ངན་སོང་སྦྱོང་ཞིང་བྱང་ཆུབ་ཞིང་། །ཡེ་ཤེས་རྫོགས་ཆེན་ཀུན་ཏུ་སྟོན། །ཡེ་ཤེས་གསུང་མཆོག་ཅེས་བྱ་བའི་དམ་ཚིག་ནི། འདས་དང་མ་འདས་ཐམས་ཅད་ཀུན། །ཡང་དག་ཤེས་པས་རབ་བརྟགས་ན། །རང་བཞིན་མེད་ལ་ཅིར་ཡང་སྣང་། །སྣང་བ་ཉིད་ན་དབྱིངས་ཉིད་དེ། །དེ་ལྟར་རྟོགས་པའི་ཡེ་ཤེས་ནི། །ཀུན་ལ་དབང་སྒྱུར་རང་དབང་ཅན། །ཐམས་ཅད་ཚིག་གི་སྒྲ་ལྟར་སྣང་། །འདི་ནི་ཡེ་ཤེས་གས་གསུང་མཆོག་ཡིན། །བསམ་ཡས་ཡེ་ཤེས་རྡོ་རྗེ་གསུང་ཞེས་བྱ་བའི་དམ་ཚིག་ནི། ཆོས་རྣམས་བསམ་གྱིས་མི་ཁྱབ་སྟེ། །མཐའ་དང་དབུས་མེད་ཀུན་དུ་ཁྱབ། །ཁྱབ་དང་ཁྱབ་མེད་རྡོ་རྗེའི་གསུང་། །སྒྲ་སྐད་སྣ་ཚོགས་བསྒྲགས་པ་དང་། །དངོས་པོ་མེད་ལ་དངོས་པོའི་སྒྲ། །ཇི་ལྟར་པི་བང་ལག་ཐོགས་ན། །སྒྲ་ནི་སྣ་ཚོགས་འབྱུང་འགྱུར་ཡང་། །དངོས་པོ་མེད་པ་དེ་བཞིན་ཉིད། །ཕྱོགས་དུས་དབྱེར་མེད་ཅེས་བྱ་བའི་དམ་ཚིག་ནི། ཕྱོགས་བཅུ་མ་ལུས་ཐམས་ཅད་དང་། །དུས་བཞིར་འབྱུང་བ་མ་ལུས་ཀུན། །ཕྱོགས་དང་སྔ་ཕྱི་མེད་པ་ཡི། །ཐམས་ཅད་དེ་བཞིན་ཉིད་ཀྱི་དབྱིངས། །འཇིག་རྟེན་འདས་དང་འཇིག་རྟེན་པའི། །སོ་སོར་སྣང་བ་ཐམས་ཅད་ཀུན། །རང་རིག་རྒྱལ་པོར་ཡང་དག་འདུ། །རང་རིག་དེ་ཉིད་ཐམས་ཅད་ཡིན། །འཇིགས་མེད་རྡོ་རྗེ་ཞེས་བྱ་བའི་དམ་ཚིག་ནི། འདུས་མ་བྱས་ཉིད་འདུས་བྱས་ཡིན། །འདུས་བྱས་སྣང་དང་མི་སྣང་གཉི་ག་མིན། །ཡོད་དང་མེད་པའང་དབྱེར་མེད་དེ། །རང་བཞིན་ཡེ་ནས་དག་པ་ཡི། །མ་བཅོས་མ་བྱས་ངང་གིས་གསལ། །འཇིག་དང་གཞིག་པར་བྱ་བ་མིན། །ཅིས་ཀྱང་མི་ཚུགས་རྡོ་རྗེའི་བདག །ཅེས་གསུངས་སོ། །དེ་བཞིན་སྐུ་ཉིད་ཅེས་བྱ་བའི་དམ་ཚིག་ནི། དེ་བཞིན་ཞིང་ཁམས་བསམ་ཡས་དང་། །འགྲོ་བ་མ་ལུས་ཐམས་ཅད་ལ། །
ཐར་པ་རྣམས་ལ་དག་པའི་སྐུ། །རྟོག་པ་ཅན་ལ་འཁོར་བའི་ལུས། །སོ་སོར་འཚམ་པར་དོན་སྟོན་ཅིང་། །སྟོན་པ་ཉིད་ལ་དངོས་པོ་མེད། །ཆུ་ཟླའི་ཚུལ་དུ་ཀུན་ལ་སྣང་། །ཀུན་ལ་དེ་ལྟར་རྟོགས་པར་བྱོས། །ལྷུན་གྲུབ་བདེ་གནས་ཞེས་བྱ་བའི་དམ་ཚིག་ནི། ཆོས་རྣམས་མ་ལུས་ཐམས་ཅད་ལ། །བྱང་ཆུབ་སྙིང་པོ་ཡོད་པ་ལྟར། །རང་བཞིན་ཡེ་ནས་འོད་གསལ་བའི། །བྱང་ཆུབ་སྙིང་པོར་ཐམས་ཅད་འདུས། །ཕྱི་ནང་མ་ལུས་ཐམས་ཅད་ཀུན། །བདག་གི་ངང་དུ་གནས་པས་ན། །བདག་ལ་བདག་གིས་དབང་བསྒྱུར་ནས། །སྤྱོད་ཡུལ་ཐམས་ཅད་སྨོན་མི་དགོས། །ཆེ་མཆོག་རྣམ་དག་ཅེས་བྱ་བའི་དམ་ཚིག་ནི། རིག་པའི་རྒྱལ་པོ་རང་གྱུར་པས། །ཐམས་ཅད་ཀུན་ལ་དབང་བསྒྱུར་ཏེ། །གོང་ན་མེད་པའི་ས་མནན་པས། །ཐམས་ཅད་ཀུན་གྱི་གཙོ་བོ་ཡིན། །ཐམས་ཅད་མ་ལུས་གཉིས་མེད་པས། །བསྒོ་དང་བསྒོ་བར་བྱ་བ་མིན། །དེ་བཞིན་ཉིད་ལ་དབང་བསྐུར་བས། །ཐམས་ཅད་དབྱིངས་སུ་རོ་གཅིག་གོ། །ཆོས་ཐམས་ཅད་ཀྱི་དཀྱིལ་འཁོར་ཞེས་བྱ་བའི་དམ་ཚིག་ནི། ཕྱི་ནང་སྣོད་བཅུད་བདག་རྣམས་ལ། །རང་བཞིན་དཀྱིལ་འཁོར་ཡེ་ནས་གནས། །ཆེན་པོའི་གཟུགས་སྣང་ཐམས་ཅད་ནི། །དེ་བཞིན་གཤེགས་པའི་དཀྱིལ་འཁོར་ཉིད། །སྒྱུ་མའི་རྩལ་རྣམས་འཛིན་འགྱུར་བའི། །དེ་བཞིན་ཡུམ་གྱི་དཀྱིལ་འཁོར་རོ། །རང་རིག་བྱང་ཆུབ་དཀྱིལ་འཁོར་ཏེ། །ཐམས་ཅད་ཀུན་ནས་འཁྱིལ་བར་གནས། །ཟད་མེད་གཏེར་ཆེན་ཞེས་བྱ་བའི་དམ་ཚིག་ནི། ཟག་བཅས་གནོད་སྦྱིན་ནོར་དང་འདྲ། །སེམས་ཅན་འཕེལ་འགྲིབ་ཟད་འགྱུར་གྱི། །དེ་བཞིན་གཤེགས་པའི་ཡོན་ཏན་ནི། །ཟད་མེད་འཕེལ་འགྲིབ་མེད་པ་ཡི། །མང་པོ་སྤྲོས་པས་འཕྲོ་མི་འགྱུར། །ཉུང་ངུ་བསྡུས་པས་སྦོམ་པོ་མིན། །ཟད་མེད་རིན་ཆེན་གཏེར་ཡིན་པས། །ཐམས་ཅད་ཀུན་ལ་ཁྱབ་པའོ། །རྣམ་དག་བྱང་ཆུབ་ཅེས་བྱ་བའི་དམ་ཚིག་ནི། ཆོས་རྣམས་མ་ལུས་ཐམས་ཅད་ཀུན། །ཡེ་ནས་རྣམ་པར་དག་པ་ལ། །རྣམ་རྟོག་རྐྱེན་གྱིས་གློ་བུར་དུ། །ཁམས་གསུམ་འཁོར་བའི་བཙོན་རར་གནས། །རང་རིག་སྒྲིབ་མེད་དག་པ་ཡིས། །མྱ་ངན་
འདས་དང་འཁོར་བ་གཉིས། །རང་བཞིན་མེད་པར་དོན་རྟོགས་ན། །སངས་རྒྱས་ཞིང་དུ་རྣམ་པར་དག །གཟུང་འཛིན་དྲིལ་བྱེད་ཅེས་བྱ་བའི་དམ་ཚིག་ནི། ཕྱིན་ཅི་ལོག་ཏུ་རྣམ་བརྟགས་ན། །བདག་དང་བདག་གིར་སོ་སོར་སྣང་། །དེ་ལ་འཛིན་པ་གཉིས་ཞུགས་ནས། །རང་བཞིན་མེད་བཞིན་སོ་སོར་སྣང་། །ཡང་དག་རྟོགས་པས་རབ་བརྟགས་ན། །དངོས་པོ་ཐམས་ཅད་སྟོང་པ་ཡིན། །དངོས་དང་དངོས་ཉིད་མི་གནས་པ། །དེ་རྟོགས་སྡུག་བསྔལ་བྲལ་བྱེད་ཡིན། །ཡུམ་འགྱུར་དབྱིངས་ཕྱུག་མའི་དམ་ཚིག་ནི། འབྱུང་བ་ལྔ་ལ་བརྟེན་འགྱུར་ན། །ཐམས་ཅད་འབྱུང་ཞིང་མ་ལུས་གནས། །སྐྱེ་འཁྲུངས་མ་ལུས་གཞི་ཡང་ཡིན། །ཐམས་ཅད་ཀུན་གྱི་རྒྱུ་ཡང་ཡིན། །དེ་བཞིན་ཤེས་རབ་རྣམ་གསུམ་གྱིས། །ལེ་ལོ་མེད་པའི་བརྩོན་པ་འབོད། །དེ་བཞིན་དབྱིངས་ཉིད་རྟོགས་གྱུར་ན། །བླ་མེད་བྱང་ཆུབ་འབྱུང་བའི་གནས། །ཆོས་ལ་སྐྱོན་མེད་ཅེས་བྱ་བའི་དམ་ཚིག་ནི། བླ་ན་མེད་པའི་དཀྱིལ་འཁོར་དང་། །ངན་སོང་གནས་རྣམས་མ་ལུས་ཀུན། །རྒྱུ་ཉིད་རང་བཞིན་གཉི་ག་དག །རང་བཞིན་ཡེ་ཤེས་དེ་བཞིན་ནོ། །འབྲས་བུ་རྣམ་པར་དག་པ་ཡི། །འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོ་ཡིན། །སེམས་ཅན་དོན་བྱེད་ཅེས་བྱ་བའི་དམ་ཚིག་ནི། བྱང་ཆུབ་སེམས་སུ་དོན་གཅིག་པས། །རྩ་བ་སྙིང་རྗེ་ཆེན་པོ་འབྱུང་། །ཐབས་ཀྱིས་ཕ་རོལ་ཕྱིན་པ་སྤྱོད། །ཉོན་མོངས་ལམ་ནས་འགྲོ་བར་བྱེད། །ཉོན་མོངས་ཁམས་གསུམ་གནས་པ་ཡང་། །ཕྱིན་ཅི་ལོག་ཉིད་སྣང་བ་ཡིན། །དེར་རྟོགས་མཐོ་རིས་ཐར་པའོ། །རྟོགས་ནས་དོན་འཛིན་ཅེས་བྱ་བའི་དམ་ཚིག་ནི། ཐམས་ཅད་ལྷུན་གྱིས་གྲུབ་པ་དང་། །སྒྱུ་མ་མིག་ཡོར་ཚུལ་ཤེས་པ། །གཉིས་ཀ་རང་རིག་ཉིད་དུ་འདུས། །དེ་ཉིད་ཡང་དག་ཡིན་པར་བཤད། །སྒྲ་དང་ཚིག་ཏུ་བརྗོད་པ་ནི། །ཡང་དག་དོན་གྱི་སྙིང་པོ་འབྱིན། །མིང་ཚིག་སྒྲ་ལ་མི་རྟེན་པར། །བློ་ཡི་གཏིང་དུ་གོ་བར་བྱ། །སེམས་ལ་གནས་བཅས་ཞེས་བྱ་བའི་དམ་ཚིག་ནི།
ཐམས་ཅད་མ་ལུས་ཆོས་སོ་ཅོག །སེམས་ཉིད་ལས་ནི་གཞན་ན་མེད། །སེམས་དང་ཆོས་སུ་དབྱེར་མེད་པས། །བྱང་ཆུབ་ལམ་དེ་རིང་བ་མིན། །གང་ནས་མ་འོངས་གར་མི་འགྲོ། །རྟོག་མེད་རང་རིག་ཁོ་ན་ཙམ། །སངས་རྒྱས་སེམས་ཅན་སེམས་ལ་གནས། །བརྗོད་མེད་སྤྲོས་མེད་ཅེས་བྱ་བའི་དམ་ཚིག་ནི། འཇིག་རྟེན་འདས་དང་འཇིག་རྟེན་པའི། །སྣ་ཚོགས་ཇི་སྙེད་བརྗོད་པ་ཡང་། །སོ་སོའི་མཚན་ཉིད་མ་གཏོགས་པ། །བ་སྤུ་ཙམ་ཡང་བརྗོད་པ་མེད། །བསོད་ནམས་ཆེན་པོས་བསྟངས་པ་ཡི། །སངས་རྒྱས་ཞིང་ཉིད་དག་པའོ། །ལས་ངན་དག་གིས་ཁམས་གསུམ་གནས། །དེ་ཉིད་དབྱིངས་ལས་སྤྲོས་པ་མེད། །མི་འགྱུར་རྡོ་རྗེ་གསུང་ཞེས་བྱ་བའི་དམ་ཚིག་ནི། རྣམ་དག་སྐུ་གསུང་སྤྲུལ་བ་དང་། །ཆེ་མཆོག་སྣ་ཚོགས་བསྟན་པ་ཡང་། །བྱང་ཆུབ་སེམས་ལ་སྣང་འགྱུར་ཏེ། །སྣང་བ་ཉིད་ན་དབྱིངས་སུ་འུབ། །ཕྱིན་ཅི་ལོག་གཡོ་བསམ་ཡས་ཀྱིས། །ཁམས་གསུམ་གནས་དང་ལམ་ལྔར་འཁོར། །དེ་ཉིད་ལོག་རྟོགས་སྣ་ཚོགས་སྣང་། །དེ་ལས་མ་གཏོགས་གང་ཡང་མེད། །ཡེ་ནས་མ་བཅོས་ཞེས་བྱ་བའི་དམ་ཚིག་ནི། བློ་མེད་བྱང་ཆུབ་སྨོན་མི་དགོས། །འགྲོ་ལྔ་མ་ལུས་ཐམས་ཅད་ཀུན། །ཡེ་ནས་བྱང་ཆུབ་སྙིང་པོར་གནས། །དེ་བཞིན་དབྱིངས་ཀྱིས་ཀུན་དུ་ཁྱབ། །ཇི་ལྟ་བ་ཡི་ངང་གནས་ལ། །དེ་ལྟར་རྟོགས་པའི་བློ་འཇུག་པས། །གཉིས་སུ་མེད་པར་རྟོགས་འགྱུར་ན། །སུ་ཞིག་བཅོས་ཤིང་སུ་ཡིས་རྟོགས། །རང་བཞིན་འོད་གསལ་ཞེས་བྱ་བའི་དམ་ཚིག་ནི། ཆོས་རྣམས་མ་ལུས་ཐམས་ཅད་ཀུན། །རང་རིག་ཡེ་ནས་དག་པ་ཡི། །སུས་ཀྱང་མ་བཅོས་ངང་གིས་གསལ། །མ་ཆགས་པདྨ་འདྲ་བ་ཡི། །ཡེ་ཤེས་ཅན་གྱི་སྤྱོད་ཡུལ་དེ། །ཀུན་དང་ཐུན་མོང་དེ་མ་ཡིན། །དེ་བཞིན་གཤེགས་པའི་སྤྱོད་ཡུལ་དེ། །སྐྱེས་བུ་བློ་རྩལ་རབ་ཀྱིས་རྟོགས། །ཐམས་ཅད་དབྱིངས་ཕྱུག་མ་ཞེས་བྱ་བའི་དམ་ཚིག་ནི། མི་ཟད་ཡོན་ཏན་གཏེར་གྱུར་པ། །ཟད་པའི་དུས་མེད་ཡིད་བཞིན་མཛོད། །བདག་དང་བདག་གི་མེད་པ་
ཡི། །ཤིན་ཏུ་ཟབ་པའི་བློ་ལས་བྱུང་། །ཆོས་དབྱིངས་ཟབ་མོའི་དོན་རྟོགས་ན། །སྐུ་དང་ཡེ་ཤེས་བསམ་མི་ཁྱབ། །རང་རིག་ཡེ་ཤེས་དོན་རྟོགས་ན། །སྐྱེ་ཤི་མེད་པའི་གཡུང་དྲུང་ཐོབ། །བྱང་ཆུབ་སྡོམ་བྱེད་ཅེས་བྱ་བའི་དམ་ཚིག་ནི། གཟུང་འཛིན་བྲལ་བའི་ཡེ་ཤེས་ཀྱིས། །ཆགས་མེད་དབྱིངས་ལ་མཉམ་བཞག་ན། །ཐམས་ཅད་དེ་བཞིན་ཉིད་ཀྱི་ཞིང་། །ཉོན་མོངས་སྡུག་བསྔལ་འབྱུང་མི་འགྱུར། །ཆོས་ཀྱི་རང་བཞིན་ཇི་ལྟ་བུར། །བདག་གིས་ཡང་དག་རྫོགས་བྱས་ཏེ། །ཐེག་པ་དམན་དང་ཕྱིན་ཅི་ལོག །ཐམས་ཅད་མཉམ་པའི་དབྱིངས་སུ་དགོད། །ཕྱོགས་དུས་གཉིས་མེད་ཅེས་བྱ་བའི་དམ་ཚིག་ནི། ཕྱོགས་བཅུ་དུས་བཞི་ཐམས་ཅད་ཀྱང་། །རྟོགས་པའི་མཚན་མ་སོ་སོར་སྣང་། །སྣང་བ་ཉིད་ན་དབྱེར་མེད་དེ། །མཐའ་དང་དབུས་མེད་ཟླུམ་པོ་ཡི། །དེ་བཞིན་རང་གིས་རིག་པ་ཡང་། །མཐའ་དང་དབུས་མེད་དུ་མ་མིན། །གང་དུ་མི་འགྲོ་ཀུན་དུ་ཁྱབ། །ཀུན་ལ་བདེ་སྦྱིན་མི་གནས་པའོ། །ཐམས་ཅད་འབྱོར་ལྡན་ཞེས་བྱ་བའི་དམ་ཚིག་ནི། ཆོས་རྣམས་སོ་སོར་རྟོགས་བྱས་ཤིང་། །ཐམས་ཅད་གཉིས་མེད་དབྱིངས་ཤེས་ན། །མི་ཟད་པར་ལྡན་རྒྱན་ཐོབ་སྟེ། །ཀུན་དུ་ཟད་མེད་རིན་ཆེན་གཏེར། །དེ་བཞིན་ཉིད་ལ་གནས་བཅས་ན། །ཉོན་མོངས་སྡུག་བསྔལ་མི་འབྱུང་སྟེ། །རྟག་ཏུ་བདེ་གནས་བྱང་ཆུབ་ཉིད། །མཚན་དང་དཔེ་བྱད་ཀུན་དང་ལྡན། །ཐབས་གཉིས་ཤེས་རབ་ཅེས་བྱ་བའི་དམ་ཚིག་ནི། ཇི་ལྟར་སྣང་བ་ཐམས་ཅད་ཀུན། །ཐམས་ཅད་ཐབས་ཀྱི་རང་བཞིན་ཏེ། །ཐབས་ལ་ཐབས་ནི་རྣམ་པར་སྦྱོར། །སྦྱོར་དང་སྦྱོར་བ་གཉིས་ཀ་མེད། །སྣ་ཚོགས་སྣང་བ་ཐམས་ཅད་ཀྱང་། །སྣང་བ་ཉིད་ན་རང་བཞིན་མེད། །དེ་ཉིད་ཤེས་རབ་ཡིན་པར་བཤད། །རྟག་ཏུ་ཐབས་ཉིད་མི་དམིགས་པའོ། །ཤེས་རབ་ཉིད་ལ་ཐབས་སུ་སྦྱོར་བ་ཞེས་བྱ་བའི་དམ་ཚིག་ནི། དེ་བཞིན་ཉིད་ཀྱི་དབྱིངས་ཉིད་ལས། །རོལ་བ་སྣ་ཚོགས་ཅིར་ཡང་འབྱུང་། །འབྱུང་བ་ཉིད་ན་རང་བཞིན་མེད། །མེད་པ་ཉིད་ན་སྣ་ཚོགས་སྣང་། །ཐབས་དང་ཤེས་རབ་དབྱིངས་ལས་བྱུང་། །མཉན་བསམས་བསྒོམས་པའི་
ཤེས་རབ་ཀྱིས། །ཤེས་རབ་ཐབས་སུ་དོན་རྟོགས་བྱོས། །ཀུན་ལ་དེ་ལྟར་འབྱོར་པར་གྱིས། །གཉིས་མེད་བྱང་ཆུབ་སེམས་ཞེས་བྱ་བའི་དམ་ཚིག་ནི། ཐབས་དང་ཤེས་རབ་ལྡན་འགྱུར་ན། །གཉིས་མེད་བྱང་ཆུབ་སེམས་འཕྲོས་ན། །ཀུན་གྱི་འབྱུང་གནས་བྱེད་པ་པོ། །དེ་ཡིས་མ་བྱས་གང་ཡང་མིན། །ཁ་དོག་དབྱིབས་རིགས་གང་ཡང་མིན། །ཤིན་ཏུ་བརྟག་དཀའ་སུས་མི་རིག །བདག་གིས་བདག་ཀྱང་མི་མཐོང་ན། །གཞན་གྱིས་རྟོགས་པར་ག་ལ་འགྱུར། །ཐམས་ཅད་སྦྱོར་བྱེད་ཅེས་བྱ་བའི་དམ་ཚིག་ནི། ཡེ་ནས་ལྷ་དང་ལྷ་མོ་ཡིན། །དཀྱིལ་འཁོར་ཡང་དག་སྦྱོར་བ་དང་། །དབང་པོ་ཡུལ་དུ་སྦྱོར་བའོ། །ཕུང་པོ་ལྔ་ཉིད་དེ་བཞིན་གཤེགས། །འབྱུང་བ་ལྔ་ཉིད་ཡུམ་དུ་སྦྱོར། །དུས་བཞིའི་ལྷ་མོ་ཉིད་དུ་སྦྱོར། །རྟག་ཆད་མུ་བཞི་ཁྲོ་མོའོ། །ཐམས་ཅད་མ་ལུས་འབྱུང་བ་ཀུན། །མཉམ་པའི་དབྱིངས་དང་རིག་པར་སྦྱོར། །ཡང་ན་ཤེས་རབ་དབྱིངས་མ་ལ། །བདེར་གཤེགས་དཀྱིལ་འཁོར་ཀུན་བཀོད་ལ། །བདག་ཉིད་རིག་པའི་ལྷར་བསྒོམས་ཏེ། །གཉིས་སུ་མེད་པར་ལྡན་པར་བྱ། །རྡོ་རྗེ་དྲིལ་བུ་ལྡན་གྱུར་ནས། །བྱང་ཆུབ་པདྨ་ཤིན་ཏུ་སྤྲོ། །ཕྱོགས་དུས་དཀྱིལ་འཁོར་མཉེས་པ་དང་། །འགྲོ་བ་མང་པོ་བདེ་ཐོབ་ནས། །སླར་ཡང་གཉིས་མེད་དབྱིངས་སུ་བསྟིམ། །ཐིམ་འགྱུར་དབྱིངས་ནས་ཕྱག་རྒྱར་འབར། །བདེར་གཤེགས་ཐབས་དང་ཤེས་རབ་རྫོགས། །ཕྱག་རྒྱ་དྲུག་ཀྱང་ཡང་དག་རྫོགས། །བསོད་ནམས་ཚོགས་ཆེན་གཉིས་ཀྱང་རྫོགས། །ཐམས་ཅད་དབྱིངས་སུ་འབྱོར་པས་ན། །ངན་འགྲོ་མི་ལྟུང་ཡང་དག་འགྲུབ། །འདི་ནི་བསྒྲལ་བ་ཆེན་པོ་ཡིན། །སྒྲོལ་བ་ཉིད་ནི་སྦྱོར་བ་ཡིན། །སྦྱོར་བ་ཉིད་ནི་མ་ལུས་བསྒྲལ། །ཐམས་ཅད་མ་ལུས་པར་སྒྲོལ་བྱེད་ཅེས་བྱ་བའི་དམ་ཚིག་ནི། ཕྱི་ནང་སྣོད་བཅུད་ཇི་སྙེད་པ། །གནས་པའི་སེམས་ཅན་མ་ལུས་ཀུན། །བདག་ཉིད་ཆེན་པོར་རྟོགས་པ་ཡིས། །དབྱིངས་སུ་ཡང་ནི་བསྒྲལ་བར་བྱ། །ཤིན་ཏུ་ཁྲོ་བོ་ཆེན་པོ་ཡིས། །ཐབས་ཀྱིས་ལྷ་ཆེན་བསྒྲལ་བ་ལྟར། །ཆོས་ཉིད་རྟོགས་པའི་ཏིང་འཛིན་གྱིས། །གཉིས་སུ་མེད་པར་ཐབས་ཀྱིས་བསྒྲལ། །
ཐུགས་རྗེ་ཆེན་པོའི་བྱིན་བརླབས་ཀྱིས། །ལམ་ལྔའི་སེམས་ཅན་ཀུན་བཀུག་ནས། །ཐམས་ཅད་མ་ལུས་བསྒྲལ་བར་བྱ། །རི་རབ་ཆེན་པོའི་གླིང་བཞི་ལ། །གནས་པའི་སེམས་ཅན་མ་ལུས་ཀུན། །ཐུགས་རྗེ་ཆེན་པོས་བྱིན་བརླབས་ཏེ། །ཡེ་ཤེས་མེ་ཆེན་བསྒོམ་བྱས་ན། །ཐམས་ཅད་མ་ལུས་བསྲེག་པར་བྱ། །དབྱིངས་སུ་ཡང་ནི་བསྟིམ་བྱས་ཏེ། །དེ་བཞིན་གཤེགས་པར་བྱིན་གྱིས་བརླབས། །རྒྱལ་བའི་སྲས་སུ་དབང་ཡང་བསྐུར། །དེ་ལྟར་བསྒྲལ་བ་ཀུན་བྱས་ཀྱང་། །བསྒྲལ་བའི་དངོས་པོ་གང་ཡང་མེད། །ཕུང་པོ་ལྔ་པོ་བཤིག་པ་ལ། །བཤིག་ནས་འབྱུང་བ་བག་ལ་ཞ། །མ་བཤིག་ན་ཡང་འབྱུང་བ་ཡིན། །རྣམ་ཤེས་མེད་པས་བསད་བྱས་ན། །གནས་པ་ཉིད་ན་དངོས་པོ་མེད། །སེམས་ཀྱི་རང་བཞིན་དེ་ལ་ནི། །དུས་གསུམ་སངས་རྒྱས་དགྲར་ལངས་ཀྱང་། །སུས་ཀྱང་མི་ཟིན་སོད་པ་མེད། །འོ་ན་ཐུགས་རྗེས་གང་བསྒྲལ་ན། །རྣམ་རྟོག་མཚན་མ་ཐམས་ཅད་ཀུན། །ཕྱིན་ཅི་ལོག་ལས་བཟློག་བྱས་ཏེ། །ཏིང་འཛིན་སྔགས་དང་ཕྱག་རྒྱ་དང་། །ཤིན་ཏུ་གོམས་པས་དབང་བསྐུར་ཏེ། །བྱང་ཆུབ་ཞིང་ལ་དགོད་པར་བྱ། །དེ་ཙམ་ལ་ནི་བསྒྲལ་ཞེས་གདགས། །བསྒྲལ་བ་ཉིད་ན་སྦྱོར་བ་ཡིན། །ཉོན་མོངས་སྡུག་བསྔལ་རྩད་བཅད་ནས། །བྱང་ཆུབ་གནས་སུ་བསྒྲལ་བས་ན། །གཉིས་མེད་དབྱིངས་སུ་སྦྱོར་བ་ཡིན། །ཐབས་ཉིད་ཤེས་རབ་ཤེས་རབ་ཉིད་ཐབས་ཏེ། །གཉིས་སུ་མེད་པ་ཉིད་བྱང་ཆུབ་ཀྱི་སེམས་སོ། །སྦྱོར་བ་ནི་ལྷ་དང་ལྷ་མོར་སྦྱོར་བའི་དཀྱིལ་འཁོར་དང་། དབང་པོ་ཡུལ་དུས་སྦྱོར་བ་དང་། ཆེན་པོ་ལྔ་དེ་བཞིན་གཤེགས་པ་ལྔར་སྦྱོར་བ་དང་། སོ་སོ་རྩལ་སྒྱུ་མ་ཙམ་དུ་ཡོད་པ་ཡུམ་དུ་སྦྱོར་བ་དང་། དབང་པོ་ཡུལ་དུས་ལྷ་དང་ལྷ་མོར་སྦྱོར་བ་དང་། རྟག་ཆད་མུ་བཞི་ཁྲོ་བོ་ཁྲོ་མོར་སྦྱོར་བ་དང་། མངོན་སུམ་དུ་སྦྱོར་བའོ། །སྒྲོལ་བ་ནི་ཐབས་ཀྱིས་སྒྲོལ་བ་དང་། འཕོ་བས་བསྒྲལ་བ་དང་། དུས་བཞི་མཉམ་པ་ཉིད་དུ་བསྒྲལ་བ་དང་། ཐམས་ཅད་མ་ལུས་པར་དབྱིངས་སུ་དུས་གཅིག་བསྒྲལ་བ་དང་། ཐམས་ཅད་ཐུགས་རྗེ་ཆེན་པོས་གཉིས་སུ་
མེད་པར་སྒྲོལ་བའོ། །འདི་གཉིས་དུས་གཅིག་ཏུ་མཛད་དེ། ཡ་ཆར་མ་གྱུར་པར་བྱའོ། །དངོས་གྲུབ་མཆོག་ཀྱང་དེར་ཐོབ་ཅེས། དེ་བཞིན་གཤེགས་པ་ཉིད་ལ་དེ་བཞིན་གཤེགས་པ་ཉིད་ཀྱིས་བཤད་དོ། །མ་བྱིན་པར་ལེན་པ་ཞེས་བྱ་བའི་དམ་ཚིག་ནི། འཇིག་རྟེན་འདས་དང་འཇིག་རྟེན་པའི། །ཆོས་རྣམས་མ་ལུས་ཐམས་ཅད་ཀུན། །བདག་དང་བདག་གི་གཞན་ན་མེད། །རང་བཞིན་རང་གིས་བདག་མེད་པ། །ཀུན་ལ་ཐོགས་མེད་སྤྱད་འགྱུར་ཡང་། །སྤྱད་དང་སྤྱོད་པ་གཉི་ག་མེད། །ཐམས་ཅད་ཡེ་ནས་སྟོང་པ་ལ། །གང་གིས་ལེན་ཅིང་གང་ལ་སྤྱོད། །སྣང་སྲིད་མ་ལུས་ཐམས་ཅད་ལ། །ཐོགས་པ་མེད་པའི་སྤྱོད་འགྱུར་ཡང་། །བཅིང་པར་མི་འགྱུར་བསོད་ནམས་ཚོགས། །ཆགས་མེད་ཡེ་ཤེས་ཆེན་པོ་ཡིན། །མ་ལུས་ཐམས་ཅད་ཆོས་ཀྱི་དབྱིངས། །དེ་ལྟར་རང་རིག་ཡིན་པར་བཤད། །གཉིས་སུ་མེད་པར་རྟོགས་གྱུར་ན། །བླངས་པ་ཉིད་ན་ཀུན་དུ་བཟང་། །བརྫུན་དུ་སྨྲ་བ་ཞེས་བྱ་བའི་དམ་ཚིག་ནི། ཆོས་རྣམས་མ་ལུས་ཐམས་ཅད་ཀུན། །ཡེ་ནས་དངོས་པོ་ཡོད་མ་ཡིན། །རང་བཞིན་ངང་གིས་འོད་གསལ་ལ། །མིང་ཙམ་ཚིག་གིས་མཚོན་མོད་ཀྱིས། །མིང་དང་ཚིག་ལ་དངོས་པོ་མེད། །མ་རིག་པ་ཡི་འཁྲུལ་རྟོག་གིས། །ང་དང་བདག་ཏུ་མེད་པ་ལ། །སོ་སོ་མཚན་མ་དངོས་པོར་བཟུང་། །འཛིན་པའི་དངོས་པོ་ཡོང་མེད་དེ། །ཆོས་རྣམས་ཐམས་ཅད་མིང་ཚིག་ཙམ། །ཇི་སྙེད་མང་པོ་བརྗོད་པ་ཡང་། །རྗོད་པར་བྱེད་དང་བརྗོད་པ་མེད། །ཆོས་རྣམས་ཐམས་ཅད་བརྫུན་དུ་སྣང་། །བརྫུན་ཉིད་ལ་ནི་བརྫུན་སྤྱོད་དེ། །བརྫུན་ཞེས་བྱ་བ་བཏགས་པ་ཙམ། །ཐམས་ཅད་བརྫུན་གྱི་ཚིག་ཡིན་ནོ། །རྡོ་རྗེ་འཇོམས་བྱེད་ཅེས་བྱ་བའི་དམ་ཚིག་ནི། ཐོག་མ་མེད་ནས་ཕྱིན་ཅི་ལོག །བདག་དང་བདག་གི་མེད་པ་ལ། །རྣམ་རྟོག་མཚན་མ་སོ་སོར་འཛིན། །འཛིན་པའི་དངོས་པོ་ཡོད་མ་ཡིན། །མི་མཐུན་མཚན་མ་གཞོམ་པའི་ཕྱིར། །རྡོ་རྗེ་ལྟ་བུའི་ཏིང་འཛིན་གྱིས། །བདག་རྟོག་བག་ཆགས་ཀུན་བཅོམ་ནས། །རྡོ་རྗེ་དབྱིངས་སུ་ཐིམ་པར་བྱ། །ཆོས་ཀྱི་འཁོར་ལོ་ཞེས་བྱ་བའི་དམ་ཚིག་ནི། ཐུགས་རྗེ་
ཆེན་པོའི་བྱིན་བརླབས་ཀྱིས། །ཁམས་གསུམ་ཉོན་མོངས་འཁོར་བ་རྣམས། །གཞན་གྱིས་བཅིངས་ཏེ་འཁོར་བ་མིན། །འཛིན་རྟོག་ཆགས་པ་ཉིད་ཀྱིས་འཁོར། །བློ་ཆེན་རབ་ཏུ་ལྡན་པ་ཡིས། །ཆོས་ཀྱི་དོན་པོ་མཆོག་ཉོན་ལ། །འཁོར་བ་སྤང་མེད་སངས་རྒྱས་ཞིང་། །ཐམས་ཅད་མ་ལུས་ཆོས་ཉིད་རྟོགས། །རིན་ཆེན་འབྱུང་བ་ཞེས་བྱ་བའི་དམ་ཚིག་ནི། ནོར་གྱི་མཆོག་ནི་དཀོར་བདུན་ཡིན། །འདོད་པས་བཙལ་བར་མི་རྙེད་དེ། །སྐུ་གསུང་ཐུགས་འདས་མི་དམིགས་པའི། །ཆགས་པ་མེད་པའི་ཚུལ་གྱིས་ནི། །གཉིས་སུ་མེད་པར་འབྱོར་བྱས་ན། །ནོར་བདུན་ཆེན་པོ་འབྱུང་བར་འགྱུར། །མཚན་དང་དཔེ་བྱད་སྣ་ཚོགས་ལྡན། །པདྨ་ཆགས་མེད་ཅེས་བྱ་བའི་དམ་ཚིག་ནི། འཇིག་རྟེན་འདས་དང་འཇིག་རྟེན་པའི། །ཆོས་རྣམས་མ་ལུས་ཐམས་ཅད་ལ། །བསྒོ་དང་བསྒོ་བར་བྱ་བ་མེད། །པདྨ་འདམ་ནས་སྐྱེས་པ་འདྲ། །ཇི་ལྟར་སྣང་བ་མཐའ་ཡས་ཀུན། །བདག་ལས་གུད་ན་གཅིག་ཀྱང་མེད། །བདག་ཉིད་ཤིན་ཏུ་མི་དམིགས་པས། །ཉོན་མོངས་ཉིད་ཀྱང་བྱང་ཆུབ་ཞིང་། །དོན་རྣམས་བསྒྲུབ་པ་ཞེས་བྱ་བའི་དམ་ཚིག་ནི། རྡོ་རྗེ་རིགས་ཀྱིས་ཐམས་ཅད་བཅོམ། །རིན་ཆེན་རིགས་ཀྱིས་ཡོན་ཏན་འབྱིན། །པདྨ་རིགས་ཀྱིས་ཆགས་མེད་འགྱུར། །སྐུ་གསུང་ཐུགས་དང་ཡེ་ཤེས་ལྔ། །ཐམས་ཅད་དོན་རྣམས་རྫོགས་པར་བྱས། །གཟུང་དང་འཛིན་པ་རྣམ་སྤངས་ཏེ། །མཉམ་པའི་དབྱིངས་ལ་སེམས་ཀྱིས་ལྟ། །སྐྱེ་འཆི་མེད་པ་ལྷུན་གྱིས་གྲུབ། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་རྨད་འབྱུང་ཀུན་གྲགས་པ། །གཞན་ན་ཡོད་འོང་མ་ཡིན་ཏེ། །རང་བྱུང་ཡེ་ཤེས་གནས་མེད་ཡིན། །མཐོང་བའི་ཚུལ་གྱིས་གཟུགས་སྣང་དང་། །བླ་མེད་བྱང་ཆུབ་སྐུར་སྣང་བ། །མེ་ལོང་ལྟ་བུའི་ཚུལ་བཞིན་དུ། །སྣ་ཚོགས་ཁ་དོག་དབྱིབས་སུ་སྣང་། །དེ་བཞིན་གཤེགས་པའི་གསུང་རྣམས་ནི། །སྒྲ་དང་མིང་ཚིག་ཀུན་ལས་འདས། །བརྗོད་མེད་རང་བཞིན་ཀུན་དུ་གོ། །ཉོན་མོངས་མེད་ཅིང་བླ་མེད་སྒྲ། །མ་བརྗོད་སྟོང་གསུམ་གྲགས་པ་ཡི། །གསུང་བརྗོད་བསམ་
གྱིས་མི་ཁྱབ་པ། །བརྗོད་པ་ཉིད་ན་སྟོང་གསུམ་མེད། །དེ་ཉིད་སྣ་ཚོགས་བརྗོད་པའོ། །ཐམས་ཅད་མཁྱེན་པའི་ཐུགས་ལྡན་པ། །ཡང་དག་རྟོགས་པས་རབ་བརྟགས་པ། །གཞི་རྩ་མེད་དབྱིངས་སྐད་ཅིག་མ། །མཐའ་དང་དབུས་ཀྱང་བརྟག་ཏུ་མེད། །དེ་ཉིད་སྣ་ཚོགས་འབྱུང་བའི་རྒྱུ། །སུས་ཀྱང་མ་བཅོས་མ་བྱས་པ། །བདག་གིས་བདག་ཀྱང་དམིགས་མི་འགྱུར། །དངོས་མེད་ཀུན་ལ་དབང་སྒྱུར་བ། །སྐུ་གསུང་ཡང་དག་ལྡན་འགྱུར་ན། །ཡོན་ཏན་ནམ་མཁའི་མཐའ་དང་མཉམ། །མི་འགྱུར་སངས་རྒྱས་ཞིང་དུ་འུབ། །སྤྱོད་ཡུལ་མ་ལུས་ཐམས་ཅད་ལ། །ཇི་ལྟར་དམིགས་པ་བཞིན་དུ་འབྱུང་། །མི་ཟད་པ་ཡི་གཏེར་ཆེན་འགྲུབ། །གཞན་གྱིས་དབྲོག་ཏུ་མེད་པ་ཡི། །པོ་དེའི་དཀོར་ནི་རིན་པོ་ཆེ། །ཐུགས་རྗེ་ཆེན་པོའི་བྱིན་བརླབས་ཀྱིས། །བྱ་བྱེད་མེད་པར་རྣམ་བཞི་མཛད། །མཛད་དང་མཛད་པར་བྱ་བ་མེད། །ཡེ་ནས་ལྷུན་གྲུབ་སངས་རྒྱས་ཆོས། །སྒྱུ་མའི་ཚུལ་དུ་ཀུན་ལ་སྤྱོད། །སྤྱོད་མེད་ངང་གི་དཀྱིལ་འཁོར་ལ། །ཆགས་མེད་ཚུལ་དུ་རྣམ་པར་རོལ། །བྱ་བྱེད་རྣམ་པ་སྣ་ཚོགས་ཀྱང་། །བྱེད་པ་ཉིད་ན་ཆུ་ཟླའི་ཚུལ། །གཟུང་འཛིན་བྲལ་བའི་ཡེ་ཤེས་ནི། །རྩ་བ་ལྔ་ཞེས་བརྗོད་མོད་ཀྱི། །བརྗོད་པ་ཉིད་ན་ཡོང་མེད་དེ། །མཚན་ཉིད་མེད་པ་སྣ་ཚོགས་སྣང་། །དེ་ཉིད་ཐམས་ཅད་མཁྱེན་ཉིད་ཡིན། །ཀུན་ལ་ཁྱབ་ཅིང་མི་གནས་པ། །དེ་ནི་རིག་པ་རང་དབང་འགྱུར། །བསམ་གྱིས་མི་ཁྱབ་ཀུན་དུ་ཁྱབ། །ནམ་མཁའ་སྣང་བྱེད་ཅེས་བྱ་བའི་དམ་ཚིག་ནི། ཆོས་རྣམས་མ་ལུས་ཐམས་ཅད་ལ། །དེ་བཞིན་ཉིད་ཀྱིས་ཀུན་དུ་ཁྱབ། །སྣོད་བཅུད་མ་ལུས་ཐམས་ཅད་ལ། །སྣང་བ་ཆེན་པོས་ཁྱབ་པར་འགྱུར། །ནམ་མཁའ་གཟུང་དུ་མེད་པ་ལྟར། །སྣང་སྲིད་ཐམས་ཅད་དེ་དང་འདྲ། །ཆོས་རྣམས་ཐམས་ཅད་སེམས་ཡིན་ཏེ། །སེམས་ནི་ནམ་མཁའི་རང་བཞིན་ནོ། །རྟེན་བྱེད་ས་ཆེན་ཞེས་བྱ་བའི་དམ་ཚིག་ནི། ཇི་ལྟར་ས་གཞི་ཆེན་པོ་ལ། །སེམས་ཀྱིས་ཟིན་དང་མ་ཟིན་པའི། །སྐྱེ་འཁྲུངས་མ་ལུས་ཐམས་ཅད་འབྱུང་། །ཐམས་ཅད་ཀུན་གྱི་གནས་བརྟེན་ཏེ། །དེ་བཞིན་ཐེག་ཆེན་བླ་
མེད་ལ། །བྱང་ཆུབ་སངས་རྒྱས་ཀུན་ཀྱང་གནས། །ཐེག་པ་མཐོ་དམན་ཐམས་ཅད་འབྱུང་། །ཐམས་ཅད་ཐེག་ཆེན་དབྱིངས་སུ་འདུས། །སྲེག་བྱེད་ཡེ་ཤེས་མེ་ཞེས་བྱ་བའི་དམ་ཚིག་ནི། བདག་མེད་ཡེ་ཤེས་རང་རིག་གིས། །དངོས་དང་དངོས་མེད་བག་ཆགས་བསྲེགས། །རང་དང་སྤྱི་ཡི་ཆོས་རྣམས་དང་། །སེམས་ཀྱི་ཕྲག་དོག་ཐམས་ཅད་ཀུན། །དངོས་པོ་མེད་པར་རྟོགས་བྱས་ན། །འཁོར་བ་མ་སྤངས་རྣམ་པར་དག །མྱ་ངན་མི་འདའ་ཡེ་ནས་གནས། །འགྲོ་དང་གནས་པར་བྱ་བ་མིན། །རྟོག་པ་ཐམས་ཅད་ཡེ་ནས་ཚོགས། །ཐམས་ཅད་འཁྲུ་བྱེད་ཅེས་བྱ་བའི་དམ་ཚིག་ནི། སེམས་ཅན་མ་ལུས་ཐམས་ཅད་ནི། །སྒྲིབ་གཉིས་དག་གིས་འཁོར་བར་འགྱུར། །མཉན་བསམས་བསྒོམས་པའི་ཤེས་རབ་ཀྱིས། །བདག་མེད་གཉིས་ནི་རྟོགས་བྱས་ན། །ཕ་རོལ་ཕྱིན་རྫོགས་ས་བཅུ་བསྒྲུབས། །ས་གསུམ་ཡང་དག་རྫོགས་བྱས་ཏེ། །མཉམ་པའི་ཞིང་ལ་ཐམས་ཅད་འགོད། །ཁྲུས་ཀྱི་མཆོག་ནི་འདི་ཡིན་ནོ། །གཡེང་བྱེད་ཆེན་པོ་ཞེས་བྱ་བའི་དམ་ཚིག་ནི། སེམས་ཅན་ཡེ་ནས་དག་པ་ལ། །བདག་འཛིན་རྡུལ་སྙེད་གཡོགས་པར་འགྱུར། །སེམས་དང་རྡུལ་རྣམས་མེད་རྟོགས་པས། །ཡེ་ཤེས་རླུང་གིས་བག་ཆགས་གཏོར། །ཆོས་རྣམས་ཡེ་ནས་རླུང་དང་འདྲ། །དེ་ལ་གཟུང་དུ་མེད་པ་ལྟར། །ཀུན་ལ་དེ་ལྟར་འབྱོར་པར་གྱིས། །མ་བཅོས་ཡེ་ནས་དེ་ལྟར་གནས། །ཐམས་ཅད་ཀུན་ལ་དབང་སྒྱུར་ཞེས་བྱ་བའི་དམ་ཚིག་ནི། རང་རིག་ཕྱིན་ཅི་མ་ལོག་པའི། །གཟུང་འཛིན་གཉིས་མེད་རྟོགས་པ་ཡིས། །ཐམས་ཅད་མཉམ་པའི་ངང་འགྱུར་ན། །ཐམས་ཅད་མ་ལུས་བདག་ཡིན་པས། །ཐམས་ཅད་ཀུན་ལ་དབང་སྒྱུར་ཏེ། །ཇི་ལྟར་དམིགས་པ་བཞིན་དུ་འགྲུབ། །ཇི་ལྟར་སྤྱད་ཀྱང་བསོད་ནམས་ཚོགས། །མཉམ་རིག་ཡེ་ཤེས་ཆེན་པོ་ཡིན། །ཆོས་ཐམས་ཅད་གཟུགས་བརྙན་ལྟར་ཤེས་པར་བྱ་བའི་དམ་ཚིག་ནི། །ཐམས་ཅད་འབྱུང་བའི་གནས་ཡིན་ཏེ། །སྣང་བ་ཉིད་ན་འཇའ་ཚོན་བཞིན། །རང་བཞིན་མེད་པར་ཀུན་དུ་སྣང་། །དེ་
ཉིད་ཆོས་སྐུ་ཡིན་པར་བཤད། །ཅིས་ཀྱང་མ་གོས་མ་སྤངས་པའོ། །སོ་སོར་སྣང་ཞིང་མཐུན་པའི་གཟུགས། །བདག་དང་བདག་ཏུ་མ་བརྟགས་པ། །དེ་ལྟ་བུ་ཡི་ངང་དུ་སྣང་། །ཆོས་རྣམས་སྒྲ་ལྟར་ཤེས་པར་བྱ་བའི་དམ་ཚིག་ནི། སྒྲ་རྣམས་ཇི་སྙེད་བརྗོད་པ་ཡང་། །དངོས་པོ་མེད་ལས་དངོས་པོ་སྒྲ། །བརྗོད་དང་སྒྲ་ཡི་དངོས་པོ་མིན། །ཆོས་རྣམས་སྒྲ་ལྟར་ཤེས་པར་བྱོས། །ཐམས་ཅད་མ་ལུས་དོན་འབྱུང་བ། །ཚིག་གིས་མཚོན་པས་གུད་ན་མེད། །སྒྲ་ཉིད་དོན་གྱི་དངོས་པོ་མིན། །དོན་ཉིད་སྒྲ་ལས་གུད་ན་མེད། །ཆོས་རྣམས་དྲིའི་མཚན་ཉིད་དུ་ཤེས་པར་བྱ་བའི་དམ་ཚིག་ནི། ཆོས་རྣམས་ཐམས་ཅད་དངོས་མེད་པར། །སྣ་ཚོགས་འབྱུང་ཞིང་རྣམ་པར་འཕྲོ། །དེ་བཞིན་དྲི་ཡི་དངོས་པོ་ཡང་། །ཡོད་པ་མ་ཡིན་ཀུན་དུ་མནམ། །ཐེ་ཚོམ་མེད་པའི་ཤེས་རབ་ཀྱིས། །ཆོས་ཀུན་དེ་ལྟར་ཤེས་པར་གྱིས། །དྲི་ཡིས་རབ་ཏུ་ཚིམ་འགྱུར་ཡང་། །དྲི་དང་དངོས་པོ་གཉིས་སུ་མེད། །དངོས་གྲུབ་ཐམས་ཅད་དེ་ལྟར་རོ། །ཆོས་ཐམས་ཅད་རོ་ལྟར་ཤེས་པར་བྱ་བའི་དམ་ཚིག་ནི། ཆོས་རྣམས་མ་ལུས་ཐམས་ཅད་ཀུན། །གཞི་རྩ་མེད་ལས་ཐམས་ཅད་བྱུང་། །དེ་བཞིན་དབང་པོ་དངོས་མེད་དང་། །རྫས་ཀྱི་དངོས་པོ་མེད་པ་ཡི། །རྣམ་ཤེས་དབང་པོ་ཡུལ་ཚོགས་ན། །རོ་ཡི་དབང་པོ་ཐམས་ཅད་འགྲུབ། །རོ་དང་རོ་རུ་རྟོགས་པ་ཡང་། །རང་བཞིན་མེད་པ་སྐད་ཅིག་མ། །ཆོས་ཐམས་ཅད་རེག་བྱ་ལྟར་ཤེས་པར་བྱ་བའི་དམ་ཚིག་ནི། གཟུགས་རྣམས་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །མཚན་འཛིན་སྨིག་རྒྱུ་བཞིན་དུ་གནས། །རྣམ་ཤེས་སྒྱུ་མས་དབང་སྒྱུར་ན། །མཚན་མ་སྣ་ཚོགས་འབྱུང་བར་ངེས། །བདེ་བའི་རོ་མཆོག་ཀུན་ཀྱང་མྱོང་། །དེ་ཉིད་བསོད་ནམས་ཚོགས་ཆེན་ཏེ། །བདེ་བ་ཆགས་མེད་ཡེ་ཤེས་ཡིན། །རེག་གི་དངོས་གྲུབ་དེ་ལྟར་རོ། །འདུས་བྱས་རྣམ་པར་དག་པ་ཞེས་བྱ་བའི་དམ་ཚིག་ནི། ཡང་དག་ཉིད་ལ་གནས་བཅས་ན། །ཕྱི་ནང་སྣོད་བཅུད་རྣམ་པར་དག །རགས་པར་སྣང་བ་དེ་བཞིན་གཤེགས། །སྒྱུ་མར་
འཛིན་པ་ཡུམ་གྱི་དབྱིངས། །གཟུགས་ནི་མཚན་མ་དངོས་པོ་མེད། །གཅིག་ལ་ལྔ་ལྔར་བཤིག་པ་དང་། །ཐམས་ཅད་ནམ་མཁའི་ངང་དུ་གནས། །ནམ་མཁའ་དེ་བཞིན་ཆོས་ཀྱི་དབྱིངས། །འདུས་བྱས་ཉིད་ཀྱི་དངོས་གྲུབ་བོ། །འདུས་བྱས་ཀུན་དུ་འབྱུང་བ་ཞེས་བྱ་བའི་དམ་ཚིག་ནི། གཤེགས་སྐུ་སྒྱུ་མར་སྣང་བ་དང་། །ལོག་རྟོགས་སྒྱུ་མར་སྣང་བ་གཉིས། །གཞི་རྩ་མེད་དེ་རང་བཞིན་སྟོང་། །རིགས་དང་རྒྱུད་དུ་བརྟག་ཏུ་མེད། །རིགས་དང་ཁ་དོག་དབྱིབས་མེད་པས། །ཕྱི་ནང་སྣོད་བཅུད་རྣམ་པར་སྣང་། །སྣང་བ་ཉིད་ན་ཆོས་ཀྱི་སྐུ། །ཅིར་ཡང་འགྱུར་ཞིང་ཐམས་ཅད་འགྲུབ། །ཀུན་འབྱུང་དངོས་གྲུབ་དེ་ལྟར་རོ། །གླང་པོ་བརྗིད་གནོན་ཞེས་བྱ་བའི་དམ་ཚིག་ནི། སེམས་ཅན་མ་ལུས་ཐམས་ཅད་ཀུན། །རྣམ་རྟོག་འདུ་བྱེད་མང་པོས་གཡེངས། །ཇི་ལྟར་བུས་པ་ཤེད་མ་བྱེ། །བྱ་བྱེད་མང་པོས་གཡེངས་པར་གནས། །བྱ་བྱེད་མང་པོ་བདག་མེད་པས། །ཏིང་ངེ་འཛིན་གྱིས་དབང་སྒྱུར་ན། །མཚན་མ་མཉམ་པའི་དབྱིངས་སུ་གནས། །འདུ་བྱེད་སྣ་ཚོགས་མི་གཡོ་བརྟན། །དབང་ལྔ་རྫོགས་པ་ཞེས་བྱ་བའི་དམ་ཚིག་ནི། ཆོས་རྣམས་ཐམས་ཅད་སྐྱེ་མེད་པས། །ཤིན་ཏུ་བརྟན་པའི་དབང་ཐོབ་འགྱུར། །རང་རིག་ཡེ་ཤེས་འོད་གསལ་བས། །ཐམས་ཅད་མཁྱེན་པའི་དབང་ཡང་ཐོབ། །ཆོས་རྣམས་ཐམས་ཅད་དབྱེར་མེད་པས། །ཀུན་ལ་སྤྱོད་པའི་དབང་ཐོབ་སྟེ། །སྤྱོད་ཅིང་ཆགས་པ་མེད་པའི་ཚུལ། །ཀུན་ཀྱང་རང་བཞིན་ཡེ་ནས་ཟླུམ། །ཐམས་ཅད་རྒྱས་འདེབས་ཞེས་བྱ་བའི་དམ་ཚིག་ནི། ཕྱོགས་བཞི་མཚམས་བཞི་སྟེང་འོག་བཅུ། །རང་བཞིན་ཆེན་པོས་ཀུན་དུ་ཁྱབ། །རང་བྱུང་དེ་ཉིད་དངོས་མེད་པར། །ཀུན་གྱི་ཕྱག་རྒྱ་སྒྱུ་ཡིན་ནོ། །ཆོས་དབྱིངས་དེ་ཉིད་ཟབ་པ་ཡི། །བདག་ལ་གནས་ཤིང་བརྟག་དཀའ་བའོ། །མཉམ་པའི་དབྱིངས་སུ་ཐམས་ཅད་འདུས། །ཡེ་ནས་བདེ་གནས་ཞིང་དུའོ། །ཆོས་རྣམས་དབྱེར་མེད་པ་ཞེས་བྱ་བའི་དམ་ཚིག་ནི། ཡེ་ནས་དབྱིངས་སུ་རོ་གཅིག་པས། །དེ་ལ་ང་དང་བདག་མ་རྟོགས། །རང་བཞིན་རྣམ་པར་
དག་པ་ལ། །གཙང་དང་སྨེ་བའི་བློ་ཙམ་མེད། །ཐམས་ཅད་བདེར་གཤེགས་སྙིང་པོ་བས། །རྐྱེན་གྱི་རྡུལ་གྱིས་ག་ལ་འགོ། །ཤེས་རབ་མཆོག་གིས་དེ་ལྟར་རྟོགས། །མ་ལུས་ཀུན་འདུས་དབྱིངས་ཤེས་བྱོས། །ཐམས་ཅད་འཇིགས་བྱེད་ཅེས་བྱ་བའི་དམ་ཚིག་ནི། ཤེས་རབ་བློ་རྩལ་ལྡན་པ་ཡིས། །བརྟག་རྟོག་མཚན་མ་ཀུན་བཤིག་ནས། །མཚན་མ་མེད་པའི་ཕྱག་རྒྱ་རུ། །ཐམས་ཅད་འདུས་པར་ཡང་དག་རྟོགས། །རྟོག་པ་ཉིད་ཀྱང་དངོས་མེད་ལ། །དེ་ཉིད་སྣ་ཚོགས་བར་སྣང་བའི། །སྣང་བ་ཉིད་ན་བྱང་བ་མེད། །དེ་ཉིད་འཇིག་པའི་ཕྱག་རྒྱ་ཡིན། །གཡུང་དྲུང་ཚེ་འཕེལ་ཞེས་བྱ་བའི་དམ་ཚིག་ནི། ཆོས་རྣམས་ཐམས་ཅད་བདག་ཡིན་པས། །གང་དུ་འགྲོ་ཞིང་གང་དུ་སྐྱེ། །འཇིག་དང་སྐྱེ་བའི་དངོས་པོ་མེད། །དངོས་མེད་དེ་ལ་སུ་ཞིག་གསོད། །གང་ཞིག་གཉིས་སུ་འཛིན་པ་ལ། །སྐྱེ་དང་འཆི་བ་དེ་ལ་ཡོད། །ཡེ་ཤེས་ཅན་གྱིས་བརྟགས་པས་ན། །སྐྱེ་འཇིག་ཉིད་ན་དངོས་པོ་མེད། །ཐམས་ཅད་མི་འགོག་པ་ཞེས་བྱ་བའི་དམ་ཚིག་ནི། མཆོག་གསུམ་རྫོགས་པ་མན་ཆད་ནས། །ངན་སོང་གནས་རྣམས་ཡན་ཆད་དུ། །ཡང་དག་པར་ནི་དབྱེར་མེད་དེ། །གང་ཡང་སྤང་བར་བྱ་བ་མིན། །ཐེག་པ་མཐོ་དམན་བསམ་ཡས་པ། །དོན་དུ་མི་འགྱུར་ཡོང་མ་གསུངས། །ངན་སོང་གནས་རྣམས་ཐམས་ཅད་ཀུན། །བླ་མེད་བྱང་ཆུབ་རྒྱུ་ཡོད་པའོ། །ཐམས་ཅད་སྤྱོད་པ་ཞེས་བྱ་བའི་དམ་ཚིག་ནི། ཐམས་ཅད་ཀུན་དུ་བཟང་པོ་ཡི། །འདོད་པའི་ཡོན་ཏན་ལྔ་རྣམས་ལ། །ཐོགས་པ་མེད་པར་སྤྱད་བྱས་ཏེ། །བསོད་ནམས་ཚོགས་ཆེན་ཡིན་པར་བརྟག །དེ་བཞིན་གཤེགས་པ་ལྔར་ཡང་བརྟག །གཞན་ཡང་སྟོང་ཁམས་ཐམས་ཅད་ནི། །ཤེས་རབ་དབྱིངས་དང་འདོད་ཡོན་རྣམས། །རབ་འབྲིང་ཐ་མ་ཐམས་ཅད་སྤྱོད། །ཐམས་ཅད་མི་ཆུད་པ་ཞེས་བྱ་བའི་དམ་ཚིག་ནི། ཕྱོགས་དུས་མཉམ་པའི་དཀྱིལ་འཁོར་དུ། །རྡོ་རྗེ་རིགས་མཆོག་མ་རྟོགས་པར། །ཐེག་པ་དམན་དང་ལྟ་བ་དམན། །དེས་ནི་ཐེག་མཆོག་རྟོགས་མི་འགྱུར། །མི་མཉམ་པ་ཡི་དོན་ཉིད་ཀུན་ཁྱབ་ཀྱང་། །ཉོན་མོངས་སྡུག་
བསྔལ་ཉིད་ཀྱིས་བསྒྲིབས། །དེ་ཡིས་ཡང་དག་ཉིད་མི་མཐོང་། །མ་མཐོང་བ་ལ་མི་ཆུད་བྱ། །ཐམས་ཅད་བསྲུང་དུ་མེད་ཅེས་བྱ་བའི་དམ་ཚིག་ནི། ཐམས་ཅད་མ་ལུས་སངས་རྒྱས་ལ། །བསྒྲུབ་ཅིང་བསྲུང་བར་བྱ་བ་མེད། །དགེ་དང་མི་དགེ་གཉི་ག་མེད། །ཉོན་མོངས་སྤང་ཞིང་བྱང་བསྒྲུབ་མེད། །དེ་བཞིན་ཉིད་ཀྱི་ཀློང་གྱུར་ན། །བདེ་དང་མི་བདེ་དབྱེར་མེད་དེ། །ཡེ་ནས་དག་མཉམ་ཉིད་དུ་གནས། །དེ་ལ་བསྲུང་བྱ་རྡུལ་ཙམ་མེད། །ཐམས་ཅད་བསྲུང་བ་མེད་པ་ཞེས་བྱ་བའི་དམ་ཚིག་ནི། སེམས་ཅན་ཁམས་གསུམ་འཁོར་བ་ཡི། །ཐོག་མ་མེད་ནས་འཁོར་བ་ཡི། །ཕྱིན་ཅི་ལོག་ལ་འཇོལ་ཉོག་སྤྱོད། །གཟུང་འཛིན་དོན་ལ་ཤིན་ཏུ་ཆགས། །དེས་ན་འཁོར་བར་རྟག་ཏུ་འཕྱན། །དེ་བས་རང་སེམས་རྟོགས་བྱས་ཏེ། །ལེ་ལོ་མེད་པར་ཡོངས་སྤངས་ཏེ། །ང་མེད་བདག་མེད་མཉམ་པར་བསྲུང་། །ཐམས་ཅད་འཇིགས་པར་བྱེད་པ་ཞེས་བྱ་བའི་དམ་ཚིག་ནི། རྡོ་རྗེ་སེམས་དཔས་བཀས་བཅད་པ། །སྡོམ་པའི་རྩ་བ་ཐམས་ཅད་ཀུན། །དོན་བཞིན་དུ་ནི་མ་བསྲུངས་ན། །ཡཀྵ་ཁྲོ་བོ་མེད་དབལ་གྱིས། །སྙིང་ནས་དྲངས་ཏེ་ཁྲག་འཐུངས་ནས། །ངན་སོང་གསུམ་དུ་སྐྱེ་བར་འགྱུར། །དེ་ཡི་སྡུག་བསྔལ་བཟོད་[བླད,གླག]་ཆད། །དམ་ཚིག་འདི་ནི་རྡོ་རྗེ་ཆེ། །དམ་རྫས་སོ་སོར་སྤྱོད་པ་ཞེས་བྱ་བའི་དམ་ཚིག་ནི། །རིགས་ལྔ་སོ་སོར་དབྱེ་བ་ཡི། །རྡོ་རྗེ་སེམས་དཔའ་གླང་པོའི་ཤ། །རིན་པོ་ཆེ་ནི་རྟ་ཡི་ཤ། །པདྨ་རིགས་ནི་ཨ་རི་ཀ་ཡི་ཤ། །དོན་ཡོད་ནམ་མཁའ་ལྡིང་གི་ཤ། །བདེར་གཤེགས་རིགས་ནི་ཤ་ཆེན་ནོ། །དབྱེ་བའམ་ཡང་ན་མི་དབྱེ་བར། ངེས་པར་དང་དུ་བླང་བའོ། །ཡང་ན་ཐམས་ཅད་གཅིག་ཏུ་བསྡུ། །ཡང་ན་མཚན་ཉིད་མེད་པར་བརྟག །ཏིང་འཛིན་ཕྱག་རྒྱའི་དམ་ཚིག་ནི། །བདེར་གཤེགས་དཀྱིལ་འཁོར་མ་ལུས་ཀུན། །ཡེ་ནས་རང་བཞིན་གསལ་བ་ལ། །ཐམས་ཅད་ཀུན་ལ་ཡོད་པར་བཤད། །ཡེ་ཤེས་སེམས་དཔའི་དཀྱིལ་འཁོར་ཉིད། །བླ་ན་མེད་པའི་མཆོག་ཡིན་ཏེ། །རྡོ་རྗེ་རིགས་མཆོག་ཐམས་ཅད་ཀྱིས། །བར་མ་ཆད་པར་རྟག་ཏུ་བསྒྲུབ། །བྱང་ཆུབ་ཤིང་
དྲུང་སྐྱེ་བར་འགྱུར། །བླ་མེད་བྱང་ཆུབ་མཆོག་ཀྱང་འགྲུབ། །སྐྱེ་འཆི་མེད་པའི་པད་འགྲུབ་སྟེ། །སེམས་ལ་དབང་ཡང་ཐོབ་པར་འགྱུར། །སྤྱོད་ཡུལ་ཐམས་ཅད་སྨོན་ན་ཤེས། །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་དམ་ཚིག་རྣམ་པར་སྤྲོས་པའི་ལེའུ་སྟེ་བདུན་ཅུ་དྲུག་པའོ།། །།གང་ཞིག་དཀྱིལ་འཁོར་འདི་སྤངས་ན། །ཉོན་མོངས་ངན་སོང་གནས་སུ་སྐྱེ། །བྱང་ཆུབ་འབྲས་བུ་ཐོབ་མི་འགྱུར། །བླ་མེད་འགྲོ་བའི་རྒྱུ་ཡང་ཆད། །རིགས་ཆད་ཉིད་དུ་སྐྱེ་བར་འགྱུར། །རྡོ་རྗེ་སེམས་དཔའ་བསྒྲུབ་འདོད་པས། །རྟག་ཏུ་མཉམ་པའི་དོན་རྟོགས་ལ། །སྐུ་ནི་འཇའ་ཚོན་ཚུལ་འདྲ་བར། །སྣང་ལ་རང་བཞིན་མེད་པར་བསྒོམ། །འཁོར་རྣམས་ཆུ་ཟླའི་ཚུལ་ཤེས་པར། །གསལ་ལ་རང་བཞིན་མེད་པར་བསྒོམ། །ལྷ་ཡི་སྐུ་རྣམས་གསལ་བསྒོམས་ན། །བསོད་ནམས་ཚོགས་ཆེན་ཐོབ་པར་འགྱུར། །དེ་ཉིད་གཟུགས་བརྙན་ཚུལ་ཤེས་ན། །ཡེ་ཤེས་ཚོགས་ཆེན་ཐོབ་པར་འགྱུར། །རྣལ་འབྱོར་པས་ནི་རྟག་ཏུ་བསྒོམ། །ཡི་དམ་ལྷ་དེ་སྤངས་བྱས་ན། །ངན་སོང་མི་བདེ་རྟག་ཏུ་མྱོང་། །སྔགས་དང་ཕྱག་རྒྱ་རྒྱུན་མི་གཅད་པའི་དོན་ནི། སྔགས་དང་ཕྱག་རྒྱ་བར་མི་གཅད། །རྣལ་འབྱོར་འགྲུབ་པའི་ལམ་ཡང་ཡིན། །མི་གཏོང་སྡོམ་ཞིང་འདྲེན་པའང་ཡིན། །དོན་མཆོག་རྫོགས་པའི་གནས་ཡིན་ཏེ། །རྟག་ཏུ་མཉམ་གཞག་ཕྱག་རྒྱ་ཡིན། །དུག་གསུམ་གཏིང་འབྱིན་སྔགས་ཡིན་ཏེ། །ཡང་དག་དོན་ཆེན་ཀླུང་འདོད་པས། །དུས་མཚམས་མེད་པར་ཕྱག་རྒྱ་སྔགས། །ཡིད་བརྟན་དྲག་ཏུ་བཟླས་བརྗོད་བྱ། །ཡོན་ཏན་ནམ་མཁའི་མཐའ་དང་མཉམ། །ཕྱག་རྒྱ་བསྐྱོད་དང་ཡི་གེ་ཨོྃ། །རྡོ་རྗེ་སློབ་དཔོན་གྱི་མཚན་ཉིད་བསྟན་པ། བླ་མེད་དཀྱིལ་འཁོར་སྟོན་པ་པོ། །ཡོན་ཏན་ཟད་མེད་སྦྱིན་པ་ཡིན། །བྱང་ཆུབ་ལམ་ཆེན་འདྲེན་མཛད་པ། །ཆགས་མེད་ཞིང་དུ་འགོད་པ་ཡིན། །ཉོན་མོངས་སྡུག་བསྔལ་རྩད་གཅོད་ཅིང་། །འཁོར་བའི་ལམ་རྣམས་སྟོངས་པར་བྱེད། །མ་རིག་མུན་སེལ་སྒྲོན་མ་ཡིན། །ལོང་བ་རྣམས་ཀྱི་དམིགས་བུ་མཁན། །དེ་ལ་རྟག་ཏུ་
མཆོད་བྱས་ན། །སངས་རྒྱས་བྱང་ཆུབ་ཐག་མི་རིང་། །རྡོ་རྗེ་མཆེད་དང་ལྕམ་དྲལ་གྱི་མཚན་ཉིད་བསྟན་པ། རྡོ་རྗེ་རིགས་ཀྱི་སྤུན་ཡིན་ཏེ། །ཐོག་མ་མེད་ནས་ལས་མཐུན་པས། །ལྟ་སྤྱོད་མཐུན་པས་འདིར་སྐྱེས་ཏེ། །གཅིག་ལ་གཅིག་ནི་མིག་དང་འདྲ། །ཤིན་ཏུ་གདུང་ཞིང་བརྩེ་བར་བྱ། །དམ་ཚིག་ངན་སེམས་དཔྱ་བྱས་ན། །དམྱལ་བ་ཆེན་པོར་ལྟུང་བར་འགྱུར། །དེ་བས་དམ་ཚིག་འདའ་མ་བྱེད། །གསང་བའི་དམ་ཚིག་བསྟན་པ་ནི། །དེ་བཞིན་གཤེགས་པའི་དཀྱིལ་འཁོར་ནི། །སྲིད་གསུམ་མ་ལུས་ཀུན་ལ་ཁྱབ། །ཕྱིན་ཅི་ལོག་གིས་རབ་བསྒྲིབས་ནས། །དབུལ་པོ་གཏེར་དང་གྱད་ཀྱི་ནོར་བུ་འདྲ། །དེ་བས་རྡོ་རྗེ་གསང་མཆོག་འདི། །ཐམས་ཅད་མཁྱེན་པའི་ཐུགས་རྗེ་ཡིས། །ཆོས་ལ་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་ཤིན་ཏུ་གསང་། །ཐེག་པ་དམན་དང་ཕྱིན་ཅི་ལྡོག །དེ་ལ་གསང་དོན་བསྟན་གྱུར་ན། །རང་བཞིན་གསང་དོན་མི་ཤེས་པར། །འཕྲལ་གྱི་སྤྱོད་ཡུལ་དེ་དག་ལ། །ཤིན་ཏུ་ངེས་པའི་དོན་བཟུང་ནས། །གསང་དོན་དེ་ཉིད་ལོག་པར་ཁྲིད། །མ་རྟོགས་དེ་ཉིད་དམྱལ་བར་འཁོར། །དེ་བས་ཤིན་ཏུ་གསང་བར་བྱ། །ཐུགས་རྗེ་ཆེན་པོ་དང་ལྡན་པས། །ཐར་ལམ་ཀུན་ལ་མཁས་པར་བྱ། །ཤེས་རབ་མཆོག་དང་ལྡན་པས་ན། །སེམས་ཅན་སྣོད་ཀྱི་རིམ་པ་བཞིན། །ཐེག་པ་མཐོ་དམན་དོན་ཉིད་ནི། །སོ་སོར་འཚམ་པར་བསྟན་དགོས་སོ། །དང་དུ་བླང་དང་མི་སྤང་བ། །རྣལ་འབྱོར་པས་ནི་རྟག་ཏུ་སྤྱད། །ཆགས་པ་མེད་པར་གྱུར་པ་དང་། །དངོས་གྲུབ་ཡ་མཚན་ཆེན་པོ་ནི། །དམ་ཚིག་མདོ་བཤད་ནང་ནས་འབྱུང་། །མ་རྟོགས་པ་ཞེས་སྤྱད་གྱུར་ན། །ཡི་དགས་སྲིན་པོའི་ནང་དུ་སྐྱེ། །ཡང་ན་དམ་ཚིག་འདི་ལྟ་བུར། །ཇི་ལྟར་སྤྱད་ཀྱང་སྡོམ་པ་མི་འདའ་སྟེ། །བྱེད་སྤྱོད་ཚོགས་ཆེན་གཉིས་སུ་འགྱུར། །འགྲོ་དང་ཉལ་དང་འདུག་པ་ན། །མཉམ་པ་དེ་ཡི་དབྱིངས་ན་གནས། །ཤེས་རབ་མཆོག་གིས་རྟག་ཏུ་གྱིས། །ཆོས་རྣམས་མ་ལུས་ཐམས་ཅད་ལ། །བྱ་ལམ་ནམ་མཁའ་གཅོད་བཞིན་གྱིས། །འཛིན་ཆགས་མ་ལུས་ཐམས་ཅད་ཀུན། །མཁའ་ལ་རླུང་ཆེན་
འཕྲོ་བ་བཞིན། །ཡིད་ཀྱི་རྟོག་ཆགས་མ་ལུས་པ། །ཆུ་ལ་ཉ་ཆེན་འཕྱོ་བ་ལྟར། །རྣལ་འབྱོར་ལྟ་བ་དེ་ལྟར་ལྟོས། །དེ་ལྟར་རྟོགས་པའི་ཤེས་རབ་ཀྱིས། །ཚིག་ཙམ་མ་ཡིན་བློ་གཏིང་སྤོས། །རྡོ་རྗེ་ཐེག་མཆོག་ཁ་འཆེས་ལ། །མཉམ་པའི་དོན་ཉིད་མི་ཤེས་པར། །གསང་སྔགས་དམ་ཚིག་མཉམ་ཟེར་ཞིང་། །ཐུགས་ཐུབ་དག་གིས་སྤྱད་བྱས་པ། །དམྱལ་ཁམས་དག་ཏུ་བརྒྱུད་པར་འགྱུར། །མཉམ་པའི་དོན་ཉིད་ཇི་ལྟ་བུ། །མཉམ་དང་རྟོགས་པ་གང་ཡང་མེད། །ཇི་ལ་མི་གནས་ཡུལ་ལ་སྤྱོད། །སྤྱོད་པར་བྱེད་དང་སྤྱོད་པ་མེད། །དེ་ལྟར་རྟོགས་པའི་རིགས་མཆོག་ནི། །རྡོ་རྗེ་རིག་འཛིན་སྐྱེ་བ་ན། །འཇིགས་མེད་ཀུན་ཏུ་བཟང་པོར་སྦྱོར། །ཡོན་ཏན་མི་ཟད་གནས་པ་ཡིན། །མཉམ་པའི་དོན་ཉིད་མི་ཤེས་ཤིང་། །ཀུན་རྫོབ་དོན་དམ་གཉིས་མེད་ལ། །ཆོས་དང་གང་ཟག་གཉིས་མེད་ན། །འདི་ནི་བྱང་ཆུབ་ས་པ་ཡིན། །ལས་དང་ཉོན་མོངས་ཐམས་ཅད་ལ། །མཉམ་པའི་དོན་དུ་མི་ཤེས་ཤིང་། །རྟེན་འབྲེལ་རྒྱུ་འབྲས་ཡོད་འཛིན་ན། །འདི་ནི་རང་སངས་རྒྱས་ཀྱིས། །ཆོས་རྣམས་མ་ལུས་ཐམས་ཅད་ལ། །བདེན་བཞིའི་དངོས་པོ་ཡོད་ལྟ་ཞིང་། །སྤང་དང་མི་སྤོང་བྱེད་འགྱུར་བ། །འདི་ནི་ཉན་ཐོས་ས་པ་ཡིན། །དགེ་བཅུ་དག་ལ་གཙོར་ལེན་ཅིང་། །དགེ་དང་མི་དགེ་མི་མཉམ་པས། །ལྷ་དང་མི་ཡི་སྐྱེ་གནས་ཏེ། །འདོད་ཁམས་དག་ཏུ་འཁོར་བའི་ས། །མཉམ་པའི་དོན་ཉིད་མི་རྟོགས་ཤིང་། །ཚད་མེད་བཞི་དང་བསམ་གཏན་བཞི། །རིམ་པར་སོ་སོར་བདག་འཛིན་ཅིང་། །གཟུགས་ཚོགས་དག་ལ་བདག་ཏུ་རྟོག །འདི་ནི་ཚངས་གནས་རིམ་པར་སྐྱེ། །མཉམ་དང་གཟུགས་མེད་མ་རྟོགས་པར། །མིང་བཞི་མེད་པར་མ་ཤེས་ཏེ། །སྐྱེ་མཆེད་བཞི་ལ་གནས་འགྱུར་བས། །སྲིད་པའི་རྩེ་མོའི་ས་རུ་སྐྱེ། །ཐམས་ཅད་མཉམ་པར་མ་ཤེས་ན། །མ་ལུས་ཀུན་ལ་ཞེ་སྡང་ཞིང་། །སྙིང་རྗེ་ཡང་དག་མེད་འགྱུར་ན། །འདི་ནི་མི་བཟད་ཆེན་པོ་ཡི། །དམྱལ་ཁམས་བཅུ་དྲུག་གནས་པ་ཡིན། །ཆགས་མེད་དངོས་པོ་མི་ཤེས་ནས། །ཐམས་ཅད་ཀུན་ལ་འདོད་ཆགས་ཤིང་། །ལུས་ཀྱིས་བསྒྲིབས་
དང་ཟས་ཀྱིས་བསྒྲིབས། །ཡི་དགས་ཆེན་པོའི་གནས་སུ་སྐྱེ། །ང་དང་བདག་མེད་མི་ཤེས་ཤིང་། །ཆོས་རྣམས་ཀུན་ལ་རྨོངས་བྱས་པས། །ཤེས་རབ་མི་གསལ་དོན་མེད་པས། །དགེ་སྡིག་གཉིས་ཀྱི་དོན་མ་རྟོགས། །འདི་ནི་བྱོལ་སོང་གནས་སུ་སྐྱེ། །ཤིན་ཏུ་ང་རྒྱལ་ཆེར་བསྐྱེད་ཅིང་། །ཐམས་ཅད་བདག་གིར་བཟུང་བས་ན། །ཀུན་དང་རྩོད་པའི་ལས་བྱེད་པ། །ལྷ་མ་ཡིན་གྱི་གནས་སུ་སྐྱེ། །ཐེག་མཆོག་མཐོ་དམན་ཐམས་ཅད་དང་། །འཇིག་རྟེན་ལྟ་བ་ཐམས་ཅད་ཀུན། །ཡེ་ཤེས་ཆེན་པོས་རབ་བརྟགས་ན། །རང་བཞིན་མེད་ལ་ཅིར་ཡང་འགྲུབ། །རང་བཞིན་དབྱིངས་ལས་ཉམས་པ་མེད། །ཤེས་རབ་ཆེན་པོ་མིག་ལྡན་པས། །མཐོ་དམན་གནས་དང་ལམ་དྲུག་དང་། །རང་བཞིན་མེད་ལ་ཅིར་ཡང་འགྲུབ། །སོ་སོར་དེ་བཞིན་འཁོར་བར་གཟིགས། །སྔགས་མཆོག་བླ་ན་མེད་པས་ནི། །མཚན་མ་ཀུན་དང་མི་བརྟག་པར། །མཚན་མ་ཀུན་དང་ཐམས་ཅད་མེད། །ཀུན་དང་མཉམ་པ་ཉིད་ཡིན་པས། །འཇིག་རྟེན་འདས་དང་འཇིག་རྟེན་པའི། །སོ་སོར་ལྟ་བ་བརྗོད་མི་བྱ། །སྤྱི་ནི་ལོག་རྟོག་བསམ་ཡས་པ། །ཡེ་ནས་ཡོད་པ་མ་ཡིན་ཏེ། །སོ་སོའི་རྣམ་རྟོག་བག་ཆགས་ཀྱིས། །གཟུང་འཛིན་དྲ་བས་བསྒྲིབས་འགྱུར་ཏེ། །ཅི་ཡང་མེད་ལ་ཅིར་ཡང་སྣང་། །སྣང་བ་ཉིད་ན་རང་བཞིན་མེད། །དེ་ལྟར་རྟོགས་ན་བདེར་འགྲོའི་གནས། །རྡོ་རྗེ་ཅན་གྱིས་དེ་ལྟར་རྟོགས། །རྣལ་འབྱོར་ཆེན་པོའི་ལྟ་སྤྱོད་ནི། །ཅིར་ཡང་སྤྱོད་ཀྱང་རང་བཞིན་མེད། །མཁའ་ལ་བྱ་ཆེན་ལྡིང་བ་བཞིན། །ཆུ་ལ་སྐྱར་ཆེན་འཕྱོ་བ་བཞིན། །མཁའ་ལ་རླུང་ཆེན་འགྲོ་བ་བཞིན། །རྣལ་འབྱོར་ལྟ་བ་དེ་ལྟར་བལྟ། །རྣལ་འབྱོར་སྤྱོད་པ་ཆེན་པོ་ནི། །ཐམས་ཅད་ཀུན་ལ་དབྱེར་མེད་སྤྱོད། །བདེ་བའི་རོ་མཆོག་མྱོང་བར་འགྱུར། །དེ་ལ་སུ་ཞིག་ཆགས་པར་བྱེད། །སྤྱོད་བཞིན་མ་ཆགས་ཡེ་ཤེས་ཡིན། །བདེ་བའི་མཆོག་ཉིད་བསོད་ནམས་ཚོགས། །དེ་ལྟ་བུ་ཡི་ངང་དུ་སྤྱོད། །འདི་ནི་སྤྱོད་པ་རླབས་ཆེན་ཡིན། །ལྟ་སྤྱོད་ཡ་ཆར་མ་གྱུར་པར། །སྔགས་འཆང་རྣམས་ཀྱིས་རྟག་ཏུ་སྤྱད། །ཁ་ཅིག་ལྟ་བ་མཉམ་གནས་ཀྱང་། །
སྤྱོད་པ་དག་དང་ཡོང་མི་མཐུན། །ཁ་ཅིག་སྤྱོད་པ་རྫོགས་བྱེད་ཀྱང་། །མཉམ་པའི་ལྟ་བ་ཡོང་མི་ཤེས། །ཁ་ཅིག་ལྟ་སྤྱོད་གཉི་ག་མེད། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པས། །ཡང་དག་ཉིད་དུ་རབ་ཏུ་རྟོགས། །བླ་མེད་ཐེག་ཆེན་ངང་གནས་ནི། །དོན་དམ་ཀུན་རྫོབ་དབྱེར་མེད་དེ། །ཀུན་རྫོབ་ཙམ་དུ་ཐམས་ཅད་ལ། །དག་དང་མ་དག་གཉི་གར་འཛིན། །ཐབས་ཀྱི་ཐེག་པ་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་འང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་ནོར་བདུན་ནོ། །ཀུན་རྫོབ་ཏུ་ནི་མཉམ་རྫོགས་སོ། །མཉམ་པ་ཉིད་ལས་མ་གཡོས་བཞིན། །ཐབས་ཀྱི་ཕྱག་རྒྱ་ཆེན་པོ་སྟོན། །ཐབས་དང་ཤེས་རབ་རྣམ་པར་དག །ཐམས་ཅད་དག་ཅེས་བྱ་བ་ཡང་། །དངོས་པོ་གསལ་དག་མ་ཡིན་ཏེ། །སྣང་སྤྱོད་ཉིད་ན་རྣམ་པར་དག །དམ་ཚིག་ཆེན་པོའི་མདོ་རྣམས་ལས། །རིགས་ལྔ་དག་ཏུ་བསྟན་པ་ནི། །ཆོས་རྣམས་མ་ལུས་ཐམས་ཅད་ཀུན། །རིགས་ཆེན་དག་ཏུ་ཟད་པར་འདུས། །མ་ལུས་ཆོས་ཀུན་དབྱེར་མི་དམིགས། །ཅིས་ཀྱང་མི་ཚུགས་རྡོ་རྗེ་ཡིན། །རིགས་ངན་འཇོམས་པས་རྡོ་རྗེ་ཡིན། །མི་དམིགས་དབྱིངས་ནས་ཀུན་འབྱུང་བ། །ཡོན་ཏན་ཆེན་པོ་གནས་ཡིན་ཏེ། །ཞིང་ཁམས་མི་བཟད་གནས་ཀྱང་ཡིན། །འདི་ནི་རིན་ཆེན་རིགས་སུ་གསུངས། །ཆོས་རྣམས་ཐམས་ཅད་དབྱེར་མེད་པས། །ཆགས་དང་ཆགས་པར་བྱ་བ་མེད། །དེ་བཞིན་ཉིད་དུ་གཅིག་པ་སྟེ། །ཉེས་པས་མི་གོས་པདྨ་བཞིན། །ཐམས་ཅད་མ་ལུས་དབྱིངས་འདུས་པས། །འདི་ལ་བྱ་བར་ལ་ཙམ་མེད། །མ་བྱས་བཞིན་དུ་དོན་གྲུབ་པ། །སྐྱོན་ཡོན་བྱང་ཆུབ་ཉིད་དུ་སྦྱོར། །འདི་ནི་ལས་རྣམས་གྲུབ་པ་ཡིན། །ཆོས་རྣམས་མ་ལུས་ཐམས་ཅད་ཀུན། །མཐའ་དང་དབུས་མེད་དུ་མར་བྲལ། །གང་ཡང་མ་ཡིན་དེ་བཞིན་ཉིད། །དབྱེར་མེད་པ་ཡི་ཚུལ་རྟོགས་ཏེ། །འདི་ནི་དེ་བཞིན་གཤེགས་པའི་
རིགས། །སྣང་སྲིད་མ་ལུས་ཐམས་ཅད་ལ། །གསལ་ཞིང་དྲོ་བའི་གནས་བྱེད་ཅིང་། །མཚན་མ་བག་ཆགས་སྲེག་བྱེད་པ། །འདི་ནི་མེ་ཡི་རིགས་སུ་བཤད། །ཆོས་རྣམས་མ་ལུས་ཐམས་ཅད་ལ། །དངོས་པོར་སྣང་ལ་གཟུང་དུ་མེད། །བསྐྱོད་ན་ཐམས་ཅད་ཀུན་སྨྲ་སྟེ། །འདི་ནི་རླུང་ཆེན་ཡིན་པར་བཤད། །དམ་ཚིག་ཆེན་པོའི་མདོ་རྣམས་ལས། །འབྱུང་བ་ལྔ་རྣམས་བཤད་པ་ནི། །ཐམས་ཅད་མ་ལུས་འབྱུང་བའི་གནས། །ཐམས་ཅད་ཀུན་གྱི་མཛོད་སྐྱེད་ཡིན། །ཆོས་རྣམས་མ་ལུས་ཐམས་ཅད་ལ། །སྲ་ཞིང་བརྟན་པའི་གནས་ཡོད་པས། །དངོས་པོ་མེད་པའི་ཚུལ་རྟོགས་ཏེ། །འདི་ནི་ས་ཆེན་ཡིན་པར་བཤད། །ཆོས་རྣམས་མ་ལུས་ཐམས་ཅད་ལ། །དེ་བཞིན་ནམ་མཁའ་ཆེན་པོ་ཡིས། །ཕྱི་དང་ནང་གི་གོ་འབྱེད་པའོ། །ཐམས་ཅད་གསལ་བའི་ངང་ཉིད་དེ། །འབྱུང་བ་བཞི་པོ་ཐམས་ཅད་ཀྱང་། །ཐམས་ཅད་ནམ་མཁའི་ངང་དུ་ཐིམ། །ཆོས་རྣམས་མ་ལུས་ཐམས་ཅད་ཀུན། །དེ་བཞིན་ཉིད་ཀྱི་དབྱིངས་སུ་འུབ། །ཉོན་མོངས་ལྔ་པ་ཞེས་བྱ་བའི་དམ་ཚིག་ནི། མ་རིག་པ་ནི་རིག་པར་འགྱུར། །ཕྱིན་ཅི་ལོག་ནི་ཡང་དག་སྟེ། །ཉོན་མོངས་ལྔ་པོ་དེ་བཞིན་གཤེགས། །དངོས་མེད་རྟོགས་ན་བྱང་ཆུབ་ལམ། །མ་རྟོགས་ངན་སོང་གསུམ་དུ་འགྲོ། །དེ་བས་ཐོས་བསམ་བསྒོམས་པ་ཡིས། །ཡང་དག་དོན་ཉིད་རྟོགས་བྱས་ཏེ། །ཐམས་ཅད་སངས་རྒྱས་ཉིད་དུ་སྦྱོར། །འདོད་ཆགས་རང་བཞིན་མེད་པས་ན། །ཡང་དག་དོན་ལ་ཆགས་བྱེད་དེ། །ཆགས་པ་མེད་པའི་ཚུལ་གྱིས་གནས། །མ་ཆགས་པ་ལ་ཆགས་པ་དང་། །ཤིན་ཏུ་ཆགས་མཆོག་ཆེན་པོ་ཡིན། །རྒྱལ་བའི་ཞིང་ཁམས་འབྱུང་འགྱུར་ཏེ། །སྣང་བ་མཐའ་ཡས་ཞིང་དག་ཡིན། །ཐམས་ཅད་པདྨ་བརྫུས་སྐྱེས་ཡིན། །རྡོ་རྗེ་འཛིན་གྱི་ས་རུ་སྐྱེ། །ཞེ་སྡང་ཆེན་པོའི་མཚན་ཉིད་ནི། །ཕྱིན་ཅི་ལོག་ལ་ཞེ་སྡང་ཞིང་། །ཞེ་སྡང་དངོས་པོ་མེད་ཤེས་ན། །སྡང་དང་མི་སྡང་མཉམ་ཤེས་ཏེ། །ཅིས་ཀྱང་མི་ཚུགས་རྡོ་རྗེ་ཡིན། །མཉམ་པ་ཆེན་པོའི་ངང་ཉིད་ནི། །ཐམས་ཅད་ཀུན་ལ་དབྱེར་མེད་དེ། །དེ་ལྟར་མ་རྟོགས་
ཀུན་ལ་སྣང་། །དེ་བཞིན་ཕལ་གྱིས་མཉམ་མི་ཤེས། །དེས་ནི་ཞེ་སྡང་ཉིད་དུ་མཐོང་། །ཡང་དག་རྟོགས་པས་རབ་བརྟགས་ན། །ཞེ་སྡང་ཐུགས་རྗེ་ཆེན་པོ་ཡིན། །གཏི་མུག་རྨོངས་པ་ཞེས་བརྗོད་པས། །ཆོས་རྣམས་མ་ལུས་ཐམས་ཅད་ཀུན། །དོན་དམ་དུ་ནི་དབྱེར་མེད་ལ། །ཀུན་རྫོབ་སྒྱུ་མ་མིག་ཡོར་ཚུལ། །སྣང་བ་ཉིད་ན་དངོས་མེད་པས། །དེ་ལ་སུ་ཞིག་བདག་ཏུ་འཛིན། །ཐམས་ཅད་དབྱེར་མེད་མི་དམིགས་པ། །ཤེས་རབ་ཅན་གྱི་གཏི་མུག་ཡིན། །དེ་རྟོགས་དེ་བཞིན་གཤེགས་པའོ། །ང་རྒྱལ་མཚན་ཉིད་བརྗོད་པ་ནི། །མཉམ་པ་ཉིད་ལ་གནས་བཅས་ནས། །ཕྱིན་ཅི་ལོག་དང་ཐེག་དམན་ལ། །ཤིན་ཏུ་ང་རྒྱལ་ཆེན་པོར་སྣང་། །ང་རྒྱལ་ཞི་བ་སོ་སོ་མིན། །རང་བཞིན་མེད་པས་དབྱིངས་སུ་འདུས། །འདི་ནི་ཡོན་ཏན་འབྱུང་གནས་ཡིན། །དེ་བཞིན་དག་པར་ཤེས་པར་བྱོས། །ཕྲག་དོག་མཚན་ཉིད་བརྗོད་པ་ནི། །ང་དང་བདག་ཏུ་འཛིན་པ་སྟེ། །འཛིན་ཉིད་དངོས་པོ་ཡོད་མ་ཡིན། །མཉམ་མི་ཤེས་ལ་ཕྲག་དོག་ཅིང་། །ཐམས་ཅད་མཉམ་པ་ཉིད་དུ་འདུས། །མི་མཉམ་པ་ལ་ཤིན་ཏུ་སྡོམ། །དེ་བས་ཕྲག་དོག་ཆེན་པོ་ཡིན། །ཕྱིན་ཅི་ལོག་ཏུ་བདག་ཏུ་བཅིངས། །གཟུང་དང་འཛིན་པས་ཤིན་ཏུ་དོག །གཟུང་འཛིན་བྲལ་བའི་ཡེ་ཤེས་ནི། །དོག་ཡངས་མེད་དེ་ཐམས་ཅད་མཉམ། །དེ་ཉིད་ཤེས་པས་ལས་རབ་འགྲུབ། །ཕུང་པོ་ལྔ་ཞེས་བྱ་བའི་དམ་ཚིག་ནི། ཕུང་པོ་ལྔ་པོར་སྣང་བ་ཡང་། །ཀུན་རྫོབ་བྱ་བ་སྣ་ཚོགས་བྱེད། །བདེ་བའི་ཡུལ་དང་མི་བདེའི་ཡུལ། །སོ་སོའི་རོ་རྣམས་མྱོང་བྱེད་ཅིང་། །ལྔ་པོའི་མཚན་ཉིད་བཤིག་བྱས་ནས། །སོ་སོའི་མཚན་ཉིད་དངོས་པོ་མེད། །གང་གིས་དེ་ལ་དངོས་བཟུང་ན། །ངན་སོང་གསུམ་དུ་སྐྱེ་བར་འགྱུར། །དེ་ལ་གཟུགས་ཀྱི་མཚན་ཉིད་ནི། །སྣང་བ་ཉིད་ནི་རང་བཞིན་མེད། །སྣང་མེད་དེ་ཉིད་སྣ་ཚོགས་སྟོན། །སྣང་དང་མི་སྣང་གཉིས་སུ་མེད། །དེ་རྟོགས་རྣམ་པར་ཐར་པའི་གནས། །གཟུགས་ཉིད་ལོངས་སྤྱོད་རྫོགས་པའི་སྐུ། །ཚོར་བའི་མཚན་ཉིད་བརྗོད་པ་ནི། །ཀུན་ལ་རྣམ་གསུམ་འབྱུང་མོད་ཀྱི། །བདེ་དང་མི་བདེ་དངོས་པོ་མེད། །གཉི་ག་མ་ཡིན་ལུང་མ་
བསྟན། །སྣ་ཚོགས་ཚོར་བ་འབྱུང་འགྱུར་ཡང་། །ཚོར་དང་འབྱུང་བ་གཉི་ག་སྟོང་། །སྟོང་ཉིད་དངོས་པོ་ཡོད་མ་ཡིན། །དེ་རྟོགས་ཆོས་ཀྱི་གོ་བགོས་ཡིན། །འདུ་ཤེས་མཚན་ཉིད་བཤད་པ་ནི། །གསུམ་ཚོགས་མཚན་མར་འཛིན་པ་ཡིན། །སོ་སོ་མཚན་ཉིད་བཤིག་པ་ན། །དངོས་པོ་མེད་དེ་དེ་བཞིན་ཉིད། །དངོས་པོ་དེ་ནི་སྣ་ཚོགས་པ། །བྱེད་མེད་པར་ཀུན་དུ་འཇུག །ཁམས་གསུམ་མ་ལུས་ཐམས་ཅད་ལ། །མཚན་མ་ཆེ་ཆུང་བསམ་མི་ཁྱབ། །ཁྱབ་མེད་དངོས་པོ་ཡོད་མ་ཡིན། །དེ་ལྟར་རྟོགས་ན་སངས་རྒྱས་མཚན། །འདུ་བྱེད་མཚན་ཉིད་འདི་ལྟར་གནས། །རྩ་བ་བརྒྱད་པའི་གྲངས་འགྱུར་ཏེ། །ལྔ་བཅུ་རྩ་གཅིག་ཀུན་ལ་འཕོ། །དེར་རྟོགས་རྩ་བ་ཡོད་མ་ཡིན། །མེད་བཞིན་ལོག་གཡོ་རྣམ་པར་འབྱུང་། །དེ་ལ་དངོས་པོར་འཛིན་པ་ནི། །རྟག་ཏུ་ཉོན་མོངས་གཡེངས་གྱུར་ནས། །ཁམས་གསུམ་བཙོན་ར་ཀུན་དུ་འཁོར། །ཡང་དག་དོན་ཕྱིར་རིག་པས་ནི། །འཕྲོ་བའི་གཞི་རྩ་དེ་བཞིན་དེ། །དེ་ལ་རྣམ་རིག་འབྱུང་བ་ནི། །དངོས་པོ་མེད་དེ་སྐད་ཅིག་མ། །ཡེ་ཤེས་དབྱིངས་ལ་རོལ་པ་མཛད། །སྤྲུལ་པའི་ཚོགས་ཆེན་ཡིན་པར་བཤད། །ཀུན་གྱི་འབྱུང་གནས་རྣམ་ཤེས་ཏེ། །དེ་ཡི་དངོས་པོའི་རང་བཞིན་ནི། །ཁ་དོག་དབྱིབས་དང་རིག་རྒྱུན་མིན། །གང་ཡང་མ་ཡིན་ཉིད་མི་དམིགས། །འདི་ནི་ཀུན་ལ་དབང་བསྒྱུར་ཏེ། །མཐོ་རིས་འགྲོའམ་ངན་སོང་འགྲོ། །རྟོགས་དང་མི་རྟོགས་ཁྱད་པར་རོ། །བཞི་པོ་མཉམ་པའི་ངང་ཤེས་ན། །འདི་ནི་ཡེ་ཤེས་ཆེན་པོ་ཡིན། །ཁ་དོག་ལྔ་ཡི་དམ་ཚིག་ནི། །སེམས་ཅན་མ་ལུས་ཐམས་ཅད་ལ། །ཡེ་ཤེས་ལྔ་ཡིས་ཀུན་ཁྱབ་ཀྱང་། །རང་གི་རྣམ་རྟོག་བསྒྲིབས་བྱས་ཏེ། །ཡེ་ཤེས་ལྔ་ཡི་དོན་མ་མཐོང་། །མ་མཐོང་རྨོངས་པ་ཐམས་ཅད་ལ། །ཡེ་ཤེས་མཚན་ཉིད་བསྟན་པའི་ཕྱིར། །དཀར་དང་དམར་དང་སེར་བ་དང་། །ལྗང་གུ་ལ་སོགས་ནག་པོར་བསྟན། །ཆོས་རྣམས་བདག་མེད་རྟོགས་བྱས་ནས། །བྱང་ཆུབ་སེམས་ཉིད་དག་པའི་ཕྱིར། །ཤིན་ཏུ་མདོག་ནི་དཀར་བསྟན་པ། །དེ་རྟོགས་བྱ་ཕྱིར་དག་པའི་མདོག །ཆོས་རྣམས་མ་ལུས་ཐམས་ཅད་ཀུན། །པདྨ་
རཱ་ག་ཞེས་བརྗོད་དེ། །ཆགས་དང་ཆགས་པར་བྱ་བ་མེད། །ཆགས་མེད་ཕྱིར་ཡང་དམར་པོའོ། །ཡོན་ཏན་གཏེར་ཆེན་ཟད་མི་ཤེས། །ཐམས་ཅད་འབྱུང་བའི་གནས་ཡིན་ཏེ། །དེ་བཞིན་ཉིད་དབྱིངས་མ་ལུས་ལ། །ཟད་མེད་རིན་ཆེན་གཏེར་འགྱུར་བ། །མདོག་ནི་གསེར་གྱི་མདོག་ཏུ་བསྟན། །ཆོས་རྣམས་ཕྱིན་ཅི་ལོག་རྣམས་ལ། །ཐུགས་རྗེ་ཆེན་པོའི་བྱིན་བརླབས་ཀྱིས། །དབྱིངས་སུ་ཡང་དག་བསྡུ་དགོས་པས། །ལས་རྣམས་མ་ལུས་རྫོགས་པར་བྱེད། །ཀུན་དུ་ལས་ནི་ལྗང་གུའི་མདོག །དེ་བཞིན་ཉིད་ཀྱི་དབྱིངས་ཉིད་ལས། །ཅིས་ཀྱང་མི་ཚུགས་བཅོས་སུ་མེད། །ཁ་དོག་ནག་པོ་དངོས་པོ་ལ། །ཚོན་གཞན་དག་གིས་བསྒྱུར་དུ་མེད། །དེ་བཞིན་ཀུན་ལ་ཤེས་པར་བྱོས། །ཕྱོགས་ལྔ་ཞེས་བྱ་བའི་དམ་ཚིག་ནི། མཐའ་དང་དབུས་མེད་དེ་བཞིན་དུ། །དབྱེར་མེད་ངང་དུ་གནས་པ་ལ། །ཡེ་ཤེས་རྟོགས་པའི་དོན་བྱ་ཕྱིར། །ཕྱོགས་དང་དབུས་སུ་གནས་པར་བྱ། །སེམས་ཅན་མ་རིག་མདོངས་པ་ལ། །ཉོན་མོངས་མ་རིག་བསལ་བྱའི་ཕྱིར། །ཡེ་ཤེས་སྒྲོན་མ་འོད་འབར་བས། །མ་རིག་མུན་པ་སེལ་བར་བྱེད། །དེ་ཕྱིར་དེ་ལ་ཤར་ཞེས་བྱ། །སེམས་ཅན་མ་ལུས་ཐམས་ཅད་ལ། །ཉོན་མོངས་སྡུག་བསྔལ་མི་གནས་ཤིང་། །མ་རིག་མུན་པ་ནུབ་འགྱུར་བས། །དེ་ལ་ནུབ་ཀྱི་ཕྱོགས་ཞེས་བྱ། །སེམས་ཅན་ཀུན་གྱི་ཉོན་མོངས་ཀུན། །ཡེ་ཤེས་ཆེན་པོ་བདག་མེད་པས། །སྡུག་བསྔལ་རབ་ཏུ་བྱང་བྱས་ནས། །དེ་ལ་བྱང་གི་ཕྱོགས་ཞེས་བརྗོད། །དེ་ལྟར་མ་ལུས་ཐམས་ཅད་ལ། །ཐུགས་རྗེ་ཤར་དང་སྒྲིབ་པ་ནུབ། །རྣམ་རྟོག་མཚན་ཉིད་བྱུང་གྱུར་ན། །དེ་ཡི་ཡོན་ཏན་ཆེན་པོ་རྫོགས། །དེ་ལྟར་ཆོས་རྣམས་མ་ལུས་ཀུན། །རང་བཞིན་ཉིད་ཀྱི་དབྱིངས་སུ་འདུས། །ཕྱོགས་རྣམས་མ་ལུས་ཐམས་ཅད་ཀུན། །དེ་བཞིན་ཉིད་དུ་ཟླུམ་པའི་ཚུལ། །ཕྱོགས་རྣམས་ཀུན་ལ་དེ་ལྟར་བལྟ། །མ་རིག་ཕྱིན་ཅི་ལོག་རྣམས་ཀྱིས། །ཕྱོགས་རྣམས་སོ་སོར་བཟུང་འགྱུར་ན། །རྟག་ཏུ་ཉོན་མོངས་འཁོར་བར་འགྱུར། །དབང་པོ་ལྔ་ཞེས་
བྱ་བའི་དམ་ཚིག་ནི། ཡུལ་ལྔ་དག་ལ་དབང་བྱེད་ཅིང་། །ཕྱིན་ཅི་ལོག་ནི་དངོས་པོར་འཛིན། །དངོས་པོར་བཟུང་བས་ཁམས་གསུམ་འཁོར། །གཟུགས་རྣམས་མ་ལུས་ཐམས་ཅད་ལ། །སྣང་ཞིང་དངོས་པོ་མེད་པ་དང་། །ལྷ་དང་ལྷ་མོར་དངོས་པོར་བརྟགས། །བདག་དང་ལྷ་ཉིད་གཉིས་པའོ། །སྒྲ་རྣམས་སྣ་ཚོགས་གྲགས་པ་ཡང་། །སྒྲ་ཉིད་དངོས་པོ་མེད་པར་ཤེས། །སྒྲ་བརྗོད་མ་ལུས་ཐམས་ཅད་ནི། །ཆོས་ཀྱི་སྒྲ་ཆེན་སྣ་ཚོགས་ཡིན། །དྲི་ཡི་དངོས་པོར་སྣང་བ་ཡང་། །དྲི་ཉིད་རང་བཞིན་གང་ཡང་མེད། །དྲི་སྣོམ་ཆོས་ཀྱི་དྲི་ཡིན་ཏེ། །ཤེས་རབ་ཆེན་པོས་དེ་ལྟར་རྟོགས། །རོ་ཡི་དངོས་པོར་སྣང་བ་ཡང་། །རོ་ཡི་རང་བཞིན་ཡོད་མ་ཡིན། །རོ་བྲོ་དེ་བཞིན་ཉིད་ཀྱི་རོ། །བདེ་བ་དེ་ཡིས་ཚིམ་པར་བྱེད། །རེག་བྱ་སྣ་ཚོགས་སྣང་བ་ཡང་། །རེག་བྱའི་དངོས་པོ་ཡོད་མེད་དེ། །རེག་བྱར་སྣང་བ་ལོངས་སྤྱོད་ཡིན། །བདེ་བ་ཆེན་པོ་ཆོས་ཀྱི་སྐུ། །མི་ཤེས་ཕྱིན་ཅི་ལོག་རྣམས་ཀྱིས། །དབང་པོའི་ཡུལ་ལ་ཆགས་འགྱུར་ན། །རྟག་ཏུ་འདོད་དང་མི་འབྲལ་ཞིང་། །ངན་སོང་གསུམ་དང་མི་ཁོམ་བརྒྱད། །རྩ་བ་སོག་མའི་མེ་བཞིན་དུ། །ཁམས་གསུམ་དག་ཏུ་འཁོར་བར་འགྱུར། །དེ་བས་ཡེ་ཤེས་ཆགས་མེད་རྟོགས། །བྱས་ལ་མི་སོགས་བསོད་ནམས་བྱོས། །ཀུན་ལ་སྤྱོད་ཅིང་མི་གོས་པས། །ཡེ་ཤེས་ཆེན་པོ་རྟག་ཏུ་བསྒོམས། །མཉམ་པ་ལྔ་ཞེས་བྱ་བའི་དམ་ཚིག་ནི། དོན་དམ་པར་སྐྱེ་བ་མེད་པར་མཉམ་པ་དང་། ཀུན་རྫོབ་[སྒྱུ]་མར་མཉམ་པ་དང་། དོན་དམ་པ་དང་ཀུན་རྫོབ་ཏུ་དབྱེར་མེད་པར་མཉམ་པ་དང་། ཆེན་པོ་ལྔ་དེ་བཞིན་གཤེགས་པ་ལྔར་མཉམ་པ་དང་། རྣམ་པར་ཤེས་པ་བརྒྱད་ཡེ་ཤེས་ལྔར་མཉམ་པའོ། །དེ་ལ་དོན་དམ་པར་སྐྱེ་བ་མེད་པར་མཉམ་པ་ནི། ཆོས་རྣམས་མ་ལུས་ཐམས་ཅད་ཀུན། །དེ་བཞིན་ཉིད་དང་སྟོང་བའི་མཐའ། །ཡང་དག་པ་དང་ཆོས་ཀྱི་དབྱིངས། །མཚན་ཉིད་མེད་ཅིང་དམིགས་སུ་མེད། །གཟུང་དུ་མེད་ཅིང་སྨན་པ་མེད། །ཡེ་ནས་མྱ་ངན་འདས་པ་ཡིན། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །
ཀུན་རྫོབ་སྒྱུར་མར་མཉམ་པ་དང་། །འདུས་བྱས་དངོས་པོ་སྣ་ཚོགས་ནི། །སྒྱུ་མའི་ཚུལ་དུ་ཐམས་ཅད་སྣང་། །འཕྲལ་གྱི་བྱ་བ་ཀུན་ཀྱང་བྱེད། །རྟོགས་པ་ཀུན་གྱི་མཚན་མ་སྣང་། །འདི་དག་ཐམས་ཅད་གཟུགས་བརྙན་ཏེ། བྱ་བྱེད་སྣང་ཞིང་དངོས་པོ་མེད། །ཆུ་ཟླའི་ཚུལ་དུ་ཐམས་ཅད་གནས། །ཐམས་ཅད་སྣང་ལ་རང་བཞིན་མེད། །དོན་དམ་ཀུན་རྫོབ་དབྱེར་མེད་ནི། །ཆོས་རྣམས་མ་ལུས་ཐམས་ཅད་ཀུན། །གཞི་རྩ་མེད་ལས་ཐམས་ཅད་འབྱུང་། །ཡོད་དང་མེད་པ་གཉི་ག་མིན། །དོན་དམ་ཀུན་རྫོབ་དབྱེར་མེད་དེ། །འདུས་མ་བྱས་ཉིད་འདུས་བྱས་སྣང་། །སྣང་བ་ཉིད་ན་དངོས་པོ་མེད། །དངོས་མེད་དེ་ཉིད་སྣ་ཚོགས་ཏེ། །དེ་ཉིད་སྒྱུ་མ་མིག་ཡོར་ཚུལ། །འབྱུང་བ་ཆེན་པོ་ལྔ་དེ་བཞིན་གཤེགས་པ་ལྔར་མཉམ་པ་ནི། ས་ཆུ་མེ་རླུང་ནམ་མཁའ་ལས། །ཡ་མཚན་སྣ་ཚོགས་འབྱུང་འགྱུར་བ། །གཞི་རྩ་ཡོད་པ་མ་ཡིན་ཏེ། །རང་བཞིན་ངང་གིས་དེ་ལྟར་འབྱུང་། །སོ་སོའི་རིགས་ཚོགས་སྣང་བ་ནི། །ཐབས་ཆེན་དག་ཏུ་རྟག་ཏུ་མཉམ། །མཚན་ཉིད་སོ་སོར་གནས་པ་ནི། །ཤེས་རབ་དབྱིངས་ཀྱི་ངང་དུ་མཉམ། །རྣམ་པར་ཤེས་པ་བརྒྱད་ཡེ་ཤེས་ལྔར་མཉམ་པ་ནི། རྣམ་རྟོག་ཀུན་གཞི་མ་ཡིན་པ། །རང་བཞིན་མེད་པ་དོན་གྱི་གཞི། །འདི་ནི་ཆོས་ཀྱི་དབྱིངས་ཞེས་བྱ། །དེ་བཞིན་ཉིད་ཀྱི་ཡེ་ཤེས་སོ། །ཆོས་རྣམས་མ་ལུས་ཐམས་ཅད་ཀུན། །ང་དང་བདག་ཏུ་མི་འཛིན་ཅིང་། །ཀུན་ཀྱང་དབྱེར་མེད་པ་ཡིན་པས། །ཐམས་ཅད་མེ་ལོང་ལྟ་བུའི་ཚུལ། །ཐམས་ཅད་ཀུན་ལ་ཡུད་རྟོག་ཅིང་། །རྟོག་དང་བརྟག་པར་བྱ་བ་མེད། །དུས་གསུམ་ཀུན་དུ་མི་དམིགས་པ། །འདི་ནི་མཉམ་ཉིད་ཡེ་ཤེས་ཡིན། །ལོག་རྟོགས་དབང་པོའི་སྤྱོད་ཡུལ་སྤངས། །དབང་པོའི་ཡུལ་རྣམས་དངོས་མེད་པར། །ཐམས་ཅད་དབྱེར་མེད་དེ་བཞིན་ཉིད། །སོ་སོར་རྟོག་པའི་ཡེ་ཤེས་ཡིན། །མཉམ་པ་རྣམ་ལྔ་དེ་ལྟར་བརྟགས། །ཆོས་རྣམས་མ་ལུས་ཐམས་ཅད་ལ། །ཡེ་ནས་རང་བཞིན་མེད་པ་དང་། །ཐབས་ཆེན་ལྷུན་གྱིས་གྲུབ་པར་བརྟགས། །འདི་ནི་ཡང་དག་རྟོགས་པ་ཡིན། །ཚོགས་ཀྱི་དཀྱིལ་འཁོར་ཞེས་བྱ་བའི་དམ་ཚིག་ནི། བསོད་ནམས་ཡེ་ཤེས་ཚོགས་རྫོགས་
ཏེ། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཡང་ན་རྡོ་རྗེ་སེམས་དཔའ་ཉིད། །རིགས་བཞིའི་ལྷ་དང་ལྷ་མོ་དང་། །འཁོར་གྱི་ཁྲོ་བོ་ཁྲོ་མོ་དང་། །ཡང་ན་འདས་པའི་དཀྱིལ་ཉིད་དེ། །འཇིག་རྟེན་སྣ་ཚོགས་འཁོར་ཡིན་ནོ། །ཚོགས་ཀྱི་མཆོད་པ་ཞེས་བྱ་བའི་དམ་ཚིག་ནི། ཐབས་དང་ཤེས་རབ་ལྡན་གྱུར་ཅིང་། །བྱང་ཆུབ་སེམས་དང་མ་ཆགས་པའི། །གཉིས་སུ་མེད་པར་ཐིམ་གྱུར་ན། །ཚོགས་ཆེན་གཉིས་ཀྱང་རྫོགས་པར་ལྡན། །འདོད་ཡོན་ལྔ་པོ་ཐམས་ཅད་དང་། །སྣ་ཚོགས་སྣང་བ་ཐམས་ཅད་ཀུན། །དེ་བཞིན་གཤེགས་པའི་དཀྱིལ་འཁོར་དང་། །གཟུགས་མཛེས་ལྷ་དང་ལྷ་མོར་བརྟགས། །ཐམས་ཅད་མ་ལུས་སྒྲ་རྣམས་ནི། །ཆོས་ཀྱི་སྒྲ་ཆེན་ཡིན་པ་དང་། །ངན་སོང་སྦྱོང་ཞིང་ཐར་ལམ་སྟོན། །སྟོང་གསུམ་གྲགས་པའི་སྒྲ་ཆེན་དང་། །ཐམས་ཅད་འཇལ་བའི་སྒྲ་ཡང་ཡིན། །བདེ་བ་ཚིམ་བྱེད་བསོད་ནམས་ཏེ། །བརྗོད་མེད་མི་གནས་ཡེ་ཤེས་ཡིན། །འདི་ནི་ཆགས་མེད་པདྨའི་གསུང་། །ཆོས་ཉིད་དངོས་པོ་མེད་པ་ལ། །དྲི་ཡིས་མཆོག་ཏུ་ཚིམ་བྱེད་པ། །བསོད་ནམས་ཚོགས་ཆེན་ཡིན་པར་བཤད། །ཆགས་མེད་ཡེ་ཤེས་ཚུལ་ཡིན་ཏེ། །དེ་བཞིན་དྲི་ཡིས་མཉེས་མཆོད་ན། །རིག་འཛིན་ས་རྣམས་བསྐུལ་བར་འགྱུར། །ངན་སོང་གསུམ་དུ་ཆོས་ཀྱི་དྲི། །ཀུན་དུ་བདེ་གནས་ཐོབ་པར་བྱེད། །བདེར་གཤེགས་དཀྱིལ་འཁོར་མ་ལུས་ལ། །བདེ་བའི་རོ་ཡིས་མཆོད་པར་འགྱུར། །ཚིམ་བྱེད་བསོད་ནམས་ཚོགས་ཆེན་འགྱུར། །དངོས་པོར་མི་འཛིན་བསོད་ནམས་ཚོགས། །དེ་ལྟ་བུ་ཡི་རོ་མཆོག་གིས། །ཐམས་ཅད་ཀུན་ལ་ཚིམ་པར་འགྱུར། །ཡི་དགས་གནས་སུ་ལོངས་སྤྱོད་ལྡན། །དཀྱིལ་འཁོར་མ་ལུས་མཆོད་པ་ཡིན། །བདེ་བ་ཆེན་པོ་རྫོགས་པའོ། །རྣལ་འབྱོར་ལས་སུ་རུང་རྣམས་ཀྱིས། །རྣམ་པ་མང་པོས་བརྒྱན་པ་དང་། །སྦྱོར་མཆོད་དག་གིས་ལོངས་སྤྱོད་ན། །དཀྱིལ་འཁོར་བསམ་ཡས་ལྷུན་གྲུབ་འགྱུར། །བདེ་ཆེན་དཀྱིལ་འཁོར་འབར་འགྱུར་ནས། །སྡིག་པའི་མུན་ནག་སེལ་བར་བྱེད། །དཔུང་གི་
ཚོགས་ཀྱིས་མི་ཐུབ་པའི། །མཐུ་ཆེན་དག་ཀྱང་འགྲུབ་པར་བྱེད། །ཚོགས་ཀྱི་ཕྲིན་ལས་ཞེས་བྱ་བའི་དམ་ཚིག་ནི། བྱེད་པ་མེད་པའི་ཚུལ་གྱིས་ནི། །ཀུན་ལ་ཐོགས་པ་མེད་པར་སྤྱད། །ཐམས་ཅད་མ་ལུས་འདུལ་བར་བྱེད། །མི་མཐུན་ཕྱོགས་ནས་དབང་དུ་བྱེད། །ཡོན་ཏན་ཆེན་པོ་འཕེལ་བར་བྱེད། །ཁྲོ་བོ་གཏུམ་པའང་ཞི་བར་བྱེད། །ཐམས་ཅད་ཀུན་ལ་སྤྱད་བདེ་བ། །ཆགས་པ་མེད་པའི་ཚུལ་གྱིས་གནས། །དབྱིངས་སུ་བསྡུས་པའི་དཀྱིལ་ཡིན་ཏེ། །འཕྲོ་འདུ་མང་པོའི་འཁོར་གྱིས་བསྐོར། །མཉམ་པ་ཆེན་པོའི་ངང་ཉིད་ནི། །དེ་ལྟ་བུ་ཡི་ཚུལ་དུ་གནས། །འཁོར་གྱི་ཕྲ་མེན་ཚིམ་པར་བྱེད་ཅེས་བྱ་བའི་དམ་ཚིག་ནི། བདག་ཉིད་འདུལ་བའི་དབང་ཕྱུག་ཏུ། །རྟག་ཏུ་མཉམ་བཞག་ཁྲོ་བོའི་ཚུལ། །འཁོར་གྱི་ཁྲོ་རྣམས་དེ་བཞིན་ཏེ། །མདོག་དང་ཕྱག་རྒྱ་ཐམས་ཅད་དང་། །སྔགས་མཆོག་དམ་པ་མ་ལུས་འདོན། །དེ་ནས་ཕྲ་མེན་འཁོར་བསྡུས་ནས། །སོ་སོའི་ལས་དང་མཐུན་བྱས་ཏེ། །སོ་སོའི་གནས་སུ་གཞག་པར་བྱ། །དབང་དུ་བསྡུ་དང་བསྒོམ་པའི་ཐབས། །ཇི་ལྟར་འཚམ་པ་བཞིན་དུ་བྱ། །མ་ལུས་ཐམས་ཅད་བྱོས་ཤིག་པར། །ལྷག་མ་བྱིན་ནས་དབང་ཡང་བསྐུར། །གཞན་ཡང་འགྲོ་བ་ཐམས་ཅད་ལ། །འདོད་ཡོན་ལྔ་ཡི་སྦྱིན་པ་བཏང་། །དེ་ནས་ལས་རྣམས་རྫོགས་བྱས་ནས། །དབང་ཕྱུག་ཆེན་པོའི་གནས་བརྟེན་ནས། །རིགས་ལྔ་ཡེ་ཤེས་ལྔ་ལ་སོགས། །འཁོར་གྱི་དཀྱིལ་འཁོར་མ་ལུས་པ། །བདག་ལ་ཐམས་ཅད་བསྡུ་བར་བྱ། །དེ་ལྟར་བསྒྲུབ་པའི་ངང་འཆང་བ། །ཡེ་ཤེས་ཚོགས་གཉིས་རྫོགས་བྱས་ནས། །རིག་འཛིན་རིག་པའི་ས་ལ་གནས། །ཐེག་དམན་སྤྱོད་པར་ཡོད་མི་འགྱུར། །མི་ཁོམ་གནས་སུ་སྐྱེ་མི་འགྱུར། །སྐྱེ་ཤི་མེད་པའི་གཡུང་དྲུང་ཐོབ། །སངས་རྒྱས་ཞིང་ཡང་སྦྱོང་བར་བྱེད། །ངན་སོང་གནས་རྣམས་སྟོངས་པར་བྱེད། །ཡང་དག་མཆོག་གི་སྙིང་པོ་འགྲུབ། །དབང་པོ་ཡུལ་དུ་སྣང་བ་ཀུན། །ཡུལ་རྣམས་ཡོད་པ་མ་ཡིན་ཏེ། །ཀུན་གཞི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་སྟེ། །སྣང་བའི་དངོས་པོ་
རྣམ་བཤིག་ན། །སོ་སོའི་མཚན་ཉིད་རྣམ་བཤིག་ནས། །གཞིགས་ན་ནམ་མཁའི་ངང་དུ་ཞི། །ནམ་མཁའ་དེ་ཉིད་ལྔས་གཞིགས་ན། །མཚན་ཉིད་མེད་པའི་དབྱིངས་སུ་ཐིམ། །ཐམས་ཅད་ཀུན་གྱི་འབྱུང་གནས་སོ། །གཞི་རྩ་མེད་པའི་སྐད་ཅིག་མ། །སྣང་བ་མི་འགོག་ཐབས་ཡིན་ཏེ། །རང་བཞིན་མེད་པ་ཤེས་རབ་ཉིད། །ཉོན་མོངས་རྣམ་པར་ཤེས་པ་ནི། །ཀུན་གཞི་ཉིད་སྣང་སྤྱོད་ཡུལ་ལ། །དེ་དང་བདག་ཏུ་རྣམ་པར་རྟོག །བདེ་སྡུག་མཚན་མ་སོ་སོར་འཛིན། །ཀུན་གཞི་དངོས་པོ་མེད་པ་ལ། །བག་ཆགས་སོགས་པའི་གནས་མེད་དེ། །སྣང་བའི་དངོས་པོ་མེད་པ་ལ། །ཉོན་མོངས་བློ་ཡིས་བླང་དུ་མེད། །བསྒོ་དང་བསྒོ་བར་བྱ་བ་མེད། །དེ་ལྟར་སྒོ་བྱེད་དངོས་པོ་མེད། །མེད་བཞིན་སེམས་ཀྱིས་ལོག་བརྟགས་པ། །ཁམས་གསུམ་བཙོན་རར་རྟག་ཏུ་འཁོར། །ཡིད་ཀྱི་རྣམ་པར་ཤེས་པ་ནི། །སྣང་དང་མི་སྣང་གཉི་ག་ལ། །སྐད་ཅིག་ཡུད་ཙམ་རྟོག་པ་ཡིན། །རྟོག་པ་ཉིད་ཀྱང་མ་གྲུབ་ན། །ཡུལ་གྱི་དངོས་པོ་ག་ལ་འགྲུབ། །ཡིད་ཀྱི་དེ་བཞིན་རྒྱུན་ཉིད་ནི། །སྔ་མ་འདས་ཤིང་མི་དམིགས་པ། །ཕྱི་མ་མ་བྱུང་བརྟག་ཏུ་མེད། །དེ་ལྟར་རང་བཞིན་དམིགས་སུ་མེད། །རྩི་ཤིང་ཁ་ན་རླུང་འཕྱོ་འདྲ། །རྒྱུད་ནི་ཡོངས་སུ་མ་ཆད་པ། །འདི་ནི་ཀུན་དུ་འབྱུང་བ་ཡིན། །དེ་ལྟར་དོན་རྣམས་དངོས་པོ་མེད། །ཆུ་དང་རླུང་དང་རླབས་འདྲ་བ། །དེ་གསུམ་གཅིག་དང་སོ་སོ་མིན། །དེ་བཞིན་ཀུན་གཞི་ཉོན་མོངས་ཡིད། །གཅིག་པ་མ་ཡིན་སོ་སོ་མིན། །ཆོས་ཀྱི་དབྱིངས་དང་མཉམ་པའི་དབྱིངས། །ཐམས་ཅད་ཡེ་ཤེས་དབྱེར་མེད་ཅིང་། །གཅིག་ཏུ་ཡང་ནི་བརྗོད་པ་མེད། །དེ་ལྟར་མ་རྟོགས་སེམས་ཅན་ཡིན། །རྟོགས་ན་སངས་རྒྱས་གུད་ན་མེད། །བྱང་ཆུབ་སེམས་ཀྱི་དེ་བཞིན་ནི། །ཤིན་ཏུ་མི་དམིགས་བརྟག་དཀའ་བ། །ཡངས་ལ་རྒྱ་ཆེ་གཏིང་ཟབ་པ། །ཤེས་རབ་ཟབ་པས་རྟོགས་འགྱུར་ཏེ། །གང་ནས་མ་འོངས་གར་མི་འགྲོ། །འོང་དང་འགྲོ་བར་བྱ་བ་མིན། །ཤིན་ཏུ་བརྟག་དཀའ་མི་དམིགས་པ། །མཐའ་དང་དབུས་ཀྱང་བརྟག་ཏུ་མེད། །གཟུང་འཛིན་བྲལ་བའི་རང་ཉིད་ནི། །དམིགས་མེད་ཚུལ་དུ་དེ་ལྟར་
སྣང་། །དབྱིངས་དང་དབྱིངས་ཀྱི་ཡེ་ཤེས་ཀྱང་། །རང་རིག་ཁོ་ན་ཙམ་དུ་ཟད། །སེམས་ཅན་མ་ལུས་ཐམས་ཅད་ཀྱིས། །དེ་ལྟར་ཁོང་དུ་ཆུད་པར་བྱོས། །ཉོན་མོངས་སྡུག་བསྔལ་མེད་པ་དང་། །བླ་མེད་འབྲས་བུ་ཐོབ་པར་འགྱུར། །སེམས་ཅན་མ་ལུས་ཐམས་ཅད་ལ། །སྙིང་རྗེའི་ཐག་པ་མ་ཆགས་པར། །ཉོན་མོངས་ལམ་ལས་གྲོལ་བྱེད་ཅིང་། །བྱམས་པ་དག་གིས་མཉེས་པར་གྱིས། །དེ་བཞིན་འཁོར་བའི་བཙོན་ར་ལ། །སྙིང་རྗེའི་ཞགས་པ་ཆེར་བརྐྱང་ནས། །ཉོན་མོངས་འདམ་ནས་འདྲེན་པར་བྱེད། །སྙིང་རྗེ་ཆེན་པོ་སྐྱེ་མ་བྱེད། །དེ་བཞིན་སྐྱེ་བོ་ཕལ་རྣམས་ལ། །ལས་ཀྱི་སྒྲིབ་པས་མི་གོས་ཤིང་། །ཐམས་ཅད་མངོན་པར་སངས་རྒྱས་པར། །དགའ་བ་དག་ལ་འགྱོད་པ་མེད། །སེམས་ཅན་ང་དང་བདག་མེད་ལ། །ཐུགས་རྗེས་གཉིས་རྟོག་མི་འབྱེད་དེ། །བུ་གཅིག་འདྲ་བར་བློ་གཞག་བྱ། །ཐམས་ཅད་དྲི་མ་མེད་པར་བྱ། །ཆོས་རྣམས་ཐམས་ཅད་སྟོང་པ་བས། །དེ་ལ་དངོས་དང་རྟོག་པ་མེད། །ནམ་མཁའི་ངང་དུ་གནས་པ་ལ། །དེ་ལ་བཅོས་ཤིང་བསྒྱུར་དུ་མེད། །ཆོས་རྣམས་ཐམས་ཅད་མཚན་ཉིད་མེད། །སྣང་བ་ཐམས་ཅད་དངོས་མེད་པས། །ཡོད་དང་མེད་པ་ཐམས་ཅད་ཀུན། །མཚན་ཉིད་མེད་པས་མི་དམིགས་སོ། །འཇིག་རྟེན་འདས་དང་འཇིག་རྟེན་པ། །ཆོས་རྣམས་སྣ་ཚོགས་སྣང་བ་ཡང་། །བདག་ལས་གཞན་པ་མ་ཡིན་པས། །ཀུན་ལ་སྨོན་ཅིང་ཆགས་སུ་མེད། །བྱང་ཆུབ་སེམས་རྣམས་ཐམས་ཅད་ནི། །ཤིན་ཏུ་བརྟག་དཀའ་གཏིང་ཟབ་པས། །རྟོག་གེའི་སྤྱོད་ཡུལ་དེ་མ་ཡིན། །མ་དམིགས་མི་དམིགས་དམིགས་སུ་མེད། །སེམས་ཉིད་དེ་ཉིད་ཇི་ལྟ་བུ། །བྱང་ཆུབ་དེ་ཉིད་སེམས་ཡིན་ནོ། །སེམས་དང་བྱང་ཆུབ་དབྱེར་མེད་པས། །སེམས་ཅན་མ་ལུས་ཐམས་ཅད་དང་། །དུས་གསུམ་ཆོས་རྣམས་ཐམས་ཅད་ཡིན། །ཐམས་ཅད་མ་ལུས་ཆོས་སོ་ཅོག །སེམས་དང་བྱང་ཆུབ་ཉིད་དུ་འུབ། །བོ་དྷི་ཆེན་པོས་དེ་སྐད་བཤད། །སྐྱེས་བུ་བློ་རྩལ་རབ་ལྡན་པས། །ཅི་ལའང་ཐོགས་པ་མེད་པར་སྤྱད། །སྤྱད་པ་ཉིད་ན་ཆགས་པ་མེད། །དུས་མཐའ་མེད་པར་མ་ཉམས་གནས། །འདི་ལྟར་སྣང་བ་ཐམས་ཅད་ལ། །
མངོན་སུམ་ཚད་མས་རྟག་མཐོང་ཡང་། །སྣང་བ་ཉིད་ན་དངོས་པོ་མེད། །དེ་བཞིན་ཡང་དག་ཉིད་དུ་རྟོགས། །གང་ཞིག་སྟོང་པའི་ངང་ཡོད་ཅེས། །མེད་པའི་རང་བཞིན་རྟོགས་པ་དེ། །རི་བོང་རྭ་དང་མོ་ཤམ་བུ། །ཚིག་ཙམ་གདགས་སུ་རུང་མོད་ཀྱི། །ཐམས་ཅད་མིང་ཙམ་སྟོང་ཉིད་མེད། །ཐམས་ཅད་མ་ལུས་སྟོང་ཞེས་ཏེ། །དྲན་མེད་བརྡོས་པ་མ་ཡིན་པས། །རྟོགས་མེད་རང་བཞིན་འོད་གསལ་ཞིང་། །འདི་ལྟར་སྣང་བ་ཐམས་ཅད་ཀུན། །བརྡོས་པ་ཙམ་གྱི་ཆོས་མེད་དོ། །ཤེས་པ་འབའ་ཞིག་ཁོ་ནའོ། །ཐམས་ཅད་གཉིས་མེད་རྟགས་གྱུར་ན། །དེ་ཉིད་དོན་དམ་དབྱིངས་ཡིན་ཏེ། །གཞན་ནས་བཙལ་ཞིང་གཞག་ཏུ་མེད། །ཡོད་ལས་བཙལ་ན་སྒྲོ་བཏགས་འགྱུར། །མེད་ལས་བཙལ་ན་སྐུར་བཏབ་སྟེ། །ཡོད་མེད་གཉིས་ལས་བཙལ་བྱས་ན། །དེ་ནི་ལུང་དུ་མ་བསྟན་འགྱུར། །རྣམ་པར་རྟོག་པ་མི་མངའ་སྟེ། །དེ་ཡིས་མི་མཁྱེན་ཅི་ཡང་མེད། །རྣལ་འབྱོར་ལྟ་བ་དེ་ལྟ་བུ། །ཚིག་གིས་སྔ་ཕྱི་ཡོད་མོད་ཀྱང་། །དོན་གྱིས་ཅིག་ཆར་རྫོགས་པར་བསྒོམ། །དེ་ལྟ་བུ་ཡི་དོན་རྟོགས་ཀྱང་། །འགྲོ་ཉལ་འདུག་སྡོད་ལོངས་སྤྱད་ཀྱང་། །ཐེག་ཆེན་སྒོམ་ལས་ཉམས་པ་མེད། །གོང་གི་དོན་ལྟར་མ་རྟོགས་པའི། །བློ་ངན་མཉམ་པར་ཁུངས་ཕྱུང་ནས། །མ་རྟོགས་ལེ་ལོ་སྙོམ་ལས་བྱས། །དོན་མ་གྲུབ་པར་ངན་སོང་འགྲོ། །སེམས་ཀྱིས་མཉམ་པར་མ་རྟོགས་ན། །ཚིག་གིས་མཉམ་པས་སངས་མི་རྒྱས། །དེ་བས་དོན་ཚིག་ལྡན་པར་བྱོས། །འོན་ཏང་ཐེ་ཚོམ་མེད་པར་འགྲུབ། །རྣལ་འབྱོར་དོན་ཆེན་རྟོགས་པ་ཡིས། །དུས་མཐའ་མེད་པར་དེ་ལྟར་བསྒོམ། །ཡོན་ཏན་ནམ་མཁའི་མཐའ་དང་མཉམ། །སྤྱོད་ཡུལ་སངས་རྒྱས་ཉིད་དུ་གཅིག །རྟག་ཏུ་བསོད་ནམས་ཚོགས་ཆེན་ལྡན། །བྱེད་མེད་པའི་བརྩོན་འགྲུས་ཀྱིས། །དེས་ནི་བྱང་ཆུབ་སྙིང་པོ་ལེན། །ཞེས་གསང་བའི་ཚིག་ཏུའོ། །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་དབང་པོ་དང་ཡུལ་དུ་འདུས་པ་བསྟན་པའི་ལེའུ་སྟེ་བདུན་ཅུ་བདུན་པའོ།། །།དེ་ནས་དེ་བཞིན་གཤེགས་པ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་
སྔགས་འཆང་རྣམས་དོན་ཡོད་པར་བྱ་བའི་ཕྱིར་ཐམས་ཅད་ཕྱག་རྒྱར་འདུས་ཤིང་ཕྱི་ནང་སྣོད་བཅུད་ཐམས་ཅད་ལ་འདི་ལྟར་བརྟགས་ཤིང་ཕྱག་རྒྱའི་དམ་ཚིག་བསྲུང་བ་དང་། དམ་ཚིག་ནི་གནས་ཡིན་ནོ། །ཕྱག་རྒྱས་བསྡུས་ཤིང་སྤྲོས་པ་ཡང་འདི་ཡིན་ཏེ། ཆེད་དུ་བརྗོད་པ་འདི་བརྗོད་དོ། །གསང་བ་དེ་ཉིད་ཁོ་ན་ལས། །བྱང་ཆུབ་མཆོག་འདི་བསྟན་པའོ། །མཉམ་པ་ཆེན་པོའི་དཀྱིལ་འཁོར་ནི། །ཕྱོགས་བཅུ་དུས་བཞི་མ་ལུས་པའི། །འདས་དང་མ་འདས་ཐམས་ཅད་ཀུན། །ཡེ་ནས་དབྱེར་མེད་དེ་བཞིན་ཉིད། །མཉམ་དང་མི་མཉམ་བྱ་བ་མིན། །དེ་བཞིན་ཉིད་ཀྱི་ངང་དུ་འུབ། །འཇིག་རྟེན་འདས་དང་འཇིག་རྟེན་པའི། །བརྗོད་པ་མ་ལུས་ཐམས་ཅད་ཀུན། །ཆོས་ཉིད་ངང་ལས་མ་རྟོགས་པ། །ལོག་རྟོགས་ཉོན་མོངས་རྡུལ་ཙམ་མེད། །ཕྱག་རྒྱ་སྣ་ཚོགས་འོད་འབར་ཡང་། །དེ་བཞིན་ཉིད་ལས་མ་གཡོས་ཏེ། །བདག་ཉིད་དབྱིངས་ལས་མི་གཞན་ཕྱིར། །མཉམ་ལ་མཉམ་པར་གནས་པ་ཡི། །རྣམ་གསུམ་ཚུལ་གྱིས་བསྒོམ་བྱས་ཤིང་། །ཕྱག་རྒྱ་སྐྱེད་ཅིང་ལོག་འདུལ་བ། །བྱ་བྱེད་མེད་པའི་ཚུལ་གྱིས་སུ། །ལས་རྣམས་མ་ལུས་རྫོགས་པར་བྱེད། །དེ་ལྟར་རྟོགས་ཤིང་རིགས་ཀྱི་མཆོག །བདག་ཉིད་ཕྱག་རྒྱ་ཀུན་གྱི་བདག །ཡེ་ནས་རང་བཞིན་འོད་གསལ་བས། །བྱང་ཆུབ་སྐྱེ་འཁྲུངས་རྒྱུ་ཡང་ཡིན། །འབྲས་བུ་ཡང་དག་ཉིད་དུའོ། །རྒྱུ་འབྲས་དབྱེར་མེད་རྡོ་རྗེའི་ས། །བཅུ་གསུམ་དོན་གྲུབ་དེ་གནས་པ། །མཐར་ཕྱིན་གང་ལའང་མི་གནས་པའོ། །རང་བཞིན་ཕྱག་རྒྱ་ཆེན་པོ་ནི། །ཕྱི་ནང་སྣོད་བཅུད་ཐམས་ཅད་ཀུན། །ཐམས་ཅད་ཤེས་རབ་ངང་དུ་གནས། །རིགས་ལྔ་བདེར་གཤེགས་ཡབ་ཡུམ་དུ། །མ་བཅོས་ཡེ་ནས་དེ་ལྟར་གནས། །ཐབས་དང་ཤེས་རབ་ཉིད་ལ་རོལ། །བདེ་མིན་མ་ཆགས་ཚོགས་ཆེན་པོ། །ཡང་དག་ཉིད་ལ་རབ་ཏུ་རྫོགས། །ལྷག་པའི་ཕྱག་རྒྱ་ཆེན་པོ་ནི། །ནང་གི་རྟགས་ནི་ཕྱིར་བྱུང་སྟེ། །མདོར་བསྡུས་ཕྱག་རྒྱ་ཆེན་པོ་དང་། །གཞན་ཡང་ཕྱག་རྒྱ་སྣ་ཚོགས་པ། །ལག་གི་འདུ་འཕྲོ་བསམ་ཡས་དང་། །ཡན་ལག་སྟབས་ཆེན་བསྒུལ་བསིགས་ཀུན། །ཉིད་ཀྱི་དབྱིངས་ལས་མ་གཡོས་ཀྱང་། །རང་བཞིན་ཉིད་ཀྱིས་དེ་ལྟར་
གནས། །འཇོམས་ཤིང་ཅིས་ཀྱང་མི་ཚུགས་པ། །རང་བྱུང་ཆེན་པོ་ལྷ་ཡི་ལྷ། །ཐམས་ཅད་ཀུན་ལ་འབིགས་པར་བྱེད། །དཔའ་བོ་ཞེས་ཀྱང་གདགས་པར་བྱའོ། །ལས་དང་ལས་ཀྱིས་མི་གོས་པ། །གཉིས་མེད་དབྱིངས་ཀྱི་དོན་རྟོགས་ཤིང་། །མ་ཆགས་པ་ལ་ཆགས་པ་དང་། །ཤིན་ཏུ་རྣམ་པར་དག་པ་ཡི། །དེ་བཞིན་ཉིད་དབྱིངས་དཀྱིལ་འཁོར་ལ། །སྐུ་གསུངས་ཐུགས་ལྡན་ཟད་མི་ཤེས། །ཡོན་ཏན་མི་ཟད་གཏེར་དུ་འགྱུར། །གཞི་ནི་མི་ཟད་པར་ལྡན་པའོ། །སྐུ་གསུང་ལས་རྣམས་རྫོགས་བྱེད་པའོ། །རྣམ་པར་རྟོག་མེད་ཚུལ་གྱིས་ནི། །ཐམས་ཅད་ཀུན་ལ་ཆགས་མེད་རོལ། །འདུལ་བའི་དོན་ལན་བསམ་མི་ཁྱབ། །འཇོམས་དང་མ་ཆགས་ཀུན་འབྱུང་དང་། །ཐམས་ཅད་དབང་བསྡུས་དོན་འགྲུབ་པ། །མ་ལུས་ཀུན་འདུས་རྣམ་པར་དག །ཀུན་ནས་ཟླུམ་ཞིང་འོད་ཟེར་འཕྲོ། །རིགས་བཞི་མ་ལུས་ཐམས་ཅད་ཀུན། །མཉམ་རྫོགས་དབྱིངས་སུ་ཐམས་ཅད་འདུས། །རིགས་རྣམས་གཅིག་མེད་གཅིག་པ་སྟེ། །ལྷུན་གྲུབ་དཀྱིལ་འཁོར་ངང་ཉིད་དུ། །ཕྱག་རྒྱའི་དམ་ཚིག་མཚན་ཉིད་ནི། །ཐུགས་ཀྱི་རྟགས་སུ་བསྟན་པ་ཡིན། །དཔེར་ན་རྒྱལ་པོས་རྒྱས་བཏབ་ན། །སེམས་ཅན་ཀུན་གྱི་ཡོང་མི་འདའ། །དེ་བཞིན་མཉམ་ཉིད་ཕྱག་རྒྱ་ཡིན། །ཀུན་ལ་ཁྱབ་ཅིང་ཐམས་ཅད་སྣང་། །སྐུ་གསུང་ཐུགས་ཀྱི་རྒྱས་བཏབ་ན། །བདུད་དང་མུ་སྟེགས་མང་པོ་ཀུན། །མི་མཐུན་ཕྱོགས་ཀྱིས་དབང་བྱར་མེད། །རྡོ་རྗེ་སེམས་དཔའི་རིགས་ངེས་ན། །འདི་ལྟ་བུ་ལ་རྟག་ཏུ་གནས། །དེ་ལྟ་བུ་ཡི་བློ་མེད་ན། །རྡོ་རྗེའི་རིགས་སུ་ཡོང་མི་བཤད། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཕྱག་རྒྱའི་དམ་ཚིག་གི་ལེའུ་སྟེ་བདུན་ཅུ་བརྒྱད་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོས་དེ་བཞིན་གཤེགས་པ་ཉིད་ལ་གསང་སྔགས་ཀྱི་རྒྱལ་པོ་བརྟན་པར་བཟུང་བ་འདི་ཆེད་དུ་བརྗོད་དོ། །ཀྱེ་ཀྱེ་ཕྱོགས་བཅུ་དུས་བཞི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །གཟུང་འཛིན་སྤྲོས་ལ་འཆེལ་བ་ཡི། །རྣམ་རྟོག་ཞགས་པས་སོ་སོར་ཟིན། །ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཡེ་ཤེས་ངོ་མཚར་རབ་འབྱམ་གྱིས། །དོན་དུ་
མི་འགྱུར་ཡོང་མ་གསུངས། །དེ་བཞིན་གཤེགས་པ་ཐམས་ཅད་ཀྱིས། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་བྱེད་པ་གང་། །དེ་ཉིད་ང་ཡིན་དབང་ཡང་རྫོགས། །དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་བ་ཞི་བ་ཡི། །གསང་བའི་སྙིང་པོ་དེ་ཁོ་ན། །དེ་ཉིད་ངེས་པའི་དབྱིངས་ལས་ཕྱུང་། །དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལས་གནས། །ཞེས་བརྗོད་པས་དེ་བཞིན་གཤེགས་པ་ཐམས་ཅད་དབྱེར་མེད་པར་དགྱེས་ནས་དུས་བཞི་མཉམ་པ་ཉིད་ཀྱི་དབྱིངས་སྐུ་དང་གསུང་ཐུགས་ཀྱི་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཡོངས་སུ་གཟུང་བའི་ལེའུ་སྟེ་བདུན་ཅུ་དགུ་པའོ།། །།འཕགས་པའི་རྒྱལ་པོ་སྒྱུ་འཕྲུལ་དྲ་བའི་སྟོང་ཕྲག་བརྒྱ་པ་ལས་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི། དེ་བཞིན་གཤེགས་པ་ཐམས་ཅད་ཀྱི་གསང་བ། གསང་བའི་སྙིང་པོ་དེ་ཁོ་ན་ཉིད་ངེས་པའི་ལེའུ་ལས་ཐམས་ཅད་མ་ལུས་པར་སྤྲོས་ཏེ་འཁོར་ལོ་བསྐོར་བ་དེ་དག་གི་འབྲས་བུ་མཆོག །གསང་བ་ཆེན་པོ་འདི་ཡོད་པར། །མེ་མར་མུར་གྱི་དོང་འབོགས་ཤིང་། །སྤུ་གྲི་སོ་ནི་གཏམས་ལས་ཀྱང་། །འཛེགས་ནས་བུ་དག་འགྲོ་བར་བྱོས། །ཁོང་ན་གནས་པའི་ཡང་ཁོང་དུ། །ལྕགས་ཀྱི་སྒྲོམ་བུ་ཁ་བསྡམ་མོ། །ཐམས་ཅད་ལ་ཡང་མེ་ལོང་བཞིན། །བལྟས་ཀྱང་གཟུགས་བརྙན་མི་སྣང་ངོ་། །ཡེ་ཤེས་འཕྲུལ་གྱི་ལྡེ་མིག་གིས། །རྡོ་རྗེ་ཐ་རམ་སྒྲོམ་ཕྱེ་ནས། །ཡིད་བཞིན་རིན་ཆེན་གཏེར་ཕྱུང་བ། །སྐལ་ལྡན་མཆོག་གིས་སྤྱད་དུ་གསོལ། །ཡི་གེ་ཀུན་ལ་མི་སྣང་ཞིང་། །བླ་མའི་ཐུགས་ལ་གནས་པ་ནི། །སྐལ་ལྡན་མཆོག་གི་སྤྱོད་ཡུལ་ཏེ། །ཀུན་དང་ཐུན་མོང་དེ་མ་ཡིན། །དཔེར་ན་སེང་གེའི་འོ་མ་ནི། །གསེར་གྱི་ཕྱིས་བུས་འཛིན་འགྱུར་གྱི། །སྣོད་གཞན་དག་ཏུ་བླུགས་པ་ནི། །སྣོད་ཀྱང་འཆག་ལ་འོ་མའང་འབོ། །ཡོང་གིས་གསེར་གྱི་རང་བཞིན་ལ། །དབྱིབས་ཀྱི་ཁྱད་པར་ཅིར་ཡང་སྣང་། །གསེར་ལས་གྱུར་པ་རྡུལ་ཙམ་མེད། །དེ་བཞིན་ཆོས་ཀྱི་མཚན་ཉིད་ཀྱང་། །མཚན་མ་སྣ་ཚོགས་ཅིར་སྣང་ཡང་། །ཉིད་ལས་གྱུར་པ་རྡུལ་ཙམ་མེད། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཆོས་ཉིད་ཀུན་དུ་མི་འགྱུར་བར་བསྟན་པའི་ལེའུ་སྟེ་བརྒྱད་ཅུ་པ་རྫོགས་སོ།། །།