 རྙིང་མ་རྒྱུད་འབུམ་པོད་དང་པོ། ཀ༽སྡེ་དགེའི་ཤིང་པར་རྙིང་མ་རྒྱུད་འབུམ།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། སྤྲོས་བྲལ་དོན་གསལ་ཆེན་པོའི་རྒྱུད་ཅེས་བྱ་བ།― DNG001_Page_0001 ―
[མ་དཔེ་གཟིགས་ན་འདིར་གནོན།]
རྒྱ་གར་སཾ་སྐྲི་ཏའི་སྐད་དུ། ཏི་ལ་ཀཱ་པྲ་པཉྩཱནྲ་པྲ་ཀ་ཊ་ཏནྟྲ་མ་ཧཱ་ནཱ་མ། བོད་སྐད་དུ། སྤྲོས་བྲལ་དོན་གསལ་ཆེན་པོའི་རྒྱུད་ཅེས་བྱ་བ། དཔལ་རྡོ་རྗེ་འཆང་ཆེན་པོ་ཐམས་ཅད་མཁྱེན་པའི་སྐུ་གསུང་ཐུགས་ལ་ཕྱག་འཚལ་ལོ། །སུམ་ཅུ་རྩ་གསུམ་གྱི་གནས་བརྩེགས་པ་མེད་པའི་ཁང་བཟང་ཆེན་པོ་ན། ལྷ་ཡི་དབང་པོ་བརྒྱ་བྱིན་ཞེས་བྱ་བ་ལྷ་རྣམས་ཀྱི་གཙོ་བོར་གྱུར་པ། འཁོར་ལྷ་ཕྲན་མང་པོས་བསྐོར་ནས་བཞུགས་པ་དེས་ལྷ་མ་ཡིན་གྱི་འཁྲུག་པ་ཆེན་པོ་བྱེད་པའི་གཡུལ་ངོ་བཟློག་ནས་བདེ་བ་ལ་འགོད་པའི་མན་ངག །དྷརྨ་སརྦ་ཏི་ལ་ཨཀ་ཧྃ་རུ་བི་ཏི་ཀ་ཡ་ཏྲི་རུ་ཀ་རུས་དུ་བ་ཧི་ན་མ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རང་རིག་རྟོགས་པ་མངོན་གྱུར་གྱི་རྡོ་རྗེ་འཆང་ཆེན་པོ་དེ། སྐུ་ཡེ་ཤེས་ཀྱི་རྩལ་སྣང་ལ་རང་བཞིན་མེད་པ། སྐུ་མདོག་སྣ་ཚོགས་སུ་བཞུགས་པ། ཆ་ལུགས་མཉམ་པའི་སྐྱིལ་མོ་ཀྲུང་ལ། ཕྱག་རྒྱ་ཆོས་འཆད་པའི་ཚུལ་དུ་མཛད་པ། ཡེ་ཤེས་ཀྱི་སྐུ་ཡིན་པའི་ཕྱིར། ཞལ་ཕྱོགས་བཅུ་ཀུན་ཏུ་མ་འགགས་པར་ཐལ་ལེ་གསལ་བ། གནས་རང་བཞིན་གྱིས་རྣམ་ ― DNG001_Page_0002 ―
[མ་དཔེ་གཟིགས་ན་འདིར་གནོན།]
པར་དག་པ་པད་མ་བདེ་གསལ་ཞེས་བྱ་བ། ཡེ་ཤེས་ཀྱི་རྩལ་འོད་དུ་མ་འགགས་པར་ཤར་བ་ལས་རྒྱུ་གྲུབ་སྟེ་ཁ་དོག་ལྔ་ཡིས་རྒྱུ་བྱས། དབྱིབས་གྲུ་བཞིར་གྱུར་པ། རྩིགས་པ་རིན་པོ་ཆེ་ཁ་དོག་ལྔས་བྱས་པ། ཕོ་བྲང་ཟླུམ་པོ། འཁོར་ལོ་རྩིབས་བཞི་མུ་ཁྱུད་ཀྱིས་བསྐོར་བ། གྲུ་ཆད་དང་བཅས་པ། བར་ཁྱམས་ལྷ་མོ་དང་ལྡན་པ། སྒོ་བཞི་རྟ་བབས་དང་བཅས་པ། འདོད་ཡོན་གྱི་སྣམ་བུ་ལ་མཁའ་འགྲོ་མ་སྣ་ཚོགས་དང་བཅས་པ། མཐའ་རྡོ་རྗེའི་རྭ་བ་པད་མས་བསྐོར་བ། དེ་དག་སྣང་ལ་རང་བཞིན་མེད་པ། བར་སྣང་གི་གཞའ་ལྟ་བུ། དེ་ལྟ་བུའི་གཞལ་ཡས་ཁང་ཆེན་པོ་ན། སྟོན་པ་བཅོམ་ལྡན་འདས་རྡོ་རྗེ་འཆང་ཆེན་པོ། འཁོར་ཡེ་ཤེས་ཀྱི་རྩལ་མ་འགགས་པ་རིགས་ལྔར་སྣང་བ་དང་། གཞན་ཡང་ཡེ་ཤེས་ཀྱི་རྩལ་མ་འགགས་པ་སེམས་དཔའ་དང་། སེམས་མ་དང་། ཁྲོ་བོ་དང་། ཁྲོ་མོ་དང་། ཞུ་བ་པོའི་འཁོར་གསང་བའི་བདག་པོ་ཕྱག་ན་རྡོ་རྗེ་དང་། སྡུད་པ་པོའི་འཁོར་དགའ་རབ་རྡོ་རྗེ་དང་། །གཞན་ཡང་མཁའ་འགྲོ་མ་རྣམ་པ་ལྔ་སྟེ། པུརྞ་ཉེ་བར་ཞི་བ་དང་། རྡོ་རྗེ་ཁྲོ་གདོང་མ་དང་། གཙུག་གི་རྒྱན་གཅིག་མ་དང་། རོ་ཟན་ཤཱནྟི་ཐོད་པའི་ཕྲེང་བ་ཅན་དང་། རྡོ་རྗེ་རླུང་གི་གཤོག་པ་ཅན་དང་ལྔ་སྟེ། དེའི་རང་རང་ཉེ་འཁོར་ན་མཁའ་འགྲོ་མ་གྲངས་མེད་པ་དང་བཅས་པས་བསྐོར་ནས་བཞུགས་སོ། །དེའི་ཚེ་གསང་བའི་བདག་པོས་སྣ་དྲངས་ཏེ། འཁོར་རྣམས་ཀྱིས་བསྐོར་བ་ལན་བདུན་བྱས་ཏེ་མདུན་དུ་འདུག་ནས་སྟོན་པ་ལ་འདི་སྐད་ཞུས་སོ། །ཀྱེ་ཀྱེ་བཅོམ་ལྡན་རྡོ་རྗེ་འཆང་ཆེན་པོ། །རང་རིག་དོན་རྟོགས་རྩལ་ལ་དབང་ཐོབ་པ། །སྐུ་གསུམ་ལྷུན་གྲུབ་ལོངས་སྐུའི་ཚུལ་དུ་བཞུགས། །རིག་པ་སྤྲོས་དང་བྲལ་བ་ཆོས་སྐུར་རྫོགས། །འགྱུ་བའི་རྩལ་མི་འགག་པས་སྤྲུལ་སྐུར་འཆར། །སྣང་ལ་རང་བཞིན་མ་གྲུབ་ལོངས་སྐུའི་ཚུལ། །འཁྲུལ་རྟོག་གཉིས་ཀ་བསལ་བས་འགྲོ་དོན་འབྱུང་། །དུས་ཀྱི་སྙིགས་མ་དག་ལ་ཉེ་བའི་ཚེ། །ཐེག་དགུ་བགྲོད་པའི་ ― DNG001_Page_0003 ―
[མ་དཔེ་གཟིགས་ན་འདིར་གནོན།]
ལམ་ནི་གྲུབ་ཐག་རིང་། །ཉོན་མོངས་དུག་ལྔ་རྒྱུད་ལ་ཤིན་ཏུ་སྨིན། །ཡིད་སྨོན་ལྟ་བ་གོམས་ཀྱང་བློ་ཡི་ཆོས། །རང་རིག་ཇི་ལྟར་ཡིན་པའི་དོན་རྟོགས་ནས། །རྩལ་གཉིས་ཇི་ལྟར་འཆར་ཡང་རང་གྲོལ་བའི། །ཡུལ་གྱིས་གནོད་མི་ནུས་པའི་གདམས་ངག་ཏུ། །ཚིག་གི་སྒྲོན་མས་དོན་ཆེན་མཚོན་ནས་ནི། །ཚིག་དོན་འདྲེལ་བའི་གཏན་ལ་ཕེབས་ངེས་པའི། །བཀླགས་པས་ཤེས་ནས་དེ་ཡིས་དོན་གོ་བས། །ཆོས་སྐུ་ཅིག་ཅར་བསྟན་པའི་གདམས་ངག་ཏུ། །སྤྲོས་བྲལ་དོན་གསལ་རྒྱུད་ཆེན་མན་ངག་ཞུ། །མ་རིག་མུན་པས་ཆོས་སྐུ་བསྒྲིབས་ལགས་ན། །རང་རིག་སྒྲོན་མས་ཆོས་སྐུ་བསྟན་པར་ཞུ། །ཞེ་སྡང་མེ་ཡིས་རང་རྒྱུད་བསྲེགས་ལགས་ན། །ཡེ་ཤེས་བདུད་རྩིས་མེ་ཆེན་གསད་པར་ཞུ། །མ་རིག་མུན་པས་ཤེས་རབ་རྨོངས་ལགས་ན། །ཡེ་ཤེས་སྒྲོན་མས་གཏི་མུག་བསལ་བར་ཞུ། །འདོད་ཆགས་ལན་ཚའི་ཆུ་ཡིས་གདུང་ལགས་ན། །ཡེ་ཤེས་བདུད་རྩིས་གདུང་བ་བསལ་བར་ཞུ། །ང་རྒྱལ་རི་བོས་རང་རིག་མནན་ལགས་ན། །རང་རིག་དོན་རྟོགས་རི་བོ་བསལ་བར་ཞུ། །ཕྲག་དོག་གཅོང་རོང་ལྟ་བུས་བསྡམས་ལགས་ན། །སྤྲོས་བྲལ་དོན་རྟོགས་གཅོང་རོང་བསལ་བར་ཞུ། །སྐྱེ་རྒ་ན་འཆིའི་ཆུ་བོ་མ་བརྒལ་ན། །ཡེ་ཤེས་གྲུ་ཡིས་ཆུ་བོ་བསྒྲལ་བར་ཞུ། །སྲིད་པའི་ལ་ཆེན་དག་ལ་མ་བསྒྲལ་ན། །རང་གྲོལ་སྲིད་པའི་ལ་ལས་བསྒྲལ་བར་ཞུ། །འཁོར་བའི་གཡེ་ཐང་ཆེན་པོར་བསྒྲོད་ལགས་ན། །ཡེ་ཤེས་བརྩོན་འགྲུས་རྟ་ཡིས་བསྒྲལ་བར་ཞུ། །གཟུང་འཛིན་ལྕགས་སྒྲོག་རང་རྒྱུད་བཅིངས་པ་ལ། །ཡེ་ཤེས་ལྡེ་མིག་ལྕགས་སྒྲོག་དབྱེ་བར་ཞུ། །བདག་ཏུ་ལྟ་བའི་བཙོན་ར་དམ་པོར་ཆུད་ལགས་ན། །ཐུགས་རྗེས་སྒོ་དབྱེ་བདག་འཛིན་དགྲོལ་བར་ཞུ། །མ་རྟོགས་འཁྲུལ་པའི་འདམ་གྱིས་ཟིན་ལགས་ན། །ཡེ་ཤེས་ཆུ་བོས་འདམ་རྫབ་བཀྲུ་བར་ཞུ། །ལོག་རྟོགས་འཛིན་པའི་གཅོང་ནད་ཟིན་པ་ན། །ཡེ་ཤེས་སྨན་པས་གཅོང་ནད་གདོན་པར་ཞུ། །ལོག་རྟོགས་ཆད་པའི་མཐའ་རུ་ལྷུང་བ་ལ། །ཡེ་ཤེས་གསལ་ཆའི་ངང་གི་མཐའ་ལས་གདོན་པར་ཞུ། །ཐེག་དགུས་ཕྱོགས་རྟོགས་ཡང་དག་དོན་མ་རྟོགས། །ཡང་དག་དོན་ཆེན་མ་ནོར་བསྟན་པར་ཞུ། །ཆོས་རྣམས་ལྡེམ་དགོངས་བློ་སྣ་སྟོར་བ་ལ། །ངེས་དོན་ཅར་ཕོག་དག་ཏུ་བསྟན་པར་ཞུ། །རང་ངོ་མ་ཤེས་ལྟ་བ་སྤྱི་སར་ལས་པ་ལས། །རང་རིག་རང་ལ་ཅར་ཕོག་བསྟན་པར་ཞུ། །ལོག་སྣང་རིག་པར་བསྲེས་པའི་གྲུབ་ ― DNG001_Page_0004 ―
[མ་དཔེ་གཟིགས་ན་འདིར་གནོན།]
མཐའ་ལ། །སྐུ་གསུམ་རྩལ་དང་བཅས་པའི་མན་ངག་ཞུ། །ཞི་གནས་མུན་པས་ཡེ་ཤེས་འཐིབས་པ་ལ། །ཡེ་ཤེས་ལྷག་མཐོང་སྒྲོན་མེ་འདེགས་པར་ཞུ། །རྟག་པ་ཐེར་ཟུག་ནད་ཀྱིས་ཟིན་པ་ལས། །རང་བཞིན་སྟོང་པས་རྟག་པ་གཞིག་པར་ཞུ། །ཚིག་ཚོགས་ཐ་སྙད་བྱེད་སྙིང་འཛིན་པ་ལ། །རྩ་བ་རང་རིག་སྙིང་པོ་བསྟན་པར་ཞུ། །ཚིག་གི་སྒྲོན་མས་དོན་གྱི་དཔེར་མཚོན་ནས། །དེ་རྣམས་རྟོགས་པའི་གདམས་ངག་ཆེན་པོ་རུ། །ཚིག་དང་དོན་གཉིས་དུས་གཅིག་སྟོན་པ་ཡི། །བཀླགས་པས་ཤེས་ཤིང་བསྟན་པས་གོ་བའི་ཆོས། །རིན་ཆེན་ཀུན་འབྱུང་སྤྲོས་བྲལ་དོན་གསལ་གྱི། །མན་ངག་བཤད་པའི་རྒྱུད་ཆེན་བཤད་པར་ཞུ། །སྔར་འདས་ཤཱཀ་ཐུབ་ལ་སོགས་སྟོན་པ་ཡིས། །རྒྱུད་དྲུག་ཉོན་མོངས་ཀུན་གྱི་གཉེན་པོ་རུ། །ཐེག་དགུ་ལ་སོགས་བརྒྱད་ཁྲི་བཞི་སྟོང་རྣམས། །རིག་པ་ཅར་ཕོག་དག་ཏུ་བསྟན་པ་མེད། །རང་རིག་ཅར་ཕོག་དག་ཏུ་བསྟན་པར་ཞུ། །ཐུགས་རྗེ་མངའ་བདག་རྡོ་རྗེ་འཆང་ཆེན་གྱིས། །དུས་ཀྱི་སྙིགས་མའི་གདུལ་བྱའི་དོན་ཆེད་དུ། །ཐོས་བསམ་བསྒོམ་ལ་རག་མ་ལས་པ་ཡིས། །རང་རིག་སྙིང་པོ་སྤྲོས་དང་བྲལ་བའི་དོན། །ཅིག་ཆར་ཅར་ཕོག་དག་ཏུ་བསྟན་པར་ཞུ། །དེ་སྐད་ཞུས་པའི་དོན་གསན་ནས། །གསང་བདག་ལ་སོགས་འདུས་པའི་ཚོགས་རྣམས་དང་། །མ་འོངས་གདུལ་བྱ་རྣམས་ཀྱི་དོན་ཆེད་དུ། །རང་རིག་རང་རྟོགས་རྡོ་རྗེ་འཆང་ཆེན་ངས། །འདུས་པའི་ཚོགས་དང་མ་འོངས་དོན་ཆེད་དུ། །སྔར་བཤད་གཞན་གྱིས་བསྟན་པ་མེད་པ་ཡི། །ཐོས་བསམ་བསྒོམ་པར་རག་ལས་མེད་པའི་དོན། །རང་རིག་ཆོས་སྐུ་ཅར་ཕོག་བསྟན་པ་ཡི། །ཚེག་ཆུང་དོན་ཆེ་གོ་བར་སླ་བའི་ཆོས། །བསྟན་པ་ཙམ་གྱིས་བློ་དམན་ཀུན་གྱིས་རྟོགས། །ཆོས་རྣམས་ཀུན་གྱི་སྙིང་པོ་དོན་ཆེན་ཡིན། །འཁོར་འདས་ཐེག་པ་ཀུན་གྱི་རྩ་བ་ཡིན། །ལུང་མདོ་མན་ངག་ཅིག་ཆར་པ། །རྒྱུད་ཀྱི་སྙིང་པོ་རང་རིག་ཅར་ཕོག་དོན། །དོན་འདྲིལ་མཐའ་གཅོད་སྤྲོས་བྲལ་དོན་ཆོདབསྟན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གླེང་གཞི་དང་གླེང་བསླང་བའི་ལེའུ་སྟེ་དང་པོའོ།། །།ཀྱེ་གསང་བའི་བདག་པོ་ཕྱག་ན་རྡོ་རྗེ། རྩེ་གཅིག་གུས་པས་ང་ལ་ཉོན། །བར་སྣང་གི་ངོ་བོ་མ་གྲུབ་པ་ལ། གང་ཟག་ལ་ལ་ལ་ནམ་བསྲོས། ལ་ལ་ལ་ཉི་མ་ཤར། ནམ་བསྲོས་པ་ནི་སྣང་བ་གསལ་བ་མེད་དེ། ― DNG001_Page_0005 ―
[མ་དཔེ་གཟིགས་ན་འདིར་གནོན།]
མུན་པའི་སྨག་ཆེན་པོར་སོང་། ཉི་མ་ཤར་བ་ནི་མུན་པའི་སྐྱེ་མཆེད་དག་ནས་ཉི་མ་ནུབ་མི་སྲིད་དོ། །ཨཛྙཱ་ན་དྷརྨ་ཀཱ་ཡ། མུན་པའི་སྨག་ཆེན་པོ་དེ་བསལ་བའི་ཐབས་དེ་གང་གིས་བྱ་བ་དང་། མུན་པའི་སྨག་ཆེན་པོ་དེ་བསལ་ནས་ཉི་མ་ལ་ནུབ་པ་མེད་པའི་དགོངས་པ་བསྟན་པའོ། །དེ་ལ་གང་ཟག་གི་རྒྱུད་ལ་འཆར་ལུགས་ནི། དང་པོ་གཞི་དུས་བསྟན་པ་དང་། དེ་ནས་རྟོགས་དུས་བསྟན་པ་དང་། དེ་ནས་འཁྲུལ་དུས་བསྟན་པ་དང་། དེ་རྟོགས་དུས་གོམ་པས་དག་ལུགས་དང་། མཐའ་རུ་དག་པ་ཆེན་པོ་བསྟན་པའོ། །ཞེས་གསུངས་སོ། །གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་ཆེན་པོ། །གང་ཟག་སྣོད་ལྡན་ཕྱི་མའི་དོན་ཆེད་དུ། །བསྟན་པས་གོ་ཞིང་བཀླགས་པས་ཤེས་པའི་རྒྱུད། །རྩ་རྒྱུད་བཤད་རྒྱུད་གསང་བ་མན་ངག་རྒྱུད། །གཅིག་ཏུ་དྲིལ་ཞིང་ཟབ་ཅིང་རྒྱས་པ་ཞུ། །བཅོམ་ལྡན་རྡོ་རྗེ་འཆང་གིས་ཡང་གསུངས་པ། །ལྔ་བརྒྱ་ཐ་མ་དུས་ཀྱི་སྙིགས་མ་ལ། །ཉོན་མོངས་རགས་པས་སྡུག་བསྔལ་དྲག་པོ་འབྱུང་། །སྡུག་བསྔལ་དྲག་པོས་དད་པ་རགས་པ་སྐྱེད། །དད་པ་རགས་ཀྱང་རྒྱུ་འབྲས་ཆོས་ལ་སྤྱད་དབང་མེད། །དེ་དུས་བསྟན་པ་ཙམ་གྱིས་གོ་བ་ཡི། །བཀའ་རྒྱུད་ཀུན་གྱི་རྩ་བའི་མན་ངག་འདི། །གདུལ་བྱ་དྲང་ཕྱིར་སྟོན་པ་ང་ཡིས་བཤད། །དང་པོ་གཞི་ཡི་གནས་ལུགས་བསྟན་པ་དང་། །བར་དུ་བཟང་རྩལ་ངན་རྩལ་གཉིས་སུ་འཆར་ལུགས་བསྟན་པ་དང་། །ངན་རྩལ་དག་ལས་འགྲོལ་ཐབས་ཐུན་མོང་ཁྱད་པར་བསྟན་པ་དང་། །གྲོལ་ནས་རྩལ་འཆར་ཐིམ་དུས་བསྟན་པའོ། །གཞི་ནི་འཁོར་འདས་གཉིས་ཀའི་གཞི་ཡིན་ཏེ། །དེ་ཡི་གནས་ལུགས་མཚོན་ལུགས་རྒྱས་པར་བཤད། །རྩལ་ནི་གཞི་ཡི་རྩལ་དེ་རྟོགས་འཁྲུལ་གཉིས། །རྟོགས་པ་ལོངས་སྐུའི་ས་ཟིན་ཐུགས་རྗེ་ཡིས། །འགྲོ་བའི་དོན་བྱས་ཆོས་སྐུ་ཉིད་དུ་ཐིམ། །མ་རྟོགས་རྩལ་ནི་འཁྲུལ་བའི་རྒྱུ་རྐྱེན་གྱིས། །ཁམས་གསུམ་འཁོར་བའི་གནས་སུ་དུག་ལྔས་རང་རྒྱུད་བསྲེག །ངན་རྩལ་དེ་ལས་བཟང་པོའི་རྩལ་དག་གིས། །སྒྲོལ་བའི་ཐབས་སུ་གཉན་པོ་ཐེག་པའི་བྱེ་བྲག་བསྟན། །དེ་ཡང་བརྒྱད་ཁྲི་བཞི་སྟོང་ཆོས་བསྟན་ཀྱང་། །བསྡུ་ན་ཐེག་པ་རིམ་པ་དགུ་རུ་འདུས། །དེ་དག་ཀུན་གྱི་རྩ་བ་ཅར་ཕོག་རྒྱུད་ཆེན་འདི་རུ་འདུས། །འདི་ཉིད་ཁྱད་པར་གྲོལ་ཐབས་ཡིན་ཏེ་ཤིན་ཏུ་ཟབ། །གྲོལ་ཐབས་འདི་ལ་ལྟ་སྒོམ་སྤྱོད་འབྲས་བཞི་ཡི་ཆ་རྐྱེན་དུ། །མན་ ― DNG001_Page_0006 ―
[མ་དཔེ་གཟིགས་ན་འདིར་གནོན།]
ངག་བྱེ་བྲག་མང་དུ་བསྟན་གྱིས་ལེགས་པར་ཡིད་ལཞོག །གྲོལ་དུས་ལོངས་སྐུས་གདུལ་བྱ་གཞན་གྱི་དོན་བྱས་ཏེ། །མཐའ་རུ་ཆོས་སྐུར་ཐིམ་དུས་བསྟན་པའོ། །ཐིམ་ལུགས་ཆོས་སྐུའི་ས་ན་གནས་ལུགས་འདི་ལྟར་ཡོད། །རང་གི་རིག་པ་གསལ་བར་མི་རྟོག་དང་། །ཐིམ་པ་ལ་ནི་མ་རྨུགས་དང་། །ཡོད་ལ་བདག་ཏུ་འཛིན་པ་མེད། །སོ་སོར་མ་འདྲེས་ཡོངས་སུ་འབྱེད་པ་མེད། །མཐའ་རྣམས་ཀུན་དང་བྲལ་བས་ཕྱོགས་སུ་ལྷུང་བ་མེད། །མྱ་ངན་སྡུག་བསྔལ་བྲལ་བས་བདེ་བ་རྒྱུན་མི་ཆད། །རང་བྱུང་མཐའ་རུ་འདུག་པས་རྐྱེན་གྱིས་འཇིག་བྲལ་མེད། །འབྲས་བུ་མངོན་དུ་བྱས་པས་རེ་དོགས་གཉིས་དང་བྲལ། །མ་བཙལ་ལྷུན་གྱིས་གྲུབ་པས་གཞན་ལ་རག་མ་ལས། །འཁྲུལ་པ་རྣམ་པར་དག་པས་འཁོར་བར་ལྡོག་མི་སྲིད། །རིག་པའི་རྩལ་མ་འགགས་པས་ཐམས་ཅད་མཁྱེན་པར་ཤར། །རང་གི་ངོ་བོས་སྟོང་པས་བག་ཆགས་བསག་ཏུ་མེད། །རྡོ་རྗེ་འཛིན་པ་ལེགས་པར་ཟུང་ཞིག །དང་པོ་གཞི་ཡི་གནས་ལུགས་བསྟན་པ་ནས། འབྲས་བུ་མཐར་ཐུག་པའི་བར་དུ་དེ་ལྟར་ཤེས་པར་བྱའོ། །ཞེས་བཀའ་སྩལ་ཏོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྤྱི་ཁོག་བསྡུས་པ་མདོར་བསྟན་པའི་ལེའུ་སྟེ་གཉིས་པའོ།། །།ཨ་ཨ་ཨ་སརྦ་ཛྙཱ་ན་དྷརྨ་ཀཱ་ཡ་ན་མ། ནམ་མཁའི་མཐའ་འདི་སྤྲོས་དང་བྲལ་བ་ལ་མུན་སྣང་གཉིས་ཀ་མ་གྲུབ་པ་ཞེས་བྱ་བ་སྟོན་ཏེ། གསང་བའི་བདག་པོས་ཡང་ཞུས་པ། ཀྱེ་བཅོམ་ལྡན་རྡོ་རྗེ་འཆང་ཆེན་པོ། །འཁོར་དང་མྱང་འདས་གཉིས་ཀའི་གཞིར་གྱུར་པ། །དངོས་པོའི་གནས་ལུགས་ཇི་ལྟར་གནས་པའི་དོན། །དེ་ལས་རྩལ་བྱུང་ཇི་ལྟར་འབྱུང་བའི་རྒྱུ། །དེ་དག་རྒྱས་བཤད་ཇི་ལྟར་ཕྱེ་ལ་བཤད། །བཅོམ་ལྡན་རྡོ་རྗེ་འཆང་གིས་བཤད་པར་ཞུ། །བཅོམ་ལྡན་རྡོ་རྗེ་འཆང་གིས་གསུངས་པའི་དོན། །དང་པོ་གཞི་ཡི་གནས་ལུགས་བསྟན་པ་དང་། །གཉིས་པ་གཞི་ལས་རྩལ་གྱི་འབྱུང་ལུགས་དང་། །གསུམ་པ་གཞི་ཡི་བྱེ་བྲག་བསྟན་པ་དང་། །བཞི་པ་གཞི་ཡི་མཚོན་དཔེ་བསྟན་པ་དང་། །ལྔ་པ་གཞི་ཡི་བརྗོད་ཚིག་བསྟན་པ་དང་། །དྲུག་པ་གཞི་ཡི་མདོར་བསྡུས་བསྟན་པ་དང་། །བདུན་པ་གཞི་ཡི་ངོས་བཟུང་བསྟན་པའོ། །དང་པོ་གཞི་ཡི་གནས་ལུགས་བསྟན་པ་ནི། །འཁོར་འདས་རྟོགས་ ― DNG001_Page_0007 ―
[མ་དཔེ་གཟིགས་ན་འདིར་གནོན།]
འཁྲུལ་མེད་པའི་གོང་རོལ་ན། །རྒྱུ་རྐྱེན་གཉིས་ལས་འདས་པ་རང་བྱུང་སྟེ། །བདེ་གཤེགས་ཐུགས་རྗེ་དག་ལས་མ་བྱུང་དང་། །སེམས་ཅན་རྣམས་ཀྱི་ལས་ཀྱིས་མ་བསྐྱེད་དང་། །ཕྱི་རོལ་འབྱུང་བ་ལྔ་ཡིས་མ་བསྐྱེད་དང་། །ནང་གི་རྣམ་རྟོག་དག་ལས་མ་གྲུབ་དང་། །གང་ཟག་ལམ་པའི་བློ་ཡིས་མ་བཅོས་པའོ། །མིང་དང་མཚན་མ་གང་ཡང་བཏགས་པ་མེད། །ཤེས་མེད་རྟོག་མེད་མ་རིག་འཁྲུལ་པ་མེད། །འཁྲུལ་དང་བག་ཆགས་རྟོག་པ་སྣ་ཚོགས་དང་། །ཡེ་ཤེས་རྩལ་སྣང་འབྲས་བུའི་ཆོས་རྣམས་ནི། །རང་བྱུང་གནས་ལུགས་གཞི་ལ་དབྱེ་བ་མེད། །ཐོག་མའི་དུས་དང་སྔ་ཕྱི་གྲུབ་པ་མེད། །བཟང་ངན་བླང་དོར་བསྒྲུབ་བྱ་གང་ཡང་མེད། །མཐའ་དང་དབུས་མེད་ཕྱོགས་དང་རིས་སུ་མེད། །ངོ་བོ་མ་བཅོས་མ་བསླད་གཉུག་མར་གནས། །སོ་མ་རང་ལུགས་མ་བྱུང་མ་སྐྱེས་སོ། །གཉིས་མེད་མཉམ་ཉིད་བཟང་ངན་གར་མི་འབྱེད། །བདེན་རྫུན་ཡོད་མེད་གར་ཡང་འཛིན་པ་མེད། །བསམ་མེད་རྟོག་མེད་ནམ་མཁའ་དག་པ་འདྲ། །ངོ་བོ་གཟུགས་དང་དངོས་པོའི་མཚན་མ་མེད། །གནས་དང་མི་གནས་སྣང་དང་སྟོང་པ་མེད། །རྟག་དང་ཆད་དང་གཅིག་དང་དུ་མ་མེད། །དགའ་དང་མི་དགའི་རྩིས་གདབ་དག་ལས་འདས། །མདོར་ན་མཐའ་དང་ཕྱོགས་འཛིན་གང་ཡང་མེད། །རིགས་དྲུག་སེམས་ཅནའཁྲུལ་པ་སྣ་ཚོགས་དང་། །རྒྱལ་བའི་སྐུ་དང་ཡེ་ཤེས་སྣང་བ་དང་། །རིམ་དགུ་ལ་སོགས་ཐེག་པའི་བྱེ་བྲག་རྣམས། །དངོས་པོའི་གནས་ལུགས་གཞི་ལ་གྲུབ་པ་མེད། །ཇི་བཞིན་མ་བཅོས་ཀུན་གྱི་གཞི་ཡིན་ཏེ། །རང་བྱུང་ལྷུན་གྲུབ་ཀུན་གྱི་འབྱུང་གནས་དེ། །མ་བསླད་སྙིང་པོ་ཀུན་ལ་ཁྱབ་པའི་དོན། །རང་གནས་བྱང་ཆུབ་ཀུན་གྱི་གཞི་མ་ཡིན། །མ་ཕྱེ་མི་འབྱེད་རང་གནས་ངོ་བོ་སྟེ། །འགྲོ་དང་འོང་ཞིང་འབྱུང་འཇུག་ཀུན་ལས་འདས། །མྱང་དང་མ་མྱང་འཇུག་དང་མི་འཇུག་མེད། །སྟོར་དང་མ་སྟོར་མེད་པས་བཙལ་མི་དགོས། །དངོས་མེད་ཀུན་གྱི་སྙིང་པོ་ཀུན་གཞི་སྟེ། །ཆགས་དང་མ་ཆགས་བྱ་བྱེད་ཀུན་དང་བྲལ། །སྐྱེ་མེད་འགྱུ་མེད་སྣང་བའི་ཡུལ་ལས་འདས། །རང་ལུས་རང་གནས་མ་བཅོས་བྱང་ཆུབ་སེམས། །གདོད་ནས་ལྷུན་གྲུབ་རིན་ཆེན་ཀུན་གྱི་མཛོད། །རྟོག་མེད་མཉམ་ཉིད་ ― DNG001_Page_0008 ―
[མ་དཔེ་གཟིགས་ན་འདིར་གནོན།]
གསལ་ཆའི་རྩལ་མ་ཤར། །ཤེས་པ་སྒོ་ལྔར་མ་དོན་ཉམས་མྱོང་མེད། །འགྱུ་བ་རང་སྣང་མ་བཅོས་རྣལ་མར་གནས། །གང་གི་རིག་པའི་རྩལ་ནི་སྔར་མ་འགྱུས། །བསམ་འཕེལ་རིན་པོ་ཆེ་ལས་དགོས་འདོད་འབྱུང་བ་བཞིན། །མན་ཤེལ་རྣམ་པར་དག་ལས་འོད་ལྔ་ལྷུན་གྲུབ་བཞིན། །ཏིལ་འབྲུ་ལ་སོགས་མར་ཁུ་ལྷུན་གྲུབ་བཞིན། །སྙིང་པོའི་གཞི་ལ་རྩལ་གཉིས་ལྷུན་གྱིས་གྲུབ། །རྟོགས་ན་གཞི་ལ་རྩལ་གཉིས་སྐུ་རུ་འཆར། །མ་རྟོགས་གཞི་ལ་འཁོར་བ་རང་ཁ་མ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གཞིའི་གནས་ལུགས་ཀྱི་ལེའུ་སྟེ་གསུམ་པའོ།། །།ཨ་ཨ་རཏྣ་དྷརྨ་ཀཱ་ཡ། ནམ་མཁའ་རྒྱ་མཚོ་མེ་ལོང་ཅན་གྱི་གནས་གཡུའི་མཎྜལ་ཆེན་པོ་ཁོད་སྙོམས་པའི་སྟེང་ན། རིན་པོ་ཆེའི་མཆོད་རྟེན་ཁྲི་འཕང་ལྔ་པ། ཤེལ་གྱི་ཟ་མ་ཏོག་ཆེན་པོའི་ནང་ན་གནས་པ་ལ། རླུང་གི་རྟ་ཕོས་བདག་པོ་བྱེད་པའི་མན་ངག་གསང་བའི་བདག་པོ་ཕྱག་ན་རྡོ་རྗེས་རྡོ་རྗེ་འཆང་ལ་ཡང་ཞུས་པ། གོང་གསུངས་གཞིའི་གནས་ལུགས་དེ་ལགས་ན། །རྩལ་འཆར་གཞི་དང་གཞི་སྣང་དོན། །འདུས་པའི་འཁོར་ལ་གསུང་དུ་གསོལ། །རྡོ་རྗེ་འཆང་གིས་བཀའ་སྩལ་པ། །རིགས་ཀྱི་བུ་རྒྱུད་ཐམས་ཅད་ཀྱི་དོན། གཞི་དང་གཞི་སྣང་ཆེན་པོའི་འདུག་ཚུལ་ང་ཡིས་སྨྲ་ཡིས་མ་ནོར་ཡིད་ལ་ཟུང་ཞིག །ངོ་བོ་ཉིད་ཀྱི་སྣང་བ་ལ། ངོ་བོ་ཉིད་ཀྱི་སྐུར་ཤར་ཏེ། ཆོས་སྐུ་ཐིག་ལེ་ཉ་ཤ་གཅིག་མ་བཅད་པའི་ཡུལ་ཅན། སྙིང་པོ་བཅུད་དུ་འདྲིལ་བ། དཔེ་ནམ་མཁའ་དང་ཉི་མ་ལྟ་བུར་གནས་སོ། །ཀྱེ་གསང་བའི་བདག་པོ་ངེས་པར་ཟུང་ཞིག །ངོ་བོ་ཉིད་ཀྱི་སྣང་བ་ནི་ཡུལ་ཆོས་ཀྱི་དབྱིངས། སངས་རྒྱས་ཀྱི་ཞིང་ཁམས་རྣམ་པར་དག་པ་སྟེ། དེ་ལ་ནི་མཐའ་དང་དབུས་མེད་པ། སྟེང་འོག་ཕྱོགས་མཚམས་མེད་པ། དུ་མ་དང་རྟེན་པ་མེད་པ། དེ་རྡོས་པ་ཅན་གྱི་ཆོས་མིན་པས་མནན་ན་ནེམ་པ་སྙམ་བྱེད་པ། བཏེགས་ན་འཕར་བ་སྙམ་བྱེད་པ། གར་ཡང་གསལ་བཟང་ཐལ་བ། ཀུན་ཏུ་རྒྱ་མ་ཆད་པ། སྤྲོས་བྲལ་གྱི་དབྱིངས། འགྱུར་མེད་ཀྱི་ཀློང་ངོ་། །ངོ་བོ་ཉིད་ཀྱི་སྐུ་ནི་ཕྱོགས་ལྷུང་མེད་པའི་ཤེས་རབ། རྒྱ་མ་ཆད་པའི་ཡེ་ཤེས། ལྷུན་གྱིས་གྲུབ་པའི་སངས་རྒྱས་དངོས་མེད་ཟང་ཐལ་བ། བྱེད་པ་པོའི་མཐའ་ ― DNG001_Page_0009 ―
[མ་དཔེ་གཟིགས་ན་འདིར་གནོན།]
ཐམས་ཅད་ལས་འདས་པ། མ་བཅོས་པ་སྒྲོ་སྐུར་གྱི་མཐའ་ཐམས་ཅད་ལས་འདས་པ། མ་བསླད་པ་སྐྱོན་གྱི་མཐའ་རྣམ་པར་དག་པ། དང་པོ་རྒྱུ་མེད་པ། བར་དུ་རྐྱེན་མེད་པ། ཐ་མ་གཉེན་པོ་མེད་པས་མི་འགྱུར་བ། མ་རིག་པ་དང་ལོག་པར་ལྟ་བ་དང་། མ་དད་པ་དང་ལེ་ལོ་ལ་སོགས་པ་དྲི་མར་མ་གྱུར་པ་རྟག་ཆད་ཀྱི་མཐའ་དང་། ཡོད་མེད་ཀྱི་མཐའ་དང་། བེམ་རིག་དང་གཟུང་འཛིན་གྱི་མཐའ་དང་བྲལ་བའོ། །འཁོར་འདས་ཀྱི་ཆོས་ཐམས་ཅད་ཀྱི་དོན་གྱི་ངོ་བོར་གྱུར་པའོ། །ཤར་བ་ནི་ཡེ་ཤེས་དབྱིངས་ལས་ཤར། དབྱིངས་རིག་པ་དང་ལྡན། མཐའ་རྣམ་པར་མི་འབྱེད། ཤེས་པས་གུད་དུ་མི་གཅད་དོ། །རིག་པས་དབྱིངས་ལ་ཁྱབ། ཡེ་ཤེས་ཀུན་ཏུ་བརྡལ། ཆོས་ཉིད་རིག་པར་འདུས་སོ། །རིགས་ཀྱི་བུ་དེ་ལྟར་ངོ་བོ་ཉིད་ཀྱི་སྣང་བ་དང་ཆོས་སྐུ་གཉིས་སུ་བརྗོད་ཅིང་མཚོན་ཀྱང་། དོན་གོང་མ་བཞིན་དུ་གཉིས་སུ་མེད་པས། མཐའ་བླ་ན་མེད་པའི་སྦུབས་སུ་འདུས་ཤིང་། སྦུབས་བླ་ན་མེད་པས་མཐའ་དབུས་ཡོངས་ལ་ཁྱབ་སྟེ། དོན་གཉིས་མེད་ཆོས་ཀྱི་སྐུ་ཐིག་ལེ་ཉགགཅིག་གོ། །དེ་ཅིའི་ཕྱིར་ཞེ་ན། མ་བཅད་པའི་ཡུལ་ཅན་ཡིན་པས་སོ། །དེ་ཡང་མ་བཅད་པའི་རིག་པ་ལ་འཛིན་རྟོག་མ་སྐྱེས་ཏེ། ཡུལ་དུ་ཡང་མ་བཟུང་། གཟུང་འཛིན་གཉིས་སུ་མེད་ཀྱང་། ཡུལ་རང་སྣང་ཆེན་པོ་དེ་དང་ལྡན་པས། ཡེ་ཤེས་འོད་དུ་གསལ་ནུས་ཏེ། ཡུལ་ཅན་ཞེས་ལྡན་ཚིག་གོ། །སྙིང་པོ་བཅུད་དུ་དྲིལ་བ་ནི། དབྱིངས་ཀྱི་སྙིང་པོ་རིག་པའོ། །དེའི་སྙིང་པོ་ནི་ཡེ་ཤེས་ཀྱི་རང་གདངས་ལྔའོ། །དེའི་སྙིང་པོ་ནི་ཡེ་ཤེས་ཀྱི་སྐུ་ལྔའོ། །རིགས་ཀྱི་བུ་བཅུད་དང་ཡང་དེ་བཞིན་དུ་སྦྱར་རོ། །དྲིལ་བ་ནི་སྒྱུ་མ་ལྟ་བུས་ཡེ་ཤེས་ཀྱི་སྣང་བ་ཡིན་པས་སོ། །དཔེ་ཅི་ལྟ་བུ་ཞེ་ན། ནམ་མཁའ་ལ་ཉི་མ་ཤར་བ་ལྟ་བུའོ། །རིགས་ཀྱི་བུ་ངོ་བོ་ཉིད་ཀྱི་སྣང་བ་ནི། ནམ་མཁའ་སྤྲིན་དང་བྲལ་བ་ལྟ་བུའོ། །ངོ་བོ་ཉིད་ཀྱི་སྐུ་ནི་ཉི་མའི་སྙིང་པོ་ལྟ་བུའོ། །ཞེས་དོན་གྱི་སྙིང་པོ་དགོས་འདྲེལ་ཆེན་པོ་དང་སྦྱར་ནས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གཞི་དང་གཞི་སྣང་ཆེན་པོའི་འདུག་ཚུལ་བསྟན་པའི་ལེའུ་སྟེ་བཞི་པའོ།། །།དེ་ནས་ཡང་བཅོམ་ལྡན་འདས་རྡོ་རྗེ་འཆང་ཆེན་པོ་གཞིའི་མཚན་ཉིད་ཀྱི་ཏིང་ངེ་འཛིན་ལ་ ― DNG001_Page_0010 ―
[མ་དཔེ་གཟིགས་ན་འདིར་གནོན།]
སྙོམས་པར་ཞུགས་སོ། །དེ་ནས་ཡང་གསང་བའི་བདག་པོས་ཞུས་པ། ཀྱེ་བཅོམ་ལྡན་རྡོ་རྗེ་འཆང་ཆེན་པོ། །གཞི་ཡི་བྱེ་བྲག་གསུང་དུ་གསོལ། །ཞེས་ཞུས་པས། གཞིའི་ཏིང་ངེ་འཛིན་ལས་བཞེངས་ཏེ། བཀའ་སྩལ་པ། རིགས་ཀྱི་བུ་གཞིའི་ངོ་བོ་ནི་གཉིས་སུ་མེད་པའོ། །ངེས་ཚིག་ནི་ཐམས་ཅད་འབྱུང་བས་ན་གཞིའོ། །ཡང་ན་འཁོར་འདས་གཉིས་ཀྱི་རྟེན་དུ་གྱུར་པའོ། །མཚན་ཉིད་ནི་ཡེ་ཤེས་ལྔའོ། །དབྱེ་བ་ནི་གསུམ་སྟེ། ཡེ་དོན་གྱི་ཀུན་གཞི་ན་ཡང་དག་པའི་གཞིའོ། །སྣ་ཚོགས་བསགས་པའི་ཀུན་གཞི་ནི་བག་ཆགས་དང་འདྲེས་པའི་ཤེས་པ་ཚོགས་བརྒྱད་དོ། །གནས་ལུགས་དོན་གྱི་ཀུན་གཞི་ནི་འདུག་ཚུལ་བརྒྱད་ཀྱི་དཔེའོ། །གཞན་སེལ་ནི་རིག་པར་འདུག་པས་བེམ་པོ་སེལ། སྟོང་པར་འདུག་པས་དངོས་པོ་སེལ། གཉིས་མེད་ཡིན་པས་གཉིས་སྣང་སེལ། རང་བྱུང་ཡིན་པས་རྒྱུ་རྐྱེན་སེལ། ལྷུན་གྲུབ་ཡིན་པས་རེ་དོགས་སེལ། ཡང་དག་ཡིན་པས་དྲི་མ་སེལ། མེད་པས་ཡོད་པའི་རྟག་མཐའ་སེལ། ཡོད་པས་མེད་པའི་ཆད་མཐའ་སེལ། ཀྱེ་རྡོ་རྗེ་འཛིན་པ་ལེགས་པར་ཟུང་ཞིག །ཡང་དག་པ་དོན་གྱི་གཞིའི་ཕྱི་མོ་ནི། རང་དང་རིགས་མཐུན་པ་ལས་ཀྱང་ལོག་པ་སྟེ། རིག་པ་ཙམ་དུ་མཐུན་པ་ཚོགས་བརྒྱད་ལས་གྲོལ་ལོ། །དེ་ཡང་ཇི་ལྟར་གྲོལ་ཞེ་ན། འཕེལ་འགྲིབ་མེད་པས་ཀུན་གཞིའི་རྣམ་ཤེས་ལས་གྲོལ། ངར་འཛིན་མེད་པས་ཉོན་མོངས་པའི་ཡིད་ལས་གྲོལ། གཟུང་འཛིན་མེད་པས་ཡིད་ཀྱི་རྣམ་ཤེས་ལས་གྲོལ། སྐྱེ་འགག་མེད་པས་སྒོ་ལྔའི་རྣམ་ཤེས་ལས་གྲོལ་ཞིང་ལོག་པའོ། །གསང་བའི་བདག་པོ་སྟོང་པར་རིགས་མཐུན་ལས་ལོག་སྟེ། རང་བཞིན་དག་པས་ནམ་མཁའ་ཁ་དོག་དང་བཅས་པ། དབྱིབས་དང་བག་རྡུལ་དང་བཅས་པ་འདི་མ་ཡིན་ནོ། །ཀྱེ་སེམས་དཔའ་ཆེན་པོ། རིགས་མི་མཐུན་པ་ལས་ཀྱང་ལོག་སྟེ། རིག་པ་དང་རིགས་མི་མཐུན་པས་བེམ་པོ་མིན། སྟོང་པ་དང་ནི་རིགས་མི་མཐུན་པས། ཕྱི་ནང་གཉིས་ཀྱི་འབྱུང་བ་བཞི་ལས་གྲུབ་ཅིང་བསྐྱེད་པའི་དངོས་པོ་མེད་དོ། །རིགས་ཀྱི་བུ་དོན་ཆེན་པོ་དེས་ན། གཉིས་ཀ་ལས་ཀྱང་ལྡོག་པ་ཤེས་པར་བྱའོ། །གཉིས་ཀ་མ་ཡིན་པའི་དངོས་པོར་འཛིན་པ་དང་བྲལ་བའོ། །ཞེས་གསུངས་སོ། །སྤྲོས་ ― DNG001_Page_0011 ―
[མ་དཔེ་གཟིགས་ན་འདིར་གནོན།]
བྲལ་དོན་གསལ་ཆེན་པོའི་རྒྱུད་ལས། གཞིའི་བྱེ་བྲག་བཤད་པའི་ལེའུ་སྟེ་ལྔ་པའོ།། །།དེ་ནས་ཡང་མཚོན་པ་དཔེའི་དགོངས་པ་ལ་བཞུགས་སོ། །གསང་བའི་བདག་པོས་ཡང་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དེ་བཞིན་མཚོན་དཔེ་གསུང་དུ་གསོལ། །ཞེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། རྡོ་རྗེ་འཛིན་པ་ཁྱོད་ཉོན་ཅིག །ངས་གཞི་དང་གཞི་སྣང་ཆེན་པོ་དཔེ་དང་བརྡས་བཤད་པར་བྱའོ། །མི་གཡོ་བ་རྒྱ་མཚོའི་གཏིང་ལྟ་བུའོ། །སྟོང་པ་ཁྱབ་པ་དང་ཡངས་པ་ནམ་མཁའ་ལྟ་བུའོ། །དྲི་མ་མེད་པ་མན་ཤེལ་ལྟ་བུའོ། །དག་ཅིང་གསལ་ལ་མ་རེག་པ་མེ་ལོང་གི་གཟུགས་བརྙན་ལྟ་བུའོ། །སྣ་ཚོགས་སུ་སྣང་ཡང་དྲི་མས་མ་གོས་པ་པདྨ་ལྟ་བུའོ། །འགྱུར་བ་མེད་པ་གླང་པོའམ་རྡོ་རྗེ་ལྟ་བུའོ། །ཐམས་ཅད་འབྱུང་བས་ས་གཞི་ལྟ་བུའོ། །དངོས་སུ་མི་སྣང་ལ་བྱིན་རླབས་ལས་འབྱུང་བ་ཡིད་བཞིན་གྱི་ནོར་བུ་ལྟ་བུའོ། །རང་གི་ངོ་བོ་གསལ་ལ་མི་འགག་པ་ཉི་མའི་སྙིང་པོ་བཞིན་ནོ། །རྒྱུན་ཆད་མེད་པ་ཆུ་བོ་བཞིན་ནོ། །བརྟན་པ་རི་བོ་ལྟ་བུའོ། །གཅིག་དུ་མར་སྣང་བ་ཉི་ཟླ་བཞིན་ནོ། །གཅིག་ཀུན་ལ་ཁྱབ་པ་ཆུའི་ལྦུ་བ་ལ་བྱད་ཀྱི་གཟུགས་བརྙན་བཞིན་ནོ། །ཆོས་ཉིད་ལ་ཆོས་སྐུར་ཤར་བ་ནི་མེ་ལོང་ལ་ཉི་མ་ཤར་བ་བཞིན་ནོ། །ཆོས་ཉིད་ལ་ཆོས་སྐུས་ཁྱབ་པ་ནི་འོ་མ་དང་མར་བཞིན་ནོ། །ཆོས་ཉིད་ཀྱི་སྙིང་པོ་རིག་པར་གནས་པ་ནི་ནམ་མཁའ་དང་ཉི་མ་བཞིན་ནོ། །ཆོས་ཉིད་མི་རྟོག་པ་ལ་ཆོས་སྐུའི་རྩལ་གཅོད་པ་ནི་སྤུ་གྲིའི་ལྟག་པ་དང་སོ་བཞིན་ནོ། །མ་འདྲེས་པ་ལ་རྫོགས་པ་ནི་ཟ་འོག་གི་གུར་ཁྱིམ་དང་གཟུགས་བརྙན་བཞིན་ནོ། །སྣ་ཚོགས་སྣང་ལ་གཉིས་སུ་མེད་པ་ནི་ཤིང་གི་གྲིབ་མ་བཞིན་ནོ། །གཞི་ལས་རྩལ་འདུ་འཕྲོ་ནི་རྒྱ་མཚོ་ལ་ཆུ་བྲན་འདུ་བ་བཞིན་ནོ། །གཞི་ལ་སྐུ་གསུམ་རྫོགས་པ་ནི། ཉི་མའི་སྙིང་པོ་ལ་འོད་ཟེར་མ་འགགས་པ་བཞིན་ནོ། །ངོ་བོ་རང་བཞིན་ཐུགས་རྗེ་གསུམ་གྱི་དཔེ་ནི་རྨ་བྱའི་སྒོ་ངའམ་ཉི་མའམ་ནམ་མཁའི་སྤྲིན་དང་ཆར་བཞིན་ནོ། །ཡང་ན་མན་ཤེལ་བཞིན་ནོ། །འཁོར་འདས་གཉིས་སྐྱོན་ཡོན་དུ་ཤར་ཡང་ངོ་བོ་གཅིག་པ་ནི་ག་པུར་བཞིན་ནོ། །གནས་ལུགས་དང་སྣང་ཚུལ་ནི་མར་མེ་དང་མེ་ལོང་བཞིན་ནོ། །རིག་པ་དང་ཡེ་ཤེས་ཀྱི་དཔེ་ནི་གསེར་དང་སེར་པོ་བཞིན་ནོ། །སྐུ་གསུམ་ངོ་བོ་རང་ཉིད་ཡིན་ ― DNG001_Page_0012 ―
[མ་དཔེ་གཟིགས་ན་འདིར་གནོན།]
ཡང་ངོ་མ་ཤེས་པ་རྒྱལ་བུ་དམངས་སུ་འཁྱམས་པ་བཞིན་ནོ། །རྒྱུ་རྐྱེན་གང་གིས་མ་བྱས་པ་བར་སྣང་འདུས་མ་བྱས་པ་ལྟ་བུའོ། །རང་གི་ངོ་བོ་དུས་གསུམ་དུ་འགྱུར་པ་མེད་པས་གསེར་ལྟ་བུའོ། །མིང་གང་དུ་ཡང་མ་ཐོགས་པས་རྒྱུས་མེད་ཀྱི་ཡུལ་དུ་ཕྱིན་པ་ལྟ་བུའོ། །དགོས་འདོད་རང་ལ་ཡོད་ཀྱང་སྤྱད་པར་མ་ཕན་པ་གྱད་ཀྱི་ནོར་བུ་ལྟ་བུའོ། །གཞི་སྣང་ཆེན་པོའི་དཔེ་ལ་ཨ་ཞེས་ཟེར་རོ། །དཔེའི་དོན་རྟགས་པ་འབྱོར་པས། དཔེ་ཨོཾ་གྱི་སྒྲ་དེ་བཞིན་རྗེས་འཇུག་རྣམས་ཀྱིས་ལེགས་པར་དགོངས། འབོད་སྐདཐབས་གསུམ་དོན་གྱི་ཁྲིགས་སྡེབ་ལ། གར་བྱུང་དཔེ་དང་དོན་དུ་འབྱོར་བར་ངེས། དཔེ་ཁ་གཅིག་ནི་ཀུན་ཏུ་རྒྱུག་པར་བྱའོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གཞི་མཚོན་པའི་དཔེ་བསྟན་པའི་ལེའུ་སྟེ་དྲུག་པའོ།། །།དེ་ནས་ཡང་བཅོམ་ལྡན་འདས་རྡོ་རྗེ་འཆང་ཆེན་པོ་ཚིག་དོན་གསལ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དེ་ཡི་བརྗོད་ཚིག་ངོས་བཟུང་གསུང་དུ་གསོལ། །ཞེས་ཞུས་སོ། །ཡང་སྟོན་པས་གསུངས་པ། ངས་བསྟན་རྒྱུད་ལུང་ཐམས་ཅད་ནས། །གཞི་ཡི་ཚིག་ཚོགས་མང་གིས་ཀྱང་། །མདོར་བསྡུས་ངས་བཤད་ཁྱོད་ཀྱིས་ཉོན། །འཁོར་འདས་ཀྱི་ཆོས་ཐམས་ཅད་ཀྱི་ངོ་བོར་གྱུར་པས་ན། ངོ་བོ་ཉིད་ཀྱི་སྐུའོ། །དེ་རང་སྣང་ཡིན་པས་ན། ངོ་བོ་ཉིད་ཀྱི་སྣང་བའོ། །དེ་ཡང་རང་གདངས་ཆེན་པོ་མི་འགག་པས་སྣང་བ་ཆེན་པོའོ། །འཁོར་འདས་ཀྱི་ཐ་སྙད་ལས་གྲོལ་བས་ཆོས་ཀྱི་སྐུའོ། །ཡོན་ཏན་དུས་ཕྱིས་འབྲས་བུ་ཆོས་སྐུར་གསལ་བས། འབྲས་བུའི་མིང་རྒྱུ་ལ་བཏགས་པས་ཆོས་ཀྱི་སྐུའོ། །མ་རིག་པ་དང་བེམ་པོ་ལས་ལོག་སྟེ། ཡང་དག་པའི་ཤེས་པའི་ངོ་བོར་གནས་པ་ནི་རིག་པའོ། །རྒྱུ་རྐྱེན་ལས་འདས་པས་རང་བྱུང་ངོ་། །གློ་བུར་དུ་བྱུང་བ་མིན་ཏེ། ཡེ་ནས་གནས་པའི་རིག་པའི་བདག་ཉིད་དུ་གྱུར་པས་ན་ཡེ་ཤེས་སོ། །རང་སྣང་ལས་གཞན་སྣང་མེད་ཅིང་ངོ་བོ་མི་འགྱུར་བས་ན། སྣང་བ་རང་སྣང་ཆེན་པོར་གསལ་བའི་ཐིག་ལེ་ཉག་གཅིག་གོ། །དེའི་གོང་ན་གཞན་མེད་པས་ཆེན་པོའོ། །དེ་བས་སྔ་བ་གཞན་མེད་པས་སྔོན་བྱུང་ངོ་། །ཐམས་ཅད་དེ་ལས་ཤར་ཅིང་སྣང་བས་ཀུན་བྱེད་དོ། །འཁོར་འདས་ཐམས་ཅད་དེ་ལས་སྣང་བས་ ― DNG001_Page_0013 ―
[མ་དཔེ་གཟིགས་ན་འདིར་གནོན།]
གཞིའོ། །ངོ་བོ་གསལ་ལ་མི་འགག་པས་ཟང་ཐལ་ཏེ། སྒྲིབ་པ་མེད་པས་ཀུན་གཞི་མེ་ལོང་ལྟ་བུའོ། །ཡེ་ཤེས་ཡུལ་ཆོས་ཉིད་སྟོང་པ་དང་། རིག་པ་འདུས་མ་བྱས་སྟོང་པ་དང་། སྟོང་པ་དབྱེར་མེད་གསལ་བ་ཟང་ཐལ་གྱི་ངང་ན་སྐུ་གཉིས་ནང་གསལ་དུ་བཞུགས་ཤིང་འདུ་འབྲལ་མེད་དེ། དོན་དབྱེར་མི་ཕྱེད་པ་རྡོ་རྗེ་འཆང་ངོ་། །སྐུ་ལྔ་ངོ་བོ་ཉིད་དང་དྲུག །ཡེ་ཤེས་ལྔ་མི་གནས་པའི་ཡེ་ཤེས་དང་དྲུག །ཡུལ་ལྔ་བདག་ཏུ་མེད་པའི་ཀློང་དང་དྲུག །རིགས་ལྔ་ཨའི་རིགས་དང་དྲུག །འོད་ལྔ་རང་བཞིན་གྱི་འོད་དང་དྲུག །འབྱུང་བ་ལྔ་རང་བྱུང་གི་འབྱུང་བ་དང་དྲུག །ཡུལ་ལྔ་དབྱིངས་ཀྱི་ཡུལ་དང་དྲུག །ཉོན་མོངས་པ་ལྔ་ཁོང་ཁྲོ་བ་དང་དྲུག །འགྲོ་བ་རིགས་དྲུག་རྣམས་དོན་གཉིས་སུ་མེད་པར་བཞུགས་ཤིང་ཕྱིས་ཡོན་ཏན་དུ་མི་འགག་པས་དྲུག་པ་རྡོ་རྗེ་འཆང་ངོ་། །གཟུགས་སྐུའི་སངས་རྒྱས་གྲངས་ལས་འདས་པས། ཐམས་ཅད་དེའི་དོན་རྟོགས་པ་ལས་ཤར་ཅིང་བྱུང་བས་ན། སངས་རྒྱས་ཐམས་ཅད་ཀྱི་མེས་པོའོ། །རང་གི་ངོ་བོ་དྲི་མ་མེད་ཅིང་ཡེ་ཤེས་ཀྱི་རང་གདངས་ཆེན་པོ་མི་འགག་པར་གསལ་བས། དེ་ཀུན་གྱི་གོང་དུ་གྱུར་པ་དང་། རིག་པ་རང་ཆས་སུ་མི་འགྱུར་བས་ཐོག་མའི་སངས་རྒྱས་འོད་མི་འགྱུར་བའོ། །ཡོན་ཏན་གྱི་བྱེ་བྲག་ཅིར་ཡང་སྣང་བ་ལས། རང་གི་ངོ་བོ་ལ་དབྱེར་མེད་པས་ཐམས་ཅད་གཉིས་མེད་ཆེན་པོར་རོ་གཅིག་པས་ཀུན་ཏུ་བཟང་པོའོ། །ཆོས་ཉིད་གསལ་བའི་རང་གདངས་ལ། །ཡེ་ཤེས་དག་པའི་ཟེར་མདངས་ཤར། །འགག་མེད་འོད་ཀྱི་གཞལ་ཡས་ཁང་། །སྙིང་པོ་སྐུ་ལྔ་ནང་ན་གསལ་བས་ན། གཞོན་ནུའི་སྐུའོ། །བགྲེས་པ་མི་མངའ་བས་གཞོན་པའོ། །རིག་པ་དང་ཡེ་ཤེས་འདུ་འབྲལ་མེད་པས། ཐབས་འགག་པ་མེད་པའི་ཡེ་ཤེས་དང་། ཤེས་རབ་འགྱུར་བ་མེད་པས་ཡེ་ཤེས་སོ། །ཆོས་ཉིད་ཀྱི་ཀློང་དུ་རིག་པ་གྲུབ་ཅིང་རིག་པའི་ཀློང་དུ་ཡེ་ཤེས་ཀྱི་རང་གདངས་ལྔ་གྲུབ་སྟེ། འོད་ཀྱི་སྦུབས་ན་སྐུ་ལྔ་གྲུབ་པས། རང་བཞིན་ལྷུན་གྱིས་གྲུབ་པའི་སངས་རྒྱས་སོ། །ངོ་བོ་ཉིད་ཀྱི་སྐུ་དབྱེར་མི་ཕྱེད་པའི་ངང་ནས། རང་བཞིན་འོད་ཀྱི་བུམ་པ་ལྔ་གསལ་སྟེ། ཐུགས་རྗེའི་སྙིང་པོ་སྐུ་ལྔ་ཕྱག་རྒྱ་མ་སྐྱེས་པའི་ཚུལ་དུ་གནས་པས་ན་ངོ་བོ་རང་བཞིན་ཐུགས་རྗེ་གསུམ་མ། ཞེས་རྡོ་རྗེ་འཛིན་པས་ལེགས་པར་ཟུང་ཞིག ། ― DNG001_Page_0014 ―
[མ་དཔེ་གཟིགས་ན་འདིར་གནོན།]
གཞན་ཐམས་ཅད་ཐ་སྙད་ཡིན་ལ། ཡང་དག་པའི་དོན་དེ་ལྟར་གསལ་བས་ན། དང་པོའི་གནས་ལུགས་སོ། །རང་བྱུང་གི་ཡེ་ཤེས་ཡིན་པས་ན། དང་པོའི་སངས་རྒྱས་རྒྱུ་མེད་པ། སངས་རྒྱས་ཐོག་མཐའ་མེད་པའོ། །གཟིགས་སྣང་ལས་འདས་པའི་གསལ་བ་མི་འགག་པས་ཡེ་ཤེས་ཀྱི་མིག་གོ། །གཉིས་སུ་སྣང་བས་རྟག་ཆད་དང་ཡོད་མེད་ཆེ་ཆུང་མཐོ་དམན་དང་། ཡངས་དོག་གཟུང་འཛིན་དགག་བསྒྲུབ་དང་། དག་དང་མ་དག་ཕྱི་ནང་ཡང་དོག་དང་། བླང་དོར་ཡིན་མིན་གཉིས་ཀྱི་ཆོས། དེ་བཞིན་དུ་གཉིས་སྣང་མེད་པས་གཉིས་མེད་དོ། །མི་མཐུན་པའི་སྣང་བ་མེད་པས་གཅིག་གོ། །སྒྲིབ་པ་མེད་པས་ཟང་ཐལ་ལོ། །འཁོར་འདས་ཐམས་ཅད་དེ་ལས་འབྱུང་ཞིང་ཐུག་པས་ན་རྩ་བའོ། །བརྗོད་མེད་བསམ་གྱིས་མི་ཁྱབ་ཀྱང་། དོན་ཡང་དག་པ་དེ་ལས་མི་འདའ་བས་ན་བརྗོད་པ་ཞེས་བྱའོ། །མ་བཅོས་པར་ངང་གིས་གནས་པས་གཤིས་སོ། །ཐམས་ཅད་དེ་ལས་བྱུང་བས་རྒྱུའོ། །གཞི་ཆེན་པོ་དེ་ལས་ཐམས་ཅད་བསྐྱེད་ཅིང་འདྲེལ་པས་ས་བོན་ནོ། །ཀ་དག་པའི་ཡེ་ཤེས་ཡིན་ཏེ། དྲི་མ་མི་གནས་པས་རྣམ་པར་དག་པའོ། །འཁོར་འདས་ཐམས་ཅད་དེ་ལས་འབྱུང་བས་ན་རིན་པོ་ཆེའོ། །རིགས་ཀྱི་བུ་གཞན་ཡང་འདི་ལྟ་སྟེ། སྣ་ཚོགས་སུ་སྣང་ཞིང་ཤར་ཡང་ངོ་བོ་མི་རྟོག་པས་འབྱེད་པ་མེད་པའི་ཤེས་རབ་བོ། །རང་གི་ངོ་བོ་རིག་པ་དངོས་མེད་ཡེ་ཤེས་ཡེ་དག་ཟང་ཐལ་དུ་གནས་ལ། དེ་རྡོས་པ་ཅན་གྱི་ཆོས་མིན་པས། ཡོན་ཏན་གྱི་སྒོ་ཡངས་པ་ནི་ཆོས་ཐམས་ཅད་ཀྱི་འབྱུང་གནས་ཏེ། ངོ་བོ་རྒྱ་མ་ཆད་པའོ། །ཀྱེ་རྡོ་རྗེ་འཛིན་པ་ངས་བསྟན་རྒྱུད་ལུང་དུ། ཚིག་དེ་རྣམས་གང་བྱུང་ཡང་། གཞི་མཚོན་པའི་ཚིག་ཏུ་ཤེས་པར་གྱིས་ཤིག །ངོ་བོ་ཉིད་ཀྱི་སྐུ་ཞེས་པ་ནས་རྒྱ་མ་ཆད་དོ། །ཞེས་པ་ཡན་ཆད་དུ་བསྟན་པའི་ཚིག་འདི་རྣམས་ངས་འདིར་བསྟན་ཅིང་བཤད་པ་བཞིན་དུ། རྒྱུད་ལུང་ཐམས་ཅད་དུ་ཤེས་པར་གྱིས་ཤིག །གཞན་ཡང་འབོད་སྐད་ཐབས་གསུམ་དང་སྦྱར་ལ། གཞི་མཚོན་པའི་ཚིག་ཏུ་འགྲོ་བ་ལ་འབྱུང་བ་ན་དེ་དང་མཐུན་པར་འབྲུ་མནན་ནོ། །ཞེས་གསུངས་ནས། ཆོས་ཉིད་མཚོན་པའི་ཚིག་བཀའ་སྩལ་པ། ཀྱེ་གསང་བདག་སྣང་བ་ཆེན་པོ་ཟེར་ན། སྣང་བ་ནི་ཡུལ་འགག་པ་མེད་པར་གྱིས་ཤིག །ཆེན་པོ་ནི་སྣང་བ་དེ་མ་བྱས་པ་དང་། དེའི་གོང་ན་གཞན་མེད་པ་དང་། ― DNG001_Page_0015 ―
[མ་དཔེ་གཟིགས་ན་འདིར་གནོན།]
སྣང་བ་གཞན་ལས་འཕགས་པར་ཤེས་པར་བྱའོ། །རང་སྣང་ཟེར་ན་གཞན་མི་སྣང་སྟེ་གཟུང་འཛིན་དང་བྲལ་བའོ། །སྣང་བ་རྣམ་པར་དག་པ་ཟེར་ན། སྣང་བ་ལ་དུ་མ་མེད་པར་ཤེས་པར་བྱའོ། །ཆོས་ཉིད་ཟེར་ན་ཡུལ་འགྱུར་བ་མེད་པའོ། །དབྱིངས་ཟེར་ན་ཡུལ་སྤྲོས་པ་དང་བྲལ་བའོ། །ཀློང་ཟེར་ན་ཡངས་པ་ཆེན་པོ་ཆ་ཤས་དང་བྲལ་བའོ། །སྟོང་པ་འགྱུར་བ་མེད་པར་ཤེས་པར་བྱའོ། །ཡུལ་ཟེར་ན་བཞུགས་པའི་གནས་དང་དེའི་སྣང་བ་ལ་ཤེས་པར་བྱའོ། །སྟོང་པ་ཟེར་ན་མཚན་མ་ལས་འདས་ཏེ་དངོས་པོ་མེད་པའོ། །ཡངས་པ་ཟེར་ན་གང་ལ་ཡང་དོག་པ་མི་མངའ་སྟེ། དེ་ཉིད་ཀྱི་ཁྱད་པར་དང་དེ་ལས་སྣང་བ་དུ་མ་མི་འགག་པར་འཆར་བའི་རྟེན་དུ་ཤེས་པར་བྱའོ། །དབྱིངས་རྣམ་པར་དག་པ་ནི། སྙིགས་མའི་འབྱུང་བ་མ་གྲུབ་པས་བག་རྡུལ་མེད་ཅིང་ཡེ་ཤེས་ཀྱི་གདངས་འཆར་ནུས་པ་ལ་བྱའོ། །པདྨ་བདེ་གསལ་ཟེར་ན། དྲི་མ་མེད་པའི་སྣང་བ་ལ་གནོད་པ་མི་སྐྱེལ་སྟེ། རང་གསལ་འཛིན་མེད་དུ་ཤེས་པར་བྱའོ། །སྤྲོས་བྲལ་གྱི་དབྱིངས་ཟེར་ན་འབྱུང་བ་བཞིའི་མཚན་མ་དང་བྲལ་བའོ། །འགྱུར་མེད་ཀྱི་ཀློང་ཟེར་ན་ཆོས་ཉིད་ལ་ཁ་གཏིང་མེད་པའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གཞི་དངོས་པོའི་གནས་ལུགས་དང་སྣངཚུལ་མཚོན་པའི་ཚིག་ངོས་བཟུང་བའི་ལེའུ་སྟེ་བདུན་པའོ།། །།གསང་བའི་བདག་པོས་ཡང་ཞུས་པ། །ཀྱེ་ཀྱེ་རྡོ་རྗེ་འཆང་ཆེན་པོ། །གཞི་ཉིད་རྒྱས་པར་བཤད་པ་དེ་ལགས་ན། །གཞི་ཉིད་བསྡུས་ནས་བཤད་པ་དང་། །དེ་དོན་ངོས་བཟུང་བསྟན་པ་དང་། །དེ་ལ་འཁྲུལ་རྟོག་འཆར་ལུགས་དང་། །ཡར་ལ་ཇི་ལྟར་གྲོལ་ལུགས་དང་། །གྲོལ་ནས་ཐིམ་དུས་བཤད་པར་ཞུ། །དེ་སྐད་ཅེས་ནི་ཞུས་པ་དང་། །རྡོ་རྗེ་འཆང་གིས་བཀའ་སྩལ་པ། །དང་པོ་གཞི་ཡི་བསྡུས་དོན་ནི། །གཞི་ཉིད་མ་བཅོས་མ་བསླད་པ། །རིག་པ་གསལ་བས་ནམ་མཁའ་ལྟ་བུར་མེད། །དངོས་པོར་མ་གྲུབ་བེམ་པོ་མེད། །རིག་པ་གསལ་སྟོང་གཉིས་མེད་ཟང་ཐལ་ཡིན། །རིག་པ་རླུང་བཞིན་འགྱུ་ཞིང་སྤྱོད་པར་ནུས། །རྟག་ཆད་ལ་སོགས་མཐའ་བརྒྱད་དག་དང་བྲལ། །རྟོགས་དང་མ་རྟོགས་ཤན་མ་ཕྱེད། །རིག་དང་མ་རིག་ཡེངས་དང་མ་ཡེངས་དང་། ཡིན་མིན་གང་ ― DNG001_Page_0016 ―
[མ་དཔེ་གཟིགས་ན་འདིར་གནོན།]
གི་འཛིན་པ་མ་ཞུགས་སྟེ། །གོང་གི་མིང་དང་བརྡའ་རུ་བཏགས་པ་མེད། །ཤེས་རིག་ཙམ་དུ་ཡོད་ཀྱང་དེར་མ་ཤེས། །ཐམས་ཅད་ལྷུན་གྱིས་གྲུབ་ཀྱང་འབྱུང་མ་ནུས། །གཞི་ཡི་ངོ་བོ་རང་བྱུང་སྟོང་གསལ་དག་ཏུ་ངེས་པ་ལ། །ངེས་པའི་ཤེས་པ་ཤར་དང་མ་ཤར་གཉིས་མ་ཕྱེ། །རྩལ་ནི་མ་ངེས་གང་འགྱུ་ངེས་པ་མེད། །དཔེར་ན་ནོར་བུ་རིན་ཆེན་ཡོན་ཏན་ལྷུན་གྲུབ་སྟེ། །བསོད་ནམས་ཆེ་ཆུང་གཉིས་ཀྱི་རྐྱེན་གྱིས་ནི། །དགོས་པ་བཟང་སྣང་ངན་སྣང་ངེས་པ་མེད། །དེ་ལྟ་བུ་ཡི་གཞི་དེ་ནི། །ཐ་མལ་རང་རྒྱུད་ད་ལྟའི་ཤེས་པ་ལ། །ངོ་ཡིས་ཙིར་གྱིས་བཟུང་བར་ང་ཡིས་བསྟན། །དེ་ལྟར་གཞི་ཉིད་ངེས་པར་ཤེས་གྱུར་ན། །ལྟ་སྒོམ་སྤྱོད་འབྲས་ངེས་པ་དུས་གཅིག་འཆར། །ཀུན་ལ་སྤེལ་བའི་སྣོད་མི་ལྡན། །ཐེག་པ་གཞན་དུ་དེ་ལྟར་བསྟན་པ་མེད། །གཞི་ཡི་ངོ་བོ་མ་བཅོས་མ་བསླད་ཅིང་། །སོ་མ་རང་བྱུང་དངོས་པོའི་གནས་ལུགས་ལས། །རང་རྩལ་མི་འགགས་དང་པོ་གཞི་རུ་འཆར། །དང་པོ་གཞི་ལས་རྩལ་དེ་གཡོ་ཙམ་འབྱུང་། །གཡོ་མི་གཡོ་ལས་ཡིད་ཙམ་གཡོས། །དེ་ལས་ཤེས་པ་རྩལ་འགྱུས་པ། །རང་གཟུགས་འོད་དུ་སྣང་བ་མཐོང་། །ཚོར་བས་ཡར་ཆད་མར་ཆད་བྱུང་། །ཡར་ཆད་རང་སྣང་འཛིན་མེད་ཀྱིས། །རྡོ་རྗེ་འཆང་ཆེན་ཡར་ལ་གྲོལ། །མར་ཆད་འཛིན་པ་བརྟས་པ་ཡིས། །འགྲོ་དྲུག་སེམས་ཅན་མར་ལ་འཁྲུལ། །འཁྲུལ་པ་རྟོག་པའི་བྱེ་བྲག་རྣམས། །རྒྱས་པར་འོག་ནས་གསལ་བར་བསྟན། །སྣང་བ་རང་སྣང་འཛིན་མེད་མ་ཤེས་པས། །ལྷན་ཅིག་སྐྱེས་པའི་མ་རིག་པ་རུ་བྱུང་། །དེ་ལ་བརྟགས་པས་ཀུན་བརྟགས་མ་རིག་ཡིན། །དེ་ལྟར་རྒྱུ་གཉིས་རྐྱེན་ནི་བཞི་རུ་བྱུང་། །ཕྱི་ནང་སྣོད་བཅུད་དག་ཏུ་ནི། །ཡེ་ཤེས་དང་ནི་སེམས་ཅན་གཉིས་སུ་ཆགས། །ཆོས་ཀྱི་དབྱིངས་ལ་ཡེ་ཤེས་ལྔ་ལས་ནི། །མ་རིག་ཡེ་ཤེས་དུག་ལྔར་འཁྲུལ། །ཆོས་ཀྱི་སྐུ་ཡི་རྩལ་ལས་ལོངས་སྐུ་དེ་ལས་ལུས་སུ་འཁྲུལ། །དེ་གཉིས་ཚོགས་པའི་རྩལ་ལས་ནི། །སྤྲུལ་སྐུ་དེ་ལས་ངག་ཏུ་འཁྲུལ། །ཕྱི་ཡི་ཆོས་དབྱིངས་མ་ཤེས་པས། །འགྲོ་བ་རིགས་དྲུག་སྣང་བར་ཤར། །དེ་ལྟར་འཁྲུལ་པས་ཁམས་གསུམ་སེམས་ཅན་ལ། །སྐུ་གསུམ་ཡེ་ཤེས་རྣམ་ལྔ་ལྷུན་གྱིས་གྲུབ། ། ― DNG001_Page_0017 ―
[མ་དཔེ་གཟིགས་ན་འདིར་གནོན།]
བག་ཆགས་སྦུབས་ན་སྐུ་གསུམ་གནས་པ་ལ། །བླ་མའི་གདམས་ངག་རྐྱེན་གྱིས་རྟོགས་པར་བྱ། །རྟོགས་པ་གོམས་ནས་དག་པའི་སྣང་བ་འཆར། །ཟག་བཅས་ལུས་དང་བྲལ་ན་རིན་ཆེན་སྦུབས་འཆར་ཏེ། །ལོངས་སྐུའི་འགྲོ་དོན་བྱས་ནས་ཆོས་སྐུར་གསལ། །དེ་ལས་སྐུ་གསུམ་ལྷུན་གྱིས་འགྲུབ། །རྒྱས་པར་འོག་ནས་འབྱུང་བས་ཤེས་པར་གྱིས། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གཞི་བསྡུས་ཏེ་བསྟན་པ་དང་ངོས་བཟུང་བའི་ལེའུ་སྟེ་བརྒྱད་པའོ།། །།ཤེལ་གྱི་ཟ་མ་ཏོག་གིས་མ་ཐུབ་པར་གཡུའི་མཎྜལ་ལས་མཆོད་རྟེན་གྱི་གདངས་ཕྱི་རུ་ཕྱུང་བ་སྟེ། གཞིའི་མན་ངག་ལྷ་ཚོགས་ལྔ་ཤར་བའི་མན་ངག །ཨ་བྷིད་ཏ་ད་ཀ་ན་པཉྩ་པྲ་པ་རཱ་པྲ་ར་ཀ་ལ་དྷཱ་ཏུ་ཨ་ཧ་ར། དེའི་ཚེ་སྟོན་པ་རྡོ་རྗེ་འཆང་ཆེན་པོ། །ཡེ་ཤེས་གསལ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཡང་དེའི་ཚེ་གསང་བའི་བདག་པོས་ཞུས་པ། །གོང་གསུངས་གཞི་སྣང་ཆེན་པོ་དེ། །གློ་བུར་མ་ཡིན་ཡེ་ཤེས་དེ། །ད་ལྟ་མ་འོངས་རྗེས་འཇུག་ལ། །ཡེ་ཤེས་དོན་རྣམས་གསུང་དུ་གསོལ། །ཞེས་ཞུས་སོ། །སྟོན་པ་ཡེ་ཤེས་གསལ་བའི་དགོངས་པ་ལས་བཞེངས་ནས་བཀའ་སྩལ་པ། རིགས་ཀྱི་བུ་ཉོན་ཅིག །ངས་ཡེ་ཤེས་ཀྱི་དོན་མདོར་བསྡུས་པ་བསྟན་ནོ། །ཡེ་ཤེས་ཀྱི་ངོ་བོ་དང་། ཡེ་ཤེས་ཀྱི་ངེས་ཚིག་དང་། དབྱེ་བ་རྣམ་གྲངས་དང་བཅས་པ་དང་། མཚོན་དཔེ་དང་སྦྱར་ལ་བཤད་དེ། ཡེ་ཤེས་ཀྱི་ངོ་བོ་ནི་གསལ་ལ་མི་རྟོག་པའོ། །དེ་ཡང་རང་བཞིན་རྣམ་པར་དག་པ་གཞི་གནས་ཀྱི་ཡེ་ཤེས་དངོས་མེད་ཟང་ཐལ་ལོ། །སྐུ་དང་སྦྱར་ན་ཆོས་སྐུའོ། །རིག་པ་དང་སྦྱར་ན་ངོ་བོའོ། །རིགས་ཀྱི་བུ་འདུག་ཚུལ་འོད་དུ་གནས་པས། སྐུ་དང་སྦྱར་ན་གཟུགས་ཀྱི་སྐུའོ། །ཡེ་ཤེས་དང་སྦྱར་ན་མཚན་ཉིད་འཛིན་པའི་ཡེ་ཤེས་ལྔའོ། །སྣང་ཚུལ་ཕྱི་ནང་མེད་པར་སྣང་བས་སྒྲིབ་མེད་དུ་གསལ་བའི་ཡེ་ཤེས་སོ། །དེ་ཡང་རང་བཞིན་རྣམ་པར་དག་པས་རྟག་པའི་མཐའ་ལས་འདས། འདུག་ཚུལ་འོད་དུ་འདུག་པས་ཆད་པའི་མཐའ་ལས་འདས། སྣང་ཚུལ་ཕྱི་ནང་མེད་པས་གཟུང་འཛིན་གྱི་མཐའ་རྣམ་པར་དག་པ་ནི་ཡེ་ཤེས་ཀྱི་ངོ་བོའོ། །ངེས་ཚིག་ནི་ཡེ་ནས་ཡིན་པའི་དོན་དེ་མ་ནོར་བར་ཤེས་པས་ཡེ་ཤེས་སོ། །དབྱེ་བ་ ― DNG001_Page_0018 ―
[མ་དཔེ་གཟིགས་ན་འདིར་གནོན།]
རྣམ་གྲངས་དང་བཅས་པ་ནི་རིག་པ་དངོས་མེད་ཡེ་དག་ཟང་ཐལ་ཆེན་པོ་དེ་ལས། འཁོར་འདས་ཐམས་ཅད་སྣང་བས་ན་གཞི་གནས་ཀྱི་ཡེ་ཤེས་སོ། །དེ་སྟོང་པར་གནས་པས་ན་ཆོས་ཀྱི་དབྱིངས་ཀྱི་ཡེ་ཤེས་སོ། །སྟོང་བ་དེ་རིག་པ་འགག་པ་མེད་པར་འདུག་པས་མེ་ལོང་ཡེ་ཤེས་སོ། །སྟོང་པ་དེ་ཉིད་རིག་པ་ཡིན་ལ་རིག་པ་དེ་ཉིད་སྟོང་པ་ཡིན་ཏེ། སྟོང་རིག་དབྱེར་མི་ཕྱེད་པས་མཉམ་པ་ཉིད་ཀྱི་ཡེ་ཤེས་སོ། །སྟོང་པ་དང་རིག་པ་གཉིས་སུ་མེད་པ་སོ་སོར་མཁྱེན་པས་སོ་སོར་རྟོགས་པའི་ཡེ་ཤེས་སོ། །རིག་པ་དངོས་མེད་ཀྱི་ཡེ་ཤེས་རྡོས་པ་ཅན་གྱི་ཆོས་མ་ཡིན་པས་ཡོན་ཏན་གྱི་སྒོ་ཡངས་པ་སྟེ། རྩལ་ཕྱོགས་མེད་དུ་གང་ལའང་མ་ཐོགས་པར་འབྱུང་བས་བྱ་བ་གྲུབ་པའི་ཡེ་ཤེས་སོ། །དེ་ལྟར་ཚིག་ཕྱོགས་རེ་ནས་བཏགས་ཀྱང་། དོན་ཕྱོགས་ཆ་དང་བཅས་པ་མི་སྣང་བས་མི་གནས་པའི་ཡེ་ཤེས་སོ། །ཀྱེ་ཧོ་རིགས་ཀྱི་བུ་དེ་ལྟར་ཤེས་པ་ནི། རང་གིས་རང་རིག་པས་རིག་པའི་ཡེ་ཤེས་སོ། །དེ་ལ་བྱེད་པ་པོ་མེད་པས་རང་བྱུང་གི་ཡེ་ཤེས་སོ། །དེའི་དོན་ལས་མི་འདའ་བས་ན། འདའ་ཀ་ཐུགས་ཀྱི་ཡེ་ཤེས་སོ། །དཔེ་བསྟན་ན་གཞི་གནས་ཀྱི་ཡེ་ཤེས་ཀྱི་དཔེ་ནི། ཐམས་ཅད་འབྱུང་བས་ས་གཞི་རིན་པོ་ཆེ་ལྟ་བུའོ། །ཆོས་ཀྱི་དབྱིངས་ཀྱི་ཡེ་ཤེས་ནི་ནམ་མཁའ་ལྟ་བུའོ། །མེ་ལོང་ཡེ་ཤེས་ཀྱི་དཔེ་ཆུ་དྭངས་པའམ་མེ་ལོང་གཡའ་དག་པ་ལྟ་བུའོ། །མཉམ་པ་ཉིད་ཀྱི་ཡེ་ཤེས་ཀྱིས་ནི་དུས་གསུམ་མཉམ་པ་ཉིད་ཀྱི་དཔེ་ཆུ་བོ་ལྟ་བུའོ། །གཉིས་སུ་མེད་པའི་ཡེ་ཤེས་ཀྱི་དཔེ་ནི། གསེར་དང་སེར་པོ་ལྟ་བུའོ། །སོ་སོར་རྟོག་པའི་ཡེ་ཤེས་ཀྱི་དཔེ་ནི། རྒྱ་མཚོར་གཟའ་སྐར་ཤར་བ་ལྟ་བུའོ། །བྱ་བ་གྲུབ་པའི་ཡེ་ཤེས་ཀྱི་དཔེ་ནི། །རླུང་དང་ཉི་མ་བཞིན་ནོ། །མི་གནས་པའི་ཡེ་ཤེས་ཀྱི་དཔེ་ནི་ཆུ་ཟླ་བཞིན་ནོ། །རང་རིག་པའི་ཡེ་ཤེས་ཀྱི་དཔེ་ནི་མན་ཤེལ་དང་འོད་བཞིན་ནོ། །རང་བྱུང་ཡེ་ཤེས་ཀྱི་དཔེ་ནི་རྡོ་རྗེ་ལྟ་བུའོ། །འདའ་ཀ་ཐུགས་ཀྱི་ཡེ་ཤེས་ཀྱི་དཔེ་ནི། རྒྱལ་པོའི་བཀའ་ཁྲིམས་ལ་གནས་པའི་ཕྱག་རྒྱ་མོ་ལ་མི་ཡིས་གླགས་མི་འཚོལ་བ་བཞིན་ནོ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ཡེ་ཤེས་ཡོངས་སུ་ངོས་བཟུང་བ་བསྟནཔའི་ལེའུ་སྟེ་དགུ་པའོ།། །།དེ་ནས་ཡང་སྟོན་པས་བཀའ་སྩལ་ ― DNG001_Page_0019 ―
[མ་དཔེ་གཟིགས་ན་འདིར་གནོན།]
པ། ངས་བསྟན་པ་ཡི་རྒྱུད་ལུང་དག་ནས། ཐམས་ཅད་འབྱུང་བར་སྨྲ་ན། གཞི་གནས་ཀྱི་ཡེ་ཤེས་ཡིན། དངོས་མེད་སྟོང་པར་བརྗོད་ན་ཆོས་ཀྱི་དབྱིངས་ཀྱི་ཡེ་ཤེས་ཡིན། འགགས་པ་མེད་པར་བརྗོད་ན། མེ་ལོང་ལྟ་བུའི་ཡེ་ཤེས་ཡིན། གཉིས་སུ་མེད་པར་བརྗོད་ན། མཉམ་པ་ཉིད་ཀྱི་ཡེ་ཤེས་ཡིན། མ་འདྲེས་ཡོངས་སུ་རྫོགས་པར་བརྗོད་ན། སོ་སོར་རྟོགས་པའི་ཡེ་ཤེས་ཡིན། གང་ལ་ཐོགས་པ་མེད་པར་བརྗོད་ན། བྱ་བ་གྲུབ་པའི་ཡེ་ཤེས་ཡིན། མཐའ་དང་བྲལ་བར་བརྗོད་པ་ན། །མི་གནས་པ་ཡི་ཡེ་ཤེས་ཡིན། །རིག་པ་འོད་གསལ་བརྗོད་པ་དང་། །རང་རིག་ཞེས་སུ་བརྗོད་པ་ན། །རིག་པའི་ཡེ་ཤེས་ཆེན་པོ་ཡིན། །འགྱུར་བ་མེད་དང་འདུས་མ་བྱས། །རྡོ་རྗེ་ལྟ་བུའི་ཚིག་བརྗོད་ན། །རང་བྱུང་ཡེ་ཤེས་ཆེན་པོར་བཤད། །འདའ་རུ་མེད་པ་དང་འདའ་མི་སྲིད་པ་དང་མི་འདའ་བ་ནི་འདའ་ཀ་ཐུགས་སུ་འབྲུ་རྣམས་མནན། ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ཡེ་ཤེས་མཚོན་པའི་ཚིག་བསྟན་པའི་ལེའུ་སྟེ་བཅུ་པའོ།། །།ཉི་མའི་སྙིང་པོ་ལ་འོད་ཟེར་མི་འགག་པའི་མན་ངག །ཛྙཱ་ན་ཨཱ་ཤ་ཏ་རཏྣ། ཀཱ་ལ་པྲ་ས་ཧ་དུ། བཅོམ་ལྡན་འདས་ཐུགས་རྗེ་རྩལ་གྱི་དགོངས་པ་ལ་ཞུགས་སོ། །ཡང་གསང་བའི་བདག་པོས་དགོངས་པ་མཁྱེན་ནས་ཞུས་པ། ཆོས་སྐུ་གཅིག་ལ་ཐ་དད་སྣང་། །རིག་པའི་རྩལ་དེ་ཤར་ལུགས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རིག་པ་དངོས་མེད་ཟང་ཐལ་ལ། །སྟོང་པ་མི་འགག་དབྱེར་མི་ཕྱེད། །དེང་ཤེས་ཐོགས་པ་མེད་པ་ནི། །ཡེ་ཤེས་ལྔ་རུ་རང་ཤར་བའོ། །ཆོས་དབྱིངས་འོད་ཀྱི་ཡེ་ཤེས་རང་གདངས་ལས། །སྟོང་པའི་ངང་ནས་མཐིང་ག་གསལ། །མེ་ལོང་ཡེ་ཤེས་རང་གདངས་ནི། །འགགས་མེད་ངང་ནས་དཀར་པོ་གསལ། །མཉམ་ཉིད་ཡེ་ཤེས་རང་གདངས་ནི། །དབྱེར་མེད་ངང་ནས་སེར་པོར་གསལ། །ཀུན་རྟོགས་ཡེ་ཤེས་རང་གདངས་ནི། །དེ་ཤེས་ངང་ནས་དམར་པོར་གསལ། །བྱ་གྲུབ་ཡེ་ཤེས་རང་གདངས་ནི། །ཐོགས་མེད་ཀློང་ནས་ལྗང་གུར་གསལ། །དེ་ལྔ་ཆོས་ཉིད་ཀློང་དུ་ཤར། །ཡེ་ཤེས་འོད་དུ་ཤར་ཅེས་བྱ། །རྟོགས་པས་སྐུ་དང་ཡེ་ཤེས་སྣང་། །མ་རྟོགས་སྣོད་བཅུད་གཉིས་སུ་ཤར། །དཔེར་ན་མེ་ལོང་དག་པ་ལ། །གང་འཕྲད་རྐྱེན་ ― DNG001_Page_0020 ―
[མ་དཔེ་གཟིགས་ན་འདིར་གནོན།]
གྱིས་སྣང་མོད་ཀྱང་། །སྣང་བའི་དུས་ནས་གོས་པ་མེད། །གོས་པ་མེད་ཀྱང་དེ་ལྟར་སྣང་། །དེ་བཞིན་རིག་པ་ཆོས་སྐུ་ལ། །ཡོན་ཏན་མ་འགགས་སྣ་ཚོགས་ཤར། །ཤར་ཀྱང་རང་རིག་གཅིག་པུར་གསལ། །གཅིག་པུར་གནས་ལ་དུ་མ་མེད། །དུས་དང་གནས་སྐབས་ཐམས་ཅད་དུ། །དངོས་མེད་དག་པ་ཆེན་པོར་གནས། །སྒྲིབ་མེད་གསལ་བ་ཟང་ཐལ་གནས། །གཟུགས་སྐུ་གཉིས་ཀྱི་སྣང་བ་ཡང་། །རང་ལ་མི་སྣང་རྣམ་པར་དག །ཅེསགསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། རིག་པའི་རྩལ་འབྱུང་བ་དང་། རྩལ་རྣམ་པར་དག་པ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ཡང་གསང་བའི་བདག་པོས་ཞུས་པ། དེས་མཚོན་ཚིག་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ངས་བསྟན་རྒྱུད་ལུང་ཐམས་ཅད་དུ། །རྩལ་ཞེས་བྱུང་ན་འདི་སྐད་བཤད། །རིག་པའི་རྩལ་ནི་ཡེ་ཤེས་ལྔ། །དེ་ཡི་རྩལ་ནི་འོད་ཟེར་ལྔ། །འོད་ལྔའི་རྩལ་ནི་འབྱུང་བ་ལྔ། །ནམ་མཁའི་རྩལ་ནི་སྤྲིན་དང་ཁུ་རླུང་གིས་གོ་འབྱེད། །རླུང་གི་རྩལ་འུར་སྒྲ་དང་བསྐྱོད་པའོ། །ཆུ་ལས་ཤྭ་སྒྲ་དང་རླན་ཅིང་སྡུད་པའོ། །ས་ལས་གཟུགས་དང་སྣང་རྟེན་བྱེད་པའོ། །མེ་ལས་ཚ་བ་དང་བསྲེག་པ་སྨིན་པའོ། །འོད་དཀར་པོ་ལས་ཤ་དང་རུས་པ། འོད་སེར་པོ་ལས་མཁྲིས་པ་དང་ཆུ་སེར། འོད་དམར་པོ་ལས་ཁྲག་དང་དྲོད། འོད་ལྗང་གུ་ལས་དབུགས། འོད་མཐིང་ག་ལས་ལུས་ཀྱི་སྐབས་འབྱེད་པའོ། །འབྱུང་བ་ལྔའི་རྩལ་ནི་སོ་སོར་ཤར། །ཕྱི་ནང་གཉིས་སུ་བསྟན་པ་ཡིན། ཐིག་ལེ་ཕྱི་ནང་རྩལ་ཞེས་བྱ། །དེ་ལྟར་སྣང་ནུས་སྟོབས་སུ་བཤད། དེ་ལྟར་འབྱུང་བས་རང་བྱུང་ངོ་། །གཞན་ལས་མ་བྱུང་རང་ལས་རང་བྱུང་བས། །ཡོན་ཏན་འབྱུང་བས་རང་བྱུང་ཡིན། །དེ་ལྟར་ཤར་བས་རང་ཤར་ཡིན། །ཡོན་ཏན་ཞེས་བྱ་དེ་ལ་བྱ། །ཐམས་ཅད་འབྱུང་དང་ཀུན་འབྱུང་དང་། །མང་པོ་རགས་པ་འབྱུང་བ་རྣམས། །རིག་པར་ཤར་བས་རང་ཤར་ཡིན། །སྐུ་ལྔ་རང་སྣང་ཡུལ་ལྔར་སྣང་། །དེ་བཞིན་སེམས་དཔའ་སེམས་མར་སྣང་། །དེ་བཞིན་ཐུགས་རྗེའི་མཛད་སྤྱོད་སྣང་། །དེ་མཚུངས་སྣང་བ་སྣ་ཚོགས་སྣང་། །སྒྱུ་མ་ལྟ་བུར་གསུངས་པ་ ― DNG001_Page_0021 ―
[མ་དཔེ་གཟིགས་ན་འདིར་གནོན།]
དང་། །སྣང་ལ་རང་བཞིན་མེད་པ་དང་། །གསལ་ལ་རྟོག་པ་མེད་པའོ། །ཞེས་བྱུང་ན། རྩལ་ལ་རང་བཞིན་མེད་པར་བཤད། ཐམས་ཅད་རང་སྣང་རང་ཤར་ཡིན། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། རིག་པའི་རྩལ་འབྱུང་བ་དང་། དེ་མཚོན་པའི་ཚིག་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། སྟོན་པ་ཐུགས་རྗེ་ཆེ་མངའ་བ། །རྩལ་གྱི་ངོ་བོ་ཇི་ལྟར་ལགས། །དེའི་ངེས་ཚིག་དབྱེ་བ་ཇི་ལྟར་ལགས། །དེ་ཡི་མཚོན་དཔེ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། ངོ་བོ་ནི་མ་འགགས་པའོ། །རྩལ་གྱི་ངེས་ཚིག་ནི། འབྱུང་བའི་སྟོབས་དང་ལྡན་པས་ན་རྩལ་ལོ། །དབྱེ་བ་ནི་རིག་པ་འཁོར་འདས་གཉིས་སུ་སྣང་བའོ། །དཔེར་ན་ཉི་མ་གཅིག་དུ་མར་སྣང་བའམ། ཉི་མ་ལ་འོད་དང་འོད་ཟེར་མི་འགག་པའམ། བཙན་དུག་གམ། ག་བུར་རམ་གློག་འགྱུས་པ་ལྟ་བུའོ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། རྩལ་བསྡུས་ནས་བསྟན་པའི་ལེའུ་སྟེ་བཅུ་གསུམ་པའོ།། །།གསེར་གྱི་སོར་གདུབ་ལ་གཡུའི་ཕྲ་བཅུག་པའི་མན་ངག །དྲཱུ་ཨ་ཏྲ་ཨཱན་ཀྵ་ལ་ཨ་ཧྃ། དེ་ནས་བཅོམ་ལྡན་འདས་ཆོས་ཉིད་ཀྱི་རྒྱན་མ་འགགས་པར་རོལ་པའི་ཏིང་ངེ་འཛིན་ལ་སྙོམས་པར་ཞུགས་སོ། །ཡང་དེའི་ཚེ། གསང་བའི་བདག་པོས་ཞུས་པ། ཀྱེ་ཀྱེ་སྟོན་པ་ཀུན་བཟང་རྡོ་རྗེ་འཆང་། །སྣ་ཚོགས་རྩལ་དུ་སྣང་བ་དེ། །རྒྱན་དང་རོལ་པ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྒྱན་གྱི་ངོ་བོ་ངེས་ཚིག་དང་། །དབྱེ་བ་མཐུན་པའི་སྒོ་ནས་བསྟན། །རོལ་པ་ལ་ཡང་དེ་བཞིན་བསྟན། །ངོ་བོ་དབྱེ་བའི་སྒོ་ནས་བསྟན། །ངེས་ཚིག་མཛེས་པས་རྒྱན་ཞེས་བྱ། །དབྱེ་ན། ཆོས་ཉིད་རྒྱན་ནི་སྐུ་གསུམ་ཡིན། །ཆོས་སྐུའི་རྒྱན་ནི་སྐུ་གཉིས་ཡིན། །མཚན་ཉིད་མཚོན་པའི་ཡེ་ཤེས་ལྔ། །གཉིས་ཀའི་རྒྱན་དུ་དེ་བཞིན་བརྗོད། །མཚོན་དཔེ་གསེར་ལ་གཡུས་སྤྲས་འདྲ། །ངེས་ཚིག་དོན་གྱི་དབྱེ་བ་ནི། །ཆོས་ཉིད་དག་ལ་ཆོས་སྐུས་བརྒྱན་པ་ནི། །སྟོང་ལ་ཕྱང་ཆད་གསལ་བས་མཛེས། །ཆོས་ཀྱི་སྐུ་ལ་ཡེ་ཤེས་བརྒྱན། །ཡོན་ཏན་འགག་པ་མེད་པར་མཛེས། །ཡེ་ཤེས་གསལ་ལ་ཐུགས་ ― DNG001_Page_0022 ―
[མ་དཔེ་གཟིགས་ན་འདིར་གནོན།]
རྗེས་བརྒྱན། །འགྲོ་དྲུག་རང་སར་འདྲེན་པས་མཛེས། །དེ་ཕྱིར་མཛེས་པས་རྒྱན་ཞེས་བྱ། །དེ་ནས་རོལ་པའི་དོན་བསྟན་པ། །མ་འགགས་གཉིས་མེད་སྦྱོར་བ་ནི། །རོལ་པའི་ངོ་བོ་ཡིན་པར་བསྟན། །ཅི་ཕྱིར་རོལ་པར་བཏགས་ཤེ་ན། །རང་ལས་ཤར་ཞིང་རང་ལས་གྲོལ། །ངེས་ཚིག་གཏན་ཚིགས་བཅས་པ་ཡིན། །དབྱེ་ན་རྣམ་པ་གཉིས་ཡིན་ཏེ། །དག་པ་ཆོས་ཉིད་རོལ་པ་དང་། །འཁོར་བ་རང་རྒྱུད་རོལ་པའོ། །དག་པ་ཆོས་ཉིད་རོལ་པ་ནི། །མ་བཅོས་པ་ཡི་ཆོས་ཉིད་དང་། །མ་གཡོས་པ་ཡི་ངང་ཉིད་ལས། །རང་བཞིན་འགག་པ་མེད་པར་ཤར། །བག་དང་བྲལ་བའི་ནམ་མཁའ་ལ། །འབྱུང་བ་བཞི་ཡི་གདངས་ཤར་བཞིན། །སྣང་ལ་རང་བཞིན་མེད་པར་ཤེས། །མ་འགགས་རང་གདངས་ཆེན་པོར་གསལ། །འཁོར་བ་རང་རྒྱུད་རོལ་པ་ནི། །ཕྱི་ནང་སྣོད་བཅུད་བསྡུས་པའི་ཆོས། །གཟུགས་སུ་སྣང་བ་སྐུ་ཡིན་ཏེ། །ཆུ་ཟླ་ལྟ་བུར་གཟུང་དུ་མེད། །སྒྲ་སྐད་ཐམས་ཅད་གསུང་ཡིན་ཏེ། །བྲག་ཆ་བཞིན་དུ་རང་བཞིན་མེད། །དྲན་དང་རྟོག་པ་ཐུགས་ཡིན་ཏེ། །ཆུ་ལ་རི་མོ་བྲིས་པ་བཞིན། །འཛིན་པ་རང་རྒྱུད་ཡོད་མ་ཡིན། །དེ་ལྟར་གཟུགས་སྣང་ཐམས་ཅད་སྐུ་ཡི་རོལ་པ་ཡིན། །སྒྲ་སྐད་ཐམས་ཅད་གསུང་གི་རོལ་པ་ཡིན། །དྲན་རྟོག་ཐམས་ཅད་ཐུགས་ཀྱི་རོལ་པ་ཡིན། །དེ་ལྟར་མ་ཤེས་མཚན་མ་རང་རྒྱུད་འཛིན། །དེ་ནི་འཁོར་བའི་རོལ་པ་ཡིན། །གང་ཞིག་རྣལ་འབྱོར་རྟོགས་ལྡན་ལ། །རྒྱན་དང་རོལ་པ་སྣ་ཚོགས་ཀུན། །སྒྱུ་མའི་དཔེ་བཞིན་སྣང་ཡང་རང་བཞིན་མེད། །ཆོས་ཉིད་ཆོས་སྐུ་མི་སྣང་རང་བཞིན་ཡོད། །ཡོད་པས་མེད་པར་རྟོགས་པས་མཚན་མཟིལ་གྱིས་གནོན། །མེད་པས་ཡོད་པར་རྟོགས་པས་རིག་པ་རང་ས་ཟིན། །དེ་ཡི་ཆེད་དུ་རྒྱན་ཏིཀ་བཀོད་པ་བཞི་ལྡན་མཛེས། །ཀྱེ་ཀྱེ་གསང་བའི་བདག་པོ་རྒྱན་དང་རོལ་པ་གར་བྱུང་ཡང་། །ངས་དོན་གསལ་འདིར་སྨྲས་པ་བཞིན་དུ་ཤེས་པར་གྱིས། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། རྒྱན་དང་རོལ་པ་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དེས་མཚོན་ཚིག་རྣམས་གསུང་དུ་ ― DNG001_Page_0023 ―
[མ་དཔེ་གཟིགས་ན་འདིར་གནོན།]
གསོལ། །ཞེས་ཞུས་སོ། །སྟོན་པས་བཀའ་སྩལ་པ། ངས་བསྟན་རྒྱུད་ལུང་ཐམས་ཅད་དུ། །ཆོས་ཉིད་ངང་ལ་ཆོས་སྐུ་གནས། །དེ་སྐད་བརྗོད་པའི་ཚིག་བྱུང་ན། །ཆོས་ཉིད་ལ་ཆོས་སྐུ་རྒྱས་པར་བཤད། །རིག་པའི་མཚན་ཉིད་ལྔར་བཅད་ཅིང་། །དེ་ལྔ་ཡེ་ཤེས་ལྔ་ཡི་མཚན་ཉིད་དང་། །དེ་ཡི་གདངས་སུ་བརྗོད་པས་ན། །ཆོས་ཀྱི་སྐུ་ལ་ཡེ་ཤེས་བརྒྱན་པར་བཤད། །ཡེ་ཤེས་འོད་ལྔ་སྐུ་རུ་རྫོགས་ལུགས་དང་། །རིགས་དང་ཁ་དོག་དབྱིབས་བརྗོད་པ། །ཡེ་ཤེས་དག་ལ་ཐུགས་རྗེས་བརྒྱན་པར་བཤད། །རྩལ་དང་རོལ་པ་རྒྱན་དང་མཛད་སྤྱོད་དང་། །རིམ་པར་བཀོད་དང་དུ་མར་སྣང་། །པདྨ་ཅན་དང་མཛེས་དང་སྡུག །མ་འགགས་ཤར་དང་ཐུགས་དང་སྟོབས། །སྣང་སྲིད་རྒྱན་དུ་བཀོད་པ་དང་། །ལུང་རྣམས་རྒྱན་དུ་བཀོད་པ་དང་། །མན་ངག་རྒྱན་དུ་བཀོད་པ་དང་། །འགྲོ་དྲུག་རྒྱན་དུ་བཀོད་པ་དང་། །དེ་རྣམས་བརྗོད་པའི་ཚིག་ཏུ་མང་ཡང་བསྡུས་པ་ཡིན། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། རྒྱན་དང་རོལ་པའི་ཚིག་མདོར་བསྡུས་ནས་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། དེ་མཚོན་དཔེ་རྣམས་ཇི་ལྟར་ལགས། །ཐབས་ལ་མཁས་པས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ནམ་མཁའི་དཀྱིལ་ན་ཉི་ཟླ་གསལ་བར་གནས་པ་དང་གཅིག །རིན་ཆེན་གསེར་ལ་གཡུའི་ཕྲ་བཅུག་པ་དང་གཉིས། །ཆོས་ཉིད་ཆོས་སྐུས་བརྒྱན་པའི་དཔེ་རུ་བསྟན། རྨ་བྱའི་སྒོ་ང་ཁ་དོག་ལྔ་ལྡན་དང་། །མན་ཤེལ་སྐུ་ལྔ་འོད་ལྔ་མི་འགག་པས། །ཆོས་ཀྱི་སྐུ་ལ་ཡེ་ཤེས་བརྒྱན་པའི་དཔེ། །མན་ཤེལ་རྐྱེན་འཕྲད་སྣང་བ་ཕྱིར་འབྱུང་དང་། །སྒོ་ངའི་བྱིའུ་ཕྲུག་སྨིན་ཏེ་ཕྱིར་འབྱུང་བྱ་བ་བྱེད། །ཉི་མའི་སྙིང་པོ་འོད་དང་ཟེར་འབྱུང་བ། །ཡེ་ཤེས་དག་ལ་ཐུགས་རྗེས་བརྒྱན་པའི་དཔེ། །རྒྱ་མཚོར་ཆུ་བྲན་འཕྲོ་ཞིང་འདུ་བ་དང་། །སྒྱུ་མའི་སྦྱོར་བས་གཟུགས་བརྙན་སྣ་ཚོགས་སྣང་། །ཡོན་ཏན་མ་འགགས་རོལ་པ་ཅིར་ཡང་འབྱུང་། །དེ་ཡིས་དཔེ་རྣམས་མང་ཡང་བསྡུས་པ་ཡིན། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། རྒྱན་དང་རོལ་པ་མཚོན་པའི་དཔེ་བསྟན་པའི་ལེའུ་སྟེ་བཅུ་དྲུག་པའོ།། །།ཡུལ་ཡངས་པ་ཆེན་པོ་པདྨ་བདེ་གསལ་གྱི་གྲོང་ཁྱེར་བྱ་བ་ན། ― DNG001_Page_0024 ―
[མ་དཔེ་གཟིགས་ན་འདིར་གནོན།]
རྒྱལ་པོ་ནོར་བུ་འོད་ལྡན་ཞེས་བྱ་བ་བཞུགས་པས། ཁོང་ལ་ནོར་བུ་རིན་པོ་ཆེའི་ཟ་མ་ཏོག་ཆེན་པོ་གཅིག་རིན་པོ་ཆེ་ཕྲ་མོ་མང་པོས་བཀང་ནས་ཡོད་པ་ལ་ཁོང་ཕྱི་རོལ་དུ་ཞབས་འཆག་ཅིང་ཡུལ་གཟིགས་སུ་བྱོན་པ་ལས། རྒན་མོ་ལིང་ཏོག་ཅན་བྱ་བ་དང་འཕྲད་ནས། རྒན་མོས་སླའོ་ལ་བྲིད། རྐུན་མོ་མི་ལྔས་བར་དུ་ཟ་མ་ཏོག་བརྐུས། སྨེ་ཤ་ཅན་གྱི་གྲོང་ཁྱེར་དྲུག་ཏུ་མུན་པའི་མི་དྲུག་ལ་བཙོངས། མུན་པའི་མི་དྲུག་གིས་ནོར་བུ་ལ་མཆོད་པ་དང་བཀུར་སྡི་ཆག །ནོར་བུ་ལ་ཡང་དགོས་འདོད་མ་བྱུང་། ཁོང་ཡང་ཡིད་ཅུང་ཐེ་ཙོམ་ཟོས་སོ། །ཕྱིས་རྒྱལ་པོ་ལ་ལྡམ་པོ་གཅིག་བྱུང་། རྒན་མོས་སླའོ་ལ་བྲིད། རྐུན་མ་མི་ལྔས་བརྐུས། སྨེ་ཤ་ཅན་གྱི་གྲོང་ཁྱེར་དྲུག་ཏུ་མུན་པའི་མི་དྲུག་ལ་བཙོངས་སོ་བྱས་པས། རྒྱལ་པོ་ཐུགས་ནུར་ཏེ། རྒན་མོ་བསད། གྲོང་ཁྱེར་དྲུག་བཅོམས། མུན་པའི་མི་དྲུག་ལ་ཆབ་བསལ། རྐུན་མོ་ལྔ་བྲན་དུ་བཀོལ། ནོར་བུ་རིན་པོ་ཆེ་དང་ཕྲད་ནས་ཡུལ་བཟུང་བའི་མན་ངག །བཛྲ་ཨ་ཧཾ་རཏྞ། ཛྙཱ་ན་པཉྩ་པྲ་པ་ར་ཨ་ཧཾ་བྷུ་ཏི། དེ་ནས་ཡང་བཅོམ་ལྡན་འདས་སྣང་བ་རྣམ་པར་བཀོད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེའི་ཚེ་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གོང་གསུངས་རྩལ་དང་རོལ་པ་དེ། །མ་རྟོགས་གཟུང་འཛིན་འཁྲུལ་པར་སྣང་། །འཁོར་བ་རང་རྒྱུད་རོལ་པར་བྱུང་། །དེ་ཡི་འཁྲུལ་ལུགས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རིགས་ཀྱི་བུ་ལེགས་པར་ཉོན་ཅིག །གཞི་འགྱུར་བ་མེད་པར་ཡེ་ནས་སངས་རྒྱས་པ། བཅོམ་ལྡན་འདས་རྡོ་རྗེ་འཆང་ཆེན་པོ་ཡིན་པས། སྔར་ཡང་འཁྲུལ་མ་མྱོང་། ད་ལྟ་ཡང་མ་འཁྲུལ། ཕྱིས་ཀྱང་འཁྲུལ་མི་སྲིད་དོ། །དཔེར་ན་ཉི་མའི་སྙིང་པོ་དེ་ལ། མུན་པའི་གཞི་མེད་པ་ལྟ་བུའམ། མན་ཤེལ་ལ་རྐྱེན་དང་གང་འཕྲད་དེ་ལ་སྣང་ཡང་། དག་པའི་སྟོབས་ཀྱིས་སྣང་མོད་ཀྱི། །ཁོ་ལ་འབྱར་དང་གོས་པ་མེད། །དེ་བཞིན་དུ་ཕྱོགས་སུ་ལྷུང་བ་མེད་པའི་ཤེས་རབ་ནི། མགོན་པོ་གཞི་ནས་རྫོགས་སངས་རྒྱས། །བག་ཆགས་འཁྲུལ་པ་ཀ་ནས་དག །མ་འཁྲུལ་པ་ཡི་སངས་རྒྱས་ལ། །འཁྲུལ་པའི་ཐ་སྙད་ག་ལ་ཡོད། །འོན་ཀྱང་དེ་ལྟར་མ་རྟོགས་ཏེ། །ཉི་མ་གཅིག་ལས་མེད་བཞིན་དུ། །ཡུལ་ཁམས་རེ་ན་ཉི་མ་རེ། ། ― DNG001_Page_0025 ―
[མ་དཔེ་གཟིགས་ན་འདིར་གནོན།]
མཐོང་བའི་སྟོབས་ཀྱིས་སྣང་བ་ལྟར། །རང་རིག་གཅིག་ལས་མེད་བཞིན་དུ། །འཁོར་འདས་གཉིས་ལ་དུ་མར་སྣང་། །སྨན་དུག་ག་བུར་དབྱེར་མེད་ཀྱང་། །སྨན་དང་དུག་ཏུ་སྣང་བ་བཞིན། །གཉིས་མེད་གཞི་སྣང་ཆེན་པོ་དེ། །གཉིས་མེད་ངང་ལས་མ་གཡོས་ཀྱང་། །ཡོན་ཏན་སྟོབས་ཀྱིས་སྣང་བའོ། །དུ་མར་སྣང་བའི་ཡོན་ཏན་ལ། །འཁྲུལ་པར་འགྱུར་བས་ཡོན་ཏན་སྐྱོན་དུ་འཆར། །གོང་ལྟར་རྟོགས་པས་སྐྱོན་ཉིད་ཡོན་ཏན་གྲོལ། །འོན་ཀྱང་འཁྲུལ་ལུགས་རྒྱས་པར་ངས་བསྟན་གྱིས། །འཁྲུལ་པའི་གཞི་དང་རྒྱུ་དང་དུས། །འཁྲུལ་པའི་རྐྱེན་དང་འཁྲུལ་པ་དངོས། །འབྲིང་པོ་རྣམས་ལ་ངས་བསྟན་ཉོན། །དང་པོ་འཁྲུལ་པའི་གཞི་བསྟན་པ། །དེ་ལ་ཡང་ནི་རྣམ་པ་གསུམ། །ཆོས་ཉིད་ཡུལ་གྱི་འཁྲུལ་གཞི་དང་། །རིག་པ་སེམས་ཀྱི་འཁྲུལ་གཞི་དང་། །འོད་ལྔ་ལུས་ཀྱི་འཁྲུལ་གཞི་བསྟན། །དང་པོ་ཆོས་ཉིད་རིས་མེད་སྟོང་། །བར་དུ་ཡེ་ཤེས་རྣམ་པར་ཤར། །ཐ་མར་འཛིན་རྟོག་བག་ཆགས་བརྟས། །དེ་ལ་སྙིང་པོ་མེད་བཞིན་སྣང་། །དེས་ནི་ཡུལ་གྱི་འཁྲུལ་གཞི་བསྟན། །ད་ནི་སེམས་ཀྱི་འཁྲུལ་གཞི་བཤད། །དང་པོ་རིག་པ་འགག་མེད་འགྱུས། །བར་དུ་གདངས་ལ་འཛིན་པ་སྐྱེས། །ཐ་མར་སེམས་ཀྱི་ཡིད་འགྱུས་པ། །དེ་ལས་སེམས་རྟོག་དུ་མ་ཤར། །སེམས་ཀྱི་འཁྲུལ་གཞི་དེར་བསྟན་ཏོ། །འདིས་ནི་ལུས་ཀྱི་འཁྲུལ་གཞི་བསྟན། །དང་པོ་རིག་པ་ཀློང་ནས་ཤར། །བར་དུ་ཆོས་ཉིད་ཀློང་དུ་ཤར། །ཐ་མ་དེ་ལ་བག་ཆགས་པས། །གཟུགས་ཀྱི་ཕུང་པོ་རྡོས་བཅས་སྣང་། །ལུས་ཀྱི་འཁྲུལ་གཞི་དེས་བསྟན་ཏོ། །ཀྱེ་ཀྱེ་གསང་བདག་ངེས་པར་ཟུང་། །གཞི་གསུམ་འཐད་པ་ངས་བཤད་ཀྱི། །ཆོས་ཉིད་ཡུལ་གྱི་འཁྲུལ་གཞི་འཐད། །ཅི་ཕྱིར་རིག་མེད་དེ་ལ་བེམ་པོར་སྣང་། །རིག་པ་སེམས་ཀྱི་འཁྲུལ་གཞིར་འཐད། །ཅི་ཕྱིར་རིག་ཙམ་ཕྱོགས་མཐུན་ཕྱིར། །འོད་ལྔ་ལུས་ཀྱི་འཁྲུལ་གཞིར་འཐད། །ཁ་དོག་དབྱིབས་སུ་ཕྱོགས་མཐུན་ཕྱིར། །ཕྲ་དང་རགས་པའི་ཁྱད་པར་ལས། །གཞི་དང་དངོས་ཀྱི་ཁྱད་པར་བསྟན། །དེས་མཚོན་ཚིག་རྣམས་ངས་བཤད་ཉོན། །འཁྲུལ་པ་ཞེས་སུ་བཤད་པ་དང་། །རིག་པ་ཞེས་སུ་བརྗོད་པ་དང་། །འོད་ཟེར་ཞེས་སུ་བརྗོད་པ་དང་། །བསྐལ་པ་དང་པོར་བརྗོད་པ་དང་། །ཐོག་མ་ཞེས་སུ་བརྗོད་པ་དང་། །འདས་ ― DNG001_Page_0026 ―
[མ་དཔེ་གཟིགས་ན་འདིར་གནོན།]
དང་མ་འོངས་གོང་རོལ་ནས། །ཞེས་པ་དང་། ང་མེད་པ་ཡི་སྔོན་རོལ་ན། །སེམས་ཅན་བྱ་བ་གདོད་ནས་མེད། །སེམས་ཅན་མེད་པའི་སྔོན་རོལ་ནས། །འབྱུང་བ་ཆེན་པོ་ཡེ་ནས་འཕགས། །འབྱུང་བ་མེད་པའི་སྔོན་རོལ་ནས། །ནམ་མཁའ་ཆེན་པོ་ཡེ་ནས་འཕགས། །ནམ་མཁའ་མེད་པའི་སྔོན་རོལ་ནས། །ཆོས་ཉིད་རྣམ་དག་ཡེ་ནས་འཕགས། །ཆོས་ཉིད་རྣམ་དག་ཀློང་ཡངས་ནས། །ཆེན་པོ་ལྔ་ཉིད་ཡེ་ནས་རྣམ་པར་དག །ཆེན་པོ་ལྔ་ཡི་སྙིང་པོ་རུ། །ང་ཉིད་གཅིག་པུ་སྔོན་དུ་བྱུང་། །དེ་ཕྱིར་བསྐལ་པ་འབུམ་ཁྲི་འབུམ་སྟོང་སྔོན་རོལ་དུ། །ང་ཉིད་གཞན་པས་སྔ་བར་བྱུང་བའི་ཕྱིར། །ཞེས་ངས་བཤད་པ་རྣམས་ནི། འབོད་སྐད་ཀྱིས་སྡེབས་ལ་འཁྲུལ་གཞིར་འབྲུ་གནོན། རིགས་ཀྱི་བུ་ཞིབ་ཏུ་གཞི་སྣང་གི་སྐབས་སུ་བསྟན་པས་འདིར་མ་བརྗོད་དོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཡང་དག་པའི་གཞི་ལ་འཁྲུལ་པ་མེད་པར་བསྟན་པ་དང་། ཡོན་ཏན་གྱི་སྣང་བ་འཁྲུལ་པའི་གཞི་གསུམ་བསྟན་པའི་ལེའུ་སྟེ་བཅུབདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་སྟོན་པ་རྡོ་རྗེ་འཆང་། །འཁྲུལ་པའི་རྒྱུ་ནི་གང་གིས་བྱས། །འཁྲུལ་པའི་དུས་ཚོད་ཇི་ཙམ་ལགས། །ཞེས་ཞུས་སོ། །སྟོན་པས་གསུངས་པ། འཁྲུལ་པའི་རྒྱུ་ནི་མ་རིག་པ། །ལྷན་ཅིག་སྐྱེས་དང་ཀུན་ཏུ་བརྟགས་། །ངོ་བོ་ངེས་ཚིག་དབྱེ་བ་དང་། །མཐུན་པའི་ཚུལ་དུ་བརྗོད་ཚིག་བསྟན། །རིགས་ཀྱི་བུ་མ་རིག་པའི་ངོ་བོ་ནི། །གཏི་མུག་དང་དེ་མ་ཡིན་ལ་དེར་འཛིན་པའོ། །ངེས་ཚིག་དོན་ལ་རྨོངས་པའི་ཕྱིར་ན་མ་རིག་པའོ། །དབྱེ་བ་རྣམ་གཉིས་ཏེ། ལྷན་ཅིག་སྐྱེས་པའི་མ་རིག་པ་དང་། ཀུན་ཏུ་བརྟགས་པའི་མ་རིག་པའོ། །ལྷན་ཅིག་སྐྱེས་པའི་མ་རིག་པ་དེ་གང་ལས་གང་དུ་ལྷན་ཅིག་ཏུ་སྐྱེས་ནས་གང་གིས་གང་མ་རིག་ཅེ་ན། རིགས་ཀྱི་བུ་གང་ལས་ཞེ་ན། གཞི་འཛིན་པའི་རིག་པ་ལས་སོ། །གང་དང་གང་ཞེ་ན། ལྷན་ཅིག་སྐྱེས་པའི་ཡེ་ཤེས་དང་མ་རིག་པའོ། །གང་ཞེ་ན་བཅོས་པས་མ་བཅོས་པའི་ཆོས་ཉིད་ཀྱི་ཀློང་དུ་མ་རིག་པའོ། །གང་གིས་གང་མ་རིག་ཅེ་ན། རང་བཞིན་གྱི་འོད་བྱད་ལྟ་བུས་གཟུགས་བརྙན་གྱི་འོད་བྱད་ཀྱི་རྣམ་པ་མེ་ལོང་ལ་སྣང་བ་ལྟ་བུ་མ་རིག་པའོ། །དོན་དེས་ལྷན་ཅིག་སྐྱེས་པའི་ ― DNG001_Page_0027 ―
[མ་དཔེ་གཟིགས་ན་འདིར་གནོན།]
མ་རིག་པ་ཅེས་བྱའོ། །ཀུན་ཏུ་བརྟགས་པའི་མ་རིག་པ་ནི། ཡུལ་ལ་རྟོག་པ་ཕྲ་རགས་སུ་སྐྱེས་ཏེ། སྐད་ཅིག་མ་སྔ་ཕྱིའི་ཚུལ་ལོ། །དཔེ་རྒན་མོ་ལོང་མ་དང་འདྲའོ། །ཀྱེ་མ་རིགས་ཀྱི་བུ། མ་རིག་པ་དེ་ཡང་དག་པར་ཡོད་པ་མ་ཡིན། འོ་ན་ཇི་ལྟ་བུ་ཞེ་ན། ཐོ་ཡོར་རམ་ཐག་པ་ལ་མི་བདེན་པ་བཞིན་དུ་རྒྱུས་མེད་དམ་སྔར་སུན་པའི་མི་ལ་དགྲར་སྣང་བའམ། སྣང་བ་མ་དག་པ་ལས་ཐག་པ་ལ་སྦྲུལ་དུ་སྣང་བ་ལྟ་བུའོ། །དེ་ནི་ཡང་དག་པར་མེད་བཞིན་དུ་སྣང་། སྣང་བཞིན་དུ་སྟོང་པའོ། །རིགས་ཀྱི་བུ་དཔེ་དེ་བཞིན་དུ། མ་རིག་པ་དངོས་སུ་མེད་ལ་ཉམས་སུ་ཡོད་པའོ། །དེ་ཅི་ལས་བྱུང་ཞེ་ན། ལུས་ཀྱི་ཐ་མ་རྫོགས་པས་ཤེས་རབ་ཀྱི་རྩལ་མ་རྫོགས་ཏེ། ཤེས་རབ་ཀྱི་རྩལ་མ་རྫོགས་པས་མཐོང་བའི་ཡུལ་ཡེ་ཤེས་ཀྱི་རང་གདངས་ལྔ་ལ་ཤེས་པའི་དྲན་པ་མ་སད་དོ། །དེ་ཡང་མ་གཡོས་པའི་ངང་ཀུན་ཏུ་བཟང་པོ་ལས། ངང་གི་རང་བཞིན་ཡེ་ཤེས་ཀྱི་འབྱུང་བ་ཡུལ་མ་འགགས་པར་སྣང་བ་ལ། སྔར་མཐོང་མ་མྱོང་བ་དེ་ལས་ཡིད་འགྲོགས་ཏེ། རང་སྣང་ཆེན་པོར་རྟོགས་པའི་མཐའ་མ་ཆོད་དོ། །རིགས་ཀྱི་བུ་མ་རིག་པའི་གཏན་ཚིགས་སོ། །མ་རིག་པ་དང་། མ་ཤེས་པ་དང་། གཏི་མུག་དང་། མ་རྟོགས་པ་དང་། མ་གོམས་པ་དང་། དོན་མ་མཐོང་བས་འཁྲུལ་པ་དང་། ཕྱིན་ཅི་ལོག་པ་ལ་སོགས་པ་བྱུང་ཡང་མ་རིག་པ་གཉིས་སུ་བཤད། ཅེས་གསུངས་སོ། །ཀྱེ་གསང་བའི་བདག་པོ་འཁྲུལ་པའི་དུས་ནི་རང་གི་ལུས་ལས་ཤར་སྟེ་འཛིན་པ་སྐྱེ་བའི་དུས་སོ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། འཁྲུལ་པའི་རྒྱུ་དང་དུས་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །འཁྲུལ་པའི་རྐྱེན་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རིགས་ཀྱི་བུ་ངས་བཤད་ཁྱོད་ཀྱིས་ཡིད་ལ་ཟུང་། རྒྱུ་དང་རྒྱུ་ཡིས་རྐྱེན་དུ་བསྟན། །བདག་པོའི་རྐྱེན་དང་དམིགས་པའི་རྐྱེན། །མཚུངས་པའི་རྐྱེན་དང་དེ་བཞིའོ། །རྒྱུ་དང་རྒྱུ་ཡི་རྐྱེན་བཤད་པའོ། །རྒྱུ་ནི་རིག་པ་འགག་པ་མེད། །རྐྱེན་ནི་ཆོས་ཉིད་སྟོང་པ་ཡིན། །རིག་པ་ཆོས་སྐུའི་མཚན་ཉིད་ནི། །རིག་སྟོང་དབྱེར་མེད་ཤེས་རབ་ཐོགས་པ་མེད། །མཐིང་ག་དཀར་སེར་དམར་དང་ལྗང་ ― DNG001_Page_0028 ―
[མ་དཔེ་གཟིགས་ན་འདིར་གནོན།]
གུ་ཡིས། །སོ་སོའི་མཚན་ཉིད་འཛིན་ཅིང་རང་རང་རྒྱུར་གནས་པའི། །ཆོས་ཉིད་དག་པ་མེ་ལོང་ལྟ་བུར་ཤར། །ཡེ་ཤེས་འབྱུང་ལྡན་ནམ་མཁའི་གཞའ་ལྟར་ཡལ། །དེ་ཡི་སྐད་ཅིག་ཕྱི་མ་ལ། །དེ་ལས་དེ་བཞིན་བྱད་དང་གཟུགས་བརྙན་བཞིན། །རང་ལས་བྱུང་བའི་རྣམ་རྟོག་བདག་རྐྱེན་ཤར། །དེ་ཡི་སྐད་ཅིག་ཕྱི་མ་ལ། །དམིགས་པའི་རྣམ་པ་ཡུལ་དུ་སྣང་། །རྐྱེན་དུ་འཛིན་པའི་རྟོག་པ་བྱུང་། །དེ་ལ་དམིགས་པའི་རྐྱེན་ཞེས་བརྗོད། །དེ་རྣམས་མཚུངས་པས་འཁྲུལ་རྐྱེན་བྱས། །དེ་ལ་མཚུངས་པའི་རྐྱེན་ཞེས་བརྗོད། །དེ་དུས་གཟུང་འཛིན་རྣམ་རྟོག་གིས། །རང་བཞིན་འོད་ལྔ་གསལ་མ་ནུས། །གཟུགས་བརྙན་ལྔ་ལ་བག་ཆགས་པས། །མཚོ་ལ་དར་ཆགས་ཞོ་ལ་སྤྲིས་ཆགས་ལྟར། །གླིང་བཞི་རི་རབ་གླིང་ཕྲན་སྣང་། །དེ་ཡི་བཅུད་ལ་སྲིད་པའི་སྒོ་ང་དང་། །རྩི་ཤིང་སྨན་དང་མེ་ཏོག་ནགས་ཚལ་འཁྲུངས། །རླན་དང་དྲོད་ལས་སྐྱེས་པ་ཡིན། །དེ་ལྟར་བར་གྱི་བསྐལ་པ་ལས། །སྣོད་ཀྱི་འཇིག་རྟེན་ལོགས་སུ་བསྐལ། །ཤེས་པས་མ་བཟུང་རླན་དང་དྲོད་ལས་སྐྱེས། །མཆོག་ཏུ་པདྨའི་སྒོ་ང་གྲུབ། །ཨུ་དུམྺ་ར་དག་ལ་བརྟེན། །དྲི་མེད་ཡེ་ཤེས་བརྫུས་ནས་སྐྱེས། །འབྱུང་བ་ལྔ་ཡི་བདག་ཉིད་ཅན། །སྲིད་པའི་སྒོ་ང་མ་དག་སྟེ། །ཤེད་བུ་ཤེད་རིགས་དེ་ལས་སྐྱེས། །ཆགས་སྡང་གཉིས་ཀྱི་བདག་ཉིད་ཅན། །དེ་ནི་ལུས་ཀྱི་རྟེན་ཡིན་ནོ། །ཞེས་གསུངས་སོ། །རིགས་ཀྱི་བུ་དེ་ལ་མཚོན་པའི་ཚིག་བསྟན་པ། དང་པོ་གཞི་མཚོན་གོང་དུ་བྱུང་། །སངས་རྒྱས་སེམས་ཅན་འོག་ནས་འབྱུང་། །དེ་གཉིས་བར་དུ་རྩལ་འཕྲོ་བ། །བར་གྱི་བསྐལ་པར་བཤད་པ་ཡིན། །རང་གི་ས་ལ་གནས་པས་ན། །མི་བསྐྱོད་པ་ཞེས་དེ་ལ་བྱ། །དེ་མ་ཡིན་ལ་དེར་འཛིན་གྱིས། །འོད་ལྔ་འགྲིབ་ཅིང་རིག་པ་སྟོངས། །མི་བསྐྱོད་རྡོ་རྗེ་ཡིན་པར་བཤད། །འགྲོ་མ་ནུས་པས་འཕྱེ་བོ་ཡིན། །ངོ་བོ་གསལ་ལ་མི་འགོག་པ། །དངོས་སུ་གསལ་མ་ནུས་པ་ཡིན། །མི་གསལ་གསལ་བའི་བདག་ཉིད་ཅན། །གཞི་ལས་འཕགས་ཤིང་སེམས་ཅན་སངས་རྒྱས་དངོས་མ་ཡིན། །བར་ན་མྱུ་གུ་ཇི་བཞིན་ནོ། །མྱུ་གུ་འབྱུང་ཞེས་དེ་ལ་བྱ། །དེ་བཞིན་ངས་བསྟན་རྒྱུད་ལུང་དུ། །གང་བྱུང་དེ་བཞིན་ཤེས་པར་གྱིས། །ཞེས་གསུངས་ ― DNG001_Page_0029 ―
[མ་དཔེ་གཟིགས་ན་འདིར་གནོན།]
སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་བཤད་པའི་རྒྱུད་བཀླགས་པས་ཤེས་པ་ལས། འཁྲུལ་པའི་རྐྱེན་དང་བར་གྱི་བསྐལ་པ་ལ་ཡུལ་གྱི་འཁྲུལ་པ་ལུས་ཀྱི་རྐྱེན་དང་བཅས་པ་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་ཡང་གསང་བའི་བདག་པོས་ཞུས་པ། སྣོད་ཀྱི་འཇིག་རྟེན་དེ་ལྟར་ན། །བཅུད་ཀྱི་རིགས་དྲུག་ཇི་ལྟར་ཆགས། །ཞེས་ཞུས་སོ། །སྟོན་པས་བཀའ་སྩལ་པ། རིགས་ཀྱི་བུ་ངས་བསྟན་གྱིས་མ་ནོར་བར་ཟུང་ཞིག །ནམ་མཁའ་སྟོང་པ་ལ་ནི་རླུང་འགྱུ་བཞིན། །ཡིད་ཀྱི་གླང་ཆེན་རླུང་ཡང་ཀུན་ཏུ་རྒྱུག །སྤྱན་གྱི་སྦྱོར་བས་སྲིད་པའི་སྒོ་ང་མཐོང་། །ཐུགས་ཀྱི་སྦྱོར་བས་སྲིད་པའི་སྒོ་ང་ལེགས་ཤིང་མཛེས་པར་མཁྱེན། །ཞལ་གྱི་སྦྱོར་བས་དེ་ལ་ཆགས་སེམས་སྐྱེས། །རིག་པ་ཡིད་དང་བཅས་པ་ཞུགས། །སེམས་ཀྱི་རྩ་བ་ཕོ་མོ་གཉིས་སུ་སྨིན། །སྐྱེ་བ་བཞི་ལས་སྒོ་ང་ཡིན། །གཞི་ལ་ཆེན་པོ་ལྔ་ཡིས་ཕུང་པོ་ལྔ་གྲུབ་ཅིང་། །རྟེན་ལས་འབྱུང་བ་ལྔ་ཡི་ཆ་རྫོགས་པས། །ཕུང་པོ་ཁམས་དང་སྐྱེ་མཆེད་གྲུབ། །ཤེད་བུ་ཤེད་ལས་རབ་ཏུ་གྲགས། །དེ་ལས་མངལ་ལས་སྐྱེས་པ་བྱུང་། །མི་མཇེད་འཇིག་རྟེན་རིམ་པར་ཆགས། །ཉོན་མོངས་རགས་ཤིང་འབྲས་བུ་ངན། །མཐའ་མ་མནར་མེད་གནས་ལ་ཐུག །ཅེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ནང་བཅུད་ཀྱི་གྲུབ་ཚུལ་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་ཡང་གསུངས་པ། ཀྱེ་ཀྱེ་རྡོ་རྗེ་འཛིན་པ་ཁྱོད་ཉོན་ཅིག །ང་ཡིས་རྒྱུད་ལུང་ཐམས་ཅད་དུ། །བསྐལ་པ་ཐ་མའི་ཚིག་བརྗོད་པ། །ཚོགས་བརྒྱད་ལྡན་པའི་སེམས་ཅན་ཡིན། །རྒྱུ་བྱེད་སྦུབས་དང་དབུགས་ཀྱང་བཅས་པའི་རྟོགས་བྱེད་སེམས་སུ་བཤད། །མང་པོ་འདུས་པས་ཕུང་པོ་ཡིན། །འདུས་པའི་ཕྱིར་ན་དེ་བཞིན་ནོ། །ཁམས་ནི་མཚན་མའི་ཆོས་ཉིད་ཅན། །མཚན་མ་བསྐྱེད་ཕྱིར་སྐྱེ་མཆེད་ཡིན། །སོ་སོ་དག་གི་སྒོ་གསལ་ཞིང་། །རང་རང་ཡུལ་ལ་དབང་བྱེད་དབང་པོར་བསྟན། །གཟུགས་ནི་ཁ་དོག་དབྱིབས་སུ་བསྟན། །སྒྲ་ནི་རྣ་བའི་ཡུལ་དུ་བསྟན། །དྲི་ནི་སྣ་ཡི་ཡུལ་དུ་བསྟན། །རོ་ནི་ལྕེ་ཡི་ཡུལ་དུ་བསྟན། །རེག་ནི་ལུས་ཀྱི་ཡུལ་དུ་བསྟན། །དེ་ཡི་ཕྱིར་ན་དེ་སྐད་བཤད། །ཚོར་བ་དུ་མ་མྱོང་བ་ཡིན། །འདུ་ཤེས་ཡུལ་ལ་མཚན་མར་འཛིན། ། ― DNG001_Page_0030 ―
[མ་དཔེ་གཟིགས་ན་འདིར་གནོན།]
འདུ་བྱེད་སེམས་ལ་གཡོ་བར་བྱེད། །ཡིད་ལ་བྱེད་པ་དམིགས་པ་སྟེ། །རིག་པ་དག་གིས་གང་གཅོད་པའོ། །རྣམ་ཤེས་རྣམ་པར་རིག་པའོ། །ཐམས་ཅད་ཀུན་ལས་བྱེད་ཕྱིར་དང་། །རྒྱུ་རྐྱེན་ལས་བྱུང་འདུ་བྱེད་ཡིན། །རླན་ལས་སྐྱེས་པས་གློ་བུར་ཡིན། །རྫོགས་པར་སྨིན་པས་རྫུས་སྐྱེས་ཡིན། །མངལ་སྐྱེས་རིམ་པར་སྨིན་པའོ། །སྒོ་ང་ལས་སྐྱེས་འགྱུར་ཏེ་སྨིན། །དམྱལ་བ་གདུང་བའི་ལམ་པ་ཡིན། །ཡི་དྭགས་འགོག་པའི་ལམ་པ་ཡིན། །བྱོལ་སོང་མུན་པའི་ལམ་པ་ཡིན། །མི་ཡི་ལམ་ནི་འདོམ་པ་ཡིན། །ལྷ་ཡི་ལམ་ནི་གཡེང་བའོ། །གནས་པའི་ཕྱིར་དང་བགྲོད་ཕྱིར་ལམ། །རྐྱེན་དང་རྟེན་པ་མི་འབྲལ་བ། །འཁོར་དང་མྱ་ངན་འདས་པའི་ལམ། །དམྱལ་བའི་གནས་ན་བཟོད་དང་ལྡན། །ཡི་དྭགས་གནས་ན་ཡིད་དང་ལྡན། །བྱོལ་སོང་གནས་ན་མྱོས་པ་དང་། །མི་ཡི་གནས་ན་འདོད་དང་ལྡན། །ལྷ་མིན་གནས་ན་རྩོད་དང་ལྡན། །ལྷ་ཡི་གནས་ན་དགའ་ལྡན་ནོ། །རྟེན་པའི་དོན་ཕྱིར་གནས་སུ་བསྟན། །རིགས་ཀྱི་བུ་དེ་དག་གི་རྒྱུ་ནི་ཉོན་མོངས་པ་སྟེ། དེ་ཡང་རང་རང་སྒྲ་ལ་འཇུག་པའི་རྒྱུ་མཚན་དང་། དོན་གྱི་བྱེ་བྲག་སོ་སོར་ཕྱེ་ན། ལས་རྒྱུ་འབྲས་དང་། དེ་ཁོ་ན་ཉིད་ཀྱི་དོན་མ་ཤེས་པས་མ་རིག་པའོ། །འདོད་ཆགས་ནི་ཞེན་པའོ། །ང་རྒྱལ་ནི་ཁེངས་པའོ། །ཁོང་ཁྲོ་བ་ནི་མནར་སེམས་པའོ། །ཞེ་སྡང་ནི་འཁྲུགས་པའོ། །ཕྲག་དོག་ནི་མི་བཟོད་པའོ། །དེ་དག་ནི་རྒྱུ་དྲུག་གོ། །དེ་ལས་ངོ་བོ་དྲུག་དང་། འབྲས་བུ་དྲུག་སྨིན་པའོ། །ཀྱེ་གསང་བའི་བདག་པོ། དེ་དག་ནི། འགྲོ་བ་དྲུག་ལ་ད་ལྟར་གནས་པའི་ཆོས་ཏེ། རྒྱུད་གར་བྱུང་ཡང་བསྐལ་པ་ཐ་མའི་ཆོས་སུ་འདིར་བཤད་པ་ལྟར་ཤེས་པར་གྱིས་ཤིག །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འབྱུང་བ་ལྔ་མདོར་བསྡུས་ནས་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་ཡང་གསང་བའི་བདག་པོས་ཞུས་པ། འཁོར་བ་རྒྱན་དང་། རོལ་པར་ཤར་བའི་དོན་དེ་ལྟར་ལགས་ན། དེ་ལྟར་འབྱུང་བའི་འབྱུང་བ་ལྔ་བཤད་དུ་གསོལ། ཞེས་ཞུས་སོ། །སྟོན་པས་བཀའ་སྩལ་པ། འབྱུང་བ་ལྔ་ཡི་ངོ་བོ་ངེས་ཚིག་དང་། །དབྱེ་བ་དཔེ་དང་བཅས་པ་རྣམས། །ངས་བཤད་ཁྱོད་ཀྱིས་ཡིད་ལ་ཟུང་། །ངོ་བོ་དབྱེ་བའི་སྒོ་ནས་བསྟན། ། ― DNG001_Page_0031 ―
[མ་དཔེ་གཟིགས་ན་འདིར་གནོན།]
འབྱུང་བའི་དྭངས་མ་ལྔ་དང་སྙིགས་མ་ལྔ། །དྭངས་མ་ལྔ་ཡི་ངོ་བོ་ནི། །མཚན་ཉིད་འཛིན་པའི་ཡེ་ཤེས་ལྔ། །སྙིགས་མ་ལྔ་ཡི་ངོ་བོ་ནི། །ས་ཆུ་མེ་རླུང་ནམ་མཁའ་ལྔ། །འབྱུང་བ་ལྔ་ཡི་ངེས་ཚིག་བསྟན་པ་ནི། །རིག་པའི་རྩལ་དུ་འཆར་བ་དང་། །རྩལ་ལས་འཁོར་འདས་སྣང་བའོ། །དབྱེ་ན་མུ་བཞིར་ཤེས་པར་བྱ། །དྭངས་མ་སྙིགས་མ་རྣམ་པ་གཉིས། །རེ་རེ་ལའང་དེ་བཞིན་ཏེ། །རིགས་ཀྱི་བུ་ཁྱོད་ལེགས་པར་ཟུང་ཞིག །འབྱུང་བའི་དྭངས་མ་འོད་ལྔའོ། །སྙིགས་མ་ས་ཆུ་མེ་རླུང་ངོ་། །དྭངས་མའི་སྙིགས་མ་ཤ་དང་རུས་ལ་སོགས། །སྙིགས་མའི་དྭངས་མ་འཇའ་ཚོན་རྣམ་པ་ལྔ། །དཔེ་ནི་ཉི་མའི་འོད་ཟེར་དང་། །མན་ཤེལ་དག་ལ་འོད་སྣང་བཞིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འབྱུང་བ་ལྔ་མདོར་བསྡུས་ནས་བསྟན་པའི་ལེའུ་སྟེ་ཉེར་གཉིས་པའོ།། །།ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྙིགས་མའི་འབྱུང་བའི་མཚན་ཉིད་ཇི་ལྟར་ལགས། །དྭངས་མ་ལྔ་ལས་ཇི་ལྟར་ཤར། །དྭངས་མ་འབྱུང་བའི་མཚན་ཉིད་ཇི་ལྟར་ལགས། །ཆོས་ཉིད་དོན་ལ་སྦྱར་ན་ཇི་ལྟར་སྦྱར། །སྙིགས་མ་དྭངས་མར་གྲོལ་ན་ཇི་ལྟར་གྲོལ། །ཞེས་ཞུས་པས། སྟོན་པས་བཀའ་སྩལ་པ། རྡོ་རྗེ་འཛིན་པ་ཉོན་ཅིག །ས་ཡི་མཚན་ཉིད་སྲ་བ་ཡིན། །ཆུ་ཡི་མཚན་ཉིད་གཤེར་པ་ཡིན། །མེ་ཡི་མཚན་ཉིད་ཚ་བ་ཡིན། །རླུང་གི་མཚན་ཉིད་ཡང་ཞིང་གཡོ། །ནམ་མཁའི་མཚན་ཉིད་ཡངས་ཤིང་གོ་འབྱེད་པའོ། །རང་རང་ལས་ཀྱང་དེ་བཞིན་དབྱེ། །དྭངས་མའི་ས་ལས་འོད་ཟེར་དཀར་པོ་བྱུང་། །དེ་ལས་སྙིགས་མ་ས་རུ་སྣང་། །དེ་བཞིན་དྭངས་མའི་འབྱུང་བ་ལས། །འོད་ཟེར་རྣམ་པ་བཞི་རུ་བྱུང་། །དེ་ལ་སྙིགས་མ་བཞི་རུ་སྣང་། །དྭངས་མའི་སྙིགས་མའི་མཚན་ཉིད་ནི། །སྲ་བ་མེད་པར་བརྟན་པ་དང་། །གཤེར་བ་མེད་པར་སྡུད་པ་དང་། །གཡོ་བ་མེད་པར་བསྐྱོད་པ་དང་། །ཚ་བ་མེད་པར་བསྲེག་པའོ། །ཁྱབ་པ་མེད་པའི་གདངས་ཅན་ཡིན། །ཆོས་ཉིད་ཆོས་སྐུ་འགྱུར་བ་མེད། །དབྱེར་མེད་སྲ་བ་མེད་པར་བརྟན་པའི་ས། །ཆོས་ཉིད་ཆོས་སྐུ་གཉིས་མེད་དེ། །དག་པ་ཟང་ཐལ་དྲི་མ་མེད། །ཐམས་ཅད་དེ་ཡི་ངང་དུ་འདུས། །གཤེར་ ― DNG001_Page_0032 ―
[མ་དཔེ་གཟིགས་ན་འདིར་གནོན།]
བ་མེད་པར་སྡུད་པའི་ཆུ། །ཆོས་ཉིད་ཆོས་སྐུ་དབྱེར་མེད་དེ། །གཡོ་བ་མེད་པར་ཐོགས་པ་མེད། །གཡོ་བ་མེད་པར་བསྐྱོད་པའི་རླུང་། །མ་སོང་གནས་སུ་ཕྱིན་པའོ། །ཆོས་ཉིད་ཆོས་སྐུ་གཉིས་མེད་པས། །ཡེ་ཤེས་ཆེན་པོ་རང་གི་གདངས་ལ་བཞུགས། །གཞན་དུ་སྣང་བའི་རྣམ་པར་རྟོག་པ་མི་མངའ་བས། །ཚ་བ་མེད་པར་བསྲེག་པ་མེད། །གཞན་སྣང་མེད་པར་རང་གསལ་བ། །ཁྱད་པར་ཡེ་ཤེས་གདངས་དང་བཅས། །ནམ་མཁའ་ཁྱབ་པ་མེད་པས་གདངས་ཅན་ཡིན། །སྙིགས་མའི་འབྱུང་ལྔ་འོད་ལྔའི་ནང་དུ་གྲོལ། །འོད་ལྔ་དྭངས་མའི་གོ་རུ་ཐིམ། །དེ་བཞིན་རྟགས་ཀྱང་རིམ་པར་འགྱུར། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འབྱུང་བའི་མཚན་ཉིད་བསྟན་པ་དང་། ཤར་ལུགས་ཐིམ་ལུགས་དོན་དང་སྦྱར་ནས་བཤད་པའི་ལེའུ་སྟེ་ཉེར་གསུམ་པའོ།། །།དེ་ནས་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །འབྱུང་བ་ལྔ་ལ་གནས་པ་ལ། །བསྐལ་པ་ཞེས་སུ་གྲགས་པ་སྟེ། །དེ་ཡི་དོན་བཤད་གསུང་དུ་གསོལ། །ཞེས་ཞུས་སོ། །དེ་ནས་ཡང་སྟོན་པས་གསུངས་པ། ཀྱེ་ཀྱེ་རྡོ་རྗེ་འཛིན་པ་ཉོན་ཅིག །བསྐལ་པའི་ངོ་བོ་བསྟན་པ་ནི། །དང་པོ་ཡེ་ཤེས་ཡུལ་ཤར་བ། །ཤར་བྱ་ཤར་བྱེད་ལྟར་སྣང་བས། །དང་པོའི་དུས་སུ་ཆོས་ཉིད་བསྐལ། །བར་དུ་འཛིན་པའི་རྣམ་རྟོག་གིས། །ཡེ་ཤེས་སྣང་བ་ནང་དུ་ནུབ། །སྣོད་ཀྱི་འཇིག་རྟེན་བསྐལ་ཞེས་བཤད། །མཐའ་མ་གཟུང་འཛིན་གཉིས་སུ་བསྐལ། །སངས་རྒྱས་སེམས་ཅན་དེ་བཞིན་བསྐལ། །ངེས་ཚིག་གཏན་ཚིགས་བཅས་པ་ཡིན། །དབྱེ་བ་རྣམ་པ་གསུམ་ཡིན་ནོ། །ཡུན་དུ་གནས་པས་བསྐལ་པའི་སྒྲ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། བསྐལ་པ་གསུམབསྟན་པའི་ལེའུ་སྟེ་ཉེར་བཞི་པའོ།། །།ནམ་མཁའི་མཐོང་ནས་སྣང་གསལ་གྱི་སྒྲོན་མེ་ཤར་བས། མཚན་མོ་མུན་པ་སེལ་བའི་མན་ངག །ཨ་བཛྲ་ཧཾ་མ་རཏྞ་ཀཱ་ཡ་ཨོཾ་ཛྙཱ་ན་ཀ་ལ་བག་བེཀུ་ལ་ཡ་སན་ཙ་ཧཱུྃ་དྷརྨ་ས་ར་ཀོ་ཏུ་ཧ་དུ་ཡ་ཨཱ། དེའི་ཚེ་བཅོམ་ལྡན་འདས་རྡོ་རྗེ་འཆང་ཆེན་པོ། ཐུགས་རྗེ་འབྱུང་བ་སྐུ་གསུམ་གྱི་དགོངས་པ་ལ་སྙོམས་ ― DNG001_Page_0033 ―
[མ་དཔེ་གཟིགས་ན་འདིར་གནོན།]
པར་ཞུགས་སོ། །དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །འཁོར་བའི་རོལ་པར་ཤར་པ་དེ་ལྟར་ན། །དེ་ཡི་འདུལ་བྱེད་གཉེན་པོ་རུ། །དག་པ་ཆོས་སྐུ་ཆེན་པོ་ལས། །སྐུ་གཉིས་རོལ་པ་ཇི་ལྟར་ཤར། །ཞེས་ཞུས་སོ། །སྟོན་པས་བཀའ་སྩལ་པ། ཐུགས་རྗེའི་སྐུ་གཉིས་སྣང་བ་ཡང་། །ནམ་མཁའ་ལྟ་བུའི་ཆོས་ཉིད་ལ། །མན་ཤེལ་ལྟ་བུའི་རིག་པ་གསལ། །ཉི་ཟེར་ལྟ་བུའི་ཐུགས་རྗེ་བྱུང་། །ནད་པ་ལྟ་བུའི་རིགས་དྲུག་ལ། །མུན་པ་ལྟ་བུའི་གཏི་མུག་པས། །དུག་གསུམ་ནད་རྣམས་སེལ་བར་བྱེད། །ཅེས་གསུངས་སོ། །ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་མགོན་པོ་རྡོ་རྗེ་འོད་དཔག་མེད། །ཆོས་སྐུ་གཞི་སྣང་ཆེན་པོ་ལ། །འབྲས་བུ་ལོངས་སྐུ་ཇི་ལྟར་རྫོགས། །ཞེས་ཞུས་སོ། །སྟོན་པས་བཀའ་སྩལ་པ། ཐུགས་རྗེ་སྐུ་གཉིས་སྣང་བ་ཡང་། །གདུལ་བྱ་རྣམས་ལ་ཤར་བར་ཟད། །རང་ལས་ཤེས་རབ་སྐུར་སྣང་བར། །མཚན་མར་བཅས་པའི་སྐུ་མི་སྣང་། །ཡེ་ཤེས་རང་རིག་ཆེན་པོ་ལ། །མཚན་མ་གཞན་སྣང་རྣམ་རྟོག་མེད། །ཡང་གསང་བའི་བདག་པོས་ཞུས་པ། ཀྱེ་ཀྱེ་སྟོན་པ་ཐུགས་རྗེ་ཆེ་མངའ་བས། །ཤེས་རབ་སྐུ་ལྔ་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རིག་པ་གཅིག་གི་ངོ་བོ་ལས། །ཐམས་ཅད་འཆར་ཞིང་སྣང་བའི་ཕྱིར། །ཀུན་སྣང་ཆེན་པོ་ཞེས་ཀྱང་བྱ། །རང་རིག་ཡོན་ཏན་མ་འགགས་པས། །རང་བྱུང་ཆེན་པོ་ཞེས་སུ་བཤད། །ཐུགས་རྗེའི་སྟོབས་དང་ལྡན་པས་འོད་དཔག་མེད། །ཤེས་རབ་ཐོགས་པ་མེད་པས་དོན་ཡོད་གྲུབ། །དེ་ཉིད་འགྱུར་བ་མེད་པས་མི་བསྐྱོད་པ། །སྟོང་པ་རིག་པ་གཉིས་མེད་ཡེ་ཤེས་ཐོགས་པ་མེད། །ཤེས་རབ་སྐུ་ལྔའི་ངོ་བོ་ཡིན། །དབྱེ་བ་ཡོན་ཏན་སྒོ་ནས་དབྱེ། །ངེས་ཚིག་ཤེས་རབ་ལ་དེ་ལྟར་མཁྱེན་པ་མ་འགགས་པས་ཤེས་རབ་ཀྱི་སྐུའོ། །ཡང་ན་རང་ལ་ཤེས་རབ་མ་འགགས་ལ། གདུལ་བྱ་ལ་སྐུར་སྣང་བའི་ཕྱིར་ན་ཡང་དེ་སྐད་ཅེས་བཏགས་སོ། །ཡང་གསང་བའི་བདག་པོས་ཞུས་པ། རང་ལ་སྐུ་མི་སྣང་བའི་གཏན་ཚིགས་ཇི་ལྟར་ལགས། ཞེས་ཞུས་སོ། །ཀྱེ་གསང་བའི་བདག་པོ་ལེགས་པར་ཟུང་ཞིག །རང་གི་རིག་པ་དངོས་ ― DNG001_Page_0034 ―
[མ་དཔེ་གཟིགས་ན་འདིར་གནོན།]
མེད་ཡེ་དག་ཟང་ཐལ་ཆེན་པོ་ཡིན། དེ་དོན་རྒྱས་པརབསྟན་པ་ནི། །གཞན་སྣང་མེད་པས་རང་བཞིན་གཞི། །གཟུགས་སྐུ་མཚན་མ་མེད་པས་རིག་པ་དངོས་མེད་ཡིན། སྤྱན་གཉིས་དག་ནས་ཡེ་ཤེས་སྤྱན་མངའ་ཡེ་དག་ཟང་ཐལ་ཡིན། དེའི་གོང་ན་གཞན་མེད་པས་ཆེན་པོར་བཤད། ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཆོས་སྐུ་ལས་ཐུགས་རྗེ་གཟུགས་སྐུ་གཉིས་འབྱུང་བར་བསྟན་པ་དང་། ཆོས་སྐུ་ཉིད་ལ་རིག་པ་རང་སྣང་ལས་སྐུ་གཉིས་མེད་པར་བསྟན་པའི་ལེའུ་སྟེ་ཉེར་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གདུལ་བྱ་ཞེས་ནི་གང་ལ་བགྱི། །སྐུ་རུ་སྣང་ཚུལ་ཇི་ལྟར་སྣང་། །ཞེས་ཞུས་པས། སྟོན་པས་གསུངས་པ། གསང་བའི་བདག་པོ་ལེགས་པར་ཟུང་ཞིག །རྣམ་དག་སྟུག་པོ་བཀོད་པ་ཡི། །ཆོས་ཉིད་ཆོས་སྐུར་དབྱེར་མེད་ཀློང་། །ཡེ་ཤེས་རང་གདངས་བུམ་པ་ལྔ། །མ་འགགས་པ་ཡི་མྱུ་གུ་སྣང་། །ཆོས་ཉིད་དག་པའི་སྣང་ཆ་ལྔ། །མཐིང་ག་དཀར་སེར་དམར་དང་ལྗང་། །མ་འདྲེས་གསལ་བའི་ཡེ་ཤེས་རྫོགས། །དེ་ལྔའི་ནང་ནས་སྐུ་ལྔ་གྲུབ། །ཕྱོགས་བཞི་དབུས་དང་ལྔར་གནས་ཏེ། །དབུས་ནི་ཀུན་སྣང་ཡེ་ཤེས་ལ། །བཞི་པོ་རྣམ་སྣང་ཀུན་ཏུ་ཞལ། །མི་བསྐྱོད་རིན་འབྱུང་ཆེན་པོ་དང་། །འོད་དཔག་མེད་དང་དོན་གྲུབ་ཆེན་པོར་སྣང་། །ཕྱག་མཚན་རང་གི་ཐུགས་ལ་གནས། །ཁ་དོག་ལྔ་ཡི་བདག་ཉིད་འཛིན། །གདན་གསུམ་ངང་ལ་ཡོངས་སུ་རྫོགས། །གདུལ་བྱ་རིགས་བཞིའི་སངས་རྒྱས་ཏེ། །དག་གཙང་གསལ་བའི་མེ་ལོང་ལ། །བྱད་ཀྱི་རྣམ་པ་ཤར་བ་ལྟར། །མཚན་རྫོགས་རྡོ་རྗེ་འཆང་གིས་ནི། །ཆོས་ཉིད་དག་པའི་སྣང་བ་ལ། །མི་བསྐྱོད་རྡོ་རྗེ་རིན་ཆེན་འབྱུང་ལྡན་དང་། །སྣང་བ་མཐའ་ཡས་དོན་གྲུབ་ཤར། །གདན་གསུམ་ངང་ལ་ལྷུན་གྱིས་རྫོགས། །རང་རང་ཕྱག་མཚན་ཐུགས་ལ་གབ། །དབྱེར་མེད་རྡོ་རྗེ་སྐྱིལ་ཀྲུང་བཞུགས། །ཡེ་ཤེས་ལྔ་ཡི་སྦུབས་ན་གསལ། །རང་རང་སོ་སོར་ཆོས་ཉིད་ཆེན་པོ་ལས། །ལྔ་པོ་སོ་སོའི་སྦུབས་ན་གནས། །རེ་རེ་ལ་ཡང་བཞི་བཞིས་བསྐོར། །ཡེ་ཤེས་ལྔ་རྫོགས་རྩལ་གྱི་མཚན་ཉིད་འཛིན། ། ― DNG001_Page_0035 ―
[མ་དཔེ་གཟིགས་ན་འདིར་གནོན།]
གཉིས་མེད་ཡུལ་ལྔ་ལུས་དང་གྲིབ་མ་བཞིན། །ཐབས་དང་ཤེས་རབ་གཉིས་མེད་ཞལ་སྦྱོར་གནས། །རྣམ་སྣང་ཞལ་གཟིགས་དགོངས་པ་གཟིགས་མཁྱེན་ཡང་། །རྣམ་སྣང་རང་ལས་གཞན་སྣང་མེད། །རང་བྱུང་རང་སྣང་རང་ཤར་རང་གི་མཁྱེན། །རང་རྩལ་རྩེ་གཅིག་འབྱེད་པ་མེད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཤེས་རབ་ཀྱིས་གདུལ་བྱ་ལ་སྐུ་ཕྱག་རྒྱར་གསལ་ལུགས་དང་གདུལ་བྱའི་སྐུར་རྫོགས་ཤིང་མཁྱེན་པར་ཤར་བ་བསྟན་པའི་ལེའུ་སྟེ་ཉེར་དྲུག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་ཆེན་པོ། །གནས་དང་གདན་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། གནས་མེད་གནས་ཆེན་ཆོས་ཉིད་རྣམ་དག་ན། །མ་བྲིས་དཀྱིལ་འཁོར་འགགས་མེད་འོད་དུ་གསལ། །ཡང་དག་གསང་བའི་དཀྱིལ་འཁོར་མཆོག །བཞུགས་གནས་ཆེན་པོ་དེར་བཤད་དོ། །དེར་བཞུགས་གདན་གྱི་ཁྱད་པར་གྱིས། །རྟགས་དང་ཁྱད་པར་ཆོས་ཀྱི་གདན། །རྟགས་ལ་རྣམ་པ་ལྔར་བཤད་དེ། །སྐུ་གསུམ་འདུ་འབྲལ་མེད་པའི་རྟགས། །རྩལ་གསུམ་རྫོགས་པ་སེང་ཆེན་གདན། །སྐུ་གསུམ་ཆོས་ཉིད་ངང་ན་གནས། །མི་འགྱུར་གླང་ཆེན་གདན་དུ་བཏིངས། །དངོས་མེད་བརྡའ་ཡིན་ཆོས་ཉིད་ངང་ལ་བཞུགས། །སྐུ་གཉིས་ཆོས་ཉིད་སྤྱོད་པའི་རྟགས། །བསྐྱོད་པའི་ཤུགས་འཆང་རྟ་མཆོག་གདན། །མཚོན་པའི་བརྡར་བྱེད་ཐུགས་རྗེའི་ཤུགས་ཀྱིས་བསྐྱོད། །ཐུགས་རྗེས་འགྲོ་ལ་མཛེས་པའི་དོན་བྱེད་པས། །མཛེས་པ་རྨ་བྱའི་གདན་མཆོག་བཏིང་། །དེས་མཚོན་དཔེ་ཡིས་མཐུན་པར་སྣང་། །རྫུ་འཕྲུལ་སྟོབས་ཀྱིས་ཕྲིན་ལས་ཐོགས་མེད་མཛད། །དེ་ཡི་རྟགས་སུ་མཁའ་ལྡིང་ཐོགས་མེད་གདན། །དེ་རང་མ་ཡིན་ཆོས་མཐུན་མཚོན་པའི་དཔེ། །དངོས་སུ་ཐུགས་རྗེ་རྫུ་འཕྲུལ་སྟོབས་དང་ལྡན། །ཐབས་མ་འགགས་པའི་ཡེ་ཤེས་དང་། །ཤེས་རབ་འགྱུར་བ་མེད་པའི་ཆོས་ཉིད་ལས། །གཉིས་མེད་སྐུ་དང་ཡེ་ཤེས་གསལ། །དེ་རྟགས་ཉི་ཟླ་རྣམ་གཉིས་གདན། ། བརྗོད་མཚོན་སྒྲ་སྟེ་སྟོང་པའི་ཡེ་ཤེས་དངོས། །རང་རིག་ཁོང་ནས་ཡེ་ཤར་དྲི་མས་གོས་པ་མེད། །དེས་མཚོན་པདྨའི་གདན་ཏེ་དངོས་མེད་དོན་ལ་སྦྱོར། །ཞེས་གསུངས་སོ། །སྤྲོས་ ― DNG001_Page_0036 ―
[མ་དཔེ་གཟིགས་ན་འདིར་གནོན།]
བྲལ་དོན་གསལ་གྱི་རྒྱུད་ཆེན་པོ་ལས། བཞུགས་གནས་དང་གདན་བསྟན་པའི་ལེའུ་སྟེ་ཉེར་བདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གདན་གྱི་ངོ་བོ་ངེས་ཚིག་དང་། །དབྱེ་བ་དཔེ་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ངོ་བོ་ཆོས་ཉིད་འགྱུར་མེད་ཡིན། །བསྡུས་པ་དེ་ལས་མེད་མོད་ཀྱི། །དབྱེ་བའི་སྒོ་ནས་མཚོན་ནས་ཀྱང་། །རྟགས་ཀྱི་གདན་ལ་རྣམ་པ་ལྔ། །ཁྱད་པར་གདན་ལ་རྣམ་པ་གཉིས། །ཆོས་ཉིད་གདན་ལའང་དེ་དང་མཚུངས། །རང་རང་དོན་གྱི་ངོ་ལས་སྦྱོར། །ངེས་ཚིག་དེ་ལ་བཞུགས་ཕྱིར་གདན་ཞེས་བྱ། །དབྱེ་བ་རྣམ་པ་གསུམ་ཡིན་ཏེ། །རྟགས་དང་ཁྱད་པར་ཆོས་དང་གསུམ། །དེ་ལས་ཕྱེ་བས་གོང་མ་བཞིན། །དཔེ་ནི་རྒྱལ་བློན་གདན་ལ་བཞུགས་པ་བཞིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གདན་གྱི་དོན་བཤད་པ་བསྟན་པའི་ལེའུ་སྟེ་ཉེར་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གདན་ལ་རྫོགས་པའི་གཙོ་བོ་ལས། །འཁོར་གྱི་སྣང་བ་ཇི་ལྟར་ཤར། །ཚོམ་བུའི་དཀྱིལ་འཁོར་ཇི་ལྟར་ལགས། །རྗེས་འཇུག་འཁོར་ལ་བཤད་དུ་གསོལ། །ཞེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། བཅོམ་ལྡན་རྡོ་རྗེ་མི་བསྐྱོད་ལས། །ས་སྙིང་བྱམས་པ་གཡས་དང་གཡོན། །ཐུགས་རྗེ་ཐབས་ཀྱི་སྐུ་རུ་ཤར། །ཡུམ་ཆེན་སངས་རྒྱས་སྤྱན་དག་ལས། །ལཱ་སྱ་པུཥ྇་གཡས་དང་གཡོན། །ཐབས་དང་ཐབས་ཀྱི་ཆ་འཛིན་ལས། །ཤེས་རབ་ཤེས་རབ་ཆ་འཛིན་པས། །རེ་རེ་ལའང་གཉིས་གཉིས་སྣང་། །ཚོམ་བུའི་དཀྱིལ་འཁོར་གཅིག་ནང་གསལ། །དེ་བཞིན་རིན་ཆེན་འབྱུང་ལྡན་ལས། །ཀུན་བཟང་ནམ་མཁའི་སྙིང་པོ་གཉིས། །གཡས་དང་གཡོན་དུ་ཤར་ཅིང་གསལ། །མཱ་མ་ཀཱི་ལས་གཡས་གཡོན་དུ། །མཱ་ལེ་དྷཱུ་པེ་གཉིས་སུ་གསལ། །ཚོམ་བུའི་དཀྱིལ་འཁོར་ཆེན་པོ་གཅིག །བཅོམ་ལྡན་སྣང་བ་མཐའ་ཡས་ལས། །སྤྱན་རས་གཟིགས་དང་འཇམ་དཔལ་ ― DNG001_Page_0037 ―
[མ་དཔེ་གཟིགས་ན་འདིར་གནོན།]
གཉིས། །མ་འགགས་གཡས་དང་གཡོན་ན་གསལ། །ཡུམ་ཆེན་ན་བཟའ་དཀར་མོ་ལས། །གཱི་ཏཱི་མ་དང་ཨཱ་ལོ་ཀེ། །གཡས་དང་གཡོན་དུ་དེ་བཞིན་གནས། །ཚོམ་བུའི་དཀྱིལ་འཁོར་ཆེན་པོ་གཅིག །བཅོམ་ལྡན་དོན་ཡོད་གྲུབ་པ་ལས། །ཕྱག་ན་རྡོ་རྗེ་སྒྲིབ་པ་སེལ། །གཡས་དང་གཡོན་དུ་རྣམ་པར་གསལ། །ཡུམ་ཆེན་དམ་ཚིག་སྒྲོལ་མ་ལས། །ནྲྀ་ཏཱི་གནྡྷེ་གཡས་དང་གཡོན། །ཚོམ་བུའི་དཀྱིལ་འཁོར་ཆེན་པོ་གཅིག །ཡབ་རྣམས་ཀུན་ཏུ་བཟང་པོ་ལ། །ཡུམ་རྣམས་ཀུན་ཏུ་བཟང་མོའོ། །དེ་ཡིས་ཀུན་བཟང་ཡབ་ཡུམ་གསལ། །དེ་རྣམས་ཕྱིན་ཅི་ལོག་བཞི་ཡི། །མཐའ་གཉིས་ལས་ནི་རབ་འདས་ཤིང་། །རྟག་ཆད་མཐའ་བཞི་རྣམ་པར་དག །བསྣོལ་བས་སྒོ་བ་ཡབ་ཡུམ་བརྒྱད། །ཡོན་ཏན་རྩལ་རྫོགས་མ་འགགས་བཞི་བཅུ་གཉིས། །མཚན་དང་དཔེ་བྱད་མ་ལུས་རྫོགས། །ཐུགས་རྗེའི་མཛད་སྤྱོད་རྒྱན་དང་རོལ་པར་ཤར། །རྣམ་རྟོག་མི་མངའ་ཅིར་ཡང་ས་ལེར་མཁྱེན། །ཡེ་ཤེས་ལུས་ལ་ཆོས་ཀྱི་སྤྱན་མངའ་བས། །མངོན་པར་རྫོགས་པའི་སངས་རྒྱས་རྣམ་པ་ཐམས་ཅད་མཁྱེན། །མ་འགགས་རང་བྱུང་ཡེ་ཤེས་གསུང་ནི་འགྱུར་མེད་ཡི་གེ་དྲུག །ཐུགས་རྗེ་སྤྲུལ་སྐུར་བྱ་བའི་གཞི་མ་འགགས། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ལོངས་སྐུའི་འཁོར་བསྟན་པའི་ལེའུ་སྟེ་ཉེར་དགུ་པའོ།། །།དེ་ནས་ཡང་སྟོན་པས་གསུངས་པ། དེ་ཡི་མཚོན་པའི་ཚིག་རྣམས་བཤད་ཀྱིས་ལེགས་པར་ཟུང་ཞིག །རྒྱུད་དང་ལུང་དུ་ངས་བཤད་པའི། །ལོངས་སྐུ་ཞེས་སུ་འབྱུང་ན་དེ་སྐད་བཤད། །དཀྱིལ་འཁོར་ཞེས་སུ་འབྱུང་བ་དང་། །གཙོ་འཁོར་ཞེས་སུ་འབྱུང་བ་དང་། །ལྔ་ལྡན་རྫོགས་ལྡན་ཞེས་སུ་འབྱུང་བ་དང་། །དེ་བཞིན་གཤེགས་པ་ཞེས་པ་དང་། །རིགས་ལྔའི་སངས་རྒྱས་ཞེས་པ་དང་། །སེམས་དཔའ་སེམས་མ་ཞེས་པ་དང་། །འོད་གསལ་རང་སྣང་ཞེས་པ་དང་། །མཚན་རྫོགས་རྡོ་རྗེ་འཆང་གིས་ཞེས་པ་རྣམས། །ཚིག་དོན་མང་ཡང་མདོར་བསྡུས་བསྟན་པ་ཡིན། །སྐུ་ལ་མཚན་དཔེས་རབ་བརྒྱན་པས། །མཚན་རྫོགས་རྡོ་རྗེ་འཆང་ཞེས་སོ། །འབོད་སྐད་ཐབས་གསུམ་དོན་གྱིས་ཁོག་སྡེབས་ལ། །ལོངས་སྐུའི་ ― DNG001_Page_0038 ―
[མ་དཔེ་གཟིགས་ན་འདིར་གནོན།]
སྣང་བ་དེ་བཞིན་བཤད། །ཅེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ལོངས་སྐུ་མཚོན་པའི་ཚིག་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཡེ་ཤེས་སྐུ་སྟེ་རང་བྱུང་བ། །སངས་རྒྱས་སྐུ་ལྔའི་བདག་ཉིད་ཅན། །སུམ་ཅུ་རྩ་གཉིས་མཚན་འཆང་བ། །ལོངས་སྤྱོད་རྫོགས་སྐུ་སྐུ་ཡི་རྒྱལ། །བཞི་བཅུ་རྩ་གཉིས་འོད་གསལ་བའི། །སྤྱི་ཡི་མཚན་ཉིད་ཇི་ལྟར་ལགས། །རང་རང་དོན་ལ་ཇི་ལྟར་སྦྱར། །ཞེས་ཞུས་སོ། །སྟོན་པས་བཀའ་སྩལ་པ། སྤྱི་ཡི་མཚན་ཉིད་བསྟན་པ་ནི། །མཚན་ཉིད་འཛིན་པའི་ཡེ་ཤེས་ལྔ། །བྱས་པ་མེད་པར་རང་བྱུང་བས། །ལོངས་སྤྱོད་ཆེན་པོ་འོད་ཀྱི་སྐུ། །གྲུབ་ཚུལ་མཚོན་ཚུལ་བསྡུས་པ་ཡིན། །སངས་རྒྱས་སྐུ་ལྔའི་བདག་ཉིད་ཅན། །མཚན་གྱི་རྣམ་གྲངས་གཙོ་བོར་བསྡུས། །རྣམ་སྣང་ལ་སོགས་རིགས་ལྔའི་སྐུ། །མེ་ལོང་ནང་གི་གཟུགས་བརྙན་བཞིན། །སྣང་ལ་རང་བཞིན་མེད་པའི་སྐུ། །ཐུན་མོང་མཚན་དང་ལྡན་པའི་སྐུ། །སྐུ་རེ་ལ་ཡང་ཡོངས་རྫོགས་པའི། །ཐུན་མོང་སྤྱི་ཡི་མཚན་དཔེ་བསྟན། །ལོངས་སྤྱོད་རྫོགས་པ་སྐུ་ཡི་རྒྱལ། །སྐུ་ཡི་རྔམས་དང་གཟི་བརྗིད་ཀྱིས། །སྤྲུལ་སྐུའི་མཚན་མ་ཟིལ་གྱིས་གནོན། །ཆེ་བའི་ཡོན་ཏན་མདོར་བསྡུས་ཡིན། །བཞི་བཅུ་རྩ་གཉིས་འོད་གསལ་བ། །རང་རང་ལྷ་ཡི་དོན་བཤད་ན། །སྐུ་གཅིག་སྐུ་ལྔར་གསལ་བ་རྣམ་པར་སྣང་མཛད་ཡིན། །དེ་ལ་འགྱུར་བ་མེད་པ་མི་བསྐྱོད་པ། །ཡོན་ཏན་ཕྱོགས་མེད་འབྱུང་བས་རིན་ཆེན་འབྱུང་ལྡན་ཡིན། །དྲི་མས་མ་གོས་ཐུགས་རྗེའི་རྩལ་སྣང་ནི། །འོད་དཔག་མེད་དེ་པདྨའི་སྐུ། །གང་ལ་ཐོགས་མེད་བདག་གཞན་དོན་འགྲུབ་པས། །ཕྲིན་ལས་མཐར་ཕྱིན་དོན་ཡོད་གྲུབ་པའི་སྐུ། །ཡོན་ཏན་ཆེན་པོ་ཀུན་ཏུ་རྒྱས་པ་དང་། །ཤེས་རབ་རྣམ་གཉིས་ཀུན་བསྐྱོད་ལོངས་སྤྱོད་པས། །ཐུགས་ཀྱི་རང་བཞིན་འཁོར་ལོ་རྩིབས་བརྒྱད་པ། །སྐུ་ལྔ་ཡེ་ཤེས་ལྔ་ལྡན་མི་འགྱུར་མི་ཕྱེད་པས། །ཐུགས་ཀྱི་རང་བཞིན་རྡོ་རྗེ་རྩེ་ལྔ་གསལ། །ངོ་བོ་མི་འགྱུར་རང་བཞིན་མི་འགག་པར། །ཐུགས་རྗེའི་ཡོན་ཏན་ཐམས་ཅད་འབྱུང་བས་ན། །ཐུགས་ཀྱི་རང་བཞིན་ནོར་བུ་རིན་ཆེན་གསལ། །རང་གི་ངོ་བོ་ ― DNG001_Page_0039 ―
[མ་དཔེ་གཟིགས་ན་འདིར་གནོན།]
དྲི་མེད་རྣམ་དག་པས། །ཐུགས་ཀྱི་རང་བཞིན་པདྨ་འདབ་བརྒྱད་གནས། །ཐུགས་ཀྱི་དགོངས་པ་མཐའ་བཞི་ལས་འདས་ཤིང་། །ཚད་མེད་ཡེ་ཤེས་ཕྲིན་ལས་རྣམ་པ་བཞིས། །འགྲོ་དོན་མ་ལུས་རྫོགས་མཛད་པས། །ཐུགས་ཀྱི་རང་བཞིན་རྡོ་རྗེ་རྒྱ་གྲམ་གསལ། །ཡུམ་ནི་ཡེ་ཤེས་སྣང་བ་སྟེ། །སྐུ་མདོག་ཕྱག་མཚན་ཡབ་དང་མཐུན། །གཉིས་མེད་ཡེ་ཤེས་འོད་དུ་གསལ། །མ་བཅོས་རང་བཞིན་ཡོངས་ལ་ཁྱབ་པའི་དབྱིངས། །ཡུམ་གྱུར་ཀུན་ཏུ་བཟང་མོའི་དོན། །རང་བཞིན་མི་འགྱུར་ངོ་བོ་འགག་པ་མེད། །ཡུམ་ཆེན་སངས་རྒྱས་སྤྱན་གྱི་དོན་ལ་སྦྱར། །ཡོན་ཏན་མདོར་བསྡུས་རང་བཞིན་མཉམ་པར་སྦྱར། །ཡུམ་གྱུར་མཱ་མ་ཀཱི་ཡི་དོན་ལ་སྦྱར། །ཡོན་ཏན་སྨིན་བྱེད་རང་བཞིན་ཀུན་དྲོ་བས། །འོད་ཀྱི་མདངས་དང་ལྡན་པས་དྲི་མས་མ་གོས་སོ་སོར་སྦྱོར། །ཡུམ་གྱི་རང་བཞིན་གོས་དཀར་མོ་དང་སྦྱར། །རང་བཞིན་སྐྱེ་བ་མེད་ཅིང་མི་ལྡོག་གནས་སུ་སྒྲོལ། །མི་འདའ་འགྱུར་མེད་ངང་ལ་གནས་པས་ན། །དམ་ཚིག་སྒྲོལ་མ་ཞེས་བགྱིའི་དོན་ལ་སྦྱོར། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྤྱིའི་མཚན་ཉིད་བསྟན་པ་དང་། རིགས་ལྔ་ཡུམ་ལྔར་སྦྱོར་བ་བསྟན་པའི་ལེའུ་སྟེ་སོགཅིག་པའོ།། །།དེ་ནས་གསང་བའི་བདག་བོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །འཁོར་རྣམས་དོན་ལ་ཇི་ལྟར་སྦྱར། །ཞེས་ཞུས་སོ། །སྟོན་པས་བཀའ་སྩལ་པ། ཀྱེ་ཀྱེ་རྡོ་རྗེ་འཛིན་པ། འཁོར་གྱི་རྣམ་གྲངས་མང་མོད་ཀྱང་། །ཡབ་ཀྱི་ཆ་འཛིན་ཡབ་ལ་སྦྱོར། །ཡུམ་གྱི་ཆ་འཛིན་ཡུམ་ལ་སྦྱོར། །ཡབ་ཡུམ་གང་ཡང་གོང་དུ་སྦྱར་བ་བཞིན། །ཞེས་གསུངས་སོ། །དེ་ནས་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །འཁོར་རྣམས་དོན་དུ་སྦྱར་བ་གསུང་བར་ཞུ། །ཞེས་ཞུས་སོ། །སྟོན་པས་བཀའ་སྩལ་པ། མི་བསྐྱོད་ཆེན་པོའི་ཞལ་གཟིགས་པས། །མེ་ལོང་ཡེ་ཤེས་དོན་རིག་པ། །ས་ཡི་སྙིང་པོ་དོན་གྱི་མཚན། །གསལ་བའི་རྟེན་གྱུར་མ་སྐྱེས་བྱམས་པའི་དོན། །གཟིགས་པའི་རྣམ་པ་མ་འགགས་པས། །དེ་གཉིས་དུས་མཚུངས་ལཱ་སྱ་པུཥ྇འི་མཚན། །རིན་འབྱུང་ཆེན་པོའི་ཞལ་གཟིགས་པས། །མཉམ་ཉིད་ཡེ་ཤེས་རིག་པ་ཀུན་ཏུ་བཟང་། །གསལ་བའི་རྟེན་ ― DNG001_Page_0040 ―
[མ་དཔེ་གཟིགས་ན་འདིར་གནོན།]
གྱུར་མ་སྐྱེས་ནམ་མཁའི་དོན། །དོན་གྱི་དྲི་གསལ་མཱ་ལེ་དྷཱུ་པེའི་དོན། །འོད་དཔག་མེད་ཀྱི་ཞལ་གཟིགས་པས། །སོ་སོར་ཀུན་རྟོགས་ཡེ་ཤེས་དོན་རིག་པ། །སྤྱན་རས་གཟིགས་ཀྱི་དོན་དང་སྦྱར། །གསལ་བའི་རྟེན་གྱུར་མ་སྐྱེས་འཇམ་དཔལ་དོན། །སྐྱེས་པའི་ཡུམ་གྱུར་གཱིརྟཱི་མ། །ཡེ་ཤེས་དོན་རྣམས་སོ་སོར་བསྟན། །ཇི་ལྟར་བསྐྱེད་དུ་མར་མེ་གསལ། །དོན་གྲུབ་ཆེན་པོའི་ཞལ་མཐོང་བ། །བྱ་གྲུབ་ཡེ་ཤེས་ལྔར་དོན་ཡང་གཟིགས་པས། །ཕྱག་ན་རྡོ་རྗེའི་དོན་གྱི་མཚན། །སྐྱེ་བའི་རྟེན་གྱུར་མ་སྐྱེས་སྒྲིབ་པ་རྣམ་པར་སེལ་བའི་དོན། །བསྐྱེད་བྱ་སྐྱེད་བྱེད་དུས་ངེས་ནྲྀ་ཏཱི་གནྡྷེ་མ། །བརྗོད་བྱ་མང་ཡང་མདོར་བསྡུས་པའོ། །གཉིས་མེད་དབྱིངས་དང་ཡེ་ཤེས་ཀུན་བཟང་ཡབ་ཡུམ་དོན། །མཐའ་བཞི་ལས་གྲོལ་བདུད་བཞི་ངང་གིས་བཅོམ། །ཕྱིན་ཅི་ལོག་ལས་གྲོལ་བའི་སྒོ་བ་བཞི། །ཡེ་ཤེས་ཚད་མེད་བཞི་ཡིས་དོན་མཛད་སྒོ་མ་བཞི། །སྐུ་ལྔ་ངོ་བོ་ཉིད་ཀྱི་སྐུ་དང་དྲུག །མ་འགགས་ཐུབ་པ་དྲུག་གི་དོན་དང་སྦྱོར། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ལོངས་སྐུའི་འཁོར་གྱི་དོན་ངོ་བོ་ལ་སྦྱོར་བ་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལོངས་སྐུ་ཤར་ལུགས་དེ་ལྟར་ན། །སྤྲུལ་པ་སྐུ་ཡི་ཞིང་ཁམས་འདིར། །སྟོན་པ་བྱོན་ལུགས་ཇི་ལྟར་ལགས། །སྤྲུལ་པའི་སྐུ་རྣམས་ཇི་ལྟར་ཤར། །ཞེས་ཞུས་སོ། །ཀྱེ་ཀྱེ་རྡོ་རྗེ་འཛིན་པ་ཉོན་ཅིག །ཆོས་སྐུའི་འོད་གྱུར་ལོངས་སྐུ་བཞི་བཅུ་གཉིས། །དེ་ཡི་གསུང་ལས་རོལ་པའི་སྤྲུལ་སྐུ་རྣམས། །གདུལ་བྱ་དྲུག་ལ་སོ་སོར་འཚམས་པར་བཤད་པའོ། །ཞེས་གསུངས་སོ། །ཡང་གསང་བའི་བདག་པོས་ཞུས་པ། སྟོན་པ་བྱོན་གཞི་དེ་ལྟར་ན། །སྐུ་ཡི་འཁྲུངས་རྟེན་གང་ཞིག་གིས། །རྟོགས་པའི་ཤེས་རབ་ཇི་ལྟར་སྐྱེས། །ཞེས་ཞུས་སོ། །སྟོན་པས་བཀའ་སྩལ་པ། ཕ་དང་མ་ལ་མ་བརྟེན་པར། །བུང་བ་མེ་ཏོག་འཛིན་པ་ལྟར། །ཨུ་དུམ་ཝ་རའི་མེ་ཏོག་ལ། །རིག་པའི་ཡེ་ཤེས་ལས་ཞུགས་བརྫུས་ནས་སྐྱེས། །ཞེས་གསུངས་སོ། །ཡང་བཀའ་སྩལ་པ། རྡོ་རྗེ་འཛིན་པ་ཉོན་ཅིག །ངས་ལེན་མ་མྱོང་བའི་ལུས་ ― DNG001_Page_0041 ―
[མ་དཔེ་གཟིགས་ན་འདིར་གནོན།]
བླངས་པས། །མཐོང་མ་མྱོང་བའི་ཡུལ་གཉིས་མཐོང་། །ཤེས་མ་མྱོང་བའི་གཏམ་ཅིག་ཤེས། །བརྗོད་མ་མྱོང་བའི་ཚིག་ཅིག་བརྗོད། །དེ་ཚེ་རྟོགས་པའི་ཤེས་རབ་སྐྱེས། །ཞེས་གསུངས་སོ། །ཡང་ཞུས་པ། རྟོགས་པའི་ཤེས་རབ་ཇི་ལྟར་སྐྱེས། །ཞུས་སོ། །ང་ཡི་ཆོས་སྐུ་དག་པ་ལས། །ཐམས་ཅད་མཁྱེན་པའི་ཡེ་ཤེས་ཤར། །ལོངས་སྐུ་མ་བསྐྱེད་ལྷུན་རྫོགས་པས། །རྣམ་པ་ཐམས་ཅད་མཁྱེན་པར་ཤར། །ང་རང་སྤྲུལ་པའི་སྐུ་ཡིན་པས། །ཆོས་རྣམས་རང་བྱུང་ཆེན་པོར་ཤར། །ང་ཡི་གཞི་ལ་དབང་བཞི་རྫོགས། །ཆུ་བོ་ཆེན་པོ་བཞི་རུ་བཅས། །དེའི་ཚེ་རང་དབང་ངང་གིས་ཐོབ། །ཐུགས་རྗེའི་སྒོ་ལྔ་མ་འགགས་པས། །གདུལ་བྱའི་ཞིང་དག་ཐུགས་རྗེས་ཟིན། །ཡིད་ཀྱི་རྣམ་ཤེས་རང་བྱུང་བས། །ཤེས་རབ་འབྱུང་བའི་གཞི་མ་འགགས། །ལྕེ་ཡི་རྣམ་ཤེས་སྤྲུལ་པའི་སྐུ། །ཚིག་རྣམས་རང་རང་དོན་ལ་སྦྱོར། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། སྤྲུལ་པའི་སྐུ་ཇི་ལྟར་འཇིག་རྟེན་དུ་བྱུང་ཚུལ་བསྟན་པའི་ལེའུ་སྟེ་སོ་གསུམ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་སྟོན་པ་རྡོ་རྗེ་འཆང་། །སྐུ་གསུམ་གྱི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ཆོས་སྐུའི་ངོ་བོ་ནི་ཕྱོགས་ལྷུང་མེད་པའི་ཤེས་རབ་དང་གཉིས་སུ་མེད་པའོ། །ལོངས་སྐུའི་ངོ་བོ་ནི། མཚན་ཉིད་འཛིན་པའི་ཡེ་ཤེས་གསལ་བ་ལ་མི་རྟོག་པའོ། །སྤྲུལ་པའི་སྐུའི་ངོ་བོ་ནི། ཐུགས་རྗེ་མ་འགགས་པའོ། །ཆོས་སྐུའི་ངེས་ཚིག་ནི་ཁྱབ་པ་དང་རྟེན་བྱེད་པའོ། །ལོངས་སྐུའི་ངེས་ཚིག་ནི། ཞིང་དག་པ་དང་འཁོར་སྨིན་པ་དང་ལོངས་སྤྱོད་པའོ། །སྤྲུལ་སྐུའི་ངེས་ཚིག་ནི་མ་འགགས་པའི་ཐུགས་རྗེ་སྣ་ཚོགས་པར་སྤྲུལ་པའི་ཕྱིར་སྤྲུལ་སྐུའོ། །ཡུན་ཐུང་བའི་ཕྱིར་སྤྲུལ་སྐུའོ། །མཐུན་པར་སྣང་བའི་ཕྱིར་སྤྲུལ་སྐུའོ། །མ་ངེས་པར་སྣང་བའི་ཕྱིར་ན་སྤྲུལ་སྐུའོ། །ཆོས་སྐུ་ལ་དབྱེ་ན་གསུམ་སྟེ། རིག་པ་ངོས་བཟུང་བྲལ་ཞིང་མི་འགྱུར་བས། ཆོས་སྐུའི་ཆོས་སྐུའོ། །རིག་པ་ཤེས་རབ་ཀྱིས་སྐུ་ལ་མཁྱེན་པ་མ་འགགས་པས་ཆོས་སྐུའི་ལོངས་སྐུའོ། །གདུལ་བྱ་ལ་སྣང་བའི་སྐུ་ལྔ་ནི། ཆོས་སྐུའི་སྤྲུལ་སྐུའོ། །རིགས་ ― DNG001_Page_0042 ―
[མ་དཔེ་གཟིགས་ན་འདིར་གནོན།]
ཀྱི་བུ་དེ་ལ་ནི་ངོ་བོ་རང་བཞིན་ཐུགས་རྗེ་གསུམ་ཞེས་ཀྱང་བྱའོ། །གཞི་ལ་གནས་པའི་སྐུ་གསུམ་ཞེས་ཀྱང་བྱའོ། །འབྲས་བུ་གཞི་ལ་གྲུབ་པ་ཞེས་ཀྱང་བྱའོ། །སྐུ་གསུམ་ཇ་ལོག་ཆེན་པོ་ཞེས་ཀྱང་བྱའོ། །འབྲས་བུའི་ངང་ལ་གནས་པ་ཞེས་ཀྱང་བྱའོ། །ལོངས་སྐུའི་ཆོས་སྐུ་ཆེན་པོ་ནི་རྣམ་པར་སྣང་མཛད་ཆེན་པོའོ། །ལོངས་སྐུའི་ལོངས་སྐུ་རིགས་བཞིའོ། །ལོངས་སྐུའི་སྤྲུལ་སྐུ་ནི་སེམས་དཔའ་དང་སེམས་མའོ། །དེ་རྣམས་ལ་མཚན་གྱི་བྱེ་བྲག་ནི། འབྲས་བུ་མངོན་དུ་གསལ་བ་ཞེས་བྱའོ། །སྐུ་གསུམ་རྣམ་པར་བཞག་པ་ཞེས་བྱའོ། །ལོངས་སྐུའི་སྐུ་གསུམ་མོ། །སྤྲུལ་སྐུའི་སྐུ་གསུམ་ནི། རིགས་བཞི་ཆོས་ཀྱི་སྐུའོ། །སེམས་དཔའ་སེམས་མ་ལོངས་སྐུའོ། །ཐུགས་རྗེའི་འོད་ཟེར་སྤྲུལ་པའི་སྐུའོ། །ཀྱེ་སེམས་དཔའ་ཆེན་པོ་དེ་ལ་ནི་ཐུགས་རྗེ་འབྱུང་བའི་སྐུ་གསུམ་ཞེས་ཀྱང་བྱའོ། །སྐུ་གསུམ་མཐའ་ལ་བསྐྱལ་བ་ཞེས་ཀྱང་བྱ། དེ་རྣམས་རྡོ་རྗེ་སེམས་དཔའི་ཐུགས་ལ་གནས་ཤིང་། སྟོན་པའི་དོན་མཛད་པས་འགྲོ་བ་འདུལ་བའི་སྐུ་གསུམ་ཞེས་བྱའོ། །ཀྱེ་གསང་བའི་བདག་པོ་ངེས་པར་ཟུང་ཞིག །ང་རྡོ་རྗེ་སེམས་དཔའ་ནི་སྤྲུལ་སྐུའི་ཆོས་སྐུའོ། །ང་ཡི་དབུ་ཡི་ཐོར་ཚུགས་དང་། མཛོད་སྤུའི་བུ་ག་དང་། ཤངས་ཀྱི་སྒྲོམ་ལ་སོགས་པ་རྣམས་ནས་སྐུ་འཇམ་དཔལ་དྲི་མེད་སྙིང་པོ་ལ་སོགས་པ་རྣམས་ནི་སྤྲུལ་སྐུའི་ལོངས་སྐུའོ། །ཐུབ་པ་དྲུག་དགའ་རབ་རྡོ་རྗེ་ལ་སོགས་པ་རྣམས་ནི་སྤྲུལ་སྐུའི་སྤྲུལ་སྐུའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྐུ་གསུམ་བྱེ་བྲག་བསྟན་པའི་ལེའུ་སྟེ་སོ་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དེ་མཚོན་ཚིག་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ཀྱེ་གསང་བའི་བདག་པོ། ངས་བསྟན་རྒྱུད་ལུང་ཐམས་ཅད་དུ། །ངོ་བོ་ངེས་ཚིག་དབྱེ་བ་རྣམ་གྲངས་གང་བྱུང་ཡང་། །ངས་བསྟན་གོང་བཞིན་ཤེས་པར་གྱིས་ཤིག །ཡང་གསང་བའི་བདག་པོས་ཞུས་པ། རྣམ་གྲངས་དོན་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ངོ་བོ་ནི་མ་བྱས་པ། མ་བཅོས་པ། མ་བསླད་པ། མི་འགྱུར་བ་རང་བཞིན་རྣམ་པར་ ― DNG001_Page_0043 ―
[མ་དཔེ་གཟིགས་ན་འདིར་གནོན།]
དག་པ། འདུས་མ་བྱས་པའི་ཡེ་ཤེས་ཆེན་པོ། ནམ་མཁའི་ལྟ་བུའི་ཆོས་ཉིད། སྟོང་པ་རྡོ་རྗེའི་ཆོས་ཅན། རིག་པ་དངོས་མེད་ཡེ་དག་ཟང་ཐལ་ཆེན་པོའོ། །རང་བཞིན་ནི་གཞི་གནས་ཀྱི་ཡེ་ཤེས་ཆེན་པོ་ལ། མཚན་ཉིད་འཛིན་པའི་ཡེ་ཤེས་ལྔ། མ་འགགས་པར་ངོ་བོ་ནང་ན་འོད་གསལ་བའོ། །ཐུགས་རྗེ་ནི་སྙིང་པོ་སྐུ་ལྔ། ཕྱག་རྒྱ་མི་འགག་པར་གསལ་བའོ། །རིགས་ཀྱི་བུ་ངོ་བོ་ཆོས་ཀྱི་སྐུ། རང་བཞིན་ལོངས་སྐུ། ཐུགས་རྗེ་སྤྲུལ་སྐུ་སྟེ། ཐམས་ཅད་ཀྱི་གཞི་མ་འགགས་པར་གནས་པས་གཞི་གནས་ཀྱི་སྐུ་གསུམ་མོ། །རྒྱུ་དག་པ་ཆོས་ཀྱི་སྐུ་ལ། འབྲས་བུ་དག་པ་ཆོས་ཉིད་གཟུགས་སྐུ་གཉིས་ནང་གསལ་དུ་གནས་པ་ནི། ཡོན་ཏན་དུ་གྲུབ་པ་སྟེ། གཞི་ལ་གྲུབ་པའི་སྐུ་གསུམ་ཞེས་བྱའོ། །སྐུ་གསུམ་ཇ་ལོག་ཞེས་བྱ་བ་ནི། མཚན་ཉིད་སྡེ་གསུམ་ལས་ཇ་ལོག་སྟེ། འདུས་བྱས་ཀྱི་ཆོས་ཀ་ནས་དག་པས་རང་བྱུང་གི་ཡེ་ཤེས་ལྷུན་གྱིས་གྲུབ་པའོ། །སྔགས་ཀྱི་བ་ལས་ཇ་ལོག་སྟེ། རིགས་ལྔ་གདུལ་བྱ་ལ་སྣང་བས་སྤྲུལ་པ་སྟེ། ལོངས་སྐུ་ལ་སྤྲུལ་སྐུ་ཇ་ལོག་གོ། །རྫོགས་པ་ཆེན་པོ་ལ་སོགས་པ་ཕྱི་ཐུན་མོང་ལས་ཇ་ལོག་སྟེ། བདག་གིས་མ་བསྒོམས་མི་བསྒོམ་བདག་ཉིད་ཆེན་པོའི་དགོངས་པ་དང་མི་འབྲལ་བར་གནས་སོ། །འདུག་ཚུལ་ཇ་ལོག་སྟེ། ཆོས་སྐུ་གཟུགས་སྐུ་གཉིས་ཀྱི་བདག་མེད་བསམ་འདས་ཀྱི་སྐུ་ཡིན་པས། ཆོས་སྐུ་ཇ་ལོག་གོ། །ལོངས་སྐུ་སྤྲུལ་སྐུར་ཇ་ལོག་ཅིང་། སྤྲུལ་སྐུ་ལོངས་སྐུར་ཇ་ལོག་པས་ན་ཇ་ལོག་གོ། །རིགས་ཀྱི་བུ་དེས་ན་ལོངས་སྐུ་མན་ཆད་ནས་ལྟོས་པའི་བརྗོད་ཚིག་གོ། །དེ་ལ་བྱེད་པ་མེད་པར་རང་བཞིན་གྱིས་དེ་ལྟར་གནས་པས་ན་ཆེན་པོའོ། །སྐུ་གཉིས་རང་གི་གཞིའི་ངང་ལ་གནས་ཤིང་འབྲས་བུའི་ངང་ལ་གནས་པས་ན། དོན་འགྱུར་བ་མེད་པར་གནས་སོ། །ཀྱེ་གསང་བའི་བདག་པོ་རྣམ་སྣང་ལ་ལོངས་སྐུའི་ཆོས་སྐུར་བཞག་པ་ནི། རྣམ་སྣང་ལ་རིགས་བཞི་འབྱུང་ཞིང་རྣམ་སྣང་གི་ཡོན་ཏན་གྱིས་ཁྱབ་པ་སྟེ། རིགས་བཞིའི་གཞི་འམ་ཤེས་བྱར་གྱུར་པའོ། །རིགས་བཞི་ཡང་ཡང་རྣམ་སྣང་གིས་ཐུགས་རྣམ་པར་དག་པ་ལ་ལོངས་སྤྱོད་མར་འཁོར་དུ་སྨིན་པས་སེམས་དཔའ་དང་སེམས་མ་ལ་ཐུགས་རྗེ་སྤྱོད་པའོ། །དེས་ན་རིགས་བཞི་ལོངས་སྐུའོ། །དེ་ལས་ཐུགས་ ― DNG001_Page_0044 ―
[མ་དཔེ་གཟིགས་ན་འདིར་གནོན།]
རྗེ་བྱེ་བྲག་མི་འདྲ་བར་མཁྱེན་པས་སེམས་དཔའ་སེམས་མར་སྤྲུལ་པའོ། །དེ་བཞིན་ཆོས་སྐུ་སྐུ་གསུམ་གྱི་བཞག་ལུགས་དང་སྤྲུལ་སྐུ་སྐུ་གསུམ་གྱི་བཞག་ལུགས་ཀྱང་ཤེས་པར་བྱའོ། །སྐུའི་ཆེ་བ་ཡོངས་སུ་རྫོགས་ཏེ་གདུལ་བྱ་འཁོར་སྨིན་པ་རྣམས་ལ་མངོན་པར་སྣང་བས། འབྲས་བུ་མངོན་པར་གསལ་བའི་དུས་ཤེས་པར་བྱའོ། །ཐུགས་ཀྱི་མཁྱེན་པས་ཡར་ཆོས་སྐུར་གསལ་ཞིང་། སྤྱན་གྱི་སྤྲུལ་པས་མར་སྤྲུལ་སྐུར་གསལ་ཏེ། བར་ན་སྐུ་མཆོག་གསལ་བས་ན། རྣམ་པར་གཞག་པའོ། །ཆོས་ཀྱི་སྤྱན་གྱིས་རྣམ་རྟོག་མི་མངའ་བས་གཟིགས་ལ་ཞལ་གྱི་བར་ནས་ཡི་གེ་དྲུག་གི་འོད་འཕྲོ་བས་འ་ཨ་ཧ་ཤ་ས་མ། འཛམ་བུ་གླིང་བྱེ་བ་ཕྲག་བརྒྱ་ན་རྡོ་རྗེ་སེམས་དཔར་གསལ་ཞིང་། འགྲོ་དྲུག་སྤྱིའི་གནས་ན་ཐུབ་པ་དྲུག་སྣང་བས། ཐུགས་རྗེ་འབྱུང་བའི་སྐུ་གསུམ་ནི། ཐུགས་རྗེ་འབྱུང་ལུགས་པར་པ་ནས་འབྱུང་བའི་ཕྱིར་རོ། །དེས་སེམས་ཅན་གྱི་དོན་དངོས་མཛད་པས་སྤྲུལ་པའི་སྐུ་སྟེ། །འགྲོ་བ་འདུལ་བའི་སྐུ་གསུམ་མོ། །མ་འགགས་པ་སྤྲུལ་པའི་སྐུ་སྟེ། །རྩལ་ལམ་ཐུགས་རྗེ་དེ་ལྟར་སྣང་བའོ། །དེས་ན་ཆོས་སྐུ་ཞེས་པ་དང་། ལོངས་སྐུ་ཞེས་པ་དང་། ཐུགས་རྗེ་ཞེས་པ་དང་། སྤྲུལ་པའི་སྐུ་ཞེས་པ་དང་། མགོན་པོ་ཞེས་པ་དང་། དཔལ་ཞེས་པ་དང་། སྐྱབས་ཞེས་པ་དང་། སྟོན་པ་ཞེས་པ་དང་། འཇིག་རྟེན་གྱི་སྒྲོན་མ་ཞེས་པ་མདོར་བསྡུས་ནས་བསྟནཔའོ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། སྐུ་གསུམ་མཚོན་པའི་ཚིག་དང་སྐུའི་རྣམ་གྲངས་བསྟན་པའི་ལེའུ་སྟེ་སོ་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། སྐུ་གསུམ་ཡེ་ནས་སངས་རྒྱས་པའི། །སངས་རྒྱས་ངོ་བོ་ངེས་ཚིག་དང་། །དབྱེ་བ་རྣམ་གྲངས་གསུང་དུ་གསོལ། །ཞེས་ཞུས་པས་སྟོན་པས་བཀའ་སྩལ་པ། སངས་རྒྱས་ཀྱི་ངོ་བོ་དྲི་མ་མེད་པའི་ཡེ་ཤེས་སོ། །ངེས་ཚིག་ནི་ཉོན་མོངས་པའི་དྲི་མ་དག་ཅིང་། མཁྱེན་པའི་ཡེ་ཤེས་རྒྱས་པས་ནའོ། །དབྱེ་ན་གཉིས་ཏེ་གཞི་ལྷུན་གྲུབ་དང་། རྟོགས་པ་མངོན་གྱུར་ཞེས་བྱའོ། །དེ་ལ་ནི་གོང་གི་གཞི་དེའི་མཚན་དང་ལྡན་པས་ན། སངས་རྒྱས་ཞེས་བྱའོ། །ཆོས་སྐུ་ལས་ལོངས་སྐུ་མཆེད་ཅིང་། །དེས་ ― DNG001_Page_0045 ―
[མ་དཔེ་གཟིགས་ན་འདིར་གནོན།]
སྤྲུལ་སྐུར་སྟོན་པ་སྟེ། སྤྲུལ་སྐུས་འགྲོ་བ་ལ་འཆད་པའི་ཕྱིར་ན་སྟོན་པའོ། །རྟོགས་པའི་ཤེས་རབ་ཀྱིས་ལོག་པར་རྟོགས་པའི་བདུད་བཅོམ་སྟེ། མཁྱེན་པའི་སྟོབས་དང་ལྡན་ཞིང་། གཟུང་འཛིན་གྱི་མཐའ་ལས་འདས་པས་ན་བཅོམ་ལྡན་འདས་སོ། །དེ་ལྟར་མཁྱེན་པས་རྟོགས་པ་བདག་གི་དཔལ་ལོ། །ཀུན་གྱི་དོན་བྱེད་ཅིང་འཆད་པས་ན་ཐུགས་རྗེ་གཞན་གྱི་དཔལ་ལོ། །འགྲོ་བའི་མ་རིག་པའི་མུན་པ་སེལ་བའི་སྒྲོན་མའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སངས་རྒྱས་ཀྱི་ངོ་བོ་ངེས་ཚིག་དབྱེ་བ་དང་། མཚན་མདོར་བསྡུས་ནས་བསྟན་པའི་ལེའུ་སྟེ་སོ་དྲུག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཆོས་སྐུའི་བདུད་འཇོམས་ཇི་ལྟར་ལགས། །ལོངས་སྐུའི་བདུད་འཇོམས་ཇི་ལྟར་ལགས། །སྤྲུལ་སྐུའི་བདུད་འཇོམས་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། ཆོས་སྐུ་འགག་པ་མེད་པས་འཆི་བདག་གི་བདུད་བཅོམ། མཚན་མ་མེད་པས་ཕུང་པོའི་བདུད་བཅོམ། དེ་གཉིས་སུ་མེད་པས་ཉོན་མོངས་པའི་བདུད་དང་ལྷའི་བུའི་བདུད་བཅོམ། དེ་ནི་ངང་གིས་བཅོམ་པ་ཡིན། སྲོག་མེད་སྐུ་ལྔས་འཆི་བདག་གི་བདུད་བཅོམ། ཡེ་ཤེས་སྒྱུ་མས་ཕུང་པོའི་བདུད་བཅོམ། སེམས་རྟོག་མེད་ཀྱིས་ཉོན་མོངས་པའི་བདུད་དང་ལྷའི་བུའི་བདུད་བཅོམ། ཆོས་སྐུ་དོན་ལྡན་རྟོགས་པས་འཆི་བདག་གི་བདུད་བཅོམ། རྡོ་རྗེ་སེམས་དཔའ་སྤྲུལ་པའི་སྐུའི་དོན་ལྡན་རྟོགས་པས་ཉོན་མོངས་བདུད་དང་ལྷའི་བུའི་བདུད་ཀྱང་དེ་བཞིན་བཅོམ། ལོངས་སྐུའི་དོན་ལྡན་རྟོགས་པས་ཕུང་པོའི་བདུད་ཀྱང་བཅོམ། ཞེས་གསུངས་སོ། །ཡང་གསང་བའི་བདག་པོས་ཞུས་པ། ཆོས་སྐུའི་ལྡན་ལུགས་ཇི་ལྟར་ལགས། །ལོངས་སྐུའི་ལྡན་ལུགས་ཇི་ལྟར་ལགས། །སྤྲུལ་སྐུའི་ལྡན་ལུགས་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། ཆོས་སྐུ་ཡོན་ཏན་སྒོ་ཡངས་པས། །ཡེ་ཤེས་ལྔ་དང་སྐུ་གཉིས་ལྡན། །ལོངས་སྐུ་མཚན་དང་དཔེ་བྱད་ལྡན། །དགོངས་པ་ཡེ་ཤེས་ལྔ་དང་ལྡན། །མངོན་པར་ཤེས་པའི་ཆོས་དྲུག་ལྡན། །སྤྲུལ་སྐུ་ ― DNG001_Page_0046 ―
[མ་དཔེ་གཟིགས་ན་འདིར་གནོན།]
ཆོ་འཕྲུལ་རྫུ་འཕྲུལ་ལྡན། །ཟུར་ཙམ་བསྡུས་ནས་བསྟན་པ་ཡིན། །ཡང་གསང་བའི་བདག་པོས་ཞུས་པ། སྐུ་གསུམ་འདས་ལུགས་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། ཆོས་སྐུ་མཐའ་རྣམས་ཀུན་ལས་འདས། །ལོངས་སྐུ་གཟུང་འཛིན་འཁོར་བའི་ཆོས་ལས་འདས། །སྤྲུལ་སྐུ་ཤེས་རབ་ཆེན་པོ་ཐུགས་རྗེའི་ཐབས་ལྡན་པས། །འཁོར་འདས་གཉིས་ཀའི་མཐའ་ལ་མི་གནས་འདས། །འདས་ལུགས་མང་ཡང་བསྡུས་ནས་བསྟན་པ་ཡིན། །ཞེསགསུངས་སོ། །ཡང་གསང་བའི་བདག་པོས་ཞུས་པ། ཆོས་སྐུའི་སངས་རྒྱས་ཇི་ལྟར་ལགས། །ལོངས་སྐུའི་སངས་རྒྱས་ཇི་ལྟར་ལགས། །སྤྲུལ་སྐུའི་སངས་རྒྱས་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། ཆོས་སྐུ་མཚན་མའི་ཆོས་གཉིས་སུ་སྣང་བ་ཐམས་ཅད་སངས། །རང་གསལ་གཉིས་མེད་ཡེ་ཤེས་རྒྱས། །ལོངས་སྐུ་འཁོར་བའི་ཆོས་རྣམས་སངས། །རྣམ་པ་ཐམས་ཅད་མཁྱེན་ཉིད་དང་། །སྐུ་ཡི་ཆེ་བའི་ཡོན་ཏན་རྒྱས། །སྤྲུལ་པའི་སྐུ་ཡིས་མ་རིག་པ་དང་། །ལོག་པར་ལྟ་བ་ཐམས་ཅད་སངས། །འཁོར་བར་འཁྲུལ་པའི་སྣང་བ་སངས། །ཤེས་རབ་ཐབས་དང་ཐུགས་རྗེ་རྒྱས། །ཞེས་གསུངས་སོ། །ཡང་གསང་བའི་བདག་པོས་ཞུས་པ། །སྐུ་གསུམ་དྲི་མ་ཇི་ལྟར་དག །སྟོན་པས་བཀའ་སྩལ་པ། ཆོས་སྐུ་ངོ་བོ་ཉིད་ཀྱིས་དྲི་མ་དག །ལོངས་སྐུ་ཤེས་བྱའི་དྲི་མ་དག །སྤྲུལ་སྐུ་ཉོན་མོངས་དྲི་མ་དག །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྐུ་གསུམ་གྱི་བཅོམ་ལྡན་འདས་དང་སངས་རྒྱས་དང་དྲི་མ་དག་ཚུལ་བསྟན་པའི་ལེའུ་སྟེ་སོ་བདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། སྐུ་གསུམ་ཐུགས་རྗེ་མ་འགགས་པས། །འགྲོ་དོན་མཛད་ཚུལ་ཇི་ལྟར་ལགས། །སྟོན་པས་བཀའ་སྩལ་པ། རིགས་ཀྱི་བུ་ང་དང་པོ་བྱིས་པ་ལོ་བརྒྱད་ལོན་པའི་ཚད་དུ་སྐྱེས་སོ། །དེ་ནས་ལོ་བརྒྱད་ཀྱི་བར་དུ་ཤེས་རབ་ཀྱི་སྲོག་ཤིང་ལ་ཡེ་ཤེས་ལྔའི་འཁོར་ལོ་བསྐོར་ནས། རྟོགས་པས་བདག་བསྒྲལ་ཏེ། དགོངས་པ་ཉིད་ལ་ཉིད་འགྲེལ་ལོ། །དེ་ནས་ལོ་བརྒྱད་ཀྱི་བར་དུ་སྤྲུལ་པ་མང་དུ་ཕྱུང་ནས་འགྲོ་བའི་དོན་བྱས་ཏེ། ལྷ་གནས་དང་པོར་འཁོར་རྣམས་ཀྱི་སྡུག་བསྔལ་གྱི་གདུང་པ་བསལ་ཏེ། རིན་པོ་ཆེའི་དར་སྐུད་ལ་མུ་ཏིག་གི་ཕྲེང་བ་བརྒྱུས་ནས་འཁོར་ལོ་ཕྱིར་ ― DNG001_Page_0047 ―
[མ་དཔེ་གཟིགས་ན་འདིར་གནོན།]
བསྐོར་ཏེ། ཐུགས་རྗེས་གཞན་བསྒྲལ་པའི་ཕྱིར། ལྡེམ་པོའི་དོན་ལ་དགོངས་ནས་ཐེག་པ་ཐུན་མོང་རྣམས་བཤད་དོ། །དེ་ནས་ཡང་མེ་རི་འབར་བའི་རྩེ་མོ་ལ་སངས་རྒྱས་ཀྱི་བདེན་པ་ངེས་པར་མཐོང་ནས། སྣང་བ་སྟོང་པའི་ཆོས་རྣམས་བཤད་དོ། །དེ་ནས་བྱ་རྒོད་ཕུང་པོའི་རི་ལ། རྒྱུད་ཆེན་པོ་གསང་བ་རྨད་དུ་བྱུང་བ་རྣམས་ཐུགས་ལས་བཀྲོལ། མགུར་གྱི་བུམ་པ་ལ་འདྲིལ། ལྗགས་ཀྱི་པདྨ་ལ་བསྐྱོན། ཡོན་ཏན་རྣམ་པ་ལྔའི་རྣམ་པར་ཤེས་པས་བཀྲམས། རིག་པའི་ཁུ་བྱུག་གསུང་དབྱངས་ཡན་ལག་དྲུག་ཅུ་དང་ལྡན་པ་གཅིག་ཏུ་བཤད་དེ། འཁོར་གྱི་བློའི་ཐེ་ཚོམ་དང་སྤྲོས་པ་བཅད་དོ། །ལོ་ཉི་ཤུ་རྩ་བཞིན་མྱ་ངན་ལས་འདའ་ཁར་ཞལ་ཆེམས་རྣམ་པ་གསུམ་བཤད་དོ། །རྗེས་འཇུག་གི་དོན་དུ་སྤྲོས་བྲལ་དོན་གསལ་དང་གཅིག །གཅིག་ཤེས་ཀུན་གྲོལ་དང་གཉིས། རིན་ཆེན་ཀུན་འདུས་དང་གསུམ་བཤད་དོ། །ངའི་རྗེས་སུ་ནི་འཇུག་ལ་ང་དང་ཕྲད་པའི་སྐལ་བ་མེད་པ་རྣམས་ཀྱི་དོན་དུ་བཞག་པའོ། །ངའི་སྐུ་གསུམ་གྱི་གདུང་རྟེན་དེ་བཞིན་དུ་བཞག་ནས། ང་ཡོངས་སུ་མྱ་ངན་ལས་འདས་སོ། །ཞེས་མ་འོངས་པའི་དོན་དུ་དེ་སྐད་སྨྲོས་ཤིག །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྤྲུལ་སྐུའི་དོན་མཛད་ལུགས་བསྟན་པའི་ལེའུ་སྟེ་སོ་བརྒྱད་པའོ།། །།དེ་ནས་ཡང་སྟོན་པས་མཚོན་པ་བསམ་གྱིས་མི་ཁྱབ་པའི་དགོངས་པ་ལ་བཞུགས་སོ། །དེའི་ཚེ་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་ཐབས་ཀྱི་བདག །ལྡེམ་པོའི་དོན་ལ་དགོངས་པ་ཡི། །ཐེག་བརྒྱད་དོན་རྣམས་གསུང་དུ་གསོལ། །ཞེས་ཞུས་སོ། །རིན་པོ་ཆེ་མཆོད་རྟེན་བང་རིམ་དགུ་པའི་སྟེང་ནས་སྟོན་པ་གཡུའི་བྱ་ཁུ་བྱུག་སྐད་ལན་བཞིན་འདོན་པའི་མན་ངག །སྭཱ་ཧཱ་སརྦ་ཡཱ་ན་པྲ་ས་ར་དུ་ས་ཡ། སྟོན་པས་བཀའ་སྩལ་པ། ཀྱེ་ཀྱེ་གསང་བའི་བདག་པོ་ལེགས་པར་ཟུང་ཞིག །ང་དང་ང་ཡི་སྤྲུལ་པ་ཡིས། ཐུན་མོང་སྤྱི་དང་ཁྱད་པར་གྱི་འཁོར་གདུལ་བྱ་རྣམ་པ་གཉིས་ལ། ལྡེམ་དགོངས་སུ་བསྟན་པའོ། །ལྡེམ་པོའི་ལྟ་བ་འདི་ལྟར་ཏེ། །ཉན་ཐོས་རང་རྒྱལ་སེམས་དཔའ་དང་། །ཀྲི་ཡོག་སྡེ་གསུམ་བསྐྱེད་རྫོགས་གཉིས། །བདེན་པ་ཕྱོགས་རེ་ནས་བཟུང་ནས། །གཟའ་གཏད་བཅས་པའི་ལྟ་བ་བརྒྱད། །བློ་ཡུལ་ ― DNG001_Page_0048 ―
[མ་དཔེ་གཟིགས་ན་འདིར་གནོན།]
གཉིས་ཀྱི་མུར་འཛིན་པས། །རང་རིག་ཡེ་ཤེས་ལ་མ་ཟློས། །དེ་བས་ཕྱིན་ཅི་ལོག་པ་ཡིན། །དོན་ལས་ཉམས་དང་གོལ་བའི་ཕྱིར། །ཞེ་འདོད་བློ་ཡི་ལྟ་བ་ཡིན། །ཀྱེ་གསང་བའི་བདག་པོ་ཞེ་འདོད་ཆས་པའི་ལྟ་བ་བརྒྱད། གང་ཟག་བདག་མེད་རྟོགས་ཀྱང་ཆོས་ཀྱི་བདག་མ་སྤངས། །ཆོས་ཀྱི་བདག་ནི་གཟུང་འཛིན་གཉིས་སུ་སྣང་། །འཛིན་པའི་རྒྱུན་རྟོག་སྐད་ཅིག་འགགས། །རྟག་ཆད་གཉིས་ལས་འདས་པར་བལྟ། །དཔེར་ན་ཆུ་བོ་གངྒཱ་བཞིན། །གཟུང་བྱ་ཀུན་རྫོབ་རྣམ་པར་བསལ། །དོན་དམ་རྡུལ་ཕྲན་རྫས་སུ་འདོད། །དཔེར་ན་གཡག་རྔ་ནེ་སེང་བཞིན། །མདོ་སྡེ་བྱེ་བྲག་གཉིས་སུ་འདོད། །ཉན་ཐོས་ཞེ་འདོད་ཡིན་པས་ན། །གཉིས་མེད་བདེ་ཆེན་དོན་དང་འགལ། །གང་ཟག་བདག་མེད་གང་མཐུན་ངེས་རྟོགས་ལ། །ཆོས་ཀྱི་ཁམས་ལ་ཕྱོགས་གཅིག་བདག་མེད་ལྟ། །དེ་གཉིས་མཚན་མར་ངེས་འཛིན་པ། །རང་རྒྱལ་ཞེ་འདོད་ལྟ་བ་ཡིས། །གཉིས་མེད་བདེ་ཆེན་དོན་ལས་ཉམས། །བདག་གཉིས་བྲལ་བར་བལྟ་ཞིང་བདེན་གཉིས་ཚུལ་དུ་འདོད། །དོན་དམ་སེམས་སུ་བལྟ་བ་དང་། །ཀུན་རྫོབ་སྐུར་པ་མི་འདེབས་པ། །དཔེར་ན་རྨི་ལམ་སྨིག་རྒྱུ་བཞིན། །བྱང་ཆུབ་སེམས་དཔའི་ལྟ་བ་ཡིན། །གཉིས་མེད་ཡེ་ཤེས་དོན་ལས་གོལ། །མི་རྟོག་སྐྱེ་འགག་མེད་པའི་ངང་ལས་མ་གཡོས་ཀྱང་། །སེམས་དཔའ་རྣམ་གཉིས་རྗེ་དང་བྲན་དུ་བལྟ། །ཀྲི་ཡཱའི་ལྟ་བ་ཞེ་འདོད་དང་བཅས་པས། །ཀུན་བཟང་བདེ་ཆེན་དོན་དང་འགལ། །མི་རྟོག་ངང་ལས་མ་གཡོས་སྐྱེ་འགག་བྲལ་བཞིན་དུ། །སེམས་དཔའ་རྣམ་གཉིས་སྤུན་དང་གྲོགས་པོར་བལྟ། །ཨུ་པ་ཡོ་གའི་འདོད་པཡིས། །དབྱེར་མེད་ཡེ་ཤེས་བདེ་ཆེན་དོན་ལས་འགལ། །མ་སྐྱེས་འགག་པ་མེད་ཅིང་མི་རྟོག་གཡོ་བ་མེད་བཞིན་དུ། །ཁམས་དང་སྐྱེ་མཆེད་ལྷ་དང་ལྷ་མོར་བལྟ། །མ་ཧཱ་ཞེ་འདོད་མཚན་མར་འཛིན། །སྤྲོས་བྲལ་བདེ་བ་ཆེན་པོའི་དོན་ལས་གོལ། །མ་གཡོས་མི་རྟོག་སྐྱེ་འགག་མེད་བཞིན་དུ། །དབྱིངས་དང་ཡེ་ཤེས་ལྷ་དང་ལྷ་མོར་འཛིན། །ཨ་ནུའི་ཞེ་འདོད་ལྟ་བ་ཡིན། །དངོས་མེད་ཟང་ཐལ་རང་སྣང་བདེ་ཆེན་དོན་ལས་གོལ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཐེག་པ་བརྒྱད་ཀྱི་གྲུབ་མཐའ་བསྟན་པའི་ལེའུ་སྟེ་སོ་ ― DNG001_Page_0049 ―
[མ་དཔེ་གཟིགས་ན་འདིར་གནོན།]
དགུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་སྟོན་པ་རྡོ་རྗེ་འཆང་། །ཐེག་པ་བརྒྱད་དུ་དེ་ལྟར་གསུངས་པ་དེ། །དགོངས་པ་ཉམས་སུ་ཇི་ལྟར་ལེན། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཤིག །དམིགས་གཏད་བཅས་པའི་བསྒོམས་པ་བརྒྱད། །རྩོལ་བའི་བློ་ཡིས་ཡུལ་བཟུང་ནས། །ཉན་ཐོས་ཐེག་པས་འདི་ལྟར་བསྒོམ། །རང་ལུས་རྡོས་བཅས་ཕུང་པོ་ལ། །མི་གཙང་རྫས་སུ་འདུ་ཤེས་བསྐྱེད། །རྣམ་པར་སྔོ་དང་བམ་པ་དང་། །རུལ་པ་མྱགས་པར་བསྒོམ་པ་སྟེ། །གཟུགས་ཕུང་ཞེན་པའི་མཐའ་ལས་བཟློག །ཞིགནས་ཡན་ལག་བཅུ་གཉིས་ལྡན། །ཚོགས་དྲུག་ཡུལ་དང་རྟོག་པ་སྤང་། །རང་རྒྱལ་འདོད་པ་འདི་ལྟར་བསྒོམ། །དང་པོ་མ་རིག་པ་ལ་སོགས་ནས། །མཐའ་མ་རྒ་ཤིར་ཐུག་པར་བསྒོམ། །རང་གི་དཔྲལ་བར་སེམས་གཏད་དེ། །ཀེང་རུས་དཀར་པོ་མཐེབ་ལོང་ཙམ། །དེ་ལ་སེམས་ཟིན་བརྟན་པ་དང་། །དེ་ལས་མཆེད་ནས་ཀེང་རུས་བལྟ། །དེ་ནས་རིམ་པར་འགག་པར་བསྒོམ། །བྱང་སེམས་འདོད་པ་འདི་ལྟར་བསྒོམ། །དེ་ཡང་བློ་ཡི་འདོད་པ་ཡིས། །སེམས་ཙམ་སེམས་ཉིད་རང་གསལ་བསྒོམ། །དབུ་མ་བདེན་པ་དབྱེར་མེད་ནམ་མཁའི་དཀྱིལ་ལྟར་བསྒོམ། ཀྲི་ཡཱའི་འདོད་པ་འདི་ལྟར་བསྒོམ། སྟོང་པའི་ལྷ་ཚོགས་སྔོན་སོང་ནས། །རིགས་གསུམ་ཕྱག་རྒྱ་ལྡན་པར་བསྒོམ། །ཡོ་གའི་ཞེ་འདོད་འདི་ལྟར་བསྒོམ། །བྱང་ཆུབ་རྣམ་ལྔ་སྔོན་སོང་ནས། །སུམ་ཅུ་རྩ་བདུན་ཕྱག་རྒྱ་བཞི་དང་ལྡན་པར་བསྒོམ། །མ་ཧཱ་ཡོ་གའི་བསྒོམ་པ་ནི། །ཏིང་འཛིན་རྣམ་གསུམ་སྔོན་སོང་ནས། །ཞི་ཁྲོ་རབ་འབྱམས་བསྒོམ་པར་བྱེད། །ཕྱག་རྒྱ་བཞི་ལྡན་བསྒོམ་པའི་མཆོག །ཨ་ནུ་ཡོ་གའི་ཞེ་འདོད་བསྒོམ་པ་ནི། །སྙིང་པོ་བརྗོད་པ་སྔོན་སོང་ནས། །ཕུང་པོ་ལྷ་ཡི་ཕྱག་རྒྱ་བཞི། །དཔེར་ན་ཆུ་ལས་ཆུ་བུར་དང་། །ཚྭ་ཚྭ་བརྐོས་ཕོར་ནང་ནས་བཏོན་པ་བཞིན། །སྐད་ཅིག་མ་ལ་གསལ་བར་བསྒོམ། །བསམ་གཏན་ཡན་ལག་སྔོན་སོང་ནས། །དངོས་གཞི་བྱེ་བྲག་དེ་ལྟར་བསྒོམ། །དགོས་ཆེད་མཐར་ཕྱིན་འབྲས་བུ་ཐོབ། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཐེག་པ་བརྒྱད་ཀྱི་བསྒོམ་པ་བསྟན་པའི་ལེའུ་སྟེ་བཞི་བཅུ་པའོ།། །།དེ་ནས་ཡང་གསང་བའི་བདག་པོས་ཞུས་པ། རང་ ― DNG001_Page_0050 ―
[མ་དཔེ་གཟིགས་ན་འདིར་གནོན།]
རང་དོན་ལ་བསྒོམ་དུས་སུ། །སྤྱོད་པའི་བྱེ་བྲག་ཇི་ལྟར་སྤྱད། །ཅེས་ཞུས་སོ། །སྟོན་པས་བཀའ་སྩལ་པ། གསང་བའི་བདག་པོ་ལེགས་པར་ཟུང་ཞིག །ཐེག་བརྒྱད་རང་གི་སྤྱོད་པ་བསྟན། །སྡུག་བསྔལ་རྩོལ་བསྒྲུབ་བཅས་པ་སྤྱོད། །སྤྱོད་པ་བླང་དོར་མེད་པར་མ་རྟོགས་པས། །ཐུན་མོང་མ་ཡིན་བླང་དོར་སྤྱོད། །ཉན་ཐོས་སྤྱོད་པའི་ཁྱད་པར་ནི། །མ་བྱིན་ལེན་དང་མི་ཚངས་སྤྱོད། །སྲོག་གཅོད་རྣམ་པར་སྤང་པ་སྟེ། །ལུས་ཀྱི་སྤྱོད་པ་རྣམ་པར་དག །ངག་གི་སྤྱོད་པ་དག་པ་ནི། །རྫུན་དང་ངག་འཁྱལ་ཕྲ་མ་དང་། །ཞེ་གཅོད་ཚིག་རྣམས་མེད་པར་སྤྱོད། །ཡིད་ཀྱི་སྤྱོད་པ་དག་པ་ནི། །བརྣབ་སེམས་གནོད་སེམས་ལོག་ལྟ་བྲལ་བ་ཡིན། །དགེ་བཅུ་རྣམས་ནི་རང་གིདོན་དུ་སྤྱོད། །རང་རྒྱལ་བ་ཡི་སྤྱོད་པ་ནི། །རྫུ་འཕྲུལ་ཡ་མ་ཟུང་འགའ་ཡིས། །འགྲོ་དོན་ཤས་ཙམ་སྤྱོད་པར་བྱེད། །བྱང་ཆུབ་སེམས་དཔའི་སྤྱོད་པ་ནི། །ཚད་མེད་བཞི་དང་བསྡུ་བ་བཞི། །གཙོ་རུ་གཞན་གྱི་དོན་དུ་སྤྱོད། །ཀྲི་ཡ་པ་ཡི་སྤྱོད་པ་ནི། །ཕྱི་ནང་རྫས་གསུམ་དག་པར་སྤྱོད། །ཡོ་ག་དག་གི་སྤྱོད་པ་ནི། །ཕྲིན་ལས་རྣམ་པ་བཞི་དག་དང་། །ཁོ་ན་ཉིད་བཞི་སྤྱོད་པར་བྱེད། །མ་ཧཱ་ཡོ་གའི་སྤྱོད་པ་ནི། །ཐབས་དང་ཤེས་རབ་གཉིས་སྒོ་ནས། །འགྲོ་དོན་མཐའ་རུ་ཕྱིན་པར་སྤྱོད། །ཨ་ནུ་ཡོ་གའི་སྤྱོད་པའི་གནས་སྐབས་ནི། །གཉིས་སུ་མེད་པའི་ཚུལ་གྱིས་སུ། །དབྱིངས་དང་ཡེ་ཤེས་རྣམ་པ་གཉིས། །གཉིས་མེད་གཅིག་ལ་ཡོངས་སུ་སྤྱོད། །ཅེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ཐེག་པ་བརྒྱད་ཀྱི་སྤྱོད་པ་བསྟན་པའི་ལེའུ་སྟེ་ཞེ་གཅིག་པའོ།། །།དེ་ནས་ཡང་གསང་བའི་བདག་པོས་ཞུས་པ། སྟོན་པ་ཐུགས་རྗེ་ཐབས་ཀྱི་བདག །དེ་ཡི་འཇུག་སྒོ་བསྲུང་མཚམས་དང་། །སྒྲུབ་པའི་ཐབས་རྣམས་ཇི་ལྟར་ལགས། །སོ་སོའི་འབྲས་བུ་ཅི་ལྟར་སྨིན། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་དེས་ཟུང་ཞིག །ཞུགས་ནས་དེ་ཡི་དོན་སྤྱོད་པས། །སོ་སོའི་འཇུག་སྒོ་སྤྱོད་པར་བསྡུ། །ལྟ་བའི་དོན་ལས་མི་འདའ་བས། །སོ་སོའི་དམ་ཚིག་ལྟ་བར་བསྡུ། །སོ་སོའི་ལྟ་བ་གོམས་པས་བསྒྲུབ་པའི་མཆོག །དེ་ལ་དེ་ཉིད་དེར་བསྡུས་པའོ། ། ― DNG001_Page_0051 ―
[མ་དཔེ་གཟིགས་ན་འདིར་གནོན།]
ཐེག་པ་སོ་སོའི་འབྲས་བུ་ནི། །ལྟ་བ་མངོན་དུ་གྱུར་པ་འབྲས་བུའི་མཆོག །ཉན་ཐོས་དག་གི་འབྲས་བུ་ནི། །ལྟ་སྒོམ་སྤྱོད་པ་མཐར་ཕྱིན་པས། །འབྲས་བུ་ཟུང་བཞི་ཡ་བརྒྱད་སྨིན། །རང་རྒྱལ་དག་གི་འབྲས་བུ་ཡང་། །ལྟ་སྒོམ་སྤྱོད་པ་མཐར་ཕྱིན་པས། །དགོས་པ་འབྲས་བུ་རྣམ་གཉིས་ཐོབ། །དཔེར་ན་ནེ་ཙོ་བསེ་རུ་བཞིན། །བྱང་སེམས་དག་གི་འབྲས་བུ་ཡང་། །ལྟ་བསྒོམ་པ་སྤྱོད་པ་རྣམས། །མངོན་གྱུར་ས་བཅུ་རིམ་སྦྱངས་ནས། །ཀུན་དུ་འོད་ལ་གནས་པར་འདོད། །ཀྲི་ཡའི་འབྲས་བུ་རྫོགས་པས་ནི། །རང་གི་ལྟ་སྒོམ་དོགས་ཆོད་པས། །རིགས་གསུམ་སྐུ་གསུམ་ངོ་བོར་འདོད། །རྡོ་རྗེ་འཛིན་པའི་ས་ནོན་པའོ། །ཡོ་ག་དག་གི་འབྲས་བུ་ནི། །ལྟ་སྒོམ་སྤྱོད་པའི་བྱིན་རླབས་ཀྱིས། །སུམ་ཅུ་རྩ་བདུན་མངོན་རྫོགས་ཏེ། །སྐུ་གསུམ་རང་བཞིན་ལྷུན་གྱིས་གྲུབ། །མ་ཧཱ་ཡོ་གའི་འབྲས་བུ་ནི། །ལྟ་བ་ལ་སོགས་མངོན་གྱུར་ནས། །ཕྱག་རྒྱ་ཆེན་པོར་མངོན་རྫོགས་པས། །བཅུ་གཅིག་ཀུན་ཏུ་འོད་ཀྱི་ས་ལ་མངོན་པར་འགྲུབ། །ཨ་ནུ་དག་གི་འབྲས་བུ་ཡང་། །ལྟ་བ་དག་གི་དགོས་པ་ནི། རྡོ་རྗེ་སེམས་དཔའ་མཚན་ཡོངས་སུ་རྫོགས་པའི་ས་ནོན་ནས། མ་ཆགས་པདྨ་ཅན་གྱི་ས་ལ་གནས། ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཐེག་པ་སོ་སོའི་འབྲས་བུ་དང་། འཇུག་སྒོ་བསྲུང་མཚམས་སྒྲུབ་ཐབས་གསུམ་ལྟ་སྒོམ་སྤྱོད་པའི་བསྡུ་ཐབས་བསྟན་པའི་ལེའུ་སྟེ་ཞེ་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཐེག་བརྒྱད་ལྟ་སྒོམ་སྤྱོད་པ་དང་། །འབྲས་བུ་མཐར་ཕྱིན་དེ་ལྟར་ན། །ཨ་ཏིའི་དོན་ལ་འཇུག་པ་ཡི། །མན་ངག་རིམ་པ་ཇི་ལྟར་ལགས། །འགྲོ་བ་སེམས་ཅན་ཐམས་ཅད་ལ། །སྐུ་གསུམ་ཡེ་ཤེས་རྣམ་པ་ལྔ། །རང་ལ་རང་ཆས་ཡོད་པ་ལ། །གང་ཟག་ལམ་དུ་ཞུགས་པ་རྣམས། །ཀུན་གྱིས་མི་རྟོགས་ཇི་ལྟར་ལགས། །ཕྱི་ཡི་ཡུལ་ཉིད་ཆོས་ཉིད་ལ། །གཞན་གྱིས་སྒྲིབ་པ་མེད་པ་སྟེ། །མཐོང་བ་མེད་པ་ཇི་ལྟར་ལགས། །རྡོ་རྗེ་འཆང་གིས་བཤད་དུ་གསོལ། །དེ་སྐད་ཅེས་ནི་ཞུས་པ་ལས། །རྡོ་རྗེ་འཆང་གིས་བཀའ་སྩལ་པ། །ཉོན་ཅིག་གསང་བདག་ཞུ་བ་པོ། །སྐུ་གསུམ་ཡེ་ ― DNG001_Page_0052 ―
[མ་དཔེ་གཟིགས་ན་འདིར་གནོན།]
ཤེས་ལྔ་ཡི་དོན། །ངོ་བོ་གཅིག་ལ་མཚོན་ཚུལ་ཕྱེ། །དེ་དོན་གཅིག་ཏུ་དྲིལ་བ་ནི། །རང་རིག་ཆོས་ཀྱི་སྐུ་རུ་འདུས། །རང་རིག་རྟོགས་པར་བྱ་བའི་ཐབས། །དུས་གསུམ་སངས་རྒྱས་ཀུན་གྱིས་ཀྱང་། །བརྒྱད་ཁྲི་བཞི་སྟོང་ཆོས་བཤད་ཀྱང་། །ཅར་གྱིས་བསྟན་པའི་གདམས་ངག་མེད། །དེ་ཕྱིར་ལམ་དུ་ཞུགས་ཚད་ཀྱིས། །རང་གི་རིག་པ་ཆོས་ཀྱི་སྐུ། །རང་ལ་རང་ཆས་ཡོད་གྱུར་ཀྱང་། །རྟོགས་པར་གྱུར་པ་མ་ཡིན་ནོ། །རང་རིག་ཆོས་སྐུར་མ་རྟོགས་པས། །ཕྱི་ཡི་འབྱུང་བ་རྣམ་པ་ལྔ། །ཆོས་ཀྱི་དབྱིངས་ཉིད་ཡིན་གྱུར་ཀྱང་། །འབྱུང་བ་རྣམ་ལྔ་རང་གར་བཟུང་། །དེ་ཕྱིར་ཆོས་ཉིད་རྟོགས་པར་དཀའ། །དེ་སྐད་ཅེས་ནི་གསུངས་པ་དང་། །གསང་བའི་བདག་པོས་ཡང་ཞུས་པ། །སྟོན་པ་རྡོ་རྗེ་འཆང་ཆེན་པོ། །གང་ཟག་ཕྱི་མའི་དོན་ཆེད་དུ། །ད་ལྟ་ཉིད་དུ་རྟོགས་པ་ཡི། །ཅར་གྱིས་བསྟན་པའི་གདམས་ངག་ནི། །ཐུགས་རྗེས་འཁོར་ལ་གསུང་དུ་གསོལ། །དེ་སྐད་ཅེས་ནི་ཞུས་པ་ཡིས། །རྡོ་རྗེ་འཆང་གིས་ཡང་གསུངས་པ། །ཐ་མལ་རང་རྒྱུད་ཤེས་པ་ནི། །ཅར་གྱིས་བསྟན་པས་རྟོགས་པའི་ཆོས། །གང་ཟག་ཕྱི་མའི་དོན་ཆེད་དུ། །བསྟན་ཀྱང་སྣོད་ནི་ཤིན་ཏུ་དཀའ། །དཔེར་ན་ཨུ་དུམ་ཝ་ར་བཞིན། །བརྒྱ་སྟོང་ཁྲི་ལས་རེ་རེ་ཞིག །འགའ་ཙམ་ཟུང་ཙམ་འབྱུང་སྲིད་ན། །དེ་ཡི་དོན་དུ་ང་ཡིས་བསྟན། །དེ་སྐད་སྟོན་པས་གསུངས་པ་དང་། །གསང་བའི་བདག་པོས་ཡང་ཞུས་པ། །སྟོན་པ་རྡོ་རྗེ་འཆང་ཆེན་པོ། །སངས་རྒྱས་ཀུན་གྱི་དགོངས་པ་དང་། །སེམས་ཅན་ཀུན་གྱི་གནས་ལུགས་དོན། །ཅར་གྱིས་བསྟན་པས་རྟོགས་པའི་ཆོས། །སལ་གྱིས་བསྟན་པས་གོ་བའི་དོན། །འདི་དོན་སྟོན་པའི་སློབ་དཔོན་དེ། །ཅར་ཕོག་མན་ངག་མཁས་པ་དང་། །སློབ་མའི་སྣོད་རྟོགས་མཁས་པ་དང་། །སྣོད་ལྡན་ཐུགས་རྗེས་འཛིན་པ་དང་། །ལྟ་སྒོམ་དོན་ལ་གནས་པ་དང་། །སྤྱོད་པ་རྐྱེན་གྱིས་མི་ཚུགས་པ། །དེ་ལྟ་བུ་ཡི་སློབ་དཔོན་དེ། །གཞན་གྱི་སྐྱོན་སྣང་མཆིས་གྱུར་ཀྱང་། །ལུས་ངག་ཡིད་གསུམ་དང་བ་ཡིས། །ཡང་དག་སྐྱེ་མེད་དོན་ཆེན་ཞུ། །ཡང་ནི་སྟོན་པས་གསུངས་པ་ནི། །ཡང་དག་སྐྱེ་མེད་བསྟན་པའི་སྣོད། །དད་བརྩོན་བརྟུལ་ཞུགས་ཤེས་རབ་ཆེ། ། ― DNG001_Page_0053 ―
[མ་དཔེ་གཟིགས་ན་འདིར་གནོན།]
གཏོང་ཕོད་མོས་གུས་བརྣགས་པ་ཆེ། །ལ་ཟློའི་ཆོས་དང་སློབ་དཔོན་དང་། །འདི་ཉིད་དོན་ལ་མོས་པ་ཆེ། །སེར་སྣའི་མདུད་ཁྲོལ་ལོངས་སྤྱོད་འབུལ། །ལོངས་སྤྱོད་མེད་ན་རང་ལུས་འབུལ། །མན་ངག་ཞུ་བའི་དོན་ཆེད་དུ། །བུ་དང་ཆུང་མ་ལ་སོགས་ཏེ། །སྲོག་ལ་བབ་ཀྱང་གཏོང་ནུས་ན། །ཡང་དག་སྐྱེ་མེད་ཅར་གྱིས་བསྟན། །དེ་སྐད་སྟོན་པས་གསུངས་པ་དང་། །གསང་བའི་བདག་པོས་ཡང་ཞུས་པ། །སློབ་དཔོན་མན་ངག་ལྡན་པ་དེས། །སློབ་མ་གོང་བཞིན་སྣོད་ལྡན་ལ། །ཅར་གྱིས་བསྟན་པའི་མན་ངག་འདིས། །ལྔ་བརྒྱའི་དུས་ལ་ཉེ་བའི་ཚེ། །ཐོས་པ་བྱ་རུ་ཚེ་ཚད་ཐུང་། །དགོན་པ་བསྟེན་དུ་འཚོ་བ་ཉམས། །སྤྱི་རུ་བཤད་པའི་མན་ངག་འདིས། །ཤེས་རབ་ཅན་དང་ཐོས་པ་ཅན། །ཇི་སྲིད་ཆ་ཡིས་རྟོགས་སྲིད་ཀྱང་། །རང་གི་མཚན་ཉིད་མཐོང་བ་མེད། །ཐོས་ཆུང་ཤེས་རབ་ཆུང་བ་ཡིས། །རྟོགས་པའི་དོན་དང་མི་ལྡན་པས། །ཐོས་པ་ཆེ་ཆུང་མེད་པ་དང་། །ཤེས་རབ་ཆེ་ཆུང་མེད་པ་ཡིས། །རང་གི་མཚན་ཉིད་མ་ནོར་བར། །བསྟན་པ་ཙམ་གྱིས་རྟོགས་པའི་དོན། །རྡོ་རྗེ་འཆང་གིས་གསུང་དུ་གསོལ། །ཨེ་མ་ཐུགས་རྗེའི་བདག་པོ་ལགས། །དེ་སྐད་ཅེས་ནི་ཞུས་པ་དང་། །རྡོ་རྗེ་འཆང་གིས་བཀའ་སྩལ་པ། །ཉོན་ཅིག་གསང་བའི་བདག་པོ་ཉོན། །བརྒྱད་ཁྲི་བཞི་སྟོང་ཆོས་བསྟན་ཀྱང་། །གང་ཟག་བློ་དང་སྦྱར་བ་ལས། །ངེས་དོན་ཅར་གྱིས་བསྟན་པ་མེད། །བརྒྱད་ཁྲི་བཞི་སྟོང་ཐེག་དགུར་འདུས། །ཐེག་པ་རིམ་དགུ་གསུམ་དུ་འདུས། །མཚན་ཉིད་སྡེ་གསུམ་རྒྱུ་ཡི་ཆོས། །གསུང་གི་སྤྲུལ་པ་ཤཱཀ་ཐུབ་ཀྱིས། །གཏན་ལ་ཕབ་ཅིང་བསྟན་པའོ། །ཕྱི་རྒྱུད་སྡེ་གསུམ་འབྲས་བུའི་ཆོས། །སྐུ་ཡི་སྤྲུལ་པ་རྣམ་སྣང་གིས། །གཏན་ལ་ཕབ་ནས་བསྟན་པ་ཡིན། །བསྐྱེད་རྫོགས་རྣམ་གཉིས་ནང་པའི་ཆོས། །ཐུགས་ཀྱི་སྤྲུལ་པ་གསང་བདག་གིས། །གཏན་ལ་ཕབ་ནས་བསྟན་པའོ། །ཐེག་བརྒྱད་རྫོགས་ཆེན་མིང་མ་ཐོབ། །དེ་ཕྱིར་གནས་ལུགས་མ་རྟོགས་ཕྱིར། །སྐུ་གསུང་ཐུགས་གསུམ་འདུས་པ་ཡི། །སྤྲུལ་སྐུ་དགའ་རབ་རྡོ་རྗེ་ཡིས། །རྫོགས་པ་ཆེན་པོའི་ཆོས་རྣམས་བཤད། །དེས་ནི་རྫོགས་ཆེན་མིང་ཐོབ་སྟེ། །དེ་ལ་བཤད་ཐབས་རྣམ་པ་བཞི། །བསྐྱེད་པས་སྣང་བའི་སྤྲོས་པ་ཆོད། །ལུང་སྡེ་རྒྱུད་ ― DNG001_Page_0054 ―
[མ་དཔེ་གཟིགས་ན་འདིར་གནོན།]
སྡེ་ཀློང་སྡེ་གསུམ། །སེམས་སྡེ་ལ་སོགས་བཞི་ཡིས་བཤད། །ཡུལ་ལ་སྤྲོས་གཅོད་བསྐྱེད་པ་ཡིན། །བསྡུས་པས་ལུས་སེམས་ཤན་མ་ཕྱེ། །དེ་ཡིས་དོན་ལ་སྤྲོས་གཅོད་པས། །སྡུད་པ་དག་ཏུ་བསྟན་པ་ཡིན། །ཅར་ཕོག་དག་གི་མན་ངག་ནི། །རིག་པ་དག་ལ་སྤྲོས་གཅོད་པས། །ཅར་བའི་མན་ངག་དག་ཏུ་བསྟན། །དེ་ཡིས་འཁྲུལ་པ་རྩད་གཅོད་མཁས། །གཞན་ལ་ལྟོས་ནས་ཟབ་འགྱུར་ཏེ། །ཅར་གྱིས་བསྟན་པའི་མན་ངག་མེད། །དེ་ཕྱིར་དོན་གྱི་ངོ་མ་འཕྲོད། །ངོ་མ་འཕྲོད་པས་དྲང་དོན་ཡིན། །ཡང་དག་དོན་གྱི་ངེས་དོན་ནི། །ཚིག་དོན་གཉིས་སུ་འདྲེལ་བ་ཡིས། །ཅར་གྱིས་བསྟན་པས་ཡེར་གྱིས་རྟོགས། །སལ་གྱིས་བསྟན་པས་ཝལ་གྱིས་རྟོགས། །ཚིག་དོན་བསྟན་པས་རང་ངོ་ཤེས། །དེ་ལྟ་བུ་ཡི་མན་ངག་ལ། །བརྟེན་ན་ངོ་སྤྲོད་གཅིག་གིས་ཆོག །དབྱེ་ན་ངོ་སྤྲོད་རྣམ་པ་བདུན། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ཨ་ཏིའི་དོན་ངོ་སྤྲོད་པ་ཞུས་ལེན་དང་བཅས་པ་བསྟན་པའི་ལེའུ་སྟེ་ཞེ་གསུམ་པའོ།། །།ཨ་དྷརྨ་ཀཱ་ཡ། མུན་པའི་སྨག་རུམ་ཆེན་པོ་རུ། ཉི་མ་ཤར་བས་མུན་པའི་སྨག་གཏན་ནས་སངས་པར་བྱེད་པའི་མན་ངག་ཅེས་བྱ་བ་འདི། ངོ་སྤྲོད་བདུན་གྱིས་གཏན་ལ་ཕབ་དགོས་སོ། །ཞེས་གསུངས་སོ། །ཀྱེ་ཀྱེ་རྡོ་རྗེ་འཆང་ཆེན་པོ། །ངོ་སྤྲོད་རྣམ་པ་བདུན་པོ་ཡི། །དང་པོ་འབྱུང་བ་དྭངས་སྙིགས་ནི། །ཕྱེ་ལ་རང་ངོ་སྤྲད་པ་དེ། །ཕྱི་རབས་དོན་དུ་གསུང་དུ་གསོལ། །དེ་སྐད་ཅེས་ནི་ཞུས་པ་དང་། །རྡོ་རྗེ་འཆང་གིས་བཀའ་སྩལ་པ། །འབྱུང་བ་དྭངས་སྙིགས་དབྱེ་བ་ཡི། །ངོ་སྤྲོད་བསྟན་པ་འདི་ལྟ་སྟེ། །དང་པོ་ཤན་དབྱེ་སྐྱོན་བསལ་དང་། །བར་དུ་སྤྱི་དང་བྱེ་བྲག་ངོ་ཡིས་བཟུང་། །ཐ་མ་སྐུ་དང་དབྱིངས་སུ་ལ་བཟླ་བ། །དང་པོ་ཤན་དབྱེ་སྐྱོན་བསལ་བ། །ཕྱི་ཡི་ཡུལ་དང་ནང་གི་ཤེས་རིག་གཉིས། །ཕྱི་ཡི་ཡུལ་ནི་འབྱུང་བ་རྣམ་པ་ལྔ། །ནང་གི་ཤེས་རིག་རྣམ་པ་བསྟན་པ་ནི། །རྣམ་པར་ཤེས་པའི་ཚོགས་བརྒྱད་ཡིན། །ཕྱི་ཡི་འབྱུང་བ་རྣམ་ལྔ་བསྟན་པ་ནི། །ཆོས་ཀྱི་དབྱིངས་ཉིད་མ་ཤེས་གོལ་བ་སྟེ། །གར་བྱུང་གནས་དང་གར་འགྲོ་བ། །དེ་དོན་གོང་འོག་རྣམས་སུ་ཤེས་ ― DNG001_Page_0055 ―
[མ་དཔེ་གཟིགས་ན་འདིར་གནོན།]
པར་བྱ། །འཁྲུལ་ནས་རགས་པའི་འབྱུང་བ་རྣམ་པ་ལྔ། །ཕྲ་བ་ཡེ་ཤེས་འོད་ཀྱི་ཁ་དོག་ལྔ། །ཆོས་ཉིད་སྟོང་པའི་ངང་དུ་ཤར་བ་སྟེ། །རྟོགས་པའི་དོན་ལྡན་རྣམས་ལ་ཆོས་ཉིད་ཡིན། །མ་རྟོགས་པ་ལ་འཁྲུལ་སྣང་ཡུལ་དུ་ཤར། །ཆོས་ཉིད་ངོ་ཡིས་བཟུང་ན་འདི་ལྟ་སྟེ། །ཆོས་ཉིད་སྟོང་པ་ཉིད་དང་ཆོས་ཉིད་ལ་འགགས་པ། །ཆོས་ཉིད་གཉིས་སུ་མེད་དང་ཆོས་ཉིད་དྲི་མ་མེད། །ཐོགས་པ་མེད་པ་དང་ནི་ལྔ་རུ་བཤད། །ཡུལ་གྱི་དངོས་པོ་སྣང་གྲག་ཆོས་ཅན་འདི། །ཆོས་ཉིད་དེ་ལ་མ་གྲུབ་སྟོང་པའོ། །ཆོས་ཉིད་ངང་དུ་སྐུ་གསུམ་ཡེ་ཤེས་ལྔ། །མི་འགགས་པ་རུ་འཆར་བ་དེ་ཉིད་དོ། །ཆོས་ཉིད་དག་པ་གཉིས་སྣང་མེད་པ་ཡིན། །ཕྱི་དང་ནང་གཉིས་ཞེས་སུ་བསྟན་པ་ཡིན། །ཆོས་ཉིད་དོན་ལ་སྤྲོས་པ་མེད་པར་དག་པའོ། །ཆོས་ཉིད་ངོ་བོས་ཁྱབ་པས་ན། །ཆོས་ཉིད་ཐོགས་པ་མེད་པར་བཤད། །ཆོས་ཉིད་བྱེ་བྲག་ཤན་དབྱེ་ངོས་བཟུང་བསྟན་པ་ནི། །ཆོས་ཉིད་སྐྱོན་གྱི་མཐའ་བསལ་འདི་ལྟ་སྟེ། །རྣམ་རྟོག་དག་པས་དྲི་མ་རགས་པ་སྟེ། །འབྱུང་བ་རྣམ་པ་ལྔ་རུ་བརྟས་པ་ཡིན། །དབུས་ཀྱི་རི་བོ་མཆོག་རབ་ནས། །རྡོ་བྲན་ས་བྲན་ཤིང་བྲན་ཡན་ཆད་ནི། །འབྱུང་བ་ས་ཡི་དངོས་པོར་བརྟས་པ་རགས་པ་ཡིན། །རྒྱ་མཚོ་ཆུ་ཀླུང་ཆེན་པོ་མན་ཆད་ནས། །རླན་ཙམ་གཤེར་ཙམ་ཆུ་ཡི་ཐིགས་པ་ཡན་ཆད་ནི། །རྣམ་རྟོག་ཆུ་རུ་བརྟས་པས་རགས་པ་ཡིན། །བསྐལ་པའི་མེ་ཆེན་འབར་བ་མན་ཆད་ནས། །གཙུབ་ཤིང་མེ་སྟག་ཕྲ་མོ་ཡན་ཆད་པ། །རྣམ་རྟོག་མེ་རུ་བརྟས་པས་རགས་པ་ཡིན། །རྡོ་རྗེ་རྒྱ་གྲམ་རླུང་ཆེན་ནས་བཟུང་སྟེ། །སེར་བུ་ཕྲ་མོ་ཡན་ཆད་རྒྱུ་བ་རྣམས། །རྣམ་རྟོག་རླུང་དུ་བརྟས་པས་རགས་པ་ཡིན། །འབྱུང་བ་རྣམ་པ་བཞི་ཡིས་ནི། །ཆོས་ཉིད་སྟོང་པ་སྤྲོས་བྲལ་དེ་ལ་བསྒྲིབས། །འབྱུང་བ་ཕྲ་བའི་དྲི་མ་སེལ། །དོན་རྩལ་དེ་ནི་ཆོས་ཉིད་ངང་དུ་འཆར་བ་ཡིན། །འོད་དང་གདངས་དང་ཡེ་ཤེས་རྩལ་ལ་བསྒྲིབས། །དྲི་མ་ཕྲ་བ་ཡུལ་གྱི་རགས་པ་སྟེ། །ཡུལ་ནི་དངོས་པོ་མཚན་མ་ཅན། །སྣ་ཚོགས་དག་ལ་སྤྱོད་པས་ཡུལ་གྱི་རགས། །སྐྱེ་ལུགས་རགས་པས་ཡུལ་གྱི་དངོས་པོ་ལྔ། །དབང་པོ་སྒོ་ལྔ་དངོས་པོ་མཚན་མར་སྐྱེས་པས་རགས། །དབང་པོ་རྣམ་ལྔ་ ― DNG001_Page_0056 ―
[མ་དཔེ་གཟིགས་ན་འདིར་གནོན།]
སྤྱོད་པས་རགས། །དེ་ཡིས་གང་ལ་བསྒྲིབ་གྱུར་ན། །དབང་པོ་སྒོ་ལྔའི་དབྱེ་བར་བཅས་པ་ཡིས། །འབྱེད་པ་མེད་པའི་ཤེས་རབ་བསྒྲིབས། །དངོས་པོ་སྣ་ཚོགས་བདག་ཏུ་འཛིན་པ་ཡིས། །དགོངས་པ་འཛིན་མེད་ཉག་ཅིག་དོན་ལ་བསྒྲིབས། །སྒོ་ལྔ་སྐྱེ་འགག་བཅས་པ་དེས། །སྐྱེ་འགག་མེད་པའི་ཡེ་ཤེས་བསྒྲིབས། །ཕྲ་བ་ཡིད་གཉིས་དག་ཏུ་བསྟན་པ་དེས། །ཡུལ་གྱིས་ཕྲ་སྟེ་དངོས་པོ་ལ་མི་སྤྱོད། །སྐྱེ་ལུགས་ཕྲ་སྟེ་སྣ་ཚོགས་གཟུགས་མི་སྤྱོད། །གྲངས་ཀྱིས་ཕྲ་སྟེ་དབང་པོ་སྒོ་ལྔ་བལྟ་རུ་མེད། །ཡིད་ཀྱི་རྣམ་ཤེས་གཟུང་འཛིན་ཏེ། །ཉོན་མོངས་ཡིད་ནི་ངར་འཛིན་ཡིན། །སྒོ་ལྔའི་རྣམ་པར་ཤེས་པས་ཡུལ་ལ་སྤྱད་པ་ནི། །དེ་ཡི་རྗེས་སུ་རྟོག་པས་ཤེས་པ་ཡིད་ལ་ཝ་ལེ་བ། །དེ་ལྟར་ཤེས་པ་དེ་ནི་ཡིད་ཀྱི་རྣམ་ཤེས་ཡིན། །དེ་ཡིས་གཟུང་འཛིན་ཉོན་མོངས་ཅན་གྱི་ཡིད། །དེ་ལྟར་ཚོགས་བདུན་ས་བོན་ཏེ། །བསགས་པ་དེ་ལ་ཀུན་གཞི་ཞེས་བྱའོ། །ཡིད་གཉིས་དག་གིས་རང་རིག་སྤྲོས་བྲལ་དེ་ལ་བསྒྲིབས། །ཡིད་ཀྱི་རྣམ་ཤེས་གཟུང་འཛིན་བཅས་པ་དེས། །འཛིན་པ་མེད་པའི་རང་གསལ་དག་ལ་བསྒྲིབས། །ཉོན་མོངས་ཅན་གྱི་ཡིད་ནི་ངར་འཛིན་བཅས་པ་དེས། །འཛིན་པ་མེད་པའི་རིག་པ་དེ་ལ་བསྒྲིབས། །ཚོགས་བདུན་གཞིའམ་རྩ་བ་བྱེད་པའི་ཕྱིར། །སྦྱོར་བ་དོན་གྱི་ཀུན་གཞི་ཞེས་སུ་བཤད། །རྣམ་ཤེས་ཚོགས་བདུན་དེ་དག་གིས། །དགེ་བ་སྤྱད་ན་གཞི་ལ་དགེ་བ་འཕེལ་ཞིང་སྡིག་པ་འགྲིབ། །སྡིག་པ་སྤྱད་ན་སྡིག་པ་འཕེལ་ཞིང་དགེ་བ་འགྲིབ། །ལུང་དུ་བསྟན་ན་ལུང་དུ་བསྟན་པ་རྣམས་འཕེལ་ཏེ། །མ་བསྟན་སྤྱད་ན་མ་བསྟན་འཕེལ་བར་འགྱུར། །མདོར་ན་སྦྱོར་བ་དོན་གྱི་ཀུན་གཞི་དེ། །ཚོགས་བདུན་སྤྱོད་པས་ལས་རྣམས་འཕེལ་བར་འགྱུར། །ཚོགས་བདུན་མ་སྤྱད་ལས་རྣམས་འགྲིབ། །ཚོགས་བདུན་གཞི་རྩ་བྱེད་པ་ཡི། །ཀུན་གཞི་དེ་དག་གིས་ནི་གང་ལ་བསྒྲིབ་འགྱུར་ན། །རིག་པའི་མཚན་ཉིད་ལྔ་ལྡན་དེ་ལ་བསྒྲིབས། །སྤྱི་ཡི་ངོས་བཟུང་རིག་པའི་མཚན་ཉིད་བྱེ་བྲག་ནི། །སྐུ་གསུམ་ཤན་དབྱེ་སྐྱོན་གྱི་མཐའ་བསལ་དང་། །སྤྱི་དང་དྲེ་བྲག་གཉིས་སུ་ངོས་བཟུང་བའོ། །ཆོས་སྐུ་ངོས་བཟུང་ལ་ ― DNG001_Page_0057 ―
[མ་དཔེ་གཟིགས་ན་འདིར་གནོན།]
ཤན་དབྱེ་བ་དང་། །སྐྱོན་གྱི་དྲི་མ་བསལ་བ་དང་། །འབྱུང་བའི་དྲི་མ་ཕྲ་རགས་གསུམ་བྲལ་བ། །ཆོས་ཉིད་དག་གསལ་མེ་ལོང་གི་དཀྱིལ་འཁོར་གཡའ་ཕྱིས་པ་ལྟ་བུ་ལ། རིག་པ་སེམས་ཀྱི་དྲི་མ་ཕྲ་རགས་གསུམ་དང་བྲལ་བ་ཡི། རང་གསལ་འཛིན་མེད་མར་མེ་རླུང་གིས་མ་བསྐྱོད་པ་ལྟ་བུ་ནི། ཆོས་ཉིད་ངང་དུ་ཤར་བ་དེ། །ཡེ་ཤེས་དབྱིངས་ལས་ཤར་བ་ཡིས། །མཐའ་རྣམས་རྣམ་པར་མི་འབྱེད་དོ། །འཕྲལ་དུ་འབྱུང་བ་ལྟ་བུ་མ་ཡིན་ཏེ། །ཡེ་ཤར་ཡེ་བརྡལ་ཆེན་པོ་ཡིན། །ཆོས་སྐུ་མཚན་ཉིད་བདུན་ལྡན་ཏེ། །སྟོང་པ་འགྱུར་བ་མེད་པ་དང་། །ཡོན་ཏན་འབྱུང་ཞིང་དྲི་མ་མེད། །ཐོགས་པ་མེད་དང་མཚན་མ་ཡི། །ཆོས་དང་བྲལ་བས་སྟོང་པའོ། །རང་བྱུང་ཆོས་སྐུ་རྐྱེན་གྱིས་མི་ཤིགས་འགྱུར་བ་མེད། །སྐུ་དང་ཡེ་ཤེས་མི་འགག་པས། །ཡོན་ཏན་འགག་པ་མེད་པའོ། །ངོ་བོ་སྐྱོན་མེད་པས་ནི་དྲི་མ་མེད་པའོ། །རྩལ་མི་འགག་པས་ཕྱོགས་གཅིག་རྒྱ་ཆད་མེད། །མཚན་མའི་ཆོས་ཅན་མ་ཡིན་པས་ནི་སྟོང། །ཅར་གྱིས་བསྟན་ན་མཚན་ཉིད་བཞི། །རིག་པ་ཆོས་སྐུ་རྣམ་པ་གཉིས། །ངོ་བོ་གཅིག་པར་བསྟན་པ་ཡིན། །དེ་ཡི་མཚན་ཉིད་འདི་བཞི་ཡིན། །རང་རིག་ཆོས་སྐུའི་ངོ་བོ་སྟོང་། །དེ་ནི་ཆོས་ཉིད་སྟོང་པའོ། །ངོ་བོ་སྟོང་པ་དེ་ཉིད་གསལ། །རང་གསལ་དག་ཏུ་གནས་པ་ཡིན། །གསལ་བའི་རྩལ་ནི་གཉིས་སུ་འབྱུང་། །འགྱུ་བ་རླུང་དང་སྣང་བ་འོད། །འགྱུ་བའི་དབང་གིས་ཉམས་སུ་མྱོང་བ་འཆར། །ཡེ་ཤེས་ལྔ་ཤར་རྩལ་དུ་འོད་ལྔ་ཤར། །དེ་དག་སྐུ་གསུམ་རྫོགས་པར་རྟོག་པ་སྟེ། །ཆོས་སྐུ་གསལ་ལ་མི་རྟོག་པའོ། །དེ་ཉིད་ཅར་གྱིས་ངོ་སྤྲད་པ། །དཔེ་སྐྱོན་གཉིས་སུ་ཤེས་བྱ་སྟེ། །དཔེ་ནི་མུན་པའི་སྒྲོན་མ་ཡིས། །རིན་ཆེན་སྟོར་བ་རྙེད་པ་འདྲ། །སྐྱོན་གྱི་མཐའ་གསལ་ཤན་དབྱེ་བ། །ཡོད་པའི་མཐའ་དང་རྟག་མཐའ་ཡིས། །ཆོས་སྐུ་སྟོང་པ་སྤྲོས་བྲལ་བསྒྲིབས། །མེད་མཐའ་དང་ནི་ཆད་མཐའ་ཡིས། །འཛིན་པ་མེད་པའི་རང་གསལ་བསྒྲིབས། །དེར་འཛིན་ཤེས་པ་ཆ་ཕྲ་འདིས། །ཆོས་སྐུ་སྟོང་པ་སྤྲོས་བྲལ་བསྒྲིབས། །ཕྲ་བའི་ཤིན་དུ་ཕྲ་བ་ཡིས། །ནམ་མཁའ་སྟོང་པ་འདི་ཡིས་ནི། །དྲི་མེད་རྣམ་དག་ ― DNG001_Page_0058 ―
[མ་དཔེ་གཟིགས་ན་འདིར་གནོན།]
ཆོས་ཀྱི་སྐུ་ལ་བསྒྲིབས། །དྲི་མ་ཕྲ་རགས་དེ་རྣམས་ཀྱིས། །ཆོས་ཀྱི་དབྱིངས་ལ་བསྒྲིབས་པས་ན། །ཆོས་སྐུ་ངོ་མ་ཤེས་པས་ལྷན་སྐྱེས་མ་རིག་བྱུང་། །རྒྱུ་རྐྱེན་གཉིས་ཀྱིས་རྣམ་རྟོག་རགས་པ་བརྟས། །དེ་ཡི་སྐྱོན་གྱིས་སྐུ་གསུམ་དོན་མ་གསལ། །ཆོས་ཉིད་དོན་ཀྱང་མ་གསལ་རགས་པར་བརྟས། །ཕྱི་ཡི་ཡུལ་ཉིད་འཁྲུལ་པ་དང་། །མ་འཁྲུལ་པ་ཡི་བྱེ་བྲག་དེ་ལྟར་བྱུང་། །རིག་པའི་མཚན་ཉིད་སྐུ་གསུམ་ཡེ་ཤེས་ལྔ་ཡི་དོན་ཡིན་ཏེ། །དེ་ཡང་མཚོན་ཚུལ་སོ་སོར་དབྱེ་བ་ནི། །རིག་པ་ཆོས་སྐུ་ལོངས་སྐུ་སྤྲུལ་སྐུ་དང་། །སྟོང་པ་ཉིད་ལ་སོགས་པའི་ཡེ་ཤེས་རྣམ་པ་ལྔ། །དང་པོ་རིག་པ་ལ་ཡང་ངོ་ཡིས་བཟུང་བ་དང་། །ཤན་དབྱེ་སྐྱོན་གྱི་དྲི་མ་བསལ་བའོ། །རིག་པ་ངོས་བཟུང་བསྟན་པ་འདི་ལྟ་སྟེ། །མཚན་ཉིད་རྣམ་པ་ལྔ་རུ་བསྟན་པ་ཡིན། །འབྱེད་མེད་འཛིན་མེད་རང་གསལ་དང་། །རྒྱ་མ་ཆད་པའི་ཡེ་ཤེས་དང་། །ལྷུན་གྱིས་གྲུབ་པའི་སངས་རྒྱས་དང་། །རང་གི་ཡེ་ཤེས་དེ་ལ་གཞན། །སྣང་གི་རྟོག་པ་མེད་པ་ཡིས། །ཤན་དབྱེ་ངོས་བཟུང་སྐྱོན་བསལ་བའོ། །སྐྱོན་གྱི་མཐའ་བསལ་བ་འདི་ལྟ་སྟེ། རིག་པའི་དྲི་མ་རྣམ་པ་གསུམ་ཡིན་ཏེ། །རགས་དང་ཕྲ་དང་ཤིན་ཏུ་ཕྲ་བའོ། །རགས་པ་དབང་པོའི་སྒོ་ལྔར་ཤར་བའོ། །ཕྲ་བའི་ཡིད་གཉིས་ཕྲ་བའི་ཕྲ་བ་ཀུན་གཞིའོ། །དབང་པོ་སྒོ་ལྔ་རགས་པར་ཅིའི་ཕྱིར་ན། །ཡུལ་དང་སྐྱེ་ལུགས་གྲངས་དང་གསུམ་གྱིས་རགས་པའོ། །ལོངས་སྐུ་ཤན་དབྱེ་སྐྱོན་གྱི་མཐའ་བསལ་དང་། །བར་དུ་སྤྱི་དང་རང་གི་མཚན་ཉིད་དངོས་བཟུང་དང་། །མཐའ་མ་སྐུ་དང་ཡེ་ཤེས་དག་ཏུ་ལབཟླའོ། །ལོངས་སྐུའི་ངོ་བོ་བསྟན་པ་དང་། །ཆོས་སྐུ་དྲི་མེད་རྣམ་དག་པ། །དོན་ལ་ཡེ་ཤེས་རྣམ་པ་ལྔ་རུ་གྲུབ་པ་སྟེ། །ཆོས་སྐུའི་རྩལ་བྱུང་ཡེ་ཤེས་ལྔ། །ཡེ་ཤེས་ལྔ་ཡི་གདངས་ཤར་བས། །ལོངས་སྐུའི་མཚན་ཉིད་བསྟན་པའོ། །རང་རིག་ཡེ་ཤེས་ལྔ་ལྡན་དེ། །གདངས་གཉིས་འོད་ལྔར་ཤར་བས་རིགས་ལྔའི་སྐུ་རུ་བྱུང་། །འོད་ལྔ་གཅིག་ཏུ་གྲུབ་པས་རྣམ་སྣང་ཆེན་པོའི་སྐུ་རུ་རྫོགས། །ཡོན་ཏན་རྩལ་ལྔ་ཁ་དོག་རྣམ་པ་ལྔ། །སོ་སོའི་ཆ་ལས་རིགས་ལྔར་ཤར་བ་ཡིན། །སྐུ་མདོག་ཕྱག་ ― DNG001_Page_0059 ―
[མ་དཔེ་གཟིགས་ན་འདིར་གནོན།]
མཚན་གདན་ཁྲི་ལ་སོགས་པ། །སྣང་ཡང་ཡང་དག་དོན་དུ་གྲུབ་པ་མེད། །ཆོས་སྐུའི་ཡོན་ཏན་ཙམ་དུ་སྣང་བ་ཡིན། །རྩལ་དང་མདངས་སུ་མ་འགགས་ཆ་ཙམ་ཤར་བ་ཡིན། །མཁྱེན་པའི་ཤེས་རབ་ཙམ་ལས་གསལ་པ་ཡིན། །ལོངས་སྐུའི་སྐྱོན་གྱི་མཐའ་བསལ་བ། །དྲི་མ་རགས་པའི་ཕུང་པོ་རྣམ་པ་ལྔས། །ལོངས་སྐུ་རིགས་ལྔ་དག་ལ་བསྒྲིབས་པ་ཡིན། །དྲིལ་བས་ལོངས་སྐུ་རྣམ་སྣང་དེ་ལ་བསྒྲིབས། །ཕྲ་བས་རིགས་ལྔ་བློ་ལ་བསྒོམ་པ་དག་གིས་ཀྱང་། །ལོངས་སྐུ་རིགས་ལྔ་ཆོས་སྐུའི་རྩལ་ཅན་ད་ལ་བསྒྲིབས། །དངོས་སུ་ཞེན་པ་ཕྲ་མོ་དེ། །ལོངས་སྐུ་སྒྲིབ་བྱེད་ཕྲ་མོ་ཡིན། །ལོངས་སྐུ་མཐོང་དུ་མི་སྟེར་སྒྲིབ་བྱེད་དྲི་མའོ། །ལོངས་སྐུ་དང་ནི་སྒྲིབ་བྱེད་ཕྱེ་ལ་ཤན་འབྱེད་དོ། །བར་དུ་སྤྱི་དང་བྱེ་བྲག་ངོས་བཟུང་བ། །སྤྱི་ནི་གོང་དུ་སྨོས་པ་བཞིན། །ལོངས་སྐུའི་བྱེ་བྲག་ངོ་ཡིས་བཟུང་བ་ནི། །ཆོས་སྐུ་གསལ་སྟོང་དེ་ཉིད་ལ། །གསལ་ཆ་རླུང་འགྱུས་དུས་སུ་འོད་བྱུང་བ། །དེ་ཉིད་ལོངས་སྐུ་ཁོ་ན་ཡིན་པའོ། །མདོར་ན་གསལ་སྟོང་གཉིས་མེད་ཆོས་ཀྱི་སྐུ། །ལྷུན་གྲུབ་ཆོས་ཀྱི་སྐུ་ཞེས་དེ་ལ་བྱ། །མ་རྟོགས་དུས་ན་ངོ་བོ་ཉིད་ཀྱི་སྐུ། །རྟོགས་པའི་དུས་ན་ཆོས་སྐུ་ཁོ་ནའོ། །ཆོས་སྐུའི་རྩལ་མདངས་འཆར་ནས་ལོངས་སྐུ་སྤྲུལ་སྐུའོ། །ཆོས་སྐུ་ངོ་འཕྲོད་དུས་ན་ལོངས་སྐུ་སྤྲུལ་སྐུ་གཉིས་ཀ་འཕྲོད། །བྱེ་བྲག་ངོས་འཛིན་ལོངས་སྐུ་ངོ་སྤྲོད་ཁོ་ནའོ། །སྐུ་གསུམ་ལ་ཟློ་གོང་འོག་གཞན་ན་གསལ། །སྤྲུལ་སྐུ་ཤན་དབྱེ་སྐྱོན་གྱི་མཐའ་བསལ་དང་། །བར་དུ་སྤྱི་དང་རང་གི་མཚན་ཉིད་ངོས་བཟུང་དང་། །མཐའ་མ་སྐུ་གསུམ་དག་ཏུ་ལ་བཟླ་བའོ། །དང་པོ་ཤན་དབྱེ་སྐྱོན་གྱི་མཐའ་བསལ་བ། །ཆོས་སྐུ་རང་རིག་གསལ་སྟོང་ལ། །འོད་གདངས་ལྷུན་གྲུབ་ཤར་བ་ལོངས་སྐུ་སྟེ། །དེ་གཉིས་རྩལ་ཤར་གདུལ་བྱའི་ངོ་ལ་ནི། །འོད་དང་རིག་པའི་རྩལ་གྱིས་སྐུར་སྣང་བ། །འགྲོ་བ་དྲུག་ལ་མཐུན་སྣང་འཆར་བ་དེ། །ཐུབ་དྲུག་ལ་སོགས་སྤྲུལ་པའི་སྐུར་སྣང་ངོ་། །སྒྲིབ་བྱེད་གཟུགས་ཀྱི་ཕུང་པོ་རགས་པས་བསྒྲིབས། །མདོར་ན་རིག་པ་གསལ་སྟོང་དེ་ལ་ནི། །འོད་དང་རླུང་མ་བྱུང་བའི་ཆ་ནས་ནི། །ཆོས་སྐུའི་ངོ་བོ་ཞེས་ནི་དེ་ལ་བྱ། །འགྱུས་ཏེ་འོད་བྱུང་སྐུ་དང་ཐུགས་ཚོགས་པ། །དེ་ལྟར་རྫོགས་པའི་ཆ་ནས་ལོངས་སྐུའོ། །སྐུ་ ― DNG001_Page_0060 ―
[མ་དཔེ་གཟིགས་ན་འདིར་གནོན།]
དང་ཐུགས་ལས་བྱུང་བའི་ཆ་ནས་སྤྲུལ་སྐུའོ། །ཆོས་སྐུ་ངོ་འཕྲོད་དུས་ན་སྐུ་གསུམ་ངོ་འཕྲོད་པའོ། །ཅིའི་ཕྱིར་ཞེ་ན་སྐུ་གསུམ་ལྷུན་གྲུབ་ཕྱིར། །སྐུ་གསུམ་མ་རྟོགས་ལུས་ངག་ཡིད་གསུམ་སྟེ། །རྟོགས་པའི་དུས་ན་སྐུ་གསུམ་དུས་གཅིག་འཆར། །ཆོས་ཀྱི་སྐུ་ལ་གསུམ་ག་དུས་གཅིག་རྫོགས། །ཅི་ཡི་ཕྱིར་ན་ལྷུན་གྱིས་གྲུབ་པའི་ཕྱིར། །སྐྱོན་བསལ་ངོས་བཟུང་ལ་བཟླ་རྣམས། །རང་རང་སྐབས་ནས་རྫོགས་པར་འགྱུར། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཆོས་ཀྱི་དབྱིངས་དང་རིག་པ་ཆོས་ཀྱི་སྐུ་ལ་སོགས་པ་སྐུ་གསུམ་ངོ་སྤྲོད་པའི་ལེའུ་སྟེ་ཞེ་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཡེ་ཤེས་ལྔ་ཡི་ངོ་སྤྲོད་གསུང་དུ་གསོལ། །ཞེས་ཞུས་པས། རྡོ་རྗེ་འཆང་གིས་བཀའ་སྩལ་པ། སྐུ་གསུམ་དོན་ལས་མ་གཡོས་ཀྱང་། །མཚོན་ཚུལ་ཡེ་ཤེས་ལྔར་བྱུང་བས། །ཡེ་ཤེས་ལྔ་ཡི་ངོ་སྤྲོད་བསྟན། །ཤན་དབྱེ་སྐྱོན་གྱི་མཐའ་བསལ་དང་། །རང་དང་སྤྱི་ཡི་མཚན་ཉིད་དངོས་བཟུང་བ། །ཐ་མ་ཡེ་ཤེས་ལྔ་རྣམས་ལ་བཟླའོ། །དང་པོ་ཤན་དབྱེ་སྐྱོན་གྱི་མཐའ་བསལ་བ། །རིག་པའི་ངོ་བོ་སྟོང་པར་འདུག་པས་ན། །སྟོང་པ་ཉིད་ཀྱི་ཡེ་ཤེས་ཡིན། །རིག་པ་སྟོང་པ་དེ་ཉིད་མ་འགགས་གསལ་བ་ཡིས། །མེ་ལོང་ལྟ་བུའི་ཡེ་ཤེས་ཡིན། །རིག་པ་སྟོང་གསལ་གཉིས་སུ་མེད་པར་མཉམ་པ་ཡིས། །གཉིས་མེད་མཉམ་པ་ཉིད་ཀྱི་ཡེ་ཤེས་སོ། །རིག་པ་དེ་ཡི་ངོ་བོ་ལ། །སྟོང་པའི་ཕྱོགས་ནས་བལྟས་ན་སྟོང་པར་གསལ། །གསལ་བའི་ཕྱོགས་ནས་བལྟས་ན་གསལ་བར་འདུག །གཉིས་མེད་ཕྱོགས་ནས་བལྟས་ན་གཉིས་མེད་དེ། །དེ་ལྟར་སོ་སོར་མ་འགགས་ཆ་ནས་ནི། །སོ་སོར་རྟོགས་པའི་ཡེ་ཤེས་སོ། །དོན་དེ་རྟོགས་པའི་རྩལ་གྱིས་ནི། །བྱ་བ་ཐམས་ཅད་ཐོགས་པ་མེད་པར་འགྲུབ། །བྱ་བ་གྲུབ་པའི་ཡེ་ཤེས་སོ། །དེ་ལྔར་མ་རྟོགས་དུག་ལྔར་ཤར། །སྐྱོན་གྱི་མཐའ་བསལ་འདི་ལྟ་སྟེ། །ཡེ་ཤེས་ལྔ་ལ་སྒྲིབ་བྱེད་དེ། །རགས་པ་ཉོན་མོངས་དུག་ལྔས་བསྒྲིབས། །ཕྲ་བ་འཛིན་བྱེད་ཕྲ་མོས་བསྒྲིབས། །ཤིན་དུ་ཕྲ་བ་ངོ་མ་ཤེས་པས་བསྒྲིབས། །སྒྲིབ་པའི་ཕྱིར་ན་དྲི་མའོ། ། ― DNG001_Page_0061 ―
[མ་དཔེ་གཟིགས་ན་འདིར་གནོན།]
ཤན་དབྱེ་བ་ནི་འདི་ལྟ་སྟེ། །ཡེ་ཤེས་ལྔ་དང་དུག་ལྔར་དབྱེ། །སྐྱོན་གྱི་མཐའ་ནི་དུག་ལྔར་གསལ། །ངོས་བཟུང་སྤྱི་རུ་ཤེས་པར་བྱ། །རང་གི་མཚན་ཉིད་ངོས་བཟུང་བ། །རང་བྱུང་ཡེ་ཤེས་རང་སྣང་དེ། །རང་བྱུང་ཡེ་ཤེས་ཆེན་པོ་ཞེས་པ་སྟེ། །དུག་ལྔ་མངོན་དུ་གྱུར་པ་ནི། །བཅོས་པའི་ཤེས་པ་ཞེས་པ་སྟེ། །མ་བཅོས་གཉུག་མར་གནས་པའི་དོན། །དེ་ནི་རང་བྱུང་ཡེ་ཤེས་ཏེ། །ཡོན་ཏན་ཡེ་ཤེས་ལྔ་རུ་འཆར། །ལ་ཟློ་ལྟ་སྒོམ་སྤྱོད་པར་ཟློ། །ཡེ་ཤེས་ལྔ་པོ་དེ་དག་དང་། །སྐུ་གསུམ་དོན་ལ་དབྱེ་བ་མེད། །ཆོས་ཉིད་སྟོང་ཆ་རིག་གསལ་དང་། །གཉིས་སུ་མེད་པའི་ཆ་ཡིས་ནི། །ཆོས་ཀྱི་སྐུ་ཡི་ངོ་བོ་ཡིན། །སྐུ་གཉིས་རྩལ་མི་འགག་པ་སྟེ། །སོ་སོར་མ་འགགས་ཆ་ནས་འོད་འབྱུང་བ། །ལོངས་སྐུའི་ངོ་བོ་དེ་ཉིད་ཡིན། །ཐུགས་རྗེས་འགྲོ་བའི་དོན་མཛད་པ། །སྤྲུལ་སྐུ་བྱ་གྲུབ་ཡེ་ཤེས་ཡིན། །སྐུ་གསུམ་ཡེ་ཤེས་ལྔ་པོ་དེ། །ཆོས་སྐུའི་ངང་ལ་ལྷུན་གྱིས་གྲུབ། །ཅེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ཡེ་ཤེས་རྣམ་པ་ལྔ་ངོ་སྤྲོད་པའི་ལེའུ་སྟེ་ཞེ་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཚོགས་བརྒྱད་གཏན་ལ་ཕབ་སྟེ་ངོ་སྤྲད་པ། །ཕྱི་རབས་དོན་དུ་གསུང་དུ་གསོལ། །ཞེས་ཞུས་པས། རྡོ་རྗེ་འཆང་གིས་བཀའ་སྩལ་པ། ཚོགས་བརྒྱད་གཏན་ལ་ཕབ་སྟེ་ངོ་སྤྲད་འདི་ལྟར་ཤེས་པར་གྱིས། ཚོགས་བརྒྱད་གྲངས་ནི་འདི་ལྟ་སྟེ། སྒོ་ལྔའི་རྣམ་པར་ཤེས་པ་དང་། ཡིད་ཀྱི་རྣམ་པར་ཤེས་པ་དང་། ཉོན་མོངས་པ་ཅན་གྱི་ཡིད་དང་། སྣ་ཚོགས་གསོག་པའི་ཀུན་གཞི་དང་བརྒྱད་ཡིན་ཏེ། དེ་དག་ནི་འཁོར་བའི་ཆོས་ཡིན་ནོ། །དེ་འཁོར་བར་འགྲོ་བ་ནི། གཞི་དོན་གྱི་ཀུན་གཞི་ངོ་མ་ཤེས་པས། རིག་པའི་རྩལ་གྱིས་ཡུལ་ལ་འཇུག་པ་ཡིན་ཏེ། དེའི་ཕྱིར་ཚོགས་བརྒྱད་འཆར་བ་ཡིན་ཏེ། དེ་ལ་སྒོ་ལྔ་རིག་པ་རྩལ་མ་འགགས་པ་རྟེན་མེད་དེ་རྟེན་དབང་པོ་དང་བཅས་པས་མིག་གི་ཡུལ་དུ་གཟུགས་མཐོང་། གཟུགས་སྡུག་མི་སྡུག་ལ་ཆགས་སྡང་སྐྱེ། དེ་བཞིན་དུ་རྣ་བའི་ཡུལ་དུ་སྒྲ་དང་། སྣའི་ཡུལ་དུ་དྲི་དང་། ལྕེའི་ཡུལ་དུ་རོ་དང་། ལུས་ཀྱི་ཡུལ་དུ་རེག་བྱ་ལ་སོགས་སྤྱད་ནས། ― DNG001_Page_0062 ―
[མ་དཔེ་གཟིགས་ན་འདིར་གནོན།]
བྲན་ལྟ་བུར་བྱས་ཏེ། ཡིད་ཀྱི་རྣམ་པར་ཤེས་པ་ལ་བསྐྱལ་ཏེ། ཇོ་བོ་ལ་གཏད་པ་ལྟ་བུའོ། །དེས་ཉོན་མོངས་པ་ཅན་གྱི་ཡིད་ལ་བསྐྱལ་ཏེ། དེས་ཆགས་སྡང་ལ་སོགས་པའི་ཉོན་མོངས་པ་ཡིས་དམ་པར་བཟུང་སྟེ། ཁྱོས་ཆུང་མ་ལ་གཏད་ནས་གཉེར་བྱས་པ་ལྟ་བུའོ། །དེས་བག་ཆགས་སུ་སོང་སྟེ། དེ་གསོག་པའི་གཞིའམ་སྣོད་ལྟ་བུ་སྟེ། སྣ་ཚོགས་གསོག་པའི་ཀུན་གཞིའོ། །རིག་པ་འགྱུ་བའི་རྩལ་དེ་རླུང་གིས་འགྱུ་བ་ཡིན་ཏེ། དེ་ལ་ཡིད་ཅེས་བྱའོ། །ཡིད་དེ་ཉིད་ལས་བྱེད་པའི་ཆ་ནས་ཚོགས་བརྒྱད་དུ་ཞུགས་པས་ཡིད་དེ་གསལ་ཆ་མི་འགག་པར་དེས་ཡུལ་ལྔ་སྤྱོད་པས་ཁ་ཕྱིར་བལྟས་ཏེ་སྒོ་ལྔའོ། །ཡིད་དེས་སྒོ་ལྔས་སྤྱད་པའི་ཉོན་མོངས་པ་ཟུངས་སུ་བཟུང་སྟེ། ཁ་ནང་དུ་བལྟས་པའི་ཆ་ནས་ཉོན་མོངས་པའི་ཡིད་དེ། མདོར་ན་ཡིད་ཁ་ཕྱིར་བལྟས་ནས་ཡུལ་སྤྱོད་པའི་ཆ་ནས་སྒོ་ལྔའོ། །ནང་དུ་བལྟས་ནས་བཟུང་བས་ཉོན་མོངས་པའི་ཡིད་དོ། །བསགས་པའི་གཞིའི་ཆ་ནས་སྣ་ཚོགས་གསོགས་པས་ཀུན་གཞིའོ། །རིག་པས་ཕྱིར་བཅད་པ་ནང་དུ་སྐྱེལ་བའི་ཆ་ནས་ཡིད་དོ། །མ་རྟོགས་པའི་དབང་གིས་དེ་ལྟར་བྱུང་། གཞིའི་དངོས་པོའི་གནས་ལུགས་གོང་དུ་སྨོས་པ་དེ་རྟོགས་ན་ཡེ་ཤེས་ལྔར་འཆར་ཏེ། ཐམས་ཅད་མཁྱེན་པ་འབྱུང་བ་ཡིན། རྟོགས་པའི་ཐབས་ནི་ངོ་སྤྲོད་པས་རྟོགས་པ་འཆར་ཏེ། དེ་ངོ་སྤྲོད་ཀྱི་གདམས་ངག་ཅར་ཕོག་ཏུ་བསྟན་ན་གོང་གི་ཚིག་གིས་ཤེས་པ་ཡིན་ཏེ། གཞིའི་སྐབས་ཀྱི་རང་བྱུང་གི་ཡེ་ཤེས་དེ་ཉིད་ཅར་ཕོག་ཏུ་བསྟན་ན། ཚིག་དོན་འདྲེལ་པ་ཡིན་ཏེ། ངོ་འཕྲོད་པ་ནི་དབང་པོ་རྣོ་རྟུལ་མེད་དོ། །ཐོགས་པ་མེད་པར་རང་ངོ་རང་གིས་ཤེས་སོ། །དེ་མཚན་ཉིད་ལྔ་དང་ལྡན་ཏེ། ངོ་བོ་སྟོང་པ་རང་བཞིན་གསལ་བ། མཚན་ཉིད་གཉིས་སུ་མེད་པ། ཐུགས་རྗེ་འགག་པ་མེད་པ། ཡོན་ཏན་མ་བཙལ་ལྷུན་གྱིས་གྲུབ་པ་སྟེ། །དེ་ལ་ཡེ་ཤེས་ལྔ་ཞེས་ཀྱང་བྱའོ། །དེ་ལྟར་ངོ་ཤེས་པས་ངོ་བོ་སྟོང་པ་མི་རྟོག་པས་འཛིན་པ་མེད་པའོ། །རང་བཞིན་གསལ་བ་མ་འགགས་པས་སྒོ་ལྔའི་རྣམ་པར་ཤེས་པ་དང་བཅས་པ་སྟེ། སེམསཅན་གྱི་དུས་ན་ཡུལ་རྣམ་པ་ལྔ་ལ་རང་ཁ་མར་སྤྱོད། རྟོགས་ལྡན་གྱི་དུས་ན་རང་སྣང་འཛིན་མེད་དུ་ ― DNG001_Page_0063 ―
[མ་དཔེ་གཟིགས་ན་འདིར་གནོན།]
གྲོལ། སངས་རྒྱས་པའི་དུས་ན་ཐམས་ཅད་མཁྱེན་པར་འབྱུང་སྟེ་སྟོང་པའོ། །གསལ་བ་གཞི་ཐོག་ཏུ་རང་གསལ་ལོ། །གསལ་བའི་རྩལ་རླུང་གིས་འགྱུས་ན། ཡུལ་ལ་སྤྱོད་བཞིན་དུ་མི་འཛིན་པ་རྟོགས་པའི་རྩལ་ལོ། །གསལ་བ་དང་སྟོང་པ་ཡེ་ནས་གཉིས་སུ་མེད་དེ། །གསལ་བའི་རྩལ་ལས་གདངས་འོད་ལྔ་བྱུང་། གཉིས་མེད་དེ་ལས་རྩལ་ཕྲིན་ལས་ཐོགས་པ་མེད་པ་བྱུང་སྟེ། དེས་གདུལ་བྱའི་དོན་ཐམས་ཅད་ལྷུན་གྱིས་གྲུབ་པའོ། །འོད་རྣམ་ལྔ་འཆར་བས་སྣང་བ་ལྷུན་གྱིས་གྲུབ་པའོ། །དེ་ལྟར་རྟོགས་པས་ངོ་འཕྲོད་པ་ཡིན་ནོ། །ལ་བཟླ་བ་ནི་ལྟ་བའི་སྐབས་སུ་བཤད་དོ། །གསང་བའི་བདག་པོ་དེ་ལྟར་ཤེས་པར་གྱིས་ཤིག །ཅེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ཚོགས་བརྒྱད་གཏན་ལ་ཕབ་ནས་ངོ་སྤྲད་པའི་ལེའུ་སྟེ་ཞེ་དྲུག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཚོགས་བརྒྱད་ཕྱེ་སྟེ་ངོ་སྤྲད་དེ་ལྟར་ན། །ཐོག་མཐའ་བཅད་དེ་ངོ་སྤྲད་པ། །རྡོ་རྗེ་འཆང་གིས་གསུང་དུ་གསོལ། །ཞེས་ཞུས་སོ། །རྡོ་རྗེ་འཆང་གིས་བཀའ་སྩལ་པ། འཁོར་བ་རྒྱུ་ནས་བ་བདས་མུ་ནས་རྩད་བཅད་པས། །སྙིང་པོ་གཞི་ལ་ཐུག་གིས་ཐུག །གཞི་ཉིད་ངོ་ཡིས་ཙིར་བཟུང་བས། །ངོ་སྤྲོད་ཅེས་སུ་བསྟན་པ་ཡིན། །གཞི་ཉིད་རྟོགས་པ་ལྟ་བའི་མཆོག །བ་བདས་གྱེན་ལ་བདས་པ་ནི། །འཁོར་བ་རང་སར་ལྡོག་པ་སྟེ། །འཁོར་བ་འདི་དག་ཅི་ལས་བྱུང་། །འཁོར་བ་རྐྱེན་དང་རྒྱུ་ལས་བྱུང་། །འཁོར་བའི་རྐྱེན་གཞི་བདས་པས་ནི། །དེ་མ་ཐག་པའི་སྐད་ཅིག་འཕེལ། །དེ་ཡང་དམིགས་པའི་རྐྱེན་ལས་བྱུང་། །དམིགས་པ་ཡུལ་ལ་དམིགས་པ་ཡིན། །ཡུལ་དམིགས་བདག་པོའི་རྐྱེན་ལས་བྱུང་། །བདག་པོ་ཡིད་ཀྱི་འཛིན་བཅས་ཡིན། །བདག་པོ་རྒྱུ་ཡི་རྐྱེན་ལས་བྱུང་། །རླུང་གིས་ཡིད་འགྱུས་རྒྱུ་ཡི་རྐྱེན། །འཁོར་བའི་རྒྱུ་གཉིས་འདི་ལྟ་སྟེ། །མ་རིག་རྣམ་པ་གཉིས་ཡིན་ཏེ། །ཀུན་བརྟགས་མ་རིག་འོད་ལྔ་བརྟགས་པས་བརྟས། །ལྷན་སྐྱེས་གསལ་ཆ་འོད་ལྔར་སྣང་བ་ལ། །རང་སྣང་ཡིན་པར་ངོ་མ་ཤེས་པའོ། །དེ་དག་འགྱུ་བས་ཡིད་བཞི་བསྐྱེད། །གཡོ་དང་འགྱུ་ ― DNG001_Page_0064 ―
[མ་དཔེ་གཟིགས་ན་འདིར་གནོན།]
དང་ཚོར་བ་དང་། །གཅོད་པ་ཡི་ནི་ཡིད་བཞི་ནི། །མ་རིག་རྒྱུ་རྐྱེན་དེ་ལས་བྱུང་། །སྤྱོད་པ་འོད་ལས་ཡུལ་དུ་སྤྱོད། །ཚོར་བ་འོད་ཀྱི་སྣང་བ་ཚོར། །འགྱུ་བ་རླུང་གིས་རིག་རྩལ་འགྱུས། །གཡོ་བ་གཞི་ནི་རླུང་གིས་གཡོས། །རླུང་ནི་རང་གི་རིག་པའི་རྩལ། རླུང་གི་མཚན་ཉིད་འགྱུ་བ་སྟེ། །རིག་པའི་རྩལ་ནི་འགྱུ་བའི་རླུང་། །རླུང་ལས་འབྱུང་ལྔ་ལྷུན་གྱིས་གྲུབ། །རླུང་དེ་སྡུད་པས་ཆུ་ཡིན་ནོ། །རླུང་དུ་སྨིན་པས་མེ་ཡིན་ནོ། །རླུང་དུ་བརྟས་པས་ས་ཡིན་ནོ། །རེ་རེ་དག་ལ་རྫོགས་པའོ། །རིག་པ་ཡེ་ཤེས་ལྔ་ལྡན་དེའི། །རྩལ་ནི་གདངས་ལྔ་འོད་ལྔ་ཤར། །དེ་དག་ཕྱི་ཡི་ཡུལ་དུ་བརྟགས། །གཞི་ཉིད་རྒྱས་པར་བཤད་པ་སྟེ། །རྒྱུད་ཀྱིས་སྟོན་ནས་གསལ་བར་བཤད། །ངེས་བཟུང་འདི་རུ་བསྟན་པ་སྟེ། །ངོ་སྤྲོད་ཅར་གྱིས་བསྟན་པ་སྟེ། །ཡིད་དང་རྒྱུ་རྐྱེན་རྩ་བ་ནི། །འཁོར་འདས་ཀུན་གྱི་གཞིར་གྱུར་པ། །དེ་ཡི་ངོས་འཛིན་འདི་ལྟར་ཡིན། །ཧད་དེ་ས་ལེ་སོ་ལེ་བ། །དེ་ཉིད་ལས་ནི་འཁོར་འདས་ཐམས་ཅད་འབྱུང་། །གཞི་ཡི་རང་རྩལ་གཉིས་ཡིན་ཏེ། །རླུང་དང་འོད་གདངས་གཉིས་སུ་བྱུང་། །གཞི་ནི་གཡོ་འགུལ་མེད་པ་ལ། །རྩལ་ནི་མ་འགགས་རླུང་གཡོས་པས། །གཡོ་བ་ཡིས་ནི་འགྱུ་བ་བྱུང་། །འགྱུས་བས་འོད་ཀྱི་སྣང་བ་ཚོར། །འོད་དེ་རང་སྣང་མ་ཤེས་པས། །ལྷན་ཅིག་སྐྱེས་པའི་མ་རིག་བྱུང་། །རང་སྣང་མ་ཤེས་ཡུལ་དུ་བཅད། །གཅོད་པའི་ཡིད་ཅེས་དེ་ལ་བྱ། །འོད་ལ་བརྟགས་པས་ཀུན་བརྟགས་མ་རིག་བྱུང་། །རྩལ་ནི་ཡིད་དུ་འགྱུས་པ་དེས། །རྒྱུ་ཡང་བྱས་ཏེ་རྐྱེན་ཡང་བྱས། །རྒྱུ་ཡི་རྐྱེན་ཞེས་དེ་ལ་བྱ། །འགྱུ་བའི་ཡིད་ནི་རླུང་ཅན་དེས། །འཁོར་བ་བསྐྱེད་ནས་འཁོར་བའི་བདག་པོ་བྱེད། །མྱ་ངན་འདས་ན་དེ་ཡི་བདག་པོ་བྱེད། །གང་བསྐྱེད་བདག་པོ་དེ་ཡིས་བྱེད། །དེ་ཡིས་རྐྱེན་བྱས་བདག་པོའི་རྐྱེན། །འགྱུ་བ་འོད་ལ་དམིགས་པའི་རྐྱེན། །དེ་ལ་འཁྲུལ་པས་བརྟགས་བྱས་ནས། །སྐད་ཅིག་དེ་མ་ཐག་པའི་རྐྱེན། །དེ་ལྟར་འཁོར་བ་བསྐྱེད་བས་ཏེ། །གོང་དུ་ཤིན་ཏུ་གསལ་བར་བཤད། །གཞི་ཉིད་ངོས་འཛིན་འཕྲད་པའོ། །གཞི་ལས་གསལ་བའི་ཆོས་སྐུ་ཡིས། །སྤངས་ནས་མྱ་ངན་འདས་ལུགས་ནི། ། ― DNG001_Page_0065 ―
[མ་དཔེ་གཟིགས་ན་འདིར་གནོན།]
གཞན་ནས་བསྟེན་པ་དེ་བཞིན་དུའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འཁོར་བ་རྒྱུ་ནས་བ་བདས་མུ་ནསརྩད་བཅད་ནས་ངོ་སྤྲད་པའི་ལེའུ་སྟེ་ཞེ་བདུན་པའོ།། །།གསང་བའི་བདག་པོས་ཡང་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དུས་གསུམ་ཕྱེ་ལ་ངོ་སྤྲད་པ། །ཐུགས་རྗེ་ཅན་གྱིས་གསུང་དུ་གསོལ། །དེ་སྐད་ཅེས་ནི་ཞུས་པ་དང་། །རྡོ་རྗེ་འཆང་གིས་བཀའ་སྩལ་པ། ཉོན་ཅིག་གསང་བའི་བདག་པོ་རྡོ་རྗེ་ཅན། །དུས་གསུམ་ཕྱེ་ལ་ངོ་སྤྲད་པ། །གང་ཟག་གཅིག་གི་ཤེས་རྒྱུད་ལ། །ཤེས་པ་བསམ་གྱིས་མི་ཁྱབ་ཀྱང་། །ཤེས་པ་བཞི་རུ་འདུས་པའོ། །དུས་གསུམ་དག་གི་ཤེས་པ་དང་། །དུས་མེད་རྟོག་པའི་ཤེས་པའོ། །དུས་གསུམ་ཤེས་པ་ངོས་བཟུང་ན། །འདས་པ་རྗེས་གཅོད་ཤེས་པ་དང་། །མ་འོངས་སྔོན་བསུ་ཤེས་པ་དང་། །ད་ལྟ་ཉིད་དུ་འཕྲོས་པ་ཡི། །སྒོ་ལྔ་ཡུལ་ལ་ཤོར་བའི་ཤེས་པའོ། །དོན་དྲན་རྟོག་གློ་བུར་ཤེས་པའོ། །འདས་པ་རྗེས་གཅོད་ཤེས་པ་ནི། །སྔར་བྱས་བློ་ལ་དྲན་པའོ། །མ་འོངས་སྔོན་བསུའི་ཤེས་པ་ནི། །ཕྱི་མ་བློ་ལ་དྲན་པའོ། །ད་ལྟ་དྲན་རྟོག་གློ་བུར་བ། །སྒོ་ལྔ་ཡུལ་ལ་བསྐྱེད་པ་ཡིས། །དེ་བཞིན་རྟོགས་པས་ཤེས་པའོ། །དེ་གསུམ་འཁོར་བའི་ཆོས་ཡིན་ཏེ། །དེ་གསུམ་གློ་བུར་ཤེས་པ་ཡིས། །བདག་མེད་འཛིན་གྲོལ་དུས་གསུམ་དག །མ་བྱས་མ་བཅོས་མ་བསླད་པ། །རང་བྱུང་ཡེ་ནས་གནས་པ་སྟེ། །དེ་ཉིད་ཤེས་པས་ཡེ་ཤེས་ཡིན། །དེ་ཉིད་ལྷག་གིས་ངོ་སྤྲད་པ། །ཧད་དེ་ཝ་ལེ་སལ་ལེ་བ་ཉིད། །དེ་ལས་རང་བྱུང་ཡེ་ཤེས་ཏེ། །རྒྱུ་རྐྱེན་མེད་པས་རང་བྱུང་ངོ་། །དེ་ཉིད་ཤེས་པས་ཡེ་ཤེས་ཡིན། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། དུས་གསུམ་ཕྱེ་ནས་ངོ་སྤྲད་པའི་ལེའུ་སྟེ་ཞེ་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དུས་གསུམ་ངོ་སྤྲོད་དེ་ལགས་ན། །ངོ་སྤྲོད་རྣམ་བཞི་གསུང་དུ་གསོལ། །ཞེས་ཞུས་པས། སྟོན་པ་རྡོ་རྗེ་འཆང་གིས་བཀའ་སྩལ་པ། རྡོ་རྗེ་འཛིན་པ་ངེས་ཟུང་ཞིག །རང་གི་བྱད་ཀྱི་མཚན་ཉིད་ནི། །མེ་ལོང་དག་ལ་རབ་བརྟེན་ནས། ། ― DNG001_Page_0066 ―
[མ་དཔེ་གཟིགས་ན་འདིར་གནོན།]
ཇི་ལྟར་གཏན་ལ་འབེབས་པ་ལྟར། །སྐུ་གསུམ་འདུ་འབྲལ་མེད་པའི་དོན། །ཡེ་ནས་རང་ལ་ལྷུན་གྲུབ་པས། །བརྡའ་ཡིས་གཏན་ལ་དབབ་པར་བྱ། །ཀྱེ་གསང་བའི་བདག་པོ་ཁྱོད་ཉོན་ཅིག །ངོ་སྤྲོད་བཞི་རུ་ཤེས་པར་བྱ། །ཅིའི་ཕྱིར་ཡུལ་བཞིར་ངེས་པས་སོ། །བཞི་པོ་གང་ཡིན་ཇི་ལྟར་ཡིན། །སྐུ་ལྔ་རིན་པོ་ཆེའི་སྦུབས་དང་གཅིག །ལོངས་སྐུ་ལྔ་ལྡན་དེ་དང་གཉིས། །སྤྲུལ་སྐུའི་བར་དོ་དེ་དང་གསུམ། །སྐུ་གསུམ་འདུ་འབྲལ་མེད་པར་རྫོགས་ལྡན་ནོ། །དེ་བཞི་མི་རྫུན་ངེས་པས་ཐེ་ཚོམ་དང་བྲལ་བའོ། །བདེན་བཞིའི་ཚུལ་གྱི་རྣམ་པ་ཅན། །ངོ་སྤྲོད་བྱ་བའི་ཤེས་པ་མ་འགགས་པའོ། །རིགས་ཀྱི་བུ་ཁྱོད་ལེགས་པར་ཉོན། །གྲངས་ལྡན་གཏན་ཚིགས་བསྟན་པའོ། །བླ་མས་གདམས་ངག་སྒྲོགས་པའི་ཚེ། །གོ་རིམ་གཉིས་སུ་བསྟན་པ་ནི། །གཞི་ཉིད་ལྷུན་གྲུབ་དག་གི་གོ་རིམ་དང་། །རྟོགས་པ་མངོན་གྱུར་དག་གི་གོ་རིམ་མོ། །ཀྱེ་གསང་བའི་བདག་པོ་ལེགས་པར་ཉོན་ཅིག །དེ་ལ་གཞི་ཉིད་ལྷུན་གྲུབ་ནི། །དང་པོ་ཆོས་སྐུའི་ངོ་སྤྲོད་དང་། །དེ་ནས་ལོངས་སྐུའི་ངོ་སྤྲོད་དང་། དེ་ནས་སྤྲུལ་སྐུའི་ངོ་སྤྲོད་བསྟན་པ་དང་། དེ་ནས་སྐུ་གསུམ་འདུ་འབྲལ་མེད་པའོ། །སྤྲད་པའི་ཐབས་ལ་གཉིས་ཡིན་ཏེ། །བརྡ་དང་ངག་ཏུ་བསྟན་པའོ། །མཚོན་པའི་བརྡ་ལ་རྣམ་པ་བཞི། །རྡོ་རྗེ་སེམས་དཔའི་མེ་ལོང་བསྟེན་པ་དང་། །འདྲ་འབག་དག་ལ་བརྟེན་པ་དང་། །འོད་ཁྱིམ་དག་ལ་བརྟེན་པ་དང་། །ཉི་མ་དག་ལ་བརྟེན་པའོ། །བརྗོད་པའི་སྒྲ་ལ་རྣམ་བཞི་སྟེ། །དང་པོ་ཆོས་སྐུ་མཚོན་པའི་ཚེ། །ཀྱེ་སྣོད་ལྡན་སློབ་མ་ང་ལ་ཉོན། །ཐུགས་ཀྱི་མེ་ལོང་མན་ཤེལ་འདི། །ཆོས་སྐུ་དངོས་ནི་མ་ཡིན་ཏེ། །འདི་ཉིད་ཅི་འདྲར་ཤེས་པར་བྱ། །མན་ཤེལ་ཕྱི་ནང་མེད་པ་ལྟར། །རང་གི་རིག་པ་ཆོས་སྐུ་ཡང་། །ཕྱི་ནང་མེད་པར་ཤེས་པར་བྱ། །མན་ཤེལ་མདུན་རྒྱབ་མེད་པ་ལྟར། །ཆོས་སྐུ་ཡང་ནི་མདུན་རྒྱབ་མེད། །མན་ཤེལ་ཟང་ཐལ་གསལ་བ་བཞིན། །ཆོས་སྐུ་དྲི་མེད་དག་པ་ཟང་ཐལ་ཡིན། །འདི་ན་ནང་མེད་ནང་ན་རྐྱེན་མེད་འོད་ལྔ་གསལ་བ་ལྟར། ཆོས་སྐུ་ཟང་ཐལ་ནང་ན་ནི། སྐུ་གསུམ་ནང་གསལ་དུ་ནི་ ― DNG001_Page_0067 ―
[མ་དཔེ་གཟིགས་ན་འདིར་གནོན།]
གནས་པ་སྟེ། སྟོང་པ་ཡེ་ཤེས་སྙིང་པོ་ཅན་དུ་ཤེས་པར་གྱིས། དཔེ་འདིའི་ནང་ནས་འོད་ལྔ་ཕྱི་རུ་འཆར་བ་ལྟར། །ཆོས་ཀྱི་སྐུ་ལས་གཟུགས་སྐུ་གཉིས། གདུལ་བྱ་གཉིས་ལ་སྣང་བའོ། །རིགས་ཀྱི་བུ་དག་ཚུར་ཉོན་དང་། ལོངས་སྐུ་དག་ལ་གདམས་པ་ནི། འདྲ་འབག་མེ་ལོང་ངོས་ལ་བསྟན་པའི་ཚེ། མེ་ལོང་དག་ཅིང་གསལ་བ་ལྟར། ཆོས་ཉིད་དག་ཅིང་གསལ་བའོ། །མེ་ལོང་ནང་གི་གཟུགས་བརྙན་སྣང་ལ་རང་བཞིན་མེད་པ་ལྟར། ཆོས་ཉིད་ཀློང་ན་སྐུ་ལྔ་སྣང་ལ་རང་བཞིན་མེད་པར་གསལ་བར་གནས། ཀྱེ་རིགས་ཀྱི་བུ་དག་ཚུར་ཉོན་དང་། སྤྲུལ་སྐུ་བརྡའ་དང་ངག་ཏུ་སྦྱར་དུས་སུ། །ངག་གི་མེ་ལོང་དག་ཅིང་གསལ་བ་ལྟར། །ཆུ་ཡི་སྒྲོན་མ་དག་གི་དབྱིངས། །མེ་ལོང་ངོས་ལ་སྐུ་ལྔ་གསལ་བ་ལྟར། །རྟགས་ཀྱི་ཡེ་ཤེས་སྤྲུལ་སྐུ་འོད་དུ་གསལ། །སྐུ་གསུམ་འདུ་འབྲལ་མེད་པར་བརྡ་དང་ངག་སྦྱོར་བས། ཀྱེ་མ་གསང་བདག་ངེས་ཟུང་ཞིག །ཉི་མའི་སྙིང་པོ་འོད་ཟེར་བཅས་པ་བཞིན། །ཆོས་ཀྱི་སྐུ་ལ་ཐུགས་རྗེ་གཟུགས་སྐུར་བརྒྱན། །ཉི་མ་འོད་ཟེར་ཉིད་དང་མི་འབྲལ་ལྟར། །སྐུ་གསུམ་ཡེ་ནས་འདུ་འབྲལ་མེད་པར་གནས། །ཀྱེ་གསང་བདག་ངེས་པར་ཟུང་ཞིག །རྟོགས་པ་མངོན་གྱུར་གོ་རིམ་ནི། །བར་དོ་མན་ཆད་བརྩི་བ་སྟེ། །སྤྲུལ་པ་སྐུ་ཡི་ངོ་སྤྲོད་ནི། །ཆོས་ཉིད་བར་དོའི་ངོ་སྤྲོད་ཡིན། །ལོངས་སྤྱོད་རྫོགས་སྐུའི་ངོ་སྤྲོད་ནི། །ལྔ་ལྡན་དག་གི་ངོ་སྤྲོད་ཡིན། །སྐུ་གསུམ་འདུ་འབྲལ་མེད་པ་ནི། །རྫོགས་ལྡན་དག་གི་ངོ་སྤྲོད་ཡིན། །ཆོས་སྐུ་དག་གི་ངོ་སྤྲོད་ནི། །རྫོགས་ལྡན་ཆེན་པོའི་ངོ་སྤྲོད་ཡིན། །གདམས་ངག་གོང་དང་མཐུན་པ་ལ། །དང་པོ་བར་དོའི་ངོ་སྤྲོད་བྱ། །དེ་རྟོགས་སྐུ་རུ་སྣང་བས་ན། །དེ་ནས་ལྔ་ལྡན་ངོ་སྤྲོད་བྱ། །དེ་ནས་མངོན་ཤེས་ལ་སོགས་པའི། །ཆེ་བ་ཡོངས་སུ་རྫོགས་པས་ན། །རྫོགས་ལྡན་ངོ་སྤྲོད་བྱ་བ་ཡིན། །ཐུགས་རྗེ་བྱུང་ན་མྱ་ངན་འདས། །དེ་བས་རྫོགས་ལྡན་ཆེན་པོ་ཡིན། །ངོ་སྤྲོད་གདམས་ངག་གསལ་བར་བསྟན། །དེས་ནི་གོང་གིས་བརྡའ་བཞི་ལ། །རྟགས་ནི་བྱང་ཆུབ་སེམས་ཡིན་ཏེ། །ངོ་སྤྲོད་བཞི་ཡིས་འགྱུར་མེད་བསྟན། །དོན་ནི་སྐུ་གསུམ་འདུ་འབྲལ་མེད། །བདེན་དོན་རྣམ་པ་བཅུ་ ― DNG001_Page_0068 ―
[མ་དཔེ་གཟིགས་ན་འདིར་གནོན།]
གཉིས་ཡིན། །སྤྲོད་པའི་ཡུལ་བཞི་གང་བསྟན་པས། །དེ་ཉིད་རྣམ་པ་བཅུ་དྲུག་རིག །དེ་ལ་དགོངས་པ་རྣམ་པ་བཞི། །ལྷུན་གྲུབ་ངེས་པའི་གདམས་པ་བཞི། །ངོ་སྤྲོད་རྟོགས་པས་ཐོབ་པར་འགྱུར། །མངོན་གྱུར་ཡུལ་གྱི་གདམས་པ་བཞི། །ངོ་སྤྲོད་རྟོགས་པ་ཐོབ་པར་འགྱུར། །དེ་ནི་དགོངས་པ་མདོར་བསྡུས་ཡིན། །དེ་ཡི་མཚན་ཉིད་རྒྱས་བཤད་ན། །ཐིག་ལེ་ཉག་གཅིག་ངོ་སྤྲོད་ཀྱིས། །ཆོས་སྐུ་རང་གསལ་དོན་རྟོགས་ཤིང་། །རིན་ཆེན་སྦུབས་ཀྱི་དགོངས་པ་ཆོད། །མ་ཧཱ་ཡོ་གའི་ངོ་སྤྲོད་ཀྱིས། །ཡེ་ཤེས་ལྔ་ལྡན་དགོངས་པ་ཆོད། །རྫོགས་པ་ཆེན་པོའི་ངོ་སྤྲོད་ཀྱིས། །སྤྲུལ་སྐུ་རང་གནས་དོན་རྟོགས་ཤིང་། །ཆོས་ཉིད་བར་དོའི་དགོངས་པ་ཆོད། །ཨ་ནུ་ཡོ་གའི་ངོ་སྤྲོད་ཀྱིས། །སྐུ་གསུམ་འདུ་འབྲལ་མེད་པར་རང་གནས་དོན་རྟོགས་ཤིང་། །རྫོགས་ལྡན་དགོངས་པ་ཆོད་པ་ཡིན། །ངོ་སྤྲོད་རྣམ་བཞི་བྱས་པ་ཡིས། །ཡུལ་བཞི་རིམ་པར་ཤར་བའི་ཚེ། །ཤེས་པའི་དྲན་པ་རེ་རེ་སད། །སོ་སོའི་གྲུབ་མཐའ་རྫོགས་པའོ། །མཐོང་བའི་ཡུལ་ལ་ཤེས་པའི་དྲན་པ་སད། །དྲན་པ་བཞི་ཡི་ཏིང་འཛིན་རྒྱལ། །དེ་ཚེ་མངོན་པར་སངས་རྒྱས་ཤིང་། །ཞི་བ་མྱ་ངན་འདས་པས་ན། །རྣམ་པ་ཉི་ཤུས་བྱང་ཆུབ་པའི། །དེ་ལྟར་རྟོགས་ནས་སངས་རྒྱས་པས། །རྣམ་པ་ཀུན་རིག་སངས་རྒྱས་མཆོག །ངོ་སྤྲོད་བཞི་ཡིདགོངས་པ་ཡིན། །དེ་རྣམས་མི་ལྡན་ངོ་མ་སྤྲད་པའི་སྐྱོན། །རྡོ་རྗེ་འཆང་ཆེན་བདག་གིས་བཤད། །ཅེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ངོ་སྤྲོད་བཞི་བསྟན་པའི་ལེའུ་སྟེ་ཞེ་དགུ་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་ཆེན་པོ། །སྐུ་གསུམ་ལྷུན་གྲུབ་ངོ་སྤྲོད་དང་། །དཔེ་དོན་རྟགས་ཀྱི་ངོ་སྤྲོད་ལ། །མདོ་རུ་བསྟན་པ་དེ་ལགས་ན། །ངོ་སྤྲོད་རྣམས་ནི་ལ་བཟླའི་ཕྱིར། །ཕྱི་ནང་གསང་གསུམ་ངོ་སྤྲོད་གསུང་དུ་གསོལ། །དེ་སྐད་ཅེས་ནི་ཞུས་པ་དང་། རྡོ་རྗེ་འཆང་གིས་བཀའ་སྩལ་པ། །ཉོན་ཅིག་རྡོ་རྗེ་འཛིན་པ་སོགས། །ཕྱི་ནང་གསང་གསུམ་སོ་སོའི་ངོ་སྤྲོད་ནི། །ངོ་སྤྲོད་རྣམས་ལ་ལ་བཟླ་སྟེ། །ལྟ་བའི་དོན་དང་སྦྱར་བའོ། །དེ་ལ་ཕྱི་ཡི་ངོ་སྤྲོད་ནི། །སྣང་བ་ཆོས་ ― DNG001_Page_0069 ―
[མ་དཔེ་གཟིགས་ན་འདིར་གནོན།]
དབྱིངས་ངོ་སྤྲོད་དོ། །ནང་གི་ངོ་སྤྲོད་བསྟན་པ་ནི། །གཟུགས་སྐུ་གཉིས་ཀྱི་ངོ་སྤྲོད་དོ། །གསང་བའི་ངོ་སྤྲོད་བསྟན་པ་ནི། །རིག་པ་ཆོས་སྐུར་ངོ་སྤྲོད་དོ། །ཀྱེ་ཀྱེ་རྡོ་རྗེ་འཆང་ཆེན་པོ། །ཕྱི་ཡི་ངོ་སྤྲོད་ཅི་ལྟར་སྤྲོད། །ནང་གི་ངོ་སྤྲོད་ཅི་ལྟར་སྤྲོད། །གསང་བའི་ངོ་སྤྲོད་ཇི་ལྟར་སྤྲོད། །དེ་དག་དཔེ་དོན་གསུང་དུ་གསོལ། །ཞེས་ཞུས་པས། རྡོ་རྗེ་འཆང་གིས་བཀའ་སྩལ་པ། །རིག་པ་ཆོས་སྐུའི་དཔེ་བསྟན་པ། །མན་ཤེལ་ཡོངས་སུ་དག་པ་སྟེ། །གསལ་བར་ཡོད་ལ་ངོས་གཟུང་མེད་པ་བཞིན། །འོད་ཀྱི་གསལ་ཆ་ཕྱི་རུ་འབྱུང་། །བྱུང་ཡང་མན་ཤེལ་དག་པ་ལ། །རང་རྒྱུད་པ་རུ་གྲུབ་པ་མེད། །གསལ་བའི་རྩལ་ནི་གཉིས་སུ་འབྱུང་། །རིག་པའི་གསལ་ཆ་སྒོ་ལྔར་ཤར། །གཟུགས་ཀྱི་གསལ་ཆ་འོད་ལྔར་ཤར། །རིག་པའི་ངོ་བོ་མ་གྲུབ་པ། །མན་ཤེལ་རྣམ་པར་དག་པ་འདྲ། །དེ་ཉིད་མི་འགག་གསལ་བ་དེ། །མན་ཤེལ་རྣམ་པར་དག་པ་འདྲ། །གསལ་སྟོང་གཉིས་སུ་མེད་པ་ལ། །གཟུགས་སྐུ་གཉིས་སུ་འཆར་བ་དེ། །མན་ཤེལ་གསལ་བ་སྒོ་ལྔ་དང་། །འོད་ལྔ་མི་འགག་འཆར་བ་འདྲ། །རིག་པ་གསལ་སྟོང་གཉིས་སུ་མེད་པ་ལ། །སྒོ་ལྔ་མ་འགག་གསལ་པ་ནི། །ཆོས་སྐུ་སྒོ་ལྔ་ཚང་བའོ། །རིག་པའི་ཆ་ནས་ཆོས་ཀྱི་སྐུ། །འོད་ཀྱི་ཆ་ནས་ལོངས་སྐུའོ། །སྒོ་ལྔ་གསལ་བའི་ཆ་ནས་སྣ་ཚོགས་འགྱུ། །དེ་ཉིད་སྤྲུལ་པའི་སྐུ་རུ་བསྟན། །ལོངས་སྐུའི་དཔེ་བསྟན་འདི་ལྟ་སྟེ། །སྤྲིན་མེད་ཉི་མ་ཤར་བ་ལ། །མན་ཤེལ་བསྟན་ཅིང་བྲིས་སྐུ་དགྲམ། །མན་ཤེལ་ཉི་མའི་ངོས་སུ་ཕྱར། །བྲིས་སྐུ་འོད་བརྡལ་དངོས་སུ་དགྲམ། །ཤེལ་དང་བྲིས་སྐུ་གཉིས་ཀ་ལ། །མ་ཡེངས་མིག་ནི་བཙུགས་ལ་བལྟ། །རེས་མོས་བལྟ་ཞིང་ནམ་མཁར་བལྟ། །མན་ཤེལ་ཉི་མའི་འོད་ཕོག་དང་། །བྲིས་སྐུ་ཁ་དོག་དབྱིབས་ལྡན་པར། །མིག་བཙུགས་ལ་ནི་བལྟ་བར་བྱ། །མིག་བསྒྲིམ་ནམ་མཁའ་སྟོང་པར་བལྟ། །བྲིས་སྐུ་གང་ཡིན་ཁ་དོག་དབྱིབས། །དབང་པོ་མིག་གིས་མངོན་སུམ་དུ། །སྣང་ལ་རང་བཞིན་མེད་པ་འབྱུང་། །དེ་བཞིན་ལོངས་སྐུའི་རྣམ་པ་ཡང་། །ཆོས་སྐུ་གསལ་སྟོང་གཉིས་མེད་ ― DNG001_Page_0070 ―
[མ་དཔེ་གཟིགས་ན་འདིར་གནོན།]
ལ། །ཡོན་ཏན་ཡེ་ཤེས་ལྔ་རུ་སྣང་། །དེ་རྩལ་ཁ་དོག་འོད་ལྔ་ཤར། །འོད་ཉིད་ལོངས་སྐུར་བསྟན་པ་སྟེ། །འོད་ལྔ་གཅིག་ཏུ་འདྲིལ་བ་ལ། །རྣམ་པར་སྣང་མཛད་ཀུན་ཏུ་བཟང་། །ལོངས་སྐུ་ཆེན་པོར་བསྟན་པ་སྟེ། །མཚན་དང་དཔེ་བྱད་རྫོགས་པས་སྤྲས། །དེ་དག་ཕྱོགས་རེའི་ཆ་བཟུང་བ། །རིགས་ལྔ་སེམས་དཔའི་ཚོགས་སུ་བྱུང་། །དེ་དག་སྣང་ལ་རང་བཞིན་མེད། །གསལ་ལ་རྟོག་པ་མེད་པ་སྟེ། །དཔེར་ན་བར་སྣང་འཇའ་དང་འདྲ། །སྐུ་ནི་འོད་ཀྱི་སྐུ་ཡིན་ཏེ། །ཐུགས་ནི་གསལ་སྟོང་ཆོས་སྐུ་དེ། །གཉིས་མེད་རྟོག་བྲལ་ཆེན་པོ་ཡིན། །སྐུ་དང་ཐུགས་གཉིས་འདུས་པ་ལས། །རྩལ་ནི་མི་འགག་བདག་ཉིད་ཀྱི། །གདུལ་བྱ་གང་དང་མོས་ཕྱོགས་སུ། །གང་ལ་གང་འདོད་འབྱུང་བ་དེ། །སྤྲུལ་པའི་སྐུ་ཡི་གནས་ལུགས་ཡིན། །དཔེ་ནི་སྒྱུ་མ་མཁན་པོ་ཡིས། །རྫས་དང་སྔགས་ཀྱི་རྟེན་འདྲེལ་གྱིས། །ལྟས་མོའི་མི་ཡི་མིག་སྔ་རུ། །གང་འདོད་གཟུགས་སུ་ཡོང་པ་འདྲ། །དེ་བཞིན་དཔེ་ནི་སྒྱུ་མ་ཡི། །གཟུགས་བརྙན་སྣ་ཚོགས་སྣང་བ་འདྲ། །ཆོས་སྐུའི་རྩལ་མ་འགགས་པ་ཡིས། །གཟུགས་སྐུ་གཉིས་སུ་སྣང་བའོ། །རིག་པའི་ཆ་ནས་ཆོས་ཀྱི་སྐུ། །དེ་གསལ་གཟུགས་ཆ་མི་འགག་པས། །འོད་སྣང་ཆ་ནས་ལོངས་སྐུའོ། །འགྱུ་བ་དྲན་རིག་ཆ་ནས་ནི། །སྒོ་ལྔ་ཡུལ་དུ་སྣ་ཚོགས་འགྱུ། །དེ་དག་སྤྲུལ་པའི་སྐུ་ཡིན་ཏེ། །སྐུ་ནི་ལོངས་སྐུར་བསྟན་པའོ། །གསུང་གི་ཆ་ལས་སྤྲུལ་སྐུའོ། །ཐུགས་ཀྱི་ཆ་ནས་ཆོས་སྐུའོ། །དེ་ལྟར་སྐུ་གསུམ་ལྷུན་གྱིས་གྲུབ། །ཆོས་ཀྱི་སྐུ་ལས་གཟུགས་སྐུ་གཉིས། །རྩལ་ལམ་ཤུགས་ལས་བྱུང་བའོ། །དེའི་ཕྱིར་ཆོས་སྐུ་ངོ་སྤྲོད་པས། །གཟུགས་སྐུ་གཉིས་པོ་ཤུགས་ལ་འཕྲོད། །གོང་བཞིན་ཆོས་སྐུའི་གནས་ལུགས་དེ། །ཡེ་ནས་བདག་གི་རང་བཞིན་ཡིན། །དེ་དག་རང་ལ་ངོས་བཟུང་སྟེ། །ངོ་བོ་རང་གིས་མཐོང་བ་ན། །དེ་དག་ངོ་ཡིས་ཙིར་བཟུང་ནས། །ཐ་མལ་ཤེས་པ་འདི་ཉིད་ལ། །བྱ་བཏང་རྩོལ་དང་བྲལ་དུས་སུ། །དབང་པོ་ཡིད་ནི་ཧད་དེ་བ། །དེ་དག་གཞི་ཡི་ངོ་བོ་སྟེ། །ངོ་བོ་ཉིད་ཀྱི་སྐུ་ཞེས་བྱ། །ལྷུན་གྲུབ་སངས་རྒྱས་ཞེས་ཀྱང་བྱ། །དེ་ཉིད་ ― DNG001_Page_0071 ―
[མ་དཔེ་གཟིགས་ན་འདིར་གནོན།]
རྟོགས་པ་མངོན་གྱུར་ནི། །ཕྱི་ལྟར་དབྱེ་བའི་ལྟ་བ་སྟེ། །དེ་ཉིད་རྟོགས་པ་ཞི་གནས་ཡིན། །ནང་གི་ཡེ་ཤེས་མ་ཤར་བས། །སྟོང་པ་བཏང་སྙོམས་ཆ་ནས་ནི། །ཕྱི་ཡི་ཉོན་མོངས་ཞི་བ་ཙམ། །དེ་ལ་ཞི་གནས་ཞེས་སུ་བསྟན་པ་ཡིན། །གོང་གི་གཞི་ཉིད་ངོས་བཟུང་བ། །དེ་ལ་གསལ་ཆ་བརྟན་པ་སྟེ། །ལྷག་མཐོང་རིག་པ་ཆོས་སྐུ་ཡིན། །གསལ་ཆ་གོང་འོག་ཀུན་ཏུ་ནི། །ཤིན་ཏུ་ཞིབ་པར་བསྟན་པ་སྟེ། །སྟོང་པའི་ཆ་དང་གསལ་བའི་ཆ། །གསལ་བ་རང་གསལ་དག་དང་ནི། །འགྱུས་པས་སྒོ་ལྔ་ཡུལ་ལ་གསལ། །རྗེས་སུ་མི་འཛིན་རྟོག་པ་ཡིན། །གཟུགས་རྩལ་འོད་གདངས་དག་ཏུ་འཆར། །རང་གི་སྣང་བར་ཤར་བ་སྟེ། །དེ་ལ་མི་འཛིན་མི་རྟོག་པའོ། །རང་གི་མཚན་ཉིད་རྟོགས་པ་ཡིན། །དེ་ལྟར་ཆོས་སྐུ་གསལ་སྟོང་ལ། །སྐུ་གསུམ་ཡེ་ཤེས་ལྔ་རྫོགས་པ། །ལྟ་བའི་དམ་པ་ཁོ་ནའོ། །གསལ་རྩལ་གང་ཡང་མི་འགག་པ། །མི་འཛིན་མི་རྟོག་མི་འབྲང་བ། །ལྟ་བའི་དམ་པ་ཁོ་ནའོ། །གསལ་བའི་རྩལ་དང་མི་ལྡན་ན། །ཞི་གནས་བརྟན་པོ་ཞི་བ་ལས། །གསལ་རྩལ་དག་གིས་བོགས་དབྱུང་སྟེ། །འོག་ནས་གོང་དུ་འཕར་བར་འགྱུར། །རྟོག་པ་གསལ་དང་བརྟན་པ་ཡིས། །ཉོན་མོངས་སྒྲིབ་པ་ཆ་ཡིས་འབྲལ། །དོན་ལ་ཆེད་དུ་སྤང་དུ་མེད། །བོགས་དང་འཕར་བ་དག་ཀྱང་མེད། །རྟོག་པ་གསལ་དང་གདེངས་ལྡན་པས། །ཉོན་མོངས་ཆ་ཡིས་འགགས་པ་ལ། །ལམ་གྱི་མིང་དུ་བཏགས་པ་ཙམ། །ཡེ་ནས་གནས་པས་གཞི་རུ་བསྟན། །འཁོར་འདས་འབྱུང་ཕྱིར་གཞི་རུ་བསྟན། །དེ་དག་རང་ངོ་སྟོན་པ་ལ། །ངོ་སྤྲོད་ཞེས་སུ་སྟོན་པ་ཡིན། །དེ་དོན་རྟོགས་པ་ལྟ་བ་ཡིན། །རྒྱུད་ལ་གསལ་བ་སྒོམ་པར་སྟོན། །རྒྱུན་དུ་འཁྱེར་བ་སྤྱོད་པའོ། །མངོན་གྱུར་འབྲས་བུའི་གཞི་མར་རིག །དག་པ་ཆེན་པོའི་མཐར་ཐུག་པའོ། །ལྟ་བ་མདོར་བསྡུས་བསྟན་པ་ནི། །མཐའ་རྣམས་ཀུན་དང་མ་སྤངས་བྲལ། །མཐའ་བྲལ་ཆེན་པོར་གྱུར་པས་ན། །ཕྱོགས་སུ་ལྷུང་བ་གང་ཡང་མེད། །མ་བརྩལ་ལྷུན་གྱིས་གྲུབ་པས་ན། །རྩལ་རྣམས་གང་ཡང་མི་འགག་འཆར། །ཐམས་ཅད་མཁྱེན་པ་དེ་ལས་རྒྱུད། །རྩ་ ― DNG001_Page_0072 ―
[མ་དཔེ་གཟིགས་ན་འདིར་གནོན།]
བ་གསལ་སྟོང་ཆེན་པོའོ། །རིག་པ་ཆོས་སྐུར་ངོ་སྤྲད་པས། །གཟུགས་སྐུ་གཉིས་པོ་ཤུགས་ལས་འཆར། །གཟུགས་སྐུ་གཉིས་པོ་ངོ་སྤྲད་པས། །སྐུ་གསུམ་ལྷུན་གྱིས་གྲུབ་པས་ན། །ཕྱི་ཡི་ཆོས་དབྱིངས་བསྟན་པ་ནི། །སྟང་པར་འོད་གདངས་ཤར་བའོ། །སྣང་བ་རང་སྣང་མི་འཛིན་པས། །ཆོས་དབྱིངས་ངོ་ནི་འཕྲད་པའོ། །མ་རྟོགས་འཁྲུལ་པར་རགས་པར་བརྟས། །དེ་ལ་རྟོགས་ལྡན་གང་ཟག་གིས། །རང་སྣང་འཛིན་མེད་ཆགས་པ་མེད། །གང་ཟག་རྟོགས་ལྡན་ཆོས་དབྱིངས་ཡིན། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ཕྱི་ནང་གསང་བ་གསུམ་གྱི་ངོ་སྤྲོད་བསྟན་པའི་ལེའུ་སྟེ་ལྔ་བཅུ་པའོ།། །།རྡོ་རྗེ་འཛིན་པ་ལེགས་པར་ཟུང་ཞིག །ངོ་སྤྲོད་བདུན་གྱིས་ངོ་སྤྲད་པས། །རང་གི་མཚན་ཉིད་རྟོགས་པར་འགྱུར། །ཞེས་གསུངས་སོ། །ཀྱེ་ཀྱེ་རྡོ་རྗེ་འཆང་ཆེན་པོ། །ངོ་སྤྲོད་རྣམས་ཀྱི་ངོ་བོ་ངེས་ཚིག་དབྱེ་བ་དང་། །བརྗོད་པའི་ཚིག་རྣམས་གསུང་དུ་གསོལ། །ཞེས་ཞུས་པས། སྟོན་པས་བཀའ་སྩལ་པ། གསང་བའི་བདག་པོ་ཉོན་ཅིག །ངོ་བོ་ནི་རང་སེམས་རང་གི་ངོ་བོའོ། །ངེས་ཚིག་ནི་རང་ངོ་རང་ལ་བསྟན་སྟེ་སྤྲད་པས་འཕྲོད་པའོ། །དབྱེ་བ་ནི་བདུན་དུ་བསྟན་པ་སྟེ། །གོང་དུ་གསལ་ཞིང་རྒྱས་པར་བསྟན་པའོ། །བརྗོད་པའི་ཚིག་ནི་ངོ་སྤྲོད་ཅེས་ཀྱང་བྱ། ངོ་བོ་མཐོང་བ་ཞེས་ཀྱང་བྱ། རང་ངོ་ཤེས་པ་ཞེས་ཀྱང་བྱ། གཞིའི་དོན་ཤེས་པ་ཞེས་ཀྱང་བྱ། རིག་པ་ཆོས་སྐུར་རྟོགས་པ་ཞེས་ཀྱང་བྱ། དོན་མ་ནོར་བར་མཐོང་བ་ཞེས་ཀྱང་བྱ། རང་གི་མཚན་ཉིད་བསྟན་པའི་གདམས་ངག་ཅེས་ཀྱང་བྱའོ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ངོ་སྤྲོད་མཇུག་བསྡུ་བའི་མན་ངག་གི་ལེའུ་སྟེ་ང་གཅིག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ངོ་སྤྲོད་གཏན་ལ་དབབ་པ་ཡིས། །བསྟན་པའི་དོན་འདི་ཇི་ལྟར་ལགས། །ཕྱི་རབས་དོན་དུ་གསུང་དུ་གསོལ། །རྡོ་རྗེ་འཆང་གིས་བཀའ་སྩལ་པ། ཨ་ཀཱ་ཡ་ཏྲི་ཛྙཱ་ན་པཉྩ། ཉི་མའི་སྙིང་ ― DNG001_Page_0073 ―
[མ་དཔེ་གཟིགས་ན་འདིར་གནོན།]
པོ་ལ་འོད་ཟེར་གསལ་བས། མུན་པ་གཏན་མི་གནས་པ་ཞེས་བྱ་བ་འདི་གསུངས་སོ། །བལྟར་མེད་ལྟ་བའི་དོན་བསྟན་པ། །ཨ་ཏིའི་ལྟ་བ་གཟའ་གཏད་བྲལ། །དངོས་མེད་ཡེ་ཤེས་ཟང་ཐལ་བས། །རང་རིག་ཡེ་ཤེས་ལྷུན་གྱིས་གྲུབ། །དེ་ལས་མ་གཏོགས་གཞན་མེད་པས། །སོ་སོ་རང་རིག་ཡེ་ཤེས་ལ། །ཅིར་སྣང་ཡེ་ཤེས་ཆེན་པོའི་གདངས། །ཡེ་ཉིད་བཅོམ་ལྡན་རྡོ་རྗེ་འཆང་། །དེ་བས་གཞི་སྣང་རྫོགས་སངས་རྒྱས། །སངས་རྒྱས་ཡུལ་མེད་གཟུང་འཛིན་རྣམ་པར་དག །རང་རིག་ཡེ་ཤེས་རང་གི་གདངས་ལ་བཞུགས། །འབྱུང་བཞི་རང་བཞིན་དག་པའི་ནམ་མཁའ་ལ། །ཆོས་ཉིད་དོན་གྱི་ནམ་མཁས་ཡེ་ནས་ཁྱབ། །ཆོས་ཉིད་དོན་གྱི་ནམ་མཁའ་ལ། །རང་རིག་ཡེ་ཤེས་ཉི་མ་ཤར། །ཕྱོགས་རིས་མེད་པ་ཀུན་ཏུ་བཟང་། །ཡིད་ཀྱི་རྣམ་རྟོག་ཅི་འགྱུ་ཡང་། །མ་འགགས་རང་བཞིན་མེད་པའི་དོན། །བལྟས་ཤིང་གསལ་བས་མཐོང་རྙེད་ལ། །ཕྱི་ནང་གཉིས་ཀ་ཕྱི་ཉིད་ནང་། །ཟབ་པའི་ཆ་ཤས་རྟོགས་ཡུལ་བྲལ། །ཕྱི་ནང་སྣོད་བཅུད་ཐམས་ཅད་ཀུན། །བྱིས་པའི་སྐྱེ་བོ་རྣམས་ལ་སྣང་མོད་ཀྱི། །ལྟ་བ་རང་རིག་ཡེ་ཤེས་དངོས་མེད་ཟང་ཐལ་བ། །དངོས་པོ་མཚན་མའི་སྒྲིབ་པ་ཡེ་ནས་རྣམ་པར་དག །ཀུན་བཟང་ཞལ་ནི་ཕྱོགས་བཅུ་ཀུན་ཏུ་གསལ། །ཡུམ་གྱི་བྷ་ག་བདེ་ཀློང་གཅིག་ཏུ་འཁྱིལ། །དེ་བས་ཁམས་གསུམ་མ་ལུས་སྤྲོས་བྲལ་ཆེན་པོར་གཅིག །ལྟ་བ་རྣམ་དག་རང་རིག་ཡེ་ཤེས་ལ། །སངས་རྒྱས་མེད་པས་སངས་རྒྱས་མིང་ཡང་མེད། །སེམས་ཅན་མེད་པས་ཁམས་དང་འབྱུང་བ་མེད། །མན་ཤེལ་སྐུ་ལྟར་རང་གི་རྒྱུད་དག་པས། །དྲི་མེད་ཟང་ཐལ་དག་པ་ཆོས་ཀྱི་སྐུ། །ས་ཆུ་མེ་རླུང་ནམ་མཁར་སྣང་བ་ཡང་། །མ་རྟོགས་བློ་ལ་ཚད་མར་སྣང་མོད་ཀྱི། །སྣང་ལ་རང་བཞིན་མེད་དེ་ཡེ་ཤེས་གདངས་སུ་གསལ། །དཔེར་ན་མཁའ་ལ་འཇའ་ཚོན་གསལ་བ་ཡང་། །མཁའ་ལས་ལོགས་ན་མེད་ཀྱང་ལོགས་པར་སྣང་། །མཁའ་ཡི་ངང་དུ་གནས་ཤིང་མཁའ་དང་མི་ཕྱེད་ལྟར། །ཆོས་ཉིད་ཆོས་སྐུ་དབྱེར་མེད་དོན་གྱི་ནམ་མཁའ་ལ། །རང་ཤར་རང་སྣང་རང་གསལ་ཡེ་ཤེས་གདངས། །ལོགས་ལྟར་སྣང་ཞིང་འགགས་པ་ ― DNG001_Page_0074 ―
[མ་དཔེ་གཟིགས་ན་འདིར་གནོན།]
མེད་པར་གསལ། །གསལ་ལ་རྟོག་མེད་ཡེ་ཤེས་ཆོས་ཀྱི་སྐུ། །རང་ལ་རང་སྣང་སྣོད་བཅུད་ཡེ་སངས་རྒྱས། །ལས་དང་ཐུགས་རྗེའི་མཐའ་གཉིས་རྣམ་པར་དག །ས་དང་རྣམ་ཐར་བྱང་ཆུབ་མཆོག་ལ་རིང་། །བགྲོད་དུ་མེད་དེ་ཆོས་ཉིད་བྱང་ཆུབ་མཆོག །བགྲོད་པར་འདོད་ན་ཡེ་ཤེས་མཐའ་ལ་རིང་། །མ་བསགས་བཞིན་དུ་ཚོགས་གཉིས་ཡེ་ནས་རྫོགས། །མ་སྦྱངས་བཞིན་དུ་སྒྲིབ་གཉིས་ཡེ་ནས་བྱང་། །མ་བྱུང་མ་སྐྱེས་འོད་ཀྱི་དཀྱིལ་འཁོར་ལ། །བཀོད་པ་ལྷ་ཡི་དཀྱིལ་འཁོར་བསྒོམ་མི་དགོས། །དཀྱིལ་འཁོར་ཁྲོ་གཉེར་ཆ་ལུགས་ཀྱིས། །ཁྲོ་བདག་ཆེན་པོའི་སྐུར་བསྐྱེད་ནས། །སྐུ་གསུང་ཐུགས་ཀྱི་བཟླས་པ་དག །ཆུ་ཡི་རྒྱུན་ལྟར་བཟླས་ན་ཡང་། །རང་རིག་ཡེ་ཤེས་རྒྱབ་ཀྱིས་ཕྱོགས། །ཡེ་ནས་བྱས་ཟིན་ད་གདོད་བཙལ་བ་མེད། །ཆེད་དུ་བྱར་མེད་ཆེད་དུ་དགག་ཏུ་མེད། །མར་མེའི་སྙིང་པོ་རང་གི་འོད་ལ་གནས་པ་ལྟར། །རང་རིག་ཡེ་ཤེས་རང་གི་གདངས་ལ་གནས། །འདས་དང་མ་བྱོན་ད་ལྟའི་སངས་རྒྱས་དང་། །གཉིས་མེད་རོ་གཅིག་ཆུ་ལ་ཆུ་བཞག་བཞིན། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། བལྟ་བ་སྤྱི་རུ་བསྟན་པའི་ལེའུ་སྟེ་ང་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དེ་ལྟར་ལྟ་བ་བསྟན་པ་དེ། །ཕྱི་ལྟར་དབྱེ་བར་འདུག་པ་ན། །རང་གི་མཚན་ཉིད་ལྟ་བ་དེ། །མ་ནོར་ངེས་པར་བསྟན་དུ་གསོལ། །ཞེས་ཞུས་པས། རྡོ་རྗེ་འཆང་གིས་བཀའ་སྩལ་པ། ཕྱི་རབས་དད་ལྡན་དོན་ཆེད་དུ། །རང་གི་མཚན་ཉིད་ལྟ་བ་ནི། །མ་ནོར་ངེས་པར་ངས་བཤད་ཉོན། །སྣང་བ་ཆོས་དབྱིངས་ཆོས་ཉིད་དང་། །རང་བྱུང་རང་རིག་ཆོས་ཀྱི་སྐུ། །ཝལ་གྱིས་རྟོགས་པའི་ལྟ་བ་ཡིན། །དེ་ཉིད་ཅར་གྱིས་ངོས་བཟུང་ན། །ཐ་མལ་ཤེས་པ་འདི་ཉིད་ལ། །ཧད་དེ་ས་ལེ་སོ་ལེ་བ། །ཧྲིག་གེ་ས་ལེ་སང་ངེ་བ། །དེ་ཉིད་རང་གི་མཚན་ཉིད་ཡིན། །རིག་པ་ཆོས་སྐུ་བཞི་ལྡན་ཡིན། །རང་གི་ངོ་བོ་མ་གྲུབ་པས། །ཆོས་ཉིད་སྟོང་པའི་ཆ་ཡིན་ནོ། །ངོ་བོ་མི་རྟོག་པ་ཞེས་བྱ། །སྟོང་པ་དེ་ཉིད་རང་གསལ་ཡིན། །རིག་པ་རང་གསལ་ཞེས་ ― DNG001_Page_0075 ―
[མ་དཔེ་གཟིགས་ན་འདིར་གནོན།]
བྱ་སྟེ། །གསལ་བའི་དུས་ན་དངོས་པོ་མེད། །དངོས་མེད་དེ་ཉིད་གསལ་བར་ཤར། །གསལ་སྟོང་གཉིས་སུ་མེད་པའོ། །གསལ་བ་ལ་ནི་རྣམ་པ་གཉིས། །ཡེ་ཤེས་ལྔ་རུ་མ་འགགས་ཏེ། །དེ་ལ་གདངས་ལྔ་འོད་ལྔ་ཤར། །དེ་ཉིད་མ་རྟོགས་དུག་ལྔར་འཁྲུལ། །འོད་ལྔ་མ་རྟོགས་འབྱུང་ལྔར་འཁྲུལ། །ཡེ་ཤེས་ལྔ་པོ་མ་ཤེས་པས། །འགྱུ་བའི་རླུང་ནི་དུག་ལྔར་ཤར། །དེ་བཞིན་གཅིག་ལ་ཚང་ལུགས་ཡིན། །དེ་ལ་སྐུ་གསུམ་རྫོགས་ལུགས་ནི། །རང་བྱུང་གསལ་སྟོང་གཉིས་སུ་མེད། །དེ་ཉིད་མི་འཛིན་མི་རྟོག་པས། །རྟོག་མེད་ཆོས་ཀྱི་སྐུ་ཡིན་སྟེ། །ཆོས་སྐུ་དེ་ལས་གདངས་བྱུང་བས། །ལོངས་སྤྱོད་རྫོགས་པའི་སྐུ་ཡིན་ནོ། །དེ་གཉིས་རྩལ་ནི་མ་འགགས་པས། །ཐུགས་རྗེ་སྤྲུལ་པའི་སྐུ་ཞེས་བྱ། །རང་བྱུང་རིག་པའི་རྩལ་ཞེས་པས། །སྐུ་གསུམ་ཡོངས་སུ་དེ་ལྟར་རྫོགས། །ལྟ་བ་རང་བྱུང་རིག་པ་ལ། །ཡེ་ཤེས་ལྔ་ཡི་རྫོགས་ལུགས་ནི། །རིག་པའི་ངོ་བོ་མ་གྲུབ་པས། །སྟོང་པ་ཉིད་ཀྱི་ཡེ་ཤེས་རྫོགས། །དེ་ཉིད་མ་འགགས་གསལ་བས་ན། །མེ་ལོང་ལྟ་བུའི་ཡེ་ཤེས་རྫོགས། །དེ་ཉིད་གཉིས་མེད་མཉམ་པས་ན། །མཉམ་པ་ཉིད་ཀྱི་ཡེ་ཤེས་རྫོགས། །མ་འགགས་སོ་སོར་གསལ་བས་ན། །སོ་སོར་རྟོགས་པའི་ཡེ་ཤེས་རྫོགས། །རྩལ་ནི་སྒོ་ལྔར་བཅས་པ་ཡིས། །ཐམས་ཅད་གྲུབ་པར་གྱུར་པས་ན། །བྱ་བ་གྲུབ་པའི་ཡེ་ཤེས་རྫོགས། །རྒྱུ་དང་རྐྱེན་གྱིས་མ་བསྐྱེད་པས། །རང་བྱུང་ཡེ་ཤེས་ཞེས་བྱའོ། །རང་རིག་གཅིག་གི་ཡོན་ཏན་ཡིན། །རང་གི་རིག་པ་ཆོས་སྐུ་ལ། །ཡོན་ཏན་ཐམས་ཅད་ལྷུན་གྱིས་གྲུབ། །གང་ལ་ཐོགས་མེད་ཟང་ཐལ་ཡིན། །མན་ཤེལ་དག་པའི་དཔེ་བཞིན་དུ། །གསལ་དྭངས་རྟོག་མེད་ཟང་ཐལ་ལོ། །དཔེར་ན་མར་མེ་གསལ་བ་བཞིན། །རང་གསལ་དག་གི་ངོ་བོར་ཡོད། །སྣང་བ་ཆོས་དབྱིངས་ལྟ་བ་ནི། །མཚན་མར་མ་གྲུབ་སྟོང་པ་ལ། །རིག་པ་དག་གི་རྩལ་ཤར་བས། །གདངས་དང་འོད་ཀྱི་རྣམ་པ་བྱུང་། །རང་སྣང་དག་ཏུ་ཤར་བས་ན། །རིག་པ་རང་སར་གྲོལ་བ་དང་། །སྣང་བ་རང་སར་དག་པའོ། །དཔེར་ན་ནམ་མཁའ་སྟོང་པ་ལ། །ཉི་མ་གསལ་ཞིང་འཕྱོ་བ་བཞིན། །ཡུལ་ཉིད་སྟོང་ ― DNG001_Page_0076 ―
[མ་དཔེ་གཟིགས་ན་འདིར་གནོན།]
པའི་ཆོས་ཉིད་ན། །རང་རིག་ཆོས་སྐུ་གསལ་སྟོང་འཕྱོ། །གང་ཟག་རྟོགས་ལྡན་ལམ་ཞུགས་ཀྱིས། །འཁྲུལ་སྣང་འདི་ལ་དེ་བཞིན་སྦྱར། །ཐམས་ཅད་རང་ཉིད་རྟོགས་པས་གྲོལ། །རང་སར་བཞག་པས་ལྟ་ངོས་ཟིན། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ལྟ་བ་རང་གི་མཚན་ཉིད་བསྟན་པའི་ལེའུ་སྟེ་ང་གསུམ་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་། །མ་འོངས་སྐལ་ལྡན་དོན་ཕྱིར་དུ། །ལྟ་བ་རང་གི་མཚན་ཉིད་དེ་ལྟར་ན། །རྒྱས་པར་བཤད་པ་ཇི་ལྟར་ལགས། །དེ་སྐད་ཅེས་ནི་ཞུས་པ་ཡིས། །རྡོ་རྗེ་འཆང་གིས་བཀའ་སྩལ་པ། །ཕྱི་རབས་རྣལ་འབྱོར་དོན་ཆེད་དུ། །ལྟ་བ་རྒྱས་པར་ང་ཡིས་བཤད། །ལྟ་བའི་རྒྱུ་རྐྱེན་ངོ་བོ་དང་། །ངེས་ཚིག་རང་བཞིན་མཚན་ཉིད་དང་། །དབྱེ་བསྡུ་དགོས་ཆེད་གོལ་ས་དང་། །སྐྱོན་དག་ལྷུན་གྱིས་གྲུབ་ལུགས་དང་། །གཏན་ཚིགས་མཚོན་པའི་དཔེ་དང་ནི། །རྟོགས་ཆད་མ་རྟོགས་སྐྱོན་བསྟན་དང་། །གཞན་སེལ་རང་ངོ་བཟུང་བ་དང་། །ལ་བཟླ་སྤྲོས་བྲལ་ཆེན་པོའོ། །ལྟ་བའི་རྒྱུ་ནི་རང་བྱུང་ཆེན་པོ་ཡིན། །ཅིའི་ཕྱིར་རང་བྱུང་ཆེན་པོ་ཡིན་ཞེ་ན། །རང་རིག་ཆོས་སྐུ་རང་ལ་གནས་པ་དེ། །སངས་རྒྱས་ཐུགས་རྗེ་དག་ལས་མ་བྱུང་དང་། །སེམས་ཅན་རྣམས་ཀྱི་ལས་ཀྱིས་མ་བསྐྱེད་དང་། །ནང་གི་ཨ་རིག་འཁྲུལ་པས་མ་བསྐྱེད་དང་། །ཕྱི་ཡི་འབྱུང་བ་ལྔ་ལས་མ་གྲུབ་དང་། །གང་ཟག་ལམ་པའི་བློ་ཡིས་མ་བཅོས་དང་། །སྒྲ་དང་གཏན་ཚིགས་དག་གིས་གཏན་ལ་མ་ཕབ་དང་། །སྔགས་དང་ཕྱག་རྒྱའི་བྱིན་རླབས་དག་ལས་མ་བྱུང་དང་། །རྒྱུ་ཡིས་མ་བསྐྱེད་རྐྱེན་གྱིས་འཇིག་མི་འགྱུར། །མ་བཅོས་མ་བསླད་སོ་མ་རང་བྱུང་ཆེན་པོ་ཡིན། །དེ་ཕྱིར་རྒྱུ་མེད་རྒྱུ་དེ་རྒྱུ་ཡི་མཆོག །རྐྱེན་ནི་བླ་མ་དག་པའི་གདམས་ངག་སྟེ། །ཅི་ཕྱིར་མན་ངག་བླ་མ་ཡིན་ཞེ་ན། །བླ་མ་དམ་པས་གདམས་ངག་བསྟན་པ་ཡིས། །རང་བྱུང་གསལ་སྟོང་གཉིས་མེད་དོན་རྟོགས་སོ། །དེ་ཕྱིར་རྐྱེན་ནི་བླ་མ་དམ་པའི་གདམས་ངག་ཡིན། །ངོ་བོ་རང་རིག་གསལ་སྟོང་གཉིས་མེད་ཡིན། །དེ་དོན་རྟོགས་པ་ལྟ་བའི་ངོ་བོ་ཡིན། །ལྟ་བའི་ངེས་ཚིག་རང་རིག་ཡེ་ཤེས་ཡིན། །གཞན་ལ་རག་མི་དགོས་ ― DNG001_Page_0077 ―
[མ་དཔེ་གཟིགས་ན་འདིར་གནོན།]
པས་རང་ཞེས་བྱ། །བེམ་པོ་དག་ལས་ལོག་པས་རིག་པའོ། །དུས་ནི་གློ་བུར་མ་བྱུང་ཡེ་ཞེས་བྱ། །དེ་ཉིད་དོན་དང་ངོ་སྤྲོད་ཤེས་པ་ཡིན། །ལྟ་བའི་རང་བཞིན་གསལ་དྭངས་ཆེན་པོ་ཡིན། །རང་རིག་གསལ་བས་དེ་རྩལ་འོད་ལྔར་ཤར། །རང་ནི་རང་བྱུང་རིག་པའི་དོན་ཡིན་ཏེ། །གཞི་ལས་གསལ་རྩལ་འོད་གདངས་ཤར་བའོ། །དེ་ཡི་གོང་ན་གཞན་མེད་ཆེན་པོ་ཡིན། །ལྟ་བའི་མཚན་ཉིད་ཡེ་ཤེས་ལྔ་ལྡན་ཡིན། །རང་བྱུང་རིག་པ་ཆོས་སྐུ་དེ་ལ་ནི། །ངོ་བོ་མ་གྲུབ་སྟོང་ཉིད་ཡེ་ཤེས་ཡིན། །མ་འགགས་གསལ་བས་མེ་ལོང་ལྟ་བུའི་ཡེ་ཤེས་ཡིན། །དེ་ཉིད་གཉིས་སུ་མེད་པར་མཉམ་པ་ཡིས། །གཉིས་མེད་མཉམ་པ་ཉིད་ཀྱི་ཡེ་ཤེས་ཡིན། །དེ་རྣམས་མ་འགགས་སོ་སོར་གསལ་བ་ཡིས། །སོ་སོར་རྟོགས་པའི་ཡེ་ཤེས་ཞེས་བྱའོ། །དེ་ལྟ་བུ་ཡི་ཡེ་ཤེས་དེ་རྩལ་གྱིས། །གསལ་བ་མ་འགགས་གང་ཡང་གྲུབ་པས་ན། །བྱ་བ་གྲུབ་པའི་ཡེ་ཤེས་ཞེས་སུ་བསྟན། །དེ་ལས་གསལ་རྩལ་འོད་ལྔ་ཤར་བས་ན། །མཚན་ཉིད་འཛིན་པའི་ཡེ་ཤེས་ལྔ་ཞེས་བྱ། །ལྟ་བའི་དབྱེ་བ་རྣམ་པ་གསུམ་དུ་བསྟན། །རང་གི་རིག་པ་ཆོས་སྐུར་བསྟན་པ་དང་། །བར་གྱི་རིག་རྩལ་མ་འགགས་བསྟན་པ་དང་། །ཕྱི་ཡི་སྣང་བ་ཆོས་དབྱིངས་བསྟན་པའོ། །ནང་གི་རིག་པ་རྟོགས་ན་ཆོས་ཀྱི་སྐུ། །རྩལ་ནི་གཟུགས་སྐུ་གཉིས་སུ་སྣང་བའོ། །ཆོས་སྐུ་ཕྱེ་ན་ཡེ་ཤེས་ལྔ་རུ་བསྟན། །དེ་ཡི་རྩལ་ནི་ཁ་དོག་འོད་ལྔར་ཤར། །ནང་གི་འགྱུ་བ་སྒོ་ལྔར་བཅས་པ་ཡིན། །ཕྱི་ཡི་ཡུལ་ལ་སྤྱོད་ཀྱང་རང་སར་གྲོལ། །འཛིན་རྟོག་མེད་པས་འགྱུ་བ་ཟང་ཐལ་ཡིན། །ཕྱི་ཡི་རང་བྱུང་རིག་པ་གསལ་གྱུར་ན། །ཕྱི་ཡི་ཡུལ་ནི་ཆོས་དབྱིངས་སྟོང་པ་ལ། །འོད་ལྔ་ཤར་བས་འབྱུང་བ་ལྔ་རུ་བརྟས། །བར་གྱི་གདངས་ནི་རང་རང་ལུས་སུ་གྲུབ། །མ་རིག་ལས་བྱུང་ཉོན་མོངས་དུག་ལྔ་ནི། །རང་རིག་རང་གསལ་འཛིན་མེད་ངོ་ཤེས་ན། །རང་ཆས་ཤར་བས་རང་སྣང་དག་ཏུ་བསྟན། །འཛིན་པ་འགྱུས་ཀྱང་གར་འགྱུས་རང་སར་གྲོལ། །ཕྱི་ཡི་སྣང་བ་ཡུལ་ལ་མ་ཞེན་ཅིང་། །ནང་གི་རང་བྱུང་རིག་པ་གསལ་གྱུར་ན། །རང་རིག་ཆོས་ཀྱི་སྐུ་ཞེས་དེ་ལ་བྱ། །སྟོང་གསལ་མི་རྟོག་བདེ་ ― DNG001_Page_0078 ―
[མ་དཔེ་གཟིགས་ན་འདིར་གནོན།]
ལྡན་པས། །ཀུན་གྱི་དོན་ཤེས་རྗེས་སུ་འཛིན་པ་མེད། །རིག་པ་ཆོས་ཀྱི་སྐུ་ཞེས་དེ་ལ་བྱ། །ལྟ་བའི་བསྡུས་དོན་བསྟན་པ་འདི་ལྟར་ཡིན། །རིག་པའི་ངོ་བོ་མ་གྲུབ་སྟོང་པའི་ཆ། །དེ་ཉིད་གསལ་བར་འདུག་པས་སྟོང་གསལ་ཆེན་པོ་ཡིན། །གསལ་བ་མི་འགག་རྩལ་དུ་བསྟན་པ་ནི། །འགྱུ་བ་རྗེས་མེད་ཐམས་ཅད་མཁྱེན་པའི་རྒྱུ། །གསལ་ཆ་གཟུགས་མི་འགག་པས་འོད་ལྔའི་གདངས། །ཡུལ་ལ་འཛིན་པ་མ་ཞུགས་ཆོས་ཀྱི་དབྱིངས། །སྟོང་ཆ་གསལ་ཆ་སྣང་ཆ་འགྱུས་ཆ་བཞི། །འཛིན་མེད་དོན་གྱི་ཟིན་པས་ལྟ་བ་ཡིན། །ལྟ་བའི་དགོས་ཆེད་བསྟན་པ་ན། །ལྟ་བ་མིག་དང་འདྲ་སྟེ་ཐམས་ཅད་གསལ། །ལྟ་མེད་རྒྱུད་དག་སངས་རྒྱས་ཐོབ་མི་སྲིད། །ལྟ་མེད་མ་རིག་མུན་པ་སངས་མི་སྲིད། །ལྟ་མེད་བསྒོམ་པ་བྱས་ཀྱང་དོན་མི་འགྱུར། །ལྟ་མེད་སྤྱོད་པ་བྱས་ཀྱང་སྤྱོད་རྒྱུ་མེད། །ལྟ་མེད་འཁོར་བའི་གནས་ནས་ཐར་མི་སྲིད། །ལྟ་མེད་སྡུག་བསྔལ་དག་ལས་གྲོལ་མི་སྲིད། །ལྟ་མེད་བདེ་བ་ཆེན་པོ་ཐོབ་མི་སྲིད། །དེ་ཕྱིར་ལྟ་བ་དགོས་ཆེད་ཤིན་ཏུ་ཆེ། །ལྟ་བའི་གོལ་ས་བཅད་པར་བསྟན་པ་ནི། །རང་བྱུང་ཡིན་པས་རྒྱུ་རྐྱེན་ག་ལས་ཆོད། །སྟོང་པར་འདུག་པས་དངོས་པོའི་གོལ་ས་ཆོད། །གསལ་བར་འདུག་པས་སྟོང་པའི་གོལ་ས་ཆོད། །རིག་པ་ཟང་ཐལ་ཤར་བས་གཞི་གནས་གོལ་ས་ཆོད། །གསལ་བ་འོད་དུ་འཆར་བས་རིག་པ་སྟོང་པའི་གོལ་ས་ཆོད། །མ་བཅོས་མ་བསླད་གནས་པས་བསྐྱེད་རིམ་གོལ་ས་ཆོད། །འདུ་འབྲལ་མེད་པར་གསལ་བས་བསྒོམ་པའི་གོལ་ས་ཆོད། །རང་ཉིད་ཡིན་པས་གཞན་ལ་རེ་བའི་གོལ་ས་ཆོད། །ཕྱོགས་མེད་འཆར་བས་ཕྱོགས་མཚམས་གོལ་ས་ཆོད། །ཀུན་གྱི་རྩ་བ་ཡིན་པས་ཐེག་པའི་གོལ་ས་ཆོད། །བསྟན་པ་ཙམ་གྱིས་རྟོགས་པས་ཐོས་བསམ་གོལ་ས་ཆོད། །རང་ངོ་རང་གིས་ཤེས་པས་གཞན་དུ་གོལ་མི་སྲིད། །སྐྱོན་རྣམས་དག་པར་བསྟན་པ་ནི། །གོལ་ས་ཆོད་པས་སྐྱོན་རྣམས་རྣམ་པར་དག །རྟག་མཐའ་དག་ལ་ཆད་མཐའ་དག །ཡོད་མཐའ་དག་ལ་མེད་མཐའ་དག །སྣང་མཐའ་དག་ལ་སྟོང་མཐའ་དག །གཅིག་ ― DNG001_Page_0079 ―
[མ་དཔེ་གཟིགས་ན་འདིར་གནོན།]
མཐའ་དག་ལ་དུ་མ་དག །མཐའ་རྣམས་ཐམས་ཅད་དག་པ་ནི། །ལྟ་བ་རྣམ་དག་ཆེན་པོ་ཡིན། །ཆེན་པོ་ཞེས་ནི་ཅི་ཕྱིར་བྱ། །རྣམ་དག་དོན་ལ་ལྷུན་གྲུབ་པས། །དག་པ་ཆེན་པོ་ཞེས་བྱའོ། །ལྟ་བ་ལྷུན་གྲུབ་བསྟན་པ་ནི། །སྐྱོན་རྣམས་དག་པས་ཡོན་ཏན་ལྷུན་གྱིས་གྲུབ། །དེ་ཡང་སྐུ་གསུམ་ཡེ་ཤེས་རྣམ་པ་ལྔ། །ལྷུན་གྱིས་གྲུབ་པས་ཐམས་ཅད་རྫོགས་པ་ཡིན། །བལྟ་བ་ལྷུན་གྲུབ་ཆེན་པོ་ཡིན། །དཔེར་ན་བསམ་འཕེལ་ནོར་བུ་ལ། །དགོས་འདོད་ཐམས་ཅད་འབྱུང་བ་འདྲ། །སྐྱོན་རྣམས་དག་པས་ཆེད་དུ་སྤངས་པ་མ་ཡིན་ཏེ། །རང་གི་ངོ་བོ་རྟོགས་པས་སྐྱོན་རྣམ་དག །དཔེར་ན་ཉི་མ་ཤར་བས་མུན་པ་མི་གནས་བཞིན། །ཡོན་ཏན་ཐམས་ཅད་ལྷུན་གྱིས་གྲུབ་པ་ནི། །བསྒྲུབས་པས་གྲུབ་པ་མ་ཡིན་ཏེ། །རང་ངོ་རྟོགས་པས་ཐམས་ཅད་མཁྱེན་པར་འཆར། །དཔེར་ན་རིན་ཆེན་རྙེད་པས་དགོས་འདོད་འབྱུང་བ་ལྟར། །ལྟ་བ་མཚོན་པའི་དཔེ་བསྟན་པ། །རྒྱས་པར་བསྟན་ན་བསམ་གྱིས་མི་ཁྱབ་སྟེ། །བསྡུ་ན་མཚོན་དཔེ་སུམ་ཅུ་དག་ཏུ་བསྟན། །རྣམ་པར་དག་པས་མན་ཤེལ་དྲི་མེད་འདྲ། །ལྷུན་གྱིས་གྲུབ་པས་ནོར་བུ་རིན་ཆེན་འདྲ། །མཐའ་དང་བྲལ་བས་ནམ་མཁའ་ཆེན་པོ་འདྲ། །ཐམས་ཅད་འབྱུང་བས་ས་གཞི་ཆེན་པོ་འདྲ། །ཉོན་མོངས་སྡིག་སྒྲིབ་བསྲེག་པས་མེ་དང་འདྲ། །མི་གཙང་ལྗན་ལྗིན་འཁྲུ་བས་ཆུ་དང་འདྲ། །གང་ལ་ཐོགས་པ་མེད་པས་རླུང་དང་འདྲ། །ངོ་བོ་མ་གྲུབ་པར་སྣང་སྟོང་པ་འདྲ། །གསལ་ལ་མི་འགག་ཉི་མའི་ཟེར་དང་འདྲ། །གསལ་ལ་མི་རྟོག་མེ་ལོང་མན་ཤེལ་རྐྱེན་འཕྲད་འདྲ། །བདེ་ལ་མི་རྟོག་བྱང་ཆུབ་སེམས་དཔའ་འདྲ། །གང་གི་སྐྱོན་གྱིས་མ་གོས་མེ་ཏོག་པདྨ་འདྲ། །ཕྱིར་མི་ལྡོག་པས་སེམས་ཅན་དུག་ཟོས་ཚེ་དང་འདྲ། །རྒྱུན་མི་འཆད་པས་ཆུ་བོའི་གཞུང་དང་འདྲ། །ངོ་བོ་གཅིག་ལ་རང་རྩལ་མི་འགགས་པ། །རྒྱ་མཚོ་ཆེན་པོ་དག་ལས་རླབས་འཆར་འདྲ། །འོད་གདངས་ལྷུན་གྲུབ་མན་ཤེལ་རྐྱེན་འཕྲད་འདྲ། །ཉོན་མོངས་རང་གྲོལ་སྦྲུལ་གྱི་མདུད་པ་འདྲ། །རྟོག་པ་རང་ངོ་རང་གིས་ཤེས་པ་ནི། །རྒྱལ་བུ་དམངས་ནས་རྒྱལ་སར་བཏོན་པ་འདྲ། །དུས་གསུམ་ ― DNG001_Page_0080 ―
[མ་དཔེ་གཟིགས་ན་འདིར་གནོན།]
འགྱུར་བ་མེད་པས་རིན་ཆེན་གསེར་དང་འདྲ། །ནང་དུ་གསལ་བས་བུམ་ནང་མར་མེ་འདྲ། །གཅིག་གིས་ཕྱི་ཡི་ཡུལ་ལྔ་སྤྱོད་པས་ན། །རིན་ཆེན་གསེར་སྦྲུལ་མིག་དང་འདྲ། །ཞེ་ལ་ཡོད་ཀྱང་ཁ་རུ་མི་ཐོན་པ། །དིག་པས་ཁ་རུ་བུ་རམ་མྱོང་བ་འདྲ། །རང་རིག་རྟོགས་པས་མ་རིག་སེལ་བ་ནི། །སྒྲོན་མེ་བཏེག་པས་མུན་པ་སེལ་བ་འདྲ། །ཕར་ལ་འཇོམས་ཤིང་ཚུར་ལ་མི་ཚུགས་པས། །མི་འགྱུར་མི་ཤིགས་རྡོ་རྗེ་ཕ་ལམ་འདྲ། །ངོ་བོ་འདུས་མ་བྱས་པས་ནམ་མཁའ་འདྲ། །རང་རིག་དོན་རྟོགས་ཉོན་མོངས་དག་པ་ནི། །ཉི་མ་ཤར་བས་ཐམས་ཅད་གསལ་བ་འདྲ། །མ་བསྒོམས་གསལ་རྩལ་བྱད་དང་མེ་ལོང་འདྲ། །མ་བཅོས་མ་བསླད་རང་རིག་གཉུག་མ་འདྲ། །མཚོན་དཔེ་སུམ་ཅུ་ཐམ་པས་ལྟ་བའི་དོན་གྱི་ཕྱོགས་རེ་མཚོན། །ལྟ་བ་བློ་དང་འཐས་པའི་ཡུལ་ལས་འདས་པས་ན། །འདི་ཡིན་འདི་དག་ཁོ་ན་ཞེས་སུ་བསྟན་པ་ཤིན་ཏུ་དཀའ། །དོན་གྱི་ཟུར་ཙམ་ཕྱོགས་ཙམ་མཚོན་པ་ཡིན། །གཏན་ཚིགས་མང་བར་བསྟན་ཀྱང་གསུམ་ཡིན་ཏེ། །ལུང་གིས་གཏན་ལ་ཕབ་པའི་གཏན་ཚིགས་དང་། །མན་ངག་དག་གི་གཏན་ཚིགས་བསྟན་པ་དང་། །དེ་གཉིས་འཛོམ་པའི་རྗེས་སུ་རིགས་པའི་གཏན་ཚིགས་སོ། །ལུང་གི་གཏན་ཚིགས་རྡོ་རྗེ་འཆང་གི་བཀའ། །མན་ངག་གཏན་ཚིགས་བཀའ་ལུང་བཅུད་ཀྱི་དོན། །རིག་པའི་གཏན་ཚིགས་རང་རིག་མངོན་སུམ་དོན། །ལུང་དང་མན་ངག་གཉིས་ཀྱིས་ངོ་སྤྲད་པའོ། །ལྟ་དོན་རང་རིག་མངོན་སུམ་རྟོགས་པའི་ཚེ། །ངོ་སྤྲོད་ཤེས་པས་རང་ངོ་ཤེས་པ་སྟེ། །ཉམས་སུ་མྱོང་བས་རང་ལས་འབྱུང་བའི་དོན། །ཉོན་མོངས་དུག་ལྔ་ལ་སོགས་རང་གྲོལ་དུ། །འདོད་པའི་ཡོན་ཏན་ལྔ་ལ་མ་ཞེན་དང་། །ཉམས་རྟོགས་ཐམས་ཅད་རང་ལས་འབྱུང་བ་དང་། །དུས་གསུམ་དག་ཏུ་འགྱུར་བ་མེད་པ་ཡིས། །བར་དུ་གཅོད་པའི་བདུད་ཀྱིས་ཚུགས་མི་འགྱུར། །ནང་གི་རིག་པ་ཆོས་ཀྱི་སྐུ་རུ་རྟོགས། །གསལ་སྟོང་གཉིས་མེད་སྤྲོས་དང་བྲལ་བའི་གདེངས། །བར་གྱི་རྩལ་ནི་འགྱུ་བ་རང་སར་གྲོལ། །རིག་པ་ཟང་ཐལ་ཅི་སྤྱོད་ཡེ་ཤེས་སོ། །ཕྱི་ཡི་སྣང་བ་བདེ་སྡུག་རང་སར་གྲོལ། །མ་བཅོས་སྟོང་ཉིད་ ― DNG001_Page_0081 ―
[མ་དཔེ་གཟིགས་ན་འདིར་གནོན།]
ཆོས་ཀྱི་དབྱིངས་སུ་གྲོལ། །རིག་པ་བསྟན་པས་རྐྱེན་རྣམས་ཐམས་ཅད་བྲལ། །དེ་ལྟར་ཤེས་ན་ལྟ་བ་རྟོགས་པའི་ཚད། །ལྟ་བ་མ་རྟོགས་པ་ཡི་སྐྱོན་བསྟན་པ། །དཔེར་ན་བྱེ་མའི་རི་ལ་མཁར་བརྩིག་འདྲ། །བྱེ་མ་ཉིལ་ནས་མཁར་སྤེ་འཇིག་པ་ལྟར། །ཡང་དག་མ་རྟོགས་བྱང་ཆུབ་ལམ་ཞུགས་པས། །གནས་སྐབས་ཙམ་ལས་མཐར་ཐུག་འབྲས་བུ་མེད། །དེ་ཕྱིར་ལྟ་བ་མ་རྟོགས་སངས་མི་རྒྱ། །ལྟ་བའི་ངོས་འཛིན་ངོ་སྤྲོད་སྐབས་ན་གསལ། །ངོ་ཡིས་ཟིན་ན་འཕྲལ་དུ་རྟོགས་པ་འཆར། །ཅི་ཕྱིར་ཞེ་ན་ཅར་ཕོག་བསྟན་པ་ཡིན། །དེ་ཕྱིར་ངོས་འཛིན་ངོ་སྤྲོད་ཤིན་ཏུ་གཅེས། །ལྟ་བའི་དོགས་བཅད་ཤིན་ཏུ་གཅེས། །མི་མཐུན་པ་ཡི་རྐྱེན་ལས་བཟློག་པར་འགྱུར། །དེ་ཡང་རྣམ་པ་གཉིས་སུ་བསྟན་པ་སྟེ། །མི་མཐུན་ཕྱོགས་དང་མཐུན་པའི་ཕྱོགས་ལས་བཟློག །མི་མཐུན་ཕྱོགས་ལས་བཟློག་པར་བསྟན་པ་ནི། །རིག་པ་ཡིན་པས་བེམ་པོ་དག་ལས་བཟློག །མཐུན་པའི་ཕྱོགས་ལས་ལྡོག་པར་བསྟན་པ་ནི། །ནང་གི་རྣམ་ཤེས་ཚོགས་བརྒྱད་ལྡོག་པའོ། །ཤེས་རིག་ཙམ་དུ་མཐུན་སྣང་གྱུར་ན་ཡང་། །འཛིན་པའི་རྟོག་པ་ཡོད་མེད་ཁྱད་པར་ཆེ། །དེ་ཡང་སྒོ་ལྔའི་རྣམ་པར་ཤེས་པ་ནི། །ཡུལ་དེ་སྣང་བས་ཤེས་པ་སྐྱེ་བར་འགྱུར། །ཡུལ་མི་སྣང་ན་ཤེས་པ་སྐྱེ་མི་འགྱུར། །དེ་ཡང་ཡུལ་ལ་འཛིན་པ་བཅས་ནས་སྐྱེ། །དེ་ཕྱིར་སྒོ་ལྔའི་རྟོགས་པ་རང་ཁ་མ། །རྟོག་པ་གསལ་ན་སྒོ་ལྔའི་འཛིན་པ་འགགས། །ཡིད་ཀྱི་རྣམ་ཤེས་མཚན་ཉིད་བསྟན་པ་ནི། །ཕྱི་རུ་ཡུལ་ལྔ་སྤྱོད་པའི་བདག་པོ་བྱེད། །ནང་དུ་དེ་ལས་བཟུང་བའི་ཉོན་མོངས་ཡིད། །གཟུང་དང་འཛིན་པ་གཉིས་ཀྱི་བདག་པོ་ཡིན། །དེ་ཕྱིར་རྣམ་པར་རྟོག་པ་རྣམས། །རང་གི་རིག་པ་དག་གི་རྩལ་ཡིན་ཏེ། །འཛིན་མེད་གསལ་བའི་རིག་པ་དེ་ཉིད་ནི། །རིག་པ་འགྱུས་ཀྱང་འཛིན་པའི་རྗེས་མེད་དེ། །ཕྱི་རུ་ཡུལ་ལ་སྤྱད་ཀྱང་མ་བཟུང་ན། །ལྟ་བ་ཟང་ཐལ་ཡིན་ཏེ་ཡིད་ལས་ལྡོག །ཉོན་མོངས་ཡིད་ཀྱི་མཚན་ཉིད་ནི། །ཡུལ་གྱི་རྟོག་པ་དཔྱོད་པ་དེ་དག་ནི། །ཡིད་ལ་བཟུང་བའི་ཆ་ནས་ཉོན་མོངས་ཡིད། །འཛིན་མེད་རིག་པ་གསལ་བ་ལྟ་བ་ཡིན། །དོན་ལ་རིག་པའི་རྩལ་ནི་མ་འགགས་པས། །མ་ ― DNG001_Page_0082 ―
[མ་དཔེ་གཟིགས་ན་འདིར་གནོན།]
ཤེས་ཡུལ་ལ་གཟུང་བས་རྟོག་པའི་ཚོགས་སུ་ཤར། །ཤེས་ནས་ཡུལ་ལ་འཛིན་པ་མེད་པ་ནི། །ཡེ་ཤེས་ཟང་ཐལ་བལྟ་བའི་མཐར་ཐུག་ཡིན། །སྦྱོར་བ་དོན་གྱི་ཀུན་གཞིའི་མཚན་ཉིད་བསྟན་པ་ནི། །ཚོགས་བདུན་རྟོག་པའི་གཞི་ལ་བྱ། །ཚོགས་བདུན་དག་ལ་རྟོག་པ་མི་གསོག་ན། །སྦྱོར་བ་དོན་གྱི་ཀུན་གཞི་དེ་ལས་བཟློག །མཐུན་ཕྱོགས་ཚོགས་བརྒྱད་དག་ལས་དེ་ལྟར་བཟློག །ནང་རིག་པའི་ཚོགས་བརྒྱད་དག་ལས་བཟློག་པ་ཡིན། །ཕྱི་ཡི་ཆོས་དབྱིངས་དག་ལས་བཟློག་པ་ཡིན། །འབྱུང་བ་ལྔ་ནི་རགས་པ་རྡོས་པ་ཅན། །ལྟ་བ་ཆོས་ཀྱི་དབྱིངས་ནི་སྟོང་པ་ལ། །འོད་གསལ་དག་ནི་རྩལ་གྱི་སྣང་བ་འཆར། །དེ་ཕྱིར་ཆོས་སྐུ་ཆོས་དབྱིངས་ཤར་ཙམ་ན། །འཁྲུལ་པའི་སྣང་བ་ལས་ནི་བཟློག་པ་ཡིན། །ལྟ་བའི་ལ་ཟློ་སྤྲོས་དང་བྲལ་བ་ཡིན། །ཅི་ཕྱིར་སྤྲོས་དང་བྲལ་ཞེ་ན། །སྤྲོས་པའི་མཐའ་ནི་མཐར་ལྷུང་སྟེ། །དེ་དང་བྲལ་ན་སྤྲོས་བྲལ་ལོ། །མཐའ་ཡང་འཁོར་བའི་མཐའ་ཡིན་ཏེ། །འཁོར་བའི་མཐའ་ཡང་ཕྱི་ནང་གཉིས་ཡིན་ཏེ། །ཕྱི་ཡི་འབྱུང་ལྔ་རྡོས་པའི་མཐའ། །འབྱུང་བ་ལྔ་ནི་འདུས་བྱས་ཏེ། །འདུས་མ་བྱས་ཤིང་འཛིན་པ་མེད་པས་མཐའ་ལས་གྲོལ། །ནང་ནི་ཉོན་མོངས་དུག་ལྔ་འཛིན་པའི་མཐའ། །འཛིན་པའི་ཕྱོགས་སུ་མ་ལྷུང་མཐའ་དང་བྲལ། །ཕྱི་ནང་སྣོད་བཅུད་མཐའ་ལས་དེ་ལྟར་གྲོལ། །གསལ་ལ་འཛིན་པ་མེད་པས་ཆད་པའི་མཐའ་ལས་གྲོལ། །མི་རྟོག་སྟོང་པས་རྟག་པའི་མཐའ་ལས་གྲོལ། །ཕྱོགས་ཆ་གང་ཡང་མེད་པས་རིམ་དགུའི་མཐའ་ལས་གྲོལ། །ཕྱི་ནང་སྣོད་བཅུད་ཀུན་གྱིམཐའ་ལས་གྲོལ། །སྐུ་གསུམ་ཡེ་ཤེས་ལྔ་རུ་འཛིན་མེད་པས། །མྱ་ངན་འདས་པའི་མཐའ་ལས་གྲོལ། །ཕྱོགས་རིས་གང་ཡང་མེད་པས་མཐའ་རྣམས་ཀུན་དང་བྲལ། །འཛིན་པ་གང་ཡང་མེད་པས་ཕྱོགས་སུ་ལྷུང་བ་མེད། །བློ་ཡི་ཡུལ་ལས་འདས་པས་བརྗོད་པའི་ཚིག་དང་བྲལ། །དོགས་པ་མེད་ཅིང་རེ་གནས་མེད་པས་སངས་རྒྱས་ད་ལྟ་ཉིད། །རེ་དོགས་ཀུན་དང་བྲལ་བས་འབྲས་བུ་ད་ལྟ་ཉིད། །དེ་ལྟར་ཤེས་ཤིང་རྟོགས་པའི་གང་ཟག་དེ། །འཁོར་བའི་གནས་སུ་འདུག་ཀྱང་འབྲས་བུ་སྐུ་གསུམ་རྫོགས། ། ― DNG001_Page_0083 ―
[མ་དཔེ་གཟིགས་ན་འདིར་གནོན།]
ཡེ་ཤེས་ལྔ་ཡིས་དོན་ལས་འགྱུར་བ་མེད། །རང་བྱུང་རིག་པའི་དོན་དེ་མངོན་དུ་ཤར། །ཡ་ང་བག་ཚ་མེད་པས་ཁྱུང་ཆེན་ནམ་མཁར་ལྡིང་པ་འདྲ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ལྟ་བ་རྒྱས་པར་བཤད་པའི་ལེའུ་སྟེ་ང་བཞི་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལྟ་བ་རྒྱས་པར་བསྟན་པ་དེ་ལགས་ན། །ཕྱི་རབས་གང་ཟག་སྣོད་ལྡན་དོན་ཆེད་དུ། །ལྟ་བ་རང་གི་མཚན་ཉིད་དེ་དག་ལ། །གནད་ཀྱི་མན་ངག་མི་འཁྲུལ་དེ་དག་གི། །གཅིག་སྲོག་གཅིག་གིས་གཟུང་བ་བཤད་དུ་གསོལ། །ཞེས་ཞུས་པས། དེ་ནས་སྟོན་པས་བཀའ་སྩལ་པ། རང་རིག་ཆོས་སྐུ་གཏན་ལ་དབབ་པ་ནི། །རང་རིག་ཡོན་ཏན་བརྗོད་ཀྱིས་མི་ལངས་ཀྱང་། །ཡོན་ཏན་བཅུ་ལྡན་རང་རིག་ཆོས་ཀྱི་སྐུ། །རྒྱུ་དང་རྐྱེན་གྱིས་མ་བསྐྱེད་རང་བྱུང་ཆ། །དངོས་པོ་མཚན་མར་མ་གྲུབ་སྟོང་པའི་ཆ། །རང་རིག་རང་གསལ་རིག་པ་ནང་གསལ་ཆ། །རིག་རྩལ་སྒོ་ལྔར་ཤར་བ་ཕྱི་གསལ་ཆ། །སྒོ་ལྔའི་རྗེས་སུ་འཇུག་པ་འགྱུ་བ་ཟང་ཐལ་ཆ། །རིག་རྩལ་འོད་དུ་ཤར་བ་གཟུགས་ཀྱི་ཆ། །གསལ་སྟོང་གཉིས་མེད་དོན་ལ་གཅིག་པའི་ཆ། །ཡོན་ཏན་མ་བཙལ་ལྷུན་གྱིས་གྲུབ་པས་ལྷུན་གྲུབ་ཆ། །སྐྱོན་རྣམས་མ་སྤངས་དག་པས་རྣམ་དག་ཆ། །ཡུལ་རྐྱེན་རང་སར་གྲོལ་བས་འཛིན་མེད་ཆ། །རྒྱུ་རྐྱེན་གཉིས་ཀྱིས་མ་བསྐྱེད་རང་བྱུང་ནི། །བདེ་གཤེགས་ཐུགས་རྗེ་དག་ལས་མ་བྱུང་རང་བྱུང་དང་། །སེམས་ཅན་རྣམས་ཀྱི་ལས་ཀྱིས་མ་བསྐྱེད་དང་། །ཕྱི་ཡི་འབྱུང་བ་ལྔ་ཡིས་མ་བསྐྱེད་དང་། །ནང་གིས་རྣམ་རྟོག་དག་ལས་མ་བྱུང་དང་། །གང་ཟག་ལམ་པའི་བློ་ཡིས་མ་བཅོས་པའོ། །དེ་ཕྱིར་རང་བྱུང་རྒྱུ་རྐྱེན་མེད་པའོ། །དངོས་པོ་མཚན་མར་མ་གྲུབ་སྟོང་པ་ནི། །གློ་བུར་མ་ཡིན་གདོད་མ་ནས་ཀྱི་སྟོང་པ་དང་། །གསལ་བའི་ངོ་བོ་མ་གྲུབ་སྟོང་པ་དང་། །བློ་ཡིས་མ་བཅོས་མ་བསླད་པ་ཡི་སྟོང་པ་དང་། །རྫས་དང་མཚན་མར་མ་གྲུབ་སྟོང་པ་དང་། །ཉོན་མོངས་བག་ཆགས་མ་གྲུབ་སྟོང་པའོ། །དེ་ཕྱིར་ཆོས་ཉིད་སྟོང་པ་ཉིད་ཅེས་བྱ། །རིག་པ་ནང་གསལ་ངོ་བོ་བསྟན་པ་ནི། །གཞན་ལ་རག་མ་ལས་པར་གསལ་བ་དང་། །གློ་བུར་མ་ ― DNG001_Page_0084 ―
[མ་དཔེ་གཟིགས་ན་འདིར་གནོན།]
ཡིན་གདོད་མ་ནས་ཀྱི་གསལ་བ་དང་། །གསལ་ཙམ་ཉིད་ནས་ངོ་བོ་མ་གྲུབ་གསལ་བ་དང་། །གསལ་བའི་དུས་ན་བདེ་ཡིན་གསལ་བ་དང་། །ཡོན་ཏན་ལྷུན་གྱིས་གྲུབ་པས་གསལ་བའོ། །དེ་ཕྱིར་རང་རིག་རང་གསལ་དག་ཡིན་ནོ། །སྒོ་ལྔའི་རིག་རྩལ་ཕྱི་གསལ་བསྟན་པ་ནི། །མིག་གི་ཡུལ་དུ་གཟུགས་རྣམས་སྣང་བ་དང་། །རྣ་བའི་ཡུལ་དུ་སྒྲ་རྣམས་གྲག་པ་དང་། །སྣ་ཡི་ཡུལ་དུ་དྲི་རྣམས་སྣོམ་པ་དང་། །ལྕེ་ཡི་ཡུལ་དུ་རོ་རྣམས་བྲོ་བ་དང་། །ལུས་ཀྱི་ཡུལ་དུ་རེག་བྱ་ཚོར་བའོ། །སྒོ་ལྔ་དེ་རྣམས་རིག་པ་དག་ལ་ཆང་། །སྒོ་ལྔའི་རྗེས་འཇུག་འགྱུ་བ་ཟང་ཐལ་ཡིན། །མིག་ལ་བརྟེན་ནས་གཟུགས་ཀྱི་རྣམ་པར་སྤྱོད། །རྣ་བ་ལ་བརྟེན་སྒྲ་ཡི་རྣམ་པར་སྤྱོད། །སྣ་ལ་བརྟེན་ནས་དྲི་ཡི་རྣམ་པར་སྤྱོད། །ལྕེ་ལ་བརྟེན་ནས་རོ་ཡི་རྣམ་པར་སྤྱོད། །ལུས་ལ་བརྟེན་ནས་རེག་བྱའི་རྣམ་པར་སྤྱོད། །སྤྱོད་པའི་རྗེས་སུ་འབྲང་ན་འཁྲུལ་པ་ཡིན། །ཡུལ་ལ་མ་སྤྱད་རང་སར་གྲོལ་བས་ཟང་ཐལ་ཡིན།་། རིག་རྩལ་འོད་དུ་ཤར་བས་གཟུགས་རྩལ་ཡིན། །སྟོང་ཉིད་ཡེ་ཤེས་རྩལ་ནི་མཐིང་གར་ཤར། །མེ་ལོང་ཡེ་ཤེས་རྩལ་ནི་དཀར་པོར་ཤར། །མཉམ་ཉིད་ཡེ་ཤེས་རྩལ་ནི་སེར་པོར་ཤར། །སོར་རྟོག་ཡེ་ཤེས་རྩལ་ནི་དམར་པོར་ཤར། །བྱ་གྲུབ་ཡེ་ཤེས་རྩལ་ནི་ལྗང་གུར་ཤར། །རྩལ་གཉིས་རང་སར་མི་འཛིན་མི་རྟོག་པ། །རང་སྣང་རང་སར་གྲོལ་བ་རྟོགས་པའི་ཚད། །གསལ་སྟོང་གཉིས་མེད་དོན་ལ་ཅིག་ཅར་ནི། །ཐ་དད་གཉིས་སུ་མ་གྲུབ་གཉིས་མེད་དང་། །གསལ་སྟོང་གཉིས་སུ་མ་གྲུབ་གཉིས་མེད་དང་། །གདོད་ནས་འབྲལ་མ་མྱོང་བའི་གཉིས་མེད་དང་། །རང་བྱུང་རྒྱུ་རྐྱེན་མེད་པའི་གཉིས་མེད་དང་། །བཟང་ངན་མེད་པས་མཉམ་པ་ཉིད་ཀྱི་ཡེ་ཤེས་དང་། །གཉིས་མེད་སྟེང་དུ་འཛིན་མེད་ལྟ་བའི་མཆོག །ཡོན་ཏན་མ་བཙལ་ལྷུན་གྱིས་གྲུབ་པའི་ལྷུན་གྲུབ་ནི། །རྩོལ་བ་གང་གིས་མ་བཙལ་ལྷུན་གྲུབ་དང་། །ཡོན་ཏན་ལྷུན་གྱིས་གྲུབ་པས་ལྷུན་གྲུབ་དང་། །འདོད་པའི་ཡོན་ཏན་ཆང་བས་ལྷུན་གྲུབ་དང་། །གློ་བུར་མ་ཡིན་གདོད་ནས་རྫོགས་པས་ལྷུན་གྲུབ་པོ། །དེ་ཕྱིར་མ་བསྒྲུབ་ལྷུན་གྲུབ་ཆེན་པོ་ཡིན། །སྐྱོན་རྣམས་མ་སྤངས་དག་པའི་རྣམ་དག་ནི། ། ― DNG001_Page_0085 ―
[མ་དཔེ་གཟིགས་ན་འདིར་གནོན།]
རང་གི་རིག་པ་ཆོས་སྐུ་དེ་ལ་ནི། །རྣམ་རྟོག་མཚན་མ་ཐམས་ཅད་རྣམ་པར་དག །དངོས་པོ་རྟག་མཐའ་ཐམས་ཅད་རྣམ་པར་དག །མེད་མཐའ་དང་ནི་ཆད་མཐའ་རྣམ་པར་དག །དྲང་དོན་ཐེག་པའི་བཀྲི་དྲང་རྣམ་པར་དག །མ་རིག་གཏི་མུག་བློ་ནི་རྣམ་པར་དག །ཡུལ་རྐྱེན་རང་སར་གྲོལ་བའི་མཚན་ཉིད་ནི། །དོན་རྟོགས་སྣང་རྐྱེན་རང་སར་གྲོལ་བ་སྟེ། །རིག་པ་ཆོས་སྐུ་ལྟ་བའི་དོན་རྟོགས་པས། །ཡུལ་རྐྱེན་ཇི་ཤར་འཛིན་པ་མེད་པར་གྲོལ། །མིག་གི་ཡུལ་དུ་གཟུགས་ཤར་འཛིན་མེད་གྲོལ། །རྣ་བའི་ཡུལ་དུ་སྒྲ་བྱུང་འཛིན་མེད་གྲོལ། །སྣ་ཡི་ཡུལ་དུ་དྲི་བྱུང་འཛིན་མེད་གྲོལ། །ལྕེ་ཡི་ཡུལ་དུ་རོ་མྱོང་འཛིན་མེད་གྲོལ། །ལུས་ཀྱི་ཡུལ་དུ་རེག་ཚོར་འཛིན་མེད་གྲོལ། །དོན་རྩལ་རང་ཤར་རིག་པ་ཟང་ཐལ་ཡིན། །རང་རིག་ཆོས་ཀྱི་སྐུ་ཡི་དོན་རྟོགས་ན། །སྣང་བ་རང་སྣང་འཛིན་པ་རང་གྲོལ་ལོ། །དེ་ཕྱིར་རང་སྣང་རང་ཤར་ཞེས་སུ་བཤད། །དེ་ལྟར་ཡོན་ཏན་བཅུ་ལྡན་དེ། །གཅིག་སྲོག་གཅིག་གིས་བཟུང་བས་མཐར་མི་ལྟུང་། །ལ་ཟློ་སྤྲོས་པའི་མཐའ་རྣམས་ཀུན་དང་བྲལ། །དེ་ཕྱིར་རང་རིག་བློ་ཡི་ཡུལ་ལས་འདས། །བཏགས་ཚད་མིང་ཡིན་བསམ་ཚད་བློ། །སྣང་ཚད་ཡུལ་ཡིན་བྱས་ཚད་འཇིག །དུས་གསུམ་རྟོག་པ་ཐམས་ཅད་འཇིག་པས་ན། །མ་བྱུང་མ་སྐྱེས་རང་བྱུང་ཆེན་པོའི་སྐུ། །མ་བཅོས་མ་བསླད་མ་བསྒྲུབས་མ་ཞེན་པ། །མི་རྟོག་མི་འཛིན་མི་ཞེན་མི་ལྟོས་སོ། །རིག་པའི་གནས་ལུགས་དེ་ལྟར་གནས་པའོ། །ལྟ་བ་རང་བྱུང་རིག་པའི་དོན་རྟོགས་པས། །སྣང་བ་ཆོས་ཉིད་སྟོང་པའི་ངང་ལས་རིག་རྩལ་འོད་ལྔར་ཤར། །མ་རྟོགས་པ་ལས་འབྱུང་བ་ལྔ་རུ་བརྟས། །རང་གི་རྩལ་སྣང་བླང་དོར་མཐའ་དང་བྲལ། །རང་སྣང་རང་གྲོལ་ཞེན་པ་ཀུན་དང་བྲལ། །རང་རིག་དོན་རྟོགས་འགྱུ་བ་རང་གྲོལ་ན། །སྒོ་ལྔའི་ཡུལ་ལྔ་དག་གིས་གནོད་མི་ནུས། །རང་བྱུང་ཡེ་ཤེས་ལྟ་བའི་དོན་རྟོགས་ན། །མ་བསླད་མ་བྱུང་མ་བྱས་མ་བཙལ་བ། །མི་འཁྲུལ་མི་རྟོག་མི་ལྟོས་མི་ཞེན་ནོ། །ངོ་བོ་གཅིག་ལ་ཡོན་ཏན་ལྡན་ལུགས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ལྟ་བ་གཅིག་སྲོག་གཅིག་གིས་བཟུང་ནས་བསྟན་ ― DNG001_Page_0086 ―
[མ་དཔེ་གཟིགས་ན་འདིར་གནོན།]
པའི་ལེའུ་སྟེ་ང་ལྔ་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལྟ་བའི་སྲོག་བཟུང་དེ་ལགས་ན། །ལྟ་བ་བསྒོམ་པ་སྤྱོད་པ་གསུམ། །གཅིག་ཏུ་དྲིལ་ཏེ་བསྟན་པར་ཞུ། །རྡོ་རྗེ་འཆང་གིས་བཀའ་སྩལ་པ། །ལྟ་སྒོམ་སྤྱོད་པ་དྲིལ་བ་ནི། །རང་གི་རིག་པ་ཆོས་ཀྱི་སྐུ་སྤྲོས་པ་དང་བྲལ་བ་ཡིན་ཏེ། དེ་ལ་དབྱེ་ན་གསུམ། ནང་རིག་པ་ཆོས་ཀྱི་སྐུ་དང་། ཕྱི་སྣང་བ་ཆོས་ཀྱི་དབྱིངས་དང་། བར་དུ་རིག་པའི་རྩལ་མི་འགགས་པ་དང་གསུམ་མོ། །ནང་རིག་པ་ཆོས་ཀྱི་སྐུ་ནི་རིག་པ་གསལ་སྟོང་གཉིས་སུ་མེད་པ་ཡིན་ཏེ། དེ་ཡང་རང་གི་རིག་པ་མ་བཅོས་པར་ས་ལེ་བ་དེ་ཉིད་ཅིའི་ངོ་བོར་ཡང་མ་གྲུབ་པ་དེ་ཆོས་ཉིད་ཀྱི་སྟོང་ཆ་ཡིན་ནོ། །མ་གྲུབ་པ་དེ་ཀ་རང་རིག་པ་ས་ལེ་འདུག་པས་རང་རིག་གི་གསལ་ཆའོ། །སྟོང་པ་དང་གསལ་བ་ཐ་དད་དུ་མ་གྱུར་པས་གསལ་སྟོང་གཉིས་སུ་མེད་པའོ། །དེའི་ཕྱིར་ན་གཉིས་མེད་ཀྱི་བདེ་ཆ་ཞེས་བྱའོ། །གཉིས་མེད་ལ་རྩལ་མ་འགགས་པར་འགྱུ་བས། རྩལ་གྱི་འགྱུ་ཆ་ཞེས་བྱའོ། །འགྱུ་ཆ་མེད་ན་ཞི་གནས་ལྟེངས་པོ་ཞེས་བྱ་སྟེ། ཐམས་ཅད་མཁྱེན་པ་འཆར་མི་སྲིད་དོ། །རིག་པའི་རྩལ་འགྱུས་པ་དེ་སྒོ་ལྔ་ལ་བརྟེན་ནས། ཡུལ་གར་བྱུང་ཡང་ཤེས་པ་འཆར་བས་གསལ་བའི་ཆ་ཡིན་ནོ། །སོ་སོ་སྐྱེ་བོ་ནི་རང་ཁ་མ་ཡིན་ཏེ་འཛིན་པ་དང་བཅས་པའོ། །རྟོགས་ལྡན་ནི་ཡུལ་ལ་འགྱུ་ཡང་འཛིན་པ་རང་སར་གྲོལ་ཏེ་བག་ཆགས་ཀྱིས་གནོད་མི་ནུས་པ་ཡིན་ནོ། །རིག་པ་གསལ་སྟོང་གཉིས་སུ་མེད་པ་དེའི་རྩལ་གཟུགས་སུ་ཤར་བ་ནི་འོད་ཁ་དོག་ལྔ་རུ་ཤར་བའོ། །བར་གྱི་རྩལ་མ་འགགས་པ་ནི་རིག་པ་གསལ་སྟོང་གཉིས་སུ་མེད་པ་དེ་གསལ་བའི་ཆའོ། །དེ་ནི་ཕྱིའི་ཡུལ་ལ་འགྱུ་བ་དེ་ཡིན་ཏེ། དེ་ཡང་འགྱུ་བའི་གསལ་ཆ་མི་འགག་པ་ལ་འཛིན་པ་མེད་དེ་འཛིན་པའི་ཤེས་པ་རང་རྒྱུད་པ་དེ་གྲོལ་བའོ། །དེ་ཡང་འགྱུ་བ་རང་གྲོལ་དུ་སོང་བ་སྟེ། །བར་གྱི་རྩལ་མི་འགག་པ་དེ་ཡེ་ཤེས་ཟང་ཐལ་ཞེས་བྱའོ། །རིག་པ་ཆོས་ཀྱི་སྐུ་གསལ་སྟོང་གཉིས་སུ་མེད་པར་སྤྲོས་པའི་མཐའ་དང་བྲལ་བ་དེ་ལྟ་བུ་གཅིག་རང་བྱུང་དུ་རང་གསལ་ཙམ་ན། ཕྱིའི་ཡུལ་མི་འགག་རིག་པ་འགྱུ་བ་སྒོ་ལྔ་ ― DNG001_Page_0087 ―
[མ་དཔེ་གཟིགས་ན་འདིར་གནོན།]
ལ་བརྟེན་ནས་འགྱུ་ཡང་འཛིན་པ་རང་སར་གྲོལ་བའི་ཡུལ་དེ་གསལ་རུང་མི་གསལ་རུང་། སྣང་རུང་སྟོང་རུང་ཡུལ་ཆོས་ཀྱི་དབྱིངསཡིན་པར་ལ་བཅད་དོ། །དེ་ལྟར་རྟོགས་པ་དེ་ལྟ་བ་ཡིན་ཏེ། དེ་ཉིད་རྒྱུད་ལ་གསལ་བ་དེ་བསྒོམ་པའོ། །དེ་ཁོ་ན་འགྲོ་ཉལ་འདུག་སྡོད་མི་འབྲལ་བར་མ་ཡེངས་ལ་ཡེངས་ནས་རྣམ་རྟོག་བྱུང་ཡང་རང་སར་གྲོལ་བ་ནི་སྤྱོད་པའོ། །རྟོགས་པའི་དོན་དང་མི་འབྲལ་བ་འབྲས་བུའོ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ལྟ་སྒོམ་སྤྱོད་པ་གཅིག་ཏུ་དྲིལ་ནས་བསྟན་པའི་ལེའུ་སྟེ་ང་དྲུག་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་། །གང་ཟག་སྤྲོས་པ་བཅད་པའི་ཕྱིར། །རང་བྱུང་རིག་པ་ཕྱོགས་རེ་ནས། །ཡོན་ཏན་བྱེ་བྲག་བརྗོད་པ་དང་། །སྤྲོས་པའི་མཐའ་རྣམས་བཅད་པའི་ཕྱིར། །རྒྱས་བསྡུས་སྤྲོས་དང་བྱེ་བྲག་མང་བསྟན་ཀྱང་། །རང་བྱུང་རིག་པའི་ངོ་བོ་དེ། །དོན་གྱི་ལ་ཟློ་ཅི་ལྟར་ཟླ། །དེ་སྐད་ཅེས་ནི་ཞུས་པ་ཡིས། །རྡོ་རྗེ་འཆང་གིས་བཀའ་སྩལ་པ། །རང་རིག་ཆོས་སྐུའི་ངོ་བོ་དེ། །ལྟ་བ་མ་ནོར་དམ་པ་ཡིན། །དཔེ་དང་གཏན་ཚིག་ཐ་སྙད་དང་། །ངོ་སྤྲོད་ལྟ་བསྒོམ་སྤྱོད་འབྲས་དང་། །འཁྲུལ་དང་རྟོགས་དང་གོམས་པ་རྣམས། །བློ་དམན་ལམ་གྱི་ཆ་རྐྱེན་ལས། །དོན་ལ་མ་གྲུབ་བཏགས་པ་ཙམ། །ངོ་བོ་རིག་པ་ཆོས་སྐུ་འམ། །རང་བྱུང་ཡེ་ཤེས་བྱ་བ་དེ། །རང་རིག་ཆོས་སྐུའི་ངོ་བོ་ལས། །འཁོར་བ་མེད་ཅིང་མྱང་འདས་མེད། །གཞི་མེད་ལམ་མེད་འབྲས་བུ་མེད། །ཐེག་པ་མེད་ཅིང་གང་ཟག་མེད། །ཆོས་དང་ཆོས་མིན་གང་ཡང་མེད། །འཁོར་བའི་རྒྱུ་དང་འབྲས་བུ་མེད། །རྒྱུ་ནི་མ་རིག་གཉིས་བསྟན་དང་། །རྐྱེན་གཞི་ལ་སོགས་གང་ཡང་མེད། །འབྲས་བུ་འདོད་ཆགས་ཞེ་སྡང་དང་། །གཏི་མུག་ང་རྒྱལ་ཕྲག་དོག་མེད། །དུག་ལྔ་ལ་སོགས་ཉོན་མོངས་མེད། །རིགས་དྲུག་འཁོར་བའི་སེམས་ཅན་མེད། །ཕྱི་ཡི་འབྱུང་བ་ལྔ་ཡང་མེད། །ས་མེད་ཆུ་མེད་མེ་རླུང་མེད། །ནམ་མཁའ་དག་ཀྱང་བཏགས་པ་ཙམ། །དེ་ལྟར་སྣོད་བཅུད་གང་ཡང་མེད། །འཁོར་བ་འཁྲུལ་པས་བཏགས་པ་ཙམ། །འཁོར་བ་མེད་ཅིང་མྱང་འདས་མེད། །རྟོགས་པས་སངས་རྒྱས་བཏགས་པ་ ― DNG001_Page_0088 ―
[མ་དཔེ་གཟིགས་ན་འདིར་གནོན།]
ལས། །དོན་གྱིས་ངོ་བོ་ཆོས་སྐུ་ལ། །སངས་མེད་རྒྱས་མེད་གང་ཡང་མེད། །བཅོམ་མེད་ལྡན་མེད་འདས་པ་མེད། །བྱང་མེད་ཆུབ་མེད་སེམས་དཔའ་མེད། །དེ་བཞིན་མེད་དེ་གཤེགས་པ་མེད། །དགྲ་བཅོམ་ཟག་པ་ཟད་པ་མེད། །སྤང་བྱ་སྤང་ཞིང་ཐོབ་བྱ་ཐོབ་ཏུ་མེད། །སངས་རྒྱས་བྱ་བ་རྡུལ་ཙམ་མིང་ཡང་མེད། །དེས་གསུང་ལམ་དང་ཐེག་པ་མེད། །ལམ་ལྔ་ས་བཅུ་ལ་སོགས་མེད། །ཐེག་དགུ་རྒྱུ་འབྲས་ཕྱི་ནང་མེད། །ཐབས་ལམ་དང་ནི་གྲོལ་ལམ་མེད། །རིམ་གྱིས་དང་ནི་གཅིག་ཅར་མེད། །བསྒོམ་དང་མི་བསྒོམ་སྤྱོད་དང་མི་སྤྱོད་མེད། །ལྷ་དང་དཀྱིལ་འཁོར་ཏིང་འཛིན་འཕྲོ་འདུ་མེད། །ཡོད་དང་མེད་དང་སྣང་དང་སྟོང་པ་དང་། །གཅིག་དང་དུ་མ་རྟག་དང་ཆད་པ་དང་། །དགའ་དང་མི་དགའ་སྙན་དང་མི་སྙན་དང་། །རྙེད་དང་མ་རྙེད་གྲུབ་དང་མ་གྲུབ་དང་། །སངས་དང་མ་སངས་རྒྱས་དང་མ་རྒྱས་དང་། །བྱེད་དང་མི་བྱེད་ལ་སོགས་གང་ཡང་མེད། །འདོད་དང་མི་འདོད་དབང་གིས་གཉིས་སུ་བྱུང་། །དོན་ལ་གཉིས་མེད་བྱ་བ་དག་དང་ནི། །བློ་ཡི་ཡུལ་ལ་སྤང་བླང་རྡུལ་ཙམ་མེད། །ཡོད་པ་བཀག་ནས་མེད་པ་བསྒྲུབ་ཏུ་མེད། །མེད་པ་བཀག་ནས་ཡོད་པ་བསྒྲུབ་ཏུ་མེད། །མདོར་ན་མཐའ་ཡི་སྤྲོས་པ་ཀུན་དང་བྲལ། །ཡུལ་ལ་རྩལ་འཕྲོས་སྤྲོས་པ་སྟེ། །ཕྱོགས་སུ་བཟུང་བས་མཐའ་ཞེས་བྱ། །ཡུལ་འཕྲོས་ཞེན་ཅིང་ཆགས་པ་མེད། །མཐའ་ཡི་ཕྱོགས་སུ་མ་ལྷུང་བས། །སྤྲོས་པའི་མཐའ་རྣམས་ཀུན་དང་བྲལ། །བློ་འདས་ཡིད་ཀྱི་ཡུལ་ལས་འདས། །ལུས་ཀྱིས་བྱས་ཤིང་ངག་གིས་སྨྲས་པ་དང་། །བློ་ཡིས་བསམས་ཤིང་ཡིད་ཀྱིས་མནོ་ལས་འདས། །རང་རིག་ཆོས་སྐུ་བྱ་བ་ཡང་། །བཏགས་པ་ཙམ་ལས་དོན་ལ་འདི་འདྲ་མེད། །སྐུ་གསུམ་ཡེ་ཤེས་ལྔ་སོགས་ཀྱང་། །མཚོན་པ་ཙམ་དུ་བསྟན་པ་ཡིན། །བྱང་ཆུབ་བསྒྲུབ་བྱ་བསྒྲུབ་ཏུ་མེད། །དེ་དག་རང་གི་ངོ་བོ་སྟེ། །རིག་པ་ཆོས་སྐུ་ཙམ་དུ་བཏགས། །ལྟ་བ་ལ་ཟློ་དེ་བཞིན་ཡིན། །གདེངས་ཆེན་དེ་ལ་ཡིད་ཆེས་གྱིས། །བརྗོད་མེད་བསམ་མེད་མཐའ་བྲལ་དེ། །ཡེ་ནས་གནས་པའི་ཆ་ནས་གཞི། །དེ་མ་རྟོགས་ལས་འཁྲུལ་པ་བྱུང་། །དེ་རྟོགས་ ― DNG001_Page_0089 ―
[མ་དཔེ་གཟིགས་ན་འདིར་གནོན།]
མཚོན་དཔེ་ངོ་སྤྲོད་ཡིན། །ཇི་ལྟར་གཞི་མཐོང་ལྟ་བ་ཡིན། །མཐོང་དོན་གསལ་བས་བསྒོམ་པ་ཡིན། །དེ་ཉིད་དུས་གསུམ་རྒྱུན་ཁྱེར་བ། །སྤྱོད་པ་ཙམ་དུ་བཏགས་པ་ཡིན། །མངོན་གྱུར་འབྲས་བུ་ཞེས་སུ་བསྟན། །ལྟ་བ་ལམ་ཁྱེར་དུས་སུ་ནི། །ངོ་བོ་རྩལ་དང་བཅས་པ་གསུམ། །ཕྱི་ཡི་ཡུལ་རྐྱེན་འབྱུང་བའི་ཆ། །དོན་ལ་གྲུབ་པ་མེད་པས་ན། །རང་སྣང་རང་གྲོལ་དངོས་མེད་ཡིན། །ཡུལ་གྱིས་དོན་ལ་གནོད་མི་ནུས། །གདེངས་ཆེན་ལ་ཟློ་དེ་བཞིན་ནོ། །ཞེས་གསུངས་སོ། །སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ལྟ་བ་ལ་བཟླ་བའི་ལེའུ་སྟེ་ང་བདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །བསྒོམ་དུ་ཡོད་མེད་ཇི་ལྟར་ལགས། །ཞེས་ཞུས་སོ། །དེ་ནས་སྟོན་པས་བཀའ་སྩལ་པ། །རྡོ་རྗེ་འཛིན་པ་ལེགས་པར་ཟུང་ཞིག །ངས་བསྟན་བདེ་ཆེན་གཉིས་མེད་ལ། །བསྒོམ་དུ་ཡོད་དང་མེད་པ་ཡི། །ཐ་སྙད་ཐམས་ཅད་རྣམ་པར་དག །ཤེས་རབ་སྟོབས་ཆེན་རང་རིག་དོན་རྟོགས་པས། །གཉིས་མེད་བདེ་ཆེན་ངང་དུ་འདུ་བྲལ་མེད། །མ་བཙལ་བཞག་པས་ངང་ལས་མ་གཡོས་ཀྱང་། །རྒྱུན་ཆད་མེད་པ་ཆུ་བོ་གངྒཱ་བཞིན། །དབང་པོ་ཡང་རབ་དོན་དུ་དེ་བསྟན་ཏོ། །རྟེན་གྱི་གང་ཟག་ཤེས་རབ་འབྲིང་རྣམས་ལ། །མི་བསྒོམ་བསྒོམ་པར་བསྟན་པ་ཡིན། །རྣལ་འབྱོར་ཤེས་རབ་རྩལ་ཆུང་ལ། །མ་བསྒོམས་སངས་མི་རྒྱ་བར་བསྟན། །ཀྱེ་གསང་བདག་ངེས་པར་ཟུང་ཞིག །པདྨ་འདམ་ན་གནས་ཀྱང་སྐྱོན་གྱིས་མ་གོས་ལྟར། །ཕྱི་ནང་འཁྲུལ་པར་ཤར་ཀྱང་ནི། །རང་རིག་ཡེ་ནས་གོས་པ་མེད། །མ་འཁྲུལ་པ་ཡི་སངས་རྒྱས་ཡིན། །རིགས་ཀྱི་བུ་གཞི་དག་པ་ཆོས་ཀྱི་སྐུ་ལ། །འབྲས་བུ་དག་པ་གཟུགས་ཀྱི་སྐུ་གཉིས་ཀྱིས་བརྒྱན་ནས། །དོན་སྐུ་གསུམ་འདུ་འབྲལ་མེད་པ་ནི། །བུམ་པའི་ནང་གི་མར་མེ་ལྟར། །ཡེ་ཤེས་ནང་ན་གསལ་བའོ། །རིགས་ཀྱི་བུ་གཟུགས་ཀྱི་ཕུང་པོ་ཕྱི་སྣོད་ཀྱི་འཇིག་རྟེན། གཞལ་ཡས་ཁང་འགྲོ་བ་འདུལ་བའི་དཀྱིལ་འཁོར་གྱི་ནང་ན། སྐུ་གསུམ་གྱི་རང་གདངས་འགག་པ་མེད་པའི་ཡེ་ཤེས་ཀྱི་གཞལ་ ― DNG001_Page_0090 ―
[མ་དཔེ་གཟིགས་ན་འདིར་གནོན།]
མེད་ཁང་དུ་འོད་གསལ་ལོ། །དེའི་ནང་ན་སྐུ་བཞི་སྐུ་གསུང་ཐུགས་དང་ལྡན་ཏེ། རང་བཞིན་རྣམ་པར་དག་པའི་དཀྱིལ་འཁོར་འགག་པ་མེད་པར་གནས་པའོ། །དེའི་ཐུགས་རྗེ་ཧེ་རུ་ཀ་ལྔར་སྣང་བ་མི་འགག་པས། ཐུགས་རྗེ་རང་བྱུང་གི་དཀྱིལ་འཁོར་སྟེ། དེ་ལྟར་གནས་པ་ནི་མ་འཁྲུལ་པའི་བུཌྜྷའོ། །རིགས་ཀྱི་བུ་མ་འཁྲུལ་པའི་བུཌྜྷ་ལ། མ་བྱས་པའི་ཆོས་ཉིད་བསྟན་པ་ནི། ཐུགས་ཀྱི་མེ་ལོང་ཡིན་ཏེ། དཔེར་ན་ཟག་བཅས་ཀྱི་ཕུང་པོ་འདི་བྱས་པའི་མེ་ལོང་གིས་གཏན་ལ་ཕེབས་པ་ལྟར། །ཟག་པ་མེད་པའི་ཡེ་ཤེས་འགག་པ་མེད་པར་གསལ་བ། ཀུན་གཞི་མེ་ལོང་ལྟ་བུའི་ཡེ་ཤེས་གསལ་ལ་དག་པ། ཐམས་ཅད་འབྱུང་བའི་གཞི་མ་འགགས་པའི་དོན། མགར་བའི་ལག་གི་འདུ་བྱེད་ཀྱིས་མ་བྱས་པ། སྣང་བ་མཐའ་ཡས་ཀྱི་ཐུགས་ཀྱི་ཀློང་ནས། རང་བྱུང་དུ་རང་ཤར་བའི་ཤེལ་གྱི་མཆོད་རྟེན་ཁྲི་འཕང་ལྔ་པ། ཐུགས་ཀྱི་མེ་ལོང་དུ་གྱུར་པ་སྟེ། བརྡར་བསྟན་པའི་ཚེ་ཟག་བཅས་ཀྱི་སྒྲོམ་བུས་ཟག་མེད་ཀྱི་ཡེ་ཤེས་མི་ཐུབ་པར་ཐུགས་ཀྱི་ཡེ་ཤེས་ཀྱི་མེ་ལོང་ལ་ཇི་ལྟ་བ་བཞིན་དུ་སྣང་ངོ་། །དེའི་འཁྲུལ་གཞི་མན་ངག་ཏི་ཀ་ཆེན་པོ་ལས་གཏན་ལ་ཕབ་པའོ། །དོན་རང་བྱུང་གི་ཡེ་ཤེས་ཆེན་པོ་ཡིན་པས། དུས་གསུམ་དུ་འགྱུར་མ་མྱོང་སྟེ། མི་འགྱུར་བའི་ལྟ་བ་ཐོད་རྒལ་ཆེན་པོའོ། །དེ་ནི་འཁྲུལ་པ་ལོག་ནས་ཡེ་ཤེས་ཀྱི་དེ་ཁོ་ན་ཉིད་ཀྱི་ཏི་ཀ་ཆེན་པོའོ། །དེས་ནི་རྟགས་ཀྱི་སྒོ་ནས་མི་འགྱུར་བའི་གཟེར་བཏབ་པའོ། །ལུང་གི་ཏི་ཀ་ཆེན་པོས་དོན་ལ་སྦྱོར་རོ། །བདག་ཉིད་ཆེན་པོ་དེ་ཁོ་ན་ཉིད་ཀྱི་ཏི་ཀ་ལ་གཞི་བཅས་པའོ། །དེའི་དོན་རྟོགས་ནས་བསྒོམ་དུ་མེད་དེ་ཡོན་ཏན་ནོ། །དེ་ཡང་རང་ཆས་སུ་གནས་པས་འདུ་འབྲལ་མེད་དོ། །ཡུལ་དང་ཡུལ་ཅན། བསྒོམ་བྱ་དང་སྒོམ་བྱེད། དངོས་པོ་དང་མཚན་མར་དམིགས་སུ་མེད། དཔེར་ན་གར་སྦྱིན་ལ་སྦྲང་མའི་འདབ་མ་ཆག་པ་ལྟ་བུའོ། །ཆོས་ཉིད་ཀྱི་དོན་ཐ་མལ་གྱིས་མི་རྟོགས་པས། སོ་སོའི་སྐྱེ་བོ་ཐ་མལ་གྱིས་མི་གོ་སྟེ། གོང་ལྟར་རྟོགས་དགོས་པས། ཡེངས་སུ་མེད་དེ་སྐྱོན་ཅན་ནོ། །ངེས་པར་རྟོགས་ཙ་ན། ཡེངས་པ་མེད་དེ་ཡོན་ ― DNG001_Page_0091 ―
[མ་དཔེ་གཟིགས་ན་འདིར་གནོན།]
ཏན་ནོ། །ཡེངས་སུ་མེད་པ་ནི། འདུག་ཀྱང་ཆོས་ཉིད་རང་སྣང་གི་ངང་ལས་མ་གཡོས་བ་ཙམ་དུ་འདུག་ལ། འགྲོ་ཡང་ཡེ་ཤེས་ཀྱི་རང་གདངས་ལ། རང་བཞིན་མི་འགག་པ་ཙམ་དུ་འགྲོ་སྟེ། མར་མེའམ་ཉི་མ་རང་སྣང་དང་ཆས་ནས་འགྲོ་བ་བཞིན་ནོ། །ཉལ་ཡང་རང་ལས་མ་གཡོས་པའི་ཀློང་རིག་པ་ཟང་ཐལ་གྱི་ངང་ནས་རྩལ་གཞི་ལ་འདུས་ཏེ། རང་བཞིན་གཞི་ལ་ཐིམ་མོ། །མཚན་མ་རང་སར་གྲོལ་ནས་དོན་ལ་སྦྱོར་བ་ཆེན་པོར་འགྱུར་རོ། །ལངས་ཀྱང་ངང་མ་གཡོས་པ་ལས་ལངས། རིག་པ་རང་ཤར་ཏེ་རང་བཞིན་མ་འགགས་པར་གསལ་ལོ། །ཀྱེ་མ་རིགས་ཀྱི་བུ་ལེགས་པར་ཡིད་ལ་ཟུང་ཞིག །སྤྱོད་ལམ་བཞི་ཅི་སྤྱད་ཀྱང་། རང་གི་གདངས་ལས་མི་འདའ་ཞིང་། ཆོས་ཉིད་ངང་ལས་མ་གཡོས་པ། དཔེར་ན་བྱ་ཡིས་གར་འཕུར་ཀྱང་། མཁའ་ལས་འདའ་བ་མེད། ཉ་ཡིས་གར་འཕྱོས་ཀྱང་ཆུ་ལས་མི་འདའ་བ་དང་། མི་ཡིས་གར་ཕྱིན་ཡང་ས་ལས་མི་འདའ་བ་བཞིན། རྣལ་འབྱོར་རྟོགས་ལྡན་ངང་ལས་གཡོས་པ་མེད། རིགས་ཀྱི་བུ་བསྒོམ་བྱ་ཡང་དག་པར་རྫོགས་པའི་སངས་རྒྱས་སོ། །དེ་ཡི་དོན་ལོགས་ན་མེད་དེ། རང་རིག་ཆོས་ཀྱི་སྐུ་ཁོ་ནའོ། །ཤར་བ་རྣམས་ཐམས་ཅད་ནི་རང་ཤར་བ་སྟེ། རིག་པ་ཆོས་སྐུ་སྟོང་པ་དང་འགག་པ་མེད་པ་དང་། དེ་ཉིད་དབྱེར་མེད་པ་དང་། དེ་ལྟར་ཤེས་པའི་ཤེས་རབ་མི་འགག་པ་དང་། དེ་ལ་ཐོགས་པ་མེད་པ་དང་། མཚན་ཉིད་ལྔར་ཤར་རོ། །དེ་ལྔ་ཡེ་ཤེས་ལྔར་ཤར་རོ། །ཡེ་ཤེས་ལྔ་འོད་དུ་ཤར་རོ། །འོད་ལྔ་རིགས་ལྔར་ཤར་རོ། །རིགས་ལྔ་སྐུ་ལྔར་ཤར་རོ། །སྐུ་ལྔ་ཡུམ་ལྔ་མི་འགགས་སོ། །ཡབ་ཡུམ་ལ་སེམས་དཔའ་དང་སེམས་མ་མི་འགགས་སོ། །སེམས་མ་རྣམས་ལས་ཡུལ་དུ་ཤར་རོ། །སེམས་དཔའ་རྣམས་ལས་དབང་པོ་དང་རྣམ་ཤེས་སུ་ཤར་རོ། །དེས་ན་རིག་པ་རང་ཤར་གྱི་དགོངས་པས་སྣང་བ་ལ་རྒྱས་གདབ་སྟེ། ཐམས་ཅད་རང་སྣང་གི་ཡེ་ཤེས་ལས་གཞན་སྣང་གི་རྟོག་པ་མེད་དོ། །འགགས་པའི་དུས་སུ་མཚན་མ་རང་གྲོལ་གྱི་དགོངས་པ་རྩལ་གཞི་ལ་འདུས་ཏེ། །ཡུལ་ལྔ་སྒོ་ལྔའི་ངང་དུ་གྲོལ། སྒོ་ལྔ་སེམས་དཔའ་སེམས་མའི་ངང་དུ་གྲོལ། སེམས་ ― DNG001_Page_0092 ―
[མ་དཔེ་གཟིགས་ན་འདིར་གནོན།]
དཔའ་སེམས་མ་རིགས་ལྔ་ཡབ་ཡུམ་གྱི་ངང་དུ་གྲོལ། དེ་ཡང་ཡེ་ཤེས་ལྔ་རུ་གྲོལ། ཡེ་ཤེས་ལྔ་ཡང་རིག་པའི་མཚན་ཉིད་ལྔར་གྲོལ། མཚན་ཉིད་ལྔ་རིག་པ་འཛིན་མེད་རང་གསལ་དུ་གྲོལ་སྟེ། དབང་པོ་གནད་བསྡུས་ཀྱི་མན་ངག་འབྱུང་བ་མ་ལ་ཞ། ཡེ་ཤེས་དབྱིངས་སུ་ཐིམ་པའོ། །དེ་ལྟར་གྲོལ་ནས་ངང་ལས་མ་གཡོས་པ་ནི། ཤེས་བྱ་བུམ་པར་ཚུད་པ་སྟེ། ཆོས་ཉིད་ཆོས་སྐུ་དབྱེར་མེད་ཟང་ཐལ་གྱི་བུམ་པ་ན། རང་རིག་པའི་ཡེ་ཤེས་མར་མེ་རླུང་གིས་མ་བསྐྱོད་པ་ལྟར་གསལ་བ། ཤེས་བྱ་བུམ་འཇུག་གི་མན་ངག །གཏི་མུག་གཉིད་ལ་སོགས་པ་ཤེས་རབ་ཀྱི་དོན་དེ་ཁོ་ན་ཉིད་ལ་འབྱོར་པའོ། །ཐམས་ཅད་བྱུང་ཡང་རང་ལས་བྱུང་། སྣང་ཡང་རང་ལས་སྣང་། གསལ་ཡང་རང་ལས་གསལ། དག་ཅིང་གྲོལ་ཡང་རང་གི་ངང་དུ་གྲོལ་བས་ན། ཡེ་ཤེས་ཡང་དག་ཆེན་པོའོ། །དེ་ནི་ངོ་བོ་ཉིད་ཀྱི་སྣང་བ་རང་སྣང་ལས་གཞན་སྣང་མེད་པའོ། །སྤྲིན་དང་ཁུ་རླངས་བྱུང་ཡང་ནམ་མཁའ་ནས་བྱུང་། སྣང་ཡང་ནམ་མཁའི་ངང་ལ་སྣང་། གནས་ཀྱང་ནམ་མཁའི་ངང་ལ་གནས། དག་ཀྱང་ནམ་མཁའི་ངང་དུ་དག །གྲོལ་ཡང་ནམ་མཁའི་ངང་དུ་གྲོལ་བ་ལྟ་བུའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བསྒོམ་དུ་ཡོད་མེད་བློ་དང་སྦྱར་བར་བསྟན་པ་སྟེ། བློ་འབྲིང་ལ་རྒྱུན་གྱི་ཏིང་ངེ་འཛིན་གཏན་ཚིགསདང་བཅས་པ་བསྟན་པ་སྟེ་ལེའུ་ང་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །བསྒོམ་དུ་ཡོད་ལ་བཤད་དུ་གསོལ། །ཞེས་ཞུས་པས། སྟོན་པས་བཀའ་སྩལ་པ། རྡོ་རྗེ་འཛིན་པ་ངེས་ཟུང་ཞིག །བློ་ཞན་རྣམས་ལ་བསྒོམ་པ་བསྟན། །བསྒོམ་དུ་མེད་པར་མ་ཤེས་ན། །མ་ཚོར་ཡིད་ལ་བྱེད་པ་དང་། །བྱ་རྩོལ་བྲལ་བ་མི་རྟོགས་ཏེ། །རྒྱུན་གྱི་ཏིང་འཛིན་དོན་མི་གསལ། །བསྒོམ་དུ་ཡོད་པར་མ་ཤེས་ན། །སྐྱེ་བོ་རྣམས་དང་ཁྱད་པར་མེད། །ཐ་མལ་རང་རྒྱུད་གོལ་བར་འགྲོ། །མི་བསྒོམ་བསྒོམ་པའི་དོན་ཤེས་པས། །སངས་རྒྱས་ཉག་གཅིག་དོན་དུ་འདུ་འབྲལ་མེད། །བསྒོམ་པ་མི་བསྒོམ་དོན་ཤེས་པས། །དམིགས་གཏད་བློ་ཡི་མཐའ་ལས་བཟློག །གཉིས་སུ་མེད་པའི་དོན་རྟོགས་པས། ། ― DNG001_Page_0093 ―
[མ་དཔེ་གཟིགས་ན་འདིར་གནོན།]
ཕྱོགས་རེར་འཛིན་པའི་མཐའ་དང་བྲལ། །བསྒོམ་དུ་ཡོད་པའི་དོན་བསྟན་པར། །བསླབ་ཐབས་བསླབ་བྱ་ལོབས་པའི་ཚད། །རྣམ་པ་གསུམ་དུ་བསྟན་པ་ཡིན། །བསླབ་ཐབས་རྣམ་པ་གསུམ་དུ་བསྟན། །ཕྱི་དང་ནང་དང་གསང་བའོ། །ཕྱི་ནི་ལུས་ངག་ཡིད་གསུམ་སློང་། །བྱ་བ་བཏང་ལ་སྡོད་པ་ཡིན། །ནང་ནི་རྩ་ཡི་རླུང་སྒོ་བསྡོམས། །རང་བྱུང་དབྱིངས་ཀྱི་ཐིག་ལེ་ལས། །དང་པོར་ལུས་ཀྱི་སྲིད་པ་ཆགས། །དེ་ལས་ཡས་མར་རྩ་གཉིས་ཤར། །རྩ་གཉིས་འདུས་ནས་རྩ་མདུད་ལྟེ་བར་གྱུར། །དེ་ལས་རྩ་བྲན་རྣམས་ཀྱི་ལུས་བྱིངས་བསྐྱེད། །དེ་ནས་སྙིང་ལ་སོགས་པའི་ནང་ཁྲོལ་རྒྱས། །དེ་ལས་དབུགས་ཡོད་དེ་ལས་རྣམ་རྟོག་ཤར། །དེ་ལ་རྩ་བར་བཏགས་པ་མིག་ཡིན་པས། །ཅི་སྣང་རང་སྣང་ཡིན་གྱི་རྣམ་རྟོག་མ་བྱེད་ཅེ་རེ་ལྟོས། །རྟགས་མ་བསྐུལ་བས་དེ་ནས་རིག་པ་རྩལ་མི་འགྱུར། །རྩལ་དང་མ་འགྲོགས་རླུང་དང་སེར་བུ་བཞིན། །མ་བསྡུས་རང་སར་ཞོག་ཅིག་འཕྲོ་མི་ནུས། །དེ་བས་རླུང་ཅེས་དེ་ལ་སྐྱོན་མི་བལྟ། །རླུང་ཡོད་རྟོགས་པའི་ཤེས་རབ་ཡོངས་སུ་རྒྱས། །ཐབས་ཀྱིས་ཟིན་པས་མི་རྟོག་རང་སར་གནས། །སྐབས་སུ་ཧ་དང་ཕཊ་ཅེས་རླུང་རོ་འབུད། །གསང་བར་བསླབ་པའི་ཐབས་གསུམ་སྟེ། །རྒྱལ་པོ་གདན་ལ་བཞག་པ་དང་། །བློན་པོ་བཙོན་དུ་བཟུང་བ་དང་། །དམངས་རྣམས་ཆམ་ལ་ཤུགས་ཀྱིས་ཕེབས་སོ། །ཀྱེ་རྡོ་རྗེ་འཛིན་པ་ལེགས་པར་ཟུང་ཞིག །རྒྱལ་པོ་ནི་རང་རིག་དག་པ་ཆོས་ཀྱི་སྐུའོ། །གདན་ནི་རང་བཞིན་དག་པ་ནམ་མཁའི་ཡུལ་དུ་སྣང་བ་འདིའོ། །དོན་ནི་དབྱིངས་ཀྱི་ཐིག་ལེ་ཡུལ་སྣང་བ་འདིའོ། །དེ་ཉིད་ཀྱི་དོན་བདག་དང་བྲལ་བ་ནི། །དབྱིངས་རྣམ་པར་དག་པ་རིག་པའི་ཡེ་ཤེས་བཞུགས་པའི་གདན་ཏེ། ད་ལྟ་བྱང་ཆུབ་སེམས་ཀྱི་སྒྲོན་མ། ཆུའི་རང་བཞིན་དག་ཅིང་གསལ་བ་ལ་སྦྱར་རོ། །དེ་ཡང་འདུག་ཚུལ་གྱིས་གནས་པ་དང་། སྣང་ཚུལ་གྱིས་འབྱམས་པ་སྟེ། དཔེར་ན་བྱ་ཁྲ་གནས་རི་བྲག་གི་ནང་ན་གནས་བཅས་ནས། སྡོད་ས་ཚང་སྒོར་སྡོད་པ་བཞིན། དཔེ་དེ་བཞིན་དུ་རིག་པའི་ཡེ་ཤེས་ཙིཏྟ་རིན་པོ་ཆེ་ན་བཞུགས་པ་སྟེ། རང་གི་ངོ་བོ་རྟགས་ལ་མངོན་པར་གསལ་ལོ། །གདན་ལ་ ― DNG001_Page_0094 ―
[མ་དཔེ་གཟིགས་ན་འདིར་གནོན།]
བཞུགས་པ་ཡེ་ཤེས་ཀྱི་སྣང་བ་ནི། དེ་ནི་ཀུན་གཞི་མེ་ལོང་ལྟ་བུའི་ཡེ་ཤེས་གསལ་བ་ཟང་ཐལ་ལོ། །དེ་བས་ན་དབྱིངས་རྣམ་པར་དག་པའི་ཐིག་ལེ་ནི། ཆུའི་སྒྲོན་མའོ། །ནང་དུ་ཙིཏྟ་གོང་བཞིན་དུ་ཡེ་ཤེས་ཀྱི་སྣང་བ་འོད་དུ་གསལ་ལོ། །གདན་ལ་བཞུགས་པ་ཡེ་ཤེས་ཀྱི་སྣང་བ་ནི། ཡེ་ཤེས་ཆེན་པོའི་ཐིག་ལེ་མ་འགགས་པར་རང་གསལ་ལོ། །ཡེ་ཤེས་སྙིང་པོ་རིག་པར་གནས་ཤིང་། རིག་པ་ལ་ཡེ་ཤེས་གསལ་བས། ལྷུན་གྱིས་གྲུབ་པའི་ཐིག་ལེས་མཚན་མ་དང་། རྣམ་རྟོག་བཅོམ་པའོ། །དེ་ལྟར་མི་འགྱུར་བར་གནས་ཤིང་། རང་སྣང་ལས་གཞན་སྣང་མེད་དོ། །དེ་ནི་ལྷུན་གྱིས་གྲུབ་པའི་ཐིག་ལེ་སྟེ། དོན་སྣང་བ་གསུམ་སྦྱོར་དུ་བསྟན་ན། མཐོང་བྱ་རང་བཞིན་དག་པའི་ནམ་མཁའ་ནི། །ནམ་མཁའ་དག་པའི་རང་གདངས་ཡིན། །དེ་ཡི་ངོ་བོ་དག་པ་དང་། །མཐོང་བྱེད་ཆུ་ཡི་སྒྲོན་མ་ནི། །ཆོས་ཉིད་དག་པའི་ཡེ་གདངས་སོ། །རིག་པ་ཡུལ་ལ་ཤར་བའི་སྣང་བ་ནི། །ཡེ་ཤེས་དག་པའི་ཟེར་གདངས་སོ། །ཀྱེ་མ་ནམ་མཁའ་དག་པའི་རང་གདངས་ནི། །མཚན་མོའི་ནམ་མཁའ་ལྟ་བུའོ། །ཆོས་ཉིད་དག་པའི་ཡེ་གདངས་ནི། །ནམ་ལངས་པའི་ནམ་མཁའ་ལྟ་བུའོ། །ཡེ་ཤེས་ཆེན་པོའི་ཟེར་གདངས་ནི། །ནམ་མཁའ་ལ་ནི་ཉི་མ་ཤར་བ་ལྟ་བུའོ། །རྒྱལ་པོ་གདན་ལ་བཞུགས་པ་ནི། སྤྲོས་བྲལ་གྱིས་དབྱིངས་འགྱུར་མེད་ཀྱི་ངང་དུ་རིག་པ་ཡེ་ནས་དག་པ་སྟེ། དེ་ལས་མ་གཡོས་པར་བཞག་གོ། །འཆི་བདག་བདུད་ཀྱི་སྒོ་ནས་ཡེ་ཤེས་ཀྱི་རླུང་རྒྱུ་བའི་རྩ་གསུམ་གནས་པས། དེ་གསུམ་གཅུན་ཏེ། དེ་བཞིན་གཤེགས་པའི་དགོངས་པ་ལ་ཐུག་པ་མེད་དེ། མཚན་མར་མི་གནས་པས། སྤྱན་ནམ་མཁའི་དཀྱིལ་དུ་བལྟས་ཏེ། རྩ་རླུང་གི་སྒོ་བསྡམས་སོ། །བྱང་ཆུབ་སེམས་དཔའི་ཏིང་ངེ་འཛིན་ནི། སངས་རྒྱས་སེམས་ཅན་གྱི་བར་ན་གནས་པས། སྤྱན་བར་སྣང་དུ་བལྟའོ། །མགྲིན་པ་ཅུང་ཟད་གཅུས་ཏེ། དཔུང་པའི་ཁར་ཨོག་མ་བཞག་གོ། །རྩ་གསུམ་རླུང་གི་འགྱུ་སྲང་བཅད་པའོ། །ལྷ་དང་མིའི་བསམ་གཏན་དང་། སེམས་འཛིན་ནི་མཚན་མ་ཤས་ཆེ་བས་གོང་མ་གཉིས་པོ་བས་དཀའ་སྟེ། སྤྱན་ས་ལ་བལྟའོ། ། ― DNG001_Page_0095 ―
[མ་དཔེ་གཟིགས་ན་འདིར་གནོན།]
དེ་ནི་མགྲིན་པ་ཅུང་ཟད་བཀུག་སྟེ། ཨོག་མ་བྲང་ལ་རེག་ལ་ཁད་དུ་བྱའོ། །དེ་ནི་རྒྱལ་པོ་གདན་ལ་བཞུགས་ཤིང་གདན་ཐོག་ཏུ་བཏང་བའི་ཐབས་སོ། །དེས་རིག་པ་རྒྱལ་པོ་དང་འདྲ་སྟེ་རང་ས་འཛིན་པའོ། །བློན་པོ་ནི་སེམས་ཏེ། རིག་པའི་རྩལ་རླུང་ཐོག་ཏུ་མ་ཤོར་བས། རྟོག་བཅས་སུ་མི་རྒྱུ་རྟོག་མེད་དུ་གསལ་ཏེ། དཔེར་ན་བློན་པོ་བཙོན་དུ་ཟིན་པས་གྲོས་བློ་དང་བྱ་བ་བྱེད་མཁན་མེད་པ་ལྟ་བུའོ། །ལུས་དང་མ་བྲལ་བར་དབུགས་ཡོད་དེ། རིག་པ་ལ་རྟ་ཡོད་པས་བློན་པོ་ལྟ་བུའོ། །བཙོན་དུ་ཟིན་པ་འདྲ་སྟེ། རྟོག་པའི་རླུང་ཡོད་ལ་རྒྱུ་མི་ནུས་སོ། །སྒོ་ལྔ་འབངས་དང་འདྲ་བས་ལས་བྱེད་པ་ཡིན་ནོ། །དུས་དེར་གསལ་ལ་རྟོག་པ་མེད་དོ། །དེ་ནི་འབངས་ཆམ་ལ་འབེབས་པ་ལྟ་བུའོ། །ཀྱེ་རིགས་ཀྱི་བུ་བསླབ་པར་བྱ་བ་ནི། །ངང་དྭངས་རང་བཞིན་བདག་ཉིད་ཆེན་པོའོ། །རང་བཞིན་དག་པའི་ནམ་མཁའ་དང་། །ཆོས་ཉིད་དག་པའི་ནམ་མཁའ་གཉིས། །རྣམ་རྟོག་བྲལ་བའི་རིག་པ་གསུམ། །དབྱེར་མེད་སྟོང་ཞིང་མི་རྟོག་པས། །མ་བཅོས་པ་ཡི་ངང་ཞེས་བྱ། །རང་རིག་ཡེ་ཤེས་གསལ་བ་དང་། །འབྱུང་བཞི་གདངས་སུ་ཤར་བ་གཉིས། །རང་བཞིན་མ་འགགས་ཡེ་ཤེས་གདངས། །གསལ་བར་སྣང་ལ་རང་བཞིན་མེད། །སྟོང་པ་མེད་ན་རང་བཞིན་ཡོད། །དབྱེར་མེད་བདག་ཉིད་ཆེན་པོའི་དོན། །མདོར་ན་རང་རིག་ཡེ་ཤེས་ཡིན། །ལོབས་པའི་ཚད་ནི། ཤེས་པ་རྐྱེན་གྱི་དབང་དུ་མི་འགྲོ་ཞིང་། རྣམ་རྟོག་རྒྱུན་བཅད་མཚན་མ་ཟིལ་གྱིས་གནོན་པའོ། །དྲོད་རྟགས་མི་འདོད་བཞིན་དུ་འབྱུང་། །འདུས་བྱས་ཞིང་ཁམས་ཆེན་པོར་ལྡོག །ལུང་སྟོན་རིམ་པར་འབྱུང་བ་ཡིན། །བླ་མ་ཡི་དམ་མཁའ་འགྲོ་ལས། །དངོས་དང་འབྱུང་བའི་སྒྲ་ལ་བརྟེན། །དེ་ཡིས་ངེས་པར་རྒྱུད་ལ་སྐྱེའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བསྒོམ་དུ་ཡོད་པར་བསྟན་པའི་དགོངས་པ་དང་། བསྒོམ་ཐབས་རྒྱས་པར་བསྟན་པའི་ལེའུ་སྟེ་ང་དགུ་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་། །བསྒོམ་དུ་ཡོད་མེད་ས་མཚམས་ཡང་། །བློ་དང་སྦྱོར་བ་དེ་ལགས་ན། །རང་གི་མཚན་ཉིད་བསྒོམ་པ་དེ། །མ་ནོར་ལེགས་པར་བསྟན་དུ་ ― DNG001_Page_0096 ―
[མ་དཔེ་གཟིགས་ན་འདིར་གནོན།]
གསོལ། །ཞེས་ཞུས་པས། སྟོན་པས་བཀའ་སྩལ་པ། རང་གི་མཚན་ཉིད་བསྒོམ་པ་དེ། །རང་གི་རིག་པ་ཆོས་ཀྱི་སྐུ། །ངོ་སྤྲོད་བདུན་གྱིས་རྟོགས་པ་དེ། །ཞེ་ལ་གདེངས་སུ་ཚུད་གྱུར་པས། །དེ་དོན་རྒྱུད་དུ་གསལ་གྱུར་ན། །བསྒོམ་པ་རང་གི་མཚན་ཉིད་ཡིན། །རིག་པ་ཆོས་སྐུར་རྟོགས་གྱུར་ན། །སྐུ་གསུམ་ལྷུན་གྱིས་གྲུབ་པ་ཡིན། །ཡེ་ཤེས་ལྔ་ཡང་ལྷུན་གྱིས་གྲུབ། །རང་རིག་ཆོས་སྐུ་དེ་ལས་ནི། །རྣམ་རྟོག་ཡུལ་གྱི་རྐྱེན་གྱུར་ནས། །འཁྲུལ་པའི་རྟོག་པ་བྱུང་གྱུར་ན། །སྤྱོད་ལམ་གདམས་པ་བཞིན་དུ་ཁྱེར། །ཡེ་ནས་གནས་པའི་ཆ་ནས་གཞི། །དེ་ཉིད་རྟོགས་པ་ལྟ་བའོ། །དེ་གསལ་བསྒོམ་པ་ཙམ་དུ་བཏགས། །རྒྱུན་ཏུ་ཁྱེར་བ་སྤྱོད་པའོ། །མངོན་གྱུར་འབྲས་བུར་བསྟན་པའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བསྒོམ་པ་རང་གི་མཚན་ཉིད་བསྟན་པའི་ལེའུ་སྟེ་དྲུག་ཅུ་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་། །བསྒོམ་ཡོད་བསྒོམ་མེད་བསྟན་པ་དང་། །བསྒོམ་པ་རང་གི་མཚན་ཉིད་བསྒོམ། །རྒྱས་པར་བཤད་པ་དེ་ལགས་ན། །ཐེག་པ་བརྒྱད་ཀྱི་གོལ་ས་དང་། །སྤྱི་ཡི་གོལ་ས་བསྟན་པ་རྣམས། །རྡོ་རྗེ་འཆང་གིས་གསུང་དུ་གསོལ། །དེ་སྐད་ཅེས་ནི་ཞུས་པ་ལས། །རྡོ་རྗེ་འཆང་གིས་བཀའ་སྩལ་པ། །རིམ་དགུ་བསྒོམ་པའི་གོལ་ས་དག །གོང་འོག་སྐབས་ནས་གསལ་བར་བཤད། །སྤྱི་ཡི་གོལ་ས་འདི་ལྟར་བཤད། །ཞི་གནས་སྟོང་པའི་གོལ་ས་ལྔ། །ལྷག་མཐོང་གསལ་བའི་གོལ་ས་ལྔ། །དེ་ཉིད་སྤྱི་ཡི་གོལ་ས་གཉིས། །གོལ་ས་བཅུ་གཉིས་དག་ཏུ་བཤད། །སྟོང་པའི་ཕྱོགས་ཀྱི་གོལ་ས་ལྔ་པོ་ནི། །ཞི་གནས་ཧད་པོའི་གོལ་ས་ནི། །རྣམ་རྟོག་ཞི་གནས་ཡིན་པས་ནའོ། །བཏང་སྙོམས་ལྟེང་པོའི་གོལ་ས་ནི། །རྩོལ་བ་མེད་དེ་ངང་གནས་པའོ། །སྟོང་པ་ཆད་པོའི་གོལ་ས་ནི། །བེམ་རིག་གང་ཡང་མི་འདོད་པའོ། །མི་རྟོག་འཐོམ་པའི་གོལ་ས་ནི། །དྲན་མེད་གསལ་ཆ་འགགས་པའོ། །འཛིན་མེད་ཧད་པོའི་གོལ་ས་ནི། །ཡུལ་གྱི་རྣམ་པ་སྣང་ ― DNG001_Page_0097 ―
[མ་དཔེ་གཟིགས་ན་འདིར་གནོན།]
གྱུར་ཡང་། །གང་ཡང་གཏན་ལ་མ་ཕེབས་པས། །རང་ངོ་མ་ཤེས་འཛིན་པ་མེད། །འཛིན་པ་མེད་ཀྱང་གསལ་ཆ་མེད། །དེ་ཕྱིར་གོལ་སར་བསྟན་པའོ། །ཀྱེ་གསང་བའི་བདག་པོ་ཉོན་ཅིག །གསལ་བ་ལྷག་མཐོང་གོལ་ས་ནི། །ཀུན་བརྟགས་ལྷ་ཡི་གོལ་ས་དང་། །མཚན་མ་འོད་ཀྱི་གོལ་ས་དང་། །རྩ་རླུང་བདེ་བའི་གོལ་ས་དང་། །གཟུང་འཛིན་ཡུལ་གྱི་གོལ་ས་དང་། །འཁོར་བ་སྡུག་བསྔལ་གོལ་ས་རྣམས། །གསལ་བ་དག་ལས་གོལ་སའོ། །ཆེད་དུ་བྱས་པའི་གོལ་ས་ནི། །མ་ཚོར་ཡིད་ལ་བྱེད་པའོ། །མ་བསྒོམས་འཁྲུལ་པའི་གོལ་ས་ནི། །སྐྱེ་བོརང་ཁར་འཛིན་པ་སྟེ། །འཁྲུལ་པ་ཕྱི་རུ་ཤོར་བ་ཡིན། །ལྟ་བ་རྟོགས་དོན་གསལ་གྱུར་ན། །གོལ་སྒྲིབ་སྡུག་བསྔལ་འབྱུང་མི་སྲིད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བསྒོམ་པའི་གོལ་ས་བསྟན་པའི་ལེའུ་སྟེ་རེ་གཅིག་པའོ།། །།ཀྱེ་ཀྱེ་རྡོ་རྗེ་འཆང་ཆེན་པོ། །བསྒོམ་པ་རང་གི་མཚན་ཉིད་ནི། །མ་ནོར་བསྟན་པ་དེ་ལགས་ན། །དེ་ལྟར་མ་ཤེས་བསྒོམ་པའི་སྐྱོན་དུ་འགྱུར་བ་སྟེ། །དེ་ཉིད་མི་གོལ་གདམས་ངག་མ་ནོར་གསུང་དུ་གསོལ། །དེ་སྐད་ཅེས་ནི་ཞུས་པ་དང་། །རྡོ་རྗེ་འཆང་གིས་བཀའ་སྩལ་པ། །ཉོན་ཅིག་གསང་བདག་རྡོ་རྗེ་འཆང་། །རང་གི་རིག་པ་ཆོས་སྐུ་དེ་ལ་ནི། །རྒྱུ་རྐྱེན་མ་བསྐྱེད་རང་བྱུང་ཡིན་པས་ན། །གློ་བུར་བྱས་བསམ་དག་གི་གོལ་ས་ཆོད། །རང་གི་ངོ་བོ་སྟོང་པར་འདུག་པས་ན། །དངོས་པོ་རྟག་པ་ལ་སོགས་གོལ་ས་ཆོད། །དེ་ཉིད་ངོ་བོ་གསལ་བ་ཡིན་པས་ན། །ཆད་པ་སྟོང་པ་རྣམས་ཀྱི་གོལ་ས་ཆོད། །གསལ་སྟོང་གཉིས་མེད་གཅིག་པའི་བདག་ཉིད་པས། །ཏིང་འཛིན་རྣམ་གསུམ་རིག་པའི་གོལ་སཆོད། །ཡོན་ཏན་ཐམས་ཅད་ལྷུན་གྱིས་གྲུབ་པས་ན། །འབྲས་བུ་གཞན་ནས་རེ་བའི་གོལ་ས་ཆོད། །ཐུགས་རྗེ་འགག་པ་མེད་པར་འབྱུང་བས་ན། །འགྲོ་བའི་དོན་མེད་ཐུགས་རྗེ་རྒྱུན་ཆད་གོལ་ས་ཆོད། །གསལ་བའི་རྩལ་གཉིས་མི་འགག་པས། །ཞི་གནས་བཏང་སྙོམས་མི་རྟོག་གོལ་ས་ཆོད། །ཆོས་སྐུ་རང་གནས་བསྒོམ་མི་དགོས་པ་ཡིས། །ལྟ་སྒོམ་ཀུན་བརྟགས་བསྒོམ་པའི་གོལ་ས་ཆོད། ། ― DNG001_Page_0098 ―
[མ་དཔེ་གཟིགས་ན་འདིར་གནོན།]
ཆོས་སྐུ་མཚན་མ་གང་དུ་མི་གནས་པས། །མཚན་མ་འོད་དུ་བསྒོམ་པའི་གོལ་ས་ཆོད། །རིག་པ་བདེ་སྟོང་གསལ་ལ་མི་རྟོག་པས། །རྩ་རླུང་ཐིག་ལེ་ལུས་ལ་བརྟེན་པའི་གོལ་ས་ཆོད། །དངོས་པོ་རང་རྒྱུད་མ་ཡིན་པས། །འཇིག་རྟེན་དངོས་པོ་རང་གར་འཛིན་པའི་གོལ་ས་ཆོད། །ཡེ་གསལ་ཆེན་པོ་ཆུ་བོའི་རྒྱུན་དུ་གནས་པས་ན། །སེམས་འཛིན་ཐུན་བསྒོམ་རྩོལ་བའི་གོལ་ས་ཆོད། །ཡུལ་གཉིས་སེམས་སུ་བསྡུས་ནས་མི་བསྒོམ་པས། །སྣང་བ་ཆོས་སྐུར་འདོད་པ་རྣམས་ཀྱི་གོལ་ས་ཆོད། །ད་ལྟའི་དུས་སུ་ཆོས་སྐུ་རང་ཤར་བས། །འབྲས་བུ་ཕྱི་ནས་ཐོབ་པའི་གོལ་ས་ཆོད། །རྩ་བ་ཆོས་ཀྱི་སྐུ་ལ་བདག་འཛིན་མ་གྲུབ་པས། །འཛིན་པ་ཞེ་འདོད་ཅན་གྱི་གོལ་ས་ཆོད། །བསྒོམ་དང་མི་བསྒོམ་ཡེངས་དང་མ་ཡེངས་མཐའ་དང་བྲལ་བ་ཡིས། །མ་ཚོར་ཡིད་ལ་བྱེད་པའི་གོལ་ས་ཆོད། །ཆོས་སྐུའི་ངོ་བོ་རྟག་པ་ཆེན་པོ་ལས། །སྨོན་ལམ་འདུས་བྱས་དག་ལ་རེ་བའི་གོལ་ས་ཆོད། །ད་ལྟ་ཉིད་དུ་འབྲས་བུ་མངོན་དུ་གྱུར་པས་ན། །ས་ལམ་རིམ་གྱིས་བགྲོད་པའི་གོལ་ས་ཆོད། །སྤྱི་ཡི་གོལ་ས་བཅོ་བརྒྱད་ཡིན། །ཐེག་པའི་རིམ་པའི་གོལ་ས་རྣམས། །རང་གི་མཚན་ཉིད་མཐོང་ན་གོལ་མི་སྲིད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བསྒོམ་པའི་གོལ་ས་བཅད་པའི་ལེའུ་སྟེ་རེ་གཉིས་པའོ།། །།གསང་བའི་བདག་པོས་ཡང་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྤྱོད་པའི་བྱེ་བྲག་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ངེས་ཟུང་ཞིག །བླང་དོར་མེད་པའི་སྤྱོད་པ་ནི། །སྤྱད་རྒྱུ་མེད་པ་སྤྱོད་པའི་མཆོག །ཆོས་ཉིད་དོན་གྱིས་སྤྱོད་པ་ནི། །མཚན་མ་མེད་པས་ནམ་མཁའ་བཞིན། །ཆོས་ཅན་མཚན་མར་མི་བལྟ་བར། །རྣལ་འབྱོར་ཟག་མེད་ཤེས་རབ་ཀྱིས། །དངོས་མེད་ནམ་མཁའ་བཞིན་དུ་སྤྱད། །རང་རིག་ཡེ་ཤེས་སྤྱོད་པ་ནི། །དཔེར་ན་རིན་ཆེན་མེ་ལོང་བཞིན། །ཡེ་ཤེས་རང་བཞིན་མ་འགགས་པས། །རང་ཤར་རང་སྣང་ཆགས་སྡང་བྲལ་བར་སྤྱོད། །ལྟ་བ་དོན་གྱི་སྤྱོད་པ་ནི། །ཁྱུང་ཆེན་མཁའ་ལ་ལྡིང་བ་བཞིན། །བྱ་བྲལ་ལྷུན་ ― DNG001_Page_0099 ―
[མ་དཔེ་གཟིགས་ན་འདིར་གནོན།]
གྱིས་རྫོགས་པར་སྤྱད། །དགོངས་པ་དོན་གྱི་སྤྱོད་པ་ནི། །དཔེར་ན་ཆུ་བོ་གངྒཱ་བཞིན། །རྒྱུན་གྱི་རྣལ་འབྱོར་ཆེན་པོར་སྤྱོད། །འབྲས་བུ་དོན་གྱི་སྤྱོད་པ་ནི། །ཉི་མ་འོད་ཟེར་བཅས་པ་བཞིན། །སྐུ་གསུམ་འདུ་འབྲལ་མེད་པར་སྤྱད། །དགོངས་པའི་ངང་ལས་མ་གཡོས་པར། །ཤེས་རབ་ཆེན་པོས་དོན་ལ་སྤྱད། །རྣལ་འབྱོར་ཡིད་ཀྱི་སྤྱོད་པ་ཡིན། །རྣལ་འབྱོར་ངག་གི་སྤྱོད་པ་ནི། །དཔེར་ན་བྲག་ཆ་སྒྲ་སྒྲོགས་ལྟར། །སྒྲ་རྣམས་ཞེན་པ་མེད་པར་སྤྱད། །ལུས་ངག་ཡིད་གསུམ་སྤྱོད་པ་ནི། །འཇིག་རྟེན་འཁོར་འདས་ཆོས་འདི་ལ། །དཔེར་ན་མེ་ལོང་གཟུགས་བརྙན་བཞིན། །སྣང་ལ་ཞེན་ཆགས་མེད་པར་སྤྱད། །དྲན་པ་མེད་པའི་སྤྱོད་པ་ནི། །རྣལ་འབྱོར་ཚུལ་འཆོས་མི་བྱ་བར། །གླང་ཆེན་སྨྱོན་པ་བཞིན་དུ་སྤྱད། །བུང་བ་མེ་ཏོག་འཇིབ་པ་བཞིན། །གཅིག་ཏུ་ཞེན་མེད་རྣལ་འབྱོར་གང་བདེར་སྤྱོད། །ཐུགས་རྗེ་ཆེན་པོའི་སྤྱོད་པ་ནི། །དཔེར་ན་ཉི་མའི་སྙིང་པོ་བཞིན། །ལུས་ངག་ཡིད་ཀྱིས་འགྲོ་དོན་རྫོགས་པར་སྤྱད། །ཐུགས་རྗེ་གདུང་བའི་སྤྱོད་པ་ནི། །བུ་གཅིག་པ་ཡི་མ་བཞིན་དུ། །རྣལ་འབྱོར་པ་ཡིས་འགྲོ་དོན་སྤྱད། །གཉིས་སུ་མེད་པའི་སྤྱོད་པ་ནི། །ཆེད་དུ་མི་དགག་ཆེད་དུ་བསྒྲུབ་པ་མེད། །ཆེད་དུ་མི་སྤྱད་ཆེད་དུ་མི་སྤང་ངོ་། །མ་བཅོས་ངང་ལ་རང་བཞིན་འགགས་མེད་སྤྱད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྤྱོད་པ་བསྡུས་ནས་བསྟན་པའི་ལེའུ་སྟེ་རེ་གསུམ་པའོ།། །།གསང་བའི་བདག་པོས་ཡང་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྤྱི་ཡི་སྤྱོད་པ་དེ་ལྟར་ན། །རང་གི་མཚན་ཉིད་སྤྱོད་པ་གང་། །རྡོ་རྗེ་འཆང་གིས་གསུང་དུ་གསོལ། །ཞེས་ཞུས་སོ། །རྡོ་རྗེ་འཆང་གིས་བཀའ་སྩལ་པ། སྤྱི་ཡི་སྤྱོད་པ་གོང་བཞིན་ཏེ། །གང་ཟག་ཉམས་སུ་ལེན་པ་ལ། །རང་གི་མཚན་ཉིད་སྤྱོད་པ་ནི། །དབང་པོ་ཡང་རབ་གྱུར་པ་ལ། །ལྟ་བ་ལྷག་གིས་རྟོགས་པ་ཡི། །དེ་ཡི་ངང་ལས་མི་འབྲལ་བས། །ལྟ་སྒོམ་སྤྱོད་པ་དུས་གཅིག་རྫོགས། །འབྲས་བུ་གཞན་ནས་མི་འཚོལ་བས། །དུས་དེ་ཉིད་དུ་ཅིག་ཅར་རྫོགས། །འབྲིང་དང་ཐ་མའི་ ― DNG001_Page_0100 ―
[མ་དཔེ་གཟིགས་ན་འདིར་གནོན།]
སྤྱོད་པ་ནི། །དུས་བཞི་དག་གི་སྤྱོད་པ་དང་། །དུས་གསུམ་གཅིག་པའི་སྤྱོད་པའོ། །དུས་བཞི་དག་གི་སྤྱོད་པ་ནི། །ཉལ་ཁར་རྩལ་ལྔ་གཞི་ལ་བསྡུ། །དབང་པོ་རྣམ་ལྔ་གཞི་ཡི་རྩལ། །གཞི་ཡི་གསལ་ཆ་མ་འགགས་པས། །དབང་པོ་ལ་བརྟེན་ཕྱི་ཡུལ་སྤྱོད། །གཟུང་འཛིན་གཉིས་སྣང་དུག་ལྔ་བསྐྱེད། །དེ་དག་གཉིད་དུ་འགྲོ་ཁ་རུ། །གསལ་ཆ་གཞི་ཡི་སྟེང་དུ་འདུས། །ཐ་མལ་གཏི་མུག་གཉིད་དུ་འགྲོ། །གང་ཟག་རྟོགས་དང་ལྡན་པ་ལ། །རྨི་ལམ་མེད་པར་སོང་གྱུར་ནས། །ཤེས་བྱ་བུམ་པར་ཚུད་པ་ཡིན། །མ་བསྒོམས་རྨི་ལམ་འབྱུང་གྱུར་ཡང་། །མེད་པའི་བར་དུ་བུམ་འཇུག་གོ། །རྨི་ལམ་དག་དང་སད་དུས་སུ། །རིག་པ་རང་གསལ་གདམས་ངག་ཏུ། །རྨི་ལམ་དྲན་རྟོག་བྱུང་བ་འམ། །སད་པའི་དྲན་རྟོག་བྱུང་བ་ན། །དོན་དྲན་འཛིན་པ་རང་གྲོལ་བས། །སྣང་བ་རང་སྣང་རང་སར་དག །འཛིན་པ་གྲོལ་བས་སྣང་བ་དག །གོམས་པ་བརྟས་ན་རྨི་ལམ་ཆད། །འཛིན་པ་གྲོལ་བའི་སྤྱོད་པ་ནི། །མར་མེ་བཞིན་དུ་རང་གསལ་ལོ། །ལངས་དུས་ཡུལ་ལྔ་རྒྱས་བཏབ་སྟེ། །མིག་ཡུལ་གཟུགས་ལ་རྣ་ཡུལ་སྒྲ། །སྣ་ཡུལ་དྲི་ལ་ལྕེ་ཡུལ་རོ། །ལུས་ཡུལ་རེག་བྱ་ལ་སོགས་པ། །ཡུལ་ནི་རྣམ་པ་ལྔ་ཡང་སྣང་། །རང་སྣང་ཞེས་སུ་བསྟན་པ་ཡིན། །བསྐྱོད་པར་བྱེད་པས་འགྱུ་བ་རླུང་གི་རྩལ། །ཡུལ་དང་སྣང་བ་གཟུགས་ཙམ་ཡིན། །རང་སྣང་ཡུལ་ལ་འཛིན་ཞེན་མེད་གྱུར་ན། །ཕྱི་ཡི་ཡུལ་ལ་རྒྱ་ཡིས་ཐེབས་པ་ཡིན། །སྣང་བ་རྒྱ་ཡིས་བཏབ་ཅེས་བྱ། །རྟོག་པ་སྐྱེས་ནས་དོན་དྲན་པས། །འཛིན་མེད་སྐྱེ་བས་འཛིན་པ་གྲོལ། །གྲོལ་འཛིན་ཡུལ་ལ་རྟོག་མི་འཇུག །ཉམས་བླངས་གོམས་ན་རྟོག་པ་ཡལ། །དུས་བཞིར་འགྱུ་བ་མེད་པར་ནི། །རང་རིག་ཆོས་སྐུ་རང་གསལ་ཏེ། །དཔེར་ན་ཉི་མའི་སྙིང་པོ་དེ། །གསལ་དང་མི་གསལ་འགྲོགས་ནས་ཡོད། །རིག་པ་ཆོས་སྐུ་དེ་བཞིན་པས། །དུས་བཞི་འགྱུར་མེད་གདེང་གྱིས་བཟུང་། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྤྱོད་པ་རང་གི་ ― DNG001_Page_0101 ―
[མ་དཔེ་གཟིགས་ན་འདིར་གནོན།]
མཚན་ཉིད་དུས་བཞི་མཉམ་སྦྱོར་གྱི་མན་ངག་བསྟན་པའི་ལེའུ་སྟེ་རེ་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་རྡོ་རྗེ་འཆང་ཆེན་པོ། །དུས་བཞིའི་སྤྱོད་པ་དེ་ལྟར་ན། །དུས་གསུམ་སྤྱོད་པ་ཇི་ལྟར་ལགས། །ཞེས་ཞུས་སོ། །རྡོ་རྗེ་འཆང་གིས་བཀའ་སྩལ་པ། གང་ཟག་སྣོད་ལྡན་དོན་ཆེད་དུ། །དུས་གསུམ་སྤྱོད་པ་འདི་ལྟར་སྤྱད། །རང་རིག་ཆོས་སྐུ་དུས་གསུམ་དུ། །ཉི་མ་གསལ་དང་མི་འབྲལ་བཞིན། །རང་རིག་གསལ་དང་མི་འབྲལ་ཏེ། །ངོ་མ་ཤེས་པའི་སྟོབས་དག་གིས། །བག་ཆགས་ངན་པས་གསལ་སྒྲིབ་འབྱུང་། །དེ་ཕྱིར་དུས་གསུམ་སྤྱོད་པ་གཅེས། །རང་རིག་རང་གསལ་མཉམ་གཞག་དུས། །དེ་ལས་ཡེངས་པ་རྗེས་ཐོབ་དུས། །དུག་ལྔ་ལངས་པ་རྣམ་རྟོག་དུས། །དེ་གསུམ་ཆོས་སྐུ་མི་འབྲལ་བ། །སྤྱོད་པའི་ལ་ཟློ་ཡིན་པར་བཤད། །མཉམ་གཞག་ཆོས་སྐུ་གསལ་བ་ལ། །དེ་ལས་ཡེངས་པ་བྱུང་དུས་སུ། །ཡུལ་ནི་གང་བྱུང་རྩལ་སྣང་དེ། །འཛིན་བྱེད་རྟོག་པ་རང་གྲོལ་བས། །རང་རིག་ཆོས་སྐུ་རང་དྲན་པས། །ངར་འཛིན་པ་ཡི་རྟོག་པ་སྟོང་། །དེ་ཕྱིར་སྣང་བ་རང་སྣང་ལ། །འཛིན་བྱེད་རྟོག་པ་རང་སར་གྲོལ། །རགས་པ་དུག་ལྔ་སྐྱེས་པའི་ཚེ། །ཞེ་སྡང་དགྲར་སྣང་རང་སྣང་ལ། །འཛིན་བྱེད་དགྲར་སྣང་རང་གྲོལ་ཡིན། །རང་རིག་ཆོས་སྐུའི་དོན་རྟོགས་པས། །འཛིན་རྟོག་ཕྲ་རགས་རང་སར་གྲོལ། །དུག་ལྔ་གཞན་ལའང་དེ་བཞིན་སྦྱོར། །རང་རིག་ཆོས་སྐུའི་རྩལ་ལས་བྱུང་། །ཞི་ཡང་ཆོས་སྐུའི་ངང་དུ་ཞི། །༼རྙིང་རྒྱུད། ཀ ༡༽སྤྲོས་བྲལ་དོན་གསལ་ཆེན་པོའི་རྒྱུད་ཅེས་བྱ་བ། དཔེར་ན་ནམ་མཁའི་རང་བཞིན་ལ། །སྤྲིན་དང་དུ་བ་ཁུ་རླངས་འབྱུང་། །བྱུང་ཡང་ནམ་མཁའི་ངང་ལས་བྱུང་། །ཞི་ཡང་ནམ་མཁའི་ངང་དུ་ཞི། །རང་བྱུང་རང་སྣང་རང་བཞིན་ནམ་མཁའི་ངང་། །ཕྱི་ཡི་ཡུལ་ཉིད་སྣང་བ་ལ། །ནང་གི་རིག་པ་རྩལ་ཤར་བ། །འཛིན་པ་དག་གིས་བཟུང་གྱུར་ན། །རྣམ་པར་རྟོག་པ་ཟང་ཐལ་ཡིན། །འཁོར་བའི་སེམས་ཅན་རྣམས་ཀྱི་ལས། །ཡུལ་ལ་འགྱུ་བའི་ཤེས་པ་མ་འགགས་ཏེ། །འཛིན་བྱེད་རྟོག་པ་རང་གྲོལ་པ། །ཡེ་ཤེས་ཟང་ཐལ་རྟོག་པའི་ལས། །རང་གི་ཤེས་པས་སྤྱད་ཀྱང་ ― DNG001_Page_0102 ―
[མ་དཔེ་གཟིགས་ན་འདིར་གནོན།]
ནི། །རང་སྣང་རང་གྲོལ་འཛིན་པ་མེད། །ཡུལ་སེམས་ཆ་མཉམ་འཕྲད་གྱུར་ན། །འཛིན་པ་གྲོལ་བ་དུས་མཉམ་དག །སྣང་བ་དུས་མཉམ་དག་པ་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། དུས་གསུམ་མཉམ་སྦྱོར་གྱི་སྤྱོད་པའི་ལེའུ་སྟེ་རེ་ལྔ་པའོ།། །།གསང་བའི་བདག་པོས་ཡང་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལྟ་སྒོམ་སྤྱོད་པའི་གདེང་མེད་པར། །བདུད་ཀྱི་སྤྱོད་ཡུལ་ཇི་ལྟར་འབྱུང་། །དེ་ཡི་བཟློག་ཐབས་ཇི་ལྟར་ལགས། །དེ་སྐད་ཅེས་ནི་ཞུས་པ་ཡིས། །རྡོ་རྗེ་འཆང་གིས་བཀའ་སྩལ་པ། །ལྟ་སྒོམ་སྤྱོད་པའི་གདེང་དང་ལྡན་གྱུར་ན། །བདུད་ཀྱི་སྤྱོད་ཡུལ་མི་འབྱུང་སྟེ། །ཇི་སྲིད་གདེང་དང་མ་ལྡན་ན། །བདུད་ཀྱི་སྤྱོད་ཡུལ་བཅོ་བརྒྱད་བྱུང་། །ལྟ་བ་གོལ་ཞིང་གདེང་མེད་ན། །གཟུང་འཛིན་ཉོན་མོངས་དུག་ལྔ་འབྱུང་། །བསྒོམ་པ་གདེང་མེད་གོལ་གྱུར་པས། །བྱིང་དང་རྒོད་པའི་བདུད་གཉིས་བྱུང་། །སྤྱོད་པ་གདེང་མེད་གོལ་གྱུར་པས། །སྤྱོད་པ་དག་ལ་བདུད་བདུན་བྱུང་། །ལྟ་སྒོམ་སྤྱོད་པའི་གདེང་མེད་པས། །ཉམས་ཀྱི་བདུད་ནི་བཞི་འབྱུང་སྟེ། །དེ་ལྟར་དོན་དང་མི་ལྡན་པས། །བདུད་ཀྱི་སྤྱོད་ཡུལ་འབྱུང་བར་འགྱུར། །རང་བྱུང་ཡེ་ཤེས་རང་ལ་ཡོད་གྱུར་ཀྱང་། །རྒྱལ་བུ་དམངས་སུ་འཁྱམས་པ་བཞིན། །རང་ངོ་རང་གིས་མ་ཤེས་པས། །གདམས་ངག་མེད་དེ་རྟོགས་པ་མ་ཤར་བས། །ལྟ་བ་གདེངས་སུ་མ་གྱུར་པ། །དུག་ལྔ་ཡུལ་སྣང་ཤར་བའི་ཚེ། །དེ་ལ་འཛིན་པའི་ཤེས་པ་འཇུག་པར་འགྱུར། །སྒོ་ལྔ་དག་ལ་བརྟེན་ནས་འཇུག །ཞེ་སྡང་གཟུང་ཡུལ་དགྲར་སྣང་ཚེ། །འཛིན་པ་ཡིད་ཀྱི་རྣམ་རྟོག་ནི། །མིག་གི་ཡུལ་དུ་གཟུགས་སྣང་བར། །ཞེ་སྡང་བར་ནི་སྐྱེ་འགྱུར་རོ། །རྣ་བར་ཚིག་རྩུབ་བྱུང་བ་དང་། །ཡིད་འཛིན་ཞེ་སྡང་ལྷག་གིས་བསྐྱེད། །རང་སྣང་འཛིན་མེད་མི་བདེན་བདུད། །རང་གར་བཟུང་ན་བདུད་ཀྱི་ལས། །ཁམས་གསུམ་འཁོར་བའི་གནས་སུ་འཁྱམས། །དེ་བཞིན་ཉོན་མོངས་གཞན་ལ་ཡང་། །གཟུང་འཛིན་གཉིས་ཀྱིས་ལོག་པར་སྤྱོད། ། ― DNG001_Page_0103 ―
[མ་དཔེ་གཟིགས་ན་འདིར་གནོན།]
བདུད་ལས་བཟློག་ཕྱིར་ཉོན་མོངས་གྲོལ་བ་ནི། །དགྲ་ཉིད་རིག་པའི་རྩལ་སྣང་བ། །རང་གི་ངོ་བོ་སྟོང་གསལ་ཡང་། །སྟོང་གསལ་འཛིན་པ་མ་གྲུབ་པས། །ཞེ་སྡང་འཛིན་པ་རང་སར་གྲོལ། །དེ་བཞིན་ཉོན་མོངས་གང་ལ་ཡང་། །རང་སྣང་རང་གྲོལ་དག་ཡིན་ཏེ། །རང་གིས་ཡུལ་ལ་ཕར་དཔྱད་ན། །རང་གི་རྩལ་ཤར་རང་སར་གྲོལ། །ཡུལ་ཉིད་ཚུར་ལ་མངོན་ཤར་ན། །དེ་ལ་ཤེས་པ་ཕར་འཇུག་པས། །རང་སྣང་འཛིན་མེད་རང་སར་གྲོལ། །ཡུལ་སེམས་དུས་མཉམ་འཕྲད་གྱུར་ན། །རང་གསལ་ཡུལ་གསལ་འཛིན་མེད་གྲོལ། །ཆོས་སྐུ་རང་གསལ་ཆེན་པོ་ལས། །དུས་གསུམ་འགྱུར་བ་མེད་པའོ། །རྣམ་རྟོག་འགྱུ་བ་གློ་བུར་ཡིན། །ཡུལ་ལ་འཛིན་པ་གཉིས་ཀ་ནི། །འཁྲུལ་རྩལ་ཡིན་པས་གློ་བུར་ཡིན། །དེ་ལྟར་ཤེས་པས་ལྟ་བདུད་ཆོམ། །བདུད་ཆོམ་སངས་རྒྱས་ད་ལྟ་ཉིད། །ལྟ་བ་གདེང་དང་ལྡན་གྱུར་ན། །སྒོམ་སྤྱོད་ཉམས་ཀྱི་བདུད་ཀྱང་ཆོམ། །སྒོམ་པའི་བདུད་ནི་གཉིས་ཡིན་ཏེ། །བྱིང་དང་རྒོད་པ་རྣམ་གཉིས་སོ། །བྱིང་རྒོད་བདུད་ནི་གང་བྱུང་ཡང་། །བྱིང་རྒོད་རང་སར་རང་གྲོལ་ལོ། །ཇི་ལྟར་བྱིང་རྒོད་བྱུང་གྱུར་ཀྱང་། །ཆོས་སྐུ་འགྱུར་མེད་གདེང་གིས་བཟུང་། །སྤྱོད་པ་མན་ངག་ཇི་བཞིན་ནོ། །རང་བྱུང་རང་སྣང་རང་གསལ་ཏེ། །རང་རིག་འགྱུར་མེད་རྩལ་སྣང་སྟེ། །ཉི་མའི་འོད་བཞིན་གསལ་ཞིང་འབྲལ་བ་མེད། །རྣམ་པར་རྟོག་པ་གློ་བུར་ཙམ། །དེ་ལྟར་རྟོགས་པའི་གང་ཟག་གིས། །བྱིང་རྒོད་བདུད་ལས་གྲོལ་བར་འགྱུར། །སྤྱོད་པའི་དོན་ལས་གྲོལ་གྱུར་པས། །སྤྱོད་པའི་བདུད་ནི་བདུན་དུ་བྱུང་། །འདུ་འཛི་ལོངས་སྤྱོད་གཡེང་བའི་བདུད། །ཤེས་བྱ་ཡོན་ཏན་གཡེང་བའི་བདུད། །ལོངས་སྤྱོད་བདུད་ལ་རྣམ་པ་གཉིས། །འདོད་པའི་ལོངས་སྤྱོད་འགྲུབ་ཏུ་རེ་བ་དང་། །མི་འདོད་དགྲ་ལྟར་དགག་པའོ། །ཤེས་བྱ་ཡོན་ཏན་ལ་ཡང་གཉིས་སུ་བསྟན། །འགྲུབ་ཏུ་རེ་དང་མ་འགྲུབ་དོགས་པའོ། །གང་ལ་སྤྱོད་པ་གང་ལ་སྐྱེ་གྱུར་ཡང་། །འགྲུབ་པ་མེད་དེ་བདུད་དུ་འགྱུར། །ཕྱི་རུ་ཚུལ་འཆོས་བདུད་དང་ནི། །ནང་ན་ཉོན་མོངས་རང་གིས་སྤྱོད་བདུད་དྲུག །བྱེ་བྲག་ཡིན་ཏེ་དེ་ལས་ ― DNG001_Page_0104 ―
[མ་དཔེ་གཟིགས་ན་འདིར་གནོན།]
དབྱེ་ན་བསམ་མི་ཁྱབ། །གང་ལ་ཆེད་དུ་འཛིན་པ་དེ། །བདུད་རྣམས་ཀུན་གྱི་སྤྱི་ཡིན་ཏེ། །ཆེད་འཛིན་མེད་ན་བདུད་མི་འབྱུང་། །སྤྱོད་པའི་བདུད་བདུན་གང་ལ་ཡང་། །རང་ལས་བྱུང་ཞིང་རང་ལས་སྣང་། །དེ་དག་རང་སར་གྲོལ་བ་ཡིས། །གོང་གི་ལྟ་སྒོམ་སྤྱོད་སྐབས་བཞིན། །གོང་གི་གདེང་བཅས་དུས་བཞིན་དུ། །ལྟ་བ་རང་བྱུང་རང་སྣང་གདེང་ལྡན་པས། །སྤྱོད་པའི་བདུད་ཀྱིས་མི་ཚུགས་ཏེ། །མདོར་ན་བདུད་རྣམས་གང་བྱུང་ཡང་། །རང་བྱུང་རང་སྣང་རང་སར་གྲོལ། །དེ་ལྟར་རྟོགས་ན་བདུད་དང་བྲལ། །ཉམས་ཀྱི་བདུད་བཞི་བསྟན་པ་ནི། །ལུས་ངག་ཡིད་ལས་བྱུང་བ་དང་། །བྱིན་གྱི་རློབ་པ་ལུང་སྟོན་འབྱུང་། །དང་པོ་ལུས་ཀྱི་བདུད་བསྟན་པ། །དེ་བཞིན་གང་ཡང་ཡིད་ལ་ཡང་། །མཚན་མ་རྟགས་སུ་འབྱུང་བ་ནི། །དེ་ལ་ཡང་དག་འཛིན་པ་ཡིན། །དེ་བཞིན་ངག་དང་ཡིད་ལ་ཡང་། །མཚན་རྟགས་དམ་པར་བལྟ་བ་ནི། །དེ་ཉིད་ངག་དང་ཡིད་ཀྱི་བདུད། །ལུས་ལ་བདེ་བ་ལ་སོགས་འབྱུང་། །ངག་ལ་བདེ་ཐོབ་ཆོས་སྨྲ་ལ་སོགས་འབྱུང་། །སེམས་ལ་མངོན་ཤེས་ལ་སོགས་འབྱུང་། །ཕྱི་རུ་བྱིན་རླབས་ལུང་བསྟན་འབྱུང་། །དེ་ལྟར་དམ་པར་དགོངས་སྤྱོད་དུ། །བཟུང་ན་ཉམས་ཀྱི་བདུད་དུ་འགྱུར། །དེ་དག་བདུད་ལས་འགྲོལ་བ་ནི། །དེ་བཞིན་ལྟ་སྒོམ་སྤྱོད་པ་ལ། །གདེང་གིས་ཟིན་པ་ཇི་བཞིན་དུ། །ཉམས་བདུན་བཞི་སོགས་ངོས་ཟིན་ན། །ཉམས་ལ་བདེན་པར་འཛིན་པ་དེ། །རང་སྣང་རང་གྲོལ་དག་ཏུ་འགྱུར། །ཆེད་འཛིན་རང་སར་གྲོལ་གྱུར་བས། །ཉམས་ཀྱི་རིམ་པ་ཅི་བྱུང་ཡང་། །དེ་ལྟར་ལྟ་སྒོམ་སྤྱོད་པའི་རྟགས། །རང་བྱུང་ཡེ་ཤེས་རང་ཆས་ལས། །མཚན་རྟགས་ཆེད་དུ་མི་བསྒྲུབ་སྟེ། །ཤུགས་ལས་འབྱུང་བ་མི་དགག་གོ། །དཔེར་ན་རིན་ཆེན་དགོས་འདོད་འདྲ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བདུད་ཀྱི་སྤྱོད་ཡུལ་བཅོ་བརྒྱད་བསྟན་པའི་ལེའུ་སྟེ་རེ་དྲུག་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་། །བདུད་ཀྱི་སྤྱོད་ཡུལ་གྲོལ་གྱུར་ནས། །ཐེ་ཙོམ་གེགས་རྣམས་སེལ་གྱུར་ན། ། ― DNG001_Page_0105 ―
[མ་དཔེ་གཟིགས་ན་འདིར་གནོན།]
ཉམས་ཀྱི་རིམ་པ་ཇི་ལྟར་འཆར། །རྡོ་རྗེ་འཆང་གིས་གསུང་དུ་གསོལ། །དེ་སྐད་ཅེས་ནི་ཞུས་པ་ལས། །རྡོ་རྗེ་འཆང་གིས་བཀའ་སྩལ་པ། །ཉོན་ཅིག་གསང་བའི་བདག་པོ་ཁྱོད། །གང་ཟག་ཕྱི་མ་ལྟ་སྒོམ་དང་། །སྤྱོད་པ་དག་ལ་གནས་པ་ལ། །ཉམས་ཀྱི་རིམ་པ་འབྱུང་བ་ནི། །དབང་པོ་རབ་འབྲིང་ཐ་གསུམ་ལས། །རབ་ནི་རྟོགས་པས་གྲོལ་བ་སྟེ། །བདུད་དང་ཐེ་ཙོམ་གེགས་རྣམས་སེལ། །སྒོམ་སྤྱོད་གཉིས་ལ་སྦྱང་མི་དགོས། །རྟོགས་གྲོལ་སངས་རྒྱས་ད་ལྟ་ཉིད། །ཉམས་ཀྱི་རིམ་པ་བརྩི་རུ་མེད། །ཐ་མལ་ལུས་དང་མ་བྲལ་ཀྱང་། །དགོངས་པ་སངས་རྒྱས་ཐུགས་ལྟར་གནས། །རང་རིག་ཆོས་སྐུ་གསལ་སྟོང་འཕྱོ། །ཐིག་ལེ་ཉག་གཅིག་སྤྲོས་དང་བྲལ། །ངོ་བོ་འགྱུར་བ་མེད་པ་ལ། །རྩལ་མི་འགག་སྟེ་སྒོ་ལྔར་ཤར། །དེ་ཕྱིར་རྩལ་ནི་ཟང་ཐལ་འཛིན་པ་མེད། །སྐུ་གསུམ་འགྱུར་བ་མེད་པར་གནས། །གང་ཟག་འབྲིང་དང་ཐ་མ་ལ། །བདུད་དང་ཐེ་ཙོམ་གེགས་འབྱུང་སྲིད། །དེ་ལ་གོལ་ས་གོང་ལྟར་ཆོད། །གོལ་ས་ཆོད་པས་ཉམས་རྟོགས་འབྱུང་། །བདུད་མེད་ཉམས་ནི་མྱུར་དུ་འབྱུང་། །དྲོད་དང་རྟགས་དང་ཉམས་དང་གསུམ། །དྲོད་ནི་རང་ལ་གསལ་བ་ཡིན། །རྟགས་ནི་གཞན་ལ་གསལ་བར་འབྱུང་། །གཉིས་ཀ་ལ་ནི་ཉམས་སུ་རྟོགས། །དེ་དག་ཉམས་ཀྱི་རིམ་པ་ནི། །ལུས་ངག་ཡིད་ལ་འབྱུང་བར་འགྱུར། །འོག་མ་རྣམས་དང་ཆ་བསྟུན་པ། །གཡོ་ཐོབ་གོམས་བརྟན་མཐར་ཕྱིན་པའོ། །དེ་ཡང་རྟོགས་དང་དག་པ་དང་། །དག་པ་ཆེན་པོ་གསུམ་དུ་འདུས། །དང་པོ་གཡོ་བའི་ཉམས་བསྟན་པ། །ངོ་སྤྲོད་གདམས་ངག་ཞུ་དུས་སུ། །རང་ངོ་འཕྲོད་པས་རྟོག་པ་གཡོས། །རྟོགས་པ་ལྷག་གིས་སྐྱེ་བར་འགྱུར། །ལུས་ཀྱང་བདེ་བ་དེ་ལ་འབྱུང་། །ངག་ཀྱང་འཁྲུལ་གཏམ་ཤས་ཆུང་ངོ་། །དེ་ནས་ཐོབ་པའི་རྟགས་བསྟན་པ། །ལྟ་བ་གདེང་དུ་གྱུར་པ་དེ། །ཐོབ་པའི་ཉམས་ནི་ཡིན་པར་བསྟན། །དེ་ཕྱིར་ལྟ་བ་གདེང་ཟིན་ཐོབ། །ལྟ་བ་གདེང་གིས་ཟིན་པ་ནི། །རང་རིག་ཆོས་སྐུ་རྟོགས་པ་སྟེ། །རང་བྱུང་ཡེ་ཤེས་ཡིན་པའི་ཕྱིར། །དུས་གསུམ་འགྱུར་བ་མེད་པར་གོ། །འགྱུས་པ་རང་སར་གྲོལ་བས་ན། །འགྱུ་བ་ཡེ་ ― DNG001_Page_0106 ―
[མ་དཔེ་གཟིགས་ན་འདིར་གནོན།]
ཤེས་ཟང་ཐལ་ཡིན། །འགྱུ་བའི་སྲོག་ནི་ཆོད་པའོ། །ཡིད་ནི་ཆེད་འཛིན་བྲལ་བས་སེམས་བདེ་སྟེ། །ངག་ཀྱང་འཁྲུལ་པའི་གཏམ་རྣམས་འགགས། །གོམས་པའི་ཉམས་ནི་འདི་ལྟར་འབྱུང་། །གོང་གི་དོན་དང་མ་བྲལ་བ། །དུས་གསུམ་རྒྱུན་ཏུ་ལམ་ཁྱེར་བས། །གོམས་པའི་ཉམས་སུ་བསྟན་པ་ཡིན། །སྤྱོད་པའི་མན་ངག་ཅེས་པ་སྟེ། །དུས་བཞིའམ་དུས་གསུམ་གོང་ལྟར་རོ། །དེ་དག་ཤིན་ཏུ་གོམས་གྱུར་ན། །ཡེངས་དང་མ་ཡེངས་མེད་པ་ཡིན། །མཉམ་བཞག་རྗེས་ཐོབ་གཉིས་དང་བྲལ། །ཡེངས་དང་མ་ཡེངས་གཉིས་ཀ་མེད། །རང་རིག་ཆོས་སྐུའི་ངོ་བོ་ལ། །སྐུ་གསུམ་ཡེ་ཤེས་ལྷུན་གྲུབ་སྟེ། །རང་ཡིན་དུས་གསུམ་འབྲལ་བ་མེད། །འཁྲུལ་པའི་སྣང་བ་འབྱུང་གྱུར་ཡང་། །འཛིན་པའི་བློ་དང་བྲལ་བས་ན། །ཡུལ་རྐྱེན་ཅི་བྱུང་རང་སར་གྲོལ། །རིག་པ་དེ་ལྟར་ཤར་བའི་ཚེ། །ལུས་སེམས་འཁྲུལ་པའི་དབང་མི་འགྱུར། །རིག་པ་མངོན་ཤེས་ཕྲ་མོ་འབྱུང་། །ངག་ཀྱང་བདེན་པ་ཐོབ་པར་འགྱུར། །ལུས་ལ་ན་ཚ་སྡུག་བསྔལ་བྲལ། །དགྲ་བགེགས་ཕྱི་ནང་སྲིན་འབུ་རྣམས། །དེ་ཡི་གནོད་པས་ཚུགས་མི་འགྱུར། །ངག་གིས་མ་བསླབས་ཆོས་རྣམས་སྨྲ། །མཁའ་འགྲོ་བདེ་གཤེགས་ལུང་སྟོན་འགྱུར། །དགྲ་བགེགས་གཉིས་ལ་བདེན་པ་འཇུག །གོམས་པ་བརྟན་པའི་ཉམས་ཡིན་ནོ། །གོམས་པའི་གཞུག་ལ་བརྟན་པ་འབྱུང་། །གོམས་པ་ཤིན་ཏུ་གསལ་བར་འབྱུང་བའོ། །དེ་ལ་དག་པའི་སྣང་བ་ཤར། །ཕྱི་ཡི་འཁྲུལ་སྣང་འདི་དག་ལྡོག །དག་པའི་སྣང་བ་འོད་སྣང་འཆར། །ལུས་དག་པ་ནི་འོད་ཀྱི་ལུས། །རིག་པ་ཆོས་སྐུ་འགྱུར་མི་སྲིད། །རྣམ་པར་རྟོག་པ་རྩད་ནས་ཆོད། །བདག་ཏུ་འཛིན་པ་གཞི་ནས་གྲོལ། །མངོན་པར་ཤེས་པ་ལྔ་ག་འཆར། །ཐ་མལ་ལུས་དང་བྲལ་དུས་སུ། །ནད་གཅོད་སྐྱེ་ཤིའི་སྡུག་བསྔལ་མེད། །ལུས་དང་བྲལ་ནས་རིན་ཆེན་སྦུབས། །ལོངས་སྐུའི་སྣང་བ་འཆར་བར་འགྱུར། །དེ་དག་གོང་འོག་གཞན་ན་གསལ། །མཐར་ཕྱིན་ཉམས་ནི་ལོངས་སྐུའི་དུས། །ཡོན་ཏན་བརྗོད་ ― DNG001_Page_0107 ―
[མ་དཔེ་གཟིགས་ན་འདིར་གནོན།]
ཀྱིས་མི་ལངས་སོ། །བདེ་བ་དུས་གསུམ་ཟད་མི་སྲིད། །ཉམས་ལྔ་ལམ་ལྔར་སྦྱར་བ་ནི། །ཚོགས་ལམ་སྦྱོར་ལམ་དུས་ན་གཡོ་ཉམས་འབྱུང་། །མཐོང་བའི་ལམ་ལ་ཐོབ་པའོ། །བསྒོམ་པའི་ལམ་དང་གོམས་ཉམས་གཅིག །བརྟན་དང་མཐར་ཕྱིན་ཉམས་གཉིས་ཀྱང་། །མི་སློབ་ལམ་དང་ངོ་བོ་གཅིག །ཉམས་དང་ལམ་དུ་སྦྱོར་བའོ། །རྟོགས་པ་དོན་གྱི་ངོ་བོ་ལ། །རང་རིག་ཆོས་སྐུ་འགྱུར་བ་མེད། །དེ་ལ་རྟགས་མཚན་བློ་སྣང་ཡིན། །འབྲིང་དང་ཐ་མའི་བློ་དག་ལ། །རྣམ་རྟོག་དག་གིས་བསྒྲིབས་པ་སྟེ། །རྟོག་པ་གསལ་ཞིང་འཁྲུལ་པ་འགགས། །དེ་ལ་ཉམས་ཀྱི་སྣང་བ་འབྱུང་། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཉམས་བསྟན་པའི་ལེའུ་སྟེ་རེ་བདུན་པའོ།། །།དེ་ནས་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་ཆེན་པོ། །དང་པོ་གཞི་ཡི་གནས་ལུགས་ནས། །འབྲས་བུའི་དོན་ལ་ཐུག་གི་བར། །ཐེ་ཚོམ་གེགས་རྣམས་ཇི་ལྟར་སེལ། །སེལ་བའི་ཡོན་ཏན་ཇི་ལྟར་ལགས། །རྡོ་རྗེ་འཆང་གིས་གསུང་དུ་གསོལ། །དེ་སྐད་ཅེས་ནི་ཞུས་པ་ལས། །རྡོ་རྗེ་འཆང་གིས་བཀའ་སྩལ་པ། །གསང་བའི་བདག་པོ་ང་ལ་ཉོན། །གཞི་ནས་འབྲས་བུར་ཐུག་བར་ལ། །གེགས་བདུན་དག་གིས་སེལ་འགྱུར་ཏེ། །གཞི་ཡི་གེགས་དང་འཁྲུལ་པའི་གེགས། །ལྟ་སྒོམ་སྤྱོད་པ་ཉམས་ཀྱི་གེགས། །འབྲས་བུའི་གེགས་དང་བདུན་གྱིས་བསྟན། །ཀྱེ་ཀྱེ་རྡོ་རྗེ་འཆང་ཆེན་པོ། །གེགས་བདུན་རྒྱས་པར་གསུང་དུ་གསོལ། །ཞུས་པའི་དོན་གསན་བཀའ་སྩལ་པ། །དང་པོ་གཞི་ཡི་གེགས་བསྟན་པ། །སངས་རྒྱས་སེམས་ཅན་གཉིས་མེད་དེ། །དངོས་པོའི་དོན་གྱི་གནས་ལུགས་དེ། །ཀ་དག་ཡིན་ནམ་ལྷུན་གྲུབ་ཡིན། །སངས་རྒྱས་ཡིན་ནམ་སེམས་ཅན་ཡིན། །སངས་རྒྱས་ཡིན་ན་འཁྲུལ་མི་སྲིད། །ཇི་སྲིད་སེམས་ཅན་ཡིན་གྱུར་ན། །ངེས་པ་ཡིན་ནམ་མ་ངེས་ཡིན། །ཇི་སྲིད་ངེས་པ་ཡིན་གྱུར་ན། །སྤྲོས་བཅས་ཡིན་ནམ་སྤྲོས་མེད་ཡིན། །མཐའ་ཅན་ཡིན་ནམ་མཐའ་བྲལ་ཡིན། །གཞི་ཡི་ངོ་བོ་ལྷུན་གྲུབ་དེར། །འཁོར་འདས་ཐམས་ཅད་ལྷུན་གྱིས་གྲུབ། །ངོ་བོ་ངེས་པ་ཆེན་པོ་ ― DNG001_Page_0108 ―
[མ་དཔེ་གཟིགས་ན་འདིར་གནོན།]
ལ། །རྩལ་ནི་མ་ངེས་སྣ་ཚོགས་སྣང་། །མཚོན་ཚུལ་གང་དུ་ཤན་མ་ཕྱེད། །གཞི་ཡི་ཐེ་ཚོམ་དེ་ལྟར་ཆོད། །འཁྲུལ་པའི་གེགས་ནི་འདི་ལྟར་བསལ། །མེད་ལ་ཡོད་འཛིན་འཁྲུལ་པ་ལ། །ཕྱིན་ཅི་ལོག་ཏུ་བརྟགས་པ་ཡིན། །ཡང་དག་རྟོགས་ན་འཁྲུལ་པ་དག །དེ་ཡིས་འཁྲུལ་པའི་ཐེ་ཚོམ་ཆོད། །ལྟ་བའི་གེགས་ནི་གང་སེལ་ན། །རང་བྱུང་ཆེན་པོ་ཡིན་པས་ན། །གློ་བུར་སྐྱོན་གྱིས་གོས་པ་མེད། །ངོ་བོ་འགྱུར་མེད་གསལ་སྟོང་ལ། །རྩལ་ནི་སྣ་ཚོགས་འཛིན་མེད་འཆར། །གང་གི་མཐའ་རུ་མི་འགྱུར་བས། །མཐའ་ཡི་སྐྱོན་གྱིས་འཇིགས་མེད་པས། །ལྟ་བའི་ཐེ་ཚོམ་དེ་ཡིས་ཆོད། །གོལ་ས་གཅོད་པའི་སྐབས་ན་གསལ། །བསྒོམ་པའི་གེགས་ནི་གང་སེལ་ན། །བསྒོམ་དུ་ཡོད་ན་འོག་མར་འགྱུར། །མེད་ན་རྟོག་མེད་སངས་རྒྱས་འགྱུར། །ཡང་ན་སོ་སོ་སྐྱེ་བོར་འགྱུར། །རང་བྱུང་ཡེ་ཤེས་རང་གནས་པའི། །ངོ་སྤྲོད་རང་ངོ་ཤེས་ཙམ་ན། །རང་གིས་རང་ཉིད་གསལ་བ་ལས། །བློ་ཡིས་བསྡུ་ཞིང་བསྒོམ་དུ་མེད། །དབང་པོ་འབྲིང་ལ་དྲན་པ་ཙམ། །ཆོས་སྐུ་གསལ་ན་དྲན་པ་སྟོང་། །མ་བསྒོམས་རྒྱུན་དུ་འབྲལ་མ་མྱོང་། །བསྒོམ་དང་མ་བསྒོམས་དོན་ལ་མེད། །བསྒོམ་པའི་ཐེ་ཚོམ་དེ་ཡིས་ཆོད། །སྤྱོད་པའི་གེགས་རྣམས་གང་སེལ་བ། །སྤྱད་པས་གྲོལ་ལམ་མ་སྤྱད་གྲོལ། །མ་སྤྱད་གྲོལ་བའི་སྒྲ་མི་འཇུག །སྤྱད་ན་ཆེད་སྤྱད་དག་ཏུ་འགྱུར། །རིག་པ་དང་ནི་སྣང་བ་གཉིས། །རྩལ་མི་འགག་པའི་སྟོབས་ཀྱིས་ནི། །དེ་གཉིས་ཕན་ཚུན་རོལ་པ་ལས། །ཆེད་དུ་སྤྱད་པས་སྤྱད་རྒྱུ་མེད། །ངོ་བོ་སྤྲོས་དང་བྲལ་བ་ལ། །རྩལ་ནི་མི་འགག་སྣ་ཚོགས་འཆར། །དེ་ཡང་ཡུལ་ལ་བརྟེན་ནས་འཆར། །རང་ཤར་རང་གྲོལ་སྤྱོད་པ་སྟེ། །ཡུལ་རྐྱེན་སྣ་ཚོགས་ཤར་གྱུར་ཀྱང་། །འཛིན་མེད་རང་སར་གྲོལ་བ་ཡིས། །སྤྱད་རྒྱུ་མེད་དེ་ཤུགས་འབྱུང་ཙམ། །སྤྱད་མེད་དོན་དང་མི་འབྲལ་ཙམ། །མ་འགགས་ཞེན་མེད་སྤྱོད་པའི་མཆོག །སྤྱོད་པའི་ཐེ་ཚོམ་དེ་ཡིས་ཆོད། །ཉམས་ཀྱི་གེགས་ནི་གང་སེལ་ན། །རང་བྱུང་ཆོས་སྐུ་འགྱུར་མེད་ནི། །ཉམས་མྱོང་མཐའ་ལས་འདས་པ་སྟེ། །རེ་ཞིག་གང་ཟག་མ་གོམས་པས། །བདེན་ ― DNG001_Page_0109 ―
[མ་དཔེ་གཟིགས་ན་འདིར་གནོན།]
པ་གསལ་ནི་འདེབས་པ་ལ། །ཆོས་སྐུ་གསལ་ཞིང་རྟག་པ་འགྲིབ། །དེ་ཡིས་ཉམས་མྱོང་ཤུགས་ལས་འཆར། །ཉམས་ལ་ཆེད་འཛིན་འདོད་པ་མེད། །སྤྲིན་དེངས་ཉི་མ་གསལ་བ་འདྲ། །ཉམས་ཀྱི་ཐེ་ཚོམ་དེ་ཡིས་ཆོད། །འབྲས་བུའི་གེགས་ནི་གང་སེལ་ན། །འབྲས་བུ་རང་བྱུང་ཆོས་སྐུ་དེ། །གདོད་ནས་ཡོད་ན་བཙལ་མ་དགོས། །གློ་བུར་འདུས་བྱས་འཇིག་པར་འགྱུར། །གདོད་ནས་རང་བྱུང་ཆོས་སྐུ་དེ། །རང་ངོ་མ་ཤེས་རྟོག་པས་བསྒྲིབས། །དེ་ཉིད་ངོ་ཤེས་རྟོགས་ཙམ་ན། །དང་པོ་རང་བྱུང་རང་ངོ་འཕྲོད། །རྟོགས་པ་གྲོལ་ནས་མངོན་དུ་འགྱུར། །རྒྱལ་བུ་དམངས་འཁྱམས་རྒྱལ་སར་བཏོན། །རང་ས་ཟིན་པ་ཇི་བཞིན་ནོ། །འབྲས་བུའི་ཐེ་ཚོམ་དེ་ཡིས་ཆོད། །རང་བྱུང་རིག་པ་ཆོས་སྐུ་དེ། །གང་གི་ངོ་བོར་མ་གྲུབ་པས། །མཚན་མ་འདུས་བྱས་ཐེ་ཚོམ་ཆོད། །གསལ་ལ་མི་འགག་འཆར་བ་ཡིས། །སྟོང་པ་ཞི་གནས་ཐེ་ཚོམ་ཆོད། །རྩལ་ནི་འོད་དུ་སྣང་བ་ཡིས། །རིག་པ་རྐྱང་པའི་ཐེ་ཚོམ་ཆོད། །གསལ་བ་སྣ་ཚོགས་འཆར་བ་ཡིས། །མི་རྟོག་ལྟེངས་པོའི་ཐེ་ཚོམ་ཆོད། །གང་ལ་འཛིན་པ་མེད་གྱུར་པས། །མ་ཚོར་ཡིད་ལ་བྱེད་པ་བྲལ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཐེ་ཚོམ་དང་གེགས་བསལ་བའི་ལེའུ་སྟེ་རེ་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དེ་ཡི་འབྲས་བུ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། །རྡོ་རྗེ་འཛིན་པ་ལེགས་ཟུང་ཞིག །འབྲས་བུ་ལྟ་བ་མངོན་གྱུར་ཏེ། །དེ་ཡི་གནས་ལུགས་བསྟན་པ་ནི། །ཆོས་ཉིད་ཕྱི་ནང་མེད་པར་གསལ། །རིག་པ་ཕྱི་ནང་མེད་པར་ཁྱབ། །གཉིས་མེད་ཆོས་སྐུ་རྡོ་རྗེའི་ལུས། །རང་གསལ་འཛིན་མེད་ངང་དུ་གནས། །དེ་ལས་མཁྱེན་པ་མ་འགགས་པས། །རང་རིག་ཡེ་ཤེས་ལོངས་སྤྱོད་རྫོགས་པའི་སྐུ། །ཡུལ་གྱི་རང་བཞིན་ཡེ་ཤེས་སྤྱན་གྱི་བུམ་པ་ལྔ། །སྣང་ལ་དངོས་མེད་ནམ་མཁའི་འཇའ་ཚོན་བཞིན། །དེ་ཡི་ངང་ན་སྤྲུལ་བའི་སྐུ་ལྔ་གསལ། །གསལ་ལ་མི་རྟོག་བུམ་པའི་མར་མེ་བཞིན། །སྐུ་གསུམ་ནང་གསལ་འདུ་འབྲལ་མེད་པར་གནས། ། ― DNG001_Page_0110 ―
[མ་དཔེ་གཟིགས་ན་འདིར་གནོན།]
རིག་པ་རང་སྣང་གསལ་བ་ཟང་ཐལ་བས། །སྐུ་གཉིས་ཡུལ་དུ་མི་སྣང་ཞིང་། །ཡོན་ཏན་མ་འགགས་འདུ་འབྲལ་མེད། །སྐུ་གཉིས་མ་འགགས་ཡོད་པས་མེད་པ་སྟེ། །ཆོས་སྐུ་མི་འགྱུར་མེད་པས་ཡོད་པ་ནི། །མཁར་གཞོང་བཅུད་དང་མེ་ལོང་གཟུགས་བརྙན་བཞིན། །སྣང་ལ་རང་བཞིན་མེད་པས་མཚན་མའི་སྐྱོན་དང་བྲལ། །མི་སྣང་རང་བཞིན་མེད་པས་ཆད་ལྟ་སྟོང་པའི་སྐྱོན་ལས་འདས། །མཐའ་བཞི་ལས་གྲོལ་འཁོར་བ་རྒྱ་ཡིས་ཐེབས། །དོན་ལ་འགྱུར་མེད་རིག་པ་རང་ས་ཟིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འབྲས་བུ་ཇི་ལྟར་འབྱུང་བ་བསྟན་པའི་ལེའུ་སྟེ་རེ་དགུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཐེག་པའི་ངོ་བོ་ངེས་ཚིག་དང་། དབྱེ་བ་དཔེ་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་ཟུང་ཞིག །ཐེག་པའི་ངོ་བོ་ཤེས་རབ་སྙིང་རྗེ་ཡིན། །དེ་གཉིས་ཆེ་ཆུང་ཐེག་པ་ཆེ་ཆུང་སྣང་། །ཐེག་པའི་ངེས་ཚིག་འདེགས་དང་བསྐྱོད་པ་ཡིན། །དབྱེ་ན་མང་ཡང་བསྡུ་ན་གཉིས་ལས་མེད། །རྒྱུ་རྐྱེན་ལམ་ཁྱེར་མཚན་ཉིད་ཐེག་པ་དང་། །འབྲས་བུ་ལམ་ཁྱེར་གསང་སྔགས་ཐེག་པ་གཉིས། །རྐྱལ་པ་གྲུ་གཟིངས་མཚན་ཉིད་ཐེག་པའི་དཔེ། །ཟམ་པ་ས་གཞི་གསང་སྔགས་ཐེག་པའི་དཔེ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཐེག་པའི་དོན་བཤད་བསྡུས་ཏེ་བསྟན་པའི་ལེའུ་སྟེ་བདུན་ཅུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཐག་པ་སོ་སོའི་ལྟ་བསྒོམ་དང་། །སྤྱོད་པ་འབྲས་བུའི་དོན་གསུངས་པ། །དེ་ཡི་ངོ་བོ་ངེས་ཚིག་དང་། །དབྱེ་བ་མཐུན་དཔེ་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ལྟ་བའི་ངོ་བོ་སོ་སོའི་དབྱེ་བ་ལས་ཤེས་པར་བྱའོ། །ངེས་པའི་དོན་ལྟ་བ་རང་རིག་ཡེ་ཤེས་ཀྱི་ངོ་བོ་ནི། ཕྱོགས་ལྷུང་མེད་པའི་ཤེས་རབ་པོ། །ངེས་ཚིག་ནི་ཡང་དག་པའི་ཤེས་བྱ་གྲུབ་མཐའི་མཐར་གྱུར་པས་ན་ལྟ་བའོ། །དབྱེ་ན་གཉིས་སོ། །ཡང་དག་པའི་ལྟ་བ་དང་། ཡང་དག་པའི་ལྟ་བ་མ་ཡིན་པའོ། །ཡང་དག་པའི་ ― DNG001_Page_0111 ―
[མ་དཔེ་གཟིགས་ན་འདིར་གནོན།]
ལྟ་བ་ནི་ཨ་ཏི་ཡོ་གའོ། །ཡང་དག་པའི་བལྟ་བ་མ་ཡིན་པ་ནི་ཨ་ནུ་མན་ཆོད་དོ། །ལྟ་བའི་དཔེ་ནི་གཉིས་ཏེ། ཡང་དག་པའི་དཔེ་ནི་མན་ཤེལ་དང་སྣང་བ་ལྟ་བུའོ། །ཡང་དག་པ་མ་ཡིན་པའི་དཔེ་བརྒྱད་དོ། །རིགས་ཀྱི་བུ་ལེགས་པར་ཟུང་ཞིག །ཉན་ཐོས་རང་རྒྱལ་ཆུ་རྒྱུན་ནེ་སིང་བཞིན། །བྱང་ཆུབ་སེམས་དཔའི་དཔེ་ནི་ནམ་མཁའ་སྒྱུ་མ་སྐྲ་ཤད་དང་། །ཆུ་ཟླ་ལ་སོགས་མེད་བཞིན་སྣང་། ཀྲི་ཡ་རྗེ་དང་འབངས་ལྟ་བུའོ། །ཡོ་ག་སྤུན་དང་གྲོགས་པོའི་དཔེ། མ་ཧཱ་ཡོ་ག་རྒྱལ་པོ་མངའ་དར་བཞིན། ཨ་ནུ་ཡོ་ག་ཕོ་མོ་སྙོམས་འཇུག་བཞིན། །ཨ་ཏི་ཡོ་ག་ཁྱུང་ཆེན་མཁའ་ལ་ལྡིང་བ་བཞིན། །ཞེས་གསུངས་སོ། །ཡང་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དེས་མཚོན་པའི་ཚིགས་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། །ངས་བསྟན་རྒྱུད་ལུང་ཐམས་ཅད་དུ། །ལྟ་བ་ཞེས་པའི་ཚིག་རྣམས་དང་། །གྲུབ་མཐའ་ཞེས་པའི་ཚིག་རྣམས་དང་། །ཡང་དག་ཞེས་པའི་ཚིག་རྣམས་དང་། །མཐར་ཐུག་པ་དང་མཐར་ཕྱིན་དང་། །འབྲས་བུ་ཞེས་པ་གང་བྱུང་ཡང་། །དེ་མཚོན་ཚིག་ཏུ་བསྡུས་པ་ཡིན། །སོ་སོའི་གནས་སྐབས་ཤེས་པར་བྱ། །ཀྱེ་སེམས་དཔའ་ཆེན་པོ། གཟུང་འཛིན་གཉིས་སུ་འདོད་པ་ཉན་ཐོས་ལྟ་བར་བཤད། །འཛིན་པ་ཡོད་པས་གཟུང་དུ་མེད་དོ་ཟེར་ན་རང་རྒྱལ་ལྟ་བར་བཤད། །སེམས་དང་སེམས་ཀྱི་རྣམ་པར་སྨྲ་བ་དང་། །དོན་དམ་དང་ཀུན་རྫོབ་ཏུ་སྨྲ་ན། །བྱང་ཆུབ་སེམས་དཔའི་ལྟ་བར་བཤད། །དོན་དམ་ཐམས་ཅད་མཐུན་པ་ལ། །རིགས་གསུམ་འདོད་པ་ཀྲི་ཡའི་ལྟ་བར་བཤད། །ཆ་གཉིས་འདོད་པ་ཨུ་པ་ཡ་ཡི་ལྟ་བར་བཤད། །སེམས་དཔའ་རྩ་བདུན་འདོད་པའི་ཚིག་བྱུང་ན། །རྣལ་འབྱོར་ཡོ་གའི་ལྟ་བར་བཤད། །བཞི་བཅུ་རྩ་གཉིས་ལྔ་བཅུ་རྩ་བརྒྱད་སོགས། །མ་ཧཱ་ཡོ་གའི་བལྟ་བར་བཤད། །མ་བསྐྱེད་རྫོགས་པའི་ཚིག་ཚོགས་དང་། །དབྱིངས་དང་ཡེ་ཤེས་ཚིག་བྱུང་ན། །ཨ་ནུ་ཡོ་གའི་ལྟ་བ་ཡིན། །བྱ་རྩོལ་འདས་པའི་ཚིག་ཚོགས་དང་། །རང་བྱུང་ཡེ་ཤེས་ཚིག་རྣམས་དང་། །ལྷུན་གྲུབ་ཡེ་སངས་རྒྱས་ལ་སོགས། །འདི་རྣམས་རྫོགས་ ― DNG001_Page_0112 ―
[མ་དཔེ་གཟིགས་ན་འདིར་གནོན།]
ཆེན་ལྟ་བར་བཤད། །ཟུར་ཙམ་མདོར་བསྡུས་བསྟན་པ་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ལྟ་བའི་དོན་བཤད་པ་དང་མཚོན་པའི་ཚིག་བསྟན་པའི་ལེའུ་སྟེ་དོན་གཅིག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དགོངས་པ་བསྒོམ་པ་རྣམ་ཕྱེ་བ། །དེ་ཡི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ངོ་བོ་ངེས་ཚིག་དབྱེ་བ་དང་། །མཐུན་དཔེ་བརྗོད་པའི་ཚིག་ཏུ་བསྟན། །ངོ་བོ་གཅིག་ཏུ་གནས་པ་ཡིན། །བསྒོམ་པའི་ངེས་ཚིག་རྣམ་པ་བཞི། །དོན་ལ་དམིགས་པས་བསྒོམ་པ་ཡིན། །མ་ཡེངས་བས་ན་བསྒོམ་པ་ཡིན། །མི་འབྲལ་བས་ན་བསྒོམ་པ་ཡིན། །གོམས་ཤིང་འདྲིས་དང་མི་འཕྲོ་བའོ། །དབྱེ་བ་རྣམ་པ་གཉིས་སུ་བསྟན། །མཚན་བཅས་མཚན་མེད་གཉིས་ཡིན་ནོ། །མཚན་མེད་ལའང་གཉིས་ཡིན་ཏེ། །རྩོལ་བྲལ་ཆེན་པོའི་བསྒོམ་ཐབས་དང་། །རྩོལ་བ་བྲལ་བའི་བསྒོམ་པའོ། །མཚན་བཅས་ལའང་དེ་བཞིན་ནོ། །མདོར་ན་བསྐྱེད་རྫོགས་རྣམ་གཉིས་ཏེ། །བསྒོམ་པ་མཚོན་པའི་དཔེ་བཞི་སྟེ། །མར་ཁུ་སྡོང་བུ་གནས་པ་དང་། །ཆུ་དང་འོ་མ་འདྲེས་པ་དང་། །ནོར་བུ་ཆུ་དྭངས་ལྟ་བུ་དང་། །བུམ་པའི་མར་མེ་ལྟ་བུའོ། །ཀྱེ་གསང་བའི་བདག་པོ་ངེས་པར་ཟུང་ཞིག །དགོངས་པ་ཞེས་པ་གར་བྱུང་ཡང་། །བསྒོམ་པ་བསམ་གཏན་ཏིང་འཛིན་དང་། །མ་ཡེངས་མ་འཕྲོས་འདུ་འབྲལ་མེད། །གནས་དང་གོམས་དང་འདྲིས་པ་དང་། །དེ་རྣམས་གང་བྱུང་འབོད་སྐད་སྡེབས་ལ་བཤད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བསྒོམ་པའི་དོན་བཤད་པ་མཚོན་པའི་ཚིག་དང་བཅས་པའི་ལེའུ་སྟེ་དོན་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །བསྒོམ་མེད་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། །ལག་ན་རྡོ་རྗེས་ངེས་ཟུང་ཞིག །བསྒོམ་མེད་ངོ་བོ་ངེས་ཚིག་དང་། །དབྱེ་བ་མཐུན་དཔེ་བརྗོད་ཚིག་བཤད། །ངོ་བོ་རང་རིག་རྒྱུན་ཆད་མེད་པ་ཡིན། ། ― DNG001_Page_0113 ―
[མ་དཔེ་གཟིགས་ན་འདིར་གནོན།]
ཡིད་ལ་མི་བྱེད་དེ་ཡི་ཕྱིར་ན་བསྒོམ་དུ་མེད་པའི་ཚིག །ངང་གནས་མི་ཕྱེད་ཕྱིར་དང་བྱ་མི་དགོས་པའོ། །བསྒོམ་མེད་དབྱེ་བ་རྣམ་པ་གཉིས། །མཚན་བཅས་བསྒོམ་དུ་མེད་པ་དང་། །མཚན་མེད་བསྒོམ་དུ་མེད་པའོ། །རེ་རེ་ལའང་རྣམ་པ་གཉིས། །གཞི་ལ་བསྒོམ་དུ་མེད་པ་དང་། །རྟོགས་པས་བསྒོམ་དུ་མེད་པའོ། །མ་བསྒོམས་རྒྱུན་ཆད་མེད་པའི་དཔེ། །ཆུ་བོ་ལྟ་བུར་བསྟན་པ་ཡིན། །མ་བསྒོམས་དོན་དང་མི་འབྲལ་བས། །སྦྱོར་སྦྱིན་སྦྲང་མའི་འདབ་མ་བཞིན། །མ་བསྒོམས་ངང་གིས་གསལ་བ་ནི། །གསལ་གདངས་ཉི་མའི་སྙིང་པོ་འདྲ། །ཀྱེ་གསང་བའི་བདག་པོ་ངེས་ཟུང་ཞིག །ངས་བསྟན་རྒྱུད་ལུང་ཐམས་ཅད་ནས། །བསྒོམ་མེད་ཞེས་པའི་ཚིག་རྣམས་དང་། །གནས་མི་དགོས་པའི་ཚིག་རྣམས་དང་། །བསྒྲུབ་ཏུ་མེད་པའི་ཚིག་རྣམས་དང་། །འདུ་འབྲལ་མེད་པའི་ཚིག་རྣམས་དང་། །ངང་དྭངས་རང་བཞིན་བདག་ཉིད་ཆེན་པོ་དང་། །ཡེ་ནས་འདུ་འབྲལ་མེད་པ་དང་། །བྱ་རྩོལ་རྣམས་ལས་འདས་པ་དང་། །ལམ་ལ་བགྲོད་དུ་མེད་པ་དང་། །རྟོགས་པ་མངོན་གྱུར་སངས་རྒྱས་དང་། །རང་བྱུང་ཡེ་ཤེས་ཆེན་པོ་དང་། །ལྷུན་གྲུབ་ཡེ་སངས་རྒྱས་པ་དང་། །ཡིད་ལ་བྱ་རྒྱུ་མེད་པ་དང་། །དམིགས་པའི་ཡུལ་ལས་བྲལ་བ་དང་། །བསྒོམ་མེད་བློ་བཞག་ཅེས་པ་དང་། བསྒོམ་དུ་མེད་པའི་ཚིག་ཐམས་ཅད་ནི། འབོད་སྐད་ཀྱིས་བསྡེབས་ལ་ངས་འདིར་བསྟན་པ་བཞིན་དུ་ཤེས་པར་གྱིས་ཤིག །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བསྒོམ་མེད་དོན་བཤད་བརྗོད་པའི་ཚིག་དང་བཅས་པ་བསྟན་པའི་ལེའུ་སྟེ་དོན་གསུམ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་ཐབས་ལ་མཁས། །སྤྱོད་པའི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། གསང་བའི་བདག་པོ་ལེགས་པར་ཟུང་ཞིག །སྤྱོད་པའི་ངོ་བོ་ངེས་ཚིག་དང་། དབྱེ་བ་མཐུན་དཔེ་བརྗོད་ཚིག་དང་། བསྡུས་ཏེ་བརྗོད་པའི་དོན་བཤད་པ། སྤྱོད་པའི་ངོ་བོ་ནི། སྤྱོད་པ་མ་འགགས་པར་དོན་ལ་སྦྱོར་བའོ། །སྤྱོད་པའི་ངེས་ཚིག་ནི་དོན་སོ་སོ་དང་མཐུན་པར་འཇུག་ཅིང་ལོངས་སྤྱོད་པས་ནའོ། །དབྱེ་ ― DNG001_Page_0114 ―
[མ་དཔེ་གཟིགས་ན་འདིར་གནོན།]
ན་རྣམ་པ་གཉིས་ཡིན་ཏེ། བླང་དོར་ཡོད་ཅེས་སྤྱོད་པ་དང་། །བླང་དོར་མེད་ཅེས་སྤྱོད་པའོ། །དཔེ་ནི་སྣ་ཚོགས་སྒྱུ་མའི་གར་མཁན་ལྟ་བུ་དང་། །གང་ལྟར་ཡང་བདེ་དོན་ལ་སྦྱོར་ཤེས་པའི་དཔེ། བཟོ་བོ་མཁས་པའི་སྐྱེས་བུ་ལག་གི་འདུ་བྱེད་མཁན་ལྟ་བུའོ། །ཀྱེ་གསང་བའི་བདག་པོ། ངས་བསྟན་རྒྱུད་ལུང་ཐམས་ཅད་ནས། །སྤྱོད་པ་དང་ནི་ཕྲིན་ལས་དང་། །བྱ་བ་བྱེད་པའི་ཚིག་རྣམས་དང་། །རྣལ་འབྱོར་རབ་འབྲིང་ཐ་མ་དང་། །གཞི་ལམ་འབྲས་བུའི་སྤྱོད་པ་རྣམས། །གང་བྱུང་ཡང་ངས་བསྟན་པ་བཞིན་དུ་སྤྱོད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྤྱོད་པ་བསྡུས་ནས་བསྟན་པའི་ལེའུ་སྟེ་དོན་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །འབྲས་བུའི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ཀྱེ་རྡོ་རྗེ་འཛིན་པ་ལེགས་པར་ཟུང་ཞིག །འབྲས་བུའི་ངོ་བོ་ངེས་ཚིག་དང་། །དབྱེ་བ་མཐུན་དཔེ་བརྗོད་ཚིག་རྣམས། །བསྡུས་པ་ང་ཡིས་ངེས་པར་བཤད། །འབྲས་བུའི་ངོ་བོ་ནི། སོ་སོའི་ལྟ་བ་ཡོངས་སུ་རྫོགས་པའོ། །ངེས་ཚིག་ནི། གྲོལ་སྨིན་རྫོགས་མཐར་ཕྱིན་ཕྱིར་མི་ལྡོག་པའོ། །དབྱེ་ན་ཟག་བཅས་ཟག་པ་མེད་པའོ། །རིམ་བཞིན་གཅིག་ཆར་རྫོགས་པའི་དཔེ། །ཤིང་ཏོག་ལོ་ཏོག་སྨིན་པ་འམ། །ཨུ་དུམ་ཝ་རའི་འབྲས་བུ་བཞིན། །ཀྱེ་གསང་བདག་ངེས་པར་ཟུང་ཞིག །ངས་བསྟན་རྒྱུད་ལུང་ཐམས་ཅད་དུ། །སོ་སོའི་འབྲས་བུ་གང་བྱུང་ཡང་། །འདིར་བསྟན་བཞིན་དུ་ཤེས་པར་བྱ། །འབྲས་བུ་མཚོན་པའི་ཚིག་ཚོགས་ནི། །མཐར་ཕྱིན་པ་དང་རྫོགས་པ་དང་། །སྨིན་པ་དང་ནི་གྲུབ་པ་དང་། །གྲོལ་དང་ཕྱིར་མི་ལྡོག་ལ་སོགས། །དང་པོ་དགྲ་བཅོམ་ཞེས་པ་ནས། །ཐ་མ་རང་ས་ཟིན་པ་དག །ངས་བསྟན་བཞིན་དུ་ཤེས་པར་གྱིས། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འབྲས་བུའི་དོན་བཤད་པའི་ལེའུ་སྟེ་དོན་ལྔ་པའོ།། །།ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལྟ་སྒོམ་སྤྱོད་པ་ཡོངས་རྫོགས་པའི། །ཐེག་པ་དགུ་ཡི་མིང་གི་ངེས་ཚིག་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། སོ་སོའི་ངེས་ཚིག་ནི། །ངས་བསྟན་ཁྱོད་ཀྱིས་ཡིད་ལ་ཟུང་། །སྟོན་པས་གསུངས་པའི་དོན་ཚིག་རྣམས། ། ― DNG001_Page_0115 ―
[མ་དཔེ་གཟིགས་ན་འདིར་གནོན།]
རྣ་བའི་དབང་པོས་ཉན་ཞིང་ཡིད་ཀྱི་དབང་པོས་ཐོས། །རང་རིག་ཁོང་ནས་མི་འཆར་བ། །སྟོན་པའི་གསུང་ལ་རག་ལུས་པ། །དེ་དོན་གཞན་ལ་སྒྲོག་བྱེད་པ། །ཉན་ཐོས་མིང་གི་ངེས་ཚིག་ཡིན། །སྟོན་པ་གཞན་ལ་མི་ལྟོས་པར། །གོམས་པའི་མཐུ་ཡིས་བསྒྲུབས་པས་རང་སངས་རྒྱས། །རང་རྒྱལ་མིང་གི་ངེས་ཚིག་ཡིན། །སྤངས་དང་ཡེ་ཤེས་ཐུགས་རྗེ་དང་། །ཕྲིན་ལས་ཕུན་སུམ་ཚོགས་ལྡན་པས། །བྱང་ཆུབ་སེམས་དཔའི་མིང་གི་ངེས་ཚིག་ཡིན། །ཁྲུས་དང་གཙང་སྦྲ་གཟའ་དང་རྒྱུ་སྐར་གཙོར་བཏོན་པ། །ཀྲི་ཡའི་མིང་གི་ངེས་ཚིག་ཡིན། །སྤྱོད་པ་མས་འཛེགས་ལྟ་བ་ཡས་འབུབ་པས། །ཨུ་པ་ཡ་ཡི་མིང་གི་ངེས་ཚིག་ཡིན། །རིགས་བཞིའི་སངས་རྒྱས་དོན་གྱི་རྣལ་མ་ལ། །རང་གི་ལུས་ངག་ཡིད་གསུམ་སྦྱོར་ཞིང་གཞན་དོན་བྱེད། །ཡོ་གའི་མིང་གི་ངེས་ཚིག་ཡིན། །ཏིང་འཛིན་རྣམ་གསུམ་ཐབས་དང་ཤེས་རབ་གཙོར་བཏོན་པས། །དོན་ལ་འཇུག་ཕྱིར་མ་ཧཱ་ཡོ་གའི་མིང་གི་ངེས་ཚིག་ཡིན། །མ་བསྐྱེད་རྫོགས་དང་དེ་ཡི་དོན་ལ་འཇུག་པའི་ཕྱིར། །རྫོགས་པ་ཨ་ནུའི་མིང་གི་ངེས་ཚིག་ཡིན། །སྣང་ཞིང་སྲིད་པའི་ཆོས་རྣམས་ཀུན། །ཆོས་སྐུ་ཡེ་ནས་རྫོགས་སངས་རྒྱས། །གཉིས་མེད་ཚུལ་གྱིས་འཇུག་པ་ནི། །རྣལ་འབྱོར་རྫོགས་ཆེན་མིང་གི་ངེས་ཚིག་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཐེག་པ་སོ་སོའི་ངེས་ཚིག་དང་། གཏན་ཚིགས་བསྟན་པའི་ལེའུ་སྟེ་དོན་དྲུག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཐེག་པ་དགུ་ཡི་ཁྱད་པར་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་ཟུང་ཞིག །མ་རྟོགས་ལོག་རྟོགས་གཉིས་ལས་ཉན་ཐོས་འཕགས། །དེ་ཡང་ཅི་ལྟར་འཕགས་ཞེ་ན། །གང་ཟག་བདག་མེད་རྟོགས་པས་ལྟ་བ་འཕགས། །དགེ་བཅུ་རང་གིས་དོན་དུ་སྤྱོད་པས་སྤྱོད་པ་འཕགས། །བདེན་པ་བཞི་ཡི་སྒོ་ནས་བསྒྲུབ་པས་སྒྲུབ་པ་འཕགས། །དགྲ་བཅོམ་ལ་སོགས་ཟུང་བཞི་ཡ་བརྒྱད་ཐོབ་པས་འབྲས་བུ་འཕགས། །ཉན་ཐོས་དག་ལས་རང་རྒྱལ་འཕགས་པ་ཡང་། །གཟུགས་ཕུང་ཆོས་ཁམས་ཕྱོགས་གཅིག་ལ། །བདག་མེད་རྟོགས་པའི་ལྟ་བ་འཕགས། །དགེ་བཅུའི་སྟེང་དུ་རྫུ་ ― DNG001_Page_0116 ―
[མ་དཔེ་གཟིགས་ན་འདིར་གནོན།]
འཕྲུལ་ཡ་མ་ཟུང་འགའ་ཡིས། །འགྲོ་དོན་མཛད་ཤས་ཙམ་པས་སྤྱོད་པ་འཕགས། །དགེ་བའི་བཤེས་གཉེན་མི་བསྟེན་པར། །གོམས་པའི་ཤུགས་ཀྱིས་བསྒྲུབ་པས་སྒྲུབ་པ་འཕགས། །ནེ་ཙོ་བསེ་རུ་ལྟ་བུའི་འབྲས་བུ་ཁྱད་པར་འཕགས། །རང་རྒྱལ་དག་ལས་བྱང་སེམས་འཕགས་པ་ཡང་། །བདག་མེད་རྣམ་གཉིས་རྟོགས་པས་ལྟ་བ་འཕགས། །ཚད་མེད་བསྡུ་བ་རྣམ་བཞིས་དོན་མཛད་སྤྱོད་པ་འཕགས། །ཕ་རོལ་ཕྱིན་བཅུ་བསྒྲུབ་པས་སྒྲུབ་པ་འཕགས། །ཀུན་ཏུ་འོད་ཀྱི་ས་ནོན་འབྲས་བུ་འཕགས། །བྱང་སེམས་དག་ལས་ཀྲི་ཡ་འཕགས་པ་སྟེ། །དོན་དམ་སྐྱེ་བ་མེད་པར་རབ་རྟོགས་ཏེ། །ཀུན་རྫོབ་བདག་དང་ཡེ་ཤེས་ལྷ། །རྗེ་འབངས་ལྟ་བུར་བལྟ་བས་ལྟ་བ་འཕགས། །དག་པ་རྣམ་གསུམ་སྤྱོད་པས་སྤྱོད་པ་འཕགས། །གོམས་དང་བསྒྱུར་དང་བྱིན་རླབས་སྒོ་ནས་བསྒྲུབ་པས་སྒྲུབ་པ་འཕགས། །རིགས་གསུམ་འབྲས་བུ་ཐོབ་པས་འབྲས་བུ་འཕགས། །ཀྲི་ཡ་དག་ལས་ཨུ་པ་ཡ་འཕགས་ཏེ། །ལྷ་དང་དཔོན་གཡོག་བལྟ་བས་ལྟ་བ་འཕགས། །མཚན་མ་ཡོད་མེད་བསྒོམས་ནས་འགྲོ་དོན་མཛད་པས་སྤྱོད་པ་འཕགས། །དེ་ཁོ་ན་ཉིད་བཞི་ཡི་སྒོ་ནས་བསྒྲུབ་པས་སྒྲུབ་པ་འཕགས། །རིགས་བཞིའི་འབྲས་བུ་ཐོབ་པས་འབྲས་བུ་ཁྱད་པར་འཕགས། །ཨུ་པ་ཡ་ལས་ཡོ་ག་འཕགས་པ་ཡང་། །ཀུན་རྫོབ་ལྷ་དང་གྲོགས་པོར་བལྟ་བས་ལྟ་བ་འཕགས། །ཕྲིན་ལས་རྣམ་བཞི་སྤྱོད་པས་སྤྱོད་པ་འཕགས། །ཕྱག་རྒྱ་རྣམ་བཞི་བསྒྲུབ་པས་སྒྲུབ་པ་འཕགས། །རིགས་ལྔའི་སངས་རྒྱས་ཉིད་དུ་བསྒྲུབ་པས་འབྲས་བུ་འཕགས། །ཡོ་ག་དག་ལས་མ་ཧཱ་བཞིས་འཕགས་ཏེ། །རང་ལུས་རྒྱལ་བའི་དཀྱིལ་འཁོར་བལྟ་བས་ལྟ་བ་འཕགས། །སྦྱོར་སྒྲོལ་གཉིས་ཀྱིས་འགྲོ་དོན་མཛད་པས་སྤྱོད་པ་འཕགས། །ཐབས་དང་ཤེས་རབ་གཉིས་ཀྱི་སྒོ་ནས་བསྒྲུབ་པས་སྒྲུབ་པ་འཕགས། །ཀུན་ཏུ་འོད་ཀྱི་ས་ནོན་འབྲས་བུ་འཕགས། །མ་ཧཱ་དག་ལས་ཨ་ནུ་བཞིས་འཕགས་ཏེ། །དབྱིངས་དང་ཡེ་ཤེས་གཉིས་མེད་རྟོགས་པས་ལྟ་བ་འཕགས། །དབྱིངས་ཀྱི་ལོངས་སྤྱོད་ཡེ་ཤེས་དག་ལས་སྤྱོད་པ་དང་། །ཡེ་ཤེས་ལོངས་སྤྱོད་དབྱིངས་ལ་སྤྱོད་པས་སྤྱོད་པ་འཕགས། །ཕུང་པོ་ལྔ་དང་འབྱུང་ལྔ་ ― DNG001_Page_0117 ―
[མ་དཔེ་གཟིགས་ན་འདིར་གནོན།]
རིགས་ལྔ་ཡབ་ཡུམ་བསྒྲུབ་པས་སྒྲུབ་པ་འཕགས། །མ་ཆགས་པདྨ་ཅན་གྱི་ས་ཐོབ་འབྲས་བུ་འཕགས། །ཨ་ནུ་དག་ལས་ཨ་ཏི་བཞིས་འཕགས་ཏེ། །སྣང་སྲིད་ཐམས་ཅད་ཆོས་སྐུའི་སངས་རྒྱས་བལྟ་བས་ལྟ་བ་འཕགས། །ཆོས་སྐུའི་བྱིན་བརླབས་སྒོ་ནས་འགྲོ་དོན་མཛད་པས་སྤྱོད་པ་འཕགས། །བྱ་རྩོལ་མེད་པར་བསྒྲུབ་པས་སྒྲུབ་པ་འཕགས། །བཅུ་གསུམ་འཁོར་ལོ་ཚོགས་ཆེན་ཡན་ཆད་ནས། །ཉི་ཤུ་རྩ་གཅིག་མན་ཆད་ས་ནོན་འབྲས་བུ་འཕགས། །ཀྱེ་རིགས་ཀྱི་བུ། ངས་བསྟན་རྒྱུད་ལུང་ཐམས་ཅད་དུ། །འཕགས་པ་འཕགས་ཆེན་ཨ་ནུ་དང་། །གོང་འོག་ཤན་དབྱེ་གང་བྱུང་བ། །འདིར་བཤད་བཞིན་དུ་ཤེས་པར་གྱིས། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཐེག་པ་བརྒྱད་ཀྱི་འཕགས་ལུགས་བསྡུས་ནས་བསྟན་པའི་ལེའུ་སྟེ་དོན་བདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །འཕགས་པའི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ངས་བཤད་ཁྱོད་ཀྱིས་ལེགས་པར་ཟུང་། །འཕགས་པའི་ངོ་བོ་ངེས་ཚིག་དང་། །དབྱེ་བ་ཞེས་བྱ་འཕགས་པའི་དཔེ། །རྣམ་པ་བཞི་རུ་བསྡུས་ལ་བཤད། །འཕགས་པ་དག་གི་ངོ་བོ་ནི། །ཁྱད་པར་དོན་ཆེན་མཆོག་གྱུར་པའོ། །འཕགས་པ་དག་གི་ངེས་ཚིག་ནི། །མི་གནས་རིང་པོར་གང་གྱུར་ཕྱིར། །ངེས་ཚིག་གཏན་ཚིགས་བཅས་པ་ཡིན། །དབྱེ་བ་རྣམ་པ་གཉིས་ཡིན་ཏེ། །གནས་སྐབས་འགྱུར་བས་འཕགས་པ་དང་། །འགྱུར་མེད་མཐར་ཐུག་འཕགས་པའོ། །རེ་རེ་ལའང་བཞི་བཞི་སྟེ། །ལྟ་སྤྱོད་སྒྲུབ་དང་འབྲས་བུའོ། །དཔེ་ནི་མཆོད་རྟེན་ཁྲི་འཕང་བཞིན། །ཨ་ཏི་མ་འདྲེས་ཡོངས་སུ་རྫོགས། །གཉིས་མེད་ཆོས་སྐུ་དབྱེར་མེད་ཤེས་རབ་ལ། །བཟང་ངན་ཆེ་ཆུང་མཐོ་དམན་མི་གནས་ཀྱང་། །བློ་དང་སྦྱར་ནས་དྲང་བའི་ཐབས་སུ་བསྟན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འཕགས་པའི་དོན་བཤད་པའི་ལེའུ་སྟེ་དོན་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྤྲོས་བྲལ་འཕགས་པ་ཆེ་བ་སྟེ། །ཆེ་ ― DNG001_Page_0118 ―
[མ་དཔེ་གཟིགས་ན་འདིར་གནོན།]
བའི་བྱེ་བྲག་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། །རྡོ་རྗེ་འཛིན་པ་ངེས་ཟུང་ཞིག །གནས་སྐབས་འགྱུར་བའི་ཆེ་བ་རྣམས། །ཐེག་པ་སོ་སོའི་ཆེ་བ་ཡིན། །མཐར་ཐུག་ཆེན་པོ་རྣམ་པ་ལྔ། །ཡེ་ནས་འདུ་འབྲལ་མེད་པ་ནི། །ཕུན་སུམ་ཚོགས་པ་རྣམ་པ་ལྔས། །མངོན་པར་སངས་རྒྱས་ཆེ་བ་དང་། །བཞུགས་གནས་དབྱིངས་ཀྱི་མཚན་ཉིད་ལྔས། །ཆོས་དབྱིངས་སངས་རྒྱས་ཆེ་བ་དང་། །བདག་ཉིད་ཆེན་པོ་རང་ལ་རྫོགས་པ་ཡིས། །བདག་ཉིད་སངས་རྒྱས་ཆེ་བ་དང་། །གཏན་ལ་འབེབས་པའི་ཐབས་ཆེན་ལྔས། །དེ་ཉིད་སངས་རྒྱས་ཡིན་པས་ཆེ་བ་དང་། །དྲི་མེད་རྣམ་པ་ལྔ་ཡིས་འཕགས་པས་ཆེ་བ་དང་། །ཐམས་ཅད་སངས་རྒྱས་པས་ནི་ཆེ་བ་རྣམ་ལྔ་ཡིན། །ཞེས་གསུངས་སོ། །ཡང་གསང་བའི་བདག་པོས་ཞུས་པ། །ཀྱེ་ཀྱེ་བཅོམ་ལྡན་རྡོ་རྗེ་འཆང་། །མངོན་པར་སངས་རྒྱས་ཆེ་བ་ཇི་ལྟར་ལགས། །ཞུས་པས། སྟོན་པས་བཀའ་སྩལ་པ། བདག་མེད་སྐུ་ནི་སྟོན་པ་ཆེ། །རང་རིག་ཡེ་ཤེས་བསྟན་པ་ཆེ། །མ་བྲིས་དཀྱིལ་འཁོར་གནས་སུ་ཆེ། །སྲོག་མེད་སྐུ་ལྔ་འཁོར་དུ་ཆེ། །ཡེ་ནས་ལྷུན་གྲུབ་དུས་སུ་ཆེ། །ཞེས་གསུངས་སོ། །ལག་ན་རྡོ་རྗེས་ཞུས་པ། ཆོས་དབྱིངས་སངས་རྒྱས་ཆེ་བ་ཇི་ལྟར་ལགས། །ཞེས་ཞུས་སོ། །ཡང་སྟོན་པས་བཀའ་སྩལ་པ། ཆོས་སྐུའི་དཀྱིལ་འཁོར་བཞུགས་པའི་གདན། །རྣམ་དག་དབྱིངས་ཀྱི་ཐིག་ལེ་ལ། །གཅིག་ལ་མཚན་ཉིད་ལྔ་དང་ལྡན། །འགྱུར་བ་མེད་པ་རྡོ་རྗེའི་དབྱིངས། །ཡོན་ཏན་སྡུད་པ་རིན་ཆེན་དབྱིངས། །དྲི་མ་མེད་པ་པདྨའི་དབྱིངས། །ཐོགས་མེད་བསྟན་པས་ལས་ཀྱི་དབྱིངས། །མ་བསྒྲིབས་གསལ་ཁྱབ་ནམ་མཁའི་དབྱིངས། །རང་རིག་ཡེ་ཤེས་གདངས་ཤར་བས། །ཡེ་ཤེས་དབང་གི་བུམ་པ་ལྔ། །སྐྱེ་མེད་ཀློང་ནས་འགག་པ་མེད། །དེ་ཡི་ངང་ལ་འདུ་འབྲལ་མེད། །ས་ཆུ་མེ་རླུང་ནམ་མཁའ་ལྔ། །དེ་ཡི་རྩལ་དུ་སྣང་བ་སྟེ། །ཆོས་ཉིད་ལྔ་རུ་ཡེ་སངས་རྒྱས། །ཡེ་ཤེས་ལྔ་དང་སྐུ་གསུམ་གྱི། །བཞུགས་པའི་གནས་ཏེ་ཀུན་ལས་ཁྱད་པར་འཕགས། །ས་ཆུ་མེ་རླུང་རྣམ་པར་དག་པས་ཆེ། །ཞེས་གསུངས་སོ། །ལག་ན་རྡོ་རྗེས་ཡང་ཞུས་ ― DNG001_Page_0119 ―
[མ་དཔེ་གཟིགས་ན་འདིར་གནོན།]
པ། བདག་ཉིད་སངས་རྒྱས་ཆེ་བ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། སྤྲུལ་སྐུའི་སྣོད་གྱུར་འབྱུང་བ་ལྔ། །རང་ལས་བྱུང་བའི་ཆོས་ཉིད་པས། །ལས་ལ་མ་རྨོངས་ཐབས་ཀྱིས་ཞི། །གཟུང་འཛིན་མི་གནས་རྣམ་པར་དག །བདག་ཉིད་ངང་དུ་མངོན་སངས་རྒྱས་པས་ཆེ། །ཕུང་པོ་ལྔ་རྣམས་སྣང་བ་ཡང་། །རིགས་ལྔའི་སངས་རྒྱས་རྣམས་ཀྱི་སྐུ། །སྐུ་ལྔ་རིན་ཆེན་འོད་དུ་འབར། །མ་བཙལ་རང་ལ་ཡེ་ནས་ལྷུན་གྱིས་གྲུབ། །ཡེ་ཤེས་རང་སྣང་ཡིན་པས་ཆེ། །རྣམ་ཤེས་བརྒྱད་དུ་བལྟ་བ་སྣང་བ་ཡང་། །སེམས་དཔའ་བརྒྱད་དུ་རང་ལ་རྫོགས། །གཞན་མ་ཡིན་པར་རང་སྣང་ཡིན་པས་ཆེ། །རྣམ་པར་ཤེས་པའི་ཡུལ་བརྒྱད་ཀྱང་། །རང་ལ་སྣང་བའི་སེམས་མ་བརྒྱད། །མ་བཙལ་རང་ལ་ལྷུན་གྱིས་གྲུབ། །ཡེ་ཤེས་རང་སྣང་ཡིན་པས་བདག་ཉིད་ཆེ། །རང་ལས་བྱུང་ཞིང་རང་ལས་སྣང་། །རང་སྣང་ཡིན་པས་ཡུལ་དང་བྲལ། །ཡུལ་མེད་རང་སྣང་ཆེན་པོ་ལ། །བགྲོད་དུ་མེད་པས་ཀུན་ལས་ཆེ། །རང་ཆས་ཡིན་པས་བཙལ་དུ་མེད། །མ་བཙལ་ལྷུན་གྱིས་གྲུབ་པས་ཆེ། །རང་ལ་རང་ཆས་གྲུབ་པས་ན། །མ་བསྒྲུབས་རྩོལ་བསྒྲུབ་འདུས་པས་ཆེ། །རང་སྣང་རྟོགས་པའི་དོན་དེ་ལ། །འདུ་འབྲལ་མེད་པའི་ཆེ་བའོ། །མི་འགྱུར་བ་ལ་སྦྱངས་དུ་མེད་པས་ཆེ། །བགྲོད་མེད་ལམ་ལ་དམིགས་སུ་མེད་པས་ཆེ། །ཆོས་རྣམས་ཐམས་ཅད་བདག་ཉིད་དེ། །འོག་མ་དག་གིས་ཤེས་པ་མེད། །དེས་ན་བདག་ཉིད་ཆེན་པོར་བཤད། །ཅེས་གསུངས་སོ། །གསང་བའི་བདག་པོས་ཡང་ཞུས་པ། དེ་ཉིད་སངས་རྒྱས་ཡིན་པས་ཆེ་བ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། དེ་ལྟར་གཏན་ལ་འབེབས་པ་ནི། །མཚོན་པའི་བརྡ་བཞི་ཀུན་ལས་འཕགས་པའི་དཔེ་རུ་ཆེ། །སྐུ་གསུམ་འདུ་འབྲལ་མེད་པས་དོན་དུ་ཆེ། །རྒྱང་ཞགས་ཆུ་ལ་ཡེ་ཤེས་སྣང་བ་གསལ་བས་རྟགས་སུ་ཆེ། །བརྡ་བཞི་དཔེ་རུ་ཡིན་པར་ངེས། །སྐུ་གསུམ་འདུ་འབྲལ་མེད་པ་དོན་དུ་ངེས། །ཡེ་ཤེས་སྒྲོན་མ་རྟགས་སུ་ངེས། །དེ་བས་ངེས་པ་གསུམ་གྱིས་ཆེ། །དང་པོ་སྟོན་པ་ལ་སོགས་ཚོགས་ནས་གཏན་ལ་ཕབ་པས་གཏན་ཚིགས་ལྔ་ཡིས་ཆེ། །ཞེས་གསུངས་སོ། །ལག་ན་རྡོ་རྗེས་ཡང་ཞུས་པ། ཐམས་ཅད་སངས་རྒྱས་ ― DNG001_Page_0120 ―
[མ་དཔེ་གཟིགས་ན་འདིར་གནོན།]
པས་ནི་ཆེ་བ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རང་རིག་འགྱུར་མེད་ཆོས་སྐུ་ལ། །ངོས་གཟུང་མེད་པས་བསམ་ལས་འདས། །བསྒོམ་དུ་མེད་པས་ཁྱད་པར་འཕགས། །ཆོས་སྐུ་དངོས་མེད་ཟང་ཐལ་ལ། །དམིགས་པར་བྱ་བའི་ཡུལ་མེད་པས། །གཉིས་སུ་མེད་པར་ཁྱད་པར་འཕགས། །རིག་པ་དངོས་མེད་ཞི་བ་ལས། །སྤྲོས་པའི་དངོས་མེད་མཚན་མ་མེད། །རང་གདངས་ཆེན་པོ་འཕགས་ཏེ་ཆེ། །རང་རིག་ཆོས་སྐུ་གཉིས་མེད་ཆེན་པོ་ལ། །མཚོན་དུ་མེད་པས་འཕགས་ཏེ་ཆེ། །ཆོས་སྐུ་རང་བྱུང་ཡེ་ཤེས་ལ། །རྒྱུ་རྐྱེན་མེད་པས་འདུས་བྱས་མེད། །འགྱུར་བ་མེད་པས་འཕགས་ཏེ་ཆེ། །རང་རིག་དྲི་མ་ལྔ་དང་བྲལ་བས་ཐམས་ཅད་ཡེ་སངས་རྒྱས། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཐེག་པ་བརྒྱད་ལས་ཆེ་བ་ལྔས་འཕགས་པའི་ལེའུ་སྟེ་དོན་དགུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཐེག་པ་རིམ་དགུའི་བྱེ་བྲག་རྣམས། །གདུལ་བྱའི་ཡུལ་དང་སྦྱར་ནས་གསུངས། །དེ་ཡི་གོལ་སྒྲིབ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། །རྡོ་རྗེ་འཛིན་པ་ལེགས་པར་ཟུང་ཞིག །ཐེག་པ་དགུ་ཡི་གོལ་སྒྲིབ་རྣམས། །དབྱེ་ན་བསམ་གྱིས་མི་ཁྱབ་སྟེ། །བསྡུ་ན་སུམ་ཅུ་རྩ་དྲུག་ཡོད། །ལྟ་སྒོམ་སྤྱོད་པ་འབྲས་བུ་བཞི། །མཚན་ཉིད་སྡེ་གསུམ་སྒྲིབ་པ་མང་། །སུམ་ཅུ་རྩ་དྲུག་རྩ་གཉིས་དང་། །རྩ་བརྒྱད་གསུམ་ལ་རིམ་པ་ཡོད། །གོལ་ས་བཅུ་གཉིས་བརྒྱད་དང་བཞི་གནས་སོ། །ཕྱི་པ་སྡེ་གསུམ་གོལ་སྒྲིབ་མཉམ། །སྒྲིབ་པ་བཅུ་གཉིས་མུན་པས་ཆོད། །ལྟུང་ས་གོལ་ས་བཅུ་གཉིས་ཡོད། །ནང་པ་སྡེ་གཉིས་གོལ་ས་མང་། །སོ་གཉིས་རྩ་བརྒྱད་རིམ་པར་ཡོད། །སྒྲིབ་པ་བཅུ་དང་དྲུག་ཏུ་གནས། །རྫོགས་ཆེན་ཐིག་ལེ་ཉག་གཅིག་ལ། །གོལ་དང་མ་གོལ་གཉིས་སུ་མེད། །གོལ་ས་རང་བཞིན་རྣམ་པར་དག །ཀུན་བྲལ་ཉག་གཅིག་སྤྱིར་མ་སྤངས། །ཨ་ཏིའི་ལྟ་སྒོམ་སྤྱོད་པ་དང་། །འབྲས་བུ་ཡེ་ནས་གཉིས་མེད་པས། །གཉིས་སུ་སྣང་བའི་གོལ་སྒྲིབ་མེད། །ལྟ་སྒོམ་སྤྱོད་པ་འབྲས་བུ་བཞི། །ཡེ་ནས་རང་བྱུང་ཡེ་ ― DNG001_Page_0121 ―
[མ་དཔེ་གཟིགས་ན་འདིར་གནོན།]
ཤེས་གསལ། །རྒྱུ་རྐྱེན་འདུས་པའི་གོལ་སྒྲིབ་མེད། །རྫོགས་ཆེན་ལྟ་བ་སྒོམ་པ་དང་། །སྤྱོད་པ་འབྲས་བུ་ལྷུན་གྲུབ་པས། །སྒོམ་སྒྲུབ་རྩོལ་བསྒྲུབ་རེ་དོག་རྩོལ་བ་ཡི། །གོལ་ས་སྒྲིབ་པ་རྣམ་པར་དག །ང་ཡི་གོང་ན་གཞན་མེད་པས། །སྒྲིབ་མེད་གསལ་བ་ཡེ་ཤེས་ཡིན། །ཐེག་བརྒྱད་འོག་མ་སྣང་བ་ཡང་། །ང་ཡི་ཐུགས་རྗེའི་མཛད་སྤྱོད་ཡིན། །འབྱེད་མེད་ཤེས་རབ་ངང་ལ་གནས། །ངང་ལས་མ་འདྲེས་རྫོགས་པའི་ཡེ་ཤེས་པས། །ལྟུང་བའི་གོལ་ས་རྣམ་པར་དག །འབྱེད་པ་མེད་པའི་ཤེས་རབ་རང་གསལ་ལ། །གོལ་ས་སྒྲིབ་པ་གཉིས་སུ་དབྱེར་མེད་གསལ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གོལ་སྒྲིབ་ཐེག་པ་བརྒྱད་ལ་ཡོད་པར་བསྟན་པ་དང་། ཨ་ཏི་ལ་གོལ་སྒྲིབ་མེད་པར་བསྟན་པའི་ལེའུ་སྟེ་བརྒྱད་ཅུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གོལ་སྒྲིབ་དོན་བཤད་གསུང་དུ་གསོལ། །ཞེས་ཞུས་པས། སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ངོ་བོ་ངེས་ཚིག་དབྱེ་བ་དང་། །མཚོན་དཔེ་ཚིག་དང་བཅས་ནས་བསྟན། །གོལ་སྒྲིབ་ངོ་བོ་མ་རིག་པ། །གོལ་སྒྲིབ་ངེས་ཚིག་བསྟན་པ་ནི། །གོང་མའི་དོན་མ་མཐོང་བས་སྒྲིབ་པ་ཡིན། །གོང་མས་འོག་མའི་དོན་སྤྱོད་གོལ་བ་ཡིན། །དེ་ཕྱིར་གོལ་སྒྲིབ་མིང་གི་ངེས་ཚིག་ཡིན། །གོལ་སྒྲིབ་དབྱེ་ན་རྣམ་གྲངས་ཏེ། །བསྡུ་ན་རྣམ་པ་བཞི་ཡིན་ནོ། །ལྟ་སྒོམ་སྤྱོད་པ་འབྲས་བུ་བཞི། །རེ་རེ་ལའང་གོལ་སྒྲིབ་གཉིས། །གོལ་སྒྲིབ་མཚོན་པའི་དཔེ་རུ་བསྟན། །བྱང་དུ་དོན་གཉེར་ལྷོ་རུ་ཕྱིན། །ལྷོར་ཕྱིན་བྱང་གི་དོན་མི་འགྲུབ། །གོང་མའི་དོན་འདོད་འོག་མ་སྤྱད། །འོག་མས་གོང་མའི་དོན་མི་གཉེར། །ཅེས་གསུངས་སོ། །ཀྱེ་རིགས་ཀྱི་བུ། ངས་བསྟན་རྒྱུད་ལུང་ཐམས་ཅད་དུ། །ནོར་ཞེས་ཟེར་ན་དེ་སྐད་བཤད། །མ་ཤེས་མ་རྟོགས་བྱུང་ན་དེ་སྐད་བཤད། །གོལ་ས་སྒྲིབ་པ་བྱུང་ན་དེ་ལྟར་བརྗོད། །གོལ་སྒྲིབ་མེད་པར་བཤད་ན་དེ་སྐད་བཤད། །གཞན་ཡང་འབོད་སྐད་ངག་གི་ཁོག་སྡེབས་ལ། །དོན་གསལ་ནང་འདིར་བསྟན་པ་བཞིན་དུ་སྤྱད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གོལ་ས་བཤད་པ་དང་མཚོན་ཚིག་བསྡུས་པ་བསྟན་པའི་ལེའུ་སྟེ་གྱ་གཅིག་པའོ།། །།དཀོར་མཛོད་གསུམ་ ― DNG001_Page_0122 ―
[མ་དཔེ་གཟིགས་ན་འདིར་གནོན།]
གྱི་སྒོ་ཕྱེ་ནས། གསལ་ཤིང་སྒྲོན་མེས། རྒྱལ་བློན་དམངས་དང་གསུམ་གྱིས་ནོར་འབྱིན་ཅིང་མུན་པ་སེལ་པའི་མན་ངག །ཏནྟྲ་ཨ་ནུ་ཨུ་པ་ཨརྟ་ཀ་ལ་ས་ཏཱ་ཧཱུཾ། དེའི་ཚེ་བཅོམ་ལྡན་འདས་གསང་བ་བླ་ན་མེད་པ་མཚོན་པའི་དགོངས་པ་ལ་བཞུགས་སོ། །དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་དོན་གསལ་མཁྱེན། །ཐེག་པ་སྤྱི་ཡི་མཚན་ཉིད་དང་། །རང་གི་དོན་རྣམས་དེ་ལྟར་ན། །རང་དོན་མ་ལུས་ཀུན་བཤད་པའི། །རྒྱུད་ལུང་མན་ངག་ཇི་ལྟར་བཤད། །རྒྱུད་ཀྱི་ལྡང་ཚད་ཇི་ལྟར་ལགས། །དེ་ཡི་ནང་ནས་གསུངས་པ་ཡི། །སྦྱང་བ་མེད་པའི་ས་རྣམས་དང་། །བགྲོད་དུ་མེད་པའི་ལམ་རྣམས་དང་། །སྤྱད་མི་དགོས་པའི་ཕ་རོལ་ཕྱིན་པ་རྣམས། །སྒྲ་མཐུན་དོན་དཔག་ཇི་ལྟར་ལགས། །སྦུབས་ཞེས་སྨྲོས་པ་ཇི་ལྟར་ལགས། །སྣང་བ་ཞེས་པ་ཇི་ལྟར་ལགས། །ཆ་ལུགས་རྣམ་བཞི་ཇི་ལྟར་ལགས། །སེམས་དང་ཡེ་ཤེས་ཇི་ལྟར་ལགས། །བར་དོ་ཞེས་ནི་ཅི་ལ་བགྱི། །གྲོལ་དང་མ་གྲོལ་ཇི་ལྟར་ལགས། །སྤྱན་ཞེས་བྱ་བ་ཇི་ལྟར་ལགས། །ལུས་སེམས་བྲལ་ཞེས་བྱ་བ་ཇི་ལྟར་ལགས། །ལྔ་ལྡན་རྫོགས་ལྡན་ཇི་ལྟར་ལགས། །ཐུགས་རྗེའི་བྱེ་བྲག་ཇི་ལྟར་ལགས། །མྱ་ངན་འདའ་ལུགས་ཇི་ལྟར་ལགས། །ཕས་རྒོལ་རྩོད་པ་ཅི་ལྟར་བཟློག །སྣ་ཚོགས་འབྲུ་རྣམས་ཇི་ལྟར་གཞོམ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཞུ་ཚིག་ངེས་པའི་སྡོམ་དང་བཅས་པའི་ལེའུ་སྟེ་གྱ་གཉིས་པའོ།། །།དེ་ནས་སྟོན་པས་བཀའ་སྩལ་པ། །རྡོ་རྗེ་འཛིན་པ་ངེས་ཟུང་ཞིག །རྒྱུད་ནི་ཕུན་སུམ་ཚོགས་པ་རྣམ་ལྔས་བཤད། །དེ་ལ་དབྱེ་བ་རྣམ་གསུམ་སྟེ། །ཆོས་སྐུ་ཕུན་སུམ་ཚོགས་པ་དང་། །ལོངས་སྐུ་ཕུན་སུམ་ཚོགས་པ་དང་། །སྤྲུལ་སྐུ་ཕུན་སུམ་ཚོགས་པའོ། །ཆོས་སྐུའི་ཕུན་སུམ་ཚོགས་པ་ལྔ། །སྟོན་པ་འགྱུར་མེད་ཆོས་ཀྱི་སྐུ། །བསྟན་པ་མི་ནུབ་རྒྱལ་མཚན་ནི། །གསང་བ་རིག་པའི་རྒྱུད་ཆེན་ལྔ། །འདུས་པའི་འཁོར་ཚོགས་ཉིད་ལས་མི་གཞན་པ། །རིགས་ལྔ་བདེ་གཤེགས་འོད་དུ་འབར་བ་ལྔ། །བཞུགས་གནས་སྐྱེ་མེད་ཆོས་ཀྱི་དབྱིངས། །དུས་ནི་འདས་དུས་མ་བྱོན་སྔོན་རོལ་ནས། །རྟོག་མེད་སྟོན་པས་བྱིན་གྱི་རླབས་ཀྱིས་བཤད། །ཉིད་ལས་མི་གཞན་སྐུ་ལྔ་ ― DNG001_Page_0123 ―
[མ་དཔེ་གཟིགས་ན་འདིར་གནོན།]
རང་རང་གིས། །རྒྱུད་ཆེན་བྱིན་གྱི་རླབས་ཀྱིས་གོ། །དེ་ནས་ཡང་སྟོན་པས་ལོངས་སྐུའི་ཕུན་སུམ་ཚོགས་པ་ལྔ་གསུངས་སོ། །སྟོན་པ་རིགས་ལྔ་བདེ་བར་གཤེགས་པ་ལྔ། །བསྟན་པ་གསང་བའི་རྒྱུད་ཆེན་ལྔ། །འདུས་པའི་འཁོར་ནི་སེམས་དཔའ་སེམས་མའི་ཚོགས། །བཞུགས་པའི་གནས་ནི་ཡེ་ཤེས་གཞལ་མེད་འོད་ཀྱི་ཀློང་། །དུས་ནི་དེ་རྣམས་རིག་པ་ཡུལ་དུ་ཤར་བའི་ཚེ། །ཚིག་དང་ཡི་གེའི་སྒོ་ནས་མི་འཆད་པར། །སྐུ་ཡི་ཆ་བྱད་སྒོ་ནས་སྟོན། །བདེ་གཤེགས་རྣམ་པར་སྣང་མཛད་ཀྱིས། །རིགས་བཞིའི་སངས་རྒྱས་འདུས་པ་ལ། །སྐུ་ཡི་རྒྱུད་ཆེན་རང་གི་ངོ་བོས་བཤད། །བཅོམ་ལྡན་རྡོ་རྗེ་མི་བསྐྱོད་པས། །རྡོ་རྗེ་རིགས་ཀྱི་འཁོར་རྣམས་ལ། །ཐུགས་ཀྱི་རྒྱུད་ཆེན་རང་གི་ངོ་བོས་བཤད། །བཅོམ་ལྡན་རིན་ཆེན་འབྱུང་ལྡན་གྱིས། །རིན་ཆེན་རིགས་ཀྱི་སེམས་དཔའ་སེམས་མ་ལ། །ཡོན་ཏན་རྒྱུད་ཆེན་རང་གི་ངོ་བོས་བཤད། །བཅོམ་ལྡན་སྣང་བ་མཐའ་ཡས་ཀྱིས། །པདྨའི་རིགས་ཀྱི་སེམས་དཔའ་སེམས་མ་ལ། །གསུང་གི་རྒྱུད་ཆེན་རང་གི་ངོ་བོས་བཤད། །བཅོམ་ལྡན་དོན་ཡོད་གྲུབ་པ་ཡིས། །ལས་ཀྱི་རིགས་ཀྱི་འཁོར་རྣམས་ལ། །ཕྲིན་ལས་རྒྱུད་ཆེན་རང་གི་ངོ་བོས་བཤད། །ཐུགས་ཀྱི་དགོངས་པ་ཡེ་ཤེས་རྣམ་ལྔར་གསལ། །བཤད་པ་མ་ཡིན་མཉན་པ་མེད། །གཙོ་བོའི་ཞལ་གཟིགས་ཐུགས་ཀྱི་དགོངས་པ་གསལ། །རང་གི་ངོ་བོས་བཤད་ཅེས་བྱ། །ཏིང་ངེ་འཛིན་གྱི་དགོངས་པས་བཤད། །སྟོན་པས་སྤྲུལ་སྐུའི་ཕུན་སུམ་ཚོགས་པ་ལྔ་གསུངས་པ། །སྟོན་པ་རྡོ་རྗེ་འཆང་ཆེན་ངས། །བསྟན་པའི་སྙིང་པོ་གསང་བའི་རྒྱུད་ཆེན་ལྔ། །དེ་སོགས་ཕྱི་ནང་གསང་བས་བསྡུས་པ་རྣམས། །ཐུགས་ཀྱི་ཀློང་དུ་ཤེས་རབ་ཆེན་པོས་བཀྲོལ། །མགུར་གྱི་བུམ་པར་ཡེ་ཤེས་རླུང་གིས་དྲིལ། །ཞལ་གྱི་ལྗགས་ལ་མ་འདྲེས་གསལ་བར་བཀྲམ། །ཚེམས་ཀྱི་བར་ནས་ཚིག་དོན་སོ་སོར་བཤད། །ཡན་ལག་དྲུག་ཅུ་སྡེབ་སྦྱོར་ལེགས་པར་བཤད། །ཁྱུང་ཆེན་ལྡིང་ཐབས་དོན་གྱི་སྤྱི་ཁོག་ཕུབ། །སྟག་མོའི་མཆོང་སྟབས་དཀྱུས་ཀྱི་ས་ཆེན་བཅད། །རུས་སྦལ་འགྲོས་ཀྱིས་ཚིག་གི་འབྲུ་རྣམས་བཅོམ། །སེང་གེའི་གདངས་སྐད་ལྟ་བུས་ཐེག་བརྒྱད་ཟིལ་གྱིས་མནན། །གླག་མོ་གཟན་འཇུམ་ལྟ་བུས་མན་ངག་འདྲིལ། །འདུས་པའི་འཁོར་ཚོགས་སངས་རྒྱས་རབས་བདུན་ལ། །ལྷ་གནས་ ― DNG001_Page_0124 ―
[མ་དཔེ་གཟིགས་ན་འདིར་གནོན།]
གསུམ་དུ་བདུད་རྩིའི་ཆར་ཆེན་ཕབ། །པདྨ་བརྩེགས་པའི་གནས་མཆོག་རྣམ་གསུམ་མོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཕུན་སུམ་ཚོགས་པ་ལྔ་ཡི་ལེའུ་སྟེ་གྱ་གསུམ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཕུན་སུམ་ཚོགས་པའི་དོན་བཤད་དང་། །དེ་ཡི་དགོས་པ་གསུང་དུ་གསོལ། །ཞེས་ཞུས་པས། སྟོན་པས་བཀའ་སྩལ་པ། ཀྱེ་ཀྱེ་བཅོམ་ལྡན་རྡོ་རྗེ་འཛིན་པ་ལེགས་པར་ཟུང་ཞིག །ཕུན་སུམ་ཚོགས་པའི་ངོ་བོ་དང་། ཕུན་སུམ་ཚོགས་པའི་ངེས་ཚིག་དབྱེ་བ་དང་། ཕུན་སུམ་ཚོགས་པའི་དཔེ་རྣམས་བསྟན། དང་པོ་ངོ་བོ་བསྟན་པ་ནི། །རྒྱུ་ནི་ངོ་བོ་ཚོགས་པ་ཡིན། །དགོས་པ་རྒྱུ་རྐྱེན་ཚོགས་པར་སྦྱོར། །ཅི་ཕྱིར་ཕུན་སུམ་ཚོགས་ཟེར་ན། །ཀུན་ནས་དགོས་པ་ཚང་བས་ཕུན་སུམ་ཚོགས། །ངེས་ཚིག་གཏན་ཚིགས་བཅས་པ་ཡིན། །དབྱེ་བ་གོང་དུ་བསྟན་པ་བཞིན། །དཔེར་ན་རྒྱལ་བློན་དམངས་དང་གསུམ། །གང་ལ་གང་ཚོགས་བཀའ་བགྲོས་འབྱུང་། །དེས་མཚོན་ཕྱོགས་གཅིག་དཔེར་བསྟན་པའོ། །ཞེས་གསུངས་སོ། །ཡང་གསང་བའི་བདག་པོས་ཞུས་པ། །ཕུན་སུམ་ཚོགས་པ་རྣམ་པ་ལྔ། །སྨོས་པའི་དགོས་པ་ཇི་ལྟར་ལགས། །མ་བསྟན་སྐྱོན་དུ་ཇི་ལྟར་འགྱུར། །ཞེས་ཞུས་སོ། །སྟོན་པས་བཀའ་སྩལ་པ། སྟོན་པ་ཕུན་སུམ་ཚོགས་པ་སྨོས་པའི་དགོས་པ་ནི། །གང་ཟག་རིག་བཅོས་མ་ཡིན་པར། །སངས་རྒྱས་ཞལ་ནས་གསུངས་པ་ཡིད་ཆེས་ཏེ། །མི་བསླུ་བདེན་པའི་གཏན་ཚིགས་དག་ཏུ་འགྱུར། །བསྟན་པ་ཕུན་སུམ་ཚོགས་པ་སྨོས་པའི་དགོས་པ་ནི། །བབ་ཅོལ་མ་ཡིན་དོན་དང་ལྡན་པར་ཡིད་ཀྱང་ཆེས། །འདུས་པའི་འཁོར་ཚོགས་སྨོས་པའི་དགོས་པ་ནི། །ཀུན་གྱི་ཐུན་མོང་མ་ཡིན་པའི། །ངེས་པར་སྟོན་པས་གསུངས་པར་ཡིད་ཀྱང་ཆེས། །གནས་ཀྱི་བྱེ་བྲག་གསུངས་པའི་དགོས་པ་ནི། །གཞན་དུ་བསྟན་པའི་སྙིང་པོ་མ་གསུངས་པར། །ངེས་པའི་གནས་དེར་གསུངས་པར་ཡིད་ཀྱང་ཆེས། །དུས་ཀྱི་ཕུན་སུམ་ཚོགས་པ་སྨོས་པའི་དགོས་པ་ནི། །གནས་སྐབས་སྔ་ཕྱི་མ་བསྐལ་བར། །དུས་ཚོད་མཚུངས་ཤིང་ཟིན་པས་ཡིད་ཀྱང་ཆེས། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཕུན་སུམ་ཚོགས་ ― DNG001_Page_0125 ―
[མ་དཔེ་གཟིགས་ན་འདིར་གནོན།]
པ་ལྔའི་དོན་བཤད་དགོས་པ་དང་བཅས་པའི་ལེའུ་སྟེ་གྱ་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །རྒྱུད་རྣམས་དོན་བཤད་ཇི་ལྟར་ལགས། །ཞེས་ཞུས་པས། སྟོན་པས་བཀའ་སྩལ་པ། །རྒྱུད་ཀྱི་ངོ་བོ་ངེས་ཚིག་དང་། །དབྱེ་བ་མཐུན་པའི་དཔེ་རུ་བཤད། །རྒྱུད་ཀྱི་ངོ་བོ་བསྟན་པ་ནི། །ཚིག་གི་རྒྱུད་ཀྱི་ངོ་བོ་དང་། །དོན་གྱི་རྒྱུད་ཀྱི་ངོ་བོའོ། །དོན་གྱི་རྒྱུད་ཀྱི་ངོ་བོ་ནི། །རང་རིག་ཡེ་ཤེས་ཆེན་པོ་ཡིན། །ཚིག་གི་རྒྱུད་ཀྱི་ངོ་བོ་ནི། །མ་བསྣན་མ་ཕྲིས་མ་བྱས་དགོས་པ་ཚང་། །གླེགས་བམ་ཚིག་གི་ཚོགས་སུ་བསྟན། །རྒྱུད་ཀྱི་ངེས་ཚིག་རྣམ་པ་ལྔ། །འདྲེལ་དང་མ་ཚང་མེད་པ་དང་། །ཡོངས་སུ་རྫོགས་དང་དཀྲུགས་པ་དང་། །ཕུན་སུམ་ཚོགས་པའི་ཕྱིར་རྒྱུད་དོ། །དབྱེ་བ་ཚིག་དང་དོན་རྒྱུད་གཉིས། །གོང་བཤད་བཞིན་དུ་ཤེས་པར་བྱ། །འདྲེལ་བའི་དཔེ་ནི་དྲ་བ་བཞིན། །དགོས་པ་ཚང་བའི་ནོར་བུ་བཞིན། །ཡོངས་སུ་རྫོགས་པ་ལྗོན་ཤིང་བཞིན། །དཀྲུགས་པས་ཐགས་ཀྱི་སྤུན་བཞིན་ནོ། །ངས་བསྟན་རྒྱུད་རྣམས་དེ་ལྟར་བཤད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། རྒྱུད་ཀྱི་དོན་བཤད་བསྟན་པའི་ལེའུ་སྟེ་གྱ་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གོང་བཤད་རྒྱུད་ཀྱི་ལྡང་ཚད་བཤད་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། །རྡོ་རྗེ་འཛིན་པ་ལེགས་པར་ཟུང་ཞིག །རྒྱུད་ཀྱི་ལྡང་ཚད་རྣམ་པ་བཅུ། །དབང་དང་དམ་ཚིག་གཉིས་སུ་བཤད། །དཀྱིལ་འཁོར་ཕྲིན་ལས་གཉིས་སུ་བསྟན། །མཆོད་པ་རྣལ་འབྱོར་གཉིས་སུ་བཤད། །སྔགས་དང་ཕྱག་རྒྱ་གཉིས་སུ་བཤད། །བསྙེན་པ་བསྒྲུབ་པ་གཉིས་སུ་བསྟན། །ཀྱེ་རྡོ་རྗེ་འཛིན་པ། །དབང་ལ་རྣམ་པ་གསུམ་དུ་བསྟན། །གཞི་ལ་རྫོགས་ཚུལ་བསྟན་པ་དང་། །རིམ་པས་བབས་ལུགས་བསྟན་པ་དང་། །དབང་གི་དངོས་པོ་བསྟན་པའོ། །དང་པོ་གཞི་ལ་རྫོགས་ཚུལ་ནི། །མི་རྟོག་འགྱུར་མེད་ཆོས་སྐུ་ལ། །མཁྱེན་པའི་ཡེ་ཤེས་རྣམ་ལྔ་གསལ། །རང་ལས་མི་གཞན་སྣང་བ་ནི། །རིན་ཆེན་འོད་འབར་སྐུར་གསལ་བའི། །ཉིད་ལས་མི་གཞན་དབང་གི་ཆུ་བོ་བཞི། ། ― DNG001_Page_0126 ―
[མ་དཔེ་གཟིགས་ན་འདིར་གནོན།]
མ་བསྐུར་གཞི་ལ་ཡེ་ནས་རྫོགས། །སྐུ་ལྔའི་ཐུགས་རྗེ་མ་འགགས་པར། །ཁྲག་འཐུང་ཧེ་རུ་ལྔར་སྣང་བས། །ཐུགས་རྗེ་རང་བྱུང་དབང་གི་ཆུ་བོ་བཞི། །མ་བཙལ་གཞི་ལ་ཡེ་ནས་རྫོགས། །དེ་ཉིད་ཡེ་ཤེས་ལུས་ཅན་རང་སྣང་ལ། །དེ་ཉིད་ངང་ལ་གནས་ཤིང་ངང་དུ་གྲོལ། །ཡེ་ཤེས་ཆེན་པོའི་དབང་གི་ཆུ་བོ་བཞི། །མ་བཙལ་མ་བསྐུར་གཞི་ལ་ཡེ་ནས་རྫོགས། །དེས་མཚོན་གསུང་གི་ངོ་བོ་ནི། །རིན་པོ་ཆེ་ཡི་ཡི་གེ་ལྔ། །མ་བཙལ་གཞི་ལ་ཡེ་གནས་པས། །དཔའ་བོ་འབྲུ་ལྔ་དབང་གི་ཆུ་བོ་བཞི། །མ་བཙལ་མ་བསྐུར་གཞི་ལ་ཡེ་ནས་རྫོགས། །དེ་ལྟ་བས་ན་གཞིའི་ཡེ་ཤེས་གཞན་ལ་རག་མི་ལུས་ཤིང་རྒྱུ་རྐྱེན་གྱི་དབང་དུ་འགྲོ་མི་སྲིད་པའོ། །རིགས་ཀྱི་བུ་རིམ་པས་བབས་ལུགས་བཤད་པ་ནི། ཤེས་རབ་ཀྱི་སྐུ་བཞིས་དེ་བཞིན་གཤེགས་པ་ཀུན་སྣང་གི་ཡེ་ཤེས་ལ། དབང་བཞི་རྫོགས་སུ་གནས་པ་སྟེ། མཁྱེན་པའི་སྟོབས་མི་འགགས་པས། །གཞི་འགྱུར་བ་མེད་པའི་ཆོས་སྐུ་ལ། ཤེས་རབ་འགགས་པ་མེད་པའི་དབང་ཐོབ་པའོ། །ཤེས་རབ་འགགས་པ་མེད་པའི་སྐུ་བཞི་ལས། གདུལ་བྱ་ལ་སྣང་བའི་སྐུ་བཞི་ཤར་བའི་ཚེ། ཉིད་ལས་མི་གཞན་པའི་སྐུ་བཞིའོ། །ཞལ་གཟིགས་པས་ཐུགས་མཁྱེན་ཏེ། ཤེས་རབ་རིག་པའི་སྐུ་ལྔ་ལ། རང་དབང་ཡས་བབས་སུ་ཐོབ་པའོ། །དེ་བཞིན་དུ་རིགས་བཞི་ལས། སེམས་དཔའ་སེམས་མ་རང་དབང་ཡས་བབས་སུ་ཐོབ་པའོ། །ང་སྤྲུལ་པའི་སྐུར་ཤར་ཏེ། ཐུགས་ཀྱི་ཀློང་ནས་རང་ཆས་སུ་གནས་པས། ངས་མཐོང་ཞིང་གསལ་ཏེ། དེའི་ཚེ་ངས་རྟོགས་པའི་ཡེ་ཤེས་རང་དབང་སྐད་ཅིག་མ་ལ་ཐོབ་བོ། །དེ་བཞིན་དུ་ཁམས་གསུམ་པ་ཐམས་ཅད་རང་ལ་དབང་བཞི་རྫོགས་སུ་གནས་པས། རིམ་པས་རིག་པ་རྩལ་གྱི་དབང་འཐོབ་པར་འགྱུར་བར་ངས་ལུང་བསྟན་ཏོ། །ཞེས་གསུངས་སོ། །ཀྱེ་རྡོ་རྗེ་འཛིན་པ་ལེགས་པར་ཟུང་ཞིག །དབང་གི་དངོས་གཞི་ནི་བསྐུར་ཐབས་གཉིས་ཏེ། ཁྱད་པར་ཀྱི་དབང་རྫས་བཞི་ཤེས་རབ་ལ་བརྟེན་ནས། གཞི་རྫོགས་རིག་པ་རྩལ་དབང་དུ་བསྐུར་བ་དང་། ཐུན་མོང་གི་དབང་རྫས་བཞི་ལ་བརྟེན་ནས། རྡོ་རྗེ་སློབ་དཔོན་གྱི་གདམས་ངག་དང་སྦྲེལ་ཏེ། བསྐུར་ཞིང་ཐོབ་པར་བྱེད་པའོ། །ཁྱད་པར་གྱི་དབང་རྫས་བཞི་ཤེས་རབ་ལ་བརྟེན་ནས་གཞི་རྫོགས་ ― DNG001_Page_0127 ―
[མ་དཔེ་གཟིགས་ན་འདིར་གནོན།]
ཆེན་པོ་རིག་པ་རྩལ་དབང་དུ་བསྐུར་བ་དང་། བརྒྱུད་འཛིན་བུམ་པའི་དབང་ལྔ་སྟོང་ཉིད་དུ་བསྐུར་ཏེ། མཁའ་ཀློང་རྣམ་པར་དག་པའི་ངང་ན། ཡེ་ཤེས་ཀྱི་སྤྱན་མ་འགགས་པ། འོད་ཀྱི་བུམ་པ་ལྔར་གསལ་ཏེ། དེ་བཞིན་གཤེགས་པ་ལྔ་བཞུགས་པའི་རྟེན་དུ་གྱུར་པས་ན། བུམ་པ་ཞེས་བྱ་སྟེ། ངོ་བོ་དབྱིངས་སྟོང་པ་ཉིད་དུ་བསྟན་པ་ལས། དོན་སྟོང་པ་ཉིད་དུ་རིག་སྟེ། དངོས་པོའི་མཐའ་ལས་ལོག་གོ། །རྒྱལ་པོ་རང་རྟགས་ཕྱག་རྒྱའི་དབང་བསྐུར་ནི། བུམ་པ་ལྔའི་ཀློང་ན་དེ་བཞིན་གཤེགས་པ་ལྔ་བཞུགས་ལུགས་བཤད་དེ། ཤེས་རབ་ཀྱི་བདག་ཉིད་ཡེ་ཤེས་ལྔར་གསལ་ཞིང་། ཐུགས་རྗེའི་བདག་ཉིད་ཕྱག་རྒྱ་ལྔར་གསལ་བས། སྣོད་བཅུད་དངོས་པོ་དང་མཚན་མར་སྣང་བ་ཐམས་ཅད་ཕྱག་རྒྱ་མ་བསྐྱེད་པའི་དེ་བཞིན་གཤེགས་པ་ལྔ་དང་། ཕྱག་རྒྱ་གསལ་བའི་དེ་བཞིན་གཤེགས་པ་ལྔར་འགྱུར་བས། དེ་བཞིན་གཤེགས་པ་ཡིན་པ་ལ་ཡིན་པར་རིག་སྟེ། དངོས་པོ་དང་མཚན་མ་མ་ལུས་པར་སྐུ་དང་ཡེ་ཤེས་སུ་དག་པ་སྟེ། མཚན་མ་ཟིལ་གྱིས་གནོན་ཏོ། །རྒྱལ་སྲིད་རིན་པོ་ཆེ་སྣ་བདུན་གྱི་དབང་ནི། འཕགས་པའི་ནོར་བདུན་ཏེ། དཔེར་ན་རྒྱལ་པོ་ལ་རྒྱལ་སྲིད་ནོར་བདུན་ཡོད་པ་འདྲ་བར། རང་གི་ངོ་བོ་གང་ལ་ཡང་མི་གནས་ཤིང་། ཡོན་ཏན་ཅིར་ཡང་སྣང་བས། སྦྱིན་པའི་ཕ་རོལ་ཏུ་ཕྱིན་པ་སྟེ། ཡིད་བཞིན་གྱི་ནོར་བུ་རིན་པོ་ཆེ་ལྟ་བུར་རིགས་སོ། །རང་རིག་པའི་ཡེ་ཤེས་རང་བཞིན་གྱིས་རྣམ་པར་དག་པ་ཐམས་ཅད་འབྱུང་བའི་གཞི་མ་འགགས་པས། ཡོན་ཏན་འཁོར་འདས་སུ་འབྱུང་ཞིང་ཉོན་མོངས་པ་མི་མངའ་བས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་ཏེ་བཙུན་མོ་ལྟ་བུར་རིགས་སོ། །རིག་པ་ཆོས་སྐུ་ལ་འགྲན་པའི་ཟླ་མེད་དེ། རིག་པ་སྐུ་ལྔར་སྣང་ཡང་དོན་གཉིས་སུ་མེད་པས། ཡུལ་གྱི་མཚན་མ་ངང་གིས་བཅོམ་སྟེ། ཉོན་མོངས་པ་མེད་པས་བཟོད་པའི་ཕ་རོལ་ཏུ་ཕྱིན་པ་དང་ལྡན་པས། དམག་དཔོན་ལྟ་བུར་རིགས་སོ། །རང་རིག་པའི་ཡེ་ཤེས་བྱ་རྩོལ་མི་མངའ་བར་ཡོན་ཏན་རང་ལ་རྫོགས་ཏེ། ཐུགས་རྗེ་ཤུགས་ཀྱིས་འཆར་ལ། བརྗེད་པ་མེད་པའི་གཟུངས་ཐོབ་པའི་བརྩོན་འགྲུས་དང་ལྡན་ཏེ། རྟ་རིན་པོ་ཆེ་ལྟ་བུར་རིགས་སོ། །རང་རིག་པའི་ཡེ་ཤེས་དེ་རང་གི་ངོ་བོ་ལས་མི་འདའ་བས། ངང་ལས་མ་གཡོས་པར་གནས་པས་བསམ་གཏན་ཏེ། གླང་པོ་ ― DNG001_Page_0128 ―
[མ་དཔེ་གཟིགས་ན་འདིར་གནོན།]
ཆེ་ལྟ་བུར་རིགས་སོ། །རིག་པ་ཆོས་ཀྱི་སྐུ་དེ་ཕྱོགས་ལྷུང་མེད་པས་ཤེས་རབ་ཏུ་གནས་ཤིང་། རྩལ་སོ་སོར་རྟོག་པའི་ཤེས་རབ་མི་འགག་པར་དཔྱད་པས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་ཏེ། འཁོར་ལོ་ལྟ་བུར་རིགས་སོ། །རང་རིག་པའི་ཡེ་ཤེས་དེ་ཐབས་མ་འགགས་པས་དང་། སྟོབས་མ་འགགས་པས་དང་། ཐམས་ཅད་དུ་རེ་སྨོན་དུ་གྱུར་པས་ཡེ་ཤེས་ཀྱི་ཡོན་ཏན་ཏེ། དེ་བཞིན་དུ་བཤད་པའི་ཡོན་ཏན་དང་། ཡེ་ཤེས་ལྡན་ཏེ། བློན་པོ་ལྟ་བུར་རིགས་སོ། །དེ་ལྟར་ཚིག་དབང་བསྐུར་བས་རྟོགས་པ་རྒྱུད་ལ་སྐྱེས་ཏེ། གྲུབ་པའི་མཐའ་ལ་ཡོན་ཏན་གྱི་སྒོ་མ་འགགས་པས་ཡོན་ཏན་སྐྱོན་དང་བྲལ་བའོ། །དེ་ལྟར་རྟོགས་པའི་སྤྲོས་པ་ཆོད་དེ། སྤྲོས་པ་གཅོད་པའི་ཆོས་བཞིས། རྒྱུད་ཀྱི་སྙིང་པོ་གསུམ་གྱི་ལྟ་བ་ལ་ཟློས་པས། དོན་གྱི་དགོངས་པ་བཞི་ལ་གནས་པས་ནི། དོན་བརྒྱད་རྫས་སུ་བསྟན་པའི་ཐུན་མོང་གི་རྫས་ལ་རག་མ་ལུས་ཏེ། ཐུགས་རྗེས་སེམས་ཅན་ལ་འོད་འཕྲོ་བའོ། །རིགས་ཀྱི་བུ་དེས་ནི་རིག་པའི་མཚན་ཉིད་རྟོགས་ཤིང་། རྩལ་མ་འགགས་པར་རྟོགས་པས། དབང་ཡེ་ཤེས་བཞི་རྫོགས་སུ་ཐོབ་པའོ། །ཀྱེ་རྡོ་རྗེ་འཛིན་པ། ཐུན་མོང་གི་རྫས་ལ་བརྟེན་ནས་དབང་བསྐུར་བ་ཐོབ་པས་ཚིག་དབང་རིན་པོ་ཆེ་སྟེ། ཕྱིར་དབང་རྫས་ལ་བརྟེན་ཏེ་བསྐུར། ནང་དུ་བག་ཆགས་ལུས་ལ་བསྐུར། སྐུ་གསུམ་བཞི་རྫོགས་སུ་ངོ་བསྟན་ནོ། །རིགས་ཀྱི་བུ་དབང་ནི་ཡེ་ཤེས་སྤྱི་བླུག་དང་། རྒྱལ་རྟགས་ཕྱག་རྒྱ་དང་། རིག་པ་རྩལ་གྱི་དབང་གསུམ་སྟེ། ཕྱིར་རྫས་ཀྱི་བུམ་པ་ལྔ་ལ་བརྟེན་ནས་དབང་བསྐུར། ནང་དུ་ལོངས་སྐུ་རང་ལ་གྲུབ་ལུགས་དང་ལྔ་ལྡན་གྱི་དགོངས་པ་རྫོགས་པར་བཤད་དོ། །ཕྱིར་ཕྱག་མཚན་དྲུག་ལ་བརྟེན་ཏེ་དབང་བསྐུར། ནང་དུ་ད་ལྟ་ཚོགས་དྲུག་སྤྲུལ་པ་ཤར་ལུགས་དང་། རྫོགས་ལྡན་གྱི་སྐབས་སུ་སྤྲུལ་སྐུ་བྱོན་ལུགས་སུ་བཤད་དོ། །ཕྱིར་དབང་རྫས་བཞི་ལ་བརྟེན་ལ་དབང་བསྐུར། ནང་དུ་ཆོས་སྐུའི་གནས་ལུགས་དང་། རིན་པོ་ཆེའི་སྦུབས་བཤད་དོ། །རིན་པོ་ཆེའི་གདམས་ངག་དང་འདྲེལ་བར་བཤད་དོ། །དེའི་རིམ་པ་ནི་ངས་བསྟན་པའི་ཡེ་ཤེས་བླ་མ་རུ་ཤེས་པར་བྱའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། རྒྱུད་ ― DNG001_Page_0129 ―
[མ་དཔེ་གཟིགས་ན་འདིར་གནོན།]
ཀྱི་ལྡང་ཚད་སྡོམ་དང་། དབང་བསྡུས་ནས་བསྟན་པའི་ལེའུ་སྟེ་གྱ་དྲུག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དབང་གི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་བ། རྡོ་རྗེ་འཛིན་པ་ལེགས་པར་ཟུང་ཞིག །དབང་གི་ངོ་བོ་ངེས་ཚིག་དང་། །དབྱེ་བ་མཐུན་པའི་དཔེ་བཤད་པ། །དབང་གི་ངོ་བོ་རང་བྱུང་གི་ཡེ་ཤེས་གཞན་དབང་དུ་མ་གྱུར་པའོ། །དབང་གི་ངེས་ཚིག་ནི། འཁོར་འདས་ཀྱི་ཆོས་ཐམས་ཅད་ལ་མངའ་མཛད་ཅིང་དབང་བསྒྱུར་བས་ནའོ། །དབྱེ་ན་ཐུན་མོང་དང་ཁྱད་པར་གོང་བཞིན་ནོ། །དཔེ་ནི་རྒྱལ་པོ་ལ་གླང་པོ་ཆེས་དབང་བསྐུར་བས་རྒྱལ་པོར་རང་དབང་ཐོབ་སྟེ། རྒྱལ་ས་ཟིན་པ་ལྟ་བུའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། དབང་གི་དོན་བཤད་པ་གསལ་བར་བསྟན་པའི་ལེའུ་སྟེ་གྱ་བདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དམ་ཚིག་གསང་བ་བཤད་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རིགས་ཀྱི་བུ་ངེས་པར་ཟུང་ཞིག །དམ་ཚིག་དབང་ལས་སྐྱེ་བས་ན། །མ་བསྐུར་པ་ཡི་དབང་ཆེན་ལ། །བསྲུང་དུ་མེད་པའི་དམ་ཚིག་བཞི། །མ་ཉམས་ཡེ་བསྲུངས་གདེང་དང་ལྡན། །ང་ཡི་དམ་ཚིག་གསང་བ་ནི། །རང་རིག་ཡེ་ཤེས་ཆེན་པོ་ལ། །བསྲུང་བྱ་སྲུང་བྱེད་གཉིས་མེད་པས། །ཉམས་དང་མ་ཉམས་གཉིས་སུ་མེད། །ཐེག་བརྒྱད་བཅོས་པའི་དམ་ཚིག་གྲངས། །མི་བསྲུང་བས་ན་མེད་ཅེས་བྱ། །འོག་མའི་དམ་ཚིག་ལས་གྲོལ་ཞིང་། །རང་གི་སྒོ་གསུམ་ཡངས་པས་ན། །ཕྱལ་པ་ཞེས་སུ་བཏགས་པ་ཡིན། །བསྲུང་དུ་མེད་པའི་དམ་ཚིག་ལ། །འདའ་མི་སྲིད་པའི་བསྲུང་ཐབས་ནི། །རང་རིག་ཡེ་ཤེས་གཅིག་པུ་ལས། །གཅིག་པུ་ཞེས་སུ་བཏགས་པ་ཡིན། །རང་རིག་ཡེ་ཤེས་གཅིག་པུ་ལ། །བྱ་བཙལ་མེད་པར་ཡེ་བསྲུངས་པས། །ལྷུན་གྲུབ་ཅེས་སུ་བཏགས་པ་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། དམ་ཚིག་བསྟན་པའི་ལེའུ་སྟེ་གྱ་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། ། ― DNG001_Page_0130 ―
[མ་དཔེ་གཟིགས་ན་འདིར་གནོན།]
དམ་ཚིག་དོན་བཤད་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །དམ་ཚིག་ངོ་བོ་ངེས་ཚིག་དང་། །དབྱེ་བ་མཐུན་པའི་དཔེ་རུ་བསྟན། །དང་པོ་ངོ་བོ་བཤད་པ་ནི། །འདའ་མི་སྲིད་པའི་ངོ་བོ་དེ། །བལྟ་བ་རང་རིག་ཡེ་ཤེས་ཡིན། །བསྲུང་བ་དོན་གྱི་ངེས་ཚིག་ཡིན། །འདའ་རུ་མེད་པའི་དམ་ཚིག་ཡིན། །མ་ནོར་ངེས་པའི་དམ་ཚིག་ཡིན། །དེ་ལས་མི་འདའ་བས་ན་དམ་ཚིག་གོ། །དབྱེ་བ་རྣམ་པ་གཉིས་ཡིན་ཏེ། །བསྲུང་མཚམས་བཅས་པའི་དམ་ཚིག་དང་། །བསྲུང་མཚམས་མེད་པའི་དམ་ཚིག་གོ། །གོང་དང་འོག་ཏུ་ཤེས་པར་བྱ། །དམ་ཚིག་དོན་ལ་མི་འདའ་བ། །ཐམས་ཅད་ནམ་མཁའི་ངང་ལས་མི་འདའ་ལྟར། །རང་རིག་ཡེ་ཤེས་དོན་ལས་འདའ་བ་མེད། །འདའ་མི་སྲིད་པའི་དམ་ཚིག་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། དམ་ཚིག་གི་དོན་བསྟན་པའི་ལེའུ་སྟེ་གྱ་དགུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དཀྱིལ་འཁོར་ཕྲིན་ལས་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །དང་པོ་དཀྱིལ་འཁོར་བཤད་པར་བྱ། །ངོ་བོ་དང་ནི་ངེས་ཚིག་དང་། །དབྱེ་བ་མཐུན་པའི་དཔེ་རུ་བཤད། །དབྱེ་ན་རྣམ་པ་གསུམ་དུ་བཤད། །མཚོན་པ་བརྡའ་ཡི་དཀྱིལ་འཁོར་དང་། །དམ་ཚིག་ཏིང་འཛིན་དཀྱིལ་འཁོར་དང་། །རང་བཞིན་ལྷུན་གྱིས་གྲུབ་པའི་དཀྱིལ་འཁོར་རོ། །ངོ་བོ་རྣམ་པ་གསུམ་ཡིན་ཏེ། །མཚོན་པ་བརྡའ་ཡི་དཀྱིལ་འཁོར་ངོ་བོ་ནི། །བྲིས་དང་འབུར་དུ་བཏོད་པ་ཡིན། །དམ་ཚིག་ཏིང་འཛིན་ངོ་བོ་ནི། །གང་བསྒོམ་ཡིད་ལ་གསལ་བ་ཡིན། །རང་བཞིན་ལྷུན་གྱིས་གྲུབ་པའི་དཀྱིལ་འཁོར་ནི། །སྐུ་གསུམ་རྒྱལ་བའི་དཀྱིལ་འཁོར་ཡིན། །རིག་པ་དཀྱིལ་ལ་ཡེ་ཤེས་འཁོར། །ཆོས་སྐུའི་ངོ་བོ་ངེས་ཚིག་ཡིན། །གཙོ་བོ་དཀྱིལ་ལ་སེམས་དཔའ་ཡབ་ཡུམ་འཁོར། །ལོངས་སྐུའི་ངོ་བོ་ངེས་ཚིག་ཡིན། །ཀུན་གཞི་དཀྱིལ་ལ་ཚོགས་བརྒྱད་འཁོར། །སྤྲུལ་སྐུའི་ངོ་བོ་ངེས་ཚིག་ཡིན། །དཔེ་ནི་ཉི་ཟླ་གཟའ་སྐར་ཤར་བ་བཞིན། །བརྗོད་ལུགས་མང་ཡང་བསྡུས་པ་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། དཀྱིལ་ ― DNG001_Page_0131 ―
[མ་དཔེ་གཟིགས་ན་འདིར་གནོན།]
འཁོར་བསྟན་པའི་ལེའུ་སྟེ་དགུ་བཅུ་པའོ།། །།དེ་ནས་ཡང་སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །མ་བྲིས་མ་བསྐྱེད་མ་བསྒོམས་པར། །རང་བཞིན་གསལ་བའི་དཀྱིལ་འཁོར་ལ། །བྱ་རྩོལ་འདས་པའི་ཕྲིན་ལས་ཀྱིས། །ཐོག་མ་མེད་པར་དོན་མཛད་དེ། །སྐུ་གསུམ་རྒྱལ་བའི་དཀྱིལ་འཁོར་དུ། །སྟོན་པས་སྐུ་གསུམ་དོན་མཛད་དེ། །སྐུ་ཡི་འོད་དང་གསུང་གི་འོད་ཟེར་ལས། །སྟོན་པས་སྐུ་གསུམ་རྩལ་དུ་གྲུབ། །བྱིན་རླབས་ངང་གི་ཚིག་སྦྱོར་གྱིས། །ཕྲིན་ལས་འགྲོ་དོན་ཐོགས་མེད་མཛད། །བྱས་པ་མེད་པར་ལྷུན་གྱིས་གྲུབ། །ཅེས་གསུངས་སོ། །ཡང་གསང་བའི་བདག་པོས་ཞུས་པ། །ཕྲིན་ལས་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ཕྲིན་ལས་ཀྱི་ངོ་བོ་བྱ་བ་གྲུབ་པའི་ཡེ་ཤེས་ཡིན། ཕྲིན་ལས་ཀྱི་ངེས་ཚིག་ནི། རང་བཞིན་བྱ་རྩོལ་ལས་འདས་པས། །སོ་སོའི་དོན་མཛད་ཕྲིན་ལས་ཡིན། །དབྱེ་བ་རྣམ་པ་གཉིས་ཡིན་ཏེ། །རྩོལ་བ་ཡོད་དང་མེད་པའོ། །རྩོལ་བྲལ་ཕྲིན་ལས་རྣམ་པ་བཞི། །ཆོས་སྐུ་དངོས་མེད་སྤྲོས་དང་བྲལ། །རྟོགས་པས་སྤྲོས་པ་ཐམས་ཅད་ཞི། །ཞི་བའི་ཕྲིན་ལས་ཞེས་སུ་བྱ། །ཡོན་ཏན་ནོར་བུ་བཞིན་དུ་འབྱུང་། །རྒྱས་པའི་ཕྲིན་ལས་ཞེས་སུ་བྱ། །ཐམས་ཅད་འབྱུང་ཡང་དེ་ལས་འབྱུང་། །ཐམས་ཅད་གནས་ཀྱང་དེ་ལ་གནས། །ཐམས་ཅད་ཐིམ་ཡང་དེ་ལ་ཐིམ། །ཐམས་ཅད་ལ་ཡང་དབང་བསྐུར་བས། །དབང་གི་ཕྲིན་ལས་ཞེས་སུ་བྱ། །རེག་པ་དངོས་མེད་རྡོས་པའི་ཆོས་མེད་པས། །ཕྱོགས་མེད་གང་ལ་འང་ཐོགས་པ་མེད་པར་འཆར། །ཐུགས་རྗེའི་སྟོབས་ཀྱིས་སྣང་ཞིང་བསྡུས་པས་ན། །དྲག་པོའི་ཕྲིན་ལས་ཞེས་སུ་གསུངས་པ་ཡིན། །བྱ་རྩོལ་མེད་པར་ཉི་མའི་འོད་ཟེར་གྱིས། །ཁམས་གསུམ་མཚན་མའི་མུན་པ་སེལ་བ་ལྟར། །ཐོགས་པ་མེད་པའི་ཐུགས་རྗེ་ཆེན་པོ་ཡིས། །བྱ་རྩོལ་མེད་པའི་ཕྲིན་ལས་ཆེན་པོ་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཕྲིན་ལས་ཀྱི་རང་བཞིན་བྱ་རྩོལ་མེད་པའི་དོན་བསྟན་པའི་ལེའུ་སྟེ་གོ་གཅིག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །མཆོད་པའི་རྣལ་འབྱོར་ཇི་ ― DNG001_Page_0132 ―
[མ་དཔེ་གཟིགས་ན་འདིར་གནོན།]
ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ཆོས་ཉིད་དག་པའི་ཕོ་བྲང་དུ། །རང་རིག་ཡེ་ཤེས་མ་འགགས་ཤར། །ཡེ་ཤེས་དབྱིངས་ལ་ཤར་བ་ཡིས། །དབྱིངས་དང་ཡེ་ཤེས་གཉིས་མེད་འགྱུར། །ཡེ་ཤེས་གཉིས་མེད་མཆོད་པ་ཡིན། །མཚན་རྫོགས་རྡོ་རྗེ་འཆང་གི་སར། །ཡབ་ཡུམ་བཞི་བཅུ་རྩ་གཉིས་འཕྲོས། །ཡེ་ཤེས་ལྔ་ཡི་ངང་ལ་རོལ། །མ་འགགས་གཉིས་མེད་མཆོད་པ་ཡིན། །སྤྲུལ་སྐུའི་མཆོད་པ་རྣམ་པ་ལྔ། །མཆོད་རྫས་གཟུགས་སྒྲ་དྲི་རོ་རེག །སེམས་དཔའི་ཁྱེའུ་ཆུང་ལྔས་བླངས་ནས། །རིག་བྱེད་ངང་དུ་གཉིས་མེད་ཐིམ། །རྒྱ་མཚོ་ཆུ་ཡི་འཕྲོ་འདུ་བཞིན། །མཆོད་པ་རྒྱུན་མི་ཆད་པའོ། །ཞེས་གསུངས་སོ། །དེ་ནས་ཡང་རྣལ་འབྱོར་གསུངས་པ། །སྐུ་གསུམ་འདུ་འབྲལ་མེད་པ་ནི། །དོན་ལ་མོས་བྱེད་རྣལ་འབྱོར་ཡིན། །རྣལ་འབྱོར་ཆེན་པོ་བསྒོམ་ལས་འདས་པར་རྟོགས། །རྟོགས་པའི་དོན་ལ་བྱ་རྩོལ་མི་མངའ་བར། །རང་གདངས་ཆེན་པོའི་ངང་ལ་གནས་པ་ཡིན། །རྣལ་འབྱོར་དབང་ཆེན་བྱ་རྩོལ་འདས་པ་ཡིན། །དེ་དོན་རང་ལ་གནས་པ་ནི། །རྣལ་འབྱོར་བླ་ན་མེད་པ་ཡིན། །རྣལ་འབྱོར་དག་གི་ངོ་བོ་ཡང་། །གཉིས་སུ་མེད་པའི་དགོངས་པ་ཡིན། །རྣལ་འབྱོར་དག་གི་ངེས་ཚིག་ཀྱང་། །བློ་དངོས་གཉིས་མེད་འབྱོར་བ་དང་། །སྐུ་གསུམ་གཉིས་མེད་འབྱོར་པས་འབྱོར་ཞེས་བྱ། །དབྱེ་བ་རྣམ་པ་གཉིས་ཡིན་ཏེ། །མིང་དང་དོན་དུ་ང་ཡིས་བཤད། །དོན་གྱི་རྣལ་འབྱོར་གོང་བསྟན་བཞིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། མཆོད་པ་དང་རྣལ་འབྱོར་བསྟན་པའི་ལེའུ་སྟེ་གོ་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། སྔགས་དང་ཕྱག་རྒྱ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །དང་པོ་སྔགས་ཀྱི་དོན་བཤད་པ། །མཆོག་ཏུ་གྱུར་པའི་སྔགས་དོན་ནོ། །ངོ་བོ་ངེས་ཚིག་དབྱེ་བ་བསྟན། །དབྱེ་བ་རྣམ་པ་གསུམ་ཡིན་ཏེ། །གསང་སྔགས་རིག་སྔགས་གཟུངས་སྔགས་གསུམ། །གསང་སྔགས་དག་གི་ངོ་བོ་ནི། །ཤེས་རབ་སྙིང་རྗེ་གཉིས་སུ་བསྟན། །རིག་སྔགས་དག་གི་ངོ་བོ་ནི། །ཤེས་རབ་དང་ནི་ཡེ་ཤེས་ཡིན། །གཟུངས་ ― DNG001_Page_0133 ―
[མ་དཔེ་གཟིགས་ན་འདིར་གནོན།]
སྔགས་དག་གི་ངོ་བོ་ནི། །ཤེས་རབ་དང་ནི་ཏིང་འཛིན་ཡིན། །སྔགས་གསུམ་དག་གི་ངེས་ཚིག་ནི། །ཤེས་སྐྱོབས་ཕྱིར་ན་དེས་བརྗོད་པའོ། །སྔགས་གསུམ་དག་གི་ཕྲིན་ལས་ནི། །གཞི་གནས་བག་ཆགས་སེལ་བ་དང་། །མ་རིག་ལོག་ལྟ་སེལ་བ་དང་། །འཕྲལ་བྱུང་བག་ཆགས་སེལ་བར་བྱེད་པ་ཡིན། །ཞེས་གསུངས་སོ། །སྟོན་པས་བཀའ་སྩལ་པ། །ཕྱག་རྒྱ་ཆེན་པོའི་ངོ་བོ་ནི། །འགྱུར་བ་མེད་པའི་རང་བཞིན་ཡིན། །ཕྱག་རྒྱ་ཆེན་པོའི་ངེས་ཚིག་ནི། །མི་འདའ་བས་ན་ཕྱག་རྒྱ་ཡིན། །དབྱེ་བ་ཕྱེ་དང་བསྡུས་པ་ཡིན། །ཕྱག་རྒྱ་བཞི་དང་རྩ་ལྔ་ཡོད། །འདི་རུ་བསྡུས་ཏེ་བཞི་བསྟན་པ། །ཆོས་ཉིད་མ་བྲལ་ཆོས་ཀྱི་སྐུ། །ཕྱག་རྒྱ་ཆེན་པོ་ཡིན་པར་བཤད། །རང་རིག་ཡེ་ཤེས་དབྱིངས་ལས་ཤར། །དབྱིངས་ཉིད་རིག་པ་དང་ལྡན་པས། །དབྱིངས་དང་ཡེ་ཤེས་གཉིས་སུ་མེད་པ་ནི། །དམ་ཚིག་ཕྱག་རྒྱ་ཡིན་པར་བཤད། །རང་བྱུང་ཡེ་ཤེས་མ་འགགས་པ། །གསལ་བ་ཆོས་ཀྱི་ཕྱག་རྒྱ་ཡིན། །ཐུགས་རྗེའི་སྐུ་གཉིས་མི་འགག་པས། །རྟོག་མེད་ཐུགས་རྗེའི་དོན་འཛིན་པ། །ལས་ཀྱི་ཕྱག་རྒྱར་ངས་བསྟན་པའོ། །ཕྱག་རྒྱའི་དཔེ་ནི་ནམ་མཁའ་དང་། །རྒྱལ་པོས་ཕྱག་རྒྱས་བཏབ་པ་ལ། །དེ་ལས་འདའ་བར་མི་ནུས་བཞིན། །གསང་སྔགས་མ་ཡིན་ཤེས་རབ་མ་འགགས་པའོ། །ཕྱག་རྒྱ་མ་ཡིན་ཐུགས་རྗེ་མ་འགགས་པའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྔགས་དང་ཕྱག་རྒྱ་བསྟན་པའི་ལེའུ་སྟེ་གོ་གསུམ་པའོ།། །།དེ་ནས་ཡང་གསང་བའི་བདག་པོས་ཞུས་པ། བསྙེན་པ་བསྒྲུབ་པ་ཇི་ལྟར་ལགས། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ལྟ་བ་རང་རིག་ཡེ་ཤེས་དེ། །ངོ་སྤྲོད་བཞི་ཡིས་གཏན་ལ་འབེབས། །རང་རིག་མཚན་ཉིད་ཉམས་སུ་མྱོང་། །དེ་ནི་བསྙེན་པའི་དོན་དུ་བསྟན། །ལམ་ལ་གནས་པ་ཉེ་བསྙེན་ཡིན། །ལམ་གྲོལ་གྱུར་པ་བསྒྲུབ་པ་ཡིན། །ལམ་གྱི་འབྲས་བུ་མཐར་ཕྱིན་པས། །བསྒྲུབ་པ་ཆེན་པོར་གྱུར་པའོ། །གསང་སྔགས་མི་བཟླའ་དོན་ལ་བཞག །ཕྱག་རྒྱ་མི་བསྒོམ་མ་བསྐྱེད་ལྷུན་གྱིས་རྫོགས། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བསྙེན་བསྒྲུབ་རྣམ་པ་གཉིས་ ― DNG001_Page_0134 ―
[མ་དཔེ་གཟིགས་ན་འདིར་གནོན།]
བསྟན་པའི་ལེའུ་སྟེ་གོ་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཞལ་ནས་གསུངས་པའི་ལུང་ཆེན་རྣམས། །བཤད་པའི་ཐབས་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ལུང་རྣམས་ཆེ་བ་ངས་བཤད་དེ། །སྟོན་པའི་ཞལ་ནས་གསུངས་པ་ལས། །གཞན་གྱི་ལུང་ལ་མ་བརྟེན་པར། །ལུང་གིས་ཡིད་ཆེས་པའི་ཆེ་བ་དང་། སྟོན་པའི་ཐུགས་རྣམ་པར་དག་པ་ལ། དང་པོ་རྒྱུ་མེད་པར་དུ་རྐྱེན་མེད། ཐ་མ་མི་འགྱུར་བས། འགྱུར་མེད་ནམ་མཁའི་ལུང་གིས་ཆེ་བ་དང་། ཉེས་པ་ཟད་པས་རྫུན་གྱི་ཚིག་སྨྲ་བར་མི་བྱེད་པས་རྫུན་མེད་པའི་ཞལ་ནས་གསུངས་པའི་བདེན་པའོ། །སྟོན་པ་མཁས་པའི་བདག་ཉིད་ལས། །ཚིག་དང་འབྲུ་གཉིས་དོན་སྡེབས་ལེགས། །དེ་བཞིན་ཉིད་ལས་མི་འདའ་བས། །ཡིད་ཆེས་ལུང་གིས་ཆ་བའོ། །དུས་འཁོར་ཀུན་ལས་འཕགས་གྱུར་པའི། །དགའ་རབ་རྡོ་རྗེའི་དོན་ཆེད་དུ། །སྟོན་པའི་ཞལ་ནས་གསུངས་པ་ལ། །ལུང་མ་ནོར་བར་བྲིས་པ་ནི། །རིན་ཆེན་གསེར་གྱི་གླེགས་བམ་ལ། །བཻ་ཌཱུར་ཡ་ནི་ཞུན་མ་ཡིས། །རང་ནན་དག་ཏུ་ལེགས་བྲིས་པས། །ཚིག་གི་ལྷག་ཆད་མ་ཞུགས་སྟེ། །དེས་ནི་ལུང་གི་ཆེ་བའོ། །བསྐྱེད་དང་རྫོགས་པ་རྣམ་པ་གསུམ། །འདུ་འབྲལ་མེད་པའི་དགོངས་པ་ནི། །ལོ་མ་མེ་ཏོག་འབྲས་བུའི་ཚུལ། །ཐ་མི་དད་དུ་བསྟན་པས་ནི། །གསང་སྔགས་ཀུན་དང་མཐུན་གྱུར་ཏེ། །གསང་སྔགས་སྤྱི་ལུང་མི་འགལ་བས། །གསང་སྔགས་ཀུན་གྱི་བཀའ་འདུས་པས། །ལུང་གི་ཡིད་ཆེས་ཆེ་བའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ལུང་གི་ཆེ་བ་ལྔ་བཤད་པའི་ལེའུ་སྟེ་གོ་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལུང་གི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ལུང་གི་ངོ་བོ་ངེས་ཚིག་དང་། །དབྱེ་བ་ཐུན་མོང་དཔེ་རྣམས་བཤད། །རིགས་ཀྱི་བུ་ལུང་གི་ངོ་བོ་ནི། དབྱེ་བའི་སྒོ་ནས་བསྟན་པར་བྱ་སྟེ། དོན་གྱི་ལུང་གི་ངོ་བོ་ནི། མི་ ― DNG001_Page_0135 ―
[མ་དཔེ་གཟིགས་ན་འདིར་གནོན།]
འགྱུར་སེམས་ཀྱི་ལུང་ཞེས་བྱ་སྟེ། རིག་པ་ཉིད་དོ། །ཚིག་གི་ལུང་གི་ངོ་བོ་ནི། སྟོན་པའི་ཞལ་ནས་གསུངས་པ་ལས། མ་བསྣན་མ་ཕྲིས་མ་བྱས་པའི་ཚིག་གོ། །ཚིག་གི་ལུང་ལ་གཉིས་ཏེ། སྙན་ཁུང་ལས་བརྒྱུད་པ་དང་། མངོན་དུ་ཕྱུང་བའོ། །དེ་ལ་གཉིས་སྟེ། དྲང་དོན་དང་ངེས་དོན་ནོ། །ལུང་གི་ངེས་ཚིག་ནི། ཚིག་གི་དོན་མཚོན་པས་ལུང་ཞེས་བྱ། ཡིད་ཆེས་པར་བྱ་བའི་ཕྱིར་ལུང་ཞེས་བྱ། ཟིན་པས་ལུང་ཞེས་བྱ། བདེ་བླག་ཏུ་རྟོགས་པར་བྱ་བས་ལུང་། བཀྱེར་བདེ་བས་ཀྱང་ལུང་། ཀུན་དང་འདྲེལ་དུ་བཏུབ་པས་ཀྱང་ལུང་ངོ་། །དཔེ་ནི་རྒྱལ་པོས་བཀའ་སྩལ་པ་ལྟ་བུ། སྣོད་སྤྱད་ལུང་ནས་ཟིན་པ་ལྟ་བུ་དང་། སྣོད་ལུང་མེད་བཀྱེར་མི་བདེ་བ་ལས། ལུང་ཅན་བཀྱེར་བདེ་བ་ལྟ་བུ་དང་། འདམ་གྱི་ཕུར་པ་ལྟ་བུའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ལུང་གི་དོན་བཤད་བསྟན་པའི་ལེའུ་སྟེ་གོ་དྲུག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །མན་ངག་བཤད་ལུགས་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །མན་ངག་དོན་གྱི་བཤད་ལུགས་ནི། །སྤྱི་དོན་རྣམ་པ་ལྔ་ཡིས་བཤད། །ལོ་རྒྱུས་དོན་དང་རྩ་བའི་དོན་དུ་བཤད་པའོ། །ཚིག་གི་དོན་དུ་བཤད་པ་དང་། །ཡོ་གའི་དོན་དུ་བཤད་པ་དང་། །དགོས་ཆེད་ཀྱི་དོན་དུ་བཤད་པའོ། །ལོ་རྒྱུས་ཀྱི་དོན་ལ་གསུམ་སྟེ། །གང་ཟག་དག་གིས་འཕྲལ་ལ་བྱས་པ་མ་ཡིན་པར། །དུས་གསུམ་སངས་རྒྱས་ཀུན་གྱི་དགོངས་པ་བརྒྱུད་པས་བཤད། །སངས་རྒྱས་ཞལ་ནས་གསུངས་པ་ཡིད་ཆེས་འགྱུར། །ངེས་པ་དོན་གྱི་འཁོར་ཡིན་པས། །རིག་འཛིན་བརྡ་ཡི་བརྒྱུད་པས་བཤད། །ལྡེམ་པོའི་དོན་ལ་དགོངས་པ་མ་ཡིན་པར། །ངེས་པའི་དོན་དུ་གསུངས་པས་ཡིད་ཆེས་འགྱུར། །དེ་བཞིན་བཤད་པའི་དུས་སུ་གང་ཟག་རྣ་བར་བརྒྱུད་ནས་བཤད། །བརྒྱུད་པ་འདྲེལ་མ་ཆད་པས་ངེས་པར་ཡིད་ཆེས་འགྱུར། །རྩ་བའི་དོན་དུ་བཤད་པ་ནི། །རང་རིག་ཡེ་ཤེས་ཆེན་པོར་བཤད། །ཚིག་གི་དོན་དུ་བཤད་པ་ནི། །བྱིན་རླབས་ངོ་བོ་ངེས་ཚིག་བསྡེབ་པ་སྟེ། །སྐུ་གསུམ་རྒྱལ་བའི་བཤད་ལུགས་ཡིན། །མཚོན་བྱེད་ ― DNG001_Page_0136 ―
[མ་དཔེ་གཟིགས་ན་འདིར་གནོན།]
ཚིག་གིས་ངེས་པའི་དོན་བཤད་པས། །གོང་དུ་བཤད་པ་བཞིན་དུ་ཤེས་པར་བྱ། །ཡོ་གའི་དོན་དུ་བཤད་པ་ནི། །ཐེག་པའི་ལ་ཤན་ཕྱེ་ལ་བཤད། །དེ་ཡང་དོན་གསལ་འདིར་བསྟན་བཞིན། །དགོས་ཆེད་དོན་དུ་བཤད་པ་ནི། །འཁྲུལ་པ་གསུམ་པོ་རབ་འབྲིང་རིམ་པས་གྲོལ། །རིན་ཆེན་སྦུབས་སུ་གྲུབ་མཐའ་རྫོགས་པར་བསྟན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། མན་ངག་དགོས་ཆེད་ལྔས་བཤད་པའི་ལེའུ་སྟེ་གོ་བདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །མན་ངག་རྣམ་གསུམ་མཛོད་གྱུར་ཇི་ལྟར་ལགས། །ཞེས་ཞུས་པས་སྟོན་པས་བཀའ་སྩལ་པ། །རྡོ་རྗེ་འཛིན་པ་ལེགས་པར་ཟུང་ཞིག །སྐུ་དང་གསུང་དང་ཐུགས་དང་གསུམ་གྱི་མཛོད། །མན་ངག་ཀུན་གྱི་གཞི་ཡི་གནས་ལུགས་དང་། །དེ་བརྗོད་ཚིག་གི་མན་ངག་དང་། །ཚིག་དང་དོན་སྦྱོར་མན་ངག་གསུམ། །བསྡུས་པའི་མན་ངག་ཚིག་གསུམ་པ། །སྐུ་གསུང་ཐུགས་ཀྱི་མཛོད་ནས་ཕྱུང་། །སྙིང་པོ་གསུམ་དུ་ཤེས་པར་བྱ། །ཞེས་གསུངས་སོ། །ཡང་གསུངས་པ། མན་ངག་དོན་གྱི་ངོ་བོ་དང་། །མིང་གི་ངེས་ཚིག་བསྟན་པ་དང་། །དེ་ཡི་བྱེ་བྲག་ཇི་ལྟར་དཔེ་དང་བཅས་པ་བསྟན། །དེ་ཡི་དབྱེ་བ་བསྟན་པ་ནི། །ཚིག་དང་དོན་དུ་ཤེས་པར་བྱ། །དོན་གྱི་མན་ངག་ངོ་བོ་ནི། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །གསལ་བར་ཞལ་དུ་བརྗོད་པའོ། །ཚིག་གི་མན་ངག་ངོ་བོ་ནི། །ཞལ་ནས་གསུངས་པའི་ཚིག་དོན་ཀུན། །མ་ནོར་དོན་དང་ཁྲིགས་བསྡེབས་ནས། །བདེ་བླག་རྟོགས་ཕྱིར་དཀར་ཆག་མནན། །ཚིག་དོན་གསལ་བར་བྱེད་པ་ཡིན། །ངོ་བོ་དབྱེ་བ་དེ་བསྟན་ནོ། །དེ་ཡི་ངེས་ཚིག་བསྟན་པ་ནི། །ཚེག་ཆུང་དོན་ཆེའི་མན་ངག་གོ། །ངེས་དོན་གདམས་ངག་གང་ཡིན་པ། །བརྗོད་བྲལ་གསང་ཕྱིར་མན་ངག་གོ། །ངེས་ཚིག་གཏན་ཚིགས་བཅས་པ་ཡིས། །མ་ཡིས་གདམས་པ་བུ་ལ་སྨྲས་པ་བཞིན། །སྤྱིར་ན་རྒྱུད་ལུང་མན་ངག་གསུམ། །རྗེ་བློན་འབངས་དང་འདྲ་བར་བཤད། །ཅེས་གསུངས་སོ། །སྤྲོས་བྲལ་དོན་གསལ་ ― DNG001_Page_0137 ―
[མ་དཔེ་གཟིགས་ན་འདིར་གནོན།]
ཆེན་པོའི་རྒྱུད་ལས། མན་ངག་གི་དོན་བཤད་པའི་ལེའུ་སྟེ་གོ་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། མན་ངག་ལུང་གི་ས་ལམ་དང་། །ཕ་རོལ་ཕྱིན་པ་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །མན་ངག་རྫོགས་པ་ཆེན་པོ་ལ། །ས་ལ་སྦྱང་དུ་མེད་པ་ཡིན། །ལམ་ལ་བགྲོད་དུ་མེད་པ་ཡིན། །ཕ་རོལ་ཕྱིན་བཅུ་སྤྱད་དུ་མེད། །འོན་ཀྱང་ཐེག་པ་སྤྱི་དང་སྒོ་བསྟུན་པས། །སྦྱང་དུ་མེད་པའི་ས་རིམ་དང་། །བགྲོད་དུ་མེད་པའི་ལམ་རིམ་དང་། །སྤྱོད་དུ་མེད་པའི་ཕ་རོལ་ཕྱིན་པ་སྤྱད། །ཅེས་གསུངས་སོ། །དེ་ནས་ཡང་གསང་བའི་བདག་པོས་ཞུས་པ། སྦྱང་དུ་མེད་པའི་ས་རིམ་གསུང་དུ་གསོལ། །ཞེས་ཞུས་སོ། །རྫོགས་ཆེན་ཆོས་ཉིད་ས་གཅིག་པ། །ཡོན་ཏན་རྟོགས་ཚུལ་བཅོ་ལྔ་བརྩིས། །རྒྱུད་ལུང་སྤྱི་ཡི་ཁོག་དོན་ཀུན་བཀྲོལ་ནས། །ངོ་སྤྲོད་རྣམ་བཞིས་ཚེ་འདིར་བདེན་པ་མཐོང་། །དེ་ལ་རབ་ཏུ་དགའ་བའི་ས་ཞེས་བྱ། །མན་ངག་དོན་གྱིས་བློ་ཡི་ཐེ་ཚོམ་བསལ། །རང་གི་རྒྱུད་ལ་ངེས་པའི་ཤེས་པ་སྐྱེས། །དྲི་མ་མེད་པའི་ས་རུ་བཏགས་པ་ཡིན། །གསུམ་པ་འོད་བྱེད་པ་ནི་སེམས་ཉིད་ཡེ་ཤེས་སུ་དབང་དུ་འདུས་སྟེ། དེ་ཉིད་རྩལ་དུ་ཤེས་པས་དོན་བརྗོད་རག་མ་ལུས། །བཞི་པ་འོད་འཕྲོ་དེ་དོན་ཀུན་ཏུ་སྒྲོགས། །ལྔ་པ་དུག་ལྔ་དུག་གསུམ་ནང་དུ་དག །དྲུག་པ་སྦུབས་གསུམ་སྐབས་ཀྱི་སྐུ་གསུམ་གསལ། །བདུན་པ་ཐེགས་བརྒྱད་དོན་ལས་རབ་ཏུ་འཕགས། །བརྒྱད་པ་རང་གི་དོན་ལས་མ་གཡོས་མཁྱེན། །དགུ་པ་ཡོན་ཏན་རང་ལ་རྫོགས་པར་མཁྱེན། །བཅུ་པ་ཆོས་རྣམས་གང་ལའང་ཐོགས་མེད་མཁྱེན། །བག་ཆགས་སྦུབས་སུ་རྟོགས་པ་སྐྱེ་ལུགས་ཡིན། །རྟོགས་ལྡན་འཁྲུལ་པའི་སྣང་བ་འགགས་པའི་ཚེ། །ཆོས་ཉིད་ཀློང་དུ་ཡེ་ཤེས་འོད་དུ་གསལ། །བཅུ་རྫོགས་གཅིག་ལ་གནས་པ་ཀུན་ཏུ་འོད་ཀྱི་ས། །དེ་ཉིད་རང་སྣང་ཡིན་པས་མཁྱེན་པ་ཁོང་ནས་ཤར། །ཤེས་རབ་སྐྱེས་པའི་སྟོབས་ཀྱིས་སྐུར་གསལ་བ། །ཚོམ་བུ་ལྔ་པ་ཆོས་ཀྱི་སྤྱན་དྲུག་ཤར། །གསལ་ལ་མི་གནས་པད་མ་ཅན་གྱི་ས། །གསུང་གི་ངོ་བོ་རང་བྱུང་ཡི་གེ་དྲུག །ལྗགས་ལས་འོད་འཕྲོས་སྤྲུལ་པའི་སྐུར་གྱུར་པས། །བཅུ་གསུམ་ ― DNG001_Page_0138 ―
[མ་དཔེ་གཟིགས་ན་འདིར་གནོན།]
ཡི་གེ་འཁོར་ལོ་ཚོགས་ཆེན་ས། །སྤྲུལ་པའི་སྐུ་ཡི་འགྲོ་དོན་རྫོགས་མཛད་པ། །རྡོ་རྗེ་འཛིན་པ་བཅུ་བཞིའི་ས་རུ་བཞག །ཡེ་ཤེས་སྦུབས་སུ་རྫོགས་སངས་རྒྱས་པ་ཡིས། །ཐུགས་རྗེས་གནས་ནས་སྒྲོལ་ཞིང་རང་རང་གཞི་ལ་སྦྱོར། །གསང་བའི་དོན་གྱིས་སྦྱོར་སྒྲོལ་ཞེས་སུ་བཏགས། །རང་བྱུང་ཚིག་ལྔ་ཞི་བ་མྱ་ངན་འདས། །རིན་ཆེན་སྦུབས་སུ་སྐུ་ལྔ་ཀློང་ནས་འཁྱིལ། །དཔེར་ན་གནམ་སྟོང་ཟླ་བ་ཡོངས་རྫོགས་ཀྱང་། །ཉི་མའི་སྟོབས་ཀྱིས་ཟླ་བ་མི་སྣང་བ། །ཚེས་གཅིག་དགོང་ནས་བཅོ་ལྔ་རྫོགས་གྱུར་ཏེ། །དེ་ནས་ཟླ་བ་སྐྱེ་བ་མེད་པ་ལྟར། །རིན་ཆེན་སྦུབས་སུ་འདུ་འབྲལ་མེད་ཀྱིས་ཀྱང་། །འཁྲུལ་པའི་སྟོབས་ཀྱིས་དངོས་སུ་གསལ་མ་ནུས། །དང་པོའི་ས་ནས་བཅོ་ལྔ་ཡོངས་རྫོགས་ཏེ། །དེ་ལས་ཡར་གཤེགས་དགུ་ལ་ཤུལ་མི་མངའ། །ཉི་ཤུ་རྩ་གཅིག་སུམ་ཅུ་རྩ་སོགས་རྣམས། །བཅོ་ལྔའི་འདུག་ཚུལ་ཡོན་ཏན་ཟུར་ཙམ་ཡིན། །བརྩི་བ་མས་བརྩི་ཤེས་པ་ཐད་ཀར་ཆོད། །གཟིགས་པ་མ་འགགས་ཡས་གཟིགས་ཏེ། །རྣམ་རྟོག་མི་མངའ་ས་ལེར་མཁྱེན་པའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ས་དང་ཕ་རོལ་ཕྱིན་པ། ལམ་ལྔ་འཁྲུགས་པའི་བསྡེབ་དང་། སའི་རིམ་པ་དངོས་བསྟན་པའི་ལེའུ་སྟེ་གོ་དགུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ས་ཡི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ངོ་བོ་ངེས་ཚིག་དབྱེ་བ་དང་། །མཐུན་པའི་དཔེ་རུ་བསྡུས་ལ་བཤད། །ཀྱེ་རིགས་ཀྱི་བུ་ས་ཡི་དོན་གྱི་ངོ་བོ་ནི། ཆོས་ཉིད་མི་འགྱུར་བའོ། །མཐོ་དམན་གྱི་ངོ་བོ་ནི། ཤེས་རབ་དང་སྙིང་རྗེ་ཆེ་ཆུང་ངོ་། །ས་ཡི་དབྱེ་བ་ནི། འཇིག་རྟེན་པའི་ས་དང་འདས་པའི་སའོ། །འདས་པའི་ས་ལ་གཉིས་ཏེ། ཐེག་པ་ཆེན་པོའི་ས་དང་། ཐེག་པ་འོག་མའི་སའོ། །ཐེག་པ་ཆེན་པོའི་ས་ལ་ཐུན་མོང་དང་ཁྱད་པར་རོ། །ཁྱད་པར་འདིར་བསྟན་པའོ། །ངེས་ཚིག་ནི་མི་འགྱུར་གནས་པའི་ཕྱིར་སའོ། །དཔེ་ནི་མ་འདྲེས་ལ་རྫོགས་པ་མཆོད་རྟེན་གྱི་ཁྲི་འཕང་ལྟ་བུའོ། ། ― DNG001_Page_0139 ―
[མ་དཔེ་གཟིགས་ན་འདིར་གནོན།]
ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སའི་དོན་བཤད་བསྟན་པའི་ལེའུ་སྟེ་བརྒྱ་ཐམ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །བགྲོད་ཅིང་འཇུག་ཏུ་མེད་པ་ཡི། །ལམ་གྱི་རིམ་པ་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ལག་ན་རྡོ་རྗེ་ངེས་པར་ཟུང་ཞིག །ལམ་མེད་ལམ་དུ་འཇུག་པ་རྣམས་ལམ་གྱི་ནད་ཆེ་བ། ཕྱིན་པར་འདོད་པ་རི་དྭགས་སྨིག་རྒྱུར་བསྙེགས་པ་འདྲ། དེ་བས་ངེས་པའི་ལམ་མ་ཡིན། །བགྲོད་མེད་ལམ་ལ་རབ་གནས་པའི། །འདུ་འབྲལ་མེད་པའི་དགོངས་པ་ལས། །མ་ནོར་ངེས་པའི་ལམ་ཆེན་གཅིག །བགྲོད་དུ་མེད་པའི་ཆོས་ཉིད་བྱང་ཆུབ་སེམས། །རྩོལ་བས་འགྲོ་བས་ཡེ་ཤེས་མཐའ་ལ་རིང་། །འཇུག་དུ་མེད་དོ་རང་རིག་ཡེ་ཤེས་ལམ། །འཇུག་པའི་རྩོལ་བས་སྡུག་བསྔལ་མཐའ་རུ་ལྷུང་། །འོན་ཀྱང་མ་བཤད་གོ་བར་མི་འགྱུར་བས། །བགྲོད་མེད་ལམ་གཅིག་རྟོགས་པའི་ཐབས། །སྒྲ་མཐུན་དོན་འཕགས་ལམ་ལྔ་བཤད། །བླ་མར་བསྙེན་བཀུར་ཡོངས་རྫོགས་ནས། །དམ་པའི་དྲུང་ན་གནས་པ་ནི། །ཚོགས་ཀྱི་ལམ་ཞེས་དེ་ལ་བྱ། །བླ་མས་དམ་པའི་དོན་བཤད་དེ། །གདམས་ངག་གཉིས་ཀྱི་དོན་ལ་སྦྱོར། །སྦྱོར་བའི་ལམ་དུ་ང་ཡིས་བཤད། །ངོ་སྤྲོད་རྣམ་པ་བཞིའི་སྒོ་ནས། །ཚེ་འདིར་ངེས་པའི་བདེན་པ་མཐོང་། །མཐོང་བའི་ལམ་དུ་ང་ཡིས་བཤད། །བསྒོམ་དུ་མེད་པའི་བསྒོམ་པ་དང་། །བསྒོམ་དུ་ཡོད་པའི་མེད་པ་གཉིས། །འདུ་འབྲལ་མེད་པར་གནས་པ་ནི། །བསྒོམ་པའི་ལམ་དུ་ང་ཡིས་བསྟན། །སངས་རྒྱས་དགོངས་པ་གདེང་ཆེན་བཞི། །མི་གནས་ཚུལ་གྱིས་མཐར་ཕྱིན་པས། །མཐར་ཕྱིན་ལམ་དུ་ང་ཡིས་བཤད། །ཅེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འབྲས་བུ་ངེས་པའི་ལམ་ལྔ་བསྟན་པའི་ལེའུ་སྟེ་བརྒྱ་དང་གཅིག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལམ་གྱི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། །གསང་བའི་བདག་པོ་ངེས་ཟུང་ཞིག །ལམ་གྱི་ངོ་བོ་ངེས་ཚིག་དང་། །དབྱེ་བ་མཐུན་པའི་དཔེ་རུ་བཤད། །ངས་བསྟན་ལམ་གྱི་ངོ་བོ་ནི། ། ― DNG001_Page_0140 ―
[མ་དཔེ་གཟིགས་ན་འདིར་གནོན།]
འདུ་འབྲལ་མེད་པའི་རྣལ་འབྱོར་ཡིན། །ལམ་གྱི་ངེས་ཚིག་བསྟན་པ་ནི། །གཞན་དུ་བགྲོད་ཅིང་འཇུག་ཏུ་མེད། །མི་འབྲལ་གནས་པས་ལམ་ཞེས་བྱ། །དབྱེ་བ་རྣམ་པ་གཉིས་ཡིན་ཏེ། །རྒྱུ་ཡི་ལམ་དང་འབྲས་བུ་ངེས་པའི་ལམ། །དཔེ་ནི་འཇིག་རྟེན་ལམ་དང་འདྲ། །རྩོལ་བྲལ་ལམ་གྱི་མཚོན་དཔེ་ནི། །མཁའ་ལ་ཁྱུང་ཆེན་ལྡིང་བ་འདྲ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ལམ་གྱི་དོན་བཤད་བསྟན་པའི་ལེའུ་སྟེ་བརྒྱ་དང་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །རྩོལ་བསྒྲུབ་དག་ལས་འདས་པ་ཡི། །སྤྱད་མེད་ལྷུན་གྱིས་གྲུབ་པ་ཡི། །འབྲས་བུ་ཕ་རོལ་ཕྱིན་པ་བཅུ། །སྒྲ་མཐུན་དོན་འཕགས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ཕ་རོལ་ཕྱིན་པ་ཆེན་པོ་བཅུ། །ཟིན་པས་རྩོལ་བའི་ནད་སྤངས་པ། །ལྷུན་གྱིས་གནས་པས་བཞག་པ་ཡིན། །སྙིང་པོ་ཡེ་ནས་སངས་རྒྱས་པས། །རྩོལ་བའི་བསམ་པས་དབྱིངས་མི་བསྐྱོད། །བསམ་གཏན་ཏིང་འཛིན་སངས་རྒྱས་སྐུ་ལ་བསྒྲིབས། །སངས་རྒྱས་སྐུ་ནི་མ་བསྒྲིབས་ཀུན་ཏུ་གསལ། །ལྷུན་གྲུབ་ཆེན་པོར་མ་རྟོགས་པ། །ངེས་པའི་ཕ་རོལ་ཕྱིན་པ་མིན། །ཡང་དག་ངེས་པའི་དོན་ཆེན་དེ། །ངོ་བོ་ནམ་མཁའ་ལྟ་བུ་ལ། །ཡོན་ཏན་སྣང་བ་ཕྱོགས་མེད་ཤར། །ཤར་ཡང་རང་རིག་རྣམ་པར་དག །དེ་ཉིད་སྦྱིན་པའི་ཕ་རོལ་ཕྱིན། །དྲི་མེད་རྣམ་དག་ཚུལ་ཁྲིམས་ཕ་རོལ་ཕྱིན། །འགྲན་ཟླ་མེད་པས་བཟོད་པའི་ཕ་རོལ་ཕྱིན། །བརྗེད་པ་མེད་པས་བརྩོན་འགྲུས་ཕ་རོལ་ཕྱིན། །གཡོ་བ་མེད་པས་བསམ་གཏན་ཕ་རོལ་ཕྱིན། །འགག་པ་མེད་པས་ཤེས་རབ་ཕ་རོལ་ཕྱིན། །གཏི་མུག་མ་རིག་མེད་པས་དེ་བཞིན་ནོ། །བྱ་རྩོལ་མི་མངའ་ཐབས་ཀྱི་ཕ་རོལ་ཕྱིན། །སྐད་ཅིག་སྤྱོད་པས་སྟོབས་ཀྱི་ཕ་རོལ་ཕྱིན། །ཡོན་ཏན་རང་ལ་རྫོགས་པས་སྨོན་ལམ་ཕ་རོལ་ཕྱིན། །གཞི་གནས་ཡེ་ཤེས་ཡིན་པས་ཡེ་ཤེས་ཕ་རོལ་ཕྱིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཕ་རོལ་ཏུ་ཕྱིན་པ་བཅུའི་སྤྱོད་པའི་ལམ་གཞི་རྫོགས་སུ་བསྟན་པའི་ལེའུ་སྟེ་བརྒྱ་དང་གསུམ་པའོ།། །།དེ་ནས་ཡང་གསང་བའི་བདག་པོས་ ― DNG001_Page_0141 ―
[མ་དཔེ་གཟིགས་ན་འདིར་གནོན།]
ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དོན་གྱི་ཕ་རོལ་ཕྱིན་པ་བཅུ། །དེ་ཡི་དོན་བཤད་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །ཕ་རོལ་ཕྱིན་པའི་ངོ་བོ་དང་། །ངེས་ཚིག་དབྱེ་བ་མཐུན་དཔེ་རྣམས། །བསྡུས་ཏེ་དོན་དུ་གསལ་བར་བཤད། །དང་པོ་ངོ་བོ་བཤད་བྱ་བ། །རྣམ་གྲངས་ངེས་པའི་དོན་ལ་བཞག །དབྱེ་བའི་སྒོ་ནས་ཤེས་པ་ཡིན། །ངེས་ཚིག་གཏན་ཚིགས་བཅས་པ་ནི། །མི་གནས་མཐར་རྫོགས་ཕ་རོལ་ཕྱིན། །དབྱེ་བ་རྣམ་པ་གཉིས་སུ་འདུས། །རྒྱུ་ཡི་ཕ་རོལ་ཕྱིན་པ་དང་། །འབྲས་བུའི་ཕ་རོལ་ཕྱིན་པའོ། །དཔེར་ན་དོན་གཉེར་ལམ་ཞུགས་པས། །འདོད་པའི་ཡུལ་དུ་ཕྱིན་པ་འམ། །གྲུ་ལ་བརྟེན་ནས་མཚོ་ལས་ཐར། །སྐྱེས་བུའི་མཐེབ་མོས་མདའ་བསྐྱོད་བཞིན། །མཐར་ཕྱིན་གྲུབ་པའི་ས་ལ་གནས། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འབྲས་བུ་ཕ་རོལ་དུ་ཕྱིན་པའི་དོན་བཤད་བསྟན་པའི་ལེའུ་སྟེ་བརྒྱ་དང་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྟོན་པས་གསུངས་པའི་རྒྱུད་ལུང་ལས། །སྦུབས་ཞེས་གསུངས་པ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །སྦུབས་ཀྱི་ངོ་བོ་ངེས་ཚིག་དང་། །དབྱེ་བ་མཐུན་པའི་དཔེ་ཡིས་བཤད། །དབྱེ་བ་རྣམ་པ་གསུམ་ཡིན་ཏེ། །རིན་ཆེན་སྦུབས་དང་འོད་ཀྱི་སྦུབས། །བག་ཆགས་སྦུབས་དང་གསུམ་ཡིན་ནོ། །དང་པོ་མཚན་ཉིད་འཛིན་པ་ནི། །རྣམ་དག་ཟང་ཐལ་མི་རྟོག་འགྱུར་བ་མེད། །འགག་མེད་ཀུན་གསལ་ཡེ་ཤེས་སྐུ། །ཕྱོགས་གཅིག་མཚན་མ་མན་ཤེལ་བཞིན། །ཞིབ་ཏུ་གོང་བསྟན་གཞི་སྣང་བཞིན། །རིན་ཆེན་སྦུབས་ཞེས་ཆོས་སྐུ་ཡིན། །བར་པའི་མཚན་ཉིད་བསྟན་པ་ནི། །འགག་མེད་ཡེ་ཤེས་འོད་ཀྱི་སྐུ། །སུམ་ཅུ་རྩ་གཉིས་མཚན་འཆང་བ། །ཚོམ་བུའི་དཀྱིལ་འཁོར་ཆེན་པོ་ལྔ། །གསལ་འཚེར་ལྷུན་སྡུག་གཟི་བརྗིད་འབར། །འོད་ཀྱི་སྦུབས་དེ་ལོངས་སྐུ་ཡིན། །ཐ་མའི་མཚན་ཉིད་བསྟན་པ་ནི། །བག་ཆགས་རྣམ་བཞི་ཡོངས་རྫོགས་པ། །ཕུང་པོ་ཁམས་དང་སྐྱེ་མཆེད་བཅས། །ཚོགས་བརྒྱད་སེམས་དང་བཅས་པ་ནི། །བག་ཆགས་སྦུབས་སུ་ང་ཡིས་བསྟན། ། ― DNG001_Page_0142 ―
[མ་དཔེ་གཟིགས་ན་འདིར་གནོན།]
དེ་ལ་སྦུབས་གསུམ་ངོ་བོ་ནི། །གོང་བསྟན་སྐུ་གསུམ་ཡིན་པར་བཤད། །སྦུབས་ཞེས་བྱ་བའི་གཏན་ཚིགས་ནི། །ཞུགས་པའི་རྟེན་དུ་གྱུར་པ་ཡིན། །སྦུབས་ཞེས་བྱ་བའི་བརྗོད་ཚིག་ནི། །སོ་སོའི་ངེས་ཚིག་བསྟན་པ་ཡིན། །ཡོན་ཏན་ཀུན་འབྱུང་རིན་ཆེན་སྦུབས། །སྣང་ལ་རང་བཞིན་མེད་པ་འོད་ཀྱི་སྦུབས། །ཆུ་ཟླ་མེ་ལོང་གཟུགས་བརྙན་དང་། །འཇའ་ཚོན་ལྟ་བུའི་དཔེ་ཡིས་བསྟན། །རྣམ་རྟོག་མཐུ་བརྟས་བག་ཆགས་སྦུབས། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྦུབས་བསྟན་པའི་ལེའུ་སྟེ་བརྒྱ་དང་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྟོན་པས་གསུངས་པའི་རྒྱུད་ལུང་དུ། །སྣང་བའི་བྱེ་བྲག་གསུངས་པ་རྣམས། །དེ་ཡི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །སྣང་བའི་ངོ་བོ་ངེས་ཚིག་དང་། །དབྱེ་བ་སོ་སོའི་དཔེ་རུ་བསྟན། །དང་པོ་དབྱེ་བ་རྒྱས་བསྡུས་གཉིས། །རྒྱས་པ་ལ་ཡང་རྣམ་པ་བཞི། །འགྲོ་དྲུག་ཞེན་པའི་སྣང་བ་དྲུག །རྒྱུ་འབྲས་བློ་ཡི་སྣང་བ་བཅུ། །རྟོགས་ལྡན་དོན་གྱི་སྣང་བ་གཅིག །དབྱེར་མེད་ཀུན་ཏུ་བཟང་པོའི་སྣང་བ་བཞི། །བསྡུས་པའི་སྣང་བ་རྣམ་པ་གསུམ། །མ་དག་འཁྲུལ་པའི་སྣང་བ་དང་། །དག་པ་འཇིག་རྟེན་པའི་སྣང་བ་དང་། །ཡང་དག་པ་ཡེ་ཤེས་ཀྱི་སྣང་བའོ། །དང་པོ་སྣང་བ་རྒྱས་བཤད་པ། །འགྲོ་དྲུག་ཞེན་པའི་སྣང་བ་དྲུག །ཤེས་བྱའི་དཀྱིལ་འཁོར་མ་འགགས་པས། །སྣང་བའི་དངོས་པོ་འདི་ཉིད་ལ། །དམྱལ་བས་ཚ་གྲང་གཉིས་སུ་མཐོང་། །ཡི་དྭགས་གསུམ་ལ་སྣང་བ་གསུམ། །ཕྱི་ནང་སྤྱི་མཐུན་སྣང་བའོ། །ཕྱི་ཡིས་ཟས་ལ་རྣག་ཁྲག་དང་། །གོས་ལ་ཚེར་མ་ལྟ་བུའོ། །གཅིག་ལ་ཟས་སྣང་སྲུང་མས་བསྲུང་། །གཅིག་ལ་སྲུང་མེད་ཟོས་པ་དུག །དེ་བཞིན་ཡི་དྭགས་གསུམ་དུ་སྣང་། །བྱོལ་སོང་གཉིས་ལ་སྣང་བ་གཉིས། །བྱིངས་ན་གནས་པས་མུན་པ་སྟེ། །ཁ་འཐོར་གནས་པས་གྱེན་ཐུར་སྣང་། །མི་ལ་མཐུན་སྣང་འདི་ཉིད་སྟེ། །རང་རང་ཡུལ་མི་ཁྱིམ་མཚེས་སོགས། །ལྷ་མ་ཡིན་ལ་གོ་མཚོན་སྣང་། །ལྷ་ལ་རིན་ཆེན་བདུད་རྩིར་སྣང་། །བློ་སྣང་ཞེན་པའི་བག་ཆགས་ཡིན། །རྒྱུ་འབྲས་བློ་ཡི་སྣང་བ་བཅུ། །མུ་སྟེགས་རྟག་ ― DNG001_Page_0143 ―
[མ་དཔེ་གཟིགས་ན་འདིར་གནོན།]
པའི་སྣང་བ་ཡང་། །རྟག་པའི་དངོས་ལས་གཞན་མི་སྣང་། །མུ་སྟེགས་ཆད་པའི་སྣང་བ་ཡང་། །འདི་ཡོད་ཕྱི་མ་མེད་པ་སྟེ། །སྣང་འདི་གློ་བུར་བྱུང་བ་དང་། །ཞིག་པས་འབྱུང་ལྔའི་ངང་དུ་ཞི། །ཆད་པར་སྣང་ལས་གཞན་མི་སྣང་། །ཉན་ཐོས་གཡག་རྔ་ནེའུ་སིང་དང་། །གོང་བུ་ཆ་ཤས་མེད་པ་ལྟར། །གཟུང་འཛིན་ཆོས་ཀྱི་བདག་ཏུ་འཛིན། །རང་རྒྱལ་གོང་མཐུན་ཕྱོགས་གཅིག་སྟོང་། །ཕུང་པོ་ཁམས་ལ་ཕྱོགས་གཅིག་བདག་མེད་པ། །མདོ་སྡེ་དོན་དམ་སྟོང་པ་ཉིད། །ཀུན་རྫོབ་སྒྱུ་མ་ཙམ་དུ་སྣང་། །གསང་སྔགས་ཕྱི་ནང་གཉིས་ཀ་ཡང་། །དོན་དམ་མདོ་སྡེ་མཐུན་པ་ལ། །ཀུན་རྫོབ་སྣང་བ་སོ་སོར་མཐོང་། །ཀྲི་ཡས་རིགས་གསུམ་རྗེ་ཁོལ་མཐོང་། །ཨུ་པས་ལྷ་དང་དཔོན་གཡོག་མཐོང་། །ཡོ་གས་སྤུན་དང་གྲོགས་པོར་མཐོང་། །མ་ཧཱས་ཕུང་པོ་ལྷར་སྣང་མཐོང་། །ཨ་ནུས་དབྱིངས་དང་ཡེ་ཤེས་མཐོང་། །ཀུན་གྱིས་རྒྱུ་འབྲས་མི་སྤངས་ཤིང་། །དངོས་པོ་མི་བདེན་བློ་ལ་སྣང་། །རྒྱུ་འབྲས་བློ་ཡི་སྣང་བ་ཡིན། །རྟོགས་ལྡན་དོན་གྱི་སྣང་བ་ནི། །རྫོགས་ཆེན་རྟོགས་པའི་སྣང་བ་ཡིན། །ཐམས་ཅད་ཆོས་སྐུའི་ངོ་བོར་མཐོང་། །ཀུན་ཏུ་བཟང་པོའི་སྣང་བ་ཡིན། །གོང་མ་དང་མཚུངས་གཉིས་མེད་སྣང་། །ཐོག་མའི་གཞི་སྣང་འདུག་ཚུལ་ཡིན། །བསྡུས་པའི་སྣང་བ་རྣམ་པ་གསུམ། །མ་དག་འཁྲུལ་སྣང་གོང་བསྟན་རིགས་དྲུག་ཡིན། །དག་པ་འཇིག་རྟེན་པའི་སྣང་བ་བཅུ་ནི་བྱང་ཆུབ་སེམས། །ཡང་དག་ཡེ་ཤེས་སྣང་བ་བཞི་པོ་གོང་དང་མཚུངས། །སྣང་བའི་དབྱེ་བ་རྒྱས་བསྡུས་བསྟན་པའོ། །སྣང་བའི་ངོ་བོ་བསྟན་པ་ནི། །དབྱེ་བ་གོང་ནས་ཤེས་པར་གྱིས། །འོག་ཏུ་ཟུར་ཙམ་བརྗོད་མི་ལང་། །ཡང་དག་ངེས་པའི་ངོ་བོ་ནི། །ཆོས་ཉིད་གདངས་དང་སྣང་བ་དག་གི་ངེས་ཚིག་ནི། །འགག་མེད་ཡུལ་དུ་མཐོང་བས་སྣང་བར་བཏགས། །དཔེ་ནི་དབྱེ་བའི་ཁོག་ཏུ་བསྟན། །འདི་རུ་ངེས་པའི་དཔེ་བསྟན་པ། །ཉི་མ་དག་ལས་ཟེར་སྣང་དང་། །མར་མེ་ལ་སོགས་སྣང་འོད་བཞིན། །སྣང་ཞིང་རང་གི་གདངས་ལ་ཞུགས། །དེ་བཞིན་ཡེ་ཤེས་ཆེན་པོ་ལས། །ཡེ་ཤེས་རང་གདངས་ཟང་ཐལ་སྣང་། །ཡེ་ཤེས་རང་གི་གདངས་ལ་ཞུགས། །ཆོས་ཉིད་དག་པའི་དཔེ་བསྟན་པ། །མེ་ལོང་ལ་སོགས་བཞིན་སྣང་བཞིན། །གོང་དུ་བཤད་པས་འདིར་མ་བརྗོད། །བསྡུས་པས་གནས་པའི་ ― DNG001_Page_0144 ―
[མ་དཔེ་གཟིགས་ན་འདིར་གནོན།]
ཡུལ་མ་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྣང་བའི་དོན་བསྡུས་གསལ་བར་བསྟན་པའི་ལེའུ་སྟེ་བརྒྱ་དང་དྲུག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྣང་བ་དེ་ལ་གནས་པ་ཡི། །འཆར་ལུགས་བཞི་པོ་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། ལག་ན་རྡོ་རྗེ་ལེགས་པར་ཟུང་ཤིག །དང་པོ་ཐུགས་རྗེ་རྩལ་གྱི་འཆར་ལུགས་ནི། །རིག་པ་མཚན་ཉིད་ལྔར་སྣང་བས། །རང་བྱུང་ཡེ་ཤེས་འོད་དུ་གསལ། །དེ་ལས་གཟུང་འཛིན་རྟོག་འགྱུས་པས། །འོད་དེ་ལུས་ཀྱི་རྟེན་དུ་གྱུར། །ཐུགས་རྗེ་རྩལ་གྱི་འཆར་ལུགས་ལ། །དེ་ནི་འཁྲུལ་པའི་སེམས་ཅན་ལའོ། །ཐུགས་རྗེ་སྤྲུལ་སྐུའི་འཆར་ལུགས་ནི། །ལོངས་སྐུ་ཡབ་ཡུམ་ཞལ་བར་ནས། །ཡི་གེ་དྲུག་པ་འོད་དུ་འཕྲོ་བའོ། །སྲིད་པ་གཞི་ཡི་འཛིན་ལུགས་ནི། །དང་པོ་བག་ཆགས་ལུས་འདི་ལ། །བརྟགས་ནས་སྲིད་པ་གཟུང་བའོ། །དེ་ནས་ལུས་བྱིངས་བསྐྱེད་པའོ། །མིག་གཉིས་དག་ནས་རྩ་གཉིས་ཤར། །དེ་ལས་རྩ་ཡི་མདུད་པར་གྱུར། །དེ་ལས་ལུས་བསྐྱེད་རྩ་ཡིས་ཡན་ལག་རྒྱས། །དེ་ཡི་ནང་དུ་ཙིཏྟ་དང་། །གློ་བ་ལ་སོགས་ནང་ཁྲོལ་རྣམས། །དོན་སྙིང་སོ་སོར་རྫོགས་པར་འགྱུར། །སྡུད་བྱེད་ལུས་ཀྱི་ཆགས་ལུགས་ཡིན། །ལུས་བྱིངས་བསྐྱེད་རྫོགས་གཡོ་བར་བྱེད། །ནང་གི་བཅུད་ཀྱི་ཆགས་ལུགས་ནི། །མ་བུའི་ལྟེ་བ་གཉིས་འདྲེལ་ཏེ། །ལྟེ་བས་ནང་ནས་བསྐྱེད་པར་བྱེད། །དེ་ཡིས་སྟོབས་དང་གཟི་མདངས་འཕེལ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། ཆགས་ལུགས་བཞི་བསྟན་པའི་ལེའུ་སྟེ་བརྒྱ་དང་བདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །རྒྱུད་ལུང་ཀུན་ནས་གསུངས་པ་ཡི། །བར་དོ་རྣམ་བཞི་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རིགས་ཀྱི་བུ་ལེགས་པར་ཉོན་ཅིག །བར་དོ་རྣམ་པ་བཞི་པོ་ནི། །རང་བཞིན་དག་པའི་བར་དོ་དང་། །ཏིང་ངེ་འཛིན་གྱི་བར་དོ་དང་། །ཆོས་ཉིད་འོད་གསལ་གྱི་བར་དོ་དང་། །སྲིད་པའི་བར་དོ་དང་རྣམ་པ་བཞིའོ། །དེ་ལ་རང་བཞིན་བར་དོ་ནི། །ད་ལྟའི་འཁྲུལ་སྣང་འདི་ ― DNG001_Page_0145 ―
[མ་དཔེ་གཟིགས་ན་འདིར་གནོན།]
ཉིད་ཡིན། །ཏིང་ངེ་འཛིན་གྱི་བར་དོ་ནི། །ལས་སུ་མ་རུངས་བསྒོམ་དུས་ཡིན། །ཆོས་ཉིད་བར་དོ་ཞེས་བྱ་བ། །འཁྲུལ་སྣང་འགགས་ནས་ཞག་ལྔའི་བར། །རང་རིག་ཡེ་ཤེས་འོད་དུ་ཤར། །འོད་ལ་གནས་པ་བར་དོ་ཡིན། །སྲིད་པའི་བར་དོ་ཞེས་བྱ་བ། །ཆོས་ཉིད་འོད་གསལ་སྣང་བ་ཡང་། །རྟོགས་པའི་ཤེས་རབ་མ་སྐྱེས་པས། །སྔ་ནས་ཡེ་ཤེས་བག་ལ་ཞ། །སྔར་གྱི་བག་ཆགས་སྣང་བ་ཤར། །དབང་པོ་ཀུན་ཚང་ཐོགས་མེད་ལྡན། །སྲིད་པའི་ཤ་གཟུགས་སྔོན་དུ་ཤར། །རང་དང་རིགས་མཐུན་ལྷ་མིག་མཐོང་། །ལུས་དང་འདུག་ས་ཚོལ་བར་བྱེད། །ངོ་བོ་དབྱེ་བར་བཅས་པའོ། །ངེས་པའི་དོན་ལ་མི་གནས་པས། །རང་ས་མ་ཟིན་བར་དོ་ཡིན། །ངེས་པའི་གཏན་ཚིགས་ཞེས་བྱའོ། །དཔེར་ན་འཇིག་རྟེན་དོན་གཉེར་བ། །འགྲོ་སར་མ་ཕྱིན་ཞག་ས་བཞིན། །རང་བཞིན་གནས་པའི་བར་དོ་ལ། །རྒྱུད་ལུང་ཀུན་གྱི་ཁོག་དགྲོལ་ཏེ། །ངོ་སྤྲོད་བདུན་གྱིས་གཏན་ལ་ཕབ། །རང་རིག་ལྟ་བས་ཐག་ཆོད་པའོ། །ཏིང་འཛིན་བར་དོ་གསལ་བར་བྱ། །ཆོས་ཉིད་བར་དོ་ཡེ་ཤེས་ངོས་བཟུང་བའོ། །གལ་ཏེ་དེ་ལྟར་མ་གྱུར་པས། །སྲིད་པའི་བར་དོར་ལས་ཀྱི་འཕྲོ་མཐུད་པའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བར་དོ་བཞི་བསྟན་པའི་ལེའུ་སྟེ་བརྒྱ་དང་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །ཆོས་ཉིད་བར་དོར་གྲོལ་བའི་ཐབས། །སེམས་དང་ཡེ་ཤེས་ཇི་ལྟར་དབྱེ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ངེས་པར་ཟུང་ཞིག །སེམས་དང་ཡེ་ཤེས་རྣམ་པ་གཉིས། །གཅིག་མིན་ཐ་དད་མ་ཡིན་ཏེ། །དབྱེ་བ་རབ་ཏུ་དཀའ་བའི་ཆོས། །སེམས་ཉིད་ཡེ་ཤེས་རྩལ་ཡིན་ཏེ། །སེམས་ཀྱི་གཞི་མ་ཡེ་ཤེས་ཡིན། །དེ་ལ་སེམས་དང་ཡེ་ཤེས་གཉིས། །གཅིག་པ་དང་ནི་ཐ་དད་པས། །གྲོལ་དང་མ་གྲོལ་ཞེས་བྱའོ། །སེམས་དང་ཡེ་ཤེས་དབྱེ་བ་ནི། །ངོ་བོའི་སྒོ་ནས་དབྱེ་བ་དང་། །གནས་ཀྱི་སྒོ་ནས་དབྱེ་བ་དང་། །ལམ་གྱི་སྒོ་ནས་དབྱེ་བ་དང་། །འབྱུང་བའི་སྒོ་ནས་དབྱེ་བ་དང་། །སྐྱོན་ཡོན་སོ་སོའི་སྒོ་ནས་དབྱེ་བའོ། །དེ་ལ་ཡེ་ཤེས་ངོ་བོ་ནི། །རང་བཞིན་རྣམ་པར་དག་པ་ཆོས་ཀྱི་སྐུ། །འདུག་ཚུལ་འོད་དུ་འདུག་པས་གཟུགས་ཀྱི་སྐུ། །སྣང་ཚུལ་ཕྱི་ནང་མེད་པས་ ― DNG001_Page_0146 ―
[མ་དཔེ་གཟིགས་ན་འདིར་གནོན།]
ཡེ་ཤེས་ཟང་ཐལ་ཡིན། །སྐུ་གསུམ་དབྱེར་མེད་དངོས་པོའི་སྒྲིབ་ལས་འདས། །ཞིབ་ཏུ་གོང་བཤད་འདིར་ནི་མ་བརྗོད་དོ། །སེམས་ཀྱི་ངོ་བོ་བསྟན་པ་ནི། །སྦུབས་དང་བཅས་པའི་གཟུང་འཛིན་ཡིན། །སེམས་དང་ཡེ་ཤེས་གནས་བསྟན་པ། །ཡེ་ཤེས་ཆེན་པོའི་བཞུགས་གནས་ཡིན། །རྣམ་དག་དབྱིངས་ཀྱི་ཐིག་ལེ་ཡིན། །དེ་ལྟར་རིན་ཆེན་སྦུབས་ན་བཞུགས། །འདུག་ཚུལ་གནས་དང་སྣང་ཚུལ་རྣམས། །གོང་དང་འོག་ཏུ་ཤེས་པར་བྱ། །སེམས་ནི་རླུང་ཅན་གྲོང་ན་བཞུགས། །ལམ་ཡང་རྣམ་པ་གཉིས་སུ་བསྟན། །རིན་ཆེན་རྒྱ་མཚོར་འདྲེལ་བ་ཡིན། །དཀར་འཇམ་ཁོག་པ་སྟོང་པའི་རྩ། །ཐིག་ལེ་ཁྲག་གིས་མ་གང་བར། །ཡེ་ཤེས་ཆེན་པོ་ཀུན་ཏུ་རྒྱུ། །དེ་ནི་ཡེ་ཤེས་ལམ་དུ་བཤད། །མགྲིན་པ་སེམས་ཀྱི་ལམ་དུ་བཤད། །དེ་ནི་དབུགས་རྒྱུའི་འགྱུ་སྲང་ཡིན། །སྒོ་ནི་རྣམ་པ་གཉིས་སུ་བཤད། །ཡེ་ཤེས་སྒོ་དང་སེམས་ཀྱི་སྒོ། །ཡེ་ཤེས་སྒོ་ནི་གཉིས་ཡིན་ཏེ། །ཁྱབ་པ་མི་སྣང་སྒོ་དང་ལྐོག་གྱུར་སྒོ། །རྣམ་པ་གཉིས་སུ་བསྟན་པ་ཡིན། །གསལ་བའི་བདག་ཉིད་ཟང་ཐལ་བས། །མངོན་གྱུར་སྒོ་དེ་སྤྱན་དུ་བསྟན། །སེམས་སྒོ་འདོད་པའི་སྒོ་གསུམ་ཡིན། །དབུགས་རྒྱུ་མི་རྒྱུའི་རྣམ་ཤེས་དབྱེའོ། །ཡེ་ཤེས་ཡོན་ཏན་ཀུན་སྣང་རྫོགས། །སེམས་ཀྱི་སྐྱོན་ནི་འཁོར་བའི་ཆོས། །དེ་དང་དེ་ལས་བྱུང་བའི་རྩི། །ཀྱེ་མ་རིགས་ཀྱི་བུ་ལེགས་པར་ཉོན་ཅིག །དོན་དེ་ཟབ་མོའི་བརྡར་བསྟན་ན། །སྔོན་རི་རབ་ཀྱི་རྩེ་མོ་རྒྱ་མཚོའི་ཉི་མ་ཅན་ན། ཀླུའི་རྒྱལ་པོ་ནོར་བུ་འོད་ལྡན་བྱ་བ་བཞུགས་སྐད། ཁོ་སྐྱོ་ནས་ཡས་མར་གཟིགས་པས། རྣམ་དག་པད་མའི་ཚལ་བྱ་བ་ན་རིན་པོ་ཆེའི་ཁང་པ་ཉི་ཟླས་བརྒྱན་པ་བྱ་བ་འདུག་པ་མཐོང་། དེར་ཁོང་ཡར་བྱོན་ཏེ་བཞུགས་པའི་ཕོ་བྲང་བྱས་སྐད་དོ། །གོང་མ་ལ་མཆོད་ཁང་བྱས་ཏེ་བཞུགས་སྐད། དེ་ནས་མར་གཟིགས་པས་རླུང་ཅན་གྱི་གྲོང་ན། བློན་པོ་ཀུན་བྱེད་བྱ་བ་འདུག་པ་མཐོང་ངོ་། །དེར་བྱོན་ནས་བློན་པོར་བསྐོས་སོ། །རྒྱལ་བློན་འཁྲུགས་པར་གྱུར་སྐད་དོ། །དེ་ནས་བློན་པོས་བསྐྱོད་པ་ཤུགས་ཀྱི་རྟ་ལ་ཞོན་ནས། ཀུན་ཏུ་རྒྱུའི་སྲང་དུ་ཕྱིན་ཏེ། འཐབ་རྩོད་ཀྱི་སྒོ་གསུམ་དུ་བྱོན་ཏེ། རིན་པོ་ཆེ་རྣམ་པ་ལྔ་བཙལ་ནས། རྒྱལ་པོ་ལ་དཔྱ་ཕུལ་ ― DNG001_Page_0147 ―
[མ་དཔེ་གཟིགས་ན་འདིར་གནོན།]
བས། རྒྱལ་པོ་མཉེས་པ་དང་ཚིམས་པར་མ་གྱུར་ཏེ། དམངས་དང་བློན་པོ་ཡི་མུག་ག་ཆད་ནས། རྒྱལ་བློན་འཐབ་པས། རྒྱལ་པོས་བློན་པོ་ལ་ཆབ་བསལ། འབངས་ཆམ་ལ་ཕབས་ནས། རྒྱལ་བློན་བྲལ་བས་མཆོད་པ་རྒྱུན་ཆད་དེ། རྒྱལ་པོ་ཕོ་བྲང་དུ་བསྐྱོད་དེ། འཐབ་ཟླ་མེད་པས་ཤིན་ཏུ་སོ་བསོད་དོ་སྐད། ཛྙཱ་ན་ཙིཏྟ་པྲ་བེ་ཤ་ཡ་ས་དུ་ཨ་ཧཱ་ཀཱ་ལ། ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སེམས་དང་ཡེ་ཤེས་དབྱེ་བ་བསྟན་པའི་ལེའུ་སྟེ་བརྒྱ་དང་དགུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གང་གསུངས་དོན་རྣམས་རྟོགས་པ་ཡིས། །འཁྲུལ་པའི་སྣང་བ་ཇི་ལྟར་འགགས། །ཡེ་ཤེས་སྣང་བ་ཇི་ལྟར་འཆར། །རང་རིག་ཤེས་པ་ཇི་ལྟར་འཇུག །རྟགས་ཀྱི་ཤེས་པ་ཇི་ལྟར་འབྱུང་། །རབ་འབྲིང་གྲོལ་ལུགས་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། །གསང་བདག་ངེས་པའི་དོན་འདི་ཟུང་། །འཇིག་རྟེན་འཁྲུལ་པའི་སྣང་བ་འདི། །དང་པོ་རང་ལས་ཤར་བའི་ཕྱིར། །མཐའ་མ་རང་གི་ངང་དུ་གྲོལ། །གང་བསྟན་རང་ཤར་རང་གྲོལ་བཞིན། །སྣང་བ་སེམས་ཀྱི་དབང་དུ་འདུས། །གཟུང་བར་བྱ་བའི་ཡུལ་དང་བྲལ། །སེམས་རྟོགས་ཡེ་ཤེས་དབང་འདུས་པས། །འཛིན་པར་བྱེད་པའི་སེམས་དང་བྲལ། །གཟུང་འཛིན་བྲལ་བའི་རིག་པ་ལ། །ཡེ་ཤེས་རང་དྭངས་འོད་གསལ་བ། །མཁའ་ལ་འཇའ་ཚོན་གསལ་བ་ལྟར། །ཆོས་ཉིད་ཀློང་ན་ཡེ་ཤེས་གསལ། །མཐའ་དབུས་མེད་པར་ཀུན་ཏུ་ཁྱབ། །དེ་ཚེ་ཤེས་པ་དེ་ལ་འཇུག །དྭངས་མའི་འབྱུང་བ་རྣམ་པ་ལྔ། །ཆོས་ཉིད་ངོ་བོ་ཉིད་ལ་ཤར། །དེ་ལ་སྣང་བའི་འབྱུང་བ་ལྔ། །རང་རང་ངང་དུ་དག་ཅིང་ཐིམ། །འབྱུང་བའི་སྐབས་སུ་བསྟན་པ་ཡིན། །དང་པོ་ས་ལ་ས་ཐིམ་པས། །ལུས་ལྕི་ཤེས་པ་འཐིབ་པ་ཡིན། །དེ་ནས་ཆུ་ལ་ཆུ་ཐིམ་པས། །ལུས་པོ་ཁ་སྣ་སྐམ་པ་ཡིན། །དེ་ནས་རླུང་ལ་རླུང་ཐིམ་པས། །ལུས་དང་ཤེས་པ་ལྗི་ཞིང་བྱིངས། །དེ་ཚེ་མེ་ལ་མེ་ཐིམ་པས། །ལུས་ནི་དྲོད་དང་བྲལ་བ་ཡིན། །རྣམ་ཤེས་ནམ་མཁའི་ངང་དུ་ཐིམ། །ཚོར་བ་བདེ་སྡུག་རྣམ་རྟོག་བྲལ། །ཁྱབ་པ་མེད་པའི་གདངས་ལ་གནས། །ཆོས་ཉིད་རང་གི་ངོ་བོ་ལྔ། །ཐིག་ལེ་ལྔ་ཡི་བདག་ ― DNG001_Page_0148 ―
[མ་དཔེ་གཟིགས་ན་འདིར་གནོན།]
ཉིད་ཅན། །རང་བཞིན་དག་པའི་ནམ་མཁའ་དང་། །གཉིས་མིན་གཅིག་མིན་དོན་གྱིས་གནས། །ཅི་ཡི་ཕྱིར་ན་ལོགས་ན་མེད། །བག་དང་མ་བྲལ་ཁ་དོག་དབྱིབས། །དེ་ལ་དེ་སྣང་དེ་ཡི་ངོ་བོ་ལ། །དེ་ཕྱིར་དེ་ལ་དེ་སྐད་ཅེས་བརྗོད་པའོ། །ཡེ་ཤེས་གཞི་ལ་འཕྲོས་པའི་རྟགས། །རི་རབ་རྩེ་ནས་ཉི་མ་ནུབ། །རླུང་བཞི་རིམ་པས་ཞི་གྱུར་ནས། །ལས་ཀྱི་རླུང་གིས་བསྐྱོད་པའི་བདག །འཆི་བདག་བདུད་ཀྱི་གྲོང་ཁྱེར་ནས། །བདུད་ཀྱི་སོ་བ་མིག་གཅིག་པོ། །དུས་ལ་བབ་དང་མ་བབ་བལྟ། །མང་ཡང་རྟགས་ཀུན་བསྡུས་པ་ཡིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གྲོལ་ས་སྤྱིའི་མཚན་ཉིད་བསྡམས་པ་དང་རྟགས་བསྟན་པའི་ལེའུ་སྟེ་བརྒྱ་དང་བཅུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གང་ཟག་ལུས་སེམས་འབྲལ་མི་འབྲལ། །རྟགས་ཀྱི་བྱེ་བྲག་ཇི་ལྟར་འབྱུང་། །དེ་སྐད་ཞུས་པའི་ལན་གསུངས་པ། །ཉོན་ཅིག་གསང་བའི་བདག་པོ་ཁྱོད། །གང་ཟག་ལུས་སེམས་འབྲལ་མི་འབྲལ། །རྟགས་ཀྱི་བྱེ་བྲག་ངས་བསྟན་ཉོན། །འཆི་ལྟས་བཅུ་གསུམ་དག་ཏུ་བསྟན། །གངས་ཀྱི་རླངས་པ་ཡལ་མ་ཡལ། །ཉི་མའི་ངོས་ལ་རླངས་པ་ཡལ་མ་ཡལ། །རླངས་པ་ཡལ་ན་ལུས་སེམས་འབྲལ་བར་འགྱུར། །གཞུང་རྩ་ཉམས་ཏེ་རླངས་པ་མེད་པ་ཡིན། །གསལ་བ་ཤེལ་གྱི་མེ་ལོང་གི། །གདངས་དེ་ནུབ་བམ་མ་ནུབ་བལྟ། །མེ་ལོང་བཙིར་བས་བལྟས་པ་དེར། །མདངས་ཤོར་གཞི་འདུས་འཆི་བའི་རྟགས། །དཔག་བསམ་འདབ་མ་ཆག་གམ་མ་ཆག་བལྟ། །སྐྲ་དང་བ་སྤུ་ལོག་ན་ལོ་འདབ་བསྐམས། །རྩ་བྲན་ནང་དུ་འཁུམས་པས་འཆི་བའི་རྟགས། །མཁའ་འགྲོའི་སྒྲ་སྒྲོགས་ཆག་གམ་མ་ཆག་བརྟག །རྣ་བ་གཉིས་བཙིར་བས་ནི་མངོན་པ་སྟེ། །སྒྲ་ཆག་གཞི་ལ་རྩལ་འདུས་འཆི་བའོ། །གནམ་སའི་འདྲེལ་ཐག་ཆད་དམ་མ་ཆད་བརྟག །ལག་ངར་མིག་སྔར་ཕྱར་བས་བརྟག །ཆད་ན་ཨ་ཏོ་ལི་ཀ་ཉམས་ཏེ་འཆི། །ཐབས་དང་ཤེས་རབ་འབྲལ་ལ་མ་མ་བྲལ་ནི། །སྣ་བུག་གཉིས་ཀྱི་དབུགས་ལ་བལྟ་བ་སྟེ། དབུགས་ལ་རིང་ཐུང་བྱུང་ན་རྩ་འགགས་འཆི། །རྟ་མཆོག་ཁང་བཟང་གཏིབ་བམ་མ་གཏིབ་བརྟག །སྣ་བུག་ཞོམ་ན་ཁང་བཟང་གཏིབ་སྟེ་འཆི། །དོན་སྙིང་གློ་རྩ་ཉམས་ ― DNG001_Page_0149 ―
[མ་དཔེ་གཟིགས་ན་འདིར་གནོན།]
པས་འཆིའོ། །ཁྲག་གི་རྒྱ་མཚོ་བསྐམས་སམ་མ་བསྐམས་བལྟ། །མཁུར་ཚོས་བཀྲག་ལ་བལྟ་ཏེ་ཉམས་ན་འཆི། །ཁྲག་རྣམས་ནང་དུ་འདུས་པ་ཡིན། །ཀློག་དབང་བྲི་འམ་མ་བྲི་ལྕེ་ལ་བརྟགས། །ལྕེ་ལྡིབས་གྱུར་ན་ལྕེ་རྩ་འཁུམས་པས་འཆི། །བཙན་པོའི་མཁར་གྱི་སྒོ་མོ་ཆོད་དམ་མ་ཆོད་མཆུ་ལ་བལྟ། །མ་ཆོད་མཚེར་རྩ་ནང་དུ་བྲོས་པས་མཆུ་ནི་བསུམ་མི་ཤེས། །རི་རབ་སྐེད་ནས་བདུད་ནག་ལངས་མ་ལངས། །མཛུབ་བུ་ཁ་སྦྱར་སྲིན་ལག་བསྡོམ། །སྲིན་ལག་ཕྱེད་དམ་མ་ཕྱེད་བལྟ། །ཕྱེད་ན་སྙིང་རྩ་འཁུམས་པས་འཆི། །གཟུགས་བརྙན་ཆོ་འཕྲུལ་ཡལ་མ་ཡལ། །རང་གྲིབ་བར་སྣང་གཟུགས་ལ་བལྟ། །གཟུགས་མེད་སྣང་བ་ལོག་པས་འཆི། །དུས་ཀྱི་ཆུ་ཀླུང་མལ་ན་ཉལ་མ་ཉལ། །བླ་རྩ་འཁྱམས་པོ་མེད་ན་འཆི། །དེ་ལྟར་འཆི་ལྟས་བྱུང་ན་ནི། །ཚེ་ཡི་འདུ་བྱེད་བྱེར་བར་འགྱུར། ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འཆི་ལྟས་རྒྱས་པར་བསྟན་པའི་ལེའུ་སྟེ་བརྒྱ་དང་བཅུ་གཅིག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །གང་ཟག་རྟོགས་ཤིང་གོམས་ལྡན་ལ། །བར་དོའི་སྣང་བ་ཇི་ལྟར་འཆར། །དེ་ཉིད་ཞུས་པའི་ལན་གསུངས་པ། །སྤྱི་དང་བྱེ་བྲག་གཉིས་སུ་བསྟན། །བྱེ་བྲག་དབང་པོ་རབ་འབྲིང་གི། གོ་རིམ་བཞིན་དུ་འཆར་བར་འགྱུར། །རྟོགས་ལྡན་སྤྱི་རུ་འདི་ལྟར་འབྱུང་། །ལུས་སེམས་བྲལ་ཏེ་སྐུ་གསུམ་འཆར་དུས་སུ། །འཁོར་བའི་ཆུ་བོ་བཞི་ལས་བརྒལ། །སྐྱེ་རྒས་ན་འཆི་བཞི་ཡིན་ནོ། །སྲིད་པའི་ལམ་ཆེན་ལྔ་ལས་བརྒལ། །ཉོན་མོངས་ཆགས་སྡང་རྣམས་ལྔའོ། །སེམས་ཀྱི་རྟེན་ཕུར་བྱུང་བ་སྟེ། །བེམ་རིག་བྲལ་བའི་དུས་ཡིན་ནོ། །མྱ་ངན་ཐང་ཆེན་དག་ལས་བརྒལ། །འཇིག་རྟེན་འདི་ཡི་སྡུག་བསྔལ་ལོ། །ལྷན་ཅིག་སྐྱེས་པའི་གྲོགས་དང་བྲལ། །ལྷན་སྐྱེས་མ་རིག་སངས་པ་ཡིན། །རྟག་པའི་ཡུལ་དང་བྲལ་བར་གྱུར། །འཇིག་རྟེན་སྣང་བ་འདི་ཉིད་འགགས། །ཡུན་རིང་འགྲོགས་པའི་གྲོགས་དང་བྲལ། །འཇིག་རྟེན་འདི་ཡི་སེམས་ཡིན་ནོ། །འགྱུར་ལྡོག་ཅན་གྱི་བློ་དང་བྲལ། །གཟུང་འཛིན་རྟོག་པ་སྣ་ཚོགས་སོ། །རྟག་ཏུ་ན་བའི་ནད་དང་བྲལ། །དེ་ནི་འཁོར་བའི་སྡུག་བསྔལ་ལོ། །དུས་ཀྱི་དམར་ ― DNG001_Page_0150 ―
[མ་དཔེ་གཟིགས་ན་འདིར་གནོན།]
ཐག་ཆད་པ་ཡིན། །སྐད་ཅིག་དུས་མཐའ་ཟད་པའི་དུས། །དྭངས་མའི་རང་སྣང་ཤར་བའི་དུས། །རིག་པ་རང་ངོ་རང་གིས་ཤེས་པའོ། །འཛིན་པའི་ཤེས་པ་མེད་པས་ན། །སྣང་བའི་རྐྱེན་གྱིས་བསླུར་མི་ཚུགས། །རང་སྣང་ཤར་ཀྱང་རང་སར་གྲོལ། །འགྱུ་བ་མི་ཤེས་ཟང་ཐལ་ཡིན། །འོག་འགྱུའི་སྲོག་གཅོད་དང་མ་སངས། །རིག་པ་རང་ས་ཟིན་པ་ཡིན། །རིག་པ་མ་དང་འཕྲད་དེ་ལྡོག་མི་སྲིད། །སྣང་བ་རང་སྣང་ཉིད་དུ་སྣང་བ་ལ། །རིག་པ་འཛིན་མེད་འཁྲུལ་མི་སྲིད། །སྐུ་གསུམ་ལྷུན་གྱིས་གྲུབ་པ་ལ། །འབྲས་བུ་གཞན་ནས་མི་འཚོལ་རྩོལ་སྒྲུབ་བྲལ། །ལོངས་སྐུར་བྱོན་ནས་གཞན་དོན་མཐའ་རུ་འབྱུང་། །གཞན་དོན་རྫོགས་ནས་ཆོས་སྐུ་ཉིད་དུ་ཐིམ། །དེ་ཉིད་དུས་ན་གཞན་དོན་གཟུགས་སྐུ་མན་ཆད་ནས། །འཇིག་རྟེན་དག་དང་ཐེག་པའི་མཐའ་རྣམས་བྲལ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། བར་དོའི་འབྲས་བུ་བསྟན་པའི་ལེའུ་སྟེ་བརྒྱ་དང་བཅུ་གཉིས་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྤྱི་ཡི་བྱེ་བྲག་དེ་ལྟར་ན། །རབ་འབྲིང་ཐ་མའི་གྲོལ་ལུགས་རྣམས། །མ་ནོར་རིམ་པས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། །དབང་པོ་ཡང་རབ་གྱུར་པ་ལ། །ཡེ་ནས་ཟང་ཐལ་ཆེན་པོ་བས། །བར་དོ་མེད་ཅིང་སྐད་ཅིག་མར། །དེ་ལྟ་ཉིད་དུ་གནས་པ་ཡིན། །རང་བཞིན་དག་པའི་ནམ་མཁའ་ལ། །ཆོས་ཉིད་དག་པའི་ངོ་བོར་གནས། །དེ་ལ་རིག་པ་ཟང་ཐལ་ཤར། །ཤར་བ་མ་ཡིན་གནས་པ་ཡིན། །དཔེར་ན་ནམ་མཁའ་ཟང་ཐལ་ལ། །ཁང་ཁྱིམ་བྱས་པས་ནམ་མཁའ་གུད་དུ་བཅད། །ཁང་པའི་ནང་གི་ནམ་མཁའ་དང་། །རང་བཞིན་དག་པའི་ནམ་མཁའ་གཉིས། །སྒོ་འམ་མཐོང་ན་སྒྲིབ་མེད་པས། །ནམ་མཁའ་གཉིས་པོ་སྒྲིབ་མེད་གསལ། །བག་ཆགས་སྦུབས་ཀྱི་རིག་པ་དང་། །མཁའ་ལ་གནས་པའི་རིག་པ་གཉིས། །ཡེ་ཤེས་སྒོ་ཡིས་མཚམས་སྦྱར་ནས། །བག་ཆགས་ལུས་ཀྱིས་མ་བསྒྲིབས་པར། །གཉིས་མེད་ཟང་ཐལ་ཆེན་པོར་གནས། །རྟོགས་པའི་དོན་ཆེན་དེ་ལྟར་ནི། །སེང་གེའི་མཆོངས་པས་ས་ཆོད་ལྟར། །ཡེ་ཤེས་ཟང་ཐལ་ཆེན་པོ་ཡིས། །བར་དོ་སྐྱེ་འགགས་ ― DNG001_Page_0151 ―
[མ་དཔེ་གཟིགས་ན་འདིར་གནོན།]
མི་གནས་པར། །རིན་ཆེན་སྦུབས་ཀྱི་ནང་དུ་གཅོད། །དེ་བས་ཡེ་གྲོལ་ཆེན་པོར་གནས། །དེ་ལ་རྩིས་གདབ་མི་བྱའོ། །ཇི་ལྟར་དོན་བརྗོད་མི་ཤེས་པས། །དབང་པོ་དམན་པའི་གང་ཟག་ལ། །གྲོལ་ལུགས་རྩིས་གདབ་བྱ་རུ་མེད། །བྱས་ཀྱང་ངེས་པ་མི་རྙེད་པས། །སྐྱེ་བ་གཅིག་གིས་ཐོགས་པར་བཤད། །དེ་ནས་དེ་ཉིད་འཕྲད་པར་འགྱུར། །འབྲིང་ལ་རབ་འབྲིང་ཐ་མ་གསུམ། །འབྲིང་གི་རབ་དང་འབྲིང་གི་འབྲིང་། །འབྲིང་གི་ཐ་མ་རྣམ་པ་གསུམ། །འབྲིང་གི་རབ་ཀྱི་གྲོལ་ལུགས་ནི། །སྐད་ཅིག་གསུམ་ལ་གྲོལ་བར་འགྱུར། །དང་པོ་སྣང་བ་ཚུར་ལ་འཇུག །སྒོ་ལྔའི་རྣམ་ཤེས་དག་ལའོ། །ནང་གི་འབྱུང་བ་འོད་ལ་འདུ། །རྣམ་ཤེས་ལྔ་པོ་དེ་ལྟར་འཇུག །རྩལ་སྣང་གཞི་ལ་འདུས་པ་ནི། །ཚོན་གྱི་གྲུ་གུ་བསྡོག་པ་བཞིན། །དེ་ཚེ་རླུང་བཞི་རིམ་ཞི་ནས། །སྙིང་རྗེ་མེད་པའི་ལས་ཀྱི་རླུང་། །སྲོག་པ་རྩ་ནས་ལྡང་བར་འགྱུར། །དེ་ཚེ་གནས་ནས་ལམ་དུ་འཇུག །ལམ་ནས་སྒོ་རུ་མྱུར་དུ་འཇུག །སྒོ་ཡི་སྣང་བ་ཆོས་ཉིད་ཀློང་དུ་འཆར། །ཐུགས་རྗེ་རྒྱུན་གྱི་ཐག་པ་ཟང་ཐལ་ལ། །ཞོན་ནས་ཡེ་ཤེས་རང་གི་གདངས་ལ་འཇུག །དེ་ཡི་སྐད་ཅིག་དང་པོ་ལའོ། །དེའི་ཚེ་སྐུར་སྣང་ཤེས་རབ་སྐྱེ། །བཞི་བཅུ་རྩ་གཉིས་མངོན་གསལ་བ། །མེ་ལོང་ནང་གི་གཟུགས་བརྙན་བཞིན། །ཡེ་ཤེས་ལྔ་ལྡན་དགོངས་པ་ཡིན། །གོང་དུ་ཞིབ་པར་བརྗོད་པའི་ཕྱིར། །འདི་རུ་བརྗོད་པར་མི་བྱའོ། །དེ་ལས་མངོན་ཤེས་ཆོས་སྤྱན་ཤར། །སྐུ་གསུམ་རྣམ་པར་བཞག་པ་སྟེ། །ཡི་གེ་དྲུག་པོ་འོད་ཟེར་འཕྲོ། །སྤྲུལ་པའི་སྐུར་འགྱུར་དོན་རྣམས་བྱེད། །དེ་ཚེ་རྫོགས་ལྡན་དགོངས་པ་རྫོགས། །དེ་ཡི་སྐད་ཅིག་གཉིས་པ་ལའོ། །དེ་ནས་མྱ་ངན་འདས་གྱུར་ཏེ། །བློ་དང་འཁོར་བའི་ཆོས་ཅན་ལས། །འདས་ཏེ་མི་གནས་ངང་དུ་ཐིམ། །ཡེ་ཤེས་སྤྱན་གཅིག་འགྱུར་མེད་གསལ། །རྫོགས་ལྡན་ཆེན་པོའི་དགོངས་པ་རྫོགས། །དེ་ཡི་སྐད་ཅིག་གསུམ་པའོ། །འབྲིང་གི་འབྲིང་གི་གྲོལ་ཚུལ་ནི། །དང་པོ་ཕྱི་ནང་འཁྲུལ་པ་དག །གཉིས་པར་རང་གདངས་འོད་དུ་གསལ། །གསུམ་པར་དེ་ལ་སྐད་ཅིག་གནས། །བཞི་པར་རང་སྣང་ཤེས་རབ་སྐྱེ། །མ་རིག་བདུད་བཞི་ངེས་བཅོམ་སྟེ། །བཞི་བཅུ་རྩ་གཉིས་ ― DNG001_Page_0152 ―
[མ་དཔེ་གཟིགས་ན་འདིར་གནོན།]
མངོན་སངས་རྒྱས། །འབྲིང་གི་འབྲིང་གིས་ལྔ་ལྡན་དགོངས་པ་རྫོགས། །མངོན་ཤེས་དྲུག་ལྡན་རྗེས་དྲན་དྲུག །ནམ་མཁའི་མཐོངས་ནས་ཉི་ཤར་ལྟར། །རྣམ་པ་ཀུན་མཁྱེན་ཡེ་ཤེས་ཤར། །འ་སོགས་ཡི་གེ་རྣམ་དྲུག་འཕྲོ། །དེ་ནི་སྤྲུལ་སྐུའི་རྒྱུ་ཡིན་ཏེ། །ལས་དག་གང་ཟག་རྣམ་པ་གཉིས། །འདུ་འཕྲོ་བྱེད་པའི་བར་དུ་འཕྲོ། །དཀར་དམར་རྣམ་གཉིས་ལུས་ཀྱི་རྒྱུ། །ཡི་གེ་དྲུག་པའི་བྱང་ཆུབ་སེམས། །ལུས་ཀྱི་རྒྱུ་ལས་སེམས་ཤར་བས། །དཀར་དམར་ཀློང་དུ་གནས་པ་ནི། །གནས་ལ་གནས་གབ་ལུས་དང་སེམས་ཀྱི་ཚུལ། །དེ་ནས་ལུས་ཀྱི་སྤྲུལ་པས་འགྲོ་དོན་མཛད། །འགྲོ་བ་མ་ལུས་ཐམས་ཅད་ལ། །རང་རིག་ཡེ་ཤེས་ཡེ་གནས་པ། །སྙིང་པོ་འགྱུར་མེད་འགག་པ་མེད། །དེ་དོན་ངེས་པ་ཀུན་ལ་སྒྲོགས། །ཐུགས་ཀྱི་སྙིང་པོ་འགྲོ་ལ་འཆར། །སྟོན་པའི་དགོངས་པ་ལོངས་འགྱུར་བས། །ཡིད་འདྲེས་བཅུད་ལ་བཅུད་གབ་འགྱུར། །དེ་ཡིས་ངེས་པར་གྲོལ་བར་འགྱུར། །འབྲིང་གིས་རྫོགས་ལྡན་དགོངས་པ་རྫོགས། །དེ་ནས་སྐད་ཅིག་དྲུག་པ་ལ། །སངས་རྒྱས་མྱ་ངན་ཡོངས་འདའ་སྟེ། །ཡེ་ཤེས་རླུང་གི་སྟོབས་རྣམས་ཀྱིས། །དང་པོ་ཆོས་སྐུར་གཟུགས་སྐུ་བསྐྱེད། །ཐ་མ་གཙོ་འཁོར་རིམ་པས་ཐིམ་གྱུར་ཏེ། །ཡེ་ཤེས་རླུང་གིས་ཆོས་ཉིད་ངང་ལ་སྤྱོད། །དེ་ཚེ་འབྱུང་བའི་མཚན་མ་རང་སར་ཐིམ། །སྤྲུལ་སྐུའི་འབྱུང་ལྔ་འོད་ལྔའི་ནང་དུ་ཐིམ། །དེ་ཡང་ཡེ་ཤེས་འབྱུང་བའི་ངོ་བོར་གྲོལ། །དང་པོ་མ་ལས་ཤར་བས་མ་ཡི་ངང་དུ་ཞི། །དང་པོ་ཤར་ཡང་དབྱིངས་ཀྱི་ངང་ནས་ཤར། །བར་དུ་གནས་ཀྱང་ཆོས་ཉིད་ངང་དུ་གནས། །ཐ་མ་ཐིམ་ཡང་ཆོས་ཉིད་ངང་དུ་ཐིམ། །སྤྱན་གསུམ་རྣམ་དག་འགྱུར་མེད་གཅིག་ཏུ་གསལ། །ཆོས་ཉིད་ངང་ན་རིག་པའི་ཡེ་ཤེས་གསལ། །ཕྱིར་མི་གསལ་ལ་ཡེ་ཤེས་ནང་དུ་གསལ། །བུམ་པའི་ནང་དུ་མར་མེ་གསལ་བ་བཞིན། །དེ་ཚེ་འགྱུར་མེད་སྐུ་གསུམ་རང་ས་ཟིན། །འབྲིང་གིས་རྫོགས་ལྡན་ཆེན་པོའི་དགོངས་པ་རྫོགས། །འབྲིང་གི་ཐ་མའི་གྲོལ་ལུགས་ནི། །ཕྱི་ཡི་འབྱུང་བ་རྣམ་པ་ལྔ། །ཕྱི་ཡི་སྣང་བྱེད་སྒྲོན་མ་ལ་ཚུར་ཤར་ཏེ། །གཟུང་བའི་ཡུལ་དང་བྲལ་བའོ། །སྒོ་ལྔ་གསལ་བའི་སྒྲོན་མ་ནི། །ཡེ་ཤེས་ ― DNG001_Page_0153 ―
[མ་དཔེ་གཟིགས་ན་འདིར་གནོན།]
དབང་དུ་འདུས་པས་འཛིན་རྟོག་བྲལ། །ནང་གི་འབྱུང་བ་རྣམ་པ་ལྔ། །རིག་པའི་སྒྲོན་མ་ཡེ་ཤེས་རྩལ་སྣང་ལྔ་ལ་འདུས། །དེ་ནི་རྩལ་གཞི་ལ་འདུས་པར་བསྟན་པའོ། །དེའི་ཚེ་ཐུགས་རིན་པོ་ཆེ་ཉི་ཟླ་ཁ་སྦྱོར་གྱི་ཀློང་ཡངས་ན། འབྱེད་པ་མེད་པའི་ཤེས་རབ་ཀློང་གཅིག་དུ་དྲིལ་བའོ། །དེ་ནི་བག་ཆགས་ཀྱི་སྦུབས་རང་སངས་ཏེ། །སྐད་ཅིག་མ་དང་པོ་ལ་གནས་སོ། །དེའི་དུས་ན་འབྱུང་བ་བཞི་ཁྲོས་པས། རྟགས་རིམ་པར་འབྱུང་ངོ་། །སྙིང་རྗེ་མེད་པ་ལས་ཀྱི་རླུང་ལ་སོགས་པ་རླུང་ལྔ་གནས་པར་བྱེད་པ་ནི་འདེགས་པར་བྱེད་པའི་རླུང་ཚིགས་པ་ལ་གནས་ཏེ། ལུས་ཡང་ཞིང་བསྐྱོད་ནུས་པའོ། །དེ་ཞི་བས་ལུས་མི་ཐེག་སྟེ། དེ་ནི་ས་དང་འགྲོགས་པའི་རླུང་ངོ་། །བཀྲག་དང་གཟི་མདངས་སྐྱེད་པའི་རླུང་ལུས་ལ་སྤྱིར་ཁྱབ་པར་གནས་ཏེ། དེ་ནི་ཁྱབ་བྱེད་ཀྱི་རླུང་ཞེས་བྱ་སྟེ། ལུས་ཀྱི་སྣུམ་བཀྲག་དང་གཟི་མདངས་འབྱིན་པའོ། །ཤིན་ཏུ་ཡང་བས་རྐྱེན་ཕྲ་མོས་ཀྱང་བསྐྱོད་ནུས་ཏེ། ལུས་མདངས་དང་བཀྲག་འཆོར་བའོ། །དེ་ནི་ཆུ་དང་འགྲོགས་པའི་རླུང་སྟེ། ཞི་བས་མདངས་ཉམས་པའོ། །མེ་དང་དུས་མཉམ་པའི་རླུང་ཕོ་བ་ན་གནས་ཏེ། དེར་ཟས་འཇུ་བ་དང་ལུས་བྱིངས་དྲོད་སྐྱེ་བར་བྱེད་དོ། །ཞི་བས་དྲོད་འཆོར་བས་ཟས་མི་འཇུ། དེ་ནི་མེ་དང་འགྲོགས་པའི་རླུང་ངོ་། །དྭངས་སྙིགས་འབྱེད་པའི་རླུང་ནི་སྟེང་སྒོ་འོག་སྒོ་གཉིས་ལ་ཁྱབ་པར་གནས་ཏེ། དེ་ནི་རླུང་གི་རླུང་སྟེ་ཟས་དྭངས་སྙིགས་འབྱེད་པ་དང་། སྙིགས་མ་གྱེན་མཐུར་དུ་སེལ་བར་བྱེད། ཐིག་ལེ་དཀར་དམར་དང་དྲི་ཆུ་ལ་སོགས་པ་སེལ་བའོ། །དེ་ཞི་བས་ཕོ་བ་བརྫངས་པ་དང་། ཤེས་པ་དང་ལུས་བྱིང་ངོ་། །སྙིང་རྗེ་མེད་པ་ལས་ཀྱི་རླུང་ནི། རླུང་འཁོར་བ་སྲོག་རྩ་ན་གནས་ཏེ། སྲོག་འཛིན་པའི་རླུང་ཡིན་པས། ཇི་སྲིད་གནས་ཀྱི་བར་དུ་ལུས་སེམས་མི་འབྲལ་བའོ། །དེ་ནི་རྣམ་པར་ཤེས་པ་དང་འགྲོགས་པའི་རླུང་སྟེ། དེ་བསྐྱོད་པས་སྙིང་ནས་ལམ་རྩ་དར་དཀར་གྱི་སྐུད་པ་འདྲ་བ་དེར་བསྐྱོད་དེ། རྟགས་ཀྱི་གསང་སྒོར་ཕྱིན་ནོ། །དེའི་ཚེ་ཉི་མ་ཤར་གྱི་ལ་ཁར་ཕྱིན་པས། འོད་ནུབ་རི་ལ་འབྱུང་ལ། བར་ན་འོད་ཟེར་ཐག་པ་བཞིན་དུ། རིག་པའི་ཡེ་ཤེས་སྒོ་ལྔར་གནས་ལ། དེའི་སྣང་བ་ཡུལ་ཆོས་ཉིད་ན་གསལ་ཏེ། ཡེ་ཤེས་ཟང་ཐལ་ཡིན་ཏེ། བར་ཆད་མེད་པ་ཐུགས་རྗེ་རྒྱུན་གྱི་ཐག་པས་སྦྲེལ་ཏེ། ཐུགས་རྗེ་རྒྱུན་གྱི་ཐག་པ་ལ་ ― DNG001_Page_0154 ―
[མ་དཔེ་གཟིགས་ན་འདིར་གནོན།]
ཞོན་ནས་རང་གི་གདངས་ལ་འཇུག་གོ། །ཡེ་ཤེས་ཀྱི་གདངས་ལ་ཞག་ལྔར་གནས་ཏེ། ཤར་བ་ཅིག་ཅར་ཤར་བའོ། །ཡང་ཡེ་ཤེས་ཀྱི་སྣང་བ་ནམ་མཁའ་ལ་འཇའ་ཤར་བ་ལྟར་སྣང་བའོ། །དེ་ལ་རྟོགས་པའི་ཤེས་རབ་རིམ་པས་སྐྱེ་སྟེ། ཞག་དང་པོ་ལ་འོད་མཐིང་ག་གསལ་བས། རིག་པ་ངོས་བཟུང་དང་བྲལ་བས་ཆོས་ཀྱི་དབྱིངས་ཀྱི་ཡེ་ཤེས་རང་སྣང་རང་ཤར་རང་གདངས་རང་གསལ་དུ་ཤེས་པས། ཤེས་བྱ་ལ་གཅོད་བྱེད་མེད་དོ། །ཞག་གཉིས་པ་ལ་ཆོས་དབྱིངས་ཡེ་ཤེས་གསལ་བའི་སྟེང་དུ་མེ་ལོང་ཡེ་ཤེས་ཤར་རོ། །འོད་དཀར་པོ་ཡུལ་དུ་སྣང་བའི་ཚེ། དེ་ཉིད་རིག་པ་འགག་པ་མེད་པའི་མེ་ལོང་ཡེ་ཤེས་སུ་ཐག་ཆོད་དོ། །ཞག་གསུམ་པ་ལ་འོད་ཟེར་སེར་པོ་ཡུལ་དུ་སྣང་བའི་ཚེ། དེ་ཉིད་རིག་སྟོང་དབྱེར་མེད་རང་སྣང་མཉམ་པ་ཉིད་ཀྱི་ཡེ་ཤེས་གདངས་སུ་གསལ་ལོ། །ཞག་བཞི་པ་ལ་འོད་དམར་པོ་ཡུལ་དུ་སྣང་བའི་ཚེ། དེ་ཉིད་ཤེས་པའི་ཤེས་རབ་མ་འགགས་པའི་རང་སྣང་སོ་སོར་རྟོགས་པའི་ཡེ་ཤེས་ཀྱི་གདངས་སུ་གསལ་ལོ། །ཞག་ལྔ་པ་ལ་འོད་ལྗང་གུ་ཡུལ་དུ་སྣང་བའི་ཚེ། དེ་ཉིད་བྱ་བ་གྲུབ་པའི་ཡེ་ཤེས་ཀྱི་གདངས་སུ་གསལ་ལོ། །སྐྱེ་བ་རིམ་པས་སྐྱེ་བས་ཞག་ལྔ་ལ་ཡེ་ཤེས་ཀྱི་སྣང་བ་རེ་རེ་གསལ་ལོ། །ཆོད་པ་ཐད་ཀར་ཆོད་པས། སྣང་བ་རེ་རེ་ལ་རྟོགས་པའི་ཤེས་རབ་རེ་རེ་སྐྱེ་སྟེ། སེམས་མེད་པའི་ཤེས་པ་སྐྱེས་ཀྱང་གཅོད་བྱེད་མེད་དོ། །ཞག་ལྔ་ལ་ལུས་མཐའ་རྫོགས་པས་ཤེས་རབ་མཐའ་རྫོགས་ཏེ། སྐད་ཅིག་མ་ལ་ཆོས་ཉིད་འོད་གསལ་གྱི་དཀྱིལ་འཁོར་ན། ཚོམ་བུ་ལྔར་ཕྱག་རྒྱ་མི་འགག་པར་གསལ་ལོ། །དེས་ཐ་མའི་ལྔ་ལྡན་གྱི་དགོངས་པ་རྫོགས་སོ། །སྐུ་དེ་རྣམས་ལ་མངོན་པར་ཤེས་པ་དྲུག་འཆར་ཏེ། སྤྱན་གསུམ་ལས་ཆོས་ཀྱི་སྤྱན་ནོ། །དེ་ཅི་ལྟར་འཆར་ན། སྤྱན་གྱི་མངོན་པར་ཤེས་པས། ཡར་གཟིགས་སུ་མེད་པ་ཆོས་སྐུ་རིན་པོ་ཆེའི་སྦུབས་ལ་གཟིགས། ཐད་ཀ་ནས་ལོངས་སྤྱོད་རྫོགས་པའི་སྐུ་བཞི་བཅུ་རྩ་གཉིས་མ་འགགས་པར་འོད་དུ་གསལ་ལོ། །མར་སྤྲུལ་པ་སྐུའི་ཞིང་ཁམས་བག་ཆགས་སྦུབས་ན་ཇི་ལྟར་གནས་པ་ཐམས་ཅད་གཟིགས་སོ། །སྙན་གྱི་མངོན་པར་ཤེས་པ་ནི། ཡར་དུས་གསུམ་གྱི་སངས་རྒྱས་ ― DNG001_Page_0155 ―
[མ་དཔེ་གཟིགས་ན་འདིར་གནོན།]
ཐམས་ཅད་ཐུགས་རྗེ་ཡེ་ཤེས་རྩེ་གཅིག་པ་ལ། ཉིད་ལ་ཉིད་གླེང་བསླངས་པ་ཡང་གསན། ཐད་ཀར་ལོངས་སྤྱོད་རྫོགས་སྐུ་ཚོམ་བུ་ལྔ་གསལ་ལོ། །མར་སྤྲུལ་པའི་སྐུའི་ཞིང་ཁམས་ན། ཇི་སྐད་སྨྲ་བ་ཐམས་ཅད་གསན་ནོ། །ཐུགས་ཀྱི་མངོན་པར་ཤེས་པས། ཡར་ཆོས་སྐུ་རིན་པོ་ཆེའི་སྦུབས་ནས་འབྱེད་པ་མེད་པའི་ཤེས་རབ་འཛིན་པ་མེད་པའི་རང་གསལ། གཞན་སྣང་གི་རྣམ་རྟོག་མེད་པར་བཞུགས་པར་མཁྱེན་ནོ། །ཐད་ཀར་རང་གི་དགོངས་པ་མ་འགགས་པར་གསལ་ལོ། །མར་སེམས་ཅན་གྱི་རྣམ་རྟོག་མངོན་དུ་མཁྱེན་ནོ། །གནས་ཀྱི་མངོན་པར་ཤེས་པ་ནི། སྐུ་གསུམ་གྱི་ཞིང་ཁམས་དང་། ཆོས་ཀྱི་དབྱིངས་དང་འོད་ཀྱི་སྣང་བ་དང་། །འབྱུང་བ་བཞི་ལ་བརྟེན་པ་བཅའ་ལུགས་བཞིན་གྱི་རིགས་དྲུག་གི་གནས་གཞན་མ་འགགས་པར་གསལ་ལོ། །ལས་ཀྱི་མངོན་པར་ཤེས་པ་ནི། སྔོན་རང་གིས་ཇི་ལྟར་སྤྱད་པ་དང་། ད་ལྟ་འགྲོ་བ་གཞན་ཇི་ལྟར་སྤྱོད་པ་མཁྱེན་ནོ། །ཐུགས་རྗེ་བྱིན་རླབས་ཀྱི་མངོན་པར་ཤེས་པ་ནི། མཐུན་པའི་སེམས་ཅན་རྣམས་ལ་སྣང་བས། རིགས་དྲུག་མཐུན་པས་མཐུན་པར་སྣང་བས་འདུལ་བ་གཟིགས་ཏེ། སྤྲུལ་པའི་སྐུ་དྲུག་ཤར་ལུགས་མཁྱེན་ནོ། །རིགས་ཀྱི་བུ་དེ་ལ་ཆོས་ཀྱི་སྤྱན་ཞེས་ཅིའི་ཕྱིར་གདགས་ཤེ་ན། སྤྲུལ་པའི་སྐུས་འཁོར་བའི་ཆོས་དང་། ཆོས་སྐུ་རིན་པོ་ཆེ་མྱ་ངན་ལས་འདས་པའི་ཆོས་གཉིས། རྣམ་རྟོག་མི་མངའ་བར་གསལ་བས་ཆོས་ཀྱི་སྤྱན་ནོ། །དོན་ལ་རྣམ་པར་མཁྱེན་པ་ནི་ལྐོགས་སུ་གྱུར་པ་མཁྱེན་པའོ། །སྤྱན་ནི་གསལ་ལ་མི་རྟོག་པ་སྟེ། གཟུགས་བརྙན་ལ་སོགས་པ་བཞིན་ནོ། །དེ་ཚེ་རང་བྱུང་གི་ཡི་གེ་དྲུག་འཆར་བ་ཡང་། འ་དང་། ཨ་དང་། ཧ་དང་། ཤ་དང་། ས་དང་། མ་དང་དྲུག་སྟེ། རིགས་ཀྱི་བུ་ཡི་གེ་དྲུག་པོ་དེ་གཞི་ཆོས་སྐུ་ལ་དོན་ལྡན་དུ་བཞུགས་སོ། །དབྱིངས་དང་རིག་པ་དང་། ཡེ་ཤེས་དང་། ཤེས་རབ་དང་། མི་འགྱུར་བ་དང་། མཉམ་པ་ཉིད་དང་། དབྱེ་རུ་མེད་པར་གནས་པའོ། །བག་ཆགས་ལུས་ཅན་སྤྲུལ་སྐུ་ལ། ལུས་ཀྱི་གནས་དྲུག་ལ་གནས་ཏེ། གསུང་འགག་པ་མེད་པར་དོན་ལ་སྦྱར་བའོ། །ལོངས་སྐུའི་ལྗགས་ལས་འཕྲོ་བ་ནི། ཐུགས་རྗེ་འབྱུང་བའི་གཞི་མ་འགགས་པ། ཡི་གེ་དྲུག་པོ་ལས་རིན་པོ་ཆེའི་ ― DNG001_Page_0156 ―
[མ་དཔེ་གཟིགས་ན་འདིར་གནོན།]
སྲད་བུ་བསྒྲིལ་བའམ། སྣལ་མའི་ཚོན་སྐུད་བསྒྲིལ་མ་བཞིན་འཕྲོས་པས། ལས་དག་པ་སྤྲུལ་པ་ཕོ་མོའི་སྤྱན་ནས་འཇུག །སེམས་ཅན་ལས་ཀྱི་སྐྱེ་བ་མངལ་ནས་འཇུག་པའོ། །བདེ་བ་ཆེན་པོའི་གསང་གནས་ནས། འོད་འབར་བ་བདེ་བའི་རྟ་ལ་ཞོན་སྟེ། །བདེ་ཆེན་ཡོངས་ལ་ཁྱབ་པའི་ཐིག་ལེ་ལ། སྣོད་དང་བཅུད་ཀྱི་ཚུལ་དུ་གབ། དེ་སྤྲུལ་པའི་སྐུར་གྱུར་ནས་སེམས་ཅན་གྱི་དོན་བྱེད་པའོ། །དོན་ཡོད་འགྲོ་བའི་དོན་བྱེད་པའོ། །རྟོག་མེད་དུ་འབྱུང་བ་ཀུན་གྱི་དོན་མ་སྤངས་པའོ། །དེ་བཞིན་གཤེགས་པ་སྔ་མ་ལས་ཕྱི་མ་འཆར་ཏེ། དེ་ཉིད་སྤྲུལ་པ་རྒྱུན་མི་ཆད་པས། སངས་རྒྱས་སྤྲུལ་པའི་རྒྱུད་འཆང་བའོ། །ཕྱོགས་གཅིག་ཏུ་མ་ངེས་ཏེ། གདུལ་བྱ་གང་ན་གནས་པའི་དོན་མཛད་པས་ན། ཕྱོགས་བཅུར་སྤྲུལ་པ་སྣ་ཚོགས་འགྱེད་པའོ། །མཐུན་པས་མཐུན་པ་འདུལ་པར་གཟིགས་པས་ན། ཇི་བཞིན་འགྲོ་བའི་དོན་བྱེད་པའོ། །དངོས་སུ་ཐུབ་པ་དྲུག་གིས་འགྲོ་བ་དག་གི་དོན་བྱེད་པའོ། །ཐུགས་རྗེའི་ལྕགས་ཀྱུས་ཞིང་དག་པ་དེ་ཡང་དག་པའི་ས་ལ་འཛིན་པའོ། །རྫོགས་ལྡན་གྱི་དགོངས་པའོ། །དེ་ནས་བདག་ཉིད་ཆོས་སྐུར་གྲོལ་བས་ནི། མི་གནས་པའི་ཡེ་ཤེས་ཆེན་པོས་འབྱེད་པ་མེད་པའི་མཁའ་ཀློང་དུ་ཁོད་སྙོམས་སོ། །དེ་བས་ཐ་མས་རྫོགས་ལྡན་ཆེན་པོའོ། །ཞེས་གསུངས་སོ། །གསང་བའི་བདག་པོས་ཞུས་པ། མངོན་པར་རྫོགས་པར་སངས་རྒྱས་པའི་དཔེ་ཇི་ལྟ་བུ་ལགས། མ་རྟོགས་པ་ལ་བར་དོ་ན་སེམས་དངོས་སུ་མེད་པར་སེམས་ཕྱིས་འཆར་བའི་དཔེ་ཇི་ལྟ་བུ་ལགས། སྤྲུལ་པའི་སྐུས་དོན་བྱས་ནས་རང་གྲོལ་བའི་དཔེ་ཇི་ལྟ་བུ། མྱ་ངན་ལས་འདས་པའི་དཔེ་ཇི་ལྟ་བུ་ལགས། ཞིང་ཁམས་གཅིག་པ་ལ་སྙིང་པོ་ཐ་དད་པའི་དཔེ་ཇི་ལྟ་བུ་ལགས། རིག་པ་གཅིག་ལ་རྩལ་སོ་སོར་རྫོགས་པའི་དཔེ་ཇི་ལྟ་བུ་ལགས། རང་ས་ན་གྲོལ་ཞིང་རང་ས་ནས་དབྱེར་མི་ཕྱེད་པའི་དཔེ་ཇི་ལྟ་བུ་ལགས། མུ་བཞིའི་དཔེ་ཇི་ལྟ་བུ་ལགས། ཡེ་ཤེས་རང་ལ་གནས་པའི་དཔེ་ཇི་ལྟ་བུ་ལགས། རྟོག་པ་མེད་པར་བསྒོམ་པས་མི་གྲོལ་བའི་དཔེ་ཇི་ལྟ་བུ་ལགས། རིན་པོ་ཆེའི་སྦུབས་ན་དགོངས་པ་གསལ་ལ་གཞན་གྱིས་མི་གཟིགས་པའི་དཔེ་ཇི་ལྟ་བུ་ལགས། དང་པོ་རིན་པོ་ཆེའི་སྦུབས་ལས་ ― DNG001_Page_0157 ―
[མ་དཔེ་གཟིགས་ན་འདིར་གནོན།]
འཁྲུལ་པའི་དཔེ་ཇི་ལྟ་བུ་ལགས། ཕྱིས་མི་འཁྲུལ་པའི་དཔེ་ཇི་ལྟ་བུ་ལགས། དཔེའི་ངོ་བོ་གང་ལགས། ངེས་ཚིག་གང་ལགས། དབྱེ་བ་ཇི་ལྟར་ལགས། དགོས་ཆེད་ཇི་ལྟར་ལགས། ཞེས་ཞུས་སོ། །སྟོན་པས་བཀའ་སྩལ་པ། རིགས་ཀྱི་བུ་ངེས་པར་ཟུང་ཞིག །མངོན་པར་རྫོགས་པར་སངས་རྒྱས་པའི་དཔེ་ནི། ནམ་ལངས་པས་རི་ཀླུང་མེད་པར་གསལ་བ་ལྟ་བུ་དང་རྒྱ་མཚོ་ལ་གཟའ་སྐར་ཤར་བ་ལྟ་བུ་དང་ཆུ་ཟླ་ལྟ་བུའོ། །བར་དོ་ལ་སེམས་དང་པོ་མེད་པར་ཕྱིས་འཆར་བའི་དཔེ་ནི། ས་བོན་སྐྱེའུ་ལ་མྱུ་གུ་སྔོན་པོ་མེད་པར་ཕྱིས་འབྱུང་བ་ལྟ་བུའོ། །སྤྲུལ་སྐུའི་དོན་བྱས་ནས་རང་གྲོལ་བ་ནི། ཆུ་བྲན་རྒྱ་མཚོར་འདུ་བ་ལྟ་བུའམ་ཉི་མ་ནུབ་ཁར་ཟེར་འདུ་བ་བཞིན་ནོ། །མྱ་ངན་ལས་འདས་པའི་དཔེ་ནི་འཇའ་ཚོན་ནམ་མཁར་ཐིམ་པ་ལྟ་བུའོ། །ཞིང་ཁམས་གཅིག་ལ་རིགས་ཐ་དད་པའི་དཔེ་ནི། མར་མེ་མང་དུ་བཏང་བའི་འོད་མི་ཕྱེད་པར་སྙིང་པོ་སོ་སོར་གསལ་བ་ལྟ་བུའོ། །རིག་པ་གཅིག་ལ་རྩལ་སོ་སོར་རྫོགས་པའི་དཔེ་ནི། ས་བོན་གཅིག་ལ་སྡོང་བུ་སོ་སོར་གྱེས་ནས་དེ་ལ་སྙིང་པོ་སོ་སོར་བྱུང་ནས། འབྲས་བུ་མང་པོ་རྫོགས་པ་བཞིན་ནོ། །རང་ས་ནས་རང་གྲོལ་ནས་དབྱེར་མེད་དུ་གནས་པའི་དཔེ་ནི་ནམ་མཁའ་གུད་དུ་བཅད་པ་བཏང་བ་ལྟ་བུའོ། །མུ་བཞིའི་དཔེ་ནི་གཅིག་དང་ཐ་དད་ལས་གྲོལ་བ་གསེར་དང་གསེར་གྱི་སེར་པོ་ལྟ་བུའོ། །མ་གྲོལ་བ་སྨིག་སྒྱུ་ཆུ་ཟླ་ལྟ་བུའོ། །གྲོལ་བའི་མ་གྲོལ་བ་ཁམས་དང་བུམ་པ་ལྟ་བུའོ། །མ་གྲོལ་བའི་གྲོལ་བ་ཉི་མ་དང་འོད་ལྟ་བུའོ། །ཡེ་ཤེས་རང་ལ་གནས་པའི་རྟགས་ཀྱི་དཔེ་ནི་ཆང་འཐུང་བས་ར་རོ་བ་ལྟ་བུའོ། །རྟོག་པ་མེད་པའི་བསྒོམས་པས་མི་གྲོལ་དཔེ་ནི། རི་མོའམ་ལྡེར་སོ་ལྟ་བུའོ། །རིན་པོ་ཆེའི་སྦུབས་ནས་དགོངས་པ་གསལ་བ་གཞན་གྱིས་མི་མཐོང་བའི་དཔེ་ནི། གནས་ཁང་ཡངས་པར་མཚན་མོ་མགྲོན་པོ་སྔ་ཕྱི་ཚོགས་ནས་ཉལ་བ་ལྟ་བུའོ། །དང་པོ་རིན་པོ་ཆེའི་སྦུབས་ནས་འཁྲུལ་པའི་དཔེ་ནི། བྱིས་པས་མེ་ལོང་དུ་ཤར་བའི་བྱད་ངོ་མ་ཤེས་པར་གཞན་དུ་མཐོང་བ་ལྟ་བུའོ། །ཕྱིས་མི་འཁྲུལ་པའི་དཔེ་ནི། བྱིས་པས་རང་གི་ན་རྫོགས་ནས་རང་བྱད་ལ་རང་གི་ངོ་ཤེས་པ་ལྟ་བུའམ། ལོ་ཐོག་ནས་སུ་སྨིན་ནས་ནང་པར་ལྗང་པར་ ― DNG001_Page_0158 ―
[མ་དཔེ་གཟིགས་ན་འདིར་གནོན།]
མི་འགྱུར་བ་ལྟ་བུའོ། །རིགས་ཀྱི་བུ་དཔེའི་ངོ་བོ་ནི། སོ་སོར་མཚོན་པའི་དཔེ་ཇི་བཞིན་པའོ། །དཔེའི་ངེས་ཚིག་ནི་ཕྱོགས་མཐུན་འདྲ་བའི་སྒོ་ནས་མཚོན་པར་བྱེད་པའི་ཕྱིར་ནའོ། །དབྱེ་བ་ནི་གཞི་མཚོན་པའི་དཔེ། རྩལ་མཚོན་པའི་དཔེ་དང་། གྲོལ་བ་མཚོན་པའི་དཔེ་དང་། གཉིས་མེད་མཚོན་པའི་དཔེའོ། །དགོས་པ་ནི་དོན་རྟོགས་པའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། དབང་པོ་ཡང་རབ་ལ་གྲོལ་དུ་མེད་པར་བསྟན་པ་དང་། འབྲིང་ལ་རབ་འབྲིང་ཐ་གསུམ་གྱི་དབྱེ་བ་དང་། ལྔ་ལྡན་རྫོགས་ལྡན་ཐད་ཀར་ངོས་བཟུང་བ་དང་། མངོན་ཤེས་དྲུག་ཐུགས་རྗེའི་འབྱུང་ལུགས་དང་བཅས་པ་དང་། རྫོགས་ལྡན་ཆེན་པོ་སོ་སོར་ཕྱེ་སྟེ་བསྟན་པའི་ལེའུ་སྟེ་བརྒྱ་དང་བཅུ་གསུམ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །དེ་ཡི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། གསང་བའི་བདག་པོ་ངེས་པར་ཟུང་ཞིག །སོ་སོའི་ངོ་བོ་ངེས་ཚིག་དང་། །དབྱེ་བ་མིང་དང་མཐུན་དཔེ་བསྟན། །འཁོར་བའི་ཆོས་ལ་མི་གནས་པར། །མྱ་ངན་འདས་པའི་དོན་ལ་གནས། །གྲོལ་བ་སྤྱི་ཡི་ངོ་བོར་བཤད། །རང་རང་སོ་སོའི་ངོ་བོར་ཏེ། །ལུས་ལས་གྲོལ་བའི་ངོ་བོ་ནི། །རང་གདངས་ཆེན་པོ་གསལ་བ་ཡིན། །ཡུལ་ལས་གྲོལ་བའི་ངོ་བོ་ནི། །རིག་པ་དངོས་མེད་རིན་ཆེན་སྦུབས། །སེམས་ལས་གྲོལ་བའི་ངོ་བོ་ནི། །རྟོག་མེད་དྲི་དག་རང་གསལ་ཡིན། །གྲོལ་བ་ཞེས་པའི་ངེས་ཚིག་ནི། །རྩོལ་བའི་ཆོས་ལས་རབ་འདས་ཤིང་། །འཁྲུལ་པ་གསུམ་གྱིས་མ་བཅིངས་པས། །ངེས་ཚིག་གཏན་ཚིགས་བཅས་པ་ཡིན། །དབྱེ་བ་ངོ་བོའི་སྐབས་སུ་བཤད། །དཔེ་ནི་སྦྲུལ་ལ་མདུད་བོར་དང་། །རྔ་མ་དག་གི་མདུད་པ་བཞིན། །ཐུགས་རྗེའི་ངོ་བོ་ངེས་ཚིག་ནི། །ངོ་བོ་མ་འགགས་གཟུགས་སྐུ་གཉིས། །ཅིའི་ཕྱིར་ན་ཐུགས་རྗེ་ཞེས་བྱ་ན། །མ་འགགས་གནོད་པ་སེལ་བའི་རྟགས། །དབྱེ་ན་ཆེན་པོ་ཆུང་ངུ་གཉིས། །རྟོག་མེད་དང་ནི་རྟོག་བཅས་སོ། །འཛིན་པར་བྱེད་པས་ལྕགས་ཀྱུ་བཞིན། །སྒྲོལ་བར་བྱེད་པའི་གྲུ་བཞིན་ནོ། ། ― DNG001_Page_0159 ―
[མ་དཔེ་གཟིགས་ན་འདིར་གནོན།]
མ་རིག་སེལ་བས་ཉི་ཟླ་བཞིན། །སྡུག་བསྔལ་ནད་སེལ་སྨན་དང་སྨན་པ་བཞིན། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། གྲོལ་བ་དང་ཐུགས་རྗེའི་དོན་བསྟན་པའི་ལེའུ་སྟེ་བརྒྱ་དང་བཅུ་བཞི་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །བག་ཆགས་སྦུབས་ན་གནས་པའི་དཔེ་ཇི་ལྟར་ལགས། སྦུབས་འཕོ་བའི་དཔེ་ཇི་ལྟར་ལགས། འདིར་རྟོགས་པས་བར་དོར་ཤེས་པ་སྐྱེ་བ་ཇི་ལྟར་ལགས། བག་ཆགས་སྦུབས་བོར་བའི་ཚེ་ཡེ་ཤེས་དང་མི་འབྲལ་བའི་དཔེ་ཇི་ལྟར་ལགས། འཁྲུལ་བ་ལྡོག་པའི་དཔེ་ཇི་ལྟར་ལགས། རྟོགས་པ་ཅན་འཆི་ཁར་ནད་དང་རྐྱེན་གྱིས་དཀྲུགས་ཀྱང་། ཤེས་པ་ཕྱིས་མི་འཁྲུལ་པའི་དཔེ་ཇི་ལྟར་ལགས། ཆོས་སྐུ་ལུས་ལས་མ་བྱུང་བར་ཡེ་ཤེས་སྔོན་དུ་འཆར་བའི་དཔེ་ཇི་ལྟར་ལགས། སྐད་ཅིག་མའི་ཆོས་སྐུ་གསུམ་དུ་བསྡུ་བར་གསུངས་པ་གང་ལགས། སྐད་ཅིག་མ་ལ་གྲོལ་བའི་དཔེ་གང་ལགས། ཡེ་ཤེས་ཀྱི་གདངས་ལ་ཤེས་པ་མྱུར་དུ་འཇུག་པའི་དཔེ་ཇི་ལྟར་ལགས། ཆོས་ཉིད་ལས་ཡེ་ཤེས་ཀྱི་སྣང་བ་འཆར་བའི་དཔེ་ཇི་ལྟར་ལགས། ཕྱིར་མི་ལྡོག་པའི་དཔེ་ཇི་ལྟ་བུ་ལགས། ཞེས་ཞུས་པས། སྟོན་པས་བཀའ་སྩལ་པ། །རིགས་ཀྱི་བུ་ངེས་པར་ཟུང་ཞིག །བག་ཆགས་སྦུབས་ན་གནས་པ་ནི། །སེང་ཕྲུག་དང་ཁྱུང་ཕྲུག་ལྟ་བུའོ། །སྦུབས་འཕོ་བའི་དཔེ་བྱེ་ཕྲུག་སྒོ་ང་ནས་འབྱུང་བ་དང་། སྦྲུལ་སྐོགས་པ་དང་བྲལ་བ་བཞིན་ནོ། །འདི་རྟོགས་པས་བར་དོ་ཆོད་པ་ནི། སྔར་འདྲིས་པའི་མི་ཕྱིས་ངོ་ཤེས་པ་ལྟ་བུའོ། །སྦུབས་འཕོ་ཁར་ཡེ་ཤེས་དང་མི་འབྲལ་བར་འགྲོགས་པ་ནི། ཚང་བང་ནས་མེ་སྒྲོན་ཕྱིར་བཏོན་པས་ཚང་བང་མུན་པར་གྱུར་ཏེ། མིའི་ལག་པ་སྒྲོན་མེ་དང་མ་བྲལ་བས་འགྲོ་སར་ཕྱིན་པ་ལྟ་བུའོ། །འཁྲུལ་པ་ལྡོག་པའི་དཔེ་གཉིད་སད་པ་ལྟ་བུའོ། །རྟོགས་པ་ཅན་འཆི་ཁར་ནད་དང་རྐྱེན་གྱིས་དཀྲུགས་ཀྱང་མི་བརྗེད་པའི་གཟུངས་ཐོབ་སྟེ། ཤེས་པ་ཕྱིས་མི་འཁྲུལ་བའི་དཔེ་ནི། ཆུ་ཟླ་ལ་རྡོ་བརྒྱབ་ནས་འཁྲུགས་ནས་མི་གསལ་ཀྱང་ཆུ་དྭངས་པའི་འཕྲོ་ལ་གསལ་བ་ལྟ་བུའོ། །ཆོས་སྐུ་ལུས་ལས་མ་བྱུང་བར་ཡེ་ ― DNG001_Page_0160 ―
[མ་དཔེ་གཟིགས་ན་འདིར་གནོན།]
ཤེས་སྔོན་རོལ་དུ་འཆར་བའི་དཔེ་ནི། ཉི་མ་ཤར་གྱི་ལ་ཀ་ན་འདུག་ཀྱང་འོད་ནུབ་རི་ལ་འཆར་བ་ལྟ་བུའོ། །སྐད་ཅིག་མའི་ཆོས་སྐུ་གསུམ་ནི། འཛིན་པར་བྱེད་པའི་ལྕགས་ཀྱུའི་འོད་ལྔས་མ་བཟུང་བ་གཟུང་བར་འགྱུར་བ་དང་། སྡུད་པར་བྱེད་པའི་དྭངས་མ་ཆོས་ཀྱི་ངོ་བོ་ཡེ་ཤེས་ཤར་བའི་ངང་དུ་ཐིམ་པ་དང་། མི་བརྗེད་པའི་གཟུངས་རྒྱུན་གྱི་ཐག་པ་དང་གསུམ་མོ། །སྐད་ཅིག་མ་གཅིག་ལ་གྲོལ་བའི་དཔེ་ནི། སེང་གེ་མཆོངས་པ་ལྟ་བུ་དང་། བུམ་པ་ཆག་པས་མར་མེ་གསལ་བ་ལྟ་བུ་དང་། སྐར་མདའ་ནམ་མཁའ་ལ་རྒྱུག་པ་ལྟ་བུའོ། །ཡེ་ཤེས་ལ་ཤེས་པ་མྱུར་དུ་འཇུག་པ་ནི་གསེར་གྱི་ཐུར་མ་ལྟ་བུའོ། །ཆོས་ཉིད་ལ་ཡེ་ཤེས་ཀྱི་སྣང་བ་འཆར་བའི་དཔེ་ནི། ནམ་མཁའ་ལ་འཇའ་ཤར་བ་ལྟ་བུའོ། །ཕྱིར་མི་ལྡོག་པའི་དཔེ་ནི་ཐོག་དང་དཔག་ཆེན་གྱི་མདའ་བཞིན་ནོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། དཔེ་སྤྱིར་དྲིལ་ནས་དོན་བཤད་དང་བཅས་པའི་ལེའུ་སྟེ་བརྒྱ་དང་བཅོ་ལྔ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །མྱ་ངན་འདའ་ལུགས་ཇི་ལྟར་ལགས། །ཞེས་ཞུས་སོ། །སྟོན་པས་བཀའ་སྩལ་པ། །སངས་རྒྱས་མྱ་ངན་འདའ་བའི་ཚུལ། །ཟུར་ཙམ་གོང་དུ་ངས་བསྟན་ཡང་། །ཁྱོད་ཀྱིས་ངེས་པར་མ་ཤེས་ན། །རྒྱས་པར་ངས་བཤད་ལེགས་པར་ཟུང་། ཤེས་རབ་མཁའ་ལ་འདེགས་པ་ཡི། །མ་བསྐྱོད་ཤུགས་ནི་བསྐྱོད་པར་བྱེད། །འབྱུང་བ་མ་ལ་ཞ་བ་ཡི། །མཚན་མ་རང་སར་གྲོལ་བར་བྱེད། །ཡེ་ཤེས་དབྱིངས་སུ་ཐིམ་པ་ཡིས། །རྩལ་རྟོག་གཞི་ལ་ཐིམ་པར་སྟོན། །ཤེས་རབ་མཁའ་ལ་ཐིམ་པ་ཡིས། །སྐུ་གསུམ་ཡེ་ནས་ནང་གསལ་སྟོན། །རིག་པ་རང་ས་ཟིན་པ་ཡིས། །དགོངས་པ་འགྱུར་བ་མེད་པར་སྟོན། །ཞེས་གསུངས་སོ། །དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །རང་བྱུང་ཚིག་ལྔའི་དགོངས་པ་དེ་ལྟར་ན། །སོ་སོའི་མཚན་ཉིད་རྣམ་གྲངས་དང་། །དཔེ་དང་དོན་གྱི་གྲོལ་ལུགས་རྣམས། །ད་ལྟར་གནས་དང་རྗེས་འཇུག་ལ། །ཐབས་ལ་མཁས་པས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ལག་ན་ ― DNG001_Page_0161 ―
[མ་དཔེ་གཟིགས་ན་འདིར་གནོན།]
རྡོ་རྗེ་ངེས་ཟུང་ཞིག །ཤེས་རབ་མཁའ་ལ་འདེགས་པ་ལ། །མཚན་ཉིད་རྣམ་གྲངས་རྣམ་པ་བཞི། །སྟོབས་ལྡན་མ་དང་ཤུགས་འཆང་མ། །འདེགས་བྱེད་མ་དང་བརྟན་མ་བཞི། །སྟོབས་ལྡན་མས་ནི་འཆར་བ་དང་། །གཉིས་སུ་མེད་པར་སྦྱོར་བར་བྱེད། །ཤུགས་འཆང་མ་ཞེས་བྱ་བ་དེ། །དང་པོ་རིག་པའི་རྩལ་དུ་ནི། །སྐུ་དང་ཡེ་ཤེས་འཆར་བ་ཡང་། །རྩོལ་བ་མེད་པའི་ངང་གིས་ཤར། །ཐ་མ་འཁོར་རྣམས་གཙོ་བོ་ལྔ་ལ་འདུས། །གཙོ་བོ་ལྔ་ཡང་རིན་ཆེན་སྦུབས་སུ་གཤེགས། །གཙོ་དང་བཅས་ཏེ་བསྐྱོད་པ་མ་ཡིན་ཡང་། །ངང་ངམ་ཤུགས་ཀྱིས་གྲོལ་བའི་ཕྱིར་ན་ཤུགས་འཆང་མའོ། །དེའི་དུས་ན་ཆོས་སྐུ་རིན་པོ་ཆེ་ལྟ་བུ་ལ་རྡོས་པ་ཅན་གྱི་ཆོས་མེད་དེ། ཆོས་ཉིད་ནམ་མཁའ་ལྟ་བུ་དང་། །ཆོས་སྐུ་ནམ་མཁའ་ལྟ་བུ་གཉིས། །གཉིས་སུ་མེད་པར་ཟང་ཐལ་བ། །མ་བྱིང་སེང་ངེ་གནས་པས་འདེགས་བྱེད་མ། དེ་ཙམ་དུས་ན་ཡེ་ཤེས་རླུང་གིས་མི་གཡོ་བས་བརྟན་མའོ། །དེ་རྣམས་རླུང་གི་མཚན་ཉིད་གཅིག་ལ་གནས་པའོ། །རིགས་ཀྱི་བུ་འབྱུང་བ་མ་ལ་ཞ་བའི་མཚན་ཉིད་ལ་ལྔ་སྟེ། འཁྲུལ་པའི་འབྱུང་བ་རྣམ་པ་ལྔ། །ཡེ་ཤེས་ལྔ་ཡི་གདངས་ལ་འདུས། ཡེ་ཤེས་ལྔའི་འོད་གདངས་ཀྱང་། རང་བྱུང་འབྱུང་བ་ལྔ་ལ་འདུས། དེའི་ཚེ་ན་རླུང་གི་རྒྱ་གྲམ་བཀོད་ལེགས་ཏེ་གདན་དུ་བཏིང་བའོ། །དེ་ཡང་རླུང་ནི་མ་བྱིང་བའོ། །དུས་དེར་རླུང་གཡོ་བྱེད་མེད་པར་གནས་པས་ཀྱང་རྒྱ་གྲམ་ལྟ་བུའོ། །དེ་ནི་གཡོ་བྱེད་མེད་པར་བསྐྱོད་པ་ལྟ་བུའོ། །ཆུ་ཤེལ་གྱི་འཁོར་ལོ་བརྩེགས་ལེགས་ཏེ། འབྱེད་པ་མེད་པའི་ཤེས་རབ་ཀློང་གཅིག་དུ་དྲིལ་ཏེ། གཤེར་བ་མེད་པའི་ཆུའོ། །དེ་བཞིན་རྣམ་པར་དག་པའི་དབྱིངས་དེ་བརྩེགས་ལེགས་སོ། །དེ་ཡང་དབྱིངས་རྣམ་པར་དག་པའི་ངང་ན། རིག་པ་གསལ་སྟོང་དབྱེར་མེད་དོ། །དེའི་ངང་ནས་ཡེ་ཤེས་ཀྱི་སྤྱན་མ་འགགས་པར་ཤར་བ་འོད་ཀྱི་བུམ་པ་ལྔར་གནས་ལ། དེའི་སྙིང་པོ་རིགས་ལྔའི་སྐུ་གསལ་ལ་མ་འདྲེས་པར་གནས་སོ། །དེས་ན་བརྩེགས་ལེགས་སོ། །རིགས་ཀྱི་བུ་རང་གསལ་འཛིན་པ་མེད་པའོ། །དེའི་དུས་སུ་སྲ་བ་དང་བཅས་པའི་ས། སྲ་བ་མེད་པའི་ངང་དུ་གྲོལ་ཏེ། དོན་འགྱུར་བ་མེད་པའོ། །དེ་ཡང་རང་གི་ངོ་བོ་འགྱུར་བ་མེད་པའི་ངང་ན། གོང་མ་བཞིན་མ་འདྲེས་པར་ ― DNG001_Page_0162 ―
[མ་དཔེ་གཟིགས་ན་འདིར་གནོན།]
ཡོངས་སུ་རྫོགས་པར་གནས་པ་མཆོད་རྟེན་ལྟ་བུའོ། །དེ་ལ་བཟང་ངན་དང་ཆེ་ཆུང་དང་ཡངས་དོག་མེད་པར་གནས་པས་ཀུན་ཏུ་ཁོད་སྙོམས་པའོ། །འདུག་ཚུལ་སྐུ་དང་ཡེ་ཤེས་ལ། སྣང་ཚུལ་སྐུ་དང་ཡེ་ཤེས་ལྔར་ཤར་བས། རྟོགས་ཚུལ་གཉིས་མེད་ཆེན་པོར་རྟོགས་ཏེ། དབྱེ་བ་མེད་པའི་ཚུལ་ཤེས་པའོ། །རིགས་ཀྱི་བུ་དུས་དེར་ཚ་བ་དང་བཅས་པའི་མེ་ཚ་བ་མེད་པའི་ངང་དུ་གྲོལ་ཏེ། རང་རིག་པའི་ཡེ་ཤེས་ལས་གཞན་སྣང་གི་རྟོག་པ་མེད་པའོ། །དྲི་མ་མེད་པའི་རིག་པ་ལ་སྐུ་དང་ཡེ་ཤེས་སུ་གནས་ཀྱང་། དོན་གཉིས་སུ་མེད་པར་གསལ་ཏེ། ས་བོན་འབྲས་བུར་སྨིན་ལ་འབྲས་བུ་འགྱུར་བ་མེད་པར་གནས་པ་ནི། མེ་ཏོག་པད་མ་འདྲ་བར་འོད་འབར་ཏེ། མ་སྨིན་པ་སྨིན་པར་བྱས་སོ། །རིག་པའི་ཡེ་ཤེས་འབྱུང་བ་ལས་འདས་པའི་རང་གདངས། འོད་ལས་འདས་པའི་ཡེ་ཤེས། ཡིད་ལས་འདས་པའི་ཤེས་རབ་དུས་ཐམས་ཅད་དུ་སྐྱེ་འགགས་དང་ནུབ་པ་མེད་པར་གནས་པ་ནི། ནམ་མཁའ་ཁྱབ་པ་མེད་པའི་གདངས་ཅན་དེ། རྒྱལ་མཚན་གྱི་རྩེ་མོ་ལྟ་བུའོ། །དེ་ལྟར་འབྱུང་བ་ལྔ་པོ་མ་ཐོག་ནས་ཤར་བས། མ་ཐོག་ཏུ་གྲོལ་ཏེ། མི་གནས་པས་འབྱུང་བ་མ་ལ་ཞའོ། །དེ་ཡང་དང་པོ་དབྱིངས་དང་རིག་པ་དབྱེར་མེད་ཀྱི་ངང་ལ་ཤར་བས། ཐ་མ་ཡང་དེའི་ངང་དུ་དག་ཅིང་ཐིམ་པས་ཡེ་ཤེས་དབྱིངས་སུ་ཐིམ་པའི་མན་ངག །ཡེ་ཤེས་དབྱིངས་སུ་ཐིམ་པས་སོ་སོར་རྟོགས་པའི་ཤེས་རབ་ལས་འདས་ཤིང་། གཟིགས་སྣང་གི་ཡུལ་ལ་མི་གནས་པས་ཡེ་ཤེས་རྩེ་གཅིག་པར་གསལ་བ་སྟེ། ཡེ་ཤེས་ཀྱི་སྤྱན་རྣམ་པར་དག་པའོ། །དེའི་ཚེ་ཤེས་རབ་ཀྱི་སྤྱན་དང་ཆོས་ཀྱི་སྤྱན་ལས་གྲོལ་བའོ། །རིགས་ཀྱི་བུ་ཡེ་ཤེས་ཀྱི་དབྱིངས་སུ་ཐིམ་ཀྱང་། སྟོང་པ་ཕྱང་ཆད་དུ་མ་གྱུར་ཏེ། དབྱིངས་ཀྱི་ཐིག་ལེ་གཤེར་བ་མེད་པའི་ཆུས། ནང་མེད་པའི་ནང་དུ་འདུས་ཏེ། སྐུ་དང་ཡེ་ཤེས་ནང་གསལ་དུ་གནས་པས། ཤེས་རབ་མཁའ་ལ་འཁྱིལ་པའོ། །དེ་ཡང་རྒྱས་པར་བསྟན་ན་མཚན་ཉིད་བཞི་སྟེ། སྐུ་དང་ཡེ་ཤེས་དབྱིངས་སུ་ཐིམ་ཀྱང་། །རིག་པ་རང་གསལ་དབྱིངས་ན་མི་གནས་པས། ཐིམ་པ་ལ་མ་རྨུགས་པའོ། །མ་རྨུགས་ཀྱང་སེམས་ཉིད་རྣམ་པར་དག་པ་སྟེ། རང་རིག་པའི་ཡེ་ཤེས་ལས་གཞན་སྣང་རྟོག་པ་མི་མངའ་བས། ། ― DNG001_Page_0163 ―
[མ་དཔེ་གཟིགས་ན་འདིར་གནོན།]
འཛིན་རྟོག་བྲལ་བའི་ཡེ་ཤེས་སོ། །རིགས་ཀྱི་བུ་དེ་ནི་གཞན་མ་ཡིན་ཏེ། རང་གི་རིག་པ་འདི་ཉིད་དོ། །འདི་ཉིད་རྟོག་པ་ལྟར་སྣང་བ་ནི། རྐྱེན་ཕྲ་མོས་སྣང་བའོ། །དོན་ཤེས་པ་གནས་འགྱུར་མ་ཡིན་ཏེ། །དཔེར་ན་ཁྱིམ་གྱི་ནམ་མཁའ་སྒྲིབ་པས་བཅད་ཀྱང་རྒྱ་མཐོངས་ན་ཡར་ཟང་ཐལ་ཏེ་ནམ་མཁའ་དབྱེར་མེད་དོ། །དེ་བཞིན་དུ་བག་ཆགས་སྦུབས་ཀྱིས་བཅད་ཀྱང་། དོན་ཡེ་ཤེས་ཟང་ཐལ་ཏེ། བརྟགས་ན་མ་བསྒྲིབས་པར་ཟང་ཐལ་ལོ། །དེ་བས་ན་ཡིན་པ་ལ་བདག་མེད་པའོ། །དེའི་ངང་ལ་དུས་གསུམ་གྱི་སངས་རྒྱས་བཞུགས་ཀྱང་། འབྱེད་པ་མེད་པའི་ཤེས་རབ་རང་གསལ་རྟོག་པ་མེད་པར་བཞུགས་སོ། །རིག་པའི་ཡོན་ཏན་དང་པོ་ཀློང་ནས་ཤར་བ། ཐ་མར་མི་འགགས་པ་རང་གི་ཀློང་ན་གནས་ཏེ། ཡུམ་གྱི་བུམ་པ་ཡེ་ཤེས་ཀྱི་སྐུ་ལྔ་སོ་སོར་གནས་ཏེ། རང་སྣང་ལས་གཞན་སྣང་མེད་པའོ། །དོན་དེ་སོ་སོར་མ་འདྲེས་པ་ལ་མི་འབྱེད་པར་བཞུགས་སོ། །དུས་དེར་རིག་པ་རང་ས་ཟིན་ཏེ། །གཉིས་མེད་ཆོས་སྐུ་མི་འགྱུར་བས། སྟོང་པ་ཉིད་རྡོ་རྗེ་ལྟ་བུའི་སྐུ་ཐོབ་པོ། །གཉིས་སུ་མེད་པ་ཆོས་སྐུའི་ངང་ན་རིག་པ་ཡེ་ཤེས་ཀྱི་སྤྱན་འགགས་པ་མེད་པར་གསལ་བས། ལོངས་སྤྱོད་རྫོགས་པའི་སྐུ་འགགས་པ་མེད་པའི་གསུང་གཡུང་དྲུང་ལྟ་བུའི་ཚེའོ། །རིགས་ལྔ་སྤྲུལ་པའི་སྐུ་ཡེ་ཤེས་ཀྱི་སྤྱན་གྱི་ངང་ན་གསལ་བས་དེ་གསུམ་དབྱེ་བ་མེད་པའི་ཤེས་རབ་ཀློང་གཅིག་དུ་འཁྱིལ་ནས་ཐུན་མེད་པའི་ཐུན་ཆེན་པོ་གཅིག་གི་ངང་དུ་གྲོལ་ཏེ། རྒྱུན་གྱི་ཏིང་ངེ་འཛིན་རྩེ་གཅིག་གི་ངང་ལ་གནས་སོ། །དེའི་ཚེ་ཡུལ་ཉིད་ལས་གྲོལ་ཏེ། རང་སྣང་ལས་གཞན་སྣང་མེད་དོ། །སྤྱན་གཉིས་དག་ནས་ཡེ་ཤེས་རང་གསལ་གྱི་སྤྱན་རྩེ་གཅིག་པའོ། །ལུས་གཉིས་ལས་འདས་ཏེ། རིག་པ་རྐྱང་པ་རིན་པོ་ཆེ་ལྟ་བུ་དྲི་མ་དང་བྲལ་ཏེ། གཅེར་བུ་རུ་གནས་པའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། མྱ་ངན་ལས་འདས་པའི་དགོངས་པ་དང་། དེ་མཚོན་པའི་ཚིག་ལྔའི་དོན་བཤད་པའི་ལེའུ་སྟེ་བརྒྱ་དང་བཅུ་དྲུག་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་མཐའ་ལས་འདས། །མྱ་ངན་འདས་པའི་དོན་བཤད་ཇི་ལྟར་ལགས། །ཞེས་ཞུས་སོ། ། ― DNG001_Page_0164 ―
[མ་དཔེ་གཟིགས་ན་འདིར་གནོན།]
སྟོན་པས་བཀའ་སྩལ་པ། རིགས་ཀྱི་བུ་ངེས་པར་ཟུང་ཞིག །ངོ་བོ་ངེས་ཚིག་དབྱེ་བ་དང་། །མཚན་ཉིད་དབྱེ་བ་བཞི་ཡིས་བཤད། །མྱ་ངན་འདས་པའི་ངོ་བོ་ནི། །མི་གནས་ཡེ་ཤེས་ཆེན་པོའོ། །ངེས་ཚིག་སྡུག་བསྔལ་གྱི་མཐའ་ལས་འདས་པ་སྟེ། མི་རྟོག་པའི་བདེ་བ་ཆེན་པོ་ལ་གནས་པའི་ཕྱིར་ནའོ། །དབྱེ་བ་ནི་ཟག་བཅས་ཀྱི་མྱ་ངན་ལས་འདས་པ་དང་། ཟག་པ་མེད་པའོ། །མཚན་ཉིད་ནི་མཐའ་རྣམ་པ་བཞི་ལས་འདས་པའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། མྱ་ངན་ལས་འདས་པའི་དོན་བཤད་བསྟན་པའི་ལེའུ་སྟེ་བརྒྱ་དང་བཅུ་བདུན་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །རྟོག་མེད་གསལ་བ་སྤྱན་གྱི་དོན་རྣམས་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྒྱུད་ལུང་ཀུན་གྱི་ནང་ན་སྤྱན་ཞེས་བརྗོད་པ་ནི། ངས་བསྟན་འདི་ལྟར་ཤེས་པར་བྱའོ། །ངོ་བོ་དབྱེ་བ་བཅས་པ་ནི། ཡེ་ཤེས་ཀྱི་སྤྱན་འབྱེད་པ་མེད་པ་ནི་རྩེ་གཅིག་ཏུ་གསལ་བ་དང་། ཆོས་ཀྱི་སྤྱན་རྟོག་པ་མེད་པར་རྣམ་པར་མཁྱེན་ཅིང་གསལ་བ་དང་། ཤེས་རབ་ཀྱི་སྤྱན་རྣམ་པར་དཔྱོད་ཅིང་དོན་སོ་སོར་གསལ་བ་དང་། ལྷའི་སྤྱན་རྣམ་པར་དག་པ་བག་ཆགས་ཟད་པ་ལ་སྣང་བ་དང་། ཤའི་སྤྱན་རྣམ་པར་དག་པ་ཏིང་ངེ་འཛིན་ལས་སུ་རུང་བ་ལ་གསལ་བ་དང་། ཆུ་བུར་གྱི་མིག་བག་ཆགས་ཀྱི་ལུས་ཅན་རྣམས་ལ་ཐུན་མོང་དུ་སྣང་ཞིང་གསལ་བའོ། །ངེས་ཚིག་ནི་དོན་མཐོང་ཞིང་མ་འགགས་པར་གསལ་བས་ནའོ། །མཚན་ཉིད་སྤྱི་ནི་སྒྲིབ་པ་དང་བྲལ་བའོ། །དཔེ་ནི་ཉི་མའི་སྙིང་པོ་ལྟ་བུའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྤྱན་གྱི་དོན་བསྟན་པའི་ལེའུ་སྟེ་བརྒྱ་དང་བཅོ་བརྒྱད་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྣམ་པར་མཁྱེན། །རྒྱུད་ལུང་མན་ངག་ལས་བྱུང་བའི། །མུ་བཞིའི་དོན་ཡང་བཤད་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །མུ་བཞིའི་ངོ་བོ་ངེས་ཚིག་དང་། །དབྱེ་བ་མཐུན་པའི་དཔེ་རྣམས་ཏེ། །དཔེ་ནི་གོང་ལྟར་ཤེས་པར་བྱ། །ངོ་བོ་དབྱེ་བ་བཅས་པ་ནི། །མུ་བཞི་རྣམ་པ་གཉིས་ ― DNG001_Page_0165 ―
[མ་དཔེ་གཟིགས་ན་འདིར་གནོན།]
ཡིན་ཏེ། །དུས་དང་གྲོལ་བ་ལ་སོགས་བརྩི། །དང་པོ་དུས་ཀྱི་མུ་དབྱེ་ན། །ལུས་ཀྱི་མཐའ་རྫོགས་པའི་དུས་དང་། ཤེས་རབ་ཀྱི་རྩལ་རྫོགས་པའི་དུས་དང་། ལས་ཀྱི་མཐའ་ཟད་པས་ཆེ་བའི་ཡེ་ཤེས་མཐར་རྫོགས་པའི་དུས་དང་། ཡང་དག་པར་རྫོགས་པའི་སངས་རྒྱས་ལ་ཐུགས་རྗེའི་རྩལ་ཟད་པའི་དུས་སོ། །གྲོལ་བའི་མུ་བཞི་ནི། གཅིག་པ་དང་ཐ་དད་པ་ལས་གྲོལ་བའི་ཐིག་ལེ་དང་རང་བྱུང་གི་ཡེ་ཤེས་སོ། །རིགས་ཀྱི་བུ་ཅིའི་ཕྱིར་ན་རང་བྱུང་ཡེ་ཤེས་ཉིད་ཐིག་ལེ་ཡིན་ལ། ཐིག་ལེ་ཉིད་ཀྱང་རང་བྱུང་གི་ཡེ་ཤེས་སུ་གསལ་བས། གཅིག་དང་ཐ་དད་དུ་བརྗོད་པ་ལས་འདས་པའོ། །གཅིག་པ་དང་ཐ་དད་པ་ལས་གྲོལ་བ་ནི། ཆོས་སྐུ་དང་ནམ་མཁའོ། །རིགས་ཀྱི་བུ་ཅིའི་ཕྱིར་ན། དེ་གཉིས་ཐ་དད་པའི་ཕྱིར་དེ། རང་བཞིན་དག་པའི་ནམ་མཁའ་ནི། ཁ་དོག་དང་དབྱིབས་ཀྱི་བདག་ཉིད་དང་། འབྱུང་བའི་རང་བཞིན་དག་ཀྱང་། བག་དང་མ་བྲལ་ཏེ་ངོ་བོ་རིག་མེད་སྟོང་པ་ཡིན་པའི་ཕྱིར་རོ། །ཆོས་སྐུ་ཐིག་ལེ་ཆེན་པོ་ནི། སྟོང་པར་མཐུན་ཀྱང་དེ་རྣམས་ལས་ལྡོག་སྟེ། དོན་དེས་གཅིག་པ་དང་ཐ་དད་པ་ལས་གྲོལ་བའོ། །གྲོལ་བའི་མ་གྲོལ་བ་ནི་སེམས་དང་ཡེ་ཤེས་ཏེ། །གྲོལ་བ་ནི་གཞི་གཅིག་པའོ། །སེམས་རྟོག་བཅས་སུ་གསལ་ལ། ཡེ་ཤེས་རྟོག་མེད་དུ་བཞུགས་པས། དོན་དེས་རྩལ་གྱི་ངོ་བོ་ནས་མ་གྲོལ་བའོ། །མ་གྲོལ་བའི་གྲོལ་བ་ནི་ཐིག་ལེ་དང་ཡུལ་ཏེ། ཐིག་ལེའི་རིག་པ་འགགས་པ་མེད་པ་དང་། ཡུལ་མེད་སྟོང་པར་གནས་པས་མ་གྲོལ་བའོ། །གྲོལ་བ་ནི་ཆོས་ཐམས་ཅད་ཐ་དད་པ་ལྟ་བུ་མ་ཡིན་པས། སྟོང་པ་དབྱེར་མེད་དུ་གནས་པས། སོ་སོར་བརྗོད་པ་ལས་འདས་པའི་གསལ་བ་ཟང་ཐལ་ལོ། །དོན་དེས་མ་གྲོལ་བའི་གྲོལ་བའོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། མུ་བཞིའི་དོན་བསྟན་པའི་ལེའུ་སྟེ་བརྒྱ་དང་བཅུ་དགུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །སྒྲ་ཡི་དོན་བཤད་གསུང་དུ་གསོལ། །ཞེས་ཞུས་སོ། །སྟོན་པས་བཀའ་སྩལ་པ། ངས་བཤད་རྒྱུད་ལུང་ཐམས་ཅད་དུ། །སྒྲ་རྣམས་ཇི་ལྟར་སྣང་མོད་ཀྱི། །སྒྲ་ཡི་དབྱིངས་དང་སྒྲུབ་བྱེད་ ― DNG001_Page_0166 ―
[མ་དཔེ་གཟིགས་ན་འདིར་གནོན།]
དང་། གཞན་སེལ་ཕན་པའི་རྐྱེན་ཅན་ནོ། །རྣམ་པ་བཞི་རུ་བསྡུས་ལ་བསྟན། །སྒྲ་ཡི་དབྱིངས་ནི་འ་དང་ཨའོ། །དེ་གཉིས་ཀུན་གྱི་འབྱུང་གནས་ཡིན། །དེ་ཡང་ཇི་ལྟར་འབྱུང་ཞེ་ན། །དེ་གཉིས་སུ་མེད་པར་མ་བྱུང་བའོ། །དེ་གཉིས་མི་འགྱུར་བས་སའོ། །དེ་གཉིས་ཀྱི་བར་དུ་ཡེ་ཤེས་མི་འགག་པར་རང་བྱུང་བས་ཧའོ། །དེ་ལས་ཤེས་རབ་སྐྱེ་བས་ཤ་འབྱུང་བའོ། །དེ་གཉིས་ཀ་ཕྱི་མོ་ཡིན་པ་དང་། དེ་ལྟར་སྣང་བའི་སྐུ་གཉིས་ཐུགས་རྗེར་འབྱུང་བས་ཀའོ། །དབྱིངས་ཀྱི་ངང་ལས་མི་འདའ་ཞིང་ངང་གིས་ནང་ན་གནས་པས་ན་ཁའོ། །དེ་གཉིས་རྒྱ་མ་ཆད་པས་གའོ། །དེ་གཉིས་སུ་མེད་པ་ལ་ཐམས་ཅད་འཆར་བས་ངའོ། །དེ་གཉིས་ཀུན་གྱི་འབྱུང་གནས་ཡིན་པས་ཙའོ། །དེ་ཉིད་གཉིས་སུ་མེད་པར་ཉམས་སུ་མྱང་བས་ཚའོ། །དེ་མ་འགགས་པར་ཐུགས་རྗེས་འཛིན་པར་བྱེད་ཅིང་དེ་གཉིས་འདུ་འབྲལ་མེད་པས་ན་ཛའོ། །ཨ་རིག་པ་ཡིན་པས་ན་ཏའོ། །གཞི་གནས་མཐར་གྱུར་པས་ན་བའོ། །དེ་གཉིས་སུ་མེད་པར་བྱུང་ན་ཤེས་བྱ་མ་བཅོས་པ་སྟེ་ངའོ། །ཡེ་ཤེས་སུ་འབྱུང་བས་ན་ཉའོ། །མ་རྟོགས་པ་སེམས་སུ་སྣང་བས་ནའོ། །དེ་གཉིས་སུ་མེད་པ་ཆོས་ཀྱི་སྐུ་ཡིན་པས་པའོ། །ཐབས་འགག་པ་མེད་པས་ཕའོ། །རྩལ་སྐུར་སྣང་བས་བའོ། །དེ་གཉིས་ཀྱི་ཐུགས་རྗེ་སྐུ་བཞི་ལས་གྲུབ་པ་ཡའོ། །ཐུགས་རྗེ་དང་མི་འབྲལ་བས་རའོ། །དེ་གཉིས་ལས་ཐམས་ཅད་འཕྲོ་ཞིང་འདུས་པས་ལའོ། །དེ་གཉིས་ལས་རྟོགས་མ་རྟོགས་ལྟར་སྣང་བས་ཊ་ལོག་དང་ཌ་ལོག་པའོ། །དེ་བས་ན་འ་དང་ཨ་ནི་སྒྲ་ཡི་དབྱིངས་སོ། །དེ་གཉིས་སྒྲུབ་པར་བྱེད་པ་ནི། ཨ་གཉིས་ཀྱིས་ཡི་གེ་ཐམས་ཅད་དག་པར་བསྒྲུབ་པའོ། །འས་ཐམས་ཅད་སྤྲོས་པ་དང་བྲལ་བར་བསྒྲུབ་པའོ། །དེ་གཉིས་འདྲེལ་བར་གྱུར་པས་རིག་པ་སྟེ། །རྒྱུན་ཆད་མེད་པར་བསྒྲུབ་པའོ། །ཧ་དང་འདྲེལ་པས་ན་ཆེན་པོ་སྟེ། མ་བྱས་པ་སྒྲུབ་པར་བྱེད་པའོ། །ཡེ་ཤེས་རང་བརྩེགས་འབྱུང་བས་ཐུག་པ་སྟེ། སྐྱེ་འགག་མེད་པར་བསྒྲུབ་པའོ། །ཧ་དང་ཞབས་ཀྱུས་ཀྱང་ཡི་གེ་དང་བར་འདྲེལ་བས་ཐུང་བ་སྟེ་སྡུད་པའོ། །ཛ་དེའི་ཕན་པའི་རྐྱེན་ཅན་ནོ། ། ― DNG001_Page_0167 ―
[མ་དཔེ་གཟིགས་ན་འདིར་གནོན།]
པ་ར་ཏ་ས་ར་དང་བཅས་པ་ནི་སྤྲོས་པར་བྱེད་པའི་སྒྲུབ་པའོ། །ས་དང་ཏ་ནི་དེ་ལ་ཕན་པའི་རྐྱེན་ཅན་ནོ། །ཐ་ལོག་ཐམས་ཅད་ཐུན་མོང་མ་ཡིན་པའི་བསྒྲུབ་པའོ། །རང་ངོ་ཐམས་ཅད་ནི་དབྱིངས་བསྒྲུབ་པའོ། །དེ་བཞིན་དུ་འ་དང་ཨ་ལས་ཤར་བ་ཐམས་ཅད་དོན་ཕྱོགས་རེ་དང་ལྡན་པས། ཨའི་དོན་ཕྱོགས་རེ་བསྒྲུབ་པའོ། །དེ་ནི་སྒྲའི་སྒྲུབ་བྱེད་དུ་བཞག་པའོ། །དེ་རྣམས་ཀྱི་འ་དང་ཨའི་མིང་མཐུན་པའི་ཕྱིར་མཐུན་པའི་ཕྱོགས་སེལ་ཅིང་། སྒོ་སོ་སོའི་མི་མཐུན་ཕྱོགས་སེལ་བས་གཞན་སེལ་ལོ། །དེ་རྣམས་ཀྱི་འཕྲུལ་ལུགས་ཀྱིས་རང་རང་གི་དོན་སྒྲུབ་པའི་གྲོགས་སུ་འགྱུར་བ་དང་། སྤྱིར་གཞིའི་ཡོན་ཏན་བསྒྲུབས་པས་དོན་གྲོགས་སུ་འགྱུར་བས་ན། སྒྲ་ཕན་པའི་རྐྱེན་ཅན་ནོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། སྒྲའི་དོན་བསྟན་པའི་ལེའུ་སྟེ་བརྒྱ་དང་ཉི་ཤུ་པའོ།། །།དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །རྒྱུད་ལུང་མན་ངག་གང་གསུངས་པ། །ཚིག་ཚོགས་ཐམས་ཅད་དེ་ལྟར་བཤད་ལགས་ན། །འབྲུ་རྣམས་ཇི་ལྟར་གཞོམ་པ་གསུང་དུ་གསོལ། །སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་ཞིག །རྒྱུད་ལུང་མན་ངག་གི་དོན་ཐམས་ཅད་གོང་ལྟར་བཤད་ལ། གནས་སྐབས་ཐམས་ཅད་འབོད་སྐད་ཀྱིས་བསྡེབས་ལ། །གོང་དུ་བཤད་པ་འབྲུ་མནན་ནོ། །རིགས་ཀྱི་བུ་ལེའུ་ཞེས་པ་ནི། སོ་སོའི་ས་མཚམས་དང་ཆོས་གཞན་མ་འདྲེས་ཏེ། གང་མཚོན་པའི་དོན་གཙོ་བོར་བཤད་པའོ། །སྐབས་ཤེས་པ་ཐམས་ཅད་ལེའུའི་དོན་དང་དོན་འབྱུང་བའི་གཞི་མ་འགགས་པར་ཤེས་པ་ལ་བྱའོ། །སྤྲོས་བྲལ་ཐམས་ཅད་ནི་མི་འགྱུར་མ་འགགས་པར་ཤེས་པར་བྱའོ། །སྣང་བ་ཐམས་ཅད་ཡུལ་ལོ། །ཡུལ་ཐམས་ཅད་བཞུགས་པ་དང་སྣང་བར་ཤེས་པར་བྱའོ། །རིག་པ་ཆོས་སྐུ་དང་དོན་མཁྱེན་པ་དང་བེམ་པོ་ལས་ལོག་པ་དང་མ་རིག་པ་ལས་ལོག་པའོ། །མ་རིག་པ་ཐམས་ཅད་དོན་མ་ཤེས་པའོ། །ཡོན་ཏན་ཐམས་ཅད་མཐུན་པའི་ཕྱོགས་དང་། གཞི་ལྡན་པ་དང་མ་འགགས་པར་བཤད་དོ། །སྐྱོན་ཐམས་ཅད་མཐའ་དང་གཟུང་འཛིན་དང་། མ་རིག་པ་དང་ལོག་ལྟ་དང་། དོན་སོ་སོ་དང་མི་མཐུན་པ་དང་། སྤང་བྱར་ ― DNG001_Page_0168 ―
[མ་དཔེ་གཟིགས་ན་འདིར་གནོན།]
བཤད་དོ། །གྲུབ་མཐའ་ཐམས་ཅད་བལྟ་བ་དང་འབྲས་བུར་བཤད་དོ། །འབྲས་བུ་ཐམས་ཅད་དོན་མཐར་ཕྱིན་པའོ། །དོན་ནི་ཐ་དད་དོ། །དགོངས་པ་ཐམས་ཅད་ངང་དྭངས་རང་བཞིན་བདག་ཉིད་ཆེན་པོར་བཤད་དོ། །ངང་ནི་མ་བཅོས་པ་དང་མི་གཡོ་བ་དང་། མི་འདའ་བ་དང་མི་གནས་པ་དང་། མི་འགྱུར་བར་བཤད་དོ། །རང་རང་ནི་མ་འགགས་པ་དང་། མི་མཐུན་པ་དང་སོ་སོའི་ཆོས་ཉིད་དུ་བཤད་དོ། །བདག་ཉིད་ཆེན་པོ་ནི་ཐམས་ཅད་རིག་པ་དབྱེར་མེད་པར་བཤད་དོ། །རང་བཞིན་ནི་གཞན་ལ་རག་མ་ལུས་པའོ། །འགྱུ་བ་ཐམས་ཅད་ནི་རྩལ་ལོ། །སྦུབས་མེད་པའི་འགྱུ་བ་རྟོག་མེད་ཀྱི་རྩལ་ལོ། །སྦུབས་ཅན་རྟོགས་བཅས་སོ། །དེ་ལྟར་དེ་བཞིན་དེ་འདྲ་ཞེས་པ་ནི་གར་བྱུང་ཡང་ཚིག་སྔ་ཕྱིའི་དཔེ་དང་སྦྱར་རོ། །དེ་ནི་ཞེས་པ་ཐམས་ཅད་ནི་སྔ་མ་འོག་ཏུ་རྒྱས་སུ་བསྟན་པའོ། །ད་ནི་ཞེས་པ་ནི་སྔ་མ་བཤད་ནས། དེ་དང་དེ་ལས་བཟློག་པ་གཅིག་སྟོན་པའོ། །འདི་ནི་ཞེས་པ་ནི་ཐམས་ཅད་དོན་ལོགས་སུ་བཀར་བའོ། །ཅན་ཐམས་ཅད་ཡོན་ཏན་དུ་སྣང་བ་དང་སྦྱར་བའོ། །དཔལ་དང་སྟུག་པ་དང་མཛེས་པ་ནི་མཐུ་སྟོབས་དང་བྱིན་རླབས་སོ། །འདི་ཡང་ཞེས་པ་ཐམས་ཅད་དོན་དབུས་མ་གོང་འོག་ཏུ་བསྟུན་པའོ། །ཅི་ཕྱིར་གང་གིས་ཕྱིར་ན་དེ་ཕྱིར་ནི། གཏན་ཚིགས་སུ་བསྟན་པའོ། །རྣམས་དང་མ་ལུས་པ་དང་ཐམས་ཅད་དང་ཀུན་དང་དེ་དག་ནི། ཚིག་གི་དོན་ལྷག་མ་མ་ལུས་པར་སྟོན་པའི་ཚིག་གོ། །བྱང་ཞེས་པ་རིག་པ་ཆུབ་པ་ཡེ་ཤེས་སོ། །བྱང་བ་ཆོས་སྐུ་ཆུབ་པ་ལོངས་སྐུ། སེམས་དཔའ་སྤྲུལ་སྐུའོ། །གཞི་དང་རྩལ་དུ་ཡང་བཤད་དོ། །ཆོས་ཉིད་མི་འགྱུར་བ་དང་རང་གི་མཚན་ཉིད་དང་དབྱིངས་སུ་བཤད། ཤེས་རབ་ཅེས་པ་ནི་ཕྱོགས་ལྷུང་མེད་པ་དང་། སོ་སོར་དཔྱོད་པ་དང་མ་འགགས་པར་བཤད། སྒྲོན་མ་ནི་གསལ་བྱེད་དོ། །མུན་པ་མ་རིག་པའོ། །ཤར་བ་ཡུལ་ལ་ཤར་བ་དང་། རྟོག་པ་དང་རྩལ་ཏེ། དོན་ཐད་ཀར་སྦྱར་རོ། །རང་བྱུང་ནི་འདུས་མ་བྱས་པ་དང་རྩལ་ལོ། །གནས་སྐབས་ཤེས་པ་གཅེས་སོ། །འོད་སྣང་ལ་རང་བཞིན་མེད་པ་དང་། གསལ་ལ་མ་བསྒྲིབས་པའོ། །མཚོན་བྱ་གཞིར་བཤད་དོ། །མཚོན་བྱེད་ཐབས་སུ་བཤད། །མི་གནས་པས་ནི་མཐའ་དང་བྲལ་བར་བཤད་དོ། ། ― DNG001_Page_0169 ―
[མ་དཔེ་གཟིགས་ན་འདིར་གནོན།]
རྣམ་པར་དག་པ་ནི་ཕྱོགས་ཐམས་ཅད་ནས་དག་པའོ། །མཚན་མའི་ཆོས་ལས་གྲོལ་བའོ། །བདག་མེད་པ་ནི་བདག་གཉིས་དང་བྲལ་བ་སེམས་ལས་གྲོལ་བའོ། །གཞི་ནི་ཆོས་ཉིད་དང་ཆོས་སྐུ་དང་། ཡེ་ཤེས་ཏེ་སྐབས་དང་སྦྱར་ཞེས་པའོ། །རྩལ་འོད་དང་འཁོར་འདས་སོ། །རོལ་བ་ནི་ཡུལ་དང་རྣམ་པར་བཤད། མཛད་སྤྱོད་ནི་མཐུན་པར་སྣང་བའོ། །རྫོགས་པ་ནི་ལྷག་མ་མ་ལུས་པའོ། །ཆེན་པོ་ནི་མ་བྱས་པ་དང་། གོང་ན་མེད་པའོ། །ཡེ་ཤེས་ཉིད་ནི་དང་པོའི་ཤེས་པའོ། །དེ་ཉིད་ནི་གཞིའོ། །དེ་ལྟར་རྟོགས་པས་གྲོལ་བའོ། །མཁའ་འགྲོ་མ་ནི་རྡོ་རྗེ་དང་ཡེ་ཤེས་དང་ལས་དང་ཤ་ཟར་བཤད་དོ། །འགྲོ་བ་ནི་རྟོག་པས་མཁའ་ལ་འགྲོ་བ་དང་། །ཐུགས་རྗེ་དང་ལས་དང་ཤུགས་ཀྱིས་འགྲོ་བའོ། །འབར་བ་ནི་མ་འགགས་པར་གསལ་བའོ། །མཛོད་ནི་བཞུགས་གནས་སུ་གྱུར་པའོ། །སྒོ་ནི་འབྱུང་ཞིང་འཇུག་པའོ། །ལྡེ་མིག་ནི་འབྱེད་ཅིང་གྲོལ་བའོ། །དམ་ཚིག་ནི་དབྱེར་མི་ཕྱེད་པའོ། །དཔལ་ནི་བདག་གཞན་གཉིས་ཀྱིའོ། །ཐུགས་རྗེ་ནི་ཐུན་མོང་དང་བྱིན་རླབས་ལས་བྱུང་བའོ། །སྐྱེས་བུ་ནི་དོན་མཆོག་ཏུ་གྱུར་པས་འགྲོ་བའི་ཁ་ལོ་གྱེན་དུ་བསྒྱུར་བའོ། །མ་ནི་སྐྱེ་བའི་གཞི་འབྱུང་བའི་གནས་སོ། །མོ་ནི་ཤེས་རབ་ཀྱི་བདག་ཉིད་དོ། །ཐབས་ནི་དོན་བསྒྲུབ་པའི་རྐྱེན་ནོ། །ཡན་ལག་ནི་གང་ཡིན་པ་ལས་འཕྲོ་བའི་ཆོས་ཅན་ནོ། །མེད་པ་ནི་འགྱུར་བའི་དོན་སྤྱོད་མེད་པའོ། །གསེར་ནི་མི་འགྱུར་བའོ། །གཞུང་ནི་གཞན་དང་མ་འདྲེས་པའི་ལུགས་སོ། །རང་ལུགས་ནི་མ་འདྲེས་པའི་དོན་ནོ། །འཁོར་ལོ་ནི་གཅོད་པ་དང་ཅིར་ཡང་སྣང་བའོ། །སྲིད་པ་ནི་མི་ཁེགས་པ་དང་མེད་པ་ལས་ཡོད་པར་སྣང་ནུས་པའོ། །འཆང་བ་ནི་འདུ་འབྲལ་མེད་པའོ། །རྒྱུན་ནི་སྐད་ཅིག་མས་འདབ་སྦྱོར་རོ། །ཐ་སྙད་ནི་ཕྱོགས་རེ་ནས་སྤྲོས་པའི་ཆོས་སོ། །མིང་ནི་མཚོན་པའི་སྒྲ་ཚིག་གོ། །གདངས་ནི་རང་སྣང་བ། ཆོས་ནི་མཚན་མ་ཕྲ་རགས། རྟོག་ཚོགས་གཟུང་འཛིན་ཆོས་ལས་འདས་པའི་སངས་རྒྱས་སོ། །གཟུང་འཛིན་དང་བྲལ་བའི་རིག་པ་འབྱུང་བ་ལ་འདས་པའི་གདངས་ནི། རིག་པ་རང་སྣང་རང་གསལ་ཟང་ཐལ། སྐུ་ལས་འདས་པའི་ཡེ་ཤེས་ཆོས་སྐུ་མཁྱེན་ ― DNG001_Page_0170 ―
[མ་དཔེ་གཟིགས་ན་འདིར་གནོན།]
པར་ཤར་བ། ཚིག་ལས་འདས་པའི་རང་སྣང་། བརྗོད་བྲལ་གཞན་སྣང་མེད་པའོ། །ལམ་ནི་གནས་པ་དང་འཇུག་པའོ། །སེམས་ཅན་ནི་མ་ཤེས་པའི་རྟོག་བཅས་སོ། །འཁོར་བ་ནི་གཅིག་ཏུ་མི་གནས་པར་འཁྲུལ་པའོ། །སེམས་ནི་དྲན་པ་ངེས་པའོ། །བསྐྱོད་པ་ནི་གཤེགས་པའོ། །བསྐྱོད་དུ་མེད་པ་ནི་མི་བགྲོད་པའོ། །སྡུག་བསྔལ་ལས་གྲོལ་བའི་བདེ་བ་ཆེན་པོ་ཡིན་པས་བྱང་ཆུབ་པའོ། །ཤེས་པ་ནི་མཁས་པས་དེ་དོན་ལ་མ་རྨོངས་པའོ། །གནས་པ་ནི་རྩོལ་བས་མ་སོང་བར་ཕྱིན་པའོ། །གྲུ་ནི་སྒྲོལ་བ་སྟེ་ཐབས་སོ། །ཏིང་ངེ་འཛིན་ནི་གསལ་བ་སྟེ་རྩེ་གཅིག་པའོ། །རབ་ནི་འགྲན་ཟླ་མེད་དེ་ཆེན་པོར་གྱུར་པའོ། །མཆོག་ནི་ངོ་མཚར་བ་སྟེ་འཕགས་པའོ། །ཕུལ་དུ་ཕྱིན་པ་ནི་ཁྱད་པར་འཕགས་པའོ། །བླ་ན་མེད་པ་ནི་དེའི་གོང་དང་ལོགས་ན་མེད་པ་སྟེ། དབང་བྱེད་པ་མེད་པའོ། །རྡོ་རྗེ་སེམས་དཔའ་ནི་སྟོང་པ་ཉིད། དྲན་པ་ངེས་པ་ནི་མཚན་མ་སྣ་ཚོགས་པའོ། །ཟབ་པ་ནི་གཏིང་རིང་ཞིང་དཔག་པར་དཀའ་བའོ། །གཏིང་དཔག་དཀའ་བ་ནི་ཕྲ་བས་ནའོ། །ཆོས་ནི་མཚན་ཉིད་འཛིན་པ་དང་། རྣམ་པར་དཀར་བ་དང་གཞན་ལ་བརྟེན་པ་དང་། ཀུན་འབྱུང་བས་ནའོ། །བྱང་ཆུབ་སེམས་དཔའ་ནི། བདག་གཞན་ལ་སེམས་དཔའ་དང་ས་ནོན་པའོ། །ཕུང་པོ་གསུམ་ནི། སངས་རྒྱས་དང་བྱང་ཆུབ་སེམས་དཔའ་དང་སེམས་ཅན་ནོ། །བྱང་ཆུབ་སེམས་དཔའ་ནི། ཡར་སངས་རྒྱས་དང་སྣང་བ་མི་མཐུན་ལ། མར་སེམས་ཅན་དང་མི་མཐུན་ཏེ། གཉིས་ཀ་མ་ཡིན་པའོ། །དེ་ཡིས་ཕུང་པོ་གསུམ་དུ་བཞུགས་པའོ། །བག་ཆགས་ནི་གཞི་གནས་དང་འཕྲལ་འབྱུང་ངོ་། །དག་ལུགས་ནི་རང་དེངས་སུ་འགྲོ་བ་དང་། ཕྲ་བའི་གདམས་པ་ལ་རག་ལུས་པའོ། །དཔེ་གངས་ལ་ཁ་བ་བབས་པ་དང་། མཚོ་ལ་དར་ཆགས་པ་དང་། རས་ལ་དྲི་མས་གོས་པ་བཞིན་ནོ། །གཞི་གནས་ཀྱི་དབྱེ་བ་ནི་ཆུ་དང་འོ་མ་ལྟ་བུའོ། །འཕྲལ་འབྱུང་གི་དཔེ་ཆུ་དང་ཟླ་བའོ། །སེལ་བའི་དཔེ་ནི་རལ་གྲི་ལྟ་བུ་དང་ལྕགས་ཀྱུ་ལྟ་བུའོ། །གསང་བ་ནི་གབ་པའོ། །སངས་རྒྱས་ནི་མཐར་ཕྱིན་པའོ། །མ་རིག་པ་ནི་འཁྲུལ་པའོ། །སྐྱོབ་ ― DNG001_Page_0171 ―
[མ་དཔེ་གཟིགས་ན་འདིར་གནོན།]
པས་ན་ལྷའོ། །མཛེས་པས་ན་ལྷ་མོའོ། །བྱམས་པས་ན་མགོན་ནོ། །མཛད་པ་སྣ་ཚོགས་པས་ན་ཕྲིན་ལས་སོ། །བདག་པོ་ནི་དབང་ཆེན་པོའོ། །ཡོན་ཏན་མ་འགགས་པའོ། །དྲི་མ་མེད་པ་དང་། མི་འགྱུར་བ་དང་། ཐམས་ཅད་མཁྱེན་པའི་ཐུགས་སོ། །སྣ་ཚོགས་སྟོན་པས་གསུང་ངོ་། །གཟི་བརྗིད་ལྡན་པས་ན་སྐུའོ། །ཐབས་དང་ཤེས་རབ་འཛིན་པས་ན་ཡབ་ཡུམ་མོ། །བྱང་ཆུབ་ཆེན་པོ་དང་ལྡན་ཞིང་བསྐྱེད་པས་སྲས་སོ། །དེ་ལྟར་ངས་བསྟན་པའི་རྒྱུད་ལུང་ཐམས་ཅད་དུ་ཤེས་པར་གྱིས་ཤིག །ངས་བསྟན་པའི་དོན་དེ་རྣམས་ལ་རྩོད་པར་གྱུར་ན་གང་རྩོད་པ་དང་། རྗེ་བློན་དམངས་གསུམ་དཔང་དུ་བཞག་ལ། འདྲི་ལུགས་དང་དམ་བཅའ་མ་ནོར་བར་བྱས་ལ། སྒྲུབ་བྱེད་ཀྱིས་གང་ཡིན་པ་བསྒྲུབ་ཅིང་། གཞན་སེལ་གྱིས་མི་མཐུན་པའི་ཕྱོགས་ཐམས་ཅད་སྤངས་ལ། ཕན་པའི་རྐྱེན་གྱིས་བསྟངས་བཏབ་སྟེ། དོན་མི་འགྱུར་བའི་དབྱིངས་ལ་བསྐྱལ་ལོ། །ལོག་ལྟ་ཅན་གྱི་སྒྲུབ་བྱེད་ལ། སྐྱོན་གྱིས་སྒྲུབ་བྱེད་མི་མཐུན་པའི་ཕྱོགས་བཏང་ངོ་། །ཁོང་གིས་གཞན་སེལ་ནི། མི་མཐུན་པའི་སྒྲུབ་བྱེད་བཏང་ངོ་། །ཕན་པའི་རྐྱེན་ལ་གནོད་པའི་འགལ་རྐྱེན་བཏང་ངོ་། །རང་རིག་པའི་ཡེ་ཤེས་དགག་སྒྲུབ་དང་བྲལ་བ་ནི། དབྱིངས་སུ་བཞག་སྟེ་བཙན་པའི་ཡུལ་མཁར་ལྟ་བུའོ། །དེའི་ཕྱོགས་ནས་བསྒྲུབ་པའོ། །གཏན་ཚིགས་གསུམ་དང་བཞིས་ཕན་པའི་རྐྱེན་བྱས་པའོ། །གནོད་པའི་རྐྱེན་དུ་ཡང་དེ་རྣམས་བསྟན་ནོ། །གཞི་སྣང་ལ་སོགས་པ་གང་རྩོད་ཀྱང་། གྲོགས་དེ་རྣམས་ཀྱིས་བྱས་ལ། ངས་བཤད་པ་བཞིན་དོན་གྱི་གནད་དྲི་བ་དང་ལན་གདབ་པར་བྱའོ། །མཐུན་ན་སྒྲུབ་བྱེད་ཀྱི་དབྱིངས་ལ་སྦྱར། མི་མཐུན་ན་གཞན་སེལ་གྱིས་བརྒལ་ལོ། །དོན་ངེས་པར་བྱེད་པ་དང་། ཐེ་ཚོམ་དང་བྲལ་བར་བྱེད་པ་དང་། ཤེས་བྱ་གཏན་ལ་འབེབས་པས་ན་གཏན་ཚིགས་ཞེས་བྱ་སྟེ། དེ་དང་རྗེས་སུ་མཐུན་པར་བཤད་དོ། །དེས་ཡིད་གཉིས་ཟ་བ་དང་བྲལ་བར་འགྱུར་རོ། །ཞེས་གསུངས་སོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། འབྲུ་འཐོར་བ་སྡུད་པ་དང་། ཐེ་ཚོམ་དང་བྲལ་བར་བྱེད་པ་དང་། སྐྱོན་གྱི་མཐའ་བསལ་བའི་ལེའུ་སྟེ་བརྒྱ་དང་ཉེར་གཅིག་པའོ།། །། ― DNG001_Page_0172 ―
[མ་དཔེ་གཟིགས་ན་འདིར་གནོན།]
དེ་ནས་ཡང་སྟོན་པས་རྒྱུད་ཀྱི་མཚན་ཡོངས་སུ་བསྟན་པའི་ལེའུ་འདི་གསུངས་སོ། །གསང་བའི་བདག་པོ་རྡོ་རྗེ་འཛིན་པ་ཉོན་ཅིག །དོན་གྱི་མན་ངག་རྩ་བ་ཅར་ཕོག་གི། །དེ་ཉིད་སྤྲོས་བྲལ་དོན་གསལ་བསྟན་པ་ཡི། །མན་ངག་རྒྱུད་ཀྱི་སྤྱི་འགྲེལ་ཆེན་པོ་འདི། །གསང་བདག་ཞུ་བའི་འཁོར་དང་དགའ་རབ་སྡུད་པའི་འཁོར། །གཞན་ཡང་འདིར་མོས་འདིར་འདུས་ཚོགས་པའི་འཁོར། །ང་ཡི་སྤྲོས་བྲལ་དོན་གསལ་རྒྱུད་ཆེན་འདིས། །ཆོས་རྣམས་ཀུན་གྱི་རྩ་བ་ཅར་གྱིས་སྟོན་པས་ན། །རྩ་བ་ཅར་ཕོག་རྒྱུད་ཆེན་ཞེས་སུ་ཟུང་། །གཅིག་ཤེས་ཀུན་ཏུ་གྲོལ་བར་སྟོན་པས་ན། །ཡང་ཏིག་ལྡེ་མིག་ཆེན་པོའི་རྒྱུད་དུ་ཟུང་། །ད་ལྟ་བུཌྜྷ་ཉིད་དང་མཉམ་སྦྱོར་བས། །སངས་རྒྱས་མཉམ་སྦྱོར་ཆེན་པོའི་རྒྱུད་དུ་ཟུང་། །ལ་ཟློ་སྤྲོས་དང་བྲལ་བར་སྟོན་པས་ན། །སྤྲོས་བྲལ་དོན་གསལ་རྒྱུད་ཆེན་ཞེས་སུ་ཟུང་། །རང་ངོ་རང་ལ་ངོ་སྤྲོད་སྟོན་པས་ན། །གསང་བའི་ངོ་སྤྲོད་ཆེན་པོའི་རྒྱུད་དུ་ཟུང་། །གནས་ལུགས་ཇི་ལྟར་ཡིན་པ་རྫོགས་པར་སྟོན་པས་ན། །རྫོགས་ཆེན་ནང་ནས་ཡོངས་རྫོགས་ཆེན་པོའི་རྒྱུད་དུ་ཟུང་། །ལྟ་བསྒོམ་དྲི་མེད་དག་པ་ཆེན་པོ་སྟོན་པས་ན། །དྲི་མེད་ཀ་དག་ཆེན་པོའི་རྒྱུད་དུ་ཟུང་། སྐྱོན་རྣམས་ཡོན་ཏན་དག་ཏུ་ལྷུན་གྱིས་གྲུབ་པར་སྟོན་པས་ན། །ལྷུན་གྲུབ་ཆེན་པོའི་རྒྱུད་ཆེན་ཞེས་སུ་ཟུང་། །རང་བྱུང་ཡེ་ཤེས་རང་ལ་འཆར་བར་སྟོན་པས་ན། །ཡེ་ཤེས་རང་ཤར་ཆེན་པོའི་རྒྱུད་དུ་ཟུང་། །མ་རིག་མུན་པ་རྩད་ནས་སྨག་རྣམས་སེལ་བས་ན། །མ་རིག་མུན་སེལ་ཆེན་པོའི་རྒྱུད་དུ་ཟུང་། །འཁོར་བ་ཐམས་ཅད་དོང་ནས་སྤྲུགས་པས་ན། །དོང་སྤྲུག་ཆེན་པོའི་རྒྱུད་ཆེན་བྱ་བར་ཟུང་། །འཁྲུལ་པ་ཐམས་ཅད་རྩད་ནས་གཅོད་པས་ན། །འཁྲུལ་པ་རྩད་གཅོད་རྒྱུད་ཆེན་བྱ་བར་ཟུང་། །འཁོར་བའི་ཆུ་བོ་གྲུ་ཡིས་སྒྲོལ་བས་ན། །གྲུ་སྒྲོལ་ཆེན་པོའི་རྒྱུད་ཆེན་བྱ་བར་ཟུང་། །ཉོན་མོངས་གཅོང་ནད་གཏིང་ནས་འདོན་པས་ན། །སྨན་པ་ཆེ་མཆོག་རྒྱུད་ཅེས་བྱ་བར་ཟུང་། །བདུད་བཞི་རྩད་ནས་འཇོམས་པར་འདོན་པས་ན། །བདུད་འཇོམས་ཆེན་པོའི་རྒྱུད་ཆེན་ཞེས་སུ་ཟུང་། །དོན་ཆེན་ལྷག་མེད་སྤྲུགས་ནས་སྟོན་པས་ན། །རྩལ་ ― DNG001_Page_0173 ―
[མ་དཔེ་གཟིགས་ན་འདིར་གནོན།]
ཆེན་སྤྲུགས་པའི་རྒྱུད་ཅེས་བྱ་བར་ཟུང་། །ཀྱེ་མ་ཀྱེ་མ་མ་རིག་འཁྲུལ་པས་སྙིང་རེ་རྗེ། །འཁྲུལ་པའི་ཆོས་ལ་བདེན་པར་མ་འཛིན་པར། །འདི་ལ་སྐུར་པ་མ་འདེབས་དོན་གསལ་རྗེས་སུ་འབྲངས། །རང་བྱུང་ཡེ་ཤེས་འགྱུར་མེད་མ་ཤེས་ནས། །དངོས་པོ་རྫས་གྲུབ་བདེན་པར་མ་འཛིན་པར། །སྤྲོས་བྲལ་དོན་གསལ་འདི་ཡི་རྗེས་སུ་འབྲངས། །འོན་ཀྱང་མི་འགྱུར་རྟག་པ་རྟོགས་པར་འགྱུར། །དངོས་མེད་ཞི་བ་ཆོས་སྐུ་མ་རྟོགས་པར། །སྟོང་པ་ཅང་མེད་མཐའ་ལ་མ་འཛིན་ཀྭ། །དོན་གསལ་འདི་ཡི་རྗེས་སུ་འབྲངས་པ་ན། །འོན་ཀྱང་སྟོང་ཉིད་ཞི་བ་རྟོགས་ཏེ་འོང་། །གནས་ལུགས་སྣང་ལུགས་རྣམ་གཉིས་མ་རྟོགས་པས། །གཉིས་ཀྱི་མཐའ་ལ་བདེན་པར་མ་འཛིན་ཀྭ། །སྐུར་པ་མ་འདེབས་དོན་གསལ་རྗེས་ཕྱིར་འབྲངས། །འོན་ཀྱང་གཉིས་མེད་རང་སྣང་རྟོགས་ཏེ་འོང་། །སྐུ་གསུམ་འདུ་འབྲལ་མེད་པར་མ་རྟོགས་པས། །བློས་བཏགས་བསྐྱེད་རྫོགས་རྣམ་གཉིས་བདེན་པར་མ་འཛིན་ཀྭ། །སྒྲོ་སྐུར་མ་འདེབས་དོན་གསལ་རྗེས་སུ་འབྲངས། །འོན་ཀྱང་ཡེ་ནས་ལྷུན་རྫོགས་རྟོགས་ཏེ་འོང་། །དོན་གྱི་སྤྲོས་བྲལ་དོན་གསལ་མ་རྟོགས་པར། །ཚིག་དང་ཡི་གེའི་སྒྲ་ལ་མ་ཞེན་ཀྭ། །དོན་གྱི་སྤྲོས་བྲལ་དོན་གསལ་ཉམས་སུ་ལོངས། །འོན་ཀྱང་ཡེ་ཤེས་དོན་གསལ་རྒྱུད་ལ་འཆར། །ཞེས་གསུངས་སོ། །དེ་ནས་ཡང་གསང་བའི་བདག་པོ་ལ་སོགས་ཏེ་འདུས་པའི་ཚོགས་རྣམས་ཀྱིས་ཐལ་མོ་སྦྱར་ཏེ་བསྐོར་བ་ལན་མང་དུ་བྱས་ནས། །ཀྱེ་ཀྱེ་བཅོམ་ལྡན་རྡོ་རྗེ་འཆང་། །བདག་ཅག་འདུས་པའི་ཚོགས་རྣམས་ལ། །སྤྲོས་བྲལ་དོན་གསལ་རྒྱུད་བཤད་པས། །མ་རིག་མུན་པ་རྒྱུད་འདིས་བསལ། །འཁོར་བ་རྩད་ནས་རྒྱུད་འདིས་བཅད། །ཉོན་མོངས་གཡུལ་ལས་རྒྱུད་འདིས་བཟློག །ཆུ་བོ་བཞི་ལས་རྒྱུད་འདིས་བསྒྲལ། །ངན་སོང་དོང་ནས་རྒྱུད་འདིས་སྤྲུགས། །བག་ཆགས་ལྗན་ལྗིན་རྒྱུད་འདིས་བསལ། །འཁྲུལ་པ་ཐམས་ཅད་རྒྱུད་འདིས་བཅད། །རང་ངོ་རང་ལ་རྒྱུད་འདིས་སྤྲད། །གཅིག་ཤེས་ཀུན་ལས་རྒྱུད་འདིས་གྲོལ། །གནས་ལུགས་དོན་ཆེན་རྒྱུད་འདིས་གོ། །ལོག་ལྟ་ཚར་ཆེན་རྒྱུད་འདིས་བཅད། །ཐེག་དམན་ ― DNG001_Page_0174 ―
[མ་དཔེ་གཟིགས་ན་འདིར་གནོན།]
ཤན་ཐང་རྒྱུད་འདིས་ཕྱེ། །འབྱུང་བ་དྭངས་སྙིགས་རྒྱུད་འདིས་ཕྱེ། །ཉོན་མོངས་དུག་ལྔ་རྒྱུད་འདིས་བསལ། །ལམ་ལ་རྩོལ་མེད་རྒྱུད་འདིས་བྱས། །རང་བྱུང་ཡེ་ཤེས་རྒྱུད་འདིས་ཤར། །འཁོར་བ་དྭངས་སྙིགས་རྒྱུད་འདིས་ཕྱེ། །ལོག་པའི་ལམ་ཞུགས་རྒྱུད་འདིས་བཟློག །ཆོས་འདིའི་རྩ་བ་རྒྱུད་འདིས་བཅད། །མན་ངག་རྒྱུད་སྒྲོག་ཆེན་པོ་རྒྱུད་འདིས་ཁྲོལ། །སྐུ་གསུམ་ཡོངས་རྫོགས་རྒྱུད་འདིས་ཐོབ། །ཡེ་ཤེས་རྣམ་ལྔ་རྒྱུད་འདིས་ཤར། །མ་མཐོང་ཡུལ་ཆེན་རྒྱུད་འདིས་མཐོང་། །མ་མཇལ་ཞལ་ཆེན་རྒྱུད་འདིས་མཇལ། །མ་ཐོས་གཏམ་ཆེན་རྒྱུད་འདིས་ཐོས། །འབྱུང་བ་མ་ལ་རྒྱུད་འདིས་ཞ། །གྲོལ་ཞིང་ཐིམ་པ་རྒྱུད་འདིས་བྱས། །འཁོར་བའི་ལ་ལས་རྒྱུད་འདིས་བཟླས། །རྩོལ་མེད་འབྲས་བུ་རྒྱུད་འདིས་ཐོབ། ༈ ། ཀྱེ་ཀྱེ་བཅོམ་ལྡན་རྡོ་རྗེ་འཆང་ཆེན་པོ། །དགོས་འདོད་རེ་སྐོང་ནོར་བུ་རིན་ཆེན་ལྟ་བུ་ཁྱོད་ལ་བསྟོད། །མ་རིག་མུན་པ་སེལ་མཛད་ཉི་མ་ལྟ་བུ་ཁྱོད་ལ་བསྟོད། །འཁོར་བའི་བག་ཆགས་བསྲེག་མཛད་མེ་དཔུང་ལྟ་བུ་ཁྱོད་ལ་བསྟོད། །ཉོན་མོངས་དྲི་མ་འཁྲུད་མཛད་ཆུ་བོ་ལྟ་བུ་ཁྱོད་ལ་བསྟོད། །རང་གསལ་དོན་ཉིད་གསལ་མཛད་མེ་ལོང་ལྟ་བུ་ཁྱོད་ལ་བསྟོད། །རྣམ་དག་དོན་ཆེན་སྟོན་མཛད་མན་ཤེལ་ལྟ་བུ་ཁྱོད་ལ་བསྟོད། །སྐྱོན་གྱིས་མ་གོས་སྟོན་མཛད་པད་མ་ལྟ་བུ་ཁྱོད་ལ་བསྟོད། །ཚེགས་ཆུང་དོན་ཆེན་སྟོན་མཛད་མན་ངག་ལྟ་བུ་ཁྱོད་ལ་བསྟོད། །འཁོར་བའི་གཡུལ་ངོ་བཟློག་མཛད་དཔའ་བོ་ལྟ་བུ་ཁྱོད་ལ་བསྟོད། །འཁོར་བའི་གཅོང་རྙིང་འདོན་མཛད་སྨན་པ་ལྟ་བུ་ཁྱོད་ལ་བསྟོད། །འགྲོ་དྲུག་བདེ་བར་སྒྲོལ་མཛད་ཐུགས་རྗེའི་བདག་པོ་ཁྱོད་ལ་བསྟོད། །ཅེས་གསང་བའི་བདག་པོས་བསྟོད་དོ། །སྤྲོས་བྲལ་དོན་གསལ་ཆེན་པོའི་རྒྱུད་ལས། རྒྱུད་ཀྱི་མཚན་ཡོངས་སུ་བསྟན་པ་དང་། བསྟོད་པ་ཕུལ་བའི་ལེའུ་སྟེ་བརྒྱ་དང་ཉི་ཤུ་རྩ་གཉིས་པའོ།། །།དེ་ནས་ཡང་རྡོ་རྗེ་འཆང་གིས་གསུངས་པ། །ང་ཡི་སྤྲོས་བྲལ་དོན་གསལ་རྒྱུད་ཆེན་འདི། །བསྟན་པས་ཤེས་ཤིང་བཀླགས་པས་གོ་བ་སྟེ། །ད་ལྟ་རང་ངོ་རང་གིས་ཤེས་ཏེ་དུས་གསུམ་འགྱུར་བ་མེད། །རིག་ ― DNG001_Page_0175 ―
[མ་དཔེ་གཟིགས་ན་འདིར་གནོན།]
པ་ཆོས་སྐུར་ཤེས་ཤིང་སྣང་བ་ཆོས་ཀྱི་དབྱིངས་སུ་ཤེས། །གཉིས་མེད་དོན་ཆེན་རྒྱུད་ལ་གསལ་བ་ཡིས། །སྙིང་པོའི་གཞི་རྩ་ཆོད་པས་འཁོར་བའི་གཡང་སར་ལྷུང་མི་སྲིད། །དགོས་འདོད་རེ་བ་བསྐང་མཛད་ནོར་བུ་རིན་ཆེན་ལྟ་བུ་ཡི། །རྩ་རྒྱུད་བཤད་རྒྱུད་མན་ངག་རྒྱུད་དུ་བསྟན་པ་འདིས། །སྣོད་ངན་དམ་ཚིག་མེད་པ་རྣམས་ལ་ཤོར་སྲིད་དོ། །སློབ་དཔོན་གསང་ནས་རང་ཆེ་འབྱིན་པ་རྣམས་ལ་ཤོར་སྲིད་དོ། །རང་གིས་ནོར་མ་ཤོར་བར་གདམས་ངག་འདོད་པ་རྣམས་ལ་ཤོར་སྲིད་དོ། །འཇུར་བུ་རང་འདོད་ཅན་གྱི་མི་ལ་ཤོར་སྲིད་དོ། །ཁ་གསགས་གཡོ་སྒྱུ་ཅན་གྱི་མི་ལ་ཤོར་སྲིད་དོ། །ཟོག་པོ་རྫུན་པོ་ཆེ་ཡི་མི་ལ་ཤོར་སྲིད་དོ། །མཐར་ཐུག་ལ་ཟློའི་ཆོས་ལ་མོས་པ་མི་བྱེད་དང་། །རྡོ་རྗེ་སློབ་དཔོན་གཉན་པར་མི་སེམས་དང་། །ལུས་ཀྱི་སྒོ་ནས་དམ་ཚིག་མི་བསྲུང་བར། །བཀུར་སྡི་རིམ་གྲོ་ཞབས་ཏོག་མི་བྱེད་དང་། །ངག་གི་སྒོ་ནས་དམ་ཚིག་མི་བསྲུང་བར། །སྙན་པར་མི་སྨྲ་སློབ་དཔོན་མིང་ནས་འབོད། །ཡིད་ཀྱི་སྒོ་ནས་དམ་ཚིག་མི་བསྲུང་བར། །མོས་གུས་ཆུང་ཞིང་གདུང་བའི་སེམས་དང་བྲལ། །ཇི་སྲིད་དེ་འདྲའི་གང་ཟག་བྱུང་གྱུར་ན། །ཁོང་དུ་སྦྲུལ་ཞུགས་སྙིང་ལ་མེ་འབར་ཞིང་། །སྐེ་ལ་གྲིས་གཏུབ་མགོ་ལ་ཐོག་འབེབས་ཀྱང་། །དམ་མེད་སྣོད་ངན་རྣམས་ལ་ཤོར་སྲིད་དོ། །གཅེས་པའི་ལུས་སྲོག་འབྲལ་བའི་རྐྱེན་བྱུང་ཡང་། །དམ་མེད་སྣོད་ངན་རྣམས་ལ་ཤོར་སྲིད་དོ། །ཆོས་སྐྱོང་སྲུང་མ་དམ་ཅན་རྒྱ་མཚོ་དང་། །ཨེ་ཀ་ཛ་ཊཱི་གུ་ཧྱ་རལ་གཅིག་མས། །འཇིག་རྟེན་འདི་རུ་ཚེ་ཐུང་ནད་མང་མི་བདེ་སྣ་ཚོགས་འོང་། །དམ་ཚིག་ཉམས་པས་ཕྱི་མ་རྡོ་རྗེ་དམྱལ་བར་སྐྱེ། །གཞན་གྱི་རྣམ་སྨིན་བདེ་གཤེགས་ཐུགས་རྗེས་འབྱངས། །དམ་ཚིག་ཉམས་པས་སངས་རྒྱས་བཀས་མི་སྐྱོབས། །དེ་བས་དམ་ཚིག་གཉན་པོ་སྙིང་བས་ལྷག་པར་བསྲུང་། །ལུས་ངག་ཡིད་གསུམ་དམ་ཚིག་ལྡན་པ་ཡིས། །རྒྱུད་འདི་རང་གིས་སྙིང་བས་ལྷག་པར་ཆོངས། །སྣོད་ལྡན་འགའ་ཙམ་ཟུང་ཙམ་མ་གཏོགས་པར། །སྣོད་མེད་རྣམས་ལ་ཤོར་བ་སྲིད་དོ་ཀྭ། །དམ་མེད་རྣམས་ལ་ཤོར་བ་འོང་ངོ་ཀྭ། །དད་མེད་རྣམས་ལ་ཤོར་བ་ ― DNG001_Page_0176 ―
[མ་དཔེ་གཟིགས་ན་འདིར་གནོན།]
སྲིད་དོ་ཀྭ། །ཞེས་གསུངས་སོ། །ཞུ་བ་པོའི་འཁོར་གསང་བའི་བདག་པོ་དང་། སྡུད་པ་པོའི་འཁོར་དགའ་རབ་རྡོ་རྗེ་ལ་སོགས་པ་རྣམས་རྗེས་སུ་ཡི་རང་ངོ་། །སྤྲོས་བྲལ་དོན་གསལ་ཆེན་པོའི་རྒྱུད་ལས། རྒྱུད་གཏད་པའི་ལེའུ་སྟེ་བརྒྱ་དང་ཉི་ཤུ་རྩ་གསུམ་པའོ།། །།ཏནྟྲ་རཱ་ཛ་མ་ཧཱ། སངས་རྒྱས་མཉམ་སྦྱོར་དོན་གསལ་ཆེན་པོའི་རྒྱུད་མཐོང་བས་གྲོལ་བ་འདི་ཡོངས་སུ་རྫོགས་སོ།། །། གུ་ཧྱ། གཏད་རྒྱ་རྒྱ་རྒྱ། ཨི་ཐི། ཡང་གསང་བ་མན་ངག་གི་རྒྱུད་ཆེན་པོ་འདི་སྡུད་པའི་འཁོར་དགའ་རབ་རྡོ་རྗེས་བསྡུས་ནས་ཚིག་དང་ཡི་གེར་བཀོད་ནས་གུ་རུ་འཇམ་དཔལ་བཤེས་གཉེན་ལ་བཤད། དེས་གུ་རུ་ཤྲཱི་སེང་ཧ་ལ་བཤད། དེས་ཨོ་རྒྱན་གུ་རུ་པད་མ་ལ་བཤད་དོ། །གུ་རུ་པད་མ་འབྱུང་གནས་ངས། །ལྔ་བརྒྱ་དུས་ཀྱི་སྙིགས་མ་ལ། །ལྡན་གསུམ་སྐྱེས་བུའི་དོན་ཆེད་དུ། །ཆོས་རྣམས་ཀུན་གྱི་མ་ཆེན་མོ། །ཀུན་བསྐྱེད་རང་གཞུང་ཚུགས་ཤིང་རྫོགས། །སྤྲོས་བྲལ་དོན་གསལ་རྒྱུད་ཆེན་སྦས། །སེམས་ཅན་སངས་རྒྱས་མཉམ་སྦྱོར་དོན། །ཐོས་བསམ་བསྒོམ་ལ་མི་ལྟོས་ཤིང་། །བསྟན་པས་རྟོགས་ཤིང་དྲན་པས་གསལ། །འཕྲད་པས་དབང་ཐོབ་མཐོང་བས་གྲོལ། །འབྲས་བུ་ད་ལྟ་ཐོབ་པའི་ཆོས། །ཡིད་བཞིན་ནོར་བུ་ལྟ་བུ་ཡིན། །ཐུགས་གཏེར་ཡང་གཏེར་གསང་མཛོད་འདིས། །མ་ཚངས་ཁ་བསྐང་ཤུལ་ཚོ་སྡུད། །འཕྲལ་ཐོག་ཉམས་སུ་བླང་ཆོག་མ། །སྙིང་ནོར་ཡིན་ནོ་མིག་འབྲས་ཡིན། །བདག་ཀྱང་ཐོས་ཆུང་མ་ཡིན་ཏེ། །རྡོ་རྗེ་འཆང་དང་མཁྱེན་པ་མཉམ། །དེ་ཕྱིར་ཐུགས་ཀྱི་གསང་གཏེར་འདི། །གནམ་སའི་བར་ན་གཏེར་གཅིག་མའོ། །ལས་འཕྲོ་ཅན་དང་འཕྲད་ནས་ཀྱང་། །བཅོ་ལྔ་ལོ་བར་ཡིད་ལ་བརྣག །གསང་དམ་དམ་བསྲུང་དུས་ཐལ་ཚེ། །འཁོར་བ་བློས་ཐོང་ངེས་དོན་འཚོལ། །བླ་མ་ལ་གུས་སྲོག་འདོར་ཕོད། །གསུམ་ལ་དཔེ་གཏོད་ཀུན་ལ་མིན། །དུས་ལ་བབ་ན་འགྲོ་དོན་ཡོང་། །སྙན་རྒྱུད་དུ་ཐོབ་ལ་སྐལ་ལྡན་སྐྱོངས། །རྒྱུད་མཆོག་བླ་མེད་ རྒྱུད་ཐམས་ཅད་ཀྱི་རྩེ་རྒྱལ་ནམ་མཁའ་འབར་བའི་རྒྱུད།― DNG001_Page_0177 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། སརྦཱ་གྲ་རཱ་ཛཱ་ཀ་ཤ་ཛྭ་ལ་ཏནྟྲ། བོད་སྐད་དུ། རྒྱུད་ཐམས་ཅད་ཀྱི་རྩེ་རྒྱལ་ནམ་མཁའ་འབར་བའི་རྒྱུད། མིང་མེད་མཐའ་བྲལ་དངོས་མེད་ཟང་ཀ་ལ་ཕྱག་འཚལ་ལོ། །འདི་སྐད་ཅི་ཡང་མ་ཐོས་བསམ་བརྗོད་དམིགས་པའི་ཡུལ་ལས་འདས་པའི་དུས་མཐའ་མེད་པའི་དུས་ན། གནས་ཀྱི་རྒྱལ་པོ་མུ་མཐའ་གྲོལ་བ་ན། །སྟོན་པའི་རྒྱལ་པོ་མིང་མེད་ཀུན་གྲོལ་བཞུགས། །བསྟན་པའི་རྒྱལ་པོ་གཏིང་མཐའ་ཡངས་པ་འདི། །འཁོར་གྱི་ ― DNG001_Page_0178 ―
[མ་དཔེ་གཟིགས་ན་འདིར་གནོན།]
དམ་པ་རང་བྱུང་ངང་དྭངས་སྣང་ཚད་གྲོལ་ལ་བཤད། །དུས་ཀྱི་རྒྱལ་པོ་ཐོག་མཐའ་མེད་པའི་དུས། །སྡུད་པ་པོ་ནི་གསང་བདག་རིན་ཆེན་ནོ། །དེ་ནས་འཁོར་གྱི་རྒྱལ་པོ་རང་བྱུང་ངང་དྭངས་ཀྱིས། །སྟོན་པའི་རྒྱལ་པོ་མིང་མེད་ཀུན་གྲོལ་ལ། །པུས་བཙུགས་ཐལ་སྦྱར་གུས་པས་འདི་སྐད་ཞུས། །ཕུན་སུམ་ཚོགས་པའི་དོན་ནི་དེ་ལྟར་ན། །སེམས་ཀྱི་རང་བཞིན་ཇི་ལྟར་གནས། །སེམས་ཀྱི་ངོ་བོ་ཇི་ལྟར་གསལ། །སེམས་ཀྱི་ཐུགས་རྗེ་ཇི་ལྟར་འཆར། །སེམས་ལ་ཡོན་ཏན་ཇི་ལྟར་མངའ། །སེམས་ཀྱི་ཕྲིན་ལས་ཇི་ལྟར་མཛད། །སེམས་འདི་ཡེ་ནས་ཡོད་དམ་མེད། །སེམས་ནི་སངས་རྒྱས་ཡིན་ནམ་མིན། །ཡིན་ན་སེམས་ཅན་ཇི་ལྟར་འཁྲུལ། །སེམས་ལ་ཡེ་ནས་དངོས་པོ་ཡོད་དམ་མེད། །སེམས་ལ་འཁྲུལ་པ་ཡོད་དམ་མེད། །སེམས་ཅན་ཀུན་གྱི་སེམས་འདི་མཉམ་ལགས་སམ། །སེམས་ལ་གཏི་མུག་ཡོད་དམ་མེད། །སེམས་ལ་དུག་ལྔ་དུག་གསུམ་ཡོད་དམ་མེད། །སེམས་ལ་དབྱིབས་དང་ཁ་དོག་ཡོད་དམ་མེད། །སེམས་འདི་རྟོགས་པས་སངས་རྒྱས་སམ། །སེམས་ཉིད་རྟོགས་པས་སངས་རྒྱ་འམ། །སེམས་དང་རིག་པ་ཡིད་དང་གསུམ་ལ་ཁྱད་པར་ཡོད་དམ་མེད། །དབྱིངས་དང་སྐྱེ་མེད་ཡེ་ཤེས་གསུམ་ལ་ཁྱད་པར་ཡོད་དམ་མེད། །སྐུ་ལྔ་ཡེ་ཤེས་ལྔ་དང་ཉོན་མོངས་ལྔ་ལ་ཁྱད་པར་ཡོད་དམ་མེད། །སྙིང་པོ་སྟོང་པ་རིག་པ་གསུམ་དུ་ཆོས་རྣམས་ཇི་ལྟར་གྲོལ། །གྲོལ་བར་བྱེད་པའི་གདམས་ངག་གང་ལྟར་བཤད། །སེམས་ཀྱི་སྣང་ཚུལ་སྣ་ཚོགས་པ། །མདོ་དོན་གཅིག་ཏུ་ཇི་ལྟར་བསྡུ། །སེམས་ཀྱི་ཐག་ནི་གང་དུ་བཅད། །སེམས་ཀྱི་ལ་ནི་གང་དང་གང་དུ་བཟླའ། །སེམས་ཉིད་ཕུགས་སུ་ཇི་ལྟར་བསྐྱལ། །སྐྱེལ་བར་བྱེད་པའི་གདམས་པ་གང་། །སེམས་ཀྱི་དཔེ་ནི་གང་དུ་བསྟན། །དཔེ་ཡི་ཐོག་ཏུ་ཕེབས་ཚེ་ཕེབས་མི་ཕེབས། །མི་ཕེབས་དཔེ་བསྟན་དགོས་པ་མེད། །སངས་རྒྱས་སེམས་ཅན་གཞི་གཅིག་གམ། །གཅིག་ན་གཉིས་སུ་འོང་བ་ཅི། །མི་གཅིག་འཁོར་འདས་འདྲེལ་མེད་དམ། །མ་རིག་ཡེ་ཤེས་ངོ་བོ་གཅིག་མི་གཅིག །མི་གཅིག་འདྲེལ་བ་མེད་ལགས་སམ། །འཁོར་འདས་ ― DNG001_Page_0179 ―
[མ་དཔེ་གཟིགས་ན་འདིར་གནོན།]
གཉིས་ཀྱི་གྱེས་མདོ་གང་ཙམ་ལགས། །བློས་བཏགས་ཆོས་རྣམས་ཡོད་དམ་མེད། །བྱར་མེད་བློ་འདས་གང་ལ་ཟེར། །བློ་འདས་ཞེས་པ་ཚིག་གིས་བཏགས་མི་བཏགས། །བཏགས་ན་བློས་བཏགས་ཆོས་དང་ཁྱད་པར་ཅང་ཡོད་དམ། །མ་བཏགས་ཟེར་ན་བློས་བཏགས་གང་ནས་བྱུང་། །སྣང་བཏགས་ཆོས་རྣམས་གང་དུ་བསྡུ། །ཆོས་མེད་བློ་ཟད་མཐའ་རུ་གང་དུ་བསྐྱལ། །དངོས་པོའི་ཆོས་རྣམས་ལ་བཟླ་ཇི་ལྟར་ལགས། །ཞེས་ཞུ་ཚིག་བཞི་བཅུ་རྩ་གཉིས་པོ་བདག་ཅག་འདུས་པའི་འཁོར་རྣམས་ལ་ཤིན་ཏུ་ཟབ་པར་གསུང་དུ་གསོལ། ཞེས་ཞུ་བ་ཕུལ་ལོ། །ནམ་མཁའ་འབར་བའི་རྒྱུད་ལས། གླེང་གཞི་ཕུན་སུམ་ཚོགས་པ་དང་། འཁོར་གྱིས་གླེང་སློང་ཞུས་པའི་ལེའུ་སྟེ་དང་པོའོ།། །།དེ་ནས་རང་བྱུང་ངང་དྭངས་ཀྱིས། །སྟོན་པའི་རྒྱལ་པོ་མིང་མེད་ཀུན་གྲོལ་ལ། །སེམས་ཀྱི་རང་བཞིན་ཇི་ལྟར་གནས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སེམས་ཀྱི་རང་བཞིན་བསྟན་ཏུ་མ་མཆིས་ཏེ། །འཁོར་གྱི་རྟོག་པ་སེལ་བའི་ཕྱིར། །མུན་ཁུང་གསེར་སྒྲོམ་ལྟ་བུར་བཤད། །འཁོར་རྣམས་མ་ཡེངས་གུས་པས་ཉོན། །སེམས་ཀྱི་རང་བཞིན་གནས་ལུགས་བསྟན་པ་ནི། །རང་བཞིན་སྟོང་པ་ལྷུན་གྲུབ་ཡིན། །རང་བཞིན་རྒྱུ་རྐྱེན་མེད་པ་ཡིན། །རང་བཞིན་འཕོ་འགྱུར་མེད་པ་ཡིན། །རང་བཞིན་ཅི་ཡང་མེད་པ་ཡིན། །རང་བཞིན་དངོས་པོ་མེད་པ་ཡིན། །སེམས་ལ་དཔེ་མེད་ཟླ་མེད་ངོ་ཡང་མེད། །སེམས་ཀྱི་རང་བཞིན་གནས་ལུགས་ནི། །སྟོང་གསལ་དངོས་མེད་ཁ་དོག་དབྱིབས་དང་བྲལ། །སྐྱེ་མེད་ཀ་དག་ཕྱོགས་མེད་མུ་མཐའ་ཡས། །དངོས་མེད་ཟང་ཀ་གཏད་མེད་གཏིང་མཐའ་ཡས། །ཐིག་ལེ་ཆེན་པོ་མིང་མེད་བློ་འདས་ཏེ། །མིང་མེད་མཐའ་སྟོངས་སྣ་ཚོགས་ཀུན་གྱི་གཞི། །རྣམ་པ་ཀུན་ལྡན་གང་དུའང་གྲུབ་པ་མེད། །དེས་ན་ཀུན་འདས་བློ་ཡི་སྤྱོད་ཡུལ་གྲོལ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཀྱི་རང་བཞིན་བསྟན་པའི་ལེའུ་སྟེ་གཉིས་པའོ།། །།དེ་ནས་རང་བྱུང་རང་གྲོལ་གྱིས། །མིང་མེད་སྟོན་པ་ཀུན་གྲོལ་ལ། །སེམས་ཀྱི་ངོ་བོ་ཇི་ལྟར་གསལ། ། ― DNG001_Page_0180 ―
[མ་དཔེ་གཟིགས་ན་འདིར་གནོན།]
ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སེམས་ཀྱི་ངོ་བོ་གསལ་བར་བསྟན་པ་ནི། །སེམས་ཀྱི་ངོ་བོ་ཀ་དག་འོད་གསལ་ཡིན། །སེམས་ཀྱི་ངོ་བོ་གསལ་དག་ཡིན། །སེམས་ཀྱི་ངོ་བོ་གཏིང་གསལ་ཡིན། །སེམས་ཀྱི་ངོ་བོ་ཁོང་ནས་གསལ། །སེམས་ཀྱི་ངོ་བོ་མཁའ་གསལ་ཡིན། །སེམས་ཀྱི་ངོ་བོ་འོད་དུ་གསལ། །སེམས་ཀྱི་ངོ་བོ་རྩལ་དུ་གསལ། །སེམས་ཀྱི་ངོ་བོ་ཟེར་དུ་གསལ། །སེམས་ཀྱི་ངོ་བོ་རོལ་པར་གསལ། །སེམས་ཀྱི་ངོ་བོ་སྣང་བར་གསལ། །སེམས་ཀྱི་ངོ་བོ་དབང་པོ་ལྔ་རུ་གསལ། །སེམས་ཀྱི་ངོ་བོ་དོན་སྙིང་ལྔ་རུ་གསལ། །སེམས་ཀྱི་ངོ་བོ་ཡན་ལག་ལྔ་རུ་གསལ། །སེམས་ཀྱི་ངོ་བོ་གཟུགས་ལྔ་ཡུལ་ལྔར་གསལ། །སེམས་ཀྱི་ངོ་བོ་རྣམ་ཤེས་ཚོགས་བརྒྱད་གསལ། །སེམས་ཀྱི་ངོ་བོ་དབང་པོ་ལྔ་དང་ཡིད་ལྔར་གསལ། །སེམས་ཀྱི་ངོ་བོ་ཡུལ་གྲོལ་རིག །སེམས་དེ་གསལ་དག་ཀློང་དུ་དག །ཅེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཀྱི་ངོ་བོ་གསལ་བའི་ལེའུ་སྟེ་གསུམ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ལ་ཡོན་ཏན་ཇི་ལྟར་མངའ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སེམས་ཀྱི་ཡོན་ཏན་བསྟན་པ་ནི། །ཡིད་བཞིན་ནོར་ལས་དགོས་འདོད་འབྱུང་བ་བཞིན། །སེམས་ལ་ཡོན་ཏན་འབྱུང་ལུགས་བསམ་མི་ཁྱབ། །ཡོན་ཏན་རྣམ་གྲངས་བཤད་པས་མི་ལངས་ཏེ། །རེ་ཞིག་བསྡུས་ཏེ་ཡོན་ཏན་འདི་ལྟར་བཤད། །མ་རིག་ཡེ་ཤེས་གསལ་བར་བྱེད་པའི་ཡོན་ཏན་མངའ། །དུག་གསུམ་སྐུ་གསུམ་བསྒྱུར་བའི་ཡོན་ཏན་མངའ། །དུག་ལྔ་ཡེ་ཤེས་བསྒྱུར་བའི་ཡོན་ཏན་ཡོད། །སེམས་ཅན་སངས་རྒྱས་བསྒྱུར་བའི་ཡོན་ཏན་མངའ། །འཁོར་བ་མྱང་འདས་བསྒྱུར་བའི་ཡོན་ཏན་མངའ། །རིགས་དྲུག་གཡང་ས་གཅོད་པའི་ཡོན་ཏན་མངའ། །ཁམས་གསུམ་ཞིང་ཁམས་བསྒྱུར་བའི་ཡོན་ཏན་མངའ། །ཉོན་མོངས་ཕྱགས་མས་འདེབས་པའི་ཡོན་ཏན་མངའ། །རྣམ་རྟོག་ཆོས་སྐུར་ ― DNG001_Page_0181 ―
[མ་དཔེ་གཟིགས་ན་འདིར་གནོན།]
བསྒྱུར་བའི་ཡོན་ཏན་མངའ། །སྣང་བ་རང་སར་གྲོལ་བའི་ཡོན་ཏན་མངའ། །རིག་པ་རང་རླག་བྱེད་པའི་ཡོན་ཏན་མངའ། །སེམས་ཉིད་མིང་མེད་རྟོགས་པའི་ཡོན་ཏན་མངའ། །ཇི་སྙེད་མ་ལུས་མཁྱེན་པའི་ཡོན་ཏན་མངའ། །ཇི་ལྟ་བ་བཞིན་མཁྱེན་པའི་ཡོན་ཏན་མངའ། །རྣམ་པ་ཐམས་ཅད་མཁྱེན་པའི་ཡོན་ཏན་མངའ། །མཆོག་མཁྱེན་པ་ཡི་ཡོན་ཏན་མངའ། །མ་སྤངས་གནས་སུ་དག་པའི་ཡོན་ཏན་མངའ། །མ་བསྒྲུབས་ཡོངས་སུ་གྲུབ་པའི་ཡོན་ཏན་མངའ། །འཁོར་བའི་འདམ་ནས་འདྲེན་པའི་ཡོན་ཏན་མངའ། །བུ་བཞིན་ཀུན་ལ་སྙོམས་པའི་ཡོན་ཏན་མངའ། །སྙིང་རྗེ་ཀུན་ལ་སྨན་མཛད་ཡོན་ཏན་མངའ། །སྡུག་བསྔལ་བདེ་བར་ཤེས་པའི་ཡོན་ཏན་མངའ། །ནམ་མཁའ་བཞིན་དུ་ཀུན་ལ་ཡོངས་སུ་ཁྱབ་པའི་ཡོན་ཏན་མངའ། །ཐམས་ཅད་མ་ལུས་སངས་རྒྱས་པར། །ཤེས་པ་སེམས་ཀྱི་ཡོན་ཏན་ཡིན། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཀྱི་ཡོན་ཏན་བསྟན་པའི་ལེའུ་སྟེ་བཞི་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ཀྱི་ཕྲིན་ལས་ཇི་ལྟར་མཛད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །སེམས་ཀྱི་ཕྲིན་ལས་མཛད་ལུགས་བསམ་མི་ཁྱབ། །རེ་ཞིག་ཕྲིན་ལས་མཛད་ལུགས་བསྟན་པ་ནི། །མ་རིག་མུན་པ་སེལ་བའི་ཕྲིན་ལས་བྱེད། །གཏི་མུག་བག་ཆགས་སེལ་བའི་ཕྲིན་ལས་བྱེད། །སྒྲིབ་གཡོགས་མུན་པ་འཇོམས་པའི་ཕྲིན་ལས་བྱེད། །དུག་ལྔ་རང་སར་གྲོལ་བའི་ཕྲིན་ལས་མཛད། །སེམས་ཅན་སངས་རྒྱས་བསྒྱུར་བའི་ཕྲིན་ལས་མཛད། །འཁྲུལ་གཞི་རྩད་ནས་གཅོད་པའི་ཕྲིན་ལས་མཛད། །འཁྲུལ་སྣང་རང་སར་གྲོལ་བའི་ཕྲིན་ལས་མཛད། །སྣང་བའི་དངོས་གཞི་གྲོལ་བའི་ཕྲིན་ལས་མཛད། །འཁོར་བའི་གནས་ནས་འདྲེན་པའི་ཕྲིན་ལས་མཛད། །སྡུག་བསྔལ་བདེ་བར་བྱེད་པའི་ཕྲིན་ལས་མཛད། །ཐམས་ཅད་སངས་རྒྱས་ཡིན་ཤེས་ཕྲིན་ལས་ཆེན་པོ་མཛད། །ཞི་རྒྱས་དབང་དྲག་ལྟ་བུ་འདི་ཡིན་ནོ། །ཞེས་གསུངས་སོ། །ནམ་མཁའ་འབར་ ― DNG001_Page_0182 ―
[མ་དཔེ་གཟིགས་ན་འདིར་གནོན།]
བའི་རྒྱུད་ལས། སེམས་ཀྱི་ཕྲིན་ལས་བསྟན་པའི་ལེའུ་སྟེ་ལྔ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་འདི་ཡེ་ནས་ཡོད་དམ་མེད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །སེམས་འདི་ཡེ་ནས་མེད་མོད་ཀྱང་། །མ་རིག་འགྱུ་བའི་རླུང་འདིས་འཁོར་འདས་གཉིས། །དཔེར་ན་ནམ་མཁའི་སྤྲིན་དང་མེ་ལོང་གཡའ། །གཞི་ལ་མེད་ཀྱང་ཤུགས་ལས་བྱུང་། །ཞེས་སོ། །དེ་ནས་འཁོར་གྱིས་ཡང་ཞུས་པས། །སེམས་དེ་ཡེ་ནས་ཡོད་ན་རྟག་པར་ཐལ། །ཡེ་ནས་མེད་ན་ཆད་པར་ཐལ། །རྟག་ཆད་མཐའ་འདི་གང་གིས་སེལ། །ཞེས་སྟོན་པ་ལ་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སེམས་ཉིད་གཞི་ལ་གཟུགས་སུ་གྲུབ་པ་མེད། །དེ་ཡིས་རྟག་པའི་མཐའ་སེལ་ལོ། །རྩལ་ལ་མ་འགགས་རོལ་བ་སྣ་ཚོགས་ཤར། །འོད་གསལ་ཡན་ལག་རང་སྣང་བས། །དེ་ཡིས་ཆད་པའི་མཐའ་སེལ་ལོ། །སེམས་ཉིད་གཞི་ལ་རྩལ་ཐིམ་པས། །རྟག་ཆད་གཉིས་མེད་མཐའ་སེལ་ལོ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཡོད་མེད་གཉིས་མེད་དུ་བསྟན་པའི་ལེའུ་སྟེ་དྲུག་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །སེམས་འདི་ཡེ་ནས་སངས་རྒྱས་ཡིན་ནམ་མིན། །ཡིན་ན་སེམས་འདི་ཡེ་ནས་ཇི་ལྟར་འཁྲུལ། །མིན་ན་འཁོར་བ་ལྟེ་ཆད་འགྱུར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སེམས་འདི་ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བར་འཁྱམས། །མ་རིག་དབང་གིས་འཁོར་བར་སྣང་། །འཁོར་བ་ལྟེ་བ་ཆད་པ་མ་ཡིན་ཏེ། །འཁོར་བ་རྩད་ཆོད་མྱ་ངན་འདས། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཡེ་ནས་སངས་རྒྱས་ཡིན་ཀྱང་དུག་ལྔ་མ་རིག་པའི་དབང་གིས་འཁོར་བའི་ལེའུ་སྟེ་བདུན་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །ཡེ་ནས་སངས་རྒྱས་ ― DNG001_Page_0183 ―
[མ་དཔེ་གཟིགས་ན་འདིར་གནོན།]
ཡིན་ན་སེམས་ཅན་ཇི་ལྟར་འཁྲུལ། །སངས་རྒྱས་འཁྲུལ་ན་ཐུག་པ་མེད། །སེམས་དེ་སངས་རྒྱས་མིན་ན་སངས་རྒྱས་གང་ནས་འཚོལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སེམས་དེ་རྟོགས་པ་མངོན་དུ་གྱུར་པའི་སངས་རྒྱས་མིན། །སེམས་དེ་གཞི་ནས་ལྷུན་གྲུབ་སངས་རྒྱས་ཡིན། །གཞི་རང་བཞིན་ལྷུན་གྱིས་གྲུབ་པ་ལ། །རྩལ་དང་རིག་པ་ཟེར་འཁྲུལ་བས། །དུག་ལྔ་ཉོན་མོངས་མ་རིག་དབང་གིས་སེམས་ཅན་འཁྲུལ། །སུས་ཀྱང་མ་ལན་རང་ངོ་མ་ཤེས་ཉེས། །སངས་རྒྱས་གཞན་ནས་མི་འཚོལ་ཏེ། །སེམས་ཉིད་རྟོགས་པས་སངས་རྒྱས་ཡིན། །འཁོར་བར་ངོ་ཤེས་མྱ་ངན་འདས། །སེམས་ཉིད་ངོ་ཤེས་འཁྲུལ་དུ་མེད། །ཅེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་དེ་ཡེ་ནས་སངས་རྒྱས་ཡིན་ཀྱང་མ་རྟོགས་པས་གཞི་ལྷུན་གྲུབ་ལ་འཁྲུལ་པ་བསྟན་པའི་ལེའུ་སྟེ་བརྒྱད་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ལ་ཡེ་ནས་དངོས་པོ་ཡོད་དམ་མེད། །དངོས་པོ་ཡོད་ན་སེམས་དེ་རྟག་པར་ཐལ། །དངོས་པོ་མེད་ན་ཆད་པར་ལྷུང་། །དེ་ཉིད་ངོ་བོ་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཁྱོད་ཀྱིས་ང་ལ་དྲིས་པ་ནི། །གཞི་ལ་འདྲི་འམ་རྩལ་ལ་འདྲི། །ཆོས་ཉིད་གཞི་ལ་འདྲི་བ་ན། །སེམས་ཀྱི་གཞི་ལ་དངོས་པོ་མེད། །སེམས་ཀྱི་གཞི་ལ་གཟུགས་སུ་མེད། །སེམས་ཀྱི་གཞི་ལ་ཁ་དོག་མེད། །སེམས་དེ་ཅང་མེད་དངོས་མེད་ཐ་སྙད་མེད། །ཅེས་གསུངས་སོ། །རྩལ་ལ་དྲིའོ་ཟེར་བ་ན། མཚན་ཉིད་མ་འགགས་སྣ་ཚོགས་འཆར་བའི་ཕྱིར། །སྣང་སྲིད་དངོས་པོའི་ཆོས་རྣམས་གཞིའི་རྩལ་དུ་ཤར། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཀྱི་གཞི་ལ་དངོས་པོ་མེད་པ་ལ། རྩལ་ལ་དངོས་པོ་ཡོད་པར་བསྟན་པའི་ལེའུ་སྟེ་དགུ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །སེམས་ལ་འཁྲུལ་པ་ཡོད་དམ་མེད། །འཁྲུལ་ཡོད་སེམས་དེ་སྐྱོན་དུ་འགྱུར། །སོལ་ ― DNG001_Page_0184 ―
[མ་དཔེ་གཟིགས་ན་འདིར་གནོན།]
བ་ནག་པོའི་དཔེ་བཞིན་ནོ། །སེམས་ལ་འཁྲུལ་པ་མེད་པ་ལ། །སེམས་ཅན་ཐམས་ཅད་གྲོལ་བར་རིགས། །དེ་གཉིས་འཕྲང་དེ་ཇི་ལྟར་བསལ། །ཞེས་སྟོན་པ་ལ་ཞུས་པས། སྟོན་པས་འཁོར་ལ་བཀའ་སྩལ་པ། །སེམས་ཀྱི་གཞི་ལ་འཁྲུལ་པ་མེད། །རྩལ་ལ་འཁྲུལ་སྣང་ལྟར་སྣང་ཀྱང་། །སེམས་ཀྱི་གཞི་ལ་གོས་པ་མེད། །དཔེར་ན་མན་ཤེལ་དག་པའི་ནང་། །དཀར་དམར་སྨན་དུག་བཟང་ངན་གང་སྣང་ཡང་། །ཤེལ་གྱི་གཞི་ལ་གང་ཡང་གྲུབ་པ་མེད། །སྨན་དུག་སྣང་ལ་གྲུབ་པ་མེད། །སྨན་མི་བསྒྲུབ་ལ་དུག་མི་སྤང་། །ཤེལ་གོང་ནང་དུ་གཉིས་ཀ་དག །དེ་བཞིན་སེམས་ཀྱི་གཞི་ལ་ཡང་། །འཁྲུལ་སྣང་ཅིར་ཡང་སྣང་མོད་ཀྱང་། །བཟང་པོ་མི་བསྒྲུབ་ངན་མི་སྤང་། །སེམས་ཉིད་ཀ་དག་ངང་དུ་འཁྲུལ་པ་དག །འཁྲུལ་སྣང་རང་བཞིན་མེད་དེ་སེམས་སུ་དག །ཅེས་གསུངས་སོ། །ནམ་མཁའ་འབར་བའི་རྒྱུད་ལས། འཁྲུལ་པ་གཞི་ལ་མེད་པར་བསྟན་པའི་ལེའུ་སྟེ་བཅུ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །སེམས་ཅན་ཀུན་གྱི་སེམས་འདི་མཉམ་ལགས་སམ། །མཉམ་ན་བཟང་ངན་འོང་བ་དང་། །བློ་རྣོ་རྟུལ་ཤེས་པ་ཆེ་ཆུང་འོང་བ་ཅི་ཡིས་ཉེས། །འོན་ཏེ་མི་མཉམ་སེམས་བདག་བཟང་ངན་ཐ་དད་བདོག་ལགས་སམ། ཞེས་ཞུས་པས། སྟོན་པས་འཁོར་ལ་བཀའ་སྩལ་པ། འཁོར་གྱི་དྲི་བ་གཉིས་པོ་དེ། །ཆོས་ཉིད་གཞི་ལ་དྲི་འམ་སྣང་ཚུལ་ཟེར་ལ་འདྲི། །སེམས་ཀྱི་གཞི་ལ་འདྲི་བ་ན། །ཡ་ཐ་རྒྱལ་བའི་དཀྱིལ་འཁོར་ནས། །མ་ཐ་དམྱལ་བའི་འཇིགས་ཚོགས་སུ། །སེམས་ཅན་མཐའ་ཡས་མ་ལུས་ལ། །ཏིལ་ལ་མར་གྱིས་ཁྱབ་བཞིན་མཉམ་པོར་གནས། །དཔེར་ན་རྒྱ་ཞོ་མནན་པ་འདྲ། །སེམས་ལ་བཟང་ངན་བྱེ་བྲག་མེད། །སེམས་ཉིད་གཞི་ལ་རྣོ་རྟུལ་མེད། །ཤེས་པ་གསལ་མི་གསལ་དུ་མེད། །སྣང་ཚུལ་ཟེར་ལ་འདྲི་བ་ན། །ཤེས་བྱའི་རང་བཞིན་མ་འགགས་པར། །བློ་རྣོ་རྟུལ་བཟང་ངན་ཤེས་པ་གསལ་མི་གསལ་ ― DNG001_Page_0185 ―
[མ་དཔེ་གཟིགས་ན་འདིར་གནོན།]
དུ་ཤུགས་ལས་འཁྲུལ། དཔེར་ན་ཞིང་ས་གཅིག་པ་ལ་ས་བོན་མཉམ་པོར་བཏབ་ནས། ཆུ་ལུད་མཉམ་པོར་བཏབ་ཀྱང་། བཟང་ངན་ནས་རྡོག་ཆེ་ཆུང་ཤུགས་ལས་འབྱུང་། ལྕགས་རྡོ་བཞུ་བཏུལ་མཉམ་ཡང་། རྣོ་བརྟུལ་བཟང་ངན་ཤུགས་ལས་འབྱུང་། ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཅན་ཐམས་ཅད་ལ་སེམས་དེ་མཉམ་པར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ལ་གཏི་མུག་ཡོད་དམ་མེད། །གཏི་མུག་མེད་ན་ཡེ་ཤེས་མི་འཆར་ཅི་ཡིས་ཉེས། །ཡོད་ན་ཡེ་ཤེས་འཆར་རམ་ཞེས་ཞུས་པས། །སྟོན་པས་འཁོར་ལ་བཀའ་སྩལ་པ། །འཁོར་གྱི་དྲི་བ་གཉིས་པོ་དེ། །ཤེས་དང་མ་ཤེས་གང་ལ་འདྲི། །ཤེས་པ་དག་ལ་འདྲི་བ་ན། །རང་སེམས་ཤེས་པའི་འོད་གསལ་དང་། །གཏི་མུག་མ་རིག་ཡེ་ནས་མེད། །ཀ་དག་ཡེ་ཤེས་འོད་འབར་གསལ། །དེ་ལ་བག་ཆགས་སྒྲིབ་གཡོགས་མེད། །མ་ཤེས་པ་ལ་འདྲི་བ་ན། །རང་ངོ་མ་ཤེས་མ་རིག་པས། །གཏི་མུག་བག་ཆགས་སྒྲིབ་པས་བསྒྲིབས། །ཡེ་གསལ་མ་རྟོགས་མུན་པའི་འཁོར་སྒོར་ཆུད། །ཅེས་གསུངས་སོ། །ནམ་མཁའ་འབར་བའི་རྒྱུད་ལས། རང་ངོ་ཤེས་པ་ལ་མ་རིག་གཏི་མུག་མེད་པར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ལ་དུག་ལྔ་དུག་གསུམ་ཡོད་དམ་མེད། །ཡོད་ན་སྤངས་ཀྱང་མི་སྤོང་པ་རུ་འདུག །མེད་ན་འགྲོ་དྲུག་སེམས་ཅན་འཁོར་བར་འཁྱམས་པ་མི་རིགས་སོ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །འཁོར་གྱི་དྲི་བ་གཉིས་པོ་དེ། །རྟོགས་དང་མ་རྟོགས་གང་ལ་འདྲི། །རྟོགས་པ་ལ་ནི་འདྲི་བ་ན། །དུག་ལྔ་དུག་གསུམ་མ་སྤངས་རང་གྲོལ་བས། །དུག་གསུམ་ཀ་དག་སྐུ་གསུང་ཐུགས། །དུག་ལྔ་མིང་མེད་ཡེ་ཤེས་ལྔ། །ཞེས་གསུངས་སོ། །མ་རྟོགས་པ་ལ་དྲི་བ་ན། །ཁམས་གསུམ་སེམས་ཅན་ཐམས་ཅད་ལ། །དུག་ལྔ་དུག་གསུམ་རང་ཆས་ལྡན། །དེ་ཡིས་འགྲོ་དྲུག་འཁོར་བར་འཁྱམས། །ཞེས་གསུངས་ ― DNG001_Page_0186 ―
[མ་དཔེ་གཟིགས་ན་འདིར་གནོན།]
སོ། །ནམ་མཁའ་འབར་བའི་རྒྱུད་ལས། དུག་ལྔ་རྟོགས་པ་ལ་མེད་ཅིང་མ་རྟོགས་པ་ལ་ཡོད་པར་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ལ་དབྱིབས་དང་ཁ་དོག་ཡོད་དམ་མེད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །སེམས་ལ་དབྱིབས་དང་ཁ་དོག་མེད། །སེམས་ལ་གཟུགས་དང་མཚན་མ་མེད། །སེམས་ལ་ཡོད་མེད་རྩིས་གདབ་མེད། །ཡོད་པར་མཐོང་བ་འཁྲུལ་པའི་བློ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ལ་དབྱིབས་དང་ཁ་དོག་མེད་པར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་འདི་རྟོག་པས་སངས་རྒྱས་སམ། །ཞུས་པས། སྟོན་པས་འཁོར་ལ་བཀའ་སྩལ་པ། །སེམས་འདི་རྟོག་པ་དང་བཅས་པའི། །དྲན་སེམས་འདི་ཡིས་སངས་མི་རྒྱ། །སེམས་ཉིད་ཆོས་སྐུ་ཡིན་པའི་ཕྱིར། །སེམས་ཉིད་རྟོགས་པས་སངས་རྒྱས་སོ། །སྔོན་གྱི་རྒྱལ་བ་རྣམས་ཀྱིས་ཀྱང་། །སེམས་ཉིད་རྟོགས་པས་སངས་རྒྱས་སོ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཉིད་རྟོགས་པས་སངས་རྒྱས་པའི་ལེའུ་སྟེ་བཅོ་ལྔ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་དང་རིག་པ་ཡིད་དང་གསུམ་ལ་ཁྱད་པར་ཡོད་དམ་མེད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །འཁོར་གྱི་དྲི་བ་གསུམ་པོ་དེ། །གཞི་ལ་འདྲི་འམ་རྩལ་ལ་འདྲི། །གཞི་ལ་འདྲི་ན་དེ་གསུམ་ངོ་བོ་གཅིག་སྟེ་ཁྱད་པར་མེད། །རྩལ་ལ་འདྲི་ན་ཁྱད་པར་ཡོད། །བཟང་ངན་ཡོད་པ་མ་ཡིན་ཏེ། །ཚོགས་པ་རགས་མི་རགས་སུ་ཡོད། །རིག་པ་སྐྱེ་མེད་མྱོང་བ་ཡོད། །ཡིད་དུ་འགྱུ་བས་དྲན་པ་འབྱུང་། །སེམས་སུ་གསལ་བས་མིང་དུ་བཏགས། །བཏགས་ལ་ཞེན་པས་དགའ་མི་དགའ་རུ་སྐྱེས། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་དང་རིག་པ་ཡིད་དང་གསུམ་བསྟན་པའི་ལེའུ་སྟེ་བཅུ་དྲུག་པའོ།། །། ― DNG001_Page_0187 ―
[མ་དཔེ་གཟིགས་ན་འདིར་གནོན།]
དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །སྙིང་པོ་ཆོས་ཉིད་ཆོས་སྐུ་གསུམ་ལ་ཁྱད་པར་ཡོད་དམ་མེད། །ཞུས་པས། སྟོན་པས་འཁོར་ལ་བཀའ་སྩལ་པ། །དེ་གསུམ་གཞི་ལ་ཁྱད་པར་མེད། །ཡན་ལག་རྩལ་དང་མིང་འདོགས་ལ། །མིང་གི་བྱེ་བྲག་ཁྱད་པར་ཡོད། །སྙིང་པོ་ཆོས་ཉིད་དབྱིངས་ལ་ཁྱད་པར་མེད། །ཅེས་གསུངས་སོ། །ནམ་མཁའ་འབར་བའི་རྒྱུད་ལས། དེ་གསུམ་གཞི་ལ་ཁྱད་པར་མེད་པར་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །དབྱིངས་དང་ཡེ་ཤེས་སྐྱེ་མེད་གསུམ་ལ་ཁྱད་པར་ཡོད་དམ་མེད། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དེ་གསུམ་དོན་ལ་ཁྱད་པར་མེད། །མིང་དང་བྱེ་བྲག་ཁྱད་པར་ཡོད། །དབྱིངས་ནི་ཆོས་ཉིད་འདུས་མ་བྱས། །སྐྱེ་མེད་སྙིང་པོ་ཆོས་ཀྱི་སྐུ། །ཡེ་ཤེས་ཡེ་ཤེས་ཞེས་བྱ་བ། །ཡེ་ནས་ཡོད་པའི་ཤེས་པ་ཡིན། །གསལ་འགྲིབ་མེད་པའི་ཤེས་པ་ཡིན། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། དབྱིངས་དང་སྐྱེ་མེད་ཡེ་ཤེས་གསུམ་ལ་ཁྱད་པར་མེད་པར་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སྐུ་ལྔ་ཡེ་ཤེས་ལྔ་དང་དུག་ལྔ་ཉོན་མོངས་ལྔ་ལ་ཁྱད་པར་ཡོད་དམ་མེད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །རྟོགས་ཤིང་གྲོལ་བའི་དུས་ན་ཁྱད་པར་མེད། །མ་རྟོགས་པ་ལ་ཁྱད་པར་ཆེ། །ཞེས་གསུངས་སོ། །དེ་ནས་ཡང་འཁོར་གྱིས་ཞུས་པ། །རྟོགས་པའི་སྐུ་ལྔ་ཡེ་ཤེས་ལྔ་ནི་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། སྐུ་ལྔའི་དབྱེ་བ་བཤད་པ་ནི། སྙིང་པོ་གཏིང་མཐའ་ཡས་པའི་སྐུ་དང་། སྔོན་ཐོག་མིང་མེད་མཐའ་བྲལ་གྱི་སྐུ་དང་། ཡེ་དག་ཀ་དག་སྐྱེ་བ་མེད་པའི་སྐུ་དང་། དངོས་མེད་ཟང་ཀའི་སྐུ་དང་། བྱར་མེད་བློ་འདས་ཀྱི་སྐུ་དང་ལྔའོ། །ཡེ་ཤེས་ལྔ་ལ་ཀ་དག་སྐྱེ་བ་མེད་པའི་ཡེ་ཤེས་དང་། འོད་གསལ་ཀློང་ནས་གསལ་བའི་ཡེ་ཤེས་དང་། རང་བྱུང་ངང་དྭངས་ ― DNG001_Page_0188 ―
[མ་དཔེ་གཟིགས་ན་འདིར་གནོན།]
གསལ་བའི་ཡེ་ཤེས་དང་། རང་གསལ་རང་སངས་རྒྱས་པའི་ཡེ་ཤེས་དང་། རང་སྣང་རང་སར་གྲོལ་བའི་ཡེ་ཤེས་དང་ལྔའོ། །དེ་ནི་ཐེག་པ་གཞན་ནས་མ་བཤད་དེ། ཡང་ཏི་ཉི་ཟླའི་སྙིང་པོ་སྐུ་ལྔ་ཡེ་ཤེས་ལྔའོ། །རྟོགས་ལྡན་ལ་དུག་ལྔ་ཉོན་མོངས་ལྔ་མེད་དེ། ཡེ་ཤེས་ཀློང་ན་འཕྱོ་ཞེས་སོ། །མ་རྟོགས་དུག་ལྔས་ཁམས་གསུམ་འཁོར་བར་འཁྱམས། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། རྟོགས་པ་ལ་དུག་ལྔ་དང་སྐུ་ལྔ་དབྱེར་མེད་དུ་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སྣང་བ་རིག་པ་སྟོང་པ་གསུམ་དུ་ཆོས་རྣམས་ཇི་ལྟར་གྲོལ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སྣང་ཚད་ཡེ་གནས་རང་སོ་ལ། །དགག་བསྒྲུབ་སྤང་ལེན་མེད་པར་རང་སར་གྲོལ། །འགྱུ་བ་མེད་པའི་རིག་ཡིད་ལ། །ཇི་ལྟར་སྣང་བའི་དངོས་པོའི་ཆོས་རྣམས་ལ། །མི་འགྱུ་མིང་གི་མི་དྲན་སེམས་མི་འཆར། །རིག་ཡིད་རྒྱ་ལ་འགྱུ་ཡང་ངང་དྭངས་རང་སར་གྲོལ། །གང་སྐྱེས་རང་སར་ཐིམས་པས་འཁྲུལ་པ་རྩད་ནས་བཅད། །རིག་པས་རྩད་ནས་བཅད་པའོ། །ཀུན་གཞི་རྩད་ནས་བཅད་པ་ནི། སྟོང་གསལ་དངོས་མེད་བག་ཆགས་སྒྲིབ་གཡོགས་མེད། །འདོད་རློམ་རྩིས་གདབ་མེད་དེ་སེམས་ཉིད་རྩད་ནས་བཅད། །དེ་གསུམ་དྲིལ་ནས་བསྟན་པ་ནི། །གང་སྣང་ཡུལ་རྣམས་རང་གྲོལ་སངས། །གང་སྐྱེས་རིག་པ་རང་རླགས་དང་། །གང་དྲན་དྲན་སེམས་རྩིས་གདབ་མེད་པར་ཞི། །དེ་གསུམ་ཇི་ལྟར་གྲོལ་ཞེ་ན། །སྣང་སྲིད་ཆོས་རྣམས་སྟོང་པར་གྲོལ། །ཡིད་རིག་དྲན་བློ་རང་བྱུང་རང་སར་གྲོལ། །སེམས་དེ་ཀུན་གཞིའི་ཀློང་ན་གྲོལ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སྣང་བ་སྟོང་པ་རིག་པ་གསུམ་དུ་ཆོས་རྣམས་གྲོལ་བར་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །གྲོལ་བར་བྱེད་པའི་གདམས་ངག་ཇི་ལྟར་བཤད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །སྣང་བ་རིག་པ་སྟོང་པ་གསུམ་དུ་གྲོལ་བའི་གདམས་ངག་ནི། །དེ་ལ་སྣང་བའི་ཆོས་རྣམས་ཀུན། །རང་གནས་རང་སོར་དབྱེ་བསལ་མེད་པར་གྲོལ། །རིག་སྐྱེས་མྱང་བའི་ཆོས་རྣམས་ཀུན། །རིག་མེད་འཛིན་མེད་ཞེན་མེད་གསུམ་ ― DNG001_Page_0189 ―
[མ་དཔེ་གཟིགས་ན་འདིར་གནོན།]
དུ་གྲོལ། །སྟོང་པ་ཀུན་གཞིའི་ཆོས་རྣམས་ཀུན། །བག་ཆགས་སྙོམས་བྱེད་སྒྲིབ་གཡོགས་མེད་པར་གྲོལ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། གྲོལ་བར་བྱེད་པའི་གདམས་ངག་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ཀྱི་སྣང་ཚུལ་སྣ་ཚོགས་པ། །མདོ་དོན་གཅིག་ཏུ་ཇི་ལྟར་བསྡུ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སེམས་ཀྱི་སྣང་ཚུལ་བསམ་མི་ཁྱབ། །དེ་ཡི་སྣང་ཚུལ་བསྡུས་ཏེ་བཤད། །སྣང་ཚུལ་དེ་རྣམས་ནི། གཞི་ལ་རླུང་ལྔ་སེམས་ཀྱི་སྣང་ཚུལ་ཡིན། །འབྱུང་ལྔ་འོད་ལྔ་སེམས་ཀྱི་སྣང་ཚུལ་ཡིན། །འོད་ལྔ་ཟེར་ལྔ་སེམས་ཀྱི་སྣང་ཚུལ་ཡིན། །ཤེས་དང་མ་ཤེས་སེམས་ཀྱི་སྣང་ཚུལ་ཡིན། །རིག་དང་མ་རིག་སེམས་ཀྱི་སྣང་ཚུལ་ཡིན། །སྟོང་པ་གསལ་བ་འགག་མེད་སེམས་ཀྱི་སྣང་ཚུལ་ཡིན། །རང་བཞིན་སྟོང་པ་ཐུགས་རྗེ་སེམས་ཀྱི་སྣང་ཚུལ་ཡིན། །དུག་གསུམ་སྐུ་གསུམ་ཡིད་འཁོར་རྣམ་གསུམ་སེམས་ཀྱི་སྣང་ཚུལ་ཡིན། །འཆར་སྒོ་འཁྲུལ་སྒོ་སེམས་ཀྱི་སྣང་ཚུལ་ཡིན། །ཡིད་རིག་སོ་སོར་འཁྲུལ་པ་སེམས་ཀྱི་སྣང་ཚུལ་ཡིན། །འཁྲུལ་འབྲས་གཟུགས་ལྔ་སེམས་ཀྱི་སྣང་ཚུལ་ཡིན། །རྟོགས་དང་མ་རྟོགས་སེམས་ཀྱི་སྣང་ཚུལ་ཡིན། །སངས་རྒྱས་སེམས་ཅན་སེམས་ཀྱི་སྣང་ཚུལ་ཡིན། །འཁོར་བ་མྱང་འདས་སེམས་ཀྱི་སྣང་ཚུལ་ཡིན། །སྣང་སྲིད་སྣོད་བཅུད་སེམས་ཀྱི་སྣང་ཚུལ་ཡིན། །སྐྱེས་པ་བུད་མེད་རྩི་ཤིང་ནགས་ཚལ་སེམས་ཀྱི་སྣང་ཚུལ་ཡིན། །ཡོད་མེད་དངོས་པོའི་ཆོས་རྣམས་སེམས་ཀྱི་སྣང་ཚུལ་ཡིན། །ཞེས་གསུངས་སོ། །མདོ་དོན་གཅིག་ཏུ་བསྡུ་བ་ནི། །བརྒྱད་ཁྲི་བཞི་སྟོང་ཐེག་པ་རྣམས། །རྫོགས་པ་སྤྱི་གཅོད་སྤྱི་ཏིར་འདུས། །བློས་བཏགས་ཆོས་རྣམས་ཐམས་ཅད་ཀུན། །བློ་འདས་མིང་མེད་ཆེན་པོར་འདུས། །བསམ་གྱིས་མ་ཁྱབ་ཆོས་འདི་རྣམས། །བསམ་མེད་ཆེན་པོའི་ངང་དུ་འདུས། །སྣོད་བཅུད་སྣང་སྲིད་དངོས་པོའི་ཆོས་རྣམས་ཀུན། །མུ་མེད་གཏིང་མཐའ་གྲོལ་བར་བསྡུས། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། མདོ་དོན་གཅིག་ཏུ་བསྡུས་པའི་ལེའུ་སྟེ་ཉི་ཤུ་རྩ་ ― DNG001_Page_0190 ―
[མ་དཔེ་གཟིགས་ན་འདིར་གནོན།]
གཉིས་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །སེམས་ཀྱི་ཐག་ནི་གང་དུ་བཅད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །སྐྱེ་མེད་མཚོན་དུ་མེད་པར་ཐག་བཅད་དོ། །སྙིང་པོ་འཕོ་འགྱུར་མེད་པར་ཐག་བཅད་དོ། །ཆོས་སྐུ་རྐྱེན་དང་བྲལ་བར་ཐག་བཅད་དོ། །དངོས་མེད་ཟང་ཀར་ཐག་བཅད་དོ། །བྱར་མེད་བློ་འདས་ཐག་བཅད་དོ། །མིང་མེད་བརྗོད་ལས་འདས་པར་ཐག་བཅད་དོ། །མུ་མཐའ་གྲོལ་བར་ཐག་བཅད་དོ། །གཏིང་མཐའ་ཡས་པར་ཐག་བཅད་དོ། །ཆོས་ཉིད་ཀ་དག་ཆེན་པོར་ཐག་བཅད་དོ། །དངོས་པོ་མེད་པར་ཐག་ཀྱང་བཅད། །ངོས་གཟུང་མེད་པར་ཐག་ཀྱང་བཅད། །ཡུལ་སེམས་མེད་པར་ཐག་ཀྱང་བཅད། །དགག་བསྒྲུབ་སྤང་ལེན་མེད་པར་ཐག་བཅད་དོ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཀྱི་ཐག་བཅད་པའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ཀྱི་ལ་ནི་གང་དུ་བཟླ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སེམས་ཀྱི་ལ་ནི་ཆོས་ཉིད་ཀློང་དུ་བཟླ། །སེམས་ཀྱི་ལ་ནི་སྙིང་པོའི་ཀློང་དུ་བཟླ། །སེམས་ཀྱི་ལ་ནི་དངོས་མེད་ཟང་ཀར་བཟླ། །སེམས་ཀྱི་ལ་ནི་མ་བཅོས་རྣལ་མར་བཟླ། །སེམས་ཀྱི་ལ་ནི་དངོས་གཞི་མེད་པར་བཟླ། །སེམས་ཀྱི་ལ་ནི་སྐྱེ་བ་མེད་པར་བཟླ། །སེམས་ཀྱི་ལ་ནི་མིང་མེད་བློ་འདས་ཆེན་པོར་བཟླ། །སེམས་ཀྱི་ལ་ནི་སངས་རྒྱས་ཆོས་དང་དགེ་འདུན་མེད་པར་བཟླ། །སེམས་ཀྱི་ལ་ནི་སྐུ་ལྔ་ཡེ་ཤེས་ལྔ་ཡང་མེད་པར་བཟླ། །རིག་པ་ཡིད་སེམས་མེད་པར་ལ་བཟླའོ། །ཐེག་ཆེན་ཆོས་མེད་གྲུབ་མཐའ་མེད་པར་ལ་བཟླའོ། །སྣང་མེད་རིག་མེད་འགྱུ་སེམས་མེད་པར་ལ་བཟླའོ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཀྱི་ལ་བཟླ་བསྟན་པའི་ལེའུ་སྟེ་ཉེར་བཞི་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སེམས་ཉིད་ཕུགས་སུ་ཇི་ལྟར་བསྐྱལ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །འཁྲུལ་ཆོད་རྟོག་སངས་ཕུགས་སུ་སྐྱོལ། ། ― DNG001_Page_0191 ―
[མ་དཔེ་གཟིགས་ན་འདིར་གནོན།]
བློ་ཟད་དྲན་མེད་ཕུགས་སུ་སྐྱོལ། །ཆོས་མེད་ཐེག་མེད་ཕུགས་སུ་སྐྱོལ། །ཉམས་རྟོགས་མངོན་ཤེས་མེད་པའི་ཕུགས་སུ་སྐྱོལ། །རིགས་མེད་སེམས་རླག་འོད་གསལ་ཕུགས་སུ་སྐྱོལ། །སྔོན་ཐོག་དང་པོའི་ཕུགས་སུ་སྐྱོལ། །ཆོས་ཉིད་གསང་བའི་ཕུགས་སུ་སྐྱོལ། །སྙིང་པོ་ཆོས་སྐུ་ལྷུན་གྲུབ་ཕུགས་སུ་སྐྱོལ། །སྔོན་ཐོག་ཀ་དག་ཕུགས་སུ་སྐྱོལ། །ཐོག་མ་འོད་མི་འགྱུར་བའི་ཕུགས་སུ་སྐྱོལ། །འོད་བཀོལ་བ་མེད་པའི་ཕུགས་སུ་སྐྱོལ། །འོད་འཕྲོ་འདུ་དང་འཕེལ་འགྲིབ་མེད་པའི་ཕུགས་སུ་སྐྱོལ། །མིང་མེད་མཐའ་སྟོང་ཕུགས་སུ་སྐྱོལ། །མུ་མཐའ་གྲོལ་བའི་ཕུགས་སུ་སྐྱོལ། །གཏིང་མཐའ་ཡས་པའི་ཕུགས་སུ་སྐྱོལ། །མཐའ་བྲལ་བློ་འདས་ཀྱི་ཕུགས་སུ་སྐྱོལ། །ཡེངས་མེད་གཏིང་མེད་དངོས་མེད་སྟོང་པའི་ཕུགས་སུ་སྐྱོལ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཉིད་ཕུགས་སུ་སྐྱོལ་བའི་ལེའུ་སྟེ་ཉེར་ལྔ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །ཕུགས་སུ་སྐྱོལ་བར་བྱེད་པའི་གདམས་པ་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཕུགས་སུ་སྐྱོལ་བར་བྱེད་པའི་གདམས་པ་ནི། །མུ་མཐའ་གྲོལ་བའི་གདམས་ངག་ཡིན། །གཏིང་མཐའ་ཡས་པའི་གདམས་ངག་ཡིན། །མིང་མེད་མཐའ་སྟོང་གདམས་ངག་ཡིན། །སྐྱེ་མེད་ཀ་དག་གདམས་པ་ཡིན། །དངོས་མེད་ཟང་ཀའི་གདམས་པ་ཡིན། །གཤིས་ཀྱི་འདུག་ཚུལ་གདམས་པ་ཡིན། །དངོས་པོའི་གནས་ལུགས་ཤེས་བྱའི་བབས་ཀྱི་གདམས་པ་ཡིན། །སྙིང་པོ་ངེས་པ་དེ་ཁོ་ན་ཉིད་ཀྱི་གདམས་པ་ཡིན། །མ་ནོར་མ་བཅོས་དེ་ཁོ་ན་ཉིད་ཀྱི་གདམས་པ་ཡིན། །བྱར་མེད་བློ་འདས་གདམས་ངག་ཡིན། །རེ་མེད་རང་གནས་གདམས་ངག་ཡིན། །མིང་མེད་མཐའ་བྲལ་གདམས་ངག་ཡིན། །རྩད་ཆོད་བློ་འདས་རིག་མེད་ཆོས་སྐོར་གདམས་ངག་ཡིན། །སྙིང་པོ་མུ་མེད་མཐའ་བྲལ་གྱི་ཕུགས་སུ་སྐྱོལ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། ཕུགས་སུ་སྐྱོལ་བར་བྱེད་པའི་གདམས་པ་ ― DNG001_Page_0192 ―
[མ་དཔེ་གཟིགས་ན་འདིར་གནོན།]
བསྟན་པའི་ལེའུ་སྟེ་ཉེར་དྲུག་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །སེམས་ཀྱི་དཔེ་ནི་གང་དུ་བསྟན། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སེམས་ཀྱི་དཔེ་ནི་ནམ་མཁར་བསྟན། །དངོས་མེད་སྟོང་གསལ་ཁྱབ་ལ་ཕྱོགས་རིས་མེད། །ཅེས་གསུངས་སོ། །དེ་ཡང་སྙིང་པོ་ཡན་ལག་སྣང་ཚུལ་འཁྲུལ་པའི་དཔེ་བསྟན་པ་དང་། ཞིང་ས་གསེར་དང་མཚོ་ལ་དར་ཆགས་གསུམ། །ཀུན་གཞི་སྙིང་པོ་ཆོས་ཉིད་མཚོན་པའི་དཔེ་རུ་བསྟན། །ཙན་དན་གླ་རྩི་སྒོག་པ་གསུམ། །ཤུགས་འབྱུང་འགགས་མེད་རིག་པའི་དཔེ་རུ་བསྟན། །འོད་དང་རྩལ་དང་ཟེར་གྱི་དཔེ་རུ་ནི། །ཉི་མའི་སྙིང་པོ་འོད་དང་ཟེར་གྱི་དཔེ་རུ་བསྟན། །མ་ངེས་ངོ་བོ་མི་འགྱུར་ག་པུར་དཔེ་བཞིན་བསྟན། །སྣང་ཚུལ་དཔེ་ནི་ཕུག་རོན་སྐེ་བཞིན་ནོ། །འཁྲུལ་དཔེ་ཐག་པ་ཐོ་ཡོར་སྨིག་རྒྱུ་ལ། །སྦྲུལ་དང་མི་དང་ཆུར་འཁྲུལ་དཔེ་བཞིན་ནོ། །སེམས་ཉིད་རང་གྲོལ་སྦྲུལ་གྱི་མདུད་པའི་དཔེ། །འཁྲུལ་པ་ལྡོག་པའི་དཔེ་ནི། ལན་ཚྭ་ཆུར་ཐིམ་ཤ་བཙོན་གདོས་གྲོལ་འདྲ། །སེམས་དང་ཆོས་འདྲེས་དཔེ་ནི། ཆུ་ལ་ཆུ་བུར་རང་ཐིམ་རྡོ་ཚན་ཁ་བ་འདྲ། །མ་བུ་དབྱེ་བ་མེད་པའི་དཔེ་ནི། ཡུར་ཆུས་རྒྱ་མཚོར་སླེབས་དང་འདྲ། །ཆུ་དང་འོ་མ་འདྲེས་པ་འདྲ། །འདྲ་བཞི་ཡོད་པས་དཔེ་ཡི་ཐོག་ཏུ་བབས། །དངོས་གཞི་མེད་པས་དཔེས་ཀྱང་མཚོན་དུ་མེད། །འདྲ་བའི་སྒོ་ནས་དཔེ་དང་ཚུལ་བསྟུན་དགོས་པ་ཡོད། །ཅེས་གསུངས་སོ། །ནམ་མཁའ་འབར་བའི་རྒྱུད་ལས། སེམས་ཉིད་དཔེའི་སྒོ་ནས་བསྟན་ཅིང་གཏན་ལ་དབབ་པའི་ལེའུ་སྟེ་ཉེར་བདུན་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སངས་རྒྱས་སེམས་ཅན་གཞི་གཅིག་གམ། །གཅིག་ན་འཁོར་འདས་གཉིས་སུ་འོང་བ་ཇི་ལྟར་ཡིན། །མི་གཅིག་འཁོར་འདས་འདྲེལ་མེད་དམ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། གཞི་ལྔ་མཁའ་ཀློང་རྣམ་དག་ཀུན་གཞི་སྤྱི་ས་རུ། །སངས་རྒྱས་སེམས་ཅན་གཞི་གཅིག་པས། །མཉམ་པ་ཉིད་དུ་གནས་པ་ཡིན། །དཔེར་ན་མཚོ་ལ་ ― DNG001_Page_0193 ―
[མ་དཔེ་གཟིགས་ན་འདིར་གནོན།]
དར་ཆགས་འདྲ། །ཞེས་གསུངས་སོ། །དེ་ནས་འཁོར་གྱིས་སྟོན་པ་ཉིད་ལ་ཞུས་པ། གཅིག་ན་གཉིས་སུ་འོང་བ་ཅི་ཡིན་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སངས་རྒྱས་སེམས་ཅན་གཞི་གཅིག་ཀྱང་། །ཀུན་གཞིའི་རྣམ་ཤེས་གཞི་དེ་ལ། །འགྱུ་བ་རླུང་གི་རྒྱུ་ཉིད་ལས། །མ་རིག་སྒྲིབ་གཡོགས་རྐྱེན་བྱས་ནས། །མུན་པའི་འཁོར་སྒོ་གཉིས་སུ་འཁྲུལ། །གཞི་དེ་རྟོགས་དང་མ་རྟོགས་རྣམ་གཉིས་ལས། །སངས་རྒྱས་སེམས་ཅན་གཉིས་སུ་བྱུང་། །འཁོར་བ་མྱང་འདས་གཉིས་སུ་སྣང་། །སྣང་ཡང་འཁོར་འདས་འདྲེལ་ཡིན་ཏེ། །འཁོར་བའི་རང་བཞིན་ཤེས་པ་མྱ་ངན་འདས། །རྟོགས་ལྡན་རྣམས་ལ་འཁོར་འདས་དབྱེར་མེད་ཅིང་། །འདྲེལ་མེད་མ་ཡིན་ཆོས་ཉིད་དབྱིངས་སུ་གཅིག །ཅེས་གསུངས་སོ། །ནམ་མཁའ་འབར་བའི་རྒྱུད་ལས། སངས་རྒྱས་སེམས་ཅན་གཞི་གཅིག་པར་བསྟན་པའི་ལེའུ་སྟེ་ཉེར་བརྒྱད་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །མ་རིག་ཡེ་ཤེས་ངོ་བོ་གཅིག་མི་གཅིག །མི་གཅིག་འདྲེལ་པ་མེད་ལགས་སམ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། མ་རྟོགས་མ་རིག་པ་ཡིན་ཀྱང་། །རྟོགས་ན་མ་རིག་མ་ཡིན་ཏེ། །དེ་ཕྱིར་རིག་པའི་ཡེ་ཤེས་ཡིན། །དེ་ཕྱིར་མ་རིག་ཡེ་ཤེས་ཐ་དད་མིན། །མ་རྟོགས་རྟོགས་པས་ལམ་འདིར་གཅིག །འདྲེལ་མེད་ཐ་དད་མ་ཡིན་ངོ་བོ་གཅིག །དཔེར་ན་ག་བུར་གཞི་གཅིག་ལ། །ནད་ཚ་གྲང་རྐྱེན་གྱིས་ཐ་དད་གཉིས་སྣང་ཀྱང་། །ཐ་དད་བྱེ་བྲག་གཉིས་མེད་ག་བུར་ངོ་བོར་གཅིག །ཅེས་གསུངས་སོ། །ནམ་མཁའ་འབར་བའི་རྒྱུད་ལས། མ་རིག་ཡེ་ཤེས་ངོ་བོ་གཅིག་ལ་རྟོགས་མ་རྟོགས་ཀྱིས་ཐ་དད་པར་བསྟན་པའི་ལེའུ་སྟེ་ཉེར་དགུ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །འཁོར་འདས་གཉིས་ཀྱི་གྱེས་མདོ་གང་ཙམ་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །འཁོར་འདས་གཉིས་ཀྱི་གྱེས་མདོ་ནི། །ཤེས་དང་མ་ཤེས་གྱེས་མདོ་དང་། །འགྱུ་དང་མི་འགྱུའི་གྱེས་མདོ་དང་། །ཟིན་དང་མ་ཟིན་གྱེས་མདོ་དང་། །རིག་དང་མ་རིག་གྱེས་ ― DNG001_Page_0194 ―
[མ་དཔེ་གཟིགས་ན་འདིར་གནོན།]
མདོ་དང་། །འཆར་སྒོ་འཁྲུལ་སྒོའི་གྱེས་མདོ་ཡིན། །རྟོགས་དང་མ་རྟོགས་གྱེས་མདོ་ཡིན། །སངས་རྒྱས་སེམས་ཅན་གྱེས་མདོ་ཡིན། །ལྡོག་བཅས་གཉིས་ཀྱི་གྱེས་མདོ་དང་། །འཁྲུལ་ལྡོག་གཉིས་ཀྱི་གྱེས་མདོ་ཡིན། །མདོར་ན་དབྱིངས་སྟོང་པ་གསལ་བ་འགག་མེད་གྱེས་མདོ་ཡིན། །ཅེས་སོ། །ནམ་མཁའ་འབར་བའི་རྒྱུད་ལས། སངས་རྒྱས་སེམས་ཅན་གྱི་གྱེས་མདོ་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །བློས་བཏགས་ཆོས་རྣམས་ཡོད་དམ་མེད། །བྱར་མེད་བློ་འདས་གང་ལ་ཟེར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །འཁོར་གྱི་དྲི་བ་གཉིས་པོ་དེ། །རྟོགས་དང་མ་རྟོགས་གང་ལ་འདྲི། །མ་རྟོགས་པ་ལ་འདྲི་བ་ན། །ཇི་སྲིད་རྣམ་རྟོག་བློ་འཁྲུལ་མ་ཟད་པར། །བློས་བཏགས་ཆོས་རྣམས་ཟད་པ་མེད་པ་ཡོད། །རྣམ་རྟོག་འཁྲུལ་པ་མ་ཟད་པར། །བློས་བཏགས་ཆོས་རྣམས་ཡོད་པར་གསུངས། །རྣམ་རྟོག་འཁྲུལ་པ་ཟད་པ་ན། །བློས་བཏགས་ཆོས་རྣམས་གཅིག་ཀྱང་ཡོད་མ་ཡིན། །བློ་ཟད་བློས་བཏགས་ཆོས་རྣམས་ཟད། །ཅེས་གསུངས་སོ། །དེ་ནས་འཁོར་གྱིས་སྟོན་པ་ལ་ཞུས་པ། །བྱར་མེད་བློ་འདས་གང་ལ་ཟེར། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བློ་དང་དངོས་པོ་འཕྲད་ནས་ཆོས་དང་སེམས་འདྲེས་ཙམ་ན། རིག་རླག་སེམས་མེད་ཡིད་ཀྱི་རྣམ་རྟོག་ཟད། །བྱ་བའི་ཡུལ་མེད་རྩོལ་བསྒྲུབ་སེམས་དང་བྲལ། །བློ་འདས་དོན་ལ་བློས་བཏགས་ཆོས་རྣམས་མེད། །ཅེས་གསུངས་སོ། །ནམ་མཁའ་འབར་བའི་རྒྱུད་ལས། བློས་བཏགས་ཆོས་རྣམས་མེད་པར་བསྟན་པའི་ལེའུ་སྟེ་སོ་གཅིག་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །བློས་བཏགས་ཆོས་དེ་ཚིག་གིས་བཏགས་མ་བཏགས། བཏགས་ན་བློ་འདས་ཆོས་དང་ཁྱད་པར་ཅང་བདོག་གམ། ཅི་སྟེ་ཞེ་ན་གཉིས་ཀ་ཚིག་གིས་མཚོན་ཅིང་མིང་དུ་བཏགས་པའི་ཕྱིར། ཞེས་སྟོན་པ་ལ་ཞུས་པ། སྟོན་པས་འཁོར་ལ་བཀའ་སྩལ་པ། བློས་བཏགས་ཆོས་དང་བློ་འདས་མིང་མེད་གཉིས། ། ― DNG001_Page_0195 ―
[མ་དཔེ་གཟིགས་ན་འདིར་གནོན།]
དེ་གཉིས་ཚིག་དང་དོན་ལ་ཁྱད་པར་ཆེ། །ཚིག་ཁྱད་དོན་ཁྱད་བསྟན་གྱིས་འཁོར་རྣམས་ཉོན། །འཁོར་གྱི་བློ་འདས་ཆོས་དེ་ཚིག་གིས་བཏགས་མ་བཏགས། །ཞེས་དྲིས་པ་དེ་ཁྱེད་རང་འཁོར་གྱིས་དྲིས་ཤིང་ང་ཡིས་མཚོན་པ་ལས། །འཁོར་གྱི་རྟོག་པ་བསལ་ཕྱིར་གོ་བ་ལས། །བློ་འདས་ཚིག་ཏུ་བཏགས་པ་ལས། །བློ་འདས་ཉིད་ལ་མཚོན་བྱ་མཚོན་བྱེད་མེད། །བློ་འདས་ཉིད་ལ་ཚིག་གིས་གདགས་སུ་མེད། །མིང་མེད་བློ་འདས་དོན་ལ་མིང་ཚིག་བརྡའ་ཆད་མེད། །མིང་མེད་མཐའ་བྲལ་བློ་ཡི་སྤྱོད་ཡུལ་གྲོལ། །མུ་དང་མཐའ་གྲོལ་གཏིང་མཐའ་བརྗོད་པའི་ཐ་སྙད་ཚིག་གི་ཡུལ་ལས་འདས། །འཁོར་གྱི་རྟོག་པ་བསལ་ཕྱིར་ལས། །བློ་འདས་ཉིད་ལ་དངོས་མེད་མིང་ཚིག་བཏགས་པ་མེད། །དེ་ཕྱིར་བློས་བཏགས་ཆོས་ལས་ཁྱད་པར་འཕགས། །དེ་ཡང་ཇི་ལྟར་འཕགས་ཞེ་ན། ཨ་ཏི་མན་ཆད་བློས་བཏགས་ཆོས་རྣམས་ནི། །བློ་ཡིས་རང་རང་གྲུབ་མཐར་བཏགས་ཤིང་། །བློས་བཏགས་གྲུབ་པའི་མཐའ་ལ་ཞེན། །དངོས་མེད་མིང་མེད་བློ་འདས་ཆེན་པོ་ལ། །དེ་དོན་མ་རྟོགས་ཐེག་པ་རིམ་དགུ་ཡི། །ལྟ་བ་བློས་བཏགས་ཚིག་ལ་ཞེན། །སྒོམ་པ་བློས་བསྒོམ་མིང་ཚིག་ཞེན་དང་བཅས། །སྤྱོད་པ་ཆེད་བྱས་ཆགས་སྡང་ཞན་དང་བཅས། །འབྲས་བུ་རེ་དོགས་ཡིད་སྨོན་རྩོལ་སྒྲུབ་བྱེད། །རང་ལྟར་མིང་བཏགས་བློས་བཏགས་ཚིག་ལ་ཞེན་པའི་ཐེག་དགུ་ཡིས། །བློས་བཏགས་གྲུབ་པའི་མཐའ་ལ་ཞེན་ནས་གཞན་ལྟ་རྒྱབ་ཀྱིས་ཕྱོགས། །དངོས་མེད་བློས་བཏགས་རྟོག་པའི་ཚིག་ལ་ཞེན། །སྣང་བཏགས་གཟུང་ཞེན་བློས་བཏགས་ཐེག་པ་ཡིས། །རང་གམ་བཞག་ནས་རྒྱང་དུ་བཙལ། །བཙལ་བས་བསྐལ་པ་བརྒྱར་ཡང་རྙེད་མི་འགྱུར། །དམུས་ལོང་ནམ་མཁའི་མཐའ་འཚོལ་འདུ། །བློས་བཏགས་ཆོས་རྣམས་མ་ཟད་ན། །བསྐལ་པ་བརྒྱར་ཡང་རྙེད་མི་འགྱུར། །མེད་ཅིང་སྟོང་པའི་ཆོས་ལ་མཚོན་པ་བཏགས་པའི་བློས་བཏགས་ནས། །ཚིག་གི་མཐའ་ལ་ཞེན་ཅིང་མིང་བཏགས་ཆོས་ལ་ཆགས། །མིང་མེད་མཐའ་སྟོང་བློ་ཟད་མ་རྟོགས་ན། །ནམས་ཀྱང་འཁོར་བའི་འདམ་ནས་ཐོན་དུས་མེད། །དེ་ཕྱིར་བློས་བཏགས་བློ་འདས་གཉིས་ཀྱི་ཁྱད་པར་རོ། །ཧྲིལ་ ― DNG001_Page_0196 ―
[མ་དཔེ་གཟིགས་ན་འདིར་གནོན།]
གྱིས་དྲིལ་ནས་བསྟན་པ་ནི། །བློ་འདས་མིང་མེད་རང་ལ་ཞེན་ཀྱང་བློ་ཆོས་ཡིན། །བློས་བཏགས་ཆོས་ཟད་ཞེན་ཅིང་ཆགས་པ་མེད་ན་བློ་འདས་ཡིན། །བློ་འདས་ཆོས་ནི་གཏིང་མཐའ་གྲོལ། །བློས་བཏགས་ཆོས་ནི་བློ་ཡིས་བཏགས་ཤིང་གྲུབ་པའི་མཐའ་ལ་ཞེན། །དེ་ཕྱིར་བློ་ཆོས་བློ་འདས་གཉིས་ཀྱི་ཁྱད་པར་རོ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། བློ་འདས་ཚིག་ཏུ་བཏགས་ཀྱང་མུ་མཐའ་གྲོལ་ཞིང་མིང་མེད་མཐའ་སྟོང་བློ་འདས་ཀློང་དུ་གྱུར་པའི་ལེའུ་སྟེ་སོ་གཉིས་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །སྣང་བཏགས་ཆོས་རྣམས་གང་དུ་བསྡུ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྣང་བའི་ཆོས་རྣམས་སྟོང་པར་བསྡུ། །བློས་བཏགས་ཆོས་རྣམས་མིང་མེད་བློ་འདས་ངང་དུ་བསྡུ། །ཡང་ན་སྣང་སྲིད་ཆོས་རྣམས་རང་སར་གྲོལ་བར་བསྡུ། །མིང་བཏགས་ཆོས་རྣམས་བསྟན་དུ་མེད་པར་བསྡུ། །ཡང་ན་སྣང་བའི་ཆོས་རྣམས་བཟང་ངན་དགག་བསྒྲུབ་མེད་པར་བསྡུ། །བཏགས་ཆགས་མཚོན་བརྗོད་མེད་པར་བསྡུ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། སྣང་བཏགས་བསྡུ་བའི་ལེའུ་སྟེ་སོ་གསུམ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །ཆོས་མེད་བློ་ཟད་མཐའ་རུ་གང་དུ་བསྐྱལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། ཆོས་རྣམས་གྲུབ་མཐའ་མེད་པ་ཐེག་པའི་ཕུགས་སུ་སྐྱོལ། །བློ་ཟད་རྣམ་རྟོག་ཟད་པ་ཆོས་ཉིད་ཕུགས་སུ་སྐྱོལ། །ཡིད་རིག་སེམས་ཀྱི་ཆགས་སྡང་མེད་པ་ངང་དྭངས་ཕུགས་སུ་སྐྱོལ། །ཐེག་མེད་འཇུག་སྒོ་མེད་པ་ཡང་ཏིའི་ཕུགས་སུ་སྐྱོལ། །ཅེས་གསུངས་སོ། །ནམ་མཁའ་འབར་བའི་རྒྱུད་ལས། ཆོས་རྣམས་མུ་མཐའ་ཡས་ལ་གཏིང་མཐའ་སྟོང་པའི་མཐའ་རུ་བསྐྱལ་བའི་ལེའུ་སྟེ་སོ་བཞི་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །དངོས་པོའི་ཆོས་རྣམས་ལ་བཟླ་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དངོས་པོའི་ཆོས་རྣམས་དངོས་མེད་ཆེན་ ― DNG001_Page_0197 ―
[མ་དཔེ་གཟིགས་ན་འདིར་གནོན།]
པོར་བཟླ། །དངོས་པོའི་ཆོས་རྣམས་སྟོང་པ་ཆེན་པོར་བཟླ། །དངོས་པོ་སྣ་ཚོགས་དངོས་པོ་མེད་པར་གྲོལ། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། དངོས་པོ་སྣང་གྲག་གི་ཆོས་ཐམས་ཅད་དངོས་མེད་ཆེན་པོར་ལ་བཟླ་བའི་ལེའུ་སྟེ་སོ་ལྔ་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །ཀྲི་ཡོག་མན་ཆད་དགོས་པ་མེད། །བསྐྱེད་རྫོགས་གསུམ་དང་སྤྱི་ཏི་ཡང་ཏི་ཡི། །མིང་གི་ངེས་ཚིག་ཇི་ལྟར་ལགས། །ཞེས་སྟོན་པ་ལ་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །ཀྲི་ཡོག་ཉན་ཐོས་ཡན་ཆོད་བཤད་མི་བྱ། །བསྐྱེད་རྫོགས་གསུམ་དང་སྤྱི་ཏི་ཡང་ཏི་བསྟན། །འཁོར་རྣམས་མ་ཡེངས་གུས་པས་ཉོན། །དེ་ལ་བསྐྱེད་པ་མ་ཧཱ་ཡོ་ག་ནི། །ལྷ་དང་ལྷ་མོར་བསྐྱེད་པས་བསྐྱེད་པ་ཡིན། །མ་ནི་སྐྱེ་མེད་ཆོས་ཀྱི་སྐུ། །ཧཱ་ནི་ཆོས་རྣམས་ལྷ་དང་ལྷ་མོར་གསལ། །ཡོ་ནི་འགག་མེད་ཐབས་ཡིན་ཏེ། །ག་ནི་དམིགས་མེད་ཤེས་རབ་ཡུམ། །སྣང་སྲིད་ལྷ་དང་ལྷ་མོ་སྟེ། །དེ་སྣང་ལ་རང་བཞིན་མེད་པ་ཡིས། །ཐབས་དང་ཤེས་རབ་གཉིས་མེད་སྣང་སྟོང་དབྱེར་མེད་དོ། །རྫོགས་པ་ཨ་ནུ་ཡོ་ག་ནི། །སྙིང་པོ་དྲན་པ་ཙམ་གྱིས་ལྷར་རྫོགས་པས། །དེ་ཕྱིར་རྫོགས་པ་ཞེས་སུ་བཤད། །ཨ་ནི་སྐྱེ་མེད་དབྱིངས་ཀྱི་ཀློང་། །ནུ་ནི་འགག་མེད་ཡེ་ཤེས་གསལ། །ཡོ་ནི་དབྱིངས་དང་ཡེ་ཤེས་དབྱེར་མེད་དང་། །ག་ནི་སྣང་བ་དབྱིངས་དང་ཡེ་ཤེས་གཉིས་སུ་མེད། །དེ་ཕྱིར་ཨ་ནུ་ཡོ་གའོ། །རྫོགས་ཆེན་ཨ་ཏི་ཡོ་ག་ནི། །སྣང་སྲིད་རྫོགས་པས་རྫོགས་ཆེན་ཡིན། །ཨ་ཏི་ཡོ་གའི་མིང་གི་ངེས་ཚིག་ནི། །ཨ་ཨ་ནུ་སརྦ་དྷརྨ་ན་ཏ་ཐཱ་ག་ཏ་ཡ་ཞེས་པ་སྟེ། གཟའ་གཏད་མེད་པའི་ལྟ་བ་བསྟན། །ཏི་ཏི་ཏ་ཞེས་པ་ནི། དམིགས་གཏད་མེད་པའི་བསྒོམ་པ་བསྟན། །ཡོ་ཡོ་ག་ཙརྻཱ་ནི། བྱ་རྩོལ་དང་དགག་བསྒྲུབ་མེད་པའི་སྤྱོད་པ་བསྟན། །ག་གརྦྷ་ཧྲྀ་ད་ཡ་ནི། སྤང་ཐོབ་མེད་པའི་འབྲས་བུ་བསྟན། །དེ་ཕྱིར་ཨ་ཏི་ཡོ་ག་ཡིན། །དེ་ལས་ཁྱད་པར་འཕགས་པ་ནི། །དགུ་རྩེ་སྤྱི་ཏི་ཡོ་ག་ནི། །ཐེག་པ་དགུ་ཡི་དགུ་རྩེ་ཡིན། །ཨ་ནུའི་གོང་བརྒལ་ཨ་ཏིའི་གཉའ་གཅོག་ཡིན། །སྤྱི་ཡིས་ལྟ་བ་ཏི་ཡིས་བསྒོམ་པ། ཡོ་ཡིས་ ― DNG001_Page_0198 ―
[མ་དཔེ་གཟིགས་ན་འདིར་གནོན།]
སྤྱོད་པ། ག་ཡིས་འབྲས་བུ་ཡིན་ནོ། །དེ་ལ་ཨ་ཏི་ཡོ་ག་ལས་ཁྱད་པར་གང་གིས་འཕགས་ཞེ་ན། སྤྱི་ཏི་ཡོ་ག་འཕགས་ཚུལ་ནི། །སྤྱི་ནི་ཐེག་པ་དགུ་ཡི་སྤྱི་རྡོལ་ཏེ། །སྐྱེ་མེད་ཀ་དག་ལྟ་བ་བསྟན། །ཏི་ནི་ཐེག་དགུའི་ཏི་ཀ་འདི་ནས་སྟོན་པ་སྟེ། །དངོས་མེད་ཟང་ཀའི་བསྒོམ་པ་བསྟན། །ཡོ་ནི་ཐེག་དགུའི་སྤྱོད་པའི་ཕྱགས་ཤིང་སྟེ། །བྱར་མེད་ལས་ཟིན་སྤྱོད་པ་བསྟན། །ག་ནི་ཆོས་སྐུའི་འབྲས་བུ་བཅུད་བསྡུས་ཏེ། །རེ་མེད་རང་གནས་རང་སངས་རྒྱས་པའི་འབྲས་བུའོ། །དེ་བཞིན་འོག་མ་རྣམས་ལས་ཁྱད་པར་འཕགས། །དེ་ཡང་ངོ་མཚར་ཆེ་ན་གང་གིས་སྤགས་ཞེ་ན། །སྤྱི་ཏི་ཡོ་ག་ཞེས་པས་འཕགས། །སྤྱི་ནི་བསྟན་མེད་ལྟ་བ་ཡིན། །ཏི་ནི་རྟོག་མེད་བསྒོམ་པ་ཡིན། །ཡོ་ནི་བྱར་མེད་སྤྱོད་པ་ཡིན། །ག་ནི་རེ་མེད་ཀྱི་འབྲས་བུ་ཡིན། །ཡང་ན་སྤྱི་ཏི་ཡོ་ག་ནི། །སྤྱི་གཏད་མེད་ཞེ་འདོད་མེད་པའི་ལྟ་བའོ། །ཏི་དམིགས་མེད་རྟོག་མེད་བསམ་དང་བྲལ་བའི་སྒོམ་པའོ། །ཡོ་ཡོ་ག་ཇི་ལྟར་སྣང་ཞིང་བཏགས་པའི་ཆོས་རྣམས་ལ། །གང་ལ་ཡང་མི་འགྱུ་མི་སྤྱོད་མི་ཆགས་མི་ཞེན་གཟུང་འཛིན་དགག་བསྒྲུབ་སྤང་ལེན་བཟང་ངན་དབྱེ་བསལ་རྩིས་གདབ་བཅོས་མེད་དེ། ཡོ་ནི་རྣལ་འབྱོར་སྐལ་ལྡན་མོས་སྤྱོད་པ་རྣལ་མ་ལ། ལྷུགས་པ་སོ་མ་ཟང་ཀ་ལྷོད་པ་བག་ཡང་གོ་བདེ་བའོ། །ཅིར་ཡང་བྱར་མེད་དལ་བ་རང་ཐང་གྱི་ན་དངོས་པོ་གཤིས་ཀྱི་འདུག་ཚུལ་གནས་ལུགས་གནས་པའོ། །གང་སྣང་རང་གྲོལ་དགག་བསྒྲུབ་མེད་པ་སྤྱོད་པའི་མཆོག་ཅེས་གསུངས་སོ། །ག་ནི་ངང་གནས་རེ་མེད་བློ་འདས་ཀྱི་འབྲས་བུའོ། །དེ་ཕྱིར་སྤྱི་ཏི་ཡོ་ག་ནི། །ཐེག་པ་ཀུན་ལས་ཁྱད་པར་འཕགས། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། ཐོག་མར་བསྐྱེད་རྫོགས་སྤྱི་ཏི་མིང་གི་ངེས་དོན་བསྟན་པའི་ལེའུ་སྟེ་སོ་དྲུག་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །སྤྱི་ཏི་ལས་ནི་ཡང་ཏི་ཡོ་ག་གང་གིས་འཕགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡང་ཏི་ཡོ་ག་ཁྱད་པར་འཕགས་ཚུལ་བཤད། །ཡང་ནི་མུ་མཐའ་གྲོལ་བའི་ལྟ་བའོ། །ཏི་ནི་གཏིང་མཐའ་ ― DNG001_Page_0199 ―
[མ་དཔེ་གཟིགས་ན་འདིར་གནོན།]
ཡངས་པའི་སྒོམ་པའོ། །ཡོ་ནི་མིང་མེད་མཐའ་སྟོང་སྤྱོད་པའོ། །ག་ནི་ཐིག་ལེ་སྤྱི་བརྟོལ་འབྲས་བུའོ། །དེ་ཕྱིར་ཡང་ཏི་མན་ཆོད་ཐེག་པ་ཀུན་ལས་འཕགས། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། ཡང་ཏི་ཡོ་གའི་ངེས་ཚིག་བསྟན་པའི་ལེའུ་སྟེ་སོ་བདུན་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་སྟོན་པ་ཀུན་གྲོལ་ལ། །རྒྱུད་འདིའི་མཚན་ནི་ཇི་ལྟར་གཟུང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །རྒྱུད་འདིའི་མཚན་གྱི་གཟུང་ཐབས་ནི། །རྒྱུད་རྣམས་ཐམས་ཅད་ཀུན་ལས་ཁྱད་པར་འཕགས་ཤིང་རྩེ་རྒྱལ་པས། རྒྱུད་སྡེ་ཐམས་ཅད་ཀྱི་རྩེ་རྒྱལ་བྱ་བར་ཟུང་ཞིག །གྲུབ་མཐའ་བལྟ་བསྒོམ་ཀུན་ལས་གོང་བརྒལ་ཕྱིར། །རྒྱུད་རྣམས་ཀུན་གྱི་རྒྱལ་པོ་བྱ་བར་ཟུང་ཞིག །ནམ་མཁའ་ལྟ་བུར་གོ་འབྱེད་ཕྱིར། །ནམ་མཁའ་འབར་བའི་རྒྱུད་དུ་ཟུང་། །ཐེག་དགུའི་རྩེ་རྒྱལ་བཅུ་ཡི་གཉའ་གཅོག་པས། །དགུ་རྩེ་བཅུ་ཡི་གཉའ་གཅོག་བྱ་བར་ཟུང་། །ཆོས་ཀུན་གནད་སྟོན་གལ་འགགས་འཕྲང་སེལ་བས། །གནད་སྟོན་གལ་འགགས་འཕྲང་སེལ་རྒྱུད་དུ་ཟུང་། །ཞེས་གསུངས་སོ། །ནམ་མཁའ་འབར་བའི་རྒྱུད་ལས། རྒྱུད་ཀྱི་མཚན་བཟུང་བའི་ལེའུ་སྟེ་སོ་བརྒྱད་པའོ།། །།དེ་ནས་རང་བྱུང་ངང་དྭངས་ཀྱིས། །མིང་མེད་ཀུན་གྲོལ་སྟོན་པ་ལ། །རྒྱུད་འདི་སྐལ་ལྡན་གང་ལ་གཏད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །རྒྱུད་འདི་གཏད་པའི་གང་ཟག་ནི། །སྨྲས་པ་མི་འགྱུར་དམ་ཚིག་གཞུང་བཞིན་བསྲུང་། །བླ་མ་གཙུག་ཁུར་འདོད་ཡོན་ནོར་རྣམས་འབུལ། །དགེ་བའི་སེམས་ལྡན་སྡིག་པའི་ལས་མི་བྱེད། །ང་རྒྱལ་སེར་སྣ་ཆུང་ལ་ཤེས་རབ་ཆེ། །གདམས་ངག་གཏེར་འཆང་ཟང་ཟིང་ཁར་མི་གཏང་། །སྣོད་ལྡན་སྐལ་བར་ལྡན་ལ་རྒྱུད་འདི་གཏོད། །དམ་ཉམས་སྣོད་མེད་རྣམས་ལ་མ་བསྟན་ཅིག །ཅེས་གསུངས་སོ། །ནམ་མཁའ་འབར་བའི་རྒྱུད་ལས། རྒྱུད་གཏད་པའི་སྣོད་བསྟན་པའི་ལེའུ་སྟེ་སོ་དགུ་པའོ།། །།རྒྱུད་ཐམས་ཅད་ཀྱི་རྩེ་རྒྱལ་ནམ་མཁའ་འབར་བའི་རྒྱུད་རྫོགས་སོ། །རྣལ་འབྱོར་དབང་ཕྱུག་ཆེན་པོ་ཤྲཱི་རཏྣ་བཛྲ་གྱིས་བཤད་ཅིང་། དཔལ་ རྒྱུད་ཐམས་ཅད་ཀྱི་སྤྱི་ཕུད་ཉི་ཟླ་བཀོད་པ་ནམ་མཁའི་མཐའ་དང་མཉམ་པའི་རྒྱུད།― DNG001_Page_0200 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཏནྟྲ་སརྦ་ཙཱུ་ཌཱ་སཱུརྱ་ཙནྡྲ་བྷུ་ཧ་ག་ག་ན་ཨནྟ་ས་མ་ཏནྟྲ། བོད་སྐད་དུ། རྒྱུད་ཐམས་ཅད་ཀྱི་སྤྱི་ཕུད་ཉི་ཟླ་བཀོད་པ་ནམ་མཁའི་མཐའ་དང་མཉམ་པའི་རྒྱུད། བཅོམ་ལྡན་འདས་ཀ་དག་སྙིང་པོ་ཆོས་ཀྱི་སྐུ་ལ་ཕྱག་འཚལ་ལོ། །འདི་སྐད་བདག་གིས་རྟོགས་པ་བཤད་པའི་དུས་གཅིག་ན། ཆོས་ཉིད་ཀྱི་ཀློང་། སྙིང་པོ་ཀ་ནས་དག་པའི་གནས། འོད་གསལ་རྣམ་དག་རིན་པོ་ཆེ་སྣང་གསལ་ཉི་ཟླའི་དཀྱིལ་འཁོར་ན། བཅོམ་ལྡན་འདས་སྙིང་པོ་ཀ་དག་ཆོས་ཀྱི་སྐུ་བཞུགས་ཏེ། འཁོར་ཀུན་རིག་གསལ་བའི་ཁྱེའུ་ཆུང་ལ། ནམ་མཁའི་མཐའ་དང་མཉམ་པའི་བསྟན་པ་འདི་གསུངས་སོ། །ཞེས་ཕུན་སུམ་ཚོགས་པའོ། །དེ་ནས་ཀུན་རིག་གསལ་བའི་ཁྱེའུ་ཆུང་གིས། །སྟོན་པ་སྙིང་པོ་ཀ་དག་ཆོས་སྐུ་ལ། །ཕུན་སུམ་ཚོགས་པའི་དོན་ནི་དེ་ལགས་ན། །སངས་རྒྱས་སེམས་ཅན་གཉིས་ཀྱི་གཞི་ནི་གང་། །དེ་ལས་འཁོར་འདས་གཉིས་སུ་ཇི་ལྟར་འཁྲུལ། །འཁྲུལ་པ་རྩད་ནས་གཅོད་པའི་མན་ངག་གང་། །ཆོད་ནས་དེ་ཡི་འབྲས་བུ་ཇི་ལྟར་འཐོབ། །དབང་པོ་ཡང་རབ་རྣམས་ཀྱིས་ཇི་ལྟར་རྟོགས། །དབང་པོ་ཐོད་བརྒལ་དག་གི་སྐྱེས་བུ་ལ། །གཞི་ཡི་འཁྲུལ་པ་རྩད་ཆོད་ཅང་འཚལ་ལམ། །འཁྲུལ་དང་མ་འཁྲུལ་ཞེས་བྱ་ཅང་བདོག་གམ། །མིང་མེད་མཐའ་སྟོང་དོན་ནི་གང་གིས་རྟོགས། །མུ་མཐའ་ཡངས་པར་རྟོགས་པར་བྱེད་ཐབས་གང་། །བྱར་མེད་བློ་ལས་འདས་པའི་དོན་རྟོགས་ན། །བྱ་ཞིང་བཙལ་བའི་རྩོལ་བ་མི་འཚལ་ལམ། །ཐེག་པའི་ལྟ་སྒོམ་གྲུབ་པའི་མཐའ་མེད་པར། །ཡང་ཏི་ཡོ་ག་ཇི་ལྟར་རྟོགས་པར་འགྱུར། །བཅུ་རྩེ་ཡང་ཏིར་རིམ་དགུ་ཇི་ལྟར་རྫོགས། །ཡང་ཏིས་མ་བསྒྲུབས་འབྲས་བུ་ཇི་ལྟར་འཐོབ། །ཅེས་ཞུས་སོ། །ཉི་ཟླ་བཀོད་པ་ནམ་མཁའི་མཐའ་དང་མཉམ་པའི་རྒྱུད་ལས། གླེང་གཞི་ཕུན་སུམ་ཚོགས་པ་དང་། འཁོར་གྱིས་གླེང་བསླང་ཞུས་པའི་ལེའུ་སྟེ་དང་པོའོ།། །།དེ་ནས་ཀུན་རིག་གསལ་བའི་ཁྱེའུ་ཆུང་གིས། །སྙིང་པོ་ཀ་དག་ཆོས་སྐུ་ལ། །སངས་རྒྱས་སེམས་ཅན་གཞི་ནི་གང་། །ཞེས་ཞུས་པས། སྟོན་པས་འཁོར་ལ་ ― DNG001_Page_0201 ―
[མ་དཔེ་གཟིགས་ན་འདིར་གནོན།]
བཀའ་སྩལ་པ། །གཞི་ལ་བྱེ་བྲག་མིང་མེད་ཀྱང་། །འཁོར་གྱི་རྟོག་པ་བསལ་ཕྱིར་བསྟན། །འཁོར་རྣམས་མ་ཡེངས་གུས་པས་ཉོན། །སངས་རྒྱས་སེམས་ཅན་གཉིས་ཀྱི་གཞི། །ཀུན་གཞི་མཁའ་ཀློང་ཡངས་པ་ཡིན། །ཡ་ཐ་རྒྱལ་བའི་དཀྱིལ་འཁོར་ནས། །མ་ཐ་དམྱལ་བའི་འཇིགས་ཚོགས་སུ། །མཐའ་ཡས་སེམས་ཅན་ཐམས་ཅད་ལ། །ཏིལ་ལ་མར་གྱིས་ཁྱབ་བཞིན་གནས། །དེ་ཡང་ཇི་ལྟར་གནས་ཞེ་ན། །རྒྱུ་རྐྱེན་འཕོ་འགྱུར་མེད་པར་གནས། །སྐྱེ་འགག་མཐའ་དབུས་མེད་པར་གནས། །ལྷུན་གྲུབ་རྒྱ་ཆད་ཕྱོགས་ལྷུང་མེད། །དཔེར་ན་རྒྱ་མཚོ་གནམ་བཞིན་གནས། །ས་གསེར་བང་མཛོད་རིན་ཆེན་ནོ། །གནས་ལུགས་བཞི་ཡི་དཔེ་རུ་བཤད། །ཅེས་གསུངས་སོ། །ཉི་ཟླ་བཀོད་པའི་རྒྱུད་ལས། སངས་རྒྱས་སེམས་ཅན་གྱི་གཞི་བསྟན་པའི་ལེའུ་སྟེ་གཉིས་པའོ།། །།དེ་ནས་ཀུན་རིག་ཁྱེའུ་ཆུང་གིས། །སྙིང་པོ་ཀ་དག་ཆོས་སྐུ་ལ། །གཞི་ལ་མཉམ་པར་གནས་པ་ལ། །ཁམས་གསུམ་སེམས་ཅན་ཇི་ལྟར་འཁྲུལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གཞི་ལ་འཁྲུལ་དང་མ་འཁྲུལ་གཉིས་མེད་ཀྱང་། །རིག་པ་སྐྱེས་ཤིང་ཡིད་གཡོས་སེམས་འཁྲུལ་པས། །གནས་པའི་དོན་དེ་མ་ཤེས་མ་རིག་ཏེ། །རང་ས་མ་ཟིན་རིག་པའི་མགོ་རླུང་ལངས། །ཆོས་ཉིད་མ་འཕྲད་མུན་པའི་འཁོར་སྒོར་འཁྱམས། །དེ་མ་ཡིན་ལ་དེར་འཛིན་འཁྲུལ་པ་ལངས། །རིགས་དྲུག་སེམས་ཅན་ཐམས་ཅད་དེ་ལྟར་འཁྲུལ། །གཞི་ལ་མེད་དེ་རྟོག་པའི་ཡིད་སྐྱེས་པས། །གདུག་རྩུབ་ཞེ་སྡང་དབང་གིས་སྲོག་བཅད་དེ། །དེ་ཡི་ལས་ཀྱི་རྣམ་པར་སྨིན་པ་ཡིས། །དམྱལ་བར་སྐྱེས་པས་ཚ་གྲང་བཙོ་བསྲེག་གི། །སྡུག་བསྔལ་དམྱལ་ཁམས་བཅོ་བརྒྱད་གནས་སུ་མྱང་། །དེ་ལྟར་སེམས་ཅན་དམྱལ་བའི་གནས་སུ་འཁྲུལ། །གཞི་ལ་མེད་དེ་སེར་སྣ་སྐྱེས་པ་ལས། །ཡི་དྭགས་སུ་སྐྱེས་བཀྲེས་སྐོམ་སྡུག་བསྔལ་མྱང་། །དེ་ལྟར་སེར་སྣས་ཡི་དྭགས་གནས་སུ་འཁྲུལ། །གཞི་ལ་མེད་དེ་གཏི་མུག་རྨོངས་པ་ལས། །བྱོལ་སོང་གནས་སྐྱེས་གླེན་ལྐུགས་སྡུག་བསྔལ་མྱོང་། །དེ་ལྟར་སེམས་ཅན་བྱོལ་སོང་གནས་ ― DNG001_Page_0202 ―
[མ་དཔེ་གཟིགས་ན་འདིར་གནོན།]
སུ་འཁྲུལ། །གཞི་ལ་མེད་དེ་ང་རྒྱལ་སྐྱེས་པ་ལས། །ལྷ་མིན་གནས་སྐྱེས་འཐབ་རྩོད་སྡུག་བསྔལ་མྱང་། །གཞི་ལ་མེད་དེ་འདོད་ཆགས་སྐྱེས་པ་ལས། །ལྷ་ཡི་གནས་འཁྲུལ་ལྟུང་བའི་སྡུག་བསྔལ་མྱོང་། །གཞི་ལ་མེད་དེ་ཕྲག་དོག་སྐྱེས་པ་ལས། །མི་རུ་སྐྱེས་ནས་འགྱུར་བའི་སྡུག་བསྔལ་མྱང་། །དེ་ལྟར་འགྲོ་དྲུག་སེམས་ཅན་ཐམས་ཅད་འཁྲུལ། །དཔེར་ན་ཐག་སྦྲུལ་སྨིག་རྒྱུ་ཆུར་འཁྲུལ་འདྲ། །གཞི་ལ་མེད་དེ་རྣམ་རྟོག་འཛིན་པས་འཁྲུལ། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། འཁྲུལ་ལུགས་བསྟན་པའི་ལེའུ་སྟེ་གསུམ་པའོ།། །།དེ་ནས་ཀུན་རིག་གསལ་བའི་ཁྱེའུ་ཆུང་གིས། །སྙིང་པོ་ཀ་དག་ཆོས་སྐུ་ལ། །འཁྲུལ་པ་རྩད་གཅོད་གདམས་པ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དབང་པོ་རབ་འབྲིང་རྣམ་གསུམ་ལ། །འཁྲུལ་པ་གཅོད་ཐབས་རྣམ་པ་གསུམ། །ཐ་མའི་འཁྲུལ་པ་གཅོད་ཐབས་ནི། །འཁྲུལ་སྣང་ཡུལ་གྱི་རྩད་གཅོད་དང་། །འཁྲུལ་གཞི་ཀུན་གཞིའི་རྩད་གཅོད་དང་། །སེམས་དང་བག་ཆགས་རྩད་གཅོད་དོ། །འཁྲུལ་སྣང་ཡུལ་གྱི་རྩད་གཅོད་ནི། །དངོས་པོར་སྣང་བའི་ཡུལ་རྣམས་ལ། །དགག་བསྒྲུབ་སྤང་ལེན་མི་བྱ་སྟེ། །དབྱེ་བསལ་མེད་པར་རང་སར་བཞག །སྣང་ལ་རང་བཞིན་གྲུབ་པ་མེད། །དཔེར་ན་ཆུ་ཡི་ཟླ་བ་བཞིན། །ཅིར་སྣང་དེར་འཛིན་མེད་པས་ཆོག །འཁྲུལ་རྒྱུ་ཡིད་རིག་རྩད་བཅད་པ། །རིག་མེད་གང་ལའང་བློ་མ་སྐྱེས། །དེ་ཡིས་རིག་པ་འཁྲུལ་རྩད་ཆོད། །སྣང་སྲིད་འཁོར་འདས་ཡོད་མེད་སོགས། །ཡུལ་སྣང་བཟང་ངན་གང་ལ་ཡང་། །མི་འགྱུ་མི་དཔྱོད་འཛིན་ཞེན་ཆོད། །དེས་ནི་ཡེངས་འཁྲུལ་རྩད་ནས་ཆོད། །སེམས་ཀྱི་འཁྲུལ་རྩད་བཅད་པ་ནི། །དངོས་པོ་རྣམ་པ་སྣ་ཚོགས་ལ། །མི་དཔྱོད་མི་སེམས་གཟུང་འཛིན་མེད། །གང་ཡང་སེམས་པ་མེད་པ་ནི། །ཐིག་ལེ་ཉག་གཅིག་རྡོ་རྗེའི་སྐུ། །འཁྲུལ་གཞི་ཀུན་གཞིའི་རྩད་གཅོད་ནི། །ཡེ་མེད་མིང་མེད་སྐྱེ་བ་མེད། །འདོད་རློམ་རྩིས་གདབ་བློ་ཡུལ་འདས། །གཏི་མུག་མ་རིག་བག་ཆགས་དང་། །སྒྲིབ་གཡོགས་ཞེས་བྱའི་མིང་ཡང་མེད། །དེ་ནི་འཁྲུལ་གཞི་རྩད་བཅད་པའོ། །འཁྲུལ་པའི་རྩ་བ་ཆོད་པ་ན། །ཡན་ལག་འཁྲུལ་པ་ ― DNG001_Page_0203 ―
[མ་དཔེ་གཟིགས་ན་འདིར་གནོན།]
ཤུགས་ལ་ཆོད། །དུག་གསུམ་མ་སྤངས་སྐུ་གསུང་ཐུགས། །དུག་གསུམ་འཁྲུལ་པ་ཤུགས་ལ་ཆོད། །དུག་ལྔ་མ་སྤངས་སྐུ་ལྔར་གྲོལ། །འགྲོ་བ་རིགས་དྲུག་སྡུག་བསྔལ་བཅད། །དབང་པོ་ཐ་མའི་བཅད་ཐབས་སོ། །དབང་པོ་འབྲིང་གི་འཁྲུལ་བཅད་པ། །ཅིར་སྣང་རང་སར་གྲོལ་བས་ཆོད། །ཅི་སེམས་འཛིན་སེམས་མེད་པས་ཆོད། །སྙམ་བྱེད་འདོད་པ་མེད་པས་ཆོད། །རྩིས་གདབ་བློ་ཡི་ཡུལ་ལས་འདས། །དབང་པོ་འབྲིང་གི་བཅད་ཐབས་སོ། །དབང་པོ་རབ་ཀྱིས་བཅད་ཐབས་ནི། །འཁྲུལ་དང་མ་འཁྲུལ་མེད་དེ་སྐྱེ་མེད་ཀ་ནས་ཆོད། །གཅོད་བྱ་གཅོད་བྱེད་མེད་པས་འཁྲུལ་གཞི་རྩད་ནས་ཆོད། །མ་རིག་ཡེ་ནས་ཡེ་ཤེས་གསལ། །འཁོར་བ་ཉིད་ནི་མྱ་ངན་འདས། །འཁྲུལ་སྣང་རང་སར་གྲོལ་བས་ཆོས་ཉིད་གསལ། །སེམས་ཅན་སེམས་ཉིད་ཤེས་པས་ཡང་དག་སངས་རྒྱས་ཡིན། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། འཁྲུལ་པ་རྩད་ནས་གཅོད་པའི་གདམས་ངག་བསྟན་པའི་ལེའུ་སྟེ་བཞི་པའོ།། །།དེ་ནས་ཀུན་རིག་གསལ་བའི་ཁྱེའུ་ཆུང་གིས། །སྟོན་པ་སྐྱེ་མེད་ཀ་དག་ཆོས་སྐུ་ལ། །འཁྲུལ་པ་ཆོད་ནས་འབྲས་བུ་ཇི་ལྟར་འཐོབ། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །བློས་བརྟགས་རེ་དོགས་འབྲས་བུ་ངས་མ་བསྟན། །ཐོབ་པ་མེད་པའི་འབྲས་བུ་འདི་ལྟར་ཐོབ། །འབྲས་བུའི་རྒྱལ་པོ་རང་སེམས་གདོད་ནས་དག །འབྲས་བུའི་རྒྱལ་པོ་ཐིག་ལེ་མཐོང་བརྡོལ་འཐོབ། །འབྲས་བུའི་རྒྱལ་པོ་ཐིག་ལེ་གསང་ལམ་ཡིན། །འབྲས་བུའི་རྒྱལ་པོ་སྐྱེ་མེད་ཀ་དག་ཡིན། །འབྲས་བུའི་རྒྱལ་པོ་དངོས་མེད་ཟང་ཀ་ཡིན། །འབྲས་བུའི་རྒྱལ་པོ་བྱར་མེད་བློ་འདས་ཡིན། །འབྲས་བུའི་རྒྱལ་པོ་མིང་མེད་མཐའ་སྟོང་ཡིན། །འབྲས་བུའི་རྒྱལ་པོ་སྐུ་གསུམ་རང་གནས་ཡིན། །འབྲས་བུའི་རྒྱལ་པོ་སྐུ་ལྔ་རང་ཆས་ཡིན། །འབྲས་བུའི་རྒྱལ་པོ་ཡེ་ཤེས་ཟང་ཐལ་ཡིན། །འབྲས་བུ་འདི་ལྟར་རང་གྲོལ་རང་སངས་རྒྱས། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། འབྲས་བུ་བསྟན་པའི་ལེའུ་སྟེ་ལྔ་པའོ།། །།དེ་ནས་ཀུན་རིག་གསལ་བའི་ཁྱེའུ་ཆུང་གིས། །སྟོན་པ་སྐྱེ་མེད་ཀ་དག་ཆོས་སྐུ་ལ། །དབང་པོ་ཡང་རབ་རྣམས་ཀྱིས་ཇི་ལྟར་རྟོགས། །ཞེས་ཞུས་པས། ― DNG001_Page_0204 ―
[མ་དཔེ་གཟིགས་ན་འདིར་གནོན།]
ཀ་དག་སྟོན་པས་འཁོར་ལ་བཀའ་སྩལ་པ། །ཡང་རབ་སྐལ་ལྡན་རྣམས་ཀྱིས་རྟོགས་པ་ནི། །མིང་མེད་བློ་འདས་ཆེན་པོའི་ངོ་བོ་རྟོགས། །གཏིང་མཐའ་ཡངས་ལ་མུ་མཐའ་གྲོལ་བར་རྟོགས། །བྱར་མེད་རྩོལ་བསྒྲུབ་བྲལ་བའི་ངོ་བོ་རྟོགས། །ཆོས་རྣམས་བྱ་བ་མེད་པའི་ངོ་བོ་རྟོགས། །ལྟ་བའི་རྒྱལ་པོ་མུ་མཐའ་གྲོལ་བར་རྟོགས། །སྒོམ་པའི་རྒྱལ་པོ་གཏིང་མཐའ་ཡས་པར་རྟོགས། །སྤྱོད་པའི་རྒྱལ་པོ་བྱར་མེད་རྣལ་མར་རྟོགས། །དམ་ཚིག་རྒྱལ་པོ་ཀ་དག་ཆེན་པོར་རྟོགས། །ཕྲིན་ལས་རྒྱལ་པོ་རྩོལ་བསྒྲུབ་མེད་པར་རྟོགས། །ས་ཡི་རྒྱལ་པོ་སྦྱང་དུ་མེད་པར་རྟོགས། །ལམ་གྱི་རྒྱལ་པོ་བགྲོད་དུ་མེད་པར་རྟོགས། །འབྲས་བུའི་རྒྱལ་པོ་སྐུ་གསུམ་ལྷུན་གྲུབ་རྟོགས། །ཆོས་ཉིད་རྒྱལ་པོ་བཅོས་སུ་མེད་པར་རྟོགས། །ཉམས་མྱོང་རྒྱལ་པོ་བསྟན་དུ་མེད་པར་རྟོགས། །འདི་ལྟར་སྣང་བའི་དངོས་པོ་ཐམས་ཅད་ལ། །མི་བསྒྲུབ་མི་སྤང་རང་སར་གྲོལ་བར་རྟོགས། །རིག་པ་སེམས་དང་ཡིད་དང་དྲན་པ་རྣམས། །རང་བྱུང་ངང་དྭངས་ཆུ་རླབས་ལྟ་བུར་རྟོགས། །ཆོས་རྣམས་དབྱེ་བསལ་བླང་དོར་མེད་པར་རྟོགས། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། ཡང་རབ་ཀྱི་རྣལ་འབྱོར་པས་ཐོད་རྒལ་དུ་རྟོགས་པར་བསྟན་པའི་ལེའུ་སྟེ་དྲུག་པའོ།། །།དེ་ནས་ཀུན་རིག་གསལ་བའི་ཁྱེའུ་ཆུང་གིས། །སྐྱེ་མེད་ཀ་དག་སྟོན་པ་ལ། །དབང་པོ་ཐོད་རྒལ་སྐྱེས་བུ་ཡིས། །གཞི་འཁྲུལ་རྩད་གཅོད་ཅང་དགོས་སམ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དབང་པོ་ཐོད་རྒལ་རྣལ་འབྱོར་གྱིས། །གཞི་འཁྲུལ་རྩད་གཅོད་མི་དགོས་ཏེ། །གཞི་དང་འཁྲུལ་པ་ཤེས་པས་ཆོག །གཞི་ཡི་དོན་ཤེས་འཁྲུལ་དུ་མེད། །དེ་ནི་ཅི་ཡི་ཕྱིར་ཞེ་ན། །གཞི་དེ་མིང་མེད་མཐའ་སྟོངས་ཡིན། །ཆོས་ཉིད་གཞི་ཡི་ངོ་བོ་དེ། །ཡེ་ཤེས་ཀྱིས་གསལ་མ་མྱོང་ལ། །འཁྲུལ་པས་འགྲིབ་མ་མྱོང་བའོ། །དཔེར་ན་ཤེལ་སྒོང་དྲུང་དག་ཏུ། །བཟང་ངན་སྣ་ཚོགས་གང་བསྟན་ཀྱང་། །བཟང་ངན་སྐྱོན་ཡོན་གྱིས་མ་གོས། །གཉིས་ཀ་ཤེལ་སྒོང་ནང་དུ་དག །དེ་བཞིན་གཞི་ཡི་ངོ་བོ་ཡང་། །སྐྱོན་ཡོན་གཉིས་ཀ་ཀློང་དུ་དག །མ་རིག་ཡེ་ཤེས་ཐ་དད་མེད། །འཁྲུལ་དང་མ་འཁྲུལ་ཐ་དད་ ― DNG001_Page_0205 ―
[མ་དཔེ་གཟིགས་ན་འདིར་གནོན།]
མེད། །མ་འཁྲུལ་རྟོགས་པའི་ལམ་དུ་གཅིག །ངོ་བོ་གཅིག་ལ་སྣང་ཚུལ་གཉིས། །དཔེར་ན་ག་པུར་ལྟ་བུ་སྟེ། །ག་པུར་གཞི་ལ་གཉིས་མེད་ཀྱང་། །ཚ་གྲང་རྐྱེན་གྱིས་སྨན་དུག་གཉིས། །ག་པུར་ངོ་བོ་ཐ་དད་མེད། །སྙིང་པོ་ཀ་དག་མུ་མཐའ་གྲོལ་རྟོགས་པས། །རྣམ་རྟོག་འཁྲུལ་པ་སྣང་ཡང་ག་ལ་འགྲིབ། །ཅེས་གསུངས་སོ། །ཉི་ཟླ་བཀོད་པའི་རྒྱུད་ལས། གཞི་འཁྲུལ་རྩད་གཅོད་ངོ་ཤེས་པས་འཁྲུལ་པ་དང་མ་འཁྲུལ་པ་མེད་པར་བསྟན་པའི་ལེའུ་སྟེ་བདུན་པའོ།། །།དེ་ནས་ཀུན་རིག་ཁྱེའུ་ཆུང་གིས། །སྙིང་པོ་ཀ་དག་ཆོས་སྐུ་ལ། །མིང་མེད་མཐའ་སྟོངས་གང་གིས་རྟོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མིང་མེད་མཐའ་སྟོངས་རྟོགས་འདོད་ན། །བྱ་བ་ཐམས་ཅད་བཏང་བ་ཡིན། །སྣང་སྲིད་འཁོར་འདས་ཆོས་རྣམས་ལ། །ཅི་ལ་མི་བསམ་ཞེ་འདོད་མེད་པར་བཞག །དངོས་པོར་སྣང་བའི་ཆོས་རྣམས་ལ། །མིང་མེད་ཞེན་མཐའ་གྲོལ་བར་བཞག །ཆོས་རྣམས་ཐེག་པ་སྣ་ཚོགས་ལ། །བཟང་ངན་བླང་དོར་མེད་པར་བཞག །གྲུབ་མཐའ་གང་སྣང་རང་སར་གྲོལ། །ཆོས་ཀུན་རྩོལ་བསྒྲུབ་མེད་པར་བཞག །འདྲེལ་པ་ཆོད་ལ་གཅིག་པུར་སྡོད། །བླ་མའི་མན་ངག་གནད་ཀྱིས་ཟིན་པར་གྱིས། །གང་ཤེས་ཉམས་སུ་ལོངས་ལ་ཆོས་དང་སེམས་སུ་བསྲེས། །སེམས་ཀྱི་རྒྱུ་འགྲུལ་མ་མང་རང་སར་སྡོད། །སོ་མ་ཟང་ཀ་རྣལ་མར་སྡོད། །ལོངས་སྤྱོད་གཡེངས་པའི་བདུད་བྱུང་ན། །དགྲ་དང་ཚེར་མ་བཞིན་དུ་སྤང་བར་བྱ། །གཉེན་དྲུང་ཕ་མ་ལ་སོགས་རྒྱབ་བོར་ལ། །བྱ་བ་ཀུན་བཏང་རི་ཁྲོད་དགོན་པར་སྡོད། །རྩོལ་བསྒྲུབ་ཅི་ཡང་མི་བྱ་ཡིད་ཀྱི་བྱ་བ་བཏང་། །རིག་པ་གང་ལའང་མི་རྒྱུ་ཡིད་ཀྱི་འཁྲུལ་རྟོག་མེད། །དྲན་སེམས་གང་ལའང་མི་འཇུག་གང་སྣང་ཡུལ་མ་ཆགས། །ཡིད་སེམས་ཐ་མལ་མ་ཡིན་ཆོས་ཀྱི་དབྱིངས་སུ་སྡོད། །འཇིགས་སར་དགྲ་ལ་མ་བསྐུར་རང་གི་དེ་ཉིད་ལྟོས། །དབང་པོ་འབྲིང་གིས་འདི་ལྟར་ཤེས་པར་གྱིས། །གཏད་མེད་བྱར་མེད་མཐའ་ལས་གྲོལ་བར་སྡོད། །འོན་ཀྱང་མིང་མེད་མཐའ་སྟོངས་ངོ་བོ་ ― DNG001_Page_0206 ―
[མ་དཔེ་གཟིགས་ན་འདིར་གནོན།]
རྟོགས། །ཡང་རབ་ཏུ་གྱུར་ཐོད་རྒལ་ལ། །མིང་མེད་མཐའ་སྟོངས་རྟོགས་པར་བྱེད་པའི་ཐབས། །བྱ་བ་བཏང་ནས་བློ་འདས་རྟོགས་པ་ནི། །ཉོན་མོངས་དུག་ལྔའི་མིང་མེད་མཐའ་སྟོངས་སོ། །དུག་གསུམ་ཞེས་བྱའི་མིང་མེད་མཐའ་སྟོངས་སོ། །རྣམ་རྟོག་མིང་མེད་མཐའ་སྟོངས་སོ། །འགྲོ་དྲུག་སེམས་ཅན་མིང་མེད་མཐའ་སྟོངས་སོ། །ཁམས་གསུམ་འཁོར་བའི་མིང་མེད་མཐའ་སྟོངས་སོ། །འཁྲུལ་པ་ཞེས་བྱའི་མིང་མེད་མཐའ་སྟོངས་སོ། །མ་རིག་གཉིས་འཛིན་མིང་མེད་མཐའ་སྟོངས་སོ། །སྣང་བ་ཆོས་སྐུ་སྟོང་པར་མཐའ་སྟོངས་སོ། །རིག་པ་ཆོས་སྐུ་རང་གྲོལ་མཐའ་སྟོངས་སོ། །ཆོས་ཉིད་རྩིས་གདབ་མེད་པར་མཐའ་སྟོངས་སོ། །ལྟ་བ་ཡུལ་མེད་མཐའ་སྟོངས་སོ། །སྒོམ་པ་མིང་མེད་མཐའ་སྟོངས་སོ། །སྤྱོད་པ་ལ་མེད་མཐའ་སྟོངས་སོ། །འབྲས་བུ་རྒྱུ་མེད་མཐའ་སྟོངས་སོ། །རེ་དོགས་སེམས་མེད་མཐའ་སྟོངས་སོ། །ཆོས་མེད་བཤད་མེད་མཐའ་སྟོངས་སོ། །ཐེག་མེད་འཇུག་མེད་གྲུབ་པའི་མཐའ་སྟོངས་སོ། །སེམས་རིག་མེད་པས་རྒྱུ་མཐའ་སྟོངས། །ཡུལ་སེམས་གཟུང་འཛིན་མཐའ་སྟོངས་སོ། །བཟང་མེད་ངན་མེད་སྤང་ལེན་སྟོངས། །དགྲ་མེད་གཉེན་མེད་ཕྱོགས་རིས་སྟོངས། །ཡིན་མིན་དབྱེ་བསལ་མཐའ་སྟོངས་སོ། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། མིང་མེད་མཐའ་སྟོངས་རྟོགས་ཐབས་བསྟན་པའི་ལེའུ་སྟེ་བརྒྱད་པའོ།། །།དེ་ནས་ཀུན་རིག་ཁྱེའུ་ཆུང་གིས། །སྐྱེ་མེད་ཀ་དག་སྟོན་པ་ལ། །མུ་མཐའ་ཡས་པར་རྟོགས་ཐབས་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །བརྡ་དང་གནད་ཀྱི་སྒོ་ནས་བསྟན། །འཁོར་རྣམས་མ་ཡེངས་གུས་པར་ཉོན། །མུ་མེད་མཐའ་ཡས་རྟོགས་ཐབས་ལ། །ཆོས་རྣམས་བློ་ཡིས་ཞེ་འདོད་མི་བྱ་སྟེ། །སྣང་གྲག་ཆོས་རྣམས་གང་ལ་ཡང་། །ཞེ་འདོད་བཅས་བཅོས་ཆགས་སྡང་མེད་པར་གཞག །སྣ་ཚོགས་ཡུལ་སེམས་མ་ཆགས་ཏེ། །ཆོས་ཉིད་རང་གྲོལ་ལོ། །དེ་ཡིས་མུ་མེད་མཐའ་ཡས་རྟོགས། །ཀྱེ་མ་རྣལ་འབྱོར་སྐལ་པ་ཅན། །མུ་མེད་མཐའ་ཡས་རྟོགས་འདོད་ན། །གང་ལའང་མ་སེམས་ཅི་ལའང་ཞེ་འདོད་མེད་པར་ཞོག །རིག་པ་རྣམ་དག་ཡེ་སངས་རྒྱས། །སྣ་ཚོགས་རང་སྣང་རང་སར་གྲོལ། །བརྡ་ཡི་སྒོ་ནས་རྟོགས་ཐབས་ནི། ། ― DNG001_Page_0207 ―
[མ་དཔེ་གཟིགས་ན་འདིར་གནོན།]
ཀྱེ་ཧོ་ཨེ་མ་རྣལ་འབྱོར་ཀུན། །མུ་མེད་མཐའ་ཡས་རྟོགས་འདོད་ན། །རྒྱ་མཚོའི་ཀློང་དུ་ཉོལ་ལ་ནམ་མཁའི་དབྱིངས་སུ་ལྟོས། །ཁྱུང་དང་སེང་གེ་ཞོན་ལ་ཉི་ཟླའི་སྙིང་པོ་ལྟོས། །ཤེས་རབ་གྲི་ཐོགས་ཁྱི་ཕག་བྱ་སྤྲེལ་གསོད། །སྒྲོན་མེ་ལག་ཐོགས་མུན་པའི་སྨག་རུམ་སེལ། །འཇའ་ཚོན་རྒྱལ་མཚན་གྱིས་ལ་ན་བུན་སྨུག་པ་སོལ། །ཆུ་གཉེར་ཁ་རུ་ཆུགས་ལ་སྤྲེའུ་ལག་པས་ཟུང་། །རླུང་ཕོ་སྟོད་ལ་ནོན་ལ་རྡོ་ཚན་ཁ་བ་ཕྱོགས། །རི་བོའི་རྩེ་ལ་འདུག་ལ་སྤང་ལ་གསེར་ཕུར་ཐོབ། །སྣང་བའི་ཆོས་རྣམས་དབྱེ་བསལ་མེད་པ་ཡིས། །དེ་ཡིས་མུ་མེད་མཐའ་ཡས་རྟོགས་པར་འགྱུར། །ཞེས་གསུངས་སོ། །བལྟ་བྱ་ལྟ་བྱེད་མེད་པས་མུ་མེད་མཐའ་ཡས་རྟོགས། །བསྒོམ་བྱ་སྒོམ་བྱེད་མེད་པས་མུ་མེད་མཐའ་ཡས་རྟོགས། །སྤྱད་བྱ་སྤྱོད་བྱེད་མེད་པས་མུ་མེད་མཐའ་ཡས་རྟོགས། །བསྒྲུབ་བྱ་སྒྲུབ་བྱེད་མེད་པས་མུ་མེད་མཐའ་ཡས་རྟོགས། །ཡེ་ཤེས་ཉི་མ་ཤར་བས་མུ་མེད་མཐའ་ཡས་རྟོགས། །མ་རིག་གཏི་མུག་སངས་པས་མུ་མེད་མཐའ་ཡས་རྟོགས། །དུག་ལྔ་རང་སར་གྲོལ་བས་མུ་མེད་མཐའ་ཡས་རྟོགས། །འཁྲུལ་སྒོ་འཁྲུལ་སྣང་མེད་པས་མུ་མེད་མཐའ་ཡས་རྟོགས། །སྣང་སྟེ་གྲུབ་པ་མེད་པས་མུ་མེད་མཐའ་ཡས་རྟོགས། །རིག་ཀྱང་ངོས་གཟུང་མེད་པས་མུ་མེད་མཐའ་ཡས་རྟོགས། །སེམས་ཀྱང་དངོས་གཞི་མེད་པས་མུ་མེད་མཐའ་ཡས་རྟོགས། །སྣང་བ་རང་སོར་བཞག་པས་མུ་མེད་མཐའ་ཡས་རྟོགས། །རིག་པ་མིང་མེད་རིག་མེད་མུ་མེད་མཐའ་ཡས་རྟོགས། །ཡིད་ལ་འགྱུ་མེད་འཛིན་མེད་མུ་མེད་མཐའ་ཡས་རྟོགས། །སེམས་ལ་དྲན་བསམ་མེད་པས་མུ་མེད་མཐའ་ཡས་རྟོགས། །གཟུགས་སྒྲ་དྲི་རོ་མེད་པས་མུ་མེད་མཐའ་ཡས་རྟོགས། །ཕུང་པོ་ལྔ་པོ་མེད་པས་མུ་མེད་མཐའ་ཡས་རྟོགས། །དབང་པོ་རྣམ་ལྔ་མེད་པས་མུ་མེད་མཐའ་ཡས་རྟོགས། །རྣམ་ཤེས་ཚོགས་བརྒྱད་མེད་པས་མུ་མེད་མཐའ་ཡས་རྟོགས། །ཐེག་ཆོས་ལྟ་སྒོམ་མེད་པས་མུ་མེད་མཐའ་ཡས་རྟོགས། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། མུ་མེད་མཐའ་ཡས་རྟོགས་ཐབས་བསྟན་པའི་ལེའུ་སྟེ་དགུ་པའོ།། །།དེ་ནས་ཀུན་རིག་ཁྱེའུ་ཆུང་གིས། །སྙིང་པོ་ཀ་དག་ཆོས་སྐུ་ལ། །བྱར་མེད་བློ་འདས་དོན་འདོད་ན། །བྱ་བཙལ་རྩོལ་བསྒྲུབ་མི་འཚལ་ལམ། །ཞེས་ཞུས་པས། སྟོན་པས་ ― DNG001_Page_0208 ―
[མ་དཔེ་གཟིགས་ན་འདིར་གནོན།]
འཁོར་ལ་བཀའ་སྩལ་པ། །ཆོས་དང་སེམས་སུ་འདྲེས་པ་ན། །བྱ་བཙལ་ཅི་ཡང་མི་དགོས་སོ། །བློ་དངོས་འཕྲད་ནས་མུ་མཐའ་གྲོལ་བ་ན། །བྱ་བ་གང་ཡིན་བྱ་རྒྱུ་ཅི་ཞིག་སྤྱོད། །ལྟ་བྱེད་གང་ཡིན་བལྟ་བྱ་གང་ན་འདུག །ནམ་མཁའི་དབྱིངས་སུ་ལྟོས་དང་ཅི་མ་འདྲ། །སྒོམ་བྱེད་གང་ཡིན་བསྒོམ་བྱ་གང་ན་འདུག །བསྒོམ་ན་དངོས་པོ་བསྒོམ་མམ་སྟོང་པ་བསྒོམ། །དངོས་པོ་བསྒོམ་ན་ཡེ་ནས་གྲུབ་ཟིན་པས། །གྲུབ་ཟིན་དེ་ལ་བསྒོམ་ཡང་ཅི་ཞིག་དགོས། །གལ་ཏེ་སྟོང་པ་བསྒོམ་མོ་ཞེས་འདོད་ན། །ཡེ་སྟོང་ཡིན་པས་ད་གདོད་སྟོང་མི་དགོས། །ལྷ་དང་ལྷ་མོ་གཞལ་ཡས་ཕྱི་ནང་དང་། །རྩ་དང་ཐིག་ལེ་བསྒོམ་པའི་དམིགས་གཏད་མེད། །བྱ་བ་བཏང་བས་ལས་རྣམས་དུས་གཅིག་ཟིན། །དགེ་སྤྱོད་ཆོས་སྤྱོད་སྡིག་པ་བྱ་རྒྱུ་མེད། །དལ་བ་ལྷུག་པ་བག་ཡངས་རྣལ་མ་ལ། །སོ་མ་ཟང་ཀ་མ་བཅོས་མ་བྱས་པས། །མ་བཙལ་ཡེ་ནས་རྩོལ་བསྒྲུབ་ལས་ཟིན་པས། །ད་ནི་བྱ་བྱེད་དགག་བསྒྲུབ་མི་འཚལ་ལོ། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། བྱ་བཙལ་རྩོལ་བསྒྲུབ་མི་དགོས་པར་བསྟན་པའི་ལེའུ་སྟེ་བཅུ་པའོ།། །།དེ་ནས་ཀུན་རིག་ཁྱེའུ་ཆུང་གིས། །སྙིང་པོ་ཀ་དག་ཆོས་སྐུ་ལ། །ཐེག་པའི་ལྟ་སྒོམ་མུ་མེད་པར། །ཡང་ཏི་ཡོ་གས་ཇི་ལྟར་རྟོགས་པ་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཐེག་པའི་རིམ་པ་ལྟ་སྒོམ་ཞེ་འདོད་ཡིན། །ཞེ་འདོད་ཡིད་སྨོན་ཆོས་ཀྱིས་སངས་མི་རྒྱ། །གྲུབ་མཐའི་རྩོལ་བ་མེད་པའི་ཆོས་གཅིག་དགོས། །ཆོས་གཅིག་ཡང་ཏི་ཡོ་གས་འདི་ལྟར་རྟོགས། །སྣང་སྲིད་དབྱེ་བསལ་མེད་པའི་ཆོས་གཅིག་རྟོགས། །ཡུལ་སེམས་གཟུང་འཛིན་མེད་པའི་ཆོས་གཅིག་རྟོགས། །རིག་སེམས་སྐྱེ་འགག་མེད་པའི་ཆོས་གཅིག་རྟོགས། །ལྟ་སྒོམ་རྩོལ་བསྒྲུབ་མེད་པའི་ཆོས་གཅིག་རྟོགས། །ལྟ་བ་གཏད་མེད་ཕྱོགས་མེད་མཐའ་གྲོལ་རྟོགས། །སྒོམ་མེད་བསམ་མེད་མུ་མེད་མཐའ་ཡས་རྟོགས། །བྱར་མེད་རྩོལ་མེད་མཐའ་རྣམས་ཡོངས་གྲོལ་རྟོགས། །རེ་མེད་དོགས་མེད་འདི་ལྟར་སངས་རྒྱས་རྟོགས། །ཐེག་པའི་རྒྱལ་པོ་ཡང་ཏི་ཡོ་ག་ཡིན། །མུ་མེད་མཐའ་ཡས་ ― DNG001_Page_0209 ―
[མ་དཔེ་གཟིགས་ན་འདིར་གནོན།]
མིང་མེད་བློ་འདས་རྟོགས། །རྩོལ་བསྒྲུབ་ཅི་ཡང་མ་བྱས་གྲོལ་བར་བཤད། །ཅེས་གསུངས་སོ། །ཉི་ཟླ་བཀོད་པའི་རྒྱུད་ལས། ཡང་ཏི་ཡོ་གས་ཇི་ལྟར་རྟོགས་པ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ཀུན་རིག་ཁྱེའུ་ཆུང་གིས། །སྐྱེ་མེད་ཀ་དག་ཆོས་སྐུ་ལ། །བཅུ་རྩེ་ཡང་ཏི་ཡོ་ག་རུ། །ཐེག་པ་རིམ་བཅུ་ཇི་ལྟར་རྫོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བཅུ་རྩེ་ཡང་ཏི་ཡོ་ག་འདིར། །ཐེག་པ་དགུ་ཡི་རྫོགས་ལུགས་ནི། །གང་ཟག་བདག་མེད་མི་འདོད་པས། །ཉན་ཐོས་ལྟ་བ་ཡོངས་སུ་རྫོགས། །བདག་མེད་ཕྱོགས་ཆ་མི་འབྱེད་པས། །རང་རྒྱལ་ལྟ་བ་ཡོངས་སུ་རྫོགས། །རང་རིག་སེམས་སུ་མ་གྲུབ་པས། །སེམས་ཙམ་ལྟ་བ་ཡོངས་སུ་རྫོགས། །བདེན་པ་གཉིས་སུ་མི་བལྟ་བས། །དབུ་མའི་ལྟ་བ་ཡོངས་སུ་རྫོགས། །དག་གསུམ་རིགས་གསུམ་བསྒོམ་མེད་པས། །ཀྲི་ཡའི་ལྟ་བ་ཡོངས་སུ་རྫོགས། །མར་སྤྱོད་ཡར་ལྟའི་རྩེ་གཉིས་མེད། །ཨུ་བའི་ལྟ་བ་ཡོངས་སུ་རྫོགས། །རིགས་ལྔ་སྐྱེ་འགག་གཉིས་མེད་པས། །ཡོ་གའི་ལྟ་བ་ཡོངས་སུ་རྫོགས། །སྣང་སྟོང་གཉིས་མེད་མི་བསྒྲུབ་པས། །མ་ཧཱའི་ལྟ་བ་ཡོངས་སུ་རྫོགས། །དབྱིངས་དང་ཡེ་ཤེས་གཉིས་མེད་པས། །ཨ་ནུའི་ལྟ་བ་ཡོངས་སུ་རྫོགས། །སྣང་དང་ཆོས་སྐུ་གཉིས་མེད་པས། །ཨ་ཏིའི་ལྟ་བ་ཡོངས་སུ་རྫོགས། །ཀ་དག་མ་དག་གཉིས་མེད་པས། །སྤྱི་ཏིའི་ལྟ་བ་ཡོངས་སུ་རྫོགས། །ཡང་ཏི་མིང་མེད་མཐའ་གྲོལ་དུ། །བརྒྱད་ཁྲི་བཞི་སྟོང་མ་འདྲེས་རྫོགས། །ཞེས་གསུངས་སོ། །དེ་ཡང་དཔེ་ཡི་མཚོན་ཙམ་བསྟན་པ་ནི། །གནམ་ས་གཉིས་སུ་དངོས་པོའི་ཆོས་རྣམས་རྫོགས། །ནམ་མཁའི་ཆོ་འཕྲུལ་ནམ་མཁའི་ངང་དུ་རྫོགས། །རྒྱ་མཚོའི་ཀློང་དུ་རྒྱ་མཚོའི་ཆོས་རྣམས་རྫོགས། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། རྫོགས་ཆེན་ཡང་ཏི་ཡོ་གར་ཐེག་པ་རིམ་བཅུ་རྫོགས་པར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་ཀུན་གསལ་རིག་པའི་ཁྱེའུ་ཆུང་གིས། །སྐྱེ་མེད་ཀ་དག་སྟོན་པ་ལ། །རྫོགས་ཆེན་ཡང་ཏི་ཡོ་ག་ཡི། །མ་བསྒྲུབས་འབྲས་བུ་ཇི་ལྟར་འཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །རྫོགས་ ― DNG001_Page_0210 ―
[མ་དཔེ་གཟིགས་ན་འདིར་གནོན།]
ཆེན་ཡང་ཏིའི་འབྲས་བུ་ལ། །ཐོབ་དང་མ་ཐོབ་གཉིས་མེད་ཀྱང་། །རེ་ཞིག་བྲོད་པ་སྐྱེ་ཕྱིར་བཤད། །གོང་དུ་འབྲས་བུ་བཤད་ཟིན་ཀྱང་། །མུ་མཐའ་ཡས་པའི་འབྲས་བུར་བཤད། །གཏིང་མཐའ་གྲོལ་བའི་འབྲས་བུ་ཡིན། །ཆོས་རྣམས་ཟད་སར་སྐྱོལ་བ་འབྲས་བུ་ཡིན། །སྙིང་པོ་ཀློང་དུ་གྱུར་པ་འབྲས་བུ་ཡིན། །སྐྱེ་མེད་ཀ་དག་རྟོགས་པ་འབྲས་བུ་ཡིན། །དངོས་མེད་ཟང་ཀ་རྟོགས་པ་འབྲས་བུ་ཡིན། །བྱར་མེད་བློ་འདས་རྟོགས་པ་འབྲས་བུ་ཡིན། །མིང་མེད་མཐའ་བྲལ་རྟོགས་པ་འབྲས་བུ་ཡིན། །རང་བྱུང་རང་ལ་རྟོགས་པ་འབྲས་བུ་ཡིན། །རང་དྭངས་རང་ལ་རྟོགས་པ་འབྲས་བུ་ཡིན། །གཞི་མེད་སྐྱེ་མེད་ཆོས་སྐུའི་འབྲས་བུ་ཡིན། །འོད་གསལ་ཀ་དག་ལོངས་སྐུའི་འབྲས་བུ་ཡིན། །དངོས་རྣམས་དངོས་མེད་སྤྲུལ་སྐུའི་འབྲས་བུ་ཡིན། །སྐུ་གསུམ་དབྱེར་མེད་དོན་དམ་བདེན་མེད་ཐོབ། །ཅི་ཡང་མ་གྲུབ་འདི་ལྟར་སངས་རྒྱས་སོ། །ཞེས་གསུངས་སོ། །ཉི་ཟླ་བཀོད་པའི་རྒྱུད་ལས། ཡང་ཏི་ཡོ་གའི་འབྲས་བུ་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་ཀུན་རིག་གསལ་བའི་ཁྱེའུ་ཆུང་གིས། །སྐྱེ་མེད་ཀ་དག་སྟོན་པ་ལ། །གོང་ཞུས་དོན་རྣམས་དེ་ལྟར་ན། །མཚན་དང་གཏད་རྒྱ་གང་ལ་གཏད། །ཅེས་ཞུས་པས། །སྟོན་པས་འཁོར་ལ་བཀའ་སྩལ་པ། །རྒྱུད་རྣམས་ཀུན་གྱི་སྤྱི་རྗེ་སྤྱི་ཕུད་པས། །དགུ་རྩེ་སྤྱི་ཕུད་རྒྱུད་ཀྱི་རྒྱལ་པོར་ཟུང་། །ཉི་ཟླ་བཀོད་པས་མུན་པ་འཇོམས་པའི་ཕྱིར། །མུན་སེལ་སྣང་བ་བཀོད་པའི་རྒྱུད་དུ་ཟུང་། །སྣང་གསལ་ཉི་མ་འོད་གསལ་ཟླ་བའི་རྒྱུད། །སྣང་བ་འོད་གསལ་དག་པ་བཀོད་པའི་རྒྱུད་དུ་ཟུང་། །མུ་མེད་མཐའ་ཡས་ནམ་མཁའི་མཐའ་མཉམ་ཕྱིར། །ནམ་མཁའི་མཐའ་དང་མཉམ་པའི་རྒྱུད་དུ་ཟུང་། །ནམ་མཁའི་ཆོ་འཕྲུལ་སྤྲིན་ཆར་བུ་ཡུག་སོགས། །ནམ་མཁའི་ཀློང་དང་ནམ་མཁའི་མཐའ་དང་མཉམ། །དེ་ཕྱིར་ནམ་མཁའི་མཐའ་དང་མཉམ་པའི་རྒྱུད་དུ་ཟུང་། །ཞེས་མཚན་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་ཀུན་རིག་གསལ་བའི་ཁྱེའུ་ཆུང་གིས། །རྒྱུད་འདི་གང་ཟག་གང་ལ་གཏད། །ཅེས་ཞུས་པས། །སྟོན་པས་འཁོར་ལ་བཀའ་སྩལ་པ། །རི་བོའི་བློ་ལ་རྒྱ་མཚོའི་ཐུགས། །ནམ་མཁའི་ ནམ་མཁའ་འབྲུག་སྒྲོགས་ཐོག་བབས་ཀློང་འདུས་སྤྱི་རྒྱལ་རྒྱ་མདུད་ཀྱི་རྒྱུད།― DNG001_Page_0211 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ག་ག་ན་ག པྭཱུ་ཏ་ར་བ་ཎ་མཻ་གྷ་ཛྱོ་ཏྱཱ་བེ་ཤོརྨྨི་ས་མཱ་ཛ་སཱ་མཱ་ནྱ་ཛ་ཡ་མུ་དྲཱ་གྲནྠ་ཏནྟྲ། བོད་སྐད་དུ། ནམ་མཁའ་འབྲུག་སྒྲོགས་ཐོག་བབས་ཀློང་འདུས་སྤྱི་རྒྱལ་རྒྱ་མདུད་ཀྱི་རྒྱུད། ཐིག་ལེ་ཀུན་འདུས་ལ་ཕྱག་འཚལ་ལོ། །འདི་སྐད་བདག་གིས་ཅིར་ཡང་མ་ཐོས། ཅིར་ཡང་མ་མཚོན། ཚིག་ཏུ་མ་བརྗོད། དུས་མེད་པ་ན། སྐྱེ་མེད་སྙིང་པོའི་ཀློང་ན་ཀ་དག་ཆོས་སྐུ་བཞུགས། །དངོས་མེད་ངང་དྭངས་འཁོར་ལ་བློ་འདས་བྱར་མེད་གསུངས། །སྔོན་མེད་ཕྱིས་མེད་དུས་གསུམ་དབྱེར་མེད་དུས། །སྡུད་པ་པོ་ནི་དངོས་མེད་ངང་དྭངས་སོ། །དེ་ནི་ཕུན་སུམ་ཚོགས་པར་བསྟན་པའོ། །དེ་ནས་ངང་དྭངས་ཁྱེའུ་ཆུང་གིས། །སྐྱེ་མེད་ཀ་དག་ཆོས་སྐུ་ལ། །ཕུན་སུམ་ཚོགས་དོན་དེ་ལྟར་ན། །སངས་རྒྱས་བྱ་བ་ཡོད་དམ་མེད། །སེམས་ཅན་བྱ་བ་ཅི་ལ་ཟེར། །དེ་ཉིད་ངོ་བོ་གཅིག་མི་གཅིག །གཅིག་ན་འཁོར་འདས་གཉིས་བྱུང་གང་། །མི་གཅིག་འདྲེལ་བ་མེད་ལགས་སམ། །ཞེས་སྟོན་པ་ལ་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སངས་རྒྱས་མེད་པས་སངས་རྒྱས་མིང་ཡང་མེད། །ཀ་དག་ཉིད་ལ་སངས་རྒྱས་ཡོད་མ་ཡིན། །སེམས་ཅན་བྱ་བ་འགྱུ་སེམས་སྡུག་བསྔལ་ཅན། །དེ་གཉིས་གཞི་ལ་གྲུབ་པ་གང་ཡང་མེད། །མེད་ལས་བྱུང་བས་ངོ་བོར་གཅིག་པ་སྟེ། །ངོ་བོ་གཅིག་ལ་སྣང་ཚུལ་རྣམ་པ་གཉིས། །འཁོར་དང་མྱ་ངན་འདས་པ་གཉིས་བྱུང་ཡང་། །ཐ་དད་མ་ཡིན་ ― DNG001_Page_0212 ―
[མ་དཔེ་གཟིགས་ན་འདིར་གནོན།]
ངོ་བོར་འདྲེལ་པ་ཡིན། །ཞེས་གསུངས་སོ། །ཕུན་སུམ་ཚོགས་པ་དང་གླེང་བསློང་དང་གླེང་གཞིའི་ལེའུ་སྟེ་དང་པོའོ།། །།དེ་ནས་ངང་དྭངས་ཁྱེའུ་ཆུང་གིས། །ཀ་དག་ཉིད་ལ་འདི་སྐད་ཞུས། །སེམས་དང་ཆོས་རྣམས་ཡོད་དམ་མེད། །སྐུ་དང་ཡེ་ཤེས་གང་ལ་ཟེར། །དུག་ལྔ་སྐུ་ལྔ་ཡོད་དམ་མེད། །མ་རིག་ཡེ་ཤེས་ཅི་ལ་ཟེར། །འཁོར་བ་མྱང་འདས་ཡོད་དམ་མེད། །སངས་རྒྱས་སེམས་ཅན་ཅི་ལ་ཟེར། །དགེ་སྡིག་བྱ་བ་ཡོད་དམ་མེད། །མཐོ་རིས་ངན་སོང་ཅི་ལ་ཟེར། །ཆོས་རྣམས་ཉན་བཤད་ཡོད་དམ་མེད། །ཐེག་སྒོ་རབ་འབྱམས་ཅི་ལ་ཟེར། །བག་ཆགས་སྒྲིབ་གཡོགས་ཡོད་དམ་མེད། །ལས་འཕྲོ་རྣམ་སྨིན་ཅི་ལ་ཟེར། །ཞེས་སྟོན་པ་ལ་ཞུས་སོ། །འཁོར་གྱིས་གླེང་སློང་བའི་ལེའུ་སྟེ་གཉིས་པའོ།། །།དེ་ནས་ངང་དྭངས་ཁྱེའུ་ཆུང་གིས། །ཆོས་དང་སེམས་རིག་ཡོད་དམ་མེད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་མེད་ཀ་དག་སྟོང་པ་ལ། །ཆོས་རྣམས་མིང་ཡང་ཡོད་མ་ཡིན། །ཆོས་སུ་སྣང་བ་འཁྲུལ་པའི་སེམས། །ཆོས་རྣམས་སེམས་ཀྱི་འཁྲུལ་པ་ཡིན། །བྱར་མེད་བློ་འདས་ཆོས་རྣམས་མེད། །སེམས་མེད་རིག་མེད་འཛིན་རྟོག་མེད། །སེམས་མེད་ཀ་དག་ཀློང་དུ་གྱུར། །རིག་མེད་ངང་དྭངས་སྟོང་སང་ངོ་། །གསལ་གདངས་ཅིར་ཡང་བརྗོད་དུ་མེད། །ཅེས་གསུངས་སོ། །སེམས་དང་ཆོས་མེད་པར་བསྟན་པའི་ལེའུ་སྟེ་གསུམ་པའོ།། །།དེ་ནས་ངང་དྭངས་ཁྱེའུ་ཆུང་གིས་ཞུས་པ། །སྐུ་དང་ཡེ་ཤེས་ཅི་ལ་ཟེར། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྐུ་དང་ཡེ་ཤེས་བླ་དྭགས་ཡིན། །ཀ་དག་ཉིད་ལ་སྐུ་དང་ཡེ་ཤེས་མེད། །ཅེས་གསུངས་སོ། །སྐུ་དང་ཡེ་ཤེས་མེད་པར་བསྟན་པའི་ལེའུ་སྟེ་བཞི་པའོ།། །།ངང་དྭངས་ཁྱེའུ་ཆུང་གིས་ཞུས་པ། །དུག་ལྔ་སྐུ་ལྔ་ཡོད་དམ་མེད། །མ་རིག་བྱ་བ་ཅི་ལ་ཟེར། །ཞུས་པས། སྟོན་པས་བཀའ་སྩལ་པ། ཀ་དག་དྲི་མེད་དུག་མེད་པས། །དུག་ལྔ་སྐུ་ལྔ་གཉིས་ཀ་མེད། །འདོད་ཆགས་ཞེ་སྡང་གཏི་མུག་མེད། །ང་རྒྱལ་ཕྲག་དོག་ཀ་ནས་དག །སྐུ་གསུམ་དབྱེར་མེད་སྐུ་ལྔ་མེད། །ཀ་དག་སྟོང་གསལ་མ་ ― DNG001_Page_0213 ―
[མ་དཔེ་གཟིགས་ན་འདིར་གནོན།]
རིག་མེད། །ཅང་མེད་ཡེ་གསལ་ཡེ་ཤེས་མེད། །མ་རིག་ཡེ་ཤེས་རྣམ་གཉིས་ཀྱང་། །ཀ་དག་མ་དག་རྣམ་གཉིས་ལས། །མ་རིག་ཡེ་ཤེས་གྲུབ་པ་མེད། །ཅེས་གསུངས་སོ། །དུག་ལྔ་མ་རིག་ཡེ་ཤེས་མེད་པར་བསྟན་པའི་ལེའུ་སྟེ་ལྔ་པའོ།། །།ངང་དྭངས་ཁྱེའུ་ཆུང་གིས་ཞུས་པ། །འཁོར་བ་མྱ་ངན་ཡོད་དམ་མེད། །སངས་རྒྱས་སེམས་ཅན་ཅི་ལ་ཟེར། །ཞུས་པས། སྟོན་པས་བཀའ་སྩལ་པ། འཁོར་བ་མྱ་ངན་བློ་ཡི་ཡུལ། །ཆགས་སྡང་བློ་ཡུལ་མ་ཟད་པར། །འཁོར་བ་ཟད་པར་མི་འགྱུར་རོ། །དངོས་མེད་བློ་འདས་འཁོར་འདས་ཆོས། །རྣམ་རྟོག་རང་སངས་ཀ་དག་རྒྱས། །ཅི་ཡང་མི་འགྱུར་འཛིན་རྟོག་སངས། །སྡུག་བསྔལ་ངང་དྭངས་བདེ་ཆེན་རྒྱས། །སེམས་ཅན་རྟོག་སངས་ཀ་དག་རྒྱས། །ཀ་དག་དངོས་མེད་བློ་འདས་ལ། །སངས་རྒྱས་སེམས་ཅན་ཡོད་མ་ཡིན། །ཞེས་གསུངས་སོ། །འཁོར་འདས་མེད་པར་བསྟན་པའི་ལེའུ་སྟེ་དྲུག་པའོ།། །།ངང་དྭངས་ཁྱེའུ་ཆུང་གིས་ཞུས་པ། །དགེ་སྡིག་མཐོ་རིས་ངན་སོང་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཀ་དག་རྟོགས་ན་དགེ་སྡིག་མེད། །གཉིས་ཀ་བྱར་མེད་མ་བྱས་པས། །མཐོ་རིས་ངན་སོང་སྐྱེ་ལྷུང་མེད། །དངོས་མེད་ཀ་དག་རྣལ་རྟོགས་པས། །དགེ་སྡིག་མཐོ་རིས་ངན་སོང་མེད། །སྡིག་པ་མི་སྤྱོད་མི་དགེ་སྤྱོད། །ཀ་དག་རེ་དོགས་ཁར་མི་འཆོང་། །ཞེས་གསུངས་སོ། །དགེ་སྡིག་མེད་པར་བསྟན་པའི་ལེའུ་སྟེ་བདུན་པའོ།། །།ངང་དྭངས་ཁྱེའུ་ཆུང་གིས་ཞུས་པ། །སྐྱེ་མེད་ཀ་དག་ཆོས་སྐུ་ལ། །ཐེག་པ་བརྒྱད་ཁྲི་བཞི་སྟོང་ཡོད་དམ་མེད། །ཉན་བཤད་མཚོན་ཚིག་ཅི་ལ་ཟེར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཐེག་པ་བརྒྱད་ཁྲི་བཞི་སྟོང་རྣམས། །མ་རྟོགས་ལོག་རྟོགས་དྲང་ཕྱིར་ལས། །ཀ་དག་ངང་ལ་ཆོས་ཀུན་མེད། །མེད་ལས་སྣ་ཚོགས་མེད་ལ་ཐིམ། །དབྱེར་མེད་གཅིག་འདྲེས་ཐ་སྙད་མེད། །བློ་འདས་དངོས་མེད་རྟོགས་པ་ཡིན། །མཚོན་པའི་ཚིག་གོ་རྒྱ་མཚོ་མེད། །ཆོས་མེད་བཤད་མེད་ཉན་པ་མེད། །མཚོན་མེད་དཔེ་མེད་ཟླ་མེད་དོ། །ཞེས་གསུངས་སོ། །ཆོས་སྐུ་ལ་ཉན་བཤད་མེད་ ― DNG001_Page_0214 ―
[མ་དཔེ་གཟིགས་ན་འདིར་གནོན།]
པར་བསྟན་པའི་ལེའུ་སྟེ་བརྒྱད་པའོ།། །།དེ་ནས་ངང་དྭངས་ཁྱེའུ་ཆུང་གིས། །སྐྱེ་མེད་ཀ་དག་ཆོས་སྐུ་ལ། །བག་ཆགས་སྒྲིབ་གཡོགས་ཡོད་དམ་མེད། །ལས་འཕྲོ་རྣམ་སྨིན་ཅི་ལ་ཟེར། །ཞེས་ཞུས་པས། །སྟོན་པས་འཁོར་ལ་བཀའ་སྩལ་པ། །སྟོང་གསལ་ཀ་དག་དོན་རྟོགས་ན། །བག་ཆགས་སྒྲིབ་གཡོགས་མ་རིག་མེད། །ལས་འཕྲོ་རྣམ་སྨིན་བསྒྲིབ་མི་སྲིད། །ཀ་དག་སྟོང་གསལ་དྭངས་སང་ངེ་། །གསལ་དག་ཀློང་ན་ཅི་ཡང་མེད། །ཅི་སྣང་ཅིར་ཡང་མ་གྲུབ་སྟེ། །རྩལ་སྣང་རང་བྱུང་ཉིད་དུ་དྭངས། །དབྱེར་མེད་གདེང་ལྡན་སྒྲིབ་གཡོགས་མེད། །ཅི་སྟེ་ལས་ཀྱི་དབང་གྱུར་ན། །རང་བྱུང་ཡེ་ཤེས་ཡོད་མ་ཡིན། །བྱར་མེད་ལས་མེད་རྣམ་སྨིན་མེད། །ཅེས་གསུངས་སོ། །བག་ཆགས་ལས་ཀྱི་རྣམ་སྨིན་མེད་པར་བསྟན་པའི་ལེའུ་སྟེ་དགུ་པའོ།། །།དེ་ནས་ངང་དྭངས་ཁྱེའུ་ཆུང་གིས་ཞུས་པ། །ནམ་མཁའ་འབྲུག་སྒྲོགས་དཔེ་ཡིས་མཚོན་ནས་ནི། །གནམ་ཐོག་རྒྱ་མཚོར་བབས་པ་ཇི་ལྟར་བསྟན། །ཆུ་སྲིན་ནོར་བུ་རྒྱ་མདུད་དཔེ་གང་མཚོན། །ཞེས་ཞུས་པ་དང་། དེ་ནས་སྟོན་པས་འཁོར་ལ་བཀའ་སྩལ་པ། །མཁའ་ཀློང་ཕྱོགས་མེད་ནམ་མཁའི་ཀློང་ཡངས་ནས། །ཀ་དག་སྤྱི་རྗེ་བློ་འདས་འབྲུག་སྒྲོགས་པས། །དངོས་མེད་ཀློང་ནས་སྟོང་གདངས་འབྲུག་སྟོང་ལྡིར། །སྤྱི་ཕུད་དགུ་རྩེ་རྣམ་དག་བློ་འདས་བབས། །འཁོར་བའི་རྒྱ་མཚོ་ཀློང་བཅས་ཉོན་མོངས་རླབས། །བྱ་རྩལ་ཞེ་འདོད་མེད་པར་ཆུ་སྲིན་མགྲིན་པར་ཆུད། །དགོས་འདོད་ཀུན་འབྱུང་ཡིད་བཞིན་ནོར་བུ་འཆང་། །དངོས་མེད་རྒྱ་ལས་བློ་འདས་འཕྲུལ་གྱི་མདུད། །དུས་གསུམ་མི་འགྱུར་ཐིག་ལེ་ཉག་གཅིག་རྒྱུད། །ཉོན་མོངས་གཏན་བརླག་གནམ་ཐོག་ཀློང་བབ་རྒྱུད། །དྲག་ལ་མྱུར་བས་རྡུག་མེད་ཐོག་བབས་པས། །ཀ་དག་དངོས་མེད་བློ་འདས་ཡང་གསང་རྒྱུད། །ནམ་མཁའི་དཔེས་བསྟན་སྙིང་པོ་ཆོས་ཉིད་སྟོན། །ཕྱོགས་མེད་སྟོང་གསལ་གསལ་ལ་དངོས་གཞི་མེད། །འབྲུག་སྒྲོག་དཔེས་མཚོན་མ་བཀག་རྩལ་ཟེར་སྟོན། །སྣང་སྟོང་གྲག་སྟོང་རིག་སྟོང་དབྱིངས་སུ་དྭངས། །ཡིད་རིག་གར་ཡང་ ལྟ་བ་ལ་ཤན་ཆེན་པོ་རིན་ཆེན་སྒྲོན་མ་རྩ་བའི་རྒྱུད།― DNG001_Page_0215 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། དྲྀཥྚི་མ་ཧཱ་ནི་ཡ་མ་རཏྣ་དཱི་པ་མཱུ་ལ་ཏནྟྲ། བོད་སྐད་དུ། ལྟ་བ་ལ་ཤན་ཆེན་པོ་རིན་ཆེན་སྒྲོན་མ་རྩ་བའི་རྒྱུད། མིང་མེད་མཐའ་ལས་འདས་པའི་གསང་བདག་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། མ་བྱུང་མ་སྐྱེས་མཉམ་པ་ཆེན་པོ། ཆོས་དབྱིངས་རྒྱ་ཆད་ཕྱོགས་ལྷུང་མེད་པ། རང་བཞིན་གྱི་མིང་ལས་འདས་པའི་གནས་ནས། སྙིང་པོ་རང་བྱུང་བློ་ལས་འདས་པའི་སྟོན་པ་གསང་བདག་ཆེན་པོ་ལ། རང་གི་རང་བཞིན་གྱི་འཁོར་རྣམ་པ་གསུམ་གྱིས་བསྐོར་ནས། ཐོག་བར་ཐ་གསུམ་གྱི་ཕྱོགས་རིས་དང་བྲལ་བའི་དུས་སུ། སྣང་ཚུལ་ཐམས་ཅད་བློ་འདས་སུ་སྟོན་པ། མིང་མེད་མཐའ་གྲོལ་གྱི་བསྟན་པ་འདི་བཀོད་དོ། །དེའི་ཚེ་ ― DNG001_Page_0216 ―
[མ་དཔེ་གཟིགས་ན་འདིར་གནོན།]
འཁོར་གྱི་ནང་ནས་རང་གསལ་སེམས་དཔའ་རྡོ་རྗེས་སྟོན་པ་ལ་ཞུས་པ། ཨེ་མ་སྟོན་པ་གསང་བའི་བདག་པོ་ཆེ། །མིང་མེད་མཐའ་གྲོལ་བློ་འདས་རང་ངོ་འདི། །མ་རྟོགས་གཉིས་འཛིན་གྲུབ་མཐས་བཅིངས་པ་རྣམས། །བློས་བཏགས་མཐར་འཛིན་རང་སར་གྲོལ་བའི་ཕྱིར། །རྒྱུ་དང་འབྲས་བུའི་ཆོས་རྣམས་ལ་བཟླ་བའི། །ཁྱད་འཕགས་དོན་གྱི་རང་བཞིན་ཡང་ཏིག་གང་། །དེ་ཡིས་འཛིན་པའི་མཐའ་རྣམས་ཇི་ལྟར་གྲོལ། །ཞེས་ཞུས་སོ། །བལྟ་བ་ལ་ཤན་ཆེན་པོ་རིན་ཆེན་སྒྲོན་མ་རྩ་བའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་སྟོན་པ་གསང་བའི་བདག་པོ་དེ། ཆོས་ཐམས་ཅད་དབྱིངས་ལས་ཤར་ཏེ་དབྱིངས་སུ་རང་སར་གྲོལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལ་རང་གསལ་སེམས་དཔའ་རྡོ་རྗེས་ཞུས་པ། མ་བྱུང་མ་སྐྱེས་ཐོག་མའི་སྔོན་རོལ་ན། །མིང་མེད་དོན་གྱི་དངོས་གཞི་ཇི་ལྟ་བུ། །ཞེས་ཞུས་པས། གསང་བདག་སྟོན་པ་ཆེན་པོ་དེས་ཏིང་ངེ་འཛིན་དེ་ལས་བཞེངས་ཏེ་བཀའ་སྩལ་པ། མ་བྱུང་མ་སྐྱེས་ཐོག་མའི་སྔོན་རོལ་ནས། །སེམས་ཉིད་གཏིང་ཡངས་དོན་གྱི་གནས་ལུགས་ནི། །མིང་མེད་ཤེས་མེད་རྟོག་མེད་ཀུན་འབྱུང་མཛོད། །མཐའ་སྟོངས་སྙིང་པོ་དོན་གྱི་རང་བཞིན་ལ། །མ་རིག་ཡེ་ཤེས་འཁྲུལ་དང་མ་འཁྲུལ་མེད། །སྟོང་ལས་ཀུན་འབྱུང་འཁྲུལ་རྟོག་སྣ་ཚོགས་དང་། །བྱུང་སར་རང་གྲོལ་རང་སྣང་ཡེ་ཤེས་ཡིན། །སྙིང་པོ་གཞི་ཡི་ངང་དུ་དབྱེ་བསལ་མེད། །ངོ་བོ་ཀུན་བྲལ་ཐོག་མཐའ་དགེ་སྡིག་དང་། །མཐའ་དབུས་ཕྱོགས་རིས་བླང་དོར་མིང་ཡང་མེད། །ཇི་བཞིན་ཅང་མེད་དབྱིངས་ལས་མ་གཡོས་ཀྱང་། །འོན་ཀྱང་རང་བཞིན་ཇི་ལྟར་གསལ་བར་སྣང་། །ཆོས་ཀུན་རྩ་བ་དངོས་མེད་བྱང་ཆུབ་སེམས། །མེད་ལས་མི་ཟད་འབྱུང་བའི་མཛོད་ཆེན་པོ། །རང་བཞིན་ཡེ་ནས་མ་བཅོས་གཏིང་མཐའ་ཡས། །ངོ་བོ་ཅི་ཡང་མ་ཡིན་བློ་ལས་འདས། །མཚན་ཉིད་ཐ་དད་བསམ་ཡས་ཅིར་ཡང་སྣང་། །གནས་ལུགས་གཏིང་ཡངས་དོན་གྱི་ངོ་བོ་ལ། །ཆོས་ཅན་ཆོས་ཉིད་མི་ཕྱེད་མཉམ་པ་ཉིད། །བདེན་རྫུན་འཁྲུལ་མཐའ་རང་གྲོལ་ཞེ་འདོད་མེད། །གསལ་དག་ ― DNG001_Page_0217 ―
[མ་དཔེ་གཟིགས་ན་འདིར་གནོན།]
ཟང་ཐལ་རིན་ཆེན་སྒྲོན་མ་འདི། །ངོ་བོ་ཅིར་ཡང་མ་གྲུབ་ནམ་མཁའ་བཞིན། །རྒྱུ་ལས་མ་བྱུང་ནམ་ཡང་སྐྱེ་མི་འགྱུར། །སངས་རྒྱས་སེམས་ཅན་དབྱེར་མེད་ངོ་བོ་གཅིག །གཅིག་པོ་བསྟན་དུ་མེད་པའི་སྙིང་པོ་ངོ་བོ་ཉིད། །སྣང་སྟོང་རྟག་དང་ཆད་པའི་མཐའ་ལས་གྲོལ། །སྤང་བྱ་གཉེན་པོ་བླང་དོར་དམིགས་འཛིན་བྲལ། །རིགས་དྲུག་སེམས་ཅན་འཁྲུལ་པའི་རྟོག་པ་དང་། །དུས་གསུམ་རྒྱལ་བའི་ཡེ་ཤེས་དགོངས་པ་གཉིས། །སྙིང་པོ་མིང་མེད་དོན་གྱི་ངོ་བོར་མཉམ། །མཉམ་དང་མི་མཉམ་ཉིད་ཀྱང་མཚོན་བརྗོད་མེད། །མཚོན་བརྗོད་ཡོད་མེད་ཉིད་ཀྱང་གཏིང་མཐའ་གྲོལ། །མ་བྱུང་མ་སྐྱེས་རང་བཞིན་བར་དོ་ན། །སེམས་ཉིད་ངོ་བོ་མཁའ་དང་འཇའ་ལྟར་གནས། །ཇི་བཞིན་མ་བསླད་སྙིང་པོ་ཀུན་གྱི་གཞི། །མ་ཕྱེད་མི་ཕྱེད་འགྲོ་འོང་མེད་པའི་གནས། །ཤེས་འགྱུ་མྱོང་རིག་མེད་པའི་དངོས་གཞི་ཅན། །མ་བྱུང་མ་བཙལ་དམིགས་མེད་དངོས་པོ་མེད། །བྱར་མེད་ཆགས་པ་མེད་པ་བདེ་བའི་ངང་། །འགྱུར་མེད་རང་གནས་ཀློང་ཡངས་ཚིག་ལས་འདས། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། གནས་ལུགས་གཏན་ལ་ཕབ་པའི་ལེའུ་སྟེ་གཉིས་པའོ།། །།དེ་ནས་རང་གསལ་སེམས་དཔའ་རྡོ་རྗེ་དེས། །བློ་འདས་གསང་བདག་སྟོན་པ་ལ་ཞུས་པ། །གནས་ལུགས་རང་བཞིན་དེ་ལྟར་གནས་པ་ལ། །འགྲོ་དྲུག་སེམས་ཅན་འདི་དག་ཇི་ལྟར་འཁྲུལ། །འཁྲུལ་པའི་ངོ་བོ་གང་ཡིན་འཁྲུལ་ཚུལ་གང་། །དེ་ཡི་ཉེས་པ་གང་ལགས་བཀའ་སྩོལ་ཅིག །ཅེས་ཞུས་པས། གསང་བདག་དོན་གྱི་སྟོན་པས་བཀའ་སྩལ་པ། །གནས་ལུགས་མཉམ་པའི་ངང་ལས་འཁྲུལ་ཚུལ་ནི། །སྟོང་པའི་ངང་ལས་འགྱུ་བ་རླུང་གཡོས་པས། །དེ་ལས་རིག་པ་རང་སར་ཤར་བ་ལས། །ཡིན་ནམ་མ་ཡིན་སྙམ་པ་ཡིད་དུ་མྱོངས། །སྙམས་བྱེད་འདོད་པས་སེམས་སུ་གསལ་བར་འགྱུས། །གསལ་བ་ཁ་དོག་ལྔ་རུ་སྣང་བ་ལ། །འོད་ཀྱི་དངོས་པོ་དེ་ཡིས་རྐྱེན་བྱས་ནས། །མེད་ལས་ཡོད་བྱུང་རིགས་དྲུག་སེམས་ཅན་རྣམས། །སྙིང་པོ་མིང་མེད་རང་ངོ་མ་ཤེས་འཁྲུལ། །དཔེར་ན་དམུས་ལོང་མདུན་ན་ ― DNG001_Page_0218 ―
[མ་དཔེ་གཟིགས་ན་འདིར་གནོན།]
གཟུགས་སྣང་འདྲ། །མེད་པར་ཡོད་སྣང་དུང་ལ་སེར་པོ་བཞིན། །ཀུན་གཞིའི་རྣམ་པར་ཤེས་པས་གཞི་བྱས་ནས། །ཚོགས་བདུན་ཤེས་པའི་རྩལ་གྱིས་རང་མ་ཤེས། །དཔེར་ན་རྒན་མོ་ལོང་བའི་མིག་དང་འདྲ། །རྩལ་དང་རང་ངོ་རང་གིས་མ་ཤེས་པས། །གཞི་ལ་འཁྲུལ་དུས་ལྷན་ཅིག་སྐྱེས་པ་ལས། །ལྷན་ཅིག་སྐྱེས་པའི་མ་རིག་པ་ཞེས་བྱ། །དེ་ནས་ང་བདག་གཟུང་འཛིན་ཕྱི་ནང་ཟུང་། །ཤིང་གི་སྲིན་བཞིན་ཁམས་གསུམ་སྡུག་བསྔལ་མྱངས། །རང་ངོ་རང་གིས་མ་ཤེས་བསྒྲིབས་པས་བྱུང་། །རང་ལས་གཞན་དུ་བཙལ་བས་གོལ་བར་ལྷུང་། །རྩོལ་བསྒྲུབ་གཉིས་འཛིན་རྒྱས་པས་འཁྲུལ་པ་བརྟས། །རྣམ་རྟོག་བཏགས་ཆགས་གཟུགས་གཞན་གོལ་བ་དང་། །གདེང་མེད་ཚིག་ལ་འབྱམས་པས་གོལ་བ་དང་། །གྲུབ་མཐའི་ལྟ་བ་བཟུང་བས་གོལ་བ་དང་། །སྤངས་བླངས་སྤྱོད་པ་བྱས་པས་གོལ་བ་དང་། །བསྒོམ་ཆགས་ཉམས་ལ་ཞེན་པས་གོལ་བ་དང་། །བློས་བྱས་འབྲས་བུ་བསྒྲུབས་པས་གོལ་བ་ཡིས། །སྙིང་པོ་མིང་མེད་མཐའ་སྟོང་རྟོགས་པ་མིན། །འཇིག་རྟེན་རྒྱུ་འབྲས་རྩོལ་བ་མཐར་འབྱིན་པས། །ཡང་དག་སྙིང་པོ་མིང་མེད་རྒྱང་དུ་འཕར། །ཅང་མེད་ཅིར་ཡང་སྣང་བའི་རྐྱེན་བྱས་ནས། །རང་རང་འདོད་པའི་དོན་ལ་ཞེན་པ་ཡིས། །ཡང་དག་དོན་ལས་འཁྲུལ་པས་རྟོག་པར་བཟུང་། །ཀུན་ཏུ་བརྟགས་པའི་མ་རིག་པ་ཞེས་བྱ། །ལོག་རྟོགས་ཁམས་གསུམ་སེམས་ཅན་ཐམས་ཅད་ནི། །དུས་གསུམ་གཉིས་འཛིན་ནད་ཀྱིས་རབ་གཟིར་ནས། ཡུན་རིང་འཁོར་བའི་གནས་སུ་སྡུག་བསྔལ་མྱངས། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། སེམས་ཅན་གྱི་འཁྲུལ་ཚུལ་བསྟན་པའི་ལེའུ་སྟེ་གསུམ་པའོ།། །།དེ་ནས་རང་གསལ་སེམས་དཔའ་རྡོ་རྗེ་དེས། །བློ་འདས་གསང་བདག་སྟོན་པ་ལ་ཞུས་པ། །དེ་ལྟར་མ་རིག་འཁོར་བའི་སེམས་ཅན་རྣམས། །འཁྲུལ་ཚུལ་འཁོར་བའི་ཉེས་པ་དེ་ལྟར་ན། །ཡང་དག་སངས་རྒྱས་ངོ་བོ་འབྱུང་ཚུལ་གང་། །ཞེས་གསོལ་པས། བློ་འདས་གསང་བདག་སྟོན་པས་བཀའ་སྩལ་པ། །མ་བྱུང་མ་སྐྱེས་ཐོག་ ― DNG001_Page_0219 ―
[མ་དཔེ་གཟིགས་ན་འདིར་གནོན།]
མའི་སྔོན་རོལ་ན། །མིང་མེད་མཉམ་ཉིད་ཕྱོགས་ལྷུང་མེད་པ་ལས། །རྩལ་གྱི་ཡན་ལག་རྟོགས་པའི་ཟེར་འཕྲོས་ཀྱང་། །འཕྲོ་ས་མ་རྙེད་གཞི་ཡི་ཀློང་དུ་ཐིམ། །གཞི་ཉིད་ངོ་ཤེས་རྟོག་པའི་གདེངས་ལྡན་པས། །སྔོན་ཐོག་གཞི་ཡི་སངས་རྒྱས་ཞེས་བྱའོ། །དཔེར་ན་ག་པུར་གཞི་ལ་གཉིས་མེད་ཀྱང་། །ཚ་གྲང་རྐྱེན་གྱིས་སྨན་དུག་གཉིས་སུ་སྣང་། །གྲང་བའི་དུག་ཏུ་ངོ་ཤེས་ཟ་མི་སྲིད། །དེ་བཞིན་གཞི་ཡི་ངང་ལས་ཀུན་འབྱུང་བས། །རྟོགས་མ་རྟོགས་ཀྱིས་འཁོར་འདས་གཉིས་སྣང་ཡང་། །མ་རྟོགས་འཁོར་བ་རྟོགས་པས་གཞི་ཤེས་ནས། །རྟོགས་པའི་གདེངས་ལྡན་འཁོར་བར་འཁྲུལ་མི་སྲིད། །དེས་ན་སྤྱི་གཞི་རྒྱ་ཆད་མེད་ན་ཡང་། །དེ་ཉིད་ངོ་ཤེས་སངས་རྒྱས་ཞེས་བྱ་སྟེ། །མ་བུ་དབྱེར་མེད་ཡེ་སངས་རྒྱས་པའོ། །དེ་ལས་སྣང་བ་གསུམ་གྱི་དཀྱིལ་འཁོར་ནས། །རྩལ་ཟེར་བསྟན་པ་གསུམ་གྱི་སྐུར་སྣང་བས། །འདོད་པའི་འབྲས་བུ་འཆར་གཞི་འདི་བསྟན་ཏོ། །གསལ་བྱེད་མིང་མེད་རིན་ཆེན་སྒྲོན་མ་འདི། །སྣང་ཚུལ་སྐུ་གསུམ་འགྲོ་བ་ཀུན་དོན་དུ། །འཛད་པ་མེད་པའི་ཐུགས་རྗེ་ཆེན་པོར་སྣང་། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། སངས་རྒྱས་ཀྱི་འབྱུང་ཚུལ་གཏན་ལ་འབེབས་པའི་ལེའུ་སྟེ་བཞི་པའོ།། །།དེ་ནས་སེམས་དཔའ་རྡོ་རྗེས་ཡང་ཞུས་པ། །སྐུ་གསུམ་རྒྱུ་དང་རང་བཞིན་མཚན་ཉིད་དང་། །གཞི་དང་གནས་དང་གདུལ་བྱའི་ཞིང་ཁམས་དང་། །བསྟན་པ་གསུང་ཚུལ་བརྒྱུད་པ་དགོས་ཆེད་གང་། །ཞེས་ཞུས་པས། བློ་འདས་གསང་བདག་སྟོན་པས་བཀའ་སྩལ་པ། །ཆོས་སྐུའི་རྒྱུ་ནི་ཀུན་གཞིའི་རྣམ་ཤེས་ཏེ། །ལོངས་སྐུ་ཡིད་ཀྱི་རྣམ་པར་ཤེས་ལས་བྱུང་། །སྤྲུལ་སྐུ་སྒོ་ལྔའི་རྣམ་ཤེས་དེ་ལས་སོ། །ཆོས་སྐུའི་རང་བཞིན་སྙིང་པོ་སྐྱེ་བ་མེད། །ལོངས་སྐུའི་རང་བཞིན་འགག་མེད་གཡོ་བ་མེད། །སྤྲུལ་སྐུ་གཉིས་མེད་རྒྱུན་པར་བཞུགས་པའོ། །ཆོས་སྐུའི་མཚན་ཉིད་ནམ་མཁའ་ལྟ་བུ་ལ། །ལོངས་སྐུ་སྤྲུལ་སྐུ་འཇའ་ཚོན་ཆུ་ཟླ་འདྲ། །ཆོས་སྐུའི་གནས་ནི་དབྱིངས་ཉིད་རྣམ་པར་དག །ལོངས་སྐུ་འོག་མིན་སྤྲུལ་སྐུ་འཛམ་གླིང་ཀུན། །ཆོས་སྐུའི་གཞི་ནི་སྟོང་ཉིད་ཡེ་ཤེས་ལ། །ལོངས་སྐུའི་གཞི་ནི་ ― DNG001_Page_0220 ―
[མ་དཔེ་གཟིགས་ན་འདིར་གནོན།]
མཉམ་ཉིད་ཡེ་ཤེས་ཏེ། །སོ་སོར་རྟོག་དང་ནན་ཏན་སྤྲུལ་སྐུའི་གཞི། །ཆོས་སྐུའི་གདུལ་བྱ་སྐུ་གསུང་ཐུགས་སྤྲུལ་ལ། །རང་རྒྱུད་འདྲེལ་པའི་འཁོར་རྣམས་འདུལ་བར་བྱེད། །ལོངས་སྐུའི་གདུལ་བྱ་ཕྱི་ནང་གསང་གསུམ་ལ། །དོན་གྱིས་གཅིག་པའི་འཁོར་རྣམས་འདུལ་བར་བྱེད། །སྤྲུལ་སྐུ་ཕྱི་འཁོར་ནང་འཁོར་གསུམ་ལས་ནི། །འདོད་པས་འདུས་པའི་འཁོར་རྣམས་འདུལ་བར་བྱེད། །ཆོས་སྐུའི་ཞིང་ཁམས་ནམ་མཁའི་མཐས་གཏུགས་པ། །ལོངས་སྐུའི་ཞིང་ཁམས་འོག་མིན་གནས་ཐམས་ཅད། །འཛམ་གླིང་བྱེ་བ་ཕྲག་བརྒྱར་སྤྲུལ་སྐུའོ། །ཆོས་སྐུའི་བསྟན་པ་བསྐྱེད་རྫོགས་རྣམ་གསུམ་སྟེ། །ལོངས་སྐུའི་བསྟན་པ་ཕྱི་རྒྱུད་སྡེ་གསུམ་ཡིན། །སྤྲུལ་སྐུའི་བསྟན་པ་མཚན་ཉིད་རྣམ་གསུམ་མོ། །ཆོས་སྐུས་བྱིན་རླབས་ལོངས་སྐུའི་ངོ་བོས་བཤད། །སྤྲུལ་སྐུས་ཚིག་གི་སྡེབས་ཀྱིས་འཆད་པར་བྱེད། །ཆོས་སྐུས་དགོངས་པ་ལོངས་སྐུས་རིག་པས་བརྒྱུད། །སྤྲུལ་སྐུས་རྣ་བ་ནས་ནི་རྣ་བར་རོ། །སྟོན་པ་སྐུ་གསུམ་བསྟན་པའི་དགོས་པ་ནི། །གདུལ་བྱ་དབང་པོ་རབ་འབྲིང་གསུམ་འདུལ་བའོ། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། སྐུ་གསུམ་གཏན་ལ་འབེབས་པའི་ལེའུ་སྟེ་ལྔ་པའོ།། །།རང་གསལ་རྡོ་རྗེ་སེམས་དཔས་ཡང་ཞུས་པ། །མིང་མེད་མཐའ་འདས་སྟོན་པ་གསང་བའི་བདག །ཡང་ཏི་ལ་ཤན་རིན་ཆེན་སྒྲོན་མ་འདི། །སྐུ་གསུམ་བསྟན་པ་གསུམ་གྱིས་གསུངས་མ་གསུངས། །གསུངས་ན་ཐེག་པའི་ཆོས་དང་ཁྱད་པར་གང་། །མ་གསུངས་སྟོན་པས་བསྟན་པ་གང་ཅི་ཞིག །ཅེས་ཞུས་པ་དང་། བློ་འདས་གསང་བདག་སྟོན་པས་བཀའ་སྩལ་པ། །མ་གཡོས་མཉམ་ཉིད་མིང་མེད་བློ་འདས་ལས། །ཀུན་འབྱུང་རིམ་བརྒྱུད་འཁོར་ལོ་གསུམ་རིམ་གྱིས། །གསལ་བའི་རྣམ་པ་གཅིག་ཏུ་ཤར་ནས་ནི། །གསལ་བའི་འོད་ལས་ཁ་དོག་རྣམ་པ་ལྔ། །མེད་ལས་ཡོད་པར་བཟུང་བས་རིགས་དྲུག་བྱུང་། །མི་ཟད་གཏེར་མཛོད་ཀུན་འབྱུང་རིན་པོ་ཆེ། །སྐུ་ཡི་ཀློང་ནས་རང་བཞིན་སྣང་བ་གསུམ། ། ― DNG001_Page_0221 ―
[མ་དཔེ་གཟིགས་ན་འདིར་གནོན།]
སྟོན་པ་རྣམ་གསུམ་ངོ་བོར་ཤར་ནས་ནི། །མོས་པ་ཐ་དད་ཐུགས་རྗེས་དྲང་བའི་ཕྱིར། །ཐབས་ཀྱི་བྱེ་བྲག་ཐ་དད་བསམ་ཡས་པ། །རྒྱུ་འབྲས་རིམ་དགུས་བསྡུས་པའི་ཆོས་རྣམས་ནི། །སྣང་ཚུལ་སྟོན་པ་སྐུ་གསུམ་རང་བྱུང་ནས། །སྙིང་པོ་རྟོགས་པར་བྱེད་པའི་ཐབས་སུ་བསྟན། །མིང་མེད་བློ་འདས་གྲུབ་པའི་མཐའ་བརླག་པའི། །སྙིང་པོ་ངེས་དོན་བླ་མེད་ཡང་ཏི་འདི། །སྐུ་གསུམ་སྟོན་པའི་བསྟན་པ་མ་ཡིན་ཏེ། །བློ་ཆོས་མཚན་མས་གྲོལ་བར་མི་སྟོན་པས། །ཆོས་འདས་ལ་བཟླ་ཆེན་པོར་ང་ཡིས་བཤད། །སྐུ་གསུམ་སྟོན་པའི་བསྟན་པར་བཅས་པ་ཅན། །མིང་མེད་གཏིང་མཐའ་ཡས་ལ་མུ་མཐའ་གྲོལ། །གྲུབ་མཐའི་འདོད་པ་གྲོལ་བས་ཁྱད་པར་འཕགས། །དགག་བསྒྲུབ་གཉིས་འཛིན་མཐའ་སྟོང་ངོ་མཚར་ཆེ། །མཚོན་བརྗོད་བློ་ཡི་ཡུལ་དུ་མ་གྱུར་ཀྱང་། །ཚིག་གི་སྒྲོན་མས་བློ་ལྡན་རྣམས་ལ་བསྟན། །ཅེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། ཆོས་དང་ཐེག་པ་ལས་འདས་པར་ལ་བཟླ་བའི་ལེའུ་སྟེ་དྲུག་པའོ།། །།དེ་ནས་རང་གསལ་རྡོ་རྗེ་སེམས་དཔའ་དེས། །གསང་བ་དོན་གྱི་སྟོན་པ་ལ་ཞུས་པ། །ཐེག་པའི་ཆོས་རྣམས་ལ་བཟླ་ཤན་དབྱེའི་ཕྱིར། །ཀུན་བརྟགས་རིམ་དགུའི་འདོད་པ་ཇི་ལྟ་བུ། །དེ་ལས་ཡང་ཏི་ཁྱད་པར་གང་གིས་འཕགས། །ཞེས་ཞུས་པས། བློ་འདས་སྟོན་པས་འཁོར་ལ་བཀའ་སྩལ་པ། །ཐེག་པ་རྣམས་ཀྱི་འདོད་པ་དུ་མ་རྣམས། །བློ་ཡི་སྤྲོས་པས་བཅད་ཕྱིར་བསྟན་པར་བྱ། །ཉན་ཐོས་རང་རྒྱལ་བྱང་ཆུབ་སེམས་དཔའ་གསུམ། །བདེན་བཞི་རྟེན་འདྲེལ་བདེན་གཉིས་སྒོ་ནས་འཇུག །ཀྲི་ཡ་ཨུ་པ་ཡ་དང་ཡོ་ག་གསུམ། །དག་པ་གསུམ་དང་ཕྱག་རྒྱ་བཞི་ནས་འཇུག །ནང་པ་བསྐྱེད་རྫོགས་གསུམ་གྱི་འཇུག་སྒོ་ནི། །ཏིང་འཛིན་དབྱིངས་དང་ཡེ་ཤེས་བཀའ་ཚོགས་བཞི། །དེ་ལྟར་ཐེག་པའི་རིམ་པ་འདོད་པ་ལྟར། །ཆེད་དུ་འཇུག་པའི་མིང་མེད་མུ་མཐའ་སྟོངས། །འཇུག་སྒོ་མི་དམིགས་མིང་མེད་མུ་མཐའ་སྟོངས། །དེ་ལྟར་གཉིས་ཀ་མིང་མེད་མུ་མཐའ་སྟོངས། །གཉིས་མེད་ཉིད་ ― DNG001_Page_0222 ―
[མ་དཔེ་གཟིགས་ན་འདིར་གནོན།]
ཀྱང་མིང་མེད་མུ་མཐའ་སྟོངས། །ཉན་ཐོས་རང་རྒྱལ་ཉིས་བརྒྱ་ལྔ་བཅུ་བསྲུང་། །བྱང་ཆུབ་སེམས་དཔའི་སྡོམ་པ་ཉི་ཤུ་སྟེ། །ཀྲི་ཡས་རྩ་བ་ཡན་ལག་ཉིས་སྡོམ་བརྒྱད། །ཡོ་གས་རྩ་བ་ཡན་ལག་ཉིས་སྡོམ་བཅུ། །རྣལ་འབྱོར་ཆེན་པོས་ཉིས་སྡོམ་ཉི་ཤུ་བརྒྱད། །ཨ་ནུས་དམིགས་པ་བཞི་ཡི་དམ་ཚིག་བསྲུང་། །ཨ་ཏིས་དོན་གྱི་དམ་ཚིག་རྣམ་བཞི་བསྲུང་། །དེ་ལྟར་རིམ་པར་བསྟན་པ་ཐམས་ཅད་ནི། །བསྲུང་བྱ་སྲུང་བྱེད་བདག་འཛིན་མ་ལོག་པས། །བསྲུང་ཉམས་རྟོག་པའི་ནད་ཀྱིས་ཚིག་པར་འགྱུར། །ཡང་ཏི་རྒྱུད་ཆེན་རིན་ཆེན་སྒྲོན་མ་འདི། །དེ་ལྟར་བསྲུང་བ་ཆེད་དུ་མི་འགེག་སྟེ། །ཆེད་དུ་བསྲུང་བ་བསྒྲུབ་པ་མི་བྱེད་པས། །དགག་བསྒྲུབ་གཉིས་མེད་མཐའ་སྟོང་སྙིང་པོ་ལ། །གཉིས་མེད་ཉིད་ཀྱང་མིང་མེད་མུ་མཐའ་སྟོངས། །སྤྱོད་པ་ཉན་ཐོས་རང་རྒྱལ་བྱང་སེམས་གསུམ། །ཡོན་ཏན་བཅུ་གཉིས་རྫུ་འཕྲུལ་ཡ་མ་ཟུང་། །ཕ་རོལ་ཕྱིན་དྲུག་གཞན་གྱི་དོན་དུ་སྤྱོད། །གྲི་ཡ་ཨུ་པ་ཡ་དང་ཡོ་ག་གསུམ། །གཙང་སྦྲ་ཕྲིན་ལས་བཞི་དང་ཆོ་འཕྲུལ་བཞི། །མ་ཧཱ་ཨ་ནུ་ཨ་ཏི་ནང་པ་གསུམ། །སྦྱོར་སྒྲོལ་རྫོགས་ལོངས་མ་བཅོས་ངང་ལ་སྤྱོད། །དེ་ལྟར་རིམ་པར་སྤྱོད་པའི་རྣམ་གྲངས་རྣམས། །མ་རྟོགས་བློ་ཅན་དྲང་བའི་དོན་དུ་བསྟན། །མིང་མེད་མ་རྟོགས་ཇི་ལྟར་སྤྱད་ཀྱང་འཆིང་། །རྩོལ་བསྒྲུབ་བླང་དོར་ནད་ཀྱིས་རང་ཚི་ཆད། །ཡང་ཏི་ལ་ཤན་རིན་ཆེན་སྒྲོན་མ་འདི། །དེ་ལྟར་སྤྱོད་པའི་མིང་མེད་མུ་མཐའ་སྟོངས། །སྤྱོད་པ་འགག་པའི་མིང་མེད་མུ་མཐའ་སྟོངས། །དགག་བསྒྲུབ་གཉིས་ཀའི་མིང་མེད་མུ་མཐའ་སྟོངས། །གཉིས་མེད་ཉིད་ཀྱང་མིང་མེད་མུ་མཐའ་སྟོངས། །སྒོམ་པ་ཉན་ཐོས་རང་རྒྱལ་བྱང་སེམས་གསུམ། །ཀེང་རུས་ཚོལ་བས་དབང་པོའི་སྒོ་འགེགས་པ། །རྟེན་འདྲེལ་ལུགས་འབྱུང་ལུགས་ལས་བཟློག་པ་དང་། །མཉམ་གཞག་རྗེས་ཐོབ་རྟོག་བཅས་རྟོག་མེད་བསྒོམ། །གསང་སྔགས་ཕྱི་པ་ཀྲི་ཨུ་ཡོ་ག་གསུམ། །ཡན་ལག་བཅུ་གཅིག་བྱང་ཆུབ་ལྔ་རིམ་གྱིས། །རིགས་གསུམ་རིགས་བཞི་རིགས་ ― DNG001_Page_0223 ―
[མ་དཔེ་གཟིགས་ན་འདིར་གནོན།]
ལྔའི་དཀྱིལ་འཁོར་བསྒོམ། །ནང་པ་མ་ཧཱ་ཨ་ནུ་ཨ་ཏི་གསུམ། །མ་ཧཱས་ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་དལ་དུ་སྒོམ་པར་བྱེད། །ཨ་ནུས་ཆོ་ག་ཡན་ལག་རྣམ་གསུམ་གྱིས། །དམ་ཚིག་ཡེ་ཤེས་གཉིས་མེད་སྒོམ་པར་བྱེད། །ཨ་ཏིས་བསྒོམ་དུ་ཡོད་མེད་རྣམ་པ་གཉིས། །བསྒོམ་ཡོད་འགྲོ་བ་གསུམ་གྱི་ལམ་བསྡོམས་ཤིང་། །སྐྱོན་ཅན་རྣམ་པ་གསུམ་གྱི་འཕྲང་བསལ་ནས། །དྲན་རྟོག་ཀུན་བྲལ་ལྟ་བའི་ངང་ལ་འཇོག །བསྒོམ་མེད་འཁོར་འདས་གཉིས་མེད་ཆོས་རྣམས་ཀུན། །རང་བྱུང་ཡེ་ཤེས་ཆོས་ཉིད་རང་ཡིན་པས། །དེ་ལ་བསྒོམ་བྱ་སྒོམ་བྱེད་གཉིས་མེད་དོ། །ཅི་ཡང་བསྒོམ་དུ་མེད་པར་རྫོགས་པར་འདོད། །སྙིང་པོ་ངེས་དོན་བླ་མེད་ཡང་ཏི་འདིར། །གཉིས་འཛིན་བློས་བྱས་བསྒོམ་པ་ངས་མ་བསྟན། །བསྒོམ་ཡོད་བསྒོམ་མེད་གང་ཡང་བློ་རྟོག་སྟེ། །བསྒོམ་པའི་མིང་དུ་བཏགས་པས་བཅིངས་པ་ཡིན། །ཅང་མེད་མ་ཡིན་ཀློང་དུ་ཅིར་སྣང་གི། །ཡན་ལག་བུ་དང་ཆོས་ཉིད་ངོ་སྤྲོད་དེ། །འགྱུ་མེད་ངང་དུ་རང་ཉིད་རང་ཐིམ་པས། །མ་བསྒོམས་དྲན་བསམ་སྐྱེ་མེད་སྙིང་པོའི་དོན། །གང་ཡང་རང་གྲོལ་འཛིན་བྲལ་ངོ་བོ་ཉིད། །ཆགས་བྲལ་མུ་མེད་གཏིང་ཡངས་སྙིང་པོ་འདི། །རྩོལ་བསྒྲུབ་གཉིས་འཛིན་བློ་ཡིས་རྟོགས་མི་འགྱུར། །ཤེས་མེད་གསལ་བའི་ངོ་བོར་འཁྲུལ་སྣང་དག །ཡིད་གཉིས་མཐའ་སྟོང་བརྗོད་མེད་གསུང་གིས་ནི། །བློ་འདས་གཏིང་ཡངས་གསང་བདག་དགོངས་པ་སྟོན། །སྙིང་པོ་མཐའ་སྟོངས་རིན་ཆེན་སྒྲོན་མ་འདིར། །བསྒོམ་ཡོད་བསྒོམ་མེད་མི་འདོད་མུ་མཐའ་སྟོངས། །གཉིས་ཀ་ཆེད་དུ་མི་འགག་མུ་མཐའ་སྟོངས། །དགག་བསྒྲུབ་གཉིས་མེད་མི་བསྒྲུབ་མུ་མཐའ་སྟོངས། །སྟོངས་དང་མི་སྟོངས་མིང་མེད་མུ་མཐའ་སྟོངས། །ལྟ་བ་ཐེག་པ་ཆུང་ངུ་ཉན་ཐོས་པས། །ཕྱི་ཡི་ཡུལ་དང་སེམས་ཉིད་སྣང་བ་ལ། །སེམས་ནི་བདག་མེད་ཡུལ་ནི་ཕྲ་རགས་རྡུལ། །རང་རྒྱལ་ཡུལ་གྱི་རྒྱུ་ནི་སྣང་བ་ལ། །སེམས་ནི་རྣམ་པར་རིག་བྱེད་མ་ཡིན་ནོ། །སེམས་ཙམ་ཡུལ་གྱི་རྣམ་པ་སེམས་ཡིན་ཞིང་། །སེམས་ཀྱི་ངོ་བོ་རང་རིག་རང་གསལ་ ― DNG001_Page_0224 ―
[མ་དཔེ་གཟིགས་ན་འདིར་གནོན།]
འདོད། །ཡུལ་གྱི་རྣམ་པ་ཅིར་སྣང་བརྫུན་པ་ལ། །སེམས་ནི་རིག་པའི་ངོ་བོ་བདེན་པར་འདོད། །དབུ་མས་བདེན་པ་གཉིས་སུ་ཕྱེ་ནས་ནི། །ཡུལ་ནི་ཀུན་རྫོབ་འཁྲུལ་པའི་སྣང་བ་ལ། །སེམས་ནི་དོན་དམ་སྤྲོས་དང་བྲལ་བར་བལྟ། །ཀྲི་ཡས་ཀུན་རྫོབ་སྣང་བ་རིགས་གསུམ་ལྷ། །དོན་དམ་དག་པའི་ཆོས་ཉིད་དུ་བལྟའོ། །ཨུ་པས་རིགས་བཞི་དལ་དང་སྐྱེ་འགག་མེད། །ཡོ་གས་རིགས་ལྔ་སྐྱེ་འགག་གཉིས་མེད་ལྟ། །མ་ཧཱས་སྣང་སྟོང་ཐབས་ཤེས་གཉིས་མེད་ལ། །ཨ་ནུས་རྒྱུ་འབྲས་དབྱིངས་དང་ཡེ་ཤེས་ལྟ། །ཨ་ཏིས་ཀ་དག་ལྷུན་གྲུབ་ངེས་མེད་ལྟ། །མིང་མེད་གཏིང་མཐའ་ཡས་པའི་ངོ་བོ་ལ། །དེ་ལྟར་ལྟ་བར་མིང་དུ་བཏགས་པས་ནོར། །ལྟ་བ་མ་སྐྱེས་ལྟ་བ་མ་འགགས་ཏེ། །ལྟ་བ་གཉིས་མེད་ལྟ་བ་རང་སར་གྲོལ། །ང་ཡི་ཡང་ཏི་རིན་ཆེན་སྒྲོན་མ་འདིར། །ཐེག་དགུའི་ལྟ་བ་མི་བསྒྲུབ་མུ་མཐའ་སྟོངས། །ལྟ་བ་ཆེད་དུ་མི་འགེག་མུ་མཐའ་སྟོངས། །དགག་བསྒྲུབ་གཉིས་སུ་མིང་མེད་མུ་མཐའ་སྟོངས། །གཉིས་མེད་མཐའ་གྲོལ་མིང་མེད་མུ་མཐའ་སྟོངས། །འབྲས་བུ་མཚན་ཉིད་སྡེ་གསུམ་ཐེག་པ་ཡིས། །དགྲ་བཅོམ་བསེ་རུ་སྐུ་གཞི་ཐོབ་པར་འདོད། །ཕྱི་པའི་སྔགས་ཀྱིས་ལོངས་སྐུ་ཞི་བའི་སྐུ། །མ་ཧཱས་སྐུ་ལྔ་ཡེ་ཤེས་ལྔ་བསྒྲུབ་ཅིང་། །ཨ་ནུས་དབྱིངས་གཅིག་ཡེ་ཤེས་གཅིག་བསྒྲུབ་དང་། །ཨ་ཏིས་སྐུ་གཅིག་ཡེ་ཤེས་གཅིག་ཏུ་བསྒྲུབ། །དེ་ལྟར་བློས་བཏགས་ཐེག་པའི་རིམ་པ་ཡི། །ཐོབ་བྱ་འཐོབ་བྱེད་རང་སར་དག་པ་ཡིས། །ཐིག་ལེ་སྤྱི་བརྡོལ་གཏིང་མཐའ་མ་རྟོགས་པས། །འབྲས་བུ་སངས་རྒྱས་མིང་དུ་བཏགས་པས་ཕུང་། །བསྒྲུབ་བྱ་སྒྲུབ་བྱེད་གཉིས་འཛིན་སྐྱེས་པས་བརླགས། །ཡང་ཏི་ལ་ཤན་རིན་ཆེན་སྒྲོན་མ་འདིར། །འཁོར་འདས་བླང་དོར་མ་གྲུབ་མུ་མཐའ་སྟོངས། །བླང་དོར་གཉིས་པོ་མི་འགེག་མུ་མཐའ་སྟོངས། །བླང་དོར་གཉིས་མེད་མི་འདོད་མུ་མཐའ་སྟོངས། །བླང་དོར་གཉིས་མེད་མི་འགོག་མུ་མཐའ་སྟོངས། །དེ་ལྟར་སྣང་སྲིད་འཁོར་འདས་ཆོས་རྣམས་ལ། །ཆེད་དུ་བསྒྲུབ་དང་ཆེད་དུ་འགེགས་ ― DNG001_Page_0225 ―
[མ་དཔེ་གཟིགས་ན་འདིར་གནོན།]
པ་དང་། །དགག་བསྒྲུབ་གཉིས་ཀ་གཉིས་མེད་གང་གི་ཡང་། །མིང་མེད་མུ་མཐའ་སྟོངས་པ་གནས་ཀྱི་རྫོང་། །གཉིས་འཛིན་མཚན་མའི་ཆོས་ལ་བསྐོར་བར་གྱིས། །རིམ་དགུ་བློས་བཏགས་ཐེག་པའི་རིམ་པ་ལས། །ངོ་བོ་ཉིད་ཀྱིས་འཕགས་པ་ངོ་མཚར་ཆེ། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། ཐེག་པའི་རིམ་པ་ལས་ཁྱད་པར་འཕགས་པའི་རྫོང་བཅའ་བའི་ལེའུ་སྟེ་བདུན་པའོ།། །།དེ་ནས་རང་གསལ་སེམས་དཔའ་རྡོ་རྗེ་དེས། །བློ་འདས་གསང་བདག་སྟོན་པ་ལ་ཞུས་པ། །རྒྱུད་ཅེས་བྱ་བའི་རང་བཞིན་ཇི་ལྟ་བུ། །རིན་ཆེན་སྒྲོན་མ་འདི་ཉིད་གང་གི་རྒྱུད། །དེ་ཡིས་དགོས་པ་ཇི་ཞིག་སྒྲུབ་པར་བྱེད། །ཅེས་ཞུས་པས། །གསང་བདག་སྟོན་པས་འཁོར་ལ་བཀའ་སྩལ་པ། །རྒྱུད་ནི་དངོས་པོ་ལྔ་དང་ལྡང་ཚད་བརྒྱད། །ངེས་ཚིག་དགོངས་པའི་གཞི་དང་དབྱེ་བའི་དོན། །མཐུན་པའི་དཔེ་དང་དགོས་པའི་གཞི་བསྟན་པའོ། །དངོས་པོ་ལྔ་ནི་ངོ་བོ་ངེས་ཚིག་དང་། །དབྱེ་བ་ཕན་ཡོན་དགོས་པ་དང་ལྔའོ། །ལྡང་ཚད་དབང་དང་དམ་ཚིག་འདྲེལ་པ་དང་། །ཐབས་དང་ཤེས་རབ་ལྟ་བ་སྤྱོད་པ་དང་། །འབྲས་བུ་མཆོག་དང་ཐུན་མོང་འདྲེལ་པའོ། །འདྲེལ་དང་མ་ཚད་མེད་པས་རྒྱུད་ཅེས་བྱ། །གདུལ་དཀའ་ཟབ་ཅིང་རྒྱ་ཆེས་འདུལ་བར་དགོངས། །དབྱེ་ན་ཚིག་དང་དོན་དང་གཉིས་མེད་རྒྱུད། །མཐུན་དཔེ་ཟ་འོག་གུར་ཁྱིམ་ཐགས་དང་འདྲ། །དགོས་པའི་གཞི་ནི་མྱུར་དུ་དོན་སྒྲུབ་བྱེད། །དེ་ཡང་ཡངས་དང་གསལ་དང་ཟབ་པ་དང་། །དགོས་འབྱུང་ཐམས་ཅད་ཡོངས་རྫོགས་རྒྱུད་ལྔ་ལས། །ང་ཡི་ཡང་ཏི་རིན་ཆེན་སྒྲོན་མ་འདི། །ཐམས་ཅད་ཡོངས་རྫོགས་རྒྱ་ཆད་མེད་པའི་རྒྱུད། །འདི་ཡི་དགོས་པ་ཐེག་པ་རིམ་དགུ་ཡི། །ཀུན་བརྟགས་མཐར་འཛིན་ཐམས་ཅད་སེལ་བར་བྱེད། །མིང་མེད་མཐའ་སྟོངས་ཆེན་པོར་ཡོངས་སུ་གྲོལ། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། རྒྱུད་ཀྱི་དོན་གཏན་ལ་ཕབ་པའི་ལེའུ་སྟེ་བརྒྱད་པའོ།། །།དེ་ནས་རང་ ― DNG001_Page_0226 ―
[མ་དཔེ་གཟིགས་ན་འདིར་གནོན།]
གསལ་སེམས་དཔའ་རྡོ་རྗེ་དེས། །བློ་འདས་གསང་བདག་སྟོན་པ་ལ་ཞུས་པ། །མིང་མེད་མཐའ་སྟོངས་དོན་གྱི་ངོ་བོ་ལ། །དབང་དང་འཇུག་སྒོ་ལ་སོགས་མིང་མེད་ཀྱང་། །ཡོངས་རྫོགས་རྒྱ་ཆད་མེད་པར་སྟོན་པའི་ཕྱིར། །ཡེ་རྫོགས་དབང་གི་རྒྱལ་པོ་ཇི་ལྟར་ལགས། །ཞེས་ཞུས་པས། བློ་འདས་སྟོན་པས་འཁོར་ལ་བཀའ་སྩལ་པ། །དབང་ལ་ཐུན་མོང་ཁྱད་པར་གཉིས་སུ་བསྟན། །ཐུན་མོང་དབང་ལ་རྣམ་པ་བཞི་ཡིན་ཏེ། །ལྷ་དབང་ལུས་ལ་བསྐུར་བ་བུམ་པའི་དབང་། །རྫས་དབང་ངག་ལ་བསྐུར་བ་གསང་བའི་དབང་། །བདེ་བ་རྒྱུད་ལ་སྐྱེས་པ་ཤེས་རབ་དབང་། །དེ་ཉིད་རང་ངོ་སྤྲད་པ་ཚིག་དབང་སྟེ། །བསྐུར་ཐབས་སྤྲོས་པའི་མཚན་མ་ལ་བརྟེན་ནས། །དགོས་པ་ལུས་ངག་ཡིད་གསུམ་དག་པར་བྱེད། །འབྲས་བུ་སྐུ་གསུམ་སངས་རྒྱས་ཐོབ་པར་འདོད། །བློ་དམན་དྲང་བའི་དོན་དུ་དེ་ཡང་བསྟན། །བསྐུར་བྱ་སྐུར་བྱེད་ཐོབ་བྱ་འཐོབ་བྱེད་དང་། །གཉིས་འཛིན་དབྱེ་བསལ་བྱུང་བས་འཁོར་བའི་ཆོས། །ཁྱད་པར་ཆོས་དབང་སེམས་ལ་བསྐུར་བ་ནི། །དབང་གི་ངོ་བོ་ངེས་ཚིག་དབྱེ་བ་དང་། །བསྐུར་ཐབས་དགོས་པ་འབྲས་བུར་བཅས་ཏེ་བསྟན། །ངོ་བོ་སེམས་ཉིད་ཡེ་ནས་སྐྱེ་བ་མེད། །མཚན་མའི་དྲི་བྲལ་མིང་མེད་མཐའ་སྟོངས་སོ། །ངེས་ཚིག་སྙིང་པོ་ཡེ་ནས་རང་དབང་རང་གིས་ཐོབ། །དབྱེ་ན་ཕྱི་ནང་གསང་བ་ཁོ་ན་ཉིད། །བསྐུར་བའི་ཐབས་ནི་རིག་པའི་རྩལ་དབང་སྟེ། །ཤེས་མེད་རང་སར་སྟོང་པ་བུམ་བའི་དབང་། །མཚོན་བརྗོད་བསྟན་དུ་མེད་པ་གསང་བའི་དབང་། །ཀུན་འབྱུང་རང་སར་གྲོལ་བ་མིང་མེད་གཏིང་ཡངས་ཏེ། །རྒྱུད་ལ་འདྲེས་པ་ཤེས་རབ་ཡེ་ཤེས་དབང་། །ཞེ་འདོད་བློ་བཏགས་མེད་པ་བརྡའ་ཡི་དབང་། །དབང་བཞི་བསྐུར་བས་དྲི་མ་བཞི་རང་དག །ཤེས་པར་འདོད་དང་མཐོང་བར་འདོད་པ་དང་། །བཟང་ངན་བླང་དོར་གཉིས་སུ་འདོད་པ་དང་། །ཞེ་འདོད་འབྲས་བུ་འདོད་པའི་དྲི་མ་དག །སྟོང་ལས་ཅིར་ཡང་གསལ་བ་བུམ་པའི་དབང་། །གསལ་ཡང་མཐོང་ཡུལ་འདས་པ་གསང་བའི་དབང་། །གསལ་དག་ཉམས་སུ་མྱོང་བ་ ― DNG001_Page_0227 ―
[མ་དཔེ་གཟིགས་ན་འདིར་གནོན།]
ཐབས་ཤེས་དབང་། །ཉམས་ལ་ཞེན་མེད་མཐའ་སྟོངས་བརྡའ་ཡི་དབང་། །དབང་བཞི་བསྐུར་བས་དྲི་མ་རྣམ་བཞི་དང་། །ལྷན་ཅིག་སྐྱེས་དང་ཀུན་ཏུ་བརྟགས་པ་དང་། །བསམ་བརྗོད་རྟོག་ཚོགས་ཞེན་པའི་མཐའ་ལས་གྲོལ། །འབྲས་བུ་བློ་དངོས་མུ་མཐའ་རང་གྲོལ་ནས། །གྲོལ་དང་མ་གྲོལ་ཉིད་ཀྱང་མཐའ་སྟོངས་ཏེ། །བསྐུར་ཐོབ་རང་སར་དག་པ་ངོ་མཚར་ཆེ། །ཡང་ཏི་རིན་ཆེན་སྒྲོན་མར་བསྟན་པ་ཡིན། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། རིག་པའི་རྩལ་དབང་བསྟན་པའི་ལེའུ་སྟེ་དགུ་པའོ།། །།དེ་ནས་རང་གསལ་སེམས་དཔའ་རྡོ་རྗེ་དེས། །སྟོན་པ་གསང་བདག་ཆེན་པོ་ལ་ཞུས་པ། །ཡང་ཏི་ལ་ཤན་རིན་ཆེན་སྒྲོན་མ་འདིའི། །རྒྱུད་ཀྱི་ལྡང་ཚད་འདྲེལ་ནས་ཇི་ལྟར་རྫོགས། །ཞེས་ཞུས་པས། བློ་འདས་སྟོན་པས་འཁོར་ལ་བཀའ་སྩལ་པ། །སྙིང་པོ་མུ་མཐའ་ཀུན་གྲོལ་དཀྱིལ་འཁོར་དུ། །འཛིན་མེད་འཇུག་པ་དབང་གི་རྒྱལ་པོ་ཡིན། །མིང་མེད་གཏིང་ཡངས་མཐའ་སྟོངས་ངོ་བོ་ལས། །རྟག་ཏུ་འདའ་བ་མེད་པ་དམ་ཚིག་ཡིན། །ཅིར་སྣང་རང་སར་གྲོལ་བ་ཐབས་ཡིན་ཏེ། །གྲོལ་བྱ་གྲོལ་བྱེད་བློ་འདས་ཤེས་རབ་ཡིན། །མིང་མེད་མཐའ་ཡིས་སྟོངས་པ་ལྟ་བ་སྟེ། །དེ་ཉིད་འདུ་འབྲལ་མེད་པ་སྤྱོད་པ་དང་། །ཡོངས་རྫོགས་འགྱུར་མེད་འབྲས་བུ་ཀུན་གྱི་མཆོག །མ་བཙལ་འགྲོ་དོན་རང་བྱུང་ཐུན་མོང་གི། །དངོས་གྲུབ་བླ་ན་མེད་པར་ང་ཡིས་བཤད། །ཐམས་ཅད་ཡོངས་རྫོགས་རིན་ཆེན་སྒྲོན་མའི་རྒྱུད། །རྩོལ་བྲལ་མིང་མེད་ཡང་ཏིའི་ངོ་བོ་འདི། །སྲོག་དང་བྲལ་བའི་ཁ་བཞིན་བསྣམ་པར་གྱིས། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། རྒྱུད་ཀྱི་ལྡང་ཚད་བརྒྱད་རྫོགས་པར་བསྟན་པའི་ལེའུ་སྟེ་བཅུ་པའོ།། །།དེ་ནས་རང་གསལ་སེམས་དཔའ་རྡོ་རྗེ་དེས། །གསང་བདག་བློ་འདས་སྟོན་པ་ལ་ཞུས་པ། །ཡང་ཏི་སེམས་ཉིད་རིན་ཆེན་སྒྲོན་མ་འདི། །རྟོགས་པའི་དོན་ལ་རྩིས་གདབ་དབྱེར་མེད་ཀྱང་། །དེ་ཉིད་མ་རྟོགས་བློ་ལ་མཚོན་པའི་ཕྱིར། །གཏིང་ཡངས་དོན་དང་རང་ངོ་ཇི་ལྟར་སྤྲད། ། ― DNG001_Page_0228 ―
[མ་དཔེ་གཟིགས་ན་འདིར་གནོན།]
ཅེས་ཞུས་པས། །བློ་འདས་དོན་གྱི་སྟོན་པས་བཀའ་སྩལ་པ། །སྟོང་ལས་ཀུན་འབྱུང་སྟོང་པར་རང་ཡལ་བའི། །མེ་ལོང་རྣམ་པ་གསུམ་གྱི་ངོ་སྤྲོད་བསྟན། །སྐལ་ལྡན་རྣམས་ཀྱི་བློ་ལ་གདགས་པར་གྱིས། །ཀུན་གཞི་ཕྱོགས་མེད་སེམས་ཀྱི་མེ་ལོང་དང་། །རིག་པ་ཅིར་ཡང་གསལ་བའི་མེ་ལོང་དང་། །གསལ་བ་རང་དྭངས་ཆོས་དབྱིངས་མེ་ལོང་ངོ་། །དང་པོ་ཀུན་གཞི་སེམས་ཀྱི་མེ་ལོང་དུ། །བདེ་བར་གཤེགས་པའི་དགོངས་པ་རང་ངོ་སྤྲད། །སྤྲད་པས་ཅང་མེད་ཅིར་ཡང་སྣང་བར་ཤེས། །དེ་ལ་སྣང་བ་གྲོལ་བའི་རྒྱ་ཡིས་གདབ། །རིག་པ་ཅིར་ཡང་གསལ་བའི་མེ་ལོང་དུ། །འཁྲུལ་པའི་རྟོག་པ་བག་ཆགས་རང་ངོ་སྤྲད། །སྤྲད་པས་མེ་ལོང་གཟུགས་བརྙན་ལྟ་བུར་རྟོགས། །དེ་ལ་གསལ་དག་རང་གྲོལ་རྒྱ་ཡིས་གདབ། །གསལ་བ་རང་དྭངས་ཆོས་དབྱིངས་མེ་ལོང་དུ། །སྣང་བའི་དངོས་པོ་ཡུལ་རྣམས་རང་ངོ་སྤྲད། །སྤྲད་པས་སྣང་ཡང་མིང་མེད་མཐའ་སྟོངས་རྟོགས། །དེ་ལ་དབྱེར་མེད་གཏིང་ཡངས་རྒྱ་ཡིས་གདབ། །དེ་ལྟར་བསྟན་པ་དེ་ཡང་མཚོན་པ་ཙམ། །སྤྲད་བྱ་སྤྲོད་བྱེད་གཉིས་དང་གཉིས་མེད་ཀྱིས། །མིང་མེད་མཐའ་སྟོངས་རང་དག་ཀློང་དུ་གྲོལ། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། མེ་ལོང་རྣམ་པ་གསུམ་དུ་རང་ངོ་སྤྲད་པའི་ལེའུ་སྟེ་བཅུ་གཅིག་པའོ།། །།དེ་ནས་རང་གསལ་སེམས་དཔའ་རྡོ་རྗེ་དེས། །གསང་བདག་དོན་གྱི་སྟོན་པ་ལ་ཞུས་པ། །ཡང་ཏི་སེམས་ཉིད་རིན་ཆེན་སྒྲོན་མ་འདིར། །ཡང་གསང་དོན་གྱི་གདམས་ངག་ལ་བཟླ་གང་། །ཞེས་ཞུས་པས། བློ་འདས་དོན་གྱི་སྟོན་པས་བཀའ་སྩལ་པ། །ལྟ་སྒོམ་སྤྱོད་པ་འབྲས་བུ་རྣམ་པ་བཞིས། །སངས་རྒྱས་དགོངས་པ་མཐའ་སྟོངས་ཀློང་དུ་བཟླ། །གཏན་ཚིགས་ཚད་མ་གསུམ་གྱིས་དེ་ཉིད་རྟོགས། །མིང་གི་འདོད་པ་ལྟ་སྒོམ་སྤྱོད་འབྲས་རྣམས། །ཐོགས་མེད་དོན་གྱི་ངང་དུ་ལ་བཟླའོ། །ཐོག་མའི་གནས་དང་ ― DNG001_Page_0229 ―
[མ་དཔེ་གཟིགས་ན་འདིར་གནོན།]
ཐ་མའི་གནད་དག་གིས། །འཁྲུལ་པ་རྩད་ནས་བཅད་ཅིང་ཉམས་སུ་བླང་། །སྙིང་པོ་གནས་ལུགས་གཞི་ཡི་འཕྲང་ཆེན་དུ། །སངས་རྒྱས་སེམས་ཅན་ཐམས་ཅད་ལ་བཟླའོ། །མཚན་ཉིད་རྣམ་པ་གསུམ་པོ་ངོ་སྤྲད་འཕྲང་། །ཕྱི་ནང་གསང་བ་རྣམ་གསུམ་ལ་བཟླའོ། །འཁྲུལ་པ་བཟློག་ཐབས་རིམ་པ་གདམས་ངག་འཕྲང་། །འགྱུ་ལུགས་གསུམ་གྱིས་དུས་མཚམས་ལ་བཟླའོ། །སྙིང་པོའི་ཆོས་འདས་ཐེག་གཅིག་སྒྲོན་མ་འདིས། །ཀུན་བརྟགས་ཐེག་པ་རིམ་དགུ་ལ་བཟླའོ། །འདོད་བྲལ་མིང་མེད་མཐའ་སྟོངས་ལྟ་བའི་མཆོག །བསམ་བྲལ་འགྱུར་མེད་གཏིང་ཡངས་སྒོམ་པའི་མཆོག །རང་ལུགས་བྱར་མེད་འཛིན་བྲལ་སྤྱོད་པའི་མཆོག །རེ་མེད་མུ་མཐའ་གྲོལ་བ་འབྲས་བུའི་མཆོག །འཁྲུལ་རྩད་ཆོད་ན་ལྟ་བའི་མིང་ཡང་མེད། །དུས་གསུམ་འགྱུ་མེད་བསྒོམ་པས་ཅི་ཞིག་བྱ། །སྙིང་པོ་མིང་མེད་མངོན་གྱུར་བསྒོམ་མི་དགོས། །འཁྲུལ་པ་བཟློག་ཐབས་མ་ཤེས་མུན་པ་འཇལ། །སྙིང་པོའི་མཐའ་སྟོངས་ཤེས་མེད་གསལ་དག་འདི། །དངོས་དང་དངོས་མེད་གཉིས་ཀ་གཉིས་མེད་ཡིན། །རིག་པ་མེད་ལ་ཇི་ལྟར་སྐྱེ་བར་འགྱུར། །བསྒོམ་དུ་མེད་པའི་དོན་ལ་ཅི་ཞིག་བསྒོམ། །བརྗོད་མེད་ངང་ལ་ཅི་ཞིག་བཤད་དུ་ཡོད། །སྙིང་པོ་མིང་མེད་རང་བཞིན་མཐོང་བ་མེད། །རྒྱུ་འབྲས་མདོ་རྒྱུད་ཐོས་བསམ་བསྒོམ་བསྒྲུབ་རྣམས། །གཞན་དག་སྤྲོ་བ་བསྐྱེད་ཕྱིར་རོལ་པར་སྤྱོད། །དོན་དུ་སྤྱོད་པ་དེ་ཉིད་འཁྲུལ་པའི་ལམ། །དབེན་པར་ལུས་ངག་བྱ་བཏང་དགོངས་པ་ལ། །ཡིད་གདུང་མ་བྱེད་གཏིང་ཡངས་ཀློང་དུ་ཞོག །འགྱུ་དྲན་སྐྱེ་མེད་སྐྱེས་ཀྱང་གང་བྱུང་ན། །ཕྱི་ནང་འཁྲུལ་པ་མཚོན་ཆེན་གཅིག་གིས་ཆོད། །དབུས་མཐའ་ཀུན་བྲལ་སྙིང་པོ་ཚིག་ལས་འདས། །མཚོན་མེད་མཐའ་སྟོངས་འགྱུ་མེད་ཀུན་གྱི་ལམ། །ཞེ་འདོད་འཛིན་པ་མེད་པ་ཐིག་ལེའི་ཀློང་། །ཡེ་སྟོང་ཡེ་བྲལ་སྒྲོ་སྐུར་མིང་དང་བྲལ། །ཀུན་ཁྱབ་རྒྱུ་དང་རྐྱེན་མེད་རྒྱ་མ་ཆད། །མི་ཟད་གཏེར་མཛོད་སྙིང་པོ་བསྟན་དུ་མེད། །ངོ་བོ་ཅིར་ཡང་མ་མཐོང་ལྟ་བ་ལ། །རྩལ་གྱི་ཡན་ལག་ལྟ་བའི་རིམ་པ་རྣམས། །རང་འདོད་སོ་སོར་སྣང་ཡང་གཅིག་ལས་མེད། །གཅིག་པོ་མ་སྐྱེས་བཅོས་མེད་ནམ་ ― DNG001_Page_0230 ―
[མ་དཔེ་གཟིགས་ན་འདིར་གནོན།]
མཁའ་འདྲ། །དབྱིབས་དང་ཁ་དོག་གང་ཡང་མ་གྲུབ་པས། །འདི་འདྲ་མཚོན་དུ་མེད་པའི་བྱང་ཆུབ་སེམས། །ལུས་ངག་ཡིད་གསུམ་རྩོལ་བྲལ་ངང་དུ་སྤྱོད། །འཁྲུལ་རྟོགས་སྐྱེས་དང་སྐྱེ་མེད་གཉིས་མེད་སྤྱོད། །མི་འགྱུར་མི་དམིགས་མཚོན་བྲལ་ངང་ལ་བསྒོམས། །འགྲོ་འོང་ཡེངས་མེད་བསྒོམ་བྱ་སྒོམ་བྱེད་མེད། །གཞན་མེད་རང་ས་སྙིང་པོའི་ཀློང་བསྒོམ་མཆོག །གཞན་ནས་ཐོབ་མེད་རང་གནས་འབྲས་བུའི་རྒྱལ། །རྒྱུ་དང་རྐྱེན་མེད་ཆོས་སྐུ་མཁའ་མཉམ་མཆོག །རང་བཞིན་ཀུན་ཁྱབ་མཚན་ཉིད་ཐམས་ཅད་མཁྱེན། །ཆོས་སྐུའི་ངོ་བོ་འདི་ཞེས་བསྟན་དུ་མེད། །ཐོབ་བྱ་འཐོབ་བྱེད་མིང་མེད་མུ་མཐའ་སྟོངས། །འཁྲུལ་ཞེན་གྲོལ་ཚེ་བདག་གཞན་ཡོད་མ་ཡིན། །ལོག་པའི་རྒྱུད་ལས་གྲོལ་བས་བདེ་ཆེན་དོན། །སྙིང་པོ་འཁྲུལ་པའི་རྐྱེན་གྱིས་རྟོགས་པར་དཀའ། །ལྡོག་ཐབས་གནད་ཀྱིས་གང་སྐྱེས་ཐད་ཀར་གསལ། །སྙིང་པོ་མ་ཡི་རྩ་བ་མཚོན་དུ་མེད། །འཁྲུལ་སྣང་རང་དྭངས་མ་བུ་ངོ་སྤྲོད་མཆོག །འཁོར་འདས་ཆོས་རྣམས་གང་ཡང་མཐོང་མེད་ལ། །འཁྲུལ་པའི་རྣམ་པར་རྟོག་པ་ཅིར་ཡང་སྣང་། །སྣང་བ་གྲོལ་བར་ཤེས་པས་བག་ཆགས་སྟོངས། །མཉམ་རྗེས་གཉིས་མེད་མཐའ་སྟོངས་སྙིང་པོ་རྟོགས། །གཉིས་བསྡུས་མཚན་མའི་མིང་མེད་མུ་མཐའ་སྟོངས། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། ཆོས་ཐམས་ཅད་ཡང་ཏིར་ལ་བཟླ་བའི་ལེའུ་སྟེ་བཅུ་གཉིས་པའོ།། །།དེ་ནས་རང་གསལ་རྡོ་རྗེ་སེམས་དཔའ་དེས། །སྟོན་པ་བློ་འདས་གསང་བདག་ལ་ཞུས་པ། །ཆོས་རྣམས་ཐམས་ཅད་སྣང་གྲོལ་ཀུན་བརླག་པར། །རྟོགས་པའི་དོན་ལ་དབྱེ་བསལ་མིང་མེད་ཀྱང་། །ཅིར་སྣང་མ་སྤངས་རྫོགས་ཕྱིར་བར་དོ་གང་། །ཞེས་ཞུས་པས། །བློ་འདས་སྟོན་པས་འཁོར་ལ་བཀའ་སྩལ་པ། །ཅང་མེད་ཅིར་སྣང་སྣང་ཚུལ་བསམ་འདས་པས། །བར་དོའི་མཚན་ཉིད་བསྟན་གྱིས་བཟུང་བར་གྱིས། ། ― DNG001_Page_0231 ―
[མ་དཔེ་གཟིགས་ན་འདིར་གནོན།]
རང་བཞིན་གནས་ལུགས་ཐོག་མའི་བར་དོ་རུ། །སངས་རྒྱས་སེམས་ཅན་གཉིས་ཀྱི་འབྱུང་གཞི་བཙལ། །རང་བཞིན་དང་ནི་རླུང་གི་བར་དོ་རུ། །རླུང་དང་འགྱུ་བ་གཉིས་ཀྱི་གྱེས་གཞི་བཙལ། །རྩལ་ཟེར་ཤེས་པ་ཕྲ་མོ་སྐྱེས་པ་ལ། །རག་པ་སྐྱེ་བའི་གཞི་མ་བཙལ་བར་བྱ། །ཡན་ལག་སྣང་ཚུལ་རིག་པའི་བར་དོ་རུ། །ཡར་མར་འཆར་སྒོ་འཁྲུལ་སྒོའི་གཞི་མ་བཙལ། །སྣང་བ་རྣམ་པ་གསུམ་གྱི་བར་དོ་རུ། །སྟོན་པ་སྐུ་གསུམ་འབྱུང་བའི་གཞི་མ་བཙལ། །ཁ་དོག་རྣམ་པ་ལྔ་ཡི་བར་དོ་རུ། །གཟུགས་བརྙན་འོད་ཀྱི་གཞི་མ་བཙལ་བར་བྱ། །འོད་ལྔ་གཟུགས་ལྔར་འཆར་བའི་བར་དོ་རུ། །རིགས་དྲུག་འཁྲུལ་པའི་གཞི་མ་བཙལ་བར་བྱ། །ཐོས་དང་བསམ་པ་ཤེས་རབ་བར་དོ་རུ། །མར་གྱི་སེམས་ཅན་འཁྲུལ་ཚུལ་རྩད་ནས་བཅད། །ད་ལྟ་ཤེས་པ་སྔ་ཕྱིའི་བར་དོ་རུ། །འཁྲུལ་པ་བཟློག་ཐབས་རྣམ་གསུམ་ཉམས་སུ་བླངས། །སྐྱེ་དང་ཤི་བ་སྲིད་པའི་བར་དོ་རུ། །སྙིང་པོ་མཐའ་གྲོལ་ཀློང་དུ་གནས་པར་གྱིས། །ཞེས་གསུངས་སོ། །རིན་ཆེན་སྒྲོན་མ་རྩ་བའི་རྒྱུད་ལས། བར་དོའི་ལེའུ་སྟེ་བཅུ་གསུམ་པའོ།། །།དེ་ནས་རང་གསལ་སེམས་དཔའ་རྡོ་རྗེ་དེས། །བློ་འདས་དོན་གྱི་སྟོན་པ་ལ་ཞུས་པ། །ཡང་ཏི་ལ་ཤན་རིན་ཆེན་སྒྲོན་མ་འདིར། །ཕྱི་རབས་གཏད་པའི་སྣོད་ཀྱི་ཁྱད་པར་གང་། །ཞེས་ཞུས་པས། གསང་བདག་སྟོན་པས་འཁོར་ལ་བཀའ་སྩལ་པ། །དགོས་འདོད་ཀུན་འབྱུང་ནམ་མཁའི་མཐའ་དང་མཉམ། །གསལ་བའི་གོ་འབྱེད་ཐམས་ཅད་ཡོངས་རྫོགས་པས། །ཐེག་པ་ལ་ཟློ་ཤན་འབྱེད་ཡང་ཏི་འདི། །ལྷ་མིའི་འཇིག་རྟེན་གནས་སུ་དར་བའི་ཚེ། །རིན་ཆེན་ལྟ་བུར་སྣོད་ལྡན་གཅིག་ལ་གཏོད། །ནམ་མཁའ་ལྟ་བུར་ཀློང་ཡངས་གཅིག་ལ་གཏོད། །ཉི་ཟླ་ལྟ་བུར་བློ་གསལ་གཅིག་ལ་གཏོད། །མ་འོངས་བསྟན་པའི་སྒྲོན་མ་བྱེད་པར་འགྱུར། །ཞེས་གསུངས་སོ། །ལྟ་བ་ལ་ཤན་ཆེན་པོའི་རིན་པོ་ཆེའི་སྒྲོན་མ་རྩ་བའི་རྒྱུད་ལས། རྒྱུད་གཏད་པའི་ རྩ་རླུང་ཐིག་ལེའི་རྒྱུད་བཤད་པ།― DNG001_Page_0232 ―
[མ་དཔེ་གཟིགས་ན་འདིར་གནོན།]
ཀུན་བཟང་རྫོགས་པའི་སངས་རྒྱས་ཀྱིས། །ཐིག་ལེ་ཉག་གཅིག་སྐུ་ལ་ཕྱག་འཚལ་ལོ། །རྩ་རླུང་ཐིག་ལེའི་རྒྱུད་བཤད་པ། །ཀྱེ་ཐོག་མ་ལྷུན་གྱིས་གྲུབ་པའི་གནས། །སྟོན་པ་ཐིག་ལེ་ཉག་གཅིག་སྐུ། །འཁོར་ནི་རང་བྱུང་ཆེན་པོ་ལ། །དུས་གསུམ་དབྱེ་བ་མེད་པའི་དུས། །བསྟན་པ་གཉིས་སྣང་མེད་པར་བཤད། །ཅེས་གསུངས་སོ། །རྩ་རླུང་ཐིག་ལེའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།ཀྱེ་གསང་བདག་རྡོ་རྗེ་སེམས་དཔའ་ཉོན། །རྩ་རླུང་ཐིག་ལེ་གཞི་ལ་གནས། །ངོ་བོ་ཐ་དད་རང་བཞིན་གཅིག །ཐུགས་རྗེའི་རོལ་པ་རང་ཤར་རོ། །ཤར་ཚུལ་སྣང་ཚུལ་གཉིས་སུ་སྣང་། །དེ་ནི་གཞི་ཡི་རང་རྩལ་ལས། །འགག་པ་མེད་པའི་རང་བྱུང་ཤར། །ཤར་བ་ཡིན་པས་ངེས་པ་མེད། །ཅེས་གསུངས་སོ། །རྩ་རླུང་ཐིག་ལེའི་རྒྱུད་ལས། གླེང་སློང་བའི་ལེའུ་སྟེ་གཉིས་པའོ།། །།རྡོ་རྗེ་སེམས་དཔའ་ཁྱོད་ཉོན་ཅིག །རང་ཤར་ཆེན་པོའི་རྩ་རླུང་ནི། །ཕྱི་རུ་ཤར་བའི་རྩ་ལྔ་དང་། །ནང་དུ་ཤར་བའི་རྩ་ལྔ་དང་། །གསང་བར་ཤར་བའི་རྩ་ལྔ་དང་། །ཡང་གསང་ཡང་ཏིའི་རྩ་ལྔ་དང་། །དེ་ཁོ་ན་ཉིད་གསང་བ་ཆེན་པོའི་རྩ་ལྔའོ། །དེ་ལས་ཕྱི་རུ་ཤར་བའི་རྩ་ལྔ་ནི། །དབྱིངས་ཀྱི་ཐིག་ལེ་ལྔ་ཡིན་ཏེ། །ཐིག་ལེ་ལྔ་ནི་སྟོང་གསལ་དུ། །སྣང་གསལ་ཆེན་པོའི་རྒྱས་གདབ་པོ། །རིག་གསལ་ངང་དུ་ངོ་འཕྲད་པས། །ཐིག་ལེ་ལྔ་ཡང་གཅིག་ཏུ་འདྲིལ། །འབྱུང་བ་ལྔ་ནི་རིག་སྟོང་གསལ། །འབྱུང་བ་ལྔ་ནི་ངོ་སྤྲད་དེ། །ས་དང་ཆུ་དང་མེ་དང་རླུང་། །མཁའ་ཁྱབ་དྭངས་པའི་ངང་དུ་ནི། །ཚོགས་དྲུག་རོལ་པའི་ངོ་སྤྲད་པས། །འདོད་ཡོན་ལྔ་དང་ཆགས་སྡང་ལྔ། །རང་ ― DNG001_Page_0233 ―
[མ་དཔེ་གཟིགས་ན་འདིར་གནོན།]
བྱུང་རང་གྲོལ་རང་ཤར་གསལ། །བདེ་གསལ་ངང་དུ་ངོ་སྤྲོད་དོ། །ཞེས་གསུངས་སོ། །རྩ་རླུང་ཐིག་ལེའི་རྒྱུད་ལས། དབྱིངས་རང་སར་གྲོལ་བའི་ལེའུ་སྟེ་གསུམ་པའོ།། །།རྡོ་རྗེ་སེམས་དཔའ་ཁྱོད་ཉོན་ཅིག །ནང་དུ་ཤར་བའི་རྩ་ལྔ་ནི། །ཡེ་ཤེས་རོལ་པའི་རྩ་ལྔ་སྟེ། །གསལ་བྱེད་ཤེས་རབ་རྒྱས་བཏབ་པས། །ནང་གི་རྩ་ལྔ་གཅིག་ཏུ་འཁྱིལ། །ཤེས་རབ་ཆེན་པོ་གཅིག་ཏུ་གསལ། །ཡེ་ཤེས་ལྔ་པོ་དབྱིངས་སུ་གྲོལ། །དབྱིངས་ལྔ་རིག་པའི་ཀློང་དུ་གྲོལ། །རང་གྲོལ་རང་ཤར་ངོ་ཤེས་པས། །དེ་ནི་རང་གྲོལ་རྣམ་ལྔ་ཡིན། །ཞེས་གསུངས་སོ། །རྩ་རླུང་ཐིག་ལེའི་རྒྱུད་ལས། ནང་རང་སར་གྲོལ་བའི་ལེའུ་སྟེ་བཞི་པའོ།། །།རྡོ་རྗེ་སེམས་དཔའ་ཁྱོད་ཉོན་ཅིག །གསང་བར་ཤར་བའི་རྩ་ལྔ་ནི། །ཐིག་ལེ་ཉག་གཅིག་རོལ་པ་ལྔ། །རང་བྱུང་ཡིན་པར་ངོ་ཤེས་པས། །སྒོམ་བསྒྲུབ་མེད་པའི་རང་ཤར་ལ། །དེ་ལྟར་སྒོམ་སྒྲུབ་བྱེད་པ་ནི། །ང་ཡི་གཞི་ལས་འཆོལ་བ་སྟེ། །ཤེས་རབ་ཆུང་བའི་གོལ་ས་ཡིན། །ལྟ་བ་རང་ཤར་ཆེན་པོ་ལ། །སྒོམ་པ་རང་གྲོལ་ཆེན་པོ་ཡིན། །སྤྱོད་པ་ཚོགས་དྲུག་ལྷུག་པ་ལ། །འབྲས་བུ་ཡུལ་སྣང་མེད་པ་ཡིན། །ཡེ་ཤེས་ཟང་ཐལ་ཆེན་པོ་ལ། །བར་དོ་མེད་པ་རང་གྲོལ་ཡིན། །ཞེས་གསུངས་སོ། །རྩ་རླུང་ཐིག་ལེའི་རྒྱུད་ལས། གསང་བ་རང་གྲོལ་གྱི་ལེའུ་སྟེ་ལྔ་པའོ།། །།རྡོ་རྗེ་སེམས་དཔའ་ཁྱོད་ཉོན་ཅིག །དེ་ཁོ་ན་ཉིད་ཀྱི་རྩ་ལྔ་ནི། གཉིས་སྣང་མེད་པའི་ཤེས་རབ་ལ། །ཐོགས་པ་མེད་པའི་ཤེས་རབ་ཀྱིས། །འགག་པ་མེད་པའི་རིག་པ་ལ། །རང་རིག་ཡེ་ཤེས་ཟང་ཐལ་དུ། །ལྷངས་ཀྱིས་ཤེས་པ་ཤེས་རབ་ཡིན། །ཞེས་གསུངས་སོ། །རྩ་རླུང་ཐིག་ལེའི་རྒྱུད་ལས། ཡང་གསང་རང་གྲོལ་གྱི་ལེའུ་སྟེ་དྲུག་པའོ།། །།རྡོ་རྗེ་སེམས་དཔའ་ཁྱོད་ཉོན་ཅིག །རྒྱས་པར་རྩ་ལ་བསམ་མི་ཁྱབ། །བསྡུ་ན་རྣམ་པ་གཉིས་སུ་འདུས། །ཆོས་རྣམས་ཚིག་གི་རྩ་དང་ནི། །ཡང་དག་དོན་ ― DNG001_Page_0234 ―
[མ་དཔེ་གཟིགས་ན་འདིར་གནོན།]
གྱི་རྩ་གཉིས་སོ། །འདི་ནི་ཡང་དག་དོན་གྱི་རྩ། །ཞེས་གསུངས་སོ། །ཀུན་ཏུ་བཟང་པོས་གསུངས་པ་ཡི། །ཡེ་ཤེས་རྩ་ཡི་རྒྱུད་ཆེན་འདི། །ཀུན་ཏུ་བཟང་པོའི་ཐུགས་ཀྱི་བཅུད། །རྡོ་རྗེ་སེམས་དཔའི་སྲོག་གི་ཐིགས་པ། །དགའ་རབ་རྡོ་རྗེའི་སྲོག་གི་འཁོར་ལོ། །སྲོག་གི་ཆན་པ། སྲོག་གི་བཅུད་ཆེན་པོ། ཐུགས་ཀྱི་རེག་ཆོད། རིག་པ་སྲོག་གི་འཁོར་ལོ་ཞེས་གསུངས་སོ། །རྩ་རླུང་གི་ལེའུ་སྟེ་བདུན་པའོ།། །།འཇམ་དཔལ་འདུས་པའི་རྒྱུད་ལས་བསྡུས་པ་རྫོགས་སོ།། །།སངས་རྒྱས་ཐིག་ལེ་ཉག་གཅིག་ལ། ཆོས་སྐུ་བརྡལ་ཁྱབ་ལ་རྟོགས་པར་བྱ་བ་དང་བཙལ་བའི་ཆོས་མེད་དེ། གང་ཟག་བློའི་ངོས་ནས་གཉིས་སུ་མེད་པར་རྟོགས་དགོས་པ་ལས། རྩ་རླུང་ཐིག་ལེའི་གདམས་པ་བཤད་པར་བྱ། དེ་ནས་གདམས་པ་ནི། རྩ་དང་རླུང་དང་ཐིག་ལེའི་གནད་གསུམ་རང་གྲོལ་དུ་ཤེས་དགོས་ཏེ། །ཐིག་ལེ་ཆེན་པོའི་རྩ་འདི་ནི་ཕྱི་ནང་གསང་བ་གསུམ་དུ་འདུས་སོ། །དེ་ལ་ཐིག་ལེ་ཕྱི་ལྟར་བཤད་པ། ཕྱི་འབྱུང་བ་ལྔ་ནི་ངོ་བོ་གསལ་ཏེ་རང་གསལ་དུ་གནས་པ་རང་བྱུང་ཡེ་ཤེས་སོ། །དེ་ནི་ཕྱི་ཡི་ཐིག་ལེའོ། །ནང་གི་ཐིག་ལེ་ནི། ངོ་བོ་རིག་པའི་ཡེ་ཤེས་རང་ཤར་ངོ་ཤེས་པའོ། །གསང་བའི་ཐིག་ལེ་ནི། བསྒོམས་པས་མ་རྙེད། མ་བསྒོམས་པས་མ་སྟོར། ཡེ་ཤེས་རང་ལས་མ་གཏོགས་པ་མེད་དེ། ཕྱི་གསལ་བ་འབྱུང་བ་ལྔ་ནི་རང་སྣང་ཆེན་པོའོ། །ནང་རིག་པའི་ཡེ་ཤེས་ཀྱི་མདངས་ཏེ། མེ་ལོང་དང་བྱད་ལྟ་བུའོ། །གཉིས་སུ་མེད་པའི་ཐིག་ལེ་ཆོས་སྐུ་བརྡལ་ཁྱབ་ཆེན་པོ་དང་། ཡེ་ཤེས་བརྡལ་ཁྱབ་གཉིས་སུ་མེད་པའོ། །ཐིག་ལེ་གསང་བ་གསུམ་པོ་འདི་རྟོགས་ཤིག །རྟོགས་པས་སངས་རྒྱས་ཀྱི་དགོངས་པ་ཁོང་དུ་ཆུད་པ་ཞེས་བྱའོ། །རླུང་ལ་ཡང་ཕྱི་ནང་གསང་བ་གསུམ་སྟེ། ཐོག་མའི་གནས་ནས་རིག་པ་བསྐྱོད་པ་གཞི་ལ་གནས་སོ། །ཕྱི་ཡི་རླུང་ནི་གླིང་བཞི་ ― DNG001_Page_0235 ―
[མ་དཔེ་གཟིགས་ན་འདིར་གནོན།]
འདེགས་པ་དང་། རང་བྱུང་དུ་བསྐྱོད་པའི་རླུང་ངོ་། །ནང་གི་རླུང་ནི་འགྲོ་དང་སྐད་འདོན་པ་དང་བསྐྱོད་པའོ། །གསང་བའི་རླུང་ནི་འགྱུ་བ་དང་སྙམ་བྱེད་དང་དབུགས་འབྱུང་བའོ། །རླུང་གསུམ་པོ་དེ་ཡང་ཡེ་ཤེས་ཀྱི་རླུང་དུ་རྟོགས་ན་སྐུ་གསུམ་ཐོབ་པོ། །རྩལ་ཡང་ཕྱི་ནང་གསང་གསུམ་སྟེ། །ཕྱི་ཡི་རྩ་ནི་ཆོས་ཉིད་རང་བྱུང་གི་རྩ་སྟེ། འོད་ལྔ་སྟེ་སྟོང་པ་རང་སྣང་དུ་ཤེས་པའོ། །ནང་གི་རྩ་ནི་རྣམ་རྟོག་རང་རིག་པའི་ཡེ་ཤེས་རང་ཤར་བ་སྟེ། རིག་པའི་ཡེ་ཤེས་སོ། །གསང་བའི་རྩ་ནི་དབུགས་དང་འགྱུ་བ་སྟོང་པ་ཉིད་ཀྱི་ཡེ་ཤེས་དབྱེར་མེད་པའི་ཆོས་སྐུ་ཟང་ཐལ་ལོ། །རྩ་དང་རླུང་དང་ཐིག་ལེ་གཏན་ལ་ཕབ་པ། སྐུ་གསུམ་ལྐོག་བཞེངས་ཀྱི་དགོངས་པ། བསྟན་མ་ཐག་ཏུ་ལྟ་སྒོམ་ལ་རག་མ་ལུས་པ་ལས་སངས་རྒྱས་ཀྱི་དགོངས་པ་སྐད་ཅིག་མ་ལ་ཐོབ་པ། ཟག་བཅས་ཕུང་པོའི་ནང་དུ། སངས་རྒྱས་ཀྱི་དགོངས་པ་དང་མཇལ་བ། ལམ་མ་བསྒྲོད་པར་རང་སར་སླེབས་པ། སྐུ་གསུམ་གྱི་དགོངས་པ་དུས་གཅིག་ལ་ཐོབ་པ། འཁོར་བའི་མངལ་ཁ་དུས་གཅིག་ལ་རྒྱས་ཐེབ་པ་ཞེས་བྱ་བའི་མན་ངག །མཛོད་ཀྱི་གདམས་པ། རྩ་རླུང་གི་ཐིག་ལེ་གཏན་ལ་ཕབ་པ། རྩ་རླུང་གི་རྩ་བ་རྫོགས་སོ།། །།དཔལ་ཀུན་བཟང་སྐུ་ལ་ཕྱག་འཚལ་ནས། །རྫོགས་ཆེན་བསྒོམ་པའི་རྒྱུད་ཞུས་པ། །ཀུན་ཏུ་བཟང་པོས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཆེ། །ཆོས་ཉིད་ལྷུན་གྲུབ་ཕོ་བྲང་དུ། །རིག་པ་འགག་མེད་འཁོར་རྣམས་ལ། །སངས་རྒྱས་སེམས་ཅན་དབྱེར་མེད་འདུས། །རང་ཤར་ཆེན་པོའི་བསྟན་པ་ལ། །བསྒོམ་པ་སྲོག་གི་སྤུ་གྲིའི་རྒྱུད། །ཞལ་ནས་རང་བྱུང་ཆེན་པོར་འཐོན། །བསྒོམ་པའི་སྲོག་ལ་རྣམ་བཞི་སྟེ། །སེམས་ཕྱོགས་ཡོངས་གྲགས་བསྒོམ་པའི་སྲོག །རྫོགས་པ་ཆེན་པོ་བསྒོམ་པའི་སྲོག །ཨ་ཏི་ཆེན་པོ་བསྒོམ་པའི་སྲོག །ཡང་ཏི་འབྲུ་གཅིག་བསྒོམ་པའི་སྲོག །ཅེས་གསུངས་སོ། །སེམས་ཕྱོགས་ཡོངས་ ― DNG001_Page_0236 ―
[མ་དཔེ་གཟིགས་ན་འདིར་གནོན།]
གྲགས་བསྒོམ་པ་ནི། །བསྒོམ་ཡོད་བསྒོམ་མེད་གཉིས་སུ་འདོད། །ཡོད་པར་འདོད་པ་རྟག་པའི་མཐའ། །མེད་པར་འདོད་པ་ཆད་པའི་མཐའ། །མཐའ་གཉིས་མུ་སྟེགས་རྟག་ཆད་དུ། །གོལ་ཕྱིར་ཡང་ཏི་ནག་པོ་བསྟེན། །རྫོགས་པ་ཆེན་པོ་བསྒོམ་པ་ན། །ཐམས་ཅད་རང་ལ་རྫོགས་པར་འདོད། །བསྒོམ་བྱ་སྐྱོན་ལ་བསྒོམ་མེད་སྐྱོན། །གཉིས་སུ་མེད་པར་འདུག་པ་ནི། །དེ་ལ་ཡེ་ཤེས་མ་ཤར་བས། །སོ་སོ་སྐྱེ་བོའི་ཁྱུ་རུ་གོལ། །ཨ་ཏི་ཆེན་པོའི་བསྒོམ་པ་ནི། །རིག་པ་རང་སྣང་རང་གསལ་ལ། །སྣང་བ་རང་སྣང་གཉིས་སུ་མེད། །དེ་ཡི་དོན་ལ་གང་རྟོག་པ། །མ་ཧཱ་ཨ་ནུ་སེམས་རྩལ་དུ། །འགྲོ་བ་ཡིན་པར་བཤད་པའོ། །ཡང་ཏི་ནག་པོའི་བསྒོམ་པ་ནི། །ཤན་དབྱེ་ལ་བཟླར་འདོད་པ་སྟེ། །ཤིན་ཏུ་འདི་རྣམས་སྐུར་བར་བྱ། །རིག་པ་གསལ་བའི་ཉམས་ཀྱི་ཕ་རྒྱུད་དུ། །བདེ་བའི་ཉམས་ནི་མ་རྒྱུད་དུ། །སྟོང་པའི་ཉམས་ནི་དབུ་མ་རུ། །འོད་གསལ་ཉམས་ཀྱི་ལོངས་སྐུ་རུ། །གོལ་བ་ཡིན་ཕྱིར་ཡང་ཏི་བསྟན། །ད་ནི་ལ་བཟླ་བསྟན་པ་ནི། །ཡུལ་དང་ཡུལ་ཅན་དུ་མི་བསྒོམ། །བསྒོམ་པ་ཕར་ལ་མི་བསྒོམ་རང་ཤར་ཤེས། །བདེ་བ་མི་བདེ་ཡིད་བདེར་ཤེས། །རིག་པའི་སྐུ་ལ་ཕྱི་ནང་མེད། །མཁའ་ཁྱབ་ཡུལ་ལ་སྣང་བ་མེད། །ཡེ་ཤེས་ལུས་ལ་ཕྱི་ནང་མེད། །སྤྲུལ་པའི་སྐུ་ལ་སྐུ་གསུམ་མེད། །ཕྱི་རུ་སྣང་བ་ལོངས་སྐུར་བསྒོམ། །ནང་ནས་ཤར་བ་སྤྲུལ་སྐུར་བསྒོམ། །ཐིག་ལེ་ཉག་གཅིག་ཆོས་སྐུ་ལ། །ཆོས་སྐུའི་བསྒོམ་པ་རྫོགས་པའོ། །ཕྱི་རུ་བསྒོམ་པས་ལོངས་སྐུར་གོལ། །ནང་དུ་བསྒོམ་པས་སྤྲུལ་སྐུར་གོལ། །གཉིས་མེད་བསྒོམ་པས་དབུ་མར་གོལ། །ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ཡང་། །དང་པོ་ཐིག་ལེའི་ངང་ལས་བྱུང་། །བར་དུ་ཐིག་ལེའི་ངང་ལ་གནས། །ཐ་མར་ཐིག་ལེའི་ངང་དུ་རྫོགས། །བསྒོམས་ཉམས་ ― DNG001_Page_0237 ―
[མ་དཔེ་གཟིགས་ན་འདིར་གནོན།]
ཇི་སྙེད་བྱུང་བ་ཡང་། །དང་པོ་བཀའ་ཡི་རྒྱུད་ལས་བྱུང་། །ང་ནི་ཉམས་ལ་མི་བརྟེན་ཏེ། །ཡང་ཏི་ནག་པོའི་བསྒོམ་པའོ། །བསྒོམ་པ་སྲོག་གི་སྤུ་གྲིའོ། །སྲོག་གི་འཁོར་ལོའི་རྒྱུད་རྫོགས་སོ།། །།བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། །ཆོས་ཀྱི་དབྱིངས་ཀྱི་ཕོ་བྲང་དུ། །སྟོན་པ་ཀུན་ཏུ་བཟང་པོ་ཡིས། །ཐུགས་ཀྱི་སྤྲུལ་པ་ཆེན་པོ་ལ། །དུས་གསུམ་ཁྱད་པར་མེད་པའི་ཕྱིར། །ཉིད་ལས་མི་གཞན་འཁོར་རྣམས་ལ། །རྫོགས་པ་ཆེན་པོའི་བསྟན་པ་ཤར། །ཞེས་གསུངས་སོ། །ལྟ་བ་ལ་ཐལ་ཆེན་པོའི་རྒྱུད་ཉིད་ཀྱི་ཞལ་ནས་བྱིན་བརླབས་སུ། རང་བཞིན་དག་པ་རྣམས་ལ་བབས། །ཆོས་སྐུ་ཐིག་ལེ་ཉག་གཅིག་ལ། །འཁྲུལ་པ་མེད་པས་སེམས་ཅན་མེད། །སངས་རྒྱས་སེམས་ཅན་གཉིས་སུ་མེད། །བློ་དང་དངོས་པོ་གཉིས་སུ་མེད། །ཆོས་ཅན་ཆོས་ཉིད་གཉིས་སུ་མེད། །འཁོར་བ་མྱང་འདས་གཉིས་སུ་མེད། །དབྱིངས་དང་ཡེ་ཤེས་གཉིས་སུ་མེད། །རྣམ་རྟོག་ཡེ་ཤེས་གཉིས་སུ་མེད། །སངས་རྒྱས་སེམས་ཅན་གཉིས་མེད་དེ། །ལམ་གྱིས་བཅོས་སུ་ག་ལ་ཡོད། །ཡེ་ནས་གྲོལ་བའི་ཆོས་སྐུ་ལ། །ལྟ་སྒོམ་སྤྱོད་པ་འཆིང་བའི་རྒྱུ། །ཡེ་གྲོལ་ཆེན་པོ་ཕྱོགས་མེད་ལ། །ཕྱོགས་སུ་འཛིན་པ་འཁྲུལ་པའི་ལམ། །ལྟ་སྒོམ་སྤྱོད་པ་ནོར་བའི་ལམ། །འབྲས་བུ་ཐོབ་འདོད་ལྟོས་པའི་ཆོས། །ཡེ་གྲོལ་ཆེན་པོར་ཤར་བ་ལ། །རྩོལ་བསྒྲུབ་བྱེད་པ་འཁྲུལ་པའི་ལམ། །ཐམས་ཅད་རང་སྣང་ཆེན་པོ་ལ། །བསྒོམ་དུ་མེད་པར་བསྒོམ་པ་ནི། །དེ་ནི་ནམ་མཁར་སྙེགས་པ་འདྲ། །ཡེ་ནས་ཆོས་སྐུར་གཅིག་པ་ལ། །བར་དོར་ཆོས་ཉིད་སྐྱེ་འདོད་པ། །དེ་ནི་ལམ་གྱི་གོལ་ས་ཡིན། །ཐམས་ཅད་ཡེ་ནས་ལྷུན་གྲུབ་ལ། །བར་དོར་འབྲས་བུ་འདོད་པ་ནི། །དེ་ནི་ས་ཡི་གོལ་ས་ཡིན། །རིག་པ་རང་བྱུང་ཡེ་ ― DNG001_Page_0238 ―
[མ་དཔེ་གཟིགས་ན་འདིར་གནོན།]
ཤེས་ལ། །རྒན་པོ་མཁར་ཐོགས་བསྒོམ་པ་དང་། །རྒན་མོ་མཛུབ་ཚུགས་བསྒོམ་པ་དང་། །གཞོན་པ་བདེ་བ་བསྒོམ་པ་ནི། །ཉམས་མྱོང་རེ་ལ་ཕྱོགས་ལྟོས་མེད། །ཉམས་མྱོང་རྐྱེན་གྱིས་བསྒྱུར་བའི་ཕྱིར། །ཡེ་ཤེས་སྐྱེས་པ་རྐྱེན་ཁར་ཐལ། །ཕྱོགས་ལ་ལྟོས་ནས་རྟེན་འཆའ་བས། །དེ་ནི་ཉམས་མྱོང་གོལ་ས་ཡིན། །རྫོགས་ཆེན་ཡང་ཏི་ནག་པོ་ལས། །ཕྱོགས་འཛིན་མི་སྤང་མི་འགེགས་ལ། །ཆེད་དུ་གང་ཡང་མི་བསྒྲུབ་པས། །ངེས་ན་ལྟོས་པའི་ཆོས་མེད་དེ། །དེ་ཡི་མིང་ནི་ལྷུན་གྲུབ་ཡིན། །དེ་ཡི་མཚན་ནི་རྫོགས་ཆེན་ཡིན། །གསང་མཚན་ཡང་ཏི་འབྲུ་གཅིག་ཡིན། །ཡང་གསང་ལྟ་བ་ལ་ཐལ་གྱི་རྒྱུད། ཀུན་ཏུ་བཟང་པོའི་སྲོག་གི་སྤུ་གྲི། རྡོ་རྗེ་སེམས་དཔའི་ཐུགས་ཀྱི་རེག་ཆོད། རོ་ལངས་བདེ་བའི་ཐུགས་ཀྱི་སྲོག་གི་ཐིགས་པ། བརྒྱུད་པ་གསུམ་པ། ལྟ་བ་ལ་ཐལ་གྱི་རྒྱུད་རྫོགས་སོ།། །།ཐིག་ལེ་ཉག་གཅིག་སྐུ་ལ་ཕྱག་འཚལ་ནས། །བཅོམ་ལྡན་ཀུན་ཏུ་བཟང་པོ་ཡིས། །ཆོས་ཉིད་བརྡལ་བའི་ཕོ་བྲང་དུ། །འཁོར་གྱི་རྡོ་རྗེ་སེམས་དཔའ་ལ། །རིག་པ་ཕྱི་ནང་མེད་པའི་དུས། །ཐབས་དང་ཤེས་རབ་བསྟན་པ་ཤར། །ཞེས་གསུངས་སོ། །ཐིག་ལེའི་ངང་དང་བྱིན་རླབས་ལས། །སྤྱོད་པ་གཏན་ལ་ཕེབ་པ་ཡིས། །ཐབས་དང་ཤེས་རབ་རྒྱུད་ཆེན་འདི། །བྱིན་གྱི་རླབས་ཀྱིས་ཤར་བའོ། །སྤྱོད་པའི་དོན་ཉིད་རྣམ་གསུམ་ཏེ། །སེམས་ལས་བྱས་པའི་སྤྱོད་པ་དང་། །ཆོས་ལས་བྱས་པའི་སྤྱོད་པ་དང་། །ཡང་ཏི་ནག་པོའི་སྤྱོད་པའོ། །སེམས་ཀྱི་སྤྱོད་པ་རྣམ་གསུམ་ཏེ། །མདོ་སྡེ་འདུལ་བ་མངོན་པ་གསུམ། །དེ་ཡང་སེམས་ཀྱི་སྤྱོད་པ་ཡིན། །མ་ཧཱ་ཨ་ནུ་སེམས་ཕྱོགས་གསུམ། །དེ་ཡང་སེམས་ཀྱི་སྤྱོད་པ་གསུམ། །ཆོས་ཀྱི་སྤྱོད་པ་རྣམ་པ་གཉིས། །ལྟ་བ་སྒོམ་པ་སྤྱོད་པ་ཡང་། །དེ་ཡང་ཆོས་ཀྱི་སྤྱོད་པ་ཡིན། །ཐོས་དང་བསམ་དང་བསྒོམ་པ་ཡང་། །དེ་ཡང་ཆོས་ཀྱི་ ― DNG001_Page_0239 ―
[མ་དཔེ་གཟིགས་ན་འདིར་གནོན།]
སྤྱོད་པ་ཡིན། །ཞེས་གསུངས་སོ། །ཡང་ཏི་ནག་པོའི་སྤྱོད་པ་ནི། །ཤེས་རབ་ཆེན་པོར་འདོད་པ་སྟེ། །སྣང་བ་མི་འགེགས་ཐུག་ཕྲད་ཁྱེར། །འོད་གསལ་འཁོར་ལོ་རྒྱས་འདེབས་སྤྱོད། །འཛིན་པ་རིག་པ་རང་གྲོལ་བས། །ཡིད་ཀྱི་འཛིན་པའི་རྒྱས་འདེབས་སྤྱོད། །ཡུལ་དང་ཡུལ་ཅན་གཉིས་མེད་པས། །དབྱེར་མེད་ཆོས་སྐུའི་རྒྱས་འདེབས་སྤྱོད། །དེ་ནི་ཡང་ཏི་ཕྱིར་སྤྱོད་དོ། །ཡང་ཏི་ནང་སྤྱོད་བསྟན་པ་ནི། །རང་ལུས་འབྱུང་བའི་ཡིད་ཕུང་ལ། །དབྱེར་མེད་ཆོས་སྐུའི་རྒྱས་འདེབས་སྤྱོད། །འོད་གསལ་འཁོར་ལོ་བསྐོར་བ་ཡིས། །ཆོས་སྐུ་ཤེས་རབ་ངང་དུ་འཆར། །གཟུང་འཛིན་རིག་པའི་ཀློང་དུ་དག །དེ་ནི་ནང་གི་སྤྱོད་པའོ། །ཡང་ཏི་གསང་སྤྱོད་བསྟན་པ་ནི། །རིག་པ་བཀག་པས་མི་ཁེགས་ཏེ། །རང་ཤར་དགག་བསྒྲུབ་མེད་པར་ཐེང་། །རིག་པ་གཅེར་བུར་སྤུར་གྱིས་ཕྱུངས། །སྣང་བ་བསྒོམ་པ་སྤུན་པོར་ཤོར། །ཐིག་ལེའི་ངང་དུ་ལྷངས་ཀྱིས་ཞོག །འོད་གསལ་ཆེན་པོར་ལྷངས་ཀྱིས་ཕྱུངས། །དེ་ལ་སྤྱད་པའི་ཡུལ་མེད་པ། །ཡེ་བཞེངས་ཆེན་པོ་ཞེས་ཀྱང་བྱ། །གཞི་བཞག་ཆེན་པོ་ཞེས་ཀྱང་བྱ། །ཡེ་གྲོལ་ཆེན་པོ་ཞེས་ཀྱང་བྱ། །ཡང་ཏི་ནག་པོ་ཞེས་ཀྱང་བྱ། །གསེར་གྱི་འབྲུ་གཅིག་ཞེས་ཀྱང་བྱ། །ཐིག་ལེའི་ངང་དུ་ཤར་བ་ཡི། །ཐབས་དང་ཤེས་རབ་ཀྱི་རྒྱུད། སྲོག་གི་ཐིགས་པ། བདུད་རྩིའི་བུམ་པ། སྣང་བྱེད་སྤུ་གྲིའི་རྒྱུད་རྫོགས་སོ།། །།བཅོམ་ལྡན་ཀུན་ཏུ་བཟང་པོ་ཡིས། །འཁོར་གྱི་རྡོ་རྗེ་སེམས་དཔའ་ལ། །ཕྱི་ནང་མེད་པའི་ཆོས་དབྱིངས་སུ། །འབྲས་བུ་ཐོབ་པ་མེད་པའི་དུས། །ཐམས་ཅད་ཡེ་གྲོལ་བསྟན་པ་ལ། །ཡང་ཏི་ནག་པོ་འབྲུ་གཅིག་ཤར། །བྱིན་གྱི་རླབས་ཀྱིས་བྱུང་བ་ཡི། །འབྲས་བུ་ཡེ་གྲོལ་ཆེན་པོའི་རྒྱུད་ལས། །ངང་ལ་ཤུགས་ཀྱིས་ཤར་བའོ། །འབྲས་བུ་ལ་ཡང་རྣམ་བཞི་སྟེ། །ཕྱི་ཡི་འབྲས་ ― DNG001_Page_0240 ―
[མ་དཔེ་གཟིགས་ན་འདིར་གནོན།]
བུ་བསྟན་པ་དང་། །ནང་གི་འབྲས་བུ་བསྟན་པ་དང་། །གསང་བའི་འབྲས་བུ་བསྟན་པའོ། །ཕྱི་ཡི་འབྲས་བུ་བསྟན་པ་ནི། །ཕྱི་ཡི་འབྱུང་བ་ལྔ་པོ་ཡེ་ཤེས་ལྔ། །ནང་གི་འབྲས་བུ་བསྟན་པ་ནི། །རྟགས་ཀྱི་ཡེ་ཤེས་ཚོན་གང་ལ། །ཡང་གསང་འབྲས་བུ་གཉིས་ཡིན་ཏེ། །ངོ་བོ་རང་བཞིན་ཐུགས་རྗེ་དང་། །རིག་པའི་ཡེ་ཤེས་ཁོ་ནའོ། །རེ་རེ་ལ་ཡང་བཞི་བཞིས་བསྐོར། །མཚན་ཉིད་འཛིན་པ་དབུས་གནས་ཏེ། །ཐམས་ཅད་ཡེ་ཤེས་ཆེན་པོར་ཤར། །ཐམས་ཅད་མཁྱེན་པའི་ཡེ་ཤེས་ལས། །ཐམས་ཅད་འབྱུང་ཡང་རང་བྱུང་ལ། །ཐམས་ཅད་འགགས་ཀྱང་རང་འགགས་ལ། །ཐམས་ཅད་གྲོལ་ཡང་རང་གྲོལ་ལས། །འབྲས་བུ་ཐོབ་པའི་ས་མེད་དེ། །དཔེར་ན་རྒྱ་མཚོའི་ཉ་མོ་བཞིན། །གར་ཕྱིན་རྒྱ་མཚོའི་ནང་དུ་གནས། །ལྷུན་གྱིས་གྲུབ་པས་ཐོབ་པ་མེད། །པད་མ་ནོར་བུ་རིན་པོ་ཆེ། །ཐམས་ཅད་གཅིག་ལས་རང་བྱུང་བས། །དེ་ནི་ལྷུན་གྲུབ་ཆོས་སྐུའོ། །དབང་པོ་རབ་ཀྱི་ཆོས་ཡིན་ཏེ། །འབྲིང་དང་ཐ་མ་འཁྱམས་པར་མཆིའོ། །རྫོགས་ཆེན་གནད་དུ་མ་ཕེབས་པར། །ཆོས་སྤྱོད་གང་དགར་བཏང་བ་ནི། །དེ་ནི་རྫོགས་ཆེན་རྒྱུན་ཆད་ཡིན། །རྫོགས་ཆེན་རྟག་ཅིང་མ་ཆད་པར། །དགེ་སྡིག་འཆོལ་བར་སྤྱོད་པ་ནི། །དེ་ནི་རྫོགས་ཆེན་དྲང་ཐད་ཡིན། །རྫོགས་ཆེན་རྒྱུད་ལ་མ་ཐེབས་པར། །ཐོས་བསམ་བསྒོམ་སྒྲུབ་མི་བྱེད་པ། །དེ་ནི་རྫོགས་ཆེན་ཕྱལ་པ་ཡིན། །ཡེ་ཤེས་གནད་དུ་མི་འཛིན་པར། །སེམས་འཛིན་ཕྲ་མོ་བརྩམ་པ་ནི། །དེ་ནི་སྒྲོན་མའི་ཡིད་སྨོན་ཡིན། །སེམས་འཛིན་གཅིག་ལ་ཡིད་འཆའ་བ། །དེ་ནི་ལོང་བའི་ལམ་སྣ་ཡིན། །གདམས་ངག་ཕྱོགས་རེ་མ་རྫོགས་པར། །རྒན་མོ་མཛུབ་ཚུགས་བསྒོམ་པ་ནི། །དམ་པར་ཞེན་པའི་བསྒོམ་པ་ཡིན། །ཞེ་འདོད་གཅིག་ལ་རྟེན་འཆའ་བས། །རྒད་པོ་མཁར་ཐོགས་བསྒོམ་པ་ནི། །དེ་ནི་ལོང་བའི་ལམ་རྒྱུས་ཡིན། །བདེ་བའི་ཉམས་མྱོང་ལ་བརྟེན་ནས། །གཞོན་པ་བདེ་བ་བསྒོམ་པ་ནི། །དེ་ནི་གཞོན་པའི་རྨི་ལམ་ཡིན། །ཞེས་གསུངས་སོ། །ཀུན་ཏུ་བཟང་པོ་སྲོག་གི་ཐིགས་པ། འབྲས་བུ་ཡེ་གྲོལ་ཆེན་པོའི་རྒྱུད་རྫོགས་སོ།། །། ― DNG001_Page_0241 ―
[མ་དཔེ་གཟིགས་ན་འདིར་གནོན།]
བཅོམ་ལྡན་ཀུན་ཏུ་བཟང་པོ་ཡི། །ལྷུན་གྲུབ་སྐུ་ལ་ཕྱག་བཙལ་ནས། །ཐིག་ལེ་མཐོང་བརྡོལ་རྒྱུད་གསུངས་པ། །སྟོན་པ་ཀུན་ཏུ་བཟང་པོ་ཡིས། །གནས་ནི་ཐིག་ལེ་མཁའ་ཁྱབ་ཏུ། །འཁོར་ནི་རང་བྱུང་ཡེ་ཤེས་ལ། །དུས་ནི་ཐམས་ཅད་རང་བྱུང་དུས། །བསྟན་ནི་གཉིས་མེད་ཐིག་ལེའོ། །ཞེས་གསུངས་སོ། །ཀུན་ཏུ་བཟང་པོས་བཀའ་སྩལ་པ། །འཁོར་གྱི་རྡོ་རྗེ་སེམས་དཔའ་ཁྱོད། །ཐིག་ལེ་མཐོང་བརྡོལ་རིག་པའི་འཁོར་ལོ་བསྐོར། །ཕུར་བུ་ཆེན་པོ་ཐོབ་ལ་སྒྲོལ། །སྲིད་གསུམ་དབང་དུ་བསྡུས་ལ་སྦྱོར་སྒྲོལ་གྱིས། །ཞེས་གསུངས་སོ། །ཡང་བཀའ་སྩལ་པ། རིག་པ་འགགས་པ་མེད་པ་ལ། །ཤེས་རབ་འགགས་པ་མེད་པ་ཡིས། །སྣང་སྲིད་བྱུང་ཐོབ་སྲོག་གི་རྩ་བ་ཆོད། །ཐུགས་ཀྱི་རེག་ཆོད་སྤུ་གྲི་ཚོ། །འཛིན་མེད་ཞགས་པ་ཆོད་ལ་ཐོང་། །ཞེས་གསུངས་སོ། །ཡང་བཀའ་སྩལ་པ། ཐིག་ལེ་མཐོང་ནས་བརྡོལ་བ་ནི། །ཙིཏྟའི་ནང་དུ་རབ་བརྟགས་པས། །རིག་པ་སྟོང་པར་གསལ་བ་ནི། །དེ་ནི་ཐིག་ལེ་སྤྱི་བརྡོལ་ཡིན། །ཉམས་མྱོང་འདྲེས་པའི་བདེ་གསལ་ནི། །དེ་ནི་ཐིག་ལེ་ནང་བརྡོལ་ཡིན། །ཞེས་གསུངས་སོ། །ཡང་བཀའ་སྩལ་པ། ཐིག་ལེ་མཐོང་ནས་མ་བརྡོལ་ན། །རིག་པའི་གནད་དུ་བརྡེག་པར་བྱ། །ཚོགས་དྲུག་རོལ་པ་ཧར་སངས་ལ། །རིག་པའི་བདེ་བ་རང་ཤར་ལྟོས། །འདི་ནི་ཐིག་ལེ་ནང་བརྡོལ་ཡིན། །དཀར་པོའི་དུས་སུ་རབ་ཏུ་སྦྱར། །ཁོང་ནས་ཡིད་ཀྱི་འགྱུ་བ་ལ། །འགྱུ་བས་འགྱུ་བའི་དུས་ཚོད་དུ། །བདེ་གསལ་ཉིད་དུ་ལྷང་ངེ་བལྟ། །དེ་ནི་ཐིག་ལེ་ནང་བརྡོལ་ཡིན། །གཉིས་སུ་མེད་པའི་ཡེ་ཤེས་ལ། །རྒྱུ་དང་རྐྱེན་གྱིས་མ་བསྐྱེད་པར། །རང་བཞིན་ཉིད་དུ་ཤེས་པ་གསལ། །དེ་ནི་ཕྱི་བརྡོལ་ནང་བརྡོལ་ཡིན། །ཞེས་གསུངས་སོ། །ཡང་བཀའ་སྩལ་པ། རིག་པ་གདངས་ཀྱི་ངོས་བཟུང་དང་། །བདེ་སྟོང་ཉིད་དུ་ཅུར་ཀྱིས་དབྱུང་། །བདེ་བ་ཉིད་ལ་ལྟ་སྟངས་བྱ། །འོད་གསལ་ཉིད་དུ་སྟོངས་ཀྱིས་འབྱུང་། །ཞེས་གསུངས་སོ། །ཐིག་ལེ་མཐོང་བརྡོལ་གྱི་རྒྱུད། རིག་པ་ཅུར་འབྱིན་གྱི་བརྡའ། སྲོག་གི་ཆན་པ། ཡང་ཏི་ནག་པོའི་རྒྱུད་རྫོགས་སོ།། །། རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ཅེས་བྱ་བ།― DNG001_Page_0242 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཏནྟྲ་གྲ་རཱ་ཛ་སཱུརྻ་ཙནྡྲ་པྲ་བྷཱ་ཙྭ་ལ་ཨཱ་ཀ་ཤཱ་བརྟྟ་བི་ཤུཌྜྷ་ས་མུ་དྲཱ་བརྟྟ་པྲ་ཀ་ཊ་ཏནྟྲ་ནཱ་མ། བོད་སྐད་དུ། རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ཅེས་བྱ་བ། སྔོན་ཐོག་མའི་སངས་རྒྱས་སྐྱེ་མེད་ཀ་དག་ལ་ཕྱག་འཚལ་ལོ། །འདི་སྐད་བདག་གིས་ཅི་ཡང་མ་ཐོས་པ་གང་དུ་ཡང་མཚོན་བརྗོད་ལས་འདས་པའི་དུས་མེད་པ་ན། བཀོལ་མེད་གནས་སུ་ཀ་དག་སྟོན་པ་དེས། །འོད་གསལ་འཁོར་ལ་སྐྱེ་མེད་བསྟན་པ་བཤད། །དུས་ནི་དུས་གསུམ་གཅིག་སྟེ་སྔ་ཕྱི་མེད་པའི་དུས། །སྡུད་པ་པོ་ནི་གསལ་དག་རིན་པོ་ཆེའོ། །དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཕུན་སུམ་ཚོགས་པའི་དོན་ནི་དེ་ལྟར་ན། །དངོས་པོ་གཤིས་ཀྱི་གནས་ལུགས་ཇི་ལྟར་གནས། །འོད་གསལ་རྩལ་གྱི་ཡན་ལག་ཇི་ལྟར་ཤར། །སྙིང་པོའི་ཀློང་དུ་འོད་གསལ་ཇི་ལྟར་གྲོལ། །དེ་གཉིས་དབྱེར་མེད་གདམས་ངག་ཇི་ལྟར་ལགས། །ཐོད་རྒལ་ཐེག་པ་ཇི་ལྟར་བཤད། །ཉི་ཟླའི་སྙིང་པོ་སྤྱི་ཏི་ཡོ་ག་ལ། །གྲུབ་མཐའི་བློས་བཏགས་ཡོད་དམ་མེད། །རྩིས་གདབ་བློ་བྲལ་བསྟན་པ་ལ། །བྱ་བཙལ་བློ་ཆོས་མི་འཚལ་ལམ། །རྩོལ་སྒྲུབ་འདུས་པའི་ཐེག་པ་ལ། །ལྟ་སྒོམ་སྤྱོད་འབྲས་དགོས་མི་དགོས། །ཐེག་དགུ་སྤང་ངམ་ཇི་ལྟར་བགྱི། །དཀྱིལ་འཁོར་དབང་དང་དངོས་གྲུབ་ལ། །རེ་བར་བྱ་བའམ་ཡེ་ནས་རྫོགས། །ཚོགས་དང་གཏོར་མ་མ་བཏང་བར། །ཚོགས་བསགས་སྨོན་ལམ་ཇི་ལྟར་རྫོགས། །ཉི་ཟླའི་སྙིང་པོ་སྤྱི་ཏི་ཡོ་ག་ལ། །གོལ་སྒྲིབ་འཁྲུལ་པ་ཡོད་དམ་མེད། །མ་རིག་ཡེ་ཤེས་ཡོད་དམ་མེད། །འཆར་སྒོ་འཁྲུལ་པ་ཅི་ལ་ཟེར། །རྟོགས་དང་མ་རྟོགས་ཡོད་དམ་མེད། །སངས་རྒྱས་སེམས་ཅན་ཅི་ལ་ཟེར། །དགེ་སྡིག་ལས་འཕྲོ་ཡོད་དམ་མེད། །མཐོ་རིས་ངན་སོང་ཅི་ལ་ཟེར། །རྫོགས་ཆེན་སྤྱི་ཏི་ཡོ་ག་ཡིས། །མ་བསྒྲུབས་འབྲས་བུ་ཇི་ལྟར་ཐོབ། །ཞུས་ཚིག་ཉི་ཤུ་རྩ་གཅིག་དེ། །སྟོན་པས་འཁོར་ལ་བཀའ་སྩོལ་ཅིག །ཤིན་ཏུ་ཟབ་པར་གསུང་དུ་གསོལ། །ཞེས་ཞུས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཕུན་སུམ་ཚོགས་ ― DNG001_Page_0243 ―
[མ་དཔེ་གཟིགས་ན་འདིར་གནོན།]
པ་དང་ཞུས་ཚིག་ཉི་ཤུ་རྩ་གཅིག་གི་གླེང་སློང་བསྟན་པའི་ལེའུ་སྟེ་དང་པོའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དངོས་པོ་གཤིས་ཀྱི་གནས་ལུགས་ཇི་ལྟར་གནས། །ཞུས་པས། སྟོན་པའི་རྒྱལ་པོ་སྐྱེ་མེད་ཀ་དག་གིས། །འཁོར་གྱི་དམ་པ་གསལ་དག་རིན་ཆེན་ལ། །རྫོགས་ཆེན་རྒྱལ་པོ་ཉི་ཟླའི་སྙིང་པོ་བཤད། །འཁོར་རྣམས་མ་ཡེངས་གུས་པས་ཉོན། །དོན་དམ་མཚོན་དང་བརྗོད་ལས་འདས་མོད་ཀྱང་། །རྩལ་གྱི་རིག་པ་བློ་དང་སྦྱར་ནས་བསྟན། །དཔེར་ན་མུན་ནག་རྫས་སྟོར་ལ། །ལག་ནོམ་བཙལ་བས་རྙེད་པར་དཀའ། །སྣང་གསལ་སྒྲོན་མེ་ལ་བརྟེན་ནས། །བཙལ་བས་རྙེད་པར་ཐེ་ཚོམ་མེད། །དེ་བཞིན་མ་རིག་མུན་ནག་ཏུ། །ཆོས་ཉིད་ནོར་བུ་སྟོར་བ་དེ། །ཐ་སྙད་ཚིག་གིས་རྙེད་པར་དཀའ། །མ་ནོར་བླ་མའི་ཞལ་དྲན་གྱིས། །རིན་ཆེན་བརྡ་ཡིས་རྙེད་པར་འགྱུར། །ཨ་ལ་ལ་ཧོ་ངོ་མཚར་ཆེ་བའི་བཀའ། །དངོས་པོ་གཤིས་ཀྱི་གནས་ལུགས་ནི། །གཏི་མུག་ཆོས་སྐུར་ཡེ་ནས་གནས། །ཞེ་སྡང་ལོངས་སྐུར་ཡེ་ནས་གནས། །འདོད་ཆགས་སྤྲུལ་པའི་སྐུ་རུ་གནས། །ང་རྒྱལ་སྐུ་གསུམ་དབྱེར་མེད་ཡིན། །ཕྲག་དོག་དོན་དམ་བདེ་བའི་སྐུ། །སྡུག་བསྔལ་མ་སྤངས་སྐུ་ལྔར་གྲོལ། །དུག་གསུམ་མ་སྤངས་སྐུ་གསུང་ཐུགས་སུ་གྲོལ། །མ་རིག་མ་སྤངས་ཡེ་ཤེས་ཆེན་པོར་གྲོལ། །སྒྲིབ་གཡོགས་མ་སྤངས་འོད་གསལ་ཆེན་པོར་གྲོལ། །རྣམ་རྟོག་མ་སྤངས་ཆོས་ཉིད་ཆེན་པོར་གྲོལ། །སེམས་ཅན་མ་སྤངས་སངས་རྒྱས་བསྒྲུབ་མེད་ཆེན་པོར་གྲོལ། །འཁོར་བ་མ་སྤངས་མྱང་འདས་ཆེན་པོར་གྲོལ། །སྣང་བ་མ་སྤངས་ཞིང་ཁམས་ཆེན་པོར་གྲོལ། །སྡུག་བསྔལ་མ་སྤངས་བདེ་བ་ཆེན་པོར་གྲོལ། །ཕྱི་ནང་མ་སྤངས་ཡུལ་སེམས་གཉིས་མེད་གྲོལ། །བཟང་ངན་མ་སྤངས་དགག་སྒྲུབ་མེད་པར་གྲོལ། །གཟུང་འཛིན་མ་སྤངས་དབྱེ་བསལ་མེད་པར་གྲོལ། །དངོས་པོ་གཤིས་ཀྱི་གནས་ལུགས་ནི། །ཡེ་ནས་སྐྱེ་མེད་ཆེན་པོར་གནས། །དུས་གསུམ་སྐྱེ་བར་མ་གསུངས་སོ། །ཀ་དག་ཆེན་པོར་ཡེ་ནས་གནས། །གློ་བུར་སྒྲིབ་གཡོགས་མ་གསུངས་སོ། །གཉིས་མེད་ཆེན་པོར་ཡེ་ནས་གནས། །གཉིས་འཛིན་རྟོག་པར་མ་གསུངས་སོ། །རྒྱུ་རྐྱེན་མེད་པར་ཡེ་ནས་གནས། །ཐོག་མཐའ་ཡོད་པར་མ་གསུངས་སོ། །གཉེན་པོས་བཅོས་བསྒྱུར་མེད་པར་གནས། །རྩོལ་ ― DNG001_Page_0244 ―
[མ་དཔེ་གཟིགས་ན་འདིར་གནོན།]
པས་འགྲུབ་པར་མ་གསུངས་སོ། །དངོས་མེད་ཆེན་པོར་ཡེ་ནས་གྲོལ། །ཟང་ཐལ་ཆེན་པོར་ཡེ་ནས་གྲོལ། །སྤྱི་ཕུད་ཐོད་རྒལ་ཆེན་པོར་གནས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། དངོས་པོ་གཤིས་ཀྱི་གནས་ལུགས་བསྟན་པའི་ལེའུ་སྟེ་གཉིས་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །འོད་གསལ་རྩལ་གྱི་ཡན་ལག་ཇི་ལྟར་ཤར། །ཞུས་པས། སྟོན་པས་འཁོར་ལ་བཀའ་སྩལ་པ། །དངོས་པོ་གཤིས་ཀྱི་རྩལ་ཟེར་གཉིས་མེད་ཀྱང་། །འཁོར་གྱི་རྟོག་པ་བསལ་ཕྱིར་ཤར་ཚུལ་བཤད། །མཁའ་ཀློང་རྣམ་དག་གནས་ལུགས་ཀློང་དཀྱིལ་ནས། །མ་འགགས་འོད་གསལ་རྩལ་རྣམས་ཤར། །གཞི་རླུང་ང་ཡི་རྩལ་དུ་ཤར། །འོད་གསལ་ང་ཡི་རོལ་པའི་རྩལ། །ཤེས་རིག་མ་འགགས་རོལ་པའི་རྩལ། །ངོ་བོ་རང་བཞིན་ང་ཡི་རྩལ། །དུས་གསུམ་ཡིད་འཁོར་ང་ཡི་རྩལ། །མ་རིག་ཡེ་ཤེས་ཡན་ལག་རྩལ། །འཆར་སྒོ་འཁྲུལ་སྒོ་ང་ཡི་རྩལ། །ཀུན་གཞི་རིག་ཡིད་ང་ཡི་རྩལ། །འཁྲུལ་ལུགས་རྣམ་གསུམ་ང་ཡི་རྩལ། །འཁྲུལ་སྨིན་ཕུང་ལྔ་ང་ཡི་རྩལ། །བཏང་བཟུང་ཞེན་པ་ང་ཡི་རྩལ། །ཕྱི་ནང་སྣོད་བཅུད་ང་ཡི་རྩལ། །ཡུལ་སེམས་གཉིས་ཀ་ང་ཡི་འཕྲུལ། །དགག་བསྒྲུབ་གཉིས་འཛིན་རོལ་པའི་རྩལ། །སྤང་ལེན་དབྱེ་བསལ་ཡན་ལག་རྩལ། །བཟང་ངན་རྩིས་གདབ་ཡན་ལག་རྩལ། །འཁོར་བ་མྱང་འདས་ཡན་ལག་རྩལ། །བདེ་དང་སྡུག་པ་ང་ཡི་རྩལ། །དགྲ་གཉེན་ཕྱོགས་རིས་ང་ཡི་རྩལ། །ཕྱོགས་མཚམས་ཁ་དོག་ཡན་ལག་རྩལ། །ཀུན་བཏགས་རིམ་དགུ་ཡན་ལག་རྩལ། །འགྲོ་བ་རིགས་དྲུག་ང་ཡི་རོལ་པར་ཤར། །རྟག་ཆད་རྣམ་གཉིས་རོལ་པར་ཤར། །གྲུབ་མཐའ་རྣམ་གཉིས་རོལ་པའི་རྩལ། །གྲུབ་མཐའི་ལྟ་སྒོམ་རོལ་པའི་རྩལ། ། ― DNG001_Page_0245 ―
[མ་དཔེ་གཟིགས་ན་འདིར་གནོན།]
ཞེ་འདོད་བྱ་རྩལ་ཡན་ལག་རྩལ། །འགྱུས་ཚད་རིག་ཚད་ཡན་ལག་རྩལ། །རྟགས་ཚད་མ་ལུས་རོལ་པའི་རྩལ། །འཆད་ཚད་བརྗོད་ཚད་ཐམས་ཅད་ང་ཡི་རྩལ་དུ་ཤར། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། འོད་གསལ་རྩལ་དང་ཡན་ལག་བསྟན་པའི་ལེའུ་སྟེ་གསུམ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །སྙིང་པོའི་ཀློང་དུ་འོད་གསལ་ཇི་ལྟར་གྲོལ། །ཞུས་པས། སྟོན་པས་འཁོར་ལ་བཀའ་སྩལ་པ། །མཁའ་ཀློང་རྣམ་དག་ཆོས་དབྱིངས་སྙིང་པོ་རུ། །གཞི་རླུང་འོད་ལྔ་སྙིང་པོའི་ཀློང་དུ་ཐིམ། །རྩལ་ལྔ་ཟེར་ལྔ་སྙིང་པོའི་ཀློང་དུ་གྲོལ། །སྟོང་གསལ་འོད་འབར་སྙིང་པོའི་ཀློང་དུ་གྲོལ། །ཤེས་རིག་དྲན་པ་སྙིང་པོའི་ཀློང་དུ་གྲོལ། །རང་བཞིན་ངོ་བོ་སྙིང་པོའི་ཀློང་དུ་གྲོལ། །མ་རིག་ཡེ་ཤེས་སྙིང་པོའི་ཀློང་དུ་གྲོལ། །འཆར་སྒོ་འཁྲུལ་སྒོ་སྙིང་པོའི་ཀློང་དུ་གྲོལ། །གཏི་མུག་མ་སྤངས་མི་གནས་ཀློང་དུ་གྲོལ། །མ་རིག་མ་སྤངས་མི་གནས་ཀློང་དུ་གྲོལ། །སྒྲིབ་གཡོགས་མ་སྤངས་མི་གནས་ཀློང་དུ་གྲོལ། །འགྲོ་དྲུག་མ་སྤངས་མི་གནས་ཀློང་དུ་གྲོལ། །སྣང་སྲིད་སྣོད་བཅུད་སྙིང་པོའི་ཀློང་དུ་གྲོལ། །འཁོར་དང་མྱང་འདས་སྙིང་པོའི་ཀློང་དུ་གྲོལ། །བདེ་དང་སྡུག་བསྔལ་སྙིང་པོའི་ཀློང་དུ་གྲོལ། །བཟང་ངན་སྤང་ལེན་སྙིང་པོའི་ཀློང་དུ་གྲོལ། །ཡིན་མིན་དབྱེ་བསལ་སྙིང་པོའི་ཀློང་དུ་གྲོལ། །དགྲ་གཉེན་ཕྱོགས་རིས་སྙིང་པོའི་ཀློང་དུ་གྲོལ། །རྟག་ཆད་གཟུང་འཛིན་སྙིང་པོའི་ཀློང་དུ་གྲོལ། །རིག་ཚད་འགྱུ་ཚད་སྙིང་པོའི་ཀློང་དུ་གྲོལ། །དྲན་ཚད་བསམ་ཚད་སྙིང་པོའི་ཀློང་དུ་གྲོལ། །དུག་ལྔ་སྐུ་ལྔ་སྙིང་པོའི་ཀློང་དུ་གྲོལ། །རྣམ་རྟོག་བག་ཆགས་སྙིང་པོའི་ཀློང་དུ་གྲོལ། །ཀུན་བཏགས་རིམ་དགུ་སྙིང་པོའི་ཀློང་དུ་གྲོལ། །གྲུབ་མཐའི་ལྟ་སྒོམ་ཐམས་ཅད་སྙིང་པོའི་ཀློང་དུ་གྲོལ། །མཚོན་ཚད་བཏགས་ཚད་སྙིང་པོའི་ཀློང་དུ་གྲོལ། །བྱ་བཙལ་རྩོལ་བསྒྲུབ་མ་བྱས་པར། །རང་བཞིན་ཤུགས་ཀྱིས་དེ་ལྟར་གྲོལ། །ཀློང་ནས་རྩལ་ཟེར་ཀློང་དུ་གྲོལ། ། ― DNG001_Page_0246 ―
[མ་དཔེ་གཟིགས་ན་འདིར་གནོན།]
སྟོང་ལས་ཀུན་འབྱུང་སྟོང་པར་གྲོལ། །མེད་ལས་སྣ་ཚོགས་མེད་པར་གྲོལ། །ཐོལ་བྱུང་ཡིད་རིག་བྱུང་ཚད་གྲོལ། །ཝལ་བྱུང་དྲན་རྟོག་སྙིང་པོར་གྲོལ། །གཟུགས་སུ་སྣང་ཚད་བདེ་གཤེགས་སྐུ་རུ་གྲོལ། །སྒྲ་སྐད་ཐམས་ཅད་གྲགས་སྟོང་གསུང་དུ་གྲོལ། །དྲན་རྟོག་ཐམས་ཅད་སངས་རྒྱས་ཐུགས་སུ་གྲོལ། །ཁམས་གསུམ་སེམས་ཅན་ལུས་ངག་ཡིད་གསུམ་དེ། །དུས་གསུམ་སངས་རྒྱས་ཀུན་གྱི་སྐུ་གསུང་ཐུགས་སུ་གྲོལ། །སྣང་སྲིད་འཇིག་རྟེན་འཁོར་འདས་ཐམས་ཅད་ཀུན། །སངས་རྒྱས་ཞིང་ཁམས་འོད་གསལ་ཆེན་པོར་གྲོལ། །ཞེ་འདོད་རྩོལ་སྒྲུབ་བྱས་ནས་གྲོལ་བ་མ་ཡིན་ཏེ། །ཐོག་མ་ཉིད་ནས་མ་སྤངས་མི་གནས་གྲོལ། །ཉོན་མོངས་བརྒྱད་ཁྲི་བཞི་སྟོང་གྲོལ། །བློས་བཏགས་ཆོས་སྡེ་བརྒྱད་ཁྲི་བཞི་སྟོང་གྲོལ། །དཔེར་ན་སྦྲུལ་གྱི་མདུད་པ་བཞིན། །འཆིང་མཁན་གྲོལ་མཁན་མེད་པར་གྲོལ། །དེ་བཞིན་རྟག་ཆད་ཆོས་རྣམས་མ་ལུས་ཀུན། །མ་བཅིངས་མ་གྲོལ་སྙིང་པོའི་ཀློང་དུ་གྲོལ། །དཔེར་ན་རྔ་མའི་མདུད་པ་བཞིན། །མཚན་མ་སྣ་ཚོགས་རང་གྲོལ་ཉིད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། སྙིང་པོའི་ཀློང་དུ་འོད་གསལ་གྲོལ་བར་བསྟན་པའི་ལེའུ་སྟེ་བཞི་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །སྙིང་པོའི་ཡན་ལག་གཉིས་མེད་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཆོས་ཉིད་མཁའ་ཀློང་སྙིང་པོའི་ཀློང་དཀྱིལ་དུ། །འོད་གསལ་རྩལ་ཟེར་ཡན་ལག་མ་ལུས་ཐིམ། །སྙིང་པོ་རྩལ་ཟེར་གཉིས་མེད་ཐོག་མར་ཡེ་སངས་རྒྱས། །བྱ་བཙལ་རྩོལ་བས་མ་བསྒྲུབས་པར། །མཁའ་ལ་འཇའ་ཚོན་ཐིམ་པ་འདྲ། །ནམ་མཁར་ཆོ་འཕྲུལ་ཐིམ་པ་དང་། །འོ་མ་ཆུ་དང་འདྲེས་པ་དབྱེར་མི་ཕྱེད། །དེ་བཞིན་གཞི་རླུང་གཉིས་སུ་འདྲེས་པ་དབྱེར་མི་ཕྱེད། །རླུང་ལྔ་འབྱུང་ལྔ་གཉིས་མེད་དབྱེར་མི་ཕྱེད། །འོད་ལྔ་ཟེར་ལྔ་གཉིས་མེད་དབྱེར་མི་ཕྱེད། །ཤེས་པ་སྣང་ཚུལ་འགྱུ་མེད་དབྱེར་མི་ཕྱེད། །རང་བཞིན་ངོ་བོ་ཐུགས་རྗེ་དབྱེར་མི་ཕྱེད། །དུས་གསུམ་སྐུ་གསུམ་གཉིས་མེད་དབྱེར་མི་ཕྱེད། །ཡིད་ ― DNG001_Page_0247 ―
[མ་དཔེ་གཟིགས་ན་འདིར་གནོན།]
འཁོར་འཁྲུལ་འཁོར་གཉིས་མེད་དབྱེར་མི་ཕྱེད། །མ་རིག་ཡེ་ཤེས་གཉིས་མེད་དབྱེར་མི་ཕྱེད། །འཁྲུལ་དང་མ་འཁྲུལ་གཉིས་མེད་དབྱེར་མི་བྱེད། །རྟོགས་དང་མ་རྟོགས་གཉིས་མེད་དབྱེར་མི་ཕྱེད། །སངས་རྒྱས་སེམས་ཅན་གཉིས་མེད་དབྱེར་མི་ཕྱེད། །འཁོར་བ་མྱང་འདས་གཉིས་མེད་དབྱེར་མི་ཕྱེད། །སངས་རྒྱས་འགྲོ་དྲུག་གཉིས་མེད་དབྱེར་མི་ཕྱེད། །སྣང་སྲིད་སྣོད་བཅུད་གཉིས་མེད་དབྱེར་མི་ཕྱེད། །དུག་ལྔ་སྐུ་ལྔ་གཉིས་མེད་དབྱེར་མི་ཕྱེད། །དུག་གསུམ་སྐུ་གསུམ་གཉིས་མེད་དབྱེར་མི་ཕྱེད། །རྣམ་རྟོག་ཆོས་ཉིད་གཉིས་མེད་དབྱེར་མི་ཕྱེད། །ཉོན་མོངས་བརྒྱད་ཁྲི་བཞི་སྟོང་དང་། །ཆོས་སྡེ་བརྒྱད་ཁྲི་བཞི་སྟོང་གཉིས་སུ་མེད། །ཕྱི་ནང་ཡུལ་སེམས་དབྱེ་བ་གཉིས་སུ་མེད། །གཟུགས་ལྔ་སྐུ་ལྔ་གཉིས་མེད་དབྱེ་རུ་མེད། །དབང་ལྔ་ཡུལ་ལྔ་དབྱེར་མེད་གཉིས་སུ་མེད། །སྒོ་ལྔ་གཟུགས་ལྔ་དབྱེར་མེད་གཉིས་སུ་མེད། །ཡིད་ལྔ་གསལ་དབང་དམིགས་འཛིན་གཉིས་སུ་མེད། །རིག་སེམས་མིང་འདོགས་ཉོན་མོངས་གཉིས་སུ་མེད། །འགྱུ་དྲན་གློ་རྟོག་འཛིན་ཞེན་གཉིས་སུ་མེད། །ཅི་ལ་སྤྱོད་ཀྱང་མ་ཞེན་མ་ཆགས་གཉིས་སུ་མེད། །སྡུག་བསྔལ་བདེ་བ་གཉིས་སུ་དབྱེ་རུ་མེད། །བཟང་ངན་སྤང་ལེན་དབྱེར་མེད་གཉིས་སུ་མེད། །ཡིན་མིན་དབྱེ་བསལ་དབྱེར་མེད་གཉིས་སུ་མེད། །དགྲ་གཉེན་ཕྱོགས་རིས་གཉིས་མེད་དབྱེ་རུ་མེད། །ཕྱི་ནང་ཡུལ་སེམས་དགག་སྒྲུབ་གཉིས་སུ་མེད། །དཔེར་ན་རྒྱ་མཚོ་ཆེན་པོ་རུ། །ཆུ་བྲན་འདི་ཡིན་འདི་མིན་དབྱེར་མི་ཕྱེད། །དེ་བཞིན་སེམས་ཀྱིས་བརྟགས་པའི་ཆོས་རྣམས་ཀུན། །སྙིང་པོའི་ཀློང་དུ་ཐིམ་ནས་བློ་ལས་གྲོལ་ཙམ་ན། །ཆོས་རྣམས་འདི་ཡིན་འདི་མིན་དབྱེར་མི་ཕྱེད། །ཅིའི་ཕྱིར་ཞེ་ན་ཆོས་དང་ཆོས་ཉིད་འཕྲད་ནས་བློ་དངོས་འདྲེས་ཙམ་ན། །ཡིན་རྒྱུ་གང་ཡིན་མིན་རྒྱུ་གང་བློ་ཟད། །ཐེག་པ་གྲུབ་མཐའ་སྟོངས་ཙམ་ན། །ཡིན་མིན་དབྱེ་བསལ་མེད་དེ་ཀ་དག་ཆེན་པོར་གྲོལ། །སངས་རྒྱས་གཞན་ནས་མི་རེ་བློས་བཏགས་ཆོས་རྣམས་ཟད། །སྐྱེ་མེད་ཀ་དག་དངོས་མེད་དང་། །རྣལ་མ་བློ་འདས་ངོ་བོ་ཉིད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། སྙིང་པོ་དང་རྩལ་ཟེར་དབྱེར་མེད་བསྟན་པའི་ལེའུ་སྟེ་ལྔ་པའོ།། །། ― DNG001_Page_0248 ―
[མ་དཔེ་གཟིགས་ན་འདིར་གནོན།]
དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །བློ་འདས་ཐེག་པ་ཇི་ལྟར་བཤད། །ཞུས་པས། སྟོན་པས་འཁོར་ལ་བཀའ་སྩལ་པ། །བློ་འདས་རང་ལ་བརྗོད་མེད་ཀྱང་། །འཁོར་གྱི་རྟོག་པ་བསལ་ཕྱིར་བཤད། །ཡང་ཏི་ཉི་ཟླའི་སྙིང་པོ་ཐེག་པའི་སྤྱི་ཕུད་འདི། །ཐེག་པའི་གོང་བརྒལ་རྫོགས་ཆེན་གཉའ་གཅོག་ཡིན། །ཉི་ཟླའི་སྙིང་པོ་ཐེག་དགུ་ཐོད་རྒལ་འདི། །འདི་གོ་ཀུན་གོའི་ཆོས་སུ་བཤད། །འདི་རྟོགས་ཀུན་རྟོགས་ཆོས་སུ་བཤད། །འདི་ཤེས་ཀུན་ཤེས་ཆོས་སུ་བཤད། །འདི་གསལ་ཀུན་གསལ་ཆོས་སུ་བཤད། །འདི་བཅངས་ཀུན་ཡོད་ཆོས་སུ་བཤད། །འདིར་ཞུགས་ཀུན་གྱི་སྒོར་ཞུགས་ཡིན། །འདི་བྲིས་ཆོས་ཀུན་བྲིས་པར་བཤད། །ཅིའི་ཕྱིར་ཞེ་ན་ཆོས་རྣམས་ཀུན་གྱི་རྩ་བའི་རྒྱུད་སྡེ་ཡིན། །ཐེག་པ་ཀུན་གྱི་སྤྱི་ཕུད་རྩེ་རྒྱལ་ཡིན། །བརྒྱད་ཁྲི་བཞི་སྟོང་གསལ་བར་སྟོན་པའི་ཉི་ཟླ་ཡིན། །ཐེག་པ་ཀུན་གྱི་གཏེར་མཛོད་ལྡེ་མིག་ཡིན། །བཏགས་ཆག་ཀུན་གྱི་ཞིང་ས་ཡིན། །ཐམས་ཅད་བསྐྱེད་པའི་ཡབ་ཡུམ་མཁའ་ཀློང་བྷ་ག་ཡིན། །ཀུན་གྱི་ས་བོན་གཞི་མ་རྩ་བ་ཡིན། །ཀུན་གྱི་རྩ་བ་གཅིག་རྟོགས་པས། །ཀུན་ལ་དབང་བསྒྱུར་ཐོབ་པ་ཡིན། །ཡང་ཏི་འདི་ཡིས་ཆོས་རྣམས་གཏན་ལ་ཕེབས་པའི་ཕྱིར། །བསྟན་པའི་ཡང་སྙིང་འདི་ཐོས་པས། །འདི་ཐོས་གང་ཞིག་ཐོས་པའི་མཆོག །དཔེར་ན་མཆོག་རབ་རྩེ་ནས་རི་བྲན་ཐམས་ཅད་གསལ། །འབྱུང་ཆེན་ནམ་མཁར་འབྱུང་བ་ཐམས་ཅད་གསལ། །གནམ་ས་གཉིས་སུ་སྐྱེ་འགྲོ་ཐམས་ཅད་གསལ། །ཟ་འོག་སྣམ་བུར་དར་སྣ་སྣ་ཚོགས་གསལ། །བསམ་འཕེལ་ནོར་བུར་རིན་ཆེན་སྣ་ཚོགས་གསལ། །དཀྱིལ་འཁོར་ཆེན་པོར་ས་ཚོན་རྣམ་ལྔ་གསལ། །ཕྱི་ཡི་རྒྱ་མཚོར་ཆུ་བྲན་སྣ་ཚོགས་གསལ། །དེ་བཞིན་ཆོས་ཀུན་རྩ་རྒྱུད་ཉི་ཟླའི་སྙིང་པོར་གནས། །སེམས་ཀྱིས་བཏགས་པའི་ཆོས་རྣམས་རིལ་བོར་གསལ། །ཨ་ཧོ་ང་ཡི་བཀའ་ཆེན་འདི་ལྟ་བུ། །གཞན་ནས་མི་འབྱུང་ཨ་ལ་ལ། །རང་བྱུང་ངོ་མཚར་ཁྱད་པར་ཅན། །དུག་གསུམ་སྐུ་གསུམ་ཡིན་པར་བཤད། །དུག་ལྔ་སྐུ་ལྔ་ཡིན་པར་བཤད། །མ་རིག་འོད་གསལ་ཆེན་པོར་བཤད། །གཏི་མུག་ཀ་དག་ ― DNG001_Page_0249 ―
[མ་དཔེ་གཟིགས་ན་འདིར་གནོན།]
ཆེན་པོར་བཤད། །རྣམ་རྟོག་ཆོས་ཉིད་ཆེན་པོར་བཤད། །མཚན་མའི་ཆོས་རྣམས་གཟིགས་མོར་བཤད། །བྱ་བཙལ་མེད་པའི་ཆོས་སུ་བཤད། །རྩོལ་སྒྲུབ་མེད་པའི་ཆོས་སུ་བཤད། །ཞེ་འདོད་མེད་པའི་ཆོས་སུ་བཤད། །ལྟ་སྒོམ་སྤྱོད་འབྲས་མེད་པའི་ཆོས་སུ་བཤད། །དངོས་གྲུབ་ཡིད་སྨོན་མེད་པའི་ཆོས་སུ་བཤད། །སྐུ་དང་ཡེ་ཤེས་རང་ལ་ཚང་བའི་ཆོས་སུ་བཤད། །བློ་ཟད་གྲུབ་མཐའ་སྟོངས་པའི་ཆོས་སུ་བཤད། །མཚོན་བརྗོད་དམིགས་ལས་འདས་པའི་ཆོས་སུ་བཤད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། བློ་འདས་བཤད་ཐབས་བསྟན་པའི་ལེའུ་སྟེ་དྲུག་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཉི་ཟླའི་སྙིང་པོ་ཡང་ཏི་ཡོ་ག་ལ། །གྲུབ་མཐའི་བློས་བཏགས་ཡོད་དམ་མེད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །གྲུབ་མཐའི་བློས་བཏགས་བློ་ཡི་ཡུལ། །བློ་ཡི་ཡུལ་ལ་ངེས་པ་མེད། །བློ་ཡུལ་མ་ཟད་སངས་མི་རྒྱ། །དེ་ཕྱིར་ཡང་ཏི་ཉི་ཟླའི་སྙིང་པོའི་རྟོག་པ་ལ། །ཐེག་པ་དགུ་ཡི་ཆོས་མི་དགོས། །འོན་ཀྱང་ཡང་ཏི་མ་རྟོགས་གང་ཟག་ལ། །ཐེག་པ་དགུ་ཡི་ལྟ་བསྒོམ་བསྟན། །མུ་སྟེགས་ཉན་ཐོས་རང་རྒྱལ་དང་། །སེམས་ཙམ་དབུ་མ་བྱང་སེམས་དང་། །ཀྲི་ཡཱ་ཡོ་ག་ཨུ་པ་ཡ། །མ་ཧཱ་ཨ་ནུ་ཨ་ཏི་དགུ། །དེ་ཡི་གྲུབ་མཐའ་བློས་བཏགས་ནི། །རང་རང་དཀྱུས་ན་གསལ་ཕྱིར་རོ། །བློས་བཏགས་ཐ་སྙད་འདིར་མ་བསྟན། །ཉི་ཟླའི་སྙིང་པོ་རྟོགས་པ་ལ། །དེ་རྣམས་བློ་ཡིན་དགོས་པ་མེད། །འོན་ཀྱང་འཁྲུལ་རྨོངས་མི་ཤེས་བློ་ཅན་ལ། །རེ་ཞིག་ཚིག་གི་སྒྲོན་མེས་དོན་གྱི་དཔེར་མཚོན་པ། །དངོས་པོའི་ཆོས་ཅན་གཅིག་ལ་ནི། །མུ་སྟེགས་རྟག་ལྟ་བས་ནི་ཤེས་ཤིང་རིག་པའི་ངོ་བོར་བཏགས། །དེ་ཡང་རྫས་སུ་གྲུབ་པར་འདོད། །རྟག་འདོད་ཁ་དོག་དབྱིབས་ཀྱི་ཚད། །རང་རང་ལུས་དང་སྦྱར་ནས་ནི། །སྙིང་དཀྱིལ་ཉུང་འབྲུ་སྲན་ཙམ་པ། །ཁ་དོག་དཀར་འཚེར་སྣུམ་ལ་འདྲིལ། །ཞེས་གསུངས་སོ། །མུ་སྟེགས་ཆད་པའི་ལྟ་བ་ནི། །རྒྱུ་མེད་འབྲས་བུ་མེད་པར་འདོད། །མི་ཤི་ཐལ་བ་རླུང་ཁྱེར་བཞིན། །སླར་འཚོ་བ་དག་ག་ལ་ཡོད། །ཅེས་གསུངས་སོ། །ནང་བ་སངས་རྒྱས་ཐེག་པ་ནི། །ཆོས་ཅན་གང་རུང་གཅིག་ལ་ནི། །ཉན་ཐོས་ཕྲ་རགས་རྫས་སུ་ ― DNG001_Page_0250 ―
[མ་དཔེ་གཟིགས་ན་འདིར་གནོན།]
གྲུབ་པར་འདོད། །བྱེ་བྲག་པ་ནི་བསྐོར་བ་བར་དང་བཅས་པར་འདོད། །དེ་ཡང་གཞུང་ལས་ཕྱི་ཡི་ཡུལ། །ཡུལ་ནི་ཕྲ་རབ་རྡུལ་དུ་སྣང་། །ཞེས་གསུངས་སོ། །རང་སངས་རྒྱས་ཀྱི་འདོད་པ་ནི། །རྡུལ་མིན་ཡུལ་གྱི་རྣམ་པ་སྟོང་། །རྣམ་པར་རིག་བྱེད་མ་ཡིན་འདོད། །ཅེས་གསུངས་སོ། །སེམས་ཙམ་པ་ཡི་འདོད་པ་ནི། །རྣམ་བདེན་རྣམ་རྫུན་རྣམ་གཉིས་ཏེ། །སེམས་ཙམ་རྣམ་བདེན་ལྟ་བ་ནི། །དཀར་དམར་སྣ་ཚོགས་སེམས་ཀྱི་སྣང་བར་འདོད། །འཇིག་རྟེན་ཁམས་ནི་སེམས་ཙམ་མོ། །ཞེས་གསུངས་སོ། །སེམས་ཙམ་རྣམ་རྫུན་ལྟ་བ་ནི། །ཡུལ་གྱི་རྣམ་པ་མེད་པ་རུ། །རང་རིག་རྒྱུན་གྱི་རྟག་པར་འདོད། །སྔ་མ་སྔ་མས་རྒྱུ་བྱས་ནས། །ཕྱི་མ་ཕྱི་མ་འབྲས་བུར་འདོད། །དེ་ཡང་གཞུང་ལས་ཀྱང་། །ཤེས་པ་བདེན་ཏེ་རྣམ་པ་རྫུན། །མི་རྣམས་ལ་ནི་ཕྱི་རོལ་སྣང་། །འཇིག་རྟེན་པ་ལ་སེམས་ཙམ་མོ། །སེམས་ནི་ཡང་དག་དངོས་མ་ཡིན། །སེམས་ཙམ་དུ་ནི་ངས་བཤད་དོ། །ཞེས་གསུངས་སོ། །དབུ་མ་པ་ཡི་ལྟ་བ་ནི། །སེམས་ཙམ་སྤྱོད་པའི་དབུ་མ་དང་། །རྣལ་འབྱོར་སྤྱོད་པའི་དབུ་མའོ། །དེ་ཡང་རྣམ་པར་སྣང་བ་འདི་དག་ནི། །སྒྱུ་མར་འདོད་དང་རབ་ཏུ་མི་གནས་པ། །སྒྱུ་མ་ལྟ་བུའི་ལྟ་བ་ནི། །ཡུལ་གྱི་རྣམ་པ་མི་རྟག་མི་བདེན་སྒྱུ་མའི་ཚུལ། །ཆོས་རྣམས་རྨི་ལམ་ལྟ་བུ་ལ་སོགས་པ། །སྒྱུ་མའི་དཔེ་བརྒྱད་བཞིན་དུའོ། །རྣལ་འབྱོར་སྤྱོད་པའི་ལྟ་བ་ནི། །ཡུལ་གྱི་རྣམ་པ་གང་སྣང་ཡང་། །ཕྱོགས་ཆར་བཤིགས་པས་གཅིག་མ་གྲུབ། །གཅིག་མ་གྲུབ་པའི་གཏན་ཚིགས་ཀྱིས། །མཐའ་བཞི་བྲལ་ལོ་སྟོང་པར་གནས། །སྟོང་པ་བཅོ་བརྒྱད་སྤྲོས་པའི་མཐའ་བརྒྱད་འདས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། མཚན་ཉིད་སྡེ་གསུམ་གྱི་གྲུབ་མཐའ་བསྟན་པའི་ལེའུ་སྟེ་བདུན་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཕྱི་རྒྱུད་སྡེ་གསུམ་ཐེག་པ་ཇི་ལྟར་ལགས། །སྟོན་པས་འཁོར་ལ་བཀའ་སྩལ་པ། །ཀྲི་ཡཱ་བ་ཡི་ལྟ་བ་ནི། །ཡུལ་གྱི་རྣམ་པ་སྣང་བ་ནི། །རིགས་གསུམ་ལྷ་ཡི་སྐུ་རུ་འདོད། །མཐོ་དམན་འཇམ་རྩུབ་རིགས་གསུམ་མགོན། །ཨུ་པ་ཡ་ཡི་ཐེག་པ་ནི། །ཀྲི་ཡཱར་སྤྱོད་ལ་ཡོ་གར་བལྟ། །གཉིས་ཀའི་རྒྱུད་ལས་གཞུང་ ― DNG001_Page_0251 ―
[མ་དཔེ་གཟིགས་ན་འདིར་གནོན།]
ཚུགས་མེད། །ཡོ་ག་པ་ཡི་ཐེག་པ་ནི། །ཕྱི་ཡི་ཡུལ་དུ་སྣང་བ་དེ། །རིགས་ལྔ་ལྷ་ཡི་སྣང་བར་འདོད། །སྐྱེ་འགག་གཉིས་སུ་སྣང་བ་ལ། །དེ་ཡང་སྤུན་དང་གྲོགས་པོའི་ཚུལ། །ཞེས་གསུངས་སོ། །ནང་རྒྱུད་སྡེ་གསུམ་ཐེག་པ་ལ། །མ་ཧཱ་ཡོ་གའི་ཐེག་པ་ནི། །སྣང་བ་ཐམས་ཅད་ལྷ་དང་ལྷ་མོའི་དཀྱིལ་འཁོར་དུ། །ཕུང་པོ་ལྔ་ནི་རིགས་ལྔའི་ལྷ་རུ་བསྒོམ། །རྣམ་ཤེས་ཚོགས་བརྒྱད་སེམས་དཔའ་བརྒྱད། །འབྱུང་ལྔ་རིགས་ཀྱི་ཡུམ་ལྔར་བསྒོམ། །གཟུགས་སྒྲ་དྲི་རོ་མཆོད་པའི་ལྷ་མོ་བཞི། །ཡན་ལག་རྣམ་བཞི་སྒོམ་བཞི། །སྒལ་ཚིགས་རྩ་བརྒྱད་དབང་ཕྱུག་མ། །ཕུང་པོ་ཁམས་དང་སྐྱེ་མཆེད་ལྷ་དང་ལྷ་མོའོ། །ཐབས་ཀྱི་རང་བཞིན་བསྐྱེད་རིམ་ཚུལ། །ཤེས་རབ་རང་བཞིན་རྫོགས་རིམ་འདོད། །དེ་ཡང་གཞུང་ལས། སྣང་བ་མི་འགག་ཐབས་ཡིན་ཏེ། །རང་བཞིན་མེད་པ་ཤེས་རབ་ཡིན། །ཞེས་གསུངས་སོ། །རྫོགས་པ་ཨ་ནུའི་ལྟ་བ་ནི། །ཡུལ་གྱི་རྣམ་པ་ཆོས་དབྱིངས་གཞལ་ཡས་ཁང་། །སྙིང་པོ་དྲན་ཙམ་མ་བསྐྱེད་རྫོགས་པའི་ལྷ། །ས་ཆུ་མེ་རླུང་སྣོད་བཅུད་བཅས། །ཀུན་ཀྱང་མ་བསྐྱེད་ཡོངས་རྫོགས་ལྷ། །ཞེས་གསུངས་སོ། །རྫོགས་ཆེན་ཨ་ཏིའི་ལྟ་བ་ནི། །ཆགས་ཞེན་ལ་སོགས་ཡུལ་གྱི་རྣམ་པ་རྣམས། །ཆོས་ཉིད་རོལ་པའི་སྣང་བར་འདོད། །སྟོང་གསུམ་འཇིག་རྟེན་དེ་རྣམས་ནི། །སྐུ་གསུང་ཐུགས་ཀྱི་རོལ་པར་ཤར་བའོ། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། གསང་སྔགས་ཐེག་པའི་གྲུབ་མཐའ་ཕྱི་རྒྱུད་དང་ནང་རྒྱུད་བསྐྱེད་རྫོགས་གསུམ་བསྟན་པའི་ལེའུ་སྟེ་བརྒྱད་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །གོང་བརྒལ་སྤྱི་ཏི་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཨེ་མ་ཧོ་ངོ་མཚར་ཁྱད་པར་འཕགས། །ཐེག་པ་དགུ་རྩེ་སྤྱི་ཏི་ཡོ་ག་འདི། །གཞན་ནས་མི་རྙེད་རང་ལས་རྙེད། །ཐེག་མཆོག་ངོ་མཚར་ཁྱད་པར་ཅན། །རྫོགས་ཆེན་སྤྱི་ཏིའི་ལྟ་བ་ནི། །སྣང་སྲིད་འཁོར་འདས་མ་ལུས་པ། །ཀ་དག་རྟེན་མེད་ཆེན་པོར་གྲོལ། །ཡིན་མིན་རྩིས་གདབ་མེད་པའི་དགོངས་པ་ཤར། །བྱ་བཙལ་རྩོལ་སྒྲུབ་ ― DNG001_Page_0252 ―
[མ་དཔེ་གཟིགས་ན་འདིར་གནོན།]
མེད་པ་རུ། །ཟང་ཀ་རྣལ་མར་གནས་པའོ། །སྐྱེ་མེད་དངོས་མེད་འབྲས་བུ་བློ་ལས་འདས། །ཨེ་མ་ངོ་མཚར་རྨད་བྱུང་ཆོས། །གཞན་ལས་མི་འབྱུང་ཨ་ལས་བྱུང་། །ཨ་ལ་ལ་ཧོ། མ་ལུས་རིལ་པོར་ཀ་དག་ཆེན་པོར་གྲོལ། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། སྤྱི་ཏིའི་ཐེག་པ་བསྟན་པའི་ལེའུ་སྟེ་དགུ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དེ་ལས་ཡང་ཏི་གང་གིས་འཕགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། ཨ་ཏི་ཏྲ་བྷྱོ་ཡ་ཐུ་ལ་དྷརྨྨ་དྷཱ་ཏུ། ཨ་ཨ་ཐ་ཐི། ཡང་ཏི་ཉི་ཟླའི་སྙིང་པོ་འདི། །ལྟ་སྒོམ་སྤྱོད་འབྲས་བསྒྲུབ་ཏུ་མེད། །གཏད་མེད་དམིགས་མེད་སོ་མ་བློ་ལས་གྲོལ། །སྣང་བ་ཐམས་ཅད་མིང་མེད་ཆེན་པོར་གྲོལ། །ཀ་དག་སྐྱེ་མེད་དངོས་པོའི་ཆོས་རྣམས་མེད། །སྤྱི་ཏི་ཉིད་ལ་གང་གིས་འཕགས་ཞེ་ན། །སྣང་བའི་རྣམ་པ་གང་ལ་ཡང་། །མིང་འདོགས་མེད་པར་ཐིག་ལེ་སྤྱི་བརྟོལ་ཡིན། །དག་དང་མ་དག་མེད་པར་གཏི་མུག་ཆེན་པོར་གྲོལ། །ཁམས་གསུམ་སྡུག་བསྔལ་མེད་པར་འདི་ཀ་ལྟ་བུར་གྲོལ། །སངས་རྒྱས་སེམས་ཅན་འགྲོ་དྲུག་གནས་མེད་པར། །བློས་བཏགས་མིང་འདོགས་མེད་པར་གྲོལ། །ཆོས་ཟད་བློ་སྟོར་མཚོན་བརྗོད་བསམ་ལས་འདས་པར་གྲོལ། །སརྦ་དྷརྨཱ་བྷྱོ་ཧ་ཐུ་ལ་མུ་ལ་ཨ། ཅང་མེད་ཅིར་སྣང་མིང་མེད་ཆེན་པོར་གྲོལ། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྫོགས་ཆེན་གཉའ་གཅོག་སྤྱི་ཏི་གོང་བརྒལ་ཡང་ཏི་བསྟན་པའི་ལེའུ་སྟེ་བཅུ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །སྤྱི་འདས་བློ་བྲལ་བསྟན་པ་ལ། །བྱ་བཙལ་བློ་ཆོས་མི་འཚལ་ལམ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་ལ། །བྱ་བཙལ་རྩོལ་སྒྲུབ་མི་དགོས་ཏེ། །མ་བཅོས་རང་སར་གྲོལ་བས་མཆོག །ཆོས་རྣམས་ཐམས་ཅད་སྤྲོས་བཅད་ལ། །ལུས་ངག་ཡིད་གསུམ་དལ་བར་སྡོད། །སྤྱོད་ལམ་རྣམ་བཞི་ཅིར་སྤྱོད་ཀྱང་། །སྤྱོད་ ― DNG001_Page_0253 ―
[མ་དཔེ་གཟིགས་ན་འདིར་གནོན།]
བཞིན་མ་ཆགས་བདེ་བའི་མཆོག །བལྟ་མི་བལྟ་ཡི་ལྟ་བ་མེད། །ལྟ་བ་རྩོལ་བས་སྒྲུབ་ཏུ་མེད། །བསྒོམ་མི་བསྒོམ་གྱི་སྒོམ་པ་མེད། །བསྒོམ་པ་རྩོལ་བས་བསྒྲུབ་ཏུ་མེད། །སྤྱོད་མི་སྤྱོད་ཀྱི་སྤྱོད་པ་མེད། །སྤྱོད་པ་རྩོལ་བས་བསྒྲུབ་ཏུ་མེད། །བསྒྲུབ་མི་བསྒྲུབ་ཀྱི་བསྒྲུབ་ཏུ་མེད། །འབྲས་བུ་རྩོལ་བས་བསྒྲུབ་ཏུ་མེད། །ཕྲིན་ལས་རྩོལ་བས་བསྒྲུབ་ཏུ་མེད། །དམ་ཚིག་རྩོལ་བས་བསྲུང་དུ་མེད། །ས་ལམ་རྩོལ་བས་བགྲོད་དུ་མེད། །ཅིར་སྣང་ཅིར་སྲིད་ལྟ་བ་ལ། །ལྟ་དང་མི་ལྟའི་རྩོལ་སྒྲུབ་མེད། །རིག་ཚད་འགྱུས་ཚད་གྲོལ་བ་ལས། །ཐུན་དུ་བཅད་པས་བསྒོམ་དུ་མེད། །གང་གང་སྣང་སྣང་སྤྱོད་པ་ལས། །རྩོལ་བས་ཆེད་དུ་སྤྱད་དུ་མེད། །ཀ་དག་འོད་གསལ་དམ་ཚིག་ལས། །ཆེད་དུ་བསྲུང་ཞིང་བསྡམ་དུ་མེད། །སྦྱང་བགྲོད་ཡེ་མེད་གྲོལ་བ་ལས། །ས་ལམ་སྦྱངས་ཤིང་བགྲོད་དུ་མེད། །འབྲས་བུ་ཡེ་ཀློང་མཐའ་སྟོངས་པས། །ཡིད་སྨོན་རེ་དོགས་རྩོལ་བ་མེད། །ཡང་ཏི་ཉི་ཟླའི་སྙིང་པོ་ལ། །ཞེ་འདོད་བྱ་རྩོལ་མི་བྱེད་དེ། །བྱར་མེད་ལྷུག་པར་བཞག་པས་ཆོག །མ་བཅོས་རྣལ་མ་རང་སར་ཞོག །ཆེད་དུ་རྩོལ་བསྒྲུབ་གང་ཡང་མེད། །འགྲོ་ཡིན་འགྲོ་ཡིན་རང་སར་གྲོལ། །སྡོད་ཀྱིན་སྡོད་ཀྱིན་རང་སར་གྲོལ། །ཉལ་གྱིན་ཉལ་གྱིན་རང་སར་གྲོལ། །ཟ་ཡིན་ཟ་ཡིན་རང་སར་གྲོལ། །སྡུག་གིན་སྡུག་གིན་རང་སར་གྲོལ། །སྐྱིད་ཀྱིན་སྐྱིད་ཀྱིན་རང་སར་གྲོལ། །གང་ན་གནས་ཀྱང་མ་ཆགས་རང་སར་གྲོལ། །ཅི་ལ་སྤྱོད་ཀྱང་མ་ཞེན་རང་སར་གྲོལ། །ཇི་སྐད་སྨྲས་ཀྱང་གྲག་སྟོང་གྲོལ། །ཅི་ཐོས་གང་ཡང་མ་ཉན་གྲོལ། །གང་ལ་རེག་ཀྱང་མ་བཏང་མ་བཟུང་གྲོལ། །སྒོ་ལྔ་གསལ་བའི་ཤེས་པ་ལ། །ཡིད་ལྔ་མ་བསྒྲུབས་ཟང་ཐལ་གྲོལ། །ཡིད་རིག་འགྱུས་ཀྱང་མ་བཟུང་གྲོལ། །སྐྱེ་མེད་འགག་མེད་སྣ་ཚོགས་ཀྱང་། །སྣ་ཚོགས་སྐྱེ་མེད་ཀློང་དུ་གྲོལ། །དངོས་མེད་དངོས་པོ་ཇི་སྙེད་ཀྱང་། །ངང་དྭངས་དངོས་མེད་ཀློང་དུ་གྲོལ། །ཅང་མེད་ཅིར་སྣང་དེ་ཀར་གྲོལ། །སྟོང་པའི་ཀློང་ནས་ཀུན་འབྱུང་སྟོང་པ་ངང་དུ་གྲོལ། །རྩལ་ཟེར་རིག་སེམས་འོད་གསལ་ཆེན་པོར་གྲོལ། །འགྱུ་བ་དྲན་པ་བློ་དང་རྟོག་པ་ཡང་། །ངང་དྭངས་རང་སངས་སྙིང་པོའི་ཀློང་དུ་གྲོལ། །བློས་བཏགས་ཆོས་རྣམས་ཐམས་ཅད་ཀྱང་། །ཆེད་དུ་དགག་ ― DNG001_Page_0254 ―
[མ་དཔེ་གཟིགས་ན་འདིར་གནོན།]
བསྒྲུབ་རྩོལ་བས་མ་སྤངས་པར། །ཀ་དག་དངོས་མེད་སྐྱེ་མེད་བྱར་མེད་བློ་ལས་འདས། །གནས་ལུགས་སྙིང་པོ་ཆིག་ཆོད་པ། །ཆོས་ཉིད་ཡང་དག་ངེས་པ་མ་ནོར་བ། །ཆིག་ཆོད་ཆོས་སྐུ་ལྷུན་གྲུབ་ཟང་ཐལ་ཡེ་ནས་གྲོལ། །ཡེ་དག་ཡེ་གསལ་ཡེ་གྲུབ་ཡེ་གནས་སོ། །ཡང་ཏི་ཉི་ཟླའི་སྙིང་པོ་ལ། །ད་གདོད་བྱ་བཙལ་རྩོལ་སྒྲུབ་ག་ལ་ཡོད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། སྤྱི་འདས་ཡང་ཏིལ་བྱ་བཙལ་བློ་ཆོས་མི་དགོས་པར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྩོལ་བསྒྲུབ་འདས་པའི་ཐེག་པ་ལ། །ལྟ་སྒོམ་སྤྱོད་འབྲས་དགོས་མི་དགོས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏི་རྩོལ་སྒྲུབ་འདས་པ་ལས། །ལྟ་སྒོམ་སྤྱོད་འབྲས་བློ་ཡི་ཡུལ། །བློ་ཡི་ཡུལ་ལས་ངེས་པ་མེད། །བློ་ཡུལ་མ་ཟད་སངས་རྒྱས་ཆོས་མི་ཟད། །དེས་ན་ཡང་ཏི་ཉི་ཟླའི་སྙིང་པོ་ལ། །ཞེ་འདོད་ལྟ་བའི་སེམས་དང་བྲལ། །དམིགས་པ་སྒོམ་པའི་སེམས་དང་བྲལ། །བྱ་རྩོལ་སྤྱོད་པའི་སེམས་དང་བྲལ། །རེ་དོགས་འབྲས་བུའི་སེམས་དང་བྲལ། །ཐིག་ལེ་མཐོང་བརྟོལ་སེམས་དང་བྲལ། །ཞེ་འདོད་གཟའ་གཏད་ལྟ་བ་མེད། །ཀ་དག་འོད་གསལ་བསྒོམ་པ་ལ། །དམིགས་གཏད་ཡིད་གཟུང་བསྒོམ་པ་མེད། །དངོས་མེད་བྱར་མེད་རྣལ་མ་ལ། །བྱ་བཙལ་མེད་པས་སྤྱོད་པ་མེད། །གསང་བའི་ཡང་སྙིང་བློ་འདས་ལ། །གཞན་ནས་རྙེད་པའི་སངས་རྒྱས་མེད། །ཡེ་ནས་སྐུ་གསུམ་ལྷུན་གྲུབ་ལ། །རེ་དོགས་འབྲས་བུ་ཡོངས་ཀྱིས་མེད། །མིང་མེད་ཕྱོགས་བྲལ་རྟོགས་པས་ལྟ་བ་མེད། །ཀ་དག་སྐྱེ་མེད་རྟོགས་པས་སྒོམ་པ་མེད། །དངོས་མེད་རྣལ་མ་རྟོགས་པས་བསམ་དུ་མེད། །སོ་མ་ལྷུག་པ་བག་ཡངས་རྟོགས་པས་སྤྱོད་པ་མེད། །ཡེ་ནས་རང་འཁྲུངས་རྟོགས་པས་འབྲས་བུ་མེད། །རྟག་ཆད་བློ་ལས་གྲོལ་བས་ལྟ་སྒོམ་མེད། །བློ་ཟད་ཉོན་མོངས་ཡེ་བརླག་ཡིད་སྨོན་སངས་རྒྱས་མེད། །ཡང་ཏི་ཡོ་ག་རྟོགས་པས་ན། །རིག་མེད་སེམས་མེད་ཆོས་རྣམས་མེད། །ཅེས་གསུངས་སོ། ། ― DNG001_Page_0255 ―
[མ་དཔེ་གཟིགས་ན་འདིར་གནོན།]
རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་རྩོལ་སྒྲུབ་འདས་པ་ལ་ལྟ་སྒོམ་སྤྱོད་འབྲས་མི་དགོས་པར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཐེག་དགུ་སྤང་ངམ་ཇི་ལྟར་བགྱི། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་ལ། །ཐེག་དགུ་སྤངས་པས་རྫོགས་མི་འགྱུར། །ཐེག་དགུ་སྤང་ལེན་མེད་པར་རྫོགས། །ཡུལ་སེམས་གཉིས་སུ་མ་བཟུང་བས། །ཉན་ཐོས་ལྟ་བ་ངང་གིས་རྫོགས། །རྟེན་འདྲེལ་རྣམ་པར་རིག་མེད་པས། །རང་རྒྱལ་ལྟ་བ་ངང་གིས་རྫོགས། །ཡུལ་སེམས་གཉིས་མེད་མ་བཟུང་བས། །སེམས་ཙམ་ལྟ་བ་ངང་གིས་རྫོགས། །དོན་དམ་ཀུན་རྫོབ་གཉིས་མེད་པས། །དབུ་མའི་ལྟ་བ་ངང་གིས་རྫོགས། །དག་པ་རིགས་གསུམ་མགོན་མེད་པས། །ཀྲི་ཡའི་ལྟ་བ་ངང་གིས་རྫོགས། །མར་སྤྱོད་ཡར་ལྟའི་སེམས་མེད་པས། །ཨུ་པའི་ལྟ་བ་ངང་གིས་རྫོགས། །རིགས་ལྔ་སྐྱེ་འགག་གཉིས་མེད་པས། །ཡོ་གའི་ལྟ་བ་ངང་གིས་རྫོགས། །ནང་རྒྱུད་མ་ཧཱའི་ཐེག་པ་ནི། །ཐབས་དང་ཤེས་རབ་གཉིས་མེད་པས། །མ་ཧཱའི་ལྟ་བ་ངང་གིས་རྫོགས། །དབྱིངས་དང་ཡེ་ཤེས་གཉིས་མེད་པས། །ཨ་ནུའི་ལྟ་བ་ངང་གིས་རྫོགས། །རིག་པ་འགྱུ་བའི་ཤེས་པ་ལ། །རང་རྒྱུད་མེད་པས་ཞེན་མེད་པ། །ཨ་ཏིའི་ལྟ་བ་ངང་གིས་རྫོགས། །ཆོས་ཉིད་ཀ་དག་ཆེན་པོ་ལ། །དག་དང་མ་དག་གཉིས་མེད་པས། །སྤྱི་ཏིའི་ལྟ་བ་ངང་གིས་རྫོགས། །མཁའ་ཀློང་རྣམ་དག་ཆོས་ཉིད་སྙིང་པོ་ལ། །བློས་བཏགས་ཆོས་རྣམས་མ་ལུས་ཡོངས་སུ་རྫོགས། །རྫོགས་ཆེན་ཡང་ཏི་ཡོ་ག་ལ། །སྤང་ན་དུག་ལྔ་སྤང་ཀྱང་སྤང་ལེན་ཡིན། །བསྒྲུབ་ན་སྐུ་གསུམ་བསྒྲུབ་ཀྱང་རྩོལ་བསྒྲུབ་ཡིན། །སྤང་ལེན་མེད་པ་ཉི་ཟླའི་སྙིང་པོ་ཡིན། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོར་ཐེག་པ་དགུ་མ་སྤངས་ངང་གིས་རྫོགས་པའི་ལེའུ་སྟེ་བཅུ་གསུམ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དཀྱིལ་འཁོར་དབང་དང་དངོས་གྲུབ་ ― DNG001_Page_0256 ―
[མ་དཔེ་གཟིགས་ན་འདིར་གནོན།]
ལ། །རེ་བར་བྱང་འམ་ཡེ་ནས་རྫོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་ལ། །འཇུག་པའི་དཀྱིལ་འཁོར་རེ་བའི་དངོས་གྲུབ་མེད། །ཆོས་ཉིད་བྱང་ཆུབ་སེམས་ཀྱི་དཀྱིལ་འཁོར་ནི། །གདོད་ནས་གསལ་བས་འདྲིར་མི་རེ། །མཁའ་ཀློང་རྣམ་དག་ཆོས་དབྱིངས་དཀྱིལ་འཁོར་ན། །རང་བྱུང་སྙིང་པོའི་ལྷ་ཚོགས་ངང་གིས་གསལ། །ད་གདོད་མི་བསྐྱེད་ཡེ་ནས་རྫོགས་པའི་ལྷ། །སྤྱན་འདྲེན་མཆོད་བསྟོད་མི་བྱེད་ཡེ་ནས་རང་ལ་རྫོགས། །དངོས་གྲུབ་གཞན་ནས་མི་རེ་རང་གི་སེམས་ལ་གྲུབ། །དཀྱིལ་འཁོར་གཞན་ནས་མི་བྲི་སེམས་ལ་རྫོགས། །ས་ཚོན་དཀྱིལ་འཁོར་འདུས་བྱས་ཡིན། །འདུས་བྱས་དཀྱིལ་འཁོར་ཐམས་ཅད་འཇིག །དེ་ཕྱིར་རང་བྱུང་སེམས་ཀྱི་དཀྱིལ་འཁོར་ནི། །རང་བཞིན་ངོ་བོ་ཐུགས་རྗེ་གསུམ། །ཐོག་མ་དང་པོའི་དཀྱིལ་འཁོར་ཡིན། །འདོད་ཆགས་ཞེ་སྡང་གཏི་མུག་གསུམ། །བདེ་གཤེགས་གསུམ་གྱི་དཀྱིལ་འཁོར་ཡིན། །སེམས་ཅན་ལུས་ངག་ཡིད་གསུམ་ཀྱང་། །སྐུ་གསུང་ཐུགས་ཀྱི་དཀྱིལ་འཁོར་ཡིན། །སྣང་སྲིད་སྣོད་བཅུད་འཇིག་རྟེན་རྣམས། །མ་བྲིས་འོད་གསལ་དཀྱིལ་འཁོར་ཡིན། །སྐྱེ་འགྲོ་སྣང་སྲིད་སེམས་ཅན་རྣམས། །མ་སྐྱེས་ཡོངས་རྫོགས་ལྷ་ཚོགས་ཡིན། །སྣང་བ་སྐུ་ཡི་དཀྱིལ་འཁོར་ཡིན། །སྒྲ་གྲག་གསུང་གི་དཀྱིལ་འཁོར་ཡིན། །དྲན་རྟོག་ཐུགས་ཀྱི་དཀྱིལ་འཁོར་ཡིན། །སྟོང་གསུམ་འཇིག་རྟེན་མ་ལུས་ཀུན། །ཡེ་གདོད་མ་ཉིད་ནས་ཀ་དག་ཡིན། །རང་བྱུང་འོད་གསལ་ཆེན་པོ་དེ། །གསལ་དག་སྒྲིབ་མེད་དཀྱིལ་འཁོར་ཡིན། །དཀྱིལ་འཁོར་དེ་ལྟར་རྫོགས་པས་བསྐྱེད་མི་དགོས། །སྙིང་པོ་ཆོས་དབྱིངས་དཀྱིལ་འཁོར་ལ། །རང་བྱུང་སྐྱེ་མེད་གཙོ་བོ་བཞུགས། །འོད་གསལ་ཤར་ཕྱོགས་དཀྱིལ་འཁོར་ལ། །ཀ་དག་སྒྲིབ་མེད་ལྷ་ཚོགས་གནས། །ལྷོ་ཕྱོགས་རང་བཞིན་དཀྱིལ་འཁོར་ལ། །རང་བྱུང་སངས་རྒྱས་ལྷ་ཡང་བཞུགས། །ཉོན་མོངས་རྣམ་རྟོག་ནུབ་པའི་ནུབ་ཕྱོགས་ན། །རང་གསལ་ཁྱེའུ་ཆུང་ཡེ་ནས་མ་བསྐྱེད་བཞུགས། །བློས་བརྟགས་བརྒྱད་ཁྲི་བཞི་སྟོང་བྱང་བའི་བྱང་ཕྱོགས་ན། །བློས་བརྟགས་མཚན་མ་གྲོལ་བའི་ལྷ་ཡང་བཞུགས། །མ་བསྐྱེད་ཡོངས་སུ་རྫོགས་པར་བཞུགས། །རིགས་ལྔ་ཆ་མཐུན་ཁྱད་པར་འཕགས། ། ― DNG001_Page_0257 ―
[མ་དཔེ་གཟིགས་ན་འདིར་གནོན།]
རྩོལ་བསྒྲུབ་བྱས་ནས་བཞུགས་པ་མ་ཡིན་ཏེ། །ཡེ་ཐོག་མ་ཉིད་ནས་བཞུགས་པ་ཡིན། །ཡེ་ནས་བཞུགས་པས་སྤྱན་མི་འདྲེན། །གདོད་ནས་དག་པས་སྒྲིབ་མི་སྦྱང་། །ཀ་ནས་དག་པས་ད་མི་མཆོད། །ཡེ་ནས་བཟང་བས་བསྟོད་མི་དགོས། །རང་ལ་རང་གནས་གཤེགས་བཞུད་མེད། །གོང་དུ་བཤད་པའི་དོན་རྟོགས་ན། །དེ་ལས་མི་འདའ་དམ་ཚིག་ཡིན། །ཀ་དག་སྐྱེ་མེད་དོན་རྟོགས་ན། །དེ་ལས་མི་འདའ་དམ་ཚིག་ཡིན། །མིང་མེད་བརྗོད་འདས་དོན་རྟོགས་ན། །དེ་ལས་མི་འདའ་དམ་ཚིག་ཡིན། །དངོས་མེད་ཟང་ཐལ་དོན་རྟོགས་ན། །དེ་ལས་མི་འདའ་དམ་ཚིག་ཡིན། །བྱར་མེད་བློ་འདས་དོན་རྟོགས་ན། །དེ་ལས་མི་འདའ་དམ་ཚིག་ཡིན། །ཡང་ཏི་ཉི་ཟླའི་དོན་རྟོགས་ན། །འོག་མར་མི་སྤྱོད་དམ་ཚིག་ཡིན། །དམ་ཚིག་དམ་ཚིག་ཅེས་བྱ་བ། །སྐྱེ་མེད་ཀ་དག་དམ་ཚིག་ཡིན། །དཔེར་ན་ཆུ་དང་ཤེལ་སྒོང་འདྲ། །ཕྱི་ནང་སྐྱོན་མེད་ཀ་ནས་དག །དེ་ལ་ཆེད་དུ་བསྲུང་ཞིང་བསྡམ་དུ་མེད། །དངོས་གྲུབ་གཞན་ནས་རེ་བ་མེད། །རང་གི་སེམས་ལ་ཡེ་ནས་གྲུབ། །དངོས་གྲུབ་དངོས་གྲུབ་ཞེས་བྱ་བ། །དངོས་ནི་སྐྱེ་མེད་སྙིང་པོ་སྟེ། །གྲུབ་པ་ཀ་དག་འོད་གསལ་ལོ། །དངོས་ནི་དངོས་མེད་ཟང་ཐལ་ཏེ། །གྲུབ་ནི་བློ་འདས་བྱར་མེད་གྲུབ། །དེས་ན་དངོས་གྲུབ་ཅེས་སུ་བཤད། །གོང་གི་དཀྱིལ་འཁོར་ངེས་ཚིག་ཀྱང་། །དཔེར་ན་རི་བོ་མཆོག་རབ་དཀྱིལ། །གླིང་བཞི་གླིང་ཕྲན་འཁོར་ཡིན་ནོ། །འབྱུང་བ་རིམ་བརྩེགས་དཀྱིལ་ཡིན་ལ། །གླིང་ཕྲན་བཅུ་གཉིས་འཁོར་ཡིན་ནོ། །དེ་ལ་ལྕགས་རི་མུ་ཁྱུད་བསྐོར། །ཁ་དོག་ལྔ་ཡི་ས་ཚོན་ཡེ་ནས་བཀོད། །ཕྱོགས་བཞི་མཚམས་བཞི་སྒོ་བཞི་ཡེ་ནས་གནས། །སྣོད་ཀྱི་འཇིག་རྟེན་དཀྱིལ་འཁོར་ན། །བཅུད་ཀྱི་སེམས་ཅན་ལྷ་ཚོགས་ཡིན། །རང་བཞིན་ལྷུན་གྲུབ་བུཌྜྷའི་ལྷ་ཚོགས་སོ། །བྱ་བཙལ་རྩོལ་བསྒྲུབ་མེད་པར་ཡེ་ནས་རྫོགས། །དཀྱིལ་འཁོར་དཀྱིལ་འཁོར་ཞེས་བྱ་ན། །དཀྱིལ་ནི་སྙིང་པོའི་ཀློང་ཡིན་ནོ། །འཁོར་ནི་ཀ་དག་སྐྱེ་མེད་ཡིན། །དཀྱིལ་ནི་ཡེ་ནས་གཞི་ཡིན་ཏེ། །འཁོར་ནི་སྣང་སྲིད་འཁོར་འདས་ཡིན། །དཀྱིལ་ནི་ཆོས་ཀྱི་དབྱིངས་ཡིན་ཏེ། །འཁོར་ནི་གསལ་དག་འོད་གསལ་ཡིན། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་ ― DNG001_Page_0258 ―
[མ་དཔེ་གཟིགས་ན་འདིར་གནོན།]
གསལ་གྱི་རྒྱུད་ལས། ཡང་ཏི་གནས་ལུགས་ཀྱི་དཀྱིལ་འཁོར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དཀྱིལ་འཁོར་ཆེན་པོ་དེ་ལྟར་ན། །དབང་བསྐུར་བྱིན་བརླབ་འཚལ་མི་འཚལ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །རྫོགས་ཆེན་ཡང་ཏི་རྟོགས་པ་ལ། །བྱིན་བརླབ་དབང་བསྐུར་མི་དགོས་ཏེ། །རང་སེམས་གདོད་དག་སྐྱེ་མེད་ནམ་མཁའ་ལ། །ཐིག་ལེ་མཐོང་བརྟོལ་ཀ་དག་ཉི་ཟླ་ཤར། །མ་རིག་ལས་དང་ཉོན་མོངས་ཡེ་ནས་བརླག །དེ་དག་འོད་གསལ་ཆེན་པོའི་དབང་རྫོགས་སོ། །སྙིང་པོ་འདུས་མ་བྱས་པའི་དཀྱིལ་འཁོར་དུ། །རིག་གསལ་ངང་དྭངས་ཁྱེའུ་ཆུང་ལ། །ཐིག་ལེ་ཁོང་གསལ་བཅུད་བསྡུས་དབང་བསྐུར་བས། །རང་གྲོལ་ཟང་ཐལ་དབང་ཐོབ་བོ། །མཁའ་ཀློང་རྣམ་དག་ཆོས་དབྱིངས་དཀྱིལ་འཁོར་དུ། །སེམས་རིག་ངང་དྭངས་ཁྱེའུ་ཆུང་ལ། །ཐོལ་བྱུང་ངང་དྭངས་དབང་བསྐུར་བས། །རང་བྱུང་ངང་དྭངས་དབང་ཐོབ་བོ། །རིན་ཆེན་གསལ་དག་འོད་ཀྱི་དཀྱིལ་འཁོར་དུ། །རིག་པ་ངང་དྭངས་ཀུན་བྱེད་ཁྱེའུ་ཆུང་ལ། །བྱར་མེད་རྩོལ་བསྒྲུབ་འདུས་པའི་དབང་བསྐུར་བས། །བློ་ཟད་ཆོས་མེད་གཏིང་རྫོགས་མཐའ་ཡས་དབང་ཐོབ་བོ། །དབང་བསྐུར་དབང་བསྐུར་བྱར་མེད་དེ། །རང་སེམས་ཀ་དག་ངང་ལ་རྫོགས་པ་ལ། །རྫས་དང་བུམ་པའི་རྟེན་མེད་ཀྱང་། །བྱར་མེད་བློ་འདས་དབང་བསྐུར་བས། །རྩོལ་བྲལ་མིང་མེད་དབང་ཐོབ་བོ། །དབང་ནི་རང་སེམས་སྐྱེ་བ་མེད། །བསྐུར་བ་ཀ་དག་ཆེན་པོར་བསྐུར། །ཐོབ་ནི་འཕོ་འགྱུར་མེད་པར་ཐོབ། །དབང་ནི་ངང་དྭངས་གསལ་དག་སྟེ། །བསྐུར་ནི་དངོས་མེད་རྣལ་མར་བསྐུར། །ཐོབ་ནི་ཟང་ཐལ་རང་བྱུང་ཐོབ། །དབང་ནི་སྟོང་པ་ཀུན་ཏུ་འབྱུང་། །བསྐུར་ནི་འཛིན་པ་རང་དག་བསྐུར། །ཐོབ་ནི་རྣམ་དག་ཡེ་ཤེས་ཐོབ། །གཞན་གྱིས་བསྐུར་བའི་མཁན་པོ་མེད། །རང་གི་སེམས་ལ་ཡེ་ནས་རྫོགས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྫོགས་ཆེན་ཡང་ཏི་རྟོགས་པ་ལ་དབང་དང་ ― DNG001_Page_0259 ―
[མ་དཔེ་གཟིགས་ན་འདིར་གནོན།]
བྱིན་བརླབ་གཞན་ནས་རེ་མི་དགོས་པར་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཚོགས་དང་གཏོར་མ་མ་བཏང་བར། །ཚོགས་བསགས་སྨོན་ལམ་ཇི་ལྟར་རྫོགས། །ཞེས་ཞུས་སོ། །སྟོན་པས་འཁོར་ལ་བཀའ་སྩལ་པ། །རྫོགས་ཆེན་ཡང་ཏི་ཡོ་ག་ལ། །ཚོགས་དང་གཏོར་མ་མི་དགོས་ཏེ། །ཚོགས་གསོག་གཏོར་མ་དགོས་ན་ཡང་ཏི་མིན། །ཅི་ཕྱིར་རྩོལ་སྒྲུབ་ཡིད་སྨོན་ཡིན། །ཡིད་སྨོན་ཆོས་ཀྱིས་སངས་མི་རྒྱ། །དེ་བས་ཡང་ཏི་ཡོ་ག་ལ། །ཚོགས་དང་གཏོར་མ་ཡེ་ནས་རྫོགས། །ཡེ་ནས་རང་ལ་རྫོགས་ལུགས་ནི། །ཚོགས་ནི་སྣང་སྲིད་འཁོར་འདས་ཏེ། །ཕུལ་ནི་ཀ་དག་ཆེན་པོར་ཕུལ། །དགྱེས་ནི་རང་བྱུང་སྐྱེ་མེད་དགྱེས། །ཚོགས་ནི་དུག་ལྔ་དུག་གསུམ་སྟེ། །ཕུལ་ནི་སྐུ་ལྔ་སྐུ་གསུམ་ཕུལ། །དགྱེས་པ་དོན་དམ་འགྱུར་མེད་དགྱེས། །ཚོགས་ནི་མཚན་མའི་རྣམ་རྟོག་སྟེ། །ཕུལ་ནི་རྩིས་གདབ་མེད་པར་ཕུལ། །དགྱེས་ནི་ཆོས་དབྱིངས་ཀློང་ཆེན་དགྱེས། །གཏོར་ནི་བློས་བཏགས་ཆོས་རྣམས་གཏོར། །མ་ནི་ཆོས་ཉིད་རྣལ་མ་ཡིན། །གཏོར་བ་གྲུབ་མཐའི་ལྟ་སྒོམ་གཏོར། །མ་ནི་ལྟ་སྤྱོད་བསྒྲུབ་པ་མེད། །ཚོགས་གཉིས་མ་བསགས་ཡེ་ནས་རྫོགས། །སྒྲིབ་གཉིས་མ་སྦྱངས་ཡེ་ནས་དག །ཚོགས་དང་གཏོར་མ་མ་བཏང་བར། །ཀ་དག་སྙིང་པོའི་ཀློང་དུ་གྱུར། །ཚོགས་གསོག་བྱས་པས་དེར་མི་སླེབ། །སྨོན་ལམ་ཞེས་པའི་རང་བཞིན་ཀྱང་། །འདིར་བཏབ་ཕྱི་མར་མི་རེའོ། །སྨོན་ལམ་གང་ཡིན་ཡིད་སྨོན་ཏེ། །སྨོན་ལམ་ཞེས་པའི་ཐ་ཚིག་ཡིན། །སྨོན་པའི་སངས་རྒྱས་རང་ལ་རྙེད། །དེ་ཉིད་ཐར་ལམ་འགྲོ་བའི་ལམ། །དེས་ན་སྨོན་ལམ་ཞེས་སུ་བཤད། །ཀ་དག་སྐྱེ་མེད་ཀློང་གྱུར་པས། །སྨོན་ལམ་མ་བཏབ་ཡེ་ནས་རྫོགས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་ལ་ཚོགས་གཏོར་སྨོན་ལམ་མི་དགོས་པར་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །ཡང་ཏི་ཉི་ཟླའི་སྙིང་པོ་ལ། །གོལ་སྒྲིབ་ ― DNG001_Page_0260 ―
[མ་དཔེ་གཟིགས་ན་འདིར་གནོན།]
འཁྲུལ་པ་ཡོད་དམ་མེད། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་རྟོགས་པ་ན། །གོལ་སྒྲིབ་འཁྲུལ་པ་གང་ཡང་མེད། །ཡེ་ནས་ཐོག་མའི་དོན་རྟོགས་གོལ་དུ་མེད། །སྐྱེ་མེད་ཀ་དག་རྟོགས་པས་སྒྲིབ་པ་མེད། །བྱར་མེད་བློ་འདས་རྟོགས་པས་འཁྲུལ་དུ་མེད། །ཡེ་ཤེས་སྤྱི་བླུགས་རྟོགས་པས་ཐེག་པའི་གོལ་སྒྲིབ་མེད། །ཡང་ཏི་ཡོ་ག་རྟོགས་པས་ན། །གོལ་སྒྲིབ་ཉིས་སྟོང་ལྔ་བརྒྱ་ཡང་། །ཚིག་གི་གོང་འོག་ཐེག་པས་གཅིག་ཏུ་ཆོད། །གོལ་སྒྲིབ་ཆོད་པས་འཁྲུལ་པ་གང་ཡང་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་རྟོགས་པ་ལ་གོལ་སྒྲིབ་འཁྲུལ་པ་མེད་པར་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །མ་རིག་ཡེ་ཤེས་ཡོད་དམ་མེད། །འཆར་སྒོ་འཁྲུལ་སྒོ་ཅི་ལ་ཟེར། །ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་ལ། །མ་རིག་ཡེ་ཤེས་གང་ཡང་མེད། །དཔེར་ན་ཉི་ཟླའི་སྙིང་པོ་ལ། །མུན་པ་ཡོད་པར་མ་གསུངས་སོ། །དེ་བཞིན་ཀ་དག་སྟོང་པ་ཡི། །འོད་གསལ་དེ་ལ་མ་རིག་མེད། །བག་ཆགས་སྒྲིབ་མེད་འཁྲུལ་སྒོ་མེད། །ཡེ་དག་རང་གསལ་ཡེ་ཤེས་ལ། །སྙིང་པོ་ཀློང་དུ་གྱུར་པས་འཆར་སྒོ་མེད། །ཐིག་ལེ་མཐོང་བརྟོལ་གསལ་མེད་ལ། །མ་རིག་ཡོད་པར་མ་མཐོང་ངོ་། །མ་རིག་ཡེ་ཤེས་རྣམ་གཉིས་ཀྱང་། །རྣམ་རྟོག་བློ་ལ་གཉིས་སྣང་ཏེ། །ཡང་ཏིའི་དོན་རྟོགས་གཉིས་ཀ་མེད། །མ་རིག་ཡེ་ཤེས་ཐ་དད་མེད། །མ་རྟོགས་རྟོགས་པས་ལམ་དུ་གཅིག །འཆར་སྒོ་འཁྲུལ་སྒོ་གང་ཡང་མེད། །ཐིག་ལེ་སྤྱི་བརྟོལ་རྟོགས་པས་ན། །འཆར་སྒོ་མེད་ལ་འཁྲུལ་སྒོ་མེད། །དཔེར་ན་མཚན་མོའི་མུན་ནག་ལ། །སཱུརྻ་གསལ་བའི་ཉི་ཤར་བས། །མུན་པ་མ་སྤངས་འོད་དུ་གསལ། །འོད་དང་མུན་པ་ནམ་མཁར་གཅིག །དེ་བཞིན་མ་རིག་སྒྲིབ་གཡོགས་ལ། །ཐིག་ལེ་གསལ་དག་ཉི་ཤར་བས། །མ་རིག་མ་སྤངས་ཀ་དག་ཆེན་པོར་གསལ། ། ― DNG001_Page_0261 ―
[མ་དཔེ་གཟིགས་ན་འདིར་གནོན།]
བག་ཆགས་སྒྲིབ་གཡོགས་འོད་གསལ་ཆེན་པོར་གསལ། །གཏི་མུག་ཆོས་སྐུ་རང་བཞིན་གཅིག །རྒྱུ་རྐྱེན་འཕོ་འགྱུར་མེད་པའི་དོན་རྟོགས་ནས། །སྙིང་པོ་ཡང་དག་མ་ནོར་ངེས་པའི་ལམ། །སྐྱེ་མེད་ཀ་དག་བྱར་མེད་བློ་འདས་ཡིན། །དངོས་མེད་ཟང་ཐལ་མིང་མེད་དོན་རྟོགས་པས། །འཆར་སྒོ་འཁྲུལ་སྒོ་གཉིས་ཀ་མེད། །དེ་ཕྱིར་ཐོག་མར་ཡེ་སངས་རྒྱས། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་རྟོགས་པས་མ་རིག་ཡེ་ཤེས་འཆར་སྒོ་འཁྲུལ་སྒོ་མེད་པར་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྟོགས་དང་མ་རྟོགས་ཡོད་དམ་མེད། །སངས་རྒྱས་སེམས་ཅན་ཅི་ལ་ཟེར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཡང་ཏི་ཉི་ཟླའི་སྙིང་པོ་ལ། །རྟོགས་དང་མ་རྟོགས་ཐ་སྙད་བློ། །བློ་ཡུལ་མ་ཟད་གྲོལ་མི་ཐོབ། །རྟོགས་དང་མ་རྟོགས་སྙིང་པོ་གཅིག །ཡེ་ཡིན་གློ་བུར་མངོན་སངས་རྒྱས། །ཀ་དག་མི་འབྲལ་རྟོགས་པ་ལ། །བློ་ཡུལ་མེད་ཀྱིས་མ་རྟོག་ཅིག །རྟོག་མཁན་མེད་ཀྱིས་མ་རྟོག་ཅིག །ཤེས་རྟོགས་མེད་ཀྱིས་མ་ཤེས་ཤིག །ཤེས་ཡུལ་མེད་ཀྱིས་མ་ཤེས་ཤིག །ཤེས་རྒྱུ་མེད་ཀྱིས་མ་ཤེས་ཤིག །ཤེས་མཁན་མེད་ཀྱིས་མ་ཤེས་ཤིག །གང་གིས་གང་རྟོགས་ཅི་ཞིག་རྟོགས། །རྟོགས་ན་སེམས་དེ་ཇི་ལྟར་འདུག །ཤེས་ན་གང་ཤེས་ཅིས་ཅི་ཤེས། །ཤེས་པའི་རྒྱུ་ནི་ཅི་ཞིག་འདུག །སྟོན་པས་འཁོར་ལ་བཀའ་སྩལ་པ། །ཐམས་ཅད་རྟོགས་པས་རྟོགས་རྒྱུ་མེད། །ཅང་མེད་ངང་དྭངས་ཆེན་པོ་ཡིན། །ཐ་སྙད་ཙམ་སྟེ་མཚོན་རྒྱུ་མེད། །རྟོགས་པ་པོ་ནི་དངོས་མེད་གྲོལ། །ཤེས་མེད་ཀུན་ཤེས་ཤེས་རྒྱུའི་དངོས་པོ་གྲོལ། །སྐྱེ་མེད་ཀ་དག་དངོས་པོའི་བློ་ལས་འདས། །ཚིག་གིས་ཤེས་རྟོགས་གང་ཡང་ཡོད་མ་ཡིན། །ཀུན་ཤེས་ཀུན་རྟོགས་གང་ཡང་མ་བཏགས་བཞག །རྟེན་མེད་ཀ་དག་འོད་གསལ་བློ་འདས་སོ། །ཞེས་གསུངས་སོ། །རང་གྲོལ་རང་གསལ་ཀློང་གྱུར་པས། །སངས་རྒྱས་སེམས་ཅན་གཉིས་ཀ་མེད། ། ― DNG001_Page_0262 ―
[མ་དཔེ་གཟིགས་ན་འདིར་གནོན།]
སྟོང་པ་ཀུན་འབྱུང་སྟོང་པར་སངས། །རང་བྱུང་རང་གྲོལ་རང་སངས་རྒྱས། །གཏི་མུག་མུན་པ་ཀ་དག་རྒྱས། །སངས་རྒྱས་གཞན་ན་མེད་ཀྱིས་མ་རེ་ཞིག །ཡེ་ཡིན་ཀློང་གྱུར་ངོ་ཤེས་པས། །སེམས་ཅན་འཁོར་བ་མེད་ཀྱིས་མ་དོགས་ཤིག །གཉིས་མེད་གཉིས་སུ་དབྱེར་མེད་པས། །སེམས་ཅན་སངས་རྒྱས་གཉིས་མེད་གཉིས་ཀ་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྟོགས་མ་རྟོགས་སངས་རྒྱས་སེམས་ཅན་གཞི་ལ་དབྱེར་མེད་པར་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །དགེ་སྡིག་ལས་འཕྲོ་ཡོད་དམ་མེད། །མཐོ་རིས་ངན་སོང་ཅི་ལ་ཟེར། །ཞུས་པས། སྟོན་པས་འཁོར་ལ་བཀའ་སྩལ་པ། །རྫོགས་ཆེན་ཡང་ཏི་ཡོ་ག་ལ། །དགེ་བ་མི་བསྒྲུབ་སྡིག་མི་འགེགས། །རང་སར་གྲོལ་ཞིང་སྐྱེ་མེད་རྟོགས། །དགེ་བ་ཆེད་དུ་མི་བྱེད་མཐོ་རིས་སྐྱེ་རུ་མེད། །སྡིག་པ་ཆེད་དུ་མི་བྱེད་ངན་སོང་སྐྱེ་རུ་མེད། །དགེ་སྡིག་གཉིས་པོ་ཆེད་དུ་མ་བྱས་པས། །མཐོ་རིས་ངན་སོང་རེ་དོགས་གཡང་ས་མེད། །ལས་འཕྲོ་མི་ལེན་འདི་ཀ་ལྟ་བུར་གྲོལ། །ཅི་སྟེ་ལས་ཀྱི་དབང་གྱུར་ན། །རང་བྱུང་ཡེ་ཤེས་ག་ལ་ཡོད། །མཐོ་རིས་ངན་སོང་བླ་དྭགས་ཡིན། །ཡང་དག་དོན་ལ་མཐོ་རིས་ངན་སོང་མེད། །སྐྱེ་མེད་ཀ་དག་རྟོགས་པ་ལ། །ངན་སོང་ལྟུང་བའི་རྒྱུ་ཡང་མེད། །ཐིག་ལེ་ཁོང་གསལ་དོན་རྟོགས་པས། །མཐོ་རིས་ངན་སོང་རྒྱུ་ཡང་མེད། །ཡེ་ཡིན་རང་སར་གྲོལ་གྱུར་པས། །ལས་འཕྲོ་མི་ལེན་མུ་མཐའ་ཡས། །ཀ་དག་མིང་མེད་དོན་རྟོགས་པས། །མཐོ་རིས་ངན་སོང་སྐྱེ་ལྟུང་མེད། །དགེ་སྡིག་ལས་འཕྲོའི་ཁར་མི་འོང་། །རྒྱུ་རྐྱེན་ཆོས་ལ་བློ་མི་གཏོད། །དགེ་སྡིག་གཉིས་ལ་རྟེན་མི་འཆའ། །རྒྱུ་འབྲས་གཉིས་ལ་རག་མ་ལུས། །བྱ་རྩོལ་ཞེ་འདོད་རེ་དོགས་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་ལ་དགེ་སྡིག་མཐོ་རིས་ངན་སོང་མེད་པར་བསྟན་པའི་ལེའུ་སྟེ་ཉི་ཤུ་པའོ།། །། ― DNG001_Page_0263 ―
[མ་དཔེ་གཟིགས་ན་འདིར་གནོན།]
དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །སངས་རྒྱས་བྱ་བ་ཡོད་དམ་མེད། །དམྱལ་བ་བྱ་བ་ཅི་ལ་ཟེར། །ཞུས་པས། སྟོན་པས་འཁོར་ལ་བཀའ་སྩལ་པ། །ཐིག་ལེ་མཐོང་བརྟོལ་དོན་རྟོགས་པས། །སངས་རྒྱས་མེད་པས་སངས་རྒྱས་མིང་ཡང་མེད། །རྙེད་པར་འདོད་པས་བསྐལ་པ་བརྒྱར་མི་རྙེད། །སངས་རྒྱས་གང་ཡིན་བླ་དྭགས་ཡིན། །བླ་དྭགས་ཚིག་ལ་སངས་རྒྱས་མིན། །སངས་རྒྱས་གང་ཡིན་ཞེ་འདོད་ཡིན། །ཞེ་འདོད་སངས་རྒྱས་དགོས་པ་མེད། །སངས་རྒྱས་ཡོད་འདོད་ཡིད་སྨོན་ཡིན། །ཡིད་སྨོན་སངས་རྒྱས་དགོས་པ་མེད། །སངས་རྒྱས་མེད་པས་སངས་ལ་རྒྱས་རྒྱུ་མེད། །འདོད་པས་མི་མྱོང་རེ་དོགས་ཡིན། །སངས་རྒྱས་མེད་ཀྱིས་མ་རེ་ཅིག །དམྱལ་བ་མེད་ཀྱིས་མ་དོགས་ཤིག །རེ་དོགས་གཉིས་མེད་མཐའ་ཆོད་ཅིག །ཡེ་ཤེས་གཏིང་རྫོགས་མཐོང་བརྟོལ་བས། །དམྱལ་བར་སྐྱེ་བའི་རྒྱུ་མེད་དོ། །དམྱལ་བའི་གནས་མེད་ཀ་དག་ཀློང་། །དངོས་ལ་དམྱལ་བའི་རྒྱུ་མེད་པས། །དམྱལ་བ་མེ་ལྕེའི་ཕྲེང་བ་ཡང་། །བྱང་ཆུབ་སེམས་ཀྱི་ཞིང་ཁམས་ཡིན། །འདོད་ཆགས་སྤྲུལ་པའི་སྐུ་རུ་རྫོགས། །ལྷ་རུ་སྐྱེ་བའི་གཡང་ས་བཅད། །ཞེ་སྡང་ལོངས་སྤྱོད་རྫོགས་སྐུར་རྫོགས། །དམྱལ་བར་སྐྱེ་བའི་གཡང་ས་བཅད། །གཏི་མུག་ཆོས་སྐུ་ཆེན་པོར་རྫོགས། །བྱོལ་སོང་སྐྱེ་བའི་གཡང་ས་བཅད། །ང་རྒྱལ་ངོ་བོ་ཉིད་ཀྱི་སྐུ། །ལྷ་མིན་སྐྱེ་བའི་གཡང་ས་བཅད། །ཕྲག་དོག་དོན་དམ་བདེ་བའི་སྐུ། །མི་རུ་སྐྱེ་བའི་གཡང་ས་བཅད། །སེར་སྣ་དབྱེར་མེད་སྐུ་རུ་རྫོགས། །ཡི་དྭགས་སྐྱེ་བའི་གཡང་ས་བཅད། །ཀ་དག་མིང་མེད་བློ་འདས་རྟོགས། །དམྱལ་བ་ལ་སོགས་འགྲོ་དྲུག་མེད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ཡང་ཏི་ཉི་ཟླའི་སྙིང་པོ་རྟོགས་པ་ལ་སངས་རྒྱས་དམྱལ་བ་མེད་པར་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྫོགས་ཆེན་ཡང་ཏི་ཡོ་ག་ཡིས། །མ་བསྒྲུབས་ ― DNG001_Page_0264 ―
[མ་དཔེ་གཟིགས་ན་འདིར་གནོན།]
འབྲས་བུ་ཇི་ལྟར་ཐོབ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཉི་ཟླའི་སྙིང་པོ་ཡང་ཏི་ལ། །འབྲས་བུ་ཐོབ་དང་མ་ཐོབ་གཉིས་མེད་ཀྱང་། །རྩོལ་བས་འབྲས་བུ་མི་འགྲུབ་སྟེ། །རེ་ཞིག་འཁོར་ལ་བྲོད་པ་བསྐྱེད་ཕྱིར་བཤད། །རེ་དོགས་འབྲས་བུ་ངས་མ་བཤད། །ཡིད་སྨོན་འབྲས་བུ་ངས་མ་བཤད། །ཞེ་འདོད་འབྲས་བུ་ངས་མ་བཤད། །བྱ་བཙལ་འབྲས་བུ་ངས་མ་བཤད། །ཚོགས་བསགས་འབྲས་བུ་ངས་མ་བཤད། །གཞན་ནས་འབྲས་བུ་རེ་བ་ངས་མ་བཤད། །གཞན་ནས་འབྲས་བུ་ཐོབ་པ་ངས་མ་བཤད། །སྔོན་ཐོག་ཡེ་ནས་རང་ལ་རང་ཆོས་ལྡན། །གཉིས་མེད་ཀློང་དུ་ཀ་དག་རང་གྲོལ་ལ། །ཐིག་ལེ་སྤྱི་བརྟོལ་གསང་བའི་ཡང་སྙིང་བསྒྲུབ། །སྟོང་གསལ་འོད་འབར་ཀློང་དཀྱིལ་དུ། །ཐིག་ལེ་ཡང་གསང་བཅུད་བསྡུས་པས། །ཐིག་ལེ་ཁོང་གསལ་འབྲས་བུའོ། །ཆོས་ཉིད་གསང་བའི་ཕོ་བྲང་དུ། །ཡེ་ཤེས་གཏིང་རྫོགས་ཀ་དག་པས། །གཏིང་མཐའ་ཡས་པའི་འབྲས་བུའོ། །མཁའ་ཀློང་རྣམ་དག་དཀྱིལ་འཁོར་དུ། །སྐྱེ་མེད་ཀ་དག་བློ་འདས་པས། །མུ་མཐའ་ཡས་པའི་འབྲས་བུའོ། །བྱ་བཙལ་རྩོལ་བས་མ་བསྒྲུབས་མ་བྱས་པས། །ཡོད་མེད་དབྱེ་བསལ་མེད་པ་སྟེ། །མིང་མེད་ཆེན་པོར་རང་གྲོལ་ལོ། །ཀ་དག་སྐྱེ་མེད་དངོས་པོ་མེད། །བྱར་མེད་འབྲས་བུ་བློ་ལས་འདས། །བྱ་བཙལ་ཞེ་འདོད་མ་བསྒྲུབས་པས། །གསང་སྤྱོད་འཕྲུལ་གྱི་སྙིང་པོ་ཡང་སྙིང་འདི། །རང་བྱུང་རང་གྲོལ་རང་སངས་ཉིད་དུ་གྲོལ། །བདེ་གཤེགས་གསང་བའི་སྙིང་པོའི་བཅུད་འདི་རྟོགས། །རེ་དོགས་བློ་ཡིས་མ་བསྒྲུབས་པས། །ཡེ་མེད་གཏིང་མེད་ཡོད་རྒྱུ་ཅི་ཡང་མེད། །ཐིག་ལེ་ཁོང་གསལ་ཡེ་ཤེས་ཟང་ཐལ་ལོ། །སྟོང་པའི་ཀློང་ནས་ཀུན་འབྱུང་བས། །ངང་དྭངས་རང་སངས་རང་གྲོལ་ལོ། །བྱ་བཙལ་རྩོལ་བས་མ་བསྒྲུབས་པར། །འདི་ཀ་རང་དུ་གྲོལ་བ་ཐོབ། །བསྒྲུབས་ནས་གཞན་ནས་ཐོབ་པའི་འབྲས་བུ་མིན། །རེ་ཞིག་འབྲས་བུའི་མིང་བཏགས་གོང་ལྟར་རོ། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་ ― DNG001_Page_0265 ―
[མ་དཔེ་གཟིགས་ན་འདིར་གནོན།]
གྱི་རྒྱུད་ལས། ཡང་ཏི་ཉི་ཟླ་རྟོགས་པས་མ་བསྒྲུབས་འབྲས་བུ་ཐོབ་པར་བསྟན་པའི་ལེའུ་སྟེ་ཉེར་གཉིས་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྒྱུད་ཀྱི་མཚན་བཤད་ཇི་ལྟར་བཤད། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །རྒྱུད་གསུམ་རྩེ་རྒྱལ་ཉི་ཟླའི་རྒྱུད་དུ་འདུས། །རྒྱུད་རྣམས་ཀུན་གྱི་རྩེ་མོ་བྱུང་རྒྱལ་བས། །རྒྱུད་སྡེ་ཀུན་གྱི་སྤྱི་ཕུད་རྩེ་རྒྱལ་ཡིན། །དེ་ཕྱིར་རྒྱུད་ཀྱི་རྩེ་རྒྱལ་རྒྱུད། །ཉི་ཟླ་འོད་འབར་རྒྱུད་ཆེན་དང་། །མཁའ་ཀློང་རྣམ་དག་རྒྱུད་ཆེན་དང་། །རྒྱ་མཚོ་ཀློང་གསལ་རྒྱུད་ཆེན་དང་། །དེ་གསུམ་རྒྱུད་ཀྱི་རྩེ་རྒྱལ་སྤྱི་ཕུད་ཡིན། །དེ་ནས་འཁོར་གྱིས་ཞུས་པ་ལ། །ཉི་ཟླ་འོད་འབར་རྒྱུད་ཀྱིས་དོན་ནི་གང་ཞིག་བསྟན། །མཁའ་ཀློང་རྣམ་དག་རྒྱུད་ཀྱིས་དོན་ནི་གང་ཞིག་བསྟན། །རྒྱ་མཚོ་ཀློང་གསལ་རྒྱུད་ཀྱིས་དོན་ནི་གང་ཞིག་བསྟན། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཉི་ཟླ་འོད་འབར་རྒྱུད་ཀྱིས་ནི། །ཉི་མས་གསལ་བའི་གོ་ཡང་འབྱེད། །སྣང་གསལ་གོ་འབྱེད་འོད་གསལ་རྒྱུད། །སྙིང་པོ་ཀ་དག་སྟོན་པ་སྟེ། །ཡེ་ཤེས་གསལ་དག་མཚོན་པའི་རྒྱུད། །འོད་ཆེན་རབ་ཏུ་འབར་བས་ནི། །གཏི་མུག་མ་རིག་མུན་པ་སེལ། །བག་ཆགས་སྒྲིབ་གཡོགས་ཀ་དག་རྒྱུད། །མུན་པའི་སྨག་རུམ་སངས་ཏེ་རང་སར་གྲོལ། །གསལ་བའི་གོ་འབྱེད་ཉི་མའི་རྒྱུད། །ཙནྡྲ་ཟླ་བའི་རྒྱུད་ཀྱིས་ནི། །མཐའ་ཡི་མུན་སེལ་འོད་འབར་རྒྱུད། །མ་རིག་མུན་པ་སེལ་བ་ཡིན། །མ་རིག་ཀ་དག་ཡེ་ཤེས་གསལ། །རྨོངས་པའི་མུན་པ་སེལ་བའི་རྒྱུད། །ཟླ་བའི་འོད་འབར་མ་རིག་གཏི་མུག་སངས། །ཉི་མའི་འོད་འབར་སྣང་གསལ་ཡེ་ཤེས་རྒྱས། །དེ་ཕྱིར་ཉི་ཟླ་འོད་འབར་རྒྱུད། །ཟླ་བའི་འོད་འབར་ཐབས་ཀྱི་རྒྱུད། །ཉི་མའི་འོད་འབར་ཤེས་རབ་རྒྱུད། །དེ་ཕྱིར་ཐབས་དང་ཤེས་རབ་གཉིས་མེད་རྒྱུད། །མཁའ་ཀློང་རྣམ་དག་རྒྱུད་ཀྱིས་ནི། །མཁའ་ནི་རིག་པའི་འོད་གསལ་མཁའ། །ཀློང་ནི་སྙིང་པོ་ཆོས་ཉིད་ཀློང་། །རྣམ་ ― DNG001_Page_0266 ―
[མ་དཔེ་གཟིགས་ན་འདིར་གནོན།]
དག་འཁྲུལ་པ་རྣམ་པར་དག །དེ་ཕྱིར་མཁའ་ཀློང་རྣམ་དག་རྒྱུད། །མཁའ་ནི་རྩལ་ཟེར་འོད་གསལ་ལ། །ཀློང་ནི་སྙིང་པོ་ཀ་དག་ཀློང་། །རྣམ་དག་བློས་བཏགས་ཆོས་རྣམས་འགགས། །དེ་ཕྱིར་མཁའ་ཀློང་རྣམ་དག་རྒྱུད། །མཁའ་ནི་སྣང་གསལ་ནམ་མཁའ་ལ། །ཀློང་ནི་ཆོས་ཉིད་དབྱིངས་ཀྱི་ཀློང་། །རྣམ་དག་ཆོས་ཅན་ཆོ་འཕྲུལ་དག །སྤྲིན་དང་ཁུ་རླངས་ཆར་སེར་ཀུན། །ནམ་མཁའི་ཀློང་དུ་ཡེ་ནས་དག །དེ་བཞིན་སྙིང་པོ་མཁའ་ཀློང་དུ། །ཡན་ལག་རྩལ་ཟེར་མ་ལུས་དག །དེ་ཕྱིར་མཁའ་ཀློང་རྣམ་དག་རྒྱུད་ཆེན་ཡིན། །རྒྱ་མཚོ་ཀློང་གསལ་རྒྱུད་ཀྱིས་ནི། །བལྟ་བ་རྒྱ་མཚོ་ཀློང་ན་གསལ། །བསྒོམ་པ་རྒྱ་མཚོ་ཀློང་ན་གསལ། །སྤྱོད་པ་རྒྱ་མཚོ་ཀློང་ན་གསལ། །འབྲས་བུ་རྒྱ་མཚོ་ཀློང་ན་གསལ། །དམ་ཚིག་རྒྱ་མཚོ་ཀློང་ན་གསལ། །ས་ལམ་རྒྱ་མཚོ་ཀློང་ན་གསལ། །མན་ངག་རྒྱ་མཚོ་ཀློང་ན་གསལ། །རྒྱུད་ལུང་རྒྱ་མཚོ་ཀློང་ན་གསལ། །ཡེ་ཤེས་རྒྱ་མཚོ་ཀློང་ན་གསལ། །རྒྱ་ནི་སྙིང་པོ་འགྱུར་བ་མེད། །མཚོ་ནི་ཆོས་ཉིད་ཡངས་པའི་མཚོ། །ཀློང་ནི་མཚོན་མེད་བརྗོད་ལས་འདས། །གསལ་ནི་སྐྱེ་མེད་ཀ་ནས་གསལ། །དེ་ཕྱིར་རྒྱ་མཚོ་ཀློང་གསལ་རྒྱུད། །རྒྱ་མཚོ་ཀློང་གསལ་བྱ་བ་ནི། །རྒྱ་མཚོ་སྙིང་པོ་སྐྱེ་མེད་ཡིན། །ཀློང་ནི་ཆོས་ཉིད་ཐེག་པའི་ཀློང་། །གསལ་ནི་ཀ་དག་འོད་འབར་གསལ། །དེ་ཕྱིར་རྒྱ་མཚོ་ཀློང་གསལ་རྒྱུད། །རྒྱ་ནི་གཏད་མེད་རྟེན་མེད་བསྟན། །མཚོས་ནི་དམིགས་མེད་གཡོ་མེད་བསྟན། །ཀློང་ནི་བྱར་མེད་སྤྲོས་བྲལ་བསྟན། །གསལ་བས་ཡེ་དག་སྒྲིབ་མེད་བསྟན། །དེས་ན་རྒྱ་མཚོ་ཀློང་གསལ་རྒྱུད། །རྒྱ་མཚོ་སྐྱེ་མེད་ཀ་དག་ལྟ་བ་བསྟན། །ཀློང་གིས་གཡོ་མེད་རྣལ་མའི་སྒོམ་པ་བསྟན། །གསལ་གྱིས་ལྷུག་པ་བག་ཡངས་གོ་བདེ་བ། །བྱར་མེད་སྤྲོས་བྲལ་སྤྱོད་པ་བསྟན། །རྒྱུད་ཀྱི་ཐོག་མ་བར་མཐའ་རུ། །ཡེ་ཤེས་རྒྱུན་དུ་གནས་པའི་ཕྱིར། །སྙིང་པོ་རྒྱུན་ཆད་མེད་པའི་རྒྱུད། །སྔོན་ཐོག་དུས་ནས་ཐ་མ་རུ། །སྐྱེ་མེད་རྒྱུན་དུ་གནས་པའི་ཕྱིར། །སྐྱེ་མེད་ཀ་དག་སྙིང་པོའི་རྒྱུད། །གཞི་རླུང་དུས་ནས་ད་ལྟའི་བར། །འོད་གསལ་རྒྱུན་དུ་གནས་པ་ཡིས། །སྣང་གསལ་འོད་འབར་གསལ་དག་རྒྱུད། །ཅེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། ― DNG001_Page_0267 ―
[མ་དཔེ་གཟིགས་ན་འདིར་གནོན།]
རྒྱུད་ཀྱི་མཚན་བཤད་བསྟན་པའི་ལེའུ་སྟེ་ཉེར་གསུམ་པའོ།། །།དེ་ནས་གསལ་དག་རིན་ཆེན་གྱིས། །སྐྱེ་མེད་ཀ་དག་སྟོན་པ་ལ། །རྒྱུད་འདི་བསྟན་པའི་སྐལ་ལྡན་ཇི་ལྟ་བུ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དཔེར་ན་སེང་གེའི་འོ་མ་ཡང་། །རིན་ཆེན་གསེར་ཟོར་བླུགས་པ་ལས། །སྣོད་ངན་ཕལ་དུ་བཞོས་གྱུར་ན། །བཅུད་ཀྱང་འབོ་ལ་སྣོད་ཀྱང་ཆག །དེ་བཞིན་ཉི་ཟླ་ཡང་ཏི་ཡང་། །སྣོད་ལྡན་འགའ་ལ་བསྟན་པ་ལས། །སྣོད་མེད་དག་ལ་བསྟན་གྱུར་ན། །ཆོས་ཀྱང་ཤོར་ལ་རང་ཡང་བརླག །དེས་ན་སྣོད་ཀྱི་ཁྱད་པར་གཅེས། །རྒྱུད་འདི་བསྟན་པའི་སྐལ་ལྡན་ནི། །སྨྲས་པ་མི་འགྱུར་རི་རབ་ལྟ་བུའི་བློ། །སྙིང་རྗེ་ཕན་སེམས་ཆེ་ཞིང་དཀོན་མཆོག་མཆོད། །བླ་མ་གཙུག་ཁུར་གདམས་ངག་སྙིང་ལ་འཆང་། །དམ་ཚིག་གཞུང་བསྲུང་རྣམ་སྨིན་ལས་ལ་འཛེམ། །རྒྱུད་འཇམ་ངང་རིང་སྐྱོ་དུབ་མེད་ལ་གཏད། །ང་རྒྱལ་སེར་སྣ་ཆུང་ལ་ཆོས་ཕྱོགས་གཏོང་། །རིན་ཆེན་ལ་སོགས་ཟང་ཟིང་ནོར། །ཆགས་མེད་སེར་སྣ་མེད་པར་གཏོང་། །དེ་ལ་ཡང་ཏིའི་རྒྱུད་འདི་གཏད། །རང་རྒྱུད་ངན་ལ་གྲོགས་མཆེད་བསླུ། །དམ་ཚིག་མེད་ལ་བརྩེ་གདུང་ཆུང་། །ཆེ་དགའ་སྡིག་སྤྱོད་ཆགས་སེམས་ཅན། །གཡོ་སྒྱུ་ཁྲེལ་མེད་ཐབས་ཀྱིས་བསླུ། །ལོག་ལྟ་བྱེད་ཅིང་སྒྲོ་སྐུར་འདེབས། །སློབ་དཔོན་གསང་ནས་རང་ཆེ་འབྱིན། །གཡོ་དང་ཐབས་ཀྱིས་མན་ངག་འབྲིད། །ལག་ཏུ་ཐོབ་ནས་ཟོང་དུ་འཚོང་། །དེ་ལྟ་བུ་ཡི་སྣོད་ངན་ལ། །ཡུལ་མཁར་སྟེར་ཀྱང་མི་སྦྱིན་ནོ། །དེ་ལྟ་བུ་ལ་བྱིན་གྱུར་ན། །གཉིས་བསྡོང་གཡང་ལ་ལྷུང་བ་བཞིན། །གཉིས་ཀ་རྡོ་རྗེ་དམྱལ་བར་འགྲོ། །ཞེས་གསུངས་སོ། །རྒྱུད་ཀྱི་རྩེ་རྒྱལ་ཉི་ཟླ་འོད་འབར་མཁའ་ཀློང་རྣམ་དག་རྒྱ་མཚོ་ཀློང་གསལ་གྱི་རྒྱུད་ལས། རྒྱུད་གཏད་པ་དང་སྣོད་ཀྱི་ཁྱད་པར་བསྟན་པའི་ལེའུ་སྟེ་ཉེར་བཞི་པའོ།། །།གུ་རུ་ལ་བསྟན་པ་འབྱུང་བའི་དུས་ཇི་ཙམ་ན་ལགས། ཞུས་པས། ང་ཡི་ཡང་སྙིང་ཉི་ཟླ་འདི། སྐུ་དང་གསུང་གི་བསྟན་པ་ནུབ། །གསང་སྔགས་ཐུགས་ཀྱི་བསྟན་པ་དར། །ལྔ་བརྒྱ་དུས་ཀྱི་ཐ་མ་ལ། །དུས་ངན་ཟེར་ རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ཅེས་བྱ་བ།― DNG001_Page_0268 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། བཛྲ་སཏྭ་ཤ་ཏཱཀྵ་རཱ་ཀ་ཨ་བྷི་ཥེ་ཀོཏྟ་མ་ཧཱ་རཱ་ཛ་ཏན་ཏྲ་ནཱ་མ། བོད་སྐད་དུ། རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ཅེས་བྱ་བ། བཅོམ་ལྡན་འདས་དཔལ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། དེ་བཞིན་གཤེགས་པ་ཐམས་ཅད་འོག་མིན་རྡོ་རྗེའི་གནས་ཀྱི་དང་པོ་ན་བཞུགས་ཏེ། ཆོས་ཉིད་འབྱེད་པ་མེད་པའི་ངང་ལས། ཐུགས་རྗེ་བྱམས་པ་ཆེན་པོས་འགྲོ་བ་རྣམས་ལ་གཟིགས་པ་དང་། བྱང་ཆུབ་ཀྱི་མྱུ་གུ་སྐམས་པའི་ ― DNG001_Page_0269 ―
[མ་དཔེ་གཟིགས་ན་འདིར་གནོན།]
སེམས་ཅན་དག་མཐོང་སྟེ། དེའི་ཚེ་དེའི་དུས་ན། ཕྱོགས་བཅུ་ཀུན་ནས་རྒྱལ་བ་ཐམས་ཅད་འདུས་ནས་བཀའ་བགྲོས་ཏེ་ཐུགས་རྗེའི་དོན་བགྲོ་བ། ཀྱེ་མ་རྡོ་རྗེ་སེམས་དཔའ་རྡོ་རྗེ་འཛིན། །འཇིག་རྟེན་འདོད་ཁམས་དམ་ཚིག་སྐྱོན། །ཉེས་བྱས་རྣམ་སྨིན་རྒྱུ་ལས་བཟློག །དེ་ཡི་གཉེན་པོ་ཁྱོད་ཉིད་ཡིན། །ཞེས་བགྲོའོ། །རྡོ་རྗེ་འཆང་བ་རྡོ་རྗེ་འཛིན། །དེ་ཉིད་སྤྲུལ་པས་འདི་སྐད་གསུངས། །དུས་ལ་བབ་བམ་དེ་བཞིན་དུ། །ཉེས་བྱས་རྣམ་སྨིན་ལ་སྤྱོད་པའི། །ངན་སོང་ན་རཀ་གནས་ནས་འདྲེན། །ཞེས་པ་ཞལ་གྱིས་བཞེས་པ་དང་། །དེ་ནས་སྟོན་པ་ཀུན་བཟང་དང་། །ཀུན་རིག་རྣམ་པར་སྣང་མཛད་སོགས། །མི་གཡོ་མཉམ་པའི་ངང་ལ་བཞུགས། །ཕྱོགས་བཅུའི་ཞིང་ཁམས་དེ་བཞིན་ནོ། །དེ་ནས་སྟོན་པ་རྡོ་རྗེ་སེམས། །གནས་ཀྱི་དང་པོ་འོག་མིན་དུ། །ལག་ན་རྡོ་རྗེ་རྒྱལ་སྲས་འཁོད། །འཁོར་བ་ཐུགས་རྗེས་བཟུང་བའི་དུས། །འཁོར་བ་དོང་སྤྲུག་འགྱོད་ཚངས་གསུངས། །རྒྱུད་མཆོག་རྡོ་རྗེ་རྒྱལ་པོ་དང་། །དབང་མཆོག་རྒྱལ་པོའི་རྒྱུད་འདི་བསྟན། །སློབ་དཔོན་སློབ་མས་ཉེས་བྱས་པའི། །གཅེར་བུ་ལུས་སྲུལ་ན་ར་ཀ །པྲེ་ཏ་ཀ་དང་ཏིརྱ་ཀ །རིམ་པ་བཞིན་དུ་དོན་བྱེད་དེ། །ནྲྀ་དང་དེ་ཝ་ཨ་སུ་ར། །དྲུག་གི་གནས་ནས་འདོན་བྱེད་པའི། །དབང་མཆོག་རྒྱལ་པོའི་བསྟན་པ་འབྱུང་། །ཞེས་གསུངས་སོ། །རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། གླེང་གཞི་ཕུན་སུམ་ཚོགས་པའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་དང་། །སྤྲུལ་པ་ལག་ན་རྡོ་རྗེ་ཡིས། །འཇིག་རྟེན་རྒྱལ་བ་རབ་འབྱམས་དང་། །རྒྱལ་སྲས་སྤྲུལ་པ་འདུས་རྣམས་ལ། །དམ་ཚིག་རྩ་བ་ཉམས་པ་ཡི། །སློབ་མས་སློབ་དཔོན་ཉེས་བྱས་ཏེ། །འདུལ་ཏེ་དྲང་བའི་དུས་བབས་སམ། །གདུལ་བྱར་ཐུགས་རྗེས་གཟིགས་པ་དང་། །ཉེས་སྐྱོན་སྔོན་བྱུང་ཅི་ཡི་རྒྱུ། །ཅེས་པ་མཁྱེན་བཞིན་སྨྲས་པ་དང་། །ཀུན་བཟང་རྡོ་རྗེ་རྣམ་སྣང་གིས། །སྤྲུལ་པ་ཉིད་ལ་བཀའ་སྩལ་པ། །རྒྱལ་སྲས་འཁོར་འདུས་སྔོན་བྱུང་ནི། །འཇིག་རྟེན་ཞིང་ཁམས་མི་མཇེད་འདིར། །བྲམ་ཟེ་དུང་གི་ཕྲེང་བ་ཅན། །རྒྱལ་བ་རྣམས་ལ་བསྙེན་བཀུར་བས། །རིག་པའི་གནས་ལྔ་ལ་མཁས་པ། །བྱང་ཆུབ་སེམས་དཔའི་རིགས་ཅན་ ― DNG001_Page_0270 ―
[མ་དཔེ་གཟིགས་ན་འདིར་གནོན།]
གཅིག །བས་མཐའི་དུར་ཁྲོད་གནས་ན་བསྒྲུབ། །མཁས་པ་ཀུན་གྱི་སེང་གེར་གྱུར། །དེ་ལྟ་བུ་ཡི་སློབ་དཔོན་ལ། །ཡུལ་ཁམས་སྐྱོང་བའི་རྒྱལ་པོའི་བུས། །བློ་སྦྱོང་རིག་པ་རྫོགས་བྱས་ནས། །རྒྱལ་པོའི་གོང་ན་བྲམ་ཟེ་གནས། །རྒྱལ་བུ་ཕྲག་དོག་ངན་སེམས་སྐྱེས། །བླ་མ་བྲམ་ཟེ་སྒྲུབ་པ་ལ། །མཁའ་འགྲོའི་ཚོགས་ཀྱིས་བརྡའ་བརྟན་པ། །རྣལ་འབྱོར་གསེར་སྣོད་ངན་དུག་གཡོ། །དུག་ཅན་སྣོད་ལ་བྲོས་པར་འོས། །མ་བྲོས་ཉེས་སྐྱོན་ལུས་སེམས་འབྲལ། །ཅེས་པ་དམ་ཚིག་བརྡའ་བསྟན་ཡང་། །རྣལ་འབྱོར་བས་ནི་བསམ་གཏན་མཛད། །དེ་ནས་རྒྱལ་བུས་བྲམ་ཟེ་བོས། །མྱོས་ཆང་བླུད་ནས་རྔན་བྱས་པ། །དབང་པོའི་དྭངས་མ་གསལ་བྱེད་མིག །ལྕགས་ཀྱི་ཐུར་མ་ཕྲ་མོས་གཙགས། །ཚིག་སྒོ་གསལ་བྱེད་སྨྲ་བའི་ལྕེ། །ལྕགས་ཀྱུས་དྲངས་ཏེ་སྤུ་གྲིས་བཅད། །ལུས་ལ་རུས་སྦལ་ཁྲག་གིས་བྱུགས། །མི་གཙང་དམེ་བའི་བུད་མེད་ཀྱིས། །ལུས་ལ་བརྫི་བཅག་མཉེ་བར་བྱས། །རྐང་པའི་སྒྱིད་པ་མཚོན་གྱིས་བཅད། །ལག་པའི་སྲན་ཚོ་དེ་བཞིན་དྲེགས། །དེ་ལྟར་རྔན་བྱས་བཞག་པ་ན། །བྲམ་ཟེ་དྲན་པ་སད་པ་ལས། །མིག་དབྱེར་མིག་མེད་ལྕེ་ཡང་མེད། །འགྲོ་བའི་རྐང་མེད་ལུས་སྟོབས་བྲལ། །བུད་མེད་ཀྱིས་བརྫིས་འགུལ་སྟོབས་མེད། །རུས་སྦལ་ཁྲག་བྱུགས་ཆུ་བུར་དང་། །རྐང་པ་ལ་སོགས་ནད་རྣམས་བྱུང་། །དྲན་པ་རང་ཡང་རབ་རིབ་འདུག །བརྟབས་ཏེ་བྲམ་ཟེས་བསམས་པ་ལ། །འདི་ལྟར་བདག་ལ་འདི་བྱུང་བ། །སྔོན་མའི་ལས་ཀྱི་རྣམ་སྨིན་ནམ། །འོན་ཏེ་གཞན་གྱིས་ཕྲག་དོག་བྱས། །མཉམ་པར་བཞག་སྟེ་བལྟས་པ་ལས། །རང་ལ་རྒྱལ་བུས་རྔན་བྱས་མཐོང་། །དེ་ནས་བྲམ་ཟེས་དམོད་པ་བོར། །ཀྱེ་མ་ཀྱི་ཧུད་རྒྱལ་བུ་ཁྱོད། །ལོ་དང་ཟླ་བར་བསླབས་སྦྱངས་ནས། །རིག་པའི་གནས་ལ་མཁས་བྱས་པས། །ལན་དུ་འདི་ལྟར་རྔན་བྱེད་པ། །ཁྱོད་ཀ་སྐྱེ་བ་གཅིག་གིས་སུ། །སེམས་ཅན་སྲུལ་པོ་གཅིག་ཏུ་སྐྱེས། །ཚེ་ཐུང་ནད་ཀྱིས་ལུས་གཟིར་བ། །དམུས་ལོང་ལྐུགས་པ་མཛེ་ལྷོག་དང་། །ཤ་བཀྲ་བས་ལྡག་ཆུ་བུར་དང་། །རྐང་ལག་ཞ་གྲུམ་དབུལ་པོ་དང་། །ལུས་ལ་ཤ་ཟས་ཚང་འཆའ་ ― DNG001_Page_0271 ―
[མ་དཔེ་གཟིགས་ན་འདིར་གནོན།]
ཤོག །ཚེ་འཕོས་ནས་ཀྱང་ན་རཀ་གནས། །ཁ་འཁོར་སྡུག་བསྔལ་ཐར་མེད་ཤོག །དེ་ལས་ཐར་ཡང་པྲེ་ཏ་ཀ །ཏིརྱ་ཀ་ཡི་ཁ་འཁོར་ཤོག །དུས་དང་ཚེ་རབས་ཐམས་ཅད་དུ། །འཕགས་པའི་ཞལ་ནི་མི་མཐོང་ཞིང་། །བྱང་ཆུབ་མྱུ་གུ་སྔོ་བསྐམ་ཤོག །ཅེས་པ་ངན་སེམས་དམོད་པ་བོར། །ཉེས་བྱས་དམ་ཉམས་རྒྱལ་བུ་དེ། །དེ་ནས་མྱུར་དུ་ལུས་དག་ལ། །ནད་རྣམས་ཀུན་ཕོག་ཚེ་དུས་བྱས། །རང་གི་ཉེས་བྱས་རྣམ་སྨིན་དང་། །བྲམ་ཟེའི་དམོད་པ་སྨོན་ལམ་གྱིས། །སེམས་ཅན་ལུས་སྲུལ་གཅེར་བུར་སྐྱེས། །ལུས་ལ་ནད་སྣ་སྣ་ཚོགས་བྱུང་། །ཤ་ཟ་སྟོང་གི་ཚང་ཡང་བཅས། །བྱང་ཆུབ་མྱུ་གུ་སྔོ་བསྐམས་ནས། །ན་རཀ་གནས་ན་སྡུག་བསྔལ་སྤྱོད། །ཚ་གྲང་གཤགས་གཏུབས་ལ་སོགས་མྱོང་། །དེ་བཞིན་པྲེ་ཏ་ཏིརྱ་འཁོར། །རྣམ་སྨིན་སྡུག་བསྔལ་དེ་སྤྱོད་པས། །རྡོ་རྗེ་སེམས་དཔའ་རྡོ་རྗེ་འཛིན། །ཐུགས་རྗེ་ཆེན་པོས་དེ་ལས་དྲོངས། །ཞེས་གསུངས་སོ། །རྡོ་རྗེ་སེམས་དཔའ་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། སྔོན་བྱུང་རྒྱུ་རྐྱེན་གཏམ་རྒྱུད་ཀྱི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་དང་། །ལག་ན་རྡོ་རྗེ་སྟོབས་ཆེན་གྱིས། །སྐད་མཐུན་ཚིག་སྒོ་གཅིག་པ་ཡིས། །རྒྱལ་བའི་ཚོགས་ལ་འདི་སྐད་བརྗོད། །དེ་ལྟར་འདུལ་བའི་དུས་ཡིན་ན། །ཐབས་མཆོག་གང་གིས་དྲང་བར་བྱ། །སླར་གསོལ་བ་དེ་བསྟན་དུ་གསོལ། །ཅེས་པ་རྒྱལ་བ་ལ་ཞུས་པས། །ཀུན་བཟང་རྡོ་རྗེ་རྣམ་སྣང་གིས། །སྤྲུལ་པ་ཉིད་ལ་བཀའ་སྩལ་པ། །ལེགས་སོ་སེམས་དཔའ་རྡོ་རྗེ་འཛིན། །མཁྱེན་པར་གྱུར་ཀྱང་ཞུས་པ་ལེགས། །རིག་པ་འཛིན་པ་རིགས་ཀྱི་བུ། །གསང་སྔགས་དམ་ཚིག་ཉམས་པ་ལ། །ན་རཀ་དོང་ནས་སྤྲུགས་པ་ཡིས། །འགྱོད་ཚངས་བཤགས་པའི་རྒྱལ་པོ་སྒྲོགས། །ཆོས་ཉིད་དོན་གྱི་སྒྲོན་མ་ཐེག །ལུས་ངག་ཡིད་གསུམ་བརྩོན་འགྲུས་ཕྱུང་། །སྐུ་གསུང་ཐུགས་ཀྱི་ཚངས་པ་ཐོབ། །ངན་སོང་དོང་སྤྲུགས་སྐུ་གསུམ་མཐོང་། །ཕྱི་ནང་གསང་བའི་དབང་བསྐུར་གྱིས། །རྒྱུད་དྲུག་གནས་ནས་ངེས་པར་དྲོངས། །ཡེ་ཤེས་ལྔ་ལྡན་ཆོས་སྐུ་ཐོབ། །ཡུལ་མེད་མིང་གི་སྒྲོ་འདོགས་ ― DNG001_Page_0272 ―
[མ་དཔེ་གཟིགས་ན་འདིར་གནོན།]
ཆོད། །གསང་སྔགས་བླ་མེད་རྡོ་རྗེ་ལ། །ཐབས་མཆོག་བླ་ན་མེད་པ་བཞུགས། །ཉན་ཐོས་རང་རྒྱལ་ལྟ་བུ་མིན། །དཔེར་ན་ཉན་ཐོས་འདུལ་ཁྲིམས་ནི། །རྫ་སོ་མ་བཏང་ཆག་པ་འདྲ། །ཆག་པར་གྱུར་ན་གསོ་ཐབས་མེད། །གསང་སྔགས་རྡོ་རྗེ་ཐེག་པ་ནི། །རིན་ཆེན་གསེར་འདྲ་རྒྱུ་མཆོག་བཟང་། །གསེར་དངུལ་སྣོད་འདྲ་ཞོམས་ཀྱང་བཅོས། །སྔ་མ་བཞིན་དུ་ལེགས་པར་སོས། །དེ་བཞིན་གསང་སྔགས་དམ་ཚིག་ནི། །ཉམས་ཆག་བྱུང་ཡང་གསོ་ཐབས་ཡོད། །སྦྱང་ཐབས་མང་ལ་ཐབས་སྒོ་མང་། །སྤྱི་ཁྲུས་ངན་སོང་དོང་སྤྲུགས་མཛོད། །དབང་མཆོག་རྒྱུད་དྲུག་སྐྱེ་སྒོ་ཆོད། །ཡུལ་མེད་སྒྲོ་འདོགས་གཉིས་མེད་ཆོད། །ཅེས་ལུང་བསྟན་ཏོ། །རྡོ་རྗེ་སེམས་དཔའ་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། ཉམས་པ་གསོ་ཐབས་ལུང་བསྟན་པའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་སེམས་དཔའ་དང་། །ལག་ན་རྡོ་རྗེ་འཛིན་པ་ཡིས། །སངས་རྒྱས་ཀུན་ལ་འདི་སྐད་གསོལ། །ཀྱེ་ཀྱེ་རྒྱལ་བ་རྒྱ་མཚོའི་ཚོགས། །གསང་སྔགས་བླ་མེད་རྡོ་རྗེ་ལ། །དམ་ཚིག་བསྡུས་རྒྱས་ཇི་ལྟར་ལགས། །སྲུང་སྡོམ་ཉམས་པ་ཇི་ལྟར་བསྐང་། །ཞེས་པ་མཁྱེན་བཞིན་དུ་ཞུས་པས། །རྒྱལ་བ་འདུས་པས་བཀའ་སྩལ་པ། །རྡོ་རྗེ་སེམས་དཔའ་རྡོ་རྗེ་འཛིན། །གསང་སྔགས་འབྲས་བུའི་ཐེག་པ་ལ། །དམ་ཚིག་རྩ་བ་རྣམ་པ་གསུམ། །སྐུ་དང་གསུང་དང་ཐུགས་གསུམ་མོ། །ཡན་ལག་དམ་ཚིག་ཉི་ཤུ་ལྔ། །མི་སྤང་ལྔ་དང་བླང་བ་ལྔ། །སྤྱད་བྱ་ལྔ་དང་བསྒྲུབ་བྱ་ལྔ། །གཞན་ཡང་ཉིང་ལག་བསམ་ལས་འདས། །འབུམ་སྡེ་ལ་སོགས་དམ་ཚིག་ཀྱང་། །རྩ་བ་ཡན་ལག་ཤེས་པར་བྱ། །བསྙེན་བསྒྲུབ་རྣམ་བཞིའི་སྒོར་ཞུགས་ནས། །དམ་ཚིག་དེ་དག་བསྲུང་བར་བྱ། །ལེགས་པར་བསྲུང་དང་བསྲུང་དུ་མེད། །ཡན་ལག་ཉི་ཤུ་རྩ་ལྔ་ཡང་། །རྩ་བའི་དམ་ཚིག་གསུམ་དུ་འདུས། །ལུས་ངག་ཡིད་གསུམ་བག་ཡོད་བྱ། །ཆག་ཉམས་ཐམས་ཅད་གསུམ་ལས་འབྱུང་། །སྐུ་གསུང་ཐུགས་ ― DNG001_Page_0273 ―
[མ་དཔེ་གཟིགས་ན་འདིར་གནོན།]
ཀྱིས་ལུས་ངག་ཡིད། །བྱིན་བརླབ་བཤགས་སྦྱང་སྤང་བསྒྲུབ་དང་། །རང་འཁྲུངས་རྡོ་རྗེ་གསེར་ཉིད་དོ། །ཡིད་ཀྱི་སྒོ་ནས་ཆག་ཉམས་བྱུང་། །ཐུགས་ཀྱི་ལྟ་བས་བཤགས་པར་བྱ། །ལྟ་བ་ལོག་པ་ཉམས་པ་ཆེ། །ཡིན་པ་མེད་པ་ལྟ་བའི་མཆོག །ཡིད་ཀྱི་བཤགས་ཐབས་ཆེན་པོ་ཡིན། །ལུས་ཀྱི་སྒོ་ནས་ཆག་ཉམས་ན། །ཕྱག་རྒྱ་སྐུ་ཡི་བསྒོམས་པས་བཤགས། །ཕྱོགས་སུ་འཛིན་པ་ཉམས་པ་ཆེ། །ཡེངས་པ་མེད་པ་སྒོམ་པའི་མཆོག །དེ་ནི་ལུས་ཀྱི་བཤགས་ཐབས་ཡིན། །ངག་གི་སྒོ་ནས་ཆག་ཉམས་ན། །སྔགས་དང་འདོན་བརྗོད་སྤྱོད་པས་བཤགས། །ཚུལ་འཆོས་སྤང་བླང་ཉམས་པ་ཆེ། །ཡིན་མིན་མེད་པ་སྤྱོད་པའི་མཆོག །མཛད་སྤྱོད་དག་གི་བཤགས་ཐབས་ཡིན། །དེ་ལྟར་དམ་ཚིག་གསུམ་བཤགས་ན། །ཉི་ཤུ་རྩ་ལྔ་མ་བྱུང་མ་སྐྱེས་ཏེ། །ཡན་ལག་དམ་ཚིག་བཤགས་སུ་མེད། །ཅི་སྟེ་བསྲུང་བྱ་སྲུང་བྱེད་མེད། །སྐྱེ་མེད་དམ་ཚིག་ཤེས་པར་གྱིས། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། དམ་ཚིག་མཚོན་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་དང་ལག་ན་རྡོ་རྗེས་སྲུལ་པོ་དེའི་གམ་དུ་བྱོན་ནས་མནར་མེད་ཉམ་ཐག་དེ་ལ་འདི་སྐད་ཅེས་བསྒྲགས་སོ། །ན་ར་ཀ་བྷུ་ཏ་ཙཀྵུ་པྲ་བེ་ཤ་ཡ་ཨ་ཞེས་བསྒྲགས་པས། དེ་ནས་ལས་ངན་སེམས་ཅན་དེས། །སྔོན་གྱི་ལས་ངན་དྲན་གྱུར་ཏེ། །སྡུག་བསྔལ་གནོང་ནས་འགྱོད་པ་སྐྱེས། །རྡོ་རྗེ་གཉིས་ལ་ངོ་སྨད་དེ། །ཀྱེ་མ་ཀྱེ་ཧུད་ཀྱི་ཧུད་ནོངས། །འགྲོ་མགོན་ཐུགས་རྗེས་བདག་སྐྱོབས་ཤིག །ཐབས་མཆོག་རྒྱལ་པོ་བསྒྲག་ཏུ་གསོལ། །སླད་ནས་མི་འཆབ་མི་བགྱིད་དོ། །ཞེས་སྨྲེ་སྔགས་ཕྱུང་བ་ལས། དེ་ནས་སངས་རྒྱས་རྡོ་རྗེ་སེམས་དཔས་སེམས་ཅན་ལས་ངན་དེའི་རྣ་ལམ་དུ་འགྱོད་ཚངས་ཀྱི་རྒྱལ་པོ་ན་རག་དོང་སྤྲུག་འདི་བཀའ་སྩལ་པ། ཉོན་ཅིག་ལས་ངན་སེམས་ཅན་ཁྱོད། །འགྱོད་སེམས་ཕྱུང་ལ་ཡིད་གཏོད་ཅིག །ངག་སྒོ་གསལ་བརྗོད་བརྐྱང་ཕྱག་འཚོལ། །ཞེས་གསུངས་ནས་འདི་བརྗོད་དོ། །དུས་གསུམ་འཇིག་རྟེན་རབ་འབྱམས་ཀྱི། །རྒྱལ་བ་ ― DNG001_Page_0274 ―
[མ་དཔེ་གཟིགས་ན་འདིར་གནོན།]
རྒྱ་མཚོ་རྣམས་ལ་ཕྱག་འཚལ་ལོ། །ཆོས་རྣམས་རྣམ་དག་ཡེ་ནས་ལྷུན་གྲུབ་ཅིང་། །བྱ་བ་བྱེད་དང་ཡིད་ཆོས་རྣམ་པར་དག །ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པ། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །དུས་གསུམ་རྒྱལ་བ་ཐམས་ཅད་བསྐྱེད་མཛད་མ། །རིགས་ལྔའི་ཡུམ་གྱུར་རྣམས་ལ་ཕྱག་འཚལ་ལོ། །རྣམ་ཤེས་དབང་པོ་དག་པའི་ཐུགས་དང་གསུང་། །བདེ་བར་གཤེགས་པ་ཀུན་གྱི་སྲས་མཆོག་སྟེ། །སེམས་དཔའ་ཆེན་པོ་བརྒྱད་ལ་ཕྱག་འཚལ་ལོ། །སྒེག་མོ་ཕྲེང་ཐོགས་རིན་ཆེན་གླུ་གར་ཅན། །མཁའ་མཉམ་མཆོད་པས་རྒྱལ་བ་རྒྱ་མཚོ་མཆོད། །བྱང་ཆུབ་ལྷ་མོའི་ཚོགས་ལ་ཕྱག་འཚལ་ལོ། །མེ་ཏོག་བདུག་པ་མར་མེ་དྲི་ཆབ་ཀྱིས། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ལ་ཕྱག་འཚལ་ལོ། །དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། །ཚད་མེད་བཞི་ལྡན་སྒོ་བཞི་ཐུབ་པར་སྲུང་། །ཏ་ཀྲྀཏ་སྒོ་བ་བཞི་ལ་ཕྱག་འཚལ་ལོ། །རྟག་ཆད་མཐར་ཕྱིན་གསང་བ་ཡུམ་གྱི་ངང་། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །རྡོ་རྗེ་སྒོ་མ་བཞི་ལ་ཕྱག་འཚལ་ལོ། །སྟེང་འོག་ཕྱོགས་བཞིའི་འཇིག་རྟེན་འདུལ་པའི་གཙོ། །ཉོན་མོངས་དྲུག་འཇོམས་རྒྱུད་དྲུག་དག་པར་སྦྱོང་། །བཅོམ་ལྡན་ཐུབ་པ་དྲུག་ལ་ཕྱག་འཚལ་ལོ། །གསལ་འཚེར་ལྷུན་སྡུག་གཟི་བརྗིད་འོད་ཟེར་འཕྲོ། །མཉེན་ལྕུགས་འཁྲིལ་ལྡེམ་གཞོན་ཚུལ་ཞི་བའི་ཚོགས། །རྒྱལ་བ་བཞི་བཅུ་གཉིས་ལ་ཕྱག་འཚལ་ལོ། །དེ་ལྟར་གུས་པས་ཕྱག་འཚོལ་ཞིག །རང་བཞིན་སྒྱུ་འཕྲུལ་ལྷ་ཚོགས་ལ། །གང་ཞིག་གུས་པས་ཕྱག་བཙལ་ན། །ཉམས་ཆག་ཀུན་ཀྱང་བྱང་བར་འགྱུར། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ཞི་བའི་ལེའུ་སྟེ་ལྔ་པའོ།། །།ཡང་བཀའ་སྩལ་པ། བརྩོན་འགྲུས་ཕྱུངས་ཤིག་ལས་ངན་སེམས་ཅན་ཁྱོད། ། ― DNG001_Page_0275 ―
[མ་དཔེ་གཟིགས་ན་འདིར་གནོན།]
འདི་རྣམས་དབང་དུ་གསོལ་ལ་ཕྱག །ཚིག་གསལ་ལུས་གུས་མོས་པས་འཚོལ། །སྒྱུ་འཕྲུལ་ཆེན་པོའི་དཀྱིལ་འཁོར་ནི། །ཞི་བ་ཆོས་ཉིད་ངང་ལས་མ་གཡོས་ཀྱང་། །ཕྲིན་ལས་མཐར་ཕྱིན་ཐབས་མཆོག་ཁྲོ་བོའི་ཚུལ། །འབར་བ་ཁྲོ་བོའི་ཚོགས་ལ་ཕྱག་འཚལ་ལོ། །ཧོ་རང་རིག་ཐབས་ཀྱི་རྒྱལ་པོ་མཆོག །སངས་རྒྱས་སྤྱི་དཔལ་ཁྲོ་བོའི་རྗེ། །ཆེ་མཆོག་ཧེ་རུ་ཀ་ལ་ཕྱག་འཚལ་ལོ། །འཇིག་རྟེན་འདས་པའི་དུས་ན་མངོན་འབྱུང་བ། །གདུག་པ་འདུལ་ཕྱིར་དུས་ལས་མི་མདའ་བའི། །དཔལ་ཆེན་ཧེ་རུ་ཀ་ལ་ཕྱག་འཚལ་ལོ། །རང་བཞིན་དག་པའི་དབྱིངས་ཉིད་ལས། །དཔལ་འབར་རྔམ་པའི་ཆ་ལུགས་ཅན། །ཁྲོ་མོ་གནམ་ཞལ་མ་ལ་ཕྱག་འཚལ་ལོ། །ཁྲོ་མོ་དབང་ཕྱུག་སྐུ་ལ་འཁྲིལ་མཛད་ཅིང་། །མཁའ་འགྲོ་མི་བཟད་འབར་བའི་སྤྲིན་འཕྲོ་མ། །གདུག་པ་འདུལ་མཛད་ཁྲོ་མོ་རྣམས་ལ་ཕྱག་འཚལ་ལོ། །བསྐལ་པ་མེ་ལྟར་འབར་བའི་དཀྱིལ་འཁོར་ན། །ཡེ་ཤེས་སྐུ་མཆོག་འཇིགས་བྱེད་རྒྱན་གྱིས་བཞུགས། །ཁྲོ་མོ་ཆེན་མོ་བརྒྱད་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་པ་མོ། །ཕྲ་མེན་ཆེན་མོ་བརྒྱད་ལ་ཕྱག་འཚལ་ལོ། །རྡོ་རྗེ་གདོང་མོ་ཕོ་ཉ་མགྱོགས་མ་བཞི། །ཤར་ལྷོ་ནུབ་བྱང་སྒོ་བཞི་ཐུབ་པར་སྲུང་། །སྒོ་སྐྱོང་ཁྲོ་མོ་བཞི་ལ་ཕྱག་འཚལ་ལོ། །དཔལ་གྱི་འཁོར་ཚོགས་བཛྲ་ཨ་རལླི། །མཁའ་ལ་ཤུགས་འགྲོ་མ་ཚོགས་དབང་ཕྱུག་མ། །རྣལ་འབྱོར་ཉི་ཤུ་བརྒྱད་ལ་ཕྱག་འཚལ་ལོ། །ཕྱོགས་བཅུའི་དྲེགས་པ་བསྣོལ་བའི་གདན་སྟེང་ན། །ཡེ་ཤེས་བསྐལ་པ་མེ་དཔུང་འབར་བའི་ཀློང་། །བདུད་འདུལ་ཁྲོ་བོའི་སྐུ་ལ་ཕྱག་འཚལ་ལོ། །ཁྲོ་རྒྱལ་སྐུ་ལ་གཉིས་མེད་ཚུལ་འཁྲིལ་མ། །ཕ་རོལ་ཕྱིན་བཅུ་ས་ལམ་དགེ་རྫོགས་མ། །འཇིགས་བྱེད་རྔམ་པའི་ཁྲོ་མོ་བཅུ་ལ་ཕྱག་འཚལ་ལོ། །དམིགས་མེད་ཐབས་ཀྱིས་ཁྲོ་བོའི་སྐུ་གཟུགས་སྟོན། །སྐུ་མདོག་ཕྱག་མཚན་ཅིར་ཡང་སྤྲུལ་ཞིང་བསྒྱུར། །རོལ་པ་ཁྲག་འཐུང་རྣམས་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ཐབས་མཆོག་ཁྲོ་བོའི་ལེའུ་སྟེ་ ― DNG001_Page_0276 ―
[མ་དཔེ་གཟིགས་ན་འདིར་གནོན།]
དྲུག་པའོ།། །།ཡང་བཀའ་སྩལ་པ། ལས་ངན་སེམས་ཅན་ཁྱོད། ལུས་ངག་ཡིད་གསུམ་བརྩོན་འགྲུས་ཕྱུང་། །དཀྱིལ་འཁོར་ལྷ་རྣམས་དབང་གསོལ་ལ། །གུས་པས་དཀྱིལ་འཁོར་ལྷ་ལ་མཐོལ། །དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །མི་འགྱུར་རྡོ་རྗེའི་སྐུ་ལ་ཕྱག་འཚལ་ལོ། །མངོན་པར་བྱང་ཆུབ་སྐུ་ལ་ཕྱག་འཚལ་ལོ། །ཐབས་མཆོག་འཇམ་དཔལ་དམར་ནག་སྐུ་ལ་ཕྱག་འཚལ་ལོ། །སྐྱོན་མེད་སྒྲ་སྒྲོག་པདྨའི་གསུང་ལ་ཕྱག་འཚལ་ལོ། །ཉེས་པའི་ནད་སེལ་བདུད་རྩི་སྨན་ལ་ཕྱག་འཚལ་ལོ། །དུས་གསུམ་རྒྱལ་བ་ཀུན་གྱིས་བསྒྲུབས་པ་ཡི། །ཚོགས་གཉིས་རྫོགས་ནས་ཡོན་ཏན་མཐར་ཕྱིན་པའི། །སྐུ་དང་ཡེ་ཤེས་ཚོགས་ལ་ཕྱག་འཚལ་ལོ། །འབྱུང་བ་ལྔ་ལ་མངའ་བརྙེས་པ། །རྟག་པའི་རྒྱལ་མོ་ལྔ་ལ་ཕྱག་འཚལ་ལོ། །རང་བཞིན་དབྱིངས་ནས་གྲུབ་པ་མོ། །དབྱིངས་ཕྱུག་ལྔ་ལ་ཕྱག་འཚལ་ལོ། །རྒྱུ་འབྲས་བྱང་ཆུབ་སེམས་དཔའི་སྤྲུལ་པ་སྟེ། །མཁའ་འགྲོ་སུམ་ཅུ་གཉིས་ལ་ཕྱག་འཚལ་ལོ། །ག་ཎ་པ་ཏིའི་སྤྲུལ་པ་སྟེ། །གིང་ཕོ་རྣམས་ལ་ཕྱག་འཚལ་ལོ། །ལྷ་མོ་དཔལ་མོའི་སྤྲུལ་པ་སྟེ། །གིང་མོ་རྣམས་ལ་ཕྱག་འཚལ་ལོ། །འཇིག་རྟེན་ཁམས་ལ་མངའ་མཛད་མ། །འཇིགས་བྱེད་དཔལ་འབར་རལ་བ་ཅན། །འདོད་པའི་རོ་ལ་ཆགས་པ་མོ། །མ་མོའི་ཚོགས་ལ་ཕྱག་འཚལ་ལོ། །ལེགས་ཉེས་ལྟང་འཛིན་དམ་ཚིག་རྗེས་གཅོད་ཅིང་། །བཀའ་བཞིན་སྒྲུབ་པའི་གྲོགས་མཛད་པ། །དམ་ཅན་རྒྱ་མཚོའི་ཚོགས་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ནོངས་པ་དཔང་གསོལ་ཕྱག་གི་སྐབས་ལས། དཀྱིལ་འཁོར་འདུས་པའི་ལེའུ་སྟེ་བདུན་པའོ།། །།བཀའ་སྩལ་པ། གང་གིས་སྒྱུ་འཕྲུལ་ཁྲོ་བོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆག་ཀུན་ཀྱང་བྱང་འགྱུར་ཏེ། །མཚམས་མེད་ལྔ་ཡི་སྡིག་ཀྱང་བྱང་། །ན་རག་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །དེ་སྐད་ ― DNG001_Page_0277 ―
[མ་དཔེ་གཟིགས་ན་འདིར་གནོན།]
ཅེས་བསྒྲགས་པ་དང་། །དམྱལ་བའི་གནས་ཀྱི་སེམས་ཅན་དེ། །དྲན་པ་སླར་ནི་རྙེད་པར་གྱུར། །སྡུག་བསྔལ་སྐབས་དེ་ཞི་བ་ལས། །རྡོ་རྗེ་སེམས་དཔས་འདི་སྐད་གསུངས། །ཞིང་ཁམས་རྒྱལ་བ་རྒྱ་མཚོ་དགོངས། །དུས་གསུམ་སངས་རྒྱས་ཐམས་ཅད་ཀྱི། །མཚམས་མེད་ཉེས་བྱས་རྣམ་སྨིན་བྱང་། །གསང་སྔགས་དམ་ཚིག་སོ་རུ་ཆུད། །མི་དགེ་ཕལ་པ་སྨོས་ཅི་དགོས། །གང་ཞིག་ནད་ཀྱིས་ཉེན་གྱུར་ཀྱང་། །སྡུག་བསྔལ་དེ་ལས་ངེས་པར་གྲོལ། །འགོ་བའི་ནད་རིམས་བྱུང་བའི་ཚེ། །བདག་ཉིད་ཡི་དམ་གསལ་བ་ཡིས། །སྙིང་པོ་འདི་བརྗོད་དེས་མི་ཚུགས། །གང་ཞིག་ངན་སྔགས་མཚོན་བརྡེག་ཀྱང་། །སྙིང་པོ་འདི་བརྗོད་རང་ལ་ལྡོག །དོན་གཉེར་ལམ་འགྲོ་འདི་བརྗོད་ན། །འཇིགས་པའི་དགྲ་ལས་ངེས་པར་གྲོལ། །གདོན་འཇིགས་བགེགས་ཀྱིས་འཚེ་བའི་ཕྱིར། །རིག་པ་འདི་བརྗོད་གདོན་དེ་འཇིལ། །སེམས་ཅན་གང་ཞིག་བུ་འདོད་ཀྱང་། །རིག་པ་འདི་ལས་རབས་དེ་ཟིན། །ཉོན་མོངས་དབུལ་ཞིང་ཕོངས་པས་ཀྱང་། །སྙིང་པོ་འདི་བརྗོད་རིན་ཆེན་རྙེད། །གང་ཞིག་འཁོར་སྡུད་འདི་བརྗོད་ན། །སྲིད་པ་གསུམ་ཡང་འཁོར་དུ་འདུ། །ཕྲིན་ལས་རྣམ་བཞི་ངེས་པར་འགྲུབ། །ཉམས་སྒྲིབ་ཐམས་ཅད་འདག་བྱེད་པའི། །ཡི་གེ་བརྒྱ་བ་བདག་གིས་བརྗོད། །ཆག་ཉམས་ཐམས་ཅད་འདི་ཡིས་བསྐངས། །ཞེས་སྨྲས་ཏེ། ངན་སོང་དོང་ནས་སྤྲུགས་པ་འདི་བརྗོད་དོ། །ཨོཾ་ཨཱཿཧཱུཾ་སྭཱ་ཧཱ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ། ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ། མ་ཧཱ་ས་མ་ཡ་སཏྭ་ཨ། འདི་ནི་དུས་ལ་བབ་པའི་ཚེ། །གསུམ་མམ་བདུན་ནམ་བཅུ་བཞི་འམ། །ཉི་ཤུ་རྩ་གཅིག་བརྒྱ་རྩ་བརྒྱད། །ལྷ་བསྒོམ་གསལ་བས་བརྗོད་བྱས་ན། །ཆག་ཉམས་ཐམས་ཅད་བསྐང་བར་བྱེད། །ངན་སོང་གསུམ་ལས་ཐར་བར་འགྱུར། །ཡི་དམ་དག་ཏུ་འདི་བརྗོད་ན། །དུས་གསུམ་རྒྱལ་བའི་སྲས་སུ་འགྱུར། །ཞེས་གསུངས་པས། ལས་ངན་སེམས་ཅན་དམྱལ་བ་པ་རྣམས་ཀྱིས། མགོན་པོ་སེམས་དཔའ་ ― DNG001_Page_0278 ―
[མ་དཔེ་གཟིགས་ན་འདིར་གནོན།]
ཨ་ལ་ལ་ཧོ། ཞེས་སྨྲས་སོ། །དེ་ནས་དུས་གསུམ་གྱི་སངས་རྒྱས་རྣམས་ཀྱིས། རྡོ་རྗེ་སེམས་དཔའ་ལ། ཐུགས་ཀྱི་ཡང་སྙིང་བརྗོད་པ་ཁྱོད། ཤིན་ཏུ་ལེགས་སོ། །བཤགས་པའི་རྒྱལ་པོ་བརྗོད་པ་ལེགས་སོ་ལེགས་སོ། །ཞེས་གནང་བ་བྱིན་ནོ། །དབང་མཆོག་རྒྱལ་པོའི་རྒྱུད་ལས། ཡང་སྙིང་གསང་སྔགས་བཤགས་པའི་ལེའུ་སྟེ་བརྒྱད་པའོ།། །།དེ་ནས་ཕྱག་ན་རྡོ་རྗེ་ཡིས། །ལས་ངན་སེམས་ཅན་དེ་ལ་ནི། །སྔགས་ཀྱི་སྣོད་དུ་རུང་བྱའི་ཕྱིར། །དང་པོ་སེམས་བསྐྱེད་དད་བྱས་ནས། །བུམ་པའི་ལྷ་ཡི་དབང་བསྐུར་དང་། །ན་རཀ་གནས་ནས་དྲང་བ་ཡི། །གསང་བ་སྔགས་ཀྱི་དབང་བསྐུར་རོ། །བུམ་པ་རྫས་དང་ལྡན་ཐོགས་ནས། །ལས་ངན་དེ་ཡི་གཙུག་ཏུ་བཞག །རིག་པའི་ཚིགས་བཅད་འདི་བརྗོད་དོ། །ཧཱུཾ་ཀུན་བཟང་ཡབ་ཡུམ་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། །སེམས་ཅན་ཁྱོད་ལ་དབང་བསྐུར་བས། །ན་རཀ་སྡུག་བསྔལ་བྲལ་བར་ཤོག །དུ་ད་ཧ་ད་ཧ་སརྦ་ན་རཀ་གཏེ་ཧེ་ཧཱུཾ་ཧཱུཾ་ཕཊཿ། ཧཱུཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ། བཛྲ་སཏྭ་ཨ། ཧཱུཾ་བཛྲ་ཨ་བྷི་ཥིཉྩ་ཧཱུཾ། ཞེས་དབང་བསྐུར་བས། དུས་དེར་ན་རཀ་གི་གནས་དེ་སྤྲུགས་པར་འགྱུར་རོ། །དབང་མཆོག་རྒྱལ་པོའི་རྒྱུད་ལས། ན་རཀ་དོང་སྤྲུགས་ཀྱི་ལེའུ་སྟེ་དགུ་པའོ།། །།དེ་ནས་སེམས་ཅན་ལས་ངན་དེ། །ཡི་དྭགས་གནས་སུ་ཡང་སྐྱེས་ཏེ། །ཕྱི་ནང་གཉིས་ཀའི་སྡུག་བསྔལ་མྱོང་། །རྣམ་སྨིན་ཡི་དྭགས་ཆེན་པོར་གནས། །དེ་ནས་ལག་ན་རྡོ་རྗེ་ཡིས། །ཡི་དྭགས་དེ་ཡི་རྩར་ཕྱིན་ནས། །ལས་ངན་དེ་ལ་འདི་སྐད་བསྒྲགས། །པྲེ་ཏ་ཀ་ཙཀྵུ་པྲ་བེ་ཤ་ཡ་ཨ། དེ་སྐད་རྣ་བར་བསྒྲགས་པ་ཡིས། །སྔོན་གྱི་ལས་ངན་ཡོངས་སུ་དྲན། །ཀྱེ་མ་ཀྱེ་ཧུད་མགོན་པོ་ཡིས། །ཐུགས་རྗེས་ཟུངས་ལ་བདག་སྐྱོབས་ཤིག །བདག་ལུས་སྒྲོལ་ལ་བདེ་ལ་འཁོད། ། ― DNG001_Page_0279 ―
[མ་དཔེ་གཟིགས་ན་འདིར་གནོན།]
མགོན་པོས་མྱུར་དུ་མགོན་སྐྱབས་མཛོད། །ཅེས་གསོལ་བ་བཏབ་པོ། དེ་ནས་ལག་ན་རྡོ་རྗེ་ཡིས། །རིན་ཆེན་སྒྲོམ་བུ་ཕྱག་ཐོགས་ནས། །ལས་ངན་དེ་ཡི་གཙུག་ཏུ་བཞག །རིག་པའི་ཚིགས་བཅད་འདི་བརྗོད་དོ། །ཨོཾ་རིན་ཆེན་སྒྲོམ་བུའི་བུམ་པ་ན། །སངས་རྒྱས་ཞི་ཁྲོའི་ལྷ་ཚོགས་བཞུགས། །སེམས་ཅན་ཁྱེད་ལ་དབང་བསྐུར་བས། །པྲེ་ཏའི་སྡུག་བསྔལ་བྲལ་བར་ཤོག །དྲེ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཧཱུཾ་ཧཱུཾ་ཕཊ། ཨཱཿཔདྨ་སཏྭ་ས་མ་ཡ། མ་ནུ་པཱ་ལ་ཡ། བཱཀྶཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མི་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲཻ་ཡཙྪ། སརྦ་ཀརྨ་སུ་ཙ་མེ། པདྨ་ཤྲེ་ཡཾ་ཀུ་རུ་ཧཱུཾ་ཧཱུཾ། ཨཾ་ཨཾ། ཨ་ཨ། ཧཱུཾ་ཧོ་ཧེ། བྷ་ག་བཱན། སརྦ་ཏ་ཐཱ་ག་ཏ། པཱདྨཱ་མེ་མུཉྩ། བཱ་བ། མ་ཧཱ་ས་མ་ཡ་བཱ་ག་སཏྭ་ཨ། ཨཱཾ་ཨ་བྷི་ཥིཉྩ་ཨཱ། ཞེས་དབང་བསྐུར་བས། དུས་དེར་ཡང་ཡི་དྭགས་རིགས་གསུམ་ལས། རྒྱུ་བ་གནས་པ་རྣམ་པར་སྨིན། །ཕྱི་ནང་གཉིས་ཀའི་སྒྲིབ་པ་ཅན། །ཡི་དྭགས་གནས་དེ་ཉིད་ལས་ཐར། །མཐོང་ལོག་སྡུག་བསྔལ་ལས་གྲོལ་ལོ། །དབང་མཆོག་རྒྱལ་པོའི་རྒྱུད་ལས། པྲེ་ཏ་དོང་སྤྲུགས་ཀྱི་ལེའུ་སྟེ་བཅུ་པའོ།། །།དེ་ནས་ལས་ངན་སེམས་ཅན་དེ། །བྱོལ་སོང་གནས་སུ་ཡང་སྐྱེས་སོ། །བྱོལ་སོང་རིགས་བཞིར་ཡོད་པ་ལས། །གོར་མ་རྡོ་ཡི་འབུ་རུ་སྐྱེས། །སྔོན་གྱི་ཡན་ལག་བཅད་ལ་སོགས། །དེ་ཡི་རྣམ་པར་སྨིན་ལས་བྱུང་། །རིགས་བཞིའི་མིང་ལ་དཔག་ཏུ་མེད། །བསྡུས་པས་སུམ་འབུམ་ཉི་ཁྲི་ཡོད། །ཤིན་ཏུ་བསྡུས་པ་རིགས་བཞི་ཡིན། །དེ་དག་ཀུན་ཏུ་སྐྱེ་བ་ན། །དེ་ནས་ལག་ན་རྡོ་རྗེ་ཡིས། །སེམས་ཅན་དེ་ཡི་གམ་དུ་བྱོན། །ལས་ངན་དེ་ལ་འདི་སྐད་བསྒྲགས། །ཏིརྱ་ཀ་ཙཀྵུ་པྲ་བེ་ཤ་ཡ་ཨཱ། དེ་སྐད་སེམས་ཅན་ངེས་ཐོས་བས། །སྔོན་གྱི་ལས་ངན་དེ་དྲན་ནས། །ཀྱེ་མ་ཀྱེ་ཧུད་བདག་འདྲ་ཞིག །ལས་ཀྱི་རྣམ་སྨིན་རང་ལ་སྨིན། །མགོན་པོའི་ཐུགས་རྗེས་བདག་སྒྲོལ་ཅིག །ཞེས་གསོལ་བ་བཏབ་པ་དང་། །དེ་ནས་ལག་ན་རྡོ་རྗེ་ཡིས། །ལས་ངན་སེམས་ཅན་བྱོལ་སོང་ལ། །ཤེས་རབ་པོ་ཏི་ལག་ཐོགས་ཏེ། །ལས་ངན་དེ་ཡི་གཙུག་ཏུ་བཞག །རིག་པའི་བདེན་ཚིག་འདི་བརྗོད་དོ། །ཨོཾ་ཤེས་རབ་རིགས་ ― DNG001_Page_0280 ―
[མ་དཔེ་གཟིགས་ན་འདིར་གནོན།]
པའི་པོ་ཏི་འདི། །དུས་གསུམ་སངས་རྒྱས་ཞི་ཁྲོའི་གསུང་། །སེམས་ཅན་ཁྱོད་ལ་དབང་བསྐུར་བས། །ཏིརྱའི་སྡུག་བསྔལ་གྲོལ་བར་ཤོག །སུ་མ་ཐ་མ་ཐ་སརྦ་ཏིརྻ་ཀ་ག་ཏེ་ཧེ་ཏུཾ་ཧཱུཾ་ཕཊཿ། ཨོཾ་བུཌྜྷ་སཏྭ་ས་མ་ཡ། མ་ནུ་པཱ་ལ་ཡ། བུཌྜྷ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཀརྨ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། བྷུཌྜྷ་མཱ་མེ་མུཉྩ། བུཌྜྷ་བྷ་བ། མ་ཧཱ་ས་མ་ཡ། བུཌྜྷ་སཏྭ་ཨ། ཨོཾ་ཨ་བྷི་ཥིཉྩ་ཨ། ཞེས་དབང་བསྐུར་བ་དང་། ཡང་དེའི་དུས་སུ་བྱོལ་སོང་གི་གླེན་ལྐུགས་བསད་བཅད་དང་། ཉིང་ཤ་ཉིང་གིས་ཟ་བ་ལས་ཐར་ཏེ། འཁོར་བྱོལ་སོང་ཁྲི་སུམ་སྟོང་གིས་བདེ་བ་རྙེད་དོ། །ལས་ངན་སེམས་ཅན་དེ་ཡང་། རྡོ་རང་ཞིག་སྟེ་བྱོལ་སོང་གི་མུན་པ་ལས་ཐར་རོ། །དབང་མཆོག་རྒྱལ་པོའི་རྒྱུད་ལས། ཏིརྱ་ཀ་ངན་སོང་དོང་སྤྲུགས་ཀྱི་ལེའུ་སྟེ་བཅུ་གཅིག་པའོ།། །།དེ་ནས་ལས་ངན་སེམས་ཅན་དེ། །ལྷ་མིན་གནས་སུ་སྐྱེས་ཏེ་ཡང་། །འགྲོ་ལ་གནོད་སེམས་མཐོ་རིས་འཁྲུག །འཐབ་རྩོད་ལས་ལ་དགའ་ཞིང་ནད་རིམས་གཏོང་། །མི་དགེའི་ལས་ངན་བར་གཅོད་གཏོང་། །སྒྲ་གཅན་ནག་པོ་བྱ་བར་སྐྱེས། །ལྷ་ལ་ཁོང་ཁྲོ་འཁྲུག་པ་བྱེད། །དཔུང་གི་སྟོབས་ཀྱིས་ཐམས་ཅད་དྲེད། །ལྷ་ཡུལ་དམག་འདྲེན་བསམ་གཏན་འཁྲུགས། །དེ་ནས་ལག་ན་རྡོ་རྗེ་ཡིས། །ལས་ངན་དེ་ལ་འདི་སྐད་བསྒྲགས། །ཨ་སུ་ར་ཙཀྵུ་པྲ་བེ་ཤ་ཡ་ཨ། སྒྲ་གཅན་ནག་པོས་དེ་ཐོས་ནས། །སྔོན་གྱི་ལས་ངན་དུས་དེར་དྲན། །མགོན་པོ་ཉིད་ལ་ངོ་དམའ་ཞིང་། །གདུང་བའི་སྨྲེ་སྔགས་འདི་སྨྲས་སོ། །ཨེ་མ་བདག་འདྲའི་སེམས་ཅན་ཞིག །སྔོན་གྱི་ལས་ངན་དུས་འདིར་བྱུང་། །ཀྱེ་མ་ཀྱི་ཧུད་མགོན་པོ་ཡིས། །བདག་ལུས་ངན་པ་བསྒྲལ་དུ་གསོལ། །སྔར་བྱས་འགྱོད་དོ་མཐོལ་བཤགས་བསྡམ། །ཐུགས་རྗེས་ཟུང་ལ་དབང་བསྐུར་སྦྱོངས། །སླད་ནས་བྱང་ཆུབ་མཆོག་ཐོབ་མཛོད། །ཅེས་གསོལ་བ་ཡང་བཏབ་བོ། །དེ་ནས་ཕྱག་ན་རྡོ་རྗེ་ཡིས། །ཕྱག་ན་གོ་མཚོན་ཐོགས་ནས་ནི། །ལས་ངན་དེ་ལ་ ― DNG001_Page_0281 ―
[མ་དཔེ་གཟིགས་ན་འདིར་གནོན།]
དབང་བསྐུར་བསྒྲལ། །རིག་པའི་བདེན་ཚིག་འདི་བརྗོད་དོ། །ཧཱ་ཤེས་རབ་དོན་མཚོན་རལ་གྲི་དང་། །བདུད་ཀྱི་མཚོན་རྡུགས་གོ་ཆ་ནི། །དུས་གསུམ་སངས་རྒྱས་རྣམས་ཀྱི་སྦྱོར་སྒྲོལ་ཏེ། །ཞི་ཁྲོ་རྒྱལ་བ་རྣམས་ཀྱི་ཕྱག་མཚན་འདིས། །སེམས་ཅན་ཁྱོད་ལ་དབང་བསྐུར་བསྒྲལ། །ཨ་སུ་ར་ཡི་སྡུག་བསྔལ་བྲལ་བར་བྱ། །ཏྲི་སརྦ་དུ་ག་སརྦ་ཀརྨ་པྲ་བེ་ཤ་ཧཱུཾ་ཕཊཿ། ཧཱ་ཀརྨ་སཏྭ་ས་མ་ཡ། མ་ནུ་པཱ་ལ་ཡ། ཀརྨ་སཏྭ། ཏྭེ་ནོ་པ་ཏིཥྛ། དྲྀ་ཌྷོ་མེ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཀརྨ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ། ཀརྨ་མཱ་མེ་མུཉྩ། ཀརྨ་བྷ་བ། མ་ཧཱ་ས་མ་ཡ་ཀརྨ་སཏྭ་ཨ། ཧཱ་ཀརྨཱ་ཨ་བྷི་ཥིཉྩ་ཨ། ཞེས་དབང་བསྐུར་བས་ལྷ་མ་ཡིན་གཞན་རྣམས་ཀྱང་བྱམས་པའི་སེམས་རང་སྐྱེས། སྙིང་རྗེ་ཚད་མེད་པ་ལ་གནས་སོ། །འཐབ་རྩོད་ཐམས་ཅད་དུས་དེར་ཞིའོ། །སྒྲ་གཅན་ནག་པོ་དུས་དེར་ལག་ན་རྡོ་རྗེས་བསྒྲལ་ལོ། །ལྷ་མ་ཡིན་གཞན་རྣམས་ཀྱང་དགའ་བའི་སེམས་ལ་གནས་ཏེ། སྐྱེ་བ་གཉིས་པ་དང་གཅིག་པ་ཤ་སྟག་ཏུ་གྱུར་ཏོ། །དབང་མཆོག་རྒྱལ་པོའི་རྒྱུད་ལས། སྒྲ་གཅན་ནག་པོའི་ལེའུ་སྟེ་བཅུ་གཉིས་པའོ།། །།དེ་ནས་སྔར་གྱི་སེམས་ཅན་དེ། །ལྷ་ཡི་གནས་སུ་སྐྱེ་བ་བླངས། །ལྷ་གནས་རྣམ་པ་གསུམ་ལས་ནི། །འདོད་ཁམས་སུམ་ཅུ་རྩ་གསུམ་གྱི། །དགེ་བའི་ངང་ཚུལ་བྱ་བར་སྐྱེས། །ལྷ་མོ་བདུན་དང་ལྷན་ཅིག་འགྲོགས། །འདོད་ཡོན་ཆགས་པ་ཅན་དེ་ལ། །ལག་ན་རྡོ་རྗེས་འདི་སྐད་བསྒྲགས། །དེ་བ་ཙཀྵུ་པྲ་བེ་ཤ་ཡ་ཨ། དགེ་བའི་ངང་ཚུལ་དེ་ཐོས་ནས། །སྔོན་གྱི་ལས་ངན་སྐྱེ་བ་དྲན། །རང་གི་རྒྱན་བཀྲོལ་ལག་ན་ཐོགས། །འགྲོ་མགོན་ཉིད་ལ་ངོ་དམའ་ཞིང་། །ཀྱེ་མ་ཀྱེ་ཧུད་ཐུགས་རྗེ་ཆེ། །བདག་འདྲ་རྨོངས་པའི་འདུ་འཛི་ཅན། །དམ་ཚིག་རྩ་བ་ཉམས་པའི་སྐྱོན། །ངན་སོང་མཐོ་རིས་གནས་ན་འཁོར། །མི་འཆབ་འཐོལ་བཤགས་མེ་ཏོག་བཞེས། །དབང་བསྐུར་ལྷ་ཡི་གནས་ལས་སྒྲོལ། །ཞེས་རང་གི་རྒྱན་ཕུལ་ལོ། །དེ་ནས་ལག་ན་རྡོ་རྗེ་ཡིས། །ང་རྒྱལ་ཕྲག་དོག་འཇོམས་བྱེད་པའི། །པི་ཝང་ལག་ཏུ་ཐོགས་ནས་ནི། །དགེ་བའི་ངང་ལ་དབང་བསྐུར་ ― DNG001_Page_0282 ―
[མ་དཔེ་གཟིགས་ན་འདིར་གནོན།]
ནས། །རིག་པའི་བདེན་ཚིག་འདི་བརྗོད་དོ། །ཨ་ལོངས་སྤྱོད་འདུ་འཛི་གཡེང་འཇོམས་པའི། །པི་ཝང་སྙན་པའི་དོན་བྱེད་འདིས། །དེ་བ་ཁྱོད་ལ་དབང་བསྐུར་བས། །སྐྱེ་བ་གཅིག་གི་ལས་རྫོགས་ཤོག །ཨ་སརྦ་ཏ་ཐཱ་ག་ཏ་བི་དྷྭནྶ་ན་ཁཌྒ་ཙྪིན་དྷ་ཙྪིནྡྷ་ཧཱུཾ་ཕཊཿ། སྭཱ་རནྟ་སཏྭ་ས་མ་ཡ། མ་ནུ་པཱ་ལ་ཡ། རཏྣ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། རཏྣ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། རཏྣ་མཱ་མེ་མུཉྩ། རཏྣ་བྷ་བ་མ་ཧཱ་ས་མ་ཡ། རཏྣ་སཏྭ་ཨ། ཨཱ་ཨ་བྷི་ཥིཉྩ་ཨ། ཞེས་དབང་བསྐུར་བས། ལྷ་རྣམས་གཞན་ཡང་དགེ་བ་ལ་བརྩོན་འགྲུས་དང་ལྡན་པར་གྱུར་ཏེ། སྐྱེ་བ་གཅིག་པ་ཤ་སྟག་བྱུང་བར་གྱུར་ཏོ། །དགེ་བའི་ངང་ཚུལ་ལྷའི་འཕོ་ལྟུང་ལས་དུས་དེར་གྲོལ་བར་གྱུར་ཏོ། །དབང་མཆོག་རྒྱལ་པོའི་རྒྱུད་ལས། ལྷའི་བུའི་ལེའུ་སྟེ་བཅུ་གསུམ་པའོ།། །།དེ་ནས་ལས་ངན་སེམས་ཅན་དེ། །གླིང་མཆོག་འཛམ་གླིང་མི་རུ་སྐྱེས། །སྐྱེ་བ་གཅིག་པའི་བྱང་ཆུབ་སེམས། །རིག་འཛིན་གསང་སྤྱོད་རྣལ་འབྱོར་ཏེ། །སྔར་བྱས་ལས་ཀུན་དྲན་པ་ཅན། །རིག་པའི་བློ་ཅན་སྔོན་སྦྱངས་སྟོབས། །འགྱོད་སེམས་དྲག་པོས་དཀའ་ཐུབ་སྤྱོད། །འཕགས་པ་བླ་མ་མཉེས་པར་བྱེད། །གསང་བདག་ལག་ན་རྡོ་རྗེས་ཀྱང་། །ངན་སོང་སྦྱོང་བའི་རྒྱུད་དབང་བསྐུར། །བུམ་པ་ཐབས་ཤེས་གསང་ཚིག་གིས། །དབང་མཆོག་བསྒྲུབ་པ་དེ་ལ་བསྐུར། །འགྲོ་དྲུག་སྐྱེ་སྒོ་བཅད་པའི་ཕྱིར། །རང་རྒྱུད་སྦྱོང་བའི་སྔགས་བརྗོད་པ། །ཧཱུཾ་ནི་བི་ཤ་མུ་ཙལ་ཙྪིནྡ་ཙྪིནྡ་ཧཱུཾ་ཕཊ། དེ་ནས་དམ་ཚིག་ཉམས་པ་གསོ་བྱའི་ཕྱིར། །བཤགས་པའི་རྒྱལ་པོ་ཡི་གེ་བརྒྱ་པ་བཤད། །ཡི་དམ་ལྷ་ནི་གསལ་བྱས་ལ། །འཕྲོ་འདུས་འགྱོད་སྦྱང་ཚར་བཅད་བྱ། །རྒྱལ་བ་ཞི་ཁྲོ་དཔང་གསོལ་ནས། །ཕྱག་འཚལ་མོས་གུས་བཤགས་བྱས་ལ། །གསང་སྔགས་འབྲུ་བརྒྱའི་བཤགས་པ་བཤད་དོ། །ཧཱུཾ་བཛྲ་སཏྭ་ས་མ་ཡ། མ་ནུ་བཱ་ལ་ཡ། བཛྲ་སཏྭ། ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡ་ཙྪ། སརྦ་ཀརྨ་སུ་ ― DNG001_Page_0283 ―
[མ་དཔེ་གཟིགས་ན་འདིར་གནོན།]
ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ། མ་ཧཱ་ས་མ་ཡ། བཛྲ་སཏྭ་ཨ། ཧཱུཾ་བཛྲ་ཨ་བྷི་ཥིཉྩ་ཨ། ཨོཾ་བུཌྜྷ་མ་བྷི་ཥིཉྩ་ཨ། སྭཱ་རཏྣ་ཨ་བྷི་ཥིཉྩ་ཨ། ཨཱཾ་པདྨ་ཨ་བྷི་ཥིཉྩ་ཨ། ཧཱ་ཀརྨ་ཨ་བྷི་ཥིཉྩ་ཨ། ཞེས་ཕྱག་མཚན་དུ་རིན་ཆེན་པར་བུ་དང་། གསེག་ཤང་དང་། རྡོ་རྗེ་དང་། འཁོར་ལོ་དང་། རིན་པོ་ཆེ་དང་། པདྨ་དང་། རྒྱ་གྲམ་དང་། རལ་གྲི་ལ་སོགས་པས་དབང་བསྐུར་རོ། །བདེན་པའི་ཚིགས་བཅད་འདིའོ། །ཧཱུཾ་རིན་ཆེན་པར་བུའི་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། །རིགས་ཀྱི་བུ་ལ་དབང་བསྐུར་བས། །ལྷ་དབང་ལུས་ལ་ཐོབ་པར་ཤོག །ཧཱུཾ་གསེག་ཤང་སིལ་ཁྲོལ་སྒྲ་སྒྲོག་འདི། །ཐུགས་རྟགས་ཞི་ཁྲོའི་ལྷའི་བརྡའ། །རིགས་ཀྱི་བུ་ལ་དབང་བསྐུར་བས། །ཨ་བ་དྷཱུ་ཏཱིའི་དབང་ཐོབ་ཤོག །རྡོ་རྗེ་འཁོར་ལོ་རིན་ཆེན་དང་། །པདྨ་རྒྱ་གྲམ་ཐུགས་ཀྱི་རྟགས། །རིགས་ཀྱི་བུ་ལ་དབང་བསྐུར་བས། །འཁོར་ལོ་ལྔ་ཡི་ལྷ་རྫོགས་ཤོག །ཅེས་སྔགས་དང་ཏིང་འཛིན་ཚིགས་བཅད་ཀྱིས། །རིག་འཛིན་དེ་ལ་དབང་བསྐུར་བས། །ལྷ་དབང་ལུས་ལ་ཐོབ་པར་གྱུར། །རང་ལུས་རྒྱལ་བའི་སྐུར་རྫོགས་ཀྱང་། །མྱ་ངན་འདས་པའི་དོན་མ་རྟོགས། །རྟོག་བཅས་ལྷ་ཡི་དབང་ཞེས་བྱ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ལྷ་དབང་ལུས་ལ་བསྐུར་བའི་ལེའུ་སྟེ་བཅུ་བཞི་པའོ།། །།དེ་ནས་རྡོ་རྗེ་འཛིན་པ་ཡིས། །སྣོད་ལྡན་སློབ་བུ་དེ་ལ་ནི། །ཐབས་ཀྱི་དབང་བསྐུར་བརྡའ་རུ་བསྟན། །ཤེས་རབ་དབང་བསྐུར་ཤེས་སམ་བལྟས། །གསང་བའི་དབང་བསྐུར་རང་ཉམས་བསྟན། །ཚིག་གི་དབང་བསྐུར་མེད་པར་བསྟན། །ཐབས་ཀྱི་དབང་བསྐུར་བསྟན་པ་ནི། །ཕྱི་ནང་སྣོད་བཅུད་ཐམས་ཅད་ཀྱི། །སྣང་བ་ཡོད་མེད་བརྡའ་རུ་བསྟན། །གཅིག་ལས་སྣ་ཚོགས་བསྒྱུར་བྱས་པ། །སྣང་བ་ཡོད་མེད་བསྟན་པ་ཡིན། །ཤེས་རབ་དབང་བསྐུར་བསྟན་པ་ནི། །སྣ་ཚོགས་བསྒྱུར་བའི་མིང་གིས་མཚོན། །རི་རབ་གླིང་བཞིའི་དཀྱིལ་འཁོར་དང་། །བུམ་པ་སྐུ་དང་ཡེ་ཤེས་དང་། །འཁོར་ལོ་རིན་ཆེན་པདྨ་དང་། །རྒྱ་གྲམ་རལ་གྲི་རྩེ་གསུམ་དང་། །ཕུར་པ་མདའ་དང་གཞུ་དང་ནི། །མེ་ལོང་དབྱིབས་དང་ཁ་དོག་ཏུ། ། ― DNG001_Page_0284 ―
[མ་དཔེ་གཟིགས་ན་འདིར་གནོན།]
བླ་མས་མིང་དུ་བཏགས་པ་ནི། །སློབ་མའི་ཤེས་རབ་ལྟ་བ་མིན། །དཔེ་ཡི་དོན་དེ་ཤེས་ན་ཤེས་རབ་ཡིན། །གསང་བའི་དབང་བསྐུར་བསྟན་པ་ནི། །རང་ལ་རང་གསང་སྨྲས་པ་ཡིན། །རང་ངོ་ཤེས་ན་གསང་བ་ཐོས། །གཅིག་ངོ་ཤེས་ན་ཐམས་ཅད་དེ། །མཉམ་པ་ཉིད་ནི་ངོ་མཚར་ཆེ། །ཡོད་ན་ཡོད་པར་ཡེ་ནས་མཉམ། །མེད་ན་མེད་པར་ཡེ་ནས་མཉམ། །བདེ་ན་བདེ་བར་ཡེ་ནས་མཉམ། །རྫུན་ན་རྫུན་པར་ཡེ་ནས་མཉམ། །སྟོངས་ན་སྟོང་པར་ཡེ་ནས་མཉམ། །དངོས་ན་དངོས་པོར་ཡེ་ནས་མཉམ། །མཉམ་པ་ཉིད་དུ་ཤེས་པ་ནི། །གསང་བའི་དབང་བསྐུར་ཐོབ་པ་ཡིན། །ཚིག་གི་དབང་བསྐུར་རང་མེད་བསྟན། །ང་བདག་འདུག་ན་ནམས་ཀྱང་འཁོར། །རང་མེད་རོ་དང་བྲལ་བ་ནི། །ཚིག་གཅིག་ཚིག་མེད་དབང་གི་མཆོག །ང་མེད་བདག་མེད་སྣང་བ་མེད། །ཅེས་གསུངས་པས། རིག་འཛིན་དགེ་མཐོང་དང་། འཁོར་དུ་འདུས་པའི་ལས་དང་པོ་པ་རྣམས་དང་། ཐེག་པ་བརྒྱད་པ་རྣམས་བརྒྱལ་ནས། ས་ལ་འགྱེལ་བར་གྱུར་ཏེ། ལ་ལ་ནི་ངུ་ཞིང་སྨྲེ་སྔགས་འདོན། ལ་ལ་ནི་སྐྲག་སྟེ་སྔངས་བར་གྱུར་ནས་སྐུར་པ་འདེབས། ལ་ལ་དག་མོས་པ་ལོག་སྟེ་ཁ་ན་མ་ཐོ་བ་སྨྲ། ལ་ལ་ཡི་ཆད་དེ་བྱས་པ་དོན་མེད་པ། ཀྱེ་མ་ཀྱི་ཧུད་གསང་བདག་རྡོ་རྗེ་མ་གསུངས་ཞེས་གླེང་ངོ་། །ཡིད་གཉིས་པ་རྣམས་ནི་དེ་བས་ན་མུ་སྟེགས་པ་བདེན་ནོ་ཞེས་སྨྲའོ། །དེ་ནས་ལག་ན་རྡོ་རྗེས་འཁོར་དེ་དག་ཡང་དག་ལ་ཡིད་ཆེས་པར་བྱ་བའི་ཕྱིར། བོས་ཤིང་བསྡུས་ཏེ་འདི་སྐད་ཅེས་གསུངས་སོ། །འདུས་པ་རྣམས་ཐེ་ཚོམ་གཅད་པར་བྱའོ། །རྡོ་རྗེ་སེམས་དཔའི་ཞལ་དང་ཕྲད་ཀྱིས་ལོངས་ཤིག །ཆོས་སྐུ་དང་མཇལ་དུ་འོང་ངོ་ཞེས་གསུངས་སོ། །འཁོར་རྣམས་སླར་འདུས་ཏེ། རྡོ་རྗེ་སེམས་དཔའི་དྲུང་དུ་བསྐོར་བ་དང་མཆོད་པའི་ཚོགས་ཀྱིས་མཆོད་དེ་འཁོད་དོ། །དབང་མཆོག་རྒྱལ་པོའི་རྒྱུད་ལས། གསང་བ་ཆོས་ཉིད་ལ་ཡིད་མ་ཆེས་པའི་ལེའུ་སྟེ་བཅོ་ལྔ་པའོ།། །།དེ་ནས་ལག་ན་རྡོ་རྗེ་ཡིས། །རྡོ་རྗེ་འཆང་ལ་འདི་སྐད་གསོལ། །ཀྱེ་ཀྱེ་རྡོ་རྗེ་སེམས་དཔའ་མཆོག །གསང་སྔགས་གསང་བ་མཉམ་མི་མཉམ། །ང་བདག་རང་དབང་ཡོད་དམ་མེད། །ཆོས་སྐུ་དངོས་མེད་བདེན་ནམ་རྫུན། །བག་ཆགས་རོ་དང་འབྲལ་མི་ ― DNG001_Page_0285 ―
[མ་དཔེ་གཟིགས་ན་འདིར་གནོན།]
འབྲལ། །ཞེས་ཞུས་པས། རྡོ་རྗེ་སེམས་དཔས་བཀའ་སྩལ་པ། །སྟོབས་ཆེན་རྡོ་རྗེའི་འཁོར་ཀུན་ཉོན། །ཆོས་ཉིད་ཆོས་སྐུའི་དགོངས་ཚད་ནི། །མཉམ་པ་ཉིད་དུ་མཁྱེན་པ་མིན། །མཉམ་པ་ཉིད་ལ་གཉིས་མེད་དེ། །དཔེར་ན་ཆོས་ཅན་དངོས་པོ་གཅིག །ཕྱི་རོལ་ཀ་བ་བུམ་པ་དང་། །དཔེར་ན་རྡོ་རྗེ་ལྟ་བུ་འདི། །མིང་གིས་ཡིན་ནམ་གཟུགས་ཀྱིས་ཡིན། །མཚོན་པས་ཡིན་ནམ་ལས་ཀྱིས་ཡིན། །འདུས་པས་ཡིན་ནམ་འབྲལ་བས་ཡིན། །མདོག་གིས་ཡིན་ནམ་དབྱིབས་ཀྱིས་ཡིན། །བསམ་པས་ཡིན་ནམ་གང་གིས་ཡིན། །རྡོ་རྗེ་འཛིན་པའི་འཁོར་ཚོགས་ཀུན། །རྡོ་རྗེའི་མིང་གིས་ཡིན་པས་ན། །མིང་དུ་གང་གྲགས་རྡོ་རྗེ་འམ། །གཟུགས་ཀྱིས་རྡོ་རྗེ་ཡིན་པ་ན། །གཟུགས་སུ་གང་སྣང་རྡོ་རྗེ་འམ། །འདུས་པས་རྡོ་རྗེ་ཡིན་པ་ན། །སེམས་ཅན་ཐམས་ཅད་རྡོ་རྗེ་འམ། །མདོག་གིས་རྡོ་རྗེ་ཡིན་པ་ན། །དཀར་དམར་ལ་སོགས་རྡོ་རྗེ་འམ། །དབྱིབས་ཀྱིས་རྡོ་རྗེ་ཡིན་པ་ན། །ཟླུམ་པོ་ལ་སོགས་རྡོ་རྗེ་འམ། །བསམ་པས་རྡོ་རྗེ་ཡིན་པ་ན། །ཡིད་སྨོན་ཐམས་ཅད་རྡོ་རྗེ་འམ། །དེ་ལྟར་རྒྱུ་ཡིས་ཡིན་པ་མེད། །རྡོ་རྗེ་བྱ་བ་གང་ལ་ཟེར། །ཉོན་ཅིག་བློ་རྟོག་སྐྱེས་པ་རྣམས། །དཔེར་ན་ཆོས་ཅན་རྡོ་རྗེ་འདི། །མིང་གིས་ཡིན་ནོ་ངེས་པར་འཇུག །གཟུགས་ཀྱིས་ཡིན་ནོ་སྒོ་ང་རལ། །མཚོན་པས་ཡིན་ནོ་ཆོས་ཅན་འདི། །ལས་ཀྱིས་ཡིན་ནོ་ཆོས་བདུན་ལྡན། །འདུས་པས་ཡིན་ནོ་འབྲལ་བ་ཡིས། །མདོག་གིས་ཡིན་ནོ་ཞི་རྒྱས་ཀྱིས། །དབྱིབས་ཀྱིས་ཡིན་ནོ་དེ་བཞིན་ནོ། །བསམ་པས་ཡིན་ནོ་ཆོས་ཅན་དངོས། །དེ་ལྟར་དགུ་ཡིས་ཡིན་པ་སྟེ། །སྣང་སྲིད་ཐམས་ཅད་རྡོ་རྗེ་ཡིན། །རྡོ་རྗེར་མ་གྱུར་གང་ཡང་མེད། །དེ་ལྟར་རྡོ་རྗེའི་མཚོན་པ་འདི། །ཡིན་ན་ཡིན་པར་ཡེ་ནས་མཉམ། །མིན་ན་མིན་པར་ཡེ་ནས་མཉམ། །ཆོས་ཅན་ཡོད་ན་ཡོད་པར་ཡེ་ནས་མཉམ། །མེད་ན་མེད་པར་ཡེ་ནས་མཉམ། །བདེན་ན་བདེན་པར་ཡེ་ནས་མཉམ། །རྫུན་ན་རྫུན་པར་ཡེ་ནས་མཉམ། །སྟོང་ན་སྟོང་པར་ཡེ་ནས་མཉམ། །དངོས་ན་དངོས་པོར་ཡེ་ནས་མཉམ། །སྣང་ན་སྣང་མཉམ་མཉམ་པ་ཉིད། །མཉམ་ཉིད་ནམ་མཁའ་འདྲའོ་གུད་ན་མེད། །དཔེར་ན་གསེར་གཟུགས་ཆུ་ཡི་རོ། །དུག་མཆོག་ཧ་ལ་འབར་བ་དང་། །སྨན་མཆོག་ག་བུར་དཀར་ ― DNG001_Page_0286 ―
[མ་དཔེ་གཟིགས་ན་འདིར་གནོན།]
པོ་གཉིས། །སྨན་དང་དུག་ཏུ་གཉིས་ཀ་མཉམ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ཆོས་ཉིད་མཉམ་པ་ཆོས་སྐུའི་ལེའུ་སྟེ་བཅུ་དྲུག་པའོ།། །།དེ་ནས་ལག་ན་རྡོ་རྗེས་འདི་སྐད་གསོལ། །ཀྱེ་ཀྱེ་རྡོ་རྗེ་སེམས་དཔའ་ཆེ། །ང་བདག་སྣང་བ་ལ་སོགས་ཡོད་དམ་མེད། །ཆོས་ཅན་སྣང་བ་བདེན་ནམ་རྫུན། །མི་དགེ་སྤང་དུ་ཡོད་དམ་མེད། །ཞེས་ཞུས་པས། རྡོ་རྗེ་སེམས་དཔས་བཀའ་སྩལ་པ། །ཉོན་ཅིག་རྡོ་རྗེ་འཛིན་པ་སོགས། །རང་མེད་རོ་དང་ཕྲོལ་ཅིག་འཁོར་ཚོགས་ཁྱེད། །ང་དང་སྣང་བ་གཉིས་པ་མེད། །ང་མེད་ང་གཅིག་སུ་ལ་འདུག །སྣང་མེད་སྣང་བ་སུ་ལ་བདེན། །ཆོས་ཅན་དངོས་པོ་གང་ལ་འདུས། །དགེ་དང་མི་དགེ་མཉམ་པ་ཉིད། །ང་མེད་བདག་མེད་ང་བདག་གང་། །སུ་ལ་ང་བདག་ཡོད་ལ་འཁོར། །གང་ཞིག་ཐེ་ཚོམ་སུས་ཟ་བ། །ང་བདག་ཚོལ་ཅིག་ང་ལ་ལྟོས། །བཙལ་ཀྱང་འདུག་ན་ད་རུང་ཚོལ། །ཚོལ་མཁན་ཚོལ་ཅིག་ཚོལ་མཁན་མེད། །བལྟས་ཀྱང་མ་མཐོང་ལྟ་མཁན་ལྟོས། །ལྟ་མཁན་ལྟོས་ཤིག་ལྟ་མཁན་མེད། །དཔེར་ན་ཆོས་ཅན་རྡོ་རྗེ་དེ། །རྡོ་རྗེ་དངོས་པོ་གང་གིས་བྱེད། །བུམ་པས་བྱེད་དམ་པདྨས་བྱེད། །སྟེང་རྭས་བྱེད་དམ་འོག་རྭས་བྱེད། །འདུས་པས་བྱེད་དམ་རྡོ་རྗེ་གང་། །དེ་བཞིན་ང་བདག་དངོས་པོ་ཡང་། །ལུས་ཀྱིས་བྱེད་དམ་སེམས་ཀྱིས་བྱེད། །ལུས་ཀྱིས་བྱེད་ན་ལུས་པོ་གང་། །མགོ་དང་རྐང་ལག་དབང་པོ་དང་། །དོན་སྙིང་ནང་ཁྲོལ་ཤ་ལྤགས་རུས། །རྩ་དང་བ་སྤུ་སྐྲ་སེན་གང་། །དེས་ན་ལུས་ཀྱི་དངོས་པོ་མེད། །སེམས་ཀྱིས་བྱེད་ན་གསལ་སྟོང་དང་། །འགྱུས་དྲན་འཛིན་ཆགས་དག་གིས་བྱེད། །ལུས་སེམས་དངོས་པོ་འདི་ཞེས་པ། །རྡོ་རྗེ་སེམས་དཔའ་ངས་མ་རྙེད། །མཚོན་པ་ཙམ་དུ་ང་ཞེས་བྱ། །མིང་ཙམ་འདི་ཞེས་བསྟན་པ་ནི། །ཀུན་ཏུ་བཟང་པོས་བསྟན་དུ་མེད། །རྡོ་རྗེ་སེམས་དཔས་མཚོན་དུ་མེད། །སྣང་བ་མེད་དོ་སྣང་བ་གང་། །སྣང་བ་ཡུལ་གཅིག་སུ་ལ་བདེན། །ཡུལ་དུ་བདེན་རྫུན་གཅིག་ལ་ལྟོས། །དཔེར་ན་འབྱུང་བ་ཆུ་ལྟ་བུར། །འགྲོ་དྲུག་མུ་སྟེགས་རྟག་ཆད་དང་། །རིམ་དགུ་མཐོང་སྣང་ཐ་དད་པ། །མིང་དུ་བདེན་པ་གཅིག་ཀྱང་མེད། །དཔེར་ན་རྒྱ་བོད་ཞང་ཞུང་འདྲ། ། ― DNG001_Page_0287 ―
[མ་དཔེ་གཟིགས་ན་འདིར་གནོན།]
མིང་དུ་བདེན་པ་གཅིག་ཀྱང་མེད། །མིང་ཙམ་འདི་ཞེས་བསྟན་པ་ནི། །རྡོ་རྗེ་སེམས་དཔས་མཚོན་དུ་མེད། །སྣང་བ་ཡོད་མེད་འཁྲུལ་མ་འཁྲུལ། །འཁྲུལ་ན་འཁྲུལ་པ་བདེན་ནམ་རྫུན། །བདེན་ན་འཁྲུལ་པ་སུ་ལ་བདེན། །འཁྲུལ་པ་བརྫུན་ན་དེ་ཀས་མེད། །མ་འཁྲུལ་པ་ལ་སྣང་ཟེར་སུ། །ཟེར་ན་ཟེར་མཁན་འཁྲུལ་པ་ཡིན། །དེས་ན་ཆོས་ཅན་དངོས་པོ་མེད། །ཡོད་ན་དངོས་པོ་གཏན་ལ་ཕོབ། །གཏན་ལ་ཕབས་ནས་དངོས་པོ་གང་། །དངོས་པོར་འདོད་པ་བློ་ཕུགས་ཅན། །བློ་ཕུགས་གང་ལྟར་བྱས་ཀྱང་འཁྲུལ། །བློ་ཕུགས་གཏིབ་ཅིག་སྐལ་ལྡན་བུ། །དགེ་དང་སྡིག་པ་ཡེ་ནས་མཉམ། །ཅི་ཕྱིར་བློ་ཕུགས་གྲོལ་ཕྱིར་རོ། །བློ་བཟང་དགེ་བས་གཏོང་དུ་མེད། །སྡིག་པས་གནོད་པ་སྐྱེལ་བ་མེད། །ཅི་སྟེ་མཚན་མ་མེད་པས་སྨོན་པ་མེད། །སྟོང་པ་ཉིད་ལ་ཕན་གནོད་མེད། །བག་ཆགས་བཟང་རྟོག་ངན་རྟོག་ཡིན། །རྟོག་པས་ནམས་ཀྱང་འཁོར་བར་བྱེད། །འཁོར་བའི་ནང་ནས་ཁྱད་པར་ཆེ། །དགེ་བ་སྤྱོད་ཅིག་རིགས་ཀྱི་བུ། །བག་ཆགས་རོ་དང་བྲལ་བར་གྱིས། །བག་ཆགས་རོ་དང་མ་བྲལ་ན། །འཁོར་བའི་གཟུངས་ཐག་མི་ཆོད་དོ། །སྐྱེ་བའི་རྟེན་ཕུར་ཕྱུང་རེ་ཀན། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། རྟོག་པ་ཐེ་ཚོམ་གྱི་གེགས་བསལ་བས་ཆོས་སྐུའི་ཞལ་མཐོང་བའི་ལེའུ་སྟེ་བཅུ་བདུན་པའོ།། །།དེ་ནས་ཡང་བཀའ་སྩལ་པ། ཉོན་ཅིག་རྡོ་རྗེ་འཛིན་པའི་འཁོར། །དཔེར་ན་སྣང་བ་སྣ་ཚོགས་ཀྱང་། །སྒྱུ་མའི་ཆོ་འཕྲུལ་ཇི་བཞིན་ནོ། །སྒྱུ་མའི་དངོས་པོ་གང་གིས་བྱེད། །སྒྱུ་མ་རྟེན་འདྲེལ་སྐྱེ་བ་མེད། །དཔེར་ན་སྐྱེས་བུ་གཉིད་ལོག་ན། །རྨི་ལམ་དགེ་སྡིག་ཆོ་འཕྲུལ་ནི། །དངོས་པོར་སྣང་བ་ཇི་བཞིན་རྨི། །ཉིན་པར་བག་ཆགས་མཚན་བྱུང་བ། །དེ་ལ་དངོས་པོ་ཡོད་དམ་མེད། །དཔེར་ན་གོང་གི་རྨི་ལམ་ན། །སྐྱེས་བུ་མཚོན་ཐོགས་མང་པོ་ཡིས། །བདག་གསོད་འཐབ་མཁོན་རི་ལ་དེད། །དྲེད་སྔངས་ངལ་ཆད་ཤི་ཉེར་བྲོས། །སད་པར་གྱུར་ན་དེ་ཅིར་སྣང་། །དེ་ཕྱིར་སྣང་བའི་དངོས་པོ་འདི། །རི་རབ་གླིང་བཞི་འབྱུང་བ་ཀུན། །དགྲ་གཉེན་ཆགས་སྡང་སྡུག་བསྔལ་ཀུན། །སྒྱུ་མའམ་རྨི་ལམ་ཇི་བཞིན་ནོ། །ཡོད་ནས་ ― DNG001_Page_0288 ―
[མ་དཔེ་གཟིགས་ན་འདིར་གནོན།]
མི་སྣང་མེད་ནས་སྣང་། །མཐོང་བའི་ཆོས་ཀུན་ཡོད་པ་མེད། །མེད་པས་ཡོད་བཟུང་འཁྲུལ་པ་ཡིན། །འཁྲུལ་པའི་དུས་ན་ཡོད་པ་མེད། །ཀུན་རྫོབ་ཙམ་དུ་ཡོད་ཟེར་ན། །ཀུན་རྫོབ་ཙམ་དུ་སུ་ལ་བདེན། །བདེན་ནམ་བདེན་ན་འགྲོ་བ་ཀུན། །ཐམས་ཅད་སྣང་བ་མཐུན་པར་རིགས། །དེ་བས་ཕྱོགས་མཐུན་ཙམ་ཡང་མེད། །དཔེར་ན་དངོས་པོ་ཆུ་ལྟ་བུར། །རིགས་དྲུག་རྟག་ཆད་ཐེག་པ་རྣམས། །ཕྱོགས་མཐུན་ཙམ་ཡང་མི་སྣང་ཕྱིར། །དེས་ན་མེད་པ་སྣང་བ་ཡིན། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། སྣང་བའི་གནད་བསལ་བའི་ལེའུ་སྟེ་བཅོ་བརྒྱད་པའོ།། །།དེ་ནས་ལག་ན་རྡོ་རྗེ་ཡིས། །སྟོན་པ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་སྟོན་པ་རྡོ་རྗེ་འཆང་། །མེད་ནས་སྣང་བའི་དཔེ་དོན་གསུངས། །འཁོར་རྣམས་ཚིག་ཆེན་དེས་སྐྲག་ནས། །ཡང་དག་གནས་ལ་ལོག་ལྟ་འབྱུང་། །ཞེས་ཞུས་པས། སྟོན་པ་རྡོ་རྗེ་ཆོས་སྐུ་ཡིས། །རྡོ་རྗེ་འཛིན་ལ་བཀའ་སྩལ་པ། །ཉོན་ཅིག་འདུས་པའི་འཁོར་ཚོགས་ཁྱོད། །འཁྲུལ་པའི་སྣང་བ་སྣ་ཚོགས་འདི། །ཡོད་ནས་མི་སྣང་མེད་ནས་སྣང་། །དཔེར་ན་སྒྱུ་མའི་དཔེ་བརྒྱད་འདྲ། །སྐྱེས་བུ་གཉིད་ལོག་རྨི་ལམ་ན། །བུ་དང་ཆུང་མ་ནོར་ཕྱུགས་ཀུན། །ཤིན་ཏུ་ལོངས་སྤྱོད་སྐྱིད་ལྡན་ལ། །གོ་མཚོན་དམག་མང་དགྲ་དག་གིས། །བུ་བསད་ནོར་བཅོམ་སྡུག་བསྔལ་རྨི། །སྐྱེས་བུ་དེ་ཡི་རྨི་ལམ་དེ། །ཡོད་ནས་སྣང་ངམ་མེད་ནས་སྣང་། །སད་པར་གྱུར་ནས་ཇི་སྙམ་སེམས། །འཁྲུལ་པའི་ཆོས་དེ་བདེན་ནམ་བརྫུན། །བདེན་ན་བདེན་པར་ཀྲི་ལེ་མཉམ། །བརྫུན་ན་བརྫུན་པར་ཀྲི་ལེ་མཉམ། །དེ་བཞིན་སྒྱུ་མའི་མཁན་པོ་ཡི། །སྒྱུ་མའི་སྐྱེས་པ་བུད་མེད་དང་། །ཁང་ཁྱིམ་རོལ་མོ་གཅན་གཟན་ཀུན། །ཡོད་ནས་མི་སྣང་མེད་ནས་སྣང་། །སྒྱུ་མ་ཤེས་པས་སྒྱུ་མ་མེད། །སྒྱུ་མ་བདེན་རྫུན་སྒྱུ་མས་ཤེས། །དེ་བཞིན་འཁྲུལ་པའི་དངོས་པོ་འདི། །འཁྲུལ་པ་བདེན་རྫུན་འཁྲུལ་པས་ཤེས། །སྒྱུ་མའི་ཆོས་དང་ཀྲི་ལེ་མཉམ། །དངོས་པོ་འཁྲུལ་པས་བདེན་པ་མེད། །དེ་བཞིན་སྤྲུལ་པས་སྤྲུལ་པ་རྣམས། །ཡོད་ནས་མི་སྤྲུལ་མེད་ནས་སྤྲུལ། །སྤྲུལ་པ་ཡིན་པས་ཡོད་པ་མེད། །དེ་བཞིན་འཁྲུལ་པའི་ལས་རྣམས་ ― DNG001_Page_0289 ―
[མ་དཔེ་གཟིགས་ན་འདིར་གནོན།]
ཀྱང་། །སྤྲུལ་པ་ཉིད་དང་ཀྲི་ལེ་མཉམ། །དེ་ཕྱིར་འཁྲུལ་པ་ཟེར་བས་ཆོག །དེ་བཞིན་གཟུགས་བརྙན་ཆུ་ཟླ་འདྲ། །ཀློང་དེ་འདུག་ཀྱང་ཟླ་བ་མེད། །དེ་བཞིན་དངོས་པོར་སྣང་བ་འདི། །ཀྲོང་དེ་འདུག་སྟེ་སྣང་བ་མེད། །ཡོད་ན་སྣང་བ་མཐུན་ནམ་ཅི། །སྣང་བ་གཅིག་ལ་མཐུན་པ་མེད། །གཟུགས་བརྙན་ཉིད་དང་ཀྲི་ལེ་མཉམ། །དེ་བཞིན་སྒྲ་བརྙན་ལྟ་བུ་སྟེ། །ཡོད་ནས་མ་བཏགས་མེད་ནས་བཏགས། །ཡོད་ན་མིང་བཏགས་གཅིག་པར་རིགས། །གཅིག་ལ་མིང་བཏགས་དོན་མཐུན་མེད། །སྒྲ་བརྙན་ཉིད་དང་ཀྲི་ལེ་མཉམ། །དེས་ན་བྲག་ཆ་ཉིད་དང་ཁྱད་པར་མེད། །ཡོད་པས་མི་སྣང་མེད་པས་སྣང་། །དཔེར་ན་དྲི་ཟའི་གྲོང་ཁྱེར་འདྲ། །ཀྲོང་ངེ་འདུག་པའི་དུས་ན་མེད། །སྣང་བ་རང་གིས་མེད་པ་ཡིན། །མེད་ན་སེམས་ཀྱི་ཆོ་འཕྲུལ་ལྟོས། །སྒྱུ་མའི་ཆོས་ཉིད་མཐོང་ན་ལྟ་བ་ཡིན། །མཐོང་མེད་མཐོང་ན་ཡིན་པ་མེད། །ལྟ་བ་ཡིན་པ་མེད་པ་ཡིན། །ཅེས་གསུངས་སོ། །དབང་མཆོག་རྒྱལ་པོའི་རྒྱུད་ལས། སྒྱུ་མའི་ཆོས་བདུན་གྱི་སྣང་བ་མེད་པར་ཐག་བཅད་པས་བལྟ་བ་རྟོགས་པའི་ལེའུ་སྟེ་བཅུ་དགུ་པའོ།། །།དེ་ནས་ཡང་བཀའ་སྩལ་པ། །རྡོ་རྗེ་འཛིན་པའི་འཁོར་འདུས་ཉོན། །མཐོང་ངམ་མཐོང་ངམ་མཐོང་བར་ལྟོས། །མ་མཐོང་བ་ན་ཅི་ཞིག་བསྒོམ། །དཔེར་ན་དམུས་ལོང་འགའ་དག་གིས། །གླང་ཆེན་རྩལ་ལྡན་ལ་གནོམས་ནས། །སྣ་དང་མཇུག་མ་རྐང་ལག་རྒྱབ། །དང་པོར་གང་རེག་བསྒོམ་པ་འདྲ། །དེ་བས་མཁས་པས་ལེགས་པར་ལྟོས། །རྨི་ལམ་ལྟོས་ཤིག་མཐོང་བ་ན། །རྨི་ལམ་བསྒོམ་པས་བསྒོམ་པ་ཡིན། །རྨི་ལམ་ཤེས་ནས་རྨི་ལམ་བསྒོམ། །སྒྱུ་མ་མཐོང་ནས་སྒྱུ་མ་བསྒོམ། །སྒྱུ་མའི་གཟུགས་དང་སྒྱུ་མའི་སྒྲ། །སྒྱུ་མའི་དྲི་དང་སྒྱུ་མའི་རོ། །སྒྱུ་མའི་རེག་དང་སྒྱུ་མའི་ཆོས། །སྒྱུ་མ་ལེགས་པར་མཐོང་བ་ན། །སྒྱུ་མ་འདྲིས་པ་བསྒོམ་པ་ཡིན། །གོམས་པར་གྱིས་ཤིག་སྒྱུ་མ་ལས། །སྒྱུ་མར་སྤྱོད་ཤེས་སྒྱུ་མ་ཡིན། །སྒྱུ་མ་འབྲས་མེད་འབྲས་བུ་ཡིན། །དེ་བཞིན་རྨི་ལམ་སྨིག་རྒྱུ་རྣམས། །དེ་ལྟར་མཁས་པས་ལེགས་པར་ལྟོས། །མཐོང་མེད་མཐོང་ན་བལྟ་བ་ཡིན། །དེ་དག་གོམས་ན་བསྒོམ་པའོ། །གཉིས་མེད་ ― DNG001_Page_0290 ―
[མ་དཔེ་གཟིགས་ན་འདིར་གནོན།]
སྤྱོད་པས་སྤྱོད་པ་ཡིན། །འདུ་འབྲལ་མེད་ན་འབྲས་བུའོ། །ཞེས་གསུངས་སོ། །དེ་ནས་རིག་འཛིན་རྒྱལ་པོ་དགེ་མཐོང་དེས། །སངས་རྒྱས་རྡོ་རྗེ་སེམས་དཔའ་དང་། །མགོན་པོ་རྡོ་རྗེ་འཛིན་པ་ལ། །འཛུམ་པའི་མདངས་ཕྱུང་གུས་བཏུད་ནས། །རྒྱལ་བའི་ཚོགས་ལ་འདི་སྐད་གསོལ། །དྲུག་གི་དཀྱིལ་འཁོར་གཉིས་འདུས་ལྷར། །བདག་འདྲ་མ་རིག་དྲེགས་པ་ཡིས། །ཡང་དག་ཉིད་ལ་ལོག་བལྟས་ནས། །རྩ་བའི་དམ་ཚིག་ཉམས་པ་སོགས། །མི་འཆབ་མི་སྦེད་མཐོལ་ལོ་བཤགས། །སླན་ཆད་བསྡམ་མོ་དཔང་མཛོད་ཅིག །སྔ་རབས་གོང་དུ་ཅི་བགྱིས་པ། །ལུས་ངག་ཡིད་གསུམ་འབད་རྩོལ་གྱིས། །ཕ་རོལ་ཕྱིན་དྲུག་ཉམས་བླངས་ལ། །འགྱོད་ཚངས་དཔང་གསོལ་ཞི་ཁྲོའི་ལྷར། །ལུས་ངག་ཡིད་གསུམ་མོས་ནས་བཤགས། །བྱིན་རླབས་སྔགས་མཆོག་བརྒྱ་པ་ནི། །བདུན་གསུམ་ཉི་ཤུ་རྩ་གཅིག་གམ། །བརྒྱ་རྩ་བརྒྱད་དུ་བཤགས་པར་བྱ། །སྨྲེ་འགྱོད་མཐོལ་ལོ་གདུང་བའི་ཚིག །བརྐྱང་ཕྱག་གུས་བྱས་ཚིག་གིས་བཤགས། །སེམས་བསྐྱེད་ལས་བརྩོན་འགྲོ་བའི་དོན། །སྨོན་ལམ་བཀྲ་ཤིས་དགེ་བ་བཤགས། །ཐམས་ཅད་ཡུལ་མེད་མིང་བྲལ་མཐོང་། །རྟོགས་པ་མཉམ་ཉིད་ལྟ་བས་བཤགས། །ཨེ་མ་བདག་གི་ཕུང་པོའི་ཁམས་དང་སྐྱེ་མཆེད་རྣམས། །འདོད་པའི་ཡོན་ཏན་ལྔར་གྱུར་ཏེ། །ཕྱི་ནང་གསང་བའི་མཆོད་པར་བཞེས། །བ་སྤུ་རྡུལ་ཕྲན་རེ་རེས་ཀྱང་། །འགྲོ་བའི་དོན་རྣམས་བྱེད་པར་ཤོག །ཅེས་ཕྱི་ནང་གསང་བ་གསུམ་གྱི་མཆོད་པ་ཕུལ་ལོ། །དབང་མཆོག་རྒྱལ་པོའི་རྒྱུད་ལས། སྒྱུ་མ་བཤགས་མཆོད་སྨོན་ལམ་གྱི་ལེའུ་སྟེ་ཉི་ཤུ་པའོ།། །།དེ་ནས་འཁོར་འདུས་པ་དེ་དག་གིས། རྡོ་རྗེ་སེམས་དཔའ་དཔལ་མགོན་ལགས། །རྒྱུད་ཆེན་འདི་ཡི་དཔེ་མཚོན་ཅི། །གང་གི་དུས་སུ་དར་བར་བགྱི། །ཞེས་ཞུས་པས། །རྡོ་རྗེ་སེམས་དཔས་བཀའ་སྩལ་པ། །ཉོན་ཅིག་ལག་ན་རྡོ་རྗེ་སོགས། །ང་ཡིས་རྒྱུད་ཆེན་རྒྱལ་པོ་འདི། །དཔེར་ན་ཉི་མས་མུན་པ་འདྲ། །མུན་ཁུང་སྒྲོན་མེའི་རྒྱུད་དུ་ཟུང་། །དཔེར་ན་ནད་དང་སྨན་ལྟ་བུ། །སྨན་མཆོག་རྒྱལ་པོའི་རྒྱུད་དུ་ཟུང་། །དཔེར་ན་རྩི་ཤིང་མེ་ལྟ་བུ། །བསྐལ་པའི་ ― DNG001_Page_0291 ―
[མ་དཔེ་གཟིགས་ན་འདིར་གནོན།]
མེ་ཆེན་རྒྱུད་དུ་ཟུང་། །དམ་པ་རིགས་བརྒྱའི་ལྷ་གསལ་བས། །གསང་ཆེན་རིགས་བརྒྱའི་རྒྱུད་དུ་ཟུང་། །དེ་ཉིད་རིགས་ལྔའི་ལྷར་བསྡུས་ནས། །ཡི་གེ་བརྒྱ་པའི་སྔགས་བརྗོད་པས། །ཡི་གེ་བརྒྱ་པའི་རྒྱུད་དུ་ཟུང་། །ཉམས་ཆག་ཐམས་ཅད་འདིས་སྐོང་བས། །བཤགས་པ་ཆེན་པོའི་རྒྱུད་དུ་ཟུང་། །འགྲོ་དྲུག་གནས་ནས་འདིས་དྲངས་པས། །འཁོར་བ་དོང་སྤྲུགས་རྒྱུད་དུ་ཟུང་། །ཐམས་ཅད་སྒྱུ་མར་མ་ཟློས་པས། །སྒྱུ་མ་མཉམ་ཉིད་རྒྱུད་དུ་ཟུང་། །སྣང་སྲིད་ལྷ་དང་དཀྱིལ་འཁོར་དུ། །བསྙེན་བསྒྲུབ་བསྐྱེད་རྫོགས་དམ་ཚིག་སྔགས། །ཕྱག་རྒྱ་དབང་དང་རྒྱུད་ལུང་དང་། །འཁོར་འདས་ཐམས་ཅད་བལྟས་པས་མཐོང་། །ལྟ་བ་དབང་མཆོག་རྒྱུད་དུ་ཟུང་། །མཐོང་ནས་བསྒོམ་དུ་མེད་པས་ན། །སྒོམ་པ་དབང་མཆོག་རྒྱུད་དུ་ཟུང་། །སྤྱོད་ནས་སྤྱད་དུ་མེད་སྤྱོད་པས། །སྤྱོད་པ་རྒྱལ་པོའི་རྒྱུད་དུ་ཟུང་། །མཐོང་བས་འདུ་འབྲལ་མེད་མཐོང་བས། །འབྲས་བུ་དབང་མཆོག་རྒྱུད་དུ་ཟུང་། །ཉམས་སྒྲིབ་ཐམས་ཅད་འདིས་འདག་པས། །དམ་ཚིག་ཁྲུས་ལུང་རྒྱུད་དུ་ཟུང་། །འཁོར་ཚོགས་འདུས་པ་ཁྱེད་རྣམས་ཀྱིས། །དབང་མཆོག་རྒྱལ་པོའི་རྒྱུད་འདི་ནི། །དུས་ངན་ཐ་མའི་དུས་དག་ཏུ། །སྔགས་པས་དམ་ཚིག་མི་བསྲུང་བས། །ལས་ཀྱི་འབྲས་བུ་ངན་སོང་འཁོར། །ཟང་ཟིང་ནོར་གྱིས་མིག་བྲིད་ནས། །ན་རག་གནས་སུ་འཁོར་བྱེད་པས། །དེ་དུས་ང་ཡིས་རྒྱུད་འདི་འབྱུང་། །དཔེར་ན་ནོར་བུ་རིན་ཆེན་འདྲ། །དབུལ་དང་ནད་དང་འཇིགས་པ་མེད། །ཐར་པའི་ལམ་སྐས་བྱེད་པར་ངེས། །དཔེར་ན་མཁའ་ལ་ཉི་ཤར་འདྲ། །མུན་པའི་སྨག་ལ་གསལ་བའི་རྐྱེན། །ཉི་ཟླ་ལྟ་བུ་རྟོགས་བྱེད་ངེས། །དཔེར་ན་མེ་དང་ཤིང་ལྟ་བུ། །ཤིང་ཉིད་མེ་ཡི་གྲོགས་སུ་ངེས། །ཀྱེ་ཧོ་ནམ་མཁའི་མཐོང་ན་འབྱུང་བ་གནས། །ས་ཆུ་མེ་རླུང་གང་ཡང་སྣང་། །ཐམས་ཅད་ནམ་མཁའི་ངང་དུ་ཐིམ། །ཞེས་གསུངས་ནས་མི་སྣང་བར་གྱུར་ཏོ། །རིག་འཛིན་རྒྱལ་པོ་དགེ་མཐོང་ལ་སོགས་པའི་འཁོར་རྣམས་ཀྱིས་མངོན་པར་བསྟོད་དེ་རྗེས་སུ་ཡི་རང་ངོ་། །སྤྲུལ་པ་རྣམས་ནི་མངོན་པར་བསྡུས་ཏེ། རྡོ་རྗེའི་སྤྲུལ་སྐུ་ལ་གཏད་དོ། །ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ཅེས་བྱ་བ་ལེའུ་ཉེར་ རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད།― DNG001_Page_0292 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། བཛྲ་སཏྭ་ཤ་ཏཱཀྵ་རཱ་ཀ་ཨ་བྷི་ཥེ་ཀོཏྟ་མ་ཧཱ་རཱ་ཛ་ཏན་ཏྲ་ནཱ་མ། བོད་སྐད་དུ། རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ཅེས་བྱ་བ། བཅོམ་ལྡན་འདས་དཔལ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། དེ་བཞིན་གཤེགས་པ་ཐམས་ཅད་འོག་མིན་རྡོ་རྗེའི་གནས་ཀྱི་དང་པོ་ན་བཞུགས་ཏེ། ཆོས་ཉིད་འབྱེད་པ་མེད་པའི་ངང་ལས། ཐུགས་རྗེ་བྱམས་པ་ཆེན་པོས་འགྲོ་བ་རྣམས་ལ་གཟིགས་པ་དང་། བྱང་ཆུབ་ཀྱི་མྱུ་གུ་སྐམས་པའི་སེམས་ཅན་དག་མཐོང་སྟེ། དེའི་ཚེ་དེའི་དུས་ན། ཕྱོགས་བཅུ་ཀུན་ནས་རྒྱལ་བ་ཐམས་ཅད་འདུས་ནས་བཀའ་བགྲོས་ཏེ་ཐུགས་རྗེའི་དོན་བགྲོ་བ། ཀྱེ་མ་རྡོ་རྗེ་སེམས་དཔའ་རྡོ་རྗེ་འཛིན། །འཇིག་རྟེན་འདོད་ཁམས་དམ་ཚིག་སྐྱོན། །ཉེས་བྱས་རྣམ་སྨིན་རྒྱུ་ལས་བཟློག །དེ་ཡི་གཉེན་པོ་ཁྱོད་ཉིད་ཡིན། །ཞེས་བགྲོའོ། །རྡོ་རྗེ་འཆང་བ་རྡོ་རྗེ་འཛིན། །དེ་ཉིད་སྤྲུལ་པས་འདི་སྐད་གསུངས། །དུས་ལ་བབ་བམ་དེ་བཞིན་དུ། །ཉེས་བྱས་རྣམ་སྨིན་ལ་སྤྱོད་པའི། །ངན་སོང་ན་རཀ་གནས་ནས་འདྲེན། །ཞེས་པ་ཞལ་གྱིས་བཞེས་པ་དང་། །དེ་ནས་སྟོན་པ་ཀུན་བཟང་དང་། །ཀུན་རིག་རྣམ་པར་སྣང་མཛད་སོགས། །མི་གཡོ་མཉམ་པའི་ངང་ལ་བཞུགས། །ཕྱོགས་བཅུའི་ཞིང་ཁམས་དེ་བཞིན་ནོ། །དེ་ནས་སྟོན་པ་རྡོ་རྗེ་སེམས། །གནས་ཀྱི་དང་པོ་འོག་མིན་དུ། །ལག་ན་རྡོ་རྗེ་རྒྱལ་སྲས་འཁོད། །འཁོར་བ་ཐུགས་རྗེས་བཟུང་བའི་དུས། །འཁོར་བ་དོང་སྤྲུག་འགྱོད་ཚངས་གསུངས། །རྒྱུད་མཆོག་རྡོ་རྗེ་རྒྱལ་པོ་དང་། །དབང་མཆོག་རྒྱལ་པོའི་རྒྱུད་འདི་བསྟན། །སློབ་དཔོན་སློབ་མས་ཉེས་བྱས་པའི། །གཅེར་བུ་ལུས་སྲུལ་ན་ར་ཀ །པྲེ་ཏ་ཀ་དང་ཏིརྱ་ཀ །རིམ་པ་བཞིན་དུ་དོན་བྱེད་དེ། །ནྲྀ་དང་དེ་ཝ་ཨ་སུ་ར། །དྲུག་གི་གནས་ནས་འདོན་བྱེད་པའི། །དབང་མཆོག་རྒྱལ་པོའི་བསྟན་པ་འབྱུང་། །ཞེས་གསུངས་སོ། །རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། གླེང་གཞི་ཕུན་སུམ་ཚོགས་པའི་ལེའུ་སྟེ་དང་པོའོ།། །། ― DNG001_Page_0293 ―
[མ་དཔེ་གཟིགས་ན་འདིར་གནོན།]
དེ་ནས་རྡོ་རྗེ་སེམས་དཔའ་དང་། །སྤྲུལ་པ་ལག་ན་རྡོ་རྗེ་ཡིས། །འཇིག་རྟེན་རྒྱལ་བ་རབ་འབྱམས་དང་། །རྒྱལ་སྲས་སྤྲུལ་པ་འདུས་རྣམས་ལ། །དམ་ཚིག་རྩ་བ་ཉམས་པ་ཡི། །སློབ་མས་སློབ་དཔོན་ཉེས་བྱས་ཏེ། །འདུལ་ཏེ་དྲང་བའི་དུས་བབས་སམ། །གདུལ་བྱར་ཐུགས་རྗེས་གཟིགས་པ་དང་། །ཉེས་སྐྱོན་སྔོན་བྱུང་ཅི་ཡི་རྒྱུ། །ཅེས་པ་མཁྱེན་བཞིན་སྨྲས་པ་དང་། །ཀུན་བཟང་རྡོ་རྗེ་རྣམ་སྣང་གིས། །སྤྲུལ་པ་ཉིད་ལ་བཀའ་སྩལ་པ། །རྒྱལ་སྲས་འཁོར་འདུས་སྔོན་བྱུང་ནི། །འཇིག་རྟེན་ཞིང་ཁམས་མི་མཇེད་འདིར། །བྲམ་ཟེ་དུང་གི་ཕྲེང་བ་ཅན། །རྒྱལ་བ་རྣམས་ལ་བསྙེན་བཀུར་བས། །རིག་པའི་གནས་ལྔ་ལ་མཁས་པ། །བྱང་ཆུབ་སེམས་དཔའི་རིགས་ཅན་གཅིག །བས་མཐའི་དུར་ཁྲོད་གནས་ན་བསྒྲུབ། །མཁས་པ་ཀུན་གྱི་སེང་གེར་གྱུར། །དེ་ལྟ་བུ་ཡི་སློབ་དཔོན་ལ། །ཡུལ་ཁམས་སྐྱོང་བའི་རྒྱལ་པོའི་བུས། །བློ་སྦྱོང་རིག་པ་རྫོགས་བྱས་ནས། །རྒྱལ་པོའི་གོང་ན་བྲམ་ཟེ་གནས། །རྒྱལ་བུ་ཕྲག་དོག་ངན་སེམས་སྐྱེས། །བླ་མ་བྲམ་ཟེ་སྒྲུབ་པ་ལ། །མཁའ་འགྲོའི་ཚོགས་ཀྱིས་བརྡའ་བརྟན་པ། །རྣལ་འབྱོར་གསེར་སྣོད་ངན་དུག་གཡོ། །དུག་ཅན་སྣོད་ལ་བྲོས་པར་འོས། །མ་བྲོས་ཉེས་སྐྱོན་ལུས་སེམས་འབྲལ། །ཅེས་པ་དམ་ཚིག་བརྡའ་བསྟན་ཡང་། །རྣལ་འབྱོར་བས་ནི་བསམ་གཏན་མཛད། །དེ་ནས་རྒྱལ་བུས་བྲམ་ཟེ་བོས། །མྱོས་ཆང་བླུད་ནས་རྔན་བྱས་པ། །དབང་པོའི་དྭངས་མ་གསལ་བྱེད་མིག །ལྕགས་ཀྱི་ཐུར་མ་ཕྲ་མོས་གཙགས། །ཚིག་སྒོ་གསལ་བྱེད་སྨྲ་བའི་ལྕེ། །ལྕགས་ཀྱུས་དྲངས་ཏེ་སྤུ་གྲིས་བཅད། །ལུས་ལ་རུས་སྦལ་ཁྲག་གིས་བྱུགས། །མི་གཙང་དམེ་བའི་བུད་མེད་ཀྱིས། །ལུས་ལ་བརྫི་བཅག་མཉེ་བར་བྱས། །རྐང་པའི་སྒྱིད་པ་མཚོན་གྱིས་བཅད། །ལག་པའི་སྲན་ཚོ་དེ་བཞིན་དྲེགས། །དེ་ལྟར་རྔན་བྱས་བཞག་པ་ན། །བྲམ་ཟེ་དྲན་པ་སད་པ་ལས། །མིག་དབྱེར་མིག་མེད་ལྕེ་ཡང་མེད། །འགྲོ་བའི་རྐང་མེད་ལུས་སྟོབས་བྲལ། །བུད་མེད་ཀྱིས་བརྫིས་འགུལ་སྟོབས་མེད། །རུས་སྦལ་ཁྲག་བྱུགས་ཆུ་བུར་དང་། །རྐང་པ་ལ་སོགས་ནད་རྣམས་བྱུང་། །དྲན་པ་རང་ཡང་རབ་རིབ་འདུག །བརྟབས་ཏེ་བྲམ་ཟེས་ ― DNG001_Page_0294 ―
[མ་དཔེ་གཟིགས་ན་འདིར་གནོན།]
བསམས་པ་ལ། །འདི་ལྟར་བདག་ལ་འདི་བྱུང་བ། །སྔོན་མའི་ལས་ཀྱི་རྣམ་སྨིན་ནམ། །འོན་ཏེ་གཞན་གྱིས་ཕྲག་དོག་བྱས། །མཉམ་པར་བཞག་སྟེ་བལྟས་པ་ལས། །རང་ལ་རྒྱལ་བུས་རྔན་བྱས་མཐོང་། །དེ་ནས་བྲམ་ཟེས་དམོད་པ་བོར། །ཀྱེ་མ་ཀྱི་ཧུད་རྒྱལ་བུ་ཁྱོད། །ལོ་དང་ཟླ་བར་བསླབས་སྦྱངས་ནས། །རིག་པའི་གནས་ལ་མཁས་བྱས་པས། །ལན་དུ་འདི་ལྟར་རྔན་བྱེད་པ། །ཁྱོད་ཀ་སྐྱེ་བ་གཅིག་གིས་སུ། །སེམས་ཅན་སྲུལ་པོ་གཅིག་ཏུ་སྐྱེས། །ཚེ་ཐུང་ནད་ཀྱིས་ལུས་གཟིར་བ། །དམུས་ལོང་ལྐུགས་པ་མཛེ་ལྷོག་དང་། །ཤ་བཀྲ་བས་ལྡག་ཆུ་བུར་དང་། །རྐང་ལག་ཞ་གྲུམ་དབུལ་པོ་དང་། །ལུས་ལ་ཤ་ཟས་ཚང་འཆའ་ཤོག །ཚེ་འཕོས་ནས་ཀྱང་ན་རཀ་གནས། །ཁ་འཁོར་སྡུག་བསྔལ་ཐར་མེད་ཤོག །དེ་ལས་ཐར་ཡང་པྲེ་ཏ་ཀ །ཏིརྱ་ཀ་ཡི་ཁ་འཁོར་ཤོག །དུས་དང་ཚེ་རབས་ཐམས་ཅད་དུ། །འཕགས་པའི་ཞལ་ནི་མི་མཐོང་ཞིང་། །བྱང་ཆུབ་མྱུ་གུ་སྔོ་བསྐམ་ཤོག །ཅེས་པ་ངན་སེམས་དམོད་པ་བོར། །ཉེས་བྱས་དམ་ཉམས་རྒྱལ་བུ་དེ། །དེ་ནས་མྱུར་དུ་ལུས་དག་ལ། །ནད་རྣམས་ཀུན་ཕོག་ཚེ་དུས་བྱས། །རང་གི་ཉེས་བྱས་རྣམ་སྨིན་དང་། །བྲམ་ཟེའི་དམོད་པ་སྨོན་ལམ་གྱིས། །སེམས་ཅན་ལུས་སྲུལ་གཅེར་བུར་སྐྱེས། །ལུས་ལ་ནད་སྣ་སྣ་ཚོགས་བྱུང་། །ཤ་ཟ་སྟོང་གི་ཚང་ཡང་བཅས། །བྱང་ཆུབ་མྱུ་གུ་སྔོ་བསྐམས་ནས། །ན་རཀ་གནས་ན་སྡུག་བསྔལ་སྤྱོད། །ཚ་གྲང་གཤགས་གཏུབས་ལ་སོགས་མྱོང་། །དེ་བཞིན་པྲེ་ཏ་ཏིརྱ་འཁོར། །རྣམ་སྨིན་སྡུག་བསྔལ་དེ་སྤྱོད་པས། །རྡོ་རྗེ་སེམས་དཔའ་རྡོ་རྗེ་འཛིན། །ཐུགས་རྗེ་ཆེན་པོས་དེ་ལས་དྲོངས། །ཞེས་གསུངས་སོ། །རྡོ་རྗེ་སེམས་དཔའ་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། སྔོན་བྱུང་རྒྱུ་རྐྱེན་གཏམ་རྒྱུད་ཀྱི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་དང་། །ལག་ན་རྡོ་རྗེ་སྟོབས་ཆེན་གྱིས། །སྐད་མཐུན་ཚིག་སྒོ་གཅིག་པ་ཡིས། །རྒྱལ་བའི་ཚོགས་ལ་འདི་སྐད་བརྗོད། །དེ་ལྟར་འདུལ་བའི་དུས་ཡིན་ན། །ཐབས་མཆོག་གང་གིས་དྲང་བར་བྱ། །སླར་གསོལ་བ་དེ་བསྟན་ ― DNG001_Page_0295 ―
[མ་དཔེ་གཟིགས་ན་འདིར་གནོན།]
དུ་གསོལ། །ཅེས་པ་རྒྱལ་བ་ལ་ཞུས་པས། །ཀུན་བཟང་རྡོ་རྗེ་རྣམ་སྣང་གིས། །སྤྲུལ་པ་ཉིད་ལ་བཀའ་སྩལ་པ། །ལེགས་སོ་སེམས་དཔའ་རྡོ་རྗེ་འཛིན། །མཁྱེན་པར་གྱུར་ཀྱང་ཞུས་པ་ལེགས། །རིག་པ་འཛིན་པ་རིགས་ཀྱི་བུ། །གསང་སྔགས་དམ་ཚིག་ཉམས་པ་ལ། །ན་རཀ་དོང་ནས་སྤྲུགས་པ་ཡིས། །འགྱོད་ཚངས་བཤགས་པའི་རྒྱལ་པོ་སྒྲོགས། །ཆོས་ཉིད་དོན་གྱི་སྒྲོན་མ་ཐེག །ལུས་ངག་ཡིད་གསུམ་བརྩོན་འགྲུས་ཕྱུང་། །སྐུ་གསུང་ཐུགས་ཀྱི་ཚངས་པ་ཐོབ། །ངན་སོང་དོང་སྤྲུགས་སྐུ་གསུམ་མཐོང་། །ཕྱི་ནང་གསང་བའི་དབང་བསྐུར་གྱིས། །རྒྱུད་དྲུག་གནས་ནས་ངེས་པར་དྲོངས། །ཡེ་ཤེས་ལྔ་ལྡན་ཆོས་སྐུ་ཐོབ། །ཡུལ་མེད་མིང་གི་སྒྲོ་འདོགས་ཆོད། །གསང་སྔགས་བླ་མེད་རྡོ་རྗེ་ལ། །ཐབས་མཆོག་བླ་ན་མེད་པ་བཞུགས། །ཉན་ཐོས་རང་རྒྱལ་ལྟ་བུ་མིན། །དཔེར་ན་ཉན་ཐོས་འདུལ་ཁྲིམས་ནི། །རྫ་སོ་མ་བཏང་ཆག་པ་འདྲ། །ཆག་པར་གྱུར་ན་གསོ་ཐབས་མེད། །གསང་སྔགས་རྡོ་རྗེ་ཐེག་པ་ནི། །རིན་ཆེན་གསེར་འདྲ་རྒྱུ་མཆོག་བཟང་། །གསེར་དངུལ་སྣོད་འདྲ་ཞོམས་ཀྱང་བཅོས། །སྔ་མ་བཞིན་དུ་ལེགས་པར་སོས། །དེ་བཞིན་གསང་སྔགས་དམ་ཚིག་ནི། །ཉམས་ཆག་བྱུང་ཡང་གསོ་ཐབས་ཡོད། །སྦྱང་ཐབས་མང་ལ་ཐབས་སྒོ་མང་། །སྤྱི་ཁྲུས་ངན་སོང་དོང་སྤྲུགས་མཛོད། །དབང་མཆོག་རྒྱུད་དྲུག་སྐྱེ་སྒོ་ཆོད། །ཡུལ་མེད་སྒྲོ་འདོགས་གཉིས་མེད་ཆོད། །ཅེས་ལུང་བསྟན་ཏོ། །རྡོ་རྗེ་སེམས་དཔའ་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། ཉམས་པ་གསོ་ཐབས་ལུང་བསྟན་པའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་སེམས་དཔའ་དང་། །ལག་ན་རྡོ་རྗེ་འཛིན་པ་ཡིས། །སངས་རྒྱས་ཀུན་ལ་འདི་སྐད་གསོལ། །ཀྱེ་ཀྱེ་རྒྱལ་བ་རྒྱ་མཚོའི་ཚོགས། །གསང་སྔགས་བླ་མེད་རྡོ་རྗེ་ལ། །དམ་ཚིག་བསྡུས་རྒྱས་ཇི་ལྟར་ལགས། །སྲུང་སྡོམ་ཉམས་པ་ཇི་ལྟར་བསྐང་། །ཞེས་པ་མཁྱེན་བཞིན་དུ་ཞུས་པས། །རྒྱལ་བ་འདུས་པས་བཀའ་སྩལ་པ། །རྡོ་རྗེ་སེམས་དཔའ་རྡོ་རྗེ་འཛིན། །གསང་སྔགས་འབྲས་བུའི་ཐེག་པ་ལ། །དམ་ཚིག་རྩ་བ་རྣམ་པ་གསུམ། །སྐུ་དང་གསུང་དང་ཐུགས་གསུམ་མོ། །ཡན་ལག་དམ་ ― DNG001_Page_0296 ―
[མ་དཔེ་གཟིགས་ན་འདིར་གནོན།]
ཚིག་ཉི་ཤུ་ལྔ། །མི་སྤང་ལྔ་དང་བླང་བ་ལྔ། །སྤྱད་བྱ་ལྔ་དང་བསྒྲུབ་བྱ་ལྔ། །གཞན་ཡང་ཉིང་ལག་བསམ་ལས་འདས། །འབུམ་སྡེ་ལ་སོགས་དམ་ཚིག་ཀྱང་། །རྩ་བ་ཡན་ལག་ཤེས་པར་བྱ། །བསྙེན་བསྒྲུབ་རྣམ་བཞིའི་སྒོར་ཞུགས་ནས། །དམ་ཚིག་དེ་དག་བསྲུང་བར་བྱ། །ལེགས་པར་བསྲུང་དང་བསྲུང་དུ་མེད། །ཡན་ལག་ཉི་ཤུ་རྩ་ལྔ་ཡང་། །རྩ་བའི་དམ་ཚིག་གསུམ་དུ་འདུས། །ལུས་ངག་ཡིད་གསུམ་བག་ཡོད་བྱ། །ཆག་ཉམས་ཐམས་ཅད་གསུམ་ལས་འབྱུང་། །སྐུ་གསུང་ཐུགས་ཀྱིས་ལུས་ངག་ཡིད། །བྱིན་བརླབ་བཤགས་སྦྱང་སྤང་བསྒྲུབ་དང་། །རང་འཁྲུངས་རྡོ་རྗེ་གསེར་ཉིད་དོ། །ཡིད་ཀྱི་སྒོ་ནས་ཆག་ཉམས་བྱུང་། །ཐུགས་ཀྱི་ལྟ་བས་བཤགས་པར་བྱ། །ལྟ་བ་ལོག་པ་ཉམས་པ་ཆེ། །ཡིན་པ་མེད་པ་ལྟ་བའི་མཆོག །ཡིད་ཀྱི་བཤགས་ཐབས་ཆེན་པོ་ཡིན། །ལུས་ཀྱི་སྒོ་ནས་ཆག་ཉམས་ན། །ཕྱག་རྒྱ་སྐུ་ཡི་བསྒོམས་པས་བཤགས། །ཕྱོགས་སུ་འཛིན་པ་ཉམས་པ་ཆེ། །ཡེངས་པ་མེད་པ་སྒོམ་པའི་མཆོག །དེ་ནི་ལུས་ཀྱི་བཤགས་ཐབས་ཡིན། །ངག་གི་སྒོ་ནས་ཆག་ཉམས་ན། །སྔགས་དང་འདོན་བརྗོད་སྤྱོད་པས་བཤགས། །ཚུལ་འཆོས་སྤང་བླང་ཉམས་པ་ཆེ། །ཡིན་མིན་མེད་པ་སྤྱོད་པའི་མཆོག །མཛད་སྤྱོད་དག་གི་བཤགས་ཐབས་ཡིན། །དེ་ལྟར་དམ་ཚིག་གསུམ་བཤགས་ན། །ཉི་ཤུ་རྩ་ལྔ་མ་བྱུང་མ་སྐྱེས་ཏེ། །ཡན་ལག་དམ་ཚིག་བཤགས་སུ་མེད། །ཅི་སྟེ་བསྲུང་བྱ་སྲུང་བྱེད་མེད། །སྐྱེ་མེད་དམ་ཚིག་ཤེས་པར་གྱིས། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། དམ་ཚིག་མཚོན་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་དང་ལག་ན་རྡོ་རྗེས་སྲུལ་པོ་དེའི་གམ་དུ་བྱོན་ནས་མནར་མེད་ཉམ་ཐག་དེ་ལ་འདི་སྐད་ཅེས་བསྒྲགས་སོ། །ན་ར་ཀ་བྷུ་ཏ་ཙཀྵུ་པྲ་བེ་ཤ་ཡ་ཨ་ཞེས་བསྒྲགས་པས། དེ་ནས་ལས་ངན་སེམས་ཅན་དེས། །སྔོན་གྱི་ལས་ངན་དྲན་གྱུར་ཏེ། །སྡུག་བསྔལ་གནོང་ནས་འགྱོད་པ་སྐྱེས། །རྡོ་རྗེ་གཉིས་ལ་ངོ་སྨད་དེ། ། ― DNG001_Page_0297 ―
[མ་དཔེ་གཟིགས་ན་འདིར་གནོན།]
ཀྱེ་མ་ཀྱེ་ཧུད་ཀྱི་ཧུད་ནོངས། །འགྲོ་མགོན་ཐུགས་རྗེས་བདག་སྐྱོབས་ཤིག །ཐབས་མཆོག་རྒྱལ་པོ་བསྒྲག་ཏུ་གསོལ། །སླད་ནས་མི་འཆབ་མི་བགྱིད་དོ། །ཞེས་སྨྲེ་སྔགས་ཕྱུང་བ་ལས། དེ་ནས་སངས་རྒྱས་རྡོ་རྗེ་སེམས་དཔས་སེམས་ཅན་ལས་ངན་དེའི་རྣ་ལམ་དུ་འགྱོད་ཚངས་ཀྱི་རྒྱལ་པོ་ན་རག་དོང་སྤྲུག་འདི་བཀའ་སྩལ་པ། ཉོན་ཅིག་ལས་ངན་སེམས་ཅན་ཁྱོད། །འགྱོད་སེམས་ཕྱུང་ལ་ཡིད་གཏོད་ཅིག །ངག་སྒོ་གསལ་བརྗོད་བརྐྱང་ཕྱག་འཚོལ། །ཞེས་གསུངས་ནས་འདི་བརྗོད་དོ། །དུས་གསུམ་འཇིག་རྟེན་རབ་འབྱམས་ཀྱི། །རྒྱལ་བ་རྒྱ་མཚོ་རྣམས་ལ་ཕྱག་འཚལ་ལོ། །ཆོས་རྣམས་རྣམ་དག་ཡེ་ནས་ལྷུན་གྲུབ་ཅིང་། །བྱ་བ་བྱེད་དང་ཡིད་ཆོས་རྣམ་པར་དག །ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པ། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །དུས་གསུམ་རྒྱལ་བ་ཐམས་ཅད་བསྐྱེད་མཛད་མ། །རིགས་ལྔའི་ཡུམ་གྱུར་རྣམས་ལ་ཕྱག་འཚལ་ལོ། །རྣམ་ཤེས་དབང་པོ་དག་པའི་ཐུགས་དང་གསུང་། །བདེ་བར་གཤེགས་པ་ཀུན་གྱི་སྲས་མཆོག་སྟེ། །སེམས་དཔའ་ཆེན་པོ་བརྒྱད་ལ་ཕྱག་འཚལ་ལོ། །སྒེག་མོ་ཕྲེང་ཐོགས་རིན་ཆེན་གླུ་གར་ཅན། །མཁའ་མཉམ་མཆོད་པས་རྒྱལ་བ་རྒྱ་མཚོ་མཆོད། །བྱང་ཆུབ་ལྷ་མོའི་ཚོགས་ལ་ཕྱག་འཚལ་ལོ། །མེ་ཏོག་བདུག་པ་མར་མེ་དྲི་ཆབ་ཀྱིས། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ལ་ཕྱག་འཚལ་ལོ། །དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། །ཚད་མེད་བཞི་ལྡན་སྒོ་བཞི་ཐུབ་པར་སྲུང་། །ཏ་ཀྲྀཏ་སྒོ་བ་བཞི་ལ་ཕྱག་འཚལ་ལོ། །རྟག་ཆད་མཐར་ཕྱིན་གསང་བ་ཡུམ་གྱི་ངང་། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །རྡོ་རྗེ་སྒོ་མ་བཞི་ལ་ཕྱག་འཚལ་ལོ། །སྟེང་འོག་ཕྱོགས་བཞིའི་འཇིག་རྟེན་འདུལ་པའི་གཙོ། །ཉོན་མོངས་དྲུག་འཇོམས་རྒྱུད་དྲུག་དག་པར་སྦྱོང་། །བཅོམ་ལྡན་ཐུབ་པ་དྲུག་ལ་ཕྱག་ ― DNG001_Page_0298 ―
[མ་དཔེ་གཟིགས་ན་འདིར་གནོན།]
འཚལ་ལོ། །གསལ་འཚེར་ལྷུན་སྡུག་གཟི་བརྗིད་འོད་ཟེར་འཕྲོ། །མཉེན་ལྕུགས་འཁྲིལ་ལྡེམ་གཞོན་ཚུལ་ཞི་བའི་ཚོགས། །རྒྱལ་བ་བཞི་བཅུ་གཉིས་ལ་ཕྱག་འཚལ་ལོ། །རང་བཞིན་སྒྱུ་འཕྲུལ་ཞི་བའི་ལྷ་རྣམས་ལ། །གང་ཞིག་ལུས་ངག་གུས་པས་ཕྱག་འཚལ་ན། །ཉམས་ཆག་ཀུན་ཀྱང་མ་ལུས་བྱང་བར་འགྱུར། །དེ་བས་དེ་ལ་གུས་པར་ཕྱག་འཚོལ་ཞིག །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས་ལེའུ་ལྔ་པའོ།། །།དེ་ནས་རྡོ་རྗེ་སེམས་དཔས་བཀའ་སྩལ་པ། །བརྩོན་འགྲུས་ཕྱུང་ཞིག་ལས་ངན་སེམས་ཅན་ཁྱོད། །འདི་ལྟར་རྒྱལ་བ་དཔང་དུ་གསོལ་ལ་ཕྱག །ལུས་གུས་ཚིག་གསལ་མོས་གུས་ལྡན་པས་འཚོལ། །ཧོ། རང་བཞིན་སྒྱུ་འཕྲུལ་ཆེན་པོའི་དཀྱིལ་འཁོར་ནི། །ཞི་བ་ཆོས་ཉིད་ངང་ལས་མ་གཡོས་ཀྱང་། །ཕྲིན་ལས་མཐར་ཕྱིན་ཐབས་མཆོག་ཁྲོ་བོར་སྟོན། །འབར་བ་ཁྲོ་བོའི་ཚོགས་ལ་ཕྱག་འཚལ་ལོ། །ཧོ། རང་རིག་ཡེ་ཤེས་ཐབས་ཀྱི་རྒྱལ་པོ་མཆོག །སངས་རྒྱས་ཀུན་གྱི་སྤྱི་དཔལ་ཁྲོ་བོའི་རྗེ། །ཆེ་མཆོག་ཧེ་རུ་ཀ་ལ་ཕྱག་འཚལ་ལོ། །རང་བཞིན་རྣམ་དག་ཆོས་ཉིད་དབྱིངས་གནས་པ། །ཡུམ་ཆེན་དཔལ་འབར་རྔམས་པའི་ཆ་ལུགས་ཅན། །ཁྲོ་མོ་གནམ་ཞལ་མ་ལ་ཕྱག་འཚལ་ལོ། །འཇིག་རྟེན་འདས་པའི་དུས་ན་སྔོན་བྱུང་བའི། །གདུག་པ་འདུལ་ཕྱིར་དུས་ལས་མི་འདའ་བའི། །དཔལ་ཆེན་ཧེ་རུ་ཀ་ལ་ཕྱག་འཚལ་ལོ། །ཁྲོ་མོ་དབང་ཕྱུག་སྐུ་ལ་འཁྲིལ་མཛད་ཅིང་། །མཁའ་འགྲོ་མི་བཟད་འབར་བའི་སྤྲིན་འཕྲོ་མ། །གདུག་པ་འདུལ་མཛད་ཡུམ་ལ་ཕྱག་འཚལ་ལོ། །ཕྱོགས་བཅུའི་དགྲ་བགེགས་མ་ལུས་བསྒྲལ་བའི་ཕྱིར། །གདུག་པའི་ཚོགས་འཇོམས་ཁྲོ་རྒྱལ་ཚོགས་སུ་སྤྲུལ། །ཡེ་ཤེས་མཚོན་ཆས་དགྲ་བགེགས་ཀུན་སྒྲོལ་བ། །བདུད་འདུལ་ཁྲོ་བོ་བཅུ་ལ་ཕྱག་འཚལ་ལོ། །ཕྱོགས་བཞིའི་སྒོ་གཅོད་ཡེ་ཤེས་བཞི་ཡི་ངང་། །གདུག་པའི་ཚོགས་རྣམས་མ་ལུས་འདུལ་བྱེད་པ། །ཕྱག་རྒྱ་བཞི་ཡིས་འགུགས་འཆིངས་སྡོམ་ཞིང་གཏོགས། །སྒོ་སྐྱོང་ཁྲོ་མོ་བཞི་ལ་ཕྱག་འཚལ་ལོ། །དབང་མཆོག་རྒྱལ་པོའི་རྒྱུད་ལས། ཁྲོ་བོ་ཆེ་མཆོག་གི་ལེའུ་སྟེ་དྲུག་པའོ།། །། ― DNG001_Page_0299 ―
[མ་དཔེ་གཟིགས་ན་འདིར་གནོན།]
དེ་ནས་ཡང་ནི་སེམས་དཔས་བཀའ་སྩལ་པ། །ཧོ། ཁྲོ་གཏུམས་འཇིགས་བྱེད་དཔལ་ཆེན་ཧེ་རུ་ཀ །དྲེགས་པ་རུ་དྲ་འདུལ་བའི་ཐབས་མངའ་བ། །ཁྲག་འཐུང་རིགས་ལྔའི་ཚོགས་ལ་ཕྱག་འཚལ་ལོ། །ཁྲོ་མོ་དབང་ཕྱུག་ཀྲོདྷི་ཡུམ་ཆེན་ལྔ། །ཁྲོ་རྒྱལ་སྐུ་ལ་གཉིས་མེད་དགྱེས་སྐོང་མ། །ཁྲག་འཐུང་ཡུམ་ཆེན་རྣམས་ལ་ཕྱག་འཚལ་ལོ། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །ཡེ་ཤེས་སྐུ་མཆོག་འཇིགས་བྱེད་རྒྱན་གྱིས་བརྒྱན། །ཁྲོ་མོ་ཆེན་མོ་བརྒྱད་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །ཕྲ་མེན་ཆེན་མོ་བརྒྱད་ལ་ཕྱག་འཚལ་ལོ། །རྡོ་རྗེ་གདོང་མོ་ཕོ་ཉ་མགྱོགས་མ་བཞི། །ཤར་ལྷོ་ནུབ་བྱང་སྒོ་བཞི་ཐུབ་པར་བསྲུངས། །སྒོ་སྐྱོང་ཁྲོ་མོ་བཞི་ལ་ཕྱག་འཚལ་ལོ། །དབང་མཆོག་རྒྱལ་པོའི་རྒྱུད་ལས། ཡང་དག་གི་ལེའུ་སྟེ་བདུན་པའོ།། །།དེ་ནས་ཡང་ཅིག་སེམས་དཔས་བཀའ་སྩལ་པ། །ཧོ། མི་གནས་མི་དམིགས་ཆོས་སྐུར་དག་པ་ལས། །བདུད་འདུལ་ཁྲོ་བོ་མཆོག་གི་སྐུར་བསྟན་པ། །ཐུགས་རྗེའི་གཟི་ལྡན་གདུག་པ་ཐབས་ཀྱིས་འདུལ། །ཁྲོ་མཆོག་གཤིན་རྗེའི་ཚོགས་ལ་ཕྱག་འཚལ་ལོ། །ཆོས་དབྱིངས་སྐྱེ་མེད་ངང་ལས་མ་གཡོས་ཀྱང་། །གདུག་པ་འདུལ་ཕྱིར་གཤིན་རྗེའི་སྐུ་ལ་སྦྱོར། །སྦྱོར་སྒྲོལ་ཁྲོ་མོའི་ཚོགས་ལ་ཕྱག་འཚལ་ལོ། །ཆོས་ཉིད་སྤྲོས་བྲལ་ཞི་བ་ཆེན་པོ་ལས། །གདུག་པ་འདུལ་ཕྱིར་ཁྲོ་བོའི་སྐུར་བསྟན་པ། །ཕྱོགས་སྐྱོང་གཤིན་རྗེའི་ཚོགས་ལ་ཕྱག་འཚལ་ལོ། །ཆོས་ཉིད་དབྱིངས་ནས་སྐུ་བསྐྱེད་ཡུམ་གྱི་ཚུལ། །གཤིན་རྗེའི་སྐུ་ལ་སོ་སོར་དགྱེས་པར་འཁྲིལ། །ཕྱོགས་སྐྱོང་ཡུམ་གྱི་ཚོགས་ལ་ཕྱག་འཚལ་ལོ། །ཐུགས་ཉིད་མི་རྟོག་ཡང་དག་ཡེ་ཤེས་ཀྱིས། །འཁོར་བ་འཇིག་དང་མི་གཏོང་དབྱིངས་སུ་སྒྲོལ། །གཤིན་རྗེའི་སྒོ་མ་བཞི་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། འཇམ་དཔལ་གཤིན་རྗེའི་ལེའུ་སྟེ་བརྒྱད་པའོ།། །།དེ་ནས་ཡང་ཅིག་སེམས་དཔས་བཀའ་སྩལ་པ། །ཧོ། དབང་ཆེན་ཀུན་འདུས་རྟ་མགྲིན་དབང་གི་ལྷ། ། ― DNG001_Page_0300 ―
[མ་དཔེ་གཟིགས་ན་འདིར་གནོན།]
ཤེས་རབ་གཟི་ལྡན་ཨེ་ཀ་ཛ་ཊཱི་མ། །དབང་སྡུད་སྲས་དང་བཅས་ལ་ཕྱག་འཚལ་ལོ། །སྲིད་གསུམ་མ་ལུས་འཇིག་རྟེན་རབ་འབྱམས་འདིར། །འཇིག་རྟེན་འདས་དང་མ་འདས་དབང་བསྡུ་ཕྱིར། །དྲག་པོའི་ཚུལ་གྱིས་མ་ལུས་གཟིར་ཞིང་གནོན། །ཟིལ་གནོན་ཁྲོ་བོ་བརྒྱད་ལ་ཕྱག་འཚལ་ལོ། །ཤེས་རབ་སེམས་མ་ཡུམ་གྱི་གཞལ་ཡས་འདིར། །རང་བྱུང་ཡེ་ཤེས་ཐུགས་ལས་སྐུ་སྤྲུལ་པ། །ཟིལ་གནོན་ཁྲོ་མོ་བརྒྱད་ལ་ཕྱག་འཚལ་ལོ། །འཁོར་བའི་ལས་ཉོན་དྲག་ཅིང་རྩུབ་པ་ལ། །ཐབས་ལྡན་འཕྲུལ་གྱི་ཕྱག་མཚན་སྣ་ཚོགས་ཀྱིས། །འགྲོ་དྲུག་གནས་ནས་འདྲེན་པའི་དོན་མཛད་པ། །ཡེ་ཤེས་སྒོ་མ་བཞི་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། པདྨ་དབང་གི་ལེའུ་སྟེ་དགུ་པའོ།། །།དེ་ནས་ཡང་ཅིག་སེམས་དཔས་བཀའ་སྩལ་པ། །ཧོ། ཐབས་ལྡན་ཤེས་རབ་གཉིས་མེད་བྱང་ཆུབ་སེམས། །ཕྱོགས་བཅུའི་ཁྲོ་བོ་ཀུན་གྱི་འབྱུང་གནས་ཡུམ། །དཔལ་ཆེན་ཡབ་ཡུམ་གཉིས་ལ་ཕྱག་འཚལ་ལོ། །ཕྲིན་ལས་རྣམ་བཞིས་དགྲ་བགེགས་འདུལ་མཛད་ཅིང་། །ཡེ་ཤེས་ཕུར་བས་ཐམས་ཅད་དབྱིངས་སུ་འདེབས། །སྲས་མཆོག་རིགས་བཞིའི་ཚོགས་ལ་ཕྱག་འཚལ་ལོ། །ཕྱོགས་བཅུའི་དྲེགས་པ་བསྣོལ་བའི་གདན་སྟེང་ན། །ཧཱུཾ་དང་ཕཊ་ཀྱིས་སྲིད་གསུམ་འཁོར་བ་འཇིག །ཕྱོགས་བཅུའི་ཁྲོ་བོ་བཅུ་ལ་ཕྱག་འཚལ་ལོ། །བདེ་ཆེན་དབྱིངས་ལས་ཁྲོ་མོའི་ཚོགས་སུ་བསྟན། །ཁྲོ་བོའི་སྐུ་ལ་སོ་སོར་དགྱེས་པར་འཁྲིལ། །ཕ་རོལ་ཕྱིན་བཅུའི་ས་ལ་བསྐྱེད་རྫོགས་སྦྱོར། །ཡེ་ཤེས་ཁྲོ་མོ་བཅུ་ལ་ཕྱག་འཚལ་ལོ། །འབར་བའི་ཕོ་ཉ་མཆེ་གཤོག་སྤྲུལ་པའི་ཚོགས། །ཅི་བགྱིའི་བཀའ་ཉན་ཡང་སྤྲུལ་ལས་བྱེད་པ། །འཇིག་རྟེན་ཁ་ལོ་བསྒྱུར་བའི་ཕོ་ཉ་མཆོག །ཟ་བྱེད་ཕ་བཅུའི་ཚོགས་ལ་ཕྱག་འཚལ་ལོ། །དྲག་པོའི་ལས་མཛད་ཕྲ་མེན་མགོ་བརྙན་ཅན། །མི་བཟད་རྔམ་པ་ཟ་བྱེད་མགྱོགས་མའི་ཚོགས། །ཐུགས་ཀྱི་སྤྲུལ་པས་ཕྱག་རྒྱ་སྣ་ཚོགས་སྟོན། །གསོད་བྱེད་མ་བཅུའི་ཚོགས་ལ་ཕྱག་འཚལ་ལོ། །སྙིང་རྗེ་མ་བྲལ་ལས་བྱེད་རྫུ་འཕྲུལ་ཅན། །ཐོགས་མེད་ཀུན་ཏུ་རྒྱུ་བའི་ཕོ་ཉར་བསྟན། །སྒོ་བཞིའི་ལས་ ― DNG001_Page_0301 ―
[མ་དཔེ་གཟིགས་ན་འདིར་གནོན།]
མཛད་རྣམས་ལ་ཕྱག་འཚལ་ལོ། །དབང་མཆོག་རྒྱལ་པོའི་རྒྱུད་ལས། ཕྲིན་ལས་ཕུར་པའི་ལེའུ་སྟེ་བཅུ་པའོ།། །།དེ་ནས་ཡང་ཅིག་ཐབས་སྒོ་བཀའ་སྩལ་པ། །ཆོས་དབྱིངས་ཡུམ་གྱི་ངང་ལས་སྐུ་སྤྲུལ་པ། །ཕ་རོལ་ཕྱིན་དྲུག་ཡེ་ཤེས་དྲུག་གི་ངང་། །ཐུགས་རྗེས་སེམས་ཅན་མ་ལུས་དོན་ལ་དགོངས། །དབྱིངས་ཀྱི་ཡུམ་དྲུག་ཚོགས་ལ་ཕྱག་འཚལ་ལོ། །དགོངས་སྤྱོད་རྒྱ་མཚོ་དཔག་གིས་མི་ལོངས་ཀྱང་། །ཐུགས་རྗེས་སེམས་ཅན་མ་ལུས་དོན་ལ་དགོངས། །སྙིང་རྗེའི་དབང་གིས་ཇི་ལྟར་འདུལ་མཛད་མ། །རྗེ་མོ་བཅུ་བཞིའི་ཚོགས་ལ་ཕྱག་འཚལ་ལོ། །འགྲོ་བའི་དོན་ཕྱིར་སྣ་ཚོགས་སྐུར་སྟོན་ཅིང་། །ཞིང་ཆེན་གསར་རྙིང་ཚོགས་ལ་ལོངས་སྤྱོད་པས། །གནོད་བྱེད་བགེགས་ཀྱི་ཚོགས་དཔུང་འཇོམས་མཛད་མ། །སྲིད་པ་མ་མོའི་ཚོགས་ལ་ཕྱག་འཚལ་ལོ། །མི་སྲིན་ལ་སོགས་དབང་ཕྱུག་ཉི་ཤུ་བརྒྱད། །ཀུན་ཀྱང་དུས་ལས་མི་འདའ་དམ་ཚིག་ཅན། །གདུག་པ་ཐམས་ཅད་མ་ལུས་འདུལ་མཛད་མ། །དབང་ཕྱུག་ཉི་ཤུ་བརྒྱད་ལ་ཕྱག་འཚལ་ལོ། །གདུག་པའི་དགྲ་བགེགས་མ་ལུས་བསྒྲལ་བའི་ཕྱིར། །སྐུ་མདོག་ཕྱག་མཚན་གཅིག་ཏུ་མ་ངེས་ཏེ། །ཕྲིན་ལས་རྣམ་བཞིས་བཀའ་ཡི་བསྟན་པ་བསྲུང་། །བཀའ་ཉན་ལས་བྱེད་ཚོགས་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། མ་མོའི་ལེའུ་སྟེ་བཅུ་གཅིག་པའོ།། །།དེ་ནས་ཡང་ཅིག་ཐབས་སྒོ་བཀའ་སྩལ་པ། །གང་ལ་གང་འདུལ་དེ་ལ་དེར་བསྟན་ནས། །སོ་སོའི་སྒྲུབ་མཆོག་ཡི་དམ་རྟགས་འཆང་བ། །སྒྲུབ་པའི་རིག་འཛིན་རྣམས་ལ་ཕྱག་འཚལ་ལོ། །ལྷུན་གྲུབ་ཕྱག་རྒྱ་རྣམ་སྨིན་ཚེ་ལ་དབང་། །སོ་སོའི་རིགས་སུ་རིག་འཛིན་ཕྱག་རྒྱ་བརྙེས། །རིགས་ཀྱི་རིག་འཛིན་རྣམས་ལ་ཕྱག་འཚལ་ལོ། །རིག་འཛིན་ས་ལ་གཉིས་མེད་ལྷུན་གྱིས་གྲུབ། །རྡོ་རྗེ་འཛིན་པ་ཀུན་གྱི་ངོ་བོ་ཉིད། །རྡོ་རྗེ་ཆོས་མཆོག་ཡོན་ཏན་འབྱུང་བའི་གཙོ། །རྡོ་རྗེ་སློབ་དཔོན་རྣམས་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས་རིག་འཛིན་རྣམས་ཀྱི་ལེའུ་སྟེ་བཅུ་གཉིས་པའོ།། །།དེ་ནས་ཡང་ཅིག་སྦྱངས་ཐབས་བཀའ་ ― DNG001_Page_0302 ―
[མ་དཔེ་གཟིགས་ན་འདིར་གནོན།]
སྩལ་པ། །དམིགས་མེད་ཐབས་ཀྱིས་སྣ་ཚོགས་སྐུ་གཟུགས་སྟོན། །སྐུ་མདོག་ཕྱག་མཚན་ཅིར་ཡང་སྤྲུལ་ཞིང་བསྒྱུར། །སངས་རྒྱས་བསྟན་པ་བསྲུང་བའི་ལས་མཛད་པ། །འཇིག་རྟེན་བསྟན་སྲུང་རྣམས་ལ་ཕྱག་འཚལ་ལོ། །རྒྱལ་བའི་བསྟན་པ་བསྲུང་བར་ཞལ་བཞེས་ནས། །ལེགས་ཉེས་ལྟངས་འཛིན་དམ་ཚིག་རྗེས་གཅོད་ཅིང་། །བཀའ་བཞིན་རྗེས་སུ་བསྒྲུབ་པའི་གྲོགས་མཛད་པ། །དམ་ཅན་རྒྱ་མཚོའི་ཚོགས་ལ་ཕྱག་འཚལ་ལོ། །འཇིག་རྟེན་ལས་ལས་གྲུབ་པའི་དྲེགས་པ་ཅན། །ལས་ཀྱིས་དབང་གིས་དྲེགས་པའི་སྟོབས་བརྙེས་ཤིང་། །དམ་ཚིག་དབང་གིས་བཀའ་ཡི་བསྟན་པ་བསྲུང་། །སྔགས་བདག་དམ་ཅན་ཚོགས་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས་བསྟན་སྲུང་གི་ལེའུ་སྟེ་བཅུ་གསུམ་པའོ།། །།དེ་ནས་ཡང་ཅིག་སྦྱངས་ཐབས་བཀའ་སྩལ་པ། །ལས་ངན་སེམས་ཅན་ཉེས་བྱས་ཁྱོད། །ལུས་ངག་ཡིད་གསུམ་གུས་པས་བརྩོན་འགྲུས་ཕྱུང་། །དཀྱིལ་འཁོར་ལྷ་ཚོགས་དཔང་དུ་གསོལ་ལ་མཐོལ། །དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །མི་འགྱུར་རྡོ་རྗེའི་སྐུ་ལ་ཕྱག་འཚལ་ལོ། །མངོན་པར་བྱང་ཆུབ་སྐུ་ལ་ཕྱག་འཚལ་ལོ། །ཐུགས་རྗེས་ཞི་མཛད་ལྷ་ལ་ཕྱག་འཚལ་ལོ། །ཐབས་མཆོག་དམར་ནག་འཇམ་དཔལ་སྐུ་ལ་ཕྱག་འཚལ་ལོ། །སྐྱོན་མེད་སྒྲ་སྒྲོག་པདྨའི་གསུང་ལ་ཕྱག་འཚལ་ལོ། །ཡང་དག་དོན་ལྡན་ཁྲག་འཐུང་ཐུགས་ལ་ཕྱག་འཚལ་ལོ། །ཉེས་པའི་ནད་སེལ་བདུད་རྩི་སྨན་ལ་ཕྱག་འཚལ་ལོ། །ཕྲིན་ལས་དྲག་པོ་ཕུར་བའི་ཚོགས་ལ་ཕྱག་འཚལ་ལོ། །མཁའ་འགྲོ་རྣམ་བཞི་མ་མོའི་ཚོགས་ལ་ཕྱག་འཚལ་ལོ། །ས་དང་ལམ་རྫོགས་རིག་འཛིན་ཚོགས་ལ་ཕྱག་འཚལ་ལོ། །བསྟན་པ་བསྲུང་མཛད་དམ་ཅན་ཚོགས་ལ་ཕྱག་འཚལ་ལོ། །དགྲ་བགེགས་སྒྲོལ་མཛད་སྔགས་བདག་ཚོགས་ལ་ཕྱག་འཚལ་ལོ། །ཞེས་གསུངས་སོ། །རྡོ་རྗེ་སེམས་དཔའ་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། ནོངས་པ་ ― DNG001_Page_0303 ―
[མ་དཔེ་གཟིགས་ན་འདིར་གནོན།]
དཔང་གསོལ་ཕྱག་འཚལ་རྟེན་གྱི་སྐབས་ལས། དཀྱིལ་འཁོར་བསྡུས་པའི་ལེའུ་སྟེ་བཅུ་བཞི་པའོ།། །།རྡོ་རྗེ་སེམས་དཔས་བཀའ་སྩལ་པ། །གང་གིས་རྒྱལ་བ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆག་མ་ལུས་ལྟ་ཅི་སྨོས། །མཚམས་མེད་ལྔ་ཡི་སྡིག་ཀྱང་འབྱང་། །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །དེ་སྐད་ཅེས་པ་བསྒྲགས་པ་དང་། །དམྱལ་བའི་གནས་ཀྱི་སེམས་ཅན་རྣམས། །དྲན་པ་སླར་ནི་རྙེད་པར་གྱུར། །སྡུག་བསྔལ་སྐབས་དེར་ཞི་བ་ལས། །རྡོ་རྗེ་སེམས་དཔས་འདི་སྐད་གསུངས། །ཞིང་ཁམས་རྒྱལ་བ་རྒྱ་མཚོ་དགོངས། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ཀྱི་ཡང་སྙིང་བདག་གིས་བརྗོད། །ཀུན་ནས་བྱིན་གྱིས་བརླབ་པར་མཛོད། །ཀྱེ་ཀྱེ་སྟོན་པ་སངས་རྒྱས་རྣམས། །དུས་གསུམ་རྒྱལ་བའི་ཡང་སྙིང་འདིས། །འཚམས་མེད་ཉེས་བྱས་རྣམ་སྨིན་བྱང་། །གསང་སྔགས་དམ་ཚིག་སོ་རུ་ཆུད། །མི་དགེ་རྣམས་ལ་སྨོས་ཅི་དགོས། །གང་ཞིག་ནད་ཀྱིས་ཉེན་གྱུར་ཀྱང་། །སྡུག་བསྔལ་དེ་ལས་ངེས་པར་གྲོལ། །འགོ་བའི་ནད་རིམས་བྱུང་བའི་ཚེ། །བདག་ཉིད་ཡི་དམ་གསལ་བ་ཡིས། །སྙིང་པོ་འདི་བརྗོད་དེས་མི་ཚུགས། །གང་ཞིག་ངན་སྔགས་མཚོན་བརྡེག་ཀྱང་། །སྙིང་པོ་འདི་བརྗོད་རང་ལ་བཟློག །དོན་གཉེར་ལམ་འགྲོ་འདི་བརྗོད་ན། །འཇིགས་པའི་དགྲ་ལས་ངེས་པར་གྲོལ། །གདོན་འཇིགས་བགེགས་ཀྱིས་འཚེ་བའི་ཚེ། །རིག་པ་འདི་བརྗོད་གདོན་དེ་འཇིལ། །སེམས་ཅན་གང་ཞིག་བུ་འདོད་ཀྱང་། །རིག་པ་འདི་བཟླས་རབས་དེས་ཟིན། །ཉོན་མོངས་དབུལ་ཞིང་ཕོངས་པས་ཀྱང་། །སྙིང་པོ་འདི་བརྗོད་རིན་ཆེན་རྙེད། །གང་ཞིག་འཁོར་བསྡུ་འདི་བརྗོད་ན། །སྲིད་པ་གསུམ་ཡང་འཁོར་དུ་འདུ། །ཕྲིན་ལས་རྣམ་བཞི་ངེས་པར་འགྲུབ། །ཉམས་སྒྲིབ་ཐམས་ཅད་དག་བྱེད་པའི། །ཡི་གེ་བརྒྱ་པ་བདག་གིས་བརྗོད། །ཉམས་ཆག་ཐམས་ཅད་འདི་ཡིས་སྐོངས། །ཞེས་སྨྲས་ཏེ་ངན་སོང་དོང་ནས་སྤྲུགས་པ་འདི་གསུངས་སོ། །ཨོཾ་ཨཱཿཧཱུཾ་སྭཱ་ཧཱ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་ ― DNG001_Page_0304 ―
[མ་དཔེ་གཟིགས་ན་འདིར་གནོན།]
མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་ཝ་མ་ཧཱ་ས་མ་ཡ་བཛྲ་སཏྭ་ཨ། འདི་ནི་དུས་ལ་བབ་པའི་ཚེ། །གསུམ་མམ་བདུན་ནམ་བཅུ་བཞི་འམ། །ཉི་ཤུ་རྩ་གཅིག་བརྒྱ་རྩ་བརྒྱད། །ལྷ་བསྒོམ་གསལ་བས་བརྗོད་བྱས་ན། །ཉམས་ཆག་ཐམས་ཅད་སྐོང་བར་བྱེད། །ངན་སོང་གསུམ་ལས་ཐར་བར་འགྱུར། །ཡི་དམ་དག་ཏུ་འདི་བརྗོད་ན། །དུས་གསུམ་རྒྱལ་བའི་སྲས་སུ་འགྱུར། །དེ་ནས་ལས་ངན་སེམས་ཅན་དམྱལ་བ་པ་རྣམས་ཀྱིས། །མགོན་པོ་སེམས་ཅན་ལ་དགོངས་པ་ཨ་ལ་ལ་ཧོ། །ཞེས་སྨྲས་སོ། །དེ་ནས་དུས་གསུམ་སངས་རྒྱས་རྣམས་ཀྱིས་རྡོ་རྗེ་སེམས་དཔའ་ལ་གསུངས་པ། ཐུགས་ཀྱི་ཡང་སྙིང་བརྗོད་པ་ལགས་སོ། །ཞེས་ཆེད་དུ་བརྗོད་དེ་གནང་བ་བྱིན་ནོ། །དབང་མཆོག་རྒྱལ་པོའི་རྒྱུད་ལས། ཡང་སྙིང་གསང་སྔགས་བཤད་པའི་ལེའུ་སྟེ་བཅོ་ལྔ་པའོ།། །།དེ་ནས་བཛྲ་པཱ་ཎི་ཡིས། །ལས་ངན་སེམས་ཅན་དེ་ལ་ནི། །སྔགས་ཀྱི་སྣོད་དུ་རུང་བའི་ཕྱིར། །དང་པོའི་སེམས་བསྐྱེད་དད་བྱས་ནས། །བུམ་པ་ལྷ་ཡི་དབང་བསྐུར་དང་། །ན་རཀ་གནས་ནས་དྲངས་པ་ཡི། །གསང་བའི་སྔགས་ཀྱིས་དབང་བསྐུར་རོ། །བུམ་པ་རྫས་དང་ལྡན་ཐོགས་ནས། །ལས་ངན་དེ་ཡི་གཙུག་ཏུ་བཞག །རིག་པའི་ཚིགས་བཅད་འདི་བརྗོད་དོ། །ཧཱུཾ་ཀུན་བཟང་ཡབ་ཡུམ་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། །སེམས་ཅན་ཁྱོད་ལ་དབང་བསྐུར་བས། །ན་རཀ་སྡུག་བསྔལ་བྲལ་བར་ཤོག །དུ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུན་ཧཱུཾ་ཕཊ། ཧཱུཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ་བཛྲ་མ་མེ་མུཉྩ། བཛྲཱི་བྷ་ཝ་མ་ཧཱ་ས་མ་ཡ་བཛྲ་སཏྭ་ཨ། ཧཱུཾ་བཛྲ་ཨ་བྷི་ཥིཉྩ་ཨ། ཞེས་དབང་བསྐུར་བས། དུས་དེར་ན་རཀ་གི་གནས་དོང་སྤྲུག་ ― DNG001_Page_0305 ―
[མ་དཔེ་གཟིགས་ན་འདིར་གནོན།]
པར་གྱུར་ཏོ། །དབང་མཆོག་རྒྱལ་པོའི་རྒྱུད་ལས། ན་རཀ་དོང་སྤྲུག་པའི་ལེའུ་སྟེ་བཅུ་དྲུག་པའོ།། །།དེ་ནས་སེམས་ཅན་ལས་ངན་དེ། །ཡི་དྭགས་གནས་སུ་ཡང་སྐྱེས་ཏེ། །ཕྱི་ནང་གཉིས་ཀའི་སྡུག་བསྔལ་མྱང་། །རྣམ་སྨིན་ཡི་དྭགས་ཆེན་པོར་གནས། །དེ་ནས་ལག་ན་རྡོ་རྗེ་ཡིས། །ཡི་དྭགས་དེ་ཡི་རྩར་བྱོན་ནས། །ལས་ངན་དེ་ལ་འདི་སྐད་བསྒྲགས། །པྲེ་ཏ་ཀ་ཙཀྵུ་པྲ་བེ་ཤ་ཡ་ཨ། །དེ་སྐད་རྣ་བར་བསྒྲགས་པ་ཡིས། །སྔོན་གྱི་ལས་ངན་ཡོངས་སུ་དྲན། །ཀྱེ་མ་ཀྱི་ཧུད་མགོན་པོ་ཡིས། །ཐུགས་རྗེས་ཟུང་ལ་བདག་སྐྱོབས་ཤིག །བདག་ལུས་སྒྲོལ་ལ་བདེ་ལ་འཁོད། །མགོན་པོས་མྱུར་དུ་བདག་སྐྱོབས་ཤིག །ཅེས་པ་གསོལ་བ་བཏབ་པ་དང་། །དེ་ནས་བཛྲ་པཱ་ཎི་ཡིས། །རིན་ཆེན་སྒྲོམ་བུ་ལག་ཐོགས་ནས། །ལས་ངན་དེ་ཡི་གཙུག་ཏུ་བཞག །རིག་པའི་ཚིགས་བཅད་འདི་བརྗོད་དོ། །ཨཱ། རིན་ཆེན་སྒྲོམ་གྱི་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། །སེམས་ཅན་ཁྱོད་ལ་དབང་བསྐུར་བས། །པྲེ་ཏའི་སྡུག་བསྔལ་བྲལ་བར་ཤོག །པྲེ་པ་ཙ་པ་ཙ། སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུཾ་ཕཊ། ཨཱཿཔདྨ་སཏྭ་ས་མ་ཡ། མ་ནུ་པཱ་ལ་ཡ། པདྨ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུཾ། ཨཱཾ་ཨོཾ་ཨ་ཨ་ཧཱུཾ་ཧ་ཧོ། བྷ་ག་ཝཱན་སརྦ་ཏ་ཐཱ་ག་ཏ་པདྨ་མཱ་མེ་མུཉྩ། པདྨ་བྷ་ཝ་མ་ཧཱ་ས་མ་ཡ། པདྨ་སཏྭ་ཨ། པདྨ་ཨ་བྷི་ཥིཉྩ་ཨ། ཞེས་དབང་བསྐུར་བས། དུས་དེར་ཡི་དྭགས་རིགས་གསུམ་ལ། །རྒྱུ་བ་གནས་པ་རྣམ་པར་སྨིན། །ཕྱི་ནང་གཉིས་ཀའི་སྒྲིབ་པ་ཅན། །ཡི་དྭགས་གནས་ངན་དེ་ལས་ཐར། །མཐོང་ལོག་སྡུག་བསྔལ་ལས་གྲོལ་ལོ། །དབང་མཆོག་རྒྱལ་པོའི་རྒྱུད་ལས། པྲེ་ཏ་ཀ་དོང་སྤྲུག་གི་ལེའུ་སྟེ་བཅུ་བདུན་པའོ།། །།དེ་ནས་ལས་ངན་སེམས་ཅན་དེ། །བྱོལ་སོང་གནས་སུ་ཡང་སྐྱེས་སོ། །བྱོལ་སོང་རིགས་བཞི་ཡོད་པ་ལས། །གོར་མ་རྡོ་ཡི་འབུ་རུ་སྐྱེས། །སྔོན་གྱི་ལས་ངན་བག་ཆགས་ཀྱིས། །དེ་ཡི་རྣམ་པར་སྨིན་པ་བྱུང་། །རིགས་བཞིའི་བྱོལ་སོང་དཔག་ཏུ་མེད། །བསྡུས་པས་སུམ་ ― DNG001_Page_0306 ―
[མ་དཔེ་གཟིགས་ན་འདིར་གནོན།]
འབུམ་ཉི་ཁྲི་ཡོད། །ཤིན་ཏུ་བསྡུས་པས་རིགས་བཞི་ཡིན། །དེ་དག་ཀུན་ཏུ་སྐྱེས་པ་ལ། །དེ་ནས་ལག་ན་རྡོ་རྗེ་ཡིས། །སེམས་ཅན་དེ་ཡི་གམ་དུ་བྱོན། །ལས་ངན་དེ་ལ་འདི་སྐད་བསྒྲགས། །ཏིརྱ་ཀ་ཙཀྵུ་པྲ་བེ་ཤ་ཡ་ཨཱཿ། དེ་སྐད་སེམས་ཅན་དེས་ཐོས་པས། །སྔོན་གྱི་ལས་ངན་དེ་དྲན་ནས། །ཀྱེ་མ་ཀྱི་ཧུད་བདག་འདྲ་སོགས། །ལས་ཀྱི་རྣམ་སྨིན་རང་ལ་སྨིན། །མགོན་པོའི་ཐུགས་རྗེས་བདག་སྒྲོལ་ཅིག །ཞེས་གསོལ་བ་བཏབ་པ་དང་། དེ་ནས་བཛྲ་བཱ་ཎི་ཡིས། །ལས་ངན་སེམས་ཅན་བྱོལ་སོང་ལ། །ཤེས་རབ་པུ་སྡི་ལག་ཐོགས་ནས། །ལས་ངན་དེ་ཡི་གཙུག་ཏུ་བཞག །རིག་པའི་བདེན་ཚིག་འདི་བརྗོད་དོ། །ཨོཾ་ཤེས་རབ་རིག་པའི་པུསྡི་འདི། །དུས་གསུམ་སངས་རྒྱས་ཞི་ཁྲོའི་གསུང་། །སེམས་ཅན་ཁྱོད་ལ་དབང་བསྐུར་བས། །ཏིརྱའི་སྡུག་བསྔལ་བྲལ་བར་ཤོག །སུ་མ་ཐ་མ་ཐ་སརྦ་ཏིརྱ་ཀ་ག་ཏེ་ཧེ་ཏུཾ་ཧཱུཾ་ཧཱུཾ་ཕཊ། ཨོཾ་བུཌྜྷ་སཏྭ་ས་མ་ཡ། མ་ནུ་པཱ་ལ་ཡ། བུཌྜྷ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ་བུཌྜྷ་མཱ་མེ་མུཉྩ། བུཌྜྷ་བྷ་ཝ་མ་ཧཱ་ས་མ་ཡ། བུཌྜྷ་སཏྭ་ཨ། ཨོཾ་ཨ་བྷི་ཥིཉྩ་ཨ། ཞེས་དབང་བསྐུར་བ་དང་། ཡང་དེའི་དུས་སུ་བྱོལ་སོང་གླེན་ལྐུགས་དང་། བསད་བཅད་དང་། ཉིང་ཤ་ཉིང་གིས་ཟ་བ་ལས་ཐར་ཏེ། འཁོར་དེར་བྱོལ་སོང་ཁྲི་སུམ་སྟོང་བདེ་བ་རྙེད་དོ། །ལས་ངན་གྱི་སེམས་ཅན་དེ་ཡང་རྡོ་རང་ཞིག་སྟེ། བྱོལ་སོང་གི་མུན་པ་ལས་ཐར་རོ། །དབང་མཆོག་རྒྱལ་པོའི་རྒྱུད་ལས། ཏིརྱ་ཀ་རང་གྲོལ་ངན་སོང་དོང་སྤྲུགས་ཀྱི་ལེའུ་སྟེ་བཅོ་བརྒྱད་པའོ།། །།དེ་ནས་ལས་ངན་སེམས་ཅན་དེས། །ལྷ་མིན་གནས་སུ་སྐྱེས་ཏེ་ཡང་། །འགྲོ་ལ་གནོད་སེམས་མཐོ་རིས་འཁྲུག །འཐབ་རྩོད་ལས་ལ་དགའ་ཞིང་ནད་རིམས་གཏོང་། །མི་དགེའི་ལས་བྱེད་དགེ་ལ་བར་ཆོད་གཏོང་། །སྒྲ་གཅན་ནག་པོར་བྱ་བར་སྐྱེས། །ལྷ་ལ་ཁོང་ཁྲོས་འཁྲུག་པར་བྱེད། །དཔུང་གི་སྟོབས་ཀྱིས་ཐམས་ཅད་དྲེད་པར་བྱེད། །ལྷ་ཡུལ་དམག་འདྲེན་བསམ་གཏན་ ― DNG001_Page_0307 ―
[མ་དཔེ་གཟིགས་ན་འདིར་གནོན།]
འཁྲུགས། །དེ་ནས་ལག་ན་རྡོ་རྗེ་ཡང་། །སེམས་ཅན་དེ་ཡི་གནས་སུ་བྱོན། །ལས་ངན་དེ་ལ་འདི་སྐད་བསྒྲགས། །དེ་བ་ཨ་སུ་ར་ཙཀྵུ་པྲ་བེ་ཤ་ཡ་ཨ། སྒྲ་གཅན་ནག་པོས་དེ་ཐོས་པས། །སྔོན་གྱི་ལས་ངན་དེ་རུ་དྲན། །མགོན་པོ་ཉིད་ལ་ངོ་དམའ་ཞིང་། །གདུང་བའི་སྨྲེ་སྔགས་འདི་སྐད་སྨྲས། །ཨེ་མ་བདག་འདྲའི་སེམས་ཅན་ཞིག །སྔོན་གྱི་ལས་ངན་དག་ལས་བྱུང་། །ཀྱེ་མ་ཀྱི་ཧུད་མགོན་པོ་ཡིས། །བདག་ལུས་ངན་པ་བསྒྲལ་དུ་གསོལ། །སྔར་བྱས་འགྱོད་དེ་མཐོལ་བཤགས་བསྡམ། །ཐུགས་རྗེས་ཟུང་ལ་དབང་བསྐུར་སྦྱོངས། །སླད་ནས་བྱང་ཆུབ་མཆོག་ཐོབ་མཛོད། །ཅེས་གསོལ་བ་མང་དུ་བཏབ་པོ། །དེ་ནས་ཕྱག་ན་རྡོ་རྗེ་ཡིས། །ཕྱག་ན་གོ་མཚོན་ཐོགས་ནས་སུ། །ལས་ངན་དེ་ལ་དབང་བསྐུར་བསྒྲལ། །རིག་པའི་བདེན་ཚིག་འདི་བརྗོད་དོ། །ཧཱ། ཤེས་རབ་དོན་མཚོན་རལ་གྲི་དང་། །བདུད་ཀྱི་མཚོན་རྡུག་གོ་ཆ་འདི། །དུས་གསུམ་སངས་རྒྱས་རྣམས་ཀྱི་སྦྱོར་སྒྲོལ་ཏེ། །ཞི་ཁྲོ་རྒྱལ་བ་རྣམས་ཀྱི་ཕྱག་མཚན་འདིས། །སེམས་ཅན་ཁྱོད་ལ་དབང་བསྐུར་བསྒྲལ། །ཨ་སུ་ར་ཡི་སྡུག་བསྔལ་བྲལ་བར་ཤོག །ཏྲི་སརྦ་དུཿཁ་སརྦ་ཀརྨ་པྲ་བེ་ཤ་ཧཱུཾ་ཕཊ། ཧ་ཀརྨ་སཏྭ་ས་མ་ཡ། མ་ནུ་པཱ་ལ་ཡ། ཀརྨ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཀརྨ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ། ཀརྨ་མཱ་མེ་མུཉྩ། ཀརྨ་བྷ་ཝ། མ་ཧཱ་ས་མ་ཡ། ཀརྨ་སཏྭ་ཨ། ཧཱ་ཨ་བྷི་ཥིཉྩ་ཨཿ། ཞེས་དབང་བསྐུར་བས་ལྷ་མ་ཡིན་གཞན་རྣམས་ཀྱང་བྱམས་པའི་སེམས་སྐྱེས་ཏེ། སྙིང་རྗེ་ཚད་མེད་པ་ལ་གནས་སོ། །འཐབ་རྩོད་ཐམས་ཅད་དུས་དེར་རང་ཞིའོ། །སྒྲ་གཅན་ནག་པོ་དེ་བཛྲ་པཱ་ཎིས་བསྒྲལ་ལོ། །ལྷ་མ་ཡིན་གཞན་རྣམས་ཀྱང་དགེ་བའི་སེམས་ལ་གནས་ཏེ། སྐྱེ་བ་གཉིས་པ་དང་གསུམ་པ་ཤ་སྟག་ཏུ་གྱུར་ཏོ། །དབང་མཆོག་རྒྱལ་པོའི་རྒྱུད་ལས། སྒྲ་གཅན་ནག་པོ་བསྒྲལ་བའི་ལེའུ་སྟེ་བཅུ་དགུ་པའོ།། །།དེ་ནས་སྔར་གྱི་སེམས་ཅན་དེས། །ལྷ་ཡི་གནས་སུ་སྐྱེ་བ་བླངས། །ལྷ་གནས་རྣམ་པ་གསུམ་ལས་ནི། །འདོད་ཁམས་སུམ་ཅུ་རྩ་གསུམ་གྱི། །དགེ་ ― DNG001_Page_0308 ―
[མ་དཔེ་གཟིགས་ན་འདིར་གནོན།]
བའི་ངང་ཚུལ་བྱ་བར་སྐྱེས། །ལྷ་མོ་བདུན་དང་ལྷན་ཅིག་འགྲོགས། །འདོད་ཡོན་ཆགས་པ་ཅན་དེ་ལ། །བཛྲ་པཱ་ཎིས་འདི་སྐད་བསྒྲགས། །དེ་ཝ་ཙཀྵུ་པྲ་བེ་ཤ་ཡ་ཨཿ། དགེ་བའི་ངང་ཚུལ་དེ་ཐོས་ནས། །སྔོན་གྱི་ལས་ངན་སྐྱེ་བ་དྲན། །རང་གི་རྒྱན་བཀྲོལ་ཐོགས་ནས་ནི། །འགྲོ་མགོན་ཉིད་ལ་ངོ་དམའ་ཞིང་། །ཀྱེ་མ་ཀྱི་ཧུད་ཐུགས་རྗེ་ཆེ། །བདག་འདྲ་རྨོངས་པ་འདུ་འཛི་ཅན། །དམ་ཚིག་རྩ་བ་ཉམས་པའི་སྐྱོན། །ངན་སོང་མཐོ་རིས་གནས་ན་འཁོད། །མི་འཆབ་མཐོལ་བཤགས་མེ་ཏོག་བཞེས། །དབང་བསྐུར་ལྷ་ཡི་གནས་ནས་དྲོངས། །ཞེས་གསོལ་རང་གི་རྒྱན་ཕུལ་ལོ། །དེ་ནས་ལག་ན་རྡོ་རྗེ་ཡིས། །ང་རྒྱལ་ཕྲག་དོག་འཇོམས་བྱེད་པའི། །པི་ཝང་ལག་ཏུ་ཐོགས་ནས་ནི། །དགེ་བའི་ངང་ལ་དབང་བསྐུར་ནས། །རིག་པའི་བདེན་ཚིག་འདི་བརྗོད་དོ། །སྭ། ལོངས་སྤྱོད་བདུད་ཀྱི་གཡེངས་འཇོམས་པའི། །པི་ཝང་སྙན་པའི་དོན་བྱེད་འདིས། །དེ་བ་ཁྱོད་ལ་དབང་བསྐུར་བས། །སྐྱེ་བ་གཅིག་གིས་ལས་རྫོགས་ཤོག །ཨ་སརྦ་ཏ་ཐཱ་ག་ཏ་བིདྷྭནྶ་ན་ཁཌྒ་ཙྪིནྡ་ཙྪིནྡ་ཧཱུཾ་ཕཊ། སྭ་རཏྣ་སཏྭ་ས་མ་ཡ། མ་ནུ་པཱ་ལ་ཡ། རཏྣ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ་རཏྣ་མཱ་མེ་མུཉྩ། རཏྣ་བྷ་ཝ་མ་ཧཱ་ས་མ་ཡ། རཏྣ་སཏྭ་ཨ། སྭཱ་རཏྣཨ་བྷི་ཥིཉྩ་ཨཿ། ཞེས་དབང་བསྐུར་བས། ལྷ་གཞན་རྣམས་ཀྱང་དགེ་བ་ལ་བརྩོན་འགྲུས་དང་ལྡན་པར་གྱུར་ཏེ། སྐྱེ་བ་གཅིག་པ་ཤ་སྟག་དུ་བྱུང་བར་གྱུར་ཏོ། །དགེ་བའི་ངང་ཚུལ་ལྷ་ཡི་འཕོ་ལྟུང་ལས་དུས་དེར་གྲོལ་བར་གྱུར་ཏོ། །དབང་མཆོག་རྒྱལ་པོའི་རྒྱུད་ལས། ལྷ་ཡི་ལེའུ་སྟེ་ཉི་ཤུ་པའོ།། །།དེ་ནས་ལས་ངན་སེམས་ཅན་དེ། །གླིང་མཆོག་ཛམ་གླིང་མི་རུ་སྐྱེས། །སྐྱེ་བ་གཅིག་པའི་བྱང་ཆུབ་སེམས། །རིག་འཛིན་གསང་སྤྱོད་རྣལ་འབྱོར་དེ། །སྔར་བྱས་ལས་ཀུན་དྲན་པ་ཅན། །རིག་པའི་བློ་ཅན་སྔོན་སྦྱངས་སྟོབས། །འགྱོད་སེམས་དྲག་པོས་དཀའ་ཐུབ་སྤྱོད། །འཕགས་པ་བླ་མ་མཉེས་པར་བྱེད། ། ― DNG001_Page_0309 ―
[མ་དཔེ་གཟིགས་ན་འདིར་གནོན།]
གསང་བདག་ཕྱག་ན་རྡོ་རྗེས་ཀྱང་། །ངན་སོང་སྦྱོང་བའི་རྒྱུད་དབང་བསྐུར། །བུམ་པ་ཐབས་ཤེས་གསང་ཚིག་གིས། །དབང་མཆོག་བསྒྲུབ་པ་དེ་ལ་བསྐུར། །འགྲོ་བའི་སྐྱེ་སྒོ་བཅད་པའི་ཕྱིར། །རང་རྒྱུད་སྦྱོང་བའི་སྔགས་བརྗོད་པ། །ཧཱུཾ་བི་ཤ་མུ་ཙ་ལ་ཙན་དྷ་ཙན་དྷ་ཧཱུཾ་ཕཊཿ། དེ་ནས་དམ་ཚིག་ཉམས་པ་གསོ་བའི་ཕྱིར། །བཤགས་པའི་རྒྱལ་པོ་བརྒྱ་པ་བརྗོད། །ཡི་དམ་ལྷ་ནི་གསལ་བྱས་ལ། །འཕྲོ་འདུས་འགྱོད་སྦྱོངས་ཚར་བཅད་བྱ། །རྒྱལ་བ་ཞི་ཁྲོ་དཔང་གསོལ་ལ། །ཕྱག་འཚལ་མོས་གུས་བཤགས་པ་བྱ། །གསང་སྔགས་འབྲུ་བརྒྱའི་བཤགས་པ་བརྗོད། །ཧུཾ་ཧཱུཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་ཝ་མ་ཧཱ་ས་མ་ཡ། བཛྲ་སཏྭ་ཨ། ཧཱུཾ་བཛྲ་ཨ་བྷི་ཥིཉྩ་ཨཿ། ཨོཾ་བྷུཌྜྷ་ཨ་བྷི་ཥིཉྩ་ཨཿ། སྭཱ་རཏྣ་ཨ་བྷི་ཥིཉྩ་ཨཿ། ཨཱཾ་པདྨ་ཨ་བྷི་ཥིཉྩ་ཨཿ། ཧཱ་ཀརྨ་ཨ་བྷི་ཥིཉྩ་ཨཿ། ཞེས་ཕྱག་མཚན་དུ། རིན་པོ་ཆེའི་པར་བུ་དང་། གསེག་ཤང་དང་། རྡོ་རྗེ་དང་། འཁོར་ལོ་དང་། རིན་པོ་ཆེ་དང་། པདྨ་དང་། རྒྱ་གྲམ་དང་། དྲིལ་བུ་ལ་སོགས་པས་དབང་བསྐུར་ཏེ། བདེན་པའི་ཚིགས་བཅད་འདི་ཡང་བརྗོད། །ཧཱུཾ་རིན་ཆེན་པར་བུའི་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། །རིགས་ཀྱི་བུ་ལ་དབང་བསྐུར་བས། །ལྷ་དབང་ལུས་ལ་ཐོབ་པར་ཤོག །ཧཱུཾ། གསེག་ཤང་དྲང་སྲོང་སྒྲ་སྒྲོགས་འདི། །ཐུགས་རྟགས་ཞི་ཁྲོའི་ལྷ་ཡི་བརྡའ། །རིགས་ཀྱི་བུ་ལ་དབང་བསྐུར་རོ། །ཨ་བ་དྷཱུ་ཏཱིའི་དབང་ཐོབ་ཤོག །རྡོ་རྗེ་འཁོར་ལོ་རིན་པོ་ཆེ། །པདྨ་རྒྱ་གྲམ་ཐུགས་ཀྱི་རྟགས། །རིགས་ཀྱི་བུ་ལ་དབང་བསྐུར་བས། །འཁོར་ལོ་ལྔ་ལ་དབང་རྫོགས་ཤོག །ཅེས་སྔགས་ཏིང་འཛིན་ཚིགས་བཅད་ཀྱིས། །རིག་འཛིན་དེ་ལ་དབང་བསྐུར་བས། །ལྷ་དབང་ལུས་ཀྱིས་ཐོབ་པར་གྱུར། །རང་ལུས་རྒྱལ་བའི་སྐུར་རྫོགས་ཀྱང་། །མྱ་ངན་འདས་པའི་དོན་མ་རྟོགས། །རྟོག་བཅས་ལྷ་ཡི་དབང་ཞེས་བྱ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ― DNG001_Page_0310 ―
[མ་དཔེ་གཟིགས་ན་འདིར་གནོན།]
ལྷ་དབང་བསྐུར་བའི་ལེའུ་སྟེ་ཉེར་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །བློ་ལྡན་སློབ་བུ་དེ་ལ་ནི། །ཐབས་ཀྱི་དབང་བསྐུར་བརྡའ་རུ་བསྟན། །ཤེས་རབ་དབང་བསྐུར་ཤེས་སམ་བལྟ། །གསང་བའི་དབང་བསྐུར་རང་ཉམས་བསྟན། །ཚིག་གི་དབང་བསྐུར་མེད་པར་བསྟན། །ཐབས་ཀྱི་དབང་བསྐུར་བསྟན་པ་ནི། །ཕྱི་ནང་སྣོད་བཅུད་ཐམས་ཅད་ཀྱི། །སྣང་བ་ཡོད་མེད་བརྡའ་རུ་བསྟན། །གཅིག་ལས་སྣ་ཚོགས་བསྒྱུར་བྱས་པས། །སྣང་བ་ཡོད་མེད་བསྟན་པ་ཡིན། །ལྷ་ཚོགས་བསྐུར་བ་མིང་གིས་མཚོན། །རི་རབ་གླིང་བཞི་དཀྱིལ་འཁོར་དང་། །བུམ་པ་སྐུ་དང་རྡོ་རྗེ་དང་། །འཁོར་ལོ་རིན་ཆེན་པདྨ་དང་། །རྒྱ་གྲམ་རལ་གྲི་རྩེ་གསུམ་དང་། །ཕུར་བུ་མདའ་དང་གཞུ་དང་ནི། །མེ་ལོང་དབྱིབས་དང་ཁ་དོག་ཏུ། །བླ་མས་མིང་བཏགས་དེ་ལ་ནི། །སློབ་མའི་ཤེས་རབ་ལྟ་བ་མིན། །དཔེ་ཡི་དོན་དེ་ཤེས་ན་ཤེས་རབ་ཡིན། །གསང་བའི་དབང་བསྐུར་བསྟན་པ་ནི། །རང་ལ་རང་གསལ་བསྟན་པ་ཡིན། །རང་ངོ་ཤེས་ན་གསང་དབང་ཐོབ། །གཅིག་པ་ཤེས་ན་ཐམས་ཅད་དེ། །མཉམ་པ་ཉིད་ནི་ངོ་མཚར་ཆེ། །ཡོད་ན་ཡོད་པར་ཡེ་ནས་མཉམ། །མེད་ན་མེད་པར་ཡེ་ནས་མཉམ། །བདེན་ན་བདེན་པར་ཡེ་ནས་མཉམ། །རྫུན་ན་རྫུན་པར་ཡེ་ནས་མཉམ། །སྟོང་ན་སྟོང་པར་ཡེ་ནས་མཉམ། །དངོས་ན་དངོས་པོར་ཡེ་ནས་མཉམ། །མཉམ་པ་ཉིད་དུ་ཤེས་པ་ནི། །གསང་བའི་དབང་བསྐུར་ཐོབ་པ་ཡིན། །ཚིག་གི་དབང་བསྐུར་རང་མེད་བསྟན། །ང་བདག་འདུག་ན་ནམས་ཀྱང་འཁོར། །དབང་མེད་རོ་དང་བྲལ་བ་ནི། །ཚིག་གཅིག་ཚིག་མེད་དབང་གི་མཆོག །ང་མེད་བདག་མེད་སྣང་བ་མེད། །ཅེས་གསུངས་སོ། །རིག་འཛིན་དགེ་མཐོང་དང་། འཁོར་འདུས་པ་མང་པོ་དང་། ཐེག་པ་བརྒྱད་པོའི་ལས་དང་པོ་པ་རྣམས་བརྒྱལ་ཏེ། ས་ལ་འགྱེལ་བར་གྱུར་ཏོ། །ལ་ལ་ངུ་ཞིང་སྨྲེ་སྔགས་འདོན། ལ་ལ་ནི་སྐྲག་ཅིང་སྔངས་པར་གྱུར་ནས་སྐུར་པ་འདེབས། ལ་ལ་ནི་མོས་པ་ལོག་སྟེ་ཁ་ན་མ་ཐོ་བ་སྨྲ། ལ་ལ་ནི་ཡི་ཆད་དེ་བྱས་པ་ལ་དོན་མེད་པ་ཀྱེ་མ་ཀྱི་ཧུད། གསང་བདག་རྡོ་རྗེ་མ་གསུང་ཞིག །ཅེས་གླེང་ངོ་། །ཡིད་མ་རང་བ་རྣམས་ནི་མུ་སྟེགས་པ་བདེན་ནོ། ། ― DNG001_Page_0311 ―
[མ་དཔེ་གཟིགས་ན་འདིར་གནོན།]
ཞེས་རང་རང་སྨྲའོ། །དེ་ནས་ལག་ན་རྡོ་རྗེས་འཁོར་དེ་དག་ལ་ཡིད་ཆེས་པར་བྱ་བའི་ཕྱིར། བོས་ཤིང་བསྡུས་ཏེ་འདི་སྐད་ཅེས་གསུངས་སོ། །འདུས་པ་རྣམས་ཐེ་ཚོམ་བཅད་པར་བྱའོ། །རྡོ་རྗེ་སེམས་དཔའི་ཞལ་དང་སྤྲོད་ཀྱིས་ལོངས་ཤིག །ཆོས་ཀྱི་སྐུ་དང་མཇལ་ཏེ་འོང་ངོ་། །ཞེས་གསུངས་ཏེ། འཁོར་རྣམས་སླར་འདུས་ཏེ་རྡོ་རྗེ་སེམས་དཔའི་དྲུང་དུ་བསྐོར་བ་དང་། ཕྱག་དང་མཆོད་པའི་ཚོགས་ཀྱིས་མཆོད་དེ་འཁོད་དོ། །དབང་མཆོག་རྒྱལ་པོའི་རྒྱུད་ལས། གསང་བའི་ཆོས་ཉིད་ལ་ཡིད་མ་ཆེས་པའི་ལེའུ་སྟེ་ཉེར་གཉིས་པའོ།། །།དེ་ནས་བཛྲ་པཱ་ཎི་ཡིས། །རྡོ་རྗེ་འཆང་ལ་འདི་སྐད་གསོལ། །ཀྱེ་ཀྱེ་རྡོ་རྗེ་སེམས་དཔའ་མཆོག །གསང་སྔགས་གསང་བ་མཉམ་མི་མཉམ། །ང་བདག་རང་སྣང་ཡོད་དམ་མེད། །ཆོས་ཅན་དངོས་གཅིག་བདེན་ནམ་རྫུན། །བག་ཆགས་རེ་དོགས་འབྲལ་མི་འབྲལ། །ཞེས་ཞུས་པས། རྡོ་རྗེ་སེམས་དཔས་བཀའ་སྩལ་པ། །སྟོབས་ཅན་རྡོ་རྗེ་འཁོར་འདུས་ཉོན། །ཆོས་ཉིད་ཆོས་སྐུའི་དགོངས་ཚད་ནི། །མཉམ་པ་ཉིད་དུ་མཁྱེན་པ་མིན། །མཉམ་པ་ཉིད་ལ་གཉིས་མེད་དེ། །དཔེར་ན་ཆོས་ཅན་ངོ་བོ་གཅིག །ཕྱི་རོལ་ཀ་བ་བུམ་པ་དང་། །དཔེར་ན་རྡོ་རྗེ་ལྟ་བུ་འདི། །མིང་གིས་ཡིན་ནམ་གཟུགས་ཀྱིས་ཡིན། །མཚོན་པས་ཡིན་ནམ་ལས་ཀྱིས་ཡིན། །འདུས་པས་ཡིན་ནམ་འབྲལ་བས་ཡིན། །མདོག་གིས་ཡིན་ནམ་དབྱིབས་ཀྱིས་ཡིན། །བསམ་པས་ཡིན་ནམ་གང་གིས་ཡིན། །རྡོ་རྗེ་འཛིན་པའི་འཁོར་ཚོགས་ཀུན། །མིང་གིས་རྡོ་རྗེ་ཡིན་པས་ན། །མིང་གིས་གང་གྲགས་རྡོ་རྗེ་འམ། །གཟུགས་ཀྱིས་རྡོ་རྗེ་ཡིན་པས་ན། །གཟུགས་སུ་གང་སྣང་རྡོ་རྗེ་འམ། །འདུས་པས་རྡོ་རྗེ་ཡིན་པ་ན། །ས་རྡོ་བོང་བ་རྡོ་རྗེ་འམ། །བྲལ་བས་རྡོ་རྗེ་ཡིན་པས་ན། །འདུས་བྱས་ཐམས་ཅད་རྡོ་རྗེ་འམ། །མཚོན་པས་རྡོ་རྗེ་ཡིན་པས་ན། །དཔེ་བཀོད་ཐམས་ཅད་རྡོ་རྗེ་འམ། །ལས་ཀྱིས་རྡོ་རྗེ་ཡིན་པས་ན། །སེམས་ཅན་ཐམས་ཅད་རྡོ་རྗེ་འམ། །མདོག་གིས་རྡོ་རྗེ་ཡིན་པས་ན། །དཀར་དམར་ཐམས་ཅད་རྡོ་རྗེ་འམ། །དབྱིབས་ཀྱིས་རྡོ་རྗེ་ཡིན་པས་ན། །ཟླུམ་པ་ལ་སོགས་རྡོ་རྗེ་འམ། །བསམ་པས་རྡོ་རྗེ་ཡིན་པས་ན། །ཡིད་སྨོན་ཐམས་ཅད་རྡོ་རྗེ་འམ། །དེ་ལྟར་རྒྱུ་ཡིས་ཡིན་པ་མེད། །རྡོ་རྗེ་བྱ་བ་གང་ ― DNG001_Page_0312 ―
[མ་དཔེ་གཟིགས་ན་འདིར་གནོན།]
ལ་ཟེར། །ཉོན་མོངས་རྟོག་པ་སྐྱེས་པ་རྣམས། །དཔེར་ན་ཆོས་ཅན་རྡོ་རྗེ་འདི། །མིང་གིས་ཡིན་ནོ་ངེས་པར་འཇུག །གཟུགས་ཀྱིས་ཡིན་ནོ་སྒོ་ང་རལ། །མཚོན་པས་ཡིན་ནོ་ཆོས་ཅན་འདི། །ལས་ཀྱིས་ཡིན་ནོ་ཆོས་བདུན་ལྡན། །འདུས་པས་ཡིན་ནོ་འབྲལ་བ་ཡིན། །མདོག་གིས་ཡིན་ནོ་ཞི་རྒྱས་ཀྱིས། །དབྱིབས་ཀྱིས་ཡིན་ནོ་དེ་བཞིན་ནོ། །བསམ་པས་ཡིན་ནོ་དེ་བཞིན་ནོ། །དེ་ལྟར་རྒྱུ་ཡིས་ཡིན་པ་སྟེ། །སྣང་སྲིད་ཐམས་ཅད་རྡོ་རྗེ་ཡིན། །རྡོ་རྗེར་མ་གྱུར་གང་ཡང་མེད། །དེ་ལྟར་རྡོ་རྗེ་མཚོན་པ་འདི། །ཡིན་ན་ཡེ་ནས་ཡིན་པར་མཉམ། །ཆོས་ཅན་ཡེ་ནས་ཡོད་པར་མཉམ། །མེད་ན་མེད་པར་ཡེ་ནས་མཉམ། །བདེན་ན་བདེན་པར་ཡེ་ནས་མཉམ། །རྫུན་ན་རྫུན་པར་ཡེ་ནས་མཉམ། །སྟོང་ན་སྟོང་པར་ཡེ་ནས་མཉམ། །དངོས་ན་དངོས་པོར་ཡེ་ནས་མཉམ། །སྣང་ན་སྣང་བར་ཡེ་ནས་མཉམ་། །མཉམ་ཉིད་མཁའ་འདྲ་གུད་ན་མེད། །དཔེར་ན་གསེར་གཟུགས་ཆུ་ཡི་རོ། །དུག་མཆོག་ཧ་ལ་འབར་བ་དང་། །སྨན་མཆོག་ག་པུར་དཀར་པོ་གཉིས། །སྨན་དང་དུག་ཏུ་ཡེ་ནས་མཉམ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ཆོས་ཉིད་མཉམ་པ་ཆོས་སྐུའི་ལེའུ་སྟེ་ཉེར་གསུམ་པའོ།། །།དེ་ནས་ཡང་ལག་ན་རྡོ་རྗེས་འདི་སྐད་ཅེས་གསོལ་ཏོ། །ཀྱེ་ཀྱེ་རྡོ་རྗེ་སེམས་དཔའ་ཆེ། །བདག་སྣང་ལོག་པ་ཡོད་དམ་མེད། །ཆོས་ཅན་སྣང་བ་བདེན་ནམ་རྫུན། །མི་དགེ་སྤང་དུ་ཡོད་དམ་མེད། །ཅེས་ཞུས་པས། རྡོ་རྗེ་སེམས་དཔས་བཀའ་སྩལ་པ། །ཉོན་ཅིག་རྡོ་རྗེ་འཛིན་པ་སོགས། །ང་མེད་རོ་དང་ཕྲོལ་ཅིག་འཁོར་ཚོགས་ཁྱེད། །ང་དང་སྣང་བ་གཉིས་པ་མེད། །ང་མེད་ང་གཅིག་སུ་ལ་འདུག །སྣང་མེད་སྣང་བ་སུ་ལ་བདེན། །ཆོས་ཅན་དངོས་པོ་གང་ན་འདུག །དགེ་དང་མི་དགེ་མཉམ་པ་ཉིད། །ང་མེད་བདག་མེད་ང་བདག་གང་། །སུ་ལ་ང་བདག་ཡོད་པ་འཁོར། །གང་ཞིག་ཐེ་ཚོམ་སུས་ཟ་བ། །ང་བདག་ལྟོས་ཤིག་ང་བདག་ལྟོས། །བཙལ་ཀྱང་འདུག་ན་ད་རུང་ཚོལ། །ཚོལ་མཁན་ཚོལ་བས་ཚོལ་མཁན་མེད། །བལྟས་ཀྱང་མ་མཐོང་ལྟ་མཁན་མེད། །ལྟ་མཁན་ལྟོས་ཤིག་ལྟ་མཁན་མེད། །དཔེར་ན་ཆོས་ཅན་རྡོ་རྗེ་དེ། །དེ་ཡི་དངོས་པོ་གང་གིས་བྱེད། །བུམ་པས་བྱེད་དམ་པདྨས་བྱེད། ། ― DNG001_Page_0313 ―
[མ་དཔེ་གཟིགས་ན་འདིར་གནོན།]
སྟེང་རྭས་བྱེད་དམ་འོག་རྭས་བྱེད། །འདུས་པས་བྱེད་དམ་རྡོ་རྗེ་གང་། །དེ་བཞིན་ང་བདག་དངོས་པོ་དེ། །ལུས་ཀྱིས་བྱེད་དམ་སེམས་ཀྱིས་བྱེད། །ལུས་ཀྱིས་བྱེད་ན་དངོས་པོ་གང་། །མགོ་དང་རྐང་ལག་དབང་པོ་དང་། །དོན་སྙིང་ནང་ཁྲོལ་ཤ་ལྤགས་རུས། །རྩ་དང་བ་སྤུ་སྐྲ་སེན་གང་། །དེས་ན་ལུས་ཀྱི་དངོས་པོ་མེད། །སེམས་ཀྱིས་བྱེད་ན་གསལ་སྟོང་དང་། །འགྱུ་དྲན་འཛིན་ཆགས་གང་གིས་བྱེད། །ལུས་སེམས་དངོས་པོ་འདི་ཞེས་པ། །རྡོ་རྗེ་སེམས་དཔའ་ངས་མ་རྙེད། །མཚོན་པ་ཙམ་དུ་ང་ཞེས་བྱ། །མིང་ཙམ་འདི་ཞེས་བསྟན་པ་ནི། །ཀུན་ཏུ་བཟང་པོས་བསྟན་དུ་མེད། །རྡོ་རྗེ་སེམས་དཔས་མཚོན་དུ་མེད། །སྣང་བ་མེད་དམ་སྣང་བ་གང་། །སྣང་བ་ཡུལ་གཅིག་སུ་ལ་བདེན། །ཡུལ་དུ་བདེན་རྫུན་གཅིག་ལ་ལྟོས། །དཔེར་ན་འབྱུང་བ་ཆུ་ལྟ་བུར། །འགྲོ་དྲུག་མུ་སྟེགས་རྟག་ཆད་དང་། །རིམ་དགུ་མཐོང་སྣང་ཐ་དད་པས། །མིང་དུ་བདེན་པ་གཅིག་ཀྱང་མེད། །དཔེར་ན་རྒྱ་བོད་ཞང་ཞུང་འདྲ། །མིང་ཙམ་འདི་ཞེས་བསྟན་པ་ནི། །རྡོ་རྗེ་སེམས་དཔས་མཚོན་དུ་མེད། །སྣང་བ་ཡོད་མེད་འཁྲུལ་མ་འཁྲུལ། །འཁྲུལ་ན་འཁྲུལ་པ་བདེན་ནམ་རྫུན། །འཁྲུལ་པ་བདེན་ན་སུ་ལ་བདེན། །འཁྲུལ་པ་རྫུན་ན་དེ་ལྟ་མེད། །མ་འཁྲུལ་པ་ལ་སྣང་ཟེར་སུ། །ཟེར་ན་ཟེར་མཁན་འཁྲུལ་པ་ཡིན། །དེས་ན་ཆོས་ཅན་དངོས་པོ་མེད། །ཡོད་ན་དངོས་པོ་གཏན་ལ་ཕོབ། །གཏན་ལ་ཕེབས་ན་དངོས་པོ་གང་། །དངོས་པོར་འདོད་པ་བློ་ཕུག་ཅན། །བློ་ཕུགས་གང་ལྟར་བྱས་ཀྱང་འཁྲུལ། །བློ་ཕུགས་གཏིབ་དང་སྐལ་ལྡན་བུ། །དགེ་དང་སྡིག་པ་ཡེ་ནས་མཉམ། །ཅི་ཕྱིར་བློ་ཕུགས་གྲོལ་ཕྱིར་རོ། །བློ་བཟང་དགེ་བས་གཏོང་དུ་མེད། །སྡིག་པས་གནོད་པ་བསྐྱལ་བ་མེད། །ཅི་སྟེ་མཚན་མ་མེད་པས་སྨོན་པ་མེད། །སྟོང་པ་ཉིད་ལ་ཕན་གནོད་མེད། །བག་ཆགས་བཟང་རྟོག་ངན་རྟོག་ཡིན། །རྟོག་པས་ནམས་ཀྱང་འཁོར་བ་བྱེད། །འཁོར་བའི་ནང་ན་ཁྱད་པར་ཆེ། །དགེ་བ་སྤྱོད་ཅིག་རིགས་ཀྱི་བུ། །བག་ཆགས་རོ་དང་བྲལ་བར་གྱིས། །བག་ཆགས་རོ་དང་མ་བྲལ་ན། །འཁོར་བའི་གཟུང་ཐག་མི་ཆོད་དོ། །སྐྱེ་བའི་རྟེན་ཕུར་ཕྱུང་རེ་ཀན། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། རྟོག་པ་ཐེ་ཚོམ་གྱི་གེགས་བསལ་ ― DNG001_Page_0314 ―
[མ་དཔེ་གཟིགས་ན་འདིར་གནོན།]
བ་ཆོས་སྐུ་ཞལ་མཐོང་གི་ལེའུ་སྟེ་ཉེར་བཞི་པའོ།། །།དེ་ནས་ཡང་བཀའ་སྩལ་པ། ཉོན་ཅིག་རྡོ་རྗེ་འཛིན་པའི་འཁོར། །དཔེར་ན་སྣང་བ་སྣ་ཚོགས་ཀྱང་། །སྒྱུ་མའི་ཆོ་འཕྲུལ་ཇི་བཞིན་ནོ། །སྒྱུ་མའི་དངོས་པོ་གང་གིས་བྱེད། །སྒྱུ་མའི་རྟེན་འདྲེལ་ཅི་ཡིས་བྱེད། །དཔེར་ན་སྐྱེས་བུ་གཉིད་ལོག་ན། །རྨི་ལམ་དགེ་སྡིག་ཆོ་འཕྲུལ་ནི། །དངོས་པོར་སྣང་བ་ཇི་བཞིན་རྨི། །ཉིན་པར་བག་ཆགས་མཚོན་པ་ལ། །དེ་ལ་དངོས་པོ་ཡོད་དམ་མེད། །དཔེར་ན་མདང་གིས་རྨི་ལམ་ན། །སྐྱེས་བུ་མཚོན་ཐོགས་མང་པོ་ཡིས། །བདག་གསོད་འཐབ་འཁོན་རི་ལ་དེད། །དྲེད་སྔངས་ངལ་ཆད་ཤི་མེད་བྲོས། །སད་པར་གྱུར་ན་དེ་ཅིར་སྣང་། །དེ་བཞིན་སྣང་བའི་དངོས་པོ་འདི། །རི་རབ་གླིང་བཞི་འབྱུང་བ་ཀུན། །དགྲ་གཉེན་ཆགས་སྡང་སྡུག་བསྔལ་ཀུན། །སྒྱུ་མ་རྨི་ལམ་ཇི་བཞིན་ནོ། །ཡོད་ནས་མི་སྣང་མེད་ནས་སྣང་། །མཐོང་སྣང་ཆོས་ཀུན་ཡོད་པ་མེད། །མེད་ལ་ཡོད་གཟུགས་འཁྲུལ་པ་ཡིན། །འཁྲུལ་པའི་དུས་ན་ཡོད་པ་མེད། །ཀུན་རྫོབ་ཙམ་དུ་སུ་ལ་བདེན། །བདེན་ནམ་བདེན་ན་འགྲོ་བ་ཀུན། །ཐམས་ཅད་མ་ལུས་མཐུན་པར་རིགས། །དེས་ན་ཕྱོགས་མཐུན་ཙམ་ཡང་མེད། །དཔེར་ན་དངོས་པོ་ཆུ་ལྟ་བུ། །རིགས་དྲུག་རྟག་ཆད་ཐེག་པ་རྣམས། །ཕྱོགས་མཐུན་ཙམ་ཡང་མི་སྣང་ཕྱིར། །དེས་ན་མེད་ནས་སྣང་བ་ཡིན། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། སྣང་བའི་གནད་བསལ་བའི་ལེའུ་སྟེ་ཉེར་ལྔ་པའོ།། །།དེ་ནས་ལག་ན་རྡོ་རྗེ་ཡིས། །སྟོན་པ་ཉིད་ལ་འདི་སྐད་གསོལ། །ཀྱེ་ཀྱེ་སྟོན་པ་རྡོ་རྗེ་འཆང་། །མེད་ནས་སྣང་བའི་དཔེ་དོན་གང་ལགས། བཀའ་སྩལ་པ། ཉོན་ཅིག་འདུས་པའི་འཁོར་ཚོགས་ཁྱེད། །འཁྲུལ་པ་སྣང་བ་སྣ་ཚོགས་འདི། །ཡོད་ནས་མི་སྣང་མེད་ནས་སྣང་། །དཔེར་ན་སྒྱུ་མའི་དཔེ་བརྒྱད་འདྲ། །སྐྱེས་བུ་གཉིད་ལོག་རྨི་ལམ་ན། །བུ་དང་ཆུང་མ་ནོར་ཕྱུགས་ལྡན། །ཤིན་ཏུ་ལོངས་སྤྱོད་སྐྱིད་ལྡན་ལ། །གོ་མཚོན་དམག་མང་དག་གིས་ནི། །བུ་བསད་ནོར་བཅོམ་སྡུག་བསྔལ་རྨི། །སྐྱེས་བུ་དེ་ཡིས་རྨི་ལམ་དེ། །ཡོད་ནས་སྣང་ངམ་མེད་ནས་སྣང་། །སད་པར་གྱུར་ན་ཅི་སྙམ་སེམས། ། ― DNG001_Page_0315 ―
[མ་དཔེ་གཟིགས་ན་འདིར་གནོན།]
འཁྲུལ་པའི་ཆོས་དེ་ཡོད་དམ་མེད། །དེ་བཞིན་ད་ལྟའི་འཁྲུལ་སྣང་ཡང་། །ཡོད་ནས་སྣང་ངམ་མེད་ནས་སྣང་། །རྨི་ལམ་ཚུལ་དུ་ཀྲི་ལེ་མཉམ། །རྨི་ལམ་ཆོས་དེ་བདེན་ནམ་རྫུན། །བདེན་ན་བདེན་པར་ཀྲི་ལེ་མཉམ། །རྫུན་ན་རྫུན་པར་ཀྲི་ལེ་མཉམ། །དེ་བཞིན་སྒྱུ་མའི་མཁན་པོ་ཡིས། །སྒྱུ་མའི་སྐྱེས་པ་བུད་མེད་དང་། །ཁང་ཁྱིམ་རོལ་མོ་གཅན་གཟན་ཀུན། །ཡོད་ནས་སྣང་ངམ་མེད་ནས་སྣང་། །སྒྱུ་མ་ཤེས་པས་སྒྱུ་མ་མེད། །སྒྱུ་མ་བདེན་རྫུན་སྒྱུ་མར་ཤེས། །དེ་བཞིན་འཁྲུལ་པའི་དངོས་པོ་འདི། །འཁྲུལ་པ་བདེན་རྫུན་འཁྲུལ་པས་ཤེས། །སྒྱུ་མའི་ཆོས་དང་ཀྲི་ལེ་མཉམ། །དེ་བཞིན་སྨིག་རྒྱུ་ཆུར་སྣང་བ། །ཡོད་ནས་མི་སྣང་མེད་ནས་སྣང་། །དངོས་པོའི་ཆུ་ཡང་དེ་བཞིན་ནོ། །སྨིག་རྒྱུ་ཉིད་དང་ཀྲི་ལེ་མཉམ། །ཅིས་ཏེ་བདེན་པ་མེད་པའི་ཕྱིར། །དེ་བཞིན་མིག་སྐྱོན་མིག་ཡོར་ཀྱང་། །ཡོད་ནས་མི་སྣང་མེད་ནས་སྣང་། །སྐྲ་ལོ་བལ་འདབ་ཁབ་ཙམ་ཀུན། །ཡོད་ནས་མི་སྣང་མེད་སྣང་ཕྱིར། །ཀུན་རྫོབ་དངོས་དང་ཀྲི་ལེར་མཉམ། །དངོས་པོ་འཁྲུལ་པ་བདེན་པ་མེད། །དེ་བཞིན་སྤྲུལ་པའི་སྤྲུལ་པ་ཡང་། །ཡོད་ནས་མི་སྤྲུལ་མེད་ནས་སྤྲུལ། །སྤྲུལ་པ་ཡིན་པས་ཡོད་པ་མེད། །དེ་བཞིན་འཁྲུལ་པའི་ལས་རྣམས་ཀྱང་། །སྤྲུལ་པ་ཉིད་དང་ཀྲི་ལེ་མཉམ། །ཅི་ཕྱིར་འཁྲུལ་པ་ཟེར་བས་ཆོག །དེ་བཞིན་གཟུགས་བརྙན་ཆུ་ཟླ་འདྲ། །ཀློང་ངེ་འདུག་ཀྱང་སྣང་བ་མེད། །ཡོད་ན་སྣང་བ་མཐུན་ནོ་ཅོག །སྣང་བ་གཅིག་ལ་མཐུན་པ་མེད། །གཟུགས་བརྙན་ཉིད་དང་ཀྲི་ལེ་མཉམ། །དེ་ལྟར་སྒྲ་བརྙན་ལྟ་བུ་དེ། །ཡོད་ནས་མ་བཏགས་མེད་ནས་བཏགས། །ཡོད་ན་མིང་བཏགས་གཅིག་པར་རིགས། །གཅིག་ལ་མིང་མང་དོན་མཐུན་མེད། །སྒྲ་བརྙན་ཉིད་དང་ཀྲི་ལེ་མཉམ། །དེས་ན་བྲག་ཆ་ཉིད་དང་ཁྱད་པར་མེད། །ཡོད་ནས་མི་སྣང་མེད་ནས་སྣང་། །དཔེར་ན་དྲི་ཟའི་གྲོང་ཁྱེར་འདྲ། །ཀྲོང་ངེ་འདུག་པའི་དུས་ན་མེད། །སྣང་བ་རང་གིས་མེད་པ་ཡིན། །མེད་ན་སེམས་ཀྱི་ཆོ་འཕྲུལ་ལྟོས། །སྒྱུ་མའི་ཆོས་ཉིད་མཐོང་ན་ལྟ་བ་ཡིན། །མཐོང་མེད་མཐོང་ན་ཡིན་པ་མེད། །ལྟ་བ་ཡིན་པ་མེད་པ་ཡིན། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། སྒྱུ་མ་ཆོས་མཐུན་གྱིས་ ― DNG001_Page_0316 ―
[མ་དཔེ་གཟིགས་ན་འདིར་གནོན།]
སྣང་བ་མེད་པར་ཐག་བཅད་པའི་ལྟ་བ་བསྟན་པའི་ལེའུ་སྟེ་ཉེར་དྲུག་པའོ།། །།དེ་ནས་ཡང་བཀའ་སྩལ་པ། རྡོ་རྗེ་འཛིན་པའི་འཁོར་འདུས་ཉོན། །མཐོང་ངམ་མཐོང་ན་མཐོང་བས་ལྟོས། །མཐོང་བ་མེད་ན་ཅི་ཞིག་བསྒོམ། །དཔེར་ན་དམུས་ལོང་འགའ་དག་གིས། །གླང་ཆེན་རྩལ་ལྡན་ལག་ནོམས་ནས། །སྣ་དང་མཇུག་མ་རྐང་ལག་རྒྱབ། །རང་རང་གང་རེག་བསྒོམ་པ་འདྲ། །བསྒོམ་པས་གླང་ཆེན་རིང་དུ་སྤངས། །ལྟ་བའི་གནས་ལུགས་མ་རྟོགས་པར། །སྒོམ་པ་བྱེད་པའི་བླུན་པོ་རྣམས། །དམུས་ལོང་གླང་ཆེན་བསྒོམ་པ་འདྲ། །དེ་བས་མཁས་པས་ལེགས་པར་ལྟོས། །རྨི་ལམ་ལྟོས་ཤིག་མཐོང་བ་ན། །རྨི་ལམ་ཤེས་ནས་རྨི་ལམ་བསྒོམ། །རྨི་ལམ་གོམས་པ་བསྒོམ་པ་ཡིན། །སྒྱུ་མ་མཐོང་ན་སྒྱུ་མ་བསྒོམ། །སྒྱུ་མའི་གཟུགས་དང་སྒྱུ་མའི་སྒྲ། །སྒྱུ་མའི་དྲི་དང་སྒྱུ་མའི་རོ། །སྒྱུ་མའི་རེག་དང་སྒྱུ་མའི་ཆོས། །སྒྱུ་མ་ལེགས་པར་མཐོང་བ་ན། །སྒྱུ་མ་འདྲིས་པ་བསྒོམ་པ་ཡིན། །བསྒོམ་པར་གྱིས་ཤིག་སྒྱུ་མ་ལས། །སྒྱུ་མར་སྤྱོད་ཤེས་སྒྱུ་མ་ཡིན། །སྒྱུ་མ་འབྲས་མེད་འབྲས་བུ་ཡིན། །དེ་བཞིན་རྨི་ལམ་སྨིག་རྒྱུ་རྣམས། །དེ་ལྟར་མཁས་པས་ལེགས་པར་ལྟོས། །མཐོང་ངམ་མཐོང་ན་ལྟ་བ་ཡིན། །དེ་དག་གོམས་ན་སྒོམ་པའོ། །གཉིས་མེད་སྤྱད་ན་སྤྱོད་པ་ཡིན། །འདུ་འབྲལ་མེད་པ་འབྲས་བུའོ། །ཞེས་གསུངས་སོ། །དེ་ནས་རིག་འཛིན་དགེ་མཐོང་དེས། །སངས་རྒྱས་རྡོ་རྗེ་སེམས་དཔའ་དང་། །མགོན་པོ་རྡོ་རྗེ་འཛིན་པ་ལ། །འཛུམ་པའི་མདངས་ཕྱུང་གུས་བཏུད་ནས། །རྒྱལ་བའི་ཚོགས་ལ་འདི་སྐད་གསོལ། །དྲུག་གི་དཀྱིལ་འཁོར་གཉིས་འདུས་ལྷར། །བདག་འདྲ་མ་རིག་རྟོག་པ་ཡིས། །ཡང་དག་ཉིད་ལ་ལོག་བལྟས་ནས། །རྩ་བའི་དམ་ཚིག་ཉམས་པའི་ཚོགས། །མི་འཆབ་མི་སྦེད་མཐོལ་ལོ་བཤགས། །སླན་ཆད་བསྡམ་མོ་དབང་མཛོད་ཅིག །སྔ་རབས་གོང་དུ་ཅི་བགྱིས་པ། །ལུས་ངག་ཡིད་ཀྱི་འབད་རྩོལ་གྱིས། །ཕ་རོལ་ཕྱིན་དྲུག་ཉམས་བླངས་ནས། །འགྱོད་ཚངས་དབང་གསོལ་ཞི་ཁྲོའི་ལྷར། །ལུས་ངག་ཡིད་གསུམ་མོས་ཕྱག་བཤགས། །བྱིན་རླབས་སྔགས་མཆོག་བརྒྱ་པ་ནི། ། ― DNG001_Page_0317 ―
[མ་དཔེ་གཟིགས་ན་འདིར་གནོན།]
བདུན་གསུམ་ཉི་ཤུ་རྩ་གཅིག་གམ། །བརྒྱ་རྩ་བརྒྱད་དུ་བཤགས་པ་བྱ། །སྨྲེ་འགྱོད་མཐོལ་བ་གདུང་བའི་ཚིག །བརྐྱང་ཕྱག་གུས་ཕྱག་ཚིག་གིས་བཤགས། །སེམས་བསྐྱེད་ལ་བརྩོན་འགྲོ་བའི་དོན། །སྨོན་ལམ་བཀྲ་ཤིས་དགེ་བས་བཤགས། །ཐམས་ཅད་ཡུལ་མེད་མིང་བྲལ་མཐོང་། །རྟོག་པ་མཉམ་ཉིད་ལྟ་བས་བཤགས། །ཨེ་མ་བདག་གི་ཕུང་པོ་ཁམས་དང་སྐྱེ་མཆེད་རྣམས། །འདོད་པའི་ཡོན་ཏན་ལྔར་བསྒྱུར་ཏེ། །ཕྱི་ནང་གསང་བའི་མཆོད་པར་བཞེས། །བ་སྤུ་རྡུལ་ཕྲན་རེ་རེས་ཀྱང་། །འགྲོ་བའི་དོན་རྣམས་བྱེད་པར་ཤོག །ཅེས་གསོལ་ནས། ཕྱི་ནང་གསང་བ་གསུམ་གྱི་མཆོད་པ་ཕུལ་ལོ། །དབང་མཆོག་རྒྱལ་པོའི་རྒྱུད་ལས། སྒྱུ་མ་བཤགས་མཆོད་སྨོན་ལམ་གྱི་ལེའུ་སྟེ་ཉེར་བདུན་པའོ།། །།དེ་ནས་འཁོར་དེ་དག་གིས། རྡོ་རྗེ་སེམས་དཔའ་མགོན་པོ་ལགས། །རྒྱུད་ཆེན་འདི་ཡི་དཔེ་མཚོན་ཅི། །གང་གི་དུས་སུ་དར་བར་བགྱི། །ཞེས་ཞུས་སོ། །རྡོ་རྗེ་སེམས་དཔས་བཀའ་སྩལ་པ། །ཉོན་ཅིག་བཛྲ་པཱ་ཎི་སོགས། །ང་ཡི་རྒྱུད་ཆེན་རྒྱལ་པོ་ནི། །དཔེར་ན་ཉི་མ་མུན་པ་འདྲ། །མུན་ཁུང་སྒྲོལ་བའི་རྒྱུད་དུ་ཟུང་། །དཔེར་ན་ནད་དང་སྨན་ལྟ་བུ། །སྨན་མཆོག་རྒྱལ་པོའི་རྒྱུད་དུ་ཟུང་། །དཔེར་ན་རྩི་ཤིང་མེ་ལྟ་བུ། །བསྐལ་པའི་མེ་ཆེན་རྒྱུད་དུ་ཟུང་། །དཔེར་ན་དམངས་དང་རྒྱལ་པོ་འདྲ། །དབང་མཆོག་རྒྱལ་པོའི་རྒྱུད་དུ་ཟུང་། །དམ་པ་རིགས་བརྒྱའི་ལྷ་གསལ་བས། །གསང་ཆེན་རིགས་བརྒྱའི་རྒྱུད་དུ་ཟུང་། །དེ་ཉིད་རིགས་ལྔའི་ལྷར་བསྡུས་ནས། །ཡི་གེ་བརྒྱ་པའི་སྔགས་བརྗོད་པས། །ཡི་གེ་བརྒྱ་པའི་རྒྱུད་དུ་ཟུང་། །ཉམས་ཆག་ཐམས་ཅད་འདིས་བསྐང་བས། །བཤགས་པ་ཆེན་པོའི་རྒྱུད་དུ་ཟུང་། །འགྲོ་དྲུག་གནས་ནས་འདིས་འདྲེན་པས། །འཁོར་བ་དོང་སྤྲུགས་རྒྱུད་དུ་ཟུང་། །ཐམས་ཅད་སྒྱུ་མར་ལ་བཟླ་བས། །སྒྱུ་མ་མཉམ་ཉིད་རྒྱུད་དུ་ཟུང་། །སྣང་སྲིད་ལྷ་དང་དཀྱིལ་འཁོར་དང་། །བསྙེན་བསྒྲུབ་བསྐྱེད་རྫོགས་དམ་ཚིག་སྔགས། །ཕྱག་རྒྱ་དབང་དང་དམ་ཚིག་དང་། །འཁོར་འདས་ཐམས་ཅད་བལྟས་པས་མཐོང་། །ལྟ་བ་དབང་མཆོག་རྒྱུད་དུ་ཟུང་། །མཐོང་ནས་བསྒོམ་དུ་མེད་པས་ན། །སྒོམ་པ་དབང་མཆོག་རྒྱུད་དུ་ཟུང་། ། རྡོ་རྗེ་སེམས་དཔའ་ཡི་གེ་བརྒྱ་པ་ཐུགས་ཕྲིན་ལས་ཐམས་ཅད་ཀྱི་དམ་ཚིག་གི་རྒྱུད་ཅེས་བྱ་བ།― DNG001_Page_0318 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། བཛྲ་སཏྭ་ཤ་ཏཱ་ཀྵ་ར་ཨ་བྷི་ཥེ་ཀ་ཏོཏྟ་མ་རཱ་ཛ་ཙིཏྟ་ཀརྨ་སརྦ་ས་མ་ཡ་ཏནྟྲ་ནཱ་མ། བོད་སྐད་དུ། རྡོ་རྗེ་སེམས་དཔའ་ཡི་གེ་བརྒྱ་པ་ཐུགས་ཕྲིན་ལས་ཐམས་ཅད་ཀྱི་དམ་ཚིག་གི་རྒྱུད་ཅེས་བྱ་བ། བཅོམ་ལྡན་འདས་དཔལ་རྡོ་རྗེ་འཆང་ཆེན་པོ་ཆོས་ཀྱི་སྐུ་ལ་ཕྱག་འཚལ་ལོ། །འདི་སྐད་བདག་ ― DNG001_Page_0319 ―
[མ་དཔེ་གཟིགས་ན་འདིར་གནོན།]
གིས་ཐོས་པའི་དུས་གཅིག་ན། བཅོམ་ལྡན་འདས་རྡོ་རྗེ་འཆང་ཆེན་པོ་འོག་མིན་གནས་ཀྱི་དང་པོ་རྡོ་རྗེ་དབྱིངས་ན་བཞུགས་ཏེ། དེའི་ཚེ་དེའི་དུས་ན། རྡོ་རྗེ་འཆང་བ་ཡབ་ཡུམ་དང་། །རྡོ་རྗེ་སེམས་དཔའ་ལ་སོགས་ཏེ། བུཌྜྷ་རྡོ་རྗེ་དང་། རིན་ཆེན་རྡོ་རྗེ་དང་། པདྨ་རྡོ་རྗེ་དང་། ཀརྨ་རྡོ་རྗེ་དང་། སངས་རྒྱས་སྤྱན་ལ་སོགས་ཏེ། འབྱུང་བའི་ཡུམ་ལྔ་དང་། ས་ཡི་སྙིང་པོ་ལ་སོགས་ཏེ། སེམས་དཔའ་བརྒྱད་དང་། ལཱ་སྱ་ལ་སོགས་ཏེ། སེམས་མ་བརྒྱད་དང་། རྣམ་རྒྱལ་ལ་སོགས་ཏེ། སྒོ་བ་བཞི་དང་། ལྕགས་ཀྱུ་ལ་སོགས་ཏེ། སྒོ་མ་བཞི་དང་། བརྒྱ་བྱིན་ལ་སོགས་ཏེ། ཐུབ་པ་དྲུག་རྣམས་ཀྱིས་རྡོ་རྗེ་འཆང་ཆེན་པོ་སྟོན་པ་ལ་གཡོན་ཕྱོགས་ནས་བསྐོར་རོ། །བཛྲ་ཁྲག་འཐུང་ལ་སོགས་ཏེ། རིགས་ཀྱི་ཁྲོ་བོ་ལྔ་དང་། བཛྲ་ཀྲོ་དྷི་ལ་སོགས་ཀྲོ་དྷི་མ་ལྔ་དང་། གཽ་རཱི་ལ་སོགས་ཏེ། ཀཽ་རཱི་བརྒྱད་དང་། སིདྷ་མུ་ཁ་ལ་སོགས་ཏེ། ཕྲ་མེན་བརྒྱད་དང་། ལྕགས་ཀྱུ་མ་ལ་སོགས་ཏེ། སྒོ་མ་བཞི་དང་། སྲིན་མོ་སྨུག་ནག་ལ་སོགས་ཏེ། ཡེ་ཤེས་ཀྱི་དབང་ཕྱུག་མ་ཉི་ཤུ་རྩ་བརྒྱད་ཀྱིས་སྟོན་པ་རྡོ་རྗེ་འཆང་ལ་གཡས་རོལ་ནས་བསྐོར་ཏེ་བཞུགས་སོ། །གཞན་ཡང་དཀྱིལ་འཁོར་གྱི་ལྷ་ཚོགས་བསམ་གྱིས་མི་ཁྱབ་པ་ཕུར་པ་པདྨ་བདུད་རྩི་མ་གཤིན་ལ་སོགས་པས་ཡོངས་སུ་བསྐོར་རོ། །ཚངས་པ་ལ་སོགས་པའི་ལྷ་དང་། ཀླུ་དང་། ལྷ་མ་ཡིན་དང་། ཁྱབ་འཇུག་ལ་སོགས་པས་ཡོངས་སུ་བསྐོར་རོ། །རྡོ་རྗེ་དྲག་མོ་ལ་སོགས་པ་མཁའ་འགྲོ་མ་བསམ་གྱིས་མི་ཁྱབ་པས་བསྐོར་ཏེ། བསྐོར་བ་དང་མཆོད་པས་མཆོད་ཅིང་གནས་སོ། །གཙོ་འཁོར་དེ་རྣམས་ཐམས་ཅད་ཀྱང་ཡིན་མིན་སྤང་བླང་མེད་པའི་ཏིང་ངེ་འཛིན་རྡོ་རྗེ་སྙིང་པོ་རྒྱ་ཆད་མེད་པར་གནས་པ་ལ། འཁོར་དེ་དག་གི་ནང་ནས་རྡོ་རྗེ་སེམས་དཔས་ཁྲོ་བོ་ཕྱག་ན་རྡོ་རྗེ་མངོན་པར་སྤྲུལ་ཏེ། སྟོན་པ་རྡོ་རྗེ་འཆང་བ་ལ་གཡས་ཕྱོགས་སུ་བསྐོར་བ་ལན་གསུམ་བྱས་ཏེ་ཡན་ལག་ལྔ་ས་ལ་གཏུགས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་སྦྱར་རྡོ་རྗེ་བཟུང་སྟེ། རྡོ་རྗེ་འཆང་བ་ཆེན་པོ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་སྟོན་པ་རྡོ་རྗེ་འཆང་། །རྡོ་རྗེའི་དབྱིངས་ན་ཀུན་བདེ་སྟེ། །ཁམས་གསུམ་འགྲོ་དྲུག་ཀུན་ ― DNG001_Page_0320 ―
[མ་དཔེ་གཟིགས་ན་འདིར་གནོན།]
འཁོར་བ། །མཐོང་ལོག་གཟུང་འཛིན་དུག་ལྔ་ཡིས། །ཆགས་སྡང་དགེ་སྡིག་ལས་སྤྱོད་ནས། །བདེ་གཤེགས་སྙིང་པོས་ཡོངས་ལ་ཁྱབ། །ཐུགས་རྗེ་ཆེན་པོས་མི་གཟིགས་སམ། །སྔོན་གྱི་ཉིད་ཀྱི་ཐུགས་དམ་ཅི། །དེ་བས་འཁོར་བ་ཐུགས་རྗེས་ཟུང་། །ཞེས་ཞུས་པས། དེ་ནས་སྟོན་པ་རྡོ་རྗེ་འཆང་དེ་ཏིང་ངེ་འཛིན་ཡིན་མིན་མེད་སྤང་བླང་མེད་པའི་མཉམ་པ་ཉིད་དེ་ལས་བཞེངས་ཏེ། གླང་པོ་ཆེའི་ལྟ་སྟངས་ཀྱིས་ནི་གཟིགས། །སེང་གེའི་སྒྲ་འདི་སྐད་ཅེས་བསྒྲགས་སོ། །ཉོན་ཅིག་རྡོ་རྗེ་དབྱིངས་སོགས་འཁོར། །བཛྲ་པཱ་ཎི་རྩེ་གཅིག་གཏོད། །གསང་སྔགས་གསང་བའི་སྙིང་པོ་ཧཱུཾ། །གསང་བ་སྔགས་ཀྱི་སྤྱི་གཞི་ཡིན། །སྙིང་པོ་དེ་ཡིས་ཀུན་ལ་ཁྱབ། །རྒྱ་ཆད་ཕྱོགས་ལྷུང་ག་ནས་མེད། །རྒྱུ་རྐྱེན་མཚུངས་པ་འཁོར་འདས་ཚུལ། །མྱ་ངན་འདས་པ་ང་ཉིད་ཀྱིས། །འཁོར་འདས་འགྲོ་བ་སྐལ་ལྡན་ལ། །བརྡ་རྟགས་སྒྲ་དོན་ཐུགས་རྗེས་བཟུང་། །ཞེས་ཞུས་པའི་ལན་གནང་བའོ། །རྡོ་རྗེ་སེམས་དཔའ་ཡི་གེ་བརྒྱ་པ་ཐུགས་ཕྲིན་ལས་ཐམས་ཅད་དམ་ཚིག་གི་རྒྱུད་ལས། ཕུན་སུམ་ཚོགས་པའི་ཞུས་ལན་གྱི་ལེའུ་སྟེ་དང་པོའོ།། །།དེ་ནས་ཕྱག་ན་རྡོ་རྗེ་ཡིས། །རྡོ་རྗེ་འཆང་ལ་ཞུ་བ་མེད་པས་འདི་སྐད་ཅེས་གསོལ་ཏོ། །གསང་སྔགས་གསང་བའི་སྙིང་པོ་ལ། །བརྡ་རྟགས་སྒྲ་དོན་ཁོག་ཕུབ་ནས། །ཡེ་ཤེས་རང་བྱུང་ཅི་ལྟར་འཆར། །སྡིག་པ་མཚམས་མེད་མི་དགེ་བཅུ། །ཚུལ་ཁྲིམས་དམ་ཚིག་ཇི་ལྟར་ལགས། །ཕྲིན་ལས་ཁ་ཚར་ཇི་ལྟར་བསྒྲུབ། །ཆོས་ཉིད་ལ་རུ་ཇི་ལྟར་བཟླ། །ཞེས་ཞུས་པ་དང་། རྡོ་རྗེ་འཆང་གིས་བཀའ་སྩལ་པ། །ཉོན་ཅིག་བཛྲ་པཱ་ཎི་ཁྱོད། །སྙིང་པོ་ལ་ཡང་རྣམ་གསུམ་སྟེ། །སོ་སོའི་རིགས་ཀྱི་སྙིང་པོ་དང་། །སྐུ་གསུང་ཐུགས་སུ་ཐམས་ཅད་འདུས། །དེས་ན་རང་བྱུང་སྙིང་པོ་ཧཱུཾ། །དེ་དག་དོན་ལ་སྙིང་མེད་དེ། །ཚིག་ལམ་རྐྱེན་གྱིས་མ་མཚོན་ན། །རང་བྱུང་སྙིང་པོའི་དོན་མི་རྟོགས། །མཚོན་བྱེད་བརྡ་དང་ངག་གིས་མཚོན། །ཐམས་ཅད་འདུས་པའི་སྙིང་པོ་ཧཱུཾ། །སྙན་བརྒྱུད་པྲ་ཁྲིད་གདམས་ངག་གིས། །ཡོད་མེད་གཉིས་ཀྱི་མཇུག་ཁྲིད་བསྟན། །གསང་སྔགས་ ― DNG001_Page_0321 ―
[མ་དཔེ་གཟིགས་ན་འདིར་གནོན།]
སྣང་སྲིད་འཁོར་འདས་ཆོས། །བརྡ་རུ་བསྟན་པས་ཡོད་མེད་ཤེས། །དང་པོ་བརྡ་ཡིས་དེ་མཚོན་པས། །རང་ལུས་ཟག་བཅས་རྟགས་སུ་རྫོགས། །ཕྱི་ནང་ཐམས་ཅད་ནང་དུ་སྲིད། །དཀྱིལ་འཁོར་བུམ་པ་སྐུར་རྫོགས་རྟགས། །མིང་བཏགས་རྟོག་འཛིན་སྲོག་གི་གཞི། །བརྡ་བཏགས་གྲོལ་ན་སྲོག་མེད་རྟོགས། །གང་སྣང་མིང་དུ་བཏགས་པ་ཀུན། །ཡི་གེར་འདུས་པ་ཚིག་གི་གཞི། །རང་བྱུང་ཧཱུཾ་གི་བརྡ་ཡིས་བཏགས། །སྒྲ་བཏགས་ཐམས་ཅད་སྙིང་པོ་ཧཱུཾ། །རང་ལ་རང་གསང་གསང་བའི་སྒྲ། །རང་གསང་ཐོས་ནས་མིང་མེད་སྒྲོལ། །སྲོག་སྙིང་གཉིས་མེད་རང་བྱུང་བས། །ཡུལ་མེད་མིང་བྲལ་དོན་གྱི་མཆོག །ཆོས་མིན་ཆོས་ཉིད་རང་བྱུང་རང་། །དེ་བཞིན་ཉིད་དེ་ཅི་ཡང་མེད། །ལྟ་བ་མཐའ་ཆོད་ཡིན་པ་མེད། །སྒོམ་པ་རང་བྱུང་མིན་པ་མེད། །སྤྱོད་པ་མཉམ་ཉིད་སྤང་བླང་མེད། །འབྲས་བུ་རང་ཆས་རེ་དོགས་མེད། །དོན་གྱི་མཆོག་ཅེས་ཁོག་ཏུ་དབུབས། །སྙིང་པོ་ཡེ་ནས་དེ་ལྟར་ཡིན། །གཞི་དང་དངོས་པོའི་དོན་རྟོགས་པས། །ཀུན་གྱི་གཞི་ཡིན་དངོས་རྩལ་སྲིད། །སྲིད་པ་རང་གྲོལ་གཞི་མ་རང་། །གཞི་ལས་འདས་པས་ཕྱིར་མི་ལྡོག །ཡེ་ཤེས་རང་བྱུང་རང་གྲོལ་ཡིན། །སྐུ་གསུང་ཐུགས་རྗེ་རང་བྱུང་འཆང་། །སྡིག་བཅུའི་བསྲུང་བསྡམ་བཤགས་ཐབས་དང་། །ཕྲིན་ལས་རིམ་བཞིའི་ལས་ཁ་དང་། །ཆོས་ཉིད་ལ་བཟླ་ང་ཡིས་བསྟན། །ཞེས་གསུངས་སོ། །རྡོ་རྗེ་སེམས་དཔའ་ཡི་གེ་བརྒྱ་པའི་རྒྱུད་ལས་ཞུས་ལན་ཁོག་ཕུབ་པའི་ལེའུ་སྟེ་གཉིས་པའོ།། །།དེ་ནས་ཡང་བཛྲ་པཱ་ཎིས་ཞུས་པ། ཀྱེ་ཀྱེ་སྟོན་པ་རྡོ་རྗེ་འཆང་། །འཁོར་འདས་དེ་དོན་ཁྱོད་ཡིན་ན། །འགྲོ་དྲུག་ཁྱད་པར་དགེ་སྡིག་དང་། །ཉམས་དང་ཉམས་པའི་འབྲས་བུ་གང་། །ཞེས་གསོལ་པ་དང་། ཆོས་སྐུ་རྡོ་རྗེས་བཀའ་སྩལ་པ། །ཉོན་ཅིག་ལག་ན་རྡོ་རྗེ་ཉོན། །འཁོར་འདས་གསང་བ་སྒྲོལ་མ་སྒྲོལ། །གསང་བའི་སྙིང་པོ་སྤྱི་ལ་ཡིན། །རང་བཞིན་རང་རྟགས་མྱ་ངན་འདས། །ང་སོགས་མཐར་མཁྱེན་སྐུ་གསུང་ཡིན། །ཡེ་ཤེས་རང་བྱུང་རང་རིག་ཡིན། །རང་བཞིན་མ་རིག་ཆགས་སྡང་བས། །རྒྱུ་འབྲས་འཛིན་ཆགས་དུག་ལྔར་འཁོར། །མཐོ་ ― DNG001_Page_0322 ―
[མ་དཔེ་གཟིགས་ན་འདིར་གནོན།]
རིས་ངན་སོང་ཕྲ་རགས་ཁྱད། །གཟུང་འཛིན་ལུས་ངག་ཡིད་ཀྱིས་སྡིག །མི་དགེ་བཅུ་དང་མཚམས་མེད་ལྔ། །རིགས་དྲུག་ལས་ཀྱི་རྣམ་སྨིན་བསགས། །འདོད་ལོག་མ་བྱིན་སྲོག་བཅད་དང་། །མི་ཚངས་སྤྱོད་དང་རྫུན་དང་ནི། །ཕྲ་མ་ངག་འཁྱལ་ལོག་ལྟ་དང་། །བརྣབས་སེམས་གནོད་སེམས་རྣམ་པ་བཅུས། །ཕྲ་རགས་གནས་ཀྱི་ཁྱད་པར་ལས། །དུག་ལྔས་གཙོ་བྱས་མི་དགེ་བཅུས། །འགྲོ་དྲུག་གནས་ན་སྡུག་བསྔལ་ཉོན་མོངས་སོ། །རང་རང་ལས་དང་ཚེ་ཚད་གཟུགས་བོང་ནི། །ཁམས་གསུམ་སེམས་ཅན་དེ་བཞིན་ནོ། །ལྷོ་ཕྱོགས་འཛམ་གླིང་མི་རིགས་ལ། །འགྲོ་དང་ལྟུང་བའི་གླིང་འདི་ཡིན། །སྙིང་པོའི་དོན་ལ་མཇལ་ཞིང་རྟོགས་ནུས་ན། །རིགས་དང་ན་ཚོད་རྒན་གཞོན་མེད། །དབུལ་ཕོངས་ཡིན་ཀྱང་མཆོག་ཏུ་འགྱུར། །སྤྲང་པོས་རྒྱལ་པོའི་སྲིད་ཟིན་འདྲ། །ཐམས་ཅད་སྣང་བ་སྙིང་པོར་འགྱུར། །མར་མེ་གཅིག་གི་བྱིན་རླབས་ཀྱིས། །བསྐལ་པའི་མུན་ནག་སེལ་བ་བཞིན། །སྙིང་པོའི་དོན་རིགས་སྐད་ཅིག་མས། །བསྐལ་བར་བསགས་པའི་སྒྲིབ་པ་བྱང་། །ནོར་བུ་རིན་ཆེན་བསྲེལ་བའི་མིར། །དབུལ་བའི་འཇིགས་པ་མེད་པ་ལྟར། །མཚམས་མེད་ལྔ་དང་སྡིག་པ་བཅུ། །སྙིང་པོའི་དོན་གོ་སྐད་ཅིག་གིས་ནི་བྱང་། །ལྟུང་གནས་འཁོར་བའི་འཇིགས་པ་མེད། །སྙིང་པོའི་དོན་འདུས་སུས་མཐོང་བ། །སྦྱིན་དང་ཚུལ་ཁྲིམས་བརྩོན་འགྲུས་བཟོད། །བསམ་གཏན་སྨོན་ལམ་སྟོབས་དང་ཐབས། །ཤེས་རབ་ཡེ་ཤེས་རྣམ་པ་བཅུ། །ས་དང་དགེ་བཅུ་ཕ་རོལ་རྫོགས། །དོན་གསང་སྙིང་པོའི་ཚིག་ཙམ་གྱིས། །ཉན་ཐོས་ལ་སོགས་དབུ་མ་དང་། །ཕྱོགས་ལྟའི་ཐེག་པ་ཟིལ་གྱིས་གནོན། །རྒྱུད་ལུང་མན་ངག་སྙིང་པོའི་ཆོས། །སེང་གེའི་སྒྲ་གྲགས་གཞན་འབྲོས་བཞིན། །སྡིག་སྒྲིབ་ཉོན་མོངས་བྱང་བར་ངེས། །ལུས་ངག་བར་མེད་དང་བར་གསལ། །སྙིང་པོའི་དོན་ལ་ཡོངས་མེད་པར། །ལུས་ངག་འགྱུ་དྲན་རང་བྱུང་བས། །སྡིག་སྒྲིབ་རང་གྲོལ་ཡེ་ཤེས་རང་། །འགྲོ་བ་ཀུན་ལ་རང་བཞིན་གནས། །དེ་ལ་དེ་བསྟན་དེ་ཡང་ཐོབ། །ཅེས་གསུངས་སོ། །ཡི་གེ་བརྒྱ་པའི་རྒྱུད་ལས་སྙིང་པོའི་ ― DNG001_Page_0323 ―
[མ་དཔེ་གཟིགས་ན་འདིར་གནོན།]
དོན་རྟོགས་ན་སྡིག་བཅུ་རང་དག་གི་ལེའུ་སྟེ་གསུམ་པའོ།། །།དེ་ནས་ཡང་ལག་ན་རྡོ་རྗེས་གསོལ་པ། ཀྱེ་ཀྱེ་སྟོན་པ་རྡོ་རྗེ་འཆང་། །གསང་བ་གསང་བའི་སྙིང་པོ་ཡིས། །གསང་སྔགས་དམ་ཚིག་སྐྱོན་ཡོན་གང་། །དམ་ཚིག་བསྲུང་སྡོམ་བཤགས་ཐབས་ཞུ། །ཞེས་གསོལ་པ་དང་། རྡོ་རྗེ་འཆང་གིས་བཀའ་སྩལ་པ། །ཉོན་ཅིག་བཛྲ་པཱ་ཎི་སོགས། །གསང་སྔགས་གསང་བའི་སྒོར་འཇུག་ན། །སྦྲུལ་ནི་རྨྱུག་དོང་ཞུགས་པ་འདྲ། །གསང་སྔགས་གསང་བའི་དོན་སྟོན་ལ། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་དབུལ། །སྐུ་གསུང་ཐུགས་ཀྱི་དམ་ཚིག་བསྲུང་། །ལུས་མིག་སྲོག་ལྟར་བཀུར་བར་བྱ། །རྒྱུད་ལུང་ཁོང་ཁྲོལ་སློབ་དཔོན་ལ། །དམ་ཚིག་ལུས་ལ་ཚད་བཅུགས་བཀུར། །དབང་བསྐུར་སྲོག་གི་སློབ་དཔོན་ལ། །དམ་ཚིག་དཔྲལ་གྱི་མིག་ལྟར་བསྲུང་། །མན་ངག་བལྟ་བསྒོམ་སློབ་དཔོན་ལ། །དམ་ཚིག་སྲོག་ལྟར་བསྲུང་བ་ཡིན། །ཡི་དམ་ལྷ་དང་མི་འབྲལ་བསྒོམ། །ལྕམ་དྲལ་ཕྲག་དོག་ངན་སེམས་སྤང་། །ཕ་སྤུན་སྲིང་ལ་དཔྱའ་མི་བྱ། །སྐུ་ཡི་དམ་ཚིག་བསྲུང་སྡོམ་ཡིན། །སྔགས་དང་བླ་མའི་གསུང་མི་བཅག །ཆོས་ལ་མི་བཅོས་སེལ་མི་གཞུག །རྫུན་སོགས་ངག་གི་སྐྱོན་རྣམས་སྤང་། །གསུང་གི་དམ་ཚིག་བསྲུང་སྡོམ་ཡིན། །གསང་བའི་མན་ངག་སྤེལ་མི་བྱ། །དམ་ཚིག་གནོད་སེམས་སེམས་ལ་སྤང་། །གདམས་པའི་དོན་ལས་གཞན་མི་བརྣབ། །ཐུགས་ཀྱི་དམ་ཚིག་བསྲུང་སྡོམ་ཡིན། །གཞན་ཡང་ཡན་ལག་ཉི་ཤུ་ལྔ། །ཤེས་པར་བྱ་དང་བསྒྲུབ་པར་བྱ། །ཐོབ་པར་བྱ་དང་དང་དུ་བླང་། །མི་སྤང་དམ་ཚིག་བསྲུང་བ་ཡིན། །ཡན་ལག་སྟོང་དང་རྩ་བརྒྱད་ཀྱང་། །དེ་བཞིན་ཤུགས་ལས་བསྲུང་བ་ཡིན། །ལུས་ངག་ཡིད་གསུམ་སྡོམ་པའི་དོན། །དམ་ཚིག་ཡིད་བཞིན་རིན་པོ་ཆེ། །འཁོར་བའི་རྒྱ་མཚོ་སྒྲོལ་བའི་གྲུ། །སྙིང་པོ་གོམས་འདྲིས་རྟོགས་པ་ནི། །བསྲུང་སྡོམ་མེད་དང་ཕྱལ་པ་ཡིན། །ཡུལ་མེད་མིང་དང་བྲལ་ཕྱིར་རོ། །དམ་ཚིག་མི་ལྡན་གང་ཟག་ནི། །གསང་སྔགས་བླ་མེད་བསླབ་པའི་ཕྱིར། །བཀའ་བརྒྱུད་དོན་ལ་མཁས་གྱུར་ཀྱང་། །བེ་སྦྲེལ་གཡང་དུ་ ― DNG001_Page_0324 ―
[མ་དཔེ་གཟིགས་ན་འདིར་གནོན།]
ལྟུང་བ་བཞིན། །བདག་གཞན་གཉིས་ཀ་ན་རཀ་ནས། །དེ་ཉིད་ངན་སོང་རྡོ་རྗེའི་གནས། །དེ་བས་དམ་ཚིག་ཚུལ་བཞིན་བསྲུངས། །རྒྱལ་པོ་བྲམ་ཟེ་གསང་སྔགས་འདྲེལ། །རྒྱལ་པོས་ཕྲག་དོག་བྲམ་ཟེའི་རྔན། །ལྟུང་ནས་འཁོར་བའི་སྡུག་བསྔལ་གྱིས། །དམ་ཚིག་སྐྱོན་དུ་གྱུར་པ་ཡིན། །དེ་ལ་མཆོག་གྱུར་ཐུགས་རྗེས་གཟིགས། །བཀའ་བགྲོས་ཐུགས་རྗེས་དྲངས་པ་ཡང་། །དོན་མཆོག་དོང་སྤྲུགས་ཡི་གེ་བརྒྱ་པ་ཡིན། །ཞེས་གསུངས་སོ། །རྡོ་རྗེ་སེམས་དཔའ་ཡི་གེ་བརྒྱ་པའི་རྒྱུད་ལས་དམ་ཚིག་རྩ་བ་ཡན་ལག་སྐྱོན་ཡོན་མཚོན་པའི་ལེའུ་སྟེ་བཞི་པའོ།། །།དེ་ནས་ཡང་བཛྲ་པཱ་ཎི་བཞིན་འཛུམ་མུལ་ཏེ་གསོལ་པ། ཀྱེ་ཀྱེ་སྟོན་པ་འགྲོ་བའི་མགོན། །བླ་མེད་གསང་སྔགས་དམ་ཉམས་ནས། །ན་རཀ་ངན་སོང་གནས་ལྟུང་བ། །ངན་སོང་དོང་ནས་གང་གིས་སྤྲུགས། །ཅེས་ཞུས་པས། ཉོན་ཅིག་གསང་བདག་འཁོར་ཚོགས་ཁྱོད། །མཚམས་མེད་རྩ་བ་ཡན་ལག་གིས། །ན་རཀ་ངན་སོང་རྡོ་རྗེའི་གནས། །ཚ་གྲང་ཉེ་འཁོར་རྡོ་རྗེ་དམྱལ་བ་ཡང་། །དོན་མཆོག་དོང་སྤྲུག་བརྒྱ་པས་ཐར། །རྒྱུ་གནས་རྣམ་སྨིན་ཡི་དྭགས་ཀྱང་། །དོན་མཆོག་དོང་སྤྲུག་བརྒྱ་པས་འདྲེན། །རྐང་མེད་རྐང་གཉིས་རྐང་བཞི་དང་། །རྐང་མང་ཁྲག་ཅན་རྣག་ཅན་བྱོལ་སོང་ཡང་། །དོན་མཆོག་དོང་སྤྲུག་བརྒྱ་པས་ཐར། །དོན་མཆོག་སྙིང་པོ་འབྲུ་གཅིག་ལ། །ཡོན་ཏན་ཡིག་འབྲུ་བརྒྱ་ཚན་ལྔ། །རྡོ་རྗེ་སེམས་དཔའ་ལྔ་ཚན་ཡིན། །ལྔ་གསུམ་གཅིག་ཏུ་བསྡུས་རྒྱས་ཡིན། །ཐིག་ལེ་ཆེན་པོ་ཡི་གེ་བརྒྱ། །དམ་པ་རིགས་བརྒྱ་གསང་ཆེན་ལྔ། །རིགས་གསུམ་གཅིག་ཏུ་བྱས་པ་ཡིན། །དཀྱིལ་འཁོར་ཆེན་པོ་ཡངས་པ་ཡིན། །ཞི་བ་སྐུ་ཡི་དཀྱིལ་འཁོར་དང་། །རྒྱས་པ་ཡོན་ཏན་དཀྱིལ་འཁོར་དང་། །དབང་མཆོག་གསུང་གི་དཀྱིལ་འཁོར་དང་། །ཀརྨ་ཕྲིན་ལས་དཀྱིལ་འཁོར་དང་། །ཐུགས་མཆོག་ཐུགས་ཀྱི་དཀྱིལ་འཁོར་དང་། །ལྷ་བརྒྱ་པ་ཡི་དཀྱིལ་འཁོར་ཡིན། །སྐུ་ཡི་ལྷ་བརྒྱ་ཡིག་འབྲུ་བརྒྱ། །གསུང་གི་ལྷ་བརྒྱ་ཡིག་འབྲུ་བརྒྱ། །ཐུགས་ཀྱི་ལྷ་བརྒྱ་ཡིག་འབྲུ་བརྒྱ། །ཡོན་ཏན་ལྷ་བརྒྱ་ཡིག་འབྲུ་བརྒྱ། །ཕྲིན་ལས་ལྷ་བརྒྱ་ཡིག་འབྲུ་བརྒྱ། །བསྡུ་ན་རྡོ་རྗེ་ ― DNG001_Page_0325 ―
[མ་དཔེ་གཟིགས་ན་འདིར་གནོན།]
རིགས་ལྔར་བསྡུ། །དེ་ཉིད་སྐུ་གསུང་དོན་གཅིག་འདྲིལ། །འཁོར་ལོ་ལྔ་དང་དཀྱིལ་འཁོར་སྡེབ། །བཤགས་པའི་རྒྱུད་ལྔ་དུག་ལྔ་ཉོན་མོངས་བརྒྱ། །བཤགས་པའི་དབང་པོ་རིགས་ལྔ་བརྒྱ་པའི་ལྷ། །བཤགས་བྱང་ཚངས་པའི་ཡི་གེས་ཡུལ་མིང་མེད། །དོན་མཆོག་སྙིང་པོ་ཆོས་མིང་ལྟ་བའི་གདེང་། །གང་སྣང་གྲོགས་སུ་གྱུར་པ་བསྒོམ་པའི་གདེང་། །མཉམ་ཉིད་སྤང་བླང་མེད་པ་སྤྱོད་པའི་གདེང་། །རེ་དོགས་ཕྱི་དུས་མེད་པ་འབྲས་བུའི་གདེང་། །ཞེས་གསུངས་སོ། །ཐུགས་མཆོག་ཡི་གེ་བརྒྱ་པའི་རྒྱུད་ལས་བརྒྱ་ཚན་རྒྱས་བསྡུས་བཤགས་བྱང་གི་ལེའུ་སྟེ་ལྔ་པའོ།། །།དེ་ནས་བཛྲ་པཱ་ཎི་ཡིས། །རྡོ་རྗེ་འཆང་ལ་འདི་སྐད་ཞུས། །ཀྱེ་ཀྱེ་རྡོ་རྗེ་འཆང་བ་ཆེ། །དེ་ལྟར་ན་རག་དོང་ནས་སྤྲུག །ཐུགས་ཀྱི་དཀྱིལ་འཁོར་བཛྲ་གྱི། །ལྷ་བརྒྱའི་ཡིག་འབྲུ་བརྒྱ་པ་གང་། །ཞེས་གསོལ་པས། རྡོ་རྗེ་འཆང་གིས་བཀའ་སྩལ་པ། །ཉོན་ཅིག་བཛྲ་བཱ་ཎི་སོགས། །ཐུགས་མཆོག་རྡོ་རྗེ་སེམས་དཔའ་ཡི། །ཐུགས་ཀྱི་སྙིང་པོ་འབྲུ་གཅིག་ལས། །རང་བྱུང་ཡི་གེ་འཕྲོས་པ་བརྒྱ། །རྡོ་རྗེ་སེམས་དཔའ་སེང་གེས་བསྒྲགས། །འཁོར་ཚོགས་ཁྱེད་ཀྱིས་ལེགས་པར་ཟུང་། །ཧཱུཾ་ཧཱུཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ། མ་ཧཱ་ས་མ་ཡ། བཛྲ་སཏྭ་ཨ། ཀུན་བཟང་ཡབ་ཡུམ་རིགས་ལྔ་དང་། །ཡུམ་ལྔ་སེམས་དཔའ་སེམས་མ་དང་། །སྒོ་བ་སྒོ་མ་ཐུབ་དྲུག་སོགས། །བཞི་བཅུ་རྩ་གཉིས་རྡོ་རྗེ་དབྱིངས། །ཁྲག་འཐུང་ལྔ་དང་ཀྲོ་དྷི་ལྔ། །ཀཽ་རི་བརྒྱད་དང་སིངྷ་བརྒྱད། །སྒོ་མ་བཞི་དང་དབང་ཕྱུག་སོགས། །ཁྲོ་བོ་ཁྲོ་མོ་བཅུ་གཉིས་ཏེ། །ལྔ་བཅུ་རྩ་བརྒྱད་རྡོ་རྗེའི་ལྷ། །རྡོ་རྗེ་རིགས་ཀྱི་ལྷ་བརྒྱ་ཡིན། །སྐུ་མདོག་ཕྱག་མཚན་རང་རྟགས་འཛིན། །སྦྱོར་བ་དངོས་གཞི་རྗེས་ཀྱིས་བཤད། །དང་པོར་སྨོན་འཇུག་སེམས་བསྐྱེད་ལ། །ཚད་མེད་བཞི་དང་ཏིང་འཛིན་གསུམ། ། ― DNG001_Page_0326 ―
[མ་དཔེ་གཟིགས་ན་འདིར་གནོན།]
སེམས་དཔའི་དོན་གསལ་སྤྲོ་བསྡུ་བྱ། །མཆོད་སྦྱངས་དྲེགས་པ་ཚར་བཅད་ལ། །སྲོག་དང་སྙིང་པོའི་དོན་རྟོགས་བྱས། །ཡེ་ཤེས་རང་རིག་རང་བྱུང་གནས། །ཡུལ་མེད་མིང་དང་བྲལ་ན་ཚང་། །མཚན་མ་མེད་དང་སྨོན་པ་མེད། །སྟོང་པ་ཉིད་དང་འཁྲུལ་པ་བཟློག །འགྱུས་དྲན་འཛིན་ཆགས་བར་མེད་པས། །རྟག་ཆད་མཐའ་མེད་རང་བྱུང་རང་། །བལྟ་བསྒོམ་དམ་ཚིག་ཡེ་ཤེས་ལ། །དཔའ་བོ་ཚིག་སྒྲུབ་བརྒྱ་རྫོགས་ཡིན། །ཞེས་གསུངས་སོ། །བཛྲ་བརྒྱ་བཤགས་ཀྱི་རྒྱུད་ལས་རྡོ་རྗེ་སེམས་དཔའ་རིགས་བརྒྱའི་ལེའུ་སྟེ་དྲུག་པའོ།། །།རྡོ་རྗེ་འཆང་གིས་བཀའ་སྩལ་པ། །ཉོན་ཅིག་ལག་ན་རྡོ་རྗེའི་འཁོར། །རྡོ་རྗེ་རིགས་ཀྱི་སྐུར་བསྟན་པ། །རྣམ་པར་སྣང་མཛད་རྡོ་རྗེའི་སྐུ། །ལྷ་བརྒྱ་སྲོག་གི་སྙིང་པོ་བརྒྱས། །མ་རིག་གཏི་མུག་བཤགས་པའི་ཆོས། །ཞི་བར་བྱེད་པའི་བརྒྱ་པ་ནི། །བདག་ཉིད་སྨོན་འཇུག་སེམས་བསྐྱེད་ལ། །སྦྱོར་བའི་དོན་རྫོགས་འཇུག་པ་ནི། །ཏིང་འཛིན་གསུམ་ལས་སེམས་དཔའ་གསུམ། །སྤྱི་བོ་མགྲིན་པ་སྙིང་ག་དང་། །ལྟེ་བ་གསང་སྔགས་འཁོར་ལོ་ལྟར། །འཁོར་ལོ་པདྨ་རྡོ་རྗེ་དང་། །རིན་ཆེན་རྒྱ་གྲམ་ཞི་རྒྱས་དང་། །དབང་དྲག་རྡོ་རྗེ་སྙིང་པོའི་དབུས། །དཔའ་བོ་འབྲུ་ལྔ་དཔའ་མོ་གཡོན། །སྐུ་ལྟར་སྤྲོ་བའི་བརྒྱ་པ་ཡིན། །འཁོར་ལོ་ཕྲེང་སྐོར་ཉི་ཟླའི་སྟེང་། །སངས་རྒྱས་རྣམ་པར་སྣང་མཛད་ཅེས། །སེང་གེའི་སྒྲ་བསྒྲགས་ལེགས་པར་ཟུང་། །ཨོཾ་བུཌྜྷ་སཏྭ་ས་མ་ཡ། མ་ནུ་པཱ་ལ་ཡ། བུཌྜྷ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། བུཌྜྷ་མཱ་མེ་མུཉྩ། བཛྲཱི་བྷ་བ། མ་ཧཱ་ས་མ་ཡ། བུཌྜྷ་སཏྭ་ཨཿ། ཨོཾ་ལ་ཤཱནྟིཾ་ཀུ་རུ་གདགས། ཨོཾ་ཤཱནྟིཾ་ཀུ་རུ་སྭཱ་ཧཱ། འཁོར་ལོ་སྐུ་སྟེ་རྣམ་སྣང་དབུས། །སྤྱི་གཙུག་ཟླུམ་པོར་རིགས་བརྒྱའི་ལྷ། །ཨོཾ་ལས་འོད་ཟེར་དཀར་པོ་འཕྲོས། །མཆོད་སྦྱངས་ཚར་བཅད་སྐུ་ལྟར་བཤགས། །གཏི་མུག་མ་རིག་དག་པར་ངེས། །སྲོག་སྙིང་སྣང་རྟགས་རང་བྱུང་གནས། །ཡུལ་མེད་མིང་དྲལ་ཚངས་པའི་ཚད། ། ― DNG001_Page_0327 ―
[མ་དཔེ་གཟིགས་ན་འདིར་གནོན།]
ལུས་ངག་ཡིད་གསུམ་གཅུད་ལ་བོར། །སྲོག་དང་སྙིང་པོ་ཨར་ལ་གཏད། །སྣང་བ་ཡོད་མེད་འཁྲུལ་མ་འཁྲུལ། །འཁྲུལ་པ་བདེན་རྫུན་འཁྲུལ་པས་ཆོད། །མཐོ་དད་ཐག་པར་མི་སྦྲུལ་མེད། །སྒྱུ་མའི་ཆོས་ལ་མཐོང་སྟོབས་མེད། །ཅེས་གསུངས་སོ། །རྡོ་རྗེ་བརྒྱ་བཤགས་ཀྱི་རྒྱུད་ལས་སྐུ་ལྟར་བཤགས་པ་ཞི་བའི་ལེའུ་སྟེ་བདུན་པའོ།། །།རྡོ་རྗེ་འཆང་གིས་བཀའ་སྩལ་པ། །ཉོན་ཅིག་ལག་ན་རྡོ་རྗེ་འཁོར་བཅས་ཀུན། །རྡོ་རྗེ་རིགས་ཀྱི་ཡོན་ཏན་ཏེ། །རིན་ཆེན་རྡོ་རྗེ་རྡོ་རྗེའི་སྐུ། །ལྷ་བརྒྱ་སྲོག་གི་སྙིང་པོ་བརྒྱས། །ང་རྒྱལ་ཀུན་སློང་བཤགས་པས་ཚངས། །ཚེ་དང་བསོད་ནམས་ལོངས་སྤྱོད་དང་། །ཆོས་དང་ཡེ་ཤེས་སེམས་དང་མཐུ། །སྨན་དང་འབྲུ་དང་བུ་ཚ་དང་། །འཁོར་དང་ཕྱུགས་དང་བསམ་པ་ཀུན། །འཕེལ་བར་འགྱུར་ཏེ་ཐེ་ཚོམ་མེད། །སྦྱོར་བ་དངོས་གཞི་རྗེས་གསུམ་བྱ། །བྱམས་དང་སྙིང་རྗེ་སྔོན་བཏང་ལ། །སེམས་དཔའ་གསུམ་གྱི་དོན་ལ་འཇུག །དངོས་གཞི་ཆོས་འཁོར་སྤྲོ་བསྡུ་བྱ། །མཆོད་སྦྱངས་དྲེགས་པ་ཚར་བཅད་ཡིན། །རྗེས་སུ་ལའང་རྟོགས་པའི་གདེང་། །དམིགས་པ་མེད་པར་སྒྲོ་འདོགས་བཅད། །རིན་ཆེན་རིན་ཆེན་འབྱུང་ལྡན་ཆེས། །སེང་གེའི་སྒྲ་བསྒྲགས་ལེགས་པར་ཟུང་། །སྭཱ་རཏྣ་སཏྭ་ས་མ་ཡ། མ་ནུ་པཱ་ལ་ཡ། རཏྣ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། རཏྣ་མཱ་མེ་མུཉྩ། རཏྣ་བྷ་བ་མ་ཧཱ་ས་མ་ཡ། རཏྣ་སཏྭ་ཨ། སྭཱ་ལ་པུཥྚིཾ་ཀུ་རུ་གདགས། །སྭཱ་པུཥྚིཾ་ཀུ་རུ་སྭཱ་ཧཱ། སིདྡྷི་དོན་གྱི་གདམས་ཐབས་སོ། །རིན་ཆེན་ཀུན་འབྱུང་རིན་ཆེན་དབུས། །ལྟེ་བ་གྲུ་བཞིར་རིགས་བརྒྱའི་ལྷ། །སྭཱ་ལས་འོད་ཟེར་སེར་པོ་འཕྲོས། །མཆོད་སྦྱངས་དྲེགས་པ་ཚར་བཅད་དོ། །སིདྡྷི་བསྡུ་བའི་ཏིང་འཛིན་གསལ། །སྭཱ་ལ་བརྒྱ་པའི་ཕྲེང་བསྐོར་ཏེ། །གཡས་གཡོན་བསྐོར་བ་ཕོ་མོའི་ཚུལ། །ཡོན་ཏན་རིགས་བརྒྱའི་བཤགས་པ་ཡིན། །མཉམ་ཉིད་ཡེ་ཤེས་རང་བྱུང་རིག །ཡུལ་མེད་མིང་བྲལ་ཚངས་པའི་དབང་། །ཡུལ་དུ་བདེན་རྫུན་གཅིག་ལ་ལྟོས། ། ― DNG001_Page_0328 ―
[མ་དཔེ་གཟིགས་ན་འདིར་གནོན།]
གཅིག་ལ་མཐོང་སྣང་ཐ་དད་པས། །གཅིག་ཏུ་བདེན་པ་གཅིག་ཀྱང་མེད། །མིང་དུ་བདེན་རྫུན་གཅིག་ལ་ཟུང་། །གཅིག་ལ་མིང་དུ་བདེན་པ་མེད། །དེ་ལ་མིང་དུ་ཅི་ལ་འདྲེན། །བདེན་མཉམ་རྫུན་མཉམ་མིང་མེད་ཡིན། །སྣང་མཉམ་སྟོང་མཉམ་ཡུལ་མེད་ཡིན། །བཤགས་པའི་དོན་མཆོག་ཚང་བ་ཡིན། །ཞེས་གསུངས་སོ། །རྡོ་རྗེ་བརྒྱ་བཤགས་ལས་ཡོན་ཏན་གྱི་ལེའུ་སྟེ་བརྒྱད་པའོ།། །།དེ་ནས་ཡང་བཀའ་སྩལ་པ། ཉོན་ཅིག་བཛྲ་པཱ་ཎི་སོགས། །རྡོ་རྗེ་རིགས་ཀྱི་གསུང་མཆོག་ནི། །རྡོ་རྗེ་པདྨ་སྣང་མཐའ་ཡས། །གསུང་མཆོག་སྤྲུལ་སྐུ་གསུང་གི་ལྷ། །ལྷ་བརྒྱ་གསུང་གི་ཡི་གེ་བརྒྱ། །འདོད་ཆགས་སེར་སྣའི་བཤགས་ཚངས་བྱེད། །འཇིག་རྟེན་འདས་དང་འཇིག་རྟེན་པ། །འབྱུང་བ་དགྲ་བགེགས་དབང་དུ་གྱུར། །སྦྱོར་བ་དངོས་གཞི་རྗེས་གསུམ་ལས། །སྲོག་དང་སྙིང་པོ་ལ་བཟླའི་ཚད། །སྦྱོར་བའི་དོན་ལ་རྣམ་གཉིས་ཏེ། །སེམས་བསྐྱེད་པ་དང་འཇུག་པ་དང་། །དངོས་གཞི་ཆོས་ཉན་བཤད་པ་དང་། །སྤྲོ་བསྡུ་ཏིང་འཛིན་གསལ་བ་སྟེ། །ཨོཾ་ལས་བརྒྱ་པའི་ཕྲེང་བསྐོར་ཏེ། །གཡས་གཡོན་མགལ་མེ་གཉིས་བསྐོར་བཞིན། །མཆོད་སྦྱངས་དྲེགས་པ་དབང་དུ་བསྡུ། །རྗེས་སུ་ཤེས་པར་བྱ་བ་ཡིན། །སྲོག་སྙིང་ཡུལ་མེད་དམིགས་མེད་དོ། །སྣང་བ་མཐའ་ཡས་མཐའ་ཡས་ཆེས། །གསུང་མཆོག་སེང་གེའི་སྒྲ་བསྒྲགས་གསུང་། །ཨོཾ་པདྨ་སཏྭ་ས་མ་ཡ། མ་ནུ་པཱ་ལ་ཡ། པདྨ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། པདྨ་མཱ་མེ་མུཉྩ། བཛྲི་བྷ་བ། མ་ཧཱ་ས་མ་ཡ། པདྨ་སཏྭ་ཨ། ཨོཾ་ལ་བ་ཤཾ་ཀུ་རུ་གདགས། ཧྲཱྀཿབ་ཤཾ་ཀུ་རུ་སྭཱ་ཧཱ། དབང་གི་དོན་དུ་གདགས་པ་ཡིན། །པདྨ་ཟླ་གམ་མགྲིན་པའི་སྒོར། །སྣང་མཐའ་དབུས་ལ་རིགས་བརྒྱའི་ལྷ། །ཕོ་མོ་གཉིས་ནི་གཡས་གཡོན་ནོ། །ཨཱཿལས་འོད་ཟེར་དམར་པོ་འཕྲོས། །ཨ་ལས་འོད་འཕྲོས་དམར་པོ་གཙོ། །མཆོད་ ― DNG001_Page_0329 ―
[མ་དཔེ་གཟིགས་ན་འདིར་གནོན།]
སྦྱངས་དྲེགས་པ་དབང་དུ་བསྡུས། །དབང་བསྡུའི་ཏིང་འཛིན་ང་རྒྱལ་ལྡན། །སོ་སོའི་དོན་རྟོགས་གཅིག་ཏུ་གྱུར། །འདི་ཡི་དོན་རྟོགས་གཅིག་ཀྱང་མེད། །ཤེས་པས་རང་བྱུང་ཡུལ་མེད་རང་། །སོ་སོར་མ་རིག་གཅིག་པུ་རང་། །ཡུལ་མེད་མིང་བྲལ་ཡེ་ཤེས་ཉིད། །གཅིག་ནི་ཀུན་གྱི་རང་བཞིན་ཡིན། །མ་འདྲེས་རྒྱ་མཚོའི་གཟའ་སྐར་འདྲ། །ཞེས་གསུངས་སོ། །བཛྲ་བརྒྱ་པའི་རྒྱུད་ལས་གསུང་གི་ལེའུ་སྟེ་དགུ་པའོ།། །།དེ་ནས་ཡང་བཀའ་སྩལ་པ། ཉོན་ཅིག་རྡོ་རྗེ་རིགས་ཀྱི་འཁོར། །རྡོ་རྗེ་ཀརྨ་ལས་ཀྱི་སྐུ། །དོན་ཡོད་གྲུབ་པ་དྲག་པོའི་ལྷ། །མངོན་པར་བྱང་ཆུབ་བྱ་བ་གྲུབ། །ཕྲིན་ལས་བརྒྱ་པ་ངན་སྔགས་བརྒྱ། །ཁོང་ཁྲོ་ཕྲག་དོག་བཤགས་ཚངས་བྱེད། །བདུད་དང་བར་གཅོད་དགྲ་དང་བགེགས། །དགེ་ལ་བར་གཅོད་གང་བྱེད་ཀུན། །བསད་མནན་བསྲེག་དང་བསྐྲད་དང་བཟློག །དྲག་པོའི་ལས་རྣམས་ཐམས་ཅད་འགྲུབ། །སྦྱོར་བ་དངོས་གཞི་རྗེས་གསུམ་སྟེ། །སྙིང་རྗེས་བསྒྲལ་བའི་དམ་ཚིག་ནི། །སྦྱོར་བའི་དོན་ལ་ཟིན་པར་བྱ། །ང་རྒྱལ་ཁྲོ་མཆོག་སྐུ་གསུང་ཐུགས། །སེང་གེའི་ཡིད་ལ་འབྲུག་གི་སྐད། །ཁྲོ་བོའི་ལུས་ལ་མཚོན་ཆའི་ཐོག །དངོས་གཞི་དོན་ལ་ཤེས་པའི་གདེངས། །སྤྲོ་བསྡུས་མཆོད་སྦྱངས་དྲེགས་པ་འདུལ། །ཏིང་འཛིན་གློག་དང་འབྲུག་ལྟར་སྦྱར། །རྗེས་སུ་ཡུལ་མེད་མིང་བྲལ་ལོ། །གོ་རིམ་བཟློག་དང་ཡིག་འབྲུ་བཟློག །ཁོག་ཏུ་ཚངས་པ་ཁོག་ཏུ་དཀྲུགས། །དོན་ཡོད་གྲུབ་པ་དོན་ཆེན་སྒྲུབ། །ལས་རྣམས་སེང་གེའི་སྒྲ་སྒྲོགས་ཟུང་། །བཛྲ་སཏྭ་ཨཱ། མ་ཧཱ་ས་མ་ཡ། བཛྲི་བྷ་བ། བཛྲ་མཱ་མེ་མུཉྩ། སརྦ་ཏ་ཐཱ་ག་ཏ། བྷ་ག་བཱན་ཧོ། ཧ་ཧ་ཧ་ཧ། ཧཱུཾ་ཧཱུཾ། ཙིཏྟཾ་ཤྲི་ཡཾ་ཀུ་རུ། སརྦ་ཀརྨ་སུ་ཙ་མེ། སརྦ་སིདྡྷིམྨེ་པྲ་ཡཙྪ། སུ་པོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་ཏོཥྱོ་མེ་དྷ་བ། དྲྀ་ཌྷོ་མེ་བྷ་བ། ཏྭེ་ནོ་པ་ཏིཥྛ། བཛྲ་སཏྭ། མ་ནུ་པཱ་ལ་ཡ། ཀརྨ་སཏྭ་ས་མ་ཡ། ཧཱ་ཀརྨ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ ― DNG001_Page_0330 ―
[མ་དཔེ་གཟིགས་ན་འདིར་གནོན།]
ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ། བཛྲ་སཏྭ་ཨ། བསྙེན་པའི་ལས་ལ་བྱའོ། །དཔེ་དག་རྙེད་ན་བསྡུར་དགོས་མ་ས་ཊ་ས་མ་ཡ། མ་ནུ་པཱ་ལ་ཡ། ཛྲབ་སཊྭ། ཊྭོ་ཎོ་པ་ཏིཥྛ། དྲྀ་ཌྷོ་ཙ་བྚ་བ། ཨ་ཎུ་རཀྟོ་མེ་བྚ་བ། སུ་པོཥྱོ་ཙེ་བྚ་བ། སརྦ་སིདྡྷིཙྩེ་པྲ་ཡཙྪེ་སརྦ་ཀ་ཙེ་སུ་མ་ཙེ། ཙིཊྚཾ་ཥྲེ་ཡཾ་ཀུ་རུ། རྦེ། ཪྚ་ཪྚ། བྚ་ཁ་བཱན་སརྦ་ཊ་ཐ་ཁ་ཊ། ཛྲབ་ཙ་ཙེ་ཙུརྦ། ཛྲབ་བྷ་བ། ཙ་ཊ་ས་ཙ་ཡ་ས་ཊ་ཨ། འདི་ནི་ལོག་པའི་ཡི་གེ་བཅུ་པར་སྣང་། གསོད་པའི་ལས་སུ་ཤེས་པར་བྱའོ། །ཧ་ཧ་ཙིཏྟཾ་ཤྲེ་ཡཾ་ཀུ་རུ་སརྦ། ཏ་ཐཱ་ག་ཏ་ཧཱུཾ་ཧཱུཾ། བྷ་ག་བཱན། མ་ཧཱ་ས་མ་ཡ། མ་ནུ་པཱ་ལ་ཡ། སརྦ་ཀརྨ་སུ་ཙ་མེ། ཏྭེ་ནོ་པ་ཏིཥྛ། བཛྲ་མཱ་མེ་མུཉྩ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ་ཧོ་ཧོ། ཀརྨ་སཏྭ་ས་མ་ཡ། སརྦ་སིདྡྷིམྨེ་པྲ་ཡཙྪ། བཛྲ་སཏྭ་ཨ། ཧཱ། སྒྲུབ་པ་ཆེན་པོ་ལས་ལ་སྦྱར་ཞེས་བྱ། །སྲོག་སྙིང་ལ་ཤན་ཕྱེད་ནས་ལས་རྣམས་ཟིན་ཞེས་བྱ། །ཡུལ་གྱི་སྒྲོ་འདོགས་ཆོད་ན་ལས་སྦྱོར་ཡིན། །བློ་ཕུགས་གཏིང་ནས་གྲོལ་ན་ལས་སྦྱོར་ཡིན། །བག་ཆགས་གཏིང་ཐག་ཆོད་ན་ལས་སྦྱོར་ཡིན། །རང་དབང་རང་གིས་ཐོབ་ན་ལས་སྦྱོར་ཡིན། །རང་བཞིན་འགྱུར་མེད་མ་འགགས་ལས་རྟོགས་ན། །ལྟ་བ་གྲུབ་མཐའ་ས་ལམ་དགེ་སྡིག་མེད། །ཅེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་ཕྲིན་ལས་དྲག་པོའི་ལེའུ་སྟེ་བཅུ་པའོ།། །།དེ་ནས་ཡང་དག་བཤད་བྱ་ཡིས། །རྡོ་རྗེ་རིགས་ཀྱི་ལྷ་ཚོགས་ཉོན། །ཕྲིན་ལས་དྲག་པོ་འདི་ཡི་མཆོག །ངན་སྔགས་བརྒྱ་པ་ང་ཡིས་བསྟན། །བསད་མནན་བསྲེག་པ་བཟློག་པ་དང་། །བྱོལ་སོང་དགུག་དང་ལས་ལ་སྦྱར། །ངན་སྔགས་མཚོན་ཆ་འདི་ལྟར་ཡིན། །མཱ་ར་ཡ། མཱ་ར་ཡ་རྦད། མཱ་ར་ཡ། མཱ་ར་ཡ་སྟྭཾ་བྷ་ཡ་ནན། མཱ་ར་ཡ། མཱ་ར་ཡ་ཛྭ་ལ་རཾ། མཱ་ར་ཡ་ཨུ་ཙ་ཏ་ཡ་ཕཊ་ཕཊ། ཡ་མ་ནཱ་ག་བཟློག་རྦད། ཡ་མ་ནཱ་ག་བྷོ་བྷོ་རྦད། རྣལ་མ་གདོང་བཟློག་དཀྲུགས་བཟློག་ལ། ཤམ་བུའི་སྔགས་སུ་གདགས་པ་ཡིན། །གསང་གནས་གྲུ་གསུམ་རྒྱ་གྲམ་གནས། །ཧཱ་ལས་འོད་ཟེར་ལྗང་དམར་འཕྲོས། །མཆོད་སྦྱངས་དྲེགས་པ་བསད་མནན་བསྲེག །རྗེས་སུ་ཕྲ་རགས་མཆོད་པ་ ― DNG001_Page_0331 ―
[མ་དཔེ་གཟིགས་ན་འདིར་གནོན།]
དབུལ། །སྟོང་གསུམ་འཇིག་རྟེན་རབ་འབྱམས་ཀྱི། །རྒྱལ་བ་རྡུལ་སྙེད་མཉམ་པར་མཆོད། །ཕྲིན་ལས་རིགས་བརྒྱའི་བཤགས་པ་ཡིན། །ཁོང་ཁྲོ་ཕྲག་དོག་ལ་སོགས་ཏེ། །དུག་ལྔ་ཆགས་སྡང་བྱང་འདག་ངེས། །འདོད་ཁམས་གཟུགས་ཁམས་གཟུགས་མེད་ཁམས། །ལྷ་གནས་རྣམ་གསུམ་དོང་སྤྲུག་ཡིན། །ཐུགས་ལྟར་བཤགས་པས་ན་རཀ་གནས། །ཚ་གྲང་རྡོ་རྗེ་དོང་སྤྲུག་ཡིན། །གསུང་ལྟར་བཤགས་པས་རྒྱུ་རྣམས་སྨིན། །ཡི་དྭགས་རིགས་གསུམ་དོང་སྤྲུག་ཡིན། །སྐུ་ལྟར་བཤགས་པས་མ་ངེས་གནས། །རྐང་རྫོགས་རྣག་ཁྲག་དོང་སྤྲུག་ཡིན། །ཡོན་ཏན་ལྟར་བཤགས་གླིང་བཞིའི་མི། །རིགས་བཞི་མི་ཡི་དོང་སྤྲུག་ཡིན། །བྱ་བའི་ལས་གྲུབ་ཡེ་ཤེས་པས། །གཞན་མེད་རང་ཆས་རང་བྱུང་ཤེས། །བྱར་མེད་བྱ་བ་གྲུབ་པའི་ཡེ་ཤེས་ཡིན། །དོན་གྲུབ་མངོན་པར་བྱང་ཆུབ་སྐུ། །རེ་དོགས་མེད་པས་ལས་རྣམས་ཟིན། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་སྔགས་བདག་མཆོང་གི་ལེའུ་སྟེ་བཅུ་གཅིག་པའོ།། །།དེ་ནས་ཡང་ནི་བཀའ་སྩལ་པ། །ཉོན་ཅིག་རྡོ་རྗེ་རིགས་ཀྱི་འཁོར། །དེ་དག་ཞི་རྒྱས་དབང་དྲག་ལས། །ཞི་བའི་ལས་རྣམས་བསྒྲུབ་པ་ནི། །ཉམས་དགའ་ས་དཀར་ཤར་བལྟས་བར། །དཀར་གསུམ་འབྲས་བུ་དཀར་པོའི་ཤིང་། །ཙན་དན་མེ་ཏོག་དཀར་པོ་སོགས། །དུང་དང་དངུལ་གཞོང་སྣོད་ནང་དུ། །དཀར་གཏོར་འབྲས་ཆན་བརྒྱན་པ་བཤམ། །མཎྜལ་ཟླུམ་པོ་ཧོམ་ཁུང་ཟླུམ། །ར་བ་བཞི་ཡི་ཚེས་གཅིག་བརྒྱད། །ཏིལ་དཀར་ཀ་ར་མར་བསྲེག་ན། །ཐམས་ཅད་ཞི་འགྱུར་དམྱལ་བར་འགྲོ་རེ་ཀན། །ཤཱནྟིཾ་ཀུ་རུ་བརྒྱ་སྔགས་གཤམ། །རིགས་བརྒྱ་བཞི་ཡིས་བསྟོད་བྱས་མཐར། །ལྷག་ཆད་སྤངས་པའི་བརྒྱ་པ་མཆོག །རྒྱས་པའི་ལས་ལ་འཇུག་པ་ན། །གསེར་དངུལ་ཟངས་ལྕགས་རིན་པོ་ཆེ། །འབྲུ་སྣ་གཙང་མ་སྣ་ཚོགས་དང་། །བཀྲ་ཤིས་པ་ཡི་རྫས་བརྒྱད་དམ། །ཤིང་སེར་མེ་ཏོག་སེར་པོ་དང་། །གསེར་རམ་སེར་པོའི་སྣོད་ནང་དུ། །གཏོར་མ་གྲུ་བཞི་རིན་པོ་ཆེ། །རིན་ཆེན་ལྔ་བདར་ཆན་དང་སྨན། །ཉམས་དགའ་ས་སེར་ལྷོར་བལྟས་སར། །མཎྜལ་གྲུ་བཞི་གསེར་མདོག་བྱ། ། ― DNG001_Page_0332 ―
[མ་དཔེ་གཟིགས་ན་འདིར་གནོན།]
ཚེས་བརྒྱད་ཉ་ཁར་ལས་རྫོགས་བྱ། །ཉུང་དཀར་ཏིལ་དམར་བསྲེགས་བྱས་ན། །རྒྱས་པའི་ལས་འགྲུབ་ངན་འགྲོར་མི་སྐྱེའོ། །དབང་གི་ལས་ལ་འཇུག་པའི་ཚེ། །མི་རྟ་ཁྱི་དང་བ་ལང་ཤ །ཁྲག་སྣ་རྣམ་པ་ཚོགས་ཚད་དང་། །ཙན་དན་དམར་པོ་སེང་ལྡེང་དང་། །མཚལ་དང་གུར་གུམ་དར་དམར་རམ། །ཟངས་སམ་དམར་པོའི་སྣོད་ནང་དུ། །དབང་གི་གཏོར་མ་ཟླ་གམ་བཤམ། །ཤ་ཆེན་ཁྲག་ཆེན་རབ་བརྒྱན་ལ། །མེ་ཏོག་དམར་པོས་བརྒྱན་པར་བྱ། །ཚིལ་ཆེན་སྤོས་ལ་ཙན་དན་གྲོགས། །ཡིད་འོང་བྲག་རི་དམར་པོ་རུ། །མཎྜལ་ཟླ་གམ་དམར་པོ་ལ། །ཧོམ་ཁུང་ཟླ་གམ་དབུས་སུ་བྱ། །ཐོད་ཆེན་ལ་སོགས་ཐུན་གྱི་སྣོད། །ནུབ་ཕྱོགས་ཁ་བལྟས་ས་དམར་བྱ། །དམར་པོའི་ཤིང་སོགས་བསྲེག་པའི་རྫས། །མར་ནག་དག་གིས་སྦྱིན་བསྲེག་ཏིལ་དམར་པོ། །དབང་གི་ལས་འགྲུབ་དབང་དུ་འགྱུར། །ཡི་དྭགས་གནས་སུ་འགྱུར་རེ་ཀན། །དྲག་པོའི་ལས་ནི་བྱེད་པའི་ཚེ། །ཤ་ཁྲག་རྣམ་པ་སྣ་ཚོགས་དང་། །དུག་སྣ་ས་སྣ་སྣ་ཚོགས་བསོག །ཕུར་པ་ལ་སོགས་མཚོན་ཀུན་བསོག །སྲིན་པོ་ཁྲོས་འདྲ་དྲག་པོའི་རི། །དྲག་པོར་འཇུག་པའི་གནས་མཆོག་ཏུ། །ལྕགས་སམ་ནག་པོའི་སྣོད་ནང་དུ། །ཤ་ཁྲག་དུག་གི་གཏོར་མ་བཤམ། །དུག་ཤིང་ལ་སོགས་གདུག་པའི་ཤིང་། །གུ་གུལ་ཞུན་མར་ཏིལ་མར་བསྲེག །ཨེ་འདྲ་རལ་གྲི་རྒྱ་གྲམ་བསྣམས། །ཉམས་འཇིགས་བྱང་དུ་ཁ་བལྟས་པར། །མཎྜལ་ནག་པོ་གྲུ་གསུམ་བྱ། །རྡོ་རྗེ་རྒྱ་གྲམ་གྲུ་གསུམ་དབུས། །ཧོམ་ཁུང་གྲུ་གསུམ་ལྟེ་བར་རོ། །དམིགས་པ་གསལ་བྱ་ལིངྒ་བསྲེག །གང་ཡིན་དམིགས་པ་ཐེ་ཚོམ་མེད། །དྲག་པོའི་ལས་དེ་འགྲུབ་པར་འགྱུར། །ལྷ་དང་ལྷ་མིན་སྐྱེ་མི་བྱེད། །ཐུགས་མཆོག་ཐུགས་ཀྱི་བསྒྲུབ་པ་ནི། །སྦྱོར་བ་དངོས་གཞི་གཞུང་བསྲང་སྟེ། །སེམས་དཔའ་རྣམ་གསུམ་གསལ་བ་ཡིས། །ལུས་ངག་ཡིད་གསུམ་དལ་མི་བྱ། །འགུགས་འདྲེན་ཡེངས་མེད་དལ་མེད་བཟླས། །མཆོད་སྦྱིན་ལས་ཀྱང་ཅི་ནུས་བྱ། །རྗེས་ལ་ལ་བཟླ་དགོས་ཚད་དོ། །ཐུགས་སྒྲུབ་ཕྲིན་ལས་རྣམ་བཞི་ལ། །ན་རཀ་དོང་སྤྲུག་གདོན་པར་བྱ། །ཀུན་ཀྱང་དེ་རུ་འདུས་པ་ཡིན། །ལྷ་བརྒྱ་སྔགས་བརྒྱ་བཤགས་ ― DNG001_Page_0333 ―
[མ་དཔེ་གཟིགས་ན་འདིར་གནོན།]
པ་ཚང་། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་ཕྲིན་ལས་བཞིའི་དགོས་པའི་དོན་དང་། ཐུགས་སྒྲུབ་དོན་གྱི་བསྡུ་བ་དང་ནང་གི་སྤང་སྐོང་ཀུན་ལ་གཅེས་པར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་བཛྲ་པཱ་ཎིས་ཞུས་པ། ཀྱེ་ཀྱེ་སྟོན་པ་རྡོ་རྗེ་འཆང་། །ཐུགས་མཆོག་ཡི་གེ་བརྒྱ་པ་འདིས། །མཆོད་སྦྱིན་གཏོར་མ་གཏང་བ་དང་། །སྐུ་གདུང་ཚ་ཚ་གདབ་པ་དང་། །རོ་བསྲེག་བདུན་ཚིགས་བྱེད་པ་ཡང་། །རྨོངས་པས་མ་འཚལ་བཤད་དུ་གསོལ། །ཞེས་ཞུས་པས། ཡང་བཀའ་སྩལ་པ། ཉོན་ཅིག་རྡོ་རྗེ་རིགས་ཀྱི་འཁོར། །མཆོད་སྦྱིན་ལས་ལ་འཇུག་འདོད་ན། །དོན་མཆོག་ཡི་གེ་བརྒྱ་པ་ཡིས། །གཏོར་མའི་ལས་ཀུན་རྫོགས་པ་ལ། །སྦྱོར་བ་དངོས་གཞི་རྗེས་སུ་བསྡུ། །དང་པོ་སེམས་བསྐྱེད་རྣམ་པ་གཉིས། །སྨོན་པ་དང་ནི་འཇུག་པའོ། །བདག་དང་སེམས་ཅན་བྱང་ཆུབ་སྨོན། །ཕ་རོལ་ཕྱིན་དྲུག་འཇུག་པའོ། །སྦྱོར་བ་ཞེས་པ་ཚིག་ལ་སྦྱར། །ཏིང་འཛིན་རྣམ་གསུམ་ཁོག་ཕུབ་ལ། །རྒྱུ་ཡི་ཡི་གེ་ཧཱུཾ་དེ་ལས། །བདག་ཉིད་རྡོ་རྗེ་སེམས་དཔར་བསྐྱེད། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པས་རྡོ་རྗེ་གཡོན་པས་དྲིལ། །སེང་གེ་ཉི་ཟླ་པདྨའི་གདན། །བརྐྱང་བསྐུམ་སྐྱིལ་ཀྲུང་གང་གསལ་བསྐྱེད། །དེ་ནི་དམ་ཚིག་སེམས་དཔའ་སྟེ། །དེ་ཡི་ཐུགས་ཀར་ཉི་ཟླ་པད། །དཀྱིལ་ན་རྡོ་རྗེ་སེམས་དཔའ་ཉིད། །གོང་མ་ཅི་འདྲ་ཚོན་གང་བསྒོམ། །དེ་ནི་ཡེ་ཤེས་སེམས་དཔའ་ལ། །དེ་ཡི་ཐུགས་ཀར་ཉི་ཟླ་པད། །གསེར་གྱི་རྡོ་རྗེ་རྩེ་ལྔ་ནི། །འགྲེང་སྟབས་བུམ་པའི་དཀྱིལ་ན་ཧཱུཾ། །དེ་ནི་ཡིག་འབྲུའི་ཆོ་ག་ཡིན། །སྒོ་སྲོག་གཉིས་ཀྱི་སྤྲོ་བསྡུ་བྱ། །གཞི་ཡི་ཡི་གེ་འགྱུར་མེད་ལས། །དང་པོ་རྒྱུ་ཡི་སྤྲོ་བསྡུ་ནི། །སྣོད་དང་བཅུད་ཅེས་གྲགས་པའི་དོན། །གཞི་བོའི་ཧཱུཾ་ལས་བཾ་གཅིག་འཕྲོས། །པད་མ་འདབ་བརྒྱད་རིན་ཆེན་སྣོད། །མཁའ་དང་མཉམ་པར་དམིགས་པའོ། །བཅུད་ནི་དཔའ་བོ་འབྲུ་ལྔས་བསྐྱེད། །གཞི་བོའི་འབྲུ་ནི་འགྲིབ་མེད་པས། །བཛྲ་སཏྭ་ཅེས་པ་བརྒྱས། །སྣོད་བཅུད་ཐམས་ཅད་སྦྱངས་པ་ཡིན། །སྭཱ་དང་བརྒྱ་པས་སྤེལ་བ་ཡིན། །ཨོཾ་དང་བརྒྱ་པས་མོས་པར་བསྒྱུར། །ཧཱ་སོགས་བརྒྱ་པས་ ― DNG001_Page_0334 ―
[མ་དཔེ་གཟིགས་ན་འདིར་གནོན།]
མཆོད་སྦྱིན་བྱེད། །སོ་སོར་ཐོབ་པར་བྱ་བ་ཡིན། །ཧཱུཾ་དང་བརྒྱ་པས་དབང་དུ་བསྡུས། །དབང་བསྒྱུར་ཆེན་པོའི་ཏིང་འཛིན་བྱ། །དེ་ལྟར་སྦྱངས་སྤེལ་མོས་བཤགས་ལ། །མགྲོན་རྣམས་རིམ་པར་སྤྱན་དྲངས་ཏེ། །ཧཱུཾ་ལས་ཛ་སྤྲོས་འདི་སྐད་བརྗོད། །རྡོ་རྗེ་འཆང་བ་འདི་སྐད་གཤེགས། །རྡོ་རྗེ་འཆང་ལ་ཕྱག་འཚལ་ལོ། །མི་འཇིགས་པདྨའི་གདན་ལ་བཞུགས། །རྡོ་རྗེ་འཆང་ལ་མཆོད་པ་འབུལ། །མྱ་ངན་མི་འདའ་འགྲོ་དོན་མཛོད། །གསང་སྔགས་འཁོར་ལོ་བསྐོར་དུ་གསོལ། །ཕྱི་ནང་སྒྲིབ་པ་སྦྱང་དུ་གསོལ། །ཡིད་ལ་སྙིང་པོ་ཐོབ་པར་སྨོན། །ཡང་དག་སྙིང་པོའི་དོན་རྟོགས་ཤོག །བཛྲ་ས་མ་ཡ་དེས་བརྗོད། །མགྲོན་བཞིས་ནམ་མཁའ་ཁེངས་པར་བསམ། །དེ་ནས་མཆོད་སྦྱིན་བཀྱེ་བྱས་ཏེ། །སོ་སོར་ཐོབ་པར་བྱ་བའི་བརྒྱ་པ་ལ། །བ་ལིང་ཨི་དཾ་ཁཱ་ཧི་གདགས། །དེ་ནས་རང་དོན་དབང་དུ་བྱ། །དེ་ནས་ཚིག་བཅད་བསྔོ་བ་ནི། །ཧཱུཾ་བྱིན་བརླབས་དམིགས་མེད་གཏོར་མ་ཆེན་པོ་འདི། །སྲི་ཞུ་བླ་མ་རྒྱལ་བ་འཁོར་བཅས་དང་། །ཡོན་ཏན་ཕྱི་ནང་ཆོས་སྐྱོང་འཁོར་བཅས་དང་། །སྙིང་རྗེ་འགྲོ་དྲུག་ཉོན་མོངས་སེམས་ཅན་དང་། །ལན་ཆགས་བགེགས་རིགས་སྔར་ཆགས་ཐམས་ཅད་ལ། །འདོད་ཡོན་མཆོད་སྦྱིན་གཏོར་མ་འདི་བསྔོས་པས། །མཆོད་མཉེས་ཐུགས་དམ་སྐོང་གྱུར་ཅིག །རྐྱེན་བཟློག་སྡུག་བསྔལ་བྱང་ནས་སུ། །ལན་ཆགས་ཕྱི་ནང་སྒྲིབ་པ་དག་གྱུར་ཅིག །ཀུན་གྱིས་ཡང་དག་དོན་རྟོགས་ཤོག །ཅེས་དང་དེ་ནས་ཡང་ནི་བརྒྱ་པ་གདོན། །ལྷ་བརྒྱར་ཕྱག་འཚལ་བཤགས་པ་བྱ། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་མཆོད་སྦྱིན་གྱི་ལེའུ་སྟེ་བཅུ་གསུམ་པའོ།། །།ཡང་སྟོན་པས་བཀའ་སྩལ་པ། ཉོན་ཅིག་རྡོ་རྗེ་རིགས་ཀྱི་འཁོར། །མཆོད་རྟེན་སྐུ་གདུང་གདབ་པ་ནི། །སྦྱོར་བའི་དོན་དང་དངོས་གཞིའི་དོན། །རྗེས་ཀྱི་ལས་ཀྱི་དོན་དང་གསུམ། །སྦྱོར་བ་སྨོན་འཇུག་སེམས་བསྐྱེད་དེ། །ཚད་མེད་བཞི་ལྡན་རྣལ་འབྱོར་པས། །བསྐྱེད་རྫོགས་སྐུ་གདུང་གདབ་པར་བྱ། །འཇུག་པ་ལྷ་སྟེ་སེམས་བསྐྱེད་དོ། །དངོས་གཞི་ཞེས་པ་ལས་རིམ་སྟེ། །བྱིན་བརླབས་གདབ་དང་ཏིང་འཛིན་ནོ། །བྱིན་ ― DNG001_Page_0335 ―
[མ་དཔེ་གཟིགས་ན་འདིར་གནོན།]
བརླབས་ལས་རིམ་འབྱུང་བ་ལྔ། །འཇུག་པའི་ལས་རིམ་བྱ་བ་ཡིན། །ཐིག་དང་ཕུར་བ་གདབ་པ་ཡིན། །ས་རྐོ་བ་དང་བརྡུང་བ་དང་། །སྤོས་ཆུས་བྱུག་དང་མནྟྲ་གཞུག །འབི་འབི་བྱ་དང་ན་བཟའ་སྣུམ། །བྱིན་རླབས་སྔོན་འགྲོའི་རིམ་པ་སྟེ། །རྣལ་འབྱོར་པ་ཡིས་ཤེས་པར་བྱ། །གདབ་པའི་ལས་རིམ་གཉིས་སུ་དབྱེ། །འབྱུང་བ་ལྔ་དང་འཇིམ་པ་དང་། །གང་སྣང་ལམ་དུ་འདེབས་པའོ། །འབྱུང་བ་ལྔ་ལས་ནམ་མཁའ་དག་ལ་གདབ་པ་ནི། །བདག་ཉིད་སེམས་དཔའི་སྐུར་གསལ་བས། །བརྐོས་ཕོར་བྱིན་གྱིས་བརླབས་བྱས་ལ། །གཞི་ཡི་ཡི་གེ་ཉིད་ལས་སྤྲོས། །ངག་ཏུ་བརྒྱ་པ་འདོན་གྱིན་གདབ། །སྐུ་གསུང་ཐུགས་ཀྱི་དཀྱིལ་འཁོར་དམིགས། །མེ་ཆུ་རླུང་ཡང་དེ་བཞིན་གདབ། །འཇིམ་པ་དག་ལ་གདབ་པ་ནི། །འབི་འབི་བརྐོས་ཕོར་ནང་བཅུག་ལ། །ཡིག་འབྲུ་བརྒྱ་པ་བརྗོད་གྱིན་དུ། །དྷརྨ་ཀཱ་ཡ་ཨ་ཞེས་གདབ། །བཛྲ་སཏྭའི་ལྷ་ནི་བཞུགས། །དཀྱིལ་འཁོར་ཆེན་པོའི་མཆོད་རྟེན་ལ། །ལྷ་བརྒྱ་ལ་སོགས་ཀྱིས་བསྐོར་བར། །བསྐོར་བ་མཆོད་པ་བྱེད་པར་བསམ། །དེ་ཡང་འདི་ལྟར་ཤེས་པར་གྱིས། །གདབ་པ་ལ་ཡང་གཉིས་ཡིན་ཏེ། །གསོན་དང་གཤིན་དུ་ཤེས་པར་བྱ། །གསོན་པོ་ལ་ཡང་གཉིས་ཡིན་ཏེ། །བྱང་ཆུབ་དོན་དང་རྐྱེན་བཟློག་གཉིས། །བྱང་ཆུབ་དོན་ནི་གོང་ལྟར་ཏེ། །རྐྱེན་བཟློག་ཕྲིན་ལས་རྣམ་བཞིར་གདབ། །དང་པོ་ཞི་བར་གདབ་པ་སྟེ། །ཞི་བ་བུཌྜྷ་རྡོ་རྗེར་དམིགས། །བརྐོས་ཕོར་བྷྲུཾ་གྱིས་བྱིན་བརླབས་ལ། །ཨོཾ་བུཌྜྷ་སཏྭ་ས་མ་ཡ་ནས་ཨ་ཞེས་བརྒྱ་པའི་སྔགས་བརྗོད་ལ། ཆེ་གེ་མོ་ཤཱནྟིཾ་ཀུ་རུ་གདབ། །མཆོད་རྟེན་དཀར་པོ་ཟླུམ་པོ་ཕྱི། །ནང་དུ་ཞི་མཛད་རྡོ་རྗེ་དབྱིངས། །འོད་ཟེར་དཀར་པོས་གང་རེག་པ། །ཞི་བར་འགྱུར་ཏེ་ཞི་བར་བྱེད། །རྒྱས་པ་རིན་ཆེན་རྡོ་རྗེར་དམིགས། །བརྐོས་ཕོར་བྷཱུཾ་གྱིས་གྲུ་བཞིར་བརླབས། །སྭཱ་རཏྣ་སཏྭ་ཞེས་པ་ནས། །ཨ་ལ་ཐུག་པའི་རྒྱས་པ་ནས། །ཆེ་གེ་མོ་པུཥྚིཾ་ཀུ་རུ་གདགས། །མཆོད་རྟེན་གྲུ་བཞི་སེར་པོ་ཕྱི། །ནང་དུ་རྡོ་རྗེ་རྒྱས་མཛད་དབྱིངས། །འོད་ཟེར་སེར་པོས་ཀུན་ལ་ཁྱབ། །ཚེ་དང་བསོད་ནམས་དཔལ་རྣམས་རྒྱས། །དབང་ལ་པདྨ་རྡོ་རྗེར་དམིགས། །བརྐོས་ཕོར་ཟླ་གམ་བྱིན་བརླབས་ལ། ། ― DNG001_Page_0336 ―
[མ་དཔེ་གཟིགས་ན་འདིར་གནོན།]
ཨཱཿཔདྨ་སཏྭ་ས་མ་ཡ་ནས། ཨ་ཞེས་ཡི་གེ་བརྒྱ་པ་བརྗོད། །ཧྲཱྀཿཔ་ཤད་ཀུ་རུ་གདགས། །མཆོད་རྟེན་དམར་པོ་ཟླ་གམ་ཕྱི། །ནང་དུ་དབང་བསྐུར་པདྨ་དབྱིབས། །དམར་པོ་ལྕགས་ཀྱུའི་འོད་ཟེར་གྱིས། །དབང་དུ་བྱ་བ་གང་ཡིན་པ། །མོས་ཤིང་ཐམས་ཅད་དབང་དུ་སྡུད། །དྲག་པོ་དག་གི་ལས་བསྒྲུབ་ན། །ཀརྨ་རྡོ་རྗེར་དམིགས་བསམས་ལ། །བརྐོས་ཕོར་བྷྲཱུཾ་གྱིས་ཨེ་རུ་བརླབས། །ཧཱ་ཀརྨ་སཏྭ་ཞེས་པ་ནས། །ཨ་ཞེས་བརྒྱ་པ་རྫོགས་པར་བརྗོད། །ཆེ་གེ་མོ་མཱ་ར་ཡ་ཕཊ་གདགས། །ཧོམ་ཁུང་ནག་པོ་གྲུ་གསུམ་གྱི། །ནང་དུ་ལས་མཛད་ཁྲོ་བོའི་དབྱིངས། །འོད་ཟེར་ནག་པོ་མེ་མཚོན་གྱིས། །དམིགས་པ་གང་ཡིན་སྒྲོལ་བར་བྱེད། །ཐམས་ཅད་སྒྲོལ་ཏེ་ཐེ་ཚོམ་མེད། །ལས་ནི་གང་བསྒྲུབ་ཐམས་ཅད་ལ། །སྲོག་སྙིང་བྲིས་ཤིང་ཁོང་པར་གཞུག །དེ་ལྟར་བཏབ་སྟེ་གང་ཡང་འགྲུབ། །ཅེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་གསོན་ལྟར་གདབ་པའི་ལེའུ་སྟེ་བཅུ་བཞི་པའོ།། །།དེ་ནས་ཡང་བཀའ་སྩལ་པ། ཉོན་ཅིག་འཁོར་ཚོགས་རྡོ་རྗེ་ཁྱོད། །ཚེ་འདས་དོན་དུ་གདབ་པ་ནི། །ཐར་ལམ་མཁྱེན་པ་ང་ཡིས་བསྟན། །རུས་པའི་ཕྱེ་མ་ཞིབ་པར་བསྲེ། །དོན་མཆོག་ཡི་གེ་བརྒྱ་པ་ལ། །ཨ་ནྲྀ་སུ་ཏྲི་པྲེ་དུ་དྲུག་བཏགས་པའི། །ངན་སོང་སྦྱོང་བའི་སྙིང་པོའམ། །ཡང་ན་འདི་བཏགས་གདབ་པ་ཡིན། །ད་ཧ་ད་ཧ་སརྦ་ན་རག་ཀ་ཏེ་ཧེ་དུན་ཧཱུཾ་ཕཊ། མ་ཐ་མ་ཐ་སརྦ་ཏཱིརྱ་ཀ་ཏེ་ཧེ་དུན་ཧཱུཾ་ཕཊ། པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་དུན་ཧཱུཾ་ཕཊ། ཞེས་པས། ཚེ་འདས་ངན་སོང་གནས་ནས་དྲང་། །ཧཱུཾ་གིས་བརྐོས་ཕོར་ནང་བསྡིམས་ལ། །ཕཊ་ཀྱིས་རྒྱལ་བའི་དབྱིངས་སུ་འཕང་། །རྒྱུད་དྲུག་ས་བོན་འོད་བསྲེགས་ལ། །སྒྲིབ་སྦྱང་རྡོ་རྗེའི་དབྱིངས་སུ་བསྐྱལ། །ད་ནི་རབ་གནས་ཆོ་ག་ཡང་། །དམ་ཚིག་མཆོད་རྟེན་ཅི་བཏབ་གྲངས། །ཡེ་ཤེས་མཆོད་རྟེན་སྤྱན་དྲང་བསྡིམ། །བདེ་གཤེགས་སྙིང་པོས་སྙན་གསན་དབབ། །གཤེགས་སུ་གསོལ་ཞེས་སྤྱན་དྲངས་ལ། །ས་མཱ་ཛ་ཞེས་བརྗོད་པར་བྱོན། །ཏིང་ངེ་འཛིན་གྱིས་བསྡིམ་པར་བྱ། །འཁོར་བ་མ་སྟོངས་བར་དུ་བཞུགས། །རྣམ་དག་སྒྱུ་མའི་ཚིགས་བཤད་བརྗོད། །ཨ་ཏི་པུ་ཧོ་ཞེས་ཕྱག་བཙལ་ལ། ། ― DNG001_Page_0337 ―
[མ་དཔེ་གཟིགས་ན་འདིར་གནོན།]
དེ་ནས་མཆོད་པ་རིམ་པར་བྱ། །ཕྱག་ཞབས་བསིལ་ཞིང་དྲི་དང་ནི། །མེ་ཏོག་མར་མེ་ཨརྒྷ་དང་། །ཞལ་ཟས་རོལ་མོ་ཡན་ལག་བདུན། །ཀུན་བཟང་མཆོད་པ་སྤྱི་ཁྱབ་ཡིན། །དེ་ནས་དགོས་བསྟོད་སྨོན་ལམ་གདབ། །ན་རཀ་དོང་སྤྲུགས་གདོན་བྱས་ཏེ། །ཀུན་གྱི་ལས་རྣམས་རྫོགས་པ་ཡིན། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་གཤིན་ལྟར་གདབ་པའི་རབ་གནས་མཆོད་པའི་ལེའུ་སྟེ་བཅོ་ལྔ་པའོ།། །།ཡང་བཀའ་སྩལ་པ། ཉོན་ཅིག་རྡོ་རྗེ་རིགས་ཀྱི་འཁོར། །རོ་བསྲེག་ཕུང་པོ་སྦྱང་བ་ནི། །ས་གདོན་མེད་པའི་ས་ཕྱོགས་སུ། །མཎྜལ་འདོམ་གང་མདའ་གང་བྱ། །ཤིན་ཏུ་ཆ་མཉམ་ཆག་ཆག་གདབ། །དབུས་སུ་ཧོམ་ཁུང་བྲུ་བགྱི་སྟེ། །ཕྲིན་ལས་རྣམ་བཞིའི་ཧོམ་ཁུང་ཀུན། །ཡང་གཏིང་གྲུ་གསུམ་དེ་སྟེང་ཟླ་གམ་བྱ། །དེ་སྟེང་གྲུ་བཞི་ཡང་ཐོག་ཟླུམ་པོས་བསྐོར། །སོར་བཞི་དཔངས་དང་རྒྱ་རུ་བྱ། །དེ་སྟེང་ཀ་བཞིའི་ཐོག་གི་སྟེང་། །ཤིང་བརྩིགས་ཕྱོགས་བཞིར་སྐར་ཁུང་རེ། །རོ་ཁ་ཤར་དུ་བསྟན་ཏེ་བཞག །རོ་ཡི་སྙིང་གར་པདྨ་འཁོར་ལོ་བརྒྱ་ལྡན་ལ། །བརྒྱ་རྫོགས་ལྷ་ཡིག་བྲིས་པ་གདགས། །འཁོར་ལོའི་སྟེང་ནས་གཟུངས་ཐག་གདགས། །ལས་ཀྱི་མཁན་པོས་དེ་བཟུང་ལ། །ཏིང་འཛིན་སེམས་དཔའ་གསལ་བྱས་ནས། །ཐུགས་མཆོག་བརྒྱ་པ་བཟླས་བྱས་ལ། །སྤྲོ་བསྡུ་བྱ་བ་ཤིན་ཏུ་གཅེས། །གཙོ་བོ་དཔའ་བོ་འབྲུ་ལྔ་ལས། །ཡེ་ཤེས་མེ་དཔུང་མེ་ལྕེ་བརྒྱ་དང་བཅས། །མཆོད་སྦྱངས་དྲེགས་པ་ཚར་བཅད་ནས། །རོ་ཉིད་ཕུང་པོ་བསྲེག་པར་བྱ། །ཕྱོགས་བཞིའི་སྐར་ཁུང་རེ་ནས་གཟུངས། །རིགས་ལྷ་བརྒྱ་པའི་བཟླས་བརྗོད་བྱ། །སྔོན་འགྲོ་སྦྱོར་བ་དང་པོ་ནས། །དངོས་གཞིའི་ལས་རྣམས་ཀུན་བྱེད་དང་། །རྗེས་ཀྱི་ལས་མཐའ་རྫོགས་པ་ནི། །ན་རཀ་དོང་སྤྲུག་ཤེས་པར་བྱ། །དང་པོ་བུམ་ཆུས་རོ་བཀྲུས་ནས། །གཤེད་དང་དབྲལ་བ་དགེ་བཅུ་སྟེ། །ཁྲོ་བོ་བཅུ་ལ་ཕྱག་འཚལ་ཡིན། །འགྲོ་དྲུག་གནས་ནས་དྲང་བ་སྟེ། །ཐུང་བ་དྲུག་ལ་ཕྱག་འཚལ་བྱ། །ས་ལམ་ཕ་རོལ་ཕྱིན་བཅུ་སྟེ། །ཁྲོ་མོ་བཅུ་ལ་ཕྱག་འཚལ་ཡིན། །མེ་ལྷ་ཞི་བ་བཞི་ ― DNG001_Page_0338 ―
[མ་དཔེ་གཟིགས་ན་འདིར་གནོན།]
བཅུ་གཉིས། །མེ་ལྷ་ཁྲག་འཐུང་ཁྲོ་ཚོགས་ཡིན། །དབང་བསྒྱུར་བསྐུར་བ་རང་ཆས་ཡིན། །རིགས་ལྔ་གཽ་སེང་སེམས་དཔའ་སེམས་མ་དང་། །ཕྱག་འཚལ་ཞི་ཁྲོ་རྩ་བའི་ལྷ། །བརྒྱ་ཚན་ལྔ་བརྗོད་ཆོས་ཀྱི་འཁོར་ལོ་ཡིན། །ཞི་ཁྲོའི་ལྷ་ལ་ཕྱག་འཚལ་བཞི་བསྟོད་སྦྱིན་བསྲེག་ཡིན། །རྩ་བ་ཡན་ལག་དམ་ཚིག་ཉམས་པ་བཤགས་པ་ཡིན། །མཇུག་ཏུ་སྨོན་ལམ་གདབ་པ་རྗེས་ཀྱི་ལས་མཐའ་ཡིན། །གཞན་ཡང་ཁ་སྐོང་ཞི་ཁྲོ་ཡིས། །གོ་རིམ་བྱས་པས་སྐྱོན་མེད་གདུལ་བྱ་ཡིན། །དེ་བཞིན་མེ་ལྷ་སྤྱན་དྲང་ཁ་བསྐང་བྱ། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་རོ་སྲེག་གི་ལེའུ་སྟེ་བཅུ་དྲུག་པའོ།། །།དེ་ནས་ཡང་བཀའ་སྩལ་པ། ཉོན་ཅིག་རྡོ་རྗེ་རིགས་ཀྱི་འཁོར། །དེ་ནས་ཚེ་འདས་བདུན་ཚིགས་ནི། །ཕུང་པོ་ཤ་ཁྲག་དབུགས་དང་བྲལ་བའི་ཚེ། །ཞག་གསུམ་ཞག་ལྔ་ཞག་བདུན་དུ། །རོ་མི་བསྒུལ་བར་ཙེན་ནར་བཞག །ཤེས་པ་བརྒྱལ་ཏེ་མི་རྟོག་ཡོད། །ངུ་སྐད་སྤངས་ཏེ་ཆོས་རྣམས་བསྒྲགས། །གྲོགས་དང་སློབ་དཔོན་སློབ་མ་མཆེད། །གྲོགས་སུ་གྱུར་པས་ལས་རྣམས་བྱ། །དང་པོར་གཤེད་དང་ཕྲལ་བྱ་བ། །ཁྲོ་བཅུ་བརྒྱ་པ་དྲག་པོས་དབྲལ། །ཐུབ་དྲུག་ཨ་ནྲྀ་སུ་ཏྲི་པྲེ་དུ་ཡིས། །འགྲོ་དྲུག་གནས་ནས་དྲངས་པ་ཡིན། །བརྒྱ་པའི་ཞབས་སུ་ཡིག་འབྲུ་རེ། །དེ་ནས་ལམ་བསྟན་ཁྲོ་མོ་བཅུར། །ཕྱག་འཚལ་མཆོད་པའི་རིམ་པ་བྱ། །མཆོད་སྦྱིན་བཏང་ཞིང་སྐུ་གདུང་གདབ། །ཡན་ལག་བདུན་པའི་གོ་རིམ་བྱ། །མར་མེ་སྨོན་ལམ་དེ་བཞིན་བྱ། །ཞི་ཁྲོའི་ལྷ་ལ་ཕྱག་འཚལ་སྡིག་པ་བཤགས། །བརྒྱ་པ་བཏོན་ཏེ་མིང་ཡིག་གདག །དེ་ལྟར་ཚུལ་བཞིན་བྱས་བསྒྲུབས་ན། །བར་དོའི་གནས་ནི་ཨ་ཅང་ཆེས། །སྐྱེ་གནས་སྦུབས་ནས་ངེས་པར་འདྲོངས། །རབ་ནི་བདུན་ཚོ་དང་པོས་འདྲོངས། །འབྲིང་ནི་བདུན་གསུམ་ཉི་ཤུ་གཅིག །ཐ་མ་བཞི་བཅུ་ཞེ་དགུས་འདྲོངས། །དམ་ཚིག་རྩ་བ་གསུམ་དང་ཉི་ཤུ་ལྔ། །ཉམས་པར་གྱུར་ཀྱང་ངེས་པར་འདྲོངས། །མཚམས་མེད་ལྔ་དང་རྩ་བ་བཞི། །དེ་བཞིན་ངེས་པར་འབྱུངས་པར་འགྱུར། །མི་དགེ་ཕལ་རྣམས་སྨོས་ཅི་དགོས། ། ― DNG001_Page_0339 ―
[མ་དཔེ་གཟིགས་ན་འདིར་གནོན།]
ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས། བདུན་ཚིགས་ཀྱི་ལེའུ་སྟེ་བཅུ་བདུན་པའོ།། །།དེ་ནས་ཡང་བཀའ་སྩལ་པ། ཉོན་ཅིག་རྡོ་རྗེའི་འཁོར་རྣམས་ཀུན། །ལག་ན་རྡོ་རྗེ་ལེགས་པར་ཟུང་། །ང་ཡི་རྒྱུད་ཀྱི་རྒྱལ་པོ་འདིར། །ཐམས་ཅད་འདྲེལ་ཏེ་རྫོགས་པ་ཡིན། །སྐུ་གསུང་ཐུགས་དང་ཡོན་ཏན་ལས། །ཐམས་ཅད་མ་ལུས་བསྟན་པས་མང་པོ་འདུས། །གཙོ་དང་འཁོར་དུ་བསྟན་པས་དཀྱིལ་འཁོར་ཡིན། །རང་ལ་རང་ཆས་བསྟན་པས་དབང་ཡང་ཡིན། །རྩ་བ་ཡན་ལག་བསྟན་པས་དམ་ཚིག་ཡིན། །དམ་པ་རིགས་བརྒྱ་བསྟན་པས་ལྷ་ཡང་ཡིན། །འབྲུ་མཆོག་བརྒྱ་པ་བསྟན་པས་སྔགས་ཀྱང་ཡིན། །རྣལ་འབྱོར་ལས་སུ་བསྟན་པས་རྣལ་འབྱོར་ཡིན། །བརྩོན་འགྲུས་ཡེངས་མེད་བསྟན་པས་བསྙེན་བསྒྲུབ་ཡིན། །མཆོད་བསྟོད་གཉིས་མེད་བསྟན་པས་མཆོད་པ་ཡིན། །ཞི་རྒྱས་དབང་དྲག་བསྟན་པས་ཕྲིན་ལས་ཡིན། །ཡེངས་མེད་རྒྱུན་པ་བསྟན་པས་བསྒོམ་པ་ཡིན། །ལུས་ངག་ཡིད་གསུམ་སྤྱོད་པས་སྤྱོད་པ་ཡིན། །ཡིན་མིན་ཕྱོགས་དང་བྲལ་བས་ལྟ་བ་ཡིན། །འདྲེལ་དང་མ་ཚང་མེད་པ་དང་། །ཡོངས་སུ་རྫོགས་པས་འབྲས་བུ་ཡིན། །རྒྱུད་ཀྱང་ཡིན་ལ་འདྲེལ་རྫོགས་མཆོག །ང་ཡིས་ལུང་བསྟན་ཁྱོད་ཀྱིས་ཟུང་། །ལུང་ཡང་ཡིན་ལ་འཁྱེར་བདེ་མཆོག །ཚེགས་ཆུང་བ་ལ་དོན་ཆེན་བསྟན། །མན་ངག་ཡིན་ཏེ་གནད་ཀྱི་མཆོག །ཐབས་མཆོག་ཐོས་ནས་སྒྲུབ་བྱེད་པ། །སྒྲུབ་ཐབས་ཡིན་ཏེ་གཟེར་ཀའི་མཆོག །ཅེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་རྒྱུད་འདྲེལ་གྱི་ལེའུ་སྟེ་བཅོ་བརྒྱད་པའོ།། །།དེ་ནས་ཡང་བཀའ་སྩལ་པ། ཉོན་ཅིག་བཛྲ་རིགས་ཀྱི་འཁོར། །འཁོར་ལོ་ལྔ་ལ་ཡིག་འབྲུ་བརྒྱ། །ལྷ་བརྒྱ་རང་བཞིན་གནས་པ་ཡིན། །སྙིང་ག་ཆོས་ཀྱི་འཁོར་ལོ་ན། །རྩ་འདབ་ཆེན་པོ་བརྒྱད་དུ་གནས། །ཆོས་འབྱུང་ཟླུམ་པོ་སྟོང་དང་དགུ། །སྙིང་དཀྱིལ་ཉི་ཟླ་པདྨའི་སྟེང་། །ཡེ་ཤེས་སེམས་དཔའི་ཐུགས་ཀ་ན། །རྡོ་རྗེ་བསླང་བ་འགྲེང་བའི་ཚུལ། །རྡོ་རྗེའི་བུམ་དབུས་ཧཱུཾ་དུ་གནས། །སྟོང་པའི་ནང་ན་ཧཱུཾ་དང་བཛྲ་སཏྭའོ། །ཊ་དང་ཨ་ཡང་གནས་པ་ཡིན། །དེ་ནས་ནུ་གཡོན་རྩ་འདབ་ལ། །ས་ ― DNG001_Page_0340 ―
[མ་དཔེ་གཟིགས་ན་འདིར་གནོན།]
དང་མ་གཉིས་གནས་པ་ཡིན། །དེ་ནས་ནུ་གཡས་རྩ་འདབ་ལ། །ཡ་དང་མ་གཉིས་གནས་པ་ཡིན། །དེ་ནས་རྩ་འདབ་གསུམ་པ་ལ། །ནུ་དང་པ་གཉིས་དེ་བཞིན་གནས། །བཞི་པ་ལ་དང་ཡ་གནས་ཏེ། །ལྔ་པ་བཛྲ་སཏྭ་གཉིས་གནས་སོ། །དྲུག་པར་ཏྭ་དང་ཏེ་གཉིས་གནས། །བདུན་པ་ནོ་དང་བ་གཉིས་གནས། །བརྒྱད་པར་ཏི་དང་ཥྛ་གཉིས་གནས། །དེ་ནས་མགྲིན་པར་ལོངས་སྤྱོད་འཁོར་ལོ་ན། །རྩ་འདབ་བཅུ་དྲུག་གནས་པ་ལ། །དང་པོ་རྩ་འདབ་དྲྀ་ཌྷོ་གཉིས། །གཉིས་པ་ལ་ནི་མེ་དང་བྷ། །གསུམ་པ་ལ་ནི་བ་དང་སུ། །བཞི་པར་ཏོ་དང་ཥྱོ་གཉིས། །ལྔ་པ་ལ་ནི་མེ་དང་དྷ། །དྲུག་པ་ལ་ནི་བ་དང་ཨ། །བདུན་པ་ནུ་དང་རཀ་གཉིས་ཡིན། །བརྒྱད་པར་ཏོ་དང་མེ་གཉིས་གནས། །དགུ་པར་བྷ་དང་བ་གཉིས་གནས། །བཅུ་པར་སུ་དང་པོ་གནས་ཏེ། །བཅུ་གཅིག་པ་ལ་ཥྱོ་དང་མེ། །བཅུ་གཉིས་པ་ལ་བྷ་གཉིས་ཡིན། །བཅུ་གསུམ་པ་ལ་ས་དང་རྦ། །བཅུ་བཞི་པ་ལ་སིདྡྷི་སྟེ། །བཅོ་ལྔ་པ་ལ་མ་མེ་གཉིས། །བཅུ་དྲུག་པ་ལ་པྲ་དང་ཡ། །སེམས་དཔའ་ཀཽ་རཱི་ཡི་གེ་ཡིན། །སྤྱི་བོ་བདེ་ཆེན་འཁོར་ལོ་ལ། །ཡིག་འབྲུ་སུམ་ཅུ་རྩ་གཉིས་པོ། །དེ་ལྟར་ཤུགས་ཀྱིས་གནས་པ་ཡིན། །རྩ་ནས་བཛྲ་སུམ་ཅུ་གཉིས། །ཙྪ། སར། བ། ཀར། མ། སུ། ཙ། མེ། ཙི། ཏྟི། ཤྲེ། ཡང་། ཀུ། རུ། ཧཱུཾ། ཧཱུཾ། ཧ། ཧ། ཧ། ཧ། ཧོ། བྷ། ག །བཱན། སར། བ། ཏ། ཐཱ། ག ཏ། བ། ཛྲ། ལྟེ་བ་སྤྲུལ་པའི་འཁོར་ལོ་ལ། །རྩ་འདབ་དྲུག་ཅུ་རྩ་བཞི་སྟེ། །དྲུག་པོ་ལ་ནི་ཡིག་འབྲུ་རེ། །ཐུང་བ་དྲུག་ཏུ་གནས་པ་ཡིན། །མཱ། མེ། མུ། ཉྩ། བཛྲི། བྷ། གསང་བ་གསང་བའི་འཁོར་ལོ་ནི། །རྩ་ཆེན་བཞི་རུ་འདུས་པ་ཡིས། །སྒོ་བ་བཞི་རུ་གནས་པ་ཡིན། །ག །མ། ཧཱ། ས། དེ་ནས་དབང་པོའི་སྒོ་བཞི་སྟེ། །རྣ་བ་མིག་དང་སྣ་ལྕེ་ལ། །སྒོ་མ་བཞི་རུ་གནས་པ་ཡིན། །མ་ཡ་བཛྲ་སཏྭ་ཨ། སྙིང་དཀྱིལ་ཀུན་བཟང་ཡབ་ཡུམ་དོན། །སྙིང་ནས་གྱེས་ནས་སྙིང་དུ་འདྲིལ་བའོ། །ཞི་ཁྲོ་གཉིས་ཀྱི་མཚོན་པ་ཡང་། །སྙིང་དཀྱིལ་པདྨ་འདབ་བཞི་བརྒྱད། །ཚོགས་དྲུག་ཡན་ལག་ལྔ་པོ་བཞི་བཅུ་གཉིས། །བུཌྜྷ་ཞེ་གཉིས་པདྨས་མཚོན། །སྙིང་ནི་འཁོར་ལོ་རྩིབས་ཆེན་བརྒྱད། ། ― DNG001_Page_0341 ―
[མ་དཔེ་གཟིགས་ན་འདིར་གནོན།]
མགྲིན་པར་གྱེས་ནས་བཅུ་དྲུག་ལ། །སྤྱི་བོར་འཁོར་ལོ་སུམ་ཅུ་གཉིས། །ལྔ་བཅུ་རྩ་བརྒྱད་འཁོར་ལོས་མཚོན། །འཁོར་ལོ་ལྔ་གསུམ་རྩ་རླུང་ལས་རྫོགས་ཡིན། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་བརྒྱ་ཚན་ལུས་ལ་རྫོགས་ལུགས་ཀྱི་ལེའུ་སྟེ་བཅུ་དགུ་པའོ།། །།དེ་ནས་ཡང་བཀའ་སྩལ་པ། བཛྲ་པཱ་ཎི་ཁྱོད་ཉོན་ཅིག །ཞི་རྒྱས་དབང་དྲག་མཚོན་པ་ཡང་། །འདི་ལྟར་བཅས་ཤིང་བསམ་པར་བྱ། །དང་པོར་ཞི་བའི་མཚོན་པ་ནི། །ཟླུམ་པོའི་དཀྱིལ་དུ་རྡོ་རྗེ་ཨོཾ། །དེ་མཐའ་འཁོར་ལོ་རྩིབས་བཞིའི་ཚུལ། །མཐའ་ནི་མུ་ཁྱུད་ཟླུམ་པོས་བསྐོར། །བུམ་པའི་ཨོཾ་ལ་བུཌྜྷ་ས་མ་ཡ་ལ་སོགས། །ཨ་ལ་གཏུགས་པའི་ཕྲེང་བསྐོར་ཡིན། །དེ་ཡང་ཟླུམ་པོར་རོ། །ཤམ་བུ་ཨོཾ་ལ་ཤཱནྟིཾ་གདགས། །ཞི་བའི་ལྷ་དང་མཆོད་རྟེན་ཀུན། །འོད་ཟེར་དཀར་པོ་འཕྲོ་བ་ཡིས། །ཞི་བར་འགྱུར་ཏེ་ཐེ་ཚོམ་མེད། །དེ་ནས་རྒྱས་པའི་མཚོན་བསམ་ཡང་། །རིན་པོ་ཆེ་ཡི་ལྟེ་བ་ལ། །རྡོ་རྗེ་དཀྱིལ་གནས་བུམ་པར་སྭཱ། །མཐའ་མ་གྲུ་བཞི་ལྟེ་བ་ཡི། །བུམ་པའི་སྭཱ་ལས་འཕྲོས་པ་ནི། །སྭཱ་རཏྣ་ས་མ་ཡ། ཨཱ་ཞེས་ཕྲེང་བས་བསྐོར་དུའོ། །གྲུ་བཞིའི་གྲུ་བཞིར་ལྷམ་པ་རུ། །ཤམ་བུ་སྭཱ་ལ་པུཥྚིར་གདགས། །རྒྱས་པའི་ལྷ་དང་མཆོད་རྟེན་ཀུན། །འོད་ཟེར་སེར་པོ་འཕྲོས་པ་ཡིས། །རྒྱས་པར་འགྱུར་ཏེ་ཐེ་ཚོམ་མེད། །དེ་ནས་དབང་གི་མཚོན་བསམ་ཡང་། །པདྨ་འདབ་བརྒྱད་ལྟེ་བ་ལ། །རྡོ་རྗེའི་བུམ་པའི་ལྟེ་བར་ཨཱཿ། །མཐར་ནི་ཟླ་གམ་ལམ་པ་ཡིན། །བུམ་པར་ཨཱཾཿལས་འཕྲོས་པ་ནི། །ཧྲཱྀཿཔདྨ་སཏྭ་ས་མ་ཡཱ། ཨ་ལ་ཐུག་པའི་ཕྲེང་བས་བསྐོར། །ཟླ་གམ་ཟླ་གམ་སྒོར་སྒོར་རོ། །ཤམ་བུར་ཧྲཱྀ་ལ་བ་ཤཾ་གདགས། །དབང་གི་ལྷ་དང་མཆོད་རྟེན་ཀུན། །འོད་ཟེར་དམར་པོ་འཕྲོ་བ་ཡིས། །དབང་དུ་འདུས་ཏེ་ཐེ་ཚོམ་མེད། །དྲག་པོའི་མཚོན་བྱེད་བསམ་པ་ཡང་། །ཨེ་བརྩེགས་དབུས་སུ་རྒྱ་གྲམ་ལ། །རྒྱ་གྲམ་ལྟེ་ལ་ཧཱ་གནས་ཏེ། །མཐའ་ནི་གྲུ་གསུམ་དྲག་པོར་འཁོར། །བུམ་པའི་ཧཱ་ལས་འཕྲོ་ལུགས་བཞི། །རྣལ་མར་བསྐོར་དང་གོ་རིམ་བཟློག །ཡིག་འབྲུ་བཟློག་དང་འདུག་ས་སྤོ། །གྲུ་གསུམ་ཨེ་རུ་བསྐོར་བ་ཡིན། །ཧཱ་དང་ཀརྨ་སཏྭ་ནཱི། །ཨ་ཞེས་དྲག་པོས་བཟླས་པ་ཡི། །ཤམ་བུར་མཱ་ར་ཡ་ ― DNG001_Page_0342 ―
[མ་དཔེ་གཟིགས་ན་འདིར་གནོན།]
རྦད་རྦུད། །ནན་དང་རཾ་དང་བཟློག་ཕཊ་བྷྱོ། །དྲག་པོའི་སྔགས་ཀུན་གདགས་པར་བྱ། །བརླག་པར་འགྱུར་ཏེ་ཐེ་ཚོམ་མེད། །ཕྲིན་ལས་ལྷ་དང་མཆོད་རྟེན་ཀུན། །གྲུ་གསུམ་ནག་པོ་འཕྲོས་པ་ཡིས། །བརླག་པར་འགྱུར་ཏེ་ཐེ་ཚོམ་མེད། །ཅེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་ཕྲིན་ལས་བཞིའི་བསམ་པ་དང་། མཚོན་པའི་བྲི་ལུགས་ཀྱི་ལེའུ་སྟེ་ཉི་ཤུ་པའོ།། །།དེ་ནས་ཡང་བཀའ་སྩལ་པ། ཉོན་ཅིག་རྡོ་རྗེ་འཛིན་པ་ཁྱོད། །བསྟན་པ་དུས་ངན་བྱུང་བའི་ཚེ། །མུ་སྟེགས་ནག་པོ་དགྲར་ལངས་སམ། །སྔགས་མཁན་ནད་རྒྱས་བྱུང་བ་འམ། །སྲི་ཅན་དྲག་པོ་ལངས་པ་འམ། །ལྷ་འདྲེ་དྲག་པོ་དང་འགྲས་ན། །དོན་མཆོག་ཐུགས་སྒྲུབ་བརྒྱ་པ་ཡིས། །ཕྲིན་ལས་རྣམ་བཞི་མཆོད་རྟེན་དང་། །བསྒྲུབ་པ་ཆེན་པོའི་མཆོད་རྟེན་བཞེངས། །དང་པོ་དབང་གཟུགས་བཤགས་སྦྱང་ཕྱིར། །ཞི་བའི་མཆོད་རྟེན་ཟླུམ་པོར་བཞེངས། །ཆུ་གཏོར་དཀར་གཏོར་གཏོང་ཞིང་བཤགས་པ་ཅི་འགྱུར་བྱ། །ཤར་གྱི་ཕྱོགས་སུ་བཞུགས་སུ་གསོལ། །ཞི་བར་བྱ་བའི་ལས་ཡིན་པས། །བརྒྱ་པར་ཤཱནྟིཾ་ཀུ་རུ་གདགས། །ཞག་བདུན་བར་དུ་བཟླས་པར་བྱ། །དགྲ་བགེགས་ངན་སྔགས་ཞི་བར་བྱེད། །ཞི་བར་བྱ་བའི་ལས་སུ་བཤད། །དཀར་གསུམ་བཟའ་ཞིང་ཁྲུས་ལ་འབད། །མཎྜལ་བུམ་པ་དཀར་པོ་ལ། །གཟུངས་ཐག་དཀར་པོ་བུམ་རྫས་དཀར། །དོང་སྤྲུགས་བཀླག་ཅིང་ཁྲུས་ལ་འབད། །ཞི་བར་འགྱུར་ཏེ་ཐེ་ཚོམ་མེད། །དེ་ནས་བསོད་ནམས་སྤེལ་བའི་ཕྱིར། །རྒྱས་པའི་མཆོད་རྟེན་གྲུ་བཞི་བཞེངས། །གསེར་སྐྱེམས་གཏོང་ཞིང་གཏོར་མ་བཏང་། །འབྲུ་སྣ་རིན་ཆེན་དར་ཟབ་རྫས། །མངར་གསུམ་རྩི་སྨན་སྣ་ཚོགས་བསོག །གསེར་གཡུ་གཉིས་ནི་མགུལ་དུ་གདགས། །བརྒྱ་པར་ཨཱ་ཡུཿཔུཥྚིཾ་ཀུ་རུ་སྭཱ་ཧཱ། སརྦ་པུཎྱ་པུཥྚིཾ་ཀུ་རུ་སྭཱ་ཧཱ། ཞེས་གདགས། མངར་གསུམ་བཟའ་ཞིང་བུམ་སེར་བཀྲུ། །དོང་སྤྲུགས་གདོན་ཞིང་སིདྡྷི་བསྒྲུབ། །ཚེ་དང་བསོད་ནམས་འཕེལ་བ་ཡིན། །མཆོད་རྟེན་ལྷོ་ཡི་ཕྱོགས་སུ་བཞུགས། །རྒྱས་པར་འགྱུར་ངེས་ཐེ་ཚོམ་མེད། །དེ་ནས་དབང་དུ་བསྡུ་བའི་ཕྱིར། །དབང་གི་མཆོད་རྟེན་ཟླ་གམ་བཞེངས། །སྨན་ ― DNG001_Page_0343 ―
[མ་དཔེ་གཟིགས་ན་འདིར་གནོན།]
རག་ཤ་ཆེན་གཏོར་མ་བཤམས། །བརྒྱ་པར་བ་ཤང་ཀུ་རུ་གདགས། །ཧྲཱྀཿདང་ཡི་གེ་ཤིན་ཏུ་གཅེས། །དགྲ་བགེགས་ངན་སྔགས་དབང་དུ་སྡུད། །ཉ་ནས་ཉི་ཤུ་གཉིས་བསྒྲུབས་ཏེ། །མཎྜལ་ཟླ་གམ་བུམ་པ་དམར། །སྲོག་དང་སྲོག་གི་སྙིང་པོས་བསྒྲུབ། །མཆོད་རྟེན་ནུབ་ཕྱོགས་བཞུགས་སུ་གསོལ། །དམིགས་པ་གང་ཡིན་དབང་དུ་འགྱུར། །ཚར་བཅད་རྩད་ནས་བཅད་པའི་ཕྱིར། །དྲག་པོའི་མཆོད་རྟེན་གྲུ་གསུམ་བཞེངས། །ཤ་ཁྲག་དུག་དང་གཏོར་མ་བཤམས། །མཚོན་ཆ་སྣ་ཚོགས་ལག་ཏུ་བླངས། །བསྐོར་བ་ཕྱི་ལོག་ནང་ལོག་བྱ། །ལིངྒ་ནག་མོའི་ཐག་པས་གདགས། །དམིགས་རྟེན་འབྲུབ་ཁུང་རྩང་གིས་བསྐོར། །གྲུ་གསུམ་ནག་པོའི་ནང་དུ་བསད། །མིང་རུས་དམིགས་པའི་རྟེན་ཡང་བླངས། །གཤེར་ཐུན་སྐམ་ཐུན་མཚོན་གྱིས་བྲབ། །བྲབ་བརྡེག་དམིགས་པ་གསལ་བར་བྱ། །གུ་གུལ་རྒྱ་ཚིལ་ཚིལ་ཆེན་བདུག །དུག་དང་དུག་ཆུས་བྲན་དང་བྱུགས། །གདུག་པའི་དུག་ཤིང་ཚེར་མ་ཅན། །ཧོམ་ཆེན་བཅས་ལ་བསྲེགས་པ་ཡིན། །ཐོད་པ་ངན་པའི་ནང་དུ་མནན། །བྱང་ཕྱོགས་མཆོད་རྟེན་བཞུགས་སུ་གསོལ། །དམིགས་པས་བརླག་སྟེ་ཐེ་ཚོམ་མེད། །རྣལ་བཟློག་དཀྲུགས་དང་ཡིག་འབྲུ་བཟློག །དེ་ཤམ་ཆེ་གེ་མོ་མཱར་ཡ་རྦད། །ནན་དང་རི་དང་རྦད་ལ་སོགས་པ་གདགས། །རྫས་དགུ་བྷྱོ་དང་ཡ་དང་ཕཊ། །དྲག་པོའི་ལས་ཀྱི་རྣོ་ངར་ཡིན། །མིང་རུས་ཐལ་པ་ལིངྒ་ཀུན། །མཆོད་རྟེན་གྲུ་གསུམ་ནག་པོ་ཡི། །འོག་ཏུ་གྲུ་གསུམ་དོང་ནང་མནན། །མཆོད་རྟེན་རབ་གནས་བྱས་པ་ནི། །བདག་ཉིད་སྒྲུབ་པའི་དཀྱིལ་འཁོར་གྱིས། །ཕྱོགས་བཞིར་དཀྱིལ་འཁོར་དེ་ལྟར་བཞུགས། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་ཕྲིན་ལས་མཆོད་རྟེན་བཞིའི་ལེའུ་སྟེ་ཉེར་གཅིག་པའོ།། །།དེ་ནས་ཡང་སྟོན་པས་བཀའ་སྩལ་པ། རྡོ་རྗེ་འཛིན་པ་ལེགས་པར་ཟུང་། །མཆོད་རྟེན་ཆེན་པོའི་བཞེངས་ལུགས་ལ། །བསྒྲུབ་གནས་མཐོ་བའི་ས་བླངས་ལ། །འཇིམ་པ་བཟང་པོ་དག་དང་སྦྱར། །གསེར་དངུལ་ཟངས་ལྕགས་སྨན་རྣམས་བླུག །དཀར་གསུམ་པ་ཡི་ཆུ་ཡིས་སྤྲུ། །དང་པོ་བུམ་པའི་འཇིམ་ ― DNG001_Page_0344 ―
[མ་དཔེ་གཟིགས་ན་འདིར་གནོན།]
པ་བྱ། །ཤར་ལྷོ་ནུབ་བྱང་ས་བཞི་བླང་། །ཁ་དོག་བཞི་བཞིའི་ས་དང་སྦོལ། །འཇིམ་པ་བཟང་པོ་དག་དང་སྦྱར། །ཕྱོགས་བཞི་མགུར་ཆུ་བང་རིམ་ས། །བ་ཆུ་སྤོས་ཆུས་སྦྱར་བར་བྱ། །མི་བསད་གཡུལ་བཀྱེས་ཕུང་ཤུལ་ས། །ནག་པོ་རེ་བའི་ནང་བླངས་ལ། །ཁྲག་སྣ་དུག་སྣ་བོང་ཆུས་སྤྲུ། །རྨང་དང་འབྲུབ་ཁུང་རྒྱུ་ཡིན་ནོ། །མཆོད་རྟེན་བང་རིམ་བཞི་པ་བཞེངས། །བུམ་པ་མགུར་ཆུ་དྲེ་ཕུལ་ལྡན། །འཁོར་ལོ་གདུགས་དང་བྱ་རུ་ཏོག །དར་ཕྱང་དྲིལ་བུ་མེ་ལོང་ཀུན། །ཤོག་ཤོག་དག་ལ་བྱ་བ་ཡིན། །མཆོད་རྟེན་ན་བཟའ་འདི་ལྟར་གསོལ། །རིན་ཆེན་དྲེ་ཕུལ་མཐིང་གར་གསོལ། །བུམ་པ་མགུར་ཆུ་དཀར་པོར་བྱ། །ཤར་ཕྱོགས་བང་རིམ་དེ་བཞིན་དཀར། །ལྷོ་ཕྱོགས་སེར་ལ་ནུབ་ཕྱོགས་དམར། །བྱང་ཕྱོགས་བང་རིམ་ལྗང་གུར་གསོལ། །རྨང་ནི་གདུག་བྱེད་ནག་པོར་གསོལ། །འཁོར་ལོ་བཅུ་གསུམ་རྫོགས་པར་བྱ། །ཏོག་ནི་ནོར་བུ་རིན་ཆེན་བྱ། །གདུགས་གཉིས་ཐབས་དང་ཤེས་རབ་ཚུལ། །དར་འཕྱང་ཐུགས་རྗེ་ཆེན་པོ་ཡིན། །སྲོག་ཤིང་དཔག་བསམ་ཤིང་བླ་ཡིན། །མཆོད་རྟེན་ཕྱོགས་བཞིར་རྒྱག་པར་བྱ། །བུམ་པ་ལྟོ་བ་ཟླུམ་པོར་བྱ། །རས་སམ་གྲོ་ག་ཤིང་ཤུན་ནམ། །ཤོག་ཤོག་དག་ལ་བརྒྱ་པ་བྲི། །རང་གི་མིང་རུས་ཀུན་ཀྱང་བྲི། །བསྟེན་བསྒྲུབས་འགོ་བའི་ལྷ་ཡང་བྲི། །བུམ་པ་སྲོག་ཤིང་སྙིང་ལ་གདགས། །སྙིང་པོ་ལྔ་དང་སྨན་ལྔ་དང་། །འབྲུ་ལྔ་དྲི་ལྔ་རིན་ཆེན་ལྔ། །དར་ཟབ་རས་ཀྱིས་གཏུམས་ལ་གཞུག །དེ་ནས་བང་རིམ་བཞིའི་ནང་དུ། །ལྷ་སྲིན་སྡེ་བརྒྱད་སྲོག་སྙིང་གཟུགས། །བྲིས་ལ་བང་རིམ་བཞི་པར་རོ། །དེ་ནས་རྨིང་དང་འབྲུབ་ཁུང་དུ། །གང་ཡིན་དམིགས་པའི་ལིངྒ་ལ། །ནག་མོ་ནག་པོའི་ཐག་པས་དཀྲིས། །ལིངྒ་མིང་དང་བཅས་པ་ཡང་། །འབྲུ་ནག་ས་སྦྱིན་དུག་ཁྲག་གཟུགས་དང་སྦྱར། །ཐོད་པ་ནག་པོའི་ནང་འོག་ཏུ། །ཚོན་སྐུད་སྣ་ལྔས་བཅིངས་ལ་བཞག །རྒྱ་གྲམ་འཁོར་ལོས་ཁ་ནས་བཅད། །དེ་ནས་སྒྲུབ་པོ་བདག་ཉིད་ཀྱིས། །མཆོད་རྟེན་རབ་གནས་དབང་བསྐུར་བྱ། །བརྒྱ་པའི་སྔགས་དང་རྟེན་འདྲེལ་སྡེབ། །བརྒྱ་ཕྲག་ ― DNG001_Page_0345 ―
[མ་དཔེ་གཟིགས་ན་འདིར་གནོན།]
བདུན་གསུམ་རྟེན་འདྲེལ་བཅས། །རབ་ཏུ་གནས་པ་རྒྱས་པར་བྱ། །བརྒྱ་པ་རྟེན་འདྲེལ་གཉིས་གཤམ་ལ། །ཀཱ་ཡ་དྷརྨ་ཨོཾ་ཞེས་བརྗོད། །མཆོད་རྟེན་ཆོས་ཀྱི་སྐུར་དམིགས་ལ། །སྐུ་ཡི་དབང་བསྐུར་རབ་གནས་ཡིན། །བརྒྱ་པ་དང་ནི་རྟེན་འདྲེལ་ཤམ་ཉིད་དུ། །ཧྲཱྀཿཧྲཱ་དྷརྨ་ཨཱཿཞེས་བརྗོད། །མཆོད་རྟེན་ཆོས་སྒྲ་སྒྲོགས་པར་དམིགས། །གསུང་གི་དབང་བསྐུར་རབ་གནས་ཡིན། །བརྒྱ་དང་རྟེན་འདྲེལ་དེར་འཇུག་ལ། །ཧཱུཾ་ཙིཏྟ་དྷརྨཱ་བཛྲ་ཧཱུཾ་ཞེས་བརྗོད། །མཆོད་རྟེན་ཡེ་ཤེས་ལྔ་ལྡན་དམིགས། །ཐུགས་ཀྱི་དབང་བསྐུར་རབ་གནས་ཡིན། །བདེ་གཤེགས་ཐུགས་དང་སྐུ་གསུང་གནས། །དབང་བསྐུར་རབ་གནས་རྫོགས་པ་ཡིན། །ཀཱ་ཡ་ཝཱཀ་ཙིཏྟ་ཏིཥྛ་བཛྲ་ཞེས་བརྗོད། འཁོར་བ་མ་སྟོངས་བར་ལ་བཞུགས་པར་བསམ། །མཆོད་རྟེན་སྐུ་གཟུགས་ཀུན་ལ་དེ་བཞིན་སྦྱར། །ཡི་དམ་ནར་མ་མ་ཆག་པར། །ཐུགས་མཆོག་ཡི་གེ་བརྒྱ་པ་བཟླས། །ཞི་བའི་དུས་སུ་ཞི་བ་ལྟར། །རྒྱས་པའི་དུས་སུ་རྒྱས་པ་དང་། །དབང་གི་དུས་སུ་དབང་ལྟར་དང་། །དྲག་པོའི་དུས་སུ་དྲག་པོ་ལྟར་དུ་བཟླའ། །ཞི་བར་ནམ་ཕྱེད་ཆུ་དང་སྦྱར། །རྒྱས་པ་ཉི་མའི་དཀྱིལ་འཁོར་ལྟར། །དབང་ནི་ཆུ་རླབས་རླུང་འཚུབ་སྦྱར། །དྲག་པོའི་དུས་སུ་འབྲུག་གློག་ཐོག་ལྟར་བཟླས། །ན་རཀ་དོང་སྤྲུག་ཉིད་ལ་བརྩོན་པར་བྱའོ། །ཚ་ཚ་ཆུ་གཏོར་དེ་བཞིན་ནོ། །སྲིའུ་གསོ་ན་གཙུག་ཏོར་རྣམ་བཞི་སྒྲོགས། །མུ་སྟེགས་སྔགས་པ་ནག་པོ་དང་། །སྲི་དང་ལྷ་འདྲེས་ཚུགས་རེ་ཀན། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་བསྒྲུབ་པ་ཆེན་པོ་མཆོད་རྟེན་ལས་རྫོགས་ཀྱི་ལེའུ་སྟེ་ཉེར་གཉིས་པའོ།། །།དེ་ནས་ཡང་བཀའ་སྩལ་པ། རྡོ་རྗེ་འཛིན་པའི་འཁོར་ཐམས་ཅད་ཉོན་ཅིག །དེ་དག་ཐམས་ཅད་ལ་ཟློས་ཤིག །རོ་དང་ཕྲོལ་ཅིག་རང་མེད་དོ། །ཞེས་གསུངས་པས་འཁོར་རྣམས་ཕན་ཚུན་བལྟས་ཏེ་བརྒྱལ་བར་འགྱུར་ཏེ། དེ་ནས་ལག་ན་རྡོ་རྗེ་ལངས་ནས་འདི་སྐད་ཅེས་གསོལ་ཏོ། །ཀྱེ་ཀྱེ་སྟོན་པ་རྡོ་རྗེ་འཆང་། །དངོས་ཅག་གིས་བསྐྱེད་རྫོགས་སྤྲོ་བསྡུ་ལ་ཟློས་ཤིག །རོ་དང་ཕྲོལ་ཅིག །རང་མེད་དོ། །ཞེས་གསུངས་པ་མ་རྟོགས་སོ། །བཀའ་སྩལ་ཐུགས་རྗེས་ཟུང་ཞིག་ཞུ་འཚལ་ལོ་ཞེས་ཞུས་པ་དང་། ― DNG001_Page_0346 ―
[མ་དཔེ་གཟིགས་ན་འདིར་གནོན།]
བཀའ་སྩལ་པ། ལག་ན་རྡོ་རྗེ་འཁོར་རྣམས་སློངས་ཤིག །གསང་སྔགས་ཀྱི་དེ་ཁོ་ན་ཉིད་མ་ཤེས་ན་ལྷ་གནས་གསུམ་དང་ལོངས་སྐུ་མཐོང་མི་སྲིད་དོ་ཞེས་གསུངས་པ་དང་། དེ་ནས་ལག་ན་རྡོ་རྗེས། ཀྱེ་ཀྱེ་འཁོར་རྣམས་ལངས་ལ་ཤོག །གདོད་སྟོན་པ་ལ་དོན་ཞུ་བ་ཞུ་ཡིས། །མ་ཞུམ་པར་དཔའ་བའི་སེམས་ཀྱིས་ཉོན། གུས་པས་ཐུད་ཅིག་ཅེས་སྨྲས་པས་འདུས་པ་བརྒྱལ་བ་སངས་པ་དང་། རྡོ་རྗེ་ཆོས་སྐུས་གསོལ་པ། ཀྱེ་ཀྱེ་སྟོན་པ་རྡོ་རྗེ་འཆང་། །གསང་སྔགས་ཀྱི་དེ་ཁོ་ན་ཉིད་གསུངས་འཚལ་ཞེས་ཞུས་པས། ཡང་སྟོན་པས་བཀའ་སྩལ་པ། འཁོར་རྣམས་མ་སྐྲག་པར་ཉོན་ཅིག །གསང་སྔགས་ཀྱི་དེ་ཁོ་ན་ཉིད་ནི་ཅི་ཡང་མ་ཡིན་ནོ། །ཀྱེ་གསང་བའི་རྡོ་རྗེ་ཅིའི་ཕྱིར་ཅི་ཡང་མ་ཡིན་ཞེ་ན། ཉོན་ཅིག་ཆོས་གང་ལ་ཡང་འདི་ཡིན་འདི་མིན་མེད་པའི་ཕྱིར་ཏེ། ཆོས་གཅིག་གཏན་ལ་ཕོབ་དང་། ཡིན་པར་ཡང་མེད་ལ། མིན་པ་ཡང་མེད་པའོ། །དེ་ཡང་སྤང་བ་ཡང་མེད། བླང་པ་ཡང་མེད། རེ་བ་ཡང་མེད། དོགས་པ་ཡང་མེད་དེ་མེད་པའོ། །ཞེས་གསུངས་པས། འཁོར་རྣམས་དུས་ཏེ་འགྲེ་ལྡོག་གིན། ཀྱི་ཧུད་ཀྱི་ཧུད་བདག་ཅག་གིས་བསྐལ་པ་ནས་བསྐལ་པར་དེ་མ་མཐོང་བས་སྟོན་པ་ཉིད་ཐུགས་རྗེ་དང་བྲལ་བའོ། །ཞེས་ཞུས་པས། རྡོ་རྗེ་འཆང་གིས་བཀའ་སྩལ་པ། །རྡོ་རྗེའི་རིགས་ཀྱིས་ལེགས་པར་ཉོན་ཅིག །ང་ནི་ཡིན་མིན་མེད་པའི་ཕྱིར། །སྤང་བླང་རེ་དོགས་མེད་པར་བཤད་དོ། །ཁྱེད་རྣམས་ཀྱིས་རང་གིས་རང་མ་ཤེས་སོ། །ངས་ཀྱང་བསྐལ་པ་ནས་བསྐལ་པར་མ་ཤེས་སོ། །དེ་ལྟར་དུ་རིག་པས་ང་ཡང་མྱ་ངན་ལས་འདས་པ་ཡིན་ནོ། །རྡོ་རྗེ་འཛིན་སོགས་ལེགས་ཟུངས་ཤིག །ང་ཡི་ལྟ་བ་ཡིན་པ་མེད། །ཕྱོགས་ལྷུང་རྒྱ་ཆད་མེད་པའི་ཕྱིར། །ཕྱོགས་ལྟ་འདོར་བ་ལྟ་བའི་སྲོག །ཕྱོགས་དང་ཕྲོལ་ཅིག་མེད་པ་ཡིན། །བག་ཆགས་རོ་ལ་ཅི་ཡིན་ལྟོས། །ལྟ་བ་མེད་དོ་མེད་པ་ཡིན། །ཁྱེད་རྟོགས་ལྟ་བ་དེ་ལྟར་ཡིན། །དེ་རྟོགས་སྒོམ་པ་མིན་པ་མེད། །གང་སྣང་གྲོགས་སུ་རོ་མཉམ་ཕྱིར། །དེ་ཤར་སྤྱོད་པ་ཡིན་མིན་མེད། །སྤང་བྱ་བླང་བྱ་ཡུལ་མེད་ཕྱིར། །དེ་མཐོང་བ་ལ་རེ་དོགས་མེད། །གཞན་ ― DNG001_Page_0347 ―
[མ་དཔེ་གཟིགས་ན་འདིར་གནོན།]
ལ་ལྟོས་པའི་ཆོས་མེད་ཕྱིར། །དེ་ལ་བལྟ་བའི་ཡུལ་མི་སྲིད། །མེད་དང་གཅིག་པུ་ཕྱལ་བ་ཡིན། །ཡུལ་མེད་མིང་དང་བྲལ་བའི་ཕྱིར། །དེ་ལ་བྱ་རྩོལ་ཅི་ལ་སྲིད། །རང་བྱུང་ཡུལ་སྣང་མེད་པའི་ཕྱིར། །ཡུལ་མེད་སྲོག་གཅོད་དགེ་སྡིག་མེད། །མིང་མེད་བདེན་རྫུན་སྒྲོ་འདོགས་ཆོད། །ཅེས་གསུངས་སོ། །ཡང་བཀའ་སྩལ་པ། དེ་ནི་གསང་སྔགས་ཞེས་བྱ། གཞི་ཞེས་བྱ། མཉམ་པ་ཉིད་ཅེས་བྱ། ཆོས་ཀྱི་སྐུ་ཞེས་བྱ། རྟོགས་པའི་ལྟ་བ་ཞེས་བྱ། ཆོས་ཉིད་ཅེས་བྱ། ཆོས་རྣམས་ཀྱི་དེ་བཞིན་ཉིད་ཅེས་བྱ། །དགོངས་པ་ཞེས་བྱ། སྤྱི་ས་ཆོས་ཀྱི་དབྱིངས་ཞེས་བྱ། གསང་སྔགས་ཀྱི་དེ་ཁོ་ན་ཉིད་ཅེས་བྱའོ། །ཡེ་ཤེས་ཡེ་ཤེས་ཡིན་ནོ། །ཅིའི་ཕྱིར་རང་བྱུང་དུ་ཤེས་པ་དང་། རང་རིག་པས་ཀྱང་ཤེས་སོ། །ལྷག་པར་དེ་ཁོ་ན་ཉིད་རྟོགས་པས་ཡེ་ཤེས་ཞེས་བྱའོ། །གསང་སྔགས་རང་གི་དགོངས་པ་ནི། །ཡུལ་མེད་མིང་དང་བྲལ་བ་ཡིན། །རང་བྱུང་ཡེ་ཤེས་དགོངས་ཚད་ཡིན། །རང་རིག་ཡེ་ཤེས་དགོངས་ཚད་ཡིན། །ལྷག་མཐོང་ཡེ་ཤེས་དགོངས་ཚད་ཡིན། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་ལ་བཟླ་དེ་ཁོ་ན་ཉིད་ཀྱི་ལེའུ་སྟེ་ཉེར་གསུམ་པའོ།། །།ཡང་བཀའ་སྩལ་པ། ཉོན་ཅིག་རྡོ་རྗེ་རིགས་ཀྱི་འཁོར། །སྲོག་དང་སྙིང་པོ་གསང་སྔགས་བསྟན། །གང་སྣང་བ་ཡི་ཆོས་ཀུན་ལ། །མཚན་མར་སྣང་བས་སྲོག་ཅེས་བྱ། །ཅིའི་ཕྱིར་འཛིན་པས་བཟུང་བའི་ཕྱིར། །སྲོག་གི་ངོ་བོར་འཛིན་པ་ཡིན། །ངེས་ཚིག་འདུས་བྱས་མི་རྟག་པ། །དབྱེ་བ་དབུགས་ཅན་དབུགས་མེད་སྲོག །དཔེ་ནི་ར་ཤིང་འདུས་པས་བསྟན། །གང་སྣང་བ་ཡི་ཡུལ་དེ་ལ། །མིང་བཏགས་འབོད་པས་སྙིང་པོ་ཡིན། །ཅི་ཕྱིར་དེ་ལ་ཉེས་འཛུགས་ཕྱིར། །དེས་ན་བཏགས་པ་མེད་ན་གང་ལ་གཟུང་། །སྣང་བ་དེ་ལ་མིང་གིས་འབོད། །དེས་ན་སྲོག་རང་སྙིང་པོ་ཡིན། །སྲོག་ནི་གཟུགས་ཏེ་སྙིང་པོ་མིང་། །གཟུགས་ནས་བཟུང་ལ་སྙིང་པོར་བོད། །སྲོག་ཀྱང་མེད་ལ་སྙིང་པོ་མེད། །དཔེར་ན་འབྱུང་བ་ཆུ་ལྟ་བུ། གཅིག་ལ་ཀུན་ཏུ་སྣང་བས་མཚོན། །དེས་ན་དེ་ལྟ་བདེན་པ་མེད། །དེས་ན་དེ་ ― DNG001_Page_0348 ―
[མ་དཔེ་གཟིགས་ན་འདིར་གནོན།]
ལ་མེད་པ་གང་། །དཔེར་ན་ཆོས་ཅན་བུམ་པ་ལ། །ཡིན་མིན་གཉིས་ཀའི་ཆོས་ཅན་མེད། །འོ་ན་ཆོས་ཅན་གཅིག་པོ་དེ། །གཟུགས་ཀྱིས་ཡིན་ནམ་མིང་གིས་ཡིན། །མདོག་གིས་ཡིན་ནམ་བསམ་པས་ཡིན། །འདུས་པས་ཡིན་ནམ་འབྲལ་བས་ཡིན། །མཚོན་པས་ཡིན་ནམ་ལས་ཀྱིས་ཡིན། །རྡོ་རྗེ་འཛིན་པ་སྤོབས་པ་སྐྱེད། །ལག་ན་རྡོ་རྗེས་ལན་གསོལ་པ། །ཀུན་གྱིས་ཡིན་ཏེ་ཀུན་གྱིས་མིན། །ཡིན་པ་མིན་པས་མིན་པ་མེད། །མ་སྤངས་མ་བླངས་མཉམ་པ་མེད། །རང་ཡིན་རེ་དོགས་མེད་པར་ཁུམས། །ལེགས་སོ་ལེགས་སོ་རྡོ་རྗེ་འཛིན། །གསང་སྔགས་བླ་མེད་དེ་བཞིན་ཉིད། །ཁོ་ན་ཉིད་ནི་དེ་ལྟར་རོ། །ཡེ་ནས་ཡིན་ཤེས་ཡེ་ཤེས་ཡིན། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་ཆོས་ཅན་རོ་མཉམ་ལ་བཟླ་དེ་ཁོ་ན་ཉིད་ཀྱི་ལེའུ་སྟེ་ཉེར་བཞི་པའོ།། །།དེ་ནས་ལག་ན་རྡོ་རྗེས་གསོལ་པ། ཀྱེ་ཀྱེ་སྟོན་པ་ཐུགས་མཆོག་གཙོ། །རྡོ་རྗེ་རིགས་ཀྱི་བརྒྱ་པ་དེ་ལྟར་ན། །དེ་བཞིན་གཤེགས་དང་རིན་ཆེན་རིགས། །པདྨའི་རིགས་དང་ལས་ཀྱི་རིགས། །འབྲུ་མཆོག་བརྒྱ་ལྡན་བསྟན་དུ་གསོལ། །ཞེས་གསོལ་པས། ཐུགས་མཆོག་རྡོ་རྗེས་བཀའ་སྩལ་པ། །ང་ཡིས་གཙོ་བྱས་རྡོ་རྗེའི་རིགས། །བརྒྱ་པ་དེ་ལྟར་གོང་བསྟན་པས། །རྡོ་རྗེ་རིགས་ཀྱི་ལྷ་བསྟན་ཡིན། །མཚན་ཉིད་འཛིན་པ་དབུས་གནས་ཏེ། །རེ་རེ་ལ་ཡང་བཞི་བཞིས་བསྐོར། །སྐུ་གསུང་ཐུགས་དང་ཡོན་ཏན་ལས། །དཀྱིལ་འཁོར་དཀྱིལ་འཁོར་བྱ་བ་ཡིན། །ཉོན་ཅིག་རྡོ་རྗེ་འཛིན་པས་ཟུང་། །རྣམ་པར་སྣང་མཛད་བརྒྱ་པ་ནི། །ཨོཾ་བུཌྜྷ་སཏྭ་ས་མ་ཡ། མ་ནུ་པཱ་ལ་ཡ། བུཌྜྷ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཀཱ་ཡ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ། བུཌྜྷ་མཱ་མེ་མུཉྩ། བུཌྜྷ་བྷ་ག་མ་ཧཱ་ས་མ་ཡ། ཤུཌྜྷ་སཏྭ་ཨ། སྐུ་ཡི་བརྒྱ་པ་དེ་ལྟར་ཡིན། །གསུང་ནི་སྣང་བ་མཐའ་ཡས་ཡིན། །ཨོཾ་པདྨ་སཏྭ་ས་མ་ཡ། མ་ནུ་པཱ་ལ་ཡ། ཝཱ་ཀ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་ ― DNG001_Page_0349 ―
[མ་དཔེ་གཟིགས་ན་འདིར་གནོན།]
མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཝཱ་ཀ་ཤྲེ་ཡཾ་ཀུ་རུ་ཨཱཾཿ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། ཝཱ་ཀ་མཱ་མེ་མུཉྩ། ཝཱ་བ། མ་ཧཱ་ས་མ་ཡ། ཝཱཀྶཏྭ་ཨ། གསུང་གི་བརྒྱ་པ་དེ་ལྟར་ཡིན། །ཡོན་ཏན་རིན་ཆེན་འབྱུང་ལྡན་ཡིན། །སྭཱ་རཏྣ་སཏྭ་ས་མ་ཡ། མ་ནུ་པཱ་ལ་ཡ། རཏྣ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། རཏྣ་ཤྲེ་ཡཾ་ཀུ་རུ་སྭཱ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། རཏྣ་མཱ་མེ་མུཉྩ། རཏྣ་བྷ་བ། མ་ཧཱ་ས་མ་ཡ། རཏྣ་སཏྭ་ཨ། དེ་ནི་ཡོན་ཏན་བརྒྱ་པ་ལགས། །ཕྲིན་ལས་དོན་ཡོད་གྲུབ་པ་ཆེ། །ཧཱ་ཀརྨ་སཏྭ་ས་མ་ཡ། མ་ནུ་པཱ་ལ་ཡ། ཀརྨ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཀརྨ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། ཀརྨ་མཱ་མེ་མུཉྩ། ཀརྨ་བྷ་བ། མ་ཧཱ་ས་མ་ཡ། ཀརྨ་སཏྭ་ཨཱ། དོན་ཡོད་ཡི་གེ་བརྒྱ་པ་ཡིན། །སྐུ་ཡི་བརྒྱ་པས་གཏི་མུག་བཤགས། །གསུང་གི་བརྒྱ་པས་འདོད་ཆགས་བཤགས། །ཡོན་ཏན་བརྒྱ་པས་ང་རྒྱལ་བཤགས། །ཕྲིན་ལས་ཁོང་ཁྲོ་ཕྲག་དོག་བཤགས། །ཐུགས་མཆོག་ཞེ་སྡང་གཙོ་བྱས་བཤགས། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་རིགས་ལྔ་བརྒྱ་ཚན་གྱི་ལེའུ་སྟེ་ཉེར་ལྔ་པའོ།། །།དེ་ནས་ཕྱག་ན་རྡོ་རྗེ་ཡིས། །རྡོ་རྗེ་འཆང་ལ་འདི་སྐད་གསོལ། །ཀྱེ་ཀྱེ་སྟོན་པ་རྡོ་རྗེ་འཆང་། །དེ་ལྟར་ལྷ་བརྒྱའི་དོན་གསུངས་ན། །ཉམས་སྒྲིབ་བཤགས་པར་བྱེད་པའི་ཚེ། །ལྷ་ལ་མཆོད་པ་ཇི་ལྟར་དབུལ། །ཉམས་དང་སྡིག་སྒྲིབ་ཇི་ལྟར་བཤགས། །ཞེས་གསོལ་པས། སྟོན་པ་རྡོ་རྗེས་བཀའ་སྩལ་པ། །ཉོན་ཅིག་རྡོ་རྗེ་འཛིན་པ་ཆེ། །དེ་ལྟར་མཆོད་བཤགས་བྱ་བ་ནི། །ཉའམ་སྟོང་ངམ་ཚེས་བརྒྱད་ལ། །དུས་བཟང་གཟའ་དང་རྒྱུ་སྐར་འཛོམ། །པདྨ་བརྒྱ་ལྡན་དཀྱིལ་འཁོར་ ― DNG001_Page_0350 ―
[མ་དཔེ་གཟིགས་ན་འདིར་གནོན།]
བཞེངས། །ཡང་ན་མཎྜལ་ཚོམ་བུ་བྱ། །གཏོར་མ་ཆེན་པོ་བརྒྱ་འམ་ལྔ་འམ་གསུམ་མམ་གཅིག །དཔལ་གྱི་གཏོར་མ་བཤམས་པ་ནི། །རིན་ཆེན་རྒྱ་ཆེན་སྣོད་ནང་དུ། །དང་པོ་དཔལ་བཤོས་ཆེན་པོ་བཞུགས། །ཁམས་ཕོར་གཏོར་ཆེན་བརྒྱ་ཡིས་བསྐོར། །ལྷ་བཤོས་བརྒྱ་འམ་མར་མེ་བརྒྱ། །ཚོམ་བུ་བརྒྱ་འམ་རྣམ་རེས་བཞག །གོང་གི་གཏོར་མ་ཆེན་པོ་ཡང་། །བསྒྲུབ་པའི་སྨན་དང་ཁྲག་ཤས་བརྒྱན། །དཀར་གསུམ་ཆན་ཡང་དེ་བཞིན་ནོ། །དཀར་གཏོར་གཅིག་དང་དམར་གཏོར་གཅིག །ཆོས་སྐྱོང་ཕྱི་ནང་གཉིས་ལ་བཤམ། །འབྱོར་པའི་རྫས་ཚོགས་ཅི་ལྡན་བཤམ། །སྤོས་དང་མེ་ཏོག་ཨརྒྷ་དང་། །མཆོད་པའི་རྒྱུ་ནི་ཐམས་ཅད་བསགས། །ཐུགས་མཆོག་བརྒྱ་པ་རྒྱུན་པར་བཟླས། །ཞག་དྲུག་དག་ལ་དུས་དྲུག་ཏུ། །ན་རཀ་དོང་སྤྲུགས་འདོན་པར་བྱ། །ཕྱག་དང་བསྐོར་བ་ཅི་ནུས་བྱ། །ཁ་ཡར་ཞག་གྲངས་མཚམས་གཅད་བྱ། །ཉམས་དང་མཚམས་མེད་སྡིག་པ་ཀུན། །དཔེར་ན་སོལ་བ་དུང་ཕོར་འདྲ། །ཟླ་བ་ཡར་ངོ་མར་ངོ་འདྲ། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་ཉམས་བཤགས་མཆོད་པའི་ལེའུ་སྟེ་ཉེར་དྲུག་པའོ།། །།ཡང་བཀའ་སྩལ་པ། ཉོན་ཅིག་རྡོ་རྗེ་འཛིན་པ་སོགས། །ཐུགས་མཆོག་ཡི་གེ་བརྒྱ་པ་ནི། །དཔེར་ན་ཉི་མ་མུན་པ་འདྲ། །ཤར་བས་སངས་པས་བརྒྱ་པ་ཡིན། །དཔེར་ན་ནམ་མཁའ་ལྟ་བུ་ཡིན། །ཐམས་ཅད་གོ་ཡང་རྒྱ་ཆད་མེད། །དཔེར་ན་ནོར་བུ་རིན་ཆེན་འདྲ། །ཐམས་ཅད་མི་འབྱུང་གང་ཡང་མེད། །ཡོན་ཏན་ཐམས་ཅད་རྫོགས་པ་ཡིན། །དཔེར་ན་འཛམ་བུའི་གསེར་དང་འདྲ། །གང་ལྟར་བྱས་པ་དེ་ཉིད་དོ། །སྒྱུ་མ་མཁན་གྱི་དཔེ་དང་འདྲ། །མེད་ལས་ཐམས་ཅད་སྤྲུལ་པར་སྣང་། །དཔེར་ན་ནད་དང་སྨན་ལྟ་བུ། །དཔེར་ན་དུག་དང་བདུད་རྩི་འདྲ། །དཔེར་ན་ཟངས་ལྕགས་གསེར་དང་འདྲ། །དཔེར་ན་མེ་དང་རྩི་ཤིང་འདྲ། །དཔེར་ན་མུན་པ་སྒྲོན་མེ་འདྲ། །དཔེར་ན་རྒྱ་མཚོ་གཟའ་སྐར་འདྲ། །དཔེར་ན་ཤེལ་དང་ཟ་འོག་འདྲ། །དཔེར་ན་ཐག་པ་མཐོ་ཡོར་འདྲ། །ཞེས་གསུངས་ནས། ཡང་བཀའ་སྩལ་པ། ལག་ན་རྡོ་རྗེ་འཁོར་ཚོགས་ཉོན་ཅིག ། ― DNG001_Page_0351 ―
[མ་དཔེ་གཟིགས་ན་འདིར་གནོན།]
ངས་བཤད་ཐུགས་ཀྱི་རྒྱུད་ཆེན་འདི། །སངས་རྒྱས་ཀུན་གྱི་དགོངས་པ་ཡིན། །དགོངས་པ་འདུས་པའི་རྒྱུད་དུ་ཟུང་། །རྒྱུད་ལུང་ཞི་ཁྲོ་ལྷ་བརྒྱ་པས། །ལྷ་བརྒྱ་པ་ཡི་རྒྱུད་དུ་ཟུང་། །བསྐྱེད་པར་བྱེད་པའི་ཡི་གེ་བརྒྱ། །ཡི་གེ་བརྒྱ་པའི་རྒྱུད་དུ་ཟུང་། །རང་གི་ཉམས་བཤགས་མཛད་གསོལ་པས། །བཤགས་པ་ཆེན་པོའི་རྒྱུད་དུ་ཟུང་། །ཞི་རྒྱས་དབང་དྲག་ལས་རྫོགས་པས། །ཕྲིན་ལས་འདུས་པའི་རྒྱུད་དུ་ཟུང་། །དབང་དང་དམ་ཚིག་དཀྱིལ་འཁོར་དང་། །ལྷ་བསྒོམ་སྔགས་དང་ཀུན་འདྲེལ་བས། །འདྲེལ་པ་ཆེན་པོའི་རྒྱུད་དུ་ཟུང་། །རྩ་བ་གསུམ་དང་ཡན་ལག་དང་། །སྡིག་སྒྲིབ་ཐམས་ཅད་འདིས་བཤགས་པས། །བཤགས་པ་ཆེན་པོའི་རྒྱུད་དུ་ཟུང་། །ངན་སོང་ཐམས་ཅད་དོང་སྤྲུགས་པས། །དོང་སྤྲུགས་ཆེན་པོའི་རྒྱུད་དུ་ཟུང་། །རྡོ་རྗེ་སེམས་དཔའི་ཐུགས་བསྟན་པས། །བཛྲ་བརྒྱ་པའི་རྒྱུད་དུ་ཟུང་། །ཡང་བཀའ་སྩལ་པ། ལེགས་པར་ཟུང་ཞིག་ཐུབ་པར་ཆོངས། །ཉམས་པར་གྱུར་ན་ན་རཀ་གནས། །རྒྱུ་གནས་རྣམ་པར་སྨིན་པ་ནི། །རིགས་བཞི་བྱོལ་སོང་ལྐུགས་པའི་གནས། །མི་བཟད་བདུད་མོའི་གྲོགས་ཀྱིས་མཚོན། །དབང་པོ་མ་ཚང་དབུལ་རྨོངས་ཞན། །མ་ཉམས་རྡོ་རྗེའི་སྐུ་གསུང་ཐུགས། །འགྲོ་ལ་ཕན་འདོགས་སྐུར་གནས་ས། །ལོངས་སྤྱོད་འཁོར་ལྡན་ལྷ་མིའི་ས། །དམན་ལུས་འཛིན་འཆང་ནོར་བུ་འཆང་། །བྲག་དང་ཆུ་གཞུང་ཆུ་བོ་ཡིས། །དུས་ངན་མགོ་མཐོང་རྒྱས་པར་གྱིས། །ཞེས་གསུངས་སོ། །རྡོ་རྗེ་བརྒྱ་པའི་རྒྱུད་ལས་དཔེ་མཚན་བཏགས་པའི་ལེའུ་སྟེ་ཉེར་བདུན་པའོ།། །།དེ་ནས་སྟོན་པ་ཉིད་མྱ་ངན་ལས་འདས་སོ། །འཁོར་དུ་འདུས་པའི་སྒྱུ་འཕྲུལ་ཞི་ཁྲོའི་ལྷ་ཚོགས་རྣམས་དང་། ཡང་ཕུར། བདུད་རྩི། མ་གཤིན། དབང་དང་། དཀྱིལ་འཁོར་གྱི་ལྷ་རྣམས་དང་། ཚངས་པ་དང་། བརྒྱ་བྱིན་དང་། འཇོག་པོ་དང་། ཐགས་བཟངས་རིས་དང་། སྡེ་བརྒྱད་དང་། ཕྱོགས་སྐྱོང་བཅུ་དང་། རྡོ་རྗེ་དྲག་མོ་ལ་སོགས་ཏེ། མཁའ་འགྲོ་མ་རྣམས་ཀྱིས་ལག་ན་རྡོ་རྗེར་ཡི་རང་སྟེ་མངོན་པར་བསྟོད་ནས། ཐུགས་རྩེ་གཅིག་པས་བཛྲ་པཱ་ཎིས་བསྡུས་ཏེ། སྤྲུལ་སྐུ་པདྨ་འབྱུང་གནས་ལ་གཏད་དོ། །རྡོ་རྗེ་སེམས་དཔའ་ཡི་གེ་བརྒྱ་པའི་ཐུགས་ཕྲིན་ལས་ཐམས་ཅད་དམ་ཚིག་གི་རྒྱུད་ཅེས་བྱ་བ་རྫོགས་སོ། །སྤྲུལ་སྐུ་པདྨ་འབྱུང་གནས་དང་། དགེ་སློང་ནམ་མཁའི་སྙིང་པོས་བསྒྱུར་བའོ།། །། རྫོགས་པ་ཆེན་པོ་ངེས་དོན་འདུས་པའི་རྒྱུད། ལྟ་བ་ཐམས་ཅད་ཀྱི་སྙིང་པོ་རིན་པོ་ཆེ་རྣམ་པར་བཀོད་པ་ཞེས་བྱ་བ།― DNG001_Page_0352 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྟི་ནི་ཡ་མཱརྠ་སམཱུ་ཧ་ཏནྟྲ་དྲྀཥྚི་སརྦ་གརྦྷ་རཏྣ་བྱཱུ་ཧ་ནཱ་མ། བོད་སྐད་དུ། རྫོགས་པ་ཆེན་པོ་ངེས་དོན་འདུས་པའི་རྒྱུད། ལྟ་བ་ཐམས་ཅད་ཀྱི་སྙིང་པོ་རིན་པོ་ཆེ་རྣམ་པར་བཀོད་པ་ཞེས་བྱ་བ། བཅོམ་ལྡན་འདས་མཉམ་པ་ཉིད་ཀྱི་རྒྱལ་པོ་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། །ཀུན་རིག་སེམས་ཀྱི་རྒྱལ་པོ་དེས། །འོག་མིན་ཆོས་ཀྱི་དབྱིངས་གནས་ན། །ངེས་པའི་དོན་ལ་རབ་ཞུགས་ཏེ། །རྡོ་རྗེ་སེམས་དཔའ་ལ་སོགས་པའི། །འཁོར་རྣམས་འདུས་ནས་རབ་ཏུ་འཁོད། །དེ་ཚེ་འདུས་པ་རྣམ་བཞི་ཡང་། །རྡོ་རྗེ་གསང་བ་རིན་ཆེན་སྙིང་། །དྲི་མེད་གྲགས་པ་ལས་རབ་གྲུབ། །རྒྱལ་བའི་དབང་པོ་བསོད་ནམས་སྙིང་། །ཞི་བའི་བདེ་དང་ཉི་མའི་འོད། །ནམ་མཁའི་སྙིང་པོ་འབུམ་གཟིགས་དང་། །ཕྱོགས་བཅུའི་སངས་རྒྱས་རྣམས་ཀྱང་བཞུགས། །རིག་འཛིན་སེམས་དཔའ་ཆེན་པོ་དང་། །བློ་གྲོས་སྩོལ་དང་རྣམ་དག་དང་། །དམ་པའི་ཡོན་ཏན་འོད་རླབས་ཅན། །ཤེས་རབ་བླ་མ་རྒྱལ་མཚན་དང་། །རྣམ་པར་གྲོལ་བའི་ཏིང་འཛིན་དབང་། །ཆོས་དབང་དང་ནི་སྤོབས་པ་བརྩེགས། །བདུད་འཇོམས་དང་ནི་སེང་གེའི་སྒྲ། །རིན་ཆེན་མཐོང་དང་བརྩེ་བ་ཅན། །དབང་ཕྱུག་གཙོ་དང་ཡིད་དགེ་དང་། །མཐོང་ན་དགའ་དང་བདེན་མོས་དང་། །གསུང་བརྩེགས་ལ་སོགས་འཁོར་རྣམས་ཀུན། །རང་རང་གཙོ་ལ་བསྐོར་ནས་ནི། །རྒྱལ་སྲས་སྤྲུལ་པའི་འཁོར་རྣམས་ཀྱང་། །ཚངས་པ་བརྒྱ་བྱིན་རྒྱལ་ཆེན་བཞི། །ཐག་བཟང་རིས་དང་གང་བ་བཟང་། །ཆོས་ཀྱི་རྒྱལ་པོ་རྟ་མགོ་ཅན། །ཟུར་ཕུད་ལྔ་པ་ནོར་སྲུང་དང་། །མགྲིན་བཅུ་དང་ནི་ཀླུ་རྒྱལ་དང་། །དེ་འཁོར་ལ་སོགས་ཀུན་ཀྱང་གནས། །མཁའ་འགྲོ་སྡེ་ལྔ་སྲིན་མོའི་ཚོགས། །ཡེ་ཤེས་མཁའ་འགྲོ་རིག་པ་འཛིན། །རྡོ་རྗེ་མཁའ་འགྲོ་རིགས་ཀྱི་ཡུམ། །རིན་ཆེན་མཁའ་འགྲོ་འདོད་དགུར་སྒྱུར། །པདྨ་མཁའ་འགྲོ་བདེ་ཆེན་རྒྱས། །ལས་ཀྱི་མཁའ་འགྲོ་ལུས་སྒྲིབ་སྦྱོང་། །འཇིག་རྟེན་མཁའ་འགྲོ་དམ་བཏགས་པའོ། །འཁོར་གྱི་གཏོར་ཟན་ཕོ་མོ་ཀུན། །སྙིང་རྗེ་མེད་པར་གསོད་ལ་དགའ། །རྐྱེན་མཐོང་ཙམ་ན་ཆད་པས་གཅོད། ། ― DNG001_Page_0353 ―
[མ་དཔེ་གཟིགས་ན་འདིར་གནོན།]
ཀུན་ཀྱང་སྲིན་པོའི་ཆ་བྱད་ཅན། །རྔམས་པའི་ང་རོ་འཇིགས་ཚུལ་གྱིས། །བསྟན་པ་བསྲུང་ཕྱིར་དུས་དེར་འདུས། །སྤྲུལ་སྐུར་སྣང་བའི་འཁོར་རྣམས་ནི། །དད་ཉན་ལྷ་མི་ལས་ཅན་ཀུན། །མོས་ཤིང་དད་པས་འདུས་པ་ཡིས། །ལས་དང་ཐུགས་རྗེ་འཛོམས་ནས་འཁོད། །དེ་ཚེ་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདག་ཕྱིར། །གུས་པའི་ཚུལ་གྱིས་ཐལ་སྦྱར་ཏེ། །བདེན་པའི་ཡིད་ཀྱིས་འདི་སྐད་གསོལ། །རྩ་བ་གཅིག་པའི་ཆོས་ཉིད་ལ། །སངས་རྒྱས་ཆོས་རྣམས་ཇི་ལྟར་གསུངས། །ཆོས་ཉིད་གནས་ལུགས་ཇི་ལྟར་ཡིན། །སྣོད་ཀྱི་རིམ་པ་གང་ལ་བསྟན། །ཆོས་རྣམས་གཏན་ལ་ཇི་ལྟར་དབབ། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །ལེགས་སོ་འདུས་པའི་འཁོར་རྣམས་ཀུན། །དད་ལྡན་བུ་ལ་ངས་བསྟན་གྱིས། །ལེགས་པར་ཉོན་ལ་ཡིད་ལ་ཟུང་། །དུས་གསུམ་སངས་རྒྱས་ཐམས་ཅད་ཀྱང་། །རྩ་བ་རང་སེམས་རྟོགས་པའི་ཕྱིར། །གཟི་ལྡན་ནོར་བུ་རིན་ཆེན་བཞིན། །ཆོས་སྐུའི་སྟོན་པ་ཀུན་བཟང་ངས། །ཐམས་ཅད་ཡེ་ཤེས་ཆེན་པོར་མཁྱེན། །དེ་དོན་རང་རིག་ཆོས་ཀྱི་སྐུ། །ཚིག་དང་ཡི་གེ་བརྗོད་ལས་འདས། །རང་བྱུང་ཡེ་ཤེས་ཐུགས་ལ་གསལ། །དྲང་སྲོང་མངོན་ཤེས་དཔེ་བཞིན་དུ། །རང་བྱུང་ངོ་བོ་ཉིད་ཀྱི་སྐུ། །དུས་གསུམ་བདེ་གཤེགས་འཁོར་རྣམས་ལ། །ཡིད་ལ་བསྟན་པའི་དོན་ཉིད་ཤར། །ངེས་དོན་རྟོགས་ཕྱིར་ཡང་སངས་རྒྱས། །རང་རིག་ཆོས་སྐུའི་བྱིན་བརླབས་ཤར། །དེ་ཚེ་ངེས་པའི་དོན་ཆེན་འདི། །རྡོ་རྗེ་སེམས་དཔས་དོན་རིག་ནས། །གཙང་རིགས་ལྷ་ཡི་གནས་ཆེན་དུ། །བརྩེར་དགོངས་དུས་ལ་བབ་གྱུར་ནས། །རིག་འཛིན་འཁོར་ལ་དབང་བསྐུར་ཏེ། །གསང་སྔགས་རང་གི་ངོ་བོས་བཤད། །དུས་དེར་སྙིང་པོ་སེམས་དག་གིས། །ཕྱོགས་བཅུའི་འདུས་པའི་སངས་རྒྱས་ལ། །ཞུ་བ་ཞུས་ནས་ཐེ་ཚོམ་བཅད། །དེ་ཉིད་མངོན་དགའི་ཕུག་ཏུ་ཞུགས། །དེ་བསྐུལ་སྤྲུལ་པ་འཛམ་གླིང་དུ། །བྱང་ཆུབ་མོ་ཡི་བུར་སྐྱེས་ནས། །རིག་པའི་གནས་ལྔ་ཐམས་ཅད་མཁྱེན། ། ― DNG001_Page_0354 ―
[མ་དཔེ་གཟིགས་ན་འདིར་གནོན།]
ཡ་མཚན་ཅན་དུ་ཀུན་ཏུ་གྲགས། །སྤྱན་དྲངས་གནས་སུ་དོན་ཞུས་ཏེ། །བདུད་བཏུལ་ཚར་བཅད་དམ་ལ་བཏགས། །དེ་ནས་ཤཱཀྱ་ཐུབ་སྤྲུལ་དེ། །བཀྲ་ཤིས་བདེ་ལྡན་གནས་དག་ཏུ། །ད་ལྟ་དུས་ཀྱི་དེང་སང་ན། །གསང་བདག་སྤྲུལ་པ་དད་ཉན་ལ། །སྡེབ་སྦྱོར་ལེགས་པའི་ཚིག་ཏུ་གསུངས། །ད་ཡང་རྡོ་རྗེ་སེམས་དཔའ་ཉོན། །ཤེས་རབ་བློ་ཡི་ཁྱད་པར་ལས། །སྐུ་གསུམ་ཆོས་རྣམས་ཅི་གསུངས་པའི། །བཤད་ལུགས་རྣམ་པ་དེ་དག་ཀུན། །གདུལ་བྱའི་འཁོར་ལ་ཐ་དད་ཀྱང་། །དུས་གསུམ་གཅིག་ཕྱིར་ཁྱད་མེད་པས། །དོན་ལ་དབྱེར་མེད་ངོ་བོ་གཅིག །རྫོགས་པ་ཆེན་པོ་ངེས་དོན་འདུས་པའི་རྒྱུད་རིན་པོ་ཆེ་རྣམ་པར་བཀོད་པ་ལས། ངེས་དོན་འབྱུང་བའི་རྒྱུད་གླེང་གཞི་བསྟན་པའི་ལེའུ་སྟེ་དང་པོའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ཆོས་ཉིད་གནས་ལུགས་བཀའ་སྩལ་པ། །འཁོར་བ་མྱ་ངན་འདས་པའི་ཆོས། །གཞི་ལ་ཡང་དག་མེད་པའི་ཕྱིར། །རང་རིག་རྟོགས་པའི་ཆོས་སྐུ་ལ། །སྣང་བ་གཟུགས་བརྙན་མི་འགོག་པ། །ཆོས་ཉིད་ངེས་པའི་གནས་ལུགས་ཡིན། །ཡེ་ནས་རང་བྱུང་རིག་པ་འདི། །ཡེ་ནས་ཡང་དག་ངོས་ཟིན་ཅིང་། །བྱ་བ་མེད་ཅིང་བསྒྲུབ་ཏུ་མེད། །དེ་ཡང་ཆོས་ཉིད་གནས་ལུགས་ཡིན། །ཡེ་ནས་རང་ལ་གནས་པའི་དོན། །གཞན་ནས་མི་འབྱུང་ཆོས་ཀྱི་སྐུ། །རྒྱུ་ལས་མ་བྱུང་བདག་མེད་པས། །དེ་ཡང་ཆོས་ཉིད་གནས་ལུགས་ཡིན། །རང་བྱུང་ངོ་བོ་ཉིད་ཀྱི་སྐུ། །མ་བཅོས་མ་བསླད་དོན་ཡིན་ཕྱིར། །མ་ནོར་ཇི་བཞིན་མ་འགགས་པ། །དེ་ཡང་ཆོས་ཉིད་གནས་ལུགས་ཡིན། །དུས་གསུམ་གཅིག་པར་ངེས་པའི་ཕྱིར། །མ་སྐྱེས་མི་ནུབ་ཡེ་ཤེས་ནི། །མི་འབྱུང་མི་འགྲོ་ཡེ་གནས་པ། །དེ་ཡང་ཆོས་ཉིད་གནས་ལུགས་ཡིན། །རང་བྱུང་རིག་པ་རང་གསལ་ཏེ། །ཀུན་ལ་ཁྱབ་པ་མི་བྱེད་ཕྱིར། །བལྟ་རུ་མེད་པས་ཐ་སྙད་མེད། །དེ་ཡང་ཆོས་ཉིད་གནས་ལུགས་ཡིན། །དངོས་མེད་རང་རིག་ཡེ་ཤེས་དེ། །མཚོན་དུ་དཔེ་མེད་རྟོག་ལས་འདས། །བསམ་དུ་མེད་པ་བསམ་མི་ཁྱབ། །དེ་ཡང་ཆོས་ཉིད་གནས་ལུགས་ཡིན། ། ― DNG001_Page_0355 ―
[མ་དཔེ་གཟིགས་ན་འདིར་གནོན།]
ངོ་བོ་རང་བྱུང་སྙིང་པོ་དེ། །རྒྱུ་ལས་མ་བྱུང་རྐྱེན་མེད་པས། །དངོས་པོ་མ་ཡིན་རྟག་ཆད་མེད། །དེ་ཡང་ཆོས་ཉིད་གནས་ལུགས་ཡིན། །སྣང་བ་རང་གསལ་ཆོས་དབྱིངས་ལ། །སྤྲོས་དང་བྲལ་བས་སྒྲོ་སྐུར་མེད། །མཐའ་དབུས་མེད་པས་རྒྱུ་འབྲས་མེད། །དེ་ཡང་ཆོས་ཉིད་གནས་ལུགས་ཡིན། །དེ་ཡང་རྡོ་རྗེ་སེམས་དཔའ་ཉོན། །གཞི་གཅིག་གང་ཡང་མི་འགལ་བ། །སངས་རྒྱས་རྣམས་ཀྱི་གནས་ལུགས་ཡིན། །རྫོགས་པ་ཆེན་པོ་ངེས་དོན་འདུས་པ་རིན་པོ་ཆེ་རྣམ་པར་བཀོད་པ་ལས། དོན་ཆོས་ཉིད་ཀྱི་གནས་ལུགས་བསྟན་པའི་ལེའུ་སྟེ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །དོན་ལྡན་སྣོད་བཅུད་རིམ་པ་ནི། །ཡང་དག་ངེས་པའི་སངས་རྒྱས་དོན། །གསང་སྔགས་ཀུན་གྱི་རྩ་བ་ཡི། །དབང་རྣམས་རིམ་པར་རྫོགས་བྱས་ནས། །ཆོས་ཀྱི་གཞུང་དང་མི་འགལ་བར། །ཐོས་བསམ་ཀུན་ལ་རབ་སྦྱངས་ནས། །ངེས་དོན་བཀའ་རྒྱུད་གསང་བ་ཡི། །དམ་པའི་མཛོད་ཀྱི་གཏེར་ལྡན་ཞིང་། །སྲིད་པར་ཞུས་ཀྱང་ཚད་མེད་པའི། །བླ་མ་རྡོ་རྗེ་སློབ་དཔོན་དེ། །ཚུལ་འཆོས་མེད་པར་གདེང་ལྡན་པའི། །དཔེ་ནི་ནགས་ཀྱི་སེང་གེ་བཞིན། །གཅིག་པུར་གནས་ཀྱང་དོན་ལྡན་ལ། །སངས་རྒྱས་དགོངས་པ་ཐུགས་ལ་གསལ། །ད་ཡང་རྡོ་རྗེ་སེམས་དཔའ་ཉོན། །སྐལ་ལྡན་སློབ་མའི་མཚན་ཉིད་ནི། །བླ་མ་ལ་གུས་དད་ལྡན་པས། །སེར་སྣ་ཆུང་ལ་བརྩོན་འགྲུས་ཆེ། །བརྩེ་གདུང་དམ་ཚིག་མི་འགལ་བསྲུང་། །དོན་གསང་ཐུགས་ལ་ཤེས་རབ་ཟབ། །ཚུལ་ཤེས་ངང་བཟང་རྣམས་ཀྱི་དོན། །ཡོན་ཏན་ཟད་མེད་རིན་ཆེན་གཏེར། །ཐམས་ཅད་འབྱུང་བའི་གཞི་རུ་བསྟན། །ད་ཡང་འདུས་པའི་སྙིང་པོ་ཉོན། །དེ་དང་མི་ལྡན་འདི་བསྟན་ན། །སངས་རྒྱས་རྣམས་ཀྱི་བཀའ་བཅག་སྟེ། །མཚམས་མེད་སྡིག་པས་ཆར་མི་ཕོད། །དམྱལ་བའི་འོག་གཞི་བྱེད་པར་གསུངས། །རྫོགས་པ་ཆེན་པོ་ངེས་དོན་འདུས་པ་རིན་པོ་ཆེ་རྣམ་པར་བཀོད་པ་ལས། སྣོད་བཅུད་བསྟན་པའི་ལེའུ་སྟེ་གསུམ་པའོ།། །།དེ་ནས་འདུས་པའི་ ― DNG001_Page_0356 ―
[མ་དཔེ་གཟིགས་ན་འདིར་གནོན།]
ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །ཆོས་རྣམས་གཏན་ལ་དབབ་པའི་ཕྱིར། །དོན་གྱི་སྙིང་པོ་འདི་གསུངས་པས། །ཡང་དག་ངེས་དོན་རྟོགས་པའི་ཐབས། །འདུས་པ་ལྔ་ཡི་དོན་མཚོན་ཕྱིར། །སུན་འདོན་བདུན་གྱིས་ཤན་ཕྱེ་བ། །སྐབས་དབྱེ་ལྔ་ཡི་སྒོ་ཕྱེས་ནས། །རྩ་བ་བཞི་ཡི་མདོར་བསྡུས་ལ། །འཕྲང་ཆེན་དྲུག་གིས་གཏན་ལ་དབབ། །ངེས་དོན་བདུན་གྱིས་ཉམས་སུ་བླངས། །ངེས་པ་གསུམ་གྱིས་ཁྱད་པར་འཕགས། །ཆེ་བ་ལྔ་ཡི་དངོས་འཛིན་དག །གཉིས་མེད་གསུམ་གྱིས་ལ་བཟླ་ལ། །གཏན་ཚིགས་བཞི་ཡིས་ཡིད་ཆེས་བྱས། །འབྲས་བུ་དགུ་ཡིས་མཐའ་རུ་གཏུག །རྟོགས་པ་བཞི་ཡིས་གདེངས་ལྡན་བྱ། །རྫོགས་པ་ཆེན་པོ་ངེས་དོན་འདུས་པ་ལས་ཆོས་རྣམས་གཏན་ལ་ཕབ་པ་མདོ་རུ་བསྡུས་ཏེ་བསྟན་པའི་ལེའུ་སྟེ་བཞི་པའོ།། །།དེ་ནས་འདུས་པའི་སྙིང་པོ་ཡིས། །དད་ལྡན་འཁོར་ལ་ཕན་གདགས་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་དོན་ནི་འདི་སྐད་ཞུས། །སངས་རྒྱས་དགོངས་པ་གང་དུ་འདུས། །རྒྱུ་འབྲས་ངེས་ཚིག་ཇི་ལྟར་འདུས། །སྙིང་པོ་འདུས་པའི་ཁྱད་པར་གང་། །དཔེ་དང་དོན་དུ་ཇི་ལྟར་འདུས། །རྫོགས་ཆེན་རང་གཞུང་ཇི་ལྟར་འདུས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སངས་རྒྱས་ཀུན་གྱི་དགོངས་པའི་ཆོས། །ངེས་དོན་བླ་མ་དམ་པ་ཡི། །གདམས་ངག་ཁྱད་པར་ཅན་དུ་འདུས། །དཔེ་ཡིས་འདུས་ལ་དོན་གྱིས་འདུས། །རྟགས་དང་གཏན་ཚིགས་མཐུན་པར་འདུས། །དོན་ནི་རང་བྱུང་ཆོས་སྐུར་འདུས། །ད་ཡང་རྡོ་རྗེ་སེམས་དཔའ་ཉོན། །ཀུན་ཏུ་བཟང་པོའི་དགོངས་འདུས་པ། །འཕོ་འགྱུར་མེད་པའི་བལྟ་བ་ལ། །སྐྱེ་འགགས་མེད་པའི་བསྒོམ་པ་ཤར། །བླང་དོར་མེད་པའི་སྤྱོད་པ་ལ། །རེ་དོགས་མེད་པའི་འབྲས་བུ་གནས། །རིགས་ལྔའི་སངས་རྒྱས་དགོངས་འདུས་པ། །རང་བྱུང་སྐྱེ་མེད་རང་གསལ་དེ། །འགགས་མེད་མི་འགྱུར་རིག་པ་དེ། །རྡོ་རྗེ་སེམས་དཔའི་དགོངས་པ་སྟེ། ། ― DNG001_Page_0357 ―
[མ་དཔེ་གཟིགས་ན་འདིར་གནོན།]
མི་ཤིགས་ཡེ་ནས་རྡོ་རྗེའི་སྐུ། །ཆོས་ཉིད་མ་བཅོས་མ་བསླད་པ། །མི་ཟད་གཏེར་གྱི་དགོངས་པ་སྟེ། །འདུ་འབྲལ་མེད་པའི་ཡེ་ཤེས་ཐུགས། །རིན་ཆེན་འབྱུང་ལྡན་དགོངས་པར་འདུས། །ཆོས་ཉིད་མཐའ་ཡས་བརྡལ་ཁྱབ་པ། །མ་བྱུང་མ་སྐྱེས་སྙིང་པོ་ལ། །འཕེལ་འགྲིབ་མེད་པར་རང་གནས་པ། །སྣང་བ་མཐའ་ཡས་དགོངས་པར་འདུས། །སངས་རྒྱས་ཡེ་ཤེས་ད་ལྟ་ཉིད། །དེ་རྟོགས་རང་བྱུང་ཆོས་ཉིད་གསལ། །དོན་ཡོད་གྲུབ་པའི་དགོངས་པ་སྟེ། །དེ་ལས་འགྱུར་མེད་སངས་རྒྱས་ཐུགས། །ཡེ་ཤེས་ལུས་ཅན་སངས་རྒྱས་སྐུ། །དེ་ལྡན་སྣང་བའི་ཡུལ་རྣམས་ལ། །ཞེན་མེད་རང་བྱུང་ཡེ་ཤེས་གསལ། །རྣམ་པར་སྣང་མཛད་དགོངས་པར་འདུས། །ད་ཡང་རྡོ་རྗེ་སེམས་དཔའ་ཉོན། །དཔེ་ནི་ཀུན་དཔེ་ནམ་མཁར་འདུས། །རྟགས་ནི་བྱང་ཆུབ་སེམས་སུ་འདུས། །གཏན་ཚིགས་རང་བྱུང་སྙིང་པོར་འདུས། །ད་ཡང་འདུས་པའི་སྙིང་པོ་ཉོན། །དུས་གསུམ་སངས་རྒྱས་དགོངས་འདུས་པ། །འདུས་མ་བྱས་པའི་ཡེ་ཤེས་དེ། །རྒྱུ་དང་རྐྱེན་གྱིས་མ་བསྐྱེད་པར། །ཆོས་རྣམས་ཀུན་གྱི་སྙིང་པོ་རུ། །རང་བྱུང་ལྷུན་གྱིས་གྲུབ་པའི་སྐུ། །སངས་རྒྱས་ཀུན་གྱི་དགོངས་པར་འདུས། །དགོངས་པ་དེ་དག་མཚོན་པའི་ཕྱིར། །རང་སེམས་བླ་མར་གསུངས་པ་ལ། །དབྱེ་བ་རྣམ་པ་གསུམ་ཡོད་དེ། །སེམས་ཉིད་རྒྱུ་ཡི་བླ་མ་དང་། །འབྲས་བུ་ཡེ་ཤེས་བླ་མ་དང་། །སྣང་བ་ཆོས་དབྱིངས་བླ་མའོ། །ད་ཡང་འདུས་པའི་སྙིང་པོ་ཉོན། །སེམས་ཉིད་རྒྱུ་ཡི་བླ་མ་ནི། །ལོག་སྲེད་ཅན་ནི་མ་ཡིན་ཏེ། །ལུང་རིགས་ལྡན་པའི་གང་ཟག་གིས། །འཁོར་འདས་ཆོས་རྣམས་བློས་བརྟགས་པས། །བདེ་དང་སྡུག་བསྔལ་གཉིས་སུ་མཐོང་། །བདེ་སྡུག་གཉིས་ལ་དོན་བརྟགས་པས། །དགེ་སྡིག་གཉིས་ལས་བྱུང་བར་ངེས། །དད་པ་བརྩོན་འགྲུས་ཤེས་རབ་ཀྱིས། །རྣམ་པར་རྟོག་པའི་བློ་སྦྱང་ཕྱིར། །དྲང་པའི་དོན་ལ་དགོངས་ནས་ནི། །སྒྲིབ་སྦྱོང་ཚོགས་བསགས་བྱ་བར་གསུངས། །ད་ཡང་འཁོར་གྱི་སྙིང་པོ་ཉོན། །འབྲས་བུ་ཡེ་ཤེས་བླ་མ་ནི། །ངེས་པའི་དོན་ལ་དགོངས་པའི་ཕྱིར། །འཁོར་འདས་འབྱུང་བས་མ་རེག་པའི། ། ― DNG001_Page_0358 ―
[མ་དཔེ་གཟིགས་ན་འདིར་གནོན།]
ཡེ་ཤེས་ངོས་ཟིན་མ་བཅོས་པ། །རང་རིག་ཆོས་སྐུ་དང་ལྡན་ཐུགས། །ངོ་བོ་ལོངས་སྤྱོད་རྫོགས་སྐུར་ལྡན། །ཐུགས་རྗེ་སྤྲུལ་པའི་སྐུ་རུ་འབྱུང་། །གཞི་ནི་ཆོས་སྐུ་ཉག་གཅིག་ལས། །གདུལ་བྱར་སྟོན་པ་གསུམ་དུ་འབྱུང་། །ད་ཡང་འདུས་པའི་སྙིང་པོ་ཉོན། །སྣང་བ་ཆོས་དབྱིངས་བླ་མ་ནི། །འབྱུང་ཆེན་ལྔ་ནི་བླ་མ་སྟེ། །འདོད་ཡོན་ལྔ་སོགས་ཆོས་རྣམས་ནི། །ཚིག་དང་ཡི་གེས་མི་མཚོན་པར། །ལྡེམ་དགོངས་རང་གི་ངོ་བོས་ནི། །སྣང་བ་ཆོས་ཀྱི་དབྱིངས་སུ་བསྟན། །རྫོགས་པ་ཆེན་པོ་ངེས་དོན་འདུས་པ་ལས་སངས་རྒྱས་ཆོས་ཀུན་བླ་མ་དམ་པའི་གདམས་ངག་ལ་འདུས་པར་བསྟན་པའི་ལེའུ་སྟེ་ལྔ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །འཁོར་འདས་གཞི་ནི་གཅིག་མོད་ཀྱང་། །སེམས་ཀྱི་སྣང་བ་མི་འདྲ་སྟེ། །སྣོད་ཀྱི་རིམ་པ་དང་སྦྱར་ནས། །དབང་བོ་རབ་འབྲིང་གསུམ་དུ་བྱུང་། །ད་ཡང་འདུས་པའི་སྙིང་པོ་ཉོན། །དབང་པོ་ཐ་མའི་དོན་དུ་ནི། །དགེ་སྡིག་ལས་ཀྱི་རྒྱུ་འབྲས་ཀྱིས། །འབྲས་བུ་བདེ་དང་སྡུག་བསྔལ་ལ། །གཉེན་པོ་དགེ་བས་རྒྱུ་བྱས་ནས། །ཆོས་སྤྱོད་ལམ་དུ་ཁྱེར་བའི་ཕྱིར། །སྡེ་སྣོད་གསུམ་གྱི་ཆོས་བསྟན་པས། །རྒྱུ་ཡི་ཐེག་པར་བཏགས་ཤིང་འདུས། །ད་ཡང་རྡོ་རྗེ་སེམས་དཔའ་ཉོན། །དབང་པོ་འབྲིང་གི་དོན་དུ་ནི། །འབྲས་བུ་རྡོ་རྗེ་ཐེག་པ་སྟེ། །ཀྲི་ཡོག་རྒྱུད་ལུང་མན་ཆད་ཆོས། །ཕྱག་རྒྱའི་དཀྱིལ་འཁོར་ལམ་བྱས་ནས། །འབྲས་བུ་དེ་ཉིད་ཡེ་ཤེས་སྐུ། །རང་གི་ལུས་ངག་ཡིད་གསུམ་ནི། །སྐུ་གསུང་ཐུགས་སུ་སྦྱོར་བའི་ཕྱིར། །རྡོ་རྗེ་ཐེག་པར་བཏགས་ཤིང་འདུས། །ད་ཡང་འདུས་པའི་སྙིང་པོ་ཉོན། །དབང་པོ་རབ་ཀྱི་དོན་དུ་ནི། །བསྟན་པ་ཙམ་གྱིས་རྟོགས་པའི་ཆོས། །ཐིག་ལེ་ཉག་གཅིག་ཆོས་ཀྱི་སྐུ། །ཤེས་པ་ཙམ་གྱིས་སངས་རྒྱས་ངེས། །པ་ན་ས་ཡི་འབྲས་བུ་བཞིན། །རྒྱུ་འབྲས་རོ་གཅིག་ཐེག་པར་འདུས། །རྫོགས་པ་ཆེན་པོ་ངེས་དོན་འདུས་པ་ལས་རྒྱུ་འབྲས་འདུས་པའི་ངེས་ཚིག་བསྟན་པའི་ལེའུ་སྟེ་དྲུག་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །ཀུན་གྱི་གཞི་ནི་ནམ་མཁའ་ལ། ། ― DNG001_Page_0359 ―
[མ་དཔེ་གཟིགས་ན་འདིར་གནོན།]
མུན་པར་ནམ་ལངས་ཉི་ཤར་བཞིན། །གཞི་སེམས་རིག་པའི་ཡེ་ཤེས་ནི། །གཅིག་པ་མ་ཡིན་ཁྱད་པར་ཆེ། །དེ་དོན་ངས་བཤད་ལེགས་པར་ཉོན། །འཁོར་འདས་གཞི་ནི་ངོ་བོ་ཉིད། །དེ་ལས་བསྐྱེད་པའི་ཆོས་རྣམས་བྱུང་། །དེ་ཙམ་ཉིད་ནས་ངང་གིས་སྟོང་། །གཞི་ལ་དངོས་མེད་ནམ་མཁའ་འདྲ། །ད་ཡང་འཁོར་གྱི་སྙིང་པོ་ཉོན། །མ་རིག་ལས་སྐྱེས་ཆགས་སྡང་སེམས། །དེ་ཕྱིར་འཁོར་བའི་རྩ་བ་སྟེ། །ཉོན་མོངས་བག་ཆགས་བསྐྱེད་པར་བྱེད། །སེམས་ནི་ཚོགས་བརྒྱད་མུན་པ་འདྲ། །དེ་འདྲ་ལུང་གི་སློབ་དཔོན་གྱིས། །རིག་པའི་གཏན་ཚིགས་རྣམ་བཞི་ནི། །ཡུལ་གྱི་སྣང་བ་འདི་ཉིད་ལ། །གཞིག་པས་རང་བཞིན་མེད་པར་ཤེས། །གསལ་ལ་མི་རྟོག་གང་བསྒོམ་པ། །ཐོས་པའི་ཤེས་རབ་ཡིན་པའི་ཕྱིར། །རིག་པ་ཡིན་ཏེ་ཡེ་ཤེས་མིན། །དེ་ཡང་འདུས་པའི་སྙིང་པོ་ཉོན། །སེམས་དང་རིག་པའི་བར་དུ་ནི། །ལུང་ལྡན་ངེས་པའི་གདམས་ངག་གིས། །སྣང་བ་གཏན་ཚིགས་མ་གཞིགས་པ། །འཁོར་འདས་མ་རིག་ཆོས་ཀྱི་སྐུ། །གཞི་ཤེས་ནང་གི་རིག་པ་དེ། །བསམ་པའི་ཤེས་པ་ཡིན་པའི་ཕྱིར། །རང་བྱུང་ཡིན་ལ་ངེས་ཤེས་མིན། །ནམ་ལངས་མུན་པ་མེད་པ་འདྲ། །ད་ཡང་རྡོ་རྗེ་སེམས་དཔའ་ཉོན། །ཡེ་ཤེས་ཆོས་སྐུའི་བར་དུ་ནི། །རྣལ་འབྱོར་རིག་པའི་བློ་ལྡན་པས། །སེམས་ཅན་རྒྱུ་བ་རྒྱུན་གཅོད་པས། །ཡེ་ཤེས་འགག་པ་མེད་པར་གསལ། །བསྒོམ་པའི་ཤེས་རབ་ཡིན་པའི་ཕྱིར། །མཉམ་གཞག་ངང་ལ་ཡེངས་པ་མེད། །རྗེས་ཐོབ་མ་ཡེངས་རྟིང་བཞིན་དུ། །ཡེ་ཤེས་ངང་ལས་ཆོས་སྐུ་བཙལ། །དེ་ཤེས་གདེང་གིས་ཟིན་པ་ནི། །ཉི་ཤར་མུན་གྲིབ་མེད་པ་འདྲ། །ད་ཡང་འདུས་པའི་སྙིང་པོ་ཉོན། །སེམས་ཀྱི་སྙིང་པོ་རིག་པ་དང་། །སངས་རྒྱས་སྙིང་པོ་ཡེ་ཤེས་དང་། །ཆོས་ཀྱི་སྙིང་པོ་རྫོགས་ཆེན་དང་། །འབྱུང་བའི་སྙིང་པོ་ནམ་མཁའ་དང་། །འཁོར་འདས་སྙིང་པོ་ངོ་བོ་ཉིད། །དེ་དོན་རྣམ་པར་དབྱེ་བ་ནི། །ཀུན་བཟང་རྒྱུད་དུ་ངས་བཤད་ཀྱིས། །དད་ལྡན་ཕྱི་རབས་རྟོགས་པར་གྱིས། །རྫོགས་པ་ཆེན་པོ་ངེས་དོན་འདུས་པ་ལས་སྙིང་པོ་ངེས་དོན་འདུས་པར་བསྟན་པའི་ལེའུ་སྟེ་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་ ― DNG001_Page_0360 ―
[མ་དཔེ་གཟིགས་ན་འདིར་གནོན།]
པ་ཆོས་རྗེ་ཡིས། །དཔེ་དང་དོན་དུ་བཀའ་སྩལ་པ། །དཔེར་ན་ཝཱ་ར་ཎཱ་སཱིའི་རས། །ཚོན་གྱི་རྐྱེན་གྱིས་བསྒྱུར་བྱས་ནས། །ཁ་དོག་སྣ་ཚོགས་ཅིར་སྣང་ཡང་། །རས་སུ་དབྱེར་མེད་ངོ་བོ་གཅིག །སེམས་ཀྱི་སྣང་བ་སྣ་ཚོགས་པས། །ཡུལ་དབང་རྐྱེན་གྱིས་སོ་སོར་སྣང་། །དེ་ཡང་འཁྲུལ་པའི་སེམས་སུ་སྣང་། །དེ་ཕྱིར་སྣང་བ་ངེས་མེད་ཡིན། །ཤེལ་སྒོང་དག་གི་ནང་དུ་ནི། །ཁ་དོག་སྣ་ཚོགས་རས་བཞག་པས། །ཁ་དོག་སྣ་ཚོགས་ཅིར་ཡང་སྣང་། །སྣང་ཡང་ཤེལ་ལ་འགྱུར་བ་མེད། །དེ་བཞིན་རང་བྱུང་ངོ་བོ་ལ། །གཟུང་འཛིན་རྐྱེན་གྱིས་རིས་དྲུག་འབྱུང་། །འཁྲུལ་པའི་ངོ་ལ་ཅིར་ཡང་སྣང་། །སྣང་ཡང་གཞི་ལ་འགྱུར་བ་མེད། །ད་ཡང་འདུས་པའི་སྙིང་པོ་ཉོན། །གསེར་བཟོའི་ལག་གིས་བསྒྱུར་བྱས་ནས། །ཆོལ་ཟངས་དྲི་ཆུའི་སྣོད་བྱས་ན། །གསེར་ཀྱང་ངན་པའི་རྫས་སུ་སྣང་། །དེ་བཞིན་འཁྲུལ་པས་བརྟགས་ཙམ་ན། །ཡུལ་ཀྱང་མ་དག་འཇིག་རྟེན་ཁམས། །དམ་གྲོག་གཡང་ས་ཚེར་དོང་སྣང་། །གསེར་སྐུ་མཆོད་རྟེན་བྱས་ཙམ་ན། །ཚོགས་བསགས་རྟེན་དུ་འགྱུར་བའི་ཕྱིར། །གསེར་ཀྱང་བཟང་པོའི་རྫས་སུ་མཐོང་། །ཡེ་ཤེས་ཅན་གྱི་ངོ་གང་ལ། །ཡུལ་ཀྱང་ཞིང་ཁམས་རྣམ་པར་དག །རིན་ཆེན་གསེར་གྱི་ངོ་གང་ལ། །གསེར་གྱི་རྒྱུ་ལ་བཟང་ངན་མེད། །དེ་བཞིན་ཆོས་སྐུའི་ངོ་བོ་ལ། །སྣང་དང་མི་སྣང་གཞི་ལ་མེད། །ད་ཡང་འདུས་པའི་སྙིང་པོ་ཉོན། །སྣ་ཚོགས་དར་གྱི་ཚོགས་རྣམས་ལ། །ཟ་འོག་སྣམ་བུ་བྱས་ཙམ་ན། །སྣ་ཚོགས་དར་གྱི་མིང་དང་བྲལ། །ཟ་འོག་སྣམ་བུར་གཅིག་པ་ལྟར། །ཆོས་སྐུ་རང་གི་སེམས་ཡིན་ཀྱང་། །ལུང་ལྡན་རྐྱེན་གྱིས་བསྟན་ཙམ་ན། །སྣ་ཚོགས་འཛིན་པའི་སེམས་དང་བྲལ། །ཐིག་ལེ་ཉག་གཅིག་ཆེན་པོར་འདུས། །དཔེར་ན་སྨན་དུག་གཞི་གཅིག་ལ། །ལ་ལའི་སྨན་ལ་ལ་ལའི་དུག །དེ་བཞིན་ངེས་དོན་ཆོས་འདི་ལ། །ལ་ལའི་བྱང་ཆུབ་ལ་ལའི་དམྱལ། །ཧ་ལ་ནག་པོའི་དུག་དག་ཀྱང་། །ཐབས་མཁས་བཟའ་ལེགས་སྨན་གྱི་མཆོག །དེ་བཞིན་འདོད་ཆགས་ཞེ་སྡང་ཡང་། །ཉོན་མོངས་རང་སར་གྲོལ་ཙམ་ ― DNG001_Page_0361 ―
[མ་དཔེ་གཟིགས་ན་འདིར་གནོན།]
ན། །དེ་ནི་རང་བྱུང་ཡེ་ཤེས་ཡིན། །སྨན་གྱི་རྒྱལ་པོའི་བཅུད་ལེན་ཀྱང་། །ཐབས་ལ་མི་མཁས་བཟང་ཉེས་ན། །ཧ་ལ་ནག་པོའི་དུག་དང་འདྲ། །རང་ལ་གནས་པའི་ཆོས་ཉིད་ཀྱང་། །ལུང་མེད་འཁྲུལ་པའི་དབང་སོང་ཚེ། །འདོད་ཆགས་ལ་སོགས་དུག་ལྔ་ཡིན། །ད་ཡང་རྡོ་རྗེ་སེམས་དཔའ་ཉོན། །ས་འོག་གནས་པའི་རིན་ཆེན་གསེར། །ངོ་མ་ཤེས་ན་རྡོ་དང་འདྲ། །དེ་བཞིན་རང་ལ་ཡོད་པའི་དོན། །རྟོགས་པ་མེད་པའི་འཁྲུལ་རྟོག་སེམས། །ངོ་ཤེས་ཕྲད་ན་མི་ཟད་གཏེར། །དགོས་འདོད་རེ་བ་དེ་ལས་བྱུང་། །ངེས་དོན་ཆོས་སྐུ་རྟོགས་ཙམ་ན། །བྱིན་རླབས་ནོར་བུའི་ཚུལ་དུ་འབྱུང་། །ད་ཡང་འདུས་པའི་སྙིང་པོ་ཉོན། །མཁའ་ལ་གཟའ་སྐར་ཤར་བ་དང་། །ཆུ་ནང་དག་གི་གཟུགས་བརྙན་ནི། །གཅིག་པ་མ་ཡིན་སོ་སོ་མིན། །དེ་བཞིན་རིག་པའི་རྒྱལ་པོ་དང་། །རིག་པའི་རྩལ་དུ་སྣང་བ་གཉིས། །ལྡོག་བཅས་ཐ་དད་ངོ་བོ་གཅིག །རྫོགས་པ་ཆེན་པོ་ངེས་དོན་འདུས་པ་ལས་དཔེ་དོན་འདུས་པ་བསྟན་པའི་ལེའུ་སྟེ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །རྒྱུ་རྐྱེན་མ་བསྐྱེད་རང་བྱུང་ལ། །གསལ་འགྲིབ་མེད་པ་ཡེ་ཤེས་ཡིན། །རྩོལ་སྒྲུབ་དག་ལས་མ་བྱུང་བས། །རང་བྱུང་ལམ་ལ་རག་མ་ལུས། །ཡུལ་ལས་མ་བྱུང་ཡེ་གནས་ཏེ། །ལུང་ལྡན་རྐྱེན་གྱིས་རྟོགས་པས་ཆོག །ད་ཡང་རྡོ་རྗེ་སེམས་དཔའ་ཉོན། །ཡང་དག་ཆོས་སྐུ་འདུས་པ་འདི། །རང་ལ་ཡོད་ཀྱིས་གཞན་མ་བལྟ། །ཆོས་ཉིད་ངང་ལས་ཐུགས་མ་བཅོས། །ལྟ་བའི་དོན་ལ་བརྗེད་མ་ངེས། །སྒོམ་པའི་ངང་ལ་དྲན་མ་གསལ། །སྤྱོད་པའི་ཆོས་ལ་བཅོས་མ་བསླད། །དམ་ཚིག་གཞུང་ལ་འཚུར་མ་རྐྱེན། །འབྲས་བུའི་ཆོས་ལ་རྟགས་མ་རིང་། །ད་ཡང་འཁོར་གྱི་སྙིང་པོ་ཉོན། །འགྲོ་ས་མེད་ཀྱིས་ཙེན་ནེར་འདུག །ཡེ་ནས་ཡིན་གྱིས་གཟོད་མ་འཚོལ། །འཁོར་བའི་ཆོས་ལ་ངོས་མ་འཛིན། །སྣང་བའི་ཡུལ་ལ་ཞེན་མ་ཆེ། །འཇིག་རྟེན་གཏམ་ལ་བློ་མ་རྣོ། །ནམ་མཁའ་དག་ལ་བགོས་མ་བྱེད། །རྒྱལ་བའི་བཀའ་ལ་ཤེད་མ་ཕྱུངས། །སློབ་དཔོན་དག་ལ་འགྲས་མ་འཛུག ། ― DNG001_Page_0362 ―
[མ་དཔེ་གཟིགས་ན་འདིར་གནོན།]
རྫོགས་པ་ཆེན་པོ་ངེས་དོན་ཐམས་ཅད་འདུས་པ་ལས། དོན་གྱི་བསྡུ་བ་བསྟན་པའི་ལེའུ་སྟེ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིགས་སེམས་ཀྱི་རྒྱལ་པོ་ལ། །ཡིད་ཀྱི་དྲན་པས་འདི་སྐད་གསོལ། །མཚན་ཉིད་ཐེག་པ་ཇི་ལྟར་འཁྲུལ། །ཕྱི་ནང་གསང་སྔགས་སྒྲིབ་པ་གང་། །ཐབས་མེད་ཡོན་ཏན་ཇི་ལྟར་རྫོགས། །ཐེག་ཆེན་ཀུན་དང་མི་འདྲ་གང་། །རྫོགས་ཆེན་རང་གཞུང་དབྱེ་བ་དང་། །ལམ་དང་འབྲས་བུའི་ཁྱད་པར་གྱིས། །ཐེག་པ་གཞན་སུན་ཇི་ལྟར་གདོན། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །འགྲོ་དྲུག་སེམས་ཅན་ཐམས་ཅད་ལ། །ཕུང་པོ་ལྔ་ཡིས་ཀུན་ཁྱབ་སྟེ། །སྤྱི་དང་རང་གི་མཚན་ཉིད་ནི། །སོ་སོའི་དབྱེ་བ་ངས་བཤད་ཀྱིས། །དང་པོ་སྤྱི་ཡི་མཚན་ཉིད་ཀྱིས། །ཕུང་པོ་ལྔ་རུ་འདོད་པའི་གཞུང་། །སེམས་ཙམ་ཐེག་ཆེན་པ་ན་རེ། །ཕུང་པོ་ལྔ་ལ་མ་གཏོགས་པའི། །ཆོས་ནི་གཞན་ནས་ཡོད་མིན་ཕྱིར། །ཕུང་པོ་ལྔ་ནི་ཡང་དག་ཡོད། །ད་ཡང་འདུས་པའི་སྙིང་པོ་ཉོན། །རྒྱུ་ཡི་ཕུང་པོ་ལྔ་རྣམས་ཀྱང་། །ལྷར་ནི་མ་ཤེས་དད་པ་ཡིས། །ས་དང་ཕ་རོལ་ཕྱིན་པ་ཡི། །ལམ་ལ་རིམ་གྱིས་བགྲོད་བྱས་ནས། །རྣམ་པར་མི་རྟོག་ཏིང་འཛིན་གྱིས། །སྒྲིབ་པ་རྣམ་པ་གཉིས་སྦྱང་སྟེ། །ཐབས་དང་ཤེས་རབ་གཉིས་ལྡན་ན། །རང་གི་དོན་དམ་ངེས་པ་ཡིན། །འབྲས་བུ་ཐོབ་པའི་དུས་ན་ནི། །སྐུ་གསུམ་ཡེ་ཤེས་བཞི་རུ་འདོད། །ད་ཡང་རྡོ་རྗེ་སེམས་དཔའ་ཉོན། །ཕུང་པོ་ལྔ་རུ་འདོད་པ་དེ། །ཡང་དག་དོན་དམ་མ་ཡིན་ཏེ། །དུ་མར་སྣང་ཡང་རྐྱེན་གྱིས་བསྐྱེད། །གཉེན་པོས་བཅོས་ཤིང་བསྒྱུར་ཡོད་ཕྱིར། །ཀུན་རྫོབ་སྒྱུ་མ་ཙམ་ཡོད་པར། །ཡང་དག་དོན་དུ་འདོད་པ་འཁྲུལ། །མི་དང་ཐོ་ཡོར་ཐག་སྦྲུལ་བཞིན། །འཁྲུལ་པ་ཡིན་པར་ཐེ་ཚོམ་མེད། །ད་ཡང་རྡོ་རྗེ་སེམས་དཔའ་ཉོན། །ཕུང་པོ་ལྔ་ཡི་དབྱེ་བ་དང་། །མཚན་ཉིད་སོ་སོར་ཐ་དད་པའི། །སེམས་ཙམ་གཞུང་དུ་ཞིབ་བསྟན་གྱིས། །ངེས་དོན་སྐབས་སུ་ངས་མ་ ― DNG001_Page_0363 ―
[མ་དཔེ་གཟིགས་ན་འདིར་གནོན།]
བཤད། །རྫོགས་པ་ཆེན་པོ་ངེས་དོན་འདུས་པ་ལས། སེམས་ཙམ་སུན་འདོན་པ་བསྟན་པའི་ལེའུ་སྟེ་བཅུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་བཟང་སྟོན་པས་བཀའ་སྩལ་པ། །གསང་སྔགས་ཕྱི་ནང་འདོད་པའི་གཞུང་། །ཕུང་པོ་ཁམས་དང་སྐྱེ་མཆེད་རྣམས། །སངས་རྒྱས་ཡིན་པར་བློས་བསྒྱུར་ནས། །ཡེ་ཤེས་སེམས་དཔའ་མཆོད་ལ་སོགས། །ཚོགས་གཉིས་བསོད་ནམས་བསྐྱེད་ནས་ནི། །ཆོས་ཉིད་སྒྲིབ་པ་བྲལ་དུས་ན། །འབྲས་བུ་འབྱུང་བར་ངེས་པ་ནི། །སྐུ་གསུམ་ཡེ་ཤེས་ལྔར་འདོད་པས། །རང་རིག་ཆོས་སྐུ་ངེས་དོན་བསྒྲིབས། །ད་ཡང་རྡོ་རྗེ་སེམས་དཔའ་ཉོན། །ཨ་ནུ་ཡོ་ཀའི་འདོད་པ་ནི། །ཕུང་པོ་ལྔ་སོགས་རྟོག་ཚོགས་ཀུན། །མ་བསྐྱེད་རྫོགས་པར་འདོད་པ་དེ། །འབྲས་བུ་ཡེ་ཤེས་ལྔ་དང་ནི། །སྐུ་ལྔ་ལྷུན་གྲུབ་འདོད་པས་བསྒྲིབས། །ཡང་དག་འདུས་པའི་སྙིང་པོ་ཉོན། །རང་བཞིན་ལྷུན་གྲུབ་སངས་རྒྱས་ནི། །དུས་གསུམ་དག་ཏུ་མི་འགྱུར་ཅིང་། །གཉེན་པོས་བཅོས་ཤིང་བསྒྱུར་དུ་མེད། །ཐབས་ནི་གང་ལའང་མི་བརྟེན་ཕྱིར། །རང་བྱུང་ཀུན་ཏུ་བཟང་པོ་བྱ། །ད་ཡང་འཁོར་གྱི་སྙིང་པོ་ཉོན། །ཕུང་པོ་རྣམ་པ་ལྔ་ལས་ཀྱང་། །སྐུ་ལྔ་ཡེ་ཤེས་ལྔ་རུ་འདོད། །ཕུང་པོ་གཅིག་ལས་མེད་པ་ལ། །འབྲས་བུ་ཐ་དད་འབྱུང་བ་ཡིས། །གནས་འགྱུར་དུ་ནི་སངས་རྒྱས་ནས། །རིགས་ལྔའི་ཡོན་ཏན་རྫོགས་འདོད་པས། །ཤིན་ཏུ་མི་འཐད་འགལ་བའི་ཕྱིར། །མ་རིག་རྨོངས་པས་རང་ལ་བསྒྲིབས། །དེ་དོན་དགོངས་ཤིང་བསྒྲིབ་པ་ནི། །རྒྱུད་གཞན་དུ་ནི་ཞིབ་བསྟན་ཕྱིར། །ངེས་དོན་སྐབས་སུ་ངས་མ་བཤད། །ད་ཡང་རྡོ་རྗེ་སེམས་དཔའ་ཉོན། །མིང་གི་རྣམ་གྲངས་དུ་བསྟན་ཡང་། །དོན་གྱི་ངོ་བོ་གཅིག་ཏུ་འདུས། །རྩལ་ཤུགས་ཚུལ་དུ་གཉིས་སུ་སྣང་། །དོན་ལ་དགོས་མེད་ཚིག་དང་བྲལ། །དེ་ཕྱིར་བྱིས་པའི་སྒྲིན་ཚིག་འདྲ། །ཕུང་པོ་ཁམས་དང་སྐྱེ་མཆེད་ཀུན། །སེམས་སུ་བྱས་ཤིང་བློ་ཡིས་བཅོས། །དེ་ཕྱིར་ཡང་དག་ཕུང་པོ་མིན། །དོན་དམ་ཆོས་ལ་སྨོས་ཅི་དགོས། །དེ་ཕྱིར་མ་རིག་རྨོངས་པ་ཀུན། །གནས་འགྱུར་སངས་རྒྱས་འདོད་པས་ཕུང་། །གཏན་དུ་འཁྱམས་པ་ ― DNG001_Page_0364 ―
[མ་དཔེ་གཟིགས་ན་འདིར་གནོན།]
སྙིང་རེ་རྗེ། །རྫོགས་པ་ཆེན་པོ་ངེས་དོན་འདུས་པ་ལས། གསང་སྔགས་ཕྱི་ནང་གི་འདོད་གཞུང་སུན་འདོན་པ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །མུ་སྟེགས་ཆད་འདྲར་བསྐུར་བཏབ་ཀྱང་། །ངེས་དོན་སྙིང་པོ་མ་མཐོང་ཕྱིར། །གཏན་ཚིག་སྒྲོ་སྐུར་སྐྱོན་བཀལ་ཀྱང་། །དོན་དང་མཐུན་པར་མི་འགྱུར་རོ། །དེ་ཡང་རྡོ་རྗེ་སེམས་དཔའ་ཉོན། །ཐེག་པ་འོག་མའི་ཆོས་ཀུན་བཞིན། །ཤེས་རབ་ཐབས་ལ་བརྟེན་དགོས་ན། །བྱས་པ་ཡིན་ཕྱིར་གནས་ལུགས་མིན། །སྐུ་དང་ཡེ་ཤེས་འབྱུང་མི་སྲིད། །དེ་ཕྱིར་ཐབས་ལ་རག་ལུས་མེད། །རང་བྱུང་སྙིང་པོ་ཆོས་སྐུ་ནི། །ཉི་མ་དང་ནི་འོད་བཞིན་དུ། །ཤེས་རབ་ཆོས་སྐུ་གཅིག་པུ་ལ། །སྐུ་དང་ཡེ་ཤེས་ཀུན་ཀ་རྫོགས། །ད་ཡང་འདུས་པའི་སྙིང་པོ་ཉོན། །ངེས་དོན་བཀའ་ཡིས་དྲང་དོན་ཀུན། །སུན་བཏོན་སྒྲོ་འདོགས་ཆོད་པ་ཡིན། །ངེས་དོན་བཀའ་ལ་སུན་འདོན་མེད། །དེ་ཕྱིར་དྲང་དོན་བཀའ་འདི་གོལ། །ངེས་དོན་ཡང་ཏིའི་གཞུང་གིས་ནི། །དངོས་སུ་སྣང་ཡང་འབྱུང་བ་མེད། །དོན་དམ་རང་བཞིན་ངོ་བོར་གནས། །དོན་དུ་བྱ་བ་མ་དམིགས་ཀྱང་། །རང་བྱུང་ཡོན་ཏན་ཐུགས་ལ་རྫོགས། །ཆུ་ཟླའི་དཀྱིལ་འཁོར་ལྟ་བུར་སྣང་། །རང་བྱུང་ལྷུན་གྱིས་གྲུབ་པ་ཡིས། །རང་བྱུང་ངང་ལ་ཤུགས་ཀྱིས་འབྱུང་། །ད་ཡང་རྡོ་རྗེ་སེམས་དཔའ་ཉོན། །ཕུང་པོའི་དབྱེ་བ་འདུས་ལུགས་ཀྱང་། །ཐུན་མོང་ཐེག་པར་སྒོ་བསྟུན་ཕྱིར། །ཀུན་དང་མི་མཐུན་བསྟན་པ་ཡང་། །དྲང་དོན་ཡིན་ཕྱིར་ཡང་དག་མིན། །ཡང་དག་ངེས་དོན་ཡང་ཏི་ནི། །དཔེར་ན་ཤིང་ཐོག་སྨིན་པ་ལ། །འབྲས་བུ་ཤུགས་ཀྱིས་འབྱུང་བ་ལྟར། །ཆོས་སྐུ་སྒྲིབ་པ་མེད་པ་ལ། །སྐུ་གསུམ་ཡེ་ཤེས་ལྔ་རྣམས་ཀྱང་། །མ་བཙལ་རང་བཞིན་ལྷུན་གྱིས་རྫོགས། །རིགས་ལྔའི་སངས་རྒྱས་དོན་གྱིས་ཚང་། །ཐམས་ཅད་མཁྱེན་པའི་ཡེ་ཤེས་ཀུན། །མ་ལུས་ཐོགས་པ་མེད་པར་མཁྱེན། །རྫོགས་པ་ཆེན་པོ་ངེས་དོན་འདུས་པ་ལས་ཐབས་ལམ་བརྟེན་པར་ཡོན་ཏན་ཐམས་ཅད་རང་ལ་རྫོགས་པར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་ ― DNG001_Page_0365 ―
[མ་དཔེ་གཟིགས་ན་འདིར་གནོན།]
འདུས་པའི་འཁོར་རྣམས་ཀྱིས། །ཀུན་རིག་སེམས་ཀྱི་རྒྱལ་པོ་ལ། །ཐེག་པ་གཞན་དང་སྒོ་བསྟུན་ཕྱིར། །ཕུང་པོ་རྒྱུ་འབྲས་དོན་ཞུས་པ། །ཕུང་པོ་རྣམ་པ་ལྔ་པོ་དེ། །ཡང་དག་དོན་དང་བྱིན་བརླབས་སུ། །རྟག་ཆད་བྲལ་དང་ངོ་བོར་གནས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རྣམ་ཤེས་ཕུང་པོ་ཡང་དག་ཡོད། །ཕུང་པོ་བཞི་ནི་བྱིན་རླབས་བྱུང་། །རྟག་ཆད་བྲལ་བའི་རྣམ་ཤེས་ནི། །ཀུན་གཞི་རང་གིས་ངོ་བོ་ཡིན། །རྟག་ཆད་ངོ་བོར་གནས་པ་ནི། །ཕུང་པོ་གཞན་དང་ཚོགས་བདུན་ཡིན། །ད་ཡང་འདུས་པའི་སྙིང་པོ་ཉོན། །དེ་ཡི་འབྲས་བུ་སྐུ་ལྔ་དང་། །ཡེ་ཤེས་ལྔ་རྣམས་ཡོད་ཚུལ་ནི། །འདུས་མ་བྱས་ཀྱི་ནམ་མཁའ་བཞིན། །དུས་གསུམ་འདུ་འབྲལ་མེད་པར་ནི། །ཆོས་སྐུ་ཡེ་ཤེས་ཡང་དག་ཡོད། །སྐུ་དང་ཡེ་ཤེས་གཞན་དག་ནི། །བྱིན་གྱིས་བརླབས་ལས་འབྱུང་བ་སྟེ། །གཟའ་སྐར་རྒྱ་མཚོ་ཇི་བཞིན་དུ། །རྩོལ་དུ་མེད་པར་ཤུགས་ལས་འབྱུང་། །ཆོས་སྐུ་མེ་ལོང་ལྟ་བུ་ནི། །རྟག་ཆད་གཉིས་དང་བྲལ་བར་གནས། །ངོ་བོ་རང་བཞིན་ལྷུན་གྱིས་གྲུབ། །དེ་ཕྱིར་དུས་གསུམ་འཕོ་འགྱུར་མེད། །སྐུ་དང་ཡེ་ཤེས་གཞན་དག་ནི། །རྟག་ཆད་གཉིས་ཀྱི་ངོ་བོར་གནས། །ཐེག་པ་གཞན་དུ་ཞིབ་བསྟན་གྱིས། །ངེས་དོན་སྐབས་སུ་ངས་མ་བཤད། །རྫོགས་པ་ཆེན་པོ་ངེས་དོན་འདུས་པ་ལས། ཐེག་པ་སྤྱི་དང་རང་གི་འགལ་བར་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་འདུས་པའི་འཁོར་རྣམས་ལ། །ཡང་ཏི་རང་གཞུང་བཀའ་སྩལ་པ། །རང་བྱུང་ཡེ་ཤེས་ཆོས་སྐུ་ལ། །མེ་ལོང་ལྟ་བུའི་ཡེ་ཤེས་ཀྱང་། །ཡང་དག་དོན་དུ་མི་འདོད་ཕྱིར། །ཡེ་ཤེས་གཞན་ལ་སྨོས་ཅི་དགོས། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཡེ་ཤེས་ཆེན་པོ་ནི། །དུས་གསུམ་དག་ཏུ་མི་འགྱུར་ལ། །མེ་ལོང་ལྟ་བུའི་ཡེ་ཤེས་ཀྱང་། །ཐོག་མ་མེད་ཀྱང་ཐ་མ་ཡོད། །དེ་ཕྱིར་རྐྱེན་ལས་བྱུང་བ་ཡིན། །ཁམས་གསུམ་འཁོར་བའི་དུས་ཙམ་ན། །ཀུན་གཞི་རྣམ་པར་ཤེས་པ་ལ། །གཉེན་པོས་བསྐྱེད་པའི་གནས་ ― DNG001_Page_0366 ―
[མ་དཔེ་གཟིགས་ན་འདིར་གནོན།]
འགྱུར་གྱི། །ཡེ་ཤེས་བྱ་བའི་མིང་ཡང་མེད། །ངེས་དོན་ཡང་ཏིའི་གཞུང་གིས་ནི། །ཁམས་གསུམ་འཁོར་བའི་དུས་ན་ཡང་། །རང་བྱུང་ངོ་བོ་ཉིད་ཀྱི་སྐུ། །ཆོས་སྐུ་ཁྱབ་པ་ཡེ་གནས་ཕྱིར། །སངས་རྒྱས་འབྲས་བུ་ཐོབ་དུས་ན། །ཡེ་ཤེས་ཆོས་ཀྱི་སྐུ་ནི་གནས། །དེ་ཕྱིར་དོན་དམ་ཆོས་སྐུ་ལ། །ཆོས་ནི་གཞན་ན་ཡོད་མི་སྲིད། །ད་ཡང་རྡོ་རྗེ་སེམས་དཔའ་ཉོན། །འོ་ན་ཁྱོད་ཀྱི་འདོད་པ་དེ། །སེམས་ཅན་ལས་ནི་སངས་རྒྱས་པས། །དེ་ཉིད་འགྱུར་བ་མ་ཡིན་ནམ། །ངེས་དོན་འགྱུར་བ་མ་ཡིན་ཏེ། །མ་རྟོག་བག་ཆགས་བཅས་པ་དང་། །རྟོགས་པ་བག་ཆགས་བྲལ་བའི་ཕྱིར། །ཁྱད་པར་ཐ་དད་སྣང་གྱུར་ཀྱང་། །དོན་ལ་རྒྱུ་འབྲས་རིམ་གྱིས་མེད། །ངོ་བོ་གཞི་ཡི་ཆོས་སྐུ་དང་། །རྟོགས་པ་ཡེ་ཤེས་ཆོས་སྐུ་གཉིས། །ངོ་བོའི་གཞི་ལ་ཐ་དད་མེད། །ཉི་མ་རང་གི་ངོ་བོ་ལ། །མུན་གྲིབ་གྲང་བ་གང་ཡང་མེད། །གློ་བུར་སྤྲིན་གྱིས་བསྒྲིབས་ཙམ་ན། །ཉི་འོད་མེད་པ་མ་ཡིན་ཏེ། །ངོ་བོ་འཕེལ་འགྲིབ་མེད་པ་ལྟར། །རྟོགས་མ་རྟོགས་པའི་ཁྱད་པར་ལས། །སེམས་ཅན་སངས་རྒྱས་གཅིག་པའི་ཕྱིར། །གཞི་ལ་དུས་གསུམ་འགྱུར་མེད་ཡིན། །ད་ཡང་རྡོ་རྗེ་སེམས་དཔའ་ཉོན། །ལུང་ལྡན་བསྟན་པས་ཐམས་ཅད་མཁྱེན། །དེ་དུས་འབྲས་བུ་སངས་རྒྱས་ཕྱིར། །ངོ་བོ་དག་ལ་འཕེལ་འགྲིབ་མེད། །སྐྱེ་འགག་མེད་པར་རྒྱུན་དུ་གནས། །སེམས་ཅན་དུས་ཀྱི་ཆོས་སྐུ་ལས། །དེ་ལས་འཕེལ་བ་རྡུལ་ཙམ་མེད། །དེ་ཕྱིར་ཡང་དག་ངས་བཤད་ཉོན། །ད་ཡང་འདུས་པའི་སྙིང་པོ་ཉོན། །འོ་ན་དུས་གསུམ་མི་འགྱུར་ཅིང་། །ཐམས་ཅད་ཆོས་སྐུར་འདོད་པ་དེ། །ལུང་རིགས་གཉིས་དང་འགལ་བ་དང་། །སྡུད་པའི་རྟོགས་པར་འགྱུར་བའི་ཕྱིར། །འོ་ན་རྟག་དང་ཁྱད་ཅི་ཡོད། །དེ་ཡང་དོན་དང་མི་འགལ་ཏེ། །ཐམས་ཅད་ཆོས་སྐུར་འདུས་པ་དེ། །བསྡུས་ནས་འདུས་པ་མ་ཡིན་ཏེ། །ཉི་འོད་བུ་རམ་མངར་བ་བཞིན། །དུས་གཅིག་རྫོགས་པ་ཆོས་ཀྱི་སྐུ། །རང་བཞིན་ངང་གིས་གནས་པ་བཞིན། །རྒྱུ་རྐྱེན་ཚོགས་འདུས་མ་ཡིན་པས། །ལུང་དང་རིགས་པར་ཅི་ལ་འགལ། །ཁ་དོག་དབྱིབས་སུ་མེད་པ་ལ། །རྟག་པའི་ ― DNG001_Page_0367 ―
[མ་དཔེ་གཟིགས་ན་འདིར་གནོན།]
སྐྱོན་གྱིས་ཅི་ལ་གོས། །མི་འགྱུར་ཡེ་ནས་གནས་པ་ལ། །རྟག་ཅེས་ཟེར་ན་རྟག་དཀའ་བས། །ཆོས་སྐུ་རྒྱུན་དུ་ཡེ་ཡོད་ཕྱིར། །ཆད་པའི་སྐྱོན་གྱིས་ང་མ་གོས། །དངོས་པོ་མཚན་མ་མེད་པའི་ཕྱིར། །རྟག་པ་ཐེར་ཟུག་ང་ལ་མེད། །དེ་ཕྱིར་སྐྱོན་མེད་གཉིས་ཀར་གནས། །ད་ཡང་རྡོ་རྗེ་སེམས་དཔའ་ཉོན། །ཆོས་ཉིད་མཆོག་ཏུ་གསང་བའི་ཕྱིར། །སྒོ་ལྔ་དག་གི་སྤྱོད་ཡུལ་མིན། །དེ་ཕྱིར་ཆོས་སྐུ་བརྗོད་ལས་འདས། །བཏགས་པའི་ཐ་སྙད་ཀུན་དང་བྲལ། །དེ་ཕྱིར་སེམས་ཀྱི་ཡུལ་ལས་འདས། །རང་བྱུང་རིག་པའི་ཡེ་ཤེས་ལ། །ཚིག་གི་མཚོན་པ་ཐམས་ཅད་ནོར། །རྫོགས་པ་ཆེན་པོ་ངེས་དོན་འདུས་པ་ལས། ཡང་ཏི་རང་དོན་ཤན་དབྱེ་བ་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །ཉན་ཐོས་ལམ་དང་འབྲས་བུའི་གཞུང་། །ཚེ་འདིའི་སྔ་མ་ཡང་སྔ་ལ། །དགེ་སྡིག་ལས་ནི་གང་བྱས་པས། །ད་ལྟའི་ལུས་འདི་བླངས་པ་ལ། །བདེ་སྡུག་གཉིས་ཀ་དུས་འདིར་འབྱུང་། །ཕྱི་མ་འཁོར་བར་ལྷུང་དོགས་ནས། །སྡིག་སྤང་དགེ་བ་སྤྱད་བྱས་ན། །འབྲས་བུ་ལྷ་མིའི་གོ་འཕང་ཐོབ། །ད་ཡང་འདུས་པའི་སྙིང་པོ་ཉོན། །རྒྱུ་རྐྱེན་ཚོགས་པའི་དགེ་སྤྱད་ནས། །ལས་དེའི་འབྲས་བུ་ཐོབ་དུས་ནི། །གཞན་དོན་མཐར་ཕྱིན་གྲུབ་པ་ལས། །འབྲས་བུ་སངས་རྒྱས་ཐོབ་པར་དུ། །མཐོ་རིས་འབྲས་བུ་གནས་རྟེན་བཅས། །ལྷ་དང་མི་ཡི་ཐེམ་སྐས་ལ། །རིམ་པར་འཛེགས་ནས་སངས་རྒྱས་འབྱུང་། །ད་ཡང་འདུས་པའི་སྙིང་པོ་ཉོན། །ཁྱོད་ནི་ཡང་ཏི་རྫོགས་ཆེན་པ། །རྟོགས་པ་གཅིག་པུས་ཆོག་ཟེར་ན། །རྒྱུ་རྐྱེན་མ་ཚོགས་འབྲས་བུ་འདོད། །སྟོང་པ་ཉིད་ཀྱིས་མཐའ་རུ་ལྷུང་། །ལུང་རིགས་གཉིས་དང་ཤིན་ཏུ་འགལ། །དེ་བས་དགེ་བ་ཚོགས་པར་སྤྱད། །འབྲས་བུ་ལྷ་དང་མི་ཡི་ནི། །འབྲས་བུ་ཐོབ་པར་བྱ་བ་ལ། །རང་སེམས་རྟོགས་པས་མི་ཆོག་སྟེ། །བསོད་ནམས་ཚོགས་ནི་བསགས་ནས་ཀྱང་། །མྱ་ངན་འདས་པའི་མཐའ་བརྟེན་ཏེ། །ཏིང་འཛིན་རྩེ་གཅིག་བསྒོམ་གྱུར་ན། །འབྲས་བུ་ཐམས་ཅད་མཁྱེན་པ་ཡི། །ཡེ་ཤེས་ཐོབ་པར་འགྱུར་བ་ལ། །ཁྱོད་ནི་ཡང་ཏི་རྫོགས་ཆེན་པ། །འཁོར་བ་ལས་ནི་ཐར་གྱུར་ནས། །མྱ་ངན་འདས་པའི་མཐའ་རུ་བལྟ། ། ― DNG001_Page_0368 ―
[མ་དཔེ་གཟིགས་ན་འདིར་གནོན།]
ལམ་དེའི་འབྲས་བུས་སངས་མི་རྒྱ། །དེ་བས་འབྲས་བུ་བླ་མེད་པའི། །བྱང་ཆུབ་ཐོབ་པར་བྱ་བ་ལ། །རྒྱུ་ནི་ས་དང་ཕ་རོལ་ཕྱིན། །ལམ་ལ་རིམ་གྱིས་བགྲོད་གྱུར་ན། །གཞན་དོན་འབྲས་བུ་ཕུན་སུམ་ཚོགས། །གཟུགས་སྐུ་རྣམ་གཉིས་འཐོབ་པར་འགྱུར། །ཤེས་རབ་མི་རྟོག་རྩེ་གཅིག་ཏུ། །མ་ཡེངས་དོན་ལ་བསྒོམ་གྱུར་ན། །བདག་དོན་ཆོས་སྐུ་འགྲུབ་པར་འགྱུར། །ད་ཡང་འདུས་པའི་སྙིང་པོ་ཉོན། །འབྲས་བུ་བདག་དང་གཞན་དོན་གྱིས། །ཕུན་སུམ་ཚོགས་པ་ཐོབ་པ་ནི། །འདི་ལས་ཐབས་ཆེན་ངེས་པའི་ལམ། །ཆོས་ནི་གཞན་ན་ཡོད་དོ་ཟེར། །དེ་དག་དབྱེ་བའི་ཚོགས་བསགས་ཐབས། །སྙིང་རྗེ་ཆེན་པོས་གཞི་བཟུང་ནས། །ཐེག་པ་གཞན་དུ་ཞིབ་བསྟན་ཕྱིར། །ངེས་དོན་སྐབས་སུ་ངས་མ་བཤད། །ད་ཡང་རྡོ་རྗེ་སེམས་དཔའ་ཉོན། །གསང་སྔགས་ཕྱི་ནང་འདོད་པའི་གཞུང་། །ལམ་དང་འབྲས་བུའི་ཁྱད་པར་ནི། །ཐབས་དང་ཤེས་རབ་ཟུང་འདྲེལ་ནས། །བདེ་བའི་ཡོན་ཏན་རྙེད་པར་འགྱུར། །འབྲས་བུ་ཐམས་ཅད་མཁྱེན་པ་ཡི། །ཡེ་ཤེས་ཐོབ་པར་བྱ་བ་ལ། །ཐབས་དང་ཤེས་རབ་འཛོམ་པ་དགོས། །དེ་ཕྱིར་ཐབས་ནི་གང་ཞེ་ན། །ཕུང་པོ་ཁམས་དང་སྐྱེ་མཆེད་ཀུན། །ལྷ་དང་ལྷ་མོར་གནས་འགྱུར་བར། །རིམ་གྱིས་བསྐྱེད་དམ་མ་བསྐྱེད་རྫོགས། །ཆོ་ག་གསུམ་མམ་བདུན་གྱིས་ནི། །བསྐྱེད་ཅིང་བསྒྱུར་བྱས་ཡེ་ཤེས་སེམས། །སྤྱན་དྲངས་བསྡིམ་དང་མཆོད་ལ་སོགས། །གཞུང་དང་ལྡན་པར་བྱས་གྱུར་པས། །མཐར་ཕྱིན་འབྲས་བུ་ཐོབ་དུས་ན། །གཟུགས་སྐུ་རྣམ་གཉིས་འབྱུང་ནས་ཀྱང་། །བྱང་ཆུབ་སེམས་དཔའ་མན་ཆད་ནས། །སེམས་ཅན་དམྱལ་བ་ཡན་ཆད་ཀྱིས། །འགྲོ་དོན་མཐར་ཕྱིན་གྲུབ་པ་ལ། །སྟོང་ཉིད་ཏིང་འཛིན་བག་ཆགས་སྦྱངས། །ཆོས་སྐུ་ཐམས་ཅད་མཁྱེན་པ་ཡི། །ཡེ་ཤེས་བདེ་ལྡན་ཐོབ་པར་འགྱུར། །ད་ཡང་རྡོ་རྗེ་སེམས་དཔའ་ཉོན། །འདི་ལས་ལྷག་པའི་ངེས་དོན་ཆོས། །རྫོགས་ཆེན་ཡང་ཏི་ཁྱེད་ལ་མེད། །དེ་ཕྱིར་ཐབས་ལ་བརྟེན་ནས་ནི། །ཤེས་རབ་ལྟ་བས་ཐག་བཅད་དེ། །འབྲས་བུ་ངེས་པར་འབྱུང་བར་འདོད། །རྫོགས་པ་ཆེན་པོ་ངེས་དོན་འདུས་པ་ལས། སྔགས་དང་མཚན་ཉིད་ཀྱི་ལམ་དང་འབྲས་བུ་དབྱེ་བའི་ལེའུ་སྟེ་ ― DNG001_Page_0369 ―
[མ་དཔེ་གཟིགས་ན་འདིར་གནོན།]
བཅོ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ཐེག་བརྒྱད་ལམ་གྱི་གོལ་ས་ནི། །ཁྱེད་ཅག་བློ་དམན་མ་རིག་པས། །ཐབས་དང་ཤེས་རབ་འདྲེལ་དགོས་ཟེར། །འཁྲུལ་པ་བརྟས་པའི་རྟོག་པ་ཡིན། །ད་ཡང་འདུས་པའི་སྙིང་པོ་ཉོན། །དཔེར་ན་མར་འདོད་པ་ལ་ནི། །ཆུ་བསྲུབས་པས་ནི་མར་མེད་ལྟར། །ཐབས་ཀྱི་མཚན་མ་དངོས་སུ་སྤྱད། །ཞེན་པའི་སེམས་ཀྱིས་བྱང་ཆུབ་འདོད། །དཔེར་ན་ཉི་མའི་སྙིང་པོ་ལ། །སྤྲིན་ནི་དཀར་ནག་གཉིས་ཀས་སྒྲིབ། །དེ་བཞིན་ཐབས་ལ་བརྟེན་པ་ཡི། །གང་ཟག་ཀུན་གྱིས་དངོས་པོར་བཟུང་། །དེ་ཕྱིར་ལམ་གྱི་གེགས་སུ་གསུངས། །ད་ཡང་རྡོ་རྗེ་སེམས་དཔའ་ཉོན། །དཔེར་ན་སྐྱེས་བུ་མི་རྣམས་ཀྱིས། །སྔགས་མེད་པ་ཡི་དུག་ཟོས་ན། །ཨ་ཤུ་ཀ་ཡི་རྐྱེན་ཡིན་ཕྱིར། །ཆེ་ཆུང་གང་ཟོས་གཉིས་ཀ་འཆི། །ངེས་པའི་ལུང་ལྡན་དོན་མེད་ཕྱིར། །ཐབས་ནི་ཆེ་ཆུང་གཉིས་ཀས་བསྒྲིབས། །རྩོལ་བ་བྱས་པས་ཐམས་ཅད་གོལ། །དེ་ཕྱིར་རང་རིག་ཆོས་སྐུ་ནི། །སེམས་ཀྱི་གཟེབ་ན་ངོས་ཟིན་ན། །ཐབས་ནི་གང་ལའང་བརྟེན་པ་མེད། །དེ་ཕྱིར་མན་ངག་སྙིང་པོའི་ཆོས། །ད་ཡང་འདུས་པའི་སྙིང་པོ་ཉོན། །ཁྱེད་ཅག་ཐེག་པ་འོག་མ་པ། །མཚན་མ་དངོས་སུ་སྤྱད་སྒོ་ནས། །འབྲས་བུ་ཐམས་ཅད་མཁྱེན་པ་ཡི། །ཡེ་ཤེས་ཐོབ་པར་འདོད་པ་ནི། །ཤིན་ཏུ་གཏི་མུག་སྨད་པའི་གནས། །ཀུན་བརྟགས་བསྒོམ་པའི་ཆོས་པ་ཀུན། །ལམ་གྱི་གེགས་ནི་ཐབས་ཡིན་ཕྱིར། །གོལ་ས་ཡིན་པར་ཀུན་ནས་བཤད། །དེ་ཕྱིར་ཐབས་ལ་བརྟེན་མི་དགོས། །ད་ཡང་འདུས་པའི་སྙིང་པོ་ཉོན། །སངས་རྒྱས་ཉིད་དུ་འགྲོ་བ་ཡི། །ངེས་པའི་ལམ་ནི་གང་ཡིན་ཕྱིར། །ཐོག་མར་བལྟ་བའི་གདེངས་དང་ནི། །ཏིང་འཛིན་སྤྱོད་ལམ་དུས་གཅིག་ཏུ། །རང་བྱུང་སྙིང་པོའི་དོན་རྟོགས་ཕྱིར། །བརྗོད་པའི་ཐ་སྙད་ཀུན་དང་བྲལ། །ཐིག་ལེ་ཉག་གཅིག་ཆོས་ཀྱི་སྐུ། །ཤེས་དང་སངས་རྒྱས་དུས་མཉམ་ཕྱིར། །དེ་ལས་ལྷག་པའི་ཆོས་གཞན་མེད། །ད་ཡང་རྡོ་རྗེ་སེམས་དཔའ་ཉོན། །ཁྱེད་ནི་ཐེག་པ་འོག་མ་པ། །བྱེ་མ་ལས་ནི་མར་བཙིར་བཞིན། །བེམ་པོ་འབྱུང་བ་རྣམ་བཞི་ལས། །སངས་རྒྱས་འདོད་པའི་སྙིང་རུལ་ཀུན། །བསྐལ་ ― DNG001_Page_0370 ―
[མ་དཔེ་གཟིགས་ན་འདིར་གནོན།]
པར་བསྒྲུབ་ཀྱང་འགྲུབ་མི་སྲིད། །བེམ་པོ་རང་ཡང་སེམས་ཡིན་ན། །ཡུལ་ལ་འཕོ་འགྱུར་ཡོད་པའི་ཕྱིར། །སེམས་ལ་སྐྱེ་ཤི་ཡོད་པར་འགྱུར། །དེ་ཕྱིར་རང་བྱུང་ཡེ་ཤེས་མིན། །རྫོགས་ཆེན་ལས་ནི་ཇི་ལྟར་འདོད། །ཡང་ཏི་དོན་དམ་ཆེན་པོ་ནི། །ཁྱུང་ཆེན་ནམ་མཁར་ལྡིངས་པ་བཞིན། །དྲན་པ་ཙམ་གྱིས་ཆོས་སྐུར་གསལ། །དེ་ཙམ་ཉིད་ནས་བཙལ་མི་དགོས། །དེ་ཕྱིར་མ་བསྒྲོད་པ་ཡི་ལམ། །དཔེར་ན་ནོར་བུ་རིན་ཆེན་བཞིན། །རྟོགས་པ་ཙམ་གྱིས་ཆོག་པའི་ཕྱིར། །བདག་གཞན་དོན་ནི་ལྷུན་གྱིས་འགྲུབ། །དེ་ཕྱིར་ངེས་དོན་ཡ་མཚན་ཆེ། །ད་ཡང་རྡོ་རྗེ་སེམས་དཔའ་ཉོན། །ཁྱེད་ཅག་ཐེག་པ་འོག་མ་པ། །དཔེར་ན་ཏིལ་ལ་མར་ཡོད་ཀྱང་། །མ་བཙིར་བར་དུ་མར་མི་འབྱུང་། །དེ་བཞིན་རང་ལ་ཡོད་མོད་ཀྱང་། །མ་བསྟན་བར་དུ་ཤེས་མི་སྲིད། །བསྐལ་པ་འབུམ་ཕྲག་བརྒྱ་ཡི་བར། །འདུས་བྱས་ཆོས་སྤྱོད་བྱས་གྱུར་ཀྱང་། །འབྲས་བུ་སངས་རྒྱས་འབྱུང་བ་མེད། །ད་ཡང་འདུས་པའི་སྙིང་པོ་ཉོན། །དེ་དག་ཤེས་བྱེད་ལམ་མང་ཡང་། །རང་ལ་ཡོད་པ་མ་ཤེས་ན། །གཞན་ལ་ཚོལ་བ་རྨོངས་པའི་ཆོས། །དེ་ཕྱིར་ཚོལ་མེད་དོན་འདི་གཅེས། །རྫོགས་པ་ཆེན་པོ་ངེས་དོན་འདུས་པ་ལས། ཐེག་པ་གཞན་སུན་འདོན་པའི་ལེའུ་སྟེ་བཅུ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཚིག་གིས་འདི་སྐད་གསོལ། །མ་རིག་ཡེ་ཤེས་དབྱེ་བ་གང་། །ཡུལ་སེམས་གཞི་ལ་གཅིག་མི་གཅིག །རྒྱུ་འབྲས་དོན་གྱི་དབྱེ་བ་གང་། །བསྒོམ་དུ་ཡོད་མེད་ཇི་ལྟར་ཡིན། །རྟོགས་མ་རྟོགས་ཀྱི་ཁྱད་པར་གང་། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སེམས་ཅན་ཀུན་ལ་གནས་པའི་དོན། །མ་རིག་ཡེ་ཤེས་ཁྱད་པར་ནི། །ང་ཡི་བཤད་ཀྱིས་ད་ཉོན་ཅིག །དང་པོ་འཁོར་འདས་བར་དོ་ལ། །ཤེས་བཞིན་ལུང་མ་བསྟན་དུ་ཡོད། །དེ་ཉིད་རང་དུ་ངོ་མ་ཤེས། །དེ་ཕྱིར་གང་གི་བློ་ཡིས་འཇུག །དེ་ནི་གཏི་མུག་འཁོར་བའི་གཞི། །དེ་ལ་དཔྱད་ཀྱང་མི་ཤེས་པ། །གཞི་གནས་མ་རིག་པ་ཞེས་བྱ། ། ― DNG001_Page_0371 ―
[མ་དཔེ་གཟིགས་ན་འདིར་གནོན།]
ད་ཡང་འདུས་པའི་སྙིང་པོ་ཉོན། །དེ་ལ་ཡུལ་མེད་འཛིན་པ་ནི། །བག་ལ་ཉལ་བའི་ཆ་ཕྲ་བྱུང་། །དེ་ཕྱིར་རང་ལ་རང་གིས་བསྒྲིབས། །ལྷན་ཅིག་སྐྱེས་པའི་མ་རིག་པ། །རྒྱུ་ཡི་རྐྱེན་ཞེས་དེ་ལ་བྱ། །རྒྱུ་དེ་ཤིན་ཏུ་མྱུར་བར་ནི། །དེ་མ་ཐག་ཏུ་འཛིན་པས་བརྟགས། །བག་ཉལ་མིང་ལ་ཞེན་འཛིན་ཅིང་། །དེ་མ་ཐག་པའི་རྐྱེན་ཞེས་བྱ། །རྒྱུ་དང་དེ་མ་ཐག་པ་ཡི། །རྐྱེན་གཉིས་ཟུང་དུ་འཛོམ་པའི་ཕྱིར། །ལྷན་ཅིག་སྐྱེས་པའི་མ་རིག་ཡིན། །ད་ཡང་འདུས་པའི་སྙིང་པོ་ཉོན། །དེས་བསྐྱེད་ཤེས་པ་མངལ་དུ་འཇུག །ངར་འཛིན་ཆགས་སྡང་ཕྲ་མོ་སྐྱེ། །ནང་གི་བཟུང་བ་ཀུན་ཏུ་བརྟས། །དེ་ཕྱིར་དམིགས་པའི་རྐྱེན་ཞེས་བྱ། །ཁོང་ནས་ཕྱུང་ནས་ཕྱི་རོལ་གྱི། །བག་ཆགས་ཡུལ་གྱི་སྣང་བ་ལ། །རང་གི་ཡིད་ཀྱི་ངན་རྟོག་ཞུགས། །ཡུལ་ལ་ཆོས་བརྒྱད་ཀུན་ཏུ་བརྟགས། །ང་བདག་ངན་རྟོག་འཛིན་བལྟས་ཞེན། །མངོན་རྒྱུ་ཆགས་སྡང་ཁ་ཚང་ཕྱིར། །དམིགས་པ་བདག་པོའི་རྐྱེན་གཉིས་ཚང་། །ཀུན་བརྟགས་མ་རིག་པ་ཞེས་བྱ། །ད་ཡང་འདུས་པའི་སྙིང་པོ་ཉོན། །ལྷན་ཅིག་ཀུན་བརྟགས་གཉིས་འཛོམ་པས། །ཀུན་གཞིའི་རྣམ་པར་ཤེས་པ་ཡིན། །དེས་བསྐྱེད་ཚོགས་བརྒྱད་ཁ་ཚང་བས། །འཁོར་བར་འཁྱམས་ཞེས་དེ་ལ་བྱ། །ད་ཡང་འདུས་པའི་སྙིང་པོ་ཉོན། །སངས་རྒྱས་ཀུན་གྱི་ཡེ་ཤེས་ནི། །རང་སེམས་ངོ་བོ་རྟོགས་ལས་བྱུང་། །ཡང་ན་རང་བྱུང་ཀུན་གྱི་གཞི། །ཤེས་ནས་ལུང་ལྡན་ངེས་པའི་དོན། །ཟུང་དུ་འཛོམ་ཕྱིར་ཡེ་ཤེས་ཡིན། །སྨན་དང་སྨན་པ་འཛོམ་པ་འདྲ། །རྫོགས་པ་ཆེན་པོ་ངེས་དོན་འདུས་པ་ལས། མ་རིག་པ་དང་ཡེ་ཤེས་དབྱེ་བ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་ཀུན་རིག་རྒྱལ་པོ་ཡིས། །ཡུལ་སེམས་དབྱེ་བ་བཀའ་སྩལ་པ། །སྣང་ཞིང་སྲིད་པའི་ཆོས་རྣམས་ཀུན། །འཁྲུལ་སེམས་བག་ཆགས་བརྟས་པའི་ ― DNG001_Page_0372 ―
[མ་དཔེ་གཟིགས་ན་འདིར་གནོན།]
ཕྱིར། །སྣང་བ་ཞེན་པ་སྣ་ཚོགས་པ། །ངོ་བོ་ཡུལ་དུ་གྲུབ་པ་མེད། །དེ་ཕྱིར་སྣང་བ་ལོག་འཁྲུལ་ཡིན། །ད་ཡང་འདུས་པའི་སྙིང་པོ་ཉོན། །རང་གི་སེམས་ནི་འཁྲུལ་པའི་དཔེ། །ཐག་སྦྲུལ་ཐོ་ཡོར་མི་བཞིན་དུ། །མེད་ལ་ཡོད་འཛིན་ཀུན་ཏུ་བརྟགས། །ས་ཆུ་མེ་རླུང་འབྱུང་བ་བཞི། །འཁྲུལ་པའི་བག་ཆགས་བརྟས་པའི་ཕྱིར། །དངོས་སུ་སྣང་ཡང་དོན་དུ་མེད། །དེ་ཡུལ་འདི་ནི་གཏན་མེད་ལ། །རྨོངས་པ་ཀུན་གྱིས་དམ་པར་འཛིན། །ལོག་པའི་རྗེས་སུ་འབྲང་བས་ལྟུང་། །སྤྲེལ་འདྲའི་ལུང་གིས་བསླད་པ་ཡིན། །ད་ཡང་རྡོ་རྗེ་སེམས་དཔའ་ཉོན། །རང་རིག་ཆོས་སྐུ་ཡེ་ཤེས་ལ། །མ་རིག་རྐྱེན་བཞིས་མ་བསྐྱེད་པས། །ཀུན་གཞི་མེད་ཕྱིར་སེམས་ཀྱང་མེད། །ཡུལ་སེམས་གཉིས་ཀ་གཞི་ལ་མེད། །དེ་ཕྱིར་སེམས་མིན་ཆོས་སྐུ་ལ། །རང་རིག་ཡེ་ཤེས་བློ་ལྡན་པས། །སྣང་བ་མེད་ཕྱིར་འཛིན་པ་བྲལ། །གསལ་ལ་འཛིན་མེད་མི་གཡོ་བ། །སངས་རྒྱས་ཀུན་གྱི་དགོངས་པར་བཤད། །ད་ཡང་རྡོ་རྗེ་སེམས་དཔའ་ཉོན། །རང་སེམས་ཡུལ་དུ་འཛིན་པའི་རྒྱུ། །འཁོར་བའི་ས་བོན་མ་རིག་པས། །རྒྱུ་རྐྱེན་བྱས་ནས་སྡུག་བསྔལ་འབྱུང་། །དེ་ཕྱིར་རང་འཁྲུལ་རྨོངས་པའི་སེམས། །གཟུང་འཛིན་བྱིང་རྒོད་ཞེན་པའི་རྒྱུ། །ཡལ་ལ་བརྟེན་ནས་ཆགས་སྡང་སྐྱེ། །འཁོར་བའི་རྒྱུ་ནི་ཆགས་སྡང་གཉིས། །གཅིག་དང་མི་གཅིག་རྩོལ་བའི་བར། །འཁོར་བའི་མཐའ་ལ་ཟད་པ་མེད། །དེ་ཕྱིར་རང་རིག་དོན་རྟོགས་ནས། །སེམས་མེད་ཡུལ་འདི་ཅི་ལ་སྲིད། །དེ་བས་རང་སེམས་སྙིང་པོ་འདི། །སེམས་ཀྱི་ཡུལ་ལས་འདས་པའི་ཕྱིར། །གཅིག་དང་མི་གཅིག་བརྗོད་ཀྱི་བར། །མ་རིག་བློ་ལ་ཡུལ་སེམས་ཡོད། །ལོག་ལྟ་ཅན་རྣམས་དམ་པར་འཛིན། །དེ་ཕྱིར་སྒྲ་དང་མཚན་མའི་ཆོས། །སྤྲེལ་འདྲའི་ལུང་གི་བློས་བཏགས་ནས། །ཡུལ་སེམས་རྩོལ་བའི་ཆོས་ཀུན་བྱུང་། །ངས་ལུང་མན་ངག་བསྟན་པ་ཡིས། །ཡང་དག་ངེས་པའི་སངས་རྒྱས་ལ། །རང་རིག་ཆོས་སྐུ་སེམས་དང་བྲལ། །དེ་ཕྱིར་ཡུལ་མེད་རིག་པ་གཙོ། །ངའི་ལུང་གོ་བས་ཡུལ་སེམས་བརླག །ད་ཡང་འདུས་པའི་སྙིང་པོ་ཉོན། །དེ་ཡང་རྩ་བ་མདོར་བསྡུས་ན། །ཉི་ཤར་མུན་གྲིབ་མེད་པ་བཞིན། །རང་བྱུང་ཆོས་སྐུའི་དོན་རྟོགས་པས། །གོལ་སྒྲིབ་ཡུལ་སེམས་གཞི་ནས་དག །དེ་ཕྱིར་རང་བྱུང་ཡེ་ཤེས་སྐུ། །དུས་གསུམ་འཕོ་འགྱུར་མེད་པའི་ཕྱིར། །འཁྲུལ་མེད་ཡང་དག་མངོན་སངས་རྒྱས། །དེ་ཕྱིར་ངེས་དོན་རྟོགས་པས་ཆོག །རྫོགས་པ་ཆེན་པོ་ངེས་དོན་འདུས་པ་ལས། ཡུལ་སེམས་གཞི་ལ་སྐབས་དབྱེ་ ― DNG001_Page_0373 ―
[མ་དཔེ་གཟིགས་ན་འདིར་གནོན།]
བ་བསྟན་པའི་ལེའུ་སྟེ་བཅྭོ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །རྒྱུ་འབྲས་སྐབས་དབྱེ་བཀའ་སྩལ་པ། །ཡང་དག་ངེས་དོན་སྙིང་པོ་ལ། །མཛད་སྤྱོད་འབྱུང་བས་མ་བསླད་ཕྱིར། །རྒྱུ་དང་འབྲས་བུ་ངོ་བོ་གཅིག །རང་བྱུང་རིག་པའི་ཆོས་ཉིད་ནི། །དཔེར་ན་ནོར་བུ་རིན་ཆེན་ལ། །དགོས་འདོད་འབྲས་བུ་དུས་གཅིག་རྫོགས། །དེ་བཞིན་ཆོས་སྐུའི་ངེས་དོན་ལ། །རྟོགས་པ་ཙམ་གྱིས་ཡོན་ཏན་རྫོགས། །དེ་ཡང་འདུས་པའི་སྙིང་པོ་ཉོན། །ཐེག་གཞན་ཆོས་ཀུན་རྒྱུ་འབྲས་ཏེ། །དུས་གཅིག་མ་ཡིན་རིམ་གྱིས་ཚོལ། །རྩོལ་བསྒྲུབ་ཡོད་ཕྱིར་འཁོར་བའི་རྒྱུ། །གནས་སྐབས་བདེ་ཐོབ་མཐར་ཐུག་མེད། །རྒྱུ་འབྲས་བསྐྱེད་རིམ་གོལ་བར་གསུངས། །དཔེར་ན་བྱས་པའི་རྫས་རྣམས་ཀུན། །མི་རྟག་མྱུར་དུ་འཇིག་པ་བཞིན། །རྒྱུ་རྐྱེན་བྱས་པའི་ཆོས་ཀུན་ནོར། །འབྲས་བུ་མི་འབྱུང་ཆུ་ཤིང་འདྲ། །ད་ཡང་འདུས་པའི་སྙིང་པོ་ཉོན། །བདེན་དོན་རྩ་བ་མདོར་བསྡུས་ན། །ཏཀྵ་ཀ་ཡི་རྒྱན་བཞིན་དུ། །རྒྱུ་འབྲས་མཐར་ཕྱིན་གཞི་ནས་རྫོགས། །དེ་བཞིན་ཆོས་སྐུའི་སྙིང་པོ་ལ། །བདེ་བའི་ཡོན་ཏན་རང་ལ་འཆར། །རྒྱུ་འབྲས་གཅིག་ཕྱིར་ལྷུན་གྱིས་གྲུབ། །རྫོགས་པ་ཆེན་པོ་ངེས་དོན་འདུས་པ་ལས། རྒྱུ་འབྲས་དོན་གྱི་སྐབས་དབྱེ་བ་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་ཀུན་རིག་རྒྱལ་པོ་ཡིས། །བསྒོམ་དུ་ཡོད་མེད་སྐབས་དབྱེ་བ། །ཆེད་དུ་དགོངས་ཏེ་བཀའ་སྩལ་པ། །དེས་དོན་མ་ནོར་འཕྲད་འདོད་ན། །མ་བསྒོམས་སངས་རྒྱས་ད་ལྟ་ཉིད། །རང་བྱུང་ཆོས་སྐུ་ཡེ་ཡིན་ལ། །བྱང་ཆུབ་སྙིང་པོ་བསྒོམ་དུ་མེད། །ད་ཡང་འདུས་པའི་སྙིང་པོ་ཉོན། །དེ་ཕྱིར་ཆོས་ཉིད་གདོད་ནས་དག །ཀུན་བཟང་ང་ཡི་ཡང་སྙིང་རྒྱུད། །མ་ནོར་གདམས་ངག་རྣམ་པ་ལྔས། །ཚེགས་མེད་རང་སེམས་སྙིང་པོའི་དོན། །སྐལ་ལྡན་རྣམས་ཀྱིས་རྟོགས་པར་གྱིས། །ད་ཡང་རྡོ་རྗེ་སེམས་དཔའ་ཉོན། །སངས་རྒྱས་དགོངས་པ་ཇི་ལྟ་བ། །སེམས་ཅན་བློ་ཡིས་རྟོགས་པའི་ཐབས། །དཔེས་མི་མཚོན་ཕྱིར་མ་བཤད་པར། །གདམས་ངག་བསྟན་པ་ཙམ་གྱིས་ནི། །མ་བསྒོམས་ད་ལྟ་ཉིད་དུ་ཡང་། །ངེས་དོན་རྟོགས་ཕྱིར་བསྒོམ་ ― DNG001_Page_0374 ―
[མ་དཔེ་གཟིགས་ན་འདིར་གནོན།]
མེད་དོན། །མ་བསྒོམས་འབྲལ་མེད་སངས་རྒྱས་ཐུགས། །ཀུན་བཟང་ཐུགས་དང་མཉམ་པར་ནི། །བདེ་བའི་འཁོར་ལོའི་རྒྱུད་ཆེན་དུ། །བསྒོམ་དུ་མེད་པར་ངས་བཤད་ཀྱིས། །ད་ཡང་རྡོ་རྗེ་སེམས་དཔའ་ཉོན། །དེ་དོན་གདམས་ངག་སྐལ་མེད་ལ། །ཞི་གནས་བློ་ནི་མ་ཡེངས་པ། །བསྒོམ་དུ་ཡོད་པ་གནས་པའི་ཐབས། །འཁོར་ལ་བསྟན་གྱིས་ཡིད་ཀྱིས་ཉོན། །བསྒོམ་དུ་མེད་ལ་སུ་སྐྲག་པ། །མཚན་ཉིད་དབང་གསུམ་རིམ་གྱིས་བསྟན། །དེ་དོན་ཉམས་སུ་མྱོང་བ་ལ། །ཡིད་ཆེས་གདེངས་དང་ལྡན་པར་འབྱུང་། །དེ་ཕྱིར་རང་སེམས་དགོན་པ་བརྟེན། །དེར་གནས་ཤེས་རབ་ཤིན་ཏུ་འཕེལ། །ཉམས་ནི་ཕྱི་ནང་རིམ་གྱིས་འབྱུང་། །དེ་བྱུང་དགའ་བྲོད་སེམས་མི་བྱ། །ད་ཡང་རྡོ་རྗེ་སེམས་དཔའ་ཉོན། །རྣམ་གྲངས་མཚོན་པའི་ཚིག་རྣམས་ལས། །བཟློག་སྟེ་བརྗོད་མེད་རང་ལ་བཞག །ཐ་མལ་རྗེས་སུ་མ་འབྲངས་པ། །བསྒོམ་དུ་ཡོད་པའི་མཆོག་ཏུ་བཤད། །དེ་ཕྱིར་མ་ཡེངས་བསྒོམ་པ་ནི། །ཉིད་ལས་མི་གཞན་འཁོར་རྣམས་ཀྱང་། །དོན་གྱིས་སྒོ་ནས་ཤེས་པར་གནང་། །རིག་འཛིན་སེམས་དཔའ་རྣམས་ཀྱང་ནི། །ཏིང་འཛིན་གོམས་པས་བརྟན་པ་ཐོབ། །འཁོར་ན་གནས་པའི་དད་ཉན་ཀྱང་། །མོས་པའི་ལྟ་བ་གོམས་པར་བྱེད། །ཤེས་རབ་དམན་པའི་རྣལ་འབྱོར་པ། །གནས་དང་མི་གཡོ་ལྷུན་གྲུབ་འདོད། །དེ་ཕྱིར་རང་སེམས་རྟོགས་པར་དཀའ། །རྫོགས་པ་ཆེན་པོ་ངེས་དོན་འདུས་པ་ལས། བསྒོམ་དུ་ཡོད་མེད་སྐབས་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ཡེ་ནས་ཡོད་པའི་ཆོས་ཀྱི་སྐུ། །རྟོགས་མ་རྟོགས་ཀྱི་ཁྱད་དབྱེ་བ། །ལེགས་པར་ཉོན་ལ་ཡིད་ཀྱིས་ཟུང་། །རང་སེམས་མ་རྟོགས་སེམས་ཅན་གྱིས། །འཁོར་བ་གང་ནས་གང་དུ་འཁྲུལ། །ཅིས་འཁྲུལ་ལྡོག་ཐབས་མ་ཤེས་པས། །ཡོད་མེད་གཟུང་འཛིན་བླ་དྭགས་ལ། །འཁྲུལ་པ་རྣམས་ནི་དམ་པར་འཛིན། །འཁོར་འདས་ཆོས་ལ་བརྟགས་པས་ལན། །ད་ཡང་འདུས་པའི་སྙིང་པོ་ཉོན། །གང་ལའང་རྟོག་པ་མ་ཤེས་ཕྱིར། །ལོག་ལྟ་གང་ཞིག་ནོར་བའི་ལམ། །གཉིས་མེད་དོན་ལ་མ་རེག་ ― DNG001_Page_0375 ―
[མ་དཔེ་གཟིགས་ན་འདིར་གནོན།]
འཁྲུལ། །དེ་ཕྱིར་གཉིས་མེད་མ་རྟོགས་ནས། །ལུས་ངག་སྩོལ་བ་སྡུག་བསྔལ་སྣོན། །དེ་ཕྱིར་ངེས་དོན་ལུང་མེད་ན། །ཐེག་དགུ་ཤེས་ཀྱང་གྲོལ་མི་སྲིད། །ད་ཡང་རྡོ་རྗེ་སེམས་དཔའ་ཉོན། །ཡེ་ནས་ཡོད་པའི་ཆོས་ཉིད་ལ། །ལུང་ལྡན་ངེས་པའི་དོན་ཕྲད་ན། །རྟོགས་དུས་ད་ལྟའི་ཚེ་འདི་ལ། །རང་སེམས་སྙིང་པོ་རྟོགས་པར་གྱིས། །ཀུན་བཟང་ངང་ལ་ཐོག་མཐའ་མེད། །དུས་གཅིག་ཆོད་ཕྱིར་མངོན་སངས་རྒྱ། །འདས་པའི་སངས་རྒྱས་ཀུན་གྱིས་ཀྱང་། །ད་ཡོད་ཕྱིར་ན་ཐོག་མ་ཡོད། །སྐྱེ་བ་མི་ལེན་ཐ་མ་བྱུང་། །ད་ལྟར་མ་བྱོན་སེམས་དཔའ་ཡིས། །ཐོག་མཐའ་མ་ཆོད་རྩོལ་བར་བྱེད། །དེ་ཕྱིར་རང་སེམས་རྟོགས་པར་དཀའ། །སེམས་ཅན་ཀུན་ལ་སྨོས་ཅི་དགོས། །ད་ཡང་འདུས་པའི་སྙིང་པོ་ཉོན། །དེ་ཕྱིར་ངེས་པའི་ལུང་བསྟན་གྱིས། །འཁྲུལ་པ་ལྡོག་ཐབས་ཤེས་པ་དེས། །ངེས་དོན་ཚིག་གི་གདམས་ངག་ནི། །བསྟན་པས་དོན་རྟོགས་སྐད་ཅིག་མར། །སངས་རྒྱས་ཀུན་དང་དགོངས་པ་མཉམ། །ཐོག་མཐའ་ཆོད་ཕྱིར་ཐམས་ཅད་མཁྱེན། །དེ་ཕྱིར་ངེས་པའི་རྒྱུད་དོན་འདི། །རྟོགས་པས་ཆོག་ཕྱིར་ཡ་མཚན་ཅན། །དེས་ན་ཚེགས་མེད་དོན་ཆེན་པོ། །ཆོས་རྣམས་ཀུན་གྱི་མཆོག་ཏུ་བཤད། །རྫོགས་པ་ཆེན་པོ་ངེས་དོན་འདུས་པ་ལས། རྟོགས་མ་རྟོགས་ཀྱི་ཁྱད་པར་སྐབས་དབྱེ་བ་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་ཀུན་རིག་རྒྱལ་པོ་ལ། །རྡོ་རྗེ་སེམས་དཔས་དོན་ཞུས་པ། །ལྟ་སྒོམ་སྤྱོད་པ་འབྲས་བུ་ཡི། །རྩ་བའི་མདོ་ནི་ཇི་ལྟར་བསྡུ། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །དངོས་མེད་རིག་པའི་ལྟ་བ་ནི། །རང་བྱུང་སྐུ་ཉིད་རྒྱུ་ཡིན་ཕྱིར། །ལྟ་བའི་ནང་ནས་དམ་པའི་མཆོག །དེ་ཕྱིར་དོན་ལ་རིག་པར་བལྟ། །ད་ཡང་རྡོ་རྗེ་སེམས་དཔའ་ཉོན། །ཤེས་པ་རང་གསལ་ལྟ་བ་ནི། །ངོ་བོ་དབྱེ་བ་རྣམ་དྲུག་གིས། །རང་གི་མཚན་ཉིད་དེ་ཡིན་པས། །དེ་ཉིད་ལུས་མེད་ཆོས་ཀྱི་སྐུ། །ཕྱི་ནང་མེད་པ་རྣམ་དག་དབྱིངས། །ཉི་མ་ཤར་ནས་མུན་མེད་གསལ། །རང་བྱུང་ངོ་བོ་རིག་པར་ཤར། །དེ་ཙམ་ཉིད་ནས་ད་ལྟའི་ཐུགས། །གསང་བ་ ― DNG001_Page_0376 ―
[མ་དཔེ་གཟིགས་ན་འདིར་གནོན།]
དམ་པ་ལྟ་བའི་མཆོག །ད་ཡང་འདུས་པའི་སྙིང་པོ་ཉོན། །རང་བྱུང་རིག་པའི་ལྟ་བ་ལ། །དེ་ལ་མ་ནོར་ངེས་ཤེས་ཏེ། །སྐྱེས་ཀྱང་དམ་པར་མི་འཛིན་ཕྱིར། །འདི་མཉམ་འཛིན་རྟོག་མེད་པར་གསལ། །ཡང་དག་བློ་ལ་གོལ་ས་མེད། །དེ་ཕྱིར་དངོས་མེད་འཛིན་བྲལ་གྱིས། །ཡང་དག་ལྟ་བའི་དགོངས་པ་འདི། །མ་ནོར་ལུང་དང་མཐུན་གྱུར་ན། །ཀུན་བཟང་ང་དང་ལྟ་བ་མཐུན། །ད་ཡང་རྡོ་རྗེ་སེམས་དཔའ་ཉོན། །གཞི་ངེས་པ་དང་མ་ངེས་པ། །གར་མཁན་ལག་པ་ཇི་བཞིན་དུ། །སྣ་ཚོགས་སྣང་ཡང་གཟུང་དུ་མེད། །དེ་ཙམ་ཉིད་ནས་གཞི་མི་འགྱུར། །དེ་དོན་མ་ནོར་རྟོགས་པ་ན། །རང་གི་མཚན་ཉིད་རྟོགས་པ་ན། །རང་གི་མཚན་ཉིད་འགྱུར་བ་མེད། །ཇི་སྐད་བཏགས་ཀྱང་དོན་དང་མཐུན། །རང་བྱུང་ངེས་པའི་ལྟ་བ་ཡིན། །རྫོགས་པ་ཆེན་པོ་ངེས་དོན་འདུས་པ་ལས། ལྟ་བ་ངེས་པ་མདོར་བསྡུ་བ་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་ཡང་གསུངས་པ། །རང་རིག་ཡེ་ཤེས་གསལ་བ་ཡི། །དོན་དང་མི་འབྲལ་ཏིང་འཛིན་ནི། །གསལ་ལ་མི་རྟོག་མི་གཡོ་བ། །ངོ་བོ་ལ་སོགས་དབྱེ་བ་ཡིས། །བརྒྱད་ཚན་གསུམ་གྱི་མན་ངག་གིས། །གཉིས་གསུམ་བསྲེས་པའི་ཆོས་ཉིད་ནི། །ཡེ་ཤེས་རང་བྱུང་ཆེན་པོ་ལ། །མི་རྟོག་ཡེ་ཤེས་ལྷུན་གྲུབ་ན། །རྩོལ་བསྒྲུབ་འདས་པའི་བྱང་ཆུབ་སེམས། །གསལ་ཙམ་ཉིད་ནས་དམིགས་པ་མེད། །དེ་བཞིན་ཉིད་དུ་ཀུན་རིག་པས། །དེས་ཁྱབ་གར་གནས་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །ནམ་མཁའི་ངང་དུ་སྤྲིན་སངས་ལྟར། །ང་ཡི་ཆོས་སྐུ་ངོས་ཟིན་ན། །ཐོག་མ་མེད་ནས་བསགས་པ་ཡི། །རྣམ་རྟོག་ཕུང་པོ་དཔག་མེད་པའི། །དངོས་དེ་ཆོས་སྐུ་རིག་པ་ལས། །རྣམ་རྟོག་སྟོང་བའི་ངང་དུ་སངས། །འདི་ཤེས་རང་རིག་སྒོམ་པའི་མཆོག །ཆོས་སྐུ་སྙིང་པོ་བྱང་ཆུབ་ལ། །མཚོན་དུ་མེད་པར་རྐྱེན་དང་བྲལ། །དེ་བཞིན་ཉིད་དུ་ཀུན་རིག་ནས། །དེས་ཁྱབ་ཆོས་སྐུ་རང་གསལ་འདིས། །ཀུན་ལ་དབང་བསྒྲུབ་ཐོབ་པ་ཡིན། །རྫོགས་པ་ཆེན་པོ་ངེས་དོན་ ― DNG001_Page_0377 ―
[མ་དཔེ་གཟིགས་ན་འདིར་གནོན།]
འདུས་པ་ལས། ངེས་དོན་སྒོམ་པ་བསྡུ་བ་བསྟན་པའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །བྱ་བ་མེད་པའི་སྤྱོད་པ་ནི། །ད་ལྟའི་ལུས་འདི་བླངས་པའི་ཚེ། །སྤྱོད་པའི་དབྱེ་བ་རྣམ་དྲུག་གིས། །དོན་རྟོགས་སྤང་བླང་མེད་པའི་ཕྱིར། །ཐེག་པ་ཀུན་ལས་ཁྱད་པར་འཕགས། །དེ་ཡང་རང་སེམས་རྟོགས་པའི་གདེང་། །དུས་དང་རྣམ་པ་ཐམས་ཅད་དུ། །རང་གསལ་རིག་པ་འདི་ཉིད་ལས། །དེ་ལས་གཞན་དུ་བོགས་མི་འདོན། །ད་ཡང་རྡོ་རྗེ་སེམས་དཔའ་ཉོན། །ད་ལྟ་ལུས་ངག་ཡིད་ཀྱིས་ཀྱང་། །གཞན་དུ་མ་ཚོལ་དོན་འདི་ལ། །མ་ཡེངས་རིག་སྤྱོད་དོན་དྲན་ན། །འཁོར་བ་མེད་པའི་མཛད་སྤྱོད་ཡིན། །གང་ཡང་རུང་བ་ཅི་ལ་ཡང་། །སྐྱོན་ཡོན་དགགས་བསྒྲུབ་མེད་རྟོགས་པས། །འཇིག་རྟེན་ཐ་སྙད་འཛིན་པ་ནུབ། །དོན་གསལ་བརྗེད་ངས་ཆགས་པ་ཆུང་། །རྩིང་ཆོས་ང་རྒྱལ་ཆོས་མི་འབྱུང་། །དེ་ཕྱིར་སྤྱོད་པའི་གདེང་དུ་བཤད། །ད་ཡང་འདུས་པའི་སྙིང་པོ་ཉོན། །ཤེས་རབ་བལྟ་བའི་གདེང་སྤྱོད་ཀྱིས། །དུག་ལྔ་རང་གྲོལ་ཡེ་ཤེས་ཀྱི། །གང་དུ་སྐྱེས་ཚེ་འདི་ཉིད་གསལ། །རང་བྱུང་རིག་པའི་གོལ་ས་མེད། །དེ་ཕྱིར་རྣལ་འབྱོར་སྤྱོད་པ་སྟེ། །འདུ་ཤེས་རྟོགས་པ་ཐབས་ཀྱིས་ཀྱང་། །ངོས་ཟིན་ངེས་པའི་གདེང་ལྡན་ཕྱིར། །རྐྱང་པ་དུས་མཉམ་ཡུལ་སྣང་ལ། །ཉི་ཟླ་གཟས་ཟིན་ཇི་བཞིན་དུ། །ཡེ་ཤེས་སྤྱོད་པའི་མཆོག་ཏུ་བསྟན། །རྫོགས་པ་ཆེན་པོ་ངེས་དོན་འདུས་པ་ལས། སྤྱོད་པ་མདོར་བསྡུས་པ་བསྟན་པའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །ངེས་པའི་གདེང་ལྡན་ཡིད་ཆེས་པའི། །དབྱེ་བ་རྣམ་པ་དྲུག་པོས་ནི། །ཕྱི་མ་མ་ཡིན་དུས་འདིར་ནི། །ཡེ་ཤེས་མངོན་གྱུར་འབྲས་བུ་ཡིན། །ད་ཡང་རྡོ་རྗེ་སེམས་དཔའ་ཉོན། །དཔེར་ན་ཆུ་དྭངས་རྙོག་མེད་བཞིན། །རེ་དོགས་མེད་པའི་འབྲས་བུ་ལ། །གོལ་སྒྲིབ་བྱ་བའི་མིང་ཡང་མེད། །ཉམ་ང་མེད་པའི་གདེང་གིས་ཟིན། །ཞེ་འདོད་མེད་པའི་ཉམས་ ― DNG001_Page_0378 ―
[མ་དཔེ་གཟིགས་ན་འདིར་གནོན།]
ཞིག་འབྱུང་། །ཉམས་མེད་རིག་པ་ཉམས་ཀྱི་མཆོག །དེ་དོན་ཡིད་ཆེས་འབྲས་བུའི་མཆོག །དཔེར་ན་རྩི་འཚལ་ཡོད་པའི་ཕྱིར། །འབྲས་བུ་གསེར་ལ་སྨོས་ཅི་དགོས། །དེ་བཞིན་ངེས་པའི་གདེང་ལྡན་ན། །འབྲས་བུ་སངས་རྒྱས་སྨོས་ཅི་དགོས། །ངེས་དོན་བྱང་ཆུབ་དུས་འདིར་འགྲུབ། །ད་ཡང་འདུས་པའི་སྙིང་པོ་ཉོན། །ཆོས་སྐུ་གཟུགས་བརྙན་འབྱུང་བའི་དཔེ། །ཉི་ཟླ་གཟའ་སྐར་རྩོལ་མེད་པར། །རྒྱ་མཚོར་གཟུགས་བརྙན་འཆར་བ་ལྟར། །སེམས་ཅན་མོས་པ་ཐ་དད་པར། །གཟུགས་སྐུ་རྣམ་གཉིས་དུས་གཅིག་འབྱུང་། །རྫོགས་པ་ཆེན་པོ་ངེས་དོན་འདུས་པ་ལས། འབྲས་བུ་ངེས་པར་བསྡུ་བ་བསྟན་པའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །རྩ་བ་གཅིག་པའི་ཆོས་ཉིད་ལ། །འགྲོ་དྲུག་སྡུག་བསྔལ་ཅི་ལས་བྱུང་། །མུ་སྟེགས་རྟག་ཆད་ཇི་ལྟར་འཁྲུལ། །ཐེག་པའི་རིམ་པ་གང་ལས་བྱུང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །འགྲོ་དྲུག་སྡུག་བསྔལ་འབྱུང་བ་ནི། །ལྷན་ཅིག་མ་རིག་རྒྱུ་ཉིད་ལས། །ཀུན་བརྟགས་མ་རིག་རྐྱེན་བྱས་ནས། །ཐག་པ་སྦྲུལ་དུ་འཛིན་པ་བཞིན། །དབང་པོས་ཡུལ་ལ་དེར་སེམས་པས། །ལེ་ལོ་སྙོམས་ལས་དམན་ལ་སྦྱར། །ཆགས་སྡང་ལྔ་ལ་ལོངས་སྤྱོད་པས། །དེ་ཡི་རྣམ་སྨིན་འབྲས་བུ་འབྱུང་། །ད་ཡང་འདུས་པའི་སྙིང་པོ་ཉོན། །དམྱལ་བས་རང་སེམས་མེ་སོགས་མཐོང་། །ཡི་དྭགས་མི་གཙང་མཐོང་ཡུལ་སྣང་། །བྱོལ་སོང་ངམ་གྲོག་གྱེན་ཐུར་སྣང་། །མི་ཡིས་མཐོང་ཡུལ་བཞི་རུ་སྣང་། །ལྷ་མ་ཡིན་གྱིས་གོ་མཚོན་མཐོང་། །ལྷ་ཡིས་རིན་ཆེན་སྣ་བདུན་མཐོང་། །དེ་དག་འགྲོ་དྲུག་སྡུག་བསྔལ་ཡིན། །རྫོགས་པ་ཆེན་པོ་ངེས་དོན་འདུས་པ་ལས། འགྲོ་དྲུག་སྡུག་བསྔལ་འབྱུང་ཚུལ་བསྟན་པའི་ལེའུ་སྟེ་ཉི་ཤུ་རྩ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །མུ་སྟེགས་འཁྲུལ་ཚུལ་བཀའ་སྩལ་པ། །ཡོད་མཐར་འཛིན་པའི་ ― DNG001_Page_0379 ―
[མ་དཔེ་གཟིགས་ན་འདིར་གནོན།]
ལྟ་བ་ནི། །འགྱུར་བ་བཞི་དང་རྟག་པ་ལྔ། །ཐམས་ཅད་བདག་གིས་བྱས་པར་འདོད། །རྒྱུ་འབྲས་ལོག་པའི་བརྟུལ་ཞུགས་ཀྱིས། །ཐར་ལམ་མི་ཐོབ་འཁོར་བར་ལྟུང་། །མར་འདོད་བྱེ་མ་བཙིར་བ་འདྲ། །ད་ཡང་འདུས་པའི་སྙིང་པོ་ཉོན། །ཡེ་མེད་ཆད་པའི་འདོད་པ་ནི། །ཕུང་པོས་བསྡུས་པའི་ཆོས་རྣམས་ཀུན། །རྡུལ་ཕྲན་དག་ལས་བྱུང་བའི་ཕྱིར། །འབྱུང་བ་ལྔ་ཞིག་རང་ཐིམ་ནས། །མེ་ཤི་ཐལ་བ་རླུང་ཁྱེར་འདྲ། །ད་ཡང་འདུས་པའི་སྙིང་པོ་ཉོན། །གཉིས་ཀ་གཞིར་འདོད་མུ་སྟེགས་ནི། །རིག་བྱེད་སྨྲ་བའི་ལྟ་བ་སྟེ། །གཞི་ནི་ངེས་པ་མེད་པ་ལ། །སྣང་བ་གང་ཡང་མི་འགོག་འདོད། །གདོན་གྱིས་ཟིན་པའི་སྨྱོན་པ་འདྲ། །དེ་ཡི་འབྲས་བུ་ངེས་པ་ནི། །སེམས་ཀྱི་རྩ་བ་མ་ཤེས་པས། །འབྱུང་ཆེན་གཏོས་ཀྱི་མུན་པ་བཞིན། །ཐུགས་རྗེའི་ཉི་ཟེར་ཞགས་ཐག་ཆད། །དམྱལ་བའི་འབྲས་བུ་ཐེ་ཚོམ་མེད། །རྫོགས་པ་ཆེན་པོ་ངེས་དོན་འདུས་པ་ལས། མུ་སྟེགས་འཁྲུལ་ཚུལ་བསྟན་པའི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཐེག་པའི་རིམ་པ་བཀའ་སྩལ་པ། །གཞི་ནི་ངོ་བོ་ཉིད་སྐུ་སྟེ། །མཐུན་དཔེ་མེ་ལོང་ལྟ་བུ་ལ། །གཟུགས་བརྙན་ཐེག་པ་རིམ་དགུ་བྱུང་། །དེ་རྣམས་དོན་གྱི་དབྱེ་བ་ནི། །དང་པོ་ཉན་ཐོས་ལྟ་བ་ཡང་། །མདོ་སྡེ་པ་དང་བྱེ་བྲག་གཉིས། །མཁན་སློབ་སྡོམ་པའི་ཁྱད་པར་གྱིས། །དཀའ་ཐུབ་ལུས་གདུངས་བཟོད་པ་དེས། །སེམས་ཀྱིས་ལུས་ངག་བཙོན་བཟུང་ཡང་། །རྡུལ་དང་ཤེས་པ་གཉིས་འདོད་པས། །གླང་ཆེན་འདམ་དུ་བྱིང་བ་ལྟར། །ལུས་ངག་ལས་ཀྱི་རྩོལ་བ་ཡིས། །འབྲས་བུ་མི་ཐོབ་སྙིང་རྗེའི་གནས། །ད་ཡང་འདུས་པའི་སྙིང་པོ་ཉོན། །བླ་མ་དག་ལ་མི་བརྟེན་པར། །རང་སེམས་དོན་ལ་བློ་སྦྱངས་ཕྱིར། །རྟེན་འདྲེལ་ཕྱི་ནང་རྩད་བཅད་ནས། །སྟོང་པ་ཉིད་ལ་རྟེན་འཆའ་བ། །བཙན་པར་མི་འགྱུར་ཉམས་པའི་ཕྱིར། །ནོར་བུས་རྒྱལ་སྲིད་བསྒོམ་པ་འདྲ། །ད་ཡང་འདུས་པའི་སྙིང་པོ་ཉོན། །ཆོས་རྣམས་སེམས་སུ་འདུས་ནས་ནི། །ཀུན་རྫོབ་དང་ནི་དོན་དམ་དུ། །སོ་སོར་རྟོག་པའི་ཤེས་རབ་ཀྱིས། ། ― DNG001_Page_0380 ―
[མ་དཔེ་གཟིགས་ན་འདིར་གནོན།]
བདེན་པ་གཉིས་སུ་རྣམ་པར་ཕྱེ། །གཅིག་བོར་ནས་ནི་གཅིག་ཚོལ་བ། །ཆུ་བཞག་ཟླ་བ་ངོས་འཛིན་འདྲ། །ད་ཡང་འདུས་པའི་སྙིང་པོ་ཉོན། །ཐམས་ཅད་རྩ་བ་གཅིག་པ་ཡི། །རང་གི་སེམས་ཀྱི་སྙིང་པོའི་དོན། །ཟབ་ལ་རྒྱ་ཆེ་མི་ཤེས་པས། །བསམ་དུ་མེད་ངང་གང་འཇོག་པ། །བྱིས་པ་དེ་ནི་བླུན་པ་སྟེ། །མུན་པའི་སྐྱེ་མཆེད་ཉིད་དུ་འགྱུར། །རྫོགས་པ་ཆེན་པོ་ངེས་དོན་འདུས་པ་ལས། རྒྱུ་མཚན་ཉིད་ཀྱི་ལྟ་བ་བསྟན་པའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ཆོས་ཉིད་སྟོང་པའི་ངང་ལས་ནི། །དག་པ་བཞི་ཡི་སྒོར་ཞུགས་ནས། །ཡོ་བྱད་ཕྱི་ལ་གཙོར་འཛིན་ཅིང་། །ཀུན་རྫོབ་ལྷ་ཡི་དཀྱིལ་འཁོར་དུ། །རྒྱུད་དག་པ་ཡི་ཏིང་འཛིན་གྱིས། །སྐུ་ནི་གཟུགས་བརྙན་ཕྱག་མཚན་དང་། །བཟླས་བརྗོད་གཙང་སྦྲ་དུས་ཚིགས་ཀྱིས། །རྒྱུ་རྐྱེན་ཚོགས་པའི་ནུས་མཐུ་ཡིས། །རིགས་གསུམ་དཀྱིལ་འཁོར་ལྷར་གསལ་ཀྱང་། །དངོས་གྲུབ་གཞན་ལ་རེ་བ་ཡིས། །ཁྱི་རྒན་འདབ་ཆགས་བསྙེགས་པ་འདྲ། །ད་ཡང་འདུས་པའི་སྙིང་པོ་ཉོན། །རང་སེམས་དབྱེ་བ་མེད་པ་ལ། །ཨུ་པ་ཡ་ཡི་ཐེག་པ་ཡང་། །གོང་འོག་ལྟ་སྤྱོད་གཉིས་འཛིན་པ། །ནེ་ཙོ་མི་ལྟར་འཆོས་པ་འདྲ། །ད་ཡང་འདུས་པའི་སྙིང་པོ་ཉོན། །ཡོ་ག་རྣལ་འབྱོར་སེམས་དཔའ་ཡིས། །ཕྱག་རྒྱ་བཞི་ཡི་སྒོར་ཞུགས་ནས། །ཡོ་བྱད་གཙོ་རུ་མི་འཛིན་པར། །དོན་དམ་སྐྱེ་འགག་མེད་པ་ལ། །ལྷ་ཡི་དཀྱིལ་འཁོར་འཕགས་པའི་སྐུ། །རྣམ་པར་སྣང་མཛད་ཆེན་པོ་ཡི། །ཆོས་དབྱིངས་དག་པའི་བྱིན་བརླབས་ལས། །ལྷ་དང་བདག་ཏུ་མཉམ་པ་ཡིས། །དམ་ཚིག་ཡེ་ཤེས་ལྷར་གསལ་ཀྱང་། །རྒྱལ་སྲིད་མེད་པའི་བློན་པོ་འདྲ། །ད་ཡང་འདུས་པའི་སྙིང་པོ་ཉོན། །བླ་མའི་དོན་མེད་ནན་བརྟགས་ཀྱིས། །དམིགས་པ་ཅན་ལ་སེམས་གཏད་ཀྱང་། །རྣམ་པར་གྲོལ་བར་མི་འགྱུར་ཏེ། །ནམ་མཁའ་དག་ལ་འཛིན་པ་བཞིན། །རྫོགས་པ་ཆེན་པོ་ངེས་དོན་འདུས་པ་ལས། ཕྱི་རྒྱུད་ཀྱི་ཐེག་པའི་ལྟ་བ་བསྟན་པའི་ལེའུ་སྟེ་ཉི་ཤུ་རྩ་དགུ་པའོ།། །། ― DNG001_Page_0381 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །འཁོར་འདས་ཡེ་ནས་སངས་རྒྱས་ལ། །སེམས་ཀྱི་རྣམ་རྟོག་ཅི་སྐྱེས་ཀྱང་། །མཚན་མའི་དངོས་པོར་མ་གྲུབ་པར། །དཔེར་ན་ནམ་མཁའི་སེར་བུ་འདྲ། །ད་ཡང་འདུས་པའི་སྙིང་པོ་ཉོན། །ཡོད་མེད་དབུས་ལ་མི་གནས་པས། །སྐུ་གསུམ་ཡེ་ཤེས་ལྷུན་གྲུབ་ཀྱི། །ཡུལ་སེམས་དབྱེ་བ་མེད་པར་འདོད། །དེ་ཕྱིར་བདེན་པ་གཉིས་མེད་གཞི། །ད་ཡང་འདུས་པའི་སྙིང་པོ་ཉོན། །དེ་དོན་ལམ་གྱི་རིམ་པ་ནི། །ཐབས་དང་ཤེས་རབ་སྒོར་ཞུགས་ནས། །ཏིང་འཛིན་གསུམ་གྱིས་ལྷ་བསྒོམས་པས། །གྲིབ་མ་གཟུགས་སུ་བསྒྱུར་བ་འདྲ། །ད་ཡང་རྡོ་རྗེ་སེམས་དཔའ་ཉོན། །བྱས་པའི་ཆོས་རྣམས་མ་ལུས་ཀུན། །ཡིད་དང་ཀུན་གཞི་གཉིས་འདུས་པས། །ཀུན་གཞི་མཁའ་ཀློང་རྣམ་དག་ཏུ། །རྣམ་རྟོག་མཚན་མ་གང་སྤྱོད་ཀྱང་། །ནམ་མཁའ་གཟའ་སྐར་རྩོལ་མེད་བཞིན། །ཀུན་བཟང་བདེ་ཆེན་ཐབས་ཀྱི་གཙོ། །ཀུན་ཏུ་བཟང་པོ་གཉིས་མེད་མཁར། །འདུ་འབྲལ་མེད་པ་ཆོས་ཀྱི་སྐུ། །བདེ་ཆེན་གཉིས་མེད་རིག་པའི་རྩལ། །ངེས་པའི་གསང་སྒོ་མ་ཤེས་པས། །ཀུན་བཟང་སྤྱོད་པས་དོན་མི་རྟོགས། །ཉི་མ་སྤྲིན་གྱིས་བསྒྲིབས་པ་འདྲ། །ད་ཡང་འདུས་པའི་སྙིང་པོ་ཉོན། །སེམས་ཉིད་རྩོལ་བ་མེད་པ་ལ། །བསམ་པའི་དབང་གིས་བསྒྱུར་བྱས་ནས། །འཁོར་བའི་རྒྱ་མཚོར་གཡེངས་གྱུར་ཏེ། །མི་ཤེས་པ་ལ་དེ་ལྟར་སྣང་། །རྫོགས་པ་ཆེན་པོ་ངེས་དོན་འདུས་པ་ལས། བསྐྱེད་རྫོགས་གཉིས་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཀུན་རིག་རང་བྱུང་སྟོན་པ་ལ། །བདེན་པའི་ཡིད་ཀྱིས་འདི་སྐད་གསོལ། །སྤྱི་ཡི་ཨ་ཏི་རྫོགས་ཆེན་ནི། །ཆོས་རྣམས་སེམས་སུ་ཇི་ལྟར་འདུས། །སེམས་འདོད་ལྟ་བ་ཇི་ལྟར་གོལ། །རང་སེམས་ངེས་དོན་ཇི་ལྟར་མིན། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སེམས་སུ་ཆོས་རྣམས་གཅིག་པ་ནི། །འཁོར་བ་མྱ་ངན་འདས་པའི་ཆོས། །སྒྱུ་མ་རྣམ་གཉིས་སྤྱོད་ཡུལ་ ― DNG001_Page_0382 ―
[མ་དཔེ་གཟིགས་ན་འདིར་གནོན།]
ཏེ། །རྣམ་རྟོག་ཡེ་ཤེས་ཐ་དད་ཀྱང་། །སེམས་ཀྱི་ཆོས་ཉིད་ངང་དུ་གཅིག །ད་ཡང་རྡོ་རྗེ་སེམས་དཔའ་ཉོན། །དེ་ཡང་དེ་ཉིད་མཚོན་པའི་དཔེ། །སྤྲིན་དང་འཇའ་ཚོན་ཁུ་རླངས་དང་། །འབྱུང་བའི་ཆོ་འཕྲུལ་སྣ་ཚོགས་ལ། །ནམ་མཁའི་ངང་དུ་རོ་གཅིག་བཞིན། །ཡུལ་གྱི་ཐ་དད་མཚན་མ་རྣམས། །རང་གི་སེམས་ཀྱིས་བརྟགས་པའི་ཕྱིར། །ཕྱི་ནང་ཆོས་རྣམས་མ་ལུས་ཀུན། །རིགས་རྒྱུད་མེད་ཕྱིར་སེམས་སུ་གཅིག །རྫོགས་པ་ཆེན་པོ་ངེས་དོན་འདུས་པ་ལས། ཆོས་རྣམས་སེམས་སུ་འདུས་པར་བསྟན་པའི་ལེའུ་སྟེ་སོ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །སེམས་འདོད་གོལ་བར་བཀའ་སྩལ་པ། །སེམས་ཀྱིས་ཆོས་སྐུ་བསྒྲིབས་པའི་ཕྱིར། །འཁོར་འདས་གཉིས་ཀྱི་བར་དོ་ན། །ཐོག་མཐའ་གཅོད་ནི་མ་ཤེས་ན། །སྐྱེ་རྒས་ན་འཆི་ལས་མི་ཐར། །ས་མཁན་མེད་པའི་ཚོང་པ་འདྲ། །སྐྱེ་འཆི་གཉིས་ཀྱི་བར་དོ་ན། །ཆོས་སྐུར་ངོ་སྤྲོད་མ་ཤེས་ན། །མ་རིག་མུན་པ་སངས་དུས་མེད། །སྒྲོན་མེ་མེད་པའི་མུན་ཁུང་འདྲ། །ད་ཡང་རྡོ་རྗེ་སེམས་དཔའ་ཉོན། །ཡུལ་སེམས་གཉིས་ཀྱི་བར་དོ་ན། །གོལ་ས་གཅོད་ནི་མ་ཤེས་ན། །ཉོན་མོངས་ཉེན་ལས་ལྡོག་མི་སྲིད། །དྲེད་མོ་གདོས་ཀྱིས་ཟིན་པ་འདྲ། །མཉམ་བཞག་རྗེས་ཐོབ་བར་དོ་རུ། །རྒྱུན་དུ་འབྲལ་མེད་མ་ཤེས་ན། །ལྟ་བསྒོམ་གཉིས་ཀྱིས་རྐྱེན་མི་ཐུབ། །ཆུ་བྲན་ཐན་པས་བསྐམས་པ་འདྲ། །སྲིད་པ་དག་གི་བར་དོ་ན། །སངས་རྒྱས་འབྱུང་དུས་མ་ཤེས་ན། །གཟུགས་སྐུ་རྣམ་གཉིས་འབྱུང་མི་སྲིད། །རིན་ཆེན་འདམ་ཁུང་སྟོར་བ་འདྲ། །བདག་གཞན་རྩོད་པའི་བར་དོ་ན། །གལ་མདོ་ཚིག་གི་འཕྲང་མེད་ན། །ཐེག་པ་གཞན་ལས་ཁྱད་མི་ཐོན། །གཡུལ་ངོར་ཕམ་པའི་བློན་པོ་འདྲ། །ད་ཡང་འདུས་པའི་སྙིང་པོ་ཉོན། །དེ་དག་གདམས་ངག་མེད་པའི་སྐྱོན། །སེམས་ཀྱི་རྩ་བ་མ་རིག་པས། །འཁྲུལ་པ་སྣ་ཚོགས་འབྱུང་བའི་ཕྱིར། །འཁོར་བའི་རྩ་བ་ཆགས་སྡང་ལྔས། །ངན་སོང་གསུམ་དུ་རྟག་ཏུ་འཁོར། །དེ་ཕྱིར་མ་རིག་སེམས་ཀྱིས་འཁྲུལ། །དེ་ཡང་རྡོ་རྗེ་སེམས་དཔའ་ཉོན། །སེམས་ཀྱི་འདོད་ ― DNG001_Page_0383 ―
[མ་དཔེ་གཟིགས་ན་འདིར་གནོན།]
ལུགས་རྣམ་པ་བཅུས། །ནན་བརྟགས་ལྟ་བ་ལོག་པར་བསྟན། །དེ་ཕྱིར་སྣང་བ་སེམས་སུ་བྱས། །ངེས་དོན་མ་ཤེས་བློ་ཡིས་བཅོམ། །ཡང་དག་སེམས་མེད་ཆོས་མ་ཤེས། །དེ་ཕྱིར་ལུང་མེད་རིགས་པས་དཔྱད། །ཡུལ་སེམས་རིག་པར་བློ་ཡིས་བསྲེས། །ད་ཡང་འདུས་པའི་སྙིང་པོ་ཉོན། །བདེ་གཤེགས་སྙིང་པོ་མ་མཐོང་བར། །ལུང་ལྡན་ངེས་པའི་དོན་ཆེན་འདི། །མ་རྙེད་བར་དུ་སངས་མི་རྒྱ། །དེ་ཕྱིར་ཆོས་ཀུན་རྩ་བ་ནི། །ཆོས་སྐུ་རང་གི་སེམས་ཀྱིས་བསྒྲིབས། །ད་ཡང་འདུས་པའི་སྙིང་པོ་ཉོན། །སེམས་ནི་དོན་མེད་འཁྲུལ་པའི་ཕྱིར། །ཆོས་སྐུའི་གོལ་ས་སེམས་ཡིན་པས། །རང་བྱུང་ཆོས་ཉིད་སེམས་དང་བྲལ། །སེམས་བྲལ་རང་བྱུང་ཡེ་ཤེས་སྐུ། །ད་ཡང་རྡོ་རྗེ་སེམས་དཔའ་ཉོན། །གང་ཡང་རུང་བ་ཅི་ལ་ཡང་། །ཡིད་ཀྱི་སྒོ་ལྔའི་རྗེས་འབྲངས་པས། །ལྟ་བསྒོམ་མ་ཡིན་མ་རིག་སེམས། །རིགས་དྲུག་བསྐྱེད་པ་སེམས་ཡིན་ཕྱིར། །མ་རིག་འཁྲུལ་པ་སེམས་ལས་བྱུང་། །དེ་ཕྱིར་སེམས་ནི་གོལ་བར་གསུངས། །ད་ཡང་འདུས་པའི་སྙིང་པོ་ཉོན། །རང་བྱུང་འདུས་པའི་སྙིང་པོ་ལ། །ཚོགས་བརྒྱད་མེད་ཕྱིར་སེམས་དང་བྲལ། །སྣ་ཚོགས་སེམས་ནི་གཞན་གྱི་དབང་། །རང་གི་སེམས་ཞེས་དེ་ལ་བྱ། །སྐྱོན་གྱི་རྩ་བ་སེམས་ཡིན་པས། །དེ་ཕྱིར་སེམས་ཀྱིས་སངས་མི་རྒྱ། །སེམས་ཀྱི་རྒྱུ་རྐྱེན་སྐྱེས་པའི་ཕྱིར། །ངེས་དོན་མ་ཡིན་འཁྲུལ་པའི་བློ། །དེ་ཡང་འདུས་པའི་སྙིང་པོ་ཉོན། །ངེས་དོན་ཨ་ཏིའི་གོལ་སར་བཤད། །དེ་ཕྱིར་སེམས་ནི་གོལ་བའི་ཆོས། །དམུས་ལོང་རིན་ཆེན་མི་མཐོང་འདྲ། །རྫོགས་པ་ཆེན་པོ་ངེས་དོན་འདུས་པ་ལས། རང་སེམས་གོལ་ས་ཡིན་པར་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སེམས་ནི་འཁོར་བའི་རྩ་བ་སྟེ། །ཡུལ་ནི་སྣ་ཚོགས་སྣང་བ་ལ། །སེམས་ཀྱི་རྟོག་པ་སྣ་ཚོགས་ཞེན། །དེ་ཕྱིར་སེམས་ནི་འཁོར་བའི་རྒྱུ། །རྟག་ཆད་འཛིན་པ་སེམས་ཡིན་པས། ། ― DNG001_Page_0384 ―
[མ་དཔེ་གཟིགས་ན་འདིར་གནོན།]
ལྟ་བའི་གོལ་ས་སེམས་ལས་བྱུང་། །གང་དྲན་རང་སེམས་འཁྲུལ་པ་སྟེ། །སེམས་ལས་བྱུང་བའི་རྣམ་རྟོག་གིས། །ཆགས་སྡང་ཐམས་ཅད་བསྐྱེད་པར་བྱེད། །འཁོར་འདས་རེ་དོགས་སེམས་ཀྱིས་བྱས། །དེ་ཕྱིར་འཁོར་བའི་རྒྱུར་སེམས་གོལ། །ད་ཡང་འདུས་པའི་སྙིང་པོ་ཉོན། །སེམས་ཀྱིས་བྱས་པ་རྟོག་པ་ཡིས། །སྐྱེ་བ་བརྒྱུད་པ་གྲངས་མེད་པ། །སེམས་འདིས་བྱས་ཕྱིར་རང་བྱུང་མིན། །དེ་ཕྱིར་སེམས་ནི་གློ་བུར་འཁྲུལ། །དེ་ལྟར་ཆོས་བརྒྱད་དམ་པར་ཞེན། །ད་ཡང་རྡོ་རྗེ་སེམས་དཔའ་ཉོན། །ངེས་དོན་མ་མཐོང་གླེན་པ་ཀུན། །སེམས་ལས་མ་རྟོགས་ཆོས་མེད་ཟེར། །དེ་ཕྱིར་རྨོངས་པའི་བློ་དེ་ནོར། །གླེན་བསྒོམ་མུན་པ་བསྒོམ་པས་ཕུང་། །གང་བྲན་སེམས་ཀྱི་ཆོས་འདི་ལོབ། །ཡིད་ལ་བྱེད་པའི་ལམ་ངན་ཀུན། །བླང་དོར་སེམས་འདི་ཤིན་ཏུ་འཆལ། །དྲང་དོན་སེམས་སུ་བསྟན་པས་ཕུང་། །འབད་རྩོལ་བྱས་པའི་སེམས་ཀྱིས་དཀྲུགས། །མཁྱེན་དུ་རེ་བའི་སྒྲིམ་ཚིག་གིས། །ངེས་དོན་མ་ནོར་བཀའ་འདི་བསླང་། །ད་ཡང་འདུས་པའི་སྙིང་པོ་ཉོན། །མ་རིག་རྨོངས་པའི་གང་ཟག་ཀུན། །ཆོས་སྐུ་རང་ཡང་སེམས་ཡིན་ཟེར། །དེ་ཕྱིར་ཚིག་ལས་དོན་མ་གོ། །མིང་ལས་ངེས་དོན་ཤེས་པ་དཀོན། །དེ་ཕྱིར་སེམས་ཀྱིས་བྱང་མི་ཆུབ། །དེ་ཉིད་བཙལ་བའི་མཐུན་དཔེ་ནི། །རྗེས་བཙལ་བས་ནི་གླང་པོ་རྙེད། །སེམས་ཀྱི་ཕྱོགས་ནས་དོན་བཙལ་བས། །རང་རིག་རྒྱལ་པོ་ཡེ་ཤེས་རྙེད། །དེ་རྙེད་སེམས་ཀྱི་འཛིན་པ་བྲལ། །འཛིན་བྲལ་སེམས་མེད་རང་རིག་སྐུ། །དེ་དོན་འབྲལ་མེད་བྱང་ཆུབ་ཀློང་། །སེམས་བྲལ་ཏིང་འཛིན་རྒྱུན་དུ་གནས། །ད་ཡང་འདུས་པའི་སྙིང་པོ་ཉོན། །སེམས་ལ་སངས་རྒྱས་འདོད་པ་ནི། །མོ་གཤམ་བུ་དང་གཉེན་བྱེད་བཞིན། །སྣང་བ་སེམས་ཡིན་ཟེར་བ་དེ། །ར་གན་གསེར་དུ་བྱེད་པ་འདྲ། །དེ་བས་ལུང་ལྡན་དོན་རྙེད་ནས། །རང་བྱུང་སྙིང་པོའི་དོན་རྟོགས་ནས། །རང་རིག་སངས་ནས་རང་སེམས་བརླག །དེ་ཕྱིར་ཆོས་སྐུ་འགྱུར་བ་མེད། །རྫོགས་པ་ཆེན་པོ་ངེས་དོན་འདུས་པ་ལས། རང་སེམས་ངེས་དོན་མིན་པར་བསྟན་པའི་ལེའུ་སྟེ་སོ་གསུམ་པའོ།། །། ― DNG001_Page_0385 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་དོན་ཆེད་དུ། །རྡོ་རྗེ་སེམས་དཔས་དོན་ཞུས་པ། །སྣང་བ་ཆོས་དབྱིངས་བལྟ་བ་གང་། །དོན་གྱི་འགྱུར་མེད་གནས་ལུགས་ཅི། །མཐའ་བྲལ་གཞི་ངེས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །རང་བྱུང་ཆོས་སྐུ་གཅིག་གཅིག་ལ། །ཡོན་ཏན་ཐམས་ཅད་འབྱུང་བ་ནི། །དཔེར་ན་ནོར་བུ་རིན་ཆེན་ལྟར། །དེ་ནི་ལྷུན་གྲུབ་ཀུན་གྱི་གཞི། །ད་ཡང་རྡོ་རྗེ་སེམས་དཔའ་ཉོན། །འཁོར་བའི་རྒྱུ་ནི་ཞེན་རྟོག་སྟེ། །ལུང་ལྡན་གྲུབ་མཐས་བློ་མ་བསྒྱུར། །དབང་པོ་ཡུལ་ལ་རྟག་ཏུ་ཡེངས། །ཆོས་བརྒྱད་གཟུང་འཛིན་དམ་པར་ཞེན། །ཆུ་བོ་བཞི་ཡིས་མི་འཇིགས་བཞིན། །འཁོར་བར་འཁྱམ་པའི་གཏན་གཞི་ཡིན། །ད་ཡང་རྡོ་རྗེ་སེམས་དཔའ་ཉོན། །ཕྲ་རགས་ཡུལ་ནི་གཉེན་པོས་སྤོང་། །རིས་སུ་འཛིན་ཅིང་དབྱེ་བ་སྤོང་། །ཡོད་མེད་འཆལ་པས་རྒྱུ་འབྲས་སྤོང་། །བློ་ཡིས་གཞི་ཉིད་འཆོས་པའི་ཕྱིར། །ཉན་ཐོས་རང་རྒྱལ་གོལ་བར་བཤད། །ད་ཡང་འདུས་པའི་སྙིང་པོ་ཉོན། །ཆོས་རྣམས་སེམས་སུ་བསྡུ་བའི་ཕྱིར། །ཡུལ་སེམས་གཉིས་མེད་འདོད་པ་དང་། །སེམས་ཉིད་རང་སྣང་ཡིན་འདོད་པས། །སེམས་ཉིད་སྟོང་པ་ཡིན་བལྟ་དང་། །ཅིས་ཀྱང་ཁས་མི་ལེན་པའི་ཕྱིར། །དབུ་མ་སེམས་ཙམ་བལྟ་བ་ཡིས། །སྡུད་པའི་རྟོག་པས་གོལ་བའི་ཕྱིར། །ད་ཡང་འདུས་པའི་སྙིང་པོ་ཉོན། །ཕྱི་ཡི་འབྱུང་བ་རྣམ་ལྔ་ནི། །གཞན་འབྱུང་ཡིན་ཕྱིར་ཡེ་ཤེས་མིན། །དེ་ཕྱིར་མི་སྤོང་གནོད་མི་ནུས། །སེམས་སུ་མི་བསྡུ་ཕན་མི་ཐོག །དེ་ཕྱིར་ཁོ་ནར་ཞེན་མེད་ན། །སྣང་བའི་ཡུལ་ནི་ཅིར་སྣང་ཡང་། །སྒྲོ་སྐུར་མི་གདབ་རང་གསལ་བ། །ཆོས་ཀྱི་དབྱིངས་ཞེས་དེ་ལ་བྱ། །རྫོགས་པ་ཆེན་པོ་ངེས་དོན་འདུས་པ་ལས། གོལ་མེད་ཆོས་ཀྱི་དབྱིངས་བསྟན་པའི་ལེའུ་སྟེ་སོ་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་ཀུན་ཏུ་བཟང་པོ་ཡིས། །གནས་ལུགས་འགྱུར་མེད་བཀའ་སྩལ་པ། །ཆོས་སྐུ་ཁྱབ་པའི་ཕྱི་ནང་ཆོས། །མཐའ་དབུས་མེད་པ་ཐམས་ཅད་ཀྱི། །གནས་དང་གཞི་ཡི་རྟེན་བྱེད་པ། །རང་བྱུང་ཐིག་ལེ་ཉག་ ― DNG001_Page_0386 ―
[མ་དཔེ་གཟིགས་ན་འདིར་གནོན།]
གཅིག་སྟེ། །འདི་ནི་བདེ་གཤེགས་ཐམས་ཅད་ཀྱི། །ཐུགས་ཀྱི་དམ་པའི་དཀྱིལ་འཁོར་ཡིན། །ད་ཡང་རྡོ་རྗེ་སེམས་དཔའ་ཉོན། །རང་བྱུང་སྙིང་པོ་འགྱུར་མེད་ལ། །བློ་ཡིས་བཅོས་པས་གཞི་མི་འགྱུར། །དེ་ཕྱིར་རྐྱེན་གྱིས་བཅོས་སུ་མེད། །མ་བཅོས་ཡེ་ནས་ཀུན་གྱི་གཞི། །རང་བྱུང་ངོ་བོ་ཉིད་ཀྱི་སྐུ། །ཆོས་རྣམས་ཀུན་གྱི་རྩ་བའི་གཞི། །དུས་གསུམ་སངས་རྒྱས་ཀུན་གྱིས་གསུངས། །དེ་ཕྱིར་གཞི་ལ་འཕོ་འགྱུར་མེད། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ལྷུན་གྱིས་གྲུབ་པའི་ཕྱིར། །སངས་རྒྱས་ཉག་གཅིག་ཆོས་ཀྱི་སྐུ། །འདི་ནི་འཁོར་འདས་གཉིས་ཀྱི་རྒྱུ། །མ་རྟོགས་དུས་ན་འཁོར་བ་ལས། །རྟོགས་ན་མྱ་ངན་འདས་ཞེས་བྱ། །གཞི་ལ་སངས་རྒྱས་སེམས་ཅན་མེད། །དེ་ཕྱིར་གཉིས་མེད་གཅིག་གི་ངང་། །ཐམས་ཅད་དེ་ཡི་ངོ་བོར་གནས། །དེ་ཡང་འདུས་པའི་སྙིང་པོ་ཉོན། །འཁོར་འདས་གཉིས་པས་གཞི་སྔའི་ཕྱིར། །བློ་ཡིས་མ་བཅོས་འཁོར་འདས་མེད། །བག་ཆགས་མ་བརྟས་འབྱུང་བ་མེད། །གང་ཡང་མེད་ཕྱིར་ཀུན་གྱི་རྒྱུ། །རང་བྱུང་རྟོགས་པའི་བཅོམ་ལྡན་འདས། །ས་རྣམས་མ་བསྒྲོད་ངང་གིས་རྫོགས། །ལམ་ལ་མི་བརྟེན་ལམ་དང་བྲལ། །མེད་པ་མ་ཡིན་ཡེ་ཤེས་ཉིད། །རྫོགས་ཆེན་མཉམ་ཉིད་ཀུན་ཏུ་ཁྱབ། །ཆོས་རྣམས་ཀུན་གྱི་ཆོས་ཆེན་པོ། །ཐམས་ཅད་ངོ་བོར་ལྷུན་གྱིས་གྲུབ། །དེས་བསྐྱེད་ཆོས་རྣམས་ཐམས་ཅད་འབྱུང་། །འཁྲུལ་བྲལ་རྟོག་མེད་གཞི་དང་མཐུན། །དེ་ཕྱིར་ལུང་ལྡན་རྐྱེན་གྱིས་ནི། །བློ་དངོས་གཅིག་པའི་དགོངས་པ་ལ། །གཞི་ཤེས་པ་ལ་རྟོགས་ཞེས་བྱ། །ད་ཡང་འདུས་པའི་སྙིང་པོ་ཉོན། །ཆོས་ཀྱི་རྒྱལ་པོ་རབ་སྔགས་ཕྱིར། །འཁོར་འདས་འབྱུང་བ་ཐམས་ཅད་ཀྱང་། །རྩོལ་བ་མེད་པར་ཤུགས་ལས་འབྱུང་། །དེ་ཕྱིར་ཀུན་གྱི་གཞི་འགྱུར་ཞེས། །ཀུན་བཟང་ཉིད་ཀྱི་གསུངས་པ་ཡིན། །རྫོགས་པ་ཆེན་པོ་ངེས་དོན་འདུས་པ་ལས། གནས་ལུགས་འགྱུར་བ་མེད་པ་བསྟན་པའི་ལེའུ་སྟེ་སོ་ལྔ་པའོ།། །།དེ་ནས་འཁོར་གྱི་ཚོགས་ ― DNG001_Page_0387 ―
[མ་དཔེ་གཟིགས་ན་འདིར་གནོན།]
རྣམས་ལ། །ཀུན་རིག་སྟོན་པས་བཀའ་སྩལ་པ། །ནང་གི་སྒྲིབ་པས་བསྒྲིབ་མེད་དོན། །ད་ལྟའི་ཆོས་སྐུ་འདི་ལ་ནི། །འདུས་མ་བྱས་ཕྱིར་རྟག་ཆད་མེད། །ཡེ་ཤེས་རྣམ་པ་ཉིད་ཡིན་ནོ། །ད་ཡང་འདུས་པའི་སྙིང་པོ་ཉོན། །ཀུན་གཞི་མཉམ་ཉིད་རྒྱལ་བའི་ཐུགས། །མ་ལུས་སེམས་ཅན་ཐམས་ཅད་ལ། །རྟག་མེད་བདག་བྲལ་ཆོས་སྐུར་གནས། །དངོས་མེད་ཁྱབ་པས་ནམ་མཁའ་འདྲ། །ཆད་པ་མ་ཡིན་གཉུག་མར་གནས། །འཛིན་མེད་ཡེ་ཤེས་ངང་གིས་གསལ། །དངོས་པོར་མེད་པ་ཆོས་སྐུ་ཡོད། །རང་བྱུང་ཉི་མའི་སྙིང་པོ་འདྲ། །དབུ་མར་མི་གནས་ཡེ་ཤེས་ནི། །ཅི་ཡང་མ་ཡིན་ཉོན་མོངས་སེལ། །མཐའ་གསུམ་བྲལ་བའི་ཆོས་ཉིད་ནི། །མི་འགྱུར་འཇོམས་པས་རྡོ་རྗེ་འདྲ། །བླ་མས་དོན་བསྟན་རྣལ་འབྱོར་པས། །ཐེ་ཚོམ་མེད་པར་རང་སེམས་རྟོགས། །ཡུལ་དང་ཆོས་སྐུ་མ་འདྲེས་པ། །ཀ་ཤིའི་རས་ཀྱིས་རིན་ཆེན་འདྲ། །ད་ཡང་འདུས་པའི་སྙིང་པོ་ཉོན། །ངེས་དོན་རྟོགས་པར་ཡིད་ཆེས་པའི། །ཆོས་སྐུ་འགྱུར་མེད་རང་ལ་གསལ། །དེ་ཙམ་ཉིད་ནས་གདེང་གིས་ཟིན། །ལོང་བ་མིག་ཕྱེད་གསལ་པོ་འདྲ། །དཔེར་ན་ནམ་མཁའ་ཉི་མ་བཞིན། །མ་རིག་མུན་པ་འཇོམས་པའི་ཐབས། །བལྟ་བ་གཞི་ངེས་དོན་ཉིད་ལ། །མ་ནོར་རིག་པ་གཅིག་ཡིན་ཏེ། །འབྲས་བུ་ལྷུན་གྲུབ་གཅིག་ཏུ་བསྟན། རྫོགས་པ་ཆེན་པོ་ངེས་དོན་འདུས་པ་ལས། མཐའ་བྲལ་ལྷུན་གྱིས་གྲུབ་པའི་ལྟ་བ་བསྟན་པའི་ལེའུ་སྟེ་སོ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །འཁོར་གྱི་དོན་དུ་ཡང་ཞུས་པ། །མཚན་མ་ཟིལ་གྱིས་ཇི་ལྟར་མནན། །འགྲོ་དྲུག་གཡང་ས་ཇི་ལྟར་བཅད། །ཡེ་ཤེས་སྤྱི་བླུགས་ཇི་ལྟར་བསྒོམ། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མཚན་མ་ཟིལ་གྱིས་མནན་པའི་ཕྱིར། །མ་རིག་མུན་པ་ལྟ་བུ་ལ། །རིག་པ་ཡེ་ཤེས་བསྟན་པའི་ཐབས། །རིག་པའི་དབང་ཆེན་ ― DNG001_Page_0388 ―
[མ་དཔེ་གཟིགས་ན་འདིར་གནོན།]
བཀའ་སྩལ་པ། །དེ་ཡི་དང་པོ་དཔེ་བསྟན་པ། །བྲམ་ཟེ་གཙང་མས་ཁྲུས་གསོལ་ཏེ། །རྒྱལ་སྲིད་དག་ལ་དབང་བསྐུར་བཞིན། །དོན་གྱིས་ཟིན་ནས་རང་བྱུང་འཆར། །དེ་དོན་ངེས་པར་དྲང་ཐབས་ཀྱི། །འདུས་མ་བྱས་ཀྱི་ནམ་མཁའ་ལ། །རང་གི་ཚད་དང་ལྡན་པ་ལ། །སེམས་ནི་དྲག་ཏུ་གཏད་པར་བྱ། །དཔེར་ན་གྱི་ལིང་རྟ་འདུལ་བཞིན། །རང་གི་ཤེས་པ་མ་ཡེངས་པར། །དྲག་ཞན་བར་ནས་རྩོལ་བས་གདོན། །ཚད་ཟིན་དོན་ལ་གནས་པར་བྱ། །དེའང་ཁམས་དང་སྦྱར་བྱས་ལ། །ཁམས་བདེ་ཐུན་ནི་རིང་བར་བྱ། །མི་བདེ་ཡུན་ནི་ཐུང་བར་བྱ། །ཡང་ན་ལངས་ལ་ཅུང་ཟད་བཅག །རྟགས་ནི་ལུས་སེམས་གཉིས་འབྱུང་སྟེ། །ལུས་ནི་འདར་ཞིང་མཆི་མ་འབྱུང་། །སེམས་ནི་བདེ་ལ་བཏང་དཀའ་སྟེ། །ཏིང་འཛིན་རྩལ་གྱི་རྟགས་རྣམས་འབྱུང་། །རྟོག་པ་མེད་པར་གནས་པ་ནི། །བྱ་བ་བཏང་བའི་སྐྱེས་བུ་བཞིན། །ཅི་ཡང་མེད་པའི་རང་བཞིན་ལ། །མ་ཡེངས་གསལ་བར་ལྷུག་པར་བཞག །རྒོད་ན་ནམ་མཁའི་སྤྲིན་བཞིན་དུ། །བྱུང་ཡང་གཞི་ལ་གནོད་མེད་ལྟར། །སེམས་ཀྱི་རྩོལ་བ་ཚད་ཟིན་ན། །རྟོག་པས་མི་བསྒྲིབ་བཅོས་མི་དགོས། །དེ་ཡིས་བསྒོམ་ཉམས་བསྟན་པ་ནི། །དམིགས་པའི་དོན་ལ་སེམས་གཏད་ཀྱང་། །ཤེས་པ་གཏད་དུ་མི་ཆུད་པར། །ཡུལ་ལ་མི་རྟོག་བདེ་བར་གནས། །ཞེན་པའི་རྟོག་པ་སྐྱེ་ན་ཡང་། །བ་མོ་ལ་ནི་ཉི་ཤར་བཞིན། །རྗེས་སུ་མི་འབྲང་ལྷན་གྱིས་འགྲོ། །དེ་ཚེ་ཞེ་ལ་ཡིད་ཆེས་འབྱུང་། །དེ་དུས་ཉིད་དུ་རང་ཉམས་ནི། །སྣང་མེད་འཁྲུལ་པ་ལོག་པ་ཙམ། །སྣང་བཅས་དོན་ཟིན་དེ་ཉིད་ཉམས། །དེ་ཉིད་གོམས་པས་ཉམས་སུ་བདེ། །རྫོགས་པ་ཆེན་པོ་ངེས་དོན་འདུས་པ་ལས། ནམ་མཁའ་མཚོན་པ་ཉིད་ལ་རིག་པ་རྩལ་གྱི་དབང་བསྐུར་བའི་ལེའུ་སྟེ་སོ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །འགྲོ་དྲུག་གཡང་ས་བཅད་པའི་ཕྱིར། །རྩ་བ་སེམས་ལས་འདས་པ་ཡི། །ཡེ་ཤེས་ངོས་བཟུང་བཀའ་སྩལ་པ། །ཀུན་གཞི་གཞི་ཆ་ ― DNG001_Page_0389 ―
[མ་དཔེ་གཟིགས་ན་འདིར་གནོན།]
ངོ་བོ་ལ། །ཆོས་སྐུ་ངོས་བཟུང་མཐུན་དཔེ་ནི། །རྩ་ཆུ་བརྟགས་ནས་ངོས་ཟིན་པ། །སྨན་པ་མཁས་པ་ཇི་བཞིན་དང་། །ནོར་བུ་ཆུ་འདངས་དཔེ་བཞིན་ནོ། །བྱང་ཆུབ་སེམས་ཀྱི་རིག་པའི་དོན། །སྔ་མ་འཕྲོ་བ་ཡིད་ཡིན་ཏེ། །ཕྱི་མ་སྐྱེ་བ་ཉོན་མོངས་ཡིད། །སྒོ་ལྔར་སྐྱེ་བ་རྟོག་པ་སྟེ། །དམིགས་འཛིན་མེད་པར་ངང་གི་གསལ། །གཉུག་མར་གནས་པས་འཕེལ་འགྲིབ་མེད། །ཡེ་ཤེས་ཟང་ཐལ་ཉིད་ཡིན་ཏེ། །རང་གི་ངོ་བོ་ཆོས་ཀྱི་སྐུ། །ཤེས་པ་རྩོལ་མེད་དྲང་པོར་འཇུག །དཔེར་ན་ཐི་བྱ་ཚང་འཇུག་བཞིན། །རང་གི་ངོ་བོ་ཆོས་སྐུ་ལ། །བསྒོམ་དུ་མེད་པའི་དགོངས་པ་བྱ། །དེ་དོན་རྟགས་ནི་དྭངས་ཞིང་བདེ། །ཤེས་པ་མི་འགྱུར་བཀྲིར་མི་འདོད། །ཆུ་ལས་མི་འདའ་ཉ་བཞིན་དུ། །དོན་ལས་མི་འདའ་ཆོས་ཉིད་རྟགས། །དེ་རྟགས་ལྡན་པའི་རྣལ་འབྱོར་པས། །རྒྱལ་པོས་མངའ་བྱས་བཙུན་མོ་བཞིན། །སྔ་ཕྱི་གཉིས་པོ་སྐྱེས་པའི་ཚེ། །དེ་རྗེས་མི་གཅོད་ཆོས་སྐུ་སྟེ། །དཔེར་ན་རྐུན་པོ་ཚོར་མ་ཐག །མ་བསྐྲད་རང་བཞིན་དེངས་པ་ལྟར། །རང་རྒྱུད་རྩོལ་པ་མེད་པ་ལ། །མི་གཡོ་མཉམ་པའི་དོན་ལ་བཞག །དེ་དོན་རྟོགས་པའི་རྣལ་འབྱོར་ཉམས། །ཤིང་བལ་ལྟ་བུར་ལུས་ཡང་ཞིང་། །ཕྱི་ནང་འབྱུང་འཇུག་དབུགས་རྣམས་སྙོམས། །ཆོས་ཉིད་བདེ་ཆེན་གསང་བའི་ཉམས། །རྫོགས་པ་ཆེན་པོ་ངེས་དོན་འདུས་པ་ལས། སེམས་ཀྱི་སེམས་ཉིད་ལ་རིག་པ་རྩལ་གྱི་དབང་བསྐུར་བའི་ལེའུ་སྟེ་སོ་བརྒྱད་པའོ།། །།དེ་ནས་ཀུན་རིག་སྟོན་པ་ཡིས། །ཡེ་ཤེས་སྤྱི་བླུགས་བསྟན་པའི་ཕྱིར། །རང་བྱུང་ཆོས་སྐུ་གསལ་བ་ཡི། །ཡེ་ཤེས་སྤྱི་བླུགས་བཀའ་སྩལ་པ། །ཡེ་ཤེས་ཆེན་པོའི་མཐུན་དཔེ་ནི། །རང་བྱུང་ངོ་བོ་ཉིད་ཁྱབ་ཕྱིར། །མཐའ་དབུས་མེད་པས་ནམ་མཁའ་འདྲ། །དེ་དོན་རང་བྱུང་ཡེ་ཤེས་ལ། །སྣང་སྲིད་གསལ་བ་སྒོ་ལྔའི་ཡུལ། །རྟོག་པ་གསལ་བ་ཆོས་ཀྱི་སྐུ། །འཛིན་པ་མེད་པར་ལྷུན་གྱིས་གྲུབ། །ཁྱུང་ཆེན་ནམ་མཁར་ལྡིངས་པའི་ཚེ། །འཕུར་རླབས་འོག་ཏུ་ཀུན་ཆད་ལྟར། ། ― DNG001_Page_0390 ―
[མ་དཔེ་གཟིགས་ན་འདིར་གནོན།]
ངེས་དོན་རྟོགས་པས་སྐུ་གསུམ་རྫོགས། །འབྱུང་འཇུག་མེད་པར་གཞག་པར་བྱ། །ཇི་བཞིན་ཉིད་ཀྱི་གནས་ལུགས་ནི། །རྣམ་པར་མི་རྟོག་ས་ལེ་བ། །ས་ལེ་བ་ལ་རྟོག་པ་མེད། །དེ་ནི་རང་བྱུང་ཡེ་ཤེས་ཡིན། །ནོར་བུ་རིན་ཆེན་ཡོན་ཏན་ལ། །དགོས་འདོད་ཐམས་ཅད་ཤུགས་ཀྱིས་འབྱུང་། །དེ་བཞིན་ཡེ་ཤེས་ངོས་ཟིན་ན། །བྱིང་རྒོད་མི་འབྱུང་ཆོས་ཉིད་གསལ། །དཔེར་ན་དུག་ལ་སྔགས་བཏབ་པས། །ནད་རྣམས་སེལ་ཅིང་སྨན་འགྱུར་ལྟར། །ཆགས་སྡང་ལ་སོགས་དུག་རྣམས་ལ། །ཆོས་ཉིད་གསལ་ཐེབས་རང་སར་གྲོལ། །དེ་རྟགས་སྒྲ་ཐོས་རྨི་ལམ་བཟང་། །གཟུགས་རྣམས་མཐོང་ཞིང་བསྐོར་བ་བྱེད། །བདུད་རྩི་འདྲེན་ཅིང་ཆོས་སྟོན་པ། །བདུད་ཀྱི་ཆོ་འཕྲུལ་བཅྭོ་བརྒྱད་འབྱུང་། །ད་ཡང་འདུས་པའི་སྙིང་པོ་ཉོན། །རྟོག་པ་བཟང་ངན་ཅི་སྐྱེས་ཀྱང་། །བླང་དོར་དགའ་བྲོད་སེམས་མི་བྱ། །སྣང་བ་མི་འགག་རང་ཞིར་འགྲོ། །འཁྱག་རོམ་ཆུར་ལོག་ཇི་བཞིན་དུ། །དགོངས་པ་མ་གཡོས་དམ་པའི་རྟགས། །རྫོགས་པ་ཆེན་པོ་ངེས་དོན་འདུས་པ་ལས། ཡེ་ཤེས་སྤྱི་བླུགས་ཀྱི་ཆོས་ཉིད་ལ་རིག་པ་རྩལ་གྱི་དབང་བསྐུར་བའི་ལེའུ་སྟེ་སོ་དགུ་པའོ།། །།དེ་ནས་ཀུན་རིག་རྒྱལ་པོ་ལ། །རྡོ་རྗེ་སེམས་དཔས་དོན་ཞུས་པ། །མ་བསྒོམས་ཡེ་ཤེས་ཇི་ལྟར་གསལ། །རྟོག་པ་རང་སར་ཇི་ལྟར་གྲོལ། །ཐེ་ཚོམ་གེགས་རྣམས་ཇི་ལྟར་བསལ། །ཀུན་རིག་སྟོན་པས་བཤད་དུ་གསོལ། །ཞུས་པའི་དོན་ནི་བཀའ་སྩལ་པ། །མ་བསྒོམས་དོན་དང་མི་འབྲལ་ལ། །ཐིག་ལེ་ཉག་མ་གཅིག་ཏུ་རྫོགས། །ཀུན་གཞི་གཞི་ཆ་ཆོས་སྐུ་ལ། །སྣ་ཚོགས་སྣང་ཡང་འགྱུར་བ་མེད། །དེ་ཡང་རྡོ་རྗེ་སེམས་དཔའ་ཉོན། །སེམས་ཉིད་བསྒོམ་དུ་མེད་པའི་དཔེ། །ནམ་མཁའ་བསྒོམ་དུ་མེད་དང་འདྲ། །དེ་བཞིན་སེམས་ཀྱིས་སེམས་བསྒོམ་དུ། །ཆོས་སྐུ་སེམས་ཀྱི་ཡུལ་ལས་འདས། །སྟོང་ཉིད་རིག་པའི་ཡེ་ཤེས་ལ། །ངེས་པར་འགྱུར་མེད་བལྟ་བའི་གཟུངས། །དོན་དུ་མི་བརྗེད་ཏིང་འཛིན་ལ། །རང་སེམས་རྟོགས་ཕྱིར་བསྒོམ་ ― DNG001_Page_0391 ―
[མ་དཔེ་གཟིགས་ན་འདིར་གནོན།]
མི་དགོས། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཆོས་སྐུའི་དོན་ཟིན་ན། །ཤེས་པ་གཏད་ལ་བསྒོམ་མི་དགོས། །དེ་ཕྱིར་རང་བྱུང་ནང་ནས་གསལ། །ཆོས་ཉིད་མ་བསྒོམས་འབྲལ་བ་མེད། །ཡང་དག་སངས་རྒྱས་དགོངས་པ་ལ། །འཕོ་འགྱུར་མེད་ཕྱིར་འདུས་མ་བྱས། །དེ་རྟོགས་རྣལ་འབྱོར་སྐལ་ལྡན་གྱིས། །མ་བསྒོམས་ཆོས་ཉིད་རང་བྱུང་ཤུགས། །དེ་ལ་རྟོག་པས་བསྐྱོད་མི་བྱེད། །ད་ཡང་རྡོ་རྗེ་སེམས་དཔའ་ཉོན། །ད་ལྟའི་ཤེས་པ་འདི་ཉིད་ལ། །མ་བཅོས་རང་གསལ་ཆོས་སྐུར་ཤེས། །དེ་ཙམ་ཉིད་ནས་ཞེན་མེད་གསལ། །དེ་ཕྱིར་གཉེན་པོས་བསྒོམ་མི་དགོས། །དུང་ངེ་མ་ཡེངས་རང་ལུགས་ལ། །མ་ཡེངས་བ་ཞེས་བཏགས་པ་ཙམ། །དོན་ལ་ཆོས་སྐུ་དེ་ཉིད་ཡིན། །དེ་ཕྱིར་མ་ཡེངས་འབྲལ་བ་མེད། །གར་གནས་ཤེས་པ་འདི་ཉིད་ལས། །གཞན་དུ་གཡོས་པ་རྡུལ་ཙམ་མེད། །དེ་ཕྱིར་ཆོས་ཉིད་རྒྱུན་དུ་གནས། །ཤེས་པས་ཆོག་ཕྱིར་རྩོལ་བ་མེད། །ད་ཡང་འདུས་པའི་སྙིང་པོ་ཉོན། །ལུང་ལྡན་ངེས་པའི་དོན་ཟིན་ནས། །ཐམས་ཅད་རང་བྱུང་ཉིད་ཀྱི་དོན། །མཁའ་ལྟར་ཁྱབ་ཅིང་ཉི་ལྟར་གསལ། །གསལ་ཙམ་ཉིད་ནས་ནུབ་པ་མེད། །དངོས་མེད་ཀུན་ཁྱབ་ཆོས་སྐུ་བདེ། །མེད་པ་མ་ཡིན་ཤེས་ཤིང་རིག །རིག་ཙམ་ཉིད་ནས་ངང་གིས་སྟོང་། །སྟོང་པ་ཉིད་ན་མཐའ་དབུས་མེད། །ད་ཡང་འདུས་པའི་སྙིང་པོ་ཉོན། །ཡེ་ཤེས་ལྷུན་གྲུབ་ཆེན་པོ་ལ། །བྱིང་རྒོད་ཞེན་འཛིན་སྐྱོན་བྲལ་བས། །གསལ་བདེ་སྟོང་པ་ཆེན་པོ་ལ། །ངང་དུ་བཞག་པ་ཅི་ཡང་མེད། །མཉམ་གཞག་མེད་པས་རྗེས་ཐོབ་མེད། །ཐམས་ཅད་རང་བྱུང་ཆེན་པོ་ལས། །གཞན་དུ་གཡོ་བ་རྡུལ་ཙམ་མེད། །ད་ཡང་འདུས་པའི་སྙིང་པོ་ཉོན། །དེ་ལྟར་རྟོགས་པའི་རྣལ་འབྱོར་པས། །ལམ་མེད་ལམ་ལྔར་མ་བགྲོད་ཅིག །ས་མེད་ས་བཅུར་མ་སྦྱོར་ཅིག །རྟེན་མེད་དམིགས་པ་མ་འཆའ་ཞིག །སྒྲིབ་མེད་སྒྲིབ་གཉིས་མ་སྦྱོང་ཞིག །ཡུལ་མེད་ཚོགས་གཉིས་མ་གསོག་ཅིག །ངེས་དོན་འདི་རྙེད་བསྒྲུབ་ ― DNG001_Page_0392 ―
[མ་དཔེ་གཟིགས་ན་འདིར་གནོན།]
མི་དགོས། །རྫོགས་པ་ཆེན་པོ་ངེས་དོན་འདུས་པ་ལས། མ་བསྒོམས་དོན་དང་མི་འབྲལ་བར་བསྟན་པའི་ལེའུ་སྟེ་བཞི་བཅུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །རྣམ་རྟོག་རང་གྲོལ་བཀའ་སྩལ་པ། །དཔེར་ན་ཉི་མའི་སྙིང་པོ་ལ། །གཞན་གྱིས་མ་བྱས་རང་གསལ་བཞིན། །ཐམས་ཅད་ཡེ་ཤེས་ཆོས་སྐུ་གསལ། །མ་རིག་མུན་པ་གདོད་ནས་སངས། །ད་ཡང་རྡོ་རྗེ་སེམས་དཔའ་ཉོན། །དཔེར་ན་རྒྱལ་པོ་མཐོང་བའི་ཚེ། །མཉན་ཞིང་གུས་པའི་བློ་སྐྱེ་བཞིན། །ཆོས་ཉིད་དྲན་པས་རྟོག་པ་མེད། །རིག་པ་རྒྱུན་ཆགས་དག་ཏུ་གནས། །ད་ཡང་འདུས་པའི་སྙིང་པོ་ཉོན། །དཔེར་ན་ནམ་མཁའི་སྤྲིན་བཞིན་དུ། །རང་བྱུང་ངང་གིས་གནོད་མེད་ལྟར། །མ་རྟོགས་རང་གྲོལ་འཛིན་མེད་ཕྱིར། །ཡེ་ཤེས་ངོ་བོ་ཆོས་སྐུར་གསལ། །ད་ཡང་འཁོར་གྱི་སྙིང་པོ་ཉོན། །དཔེར་ན་དགུན་ཟླ་འབྲིང་པོ་ལ། །སྤང་ལ་མེ་མཆེད་ཇི་བཞིན་དུ། །ཅི་དྲན་ཆོས་སྐུར་འོད་གསལ་བས། །ཐམས་ཅད་ཡེ་ཤེས་ཉིད་དུ་གསལ། །ད་ཡང་འཁོར་གྱི་སྙིང་པོ་ཉོན། །དཔེར་ན་རིན་ཆེན་གསེར་གླིང་དུ། །ས་རྡོ་བཙལ་གྱིས་མི་རྙེད་ལྟར། །གང་ཡང་ཆོས་ཉིད་རང་གསལ་ཕྱིར། །ཏིང་འཛིན་དག་ལ་འབྱུང་འཇུག་མེད། །ད་ཡང་འདུས་པའི་སྙིང་པོ་ཉོན། །འཁོར་བ་མྱ་ངན་འདས་པའི་ཆོས། །ཐམས་ཅད་ཆོས་ཉིད་འགྱུར་བ་ལས། །བསྒོམ་པའི་ཐ་སྙད་བྲལ་བའི་དོན། །རང་རིག་ཡེ་ཤེས་ཉིད་དུ་གསལ། །རྫོགས་པ་ཆེན་པོ་ངེས་དོན་འདུས་པ་ལས། རྣམ་རྟོག་ཐམས་ཅད་རང་གྲོལ་དུ་བསྟན་པའི་ལེའུ་སྟེ་ཞེ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཀུན་བཟང་གིས། །ཐེ་ཚོམ་གལ་འགགས་བཀའ་སྩལ་པ། །རྩོལ་བ་ཚིག་གི་འཕྲང་ཆེན་ནི། །གཞི་ངེས་སྣང་བ་མ་ངེས་ཕྱིར། །ལུང་དང་མན་ངག་མི་འགལ་བའི། །གཏན་ཚིགས་ཆེན་པོར་བཞག་པའོ། །དཔེར་ན་ཉི་མའི་སྙིང་པོ་ལ། ། ― DNG001_Page_0393 ―
[མ་དཔེ་གཟིགས་ན་འདིར་གནོན།]
མུན་སྣང་གཉིས་ཀ་མི་འགལ་བཞིན། །གཞི་གཅིག་གང་ཡང་མི་འགལ་ལ། །དེ་ཉིད་དུས་ན་ངོས་བཟུང་མེད། །ད་ཡང་འདུས་པའི་སྙིང་པོ་ཉོན། །ཆུ་བྲན་རྒྱ་མཚོར་གཅིག་པ་བཞིན། །གང་དྲན་ཡེ་ཤེས་ཆེན་པོ་ལ། །བྱིས་པ་རྣམས་ཀྱིས་ཐ་དད་བཟུང་། །དེ་ཕྱིར་བློ་ཡི་སྣང་བ་ཡིན། །འབྱུང་བ་ནམ་མཁར་འདུས་པ་བཞིན། །ཆོས་རྣམས་སེམས་སུ་འདུས་པ་ལས། །བློ་བཞག་ཐེག་པ་རིམ་དགུ་བྱུང་། །གཞི་ལ་ཆོས་སྐུ་གཅིག་ལས་མེད། །ད་ཡང་རྡོ་རྗེ་སེམས་དཔའ་ཉོན། །ཡུལ་ཉིད་སེམས་ལ་སྡུག་བསྔལ་འབྱུང་། །རང་སེམས་ཡུལ་ལ་བེམ་པོར་འགྱུར། །གཅིག་ན་སྐྱེ་ཤི་མེད་པར་རིག །འཆི་འཕོ་འོང་ཕྱིར་བློ་འཕེལ་ཡིན། །གཉིས་ཀ་ཡུལ་སེམས་བསྲེ་བར་འགྱུར། །ཐམས་ཅད་མ་ལུས་སེམས་ཡིན་ན། །སེམས་ཙམ་ཀ་ཏ་རིམ་པར་གོལ། །ད་ཡང་འདུས་པའི་སྙིང་པོ་ཉོན། །ཕར་འགེལ་ཚུར་འགེལ་སེམས་པ་ནི། །དེ་ཤེས་མ་ཕན་འཁོར་བ་རང་། །དེ་ཕྱིར་སེམས་རྟོག་རྩིས་སུ་ཆེ། །དེ་ཕྱིར་ལུང་ལྡན་གདམས་ངག་དགོས། །ད་ཡང་འཁོར་གྱི་སྙིང་པོ་ཉོན། །ང་ཡི་ངེས་དོན་ཆོས་འདི་ལ། །བསྒོམ་དུ་ཡོད་མེད་འཁོར་བའི་ཆོས། །སེམས་ཅན་སངས་རྒྱས་གཅིག་པའི་ཕྱིར། །རྒྱུ་འབྲས་དབྱེར་མེད་ལྷུན་གྱིས་གྲུབ། །རྟོགས་ནས་འབྲལ་མེད་མ་བསྒོམས་ཕྱིར། །ཆོས་སྐུ་རང་བྱུང་དེ་ཉིད་ནི། །དུས་གསུམ་དག་ཏུ་འབྲལ་མེད་བལྟ། །དེ་ཕྱིར་ངེས་དོན་བསྒོམ་མི་དགོས། །ད་ཡང་འདུས་པའི་འཁོར་རྣམས་ཉོན། །ཕུང་པོ་སངས་རྒྱས་སྣ་ཚོགས་ནི། །བསྒོམ་པས་མ་ཕན་རྣལ་འབྱོར་འཆིང་། །སྣང་བ་བོར་ནས་སངས་རྒྱས་ན། །རྟོག་ཚོགས་ལྷ་རུ་ཅི་ལ་ཡིན། །དེ་ལྟར་ཆོས་སྐུ་མ་ཤེས་ན། །གསང་སྔགས་མན་ངག་ཅི་ལ་ཆེ། །དེ་ཕྱིར་བསྟན་ཤེས་བསྒོམ་མི་དགོས། །ད་ཡང་འདུས་པའི་སྙིང་པོ་ཉོན། །སངས་རྒྱས་སེམས་ཅན་འདྲེལ་པ་ཡང་། །མེད་ན་ཐུགས་རྗེས་ཕན་མི་ནུས། །ཡོད་ན་སེམས་ཅན་ཅི་ལ་འཁོར། །གནས་སྐབས་འདྲེལ་བ་མེད་པ་ལ། །མཐར་ཐུག་ཅི་ཕྱིར་འདྲེལ་པ་ཡོད། །རྒྱུ་འབྲས་ཚུལ་ནི་འོག་མའི་ཆོས། ། ― DNG001_Page_0394 ―
[མ་དཔེ་གཟིགས་ན་འདིར་གནོན།]
དེ་གཉིས་ལྟོས་པའི་རྒྱུ་འབྲས་མེད། །གཞི་མ་གཅིག་ལ་སྣང་ལུགས་གཉིས། །དོན་ལ་གཉིས་ཀ་ཡང་དག་མེད། །དེ་ཕྱིར་འཁོར་འདས་མ་རིག་ཆོས། །ལམ་པའི་ཆོས་ནི་དགོས་མེད་ཕྱིར། །འཁོར་བའི་རྣམ་རྟོག་ཅི་ལ་ཡོད། །མ་སྤངས་གྲོལ་ཕྱིར་བསྒོམ་དུ་མེད། །ད་ཡང་འདུས་པའི་སྙིང་པོ་ཉོན། །ཞི་གནས་བསམ་གཏན་ཉམས་མྱོང་བ། །ཡིད་ལ་ཉམས་སུ་མྱོང་བ་ན། །ཞི་གནས་ཡིན་ཕྱིར་ལྷག་མཐོང་མེད། །ཉམས་མྱོང་མེད་ན་གདེང་དང་བྲལ། །དེ་ཕྱིར་བླུན་པོའི་སྤྱོད་ཡུལ་མིན། །གཞི་ཉིད་རྟོགས་ན་ཉམས་མི་དགོས། །དེ་ཕྱིར་རྟོགས་པ་ཤིན་ཏུ་གཅེས། །གང་ལྟར་དྲན་པ་ཉམས་ཀྱི་མཆོག །དེ་ལ་འདི་ཤེས་སྨྲ་མི་ཤེས། །དེ་ཕྱིར་མ་བསྒོམས་ང་ཡི་ཉམས། །ད་ཡང་འདུས་པའི་སྙིང་པོ་ཉོན། །འཁོར་འདས་གཉིས་པས་ང་སྔའི་ཕྱིར། །སངས་རྒྱས་ཀུན་པས་ལུང་འདི་སྔ། །ཀུན་ཏུ་བཟང་པོ་འདི་རྟོགས་པས། །སངས་རྒྱས་ཐམས་ཅད་ཕྱི་ནས་རྒྱས། །དེ་ཕྱིར་སངས་རྒྱས་མ་གསུངས་ཆོས། །སངས་རྒྱས་སེམས་ཅན་ང་ལས་བྱུང་། །གཞི་ལ་འཁོར་འདས་མེད་པའི་ཕྱིར། །སེམས་ཅན་ཐ་མལ་ལུས་སྲོག་ལ། །ཡེ་ཤེས་སྤྱོད་སྤང་ལ་སོགས་མེད། །ཕོ་ཚོད་བལྟ་བ་བདུད་ཀྱིས་བསླུས། །ད་ཡང་འདུས་པའི་སྙིང་པོ་ཉོན། །རང་བྱུང་ཡེ་ཤེས་རྩ་བ་ནི། །དངོས་པོ་མེད་ལ་ཤེས་པ་ཡོད། །ཡིད་སྣང་སེམས་ཀྱི་རང་བཞིན་ལ། །ངེས་དོན་བཀའ་དང་དྲང་དོན་ལས། །ངོ་བོ་གཞི་གཅིག་མི་འགལ་ཀྱང་། །རྣམ་སྣང་ཤཱཀ་ཐུབ་ཞིང་ཁམས་བཞིན། །དྲུག་གི་སྣང་བ་ཐ་དད་པ། །གཏན་ཚིགས་བཞི་ཡི་རང་བཞིན་ལས། །སྣང་བ་ཞེན་པས་གང་འགོག་པ། །ལྟ་བའི་ཡུལ་ནི་རྣམ་བཞི་ཡིས། །ཐམས་ཅད་བློ་ཡི་སྣང་བ་སྟེ། །གང་ཡང་མ་ཡིན་ཞེན་པ་འགོག །དེ་ཕྱིར་ངེས་དོན་གདམས་ངག་ཆེ། །དེ་བས་རང་སེམས་རྟོགས་པའི་ཐབས། །ཀུན་གཞི་གཞི་ཆ་ངོས་ཟིན་ན། །ཡེ་ཤེས་ལྷུན་གྲུབ་རྫོང་ཆེན་དུ། །རང་རིག་རྒྱལ་པོ་ཡེ་ཤེས་འཕྱོ། །མ་རྟོགས་ ― DNG001_Page_0395 ―
[མ་དཔེ་གཟིགས་ན་འདིར་གནོན།]
ལོག་རྟོགས་དགག་པའི་ཕྱིར། །མདོ་སྡེ་དང་ནི་རྒྱུད་སྡེ་ལ། །ཚད་མ་བཞི་ཡི་གཏན་ཚིགས་ཀྱི། །ཐེག་པ་གོང་འོག་ཁྱད་པར་གྱིས། །མིང་དང་ཐ་སྙད་བསམ་ཡས་ཀྱང་། །ཞེན་པ་བཟློག་པའི་ཐབས་སུ་བཤད། །རྡོ་རྗེ་ཐེག་པ་འདི་ལས་མེད། །ད་ཡང་རྡོ་རྗེ་སེམས་དཔའ་ཉོན། །སྣང་བ་མི་འགོག་ཆོས་དབྱིངས་ལ། །ཞེན་པ་མེད་པས་ཡེ་ཤེས་ཏེ། །ཀུན་གཞི་རང་བཞིན་མ་བཅོས་པ། །དེ་ཉིད་དོན་དང་གང་ལྡན་པ། །མི་ཡི་ལུས་ལ་སངས་རྒྱས་ཡིན། །རྫོགས་པ་ཆེན་པོ་ངེས་དོན་འདུས་པ་ལས། ཐེ་ཚོམ་གེགས་བསལ་བའི་ལེའུ་སྟེ་ཞེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །བདེན་པའི་ཡིད་ཀྱིས་འདི་སྐད་གསོལ། །ངེས་པ་བདུན་གྱིས་ཉམས་བླངས་པའི། །ལྟ་བ་སྒོམ་པ་སྤྱོད་པ་དང་། །དམ་ཚིག་ཕྲིན་ལས་འབྲས་བུ་དང་། །རང་གིས་ཉམས་སུ་བླང་པའི་ཐབས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །གཞི་ངེས་ལྟ་བ་ཉམས་བླངས་པའི། །སངས་རྒྱས་རྒྱལ་པོ་ཆོས་སྐུ་ལ། །འཁོར་འདས་མེད་པ་རིག་པའི་ཀློང་། །གཞི་ལ་འགྱུར་མེད་བལྟ་བའི་གདེང་། །ཡུལ་ལ་མི་ལྟོས་རང་བྱུང་སྐུ། །ཡེ་ཤེས་ནམ་མཁའི་མཐའ་དང་མཉམ། །དོན་ལ་འགྱུར་མེད་རང་བྱུང་སྟེ། །སྐྱོན་གྱིས་མ་གོས་ལྟ་བའི་གཟུངས། །འགྱུར་མེད་ཆོས་ཉིད་བརྡལ་བའི་ཀློང་། །ད་ཡང་རྡོ་རྗེ་སེམས་དཔའ་ཉོན། །མི་སྐྱེ་མི་འགག་ལྟ་བ་ལ། །བསྒོམས་པས་མི་རྙེད་རྟོགས་པས་ཆོག །འབྲལ་མེད་ད་ལྟ་ཀུན་བཟང་ཐུགས། །དུས་དང་རྣམ་པ་ཐམས་ཅད་དུ། །སྐྱེ་ཤི་མེད་པ་ལྟ་བའི་མཆོག །དོན་དུ་ཡེ་ཤེས་མཐར་ཕྱིན་ལམ། །རེ་དོགས་མེད་ཕྱིར་ལྟུང་མི་སྲིད། །གདོད་ནས་སྙིང་པོ་འགྱུར་མེད་གཞི། །དེ་ཉིད་རང་རིག་ཆོས་སྐུ་ལ། །རང་རིག་རང་བལྟས་ངོ་མཚར་ཆེ། །དེ་ཕྱིར་ཆོས་སྐུ་སངས་རྒྱས་ཐུགས། །རྫོགས་པ་ཆེན་པོ་ངེས་དོན་འདུས་པ་ལས། ― DNG001_Page_0396 ―
[མ་དཔེ་གཟིགས་ན་འདིར་གནོན།]
གཞི་ངེས་པའི་ལྟ་བ་ཉམས་སུ་བླངས་པའི་ལེའུ་སྟེ་ཞེ་གསུམ་པའོ།། །།དེ་ནས་ཀུན་རིག་སྟོན་པ་ཡིས། །དོན་དང་མི་འབྲལ་ཏིང་འཛིན་ནི། །འདུས་པའི་འཁོར་ལ་བཀའ་སྩལ་པ། །ཆོས་ཉིད་མི་འགྱུར་ཡེ་ཤེས་ཀློང་། །མ་བཅོས་ཡེ་ནས་གནས་པ་སྟེ། །རྒྱུ་རྐྱེན་མ་བསྐྱེད་རང་བྱུང་སྐུ། །དངོས་མེད་རང་གསལ་འབྲས་བུ་ལ། །རྐྱེན་བྲལ་སྙིང་པོས་གཞིག་ཏུ་མེད། །བསམ་དུ་མེད་པས་བསྒོམ་མི་དགོས། །ད་ཡང་འདུས་པའི་སྙིང་པོ་ཉོན། །དབྱིབས་དང་བྲལ་བས་བྱང་ཆུབ་སེམས། །ཁ་དོག་མེད་པས་མཚོན་དུ་མེད། །སེམས་ཀྱི་ཡུལ་ལས་འདས་པ་ཡིས། །སྐྱེ་ཤི་མེད་པས་འགྱུར་བ་མེད། །རྟག་ཆད་མེད་པས་འཁོར་བ་བྲལ། །མཐོ་དམན་མེད་པས་ཀུན་གྱི་རྩེ། །ཆེ་ཆུང་མེད་པས་དམིགས་དང་བྲལ། །ཀུན་གཞི་མེད་པས་ཆོས་སྐུའི་ཀློང་། །ཡངས་དོག་མེད་པས་བཟང་མོའི་མཁའ། །མཐའ་དབུས་མེད་པས་ཀུན་ལ་ཁྱབ། །ཡེ་ཤེས་ཟང་ཐལ་ཕྱི་ནང་མེད། །མཚོན་དུ་མེད་པས་ཚད་དང་བྲལ། །འདུས་པའི་སྙིང་པོ་ད་ཉོན་ཅིག །སྣང་བ་མེད་པའི་ཆོས་ཉིད་ནི། །མ་བཅོས་ཡེ་ནས་ངང་གིས་གསལ། །རྩོལ་བསྒྲུབ་ཅིས་ཀྱང་བཙལ་དུ་མེད། །རྟོག་པའི་དགོངས་ཉམས་བླང་བ་ནི། །མ་བཅོས་ཆོས་སྐུ་དག་པའི་ཀློང་། །འབྲས་བུ་སངས་རྒྱས་དེ་ཉིད་ཡིན། །ད་ཡང་འདུས་པའི་སྙིང་པོ་ཉོན། །གདོད་ནས་འགྱུར་མེད་ཏིང་འཛིན་ལ། །རང་བྱུང་རིག་པའི་ཡེ་ཤེས་ཀྱི། །མ་བཅོས་རང་གསལ་ངང་བཞག་པས། །ཉམས་སུ་བླངས་པའི་དགོངས་པ་སྟེ། །དེ་ལ་རྣལ་འབྱོར་གང་གནས་པ། །ད་ལྟ་ཉིད་ནས་སངས་རྒྱས་ཐུགས། །རྫོགས་པ་ཆེན་པོ་ངེས་དོན་འདུས་པ་ལས། དོན་དང་འབྲལ་མེད་ཀྱི་དགོངས་པ་བསྟན་པའི་ལེའུ་སྟེ་ཞེ་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སྐྱོན་མེད་ཡོན་ཏན་ཀུན་ལྡན་པས། །ཤེས་རབ་ཐབས་ཀྱི་སྤྱོད་པ་ཡིས། །ཕྱི་ནང་ཆོས་རྣམས་རྫོགས་པར་ནི། །ང་ཡིས་བཤད་ཀྱིས་སེམས་དཔའ་ཉོན། །ལྟ་སྒོམ་ངེས་པའི་དོན་གནས་པའི། །རྣལ་ ― DNG001_Page_0397 ―
[མ་དཔེ་གཟིགས་ན་འདིར་གནོན།]
འབྱོར་ངེས་པའི་སྐལ་ལྡན་དེ། །དད་པས་ཀུན་ནས་བསླངས་པ་ཡིས། །སྙིང་རྗེའི་རླན་དང་མ་བྲལ་བས། །སེམས་བསྐྱེད་རྣམ་གཉིས་དེ་ལ་རྫོགས། །གང་ལའང་མི་རྟོག་རང་གསལ་བའི། །ཆོས་ཉིད་ངང་དུ་རང་གནས་པས། །བྱིང་རྒོད་གཉིས་ཀྱི་སྐྱོན་བྲལ་གནས། །ཞི་གནས་བདེ་བ་དེ་ལ་རྫོགས། །ཕྱི་ནང་ཆོས་རྣམས་མ་ལུས་ཀུན། །སོ་སོར་རྟོགས་པའི་ཤེས་རབ་ཀྱིས། །སྒྱུ་མ་ལྟ་བུར་ཤེས་པའི་ཕྱིར། །དངོས་མེད་རྟོགས་པས་ལྷག་མཐོང་རྫོགས། །ད་ཡང་རྡོ་རྗེ་སེམས་དཔའ་ཉོན། །ལྟ་བའི་ངང་ལ་མཉམ་བཞག་པས། །སེར་སྣ་འཛིན་པའི་སེམས་མེད་པས། །ཆོས་དང་བདག་ཏུ་མ་མཐོང་ཕྱིར། །སྦྱིན་པའི་ཕ་རོལ་ཕྱིན་པ་རྫོགས། །ངེས་དོན་རྟོགས་པའི་རྣལ་འབྱོར་པས། །ལུས་ངག་ཡིད་ཀྱི་སྤྱོད་པ་ཡིས། །མི་དགེ་ཉེས་བྱས་མི་འབྱུང་བས། །ཚུལ་ཁྲིམས་ཕ་རོལ་ཕྱིན་པ་རྫོགས། །རང་བྱུང་རིག་པའི་རྣལ་འབྱོར་པས། །ལྟ་བ་ངེས་པའི་གདེང་ཟིན་པས། །ཆོས་ཀྱི་དབྱིངས་སུ་ཀུན་ཤོང་ཕྱིར། །བཟོད་པའི་ཕ་རོལ་ཕྱིན་པ་རྫོགས། །ངེས་པའི་དོན་ལ་ཡིད་ཆེས་ནས། །རང་བྱུང་རིག་པ་ཤེས་པ་ཡིས། །ལྟ་བའི་དོན་ལ་མ་ཡེངས་པས། །བརྩོན་འགྲུས་ཕ་རོལ་ཕྱིན་པ་རྫོགས། །སྔ་ཕྱིས་མ་བསླད་གཉུག་མ་ལ། །གཞན་དུ་འཛིན་བྲལ་རང་བྱུང་སྐུ། །ཆོས་ཉིད་དོན་ལས་མི་གཡོ་ཕྱིར། །བསམ་གཏན་ཕ་རོལ་ཕྱིན་པ་རྫོགས། །ཐོས་པའི་ཤེས་རབ་བློ་སྦྱངས་ནས། །ངེས་པའི་དོན་ནི་མཐར་ཕྱིན་པས། །ཆོས་རྣམས་ལྟ་བས་ཐག་ཆོད་ཕྱིར། །ཤེས་རབ་ཕ་རོལ་ཕྱིན་པ་རྫོགས། །ད་ཡང་རྡོ་རྗེ་སེམས་དཔའ་ཉོན། །ལུང་ལྡན་ངེས་པའི་གདམས་ངག་གིས། །ཆོས་ཀྱི་དབྱིངས་སུ་ཤེས་པའི་ཕྱིར། །སྣང་བ་གང་ཡང་མི་འགོག་པས། །ཐབས་ཀྱི་ཕ་རོལ་ཕྱིན་པ་རྫོགས། །སྔོན་ནས་དགེ་བའི་ཚོགས་བསགས་པས། །བླ་མ་སངས་རྒྱས་ཀུན་དང་ཕྲད། །མི་གནས་བླ་མེད་དོན་རྟོགས་པས། །སྨོན་ལམ་ཕ་རོལ་ཕྱིན་པ་རྫོགས། །ཐོག་མཐའ་མ་རིག་སངས་པ་ལས། ། ― DNG001_Page_0398 ―
[མ་དཔེ་གཟིགས་ན་འདིར་གནོན།]
ལུང་བསྟན་རང་གི་དོན་ཤར་བས། །མ་རིག་མུན་པ་ཀུན་བཅོམ་ཕྱིར། །སྟོབས་ཀྱི་ཕ་རོལ་ཕྱིན་པ་རྫོགས། །རང་བྱུང་ངོ་བོ་ཉིད་ཀྱི་སྐུ། །ཆོས་སྐུའི་རྩ་བ་རབ་རྟོགས་པས། །ཡོན་ཏན་མ་ལུས་ཀུན་འདུས་ཕྱིར། །ཡེ་ཤེས་ཕ་རོལ་ཕྱིན་པ་རྫོགས། །དེ་ཡང་འདུས་པའི་སྙིང་པོ་ཉོན། །སངས་རྒྱས་ཀུན་གྱི་མཛད་སྤྱོད་ལ། །ཐ་མལ་སྤྱོད་པའི་མིང་མེད་པས། །ལུས་ངག་དགེ་བ་མི་ཉམས་ཕྱིར། །ཚོགས་ཆེན་མ་ལུས་རྣམ་གཉིས་རྫོགས། །རྫོགས་པ་ཆེན་པོ་ངེས་དོན་འདུས་པ་ལས། ཆོས་རྣམས་རྫོགས་པའི་མཛད་སྤྱོད་བསྟན་པའི་ལེའུ་སྟེ་ཞེ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སེམས་ཅན་དུས་ན་སངས་རྒྱས་སྤྱོད། །གང་ཡང་མ་བཅོས་དེ་བཞིན་ཉིད། །ཆོས་སྐུ་རྟོགས་ནས་འགྲོ་དོན་དུ། །ཅིར་ཡང་སྣང་བ་སྤྲུལ་པའི་སྐུ། །མཛད་པ་བཅུ་གཉིས་མཐར་ཕྱིན་པ། །ཐུགས་རྗེའི་སྤྲུལ་པས་ཀུན་འདུལ་ཡང་། །བློ་ཡི་འདུ་ཤེས་རྡུལ་ཙམ་མེད། །དེ་ཡང་འདུས་པའི་སྙིང་པོ་ཉོན། །བདག་ཏུ་རྟོག་པ་མེད་པའི་ཕྱིར། །གཉིས་མེད་དོན་གཅིག་ཆོས་ཀྱི་སྐུ། །མཐུན་འཇུག་སྤྱོད་པ་རྒྱ་མཚོར་ནི། །སྤྱོད་པ་སྣ་ཚོགས་ཅི་བདེར་སྤྱོད། །པདྨའི་སྐྱེ་ས་འདམ་ཡིན་ཏེ། །དེ་ལ་སྐྱོན་གྱིས་གོས་མེད་ལྟར། །ཆོས་ཉིད་བླང་དོར་མེད་པར་རྟོགས། །ཏིང་འཛིན་ཉམས་པ་རྡུལ་ཙམ་མེད། །ཐུན་མོང་མ་ཡིན་རྣལ་འབྱོར་པས། །འཆིང་གྲོལ་མེད་ཕྱིར་གོལ་ས་མེད། །དེ་ཡང་འདུས་པའི་སྙིང་པོ་ཉོན། །དེ་དག་རིག་སྤྱོད་ལྟ་བའི་གཟུངས། །རྒྱུན་དུ་མི་འབྲལ་དོན་མཛད་པ། །སངས་རྒྱས་མཛད་སྤྱོད་དུས་འདིར་འགྲུབ། །དེ་ཕྱིར་རྩོལ་མེད་སངས་རྒྱས་ཡིན། །རྫོགས་པ་ཆེན་པོ་ངེས་དོན་འདུས་པ་ལས། སྤྱོད་པ་འཆིང་གྲོལ་མེད་པ་ཉམས་སུ་བླངས་པ་བསྟན་པའི་ལེའུ་སྟེ་ཞེ་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཀུན་བཟང་གིས། །དམ་ཚིག་བསྲུང་དང་ཉམས་མེད་པ། །ངེས་པའི་དོན་དུ་བཀའ་སྩལ་པ། །གདེང་ ― DNG001_Page_0399 ―
[མ་དཔེ་གཟིགས་ན་འདིར་གནོན།]
ལྡན་ངེས་པའི་ཡེ་ཤེས་ཀྱིས། །བསྲུང་དུ་མེད་པའི་དམ་ཚིག་སྟེ། །ཡེ་བསྲུང་ཆེན་པོའི་ངང་དུ་བསྡམ། །སྡོམ་པ་ཕྱི་ནང་དམ་ཚིག་ཀྱང་། །གདུལ་བྱ་ཇི་ལྟར་འདོད་པ་སྟོན། །ཐ་སྙད་ཙམ་དུ་འདུལ་མོད་ཀྱང་། །དམ་དུ་བཅའ་བ་རྡུལ་ཙམ་མེད། །ཆོས་སྐུ་ཐུགས་ཀྱི་མཚན་ཉིད་དེ། །དེ་ཡི་ངང་དང་མི་འབྲལ་ན། །ཡེ་བསྲུང་གདེང་དང་ལྡན་པའི་ཕྱིར། །དམ་དུ་བཅས་ཀྱང་སྐྱོན་མེད་ཕྱིར། །དངོས་པོ་མེད་པ་ནམ་མཁའ་འདྲ། །དེ་ཡང་རྡོ་རྗེ་སེམས་དཔའ་ཉོན། །ང་ཡི་ཆོས་ཉིད་དམ་ཚིག་ནི། །མ་བཅོས་མཁའ་ལ་ཉི་ཤར་འདྲ། །མུན་པ་མེད་པར་རང་གསལ་བ། །ལྷངས་ཀྱིས་རྟོགས་ན་ལྟ་བ་ཡིན། །རང་གི་ཤེས་པ་གཉུག་མ་ཡིས། །དོན་ལ་མ་ཡེངས་ཏིང་འཛིན་ལ། །སྣང་བའི་ཡུལ་ལ་མ་ཞེན་པ། །གང་ཡང་མ་བཀག་སྤྱོད་པའི་ཕུལ། །ངེས་དོན་རྟོགས་པའི་ཆོས་ཉིད་ལ། །མི་འདའ་དམ་ཚིག་བསྲུང་བ་སྟེ། །བསྲུང་དུ་མེད་པས་ཉམས་པ་མེད། །དེ་ཕྱིར་ཡེ་ཤེས་འབྲལ་མེད་པའི། །དབྱིངས་ནས་རིག་པ་རང་ལ་ཤར། །སྣ་ཚོགས་བསགས་པའི་ཀུན་གཞི་ཡི། །སྔ་ཕྱི་གྲུབ་པ་ག་ལ་ཡོད། །ད་ཡང་འདུས་པའི་སྙིང་པོ་ཉོན། །ལུང་ལྡན་ངེས་པའི་དོན་བསྟན་པའི། །སེམས་རྟོགས་མ་བརྗོད་ལྟ་བ་ལ། །རྒྱུན་དུ་འབྲལ་མེད་དམ་ཚིག་བླང་། །རང་བྱུང་ཆོས་སྐུ་ཆེན་པོ་ལ། །བརྩོན་འགྲུས་མ་ཡེངས་གུས་པའི་ཐབས། །ལུང་ལྡན་ངེས་པའི་གདམས་ངག་ལ། །ཤེས་རབ་གོ་ཆ་དད་པའི་ལམ། །ཡིད་ཆེས་གདེང་གིས་འགྱུར་པ་མེད། །དེ་ཡང་རྡོ་རྗེ་སེམས་དཔའ་ཉོན། །དེ་ཉིད་གོམས་ཤིང་བརྟན་པའི་ཚེ། །ཤེས་རིག་མ་ཉམས་གསལ་བའི་རྟགས། །དེ་ལྡན་ཆོས་ཉིད་མངོན་དུ་རྟོགས། །དེ་ཕྱིར་དམ་ཚིག་ཀུན་གྱི་མཆོག །དེ་ལྟའི་རྣལ་འབྱོར་གང་རུང་གིས། །སྤོང་སྡུད་ཞེན་པ་མེད་པའི་ཕྱིར། །ཡུལ་ནི་མ་འགགས་ཆོས་ཀྱི་དབྱིངས། །བླ་མ་རྡོ་རྗེ་སློབ་དཔོན་ལ། །གཡོ་སྒྱུ་མེད་པའི་དམ་ཚིག་གིས། །འགལ་སེམས་རྡུལ་ཙམ་མེད་པའི་ཕྱིར། །སྤྱོད་པར་མ་ཆགས་ཁོང་ཁྲོ་མེད། །མཆེད་དང་ལྕམ་དྲལ་ལ་སོགས་པའི། །བརྩེ་གདུང་ཆོས་བྱེད་མི་འགྱོད་པ། །ངེས་དོན་ ― DNG001_Page_0400 ―
[མ་དཔེ་གཟིགས་ན་འདིར་གནོན།]
རྟོགས་པའི་ཡེ་ཤེས་ལ། །རིག་པ་སོ་ཐུབ་དགོན་པའི་མཆོག །ད་ཡང་འདུས་པའི་སྙིང་པོ་ཉོན། །དུས་དང་སྤྱོད་ལམ་ཐམས་ཅད་དུ། །རྒྱུན་དུ་གསལ་ཐེབས་ཆོས་སྤྱོད་ཡིན། །དམ་ཚིག་ཆེན་པོའི་ཆོས་ཉིད་ལ། །རྒྱུན་དུ་མི་འབྲལ་ལྷ་དྲན་ཕྱིར། །མཚམས་མེད་བྱས་ཀྱང་ངེས་པའི་དོན། །དེ་ལྡན་ཉེས་པ་རྡུལ་ཙམ་མེད། །རྫོགས་པ་ཆེན་པོ་ངེས་དོན་འདུས་པ་ལས། དམ་ཚིག་བསྲུང་ཉམས་མེད་པའི་ལེའུ་སྟེ་ཞེ་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཀུན་བཟང་གིས། །ཕྲིན་ལས་རྫོགས་པར་བཀའ་སྩལ་པ། །དཔེར་ན་ཡིད་བཞིན་ནོར་བུ་ལ། །དགོས་འདོད་ཐམས་ཅད་འབྱུང་བ་བཞིན། །ཡེ་ཤེས་རིག་པའི་དབང་ཐོབ་ཕྱིར། །ཕྱི་ནང་དབང་རྣམས་དེ་ལ་རྫོགས། །ཕྱོགས་བཅུ་ཡེ་ཤེས་ལྷུན་གྲུབ་པས། །མི་རྟོག་ཡེ་ཤེས་གེགས་བསལ་ནས། །གནོད་བྱེད་མཚམས་བརྟོལ་མེད་པའི་ཕྱིར། །ཕྱི་ནང་མཚམས་ཀུན་དེ་ལ་རྫོགས། །རང་བཞིན་དག་པའི་ངོ་བོ་ལ། །འཁོར་བའི་སྐྱོན་གྱིས་མ་གོས་ཕྱིར། །མ་རིག་རྣམ་རྟོག་སྒྲིབ་མེད་པས། །དོན་གྱི་བཤགས་པ་དེ་ལ་རྫོགས། །ཡེ་ནས་རང་བྱུང་ཆོས་སྐུ་ལ། །འཁོར་འདས་གཞི་ལ་མེད་པའི་ཕྱིར། །གཉིས་མེད་དོན་ལ་བློ་གནས་པས། །བྱིན་ཆེན་དབབ་པ་དེ་ལ་རྫོགས། །དུག་ཉིད་སྦྱོར་ཤེས་སྨན་གྱི་མཆོག །དུག་ལྔ་རང་གྲོལ་ཡེ་ཤེས་ཀྱིས། །ཉོན་མོངས་བདུད་རྩི་ཆེན་པོ་ལ། །ཡེ་ཤེས་བྱིན་བརླབས་དེ་ལ་རྫོགས། །བག་ཆགས་བརྟས་པའི་སྣང་བ་ལ། །མོས་པའི་ཏིང་འཛིན་དབང་བསྒྱུར་བ། །འབྱུང་བ་ལྔ་ཡིས་ཀུན་ཁྱབ་པ། །དབང་ཆེན་རིམ་པའི་ཕྲིན་ལས་རྫོགས། །ཕྱོགས་བཞི་རང་བཞིན་ལྷུན་གྲུབ་པས། །རིན་ཆེན་ལྔ་ལས་བྱས་པ་ཡི། །གཞལ་ཡས་ཁང་ཆེན་ཕྲིན་ལས་རྫོགས། །རྟོག་ཚོགས་ལྷ་རུ་གནས་བསྒྱུར་བས། །འཁྲུལ་སྣང་མེད་པར་གནས་པའི་ཕྱིར། །རིག་ཚོར་དོན་གྱིས་ལྷར་གསལ་བས། །ཡེ་ཤེས་ལྷ་རྣམས་དེ་ལ་རྫོགས། །འཁོར་འདས་གཞི་ལ་མེད་པའི་ཕྱིར། །ཀུན་ཏུ་བཟང་པོའི་ངོ་བོ་ལས། ། ― DNG001_Page_0401 ―
[མ་དཔེ་གཟིགས་ན་འདིར་གནོན།]
སངས་རྒྱས་སེམས་ཅན་གཉིས་མེད་ཕྱིར། །སྤྱན་དྲངས་བསྡིམ་པ་དེ་ལ་རྫོགས། །ཡེ་ནས་གནས་པའི་རང་བྱུང་དེ། །རང་ཆས་ཡོད་ཕྱིར་མ་བཙལ་བའི། །ཆོས་ཉིད་དོན་ལ་མི་འགྱུར་བས། །བརྟན་པར་བཞུགས་པའི་ཕྲིན་ལས་རྫོགས། །གཞི་ལ་སྐྱོན་ཡོན་མེད་པའི་ཕྱིར། །རང་བྱུང་ཕྱི་ནང་མེད་པས་ན། །བཟང་ངན་བླང་དོར་མི་བྱེད་པས། །ཟིལ་གྱིས་མནན་པའི་ཕྲིན་ལས་རྫོགས། །ཡང་དག་སངས་རྒྱས་དགོངས་པ་ལ། །དབྱེར་མེད་གཅིག་ཏུ་རྫོགས་པ་ཡིས། །ཐམས་ཅད་འདྲེན་པ་ཆེན་པོ་སྟེ། །ནན་ཏན་ཕྱག་རྒྱ་དེ་ལ་རྫོགས། །ཡེ་ཤེས་ལྷ་ཡི་ང་རྒྱལ་གྱིས། །ལུས་ངག་ཡིད་ཀྱི་བྱ་བ་ཀུན། །བསྒུལ་བསྐྱོད་ཐམས་ཅད་ཡེ་ཤེས་རོལ། །ཕྱག་རྒྱའི་མཆོད་པ་དེ་ལ་རྫོགས། །བལྟ་བ་ཤེས་རབ་ངོ་བོ་ལ། །བསྒོམ་པ་ཐབས་ཀྱིས་རོལ་པའི་ཕྱིར། །སེམས་དང་ཆོས་སུ་དོན་སྦྱོར་བས། །སྦྱོར་སྒྲོལ་མཆོད་པ་དེ་ལ་རྫོགས། །ཆོས་ཀུན་རང་བྱུང་རིག་པར་འདུས། །གང་ལ་སྨོན་དུ་མེད་རྟོགས་པས། །ཡོན་ཏན་ཐམས་ཅད་ལྷུན་གྱིས་གྲུབ། །མཐར་ཕྱིན་སྨོན་ལམ་དེ་ལ་རྫོགས། །རང་བྱུང་ཆོས་སྐུའི་དོན་རྟོགས་པས། །མ་བརྗོད་དགོངས་པ་གཙོར་བྱས་པས། །སྐུ་གསུང་ཐུགས་ཀྱི་དོན་ཚང་ཕྱིར། །བཟླས་བརྗོད་འཕྲོ་འདུ་དེ་ལ་རྫོགས། །དགའ་ལྡན་འབྱོར་ལྡན་ངེས་དོན་ནི། །སྣང་སྲིད་བདེ་བ་རོལ་རྟོགས་པས། །ཚོགས་ཆེན་སྣོད་བཅུད་ཡེ་ཡིན་ཕྱིར། །ཚོགས་ཀྱི་ཕྲིན་ལས་དེ་ལ་རྫོགས། །གཙོ་དང་འཁོར་དུ་མི་འབྱེད་པས། །རང་རིག་བཟང་ངན་མིང་མེད་ཕྱིར། །བདེ་ཆེན་གཉིས་མེད་ངོ་བོ་ལ། །ལྷག་མའི་ཕྲིན་ལས་དེ་ལ་རྫོགས། །བྱ་བ་མེད་པའི་ལས་རྣམས་ནི། །གང་ཡང་འཛིན་མེད་རང་གསལ་བའི། །མི་བཟུང་ཡེ་ཤེས་ཆེན་པོ་ལ། །གཏོར་མའི་ཕྲིན་ལས་དེ་ལ་རྫོགས། །འཁོར་བ་མྱ་ངན་འདས་པའི་ཆོས། །ཡེ་ཤེས་རང་བྱུང་རང་གསལ་གྱི། །ཐིག་ལེ་གཅིག་ཏུ་འདུས་པའི་ཕྱིར། །དཀྱིལ་འཁོར་བསྡུ་བའི་ཕྲིན་ལས་རྫོགས། །རང་བྱུང་ཡེ་ཤེས་རྡོ་རྗེ་ཡིས། །རང་བྱུང་ལྷར་ནི་དོན་གསལ་བས། །ཡེ་ཤེས་ལྷུན་གྲུབ་དོན་ལྡན་ཕྱིར། །བཀའ་ནན་ལུས་ ― DNG001_Page_0402 ―
[མ་དཔེ་གཟིགས་ན་འདིར་གནོན།]
བསྲུང་ཕྲིན་ལས་རྫོགས། །མ་རིག་རྐྱེན་བཞི་མེད་པའི་ཕྱིར། །གཉིས་མེད་དོན་དུ་སངས་རྒྱས་པས། །མ་རྟོགས་དོན་དུ་ངེས་པའི་དོན། །དགེ་རྩར་བསྔོ་བའི་ཕྲིན་ལས་རྫོགས། །རྫོགས་པ་ཆེན་པོ་ངེས་དོན་འདུས་པ་ལས། མཛད་པའི་ཕྲིན་ལས་ཉམས་སུ་བླང་བའི་ལེའུ་སྟེ་ཞེ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ངོ་བོ་རང་བཞིན་ངེས་པའི་དོན། །གང་ཡང་རུང་བ་ཅི་ལ་ཡང་། །དངོས་པོར་མེད་ཕྱིར་བརྟག་ཏུ་མེད། །མེད་པ་ལ་ནི་ཡོད་རྟོག་པ། །འཁྲུལ་པ་རྣམས་ཀྱིས་ཤེས་པ་ལས། །དམ་པ་ཀུན་གྱི་མི་མཁྱེན་ནོ། །ད་ཡང་རྡོ་རྗེ་སེམས་དཔའ་ཉོན། །ནམ་མཁའ་དངོས་མེད་སེམས་དང་བྲལ། །དེ་ཕྱིར་རང་བྱུང་ངོ་བོ་ཉིད། །ཁ་དོག་དབྱིབས་མེད་སེམས་ལས་འདས། །དེ་ཕྱིར་རང་བྱུང་རྟོགས་པ་དཀའ། །ཆོས་སྐུ་སྐྱེ་མེད་རིག་པའི་སྐུ། །ཡིད་ཀྱི་ཡུལ་དུ་བསམ་དུ་མེད། །གང་ཡང་མ་སྤང་རིག་པ་དེ། །ཡོན་ཏན་ཀུན་འབྱུང་རང་རིག་སྐུ། །ད་ཡང་འདུས་པའི་སྙིང་པོ་ཉོན། །དེ་ལ་ལས་དང་རྐྱེན་གྱིས་ཚུགས། །དེ་ཕྱིར་རང་བྱུང་ཇི་བཞིན་ལ། །བཅོས་པ་མེད་ཕྱིར་རང་ལུགས་ཆོས། །འདུས་མ་བྱས་པས་ནམ་མཁའ་འདྲ། །ཆོས་ཉིད་རང་བཞིན་དམིགས་པ་མེད། །དེ་དོན་རང་བྱུང་རིག་པར་ངེས། །སེམས་ཀྱི་ཀུན་གཞི་རྩད་བཅད་ནས། །བག་ཆགས་ཀུན་གཞི་སྤྲིན་ལྟར་དེངས། །ལུས་ཀྱི་ཀུན་གཞི་ལེན་མི་སྲིད། །དེ་ཕྱིར་རང་བྱུང་རྟོགས་པས་ཆོག །ད་ཡང་འདུས་པའི་སྙིང་པོ་ཉོན། །དེ་ལ་བཙལ་དུ་མེད་པའི་དོན། །དུས་གསུམ་འགྱུར་མེད་ཡེ་ཤེས་ཀློང་། །ཡང་དག་སངས་རྒྱས་དགོངས་པ་ཡིན། །ད་ཡང་འདུས་པའི་སྙིང་པོ་ཉོན། །རང་བཞིན་རྣམ་དག་ཆོས་ཉིད་ལ། །སྤྲོས་པ་མེད་པ་ཉམས་སུ་ལོངས། །དེ་བླངས་འབྲས་བུ་སངས་རྒྱས་ཐོབ། །དེ་ཕྱིར་རང་བཞིན་རྟོགས་པ་གཅེས། །རྫོགས་པ་ཆེན་པོ་ངེས་དོན་འདུས་པ་ལས། རང་བཞིན་ཉམས་སུ་བླངས་པའི་ལེའུ་སྟེ་ཞེ་དགུ་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ ― DNG001_Page_0403 ―
[མ་དཔེ་གཟིགས་ན་འདིར་གནོན།]
ལ་བཀའ་སྩལ་པ། །རྩོལ་བ་མེད་པའི་འབྲས་བུ་ནི། །གོལ་སྒྲིབ་མེད་པའི་ཆོས་སྐུ་ལ། །དབྱེ་ན་རྣམ་པ་བཅུ་ཚན་གསུམ། །ཡིད་ལ་མི་བྱེད་གོལ་སྒྲིབ་མེད། །དེ་ཕྱིར་ངེས་པའི་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །སྔ་ཕྱི་ཞེན་པའི་རྟོག་པ་ཡིས། །བྱུང་ཚོར་རྗེས་སུ་མ་འབྲངས་པས། །འཇིག་རྟེན་ཕལ་པའི་སར་མི་གོལ། །དེ་ཡང་ངེས་པའི་འབྲས་བུ་ཡིན། །དེ་ཡང་བདག་མེད་དོན་རྟོགས་ཕྱིར། །ཡོད་མེད་ཡུལ་དུ་མ་བསྒོམས་པས། །རྟག་ཆད་མཐར་ནི་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྒྱལ་བའི་བཀའ་ལས་མན་ངག་གིས། །ཤེས་རབ་ཟབ་མོའི་དོན་ཟིན་པས། །ལུང་དུ་མ་བསྟན་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ལྷག་མཐོང་རིག་པའི་གདེང་ཡོད་པས། །ཞི་གནས་རོ་ལ་མ་ཆགས་ཕྱིར། །འཇིག་རྟེན་བསམ་གཏན་སར་མི་གོལ། །དེ་ཡང་ངེས་པའི་འབྲས་བུ་ཡིན། །དབྱིངས་དང་ཡེ་ཤེས་གཉིས་མེད་ཕྱིར། །འགྲོ་དྲུག་རྣམ་ཤེས་མི་འགེགས་པས། །འདུ་ཤེས་མེད་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །སྤང་བའི་རྟོག་པ་མེད་པའི་ཕྱིར། །རྣམ་རྟོག་མ་སྤངས་རང་ཞི་བས། །ཉན་ཐོས་འགོགས་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྟེན་འདྲེལ་བཅུ་གཉིས་ཡུལ་མེད་ཕྱིར། །རྟོག་བཀག་སྟོང་པར་མ་བསྒོམས་པས། །རང་རྒྱལ་སེམས་སུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །སྣང་བ་སེམས་སུ་མི་སྡུད་པས། །རང་རིག་གསལ་བར་མི་བསྒོམ་ཕྱིར། །སེམས་ཙམ་པར་ནི་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །བདེན་པ་གཉིས་སུ་མི་དབྱེ་ཕྱིར། །མཚན་མ་སྟོང་པར་མི་བསྒོམས་པས། །དབུ་མ་གཉིས་སུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཕོ་མོ་རྩ་དང་ཐིག་ལེ་ཡི། །ཐབས་ཀྱི་བདེ་བ་མ་བསྒོམས་པས། །ཆགས་པའི་ལམ་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཚོགས་གཉིས་རྩོལ་བ་མེད་པའི་ཕྱིར། །རྒྱུ་འབྲས་རྐྱེན་ལ་མེད་ ― DNG001_Page_0404 ―
[མ་དཔེ་གཟིགས་ན་འདིར་གནོན།]
ལྟོས་པས། །འདུས་བྱས་ཆོས་སུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །བག་ཆགས་བཟང་ངན་མིང་མེད་ཕྱིར། །དགེ་སྡིག་རེ་དོགས་རྩོལ་མེད་པས། །ལས་ཀྱི་དབང་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །སྣང་སྟོང་གཞི་ལ་མེད་པའི་ཕྱིར། །དབྱེ་བ་བསྟན་པའི་ཡུལ་མེད་པས། །ཕྲ་བའི་ལམ་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །གཞི་ལ་གོང་འོག་མེད་པའི་ཕྱིར། །ལམ་ལྔ་རིམ་གྱིས་མ་སྦྱངས་པས། །ས་བཅུ་ངེས་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྫོགས་པ་ཆེན་པོ་ངེས་དོན་འདུས་པ་ལས། རྒྱུ་མཚན་ཉིད་ཀྱི་གོལ་ས་དང་སྒྲིབ་པ་མེད་པར་བསྟན་པའི་ལེའུ་སྟེ་ལྔ་བཅུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །བདག་དང་ཡེ་ཤེས་གཉིས་མེད་ཕྱིར། །དག་པའི་ལྷར་ནི་མ་བསྒོམས་པས། །ཀྲི་ཡའི་ཐེག་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །གོང་འོག་གཉིས་སུ་མི་བལྟའི་ཕྱིར། །ལྟ་སྤྱོད་ཡ་ཆར་མི་འགལ་བས། །ཨུ་ཐ་ཡར་ནི་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཡང་དག་ངེས་པའི་དོན་རྟོགས་ཕྱིར། །བྱང་ཆུབ་རྣལ་མ་མ་བསྒོམས་པས། །ཡོ་ག་སེམས་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །འཁྲུལ་སྣང་གཞི་ལ་མེད་པའི་ཕྱིར། །རྣམ་རྟོག་ལྷ་རུ་མ་བསྒྱུར་བས། །མ་ཧཱ་ཡོ་གར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །དབྱིངས་དང་ཡེ་ཤེས་གཉིས་མེད་ཕྱིར། །འདུ་འབྲལ་མེད་འཇོག་ཡིད་མེད་ཕྱིར། །ཨ་ནུ་ཡོ་གར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །སྣང་བ་སེམས་ཉིད་མིན་པའི་ཕྱིར། །ཆོས་ཉིད་མཚོན་དུ་མི་རྟོག་པས། །མཚན་མའི་སྐྱོན་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཕྱི་ནང་གསང་བའི་ཆོས་ཀུན་གྱི། །བརྟུལ་ཞུགས་གང་ཡང་མི་དགོས་པས། །བླང་དོར་སྤྱོད་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྣམ་རྟོག་གཞི་ལ་མེད་པའི་ཕྱིར། །གཉིས་མེད་དོན་ལ་མི་ལྟོས་པས། །ཕྱོགས་ཅན་ལྟ་བར་དེ་མི་གོལ། །དེ་ ― DNG001_Page_0405 ―
[མ་དཔེ་གཟིགས་ན་འདིར་གནོན།]
ཡང་ངེས་པའི་འབྲས་བུ་ཡིན། །ཚོགས་བརྒྱད་གོལ་སར་ཤེས་པའི་ཕྱིར། །སེམས་ཉིད་དོན་ལ་མ་རྩོལ་བས། །མཉམ་ཉིད་དོན་ལས་མི་འགྱུར་ཕྱིར། །ཆོས་ཀྱི་སྐུ་ལ་གོལ་ས་མེད། །རྫོགས་པ་ཆེན་པོ་ངེས་དོན་འདུས་པ་ལས། སྔགས་ཕྱི་ནང་གི་གོལ་ས་མེད་པའི་འབྲས་བུ་བསྟན་པའི་ལེའུ་སྟེ་ང་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སྒྲིབ་པ་མེད་པའི་འབྲས་བུ་དེ། །ངེས་པའི་ལུང་ལྡན་བླ་མ་ཡིས། །ཡེ་ཤེས་ཆེན་པོར་ངོས་ཟིན་ཕྱིར། །སྐབས་དབྱེའི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །ནམ་ལངས་མུན་སྒྲིབ་མེད་པ་བཞིན། །མ་རིག་བག་ཆགས་མེད་པའི་ཕྱིར། །བསླད་པའི་སྒྲིབ་པ་དེ་ལས་མེད། །དེ་ཡང་ངེས་པའི་འབྲས་བུ་ཡིན། །གང་ཡང་དམ་པར་བལྟ་མེད་ཕྱིར། །ཆེད་དུ་བྱས་ནས་བསྒོམ་མེད་པས། །ཕྱོགས་ལྷུང་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །གང་དྲན་ཆོས་སྐུར་རབ་ཤེས་པའི། །ལྟ་བ་ངེས་པའི་གདེངས་ཟིན་པས། །ཚོགས་ཀྱི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །གསང་སྔགས་མཛད་སྤྱོད་ཐམས་ཅད་ལ། །བྱ་བ་མེད་པའི་དོན་རྟོགས་ཕྱིར། །ལས་ཀྱི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །འཁོར་འདས་ཆོས་ནི་གང་ལ་ཡང་། །མ་ཆགས་མི་གཡོའི་སྟོབས་ལྡན་ཕྱིར། །མཆོད་པའི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །ཡང་དག་སངས་རྒྱས་རྣམས་གསུངས་པའི། །ངེས་པའི་ལུང་ལ་ཡིད་ཆེས་པས། །ཐེ་ཚོམ་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །གོལ་སྒྲིབ་མེད་པའི་དོན་ཤེས་ན། །རྒྱལ་བ་ཉིད་དང་དགོངས་པ་མཉམ། །དེ་ཕྱིར་ཆོས་སྐུ་ད་ལྟའི་ཐུགས། །སངས་རྒྱས་ཞེས་ནི་དེ་ལ་བྱ། །རྫོགས་པ་ཆེན་པོ་ངེས་དོན་འདུས་པ་ལས། སྒྲིབ་པ་མེད་པའི་འབྲས་བུ་ཉམས་སུ་བླངས་པའི་ལེའུ་སྟེ་ང་གཉིས་པའོ།། །།དེ་ནས་རྡོ་རྗེ་སེམས་དཔའ་ ― DNG001_Page_0406 ―
[མ་དཔེ་གཟིགས་ན་འདིར་གནོན།]
ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སྟོན་པ་ཆོས་རྗེ་ལ། །ངེས་པའི་དོན་དགོངས་འདི་སྐད་གསོལ། །སེམས་ལས་མ་བྱུང་སངས་རྒྱས་དང་། །རྒྱུ་ལས་མ་བྱུང་འབྲས་བུ་དང་། །ལུང་ལ་མ་བརྟེན་མན་ངག་རྣམས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །ངེས་པ་གསུམ་གྱིས་ཁྱད་འཕགས་པ། །ཁྱོད་ལ་ལེགས་པར་བཤད་ཀྱིས་ཉོན། །ཡིད་ལ་ཟུང་ལ་ངེས་པར་ཆོངས། །ད་ཡང་རྡོ་རྗེ་སེམས་དཔའ་ཉོན། །སེམས་ལས་མ་བྱུང་སངས་རྒྱས་ནི། །རང་བྱུང་ཡེ་ཤེས་ཆོས་སྐུ་དེ། །སངས་རྒྱས་ཀུན་གྱི་ངེས་པའི་དོན། །རྣལ་འབྱོར་ཀུན་གྱི་དམ་པའི་ལམ། །ཐམས་ཅད་མཁྱེན་པའི་ཡེ་ཤེས་མཆོག །ད་ཡང་འདུས་པའི་སྙིང་པོ་ཉོན། །མཚན་ཉིད་སེམས་སུ་འདོད་པ་ཡིས། །མ་རིག་ཆོས་ནི་བདེན་གཉིས་སུ། །བློ་ཡིས་ནན་བརྟགས་སེམས་ཀྱིས་བཅོས། །ཚོགས་བསགས་སྒྲིབ་སྦྱངས་ཀུན་བརྟགས་པའི། །སེམས་བྲལ་རང་བྱུང་ཆོས་ཀྱི་སྐུ། །སེམས་ལས་མ་བྱུང་སངས་རྒྱས་འདི། །ཐེག་པ་ཀུན་ལས་ཁྱད་པར་འཕགས། །ཕྱི་ནང་གསང་སྔགས་བསྐྱེད་རྫོགས་ནི། །ཏིང་འཛིན་གསུམ་གྱིས་ལྷར་བསྒོམས་ནས། །ཕྲིན་ལས་རྣམ་བཞིའི་མཛད་སྤྱོད་ཀུན། །འབྲས་བུ་མི་ཐོབ་ཀུན་བརྟགས་པས། །ཡིད་སྨོན་དཀྱིལ་འཁོར་ལྷ་ཚོགས་ཀུན། །དྲང་དོན་ཡིན་ཕྱིར་འཁྲུལ་པའི་སེམས། །གསལ་བརྟན་ཏིང་འཛིན་གོམས་གྱུར་ཀྱང་། །སེམས་ལས་མ་བྱུང་སངས་རྒྱས་མིན། །ད་ཡང་འཁོར་གྱི་སྙིང་པོ་ཉོན། །ཡང་དག་ངེས་དོན་སངས་རྒྱས་ནི། །ཡིད་ཀྱིས་མ་བསྒོམས་མ་བསྐྱེད་པས། །རྩོལ་མེད་རང་བྱུང་གསལ་བ་འདི། །སེམས་ལས་མ་བྱུང་སངས་རྒྱས་ཡིན། །སྣང་མེད་རང་བྱུང་ཆོས་ཉིད་ལ། །ཡུལ་དུ་བྱས་པ་མེད་པའི་ཕྱིར། །ལྷ་མེད་བསྒོམ་རྒྱུ་ཅི་ལ་ཡོད། །དེ་ཕྱིར་སེམས་ནི་ཀུན་བརྟགས་ཡིན། །གང་ཡང་མ་བསྒོམས་ཆོས་ཉིད་ནི། །སེམས་ཀྱི་ཡུལ་ལས་འདས་ ― DNG001_Page_0407 ―
[མ་དཔེ་གཟིགས་ན་འདིར་གནོན།]
པའི་ཕྱིར། །སེམས་ལས་མ་བྱུང་རང་བྱུང་སྟེ། །སངས་རྒྱས་ཀུན་གྱི་དགོངས་པ་ཡིན། །ད་ཡང་རྡོ་རྗེ་སེམས་དཔའ་ཉོན། །སེམས་ནི་མ་རིག་མུན་པ་ཡིན། །སངས་རྒྱས་སེམས་བྲལ་ཡེ་ཤེས་སྐུ། །མ་རིག་སེམས་སྤངས་སྒྲིབ་པ་དག །ཐམས་ཅད་མཁྱེན་པའི་ཡེ་ཤེས་རྒྱས། །རྟག་ཆད་འཛིན་པ་མ་རིག་སེམས། །གསལ་བརྟན་ཏིང་འཛིན་གོམས་གྱུར་ཀྱང་། །སེམས་ལས་མ་བྱུང་སྒྲིབ་པ་བྲལ། །རྟག་ཆད་སེམས་མེད་ཆོས་ཀྱི་སྐུ། །སེམས་ལས་མ་བྱུང་སངས་རྒྱས་ཡིན། །སངས་ནི་འཛིན་པའི་འཁྲུལ་པ་སངས། །རྒྱས་ནི་ཆོས་སྐུ་མི་གཡོ་རྒྱས། །སངས་ནི་སེམས་སུ་འཛིན་པ་སངས། །རྒྱས་ནི་རང་བྱུང་ཡེ་ཤེས་རྒྱས། །སངས་ནི་གོལ་སྒྲིབ་སེམས་ནི་སངས། །རྒྱས་ནི་མི་རྟོག་ཡེ་ཤེས་རྒྱས། །སངས་ནི་བྱིང་དང་རྨུགས་པ་སངས། །རྒྱས་ནི་ལྷག་མཐོང་ཡེ་ཤེས་རྒྱས། །དེ་ཕྱིར་སེམས་ལས་མ་བྱུང་བའི། །ཡེ་ཤེས་རང་གསལ་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །སངས་ནི་རྒོད་འཕྲོ་གཡེངས་པ་སངས། །རྒྱས་ནི་རང་རིག་ཡེ་ཤེས་རྒྱས། །སངས་ནི་འཁོར་འདས་འཛིན་པ་སངས། །རྒྱས་ནི་ཆོས་སྐུ་གསལ་བ་རྒྱས། །སངས་ནི་བག་ཆགས་ཉོན་མོངས་སངས། །རྒྱས་ནི་རང་རིག་བདེ་ཆེན་རྒྱས། །སངས་ནི་བདུད་བཞིའི་ཆོ་འཕྲུལ་སངས། །རྒྱས་ནི་ཟིལ་གནོན་བལྟ་བ་རྒྱས། །དེ་ཕྱིར་རང་བྱུང་རིག་པ་འདི། །སེམས་ལས་མ་བྱུང་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །དུས་གསུམ་སངས་རྒྱས་སེམས་དང་བྲལ། །ཚོགས་བརྒྱད་མེད་ཕྱིར་སེམས་དང་བྲལ། །རང་བྱུང་སྙིང་པོ་ཆོས་ཀྱི་སྐུ། །སེམས་ལས་མ་བྱུང་སངས་རྒྱས་ཡིན། །མ་རིག་ལས་བྱུང་སེམས་ཅན་ཀུན། །སེམས་སུ་འཛིན་ཕྱིར་སྡུག་བསྔལ་བྱུང་། །དེ་ཕྱིར་སེམས་བྲལ་སྤྲོས་པ་མེད། །སྤྲོས་བྲལ་ཆོས་ཉིད་རང་བྱུང་སྐུ། །རང་སེམས་བྲལ་བས་དམིགས་པ་མེད། །དམིགས་མེད་ཆོས་ཀྱི་སྐུ་ཞེས་བྱ། །སེམས་ལ་དུས་གསུམ་ཡོད་པའི་ཕྱིར། ། ― DNG001_Page_0408 ―
[མ་དཔེ་གཟིགས་ན་འདིར་གནོན།]
ཚེ་ལ་སྔ་ཕྱི་ད་ལྟ་འབྱུང་། །སེམས་ལ་འཕོ་འགྱུར་ཡོད་པའི་ཕྱིར། །དེ་ཕྱིར་ལུས་ལ་སྐྱེ་འཆི་འབྱུང་། །ན་ཚ་བདེ་སྡུག་སྣ་ཚོགས་པ། །རང་སེམས་ཡིན་ཕྱིར་འཁོར་བར་སྨིན། །དེ་ཕྱིར་སེམས་ནི་སངས་རྒྱས་མིན། །ད་ཡང་འདུས་པའི་སྙིང་པོ་ཉོན། །སྐྱེ་ཤི་མེད་ཕྱིར་སེམས་དང་བྲལ། །སྐྱེ་མེད་རང་བྱུང་ཡེ་ནས་གནས། །དེ་ཉིད་ལམ་གྱི་ཡེ་ཤེས་ནི། །ཐོག་མཐའ་ཆོད་ན་དུས་གསུམ་གཅིག །ཆོས་སྐུ་གཅིག་ཕྱིར་འཕོ་འགྱུར་མེད། །སྔ་ཕྱི་མེད་པ་རང་བྱུང་སྐུ། །སེམས་ལས་མ་བྱུང་སངས་རྒྱས་ཡིན། །འཕོ་འགྱུར་མེད་པས་སྡུག་བསྔལ་བྲལ། །བརྗོད་མེད་རང་གི་ངོ་བོ་ལ། །ཚོར་བ་བདེ་སྡུག་གང་ཡང་མེད། །དེ་ཕྱིར་ཆོས་ཉིད་བདེན་པའི་ངང་། །སེམས་ལས་མ་བྱུང་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །དུས་དང་སྤྱོད་ལམ་ཐམས་ཅད་དུ། །ངེས་དོན་འབྲལ་མེད་སེམས་ལས་འདས། །དེ་ཕྱིར་ལྟ་བ་འགྱུར་བ་མེད། །འགྱུར་མེད་ཆོས་དབྱིངས་རང་བྱུང་ཀློང་། །མ་ཡེངས་ཡེངས་མེད་དེ་ལྟ་ཉིད། །སྒོམ་པ་ཀུན་གྱི་མཆོག་ཏུ་ནི། །ཀུན་བཟང་རྒྱལ་བས་གསུངས་པ་དེ། །སེམས་ལས་མ་བྱུང་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །ངེས་དོན་སངས་རྒྱས་ཁྱད་པར་ཅན། །ཀུན་གཞི་མེད་ཕྱིར་སྣང་བ་མེད། །དེ་ཕྱིར་སེམས་མེད་རིག་པ་འདི། །སེམས་ལས་མ་བྱུང་སངས་རྒྱས་ཡིན། །སེམས་བྲལ་ལྷག་མཐོང་ཆོས་ཉིད་ལ། །དེ་ལ་ཡིད་ཆེས་ངེས་པའི་གདེང་། །སངས་རྒྱས་དགོངས་པ་མ་ནོར་བ། །དམ་པའི་ཐུགས་ལ་གསལ་བ་འདི། །སེམས་ལས་མ་བྱུང་སངས་རྒྱས་ཡིན། །ཐེག་དགུའི་ཆོས་ལས་ཁྱད་པར་འཕགས། །རྫོགས་པ་ཆེན་པོ་ངེས་དོན་འདུས་པ་ལས། སེམས་ལས་མ་བྱུང་བའི་སངས་རྒྱས་བསྟན་པའི་ལེའུ་སྟེ་ང་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །རྒྱུ་ལས་མ་བྱུང་འབྲས་བུ་ནི། །ཀུན་རིག་སྟོན་པས་བཀའ་སྩལ་ ― DNG001_Page_0409 ―
[མ་དཔེ་གཟིགས་ན་འདིར་གནོན།]
པ། །རྒྱུ་རྐྱེན་མེད་པའི་མཐུན་དཔེ་ནི། །ནོར་བུ་རིན་ཆེན་ཀུན་ལྡན་གཞི། །ཆོས་སྐུ་རྒྱུ་ལ་རག་མ་ལུས། །རྐྱེན་ལ་མི་ལྟོས་སྨོས་ཅི་དགོས། །ད་ཡང་འདུས་པའི་སྙིང་པོ་ཉོན། །རྒྱུ་ནི་འདུས་བྱས་མི་རྟག་ཕྱིར། །གཉེན་པོས་འཇིག་ཕྱིར་རྐྱེན་ཁར་འགྲོ། །དེ་ཕྱིར་རྐྱེན་གྱིས་མ་བསྐྱེད་པའི། །རང་བྱུང་ཆོས་སྐུ་འགྱུར་མེད་དེ། །ཆོས་རྣམས་ཀུན་གྱི་སྙིང་པོ་ཡིན། །ཕྱི་ནང་ཆོས་ཀུན་བག་ཆགས་ཀྱི། །རྒྱུ་རྐྱེན་ངན་པས་བསྐྱེད་པའི་ཕྱིར། །འཁྲུལ་པ་ཡིན་པར་ཐེ་ཚོམ་མེད། །དེ་ཕྱིར་འཁོར་འདས་མ་རིག་པའི། །ངེས་དོན་ཆོས་སྐུའི་སྙིང་པོ་ནི། །རྒྱུ་ལས་མ་བྱུང་རང་བྱུང་སྐུ། །རྐྱེན་གྱིས་མ་བསྐྱེད་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །མ་རིག་རྒྱུ་ལས་མ་སྐྱེས་པའི། །རང་བྱུང་ངོ་བོ་ཉིད་ཀྱི་སྐུ། །ཀུན་བརྟགས་རྐྱེན་གྱིས་མ་བསྐྱེད་ཕྱིར། །འབྱུང་བ་བཞི་ལ་བརྟེན་མི་དགོས། །ནམ་མཁའ་སྟོང་པ་རྒྱུ་མེད་ཕྱིར། །རིག་པ་སྟོང་པ་རྒྱུས་མ་བསྐྱེད། །ནམ་མཁའ་འབྱུང་བཞིའི་རྐྱེན་མི་ཚུགས། །དེ་བཞིན་ཆོས་སྐུ་འགྱུར་བ་མེད། །དེ་ཕྱིར་རྐྱེན་གྱིས་མ་བསྐྱེད་པའི། །འབྲས་བུ་ངེས་པར་ཡོད་པ་ཡིན། །ད་ཡང་འདུས་པའི་སྙིང་པོ་ཉོན། །རྒྱུ་མེད་འབྲས་བུ་ཡོད་ངེས་པའི། །རྒྱ་མཚོའི་གསེར་ལ་རྒྱུ་མེད་ལྟར། །རིག་པ་རང་གསལ་རྒྱུས་མ་བསྐྱེད། །གསེར་དེ་གཡའ་ཡིས་མ་གོས་ལྟར། །ཆོས་སྐུ་རྐྱེན་གྱིས་མི་འགྱུར་བས། །དེ་ཕྱིར་རྒྱུ་ལས་མ་བྱུང་བའི། །འབྲས་བུ་ངེས་པར་ཡོད་པ་ཡིན། །སེམས་ཅན་རྒྱུ་ལས་མ་སྐྱེས་པའི། །ཀུན་བཟང་སངས་རྒྱས་ཡོད་པར་ངེས། །སྔོན་གྱི་སངས་རྒྱས་རྒྱུས་མ་བསྐྱེད། །རྐྱེན་མེད་རང་བྱུང་ཡིན་པའི་ཕྱིར། །ཡེ་ནས་སངས་རྒྱས་ཡིན་པར་བཤད། །ད་ཡང་འདུས་པའི་སྙིང་པོ་ཉོན། །དྲང་དོན་སངས་རྒྱས་རྒྱུ་རྐྱེན་ནི། །ཐབས་དང་ཤེས་རབ་ཡིན་ཞེས་ཟེར། །ཇི་སྲིད་ཐབས་ལ་བརྟེན་གྱི་བར། །ཆང་དང་དུག་བསྲེས་འཆི་བ་འདྲ། །དེ་ཕྱིར་རང་བྱུང་ཐབས་མི་དགོས། །ཐབས་ནི་མ་རིག་དྲང་བ་ཙམ། །ཡེ་ཤེས་ཟང་ཐལ་རྒྱུས་མ་བསྐྱེད། །རྒྱུ་མེད་འབྲས་བུ་ཤེས་པས་ ― DNG001_Page_0410 ―
[མ་དཔེ་གཟིགས་ན་འདིར་གནོན།]
ཆོག །ད་ཡང་རྡོ་རྗེ་སེམས་དཔའ་ཉོན། །རང་བྱུང་སྟོབས་ཀྱིས་འབྱུང་བའི་དཔེ། །ལྷ་ཡི་པཉྩ་ལི་ཀ་བཞིན། །རྒྱུ་རྐྱེན་མ་བསྐྱེད་རང་བྱུང་སྐུ། །སུས་ཀྱང་མ་བྱས་བྱས་པ་མེད། །དེ་ཕྱིར་ཆོས་ཉིད་བརྡལ་པའི་སྐུ། །རང་བྱུང་ཡེ་ཤེས་རྒྱུས་མ་བསྐྱེད། །རྐྱེན་མེད་རང་གསལ་རྒྱུན་མི་ཆད། །གཉེན་པོའི་རྐྱེན་གྱིས་བཅོས་སུ་མེད། །རྒྱུ་ལས་མ་བྱུང་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །སྐྱེ་མེད་རང་བྱུང་དོན་རྟོགས་ནས། །ཚོགས་གཉིས་མ་བསགས་ཁྱད་པར་འཕགས། །དེ་ཕྱིར་ཚོགས་བསགས་རྩེད་མོ་འདྲ། །དྲང་དོན་ཚོགས་བསག་གཡེངས་པས་ཕུང་། །གཟུགས་སྐུ་ཚོགས་གཉིས་ལས་མ་བྱུང་། །དེ་ཕྱིར་ཆོས་སྐུ་རྟོགས་གྱུར་ནས། །ཚོགས་མ་བསགས་པའི་གཟུགས་སྐུ་འབྱུང་། །དེ་ཕྱིར་རྒྱུ་མེད་འབྲས་བུ་ཡིན། །ད་ཡང་རྡོ་རྗེ་སེམས་དཔའ་ཉོན། །ངོ་བོ་གཅིག་ལ་ཐ་དད་མེད། །བྱད་དང་མེ་ལོང་གཟུགས་བརྙན་བཞིན། །ཆོས་སྐུའི་རྩལ་ནི་གཟུགས་སྐུ་གཉིས། །ཚོགས་མ་བསགས་པར་ཤུགས་ལས་འབྱུང་། །སྐུ་གསུམ་འགྲོ་དོན་ཐ་དད་ཀྱང་། །རྒྱུ་རྐྱེན་མ་བསྐྱེད་ཡེ་ནས་གནས། །དེ་ཕྱིར་ཆོས་སྐུའི་རང་རྩལ་འདི། །མཐོང་སྟོང་སྣ་ཚོགས་ཅིར་ཡང་འཆར། །དེ་ཙམ་ཉིད་ནས་རྒྱུ་རྐྱེན་བྲལ། །དཔེར་ན་ནམ་མཁའ་ཇི་བཞིན་ནོ། །རྫོགས་པ་ཆེན་པོ་ངེས་དོན་འདུས་པ་ལས། རྒྱུ་ལས་མ་བྱུང་བའི་འབྲས་བུ་བསྟན་པའི་ལེའུ་སྟེ་ང་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །ལུང་ལ་མ་བརྟེན་མན་ངག་འདི། །དད་ལྡན་འཁོར་ལ་བཀའ་སྩལ་པ། །སངས་རྒྱས་ཀུན་གྱི་ཡེ་ཤེས་སྐུ། །རང་བྱུང་ཡེ་ཤེས་རྟོགས་ལས་བྱུང་། །འདུས་མ་བྱས་པ་ནམ་མཁའ་འདྲ། །གང་ཡང་མེད་པའི་སྔོན་རོལ་དུ། །རང་བྱུང་ངོ་བོ་ཉིད་ཀྱི་གཞི། །ལུང་ལ་མ་བརྟེན་མན་ངག་ཆོས། །རང་གི་རིག་པས་རང་རྟོགས་ཕྱིར། །འཁྲུལ་མ་མྱོང་ལ་རྟོགས་མ་མྱོང་། །དེ་ཚེ་འཁོར་འདས་འབྱུང་བ་མེད། །གཞི་ཤེས་རང་བྱུང་རིག་པ་ལ། །གཞི་ནས་མ་རིག་མེད་པའི་ ― DNG001_Page_0411 ―
[མ་དཔེ་གཟིགས་ན་འདིར་གནོན།]
ཕྱིར། །རྐྱེན་གྱིས་སྔར་འཁྲུལ་མ་མྱོང་བས། །ལུང་ལྡན་གྱིས་ནི་བསྟན་མི་དགོས། །དེ་ཕྱིར་ལུང་ལས་མ་བྱུང་ཆོས། །ཡ་མཚན་རྨད་དུ་བྱུང་བའི་བཀའ། །སངས་རྒྱས་ཐམས་ཅད་དེ་ལས་བསྐྱེད། །ད་ཡང་འདུས་པའི་སྙིང་པོ་ཉོན། །རང་བྱུང་ཀུན་ཏུ་བཟང་པོ་ལ། །ཡུལ་མེད་འཛིན་པ་མེད་པའི་ཕྱིར། །ཡེ་ནས་རིག་པ་རང་ལ་ཤར། །དུས་དེ་ཉིད་དུ་མ་རིག་སངས། །དེ་ཕྱིར་ལུང་ལས་མ་བྱུང་བའི། །ངེས་དོན་སྙིང་པོའི་ཆོས་ཞེས་བྱ། །ད་ཡང་འདུས་པའི་སྙིང་པོ་ཉོན། །ཀུན་བཟང་སློབ་དཔོན་མེད་པའི་ཕྱིར། །ཕྱི་ནང་ཆོས་ཀུན་བཤད་ལུང་མེད། །དེ་ཕྱིར་གཞན་ལ་མ་བརྟེན་པར། །རང་གི་རིག་པས་ཤེས་པའི་ཕྱིར། །ལུང་ལ་མ་བརྟེན་མན་ངག་ཆོས། །རྒྱལ་བ་རྣམས་ཀྱི་རྟོགས་ཚུལ་ཡིན། །ད་ཡང་འདུས་པའི་སྙིང་པོ་ཉོན། །ལུང་ལ་མ་བརྟེན་ཆོས་སྐུ་ལ། །འཁོར་བ་བཙལ་གྱིས་མི་རྙེད་པས། །སངས་རྒྱས་ཀུན་ཏུ་བཟང་པོ་བྱ། །བག་ཆགས་གང་ཡང་མ་གོས་ཕྱིར། །རྟོགས་པས་མྱོང་ཕྱིར་ཡེ་ཤེས་རྒྱས། །ལུང་ལ་མ་བརྟེན་དམ་ཆོས་ཡིན། །དེ་ཕྱིར་དུས་གསུམ་སངས་རྒྱས་ཀུན། །བསྐྱེད་པར་བྱེད་པའི་མེས་པོ་ཡིན། །ད་ཡང་འདུས་པའི་སྙིང་པོ་ཉོན། །ཀུན་བཟང་སྤྲུལ་པ་རྣམ་གསུམ་གྱིས། །སྐུ་གསུང་ཐུགས་ཀྱི་སྒོ་ནས་ནི། །ཐེག་པའི་ཆོས་རྣམས་བཤད་པ་ཡང་། །ལུང་ལ་མ་བརྟེན་ཆོས་འདི་ནི། །བྱིན་གྱི་རླབས་ཀྱིས་བྱུང་བ་ཡིན། །ཞལ་ནས་ངེས་པར་བརྒྱུད་པ་ཡི། །མན་ངག་སྙིང་པོ་འདི་རྟོགས་ན། །རྟོགས་པ་མངོན་གྱུར་སངས་རྒྱས་ཡིན། །དེ་མེད་ཆོས་རྣམས་མ་ལུས་ཀུན། །སྤྲེ་འདྲའི་ལུང་གིས་བསླད་པའི་ཕྱིར། །ཐེག་དགུའི་ཆོས་རྣམས་རྐྱེན་གྱིས་བསྐྱེད། །དེ་ཕྱིར་ངེས་དོན་བཀའ་མ་ཡིན། །དེར་བརྟེན་སྒྲུབ་ཐབས་བསྟན་བཅོས་ཀུན། །བྱས་པའི་ཆོས་ཀུན་ཤིན་ཏུ་ནོར། །ཐེ་ཚོམ་མཁས་པ་ཡིན་ཟེར་ནས། །བསྟོད་ར་ལོ་རྒྱུས་མང་བཤད་ཀྱང་། །སྤྲེ་འདྲའི་ལུང་གིས་དམ་ཆོས་བསླད། །ཆུ་དང་འོ་མ་འདྲེས་པ་འདྲ། །དེ་ཕྱིར་སྤྲེ་འདྲ་ལུང་ངན་ལ། །བརྟེན་པས་ལམ་ནོར་རྟོག་པས་ཟིན། །དེ་ཕྱིར་སྡུག་བསྔལ་སྣ་ཚོགས་མྱོང་། །རྫོགས་ ― DNG001_Page_0412 ―
[མ་དཔེ་གཟིགས་ན་འདིར་གནོན།]
པ་ཆེན་པོ་ངེས་དོན་འདུས་པ་ལས། ལུང་ལ་མ་བརྟེན་པའི་མན་ངག་བསྟན་པའི་ལེའུ་སྟེ་ང་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ཆེ་བ་རྣམ་ལྔ་དབྱེ་བ་ཡི། །དབང་གི་ཆེ་བ་ཇི་ལྟར་ལགས། །ཆོས་སྐུའི་འཁོར་ནི་ཇི་ལྟར་དག །ལོངས་སྐུའི་འཁོར་གྱི་རོལ་པ་གང་། །སྤྲུལ་སྐུའི་འཁོར་གྱིས་རྟོགས་ཐབས་ཅི། །བྱང་ཆུབ་ཆེ་བ་ཇི་ལྟར་འབྱུང་། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སངས་རྒྱས་རྣམས་ཀྱི་བལྟ་བ་ནི། །ནམ་མཁའ་ཉི་མ་རྒྱ་མཚོ་བཞིན། །མ་སྤྲོས་མ་བསྡུས་རང་སྣང་ལ། །ཆོས་སྐུ་གསལ་ལ་མ་གཡོས་པའི། །ཀུན་ལ་ཁྱབ་པའི་རིག་པ་གསལ། །ད་ཡང་འདུས་པའི་སྙིང་པོ་ཉོན། །རང་རིག་ཆོས་སྐུ་གསལ་བའི་དོན། །ཉེ་བར་རིག་པ་རང་དབང་ཐོབ། །དེ་ལ་རྩོལ་བསྒྲུབ་བྱ་མི་དགོས། །དེ་ཕྱིར་སངས་རྒྱས་ཆོས་ཀྱི་སྐུ། །འབབ་ཆུ་མར་མེ་དུག་སྔགས་བཞིན། །དམིགས་པ་དྲག་དལ་སྒོ་ལྔ་གསལ། །རྣམ་རྟོག་ཉིད་ཀྱང་ཡེ་ཤེས་གསལ། །གསལ་བ་ཉིད་ཙམ་ནུབ་པ་མེད། །ད་ཡང་འདུས་པའི་སྙིང་པོ་ཉོན། །རྒྱལ་ཐབས་སྤྱི་བླུགས་ཆེ་བ་ཡིས། །མཚན་མ་ཟིལ་གྱིས་གནོན་པའི་ཕྱིར། །རིག་པའི་དབང་ཆེན་དང་པོ་ཡིས། །འདོད་ཁམས་ཉི་ཤུ་ཟིལ་གྱིས་གནོན། །ས་གཞི་ཆུ་ཟླ་གང་གཱ་བཞིན། །སྣ་ཚོགས་སྣང་བ་གཟུང་དུ་མེད། །ཆེ་བའི་ཡེ་ཤེས་རྒྱུན་མི་ཆད། །མེད་ལ་མི་ཟད་འབྱུང་བའི་གཏེར། །ད་ཡང་འདུས་པའི་སྙིང་པོ་ཉོན། །རིག་པ་རང་གསལ་ཆེ་བ་ཡིས། །འགྲོ་དྲུག་གཡང་ས་བཅད་པའི་ཕྱིར། །རང་བྱུང་ཆོས་སྐུ་ངོས་ཟིན་པས། །གཟུགས་ཁམས་བཅུ་བདུན་དེར་མི་གོལ། །ཁྱུང་དང་རིན་ཆེན་ཀླུ་གདུག་བཞིན། །ལུང་ལྡན་ངེས་པའི་གདམས་ངག་གིས། །ཆོས་སྐུ་རང་རིག་ངོས་ཟིན་ཕྱིར། །ཀུན་གཞི་དུས་གསུམ་རྩད་ ― DNG001_Page_0413 ―
[མ་དཔེ་གཟིགས་ན་འདིར་གནོན།]
ནས་བཅད། །དེ་ཕྱིར་རང་བྱུང་དོན་འདི་ཆེ། །ད་ཡང་རྡོ་རྗེ་སེམས་དཔའ་ཉོན། །ཡེ་ཤེས་སྤྱི་བླུགས་ཆེ་བ་ཡིས། །གོལ་ས་ཕྱི་ནང་ཆོད་པའི་ཕྱིར། །ངེས་པའི་དོན་ལ་བསྒོམ་མི་དགོས། །གཟུགས་མེད་ཁམས་བཞིར་དེ་མི་སྐྱེ། །ད་ཡང་འདུས་པའི་སྙིང་པོ་ཉོན། །རྒྱུན་དུ་འབྲལ་མེད་དམ་ཚིག་གིས། །ཡེ་ཤེས་ཆེན་པོར་ལ་ཟློས་པས། །ས་བཅུ་རིམ་གྱིས་དེས་མི་བགྲོད། །དེ་ཕྱིར་ངས་ལུང་རབ་ཏུ་གཅེས། །ད་ཡང་འདུས་པའི་སྙིང་པོ་ཉོན། །ངེས་པའི་དབང་གསུམ་གཅིག་ཏུ་རྟོགས། །དེ་ཕྱིར་མ་བཅོས་ཆོས་ཉིད་ཀྱིས། །བཅོས་པའི་མཚན་མ་ཟིལ་གྱིས་གནོན། །དམིགས་པ་མེད་པའི་ནམ་མཁའ་ཡིས། །དམིགས་པའི་འབྱུང་བ་ཟིལ་གྱིས་མནན། །སྐྱེ་བ་མེད་པའི་ཡེ་ཤེས་ཀྱིས། །སྐྱེ་བའི་ཕུང་པོ་ཟིལ་གྱིས་མནན། །ད་ཡང་འདུས་པའི་སྙིང་པོ་ཉོན། །རིག་པའི་ཆོས་ཀྱི་སྐུ་ཉིད་ནི། །དུས་གསུམ་སངས་རྒྱས་ཐམས་ཅད་ཀྱི། །འབྱུང་གནས་ཐམས་ཅད་ང་ཡི་ཐུགས། །འདི་ལས་མ་གཏོགས་སངས་རྒྱས་མེད། །རང་རིག་ངེས་དོན་དབང་ཆེན་ནི། །སངས་རྒྱས་ཀུན་གྱི་མེས་པོ་ཡིན། །འདི་ལས་མ་བྱུང་སངས་རྒྱས་མེད། །དེ་ཕྱིར་དབང་གསུམ་རབ་ཏུ་བསྔགས། །རྫོགས་པ་ཆེན་པོ་ངེས་དོན་འདུས་པ་ལས། རིག་པ་དབང་གི་ཆེ་བ་བསྟན་པའི་ལེའུ་སྟེ་ང་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ཆོས་སྐུའི་འཁོར་གྱི་ཆེ་བ་ནི། །བསྒོམ་པའི་སྐྱོན་ནི་རྣམ་དག་པས། །རང་རིག་ཡེ་ཤེས་ངོས་ཟིན་ཕྱིར། །ཆོས་སྐུ་རྟོག་པ་མེད་པའི་ངང་། །འབྱུང་བའི་འདོད་ཡོན་ལྔ་སྤྱོད་ཚེ། །ལོངས་སྤྱོད་རྫོགས་པའི་སྐུ་ཡི་ངང་། །འགྲོ་དྲུག་གཟུགས་སུ་སྣང་བའི་ཚེ། །སྤྲུལ་སྐུ་ཐུབ་པ་ཆེན་པོའི་ངང་། །ད་ཡང་རྡོ་རྗེ་སེམས་དཔའ་ཉོན། །དཔེར་ན་ཟངས་ལྕགས་རྣམ་པ་ལ། །གསེར་འགྱུར་རྩི་ཡིས་བཏབ་གྱུར་ན། །ཐམས་ཅད་གསེར་དུ་འགྱུར་བ་ལས། །ཟངས་དང་ལྕགས་སུ་མི་འགྱུར་བཞིན། །མ་རིག་རྟོག་པའི་མཚན་མ་ལ། །ཡེ་ཤེས་ཆོས་སྐུའི་རྩིས་ཐེབས་ན། ། ― DNG001_Page_0414 ―
[མ་དཔེ་གཟིགས་ན་འདིར་གནོན།]
ཁམས་གསུམ་འཁོར་བ་མིང་མེད་ཅིང་། །གདོད་ནས་མ་སྤངས་ཡེ་སངས་རྒྱས། །རྩ་བ་མེད་པར་ཡེ་ནས་གྲུབ། །ད་ཡང་འདུས་པའི་སྙིང་པོ་ཉོན། །མི་ནུབ་པ་ལ་དོན་གསལ་ཕྱིར། །དེ་ཉིད་ལྷུན་གྲུབ་དོན་རྟོགས་ནས། །རྟག་ན་ཡེ་ཤེས་ཆེན་པོ་རྟག །ཆད་ན་འཁོར་བ་རྩད་ནས་ཆོད། །ལྡན་ན་སྐུ་གསུང་ཐུགས་སུ་ལྡན། །སྣང་ན་རང་རིག་ཡེ་ཤེས་སྣང་། །ཡིན་ན་ཡེ་ནས་སངས་རྒྱས་ཡིན། །མིན་ན་ཁམས་གསུམ་འཁོར་བ་མིན། །དག་ན་རྣམ་རྟོག་མཚན་མ་དག །ད་ཡང་འདུས་པའི་སྙིང་པོ་ཉོན། །གོལ་ན་ཆོས་ཀྱི་སྐུ་རུ་གོལ། །འཕྲོས་ན་ཆོས་ཀྱི་དབྱིངས་སུ་འཕྲོས། །བྱིང་ན་ཡེ་ཤེས་བློང་དུ་བྱིང་། །གསལ་ན་རང་བྱུང་ཆོས་སྐུར་གསལ། །འཕྱོ་ན་ཆོས་ཉིད་ཀློང་དུ་འཕྱོ། །དེ་རྟོགས་ཡོན་ཏན་སྐྱོན་རྣམས་ཀུན། །ཆོས་སྐུར་འདུས་པའི་དོན་རྟོགས་ན། །རྣམ་རྟོག་ཉིད་ཀྱང་ཡེ་ཤེས་ཡིན། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཡེ་ཤེས་ཆོས་སྐུ་ལ། །མ་བསྒོམས་ཡེ་ཤེས་ཆེན་པོའི་དོན། །བརྗོད་པ་མེད་པའི་ཤེས་རབ་ལ། །དམིགས་པ་མེད་པའི་ཏིང་འཛིན་གསལ། །ཤེས་པ་དྲང་ཐད་སོ་མ་ལ། །འདུ་ཤེས་མི་བསྒྱུར་བརྟུལ་ཞུགས་བསྐྱེད། །ཅི་ཡང་མི་བསྒོམ་གང་ཡང་མིན། །ཡེ་ཤེས་ཟང་ཐལ་ཉིད་དུ་བཞག །རྫོགས་པ་ཆེན་པོ་ངེས་དོན་འདུས་པ་ལས། ཆོས་སྐུའི་འཁོར་གྱི་ཆེ་བས་སྣང་བ་དག་པར་བསྟན་པའི་ལེའུ་སྟེ་ང་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ལོངས་སྐུའི་འཁོར་གྱི་སྣང་བ་ནི། །ཀུན་བཟང་རོལ་བར་དག་པའི་ཕྱིར། །སྡུག་བསྔལ་སྣ་ཚོགས་སྐྱེས་པའི་ཚེ། །ཡེ་ཤེས་བདེ་བ་ཆེན་པོའི་ངང་། །ཕྱི་ནང་སྒྲ་སྐད་སྣ་ཚོགས་པ། །གསང་སྔགས་གསུང་གི་འཁོར་ལོ་ཡིན། །རྐྱེན་གྱིས་ཆགས་སྡང་སྐྱེས་པའི་ཚེ། །རང་བྱུང་ཡེ་ཤེས་ཤར་བ་ཡིན། །ཤྭ་དང་སེར་བ་ལ་སོགས་པ། །ཀུན་བཟང་ཐུགས་རྗེའི་རོལ་པ་ཡིན། །ངན་གྲོག་ཚེར་དོང་གཡང་ས་ཡང་། །རྣམ་པར་དག་པའི་ཞིང་ཁམས་ཡིན། །ད་ཡང་ ― DNG001_Page_0415 ―
[མ་དཔེ་གཟིགས་ན་འདིར་གནོན།]
འདུས་པའི་སྙིང་པོ་ཉོན། །མཚན་མ་སྤངས་པའི་ཕ་རོལ་ན། །བསྒོམ་པ་བྱ་བ་ལོགས་ན་མེད། །སྡུག་བསྔལ་སྤངས་པའི་ཕ་རོལ་ན། །བདེ་བ་བྱ་བ་ལོགས་ན་མེད། །གཏི་མུག་སྤངས་པའི་ཕ་རོལ་ན། །རང་རིག་ཡེ་ཤེས་ལོགས་ན་མེད། །འདོད་ཆགས་སྤངས་པའི་ཕ་རོལ་ན། །བདེ་ཞིང་སྐྱིད་པ་ལོགས་ན་མེད། །ཞེ་སྡང་སྤངས་པའི་ཕ་རོལ་ན། །སྙིང་རྗེ་བྱ་བ་ལོགས་ན་མེད། །འཁོར་བ་སྤངས་པའི་ཕ་རོལ་ན། །མྱ་ངན་འདས་པ་ལོགས་ན་མེད། །ད་ཡང་འདུས་པའི་སྙིང་པོ་ཉོན། །རང་རིག་སྤངས་པའི་ཕ་རོལ་ན། །སངས་རྒྱས་ཞེས་པའི་མིང་ཡང་མེད། །ཆོས་ཅན་སྤངས་པའི་ཕ་རོལ་ན། །ཆོས་དབྱིངས་རྣམ་དག་ལོགས་ན་མེད། །ཆོས་ཉིད་ཡེ་ནས་བསྒོམ་པ་མེད། །སེམས་ལ་དམིགས་པ་མེད་པའི་ཕྱིར། །རང་གསང་དམ་པའི་སྙིང་པོ་འདི། །སངས་རྒྱས་ཀུན་གྱི་ངེས་པའི་དོན། །ཡང་དག་རང་བྱུང་ཆོས་སྐུ་ནི། །མི་དམིགས་པར་ཡང་བསྒོམ་དུ་མེད། །བྱ་བྲལ་ནམ་མཁའ་ཇི་བཞིན་ནོ། །རྫོགས་པ་ཆེན་པོ་ངེས་དོན་འདུས་པ་ལས། ལོངས་སྐུའི་འཁོར་གྱི་སྣང་བ་གྲོལ་བར་བསྟན་པའི་ལེའུ་སྟེ་ང་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སྤྲུལ་སྐུའི་འཁོར་གྱི་ཆེ་བ་ནི། །རྟོག་མེད་ཡང་དག་ངས་བཤད་ཀྱི། །ལེགས་པར་ཉོན་ལ་ཡིད་ལ་ཟུང་། །རང་བྱུང་སྙིང་པོ་ངེས་དོན་འདི། །ལུང་ལྡན་རྟོགས་པའི་ཡེ་ཤེས་ཀྱིས། །གལ་ཏེ་མཚན་མ་རྒྱུ་ན་ཡང་། །དྲན་རྟོག་དགག་བསྒྲུབ་མེད་པའི་ཕྱིར། །རྣལ་འབྱོར་སྤྱོད་ལམ་ཐམས་ཅད་དུ། །མ་དྲན་གཉིད་དང་དུབ་ལ་སོགས། །གར་དགར་སོང་ཚེ་དེ་ཉིད་ལ། །ངོ་བོ་ཉིད་དྲན་གནོད་མི་ནུས། །ད་ཡང་རྡོ་རྗེ་སེམས་དཔའ་ཉོན། །གདམས་ངག་རྐྱེན་དང་ཕྲད་ཙམ་ན། །དབང་པོ་རབ་ཀྱིས་བཙལ་དུ་མེད། །ཐ་མས་མི་རྟོག་གདམས་ངག་མིན། །སྒྱུ་མའི་ལུས་ལ་སྤྱོད་པས་འཁྲུལ། །དང་པོ་ཀུན་བཟང་ཐུགས་རྗེས་ཀྱང་། །དོན་ཉིད་ཚིག་ཏུ་ཕྱུང་བའི་ཕྱིར། །ཚིག་གིས་དོན་ནི་མཚོན་པར་ནུས། །ཚིག་ཉིད་དོན་མིན་ཟེར་བ་འཁྲུལ། །ད་ཡང་འདུས་པའི་ ― DNG001_Page_0416 ―
[མ་དཔེ་གཟིགས་ན་འདིར་གནོན།]
སྙིང་པོ་ཉོན། །གང་ཟག་བཀྲི་དོན་བདེན་གཉིས་བྲལ། །ཡང་དག་སྙིང་པོའི་ཆོས་ཉིད་ལ། །བསྒོམ་དུ་ཡོད་དང་མེད་པ་ཡི། །ཚིག་ཏུ་འཛིན་མེད་ཡེ་ནས་བདེན། །སྣང་བའི་ཡུལ་ལ་རྟོག་མེད་ཕྱིར། །སེམས་ལ་གཏད་ཅིང་གཟུང་དུ་མེད། །ཇི་སྲིད་བར་དུ་གཏད་ཡོད་ན། །དེ་སྲིད་བར་དུ་འཁྲུལ་པ་ཡིན། །དེ་ཕྱིར་གཏད་དང་གཟུང་དུ་མེད། །དེ་ལ་སྐྱོན་གྱིས་གོས་པ་མེད། །ད་ཡང་འདུས་པའི་སྙིང་པོ་ཉོན། །རང་རིག་ཆོས་སྐུའི་དགོངས་པ་འདི། །སེམས་ལས་འདས་པའི་སངས་རྒྱས་ལ། །གང་ཡང་མ་སྤངས་རིག་པར་གསལ། །དེ་དོན་སངས་རྒྱས་དགོངས་པ་ཡིན། །སེམས་མེད་ཆོས་སྐུ་རྟོགས་པའི་ཕྱིར། །ཡུལ་ཉིད་སེམས་སུ་མི་བསྒོམ་པས། །བསྒོམ་པ་པོ་ཡང་མེད་པར་འགྱུར། །གང་གིས་གང་ལ་བསམ་ཞིང་བསྒོམས། །དེ་ཕྱིར་རང་སེམས་རྟོགས་པས་ཆོག །ད་ཡང་འདུས་པའི་སྙིང་པོ་ཉོན། །རང་གསལ་སྣང་ལ་ཞེན་མེད་པས། །རྒྱུན་དུ་ཡོད་པའི་ཆོས་ཉིད་ལ། །མ་ཡེངས་དོན་ལ་གང་གནས་པ། །དེ་ནི་རྣལ་འབྱོར་དམ་པའི་ལམ། །རྫོགས་པ་ཆེན་པོ་ངེས་དོན་འདུས་པ་ལས། སྤྲུལ་པའི་སྐུ་འཁོར་གྱི་ཆེ་བས་མཚན་མའི་རྣམ་རྟོག་དག་པར་བསྟན་པའི་ལེའུ་སྟེ་ང་དགུ་པའོ།། །།དེ་ནས་ཀུན་རིག་རྒྱལ་པོ་ཡིས། །བྱང་ཆུབ་སེམས་ཀྱི་ཆེ་བའི་དོན། །འདུས་པའི་འཁོར་ལ་བཀའ་སྩལ་པ། །མ་རྟོགས་བསྒོམ་སྐྱོན་རྣམ་དག་པའི། །སྙིང་པོ་དོན་གྱི་འབྲས་བུའི་ཆོས། །གང་ཞིག་སྣོད་དང་ལྡན་པ་ཡིས། །ཤེས་ནས་དེ་ལ་གང་གནས་པ། །རང་རིག་ཉིད་ལ་དབང་ཐོབ་ཕྱིར། །སྐྱེ་བ་གཞན་དུ་མི་ལེན་པར། །སངས་རྒྱས་རིགས་ཅན་འཛིན་པ་ཐོབ། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཆོས་སྐུ་དེ་ཉིད་ནི། །ཇི་བཞིན་མ་བཅོས་མ་བསླད་པ། །དེ་བཞིན་ཉིད་དུ་བློ་བཞག་ནས། །ཡེ་ཤེས་དེ་ཉིད་མ་ཡིན་པ། །བསྒྲུབ་དང་གྲུབ་པ་ག་ལ་ཡོད། །དེ་ཡང་འདུས་པའི་སྙིང་པོ་ཉོན། །དེ་ཕྱིར་ཡེ་ཤེས་མངོན་གྱུར་ན། །མེད་ལ་མི་ཟད་རིན་ཆེན་གཏེར། །ཁམས་གསུམ་རིན་ཆེན་རྙེད་པའི་མི། ། ― DNG001_Page_0417 ―
[མ་དཔེ་གཟིགས་ན་འདིར་གནོན།]
ཇི་ལྟར་འདོད་པ་བཞིན་དུ་འགྱུར། །དེ་བཞིན་ཡེ་ཤེས་ཆོས་སྐུ་འདི། །རྟོགས་པས་ཆོག་ཕྱིར་རང་བྱུང་སྐུ། །ཆེ་བའི་ཡོན་ཏན་རྒྱུན་མི་འཆད། །ཅིར་ཡང་ཀུན་འབྱུང་ཆོས་ཀྱི་གཏེར། །དེ་བཞིན་ཉིད་དུ་ཀུན་རིག་ན། །འཁོར་བ་དང་ནི་མྱ་ངན་འདས། །སོ་སོར་ཡོད་པ་མ་ཡིན་ཏེ། །དེ་བཞིན་ཉིད་དེ་རྟོགས་ངེས་ན། །དེ་ལ་འཁོར་བའི་རང་བཞིན་མེད། །ད་ཡང་རྡོ་རྗེ་སེམས་དཔའ་ཉོན། །བྱང་ནི་ཉོན་མོངས་བག་ཆགས་བྱང་། །ཆུབ་ནི་ཆོས་སྐུ་ཐིག་ལེར་ཆུབ། །སེམས་ནི་སྐྱོན་བྲལ་འགྱུར་བ་མེད། །ཆེ་བ་རང་བྱུང་ཡེ་ཤེས་ཆེ། །དེ་ཕྱིར་བྱང་ཆུབ་སེམས་ཞེས་གསུངས། །ད་ཡང་འདུས་པའི་སྙིང་པོ་ཉོན། །མ་བཅོས་པ་ཡི་མན་ངག་གིས། །ལྟ་བ་སྤངས་པའི་ནམ་མཁའ་ལ། །འཛིན་རྟོག་མེད་པའི་ཡེ་ཤེས་བརྡལ། །གང་ཡང་མ་སྤངས་ལྷུན་གྱིས་གྲུབ། །མི་གཡོ་མི་རྟོག་དེ་ལ་བལྟ། །དེ་མཐོང་མུན་པ་རྣམ་དག་སངས། །སངས་རྒྱས་ཀུན་གྱི་མཆོག་ཏུ་བཤད། །རྫོགས་པ་ཆེན་པོ་ངེས་དོན་འདུས་པ་ལས། བྱང་ཆུབ་སེམས་ཀྱི་ཆེ་བ་བསྟན་པའི་ལེའུ་སྟེ་དྲུག་ཅུ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཀུན་རིག་སྟོན་པ་ཆོས་རྗེ་ལ། །བདེན་པའི་ཡིད་ཀྱིས་འདི་སྐད་གསོལ། །གཉིས་མེད་གསུམ་གྱིས་ལ་བཟླ་བའི། །སངས་རྒྱས་སེམས་ཅན་ཇི་ལྟར་གཅིག །སྐྱོན་ཡོན་གཞི་ལ་ཇི་ལྟར་མེད། །འཁྲུལ་པ་མ་རིག་གང་ལྟར་དག །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལ་བཟླ་བ་ཡི་གཏན་ཚིགས་ནི། །དུས་གསུམ་སངས་རྒྱས་ཐམས་ཅད་ནི། །ཡང་དག་རྟོགས་པའི་ངོ་བོར་གཅིག །དེས་ན་རྟོགས་པ་ཡེ་ཤེས་ཡིན། །ད་ཡང་འདུས་པའི་སྙིང་པོ་ཉོན། །སེམས་ཅན་ཀུན་གཞི་ལ་གནས་པའི། །བདེ་གཤེགས་སྙིང་པོ་ཆོས་སྐུ་དེ། །ཀུན་ཁྱབ་ངོ་བོ་རང་བྱུང་ཐུགས། །དེ་ཕྱིར་སངས་རྒྱས་སེམས་ཅན་གཅིག །རིག་དང་མ་རིག་གཉིས་ཀའི་གཞི། །རང་བྱུང་ངོ་བོ་ཉིད་ཀྱི་སྐུ། །དེ་ཕྱིར་གཉིས་སུ་མེད་པ་ནི། །ངེས་ ― DNG001_Page_0418 ―
[མ་དཔེ་གཟིགས་ན་འདིར་གནོན།]
པའི་དོན་དུ་ལ་བཟླའོ། །ད་ཡང་རྡོ་རྗེ་སེམས་དཔའ་ཉོན། །རང་གི་ངོ་བོ་ཀུན་གྱི་གཞི། །སངས་རྒྱས་སེམས་ཅན་གཉིས་ལ་གནས། །དེ་ཕྱིར་ངོ་བོ་གཅིག་པ་ནི། །རྒྱལ་བ་ཀུན་གྱིས་རབ་ཏུ་བསྔགས། །ཆོས་ཀྱི་སྙིང་པོ་རང་བྱུང་སྐུ། །འཁོར་འདས་རྩ་བ་དེ་ཡིན་ཕྱིར། །དེ་ལས་སངས་རྒྱས་སེམས་ཅན་བྱུང་། །དེ་ཕྱིར་རང་བྱུང་ཀུན་གྱི་གཞི། །དཔེར་ན་མར་མེ་སྟོང་བཏང་ཡང་། །འོད་ཀྱི་ངོ་བོ་གཅིག་ལས་མེད། །དེ་བཞིན་སངས་རྒྱས་རྣམས་ལ་ཡང་། །ཐུགས་ནི་ཐིག་ལེ་ཉིད་དུ་འདུས། །སེམས་ཅན་རྣམས་ཀྱི་རྣམ་སྨིན་ནི། །མ་རིག་རྐྱེན་གྱིས་བསྐྱེད་པའི་ཕྱིར། །སྐྱེ་འགྲོ་གཟུགས་སོགས་མང་གྱུར་ཀྱང་། །དོན་མ་ཤེས་པས་སེམས་ཅན་དེ། །བསྐལ་པར་འཁྱམས་ཀྱང་སྟོང་བྲལ་མེད། །དེ་ཕྱིར་སངས་རྒྱས་སེམས་ཅན་གཅིག །གཅིག་ལས་འཁོར་འདས་སྣ་ཚོགས་བསྐྱེད། །དེ་ཕྱིར་རང་བྱུང་ངོ་བོ་དེ། །རྟོགས་པར་བྱ་བ་ཤིན་ཏུ་གཅེས། །ད་ཡང་འདུས་པའི་སྙིང་པོ་ཉོན། །སངས་རྒྱས་ཐུགས་དང་སེམས་ཅན་སེམས། །སོ་སོར་སྣང་བ་མ་ཡིན་ཏེ། །རྩ་བ་ཆོས་སྐུར་རོ་གཅིག་པས། །གཉིས་སུ་མེད་པར་ལ་བཟླའོ། །རྫོགས་པ་ཆེན་པོ་ངེས་དོན་འདུས་པ་ལས། སངས་རྒྱས་སེམས་ཅན་གཞི་གཅིག་པར་ལ་བཟླ་བསྟན་པའི་ལེའུ་སྟེ་རེ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སྐྱོན་ཡོན་གཞི་ལ་མེད་པའི་དོན། །འཁོར་བ་དག་གི་སྡུག་བསྔལ་ནི། །ཉོན་མོངས་བརྒྱད་ཁྲི་བཞི་སྟོང་དང་། །ནད་ནི་བཞི་བརྒྱ་རྩ་གཅིག་དང་། །ཡེ་འདྲོག་སུམ་བརྒྱ་དྲུག་ཅུ་ཡང་། །སྐྱེ་རྒ་ན་འཆི་བཞི་རུ་འདུས། །སངས་རྒྱས་རྣམས་ཀྱི་ཆེ་བ་ནི། །དཔེ་བྱད་བཟང་པོ་བརྒྱད་ཅུ་དང་། །མཚན་ནི་སུམ་ཅུ་རྩ་གཉིས་དང་། །སྟོབས་དང་མི་འཇིགས་ལ་སོགས་པ། །ཐིག་ལེ་ཆོས་སྐུ་རྟོགས་པར་འདུས། །ད་ཡང་རྡོ་རྗེ་སེམས་དཔའ་ཉོན། །བསོད་ནམས་ཚོགས་བསྐྱེད་འབྲས་བུ་ནི། །སངས་རྒྱས་ཆེ་བའི་ཡོན་ཏན་ཡིན། །མ་རིག་པ་ལ་སོགས་པ་ ― DNG001_Page_0419 ―
[མ་དཔེ་གཟིགས་ན་འདིར་གནོན།]
ཡིས། །སེམས་ཅན་ལུས་དང་བག་ཆགས་ཡིན། །དགེ་སྡིག་གཉིས་ཀྱི་འབྲས་བུ་ནི། །དྲང་དོན་ཆོས་ལ་བདེན་འཛིན་ཀྱང་། །གཞི་ལ་སྐྱོན་ཡོན་གཉིས་མེད་ཕྱིར། །བླང་དོར་མེད་པར་ལ་བཟླའོ། །ད་ཡང་འདུས་པའི་སྙིང་པོ་ཉོན། །དཔེར་ན་འཁྲུལ་པའི་སྣང་བ་ཡང་། །གཙང་དང་མི་གཙང་གཉིས་ཀའི་གཞི། །ལུད་པ་ལ་སོགས་གང་རུང་ལ། །བྱ་ཁྱི་གཉིས་ཀྱིས་ཟས་སུ་མཐོང་། །མི་རྣམས་ཀྱིས་ནི་མི་གཙང་མཐོང་། །དེ་ཕྱིར་སྣང་བ་མ་ངེས་ཕྱིར། །དོན་ལ་བླང་དོར་མེད་པ་ཡིན། །ད་ཡང་འདུས་པའི་སྙིང་པོ་ཉོན། །གཞི་ལ་སྣང་བ་མེད་པ་ཡང་། །རང་གི་རང་སེམས་འཁྲུལ་པའི་ཕྱིར། །འཇིག་རྟེན་ཆོས་ལ་བླང་དོར་བྱས། །དེ་ཕྱིར་མ་རིག་རྨོངས་པས་ནོར། །དེ་བས་སྣང་ཞིང་གྲག་པའི་ཆོས། །མེད་ལ་ཡོད་འཛིན་བག་ཆགས་བློས། །ཆོས་བརྒྱད་བཟང་ངན་གཙང་སྨེ་ལ། །སྤང་སྡུད་བླང་དོར་མེད་པར་ནི། །མ་ཞེན་དམ་པར་བལྟ་མེད་ན། །སྣང་བ་རང་སར་གྲོལ་བའི་ཕྱིར། །བླང་དོར་མེད་པར་ལ་བཟླའོ། །ད་ཡང་འདུས་པའི་སྙིང་པོ་ཉོན། །ཡང་དག་ཆོས་སྐུ་གཅིག་གཅིག་ལ། །གང་ཡང་མེད་ཕྱིར་བླང་དོར་མེད། །དེ་ཕྱིར་ངེས་དོན་སྙིང་པོ་ལ། །བསྒོམ་དུ་ཡོད་མེད་འབྲལ་བ་མེད། །ངེས་དོན་སངས་རྒྱས་དགོངས་པ་ལ། །ཉི་ཤར་མུན་པ་མེད་པ་ལྟར། །ངེས་དོན་རྟོགས་པས་སྐྱོན་ཡོན་མེད། །དེ་ཕྱིར་བླང་དོར་མེད་པ་ཡིན། །ད་ཡང་འདུས་པའི་སྙིང་པོ་ཉོན། །ཆོས་སྐུ་ཡེ་ཤེས་ངོས་ཟིན་ན། །གང་ཡང་རང་བྱུང་ལྷུན་གྲུབ་ཆོས། །དེ་ལས་གཞན་པའི་ཆོས་མེད་ཕྱིར། །བླང་དོར་མེད་པར་ལ་བཟླའོ། །རྫོགས་པ་ཆེན་པོ་ངེས་དོན་འདུས་པ་ལས། སྐྱོན་ཡོན་གཞི་ལ་མེད་པར་ལ་བཟླ་བའི་ལེའུ་སྟེ་རེ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ཆོས་སྐུ་གཞི་ངེས་རྟོགས་པ་ལ། །མ་རིག་མེད་པས་དུག་ལྔ་གྲོལ། །ཐམས་ཅད་རང་བྱུང་ཆོས་སྐུར་གསལ། །ལུང་ལྡན་རྐྱེན་གྱིས་མ་རིག་དག །དུག་ལྔ་བྱང་ཆུབ་ལམ་ཡིན་ཕྱིར། །སྐུ་ལྔ་ལྷུན་གྲུབ་ ― DNG001_Page_0420 ―
[མ་དཔེ་གཟིགས་ན་འདིར་གནོན།]
ཡེ་ནས་རྫོགས། །འདོད་ཆགས་ལོངས་སྤྱོད་རྫོགས་པའི་སྐུ། །ཞེ་སྡང་སྤྲུལ་སྐུ་ཡེ་སངས་རྒྱས། །གཏི་མུག་ཆོས་སྐུ་མ་རིག་སངས། །ང་རྒྱལ་ངོ་བོ་ཉིད་སྐུར་དག །ཕྲག་དོག་གསང་བའི་སྐུ་རུ་རྫོགས། །དུག་ལྔ་གཅིག་ཤེས་བྱང་ཆུབ་སྐུ། །ད་ཡང་འདུས་པའི་སྙིང་པོ་ཉོན། །ཡེ་ཤེས་ཡོད་ན་མ་རིག་མེད། །དེ་ཕྱིར་ལུང་ལྡན་ངེས་པའི་དོན། །བཀའ་བརྒྱུད་ཆོས་འདི་སངས་རྒྱས་གསུང་། །མ་རིག་སེལ་བའི་སྒྲོན་མེ་ཡིན། །ཉི་ཟླས་དེ་ལ་འགྲན་མི་ནུས། །མ་རིག་མེད་ཕྱིར་སངས་རྒྱས་འགྲུབ། །ཡེ་ཤེས་ཤར་བས་ཐམས་ཅད་མཁྱེན། །ད་ཡང་རྡོ་རྗེ་སེམས་དཔའ་ཉོན། །ཐིག་ལེ་རྟོགས་པས་གང་ཡང་འགྲུབ། །ཀུན་གཞི་བརླག་པས་ཡོན་ཏན་རྫོགས། །སྣང་བ་མེད་པས་ཞིང་ཁམས་དག །སེམས་དང་བྲལ་བས་ཆོས་སྐུ་གསལ། །མ་རིག་མེད་པས་གཞི་དང་ཕྲད། །རྟེན་པ་མེད་པས་རེ་བ་མེད། །གོལ་ས་མེད་པས་ལྷུང་བ་མེད། །འཁོར་བ་མེད་པས་དོགས་པ་བྲལ། །ད་ཡང་འདུས་པའི་སྙིང་པོ་ཉོན། །བསྒོམ་དུ་མེད་པས་ཡེངས་མི་སྲིད། །སྐྱེ་འགག་མེད་པས་བྱིང་རྒོད་སངས། །རང་བྱུང་རིག་པའི་ཡེ་ཤེས་འདི། །སུས་ཀྱང་མ་བྱས་བྱས་པ་མེད། །དེ་ཕྱིར་ཆོས་ཀྱི་སྙིང་པོ་ཡིན། །རྫོགས་པ་ཆེན་པོ་ངེས་དོན་འདུས་པ་ལས། མ་རིག་པ་གཞི་ལ་མེད་ཅིང་དག་པར་བསྟན་པའི་ལེའུ་སྟེ་རེ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ཆོས་རྣམས་སྐྱེ་བ་ཇི་ལྟར་མེད། །རོལ་པ་འགག་མེད་ཇི་ལྟར་འབྱུང་། །མཚན་ཉིད་གཉིས་མེད་གཏན་ཚིགས་གང་། །རང་བློ་ངོ་བོར་ཇི་ལྟར་གྲོལ། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རང་བཞིན་སྐྱེ་མེད་གཏན་ཚིགས་ནི། །གཞི་ལ་སྣང་བ་མེད་པའི་ཕྱིར། །ཆོས་རྣམས་ཐམས་ཅད་སྤྲོས་དང་བྲལ། །དེ་ཕྱིར་རང་བཞིན་སྐྱེ་བ་མེད། ། ― DNG001_Page_0421 ―
[མ་དཔེ་གཟིགས་ན་འདིར་གནོན།]
ཚིག་ཏུ་སྨྲ་བརྗོད་ཡུལ་ལས་འདས། །བརྗོད་མེད་དོན་ལ་ཡིད་ཆེས་ཕྱིར། །རང་གསལ་སྐྱེ་མེད་ཆོས་ཀྱི་སྐུ། །དེ་དོན་ངེས་པར་རྟོགས་པས་ཆོག །ད་ཡང་འདུས་པའི་སྙིང་པོ་ཉོན། །ཆོས་སྐུ་སྟོང་པའི་རང་བཞིན་ལ། །ངོ་བོ་ཉིད་ཀྱིས་དམིགས་སུ་མེད། །དེ་ཕྱིར་ཡེ་ཤེས་ཀློང་གི་ལམ། །རྟོག་པས་སྨྲ་བསམ་ཡུལ་ལས་འདས། །དངོས་གཞི་མེད་ཕྱིར་སྐྱེ་བ་མེད། །སྐྱེ་མེད་དོན་དེ་སུས་རྟོགས་པ། །དེ་ནི་རྣལ་འབྱོར་དམ་པའི་ཐུགས། །སྐྱེ་མེད་དོན་ལ་ཡིད་ཆེས་པའི། །རང་བྱུང་ཐུགས་ལ་ཡེ་ཤེས་ལུས། །ཁ་དོག་དབྱིབས་སུ་མེད་པའི་ཕྱིར། །དངོས་པོ་ཡུལ་གྱི་མཐའ་ལས་འདས། །སྐྱེ་མེད་དོན་ནི་དེ་བཞིན་གཤེགས། །རང་གི་ངོ་བོ་བརྗོད་དུ་མེད། །རྒྱུ་མེད་ཕྱིར་ན་སྐྱེ་བ་མེད། །རྐྱེན་མེད་ཕྱིར་ན་འཇིག་པ་མེད། །དེ་ཕྱིར་སེམས་དང་བྲལ་བའི་ཐུགས། །ད་ཡང་འདུས་པའི་སྙིང་པོ་ཉོན། །རང་བཞིན་སྐྱེ་མེད་སྤྲོས་དང་བྲལ། །བརྗོད་དུ་མེད་པར་རང་ཡིད་ཆེས། །རྒྱུ་རྐྱེན་མ་བསྐྱེད་དོན་གྱི་ཕྱིར། །ལྷུན་གྱིས་གྲུབ་པར་ཐག་ཆོད་དོ། །རྫོགས་པ་ཆེན་པོ་ངེས་དོན་འདུས་པ་ལས། རང་བཞིན་སྐྱེ་བ་མེད་པའི་གཏན་ཚིགས་བསྟན་པའི་ལེའུ་སྟེ་རེ་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །རོལ་པ་གང་ཡང་མི་འགག་པས། །སྐྱེ་མེད་སྐྱེ་བའི་ཆོ་འཕྲུལ་འབྱུང་། །དེ་ཕྱིར་རོལ་པ་འགག་མེད་པས། །སངས་རྒྱས་ཀུན་གྱི་ཆེ་བ་བཤད། །ད་ཡང་འདུས་པའི་སྙིང་པོ་ཉོན། །ཕྱི་ནང་འབྱུང་བ་སྣ་ཚོགས་པ། །སྣང་སྟོང་དབྱེར་མེད་ཀུན་ཁྱབ་མངའ། །མཐའ་དབུས་མེད་ལས་ཐམས་ཅད་འབྱུང་། །དེ་ཕྱིར་ནམ་མཁའ་ཀུན་གྱི་གཞི། །རྩི་ཤིང་ནགས་ཚལ་ཐམས་ཅད་བསྐྱེད། །ཐེག་ཆེན་པོ་ལ་ཀུན་གནས་པ། །བྱང་ཆུབ་དཔེར་ནི་བསྟན་པའི་ཕྱིར། །དེས་ནི་རོལ་པ་འགག་པ་མེད། །ཐམས་ཅད་སྡུད་པར་བྱེད་པའི་ཕྱིར། །གཞི་གནས་རྣམ་དག་ཆུ་ཆེན་པོས། །མི་གཙང་གོལ་སྒྲིབ་འཁྲུད་པའི་དཔེ། །དེ་ཕྱིར་རོལ་པ་འགག་པ་མེད། །གང་ཡང་ཆགས་པའི་རྟེན་མེད་ཕྱིར། །ཤེས་བྱར་ཐོགས་མེད་ཡེ་ཤེས་རླུང་། །མ་ ― DNG001_Page_0422 ―
[མ་དཔེ་གཟིགས་ན་འདིར་གནོན།]
རིག་རྣམ་རྟོག་འཐོར་བའི་དཔེ། །དེ་ཕྱིར་ཀུན་བཟང་རོལ་བར་བསྟན། །ཐམས་ཅད་མ་ལུས་ཀུན་བསྲེག་ཕྱིར། །ལྷག་མཐོང་ཡེ་ཤེས་འོད་འབར་མེ། །བྱིང་རྒོད་མཐར་འཛིན་འཇོམས་པའི་དཔེ། །དེ་ཕྱིར་རོལ་པ་འགགས་པ་མེད། །ད་ཡང་འདུས་པའི་སྙིང་པོ་ཉོན། །ཆོས་སྐུ་ངོ་བོ་ཉིད་ཀྱི་རྩལ། །སྣང་བ་འདི་ནི་ཆོས་ཀྱི་དབྱིངས། །དེ་ཡང་རང་གསལ་ཆོས་ཉིད་རྩལ། །འབྱུང་བ་ཡེ་ཤེས་ལྔ་རུ་དག །དེ་ཕྱིར་འགག་མེད་རོལ་པ་ཡིན། །ད་ཡང་རྡོ་རྗེ་སེམས་དཔའ་ཉོན། །ཐེག་པའི་ཆོས་རྣམས་ཐམས་ཅད་ནི། །མ་འདྲེས་ཡོངས་རྫོགས་གསལ་སྟོང་གཟུགས། །ཅིར་ཡང་སྣང་བ་སྤྲུལ་པའི་སྐུ། །དེ་ཕྱིར་རོལ་པ་འགག་མེད་ཡིན། །སྣང་སྲིད་འབྱུང་བའི་སྒྲ་སྐད་ཀུན། །ཁྱད་གསལ་རང་བཞིན་གོ་བའི་སྒྲ། །གསང་སྔགས་གསུང་གི་འཁོར་ལོར་ཤར། །དེ་ཡང་འགག་མེད་རོལ་པ་ཡིན། །ད་ཡང་འདུས་པའི་སྙིང་པོ་ཉོན། །རང་གིས་ངེས་པའི་ཡེ་ཤེས་ཀྱི། །དད་པས་ཚིམས་བྱེད་ཆོས་ཀྱི་དྲི། །ལྷག་མཐོང་ཚོར་བ་རང་བྱུང་སྐུ། །དེ་ཡང་ཆོས་ཉིད་རོལ་པ་ཡིན། །ཆོས་སྐུ་ཐིག་ལེ་ཉག་གཅིག་ལ། །རྩལ་ནི་ཆོས་ཉིད་ཉམས་སུ་མྱོང་། །མྱོང་ཡང་དོན་དུ་འཛིན་པ་མེད། །དེ་ཡང་འགག་མེད་རོལ་པ་ཡིན། །རང་བྱུང་སངས་རྒྱས་ཡེ་ཤེས་དེ། །བདེ་མཆོག་དོན་ལ་རིག་པའི་ཆོས། །དེ་རྩལ་དོན་ལ་འགྱུར་བ་མེད། །དེ་ཡང་འགག་མེད་རོལ་པ་ཡིན། །དེ་ཡི་དོན་ལ་འགྱུར་བ་མེད། །འགགས་མེད་ང་ཡི་རོལ་པ་ཡིན། །ངེས་པའི་ལུང་ལྡན་གདམས་ངག་གིས། །གདེང་ཉམས་ཆེ་བའི་དོན་ཉིད་ལ། །ཡེ་ཤེས་ང་རྒྱལ་བདག་ཉིད་ཆེ། །ངེས་པའི་དོན་དང་འབྲལ་མི་ཕོད། །སྡུག་བསྔལ་གང་ཡང་མེད་པའི་ཕྱིར། །བདེ་ཆེན་རང་བཞིན་སྙིང་རྗེ་ཆགས། །ཞེན་པ་གང་ཡང་མེད་པའི་ཕྱིར། །དེ་ཡང་འགག་མེད་རོལ་པ་ཡིན། །གོལ་དང་ལྟུང་བ་མེད་པའི་ཕྱིར། །ཆོས་ཉིད་གཞན་དང་ཕྲག་དོག་མེད། །དེ་ཕྱིར་རང་བྱུང་ཆེན་པོར་ཤར། །དེ་ཡང་འགག་མེད་རོལ་པ་ཡིན། ། ― DNG001_Page_0423 ―
[མ་དཔེ་གཟིགས་ན་འདིར་གནོན།]
ད་ཡང་འདུས་པའི་སྙིང་པོ་ཉོན། །འབྱུང་བ་འདོད་ཡོན་དུག་ལྔ་ཡང་། །ཐམས་ཅད་ཡེ་ཤེས་ཆོས་སྐུར་ཤར། །ཀུན་གཞི་རང་བྱུང་དེ་ཤེས་པས། །ཀུན་ལ་དབང་བསྐུར་ཐོབ་པ་ཡིན། །རྫོགས་པ་ཆེན་པོ་ངེས་དོན་འདུས་པ་ལས། རོལ་པ་འགག་མེད་ཀྱི་གཏན་ཚིགས་བསྟན་པའི་ལེའུ་སྟེ་རེ་ལྔ་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །མཚན་ཉིད་གཉིས་མེད་གཏན་ཚིགས་ཀྱི། །ངེས་དོན་རྩ་བ་ཆོས་སྐུ་ལ། །ལུང་ལྡན་རྐྱེན་གྱིས་ཡིད་ཆེས་བྱ། །སངས་རྒྱས་སེམས་ཅན་ངོ་བོ་ལ། །རང་བྱུང་ཡིན་ཕྱིར་གཉིས་སུ་མེད། །ད་ཡང་རྡོ་རྗེ་སེམས་དཔའ་ཉོན། །དེ་ཉིད་རྟོགས་པས་འཁོར་འདས་དག །དེ་ཕྱིར་མཚན་ཉིད་གཉིས་སུ་མེད། །ཕྱི་དང་ནང་དང་སྣོད་དང་བཅུད། །མཐོ་རིས་ངན་སོང་དགེ་དང་སྡིག །དག་དང་མ་དག་གཙང་རྨེ་དང་། །ཡིན་དང་མིན་དང་བླང་དོར་དང་། །བྱ་དང་མི་བྱ་སྐྱོན་ཡོན་སོགས། །ཐ་སྙད་གཉིས་སུ་གསུངས་པ་ཀུན། །དཔེར་ན་རི་བོང་རྭ་བཞིན་དུ། །ཚིག་ཏུ་ཡོད་ལ་དོན་ལ་མེད། །དེ་ཕྱིར་མཚན་ཉིད་གཉིས་མེད་པའི། །གཏན་ཚིགས་ཆེན་པོར་བཞག་པ་ཡིན། །ད་ཡང་འདུས་པའི་སྙིང་པོ་ཉོན། །མཐའ་དང་བྲལ་བའི་ཆོས་སྐུ་འདི། །མེད་པ་མ་ཡིན་དྲན་དང་ཚོར། །ཆད་པ་མ་ཡིན་རིག་ཅིང་གསལ། །རྟག་པ་མ་ཡིན་དངོས་པོ་མེད། །གཉིས་སུ་མ་སོང་ཟླ་བོ་མེད། །གཅིག་ཏུ་མ་སོང་ཀུན་ལ་ཡོད། །ད་ཡང་རྡོ་རྗེ་སེམས་དཔའ་ཉོན། །ཆོས་ཅན་རང་གི་མཚན་ཉིད་ནི། །གདོད་ནས་གཉིས་སུ་མེད་པ་ཡི། །ཆོས་རྣམས་རྩ་བ་གཅིག་པའི་དོན། །གཏན་ཚིགས་དག་གིས་ཡིད་ཆེས་བྱ། །གཉིས་མེད་ཅེས་སུ་བཏགས་པ་ནི། །འདྲེས་པའི་དོན་གྱིས་མ་ཡིན་ཏེ། །གང་དང་མ་འདྲེས་རང་བྱུང་སྐུ། །ཆད་དང་གཉིས་མེད་མ་ཡིན་ཏེ། །སངས་རྒྱས་སྙིང་པོ་ཆོས་སྐུ་ཡོད། །དེ་ཕྱིར་གཞི་ལ་འཁོར་འདས་མེད། །གཉིས་ཀ་མེད་ཕྱིར་མཐར་མ་རེག །རང་བྱུང་ཆོས་སྐུ་ནམ་མཁའ་འདྲ། །རྫོགས་པ་ཆེན་པོ་ངེས་དོན་འདུས་པ་ལས། མཚན་ཉིད་གཉིས་སུ་མེད་པའི་གཏན་ ― DNG001_Page_0424 ―
[མ་དཔེ་གཟིགས་ན་འདིར་གནོན།]
ཚིགས་བསྟན་པའི་ལེའུ་སྟེ་རེ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ངོ་བོ་ཉིད་དུ་བློ་གྲོལ་བ། །གཏན་ཚིགས་ངེས་པར་ཡིད་ཆེས་དོན། །ལུས་ངག་རྩོལ་བ་མེད་པའི་ཕྱིར། །རང་བྱུང་བློ་ལ་འཆིང་གྲོལ་མེད། །དེ་ཕྱིར་ངོ་བོ་ཉིད་དུ་གནས། །ད་ཡང་རྡོ་རྗེ་སེམས་དཔའ་ཉོན། །གཟུང་འཛིན་སྐྱོན་གྱིས་མ་གོས་པས། །རྣམ་རྟོག་བློ་ནི་རང་སར་གྲོལ། །དེ་ཕྱིར་ངེས་དོན་ཡེ་ཤེས་ཀློང་། །རྒྱུ་དང་རྐྱེན་ལས་མ་བྱུང་བས། །རང་བྱུང་ངོ་བོ་ཉིད་ཀྱི་སྐུ། །དེ་ཉིད་རྟོགས་པས་ཆོས་སྐུར་གྲོལ། །ཡང་དག་སངས་རྒྱས་འདི་ལས་མེད། །ད་ཡང་རྡོ་རྗེ་སེམས་དཔའ་ཉོན། །ཆོས་ཉིད་དུས་གསུམ་མི་འགྱུར་ཕྱིར། །ལས་ཀྱི་དབང་དུ་གཞི་མི་འགྱུར། །དེ་ཕྱིར་ཆོས་སྐུ་རྟོགས་པས་གྲོལ། །དེ་ལས་སོགས་པ་གང་ཡང་མེད། །ངེས་པའི་ལུང་ལྡན་ཡིད་ཆེས་པའི། །ངེས་པའི་གདེང་རྙེད་རྣལ་འབྱོར་པས། །མི་ཡི་ལུས་ནི་འདི་ཉིད་ལས། །སངས་རྒྱས་འབྲས་བུ་ད་ལྟ་ཐོབ། །དེ་ཕྱིར་རང་བློ་ངོ་བོ་ཉིད། །དུས་འདིར་རྩོལ་པས་བཙལ་དུ་མེད། །འཛིན་མེད་གསལ་བས་བསྒོམ་དུ་མེད། །དེ་ཕྱིར་ཡང་དག་དགོངས་པའི་གདེང་། །དེ་དང་སུ་ལྡན་རྣལ་འབྱོར་མཆོག །ད་ཡང་འདུས་པའི་སྙིང་པོ་ཉོན། །བྱང་ཆུབ་སེམས་ནི་རྣམ་དག་པས། །དེ་དོན་རང་བྱུང་དོན་རྟོགས་པས། །སངས་རྒྱས་གཞན་དུ་བསྒྲུབ་མི་དགོས། །དེ་ཕྱིར་ལུང་ལྡན་གདམས་ངག་གཅེས། །ཆོས་ཉིད་དག་ཏུ་བློ་གྲོལ་ཕྱིར། །ཉོན་མོངས་དུག་ལྔ་རང་སར་གྲོལ། །དེ་ལ་སྐྱོན་གྱིས་མ་གོས་ཏེ། །རང་བྱུང་ལུས་ལ་ཡེ་ཤེས་ཐུགས། །སེམས་ཅན་རང་བློས་འཛིན་པ་མེད། །དེ་ཕྱིར་ཉམས་པ་རྡུལ་ཙམ་མེད། །ད་ཡང་འདུས་པའི་སྙིང་པོ་ཉོན། །འཇིག་རྟེན་མ་ལུས་ཐམས་ཅད་ཀུན། །བསམ་གྱིས་མི་ཁྱབ་ཚིག་གྱུར་ཀྱང་། །ནམ་མཁའ་ཚིག་པར་མི་འགྱུར་བཞིན། །ངེས་དོན་རྟོགས་པའི་རྣལ་འབྱོར་ལ། །ལྷ་སྲིན་མཁའ་འགྲོས་དགྲར་ལངས་ཀྱང་། །གནོད་པས་མི་ཚུགས་ཇི་བཞིན་བྱེད། །དེ་ཕྱིར་ལུང་ལྡན་ཤིན་ཏུ་གཉན། །རྫོགས་པ་ ― DNG001_Page_0425 ―
[མ་དཔེ་གཟིགས་ན་འདིར་གནོན།]
ཆེན་པོ་ངེས་དོན་འདུས་པ་ལས། རང་བློ་ངོ་བོ་ཉིད་དུ་གྲོལ་བའི་གཏན་ཚིགས་བསྟན་པའི་ལེའུ་སྟེ་རེ་བདུན་པའོ།། །།དེ་ནས་ཀུན་རིག་སྟོན་པ་ལ། །འདུས་པའི་འཁོར་གྱི་དོན་ཆེད་དུ། །རྡོ་རྗེ་སེམས་དཔས་འདི་སྐད་གསོལ། །ངེས་དོན་གདུལ་བྱ་འབྲས་བུ་ཡི། །སྐུ་གསུམ་སྟོན་པ་ཇི་ལྟར་འབྱུང་། །དེ་འཁོར་ལས་ཅན་གང་ལ་གསུངས། །འགྱུར་མེད་རྒྱུན་གྱི་དཔེ་དོན་གང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །སངས་རྒྱས་ངོ་བོ་སྐུ་གསུམ་ལས། །ཆོས་སྐུ་རང་བྱུང་རིག་པ་དེ། །དུས་གསུམ་དག་ཏུ་སྐྱེ་འགག་མེད། །འགྲོ་འོང་མེད་པར་ཡེ་ནས་གནས། །ད་ཡང་འདུས་པའི་སྙིང་པོ་ཉོན། །ངེས་དོན་ཆོས་སྐུའི་མཐུན་དཔེ་ནི། །འདུས་མ་བྱས་པའི་ནམ་མཁའ་ཆེ། །དངོས་མེད་ཀུན་ཁྱབ་དུས་གསུམ་གཅིག །མཐའ་དབུས་རིས་སུ་དབྱེ་རུ་མེད། །དེ་དོན་རང་བྱུང་ངོ་བོ་དེ། །ཚིག་ཏུ་བརྗོད་མེད་རང་རིག་སྐུ། །ཐུགས་ལ་གསལ་ཕྱིར་ངེས་ཤེས་པས། །དེ་ཕྱིར་ཀུན་བཟང་ཆོས་ཀྱི་སྐུ། །ཞིང་ཁམས་ཆོས་ཉིད་བདེ་བའི་ཀློང་། །རང་བཞིན་འོག་མིན་བྱང་ཆུབ་ཐུགས། །དེ་ལས་འགྱུར་བ་རྡུལ་ཙམ་མེད། །རང་བྱུང་རིག་པ་རྣམ་པར་དག །སྙིང་པོ་ཆོས་སྐུ་ཐུགས་སྒོ་ན། །རྒྱུ་འབྲས་གཞི་ལ་མེད་པའི་དོན། །ཆོས་ཉིད་རྩོལ་བྲལ་སྙིང་པོ་ཡིས། །འཁོར་འདས་མ་རིག་ལྷུན་རྫོགས་ཆོས། །ཆོས་སྐུའི་སྟོན་པ་ཀུན་བཟང་གིས། །དགོངས་པའི་ངེས་དོན་བྱིན་བརླབས་ཀྱིས། །ཕྱོགས་བཅུའི་ཉིད་ལས་མི་གཞན་འཁོར། །དུས་གསུམ་སངས་རྒྱས་ཉིད་ལ་བཤད། །རྫོགས་པ་ཆེན་པོ་ངེས་དོན་འདུས་པ་ལས། ཆོས་སྐུའི་གདུལ་བྱ་བསྟན་པའི་ལེའུ་སྟེ་རེ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སངས་རྒྱས་ལོངས་སྤྱོད་རྫོགས་པའི་སྐུ། །དེ་ཡི་གདུལ་བྱ་ངེས་པར་འབྱུང་། །དེ་དོན་ལེགས་པར་བཤད་ཀྱིས་ཉོན། །ལོངས་སྐུ་འབྱུང་བའི་མཐུན་དཔེ་ནི། །ནམ་མཁའ་ ― DNG001_Page_0426 ―
[མ་དཔེ་གཟིགས་ན་འདིར་གནོན།]
དངོས་མེད་སྟོང་པ་ལ། །གཞའ་ཚོན་རྣམ་ལྔ་མ་འདྲེས་གསལ། །དེ་ཙམ་ཉིད་ནས་དངོས་མེད་ཡིན། །དེ་བཞིན་རང་གི་ངོ་བོ་ཡང་། །སྐྱེ་མེད་ཆོས་སྐུ་ཉིད་ཀྱི་རྩལ། །རིགས་ལྔ་སྐུ་མདོག་བརྒྱན་པ་འབྱུང་། །དེ་ཕྱིར་ལོངས་སྐུའི་སངས་རྒྱས་ཡིན། །ཀུན་གཞི་ཆོས་སྐུའི་གཞི་ཆ་ལ། །སྔ་ཕྱི་བག་ཆགས་མེད་པར་གསལ། །འབྱུང་ལྔའི་རོལ་པ་སྣ་ཚོགས་ཀྱང་། །ཞེན་པ་མེད་ཕྱིར་ཆོས་ཉིད་དབྱིངས། །ཡང་དག་ངེས་པའི་འབྲས་བུ་རྙེད། །ལོངས་སྤྱོད་རྫོགས་པའི་སྐུའི་སྒོ་ནས། །ལྡེམ་དགོངས་ཕྱི་ནང་གསང་བའི་དོན། །ས་བཅུའི་རིག་འཛིན་སེམས་དཔའ་ལ། །གསང་སྔགས་རང་གི་ངོ་བོས་སྟོན། །རྫོགས་པ་ཆེན་པོ་ངེས་དོན་འདུས་པ་ལས། ལོངས་སྐུའི་འཁོར་གྱི་གདུལ་བྱ་བསྟན་པའི་ལེའུ་སྟེ་རེ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །སྤྲུལ་པའི་སྐུ་ཡི་སངས་རྒྱས་ནི། །ཇི་ལྟར་སྟོན་ཕྱིར་སྤྲུལ་པའི་སྐུ། །འགྲོ་བའི་དོན་ཕྱིར་གདུལ་བྱ་ལ། །ཅི་རིགས་པར་ནི་དོན་མཛད་དོ། །ད་ཡང་འདུས་པའི་སྙིང་པོ་ཉོན། །གཞན་དོན་སྤྲུལ་སྐུའི་མཐུན་དཔེ་ནི། །ངེས་མེད་བྲག་ཆ་ཁྱུང་དང་ནི། །སེང་གེ་ཆུ་ཟླ་གཟུགས་བརྙན་དང་། །ཨུ་དུམ་ཝཱ་རའི་མེ་ཏོག་འདྲ། །སྤྲུལ་སྐུ་རང་གི་ངོ་བོ་ནི། །ཐུབ་པ་དྲུག་ཏུ་སྐུ་སྤྲུལ་ཏེ། །མི་ཡིས་ཤཱཀྱ་ཐུབ་པར་མཐོང་། །ལྷ་མི་རྣམས་ཀྱི་སྟོན་པ་ཡིན། །ད་ཡང་རྡོ་རྗེ་སེམས་དཔའ་ཉོན། །ཞིང་ཁམས་གསུམ་གྱི་གནས་འདི་ཡི། །འགྲོ་དྲུག་སེམས་ཅན་ལས་དག་ནས། །ཚོགས་གཉིས་བསག་ཐབས་ལ་བརྟེན་ནས། །སྒྲིབ་སྦྱངས་འབྲས་བུ་རིམ་གྱིས་འབྱུང་། །སྤྲུལ་སྐུའི་གསུང་གི་སྒོ་ནས་ནི། །གང་ལ་གང་འོས་དྲང་དོན་དུ། །དགེ་སྡིག་རྒྱུ་འབྲས་གཉིས་ཀྱི་ཆོས། །སྡེབ་སྦྱོར་ལེགས་པའི་ཚིག་ཏུ་སྟོན། །རྫོགས་པ་ཆེན་པོ་ངེས་དོན་འདུས་པ་ལས། སྤྲུལ་སྐུའི་འཁོར་གྱི་གདུལ་བྱ་བསྟན་པའི་ལེའུ་སྟེ་བདུན་ཅུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །འབྲས་བུ་ངེས་པ་མཐར་ ― DNG001_Page_0427 ―
[མ་དཔེ་གཟིགས་ན་འདིར་གནོན།]
ཐུག་ཕྱིར། །ཆེ་བའི་ཡོན་ཏན་གཏན་ལ་དབབ། །དེ་དོན་ལེགས་པར་ངས་བཤད་ཉོན། །འཁོར་འདས་གཉིས་ཀྱི་གཞིར་གྱུར་པ། །རང་བྱུང་ངོ་བོ་ཉིད་ཀྱི་སྐུ། །དེ་ལས་འཁོར་འདས་ཐམས་ཅད་སྐྱེས། །གཞི་ལ་འཁོར་འདས་གྲུབ་པ་མེད། །འཁྲུལ་ངོར་བདེན་གྱིས་དོན་ལ་མེད། །དེ་ཕྱིར་རང་བྱུང་ཀུན་གྱི་གཞི། །དེ་ལ་བསྐྱེད་པར་ནུས་པ་མེད། །དེ་ཡང་རྡོ་རྗེ་སེམས་དཔའ་ཉོན། །དཔེར་ན་གསེར་རྒྱུ་གཅིག་པ་ལ། །དབྱིབས་དང་གཟུགས་ནི་ཐ་དད་པ། །བྱས་པ་དེ་དག་མིང་རེ་གྲགས། །གྲགས་ཀྱང་གསེར་གྱི་ངོ་བོར་གཅིག །དེ་བཞིན་འཁོར་འདས་སྣ་ཚོགས་ལ། །བླུན་པོ་རྣམས་ཀྱིས་ཐ་དད་བཟུང་། །དེ་ལ་སྤང་སྡུད་ཞེན་པ་བྱས། །གཞི་ལ་ངོ་བོ་གཅིག་ལས་མེད། །དེ་ཡང་འདུས་པའི་སྙིང་པོ་ཉོན། །དཔེར་ན་ནོར་བུ་རིན་ཆེན་ལྟར། །རྙེད་པ་ཡོད་ལ་སྟོར་བ་མེད། །རང་བྱུང་ངོ་བོ་རྟོགས་པ་ལ། །མ་བཙལ་ཡོན་ཏན་ཐམས་ཅད་འབྱུང་། །དེ་ཕྱིར་ཆོས་སྐུ་ཉིད་ཀྱི་རྩལ། །རྟོགས་པའི་བྱིན་རླབས་སྐུ་གསུམ་བྱུང་། །ཆོས་སྐུ་ཀུན་བཟང་ངེས་དོན་ལ། །རྟོགས་པས་ཕྱོགས་ཕྱིར་ཡེ་སངས་རྒྱས། །ད་ཡང་འདུས་པའི་སྙིང་པོ་ཉོན། །སྐུ་ཡི་སྤྲུལ་པ་སྣང་མཛད་ཀྱིས། །དག་པར་སྤྱོད་པའི་རྣལ་འབྱོར་ལ། །ཕྱི་རྒྱུད་རྣམ་གསུམ་ཆོས་བསྟན་ཏེ། །རྡོ་རྗེ་འཛིན་པའི་ས་རུ་བཏགས། །དཔེར་ན་གསེར་སྤྲུལ་མིག་གིས་ནི། །འདོད་པའི་ཡོན་ཏན་རྣམ་ལྔ་ཡང་། །དུས་གཅིག་ཉམས་སུ་མྱོང་བ་ཡིན། །དར་ཡ་ཀན་གྱི་སྨན་མཆོག་བཞིན། །སྐུ་དང་ཡེ་ཤེས་མ་ལུས་པའི། །ཆེ་བའི་ཡོན་ཏན་འབྱུང་འདོད་པས། །གཞན་དོན་སྨོན་ལམ་མཐར་ཕྱིན་པ། །ལོངས་སྤྱོད་རྫོགས་སྐུའི་འགྲོ་དོན་བྱེད། །ད་ཡང་འདུས་པའི་སྙིང་པོ་ཉོན། །ཐུགས་ཀྱི་སྤྲུལ་པ་བྱུང་བ་ནི། །རྡོ་རྗེ་སེམས་དཔའ་ཉིད་ཡིན་ཏེ། །སྣོད་དང་ལྡན་པའི་རིག་འཛིན་ལ། །རྒྱུད་ལུང་གཉིས་ཀྱི་ངེས་པའི་ཆོས། །སྐྱེ་བ་གཅིག་ཏུ་བསྒྲུབ་གྱུར་ན། །རྡོ་རྗེ་འཆང་གི་ས་ལ་འདུག །ད་ཡང་འདུས་པའི་སྙིང་པོ་ཉོན། །སྨན་མཆོག་རྒྱལ་པོ་ཆེན་པོ་ནི། །ལྷ་ཡི་བདུད་རྩི་མ་གི་ཏས། །ཤི་བ་ཀུན་ ― DNG001_Page_0428 ―
[མ་དཔེ་གཟིགས་ན་འདིར་གནོན།]
བསླང་སྨན་གྱི་མཆོག །གང་ལ་རེག་པས་འཚོ་བ་ལྟར། །ཡང་ཏིག་ཐིག་ལེ་ཉག་གཅིག་ལ། །ངེས་པའི་ལུང་ལྡན་དོན་བསྟན་ན། །ལུས་ངག་རྩོལ་བ་མི་དགོས་ཕྱིར། །བསྟན་དང་སངས་རྒྱས་དུས་མཉམ་བྱུང་། །དེ་ཕྱིར་མན་ངག་ཤེས་པས་ཆོག །ད་ཡང་འདུས་པའི་སྙིང་པོ་ཉོན། །གསུང་གི་སྤྲུལ་པ་ཤཱཀ་ཐུབ་ཀྱིས། །སེམས་ཅན་སྐྱེ་བོ་ལས་དག་ལ། །སྡེ་སྣོད་རྣམ་པ་གསུམ་གྱི་ཆོས། །བསྐལ་པ་གྲངས་མེད་རྣམ་གསུམ་ན། །འབྲས་བུ་བཅུ་གཅིག་ས་གནོན་འདོད། །ད་ཡང་འདུས་པའི་སྙིང་པོ་ཉོན། །དཔེར་ན་དཔག་བསམ་ལྗོན་ཤིང་ལས། །བསོད་ནམས་ཆེ་ཆུང་རིམ་པ་ཡིས། །འབྲས་བུ་སྣ་ཚོགས་རབ་འབྲིང་འབྱུང་། །དེ་ཕྱིར་ལས་དང་རྐྱེན་ལས་བྱུང་། །དེ་བཞིན་དྲང་དོན་ཆོས་རྣམས་ཀུན། །གང་ཟག་བློ་ཡི་རིམ་པ་ལ། །ཅི་རིགས་པ་ཡི་ཆོས་བསྟན་པས། །འབྲས་བུ་ལྷ་དང་མི་རུ་སྐྱེ། །ད་ཡང་འདུས་པའི་སྙིང་པོ་ཉོན། །དྲང་དོན་ཆོས་ཀྱིས་སངས་མི་རྒྱ། །ཨ་མྲའི་འབྲས་བུ་སྨིན་མི་སྲིད། །མ་རྟོགས་ཆོས་ཀུན་ཅི་སྤྱད་ཀྱང་། །རྣམ་པར་གྲོལ་བར་མི་འགྱུར་རོ། །རྫོགས་པ་ཆེན་པོ་ངེས་དོན་འདུས་པ་ལས། རང་རིག་འབྲས་བུ་མཐར་ཐུག་པའི་ལེའུ་སྟེ་དོན་གཅིག་པའོ།། །།དེ་ནས་འདུས་པའི་འཁོར་རྣམས་ལ། །འགྱུར་མེད་དོན་གྱི་དཔེ་དོན་ནི། །ཀུན་རིག་སྟོན་པས་བཀའ་སྩལ་པ། །ཆུ་བོ་ཆེན་པོའི་དཔེ་བཞི་ཡིས། །མི་འགྱུར་དོན་ཆེན་ངེས་མཚོན་པ། །བཤད་ཀྱིས་འཁོར་རྣམས་ལེགས་པར་ཉོན། །ཆུ་གཞན་སྐྱེ་འབྲི་ཡོད་མོད་ཀྱི། །ཆུ་བོ་ཆེན་པོ་གང་གཱ་ལ། །དབྱར་སྐྱེ་དགུན་འབྲི་མེད་པར་ནི། །རྒྱུན་མི་ཆད་པར་རྟག་པ་བཞིན། །རང་བྱུང་སྐྱེ་མེད་རྣལ་འབྱོར་ལ། །དུས་དང་རྣམ་པ་ཐམས་ཅད་དུ། །ལྟ་བ་འཕེལ་འགྲིབ་མེད་པར་ནི། །ཡེ་ཤེས་ཆེན་པོ་རྒྱུན་མི་ཆད། །ད་ཡང་འདུས་པའི་སྙིང་པོ་ཉོན། །ཆུ་གཞན་མཚོ་རབ་ཡོད་མོད་ཀྱང་། །ཆུ་བོ་ཆེན་པོ་པཀྵུ་ལ། །གཏིང་ལ་རིང་ཐུང་མེད་འབབ་ཅིང་། །དྲག་དལ་མེད་པར་སྙོམས་པ་བཞིན། །ཐེག་གཞན་རེས་ ― DNG001_Page_0429 ―
[མ་དཔེ་གཟིགས་ན་འདིར་གནོན།]
འཇོག་ཡོད་གྱུར་ཀྱང་། །ངེས་དོན་ཆོས་ཀྱི་ཏིང་འཛིན་ལ། །ཐུན་མཚམས་མེད་པར་རྒྱུན་དུ་གནས། །དེ་ཕྱིར་འབྱུང་འཇུག་མེད་པར་གསལ། །ད་ཡང་འདུས་པའི་སྙིང་པོ་ཉོན། །ཆུ་གཞན་འགྱར་འགྱུར་ཡོད་མོད་ཀྱང་། །ཆུ་ཆེན་ནཻ་རཉྫ་ན་ལ། །ཀྱག་ཀྱོག་མེད་པར་དལ་འབབ་ཅིང་། །དྲང་པོར་འགྱུར་བ་མེད་པ་བཞིན། །ཐེག་གཞན་བླང་དོར་ཆེད་བྱེད་ཀྱང་། །ངེས་དོན་ཡང་ཏི་རྫོགས་ཆེན་ལ། །བཟང་ངན་ཆེ་ཆུང་མེད་པར་མཉམ། །འགྱུར་མེད་བླང་དོར་མེད་པར་སྤྱོད། །ད་ཡང་འཁོར་གྱི་སྙིང་པོ་ཉོན། །ཆུ་གཞན་སྨན་དུག་གཉིས་ཡོད་ཀྱང་། །སི་ཏ་ཆུ་བོ་ཆེན་པོ་ལ། །དུག་མེད་སྨན་གྱིས་ནད་ཀུན་སེལ། །ཀུན་ལ་ཕན་པའི་སྨན་མཆོག་བཞིན། །ངེས་དོན་རྟོགས་པའི་འབྲས་བུ་ནི། །གོལ་སྒྲིབ་ལྷད་མེད་ངེས་པའི་ཆོས། །འགྲོ་བ་ཀུན་ལ་ཕན་པའི་ཆོས། །ཕྱི་མ་མ་ཡིན་དུས་འདིར་འབྱུང་། །ད་ཡང་རྡོ་རྗེ་སེམས་དཔའ་ཉོན། །ཆུ་བོ་བཞི་འདུས་རྒྱ་མཚོ་རུ། །ཆུ་བྲན་མང་པོ་ཀུན་འདུས་ཕྱིར། །རྒྱ་མཚོ་ཆེན་པོར་རོ་གཅིག་ཀྱང་། །ཆོས་སྐུ་ཐིག་ལེ་ཉག་གཅིག་ཏུ། །ལྟ་སྒོམ་སྤྱོད་པ་འབྲས་བུ་འདུས། །དེ་ཕྱིར་རང་རིག་ཆོས་སྐུ་ཉིད། །དེ་རྩལ་སྣང་བ་ཆོས་དབྱིངས་ལ། །གང་ཡང་མ་འགགས་ལྷུན་གྱིས་གྲུབ། །རྫོགས་པ་ཆེན་པོ་ངེས་དོན་འདུས་པ་ལས། འགྱུར་བ་མེད་པའི་དཔེ་དོན་མཐར་ཐུག་བསྟན་པའི་ལེའུ་སྟེ་དོན་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །ངེས་པའི་དགོངས་དོན་འདི་སྐད་གསོལ། །མཚན་ཉིད་སངས་རྒྱས་ཇི་ལྟར་བཞེད། །ཀྲི་ཡ་སངས་རྒྱས་ཇི་ལྟར་འདོད། །བསྐྱེད་རྫོགས་གཉིས་ཀྱི་སངས་རྒྱས་གང་། །ཡང་ཏི་སངས་རྒྱས་ཇི་ལྟར་གནས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །ཉན་ཐོས་རང་རྒྱལ་མདོ་སྡེ་ནི། །བསྐལ་པ་གྲངས་མེད་གསུམ་དུ་ནི། །ཚོགས་ནི་རྣམ་པ་གཉིས་བསགས་ཏེ། །ལམ་ལྔ་རིམ་གྱིས་བགྲོད་བྱས་ནས། །དཀའ་ཐུབ་མཐར་ ― DNG001_Page_0430 ―
[མ་དཔེ་གཟིགས་ན་འདིར་གནོན།]
ཕྱིན་འབྲས་བུར་ངེས། །བུད་མེད་ལུས་བོར་ཕོ་ལུས་ཐོབ། །བདེན་བཞི་སྤང་བླང་ཉན་ཐོས་ཀྱི། །ས་རྣམས་གནོན་པའི་འབྲས་བུ་ནི། །དགྲ་བཅོམ་ཆེན་པོ་སྡུག་བསྔལ་བྲལ། །ཚངས་པར་སྤྱོད་པ་དགེ་སློང་ཚོགས། །བདེ་སྐྱིད་ལྡན་པ་སྤྲུལ་སྐུའི་ཚུལ། །བྱ་བ་བྱས་ཤིང་བྷཱ་ར་ཧན། །ཟག་པ་མེད་ཅིང་འཁོར་བ་སྟོངས། །ད་ཡང་འདུས་པའི་སྙིང་པོ་ཉོན། །ཡང་ཏི་རྫོགས་ཆེན་ལ་ལྟོས་ན། །འགྲོ་དོན་མི་བྱེད་ཐབས་དང་བྲལ། །ཆོས་སྐུ་མ་རྟོགས་ཤེས་རབ་བྲལ། །ལུང་ལྡན་ངེས་པའི་དོན་མ་མཐོང་། །ཐབས་དང་ཤེས་རབ་བྲལ་པའི་ཕྱིར། །ཉན་ཐོས་རང་རྒྱལ་ཉིད་དུ་ལྟུང་། །དེ་ཕྱིར་ངེས་པའི་སངས་རྒྱས་མིན། །ད་ཡང་རྡོ་རྗེ་སེམས་དཔའ་ཉོན། །བྱང་ཆུབ་སེམས་དཔའི་འབྲས་བུ་ཡང་། །བྱང་ཆུབ་མཆོག་ཏུ་སེམས་བསྐྱེད་ནས། །འགྲོ་བའི་དོན་དུ་དཀའ་སྤྱད་ཀྱི། །ཐབས་ཀྱིས་ཕ་རོལ་ཕྱིན་པ་བཅུས། །སྒྲིབ་གཉིས་སྦྱངས་ནས་ཚོགས་གཉིས་རྫོགས། །ད་ཡང་འདུས་པའི་སྙིང་པོ་ཉོན། །ཀུན་ཏུ་འོད་ཀྱི་ས་ལ་ནི། །མི་ལུས་མེད་པར་ལོངས་སྐུའི་ཚུལ། །མཚན་དང་དཔེ་བྱད་ཐམས་ཅད་ལྡན། །དོན་དམ་རང་བཞིན་མེད་པའི་ཕྱིར། །སངས་རྒྱས་ཆེ་བའི་ཆོས་ཀུན་མཁྱེན། །གདུལ་བྱ་འཁོར་གྱིས་ལོངས་སྐུ་མཐོང་། །ད་ཡང་འཁོར་གྱི་སྙིང་པོ་ཉོན། །བྱང་ཆུབ་སེམས་དཔའི་སངས་རྒྱས་ཀྱང་། །ཡང་ཏི་རྫོགས་ཆེན་ལ་ལྟོས་ན། །ངེས་དོན་སྙིང་པོ་མ་མཐོང་ཕྱིར། །གཞི་ན་མ་རིག་ཡོད་པས་ན། །རྩོལ་བ་བྱས་པས་ཆོས་སྐུ་བསྒྲིབས། །དེ་ཕྱིར་ཡང་དག་སངས་རྒྱས་མིན། །རྫོགས་པ་ཆེན་པོ་ངེས་དོན་འདུས་པ་ལས། རྒྱུ་མཚན་ཉིད་ཀྱི་སངས་རྒྱས་བསྟན་པའི་ལེའུ་སྟེ་དོན་གསུམ་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །ཀྲི་ཡ་ལྷ་དང་ལྷ་མོ་དང་། །ཕོ་མོ་གཉིས་ཀྱི་ཚུལ་དུ་གནས། །མ་སྲིང་ལྕམ་དྲལ་ཚུལ་དུ་ཡོད། །ཐབས་དང་ཤེས་རབ་བདེ་བ་ཡང་། །ལྷ་ཡི་ཚུལ་དུ་བལྟས་པས་ཚིམ། །མི་ཚེ་བདུན་དུ་བསྒྲུབས་པའི་མཐུས། །དྲང་སྲོང་ ― DNG001_Page_0431 ―
[མ་དཔེ་གཟིགས་ན་འདིར་གནོན།]
རིག་འཛིན་ས་ཐོབ་ཚེ། །སྐྱེ་བ་མེད་པའི་རྡོ་རྗེ་འཛིན། །རིགས་གསུམ་མགོན་པོ་སངས་རྒྱས་པ། །བྲམ་ཟེའི་ཚུལ་དུ་གཙང་སྤྱོད་པས། །དག་པའི་སངས་རྒྱས་འབའ་ཞིག་འདོད། །ད་ཡང་འདུས་པའི་སྙིང་པོ་ཉོན། །ཀུན་ཀྱང་ལོངས་སྤྱོད་རྫོགས་སྐུ་ལ། །གཟུགས་བརྙན་ཆུ་ཟླ་ལྟ་བུ་དེས། །འགྲོ་དོན་སྨོན་ལམ་སྟོབས་ཀྱིས་བྱེད། །དེ་ཕྱིར་དག་པའི་སངས་རྒྱས་འདོད། །ད་ཡང་རྡོ་རྗེ་སེམས་དཔའ་ཉོན། །ཡོ་ག་རྣལ་འབྱོར་སེམས་དཔའ་ཡིས། །འབྲས་བུ་ཕྱག་རྒྱ་བཞི་བསྒྲུབས་ཏེ། །འབྲས་བུ་སྟུག་པོ་བཀོད་པའི་སར། །ཆོས་ཀྱི་དབྱིངས་སུ་སངས་རྒྱས་འདོད། །ད་ཡང་འདུས་པའི་སྙིང་པོ་ཉོན། །ཐབས་དང་ཤེས་རབ་བདེ་སྤྱོད་ནི། །ལྷ་དང་ལྷ་མོ་ཀུན་ཀྱང་ནི། །ལོངས་སྤྱོད་རྫོགས་པའི་ཆ་བྱད་ཅན། །སེམས་དཔའ་སེམས་མ་མང་པོ་ཀུན། །འཇིག་འབྲལ་མེད་ལ་ཡེ་ཤེས་ལྷ། །ཆགས་པའི་ཚུལ་གྱིས་བཏེག་པའི་ཚུལ། །ལག་བཅངས་འཁྱུད་པ་ཙམ་གྱིས་ཀྱང་། །བདེ་བ་ཆོས་ཀྱི་དབྱིངས་སུ་སྨིན། །གསང་སྔགས་ཐབས་ཆེན་འབྲས་བུའི་མཆོག །སངས་རྒྱས་ས་ན་འཇའ་ཚོན་བཞིན། །རང་བཞིན་མེད་པ་སྐྱེ་ཤི་བྲལ། །རྣམ་པར་སྣང་མཛད་ལ་སོགས་པའི། །སངས་རྒྱས་བདེ་སྐྱིད་ཀུན་ལྡན་ཕྱིར། །གཞལ་ཡས་དཀྱིལ་འཁོར་ཞིང་ཁམས་རྣམས། །བསམ་པ་ཙམ་གྱིས་རང་བཞིན་འབྱུང་། །དཔེར་ན་འཕྲུལ་དགའི་ལོངས་སྤྱོད་འདྲ། །ད་ཡང་འདུས་པའི་སྙིང་པོ་ཉོན། །དེ་དག་ཀྲི་ཡོག་སངས་རྒྱས་ཀྱང་། །ཡང་ཏི་རྫོགས་ཆེན་ལ་ལྟོས་ན། །རྩེད་མོ་འདྲ་སྟེ་ལ་ཏེ་སློབ། །ཡང་དག་ངེས་དོན་མ་ཤེས་པས། །རེ་དོགས་ཡོད་ཕྱིར་ལྷུན་གྲུབ་མིན། །རྫོགས་པ་ཆེན་པོ་ངེས་དོན་འདུས་པ་ལས། གསང་སྔགས་ཕྱི་རྒྱུད་ཀྱི་སངས་རྒྱས་བསྟན་པའི་ལེའུ་སྟེ་དོན་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །རྣལ་འབྱོར་ཆེན་པོའི་སངས་རྒྱས་ནི། །ཕུང་པོ་ཁམས་དང་སྐྱེ་མཆེད་སོགས། །ཡེ་ནས་སངས་རྒྱས་ཡིན་པའི་ཕྱིར། ། ― DNG001_Page_0432 ―
[མ་དཔེ་གཟིགས་ན་འདིར་གནོན།]
དཀྱིལ་འཁོར་མ་ལུས་རང་ལ་རྫོགས། །ད་ཡང་རྡོ་རྗེ་སེམས་དཔའ་ཉོན། །དེ་བསྒྲུབས་སངས་རྒྱས་སྐྱེ་བ་འདིས། །རྡོ་རྗེ་འཆང་གི་ས་ནོན་ཚེ། །ཐབས་དང་ཤེས་རབ་བདེ་སྤྱོད་པ། །དགའ་འདུས་ཕོ་མོའི་དཔེ་བཞིན་དུ། །འཁྲིག་པའི་སྦྱོར་བས་ཐབས་ཀྱིས་ནི། །སངས་རྒྱས་ཐམས་ཅད་སྐྱེད་པར་བྱེད། །ད་ཡང་འདུས་པའི་སྙིང་པོ་ཉོན། །ཞི་ཁྲོའི་ལྷ་ཚོགས་རྒྱན་དང་བཅས། །འདོད་ཆགས་འཁྲིག་པའི་ཚུལ་དུ་གནས། །བདེ་སྐྱིད་སངས་རྒྱས་ངོ་བོ་ལ། །ཡེ་ནས་ལྷ་ཡི་དཀྱིལ་འཁོར་ཉིད། །གྲངས་ཀྱིས་མི་ལངས་ཕོ་མོ་ཀུན། །འགྲོ་དོན་མ་ལུས་དུས་གཅིག་བྱེད། །ད་ཡང་འཁོར་གྱི་སྙིང་པོ་ཉོན། །ཆོས་རྣམས་རྣམ་རྟོག་དབྱེར་མེད་པས། །ནམ་མཁའ་སྟོང་འབྱུང་སྣ་ཚོགས་བཞིན། །སྐྱེ་ཤི་མེད་པ་སྨོས་ཅི་དགོས། །དུས་འདིར་འབྱུང་བས་ཁྱད་པར་འཕགས། །དེ་ཕྱིར་ཐབས་ལ་བརྟེན་པའི་མིས། །འབྲས་བུ་བྱང་ཆུབ་ཆུད་མི་འཛའ། །ཐབས་ཀྱི་ནང་ན་དམ་པའི་མཆོག །ད་ཡང་རྡོ་རྗེ་སེམས་དཔའ་ཉོན། །རྗེས་སུ་རྣལ་འབྱོར་སངས་རྒྱས་ནི། །མ་བསྐྱེད་རྫོགས་པའི་ཡེ་ཤེས་ཀློང་། །ལྷ་ཡི་དཀྱིལ་འཁོར་རང་བྱུང་སྐུ། །ཀུན་བཟང་རོལ་པ་ཐབས་ཀྱི་ཡབ། །ཀུན་ཏུ་བཟང་མོ་ཤེས་རབ་ཡུམ། །བདེ་ཆེན་གཉིས་མེད་རིག་པའི་རྩལ། །འཇའ་ཚོན་རིས་འདྲ་དངོས་མེད་གསལ། །ཐུགས་ནི་རིག་པའི་ཡེ་ཤེས་ཅན། །ཕྱི་ནང་རྩལ་དུ་གང་ཡང་ཤར། །ནམ་མཁའི་དཀྱིལ་དུ་ཉི་ཟེར་ཚུལ། །རང་ལ་རྫོགས་པས་བསྐྱེད་མི་དགོས། །བཙལ་དུ་མེད་པས་སྐྱེ་ཤི་མེད། །འདུ་འབྲལ་མེད་པའི་སངས་རྒྱས་ལ། །ཀུན་ཏུ་བཟང་པོའི་ས་ཞེས་གདགས། །ད་ཡང་རྡོ་རྗེ་སེམས་དཔའ་ཉོན། །དེ་དག་རྒྱུད་ལུང་སངས་རྒྱས་ཀྱང་། །ཡང་ཏི་རྫོགས་ཆེན་ལ་ལྟོས་ན། །རང་བྱུང་ངེས་དོན་མ་ཤེས་པས། །ཆེད་དུ་བྱེད་པའི་རྩོལ་བས་བསྒྲིབས། །རེ་དོགས་ཕྲ་མོ་ཡོད་པའི་ཕྱིར། །ངེས་ལུང་མ་ཤེས་སྣང་བར་འཆོལ། །གཟུགས་ཅན་སངས་ ― DNG001_Page_0433 ―
[མ་དཔེ་གཟིགས་ན་འདིར་གནོན།]
རྒྱས་འདོད་པའི་ཕྱིར། །ཆོས་སྐུའི་སངས་རྒྱས་དོན་ལ་བསྒྲིབས། །རྫོགས་པ་ཆེན་པོ་ངེས་དོན་འདུས་པ་ལས། ཐེག་དགུའི་རྒྱུད་ལུང་གི་སངས་རྒྱས་བསྟན་པའི་ལེའུ་སྟེ་དོན་ལྔ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ཐིག་ལེ་ཉག་གཅིག་མངོན་ཕྱུང་ནས། །ལུང་བསྟན་ངེས་པའི་དོན་ཕྱིར་དུ། །རྣམ་སྨིན་ལུས་དང་བྲལ་མ་ཐག །ཐོག་མཐའ་མེད་པའི་སངས་རྒྱས་ཆེ། །སྐད་ཅིག་གཅིག་ལ་མ་རིག་སངས། །ལུས་མེད་རིག་པའི་ཡེ་ཤེས་རྒྱས། །རང་བྱུང་ཐུགས་ལ་སྐྱེ་ཤི་མེད། །ཐམས་ཅད་མཁྱེན་པའི་ཡེ་ཤེས་ལྡན། །ནམ་མཁའ་ཉི་མའི་སྙིང་པོ་འདྲ། །ད་ཡང་འདུས་པའི་སྙིང་པོ་ཉོན། །ཡེ་ཤེས་ལུས་ཅན་སངས་རྒྱས་ལ། །སེམས་ཅན་མེད་ཕྱིར་དོན་མི་དགོས། །རང་བྱུང་རིག་པའི་ཆོས་སྐུ་ལ། །རང་ལ་ཡོད་པ་ངོ་ཤེས་ཕྱིར། །ཆེད་དུ་རྩོལ་བས་བསྒྲུབ་མི་དགོས། །རང་བྱུང་རིག་པའི་ཆོས་སྐུ་ལ། །དུས་གསུམ་འཁྲུགས་ཀྱང་འཕོ་འགྱུར་མེད། །སྟོང་གསུམ་ཞིག་ཀྱང་ཉམས་མི་སྲིད། །རང་བྱུང་ཆོས་སྐུ་ཁ་མིག་ཅན། །དེ་ཡི་གཟུགས་བརྙན་གཟུགས་སྐུ་གཉིས། །མ་བཙལ་འབྱུང་བ་ཆོས་ཀུན་སྟོན། །ད་ཡང་རྡོ་རྗེ་སེམས་དཔའ་ཉོན། །རྒྱུད་ལུང་ཉན་ཐོས་ཡན་ཆད་ན། །འབྲས་བུ་གཟུགས་སྐུ་འབྱུང་མི་སྲིད། །ཡིད་སྨོན་གྱིས་ནི་སངས་རྒྱས་ཀྱང་། །ངེས་དོན་ཡང་ཏིག་སངས་རྒྱས་མིན། །དུས་དང་རྣམ་པ་ཐམས་ཅད་ཀྱང་། །འདུས་མ་བྱས་པའི་སངས་རྒྱས་ནི། །དངོས་མེད་རང་བྱུང་རིག་པའི་སྐུ། །དེ་དོན་ཆོས་སྐུ་ཤེས་པ་ལ། །དྲང་བའི་དོན་དུ་གཟུགས་སྐུ་འབྱུང་། །ཐབས་ལ་མི་བརྟེན་ཡོན་ཏན་རྫོགས། །རྫོགས་པ་ཆེན་པོ་ངེས་དོན་འདུས་པ་ལས། ཡང་དག་པར་ངེས་དོན་སངས་རྒྱ་བར་བསྟན་པའི་ལེའུ་སྟེ་དོན་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སྟོན་པ་ཆོས་རྗེ་ལ། །བདེན་པའི་ཡིད་ཀྱིས་འདི་སྐད་གསོལ། །རིག་ ― DNG001_Page_0434 ―
[མ་དཔེ་གཟིགས་ན་འདིར་གནོན།]
འཛིན་སེམས་དཔའི་དོན་ཆེད་དུ། །སངས་རྒྱས་རྟོགས་པ་བཤད་དུ་གསོལ། །རྒྱལ་སྲས་སྤྲུལ་པའི་དོན་ཆེད་དུ། །རིག་འཛིན་རྟོགས་པ་བཤད་དུ་གསོལ། །མཁའ་འགྲོ་རྣམས་ཀྱི་དོན་ཆེད་དུ། །རྒྱལ་སྲས་རྟོགས་པ་འདིར་གསུངས་ཤིག །དད་ཉན་རྣལ་འབྱོར་དོན་ཆེད་དུ། །མཁའ་འགྲོའི་རྟོགས་པ་འདིར་སྨྲོས་ཤིག །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །ད་ཡང་འདུས་པའི་འཁོར་བཞི་ཀུན། །ཕྱི་རབས་རྣལ་འབྱོར་དོན་ཆེད་དུ། །རང་སེམས་ཆོས་སྐུའི་དོན་རྟོགས་པས། །རང་རང་ཐུགས་ལ་མངའ་བ་ཡིས། །ཚིག་ཏུ་མཚོན་པ་འདིར་སྨྲོས་ཤིག །དེ་སྐད་གསུངས་པའི་དོན་གོ་ནས། །ཀུན་རིག་སྟོན་པའི་སྤྱན་སྔ་རུ། །འཁོར་རྣམས་འདུས་པའི་ཚུལ་གྱིས་ནི། །རང་རང་རྟོགས་པ་བརྗོད་པའི་ཕྱིར། །ཉིད་ལས་མི་གཞན་ཕྱོགས་བཅུ་ནས། །རྡོ་རྗེ་གསང་བའི་རིན་ཆེན་སྙིང་། །དྲི་མེད་གྲགས་པ་ལས་རབ་གྲུབ། །ཞི་བ་བདེ་དང་ཉི་མའི་འོད། །ནམ་མཁའི་སྙིང་པོ་འབུམ་གཟིགས་རྣམས། །གོ་རིམ་བཞིན་དུ་རྟོགས་བརྗོད་ཕྱིར། །ངེས་པའི་དགོངས་དོན་འདིར་གསུངས་པ། །རང་སེམས་དངོས་པོ་མེད་པ་ལ། །རིག་པ་སྟོང་པའི་ངང་ལ་གནས། །དེ་ཕྱིར་རང་བྱུང་ཆོས་ཀྱི་སྐུ། །དེ་ལ་སྐྱོན་གྱིས་གོས་པ་མེད། །ད་ནི་དགོངས་དོན་འདིར་གསུངས་པ། །རང་བྱུང་རིག་པའི་ཡེ་ཤེས་ལ། །དངོས་པོ་མཚན་མ་མེད་པའི་ཕྱིར། །གང་ལ་འདུ་ཤེས་མེད་འཇུག་པ། །རྟོག་མེད་གསལ་བ་སྒོམ་པའི་མཆོག །ཡང་ནི་དགོངས་དོན་འདིར་གསུངས་པ། །དུས་གསུམ་སྐྱེ་འགག་མེད་པའི་ཕྱིར། །རང་རིག་ཆོས་སྐུ་ཡེ་ཤེས་གསལ། །སྔ་ཕྱི་ད་ལྟ་མེད་པར་གནས། །དེ་ལས་མི་འདའ་ཆོས་ཉིད་ལ། །དེ་དོན་མི་རྟོག་དགོངས་པའི་མཆོག །ཡང་ནི་དགོངས་དོན་འདིར་གསུངས་པ། །སངས་རྒྱས་ཐུགས་ནི་ཆོས་ཀྱི་སྐུ། །ཕུང་པོ་མེད་ཕྱིར་རྒུད་པ་མེད། །སྐྱེ་ཤི་མེད་པ་རང་བྱུང་སྐུ། །དེ་ཉིད་རྟོགས་པ་བལྟ་བ་ལ། ། ― DNG001_Page_0435 ―
[མ་དཔེ་གཟིགས་ན་འདིར་གནོན།]
དེ་དོན་ཡེངས་མེད་བསྒོམ་པའི་མཆོག །ཡང་ནི་དགོངས་དོན་འདིར་གསུངས་པ། །ངོ་བོ་ཡེ་ནས་སངས་རྒྱས་ཕྱིར། །འཁོར་འདས་མེད་པར་རྣམ་པར་དག །སྐྱེ་ཤི་མེད་པའི་རིག་པ་འདི། །དུས་གསུམ་མི་འགྱུར་དགོངས་པ་ཡིན། །ཡང་ནི་དགོངས་དོན་འདིར་གསུངས་པ། །རྒྱུ་རྐྱེན་མ་སྐྱེས་འབྲས་བུ་ལ། །ལུང་ལས་མ་བྱུང་ཡེ་ཤེས་ཤར། །སེམས་ལས་མ་བྱུང་ཆོས་སྐུ་རྟོགས། །དེ་དང་མི་འབྲལ་དགོངས་པའི་མཆོག །ཡང་ནི་དགོངས་དོན་འདིར་གསུངས་པ། །ཆོས་ཉིད་ངང་ལས་དངོས་པོ་མེད། །དེ་ཕྱིར་མཚན་མ་རང་སར་གྲོལ། །དེ་ཕྱིར་ཐིག་ལེ་ཉག་གཅིག་ལ། །ཡེངས་མེད་འབྲས་བུ་སངས་རྒྱས་ཉིད། །ཡང་ནི་དགོངས་དོན་འདིར་གསུངས་པ། །སེམས་ཀྱི་ཡུལ་འདས་བྱང་ཆུབ་ཐུགས། །རང་ལ་བལྟས་པས་ཡེ་ཤེས་མཐོང་། །དེ་དོན་དངོས་མེད་བྱང་ཆུབ་སྐུ། །དེ་ལས་མ་ཡེངས་ངེས་དོན་མཆོག །ཡང་ནི་དགོངས་དོན་འདིར་གསུངས་པ། །དངོས་བོར་མ་མཐོང་ཆོས་སྐུར་མཐོང་། །བསྒོམ་དང་མི་བསྒོམ་ཐ་སྙད་བྲལ། །གང་ལའང་མི་གནས་རིག་པར་ཤར། །དེ་དོན་སངས་རྒྱས་དགོངས་པ་ཡིན། །ཡང་ནི་དགོངས་དོན་འདིར་གསུངས་པ། །ངེས་པའི་རང་རིག་ཡེ་ཤེས་ལ། །གང་ཡང་མི་བསམ་དྲན་མེད་དེ། །ཡིད་ཆེས་གདེང་དང་ལྡན་པ་མཆོག །དེ་ལ་འགྱུར་མེད་ཆོས་ཀྱི་སྐུ། །རྫོགས་པ་ཆེན་པོ་ངེས་དོན་འདུས་པ་ལས། ཕྱོགས་བཅུའི་སངས་རྒྱས་ཀྱི་རྟོགས་པ་བརྗོད་པའི་ལེའུ་སྟེ་དོན་བདུན་པའོ།། །།དེ་ནས་ཀུན་བཟང་སྤྱན་སྔར་ནི། །རིག་འཛིན་རྟོགས་པ་བརྗོད་པའི་ཕྱིར། །བློ་གྲོས་གཙོ་དང་རྣམ་དག་སྙིང་། །དམ་པའི་ཡོན་ཏན་འོད་རླབས་ཅན། །ཤེས་རབ་བླ་མ་རྒྱལ་མཚན་འཛིན། །རྣམ་པར་གྲོལ་བ་ཏིང་འཛིན་དབང་། །ཆོས་དབང་དང་ནི་བསོད་ནམས་བརྩེགས། །བདུད་འཇོམས་དང་ནི་སེང་གེའི་སྒྲ། །རིན་ཆེན་མཐོང་དང་བརྩེ་བ་ཅན། །དབང་ཕྱུག་གཙོ་དང་ཡིད་དགེ་དང་། །མཐོང་དགའ་བདེན་མོས་གསུང་བརྩེགས་རྣམས། ། ― DNG001_Page_0436 ―
[མ་དཔེ་གཟིགས་ན་འདིར་གནོན།]
རང་རང་རྟོགས་པ་བརྗོད་པའི་ཕྱིར། །ངེས་པའི་གདེང་ཉམས་བརྗོད་པ་ནི། །རྩ་བ་ཆོས་སྐུའི་དོན་བཙལ་བས། །བཙལ་བས་མ་རྙེད་བཞག་པས་རྙེད། །དེ་དོན་རང་བྱུང་དོན་བཙལ་བ། །མ་བསྒོམས་སངས་རྒྱས་ད་ལྟ་ཉིད། །ཡང་ནི་གདེང་ཉམས་འདིར་གསུངས་པ། །ཉོན་མོངས་མ་སྤངས་དུག་ལྔ་སྐྱེ། །སྤངས་ན་རྩོལ་བའི་གོལ་སྒྲིབ་ཡིན། །སྤང་བླང་མེད་པའི་དོན་རྟོགས་ན། །ངེས་དོན་དགོངས་པ་དེ་ལས་མེད། །ཡང་ནི་གདེང་ཉམས་འདིར་གསུངས་པ། །གསལ་ལ་མ་ཡེངས་ཆོས་ཀྱི་སྐུ། །མ་བསྒོམས་འབྲལ་མེད་ཏིང་ངེ་འཛིན། །དམིགས་སུ་མེད་པས་ནམ་མཁའ་འདྲ། །འདུ་འབྲལ་མེད་པས་རྒྱུན་དུ་གནས། །ཡང་ནི་གདེང་ཉམས་འདིར་གསུངས་པ། །སེམས་ལ་གཉེན་པོ་མེད་པས་ནི། །བསམ་པའི་ཡུལ་ལས་འདས་པས་ན། །གཞན་ནས་མ་འོངས་རྒྱུན་མི་ཆད། །དེ་ཉིད་རང་རིག་ཆོས་སྐུར་རྟོགས། །ཡང་ནི་གདེང་ཉམས་འདིར་གསུངས་པ། །རང་བྱུང་རིག་པ་རང་ཤར་ཕྱིར། །མ་རིག་མུན་པ་རྩད་ནས་གཅོད། །དེ་ལ་གཉེན་པོས་བཅོས་སུ་མེད། །གདོད་ནས་རང་བྱུང་སངས་རྒྱས་ཐུགས། །ཡང་ནི་གདེང་ཉམས་འདིར་གསུངས་པ། །ཆོས་ཉིད་ཡེ་ནས་མ་བཅོས་པའི། །དེ་ཉིད་ནམ་མཁའི་རང་བཞིན་ལྟར། །སྐྱེ་མེད་རང་གསལ་ཆོས་ཉིད་ལ། །རྒྱུན་དུ་འབྲལ་མེད་བྱང་ཆུབ་ཀློང་། །ཡང་ནི་གདེང་ཉམས་འདིར་གསུངས་པ། །རང་བྱུང་དག་པས་པདྨ་འདྲ། །འཁོར་བའི་སྐྱོན་གྱིས་མ་གོས་པ། །དེ་ཕྱིར་ཆོས་ཉིད་ངང་ལ་ནི། །འབྲལ་མེད་བྱང་ཆུབ་སེམས་སུ་གསལ། །ཡང་ནི་གདེང་ཉམས་འདིར་གསུངས་པ། །ཟབ་མོའི་མིང་ནི་ཅིར་བཏགས་ཀྱང་། །དཔེས་ཀྱང་མཚོན་མེད་བརྗོད་ལས་འདས། །དམིགས་པའི་ཡུལ་བྲལ་ཆོས་ཀྱི་སྐུ། །དེ་ལས་མི་འགྱུར་ཉམས་ཀྱི་མཆོག །ཡང་ནི་གདེང་ཉམས་འདིར་གསུངས་པ། །རང་བྱུང་ཆོས་སྐུ་མཐའ་དབུས་མེད། །དེ་ལས་མ་ཡེངས་རྩོལ་བསྒྲུབ་འདས། །མཚོན་དུ་མེད་པས་རྐྱེན་མི་ཚུག །དེ་ཕྱིར་དུས་གསུམ་འབྲལ་བ་མེད། །ཡང་ནི་གདེང་ཉམས་འདིར་གསུངས་པ། །སྙིང་པོ་ཆོས་སྐུའི་རིག་འཛིན་དེ། །ལྷུན་གྱིས་གྲུབ་ཕྱིར་ཡེ་ཤེས་ཀློང་། །དེ་ཡི་ ― DNG001_Page_0437 ―
[མ་དཔེ་གཟིགས་ན་འདིར་གནོན།]
ངང་ལ་འཁོར་བ་མེད། །དེ་ཕྱིར་སངས་རྒྱས་དགོངས་པ་ཡིན། །ཡང་ནི་གདེང་ཉམས་འདིར་གསུངས་པ། །འབྱུང་བཞི་ཞིག་པའི་ནམ་མཁའ་བཞིན། །ཆོས་ཉིད་སྙིང་པོ་རིག་པ་ནི། །ཡེ་ཤེས་རང་གསལ་འགྱུར་བ་མེད། །དེ་ཕྱིར་བསྒོམ་མེད་བྱང་ཆུབ་སྐུ། །ཡང་ནི་གདེང་ཉམས་འདིར་གསུངས་པ། །མཚན་མའི་ཡུལ་མེད་བྱང་ཆུབ་ལམ། །དེ་ལས་མ་བཙལ་རང་བཞག་ན། །ཡང་དག་དོན་གྱི་དགོངས་པ་སྟེ། །དེ་ཉིད་མི་འབྲལ་བསྒོམ་པའི་མཆོག །ཡང་ནི་གདེང་ཉམས་འདིར་གསུངས་པ། །མངོན་སུམ་མི་གནས་ཆོས་སྐུ་ལ། །ཐ་དད་བྲལ་བས་ཡེ་ཤེས་ཀློང་། །དེ་ལས་མཚོན་པའི་མིང་མ་རྙེད། །དེ་ལས་མ་གཡོས་བསྒོམ་པ་ཡིན། །ཡང་ནི་གདེང་ཉམས་འདིར་གསུངས་པ། །རང་བྱུང་ངོ་བོ་ཉིད་ཀྱི་སྐུ། །བསྒོམས་པས་རྙེད་པར་མི་འགྱུར་ཏེ། །མ་བསྒོམས་པས་ཀྱང་སྟོར་བྲལ་མེད། །དེ་ཕྱིར་ཆོས་ཉིད་འབྲལ་བ་མེད། །ཡང་ནི་གདེང་ཉམས་འདིར་གསུངས་པ། །རང་བྱུང་ཆོས་ཉིད་ནམ་མཁའ་འདྲ། །དེ་བཞིན་ཏིང་འཛིན་སྤྲོས་མེད་གསལ། །དེ་ལ་གཉེན་པོས་བཅོས་སུ་མེད། །དེ་ཕྱིར་འབྲལ་མེད་དགོངས་པ་ཡིན། །ཡང་ནི་གདེང་ཉམས་འདིར་གསུངས་པ། །ཡུལ་གྱི་མཚན་མ་སྣ་ཚོགས་པ། །དེ་ཙམ་ཉིད་ནས་རང་བཞིན་ཤེས། །དེ་ཕྱིར་སེམས་རྟོགས་ཆོས་སྐུར་གསལ། །དེ་ལ་སྐྱོན་དུ་རྡུལ་ཙམ་མེད། །ཡང་ནི་གདེང་ཉམས་འདིར་གསུངས་པ། །མ་བཙལ་པ་ཡི་ཆོས་ཉིད་ལས། །རྟོག་དཔྱོད་མེད་པ་བསྒོམ་པ་སྟེ། །ཉམས་ནི་ཤེས་རིག་གསལ་བ་ལ། །དེ་ལས་མ་ཡེངས་བསྒོམ་པ་ཡིན། །ཡང་ནི་གདེང་ཉམས་འདིར་གསུངས་ ― DNG001_Page_0438 ―
[མ་དཔེ་གཟིགས་ན་འདིར་གནོན།]
པ། །གང་ཡང་མ་སྤངས་སྐྱོན་མ་གོས། །འགྲོ་འོང་མེད་པར་རྒྱུན་དུ་གནས། །བྱིང་རྒོད་རྐྱེན་གྱི་དབང་མི་འགྲོ། །དེ་ལས་སྒྲིབ་མེད་སངས་རྒྱས་ཐུགས། །ཡང་ནི་གདེང་ཉམས་འདིར་གསུངས་པ། །མ་བཙལ་རང་ལས་རྙེད་པའི་ཕྱིར། །ལྷག་མཐོང་དྲན་པ་བལྟ་བའི་གཟུངས། །དེ་ཕྱིར་མི་འབྲལ་བསྒོམ་པའི་གདེང་། །ཡེ་ནས་ཡོད་པས་སྟོར་བྲལ་མེད། །ཡང་ནི་གདེང་ཉམས་འདིར་གསུངས་པ། །བསྒོམ་མེད་དམིགས་དང་བྲལ་བའི་ཕྱིར། །ཕྱག་རྒྱ་བསྒྱུར་མི་དགོས་པར་ངེས། །གསུང་མེད་རིག་པའི་དགོངས་པ་ཡིན། །ཡེ་ཤེས་ཐུགས་ལ་འགྱུར་བ་མེད། །གཞན་ཡང་རིག་འཛིན་སེམས་དཔའི་ཚོགས། །བསམ་གྱིས་མི་ཁྱབ་གྲངས་ལས་འདས། །རང་རང་གདེང་ཉམས་འདིར་གསུངས་པ། །དེ་དོན་ངེས་པ་ཆོས་སྐུར་གཅིག །རྫོགས་པ་ཆེན་པོ་ངེས་དོན་འདུས་པ་ལས། རིག་འཛིན་སེམས་དཔའ་རྣམས་ཀྱི་རྟོགས་པ་བརྗོད་པའི་ལེའུ་སྟེ་དོན་བརྒྱད་པའོ།། །།དེ་ནས་རྒྱལ་སྲས་སྤྲུལ་པའི་ཚོགས། །ཚངས་པ་བརྒྱ་བྱིན་རྒྱལ་པོ་བཞི། །ཐགས་བཟང་རིས་དང་གང་བ་བཟང་། །མཁའ་ལྡིང་རྒྱལ་པོ་རྟ་མགོ་ཅན། །ཟུར་ཕུད་ལྔ་པ་ནོར་སྲུངས་དང་། །མགྲིན་བཅུ་དང་ནི་ཀླུ་རྒྱལ་རྣམས། །རང་རང་རྟོགས་པ་བརྗོད་པའི་ཕྱིར། །ངེས་དོན་རྟོགས་པ་འདིར་གསུངས་པ། །རྩོལ་བསྒྲུབ་བྲལ་བ་བྱང་ཆུབ་ཐུགས། །རེ་དོགས་མེད་པས་གོལ་ས་མེད། །དེ་དོན་མ་བྲལ་ཆོས་ཉིད་ལ། །རྒྱུན་དུ་འབྲལ་མེད་ཡེ་ནས་ཡོད། །ཡང་ནི་རྟོགས་དོན་འདིར་གསུངས་པ། །སྣང་བ་ཆོས་དབྱིངས་རྟོག་མེད་ལས། །སྒྲོ་སྐུར་བྲལ་བ་ཆོས་ཀྱི་དབྱིངས། །དེ་ཉིད་དུས་མཉམ་རང་གསལ་བ། །སངས་རྒྱས་ཀུན་གྱི་དགོངས་པར་གོ། །ཡང་ནི་རྟོགས་དོན་འདིར་གསུངས་པ། །གོལ་ས་མེད་པའི་ལྟ་བ་ལ། །བྱིང་རྒོད་བྲལ་བའི་བསྒོམ་པར་གསལ། །ཕྲག་དོག་མེད་པའི་སྤྱོད་པ་དེ། །དེ་ཉིད་ཡེ་ཤེས་ཆོས་ཉིད་ཀློང་། །ཡང་ནི་རྟོགས་དོན་འདིར་གསུངས་པ། །ནོར་བུ་ཆུ་དྭངས་དཔེ་བཞིན་དུ། །དྲན་པ་ཙམ་གྱིས་མ་རིག་སངས། །བཙལ་དུ་མེད་པས་ཡེ་ཤེས་རྒྱས། །དེ་དུས་ཉིད་ན་གཟུགས་སྐུ་འབྱུང་། །ཡང་ནི་རྟོགས་དོན་འདིར་གསུངས་པ། །ངེས་དོན་ལུང་ལ་ཡིད་ཆེས་པས། །ཐེ་ཚོམ་མེད་ལས་རང་བྱུང་གསལ། །རིག་པ་མི་འགག་བདེ་ཆེན་ཀློང་། །དེ་ལས་མི་འགྱུར་དགོངས་པར་ཤེས། །ཡང་ནི་རྟོགས་དོན་འདིར་གསུངས་པ། །ཡུལ་གྱི་མཚན་མ་ཅིར་སྣང་ཡང་། །ཡིད་ཀྱིས་དགག་སྒྲུབ་མེད་པར་ནི། ། ― DNG001_Page_0439 ―
[མ་དཔེ་གཟིགས་ན་འདིར་གནོན།]
ཆོས་དབྱིངས་གདེང་ལྡན་ངེས་དོན་ལ། །སྤང་དང་སྡུད་པའི་ཞེན་མེད་དོ། །ཡང་ནི་རྟོགས་དོན་འདིར་གསུངས་པ། །ལུང་ལ་ཡིད་ཆེས་དགོངས་པ་མེད། །ཟབ་ལ་རྒྱ་ཆེ་དགོངས་པ་གསལ། །དེ་དོན་རྟོགས་གོམས་འབྲས་བུ་ལ། །སངས་རྒྱས་ངེས་པ་དེ་ལ་བྱ། །ཡང་ནི་རྟོགས་དོན་འདིར་གསུངས་པ། །ཚེ་རབས་ཀུན་ཏུ་མཐུ་བརྟས་པས། །སྔ་ཕྱི་ཞེན་པའི་རྟོག་པ་ལ། །མ་ཡེངས་ཆོས་ཉིད་རང་གསལ་བ། །དེ་ལས་བསྒོམ་པ་རྡུལ་ཙམ་མེད། །ཡང་ནི་རྟོགས་དོན་འདིར་གསུངས་པ། །རང་བྱུང་ངེས་དོན་རྒྱུན་མི་འཆད། །དེ་ལ་རྟག་ཏུ་ཡིད་བརྟས་ན། །བག་ཆགས་སྒྲིབ་པ་ཤུགས་ལ་དག །ཡེ་ཤེས་ཚོགས་ཆེན་སངས་རྒྱས་ཡིན། །ཡང་ནི་རྟོགས་དོན་འདིར་གསུངས་པ། །དུས་དང་རྣམ་པ་ཐམས་ཅད་དུ། །ཆོས་སྐུའི་དོན་དང་མི་འདའ་ཕྱིར། །ཡང་དག་ཏིང་འཛིན་རྒྱུན་མི་འཆད། །དེ་ཕྱིར་ངེས་ཤེས་འགྱུར་བ་མེད། །ཡང་ནི་རྟོགས་དོན་འདིར་གསུངས་པ། །འཁོར་བས་མ་བསླད་ཏིང་འཛིན་ལ། །མ་བསྒོམས་ཆོས་ཉིད་ད་ལྟའི་ཐུགས། །བསྒོམ་དང་མི་བསྒོམ་ཅི་ཕྱིར་འཇུག །མཉམ་རྗེས་མེད་པར་རྒྱུན་དུ་གནས། །ཡང་ནི་རྟོགས་དོན་འདིར་གསུངས་པ། །རང་སེམས་མ་བཅོས་རང་ལུགས་ལ། །མ་བཅོས་ངང་བཞག་བསྒོམ་པ་སྟེ། །བརྗོད་དུ་མེད་པའི་ཉམས་མྱོང་གསལ། །དེ་དོན་རང་སེམས་རྟོགས་པ་ཡིན། །ཡང་ནི་རྟོགས་དོན་འདིར་གསུངས་པ། །དེ་དོན་ཆོས་ཉིད་འགྱུར་མེད་ལ། །བློ་ཡིས་བརྟགས་པ་ཐམས་ཅད་མེད། །གང་ཡང་མ་སྤངས་རང་བྱུང་ལ། །དེ་ལ་བསྒོམ་དུ་རྡུལ་ཙམ་མེད། །རྫོགས་པ་ཆེན་པོ་ངེས་དོན་འདུས་པ་ལས། རྒྱལ་སྲས་སྤྲུལ་པའི་འཁོར་གྱི་རྟོགས་པ་བརྗོད་པའི་ལེའུ་སྟེ་དོན་དགུ་པའོ།། །།དད་ཉན་འཁོར་ལ་ཕན་དོན་དུ། །མཁའ་འགྲོ་སྡེ་ལྔ་འཁོར་དང་བཅས། །རང་རང་རྟོགས་པ་བརྗོད་པའི་ཕྱིར། །ངེས་པའི་དོན་དུ་འདིར་གསུངས་པ། །གཏི་མུག་མུན་པ་འཐིབས་པ་ལ། །ཐོག་མཐའ་ཆོད་པས་མ་རིག་སངས། །ཡུལ་འདི་མ་བཤིགས་ཆོས་ཀྱི་དབྱིངས། །དེ་རྙེད་རང་ ― DNG001_Page_0440 ―
[མ་དཔེ་གཟིགས་ན་འདིར་གནོན།]
སེམས་རྟོགས་པ་ཡིན། །ཡང་ནི་རྟོགས་དོན་འདིར་གསུངས་པ། །ཞེ་སྡང་ཁ་དོག་ཡུལ་ལ་སྐྱེ། །ཕྱི་ཡི་གོ་ལས་གཅོད་ཤེས་ན། །ཞེ་སྡང་རང་གྲོལ་རྒྱལ་བའི་ཐུགས། །དེ་དུས་ཉིད་ན་ཆོས་ཀྱི་སྐུ། །ཡང་ནི་རྟོགས་དོན་འདིར་གསུངས་པ། །རྟོགས་དོན་བདེ་བའི་ཡེ་ཤེས་ཤར། །རྒྱལ་པོ་ངོ་བོ་ཉིད་ཀྱི་སྐུ། །དེ་དོན་མི་འབྲལ་ཆོས་སྐུར་གསལ། །དེ་ལ་སྐྱོན་གྱིས་གནོད་མི་ཚུགས། །ཡང་ནི་རྟོགས་དོན་འདིར་གསུངས་པ། །ཕོ་མོ་འདོད་ཆགས་ཅི་སྤྱད་ཀྱང་། །གོལ་མེད་ཡེ་ཤེས་རྒྱུན་མི་འཆད། །སྔ་ཕྱིར་མ་སོང་ཞེན་མེད་ཕྱིར། །བདེ་ཆེན་ལོངས་སྤྱོད་ཆེན་པོར་བཤད། །ཡང་ནི་རྟོགས་དོན་འདིར་གསུངས་པ། །ལྷ་དམན་ཆོས་ལ་ཕྲག་དོག་ཀྱང་། །གོལ་བ་ཡིན་ཕྱིར་ཉེས་མེད་དགེ། །དེ་ཕྱིར་བྱང་ཆུབ་བདེ་བའི་ཀློང་། །དེ་ལ་སྐྱོན་གྱིས་གོས་མི་སྲིད། །ད་ཡང་འདུས་པའི་སྙིང་པོ་ཉོན། །སངས་རྒྱས་རིག་འཛིན་སྤྱན་སྔ་རུ། །འཇིག་རྟེན་མཁའ་འགྲོས་འདི་སྐད་གསོལ། །དམ་བཅས་དོན་ལས་བདག་མི་འདའ། །བཀའ་བཞིན་བགྱི་བའི་དོན་ཆེད་དུ། །ངེས་དོན་འདུས་པའི་དོན་ཆེན་འདི། །མི་ནུབ་པ་རུ་བདག་གིས་བསྲུངས། །འདི་ལ་འགལ་བྱེད་སྡིག་ཅན་ཀུན། །མྱུར་དུ་བསྒྲལ་ལ་ཞལ་དུ་རྡུང་། །ད་ཡང་སྟོན་པའི་འཁོར་ཀུན་ཉོན། །བདག་ཅག་ཡིད་ཀྱིས་དམ་བཅས་པའི། །སངས་རྒྱས་བསྟན་པ་བསྲུང་བའི་ཕྱིར། །སྡིག་ཅན་བསད་ཀྱང་གྲོལ་བར་ངེས། །རྣམ་སྨིན་སྲོག་ལ་ལོངས་སྤྱོད་ཀྱིས། །སངས་རྒྱས་རིག་འཛིན་རྣམས་ཀྱིས་ཀྱང་། །རང་སེམས་ཆོས་སྐུར་བྱིན་གྱིས་རློབས། །དེ་སྐད་བརྗོད་པའི་དོན་གསན་ནས། །ཀུན་རིག་སྟོན་པས་འཁོར་རྣམས་ལ། །རྩ་བ་ངེས་པའི་དོན་འདི་གསུངས། །ལེགས་སོ་དད་ལྡན་འཁོར་རྣམས་ཉོན། །ཤེས་རབ་བློ་ཡི་ཁྱད་པར་ལས། །ཚིག་ཏུ་མཚོན་པ་སྣ་ཚོགས་ཀྱང་། །དོན་ལ་དབྱེར་མེད་ངོ་བོ་གཅིག །དེ་ཕྱིར་འཁོར་རྣམས་ཆོས་སྐུར་རྟོགས། །སངས་རྒྱས་འབྲས་བུ་དེ་ཉིད་ཡིན། །རྫོགས་པ་ཆེན་པོ་ངེས་དོན་འདུས་པ་ལས། ― DNG001_Page_0441 ―
[མ་དཔེ་གཟིགས་ན་འདིར་གནོན།]
མཁའ་འགྲོའི་རྟོགས་པ་བརྗོད་པའི་ལེའུ་སྟེ་བརྒྱད་ཅུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ལྟ་བའི་སྙིང་པོའི་དོན་གཏད་པ། །ཆོས་ཀྱི་རྒྱལ་པོ་ཀུན་རྫོགས་འདི། །སྐལ་ལྡན་འདུས་པ་རྣམས་ཀྱིས་ཀྱང་། །ཡིད་ལ་བརྣག་ཅིང་བཅང་བར་གྱིས། །ད་ཡང་འདུས་པའི་སྙིང་པོ་ཉོན། །ང་ཡིས་བསྟན་པའི་སྙིང་པོ་འདི། །སངས་རྒྱས་ཀུན་གྱི་གསང་བའི་ཆོས། །རིག་འཛིན་རྣམས་ཀྱི་ཐུགས་ལ་སྦོས། །ཆོས་སྐྱོང་རྣམས་ཀྱིས་གཏེར་ལྟར་སྲུངས། །དེ་དོན་མན་ངག་ངེས་དོན་འདི། །ལོག་སྲེད་ཞེན་ཆགས་མ་ངེས་ལ། །ནམ་ཡང་བསྟན་པར་མ་བྱེད་ཅིག །ཉན་ཐོས་ལ་སོགས་ལྟ་དམན་ལ། །བསྟན་ཀྱང་གོ་བར་མི་འགྱུར་ལ། །མི་ཐེག་ཁལ་ཆེན་བཀལ་བ་བཞིན། །དོན་མ་གོ་བས་ངན་སོང་ལྟུང་། །ད་ཡང་འདུས་པའི་འཁོར་ཀུན་ཉོན། །དེ་བས་རང་སེམས་སྔོན་སྤྱངས་པའི། །རྣལ་འབྱོར་དད་ལྡན་འཁོར་རྣམས་ལ། །འཆི་ཀའི་སྙིང་པོ་དོན་མཚོན་ནས། །ངེས་དོན་རྒྱུད་འདི་རྟོགས་པར་གྱིས། །ད་ཡང་རྡོ་རྗེ་སེམས་དཔའ་ཉོན། །ཡང་གསང་ངེས་དོན་ཁྱད་པར་ཅན། །འབྲས་བུ་ངེས་པའི་གདམས་ངག་འདི། །བླ་མར་མི་གུས་ང་རྒྱལ་ཅན། །ཚུལ་འཆོས་བྱེད་ཅིང་སློབ་དཔོན་སྨོད། །ནོར་ཕོངས་གཞོགས་སློང་ཁ་གསགས་ཅན། །གཡོ་སྒྱུའི་ཐབས་ཀྱིས་ཆོས་འདོད་ལ། །རྒྱུད་ཀྱི་སྙིང་པོའི་ལྟ་བ་ནི། །ནམ་ཡང་བསྟན་པར་མ་གསུངས་སོ། །རྙེད་འདོད་རང་བཟོར་ངེས་དོན་ཆོས། །གལ་ཏེ་སྙིང་པོའི་དོན་བསྟན་ན། །འཕགས་པ་རྣམས་ཀྱང་དགྲར་ལྡང་ན། །མཁའ་འགྲོ་དམ་ཅན་སྨོས་ཅི་དགོས། །རང་གི་སྲོག་བཅད་མནར་མེད་ལྟུང་། །ད་ཡང་འདུས་པའི་སྙིང་པོ་ཉོན། །ངེས་དོན་འདུས་པའི་རྒྱུད་ཆེན་འདི། །མར་མེ་ཤི་ཁའི་འོད་བཞིན་དུ། །བསྟན་པ་འཇིག་པའི་དུས་དག་ཏུ། །ཀུན་བཟང་ཐུགས་རྗེའི་བྱིན་རླབས་ཀྱིས། །རྣལ་འབྱོར་སྐལ་ལྡན་རྣམས་ལ་འབྱུང་། །དེ་ཚེ་ངེས་དོན་འབྲས་བུ་འདི། །གུ་ལང་གསེར་བཞིན་མི་ནུབ་ཙམ། །སྣོད་ལྡན་འགའ་ལ་བསྟན་པ་ལས། །སྣང་དགུ་ རྫོགས་པ་ཆེན་པོ་རིན་པོ་ཆེ་འཁོར་བ་རྩད་གཅོད་ཀྱི་རྒྱུད་ཅེས་བྱ་བ།― DNG001_Page_0442 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྟི་རཏྣ་སཾ་སཱ་ར་མཱུ་ལ་ཙྪེ་ད་ན་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོ་རིན་པོ་ཆེ་འཁོར་བ་རྩད་གཅོད་ཀྱི་རྒྱུད་ཅེས་བྱ་བ། བཅོམ་ལྡན་འདས་དཔལ་རང་བྱུང་གི་ངོ་བོ་ཉིད་ཡེ་ཤེས་ཀྱི་སྐུ་དང་ལྡན་པ་ལ་ཕྱག་འཚལ་ལོ། །འདི་སྐད་བདག་གིས་གསུངས་པའི་དུས་གཅིག་ན། བཅོམ་ལྡན་འདས་འོག་མིན་གྱི་གནས་ན། སྐུ་བྱང་ཆུབ་ཀྱི་སྙིང་པོ་ལ་བཞུགས་པས། རྡོ་རྗེ་སེམས་དཔའ་ལ་གཟིགས་ནས། །ཡེ་ཤེས་འཁོར་ལོའི་དགོངས་པ་ལས། །གཡོས་པ་མེད་པར་སྙོམས་པར་ཞུགས། །དེའི་ཚེ་དུས་གསུམ་སངས་རྒྱས་དང་། །རྡོ་རྗེ་འཆང་གི་རིག་འཛིན་དང་། །དཔལ་ཆེན་ཁྲག་འཐུང་མ་མོའི་ཚོགས། ། ― DNG001_Page_0443 ―
[མ་དཔེ་གཟིགས་ན་འདིར་གནོན།]
གཞན་ཡང་ལྷ་མི་ལ་སོགས་པ། །དང་བའི་དད་པས་འདུས་པ་རྣམས། །རང་སེམས་གདོད་ནས་དག་པའི་ཕྱིར། །དང་བའི་ཡིད་ཀྱིས་ཡེངས་མེད་པར། །ཐབས་ཅིག་རིམ་པར་འཁོད་གྱུར་ཏོ། །དེ་ནས་ཐུགས་ཀྱིས་གཟིགས་པའི་དོན། །རྡོ་རྗེ་སེམས་དཔས་དོན་རིག་སྟེ། །འཁོར་རྣམས་ལ་ནི་བརྩེར་དགོངས་ནས། །ཏིང་ངེ་འཛིན་གྱི་དོན་གསོལ་པ། །འཇིག་རྟེན་མགོན་པོ་རྫོགས་སངས་རྒྱས། །ཡེ་ཤེས་ཐུགས་རྗེ་ཆེན་པོ་ཡིས། །ཆོས་ཉིད་གནས་ལུགས་ཇི་ལྟ་བ། །མ་ནོར་མ་བཅོས་སྙིང་པོའི་ཐུགས། །འཁྲུལ་པའི་བློ་ཡིས་རྟོགས་པའི་ཐབས། །དུས་འདིར་བདག་ལ་བཤད་དུ་གསོལ། །རང་བྱུང་ངོ་བོ་ཉིད་སྐུ་སྟེ། །དོན་ལྡན་ཆོས་རྗེས་བཀའ་སྩལ་པ། །སངས་རྒྱས་ཆོས་ཉིད་ཇི་ལྟ་བ། །འཁོར་འདས་མ་རིག་སྙིང་པོའི་དོན། །ཡང་མེས་ང་ཡིས་དོན་བཤད་དུ། །རྒྱུད་ལུང་སངས་རྒྱས་སྐྲག་ཅིང་སྔངས། །ཉན་ཐོས་མདོ་སྡེ་བརྒྱལ་ཞིང་འབོག །ལྷ་མིན་འཇིག་རྟེན་སྲིན་པོའི་ཚོགས། །སྒྲོ་སྐུར་འདོགས་པའི་གང་ཟག་རྣམས། །གཏན་དུ་དམྱལ་བ་ཆེན་པོར་ལྟུང་། །དེ་ལ་ཚེ་ཡི་བར་གཅོད་དང་། །འཇིགས་པ་སྣ་ཚོགས་ཀུན་ཀྱང་འོང་། །མགོ་ལུས་ཚལ་པ་སྟོང་དུ་འགས། །རིག་འཛིན་རྣམས་ཀྱིས་སྤོང་བར་འགྱུར། །དེ་ལྟར་བཀའ་སྩལ་དོན་གོ་ནས། །སེམས་ཀྱི་གདུང་བའི་ཡུས་བཏོན་ཏོ། །འགལ་སེམས་རྡུལ་ཙམ་མེད་པ་ནི། །དད་པས་བྱང་ཆུབ་དོན་ལ་མོས། །ངེས་ཚིག་བསྟན་པར་ཡིད་བསྡུས་སོ། །དེ་ཚེ་ངོ་བོ་ཉིད་སྐུ་དེས། །ཡེ་ཤེས་འཁོར་ལོའི་དགོངས་པ་ལས། །ཐུགས་རྗེས་མངོན་པར་གཟིགས་ནས་ཀྱང་། །ཀུན་བཟང་ཆོས་སྐུ་རྟོགས་འདོད་དེ། །དོན་དུ་བསྡུས་པ་བཀའ་སྩོལ་པ། །ལེགས་སོ་དད་པའི་འཁོར་རྣམས་ཉོན། །དོན་རྣམས་གསལ་བར་ངས་བཤད་ཀྱིས། །ལེགས་པར་ཉོན་ལ་ཡིད་ཀྱིས་ཟུང་། །འཁོར་འདས་ཚིག་ཏུ་བརྗོད་དཀའ་བ། །ཆོས་སྐུ་ནམ་མཁའ་ལྟ་བུ་དེ། །ཀུན་ལ་གནས་ཀྱང་རྟོགས་པར་དཀའ། །མངོན་སུམ་དུ་ཡང་མི་གནས་ཕྱིར། །སྲིད་གསུམ་སེམས་ཅན་ཐམས་ཅད་ནི། ། ― DNG001_Page_0444 ―
[མ་དཔེ་གཟིགས་ན་འདིར་གནོན།]
བཀྲིར་དང་དོན་གྱིས་འདུལ་བ་ལས། །ངེས་པའི་དོན་གྱིས་འདུལ་བ་མིན། །ངེས་པའི་དོན་གྱིས་འདུལ་བ་ནི། །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ལས་ནི་རེས་འགའ་ཞིག །འབྱུང་སྲིད་ཀུན་དང་ཐུན་མོང་མིན། །དེ་ཕྱིར་སྣོད་ལྡན་འཕྲད་གྱུར་ན། །མ་མཚོན་གོ་དང་མ་དཔྱད་རྟོགས། །དོན་ལྡན་དག་ཏུ་རིག་པའི་བློས། །མ་བསྒོམས་བསྟན་པས་ངེས་པར་ཆོག །ད་ཡང་རྡོ་རྗེ་སེམས་དཔའ་ཉོན། །བླ་མ་རྡོ་རྗེ་སློབ་དཔོན་ལ། །དད་པ་སྐྱོ་ངལ་མེད་པ་དང་། །མཆེད་ལ་སྲིང་ལྟར་གདུང་བ་དང་། །འཁོར་བའི་སྡུག་བསྔལ་འཇོམས་པའི་ཕྱིར། །བྱང་ཆུབ་སྲོག་དང་བསྡོ་བ་ལ། །དོན་འདི་ཁྱོད་ལ་བཤད་ཀྱིས་ཉོན། །དེ་དང་མི་ལྡན་འདི་བསྟན་ན། །ཕྱི་མའི་དུས་ཀྱི་སྣོད་མེད་རྣམས། །གནམ་ལྕགས་ས་ལ་བྱིང་བ་བཞིན། །མཁའ་འགྲོ་རྣམས་ཀྱིས་སྲོག་བཅད་ནས། །ཐར་མེད་དམྱལ་བའི་གནས་སུ་ལྟུང་། །རྫོགས་པ་ཆེན་པོ་རིན་པོ་ཆེ་འཁོར་བ་རྩད་ནས་གཅོད་པའི་རྒྱུད་ལས། དོན་གྱི་གླེང་གཞི་བསྟན་པའི་ལེའུ་སྟེ་དང་པོའོ།། །།སེམས་དཔའ་ཆེན་པོ་ཁྱོད་ཉོན་ཅིག །ང་ཡི་ཆོས་ཉིད་གནས་ལུགས་ནི། །དུས་གསུམ་མེད་པའི་གོང་རོལ་དུ། །འཁོར་འདས་གཉིས་ཀ་གདོད་ནས་མེད། །ང་ཉིད་དེ་ཚེ་གདོད་ནས་གནས། །བསྟན་པ་མེད་པའི་སྟོན་པའི་ཐུགས། །ང་རང་ཉིད་ལས་མ་གཏོགས་པ། །སངས་རྒྱས་སེམས་ཅན་མིང་ཡང་མེད། །འབྱུང་བ་ལྔ་དང་སྲིད་པའང་མེད། །མི་སྲིད་ཕུང་པོ་གང་ལས་སྐྱེད། །བག་ཆགས་མ་བགོས་སྨོས་ཅི་དགོས། །དོན་རྟོགས་སངས་རྒྱས་མེད་པའི་ཕྱིར། །དེ་བསྟན་རྟོགས་པ་ཤར་བ་མེད། །དེ་ཕྱིར་འཁོར་འདས་ང་ལ་བསླད། །གཟུགས་མེད་སེམས་ཀྱི་སྙིང་པོ་ལ། །སྒོ་ལྔ་མེད་ཕྱིར་ཡུལ་ཡང་མེད། །བཟང་ངན་རྣམ་རྟོག་གཏིང་ནས་མེད། །ང་ཉིད་གཅིག་པུ་སྔོན་དུ་བྱུང་། །རང་གསང་ང་ཉིད་ཀུན་གྱི་མེས། །རྒྱུ་རྐྱེན་མེད་པའི་སྙིང་པོ་ཡིན། །ད་ཡང་འདུས་པའི་སྙིང་པོ་ཉོན། །ང་ཡི་མཚན་ཉིད་མཐུན་དཔེ་ནི། །དངོས་པོ་མེད་པས་ནམ་མཁའ་འདྲ། །མི་འགྱུར་སྲ་བས་རྡོ་རྗེ་འདྲ། ། ― DNG001_Page_0445 ―
[མ་དཔེ་གཟིགས་ན་འདིར་གནོན།]
སྐྱེ་བ་མེད་པས་ཨ་དང་འདྲ། །དོན་ལ་ཡིན་ཕྱིར་དཔེ་མི་བསྟན། །དེ་ཕྱིར་སྙིང་པོའི་ཐིག་ལེ་འདི། །ཆོས་ཉིད་མེད་པའི་སྔོན་རོལ་དུ། །སྟོང་པ་ཉིད་ལས་ང་སྔ་ཕྱིར། །ང་ལ་སྟོང་པར་སྐུར་མ་འདེབས། །གདགས་པ་མེད་པའི་སྔོན་རོལ་དུ། །མིང་དང་ཚིག་པས་ང་སྔ་ཕྱིར། །ཡོད་ཅིང་རྟག་པར་སྒྲོ་མི་གདགས། །ང་ནི་འགྱུར་མེད་སྙིང་པོ་ལ། །སྐྱེ་ཤི་མེད་པར་ཡིད་ཆེས་པས། །འཁོར་འདས་མ་རེག་ང་སྔ་ཕྱིར། །རེག་གཉིས་ལོག་ཕྱིར་གདོད་ནས་དག །སྐྱོན་གྱིས་མ་གོས་ཆོས་ཀྱི་སྐུ། །ཀུན་བཟང་གློ་བུར་སངས་རྒྱས་ཏེ། །རབ་ཏུ་ཆེ་མཆོག་ཡེ་ཤེས་སྐུ། །དོན་གྱི་སངས་རྒྱས་རྟོགས་པའི་ཕྱིར། །མི་སྐྱེ་མི་འགག་ནམ་མཁའ་འདྲ། །ང་མ་རྟོགས་པའི་སངས་རྒྱས་མེད། །དེ་ཕྱིར་སངས་རྒྱས་ཀུན་གྱི་མེས། །སངས་རྒྱས་ཀུན་གྱི་བླ་མ་ང་། །ང་མ་འཁྲུལ་པའི་སེམས་ཅན་མེད། །སེམས་ཅན་ཕ་མ་ང་ཉིད་ཡིན། །ང་ལས་འཁྲུལ་པའི་རྐྱེན་གྱིས་སུ། །སངས་རྒྱས་སེམས་ཅན་ང་ལས་བྱུང་། །ཕྱི་ཡི་འབྱུང་བ་ང་ཡི་རྩལ། །ནམ་མཁའ་སྟོང་པ་ང་ཡི་དཔེ། །ཕྱི་ནང་མཚན་མ་ང་འཁྲུལ་རྟགས། །འཁོར་འདས་རྩ་བ་ང་ཉིད་ཡིན། །དུས་གསུམ་སངས་རྒྱས་ཐམས་ཅད་ཀྱིས། །ང་ལ་བཤད་ཅིང་མཚོན་མི་མཁྱེན། །མཛད་པའི་ཆོས་ཉིད་སྨོས་ཅི་དགོས། །བསྐལ་པར་འཁྱམས་ཀྱང་སྐྱེ་བ་མེད། །ཤི་མེད་ནོར་མཆོག་ཀུན་གྱི་གཞི། །རང་བྱུང་སྙིང་པོ་ཀུན་ལ་ཁྱབ། །དོན་ལ་འགྱུར་བ་རྡུལ་ཙམ་མེད། །གདོད་ནས་འགྱུར་མེད་བྱང་ཆུབ་ལ། །ཇི་སྐད་བརྗོད་ཀྱང་མཐུན་པ་མེད། །དེ་ཕྱིར་བློ་ཡི་སྤྱོད་ཡུལ་མིན། །མཛད་སྤྱོད་འབྱུང་བ་འཁོར་བའི་ཆོས། །དེ་ལ་དམ་པར་གང་འཛིན་པ། །ནམ་མཁའ་དག་ལ་འཛིན་པ་འདྲ། །སངས་རྒྱས་རྣམས་ནི་སྤྱོད་མི་མཛད། །མ་བྱུང་མ་སྐྱེས་ང་ཉིད་ཡིན། །རྫོགས་པ་ཆེན་པོ་རིན་པོ་ཆེ་འཁོར་བ་རྩད་གཅོད་ཀྱི་རྒྱུད་ལས། དོན་ཆོས་ཉིད་ཀྱི་གནས་ལུགས་བསྟན་པའི་ལེའུ་སྟེ་གཉིས་པའོ།། །།ད་ཡང་སེམས་དཔའ་ཆེན་པོ་ཉོན། །ང་ལས་འཁྲུལ་པ་ ― DNG001_Page_0446 ―
[མ་དཔེ་གཟིགས་ན་འདིར་གནོན།]
བྱུང་བ་ནི། །ཐོག་མའི་དུས་ཀྱི་མཐའ་དྲུག་གཉིས། །ཀུན་གཞི་མ་རིག་མུན་གསེབ་ན། །གཅིག་ལ་སྣང་བ་གཉིས་སུ་འབྱུང་། །ཡར་མར་འཁྲུལ་འཁོར་འཁོར་བའི་ཆོས། །ཐག་སྦྲུལ་ཐོ་ཡོར་ཇི་བཞིན་དུ། །མ་རིག་པ་ལས་འཁྲུལ་པ་བརྒྱུད། །དམུས་ལོང་ལྟ་བུར་རང་བསྒྲུབས་པས། །མི་ཤེས་ལོག་པའི་འཁོར་བར་འཁྱམས། །དེ་བས་སེམས་དཔའ་ཆེན་པོ་ཉོན། །འོག་མའི་ལུང་ལྡན་རྐྱེན་ཕྲད་ནས། །བློས་འཇལ་ལྟ་བ་རྣམ་པ་བཞི། །ཡོ་ག་མན་ཆད་ང་ཡི་གཏམ། །ཇི་སྙེད་མཛད་ཀྱང་ང་མི་རྙེད། །མཚན་མ་རགས་ཤིང་ང་མི་རྟོགས། །རྒྱུད་ལུང་རྣལ་འབྱོར་ཆེན་པོ་ལས། །ང་ཚོལ་པ་འཁྲུལ་ང་མི་རྙེད། །ང་མ་རྙེད་པས་སྣང་བ་ཞེན། །འགྲོ་དོན་ཐེག་པ་རྣམ་པ་བརྒྱད། །གཞི་ཉིད་མ་ཤེས་འཁྲུལ་པའི་ཕྱིར། །བརྒྱད་གཉིས་མི་སྒྲོལ་ཤིན་ཏུ་འཆིང་། །ད་ཡང་རྡོ་རྗེ་སེམས་དཔའ་ཉོན། །འཁོར་བའི་རྒྱུ་ནི་རྟོག་པ་ཡིན། །གཟུང་འཛིན་ཞེན་པ་མཚན་མར་སྣང་། །བག་ཆགས་བརྟས་ཕྱིར་ཀུན་གཞི་ཡིན། །ཡེ་ཤེས་མྱ་ངན་འདས་པའི་རྒྱུ། །མི་རྟོག་གཞི་གནས་ཉིད་བརྡལ་བ། །འབྲས་བུ་ཟུང་འདྲེལ་ལྷུན་གྲུབ་པ། །གཉིས་ཀའི་རྒྱུར་གྱུར་གཞི་ཉིད་ནི། །རང་བྱུང་ངོ་བོ་ཉིད་ཀྱི་སྐུ། །དེ་ཉིད་མ་རྟོགས་དམན་རྣམས་ཀྱིས། །སྣང་བ་དེ་ཉིད་གཞིར་འདོད་པས། །སྨིག་རྒྱུ་ཆུར་མཐོང་འཐུངས་འདོད་བཞིན། །འཁོར་འདས་གློ་བུར་རྐྱེན་ཡིན་ཕྱིར། །ངོ་བོ་གནས་ལུགས་ཆོས་སྐུ་ཡིན། །རྫོགས་པ་ཆེན་པོ་རིན་པོ་ཆེ་འཁོར་བ་རྩད་གཅོད་ཀྱི་རྒྱུད་ལས། དེ་ལས་འཁྲུལ་ཚུལ་བསྟན་པའི་ལེའུ་སྟེ་གསུམ་པའོ།། །།ཀྱེ་སེམས་དཔའ་རྡོ་རྗེ་ཉོན་ཅིག །མ་རིག་འཁྲུལ་པ་ལྡོག་འདོད་རྣམས། །འཁོར་འདས་གཉིས་ཀྱི་མ་རིག་འདོད། །རང་སེམས་སྙིང་པོ་རྟོགས་པའི་ཐབས། །ལུས་སྲོག་མི་ལྟ་དད་པ་ཡིས། །སྐྲག་ཅིང་ཡ་ང་མེད་སེམས་ཀྱིས། །ཐེ་ཚོམ་ཡིད་གཉིས་མེད་པར་ནི། །འཁོར་འདས་རྩ་བའི་ངོ་བོ་ཉིད། །དཔའ་བརྟུལ་ཆེན་པོའི་བརྩོན་འགྲུས་ཀྱིས། །ཕྱིར་མི་ ― DNG001_Page_0447 ―
[མ་དཔེ་གཟིགས་ན་འདིར་གནོན།]
ལྡོག་ཅིང་ཡིད་ཆེས་པས། །ཡེངས་པར་མི་འབྱུང་རྒྱུན་མི་འཆད། །སེམས་ཉིད་མ་རྟོགས་དོན་མི་བཙལ། །དུག་ལྔ་མི་སྤང་ཆོས་ཉིད་དུ། །དེ་ཤེས་མི་བསྒོམ་དགོས་པ་མེད། །ད་ཡང་འདུས་པའི་འཁོར་རྣམས་ཉོན། །འཁོར་འདས་གཉིས་ཀྱི་སྒྲོ་སྐུར་གྱིས། །མ་གོས་ངོ་བོ་ཉིད་ཀྱི་སྐུ། །ཆོས་རྣམས་ཀུན་གྱི་གཞི་ཡིན་ཕྱིར། །རྒྱུ་ཡི་ཡེ་ཤེས་དེ་ལ་བྱ། །རྟོགས་པའི་རྐྱེན་གྱིས་ཆོས་ཀྱི་སྐུ། །ཐམས་ཅད་མཁྱེན་པའི་རྒྱུ་ཡིན་ཕྱིར། །མ་རྟོགས་སེམས་ཅན་ཐམས་ཅད་ཀྱང་། །བླ་མའི་རྐྱེན་གྱིས་ཡེ་ཤེས་འབྱུང་། །འཁོར་འདས་ལམ་གྱི་འབད་རྩོལ་གྱིས། །བླ་མེད་བྱང་ཆུབ་གེགས་ཡིན་ཕྱིར། །བསྒོམ་རྩོལ་མེད་པའི་ཡེ་ཤེས་འདི། །ལམ་གྱི་མཆོག་ནི་དམ་པར་གསུངས། །དེ་ཉིད་རྟོགས་པའི་ཤེས་རབ་ཀྱིས། །ཐེག་བརྒྱད་སྤང་ལེན་ཟིལ་གྱིས་གནོན། །སེམས་རྟོགས་སྙིང་པོ་དེ་ཉིད་ནས། །སྟོབས་རྣམས་མ་བཙལ་ཡོན་ཏན་རྫོགས། །དེ་ལྟའི་ཡེ་ཤེས་འབྲས་བུ་ནི། །ཕྱི་མ་མ་ཡིན་དུས་འདི་རུ། །དབུལ་པོས་རིན་ཆེན་རྙེད་པ་བཞིན། །བཙལ་མེད་རིག་པ་མངོན་སངས་རྒྱས། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཡེ་ཤེས་ཆེན་པོ་ཡི། །ཡིན་མིན་དབྱེ་བ་ངས་བཤད་ཀྱིས། །ཡིད་ཀྱིས་ཉོན་ལ་ལེགས་པར་ཟུང་། །ཡེ་ཤེས་ཆེན་པོ་རང་བྱུང་དེ། །སེམས་ཅན་ཀུན་ལ་ཡོད་མོད་ཀྱང་། །མ་རྟོགས་ཕྱིར་ན་ཡེ་ཤེས་མེད། །མིག་མཁན་མ་རྙེད་ལོང་བ་འདྲ། །རང་བྱུང་མེད་པའི་ཡེ་ཤེས་དེ། །གནས་འགྱུར་ཡེ་ཤེས་ལྔ་འདོད་པ། །རྐྱེན་གྱིས་འགྱུར་ཕྱིར་ཡེ་ཤེས་མིན། །རྡོ་ལ་གསེར་དུ་འཛིན་པ་ལྟར། །ཡེ་ཤེས་རང་བྱུང་མ་ཡིན་ཏེ། །ཡིད་གཉིས་ཀུན་གཞི་གློ་བུར་སྐྱེད། །གཞི་འཁྲུལ་ཕྱིར་ན་གཉིས་མེད་མིན། །རི་བོང་རྭ་ཡི་ཁ་དོག་འདྲ། །རང་བྱུང་ཡེ་ཤེས་ཡིན་པས་ན། །ཤེས་རབ་ལྷག་མཐོང་རང་བྱུང་བ། །ཡེ་ནས་གནས་པའི་རང་བྱུང་དེ། །ལུང་ལྡན་རྐྱེན་གྱིས་རྟོགས་པའི་ཕྱིར། །རང་བྱུང་ཡེ་ཤེས་འཛོམ་པ་ནི། །མར་གྱི་ཡང་ཞུན་ལྟ་བུར་གསུངས། །རྫོགས་པ་ཆེན་པོ་རིན་པོ་ཆེ་འཁོར་བ་རྩད་གཅོད་ཀྱི་རྒྱུད་ལས། དོན་ ― DNG001_Page_0448 ―
[མ་དཔེ་གཟིགས་ན་འདིར་གནོན།]
རྟོགས་པར་བྱ་བའི་ཐབས་བསྟན་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཟིལ་གྱིས་གནོན་པའི་ཏིང་འཛིན་ལ། །སྙོམས་པར་ཞུགས་ནས་ཡང་གསོལ་པ། །ཀུན་བཟང་ངོ་བོ་ཉིད་ཀྱི་སྐུས། །ཚེགས་མེད་གདམས་ངག་མ་བསླད་པར། །ཁྱོད་ཀྱི་མཛད་སྤྱོད་ཇི་ལྟ་བ། །དོན་དང་མཐུན་པར་མཛད་དུ་གསོལ། །དོན་གསན་སྟོན་པས་བཀའ་སྩལ་པ། །གཞི་ཉིད་རྟོགས་པར་བྱ་བའི་ཕྱིར། །དོན་གྱི་ལྟ་བ་ངོས་བཟུང་སྟེ། །རྣམ་གཞི་ཕྱི་མ་བར་མ་ནང་། །གསུམ་བྲལ་བཞི་ལྡན་ཆོས་སྐུ་གསང་། །གཅིག་ལས་ཐ་དད་ངོས་ཟིན་པས། །ཉི་མའི་ཟེར་དང་འཆར་ངོས་བཞིན། །དགག་བསྒྲུབ་མེད་ཕྱིར་ཆོས་ཀྱི་དབྱིངས། །དེ་ཕྱིར་རང་སེམས་སྙིང་པོ་འདི། །རྟོགས་པས་སངས་རྒྱས་ལམ་དུ་བདེ། །རང་སེམས་བསྒོམ་པ་ཡེ་ཤེས་ལམ། །ནམ་མཁའ་འབྱུང་བའི་ལམ་ཡིན་ནོ། །དཔེར་ན་ཁྱུང་ཆེན་མཁའ་ལ་ལྡིང་། །ཆུ་ཀླུང་གྱེན་མཐུར་ཡ་མི་ང་། །བར་སྣང་ཁམས་ཀུན་ལམ་དུ་བདེ། །དམིགས་པའི་ས་ཕྱོགས་ཡིད་ཀྱིས་ཕྱིན། །ལྟ་བ་རྟོགས་པའི་ལམ་ཡིན་པས། །དེ་བཞིན་ཡེ་ནས་རྣལ་འབྱོར་ཐུགས། །མ་བསྒོམས་ཡེ་ཤེས་ད་ལྟ་ཉིད། །རྟོགས་ཕྱིར་རང་སེམས་བསྒོམ་དུ་མེད། །དེ་ལས་མི་འདའ་ལྷུན་གྱིས་གྲུབ། །དེ་ཕྱིར་མ་བཅོས་ལྟ་བ་ཡིན། །དམིགས་མེད་སེམས་ཀྱི་ཡེ་ཤེས་གསལ། །བཏང་བཞག་མེད་པའི་ལྟ་བ་ལ། །གོལ་ས་རྡུལ་ཙམ་མེད་པའི་ཕྱིར། །བསྒོམ་མེད་ཡེ་ཤེས་ཆེན་པོ་འབྱུང་། །ད་ཡང་རྡོ་རྗེ་སེམས་དཔའ་ཉོན། །སྒྲོ་སྐུར་གཅོད་པའི་མན་ངག་བསྟན། །རང་སེམས་ཆོས་སྐུར་ངོ་སྤྲད་ནས། །ལུས་བཅོས་ཀུན་གཞི་གཞི་ཆ་ལ། །སྔ་ཕྱི་དང་བྲལ་ཡེ་ཤེས་གསལ། །ཆུ་དྭངས་རྙོག་མེད་དཔེ་བཞིན་དུ། །ཆོས་སྐུ་ཁ་མིག་རྣ་བ་ཅན། །འབྱུང་འཇུག་མེད་ཕྱིར་བསྒོམ་མི་དགོས། །སྟོང་ཉིད་ཆིག་ཆོད་དུས་མཉམ་ཕྱིར། །དྲན་རིག་རྒྱུ་བ་ཅི་བྱུང་ཡང་། །གཞི་ལ་མེད་ཕྱིར་མ་བསྒོམས་ཀྱང་། །སེམས་ཅན་དུས་ན་ཆོས་ཀྱི་སྐུ། །སྒྲོ་འདོགས་མ་ ― DNG001_Page_0449 ―
[མ་དཔེ་གཟིགས་ན་འདིར་གནོན།]
ཆོད་སུས་བསྒོམས་པ། །དཔེར་ན་བུམ་ནང་ནམ་མཁའ་བཞིན། །ཚེ་གཅིག་བསྒོམས་ཀྱང་ཡེ་ཤེས་མེད། །རྣལ་འབྱོར་མ་བསྒོམས་རྟོགས་པར་གྱིས། །ད་ཡང་འདུས་པའི་སེམས་དཔའ་ཉོན། །ཡུལ་གྱི་རྐྱེན་གྱིས་རྟོག་བྱུང་ཚེ། །ཕྱི་ཡི་དུས་བཞི་དོན་གསལ་བ། །ཡེ་ཤེས་མ་བསྒོམས་བྲལ་བ་མིན། །བ་མོ་ལ་ནི་ཉི་ཤར་བཞིན། །ཡུལ་ཉིད་སེམས་སུ་མི་བསྒོམ་པས། །དྲན་རིག་ཆོས་ཉིད་བྱང་ཆུབ་སེམས། །དེ་ཉིད་སྤྱད་པའི་ཡུལ་ལས་འདས། །དེ་ཉིད་དོན་ལས་ཉམས་པ་མེད། །རང་སེམས་བྱིང་རྒོད་རུམ་གནས་ཚེ། །ནང་གི་དུས་བཞི་དོན་དྲན་པས། །ཚོགས་དྲུག་འགགས་ཀྱང་ཆོས་སྐུར་གསལ། །བུམ་པའི་ནང་གི་མར་མེ་འདྲ། །འཇིགས་པ་བརྒལ་འདོད་མི་བཞིན་དུ། །ཉམས་མེད་རིག་པའི་དོན་འདི་ལས། །ནད་གཅོད་སྡུག་བསྔལ་ཅི་བྱུང་ཡང་། །མན་ངག་དྲན་པ་གཅེས་པར་གསུང་། །སངས་རྒྱས་སེམས་ཅན་གཉིས་ཀའི་གོང་། །གསང་བའི་དུས་གཅིག་ཉིད་དུ་ཤེས། །གོལ་ས་རྡུལ་ཙམ་མི་འབྱུང་བས། །དེ་ཚེ་ཆོས་སྐུ་ཟང་ཀ་མ། །མི་འགྱུར་བརྟན་པས་གསེར་བཞིན་ནོ། །དེ་ཕྱིར་སྐྱེ་བའི་རྒྱུ་མེད་པས། །ཐ་མ་འཆི་ཞིང་འཕོ་བ་མེད། །དེ་ལྟར་རིག་པ་རྒྱུན་མི་འཆད། །ལུས་ངག་ཡིད་གསུམ་སྐུ་གསུང་ཐུགས། །རྫོགས་པ་ཆེན་པོ་རིན་པོ་ཆེ་འཁོར་བ་རྩད་ནས་གཅོད་པའི་རྒྱུད་ལས། གདམས་ངག་མངོན་དུ་བསྟན་པའི་ལེའུ་སྟེ་ལྔ་པའོ།། །།སེམས་དཔའ་ཆེན་པོ་ད་ཡང་ཉོན། །ང་ཡི་རྟོགས་པ་ལ་བཟླ་ན། །འདོད་ཆགས་ཞེ་སྡང་གཏི་མུག་ཀྱང་། །སྤང་དུ་མེད་དེ་བྱང་ཆུབ་ལམ། །འདོད་ཡོན་ལྔ་ནི་ལོངས་སྤྱོད་རྒྱན། །ལུས་ལ་ཕོ་མོ་ཡོད་པའི་ཕྱིར། །ཆགས་པ་སྤྱོད་ཚེ་དོན་གྱིས་ཟིན། །གསལ་ཐེབས་ཆོས་སྐུའི་སྙིང་པོ་ཉིད། །དེ་ཚེ་བདེ་བ་ལོངས་སྤྱོད་རྒྱན། །གཞི་ལ་འཆིང་གྲོལ་མེད་པའི་ཕྱིར། །དཀར་པོའི་ཆོས་དང་སྡིག་ལ་སོགས། །གཉིས་ཀའི་འབྲས་བུ་མི་འབྱུང་བས། །སེམས་ཉིད་ཡེ་ནས་རྟོགས་པ་ཡིན། །དེ་ཕྱིར་དགེ་སྡིག་བྱེད་མཁན་མེད། ། ― DNG001_Page_0450 ―
[མ་དཔེ་གཟིགས་ན་འདིར་གནོན།]
གཉིས་ཀ་སྐྱེས་བུའི་ལོག་རྟོགས་ཙམ། །དོན་ལ་སྤྱོད་སྤངས་གཉིས་ཀ་མེད། །དེ་ཕྱིར་ཞེ་སྡང་ཡུལ་མི་དམིགས། །འཇིག་རྟེན་ཚོར་བ་བསལ་པ་ནི། །གཏི་མུག་རྨོངས་པར་ངས་བཤད་པས། །རྟོགས་ནས་མི་འབྱེད་རང་སེམས་འདི། །ཅི་སྤྱད་བལྟ་བར་རབ་ཤེས་པས། །འདོད་ཡོན་ལྔ་ལ་ཅི་སྤྱོད་ཀྱང་། །བཅིང་བར་མི་འགྱུར་གྲོལ་བར་འགྱུར། །རྡོ་རྗེ་སེམས་དཔའ་ད་ཉོན་ཅིག །ཆོས་འདི་ཐོས་པས་འཛིན་རྟོག་ནུབ། །རྒྱུད་འདི་གོ་བས་རྟོག་པ་ཞི། །འཁོར་འདས་འབྱུང་བ་རྣམ་པར་དག །སྤང་སྡུད་ཞེན་པ་རྡུལ་ཙམ་མེད། །རྟག་ཆད་གཉིས་པོ་རྡུལ་དུ་བརླག །འཁོར་འདས་བཟང་ངན་སྤྲིན་ལྟར་དེངས། །ཞེན་པའི་ཆོས་རྣམས་གཏིང་ནས་མེད། །སངས་རྒྱས་སེམས་ཅན་གཅིག་ཏུ་བྱས། །མཐོ་རིས་ངན་སོང་རྫུན་དུ་སོང་། །འཁོར་བ་ཆོས་ཉིད་ངང་དུ་བརླག །ཉེས་པ་དག་པས་སྒྲིབ་པ་མེད། །གཉིས་སུ་མེད་པས་ཤེས་རབ་གསལ། །གཞི་ནི་མི་འགྱུར་གསེར་བཞིན་དུ། །ཡེ་ཤེས་མི་འགྱུར་བརྟན་པ་ཆེ། །དེ་ལྟར་རྟོགས་པས་ཡེ་ཤེས་ཉིད། །འབྲས་བུ་གཞན་ནས་བཙལ་མི་དགོས། །གདོད་ནས་བྱུང་བའི་ངོ་བོ་ཉིད། །འབྲས་བུ་སུ་ལ་མི་ལྟོས་པ། །ལུས་དང་བྲལ་བ་ཀུན་བཟང་ཐུགས། །གཞི་གནས་བག་ཆགས་མི་གོས་པས། །རྣམ་ལྔ་མི་གཡོ་ཡེ་ཤེས་སྐུ། །རྫོགས་པ་ཆེན་པོ་རིན་པོ་ཆེ་འཁོར་བ་རྩད་ནས་གཅོད་པའི་རྒྱུད་ལས། རང་བྱུང་གི་ཡེ་ཤེས་ཆེན་པོར་ལ་བཟླ་བའི་ལེའུ་སྟེ་དྲུག་པའོ།། །།སེམས་དཔའ་རྡོ་རྗེ་ད་ཉོན་ཅིག །ང་ཡི་མཛད་སྤྱོད་ཆེན་པོ་ནི། །སྟོང་གསུམ་འཇིག་རྟེན་ཐམས་ཅད་ནི། །ང་ཡི་བཞུགས་གནས་གཟིགས་མོའི་ས། །གཟུགས་ཉིད་སྐུ་ལ་སྒྲར་སྣང་གསུང་། །དྲན་རྟོག་ཐམས་ཅད་ང་ཡི་ཐུགས། །སྣང་སྲིད་ཀུན་གྱིས་ང་མ་མཐོང་། །མཐའ་ཡས་མིང་དུ་བཏགས་པ་རྣམས། །ང་ཡི་རོལ་པ་ལས་གཞན་མེད། །ང་ཡི་སྣང་བ་སྣ་ཚོགས་པ། །དོན་ལ་མེད་ཕྱིར་གཞིག་མི་དགོས། །སྤྲོས་ཀྱང་ང་ལ་བསྡུས་ ― DNG001_Page_0451 ―
[མ་དཔེ་གཟིགས་ན་འདིར་གནོན།]
ཀྱང་ང་། །ང་ཡི་སྐུ་གསུང་ཐུགས་ལ་ནི། །འཁོར་བ་གདོད་ནས་མེད་པ་སྟེ། །ད་ཡང་རྡོ་རྗེ་སེམས་དཔའ་ཉོན། །ཡེ་ནས་གནས་པའི་གཞི་ཉིད་ནི། །ཆོས་ཀྱི་སྐུ་ཡི་ཐུགས་སུ་བསྟན། །དེ་ཉིད་རྟོགས་པའི་ཡེ་ཤེས་དེ། །ཆོས་ཀྱི་སྐུ་ཡི་ལོངས་སྤྱོད་ཐུགས། །དྲན་རྟོག་དོན་དུ་ཤེས་པ་དེ། །ཆོས་ཀྱི་སྐུ་ཡི་སྤྲུལ་པའི་ཐུགས། །དེ་ཉིད་རྟོགས་པའི་ཡེ་ཤེས་ཏེ། །དོན་ལྡན་གཟུགས་ཀྱི་ཕུང་པོ་འདི། །ལོངས་སྤྱོད་རྫོགས་པའི་ཆོས་ཀྱི་སྐུ། །དབང་པོ་མ་འགགས་གསལ་བ་དེ། །ལོངས་སྤྱོད་རྫོགས་པའི་ལོངས་སྤྱོད་སྐུ། །བསྒུལ་བསྐྱོད་ཡན་ལག་གང་ཡིན་ནི། །ལོངས་སྤྱོད་རྫོགས་པའི་སྤྲུལ་བའི་སྐུ། །དོན་ལྡན་ཚིག་ཏུ་བརྗོད་པ་དེ། །སྤྲུལ་པའི་སྐུ་ཡི་ཆོས་སྐུར་གསུང་། །དངོས་མེད་ཚིག་ཏུ་གསལ་བ་དེ། །སྤྲུལ་པའི་སྐུ་ཡི་ལོངས་སྤྱོད་གསུང་། །ཚིག་ལ་བརྟེན་ནས་དོན་གོ་བར། །སྤྲུལ་པ་སྐུ་ཡི་ཐུགས་ཡིན་ཕྱིར། །ཐུགས་ཀྱི་ཐུགས་ཏེ་ཐུགས་ལ་རོལ། །སྐུ་ཡི་སྐུ་སྟེ་སྐུ་ལ་རོལ། །གསུང་གི་གསུང་སྟེ་གསུང་ལ་རོལ། །དེ་ཡང་སེམས་དཔའ་ཆེན་པོ་ཉོན། །ང་ཡི་སྐུ་གསུང་ཐུགས་ཉིད་ལས། །གང་ཡང་མེད་དེ་ཡེ་ནས་གོང་། །ང་ཡི་མཛད་སྤྱོད་ཅི་སྤྱད་པ། །རྣམ་སྨིན་ལུས་དང་མ་བྲལ་ཀྱང་། །པདྨ་དང་ནི་འདམ་བཞིན་དུ། །ཉེས་པ་ཀུན་གྱིས་གོས་པ་མེད། །ཕྱི་མའི་མཛད་སྤྱོད་ཆེན་པོ་ཡང་། །རང་སེམས་རྟོགས་པའི་རྣལ་འབྱོར་པར། །དུས་འདི་མ་ཡིན་ཕྱི་མ་ཡི། །བར་དོར་མངོན་སངས་རྒྱ་བ་ཉིད། །མངལ་གྱི་སྒྲིབ་གཡོགས་མེད་པའི་ཕྱིར། །ཀུན་ཏུ་བཟང་པོ་གུད་ན་མེད། །ཐུགས་ནི་ཆོས་སྐུ་ཉིད་ཀྱི་ཐུགས། །སྐུ་ནི་ཡེ་ཤེས་ཆེན་པོའི་སྐུ། །ཡེ་ཤེས་ལུས་ཅན་ཐམས་ཅད་མཁྱེན། །སངས་རྒྱས་ཀུན་དང་མཉམ་ལས་ལྷག །དེ་ཕྱིར་གསང་སྔགས་འབྲས་བུ་ཆེ། །ཚེ་གཅིག་འབྲས་བུ་ངེས་པར་འབྱུང་། །དེ་བས་རང་སེམས་ཡེ་ཤེས་སྐུ། །དེ་ཡི་ཡོན་ཏན་བརྗོད་མི་ལངས། །དེ་ཉིད་སྟོན་པའི་ཡེ་ཤེས་ཀྱིས། །གཟུགས་མེད་རིག་པའི་ཡེ་ཤེས་དེ། ། ― DNG001_Page_0452 ―
[མ་དཔེ་གཟིགས་ན་འདིར་གནོན།]
སངས་རྒྱས་རྒྱལ་པོ་ཆོས་ཀྱི་སྐུ། །ཡོན་ཏན་ཐམས་ཅད་མ་བཙལ་རྫོགས། །གདུལ་བྱ་མ་ངེས་གཟུགས་རྣམས་འབྱུང་། །དེ་ཚེ་སེམས་ཅན་ཐམས་ཅད་ལ། །ཡིད་བཞིན་དབང་པོར་གང་འཐད་སྟོན། །འབྱུང་བ་ཞིག་པའི་ནམ་མཁའ་ལ། །ལུས་དང་བྲལ་བས་སྒྲིབ་མི་གོས། །སྤྲིན་དང་ཁུ་རླངས་འབྱུང་མི་སྲིད། །དེ་བཞིན་རང་སེམས་སྙིང་པོ་ལ། །སེམས་ཅན་དོན་ཕྱིར་ཅི་སྤྱད་ཀྱང་། །སྒྲིབ་པ་གཉིས་ཀྱིས་མི་གོས་པས། །ཆོས་སྐུ་དག་ལ་ཉམས་པ་མེད། །ཅེས་གསུངས་སོ། །དེ་ནས་དུས་གསུམ་སངས་རྒྱས་དང་། །རིགས་གསུམ་འདུས་པའི་རྒྱལ་སྲས་འཁོར། །དད་ལྡན་ལ་སོགས་དཀྱིལ་འཁོར་གྱིས། །རང་སེམས་ལྷག་མཐོང་མངོན་གྱུར་ནས། །དགའ་བའི་སེམས་ཀྱིས་ཡི་རང་སྟེ། །རང་རང་སེམས་ལ་གསལ་བའི་དོན། །རྟོགས་པ་བརྗོད་པའི་དོན་མཐུན་ནས། །འདུས་པའི་འཁོར་གྱིས་ཚིག་འདི་གསོལ། །འབྲས་བུ་སངས་རྒྱས་ད་ལྟ་མྱངས། །རང་སེམས་མ་དང་ཐུག་གིས་སྤྲད། །དེ་ཕྱིར་ད་ལྟ་ཀུན་བཟང་ཉིད། །རྡོ་རྗེ་སེམས་དཔའ་དགེ་བ་ཆེ། །འདྲེན་མཛད་ཁྱོད་ལ་བདག་ཕྱག་འཚལ། །དེ་སྐད་གསོལ་བའི་ཚིག་གོ་ནས། །རྡོ་རྗེ་སེམས་དཔས་ཡང་གསུངས་པ། །སངས་རྒྱས་ཐུགས་ཀྱིས་བྱིན་བརླབས་པའི། །དགོངས་པ་མ་ལུས་བཅུད་འདུས་པའི། །དུས་གསུམ་སངས་རྒྱས་ཐུགས་ཀྱི་དོན། །གདམས་ངག་ཚད་མེད་ཉིང་ཁུ་འདི། །དད་ཉན་འཁོར་ལ་ངས་བཤད་ཀྱིས། །དོན་འདི་རྒྱུད་ལ་ཤིན་ཏུ་སྦོས། །ཡང་དག་ཉིད་དུ་སེམས་ཀྱིས་དཔྱད། །ཐིག་ལེ་ཉག་གཅིག་མངོན་ཕྱུང་བ། །ཆོས་ཀྱི་གཏེར་གྱི་འབྱུང་གནས་འདི། །སྣོད་ལྡན་རྣལ་འབྱོར་དོན་གྱི་མཆོག །དེ་ཡང་དད་ཉན་འཁོར་རྣམས་ཉོན། །གལ་ཏེ་ཕྱི་རབས་རྣལ་འབྱོར་པ། །དོན་འདི་སྟོན་ཅིང་བཤད་པའི་ཚེ། །དུས་གསུམ་སངས་རྒྱས་དཔང་དུ་གཟུག །མཁའ་འགྲོ་རྣམས་ལ་ཆོས་སྲུངས་བཅོལ། །གིང་ལ་དམ་མེད་བཤད་པར་བསྐོས། །རྒྱལ་པོ་བཞི་ནི་མཚམས་པར་བཅུག །མན་ རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ཅེས་བྱ་བ།― DNG001_Page_0453 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྡྷི་སཾ་སཱ་ར་མཱུ་ལ་ཙྪེ་ད་ན་དྷརྨ་ཀཱ་ཡ་ཨ་ནུ་ཏྤནྣ་བིདྱཱ་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ཅེས་བྱ་བ། བཅོམ་ལྡན་འདས་དཔལ་རང་བྱུང་ངོ་བོ་ཉིད་ཡེ་ཤེས་ཀྱི་སྐུ་དང་ལྡན་པ་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། བཅོམ་ལྡན་འདས་འོག་མིན་གྱི་གནས་བྱང་ཆུབ་ཀྱི་སྙིང་པོ་ན་བཞུགས་པས། རིགས་ལྔ་ལ་ནི་སྐུ་གསུང་ཐུགས་གཟིགས་ནས། ཡེ་ཤེས་འཁོར་ལོའི་དགོངས་པ་ལས་གཡོས་པ་མེད་པར་སྙོམས་པར་གནས་སོ། །དེ་ཚེ་དུས་གསུམ་སངས་རྒྱས་དང་། །རྡོ་རྗེ་འཆང་གི་རིག་འཛིན་དང་། །ཕྱི་ནང་དམ་བཏགས་ཆོས་སྐྱོང་དང་། །གཞན་ཡང་ལྷ་མི་ལ་སོགས་པ། །དབང་མེད་དད་པས་འདུས་པ་རྣམས། །རང་སེམས་རྟོགས་པར་འདོད་པའི་ཕྱིར། །དད་པའི་ཡིད་ཀྱིས་སེམས་དམད་ནས། །ཐབས་གཅིག་རིམ་པར་འཁོད་འགྱུར་ཏེ། །དེ་ནས་ཐུགས་ཀྱིས་གཟིགས་པའི་དོན། །རྡོ་རྗེ་སེམས་དཔས་དོན་རིག་སྟེ། །བསྐུལ་དོན་གསོལ་བཏབ་བརྩེར་དགོངས་ནས། །ཏིང་ངེ་འཛིན་གྱིས་གསོལ་བཏབ་པ། །འཇིག་རྟེན་མཁས་པ་རྫོགས་སངས་རྒྱས། །ཡེ་ཤེས་ཐུགས་རྗེ་ཆེན་པོ་ཡིས། །ཞི་གནས་ལ་ནི་འབྲལ་མེད་དོན། །ཆོས་ཉིད་གནས་ལུགས་ཇི་ལྟ་བ། །འཁྲུལ་པའི་བློ་ཡིས་རྟོགས་པའི་ཐབས། །ངེས་དོན་ཆོས་སྐུ་རང་ཆས་པ། །དུས་འདིར་བདག་ལ་བཤད་དུ་གསོལ། །རང་བྱུང་ངོ་བོ་ཉིད་སྐུ་དེས། །དོན་གསན་ཆོས་རྗེས་བཀའ་སྩལ་པ། །སངས་རྒྱས་དགོངས་པ་ཇི་ལྟ་བ། །འཁོར་འདས་མ་རིག་སྙིང་པོའི་དོན། ། ― DNG001_Page_0454 ―
[མ་དཔེ་གཟིགས་ན་འདིར་གནོན།]
ཡང་མེས་ང་ཡིས་དོན་བཤད་དུ། །རྫོགས་ཆེན་སྐྱེ་མེད་དོན་ཟབ་ཀྱང་། །སྣོད་ངན་རྣམས་ལ་སྡིག་མོར་ཆེ། །ལན་ཅིག་དེང་སང་མི་རྣམས་ནི། །དམ་ཆོས་སྤངས་པའི་རྒྱུ་བདུན་ནི། །འཇིག་རྟེན་དྲུག་གིས་རྐྱེན་བྱས་ཏེ། །ཤེས་རབ་འཆལ་པའི་སྐྱོན་བཞི་ལ། །མ་གོ་བ་ཡི་རྟོག་གསུམ་གྱིས། །ལྟ་གདེང་ཉམས་པའི་སྐྱོན་བདུན་འབྱུང་། །དེ་ཚེ་སྣོད་ལྡན་ཁ་ཅིག་ལས། །རྒྱུད་ལུང་སངས་རྒྱས་སྐྲག་ཅིང་སྔངས། །ཉན་ཐོས་མདོ་སྡེ་བརྒྱལ་ཞིང་འབོག །ལྷ་དང་ལྷ་མིན་སྲིན་པོའི་ཚོགས། །སྒྲོ་སྐུར་འདོགས་པའི་གང་ཟག་རྣམས། །རྟག་ཏུ་དམྱལ་བ་ཆེན་པོར་ལྟུང་། །འདི་ལ་ཚེ་ཡི་བར་ཆད་དང་། །འཇིགས་པ་སྣ་ཚོགས་ཀུན་ཀྱང་འོང་། །མགོ་ལུས་ཚལ་པ་བདུན་དུ་འགས། །རིག་འཛིན་རྣམས་ཀྱིས་སྤང་བར་འགྱུར། །དེ་ཕྱིར་སྣོད་ལྡན་ཤིན་ཏུ་དཀོན། །དེ་སྐད་བཀའ་སྩལ་དོན་གོ་ནས། །སེམས་ཀྱི་གདུང་བའི་ཡུས་བཏོན་ཏེ། །འགལ་སེམས་རྡུལ་ཙམ་མེད་པར་ནི། །དད་པས་བྱང་ཆུབ་དོན་ལ་མོས། །ངེས་ཤིང་དད་པས་ཡིད་བསྡུས་སོ། །དེ་ཚེ་ངོ་བོ་ཉིད་སྐུ་དེས། །ཡེ་ཤེས་འཁོར་ལོའི་དགོངས་པ་ལས། །ཐུགས་རྗེས་མངོན་པར་བཞེངས་ནས་ཀྱང་། །ཀུན་བཟང་ཆོས་སྐུའི་རྟོགས་དོན་དེ། །དོན་བསྡུས་རྩ་བ་བཀའ་སྩལ་པ། །ལེགས་སོ་དད་ལྡན་འཁོར་རྣམས་ཉོན། །ལྷག་མཐོང་གསལ་བར་ངས་བཤད་ཀྱིས། །གདེང་དུ་གོ་གྱུར་རྣལ་འབྱོར་པས། །ད་ལྟའི་ཤེས་པ་འདི་ཉིད་ལ། །ཡུལ་མེད་རང་ཡན་བཏང་བ་ལས། །གོལ་མེད་ཡེ་ཤེས་ཤུགས་ལ་འཆར། །དེ་སྐད་གསུངས་པའི་དོན་གོ་ནས། །འཁོར་རྣམས་དགའ་མགུ་ཡི་རང་སྟེ། །དོན་བཞིའི་སྒོ་ནས་བསྟོད་བྱས་ནས། །སྣོད་ངན་དད་པས་བསྒོམ་པ་དང་། །སྐལ་ལྡན་རྟོགས་པས་ཆོག་པ་ཡི། །བྱེ་བྲག་སྟོན་པས་བཤད་དུ་གསོལ། །དོན་གསན་འཁོར་ལ་བཀའ་སྩལ་པ། །མ་ ― DNG001_Page_0455 ―
[མ་དཔེ་གཟིགས་ན་འདིར་གནོན།]
རྟོགས་དད་པས་ཅི་བསྒོམས་ཀྱང་། །རང་སེམས་རྨུ་རྒོད་སྟོང་ཁམས་ཡན། །མངལ་གྱིས་སྒྲིབ་གཡོགས་ཁང་སྟོང་བསྲུང་། །མ་རྟོགས་བསྒོམས་པས་མི་གྲོལ་འཆིང་། །ད་ཡང་འདུས་པའི་སྙིང་པོ་ཉོན། །ཡང་དག་དོན་གྱི་ངེས་དོན་འདི། །འཁོར་འདས་ཚིག་ཏུ་བརྗོད་དཀའ་བ། །ཆོས་སྐུ་ནམ་མཁའ་ལྟ་བུ་དེ། །ཀུན་ལ་ཁྱབ་ཀྱང་རྟོགས་པར་དཀའ། །ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་འགའ་ལ་རེས་འགའ་ཙམ། །འབྱུང་སྲིད་ཀུན་གྱི་ཐུན་མོང་མིན། །དེ་ཕྱིར་སྣོད་ལྡན་ཕྲད་གྱུར་ནས། །བླ་མ་རྡོ་རྗེ་སློབ་དཔོན་ལ། །ཉན་བཤད་བསྒྲུབ་པ་དབང་ནོས་ནས། །མཆེད་ལ་སྲིང་ལྟར་གདུང་བྱེད་ཅིང་། །ཐོས་བསམ་བསྒོམ་པར་འདོད་པའི་ཕྱིར། །བྱང་ཆུབ་སྲོག་དང་བསྡོ་བ་ལ། །ངེས་དོན་མ་ནོར་གདམས་ངག་འདི། །མ་མཚོན་གོ་དང་མ་དཔྱད་རྟོགས། །དོན་ལྡན་མན་ངག་རིག་པའི་བློས། །བསྟན་ཏེ་གོ་བས་ངེས་པར་ཆོག །དེ་ཕྱིར་ལུང་བསྟན་བཞིན་དུ་སྟོན། །ད་ཡང་རྡོ་རྗེ་སེམས་དཔའ་ཉོན། །ལན་ཅིག་དུས་ཀྱི་དེང་སང་ན། །རྫོགས་ཆེན་ངེས་དོན་ཡང་སྙིང་ལ། །དད་ལྡན་རྣམས་ནི་འདི་ལ་འཇུག །དེ་ཚེ་རྫོགས་ཆེན་བསྟན་པ་འབྱུང་། །དེ་དུས་ངེས་དོན་འཆད་པ་ལ། །ལྷ་དམན་ལ་སོགས་དགྲ་ལྔ་འབྱུང་། །ཉེས་པ་བཞི་ཡིས་གནོད་བསམས་ཀྱང་། །ཚམ་ཚོམ་མེད་པར་འཆད་ནུས་ན། །བདེ་གཤེགས་མཁའ་འགྲོས་བྱིན་གྱིས་བརླབས། །གནོད་པས་མི་ཚུགས་བསོད་ནམས་འཕེལ། །དེ་ཚེ་མུ་སྟེགས་ལ་སོགས་རྣམས། །རང་རང་བརྐམ་ཆགས་རྩོད་འགྱུར་བས། །བཀྲ་མི་ཤིས་ཤིང་རང་བརླག་ནས། །འོག་མའི་བསྟན་པ་འཇིག་པར་འགྱུར། །དེ་ལྟ་བུ་ཡི་དུས་བྱུང་ཚེ། །གལ་ཏེ་ཚོགས་ལ་ཆོས་འཆད་ན། །ཉམས་དང་ལྐུགས་པ་ཞེ་འཁོན་རྣམས། །ཡོད་མེད་བཤེར་ལ་བཤགས་སུ་གཞུག །ཉམས་སུ་ལེན་པར་དམ་བཅའ་ལ། །གདམས་ངག་ཡང་སྙིང་ཚང་བར་བསྟན། །དེ་ལྟ་མིན་ལ་འདི་བསྟན་ན། །གནམ་ལྕགས་ས་ལ་བྱིང་བ་བཞིན། །མཁའ་འགྲོས་སྲོག་བཅད་ངེས་པར་ལྟུང་། །དེ་ཕྱིར་མ་བརྟགས་ཆོས་མི་བཤད། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་བ་མེད་པ་རིག་པའི་རྒྱུད་ལས། དོན་གྱི་གླེང་གཞི་བསྟན་པའི་ལེའུ་སྟེ་དང་པོའོ།། །། ― DNG001_Page_0456 ―
[མ་དཔེ་གཟིགས་ན་འདིར་གནོན།]
ད་ཡང་རྡོ་རྗེ་སེམས་དཔའ་ཉོན། །ང་ཡི་གསུང་གི་འོད་ཟེར་གྱིས། །མ་རིག་སེམས་ཀྱི་མུན་སེལ་བ། །སྒྲོན་མེའི་སྣང་བ་ཉི་བཞིན་ཤར། །ཡུལ་དང་མ་བྲལ་ཆོས་ཀྱི་སྐུ། །ངེས་དོན་མ་ནོར་གདམས་ངག་དྲུག །ལུང་ལྡན་སྟོན་པ་ངས་བཤད་ཉོན། །ཆོས་ཉིད་གནས་ལུགས་ངོ་བོ་ལ། །རང་བྱུང་ཡིན་ཕྱིར་ཐོག་མཐའ་མེད། །འཁོར་འདས་གཉིས་ལ་ཐོག་མཐའ་ཡོད། །དུས་གཅིག་ཆོད་པར་ཏ་ལ་བཞིན། །འཁྲུལ་དང་རྟོག་པ་ཡོད་པའི་ཕྱིར། །མུན་དང་ཆགས་འཇིག་ནམ་ལངས་འདྲ། །ད་ཡང་འདུས་པའི་སྙིང་པོ་ཉོན། །འཁོར་བའི་རྒྱུ་ནི་རྣམ་གཉིས་ཏེ། །གཟུང་འཛིན་ཞེན་རྟོག་གཞི་རུ་སྣང་། །རས་དཀར་ལ་ནི་སྣུམ་ཞེན་འདྲ། །བག་ཆགས་བརྟས་ཕྱིར་ཀུན་གཞི་ཡིན། །ཡེ་ཤེས་མྱ་ངན་འདས་པའི་རྒྱུ། །ལུང་ལྡན་རྐྱེན་གྱི་གདམས་ངག་གིས། །ཤེས་རབ་ལྷག་མཐོང་ལས་བྱུང་བ། །ཐིག་ལེ་ཆོས་ཀྱི་སྐུ་ཞེས་བྱ། །ད་ཡང་རྡོ་རྗེ་སེམས་དཔའ་ཉོན། །གཉིས་ཀའི་རྒྱུ་ཡི་རྒྱུ་རུ་ནི། །རང་བྱུང་ངོ་བོ་ཉིད་ཀྱི་སྐུ། །ཡེ་ཤེས་རྒྱུ་ལ་སོགས་པ་ལྔ། །མི་གནས་ཡེ་ཤེས་དོན་རྟོགས་པས། །འཆིང་གྲོལ་དགེ་སྡིག་གཉིས་ཀྱི་ཆོས། །གཞི་ལ་གཉིས་ཀ་གདོད་ནས་མེད། །དེ་ཕྱིར་ཐིག་ལེ་ཉག་གཅིག་གོ། །རྣལ་འབྱོར་གདེང་དུ་དེ་འཆང་ན། །དེ་ལ་བསྒོམ་བསྒྲུབ་མ་བྱས་ཀྱང་། །གཅིག་ལས་ཤེས་པ་ཀུན་ཤེས་པས། །འབྲས་བུ་སངས་རྒྱས་སྨོས་ཅི་དགོས། །དེ་ལས་གཞན་པའི་དོན་མེད་ཕྱིར། །ལྷུན་གྱིས་རྫོགས་པའི་ཆོས་སྐུ་ལ། །སྐྱེ་ཤིའི་སྡུག་བསྔལ་མི་འབྱུང་བས། །གཞི་ལས་མི་འགྱུར་གསེར་བཞིན་ནོ། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། གསུང་བར་ཞལ་གྱིས་བཞེས་ཏེ་ཆེད་དུ་བརྗོད་པའི་ལེའུ་སྟེ་གཉིས་པའོ།། །།དེ་ནས་ཀུན་རིག་རྒྱལ་པོ་ལ། །འཁོར་གྱི་སྙིང་པོས་འདི་སྐད་གསོལ། །རང་བྱུང་དོན་གྱི་གནས་ལུགས་ཀྱི། །དཔེ་དང་དོན་གྱི་ཁྱད་པར་དང་། །ཡིད་ཆེས་མི་འགྱུར་གནས་ ― DNG001_Page_0457 ―
[མ་དཔེ་གཟིགས་ན་འདིར་གནོན།]
ལུགས་གང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སེམས་ཀྱི་རྒྱལ་པོ་ཡིས། །དཔེ་དོན་ཁྱད་པར་བཀའ་སྩལ་པ། །འབྱུང་ལྔས་གར་ཁྱབ་སེམས་ཀྱིས་ཁྱབ། །འབྱུང་བ་ལྔ་ལ་རིག་པ་མེད། །དེ་ཕྱིར་འབྱུང་ལྔ་བྱང་ཆུབ་སེམས། །ཕྱོགས་འགའ་འདྲ་བ་དཔེ་རུ་བསྟན། །རྒྱ་མཚོའི་དཀྱིལ་ནས་མེ་འབར་བ། །གཅིག་གིས་གཅིག་ལ་གནོད་མི་ནུས། །དེ་བཞིན་མ་རིག་ཡེ་ཤེས་ཀྱི། །ཐོག་མཐའ་རྩ་བ་མ་ཆོད་ན། །མྱང་འདས་ཡོན་ཏན་མི་འབྱུང་ཕྱིར། །འཁོར་བ་ཟིལ་གྱིས་ཅི་ལ་ནོན། །དཔེར་ན་ཁྱུང་ཆེན་རིན་ཆེན་གྱིས། །མཚོ་ཉིད་བདུད་རྩིར་གྱུར་པ་ལྟར། །སངས་རྒྱས་པས་ཀྱང་སེམས་ཅན་གཉན། །སེམས་ཅན་དུས་ན་མ་རྟོགས་ན། །དུག་ལྔ་རང་གྲོལ་ཅི་ལ་འོང་། །མཉམ་བཞག་པས་ཀྱང་རྗེས་ཐོབ་གཙོ། །རྗེས་ཐོབ་ལྟ་བར་མ་ཤེས་ན། །ཐུན་མཚམས་བསྒོམ་པས་སངས་མི་རྒྱ། །ལུང་ལ་བརྟེན་ནས་རྟོགས་པ་ཡིས། །དུས་བཞིའི་གདམས་ངག་མ་ཤེས་ན། །ཡེ་ཤེས་འབྲལ་མེད་ཅི་ལ་འཆར། །དེ་ཕྱིར་ལུང་ལྡན་གདམས་ངག་གིས། །བར་དོ་ལྔ་ཡི་དོན་རྟོགས་པས། །སངས་རྒྱས་རྒྱལ་པོ་ཡེ་ཤེས་སྐུ། །འདི་དོན་རྟོགས་པས་འཛིན་རྟོག་ནུབ། །ལུང་དོན་རྟོགས་པས་རྟོག་པ་བྲོས། །འཁོར་འདས་འབྱུང་བ་རྣམ་དག་བཅོམ། །སྤང་སྡུད་གཉིས་པོ་འཆོར་མེད་བཟུང་། །རྟག་ཆད་ཞེན་པ་རྡུལ་དུ་བརླག །མཐོ་རིས་ངན་སོང་རྫུན་དུ་སོང་། །ཆགས་སྡང་སྐྱེས་ཤིང་ཏིང་འཛིན་གསལ། །གཡེང་བ་ཆེ་ན་བདེ་ཆེན་རྒྱས། །ད་ཡང་འདུས་པའི་སྙིང་པོ་ཉོན། །ཤེས་རབ་ལྟ་བ་འདི་མེད་ན། །འགྲོ་དོན་སྙིང་རྗེ་ཅི་སྤྱད་ཀྱང་། །བྱས་པ་དོན་མེད་བདུད་ཀྱི་ལས། །ཚོགས་སུ་མི་འགྱུར་ཚི་ཆད་གནས། །དེ་ཕྱིར་རྟོགས་པ་ཤིན་ཏུ་གཅེས། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། དཔེ་དོན་ཁྱད་པར་ ― DNG001_Page_0458 ―
[མ་དཔེ་གཟིགས་ན་འདིར་གནོན།]
གྱི་ལེའུ་སྟེ་གསུམ་པའོ།། །།ད་ཡང་རྡོ་རྗེ་སེམས་དཔའ་ཉོན། །འགྲོ་དྲུག་སེམས་ཅན་ཐམས་ཅད་ལ། །རང་བྱུང་ཡེ་ཤེས་སྙིང་པོ་ནི། །རྟོགས་དང་མ་རྟོགས་མེད་པར་གནས། །དེ་ཡི་དེ་ཉིད་མཚོན་པའི་དཔེ། །བར་སྣང་ཁྱུང་ཕྲུག་ཁུ་བྱུག་དང་། །སེང་ཕྲུག་པདྨ་དངུལ་རྡོ་བཞིན། །ངོས་གཟུང་མེད་ལ་རྐྱེན་མི་ཚུགས། །མངལ་ན་ཆོས་སྐུ་ཡེ་ཤེས་གནས། །ངོས་ཟིན་ལྟ་དམན་ཟིལ་གྱིས་གནོན། །བསྟན་མ་ཐག་ཏུ་ཡེ་ཤེས་སྐུ། །ཉོན་མོངས་ནང་ནས་རང་བྱུང་གསལ། །རྩོལ་མེད་རང་ཆས་ཡེ་ནས་གནས། །དེ་ཕྱིར་གཞི་ནི་འགྱུར་བ་མེད། །ད་ཡང་རྡོ་རྗེ་སེམས་དཔའ་ཉོན། །སངས་རྒྱས་དགོངས་པ་བརྟག་དཀའ་ཡང་། །སེམས་ཅན་བློ་ཡིས་དོན་རྟོགས་ཐབས། །དགོས་དོན་གཞི་ཡི་མན་ངག་གིས། །ཅི་སྤྱོད་རང་བྱུང་ཡེ་ཤེས་ཤར། །ཐོག་མ་མ་ཡིན་ཐ་མ་མེད། །ད་ལྟའི་ཤེས་པ་འདི་ཉིད་ལས། །བཟང་པོར་སོང་བ་གང་ཡང་མེད། །ཡིད་ཆེས་ཆོས་སྐུ་ཁ་མིག་ཅན། །དེ་ཕྱིར་འཁོར་འདས་མ་བྲལ་ཕྱིར། །ཕྱི་ནང་སྣོད་བཅུད་ཀུན་གྱི་གོང་། །སངས་རྒྱས་སེམས་ཅན་གཉིས་པས་སྔ། །བལྟར་མེད་ངོ་བོ་ཀུན་གྱི་གཞི། །ནམ་མཁའ་ཉི་མ་རིན་པོ་ཆེ། །ས་གཞི་རྒྱ་མཚོའི་རི་བོ་བཞིན། །མཐའ་དབུས་མི་དཔྱད་རང་གི་སེམས། །གསལ་ལ་མ་བསྒྲིབས་ཆོས་ཀྱི་སྐུ། །ཡོན་ཏན་འབྱུང་བ་ལྷུན་གྱིས་གྲུབ། །འཁོར་འདས་བསྐྱེད་ཕྱིར་ཀུན་གྱི་གཞི། །གཡོས་པ་མེད་པས་བསམ་མི་ཁྱབ། །འགྱུར་བ་མེད་ཕྱིར་འདུ་འབྲལ་མེད། །ད་ཡང་འདུས་པའི་སྙིང་པོ་ཉོན། །རྣལ་འབྱོར་དམ་པའི་ལས་ཅན་གྱིས། །ཡིད་ཀྱིས་ངོ་ཤེས་དོན་རྟོགས་པས། །ཀུན་བཟང་ཆོས་སྐུ་ད་ལྟ་དང་། །དམན་པའི་ལུས་ལ་སངས་རྒྱས་ཡིན། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། དོན་ཆོས་ཉིད་ཀྱི་གནས་ལུགས་བསྟན་པའི་ལེའུ་སྟེ་བཞི་པའོ།། །།རྡོ་རྗེ་སེམས་དཔས་ཡང་ཞུས་པ། །ཆོས་ཉིད་ངོ་བོ་ ― DNG001_Page_0459 ―
[མ་དཔེ་གཟིགས་ན་འདིར་གནོན།]
གནས་ལུགས་ལས། །ཚོགས་བརྒྱད་འཁོར་བ་གང་ནས་བྱུང་། །མུ་སྟེགས་ཕྱི་རོལ་ཡང་དག་དང་། །གསང་སྔགས་གསང་ཆེན་ཇི་ལྟར་འཁྲུལ། །སླེན་བསྒོམ་སྤྱོད་པའི་ཉེས་པ་གང་། །ལས་སྒྲིབ་འཁོར་བ་གང་ན་གནས། །ཀུན་རིག་རྒྱལ་པོས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །དེ་ལས་འཁྲུལ་པ་བྱུང་བ་ནི། །ཐོག་མའི་དུས་ཀྱི་མཐའ་དྲུག་གཉིས། །ཀུན་གཞིའི་རྣམ་ཤེས་ཚོགས་བརྒྱད་ཀྱང་། །རང་སེམས་ཡིན་ཏེ་ཆོས་སྐུ་མིན། །ཡར་ལྡན་མར་འཁྲུལ་འཁོར་འདས་བྱུང་། །དེ་ཡང་འདུས་པའི་སྙིང་པོ་ཉོན། །ཉི་མ་འཆར་ཀའི་མདངས་བཞིན་དུ། །དང་པོ་ཤེས་བཞིན་ལུང་མ་བསྟན། །ཆོས་ཉིད་བདག་གི་རྩལ་ཡིན་ཀྱང་། །ལུང་མ་བསྟན་ཕྱིར་རྐྱེན་དབང་གྱུར། །འཁོར་འདས་འབྱུང་བའི་དང་པོར་ནི། །འཁྲུལ་པའི་གཞི་ལ་སོགས་པ་ཡིས། །མ་རིག་ལས་འཁྲུལ་རྣམ་པ་བརྒྱད། །རྐྱེན་བཞིས་གཟུང་འཛིན་བློས་བཏགས་པས། །རྒྱུ་རྐྱེན་ཟུང་དུ་འཛོམ་པ་ཡིས། །རང་བྱུང་རིག་པའི་ངོ་བོ་དེས། །དམུས་ལོང་ལྟ་བུར་རང་བསྒྲིབ་པས། །མི་ཤེས་འཁྲུལ་པས་འཁོར་བར་འཁྱམས། །ད་ཡང་རྡོ་རྗེ་སེམས་དཔའ་ཉོན། །སྒོ་ལྔ་ལ་སོགས་ཚོགས་བརྒྱད་ཀྱིས། །རྟོག་པས་བྱེ་བྲག་འཛིན་སྐྱོང་བཞིན། །འཁོར་བའི་བག་ཆགས་བརྟས་པར་བྱེད། །དེ་ཕྱིར་རྣམ་ཤེས་ཚོགས་བརྒྱད་དག །ཡང་དག་མ་ཡིན་འཁོར་བའི་ཆོས། །གནས་འགྱུར་ཆོས་སུ་བསྟན་པ་ཡང་། །བཀྲི་དྲང་ལྡེམ་དགོངས་བསྟན་པར་ཟད། །དེ་ཕྱིར་ཀུན་གཞིས་འདུས་བྱས་ཏེ། །གཉེན་པོ་གཞི་ཡིས་འཇིག་པ་དང་། །བག་ཆགས་ཆགས་པའི་རྟེན་བྱེད་པས། །ཡང་དག་མ་ཡིན་འཁོར་བ་བྱུང་། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། འཁོར་བ་དང་པོ་གང་ནས་བྱུང་བ་བསྟན་པའི་ལེའུ་སྟེ་ལྔ་པའོ།། །།ད་ཡང་རྡོ་རྗེ་སེམས་དཔའ་ཉོན། །ལྟ་ལོག་མུ་སྟེགས་རྣམ་གཉིས་དང་། །ཕྱི་རོལ་ཡང་དག་གསང་ ― DNG001_Page_0460 ―
[མ་དཔེ་གཟིགས་ན་འདིར་གནོན།]
སྔགས་དང་། །གསང་ཆེན་འཁྲུལ་པ་ངས་བཤད་ཉོན། །ངོ་བོ་ངེས་མེད་གཞི་བྱས་ནས། །ལས་ཀྱི་རྒྱུ་འབྲས་མེད་འདོད་འཁྲུལ། །དོན་དེ་མི་འགྱུར་གཞི་བྱས་ནས། །ཁ་དོག་རྟག་པར་འདོད་པས་འཁྲུལ། །ད་ཡང་རྡོ་རྗེ་སེམས་དཔའ་ཉོན། །འོག་མའི་ལུང་ངན་རྐྱེན་ཕྲད་ནས། །བློས་འཆེལ་བལྟ་བ་རྣམ་པ་བཞིས། །ཉན་ཐོས་རང་རྒྱལ་ཡན་ཆད་ནས། །ཡོ་ག་མན་ཆད་ང་ཡི་གཏམ། །མཚན་མར་འཁྲུལ་ཕྱིར་ང་མི་རྟོགས། །རྒྱུད་ལུང་རྣལ་འབྱོར་ཆེན་པོ་ལས། །ང་ཚོལ་པས་འཁོར་ང་མི་རྙེད། །ང་མ་རྙེད་པས་སྣང་བ་འཛོལ། །གྲོལ་འདོད་ཐེག་པ་རྣམ་པ་བཅུས། །སྣང་བའི་རང་བཞིན་ཤེས་པ་ལས། །རང་སེམས་དོན་གྱི་སྙིང་པོ་ཡི། །གཞི་ཉིད་མ་ཤེས་འཁྲུལ་པའི་ཕྱིར། །མ་རྟོགས་མི་གྲོལ་ཤིན་ཏུ་འཆིང་། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་བ་མེད་པ་རིག་པའི་རྒྱུད་ལས། ཐེག་པ་འོག་མ་བའི་འཁྲུལ་ཚུལ་བཤད་པའི་ལེའུ་སྟེ་དྲུག་པའོ།། །།ད་ཡང་རྡོ་རྗེ་སེམས་དཔའ་ཉོན། །རང་བྱུང་སྙིང་པོའི་ཆོས་ཉིད་ནི། །མ་རྟོགས་ཆེད་དུ་དུག་ལྔ་བསྒོམ། །རྒྱུ་མཐུན་སྡུག་བསྔལ་ལྗོན་ཤིང་བཞིན། །སྤངས་པའི་རྟོག་པ་རྣམ་གསུམ་གྱིས། །རང་སེམས་སྙིང་པོ་མ་རྟོགས་པར། །བསྒོམ་དུ་འདོད་པ་སྙིང་རེ་རྗེ། །རྐྱལ་མ་སྦྱང་བར་མཚོར་འཇུག་ཕུང་། །ད་ཡང་འདུས་པའི་སྙིང་པོ་ཉོན། །དམུས་ལོང་ཆུང་མ་མཛེས་མ་བཞིན། །ངོ་བོ་ཆོས་སྐུ་མ་རྟོགས་པར། །འཁོར་འདས་ཆོས་ལ་ཅི་བསམས་ཀྱང་། །བསྒོམས་པས་གྲོལ་བར་མི་འགྱུར་རོ། །དེ་ཕྱིར་མ་རྟོགས་ཅི་བསྒོམས་ཀྱང་། །སྣང་བ་འདི་ཉིད་གཞིར་འདོད་པས། །སྨིག་རྒྱུ་ཆུར་མཐོང་འཐུང་འདོད་བཞིན། །འཁོར་འདས་གློ་བུར་རྐྱེན་ཡིན་ཕྱིར། །ངོ་བོ་གནས་ལུགས་ཆོས་སྐུ་མིན། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། མ་རྟོགས་པར་བསྒོམས་ན་གོལ་བར་བསྟན་པའི་ལེའུ་སྟེ་བདུན་པའོ།། །།ད་ཡང་རྡོ་རྗེ་སེམས་དཔའ་ཉོན། །ཆོས་རྣམས་ཀུན་གྱི་རྩ་བ་ཡི། །བླ་མ་དག་ལ་མི་བརྟེན་པར། །གསང་སྔགས་ཟབ་མོའི་ ― DNG001_Page_0461 ―
[མ་དཔེ་གཟིགས་ན་འདིར་གནོན།]
སྒོར་ཞུགས་ནས། །ཉན་བཤད་བསྒྲུབ་དབང་མེད་པ་ཡིས། །རང་དབང་མེད་པར་གཞན་དབང་བསྐུར། །ནོང་པོ་སྡར་མ་གདོལ་པ་བཞིན། །ཐོ་ཆོ་བཀའ་གཞུང་ཉམས་པར་བྱེད། །བར་ཆོད་གནོད་པ་ལྕེར་རྨོད་ལྟུང་། །ད་ཡང་འདུས་པའི་སྙིང་པོ་ཉོན། །དུག་དང་གཉན་གསོད་མནའ་ཟ་ཞིང་། །སྐུ་གསུང་ཐུགས་ཀྱི་དམ་ཉམས་ན། །འབྲས་བུ་སྨྱོ་འབོགས་ལྐུགས་པ་དང་། །ཕྱི་མ་རྡོ་རྗེ་དམྱལ་བར་ལྟུང་། །ནར་མ་དབང་ཆུང་མ་རྒྱས་བཞིན། །ཤན་མ་ཕྱེད་པས་རྒྱུད་མི་གྲོལ། །གདམས་ངག་གདེང་མེད་སེམས་མི་རྟོགས། །ཉམས་སུ་མ་བླངས་ཟིལ་མི་གནོན། །ད་ཡང་འདུས་པའི་སྙིང་པོ་ཉོན། །ཡུལ་ངན་མུན་སྲོས་ལོ་ཉེས་བཞིན། །ཞི་གནས་ལྷག་མཐོང་མ་འདྲེལ་ན། །རེས་འཇོག་འབྲས་བུ་གསུམ་མི་འབྱུང་། །དེ་ཕྱིར་འདྲེལ་མེད་རྣལ་འབྱོར་མིན། །འདྲལ་དང་བརྣངས་པ་འབོ་བ་བཞིན། །ལུས་ངག་ཡིད་ཀྱི་སྤྱོད་རྩིང་པས། །སྡུག་བསྔལ་སྒྲོ་སྐུར་གཟུང་འཛིན་འགྱུར། །ཕྱི་མ་ལས་ངན་རཱུ་ཏྲར་ལྟུང་། །རྒྱུས་མེད་ལོང་བ་གྲུ་མེད་བཞིན། །ཕྱག་རྒྱ་སྔགས་དང་ཏིང་འཛིན་ཉམས། །ཉེས་སྐྱོན་གསུམ་བྱུང་དོན་མེད་འཁྱམས། །དེ་ཕྱིར་གསང་སྔགས་སྤྱད་པར་དཀའ། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། ལྟ་སྤྱོད་ཉམས་པའི་ཉེས་པ་བསྟན་པའི་ལེའུ་སྟེ་བརྒྱད་པའོ།། །།རྡོ་རྗེ་སེམས་དཔའ་ཡང་ཉོན་ཅིག །འཁོར་འདས་དག་གི་ས་མཚམས་ནི། །རྒྱུད་ལུང་སྤྲེ་འདྲའི་སློབ་དཔོན་སེམས། །དྲང་དོན་གྲུབ་པ་ཐོབ་འདོད་ནས། །སྨན་གྱི་སྦྱོར་བ་ལ་སོགས་ཀྱིས། །ཐུན་མོང་ཡོན་ཏན་ལྔ་ལྡན་ཡང་། །རྣམ་སྨིན་ལུས་དང་མ་བྲལ་བར། །སངས་རྒྱས་ཡོན་ཏན་རྫོགས་འདོད་པ། །ཤིན་ཏུ་གཏི་མུག་སྨད་པའི་གནས། །བཅོམ་ལྡན་འདས་ཀྱང་རྩྭ་མཆོག་ཏུ། །རང་ལུས་བོར་ནས་སངས་རྒྱས་ན། །རྣམ་སྨིན་ལུས་དང་བཅས་པས་ནི། །འབྲས་བུ་མི་ཐོབ་སྨོས་ཅི་དགོས། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། རྣམ་སྨིན་གྱི་ལུས་དང་མ་བྲལ་བར་སངས་མི་རྒྱ་བར་བསྟན་པའི་ལེའུ་སྟེ་དགུ་པའོ།། །།ད་ཡང་འདུས་པའི་སྙིང་པོ་ཉོན། །དེ་ཕྱིར་འཁོར་བའི་མཚན་ཉིད་ནི། ། ― DNG001_Page_0462 ―
[མ་དཔེ་གཟིགས་ན་འདིར་གནོན།]
གཞི་གནས་བག་ཆགས་རྣམ་པ་བཞི། །ལྟུང་རྐྱེན་འཕྲལ་འབྱུང་བག་ཆགས་ལྔས། །རང་དབང་མེད་པར་མངལ་དུ་འཇུག །དེ་རྒྱུ་ཉོན་མོངས་རྣམ་གསུམ་གྱིས། །ཀུན་གཞི་རྣམ་གསུམ་སྡུག་བསྔལ་འབྱུང་། །ཐར་ལམ་མི་ཐོབ་སྐྱེ་ཞིང་འཆི། །ད་ཡང་འདུས་པའི་སྙིང་པོ་ཉོན། །སེམས་ཅན་ཀུན་ལ་གནས་པ་ཡི། །ཀུན་གཞི་འཁོར་བའི་གཞི་ཡིན་ཡང་། །ཆོས་ཀྱི་སྐུ་ཡི་གཞི་ཉིད་མིན། །དེ་ཕྱིར་ཀུན་གཞི་འདུས་བྱས་ལ། །རྐྱེན་གྱི་དབང་གིས་འགྲོ་བ་སྟེ། །ཆུ་བོ་བཞི་ཡི་མཐའ་ལ་ཆུད། །མ་བསྒྲལ་བར་དུ་ཐར་མི་སྲིད། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། འཁོར་བ་ད་ལྟ་གང་ན་གནས་པ་བསྟན་པའི་ལེའུ་སྟེ་བཅུ་པའོ།། །།རྡོ་རྗེ་སེམས་དཔས་ཡང་ཞུས་པ། །འཁྲུལ་པ་ལྡོག་པའི་ཐབས་ཆེན་ནི། །དད་པ་བརྩོན་འགྲུས་དམ་ཚིག་དང་། །རང་བྱུང་ཡེ་ཤེས་དབྱེ་བ་ཡིས། །ཐ་མ་འཁོར་བ་གང་དུ་འགྲོ། །ཀུན་རིག་རྒྱལ་པོས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །མ་རིག་འཁྲུལ་པ་ལྡོག་འདོད་རྣམས། །འཁོར་འདས་གཉིས་ཀྱིས་མ་རིག་དོན། །རང་སེམས་སྙིང་པོ་རྟོགས་པའི་ཐབས། །ལུས་སྲོག་མི་བལྟ་དད་པ་ཡིས། །སྐྲག་ཅིང་ཡ་ང་མེད་སེམས་ཀྱིས། །ཐེ་ཚོམ་ཡིད་གཉིས་མེད་པར་ནི། །འཁོར་འདས་རྩ་བ་ངོ་བོར་ཞུས། །དཔའ་བརྟུལ་ཆེན་པོའི་བརྩོན་འགྲུས་ཀྱིས། །ཕྱིར་མི་ལྡོག་པར་ཡིད་ཆེས་ནས། །ཡེངས་པ་མི་འབྱུང་རྒྱུན་མི་ཆད། །ད་ཡང་འདུས་པའི་སྙིང་པོ་ཉོན། །སེམས་ལས་མ་རྟོགས་དོན་མི་བཙལ། །དུག་ལྔ་མ་སྤངས་ཆོས་ཉིད་ཤེས། །དེ་ཤེས་མི་བསྒོམ་གོལ་ས་མེད། །ད་ཡང་འདུས་པའི་སྙིང་པོ་ཉོན། །རང་བྱུང་ཡེ་ཤེས་ཡིན་མིན་གྱིས། །དབྱེ་ན་རྣམ་པ་བཞི་ཡི་དོན། །ལུང་ལྡན་བླ་མའི་གདམས་ངག་གིས། །རང་སེམས་སྙིང་པོ་ཆོས་སྐུ་ནི། །བསྟན་ན་དེ་མ་ཐག་ཏུ་ཤེས། །མ་བསྟན་པར་དུ་ཤེས་མི་སྲིད། །ད་ཡང་འདུས་པའི་སྙིང་པོ་ཉོན། །རང་རིག་ཡེ་ཤེས་འོད་པོ་ཆེ། །འགྲོ་འོང་མེད་པར་འཁོར་བ་བརླག །མ་རིག་ལོག་པས་ཡེ་ཤེས་སྐྱེ། །འཁོར་བ་རུ་བཟློག་མྱ་ངན་འདས། །དེ་ཤེས་མ་བསྒོམས་ལྷུན་གྱིས་གྲུབ། །དོན་དང་མཐུན་པའི་ཉམས་མྱོང་གིས། །བསྒོམས་ཀྱང་དེ་ཉིད་ངེས་ཤེས་སྐྱེ། །དེ་ཕྱིར་རྟོགས་པ་རབ་ཏུ་གཅེས། །རྫོགས་པ་ ― DNG001_Page_0463 ―
[མ་དཔེ་གཟིགས་ན་འདིར་གནོན།]
ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། འཁྲུལ་པ་ལྡོག་པའི་ཐབས་བསྟན་པའི་ལེའུ་སྟེ་བཅུ་གཅིག་པའོ།། །།འཁོར་གྱི་སྙིང་པོས་ཡང་གསོལ་པ། །ངེས་པའི་དོན་དང་མཐུན་པ་ཡི། །ཕྱི་ནང་དུས་མཉམ་བལྟ་བ་གང་། །ཆོས་སྐུ་ཉམས་སུ་བླང་ཐབས་དང་། །རིགས་གསང་མཐུན་འཇུག་ལ་བཟླ་བའི། །ངེས་དོན་སྤྱད་པ་ཇི་ལྟར་སྤྱད། །མཉམ་པའི་རྒྱལ་པོས་བསྟན་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ང་ཡི་ཆོས་ཉིད་གནས་ལུགས་ནི། །དོན་གྱི་སྙིང་པོ་རང་བྱུང་ལ། །བག་ཆགས་མ་གོས་རྟོག་མེད་ཕྱིར། །འཁོར་འདས་འབྱུང་བ་གདོད་ནས་མེད། །རྒྱུ་རྐྱེན་མ་བསྐྱེད་ལ་སོགས་པའི། །རང་གི་ངོ་བོ་བཞི་ལྡན་པ། །སྙིང་པོ་ང་ཉིད་བསྒྲུབ་མཐར་ཕྱིན། །སྐྱེ་འཆི་མེད་པ་རང་བྱུང་སྐུ། །དེ་ཕྱིར་འཁོར་འདས་ལྟུང་དོགས་མེད། །རང་གསལ་ངོ་བོ་ཀུན་གྱི་གཞི། །རང་སེམས་སྙིང་པོ་མཚོན་འདོད་པའི། །ནམ་མཁའི་རྡོ་རྗེ་ང་ཡི་དཔེ། །སྐྱེ་བ་མེད་ཕྱིར་ཨ་དང་འདྲ། །དོན་མ་ཡིན་ཕྱིར་དཔེར་ནི་བསྟན། །ད་ཡང་འདུས་པའི་སྙིང་པོ་ཉོན། །ངོ་བོ་ཉིད་ཀྱི་ཆོས་སྐུ་ལ། །ཡོད་དང་མེད་པའི་རིགས་གཉིས་ཡོད། །ཚོགས་བརྒྱད་ཡུལ་ལས་ལྡོག་པའི་ཕྱིར། །ཡེ་ཤེས་ངོ་བོ་རང་བྱུང་སྐུ། །ཆོས་ཉིད་དག་པའི་མཚན་ཉིད་ནི། །ཕྱི་རུ་འདྲ་མིན་ལ་སོགས་པའི། །རང་གི་མཚན་ཉིད་ལྔ་འདྲའི་ཕྱིར། །སྐྱོན་གྱིས་མ་གོས་ཆོས་ཀྱི་སྐུ། །གང་ཡང་རུང་བ་ཅི་ལ་ཡང་། །སེམས་ཅན་འདུལ་ཕྱིར་མ་གཏོགས་པ། །ཡང་དག་དོན་དུ་མི་བྱའི་ཕྱིར། །དགག་བསྒྲུབ་མེད་པར་བཏང་སྙོམས་བཞག །ད་ཡང་འདུས་པའི་སྙིང་པོ་ཉོན། །ཕྱི་རོལ་ཡུལ་གྱི་རང་བཞིན་ནི། །རྣམ་བཞི་ཕྱི་ལ་བར་སྣང་ནང་། །གསུམ་བྲལ་སྣང་བ་ཆོས་དབྱིངས་ལ། །གཅིག་པ་ཐ་དད་ངོས་ཟིན་པས། །ཉི་མ་ཟེར་དང་འཆར་ངོས་ཟིན། །དགག་བསྒྲུབ་མེད་ཕྱིར་ཆོས་ཀྱི་དབྱིངས། །དྲེད་མོ་གདོས་ཐག་ཆོད་པ་བཞིན། །འདྲེལ་པ་ཡོད་མེད་རྣམ་པ་བཞིས། །ལོག་རྟོག་ཞེན་པ་ལྔ་ལོག་ནས། །ཉམ་ང་མེད་པའི་བརྟུལ་ཤུགས་འབྱུང་། །དཔེར་ན་ཁྱུང་ཆེན་མཁའ་ལྡིངས་པའི། །འཕུར་རླབས་འོག་ཏུ་ཀུན་ཆུད་ལྟར། །ཕྱི་རོལ་ཡུལ་གྱི་རྣམ་པ་ནི། །སྣ་ཚོགས་མདུན་དུ་བཞག་པ་བཞིན། །སྣང་ཙམ་ཉིད་ནས་སྤང་སྡུད་མེད། །ཞེན་མེད་ ― DNG001_Page_0464 ―
[མ་དཔེ་གཟིགས་ན་འདིར་གནོན།]
རྣལ་འབྱོར་ཆོས་དབྱིངས་ལ། །འཁྲུལ་པའི་རྟོག་པས་གཞི་མི་འགྱུར། །རྩོལ་བའི་སེམས་ལས་དབྱིངས་མི་བསྐྱོད། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། ངེས་པ་དོན་གྱི་ལྟ་བ་བསྟན་པའི་ལེའུ་སྟེ་བཅུ་གཉིས་པའོ།། །།ད་ཡང་རྡོ་རྗེ་སེམས་དཔའ་ཉོན། །རང་སེམས་ཆོས་སྐུ་ངོ་སྤྲད་ན། །ལུས་ཅན་ཀུན་གཞི་གཞི་ཆ་ལ། །སྔ་ཕྱི་མ་བྲལ་ཡེ་ཤེས་གསལ། །ཆུ་དྭངས་རྙོག་མེད་ཇི་བཞིན་ནོ། །ད་ཡང་འདུས་པའི་སྙིང་པོ་ཉོན། །ཡང་དག་ཟབ་མོ་ཆོས་སྐུ་ནི། །སྐྱེ་བ་མེད་ཅིང་འགག་པ་མེད། །རྣམ་རྟོག་མཚན་མ་གཞི་ནས་དག །ཉོན་མོངས་ངར་འཛིན་རྣམས་དང་བྲལ། །འཕེལ་འགྲིབ་སྐྱོན་རྣམས་ངང་གིས་མེད། །དེ་ཡི་ངང་ལ་གནས་ཐབས་ནི། །ཐ་མ་འབྲིང་གི་རྣལ་འབྱོར་པས། །སྟོང་པ་གསལ་བ་མ་ཡེངས་བསྒོམས། །གལ་ཏེ་བྱིང་རྒོད་སྐྱོན་བྱུང་ན། །གདམས་ངག་བཅོས་པའི་ཐབས་གཉིས་ཀྱིས། །དགག་བསྒྲུབ་མེད་པའི་རང་བཞིན་ལ། །གཟེངས་བསྟོད་དབང་པོ་ཡན་དུ་གཞུག །མེ་ལ་ཤིང་བསྣན་རིན་ཆེན་གཏེར། །རྣམ་རྟོག་ཡེ་ཤེས་བསྐུལ་མར་ཤེས། །དེ་ཙམ་ཉིད་ནས་ཆོས་ཉིད་གསལ། །དབང་པོ་རབ་ཀྱི་ལྟ་སྒོམ་ལ། །བཅོས་དང་མི་བཅོས་མེད་པའི་ཕྱིར། །སྤྲིན་མེད་ནམ་མཁའ་ཇི་བཞིན་དུ། །རྟོགས་པའི་གདེང་དང་འབྲལ་བ་མེད། །དེ་ཡང་བློ་གྲོས་དམ་པ་ཉོན། །ཉི་ཟླ་གཟས་ཟིན་མཉམ་པ་བཞིན། །དབྱིངས་དང་ཆོས་སྐུ་དུས་མཉམ་ཕྱིར། །སྤྱོད་ལམ་རྣམ་པ་བཞི་ལྡན་པས། །འབྲལ་མེད་ཡེ་ཤེས་རྫོགས་པ་ཡིན། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། མ་བསྒོམས་འབྲལ་མེད་མངོན་དུ་བསྟན་པའི་ལེའུ་སྟེ་བཅུ་གསུམ་པའོ།། །།ད་ཡང་འདུས་པའི་སྙིང་པོ་ཉོན། །ཡུལ་གྱི་རྐྱེན་བྱས་རྟོགས་བྱུང་ཚེ། །ལས་དང་དུས་བཞི་དོན་གསལ་བ། །ཡེ་ཤེས་མ་བསྒོམས་འབྲལ་བ་མེད། །བ་མོ་ལ་ནི་ཉི་ཤར་འདྲ། །ཡུལ་ཉིད་སེམས་སུ་མི་བསྒོམ་པས། །དྲན་རིག་ཆོས་ཉིད་བྱང་ཆུབ་སེམས། །དགག་བསྒྲུབ་མེད་པའི་རང་བཞིན་ལས། །དེ་ཉིད་སྤྱད་པའི་ཡུལ་ལས་འདས། །དེ་ཕྱིར་དོན་ལས་ཉམས་པ་མེད། །རང་སེམས་དབྱིངས་འགགས་རུམ་གནས་ཚེ། །རྐྱེན་བྱུང་དུས་བཞིར་དོན་དྲན་ ― DNG001_Page_0465 ―
[མ་དཔེ་གཟིགས་ན་འདིར་གནོན།]
པས། །ཚོགས་དྲུག་འགགས་ཀྱང་ཆོས་སྐུར་གསལ། །བྱ་ན་པ་ཏིའི་མིག་ཞགས་འདྲ། །འཇིགས་པ་འགལ་འདོད་མི་བཞིན་དུ། །ཉམས་མེད་རིག་པའི་དོན་འདི་ལ། །ནད་གཅོད་སྡུག་བསྔལ་ཅི་བྱུང་ཡང་། །གདམས་ངག་དྲན་པ་གཅེས་པར་གསུངས། །སངས་རྒྱས་སེམས་ཅན་གཉིས་ཀའི་གོང་། །རྟོགས་དང་འཁྲུལ་པའི་བྱེ་བྲག་གིས། །མུ་བཞི་ཡ་བརྒྱད་གཅིག་ཏུ་ཤེས། །གོལ་ས་རྡུལ་ཙམ་མི་འབྱུང་བས། །དེ་ཚེ་ཆོས་སྐུ་ཟང་ཀ་མ། །མི་འགྱུར་བརྟན་པས་གསེར་བཞིན་ནོ། །ད་ཡང་རྡོ་རྗེ་སེམས་དཔའ་ཉོན། །འཇིག་རྟེན་དམན་པའི་སྤྱོད་པ་ནི། །སྲོག་གཅོད་མ་བྱིན་ལེན་པ་དང་། །མི་གཙང་སྤྱོད་དང་རྫུན་དུ་སྨྲ། །རེ་རེ་ལ་ནི་གཉིས་གཉིས་དང་། །གནང་དང་བཀག་པ་ཡོད་པའི་ཕྱིར། །བླང་དོར་སྐྱོན་གྱིས་མ་གོས་ཏེ། །གཞི་ལ་འཆིང་གྲོལ་མེད་པའི་ཕྱིར། །དཀར་པོའི་ཆོས་དང་སྡིག་ལ་སོགས། །གཉིས་ཀའི་འབྲས་བུ་མི་འབྱིན་ན། །དུག་ལྔ་ཡེ་ཤེས་ཤར་བ་ཡིན། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། རིག་པའི་སྤྱོད་པ་གསང་བར་བསྟན་པའི་ལེའུ་སྟེ་བཅུ་བཞི་པའོ།། །།ད་ཡང་འདུས་པའི་འཁོར་རྣམས་ཉོན། །ཆེད་དུ་བསྒོམ་དུ་མེད་པའི་དཔེ། །ནམ་མཁའ་བསྒོམ་དུ་འཛིན་པ་འདྲ། །དེ་བཞིན་ཡོད་མེད་ཡུལ་ལས་འདས། །དེ་ཕྱིར་གཞི་ཤེས་བསྒོམ་མི་དགོས། །འགྲོ་དོན་འབྱུང་བའི་ཆོས་ཉིད་ཀྱི། །རྣལ་འབྱོར་སྤྱོད་ལམ་ཐམས་ཅད་དུ། །ནམ་མཁའ་ལྟ་བུའི་རྣལ་འབྱོར་དེ། །དོན་ལ་མི་འདའ་དམ་ཚིག་སྲུང་། །རང་རིག་མ་ཡེངས་དམ་ཚིག་མཆོག །ད་ཡང་འདུས་པའི་འཁོར་རྣམས་ཉོན། །སྙིང་པོ་ཆོས་སྐུ་རང་གསལ་དོན། །མ་བསྒོམས་འབྲལ་མེད་ཡེ་ཤེས་ཀློང་། །རང་སེམས་ཤེས་པ་སྣ་ཚོགས་པས། །གང་ཡང་ཡེ་ཤེས་ལས་གཞན་མེད། །ཐ་མལ་རང་སེམས་ཆོས་ཉིད་ནི། །ད་ཡང་མི་འགྱུར་ངོ་བོར་སོན། །དག་དང་མ་དག་གཞི་ལ་མེད། །དུས་དང་སྤྱོད་ལམ་ཉིད་དུ་ཡང་། །ཀྲི་ལེ་ཡི་ནི་རྣམ་བཞི་ནི། །རྟོགས་པའི་གདེང་དང་མི་འབྲལ་ན། །མི་རྟོག་ཐབས་ཀྱིས་ཅི་ཞིག་བྱ། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། བསྒོམ་དུ་མེད་པར་ལ་བཟླ་བའི་ལེའུ་སྟེ་བཅོ་ལྔ་པའོ།། །།ད་ཡང་འདུས་པའི་སྙིང་པོ་ཉོན། །རྫོགས་ཆེན་ཤིན་ཏུ་རྣལ་འབྱོར་པ། ། ― DNG001_Page_0466 ―
[མ་དཔེ་གཟིགས་ན་འདིར་གནོན།]
བླ་མེད་གོ་འཕང་མཆོག་བརྙེས་པའི། །བླ་མ་དུས་གསུམ་སངས་རྒྱས་དཔལ། །དཀྱིལ་འཁོར་སྒོར་ཞུགས་འབྲལ་མེད་ལྷ། །མན་ངག་རྒྱུད་དོན་རང་རིག་ལྷ། །རྩོལ་མེད་རྣལ་འབྱོར་མཁའ་འགྲོ་ལ། །ལུས་ངག་ཡིད་ཀྱིས་ཕྱག་འཚལ་ཏེ། །དགོངས་པ་དོན་གྱིས་བརླབས་པའི་ཕྱིར། །ཆེད་དུ་རྩོལ་བ་མི་དགོས་ཏེ། །ཕྱི་ཡི་མཆོད་གཏོར་གཏོང་བའི་ཚེ། །བྱིན་བརླབ་དྲུག་དང་སྨོན་ལམ་བཏབ། །ཉན་བཤད་ཁ་ཏོན་ལ་སོགས་རྣམས། །དཀར་པོའི་ཆོས་སྤྱོད་གང་བྱེད་ཀྱང་། །བལྟ་བ་དྲན་པས་ཚོགས་སུ་འགྱུར། །ད་ཡང་འདུས་པའི་སྙིང་པོ་ཉོན། །ནང་གི་མཛད་སྤྱོད་ཚོགས་ཆེན་ནི། །ཡིད་འཐད་པ་ཡི་གནས་དག་ཏུ། །དམ་ཚིག་སེལ་མེད་ཚོགས་འཁོར་དེ། །སྔོན་འགྲོ་ལས་དྲུག་རྫོགས་བྱས་ནས། །དཀྱིལ་འཁོར་བསྐྱེད་དང་སྤྱན་དྲངས་ཏེ། །བྱིན་གྱིས་བརླབས་ལ་ཚོགས་དྲངས་ནས། །མཆོད་པ་རྣམ་གསུམ་རྫོགས་པར་འབུལ། །ལྷ་གཤེགས་ལྷག་མར་རོལ་པ་དང་། །སྐྱེ་ཤི་དུས་ཀྱི་སྨོན་ལམ་ཡང་། །ལྟ་བའི་ངང་དུ་རྫོགས་པར་བྱ། །དེ་ཕྱིར་ཚོགས་གཉིས་དུས་གཅིག་རྫོགས། །དེ་ཡི་ཡོན་ཏན་བརྗོད་མི་ལང་། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། མཐུན་འཇུག་ཐབས་ཀྱི་སྤྱོད་པ་བསྟན་པའི་ལེའུ་སྟེ་བཅུ་དྲུག་པའོ།། །།རྡོ་རྗེ་སེམས་དཔས་ཡང་ཞུས་པ། །ཐེ་ཚོམ་གེགས་རྣམས་བསལ་བའི་ཕྱིར། །གདམས་ངག་དོན་རྣམས་དབྱེ་བ་དང་། །འཁྲུལ་པ་བཟློག་པའི་རྟགས་གཉིས་གང་། །ཐིག་ལེ་ལ་ཤན་གེགས་བསལ་བའི། །ཡོན་ཏན་དོན་ལ་ཇི་ལྟར་རྫོགས། །ཀུན་རིག་རྒྱལ་པོས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །ལྟ་སྒོམ་སྤྱོད་པ་འབྲས་བུ་ཡི། །གདམས་ངག་དབྱེ་བ་ཉི་ཤུ་བཞི། །ངོ་བོ་ལ་སོགས་དྲུག་དྲུག་ཏུ། །དབྱེ་བ་གཅིག་ཏུ་རྟོགས་པའི་ཚེ། །མི་ཡི་ལུས་ལ་སངས་རྒྱས་ཐུགས། །དེ་ཡི་ཡོན་ཏན་བསམ་མི་ཁྱབ། །ད་ཡང་འདུས་པའི་སྙིང་པོ་ཉོན། །དང་པོ་འཁྲུལ་པའི་གཞི་ཤེས་བྱ། །མ་རིག་ངར་འཛིན་འཁྲུལ་པ་སྟེ། །མ་སྤངས་རང་སར་གྲོལ་བའི་ཕྱིར། །འཁྲུལ་ལྡོག་རྟགས་བརྒྱད་ལྡན་པ་ལ། །ངེས་པའི་སངས་རྒྱས་རྩོལ་མེད་འགྲུབ། །ད་ཡང་འཁོར་གྱི་སྙིང་པོ་ཉོན། །ཕྱི་རོལ་ཡང་དག་རྣམ་པ་བཞི། །གསང་སྔགས་གསང་ཆེན་ཕྱི་ནང་ལྔས། །ཡུལ་ཉིད་སེམས་སུ་འཛིན་པ་དེ། ། ― DNG001_Page_0467 ―
[མ་དཔེ་གཟིགས་ན་འདིར་གནོན།]
ལུང་ལྡན་རྐྱེན་གྱི་གདམས་ངག་གིས། །འབྱུང་བཞིའི་ལུས་དང་འབྲལ་མེད་ཤེས། །འཁྲུལ་པ་ལོག་པའི་རྟགས་བརྒྱད་གཉིས། །དེ་ལྡན་རྣལ་འབྱོར་གང་ཡང་རུང་། །སངས་རྒྱས་སྲས་ལ་རྒྱལ་བའི་ཐུགས། །རིག་འཛིན་གདུང་འཚོབ་སྤྲུལ་པའི་སྐུ། །ཡོན་ཏན་ནམ་མཁའི་མཐའ་དང་མཉམ། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། མན་ངག་གི་དབྱེ་བའི་སྒོ་ནས་འཁྲུལ་པ་ལྡོག་པའི་ཡོན་ཏན་བསྟན་པའི་ལེའུ་སྟེ་བཅུ་བདུན་པའོ།། །།ཀུན་བཟང་ང་ཡི་བྱིན་བརླབས་ཀྱིས། །ཚིག་ཏུ་མ་བཀོད་ཐུགས་ལས་བརྒྱུད། །དོན་གྱི་གཏིང་ཕྱིན་བསྟན་པའི་ཕྱིར། །ཚིག་ཉུང་དོན་དུ་རྫོགས་པ་ཡིས། །ཐིག་ལེ་ལ་ཤན་དབྱེ་བ་ནི། །མཚན་ཉིད་བརྟགས་པའི་ཐིག་ལེ་དང་། །གསང་སྔགས་གཞི་ཡི་ཐིག་ལེ་དང་། །རྫོགས་ཆེན་སྤྱི་ཡི་ཐིག་ལེ་དང་། །ཡང་ཏིའི་ཐིག་ལེ་ཉག་གཅིག་ལ། །རེ་རེ་ལ་ནི་བཞི་བཞི་སྟེ། །ངོ་བོ་དཔེ་དང་གཏན་ཚིགས་ཀྱིས། །འགྲོ་ས་ལ་ཤན་དབྱེ་བ་ཡང་། །རྩལ་གྱི་སྒོ་ནས་གསུམ་བསྟན་པ། །སྣང་བ་ཆོས་དབྱིངས་ལ་སོགས་པ། །དབྱེ་བའི་སྒོ་ནས་བཞི་རུ་སྣང་། །ད་ཡང་འདུས་པའི་སྙིང་པོ་ཉོན། །ནང་གི་རིག་པ་ཆོས་སྐུ་ལ། །སྒྲ་མཐུན་དོན་དཔགས་གཏན་ཚིགས་ཀྱིས། །ཐམས་ཅད་ཐིག་ལེ་ཡིན་མོད་ཀྱང་། །གྲངས་ནི་བཞི་ཡི་མཚན་ཉིད་ལ། །ངོ་བོ་ལ་སོགས་བཞི་བཞིའོ། །ཕྱེ་ནས་བསྟན་པས་རྟོགས་པའི་ཚེ། །དོན་གྱི་ངོ་བོ་གཉིས་སུ་འདུས། །ལ་བཟླ་གཅིག་གི་ངང་དུ་རྫོགས། །ད་ཡང་འདུས་པའི་སྙིང་པོ་ཉོན། །ཕྱི་ནང་ཡུལ་ལ་སོགས་རྣམས་ཀྱི། །ཐེ་ཚོམ་གེགས་རྣམས་བསལ་བའི་ཕྱིར། །ཟུང་ལྔ་ཡ་བཅུ་བདུན་གྱིས་ནི། །མི་འགལ་ཤེས་པའི་རྣལ་འབྱོར་དེས། །ངེས་པའི་གདེང་ལྡན་སྟོན་པའི་མཆོག །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། ཐེ་ཚོམ་གྱི་གེགས་བསལ་བ་དངོས་བསྟན་པའི་ལེའུ་སྟེ་བཅོ་བརྒྱད་པའོ།། །།ད་ཡང་རྡོ་རྗེ་སེམས་དཔའ་ཉོན། །དེ་ཉིད་རྟོགས་པའི་ཡོན་ཏན་ནི། །སེམས་བསྐྱེད་གོང་འོག་རྣམ་པ་དང་། །ཞི་གནས་ལྷག་མཐོང་རྫོགས་པ་ཡིས། །ཕ་རོལ་ཕྱིན་བཅུ་དབང་ལ་སོགས། །སྔགས་ཀྱི་མཛད་སྤྱོད་ཐམས་ཅད་རྫོགས། །ད་ཡང་འདུས་པའི་འཁོར་རྣམས་ཉོན། །རང་སེམས་རྟོགས་པའི་ཡེ་ཤེས་ལ། །གོལ་སྒྲིབ་མེད་པར་བསྟན་པ་ཡང་། །བཅུ་གཉིས་གསུམ་དང་བདུན་བསྟན་པ། །སྔ་ཕྱིའི་ ― DNG001_Page_0468 ―
[མ་དཔེ་གཟིགས་ན་འདིར་གནོན།]
རྟོགས་པ་གསུམ་དུ་འདུས། །གང་ཡང་ཡིད་ལ་མ་བྱས་ན། །གོལ་མེད་ཆོས་སྐུ་ཤུགས་ལ་གནས། །ད་ཡང་འདུས་པའི་སྙིང་པོ་ཉོན། །ཡང་དག་དོན་གྱི་ཉིང་ཁུའི་དོན། །ཡེ་ནས་ཆོས་སྐུ་འབྲལ་མེད་དོན། །ཉམས་ཀྱི་རིམ་པ་ལྔ་ལྡན་པས། །རྟགས་ཆེན་གསུམ་གཉིས་ཤུགས་ལས་འབྱུང་། །དེ་ཚེ་བདུད་ཀྱི་སྤྱོད་ཡུལ་ནི། །བཞི་གསུམ་དྲུག་འབྱུང་ཟིལ་གནོན་ན། །ངེས་པ་དོན་གྱི་རྟགས་ཡིན་པས། །དེ་ཕྱིར་བར་དོར་སངས་རྒྱས་འགྲུབ། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། གེགས་སེལ་བའི་ཡོན་ཏན་བསྟན་པའི་ལེའུ་སྟེ་བཅུ་དགུ་པའོ།། །།སེམས་དཔའ་ཆེན་པོས་ཡང་གསོལ་པ། །འབྲས་བུ་ཡོན་ཏན་གདུལ་བྱ་ནི། །ལྟ་དམ་ཉམས་པ་སྐོང་ཐབས་དང་། །རྩ་བ་གཅིག་པའི་བདེན་རྟོགས་ན། །སངས་རྒྱས་མཛད་སྤྱོད་ཇི་ལྟར་སྤྱད། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འཁོར་རྣམས་ལ་ནི་བཀའ་སྩལ་པ། །ལྟ་སྤྱོད་ལ་སོགས་ཉམས་བསྐང་བ། །ཉེས་འགྱོད་ཡིད་ལ་བྱས་ནས་སུ། །བླ་མ་མཁས་པའི་དོན་ལྡན་ནས། །དབང་རྣམས་རིམ་པར་མནོས་ནས་ནི། །རང་སེམས་དཔང་བཙུག་དོན་ཞུས་ནས། །རྒྱུན་དུ་མི་གཏོང་གུས་པས་མཆོད། །དེ་ལ་རྟག་ཏུ་གནས་པར་བྱ། །དེ་བསྐང་གདེང་ཆེན་བདུན་ལྡན་པས། །ད་ལྟ་ཉིད་དུ་སངས་རྒྱས་ཐུགས། །གསེར་སྦྲུལ་མིག་གིས་འདོད་ཡོན་ལྔ། །དུས་གཅིག་ཉམས་སུ་མྱོང་བ་བཞིན། །ཅི་སྤྱོད་སངས་རྒྱས་ཡེ་ཤེས་ཐུགས། །སེམས་ཅན་འགྲོ་དོན་བཙལ་མི་དགོས། །མི་ལུས་ལྡན་པ་དེ་ཉིད་ལ། །ལྷ་མིས་ཕྱག་འཚལ་མཆོད་པར་འགྱུར། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། ལྟ་སྤྱོད་ཉམས་པ་བསྐལ་པའི་ཚད་བསྟན་པའི་ལེའུ་སྟེ་ཉི་ཤུ་པའོ།། །།ད་ཡང་འདུས་པའི་འཁོར་རྣམས་ཉོན། །འཁོར་འདས་འབྱུང་བའི་རྩ་བ་ནི། །ཕ་མ་མེད་པའི་བུ་བཞི་ཡིན། །དེ་ཡང་གདོད་ནས་གཅིག་ལས་གཉིས། །གསུམ་ལས་འདྲེལ་ཡོད་གཅིག་ལ་མེད། །རྩ་བ་བཞི་ཡི་དོན་ཤེས་པས། །སྐལ་ལྡན་རྣམས་ཀྱིས་རང་རིག་པ། །བདེན་མཐོང་སྣང་མེད་རྟོགས་དུས་འདིར། །ཚིག་ཏུ་བརྗོད་པར་མི་ནུས་ ― DNG001_Page_0469 ―
[མ་དཔེ་གཟིགས་ན་འདིར་གནོན།]
ཀྱང་། །སེམས་ལ་གསལ་པོར་ཡོད་པའི་ཕྱིར། །རིག་པའི་ཡེ་ཤེས་ཆོས་ཉིད་མཐོང་། །དུས་གསུམ་དག་ཏུ་སྐྱེ་འགགས་མེད། །མཚན་མར་མཐོང་བ་ཅི་ཡང་མེད། །རིན་ཆེན་འདམ་ཁུང་སྟོར་གྱུར་ཀྱང་། །དེ་ཡི་ཡོན་ཏན་མཁའ་ལ་འབྱུང་། །དེ་བཞིན་རང་སེམས་ངོ་བོ་ཉིད། །མངལ་དུ་རང་སེམས་བྱིང་གྱུར་ཀྱང་། །རང་བྱུང་གདོད་ནས་རང་གསལ་ཕྱིར། །ཡེ་ཤེས་ཆེན་པོ་རྒྱུན་མི་ཆད། །ད་ཡང་རྡོ་རྗེ་སེམས་དཔའ་ཉོན། །ལུས་ཀྱི་ནང་ན་ཆོས་སྐུ་གསལ། །ནང་སྒོ་ལྔ་ཡི་འོད་ཤར་བས། །སྣང་བ་གྲོགས་སུ་འོང་བ་རྣམས། །དེ་ཚེ་ཡུལ་དང་འདྲེལ་བ་མེད། །ཅང་ཤེས་རེག་འཇམ་ནམ་མཁའ་ལྡིང་། །རྒྱ་མཚོ་གསེར་དང་མཆོག་རབ་བཞིན། །སེམས་ཀྱིས་གར་ཕྱིན་ཆོས་སྐུར་གསལ། །ཡུལ་གྱི་གཟུང་འཛིན་སྐྱོན་མི་གོས། །རིག་པ་ཟོ་ཐུབ་བག་ཟོན་ལྡན། །འཁོར་བར་གནས་ཀྱང་གོལ་ས་མེད། །དེ་ཕྱིར་ཆོས་ཉིད་མི་འགྱུར་བརྟན། །དེ་ལྟར་དོན་ལ་ཡེ་གནས་ཕྱིར། །འབྲས་བུ་རིག་པ་ད་ལྟ་ཉིད། །དེ་ཉིད་མ་བརྗེད་རྒྱུན་གསལ་ན། །མི་གནས་མྱ་ངན་འདས་ཞེས་བྱ། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། སྣང་མེད་སེམས་ཀྱི་རིག་པ་རྟོགས་དུས་བསྟན་པའི་ལེའུ་སྟེ་ཉེར་གཅིག་པའོ།། །།ད་ཡང་རྡོ་རྗེ་སེམས་དཔའ་ཉོན། །ང་ཡི་མཛད་སྤྱོད་ཆེན་པོ་ནི། །སྐུ་མེད་གཟུགས་སྐུར་འབྱུང་བ་ནི། །ཐམས་ཅད་ཟིལ་གྱིས་གནོན་པར་བྱེད། །ཚིག་མེད་རིག་པའི་གསུང་གིས་ནི། །སངས་རྒྱས་བསྟན་པ་རྒྱས་པར་བྱེད། །རྣམ་པར་རྟོག་མེད་ཡེ་ཤེས་ཐུགས། །ཅིར་ཡང་ས་ལེ་ཐམས་ཅད་མཁྱེན། །སྟོང་གསུམ་འཇིག་རྟེན་གསུམ་པོ་ཡང་། །ང་ཡི་བཞུགས་གནས་གཟིགས་མོར་འོས། །སྐུ་གསུང་ཐུགས་ཀྱི་རོལ་པ་སྟེ། །རེ་རེ་ལ་ནི་གསུམ་གསུམ་དང་། །དབྱེ་བ་རྣམ་པ་དགུ་ཡིས་ནི། །ད་ལྟ་ཆོས་སྐུ་ཁ་མིག་ཅན། །ལུས་དང་བྲལ་བའི་སྐད་ཅིག་ལ། །སངས་རྒྱས་རྒྱལ་པོ་ཡེ་ཤེས་སྐུ། །གཟུགས་སྐུ་རྣམ་གཉིས་ཤུགས་ལ་འཆར། ། ― DNG001_Page_0470 ―
[མ་དཔེ་གཟིགས་ན་འདིར་གནོན།]
སེམས་ཅན་བསམ་པའི་ཁྱད་པར་ལས། །ཡིད་བཞིན་དབང་པོ་གང་འཐད་སྟོན། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། ཡོན་ཏན་གྱི་གདུལ་བྱ་བསྟན་པའི་ལེའུ་སྟེ་ཉེར་གཉིས་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ནི་རྣམ་བཞི་ལ། །ངེས་པའི་དགོས་ཆེད་བཀའ་སྩལ་པ། །རང་རང་རྟོགས་པ་འདིར་སྨྲོས་ཤིག །དེ་སྐད་གསུངས་པའི་དོན་གསན་ནས། །རྣམ་པར་གཟིགས་ལ་སོགས་པ་ཡི། །སྔོན་བྱུང་སངས་རྒྱས་རྣམ་བདུན་གྱིས། །རང་རང་རྟོགས་པའི་དོན་བརྗོད་པ། །རིག་པ་འགག་མེད་ཆོས་ཀྱི་སྐུ། །རྟོགས་པ་བརྗོད་མེད་རང་ཡིད་ཆེས། །མ་བཙལ་རང་སར་འགྱུར་བ་མེད། །དྲན་པ་སྐྱོན་བྲལ་ངང་དུ་བཞག །སྣང་མེད་རང་སེམས་ཆོས་སྐུར་གསལ། །རང་ལུས་ད་ལྟ་ཉམས་པ་མེད། །དངོས་མེད་རིག་པ་སྟོང་པར་གསལ། །ལོག་པར་དད་སེལ་ལ་སོགས་པའི། །ད་ལྟའི་སངས་རྒྱས་རྣམ་བདུན་གྱིས། །རང་རང་རྟོགས་པ་ཡང་གསུངས་པ། །རང་བྱུང་ཀུན་ཁྱབ་ཡེ་ཤེས་གསལ། །སལ་ལེ་མི་རྟོག་ད་ལྟ་ཉིད། །ནང་གསལ་ཡུལ་ལ་མ་ཡེངས་པ། །དངོས་མེད་གསལ་བ་བསྒོམ་མི་དགོས། །རང་ལུས་རང་སེམས་ཆོས་ཉིད་དོན། །ངོ་བོ་འགྱུར་མེད་མ་བཅོས་པ། །ཐ་མལ་སྙིང་པོ་རྟོགས་པའི་སྐུ། །བྱམས་པ་ལ་ནི་སོགས་པ་ཡི། །མ་བྱོན་སངས་རྒྱས་རྣམ་པ་བདུན། །རང་རང་རྟོགས་པ་ཡང་གསུངས་པ། །ཤེས་པ་འཛིན་མེད་ཡེ་ཤེས་གྲུབ། །ཅིར་སྣང་དགག་བསྒྲུབ་མེད་པར་ཟད། །སྔ་ཕྱི་ཡེངས་མེད་ཡེ་ཤེས་རྒྱུན། །རྣལ་དུ་རིག་པ་འགྱུར་བ་མེད། །སྐྱེ་མེད་རྟོགས་པ་བྱང་ཆུབ་སྐུ། །བརྗོད་མེད་ཏིང་འཛིན་འབྱུང་འཇུག་མེད། །རང་སེམས་མ་བཅོས་དོན་ལ་ཞོག །དུས་གསུམ་སངས་རྒྱས་དེ་དག་གི། །དགོངས་པ་གཅིག་ཕྱིར་ཡེ་ཤེས་ཐུགས། །རྡོ་རྗེ་ཡེངས་མེད་ལ་སོགས་པ། །རིག་འཛིན་སེམས་དཔའ་ཡབ་ཡུམ་བཅུ། །རང་རང་རྟོགས་པའི་དོན་བརྗོད་པ། །ཡེ་ཤེས་འཛིན་མེད་རིག་པ་སྟོང་། །རྟོག་པའི་དྲན་པ་འགྱུར་བ་མེད། །སྤྲོས་བྲལ་ལྟ་བ་ཡེངས་པ་མེད། །ཡེ་ཤེས་འཆི་མེད་ཞེ་སྡང་བྲལ། །རང་སེམས་ཅི་སྤྱོད་སྙིང་པོའི་དོན། །མ་སྐྱེས་ང་རྒྱལ་ངོ་བོ་ཉིད། །དངོས་མེད་ཡེ་ཤེས་ཞེ་ལ་ཡོད། །འདོད་ཆགས་གོལ་མེད་ཡེ་ཤེས་རྒྱུན། །ལྟ་བ་རྩོལ་བ་མེད་པའི་ཀློང་། །གསལ་བ་ཞེན་མེད་ཉམས་ ― DNG001_Page_0471 ―
[མ་དཔེ་གཟིགས་ན་འདིར་གནོན།]
ཀྱི་མཆོག །ད་ཡང་འདུས་པའི་སྙིང་བོ་ཉོན། །རྒྱལ་སྲས་སྤྲུལ་པ་ད་ཉོན་ཅིག །རང་སེམས་འགྱུར་མེད་རིག་པ་གསལ། །རེ་དོགས་མེད་པར་ལམ་དུ་རྟོགས། །དེ་སྐད་ཅེས་ནི་གསོལ་པ་དང་། །ཐུགས་ལ་དགོངས་ནས་བཀའ་སྩལ་པ། །ཤེས་པ་བློ་ཡི་ཁྱད་པར་ལས། །ཚིག་ཏུ་མཚོན་པ་སྣ་ཚོགས་ཀྱང་། །དོན་ལ་དབྱེར་མེད་ངོ་བོ་གཅིག །སངས་རྒྱས་དགོངས་པ་ཁྱོད་ཀྱིས་རྟོགས། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། འཁོར་གྱི་རྟོགས་པ་བརྗོད་པའི་ལེའུ་སྟེ་ཉེར་གསུམ་པའོ།། །།དེ་སྐད་ཅེས་ནི་གསུངས་པ་དང་། །དེ་ཚེ་འདུས་པ་རྣམ་བཞི་ཡང་། །རང་སེམས་རྟོགས་པ་མངོན་གྱུར་ནས། །དགའ་བའི་སེམས་ཀྱིས་ཡི་རང་ནས། །རྡོ་རྗེ་སེམས་དཔར་དོན་གསོལ་པ། །རྟོགས་པ་བརྗོད་པའི་དོན་མཐུན་པ། །འབྲས་བུའི་སངས་རྒྱས་ད་ལྟ་མྱོང་། །རང་སེམས་མ་དང་ཐུག་གིས་ཕྲད། །དེ་ཕྱིར་ད་ལྟ་ཀུན་བཟང་ཉིད། །རྡོ་རྗེ་སེམས་དཔའ་དགའ་བ་ཆེ། །འདྲེན་མཛད་ཁྱོད་ལ་ཕྱག་འཚལ་ལོ། །དེ་སྐད་གསོལ་བའི་དོན་གོ་ནས། །རྡོ་རྗེ་སེམས་དཔས་ཡང་གསུངས་པ། །སངས་རྒྱས་ཐུགས་ཀྱི་བྱིན་རླབས་ལས། །དགོངས་པ་མ་ལུས་བཅུད་བསྡུས་པ། །དུས་གསུམ་རྒྱལ་བའི་ཐུགས་ཀྱི་དོན། །གདམས་ངག་ཚད་མེད་ཉིང་ཁུ་ནི། །དད་ལྡན་ཁྱོད་ལ་ངས་བཤད་པས། །དོན་འདི་རྒྱུད་ལ་ཤིན་ཏུ་སྦོས། །ཡང་དག་ཉིང་ཁུ་སེམས་ཀྱི་བཅུད། །ཐིག་ལེ་ཉག་གཅིག་མངོན་ཕྱུང་བ། །ཆོས་ཀྱི་གཏེར་གྱི་འབྱུང་གནས་འདི། །སྣོད་ལྡན་རྣལ་འབྱོར་རྣམས་ཀྱིས་ཀྱང་། །གལ་ཏེ་ཕྱི་རབས་དོན་སྟོན་ན། །སངས་རྒྱས་ཆོས་སྐྱོང་དཔང་དུ་ཚུགས། །གཞན་ལ་མི་སྤེལ་མནའ་བོར་ནས། །སྣོད་ལྡན་མན་ངག་ཚང་བར་བསྟན། །ཚོགས་ཀྱི་མཆོད་པ་ཅི་ནུས་བྱ། །དེ་ལྟར་མ་བྱས་ཆོས་བསྟན་ན། །སློབ་དཔོན་ཚེ་ཐུང་བར་ཆད་འོང་། །བཀའ་རྐུ་བླ་མ་སྨོད་པ་ལ། །མི་ཚེ་འདི་ཉིད་ད་ལྟའི་དུས། །ནད་དང་ཁ་ཡོགས་སྣ་ཚོགས་འོང་། །དེ་ཕྱིར་མན་ངག་ཡང་སྙིང་འདི། །འཇིག་རྟེན་གྲགས་པ་ནོར་འདོད་ཕྱིར། །ནམས་ཀྱང་མ་སྤེལ་སེམས་ལ་ཆོང་། །རྡོ་རྗེ་སེམས་དཔས་དེ་སྐད་གསུངས། །རྫོགས་པ་ཆེན་པོ་འཁོར་བ་རྩད་ནས་གཅོད་པ་ཆོས་སྐུ་སྐྱེ་མེད་རིག་པའི་རྒྱུད་ལས། རྟོགས་པའི་མཛད་སྤྱོད་དང་རྒྱུད་གཏད་པའི་ལེའུ་སྟེ་ཉི་ཤུ་བཞི་པའོ།། །།རིན་པོ་ཆེ་གཏེར་གྱི་འབྱུང་གནས་ཞེས་བྱ་བ་རྫོགས་སོ། །རྒྱ་གར་གྱི་མཁན་པོ་བི་མ་ལ་མི་ཏྲ་དང་། ཨཱ་ཙརྱ་དྲན་པ་ཡེ་ཤེས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །། རྫོགས་པ་ཆེན་པོ་ལྟ་བའི་ཡང་སྙིང་། སངས་རྒྱས་ཐམས་ཅད་ཀྱི་དགོངས་པ། ནམ་མཁའ་ཀློང་ཡངས་ཀྱི་རྒྱུད་ཅེས་བྱ་བ།― DNG001_Page_0472 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྟི་དྲྀཥྚཱ་ཏི་གརྦྷ། སརྦ་བུདྡྷཱ་ཤ་ཡ། ག་ག་ནོརྨྨི་བི་པུ་ལ་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོ་ལྟ་བའི་ཡང་སྙིང་། སངས་རྒྱས་ཐམས་ཅད་ཀྱི་དགོངས་པ། ནམ་མཁའ་ཀློང་ཡངས་ཀྱི་རྒྱུད་ཅེས་བྱ་བ། བཅོམ་ལྡན་འདས་རང་བྱུང་ངོ་བོ་ཉིད་ཀྱི་སྐུ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། །བཅོམ་ལྡན་ཀུན་རིག་རྒྱལ་པོ་དེ། །འོག་མིན་ཆོས་དབྱིངས་ཕོ་བྲང་དུ། །སྙིང་པོ་བྱང་ཆུབ་སྐུ་བཞུགས་པས། །རིགས་ལྔའི་འཁོར་ལ་ཐུགས་གཟིགས་ཏེ། །ཡེ་ཤེས་འཁོར་ལོའི་དགོངས་པ་ལས། །གཡོས་པ་མེད་པར་ལྷུན་གྱིས་གྲུབ། །དེ་ཚེ་འདུས་པ་རྣམ་བཞི་ཡང་། །རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་འཇིག་བསོད་སྐྱབས་རིན་ཆེན་མང་། །མར་མེ་ལོག་པར་དད་སེལ་དང་། །འོད་སྲུངས་རིན་ཆེན་སྙིང་པོ་དང་། །དབང་པོ་ཞི་དང་པདྨ་བརྩེགས། །གསེར་ཐུབ་དང་ནི་ཤཱཀྱ་ཐུབ། །མཻ་ཏྲི་མཐུ་ཆེན་ཐོབ་དང་ནི། །སྤྱན་རས་གཟིགས་དང་འཇམ་པའི་དཔལ། །དྲི་མེད་ཕྱག་ན་དགའ་བའི་དབང་། །དུས་གསུམ་སངས་རྒྱས་རྣམས་ཀྱང་བཞུགས། །སེམས་དཔའ་རྡོ་རྗེ་སྣང་བ་དང་། །ཡེ་ཤེས་དཔལ་དང་ཡོན་ཏན་སྙིང་། །སྐྱོན་མེད་གྲགས་པ་གྲུབ་པ་རྩལ། །ཡེ་ཤེས་སྤྱན་མ་རྡོ་རྗེ་དབྱིངས། །དཔལ་འབར་མ་དང་དཔལ་ལྡན་བདེ། །ལས་ཀྱི་སེམས་མ་ཆེན་མོ་རྣམས། །རང་རང་གཙོ་ལ་འཁྱུད་ནས་འཁོད། །གཞན་ཡང་ཆོས་སྲུང་སྤྲུལ་པའི་ཚོགས། །འཇིག་རྟེན་མཁའ་འགྲོ་ཕོ་མོ་དང་། །དྲེགས་ཅན་དམ་བཏགས་ཞལ་འཆེས་པ། །རང་དབང་མེད་པར་དད་འདུས་རྣམས། །རང་སེམས་རྟོགས་པར་འདོད་པའི་ཕྱིར། །ལུས་ངག་སེམས་ཀྱིས་ཟོལ་མེད་པར། །ཐབས་ཅིག་རིམ་པར་འཁོད་གྱུར་ཏེ། །དེ་ཚེ་རྡོ་རྗེ་སེམས་དཔའ་ཡིས། །དུས་གསུམ་བདེ་བར་གཤེགས་པ་ཡི། །ཐམས་ཅད་སྐུ་གསུང་ཐུགས་དང་ནི། །རྡོ་རྗེ་ལས་བྱུང་ཕུན་སུམ་ཚོགས། །ཀུན་རིག་རྒྱལ་པོའི་དགོངས་པ་དེས། །མངོན་པར་གཟིགས་པའི་དོན་གོ་ནས། །རྡོ་རྗེའི་ཡིད་ཀྱི་དོན་བསྐུལ་བ། །འཁོར་འདས་མ་རིག་རྣལ་འབྱོར་ཐུགས། །ནམ་མཁའ་བཞིན་དུ་ཡེ་གནས་པས། །ཡེ་ཤེས་རྣམ་པར་གྲོལ་བའི་ཐུགས། །ངོ་བོ་ཉིད་ཀྱི་སྐུ་བསྐྱོད་ནས། ། ― DNG001_Page_0473 ―
[མ་དཔེ་གཟིགས་ན་འདིར་གནོན།]
ཐུགས་དམ་དབང་གིས་བཞེངས་སུ་གསོལ། །དེ་སྐད་བསྐུལ་བ་མཁྱེན་གྱུར་ནས། །ངོ་བོ་ཉིད་ལས་གཟུགས་སྐུར་བཞེངས། །གཟུགས་སྐུ་རོལ་པའི་མཛད་སྤྱོད་ཀྱིས། །འོད་ཟེར་སྤྲོས་པས་ནམ་མཁའ་ཁྱབ། །ཐམས་ཅད་ཀུན་ཏུ་སྣང་མཛད་པས། །འཁོར་རྣམས་ངོ་མཚར་དུ་གྱུར་ནས། །རྩེ་གཅིག་ལུས་ངག་ཡིད་ཀྱིས་ཀྱང་། །རྣལ་འབྱོར་ཚོགས་ཀྱིས་ཕྱག་འཚལ་ནས། །བདེན་པའི་ཡིད་ཀྱིས་ཡང་བསྐུལ་བ། །འཁོར་འདས་རྩ་བ་ཐུགས་ཀྱི་དབྱིངས། །ཤེས་རབ་ཆེན་པོར་མངའ་བརྙེས་པས། །སྤྲུལ་པ་གྲངས་མེད་འབྱུང་བའི་གནས། །ཆོས་སྐུ་བདེ་བས་འགྲོ་དོན་གྱིས། །དེ་དོན་བསྐུལ་བ་ཐུགས་ཆུད་ནས། །འཁོར་འདས་མ་རེག་དོན་ཆེན་ལ། །འབྲལ་མེད་དགོངས་པར་སྙོམས་ཞུགས་ཏེ། །ཅང་མི་གསུང་བར་ལྷུན་གྱིས་བཞུགས། །དེ་ནས་བློ་གྲོས་དམ་པ་དེ། །ཅང་མི་གསུང་བར་ངོ་མཚར་ཏེ། །དཔའ་བོ་མགོན་པོར་ཡང་ཞུས་པ། །ཨེ་མ་ནམ་མཁའ་ལྟ་བུ་ཡི། །སྐུ་མཆོག་ཁྱབ་པའི་བྱིན་རླབས་ཀྱིས། །ཐོགས་མེད་རོལ་པའི་ཆོ་འཕྲུལ་གྱིས། །བདུད་དཔུང་གཟི་བརྗིད་ཟིལ་གྱིས་གནོན། །ཡིད་བཞིན་གསུང་མཆོག་སྒྲ་སྙན་གྱིས། །ཚིག་གཅིག་དོན་གོ་ཐམས་ཅད་འདུས། །གཟུང་སླ་ཡན་ལག་ཚང་བའི་གསུང་། །སེང་གེའི་སྒྲ་ཡིས་གསང་སྔགས་གསུང་། །ཡེ་ཤེས་སྙིང་པོ་རྡོ་རྗེའི་ཐུགས། །ཉི་ཟླ་ལྟ་བུར་རང་གསལ་བ། །འཁོར་འདས་སྤྲོས་བྲལ་ཐིག་ལེའི་ཐུགས། །ཡེ་ཤེས་རིག་པར་བྱིན་གྱིས་བརླབས། །ཐུགས་རྗེ་ཀུན་གྱི་བདག་པོ་ཁྱོད། །སངས་རྒྱས་རྣམས་ཀྱི་ཡང་མེས་པོ། །རྣལ་འབྱོར་ཀུན་གྱི་དམ་པའི་ལམ། །བདུད་རྣམས་ཀུན་གྱི་བདུད་ཆེན་པོ། །ཡོན་ཏན་ཐམས་ཅད་འབྱུང་བའི་གནས། །བྱང་ཆུབ་སེམས་ཀྱི་མཛོད་ཆེན་པོ། །མ་རིག་མུན་པ་བསལ་དུ་གསོལ། །དེ་སྐད་གསོལ་བའི་དོན་གོ་ནས། །བཅོམ་ལྡན་ངོ་བོ་ཉིད་སྐུ་དེས། །འཁོར་རྣམས་ལ་ནི་ཐུགས་གཟིགས་ནས། །ཕྱོགས་བཅུར་ཞལ་ནི་འཛུམ་མཛད་དེ། །དཔེར་ན་ཉི་མའི་སྙིང་པོ་ལས། །འོད་ཟེར་ཀུན་ཏུ་བཀྱེ་བ་ལྟར། །ཁྱབ་པར་མཛད་ཅིང་བཀའ་སྩལ་པ། །འཁོར་འདས་མེད་པའི་གོང་རོལ་དུ། །ང་རྟོགས་ཀུན་ཏུ་བཟང་པོ་བྱུང་། །གཞན་པའི་ཞི་གནས་བློས་བསྒོམས་པས། །སངས་རྒྱས་ཉིད་ཀྱང་གདེང་མེད་གོལ། །ཕྲ་མོའི་རྣལ་འབྱོར་སྨོས་ཅི་དགོས། །དེ་སྐད་ ― DNG001_Page_0474 ―
[མ་དཔེ་གཟིགས་ན་འདིར་གནོན།]
བཀའ་སྩལ་གསུངས་མ་ཐག །འཁོར་རྣམས་མ་དགའ་ཡིད་འདྲོགས་ཏེ། །དོན་ལ་ཐེ་ཚོམ་ཟ་གྱུར་ཏེ། །མྱ་ངན་ཡིད་ཀྱིས་ཟིན་གྱུར་ནས། །འཇིག་རྟེན་ཀུན་འགུལ་རབ་ཏུ་གཡོས། །ལྷ་མི་མི་མ་ཡིན་ལ་སོགས། །ཀུན་ཀྱང་སྐྲག་ཅིང་ཡ་ངར་གྱུར། །དེ་ནས་རྡོ་རྗེ་སེམས་དཔའ་ཡི། །ཐུགས་ཀྱིས་གཟིགས་ནས་དོན་རིག་པ། །འཁོར་རྣམས་ཞི་གནས་བསམ་གཏན་ལ། །ཞེན་པ་གསལ་བར་ཡིད་གཟིགས་ནས། །ཏིང་ངེ་འཛིན་གྱི་དོན་གསོལ་པ། །འཇིག་རྟེན་མཁས་པ་རྫོགས་སངས་རྒྱས། །ཡེ་ཤེས་ཐུགས་རྗེ་ཆེན་པོ་ཡིས། །ཆོས་ཉིད་གནས་ལུགས་ཇི་ལྟ་བ། །མ་ནོར་མ་བཅོས་སྙིང་པོའི་ཐུགས། །འཁྲུལ་པའི་བློ་ཡིས་རྟོགས་པའི་ཐབས། །འཁོར་འདས་མ་རིག་ལྷག་མཐོང་དོན། །དུས་འདིར་བདག་ལ་བཤད་དུ་གསོལ། །རང་བྱུང་ངོ་བོ་ཉིད་སྐུ་དེས། །དོན་རིག་ཐུགས་ཀྱིས་བཀའ་སྩལ་པ། །སངས་རྒྱས་ཆོས་ཉིད་ཇི་ལྟ་བ། །འཁོར་འདས་མ་རིག་སྙིང་པོའི་དོན། །ཡང་མེས་ང་ཡིས་དོན་བཤད་དུ། །རྫོགས་ཆེན་སྐྱེ་མེད་དོན་ཟབ་ཀྱང་། །མ་རྟོགས་པ་ལ་སྡིག་མོར་ཆེ། །ནོར་བུ་རིན་ཆེན་རྙེད་དཀའ་བཞིན། །ཕྱི་མའི་དུས་ཀྱི་མི་ངན་རྣམས། །དར་དྲག་ངང་ཐུང་ཚོར་སྐྱེན་ལ། །བཀའ་ཡི་དོན་ལ་ཡིད་མི་ཆེས། །གཞུང་མང་སྒྲིན་ཚིག་རྟོག་པ་ཟ། །བྱང་ཆུབ་པས་ནི་ཁེ་གྲགས་བསྒྲུབ། །ལེ་ལོ་ཆེ་བས་གྲུབ་རྟགས་རིངས། །འཇུག་ལ་བརྩོན་ནས་འདོར་བ་སྐྱེན། །ངེས་པའི་དོན་ལ་གལ་ཆེན་འཛུགས། །བདེན་པའི་ཚིག་ལ་སྒྲོ་སྐུར་འདེབས། །ཚིག་ཏུ་ཞིབ་ལ་དོན་ཏུ་རྩིང་། །ཐོས་བསམ་པས་ནི་ངོམ་པར་རིངས། །ཤེས་ནས་མི་བསྒྲུབ་ཡལ་བར་འདོར། །གོང་འོག་གཞུང་ནི་བསྲེས་ཏེ་བསླད། །བཀའ་མིན་མི་ཆོས་དོན་དུ་བྱེད། །མན་ངག་ཟབ་མོ་ཟོང་དུ་འཚོང་། །ཚིག་ཉུང་ཟབ་མོ་གཏིང་ཕྱིན་ལ། །ཤ་ཐང་མི་ཕྱེད་སྤོམ་ཞེས་སྨྲ། །གདམས་ངག་བློས་ཆུད་མི་གསོན་པར། །དོན་ཉིད་རྟོགས་པར་བྱེད་པ་ལ། །ཡིད་མི་ཆེས་པའི་རིགས་པ་འཛུགས། །མང་པོར་བཤད་ཀྱང་དོན་མེད་ལ། །མཁས་པ་ཡིན་ཞེས་ཡོན་ཏན་བརྗོད། །བླ་མ་སྨོད་པའི་གང་ཟག་ལ། །ཁོ་བདེན་ཟེར་ཞིང་རྗེས་སུ་འཇུག །གསང་བའི་མན་ངག་མ་གོ་བར། །སློབ་བུས་མ་བྱས་སློབ་དཔོན་འཁངས། །ཁུངས་ནས་བརྒྱུད་པའི་མན་ངག་ལ། །མ་ནོར་ཡིན་པར་མི་བརྩི་ ― DNG001_Page_0475 ―
[མ་དཔེ་གཟིགས་ན་འདིར་གནོན།]
བར། །རང་བཟོ་ཁ་ཚབས་བསྲེས་པ་ལ། །ཡིད་ཆེས་བྱེད་ཅིང་དམ་པར་འཛིན། །ལྟ་དམན་རྣམས་ཀྱི་ངོ་སྲུང་བྱེད། །དེ་ལྟ་བུ་ཡི་དུས་བྱུང་ཚེ། །དོན་བསྟན་སྐད་ཅིག་དེ་ཉིད་ལ། །རྒྱུད་ལུང་སངས་རྒྱས་སྐྲག་ཅིང་དངངས། །ཉན་ཐོས་མདོ་སྡེ་བརྒྱལ་ཅིང་འབོག །ལྷ་དང་ལྷ་མིན་སྲིན་པོའི་ཚོགས། །སྒྲོ་སྐུར་འདོགས་པའི་གང་ཟག་རྣམས། །གཏན་དུ་དམྱལ་བ་ཆེན་པོར་ལྟུང་། །འདི་ལ་ཚེ་ཡི་བར་ཆད་དང་། །འཇིགས་པ་སྣ་ཚོགས་དེ་ལ་འོང་། །མགོ་ལུས་ཚལ་པ་སྟོང་དུ་འགས། །རིག་འཛིན་རྣམས་ཀྱིས་སྤོངས་པར་འགྱུར། །དེ་ཕྱིར་ཤིན་ཏུ་གསང་བའི་དོན། །སྣོད་ལྡན་སློབ་བུ་མི་རྙེད་དཀོན། །དེ་སྐད་བཀའ་སྩལ་དོན་གོ་ནས། །འཁོར་རྣམས་མགྲིན་གཅིག་ཐལ་སྦྱར་ནས། །ཡིད་ཀྱིས་གདུང་བའི་དོན་གསོལ་པ། །འཁོར་བའི་གཡང་སར་ལྟུང་བ་ལ། །ཐུགས་རྗེ་ཆེན་པོས་མི་འཛིན་ནམ། །རི་དྭགས་འཛིན་པའི་རྒྱར་ཆུད་ན། །རྣམ་རྟོག་དྲ་བ་མི་གཅོད་དམ། །སེམས་ཅན་ལས་ལ་ཐུགས་ཚད་ཀྱང་། །འགྲོ་དོན་སྙིང་རྗེ་མི་མཛད་དམ། །མ་རིག་མུན་པའི་སྨག་རུམ་དུ། །དམུས་ལོང་བཞིན་དུ་རང་སེམས་འཐིབས། །ཡེ་ཤེས་ཉི་མ་མི་འཆར་རམ། །ཞེ་སྡང་མེ་ཆེན་འབར་བ་ནི། །ལས་ཀྱི་རླུང་དམར་ཆེན་པོས་བུས། །ཆོས་ཉིད་རླན་གྱིས་མི་འཇིལ་ལམ། །འདོད་ཆགས་ཆུ་ལྟར་བྲུབ་པ་ཡིས། །བསེ་རྩི་བཞིན་དུ་ཞེན་པ་ལ། །ཡེ་ཤེས་མེ་ཡིས་མི་བསྲེག་གམ། །དོན་སྟོར་ལུས་ཀྱི་ནང་དུ་སྟོར། །ལམ་སྟོར་བདག་ལ་ས་མཁན་མཛོད། །དུས་འདིར་འདུས་པ་རྣམས་ཀྱིས་ཀྱང་། །འགལ་སེམས་རྡུལ་ཙམ་མེད་པར་ནི། །དད་པས་བྱང་ཆུབ་དོན་ལ་མོས། །ངེས་ཤིང་དད་པས་ཡིད་བསྡུས་སོ། །དེ་ནས་ངོ་བོ་ཉིད་སྐུ་དེས། །ཡེ་ཤེས་འཁོར་ལོའི་དགོངས་པ་ལས། །ཐུགས་ནི་མངོན་པར་བཞེངས་ནས་ཀྱང་། །ཀུན་བཟང་ཆོས་སྐུའི་རྟོགས་དོན་དེ། །འདུས་པའི་འཁོར་ལ་བཀའ་སྩལ་པ། །ལེགས་སོ་དད་ལྡན་འཁོར་རྣམས་ཉོན། །ལྷག་མཐོང་གསལ་བར་ངས་བཤད་ཀྱི། །ལེགས་པར་ཉོན་ལ་ཡིད་ཀྱིས་ཟུང་། །གོལ་ས་ཆོད་པའི་ལྟ་བ་ཡིས། །གདེང་དུ་གོ་འགྱུར་རྣལ་འབྱོར་པས། །ཆེད་དུ་མི་བསྒོམ་རང་ཡན་ཏེ། །སངས་རྒྱས་བཅོམ་ལྡན་འདས་རྣམས་ཀྱིས། །དབང་པོ་རང་ཡན་བཏང་ལས་བྱུང་། །མ་བསྒོམས་ཡེ་ཤེས་ ― DNG001_Page_0476 ―
[མ་དཔེ་གཟིགས་ན་འདིར་གནོན།]
ཤུགས་ལ་འཆང་། །གོལ་མེད་ཡེ་ཤེས་ཆོས་ཉིད་ཀློང་། །ཐུགས་ཀྱི་འོད་ཟེར་སྟོང་གི་ཆ། །ཕྱོགས་བཅུ་ཀུན་ཏུ་རབ་སྤྲོས་པས། །འཁོར་རྣམས་སེམས་ལ་དོན་ཤར་ནས། །ཞི་གནས་ལ་ནི་ལྷག་མཐོང་དུ། །རྡུལ་ཙམ་དུ་ཡང་མ་བསྒོམས་པར། །ཕྲ་མོ་ཆ་ཙམ་རྟོགས་གྱུར་ནས། །དགའ་བའི་ཡིད་ཀྱིས་དོན་བསྟོད་པ། །འཁོར་བའི་ནད་འབྱིན་སྨན་པའི་མཆོག །རབ་མེད་སྒྲོལ་བ་ཆོས་ཀྱི་གྲུ། །འཇིགས་སར་རྟེན་པའི་ཡེ་ཤེས་མཁར། །དྲིན་མེད་བྱམས་པའི་ཕ་དང་མ། །འདྲེན་མཛད་ཁྱོད་ལ་ཕྱག་འཚལ་བསྟོད། །དེད་དཔོན་ཀུན་བཟང་ཆོས་ཀྱི་སྐུ། །འཁོར་བའི་ལམ་མེད་ལམ་སྟོན་པ། །རང་རིག་ཡེ་ཤེས་བྱང་ཆུབ་ཀློང་། །ཡེ་ཤེས་སྐུ་ལ་ཡིད་ཀྱིས་བསྟོད། །ནམ་མཁའ་ལྟ་བུར་དྭངས་པ་ཡི། །ཁྱབ་གསལ་རབ་བརྗིད་སྐུར་སྟོན་ཅིང་། །མཁས་ལ་རྒྱ་ཆེ་ཤིན་ཏུ་གསལ། །ཨེ་མ་སངས་རྒྱས་བཅོམ་ལྡན་གསུང་། །ཤེས་རབ་གཏིང་ཕྱིན་གཡོས་པ་མེད། །རྒྱུན་མི་གཅད་ལ་ཕྱག་འཚལ་ལོ། །མ་རྩོལ་བདུད་རྣམས་འདུལ་མཛད་པ། །སྟོབས་ལྡན་དཔའ་བོ་ཆེན་པོ་སྟེ། །ཡོན་ཏན་ཕྲིན་ལས་རྫོགས་མཛད་པ། །ཅི་བསམ་འགྲུབ་ལ་ཕྱག་འཚལ་བསྟོད། །ད་ནི་ཁྱོད་ཀྱི་འབངས་སུ་མཆི། །དཔའ་བོ་ཆེན་པོ་བདག་ལ་དགོངས། །བཀའ་ལས་མི་འདས་ཡིད་ཀྱིས་བཟུང་། །ལྟ་བའི་ཡང་སྙིང་བཤད་དུ་གསོལ། །དེ་སྐད་གསོལ་བའི་དོན་གསན་ནས། །བཅོམ་ལྡན་ངོ་བོ་ཉིད་ཆེན་དེས། །གདོད་ནས་འབྲལ་མེད་ཏིང་འཛིན་ལ། །བདེ་བར་ཞུགས་ནས་བཀའ་སྩལ་པ། །ཡང་སྙིང་ལྟ་བའི་རྒྱུད་ཆེན་འདི། །ཡིད་ཀྱིས་བཤད་པས་རྟོགས་པའི་དོན། །ངས་ཤེས་ཡེ་ཤེས་དམ་པར་གྱིས། །བདུད་དང་བར་གཅོད་ཐམས་ཅད་ཀྱང་། །ང་ཉིད་རོལ་པ་ལས་གཞན་མེད། །ང་མ་ཤེས་པར་ཅི་སྤྱད་ཀྱང་། །འབྲས་བུ་བརླག་ཅིང་འཚིག་པར་འགྱུར། །དེ་སྐད་གསུངས་ནས་སྐུ་གསུང་ཐུགས། །སྐྱེ་འགག་མེད་པའི་ཡེ་ཤེས་ཀྱིས། །རྒྱུན་མི་ཆད་ཀྱི་དགོངས་པ་ལ། །ཐུགས་ནི་ཤིན་ཏུ་ཐིམ་གྱུར་ཏོ། །དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་བཏགས་ཕྱིར། །ཡིད་ཀྱིས་ངེས་དོན་འདི་སྐད་གསོལ། །དད་པས་བསྒོམ་དང་རྟོགས་པ་ཡིས། །སྣོད་ལྡན་སྣོད་ངན་བྱེ་བྲག་གི། །འབྲས་བུ་བསྟན་ ― DNG001_Page_0477 ―
[མ་དཔེ་གཟིགས་ན་འདིར་གནོན།]
པ་བཤད་དུ་གསོལ། །ཀུན་རིག་རྒྱལ་པོས་བཀའ་སྩལ་པ། །ཁྱོད་ཀྱིས་ཞུས་པ་ངས་བཤད་ཉོན། །ང་ཡི་ཡེ་ཤེས་ལྷུན་གྲུབ་ལ། །རེ་ཞིག་མོས་པ་དྲང་བའི་ཕྱིར། །སྤྱི་ཡི་མཚན་ཉིད་རྟོགས་པའི་ཐབས། །བརྡའ་ཙམ་མཚོན་ནས་ཞེན་གྲོལ་བའི། །རང་དོན་སེམས་ཀྱི་མོས་པ་ཡིས། །ཐེག་པ་ཀུན་ལ་ཐོས་བསམ་གནས། །དབེན་པའི་དགོན་པར་གང་བསྒོམ་པ། །རང་སེམས་དམུ་རྒོད་སྟོང་ཁམས་ཡན། །མངལ་གྱིས་སྒྲིབ་གཡོགས་ཁང་སྟོང་བསྲུང་། །བཅོས་མའི་སྤྱོད་པ་སུས་བསྒོམ་པ། །འབྲས་བུ་སངས་རྒྱས་ཐོབ་འདོད་པ། །ཞེ་འདོད་ཡོད་ཕྱིར་འཁོར་བའི་རྒྱུ། །སྣང་བ་སེམས་སུ་བྱས་པའི་ཕྱིར། །འབྲས་བུ་ཡེ་ཤེས་འབྱུང་མི་སྲིད། །ད་ཡང་འདུས་པའི་སྙིང་པོ་ཉོན། །འཁོར་འདས་ཚིག་ཏུ་བརྗོད་དཀའ་བ། །ཆོས་སྐུ་ནམ་མཁའ་ལྟ་བུ་དེ། །ཀུན་ལ་གནས་ཀྱང་རྟོགས་པར་དཀའ། །ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་ན་ཡང་རེ་འགའ་ཞིག །འབྱུང་སྲིད་ཀུན་གྱི་ཐུན་མོང་མིན། །དོན་འདི་ཀུན་ལ་བཤད་ཀྱིས་ཉོན། །བླ་མ་རྡོ་རྗེ་སློབ་དཔོན་ལས། །ཉན་བཤད་སྒྲུབ་པའི་དབང་མནོས་ནས། །མཆེད་ལ་སྲིང་ལྟར་གདུང་བྱེད་ཅིང་། །ཐོས་བསམ་བསྒོམ་པར་འདོད་པའི་ཕྱིར། །བྱང་ཆུབ་སྲོག་དང་བསྡོ་བ་ཡི། །སྣོད་ལྡན་མ་ནོར་ཕྲད་གྱུར་ན། །འཚོ་བ་རང་གིས་སྦྱར་ལ་ཡང་། །ལྟ་བའི་དགོངས་དོན་འདི་བསྟན་ཏེ། །མ་མཚོན་གོ་དང་མ་དཔྱད་རྟོགས། །དོན་ལྡན་མན་ངག་རིག་པའི་བློས། །མ་བསྒོམས་རྟོགས་པས་ངེས་པར་ཆོག །དེ་ཡི་འབྲས་བུ་ད་ལྟ་ཉིད། །སངས་རྒྱས་རྒྱལ་པོ་ཡེ་ཤེས་སྐུ། །ཐམས་ཅད་མཁྱེན་པའི་ཡེ་ཤེས་ཏེ། །འབྲས་བུ་ཀུན་གྱི་མཆོག་ཏུ་བཤད། །རྡོ་རྗེ་སེམས་དཔའ་ད་ཡང་ཉོན། །ངོ་བོ་ཉིད་ཀྱི་ཆོས་སྐུ་ལ། །འདས་དང་མ་འདས་མི་མངའ་ཡང་། །ང་ཉིད་དངོས་སུ་མི་བཞུགས་ཚེ། །འཛམ་གླིང་དབུས་ཀྱི་ཤར་ཕྱོགས་སུ། །སྐལ་ལྡན་རིགས་ཀྱི་སྤྲུལ་པ་གཅིག །ཕ་མེད་བྲམ་ཟེའི་རིགས་སྐྱེས་ནས། །ང་ཡི་ངེས་དོན་ལྟ་བ་འདི། །གདམས་ངག་མི་འཆད་སྟོན་པ་འབྱུང་། །ཕྱིས་ཀྱི་རྣལ་འབྱོར་འཇུག་འདོད་པས། །ང་ཡི་རྒྱུད་འདི་རྟོགས་པར་གྱིས། །འདི་ཤེས་བླ་མ་དམ་པར་བཟུང་། །དེ་བཟུང་ཡོན་ཏན་བརྗོད་མི་ལངས། །ངེས་དོན་འདི་ལ་གང་མོས་ ― DNG001_Page_0478 ―
[མ་དཔེ་གཟིགས་ན་འདིར་གནོན།]
རྣམས། །བཀའ་དང་མཐུན་པར་དོན་གོ་ནས། །རྡུལ་ཙམ་དུ་ཡང་མ་བསྒོམས་ཀྱང་། །སངས་རྒྱས་ས་ལ་སྨོས་ཅི་དགོས། །དེ་ཚེ་དད་ལྡན་འདི་ལ་འཇུག །འཁོར་འདས་མ་རེག་ཆོས་སྐུའི་དོན། །ལས་ཅན་ཀུན་ཀྱི་རྟོགས་དོན་ཆོས། །མན་ངག་རྫོགས་ཆེན་བསྟན་པ་འབྱུང་། །དེ་ཚེ་ང་ཡི་འཁོར་རྣམས་ཀྱིས། །ངེས་དོན་ལྟ་བ་འཆད་པ་ལ། །ལྟ་དམན་ཚུལ་འཆོས་སྡེ་པ་ནི། །སྔགས་པར་ཁས་འཆེའི་མུ་སྟེགས་དང་། །དྲང་དོན་ཐེག་པ་ལ་ཞེན་རྣམས། །ཞེ་སྡང་བྱེད་པའི་དུས་བྱུང་ཚེ། །ཁ་ཟེར་འཕྱར་ཁ་གཏོང་བ་དང་། །དུག་དང་རྡོ་དང་མཚོན་སོགས་ཀྱིས། །དེ་ལ་གསོད་པར་སེམས་འགྱུར་ཞིང་། །ས་ཕྱོགས་མངའ་རིས་འགེགས་པའི་ཚེ། །ཀུན་བཟང་ལྟ་བ་ངེས་དོན་འདི། །ངོ་བསྲུང་ཚུལ་འཆོས་མ་ཡིན་པར། །ཞུམ་མེད་དམ་ཆོས་འདི་འཆད་པ། །ཚམ་ཚོམ་མེད་པ་དཔའ་བོའི་མཆོག །འཇིགས་མེད་མ་ནོར་སྟོན་པའི། །བདེ་གཤེགས་རྣམས་ཀྱི་བྱིན་གྱིས་རློབས། །མཁའ་འགྲོ་ཆོས་སྐྱོང་སྨོས་ཅི་དགོས། །གནོད་པས་མི་ཚུགས་བསོད་ནམས་འཕེལ། །དེ་ཚེ་མུ་སྟེགས་ཉན་ཐོས་སོགས། །རང་རང་བརྐམ་ཆགས་རྩོད་འགྱུར་ནས། །གཡུལ་འགྱེད་བྱེད་ཅིང་རུ་ཏྲ་འདྲ། །རིམས་ནད་སྣ་ཚོགས་བཀྲ་མི་ཤིས། །ཡོན་བདག་རྣམས་ནི་དད་པ་ལྡོག །འོག་མའི་བསྟན་པ་འཇིག་པའི་རྟགས། །ཕྱི་མ་ངན་སོང་སྨོས་ཅི་དགོས། །དེ་ཡང་འདུས་པའི་སྙིང་པོ་ཉོན། །དེ་ལྟ་བུ་ཡི་དུས་བྱུང་ཚེ། །གལ་ཏེ་ཚོགས་ལ་ཆོས་འཆད་ན། །ཉམས་དང་ལྐུགས་པ་ཞེ་འཁོན་རྣམས། །ཡོད་མེད་གཤེར་ལ་བཤགས་སུ་བཞུགས། །དེ་མི་ནུས་པར་ཆོས་མི་འཆད། །དཔེར་ན་ལྡུམ་རར་དུག་སྐྱེས་ན། །བདག་པོས་དུག་ཏུ་ཤེས་མ་ཐག །རྩད་ནས་ཕྱུང་སྟེ་མེད་པར་བྱེད། །དེ་བཞིན་དམ་ཉམས་མི་མཐོང་ན། །གང་ཡིན་ཚོགས་ལས་བཀར་ལ་བཏང་། །ལྟ་བཤགས་ཆེད་དུ་ཡིད་ལ་བྱ། །དེ་ལྟར་མ་ཡིན་ཕྱལ་བཞག་ན། །རྟེན་མེད་མ་ཐུག་སྲོག་གཅོད་བཞིན། །ཉམས་གྲིབ་སྐྱོན་གྱིས་ན་ཚ་འབྱུང་། །མཁས་འགྲོས་ཆད་པ་རིམས་ཀྱིས་གཅོད། །དེ་ཡང་འདུས་པའི་སྙིང་པོ་ཉོན། །གལ་ཏེ་དད་པས་གདུང་སེམས་ཀྱིས། །དམ་ཚིག་ཉམས་པའི་སྐྱོན་འགྱོད་ནས། །བསྐང་བཤགས་གཡོ་སྒྱུ་མི་བྱེད་པ། །གསེར་དངུལ་ཆག་བཅོས་ཕྱིར་ ― DNG001_Page_0479 ―
[མ་དཔེ་གཟིགས་ན་འདིར་གནོན།]
ལེགས་བཞིན། །དོན་ལ་བརྩོན་འགྲུས་ཤིན་ཏུ་ཆེ། །དེ་ནི་སྣོད་ཀྱི་དམ་པའི་མཆོག །མན་ངག་ཡང་སྙིང་རྫོགས་པར་བསྟན། །དེ་དོན་ཤིན་ཏུ་བཙལ་དཀའི་ཕྱིར། །སྣོད་ལ་བརྟག་པ་ཤིན་ཏུ་གཅེས། །བཀའ་དང་མཐུན་པའི་དོན་འགྲུབ་ཕྱིར། །མ་བརྟགས་རང་འདོད་ཆོས་མི་འཆད། །རྫོགས་པ་ཆེན་པོ་ལྟ་བ་ཐམས་ཅད་ཀྱི་ཡང་སྙིང་། སངས་རྒྱས་ཐམས་ཅད་ཀྱི་དགོངས་པ། ནམ་མཁའ་ཀློང་ཡངས་ཀྱི་རྒྱུད་ལས། བསྟན་པ་འབྱུང་བའི་རྒྱུ་གླེང་གཞི་བསྟན་པའི་ལེའུ་སྟེ་དང་པོའོ།། །།དེ་ནས་འདུས་པའི་འཁོར་རྣམས་ལ། །ཞལ་གྱིས་བཞེས་ཏེ་བཀའ་སྩལ་པ། །རྒྱུད་ལུང་མན་ངག་ཡུལ་ལ་བལྟ། །དེ་ཕྱིར་མ་ནོར་ཆོས་སྐུ་མིན། །སེམས་ཡིན་ཟེར་ཞིང་སྣང་བར་འཆེལ། །སེམས་དང་འདྲེལ་མེད་བརྗོད་བྱས་ཀྱང་། །གླང་པོ་ཕག་དང་འདྲ་བ་བཞིན། །འདྲེལ་མེད་དོན་ནི་རྟོགས་བྱའི་ཕྱིར། །དེ་ཕྱིར་ཡུལ་འདི་སེམས་འདྲ་ཡང་། །སྣང་བ་ཆོས་སྐུར་འདྲེལ་མེད་པས། །གཞི་ཉིད་རང་སེམས་རྟོགས་པར་བྱ། །ད་ཡང་རྡོ་རྗེ་སེམས་དཔའ་ཉོན། །ཡུལ་གྱི་སྣང་བ་འདི་ཉིད་ལ། །མཐའ་ཡས་མིང་དུ་བཏགས་པ་ཡིན། །ཡོད་མཐོང་སྣང་གྲགས་ཆོས་རྣམས་ཀུན། །བླ་དྭགས་ཙམ་དུ་བཏགས་པར་ཟད། །དེ་ལ་དངོས་གཞི་ག་ལ་ཡོད། །མེད་པ་ཉིད་ན་ཡོད་རྟོག་པ། །འཁྲུལ་པ་རྣམས་ཀྱི་ཤེས་པ་ལ། །སངས་རྒྱས་རྣམས་ཀྱིས་མི་མཁྱེན་ཕྱིར། །ཕྱི་རོལ་ཡུལ་ལ་དོན་མི་བཞག །དེ་ཕྱིར་འཁོར་འདས་འབྱུང་བ་ཀུན། །གློ་བུར་ཡིན་ཕྱིར་གནས་ལུགས་མིན། །དེ་ཕྱིར་འདུས་པའི་སྙིང་པོ་ཉོན། །ང་ཡི་གསུང་གི་འོད་ཟེར་གྱིས། །མ་རིག་སེམས་ཀྱི་མུན་ཁུང་དུ། །སྒྲོན་མའི་སྣང་བ་ཉི་བཞིན་འཆར། །ཡུལ་དང་མ་འདྲེལ་ཆོས་ཀྱི་སྐུ། །རང་ལ་རང་ཆས་ཡེ་གནས་པས། །ལུང་ལྡན་རྐྱེན་གྱིས་རྟོགས་པ་འབྱུང་། །རྒྱུ་འབྲས་རྐྱེན་རྣམས་ངས་བཤད་ཉོན། །ངོ་བོ་གནས་ལུགས་ཆོས་སྐུ་དང་། །དེ་ལས་འཁྲུལ་པས་འཁོར་བར་འཁྱམས། །ལྡོག་ཐབས་སྣོད་བཅུད་ལྡན་པ་ཡིས། །ངེས་པའི་དོན་མཐུན་གདམས་ངག་གིས། །ཐེ་ཚོམ་གེགས་ཆེན་བསལ་བ་དང་། །འབྲས་བུ་ལྷུན་རྫོགས་གདུལ་བྱ་འབྱུང་། །དེ་སྐད་གསུངས་པའི་དོན་ཐོས་ཏེ། །འཁོར་རྣམས་དགའ་ཞིང་ཡི་རངས་སྟེ། །གུས་པའི་སེམས་ཀྱིས་ཆོས་ཉན་ཏོ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། གསུང་ ― DNG001_Page_0480 ―
[མ་དཔེ་གཟིགས་ན་འདིར་གནོན།]
བར་ཞལ་གྱིས་བཞེས་པའི་ལེའུ་སྟེ་གཉིས་པའོ།། །།དེ་ནས་ཀུན་རིག་རྒྱལ་པོ་ཡིས། །དད་ལྡན་འདུས་པའི་འཁོར་རྣམས་ལ། །སེམས་ཀྱི་རྟོག་པ་བསལ་བའི་ཕྱིར། །ཆེད་དུ་བརྗོད་པའི་དོན་གསུངས་པ། །འཁོར་འདས་གཉིས་ཀྱི་གཞིར་གྱུར་པ། །ངོ་བོ་ཉིད་ཀྱི་སྐུ་མཆོག་ནི། །རང་བྱུང་ཡིན་ཕྱིར་ཐོག་མཐའ་མེད། །འདུས་མ་བྱས་ཀྱི་ནམ་མཁའ་འདྲ། །དེ་ཡང་འདུས་པའི་སྙིང་པོ་ཉོན། །མ་མཚོན་གོ་དང་མ་དཔྱད་པར། །དེ་ཉིད་རྟོགས་པའི་ཀུན་བཟང་ལ། །མྱ་ངན་ཐོག་མཐའ་དུས་གཅིག་གཅོད། །རི་བོ་ཏ་ལའི་ཉི་ཤར་འདྲ། །ལུང་ལྡན་རྐྱེན་གྱི་གདམས་ངག་གིས། །ཐོག་མའི་གཞི་ཤེས་རྣལ་འབྱོར་པས། །འཁོར་བའི་མཐའ་མ་ཤུགས་ལ་ཆོད། །མུན་པ་ནམ་ལངས་ཉི་ཤར་འདྲ། །སེམས་ཅན་རང་སེམས་འཁྲུལ་པའི་ཕྱིར། །མཚོན་དཔྱད་རྟོག་པ་འཁོར་བའི་ཆོས། །འཁྲུལ་པ་ཡོད་ཕྱིར་ཐོག་མཐའ་ཡོད། །ཕྱི་ནང་འབྱུང་བ་ཆགས་འཇིག་འདྲ། །ད་ཡང་རྡོ་རྗེ་སེམས་དཔའ་ཉོན། །འཁོར་བའི་གཞི་ནི་ཞེན་རྟོག་ཡིན། །གཟུང་འཛིན་ཞེན་པས་འཁོར་བར་སྣང་། །རས་དཀར་ལ་ནི་སྣུམ་ཞེན་འདྲ། །བག་ཆགས་བརྟས་ཕྱིར་ཀུན་གཞི་ཡིན། །ད་ཡང་འདུས་པའི་སྙིང་པོ་ཉོན། །ཡེ་ཤེས་མྱ་ངན་འདས་པའི་རྒྱུ། །ཤེས་རབ་ལྷག་མཐོང་ལས་བྱུང་བ། །ལུང་ལྡན་རྐྱེན་གྱིས་རྟོགས་པ་དེ། །ཐིག་ལེ་ཆོས་སྐུ་དེ་ལ་བྱ། །གཉིས་ཀའི་རྒྱུ་ཡི་རྒྱུ་རུ་ནི། །རང་བྱུང་ངོ་བོ་ཉིད་ཀྱི་སྐུ། །ཆོས་རྣམས་ཀུན་གྱི་གཞི་ཡིན་ཕྱིར། །ཡེ་ཤེས་རྒྱུ་ཞེས་དེ་ལ་བྱ། །རྟོགས་མ་རྟོགས་ལ་ཐ་དད་ཀྱང་། །ལུང་ལྡན་རྐྱེན་གྱི་ཡེ་ཤེས་དེ། །ཐམས་ཅད་མཁྱེན་པའི་རྒྱུ་ཡིན་ཕྱིར། །རྒྱུ་ཡི་ཡེ་ཤེས་དེ་ལ་བྱ། །བྱ་བྱེད་ལམ་གྱི་འབད་རྩོལ་གྱིས། །རང་བྱུང་བྱང་ཆུབ་གེགས་ཡིན་པས། །ཤེས་པ་རྩོལ་མེད་ཡེ་ཤེས་འདི། །ལམ་གྱི་ཡེ་ཤེས་དམ་པར་གསུངས། །རྟོགས་པའི་ངང་ལས་མ་གཡོས་པར། །ཐེག་བརྒྱད་ལམ་གྱི་སྤོང་ལེན་དང་། །ཕ་རོལ་མཛད་སྤྱོད་འདི་ཡིས་འགྲུབ། །ཡོན་ཏན་སྟོབས་རྣམས་མ་ལུས་འབྱུང་། །ཡེ་ཤེས་འབྲས་བུ་འདི་ཤེས་པས། །དབུལ་པོས་རིན་ཆེན་རྙེད་པ་བཞིན། །ཕྱི་མ་མ་ཡིན་དུས་འདི་རང་། །རྩོལ་མེད་རིག་པ་མངོན་སངས་རྒྱས། ། ― DNG001_Page_0481 ―
[མ་དཔེ་གཟིགས་ན་འདིར་གནོན།]
ད་ཡང་འདུས་པའི་སྙིང་པོ་ཉོན། །མི་གནས་ཆོས་སྐུའི་དོན་རྟོགས་པ། །འཆིང་གྲོལ་དགེ་སྡིག་གཉིས་ཀྱི་ཆོས། །གཞི་ལ་གཉིས་ཀ་གདོད་ནས་མེད། །དེ་ཕྱིར་ཐིག་ལེ་ཉག་གཅིག་གོ། །དེ་ཡང་འདུས་པའི་སྙིང་པོ་ཉོན། །ཉི་མའི་དཀྱིལ་ན་མུན་མེད་ལྟར། །དེ་བཞིན་དོན་རྟོགས་མ་བསྒོམས་ཀྱང་། །སྐྱེ་མེད་བྱང་ཆུབ་ཆོས་སྐུའི་ཀློང་། །གོལ་སྒྲིབ་དག་ལ་ཡ་མི་ང་། །དཔེར་ན་སེང་གེའི་སྒྲ་གྲགས་པས། །རི་དྭགས་ཕྲ་མོ་འབྱེར་བ་བཞིན། །དོན་འདི་རྣལ་འབྱོར་གང་ཡོད་ལ། །ལྟ་དམན་སྒྲོ་སྐུར་ཟིལ་གྱིས་གནོན། །དཔེར་ན་པད་མ་འདམ་གནས་ཀྱང་། །དྲི་མས་མི་གོས་ཤིན་ཏུ་གསལ། །དེ་བཞིན་རྣལ་འབྱོར་ལུས་ཡོད་ཀྱང་། །སྒྲིབ་པས་མི་གོས་ཡེ་ཤེས་གསལ། །དཔེར་ན་འཁོར་ལོས་སྒྱུར་རྒྱལ་ཉིད། །གླིང་བཞི་གླིང་ཕྲན་དབང་དུ་བསྡུས། །དེ་བཞིན་དོན་འདི་རྟོགས་པ་ཡིས། །ཕ་རོལ་ཕྱིན་བཅུའི་དབང་རྣམས་ཀྱང་། །རང་བཞིན་མ་བཙལ་ལྷུན་གྲུབ་རྫོགས། །རྣལ་འབྱོར་གདེངས་སུ་དེ་འཆང་ན། །དེ་ལ་བསྒྲུབ་པ་མ་བྱས་ཀྱང་། །གཅིག་ཤེས་པས་ནི་ཀུན་ཤེས་པས། །འབྲས་བུ་སངས་རྒྱས་སྨོས་ཅི་དགོས། །དེ་ལས་གཞན་པའི་དོན་མེད་ཕྱིར། །ལྷུན་གྱིས་རྫོགས་པའི་ཆོས་སྐུ་ལ། །སྐྱེ་ཤིའི་སྡུག་བསྔལ་མི་འབྱུང་བས། །གཞི་ལས་མི་འགྱུར་གསེར་བཞིན་ནོ། །དེ་སྐད་གསུངས་པའི་དོན་གོ་ནས། །རང་སེམས་རྟོགས་པར་བྱ་བའི་ཕྱིར། །རྩེ་གཅིག་དད་པས་གུས་གྱུར་ནས། །ལ་བཟླ་བ་ལ་དོན་གྱིས་མོས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཆེད་དུ་བརྗོད་པས་གོ་བར་བསྟན་པའི་ལེའུ་སྟེ་གསུམ་པའོ།། །།དེ་ནས་ཀུན་རིག་རྒྱལ་པོ་ལ། །འདུས་པའི་འཁོར་གྱིས་དོན་ཞུས་པ། །ཆོས་ཉིད་རང་བྱུང་གནས་ལུགས་ཀྱི། །དཔེ་དོན་ཁྱད་པར་གང་གིས་དབྱེ། །ཡིད་ཆེས་པ་ཡི་གཏན་ཚིགས་གང་། །ཀུན་བཟང་ཐུགས་ནི་ཇི་ལྟར་རྟོགས། །ཞུས་པའི་དོན་གསན་བཀའ་སྩལ་པ། །དཔེ་དོན་ཁྱད་པར་ངས་བཤད་ཀྱིས། །ནམ་མཁས་གར་ཁྱབ་སེམས་ཅན་གྱིས། །ནམ་མཁའ་དག་ལ་རིག་པ་མེད། །སེམས་ཉིད་མ་བསྒྲིབས་རིག་པར་གསལ། །དེ་ཕྱིར་ནམ་མཁའ་བྱང་ཆུབ་དཔེ། །འདེགས་བྱེད་རླུང་གི་འབྱུང་བ་ལ། །ཡེ་ཤེས་རླུང་གིས་བྱང་ཆུབ་ཁྱབ། །དྲན་རིག་དངོས་མེད་བྱང་ཆུབ་དཔེ། །ཆོས་ཉིད་ཀློང་དུ་མངོན་སངས་རྒྱས། །སྡུད་པའི་ ― DNG001_Page_0482 ―
[མ་དཔེ་གཟིགས་ན་འདིར་གནོན།]
ཆུ་ལ་སེམས་ཀྱིས་ཁྱབ། །ཆུ་ཉིད་བྱང་ཆུབ་དངོས་མ་ཡིན། །དེ་བས་རིག་པ་སེམས་ཀྱི་ཆུ། །བྱང་ཆུབ་སྐུར་ནི་མངོན་སངས་རྒྱས། །སྲ་བྱེད་འདེགས་པའི་ས་ཉིད་ལ། །རང་སེམས་སྙིང་པོ་དངོས་མེད་ཀྱང་། །ཐམས་ཅད་བསྐྱེད་ཕྱིར་བྱང་ཆུབ་དཔེ། །འགྱུར་མེད་སྲ་ཕྱིར་མངོན་སངས་རྒྱས། །དྲོད་སྙོམས་ཚ་བ་མེ་འདི་ལ། །རང་སེམས་མེ་ཡི་གཞི་མེད་ཀྱང་། །ཉོན་མོངས་སྲེག་བྱེད་དཔེ་བསྟན་པ། །བྱང་ཆུབ་མེར་ནི་མངོན་སངས་རྒྱས། །འབྱུང་བ་ལྔ་པོ་འདི་ཉིད་ཀྱང་། །དོན་གྱི་སངས་རྒྱས་མ་ཡིན་ཀྱང་། །བཏགས་པའི་སངས་རྒྱས་ཡིན་པའི་ཕྱིར། །འདི་ལ་དགག་སྒྲུབ་ཅི་ཡང་མེད། །ད་ཡང་འདུས་པའི་སྙིང་པོ་ཉོན། །མ་དྲོས་མཚོ་དཀྱིལ་མེ་འབར་བ། །མཐོང་ནས་གསལ་བ་ཆུ་ཡིས་ནི། །བསྐལ་པར་དེ་ལ་གནོད་མི་ནུས། །དེ་བཞིན་མ་རིག་ཡེ་ཤེས་ཀྱིས། །ཐོག་མཐའ་རྩ་བ་མ་ཆོད་ན། །མྱང་འདས་ཡོན་ཏན་མི་འབྱུང་ཕྱིར། །འཁོར་བ་ཟིལ་གྱིས་ཅི་ལ་ནོན། །བྱ་ཁྱུང་རྒྱལ་པོ་རླབས་ཆེན་གྱིས། །རིན་ཆེན་ནམ་མཁར་ཐོན་པའི་ཚེ། །རྒྱ་མཚོ་ཉིད་ཀྱང་བདུད་རྩིར་འགྱུར། །དེ་བཞིན་བླ་མའི་གདམས་ངག་གིས། །རང་བྱུང་སྙིང་པོ་རྟོགས་ཙམ་གྱིས། །སྡུག་བསྔལ་ཉིད་ཀྱང་བདེ་ཆེན་འཆར། །ཚིག་དང་ཡི་གེས་མཚོན་པ་རྣམས། །མིང་དུ་བཏགས་པའི་ཆོས་ཀུན་ནོར། །འཁྲུལ་རྐྱེན་དཔེ་ཡིས་བསྟན་པའི་ཕྱིར། །དཔེ་དོན་དབྱེ་བ་ཤིན་ཏུ་གཅེས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། མཚོན་པའི་དཔེ་དོན་མ་ཡིན་པར་བསྟན་པའི་ལེའུ་སྟེ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །དོན་གྱི་དབྱེ་བ་བཀའ་སྩལ་པ། །སངས་རྒྱས་པས་ཀྱང་སེམས་ཅན་གཉན། །སེམས་ཅན་དུས་ནས་མ་རྟོགས་ན། །དུག་ལྔ་རང་གྲོལ་ཅི་ལ་འོང་། །མཉམ་བཞག་པས་ཀྱང་རྗེས་ཐོབ་གཅེས། །རྗེས་ཐོབ་ལྟ་བར་མ་ཤེས་ན། །ཐུན་མཚམས་བསྒོམ་པས་སངས་མི་རྒྱ། །ལུས་ལ་བརྟེན་ནས་རྟོགས་པ་ཡི། །དུས་བཞིའི་གདམས་ངག་མ་ཤེས་ན། །ཡེ་ཤེས་འབྲལ་མེད་ཅི་ལ་འཆར། །ད་ཡང་སེམས་དཔའ་ཆེན་པོ་ཉོན། །སྐྱེ་ཤི་གཉིས་ཀྱི་བར་དོར་ནི། །ལུང་བསྟན་རྐྱེན་གྱི་གདམས་ངག་ཞུ། །འཁོར་འདས་གཉིས་ཀྱི་བར་དོར་ནི། །ཆོས་ཉིད་ ― DNG001_Page_0483 ―
[མ་དཔེ་གཟིགས་ན་འདིར་གནོན།]
གནས་ལུགས་རྟོགས་པར་བྱ། །ཡུལ་སེམས་གཉིས་ཀྱི་བར་དོར་ནི། །ཕྱི་ཡི་གོལ་སྒྲིབ་གཅད་པར་བྱ། །མཉམ་བཞག་རྗེས་ཐོབ་བར་དོར་ནི། །རྣམ་རྟོག་ཡེ་ཤེས་བླང་བར་བྱ། །སྲིད་པ་དག་གི་བར་དོར་ནི། །སངས་རྒྱས་རྒྱལ་པོ་ཡེ་ཤེས་སྐུ། །བྱང་ཆུབ་སེམས་དཔའ་ཐམས་ཅད་ལ། །ངེས་དོན་འདི་རྟོགས་ཁྱད་པར་འཕགས། །ད་ཡང་འདུས་པའི་སྙིང་པོ་ཉོན། །དོན་རྟོགས་པས་ནི་འཛིན་རྟོག་ནུབ། །ཉི་མ་ཤར་ནས་མུན་པ་མེད། །ལུང་འདི་རྟོགས་པས་རྟོག་པ་བྲོས། །འཁོར་འདས་འབྱུང་བ་རྣམ་རྟོག་བཅོམ། །སྤོང་སྡུད་གཉིས་པོ་འཆོར་མེད་བཟུང་། །རྟག་ཆད་གཉིས་པོ་རྡུལ་དུ་བརླག །ཞེན་ལེན་གཉིས་པོ་ཕྱེ་མར་བཏག །བཟང་ངན་འཛིན་པ་སྤྲིན་ལྟར་དེངས། །སངས་རྒྱས་སེམས་ཅན་གཅིག་ཏུ་བྱས། །མཐོ་རིས་ངན་སོང་རྫུན་དུ་སོང་། །འཁོར་བ་ཆོས་ཉིད་ངང་དུ་བརླབ། །ཆགས་སྡང་སྐྱེས་ཤིང་ཏིང་འཛིན་གསལ། །གཡེང་བ་ཆེ་ན་བདེ་ཆེན་རྒྱས། །སྐྱེ་ཤི་མེད་པའི་གཡུལ་ངོ་རྒྱལ། །རིག་འཛིན་རྣམས་ཀྱི་ཐུགས་ངན་སངས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། དོན་གྱི་དབྱེ་བ་བསྟན་པའི་ལེའུ་སྟེ་ལྔ་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །འགྲོ་དྲུག་སེམས་ཅན་ཐམས་ཅད་ལ། །རང་སེམས་སྙིང་པོ་ཡེ་ཤེས་ནི། །རྟོགས་དང་མ་རྟོགས་མེད་པར་གནས། །དེ་ཡི་ཆོས་ཉིད་མཚོན་པའི་དཔེ། །བར་སྣང་རྐྱེན་གྱིས་མ་ཚུགས་ལྟར། །རང་སེམས་སྟོང་པའི་ཡེ་ཤེས་ནི། །སྔ་ཕྱི་མེད་པའི་ཆོས་སྐུ་ལ། །འཁོར་བའི་རྣམ་རྟོག་གཟུང་འཛིན་མེད། །ཁྱུང་ཕྲུག་སྒོ་ངར་གཤོག་རྒྱས་ལྟར། །རྣལ་འབྱོར་རང་སེམས་རྟོགས་པའི་མི། །མངལ་གྱི་སྒྲིབ་གཡོགས་མ་བྲལ་ཀྱང་། །རང་བྱུང་ཡེ་ཤེས་ཐུགས་ལ་གནས། །ཁུ་བྱུག་བྱ་བྲན་ཟིལ་གནོན་ལྟར། །ཆོས་སྐུ་སེམས་ལ་ངོས་ཟིན་པས། །ཐེག་བརྒྱད་གོལ་སྒྲིབ་ཟིལ་གྱིས་གནོན། །དེ་ཕྱིར་འཁོར་བ་མིང་ཡང་མེད། །སེང་ཕྲུག་མངལ་དུ་རྩལ་རྫོགས་ལྟར། །ལུང་ལྡན་གདམས་ངག་བསྟན་མ་ཐག །སྒྲིབ་གཉིས་མ་སྤངས་ཤུགས་ལ་དག །རྟོག་པ་མངོན་གྱུར་སངས་རྒྱས་ཡིན། །པདྨ་འདམ་གྱིས་མ་གོས་ལྟར། །དུག་ལྔའི་ནང་ནས་རང་བྱུང་གསལ། །ཉོན་མོངས་ཉིད་ཀྱང་རང་སར་གྲོལ། །ཡེ་ཤེས་དོན་ལ་འདུ་འབྲལ་མེད། །དངུལ་རྡོས་རང་ཆོས་མི་འགྱུར་ལྟར། །དང་པོ་ཤེས་བཞིན་ ― DNG001_Page_0484 ―
[མ་དཔེ་གཟིགས་ན་འདིར་གནོན།]
ལུང་མ་བསྟན། །བར་དུ་ངེས་པའི་དོན་རྟོགས་པས། །ད་ལྟའི་ཤེས་པ་འདི་ཉིད་ལ། །ངེས་དོན་ཆོས་སྐུ་རང་གསལ་ཉིད། །དུས་གསུམ་མི་འགྱུར་ཡེ་ནས་གསལ། །ད་ཡང་འདུས་པའི་སྙིང་པོ་ཉོན། །རང་བཞིན་གཞི་ཉིད་སྤྲོས་བྲལ་བས། །བརྗོད་དུ་མེད་པར་ཡིད་ཆེས་པས། །ཡུལ་ལ་མི་ལྟོས་དོན་གོའི་ཕྱིར། །དགོས་དོན་གཞི་ཉིད་ཡེ་ནས་བདེན། །ངོ་བོ་ཉིད་ཀྱི་ལྟ་བ་དེ། །རྟོགས་མ་རྟོགས་ཀྱི་ཁྱད་པར་ལས། །འཁོར་འདས་གཉིས་སུ་ཤར་བ་ཡི། །གང་ཡང་གཉིས་མེད་ཡིད་ཆེས་པས། །རིག་པ་ལྟ་བར་བཞག་པ་ཡིན། །ཆོས་ཉིད་རང་གི་མཚན་ཉིད་ནི། །མི་གཡོ་གསལ་བའི་ཏིང་འཛིན་གྱི། །འཁོར་འདས་གཉིས་ལ་རྩ་བ་གཅིག །དེ་ཕྱིར་མ་ཡེངས་སྒོམ་པའི་མཆོག །ཡེ་ནས་རང་སེམས་འགྱུར་མེད་པས། །དེ་དང་མཐུན་པར་རྟོགས་པ་ཡིས། །འཁོར་འདས་མ་རིག་འབྲས་བུ་ལ། །རེ་དོགས་མེད་པར་ལྷུན་གྱིས་གྲུབ། །དེ་ཡང་འཁོར་གྱི་སྙིང་པོ་ཉོན། །ཆུ་ཉིད་རྐྱེན་གྱིས་ཆང་འགྱུར་ལྟར། །བླ་མའི་མན་ངག་དོན་སྟོབས་ཀྱིས། །ཅི་སྤྱོད་རང་བྱུང་ཤར་བ་ལས། །ཐོག་མ་མ་ཡིན་ཐ་མ་མིན། །ད་ལྟའི་ཤེས་པ་འདི་ཉིད་ལས། །བཟང་པོར་སོང་བ་གང་ཡང་མེད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཡིད་ཆེས་པའི་གཏན་ཚིགས་ཀྱི་ལེའུ་སྟེ་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །དོན་གྱི་གནས་ལུགས་བཀའ་སྩལ་པ། །ཆོས་སྐུ་གཞན་དང་མ་འདྲེལ་ཕྱིར། །ཕྱི་ནང་སྣོད་བཅུད་ཀུན་གྱི་གོང་། །སངས་རྒྱས་སེམས་ཅན་གཉིས་པས་སྔ། །བལྟར་མེད་ངོ་བོ་ཀུན་གྱི་གཞི། །རང་བྱུང་སྙིང་པོ་ཆོས་སྐུ་དང་། །སངས་རྒྱས་རྣམས་ཀྱིས་ང་མ་མཛད། །སེམས་ཅན་རྣམས་ཀྱིས་ང་མ་བཅོས། །འབྱུང་བ་ལྔ་ལ་རག་མ་ལུས། །ད་ཡང་འདུས་པའི་སྙིང་པོ་ཉོན། །ཐིག་ལེ་ཆོས་སྐུའི་གཞི་ཉིད་ནས། །རྒྱུ་རྐྱེན་གཉིས་ལས་འདས་པ་དང་། །གཉེན་པོ་ཅིས་ཀྱང་མི་ཚུགས་ཤིང་། །དུས་གསུམ་མི་འགྱུར་མང་དག་ཡོད། །ད་ཡང་འདུས་པའི་སྙིང་པོ་ཉོན། །ནམ་མཁའ་མཐའ་དབུས་མེད་པ་ལྟར། །རང་སེམས་ཕྱོགས་བཅུར་དམིགས་དང་བྲལ། །དམིགས་མེད་ཆོས་སྐུར་ཤེས་ཤིང་རིག །དེ་ཙམ་ཉིད་ནས་ཞེན་མེད་བདེ། །ཉི་མ་མ་བསྒྲིབས་གསལ་བ་ལྟར། །སྒོ་ལྔ་གསལ་ལ་ ― DNG001_Page_0485 ―
[མ་དཔེ་གཟིགས་ན་འདིར་གནོན།]
རྟོག་པ་མེད། །རྟོག་མེད་སྙིང་པོ་ཡེ་ཤེས་ཐུགས། །འཁོར་བའི་འཛིན་པ་ཀུན་དང་བྲལ། །རིན་ཆེན་ཡོན་ཏན་འབྱུང་བ་བཞིན། །དོན་རྟོགས་འབྲས་བུ་ཆོས་སྐུ་ལ། །སངས་རྒྱས་ཆེ་བའི་ཡོན་ཏན་ཀུན། །མ་བཙལ་ལྷུན་གྱིས་རྫོགས་པ་འབྱུང་། །ས་གཞི་སྤྱད་པའི་གཞི་ཡིན་ལྟར། །རང་བྱུང་ངོ་བོ་ཉིད་ཀྱི་སྐུ། །འཁོར་འདས་ཀུན་གྱི་གཞིར་གྱུར་པ། །རིག་དང་མ་རིག་ཁྱད་པར་ལས། །རྒྱུ་འབྲས་རྣམས་ནི་དེ་ལས་བྱུང་། །རྒྱ་མཚོ་གཡོ་བ་མེད་པ་ལྟར། །སྙིང་པོ་རྟོགས་པའི་ཡེ་ཤེས་ཀྱི། །ཏིང་ངེ་འཛིན་ལ་གཡོ་བ་མེད། །དེ་ཉིད་ཡེ་ཤེས་ཆོས་ཉིད་སྐུ། །རི་བོ་འགྱུར་བ་མེད་པ་ལྟར། །ཡུལ་མེད་རིག་པ་ངེས་པའི་གཞི། །རྐྱེན་གྱིས་མི་འགྱུར་བྱང་ཆུབ་སེམས། །མ་བསམས་འདུ་འབྲལ་མེད་པར་གནས། །ད་ཡང་འདུས་པའི་སྙིང་པོ་ཉོན། །དུས་གསུམ་སངས་རྒྱས་ཀུན་གྱི་ནི། །རྟོག་པ་ང་དང་འབྲལ་བ་མེད། །མ་བྲལ་ཆོས་སྐུར་རྟོགས་པ་ལ། །འཁོར་མེད་ཡོན་ཏན་བསམ་མི་ཁྱབ། །རྣལ་འབྱོར་དམ་པ་ལས་ཅན་གྱིས། །ཡིད་ཀྱི་དོན་རྟོགས་ངོ་ཤེས་པས། །ཀུན་བཟང་ཆོས་སྐུ་ད་ལྟ་ང་། །དམན་པའི་ལུས་ལ་སངས་རྒྱས་ཡིན། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཀུན་ཏུ་བཟང་པོའི་ཐུགས་བརྟོལ་བའི་ལེའུ་སྟེ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ངོ་བོ་ཉིད་ཀྱི་ཀུན་བཟང་ལ། །བདེན་པའི་ཚིག་གིས་འདི་སྐད་གསོལ། །ཆོས་ཉིད་ངོ་བོ་གནས་ལུགས་དང་། །ཐོག་མར་འཁོར་བ་གང་ནས་བྱུང་། །ཚོགས་བརྒྱད་ཆོས་སྐུ་ཇི་ལྟར་མིན། །ཐེག་བརྒྱད་འཁྲུལ་གཞི་ཅི་ལས་བྱུང་། །མ་རྟོགས་བསྒོམས་ན་ཇི་ལྟར་གོལ། །ལྟ་སྤྱོད་ཉམས་པའི་ཉེས་པ་གང་། །རྣམ་སྨིན་ལུས་ཀྱིས་ཇི་ལྟར་བསྒྲིབས། །འཁོར་བའི་བག་ཆགས་གང་ན་གནས། །ཀུན་རིག་རྒྱལ་པོས་བཤད་དུ་གསོལ། །དེ་སྐད་གསོལ་པའི་དོན་གསན་ནས། །སེམས་ཅན་འཁྲུལ་ཚུལ་ཐུགས་རྗེ་ཡིས། །འདུས་པའི་འཁོར་ལ་བཀའ་སྩལ་པ། །གཞི་ལ་འཁྲུལ་པ་བྱུང་བ་ནི། །ཐོག་མའི་དུས་ཀྱི་མཐའ་དྲུག་ནི། །ཀུན་གཞི་རྣམ་ཤེས་ཚོགས་བརྒྱད་ཀྱང་། །རང་སེམས་ཡིན་ཏེ་ཆོས་སྐུ་མིན། །ཡར་ལྡན་མར་འཁྲུལ་འཁོར་འདས་བྱུང་། །ད་ཡང་འདུས་པའི་སྙིང་པོ་ཉོན། །ཉི་མ་འཆར་ཀའི་མདངས་བཞིན་ ― DNG001_Page_0486 ―
[མ་དཔེ་གཟིགས་ན་འདིར་གནོན།]
དུ། །དང་པོ་ཤེས་བཞིན་ལུང་མ་བསྟན། །ཆོས་ཉིད་དག་པའི་རྩལ་ཡིན་ཀྱང་། །ལུང་མ་བསྟན་པས་རྐྱེན་དབང་གྱུར། །མ་རིག་རྒྱུ་ལ་ལོག་རྟོག་རྐྱེན། །རྐྱེན་བཞི་དག་གིས་བསྐྱེད་གྱུར་པས། །མ་རིག་རྣམ་པ་གཉིས་སུ་ཚང་། །ཟུང་དུ་འཛོམ་ནས་ཀུན་གཞིར་གྲུབ། །ད་ཡང་འདུས་པའི་སྙིང་པོ་ཉོན། །ཡོད་མེད་ལ་སོགས་མ་རིག་པས། །ཐོག་མ་མེད་ནས་བདེན་འཛིན་པས། །འཁོར་བ་ལུགས་འཇུག་ཕྱིར་འབྱུང་རྟགས། །ཐག་སྦྲུལ་མཐོ་ཡོར་མི་བཞིན་དུ། །དབང་པོ་ཡུལ་ལ་རྟག་ཏུ་ཡེངས། །ཐར་ལམ་མི་ཐོབ་སྐྱེ་ཞིང་འཆི། །འཁོར་བའི་རྒྱུ་ནི་རྟོག་པ་སྟེ། །ལྟ་བས་མ་བསྒྱུར་ཡུལ་ལ་ཞེན། །ཆོས་བརྒྱད་གཟུང་འཛིན་དམ་པར་བལྟ། །སྐྱེ་ཤི་སྡུག་བསྔལ་མི་འཇིག་ཕྱིར། །བག་ཆགས་མཚན་མས་རྐྱེན་བྱས་ནས། །ཁམས་གསུམ་འཁོར་བའི་འཁོར་ལོར་འཁྱམས། །ཐར་མེད་འཁོར་བར་ཀུན་གཞིས་བྱས། །དེ་ཕྱིར་འཁོར་བ་འབའ་ཞིག་ཡིན། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། འཁོར་བ་དང་པོ་གང་ནས་བྱུང་བར་བསྟན་པའི་ལེའུ་སྟེ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །འཁོར་བ་རྣམས་ཀྱི་རྩ་བ་ནི། །ཡུལ་དང་སེམས་ནི་གཉིས་སུ་འདུས། །ཡུལ་ཀྱང་རང་སེམས་འཁྲུལ་པ་སྟེ། །སེམས་ནི་རྣམ་ཤེས་ཚོགས་བརྒྱད་ལ། །སེམས་ལས་འབྱུང་བ་ལྔ་བཅུ་གཅིག །རྩ་བ་ཀུན་གཞི་ཉིད་དུ་འདུས། །སེམས་ཅན་ཀུན་ལ་གནས་ལུགས་ནི། །ཕྱི་བལྟ་བ་དང་ནང་བལྟ་བ། །གཉིས་ཀར་བལྟས་པའི་ཤེས་པ་དང་། །བཅོས་དགོས་པ་དང་མི་དགོས་སུ། །རྟག་ཆད་བྲལ་དང་ངོ་བོར་གནས། །ཡང་དག་ཡོད་དང་བྱིན་རླབས་སུ། །ལན་དུ་ཕྱེ་ནས་བསྟན་པའི་དོན། །ཚོགས་བརྒྱད་སེམས་སུ་བསྟན་པ་ཡང་། །འཁོར་བའི་བག་ཆགས་བརྟས་པའི་ཕྱིར། །ངེས་དོན་སྙིང་པོ་མ་ཡིན་ནོ། །དེ་ཡང་སེམས་དཔའི་སྙིང་པོ་ཉོན། །སྒོ་ལྔའི་རྣམ་ཤེས་ངོ་བོ་ནི། །ཡུལ་སྣང་ཙམ་ནས་ཤེས་པ་སྐྱེ། །ཡུལ་མི་སྣང་ཙམ་ཤེས་པ་འགག །ཡིད་ཀྱི་རྣམ་ཤེས་ངོ་བོ་ནི། །ཡུལ་ལ་སྣ་ཚོགས་སེམས་པའི་ཕྱིར། །ཆགས་སྡང་ལོག་རྟོག་དག་ཏུ་འཛིན། །རྣམ་རྟོག་སྣ་ཚོགས་ངོ་བོར་གནས། ། ― DNG001_Page_0487 ―
[མ་དཔེ་གཟིགས་ན་འདིར་གནོན།]
ཉོན་མོངས་ཡིད་ཀྱི་ངོ་བོ་ནི། །ནང་དུ་ཞེན་པ་དམ་པར་ནི། །རྟག་ཏུ་འདུན་པ་ངར་འཛིན་པའོ། །ཀུན་གཞིའི་རྣམ་ཤེས་ངོ་བོ་ནི། །མ་རྟོགས་ཐ་མལ་དུས་ཙམ་ན། །རྟོག་པ་རྒྱས་ཤིང་རིག་པ་བསྒྲིབ། །རྟོགས་པ་མངོན་དུ་གྱུར་ཙ་ན། །མ་རིག་བསྒྲིབས་ཤིང་ཡེ་ཤེས་རྒྱས། །གཞན་དུ་དེ་དང་མཚུངས་པར་ནི། །ཚོགས་བདུན་སྐྱེས་ནས་འཕེལ་བར་སྣང་། །ཚོགས་བདུན་འགགས་ན་སྒྲིབ་པར་སྣང་། །དེས་ན་ཤེས་པའི་ཚོགས་བརྒྱད་ཀྱང་། །ཡང་དག་མ་ཡིན་འཁོར་བའི་ཆོས། །དེ་ཡང་འཁོར་གྱི་སེམས་དཔའ་ཉོན། །སེམས་ཅན་མོས་པ་ཐ་དད་པས། །གང་ཟག་བློ་ཡི་རིམ་པ་ལ། །གནས་འགྱུར་ཆོས་སུ་བསྟན་པ་ཡང་། །བཀྲི་དྲང་ལྡེམ་དགོངས་ཙམ་དུ་བསྟན། །དེ་ཡི་སྐྱོན་ཡོན་ཁྱད་པར་ནི། །འབྱུང་བ་མེ་ཆུའི་དཔེ་བཞིན་དུ། །ཡེ་ཤེས་ལོག་རྟོག་ཁྱད་པར་གྱིས། །ཤེས་པ་ཀུན་གཞིའི་མཚན་ཉིད་ནི། །རྒྱུ་རྐྱེན་གཉེན་པོས་འཇིག་པ་དང་། །དུས་གསུམ་མི་རྟག་འགྱུར་བ་དང་། །བག་ཆགས་མཚན་མའི་རྟེན་བྱས་པས། །ཡང་དག་མ་ཡིན་འཁོར་བའི་གཞི། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཚོགས་བརྒྱད་ཆོས་སྐུ་མིན་པར་བསྟན་པའི་ལེའུ་སྟེ་དགུ་པའོ།། །།དེ་ནས་ཀུན་རིག་རྒྱལ་པོས་ཡང་གསུངས་པ། །ལོག་ལྟ་མུ་སྟེགས་རྣམ་གཉིས་དང་། །ཕྱི་རོལ་ཡང་དག་གསང་སྔགས་དང་། །གསང་ཆེན་འཁྲུལ་ཚུལ་ངས་བཤད་ཉོན། །ངོ་བོ་ཆོས་སྐུ་གཉིས་མེད་དེས། །གཞི་བྱས་ཕ་རོལ་རྒྱུ་འབྲས་མེད། །འབྱུང་བ་ལྔ་བྱུང་རང་ཞི་སྟེ། །ཆད་པར་འདོད་པ་འཁྲུལ་པ་ཡིན། །དངོས་མེད་ངོ་བོ་མི་འགྱུར་དེས། །གཞི་བྱས་རང་སེམས་དངོས་པོ་དག །ཁ་དོག་དབྱིབས་སུ་གྲུབ་པ་ལ། །རྟག་པ་ཐེར་ཟུག་འདོད་པ་འཁྲུལ། །ད་ཡང་འདུས་པའི་སྙིང་པོ་ཉོན། །སྣང་བ་ཆོས་ཀྱི་དབྱིངས་ཉིད་ཀྱིས། །གཞི་བྱས་སེམས་ལ་ཐ་དད་པས། །ཕྲ་རགས་འདོད་ཡོན་རྣམ་ལྔའི་ཡུལ། །དོན་དམ་བདག་མེད་འདོད་པ་འཁྲུལ། །དྲང་དོན་སྒོར་ཞུགས་སྐྱེ་བོ་དང་། །ཚིག་ལ་ཁྱད་ཡོད་དོན་ལ་མེད། །དེ་ཕྱིར་ཉན་ཐོས་ཐེག་པ་བས། །རང་སེམས་མ་རྟོགས་ཤིན་ཏུ་གོལ། །དེ་ཡང་འདུས་པའི་སྙིང་པོ་ཉོན། །ངོ་བོ་དངོས་མེད་རིག་པ་དེས། །གཞི་བྱས་སྣང་བ་རང་ ― DNG001_Page_0488 ―
[མ་དཔེ་གཟིགས་ན་འདིར་གནོན།]
སེམས་སུ། །བློས་བྱས་རིག་པ་སྐད་ཅིག་དེ། །གོང་འོག་མཐའ་བྲལ་ཤེས་དག་འཁྲུལ། །རང་སེམས་རྒྱུན་གྱི་རྟག་པར་འདོད། །བདག་ཏུ་ཁས་ལེན་མུ་སྟེགས་དང་། །ཚིག་ལ་ཁྱད་ཡོད་དོན་ལ་མེད། །སྣང་བ་སེམས་སུ་འདོད་པའི་ཕྱིར། །སྒྲོ་འདོགས་སེམས་ཙམ་དོན་ལ་གོལ། །ད་ཡང་འདུས་པའི་སྙིང་པོ་ཉོན། །རིག་པ་ངོ་བོ་གཉིས་མེད་དེས། །གཞི་བྱས་ཡུལ་སེམས་ཆོས་གཞིག་ནས། །སྐད་ཅིག་མ་དེ་མ་གྲུབ་འདོད། །སྟོང་པར་བཏགས་དེ་དོན་ལ་འཁྲུལ། །མུ་སྟེགས་ཆད་པར་ལྟ་བ་དང་། །ཚིག་ལ་ཁྱད་ཡོད་དོན་ལ་མེད། །ཡུལ་སེམས་གཉིས་ལ་སྐུར་བཏབ་ཕྱིར། །དབུ་མར་འཛིན་པ་དོན་ལས་གོལ། །དེ་ཡང་སེམས་དཔའ་ཆེན་པོ་ཉོན། །འགྲོ་དྲུག་སེམས་ཅན་ཐམས་ཅད་དང་། །ཉན་ཐོས་རང་རྒྱལ་མདོ་སྡེ་བཅས། །ང་ཉིད་འགྲོགས་པས་ངོ་མ་ཤེས། །དེ་ཕྱིར་བླུན་པོའི་སྤྱོད་ཡུལ་མིན། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། རྒྱུ་མཚན་ཉིད་ཀྱི་འཁྲུལ་ཚུལ་བསྟན་པའི་ལེའུ་སྟེ་བཅུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །གསང་སྔགས་འཁྲུལ་ཚུལ་བཀའ་སྩལ་པ། །དག་དང་མ་དག་གཞི་གཅིག་པ། །ཡུལ་མེད་རང་སེམས་དག་པར་འདོད། །ཆོས་ཉིད་ངང་ལས་བཟང་ངན་འབྱུང་། །དངོས་གྲུབ་གཞན་ལ་རེ་ཕྱིར་འཁྲུལ། །དེ་ཡང་འཁོར་གྱི་སྙིང་པོ་ཉོན། །རྗེ་འབངས་ཚུལ་དུ་སྤྱོད་པའི་ཕྱིར། །གཙང་སྦྲ་སྤྱོད་པའི་བྲམ་ཟེ་དང་། །ཚིག་ལ་ཁྱད་ཡོད་དོན་ལ་མེད། །དེ་ཕྱིར་དག་བྱེད་ཀྲི་ཡ་གོལ། །གཞི་ལ་གཉིས་མེད་ངོ་བོ་ལ། །ལྟ་སྤྱོད་གོང་འོག་གཉིས་འདོད་པས། །ལྟ་སྤྱོད་ཡ་ཆ་བདུད་ཀྱི་ལས། །ལྟ་བས་ཁྱད་པར་འཕགས་འདོད་འཁྲུལ། །དེ་ཡང་རྡོ་རྗེ་སེམས་དཔའ་ཉོན། །ཡུལ་དང་མ་འདྲེལ་ངོ་བོ་ལས། །དབྱེར་མེད་ཆོས་དབྱིངས་འདོད་པ་དེ། །སྤུན་གྲོགས་ཚུལ་དུ་མཉམ་ཟེར་ནས། །ཏིང་འཛིན་གཙོར་བྱེད་ཐ་དད་འཁྲུལ། །དེ་ཡང་འདུས་པའི་སྙིང་པོ་ཉོན། །ཀུན་རྫོབ་ཡིག་འབྲུ་ལྷར་བསྐྱེད་འདོད། །དོན་དམ་མ་གྲུབ་ཟེར་བ་དེ། །ཀྲི་ཡོག་རྣམ་གསུམ་ལྟ་བ་སྟེ། །མཚན་ཉིད་ལྟ་བ་རྣམ་པ་གཉིས། ། ― DNG001_Page_0489 ―
[མ་དཔེ་གཟིགས་ན་འདིར་གནོན།]
ཚིག་ལ་ཁྱད་ཡོད་དོན་ལ་མེད། །དེ་ཕྱིར་ཀྲི་ཡོག་དོན་ལ་གོལ། །ཡོ་ག་མན་ཆད་ང་ཡི་གཏམ། །ཇི་སྙེད་བརྗོད་པས་ང་མི་རྙེད། །སྣང་བ་ལྷ་རུ་འདོད་པའི་ཕྱིར། །མཚན་མ་རགས་ཕྱིར་ང་མི་རྟོགས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློངས་ཡངས་ཀྱི་རྒྱུད་ལས། ཕྱི་རྒྱུད་རྣམ་གསུམ་གྱི་འཁྲུལ་ཚུལ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །འཁོར་འདས་མ་རིག་ཆོས་སྐུ་ལ། །ཡུལ་སེམས་སྣང་སྟོང་དབྱེར་མེད་འདོད། །རྟོག་ཚོགས་བཟང་ངན་ལྷར་གྱུར་བསྒོམ། །བཟང་ངན་འབྱུང་ཕྱིར་མ་ཧཱ་འཁྲུལ། །དེ་ཡང་བློ་གྲོས་དམ་པས་ཉོན། །རང་བྱུང་ངོ་བོ་ཉིད་ཀྱི་སྐུ། །སྐྱེ་མེད་མཁའ་ཀློང་སྟོང་པ་ལས། །སྣང་བ་ཀུན་བཟང་རོལ་པར་འདོད། །གཉིས་མེད་བདེ་ཆེན་སྲས་སུ་བསྒོམ། །རྩོལ་བས་བསྒོམ་ཕྱིར་ཨ་ནུ་འཁྲུལ། །དོན་དམ་ཀུན་རྫོབ་གཉིས་ཀའི་ཆོས། །མཐའ་དབུས་མེད་པའི་དབུ་མ་དང་། །ཁྱད་མེད་རྒྱུད་ལུང་དོན་མ་རེག །དེ་ཕྱིར་རྒྱུད་ལུང་ལྟ་བ་གོལ། །དེ་ཡང་འདུས་པའི་སྙིང་པོ་ཉོན། །རྒྱུད་ལུང་རྣལ་འབྱོར་ཆེན་པོ་ལས། །ང་ཚོལ་པས་འཁོར་ང་མི་རྙེད། །ང་མ་རྙེད་པས་སྣང་བ་འཆོལ། །དེ་ཕྱིར་ང་ཉིད་རྟོགས་མི་འགྱུར། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། བསྐྱེད་རྫོགས་རྣམ་གཉིས་ཀྱི་འཁྲུལ་ཚུལ་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །དོན་གྱི་གནས་ལུགས་ངོ་བོ་ནི། །འཁོར་འདས་བར་དོར་མ་ཤེས་པར། །གང་བསྒོམས་མ་རིག་རྨོངས་པས་གོལ། །རང་སེམས་མ་རྟོགས་རྩོལ་བ་སྟེ། །ཡུལ་གྱི་འབྱུང་བར་སེམས་བསྡུས་ནས། །གསལ་སྟོང་མཉམ་བཞག་དོན་ཚོལ་བ། །དུག་ལྔ་བསྒོམས་པའི་གང་ཟག་དེ། །བྱིང་རྒོད་འཕྲག་དོག་བྱ་ར་མཁན། །ལྟ་བར་མ་ཤེས་གཏི་མུག་སྟེ། །གསལ་ལ་མི་རྟོག་འདོད་ཆགས་བསྒོམས། །དེ་ལ་ཞེན་པའི་ང་རྒྱལ་ཅན། །ཉོན་མོངས་སྤོང་བའི་ཞེ་སྡང་གིས། །རྩ་དང་ཐིག་ལེའི་ཐབས་སྒོ་ནས། །ཡུལ་ལ་དམིགས་པའི་བསྒོམ་པ་པོ། །རྟོག་པ་བཟང་ངན་ ― DNG001_Page_0490 ―
[མ་དཔེ་གཟིགས་ན་འདིར་གནོན།]
སེམས་སུ་བྱས། །བསྒོམས་ཀྱང་ཡུལ་ལ་འགྱུར་མེད་ཕྱིར། །ཇི་བཞིན་མ་ནོར་དོན་དང་བྲལ། །ད་ཡང་རྡོ་རྗེ་སེམས་དཔའ་ཉོན། །དཔྱིད་དུས་སོ་ནམ་མ་བྱས་པར། །སྟོན་དུས་རྩ་རུ་འགྲོ་བ་བཞིན། །རང་སེམས་དོན་ཉིད་མ་རྟོགས་པར། །བསྒོམ་དུ་འགྲོ་བ་སྙིང་རེ་རྗེ། །རྐྱལ་མ་སྦྱངས་པ་ཆུར་འཇུག་འདྲ། །དེ་བཞིན་མ་རྟོགས་སུ་བསྒོམ་པ། །འབྲས་བུ་མི་འབྱུང་བདུད་ཀྱི་ལས། །རྒྱུ་མཐུན་བག་ཆགས་བློར་བརྟས་པས། །ལྗོན་ཤིང་བཞིན་དུ་སྡུག་བསྔལ་རྒྱས། །རང་སེམས་སྙིང་པོ་མ་རྟོགས་པར། །བསྒོམ་ཆེན་ཡིན་ཞེས་ཕུག་ལ་འདུག །མ་རྟོགས་བསྒོམ་པའི་ཚུལ་ནི་སྟོན། །དམུས་ལོང་ཆུང་མ་མཛེས་མ་བཞིན། །ངོ་བོ་ཉིད་ནི་མ་རྟོགས་པར། །འཁོར་འདས་ཆོས་ལ་ཅི་བསམ་ཀྱང་། །བསྒོམ་པས་གྲོལ་བར་མི་འགྱུར་རོ། །ད་ཡང་རྡོ་རྗེ་སེམས་དཔའ་ཉོན། །ཕྲ་རབ་རྡུལ་ནི་གཉེན་པོས་སྤང་། །རིས་སུ་འཛིན་པ་དབྱེ་བ་སྤོང་། །ཡོད་མེད་འཆེལ་བས་རྒྱུ་འབྲས་སྤོང་། །ཆེད་དུ་སྤོང་བའི་རྟོག་པ་ཡིས། །བློ་ཡིས་གཞི་ཉིད་འཆོས་པའི་ཕྱིར། །འཁོར་བའི་མཐའ་ལས་ཐར་པ་མེད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། བསྒོམས་པ་གོལ་བར་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་འདུས་པའི་འཁོར་རྣམས་ལ། །ལྟ་བའི་དམ་ཚིག་ཉམས་པའི་སྐྱོན། །ཀུན་རིག་རྒྱལ་པོས་བཀའ་སྩལ་པ། །ཆོས་རྣམས་ཀུན་གྱི་རྩ་བ་ནི། །བླ་མ་དག་ལ་མ་བརྟེན་པར། །གསང་སྔགས་གསང་བའི་སྒོར་ཞུགས་ནས། །རང་དབང་མ་ཐོབ་གཞན་དབང་བསྐུར། །མཁས་ལ་སྨོད་ཅིང་གཞན་ལ་འགྲན། །རང་ལ་དོན་གྱི་གདེང་མེད་པར། །དྲེགས་ཤིང་ང་རྒྱལ་མཁས་འདོད་ནས། །ཚིག་ཙམ་ལུང་ལས་ཁུངས་ཕྱུངས་ནས། །རྩལ་བཤད་ཐོ་ཆོས་གཞུང་ཉམས་བྱེད། །དམྱལ་བར་ངེས་འགྲོ་གཏན་དུ་འཁྱམས། །དེ་ཡང་རྡོ་རྗེ་སེམས་དཔའ་ཉོན། །ནོང་པོས་བློན་གྲལ་མི་འཛིན་བཞིན། །ཉན་པའི་དབང་ནི་མ་ནོས་པར། །གསང་སྔགས་རྒྱུད་ཆེན་མཉན་པ་རྣམས། །སྲོག་གི་བར་ཆད་ཚེ་ཐུང་འགྱུར། །སྡར་མས་དཔའ་ ― DNG001_Page_0491 ―
[མ་དཔེ་གཟིགས་ན་འདིར་གནོན།]
བོ་མི་ནུས་བཞིན། །འཆད་པའི་དབང་ནི་མ་བསྐུར་བར། །རྒྱུད་དང་སྒྲུབ་ཐབས་གང་འཆད་པ། །ལྕེ་ལ་ཞིང་རྨོད་དམྱལ་བར་སྐྱེ། །གདོལ་པས་རྒྱལ་ས་མི་ཟིན་བཞིན། །བསྒོམ་བསྒྲུབ་དག་གི་དབང་མེད་ན། །དམ་རྫས་འདྲེ་བཀྲེན་ཉོད་པར་འགྱུར། །རང་ཉིད་གླིང་བར་མུན་པར་སྐྱེ། །ད་ཡང་འདུས་པའི་སྙིང་པོ་ཉོན། །དཔེར་ན་རྒྱུས་མེད་དུག་འཐུང་བཞིན། །སྐུ་ཡི་དམ་ཚིག་ཉམས་པ་ནི། །གསུམ་ལྡན་རྡོ་རྗེ་སློབ་དཔོན་ལ། །བརྙས་ཤིང་ངན་སེམས་བསྐྱེད་བྱས་ན། །རྡོ་རྗེ་དམྱལ་བ་ཆེན་པོར་ལྟུང་། །ངོ་མ་ཤེས་ནས་གཉེན་གསོད་བཞིན། །གསུང་གི་དམ་ཚིག་ཉམས་པ་ནི། །སྣོད་མེད་ཆོས་བཤད་ལྷ་མི་དགའ། །འབྲས་བུ་མི་ཐོབ་སྨྱོ་འབོག་འབྱུང་། །དོན་མ་རིག་པར་མནའ་ཟ་ཞིང་། །ཐུགས་ཀྱི་དམ་ཚིག་ཉམས་གྱུར་ན། །གསང་མི་ཐུབ་ཅིང་འཛག་པ་ཡིས། །ལྐུགས་པའི་དམྱལ་བ་ཆེན་པོར་སྐྱེ། །ད་ཡང་འདུས་པའི་སྙིང་པོ་ཉོན། །ནར་མ་ཕྱིན་ན་ཤེད་མི་རྫོགས། །གོང་འོག་ལ་ཤན་མ་ཕྱེད་ཅིང་། །ལྟ་བའི་སྙིང་པོ་དོན་མེད་ན། །གོལ་ས་མི་ཆོད་རྒྱུད་མི་གྲོལ། །དབང་མེད་གྲོས་ཐག་མི་ཆོད་བཞིན། །དོན་གྱི་གདེང་མེད་རྐྱེན་མི་ཐུབ། །གདམས་ངག་མེད་པས་སེམས་མི་རྟོགས། །ལུས་ངག་ཆོས་སྤྱོད་སངས་མི་རྒྱ། །གཤོག་མ་རྒྱས་པར་འཕུར་མི་ནུས། །ཉམས་སུ་མ་བླངས་ཁ་ཚིག་གིས། །ཆགས་སྡང་ཟིལ་གྱིས་མི་ནོན་ཏེ། །སྐྱེ་བོ་རང་རྒྱུད་པ་རུ་གོལ། །ད་ཡང་འདུས་པའི་སྙིང་པོ་ཉོན། །དཔེར་ན་སྤུན་ངན་རང་སྡུག་བཞིན། །གང་ཡང་གོམས་པར་མ་བྱས་པར། །ཞི་གནས་ལས་སུ་མི་རུང་ཕྱིར། །སྣང་བའི་ཞེན་པ་ཅི་ལ་ཟློག །མུན་སྲོས་ལམ་ནི་སྟོར་བ་བཞིན། །ལྷག་མཐོང་གསལ་བར་མ་རྟོགས་པར། །གཟུགས་སྐུ་རྣམ་གཉིས་མི་འབྱུང་བས། །སེམས་ཅན་འགྲོ་དོན་བྱེད་མི་ནུས། །འབྲས་བུ་ལོ་ཉེས་ལྟོ་བཀྲེས་བཞིན། །ལྟ་བསྒོམ་གཅིག་ཏུ་མ་ཤེས་ན། །རེས་འཇོག་ཐུན་མཚམས་བསྒོམ་པ་དེ། །འབྲལ་མེད་རྒྱུན་གྱི་རྣལ་འབྱོར་མིན། །རྡོ་རྗེ་སེམས་དཔའ་ད་ཡང་ཉོན། །གོས་གོན་མི་ཤེས་དྲལ་བ་བཞིན། །ལུས་ཀྱི་སྤྱོད་པ་མ་བསྲུངས་ནས། ། ― DNG001_Page_0492 ―
[མ་དཔེ་གཟིགས་ན་འདིར་གནོན།]
ཐོ་ཆོ་སྤྱོད་པའི་ལས་བྱས་ན། །འབྲས་བུ་སྡུག་བསྔལ་རྒྱུ་རུ་འགྱུར། །ཟ་མི་ཤེས་པས་བརྣངས་པ་བཞིན། །ངག་གི་སྤྱོད་པ་མ་བསྲུང་ནས། །གཞན་གྱི་ཆོས་ལ་སྐུར་པ་འདེབས། །ཕྱི་མ་ཚ་བའི་དམྱལ་བར་སྐྱེ། །འཐུང་མ་ཤེས་ནས་འབོ་བ་བཞིན། །ཡིད་ཀྱི་སྤྱོད་པ་མ་བསྲུང་ན། །བདག་ཏུ་རྟོག་པས་གཟུང་འཛིན་སྐྱེས། །ཕྱི་མ་མུན་པའི་དམྱལ་བར་སྐྱེ། །ད་ཡང་འདུས་པའི་སྙིང་པོ་ཉོན། །རྒྱུས་མེད་ངོ་མི་ཤེས་པ་བཞིན། །ལས་ཀྱི་གོ་རིམ་མ་ཤེས་ན། །གསང་སྔགས་མཛད་སྤྱོད་ཉམས་པ་ཡིན། །མཐུ་དང་བྱིན་རླབས་མེད་པར་འགྱུར། །མིག་མེད་ལམ་མི་མཐོང་བ་བཞིན། །ཕྱག་རྒྱ་ཡེ་ཤེས་མ་གསལ་ན། །ཡེ་ཤེས་ལྷ་ཡི་དོན་རྟགས་མེད། །མཆོག་གི་དངོས་གྲུབ་ཐོབ་མི་འགྱུར། །གྲུ་མེད་ཆུ་ནི་མི་སྒྲོལ་བཞིན། །བདག་དང་གཞན་གྱི་དོན་གྱི་ཕྱིར། །ཏིང་འཛིན་གསལ་བར་མ་གྱུར་ན། །གནས་མ་འབྱོངས་ཤིང་བགེགས་སུ་སྐྱེ། །དེ་ཡང་འདུས་པའི་སྙིང་པོ་ཉོན། །དབང་དང་དམ་ཚིག་ལ་སོགས་པ། །ཉམས་པར་བྱེད་པའི་གང་ཟག་དེ། །སྐྱེས་བུའི་ལག་པ་བརྐྱང་བསྐུམ་ཙམ། །སྐད་ཅིག་གཅིག་ལ་དམྱལ་བར་ལྟུང་། །དེ་ཡི་སྡུག་བསྔལ་བརྗོད་མི་ལངས། །དེ་ལས་འཇིགས་ཤིང་ཐར་འདོད་ཀྱང་། །རང་སེམས་སྙིང་པོ་མ་རྟོགས་པར། །མ་ཧཱ་ཡོ་ག་མན་ཆད་ཀྱིས། །བསྐང་བཤགས་གཞུང་དུ་བྱས་གྱུར་ཀྱང་། །ལྟ་བ་ཉམས་པ་བསྐང་བ་མེད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ལྟ་སྤྱོད་ཉམས་པའི་སྐྱོན་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །རྣམ་སྨིན་ལུས་དང་མ་བྲལ་བར། །སངས་རྒྱས་ཡོན་ཏན་འབྱུང་མི་སྲིད། །མཚན་དང་དཔེ་བྱད་སྟོབས་དང་ནི། །མི་འཇིགས་ཆོས་ནི་བཅོ་བརྒྱད་ཀྱང་། །ད་ལྟར་མི་འབྱུང་ལུས་ཀྱིས་བསྒྲིབས། །ཁྱུང་ཆེན་སྒོ་ངར་གཤོག་རྒྱས་ཀྱང་། །མ་བཅག་བར་དུ་འཕུར་མི་ཤེས། །དེ་བཞིན་སེམས་རྟོགས་རྣལ་འབྱོར་པས། །ལུས་འདིས་ཆེ་བའི་ཡོན་ཏན་བསྒྲིབས། །དེ་ཡང་འདུས་ ― DNG001_Page_0493 ―
[མ་དཔེ་གཟིགས་ན་འདིར་གནོན།]
པའི་སྙིང་པོ་ཉོན། །རྒྱུད་ལུང་སློབ་དཔོན་སྤྲེའུ་འདྲ་བས། །ང་ཡི་དྲང་དོན་རྩེད་མོ་ལ། །ཚེ་ཡི་དངོས་གྲུབ་ཐོབ་འདོད་པས། །ཐུན་མོང་སྨན་གྱི་སྦྱོར་བ་ཡི། །བཅུད་ལེན་རི་ལུ་རྒྱུན་ལྡོག་དང་། །འོ་མས་ལུས་གསོས་བཀྲག་རྒྱས་ཚེ། །དུག་མཚོན་ལ་སོགས་ཚུགས་མི་འགྱུར། །བྱ་བཞིན་འཕུར་བ་བྱུང་ནས་ཀྱང་། །རྨི་ལམ་མངོན་ཤེས་ཕྲ་མོ་འོང་། །ལྷ་དང་བགེགས་ལ་དམ་པར་འཛིན། །རང་སེམས་མ་རྟོགས་འཁོར་བའི་ཕྱིར། །ལུས་འདི་ཕྱི་རོལ་ཡུལ་ཡིན་པས། །གནས་སྐབས་འབྲལ་མེད་ཡོད་མོད་ཀྱང་། །ཐབས་སྦྱོར་མི་གྲོལ་ཤིན་ཏུ་འཆིང་། །དེ་བས་བློ་གྲོས་དམ་པ་ཉོན། །སེམས་ཅན་ལུས་དང་མ་བྲལ་བར། །སངས་རྒྱས་ཡོན་ཏན་ཅི་ལས་འབྱུང་། །ལུས་བཅས་འབྲས་བུ་ཐོབ་འདོད་པ། །ཤིན་ཏུ་གཏི་མུག་སྨད་པའི་གནས། །དེ་ཡང་འཁོར་གྱི་སྙིང་པོ་ཉོན། །བཅོམ་ལྡན་འདས་ཀྱང་རྩ་མཆོག་ཏུ། །རང་ལུས་བོར་ནས་བར་དོ་ལ། །འོག་མིན་གནས་སུ་མངོན་སངས་རྒྱས། །སེམས་ཅན་ཀུན་ལ་སྨོས་ཅི་དགོས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ལུས་དང་མ་བྲལ་བར་སངས་མི་རྒྱ་བར་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །མ་རྟོགས་བར་དོར་འཁྱམས་པ་ནི། །ཐོག་མར་འཁྲུལ་པའི་གཞི་གནས་ཀྱིས། །འདོད་ཆགས་གཉིད་དང་འཇིག་ཚོགས་རྣམས། །སྔར་གྱི་སྐྱེ་བ་བླངས་པའི་རྟགས། །དེ་ཕྱིར་གཞི་གནས་བག་ཆགས་ཡིན། །དེ་ཡང་བློ་གྲོས་དམ་པ་ཉོན། །མ་རྟོགས་ཚེ་འཕོས་བར་དོ་ནི། །སྤྲིན་དང་ལིང་ཏོག་མུན་པ་ཡིས། །ཆུ་བུར་མིག་ནི་སྒྲིབ་པ་བཞིན། །མ་རིག་ངོ་བོ་ཉིད་སྐུ་བསྒྲིབས། །མིག་ཕྱུང་ལོང་བའི་བག་ཆགས་བཞིན། །དེ་ཚེ་སྔོན་གྱི་གནས་དྲན་སྟེ། །གོས་དང་གཉེན་འདུན་དྲན་པ་འབྱུང་། །ལུས་ཀྱི་མིག་བྲལ་འཐོམས་ནས་སྡུག །དཔེར་ན་འདབ་ཆགས་མཁར་འགྲོ་ཡང་། །འདོད་པའི་དབང་གི་རྙིས་འཛིན་བཞིན། །དབང་པོ་ཀུན་ཚང་འགྲོ་བའི་ཕྱིར། །མ་རིག་དབང་གིས་རྐྱེན་འགྱུར་འཇུག །ལྟ་ ― DNG001_Page_0494 ―
[མ་དཔེ་གཟིགས་ན་འདིར་གནོན།]
བའི་ཤེས་རབ་མིག་མེད་ཕྱིར། །ལུས་ངག་དགེ་བ་ཅི་སྤྱད་ཀྱང་། །རྡུལ་ཙམ་མི་ཕན་དོན་མེད་འཁྱམ། །བར་དོའི་གནས་སུ་དོན་དྲན་མེད། །གཅིག་གམ་ཐ་དད་གང་ལེན་པ། །ཆར་སོགས་སྡུག་བསྔལ་ཉེན་གྱུར་པ། །བུ་ག་སྤྱིལ་བུ་ཁྱིམ་སོགས་སུ། །དབང་མེད་ཤུགས་ཀྱིས་མངལ་དུ་འཇུག །ལྟ་བའི་ཤེས་རབ་མིག་མེད་ཕྱིར། །དེ་ཡང་འདུས་པའི་སྙིང་པོ་ཉོན། །མ་རིག་བག་ཆགས་རྣམ་གཉིས་ཀྱིས། །མི་ཤེས་བཞིན་དུ་སྐྱེ་བའི་གནས། །རྣམ་བཞི་གང་རུང་ལས་ཀྱིས་སྐྱེ། །མཐོ་དམན་གནས་ལ་གདམ་དབང་མེད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། སྲིད་པ་བར་དོའི་བག་ཆགས་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །འཁོར་བའི་ས་མཚམས་བཀའ་སྩལ་པ། །དཔེར་ན་མུན་པའི་སྨག་རུམ་དུ། །རང་གི་མགོ་བོ་ཐུག་པ་ལྟར། །ཕྱིས་འབྱུང་མ་རིག་རྐྱེན་གྱིས་བསླང་། །ཉོན་མོངས་རང་རྒྱུད་རིམ་གྱིས་སྐྱེ། །ལང་ཚོ་བབ་པའི་སྐྱེས་བུ་ནི། །འགྲོ་བ་བཟང་མོས་བསླུས་པ་བཞིན། །འཇིག་རྟེན་ཁ་བྲིད་ཉོན་མོངས་པ། །ཞེན་པའི་དབང་གིས་སེམས་ལ་འཆང་། །དཔེར་ན་རྒྱ་མཚོར་ནོར་ལེན་པས། །ང་རྒྱལ་གྱིས་ནི་ས་འཁོར་བཞིན། །བརྩམ་པའི་རྗེས་སུ་ཉོན་མོངས་པས། །སྐྱེ་རྒ་ན་འཆིར་ཐར་པ་མེད། །ད་ཡང་འདུས་པའི་སྙིང་པོ་ཉོན། །དང་པོ་སེམས་ཀྱི་ཀུན་གཞི་དེ། །རྒྱུ་རྐྱེན་ངན་པས་བསྐྱེད་པས་ན། །མིན་པའི་ཆོས་ལ་ཡིད་འཛིན་པས། །ཉོན་མོངས་ཐམས་ཅད་བསྐྱེད་པར་བྱེད། །ཁམས་གསུམ་འཁོར་བའི་ས་བོན་ཡིན། །བར་མ་བག་ཆགས་ཀུན་གཞི་དེ། །སྔ་མའི་རྗེས་སུ་འབྲང་བྱེད་ཅིང་། །རང་བྱུང་མི་ནུས་རྐྱེན་ལ་ལྟོས། །སྐྱེད་པའི་རྐྱེན་ནི་རྣམ་བཞིའོ། །ཐ་མ་ལུས་ཀྱི་ཀུན་གཞི་དེ། །ཆགས་སྡང་ལྔ་ལ་དངོས་སུ་སྤྱོད། །དེ་ཡི་སྡུག་བསྔལ་འབྲས་བུ་ནི། །སྐྱེ་རྒ་ན་འཆི་བསམ་མི་ཁྱབ། །སེམས་ཅན་ཀུན་ལ་གནས་པ་ཡིས། །ཀུན་གཞི་འཁོར་བའི་གཞི་ཡིན་པས། །ཆོས་ཀྱི་སྐུ་ཡི་ ― DNG001_Page_0495 ―
[མ་དཔེ་གཟིགས་ན་འདིར་གནོན།]
གཞི་ཉིད་མིན། །དེ་ཕྱིར་ཀུན་གཞི་འདུས་བྱས་ལ། །རྐྱེན་གྱི་དབང་གིས་འཁོར་བ་སྟེ། །ཆུ་བོ་བཞི་ཡི་མཐའ་ལ་ཆུད། །མ་བསྒྲལ་བར་དུ་ཐར་མི་སྲིད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། འཁོར་བ་ད་ལྟ་གང་ན་གནས་པ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་གསོལ། །འཁྲུལ་པ་བཟློག་པའི་ཐབས་ཆེན་གྱིས། །སྣོད་བཅུད་དག་པའི་རྟོགས་ཐབས་གང་། །རང་བྱུང་ཡེ་ཤེས་ཅི་ལྟར་དབྱེ། །ཐ་མ་འཁོར་བ་ཇི་ལྟར་བརླག །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །འཁྲུལ་པ་བཟློག་པའི་ཐབས་ཆེན་དེ། །དད་པ་བརྩོན་འགྲུས་དམ་ཚིག་གསུམ། །རྟོགས་པའི་ཐབས་སུ་ཤེས་པར་བྱ། །དེ་ཡང་འཁོར་གྱི་སྙིང་པོ་ཉོན། །བྲམ་ཟེ་ཟླ་དཔལ་ཇི་བཞིན་དུ། །བླ་མ་དམ་པ་དོན་ལྡན་ལ། །ལུས་དང་སྲོག་ལ་མི་བལྟ་བར། །གུས་ལྡན་མན་ངག་གནང་བར་གྱུར། །དཔེར་ན་དྲང་སྲོང་རླུང་ནད་ཅན། །སྨན་པའི་ངག་ནི་ཉན་པ་བཞིན། །འཁོར་འདས་གཅིག་ཏུ་བསྟན་པ་ལ། །སྐྲག་ཅིང་ཡ་ང་མེད་པར་ཞུ། །གཞན་གྱིས་མ་བསླད་བུད་མེད་ལ། །དུས་ཚོད་ཟིན་པའི་བུ་བཞིན་དུ། །ཐེ་ཚོམ་མེད་པར་དད་པ་ཡིས། །རང་སེམས་དོན་གཉིས་རྟོགས་པར་གྱིས། །ད་ཡང་འདུས་པའི་སྙིང་པོ་ཉོན། །འཁོར་འདས་རྩ་བ་གཅིག་པའི་ཕྱིར། །སེང་གེ་ལྟ་བུའི་བརྩོན་འགྲུས་ཀྱིས། །སྔགས་དང་མཚན་ཉིད་མ་རིག་པའི། །འཁོར་འདས་རྩ་བའི་གདམས་ངག་ཞུ། །གླང་ཆེན་མི་ལྡོག་དགྲ་འཇོམས་བཞིན། །བླ་མའི་སྤྱོད་པ་མི་རྟོགས་པར། །ཆོས་ཉིད་གདམས་ངག་དོན་ལ་བརྟག །བརྩོན་འགྲུས་མི་ལྡོག་ཐེ་ཚོམ་གཅད། །ས་ཀུ་ཙེ་ཡི་རྐང་ལག་བཞིན། །བདག་ཉིད་སྤྱོད་ལམ་ཐམས་ཅད་དུ། །དོན་ལ་ཡེངས་པ་མེད་པར་ནི། །ཡིད་ལ་རྒྱུན་དུ་དྲན་པར་བྱ། །ད་ཡང་འཁོར་གྱི་སྙིང་པོ་ཉོན། །བརྩེ་གདུང་དམ་ཚིག་ཆེན་པོ་ནི། །མ་མེད་བུ་ནི་མི་འབྱུང་བཞིན། །རང་སེམས་མ་རྟོགས་སངས་རྒྱས་ནི། །དུས་གསུམ་བཙལ་ ― DNG001_Page_0496 ―
[མ་དཔེ་གཟིགས་ན་འདིར་གནོན།]
ཡང་མི་རྙེད་པས། །ཐ་མལ་འདི་ལས་བཙལ་མི་བྱ། །གཟུགས་སྤངས་གྲིབ་མ་མི་རྙེད་བཞིན། །དུག་ལྔ་སྤངས་པའི་ཕ་རོལ་ན། །སངས་རྒྱས་བྱ་བའི་མིང་ཡང་མེད། །དེ་ཉིད་རྟོགས་ན་ཆོས་སྐུ་ཡིན། །དཔེར་ན་ཟངས་ལྕགས་ལ་སོགས་ལ། །གསེར་འགྱུར་རྩི་ཡིས་ཐེབས་པ་བཞིན། །རང་གི་སེམས་ཀྱི་དུག་ལྔ་ལ། །མན་ངག་རྩི་ཡིས་ཐེབས་པས་རྟོགས། །དུག་ལ་སྔགས་བཏབ་དཔེ་བཞིན་དུ། །དུག་མ་བསལ་བར་སྨན་འགྱུར་བཞིན། །དགག་བསྒྲུབ་མེད་པའི་དོན་གྱིས་ན། །དུག་ལྔ་ཡེ་ཤེས་ངོ་བོར་ཤར། །ནོར་བུ་རིན་ཆེན་རྙེད་པའི་མིས། །འཇིག་རྟེན་སོ་ནམ་མི་དགོས་བཞིན། །མ་བསྒོམས་སེམས་ཀྱི་དོན་རྟོགས་ནས། །དེ་ལས་མི་འདའ་དམ་ཚིག་ཡིན། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། འཁྲུལ་པ་བཟློག་པའི་དུས་ཐབས་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །རང་བྱུང་ཡེ་ཤེས་ཆེན་པོ་ཡིས། །ཡིན་མིན་དབྱེ་བ་ངས་བཤད་ཀྱི། །ཡིད་ཀྱིས་ཉོན་ལ་ལེགས་པར་ཟུང་། །ཡེ་ཤེས་མ་ཡིན་རང་བྱུང་དེ། །སེམས་ཅན་ཀུན་ལ་ཡོད་མོད་ཀྱང་། །མ་རྟོགས་ཕྱིར་ན་ཡེ་ཤེས་མིན། །ལོང་བ་མིག་མཁན་མ་རྙེད་འདྲ། །རང་བྱུང་མེད་པའི་ཡེ་ཤེས་དེ། །གནས་འགྱུར་ཡེ་ཤེས་ལྔར་འདོད་པ། །རྐྱེན་གྱིས་འགྱུར་ཕྱིར་རང་བྱུང་མིན། །ར་གན་གསེར་དུ་འཛིན་པ་འདྲ། །ཡེ་ཤེས་རང་བྱུང་མ་ཡིན་པ། །ཡིད་གཉིས་ཀུན་གཞི་གློ་བུར་རྐྱེན། །ཡིད་འཁྲུལ་ཕྱིར་ན་གཉིས་ཀ་མིན། །རི་བོང་རྭ་ཡི་ཁ་དོག་འདྲ། །རང་བྱུང་ཡེ་ཤེས་ཡིན་ལུགས་ནི། །ཤེས་རབ་ལྷག་མཐོང་ལས་བྱུང་བ། །ཡེ་ནས་གནས་པའི་རང་བྱུང་དེ། །ལུང་ལྡན་རྐྱེན་གྱིས་རྟོགས་པའི་ཕྱིར། །རང་བྱུང་ཡེ་ཤེས་འཛོམ་པ་ནི། །མར་གྱི་ཡང་ཞུན་ལྟ་བུར་གསུངས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། རང་བྱུང་གི་ཡེ་ཤེས་ཀྱི་དབྱེ་བ་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ལུང་ལྡན་བླ་མའི་ ― DNG001_Page_0497 ―
[མ་དཔེ་གཟིགས་ན་འདིར་གནོན།]
གདམས་ངག་གིས། །རང་སེམས་སྙིང་པོ་ཆོས་སྐུ་ནི། །བསྟན་ན་དེ་མ་ཐག་ཏུ་ཤེས། །མ་བསྟན་བར་དུ་ཤེས་མི་སྲིད། །ད་ཡང་འདུས་པའི་སྙིང་པོ་ཉོན། །རང་རིག་ཡེ་ཤེས་འོད་པོ་ཆེ། །འགྲོ་འོང་མེད་པར་འཁོར་བ་བརླག །མ་རིག་ལོག་པས་ཡེ་ཤེས་སྐྱེད། །འཁོར་བ་རུ་བཟློག་མྱ་ངན་འདས། །ཡེ་ཤེས་མ་བསྒོམས་ལྷུན་གྱིས་གྲུབ། །དོན་དང་མཐུན་པར་ཉམས་མྱོང་སྐྱེ། །བསྒོམས་ཀྱང་དེ་ཉིད་ཡེ་ཤེས་སྐྱེ། །དེ་ཕྱིར་རྟོག་པ་རབ་ཏུ་གཅེས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཐ་མ་འཁོར་བ་རང་བརླག་ཏུ་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་རིག་སེམས་ཀྱི་རྒྱལ་པོ་ལ། །ཡིད་ཀྱི་དྲན་པས་འདི་སྐད་གསོལ། །ངེས་པའི་དོན་མཐུན་གདམས་ངག་གིས། །ངོ་བོ་ཉིད་ཀྱི་སྐུ་མཆོག་གང་། །སྣང་བ་ཆོས་དབྱིངས་ཇི་ལྟར་ལགས། །རང་སེམས་ཆོས་སྐུ་ཇི་ལྟར་སྤྲད། །འབྲལ་མེད་མཐུན་འཇུག་ཇི་ལྟར་སྤྱད། །གསང་བ་རྣམ་བཞིའི་གནང་བཀག་གང་། །བསྒོམ་མེད་ལ་ནི་ཇི་ལྟར་བཟླ། །མཉམ་པའི་རྒྱལ་པོས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །ང་ཡི་ཆོས་ཉིད་གནས་ལུགས་ནི། །སེམས་ཅན་མེད་པའི་གོང་རོལ་ཏུ། །བག་ཆགས་མ་བསགས་ལུས་མ་བླངས། །སངས་རྒྱས་མེད་པའི་སྔོན་རོལ་ཏུ། །རྟོགས་པ་མ་བཞག་བྱང་མ་ཆུབ། །འཁོར་འདས་མ་རིག་ཀུན་གྱི་གཞི། །དེ་ཡང་རྡོ་རྗེ་སེམས་དཔའ་ཉོན། །དངོས་མེད་སེམས་ཀྱི་སྙིང་པོ་ནི། །འདུས་མ་བྱས་པའི་གཉུག་མ་ལ། །བཟང་ངན་རྣམ་རྟོག་གཏིང་ནས་མེད། །རྒྱུ་རྐྱེན་མེད་པའི་སྙིང་པོ་ཡིན། །མ་རིག་མེད་པའི་རང་འབྱུང་ནི། །མི་སྲིད་ཕུང་པོ་ག་ལ་སྐྱེ། །ལུས་མེད་ཆོས་སྐུ་འགྱུར་མེད་དེ། །རང་འབྱུང་སངས་རྒྱས་ཡང་དག་ཡོད། །ཐ་སྙད་མིང་བས་ང་སྔའི་ཕྱིར། །ཡོད་ཅིང་རྟག་པར་སྒྲོ་མ་འདོགས། །སྟོང་པ་ཉིད་པས་ང་སྔའི་ཕྱིར། །ང་ལ་མེད་པར་སྐུར་མ་འདེབས། །འབྱུང་བཞི་མ་འདྲེལ་རིག་པ་ལ། །སྒྲིབ་བྱེད་མེད་པར་རང་གསལ་འདི། །དུས་གསུམ་གཅིག་པ་ཤེས་པའི་རྒྱུན། །མ་བྱུང་མ་སྐྱེས་ད་ལྟ་ཉིད། །དེ་ཡང་འཁོར་གྱི་སྙིང་པོ་ཉོན། །རང་བྱུང་སྐུ་ལ་སྐྱེ་འཆི་མེད། ། ― DNG001_Page_0498 ―
[མ་དཔེ་གཟིགས་ན་འདིར་གནོན།]
དེ་ཕྱིར་འཁོར་བར་ལྟུང་མ་མྱོང་། །དོན་མ་རྟོགས་པའི་སངས་རྒྱས་མེད། །དེ་ཕྱིར་མྱ་ངན་འདས་མ་མྱོང་། །རང་གསལ་ང་ཉིད་ཀུན་གྱི་མེས། །ད་ཡང་འདུས་པའི་སྙིང་པོ་ཉོན། །དངོས་པོ་མེད་པས་ནམ་མཁའ་འདྲ། །མི་འགྱུར་སྲ་བས་རྡོ་རྗེ་འདྲ། །སྐྱེ་བ་མེད་པས་ཨ་དང་འདྲ། །དོན་མ་ཡིན་ཕྱིར་དཔེ་འདི་བསྟན། །ངོ་བོ་ཉིད་ཀྱི་སྐུ་མཆོག་ནི། །དངོས་པོ་མཐའ་བྲལ་ཉོན་མོངས་ལྡོག །སྟོང་པའི་མཐའ་བྲལ་ངོ་བོ་ཉིད། །གཉིས་ཀ་ལས་བཟློག་ཆོས་ཀྱི་སྐུ། །དེ་ཡང་འཁོར་གྱི་སྙིང་པོ་ཉོན། །མཚན་ཉིད་ཕྱིར་བལྟས་འདྲ་བ་མེད། །རྒྱལ་པོ་གདུང་ཆང་བུ་བཞིན་དུ། །ཁ་དོག་འདི་འདྲ་མཚོན་མི་ནུས། །གདོད་ནས་དཔེ་མེད་ཆོས་ཀྱི་སྐུ། །ནང་དུ་བསམ་པའི་ཡིད་མེད་དེ། །ནམ་མཁའ་ལྕགས་ཀྱིས་བྱུག་པ་བཞིན། །རིག་ཚོར་རྣམ་པ་ཅིར་ཡང་སྣང་། །དྲན་པ་ཉིད་ནི་ཡེ་ཤེས་ཀློང་། །ཡུལ་གྱི་སྣང་གྲག་འདི་ཉིད་ལ། །ཉི་མ་ཤར་ནས་མུན་མེད་ལྟར། །ད་ལྟའི་རང་སེམས་ཆོས་ཀྱི་སྐུ། །དེ་ལ་འཁོར་བའི་རང་བཞིན་མེད། །འགྲོ་དྲུག་སེམས་ཅན་ཐམས་ཅད་ལ། །ཏིལ་ལ་མར་གྱིས་ཁྱབ་པ་བཞིན། །རང་སེམས་ཡེ་ཤེས་བྱང་ཆུབ་སེམས། །བདེར་གཤེགས་སྙིང་པོ་ཆོས་སྐུས་ཁྱད། །ཡེ་ནས་དོན་དང་མི་འབྲལ་བའི། །ལུང་ལྡན་རྐྱེན་གྱིས་རང་སེམས་རྟོགས། །ནོར་བུ་རིན་ཆེན་འོད་བཞིན་དུ། །ཡེ་ཤེས་དག་པ་འཆར་ནུབ་མེད། །འཁོར་བ་དག་གི་མཚན་ཉིད་ཀྱང་། །མིན་པ་ཙམ་གྱིས་མི་སྤངས་པར། །ཡང་དག་དོན་དུ་མི་བྱའི་ཕྱིར། །དགག་བསྒྲུབ་མེད་པ་ཙམ་དུ་བཞག །མྱ་ངན་འདས་པའི་ཆོས་ཀུན་ཀྱང་། །ཡིན་པ་ཙམ་གྱིས་མི་བླང་བར། །སེམས་ཅན་གདུལ་ཕྱིར་མ་གཏོགས་པར། །ཆེད་དུ་མི་བསྒྲུབ་བཏང་སྙོམས་བཞག །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། རིག་པ་མ་བསླད་ངོ་བོ་ཉིད་ཀྱི་སྐུ་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་ཀུན་རིག་རྒྱལ་པོ་ཡིས། །སྣང་བའི་མཚན་ཉིད་བཀའ་སྩལ་པ། །རྣམ་བཞིའི་ཕྱི་ལ་བར་སྣང་ནང་། །གསུམ་བྲལ་སྣང་བ་ཆོས་ཀྱི་དབྱིངས། །གཅིག་ལས་ཐ་དད་དངོས་འཛིན་པས། །ཉི་ ― DNG001_Page_0499 ―
[མ་དཔེ་གཟིགས་ན་འདིར་གནོན།]
མའི་ཟེར་དང་འཆར་ངོགས་བཞིན། །དགག་བསྒྲུབ་མེད་ཕྱིར་ཆོས་ཀྱི་དབྱིངས། །དེ་ཡང་འདུས་པའི་སྙིང་པོ་ཉོན། །དྲེད་མོ་གདོས་ཐག་མ་ཆོད་པར། །བྲིད་བསྡིག་གཉིས་ཀྱིས་མི་ཕན་བཞིན། །ཡུལ་དང་གོལ་ས་མ་ཆོད་པར། །ཅི་བསྒོམ་དོན་མེད་འཁོར་བར་འཁྱམས། །འཁྲུལ་པ་ལས་ནི་ཡུལ་མེད་ཀྱང་། །འབྱུང་བ་ཆེན་པོ་ལྔ་ཉིད་ལ། །རང་སེམས་རིག་པའི་དོན་མེད་པར། །རང་བྱུང་ཡིན་ཕྱིར་ཡེ་ཤེས་མིན། །དེ་ཡང་འདུས་པའི་སྙིང་པོ་ཉོན། །གསེར་དང་སེར་པོའི་ཚུལ་བཞིན་དུ། །བྱིས་པ་ཐ་དད་ཞེན་ཟློག་ཕྱིར། །བདག་ཉིད་གཅིག་པའི་འདྲེལ་པ་ཡོད། །དེ་ཕྱིར་ཡུལ་འདི་སྤང་མི་དགོས། །ཕྱི་ཡི་འབྱུང་བར་སེམས་སྡུད་པས། །ཟེར་མཐོང་སྙིང་པོ་མ་མཐོང་བཞིན། །གཉིས་མེད་སྣང་སྟོང་ཁས་མི་ལེན། །ཡུལ་ལ་རྩོད་ཕྱིར་དོན་མི་རྟོགས། །བདེན་པ་མཐོང་བའི་དགེ་སློང་ནི། །འཁོར་དང་ལོངས་སྤྱོད་མི་སྡུད་བཞིན། །གཞི་ལ་སྣང་བ་མེད་པའི་ཕྱིར། །ཡུལ་འདི་སེམས་སུ་བློས་མི་སྡུད། །མེ་དང་དུ་བའི་ཚུལ་བཞིན་དུ། །སྣང་བ་འདི་ལ་རང་རྒྱུད་དུ། །རང་སེམས་ཡུལ་དུ་འཁྲུལ་པ་ཡིས། །བདག་ཏུ་རྟོག་པའི་ཞེན་པ་ཟློག །ཀུན་དུ་རྒྱུ་བའི་སྐྱེ་ལམ་བཞིན། །མཐར་ཐུག་འདྲེལ་པ་མེད་པ་ཡིས། །ཐ་དད་གཅིག་ཏུ་མི་བསམ་པས། །སྣང་བ་འདི་ལ་དོན་མི་བཞག །ད་ཡང་འདུས་པའི་སྙིང་པོ་ཉོན། །དཔེར་ན་ཁྱུང་ཆེན་མཁའ་ལྡིང་ལ། །ཆུ་ཀླུང་གྱེན་ཐུར་ཉམས་མི་ང་། །བར་སྣང་ཁམས་ཀུན་ལམ་དུ་བདེ། །དམིགས་པའི་ས་ཕྱོགས་ཡུད་ཀྱིས་ཕྱིན། །དེ་བཞིན་སྣང་བ་མ་བཅོས་པས། །སྣ་ཚོགས་མདུན་ན་སྣང་བཞིན་དུ། །སྣང་ཙམ་ཉིད་ནས་སྤང་སྡུད་མེད། །ཞེན་མེད་རྣལ་འབྱོར་སྤྱོད་ཡུལ་ལ། །འཁྲུལ་པའི་རྟོག་པས་གཞི་མི་འགྱུར། །བཙལ་བའི་བསམ་པས་དབྱིངས་མི་བསྐྱེད། །ད་ཡང་འདུས་པའི་སྙིང་པོ་ཉོན། །ཉི་མ་ལྟ་བུའི་ཆོས་ཀྱི་སྐུ། །ཐིག་ལེའི་རྩལ་ནི་མ་འགགས་པས། །སྒོ་ལྔ་གསལ་བ་ཉི་ཟེར་འདྲ། །ངོ་བོ་གཅིག་ཕྱིར་དགག་སྒྲུབ་མེད། །དེ་ཕྱིར་ཆོས་ཀྱི་དབྱིངས་ཞེས་བྱ། །རྫོགས་ ― DNG001_Page_0500 ―
[མ་དཔེ་གཟིགས་ན་འདིར་གནོན།]
པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། སྣང་བ་མ་བཅོས་ཆོས་ཀྱི་དབྱིངས་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །ཆོས་སྐུ་ངོ་སྤྲོད་བཀའ་སྩལ་པ། །རྣམ་སྨིན་ལུས་དང་བཅས་པ་ཡིས། །ཐ་མལ་ཀུན་གཞི་གཞི་ཆ་ལ། །སྔ་ཕྱི་རང་བྲལ་ཆོས་སྐུ་གསལ། །ཆུ་དྭངས་རྙོག་མེད་དཔེ་བཞིན་ནོ། །དེ་ཡང་འདུས་པའི་སྙིང་པོ་ཉོན། །ཡང་དག་ཟབ་མོ་ཆོས་སྐུ་ནི། །སྐྱེ་བ་མེད་ཅིང་འགག་པ་མེད། །རྣམ་རྟོག་མཚན་མ་གཞི་ནས་མེད། །ཉོན་མོངས་ངར་འཛིན་རྣམས་དང་བྲལ། །འཕེལ་འགྲིབ་སྐྱོན་རྣམས་ངང་གིས་མེད། །དེ་ཡི་ངང་ལ་གནས་ཐབས་ནི། །སྔ་ཕྱི་གཞི་ལ་མེད་ཤེས་པས། །སེམས་ཅན་དུས་ན་ཆོས་ཀྱི་སྐུ། །ཡིད་ཀྱི་ཡུལ་དུ་མ་བསྒོམས་ཀྱང་། །རང་བྱུང་རིག་པའི་ཏིང་འཛིན་གསལ། །དེ་ཡང་རྡོ་རྗེ་སེམས་དཔའ་ཉོན། །རང་གི་ཐིག་ལེའི་དོན་ལྟ་ན། །རབ་འབྲིང་ཐ་མའི་བློ་ཚད་དུ། །རིམ་གྱིས་བསྒོམས་པར་ངས་བཤད་ཀྱིས། །གཞན་དུ་མ་ཡེངས་ཡིད་ལ་ཟུང་། །ཐ་མ་རྣལ་འབྱོར་སྒོམ་པ་པོས། །སྔ་ཕྱི་མེད་པའི་གཉུག་མ་ལ། །མ་འཕྲོས་མ་བྱིང་རང་ལུགས་ཙམ། །དེ་ལ་རྒྱུན་དུ་མ་ཡེངས་བསྒོམ། །ཆགས་སྡང་དབང་གིས་འཕྲོ་གྱུར་ན། །དོན་དམ་དགག་བསྒྲུབ་མེད་པའི་ཕྱིར། །རང་བྱུང་སྙིང་པོ་རང་ཤར་བས། །བ་མོར་ཉི་ཤར་ཇི་བཞིན་ནོ། །གཏི་མུག་དབང་གིས་བྱིང་བ་ནི། །རང་སེམས་ཤེས་པ་གཟེངས་བསྟོད་ལ། །ཕྱི་རོལ་ཡུལ་ལ་མི་སྤྱད་པར། །དབང་པོ་སྒོ་དབྱེ་ཡན་དུ་གཞུག །འབྲིང་གི་རྣལ་འབྱོར་སྒོམ་པ་པོས། །ཆོས་སྐུ་ནམ་མཁའ་ལྟ་བུ་ལ། །ཇི་བཞིན་པ་ཡི་ཡེ་ཤེས་དེ། །བརྗོད་མེད་རྒྱུན་མི་ཆད་པར་ལྟ། །གལ་ཏེ་བྱུང་ཚོར་རྟག་ཆད་རྣམས། །རྣམ་རྟོག་ཡེ་ཤེས་བསྐུལ་མར་ཤེས། །མེ་ལ་ཤིང་བསྣན་ཇི་བཞིན་དུ། །དེ་ཙམ་ཉིད་ནས་བསྒོམ་པ་གསལ། །སྒོ་ལྔ་ཤེས་པ་རྨུགས་གྱུར་ན། །ཉམས་གསུམ་བསྲེས་པའི་དོན་དྲན་པས། །ཆོས་ཉིད་ཡེ་ཤེས་ཀློང་དུ་བྱིང་། །བུམ་ནང་རིན་ཆེན་གཏེར་དང་འདྲ། །དབང་པོ་རབ་ཀྱི་བསྒོམ་པ་ལ། །ཉམས་ ― DNG001_Page_0501 ―
[མ་དཔེ་གཟིགས་ན་འདིར་གནོན།]
དང་མི་ཉམས་མེད་པའི་ཕྱིར། །འབྲལ་མེད་དོན་ལ་བཅོས་མི་དགོས། །སྤྲིན་མེད་ནམ་མཁའ་ཇི་བཞིན་ནོ། །དེ་ཡང་བློ་གྲོས་དམ་པ་ཉོན། །ཉི་ཟླ་གཟས་ཟིན་དཔེ་བཞིན་དུ། །དབྱིངས་དང་ཆོས་སྐུ་དུས་མཉམ་ཕྱིར། །ཆོས་ཉིད་རང་གསལ་རང་གནས་པས། །ཡེ་ཤེས་མི་འབྲལ་རྫོགས་པ་ཡིན། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། རང་སེམས་ཆོས་སྐུར་ངོ་སྤྲོད་པའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་འདུས་པའི་འཁོར་རྣམས་ལ། །འབྲལ་མེད་སྤྱོད་པ་བཀའ་སྩལ་པ། །རང་སེམས་ལྟ་བ་རྟོགས་པ་ཡིས། །མཉམ་རྗེས་དུག་ལྔ་གཅིག་ཏུ་ཤེས། །དེ་ཚེ་ཉོན་མོངས་ཅི་སྤྱད་ཀྱང་། །ངོ་བོ་ཉིད་ལ་འཕེལ་འགྲིབ་མེད། །དེ་ཡང་འདུས་པའི་སྙིང་པོ་ཉོན། །དེ་ཙམ་ཉིད་ན་ངོ་བོ་ཉིད། །དེ་དོན་མི་བརྗེད་རྟོགས་པའི་ཕྱིར། །ཆེད་དུ་བྱས་ལ་བསྒོམ་མི་བྱ། །མ་གི་ཏ་ལ་གང་རེག་འདྲ། །ཡུལ་ཉིད་སེམས་སུ་མི་བསྒོམ་པས། །དྲན་རིག་ཆོས་ཉིད་བྱང་ཆུབ་སེམས། །དེ་ཉིད་སྤྱོད་པའི་ཡུལ་ལས་འདས། །དེ་ཕྱིར་དོན་ལ་ཉམས་པ་མེད། །དེ་ཡང་འཁོར་གྱི་སེམས་དཔའ་ཉོན། །གཉིད་ཉིད་བསྒོམ་པར་གསལ་ཐེབས་ནས། །ལྡོག་ཀ་སད་ཀའི་དུས་དག་ཏུ། །དེ་ཚེ་ཆོས་སྐུའི་དོན་དྲན་ན། །རིན་ཆེན་ག་འུར་བཅུག་པ་འདྲ། །གཤོག་རྣོ་རྡུལ་མེད་ཚ་གྲང་སྙོམས། །མི་འཚུབ་ཆུ་ཡི་ཉ་བཞིན་དུ། །རྨི་ལམ་འདྲེལ་ཐབས་མེད་པར་འབྱུང་། །ཚོགས་དྲུག་འགགས་ཀྱང་ཆོས་སྐུར་གནས། །དེ་ཡང་འཁོར་གྱི་སེམས་དཔའ་ཉོན། །འཆི་ཀ་བར་དོའི་དོན་དྲན་ན། །གནད་གཅོད་སྡུག་བསྔལ་ཅི་བྱུང་ཡང་། །འཇིགས་པ་བརྒལ་འདོད་མི་བཞིན་དུ། །ཆེད་དུ་དྲན་པ་ཤིན་དུ་གཅེས། །ན་བ་ཏ་ཡི་མིག་གཉིས་འདྲ། །རྩ་དྲོད་ཡོད་ལ་སྲོག་དང་བྲལ། །རྩ་མེད་དྲོད་བཅས་བཀྲག་མ་ཉམས། །ཆོས་ཀྱི་སྐུ་ནི་དྲན་པའི་རྟགས། །ན་ཚ་བྱུང་ན་སྨོས་ཅི་དགོས། །ད་ཡང་འདུས་པའི་སྙིང་པོ་ཉོན། །དབང་པོ་འབྲིང་གི་རྣལ་འབྱོར་པས། །གཞི་ཤེས་མངོན་དུ་མ་གྱུར་པས། །ལུས་སུ་ཞུགས་ཀྱང་དོན་དྲན་ ― DNG001_Page_0502 ―
[མ་དཔེ་གཟིགས་ན་འདིར་གནོན།]
ཏེ། །རྟོགས་པ་ཡིན་ཕྱིར་མངལ་ན་བསྒོམ། །ཚེ་འཕོས་ནས་ནི་མངོན་སངས་རྒྱས། །ཐ་མ་ཕྱི་རོལ་བརྟགས་པས་བརྗེད། །དྲན་ཚེ་རྐྱེན་དང་ཕྲད་པའི་ཕྱིར། །སྐད་ཅིག་ཟུར་ཙམ་བརྡའ་ཡིས་ནི། །ཐེ་ཚོམ་མེད་པར་དོན་གོ་ནས། །སྐྱེ་བ་གཅིག་གིས་སངས་རྒྱས་འགྲུབ། །དེ་ཡང་འདུས་པའི་སྙིང་པོ་ཉོན། །དེ་ལྟར་མ་རྟོགས་རྣལ་འབྱོར་པས། །ཇི་ལྟར་བསྒོམས་ཀྱང་དོན་མེད་འཁྱམས། །འཁོར་བ་ལུགས་ཀྱི་ནད་དུ་འཇུག །དེ་ཚེ་ལུས་ཀྱི་བཟའ་བགོ་ནི། །མི་དགོས་གཉིད་མི་འོང་ཞིང་བདེ། །གསལ་ལ་ཡུལ་གྱི་རྟོག་པ་མེད། །དུས་ལ་མ་བབ་བར་དུ་ནི། །མཁས་ཀྱང་ལྟ་སྒོམ་བསྟན་ཐབས་མེད། །བུམ་པ་ནང་གི་མར་མེ་འདྲ། །དེ་ཡང་འདུས་པའི་སྙིང་པོ་ཉོན། །སངས་རྒྱས་སེམས་ཅན་རྣལ་འབྱོར་པས། །སོ་སོར་སྣང་བ་མ་ཡིན་ཏེ། །མ་འཁྲུལ་མ་རྟོགས་གོང་རོལ་གྱི། །ངོ་བོ་ཉིད་ཀྱི་སྐུ་དང་ནི། །མ་འཁྲུལ་རྟོགས་པའི་ཀུན་བཟང་ཐུགས། །འཁྲུལ་ནས་མ་རྟོགས་སེམས་ཅན་སེམས། །འཁྲུལ་ཀྱང་རྟོགས་པའི་རྣལ་འབྱོར་ཐུགས། །ངོ་བོ་གཅིག་ཕྱིར་གོལ་ས་མེད། །དེ་ཚེ་ཆོས་སྐུ་ཟང་ཀ་མ། །མི་འགྱུར་བརྟན་པས་གསེར་བཞིན་ནོ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། དུས་བཞི་རིགས་སྤྱོད་བསྟན་པའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །མཐུན་འཇུག་ཐབས་ཀྱི་སྤྱོད་པ་ཡི། །ཚོགས་ཆེན་མ་ལུས་རྫོགས་པ་ཡིས། །འགྲོ་དོན་ཐུགས་རྗེ་མཐར་དབྱུང་ཕྱིར། །རྫོགས་ཆེན་ཤིན་ཏུ་རྣལ་འབྱོར་པས། །བླ་མེད་གོ་འཕང་མཆོག་བརྙེས་པར། །སེམས་ཅན་གནས་ཕྱིར་བླ་མ་བཀུར། །བླ་མ་བསྒོམ་ན་ཆོས་སྐུ་བསྒོམ། །ལྷ་སྐུ་འབུམ་ཕྲག་སྟོང་བསྒོམས་པའི། །བསོད་ནམས་དེ་ཡི་ཆར་མི་ཕོད། །དེ་ཕྱིར་དཀར་པོའི་ཆོས་སྤྱོད་ཀྱི། །ཉན་བཤད་བསྒོམ་དང་འཛིན་པ་དང་། །མཆོད་གཏོར་ལ་སོགས་གང་བྱེད་ཀྱང་། །སྔོན་དུ་འགྲོ་བའི་ལས་བྱེད་ཕྱིར། །བླ་མ་དུས་གསུམ་སངས་རྒྱས་དཔལ། །དཀྱིལ་ ― DNG001_Page_0503 ―
[མ་དཔེ་གཟིགས་ན་འདིར་གནོན།]
འཁོར་སྒོར་ཞུགས་ཐམས་ཅད་ཀྱི། །འབྲལ་མེད་ཡི་དམ་ལྷ་ཚོགས་དང་། །མན་ངག་རྒྱུད་དོན་རང་རིག་ལྷ། །རྩོལ་མེད་འབྲས་བུའི་ཆོས་དང་ནི། །དོན་ལྡན་རྣལ་འབྱོར་མཁའ་འགྲོ་ལ། །ལུས་ངག་ཡིད་ཀྱིས་ཕྱག་འཚལ་ནས། །བླ་མེད་མཆོད་གཏོར་གཏོང་བའི་ཚེ། །ཕྱི་ཡི་འཇིག་རྟེན་སྣོད་ནང་དུ། །བདུད་རྩིའི་རྒྱ་མཚོ་གཏིང་ཟབ་གྱུར། །དེ་སྟེང་འབྲུ་ཡི་ཕྱེ་བཏབ་པས། །གསེར་གྱི་ས་གཞི་ཆེན་པོར་གྱུར། །མེ་ཏོག་སྣ་ཚོགས་གཏོར་བས་ན། །འཛམ་གླིང་བྱེ་བ་ཕྲག་བརྒྱར་བསམ། །རིན་ཆེན་སྣ་ལྔ་བརྡར་བས་ནི། །རིན་ཆེན་རི་བདུན་མ་བསྐྱེད་རྫོགས། །སྙིང་པོ་རྣམ་ལྔ་བླུགས་པ་ཡིས། །མི་བརྗེད་དྲན་པའི་གཟུངས་ཐོབ་འགྱུར། །སྨན་ལྔ་འབྲུ་ལྔ་བླུགས་པ་ཡིས། །ནད་དང་མུ་གེའི་བསྐལ་པ་ཐར། །ལྟ་བས་བྱིན་གྱིས་བརླབས་པའི་ཕྱིར། །མགྲོན་བཞིར་རིམ་པས་བསྔོ་མི་དགོས། །དེ་ཡང་འདུས་པའི་སྙིང་པོ་ཉོན། །བསྔོ་བ་མེད་པའི་བསྔོ་བ་ནི། །བླ་མེད་མྱ་ངན་འདས་པས་ན། །འཇིག་ཚོགས་དམྱལ་བ་ཡན་ཆད་དུ། །བླ་མེད་མཆོད་སྦྱིན་འདི་བསྔོས་པས། །སེམས་ཅན་བསམ་པ་འགྲུབ་གྱུར་ནས། །ལྷུན་གྲུབ་ས་ལ་གནས་པར་ཤོག །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཕྱིའི་མཆོད་གཏོར་བཏང་བའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་ཡང་གསུངས་པ། །ནང་གི་མཛད་སྤྱོད་ཚོགས་ཆེན་ནི། །ཕྲིན་ལས་རྣམ་པ་བཞི་ཡི་ཆོས། །དོན་ལྡན་དབང་བསྐུར་བྱེད་ལ་སོགས། །ཚོགས་མཆོད་རིམ་པ་གང་བྱེད་ཀྱང་། །ཡིད་འཐད་པ་ཡི་གནས་དག་ཏུ། །དམ་ཚིག་སེལ་མེད་འཁོར་ཚོགས་བཅས། །དཀྱིལ་འཁོར་མཎྜལ་གཞུང་བཞིན་དུ། །ཡེ་ཤེས་ཚོགས་ཆེན་བསགས་པའི་ཕྱིར། །དགའ་ལྡན་ལྷ་ཡི་ལོངས་སྤྱོད་དང་། །འབྱོར་ལྡན་མི་ཡི་ལོངས་སྤྱོད་དང་། །དགོངས་ལྡན་འཕྲུལ་གྱི་ལོངས་སྤྱོད་རྣམས། །ཡིད་དང་དངོས་སུ་བསགས་བསམས་ལ། །སྔོན་དུ་འགྲོ་བའི་ལས་བྱས་ཏེ། །གནས་ཁང་བྱིན་གྱིས་བརླབས་པ་དང་། །ཏིང་འཛིན་ཞལ་ཟས་སྤྲོ་བསྐྱེད་ནས། །དམ་ཅན་འདུ་ ― DNG001_Page_0504 ―
[མ་དཔེ་གཟིགས་ན་འདིར་གནོན།]
བར་བསྒོ་བ་དང་། །ཐུགས་དམ་བསྐུལ་དང་ཚར་བཅད་ནས། །གསང་བའི་ལྷ་མོས་མཚམས་བཅད་དེ། །རྣལ་འབྱོར་ནོངས་བཤགས་བྱས་ནས་ནི། །དཀྱིལ་འཁོར་བསྐྱེད་དང་དབང་བསྐུར་དང་། །དོན་རྟོགས་བྱིན་གྱིས་བརླབ་མི་དགོས། །མ་རྟོགས་སྔགས་དང་ཡིག་འབྲུས་བརླབ། །ད་ཡང་འདུས་པའི་སྙིང་པོ་ཉོན། །ཡིད་ཀྱིས་མདུན་གྱི་ནམ་མཁའ་ལ། །དུས་གསུམ་བཞུགས་པའི་སངས་རྒྱས་དང་། །བླ་མེད་ཁྲག་འཐུང་རིགས་ལྔའི་ཚོགས། །རིག་འཛིན་རྗེ་བཙུན་བླ་མ་རྣམས། །མཁའ་འགྲོ་འཁོར་བཅས་སྤྱན་དྲངས་ནས། །ཅི་འབྱོར་པ་ཡི་ཚོགས་དྲངས་ནས། །དེ་ནས་རྣལ་འབྱོར་དད་ལྡན་གྱིས། །སྣང་བ་གཟུགས་ཀྱི་མཆོད་པ་དང་། །སྒྲོགས་པ་སྒྲ་ཡི་མཆོད་པ་དང་། །ཐབས་དང་ཤེས་རབ་བདེ་བ་ཡིས། །ཡེ་ཤེས་ལྷ་ལ་རྫོགས་པར་མཆོད། །ལྷག་མ་རོལ་ལ་ལྷ་བཤགས་དང་། །སྐྱེ་ཤི་དུས་ཀྱི་སྨོན་ལམ་བཏབ། །དེ་ཡང་རྡོ་རྗེ་སེམས་དཔའ་ཉོན། །དེ་ལྟར་ཚོགས་ཆེན་གཉིས་རྫོགས་མིའི། །སྟོང་གསུམ་སངས་རྒྱས་སར་ཤེས་ཀྱང་། །གྲོང་ཡུལ་གནས་ལ་ཆགས་མི་བྱ། །མི་སྤྱོད་རྒྱལ་བའི་མཛད་སྤྱོད་ཀྱང་། །འདུ་འཛི་གཡེང་ཕྱོགས་དབང་མི་གཏང་། །རྣམ་སྨིན་ལུས་དང་མ་བྲལ་ཀྱང་། །སེམས་ལ་ཆོས་སྐུ་ཤིན་ཏུ་གསལ། །ཉིན་དང་མཚན་མོ་དབྱེ་རུ་མེད། །ཅི་སྤྱོད་རང་བྱུང་ཡེ་ཤེས་ལ། །མ་ཆགས་དང་དུ་བླང་བ་མེད། །རྟོག་པ་སྐྱོན་དུ་འབོར་བ་མེད། །དཀའ་ཐུབ་ཚུལ་གྱིས་བསྡམ་པ་མེད། །གང་ཡང་བློ་ཡི་རྟེན་མེད་ཀྱང་། །འོན་ཀྱང་མ་གོ་དྲང་བའི་ཕྱིར། །རེ་ཞིག་ཙམ་དུ་དཀར་ཆོས་སྤྱོད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། གསང་སྔགས་ཀྱི་ཚོགས་འབུལ་བའི་ལེའུ་སྟེ་ཉི་ཤུ་རྩ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ཆོས་རྣམས་ཀུན་གྱི་རྩ་བ་ནི། །སྲོག་ནི་རྣམ་པ་གཉིས་སུ་འདུས། །མ་རིག་ཐར་པ་གང་སྤྱོད་པ། །དེ་ཡི་བྱེ་བྲག་ངས་བཤད་ཉོན། །ཐར་པ་མྱ་ངན་འདས་པའི་ཆོས། །སེམས་གསང་ལྟ་ཉམས་རང་སྲོག་གཅོད། །ཉོན་མོངས་དབང་དུ་གྱུར་པས་ན། །འདུས་ ― DNG001_Page_0505 ―
[མ་དཔེ་གཟིགས་ན་འདིར་གནོན།]
བྱས་ཆོས་ཀྱིས་མི་སྐྱོབ་ལྟུང་། །དེ་ཡང་རྡོ་རྗེ་སེམས་དཔའ་ཉོན། །དུག་ལྔ་འཁོར་བའི་རྩ་བ་ནི། །མ་རིག་ཀུན་གཞི་ཡིན་པའི་ཕྱིར། །ལུས་ཅན་སྲོག་ནི་བཅད་མི་འགྱུར། །ཀུན་བཟང་ཤེས་རབ་མཚོན་རྣོན་གྱིས། །ཐོག་མཐའི་བར་དུ་མ་རིག་བསད། །དེ་ཡང་སེམས་ཅན་སྲོག་འདི་ལ། །ལུས་འདི་གནས་སྐབས་འདྲེལ་ཡོད་ཀྱི། །ལུས་ཅན་སྲོག་ནི་བཅད་མི་བྱ། །གལ་ཏེ་ཞེ་སྡང་སྲོག་གཅོད་ན། །རང་སེམས་མ་རྟོགས་ཐ་མལ་ཏེ། །སྐྱབས་འགྲོ་ཉམས་ཕྱིར་དམྱལ་བར་ལྟུང་། །སྐྱེ་བོ་བདུན་འགྱུར་སྡིག་པ་ཆེ། །དེ་ཡང་བློ་གྲོས་དམ་པ་ཉོན། །ནམ་མཁའ་མེ་ཡིས་མི་ཚིག་བཞིན། །དེ་བཞིན་དོན་རྟོགས་རྣལ་འབྱོར་པས། །སློབ་དཔོན་སྐུ་དགྲ་ལ་སོགས་པ། །བསྒྲལ་བའི་ཞིང་བཅུ་བསྒྲལ་གྱུར་ཀྱང་། །སྒྲིབ་པར་མི་འགྱུར་ཚོགས་སུ་འགྱུར། །ངོ་བོ་ཉིད་ཀྱི་སྐུར་དྲན་ན། །མ་རིག་སྲོག་ནི་བཅད་པའི་ཕྱིར། །སྲོག་གི་ནང་ན་དམ་པའི་མཆོག །དེ་དང་མི་འབྲལ་མངོན་སངས་རྒྱས། །དེ་ཡང་འདུས་པའི་སྙིང་པོ་ཉོན། །གཞན་གྱི་མི་དང་མི་མ་ཡིན། །རྒྱུད་བཟུང་ནོར་ནི་དངོས་པོའི་རྫས། །གསང་སྔགས་སྒོར་ཞུགས་རྣལ་འབྱོར་པས། །རྐུ་བའི་སེམས་ཀྱིས་བླང་མི་བྱ། །དེ་ཕྱིར་བདག་ཉིད་རྫས་ལ་ཡང་། །མ་བྱིན་བླང་སེམས་དྲན་ན་ནི། །ཡི་དྭགས་གནས་སུ་སྐྱེ་འགྱུར་གསུངས། །གཞན་གྱི་རྫས་ལ་སྨོས་ཅི་དགོས། །དེ་ཡང་བློ་གྲོས་དམ་པ་ཉོན། །རྒྱ་མཚོ་སྐྱོགས་ཀྱིས་མི་འགྲིབ་ལྟར། །དོན་རྟོགས་རྣལ་འབྱོར་གདེང་ལྡན་པས། །སེར་སྣས་བཅིངས་པའི་རྫས་རྣམས་ནི། །གཡོ་སྒྱུའི་ཐབས་ཀྱིས་ནོར་བླངས་ལ། །བླ་མ་དཀོན་མཆོག་ཚོགས་སུ་འབུལ། །བླ་མ་ངེས་པའི་ལུང་ལྡན་གྱིས། །དེ་ལ་གསང་བའི་སྐུ་ལྔ་བྱིན། །དེ་ཕྱིར་མ་བྱིན་བླངས་ན་གྲོལ། །ད་ཡང་འཁོར་གྱི་སྙིང་པོ་ཉོན། །གནས་སྐབས་འདྲེལ་བའི་ལུས་ཡོད་པས། །འཚོ་བའི་བཟའ་བགོ་དགོས་པའི་ཕྱིར། །ལོག་འཚོའི་གཡོ་སྒྱུ་མ་ཡིན་པར། །ཆོས་ཀྱིས་འཚོ་བའི་རྫས་རྣམས་བཙལ། །དེ་ཡང་ལམ་གྱི་རྣལ་འབྱོར་པས། །བུང་བ་བཅུད་ལེན་ཞེན་མེད་ལྟར། །ཁྱིམ་པ་སུན་ནི་མ་ཕྱུང་བར། །འཚོ་བའི་ཡོ་བྱད་ཚོད་ཟིན་ ― DNG001_Page_0506 ―
[མ་དཔེ་གཟིགས་ན་འདིར་གནོན།]
བྱ། །དེ་ཡང་རྡོ་རྗེ་སེམས་དཔའ་ཉོན། །ལུས་ལ་ཕོ་མོ་ཡོད་པའི་ཕྱིར། །སེམས་ཅན་ལས་ཀྱི་ཆགས་སྤྱོད་ཚེ། །འཁོར་བའི་འབྲས་བུ་མ་སྨིན་ན། །དོན་ཟིན་བདེ་བ་གྲོགས་སུ་ཆེ། །དེ་ཕྱིར་སྔ་ཕྱི་མ་སོང་བའི། །ཡེ་ཤེས་ཆོས་སྐུ་རང་ཡིན་པས། །དེ་ལ་སྐྱོན་གྱིས་མི་གོས་ཕྱིར། །ཐབས་དང་ལྟ་བས་ཟིན་པར་བྱ། །ད་ཡང་བློ་གྲོས་དམ་པ་ཉོན། །བདག་ཉིད་མ་ཡིན་གཞན་དག་ལ། །ཆགས་སེམས་ཙམ་ཡང་མི་བྱ་ལ། །དམ་ཚིག་སྡོམ་པ་སྲུང་བ་དང་། །རྒྱལ་རིགས་མོ་དང་བསླབ་སྲུང་དང་། །བདག་པོ་ཅན་གྱི་བུད་མེད་ནི། །རྩ་བ་ཡན་ལག་དམ་ཚིག་གི། །ཉམས་པར་བྱེད་པའི་གཞི་ཡིན་ཕྱིར། །རོ་མྱགས་ངུ་འབོད་དམྱལ་བར་ལྟུང་། །བག་ཆགས་ཞེན་པའི་རྒྱུ་ཡིན་པས། །བལྟ་བས་མ་ཟིན་རྟག་ཏུ་སྤང་། །ཞེན་མེད་ཆོས་སྐུའི་སྤྱོད་པར་བཤད། །དེ་ཕྱིར་འཁོར་སྤངས་རབ་ཏུ་གཅེས། །དེ་ཡང་འདུས་པའི་སྙིང་པོ་ཉོན། །འཇིག་རྟེན་འཁོར་བ་རྫུན་གྱི་ཆོས། །ཡོད་མེད་སྐྱོན་ལ་དམ་པར་བལྟ། །མ་རིག་འཁྲུལ་པར་ཐེ་ཚོམ་མེད། །མི་བདེན་རྫུན་པར་ཤིན་ཏུ་སྨྲ། །དེ་ཡང་བློ་གྲོས་དམ་པ་ཉོན། །འདུ་ཤེས་བསྒྱུར་ནས་རང་འདོད་ཀྱིས། །མི་ཆོས་བླ་མའི་རྫུན་སོགས་བློས། །རང་སེམས་བཅོས་ཕྱིར་དོན་དང་འགལ། །དེ་བཞིན་ལྕེ་རྨོད་དམྱལ་བར་ལྟུང་། །དེ་ཡང་རང་སེམས་རྟོགས་པའི་དོན། །འཁོར་བ་མྱ་ངན་འདས་པའི་ཆོས། །གཉིས་ཀས་འབྲས་བུ་མི་འབྱིན་ན། །དུག་ལྔ་རང་གྲོལ་རྒྱལ་བའི་ཐུགས། །རྟོགས་ལ་དྲང་པོ་མ་བཅོས་པ། །སངས་རྒྱས་མཛད་སྤྱོད་དེ་གོ་བས། །གཡོ་སྒྱུ་མེད་པ་དམ་པའི་དོན། །དེ་ལྟར་རྣལ་འབྱོར་དམ་པའི་ལམ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། གསང་བའི་སྤྱོད་པ་བསྟན་པའི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་ཀུན་རིག་རྒྱལ་པོ་ཡིས། །མ་བསྒོམས་འབྲལ་མེད་བཀའ་སྩལ་པ། །སེམས་ཉིད་བསྒོམ་དུ་མེད་པའི་དཔེ། །ནམ་མཁའ་བསྒོམ་དུ་སེམས་དང་བྲལ། །དེ་བཞིན་སེམས་ཀྱི་སེམས་ ― DNG001_Page_0507 ―
[མ་དཔེ་གཟིགས་ན་འདིར་གནོན།]
བསྒོམ་དུ། །ཆོས་ཉིད་སྤྱད་པའི་ཡུལ་ལས་འདས། །སེམས་ཀྱི་གཞི་ཤེས་བསྒོམ་མི་དགོས། །དོན་གཉིས་ཚིག་ཏུ་འབྱུང་བའི་ཕྱིར། །ཚིག་ལ་དོན་མེད་ཟེར་བ་འཁྲུལ། །དེ་ཡང་རྡོ་རྗེ་སེམས་དཔའ་ཉོན། །རྒྱུན་དུ་འབྲལ་མེད་ཆོས་ཀྱི་སྐུ། །ཉམས་མྱོང་མེད་པ་ཉམས་ཀྱི་མཆོག །ཅི་ཡང་ཡིད་ལ་མི་བྱེད་ན། །གོལ་དང་སྒྲུབ་པར་ག་ལ་འགྱུར། །བསྒོམ་པའི་མཆོག་ཏུ་དེ་གསུངས་སོ། །རྣལ་འབྱོར་སྤྱོད་ལམ་ཐམས་ཅད་དུ། །ལྟ་བའི་དམ་ཚིག་ཆེན་པོ་ནི། །མ་ནོར་མ་བཅོས་དམ་ཚིག་གིས། །དེ་རྟོགས་དེ་ལས་མི་འདའ་བས། །རྒྱལ་བ་རྣམས་ཀྱི་ཐུགས་དམ་ཡིན། །སྐྱེ་མེད་དོན་ལ་སེམས་ཞུགས་པའི། །ནམ་མཁའ་ལྟ་བུའི་རྣལ་འབྱོར་དེ། །དེ་ལས་མི་འདའ་དམ་ཚིག་ནི། །རང་རིག་ཆོས་སྐུ་དམ་པའི་མཆོག །བརྗེད་པ་མེད་པའི་དམ་ཚིག་ཡིན། །བསྲུང་དུ་མེད་པའི་ངང་དུ་བསྡམ། །དེ་ཉིད་དྲན་པའི་རྣལ་འབྱོར་པས། །སྤྱོད་ལམ་རྣམ་བཞི་གང་བྱེད་ཀྱང་། །འཆིང་བར་མི་འགྱུར་གྲོལ་བར་ངེས། །དེ་ཡང་འདུས་པའི་སྙིང་པོ་ཉོན། །སྙིང་པོ་ཆོས་སྐུ་རང་གསལ་དོན། །མ་བསྒོམས་འབྲལ་མེད་ཡེ་ཤེས་ཀློང་། །རང་སེམས་ཤེས་པ་སྣ་ཚོགས་པ། །ཡེ་ཤེས་ལས་ནི་གཞན་མེད་པ། །ཐ་མལ་རང་སེམས་ཆོས་ཉིད་ནི། །དེ་ཡང་མི་འགྱུར་ངོ་བོ་སྟོན། །དག་དང་མ་དག་གཞི་གཅིག་ཕྱིར། །དུས་དང་སྤྱོད་ལམ་ཐམས་ཅད་དུ། །གཉིད་དང་བར་དོར་བསྒོམ་པ་ནི། །ད་ལྟར་ཝལ་ལེ་སྣང་བ་རྣམས། །མ་རྟོགས་བར་དུ་འཁྲུལ་པ་སྟེ། །རྟོགས་ན་དེ་ཉིད་ཆོས་སྐུ་ཡིན། །དེ་ཡང་འདུས་པའི་སྙིང་པོ་ཉོན། །ཐིག་ལེ་མ་བཙལ་ལྷུན་གྱིས་གྲུབ། །ཡེ་ནས་རང་བྱུང་ཆོས་སྐུ་ནི། །ཡུལ་ཉིད་སེམས་སུ་མི་བསྒོམས་ཕྱིར། །སྒོམ་པ་པོ་ཡང་མེད་པར་འགྱུར། །གང་གིས་གང་ལ་བསམས་ཤིང་བསྒོམ། །དེ་ཕྱིར་གནས་ལུགས་བསྒོམ་དུ་མེད། །མི་རྟོག་ཐབས་ཀྱིས་ཅི་ཞིག་བྱ། །དབང་པོ་རབ་ཀྱིས་བཙལ་དུ་མེད། །ཐ་མལ་མི་རྟོག་གདམས་ངག་མེད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། བསྒོམ་དུ་མེད་པར་ལ་བཟླ་ ― DNG001_Page_0508 ―
[མ་དཔེ་གཟིགས་ན་འདིར་གནོན།]
བའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །དད་ལྡན་འཁོར་ལ་ཕན་དོན་དུ། །ཀུན་རིག་སྟོན་པ་ཆོས་རྗེ་ལ། །བདེན་པའི་ཡིད་ཀྱིས་འདི་སྐད་གསོལ། །འབྲལ་མེད་རྐྱེན་ཐུབ་ཏིང་འཛིན་གྱིས། །ཡེ་ཤེས་བདེ་བ་རྐྱེན་ཐུབ་དང་། །སྡུག་བསྔལ་ཞི་བྱེད་རྐྱེན་ཐུབ་དང་། །བཏང་སྙོམས་ལྷག་མཐོང་རྐྱེན་ཐུབ་དང་། །རྨི་ལམ་ཀློང་ཐིམ་རྐྱེན་ཐུབ་དང་། །དུག་ལྔ་རང་གྲོལ་རྐྱེན་ཐུབ་དང་། །སྐྱེ་ཕྱིས་མི་ལེན་རྐྱེན་ཐུབ་རྣམས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །བདེ་བ་ནང་ནས་ཕྱིར་བསྟན་པ། །ནང་གི་ཞི་གནས་བདེ་བ་སྟེ། །གང་ཟག་བདག་མེད་བདེ་བ་དང་། །ཆོས་ལ་བདག་མེད་བདེ་བ་དང་། །འཇིག་རྟེན་མི་གཡོའི་བདེ་བ་ཡིན། །དེ་ཡང་འདུས་པའི་སྙིང་པོ་ཉོན། །ཕོ་མོ་ལུས་ཀྱི་བདེ་བ་དང་། །རང་སེམས་རྟོགས་པའི་བདེ་བ་དང་། །ཐབས་ཟིན་འཕྲང་གི་བདེ་བ་དང་། །ཐབས་མེད་འདོད་ཆགས་བདེ་བའོ། །དེ་ཡང་འདུས་པའི་སྙིང་པོ་ཉོན། །ཕྱི་འཛིན་ལོངས་སྤྱོད་བདེ་བ་ཡང་། །ཟས་ནོར་འཁོར་གྱི་ལོངས་སྤྱོད་དང་། །འདོད་ཡོན་ལྔ་ལ་ཅི་བདེར་སྤྱོད། །ཞེན་པའི་དབང་གིས་ཆོག་ཤེས་མེད། །དེ་ཡང་རྡོ་རྗེ་སེམས་དཔའ་ཉོན། །ནང་གི་ཞི་གནས་བདེ་བ་ནི། །གང་ཟག་བདག་མེད་འགགས་པ་རུ། །མི་གོལ་རྐྱེན་གྱི་གདམས་ངག་གིས། །སྒོ་ལྔ་མི་འགག་རང་གསལ་ལ། །ཡིད་ལ་ལྷག་མཐོང་དྲན་པས་བཟུང་། །རྐྱེན་ཐུབ་འབྲལ་མེད་ཡེ་ཤེས་ཡིན། །དེ་ཡང་འདུས་པའི་སྙིང་པོ་ཉོན། །ཆོས་ལ་བདག་མེད་བདེ་བ་ནི། །དབུ་མ་སེམས་ཙམ་བསྒོམ་པ་སྟེ། །དེར་མི་གོལ་བའི་གདམས་ངག་ནི། །བདེན་གཉིས་སེམས་སུ་བློ་མི་བསྡུ། །རིག་པས་མི་གཞིག་རང་ས་ལ། །ཡུལ་མེད་ཤེས་པ་རང་བྱུང་ཤེས། །ཡེངས་པ་མི་འབྱུང་རྐྱེན་ཐུབ་རྣམས། །དེ་ཕྱིར་འབྲལ་མེད་ཡེ་ཤེས་ཡིན། །དེ་ཡང་འདུས་པའི་སྙིང་པོ་ཉོན། །འཇིག་རྟེན་མི་གཡོའི་བདེ་བ་ནི། །བསམ་གཏན་གསུམ་སོགས་བདེ་བ་དེ། །ཞེན་པ་ཡོད་ཕྱིར་འཁོར་བའི་རྒྱུ། །དེར་མི་གོལ་ ― DNG001_Page_0509 ―
[མ་དཔེ་གཟིགས་ན་འདིར་གནོན།]
བའི་གདམས་ངག་ནི། །ལུང་ལྡན་རྐྱེན་གྱི་གདམས་ངག་རྒྱུན། །ཤན་ཕྱེད་ངོས་ཟིན་ལ་ཟློས་ཕྱིར། །བདེ་བ་ཞེན་མེད་རྐྱེན་ཐུབ་པའི། །ཡིད་ཆེས་གདེང་གིས་ཟིན་པའི་ཕྱིར། །འགལ་རྐྱེན་མི་འབྱུང་ཆོས་སྐུར་གསལ། །དེ་ཡང་རྡོ་རྗེ་སེམས་དཔའ་ཉོན། །ཕྱི་འཛིན་ལོངས་སྤྱོད་ཡུལ་ལ་ཞེན། །དེར་མི་གོལ་བའི་གདམས་ངག་ནི། །ཡུལ་རིག་བར་དུ་བདག་གཞན་གྱི། །ངར་འཛིན་བདེན་འཛིན་དམ་པར་ནི། །སྣང་བར་ཞེན་པ་མེད་པའི་ཕྱིར། །ཕྱི་ཡི་ཡེངས་པའི་རྐྱེན་རྣམས་ཐུབ། །དེ་ཕྱིར་སྣང་བ་ཆོས་ཀྱི་དབྱིངས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། བདེ་ལ་ཞེན་མེད་ཡེ་ཤེས་སུ་རྐྱེན་ཐུབ་པར་བསྟན་པའི་ལེའུ་སྟེ་ཉི་ཤུ་རྩ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །སྡུག་བསྔལ་ཞི་བྱེད་བཀའ་སྩལ་པ། །སེམས་ཅན་ཀུན་ལ་གནས་པ་ཡི། །ཕྱི་ཡི་སྡུག་བསྔལ་ཞི་གྱུར་པའི། །ལུས་ཀྱི་སྡུག་བསྔལ་ནད་ཡིན་ཏེ། །བཞི་བརྒྱ་རྩ་གཅིག་འདུ་བ་བཞི། །མི་བདེ་སྣ་ཚོགས་བསྐྱེད་པར་བྱེད། །དེ་ཡང་འདུས་པའི་སྙིང་པོ་ཉོན། །ནང་གི་སྡུག་བསྔལ་བདག་གཞན་ལ། །བྱམས་བྲལ་སྡང་འཕྲད་དོགས་པ་དང་། །ཡོད་སྐྱོང་མེད་ཚོལ་ཞེན་པ་ཀུན། །ཕྱི་ཡི་སྡུག་བསྔལ་ཡིན་པར་གསུངས། །དེ་ཡང་འཁོར་གྱི་སྙིང་པོ་ཉོན། །རང་ལུས་ན་ཚ་བཟོད་དཀའ་སྟེ། །རྐྱེན་དབང་མི་གོལ་གདམས་ངག་ནི། །གང་ན་བློ་ཡིས་མ་བཟུང་བར། །བཟོད་དཀའ་རང་རིག་ཆོས་སྐུར་ཤེས། །སྔ་ཕྱི་མ་བཏང་ད་ལྟ་ཡི། །བདེ་སྡུག་བདག་ཀྱང་ཆོས་སྐུར་གསལ། །སྡུག་བསྔལ་རང་ཞི་ཡེ་ཤེས་འཆར། །ཡི་ཆད་ཁ་བཞིའི་རྐྱེན་རྣམས་ཐུབ། །དེ་ཡང་རྡོ་རྗེ་སེམས་དཔའ་ཉོན། །ཕྱི་ཡི་སྡུག་བསྔལ་རྣམ་བཞི་ལ། །ཞེན་པ་རང་རྒྱུད་མི་གོལ་བ། །ཡུལ་སེམས་བར་དོའི་གདམས་ངག་ནི། །ངེས་དོན་དྲན་པས་རྐྱེན་མི་ཚུགས། །སྡུག་བསྔལ་ཡེ་ཤེས་ངང་དུ་ཤར། །རྣམ་རྟོག་མི་བྱེད་ཆོས་ཀྱི་སྐུ། །དེ་ཡང་འདུས་པའི་སྙིང་པོ་ཉོན། །དེ་དག་སྡུག་བསྔལ་ཕྱི་ནང་གཉིས། །རྩ་བ་མ་རིག་བློས་བྱས་ཏེ། །ལུང་ ― DNG001_Page_0510 ―
[མ་དཔེ་གཟིགས་ན་འདིར་གནོན།]
ལྡན་རྐྱེན་གྱིས་མ་རིག་འབྲལ། །ཡེ་ཤེས་རང་རིག་ཆོས་སྐུར་ཤེས། །སྡུག་བསྔལ་བྱ་བའི་མིང་ཡང་མེད། །རང་འབྱུང་རྟོགས་པས་མངོན་སངས་རྒྱ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། སྡུག་བསྔལ་ཞི་བྱེད་ཆོས་སྐུ་རྐྱེན་ཐུབ་པར་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །མ་རིག་ལས་བྱུང་བཏང་སྙོམས་ལ། །ལྷག་མཐོང་རིག་པས་བཀའ་སྩལ་པ། །བདེ་སྡུག་མ་དྲན་བཏང་སྙོམས་ནི། །ཞི་གནས་མ་རིག་གཏི་མུག་སྟེ། །གང་ལ་བློ་ཡང་མ་ཞུགས་པས། །དགེ་སྡིག་གཉིས་སུ་ལུང་མ་བསྟན། །དེ་ལས་བག་ཙམ་ཆ་ཕྲ་ལས། །ལུང་མ་བསྟན་པ་རྣམ་གསུམ་བྱུང་། །བདེ་སྡུག་སྐྱེད་པའི་རྒྱུར་ནི་གསུངས། །དེ་ཡང་འདུས་པའི་སྙིང་པོ་ཉོན། །ཤེས་བཞིན་ལུང་མ་བསྟན་དུ་ནི། །མི་གོལ་བ་ཡི་གདམས་ངག་ནི། །ཐོག་མར་རང་བྱུང་ངོ་ཤེས་ནས། །མ་རིག་མེད་ཕྱིར་ངེས་ལུང་བསྟན། །དེ་ཕྱིར་རང་རིག་ཆོས་སྐུ་རྟོགས། །བཏང་སྙོམས་ལྷག་མཐོང་རིག་པར་ཤར། །ཀུན་གཞི་དག་ཕྱིར་རྐྱེན་ཐུབ་པས། །འགྱུར་མེད་ཡེ་ཤེས་ཆོས་ཀྱི་སྐུ། །ད་ཡང་འདུས་པའི་སྙིང་པོ་ཉོན། །བཏང་སྙོམས་ལྷག་མཐོང་རང་བྱུང་དེ། །ཤེས་པ་གསལ་ལ་མི་རྟོག་པ། །ཆོས་སྐུ་མི་གཡོ་དོན་གྱིས་ཟིན། །དེ་ཕྱིར་ལུང་ལྡན་ཆོས་སྐུར་གསལ། །གསལ་ཙམ་ཉིད་ན་རྐྱེན་ཐུབ་ཕྱིར། །རང་བྱུང་ཐུགས་ལ་འགྱུར་བ་མེད། །ད་ཡང་འདུས་པའི་སྙིང་པོ་ཉོན། །ངེས་པའི་ལུང་བསྟན་གདམས་ངག་གིས། །དགེ་སྡིག་མ་དྲན་ཆོས་སྐུར་དྲན། །དེ་ཕྱིར་ལྷག་མཐོང་རིག་པ་ལ། །ཐིག་ལེ་ཉག་གཅིག་དེ་ལ་བྱ། །རང་བྱུང་སྙིང་པོ་ཡུལ་ལས་འདས། །སེམས་ཀྱི་སྤྱོད་ཡུལ་མ་ཡིན་ཕྱིར། །རྟོགས་པས་ཆོག་ལ་བསྒོམ་མི་དགོས། །ནོར་བུ་རིན་ཆེན་རྙེད་དང་འདྲ། །དེ་ཡང་འཁོར་གྱི་སྙིང་པོ་ཉོན། །ཐ་མལ་ཤེས་པ་བཏང་སྙོམས་འདི། །ཀུན་བཟང་རྒྱལ་པོའི་དགོངས་པར་ཤེས། །དེ་ཚེ་ཡུལ་སེམས་གཉིས་ལས་འདས། །རང་བྱུང་ཆོས་སྐུ་ཇི་ལྟར་གསལ། །དེ་ ― DNG001_Page_0511 ―
[མ་དཔེ་གཟིགས་ན་འདིར་གནོན།]
ལ་འགལ་བའི་སྐྱོན་མི་འབྱུང་། །འདུས་མ་བྱས་ནི་ནམ་མཁའ་འདྲ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། བཏང་སྙོམས་ལྷག་མཐོང་རིག་པས་རྐྱེན་ཐུབ་པར་བསྟན་པའི་ལེའུ་སྟེ་སོ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །རྨི་ལམ་ཀློང་ཐིམ་བཀའ་སྩལ་པ། །རྣལ་འབྱོར་དམ་པ་གཉིད་བྱུང་ཚེ། །རྨི་ལམ་དགེ་སྡིག་ལུང་མ་བསྟན། །བག་ཆགས་མཚམས་སྦྱོར་ལྟས་བསྟན་པའི། །རྨི་ལམ་སྣ་ཚོགས་བྱུང་དུས་སུ། །ཡེ་ཤེས་ཀློང་ཐིམ་ཤེས་པར་བྱ། །ད་ཡང་འདུས་པའི་སྙིང་པོ་ཉོན། །ཚེ་སྟོད་སྔར་བྱས་གང་རྨིས་པ། །བག་ཆགས་རྨི་ལམ་ཡིན་ཤེས་པས། །དེ་རྗེས་མི་གཅོད་དོན་དྲན་ཕྱིར། །བག་ཆགས་རྨི་ལམ་རང་སྟོང་ནས། །ཡེ་ཤེས་ཀློང་ཐིམ་རྐྱེན་ཐུབ་ཚེ། །འདི་ལ་མ་མཐོང་མེད་མ་མྱོང་། །གང་རྨིས་པ་ཡི་མཚམས་སྦྱོར་བས། །བག་ལ་ཉལ་དུ་ཤེས་པའི་ཕྱིར། །ཀུན་བརྟགས་མེད་པའི་ལྷག་མཐོང་གིས། །མཚམས་སྦྱོར་རང་ཞི་རྐྱེན་རྣམས་ཐུབ། །ད་ཡང་རྡོ་རྗེ་སེམས་དཔའ་ཉོན། །འཇིག་རྟེན་ལྷས་བྱས་ལུང་བསྟན་པའི། །རྨི་ལམ་བཟང་ངན་གང་བྱུང་ཡང་། །བསླུ་བའི་བདུད་དུ་ཤེས་པའི་ཕྱིར། །དམ་པར་གཏད་མེད་གང་བཞག་པ། །བསླུ་མེད་རྐྱེན་ཐུབ་ཆོས་སྐུར་གསལ། །ད་ཡང་འདུས་པའི་སྙིང་པོ་ཉོན། །རྣལ་འབྱོར་དམ་པ་གཉིད་ལོག་ཚེ། །དགེ་སྡིག་ལུང་མ་བསྟན་པའི་ཚེ། །གང་དམིགས་གང་ཡང་མ་བསམ་པར། །ཆོས་ཉིད་ངང་ལ་གནས་པར་བྱ། །གང་ཡང་རྟོག་པ་མ་ཞུགས་ན། །བཟང་ངན་ཞེན་པ་རང་ཞི་སྟེ། །ཡེ་ཤེས་ཀློང་ཐིམ་རྐྱེན་རྣམས་ཐུབ། །དེ་ཕྱིར་ངེས་དོན་གདམས་ངག་ཆེ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། གཉིད་ཡེ་ཤེས་ཀློང་ཐིམ་དུ་རྐྱེན་ཐུབ་པར་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་འདུས་པའི་དད་ལྡན་ལ། །ཀུན་རིག་སྟོན་པ་ཆོས་རྗེ་ཡིས། །དུག་ལྔ་རང་གྲོལ་བཀའ་སྩལ་པ། །ཉི་ཤར་མུན་སྒྲིབ་མེད་པ་བཞིན། །ལུང་ ― DNG001_Page_0512 ―
[མ་དཔེ་གཟིགས་ན་འདིར་གནོན།]
ལྡན་མ་རིག་རྩད་གཅོད་ནས། །ངོ་བོ་རིག་པ་ཆོས་སྐུར་གསལ། །མ་རིག་མེད་པས་གཏི་མུག་སངས། །ད་ཡང་འདུས་པའི་སྙིང་པོ་ཉོན། །ལྡུམ་བུ་སད་ཀྱིས་བསད་པ་ལྟར། །ཞེ་སྡང་ཡུལ་མེད་དོན་ཤེས་པས། །ལོག་གནོན་དྲན་པ་བསལ་བའི་ཕྱིར། །ཞེ་སྡང་རང་གྲོལ་རྐྱེན་རྣམས་ཐུབ། །རྨི་ལམ་འདོད་ཆགས་འཆལ་མེད་བཞིན། །སྔ་ཕྱིར་མ་སོང་དུས་དེ་རུ། །ཕོ་མོ་འདོད་ཆགས་ཅི་སྤྱོད་ཀྱང་། །དེ་ཙམ་ཉིད་ན་སྐྱོན་མི་གོས། །ད་ཡང་རྡོ་རྗེ་སེམས་དཔའ་ཉོན། །རི་བོ་ཆེན་པོའི་ཁར་ཕྱིན་ལྟར། །ང་རྒྱལ་ཆེན་པོའི་རྟོག་པ་འཆང་། །ལྷག་མཐོང་རིག་པའི་ཡེ་ཤེས་ཀྱིས། །ང་རྒྱལ་རང་སར་རྐྱེན་ཐུབ་གྲོལ། །ལྟ་བ་མ་ནོར་གདེང་གི་འཕྲང་། །གོལ་སྒྲིབ་མེད་པའི་ཆོས་སྐུ་ལ། །ཕྲག་དོག་རང་སར་རྐྱེན་ཐུབ་ཕྱིར། །བ་མོ་ལ་ནི་ཉི་ཤར་འདྲ། །ད་ཡང་འདུས་པའི་སྙིང་པོ་ཉོན། །ངེས་དོན་ཤེས་པས་གཏི་མུག་འཇོམས། །རང་རིག་དྲན་པས་ཞེ་སྡང་བརླག །བདེ་བ་ཞེན་མེད་འདོད་ཆགས་བྲལ། །ཡིད་ཆེས་འཛིན་མེད་ང་རྒྱལ་གྲོལ། །ཆོས་སྐུ་དྲན་པས་ཕྲག་དོག་དག །ད་ཡང་རྡོ་རྗེ་སེམས་དཔའ་ཉོན། །དོན་གྱི་ངོ་བོ་གནས་ལུགས་ལ། །སྒྲོ་སྐུར་གཉིས་ཀྱི་སྐྱོན་མེད་པས། །དུག་ལྔ་ཀུན་བརྟགས་རང་སར་གྲོལ། །དེ་ཕྱིར་ཆོས་སྐུ་སྙིང་པོར་གསུངས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། དུག་ལྔ་རང་གྲོལ་རྐྱེན་ཐུབ་བསྟན་པའི་ལེའུ་སྟེ་སོ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །བར་དོར་རྐྱེན་ཐུབ་བཀའ་སྩལ་པ། །ངེས་དོན་རྟོགས་པའི་རྣལ་འབྱོར་པས། །དུས་ཀྱི་ཐ་མ་བྱུང་བའི་ཚེ། །སྣང་བ་སྐྱེ་དང་མཆེད་པ་དང་། །སྣང་བ་འགྱུར་ཞིང་ཐོབ་པའི་དུས། །ལུང་ལྡན་ངེས་པའི་གདམས་ངག་གིས། །བར་དོར་སྐྱེ་བ་མི་ལེན་པའོ། །རྐྱེན་ཐུབ་འབྲས་བུ་སངས་རྒྱས་འབྱུང་། །དེ་ཡང་འདུས་པའི་སྙིང་པོ་ཉོན། །སྣང་བ་འགྱུར་ཞིང་སྤང་བའི་དུས། །བར་དོར་ལུས་གསུམ་མི་ལེན་པའོ། །ངེས་དོན་གདམས་ངག་དོན་དྲན་པས། །གཞི་གནས་ ― DNG001_Page_0513 ―
[མ་དཔེ་གཟིགས་ན་འདིར་གནོན།]
མ་རིག་མེད་པའི་ཕྱིར། །རྐྱེན་བཞིས་མ་བསྐྱེད་ལུས་མི་ལེན། །ཤེས་པ་ཆོས་སྐུ་འགྱུར་མེད་བརྟན། །མངོན་ཤེས་དྲུག་དང་རྗེས་དྲན་དྲུག །སངས་རྒྱས་ས་ཡི་ཡོན་ཏན་ཀུན། །ཐོགས་པ་མེད་པར་དུས་གཅིག་རྫོགས། །དེ་ཕྱིར་རྐྱེན་ཐུབ་ས་ཟིན་པས། །མ་རིག་སངས་ལ་ཡེ་ཤེས་རྒྱས། །ཐམས་ཅད་མཁྱེན་པའི་ཡེ་ཤེས་དང་། །སངས་རྒྱས་ཡོན་ཏན་ཀུན་རྫོགས་ཕྱིར། །འགྲོ་དོན་གཟུགས་སྐུ་དུས་གཅིག་འབྱུང་། །ད་ཡང་འདུས་པའི་སྙིང་པོ་ཉོན། །དེ་ཚེ་ཡེ་ཤེས་སྣང་བ་ལས། །བག་ཆགས་བྲལ་བས་ཆགས་སྡང་མེད། །སྣང་བ་མེད་པས་ཞེན་པ་གྲོལ། །རིག་པ་གསལ་བ་ཆོས་སྐུར་ཤེས། །ལུས་ཅན་གང་ཡང་མེད་པའི་ཕྱིར། །ཕོ་མོ་མ་མཐོང་མངལ་མི་འཇུག །དེ་ཕྱིར་སྐྱེ་བ་མི་ལེན་ངེས། །ད་ཡང་འདུས་པའི་སྙིང་པོ་ཉོན། །ངེས་པའི་འབྲས་བུ་སངས་རྒྱས་ནི། །རྣམ་དག་ཆོས་སྐུ་གཅིག་གཅིག་ལ། །ངེས་དོན་འབྲས་བུ་ལོགས་ན་མེད། །དྲང་དོན་སངས་རྒྱས་གྲངས་མང་ཡང་། །མཐར་ཐུག་ཆོས་སྐུ་ཡིན་པའི་ཕྱིར། །བསྒྲུབ་པ་བས་ཀྱང་རྟོགས་པ་གཅེས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། སྲིད་པ་བར་མ་དོ་ལ་སྐྱེ་བ་ཕྱི་མ་མི་ལེན་པར་བསྟན་པའི་ལེའུ་སྟེ་སོ་བཞི་པའོ།། །།དེ་ནས་ཀུན་རིག་རྒྱལ་པོ་ལ། །འདུས་པའི་འཁོར་གྱིས་ཡང་གསོལ་པ། །ཐེ་ཚོམ་གེགས་རྣམས་བསལ་བའི་ཕྱིར། །གདམས་ངག་རྣམ་དབྱེ་ཇི་ལྟར་དབྱེ། །འཁྲུལ་པ་ལོག་པའི་རྟགས་ཆེན་གང་། །ཐིག་ལེའི་ལ་ཤན་ཇི་ལྟར་དབྱེ། །ངེས་པར་ཐེ་ཚོམ་ཇི་ལྟར་བསལ། །དེ་སྐད་ཞུས་པའི་དོན་གསན་ནས། །ཀུན་རིག་རྒྱལ་པོས་བཀའ་སྩལ་པ། །ལྟ་སྒོམ་སྤྱོད་པ་འབྲས་བུ་ཡི། །དབྱེ་བ་རྣམ་པ་དྲུག་དྲུག་གི། །དབྱེ་བ་བསྟན་གྱིས་ལེགས་པར་ཉོན། །ལྟ་བའི་ངོ་བོ་ཤེས་རབ་སྟེ། །མོས་པའི་བློ་ཡིས་གང་བཟུང་བ། །དབྱེ་བ་རང་གནས་ངོ་བོ་ནི། །སྟོང་པར་ཁྱབ་པས་ནམ་མཁའ་འདྲ། །ངེས་ཚིག་ཆོས་སྐུར་ལྟ་བ་ཡིན། །གོལ་ས་མ་རིག་རྟག་ཆད་གཉིས། །སྐྱོན་ནི་ཡུལ་སེམས་བསྲེ་བྱེད་པ། ། ― DNG001_Page_0514 ―
[མ་དཔེ་གཟིགས་ན་འདིར་གནོན།]
ད་ཡང་འདུས་པའི་སྙིང་པོ་ཉོན། །སྒོམ་པའི་ངོ་བོ་མི་རྟོགས་པ། །དབྱེ་བ་མཐུན་པ་འབྲལ་མེད་དེ། །ཏིལ་གྱི་མར་མེ་དུད་མེད་འདྲ། །ངེས་ཚིག་དབང་པོ་མ་ཡེངས་པ། །གོལ་ས་བྱིང་དང་རྒོད་པའོ། །སྐྱོན་ནི་ནན་གྱིས་གླེན་བསྒོམ་བྱེད། །ད་ཡང་འཁོར་གྱི་སྙིང་པོ་ཉོན། །སྤྱོད་པའི་ཚུལ་ནི་མ་བཅོས་པ། །དབྱེ་བ་རིག་གསང་མཐུན་པའི་ཐབས། །ཚོམ་མེད་གླང་ཆེན་ཆུར་འཇུག་འདྲ། །ངེས་ཚིག་ཤུགས་འབྱུང་བླང་དོར་མེད། །གོལ་ས་རང་རྒྱུད་ཉོན་མོངས་སྤྱོད། །སྐྱོན་ནི་ཆོས་བརྒྱད་ཡུལ་ལ་ཞེན། །ད་ཡང་འདུས་པའི་སྙིང་པོ་ཉོན། །འབྲས་བུ་ངེས་པའི་གདེང་ཟིན་པས། །དབྱེ་ན་གནས་སྐབས་མཐར་ཐུག་འགྲུབ། །རིན་ཆེན་རྒྱན་གྱི་ཡོན་ཏན་འདྲ། །ངེས་ཚིག་བསླུ་མེད་རང་ཡིད་ཆེས། །གོལ་ས་འབད་པ་དོན་མེད་འཁྱམས། །སྐྱོན་ནི་ཕྱིས་འབྱུང་རེ་དོགས་བློ། །དེ་ཡང་རྡོ་རྗེ་སེམས་དཔའ་ཉོན། །དེ་དག་དབྱེ་བ་ཐ་དད་ཀྱང་། །མ་རིག་རྨོངས་པ་བསྟན་པ་ལ། །ངོ་བོ་རང་བྱུང་ཉིད་འདི་ལས། །གཞན་དུ་གཡོས་པ་རྡུལ་ཙམ་མེད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། གདམས་ངག་གི་དབྱེ་བ་བསྟན་པའི་ལེའུ་སྟེ་སོ་ལྔ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །འཁྲུལ་ལྡོག་རྟགས་བདུན་ངས་བཤད་ཀྱིས། །ལེགས་པར་ཟུང་ལ་ཡིད་ཀྱིས་ཉོན། །ཆོས་རྣམས་ཀུན་གྱི་གཞི་ཤེས་པས། །འཁོར་འདས་གློ་བུར་འཁྲུལ་པར་ཤེས། །རེ་དོགས་མེད་པ་གཞི་ཤེས་རྟགས། །མཐའ་དྲུག་རྐྱེན་བཞི་འཛིན་མེད་པས། །ཡིད་ཆེས་གདེང་ཀྱི་དོན་ཟིན་ནས། །ལྷན་ཅིག་མ་རིག་ལོག་པའི་རྟགས། །ཐོག་མའི་རང་བྱུང་ངོ་ཤེས་པས། །དུས་གསུམ་གཅིག་ཏུ་ཤེས་པའི་ཕྱིར། །འཁྲུལ་པའི་དུས་ལས་ལོག་པའི་རྟགས། །ཡུལ་ནི་མ་ངེས་སྣ་ཚོགས་ཀྱང་། །ཆོས་བརྒྱད་ཞེན་པ་མེད་པའི་ཕྱིར། །ཀུན་བརྟགས་མ་རིག་ལོག་པའི་རྟགས། །ཐག་པ་རང་དུ་ཤེས་ཙམ་ན། །སྦྲུལ་དུ་འཛིན་པ་རང་སར་གྲོལ། །དཔེ་ལས་དོན་དུ་ལོག་པའི་རྟགས། ། ― DNG001_Page_0515 ―
[མ་དཔེ་གཟིགས་ན་འདིར་གནོན།]
རྫུན་ལ་བདེན་པར་མི་འཛིན་པས། །བསྒོམ་དུ་མེད་པ་རང་སར་གྲོལ། །འཁྲུལ་པའི་ངོ་བོ་ལོག་པའི་རྟགས། །མ་རིག་མེད་ཕྱིར་བག་ཆགས་བྲལ། །བླང་དོར་གཉིས་སོགས་དོན་དྲན་པས། །ལུགས་སུ་འདུག་པ་ལོག་པའི་རྟགས། །རང་གི་སེམས་ལ་དབང་ཐོབ་པས། །ཤེས་བཞིན་སྐྱེ་བ་དྲང་དོན་ཕྱིར། །སྐྱེ་ཤིའི་སྡུག་བསྔལ་ལོག་པའི་རྟགས། །ཤེས་རིག་རང་སེམས་སྙིང་པོ་སྟེ། །གློ་བུར་མ་ཡིན་ཡེ་གནས་པས། །ཤེས་རིག་དུས་གསུམ་མི་འགྱུར་ཕྱིར། །ཆད་པའི་འཁྲུལ་པ་ལོག་པའི་རྟགས། །རང་བྱུང་ངོ་བོ་ཉིད་ཀྱི་སྐུ། །དངོས་པོ་ཡུལ་ལས་འདས་པ་དེ། །ཤེས་རིག་རང་སེམས་སྙིང་པོ་སྟེ། །ཁ་དོག་དབྱིབས་མེད་གཉུག་མར་རྟོགས། །རྟག་པར་འཛིན་པའི་འཁྲུལ་ལོག་རྟགས། །དེ་ཡང་འཁོར་གྱི་སྙིང་པོ་ཉོན། །འཇིག་རྟེན་འཁྲུལ་པ་དེ་དག་དང་། །མ་རིག་དབང་གིས་ལོག་བལྟ་བ། །ནམ་ལངས་མུན་པ་མེད་པ་བཞིན། །དེ་ཉིད་རྟོགས་པས་འཁྲུལ་པ་སངས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། འཁོར་བར་འཁྲུལ་པ་ལོག་པའི་རྟགས་བསྟན་པའི་ལེའུ་སྟེ་སོ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །མྱང་འདས་འཁྲུལ་པ་ལོག་པ་དང་། །ཡུལ་སེམས་ཐ་དད་མི་འདོད་ཅིང་། །ཡེ་ནས་གཉུག་མའི་གཞི་ཤེས་པས། །འགྲོ་དོན་སྙིང་རྗེ་མི་འབྲལ་ན། །ཉན་ཐོས་འཁྲུལ་པ་ལོག་པའི་རྟགས། །སྣང་བ་སེམས་སུ་མི་སྡུད་ཅིང་། །དོན་དམ་སྐད་ཅིག་མི་འདོད་པས། །འཕེལ་འགྲིབ་མེད་པའི་དོན་རྟོགས་ན། །སེམས་ཙམ་འཁྲུལ་པ་ལོག་པའི་རྟགས། །བདེན་པ་གཉིས་སུ་མི་རྟོག་ཅིང་། །ཡང་དག་སྟོང་པར་མི་འདོད་པས། །རང་བྱུང་ཡེ་ཤེས་འགྱུར་མེད་དེ། །དབུ་མའི་འཁྲུལ་པ་ལོག་པའི་རྟགས། །ཡུལ་མེད་སེམས་སུ་མི་འདོད་ཅིང་། །སྔགས་དང་ཡིག་འབྲུ་ལྷར་མི་སྐྱེད། །རེ་དོགས་དངོས་གྲུབ་མི་འཚོལ་བས། །ཀྲི་ཡོག་འཁྲུལ་པ་ལོག་པའི་རྟགས། །བདེན་པ་དབྱེར་མེད་མི་འདོད་ཅིང་། །ཏིང་འཛིན་ ― DNG001_Page_0516 ―
[མ་དཔེ་གཟིགས་ན་འདིར་གནོན།]
རིམ་གྱིས་མི་བསྒོམ་པས། །རྩོལ་བ་མེད་པའི་དོན་རྟོགས་པས། །མ་ཧཱར་འཁྲུལ་པ་ལོག་པའི་རྟགས། །མཁའ་ཀློང་རོལ་པར་མི་འདོད་ཅིང་། །སྙིང་པོ་དྲན་ཙམ་ལྷར་མི་བསྒོམ། །ངང་འཇོག་མི་དགོས་དོན་རྟོགས་པས། །ཨ་ནུར་འཁྲུལ་པ་ལོག་པའི་རྟགས། །དེ་རྟགས་བརྒྱད་ལྡན་སྐྱེས་བུ་ནི། །མི་ཡི་ལུས་ལ་སངས་རྒྱས་སྲས། །རིག་འཛིན་གདུང་འཚོབ་སྤྲུལ་པའི་སྐུ། །དེ་ཡི་ཡོན་ཏན་བརྗོད་མི་ལངས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཐེག་པ་འོག་མ་པའི་འཁྲུལ་པ་ལོག་པའི་རྟགས་བསྟན་པའི་ལེའུ་སྟེ་སོ་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ཕྱི་ནང་མ་བཅོས་མྱ་ངན་འདས། །མྱང་འདས་དོན་ནི་ཆོས་ཀྱི་སྐུ། །ཆོས་ཀྱི་དབྱིངས་ནི་ཆོས་སྐུའི་འོད། །སྙིང་པོ་འབྲས་བུ་ཡེ་ཤེས་སྐུ། །སྙིང་པོ་ཀུན་ལ་ཁྱབ་ཅིང་འདུས། །ཐུགས་ཀྱི་ཉིང་ཁུ་ཡིན་པའི་ཕྱིར། །ཐིག་ལེ་འགྱུར་བ་མེད་པའི་ཕྱིར། །ཀུན་བཟང་རྡོ་རྗེའི་བྱིན་གྱིས་བརླབས། །ཚིག་ཏུ་མ་བཀོད་ཐུགས་ལ་བརྒྱུད། །དོན་གྱི་གཏིང་ཕྱིན་བསྟན་པའི་ཕྱིར། །ཚིག་ཉུང་དོན་ལ་རྫོགས་པ་ཡིས། །ཐིག་ལེ་ལ་ཤན་དབྱེ་བ་ནི། །མཚན་ཉིད་བཏགས་པའི་ཐིག་ལེ་དང་། །གསང་སྔགས་གཞི་ཡི་ཐིག་ལེ་དང་། །རྫོགས་ཆེན་སྤྱི་ཡི་ཐིག་ལེ་དང་། །ཡང་ཏི་ཐིག་ལེ་ཉག་གཅིག་དང་། །རེ་རེ་ལ་འང་བཞི་བཞི་སྟེ། །ངོ་བོ་དཔེ་དང་གཏན་ཚིགས་ཀྱིས། །འགྲོ་ས་ལ་ཤན་དབྱེ་བ་ཡང་། །རྩལ་གྱི་སྒོ་ནས་གསུམ་བསྟན་པ། །སྣང་བ་ཆོས་ཀྱི་དབྱིངས་ལས་རྫོགས། །དེ་ཡང་འདུས་པའི་སྙིང་པོ་ཉོན། །བཏགས་པ་མིང་གི་ཐིག་ལེ་ནི། །མཚན་ཉིད་ཐེག་པ་རྣམ་གསུམ་སྟེ། །ངོ་བོ་རྣམ་ཤེས་ཚོགས་བརྒྱད་ལ། །དཔེ་ནི་དམུས་ལོང་གཡུ་རྡོ་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་ཚོགས་བརྒྱད་སེམས་སུ་གཅིག །ལེ་ནི་ཁམས་གསུམ་ཡོངས་ལ་ཁྱབ། །འགྲོ་ས་སྲིད་པའི་ཡང་རྩེ་ཡིན། །གོལ་ས་སྐྱེ་མཆེད་མུ་བཞི་ལགས། །གཞི་ཡི་ཐིག་ལེ་བསྟན་ ― DNG001_Page_0517 ―
[མ་དཔེ་གཟིགས་ན་འདིར་གནོན།]
པ་ནི། །གསང་སྔགས་ཕྱི་རྒྱུད་རྣམ་པ་གསུམ། །ངོ་བོ་ཀུན་གཞིའི་རྣམ་ཤེས་ལ། །དཔེ་ནི་ས་དང་ཆུ་འདྲེས་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་ཀུན་གཞི་སེམས་ཀྱི་གཞི། །ལེ་ནི་འགྲོ་དྲུག་ཡོངས་ལ་ཁྱབ། །འགྲོ་ས་འདས་དང་མ་འདས་པ། །དོན་གྱི་ཐིག་ལེ་བསྟན་པ་ནི། །རྫོགས་ཆེན་ཨ་ཏི་སྤྱི་ཡི་གཞུང་། །ངོ་བོ་ཀུན་གཞི་ལུང་མ་བསྟན། །དཔེ་ནི་ཞོ་དང་འོ་མ་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་ཀུན་གཞི་གཉུག་མ་ལ། །ལེ་ནི་ཐམས་ཅད་སེམས་སུ་སྣང་། །འགྲོ་ས་གར་འགྲོ་ངེས་པ་མེད། །དེ་ཡང་འདུས་པའི་སྙིང་པོ་ཉོན། །དེ་ལྟར་ཐིག་ལེ་བཞི་བསྟན་པ། །ཐེག་པ་ཀུན་གྱི་སྒོ་བསྟན་ཕྱིར། །ཤན་གྱི་སྒོ་ནས་བསྟན་པ་ཡིན། །དོན་ལ་དབྱེར་མེད་ངོ་བོར་གཅིག །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཐིག་ལེ་ཤན་དབྱེ་བའི་ལེའུ་སྟེ་སོ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །ལ་བཟླ་བ་ཡི་ཐིག་ལེ་གསུངས། །ནང་ནི་རིག་པ་ཆོས་སྐུ་ལ། །སྒྲ་མཐུན་དོན་དཔག་གཏན་ཚིགས་ཀྱིས། །དོན་གྱི་ངོ་བོ་གཉིས་སུ་འདུས། །ལ་བཟླ་གཅིག་གི་ངང་དུ་རྫོགས། །དེ་ཡང་རྡོ་རྗེ་སེམས་དཔའ་ཉོན། །རྟག་པའི་ཐིག་ལེ་ལ་བཟླ་ན། །ངོ་བོ་སྣང་ལ་རང་བཞིན་མེད། །དཔེ་ནི་ཉི་མའི་འོད་བརྡལ་ལ། །གཏན་ཚིགས་ངེས་པ་གང་ཡིན་པ། །ཐིག་ནི་དངོས་པོ་ཡུལ་དང་བྲལ། །ལེ་ནི་ཐམས་ཅད་རྒྱལ་བའི་ཞིང་། །འགྲོ་ས་ཐིག་ལེ་ཕྱི་མའི་རྩལ། །གཞི་ཡི་ཐིག་ལེ་ལ་བཟླ་ན། །ངོ་བོ་རང་གི་མཐུ་དང་བྲལ། །དཔེ་ནི་དུག་ཉིད་སྨན་གྱི་ངང་། །གཏན་ཚིགས་ངེས་པ་གང་ཡིན་པ། །ཐིག་ནི་ཐམས་ཅད་མཁྱེན་པའི་རྒྱུ། །ལེ་ནི་འགྲོ་དྲུག་ཡོངས་ལ་ཁྱབ། །ཡེ་ཤེས་ཀུན་གྱི་རྩལ་དུ་འགྲོ། །སྤྱི་ཡི་རྫོགས་ཆེན་ལ་བཟླ་ན། །ངོ་བོ་སྐུ་གསུང་ཐུགས་ཀྱི་རྒྱུ། །དཔེར་ན་ནོར་བུ་རིན་ཆེན་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་མ་ནོར་དྲང་པོའི་ལམ། །ལེ་ནི་བརྡལ་བ་ཆེན་པོའི་ངང་། །འགྲོ་ས་ཐིག་ལེ་ཕྱི་མའི་རྩལ། །ཡང་ཏི་རྫོགས་ཆེན་ལ་བཟླ་ན། །འཁོར་འདས་མ་རིག་ ― DNG001_Page_0518 ―
[མ་དཔེ་གཟིགས་ན་འདིར་གནོན།]
རང་བྱུང་ཞིང་། །ངོ་བོ་ཐིག་ལེ་ཉག་གཅིག་ཉིད། །དཔེ་ནི་ཉི་མའི་སྙིང་པོ་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་བག་ཆགས་སྐྱོན་དང་བྲལ། །ལེ་ནི་ཉོན་མོངས་རྣམ་པར་དག །འགྲོ་ས་ཀུན་བཟང་སངས་རྒྱས་ཉིད། །དེ་ཡང་འདུས་པའི་སྙིང་པོ་ཉོན། །ཕྱི་ནང་མེད་པར་ཐིག་ལེ་ལ། །འཁོར་འདས་མེད་པར་ཉག་གཅིག་མ། །སྣང་སྟོང་མེད་པར་ཕྲ་ལ་ཟབ། །ཐམས་ཅད་ཐིག་ལེར་སངས་རྒྱས་པས། །སྟེང་འོག་མཐའ་དབུས་མེད་པ་དང་། །ཕྱི་ནང་འཁོར་འདས་མེད་པ་ཀུན། །ཐམས་ཅད་ཐིག་ལེ་ཆེན་པོ་ལས། །གཞན་གྱི་ཆོས་ནི་རྡུལ་ཙམ་མེད། །དེ་ཡང་འདུས་པའི་སྙིང་པོ་ཉོན། །ང་ཡི་སྐུ་གསུང་ཐུགས་ལ་ཚང་། །ཡེ་སངས་རྒྱས་པའི་རང་བཞིན་ལས། །ཡོན་ཏན་ནམ་མཁའི་མཐའ་ལས་འདས། །གཞན་ཡང་ཆོས་ཀྱི་དབྱིངས་ཀྱི་ཀློང་། །རྫོགས་ནི་ལྷག་མ་མེད་པར་རྫོགས། །འཁོར་ནི་དུས་གསུམ་རྒྱལ་བར་ལྡན། །ཐམས་ཅད་ཀུན་ཏུ་བཟང་པོའི་ས། །སྐད་ཅིག་རྟོགས་པས་མངོན་སངས་རྒྱས། །རྟོགས་ཐབས་བཞི་ནི་བསྟན་པར་ཟད། །དེ་ལས་མང་དུ་འབྱེད་པ་ནི། །ཐིག་ལེ་མ་ཡིན་འཆལ་ཚིག་ཡིན། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཐིག་ལེ་ཉག་གཅིག་ལ་ལ་བཟླ་བའི་ལེའུ་སྟེ་སོ་དགུ་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །ཟུང་ལྔ་ཡ་བཅུ་བདུན་གྱི་གེགས། །རིམ་པར་བཤད་ཀྱི་ཡིད་ཀྱིས་ཉོན། །འཁོར་འདས་གཉིས་ཀྱི་གཞིར་གྱུར་པས། །རྟག་ཆད་མ་ཡིན་ཆོས་སྐུར་ངེས། །སྣང་བ་ངེས་མེད་ཡིན་པའི་ཕྱིར། །ཡུལ་དང་གོལ་ས་བཅད་པ་གཅེས། །དེ་ཡང་འདུས་པའི་སྙིང་པོ་ཉོན། །རང་སེམས་ཡུལ་དང་ཡུལ་ཉིད་སེམས། །གཉིས་ཀ་མ་ཡིན་གཉིས་མེད་མིན། །ཐ་དད་མ་ཡིན་མི་བསྡུ་བར། །ཞེན་མེད་རང་སར་གྲོལ་བའི་ཕྱིར། །སྣང་བ་མ་བཅོས་ཆོས་ཀྱི་དབྱིངས། །རྟོགས་དང་མ་རྟོགས་ཁྱད་པར་གྱིས། །སངས་རྒྱས་སེམས་ཅན་རྣམ་པ་གཉིས། །སོ་སོར་མ་ཡིན་གཅིག་པ་སྟེ། །གནས་སྐབས་འབྲལ་མེད་ ― DNG001_Page_0519 ―
[མ་དཔེ་གཟིགས་ན་འདིར་གནོན།]
མཐར་ཐུག་ཡོད། །ལས་དང་ཐུགས་རྗེ་ཐ་དད་ཕྱིར། །གདམས་ངག་མེད་ལ་ཕན་མི་ནུས། །ད་ཡང་འཁོར་གྱི་སྙིང་པོ་ཉོན། །འཁོར་འདས་འབྱུང་བ་རྟོག་པ་ཡིན། །ལོག་རྟོག་ཡེ་ཤེས་ཐ་དད་ཀྱང་། །ངོ་བོ་ཉིད་ཀྱི་གཞི་ལ་མེད། །སྣང་ལུགས་ཞེན་ངོར་ཅི་ཡང་འཆར། །རྣལ་འབྱོར་ཉམས་སུ་བླང་ཐབས་ཀྱིས། །བསྒོམ་དུ་ཡོད་མེད་གཉིས་ཀ་འགལ། །ཡོད་པར་སྒྲོ་བཏགས་རྟག་པར་འགྱུར། །མེད་པར་སྐུར་བཏབ་ཆད་པར་འགྱུར། །དེ་ཕྱིར་ངེས་དོན་སྙིང་པོ་ནི། །མ་བསྒོམས་འབྲལ་མེད་དགོངས་པ་གཅེས། །ཟུང་ལྔ་ཡ་བཅུ་དེ་ལ་བྱ། །ད་ཡང་འདུས་པའི་སྙིང་པོ་ཉོན། །མ་ནོར་ངེས་པའི་ལུང་ཆེན་ནི། །སངས་རྒྱས་སེམས་ཅན་གཉིས་ཀྱི་གཞི། །ངོ་བོ་ཉིད་ཀྱི་ཀུན་བཟང་གིས། །ཚིག་མེད་དོན་གྱི་རྟོགས་ཤར་བས། །དོན་ཉིད་ཚིག་ཏུ་འབྱུང་བའི་ཕྱིར། །ངེས་པ་ཡི་ནི་ལུང་དུ་བཤད། །ཀུན་བཟང་ང་ཡི་བྱིན་རླབས་ཀྱིས། །ཐུགས་ནས་སྙན་དུ་གསུང་བརྒྱུད་པ། །ཚིག་མེད་དོན་ཆེན་རྟོགས་པའི་ཕྱིར། །ཚིག་ལ་བརྟེན་ནས་དོན་གོ་བས། །བླ་མ་སློབ་དཔོན་ཁྱད་པར་ཆེ། །ད་ཡང་འདུས་པའི་སྙིང་པོ་ཉོན། །ཉམས་མྱོང་ཡོད་མེད་གཉིས་ཀ་སྐྱོན། །གང་ཡང་མི་འགལ་གདམས་ངག་གི། །དོན་གསལ་ཡུལ་ལ་མ་ཡེངས་པ། །ཉམས་མྱོང་དམ་པར་ང་ཡིས་བཤད། །རྣམ་རྟོག་ཐ་མལ་གློ་བུར་པ། །བཅོས་ན་ཐུལ་བའི་ཞི་གནས་ཡིན། །མ་བཅོས་བཀའ་ལ་དགོས་མེད་ཕྱིར། །བཅོས་མེད་དྲན་པ་ཆོས་སྐུར་གསལ། །མདོ་རྒྱུད་ངེས་དོན་གང་ཡང་རུང་། །དྲང་བའི་དོན་ལ་ཁྱད་ཆེ་ཡང་། །གཞི་རྟོགས་བྱེད་པའི་ཐབས་ལ་འདྲ། །ངེས་པའི་དོན་ལ་ཁྱད་པར་མེད། །དེ་ཡང་འཁོར་གྱི་སྙིང་པོ་ཉོན། །ངེས་དོན་ཆོས་སྐུ་རང་ཉིད་ལ། །ཡོད་མེད་འགལ་བ་མེད་ན་ཡང་། །ཡོད་ཀྱང་མ་རྟོགས་སེམས་ཅན་ལ། །ལུང་ལྡན་རྐྱེན་གྱི་གདམས་ངག་སྟོན། །དེ་ཕྱིར་མཐར་ཐུག་འདྲེལ་པ་ཡོད། །གཞི་ཉིད་འཁྲུལ་ལུགས་བློས་བཅོས་པས། །མ་རིག་འཁྲུལ་ངོར་བདེན་འཛིན་ཀྱང་། །ཡར་ལྡན་མར་འཁྲུལ་གཞི་ལ་མེད། །དེ་ཕྱིར་འཁྲུལ་མེད་དོན་འདི་གཅེས། །བདུད་ཀྱི་གེགས་ནི་དེ་ལ་བྱ། །ད་ཡང་རྡོ་རྗེ་སེམས་དཔའ་ཉོན། །དེ་དག་འགལ་བགེགས་རྣམ་མང་ཡང་། །བློ་ཡིས་བྱས་པ་ ― DNG001_Page_0520 ―
[མ་དཔེ་གཟིགས་ན་འདིར་གནོན།]
ཐམས་ཅད་མིན། །ངོ་བོ་ཉིད་སྐུ་ངོས་ཟིན་ན། །ཐེ་ཚོམ་ཐམས་ཅད་ཤུགས་ལ་ཆོད། །རྫོགས་པ་ཆེན་པོ་ལྟ་བུའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཐེ་ཚོམ་གྱི་གེགས་བསལ་བའི་ལེའུ་སྟེ་བཞི་བཅུ་པའོ།། །།དེ་ནས་འདུས་པའི་རྒྱལ་པོ་ལ། །འདུས་པའི་འཁོར་གྱིས་འདི་སྐད་གསོལ། །ཐིག་ལེ་གཅིག་ཏུ་འདུས་པ་ཡིས། །ཕྱི་ནང་ཆོས་རྣམས་ཇི་ལྟར་རྫོགས། །གོལ་ས་སྒྲིབ་པ་ཇི་ལྟར་མེད། །ཉམས་རྟོགས་དོན་ལྡན་ཇི་ལྟར་འབྱུང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ཐིག་ལེ་གཅིག་ཏུ་རྫོགས་པ་ཡི། །རང་སེམས་སྙིང་པོ་བྱང་ཆུབ་དེས། །སྙིང་རྗེ་བྱ་མེད་དོན་ཟིན་པས། །སེམས་བསྐྱེད་གོང་འོག་དེ་ལ་རྫོགས། །དད་པ་སྔོན་དུ་དྲན་བྱས་པས། །མི་དམིགས་དོན་ལ་མ་བལྟས་ཀྱང་། །བྱིང་རྒོད་གཉིས་ཀྱི་རྐྱེན་བྲལ་བས། །ཞི་གནས་བསམ་གཏན་དེ་ལ་རྫོགས། །ཕྱི་ནང་ཆོས་རྣམས་ཐམས་ཅད་ཀུན། །སོ་སོར་རྟོག་པའི་ཡེ་ཤེས་ཀྱིས། །སྒྱུ་མ་ལྟ་བུར་རབ་ཤེས་པས། །རང་བཞིན་མེད་པའི་ལྷག་མཐོང་རྫོགས། །འཇིག་རྟེན་གོལ་བར་དོན་རྟོགས་པས། །སེར་སྣ་འཛིན་པའི་དོན་མེད་ཕྱིར། །རེ་བ་མེད་པའི་བསམ་པ་ཡིས། །སྦྱིན་པའི་ཕ་རོལ་ཕྱིན་པ་རྫོགས། །མ་ནོར་ཁྲིམས་ལས་མི་འདའི་ཕྱིར། །ལུས་ངག་ཡིད་ཀྱི་ལས་རྣམས་ཀུན། །མི་དགེ་ཉེས་བྱས་མི་འབྱུང་བས། །ཚུལ་ཁྲིམས་ཕ་རོལ་ཕྱིན་པ་རྫོགས། །ཟབ་ལ་རྒྱ་ཆེའི་ལྟ་བ་ཡིས། །ཡིན་དང་མིན་པའི་ཆོས་རྣམས་ཀུན། །ཆོས་ཀྱི་དབྱིངས་སུ་ཀུན་ཤོང་བས། །བཟོད་པའི་ཕ་རོལ་ཕྱིན་པ་རྫོགས། །ངོ་བོ་ཉིད་ལས་འབྲལ་མེད་ཕྱིར། །ཆེད་དུ་མི་བསྒོམ་ད་ལྟ་ཉིད། །ལྟ་བའི་དོན་ལ་ཡེངས་མེད་པས། །བརྩོན་འགྲུས་ཕ་རོལ་ཕྱིན་པ་རྫོགས། །གཞི་གསུམ་དུས་གསུམ་འབྲལ་མེད་པས། །ཡེ་ཤེས་ཀུན་ཏུ་རྒྱུན་མི་ཆད། །སྙིང་པོའི་དོན་ལས་མ་གཡོས་པས། །བསམ་གཏན་ཕ་རོལ་ཕྱིན་པ་རྫོགས། །དང་པོ་འཁོར་བ་རྩད་གཅོད་པ། །ཡེ་ཤེས་རིག་པའི་ངོས་ཟིན་ཕྱིར། །ཡིད་ཆེས་གདེང་གིས་ཐག་ཆོད་པས། ། ― DNG001_Page_0521 ―
[མ་དཔེ་གཟིགས་ན་འདིར་གནོན།]
ཤེས་རབ་ཕ་རོལ་ཕྱིན་པ་རྫོགས། །ད་ཡང་འདུས་པའི་སྙིང་པོ་ཉོན། །དེ་ཕྱིར་ཡུལ་གྱི་རྣམ་པ་ལ། །སྤོང་སྡུད་ཞེན་པ་མེད་པའི་ཕྱིར། །སྣང་བ་གང་ཡང་མི་འགོག་པས། །ཐབས་ཀྱི་ཕ་རོལ་ཕྱིན་པ་རྫོགས། །ཚེ་རབས་སྔོན་ནས་སྦྱངས་པའི་ཕྱིར། །མི་གནས་བླ་མེད་དོན་རྟོགས་པས། །ད་ལྟ་ཉིད་དུ་རང་ཡིད་ཆོས། །སྨོན་ལམ་ཕ་རོལ་ཕྱིན་པ་རྫོགས། །རང་སེམས་སྙིང་པོ་རྟོགས་པའི་ཕྱིར། །མ་རིག་སྒྲིབ་པ་ཟིལ་གནོན་པར། །ལུས་ངག་རྩོལ་བ་མི་དགོས་པས། །སྟོབས་ཀྱི་ཕ་རོལ་ཕྱིན་པ་རྫོགས། །འཁོར་འདས་གཉིས་མེད་གོང་རོལ་དུ། །སྐྱེ་ཤི་མེད་པར་ཐག་ཆོད་དེ། །བྱང་ཆུབ་སེམས་ལ་འགྱུར་མེད་པས། །ཡེ་ཤེས་ཕ་རོལ་ཕྱིན་པ་རྫོགས། །ལྟ་བ་རྟོགས་པའི་རྣལ་འབྱོར་པས། །ལུས་ངག་དོན་ལས་མ་ཉམས་པས། །ཕྱི་ནང་སྤྱོད་པའི་དོན་ཟིན་ཕྱིར། །ཚོགས་ཆེན་མ་ལུས་དེ་ལ་རྫོགས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཕ་རོལ་ཏུ་ཕྱིན་པའི་ཆོས་རྣམས་རྫོགས་པར་བསྟན་པའི་ལེའུ་སྟེ་ཞེ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་ཡང་གསུངས་པ། །ལས་ཅན་རྣལ་འབྱོར་དོན་ལྡན་གྱིས། །ཡེ་དབང་སྙིང་པོ་སེམས་ཉིད་དོན། །ཆོས་ཉིད་རིག་པའི་དབང་ཐོབ་པས། །ཕྱི་ནང་དབང་རྣམས་དེ་ལ་རྫོགས། །ལྟ་བ་ངེས་པའི་གདེང་ཟིན་པས། །མི་རྟོག་ཡེ་ཤེས་གེགས་བསལ་བས། །རྣམ་པར་རྟོག་པའི་བགེགས་མེད་ཕྱིར། །ཕྱི་ནང་མཚམས་བཅད་དེ་ལ་རྫོགས། །ཡེ་ནས་ངོ་བོ་ཉིད་སྐུ་ལས། །བསྒྲུབ་ཏུ་མེད་པའི་ཆོས་ཉིད་ལ། །མ་རིག་རྣམ་རྟོག་སྒྲིབ་པ་མེད། །དོན་གྱི་བཤགས་པ་དེ་ལ་རྫོགས། །སངས་རྒྱས་སེམས་ཅན་གཉིས་མེད་ཕྱིར། །ཡུལ་དང་དབང་པོ་མི་འབྱེད་པ། །གཉིས་མེད་དོན་གྱི་ཀློང་ཁྱབ་པས། །བྱིན་ཆེན་དབབ་པ་དེ་ལ་རྫོགས། །རང་བྱུང་ཡེ་ཤེས་ཀུན་ཁྱབ་ཕྱིར། །དུག་ལྔ་རང་གྲོལ་དོན་རྟོགས་པས། །ཉོན་མོངས་བདུད་རྩི་ཆེན་པོ་ལ། །ཡེ་ཤེས་བྱིན་རླབས་དེ་ལ་རྫོགས། །དབང་པོ་ཡུལ་གྱི་རྣམ་པ་ལ། །དངོས་པོ་འབྱུང་བའི་རྩ་བ་དེ། །ས་ཆུ་མེ་རླུང་ཀུན་ཁྱབ་པས། །དབང་ཆེན་ ― DNG001_Page_0522 ―
[མ་དཔེ་གཟིགས་ན་འདིར་གནོན།]
རིམ་པ་དེ་ལ་རྫོགས། །གདན་དང་ཡིག་འབྲུ་ལ་སོགས་པ། །རང་གི་སེམས་ཀྱི་ཆོ་འཕྲུལ་ཏེ། །ཕྱོགས་བཅུར་རང་བཞིན་ལྷུན་གྲུབ་པས། །གཞལ་ཡས་ཁང་ཆེན་དེ་ལ་རྫོགས། །འཁོར་འདས་བཟང་ངན་མི་འབྱེད་པར། །རིག་ཚོར་དོན་གྱི་ལྷ་ཡིན་པས། །མ་བཙལ་ལྷུན་གྱིས་གྲུབ་པ་ལས། །ཡེ་ཤེས་ལྷ་རྣམས་དེ་ལ་རྫོགས། །ངོ་བོ་ཉིད་ཀྱི་སྙིང་པོ་ལ། །སངས་རྒྱས་སེམས་ཅན་རྒྱུ་གཅིག་པས། །ཆེད་དུ་བྱར་མེད་རང་རིག་ཕྱིར། །སྤྱན་དྲངས་བསྡིམ་པ་དེ་ལ་རྫོགས། །གཞི་ལ་སྣང་བ་མེད་པའི་ཕྱིར། །རང་གི་དྲན་རྟོག་ཅིར་སྣང་ཡང་། །སྐྱེ་མེད་ཆོས་ལས་མི་འདའ་བས། །ཟིལ་གྱིས་གནོན་པ་དེ་ལ་རྫོགས། །ཐམས་ཅད་འདྲེས་པ་ཆེན་པོ་ལ། །རྣམ་པར་གྲོལ་བ་མཚོན་པའི་ཕྱིར། །རིག་པའི་དོན་འདི་གསལ་ཐེབས་པས། །ནན་ཏན་ཕྱག་རྒྱ་དེ་ལ་རྫོགས། །ལུས་ངག་ལས་ཀྱི་རྣམ་པ་ལ། །དྲང་བའི་དོན་གྱིས་ཟིན་པའི་ཕྱིར། །བསྒུལ་བསྐྱོད་ཐམས་ཅད་ཡེ་ཤེས་ལ། །ཕྱག་རྒྱའི་མཆོད་པ་དེ་ལ་རྫོགས། །ཡེ་ཤེས་སྙིང་པོ་བྱང་ཆུབ་ལ། །བློ་དང་དངོས་པོ་གཅིག་པའི་ཕྱིར། །སེམས་དང་ཆོས་སྐུའི་དོན་འབྱོར་བས། །སྦྱོར་སྒྲོལ་མཆོད་པ་དེ་ལ་རྫོགས། །ཡེ་ནས་གནས་པའི་དོན་གོ་བས། །སྐྱེ་ཤི་མེད་པར་ཐག་བཅད་ཕྱིར། །ཡོན་ཏན་ཐམས་ཅད་ལྷུན་གྲུབ་པས། །མཐར་ཕྱིན་སྨོན་ལམ་དེ་ལ་རྫོགས། །སངས་རྒྱས་ཆེ་བའི་ཡོན་ཏན་རྣམས། །ད་ལྟ་ཉིད་དུ་རྟོགས་པའི་ཕྱིར། །སྐུ་གསུང་ཐུགས་ཀྱི་དོན་ཚང་བས། །བཟླས་བརྗོད་འཕྲོ་འདུ་དེ་ལ་རྫོགས། །དགའ་ལྡན་ལྷ་དང་འབྱོར་ལྡན་ཚོགས། །ངེས་པའི་ལྟ་བས་གདེང་ཟིན་པ། །སྣོད་བཅུད་ཡེ་ནས་ཚོགས་ཡིན་ཕྱིར། །ཚོགས་ཀྱི་མཆོད་པ་དེ་ལ་རྫོགས། །གཙོ་འཁོར་བཟང་ངན་མི་འབྱེད་པས། །ཕུད་དང་ལྷག་མ་ངོ་བོ་གཅིག །བདེ་ཆེན་གཉིས་མེད་རང་སེམས་ལ། །ལྷག་མའི་མཆོད་པ་དེ་ལ་རྫོགས། །བྱ་བ་མེད་པའི་ཏིང་འཛིན་གྱིས། །མི་བཟུང་ཡེ་ཤེས་ཆེན་པོ་ལ། །རང་གི་རིག་པ་གསལ་ཐེབས་པས། །གཏོར་མའི་མཆོད་པ་དེ་ལ་རྫོགས། །འཁོར་བ་མྱ་ངན་འདས་པའི་ཆོས། །ཐིག་ལེ་གཅིག་ཏུ་འདུས་པའི་ཕྱིར། །ཅི་སྤྱོད་ ― DNG001_Page_0523 ―
[མ་དཔེ་གཟིགས་ན་འདིར་གནོན།]
རང་གི་ལུས་ངག་ལ། །དཀྱིལ་འཁོར་བསྡུ་བ་དེ་ལ་རྫོགས། །དེ་རྟོགས་རྣལ་འབྱོར་ཆེན་པོ་ལ། །ཡེ་ཤེས་ཆེན་པོ་རྫོང་གི་ལུས། །ཡེ་ཤེས་ལྷུན་གྲུབ་གོ་ལྡན་པས། །བཀའ་ནན་ལུས་བསྲུང་དེ་ལ་རྫོགས། །ཡེ་ནས་སངས་རྒྱས་ཡིན་པའི་དོན། །རང་གི་སེམས་ཀྱིས་ཤེས་པའི་ཕྱིར། །གཉིས་མེད་དོན་དུ་སངས་རྒྱས་པས། །དགེ་བ་བསྔོ་བ་དེ་ལ་རྫོགས། །ཆོས་ཀྱི་སྐུ་ལ་མངའ་བརྙེས་པས། །ཡོན་ཏན་ཐམས་ཅད་རང་ལས་སྤྲུལ། །གཞན་དོན་བྱ་བ་སྨོས་ཅི་དགོས། །ཡེ་ནས་ལྷུན་གྲུབ་དེ་ལ་རྫོགས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཕྲིན་ལས་མཛད་སྤྱོད་རྫོགས་པའི་ལེའུ་སྟེ་ཞེ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །འཁོར་འདས་མ་རིག་རྫོགས་ཆེན་ལ། །གོལ་སྒྲིབ་མེད་པར་བསྟན་པ་ཡང་། །བཅུ་གཉིས་དགུ་ཡིས་དོན་བསྟན་པ། །ཡིད་ལ་མ་བརྒྱུས་གོལ་ས་མེད། །དེ་ཡང་རྡོ་རྗེ་སེམས་དཔའ་ཉོན། །ཕྱི་རོལ་ཡུལ་གྱི་ཐ་སྙད་ལ། །དམ་པར་ཞེན་པའི་རྟོག་པ་ཡིས། །བྱུང་ཚོར་རྗེས་སུ་མ་འབྲངས་པས། །འཇིག་རྟེན་ཕལ་པའི་སར་མི་གོལ། །རང་གི་སེམས་ཀྱི་སྙིང་པོ་འདི། །དྲན་རྟོག་བློ་ཡི་རྣམ་པ་ཡིས། །ཡོད་མེད་ཡུལ་དུ་མ་བསྒོམས་པས། །རྟག་ཆད་མཐར་ནི་དེ་མི་གོལ། །ལུང་རིགས་མན་ངག་ལ་བརྟེན་ནས། །ཐོས་བསམ་ལྟ་བས་ཡིད་ཆེས་པས། །ཤེས་རབ་ཟབ་མོའི་དོན་ཟིན་པས། །ལུང་དུ་མ་བསྟན་དེར་མི་གོལ། །མི་དམིགས་པ་ལ་བློ་གཏོད་ཅིང་། །བྱིང་རྒོད་རྣམ་གཉིས་བསལ་བ་ཡིས། །ཞི་གནས་རོ་ལ་མ་ཞེན་པས། །སེམས་འཛིན་བསམ་གཏན་སར་མི་གོལ། །ཕྱི་རོལ་ཡུལ་གྱི་སྣང་བ་ལ། །རང་གི་སེམས་དང་མ་འདྲེལ་ཕྱིར། །སྒོ་ལྔའི་རྣམ་ཤེས་མི་དགག་པས། །འདུ་ཤེས་མེད་པར་དེ་མི་གོལ། །རང་བྱུང་རང་སྣང་འདི་ཉིད་ལ། །སེམས་ཀྱི་རྩོལ་བའི་གཉེན་པོ་ཡིས། །རྣམ་རྟོག་མ་སྤངས་རང་ཞི་བས། །ཉན་ཐོས་འགོག་པར་དེ་མི་གོལ། །ཕྱི་རོལ་རྟེན་འདྲེལ་བཅུ་གཉིས་ལ། །བརྟེན་ནས་སེམས་ཀྱི་རྒྱུ་བ་ཡིས། །རྟོག་དགག་སྟོང་བར་མི་ ― DNG001_Page_0524 ―
[མ་དཔེ་གཟིགས་ན་འདིར་གནོན།]
བསྒོམ་པས། །རང་རྒྱལ་སེམས་སུ་དེ་མི་གོལ། །ཡུལ་མེད་སེམས་སུ་བློས་བསྡུས་པས། །དོན་དམ་རང་གི་ཤེས་པའི་དོན། །རང་རིག་སྐད་ཅིག་མི་བསྒོམ་པས། །སེམས་ཙམ་ལྟ་བར་དེ་མི་གོལ། །ཡུལ་འདི་ཀུན་རྫོབ་བློས་བྱས་ཏེ། །གཏན་ཚིགས་དག་གིས་གཞིག་བྱས་ནས། །མཚན་མ་སྟོང་བར་མི་བསྒོམ་པས། །དབུ་མ་གཉིས་སུ་དེ་མི་གོལ། །རེ་དོགས་ལས་ཀྱི་རྩོལ་བ་ཡིས། །དགེ་བ་བཅུ་ཡི་སྙིང་པོ་ལ། །རྒྱུ་འབྲས་རྐྱེན་ལ་མི་ལྟོས་པར། །འདུས་བྱས་ཆོས་སུ་དེ་མི་གོལ། །རང་སེམས་སྙིང་པོ་ངོ་བོ་ཉིད། །རྟོག་པའི་རྐྱེན་གྱིས་མི་འགྱུར་ཕྱིར། །འཁོར་འདས་གཉིས་ལ་མི་དཔྱོད་པས། །ལས་ཀྱི་དབང་དུ་དེ་མི་གོལ། །སྤོང་སྡུད་སེམས་ཀྱི་རྟོག་པ་ལ། །སྐྱོན་ཡོན་གཉིས་སུ་མི་བལྟ་ཞིང་། །མི་རྟོག་དབེན་པའི་ཡུལ་མེད་པས། །ཕྲ་བའི་ལམ་དུ་དེ་མི་གོལ། །སྨོན་འཇུག་གཉིས་ལ་མི་བརྟེན་ཅིང་། །ཚོགས་གསོག་དམ་པར་མི་ལྟ་བས། །ལམ་ལྔ་རིམ་གྱིས་མ་སྦྱངས་ཕྱིར། །ས་བཅུ་བགྲོད་པར་དེ་མི་གོལ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། བསམ་གཏན་གྱི་གོལ་ས་མེད་པར་བསྟན་པའི་ལེའུ་སྟེ་ཞེ་གསུམ་པའོ།། །།དེ་ནས་ཀུན་རིག་རྒྱལ་པོ་དེས། །འདུས་པའི་འཁོར་ལ་ཡང་གསུངས་པ། །ཆོས་ཉིད་དག་པའི་ངང་ལས་ནི། །རིགས་གསུམ་དཀྱིལ་འཁོར་ལྷར་མ་བསྐྱེད། །དག་གཞིའི་ཏིང་འཛིན་མི་བསྒོམ་པས། །ཀྲི་ཡའི་ཐེག་པར་དེ་མི་གོལ། །ལྟ་བ་ཡོ་གར་བལྟ་བ་དང་། །སྤྱོད་པ་ཀྲི་ཡར་སྤྱོད་པ་དང་། །རྣམ་གཉིས་འཛིན་པར་མི་བསྒོམ་པས། །ཨུ་པ་ཡར་ནི་དེ་མི་གོལ། །ཆོས་ཉིད་དབྱིངས་ཀྱི་ཡེ་ཤེས་ཀྱི། །ཆོ་འཕྲུལ་ལྷ་ཡི་ང་རྒྱལ་གྱིས། །བྱང་ཆུབ་རྣམ་ལྔ་མི་བསྒོམས་པས། །ཡོ་གའི་སེམས་དཔར་དེ་མི་གོལ། །ཕུང་པོ་ཁམས་དང་སྐྱེ་མཆེད་ཀྱི། །རྟོག་ཚོགས་དགྲ་རྣམས་མང་པོ་ཡིས། །རྣམ་རྟོག་ལྷར་ནི་མ་བསྒྱུར་བས། །མ་ཧཱ་ཡོ་གར་དེ་མི་གོལ། །ལས་ཀྱི་ཕྱག་རྒྱ་གཞིར་བཞག་ནས། །རྩ་དང་ཐིག་ལེ་བདེ་བ་ཡི། །ཐབས་ཀྱིས་འཛིན་པ་མ་བསྒོམས་པས། །ཆགས་པའི་ལམ་དུ་དེ་མི་གོལ། །ཀུན་གཞི་ ― DNG001_Page_0525 ―
[མ་དཔེ་གཟིགས་ན་འདིར་གནོན།]
དག་པའི་མཁའ་ཀློང་དུ། །བདེ་ཆེན་གཉིས་མེད་རིག་པའི་རྩལ། །འདུ་འབྲལ་མེད་འཇོག་ཡིད་མེད་པས། །ཨ་ནུ་ཡོ་གར་དེ་མི་གོལ། །འཁོར་འདས་གཉིས་ཀྱི་རྣམ་པ་ལ། །ཡིན་དང་མིན་པའི་ཆོས་རྣམས་ཀུན། །སེམས་ཀྱིས་མཚོན་དུ་མེད་རྟོགས་པས། །མཚན་མའི་རྐྱེན་དུ་དེ་མི་གོལ། །རྣལ་འབྱོར་སྤྱོད་པ་རྣམ་གསུམ་གྱིས། །ཞུམ་པ་མེད་པའི་སེམས་ཉིད་ཀྱིས། །བརྟུལ་ཞུགས་ཕྱི་ནང་མི་དགོས་པས། །རེ་དོགས་སྤྱོད་པར་དེ་མི་གོལ། །སྣང་བ་རང་གི་བློས་བྱས་པའི། །ཡུལ་སེམས་བསྲེ་བའི་ལྟ་བ་ཡི། །གཉིས་མེད་དོན་ལ་མི་གཏོད་པས། །ཕྱོགས་ཅན་ལྟ་བར་དེ་མི་གོལ། །རང་སེམས་སྙིང་པོ་ཆོས་ཀྱི་སྐུ། །ལྟ་བ་རྟོགས་པའི་དོན་ཉིད་ལས། །དེ་ལས་གཞན་དུ་མི་རྩོལ་བས། །གོལ་སྒྲིབ་བྱ་བའི་མིང་མེད་དོ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། གསང་སྔགས་གོལ་ས་མེད་པར་བསྟན་པའི་ལེའུ་སྟེ་ཞེ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སྒྲིབ་པ་དག་པའི་མཚན་ཉིད་ནི། །བླ་མ་དམ་པའི་གདམས་ངག་གིས། །ཡེ་ཤེས་ཆེན་པོར་ངོས་འཛིན་པས། །སྐབས་འབྱེད་སྒྲིབ་པ་དེ་ལ་མེད། །ཀུན་གཞི་གཞི་ཆ་རང་གསལ་ལ། །སྔ་ཕྱིར་རྗེས་སུ་མ་འདྲེངས་པས། །རང་སེམས་ཆོས་སྐུ་ངོས་ཟིན་པས། །བསླད་པའི་སྒྲིབ་པ་དེ་ལ་མེད། །ཀུན་བརྟགས་མ་རིག་རྐྱེན་བྱས་པས། །འཁྲུལ་པ་དག་གི་ཡུལ་རྣམས་ནི། །སྔ་ཕྱི་གློ་བུར་དངོས་མེད་པས། །ཕྱོགས་ལྷུང་སྒྲིབ་པ་དེ་ལ་མེད། །ཀུན་བཟང་ཉིད་ཀྱི་བཀའ་ཉིད་ལས། །བླ་མའི་གདམས་ངག་མ་ཆད་ཅིང་། །ལྟ་བ་ངེས་པའི་གདེང་ཟིན་པས། །ཚོགས་ཀྱི་སྒྲིབ་པ་དེ་ལ་མེད། །ཞི་རྒྱས་དབང་དང་དྲག་པོ་དང་། །ས་མ་ཏི་ཡི་དགོངས་པ་ཡིས། །བླ་ན་མེད་པའི་དོན་རྟོགས་པས། །ལས་བཞིའི་སྒྲིབ་པ་དེ་ལ་མེད། །འཁོར་འདས་མ་རིག་ངོས་ཟིན་པས། །མ་བསྒོམས་དོན་དང་མི་འབྲལ་ཕྱིར། །མ་ཆགས་མི་གཡོ་སྟོབས་ལྡན་པས། །མཆོད་པའི་སྒྲིབ་པ་དེ་ལ་མེད། །རང་རིག་རྟོགས་པའི་ཉམས་དང་ནི། །སངས་རྒྱས་བཀའ་ ― DNG001_Page_0526 ―
[མ་དཔེ་གཟིགས་ན་འདིར་གནོན།]
དང་མཐུན་པའི་ཕྱིར། །ངེས་པའི་དོན་ལ་ཡིད་ཆེས་པས། །ཐེ་ཚོམ་སྒྲིབ་པ་དེ་ལ་མེད། །དེ་ལ་སོགས་པའི་གོལ་སྒྲིབ་རྣམས། །བརྒྱ་དང་བརྒྱད་ཅུ་གྲངས་མང་ཡང་། །སྤོང་སྡུད་ཞེན་པ་གསུམ་དུ་འདུས། །དེ་ལས་གཞན་པའི་གོལ་སྒྲིབ་མེད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། མ་རིག་རྩོལ་བའི་སྒྲིབ་པ་མེད་པར་བསྟན་པའི་ལེའུ་སྟེ་ཞེ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་ཡང་གསུངས་པ། །ཡང་དག་སེམས་ཀྱི་ཉིང་ཁུའི་དོན། །ཡེ་ནས་ཆོས་སྐུ་འབྲལ་མེད་ཕྱིར། །ཉམས་ཀྱི་རིམ་པ་ལྔ་གསུངས་པ། །དང་པོ་མཁའ་ལ་ཉི་ཤར་བཞིན། །མ་རིག་སྒྲིབ་པ་མེད་རྟོགས་པས། །རང་རིག་ཆོས་སྐུར་ཡིད་ཆེས་དོན། །ཚིག་མཐས་མ་རེག་རང་གསལ་ཉམས། །གསེར་འགྱུར་རྩི་ཡིས་ཐེབས་པ་བཞིན། །རྟོགས་དང་མི་རྟོག་ཐམས་ཅད་དུ། །ལྟ་བ་སེམས་ཀྱི་སེམས་ཉིད་གསལ། །རང་རྒྱུད་ཟིལ་གྱིས་གནོན་པའི་ཉམས། །སྐྱེས་བུ་བྱ་བ་བཏང་བ་བཞིན། །སྣང་བའི་གཟུགས་སོགས་གང་ལ་ཡང་། །བརྟག་དཔྱད་མ་བྱས་སྒོ་ལྔ་གསལ། །སྣང་བ་ཆོས་ཉིད་གདེང་ལྡན་ཉམས། །འབྱུང་བ་ནམ་མཁའ་མི་འགྱུར་ལྟར། །ཡུལ་གྱི་བདེ་སྡུག་སྒྲ་སྐད་ཀྱིས། །གནོད་མེད་ཆོས་སྐུ་མི་འགྱུར་ཕྱིར། །ཡེངས་པ་རང་སར་གྲོལ་བའི་ཉམས། །རིན་ཆེན་གླིང་དུ་ཕྱིན་པ་བཞིན། །དུས་དང་རྣམ་པ་ཐམས་ཅད་དུ། །ཅི་དྲན་ལྷག་མཐོང་རིག་པར་འགྱུར། །འབྱུང་འཇུག་མེད་ཕྱིར་འབྲལ་མེད་ཉམས། །དེ་དག་ལྔ་ལྡན་སངས་རྒྱས་ཉིད། །དེ་ཡང་རྡོ་རྗེ་སེམས་དཔའ་ཉོན། །སྤྲིན་ལས་ཆར་རྒྱུན་འབབ་པ་བཞིན། །རང་རྒྱུད་ཞེན་མེད་ཆགས་པ་ཆུང་། །གཅིག་པུར་དགའ་ལ་འདུ་འཛི་སྤོང་། །གཡོ་བ་ལས་སུ་རུང་བའི་རྟགས། །འབབ་ཆུ་དལ་དྲག་སྙོམས་པ་བཞིན། །ངང་ངམ་ཤུགས་ཀྱིས་ཡེ་ཤེས་གསལ། །འཁོར་བའི་ཆོས་ལ་ཤིན་ཏུ་སྐྱོ། །གོམས་པའི་རྟགས་ཆེན་ཡིན་པར་བཤད། །རྒྱ་མཚོའི་གཏིང་ནི་མི་གཡོ་ལྟར། །འཁོར་འདས་དངོས་པོ་ཅིར་མ་མཐོང་། །དེ་ཕྱིར་ཉོན་མོངས་ཡུལ་མེད་པས། །བརྟན་པ་ཐོབ་པའི་རྟགས་སུ་བསྟན། །དྲང་སྲོང་ ― DNG001_Page_0527 ―
[མ་དཔེ་གཟིགས་ན་འདིར་གནོན།]
བཟོད་ལྡན་དཔེ་བཞིན་དུ། །ལུས་ཀྱི་བཟོད་པ་ཐོབ་པ་དང་། །གཉིད་ཀྱི་རྟོག་པ་ཆོམས་པའི་ཕྱིར། །ཕྱི་ནང་དབུགས་ཀྱི་ཆ་སྙོམས་པས། །འཇིག་རྟེན་ཆོས་བརྒྱད་བྲལ་བ་རྣམས། །བར་དོར་མངོན་སངས་རྒྱ་བའི་རྟགས། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཉམས་དང་རྟགས་བསྟན་པའི་ལེའུ་སྟེ་ཞེ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ཀྱི་དོན་གྱི་ཕྱིར། །ཡིད་ལ་དྲན་པས་འདི་སྐད་གསོལ། །འབྲས་བུ་ཡོན་ཏན་གདུལ་བྱ་ཡི། །ལྟ་བའི་དམ་ཚིག་ཉམས་པ་གང་གིས་བསྐང་། །རྩ་བ་གཅིག་པའི་བདེན་པ་གང་། །སྣང་མེད་རིག་པའི་རྟོགས་དུས་ནམ། །རྟོགས་པའི་མཛད་སྤྱོད་ཇི་ལྟར་སྤྱོད། །ཀུན་རིག་རྒྱལ་པོས་ལུང་བསྟན་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལྟ་བ་ཉམས་པ་སྐོང་ཐབས་ནི། །ཉེས་འགྱོད་ཡིད་ལ་བྱས་ནས་སུ། །བླ་མ་མཁས་པ་དོན་ལྡན་ལ། །དབང་རྣམས་རིམ་པར་ནོས་ནས་ནི། །རང་སེམས་དཔང་བཙུག་དོན་ཞུས་ནས། །རྒྱུན་དུ་མི་གཏོང་གུས་པའི་ཆོས། །ལྟ་བས་སེམས་རྟོགས་མ་བརྗེད་པས། །རྒྱུན་དུ་མི་འབྲལ་སྒོམ་པའི་མཆོག །རྟགས་ནི་ཤིན་ཏུ་གསལ་བའི་ཉམས། །བརྩོན་འགྲུས་མ་ཡེངས་གུས་པའི་ཐབས། །ཤེས་རབ་གོ་བ་དད་པའི་ཐབས། །རང་སེམས་གདེང་ནི་འགྱུར་བ་མེད། །ཡུལ་ནི་མ་འགགས་ཆོས་ཀྱི་དབྱིངས། །སྤྱོད་པ་མ་འགགས་ཁོང་ཁྲེལ་མེད། །གཡོ་སྒྱུ་མེད་པའི་དམ་ཚིག་གིས། །བརྩེ་གདུང་ཆོས་བྱེད་མི་འགྱོད་པ། །རིག་པ་སོ་ཐུབ་དགོན་པའི་མཆོག །བག་ཆགས་རྗེས་མེད་ཤེས་རབ་སྟེ། །རྒྱུན་དུ་གསལ་འདེབས་ཆོས་སྤྱོད་ཡིན། །ཐེ་ཚོམ་མི་ཟ་བསྐངས་པའི་ཚད། །དེས་བསྐང་གདེང་ཆེན་ངས་བཤད་ཉོན། །རང་བཞིན་དག་པའི་ངོ་བོ་ལ། །མིང་གི་ཐ་སྙད་འཛིན་མེད་པས། །ཡུལ་ལ་མི་ཞེན་རང་སར་གྲོལ། །བསམ་གཏན་བཙལ་མེད་ཉམས་ཀྱི་གདེང་། །ཕན་གནོད་བྱེད་པ་གང་འཕྲད་ཀྱང་། །བྱམས་སྡང་གཉིས་ནི་སྐྱེས་པའི་ཚེ། །མཉམ་ཉིད་རིག་པས་གསལ་ཐེབས་ན། །བློ་དངོས་གཉིས་མེད་ཉམས་ ― DNG001_Page_0528 ―
[མ་དཔེ་གཟིགས་ན་འདིར་གནོན།]
ཀྱི་གདེང་། །ཀུན་བཟང་གཤིན་རྗེ་གང་འོང་ཀྱང་། །གཞི་ལ་མེད་ཅིང་འཁྲུལ་པར་རྟོགས། །གཉིས་ཀ་སྤང་ལེན་མེད་རྟོགས་ན། །ལྟ་བ་གདེང་ལྡན་ཉམས་ཀྱི་གདེང་། །ཐེག་པའི་བྱེ་བྲག་ཅི་གསུངས་ཀྱང་། །བཟང་ངན་སྒྲོ་སྐུར་མེད་རྟོགས་ན། །ཡིད་ཆེས་དོན་ལ་བློ་གནས་པས། །ཆོས་ལ་བཟོད་པ་ཐོབ་པའི་གདེང་། །ལུས་ཀྱི་བདེ་སྡུག་ཅི་བྱུང་ཡང་། །སྐྱོན་ཡོན་མེད་པའི་དོན་དྲན་ན། །སྔ་ཕྱི་མ་བསླངས་དོན་ལྡན་པས། །ཆོས་ཉིད་རང་གསལ་ཉམས་ཀྱི་གདེང་། །གནོད་པར་བྱེད་པ་ནད་དང་བགེགས། །རྟོག་པས་བཏགས་པ་ཡིན་ཤེས་ནས། །མི་གཏོང་དོན་ལྡན་རྣལ་འབྱོར་པས། །དངོས་གྲུབ་བཙལ་མེད་ཉམས་ཀྱི་གདེང་། །སེམས་ལ་སྐྱེ་ཤི་མེད་པའི་ཕྱིར། །འཇིག་རྟེན་གནས་ནི་གར་འདུག་ཀྱང་། །སྐྱེ་འགག་མེད་པའི་དོན་ལ་གནས། །འབྲལ་མེད་དགོངས་པ་ཉམས་ཀྱི་གདེང་། །རྟགས་ཆེན་གདེང་ལྡན་རྣལ་འབྱོར་པས། །ཅི་སྤྱད་སངས་རྒྱས་ཡེ་ཤེས་ཐུགས། །མི་ལུས་རིན་ཆེན་འདི་ཉིད་ལ། །ལྷ་མིས་ཕྱག་འཚལ་མཆོད་པར་འགྱུར། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ལྟ་བ་ཉམས་པ་བསྐངས་པའི་ཚད་བསྟན་པའི་ལེའུ་སྟེ་ཞེ་བདུན་པའོ།། །།དེ་ནས་འདུས་པའི་འཁོར་རྣམས་ལ། །བཅོམ་ལྡན་འདས་ཀྱིས་བཀའ་སྩལ་པ། །འཁོར་འདས་འབྱུང་བའི་རྩ་བ་ནི། །ཕ་མ་མེད་པའི་བུ་བཞི་ཡོད། །དེ་ཡང་གདོད་ནས་གཅིག་ལས་གཉིས། །གསུམ་ལ་འདྲེལ་ཡོད་གཅིག་ལ་མེད། །བདེན་མཐོང་སྣང་མེད་རྟོགས་དུས་ཡིན། །དེ་ཡང་འདུས་པའི་འཁོར་རྣམས་ཉོན། །གཅིག་ནི་ནམ་མཁའི་མཐོངས་སུ་ཚར། །མིང་ནི་འབྱུང་བ་རྣམ་པ་ལྔ། །སྣང་སྲིད་ཀུན་གྱི་མེས་པོར་སྣང་། །ཕྱི་ནང་སྣོད་བཅུད་དེ་ལས་བསྐྱེད། །གཅིག་ནི་ཆོས་ཀྱི་དབྱིངས་སུ་ཚར། །མིང་ནི་ཆོས་སྐུ་ཀུན་ཏུ་བཟང་། །སངས་རྒྱས་ཀུན་གྱི་མེས་པོར་གྲགས། །ཐེག་པའི་ཆོས་རྣམས་དེ་ལས་བྱུང་། །གཅིག་ནི་མ་རིག་མུན་པར་ཚར། །མིང་ནི་འགྲོ་དྲུག་སེམས་ཅན་ཏེ། །ཆགས་སྡང་ལྔ་ལ་ལོངས་སྤྱོད་པས། །འཁོར་བའི་སྡུག་བསྔལ་དེ་ལ་སྨིན། །གཅིག་ནི་འཁོར་འདས་གོང་དུ་ཚར། །མིང་ནི་ངོ་བོ་ཉིད་ཀྱི་སྐུ། །འཁོར་འདས་རབས་ཆད་ ― DNG001_Page_0529 ―
[མ་དཔེ་གཟིགས་ན་འདིར་གནོན།]
ཡང་མེས་པོ། །དེ་རྟོགས་གདོད་ནས་སྐྱེ་ཤི་མེད། །ད་ཡང་རྡོ་རྗེ་སེམས་དཔའ་ཉོན། །སྐལ་ལྡན་རྣམས་ཀྱི་རང་རིག་པ། །ཚིག་ཏུ་མཚོན་པར་མི་ནུས་ཀྱང་། །སེམས་ལ་རྟོགས་པ་ཡོད་པའི་ཕྱིར། །དོན་ཆེན་ཡི་གེ་དམ་པའི་མཆོག །ལྟ་བ་རང་སེམས་ངོ་བོ་ཉིད། །འཁོར་འདས་གཉིས་ལས་འདས་པའོ། །སྒོམ་དུ་མེད་པ་ཡིད་ལས་དྲན། །རང་སེམས་སྙིང་པོ་རྟོགས་པའི་ཐབས། །དེ་ཕྱིར་སེམས་ཀྱིས་སེམས་རྟོགས་ནས། །དེ་ཡང་དངོས་པོར་ཅང་མ་མཐོང་། །རིག་པ་ཡེ་ཤེས་ཆོས་ཉིད་ནི། །དུས་གསུམ་དག་ཏུ་སྐྱེ་འགག་མེད། །སྔར་མ་མཐོང་བའི་དོན་མཐོང་བ། །བློ་ལ་རྒྱུས་པ་ཁོ་ནར་ཟད། །དེ་ལྟར་རིག་པའི་དོན་མཐོང་ན། །མཚན་མར་མཐོང་བ་ཅི་ཡང་མེད། །རིན་ཆེན་ངན་ཁུང་སྟོར་གྱུར་ཀྱང་། །དེ་ཡི་ཡོན་ཏན་མཁའ་ལ་འབྱུང་། །དེ་བཞིན་རང་སེམས་ངོ་བོ་ཉིད། །མངལ་དུ་རང་སེམས་བྱིང་འགྱུར་ཀྱང་། །རང་གསལ་ཡེ་ཤེས་རྒྱུན་མི་འཆད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ངེས་པའི་བདེན་པ་མཐོང་བར་བསྟན་པའི་ལེའུ་སྟེ་ཞེ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །སྣང་མེད་རིག་པ་བཀའ་སྩལ་པ། །བུམ་པའི་ནང་གི་མར་མེ་བཞིན། །ལུས་ཀྱི་ནང་ན་ཆོས་སྐུ་གསལ། །ནང་ནས་སྒོ་ལྔའི་འོད་ཤར་བས། །སྣང་བ་གྲོགས་སུ་འོང་བ་སྙམ། །དེ་ཚེ་ཐ་མལ་ལུས་འདི་ལ། །བརྟེན་པའི་རྣལ་འབྱོར་ལས་ཅན་ཀུན། །སྣང་མེད་རིག་པ་རྒྱུན་མི་འཆད། །དེ་ཉིད་སངས་རྒྱས་དེ་ལས་འབྱུང་། །དེ་སེམས་མ་བཅོས་ངང་གིས་གསལ། །གསལ་ཡང་ཡུལ་ལ་ཞེན་མེད་གྲོལ། །ལུས་ཀྱི་ནང་ན་སངས་རྒྱས་གནས། །དེ་ཕྱིར་ལུས་ལ་སྨད་མི་བྱ། །དཔེར་ན་ཅང་ཤེས་རྟ་ཕོ་ཡིས། །ཡིད་ཀྱིས་བསམ་སར་ལུས་ཀྱིས་ཕྱིན། །དེ་བཞིན་གང་དྲན་ཆོས་སྐུར་གསལ། །སྒྲིབ་པ་ནུབ་པ་བྱ་བ་མེད། །དེ་ཕྱིར་ཅི་སྤྱོད་ཡེ་ཤེས་ལ། །འཕེལ་འགྲིབ་མེད་པར་རང་སེམས་རྟོགས། །དེ་དོན་རྟོགས་པའི་མཆོག་ཡིན་པས། །སངས་རྒྱས་ཀུན་དང་དགོངས་པ་གཅིག །དེ་ཡང་འདུས་པའི་འཁོར་རྣམས་ཉོན། །དཔེར་ན་རེག་འཇམ་སྤུ་ཡིས་ནི། །གང་ ― DNG001_Page_0530 ―
[མ་དཔེ་གཟིགས་ན་འདིར་གནོན།]
རེག་འཇམ་ཞིང་སྤུས་མི་གོས། །དེ་བཞིན་རྣལ་འབྱོར་ཡུལ་ཕྲད་ཀྱང་། །དེ་ལ་སྐྱོན་གྱིས་གོས་པ་མེད། །དེ་ཕྱིར་དུས་རྣམས་ཀུན་ཏུ་ནི། །འབྲལ་མེད་ཡེ་ཤེས་ཐུགས་ལ་གསལ། །དེ་ཚེ་རང་ཉིད་རྟོགས་པའི་ཐབས། །དུས་འདི་ཉིད་དུ་རྟོགས་པར་གསུངས། །དེ་ཡང་འདུས་པའི་སྙིང་པོ་ཉོན། །དཔེར་ན་ནམ་མཁའ་ལྡིངས་ཆེན་ནི། །བདག་གཞན་ཀུན་ལ་མཛེས་པ་བཞིན། །རྣལ་འབྱོར་སོ་ཐུབ་བག་ཟོན་ཅན། །གོལ་ས་མེད་ཅིང་སྒྲོ་སྐུར་སྤང་། །དཔེར་ན་ཆུ་གཏིང་རྒྱ་མཚོའི་གསེར། །བསྐལ་པར་བཞག་ཀྱང་གཡས་མི་གོས། །དེ་བཞིན་དོན་རྟོགས་རྣལ་འབྱོར་པས། །འཁོར་བར་གནས་ཀྱང་གོས་པ་མེད། །དེ་ཡང་འདུས་པའི་སྙིང་པོ་ཉོན། །དཔེར་ན་དབུས་ཀྱི་མཆོག་རབ་ནི། །འགྱུར་བ་མེད་པར་བརྟན་པ་སྟེ། །དེ་ཕྱིར་རང་བྱུང་མ་བལྟས་གསལ། །དེ་ཕྱིར་ཆོས་ཉིད་མི་འགྱུར་བརྟན། །དེ་ལ་རྟོག་པས་མི་གོས་ཏེ། །ད་ལྟ་ཉིད་དུ་རྟོགས་པའི་ཐབས། །དེས་ན་ཚེགས་མེད་དོན་པོ་ཆེ། །བསམ་པ་ཙམ་གྱིས་འགྲུབ་པའི་མཆོག །དེ་ཡང་འདུས་པའི་སྙིང་པོ་ཉོན། །རང་སེམས་རྟོགས་པའི་འབྲས་བུ་ལ། །བསྟུན་ཏེ་ཅིག་ཅར་འཇུག་ནུས་ན། །བསྒོམ་པའི་ཐུན་ལ་རིང་ཐུང་མེད། །ནམ་འགྲུབ་སྙམ་པའི་ཁར་མ་ལུས། །མཉམ་པའི་དོན་ལ་ཡེ་གནས་པས། །འབྲས་བུ་རིག་པ་ད་ལྟ་ཉིད། །དེ་ཉིད་མི་བརྗེད་དོན་ལྡན་པས། །མྱང་འདས་ཞེས་ནི་དེ་ལ་བྱ། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། སྣང་མེད་ཀྱི་རིག་པའི་རྟོགས་དུས་བསྟན་པའི་ལེའུ་སྟེ་ཞེ་དགུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ང་ཡི་མཛད་སྤྱོད་ཆེན་པོ་ནི། །སྐུ་མེད་གཟུགས་སྐུར་བྱུང་བས་ནི། །ཐམས་ཅད་ཟིལ་གྱིས་གནོན་པར་བྱེད། །ཚིག་མེད་རིག་པའི་གསུང་གིས་ནི། །སངས་རྒྱས་བསྟན་པ་རྒྱས་པར་སྒྲོགས། །རྣམ་པར་རྟོག་མེད་ཡེ་ཤེས་ཐུགས། །ཅིར་ཡང་ས་ལེ་ཐམས་ཅད་མཁྱེན། །སྟོང་གསུམ་འཇིག་རྟེན་ཐམས་ཅད་ནི། །ང་ཡི་བཞུགས་གནས་གཟིགས་མོའི་ས། །དེ་ཡང་འདུས་པའི་ ― DNG001_Page_0531 ―
[མ་དཔེ་གཟིགས་ན་འདིར་གནོན།]
སྙིང་པོ་ཉོན། །སྤྲོས་ཀྱང་ང་ལ་བསྡུས་ཀྱང་ང་། །ང་ཡི་སྐུ་གསུང་ཐུགས་ལས་ནི། །འཁོར་བ་བྱ་བ་གདོད་ནས་མེད། །དེ་ཡང་རྡོ་རྗེ་སེམས་དཔའ་ཉོན། །ཡེ་ནས་གནས་པའི་གཞི་ཉིད་ནི། །ཆོས་ཀྱི་སྐུ་ཡི་ཐུགས་སུ་བསྟན། །དེ་ཉིད་རྟོགས་པའི་ཡེ་ཤེས་དེ། །ཆོས་ཀྱི་སྐུ་ཡི་ལོངས་སྤྱོད་ཐུགས། །དྲན་རྟོག་དོན་དུ་ཤེས་པ་དེ། །ཆོས་ཀྱི་སྐུ་ཡི་སྤྲུལ་པའི་ཐུགས། །དོན་ལྡན་གཟུགས་ཀྱི་ཕུང་པོ་འདི། །ལོངས་སྤྱོད་རྫོགས་པའི་ཆོས་ཀྱི་སྐུ། །དབང་པོ་མ་འགགས་གསལ་བ་དེ། །ལོངས་སྤྱོད་རྫོགས་པའི་ལོངས་སྤྱོད་སྐུ། །བསྒུལ་བསྐྱོད་ཡན་ལག་གང་ཡང་ནི། །ལོངས་སྤྱོད་རྫོགས་པའི་སྤྲུལ་པའི་སྐུ། །དོན་ལྡན་ཚིག་ཏུ་བརྗོད་པ་དེ། །སྤྲུལ་པའི་སྐུ་ཡི་ཆོས་སྐུའི་གསུང་། །དངོས་མེད་ཚིག་ཏུ་གསལ་བ་དེ། །སྤྲུལ་པའི་སྐུ་ཡི་ལོངས་སྤྱོད་གསུང་། །ཚིག་ལ་བརྟེན་ནས་དོན་གོ་བས། །སྤྲུལ་པའི་སྐུ་ཡི་གསུང་ཡིན་ཕྱིར། །ད་ལྟའི་ཆོས་སྐུ་ཁ་མིག་ཅན། །དེ་ཡང་འདུས་པའི་སྙིང་པོ་ཉོན། །ལུས་བྲལ་སྐད་ཅིག་དེ་ཉིད་ལ། །བར་དོར་མངོན་སངས་རྒྱ་བ་ཉིད། །མངལ་གྱི་སྒྲིབ་གཡོགས་མེད་པའི་ཕྱིར། །ཀུན་ཏུ་བཟང་པོ་གུད་ན་མེད། །གཟུགས་མེད་རིག་པའི་ཡེ་ཤེས་དེ། །དུས་གསུམ་དག་ཏུ་འགྱུར་མེད་པས། །རྒྱལ་བ་སངས་རྒྱས་ཆོས་ཀྱི་སྐུ། །ལུས་ནི་ཡེ་ཤེས་ཆེན་པོའི་ལུས། །ཐུགས་ནི་ཡེ་ཤེས་ཐམས་ཅད་མཁྱེན། །གཞན་དོན་ཅི་བསམ་འགྲུབ་པ་ཡིས། །གཟུགས་སྐུ་རྣམ་གཉིས་ཤུགས་ལས་འབྱུང་། །དེ་ཡང་རང་རང་འཁོར་རྣམས་ལས། །གང་གིས་གང་ལ་ཅི་རིགས་སུ། །སེམས་ཅན་བསམ་པའི་ཁྱད་པར་ལས། །ཡིད་བཞིན་དབང་པོ་གང་འདོད་སྟོན། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། ཡོན་ཏན་གྱི་གདུལ་བྱ་བསྟན་པའི་ལེའུ་སྟེ་ལྔ་བཅུ་ཐམ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སངས་རྒྱས་རྣམས་དང་རིག་འཛིན་ཚོགས། །མཁའ་འགྲོ་ཆོས་སྐྱོང་དད་ལྡན་རྣམས། །ང་ཡི་བྱིན་གྱིས་བརླབས་པ་ཡིས། །རང་རང་རྟོགས་པ་འདིར་སྨྲོས་ཞིག །དེ་སྐད་ཅེས་ནི་གསུངས་པ་དང་། །རྣམ་གཟིགས་གཙུག་ཏོར་ཐམས་ ― DNG001_Page_0532 ―
[མ་དཔེ་གཟིགས་ན་འདིར་གནོན།]
ཅད་སྐྱོབ། །བསོད་སྐྱོབ་འཁོར་འཇིག་རིན་ཆེན་མང་། །སངས་རྒྱས་མར་མེ་མཛད་རྣམས་ཀྱིས། །རང་རང་དགོངས་པ་ལས་ལངས་ནས། །གོ་རིམ་བཞིན་དུ་རྟོགས་པ་བརྗོད། །སྐྱེ་མེད་རིག་པ་འདི་ཉིད་ལ། །འགག་མེད་རིག་པ་རང་ཤར་བས། །གསལ་ལ་རིག་པ་བྱང་ཆུབ་རྒྱུན། །མ་བསྒོམས་གོལ་མེད་ཆོས་ཀྱི་སྐུ། །ངེས་པའི་ལུང་དང་མཐུན་པ་ཡི། །རྟོག་པའི་ཡེ་ཤེས་མ་འགགས་གསལ། །བརྗེད་མེད་རིག་པ་འདི་ཉིད་ལ། །ངོས་གཟུང་མེད་པས་རང་ཡིད་ཆེས། །མ་བཙལ་རིག་པ་བྱང་ཆུབ་སྐུ། །ཀུན་གཞི་གཞི་ཆ་དེ་ཉིད་ལས། །རང་གསལ་ངོ་བོ་བདེ་ཆེན་ཀློང་། །ཡིད་ཆེས་དོན་ལ་འགྱུར་བ་མེད། །གསལ་དྲན་སྟོང་པ་ཆེན་པོ་ལ། །བྱིང་རྒོད་ཞེན་འཛིན་སྐྱོན་བྲལ་བས། །ངང་དུ་བཞག་པས་ཅི་ཡང་མེད། །དེ་ཙམ་ཉིད་ན་ལྟ་སྒོམ་གཅིག །སྣང་བ་མེད་པའི་ཡེ་ཤེས་འདི། །རྒྱུ་རྐྱེན་མ་བྱས་རང་སེམས་དོན། །ཡིན་ལ་རང་སེམས་ཆོས་སྐུར་གསལ། །མ་རིག་རྟོག་པ་གདོད་ནས་སངས། །ཤེས་པ་རང་ལུགས་འདི་ཉིད་ལ། །ཅི་ཡང་མི་བསྒོམ་ད་ལྟ་ཉིད། །འདུ་ཤེས་མ་བཟུང་དོན་གསལ་བ། །ཡེ་ཤེས་ཟང་ཐལ་ཉམས་མེད་རྟགས། །དངོས་མེད་ལྟ་བ་ཤེས་ཤིང་རིག །རིག་ཙམ་ཉིད་ནས་ངང་གིས་སྟོང་། །རིག་སྟོང་གསལ་བ་མཐའ་དབུས་མེད། །གང་དྲན་ངོ་བོ་ཡེ་ཤེས་ཐུགས། །ཡེ་ཤེས་སྐུ་ནི་ཡང་སྟོན་ཅིག །ལོག་དད་སེལ་དང་འོད་སྲུང་དང་། །རིན་ཆེན་སྙིང་པོ་དབང་པོ་ཞི། །པདྨ་བརྩེགས་དང་གསེར་ཐུབ་དང་། །ཤཱཀྱ་ཐུབ་རྣམས་གོ་རིམ་བཞིན། །རང་རང་རྟོགས་པ་འདིར་བརྗོད་པ། །ནམ་མཁའ་ལྟ་བུར་ཁྱབ་པ་ཡིས། །རང་བྱུང་ཡེ་ཤེས་ཆོས་ཀྱི་སྐུ། །སྣང་སྲིད་གསལ་ལ་སྤོང་སྡུད་མེད། །རིག་པ་གསལ་བ་ཡེ་ཤེས་ཡིན། །ཕྱི་རོལ་ཡུལ་གྱི་སྣང་བ་ཡིས། །འཁོར་འདས་མི་རྟོག་ས་ལེ་བ། །གཉེན་པོས་མི་བསྒོམ་ད་ལྟ་ཉིད། །རང་བྱུང་དེ་ཉིད་ཆོས་སྐུ་ཡིན། །རང་ལ་གནས་པའི་དོན་རྟོགས་པས། །མ་བསྒོམས་རིག་པ་འདི་ཉིད་ལ། །ནང་གསལ་ཕྱི་ལ་མ་ཡེངས་པས། །རྐྱེན་བཞིས་མི་ཤིགས་རྡོ་རྗེ་འདྲ། །དངོས་མེད་སེམས་ཀྱི་ཡེ་ཤེས་འདི། །གསལ་ལ་འཛིན་པ་རྡུལ་ཙམ་མེད། །འཛིན་མེད་རིག་པ་འདི་ཉིད་ལ། །དེ་ལ་ཆེད་དུ་བསྒོམ་མི་དགོས། །ཆོས་ཉིད་གནས་ལུགས་ཞེས་བྱ་བ། །སྐྱེ་བོ་རང་སེམས་ཡིན་རྟོགས་ ― DNG001_Page_0533 ―
[མ་དཔེ་གཟིགས་ན་འདིར་གནོན།]
ན། །གཞན་དུ་མི་བསྒོམ་ད་ལྟའི་སེམས། །དེ་ཉིད་ལས་ནི་བོགས་མི་འདོན། །དང་པོའི་ངོ་བོ་ཉིད་ཀྱི་སྐུ། །དེ་རྟོགས་ཆོས་སྐུ་འགྱུར་མེད་ལ། །མ་བཅོས་རང་གསལ་འཛིན་མེད་པས། །དེ་ལས་གཞན་པ་བསྒོམ་དུ་མེད། །རྒྱུན་གྱི་གདམས་ངག་དོན་རྙེད་པས། །ཐ་མལ་ལུས་དང་བཅས་པ་ཡིས། །རང་སེམས་སྙིང་པོ་རྟོགས་པའི་ཕྱིར། །ད་ལྟའི་ཆོས་སྐུ་ཁ་མིག་ཅན། །ལུས་ཀྱི་ནང་ན་ཡེ་ཤེས་བཞུགས། །ད་ཡང་ཀུན་བཟང་ངེས་པར་གསོན། །མཻ་ཏྲི་མཐུ་ཆེན་ཐོབ་དང་ནི། །ཐུགས་རྗེ་ཅན་དང་འཇམ་པའི་དཔལ། །དྲི་མ་མེད་དང་ཕྱག་ན་རྡོར། །དགའ་བའི་དབང་པོ་རྣམས་ཀྱིས་ནི། །རང་རང་རྟོགས་པའི་དོན་བརྗོད་པ། །ད་ལྟའི་ཤེས་པ་འདི་ཉིད་ལས། །གཟུང་འཛིན་མེད་པའི་བྱང་ཆུབ་སེམས། །དེ་ལ་ཡིད་ཆེས་རིག་པའི་རྒྱུན། །ལྷུན་གྱིས་གྲུབ་ཅེས་དེ་ལ་བྱ། །འཁྲུལ་པའི་རྟོག་པ་ཅིར་སྣང་ཡང་། །དོན་གྱི་དགག་བསྒྲུབ་མ་ཞུགས་ན། །ཟབ་ཅིང་ཆ་ཕྲ་རྟོགས་དོན་དེ། །རྒྱལ་བ་རྣམས་ཀྱི་དགོངས་པ་ཡིན། །སྔ་ཕྱི་ཞེན་པའི་ཡུལ་རྣམས་ལ། །རྟོག་པ་མ་ཞུགས་ཡེངས་མེད་དོན། །བསྒོམ་དུ་མེད་པར་ཡེ་ནས་ཤེས། །དེ་ཙམ་ཉིད་ན་རྒྱུན་མི་འཆད། །དུས་དང་གནས་སྐབས་ཐམས་ཅད་དུ། །རང་སེམས་རྣལ་དུ་རིག་པ་ལ། །རྒྱུན་མི་འཆད་དུ་ཡེ་ཤེས་གསལ། །དེ་ཉིད་དོན་ལ་འགྱུར་བ་མེད། །སྐྱེ་ཤི་མེད་པར་རང་གི་སེམས། །དེ་རྟོགས་བསྒོམ་དུ་རྡུལ་ཙམ་མེད། །དེ་ཉིད་རིག་པ་བྱང་ཆུབ་སྐུ། །མ་བསྒོམས་འབྲལ་མེད་བདེ་བའི་མཆོག །བརྗོད་དུ་མེད་པའི་ཤེས་རབ་ལས། །དམིགས་པ་མེད་པའི་ཏིང་འཛིན་གསལ། །མ་བསྒོམས་ཡེ་ཤེས་ད་ལྟ་ཉིད། །འབྱུང་འཇུག་མེད་པ་རྒྱུན་དུ་གནས། །རང་སེམས་སྙིང་པོ་འདི་ཉིད་ནི། །ཅི་ཡང་མ་བཅོས་རང་རིག་གསལ། །དེ་ཉིད་རང་རིག་བྱང་ཆུབ་སེམས། །དེ་ལ་མི་བཙལ་དོན་ལ་བཞག །དུས་གསུམ་སངས་རྒྱས་དེ་དག་གིས། །རང་རང་རྟོགས་པ་བརྗོད་པའི་ཕྱིར། །དེ་དོན་སངས་རྒྱས་ཐམས་ཅད་ཀྱི། །དགོངས་པ་གཅིག་ཕྱིར་ཡེ་ཤེས་མཐུན། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། དུས་གསུམ་སངས་རྒྱས་རྣམས་ཀྱི་རྟོགས་པ་བརྗོད་ ― DNG001_Page_0534 ―
[མ་དཔེ་གཟིགས་ན་འདིར་གནོན།]
པའི་ལེའུ་སྟེ་ང་གཅིག་པའོ།། །།དེ་ནས་རིག་འཛིན་སེམས་དཔའ་ནི། །རྡོ་རྗེ་སྣང་བ་ཡེ་ཤེས་སྤྱན། །ཡེ་ཤེས་དཔལ་དང་རྡོ་རྗེ་དབྱིངས། །ཡོན་ཏན་སྙིང་པོ་དཔལ་འབར་བ། །སྐྱོན་མེད་གྲགས་དང་དཔལ་ལྡན་བདེ། །གྲུབ་པ་རྩལ་དང་ལས་ཀྱི་སེམས། །གོ་རིམ་བཞིན་དུ་རྟོགས་བརྗོད་པ། །ཐོག་མའི་ཡེ་ཤེས་འདི་ཉིད་ནི། །དམིགས་འཛིན་མེད་པར་རང་གིས་གསལ། །འགག་པ་མེད་ལ་རིག་པ་སྟོང་། །དེ་ལས་མི་འདའ་སངས་རྒྱས་ཐུགས། །རིན་ཆེན་འོད་ཀྱིས་མུན་སེལ་ལྟར། །རང་སེམས་རྟོགས་པའི་དོན་འདི་ལ། །དྲན་པ་མ་ཡིན་མ་རིག་མེད། །གང་ཡང་མ་བསམ་འགྱུར་མེད་དོན། །སྤྲོས་བྲལ་གཉུག་མའི་སེམས་འདི་ལ། །གོལ་ས་ལྟ་བར་ཤེས་པའི་ཕྱིར། །བཙལ་དུ་མེད་དེ་ཡུལ་ལས་འདས། །བསྒོམ་དུ་མེད་ཕྱིར་ཡེངས་པ་མེད། །འདུས་མ་བྱས་པའི་ཡེ་ཤེས་ནི། །སྐྱེ་ཤི་མེད་པ་རང་གི་སེམས། །ཞེ་སྡང་སྐྱོན་གྱིས་མི་གོས་ཏེ། །དོན་ལྡན་ཕྱིར་ན་རང་སར་གྲོལ། །ད་ལྟའི་རང་སེམས་འདི་ཉིད་ལ། །འགག་པ་མེད་པས་རིག་པ་སྟོང་། །ཅི་སྤྱད་དོན་ལས་མི་འདའ་བར། །སྙིང་པོའི་དོན་ལ་འགྱུར་བ་མེད། །ཇི་བཞིན་པ་ལ་མ་སྐྱེས་ཕྱིར། །ང་རྒྱལ་སྐྱེ་མེད་ངོ་བོ་ཉིད། །དེ་ཕྱིར་མི་དམིགས་ཆོས་ཀྱི་སྐུ། །བཙལ་བས་མི་འགྱུར་བདེ་ཆེན་ཀློང་། །དུས་གསུམ་མེད་དེ་རང་སེམས་ལས། །དངོས་མེད་ཡེ་ཤེས་གསལ་བའི་ཕྱིར། །གཟུང་དུ་མེད་པར་ཞེ་མ་གཅོད། །ཅི་སྤྱོད་ཆོས་ཉིད་ལོངས་སྤྱོད་རྒྱན། །སྔ་ཕྱི་མ་སོང་དོན་གསལ་དོན། །ཕོ་མོ་ཆགས་པ་ཅི་སྤྱད་ཀྱང་། །གོལ་མེད་ཡེ་ཤེས་རྒྱུན་མི་ཆད། །བདེ་ཆེན་ལོངས་སྤྱོད་ཆེན་པོར་ཤར། །རེ་དོགས་མེད་པའི་ལྟ་བ་ལ། །རྩོལ་མེད་པ་ཡི་ཏིང་འཛིན་གསལ། །རང་ཡིད་ཆེས་ལ་ཁར་མི་ཐོན། །དེ་ཉིད་བྱང་ཆུབ་བདེ་བའི་ཀློང་། །ནོར་བུ་ཆུ་དྭངས་དཔེ་བཞིན་དུ། །སྣང་སྲིད་གསལ་ལ་ཞེན་མེད་དོ། །དྲན་པ་ཙམ་གྱིས་ཡེ་ཤེས་གསལ། །དེ་ཕྱིར་ཉམས་ཀྱི་དམ་པ་ཡིན། །དེ་ཡང་འདུས་པའི་སྙིང་པོ་ཉོན། །རྒྱལ་སྲས་སྤྲུལ་པ་དད་ལྡན་གྱིས། །རང་རང་རྟོགས་པའི་དོན་བརྗོད་པ། །ཞལ་མཐོང་སྤྲུལ་པ་བདག་གིས་ནི། །དུས་གསུམ་རང་སེམས་ ― DNG001_Page_0535 ―
[མ་དཔེ་གཟིགས་ན་འདིར་གནོན།]
འགྱུར་མེད་དེ། །མཐའ་དབུས་མེད་པར་རིག་པ་གསལ། །གང་ཡང་མ་སྤངས་གནས་སུ་དག །དེ་ཉིད་རྟོགས་པ་ཆོས་ཀྱི་སྐུ། །དད་ལྡན་རྣལ་འབྱོར་བདག་ཅག་གིས། །ཆོས་སྐུ་རང་ཆས་དོན་རྟོགས་པས། །ངེས་པའི་ལྟ་བའི་གདེང་ལྡན་པས། །རྩོལ་ཞིང་སྒྲུབ་པའི་ནད་དང་བྲལ། །རེ་དོགས་མེད་པར་ལམ་དུ་རྟོགས། །དེ་སྐད་བརྗོད་ཅིང་གསལ་བའི་དོན། །ཐུགས་ཀྱི་དགོངས་པ་བཀའ་སྩལ་པ། །ལེགས་སོ་དད་ལྡན་འཁོར་རྣམས་ཉོན། །ཤེས་རབ་བློ་ཡིས་ཁྱད་པར་འཕགས། །ཚིག་ཏུ་མཚོན་པ་སྣ་ཚོགས་ཀྱང་། །དོན་ལ་དབྱེར་མེད་ངོ་བོ་གཅིག །གཅིག་ལ་རྟོགས་ཚུལ་ཀུན་གྱི་ངང་། །དོན་ལ་འགྱུར་བ་རྡུལ་ཙམ་མེད། །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། འཁོར་གྱི་རྟོགས་པ་བརྗོད་པའི་ལེའུ་སྟེ་ང་གཉིས་པའོ།། །།དེ་ནས་དུས་གསུམ་སངས་རྒྱས་དང་། །རིག་པ་འདུས་པའི་རྒྱལ་སྲས་འཁོར། །དད་ལྡན་ལ་སོགས་འཁོར་རྣམས་ཀྱིས། །རང་སེམས་རྟོགས་པ་མངོན་གྱུར་ནས། །དགའ་བའི་སེམས་ཀྱིས་ཡི་རང་སྟེ། །ཀུན་ཏུ་བཟང་ལ་འདི་སྐད་གསོལ། །འབྲས་བུའི་སངས་རྒྱས་ད་ལྟ་ཉིད། །རང་སེམས་མ་དང་ཏུག་གིས་ཕྲད། །དེ་ཕྱིར་ཆོས་སྐུ་ད་ལྟ་ཉིད། །སེམས་དཔའ་རྡོ་རྗེ་དགེ་བ་ཆེ། །འདྲེན་མཛད་ཁྱོད་ལ་ཕྱག་འཚལ་ལོ། །དེ་སྐད་གསོལ་བའི་དོན་གོ་ནས། །རྡོ་རྗེ་སེམས་དཔས་ཡང་གསུངས་པ། །སངས་རྒྱས་ཐུགས་ཀྱིས་བྱིན་བརླབས་པས། །དགོངས་པ་མ་ལུས་བཅུད་བསྡུས་པའི། །མན་ངག་ཚེགས་མེད་ཉིང་ཁུ་འདི། །གལ་ཏེ་ཕྱི་རབས་རྣལ་འབྱོར་པས། །དོན་འདི་འཆད་ཅིང་སྟོན་སྲིད་ན། །དད་པ་རབ་ལྡན་བརྩོན་འགྲུས་ཆེ། །དུལ་ཞིང་གུས་པར་བླ་མ་འཁུར། །དམ་ཚིག་གཞུང་ལྡན་དབང་རྣམས་རྫོགས། །བློ་རྣོ་ཆགས་མེད་བཟོད་པ་ཆེ། །གཏད་པ་དང་ལེན་ཆུད་མི་གསན། །གདུང་བའི་སེམས་དང་མི་འབྲལ་ཞིང་། །ཕྱི་མ་བྱང་ཆུབ་དོན་དུ་གཉེར། །དཀའ་དགུ་བསྡོས་ནས་ཞུས་པའི་ཚེ། །དུས་གསུམ་སངས་རྒྱས་དཔང་བཙུགས་ལ། །གིང་ཆེན་དམ་མེད་ཤན་པར་བསྒོ། །རྒྱལ་ཆེན་བཞི་ནི་མཚམས་པར་བཅུགས། །གཞན་ལ་མི་ ― DNG001_Page_0536 ―
[མ་དཔེ་གཟིགས་ན་འདིར་གནོན།]
སྤེལ་མནའ་བོར་ཏེ། །ཆོས་ཀྱི་གཏེར་གྱི་འབྱུང་གནས་འདི། །མན་ངག་སྙིང་པོ་ཚང་བར་བསྟན། །ཚོགས་ཀྱི་མཆོད་པ་ཅི་ནུས་བྱ། །དེ་ལྟར་མི་ནུས་སྣོད་ངན་ན། །དཔེར་ན་དོན་མེད་གཡེངས་པ་ཝ། །གཞན་ལ་ཁྲོ་ཞིང་གཏུམ་པ་དོམ། །རྟག་ཏུ་དྲན་མྱོས་གླང་ཆེན་སྨྱོན། །མེད་པ་ཟ་འདོད་ལྕེ་སྤྱང་ཁ། །ཁ་འཇམ་དོན་འཁྲི་རེག་འཇམ་སྤུ། །བསླབ་པ་མི་ཉན་དུད་འགྲོ་ཕྱུགས། །བྱི་ལ་མནོར་ཆུང་འཚང་རྫོགས་ལ། །སྙིང་སྒོར་ཕྱུང་ཡང་མི་བསྟན་ནོ། །སྲོག་ཆད་པ་ཡི་ཁ་བཞིན་སྡོམས། །དེ་ལྟ་བུ་ཡི་སྣོད་ངན་ལ། །མན་ངག་ཟབ་མོ་ཅི་བསྟན་ཀྱང་། །དད་ཆུང་མན་ངག་ཀུན་ལ་སྤེལ། །བླ་མ་སྨོད་ཅིང་རང་ཆེ་འབྱིན། །དེ་ལྟ་བུ་ཡི་མི་ངན་ལ། །འདི་སྤེལ་ཚེ་ཐུང་ནད་མང་དང་། །ཡིད་དུ་མི་འོང་རྐྱེན་རྣམས་འབྱུང་། །དམ་སྲི་ལངས་པ་མ་ཡིན་ཏེ། །སངས་རྒྱས་རྣམས་ཀྱི་བཀའ་ཆད་འབྱུང་། །དེ་ཕྱིར་ཤིན་ཏུ་རྒྱུད་འདི་སྦོས། །ཆོས་སྐྱོང་ཡོད་པའི་གཙུག་ལག་ཁང་། །ལྷ་འདྲེ་ཡོད་པའི་བྲག་དཀྱིལ་དུ། །སྨོན་ལམ་བཏབ་ནས་སྦས་ལ་བཞག །རྫོགས་པ་ཆེན་པོ་ལྟ་བའི་ཡང་སྙིང་། ནམ་མཁའ་ཀློང་ཡངས་ཀྱི་རྒྱུད་ལས། རྒྱུད་གཏད་པའི་ལེའུ་སྟེ་ང་གསུམ་པའོ།། །།རྫོགས་པ་ཆེན་པོ་ལྟ་བའི་ཡང་སྙིང་རྫོགས་སོ།། །།རྫོགས་པ་ཆེན་པོ་ལྟ་བའི་ཡང་སྙིང་། སངས་རྒྱས་ཐམས་ཅད་ཀྱི་དགོངས་པ་ནམ་མཁའ་ཀློང་ཡངས་ཀྱི་རྒྱུད་ཅེས་བྱ་བ། གསེར་གྱི་དྲིལ་ཤིང་ཅན་འདི། དང་པོ་ངོ་བོ་ཉིད་ཀྱི་སྐུས། རྒྱལ་བ་ཀུན་ཏུ་བཟང་པོ་ལ་བཤད། དེས་རྡོ་རྗེ་སེམས་དཔའ་ལ་བཤད། དེས་དགའ་རབ་རྡོ་རྗེ་ལ་བཤད། དེས་བྲམ་ཟེ་བདེ་མཆོག་སྙིང་པོ། དེས་ཤྲཱི་སིང་ཧ་ལ་བཤད། དེས་བི་མ་མི་ཏྲ་ལ་བཤད། དེས་མྱང་ཏིང་འཛིན་བཟང་པོ་ལ་བཤད། དེས་གཏེར་དུ་སྦས་པ། འབྲོམ་ཡེ་ཤེས་བླ་མའི་བུ། འབྲོམ་ཡེ་ཤེས་སྙིང་པོས་བཏོན་ནས། དེས་མྱང་ཤེས་རབ་མཆོག་གི་སྲས། དེས་ཤངས་ཀྱི་སྟོན་པ་ལྕེ་ཆུང་བ་ཡེ་ཤེས་རྒྱལ་མཚན་ལ་བཤད། དེས་བླ་མ་གཉན་ཆུང་པ་ལ་གནང་བའོ།། །།རྒྱ་གར་གྱི་མཁན་པོ་བི་མ་ལ་མི་ཏྲ་དང་བོད་ཀྱི་ལོཙྪ་བ་དྲན་པ་ཡེ་ཤེས་ཀྱིས་བསྒྱུར་ རྫོགས་པ་ཆེན་པོ་སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ཅེས་བྱ་བ།― DNG001_Page_0537 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། སནྟི་མ་ཧཱ་བུཌྜྷ་སརྦ་ས་མཱ་དྷི། དྷརྨྨ་ཀཱ་ཡ་ཨེ་ཀ་ས་མུ་དཱ་ཡ་ཀ་ཐཱ་སམྨ་ཏཱརྠ་རཏྣ་གུ་ཎ་ས་མུ་ད་ཡ་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོ་སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ཅེས་བྱ་བ། དཔལ་ཀུན་རིག་ཆོས་ཀྱི་སྐུ་དེ་ཁོ་ན་ཉིད་མ་ནོར་བར་རྟོགས་པའི་དོན་དང་ལྡན་པ་དེ་ལ་བརྗོད་མེད་ནན་ཏན་རིག་པའི་ཀློང་དུ་ཕྱག་འཚལ་ལོ། །འདི་སྐད་བདག་གིས་གསུངས་པའི་དུས་གཅིག་ན། །རང་བྱུང་རིག་པའི་སྟོན་པ་དེ། །འོག་མིན་ཀློང་གི་གནས་མཆོག་ན། །ཉིད་ལས་མི་གཞན་རྟོགས་པའི་འཁོར། །དོན་གཅིག་བསྟན་པས་མངོན་གྱུར་ཏོ། །དེ་ཚེ་ཆོས་ཀྱི་སྙིང་པོ་དེ། །བཞེངས་པ་མེད་པའི་ངང་ལས་བཞེངས། །རང་རིག་ཡེ་ཤེས་འགྱུར་མེད་དོན། །བརྗོད་མེད་སྙིང་པོས་བཀའ་སྩལ་པ། །རང་བྱུང་ངོ་བོ་རྣམ་དག་འདི། །འཛིན་པའི་ཡུལ་མེད་མཐའ་ལས་གྲོལ། །བློ་ཡིས་མ་བཅོས་དོན་དང་ལྡན། །རྟོག་མེད་མཉམ་ཉིད་ཆོས་ཉིད་དོན། །དེ་སྐད་དོན་གྱི་བཀའ་སྩལ་པ། །ཇི་བཞིན་སེམས་དཔས་དོན་རིག་ནས། །རང་གི་ཡིད་ཀྱི་རྟོག་བསལ་ཕྱིར། །ཏིང་འཛིན་ངང་ལས་འདི་སྐད་གསོལ། །དོན་ཆེན་སྨྲ་བའི་སེང་གེ་ཁྱོད། །ཆོས་ཀྱི་སྒོ་མོ་བསམ་ཡས་ཀྱང་། །བཙལ་མེད་ཐུག་མེད་བརྗོད་དུ་མེད། །དེ་དོན་བདག་ལ་བཤད་པར་མཛོད། །དེ་སྐད་ཞུས་པའི་དོན་གསན་ནས། །མཉམ་པའི་དོན་ལས་རབ་བཞེངས་ནས། །བརྗོད་མེད་དོན་དུ་བསྟན་པའི་ཕྱིར། །དོན་གྱིས་བྱིན་རླབས་བཀའ་སྩལ་པ། །བརྗོད་བྱ་ཚིག་དོན་དགོས་པ་ཡི། །ཉིང་དགོས་འདྲེལ་བཅས་དོན་ལྡན་པ། །རྒྱུད་རྣམས་ཀུན་ལ་ཚང་བ་གཅེས། །དེ་ཕྱིར་ངེས་དོན་བཤད་པ་ཡིན། །དེ་ཡང་རྡོ་རྗེ་སེམས་དཔའ་ཉོན། །ཡེ་ནས་གནས་པའི་ངོ་བོ་ ― DNG001_Page_0538 ―
[མ་དཔེ་གཟིགས་ན་འདིར་གནོན།]
ལ། །ཡིན་མིན་བརྟགས་པའི་ཐེ་ཚོམ་དེ། །རྟོག་བྲལ་ཤེས་པ་རང་གནས་ཕྱིར། །རེ་དོགས་མེད་པའི་དོན་མཐོང་གྱིས། །དེ་སྐད་དོན་གྱིས་གསུངས་པ་དང་། །འདུས་པའི་སྙིང་པོ་སེམས་དགའ་ནས། །ཇི་བཞིན་ལས་ཀྱི་རྒྱུད་དག་ཏུ། །རང་གི་རྟོགས་པ་མངོན་གྱུར་ནས། །ཀུན་བཟང་རིག་པའི་སྟོན་པ་ལ། །བདེན་པའི་དགོངས་དོན་འདི་སྐད་གསོལ། །རྩོད་བྲལ་ཡང་ཏིའི་རྟོགས་ཚུལ་ནི། །ཡུལ་མེད་རང་བྱུང་ཡེ་ཤེས་ལ། །ཞེན་པ་མེད་པའི་རིག་པ་ཤར། །གཟའ་གཏད་མེད་པའི་ངོ་བོར་རྟོགས། །དེ་སྐད་ཅེས་ནི་ཞུས་པ་དང་། །དེ་ཡི་བསམ་པ་ཐུགས་ཆུད་དེ། །ཀུན་རིག་སྟོན་པས་བཀའ་སྩལ་པ། །དེ་ལྟར་རྟོགས་པའི་བྱིན་རླབས་ཀྱིས། །ཕྱོགས་བཅུ་དུས་གསུམ་མ་ལུས་པའི། །སངས་རྒྱས་ཇི་སྙེད་གང་བཞུགས་པ། །ཆོས་ཉིད་ཆོས་སྐུར་དགོངས་པ་གཅིག །གཞན་ན་སངས་རྒྱས་རྡུལ་ཙམ་མེད། །དེ་སྐད་གསུངས་མ་ཐག་ཏུ་ནི། །དེ་ཚེ་དུས་གསུམ་སངས་རྒྱས་དང་། །རྡོ་རྗེ་འཆང་གི་རིག་འཛིན་དང་། །རྒྱལ་སྲས་སྤྲུལ་པའི་མགོན་པོ་དང་། །དམ་བཏགས་མཁའ་འགྲོ་སྡེ་ལྔ་དང་། །དད་ལྡན་ལྷ་མི་ལས་ཅན་ཀུན། །ཁབ་ལེན་ལ་ནི་ལྕགས་འདུ་བཞིན། །མོས་གུས་དད་པས་འདུས་ནས་ནི། །ལས་དང་ཐུགས་རྗེས་འདུས་ནས་འཁོད། །རྫོགས་པ་ཆེན་པོ་སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་འགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། དཔེ་དོན་ཆེད་དུ་གསུངས་པའི་གླེང་གཞིའི་ལེའུ་སྟེ་དང་པོའོ།། །།དེ་ནས་ཀུན་རིག་རྒྱལ་པོ་ལ། །འདུས་པའི་འཁོར་གྱི་དོན་ཆེད་དུ། །རྡོ་རྗེ་སེམས་དཔས་དོན་ཞུས་པ། །སེམས་ཅན་མ་རིག་བསལ་བའི་ཕྱིར། །གདུལ་བྱའི་བསམ་པའི་ཁྱད་པར་ལས། །ཅི་རིགས་པར་ནི་བཀའ་བགྲོས་ལ། །ངེས་དོན་སྙིང་པོ་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །ང་ཡིས་བྱིན་གྱིས་བརླབས་པ་ཡིས། །སངས་རྒྱས་མ་ལུས་འདིར་འདུས་པ། །སྐུ་མེད་གཟུགས་སྐུར་མངོན་བཞེངས་ལ། །གསུང་ ― DNG001_Page_0539 ―
[མ་དཔེ་གཟིགས་ན་འདིར་གནོན།]
མེད་རིག་པའི་དོན་སྒྲོགས་པས། །རང་སེམས་སྙིང་པོ་རྟོགས་པའི་ཐབས། །ཆོས་ཉིད་གནས་ལུགས་གང་ཡིན་པ། །རྟོག་མེད་ཐུགས་རྗེས་བཀའ་བགྲོས་ལ། །སེམས་ཅན་དོན་དུ་བྱིན་གྱིས་རློབས། །དེ་སྐད་ཅེས་ནི་གསུངས་པའི་དོན། །སངས་རྒྱས་སེམས་དཔའ་ཀུན་གྱིས་ཀྱང་། །གང་ཞིག་ཞུ་བར་མ་སྤོབས་ནས། །མངའ་བདག་རྡོ་རྗེ་སེམས་དཔའ་ཡིས། །ཕྱི་རབས་དད་ལྡན་དོན་ཆེད་དུ། །ངེས་པའི་དགོངས་དོན་འདི་སྐད་གསོལ། །དུས་གསུམ་སངས་རྒྱས་མ་ལུས་ཀུན། །ངེས་དོན་མངའ་བདག་ཁྱེད་ཡིན་པས། །རྩོལ་བཅས་ཆོས་ནི་མཐར་བཏོན་པས། །རྩོལ་མེད་ཐེག་པ་མི་གསུངས་པ། །སྔོན་གྱི་ཐུགས་དམ་ཡལ་ལམ་ཅི། །མ་ནོར་ཆོས་ཉིད་བཤད་དུ་གསོལ། །དེ་སྐད་ཅེས་ནི་ཞུས་པ་ཡིས། །སངས་རྒྱས་འུབ་ཆུབ་འདུས་ཀུན་ནས། །རང་རང་དགོངས་པའི་དོན་བསྡུར་ནས། །བཀའ་ཡི་བགྲོ་བ་མང་དུ་བགྱིས། །ཞུས་པའི་དོན་གསན་བཀའ་སྩལ་པ། །གཞི་ཉིད་རྟོགས་པ་ལམ་གྱི་མཆོག །དེ་ཉིད་མ་བྲལ་མངོན་གྱུར་པས། །འབྲས་བུ་སངས་རྒྱས་ད་ལྟ་ཉིད། །སྐྱེ་བ་གཞན་དུ་བཙལ་མི་དགོས། །དེ་ཡང་རྡོ་རྗེ་སེམས་དཔའ་ཉོན། །མ་ནོར་སངས་རྒྱས་དགོངས་པ་ཉིད། །ང་ཡིས་ང་ཉིད་བགྲོས་པ་ལས། །སངས་རྒྱས་སེམས་ཅན་མ་ལུས་ཀྱི། །ང་ཡི་བཀའ་ནི་བགྲོ་ནུས་མེད། །མ་གསུངས་རྒྱ་ཆེར་བཤད་པ་འདྲ། །དེ་ཡང་འདུས་པའི་སྙིང་པོ་ཉོན། །རྒྱ་ཆེར་མ་གསུངས་དོན་དེ་ནི། །ཡུལ་ལ་ཞེན་པ་མེད་པའི་ཕྱིར། །ཤེས་པ་རང་གསལ་རིག་པ་ལ། །ཡིད་ལ་དྲན་དང་མ་དྲན་པ། །གང་གི་ཕྱོགས་ལྷུང་མེད་པའི་ཕྱིར། །མ་བསྒོམས་ཡེ་ནས་འབྲལ་བ་མེད། །གང་ཡང་ཡིན་ཕྱིར་གོལ་སྒྲིབ་མེད། །དེ་ཡི་ཡོན་ཏན་བརྗོད་མི་ལངས། །དེ་སྐད་ཅེས་ནི་གསུངས་པ་དང་། །རྡོ་རྗེ་སེམས་དཔས་དོན་གོ་ནས། །མ་རིག་སངས་པས་ཆོས་སྐུ་རྒྱས། །དེ་ཕྱིར་རྟོགས་པ་མངོན་དུ་གྱུར། །རང་བཞིན་ལྟ་བ་གདེང་ལྡན་པས། །འབྲས་བུའི་སངས་རྒྱས་ད་ལྟ་འབྱུང་། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། བཀའ་བགྲོས་ ― DNG001_Page_0540 ―
[མ་དཔེ་གཟིགས་ན་འདིར་གནོན།]
པའི་ལེའུ་སྟེ་གཉིས་པའོ།། །།དེ་ནས་ཀུན་རིག་སྟོན་པ་ཡིས། །ཕྱི་རབས་རྣལ་འབྱོར་དོན་ཆེད་དུ། །བཅུད་དང་སྣོད་དུ་རིམ་པ་ཡིས། །འདུས་པའི་འཁོར་ལ་བཀའ་སྩལ་པ། །བླ་མ་དོན་ལྡན་ངེས་པའི་བཅུད། །ཕྱི་ནང་དབང་རྣམས་རྫོགས་ནས་ནི། །ཐུན་མོང་མ་ཡིན་ཁྱད་འཕགས་པའི། །རང་རིག་ཡེ་ཤེས་དབང་གསུམ་ནི། །དད་པས་མནོས་པས་བདེན་པ་མཐོང་། །བླ་མ་དེ་ཡི་ཡོན་ཏན་ནི། །ཆོས་རྒྱ་ཆེ་ལ་གདམས་ངག་ཟབ། །བཀའ་ཡངས་སྙིང་རྗེ་རབ་ཏུ་ལྡན། །མི་བརྗེད་པ་ཡི་གཟུངས་ནི་ཐོབ། །ངེས་པ་དོན་གྱི་གདེང་ཡོད་ཕྱིར། །གཅིག་པུར་གནས་ཀྱང་སྐྱོ་བ་མེད། །ལྟ་བ་རྟོགས་པས་བདུད་མི་ཚུགས། །ཏིང་འཛིན་ཡེངས་མེད་ཁམས་མི་ལྡོག །ཚུལ་འཆོས་མེད་ཅིང་དྲང་པོར་མཛད། །ཚེགས་ཆུང་ཅི་བྱེད་ཆོས་དང་མཐུན། །ངོ་དགར་མི་བཏང་སྣོད་ལ་རྟོག །དད་པ་ཅན་ལ་གདམས་ངག་ཡངས། །སངས་རྒྱས་དགོངས་པ་ཐུགས་ལ་འཆང་། །དེ་ཡང་རྡོ་རྗེ་སེམས་དཔའ་ཉོན། །སློབ་མའི་སྣོད་ཀྱི་མཚན་ཉིད་ནི། །དད་ལྡན་ཁྱད་འཕགས་ཤེས་རབ་ཅན། །འོག་མའི་རྗེས་སུ་མི་འབྲངས་པར། །གསང་སྔགས་བཀའ་ལ་རྟོག་པ་མཁས། །མན་ངག་ཆོས་ལ་ཤིན་ཏུ་མོས། །བླ་མ་ལ་གུས་ཕྱི་ཐག་རིང་། །ཆགས་མེད་དབུལ་ནུས་དད་པ་བརྟན། །ཆོས་ཀྱི་གཞུང་འཛིན་སྤྱོད་པ་མཁས། །ཕག་ཏུ་བསྟོད་ཅིང་ཡོན་ཏན་བརྗོད། །གཞན་གྱི་སྒྲོ་སྐུར་ཟིལ་གྱིས་གནོན། །ཐབས་ལ་མཁས་པས་མིས་མི་སྡང་། །གཏད་པ་དང་ལེན་ཆུད་མི་གཟོན། །དེ་ལྡན་སློབ་མ་འབྱུང་སྲིད་ན། །འབྲལ་མེད་ཡེ་ཤེས་རང་ཤར་དོན། །རྒྱུད་དྲུག་ཡང་སྙིང་ཡིན་པའི་ཕྱིར། །བསྟན་མ་ཐག་ཏུ་རྟོགས་པའི་ཆོས། །སྣོད་ལྡན་གསང་ཐུབ་འགའ་ལ་བསྟན། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན་རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སྣོད་བཅུད་བསྟན་པའི་ལེའུ་སྟེ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །རྩ་བ་མདོར་བསྡུས་བཀའ་སྩལ་པ། །ཆོས་རྣམས་ཀུན་གྱི་རྩ་བ་ནི། །འཁོར་འདས་གཞི་ཡི་ངོ་བོ་ཉིད། ། ― DNG001_Page_0541 ―
[མ་དཔེ་གཟིགས་ན་འདིར་གནོན།]
དེ་མ་ཤེས་པར་ལུང་མ་བསྟན། །དེ་ལས་འཁྲུལ་པས་འཁོར་བར་སྨིན། །དེ་ཡང་འདུས་པའི་སྙིང་པོ་ཉོན། །ཕྱི་པ་མུ་སྟེགས་རྣམ་གཉིས་དང་། །ནང་པ་སངས་རྒྱས་ཁས་འཆེ་བའི། །ཉན་ཐོས་རྒྱུད་ལུང་ཡན་ཆད་ཀྱིས། །གཞི་ཉིད་མ་ཤེས་འཁྲུལ་པའི་ཕྱིར། །བསྒོམ་གོལ་བདུད་བསླུས་བར་དོར་འཁྱམས། །དེ་ཡི་ལྡོག་ཆོས་ཤེས་པ་དགོས། །འཁོར་འདས་མ་རིག་ངེས་པའི་དོན། །བཀའ་རྟགས་ལྔ་ཡི་དོན་བསྡུས་པ། །དད་ལྡན་འཁོར་ལ་ངས་བཤད་ཀྱིས། །རང་གི་སེམས་ལ་ངེས་པར་ཆོངས། །དེ་ཡང་འདུས་པའི་སྙིང་པོ་ཉོན། །རིག་འཛིན་གྲུབ་ཐོབ་བཀའ་རྟགས་ནི། །སྲས་ལ་རྒྱལ་སྲིད་གཏད་པ་བཞིན། །ལུང་ལྡན་ངེས་པའི་གདམས་ངག་ནི། །སློབ་མ་དད་ལྡན་འགའ་ལ་གཏད། །རིག་པ་བྱིན་རླབས་བཀའ་རྟགས་ནི། །རིན་ཆེན་གསེར་འགྱུར་རྩི་བཞིན་དུ། །ཐ་མལ་ཤེས་པ་འདི་ཉིད་ལས། །རང་རིག་ཆོས་སྐུར་བྱིན་གྱིས་བརླབས། །ཉམས་སུ་སྦྱོང་བའི་བཀའ་རྟགས་ནི། །བདེ་བ་སྙིང་ལ་ཞེན་པ་བཞིན། །རང་རིག་ཆོས་སྐུར་ངོ་སྤྲད་པས། །ཞེན་མེད་ཉམས་དང་འབྲལ་མི་ཕོད། །ལ་ཟློ་སྤྱོད་པའི་བཀའ་རྟགས་ནི། །མར་གྱིས་འོ་མ་འཐུངས་པ་བཞིན། །ཅི་སྤྱོད་འབྲལ་མེད་ཆོས་སྐུར་ཤེས། །གོལ་མེད་ལ་ཟློས་དོན་མི་འབྲལ། །འབྲས་བུ་མཐར་ཕྱིན་བཀའ་རྟགས་ནི། །ནོར་བུ་རིན་ཆེན་རྙེད་པ་བཞིན། །ཆོས་རྣམས་ཆོས་སྐུར་གཅིག་ཤེས་པས། །འཁོར་སྟོངས་སངས་རྒྱས་སྨོས་ཅི་དགོས། །དེ་ཡང་འདུས་པའི་སྙིང་པོ་ཉོན། །བཀའ་རྟགས་ལྔ་ནི་གཅིག་ཤེས་ན། །རང་སེམས་རྟོགས་པས་གཞི་དང་ཕྲད། །དེ་ཕྱིར་ཆོས་སྐུ་འབྲལ་མེད་ལམ། །འབྲས་བུ་འགྱུར་མེད་སངས་རྒྱས་ཡིན། །དེ་ཡིས་དེ་ཉིད་མཚོན་པའི་དཔེ། །མཛུབ་མོ་ལ་བརྟེན་ཟླ་བ་མཐོང་། །གདམས་ངག་ལ་བརྟེན་ལྷག་མཐོང་ཤར། །དོན་རྟོགས་ཀློང་ནས་ཡེ་ཤེས་འཕྱོ། །རིག་པ་ཆོས་སྐུ་རྣམ་པ་གཉིས། །ཐ་དད་མེད་དེ་ཉི་ཟེར་ཚུལ། །དོན་ལ་དབྱེར་མེད་ཆོས་ཀྱི་སྐུ། །རྒྱུ་རྐྱེན་མ་བསྐྱེད་ཡེ་ནས་ཡིན། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། གདམས་ ― DNG001_Page_0542 ―
[མ་དཔེ་གཟིགས་ན་འདིར་གནོན།]
ངག་རྩ་བ་གཅིག་ཏུ་འདུས་པར་བསྟན་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་གདགས་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་དགོངས་དོན་འདི་སྐད་གསོལ། །འཁོར་འདས་གཞི་ནི་གང་གིས་བགྱིས། །མ་རིག་གཞི་ནི་གང་གིས་བཙལ། །དེ་ལས་འཁྲུལ་པ་ཇི་ལྟར་བྱུང་། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ཡེ་ནས་གནས་པའི་གཞི་ཉིད་ནི། །སྐྱེ་བ་མ་བླངས་དུས་ན་ཡང་། །རྒྱུ་རྐྱེན་མ་སྐྱེས་ཡེ་ཡོད་ཕྱིར། །སྒྲོ་སྐུར་བྲལ་དང་མ་བྲལ་བའི། །རྟོགས་དང་འཁྲུལ་པ་གང་ཡང་མེད། །རིག་དང་མ་རིག་ཤན་མ་ཕྱེད། །ཡེངས་དང་མ་ཡེངས་ངོས་མ་ཟིན། །རང་རིག་ཧད་དེ་ཙམ་ཡོད་ཀྱང་། །གང་གི་འདུ་ཤེས་མ་ཞུགས་པས། །བྱ་བ་བཏང་བའི་མི་བཞིན་དུ། །འཛིན་མེད་དོན་གྱི་མ་ཟིན་པས། །རང་བཞིན་ལུས་སུ་མིང་བཏགས་ཏེ། །གཞི་ནས་མ་རིག་མེད་པའི་ཕྱིར། །བག་ཆགས་མ་གོས་འཁྲུལ་མ་མྱོང་། །རྟོགས་པས་མ་བཞག་སངས་མ་རྒྱས། །ཕྱི་ཡི་འབྱུང་བ་མ་ཆགས་ཕྱིར། །རྒྱུ་དང་རྐྱེན་གྱིས་འདུས་མ་བྱས། །དེ་ཡང་འདུས་པའི་སེམས་དཔའ་ཉོན། །རང་བཞིན་གཞི་ཡི་མཚན་ཉིད་ནི། །རྟོགས་དང་མ་རྟོགས་ཆ་མེད་ཕྱིར། །འཁོར་བ་མྱང་འདས་གཉིས་ཀྱི་གཞི། །ཀུན་ལ་ཡོད་པས་གཞི་ཞེས་བྱ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན་རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། འཁོར་འདས་ཀྱི་གཞི་བསྟན་པའི་ལེའུ་སྟེ་ལྔ་པའོ།། །།དེ་ནས་ཀུན་རིག་རྒྱལ་པོ་ཡིས། །ཇི་ལྟར་འཁྲུལ་ཚུལ་བཀའ་སྩལ་པ། །དང་པོ་འཁོར་འདས་བར་དོ་ལ། །ཇི་ཞིག་ལྟར་ལ་ཡེངས་ཚུལ་གྱིས། །འཁྲུལ་གཞི་མེད་ལས་འཁྲུལ་པ་བྱུང་། །མེད་ལས་བྱུང་བ་ཡ་མཚན་ཆེ། །དེ་ཡང་འདུས་པའི་སྙིང་པོ་ཉོན། །རྒྱུན་ཙམ་ཅི་ཞིག་དྲན་པ་སྙམ། །ཇི་ཞིག་དྲན་དང་མ་དྲན་གྱིས། །གང་བློ་མི་འཇུག་དོན་མི་ཤེས། །མ་རིག་གཞི་ནི་ལུང་མ་བསྟན། །འཁྲུལ་གཞི་མེད་པའི་འཁྲུལ་པ་དེ། །རང་བཞིན་ལུས་དེ་ ― DNG001_Page_0543 ―
[མ་དཔེ་གཟིགས་ན་འདིར་གནོན།]
གྱ་གྱུ་ཡིས། །མེད་ལས་ཡོད་དྲན་ཡུད་ཙམ་བྱུང་། །དེ་ཉིད་རང་བརྗེད་རིམ་གྱིས་བསྒྲིབས། །དེ་ཉིད་དུས་མཉམ་ལུང་མ་བསྟན། །དེ་ཡང་འདུས་པའི་སྙིང་པོ་ཉོན། །འཁོར་འདས་གཞི་ནི་མ་ཤེས་རྩལ། །འཁོར་བའི་གཞི་ནི་དེ་ཡིན་ཕྱིར། །གྱ་གྱུ་ཙམ་དུ་དྲན་ཡོད་ཀྱང་། །དེ་མ་ཤེས་པ་དེ་ཁོ་ནས། །མ་རིག་སྒོ་ལྔའི་རྟེན་བྱེད་ཕྱིར། །འཁོར་བར་སྐྱེ་བའི་གཞི་མ་ཡིན། །ཉི་ནུབ་ནམ་ནི་མ་སྲོས་འདྲ། །རྫོགས་པ་ཆེན་པོ་སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། འཁོར་བའི་གཞི་ཤེས་ལུང་མ་བསྟན་པའི་ལེའུ་སྟེ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཇི་ལྟར་འཁྲུལ་པ་བཀའ་སྩལ་པ། །འཁྲུལ་གཞི་མེད་པའི་འཁྲུལ་པ་དེ། །གོང་འོག་དྲུག་འཛོམ་གཏི་མུག་དེས། །མ་རིག་བསྐྱེད་པས་རྒྱུ་བྱས་ནས། །མིག་ལ་ལིང་ཏོག་བྱུང་བ་བཞིན། །ལྷན་ཅིག་མ་རིག་གསུམ་དུ་སྨིན། །དེ་ནས་མ་རིག་སྦུབས་ནང་ནས། །ཕོ་མོ་མ་ནིང་མ་ཡིན་པའི། །རྒྱུ་འདྲ་གཟུགས་ཉིད་རྫུས་སྐྱེས་བྱུང་། །འཇིག་རྟེན་མོ་དང་མ་རིག་རྒྱས། །ཟླ་དྲུག་ལོན་ནས་ཕོ་མོར་སྨིན། །དེ་སྦྱར་འབྲུ་དྲུག་དུག་ལྔར་སྐྱེད། །དེ་ལ་སྐྱེ་བ་རྣམ་བཞི་ཡིས། །འགྲོ་དྲུག་སེམས་ཅན་ཚང་བར་བྱས། །འཁྲུལ་གཞི་ཐོག་མ་དེ་ལས་བྱུང་། །དེ་ཡང་འདུས་པའི་སྙིང་པོ་ཉོན། །མེད་པ་ལ་ནི་ཡོད་འཛིན་པས། །འཁྲུལ་གཞི་ལས་ནི་འཁྲུལ་པ་བྱུང་། །དཔེར་ན་མཐོ་ཡོར་མིར་མཐོང་ཚེ། །མཐོ་ཡོར་མི་ནི་མ་ཡིན་ཏེ། །ཇི་ཞིག་ལྟར་ལ་མི་རུ་མཐོང་། །དེ་བཞིན་གཞི་ལ་ཇི་ཞིག་ལྟར། །གློ་བུར་རྐྱེན་གྱིས་བསྐྱེད་པ་ཡིས། །སེམས་དང་བག་ཆགས་ཀུན་གཞི་བྱུང་། །དེ་ཡང་འདུས་པའི་སྙིང་པོ་ཉོན། །མེད་པ་ལ་ནི་ཡོད་པར་རྟོགས། །འཁྲུལ་པ་རྣམས་ཀྱིས་ཤེས་པ་ལས། །རྒྱལ་བ་ཀུན་གྱིས་མི་མཁྱེན་ཕྱིར། །ངེས་དོན་གཞི་ལ་འཁྲུལ་པ་མེད། །གློ་བུར་སེམས་ལས་འཁྲུལ་པ་བྱུང་། །ཐག་པ་སྦྲུལ་དུ་འཛིན་པ་བཞིན། །དེ་ལས་སྐྱེས་པས་འཁོར་བར་འཁྱམས། །དེ་ཡང་རྡོ་རྗེ་སེམས་དཔའ་ཉོན། །ད་ལྟ་ ― DNG001_Page_0544 ―
[མ་དཔེ་གཟིགས་ན་འདིར་གནོན།]
གང་ན་གནས་པའི་ཚེ། །འཁྲུལ་གཞི་ཡོད་ལ་ཀུན་བརྟགས་གསུམ། །བྱུང་ཚུལ་མ་ཤེས་གཏི་མུག་གིས། །དེ་ཕྱིར་ཐོག་མཐའ་མེད་པར་གནས། །དེ་ཉིད་མ་ཤེས་ཐ་མར་ནི། །ངེས་དོན་མེད་པའི་སྔགས་བཙུན་ཀུན། །ཆུ་བོ་བཞི་ལས་ཐར་པ་མེད། །འཁོར་བའི་སྡུག་བསྔལ་བསམ་ཐག་ཆད། །དེ་ཕྱིར་གདེང་མེད་རྟག་ཏུ་འཁྱམས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། འཁོར་བའི་བྱུང་ཚུལ་བསྟན་པའི་ལེའུ་སྟེ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་ཏུ་བཟང་ལ་འདི་སྐད་གསོལ། །ཕྱིན་ཅི་ལོག་ཏུ་བློས་བསྒྱུར་བའི། །མུ་སྟེགས་རྟག་ཆད་ཇི་ལྟར་འཁྲུལ། །ཕྱོགས་ཙམ་ཁ་འཛིན་ཐེག་པ་དགུ། །རང་གི་གཞི་ལས་ཇི་ལྟར་འཁྲུལ། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མུ་སྟེགས་རྟག་པའི་འཁྲུལ་དཔེ་ནི། །སྨན་ནི་དུག་ཏུ་འཛིན་པ་བཞིན། །དབྱེ་བ་དྲུག་གི་དོན་མཚོན་དེ། །ངོ་བོ་མི་འགྱུར་གཞི་བྱས་ནས། །ཁ་དོག་དབྱིབས་ཅན་དག་ཏུ་འཁྲུལ། །ལོག་པའི་དཀའ་ཐུབ་དམྱལ་བར་ལྟུང་། །རིག་པས་བརྟགས་པས་བདག་མ་གྲུབ། །དེ་ཉིད་ལ་ཟློས་ཆོས་སྐུ་ཉིད། །དེ་ལས་གཞན་པའི་སངས་རྒྱས་མེད། །དེ་ཡང་འདུས་པའི་སྙིང་པོ་ཉོན། །མུ་སྟེགས་ཆད་པའི་དབྱེ་བ་ནི། །ཁ་དོག་དབྱིབས་མེད་ཆད་གཞི་བྱས། །སྔ་ཕྱི་རྒྱུ་འབྲས་མེད་པར་འཁྲུལ། །སྐུར་བཏབ་དམྱལ་བ་ཆེན་པོར་ལྷུང་། །ཆད་དུ་མིན་ཏེ་རིག་པ་ཡོད། །དེ་ཕྱིར་གཞི་ལ་གོལ་ས་མེད། །རང་བྱུང་ཡེ་ཤེས་ཀློང་ན་གནས། །དེ་ཡང་འདུས་པའི་སྙིང་པོ་ཉོན། །སྤྲེའུ་འདྲས་ལོག་པར་ཁྲིད་ཀྱང་ནི། །གཞི་ཉིད་རྟག་ཆད་མཐར་མི་ལྟུང་། །བཅོས་ཤིང་བསྒྱུར་བས་གཞི་མི་འགྱུར། །དེ་ཕྱིར་ལུང་ལྡན་གདམས་ངག་གཅེས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། མུ་སྟེགས་ཀྱི་འཁྲུལ་ ― DNG001_Page_0545 ―
[མ་དཔེ་གཟིགས་ན་འདིར་གནོན།]
ཚུལ་བསྟན་པའི་ལེའུ་སྟེ་བརྒྱད་པའོ།། །།ཀུན་རིག་སྟོན་པས་ཡང་གསུངས་པ། །ངེས་དོན་གཞི་ཡི་ཕྱོགས་ཆ་ཙམ། །ཐེག་དགུ་འཁྲུལ་པར་ངས་བཤད་ཉོན། །ཉན་ཐོས་འཁྲུལ་པའི་དབྱེ་བ་ནི། །སྣང་བ་ཕྲ་རགས་ཡུལ་གྱི་གཞི། །གང་ཟག་བདག་མེད་ཆོས་བདག་ཡོད། །ཞི་བ་ཕྱོགས་གཅིག་ཐར་མི་ཐོབ། །ལྷག་མཐོང་མེད་ཕྱིར་སྐྱེ་བོ་རང་། །སྣང་བ་སྤང་མེད་དོན་ཤེས་པས། །ཞེན་མེད་ཡུལ་སྣང་ཆོས་ཀྱི་དབྱིངས། །ད་ཡང་རྡོ་རྗེ་སེམས་དཔའ་ཉོན། །སེམས་ཅན་ཀུན་གཞིའི་རྟོག་པ་དེ། །གོང་འོག་ཤེས་དག་སྐད་ཅིག་འདོད། །རིག་པ་རང་རྐྱང་སྐད་ཅིག་གོལ། །རྟག་དང་ཁྱད་མེད་སྒྲོ་འདོགས་ནོར། །ཆོས་སྐུ་རང་རིག་འགྱུར་བ་མེད། །དེ་ཡང་འདུས་པའི་སྙིང་པོ་ཉོན། །དབུ་མ་པ་ཡི་འདོད་གཞུང་དེ། །ངོ་བོ་དངོས་མེད་གཞི་བྱས་ཏེ། །ཡུལ་སེམས་གཞིག་པས་སྟོང་པར་འཁྲུལ། །ཅི་ཡང་མེད་པའི་སྐྱེ་མཆེད་ལྟུང་། །ཆད་དང་ཁྱད་མེད་སྟོང་པར་གོལ། །སྟོང་རིག་ཤེས་པས་ཆོས་སྐུ་ཡིན། །དེ་ཡང་འདུས་པའི་སྙིང་པོ་ཉོན། །ཡང་དག་མཐའ་ཚིག་རྣམ་གསུམ་ཡིན། །ཕྱོགས་ཙམ་རྟོགས་པས་གཞི་མ་ཤེས། །དེ་ཕྱིར་ངེས་དོན་མི་མཐོང་པས། །ཚིག་ཏུ་བདེན་ཏེ་དོན་ལ་གོལ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། རྒྱུ་མཚན་ཉིད་ཀྱི་འཁྲུལ་ཚུལ་བསྟན་པའི་ལེའུ་སྟེ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོ་ཆོས་སྐུ་དེས། །ཕྱི་རྒྱུད་འཁྲུལ་ཚུལ་བཀའ་སྩལ་པ། །ནམ་མཁའ་སྨིག་རྒྱུའི་དཔེ་བཞིན་དུ། །དག་པ་ཆོས་ཉིད་ཀྲི་ཡའི་གཞི། །བཟང་ངན་གཙང་སྨེ་དངོས་གྲུབ་རེ། །གྲུབ་པ་མི་ཐོབ་བྱོལ་སོང་རྒྱུ། །གཙང་སྦྲས་མི་གྲོལ་རྟོག་པ་ཉིད། །སྤྱོད་པ་མ་ཡིན་གཞི་དག་སྐུ། །དེ་ཡང་འདུས་པའི་སྙིང་པོ་ཉོན། །ཡོ་ག་རྣལ་འབྱོར་སེམས་དཔའ་ཡིས། །དབྱེར་མེད་ཆོས་དབྱིངས་གཞི་བྱས་ནས། །བྱང་ཆུབ་རྣམ་ལྔ་འདོད་པ་འཁྲུལ། །བསྒོམ་པས་མ་གྲོལ་འདོད་ཁམས་ལྷ། །སེམས་ཙམ་པ་དང་ཁྱད་མེད་གོལ། །ལ་ཟློ་རིག་པ་ཆོས་སྐུར་ཤེས། །དེ་ཡང་ ― DNG001_Page_0546 ―
[མ་དཔེ་གཟིགས་ན་འདིར་གནོན།]
རྡོ་རྗེ་སེམས་དཔའ་ཉོན། །དེ་དག་ཀྲི་ཡོག་རྣམ་གསུམ་ཡང་། །གཞི་ཉིད་མ་ངེས་བློ་འགྱུར་ཅིང་། །ནམ་མཁའ་དག་ལ་འཛིན་པ་བཞིན། །དོན་ལ་འཁྲུལ་པར་ཐེ་ཚོམ་མེད། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཕྱིའི་འཁྲུལ་ཚུལ་བསྟན་པའི་ལེའུ་སྟེ་བཅུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །བསྐྱེད་རྫོགས་རྣམ་གསུམ་འཁྲུལ་པ་ཡི། །དོན་གྱི་དབྱེ་བ་བཀའ་སྩལ་པ། །ནམ་མཁའ་སྤྲིན་དང་ཁུ་རླངས་བཞིན། །རྣལ་འབྱོར་མ་ཧཱ་ཡོ་ག་ཡིས། །བདེན་པ་དབྱེར་མེད་འདོད་པའི་གཞིས། །རྟོག་ཚོགས་ལྷ་རུ་བསྒོམ་པས་འཁྲུལ། །དོན་མེད་བགེགས་དང་རཱུ་ཏྲར་ལྟུང་། །དབུ་མ་དང་འདྲ་འབྲས་བུས་གོལ། །ལམ་ལ་མི་བརྟེན་རྟོགས་པའི་མཆོག །དེ་ཡང་རྡོ་རྗེ་སེམས་དཔའ་ཉོན། །ཨ་ནུ་ཡོ་གའི་དབྱེ་བ་ནི། །ཀུན་གཞི་མཁའ་ཀློང་གཞི་བྱས་ནས། །སྣང་བ་ཀུན་བཟང་རོལ་པར་འཁྲུལ། །ཡོད་མིན་མེད་མིན་སྐྱེ་མཆེད་ལྟུང་། །མཁའ་ཀློང་དབུ་མ་ཆད་དང་འདྲ། །ལ་ཟློ་ཆོས་ཀྱི་དབྱིངས་ཉིད་ཡིན། །མན་ངག་ཨ་ཏིའི་འཁྲུལ་ཚུལ་ནི། །སྤྱི་དང་ཁ་འབྱམས་ལུང་ཚིག་སྤང་། །དེ་དག་གོལ་སར་ངས་བཤད་ཉོན། །རིན་ཆེན་གསེར་སྦྲུལ་མཐོང་སྟོན་བཞིན། །སྤྱི་ཙམ་ལ་ནི་བརྟེན་པའི་གཞི། །མཁས་སུ་རེ་ནས་ཐ་སྙད་འདོགས། །དོན་མེད་ནམ་མཁའི་མཐའ་ཚོལ་འདྲ། །ཚིག་ཏུ་ཤེས་པས་དོན་མ་རྟོགས། །ཚིག་རང་དོན་ཡིན་ཟེར་བས་འཁྲུལ། །དེ་ཡང་རྡོ་རྗེ་སེམས་དཔའ་ཉོན། །ཁ་འབྱམས་པ་ཡིས་འཁྲུལ་པ་དེ། །སྣང་བ་སེམས་རྒྱུད་གཞི་རུ་བྱེད། །ཀུན་བརྟགས་ལྷུན་གྲུབ་བཅུ་རུ་འཁྲུལ། །འབྲས་བུ་མི་འབྱུང་ལོག་པར་གོལ། །གཞི་དང་མ་མཐུན་ལུང་རིགས་འགལ། །གཞི་ཉིད་མ་ཤེས་སྐྱེ་བོ་རང་། །དེ་ཡང་འདུས་པའི་སྙིང་པོ་ཉོན། །ཚིག་ཟིན་ལུང་གི་འཁྲུལ་པ་དེ། །ཚིག་ཙམ་ལུང་ཁུངས་གཞི་རུ་བྱེད། །དགོངས་པ་རྣམ་གསུམ་མ་ཤེས་འཁྲུལ། །ཚིག་ཙམ་ལུང་གིས་དོན་མི་རྟོགས། ། ― DNG001_Page_0547 ―
[མ་དཔེ་གཟིགས་ན་འདིར་གནོན།]
ལུང་མེད་དོན་གོ་ཡེ་སངས་རྒྱས། །དེ་ཡང་འདུས་པའི་སྙིང་པོ་ཉོན། །དེ་དག་རྒྱུད་ལུང་མན་ངག་གསུམ། །འཁོར་འདས་གཞི་ནི་མ་ཤེས་ཕྱིར། །ཉི་མ་སྤྲིན་གྱིས་བསྒྲིབས་པ་བཞིན། །དོན་དང་བྲལ་ཕྱིར་གདམས་ངག་དགོས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། བསྐྱེད་རྫོགས་རྣམ་གསུམ་འཁྲུལ་ཚུལ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ཡང་རྡོ་རྗེ་སེམས་དཔའ་ཉོན། །དེ་དག་འཁྲུལ་པ་བཟློག་འདོད་ཕྱིར། །མི་རྟོག་ཐབས་ཀྱི་བསྒོམ་གོལ་བས། །ལྷག་མེད་ཞི་གནས་ཞེན་པ་ལས། །བདུད་འབྱུང་བར་ཆད་ཞེན་ལས་བྱུང་། །ཡོན་ཏན་སྐྱོན་དུ་མ་ཤེས་པས། །བར་དོར་འཁྱམས་པར་ངེས་པའི་ཕྱིར། །དེ་ཡི་དབྱེ་བ་ངས་བཤད་ཉོན། །གདམས་ངག་མེད་པའི་ལུས་ངག་འདི། །རྟོག་བཀག་རྩེ་གཅིག་གང་བསྒོམ་པའི། །རྒྱུད་ལུང་མན་ངག་བསྒོམ་པ་དེ། །འཁོར་འདས་སྣང་བ་སེམས་བསྡུས་ནས། །རིག་པས་རྟག་ཆད་མཐའ་བསལ་ཏེ། །མི་དམིགས་ཙམ་ལ་བསྒོམས་པའི་ཐབས། །བྱིང་རྒོད་གཉིས་ཀྱི་མཐའ་བསལ་ནས། །བདེ་ལ་མི་རྟོག་ལྟིང་ངེ་ཙམ། །དེ་ཚེ་མ་རིག་དུག་ལྔ་ནི། །མ་རིག་བཞིན་དུ་བག་ལ་ཉལ། །བསྒོམ་བཏང་དུག་ལྔ་སྐྱེས་པའི་ཚེ། །བྱམས་དང་སྙིང་རྗེས་ཟིལ་མནན་ནས། །དད་པ་དང་ནི་བརྩོན་འགྲུས་ཀྱིས། །ཡང་ནས་ཡང་དུ་བསྒོམ་པར་བྱེད། །དེ་ཡང་འདུས་པའི་སྙིང་པོ་ཉོན། །མཐུན་འཇུག་ཐབས་ཀྱི་སྤྱོད་པ་ཡང་། །འོག་མའི་ཆོས་དང་སྒོ་བསྟུན་ནས། །དགེ་སྡིག་ཤན་ཐང་ཕྱེད་པར་སྤྱད། །དེ་ལ་མི་དམིགས་དོན་ཟིན་བྱ། །བལྟ་བསྒོམ་སྤྱོད་གསུམ་འཛོམ་པའི་ཚེ། །འབྲས་བུ་ཚོགས་གཉིས་ནམ་རྫོགས་ན། །སྒྲིབ་གཉིས་བྱང་ནས་སངས་རྒྱས་འདོད། །དེ་ལས་ལྷག་པའི་ཆོས་མེད་ཟེར། །གཞི་ནི་མ་རྟོག་བག་ཉལ་ཏེ། །ཇི་ཙམ་བསྒོམ་ཀྱང་བག་མེད་གོལ། །ནན་ཏན་རྩོལ་བས་ཅི་འབད་ཀྱང་། །རི་དྭགས་སྨིག་རྒྱུ་བསྙེག་འདྲར་འཁྲུལ། །དེ་ཡང་འདུས་པའི་སྙིང་པོ་ཉོན། །ཐབས་ཀྱིས་རིག་པ་བྱིན་བརླབས་པས། །སྨན་དང་ཡི་གེའི་དབང་གིས་འདུས། །རྩ་དང་ཐིག་ལེ་བདེ་བསྒོམ་པས། །ཤེས་པ་འགྱུར་ ― DNG001_Page_0548 ―
[མ་དཔེ་གཟིགས་ན་འདིར་གནོན།]
ནས་དེ་ལ་ཞེན། །དེ་ཕྱིར་མི་གྲོལ་ཤིན་ཏུ་འཆིང་། །མི་རྟོག་ཐབས་ཀྱིས་བདེ་འདོད་གོལ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། མ་རྟོགས་པར་བསྒོམ་པ་གོལ་བར་བསྟན་པའི་ལེའུ་སྟེ་བཅུ་གཉིས་པའོ།། །།ཀུན་རིག་སྟོན་པས་ཡང་གསུངས་པ། །རྣལ་འབྱོར་ལྟ་མེད་ཉམས་ཞེན་པས། །བདུད་ཀྱི་ཆོ་འཕྲུལ་མངོན་ཤེས་འབྱུང་། །དེ་ཚེ་ལྟ་སྒོམ་སྤྱོད་ཉམས་བདུད། །བར་དུ་བཅད་ནས་འཁོར་བར་འཁྱམས། །དེ་ཡང་འདུས་པའི་སྙིང་པོ་ཉོན། །དེ་བཟློག་དོན་དུ་གདམས་ངག་གིས། །ཡེ་ནས་གཞི་ལ་བདུད་མེད་ཀྱང་། །རང་སེམས་འཁྲུལ་པས་བདུད་དུ་བྱུང་། །དེ་ཕྱིར་མི་བསླུའི་གདམས་ངག་དགོས། །དང་པོ་ལྟ་དམན་བློ་དམན་ལ། །སྣང་བ་འོད་དང་གྲག་པ་སྒྲ། །འཇིགས་པའི་གཟུགས་དང་བསླུ་བའི་རྫུན། །རེ་རེ་ལ་ནི་དྲུག་དྲུག་ཏུ། །ཕྱེ་ལ་བསྟན་གྱིས་ངེས་པར་ཟུང་། །དེ་ཡང་འདུས་པའི་སྙིང་པོ་ཉོན། །སྣང་བ་འོད་ཀྱི་བདུད་བྱུང་ན། །ལྟ་མེད་མུན་ལས་སྣང་བྱུང་བས། །དགེ་སྡིག་མཐོང་བའི་སྙིང་རྗེ་ཞུགས། །འགྲོ་དོན་བྱ་མནོ་ཏིང་འཛིན་བཏང་། །ངེས་མེད་ལྷག་མཐོང་མི་གཡོ་དྲན། །གཞི་ལ་མི་འབྱུང་འཇའ་ཚོན་འདྲ། །དམྱལ་བའི་གནས་ཀྱང་སངས་རྒྱས་ཞིང་། །དེ་ཡང་འདུས་པའི་སྙིང་པོ་ཉོན། །གྲག་པ་སྒྲ་ཡི་བདུད་བྱུང་ན། །མཁའ་ལ་སྒྲ་དང་ཆོས་སྟོན་འབྱུང་། །དགའ་བས་ངོམ་ནས་ཏིང་འཛིན་བཏང་། །བཀའ་འགལ་ཆོས་བརྒྱད་འཁོར་བར་ལྟུང་། །ལྟ་བས་གདེང་ཟིན་སྒྲ་དང་བྲལ། །སྒྲ་བརྙན་རྟག་མེད་རྗེས་མི་འབྲང་། །འཚེར་ལྷང་གསུང་གི་འཁོར་ལོར་བདེ། །འཇིགས་པའི་གཟུགས་ཀྱི་བདུད་བྱུང་ན། །རྨི་ལམ་དངོས་དང་འཇིགས་པའི་གཟུགས། །མི་དགེའི་དོན་དྲན་མོ་ཆོག་བྱེད། །སེམས་ངན་ཚེ་ཐུང་ཡི་མུག་བྱུང་། །སྣང་གཟུགས་གཞི་ལ་མེད་པར་ཤེས། །སྙིང་པོ་མེད་ཅེས་ཉམ་མི་ང་། །དེ་ཉིད་ཐུབ་དྲུག་སྐུ་རུ་མཐོང་། །དེ་ཡང་འདུས་པའི་སྙིང་པོ་ཉོན། །བསླུ་བ་རྫུན་གྱི་ ― DNG001_Page_0549 ―
[མ་དཔེ་གཟིགས་ན་འདིར་གནོན།]
བདུད་བྱུང་ན། །དུས་གསུམ་ལེགས་ཉེས་སྟོན་པ་འབྱུང་། །བདེན་དང་མི་བདེན་ཐ་མ་རྫུན། །མངོན་ཤེས་རྡུག་པས་ཞེ་སྡང་ཆ། །ཚིག་ལས་འདས་ཕྱིར་རྫུན་མ་གྲུབ། །རྨི་ལམ་བཞིན་དུ་འཁྲུལ་པར་ཤེས། །དོན་རྟོགས་ཅི་སྨྲས་རྒྱལ་བའི་བཀའ། །དེ་ལྟ་བུ་ཡི་བདུད་བཞི་ཡང་། །འཁྲུལ་ངོར་ཡོད་ཀྱང་དོན་ལ་མེད། །གདམས་ངག་ཅན་ལ་གནོད་མི་ཚུགས། །དེ་ཕྱིར་རང་སེམས་རྟོགས་པས་ཆོག །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ལྟ་བདུད་ཟིལ་གྱིས་གནོན་པ་རྟོགས་པས་ཆོག་པར་བསྟན་པའི་ལེའུ་སྟེ་བཅུ་གསུམ་པའོ།། །།ཀུན་རིག་སྟོན་པས་ཡང་གསུངས་པ། །བསྒོམ་པའི་བདུད་བཞི་དབྱེ་བའི་ཕྱིར། །བྱིང་བ་བསལ་བའི་བདུད་བསྟན་པ། །བསྒོམ་མེད་ནན་ཏན་འབད་ནས་བསྒོམ། །མྱོས་པའི་དབང་གིས་གསལ་བ་བྱེད། །གཉེན་པོས་བསལ་བས་དོན་དང་བྲལ། །གཉིད་གསུམ་བསྲེ་ཤེས་གཏི་མུག་བརླག །ཆོས་ཉིད་ཀློང་དུ་གཉིད་ཐིམ་ཤེས། །སངས་རྒྱས་ཡེ་ཤེས་ཀློང་དུ་ཐིམ། །དེ་ཡང་འདུས་པའི་སྙིང་པོ་ཉོན། །རྨུགས་པ་བདེ་བའི་བདུད་བྱུང་ན། །ངེས་དོན་ཆོས་སྐུ་ངོས་མི་ཟིན། །ཤེས་པ་མུན་སངས་ལྷག་མཐོང་མེད། །བསྒོམ་པ་བྱས་ཀྱང་གཏི་མུག་འཕེལ། །རང་རིག་དྲན་པས་ཡེ་ཤེས་གསལ། །ལྟ་བས་ཟིན་ཕྱིར་ཆོས་ཀྱི་སྐུ། །འབྲས་བུ་འགྱུར་མེད་ཡེ་ཤེས་ཀློང་། །དེ་ཡང་འདུས་པའི་སྙིང་པོ་ཉོན། །རྒོད་པ་མི་རྟོག་བདུད་བྱུང་ན། །གདམས་ངག་མེད་ཕྱིར་འདུན་པར་དཀའ། །དོན་བཏང་ནས་ནི་མི་ཆོས་བྱེད། །སྤོང་སྡུད་ཞེན་པས་ཡུལ་ལ་ཞེན། །སྤང་ཕྱིར་རིག་པའི་དོན་ཟིན་པས། །བ་མོ་ཉི་ཤར་བཞིན་དུ་སྟོངས། །གདེང་ཟིན་ཆོས་དབྱིངས་གནས་ཀྱི་མཆོག །འཕྲོ་བ་མི་གཡོའི་བདུད་བྱུང་ན། །དོན་ལ་གོམས་པར་མ་བྱས་པས། །རིག་ཚོར་དྲན་པ་ཕྲ་མོ་རྒྱུ། །དོན་མེད་རྐུན་བུ་ཡང་ཡང་རྒྱུ། །མི་བརྗེད་པ་ཡི་གཟུངས་ཀྱིས་ཟིན། །རྣམ་རྟོག་རང་ཞི་རིག་པ་གསལ། །ཐམས་ཅད་ཆོས་སྐུར་འབྲས་བུ་མཆོག །དེ་དག་བསྒོམ་པའི་བདུད་བཞི་ཡང་། །ལྷག་མཐོང་མེད་ལས་བྱུང་བ་ལ། །གདེང་ལྡན་ངེས་པའི་རྣལ་འབྱོར་ལ། ། ― DNG001_Page_0550 ―
[མ་དཔེ་གཟིགས་ན་འདིར་གནོན།]
བསྒོམ་དུ་མེད་ཅིང་བདུད་རྣམས་སྟོངས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། བསྒོམ་པའི་བདུད་ཟིལ་གྱིས་མནན་པའི་ལེའུ་སྟེ་བཅུ་བཞི་པའོ།། །།ཀུན་རིག་སྟོན་པས་ཡང་གསུངས་པ། །སྤྱོད་པའི་བདུད་བཞི་བྱུང་བ་ཡང་། །སྣང་བའི་ཡུལ་ལ་ཞེན་པ་ནི། །ཡོན་ཏན་སྐྱོན་དུ་མ་ཤེས་ཕྱིར། །འདུ་འཛི་ལོངས་སྤྱོད་བདུད་བྱུང་ན། །གདམས་ངག་མེད་པར་ཚུལ་འཆོས་བྱེད། །མི་རྣམས་སྨོན་འདོད་གཞན་སེམས་འཛིན། །དོན་བོར་བདག་འཛིན་ཕྲག་དོག་ལྟུང་། །དེ་དག་དགྲར་ཤེས་ཞེན་པ་ཆུང་། །བུ་བཞིན་ཆགས་མེད་དོན་གྱིས་ཟིན། །ལོངས་སྤྱོད་རང་གྲོལ་རོལ་པར་རྟོགས། །དེ་ཡང་འདུས་པའི་སྙིང་པོ་ཉོན། །ཞེན་ཆགས་གནས་ཀྱི་བདུད་བྱུང་ན། །ཐོས་ཆུང་ཁང་ཆེན་ཉམས་དགའ་བརྩིགས། །བཀྲ་ཤིས་འདྲེ་མེད་ལྷ་ཡོད་ཟེར། །འདྲེ་བརྟེན་མཐུ་ཡོད་གཞན་ལ་བསྡིག །གནས་ལ་མ་ཆགས་ངེས་མེད་ཤེས། །བདག་གནས་གཞི་ལ་མེད་རྟོགས་པས། །གང་ན་འདུག་པ་འོག་མིན་གནས། །དེ་ཡང་རྡོ་རྗེ་སེམས་དཔའ་ཉོན། །ཡོན་ཏན་གཡེང་བའི་བདུད་བྱུང་ན། །རིག་པ་ལྔ་ལྡན་བཀུར་སྡིར་ཞེན། །དོན་བོར་གཞན་དོན་རང་རྒྱུད་གོལ། །ཞེན་ལོག་དོན་དྲན་ཟིལ་གྱིས་མནན། །བདུད་མེད་ཡེ་ཤེས་བསྐུལ་མར་ཤེས། །གཡེང་བ་བདག་གཞན་ཆོས་སྐུར་འགྲུབ། །འཁོར་ངན་སེམས་འཁྲུགས་བདུད་བྱུང་ན། །བལྟ་དམན་འཁོར་ལ་གདུང་དྲགས་པས། །འགྲན་སེམས་ཆོག་ཤེས་མེད་པར་འདོད། །དད་ལོག་སྐུར་འདེབས་ཞེ་སྡང་སྐྱེ། །གདུང་སེམས་བསྐྱུངས་ལ་འདྲེལ་སེམས་བཅད། །བདུད་ནི་ཆོས་སྐུར་ཤེས་པ་ལས། །སྤངས་ཤིང་དོར་དུ་རྡུལ་ཙམ་མེད། །དེ་ཡང་འདུས་པའི་སྙིང་པོ་ཉོན། །སྤྱོད་པའི་བདུད་ནི་དེ་དག་ཀྱང་། །སྣང་བ་ཡོད་ན་བདུད་ཀྱང་ཡོད། །དེ་ཕྱིར་ཡུལ་དང་འདྲེལ་པ་བཅད། །འདྲེལ་མེད་སེམས་ལ་བདུད་མི་འབྱུང་། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སྤྱོད་པའི་ ― DNG001_Page_0551 ―
[མ་དཔེ་གཟིགས་ན་འདིར་གནོན།]
བདུད་ཟིལ་གྱིས་མནན་པའི་རྟགས་བསྟན་པའི་ལེའུ་སྟེ་བཅོ་ལྔ་པའོ།། །།དེ་ཡང་རྡོ་རྗེ་སེམས་དཔའ་ཉོན། །ཉམས་ཀྱི་བདུད་ནི་དྲུག་གསུངས་པ། །མཁའ་འགྲོས་ལུང་སྟོན་བདུད་བྱུང་ན། །ཁྱོད་ནི་མ་འདུག་ཕན་གདགས་ཟེར། །འདོད་པ་སྙིང་ཞུགས་ཞེན་པ་ཚོལ། །མི་འགྲུབ་དཀའ་བ་སྣ་ཚོགས་བྱེད། །ཞེན་པ་ཉིད་ནས་འདོད་པ་སྟོངས། །ལུང་སྟོན་བསླུ་བའི་རྫུན་དུ་ཤེས། །གཞི་ལ་མེད་ཤེས་རེ་དོགས་བྲལ། །དེ་ཡང་འདུས་པའི་སྙིང་པོ་ཉོན། །ཉམས་མྱོང་ཞེན་པའི་བདུད་བྱུང་ན། །མི་རྟོག་ཞེན་པའི་བདེ་བ་ལ། །འཕེལ་འགྲིབ་ཡོད་པར་ངེས་མེད་པས། །དོན་ལ་ཟིན་པས་ལུང་མ་བསྟན། །ལྷག་མཐོང་དྲན་པས་གདེང་དང་ལྡན། །དོན་ལ་འགྱུར་མེད་ནམ་མཁའ་བཞིན། །དམ་པར་བལྟ་མེད་སྒྲིབ་གཉིས་དག །ད་ཡང་རྡོ་རྗེ་སེམས་དཔའ་ཉོན། །ཞེ་འདོད་ཚུལ་འཆོས་བདུད་བྱུང་ན། །གདམས་ངག་མེད་པར་བསྒོམ་ཚུལ་སྟོན། །དབུལ་པོ་རྣམས་ལ་མཚམས་བཅད་ཟེར། །དད་ལྡན་གླེན་པ་ཐབས་ཀྱིས་བསླུས། །ཆགས་ཆུང་ཚུལ་འཆོས་སྡིག་པོ་ཆེ། །གཞི་ཉིད་མ་བཅོས་དྲང་པོར་གཅེས། །ཞེ་འདོད་མེད་པས་ཚུལ་འཆོས་བྲལ། །འདོད་མེད་གདེང་ལྡན་འབྲས་བུ་མཆོག །དེ་ཡང་རྡོ་རྗེ་སེམས་དཔའ་ཉོན། །བརྐམ་ཆགས་བདེ་བའི་བདུད་བྱུང་ཚེ། །འདོད་ཆགས་འབར་ལ་བྱང་ཆུབ་རེ། །རང་གི་ཞེན་པས་འདོད་ཆགས་སྲེད། །དོན་དུ་མི་ཤེས་བྱང་མི་ཆུབ། །རང་རིག་དོན་ལས་དབང་མི་དགོས། །འདོད་སྤྱོད་རྐྱེན་ཐུབ་ཆོས་སྐུར་ཤེས། །བགེགས་མེད་ཡེ་ཤེས་སངས་རྒྱས་ཡིན། །དེ་ཡང་འདུས་པའི་སྙིང་པོ་ཉོན། །ཡོན་ཏན་ཕྲག་དོག་ཞེ་སྡང་བྱེད། །དེ་ལ་ལན་འདེབས་རྨོངས་པ་ནི། །མཁས་ལ་སྐུར་འདེབས་དམྱལ་བར་འགྲོ། །གཞི་རྟོགས་དོན་ལ་སྐུར་དང་བྲལ། །ཞེ་སྡང་རང་གྲོལ་ཆོས་ཉིད་རྟགས། །དེ་ཉིད་དུས་ན་བདུད་མེད་ཤེས། །དེ་ཡང་འཁོར་གྱི་སྙིང་པོ་ཉོན། །ང་རྒྱལ་སྒྲོ་འདོགས་བདུད་བྱུང་ཚེ། །གང་ཟག་སྨད་ཕྱིར་ཆོས་ལ་སྨོད། །ཆོས་ཆུང་བྱེད་ཅིང་བཀའ་རྐུན་བྱེད། །བསོད་ནམས་ཆུང་བ་དམྱལ་བར་འགྲོ། །མན་ངག་གསང་ཐུབ་ཟིལ་གྱིས་གནོན། །ཡིད་ཆེས་རང་རིག་གདེང་ ― DNG001_Page_0552 ―
[མ་དཔེ་གཟིགས་ན་འདིར་གནོན།]
ལྡན་པས། །ད་ལྟ་ཉིད་དུ་བདེན་པ་མཐོང་། །དེ་དག་བདུད་ཀྱི་དབྱེ་བ་ཡང་། །ལྟ་མེད་རྣམས་ལ་འབྱུང་བ་ལས། །ལུང་ལྡན་ཀུན་གྱི་ཡོན་ཏན་ཏེ། །སངས་རྒྱས་ཆོས་ནི་བཅོ་བརྒྱད་ཡིན། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཉམས་ཀྱི་བདུད་ཟིལ་གྱིས་གནོན་པའི་རྟགས་དང་འབྲས་བུ་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཡོན་ཏན་སྐྱོན་དུ་གྱུར་པ་ནི། །ཀུན་རིག་སྟོན་པས་བཀའ་སྩལ་པ། །ལུང་སྟོན་མངོན་ཤེས་རྫུ་འཕྲུལ་དང་། །བདེ་ཆེན་སྟོབས་དང་གཏེར་རྙེད་དང་། །མ་མཐོལ་མཐོང་དང་མ་བསླབས་ཤེས། །དེ་དག་བརྒྱད་ཀྱིས་གཏན་ལ་དབབ། །དེ་ཡང་འདུས་པའི་སྙིང་པོ་ཉོན། །འཇིག་རྟེན་འདས་དང་མ་འདས་ལྷ། །གཞན་གྱིས་ལུང་སྟོན་བྱུང་སྲིད་ན། །མི་འགྲུབ་དཀའ་བ་སྣ་ཚོགས་བྱེད། །རང་བསླུ་བར་ཆོད་འཁོར་བར་འཁྱམས། །སྔ་ཕྱི་དྲན་པའི་མངོན་ཤེས་ནི། །སྔོན་གྱི་བག་ཆགས་ལངས་པའི་ཕྱིར། །དགའ་དང་མི་དགའི་བདུད་ཡིན་ཏེ། །དེ་ཚེ་ཆགས་སྡང་རང་རྒྱུད་གོལ། །དེ་ཡང་འདུས་པའི་སྙིང་པོ་ཉོན། །མྱུར་མགྱོགས་རྫུ་འཕྲུལ་ལྡན་གྱུར་ཀྱང་། །རྣམ་ཤེས་རླུང་ཞོན་བདུད་ཡིན་ཏེ། །ཡང་བདེ་ཀུན་ཏུ་ལུས་ཕྱིན་ཡང་། །ལུས་བྲལ་བར་དོར་ཕན་མི་ནུས། །ལུས་ལ་བདེ་བ་འབར་གྱུར་ཀྱང་། །ཞེན་པའི་འདོད་ཆགས་བདུད་ཡིན་ཏེ། །ལུས་ནི་གནས་སྐབས་འདྲེལ་པ་ཙམ། །རྐྱེན་མི་ཐུབ་ཕྱིར་ཤིན་ཏུ་གོལ། །གཞན་གྱི་ཟིལ་གནོན་སྟོབས་ལྡན་ཀྱང་། །མ་རིག་ཟིལ་གནོན་སྟོབས་མེད་ན། །ང་རྒྱལ་དབང་གིས་ཉོན་མོངས་འཕེལ། །དེ་ཕྱིར་འཁོར་བ་འབའ་ཞིག་ལྷུང་། །གཏེར་དང་གཞན་གྱི་ནོར་རྙེད་ན། །ཞེན་པའི་བདུད་ཀྱིས་རང་བསླུས་ཏེ། །གཡེང་བའི་བསམ་པ་སྣ་ཚོགས་འཕེལ། །སྡུག་བསྔལ་འབའ་ཞིག་བདེ་བ་མེད། །སྔར་མ་མཐོང་བའི་ཡུལ་ལ་སོགས། །ད་ལྟའི་མིག་གིས་མཐོང་གྱུར་ན། །ཡིད་ཀྱི་རྣམ་རྟོག་བདུད་ཡིན་ཏེ། །ཡེ་ཤེས་སྤྱན་གྱི་གོལ་སར་གསུངས། །མ་བསླབས་རིག་པ་ལྔ་ལྡན་པ། །ཤེས་ཀྱང་ ― DNG001_Page_0553 ―
[མ་དཔེ་གཟིགས་ན་འདིར་གནོན།]
གཡེང་བའི་བདུད་ཡིན་ཏེ། །ཞེན་པའི་དབང་གིས་བརྩོན་གྱུར་ན། །དེ་ཕྱིར་བསམ་གཏན་གོལ་སར་བཤད། །དེ་དག་བདུད་དུ་ཤེས་གྱུར་ནས། །གང་ཡང་ཡོན་ཏན་ལྟར་མེད་ན། །རེ་དོགས་བྲལ་བའི་གདེང་དང་ལྡན། །དོན་གྱི་གནས་ལུགས་རྟོགས་པ་ཡིན། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཡོན་ཏན་སྐྱོན་དུ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །སྲིད་པ་བར་དོ་རྣམ་བཞི་ཡི། །མ་རིག་འཁྲུལ་པའི་བར་དོ་ནི། །རྒྱུ་ནི་མ་རིག་རྣམ་གསུམ་ལ། །རྐྱེན་ནི་བག་ཆགས་གཉིས་ཀྱིས་གོལ། །གོལ་ས་བར་དོར་ལུས་སུ་ལེན། །སྡུག་བསྔལ་སྣ་ཚོགས་ཉམས་སུ་མྱོང་། །སྐྱེ་རྒས་སྡུག་བསྔལ་ཟད་དུས་མེད། །དེ་ཡང་འདུས་པའི་སྙིང་པོ་ཉོན། །དེ་ལས་ཐར་ཅིང་ལྡོག་འདོད་པས། །ཀུན་བརྟགས་དགེ་རྩ་འདིར་བྱས་པས། །དགེ་བཅུ་སྦྱིན་སོགས་དད་པས་སྤྱད། །ཕྱི་མར་འབྲས་བུ་འདོད་པས་སེམས། །རྒྱུ་མཐུན་བག་ཆགས་མཐུ་བརྟས་པས། །ལྷ་དང་མི་ཡི་གོ་འཕང་ཙམ། །སྨོན་ལམ་བཏབ་པའི་དབང་བཙན་ཡང་། །དགེ་བའི་སྟེགས་ཟད་འཁོར་བར་འཁྱམས། །དེ་ཡང་འདུས་པའི་སྙིང་པོ་ཉོན། །གནས་འགྱུར་ལྷ་ཡི་བར་དོ་ལ། །རྟོགས་དང་ལྷ་གཉིས་དུས་མཉམ་པས། །དུས་གསུམ་གཅིག་ལ་གཅིག་ཚང་ནས། །འབྲས་བུའི་སངས་རྒྱས་དུས་དེ་ཉིད། །མ་རྟོགས་ལྷ་བསྒོམ་རུ་དྲར་སྐྱེ། །དེ་ཡང་འདུས་པའི་སྙིང་པོ་ཉོན། །རྣམ་ཤེས་རླུང་ཞོན་བར་དོ་ལ། །ཕྱི་ནང་རླུང་གི་བདེ་བསྒོམ་པས། །ཕག་མོ་ལ་སོགས་འཕོ་བ་བདུན། །འོད་གསལ་ཡེ་ཤེས་སྐུར་འདོད་པས། །དྲང་དོན་ཡིན་གྱི་ངེས་དོན་མིན། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སྲིད་པ་བར་དོར་འཁྱམས་པ་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་ ― DNG001_Page_0554 ―
[མ་དཔེ་གཟིགས་ན་འདིར་གནོན།]
དོན་ཆེད་དུ། །ཀུན་རིག་སྟོན་པ་ཆོས་རྗེ་ལ། །བདེན་པའི་དགོངས་དོན་འདི་སྐད་གསོལ། །ལུང་ལྡན་ངེས་པའི་གདམས་ངག་གིས། །བདུད་དེ་ཟློག་ཆོས་དཔེ་དོན་གང་། །མ་རིག་རྒྱ་མདུད་ཇི་ལྟར་བཟློག །ཕྱི་ནང་ལ་ཟློའི་གཏན་ཚིགས་གང་། །སྣང་བ་ཡུལ་གྱི་གོལ་ས་གང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །དེ་ཡི་ཟློག་ཆོས་བཀའ་སྩལ་པ། །དཔེ་ལས་འཁྲུལ་མེད་ཟློག་ཆོས་དང་། །དོན་གྱི་འཁྲུལ་མེད་ཟློག་ཆོས་དང་། །རྟགས་ཀྱི་འཁྲུལ་མེད་ཟློག་ཆོས་རྣམས། །ང་ཡིས་བཤད་ཀྱིས་ལེགས་པར་ཉོན། །དེ་ལ་དཔེ་ཡི་ཟློག་ཆོས་ནི། །ཐག་པ་སྦྲུལ་དུ་འཁྲུལ་སྲིད་ཀྱང་། །མཐོ་ཡོར་སྦྲུལ་དུ་འཁྲུལ་མི་སྲིད། །ལུང་མ་བསྟན་པས་འཁྲུལ་སྲིད་ཀྱང་། །རང་བཞིན་གཞི་ལ་འཁྲུལ་པ་མེད། །ཐག་པ་མི་རུ་མི་འཁྲུལ་བཞིན། །རྟོགས་པའི་གཞི་ལ་འཁྲུལ་པ་མེད། །དེ་ཡང་འདུས་པའི་སྙིང་པོ་ཉོན། །རྔ་མོ་རྟ་རུ་འཁྲུལ་སྲིད་ཀྱང་། །བྱ་ནི་རྟ་རུ་འཁྲུལ་མི་སྲིད། །ཡུལ་ནི་སེམས་སུ་འཁྲུལ་སྲིད་ཀྱང་། །རིག་པ་བེམ་པོར་འཁྲུལ་མི་སྲིད། །འབྱུང་བ་ལྔ་ལ་རིག་པ་མེད། །དེ་ཕྱིར་ཡུལ་སེམས་འདྲེལ་པ་མེད། །དེ་ཡང་རྡོ་རྗེ་སེམས་དཔའ་ཉོན། །དོན་གྱི་ཟློག་ཆོས་བསྟན་པ་ནི། །ཤེས་པ་ལུང་མ་བསྟན་པ་ལ། །འགྲོ་དྲུག་སེམས་ཅན་འཁྲུལ་པ་བྱུང་། །ལྷུན་གྲུབ་སངས་རྒྱས་འཁྲུལ་མ་མྱོང་། །དེ་ཕྱིར་གཞི་ལ་འཁྲུལ་པ་མེད། །རི་བོང་རྭ་ནི་མེད་ཤེས་བཞིན། །དོན་གོ་ལོག་རྟོགས་འཁྲུལ་མི་སྲིད། །འདྲ་བ་ལས་ནི་ཡོད་འཁྲུལ་པ། །སེམས་ནི་ཡུལ་དུ་འཁྲུལ་པ་ཡིས། །གཟུང་འཛིན་ཞེན་པ་སྣ་ཚོགས་འབྱུང་། །དེ་ཙམ་ཉིད་ནས་དོན་ལ་མེད། །དེ་ཙམ་དོན་གྱི་ཟློག་ཆོས་ཡིན། །ད་ཡང་འདུས་པའི་སྙིང་པོ་ཉོན། །རྟགས་ཀྱི་ཟློག་ཆོས་ངེས་པ་འདིས། །ངེས་པའི་ལུང་ལྡན་རྣལ་འབྱོར་པས། །ཐ་མལ་འཁྲུལ་པ་འབྱུང་མི་སྲིད། །སངས་རྒྱས་མཚན་དང་དཔེ་བྱད་ཀུན། །ཐ་མལ་ལུས་སུ་འཁྲུལ་མི་སྲིད། །ཐམས་ཅད་མཁྱེན་པའི་ཡེ་ཤེས་འདི། །མ་རིག་རྨོངས་པར་འཁྲུལ་མི་སྲིད། །ལུང་ལྡན་ངེས་པའི་ ― DNG001_Page_0555 ―
[མ་དཔེ་གཟིགས་ན་འདིར་གནོན།]
གདམས་ངག་འདིས། །ཁམས་གསུམ་འཁོར་བར་འཁྱམས་མི་སྲིད། །གཞི་དང་མཐུན་པར་ཉམས་མྱོང་ཕྱིར། །སྐྱེ་བ་ཕྱི་མ་ལེན་མི་སྲིད། །གཉིད་ནི་ཀློང་ཐིམ་དོན་ཤེས་ན། །བར་དོར་མུན་པ་འབྱུང་མི་སྲིད། །མ་བཙལ་གཟུགས་སྐུ་འབྱུང་བ་ལ། །སྔོན་དུ་དགེ་རྩ་བྱ་མི་དགོས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ངེས་དོན་རྟགས་ཀྱི་ཟློག་ཆོས་བསྟན་པའི་ལེའུ་སྟེ་བཅུ་དགུ་པའོ།། །།དེ་ཡང་འདུས་པའི་སྙིང་པོ་ཉོན། །མ་རིག་ཟློག་པའི་ཡེ་ཤེས་ནི། །དགག་བསྒྲུབ་མེད་པའི་རིག་པ་ལ། །གཞི་ལ་ཕྱོགས་སུ་ཞེན་པ་བཟློག །སྙོམས་བྱེད་ཐེ་ཚོམ་ཟ་བ་ནི། །ལྟ་བའི་གདེང་ཀྱིས་ཟིན་པས་བཟློག །གདམས་ངག་རང་གྲོལ་དྲན་པ་ཡིས། །སྔ་ཕྱི་དུས་གསུམ་འཁྲུལ་པ་བཟློག །ཆོས་སྐུ་གཅིག་ཏུ་རྫོགས་པ་ཡིས། །རྒྱུ་འབྲས་གཉིས་འཛིན་མཐའ་ལས་བཟློག །དགོངས་པའི་ངང་ལ་བློ་གནས་པས། །ཀུན་བརྟགས་ཕྲ་མོའི་ཆོས་ལས་བཟློག །དེ་ཡང་འདུས་པའི་སྙིང་པོ་ཉོན། །ཡང་ཏི་ཐིག་ལེ་ཉག་གཅིག་གིས། །ཐེག་དགུའི་འདོད་པའི་ཆོས་ལས་བཟློག །རྒྱུན་ཆད་ཕྱོགས་ལྷུང་མེད་པ་ཡིས། །རང་འདོད་ང་རྒྱལ་མཐའ་ལས་བཟློག །འཛིན་མེད་རང་བྱུང་སྨན་ཆེན་གྱིས། །འཁོར་བའི་གཅོང་རོང་ནད་ལས་བཟློག །དེ་ཡང་འདུས་པའི་སྙིང་པོ་ཉོན། །འཁྲུལ་མེད་དབྱེ་བ་རྣམ་བརྒྱད་ཀྱི། །ཞེན་འཁྲུལ་ཐམས་ཅད་གཞི་ནས་དག །དེ་ཕྱིར་ཆོས་ཉིད་གཅིག་ཤེས་པས། །འཁྲུལ་རྨོངས་ཐམས་ཅད་དུས་གཅིག་སྟོངས། །བུཌྜྷ་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། མ་རིག་བདུད་འཛིན་འཁྲུལ་པ་བཟློག་པར་བསྟན་པའི་ལེའུ་སྟེ་ཉི་ཤུ་ཐམ་པའོ།། །།དེ་ནས་འདུས་པའི་སྙིང་པོ་ཉོན། །ཐུན་མོང་ཕྱི་རྟགས་གཏན་ཚིགས་ནི། །ནམ་མཁའ་རང་བཞིན་སྐྱེ་མེད་ཕྱིར། །གདོད་ནས་རང་བྱུང་སྟོང་པ་ཉིད། །རྐྱེན་གྱིས་གཞིག་ཅིང་གཞོམ་དུ་མེད། །དེ་ཕྱིར་རང་བྱུང་སྐྱེ་མེད་ཡིན། །དེ་ཡི་ངང་ལས་འབྱུང་ ― DNG001_Page_0556 ―
[མ་དཔེ་གཟིགས་ན་འདིར་གནོན།]
ཆེན་བཞི། །རལ་པ་མ་འགགས་ཅིར་ཡང་སྣང་། །ལས་དང་རྐྱེན་དང་བག་ཆགས་བརྟས། །ཕན་གནོད་དགེ་སྡིག་གཉིས་སུ་མཐོང་། །འབྱུང་བ་མ་འགགས་ནམ་མཁའ་བཞིན། །སྣང་སྟོང་གཉིས་མེད་དབྱེར་མེད་ཕྱིར། །དེ་ཕྱིར་མཚན་ཉིད་གཉིས་སུ་མེད། །ཡེ་ནས་གཉིས་མེད་ངང་གིས་སྟོང་། །དེ་ལྟར་རྟོགས་པས་རང་གི་བློ། །ཡུལ་གྱི་འབྱུང་ལྔ་རིག་པ་མེད། །དེ་ཕྱིར་གཟུང་འཛིན་རང་སར་གྲོལ། །ངོ་བོ་ཉིད་ཀྱིས་དམིགས་སུ་མེད། །དེ་ཡང་རྡོ་རྗེ་སེམས་དཔའ་ཉོན། །ཐུན་མོང་མ་ཡིན་ནང་བལྟས་པའི། །རང་སེམས་སྐྱེ་མེད་སྟོང་པ་ལ། །ཁ་དོག་དབྱིབས་ཀྱི་མཚན་མ་མེད། །དེ་ཕྱིར་རང་བྱུང་སྐྱེ་བ་མེད། །རང་བྱུང་མ་སྐྱེས་ཡེ་གནས་ཡིན། །དེ་ལ་དྲན་རིག་མ་འགགས་པའི། །རིག་པ་གསལ་བ་རྒྱུན་མི་ཆད། །གང་དྲན་རོལ་པ་མ་འགགས་ཤེས། །དེ་ཙམ་ཉིད་ནས་ཆོས་སྐུར་ཤར། །སེམས་ཉིད་སྟོང་དང་རིག་པ་གཉིས། །སོ་སོ་མ་ཡིན་གཅིག་གི་ངང་། །དེ་ཕྱིར་མཚན་ཉིད་གཉིས་སུ་མེད། །དེ་ལ་ཐ་དད་དབྱེར་མེད་ཅིང་། །ཡེ་ཤེས་རང་བྱུང་ངོ་བོ་ཉིད། །སེམས་དང་རོལ་པ་རང་སར་གྲོལ། །གང་ཡང་གཞི་ལ་མེད་པའི་ཕྱིར། །རང་གི་བློ་གྲོས་ངོ་བོར་གནས། །དེ་ཡང་འདུས་པའི་སྙིང་པོ་ཉོན། །ཁྱད་འཕགས་ལ་ཟློའི་གཏན་ཚིགས་ནི། །ཉི་མ་དང་ནི་ཟེར་བཞིན་དུ། །ཕྱི་ནང་གཉིས་ཀ་གཟུགས་དང་སྐུ། །ཡང་དག་ཉིད་ན་སྐྱེ་བ་མེད། །མ་སྐྱེས་རིག་པ་དངོས་མེད་གསལ། །གང་ཡང་ཡེ་ཤེས་མ་འགགས་ཤར། །དེ་ཙམ་ཉིད་ནས་ཞེན་མེད་རིག །རིག་པ་གང་དྲན་ཆོས་སྐུར་ཤར། །དེ་ཕྱིར་རྣམ་རྟོག་རྡུལ་ཙམ་མེད། །དཔེར་ན་མར་དང་སྣུམ་བཞིན་དུ། །ཆོས་ཉིད་རང་གི་མཚན་ཉིད་ནི། །རིག་པ་ཆོས་སྐུ་གཉིས་སུ་མེད། །བསྲེས་པ་མ་ཡིན་ཡེ་གནས་ཡིན། །ཕྱི་ནང་མེད་པར་རང་གྲོལ་ཕྱིར། །ཆོས་ཉིད་ཞེན་པ་གཞི་ནས་དག །དེ་ཕྱིར་རང་བྱུང་མཐར་མ་ལྟུང་། །དེ་ཉིད་ཡེ་ཤེས་རང་གྲོལ་གསུངས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ ― DNG001_Page_0557 ―
[མ་དཔེ་གཟིགས་ན་འདིར་གནོན།]
ཏན་ཀུན་འབྱུང་གི་རྒྱུད་ལས། ཕྱི་ནང་ལ་ཟློའི་གཏན་ཚིགས་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །སྣང་བ་མེད་པའི་གཞི་ཉིད་ལ། །སྤོང་སྡུད་ཞེན་པས་འཁྲུལ་པའི་སེམས། །མེད་པ་ལ་ནི་ཡོད་འཛིན་ལ། །རྨོངས་པ་ཀུན་གྱིས་ཤེས་པ་ལས། །སངས་རྒྱས་ཀུན་གྱིས་མི་མཁྱེན་ནོ། །དེ་ཡང་འདུས་པའི་སྙིང་པོ་ཉོན། །ལུས་སེམས་བར་ན་རང་དབུགས་རྒྱུ། །དབུགས་ནི་སེམས་ཀྱི་རྟ་ཡིན་ཕྱིར། །དབུགས་ལ་བརྟེན་ནས་སེམས་རྒྱུས་པས། །སྔ་ཕྱིའི་ཞེན་པ་སྣ་ཚོགས་བྱས། །དེ་མ་རིག་པས་ཤིན་ཏུ་གོལ། །སྤོང་སྡུད་ཞེན་པ་སྣ་ཚོགས་ཀྱང་། །བསྡུ་ཡིས་མི་འདུས་གཅིག་མི་སྲིད། །སྤང་གིས་མི་སྤངས་འབྲལ་བར་དཀའ། །ཞེན་པས་མི་ཞེན་འདྲེ་མི་སྲིད། །གཞི་ལ་མེད་པར་མ་ཤེས་པས། །འཁྲུལ་པའི་ཆོས་ལ་བདེན་པར་འཛིན། །སྣང་བ་ཆོས་དབྱིངས་གོལ་བར་གསུངས། །བུཌྜྷ་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སྣང་བའི་ཡུལ་གྱི་གོལ་ས་བསྟན་པའི་ལེའུ་སྟེ་ཉེར་གཉིས་པའོ།། །།དེ་ནས་ཀུན་རིག་སྟོན་པ་ཡིས། །དེ་ནས་འདུས་པའི་སྙིང་པོ་ལ། །རིག་འཛིན་གྲུབ་པ་ཐོབ་པ་ཡི། །བཀའ་རྟགས་ཆེད་དུ་བཀའ་སྩལ་པ། །སངས་རྒྱས་ཀུན་གྱི་ངེས་པའི་དོན། །དོན་གྱིས་ཁྱབ་དང་རྟོགས་པ་ཡིས། །བྱིན་གྱིས་བརླབས་དང་བརྡའི་ཚིག་དོན། །སྣོད་ལྡན་བློ་དང་ལྡན་པ་ལ། །མ་ནོར་ངེས་པར་ངས་བཤད་ཀྱིས། །བརྗེད་མེད་དད་པའི་སེམས་ཀྱིས་ཉོན། །སངས་རྒྱས་སྙིང་པོ་ཆོས་སྐུ་ནི། །འགྲོ་དྲུག་སེམས་ཅན་ཐམས་ཅད་ལ། །རང་བྱུང་ཡེ་ཤེས་ངོ་བོ་ཡོད། །ཀུན་ལ་ཁྱབ་པས་ནམ་མཁའ་འདྲ། །དེ་ཡང་འདུས་པའི་སྙིང་པོ་ཉོན། །དེ་ཚེ་འོག་མིན་གནས་མཆོག་ཏུ། །སྔོན་གྱི་སངས་རྒྱས་རིགས་ལྔ་ལ། །ཚིག་ཏུ་མ་བསྟན་དོན་དུ་ཤར། །རང་གི་རིག་པ་རྟོགས་ནས་རྒྱུད། །དཔལ་གྱི་དཔལ་གྱུར་ཀུན་བཟང་གིས། །རྒྱུད་བདག་རྡོ་རྗེ་སེམས་དཔའ་ལ། །ངེས་དོན་གདམས་ངག་དོན་བསྟན་པས། ། ― DNG001_Page_0558 ―
[མ་དཔེ་གཟིགས་ན་འདིར་གནོན།]
དེ་ཕྱིར་བྱིན་གྱིས་བརླབས་ཞེས་བྱ། །དེ་ཡང་འདུས་པའི་སྙིང་པོ་ཉོན། །སྤྲུལ་སྐུས་བརྡའ་ཡིས་བསྟན་པ་ཡང་། །ཚིག་དོན་ལུས་དང་རྟགས་ཀྱི་བརྡའ། །རིག་འཛིན་སྤྲུལ་པ་བཞད་རྩལ་གྱིས། །ལྷ་གནས་མི་ཡི་ཡུལ་དུ་བྱུང་། །དེ་ཚེ་ངེས་པའི་དོན་ཚིག་གི། །ལག་ན་རྡོ་རྗེའི་སྤྲུལ་པ་ལས། །ཡང་དག་གདམས་ངག་སྔོན་བྱུང་ནས། །རྡོ་རྗེ་མི་འགྱུར་རྩལ་ལ་ནི། །སྡེབ་སྦྱོར་ལེགས་པའི་ཚིག་གིས་ནི། །དོན་དང་མཐུན་པར་བཀྲོལ་ནས་བཤད། །དེ་ཚེ་ངེས་དོན་གདམས་ངག་ནི། །རྣམ་གཟིགས་སྤྲུལ་པ་སྒྲུབ་མཆོག་ལ། །ཚིག་ཉུང་དོན་འདྲིལ་གདམས་ངག་ཟབ། །གོ་སླ་གདེང་དུ་གྱུར་པར་བསྟན། །དེ་ཡིས་བྱམས་མགོན་སྐུའི་སྤྲུལ་པ། །མི་བརྗེད་གཟུངས་ཐོབ་གྲོགས་བཙལ་ལ། །བསྟན་པ་ཙམ་གྱིས་སངས་རྒྱས་པའི། །རང་བྱུང་ཆོས་སྐུ་མངོན་དུ་གོ། །དེ་དུས་སྒྲོལ་མའི་སྐུ་སྤྲུལ་པའི། །རིན་ཆེན་རྩལ་ལ་མངོན་བསྟན་པས། །དུག་ལྔ་རང་གྲོལ་མངོན་གྱུར་ནས། །སྒྲིབ་གཉིས་མ་སྦྱངས་མངོན་སངས་རྒྱས། །དེ་ཡང་འདུས་པའི་སྙིང་པོ་ཉོན། །རྒྱུད་གསུམ་མ་ནོར་གདམས་ངག་ནི། །སྲས་ལ་རྒྱལ་སྲིད་གཏོད་པ་བཞིན། །ཡང་ཏི་གདམས་ངག་མ་ནོར་པ། །བར་མ་ཆོད་ཅིང་མ་བསླད་དོན། །ཤེས་རབ་བློ་ལྡན་སྣོད་ལ་ཡིན། །དེ་ཉིད་མངོན་དུ་ཕྱུང་བ་བསྟན། །བུཌྜྷ་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། རིག་འཛིན་གྲུབ་པ་ཐོབ་པའི་བཀའ་རྟགས་དངོས་བསྟན་པའི་ལེའུ་སྟེ་ཉེར་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །ལམ་ལྔ་རྫོགས་པར་བཀའ་སྩལ་པ། །ཅིག་ཆར་རྫོགས་ལ་རིམ་པ་ནི། །དད་པ་ཡིས་ནི་ལུང་ལྡན་ལ། །ཡིད་འཐད་འབུལ་ནུས་ཚོགས་ཀྱི་ལམ། །བསམ་པ་བཟང་པོ་གསེར་འདྲ་གྲུབ། །བླ་མས་གནད་ཕྱིན་ཐེ་ཚོམ་མེད། །དེ་དུས་མཁའ་འགྲོ་མཆོད་བྱས་ནས། །སྦྱོར་བ་མེ་འདྲ་གང་ཡང་འགྲུབ། །དེ་ཕྱིར་སྦྱོར་བའི་ལམ་ ― DNG001_Page_0559 ―
[མ་དཔེ་གཟིགས་ན་འདིར་གནོན།]
དུ་གསུངས། །ལུང་ལྡན་གདམས་ངག་གདེངས་ལྡན་པས། །བློ་ལྡན་ཡིད་ཆེས་གདེངས་ལྡན་ཕྱིར། །ལོང་བ་མིག་ཕྱེད་གནམ་མཐོང་བཞིན། །ཆོས་ཉིད་བདེན་པའི་ལམ་ཞེས་བྱ། །དོན་དེ་གོ་ནས་རྒྱུན་དུ་ནི། །འབྲལ་མེད་དབང་ཐོབ་ངེས་བསྟན་ཕྱིར། །ཆུ་ཆེན་བཞིན་དུ་གནས་འགྱུར་མེད། །བདེན་པ་བསྒོམས་པའི་ལམ་ཞེས་བྱ། །སྙན་བརྒྱུད་ངེས་པའི་གདམས་ངག་འདི། །རང་གི་ཐུགས་ལ་དོན་རྫོགས་ཕྱིར། །དབུལ་པོས་ནོར་ཆེན་རྙེད་པ་འདྲ། །དེ་ཕྱིར་མཐར་ཕྱིན་ལས་ཞེས་བྱ། །དེ་ཡང་འདུས་པའི་སྙིང་པོ་ཉོན། །དེ་དག་ལམ་ལྔར་བསྟན་པ་ཡང་། །གང་ཟག་དྲང་ཕྱིར་བསྟན་པ་ལས། །དོན་ལ་རིམ་པར་དབྱེ་རུ་མེད། །སྣོད་བཅུད་འཛོམ་པས་ཀུན་ཀ་རྫོགས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ལམ་ལྔ་དུས་གཅིག་ཏུ་རྫོགས་པར་བསྟན་པའི་ལེའུ་སྟེ་ཉེར་བཞི་པའོ།། །།དེ་ནས་འདུས་པའི་ཚོགས་རྣམས་ལ། །གདམས་ངག་མངོན་དུ་བསྟན་པ་ཡིས། །རིག་འཛིན་སེམས་དཔས་དོན་རིག་ནས། །ཐ་མལ་རང་རྒྱུད་ཤེས་པ་ནི། །ལུང་བསྟན་གདམས་ངག་འདིར་བསྟན་པས། །རྩལ་མེད་ངང་ལ་རིག་པ་འཕྱོ། །ཞེན་མེད་རང་གསལ་སྨན་ཆེན་གྱིས། །འཁོར་བར་འཛིན་པའི་ནད་ཆེན་སེལ། །དེ་ཡང་འདུས་པའི་སྙིང་པོ་ཉོན། །གཞི་དང་འདུག་ཚུལ་སྣང་ཚུལ་དང་། །ལུས་གནས་ངོ་བོ་གདམས་ངག་དང་། །གནས་སྐབས་མཐར་ཐུག་འབྲས་བུ་རྣམས། །ང་ཡིས་བསྟན་གྱིས་ལེགས་པར་ཉོན། །ཡེ་ནས་གནས་པའི་གཞི་ཉིད་ནི། །གདོད་ནས་མ་བཅོས་རང་བྱུང་སྟེ། །དེ་ཡི་དོན་གྱིས་ཀུན་ལ་ཁྱབ། །ཡེ་ཤེས་འགྱུར་མེད་ཀུན་གྱི་གཞི། །དེ་ཡི་འདུག་ཚུལ་ངང་ལ་རིག །སུས་ཀྱང་མ་བྱས་ཡེ་ནས་ཡོད། །ས་ལེ་བ་ལ་ཁ་དོག་མེད། །རང་བཞིན་གསལ་བའི་འདུག་ཚུལ་ཡིན། །རང་བྱུང་རིག་པའི་སྣང་ཚུལ་ནི། །ཕྱོགས་ཞེན་གང་ཡང་མེད་པའི་ཕྱིར། །ཕྱི་ནང་མེད་པ་ཆོས་ཀྱི་སྐུ། །ཟང་ཐལ་འགྱུར་མེད་ཡེ་ནས་ཡོད། །གདོད་ནས་རང་བྱུང་དག་པའི་སྐུ། ། ― DNG001_Page_0560 ―
[མ་དཔེ་གཟིགས་ན་འདིར་གནོན།]
རང་གི་ལུས་ལ་གནས་པའི་ཚེ། །རང་གི་གཟུགས་ཀྱི་ནང་ན་ནི། །རང་བྱུང་རིག་པ་བཞི་ལྡན་ཡོད། །དེ་ཡི་ངོ་བོ་གཅིག་ཏུ་འདུས། །མངོན་གསལ་བ་ཡི་བདག་ཉིད་ཅན། །དེ་ཉིད་ལྷང་ངེ་ལྷན་ནེ་བ། །རྡོ་རྗེ་རང་བྱུང་འགྱུར་བ་མེད། །དེ་དོན་ངེས་པའི་གདམས་ངག་འདི། །ཚིག་དང་ཡི་གེའི་ཡུལ་ལས་འདས། །རང་བྱུང་རིག་པ་སྐྱེ་འགག་མེད། །སྟོན་ཁའི་ནམ་མཁའ་སྤྲིན་མེད་འདྲ། །གནས་སྐབས་དགོངས་པ་མཐར་ཕྱིན་པས། །མ་བཙལ་མ་བསྒྲུབས་མྱ་ངན་འདས། །ལས་དང་ཐུགས་རྗེ་ད་ལྟ་འཛོམ། །དེ་ཕྱིར་འབྲས་བུ་མངོན་དུ་གྱུར། །མཐར་ཐུག་ཕྱི་རབས་རྣལ་འབྱོར་ཀུན། །ངེས་དོན་གདམས་ངག་འདི་རྙེད་པས། །ཉམས་ཀྱི་དགོངས་པ་གདེངས་ལྡན་འགྱུར། །ཤེས་རབ་ཀློང་དུ་མངོན་སངས་རྒྱས། །དེ་ནས་འདུས་པའི་སྙིང་པོ་ཉོན། །དེ་དག་རྩ་བ་མདོར་བསྡུ་ན། །ཁྱུང་ཆེན་ནམ་མཁར་ལྡིངས་པ་བཞིན། །ཆོས་སྐུའི་རིག་པ་སྤྲོ་བསྡུ་མེད། །བློ་ཡིས་མ་སྤྱད་རེ་དོགས་བྲལ། །ཡེ་ཤེས་མཐར་ཕྱིན་ལྷུན་གྱིས་གྲུབ། །བུཌྜྷ་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སངས་རྒྱས་ཐམས་ཅད་ཀྱི་བཀའ་རྟགས་ཀྱི་གདམས་ངག་མངོན་དུ་བསྟན་པའི་ལེའུ་སྟེ་ཉེར་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །དད་ལྡན་འཁོར་གྱི་དོན་ཆེད་དུ། །ཀུན་རིག་ཆོས་ཀྱི་སྟོན་པ་ལ། །བདེན་པའི་དགོངས་དོན་འདི་སྐད་གསོལ། །རྟོགས་པའི་ཡེ་ཤེས་རང་གནས་སུ། །རིག་པ་བྱིན་གྱིས་བརླབས་པའི་ཕྱིར། །མ་རིག་ཡེ་ཤེས་ཇི་ལྟར་དབྱེ། །ཕྱེད་པའི་ཡོན་ཏན་ཇི་ལྟར་འབྱུང་། །རྟོགས་གཞི་མྱ་ངན་འདས་པ་གང་། །དེ་ལས་སངས་རྒྱས་ཇི་ལྟར་འབྱུང་། །གཞི་གསུམ་འདྲེལ་པ་ཡོད་དམ་མེད། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མ་རིག་ཡེ་ཤེས་དབྱེ་བ་ནི། །སེམས་ནི་ཆུ་འདྲ་ཐམས་ཅད་སྡུད། །ཡེ་ཤེས་ཉི་མས་ཐམས་ཅད་བསྲེག །ལྕབ་ལྕིབ་ཆུ་ ― DNG001_Page_0561 ―
[མ་དཔེ་གཟིགས་ན་འདིར་གནོན།]
ཡིས་སྡུད་ནུས་ཀྱང་། །མེ་བཞིན་བསྲེག་པའི་ནུས་པ་མེད། །ཆུ་ཡི་རྒྱ་མཚོའི་གླིང་དགུ་ཡང་། །དུས་ཀྱི་མེ་ཡིས་བསྲེགས་ཤིང་བསྐམ། །དེ་བཞིན་སྐད་ཅིག་ཏིང་འཛིན་གྱིས། །སྒྲིབ་པའི་ཕུང་པོ་བརླག་ཅིང་སྟོང་། །རིག་པའི་ཡེ་ཤེས་རྟོགས་པ་ཡིས། །བག་ཆགས་སླར་བསྲེགས་གཏན་མི་སྐྱེ། །སེམས་ཀྱི་བག་ཆགས་འཁོར་བའི་རྒྱུ། །སེམས་ནི་ཅིར་ཡང་མནོ་ཞིང་རྒྱུ། །གང་དྲན་ཆགས་སྡང་ཞེན་པར་བྱེད། །ཡེ་ཤེས་ཀྱིས་ནི་ཉོན་མོངས་བསྲེགས། །དེ་ཕྱིར་སེམས་ནི་འཁྲུལ་པ་ཡིན། །དེ་ཡང་འདུས་པའི་སྙིང་པོ་ཉོན། །མ་འཁྲུལ་རིག་པའི་ཡེ་ཤེས་ཀྱིས། །ཉོན་མོངས་མ་ལུས་རྩད་ནས་འཇོམས། །ཆུ་ཡིས་ཝུར་སྡུད་བསྲེག་མི་ནུས། །ཇི་ལྟར་མེ་ལྕེའི་རྩེ་མོ་ལ། །སྦྲང་བུ་འདུ་བར་ག་ལ་ནུས། །དེ་བཞིན་སེམས་ཀྱིས་སངས་མི་རྒྱ། །གཞི་ཡི་ཡེ་ཤེས་རྟོགས་པ་ལ། །ཉོན་མོངས་བག་ཆགས་གནོད་མི་ནུས། །སྔ་ཕྱི་བྲལ་བའི་ཆོས་ཉིད་ལ། །ཡེ་ཤེས་ཞེས་ནི་དེ་ལ་བྱ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། མ་རིག་ཡེ་ཤེས་ཤན་དབྱེ་བའི་ལེའུ་སྟེ་ཉེར་དྲུག་པའོ།། །།དེ་ཡང་རྡོ་རྗེ་སེམས་དཔའ་ཉོན། །ཤན་དབྱེ་དངོས་ཀྱི་ཡོན་ཏན་ནི། །སངས་རྒྱས་དམྱལ་བ་ཡན་ཆད་དུ། །མ་བཅོས་ལྷུན་གྲུབ་བཙལ་དུ་མེད། །རང་བྱུང་ཡེ་ཤེས་བདག་མེད་སྐུ། །ཡེ་ཤེས་ཅན་ལ་སྐྱོན་མ་གོས། །རང་རིག་ཆོས་སྐུར་ངེས་པའི་དོན། །མི་གནས་ཤེས་རབ་ཕ་རོལ་ཕྱིན། །སྐྱེ་འགགས་མེད་པའི་ཀློང་དུ་གྲོལ། །འཁོར་ལོ་བསྒྱུར་རྒྱལ་བསོད་ཆེས་ཡང་། །བྲམ་ཟེའི་དམོད་མོས་བརླག་པར་བྱེད། །དེ་བཞིན་བག་ཆགས་སྦྱངས་དཀའ་བ། །སྙིང་པོ་དོན་གྱི་བཅུད་མཐོང་བས། །སྐད་ཅིག་གཅིག་ལ་རང་དག་གྲོལ། །དེ་ཡང་འདུས་པའི་སྙིང་པོ་ཉོན། །གཉིས་མེད་བདེ་ཆེན་ཡོངས་ལ་ཁྱབ། །དུག་ལྔ་བསྐྱེད་པའི་ཡུལ་འདི་ནི། །འདམ་དང་འདྲ་སྟེ་རྐྱེན་ལས་བྱུང་། །པདྨ་འདྲ་སྟེ་གོས་པ་མེད། །དེ་བཞིན་ཡང་ཏིའི་ཆོས་འདི་ལ། །འཁོར་འདས་རེ་དོགས་ ― DNG001_Page_0562 ―
[མ་དཔེ་གཟིགས་ན་འདིར་གནོན།]
སྐྱོན་མ་གོས། །ནམ་མཁའི་ངང་ལས་གཡོས་མེད་བཞིན། །ཆོས་ཉིད་རྟོགས་པའི་ངང་ལས་ནི། །དུས་གསུམ་འགྱུར་མེད་ཀུན་ཏུ་བཟང་། །རྐྱེན་དང་བྲལ་བའི་བྱང་ཆུབ་ལ། །ལས་ཀྱི་རྒྱུ་འབྲས་མེད་པའི་ཕྱིར། །མ་བྱུང་མ་སྐྱེས་ཆོས་སྐུ་ལ། །ཚིག་གི་རྐྱེན་གྱི་མཐར་མི་གནས། །དེ་ཡང་འདུས་པའི་སྙིང་པོ་ཉོན། །ཡང་དག་དོན་ལ་བདག་མེད་པས། །རྣམ་པར་མི་རྟོག་ལྷུན་གྱིས་གྲུབ། །བྱ་བཙལ་མི་མངའ་རྟོགས་པའི་ལམ། །སྟོང་པ་ཕྱོགས་ལྷུང་ཡུལ་དང་བྲལ། །ཡོད་པར་འཛིན་པའི་དངོས་པོ་སྟོར། །ཡེ་ནས་ཡོད་པའི་དོན་ཤེས་ན། །ལྷ་ཡི་དཀྱིལ་འཁོར་བསྐྱེད་མི་དགོས། །རང་རིག་ཡེ་ཤེས་རྟོགས་པའི་ལྷ། །འཛབ་དང་བསྙེན་པ་འབུལ་མི་དགོས། །ལྟ་བ་རིག་པའི་ཡེ་ཤེས་དེ། །མཚན་མར་མི་འགྱུར་ནམ་མཁའ་བཞིན། །ཞེན་དང་མ་ཞེན་དགེ་སྡིག་གཉིས། །བླང་དོར་བྱེད་པ་བྱིས་པའི་ཆོས། །ཡེ་ཤེས་འབའ་ཞིག་ལས་བྱུང་བ། །ཐམས་ཅད་རང་བྱུང་ཤར་བ་བཞིན། །ཆོས་རྣམས་ཀུན་གྱི་སངས་རྒྱས་མཆོག །དེ་ཡང་འདུས་པའི་སྙིང་པོ་ཉོན། །ཉོན་མོངས་སྐྱེ་དང་གཉེན་པོ་གཉིས། །གཅིག་ཡོད་ཙམ་ན་གཅིག་མེད་ཕྱིར། །གློ་བུར་ཡིན་གྱིས་དོན་ལ་མེད། །རེ་དོགས་གང་ཡང་མེད་པ་ཡིས། །ཀ་དག་པ་ཡི་ཡེ་ཤེས་ལ། །སྐྱོན་གྱིས་བསླད་པའི་ཆོས་མེད་པས། །མཚམས་མེད་ལྔ་དང་ཆོས་སྤྱོད་བཅུ། །རྟོགས་པའི་དོན་ལ་ཁྱད་མེད་ཕྱིར། །སྤོང་དང་ལེན་པའི་སྣང་བ་ལ། །མཐའ་དབུས་མེད་ཤེས་རྟོགས་པ་བྲལ། །ཡེ་ནས་རྣམ་དག་ལྷུན་གྱིས་གྲུབ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། མ་རིག་ཡེ་ཤེས་ཤན་དབྱེ་བའི་ཡོན་ཏན་བསྟན་པའི་ལེའུ་སྟེ་ཉེར་བདུན་པའོ།། །།དེ་ནས་དད་ལྡན་འཁོར་རྣམས་ལ། །རྟོགས་གཞི་མྱ་ངན་འདས་པ་ནི། །ཀུན་བཟང་སྟོན་པས་བཀའ་སྩལ་པ། །སངས་རྒྱས་ཀུན་གྱི་རྟོགས་པའི་དོན། །ཐིག་ལེ་ཉག་གཅིག་ཆོས་ཀྱི་སྐུ། །ཡེ་ནས་ཡོད་དང་རྟོགས་པ་གཉིས། ། ― DNG001_Page_0563 ―
[མ་དཔེ་གཟིགས་ན་འདིར་གནོན།]
སྔ་ཕྱི་མ་ཡིན་དུས་མཉམ་དུ། །གཅིག་པར་རྟོགས་པ་སངས་རྒྱས་པ། །ཀུན་ཏུ་བཟང་པོའི་དགོངས་པ་དེ། །རི་པོ་ཏ་ལར་ཉི་ཤར་འདྲ། །དེ་ཡང་རྡོ་རྗེ་སེམས་དཔའ་ཉོན། །སྲིད་པ་མ་ཆགས་སྟོང་པའི་ཚེ། །འབྱུང་བ་མ་ཆགས་གདོད་ནས་མེད། །དེ་དུས་ཡེ་ནས་ཆོས་ཉིད་དེ། །ཡེ་ནས་མ་འཁྲུལ་རིག་པ་ཡིས། །དེ་ཉིད་ཡིན་པར་ངོ་ཤེས་པས། །གཞི་དང་རྟོགས་པ་གཅིག་ཏུ་ཤེས། །དེ་ཕྱིར་ཐོག་མཐའ་དུས་ཅིག་ཆོད། །དེ་ཡང་འདུས་པའི་སྙིང་པོ་ཉོན། །སངས་རྒྱས་ཀུན་བཟང་དགོངས་པ་དེ། །རང་བྱུང་ཆོས་སྐུ་ཡེ་ནས་ཡིན། །དེ་ཕྱིར་རྒྱུ་རྐྱེན་འདུས་མ་བྱས། །རྟོག་པ་ཀུན་ལ་ཆོས་ཉིད་ཁྱབ། །དེ་ཡང་འདུས་པའི་སྙིང་པོ་ཉོན། །རང་བྱུང་རིག་པའི་ཡེ་ཤེས་ཐུགས། །དེ་ལས་གཞན་དུ་གཡོས་པ་མེད། །ཐིག་ལེ་ཉག་གཅིག་ཡེ་ཤེས་སྐུ། །སངས་རྒྱས་ཆོས་སྐུ་དེ་ལས་བྱུང་། །དེ་ཕྱིར་ཀུན་ཏུ་བཟང་པོར་གནས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། རྟོགས་པའི་གཞི་མྱ་ངན་ལས་འདས་པའི་ལེའུ་སྟེ་ཉེར་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ཀུན་བཟང་རྟོགས་དོན་ཆོས་སྐུ་དེ། །རྡོ་རྗེ་སེམས་ལ་དངོས་བསྟན་པ། །ཕྱི་རབས་དོན་དུ་བསྟན་པའི་ཆོས། །རྒྱུད་ལུང་མན་ངག་རྣམ་གསུམ་བྱུང་། །གཞིར་བཞག་རང་བྱུང་ཆེན་པོ་ལ། །བག་ཆགས་ཀ་ནས་མེད་པའི་ཕྱིར། །འཛིན་པར་ཞེན་པའི་བྱ་བ་བཏང་། །གང་ལའང་འཛིན་པར་བྱར་མེད་དེ། །དེ་དོན་གཉིས་ཆར་རིམ་གྱིས་ནི། །རང་རིག་རྟོགས་པའི་སངས་རྒྱས་བྱུང་། །དེ་ཡང་རྡོ་རྗེ་སེམས་དཔའ་ཉོན། །ད་ལྟ་གང་ན་གནས་པ་ནི། །ལུང་ལྡན་ངེས་དོན་རྟོགས་པར་བྱ། །རྒྱུ་འབྲས་ལྟོས་པས་ཞེན་པ་མེད། །མ་ཚོར་ཡིད་ལ་བྱེད་པ་མེད། །བཏང་སྙོམས་ལྟེངས་པོའི་མུན་པ་སངས། །གོལ་མེད་ནམ་མཁའ་ལྟ་བུ་ལ། །ཞེན་མེད་རང་བྱུང་ཆོས་སྐུ་གསལ། །དེང་འདུས་རིག་པའི་སྙིང་པོ་གསལ། །དེ་རྟོགས་རྣམ་པ་བཅུ་གཅིག་ལྡན། །དངོས་པོ་མེད་པའི་བྱ་བ་བཏང་། །དེ་ཉིད་རྟོགས་པ་ ― DNG001_Page_0564 ―
[མ་དཔེ་གཟིགས་ན་འདིར་གནོན།]
མངོན་གྱུར་ཡིན། །དེ་ཡང་འདུས་པའི་སྙིང་པོ་ཉོན། །ཐ་མ་སྐྱེ་ཤིའི་དུས་བྱུང་ཚེ། །ཡེ་ནས་དག་པའི་རང་བཞིན་ཕྱིར། །གཞི་གནས་འཁྲུལ་མེད་བྱ་བ་བཏང་། །དབང་པོས་གཟུང་བའི་ཡུལ་མེད་ཕྱིར། །རྟོགས་ཚུལ་རང་བཞིན་དག་པ་ལ། །གྲུབ་མཐའི་བློ་ཡི་བྱ་བ་བཏང་། །དེ་ཚེ་རྗེས་དྲན་དྲུག་དང་ནི། །འབྲས་བུ་ཡོན་ཏན་ལྔ་ལྡན་ཕྱིར། །དེ་ཚེ་སྐད་ཅིག་དེ་ཉིད་ལས། །སངས་རྒྱས་ས་ལ་ངེས་པར་འགྲོ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སངས་རྒྱས་ཀྱི་བྱུང་ཚུལ་བསྟན་པའི་ལེའུ་སྟེ་ཉེར་དགུ་པའོ།། །།དེ་ནས་འདུས་པའི་ཚོགས་རྣམས་ལ། །གཞི་གསུམ་འདྲེལ་པ་ཡོད་མེད་པ། །འདུས་པའི་འཁོར་ལ་བཀའ་སྩལ་པ། །ངེས་དོན་ཆོས་ཀྱི་སྐུ་དང་ནི། །འཁོར་གཞི་ལུང་མ་བསྟན་དག་ནི། །གནས་སྐབས་མཐར་ཐུག་གཉིས་ཀ་ཡི། །འདྲེལ་པ་མེད་པས་འཁོར་བ་སྟོངས། །དེ་ཡང་འདུས་པའི་སྙིང་པོ་ཉོན། །རང་བཞིན་ལུས་དང་ཆོས་སྐུ་གཉིས། །གནས་སྐབས་འདྲེལ་པ་མཐར་ཐུག་ཡོད། །དེ་ཕྱིར་ལུང་ལྡན་ཕྲད་དུས་ན། །ཐིག་ལེ་ཡེ་ཤེས་རྟོགས་ཕྱིར་རོ། །དེ་ཡང་འདུས་པའི་སྙིང་པོ་ཉོན། །གཉིས་ཀའི་གཞི་དང་ལུང་མ་བསྟན། །གནས་སྐབས་ཡོད་ལ་མཐར་ཐུག་མེད། །དེ་ཕྱིར་གཏི་མུག་སངས་དུས་ན། །ཆོས་སྐུ་གཅིག་ཏུ་ཤེས་པས་ཆོག །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། གཞི་གསུམ་འདྲེལ་བ་ཡོད་མེད་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་འདུས་པའི་སྙིང་པོ་ཡིས། །ཀུན་ཏུ་བཟང་ལ་འདི་སྐད་གསོལ། །གོལ་མེད་ཆོས་དབྱིངས་གང་གིས་བྱ། །ཡུལ་དུ་མ་འདྲེལ་རིག་པ་གང་། །དེ་གཉིས་དུས་མཉམ་ལྟ་བ་གང་། །ལྟ་བ་མདོར་ནི་ཇི་ལྟར་བསྡུ། ། ― DNG001_Page_0565 ―
[མ་དཔེ་གཟིགས་ན་འདིར་གནོན།]
རིག་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །སྣང་བ་ཆོས་དབྱིངས་བཀའ་སྩལ་པ། །ཡུལ་གྱི་རྟོག་པ་གསུམ་བྲལ་བའི། །སྣང་བ་མ་བཅོས་ཆོས་ཉིད་ལས། །རིག་པ་མ་བསླད་ཡེ་ཤེས་ནི། །བེམ་རིག་ཕྱེད་ན་སྐུ་དང་དབྱིངས། །དེ་ཡང་འདུས་པའི་སྙིང་པོ་ཉོན། །སྟེང་གི་ཆོས་དབྱིངས་ཆོས་སྐུར་གཅིག །བར་དུ་ཡེ་ཤེས་སྒྱུ་མའི་དབྱིངས། །འོག་གི་སྣང་བ་འབྱུང་བའི་དབྱིངས། །གཅིག་ལ་ཐ་དད་ངོས་འཛིན་ན། །འགལ་བ་མེད་དེ་ཀུན་གྱི་དབྱིངས། །ད་ལྟ་སྣང་བའི་ཆོས་རྣམས་ལ། །མི་བརྟག་མི་བཟུང་མ་བྲལ་ཙམ། །སྒོ་ལྔ་མ་འགགས་རང་ཡན་ལ། །རིག་པ་རང་དྲན་དབྱིངས་ནས་འཕྱོ། །གང་ཡང་རུང་བ་གཅིག་ལ་ཡང་། །སྒྲོ་སྐུར་མེད་པ་ཆོས་དབྱིངས་ཡིན། །དེ་ཡང་འདུས་པའི་སྙིང་པོ་ཉོན། །ཡུལ་འདི་མེད་པའི་དོན་ཤེས་ཀྱང་། །ད་དུང་བག་ཆགས་ཆ་འདྲ་ཡིས། །ཆུ་ཟླ་སྨིག་རྒྱུ་དུ་བ་བཞིན། །འོད་ཀྱི་ཟེར་བུ་མེ་ལོང་ཙམ། །དོན་ལ་ཤེས་མེད་རིག་པ་དང་། །སྣང་ཡང་སྣོད་མེད་རྟོགས་པ་ཡིན། །ཆོས་སྐུ་འཕྱོ་བ་ནམ་མཁའི་ཀློང་། །ཡིན་དང་མིན་གྱིས་ཅི་ཞིག་བྱ། །ཆོས་ཀྱི་དབྱིངས་སུ་དེ་ལ་བཏགས། །འཁྲུལ་པའི་རྟོག་པས་གཞི་མི་འགྱུར། །བཙལ་བའི་བསམ་པས་དབྱིངས་མི་སྤྱོད། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སྣང་བ་མ་བཅོས་ཆོས་ཀྱི་དབྱིངས་གཏན་ལ་ཕབ་པའི་ལེའུ་སྟེ་སོ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །ཡུལ་མེད་རིག་པ་བཀའ་སྩལ་པ། །ལུང་ལྡན་བླ་མའི་གདམས་ངག་འདི། །མ་རིག་འཁྲུལ་པ་ཕྱི་ན་ཡོད། །རང་རིག་ཡེ་ཤེས་ནང་ན་ཡོད། །ཕྱི་ནང་བར་དུ་ནམ་མཁའ་དབྱེ། །སེམས་རིག་ཕྱེད་པས་རང་བྱུང་རྟོགས། །དེ་ཡང་འདུས་པའི་སྙིང་པོ་ཉོན། །སྤྲིན་མེད་ནམ་མཁར་ཉི་ཤར་བཞིན། །ཡུལ་མེད་དྲན་པའི་རིག་པ་དེ། །ཞེན་མེད་རང་རིག་ལྷག་མཐོང་ངོ་། །རིག་པ་ ― DNG001_Page_0566 ―
[མ་དཔེ་གཟིགས་ན་འདིར་གནོན།]
ཤེས་པས་མ་རིག་སངས། །རིག་པའི་ཀློང་དུ་ཆོས་ཉིད་དྲན། །རང་བྱུང་ཀློང་ནས་ཡེ་ཤེས་ཤར། །རིག་པའི་ངང་ལ་ཆོས་ཉིད་ཞོག །ད་ཡང་འདུས་པའི་སྙིང་པོ་ཉོན། །དེ་ཚེ་ཀུན་བཟང་ཆོས་དྲུག་གིས། །གཞི་གནས་མ་རིག་དྲུག་བཅོམ་སྟེ། །ཉུག་ཙམ་ཉིད་ན་ཚིག་ཙམ་སྟོང་། །རིག་ཙམ་བྱུང་ན་རིག་འགྲིབས་བརླག །སལ་གྱིས་བྱུང་བས་མུན་པ་སངས། །ཝལ་གྱིས་བྱུང་བས་འཐིབ་པ་མེད། །སྒྲོ་སྐུར་བྲལ་བས་མ་རིག་དག །འགྱུར་བ་མེད་པས་ནམ་མཁའ་འདྲ། །དེ་ཡང་རྡོ་རྗེ་སེམས་དཔའ་ཉོན། །འཁྲུལ་པ་མ་རིག་ལོག་བཅོམ་ནས། །ལུང་མ་བསྟན་པར་རང་བརླག་སྟོང་། །བེམ་རིག་ཕྱེད་པས་གཞི་དང་ཕྲད། །དེ་ཕྱིར་མ་རིག་མུན་པ་སངས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཡུལ་དང་འདྲེལ་མེད་ཀྱི་རིག་པ་ངོས་བཟུང་བར་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །དུས་མཉམ་ལྟ་བ་བཀའ་སྩལ་པ། །རང་བྱུང་ངོ་བོ་ཉིད་ཀྱི་སྐུ། །རྒྱུ་རྐྱེན་མ་བསྐྱེད་ཡང་དག་ཡོད། །ཡིན་མིན་བློ་ཡིས་མ་བཅོས་པར། །འདུས་མ་བྱས་པའི་ནམ་མཁའ་འདྲ། །དེ་ཡི་རྟོགས་ཚུལ་ཡེ་ཤེས་དེ། །ཀུན་བཟང་ཉིད་ནི་གདོད་ནས་ནི། །རང་རིག་ཆོས་སྐུ་ཡིན་པར་རྟོགས། །རི་བོ་ཏ་ལའི་རྩེ་མོ་འདྲ། །དེ་ཡི་དེ་ཉིད་མཚོན་པའི་དཔེ། །མཐའ་དབུས་མེད་པས་ནམ་མཁའ་འདྲ། །རྣམ་རྟོག་འཇོམས་པས་རྡོ་རྗེ་འདྲ། །སྐྱེ་བ་མེད་པས་ཨ་དང་འདྲ། །འདྲ་བའི་ཕྱིར་ན་དོན་མ་ཡིན། །དེ་ཡང་འདུས་པའི་སྙིང་པོ་ཉོན། །གཏན་ཚིགས་ངེས་པ་གང་ཡིན་པ། །རང་བྱུང་འཁོར་བར་འཁྱམས་མ་མྱོང་། །དེ་རྟོགས་འབྲས་བུ་དུས་འདི་རུ། །མཐའ་བྲལ་མངོན་གྱུར་བདེན་པ་མཐོང་། །དེ་ཡི་བཟློག་ཆོས་དེད་པ་དང་། །མཐུན་པ་མི་མཐུན་གཉིས་ལོགས་པས། །གོལ་སྒྲིབ་སྐྱོན་གྱིས་མ་གོས་པ། །སེམས་ལས་མ་བྱུང་ཆོས་སྐུར་གསུངས། ། ― DNG001_Page_0567 ―
[མ་དཔེ་གཟིགས་ན་འདིར་གནོན།]
དེ་ཡང་འདུས་པའི་སྙིང་པོ་ཉོན། །རང་གི་སེམས་ཉིད་ངེས་པ་དེ། །གང་དང་འདྲ་མེད་ཡིན་པ་མེད། །ཡིན་ནི་ད་ལྟའི་ཤེས་པ་ལ། །དེ་དོན་ཀུན་ལ་གནས་པའི་ཕྱིར། །འཆར་ནུབ་འབྲལ་བ་མེད་པའི་མཆོག །ལ་ཟློས་སྤང་ལེན་ངོ་ཤེས་པས། །སྐྱོན་མེད་ཐམས་ཅད་མེད་པར་དག །དེ་ཕྱིར་དུས་འདིར་འབྲས་བུར་འགྲུབ། །ཕྱི་མར་སངས་རྒྱས་སྨོས་ཅི་དགོས། །དེ་ཡང་འདུས་པའི་སྙིང་པོ་ཉོན། །ཆོས་དབྱིངས་ཆོས་སྐུ་གཅིག་གི་ངང་། །རང་བྱུང་རིག་པའི་ཡེ་ཤེས་དེ། །ཉི་ཟླ་གཟས་ཟིན་དཔེ་བཞིན་དུ། །དོན་ཀུན་དུས་གཅིག་ཡོན་ཏན་རྫོགས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཆོས་ཀྱི་སྐུ་དང་དབྱིངས་དུས་མཉམ་པར་བསྟན་པའི་ལེའུ་སྟེ་སོ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །རིག་པ་ཆོས་སྐུར་བལྟ་ཤེས་ན། །ཀུན་ལ་ཁྱབ་པའི་རིག་པ་ཡིས། །འདུས་མ་བྱས་པའི་དོན་རྟོགས་ནས། །མཐའ་བྲལ་རིག་པ་གཅིག་ཡིན་ན། །དེ་ཡང་འདུས་པའི་སྙིང་པོ་ཉོན། །ཀུན་གཞི་མཉམ་ཉིད་རྒྱལ་བའི་ཐུགས། །མ་ལུས་སེམས་ཅན་ཀུན་ལ་གནས། །ཆོས་སྐུས་ཁྱབ་པས་རྒྱལ་བའི་སྐུ། །མཐའ་དབུས་མེད་པས་ནམ་མཁའ་འདྲ། །རིག་པ་མ་བསླད་གཉུག་མར་གནས། །དམིགས་འཛིན་མེད་པ་ངང་གིས་གསལ། །དངོས་པོ་མེད་ལ་ཤེས་པ་ཡོད། །ནམ་མཁར་ཉི་མ་ཤར་བ་འདྲ། །འདུས་མ་བྱས་པའི་ཡེ་ཤེས་ཀྱིས། །རྟེན་འཆིང་མེད་པའི་ཉོན་མོངས་སེལ། །འབྱུང་བ་ལྔ་ལ་རག་མ་ལུས། །མི་འགྱུར་འཇོམས་པས་རྡོ་རྗེ་འདྲ། །བླ་མས་དོན་བསྟན་རྣལ་འབྱོར་པས། །ཐེ་ཚོམ་མེད་པར་རང་སེམས་རྟོགས། །ཐམས་ཅད་གཅིག་ཏུ་རྫོགས་པར་ཤེས། །མ་རིག་ལོང་བའི་མིག་ཕྱེད་འདྲ། །ཡེ་ཤེས་རིག་པ་འདི་ཉིད་ནི། །ཡོད་མེད་དབུས་ཀྱི་མཐའ་བྲལ་བས། །སང་ངེ་ས་ལེ་འཕོ་འགྱུར་མེད། །ཀ་ཤིའི་རས་ཀྱི་རིན་ཆེན་འདྲ། །དེ་ཡང་ ― DNG001_Page_0568 ―
[མ་དཔེ་གཟིགས་ན་འདིར་གནོན།]
འདུས་པའི་སྙིང་པོ་ཉོན། །དེ་དག་ངོ་བོ་གཅིག་ཏུ་འདུས། །ད་ལྟའི་ཤེས་པ་འདི་ཉིད་ལ། །ཡིད་ཆེས་གདེང་ལྡན་མ་རིག་སངས། །རང་བྱུང་ཀློང་དུ་ཡེ་ཤེས་རྒྱས། །རིག་པའི་ངང་ལ་ཆོས་སྐུ་ཞོག །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ལྟ་བ་མདོར་བསྡུས་ཏེ་བསྟན་པའི་ལེའུ་སྟེ་སོ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །དད་ལྡན་འཁོར་གྱི་དོན་ཆེད་དུ། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་དགོངས་དོན་འདི་སྐད་གསོལ། །རང་གི་རིག་པ་ངོས་ཟིན་ན། །ཉམས་སུ་མྱོང་བའི་བཀའ་རྟགས་ཀྱིས། །མན་ངག་དོན་གྱི་དབྱེ་བ་གང་། །ཆོས་སྐུའི་ངོ་འདི་ཇི་ལྟར་སྤྲད། །ཆོས་སྐུ་སྤྲད་པའི་ཡོན་ཏན་གང་། །དྲུག་གཉིས་མཚོན་པའི་ཉམས་དང་ནི། །མན་ངག་གོལ་མེད་ལ་ཟློས་དང་། །ཉམས་མྱོང་བཀའ་རྟགས་བསྡུས་པ་ནི། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །འཁོར་འདས་བར་དོའི་གཞི་ཉིད་ནི། །སྐྱེ་ཤི་གཉིས་ཀྱི་བར་དོ་ལ། །ཆོས་སྐུ་གཏན་ལ་དབང་བའི་ཕྱིར། །སྤྱི་ཡི་ཀུན་གཞིའི་གཞི་ཆ་ལ། །སྦྱོར་བ་རྐྱེན་གྱིས་སྔ་ཕྱིར་བསྒྲིབས། །ལུང་ལྡན་ངེས་པའི་གདམས་ངག་གིས། །དོན་གྱི་ཀུན་གཞི་ངོས་བཟུང་ཕྱིར། །ཤན་ཕྱེ་ལ་ནི་ངོ་སྤྲོད་དེ། །ཟུང་བཞི་ཡ་བདུན་དོན་ཤེས་བྱ། །དེ་ཡང་འདུས་པའི་སྙིང་པོ་ཉོན། །སྔ་ཕྱིའི་བག་ཆགས་ཞེས་བྱ་བ། །བསམ་པ་མ་འཁྲུལ་དངོས་པོ་འཁྲུལ། །སྔར་གྱི་དགེ་སྡིག་ཅི་བྱས་དྲན། །མི་ཤིའི་ཁ་དོག་དྲན་པ་འདྲ། །ཕྱི་ཡི་ཉོན་མོངས་གློ་བུར་བ། །ད་གདོད་ཅི་བྱ་མནོ་བ་ནི། །དངོས་པོ་མ་འཁྲུལ་བསམ་པ་འཁྲུལ། །ཐག་པ་སྦྲུལ་དུ་འཁྲུལ་པ་འདྲ། །ཡུལ་སེམས་འཛིན་པའི་རྟོག་པ་ནི། །བསམ་དངོས་གཉིས་ཀ་འཁྲུལ་པའི་ཕྱིར། །མེད་ལ་ཡོད་རྟོག་སྔ་ཕྱི་འདྲེས། །རི་བོང་རྭ་ལ་རྟོག་དཔྱོད་འདྲ། །སྐྱེ་བོས་འཕྲལ་གྱི་བྱ་བ་ཀུན། །གཉིས་ཀ་མ་འཁྲུལ་དོན་ལ་རྟོགས། །གང་བྱེད་ལྟ་བས་མ་ཟིན་ ― DNG001_Page_0569 ―
[མ་དཔེ་གཟིགས་ན་འདིར་གནོན།]
ཕྱིར། །ཟླ་བ་དཀར་ཀྱང་མུན་ཡོད་འདྲ། །ཟུང་བཞི་ཞེས་ནི་དེ་ལ་བྱ། །དེ་ཡང་རྡོ་རྗེ་སེམས་དཔའ་ཉོན། །བླ་མ་ངེས་ལུང་ལྡན་པ་ལ། །དད་ལྡན་ཤེས་རབ་ཅན་ཕྲད་དུས། །དངོས་པོ་མ་འཁྲུལ་རིག་པ་ལ། །བསམ་པ་མ་འཁྲུལ་ཡེ་ཤེས་ཏེ། །གཉིས་ཀ་མ་འཁྲུལ་རང་རིག་སྐུ། །ལྟ་བ་གདེངས་ཟིན་ལྷུན་གྱིས་གྲུབ། །དེ་དོན་གཅིག་ཤེས་མངོན་སངས་རྒྱས། །ཡ་བདུན་ཞེས་ནི་དེ་ལ་བྱ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། དོན་གྱི་དབྱེ་བ་བསྟན་པའི་ལེའུ་སྟེ་སོ་ལྔ་པའོ།། །།དེ་ནས་ཀུན་རིག་སྟོན་པ་ཡིས། །རང་བྱུང་རིག་པའི་ཡེ་ཤེས་ནི། །ཆོས་སྐུ་ངོ་སྤྲོད་བཀའ་སྩལ་པ། །ཤན་དབྱེ་ངོས་བཟུང་ལ་བཟླས་ཏེ། །རྣལ་འབྱོར་པ་ཡི་ཤན་དབྱེ་བ། །སྔར་གྱི་བག་ཆགས་ཞེས་བྱ་བ། །སྔོན་བྱས་ད་ལྟ་གང་དྲན་པ། །ཡུལ་ལ་གཟུང་འཛིན་བརྟས་པ་ལ། །དམ་པར་ཞེན་ནས་ཀུན་ཏུ་བརྟགས། །དེ་ཕྱིར་འཁོར་བའི་ས་བོན་ཡིན། །ཕྱིས་ཀྱི་ཉོན་མོངས་ཞེས་བྱ་བ། །མ་རིག་རྒྱུ་ལས་རྒྱུར་བྱུང་སེམས། །དེ་ལྟས་ཀུན་གཞི་སྨིན་པ་ལས། །དེ་བསྐྱེད་ཚོགས་བརྒྱད་བདེ་སྡུག་བྱུང་། །སྔ་ཕྱི་གཉིས་འདུས་སྒོ་ལྔའི་ཡུལ། །སྣ་ཚོགས་སྤྲོས་པའི་རྟོག་པ་དེ། །དེ་ལ་ཞེན་ཕྱིར་ཆོས་བརྒྱད་འབྱུང་། །དེ་ཡི་ཉེས་པས་འཁོར་བ་སྨིན། །ལུང་ལྡན་ངེས་པའི་གདམས་ངག་གིས། །རང་རིག་ཡེ་ཤེས་ངོས་བཟུང་ནས། །ད་ལྟའི་ལུས་སེམས་འདི་ཉིད་ལ། །རྟེན་བཅས་གཞི་ལྡན་ཡོད་པའི་ཕྱིར། །འབྱུང་བ་ལྔ་ཡི་དྭངས་མ་ནི། །སྙིང་ནི་ཆོས་ཀྱི་འཁོར་ལོ་ལ། །རྟེན་བཅས་གཟུགས་ཀྱི་ནང་ནས་ནི། །ཙིཏྟ་རིན་ཆེན་གཞལ་ཡས་ཁང་། །གུར་ཕུབ་འདྲ་བའི་ནང་ཤེད་ན། །ཆོས་སྐུ་བཞི་ལྡན་ཡོད་པ་དེ། །ཡིད་ཀྱི་ཁྲི་དང་དུད་ཀ་ཡིས། །མ་རིག་སྔ་ཕྱིའི་བ་རྒྱས་བསྒྲིབས། །དེ་ཉིད་མཐོང་བར་བྱ་བའི་ཕྱིར། །བླ་མ་ངེས་པའི་གདམས་ངག་གིས། །ཀུན་བཟང་རིག་པའི་མཚོན་རྣོན་དེས། །མ་རིག་བ་རྒྱ་རྩད་ནས་གཅོད། །སྔ་ཕྱིར་ངན་རྟོག་མེད་པར་ནི། །ཧྲིག་གེ་ས་ལེ་སིང་ངེ་ཝལ། ། ― DNG001_Page_0570 ―
[མ་དཔེ་གཟིགས་ན་འདིར་གནོན།]
ད་ལྟའི་ཤེས་པ་འདི་ཉིད་ལ། །ཆོས་སྐུ་བཞི་ལྡན་ངོས་བཟུང་ངོ་། །དེ་ཡང་འདུས་པའི་སྙིང་པོ་ཉོན། །དཔེར་ན་མིག་གི་འབྲས་བུ་བཞིན། །ཧྲིག་གེ་བ་ལ་དྲན་པས་ཟིན། །ཡེ་རེ་བ་ལ་ཤེས་པ་དལ། །རང་རིག་ཞེན་མེད་གདེང་གིས་གསལ། །སྤྲིན་མེད་སྟོན་ཀའི་ནམ་མཁའ་བཞིན། །སིང་ངེ་བ་ལ་མཐའ་དབུས་མེད། །གང་གི་མནོ་བསམ་མ་བཏང་ཕྱིར། །བྱིང་རྨུགས་སྤྲོས་པ་གང་ཡང་མེད། །ཉི་མ་གཟའ་བྲལ་ལྷང་ངེ་བཞིན། །ས་ལེ་བ་ལ་འགྱུར་བ་མེད། །བདེ་ལ་མི་རྟོག་རྒྱུན་དུ་གནས། །དེ་ཕྱིར་རང་བྱུང་འགྱུར་བ་མེད། །གཡའ་མེད་མེ་ལོང་བྱད་བལྟ་བཞིན། །ཝ་ལེ་བ་ལ་དངོས་པོ་མེད། །དེ་ཙམ་ཉིད་ན་ཆོས་ཀྱི་དབྱིངས། །གཞི་ལ་ཡུལ་མེད་རྟོགས་པས་ཆོག །དེ་དག་དབྱེ་བ་རྣམ་བཞི་ཡང་། །རང་རིག་ཡེ་ཤེས་ཆོས་སྐུ་གཅིག །རང་རིག་རྙོག་མ་མེད་པའི་ཕྱིར། །ནོར་བུ་ཆུ་དྭངས་དཔེ་བཞིན་ནོ། །རང་བྱུང་ཆོས་སྐུ་གསལ་བ་ཡིས། །རང་རིག་ཡེ་ཤེས་སྒོ་ལྔ་གསལ། །དཔེ་ནི་ཏིལ་གྱི་མར་མེ་འདྲ། །ཤེས་པས་མ་བསྒྲིབས་དོན་ལ་བརྗོད། །སྣང་བ་མ་བཅོས་ཆོས་དབྱིངས་ངང་། །འབྲས་བུ་ལོངས་སྤྱོད་རྫོགས་པའི་སྐུ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཤེས་པ་སྔ་ཕྱིར་མ་སོང་བར་ཆོས་སྐུར་ངོ་སྤྲད་པའི་ལེའུ་སྟེ་སོ་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །རང་བྱུང་ཆོས་སྐུ་རྒྱུ་མེད་ཕྱིར། །ལྔ་ལྡན་གོལ་མེད་ངོ་སྤྲད་དེ། །ཟབ་ལ་རྒྱ་ཆེའི་ཡོན་ཏན་ལ། །གོལ་མེད་ཡེ་ཤེས་ཆེན་པོར་གསལ། །དེ་ཡང་འདུས་པའི་སྙིང་པོ་ཉོན། །ངེས་དོན་གཏིང་ཟབ་བརྟག་དཀའ་བ། །བསྒོམ་པའི་དུས་ན་ཆོས་སྐུར་གསལ། །ཕྱོགས་རེའི་བློ་ཡི་སྤྱོད་ཡུལ་མིན། །དེ་ཕྱིར་རྒྱ་མཚོའི་གཏིང་དང་འདྲ། །འདུས་མ་བྱས་ཀྱི་ཀློང་དཀྱིལ་ན། །མཐའ་དབུས་མེད་པའི་རིག་པ་དེ། །ཆོས་སྐུ་རྒྱ་ཆེན་ཀུན་ལ་ཁྱབ། །འདུས་མ་བྱས་ཀྱི་ནམ་མཁའ་འདྲ། །ཡོད་མེད་ལ་སོགས་ཆོས་སྐུར་ནི། །གང་ཡང་ཡིན་པར་རྟོགས་པའི་ཕྱིར། །གང་ ― DNG001_Page_0571 ―
[མ་དཔེ་གཟིགས་ན་འདིར་གནོན།]
དྲན་དོན་ཟིན་བྱེད་མི་དགོས། །ཀུན་ལྡན་རིན་ཆེན་ཡོན་ཏན་འདྲ། །གོལ་མེད་རང་བྱུང་ཆོས་སྐུ་ལ། །དུག་ལྔའི་སྐྱོན་གྱིས་མ་གོས་ཏེ། །ཡེ་ཤེས་ཀློང་ན་ཆོས་སྐུ་འཕྱོ། །པདྨ་དང་ནི་འདམ་བཞིན་ནོ། །སེམས་རྟོགས་པ་ཡི་རྣལ་འབྱོར་དེ། །ཤེས་པ་རང་ཡན་བཞག་གྱུར་ཀྱང་། །གོལ་མེད་ཡེ་ཤེས་ཆོས་སྐུར་གནས། །ཨུཏྤལ་རྙེད་པའི་ལྷ་མིག་འདྲ། །དེ་ཡང་རྡོ་རྗེ་སེམས་དཔའ་ཉོན། །སངས་རྒྱས་དགོངས་པ་མི་གཡོ་བ། །དུས་གསུམ་མི་གཡོ་འཕེལ་འགྲིབ་མེད། །ཤེས་པ་མི་གཡོ་རྒྱ་མཚོ་འདྲ། །མཉམ་ཉིད་དོན་ལ་རྐྱེན་མི་ཚུགས། །གསལ་དང་མི་རྟོག་དུས་མཉམ་པ། །འབྲས་བུ་རང་བྱུང་ཆོས་སྐུ་ཡིན། །དེ་ཡང་འདུས་པའི་སྙིང་པོ་ཉོན། །དེ་དག་རྩ་བ་མདོར་བསྡུ་བ། །ཡིད་ལ་ཆོས་སྐུ་ཝལ་གྱིས་དྲན། །དེ་ཡི་ངང་ལ་ཅོག་གིས་ཞོག །ཡུལ་ལ་འཛིན་མེད་རྟོག་པ་སྤངས། །རང་རིག་ཡིད་ཆེས་གདེང་དང་ལྡན། །འབྲས་བུ་མངོན་འགྱུར་བུཌྜྷ་ཡིན། །དེ་ཡང་འདུས་པའི་སྙིང་པོ་ཉོན། །དེ་དག་རིག་པ་བཞི་ལྡན་དེ། །གཅིག་ལ་ལྔར་སྣང་ངོ་བོ་གཅིག །ཡོན་ཏན་སྒོ་ནས་དབྱེ་བ་ལ། །གསེར་སྦྲུལ་མིག་བཞིན་གཅིག་ལས་མེད། སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། རིག་པ་རྒྱ་བསྐྱེད་དེ་ཆོས་སྐུར་ངོ་སྤྲད་པའི་ལེའུ་སྟེ་སོ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །སྐྱོན་ཉིད་ཡོན་ཏན་བཀའ་སྩལ་པ། །བག་ཆགས་ཉོན་མོངས་སེལ་བ་ཡང་། །མ་རིག་པ་ནི་ཟློག་ཕྱིར་ལས། །གཞི་ལ་སྔ་ཕྱི་གྲུབ་པ་མེད། །ཐག་པར་ཤེས་ནས་སྦྲུལ་མེད་འདྲ། །དེ་ཡང་འདུས་པའི་སྙིང་པོ་ཉོན། །རིག་གེ་ཡོད་པས་མ་རིག་སངས། །སང་ངེ་ཡོད་པས་བྱིང་རྨུགས་བྲལ། །སལ་ལེ་ཡོད་པས་རང་ཡིད་ཆེས། །ཝ་ལེ་ཡོད་པས་ཆོས་ཀྱི་དབྱིངས། །དེ་བཞིན་གཅིག་ཏུ་ཤེས་པ་ཡིས། །ཤིན་ཏུ་ཟབ་པས་སྒྲོ་སྐུར་བྲལ། །རྒྱ་ཆེ་བས་ནི་མཐའ་དབུས་མེད། །ཡོན་ཏན་ཆེ་བས་གཟུགས་སྐུ་བྱུང་། །གོལ་ས་མེད་པས་ཀུན་གྱི་རྩེ། ། ― DNG001_Page_0572 ―
[མ་དཔེ་གཟིགས་ན་འདིར་གནོན།]
ཡེ་ནས་ཆོས་སྐུ་ངོ་ཤེས་པས། །དེ་ལས་སངས་རྒྱས་ཆོས་ཀུན་རྫོགས། །གཞི་ཉིད་ཆོས་སྐུར་ངོ་ཤེས་ན། །སྐྱོན་དང་ཡོན་ཏན་གདག་པ་ཙམ། །ཉི་ཟེར་གཅེར་བུ་ཀུན་བསྲེགས་ཀྱང་། །དེ་ལ་སྡིག་པས་གོས་པ་མེད། །དེ་བཞིན་གདེངས་ཟིན་རྣལ་འབྱོར་པས། །སྣང་བ་ཞེས་པ་ཐམས་ཅད་ནི། །གོལ་སར་ཤེས་ན་གཞི་དང་ཕྲད། །དེ་ཕྱིར་འཁོར་བ་ཀ་དག་ནས། །དུག་ཉིད་སྨན་དུ་སྦྱོར་ཤེས་བཞིན། །སྐྱོན་ཉིད་རྟོགས་པས་ཡེ་ཤེས་སྐུ། །དེ་ལས་གོལ་ས་རྡུལ་ཙམ་མེད། །དེ་ཕྱིར་རང་སེམས་རྟོགས་པས་ཆོག །དེ་ཡང་འདུས་པའི་སྙིང་པོ་ཉོན། །སྔ་ཕྱི་གློ་བུར་བྱུང་བ་ན། །གཞི་ཤེས་སྤང་དུ་མེད་པའི་ཕྱིར། །ངེས་དོན་རང་སེམས་རྟོགས་པས་ཆོག །ཉི་ཤར་མུན་གྲིབ་མེད་པ་འདྲ། །ཡེ་ཤེས་བརྡལ་ཁྱབ་འགྱུར་བ་མེད། །དེ་ལྟར་རྟོགས་པའི་རྣལ་འབྱོར་པ། །དབང་པོ་རང་ཡན་སྐྱོན་སངས་པས། །རང་སེམས་དབྱིངས་ལ་ཡེ་ཤེས་ཀློང་། །གང་ན་འདུག་པ་ཆོས་ཀྱི་དབྱིངས། །ད་ཡང་འདུས་པའི་སྙིང་པོ་ཉོན། །བཏད་བཞག་མེད་པའི་ཏིང་འཛིན་ལས། །འཁོར་འདས་གཉིས་མེད་དུ་བསམ་ན། །བྱ་བ་བཏང་བའི་སྐྱེས་བུ་བཞིན། །དགེ་སྡིག་གཉིས་ཀྱི་འཛིན་པ་བྲལ། །དུས་གསུམ་ཡེངས་མེད་སྲོག་ཏུ་བལྟ། །སྔ་ཕྱིའི་ཉོན་མོངས་གང་སྐྱེས་ཀྱང་། །དེ་ཡི་དུས་ནས་ཡུལ་མི་དཔྱད། །སྣང་མེད་ངོ་བོ་ཉིད་ན་བཞག །ཤེས་པ་མ་བཅོས་གཟུང་འཛིན་བྲལ། །དབྱེར་མེད་རིག་པ་གཅིག་ལས་མེད། །ཐ་སྙད་བྲལ་བའི་དོན་གྱིས་མཚོན། །དུས་གསུམ་མི་འགྱུར་ཀུན་ཏུ་བཟང་། །ཡོན་ཏན་ཀུན་ལྡན་ཆོས་སྐུ་ལ། །འབྲས་བུ་སྤྲུལ་སྐུ་ཐུབ་དྲུག་བྱུང་། །དེ་ཡང་འདུས་པའི་སྙིང་པོ་ཉོན། །ཉི་མའི་སྙིང་པོ་གཅིག་གཅིག་གིས། །གླིང་བཞི་ཐམས་ཅད་འོད་ཀྱིས་ཁྱབ། །དེ་བཞིན་རང་རིག་ཆོས་སྐུ་ལ། །རིག་པའི་བློ་ཡིས་དཔྱད་དུ་མེད། །ཡིན་དང་མིན་གྱི་ཐ་སྙད་བྲལ། །ཡ་ང་འཇིགས་པའི་རྟོག་པ་མེད། །སྒྲོ་སྐུར་བྲལ་བའི་ཆོས་ཉིད་ལ། །རང་བྱུང་ཀུན་མཁྱེན་རིག་པའི་ཐུགས། །མཁའ་འདྲ་ཡེ་ཤེས་ལྷུན་གྲུབ་ ― DNG001_Page_0573 ―
[མ་དཔེ་གཟིགས་ན་འདིར་གནོན།]
བྱིན་གྱིས་བརླབས། །དེ་ཡང་འདུས་པའི་སྙིང་པོ་ཉོན། །དེ་དག་རྩ་བ་མདོར་བསྡུ་ན། །སྐྱོན་ཉིད་གཞི་ལ་མེད་ཤེས་པས། །རང་བྱུང་རིག་པ་ཆོས་སྐུར་གསལ། །དེ་ཙམ་ཉིད་ན་གོལ་བ་མེད། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སྐྱོན་ཡོན་ཏན་དུ་མེད་པ་ཆོས་སྐུར་ངོ་སྤྲོད་པའི་ལེའུ་སྟེ་སོ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །དེ་ཉིད་བསྟན་པའི་ཡོན་ཏན་ནི། །ཆོས་སྐུ་ངོ་སྤྲོད་རྣམ་གསུམ་གྱིས། །ལྷན་ཅིག་མ་རིག་རྣམ་པར་དག །དེ་ཕྱིར་རྐྱེན་བཞིས་བསྐྱེད་དུ་མེད། །དེ་ཡང་འདུས་པའི་སྙིང་པོ་ཉོན། །སྔ་ཕྱི་མེད་པར་ངོ་སྤྲོད་པས། །གཞི་གནས་མ་རིག་རྩད་ནས་ཆོམས། །རིག་པ་རྒྱ་བསྐྱེད་ངོ་སྤྲད་པས། །བག་ལ་ཉལ་ཕྲ་རང་བརླག་སྟོངས། །སྐྱོན་ཉིད་ཡོན་ཏན་ངོ་སྤྲོད་པས། །དེ་མ་ཐག་འཛིན་མ་རིག་སངས། །དེ་ཡང་འདུས་པའི་སྙིང་པོ་ཉོན། །དེ་དག་བསྟན་པའི་དོན་ཤེས་ནས། །ལྷན་ཅིག་མ་རིག་གཏན་སྟོངས་ཏེ། །འཁོར་བའི་ས་བོན་གཞི་ནས་བརླག །མ་རིག་སངས་ལ་རིག་པ་རྒྱས། །དེ་ཡང་འདུས་པའི་སྙིང་པོ་ཉོན། །ཆོས་སྐུ་ཉམས་མྱོང་ཡིད་ཆེས་པས། །འཁོར་བའི་རྣམ་རྟོག་མིང་ཡང་མེད། །གཞི་དང་གཅིག་ཕྱིར་ཆོས་སྐུ་ཡིན། །མ་རིག་མུན་པ་མེད་པའི་ཕྱིར། །ཆོས་ཀྱི་སྐུ་ཞེས་དེ་ལ་བྱ། །དེ་ཡང་རྡོ་རྗེ་སེམས་དཔའ་ཉོན། །དཔེར་ན་ཉི་མའི་སྙིང་པོ་ལ། །མུན་མེད་འོད་ཀྱི་རང་བཞིན་ལྟར། །ཆོས་སྐུ་སངས་རྒྱས་རང་བཞིན་ལ། །རྩོལ་བའི་འཁྲུལ་པ་གཞི་ནས་དག །ཆོས་སྐུ་དོན་དམ་ལྡན་པ་ལ། །རིགས་ལྔའི་སངས་རྒྱས་དགོངས་པ་སྟེ། །མཉམ་བཞག་རྗེས་ཐོབ་མིང་ཡང་མེད། །མ་བཅོས་རང་སར་བཞག་པས་ཆོག །དེ་ཡང་འདུས་པའི་སྙིང་པོ་ཉོན། །ཆོས་ཉིད་ཐིག་ལེ་ཉག་གཅིག་ལ། །བརྒྱད་ཁྲི་བཞི་སྟོང་བྱུང་བ་ཡང་། །ཐ་སྙད་ཙམ་དུ་ཕྱེ་བ་ལས། །དོན་ལ་དབྱེར་མེད་གཅིག་ཏུ་འདུས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། ― DNG001_Page_0574 ―
[མ་དཔེ་གཟིགས་ན་འདིར་གནོན།]
རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཆོས་སྐུ་ངོ་སྤྲད་པའི་ཡོན་ཏན་བསྟན་པའི་ལེའུ་སྟེ་སོ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཉམས་ཀྱི་རིམ་པ་བཀའ་སྩལ་པ། །ཆོས་སྐུ་རྟོགས་པའི་རྣལ་འབྱོར་པས། །དད་ལྡན་ཤེས་རབ་སྣོད་ལྡན་ལ། །དཔེ་བརྒྱད་བཞིས་མཚོན་དོན་རྣམས་བཤད། །དེ་ཡང་འདུས་པའི་སྙིང་པོ་ཉོན། །ནམ་མཁའ་ཉི་མ་རི་རབ་བཞིན། །དངོས་མེད་མཐའ་དབུས་མེད་ལ་ཁྱབ། །མ་བསྒྲིབས་མཐའ་དབུས་མེད་ལ་གསལ། །ཆོས་སྐུ་རྟོགས་པས་འགྱུར་བ་མེད། །དེ་ཡང་རྡོ་རྗེ་སེམས་དཔའ་ཉོན། །རྒྱ་མཚོ་ཆུ་བོ་བསེར་བུ་བཞིན། །ཟབ་ལ་གཡོ་མེད་ཉམས་དང་ལྡན། །འཕེལ་འགྲིབ་མེད་པས་རྒྱུན་མི་ཆད། །ཁ་དོག་མེད་པའི་རིག་པ་འཕྱོ། །དེ་ཡང་འདུས་པའི་སྙིང་པོ་ཉོན། །ཁྱུང་དང་ཨུ པྩུ ར་སྦྲུལ་མདུད་བཞིན། །ཉམ་ང་མེད་པའི་ལྟ་བ་ཡིས། །ཤིན་ཏུ་དཀོན་པའི་ཆོས་སྐུ་རྙེད། །དུག་ལྔ་སྐྱེས་ཙམ་རང་གྲོལ་ཐུགས། །རིན་ཆེན་ཅང་ཤེས་མ་གི་བཞིན། །ཆོས་ཉིད་རྟོགས་པས་ཐམས་ཅད་འགྲུབ། །གང་ཕྱིར་ཆོས་ཉིད་འདྲེལ་མེད་ཤེས། །ཉོན་མོངས་ནད་སེལ་དྲན་པའི་མཆོག །དེ་ཡང་འདུས་པའི་སྙིང་པོ་ཉོན། །དེ་དག་དཔེ་དོན་མཚོན་པའི་ཉམས། །བལྟ་བསྒོམ་སྤྱོད་པ་འབྲས་བུ་ཡིས། །རྣམ་པ་བཞིར་ནི་ཕྱེ་བ་ཡང་། །ཤེས་རབ་དམན་ལ་བསྟན་པ་ལས། །དོན་ལ་རང་རིག་ཆོས་སྐུར་འདུས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཉམས་ཀྱི་རིམ་པ་གཅིག་ཏུ་བསྟན་པའི་ལེའུ་སྟེ་བཞི་བཅུ་པའོ།། །།དེ་ནས་འདུས་པའི་ཚོགས་རྣམས་ལ། །མན་ངག་གོལ་མེད་བཀའ་སྩལ་པ། །གསལ་ལ་མི་རྟོག་མི་གཡོ་བ། །འཕེལ་འགྲིབ་མེད་པར་རྒྱུན་དུ་གནས། །གོལ་མེད་ཀུན་གཞིར་ལ་བཟླའོ། །དེ་ཡང་འདུས་པའི་སྙིང་པོ་ཉོན། །གསལ་ལ་གོལ་མེད་ཡེ་ཤེས་ནི། །སྤྲིན་མེད་ཉི་མའི་ ― DNG001_Page_0575 ―
[མ་དཔེ་གཟིགས་ན་འདིར་གནོན།]
འོད་བརྡལ་བཞིན། །མཐའ་དབུས་མེད་པའི་ཆོས་སྐུར་གསལ། །འདུ་ཤེས་མེད་འགོག་གོལ་བ་མེད། །མི་རྟོག་དམིགས་འཛིན་མེད་པ་ཡིས། །རིག་པ་རྒྱ་ཡན་ཆོས་ཀྱི་སྐུ། །ཕྱོད་དེ་སང་ངེ་འཛིན་རྟོག་མེད། །སྐྱེ་བོ་མ་རྟོག་གོལ་མི་སྲིད། །མི་གཡོ་ཡེ་ནས་གནས་པ་ཡིས། །ཆུ་བོའི་རྒྱུན་བཞིན་རྟག་ཏུ་ཡོད། །བཞག་དང་ལངས་པ་མེད་པའི་ཕྱིར། །དབུ་མ་སེམས་ཙམ་གོལ་བ་མེད། །རང་བྱུང་ངེས་པའི་གཞི་ཉིད་ལ། །འཕེལ་དང་འགྲིབ་པ་མེད་པའི་ཕྱིར། །དུས་གསུམ་དག་ཏུ་འགྱུར་བ་མེད། །བསྐྱེད་རིམ་ལྷ་ཡི་གོལ་ས་མེད། །དེ་ཡང་འདུས་པའི་སྙིང་པོ་ཉོན། །དེ་དག་གོལ་མེད་ལ་ཟློ་ནི། །རིག་པ་གསལ་བ་ལོངས་སྤྱོད་རྫོགས། །མི་རྟོག་འཛིན་མེད་སྤྲུལ་པའི་སྐུ། །མི་གཡོ་འགྱུར་མེད་ཆོས་ཀྱི་སྐུ། །ངོ་བོ་ཉིད་སྐུ་འཕེལ་འགྲིབ་མེད། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། གོལ་མེད་ཀྱི་མན་ངག་བསྟན་པའི་ལེའུ་སྟེ་ཞེ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཉམས་ཀྱི་རིམ་པ་འདི་གསུངས་སོ། །གང་ཡང་མ་མནོས་དྲན་པ་ལ། །རང་བཞིན་མེད་པའི་ཤེས་རབ་ཀྱིས། །མི་བརྗོད་པ་ཡི་ཤེས་པས་ཟིན། །གཟའ་གཏད་མེད་པ་ལམ་གྱི་ཉམས། །ཡུལ་ནི་གང་ཡང་མ་བརྟེན་པའི། །མཐོང་ཐོས་མེད་པར་རང་ཡིད་ཆེས། །འགྱུར་བ་མེད་པའི་གདེང་དང་ལྡན། །སངས་རྒྱས་དགོངས་པ་ཐུགས་ལ་འཆར། །མ་བསམས་པ་ཡི་རིག་པ་ལས། །སྐྱེ་འགགས་མེད་པའི་ཏིང་འཛིན་གསལ། །ཉམས་མྱོང་ངེས་པར་རྒྱུན་མི་འཆད། །དེ་ཙམ་ཉིད་ནས་ད་ལྟའི་ཐུགས། །ཕྱི་ཡི་འདོད་ཡོན་ཅིར་སྣང་ཡང་། །རོ་མཆོག་མེད་པར་ཉམས་སུ་མྱོང་། །འདུས་བྱས་མེད་པར་རྟག་ཏུ་གནས། །དེ་ལ་ཞེན་པའི་བློ་མི་འཇུག །ལུས་ལ་མ་བརྟེན་དགའ་བ་ལས། །ཆགས་པ་མེད་པའི་བདེ་བ་ཤར། །དེ་ཉིད་དུས་ན་འཕོ་འགྱུར་མེད། །ཉམས་ཀྱི་ནང་ནས་དམ་པའི་མཆོག །ད་ཡང་འདུས་པའི་སྙིང་པོ་ཉོན། །དེ་དག་རྩ་བ་མདོར་བསྡུ་ན། ། ― DNG001_Page_0576 ―
[མ་དཔེ་གཟིགས་ན་འདིར་གནོན།]
རྟེན་བཅས་ཤེས་པ་འདི་ཉིད་ལ། །ལུང་ལྡན་བསྟན་པས་རང་རིག་གོ། །དེ་ཉིད་འབྲལ་མེད་རྒྱུན་དུ་གནས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཉམས་སུ་མྱོང་བའི་བཀའ་བསྟན་པའི་ལེའུ་སྟེ་ཞེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་དགོངས་དོན་འདི་སྐད་གསོལ། །ཕྱི་ནང་སྤྱོད་པ་ལ་ཟློས་པ། །དེ་ཡི་ཡོན་ཏན་ཇི་ལྟར་ལགས། །མཐར་ཕྱིན་ཉམས་རིམ་ཇི་ལྟར་འབྱུང་། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལ་ཟློས་སྤྱོད་པའི་བཀའ་རྟགས་ནི། །བཀའ་དང་མི་འགལ་མཐུན་པར་ནི། །སྣོད་ལྡན་བློ་ལ་འཆར་བའི་ཕྱིར། །ངེས་པར་གཏན་ལ་དབབ་པར་བྱ། །དེ་ཡང་འདུས་པའི་སྙིང་པོ་ཉོན། །ཕྱི་རྐྱེན་ཡེ་ཤེས་རང་ཤར་བས། །དངོས་པོ་མ་འཁྲུལ་ཤེས་པ་ལ། །ཚོར་བ་བདེ་སྡུག་གང་ཡང་རུང་། །ཉམས་སུ་མྱོང་ཙམ་ཉིད་ནས་ནི། །ལུས་དང་འདྲེལ་མེད་ཤེས་པའི་ཕྱིར། །ཅི་སྤྱོད་ཡེ་ཤེས་ཆེན་པོར་ཤར། །དེ་ཡང་འདུས་པའི་སྙིང་པོ་ཉོན། །ཁ་དོག་དབྱིབས་སུ་མ་བསམ་པའི། །དངོས་པོ་མ་འཁྲུལ་འཇམ་དང་ཞིམ། །དགའ་བདེ་ཉམས་སུ་མྱོང་བ་ནི། །ད་ཙམ་ཉིད་ནས་འདྲེལ་མེད་ཤེས། །དེ་ཕྱིར་རང་རིག་ཡེ་ཤེས་ཤར། །དེ་ཡང་འདུས་པའི་སྙིང་པོ་ཉོན། །ཡུལ་མེད་ཤེས་པ་མ་འཁྲུལ་པས། །ན་ཚ་མི་ཞིམ་མི་དགའ་སོགས། །ཡུལ་དང་མི་འབྲལ་ཉམས་མྱོང་བ། །ཡེ་ཤེས་རང་ཤར་དགོངས་པ་ཡིན། །དེ་དག་སྡུག་བསྔལ་རྣམ་དྲུག་གིས། །དོན་གྱི་དབྱེ་བའི་དོན་ཤེས་ན། །གང་གིས་རྐྱེན་དང་ཕྲད་པའི་ཚེ། །ཡུལ་དང་འབྲལ་མེད་ཉམས་སུ་མྱོང་། །དེ་ཙམ་ཉིད་ན་ཆོས་སྐུར་ཤར། །དེ་ཡང་རྡོ་རྗེ་སེམས་དཔའ་ཉོན། །དུག་ནི་ཧ་ལ་ནག་པོ་ལ། །མ་གི་རྩི་ཡིས་ཐེབ་ ― DNG001_Page_0577 ―
[མ་དཔེ་གཟིགས་ན་འདིར་གནོན།]
གྱུར་ན། །དུག་དེ་སྨན་དུ་འགྱུར་བ་བཞིན། །དེ་བཞིན་ཚོར་བ་བདེ་སྡུག་ནི། །གང་གིས་རྐྱེན་དང་ཕྲད་པའི་དུས། །ལུང་བསྟན་གདམས་ངག་དོན་ཤེས་ཕྱིར། །བདེ་སྡུག་ཆོས་སྐུར་ཉམས་སུ་མྱོང་། །ཅི་དྲན་གང་ཕྲད་ཡེ་ཤེས་ཤར། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཕྱི་རྐྱེན་ཡེ་ཤེས་རང་ཤར་བསྟན་པའི་ལེའུ་སྟེ་ཞེ་གསུམ་པའོ།། །།དེ་ནས་འདུས་པའི་སྙིང་པོ་ཉོན། །ནང་གི་ཡེ་ཤེས་རང་ཤར་དོན། །གཞན་དུ་གོལ་མེད་ཆོས་སྐུ་ནི། །ལྟ་སྒོམ་སྤྱོད་པའི་འབྲས་བུ་ཡིས། །གོལ་ས་མེད་པར་དོན་བརྒྱད་ལྡན། །འབྲལ་མེད་ཆོས་སྐུ་ཉམས་སུ་མྱོང་། །སེང་གེའི་འོ་མ་འཐུང་བ་བཞིན། །དེ་ཡང་འདུས་པའི་སྙིང་པོ་ཉོན། །རྟག་པར་མ་སོང་དངོས་པོ་མེད། །ཆད་པར་མ་སོང་རྒྱུན་མི་ཆད། །བྱིང་བར་མ་བསྒྲིབས་ཤེས་པ་གསལ། །རྒོད་པར་མི་འཕྲོ་དྲན་མི་རྒྱུ། །བླང་དུ་མེད་པས་འདོད་པ་སྟོར། །དོར་དུ་མེད་པས་རྩོལ་བ་བྲལ། །སྤང་དུ་མེད་པས་གང་ཡང་ཡིན། །ཐོབ་ཏུ་མེད་པས་རེ་བ་མེད། །དེ་ཡང་འདུས་པའི་སྙིང་པོ་ཉོན། །ཆོས་སྐུ་རྟག་པས་གཞི་དང་མཐུན། །མ་རིག་ཆད་པས་འཁོར་བ་སྟོངས། །རྣམ་རྟོག་བྱིང་བས་བག་ཆགས་བརླག །ཆོས་ཉིད་འཕྲོ་བས་ཐམས་ཅད་མཁྱེན། །དེ་ཡང་འདུས་པའི་སྙིང་པོ་ཉོན། །གདམས་ངག་བླང་བས་རང་སེམས་རྟོགས། །ཉོན་མོངས་དོར་བས་སྒྲིབ་པ་དག །ཉམས་སུ་བླངས་པས་བདེན་པ་མཐོང་། །གོལ་ས་བཅད་པས་ཆོས་སྐུ་རྙེད། །མན་ངག་ཐོབ་པས་སངས་རྒྱས་འབྱུང་། །དེ་ཡང་འདུས་པའི་སྙིང་པོ་ཉོན། །སེང་གེའི་འོ་མ་གང་འཐུང་བ། །མེ་ཆུ་དུག་མཚོན་ལ་སོགས་པའི། །གནོད་པ་གང་གིས་མི་ཚུགས་ལྟར། །དེ་ཡི་ཡོན་ཏན་བརྒྱད་ལྡན་ལ། །གོལ་སྒྲིབ་སྐྱོན་གྱིས་མི་གོས་ཏེ། །མི་ཡི་ལུས་ལ་བུཌྜྷའི་ཐུགས། །ཕྱི་མ་མ་ཡིན་ད་ལྟ་ཉིད། །ངེས་དོན་བཀའ་ལས་དེ་སྐད་གསུངས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་ ― DNG001_Page_0578 ―
[མ་དཔེ་གཟིགས་ན་འདིར་གནོན།]
འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ནང་གོལ་མེད་ཡེ་ཤེས་རང་ཤར་བསྟན་པའི་ལེའུ་སྟེ་ཞེ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །གཞི་ཤེས་གཞི་མཐུན་བརྟུལ་ཤུགས་ཅན། །བགེགས་མེད་སྤྱོད་པ་བཤད་ཀྱིས་ཉོན། །གདམས་ངག་མ་ནོར་གཞི་ཤེས་པས། །ལྟ་བ་ངེས་པའི་གདེང་ལྡན་ཕྱིར། །གང་ཡང་ཆོས་སྐུ་རང་གསལ་བས། །འདུས་མ་བྱས་ཀྱི་ནམ་མཁའ་འདྲ། །དུས་དང་རྣམ་པ་ཐམས་ཅད་དུ། །གོམས་པ་གདེང་དུ་མ་གྱུར་པར། །གདམས་ངག་རྒྱུན་དུ་དྲན་པར་བྱ། །དྲན་པ་མི་དགོས་རྟག་ཏུ་ནི། །གཞི་དང་མཐུན་པར་བསྟན་ཡོད་ན། །ལྟ་བ་གདེང་གིས་ཟིན་པ་ཡིན། །དེ་ལ་སྒོ་གསུམ་བཅོས་མི་དགོས། །མ་བཅོས་པ་ཡི་ཆོས་ཉིད་ལ། །གང་མཐོང་ཉིང་འཁྲུལ་མེད་པའི་ཕྱིར། །ཡིད་ལ་གང་དྲན་ཆོས་སྐུར་གཅིག །སྨིག་རྒྱུ་ནམ་མཁར་ཤེས་པ་འདྲ། །བརྟུལ་ཞུགས་མཆོག་གིས་ལ་ཟློས་ན། །མཚམས་མེད་ལྔ་དང་མི་དགེ་བཅུ། །ཆགས་སྡང་ལྔ་ལ་ལོངས་སྤྱོད་ཀྱང་། །བལྟ་བ་རྟོགས་པའི་གྲོགས་སུ་འགྱུར། །དེ་ཡང་འདུས་པའི་སྙིང་པོ་ཉོན། །ངེས་དོན་གདམས་ངག་ཡོད་པ་ལ། །མ་རིག་གཏི་མུག་མེད་པའི་ཕྱིར། །ཡུལ་མེད་རིག་པ་ཀུན་འཕྱོ་ཡང་། །གང་ལ་ཞེན་མེད་ནམ་མཁའ་འདྲ། །སྲུང་མ་ལྔ་ཡིས་མ་བསྲུངས་པའི། །ཕོ་མོ་ཆགས་པ་ཅི་སྤྱོད་ཀྱང་། །དོན་ཟིན་ཉེས་མེད་བདེ་བའི་ལམ། །འཁོར་བ་མི་སྨིན་གོས་པ་མེད། །པདྨ་འདམ་གྱིས་མ་གོས་འདྲ། །ཞེ་སྡང་ཅི་སྤྱོད་སྡུག་བསྔལ་ཡང་། །དགྲ་གཉེན་གཞི་ལ་མེད་པའི་ཕྱིར། །དེ་ཚེ་ཞེ་སྡང་མཐའ་གསུམ་བྲལ། །སྦྲུལ་གྱི་མདུད་པ་རང་གྲོལ་འདྲ། །དུག་གསུམ་རྩ་བ་ངེས་པའི་ཕྱིར། །དེ་བཞིན་ང་རྒྱལ་ཕྲག་དོག་ཀྱང་། །རང་བྱུང་རང་སྟོང་རང་ཞིའི་ཕྱིར། །བཙོན་ཤོར་རང་ཡུལ་སླེབས་པ་འདྲ། །དེ་ཡང་འདུས་པའི་སྙིང་པོ་ཉོན། །དེ་ལྟར་རྟོགས་པའི་རྣལ་འབྱོར་པས། །རྐྱེན་བྱས་གཞན་ ― DNG001_Page_0579 ―
[མ་དཔེ་གཟིགས་ན་འདིར་གནོན།]
གྱིས་སེམས་དཀྲུགས་ཀྱང་། །ཉེས་པའི་སྐྱོན་གྱིས་མི་གོས་ཏེ། །གཞན་གྱི་ཉོན་མོངས་ཉམས་མྱོང་ཕྱིར། །གཞན་གྱི་སྡིག་པ་བསགས་གྱུར་ཀྱང་། །རྟོགས་ལྡན་རྣམས་ལ་བསྒྲིབ་མི་ནུས། །ཤེལ་དཀར་གཡའ་ཡིས་མི་གོས་འདྲ། །དེ་ཡང་འདུས་པའི་སྙིང་པོ་ཉོན། །ལུང་རིགས་མི་འགལ་དཀའ་ལས་ནི། །འབོལ་ཞིང་ཆགས་ཆུང་ཚུལ་འཆོས་པ། །ངེས་པའི་གདམས་ངག་མ་གོ་ན། །མཁས་ཀྱང་རྨོངས་པས་ཐར་མི་ཐོབ། །དེ་ཡང་འདུས་པའི་སྙིང་པོ་ཉོན། །བགེགས་མེད་ཡེ་ཤེས་སྤྱོད་པ་ནི། །རང་གི་རྣམ་རྟོག་ཡོད་ཀྱི་བར། །བགེགས་ཀྱི་གྲངས་ལ་ཟད་པ་མེད། །དངོས་སུ་མེད་ཕྱིར་འཁྲུལ་པའི་བློ། །དེ་ཡང་འདུས་པའི་སྙིང་པོ་ཉོན། །མུ་སྟེགས་ཅན་ལ་འདྲེ་ཡོད་པས། །འདྲེ་འཛིན་སྐྱེ་བ་མ་རིག་པ། །མོ་མའི་རྫུན་ལ་རེ་བས་བསླུ། །གདེང་ལྡན་ཀུན་གྱིས་སུ་སྟོན་པ། །ཡུལ་དང་གོལ་ས་ཆོད་པ་ལ། །འདྲེ་མེད་རིག་པ་ཆོས་སྐུར་ཤེས། །གཞི་ལ་ལྷ་འདྲེ་མེད་པའི་ཕྱིར། །ཕན་གནོད་བྱ་བ་རྡུལ་ཙམ་མེད། །དེ་ཡང་འདུས་པའི་སྙིང་པོ་ཉོན། །དེ་དག་ཡེ་ཤེས་རང་ཤར་བས། །ཀུན་བརྟགས་མེད་ཕྱིར་འདྲེ་ཡང་སྟོངས། །དེ་ཕྱིར་འཁྲུལ་པའི་འདྲེ་འཛིན་ཕྱིར། །རི་བོང་རྭ་ལ་རྟོག་དཔྱོད་འདྲ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། རང་ཤར་སྤྱོད་པའི་དཔེ་བསྟན་པའི་ལེའུ་སྟེ་ཞེ་ལྔ་པའོ།། །།དེ་ནས་ཀུན་རིག་རྒྱལ་པོ་ཡིས། །ལ་བཟླ་ཡེ་ཤེས་རང་ཤར་བ། །འདུས་པའི་འཁོར་ལ་བཀའ་སྩལ་པ། །དབུལ་པོས་རིན་ཆེན་རྙེད་གྱུར་ན། །སོ་ནམ་མི་དགོས་ཅི་འདོད་འབྱུང་། །དེ་བཞིན་ཆོས་སྐུ་རང་ཤར་ན། །ཆོས་བྱ་མི་དགོས་རྟོགས་པས་ཆོག །དེ་ཡང་རྡོ་རྗེ་སེམས་དཔའ་ཉོན། །ངེས་དོན་རྟོགས་པའི་རང་བྱུང་ལ། །བསྒོམ་བསྒྲུབ་བྱ་བ་རྡུལ་ཙམ་མེད། །མ་བསྒོམས་ཐ་མལ་གོལ་ས་མེད། །རང་རིག་ཡེ་ཤེས་ཀུན་ཏུ་འཕྱོ། །དེ་ཡང་འདུས་པའི་སྙིང་པོ་ཉོན། །བདེ་སྡུག་གང་གི་རྐྱེན་ ― DNG001_Page_0580 ―
[མ་དཔེ་གཟིགས་ན་འདིར་གནོན།]
ཕྲད་ན། །དེ་དུས་ཉིད་ནས་ཆོས་སྐུར་ཤེས། །བདེ་དང་མི་བདེ་ཐམས་ཅད་ཀུན། །འཁྲུལ་པའི་བློ་ལ་ཡོད་པ་ལས། །རྟོགས་པའི་དོན་ལ་གང་ཡང་མེད། །དེ་ཡང་འདུས་པའི་སྙིང་པོ་ཉོན། །མེ་བསད་དུ་བས་མི་གནོད་ལྟར། །མ་བསྒོམས་བལྟ་བ་ཐག་ཆོད་ཕྱིར། །སྔ་ཕྱི་དུག་ལྔ་གང་སྐྱེས་ཀྱང་། །གཞི་ལ་མེད་ཤེས་ཆོས་སྐུ་ཉིད། །དེ་ཡང་འདུས་པའི་སྙིང་པོ་ཉོན། །གོལ་ས་ཆོས་ཉིད་ལ་བཟླ་བ། །ཡེངས་པ་བསྒོམ་པ་ཡིན་ཤེས་ན། །མ་ཡེངས་མཚམས་བཅད་བསྒོམ་མི་དགོས། །ཡེངས་དང་མ་ཡེངས་དོན་ལ་མེད། །རང་ཡུལ་སླེབས་ན་འཇིགས་མེད་འདྲ། །རྟོག་པ་ཆོས་ཉིད་ཡིན་ཤེས་ན། །མི་རྟོག་རྩེ་གཅིག་བསྒོམ་མི་དགོས། །རྟོག་པ་རང་སྟོང་ཡེ་ཤེས་ཤར། །གསེར་འགྱུར་རྩི་ཡིས་ཐེབས་པ་འདྲ། །དུག་ལྔ་ཡེ་ཤེས་ཡིན་ཤེས་ན། །འགྱོད་ཚངས་བཤགས་པ་བྱ་མི་དགོས། །ཉོན་མོངས་ཡེ་ཤེས་རང་སར་དག །དུག་ཉིད་སྨན་དུ་སྦྱོར་ཤེས་འདྲ། །ཞེན་པ་ཆོས་སྐུ་ཡིན་ཤེས་ན། །འཇིག་རྟེན་ཆོས་བརྒྱད་བྲལ་མི་དགོས། །མ་ཞེན་བློ་ལ་བརྟེན་མི་དགོས། །ནམ་ལངས་ཉི་མ་ཤར་བ་འདྲ། །འཁོར་བ་ཆོས་ཉིད་ཡིན་ཤེས་ན། །མྱ་ངན་འདས་པ་བསྒྲུབ་མི་དགོས། །རེ་དོགས་མེད་པའི་གདེང་ལྡན་ན། །ཤི་བ་མི་ལྡོག་ཡིད་ཆེས་འདྲ། །སེམས་ཅན་སངས་རྒྱས་ཡིན་ཤེས་ན། །ཚོགས་བསགས་བསྙེན་བསྒྲུབ་བྱ་མི་དགོས། །གཏེར་ཆེན་རྙེད་པས་སོ་ནམ་མི་དགོས་འདྲ། །མ་བསྒོམས་ཆོས་ཉིད་ཡིན་ཤེས་ན། །རྩེ་གཅིག་བསྒོམ་ན་དོན་དང་བྲལ། །མ་བསྒོམས་ཆོས་སྐུ་གཞི་དང་མཐུན། །དོན་མི་གཉེར་ལ་དགྲ་མེད་འདྲ། །གཉེན་པོ་མི་མཐུན་གྲངས་མང་ཡང་། །རྩ་བ་རང་རིག་ཆོས་སྐུར་གཅིག །དེ་ལས་གཞན་པའི་གདམས་ངག་མེད། །ངེས་དོན་རྒྱུད་ནས་དེ་སྐད་གསུངས། །དེ་ཡང་འདུས་པའི་སྙིང་པོ་ཉོན། །དེ་ཕྱིར་ལ་ཟློས་འདི་ཤེས་པས། །གང་ཡང་མ་ཡིན་ཆོས་སྐུར་གསལ། །དེ་ཙམ་ཉིད་ན་དམིགས་འཛིན་མེད། །རང་ཡིན་གང་དགར་ཡེ་ཤེས་ཤར། །ཉི་ཤར་མུན་གྲིབ་བརླག་པ་འདྲ། ། ― DNG001_Page_0581 ―
[མ་དཔེ་གཟིགས་ན་འདིར་གནོན།]
དེ་ཡང་འདུས་པའི་སྙིང་པོ་ཉོན། །གཉེན་པོ་དང་ནི་མི་མཐུན་པ། །སྙིང་རྗེ་ཞེ་སྡང་གཉིས་ཀ་ལ། །ཆོས་ཉིད་ཁྱབ་པར་གཅིག་པའི་ཕྱིར། །བླང་དོར་མེད་པའི་དོན་ཤེས་ན། །དུག་སྤངས་པ་དང་སྤྱོད་པ་ཀུན། །ཆོས་སྐུ་སྤྱོད་པའི་གདེང་ལྡན་པས། །གང་ལྟར་བྱས་ཀྱང་གཞི་དང་མཐུན། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ལ་ཟློའི་ཡེ་ཤེས་རང་ཤར་བསྟན་པའི་ལེའུ་སྟེ་ཞེ་དྲུག་པའོ།། །།རང་ཤར་ཡོན་ཏན་བཀའ་སྩལ་པ། །ཕྱི་རྐྱེན་ཡེ་ཤེས་རང་ཤར་བས། །འཇུག་པ་ཀུན་ཏུ་ཚོར་བ་མེད། །ནང་དུ་གོལ་མེད་རང་ཤར་བས། །མངལ་དུ་མི་འཇུག་ལུས་མི་ལེན། །རང་ཤར་སྤྱོད་པ་ཕྱེ་བ་ཡིན། །རྣམ་རྟོག་ཐམས་ཅད་དུས་གཅིག་ཆོམས། །ལ་ཟློའི་ཡེ་ཤེས་རང་ཤར་བས། །ཕྱི་ཡི་ཀུན་བརྟགས་མ་སྤངས་དག །དེ་ཡང་འདུས་པའི་སྙིང་པོ་ཉོན། །ཀུན་བརྟགས་དེ་དག་རང་སྟོང་ཕྱིར། །འཁོར་བའི་སྐྱེ་བ་ལེན་མི་སྲིད། །མ་བསླད་རིག་པ་ཆོས་ཀྱི་སྐུ། །དུས་གསུམ་འགྱུར་མེད་རང་བྱུང་ལ། །ཅི་ཡང་མཁྱེན་པ་རང་བྱུང་སྐུ། །ངོ་སྤྲོད་རང་ཤར་རྣམ་པ་གཉིས། །རྩ་བ་བཞི་ཤེས་ཆོས་སྐུར་གཅིག །དེ་དྲུག་དབྱེ་བས་གོལ་ས་ཆོད། །སངས་རྒྱས་ཐུགས་དང་རྣལ་འབྱོར་སེམས། །གཅིག་ཏུ་ཤེས་པས་གཉིས་སུ་མེད། །ཀུན་བརྟགས་མ་རིག་གཏན་སྟོང་ཕྱིར། །ཉམ་ང་མེད་པས་ལྟུང་མི་སྲིད། །ལུས་དང་མ་བྲལ་བུཌྜྷར་འགྱུར། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཡེ་ཤེས་རང་ཤར་གྱི་ཡོན་ཏན་བསྟན་པའི་ལེའུ་སྟེ་ཞེ་བདུན་པའོ།། །།དེ་ནས་ཀུན་རིག་སྟོན་པ་ཡིས། །ཡེ་ཤེས་རང་ཤར་རྟོགས་པ་ཡི། །ཉམས་ཀྱི་རིམ་པ་བཀའ་སྩལ་པ། །མཐའ་དབུས་མེད་པའི་རིག་པ་ཡིས། །བློ་ཡི་གཏིང་དུ་གདེང་རྙེད་ཕྱིར། །མཐའ་ནི་ཡོད་མེད་རྟག་ཆད་དང་། །ཡིན་དང་མིན་དང་དག་མ་དག །ཕྱི་དང་ནང་དང་ ― DNG001_Page_0582 ―
[མ་དཔེ་གཟིགས་ན་འདིར་གནོན།]
སྣོད་བཅུད་དང་། །སངས་རྒྱས་དང་ནི་སེམས་ཅན་དང་། །མཐོ་རིས་ངན་སོང་དགེ་དང་སྡིག །འཁོར་བ་མྱ་ངན་བདེ་དང་སྡུག །བཟང་ངན་ཆེ་ཆུང་མཐོ་དམན་དང་། །བསྒོམ་དང་མ་བསྒོམས་ཞེན་མ་ཞེན། །ཡོན་ཏན་སྐྱོན་དང་འགྲིབ་མི་འགྲིབ། །ཕན་དང་གནོད་པ་ལ་སོགས་པའི། །ཐ་སྙད་གཉིས་གཉིས་བསྡུས་པ་ཀུན། །མཐའ་བསལ་དབུ་མ་མི་འགྲུབ་པས། །ཕྱོགས་རེའི་ཞེན་པ་གཞི་ལ་མེད། །མ་ཞེན་བློ་ཡི་འཛིན་པ་བྲལ། །དེ་ཕྱིར་ཆོས་དབྱིངས་མཐའ་དབུས་བྲལ། །དེ་ཡང་རྡོ་རྗེ་སེམས་དཔའ་ཉོན། །ཡེ་ནས་མེད་པའི་ཆོས་ཉིད་ལ། །སྒྲོ་དང་སྐུར་པ་གང་ལ་གདབ། །གང་ཡང་ཆོས་ཉིད་ཡིན་ཤེས་ན། །ཞེན་དང་མ་ཞེན་ལ་སོགས་བྲལ། །གང་དྲན་གཞི་དང་མི་འགལ་ན། །བསྒོམ་དུ་མེད་པའི་གཞི་དང་ཕྲད། །ཞེ་འདོད་མེད་པས་སངས་རྒྱས་ས། །དེ་ཡང་འདུས་པའི་སྙིང་པོ་ཉོན། །ད་ལྟའི་ཤེས་པ་འདི་ཉིད་ལ། །དཔག་དང་གཞལ་ལས་འདས་པའི་ཕྱིར། །ཅི་ལའང་མི་གནས་ནམ་མཁའ་འདྲ། །ངེས་ལུང་ལྡན་པས་དེ་ལྟར་གོ། །མཐའ་རྣམས་གཞི་ལ་མེད་པའི་ཕྱིར། །གང་ཡང་མི་སྤང་སྒྲོ་མི་གདགས། །ཞེན་མེད་སྟོང་པར་སྐུར་མི་གདབ། །གང་ཡང་རང་རིག་ཆོས་སྐུ་ལ། །གདམས་ངག་མེད་པའི་མི་རྣམས་ཀྱིས། །མནོས་ཤིང་བྱས་པ་ཐམས་ཅད་གོལ། །མ་མནོས་དྲན་པ་གོལ་བ་མེད། །དེ་ཡང་རྡོ་རྗེ་སེམས་དཔའ་ཉོན། །མཐའ་ཡི་འཛིན་པ་སྣ་ཚོགས་ཀྱིས། །མཚན་ཉིད་ཤེས་པ་ཉམས་ཀྱི་མཆོག །ཆེད་དུ་མ་བསྒོམས་དོན་དུ་ཟབ། །བསྒོམ་པའི་ཤེས་པ་དཔག་པའི་ཕྱིར། །ཞེ་ལ་མ་མནོས་སྡུག་བསྔལ་བྲལ། །ཚིག་ཏུ་མ་སྨྲས་བརྗོད་ལས་འདས། །དེ་དོན་གོལ་བར་མིང་འདོགས་བཞིན། །རྟོགས་པ་ཤར་ནས་བསྒོམ་མི་དགོས། །ཤེས་པ་གསལ་ལ་ཁ་དོག་མེད། །རང་ཡན་བཞག་པས་མཐའ་དབུས་མེད། །གྱི་ནར་བཞག་པས་ཆོས་སྐུར་གསལ། །དེ་ཡང་འདུས་པའི་སྙིང་པོ་ཉོན། །སྡེ་སྣོད་ཆོས་ལ་མཉན་མི་ལངས། །ཐ་སྙད་ཆོས་ལ་བཤད་མཐའ་ཟད། །ཚིག་གི་ན་ཡམ་བྲིས་མི་ཟིན། །འཇིག་རྟེན་གཏམ་ལ་ཟད་པ་མེད། ། ― DNG001_Page_0583 ―
[མ་དཔེ་གཟིགས་ན་འདིར་གནོན།]
ངེས་པ་དོན་གྱི་རིག་པ་ནི། །རིགས་དང་བཤལ་དང་འོས་པ་དང་། །འཐད་དང་མ་ནོར་དོན་དང་ལྡན། །ངེས་དོན་བཀའ་ནི་ཡིད་ཆེས་ཁུངས། །རིག་པ་ཉམས་མྱོང་གདེང་གིས་ཟིན། །ལུང་རིགས་གཉིས་འཛོམ་རྟོགས་པས་ཆོག །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། མཐའ་དབུས་མེད་པའི་ཉམས་བསྟན་པའི་ལེའུ་སྟེ་ཞེ་བརྒྱད་པའོ།། །།དེ་ནས་འདུས་པའི་སྙིང་པོ་ལ། །ཀུན་རིག་སྟོན་པ་ཆོས་རྗེ་ཡིས། །མ་བསྒོམས་གོལ་མེད་བཀའ་སྩལ་པ། །ལུང་ལྡན་ངེས་པའི་གདམས་ངག་གིས། །ད་ལྟའི་ཤེས་པ་འདི་ཉིད་ལ། །གང་ཡང་མ་བསམས་མ་དཔྱད་པ། །དོན་གྱི་གནས་ལུགས་ཆོས་སྐུ་ནི། །ཡེ་ནས་གནས་པའི་གཞི་ཉིད་ལ། །འདི་ཡིན་རྩེ་གཅིག་མི་བསྒོམ་པས། །མ་བསྒོམས་རང་ཡན་བཞག་གྱུར་ཀྱང་། །ལྟ་བའི་གདེང་གིས་ཟིན་པའི་ཕྱིར། །རང་སེམས་འཁྲུལ་པར་གོལ་མི་སྲིད། །དེ་ཡང་འདུས་པའི་སྙིང་པོ་ཉོན། །ངོ་སྤྲད་རང་ཤར་རྐྱེན་ཐུབ་ཀྱང་། །ངེས་པར་གཞི་དང་གཅིག་ཤེས་ན། །རང་སེམས་སྙིང་པོ་རྟོགས་པའི་ཕྱིར། །དེ་ལ་ཆེད་དུ་བསྒོམ་མི་དགོས། །ཡོད་མེད་ལ་སོགས་གང་རུང་གི། །མཐའ་རྣམས་ཆོས་ཉིད་ཡིན་ཤེས་ན། །མ་ཞེན་བློ་ལ་བརྟེན་དུ་མེད། །ཞེན་པ་དགག་ཅིང་སྤང་མི་དགོས། །དེ་ལྟར་རྟོགས་པའི་དད་ལྡན་གྱིས། །མ་བསྒོམས་གང་དགར་བཞག་གྱུར་ཀྱང་། །ཡུལ་དང་གོལ་ས་ཆོད་པའི་ཕྱིར། །ཐ་མལ་གོལ་ས་འབྱུང་མི་སྲིད། །དེ་ཡང་འདུས་པའི་སྙིང་པོ་ཉོན། །དེ་ལས་ལྷག་པའི་བོགས་འདོན་ནི། །རེ་བ་ཡོད་ཕྱིར་གཞི་མི་ཤེས། །དེ་ཕྱིར་བོགས་འདོན་ཐམས་ཅད་ནོར། །ཡུལ་མེད་རང་གསལ་བསྒོམ་མི་དགོས། །དེ་དོན་ངེས་པར་དོན་གོ་ན། །གཞི་ལས་ལྷག་པ་རྡུལ་ཙམ་མེད། །དེ་ཕྱིར་བྱ་བཙལ་ཡེ་བྲལ་བས། །གང་ལྟར་བྱས་ཀྱང་ཆོས་སྐུར་རྟོགས། །དེ་ལས་ལྷག་པའི་ཆོས་གཞན་མེད། །དེ་ཕྱིར་ཚེགས་མེད་དོན་པོ་ཆེ། །དེ་ཡང་འདུས་པའི་སྙིང་པོ་ཉོན། །རང་བྱུང་ཡེ་ཤེས་གཞི་ཉིད་ནི། །ད་ལྟའི་རིག་པ་འདི་ཤེས་པས། ། ― DNG001_Page_0584 ―
[མ་དཔེ་གཟིགས་ན་འདིར་གནོན།]
གཞན་ནས་བཙལ་དུ་རྡུལ་ཙམ་མེད། །རེ་དོགས་མེད་ཕྱིར་གཞི་དང་བྲལ། །འགྱུར་བ་མེད་པས་ཀུན་གྱི་གཞི། །དེ་རྟོགས་སངས་རྒྱས་ཀུན་དང་ཕྲད། །དེ་ཡང་འདུས་པའི་སྙིང་པོ་ཉོན། །སངས་རྒྱས་དགོངས་པ་ཐམས་ཅད་ནི། །ད་ལྟའི་དུས་འདིར་དོན་གོ་བས། །ཕྱི་མར་དགེ་བའི་སྟེགས་མི་དགོས། །དེ་ཕྱིར་དགོངས་པའི་འདུ་ཤེས་མེད། །ཉམ་ང་ཡིད་གཉིས་རྟག་བྲལ་བས། །རུང་དང་མི་རུང་ཐ་སྙད་བྲལ། །དེ་ཕྱིར་ཀུན་བཟང་ཐུགས་དང་མཉམ། །དེ་ཡང་འདུས་པའི་སྙིང་པོ་ཉོན། །རྒྱུད་ལུང་མན་ངག་ལྟ་སྒོམ་དེ། །རིག་མེད་འབྱུང་བ་རྣམ་ལྔ་ཡང་། །སྤྲེ་འདྲའི་ལུང་གིས་ལོག་བསྟན་པས། །རང་འཁྲུལ་སེམས་ཀྱི་རྩོལ་བ་ཡིས། །སྤང་སྦྱང་བསྒྱུར་འཇིག་ལ་སོགས་པ། །ཐབས་མང་དཀའ་བ་སྣ་ཚོགས་ཀྱིས། །གཉེན་པོ་བསྐྱེད་དང་རྫོགས་པ་ཡིས། །ལྷག་པར་ཏིང་འཛིན་ཅི་བསྒོམས་ཀྱང་། །ཡུལ་དང་འདྲེལ་པ་མ་ཆོད་ཕྱིར། །རྟགས་དང་ཉམས་ནི་ཅི་བྱུང་ཡང་། །བེམ་རིག་ཤན་འདི་མ་ཕྱེད་ན། །ཉམས་མྱོང་བཟང་ཡང་འཁྲུལ་པ་ཡིན། །དེ་ཕྱིར་ཡུལ་སེམས་གཅིག་ཟེར་བ། །དེ་ལྟ་མཁས་ཀྱང་སངས་མི་རྒྱ། །དེ་ཡང་འདུས་པའི་སྙིང་པོ་ཉོན། །དེ་དག་གཞི་དེ་རྟོགས་པ་དང་། །མ་རྟོགས་རྒྱུད་པ་མ་ཆོད་ཀྱང་། །འཁྲུལ་དང་མ་འཁྲུལ་ཕྱེ་བ་ལས། །དོན་ལ་རྒྱུད་ལུང་ཆོས་མི་དགོས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། མ་བསྒོམས་གོལ་ས་མེད་པར་བསྟན་པའི་ལེའུ་སྟེ་ཞེ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །གནས་ལུགས་ཉམས་ནི་བཀའ་སྩལ་པ། །ཆོས་རྣམས་ཀུན་གྱི་རྩ་བ་ནི། །རང་བྱུང་ཡེ་ཤེས་རྟོགས་པའི་དོན། །ད་ལྟ་ཉིད་དུ་ཉམས་སུ་མྱོང་། །བདེ་ལྡན་སངས་རྒྱས་ཀུན་དང་མཉམ། །དེ་ཡང་རྡོ་རྗེ་སེམས་དཔའ་ཉོན། །ཡེ་ནས་གནས་པར་དོན་གོ་བས། །སྒྲིབ་སྦྱོང་ཚོགས་བསགས་བྱ་མི་དགོས། །རང་བཞིན་གཞི་ཡི་གནས་ལུགས་ལ། །བྱར་མེད་བསྒྲུབ་མེད་དོན་ཤེས་པས། །བསྙེན་བསྒྲུབ་ ― DNG001_Page_0585 ―
[མ་དཔེ་གཟིགས་ན་འདིར་གནོན།]
ཆོས་ལ་རྩོལ་མི་དགོས། །གཞན་ནས་མི་འབྱུང་རང་རིག་པས། །མ་རིག་མུན་པ་གདོད་ནས་དག །རང་རིག་ཤེས་པ་གཉུག་མ་འདི། །རྒྱུ་དང་རྐྱེན་ལས་མ་བསྐྱེད་ཕྱིར། །འདུས་བྱས་ཆོས་ལ་རག་མ་ལུས། །ངེས་ལུང་བཀའ་ཡི་དགོངས་པ་འདིས། །མ་ནོར་མ་བཅོས་དོན་གོའི་ཕྱིར། །ཚུལ་འཆོས་སྤྱོད་པ་བྱ་མི་དགོས། །དེ་ཡང་འདུས་པའི་སྙིང་པོ་ཉོན། །ཡེ་ནས་གནས་པའི་གཞི་ཤེས་པས། །ཇི་བཞིན་དོན་ལ་རང་གསལ་བས། །སྣང་བའི་སྒྲོན་མ་འདེགས་མི་དགོས། །ནམ་མཁའ་དང་ནི་དུས་མཉམ་ཕྱིར། །མ་སྐྱེས་མི་ནུབ་རང་འབྱུང་ཕྱིར། །གཞན་ནས་བཙལ་དུ་རྡུལ་ཙམ་མེད། །དེ་ཡང་འདུས་པའི་སྙིང་པོ་ཉོན། །ཡེ་ནས་གནས་པའི་གཞི་ཤེས་པས། །ཀུན་ཁྱབ་ཡེ་ནས་ཆོས་སྐུ་ལ། །འཕོ་འགྱུར་བྱ་བ་རྡུལ་ཙམ་མེད། །དེ་ཕྱིར་གཞི་ངེས་ཆོས་སྐུ་ལ། །ཚིག་གི་ཐ་སྙད་བསླབ་མི་དགོས། །བལྟ་རུ་མེད་པའི་རིག་པ་ལ། །མདོག་དབྱིབས་སུ་ནི་མཐོང་བ་མེད། །གལ་ཏེ་ཡོད་ན་འཁྲུལ་པ་ཡིན། །བསམ་དུ་མེད་པའི་ཆོས་ཉིད་ལ། །རྟོག་དཔྱོད་བྱེད་ན་མ་རིག་སེམས། །བསྟན་དུ་ཡོད་ན་མཚོན་པ་དཀའ། །རྟག་ཆད་ཡེ་ནས་མེད་པ་ལ། །མཐའ་རུ་ལྟུང་བ་ཡོད་མི་སྲིད། །དེ་ཕྱིར་སྤྲོས་བྲལ་མཐའ་དབུས་མེད། །དེ་ཡང་འདུས་པའི་སྙིང་པོ་ཉོན། །ཡང་དག་མ་ནོར་དགོངས་པ་ནི། །ཞེ་ལ་འདོད་པ་ཁར་མི་ཐོན། །རང་གི་ཉམས་ལ་གསལ་བ་ལས། །ཚིག་གི་མཚོན་དུ་སྨྲར་མི་ཤེས། །དེ་ཕྱིར་བརྗོད་དུ་མེད་ཅེས་བྱ། །སུས་ཀྱང་མ་བྱས་མ་བཅོས་པར། །ཕྱོགས་མེད་པ་ལ་ཆོས་སྐུ་གསལ། །བྱིང་རྨུགས་བྱ་བའི་མིང་ཡང་མེད། །དངོས་པོ་མེད་པའི་གསལ་དོན་གྱིས། །བཏང་སྙོམས་ལྟེང་པོའི་མུན་པ་མེད། །འཇིག་རྟེན་ཆོས་ཀྱིས་ཡེངས་པ་མེད། །ཆོས་ཉིད་དོན་ལ་མ་ཡེངས་མཆོག །དེ་ཕྱིར་དོན་གྱི་གདེང་ལྡན་དགོས། །དེ་ཡང་འདུས་པའི་སྙིང་པོ་ཉོན། །གང་གི་མནོ་བསམ་མ་བཏང་བར། །དེ་ཉིད་ཆོས་ཉིད་ཡིན་ཤེས་ན། །གོལ་སྒྲིབ་སྡུག་བསྔལ་འབྱུང་མི་སྲིད། །ཆེ་ཆུང་གཉེན་པོ་བསྒོམ་མི་དགོས། །ད་ལྟའི་ཤེས་པ་འདི་ཉིད་ལས། ། ― DNG001_Page_0586 ―
[མ་དཔེ་གཟིགས་ན་འདིར་གནོན།]
དོན་གྱི་གནས་ལུགས་གཅིག་ཤེས་ན། །རྒྱུད་དག་རང་བྱུང་ཆོས་ཀྱི་སྐུ། །ཐ་མ་རང་རིག་དུས་དེར་སངས། །ཐམས་ཅད་མཁྱེན་པའི་ཡེ་ཤེས་རྒྱས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། གནས་ལུགས་དོན་གྱི་ཉམས་མྱོང་བསྟན་པའི་ལེའུ་སྟེ་ལྔ་བཅུ་པའོ།། །།ཀུན་རིག་རྒྱལ་པོས་བཀའ་སྩལ་པ། །དེ་ལྟར་མ་རྟོགས་བློ་དམན་གྱིས། །རྒྱུན་དུ་འབྲལ་མེད་བྱ་བའི་ཕྱིར། །དོན་ཟིན་སྤྱོད་པ་རྐྱེན་ཐུབ་པས། །རྒྱུ་དང་གོལ་ས་གདམས་ངག་དང་། །ཉམས་མྱོང་ལ་བཟླ་བལྟ་བ་སྟེ། །རེ་རེ་ལ་ནི་དྲུག་དྲུག་ཏུ། །ཕྱེ་ལ་བསྟན་གྱི་ཡིད་ཀྱིས་ཉོན། །དེ་ཡང་རྡོ་རྗེ་སེམས་དཔའ་ཉོན། །བདེ་བ་ཡེ་ཤེས་རྣམ་གསུམ་གྱིས། །ནང་གི་བདེ་བ་རྐྱེན་ཐུབ་པས། །བལྟ་མེད་ཞི་གནས་འགོག་པ་ལ། །བདག་མེད་མི་གཡོ་རྣམ་པ་གསུམ། །རང་ཡན་ལྷག་མཐོང་མི་བརྗེད་བཟུང་། །མཐའ་བྲལ་ཤེས་གསལ་གདེང་གིས་ཟིན། །བདག་ཉིད་དོན་ལ་མེད་པར་ཤེས། །དེ་ཉིད་བདེ་གསལ་ཡེ་ཤེས་སྐུ། །ད་ཡང་འདུས་པའི་སྙིང་པོ་ཉོན། །འདུ་འཛི་ལོངས་སྤྱོད་འཕེལ་བ་ཡིས། །ཡོ་བྱད་རྣམ་གསུམ་ལྡན་པ་དེ། །འདོད་ཡོན་ལྔ་ལ་རང་རྒྱུད་ཞེན། །གང་འཁྲུལ་མ་མཐོང་དོན་ཤེས་པས། །གང་ཡང་མྱོང་བར་རིག་པས་ཤེས། །བདག་གཞན་གཞི་ལ་མ་གྲུབ་པས། །བདེ་བ་ལོངས་སྤྱོད་ཆོས་ཉིད་རྒྱན། །དེ་ཡང་འདུས་པའི་སྙིང་པོ་ཉོན། །ཕོ་མོ་བདེ་བའི་རྐྱེན་ཐུབ་པ། །འགྲོ་བ་བཟང་པོར་ཡིད་ཆགས་པས། །ཐབས་དང་རང་རྒྱུད་ཆགས་སྤྱོད་གོལ། །སྔ་ཕྱི་མ་སོང་དོན་ཟིན་པའི། །དེ་ཚེ་བདེ་བ་མཐར་མ་ལྟུང་། །ཕོ་མོ་གཞི་ལ་གྲུབ་པ་མེད། །ལུས་བདེ་ལོངས་སྤྱོད་རིག་པའི་སྐུ། །དེ་ཡང་འདུས་པའི་སྙིང་པོ་ཉོན། །དེ་དག་བདེ་བ་རྣམ་གསུམ་ཡང་། །ཞེན་མེད་དོན་ཟིན་དངོས་སྤྱོད་ཀྱང་། །གནས་སྐབས་འདྲེལ་ཡོད་མཐར་ཐུག་མེད། །དེ་ཕྱིར་གདེང་ཟིན་རྣམས་ཀྱིས་སྤྱོད། །སངས་རྒྱས་ཐམས་ཅད་ཀྱི་ ― DNG001_Page_0587 ―
[མ་དཔེ་གཟིགས་ན་འདིར་གནོན།]
དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། བདེ་བ་ཡེ་ཤེས་སུ་རྐྱེན་ཐུབ་པར་བསྟན་པའི་ལེའུ་སྟེ་ང་གཅིག་པའོ།། །།ཀུན་རིག་རྒྱལ་པོས་བཀའ་སྩལ་པ། །ཕྱི་ཡི་ལུས་ཀྱི་སྡུག་བསྔལ་གྱི། །ནད་ནི་བཞི་བརྒྱ་རྩ་གཅིག་ལས། །ཡེ་འདྲོག་ཁད་པ་རྣམ་གསུམ་ཡིན། །གང་ན་ལྷག་མཐོང་དོན་གྱིས་ཟིན། །དེ་ཚེ་མཐའ་བྲལ་ཆོས་སྐུར་མྱོང་། །ལུས་དང་ན་ཚ་གཞི་ལ་མེད། །སྡུག་བསྔལ་དེ་ཉིད་སྤྲུལ་སྐུར་ཤར། །དེ་ཡང་འདུས་པའི་སྙིང་པོ་ཉོན། །སེམས་ཀྱི་སྡུག་བསྔལ་རྐྱེན་ཐུབ་པས། །ཆགས་སྡང་རྣམ་གཉིས་ཡིན་པའི་ཕྱིར། །བྱམས་སྡང་གཞི་ལ་དམ་པར་ཞེན། །མི་གཞིག་མི་བསམ་དྲན་པས་ཟིན། །གང་ལ་ཞེན་འཛིན་བདེ་ཟིན་ཉམས། །དེ་ཉིད་བསམ་པ་གཞི་ལ་མེད། །དེ་ཚེ་སྡུག་བསྔལ་བདེ་བར་ཤར། །དེ་ཡང་འདུས་པའི་སྙིང་པོ་ཉོན། །ཕྱི་ཡི་སྡུག་བསྔལ་རྣམ་བཞི་ཡང་། །མ་རིག་རྐྱེན་བཞིས་བསྐྱེད་པའི་རྒྱུ། །ཉོན་མོངས་བག་ཆགས་བསམས་པས་གོལ། །སྔ་ཕྱི་མེད་ཤེས་གདམས་ངག་གིས། །ཆོས་ཉིད་གཞི་ལྡན་ཉམས་སུ་མྱོང་། །གཞི་ལ་སྔ་ཕྱི་དོན་ལ་མེད། །དེ་ཕྱིར་འབྲས་བུ་ཆོས་ཀྱི་སྐུ། །དེ་ཡང་འདུས་པའི་སྙིང་པོ་ཉོན། །སྡུག་བསྔལ་ཉིད་དང་བདེ་བའི་ཀློང་། །དོན་ལ་ཡེ་ཤེས་འབྲལ་བ་མེད། །ད་ལྟའི་རིག་པ་འདི་ཉིད་ཡིན། །དེ་ཕྱིར་སྡུག་བསྔལ་བདེ་བའི་ངང་། །དེ་ལ་ཞེན་མེད་ཡེ་ཤེས་སྐུ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སྡུག་བསྔལ་ཞི་བྱེད་ཆོས་སྐུར་རྐྱེན་ཐུབ་པར་བསྟན་པའི་ལེའུ་སྟེ་ང་གཉིས་པའོ།། །།དེ་ཡང་འདུས་པའི་སྙིང་པོ་ཉོན། །བཏང་སྙོམས་ཤེས་ཤིང་རྐྱེན་ཐུབ་པ། །ལེ་ལོ་སྙོམས་ལས་ལུང་མ་བསྟན། །བཏང་སྙོམས་མུན་པས་རང་རིག་བསྒྲིབས། །ཤན་ཕྱེད་ངོས་ཟིན་ཡིད་ཆེས་ལ། །རང་རིག་འདྲེལ་མེད་ཉམས་དང་ལྡན། །མ་རིག་མེད་ཕྱིར་བཏང་སྙོམས་མེད། །ལྷག་མཐོང་ ― DNG001_Page_0588 ―
[མ་དཔེ་གཟིགས་ན་འདིར་གནོན།]
འབྲས་བུ་བདེ་བ་མཐོང་། །དེ་ཡང་འདུས་པའི་སྙིང་པོ་ཉོན། །ཀུན་གཞི་ལུང་མ་བསྟན་པ་ཡིས། །བསྒྲིབས་པ་ལུང་མ་བསྟན་པའི་ཕྱིར། །དང་པོ་ཡིད་ཙམ་བསྒྲིབས་པ་ཡིས། །མ་རིག་རྒྱུ་ལས་ལུས་བསྐྱེད་པས། །བརྒྱལ་དང་མངལ་དུ་ཆགས་ཙམ་ན། །བརྗེད་དང་མ་དྲན་ཧད་དེ་བ། །དྲན་མེད་དྲུག་གིས་ལུང་མ་བསྟན། །དྲན་མེད་ལུང་ལས་མ་གཡོས་པའི། །ངེས་དོན་གདམས་ངག་སྔོན་བསྟན་ནས། །ལུང་མ་བསྟན་པ་རང་སྟོང་ནས། །གཞི་ཉིད་དོན་ཕྲད་ཆོས་ཀྱི་སྐུ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། བཏང་སྙོམས་ལྷག་མཐོང་རིག་པ་རྐྱེན་ཐུབ་པར་བསྟན་པའི་ལེའུ་སྟེ་ང་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །གཉིད་ཀྱི་རྣམ་གྲངས་དབྱེ་བ་ནི། །དགེ་སྡིག་ལུང་མ་བསྟན་པའི་གཉིད། །བག་ཆགས་བཟང་ངན་གཉིས་ལས་བྱུང་། །དང་པོ་ལུང་མ་བསྟན་པའི་གཉིད། །རྨི་ལམ་མེད་པའི་ལམ་མེ་བ། །དེ་ལ་དགེ་སྡིག་རྨི་ལམ་བྱུང་། །བག་ཆགས་མཚམས་སྦྱོར་ལྷས་བསྟན་པ། །འཁྲུལ་པ་བཟང་ངན་དམ་པར་འཛིན། །དེ་ཕྱིར་མ་རིག་རྨོངས་པར་གོལ། །དེ་ཡང་འདུས་པའི་སྙིང་པོ་ཉོན། །གཉིད་ལོག་ཚོགས་དྲུག་བག་ལ་ཉལ། །བུམ་ནང་སྦྲང་བུ་བརྒྱལ་བ་བཞིན། །རང་དབང་མེད་པར་སེམས་སྡུད་པ། །གཏི་མུག་མུན་པར་ཆོས་སྐུ་བྱིངས། །དེ་མ་བསལ་བར་སངས་མི་རྒྱ། །དེ་ཕྱིར་ངེས་པའི་ལུང་འདི་ལ། །ཡིད་ཆེས་རིག་པའི་ཀློང་དུ་ཞོག །དེར་བཞག་ས་ལེར་དྲན་མི་རྒྱུ། །ཆོས་ཉིད་གནས་ལུགས་དེ་ཡིན་པས། །གཉིད་ནི་ཆོས་སྐུའི་ཀློང་དུ་ཐིམ། །བག་ཉལ་གཞི་གནས་རིག་མ་རིག །རྨི་ལམ་རྣམ་གསུམ་གང་བྱུང་ཡང་། །གཞན་གྱིས་བར་ནི་མ་ཆོད་པར། །སད་དུས་གདམས་ངག་འདི་དྲན་པས། །གཉིད་དེ་ཆོས་སྐུར་རང་ཤེས་ཕྱིར། །དོན་ཙམ་ཉིད་ན་ཉམས་སུ་མྱོང་། །དེ་ལ་རྨི་ལམ་གྲུབ་པ་མེད། །འབྲས་བུ་མི་རྟོག་ཆོས་སྐུར་ཤར། །དེ་ཡང་རྡོ་རྗེ་སེམས་དཔའ་ཉོན། །དང་པོ་ ― DNG001_Page_0589 ―
[མ་དཔེ་གཟིགས་ན་འདིར་གནོན།]
རང་བཞིན་ལུས་གཞི་ཡིས། །ཀུན་གཞི་ལུང་མ་བསྟན་དུས་ན། །མངལ་གྱིས་བསྒྲིབས་གཡོག་ལུས་འདིས་ནི། །རྐྱེན་བྱས་གཉིད་དུ་སོང་བའི་ཚེ། །རང་ཉིད་མལ་ལ་གཉིད་དེ་ནི། །ལུང་ལྡན་གདམས་ངག་སྔོན་ཕོག་པས། །འཁོར་འདས་མ་རིག་གཞི་དེ་ཉིད། །མི་དྲན་གཉིད་དེ་ཆོས་སྐུར་དྲན། །རིན་ཆེན་གའུར་བཅུག་པ་བཞིན། །བྱིང་ཡང་སད་དུས་གདམས་ངག་གིས། །རྨི་ལམ་གང་ཡང་མི་བསམ་པར། །དྲན་དུ་མི་གཞུག་རྗེས་མི་བཅད། །གདམས་ངག་དྲན་པས་བག་ཉལ་མེད། །དེ་ཤེས་རང་བྱུང་ཀློང་ཐིམ་ཡིན། །དེ་ཡང་འདུས་པའི་སྙིང་པོ་ཉོན། །རྨི་ལམ་བཟང་ངན་སྤྲིན་བཞིན་དུ། །ཆོས་ཉིད་སྟོང་པའི་ངང་དུ་སངས། །བརྗེད་དྲན་ནོར་ནི་རྙེད་པ་འདྲ། །དེ་ཡང་འདུས་པའི་སྙིང་པོ་ཉོན། །མ་ཡི་མངལ་དུ་གནས་དུས་ན། །འཆི་ཀར་དྲན་པ་མུན་སོང་དང་། །བརྒྱལ་དང་མ་དྲན་བརྗེད་བའི་དུས། །གདམས་ངག་དྲན་པ་མེད་ཀྱང་ནི། །གཞན་གྱིས་བར་ནི་མ་ཆོད་པར། །དེ་ཚེ་དྲན་རྙེད་ལྷག་མཐོང་ཤར། །དེ་ལྟར་ཉམས་སུ་མྱོང་བའི་ཕྱིར། །བར་དོར་མངོན་སངས་རྒྱས་པར་ངེས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། གཉིད་ཡེ་ཤེས་ཀློང་ཐིམ་དུ་བསྟན་པའི་ལེའུ་སྟེ་ང་བཞི་པའོ།། །།ཀུན་རིག་སྟོན་པས་ཡང་གསུངས་པ། །གཏི་མུག་རང་གྲོལ་རྐྱེན་ཐུབ་པས། །མ་རིག་ཤེས་བཞིན་ལུང་མ་བསྟན། །གང་ཡང་མི་སེམས་གཏི་མུག་སེམས། །ལུང་ལྡན་སྒྲོན་མའི་དོན་བསྟན་པས། །རང་རིག་ཆོས་སྐུ་ཡིད་ལ་ཤར། །གཞི་དང་ཕྲད་པས་མུན་པ་བརླག །འབྲས་བུ་ཆོས་སྐུ་ཐམས་ཅད་མཁྱེན། །དེ་ཡང་རྡོ་རྗེ་སེམས་དཔའ་ཉོན། །ཞེ་སྡང་རང་གྲོལ་རྐྱེན་ཐུབ་པས། །ཡུལ་ངན་ཁ་དོག་སྨྲ་བ་ལ། །ཞེ་སྡང་སེམས་འཁྲུགས་བཟོད་པ་ཉམས། །མི་བསམ་ཡུལ་གྱི་རྗེས་མི་བཅད། །དེ་དུས་རྟག་ཆད་མཐའ་བྲལ་ཉམས། །རང་གཞན་གཞི་ལ་གྲུབ་པ་མེད། །འབྲས་བུ་རང་རིག་སྤྲུལ་པར་ཤར། །དེ་ཡང་འདུས་པའི་སྙིང་པོ་ཉོན། །ང་རྒྱལ་རེང་ཕྱེད་རྐྱེན་ཐུབ་པས། །གཞན་དག་ལྡེམ་པོས་སྨྲ་བ་ལ། །ང་བདེན་ ― DNG001_Page_0590 ―
[མ་དཔེ་གཟིགས་ན་འདིར་གནོན།]
རྨོངས་པ་ཆེད་དུ་བྱེད། །གང་ཡང་དོན་མེད་དོན་དྲན་པས། །དེ་ཉིད་རིག་པའི་ཤེས་པ་ཉམས། །ཚིག་གི་ཆེ་ཆུང་གཞི་ལ་མེད། །དོན་ལྡན་ང་རྒྱལ་ཆོས་སྐུར་འཆར། །དེ་ཡང་འདུས་པའི་སྙིང་པོ་ཉོན། །ཕྲག་དོག་རང་གྲོལ་རྐྱེན་ཐུབ་པས། །གཞན་གྱི་ཕུན་སུམ་ཚོགས་པ་ལ། །གཡོ་སྒྱུའི་ཐབས་ཀྱིས་གཞན་ལ་སྨོད། །བདག་གཞན་མེད་ཤེས་ཆོས་ཀྱི་སྐུ། །ཕྲག་དོག་ཡེ་ཤེས་ཉམས་སུ་མྱོང་། །དེ་ཙམ་ཉིད་ན་བདག་གཞན་མེད། །གཡོ་སྒྱུའི་དོན་ཤེས་ལོངས་སྤྱོད་རྒྱན། །དེ་ཡང་འདུས་པའི་སྙིང་པོ་ཉོན། །དངོས་པོར་མ་འཁྲུལ་རང་ལུགས་ལ། །རྐྱེན་གྱི་ཉོན་མོངས་གང་སྐྱེས་ཀྱང་། །དེ་དུས་ཆོས་སྐུ་ཉམས་སུ་མྱོང་། །དེ་ཚེ་ཡུལ་དང་འདྲེལ་པ་མེད། །དེ་ཕྱིར་རྐྱེན་ཐུབ་བསྒོམ་མི་དགོས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། དུག་ལྔ་རང་གྲོལ་དུ་བསྟན་པའི་ལེའུ་སྟེ་ང་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་ཡང་གསུངས་པ། །རིག་འཛིན་སེམས་དཔའ་སྤྲུལ་པའི་སྐུ། །སངས་རྒྱས་དགོངས་པ་ངེས་པའི་དོན། །ཐུགས་ནས་སྙན་དུ་བརྒྱུད་པ་ཡི། །སྣོད་ལྡན་གདམས་ངག་སྔོན་བསྟན་ནས། །ཏིང་འཛིན་བརྟན་པར་མ་གྱུར་ཀྱང་། །སྔ་ཕྱི་མི་རྟོག་ཙམ་བསྒོམ་ལ། །ཚེ་འཕོས་མི་ལུས་གཅིག་ཐོབ་ནས། །འཁོར་བར་མི་ལྡོག་བདེན་པ་མཐོང་། །དེ་བས་མི་གཡོ་གཏན་གོམས་ན། །ལུས་ཀྱི་འབྱུང་བ་ཞིག་པའི་དུས། །ལྷ་ཡི་རིག་འཛིན་མངོན་ཐོབ་ནས། །དུས་དེ་ཉིད་དུ་མངོན་སངས་རྒྱས། །དེ་ཡང་འདུས་པའི་སྙིང་པོ་ཉོན། །ཐིག་ལེ་ཉག་གཅིག་མངོན་རྟོགས་པའི། །རྣམ་སྨིན་ལུས་དང་མ་བྲལ་བར། །ཐོག་མ་མེད་པར་སངས་རྒྱས་ཚེ། །སྐད་ཅིག་ཙམ་ལ་མ་རིག་སངས། །ལུས་མེད་རིག་པ་ཡེ་ཤེས་རྒྱས། །རང་བྱུང་ཐུགས་ལ་སྐྱེ་ཤི་མེད། །ཐམས་ཅད་མཁྱེན་པའི་ཡེ་ཤེས་ལྡན། །ནམ་མཁའ་ཉི་མའི་སྙིང་པོ་འདྲ། །དེ་ཡང་འདུས་པའི་སྙིང་པོ་ཉོན། །ཡེ་ནས་དག་པའི་གཞི་ཉིད་ནི། །ཆོས་སྐུར་ ― DNG001_Page_0591 ―
[མ་དཔེ་གཟིགས་ན་འདིར་གནོན།]
ངོ་སྤྲོད་དོན་ཤེས་ན། །ཆོས་སྐུ་གཟུགས་སྐུ་རྣམ་པ་གཉིས། །སོ་སོར་སྣང་བ་མ་ཡིན་ཏེ། །ཆོས་ཀྱི་སྐུ་ལས་གཟུགས་སྐུ་འཆར། །དཔེར་ན་སྣུམ་དང་མར་བཞིན་ནོ། །རིན་ཆེན་ལུས་ནང་ཆོས་སྐུ་ལ། །སྣང་བ་གཟུགས་མེད་ལོངས་སྤྱོད་སྐུ། །སྣང་དག་ས་བཅུའི་སེམས་དཔས་མཐོང་། །ལས་དག་ལྷ་མི་ཀུན་སྣང་ལ། །གཟུགས་ཅན་ཐུབ་དྲུག་སྤྲུལ་སྐུར་མཐོང་། །གཅིག་ལ་གཅིག་ཚང་ཡེ་ནས་ཡོད། །གསེར་དང་སེར་པོ་ཇི་བཞིན་ནོ། །དེ་ཡང་རྡོ་རྗེ་སེམས་དཔའ་ཉོན། །ཡེ་ཤེས་ལུས་ཅན་སངས་རྒྱས་ལ། །སེམས་ཅན་མེད་ཕྱིར་དོར་མི་དགོས། །རང་ལ་ཡོད་པ་ངོ་ཤེས་ཕྱིར། །ཆེད་དུ་རྩོལ་བས་བསྒྲུབ་མི་དགོས། །ད་ཡང་འདུས་པའི་སྙིང་པོ་ཉོན། །རང་བྱུང་རིག་པ་ཆོས་སྐུ་ལ། །དུས་གསུམ་འཁྲུལ་དང་འཕོ་འགྱུར་མེད། །སྟོང་གསུམ་ཞིག་ཀྱང་ཉམ་མི་ང་། །དངོས་མེད་རང་བྱུང་རིག་པའི་སྐུ། །ཡེ་ཤེས་གཟུགས་ཅན་ཁ་མིག་ཅན། །དེ་ཡི་གཟུགས་བརྙན་གཟུགས་སྐུ་འབྱུང་། །མ་བཙལ་རང་བྱུང་ཆོས་ཀྱི་སྐུ། །ཐབས་ལ་མི་བརྟེན་ཡོན་ཏན་རྫོགས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སྲིད་པ་བར་དོ་ལ་སྐྱེ་བ་ཕྱིས་མི་ལེན་པར་སངས་རྒྱས་པར་བསྟན་པའི་ལེའུ་སྟེ་ང་དྲུག་པའོ།། །།དེ་ནས་ཀུན་རིག་སྟོན་པ་ལ། །ལྷ་དབང་བརྒྱ་བྱིན་དོན་ཞུས་པ། །དོན་ཉིད་རྟོགས་པའི་རྣལ་འབྱོར་པས། །ངེས་དོན་མཐར་ཕྱིན་བཀའ་སྩལ་པ། །རྩོལ་སྤྱོད་རྟག་ཏུ་དགོས་མི་དགོས། །ཞུས་པའི་དོན་ལ་བཀའ་སྩལ་པ། །ཆོས་སྐུ་གདོད་ནས་དག་པ་ལ། །ཆོས་སྤྱོད་བཅུ་ཡིས་སངས་མི་རྒྱ། །མ་བཙལ་ལྷུན་གྱིས་གྲུབ་པ་ལ། །ཡོན་ཏན་བཅུ་ཡིས་བསྒྲུབ་ཏུ་མེད། །ཀུན་བཟང་ཆོས་བས་ང་སྔའི་ཕྱིར། །མདོ་རྒྱུད་ཀུན་གྱི་ཕྱི་མོར་བཤད། །ཐོས་པས་ཤེས་རབ་བསྐྱེད་དུ་མེད། །སངས་རྒྱས་སེམས་ལས་མ་བྱུང་ཕྱིར། །རྒྱུད་ལུང་མན་ངག་གྲོགས་མི་དགོས། །ཀུན་གྱི་གཞི་ཉིད་ང་ཉིད་ཡིན། །ང་ལ་དང་པོ་རྒྱུ་མེད་པས། །ཐ་མ་རྐྱེན་གྱིས་གཞིག་ཏུ་མེད། །ང་ལ་བསྒྲུབ་པའི་ཐབས་མེད་པས། །དངོས་གྲུབ་གཞན་ནས་རེ་བ་མེད། །ང་ལ་བསྟན་པའི་ཚིག་མེད་པས། ། ― DNG001_Page_0592 ―
[མ་དཔེ་གཟིགས་ན་འདིར་གནོན།]
རྟོག་པའི་སྨྲ་བསམ་ཡུལ་ལས་འདས། །ང་ལ་གོང་ན་རྗེ་མེད་པས། །ཡེ་ཤེས་ཀུན་ལས་ཁྱད་པར་འཕགས། །ང་ལ་འོག་ན་འབངས་མེད་ཕྱིར། །སྙིང་རྗེ་ཆེན་པོ་སྤྱིར་མི་མཛད། །ང་ཉིད་ཡེ་ཤེས་རང་བཞིན་ལ། །ཐབས་ཀྱི་ངོ་བོ་དབྱིངས་ན་གསལ། །ཉི་མའི་སྙིང་པོ་རང་ཤར་བས། །འབྱུང་བ་ལྔ་ལ་ཁྱབ་པ་བཞིན། །ཆོས་སྐུ་རིག་པ་དངོས་མེད་ལ། །བཙལ་བ་མེད་པར་ཡེ་གནས་ཕྱིར། །ནམ་མཁའ་ལྟ་བུར་རང་གསལ་བས། །བག་ཆགས་སྐྱོན་གྱིས་བསྒྱུར་དུ་མེད། །རིན་ཆེན་ལྟ་བུའི་ཡོན་ཏན་ལ། །ཆོས་སྐུའི་གཟུགས་བརྙན་གཟུགས་སྐུ་འབྱུང་། །ཕྱི་ནང་མེད་པར་ཡེ་ཤེས་སྐུ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ལྷ་དབང་གི་ཐེ་ཚོམ་གྱི་གེགས་བསལ་བའི་ལེའུ་སྟེ་ང་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ལུང་ལྡན་ངེས་པའི་རྒྱུད་ཆེན་འདི། །དད་ལྡན་ཀུན་ལ་འདི་ཡོད་ན། །རྣམ་སྨིན་ལུས་དང་མ་བྲལ་བར། །སངས་རྒྱས་ད་ལྟ་དགོངས་པ་ཉིད། །གཞི་དང་ཤེས་པ་གཅིག་ཏུ་རྟོགས། །འཁྲུལ་པ་མེད་པར་རང་ཡིད་ཆེས། །འདུ་ཤེས་བསྐུམ་དང་རྒྱ་བསྐྱེད་མེད། །གང་ལྟར་གནས་པ་ཆོས་སྐུར་ཡོད། །བྱ་དང་མི་བྱའི་རྩོལ་བ་བྲལ། །དེ་དོན་གདེང་ཟིན་རྣལ་འབྱོར་པས། །གང་ལྟར་བྱས་པ་ཐམས་ཅད་ཀུན། །རང་བྱུང་ཆོས་སྐུར་འབྲལ་མེད་ཤེས། །ངེས་དོན་འདི་རྟོགས་རྣལ་འབྱོར་པས། །འཁྲུལ་པ་བྱ་བའི་མིང་ཡང་མེད། །ཐམས་ཅད་རང་བྱུང་ཆོས་སྐུ་ཉིད། །དེ་ཡང་འཁོར་རྣམས་ལེགས་པར་ཉོན། །ལོག་རྟོག་སྒྱུ་མའི་སེམས་ཅན་དང་། །ཡེ་ཤེས་སྒྱུ་མའི་སངས་རྒྱས་གཉིས། །དྲང་དོན་བསྟན་པས་སེམས་མ་རྟོགས། །སེམས་ཅན་སངས་རྒྱས་བཏགས་པ་ཙམ། །གདག་རྒྱུ་གང་ཡང་གཞི་ལ་མེད། །དྲང་དོན་ཆོས་ཀྱིས་བདག་གཞན་ཕུང་། །ཕན་གནོད་མེད་ཕྱིར་དྲང་དོན་རྫུན། །རྡོ་རྗེ་སེམས་དཔས་དེ་སྐད་གསུངས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་ ― DNG001_Page_0593 ―
[མ་དཔེ་གཟིགས་ན་འདིར་གནོན།]
བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། དུས་ད་ལྟ་ཉིད་དུ་རྟོགས་པར་བསྟན་པའི་ལེའུ་སྟེ་ང་བརྒྱད་པའོ།། །།དེ་ཚེ་ལྷའི་བུ་སེམས་ལྷག་གིས། །ཡིད་ཀྱི་ཐེ་ཚོམ་བསལ་བའི་ཕྱིར། །རྡོ་རྗེ་སེམས་ལ་དོན་ཞུས་པ། །གཞི་ལ་འབྱུང་བ་མེད་པས་ན། །སངས་རྒྱས་སེམས་ཅན་མེད་པའི་ཕྱིར། །ཐུགས་རྗེ་རྒྱུན་ཆད་འགྲོ་དོན་མེད། །ཆད་དང་ཁྱད་མེད་མི་འགལ་ལམ། །དེ་སྐད་ཞུས་པའི་དོན་གསན་ནས། །རིག་འཛིན་འཁོར་ལ་བཀའ་སྩལ་པ། །ཡེ་ནས་དག་པའི་གཞི་ཉིད་ལ། །དུས་གསུམ་དག་ཏུ་འགྱུར་མེད་པས། །ཆད་པའི་སྐྱོན་དུ་ཅི་ལ་ཆེ། །ཆོས་སྐུ་སེམས་ཅན་ཀུན་ཁྱབ་པས། །ཐུགས་རྗེའི་རྒྱུན་ནི་ཅི་ལ་འཆད། །ཡོད་ལས་མེད་སོང་མ་ཡིན་པས། །ཆད་པའི་སྐུར་པ་གང་ལ་འདེབས། །དོན་ལ་སངས་རྒྱས་སེམས་ཅན་མེད། །གཞི་ཤེས་འབྲལ་མེད་གཅིག་པུས་ཆོག །དེ་ཡང་འདུས་པའི་སྙིང་པོ་ཉོན། །མ་རིག་རྨོངས་པའི་ལོག་ལྟ་ཅན། །འདུས་མ་བྱས་པའི་ཆོས་ཉིད་ལ། །འབྱུང་བཞི་ཐབས་ཀྱིས་ཚང་གོས་ཟེར། །རང་ཡིད་ཁྲ་བོར་ཡོད་པ་ལ། །རང་རིག་ཡིན་འདོད་རྨོངས་པ་ཀུན། །འབྱུང་བ་དྭངས་སྙིགས་གཞིར་ཕྱེ་ན། །འདུས་བྱས་འབྱུང་བའི་ཁ་དོག་ལས། །ཡེ་ཤེས་ལྔ་དང་འོད་ལྔར་འདོད། །ཕྱི་ནང་ཕུང་ཁམས་སྐྱེ་མཆེད་ཀུན། །ནན་གྱིས་གཟུགས་སྐུར་བློས་བསྒྱུར་ཀྱང་། །ཡུལ་གྱི་འདྲེལ་བ་མ་ཆོད་ཕྱིར། །སངས་རྒྱས་མི་འབྱུང་ཤིན་ཏུ་གོལ། །རུ་སྦལ་སྤུ་ལ་གོས་བྱེད་འདྲ། །ཕྱི་སྣོད་མི་འགྱུར་བཅུད་འགྱུར་ཟེར། །གཞི་ལ་འབྱུང་བ་མེད་པའི་ཕྱིར། །ཁ་དོག་ལྔ་དང་འོད་ལྔ་ནི། །གཞི་མི་ཤེས་ལ་སྣང་བ་ལས། །དོན་ལྡན་ཀུན་ལ་གདོད་ནས་མེད། །ད་ཡང་འདུས་པའི་སྙིང་པོ་ཉོན། །གཅིག་ལ་ཡོན་ཏན་ཀུན་སྣང་སྟེ། །གང་ཡང་མི་འགལ་ཆོས་སྐུ་ནི། །རང་རང་མཐོང་སྣང་སོ་སོ་ལ། །བཟང་རྟོག་གཟུགས་སྐུ་རྣམ་གཉིས་འབྱུང་། །དོན་རྟོག་འགྲོ་དྲུག་ལུས་སྣང་བ། །གཞི་ལ་གཉིས་ཀ་མེད་ལས་བྱུང་། །བྱུང་ཡང་ཕན་གནོད་གཉིས་ཀ་མེད། །དེ་ཕྱིར་འཁོར་འདས་མ་རིག་ཆོས། །དེ་ཡང་འདུས་པའི་སྙིང་པོ་ཉོན། །འཁོར་གྱི་ས་བཅུའི་སེམས་དཔའ་ཡིས། །རང་ལ་ཡོད་པ་མ་རྟོགས་པས། །འགྲོ་དོན་ཆེད་དུ་ ― DNG001_Page_0594 ―
[མ་དཔེ་གཟིགས་ན་འདིར་གནོན།]
རྩོལ་བ་བྱེད། །ཡེ་ཤེས་སྒྱུ་མའི་སངས་རྒྱས་འདོད། །གླེན་པས་ལྷ་ཁང་བལྟ་བ་བཞིན། །ལྡེམ་དགོངས་བསྒོམ་དང་སེམས་བསྐྱེད་དང་། །སྐུ་མདོག་འོད་དང་དཔེ་བྱད་དང་། །ཞིང་ཁམས་བརྒྱན་པ་མངོན་དུ་འདོད། །སྒྱུ་མའི་གཟུགས་སྐུ་བཟང་པོར་མཐོང་། །ཆོས་སྐུ་མ་ཤེས་ཡུལ་དུ་བཟུང་། །དེ་ཕྱིར་ཤེས་བྱའི་སྒྲིབ་པས་བསྒྲིབས། །གནས་ལུགས་ཆོས་སྐུའི་སངས་རྒྱས་མིན། །དེ་ཡང་འཁོར་རྣམས་ད་ཉོན་ཅིག །ཡེ་ནས་གནས་པའི་སེམས་ཉིད་དེ། །ཉན་ཐོས་རང་རྒྱལ་རང་དག་འཁོར། །ཤེས་རབ་དམན་ལ་ཚོགས་བསགས་པས། །མེ་ལོང་གཞི་ལ་རང་བྱད་འཛིན། །དེ་ནི་སྤྲུལ་སྐུར་མཐོང་བའི་ཚེ། །ཆོས་སྐུའི་གཟུགས་བརྙན་མ་ཤེས་ཕྱིར། །ངན་རྟོག་སྦྱང་ཕྱིར་མོས་གུས་བྱེད། །ཆོས་སྐུར་མ་ཤེས་ཐུབ་དྲུག་མཐོང་། །བག་ཉལ་ཉོན་མོངས་སྒྲིབ་པ་ཡོད། །དེ་ཕྱིར་ཡེ་ཡོད་གཞི་མ་ཤེས། །སྨིག་རྒྱུར་ཆུ་མཐོང་བསྙེགས་པ་འདྲ། །དེ་ཡང་འདུས་པའི་སྙིང་པོ་ཉོན། །འགྲོ་དྲུག་སེམས་ཅན་མ་ལུས་ཀུན། །དུག་ལྔ་རང་ལ་སྐྱེས་ཙམ་ན། །ཆོས་སྐུར་མ་ཤེས་གཏི་མུག་པས། །མེད་པའི་ཡུལ་ལ་ཆགས་སྡང་སྐྱེས། །འཁོར་བའི་མཐའ་ལ་ཟད་པ་མེད། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ལྷའི་བུའི་སེམས་ཀྱི་རྟོག་པ་བསལ་བའི་ལེའུ་སྟེ་ང་དགུ་པའོ།། །།དེ་ནས་ཀུན་རིག་རྒྱལ་པོ་ཡིས། །རྒྱུད་བདག་རྡོ་རྗེ་སེམས་དཔའ་ལ། །རང་རིག་རྟོགས་དོན་འདི་སྐད་གསོལ། །ཀུན་བཟང་གདམས་ངག་འདི་ཕོག་པས། །བདག་དོན་རྟོགས་པ་འདི་ལྟར་ཤར། །ཡུལ་དང་སེམས་ནི་ཅིར་སྣང་ཡང་། །འཁྲུལ་པའི་ཡིད་ཀྱིས་བརྟགས་པ་ལས། །དོན་ལ་མེད་པར་རང་ཡིད་ཆེས། །ལུང་ལྡན་གདམས་ངག་ཟིན་ཙམ་ན། །གང་ཡང་མི་འགལ་ཆོས་སྐུར་ཤེས། །དེ་ཡང་འདུས་པའི་སྙིང་པོ་ཉོན། །ཇི་བཞིན་པ་ལ་དོན་གྱིས་ཟིན། །མ་བཅོས་པ་ལ་དྲན་པ་གསལ། །ཡིད་ཆེས་དོན་ལ་འགྱུར་བ་མེད། །མ་འགགས་པ་ལ་བཟུང་རྒྱུ་མེད། །འགྲོ་འོང་མེད་པར་རང་སར་གནས། །ཤེས་པ་གསལ་ལ་མནོ་བསམ་བྲལ། །དེ་ཙམ་ཉིད་ན་བསྒོམ་དུ་མེད། །དེ་ཡང་འདུས་པའི་སྙིང་པོ་ཉོན། །ཉི་ཤར་མུན་གྲིབ་མེད་པ་བཞིན། །གནས་ལུགས་གཞི་དང་ཕྲད་པའི་ཚེ། ། ― DNG001_Page_0595 ―
[མ་དཔེ་གཟིགས་ན་འདིར་གནོན།]
འཁྲུལ་མེད་ཤེས་པ་ཡུལ་དང་བྲལ། །བསམས་ནས་མེད་པ་མ་ཡིན་ཏེ། །གདོད་ནས་མེད་པ་ཀུན་གྱི་གཞི། །དེ་ཉིད་རྟོགས་པས་ཀུན་བཟང་ཐུགས། །དུས་གསུམ་རྒྱལ་བའི་དགོངས་པ་གཅིག །དེ་ཕྱིར་ཐིག་ལེ་ཉག་གཅིག་ཡིན། །འཕོ་འགྱུར་མེད་པ་ནམ་མཁའ་འདྲ། །དེ་ཡང་འདུས་པའི་སྙིང་པོ་ཉོན། །ཆོས་སྐུ་ཡེ་ཤེས་རྟོགས་ཙམ་ན། །ད་ལྟའི་ཤེས་པ་འདི་ཉིད་ལ། །བཟང་པོར་སོང་བ་མེད་པའི་ཕྱིར། །བསྒོམ་དང་མི་བསྒོམ་ཐ་སྙད་བྲལ། །བྱིང་རྒོད་གཉིས་ཀྱང་རང་བྱུང་ཀློང་། །མ་རིག་མེད་པས་ཡེ་ཤེས་ཀློང་། །དེ་ཕྱིར་རང་བྱུང་ཤེས་རབ་གསལ། །བཞག་དང་ལངས་པ་མེད་པའི་ཕྱིར། །བདེ་དང་མི་བདེ་ཐམས་ཅད་ཀུན། །དོན་ལ་རང་རིག་ཆོས་སྐུར་གཅིག །གསལ་དང་མི་གསལ་གང་ཡང་རུང་། །འཛིན་མེད་རང་བྱུང་ཆོས་སྐུ་ལ། །དྲན་དང་མ་དྲན་གང་ཤར་ཡང་། །གང་གི་གཉེན་པོ་བརྟེན་མི་དགོས། །གང་ཡང་ཆོས་སྐུར་ཤེས་པའི་ཕྱིར། །ཡེངས་དང་མ་ཡེངས་གདོད་ནས་མེད། །དེ་ཡང་འདུས་པའི་སྙིང་པོ་ཉོན། །དེ་ལྟ་བུ་ཡི་སེམས་ཅན་ཀུན། །ལུང་ལྡན་མ་ཕྲད་ཕུགས་མ་དག །གཞི་ཉིད་མ་ཤེས་བར་དུ་ཡང་། །ཡུལ་སེམས་གཉིས་ཀྱི་འཁྲུལ་པ་ཡོད། །དེ་ཕྱིར་དད་པས་ཅི་བསྒོམ་ཡང་། །བྱིང་རྒོད་ཡེངས་དང་མ་ཡེངས་འབྱུང་། །རང་བློ་ཞེན་པ་སྣ་ཚོགས་བྱེད། །ཀུན་ཀྱང་ང་དང་འདྲ་སྙམ་ནས། །གདམས་ངག་ཅན་ལ་སྒྲོ་སྐུར་འདེབས། །དེ་ཉིད་གཞི་ཉིད་མ་ཤེས་ན། །ཆོས་སྤྱོད་བརྩོན་ཡང་རྣལ་འབྱོར་མིན། །བསྐལ་པར་བསྒོམས་ཀྱང་སངས་མི་རྒྱ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། རྡོ་རྗེ་སེམས་དཔའ་གཞི་དང་ཕྲད་པའི་རྟོགས་པ་བསྟན་པའི་ལེའུ་སྟེ་དྲུག་ཅུ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་གདགས་ཕྱིར། །ཀུན་ཏུ་བཟང་ལ་འདི་སྐད་གསོལ། །ཐིག་ལེ་ཉག་གཅིག་ཆོས་སྐུ་ལ། །ས་བཅུ་རྫོགས་པའི་ཡོན་ཏན་གང་། །སངས་རྒྱས་དགོངས་པ་ཇི་ལྟར་འདུས། །གཞན་གྱི་འགྲོ་དོན་ཇི་ལྟར་བྱེད། །གཞི་ལམ་འབྲས་བུར་ཇི་ལྟར་གཅིག །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་རྒྱལ་པོས་བཀའ་སྩལ་པ། །ངེས་པའི་ས་རྣམས་རྫོགས་པ་ནི། །གྲངས་དང་མིང་དང་རྟེན་དང་དཔེ། །ཡོན་ཏན་འབྲས་བུ་དྲུག་དྲུག་ཏུ། །ངེས་དོན་བསྟན་གྱིས་ཡིད་ལ་ཟུང་། །དེ་ཡང་འདུས་པའི་སྙིང་པོ་ཉོན། །འཁོར་བར་མི་ལྡོག་རབ་ཏུ་དགའ། །རྟེན་ནི་སྦྱིན་པ་རིན་ཆེན་གཏེར། །མ་རིག་ཆ་ཕྲ་ ― DNG001_Page_0596 ―
[མ་དཔེ་གཟིགས་ན་འདིར་གནོན།]
ཟིལ་གྱིས་གནན། །མངོན་རྒྱུའི་ཉོན་མོངས་འབྱུང་མི་སྲིད། །ས་ནི་གཉིས་པ་དྲི་མེད་ལ། །རྟེན་ནི་ཚུལ་ཁྲིམས་རིན་ཆེན་མྱུག །བག་ཉལ་མི་གནོད་འགྱུར་བ་མེད། །སྒྲིབ་མེད་རང་རིག་ཆོས་སྐུར་གསལ། །ས་ནི་གསུམ་པ་འོད་འཕྲོ་ལ། །རྟེན་ནི་བཟོད་པ་རྒྱ་མཚོ་འདྲ། །ཞེན་པའི་ཉམས་ནི་གཏིང་ནས་ཆོམས། །ཡེ་ཤེས་ངང་ལ་རྗེས་ཐོབ་མེད། །ས་ནི་བཞི་པ་འོད་བྱེད་ལ། །རྟེན་ནི་བརྩོན་འགྲུས་རི་རབ་འདྲ། །ཞེན་པའི་བག་ཆགས་དྲན་མི་སྲིད། །འཇིག་རྟེན་མཆོད་ཀྱང་ཞེན་པ་བྲལ། །ས་ནི་ལྔ་པ་སྦྱངས་དཀའ་ལ། །རྟེན་ནི་བསམ་གཏན་རྡོ་རྗེ་འདྲ། །རྩལ་ནི་བྱིང་རྒོད་རྐྱེན་མི་འབྱུང་། །དགོངས་པའི་དོན་ལ་འབྱུང་འཇུག་མེད། །ས་ནི་དྲུག་པ་མངོན་གྱུར་ལ། །རྟེན་ནི་ཤེས་རབ་སྨན་དང་འདྲ། །སྐྱེ་ཤི་མེད་པའི་ལམ་ཡང་སྟོན། །ཐམས་ཅད་རིག་པ་ཆོས་སྐུར་མཁྱེན། །ས་ནི་བདུན་པ་རིང་སོང་ལ། །རྟེན་ནི་དགེ་བའི་བཤེས་གཉེན་འདྲ། །རྩལ་ནི་དུག་ལ་སྨན་དུ་འགྱུར། །འཁོར་བའི་སྐྱོན་གྱིས་གོས་པ་མེད། །ས་ནི་བརྒྱད་པ་མི་གཡོ་བ། །རྟེན་ནི་སྨོན་ལམ་རིན་ཆེན་འདྲ། །ཤེས་བྱའི་སྒྲིབ་པ་རྩད་ནས་དག །དམ་པར་བལྟ་བ་གང་ཡང་མེད། །དགུ་པ་ལེགས་པའི་བློ་གྲོས་ལ། །རྟེན་ནི་སྟོབས་ཆེན་ཉི་མ་འདྲ། །རྩལ་ནི་ལོག་པ་དབྱིངས་སུ་སྒྲོལ། །སངས་རྒྱས་ས་ལ་ངེས་པར་འགྲོ། །རང་སེམས་ས་ནི་བཅུ་པར་འགྲོ། །རྟེན་ནི་ཡེ་ཤེས་དབྱིངས་དང་འདྲ། །རྩལ་ནི་སྒྲིབ་དག་ཐམས་ཅད་མཁྱེན། །དེ་ལས་བགྲོད་མེད་སངས་རྒྱས་ཉིད། །དེ་ཡང་འདུས་པའི་སྙིང་པོ་ཉོན། །དེ་དག་ས་བཅུའི་རྟེན་ལ་སོགས། །ངོ་བོ་རང་བྱུང་ཆོས་སྐུར་འདུས། །གདུལ་བྱའི་རིམ་པས་བཅུར་བསྟན་ཡང་། །ཡང་དག་ཡེ་ཤེས་ངོ་བོ་ཉིད། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ས་བཅུ་རྫོགས་པར་བསྟན་པའི་ལེའུ་སྟེ་རེ་གཅིག་པའོ།། །།འདུས་པའི་འཁོར་ལ་བཀའ་སྩལ་པ། །སངས་རྒྱས་ཐམས་ཅད་ཀུན་གྱི་དགོངས་པའི་དོན། །ངེས་དོན་མ་ནོར་འདི་རྟོགས་པས། །གདམས་ངག་ཁྱད་པར་ཅན་དུ་འདུས། །དཔེ་དོན་རྟགས་དང་གསུམ་ཀར་འདུས། །དེ་ཡང་འདུས་པའི་སྙིང་པོ་ཉོན། །ལྟ་བ་འཕོ་འགྱུར་མེད་པ་ལ། །སྐྱེ་འགགས་མེད་པའི་རིག་པ་ཤར། །མ་བཅོས་རང་ལུགས་སྤྱོད་པ་བདེ། །རེ་དོགས་མེད་པའི་འབྲས་བུར་གནས། །ཀུན་ཏུ་བཟང་པོའི་དགོངས་པར་གནས། །དཔེ་ནི་ཉི་མའི་སྙིང་པོ་ལ། །འཛམ་གླིང་བྱེ་བ་ཕྲག་བརྒྱ་རུ། །འཆར་ནུབ་ལྡོག་པ་ ― DNG001_Page_0597 ―
[མ་དཔེ་གཟིགས་ན་འདིར་གནོན།]
གྲངས་མང་ཡང་། །ཉི་མ་འདི་ཉིད་གཅིག་པུར་འདུས། །དེ་བཞིན་སངས་རྒྱས་ཐམས་ཅད་ཀྱང་། །མཚན་དང་སྐུ་མདོག་ཕྱག་མཚན་སོགས། །ཆེ་བའི་ཡོན་ཏན་བསམ་ཡང་ཀྱང་། །རིགས་ལྔའི་སངས་རྒྱས་དགོངས་པར་འདུས། །དེ་ཡང་འདུས་པའི་སྙིང་པོ་ཉོན། །རང་བྱུང་རིག་པ་སྐྱེ་མེད་འདི། །མི་འགྱུར་འགགས་མེད་རང་གསལ་བ། །ཡེ་ནས་གནས་པའི་དོན་ཤེས་ཕྱིར། །དེ་ཡང་རྒྱུན་དུ་མི་འབྲལ་བ། །དེ་བཞིན་རིགས་ཀྱི་དགོངས་པ་ཡིན། །ཡང་དག་སངས་རྒྱས་དགོངས་པའི་དོན། །མི་འགྱུར་མི་ཤིགས་རྡོ་རྗེའི་སྐུ། །ཆོས་ཉིད་མ་བཅོས་མ་བསླད་པ། །མི་ཟད་གཏེར་གྱི་དགོངས་པ་སྟེ། །རྡོ་རྗེ་རིགས་ཀྱི་དགོངས་པ་ཡིན། །འདུ་འབྲལ་མེད་པའི་ཡེ་ཤེས་ཐུགས། །ད་ལྟའི་ཤེས་པ་འདི་ཉིད་ལ། །འགྱུར་མེད་ཡེ་ནས་གནས་པ་ནི། །རང་བྱུང་ཡིད་ཆེས་ཀུན་གྱི་གཏེར། །རིན་ཆེན་རིགས་ཀྱི་དགོངས་པ་ཡིན། །ཆོས་སྐུ་མཐའ་ཡས་ཀུན་ཁྱབ་པས། །མ་བྱུང་མ་སྐྱེས་ད་ལྟ་ཉིད། །འཕེལ་འགྲིབ་མེད་པར་རང་གསལ་བ། །པདྨ་རིགས་ཀྱི་དགོངས་པ་ཡིན། །ལུས་ཀྱི་ནང་ན་རང་རིག་པ། །ཆོས་སྐུ་བཞི་ལྡན་རིག་པ་ལ། །དེ་རུ་མ་འདུས་གང་ཡང་མེད། །དེ་ཕྱིར་ཡེ་ཤེས་རྒྱུན་མི་འཆད། །ལས་ཀྱི་རིགས་ཀྱི་དགོངས་པ་ཡིན། །དེ་ཡང་རྡོ་རྗེ་སེམས་དཔའ་ཉོན། །རྟེན་གྱི་རྣལ་འབྱོར་རྟོགས་པའི་དོན། །བྱང་ཆུབ་སེམས་དཔའ་མན་ཆད་ནས། །ཕྱི་རབས་དད་ལྡན་ཡན་ཆད་དུ། །ངེས་ལུང་གདམས་ངག་འདི་ཐོས་པས། །སངས་རྒྱས་ཀུན་དང་དགོངས་པ་མཉམ། །དེ་ཕྱིར་མི་ལུས་སངས་རྒྱས་ཐུགས། །དེ་ཡང་འདུས་པའི་སྙིང་པོ་ཉོན། །དཔེར་ན་མར་མེ་སྟོང་བལྟམ་ཡང་། །འོད་ཀྱི་ངོ་བོ་གཅིག་ཏུ་འདུས། །དེ་བཞིན་འཇུག་སྒོ་ཐ་དད་ཀྱང་། །ངེས་དོན་རང་བྱུང་ཆོས་སྐུ་ལ། །གཞན་ནི་ཁྱད་པར་རྡུལ་ཙམ་མེད། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། སངས་རྒྱས་ཐམས་ཅད་ཀྱི་དགོངས་པ་འདིར་འདུས་པར་བསྟན་པའི་ལེའུ་སྟེ་རེ་གཉིས་པའོ།། །།ཀུན་རིག་སྟོན་པས་བཀའ་སྩལ་པ། །ཆོས་སྐུ་མེ་ལོང་ལྟ་བུ་ལ། །གཟུགས་བརྙན་ཡེ་ཤེས་སྐུ་གསུམ་འབྱུང་། །ང་ཡི་སྤྲུལ་པ་འགྲོ་དོན་དུ། །ཕྱི་ནང་ལ་ཟློས་རྣམ་གསུམ་ཡིན། །ང་ཡི་སྐུ་ཡི་སྤྲུལ་པ་ལས། །ཡེ་ཤེས་སྒྱུ་མའི་སངས་རྒྱས་ནི། །འོད་དཔག་མེད་དང་འོད་མི་འགྱུར། །མར་མེ་མཛད་ལ་སོགས་པ་ཡིས། །སྔོན་གྱི་དེ་བཞིན་གཤེགས་པ་ཡང་། །གྲངས་ཀྱི་མི་ལངས་ ― DNG001_Page_0598 ―
[མ་དཔེ་གཟིགས་ན་འདིར་གནོན།]
བརྗོད་ལས་འདས། །དེ་རྣམས་བཀའ་ཡི་དོན་བཤད་པས། །སྔོན་གྱི་སེམས་ཅན་གྲངས་མེད་ཀུན། །མ་ལུས་སངས་རྒྱས་འཁོར་བ་སྟོངས། །དེ་ཕྱིར་འདས་པའི་སངས་རྒྱས་བྱུང་། །ང་ཡི་གསུང་གི་སྤྲུལ་པ་ལས། །བསྐལ་བཟང་བྱང་ཆུབ་སྟོང་ལ་སོགས། །ད་ལྟའི་སངས་རྒྱས་གྲངས་མེད་ཀྱིས། །བཀའ་ཡི་དྲང་དོན་གསུངས་པ་ཡིས། །ད་ལྟའི་ལྷ་མི་སེམས་དཔའ་ཡིས། །དེ་ཕྱིར་ས་ལམ་རིམ་པ་བྱུང་། །དུས་ཀྱི་མཐའ་ལ་ངེས་པ་མེད། །ང་ཡི་ཐུགས་ཀྱི་སྤྲུལ་པ་ལས། །ཞི་ཁྲོའི་སངས་རྒྱས་བསམ་མི་ཁྱབ། །སྐུ་གསུང་ཐུགས་ཀྱི་དཀྱིལ་འཁོར་ལས། །སེམས་ཅན་བྱ་བའི་མིང་ཡང་མེད། །རྟོག་པ་ལྷ་རུ་གནས་གྱུར་ཕྱིར། །འཁྲུལ་པའི་སྣང་བ་རྡུལ་ཙམ་མེད། །དེ་ཡང་འདུས་པའི་སྙིང་པོ་ཉོན། །ནང་གི་སྤྲུལ་པ་རྣམ་གསུམ་ནི། །གསུང་གི་སྤྲུལ་སྐུ་འབྱུང་བ་ནི། །མཛད་པ་བཅུ་གཉིས་ཚུལ་དུ་ནི། །ཤཱཀ་ཐུབ་ལྷ་མིའི་སྟོན་པ་དེས། །མདོ་སྡེ་འདུལ་བ་མངོན་པའི་ཆོས། །དྲང་དོན་གང་མོས་ལམ་དུ་བྱས། །འབྲས་བུ་ངན་སོང་མི་ལྟུང་ཙམ། །སངས་རྒྱས་བྱང་ཆུབ་ཐོབ་ལ་རེ། །མོས་པའི་སངས་རྒྱས་འབྱུང་བར་འདོད། །ང་ཡི་སྐུ་ཡི་སྤྲུལ་པ་ལས། །རྣམ་པར་སྣང་མཛད་ལོངས་སྐུར་བཞེངས། །ཕྱི་ནང་རིགས་གསུམ་མགོན་པོ་ལ། །ཕྱི་རྒྱུད་ཏནྟྲ་མང་དུ་གསུངས། །དེ་ལྟར་ཚོགས་བསགས་སྒྲིབ་སྦྱང་ཕྱིར། །དམ་ཚིག་ཡེ་ཤེས་མཆོད་ལ་སོགས། །གཞུང་དུ་བྱས་ནས་དངོས་གྲུབ་རེ། །ཐུན་མོང་སངས་རྒྱས་འབྱུང་བར་འདོད། །ང་ཡི་ཐུགས་ཀྱི་སྤྲུལ་པ་ལས། །གཞི་ཉིད་རྟོགས་པའི་སངས་རྒྱས་ནི། །སྐུ་ནི་རང་རིག་ཆོས་ཀྱི་སྐུ། །གསུང་ནི་བརྗོད་མེད་ཚངས་པའི་གསུང་། །ཐུགས་ནི་ཐིག་ལེ་ཉག་གཅིག་གོ། །དེ་ཡང་འདུས་པའི་སྙིང་པོ་ཉོན། །ལ་ཟློས་སྤྲུལ་སྐུ་རྣམ་གསུམ་ནི། །སྐུ་ཡི་སྤྲུལ་པ་རང་ལུགས་ལ། །རྟོགས་ལྡན་ལུས་ལ་ཡེ་ཤེས་ཡོད། །རིན་ཆེན་ག་འུར་བཅུག་པ་བཞིན། །ལུས་ཀྱི་ནང་ན་ཆོས་སྐུ་གནས། །གསང་བའི་གསུང་ནི་བརྗོད་པ་ཡིན། །དོན་ལྡན་ཚིག་ཏུ་སྨྲ་མི་ཤེས། །དེ་དོན་བརྗོད་པས་བརྗོད་མེད་ཕྱིར། །སྨྲས་ཀྱང་རང་བྱུང་ཉིད་ཀྱི་གསུང་། །གསང་བའི་ཐུགས་ནི་རང་བྱུང་ལ། །བེམ་རིག་ཤན་ཕྱེ་ཆོས་ཀྱི་སྐུ། །དེ་ཡང་ཡིད་ཆེས་གདེང་གིས་ཟིན། །དེ་དོན་རྒྱུན་དུ་སྐྱེ་འགགས་མེད། །དེ་ཡང་འདུས་པའི་སྙིང་པོ་ཉོན། ། ― DNG001_Page_0599 ―
[མ་དཔེ་གཟིགས་ན་འདིར་གནོན།]
ཕྱི་ནང་དགུ་རུ་ཕྱེ་བ་ཡང་། །གདུལ་བྱའི་འཁོར་ལ་ཐ་དད་པས། །དོན་ལ་དབྱེར་མེད་གཅིག་གི་ངང་། །རྩ་བ་ཆོས་སྐུ་རྟོགས་པར་གྱིས། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ཆོས་ཀྱི་སྐུའི་སྤྲུལ་པ་གཟུགས་སྐུ་རྣམ་གཉིས་ཀྱིས་གཞན་དོན་བྱེད་པར་བསྟན་པའི་ལེའུ་སྟེ་རེ་གསུམ་པའོ།། །།དེ་ནས་འདུས་པའི་འཁོར་རྣམས་ལ། །འབྲས་བུ་ལྷུན་གྲུབ་བཀའ་སྩལ་པ། །པ་ན་སེ་ཡི་ཤིང་ཐོག་བཞིན། །རྒྱུ་རྐྱེན་འབྲས་བུ་ཐ་དད་མེད། །དེ་བཞིན་གཞི་ལམ་འབྲས་བུ་ཡང་། །ངོ་བོ་གཅིག་ཕྱིར་དབྱེ་རུ་མེད། །དེ་ཕྱིར་རིན་ཆེན་ལྷུན་རྫོགས་ཡིན། །དེ་ཡང་འདུས་པའི་སྙིང་པོ་ཉོན། །ལུང་ལྡན་ངེས་པའི་གདམས་ངག་གིས། །རྟོག་པ་བཞག་པས་མངོན་སངས་རྒྱས། །མ་རིག་མེད་པའི་ཡེ་ཤེས་ལ། །སྐྱེ་བའི་ཕུང་པོ་ལེན་མི་སྲིད། །དེ་ཡང་འདུས་པའི་སྙིང་པོ་ཉོན། །གོང་དུ་བསྟན་པའི་གཞི་ཉིད་དང་། །ཉམས་སུ་བླངས་པའི་ཉམས་དང་ནི། །འབྲས་བུ་མཐར་ཐུག་ཡིན་པའི་ཕྱིར། །ལམ་ཉིད་ལམ་ལ་ལམ་ཉིད་གཞི། །དེ་ཉིད་གཅིག་ཤེས་འབྲས་བུ་མཆོག །དེ་ཉིད་རྒྱུ་འབྲས་རོ་གཅིག་པས། །དམན་པའི་ལུས་ལ་སངས་རྒྱས་ཡིན། །དེ་ཡང་རྡོ་རྗེ་སེམས་དཔའ་ཉོན། །དེ་ལྟར་རྟོགས་པའི་རྣལ་འབྱོར་པས། །དུས་འདིར་ཆོས་ཉིད་བདེན་པ་མཐོང་། །སྤྱན་ལྔ་རིམ་གྱིས་ཅིག་ཅར་དུ། །སྔར་མ་མཐོང་བའི་ཞིང་ཁམས་གསུམ། །ཡེ་ཤེས་མིག་གིས་དུས་གཅིག་མཐོང་། །ལུས་དང་མ་བྲལ་རིག་པ་ལ། །འཆར་ནུབ་མེད་པའི་ཡེ་ཤེས་ཤར། །མ་བསམས་པ་ཡི་ལྷག་མཐོང་ལ། །མི་བརྗེད་པ་ཡི་གཟུངས་ཀྱིས་ཟིན། །མ་ཐོས་པ་ཡི་བདུད་རྩི་མྱང་། །མ་བསྒྲུབས་པ་ཡི་འབྲས་བུ་ཐོབ། །དེ་ཡང་རྡོ་རྗེ་སེམས་དཔའ་ཉོན། །རང་ཉིད་གར་འདུག་ཆོས་ཀྱི་དབྱིངས། །སུ་དང་འགྲོགས་ཀྱང་རྒྱལ་བའི་སྲས། །གང་དུ་འགྲོ་བ་བྱང་ཆུབ་ལམ། །ཐུན་མོང་དངོས་གྲུབ་ཅི་བསམ་འགྲུབ། །ཕྱི་མར་སངས་རྒྱས་སྨོས་ཅི་དགོས། །རྫོགས་པ་ཆེན་པོ་སངས་རྒྱས་ཐམས་ཅད་ཀྱིས་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། གཞི་ལམ་གཅིག་པའི་འབྲས་བུ་བསྟན་པའི་ལེའུ་སྟེ་རེ་བཞི་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་ ― DNG001_Page_0600 ―
[མ་དཔེ་གཟིགས་ན་འདིར་གནོན།]
རྒྱུད་གཏད་པ། །མཐར་ཐུག་ཆོས་ཉིད་ལྷུན་རྫོགས་འདི། །ཐོག་མའི་ཆོས་སྐུ་རྟོགས་པ་ཡིས། །རིག་འཛིན་གྲུབ་པ་ཐོབ་པ་ཡིས། །བཀའ་རྟགས་གདམས་ངག་མ་ཆད་དོན། །ད་ལྟ་མི་བརྗེད་གཟུངས་ཐོབ་ལ། །འཁོར་འདས་མ་རིག་ལྟ་བ་ཡིས། །ཡེ་ནས་ཆོས་ཉིད་རང་ཆས་ལ། །ངེས་པའི་བྱིན་རླབས་རིག་པ་ཡིས། །བསྟན་པས་ཆོས་སྐུ་བཞི་ལྡན་ཕྲད། །ཀུན་གཞི་གཞི་ཆ་རང་གསལ་ལ། །རང་རིག་ཆོས་སྐུར་ངོ་སྤྲོད་པས། །མ་རིག་ཀུན་བརྟགས་མུན་པ་སངས། །རང་གསལ་ཆོས་སྐུ་འགྱུར་བ་མེད། །ཕྱི་ནང་རང་ཤར་བལྟ་སྤྱོད་བསྟན། །ཡུལ་དང་འདྲེལ་ཆོད་གོལ་སྒྲིབ་མེད། །རྐྱེན་གྱིས་མི་ཚུགས་ཆོས་ཉིད་གྲོལ། །དེ་ཕྱིར་འབྲལ་མེད་རྒྱུན་དུ་གནས། །འབྲས་བུ་མངོན་གྱུར་བར་དོ་བྱང་། །བར་མ་ཆོད་པར་སངས་རྒྱ་བས། །སྐུ་གསུམ་དུས་གཅིག་རང་ལ་རྫོགས། །དེ་ཕྱིར་གཞི་རྟོགས་འགྱུར་བ་མེད། །ཡང་དག་རིག་པའི་འཁོར་དོན་ནི། །སྐལ་ལྡན་འདུས་པ་ཁྱེད་ཀྱིས་ཀྱང་། །ངེས་དོན་རྒྱུད་འདི་ཡིད་ལ་ཆོང་། །དེ་ཡང་འཁོར་གྱི་སྙིང་པོ་ཉོན། །ཚུལ་འཆོས་བྱེད་ཅིང་སློབ་དཔོན་སྨོད། །ནོར་ཕོང་ཆོས་འདོད་ཐབས་ཀྱིས་བསླུར། །ངེས་དོན་བཀའ་བགྲོས་རྒྱུད་ཆེན་འདི། །ནམ་ཡང་བསྟན་པར་མ་གསུངས་སོ། །བསྟན་པ་འཇིག་ཀའི་དུས་དེ་རུ། །ཡང་ཏི་སྙིང་པོའི་ཆོས་འདི་འབྱུང་། །དེ་ཚེ་སྐལ་ལྡན་འགའ་འགའ་ལ། །ངེས་དོན་རྒྱུད་འདི་གཏད་པ་ལས། །དོན་མེད་སྣ་ཚོགས་སྤྱོད་ཡུལ་མིན། །ཀུན་གྱིས་ངེས་པ་དེ་ལྟར་ཞོག །དེ་ཡང་འདུས་པའི་སྙིང་པོ་ཉོན། །གང་གིས་དད་ལྡན་རྒྱུད་འདི་ལ། །མོས་ཤིང་གུས་པར་བྱེད་པའི་མི། །དཀའ་དགུ་བསྡོས་ནས་འཚོལ་བ་ལ། །སྦ་བསྲི་མི་བྱ་ཆོས་འདི་བསྟན། །སྙིང་པོའི་ནང་ནས་ཡང་སྙིང་འདི། །གདམས་ངག་མ་ཆད་ངས་ལུང་རྒྱུད། །བདེ་གཤེགས་རྣམས་ཀྱི་ཐུགས་དམ་ཡིན། །དེ་ཡང་འདུས་པའི་སྙིང་པོ་ཉོན། །གཅིག་དང་གཉིས་ལ་སྟོན་སྲིད་ན། །བདེན་པའི་མཚམས་ལས་མི་འདའ་བར། །མཁའ་འགྲོ་ཆོས་སྐྱོང་མཆོད་བྱས་ནས། །གསང་ཐུབ་ཤེས་རབ་ལྡན་པ་ལ། །ཚིག་ཉུང་དོན་འདྲིལ་གདམས་ངག་སྟོན། །དེ་དང་མི་ལྡན་བློང་ན་ནི། །བླ་མ་ལུང་ལྡན་རྫུན་གྱིས་འབྲིད། །ཐབས་ཀྱིས་ཆོས་ཕྲལ་ཟོང་དུ་འཚོང་། །བླ་མ་སྨོད་ཅིང་རང་ཆེ་འབྱིན། །བཀའ་རྐུན་བྱས་ནས་མཁས་སུ་རེ། །སློབ་དཔོན་གསང་ནས་རང་ཆེ་འབྱིན། །དེ་ཡང་རྡོ་རྗེ་སེམས་དཔའ་ཉོན། །ངེས་དོན་གདམས་ངག་མ་ཐོབ་པས། །བསྒོམ་པ་ཉམས་སུ་མྱོང་མི་སྲིད། །འདུས་ ― DNG001_Page_0601 ―
[མ་དཔེ་གཟིགས་ན་འདིར་གནོན།]
བྱས་ཆོས་སྤང་ཡལ་བར་འཇོག །བསོད་ནམས་འདོད་ཕྱིར་ཀུན་ལ་བཤད། །མི་ཡིས་སྨོན་འདོད་ཁ་གསག་ཅན། །ཆགས་ཆུང་ཚུལ་འཆོས་སྣ་ཚོགས་བྱེད། །ཐབས་ཀྱིས་ནོར་འཚོལ་སྐྱོན་སྣ་ཚོགས། །གདམས་ངག་མེད་པར་གསང་བ་སྐད། །ཕག་ཏུ་རྫུན་གྱི་དཔེའུ་ཆུང་འདྲི། །རང་གི་ཆོས་ལ་སྐྱོན་ཡོད་ཕྱིར། །གཞན་ལ་སྐུར་འདེབས་མཐུ་སྡིག་བྱེད། །འབྱོར་ཚད་མ་ཕུལ་མི་རུང་ཟེར། །དེ་ཕྱིར་ཟོག་པོས་མི་རྣམས་བསླུ། །ཕྱི་མ་དམྱལ་བར་ངེས་པར་འགྲོ། །དེ་འདྲའི་དམ་ཉམས་མཐོང་ཐོས་ན། །ནམ་ཡང་འཕྲད་པར་མི་བྱའོ། །དེ་ཡང་འདུས་པའི་སྙིང་པོ་ཉོན། །དེ་ལྟའི་དམ་ཉམས་མི་ངན་ལ། །སློབ་མ་བྱས་ནས་ཆོས་བསྟན་ན། །མཁའ་འགྲོ་ཆོས་སྐྱོང་ཀུན་ཁྲོས་ནས། །རྒྱལ་ཆེན་རིགས་བཞི་ཐོག་ལྟར་བརྡེག །གཙང་རིགས་མགོན་པོ་རླུང་ལྟར་འཚུབས། །མ་མོ་མཁའ་འགྲོ་ཁྱི་ལྟར་ཟུག །རྒྱལ་འགོང་ཆགས་ནས་གནས་མི་རྙེད། །རི་ཙམ་ཟོས་ཀྱང་འགྲང་བ་མེད། །མཚོ་ཙམ་འཐུངས་ཀྱང་ངོམ་མེད་འགྱུར། །ཟས་སྐོམ་བཅུད་མེད་ཁ་བ་འདྲ། །འཇིག་རྟེན་ནོར་བཙལ་རང་བརླག་སྟོང་། །སློབ་མ་སྡང་ཞིང་མི་རྣམས་འཕྱ། །དེ་ཚེ་ཀུན་ལ་ཞེ་སྡང་འགྱུར། །དེ་ཡང་འདུས་པའི་སྙིང་པོ་ཉོན། །གཞན་གྱིས་ལན་པ་མ་ཡིན་ཏེ། །ཐུགས་ཀྱི་དམ་ཚིག་ཉམས་པ་ཡིན། །ཅི་བསམ་མི་འགྲུབ་དགྲ་རྐུན་མང་། །འགོ་བའི་ནད་ཀྱིས་ཐེབས་འགྱུར་ནས། །ཕྱི་མ་རྡོ་རྗེ་དམྱལ་བར་ལྟུང་། །གལ་ཏེ་འགྱོད་དེ་ཐར་འདོད་ན། །གཡོ་སྒྱུ་ཁ་གསག་རྣམས་སྤངས་ནས། །ཞེན་མེད་རང་གི་བླ་མ་ལ། །མོས་གུས་དད་པས་ཡོན་ཕུལ་ནས། །དམ་སྐོངས་འབྲས་བུ་ཅི་བསམ་འགྲུབ། །སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། རྒྱུད་གཏད་པའི་ལེའུ་སྟེ་རེ་ལྔ་པའོ།། །།རྫོགས་པ་ཆེན་པོ་སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། དྷརྨྨ་ཀཱ་ཡ་ས་མཱ་དྷི་པ་ས། གུ་རུ་ཏེ་ཙུ་ཛྙཱ་ན་ཀེ་ཏུ་ཙིཏྟ་ས་མ་ཡ་གྷུ་ཧྱ་རྫོགས་སོ།། །།རྒྱ་གར་གྱི་མཁན་པོ་བི་མ་ལ་མི་ཏྲ་དང་། ཞུས་ཆེན་གྱི་ལོཙྪ་བ་དྲན་པ་ཡེ་ཤེས་ཀྱིས་བསྒྱུར་ཅིང་གཏན་ལ་ཕབ་པའོ།། །། རྫོགས་པ་ཆེན་པོ་ཤིན་ཏུ་རྣལ་འབྱོར་སངས་རྒྱས་ཐམས་ཅད་འབྱུང་བའི་རྒྱུད། ཡེ་ཤེས་ཆོས་ཀྱི་སྐུ་དོན་འདུས་རིག་པའི་གསུང་། གསང་བ་ཐུགས་ཀྱི་ཏིང་ངེ་འཛིན། རང་བྱུང་བདེ་བའི་འཁོར་ལོ་མཐར་ཕྱིན་འབྲས་བུའི་རྒྱུད་ཅེས་བྱ་བ།― DNG001_Page_0602 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། སནྟི་མ་ཧཱ་ཨ་ཏི་ཡོ་ག་བུཌྜྷ་སརྦོ་ད་ཡ་ཏན་ཏྲ། ཛྙཱ་ན་དྷརྨཱ་ཀཱ་ཡཱརྠ་ས་མུ་དཱ་ཡ་བིདྱཱ་ཝཱཀྲ། གུཧྱ་ཙིཏྟ་ས་མཱ་དྷི་སྭ་ཡཾ་བྷུ་སུ་ཁ་ཙཀྲཱནྟ་ག་ཏ་ཕ་ལནྟནྟྲ་ནཱ་མ། བོད་སྐད་དུ། རྫོགས་པ་ཆེན་པོ་ཤིན་ཏུ་རྣལ་འབྱོར་སངས་རྒྱས་ཐམས་ཅད་འབྱུང་བའི་རྒྱུད། ཡེ་ཤེས་ཆོས་ཀྱི་སྐུ་དོན་འདུས་རིག་པའི་གསུང་། གསང་བ་ཐུགས་ཀྱི་ཏིང་ངེ་འཛིན། རང་བྱུང་བདེ་བའི་འཁོར་ལོ་མཐར་ཕྱིན་འབྲས་བུའི་རྒྱུད་ཅེས་བྱ་བ། བཅོམ་ལྡན་འདས་རང་བྱུང་རིག་པའི་རྒྱལ་པོ་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། །ངོ་བོ་ཉིད་རྟོགས་ཀུན་བཟང་དེ། །བདེ་གཤེགས་འོག་མིན་གནས་མཆོག་ན། །རིགས་ལྔ་ལ་སོགས་འཁོར་རྣམས་དང་། །འབྲལ་མེད་དགོངས་པ་ལ་བཞུགས་སོ། །དེ་ཚེ་སེམས་དག་དོན་ཆེད་དུ། །ཡེ་ཤེས་ལྷ་ཡི་རྨི་ལམ་གསུམ། །དེ་ཡི་བརྡའ་ཡི་དོན་བཀྲོལ་ནས། །ལྷ་དབང་གིས་ནི་དོན་བསྐུལ་བ། །དུས་གསུམ་སངས་རྒྱས་མ་ལུས་ཀུན། །གསུང་གི་མངའ་བདག་ཁྱོད་ཡིན་པས། །རྩོལ་བཅས་ཐེག་པ་མཐར་བསྟན་ན། །རྩོལ་མེད་ཐེག་པ་མི་གསུང་བ། །ཐུགས་རྗེ་ཆེན་པོ་ཡལ་ལམ་ཅི། །སྐལ་ལྡན་གདུལ་བྱ་མ་མཆིས་སམ། །ལྷུན་གྲུབ་ཐེག་པ་བཤད་དུ་གསོལ། །སངས་རྒྱས་ཀུན་གྱི་ངེས་པའི་དོན། །རྡོ་རྗེ་སེམས་དཔའ་ཁྱེད་ཡིན་པས། །ཚིག་གཅིག་དོན་ཀུན་རྟོགས་པའི་ཆོས། །བཙལ་མེད་དོན་དང་ཕྲད་པར་ནི། །ཆོས་ཉིད་གནས་ལུགས་ཇི་ལྟ་བ། །སེམས་ཅན་བློ་ཡིས་རྟོགས་པའི་ཐབས། །ངེས་དོན་ཀུན་བཟང་ཆོས་སྐུ་ཡིས། །དུས་འདིར་བདག་ལ་བཤད་དུ་གསོལ། །ཡང་དག་ངེས་དོན་རྒྱུད་ཆེན་འདི། །སྣོད་ངན་རྣམས་ལ་ངས་བཤད་དུ། །རྫོགས་ཆེན་སྐྱེ་མེད་དོན་བཟང་ཡང་། །མ་རྟོགས་པ་ལ་སྡིག་མོར་ཆེ། །དེ་སྐད་གསུངས་པའི་དོན་གོ་ནས། །འཁོར་རྣམས་རབ་ཏུ་གུས་པ་ཡིས། །སེམས་ཀྱི་གདུང་བ་བཏོན་ནས་ནི། །སྣོད་དང་ལྡན་པར་དམ་བཅས་ནས། །དང་བའི་དད་པའི་ཡིད་ཀྱིས་འཁོར། །དེ་ཚེ་སྟོན་པ་ཀུན་བཟང་གིས། །འཁོར་རྣམས་ལ་ནི་ཐུགས་དགོངས་ཏེ། །ཡང་དག་གསང་བའི་ངེས་དོན་འདི། །རང་བྱུང་ཆོས་སྐུས་བྱིན་བརླབས་བཤད། ། ― DNG001_Page_0603 ―
[མ་དཔེ་གཟིགས་ན་འདིར་གནོན།]
རྡོ་རྗེ་སེམས་དཔས་དོན་རིག་ནས། །གཙང་རིས་ལྷ་ཡི་གནས་ཆེན་དུ། །བརྩེར་དགོངས་དུས་ལ་བབ་གྱུར་ནས། །རིག་འཛིན་འཁོར་ལ་དབང་བསྐུར་ཏེ། །ངེས་དོན་རང་གི་ངོ་བོས་བཤད། །དུས་དེར་ཕྱོགས་བཅུའི་སངས་རྒྱས་ལ། །སྤྲུལ་པའི་རིག་འཛིན་སེམས་དག་གིས། །ངེས་དོན་ཐེ་ཚོམ་བཅད་པའི་ཕྱིར། །བདེན་པའི་ཡིད་ཀྱིས་འདི་སྐད་ཞུས། །སེམས་ཉིད་མི་འགྱུར་རྡོ་རྗེ་ལ། །སྐྱེ་ཞིང་འབྱུང་བ་ཇི་ལྟར་ལགས། །གཞི་ཉིད་མི་འགྱུར་རྡོ་རྗེ་ལ། །སྐྱེ་ཤི་ཡོད་པ་མ་ཡིན་ཏེ། །རང་གི་རྣམ་རྟོག་གཟུང་འཛིན་གྱིས། །ཐ་མལ་ལུས་ལ་སྐྱེ་ཤི་བྱུང་། །ཆོས་ཉིད་རྩོལ་བས་མ་བསྒྲུབས་པར། །ཡོན་ཏན་འབྲས་བུ་ཇི་ལྟར་འཆར། །ཏཀྵ་ཀ་ཡི་རྒྱན་བཞིན་དུ། །ཡེ་ནས་གནས་པའི་ཆོས་ཉིད་ལས། །རྒྱུ་འབྲས་མཐར་ཕྱིན་གཞི་ནས་རྫོགས། །ཉི་མའི་འོད་བཞིན་འབྲས་བུ་འབྱུང་། །སེམས་ཉིད་པདྨ་ལྟར་དག་ལ། །གཟུང་འཛིན་དྲི་མས་ཇི་ལྟར་གོས། །པདྨ་འདམ་གྱིས་མི་གོས་ལྟར། །བྱང་ཆུབ་སེམས་ཀྱི་ངོ་བོ་ལ། །གཟུང་འཛིན་དྲི་མ་གཞི་ལ་མེད། །འཁྲུལ་པའི་བློ་ལ་དྲི་མ་བྱུང་། །བཙལ་མེད་སེམས་ཀྱི་རང་བཞིན་ལ། །འགྲོ་དོན་མཛད་པ་ཇི་ལྟར་ལགས། །རང་བྱུང་ཆོས་སྐུར་རྟོགས་གྱུར་ན། །བྱ་བའི་ལས་རྣམས་མི་དགོས་ཏེ། །ནོར་བུ་རིན་ཆེན་རྙེད་པ་བཞིན། །མཛད་པའི་ཕྲིན་ལས་རང་ལས་བྱུང་། །ཚིག་གཉིས་ཆད། ཆོས་ཉིད་ཡེ་ནས་རང་ཆས་ལ། །ཐོས་བསམ་དགོས་པ་མ་ཡིན་ཏེ། །མ་རིག་མུན་པ་བསལ་བའི་ཕྱིར། །ལུང་ལྡན་རྐྱེན་གྱིས་ཡིད་ཆེས་སྐྱེས། །ཆོས་ཉིད་ཡེ་ནས་འོད་གསལ་ལ། །བྱིང་རྒོད་འབྱུང་བ་ཇི་ལྟར་ལགས། །ཆོས་ཉིད་ཡེ་ནས་འོད་གསལ་ཀྱང་། །རྣམ་སྨིན་ལུས་དང་མ་བྲལ་ཕྱིར། །ལོག་ནོན་གདམས་ངག་མེད་པ་ལས། །ཚོགས་བརྒྱད་རྐྱེན་གྱིས་བྱིང་རྒོད་བྱུང་། །ཡེ་ནས་རང་བྱུང་འགྱུར་མེད་ལ། །འཕེལ་འགྲིབ་འབྱུང་བ་ཇི་ལྟར་ལགས། །རང་བྱུང་ཡེ་ཤེས་སྙིང་པོ་ལ། །འཕེལ་འགྲིབ་ཡོད་པ་མ་ཡིན་ཏེ། །མ་རིག་མུན་པ་མ་སེལ་ཕྱིར། །ཀུན་གཞིའི་རྐྱེན་གྱིས་འཕེལ་གྱུར་ཏེ། །གཞི་ལ་ཐོག་མཐའ་མེད་པ་ལ། །འཁོར་འདས་ཐོག་མཐའ་འབྱུང་བ་ཅི། །གཞི་ཉིད་དུས་གསུམ་མི་འགྱུར་ལ། །བློ་ཡིས་ ― DNG001_Page_0604 ―
[མ་དཔེ་གཟིགས་ན་འདིར་གནོན།]
བཅོས་སུ་མི་འདོད་ཕྱིར། །ཡེ་ཤེས་མ་རིག་ཁྱད་པར་ལས། །འཁོར་འདས་གཉིས་ཀྱི་ཐོག་མཐའ་བྱུང་། །གཞི་ལ་སྣང་བ་མེད་པ་ལས། །གློ་བུར་འཁྲུལ་སྣང་ཇི་ལྟར་བྱུང་། །གཞི་ལ་སྣང་མེད་ནམ་མཁའ་འདྲ། །མ་རིག་རྐྱེན་བྱས་གཟུང་འཛིན་གྱིས། །རང་གི་ཞེན་སྣང་འཁྲུལ་པའི་ཕྱིར། །བག་ཆགས་སྣང་བ་སྤྲིན་ལྟར་བྱུང་། །རིག་པ་ཕྱི་ནང་མེད་པ་ལ། །མཉམ་གཞག་རྗེས་ཐོབ་འོང་བ་ཅི། །ཡེ་ཤེས་རིག་པ་འདི་ཉིད་ལ། །མཉམ་གཞག་རྗེས་ཐོབ་གདོད་ནས་མེད། །ངེས་དོན་འདི་མེད་བསྒོམ་ཆེན་ལ། །སྒོ་ལྔའི་ཡིད་ལ་རྗེས་ཐོབ་འབྱུང་། །ངེས་ནི་རིག་འཛིན་སེམས་དག་གིས། །ཞུ་བ་ཞུས་ནས་ཐེ་ཚོམ་ཆོད། །ངེས་རྙེད་མངོན་དགའི་ཕུག་ཏུ་ནི། །ཏིང་ངེ་འཛིན་ལ་སྙོམས་པར་ཞུགས། །དེ་ཚེ་འགྲོ་བའི་དོན་བསྐུལ་བ། །ཁྱོད་ནི་ཤཱཀ་ཐུབ་སྤྲུལ་པ་སྟེ། །འཇིག་རྟེན་གསུམ་ན་འགྲན་ཟླ་མེད། །སངས་རྒྱས་ཆོས་ཀུན་ཐུགས་ལ་རྫོགས། །འདོད་ཁམས་འཛམ་གླིང་སྣོད་ལྡན་ལ། །བསྟན་པ་ཙམ་གྱིས་རྟོགས་པའི་ཆོས། །སྡེབ་སྦྱོར་ལེགས་པའི་ཚིག་ཏུ་གསུངས། །ངེས་དོན་གསང་བའི་རྒྱུད་ཆེན་འདི། །རང་གི་སེམས་ལ་གསལ་བ་ལས། །ཚིག་གི་ཐོག་ཏུ་མི་ཕེབས་ཕྱིར། །བདག་གིས་བགྲོ་བ་ཤིན་ཏུ་དཀའ། །ཡང་དག་ངེས་དོན་དགོངས་པ་དེ། །མ་རྟོགས་པ་ལ་ཚིག་སྒོ་ནས། །མཚོན་ནས་རྟོགས་པར་བྱ་བའི་ཕྱིར། །ཅི་རིགས་པར་ནི་ཁྱོད་ཀྱིས་གསུངས། །ལྷ་དབང་བཀའ་གཉན་དྲིན་ཆེ་བས། །མི་ཡུལ་འཛམ་གླིང་དད་ལྡན་གྱི། །མ་རིག་མུན་པ་བདག་གིས་བསལ། །བདེ་གཤེགས་རྣམས་ཀྱི་བྱིན་གྱིས་རློབས། །ངེས་པའི་དོན་ལྡན་སློབ་མ་ལ། །ངེས་དོན་གསང་བའི་རྒྱུད་ཆེན་འདི། །མ་བསླད་མ་བཅོས་འཆད་ནུས་ན། །བདེ་གཤེགས་འཁོར་གྱིས་བསྲུང་ཞིང་སྐྱོབ། །དེ་སྐད་ཞུས་པའི་དོན་གསན་ནས། །རིག་འཛིན་སེམས་དག་དགྱེས་གྱུར་ཏེ། །སྐལ་ལྡན་འདུལ་བའི་དོན་ཆེད་དུ། །ངང་པ་གསེར་མདོག་སྐུར་སྤྲུལ་ཏེ། །བྱང་ཆུབ་མོ་ཡི་བུར་སྐྱེས་ནས། །ཡོན་ཏན་ཡ་མཚན་ཅན་གྱུར་ཏེ། །འབྲལ་མེད་རྒྱུན་གྱི་ཏིང་འཛིན་ལ། །བདེ་ལྡན་གནས་སུ་མཉམ་པར་གཞག །དུས་དེར་ལོག་སྲེད་དྲེགས་པ་ ― DNG001_Page_0605 ―
[མ་དཔེ་གཟིགས་ན་འདིར་གནོན།]
ཅན། །བར་ཆད་བྱ་ཕྱིར་དྲེད་བསྡིགས་པ། །ངེས་དོན་བལྟ་བས་ཟིལ་མནན་པས། །དྲེད་ཅིང་སྔངས་བརྒྱལ་དྲན་ཉམས་ཏེ། །ལུས་ངག་གདུང་བས་དོན་གསོལ་པ། །སྙིང་རྗེ་ཆེན་པོས་བདག་ལ་གཟིགས། །མ་རིག་ལས་ཀྱིས་སྲིན་པོར་སྐྱེས། །སེམས་ཅན་ལུས་སྲོག་ཟས་སུ་ཟོས། །ལས་ངན་འགྱོད་པའི་ཡིད་ཀྱིས་བཤགས། །ཉིད་ཀྱི་བསྟན་པ་བདག་གིས་བསྲུང་། །དམ་ཉམས་ལུས་སྲོག་ཟས་སུ་བསླང་། །བདག་གི་རང་སྲོག་སྙིང་པོ་འདི། །འབུལ་གྱིས་ཐུགས་རྗེ་མ་ཆུང་ཞིག །དེ་སྐད་ཞུས་པའི་དོན་གོ་ནས། །རིག་འཛིན་སེམས་དཔའ་ཆེན་པོ་དེས། །རྒྱུད་འདིའི་སྲུང་མར་དམ་བཏགས་ཏེ། །ཕྱི་རབས་རྣལ་འབྱོར་དོན་ཆེད་དུ། །དབབ་བཅད་བཟློག་དང་བྱས་པ་བཤིག །དམ་ཉམས་སྲོག་ལ་དབབ་པ་ཡི། །གསང་བའི་མན་ངག་རྣམ་བཞི་བྱས། །ཐུགས་ལ་བཅངས་ཏེ་ཡིད་ལ་སྦས། །དེ་ནས་ཤཱཀ་ཐུབ་སྤྲུལ་པ་དེས། །འཛམ་གླིང་བདེ་ལྡན་གནས་དག་ཏུ། །ད་ལྟ་དུས་ཀྱི་དེང་སང་ན། །གསང་བདག་སྤྲུལ་པ་དད་ཉན་ལ། །སྡེབ་སྦྱོར་ལེགས་པའི་ཚིག་ཏུ་གསུངས། །དེ་ཡང་འདུས་པའི་འཁོར་རྣམས་ཉོན། །ཀུན་བཟང་ང་ཡི་བྱིན་རླབས་ཀྱིས། །བཤད་དུས་དེ་དག་རྣམ་པ་གསུམ། །གདུལ་བྱའི་འཁོར་ལ་ཐ་དད་ཀྱང་། །དུས་གསུམ་གཅིག་སྟེ་ཁྱད་མེད་ཕྱིར། །རིམ་པར་དབྱེར་མེད་ངོ་བོ་གཅིག །དེ་སྐད་གསུངས་པའི་དོན་གོ་ནས། །སྐལ་ལྡན་འདུས་པ་རྣམས་ཀྱིས་ཀྱང་། །གུས་ལྡན་དང་བས་རྩེ་གཅིག་ཏུ། །དད་ཅིང་མོས་པའི་ཡིད་ཀྱིས་འཁོད། །རྫོགས་པ་ཆེན་པོ་ཤིན་ཏུ་རྣལ་འབྱོར་སངས་རྒྱས་ཐམས་ཅད་འབྱུང་བ་རང་བྱུང་བདེ་བའི་འཁོར་ལོ་མཐར་ཕྱིན་འབྲས་བུའི་རྒྱུད་ལས། ངེས་དོན་འབྱུང་བའི་རྒྱུད་ཀྱི་གླེང་གཞི་བསྟན་པའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ངེས་དོན་བཤད་དུས་གང་ལ་བབ། །སྣོད་བཅུད་རིམ་པ་གང་ལ་བསྟན། །ཚིག་དང་ཡི་གེས་ཇི་ལྟར་ ― DNG001_Page_0606 ―
[མ་དཔེ་གཟིགས་ན་འདིར་གནོན།]
མཚོན། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལེགས་སོ་དད་ལྡན་འཁོར་རྣམས་ཉོན། །དེ་དོན་ངས་བཤད་ཡིད་ཀྱིས་ཟུང་། །ངེས་དོན་བཤད་པའི་དུས་དེ་ཡང་། །ཉན་ཐོས་རང་རྒྱལ་མདོ་སྡེའི་ཆོས། །སྡེ་སྣོད་གསུམ་གྱི་ཆོས་དར་ཚེ། །ངེས་དོན་གསང་བའི་རྒྱུད་བཤད་ན། །སྣོད་ངན་རྣམས་ནི་སྐྲག་ཕྱིར་ལྟུང་། །དེ་བས་མན་ངག་ངེས་དོན་འདི། །འབྱུང་བའི་དུས་ལ་མ་བབ་པར། །རིག་འཛིན་རྣམས་ཀྱིས་སེམས་ལ་ཆོངས། །དེ་སྦས་ཡོན་ཏན་སངས་རྒྱས་འབྱུང་། །དེ་ཡང་རྡོ་རྗེ་སེམས་དཔའ་ཉོན། །དུས་ཀྱི་ཐ་མ་ལྔ་བརྒྱ་ན། །མནའ་ཟ་ཁྲིམས་འཆལ་དམ་ཉམས་འབྱུང་། །མཚོན་དང་མུ་གེས་ཚེ་ཐུང་དུས། །རྫོགས་ཆེན་སྙིང་པོ་དུས་དེར་བཤད། །ལན་གཅིག་དུས་ཀྱི་དེང་སང་ན། །སངས་རྒྱས་བསྟན་པ་འཇིག་ཀའི་ཚེ། །འཛམ་གླིང་བོད་ཀྱི་བྱང་ཕྱོགས་སུ། །རྒྱུད་དང་ཏནྟྲ་མང་པོ་འབྱུང་། །ལུང་དང་སེམས་ཀྱི་ཆོས་དར་ཏེ། །སྡེ་སྣོད་ཆོས་ཀུན་ནུབ་གྱུར་ནས། །དེ་ཚེ་སྐལ་ལྡན་འགའ་འགའ་ལ། །བསྟན་པ་ཙམ་གྱིས་རྟོགས་པ་ཡི། །འབྲས་བུའི་སངས་རྒྱས་དུས་དེར་འབྱུང་། །དེ་ཡང་འཁོར་གྱི་སེམས་དཔའ་ཉོན། །ངེས་པའི་ལུང་ལྡན་བླ་མ་ལ། །བསླབ་པའི་ཆོས་བཅུ་རྫོགས་པ་དང་། །མ་ནོར་ངེས་པའི་མན་ངག་རྒྱུན། །མ་ཆད་གཞུང་སྟོན་མཁས་ལ་ཞུས། །དེ་ཡང་རྡོ་རྗེ་སེམས་དཔའ་ཉོན། །སློབ་མ་དམ་མེད་ལ་བསྟན་ན། །ཁྱད་མེད་ཟེར་ཞིང་སྒྲོ་སྐུར་འདོགས། །དེ་ཕྱིར་ངེས་དོན་འདི་མི་བསྟན། །མི་གུས་ཕྱིར་ན་སྐུའི་དམ་ཉམས། །གཡོ་སྒྱུ་ཅན་གྱི་མི་ངན་ལ། །མན་ངག་མ་བསྟན་བར་དུ་ཡང་། །ངེས་དོན་ཟབ་མོའི་ཆོས་མི་བཤད། །མི་གོ་ཕྱིར་ན་གསུང་དམ་ཉམས། །དད་མེད་ཁ་གསག་ཅན་ལའང་། །ཐུགས་འཐད་ཡོད་རྣམས་མ་རྫོགས་པར། །ཡང་དག་ཟབ་མོའི་རྒྱུད་མི་སྦྱིན། །གཞུང་ངན་བྱེད་ཕྱིར་ཐུགས་དམ་ཉམས། །དེ་ཡང་འདུས་པའི་སྙིང་པོ་ཉོན། །དད་ལྡན་སློབ་མ་བརྩེ་གདུང་ཅན། །མངགས་པའི་ལས་ལ་གུས་པར་བྱེད། །ཡིད་འཐད་རྫས་ལ་ཕངས་མེད་ ― DNG001_Page_0607 ―
[མ་དཔེ་གཟིགས་ན་འདིར་གནོན།]
འབུལ། །མི་སྤེལ་གཉེར་ཐུབ་རྣམས་ལ་བཤད། །དེ་དང་མི་ལྡན་སྣོད་ངན་ནི། །གྱོང་ལ་ཁེངས་པའི་ང་རྒྱལ་ཅན། །སེར་སྣ་ཆེ་ལ་གཏོང་ཕོད་ཆུང་། །མན་ངག་བསྲེས་ཏེ་ཀུན་ལ་སྟེར། །ཕྱི་ཐག་ཐུང་ཞིང་བླ་མ་སྨོད། །ཟས་ལ་ངན་ལ་ནོར་དད་ཆེ། །རྣམ་སྨིན་མི་བལྟ་གྲགས་པ་བསྒྲུབ། །ཕྱི་ནང་མེད་པར་འཕྱར་ཁ་གཏོང་། །དེ་དག་སྣོད་ངན་མི་རྣམས་ལ། །ཡང་དག་ངེས་དོན་འདི་བསྟན་ན། །མཁའ་འགྲོ་རྣམས་ཀྱིས་སྲོག་བཅད་ནས། །ཕྱི་མ་རྡོ་རྗེ་དམྱལ་བར་ལྷུང་། །དེ་ཕྱིར་མ་བརྟགས་ཆོས་མི་བཤད། །དེ་ཡང་རྡོ་རྗེ་སེམས་དཔའ་ཉོན། །ཚིག་དང་ཡི་གེས་དོན་མཚོན་ཏེ། །མན་ངག་སྙིང་པོས་ཁོག་ཕུབ་ནས། །དོན་དང་མི་འགལ་ས་བཅད་ལ། །ཚིག་ཉུང་དོན་དུ་རྫོགས་པར་མཚོན། །དེ་ལྟར་མི་ཤེས་གང་ཟག་གིས། །དོན་མེད་ཚིག་གིས་གོང་འོག་དཀྲུགས། །རྩལ་བཤད་ཐོ་ཆོས་གཞུང་ཉམས་བྱེད། །མཚམས་མེད་སྡིག་པའི་ཆར་མི་ཕོད། །རྫོགས་པ་ཆེན་པོ་དོན་འདུས་རང་བྱུང་བདེ་བ་འཁོར་ལོའི་རྒྱུད་ལས། རྐྱེན་སྣོད་བཅུད་བསྟན་པའི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་སེམས་ཀྱི་རྒྱལ་པོ་ལ། །ངེས་པའི་དགོས་དོན་འདི་སྐད་གསོལ། །ཆོས་སྐུ་རང་ཆས་ཡེ་གནས་ཀྱང་། །མ་རྟོགས་འཁོར་བས་ཇི་ལྟར་འཆིངས། །མ་རིག་སེམས་ཀྱི་མུན་གསེབ་ན། །ཐིག་ལེ་ཉག་གཅིག་ཇི་ལྟར་ཡོད། །ཀུན་གཞིའི་རྣམ་གྲངས་དབྱེ་བ་གང་། །ཐེག་བརྒྱད་མི་གྲོལ་ཇི་ལྟར་གོལ། །ཐུགས་རྗེས་གཟེངས་བསྟོད་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །ཆོས་ཀུན་རྩ་བ་ཡེ་སངས་རྒྱས། །སྐྱོན་གྱི་སྤྲོས་པའི་མཐའ་བྲལ་ཀྱང་། །མ་རིག་ཀུན་གཞི་བག་ཆགས་ལུས། །འཁོར་བ་འབྱུང་བའི་རྩ་བར་བཤད། །དཔེར་ན་མེ་ལོང་གཡའ་བཞིན་དུ། །ཤེས་པ་ཆོས་སྐུ་ཉག་གཅིག་ལ། །གང་གི་རང་བློ་མ་ཞུགས་པ། །གཏི་མུག་མུན་པར་འཐིབས་པ་སྟེ། །ས་ཞག་ཆུ་འདྲས་རྙོག་མ་བཞིན། །སྤྱད་པས་མ་ཤེས་མ་རིག་རྒྱུ། །ཀུན་ཏུ་བརྟགས་པའི་རྟོག་པ་རྣམས། །རྐྱེན་གྱིས་ལོག་པར་བལྟ་བ་སྟེ། །ཕྲ་རགས་ཚུལ་ལས་ཀུན་ ― DNG001_Page_0608 ―
[མ་དཔེ་གཟིགས་ན་འདིར་གནོན།]
གཞི་འབྱུང་། །སྔ་མའི་རྟོག་པ་བག་ཙམ་ལ། །ཕྱི་མའི་ཉོན་མོངས་རྒྱུན་ཆགས་པས། །ཀུན་གཞི་ལ་བསགས་བག་ཆགས་བྱུང་། །དེ་ལྟས་དུག་ལྔ་ཉོན་མོངས་བསྐྱེད། །རང་གར་སྤྱོད་པས་འགྲོ་དྲུག་གི། །བཟང་ངན་བདེ་སྡུག་སྣ་ཚོགས་བྱུང་། །ལུས་ངན་བླངས་པས་ཐར་པ་མེད། །ཁམས་གསུམ་སྡུག་བསྔལ་གདོས་ཐག་ཅན། །མཐའ་ཡས་སེམས་ཅན་བགྲང་མི་ལང་། །འཁོར་བ་ཞེས་ནི་དེ་ལ་བྱ། །རྫོགས་པ་ཆེན་པོ་དོན་འདུས་རང་འབྱུང་བདེ་བའི་འཁོར་ལོའི་རྒྱུད་ལས། མ་རྟོགས་འཁོར་བའི་བྱུང་ཚུལ་བསྟན་པའི་ལེའུ་སྟེ་གསུམ་པའོ།། །།དེ་ནས་མ་རྟོགས་འཆིང་བ་ཡི། །སྐྱོན་གྱི་རྩ་བ་བཀའ་སྩལ་པ། །འཁྲུལ་པ་མ་ལོག་སེམས་ཅན་རྣམས། །བདུད་རྩིའི་འཚོ་བའི་སྨན་ཡོད་ཀྱང་། །མ་ཕན་དུག་གི་ནད་ཀྱིས་གཟིར། །སྒྲོན་མེའི་ཡེ་ཤེས་གསལ་ཡོད་ཀྱང་། །མ་རིག་མུན་པའི་འཁོར་བར་འཁྱམས། །དགོས་དགུའི་ཡོན་ཏན་ཡོད་གྱུར་ཀྱང་། །ཟས་ནོར་འཚོ་བས་རྟག་ཏུ་མནར། །གོང་དུ་འདྲེན་པའི་ལམ་ཡོད་ཀྱང་། །ཐར་མེད་འཁོར་བའི་དོང་དུ་ཞུགས། །ཡེ་ཤེས་བདེ་བའི་ཟམ་ཡོད་ཀྱང་། །ཆུ་བོ་བཞི་ཡི་མཐའ་ལ་གཏུགས། །ལུས་ངག་ཡིད་ཀྱི་ལས་འབད་ཀྱང་། །རྩོལ་བའི་སྡུག་བསྔལ་ཟད་མཐའ་མེད། །གང་ལྟར་བགྲོད་ཅིང་གར་ཕྱིན་ཡང་། །འཁོར་བའི་མཐའ་ལ་ཟད་པ་མེད། །དེ་ཡང་རྡོ་རྗེ་སེམས་དཔའ་ཉོན། །ཡེ་ཤེས་མ་འཁྲུལ་མ་རིག་འཁྲུལ། །ཐིག་ལེ་མ་འཁྲུལ་དངོས་པོ་འཁྲུལ། །སངས་རྒྱས་མ་འཁྲུལ་སེམས་ཅན་འཁྲུལ། །རང་བྱུང་མ་འཁྲུལ་གཞན་བྱུང་འཁྲུལ། །རིག་པ་མ་འཁྲུལ་གཟུང་འཛིན་འཁྲུལ། །སྣང་བ་མ་འཁྲུལ་ཀུན་བརྟགས་འཁྲུལ། །ཆོས་ཉིད་མ་འཁྲུལ་ཆོས་ཅན་འཁྲུལ། །མ་རྟོགས་པ་ཡི་སེམས་ཅན་ལ། །ཆོས་སྐུ་ཡོད་ཀྱང་མི་གྲོལ་འཆིང་། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མ་རྟོགས་པའི་སྐྱོན་གྱིས་འཆིང་བར་བསྟན་པའི་ལེའུ་སྟེ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །མ་རིག་སེམས་ཀྱི་མུན་པ་ནི། །སྤོང་སྡུད་ཞེན་ ― DNG001_Page_0609 ―
[མ་དཔེ་གཟིགས་ན་འདིར་གནོན།]
པའི་རྟོག་པ་དང་། །བག་ཆགས་ཉོན་མོངས་འཁོར་བ་སྟེ། །དེ་བྲལ་ཐིག་ལེ་ཆོས་སྐུ་ཡིན། །དེ་ཡང་རྡོ་རྗེ་སེམས་དཔའ་ཉོན། །སྤོང་བའི་རྟོག་པ་སྐྱེས་པའི་ཚེ། །འདུ་བྱེད་ལྔ་བཅུ་སྐར་ཕྲན་འདྲ། །ཚོགས་བརྒྱད་སྐྱེ་འགགས་ཟླ་བ་འདྲ། །ཀུན་གཞི་ནམ་མཁའི་སྤྲིན་དང་འདྲ། །དེ་ཀློང་ཐིག་ལེ་ཉག་གཅིག་ཡོད། །དཔེར་ན་ཉི་མའི་འོད་བསྒྲིབས་འདྲ། །རང་ལས་སྐྱེས་པའི་སྒྲིབ་པ་རྣམས། །སྤངས་པས་མི་སྤོང་གྲིབ་མ་འདྲ། །དེ་ཕྱིར་སྤོང་བའི་རྟོག་པ་གོལ། །དེ་ཡང་འདུས་པའི་སྙིང་པོ་ཉོན། །སྡུད་པའི་རྟོག་པ་སྐྱེས་པའི་ཚེ། །འདུ་བྱེད་མཚོ་ཁའི་ངང་ངུར་འདྲ། །ཚོགས་བརྒྱད་ཉ་ལ་སྲམ་སྡོད་འདྲ། །ཀུན་གཞི་རྒྱ་མཚོ་ཆེན་པོ་འདྲ། །ནང་ན་ཐིག་ལེ་ཉག་གཅིག་བཞུགས། །དཔེ་ནི་ཨུ་དུམ་ཝ་ར་འདྲ། །ཁ་ནས་མི་མངོན་གཏིང་ན་གནས། །དེ་བཞིན་ཡུལ་དང་འདྲེལ་མེད་ཕྱིར། །དེ་བསད་ཤ་ལ་ཟོས་པ་མེད། །སེམས་ཡིད་ཆོས་ཀྱིས་སངས་མི་རྒྱ། །དེ་ཕྱིར་སྡུད་པའི་རྟོག་པ་གོལ། །དེ་ཡང་རྡོ་རྗེས་སེམས་དཔའ་ཉོན། །ཞེན་པའི་རྟོག་པ་སྐྱེས་པའི་ཚེ། །འདུ་བྱེད་ལྔ་བཅུ་ནགས་ཚལ་འདྲ། །རྣམ་ཤེས་ཚོགས་བརྒྱད་རི་དྭགས་འདྲ། །ཀུན་གཞིའི་བག་ཆགས་རྩྭ་གྲངས་འདྲ། །དེ་ཡི་གསེབ་ན་ཆོས་སྐུ་བཞུགས། །དཔེ་ནི་སེང་གེ་དཀར་མོ་འདྲ། །གཞན་གྱིས་མཐོང་བ་མེད་པ་བཞིན། །དངོས་པོའི་ཡུལ་ལ་བྱང་ཆུབ་མེད། །དེ་ཕྱིར་ཞེན་པའི་རྟོག་པ་གོལ། །དེ་ཡང་འདུས་པའི་སྙིང་པོ་ཉོན། །སྔར་གྱི་བག་ཆགས་དྲན་པའི་ཚེ། །འདུ་བྱེད་ལྔ་བཅུ་ཆུ་ལྟར་འབྲུབ། །རྣམ་ཤེས་ཚོགས་བརྒྱད་མེ་ལྟར་འབར། །ཀུན་གཞིའི་བག་ཆགས་ས་ལྟར་རྫིངས། །དེ་གསེབ་ཐིག་ལེ་ཉག་གཅིག་བཞུགས། །དཔེ་ནི་རིན་ཆེན་གསེར་དང་འདྲ། །དེ་ཉིད་རྙེད་པར་དཀའ་བའི་ཕྱིར། །བག་ཆགས་དགེ་སྡིག་བསགས་པའི་ལས། །སེམས་ལ་འཛིན་པ་ཡོད་ཕྱིར་གོལ། །དེ་ཡང་འཁོར་གྱི་སྙིང་པོ་ཉོན། །ཕྱིས་ཀྱི་ཉོན་མོངས་སྐྱེས་པའི་ཚེ། །འདུ་བྱེད་ལྔ་བཅུ་རླུང་ལྟར་འཚུབས། །རྣམ་ཤེས་ཚོགས་བརྒྱད་དགྲ་ལྟར་རྒོད། །ཀུན་གཞིའི་ཉོན་མོངས་མུན་ལྟར་གཏིབས། །དེའི་དབྱིངས་ཐིག་ལེ་ཆོས་སྐུ་ཡོད། །དཔེར་ན་རིན་ཆེན་འདམ་བྱིང་འདྲ། །མ་རིག་ཉོན་མོངས་སྐྱེས་པའི་ཚེ། །འཁོར་བའི་མཐའ་ལ་ཟད་པ་མེད། །དེ་ཕྱིར་ ― DNG001_Page_0610 ―
[མ་དཔེ་གཟིགས་ན་འདིར་གནོན།]
ཕྱི་མའི་རྒྱར་ཆུད་གོལ། །དེ་ཡང་འཁོར་གྱི་སྙིང་པོ་ཉོན། །སྔ་ཕྱིའི་རྟོག་པ་སྐྱེས་པ་ཡིས། །སེམས་དང་སེམས་བྱུང་ལ་སོགས་པ། །མ་རིག་འཁྲུལ་པས་རྟག་ཏུ་མྱོས། །དེ་ཕྱིར་ཀུན་གཞི་འཁོར་བའི་ཆོས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སེམས་ཀྱི་མུན་གསེབ་ན་ཐིག་ལེ་ཉག་གཅིག་ཡེ་ནས་ཡོད་པར་བསྟན་པའི་ལེའུ་སྟེ་ལྔ་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །སེམས་ཅན་ཀུན་ལ་གནས་པ་ཡི། །ཀུན་གཞིའི་རྣམ་གྲངས་དབྱེ་བའི་དོན། །ཐེག་པ་ཀུན་གྱི་འདོད་གཞུང་གི། །ངོ་བོ་དབྱེ་བ་ངེས་ཚིག་ལས། །ཀུན་གཞིའི་རྣམ་ཤེས་ངོ་བོ་ནི། །རང་རིག་གསལ་བའི་ཤེས་པ་དེ། །ཤེལ་སྒོང་ལྟ་བུར་དག་པ་ལ། །སྐད་ཅིག་རྒྱུན་དུ་རྟག་པ་ཡིན། །ཀུན་གཞི་བྱང་ཆུབ་སེམས་ཀྱི་ངང་། །སུས་ཀྱང་མ་བྱས་རང་བཞིན་གནས། །དེ་དོན་ཡོངས་ལ་ཁྱབ་པའི་དབྱིངས། །གནས་འགྱུར་མེ་ལོང་ཡེ་ཤེས་རྫོགས། །ཡང་དག་ཨ་ཏི་ངེས་དོན་ལ། །མ་རིག་ལོག་ལྟའི་བག་ཆགས་རྣམས། །རང་བཞིན་གནས་ནས་ཀུན་ཁྱབ་ཀྱང་། །རྣམ་དག་དེ་བཞིན་གཤེགས་པ་ལ། །ཀུན་གཞིའི་བག་ཆགས་མེད་ཕྱིར་རོ། །དེ་ཡང་རྡོ་རྗེ་སེམས་དཔའ་ཉོན། །དེ་ཡང་ཀུན་གཞིའི་རྣམ་ཤེས་ལ། །ལུས་ཀྱི་ཀུན་གཞིར་བཏགས་པས་ན། །སྐྱེས་བུའི་མཚན་དང་དཔེ་བྱད་དང་། །འཇག་མའི་སྲིན་བུ་ཡན་ཆད་ཀྱི། །ལུས་སུ་སྣང་བའི་དངོས་པོ་ནི། །ཀུན་གཞིར་མ་བྱུང་གཅིག་ཀྱང་མེད། །སེམས་ནི་ཡུལ་ལ་དམིགས་པ་སྟེ། །དེ་ལ་ངར་འཛིན་ཕྲ་བས་བྱས། །དེ་མེད་དེ་ཡང་མི་འབྱུང་ཕྱིར། །ཉོན་མོངས་སེམས་ཀྱི་ཀུན་གཞིར་བཏགས། །སྔར་གྱི་བག་ཆགས་ཇི་སྙེད་པ། །དེ་ཉིད་རྣམ་པར་རྟོག་ལས་བྱུང་། །རྟོག་པ་ཡིད་ཀྱི་རྣམ་ཤེས་ཡིན། །དེ་ཕྱིར་བག་ཆགས་ཀུན་གཞིས་བྱས། །རང་བཞིན་དག་པའི་ཀུན་གཞི་ནི། །ཀུན་ལ་ཁྱབ་པའི་རང་ཉིད་ཀྱིས། །རང་བཞིན་ཡེ་སངས་རྒྱས་པ་སྟེ། །སུས་ཀྱང་མ་བྱས་བཙལ་དུ་མེད། །རང་བྱུང་བདེ་ཆེན་མ་རྟོགས་ཤིང་། །མ་རིག་རྟོག་པའི་བརྡའ་སྦྱོར་གྱིས། །འབྲས་བུ་གང་ཡང་ ― DNG001_Page_0611 ―
[མ་དཔེ་གཟིགས་ན་འདིར་གནོན།]
འགྲུབ་པ་མེད། །སྣ་ཚོགས་བསགས་པའི་ཀུན་གཞི་ཡིན། །ཀུན་གཞི་སྤང་སྡུད་བརྟགས་པའི་རྐྱེན། །སྒོ་ལྔ་སྣང་བའི་ཡུལ་ཡིན་ཀྱང་། །དེ་ཉིད་ཡིད་ཀྱིས་མ་བཅད་པ། །ཀུན་གཞི་ཡིན་ཀྱང་རྣམ་ཤེས་མིན། །དེ་ཡང་ཡིད་ཀྱི་རྣམ་ཤེས་ཀྱིས། །བག་ཆགས་སྣ་ཚོགས་བགོས་གྱུར་ཀྱང་། །བག་ཆགས་བརྟས་པར་མི་ནུས་པས། །རྣམ་ཤེས་ཡིད་ཀྱང་ཀུན་གཞི་མིན། །རྣམ་ལྔ་ཅིར་ཡང་སྣང་བ་ལ། །གཉིས་མེད་ཡོངས་སུ་འདྲིས་པ་དང་། །ཚོགས་བརྒྱད་འདུས་ཤིང་འཛོམ་པ་ལ། །ཀུན་གཞིའི་རྣམ་ཤེས་ཡིན་ཞེས་བྱ། །དེ་ཡང་རྡོ་རྗེ་སེམས་དཔའ་ཉོན། །ཕྱི་ནང་སྣང་གྲག་ཇི་སྙེད་པ། །ཀུན་གྱི་འབྱུང་གནས་ཀུན་གཞི་ལ། །བག་ཆགས་བརྟས་པས་འབྱུང་བའི་ཕྱིར། །འཁོར་བ་མྱ་ངན་འདས་པ་ཡང་། །མི་དགེའི་ལས་དང་བསོད་ནམས་ཚོགས། །དམིགས་པའི་སྟོབས་རྫོགས་མངོན་གྱུར་པས། །ཐམས་ཅད་དེ་ལས་བྱུང་བས་ན། །དེ་ཡི་ཕྱིར་ན་ཀུན་གཞི་བྱ། །ཀུན་གཞི་འཁོར་བ་འབའ་ཞིག་ལས། །མྱ་ངན་འདས་པར་མིང་མི་གྲག །མ་རིག་བརྟས་པས་གཉིད་འདྲིས་དང་། །མ་རིག་མ་བྱུང་འཁོར་མེད་ཕྱིར། །ཀུན་གཞི་ཞེས་ནི་དེ་ལ་བྱ། །བྱང་ཆུབ་སེམས་དཔའི་ས་ལམ་ཀྱང་། །བྱེ་བྲག་རིམ་པར་ཕྱེ་བ་ནི། །དྲང་བའི་དོན་དུ་གསུངས་པར་ཟད། །དོན་ལ་བྱང་ཆུབ་སེམས་དཔའ་མེད། །མཚན་དང་ཡོན་ཏན་ཅི་བརྗོད་པ། །འགྲོ་དོན་དེ་བཞིན་གཤེགས་པ་ཉིད། །དེ་ལྟར་སྤྲུལ་ཅིང་དངོས་མེད་དེ། །བརྗོད་པ་དོན་ཡོད་གཤེགས་པར་སྣང་། །སངས་རྒྱས་ཀུན་གཞིའི་མིང་དང་བྲལ། །དེ་ཡང་རྡོ་རྗེ་སེམས་དཔའ་ཉོན། །ད་ནི་ཀུན་གཞིའི་རྣམ་ཤེས་ཀྱང་། །ལས་ཀྱིས་མ་བསྒྲིབས་ལུང་མ་བསྟན། །ངོ་བོ་ཤེལ་སྒོང་ལྟ་བུ་ལ། །དགེ་སྡིག་གང་དུའང་མ་ངེས་ཕྱིར། །ཤེས་པ་རང་རིག་གསལ་གྱུར་ཀྱང་། །མ་བསྒྲིབས་བག་ཆགས་ཅི་སྟེ་འཇོག །མ་བསྒྲིབས་ཡེ་ཤེས་སྒྲིབ་ཉོན་ཡིན། །རྟེན་ནི་གང་གི་རྟེན་ཀྱང་བྱེད། །ཡིན་ནི་དགེ་སྡིག་གང་ཡང་མིན། །དེ་ཕྱིར་བསྒྲིབས་ལ་ལུང་མ་བསྟན། །རྫོགས་པ་ཆེན་པོ་དོན་འདུས་རང་བྱུང་བདེ་བ་འཁོར་ལོའི་རྒྱུད་ལས། ཀུན་གཞིའི་ངོ་བོ་ངེས་ཚིག་དབྱེ་བ་བསྟན་པའི་ལེའུ་སྟེ་དྲུག་པའོ།། །། ― DNG001_Page_0612 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །འཁོར་བའི་རྩ་བ་ཀུན་གཞི་ནི། །ཐོག་མ་ཐ་མ་འགྲོ་འོང་མེད། །ད་ལྟ་དེ་ལས་མི་གཞན་སྟེ། །སུས་ཀྱང་མ་བྱས་རང་བཞིན་གནས། །དེ་ནི་ཐུན་མོང་སྤྱིར་བསྟན་ཡིན། །དུས་གསུམ་འགྲོ་འོང་མེད་འདོད་པ། །ཐོག་མ་གང་ནས་མ་འོངས་ན། །ཐ་མ་དེ་ལས་གནས་འགྱུར་ཏེ། །ཐ་མ་བག་ཆགས་བྱང་གྱུར་ནས། །མེ་ལོང་ཡེ་ཤེས་གནས་འགྱུར་ཚེ། །ཀུན་གཞིའི་མིང་མེད་གཏན་དུ་སྟོངས། །དེ་ཕྱིར་ཐོག་མ་ཐ་མ་དང་། །ད་ལྟ་འགྲོ་འོང་ཡོད་པར་ངེས། །ཆོས་རྣམས་ཐམས་ཅད་མངོན་སངས་རྒྱས། །རང་བྱུང་བདག་ཉིད་ཆེན་པོ་ལ། །མ་རིག་མཚན་མ་སྣ་ཚོགས་ཀྱིས། །བག་ཆགས་མཐུ་བརྟས་ཀུན་གཞིར་གྱུར། །དེ་ཕྱིར་ཀུན་གཞི་འབྱུང་བའི་གནས། །དང་པོ་མ་རིག་པ་ལས་བྱུང་། །དེ་ལྟར་ཁམས་གསུམ་སེམས་ཅན་དང་། །ཉན་ཐོས་བྱང་ཆུབ་སེམས་དཔའ་ལ། །ཐུན་མོང་དང་ནི་མ་ཡིན་པར། །ཀུན་གཞི་བག་ཆགས་རང་བཞིན་གནས། །དེ་ཡང་འཁོར་གྱི་སེམས་དཔའ་ཉོན། །ཆོས་ཉིད་དུས་གསུམ་འདུས་མ་བྱས། །སྤྲོས་པ་ཀུན་བྲལ་འགྱུར་བ་མེད། །རྟག་པ་ཆེན་པོར་ལྷུན་གྱིས་གྲུབ། །རང་བྱུང་ཆེན་པོར་མངོན་སངས་རྒྱས། །ཀུན་གཞི་མ་རིག་མཚན་མར་ཞེན། །རྟོག་པའི་བག་ཆགས་སྣ་ཚོགས་ཡིན། །མཐར་ཡང་རང་བྱུང་ཡེ་ཤེས་ཀྱིས། །བག་ཆགས་ཀུན་བཅོམ་ཤིན་ཏུ་སྟོང་། །གཏན་མེད་སྟོང་པའི་ཆོས་ཉིད་ལ། །མུ་སྟེགས་ཆད་ལྟར་ཡང་དག་འགྱུར། །ཆོས་སྐུ་ཡོད་མེད་གཉིས་དང་བྲལ། །གཏན་མེད་སྟོང་པ་ཆད་ལྟ་ཡིན། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཀུན་གཞི་དང་པོ་ད་ལྟ་ཐ་མ་གང་དུ་འགྲོ་བ་བསྟན་པའི་ལེའུ་སྟེ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །མཚན་ཉིད་དང་ནི་རྒྱུ་རྐྱེན་དཔེ། །དང་པོ་ཀུན་གཞིའི་མཚན་ཉིད་ནི། །དངོས་པོར་མི་འགྱུར་གཏན་མེད་དང་། །དུས་གསུམ་ཤེས་པ་སྐད་ཅིག་རྒྱུན། །ཆད་པ་མེད་པར་གནས་ཕྱིར་རོ། །ཀུན་གཞི་བྱང་ཆུབ་སེམས་ཀྱི་ངང་། ། ― DNG001_Page_0613 ―
[མ་དཔེ་གཟིགས་ན་འདིར་གནོན།]
སྤྲོས་པ་ཀུན་བྲལ་ཆོས་སྐུ་ལ། །རང་བཞིན་ལྷུན་གྲུབ་རྟོག་པ་སྟེ། །རྒྱུན་དང་སྐད་ཅིག་ཡོད་དང་བྲལ། །དུས་གསུམ་འགྱུར་བ་མེད་པའི་དབྱིངས། །ཀུན་གཞིའི་མཚན་ཉིད་འདུས་བྱས་སྟེ། །མ་རིག་པ་དང་ལོག་ལྟ་གཉིས། །བག་ཆགས་ཡོངས་སུ་བརྟས་པ་ཡིན། །འདུས་བྱས་མིན་ན་མི་འགྱུར་ཞིང་། །དུས་གསུམ་བརྟན་པར་གནས་འགྱུར་ཏེ། །ཡེ་ཤེས་སྙིང་པོས་མཛད་ཕྱིར་རོ། །དེ་ཡང་རྡོ་རྗེ་སེམས་དཔའ་ཉོན། །གཞི་རྩ་མེད་པའི་ཀུན་གཞི་ནི། །གྲངས་ཀྱི་རྒྱུ་ལས་བྱུང་བ་མེད། །ཀུན་གཞིའི་རྣམ་ཤེས་འབྱུང་བའི་རྒྱུ། །སྲིད་གསུམ་མྱ་ངན་འདས་པ་དང་། །ཕྱི་ནང་དུས་གསུམ་བསྡུས་པའི་ཆོས། །ཐམས་ཅད་མཉམ་ཉིད་གཅིག་པའི་ངང་། །རང་བཞིན་ལྷུན་གྱིས་གྲུབ་པའི་སྐུ། །བདེ་བ་ཆེན་པོས་ཡོངས་ལ་ཁྱབ། །དེ་ཉིད་མ་རྟོགས་ཀུན་གཞི་ལ། །ཡེ་ནས་གནས་པས་རྒྱུ་ཞེས་བྱ། །དེ་ཡང་འདུས་པའི་སྙིང་པོ་ཉོན། །ཀུན་གཞི་སྐྱེ་བ་མེད་པའི་དབྱིངས། །གང་གིས་མ་བསྐྱེད་རང་བཞིན་ཏེ། །མ་སྤྲོས་ཀུན་བྲལ་ཁྱབ་པའི་དབྱིངས། །རྐྱེན་གྱིས་བྱས་པ་ག་ལ་སྲིད། །གསལ་བའི་རྒྱུ་རྐྱེན་མེད་པ་ལ། །ཀུན་གཞི་གཉེན་པོ་ཡེ་ཤེས་ཀྱིས། །འཇིག་པར་འགྱུར་བས་རྐྱེན་གྱིས་བསྐྱེད། །རྐྱེན་ནི་ཆོས་དབྱིངས་ཆོས་སྐུ་ལས། །ཐ་དད་མེད་ཀྱང་དེ་ལྟར་སྣང་། །ཆོས་དབྱིངས་གཅིག་ཀྱང་ཀུན་གཞི་རྐྱེན། །ཆོས་སྐུ་རྟོགས་དང་མ་རྟོགས་མེད། །ཡེ་ནས་ཀུན་ལ་ཁྱབ་པར་གནས། །ཆོས་ཉིད་སྣང་དང་མི་སྣང་མེད། །ཆོས་དབྱིངས་ཆོས་སྐུར་འདུས་མོད་ཀྱང་། །མ་འདུས་ཐ་དད་ལྟ་བུར་སྣང་། །དེ་ཡི་རྐྱེན་གྱིས་རྟོག་པ་བྱུང་། །དེ་ཕྱིར་གང་ཡང་རྟོག་པའི་རྐྱེན། །རྟོག་པའི་མཐུ་བརྟས་ཀུན་གཞིར་འགྱུར། །ཆོས་ཉིད་ཆོས་སྐུའི་རྐྱེན་ཡིན་པས། །རྒྱུ་རྐྱེན་མི་མཚུངས་ཐ་དད་ཡོད། །གདགས་ཤིང་བརྗོད་པ་ཐམས་ཅད་ནི། །མ་སྐྱེས་པ་ཡི་ཆོ་འཕྲུལ་ལས། །རང་བཞིན་མཉམ་པས་གཅིག་ཟེར་ན། །ཐམས་ཅད་རང་བཞིན་ངང་གིས་གཅིག །ཡེ་ནས་སྤྲོས་བྲལ་བརྗོད་ལས་འདས། །རྩོད་གཞི་ཀུན་གཞི་རང་ཡང་མེད། །འཁོར་བ་མྱང་འདས་བརྗོད་དང་བྲལ། །དེས་ན་མི་མཚུངས་སོ་ ― DNG001_Page_0614 ―
[མ་དཔེ་གཟིགས་ན་འདིར་གནོན།]
སོར་སྣང་། །དེ་ཡང་རྡོ་རྗེ་སེམས་དཔའ་ཉོན། །དངོས་པོར་གཟུང་དུ་རྡུལ་ཙམ་མེད། །མ་སྤྲོས་རང་བཞིན་ཡོངས་ལ་ཁྱབ། །རྣམ་ཤེས་རང་བཞིན་དེ་ལྟར་ཏེ། །ཀུན་གཞིའི་དཔེ་ནི་ནམ་མཁའ་འདྲ། །དེ་བཞིན་ཀུན་གཞིའི་རྣམ་ཤེས་ལ། །ཚོགས་བདུན་ཇི་ལྟར་སྐྱེ་འགགས་ཀྱང་། །ཀུན་གཞི་ཤེས་པའི་ངང་ཉིད་ལས། །ཚོགས་བདུན་སྐྱེས་ཀྱང་འགྱུར་བ་མེད། །ཀུན་གཞིའི་ཤེས་པའི་རང་བཞིན་ནི། །སྐད་ཅིག་མི་སྡོད་འགྲོ་བ་སྟེ། །ཆུ་བོ་བཞི་ཡི་གཞུང་དང་འདྲ། །དར་ཅིག་མི་སྡོད་རྒྱུན་མི་འཆད། །ཕྱི་ནང་འཁོར་བ་མྱ་ངན་འདས། །ཐམས་ཅད་ཀུན་གཞིའི་ངང་གྱུར་ཏེ། །གང་ཡང་སྐྱེད་པར་བྱེད་པའི་ཕྱིར། །དེས་ན་ཀུན་གཞི་ས་གཞི་འདྲ། །རང་གིས་རང་ལ་མ་བཀག་ཀྱང་། །གཞན་གྱི་རྐྱེན་གྱིས་མི་མངོན་པ། །ཉི་ཟླ་གཟའ་སྐར་དུས་གཅིག་ཏུ། །ཤར་བའི་འོད་ཀྱི་ཕྲ་རགས་འདྲ། །ཀུན་གཞི་རང་བཞིན་དག་པའི་དབྱིངས། །ཡེ་ནས་དར་དཀར་ལྟ་བུ་ལ། །རྟོག་པ་གློ་བུར་སྣུམ་གྱིས་ཞེན། །གཉིས་མེད་འདྲེས་པར་གྱུར་པ་ནི། །དར་དཀར་སྣུམ་གྱིས་ཞེན་པ་འདྲ། །ཀུན་གཞི་རྣམ་དག་ཆོས་ཀྱི་དབྱིངས། །ཡེ་ནས་རང་བྱུང་ཆོས་ཀྱི་སྐུ། །དྭངས་མའི་ཆུ་དང་འདྲ་བ་ལ། །བག་ཆགས་རྣམ་རྟོག་ས་འདྲས་བསླད། །ཡེ་ནས་རང་བྱུང་ཆེན་པོ་ཡང་། །བདག་གཞན་གང་ལ་དོན་མི་ནུས། །ཆུ་དང་ས་གཉིས་འདྲེས་དང་འདྲ། །མ་བཙལ་ལྷུན་གྱིས་གྲུབ་གྱུར་ཀྱང་། །རྟོག་པས་བསྒྲིབས་ནས་མེད་པར་སྣང་། །ཉི་མ་སྤྲིན་གྱིས་བསྒྲིབས་པ་འདྲ། །དངོས་ཉིད་དུག་དང་ཆང་འདྲ་བར། །ཡེ་ནས་གསོད་བྱེད་གཉེན་པོ་ལ། །ཆང་གིས་རྐྱེན་བྱས་ཐར་མེད་བཞིན། །མ་རིག་འཁོར་བའི་རང་བཞིན་ལ། །བག་ཆགས་འཁོར་བས་རྐྱེན་བྱས་ནས། །ཁམས་གསུམ་འཁོར་བའི་འཁོར་ལོ་བསྐོར། །ཐར་མེད་འཁོར་བའི་ཀུན་གཞི་བྱས། །དཔེ་ནི་དུག་དང་ཆང་འདྲེས་འདྲ། །ཀུན་གཞིའི་རྣམ་པར་ཤེས་པའི་དོན། །གཞན་པ་ཀུན་དང་མི་མཐུན་ཡང་། །བཀའ་རྣམས་སུན་ཕྱུང་སྐྱོན་མེད་ཅིང་། །ཐེག་གཞན་རྫུན་གསུང་མི་འགྱུར་ཏེ། །མུ་སྟེགས་འགལ་ ― DNG001_Page_0615 ―
[མ་དཔེ་གཟིགས་ན་འདིར་གནོན།]
བ་སུན་འབྱིན་པས། །ཐེག་པའི་མཚན་ཉིད་མི་ཤེས་པས། །རྟག་ཆད་མུ་བཞི་ལ་ཞེན་པས། །མ་རིག་རྨོངས་པའི་ང་རྒྱལ་གྱིས། །རང་གི་འདོད་པ་ཡང་དག་ཟེར། །གཞན་གྱི་ཡིན་པ་ཁྱད་དུ་གསོད། །དེ་དང་ཨ་ཏི་ཡོ་གའི་དོན། །མཚུངས་པར་གྱུར་པ་མ་ཡིན་ནོ། །ཐེག་པ་མཐའ་དག་ངེས་བརྟགས་ཤིང་། །རྫོགས་ཆེན་འདི་ལ་མཐར་གཏུགས་ཤིང་། །ཐེག་པ་ཀུན་གྱི་སྤྱི་ཕུད་ལ། །ལམ་དང་ས་ཡི་མཐར་གཏུགས་ཤིང་། །དཀྱིལ་འཁོར་ཡོངས་ཀྱི་སྙིང་པོ་སྟེ། །སངས་རྒྱས་ཡེ་ཤེས་ལྷུན་གྲུབ་ཡིན། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མཚན་ཉིད་རྒྱུ་རྐྱེན་དཔེ་བསྟན་པའི་ལེའུ་སྟེ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །རྩལ་དང་རང་བཞིན་དམིགས་པའི་ཡུལ། །དངོས་པོ་ཀུན་གཞི་ངེས་པའི་རྩལ། །ཚོགས་བདུན་ཡུལ་དྲུག་བཅས་པ་ནི། །ཀུན་གཞིའི་རྣམ་ཤེས་རྩལ་ཡིན་ཏེ། །ཀུན་གཞི་མེད་པར་དེ་དག་ནི། །འབྱུང་བར་འགྱུར་བ་མ་ཡིན་པས། །ཤེས་པ་བདུན་དང་ཡུལ་དྲུག་ལ། །གཅིག་གི་ཡུལ་ནི་ངོ་བོ་ཉིད། །དེ་དག་བཅས་པ་ཐུན་མོང་རྩལ། །ཕྱི་ནང་ཆོས་ནི་ཇི་སྙེད་པ། །གཞན་མང་ཀུན་གཞིའི་རྣམ་ཤེས་ལ། །དེ་ཉིད་རང་བཞིན་སྤྲོས་དང་བྲལ། །དེ་ལྟར་མ་རྟོགས་ལོག་རྟོག་གིས། །བདག་དང་ཡུལ་བརྟགས་ཞེ་སྡང་གཞི། །བདེ་སྡུག་རྣམ་པ་སྣ་ཚོགས་བསགས། །དེ་ཡིས་ཁམས་གསུམ་འཁོར་བར་འཁྱམས། །དེ་དག་ཀུན་སྩོགས་ལོག་པའི་རྩལ། །དེ་ཡང་ཀུན་གཞིའི་རྣམ་ཤེས་ཀྱི། །ཡང་དག་རྩལ་ནི་ཕྱི་ནང་ཆོས། །སྐུ་དང་ཡེ་ཤེས་ཞིང་ཁམས་ཏེ། །དངོས་སུ་མེ་ལོང་ཡེ་ཤེས་ཡིན། །ཀུན་གཞིའི་རྣམ་པར་ཤེས་པ་ལ། །རྣམ་རྟོག་བག་ཆགས་མཐུ་བརྟས་པས། །དེ་ཉིད་ཐམས་ཅད་མཁྱེན་པའི་གེགས། །ས་བཅུ་རིམ་པར་ཡོངས་སྦྱངས་ནས། །ཡོངས་སུ་སྐུ་དང་ཡེ་ཤེས་གྱུར། །དེ་ཕྱིར་ཀུན་གཞི་ཡང་དག་རྩལ། །དེ་ཡང་བྱང་ཆུབ་སེམས་དཔའ་ནས། །དམྱལ་བའི་འཇིག་ཚོགས་ཡན་ཆད་དུ། །ཀུན་ ― DNG001_Page_0616 ―
[མ་དཔེ་གཟིགས་ན་འདིར་གནོན།]
ལ་ཁྱབ་ཅིང་ཀུན་འབྱུང་བས། །དེ་ནི་ཀུན་གཞི་ཐུན་མོང་རྩལ། །ཁྱབ་པ་ཆེ་བས་ཡོན་ཏན་བསྒྲིབས། །དེ་དག་མ་རིག་བག་ཆགས་ལས། །བྱུང་ཕྱིར་ཀུན་གཞི་ཐུན་མོང་རྩལ། །དེ་ཡང་ཁམས་གསུམ་སེམས་ཅན་ནི། །མ་རིག་པ་དང་བག་ཆགས་གཉིས། །ཀུན་བརྟགས་ལྷན་ཅིག་སྐྱེས་པ་དང་། །བག་ལ་ཉལ་དང་མངོན་རྒྱུ་བས། །ཐམས་ཅད་དེ་ལས་བསྐྱེད་པའི་ཕྱིར། །ཀུན་གཞི་ཐུན་མོང་མིན་པའི་རྩལ། །གཞན་དུ་ཀུན་གཞི་རང་བཞིན་རྩལ། །དེ་ལས་གཞན་པ་རང་བཞིན་རྩལ། །ཐེ་ཚོམ་རྣམ་པར་རྟོག་པ་སྟེ། །ཅི་ཕྱིར་གཅིག་གིས་ཡིན་ཞེ་ན། །ཀུན་གཞི་མ་རིག་བག་ཆགས་གཉིས། །ཡོངས་སུ་ཞེན་པར་གྱུར་པ་ལ། །མ་རིག་པ་ལ་ཐེ་ཚོམ་སྟེ། །བག་ཆགས་ཡིན་པའི་རྟོག་པ་བྱུང་། །དེ་མེད་དེ་ཡང་མི་འབྱུང་ཕྱིར། །ཐེ་ཚོམ་རྟོག་པ་རང་བཞིན་རྩལ། །དེ་ཡང་རྡོ་རྗེ་སེམས་དཔའ་ཉོན། །ཀུན་གཞིའི་རྣམ་ཤེས་སྐད་ཅིག་རྒྱུན། །མི་རྟག་མ་ཆད་དུས་གསུམ་རྒྱུ། །དེ་ཡང་སུས་ཀྱང་མ་བཅོས་ཤིང་། །རང་བཞིན་ངང་གིས་གནས་པ་སྟེ། །དེས་ན་ངང་གི་རང་བཞིན་ཡིན། །ཀུན་གཞིའི་རྣམ་པར་ཤེས་པ་དེ། །སྐད་ཅིག་རྒྱུན་གྱིས་མི་སྡོད་འགྲོ། །འགྲོ་བས་དང་པོ་སོང་བ་ལ། །ཐ་མར་ཐ་ཆད་འགགས་པར་འགྱུར། །སྐད་ཅིག་དུས་གསུམ་ཆས་ཕྱེ་བས། །འགགས་ཤིང་ཤེས་པའི་ངོ་བོ་ཉིད། །སྐད་ཅིག་རྒྱུན་འགྱུར་མི་རྟག་ཀྱང་། །ཉེས་པའི་སྐྱོན་མེད་རང་བཞིན་ཡིན། །ངོ་བོ་སྐད་ཅིག་ཆས་འགགས་ཏེ། །རིགས་མཐུན་རྒྱུན་ལས་འགྱུར་བ་མེད། །ཀུན་གཞི་སྐད་ཅིག་མ་ཡི་རྒྱུན། །དུས་གསུམ་མི་འཆད་ཡོད་གྱུར་ན། །འབྲས་བུ་ཡོངས་སུ་རྫོགས་པ་ལ། །ཀུན་གཞིའི་མིང་ཡང་མི་གྲགས་པའི། །མི་འགྱུར་འཁོར་བར་ལོག་མི་སྲིད། །གཅིག་ཆར་འགྱུར་ན་སངས་རྒྱས་དང་། །བསྒྲུབ་པ་མཐར་ཐུག་མི་འགྱུར་ཞིང་། །རྫོགས་སངས་རྒྱས་ནས་མི་འགྱུར་ན། །འདུས་བྱས་རྒྱུན་ལ་འདུས་མ་བྱས། །འབྲས་བུ་འབྱུང་བས་མངོན་བརྟགས་འགྱུར། །འགྱུར་བའི་རྐྱེན་གྱིས་ངན་འགྱུར་ན། །ཡོངས་སུ་འགྱུར་བའི་མཐའ་རུ་ནི། །དམྱལ་བ་ལས་ཀྱང་སྡུག་བསྔལ་ཞིང་། ། ― DNG001_Page_0617 ―
[མ་དཔེ་གཟིགས་ན་འདིར་གནོན།]
གཏན་དུ་དེ་ལས་ཐར་མི་སྲིད། །རྐྱེན་གྱིས་མ་ཡིན་རང་འགྱུར་ན། །དགེ་སྡིག་ལས་ཀྱིས་འཁོར་བ་དང་། །མྱང་འདས་དངོས་པོ་མི་འབྱུང་སྟེ། །མུ་སྟེགས་བཞིན་དུ་ཁར་རྗེར་འགྱུར། །དོན་དམ་ཡིན་ན་སྐྱོན་ཡོན་ཅི། །གང་ལྟར་གནས་ཀྱང་འགལ་བའི་ཕྱིར། །ཀུན་གཞིའི་རྒྱུན་ལས་མི་འགྱུར་བས། །རང་གི་ལོག་རྟོག་འདོད་གཞུང་ཡིན། །ཀུན་གཞི་སྤྲོས་བྲལ་ཆོས་ཀུན་གྱི། །འབྱུང་གནས་དམ་པ་ཀུན་ཤེས་པས། །ཕྱི་ནང་ཆོས་ལ་ཅིར་མི་རྟོག །མ་བརྟགས་བག་ཆགས་མི་གསོག་ཅིང་། །ཕུང་པོ་སྡུག་བསྔལ་མ་བྱུང་བས། །དེས་ན་ཀུན་གཞི་རང་བཞིན་ཡིན། །ཉན་ཐོས་འགོག་པར་ཞུགས་པ་ནི། །རྟོག་མེད་བག་ཆགས་མི་གསོག་ཀྱང་། །ཀུན་གཞིའི་མཚན་ཉིད་མི་ཤེས་པས། །བག་ལ་ཉལ་གྱི་བག་ཆགས་ཀྱིས། །ཉི་ཚེ་ཕྱོགས་གཅིག་ལྷུང་བ་སྟེ། །ཐེག་པ་འདི་ཡི་ཆོས་རྣམས་ཀུན། །ཡོངས་སུ་ཞི་བའི་ངང་ཤེས་ཤིང་། །བག་ཆགས་རང་བཞིན་ཀུན་བྱང་བས། །མི་མཚུངས་ཤིན་ཏུ་ཁྱད་པར་ཆེ། །སྨན་གྱི་རྒྱལ་པོ་དར་ཡ་ཀན། །དངོས་པོ་དེ་ཉིད་འདུལ་བ་དང་། །བླུན་པོ་འཕྲད་ན་རྣམ་རྟོག་གིས། །ན་དང་འཆི་བ་དེས་འགྲུབ་ཅིང་། །སོས་འགྱུར་གཞན་གྱིས་མ་བྱས་ཏེ། །དེ་ལས་བྱུང་ཕྱིར་རང་བཞིན་དཔེ། །དེ་ཕྱིར་ཀུན་གཞི་རང་བཞིན་ཏེ། །ཕྱི་ནང་འཁོར་བ་མྱ་ངན་འདས། །བསམ་གྱིས་མི་ཁྱབ་བརྗོད་ལས་འདས། །སུས་ཀྱང་མ་བྱས་བྱེད་མེད་སྟེ། །ཀུན་གཞིའི་ངང་ལས་ཤུགས་ཀྱིས་འབྱུང་། །དེ་ཡང་ཀུན་གཞིའི་རང་བཞིན་ཡིན། །ཀུན་གཞིའི་རང་བཞིན་ངོ་བོ་ནི། །ཁམས་གསུམ་འཁོར་བ་འབའ་ཞིག་སྟེ། །དེ་ཡང་གཞན་གྱིས་བྱས་པ་མེད། །མ་རིག་པ་དང་བག་ཆགས་ལས། །བྱས་པ་མེད་པར་བྱུང་བའི་ཕྱིར། །དེ་ཡང་ཀུན་གཞིས་བྱས་པ་སྟེ། །བདེར་གཤེགས་རྣམས་ལ་མི་མངའ་ཞིང་། །དགྲ་བཅོམ་བྱང་ཆུབ་སེམས་དཔའ་ནི། །རེ་ཞིག་བརྟགས་ཟད་བདེར་གཤེགས་སྤྲུལ། །ཀུན་གཞི་གནས་པའི་གཞི་མེད་པས། །དེ་ཕྱིར་འཁོར་བ་འབའ་ཞིག་ཡིན། །དུག་གི་རང་བཞིན་ན་ཞིང་འཆི། །དེ་ཕྱིར་ཀུན་གཞིའི་རང་བཞིན་གྱིས། །ཁམས་གསུམ་འཁོར་བར་འཁྱམས་པར་བྱེད། །དེ་ ― DNG001_Page_0618 ―
[མ་དཔེ་གཟིགས་ན་འདིར་གནོན།]
ཡང་རྡོ་རྗེ་སེམས་དཔའ་ཉོན། །ཀུན་གཞིའི་རྣམ་པར་ཤེས་པ་ནི། །ཤེས་པ་གཞན་དང་མི་མཚུངས་ཤིང་། །ཀུན་ཏུ་སྐྱེ་འགགས་མེད་པས་ན། །དམིགས་པའི་ཡུལ་ཡང་ཆོས་ཉིད་ལ། །དེ་ལ་དུས་གསུམ་སྐྱེ་འགགས་མེད། །དེ་ཕྱིར་ཡོངས་སུ་རྒྱ་མ་ཆད། །ཇི་སྲིད་མ་རིག་བག་ཆགས་དང་། །མ་བྲལ་བར་དུ་མི་ཟད་ཀྱང་། །ཟད་ཅིང་ཆད་ནས་གཏིང་སྟོངས་པ། །དམིགས་པའི་ཡུལ་ནི་མ་ཡིན་ལ། །ཡུལ་ཡང་ཆོས་ཉིད་མ་ཡིན་ཏེ། །རེ་ཞིག་དེ་ལྟར་འདོད་པ་ནི། །ཁ་ཅིག་ཙམ་གྱི་གཞུང་དུ་ཟད། །ཐེག་པ་སྤྱི་ཡི་ཀུན་གཞི་ཉིད། །ཆོས་ཉིད་ཡིན་པར་འདོད་པ་ནི། །རང་གི་ཡུལ་དུ་རང་གྱུར་པས། །ཐེག་པ་འོག་མའི་གཞུང་དང་འགལ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཀུན་གཞིའི་རྩལ་དང་རང་བཞིན་དམིགས་པའི་ཡུལ་བསྟན་པའི་ལེའུ་སྟེ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ཀུན་གཞི་ཤེས་པའི་ཡོན་ཏན་མ་ཤེས་སྐྱོན། །དང་པོ་ཤེས་པའི་ཡོན་ཏན་ནི། །ཀུན་གཞིའི་རྣམ་པར་ཤེས་པ་ནི། །ཇི་ལྟར་གནས་པའི་དོན་རྟོགས་པས། །ཡོད་མེད་གང་ཡང་མི་ལྟུང་ཞིང་། །རྟག་ཆད་གཉིས་དང་བྲལ་བས་ན། །མྱ་ངན་འདས་པའི་འབྲས་བུ་ཡང་། །དེ་ཡི་ངང་གིས་ཐོབ་པར་འགྱུར། །དེ་ཡང་རྡོ་རྗེ་སེམས་དཔའ་ཉོན། །ཀུན་གཞིའི་དེ་ཉིད་མ་ཤེས་པས། །ཐམས་ཅད་དེ་ལས་འབྱུང་བ་ཡི། །དོན་ཡང་ཤེས་པར་མི་འགྱུར་ཏེ། །ལོག་པར་ལྟ་བ་སྣ་ཚོགས་བྱུང་། །མུ་སྟེགས་ཆད་པའི་རིགས་རྣམས་ཀྱིས། །ཅི་བྱས་ལས་ཀྱི་འབྲས་བུ་ནི། །སྨིན་ན་འདིར་སྨིན་ཕྱིས་མི་མྱོང་། །དེ་ལྟར་ཅི་བདེར་སྤྱོད་ཅེས་ཟེར། །རྟག་པར་ལྟ་བའི་རིགས་དག་ནི། །དངོས་པོ་བདག་ཉིད་བརྟན་པ་དང་། །ཇི་ལྟར་བྱས་པ་དེར་སྨིན་ཅིང་། །ཤེས་སུ་མི་འགྱུར་བརྟན་པར་རྟོག །གཞན་དུ་ཕྱྭ་དང་དབང་ཕྱུག་དང་། །གནམ་གྱིས་སྐྱོབ་ལ་སོགས་པ་ལྟར། །ཉན་ཐོས་ཕྱི་རོལ་སྣང་བའི་ཆོས། །ཀུན་གཞིའི་རྣམ་ཤེས་སྣང་བ་ལ། །རྡུལ་ལས་གྲུབ་པའི་རང་རྒྱུད་པ། །རིས་སུ་ ― DNG001_Page_0619 ―
[མ་དཔེ་གཟིགས་ན་འདིར་གནོན།]
ཆད་པའི་དངོས་པོར་བལྟ། །དེ་དག་ཀུན་གཞི་མ་ཤེས་སྐྱོན། །རྫོགས་པ་ཆེན་པོ་དོན་འདུས་རང་བྱུང་བདེ་བ་ཆེན་པོ་འཁོར་ལོའི་རྒྱུད་ལས། ཀུན་གཞི་ཤེས་པའི་ཡོན་ཏན་དང་། མ་ཤེས་པའི་སྐྱོན་བསྟན་པའི་ལེའུ་སྟེ་བཅུ་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །ཀུན་གཞི་འཇོམས་པར་བྱེད་པ་ཡི། །གཉེན་པོ་ལོག་དང་མ་ལོག་སྐྱོན། །དང་པོ་གཉེན་པོ་བསྟན་པ་ནི། །ཀུན་གཞིའི་རྣམ་པར་ཤེས་པ་ཡང་། །དུས་གསུམ་འདུས་མ་བྱས་པའི་ངང་། །གཉེན་པོས་གཞིག་ཅིང་གཞོམ་མེད་ཅིང་། །བསགས་པའི་ལས་དང་བག་ཆགས་ཀུན། །ཏིང་ངེ་འཛིན་དང་ཤེས་རབ་ཀྱིས། །ཡོངས་སུ་འཇོམས་པ་དེ་དག་ལ། །ཀུན་གཞིའི་གཉེན་པོར་བཏགས་པར་ཟད། །ཀུན་གཞིའི་དོན་ནི་འདུས་བྱས་ལ། །དེ་ལ་གཉེན་པོ་མེད་མི་སྲིད། །ལྷག་མཐོང་རང་བྱུང་ཡེ་ཤེས་ཀྱིས། །ཀུན་གཞི་གཏན་ནས་འཇོམས་པར་བྱེད། །རྫོགས་ཆེན་སྤྱི་ཕུད་ཡེ་ཆེ་ལ། །ད་གདོད་ཆེ་བ་ཅི་ཞིག་དབྱུང་། །ལྷག་ཆད་སྨྲ་བ་རྨོངས་པ་ཡིན། །བཀའ་ལུང་གཞན་ནི་དྲང་བར་གསུངས། །བཀའ་ལུང་ངེས་པ་མ་ཐོབ་པར། །གསུངས་དང་མ་གསུངས་ཅི་ཆ་ཡོད། །རང་བཟོའི་སྨྲས་དང་མ་སྨྲས་པ། །རྫོགས་ཆེན་ངེས་པའི་ལུང་ལ་ཉོན། །དེ་ལ་མ་བསྒྲིབས་ཨ་ཏི་ཡི། །སྤྱི་དང་རང་གི་མཚན་ཉིད་ཡིན། །ལྷག་མཐོང་ཨ་ཏི་ཡོ་ག་ལ། །རང་བྱུང་ཨ་ཏིའི་ཡང་ཏི་སྟེ། །རིམ་གྱིས་མ་ཡིན་གཞན་མི་མཐུན། །དེ་ཉིད་ཨ་ཏི་ཡོ་ག་ཡི། །ལྷག་མཐོང་མི་དམིགས་ཏིང་འཛིན་བསྒོམ། །དེ་ཡིས་སྒྲིབ་པ་འཇོམས་བྱེད་ལ། །ཨ་ཏིའི་ཨ་ཏི་ཡོ་ག་ལ། །རང་བྱུང་ཡེ་ཤེས་ཆེན་པོ་ཡིས། །ཡེ་ནས་བཅོམ་པས་གཞོམ་དུ་མེད། །བྱ་བ་མ་ལུས་ཡོངས་རྫོགས་པས། །དེ་ཕྱིར་ཁྱད་པར་ཤིན་ཏུ་འཕགས། །དེ་ཡང་རྡོ་རྗེ་སེམས་དཔའ་ཉོན། །ཀུན་གཞི་ཀུན་གྱི་འབྱུང་གནས་ལ། །ལོག་དང་མ་ལོག་མེད་པ་སྟེ། །ཡེ་ཤེས་རྒྱུན་ལ་བཏགས་པར་ཟད། །དེ་ལྟར་གྱུར་པས་འཁོར་བ་སྟོངས། །ཡེ་ནས་ཡོན་ཏན་རྫོགས་པ་ནི། །རང་གི་ས་ལས་ལོག་པའོ། །ལོག་པའི་ཡོན་ཏན་དངོས་བསྟན་ ― DNG001_Page_0620 ―
[མ་དཔེ་གཟིགས་ན་འདིར་གནོན།]
པ། །ཀུན་གཞི་ལོག་པའི་ཡོན་ཏན་ནི། །རྫོགས་པ་ལས་ཀྱང་ཡོངས་རྫོགས་པ། །ལྷུན་གྲུབ་ཨ་ཏིའི་ཨ་ཏི་ལ། །ཡེ་ནས་གནས་པ་ཇི་བཞིན་ལས། །འཁོར་བ་སྟོངས་ཤིང་ཡོངས་རྫོགས་པའི། །འཁོར་འདས་རྫོགས་པའི་མིང་ཡང་མེད། །ཡང་དག་གྲུབ་པ་ག་ལ་སྲིད། །ཇི་བཞིན་གནས་ལས་མ་འགྱུར་ཞེས། །དེ་ཉིད་ལོག་པའི་ཡོན་ཏན་ཡིན། །དེ་ཡང་རྡོ་རྗེ་སེམས་དཔའ་ཉོན། །དེ་ཡང་ཀུན་གཞི་ངར་འཛིན་དང་། །བག་ཆགས་ཡོངས་སུ་མ་ཟད་པས། །ཆེ་བའི་ཡོན་ཏན་མི་རྫོགས་ཤིང་། །འཁོར་བའི་གནས་ལས་དེ་མི་ཐར། །དེ་དག་ཀུན་གཞི་མ་ལོག་སྐྱོན། །ཆོས་རྣམས་ཡེ་ནས་སངས་རྒྱས་ཤིང་། །བཙལ་ཞིང་བསྒྲུབ་དང་བྲལ་བའི་དོན། །མངོན་སུམ་འགལ་བའི་གེགས་བྱེད་པ། །དེ་ནི་ཀུན་གཞི་མ་ལོག་སྐྱོན། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། གཉེན་པོ་ལོག་པ་དང་མ་ལོག་པའི་སྐྱོན་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཐེག་པའི་གོལ་ས་བཀའ་སྩལ་པ། །མཚན་ཉིད་ཐེག་པ་རྣམ་པ་གསུམ། །ཞིང་པའི་སོ་ནམ་ལས་དང་འདྲ། །རྒྱུ་རྐྱེན་རྩོལ་བས་ཅི་འབད་ཀྱང་། །འབྲས་བུ་འདུས་བྱས་མོད་ལ་ཟད། །དེ་བཞིན་རྒྱུ་རྐྱེན་ཚོགས་བསགས་ཀྱང་། །འབྲས་བུ་མི་འབྱུང་རེ་དོགས་མཐར། །ལུས་ངག་ཡིད་ཀྱི་རྩོལ་བ་ངེས། །བྱང་ཆུབ་འགྲུབ་པར་ངས་མ་བཤད། །ཀྲི་ཡོག་ཐེག་པ་རྣམ་པ་གསུམ། །འཇིག་རྟེན་རྫས་ཀྱི་ཡོ་ལང་འདྲ། །འདོད་པའི་ཡོ་ལང་མང་པོར་བཅས། །གླུ་གར་ལོངས་སྤྱོད་སྣ་ཚོགས་ཅན། །དེ་བཞིན་ཀྲི་ཡོག་ཐེག་པ་ནི། །རྡུལ་ཚོན་དཀྱིལ་འཁོར་ལྷ་དང་བཅས། །གླུ་གར་མཆོད་པ་ཅི་ཕུལ་ཀྱང་། །འབྲས་བུ་མི་རྟག་སྒྱུ་མ་འདྲ། །གྲུབ་པ་ཐོབ་པར་ངས་མ་བཤད། །དེ་ཡང་རྡོ་རྗེ་སེམས་དཔའ་ཉོན། །ཐེག་ཆེན་བསྐྱེད་རྫོགས་རྣམ་པ་གཉིས། །འཇིག་རྟེན་བུ་ཚའི་སོ་ནམ་འདྲ། །ཕ་མས་འཁོར་བསྐྱེད་རྫས་བསགས་ཀྱང་། །རྟག་པ་མ་ཡིན་རིམ་གྱིས་བརླག །དེ་བཞིན་ ― DNG001_Page_0621 ―
[མ་དཔེ་གཟིགས་ན་འདིར་གནོན།]
ཡབ་ཡུམ་གཉིས་མེད་སྦྱོར། །འབྲས་བུ་སྐུ་དང་ཡེ་ཤེས་འདོད། །རྒྱུ་རྐྱེན་བསྐྱེད་ཅིང་འཁོར་བའི་ཆོས། །དེ་ཕྱིར་ལྷུན་གྲུབ་ས་མི་ཐོབ། །དེ་དག་ཐེག་པའི་ཆོས་རྣམས་ནི། །ཇི་ལྟར་བསྒྲུབས་ཤིང་བཙལ་གྱུར་ཀྱང་། །རང་སེམས་སྙིང་པོ་མི་རྟོགས་ཕྱིར། །ཐེག་བརྒྱུད་བགྲོད་པ་གོལ་སར་གསུངས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཐེག་བརྒྱད་གོལ་སར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །འཁོར་བའི་སྡུག་བསྔལ་དེ་དག་ལས། །ཐར་ཅིང་གྲོལ་བར་བྱེད་འདོད་ན། །མ་རྟོགས་སྡུག་བསྔལ་སྔ་ཕྱི་ནི། །འཇིག་རྟེན་རྡུལ་གྱི་གྲངས་བཞིན་དུ། །བརྗོད་ཀྱིས་མི་ལངས་བསམ་མི་ཁྱབ། །དེ་ཡི་རྩ་བ་མདོར་བསྡུ་ན། །སེམས་ཅན་ཉོན་མོངས་བག་ཆགས་ནི། །འཇིག་རྟེན་ས་གཞིའི་གཏོས་དང་འདྲ། །ས་གསེབ་ཐིག་ལེ་ཉག་གཅིག་ནི། །རིན་ཆེན་སྙིང་པོ་གསེར་དང་འདྲ། །ས་ནས་གསེར་འཚོལ་བྱ་བའི་ཐབས། །ཆུ་ཆགས་ཐབས་ཀྱིས་ངོས་འཛིན་ལྟར། །རྒྱལ་བ་ཀུན་བཟང་ང་ཡིས་ནི། །ཆོས་རྣམས་རྩ་བ་མདོར་བསྡུས་ནས། །ངེས་དོན་མ་ནོར་གསལ་བ་ཡི། །ཡེ་ཤེས་སྒྲོན་མེ་ངས་འདེགས་ཀྱིས། །འགྲོ་དྲུག་སེམས་ཅན་ཡི་མ་ཆད། །རྨོངས་པ་རྣམས་ཀྱང་བློ་མ་སྟོར། །དད་ལྡན་རྣལ་འབྱོར་ང་ལ་ཐུད། །བྱང་ཆུབ་འདོད་པའི་ལམ་སྣ་དྲང་། །ཐེག་ཆེན་ལྟ་བ་གསལ་ཞིག་གདབ། །མ་སྦྱངས་སྒྲིབ་དག་ང་ཡིས་བསྟན། །མ་བསྒྲུབས་སངས་རྒྱས་ད་ལྟ་བྱ། །མ་བསགས་ཚོགས་གཉིས་ངས་འདིར་རྫོགས། །མ་བསྒོམས་སངས་རྒྱས་ང་ཡི་ཆོས། །མ་བཙལ་ལྷུན་གྱིས་གྲུབ་པ་ཡིན། །རྫོགས་ཆེན་རྟོགས་པའི་རྣལ་འབྱོར་པས། །ཉེས་པ་བྱས་ཀྱང་དཔལ་དུ་ཆེ། །དེ་དོན་ངེས་པར་ངས་བཤད་ཀྱི། །བློ་དམན་ཀུན་ཀྱང་གཟེངས་བསྟོད་ཅིག །ཐོས་བསམ་མི་དགོས་བསྟན་པས་ཆོག །གོམས་པ་མི་དགོས་ཤེས་པས་ཆོག །རྣམ་སྨིན་ལུས་དང་མ་བྲལ་བར། །སངས་རྒྱས་ཀུན་དང་མཉམ་པར་བྱ། །དེ་ཡང་རྡོ་རྗེ་སེམས་དཔའ་ཉོན། ། ― DNG001_Page_0622 ―
[མ་དཔེ་གཟིགས་ན་འདིར་གནོན།]
དེ་ཤེས་ཡོན་ཏན་ཆེན་པོ་ནི། །ནམ་མཁའི་དབྱིངས་དང་འདྲ་བ་སྟེ། །དཔག་ཅིང་གཞལ་བའི་སེམས་ལས་འདས། །ཐེག་པའི་སྒོ་མོ་བརྗོད་ལས་འདས། །སྡེ་སྣོད་ཆོས་རྣམས་བཤད་མི་ལངས། །སྡེ་སྣོད་ཉིད་ཀྱང་བཏགས་པ་ཙམ། །དེ་ལྟར་དབྱེ་བ་བསམ་ཡས་ཀྱང་། །དོན་གྱི་ངོ་བོ་གཅིག་ལས་མེད། །དེ་དོན་གསལ་བར་ངས་བཤད་ཀྱིས། །ལེགས་པར་ཉོན་ལ་ཡིད་ལ་ཟུངས། །དེ་སྐད་གསུངས་པའི་དོན་གོ་ནས། །འཁོར་རྣམས་དགའ་མགུ་ཡི་རང་སྟེ། །ཡང་དག་གུས་པའི་ཚུལ་གྱིས་ནི། །མ་ནོར་བདེན་པའི་ཆོས་མཉན་ཏོ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། འཁོར་རྣམས་ལ་གཟེངས་བསྟོད་པ་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་ཀུན་རིག་སྟོན་པ་དེས། །ངེས་དོན་རྩ་བ་འདི་གསུངས་པ། །ངོ་བོ་གཞི་ཡི་གནས་ལུགས་དང་། །ལྟ་སྒོམ་སྤྱོད་པ་འབྲས་བུའི་དོན། །རྟོགས་པའི་ཡོན་ཏན་ད་ལྟའི་དུས། །མངོན་དུ་གྲུབ་པ་ངས་བཤད་ཉོན། །ཡུལ་མེད་ངོ་བོ་རང་བྱུང་སྐུ། །འཁོར་འདས་མ་རེག་གདོད་ནས་བྱུང་། །དེ་དོན་ཀུན་ལ་ཡེ་ནས་གནས། །འདུས་མ་བྱས་པས་ནམ་མཁའ་འདྲ། །དེ་ཡང་འདུས་པའི་སྙིང་པོ་ཉོན། །དཔེར་ན་ཁྱུང་ཆེན་ལྡིང་པ་བཞིན། །ངེས་པའི་ལྟ་བ་གདེང་ལྡན་པས། །འཁོར་འདས་དངོས་པོ་ཅིར་སྣང་ཡང་། །གཟུང་འཛིན་ཞེན་རྟོག་གཞི་ལ་མེད། །མ་གི་ཏ་ཡིས་གང་ཐེབས་བཞིན། །ལྟ་བ་ངོ་བོ་ཉིད་རྟོགས་པས། །ཇི་དྲན་མ་བསྒོམས་ཆོས་ཉིད་གསལ། །བཞག་ལངས་མེད་པར་རྒྱུན་དུ་གནས། །བི་ཤས་གང་བྱས་ལེགས་པ་བཞིན། །རྣལ་འབྱོར་སྤྱོད་ལམ་ཐམས་ཅད་དུ། །ཡེ་ཤེས་རྩ་བ་དོན་གྱིས་ཟིན། །ཉེས་པའི་སྐྱོན་གྱིས་གོས་པ་མེད། །ཡིད་བཞིན་ནོར་བུའི་ཡོན་ཏན་བཞིན། །རང་སེམས་ཆོས་སྐུར་དོན་རྟོགས་པས། །མི་ཡི་ལུས་ལ་སངས་རྒྱས་ཐུགས། །གདུལ་བྱར་གཟུགས་སྐུ་ཤུགས་ལས་བྱུང་། །དེ་ཡང་རྡོ་རྗེ་སེམས་དཔའ་ཉོན། །དེ་དག་ངོ་བོ་གཅིག་གཅིག་ལ། །ཚིག་གི་མཚོན་པ་ཐ་དད་ཀྱང་། ། ― DNG001_Page_0623 ―
[མ་དཔེ་གཟིགས་ན་འདིར་གནོན།]
ཡུལ་མེད་རང་གསལ་ཉིད་དུ་འདུས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ངེས་དོན་རྩ་བ་གཅིག་པར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཡིད་ཀྱིས་དྲན་པས་འདི་སྐད་གསོལ། །སྣང་མེད་ངོ་བོའི་གནས་ལུགས་གང་། །གཞི་ལ་འཕོ་འགྱུར་ཇི་ལྟར་མེད། །སེམས་ཅན་ཀུན་ལ་ཇི་ལྟར་ཡོད། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སྣང་མེད་ངོ་བོའི་གནས་ལུགས་ནི། །དུས་གསུམ་མེད་པའི་སྔོན་རོལ་དུ། །འདས་པ་བས་ཀྱང་ང་སྔར་བྱུང་། །རྒྱུ་རྐྱེན་མེད་པའི་སྔོན་རོལ་དུ། །འབྲས་བུ་རང་བྱུང་སྙིང་པོ་བྱུང་། །འབྱུང་བ་མེད་པའི་སྔོན་རོལ་དུ། །ང་དང་ནམ་མཁའ་དུས་མཉམ་ཕྱིར། །བསྟན་པ་མེད་པའི་སྔོན་རོལ་དུ། །སངས་རྒྱས་པས་ཀྱང་ང་སྔར་བྱུང་། །ཐེག་པ་མེད་པའི་སྔོན་རོལ་དུ། །ལྟ་བའི་ཆོས་སུ་རང་སེམས་བྱུང་། །སྐྱེ་འཆི་མེད་པའི་སྔོན་རོལ་དུ། །མྱང་འདས་པས་ཀྱང་ཡེ་ཤེས་སྔ། །ཆོས་ཉིད་མེད་པའི་སྔོན་རོལ་དུ། །སྟོང་པ་ཉིད་པས་རང་རིག་སྔ། །བདེར་གཤེགས་མེད་པའི་སྔོན་རོལ་དུ། །སེམས་ཅན་པས་ཀྱང་ཆོས་སྐུ་སྔ། །མཚོན་ཚིག་མེད་པའི་སྔོན་རོལ་དུ། །ཐ་སྙད་པས་ཀྱང་དོན་འདི་སྔ། །ང་ནི་རྒྱུ་མེད་འབྲས་བུ་སྟེ། །རང་བྱུང་རིག་པའི་སྙིང་པོ་ཡིན། །དེ་ཕྱིར་མི་སྐྱེ་དོན་མི་འགག །སྐྱེ་འཆི་མེད་པའི་རྡོ་རྗེ་འཆང་། །ང་ནི་ནམ་མཁའི་རང་བཞིན་ཏེ། །བག་ཆགས་མ་བརྟས་ས་ཆུ་མེད། །གཟུགས་མེད་ཡེ་ཤེས་ངོ་བོ་ལས། །རླུང་མེད་མེ་ནི་ཅི་ལ་འབྱུང་། །དེ་ཕྱིར་ངོ་བོ་ཉིད་ཀྱི་སྐུ། །དེ་ཡང་རྡོ་རྗེ་སེམས་དཔའ་ཉོན། །རང་བྱུང་ངོ་བོ་ཉིད་ལ་ནི། །རྒྱུ་རྐྱེན་མ་བསྐྱེད་ཡང་དག་ཡོད། །སྒྲོ་སྐུར་བྲལ་བའི་རིག་པ་ལ། །འཕེལ་འགྲིབ་མེད་པར་རྒྱུན་དུ་གནས། །ཡང་དག་བྱང་ཆུབ་སྙིང་པོ་ལ། །ཐོབ་པ་མེད་ཅིང་སྤང་བ་མེད། །འཁོར་འདས་གཉིས་ཀྱི་འཛིན་པ་ཡང་། །ཐ་སྙད་ཡིན་གྱིས་དོན་དུ་མེད། །ཆོས་ཀུན་ ― DNG001_Page_0624 ―
[མ་དཔེ་གཟིགས་ན་འདིར་གནོན།]
མཚན་ཉིད་རྣམ་པར་དག །བདག་མེད་ཆོས་ལ་སྐྱེ་འཆི་མེད། །ངོ་བོ་ཉིད་ལ་བསྒོམ་མི་དགོས། །ཡོད་མེད་ཡུལ་གྱི་མཐའ་ལས་འདས། །དེ་དོན་རང་བཞིན་འོད་གསལ་བ། །གདོད་ནས་དག་པས་ནམ་མཁའ་འདྲ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སྣང་མེད་དོན་གྱི་གནས་ལུགས་བསྟན་པའི་ལེའུ་སྟེ་བཅོ་ལྔ་པའོ།། །།རྡོ་རྗེ་སེམས་དཔའ་ཡང་ཉོན་ཅིག །རང་རིག་རྩ་བ་ཆོས་སྐུ་ལ། །ཡོན་ཏན་ལྷག་མ་མེད་པར་རྫོགས། །རང་བྱུང་སངས་རྒྱས་ཡེ་ཤེས་སྐུ། །མ་བསྐྱེད་ཡོངས་རྫོགས་གྲུབ་པའི་ལྷ། །ཆོས་རྣམས་ཀུན་གྱི་འབྱུང་གནས་ཏེ། །ངོ་བོ་དམིགས་མེད་བརྗོད་ལས་འདས། །ཡང་དག་ལྟ་བ་མཐར་ཕྱིན་པས། །ཕ་རོལ་ཕྱིན་པར་ཡེ་ནས་གནས། །སངས་རྒྱས་ཀུན་གྱི་སངས་རྒྱས་ལ། །འགྲོ་བ་ཡོངས་ཀྱི་ཁ་ལོ་སྒྱུར། །མ་བསྐྱེད་པ་ཡི་འབྲས་བུ་ལ། །བྱས་པ་མེད་པའི་ཆོ་འཕྲུལ་བྱུང་། །ཐམས་ཅད་འབྱུང་བ་ང་ཡི་རྩལ། །དེ་ཡང་རྡོ་རྗེ་སེམས་དཔའ་ཉོན། །དོན་ལ་འགྱུར་མེད་ལྟ་བའི་གཞི། །ཡུལ་ལ་མི་ལྟོས་རང་བྱུང་སྐུ། །ཡེ་ཤེས་ནམ་མཁའི་མཐའ་དང་མཉམ། །གཞི་ལ་འགྱུར་མེད་བྱང་ཆུབ་སེམས། །སྐྱོན་གྱིས་མི་གོས་དྲན་པ་ལ། །འཕོ་འགྱུར་མེད་པ་གདལ་བའི་སྐུ། །མི་སྐྱེ་མི་འགག་རང་རིག་ཀློང་། །གོམས་པས་མི་རྙེད་འགྱུར་མེད་ཕྱིར། །འབྲལ་མེད་ད་ལྟ་ང་ཡི་ཐུགས། །བསྐལ་པར་འཁྱམས་ཀྱང་སྐྱེ་འཆི་མེད། །དེ་རྟོགས་རིག་པ་ཀུན་གྱི་གཞི། །མ་བསྒོམས་ཡེ་ཤེས་མཐར་ཕྱིན་པ། །རེ་བ་མེད་ཕྱིར་ལྟུང་མི་སྲིད། །གདོད་ནས་འགྱུར་མེད་ཡེ་ཤེས་སྐུ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། གཞི་ལ་འཕོ་འགྱུར་མེད་པར་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་འདུས་པའི་འཁོར་རྣམས་ཉོན། །རང་བྱུང་ངོ་བོ་ཉིད་ཀྱི་སྐུ། །སེམས་ཅན་ཀུན་གྱི་ལུས་ནང་ན། །རང་རིག་རྒྱལ་པོ་ཡེ་ཤེས་དེ། །རང་གི་སེམས་ལ་ཡེ་ནས་གནས། །དེ་ཡང་རྡོ་རྗེ་སེམས་དཔའ་ཉོན། །ཡང་དག་ངེས་པའི་ཆོས་སྐུ་ནི། །དངོས་པོར་མ་གྲུབ་ཡུལ་ལས་འདས། །རིག་པ་རྒྱུན་ཆགས་དེ་ཉིད་ནི། །འགྲོ་ ― DNG001_Page_0625 ―
[མ་དཔེ་གཟིགས་ན་འདིར་གནོན།]
དྲུག་ཀུན་གྱི་སེམས་ལ་གནས། །སྐྱེ་མེད་ཡེ་ཤེས་རང་བྱུང་སྐུ། །ཆེད་དུ་མ་བྱས་རང་གསལ་བ། །དེ་ཉིད་རང་རིག་ཙམ་ལས་ནི། །བཅོས་སུ་མེད་པས་ནམ་མཁའ་འདྲ། །སེམས་ཅན་ཀུན་གཞི་གཞི་ཆ་ལ། །རང་བྱུང་ཆོས་སྐུ་ཡིན་མོད་ཀྱང་། །ལུང་མེད་རྐྱེན་གྱིས་རང་རིག་བསྒྲིབས། །དེ་ཕྱིར་ཡེ་ཡོད་རྟོགས་པར་བྱ། །དེ་ཡང་རྡོ་རྗེ་སེམས་དཔའ་ཉོན། །སེམས་ཅན་ལུས་ཀྱི་ཚོར་བ་ལ། །རང་རིག་ཡེ་ཤེས་རྒྱུན་མི་ཆད། །དེ་ཉིད་མི་གཡོ་རང་གསལ་བ། །འདུ་འབྲལ་མེད་པར་ཡེ་ནས་གནས། །དེ་ཕྱིར་ཉོན་མོངས་སྦུབས་ནང་ན། །ཀུན་བཟང་ཡེ་ཤེས་སེམས་དཔའ་གནས། །ངེས་དོན་ལུང་ལྡན་དོན་རྟོགས་ན། །དེ་དོན་གཞན་ནས་བསྒྲུབ་མི་དགོས། །སེམས་ཅན་བྱང་ཆུབ་སུ་འདོད་པ། །ཀུན་གཞིའི་གསེབ་ནས་དོན་ཚོལ་ལས། །དེ་ཡི་ངང་ལ་གནས་པར་གྱིས། །དེ་དོན་རྒྱལ་བའི་དགོངས་པ་ཡིན། །བདེར་གཤེགས་རྣམས་ཀྱི་སྙིང་པོ་ཡང་། །སེམས་ཅན་ཀུན་ལ་ཡོད་མོད་ཀྱང་། །ཤེས་པས་མ་མཐོང་ཙམ་དུ་ཟད། །དེ་མཐོང་ངེས་པའི་གདམས་པ་འདི། །ཤེས་པས་རྟག་ཏུ་འབྲལ་བ་མེད། །དེ་ཡང་འདུས་པའི་སྙིང་པོ་ཉོན། །མ་རིག་འཁྲུལ་པ་ཡོད་བཞིན་དུ། །འབྲས་བུའི་སངས་རྒྱས་ཐུགས་ལ་གནས། །དེ་ཕྱིར་གཞན་ནས་འབྱུང་བ་མེད། །ཐོག་མ་མ་ཡིན་དུས་འདི་རང་། །དེ་ཡང་རང་རིག་ཡེ་ཤེས་ནི། །ཏིལ་ལ་མར་གྱིས་ཁྱབ་པ་བཞིན། །འགྲོ་དྲུག་ཀུན་ལ་རང་རིག་ཁྱབ། །སྐྱེ་འགགས་མེད་པར་རྒྱུན་དུ་གནས། །དཔེར་ན་ས་གཏིང་ནམ་མཁའ་བཞིན། །འགྲོ་འོང་མེད་པར་ཆོས་སྐུར་གནས། །དོན་དེ་མ་རྟོགས་བློས་བསླད་ནས། །འཁོར་བར་འཁྱམས་ཀྱང་ཉམས་པ་མེད། །རང་བྱུང་རིག་པའི་ཡེ་ཤེས་དེ། །སྤྲིན་མེད་ནམ་མཁའི་ཉི་མ་བཞིན། །འདུས་མ་བྱས་པའི་ཀློང་དཀྱིལ་ན། །རང་རིག་ཡེ་ཤེས་ཆོས་སྐུ་བཞུགས། །རིན་ཆེན་ག་བུར་འོད་ཐིམ་འདྲ། །ལུས་ཀྱི་ནང་ན་ཆོས་སྐུ་ཡོད། །ལུས་ཞིག་དྲན་པས་ལུས་སུ་འཇུག །དེ་ཕྱིར་འཁོར་བའི་རྒྱུད་ལ་འཁོར། །དོན་རྟོགས་རང་རིག་གནས་སུ་ཆེ། །རིག་པ་རང་བྱུང་ངོ་བོ་དེ། །སེམས་ཅན་ཀུན་གྱི་ ― DNG001_Page_0626 ―
[མ་དཔེ་གཟིགས་ན་འདིར་གནོན།]
ཡིད་ལ་གནས། །དེ་ཕྱིར་འཁོར་འདས་ཀུན་གྱི་གཞི། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོ་ལས། སེམས་ཅན་ཀུན་ལ་གནས་ལུགས་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་རིག་རྗེ་ལ་ཡང་ཞུས་པ། །དོན་གྱི་གནས་ལུགས་རྟོགས་པ་གང་། །རིག་པའི་དབང་རྣམས་ཇི་ལྟར་བསྐུར། །མ་བགྲོད་ལམ་ལྔ་ཇི་ལྟར་རྫོགས། །ས་དང་ཕ་རོལ་ཡོན་ཏན་གང་། །ཀུན་རིག་སྟོན་པས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །ངེས་དོན་ངས་བཤད་ཡིད་ཀྱིས་ཉོན། །ངེས་པའི་ལུང་ལྡན་བླ་མ་ལ། །དད་པ་བརྩོན་འགྲུས་དམ་ཚིག་གིས། །བཀུར་སྡི་རིམ་གྲོ་གུས་བྱས་ནས། །མན་ངག་སྙིང་པོ་གནང་བར་འགྱུར། །དེ་ཡང་འདུས་པའི་སྙིང་པོ་ཉོན། །དཔེར་ན་བྲམ་ཟེ་གླང་ཆེན་བཞིན། །རྒྱལ་པོའི་བཀའ་ཡི་བཙན་ཕུལ་གྱིས། །བྲིད་བསྡིགས་གཡོ་སྒྱུས་ནོར་འདོད་ང་། །སྲོག་སྙིང་མེད་པར་ཕན་མི་ཐོགས། །དེ་བཞིན་ངེས་པའི་ལུང་ལྡན་གྱིས། །གདམས་ངག་ཆོས་སྐུ་མ་བསྟན་ན། །ཐབས་དང་གཡོ་སྒྱུ་སྣ་ཚོགས་ཀྱིས། །བཀའ་རྐུན་སྐྱོན་གྱིས་ཆོས་བཙལ་ཀྱང་། །རང་སེམས་མི་རྟོགས་ངན་སོང་ལྟུང་། །དེ་ཡང་རྡོ་རྗེ་སེམས་དཔའ་ཉོན། །ཕྲག་དོག་མེད་པར་བཟང་སེམས་ཀྱིས། །སྲོག་སྙིང་རྒྱལ་པོ་ལ་བྱིན་པས། །བྲམ་ཟེ་གསེར་གླང་འདྲ་གཉིས་འབྱུང་། །གཉིས་ཀ་མངའ་ཐང་ཅི་བསམ་འགྲུབ། །དེ་བཞིན་བླ་མ་ལུང་ལྡན་ལ། །ཡིད་འཐད་ཕུལ་ཞིང་ཅི་གསུངས་ཉན། །ཤེས་རབ་རྣོ་ལ་གསང་ཐུབ་ལ། །མན་ངག་སྙིང་པོ་གནང་བའི་ཕྱིར། །སློབ་མས་རང་སེམས་རྟོགས་པར་ངེས། །དེ་ཕྱིར་བླ་མ་བཀུར་བ་གཅེས། །ངེས་དོན་གནང་བའི་ཐབས་སུ་བཤད། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། རྟོགས་པར་བྱ་བའི་ཐབས་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །དབང་གི་རིམ་པ་བཀའ་སྩལ་པ། །རྒྱལ་ཐབས་སྤྱི་བླུགས་དབང་ཆེན་ནི། །དང་པོ་ཐུན་མོང་དབང་ ― DNG001_Page_0627 ―
[མ་དཔེ་གཟིགས་ན་འདིར་གནོན།]
བསྐུར་བ། །དད་པ་དང་ནི་ཤེས་རབ་ཀྱིས། །སྟ་གོན་ལ་ནི་གནས་པར་བྱ། །ཐུན་མོང་དབང་རྣམས་རྫོགས་པར་བསྐུར། །དེ་ནས་ངེས་པའི་ལུང་ལྡན་གྱིས། །སྣོད་དང་ལྡན་ལ་ངས་བསྐུར་གྱི། །ཡིད་ལ་མ་ཡེངས་དོན་ཟུངས་ཤིག །དེ་ཡང་འདུས་པའི་འཁོར་རྣམས་ཀྱིས། །ཏིང་འཛིན་དཀྱིལ་འཁོར་དངོས་ཀྱང་རུང་། །ཁྱད་པར་འཕགས་པའི་རྫས་བདུན་གྱིས། །ཡེ་ཤེས་ལྷ་ཡི་དོན་མཚོན་ཕྱིར། །རས་སམ་ཤིང་ཤུན་གྲོ་ག་ལ། །འཇུག་སྒོ་ལྔ་ཡི་བརྡའ་བྲིས་ཏེ། །དལ་དུ་བཞག་ལ་བྱིན་གྱིས་བརླབས། །དེ་ནས་དབང་བསྐུར་རིམ་པ་ནི། །རྒྱལ་ཐབས་སྤྱི་བླུགས་དབང་བསྐུར་བ། །མཚོན་པའི་བརྡའ་ཡི་རྫས་ལྔ་ལས། །སྤྱི་བོ་སྙིང་ག་མགྲིན་པ་རུ། །སྐུ་གསུང་ཐུགས་ཀྱི་དབང་རིམ་བསྐུར། །ལག་པ་གཡས་དང་གཡོན་པ་རུ། །ཡོན་ཏན་ཕྲིན་ལས་དེ་བཞིན་ནོ། །དེ་ཡང་རྡོ་རྗེ་སེམས་དཔའ་ཉོན། །རིག་པ་རང་གསལ་དབང་བསྐུར་བ། །ལྟ་སྒོམ་སྤྱོད་པ་འབྲས་བུའི་དབང་། །དད་ལྡན་འཁོར་ལ་ངས་བསྐུར་གྱིས། །འཁོར་རྣམས་མ་ཡེངས་ཡིད་བསྡུས་ཤིག །ངེས་དོན་སངས་རྒྱས་ཆོས་ཀྱི་སྐུ། །ཐིག་ལེ་རང་བྱུང་འོད་གསལ་བ། །རིག་པའི་ཡེ་ཤེས་མངོན་གྱུར་དུ། །ཡེ་ཤེས་སྐུ་མཆོག་བདག་དབང་བསྐུར། །མ་རིག་སེམས་ཀྱི་མུན་གསབ་ཏུ། །ལུང་ལྡན་ཐུགས་ཀྱི་སྒྲོན་མ་ཡིས། །རང་རིག་རྟོག་མེད་ད་ལྟ་ཉིད། །འགྱུར་མེད་ཐུགས་ཀྱི་དབང་གཅིག་བསྐུར། །ངེས་དོན་ཡེ་ཤེས་ཚངས་པའི་གསུངས། །ཚིག་གིས་དོན་མཚོན་ཡིད་ཀྱིས་གོ། །དེ་དོན་གསལ་བ་རིག་པའི་གསུང་། །བརྡའ་མཇལ་ངེས་པའི་དབང་ཐོབ་ཤོག །དེ་ཡང་རྡོ་རྗེ་སེམས་དཔའ་ཉོན། །དངོས་མེད་རིག་པའི་ཡེ་ཤེས་འདི། །ནང་གསལ་ཡེངས་མེད་ཆོས་ཀུན་རྫོགས། །རྒྱལ་བ་རྣམས་ཀྱི་ཡོན་ཏན་དབང་། །ཡེ་ཤེས་འགྱུར་མེད་བདག་ལ་བསྐུར། །རང་བྱུང་མཛད་སྤྱོད་ཡེ་ཤེས་ལ། །རྒྱུན་དུ་མི་འབྲལ་ངེས་པའི་གསུང་། །དུས་འདིར་བརྗོད་མེད་ཡེ་གསལ་འདི། །མཛད་སྤྱོད་དབང་གཅིག་བདག་ལ་བསྐུར། །དེ་ཡང་དད་ལྡན་འཁོར་རྣམས་ཉོན། །རང་རིག་ཆོས་སྐུར་བལྟ་བ་ཡིས། །ཡིད་ཆེས་ ― DNG001_Page_0628 ―
[མ་དཔེ་གཟིགས་ན་འདིར་གནོན།]
ཐག་ཆོད་གདེང་དུ་ལྡན། །དེ་རྟོགས་ཀུན་བཟང་བྱིན་རླབས་ཀྱིས། །རང་སེམས་རྟོགས་པའི་དབང་ཐོབ་ཤོག །འབྲལ་མེད་རང་གསལ་ཡེངས་པ་མེད། །རྒྱུན་དུ་ཉམས་མྱོང་ཞེན་མེད་པའི། །ཏིང་འཛིན་རིག་པ་ལྷག་མཐོང་གསལ། །རྐྱེན་དབང་མི་འགྱུར་དབང་ཐོབ་ཤོག །ཉམ་ང་མེད་པའི་སྤྱོད་པ་ཡིས། །བླང་དོར་དགག་བསྒྲུབ་ལ་སོགས་མེད། །དེ་དོན་རྟག་ཏུ་སྐྱོན་མི་གོས། །སྤྱོད་པ་མ་བཅོས་དབང་ཐོབ་ཤོག །འབྲས་བུ་རང་རིག་ཆོས་ཉིད་ཀློང་། །མ་བགྲོད་སངས་རྒྱས་སར་ཕྱིན་པ། །ཆོས་སྐུའི་གཟུགས་བརྙན་གཟུགས་སྐུ་འབྱུང་། །འགྲོ་དོན་མཐར་ཕྱིན་དབང་ཐོབ་ཤོག །དེ་ནས་འདུས་པའི་དད་ལྡན་ལ། །ངེས་དོན་མཚོན་པའི་བརྡའ་ཡིག་དེ། །སྣོད་དུ་བླུགས་ཏེ་བྲིམ་བྱས་ནས། །གང་བབ་གདམས་ངག་བསྟན་པར་བྱ། །དེ་ཡང་རྡོ་རྗེ་སེམས་དཔའ་ཉོན། །དེ་དག་དབང་གི་རིམ་པ་ཡང་། །དོན་ལ་དབྱེར་མེད་ངོ་བོ་གཅིག །ཡེ་ཤེས་སྤྱི་བླུགས་དབང་ལ་ནི། །སྐུར་བྱེད་བསྐུར་བྱ་གདོད་ནས་མེད། །ངེས་དོན་རྐྱེན་ཐུབ་རྣམ་དྲུག་གིས། །གདམས་ངག་བསྟན་པ་ཙམ་གྱིས་ཆོག །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། དབང་གི་རིམ་པ་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །མེད་ལ་ཡོད་འཛིན་ཀུན་བརྟགས་ཡུལ། །འཁྲུལ་པ་བཟློག་དཀའ་འཇིག་ཚོགས་རི། །རང་གིས་རང་བསླུས་ཞེན་པའི་རྒྱུན། །དེ་བཟློག་དོན་ཕྱིར་ལམ་ལྔ་གསུངས། །དེ་ཡང་རྡོ་རྗེ་སེམས་དཔའ་ཉོན། །དད་ལྡན་འགྱུར་མེད་ལས་ཅན་གྱིས། །ལུང་ལྡན་རྡོ་རྗེ་སློབ་དཔོན་ལ། །ཡིད་འཐད་ཕོངས་མེད་འབུལ་བ་ནི། །ཚོགས་ཀྱི་ལམ་དུ་བསྟན་པ་ཡིན། །བླ་མས་གནང་བ་བྱིན་གྱུར་ཏེ། །ཡིད་གཉིས་ཐེ་ཚོམ་བློ་སྤངས་ནས། །མཁའ་འགྲོ་མཆོད་ཅིང་དོན་ཞུས་ཚེ། །སྦྱོར་བའི་ལམ་ཞེས་དེ་ལ་བྱ། །དེ་ཡང་འདུས་པའི་སྙིང་པོ་ཉོན། །ངེས་པའི་བཅུད་ལྡན་སློབ་དཔོན་གྱིས། །ཡང་དག་གདམས་ངག་ལུང་བསྟན་པས། །སྣོད་ ― DNG001_Page_0629 ―
[མ་དཔེ་གཟིགས་ན་འདིར་གནོན།]
ལྡན་ཡིད་ཆེས་དོན་རྟོགས་ཕྱིར། །མཐོང་བའི་ལམ་ནི་ཡིན་པར་གསུངས། །དེ་དོན་གོ་ནས་རྒྱུན་དུ་ནི། །ངེས་དོན་ཆོས་སྐུར་སྤོངས་པ་མེད། །རང་རིག་ཡེ་ཤེས་དབང་ཐོབ་ཕྱིར། །བསྒོམ་པའི་ལམ་དུ་བསྟན་པ་ཡིན། །ཡང་དག་ངེས་དོན་གདམས་ངག་འདི། །རང་གི་ཐུགས་ལ་དོན་རྫོགས་པས། །འགྱུར་མེད་གདེང་ཆུད་ཡེ་ཤེས་ཀློང་། །མཐར་ཕྱིན་ལམ་དུ་བཤད་པ་ནི། །དེ་ཡང་འདུས་པའི་སྙིང་པོ་ཉོན། །ཡང་དག་དོན་གྱི་ཆོས་ཉིད་ལ། །ལམ་གྱི་དབྱེ་བ་མེད་མོད་ཀྱང་། །རྣལ་འབྱོར་བློ་ཡི་རིམ་པ་ལས། །ཐེག་པའི་བྱེ་བྲག་ཐ་དད་པས། །ལམ་ལྔར་ཕྱེ་བ་གཅིག་ཏུ་རྫོགས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མ་བགྲོད་ལམ་ལྔ་རྫོགས་པར་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ས་ཡི་དབྱེ་བ་རྟེན་དང་དཔེ། །རྩལ་གྱི་སྒོ་ནས་བཞི་བཞི་རུ། །ཕ་རོལ་ཕྱིན་བཅུ་ས་དང་སྦྱར། །ངེས་པའི་ཡོན་ཏན་རྫོགས་པར་གསུངས། །དེ་ཡང་རྡོ་རྗེ་སེམས་དཔའ་ཉོན། །ས་ནི་དང་པོ་རབ་དགའ་ལ། །རྟེན་ནི་སྦྱིན་པའི་ཕ་རོལ་ཕྱིན། །དཔེ་ནི་མི་ཟད་གཏེར་དང་འདྲ། །རྩལ་ནི་མ་རིག་ཟིལ་གྱིས་གནོན། །ས་ནི་གཉིས་པ་དྲི་མེད་ལ། །རྟེན་ནི་ཚུལ་ཁྲིམས་ཕ་རོལ་ཕྱིན། །དཔེ་ནི་རིན་ཆེན་མྱུ་གུ་འདྲ། །རྩལ་ནི་རང་རིག་ཡེ་ཤེས་གསལ། །དེ་ཡང་འཁོར་གྱི་སྙིང་པོ་ཉོན། །ས་ནི་གསུམ་པ་འོད་འཕྲོ་ལ། །རྟེན་ནི་བཟོད་པའི་ཕ་རོལ་ཕྱིན། །དཔེ་ནི་རྒྱ་མཚོ་ཆེན་པོ་འདྲ། །རྩལ་ནི་ཉོན་མོངས་རྩད་ནས་བརླག །ས་ནི་བཞི་པ་འོད་བྱེད་ལ། །རྟེན་ནི་བརྩོན་འགྲུས་ཕ་རོལ་ཕྱིན། །དཔེ་ནི་རྡོ་རྗེ་ཕ་ལམ་འདྲ། །རྩལ་ནི་བག་ཆགས་ཞེན་པ་འཇོམས། །ས་ནི་ལྔ་པ་སྦྱང་དཀའ་ལ། །རྟེན་ནི་བསམ་གཏན་ཕ་རོལ་ཕྱིན། །དཔེ་ ― DNG001_Page_0630 ―
[མ་དཔེ་གཟིགས་ན་འདིར་གནོན།]
ནི་རི་བོ་ལྷུན་པོ་འདྲ། །རྩལ་ནི་བྱིང་རྒོད་སྐྱོན་དང་བྲལ། །ས་ནི་དྲུག་པ་མངོན་གྱུར་ལ། །རྟེན་ནི་ཤེས་རབ་ཕ་རོལ་ཕྱིན། །དཔེ་ནི་མ་ཀི་ཏ་ཡི་སྨན་བཟང་འདྲ། །རྩལ་ནི་རང་རིག་ལྷག་མཐོང་རྟོགས། །དེ་ཡང་རྡོ་རྗེ་སེམས་དཔའ་ཉོན། །ས་ནི་བདུན་པ་རིང་སོང་ལ། །རྟེན་ནི་ཐབས་ཀྱི་ཕ་རོལ་ཕྱིན། །དཔེ་ནི་དགེ་བའི་བཤེས་གཉེན་འདྲ། །རྩལ་ནི་དུག་ལྔ་སྨན་དུ་བསྒྱུར། །ས་ནི་བརྒྱད་པ་མི་གཡོ་བ། །རྟེན་ནི་སྨོན་ལམ་ཕ་རོལ་ཕྱིན། །དཔེ་ནི་ཡིད་བཞིན་ནོར་བུ་འདྲ། །རྩལ་ནི་འཇིག་རྟེན་ཆོས་བརྒྱད་བྲལ། །ས་ནི་དགུ་པ་ལེགས་པའི་བློ་གྲོས་ལ། །རྟེན་ནི་སྟོབས་ཀྱི་ཕ་རོལ་ཕྱིན། །དཔེ་ནི་ཉི་མའི་སྙིང་པོ་འདྲ། །རྩལ་ནི་ལོག་ལྟ་དབྱིངས་སུ་བསྒྲལ། །ས་ནི་བཅུ་པ་ཆོས་ཀྱི་སྤྲིན། །རྟེན་ནི་ཡེ་ཤེས་ཕ་རོལ་ཕྱིན། །དཔེ་ནི་ཚངས་པའི་དབྱངས་དང་འདྲ། །རྩལ་ནི་སྒྲིབ་དག་ཐམས་ཅད་མཁྱེན། །དེ་ཡང་འདུས་པའི་སྙིང་པོ་ཉོན། །དེ་དག་ཕ་རོལ་ཕྱིན་བཅུ་ཡང་། །ངོ་བོ་ཐིག་ལེ་གཅིག་ཏུ་འདུས། །གདུལ་བྱའི་རིམ་པས་བཅུར་བསྟན་པ། །ཡང་དག་ངོ་བོར་ཡེ་ཤེས་ཉིད། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ས་དང་ཕ་རོལ་ཕྱིན་པའི་ཡོན་ཏན་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།འདུས་པའི་འཁོར་གྱིས་ཡང་གསོལ་པ། །ངེས་པའི་དོན་གྱི་གདམས་ངག་གིས། །མ་རིག་མུན་སེལ་ལྟ་བ་ལ། །འཁོར་འདས་མཐའ་ཡིས་མ་རིག་དང་། །ཡེ་ཤེས་ལྷུན་གྲུབ་ལྟ་བ་གང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཡང་དག་འཁོར་ལ་བཀའ་སྩལ་པ། །རང་བྱུང་སྙིང་པོའི་ལྟ་བ་ནི། །ཉི་མ་ཤར་ནས་མུན་པ་སངས། །ངེས་ལུང་བསྟན་པས་མ་རིག་བརླག །ཐིག་ལེ་བརྡལ་ཁྱབ་ཆོས་སྐུ་དེ། །རིག་པ་རང་ཤར་བཅོས་པ་མེད། །དེ་དོན་ལྷུན་གྲུབ་ཡེ་ནས་གསལ། །རང་བྱུང་སྙིང་པོ་རང་གསལ་ཐུགས། །ཡེ་ནས་ཐ་སྙད་ཀུན་དང་བྲལ། །ཇི་བཞིན་གསལ་ལ་ངན་རྟོག་མེད། །དོན་དམ་སྤྲོས་བྲལ་ལྟ་བའི་མཆོག །བཙལ་མེད་སྤྱོད་པའི་ཡུལ་ལས་འདས། །ཡང་དག་ཀློང་འགྱུར་དོན་ལ་མཁས། །དེ་ཉིད་བློ་ལ་སུས་འབྱོར་པ། །ཚོགས་བརྒྱད་ཤེས་པའི་ཡུལ་ལས་འདས། །མངོན་དུ་གྱུར་པས་ཐུགས་ལ་བཀྲ། །ཀུན་གྱིས་རྟོགས་དཀའ་བྱང་ཆུབ་དེ། །གཡོ་མེད་མི་རྟོག་ཆོས་སྐུའི་ལམ། །རང་རིག་བདེ་བ་ཆོས་སྐུའི་ཀློང་། །གཅིག་ ― DNG001_Page_0631 ―
[མ་དཔེ་གཟིགས་ན་འདིར་གནོན།]
ཏུ་རྫོགས་པས་ཐིག་ལེ་གསལ། །ལྟ་བ་དབུས་དང་མཐའ་མེད་པས། །སྤོང་ལེན་མ་བཙལ་ལྷུན་གྱིས་གྲུབ། །སྐྱེ་མེད་ངང་དུ་རིག་པ་འཕྱོ། །རྟེན་མེད་ཆགས་པའི་ཡུལ་དང་བྲལ། །སྒོམ་མེད་ལྟ་བ་ངང་གིས་གསལ། །མཚོན་པའི་ཚིག་གིས་བཀྲི་དྲང་བྲལ། །སྐྱེ་མེད་གདེང་ཆུད་འདུ་འབྲལ་མེད། །སྣང་མེད་རིག་པ་དངོས་པོ་བྲལ། །ཡང་དག་ཐུགས་ལ་སྤྲོ་བསྡུ་མེད། །མ་སྤྲོས་ལྷུན་གྲུབ་རིག་པར་ཤར། །ཀུན་ཁྱབ་དོན་འདུས་མཐའ་མ་རེག །ཡེ་ཤེས་སྐུ་མཆོག་ཆོས་སྐུ་བརྡལ། །དེ་ཡང་རྡོ་རྗེ་སེམས་དཔའ་ཉོན། །འགྲོ་དྲུག་སེམས་ཅན་རང་བྱུང་སྐུ། །འདི་ལྟར་སྣང་བ་མ་ལུས་ཀུན། །གདོད་ནས་མེད་པའི་དོན་རྟོགས་པས། །ཡེ་ཤེས་གཅིག་གི་ངང་དུ་འདུས། །ལུས་ངག་ཡིད་ཀྱི་བྱ་བ་རྣམས། །བྱས་ན་འཆིང་བའི་ལས་ཡིན་པས། །གཞི་ལ་མེད་ཤེས་བཙལ་མི་དགོས། །མ་བསྒོམས་འདུ་འབྲལ་མེད་པར་བལྟ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མ་རིག་མུན་སེལ་གྱི་ལྟ་བ་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ཡང་འདུས་པའི་འཁོར་རྣམས་ཉོན། །སངས་རྒྱས་སེམས་ཅན་འབྱུང་བ་ཀུན། །གློ་བུར་བྱུང་ཕྱིར་གནས་ལུགས་མིན། །འཇིག་རྟེན་ཆོས་ལ་དཔེ་མི་བླང་། །འཁོར་འདས་གཞི་ལ་དོན་མ་རེག །དེ་ཡང་རྡོ་རྗེ་སེམས་དཔའ་ཉོན། །ཕ་མེད་མ་མེད་ནགས་ཀྱི་བྱེའུ་འདྲ། །ནམ་མཁའི་མཐོངས་སུ་ཐོན་པ་ལྟར། །གློ་བུར་འཁོར་འདས་གཉིས་བར་ནས། །ཆོས་སྐུ་རྟོགས་པས་མ་རིག་སངས། །གདོད་མའི་རང་བྱུང་འདི་ཉིད་ལ། །ལྟ་བ་ཤེས་པས་ཆོག་པའི་ཕྱིར། །འཁོར་འདས་སྙིང་པོ་གདོད་ནས་མེད། །ཡུལ་དང་མ་འདྲེལ་ངོ་བོ་ཉིད། །དེ་དོན་རྟོགས་པའི་དོན་ལ་གནས། །ཡེ་རྫོགས་ཆོས་སྐུ་ཆེན་པོ་ཡིན། །རེ་དོགས་མཐའ་ཀུན་རྣམ་པར་ཞི། །ཚིག་ཏུ་འཛིན་མེད་ཡེ་ནས་བདེན། །གཅིག་དང་དུ་མ་མཐའ་ཡི་ཆོས། །དེ་ཕྱིར་འཁོར་འདས་གཉིས་ལས་འདས། །འདི་ཐོས་མི་སྐྲག་ལྟ་བའི་མཆོག །དེ་ཡང་འདུས་པའི་སྙིང་པོ་ཉོན། །དངོས་པོ་ ― DNG001_Page_0632 ―
[མ་དཔེ་གཟིགས་ན་འདིར་གནོན།]
མེད་ཕྱིར་རྟག་པ་བྲལ། །ཀུན་ལ་ཁྱབ་པས་ཆད་པ་བྲལ། །མཐའ་དབུས་བྲལ་བས་རང་བྱུང་སྐུ། །བརྗོད་མེད་ལྟ་བ་དྲན་པའི་གཟུངས། །དེ་དོན་ཕྱིན་ཅི་མ་ལོག་པས། །ཡེ་ཤེས་ལམ་ལ་གནས་པར་བྱ། །རང་རིག་ངེས་པའི་ལྟ་བ་ལ། །ཡེངས་པ་མེད་པར་ཡིད་ཀྱིས་བལྟ། །དེ་ཡང་ཡུལ་ཅན་མ་ཡིན་ཏེ། །རང་ལ་རང་བལྟས་ཤིན་ཏུ་གསལ། །དེ་གོམས་མཐར་ཕྱིན་ཡེ་ཤེས་ཐུགས། །ཆོས་ཉིད་སྤྲོས་བྲལ་འགྱུར་བ་མེད། །རང་བྱུང་ཡེ་ཤེས་གཉུག་མར་གནས། །དེ་ཉིད་མི་འབྲལ་ལྟ་བའི་མཆོག །དེ་ཡང་རྡོ་རྗེ་སེམས་དཔའ་ཉོན། །འཁོར་འདས་གཉིས་ཀྱི་ཆོས་འདི་ལ། །ཇི་སྲིད་བག་ཆགས་ཡོད་ཀྱི་བར། །འདི་ལྟར་སྣང་བའི་ཆོས་རྣམས་ཡོད། །ཇི་སྲིད་བག་ཆགས་དག་ན་ནི། །སྣང་བའི་ཡུལ་རྣམས་གདོད་ནས་མེད། །ཐག་སྦྲུལ་ཐོ་ཡོར་མི་བཞིན་ནོ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མཐའ་མ་རེག་པའི་ལྟ་བ་བསྟན་པའི་ལེའུ་སྟེ་ཉི་ཤུ་རྩ་གསུམ་པའོ།། །།རྡོ་རྗེ་སེམས་དཔའ་ཡང་ཉོན་ཅིག །རང་སེམས་ཆོས་སྐུར་བལྟ་བ་ནི། །ཀུན་ལ་ཁྱབ་པའི་རིག་པ་ཡིས། །འདུས་མ་བྱས་པའི་དོན་རྟོགས་པས། །མཐའ་བྲལ་རིག་པ་གཅིག་ཡིན་ནོ། །དེ་ཡང་འདུས་པའི་སྙིང་པོ་ཉོན། །ཀུན་གྱི་མཉམ་ཉིད་རྒྱལ་བའི་ཐུགས། །མ་ལུས་སེམས་ཅན་ཐམས་ཅད་ལ། །ཆོས་སྐུས་ཁྱབ་པར་བརྡལ་བའི་སྐུ། །མཐའ་དབུས་མེད་པས་ནམ་མཁའ་འདྲ། །རིག་པ་མ་བསླད་གཉུག་མར་གནས། །དམིགས་འཛིན་མེད་པར་ངང་གིས་གསལ། །དངོས་པོར་མེད་ལ་ཤེས་པར་ཡོད། །ནམ་མཁར་ཉི་མའི་འོད་ཤར་འདྲ། །འདུས་མ་བྱས་པའི་ཡེ་ཤེས་ཀྱིས། །རྟེན་འཆའ་མེད་པར་ཉོན་མོངས་སེལ། །འབྱུང་བ་ལྔ་ལ་རག་མ་ལུས། །མི་འགྱུར་འཇོམས་པས་རྡོ་རྗེ་འདྲ། །བླ་མས་དོན་བསྟན་རྣལ་འབྱོར་པས། །ཐེ་ཚོམ་མེད་པར་རང་སེམས་རྟོགས། །ཐམས་ཅད་གཅིག་ལ་རྫོགས་པར་ཤེས། །མ་རིག་ལོང་བའི་མིག་འབྱེད་འདྲ། །ཡེ་ཤེས་རིག་པ་འདི་ཉིད་ནི། །ཡོད་མེད་དབུས་ཀྱི་མཐའ་བྲལ་ ― DNG001_Page_0633 ―
[མ་དཔེ་གཟིགས་ན་འདིར་གནོན།]
བས། །སང་ངེ་སལ་ལེ་འཕོ་འགྱུར་མེད། །ཀ་ཤིའི་རས་ཀྱི་རིན་ཆེན་འདྲ། །དེ་ཡང་རྡོ་རྗེ་སེམས་དཔའ་ཉོན། །མ་བཅོས་པ་ཡི་རང་བཞིན་ལ། །ཡུལ་མེད་ཆོས་སྐུ་རང་བྱུང་སྟེ། །རེ་དོགས་རྡུལ་ཙམ་མེད་པའི་ཕྱིར། །ལྷུན་གྲུབ་ཡེ་ཤེས་ཆེན་པོར་རྫོགས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཡེ་ཤེས་ལྷུན་གྱིས་གྲུབ་པའི་ལྟ་བ་བསྟན་པའི་ལེའུ་སྟེ་ཉི་ཤུ་རྩ་བཞི་པའོ།། །།རྡོ་རྗེ་སེམས་དཔས་ཡང་ཞུས་པ། །མ་བསྒོམས་ཏིང་འཛིན་ཇི་ལྟར་གསལ། །འབྲལ་མེད་རྒྱུན་གྱི་སྤྱོད་པ་གང་། །རེ་དོགས་མེད་པའི་འབྲས་བུ་རྣམས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མ་བསྒོམས་འབྲལ་མེད་ཏིང་འཛིན་ནི། །རྣམ་སྨིན་ལུས་ཀྱི་རྟེན་བཅས་པའི། །ཐ་མལ་ཀུན་གཞི་གཞི་ཆ་ལ། །ལུང་ལྡན་རྐྱེན་གྱི་གདམས་ངག་གིས། །རང་སེམས་ཆོས་སྐུར་ངོ་སྤྲད་པས། །དམིགས་འཛིན་མེད་པར་ངང་གིས་གསལ། །གཉུག་མར་གནས་ལ་འཕེལ་འགྲིབ་མེད། །དེ་ཡང་རྡོ་རྗེ་སེམས་དཔའ་ཉོན། །བྱང་ཆུབ་ཐུགས་ཀྱི་ངེས་པའི་དོན། །སངས་རྒྱས་ཀུན་གྱི་ཡེ་ཤེས་སྐུ། །རྣལ་འབྱོར་ཤེས་རབ་ཡེ་ཤེས་མིག །རང་བྱུང་ཏིང་འཛིན་རྒྱུན་མི་འཆང་། །ཆོས་སྐུ་རང་བྱུང་ངོས་ཟིན་པས། །རང་གསལ་ཡེ་ནས་བྱང་ཆུབ་ལམ། །དེ་ལས་མི་འདའ་རྒྱལ་བའི་ཐུགས། །དེ་དོན་སངས་རྒྱས་དགོངས་པ་ཡིན། །དེ་ཡང་འདུས་པའི་སྙིང་པོ་ཉོན། །སྔར་གྱི་བག་ཆགས་ཞེས་བྱ་བ། །གཟུང་འཛིན་བརྟས་པའི་སྣང་བ་ལ། །དམ་པར་ཞེན་པས་ཀུན་ཏུ་བརྟགས། །དེ་ཕྱིར་འཁོར་བའི་ས་བོན་ཡིན། །ཕྱིས་ཀྱི་ཉོན་མོངས་ཞེས་བྱ་བ། །མ་རིག་རྒྱུ་ལ་ཏུར་བྱུང་སེམས། །དེ་བལྟས་ཀུན་གཞིར་སྨིན་པའི་ལས། །དེས་བསྐྱེད་ཚོགས་བརྒྱད་བདེ་སྡུག་བྱུང་། །སྔ་ཕྱི་གཉིས་འདུས་སྒོ་ལྔའི་ཡུལ། །སྣ་ཚོགས་འཕྲོས་པས་རྟོག་པ་སྟེ། །དེ་ལ་ཞེན་ཕྱིར་ཚོགས་བརྒྱད་བྱུང་། །དེ་ཡི་ཉེས་པས་འཁོར་བར་སྨིན། །དེ་ཡང་རྡོ་རྗེ་སེམས་དཔའ་ཉོན། ། ― DNG001_Page_0634 ―
[མ་དཔེ་གཟིགས་ན་འདིར་གནོན།]
ལུང་ལྡན་རྐྱེན་གྱིས་ཆོས་ཀྱི་སྐུ། །རང་རིག་སེམས་ཀྱི་མུན་གསེབ་ནས། །ངོ་ཤེས་རང་གི་མཚན་ཉིད་ནི། །ཡུལ་སེམས་གཉིས་ལ་སྤྲོས་དང་བྲལ། །མཐའ་དབུས་མི་དམིགས་དྲན་ལས་འདས། །ཡེ་ནས་དག་ཕྱིར་བྱ་བ་མེད། །བཙལ་དུ་མེད་པས་སེམས་ལས་འདས། །ཀུན་ལ་ཁྱབ་པས་བཙལ་མི་དགོས། །འགག་པ་མེད་ལ་རིག་པ་སྟོང་། །མ་བྱས་ཕྱིར་ན་འཇིག་པ་མེད། །རིག་པ་གསལ་བས་རང་ངོ་ཤེས། །ཇི་བཞིན་པ་ལ་མ་སྐྱེས་པ། །མ་བཅོས་རྐྱེན་གྱིས་མི་འགྱུར་བ། །རྟག་ཆད་མ་ཡིན་སྡུད་པ་མེད། །སོ་སོ་མ་ཡིན་འདྲེས་པ་མེད། །དངོས་མེད་སེམས་ཀྱི་ཏིང་འཛིན་གསལ། །གཏང་གཞག་མེད་པའི་ཆོས་སྐུ་ལ། །བྱིང་རྒོད་མི་འབྱུང་རྒྱུན་དུ་གནས། །ཡེ་ཤེས་དོན་ལ་འཆར་ནུབ་མེད། །དེ་ཡང་འདུས་པའི་སྙིང་པོ་ཉོན། །རང་རིག་ཡེ་ཤེས་འདི་ཉིད་ལ། །བསྒོམ་དུ་མེད་ཕྱིར་ཡེངས་པ་མེད། །གཟུང་དུ་མེད་ལ་ཞེ་ལ་གསལ། །རང་ཡིད་ཆེས་པས་ཁར་མི་ཐོན། །སྣང་སྲིད་གསལ་ལ་ཞེན་པ་མེད། །རང་རིག་བྱ་ར་དངོས་མེད་གྲོལ། །དྲན་པ་མི་བརླག་འགྲོ་འོང་མེད། །དྲན་པའི་རིག་པ་ཅི་འབྱུང་ཡང་། །དེ་ཉིད་དུས་ན་ངོས་གཟུང་མེད། །དེ་ཡང་འདུས་པའི་སྙིང་པོ་ཉོན། །ཡང་དག་སངས་རྒྱས་ངེས་པའི་དོན། །སེམས་ཅན་ཡིད་ལ་གསལ་པོར་གནས། །རང་བྱུང་ཆོས་སྐུ་འགྱུར་མེད་ཕྱིར། །དེ་ལྡན་བློ་ལ་གོལ་ས་མེད། །སྟོང་པའི་སྙིང་པོ་རང་རིག་བློ། །ངེས་པར་རྟོགས་པའི་ཤེས་རབ་ཀྱིས། །ཡིད་ཆེས་འབྲས་བུ་ད་ལྟ་ཉིད། །རང་གི་བློ་ཡི་གཏིང་དུ་ཤར། །དེ་ཡང་རྡོ་རྗེ་སེམས་དཔའ་ཉོན། །ཡེ་ཤེས་ཀུན་ཁྱབ་རང་གསལ་བ། །ཡིད་ལ་དོན་དྲན་འདུ་འབྲལ་མེད། །དེ་གོམས་ཀློང་དུ་གྱུར་པའི་ཕྱིར། །ཚིག་གི་ཐ་སྙད་མཚོན་མི་དགོས། །ཡེ་ཡིན་དོན་དུ་རང་རིག་པས། །རྒྱལ་བའི་དགོངས་པ་མ་ནོར་བ། །མ་བྱས་མ་བཅོས་ཐུགས་ཀྱི་གདེང་། །ད་ལྟ་ཉིད་དུ་རང་ཤར་རྟོགས། །ཆོས་ཉིད་རང་བྱུང་ཡེ་ཤེས་རྒྱུན། །མ་བསྒོམས་ཤུགས་ལ་དོན་གསལ་བ། །སེམས་ ― DNG001_Page_0635 ―
[མ་དཔེ་གཟིགས་ན་འདིར་གནོན།]
ཀྱིས་གྱིན་འདའི་ངང་དུ་གཞག །དེ་ལས་མ་བཙལ་བསྒོམ་པའི་མཆོག །དེ་ཡང་འདུས་པའི་སྙིང་པོ་ཉོན། །ངེས་དོན་སྤྱོད་པའི་རྣལ་འབྱོར་པས། །བྱ་བའི་དངོས་པོ་གང་ལ་ཡང་། །ཆེད་དུ་མི་བརྟག་འདུ་ཤེས་བསྒྱུར། །རུང་དང་མི་རུང་དོན་མི་དཔྱད། །འཇིག་རྟེན་ཡུལ་ཆོས་དབང་མི་བཏང་། །དེ་དོན་ཆོས་ཉིད་གདེང་གིས་ཟིན། །རྟག་ཏུ་མི་བརྗེད་གཟུངས་ཀྱིས་བལྟ། །དེ་ཡང་རྡོ་རྗེ་སེམས་དཔའ་ཉོན། །ཡུལ་ལ་ཤེས་པ་ཞིབ་གྱུར་ན། །རྟོག་པ་ཞུགས་པས་ཆོས་ཉིད་གཡེངས། །དེ་ཕྱིར་གང་ལ་མ་བརྟགས་ན། །སྣང་བ་ཆོས་ཀྱི་དབྱིངས་སུ་རྫོགས། །སངས་རྒྱས་ཆོས་སྐུ་ངེས་པའི་དོན། །སེམས་ཅན་ལུས་ཀྱིས་བདེན་པ་མཐོང་། །རང་གི་རིག་པ་ལྷག་མཐོང་གསལ། །དེ་ཕྱིར་བདེ་ལྡན་དམ་པའི་ལམ། །དེ་ཡང་འཁོར་གྱི་སྙིང་པོ་ཉོན། །འབྲས་བུ་ཡེ་ནས་སངས་རྒྱས་པ། །ད་ལྟ་ཉིད་དུ་ངེས་པར་འགྲུབ། །དེ་ཕྱིར་རྒྱུད་དག་སངས་རྒྱས་ཡིན། །ས་དང་ལམ་གྱིས་བཅོས་སུ་མེད། །དེ་ཡང་འདུས་པའི་སྙིང་པོ་ཉོན། །རང་བྱུང་རིག་པའི་ཆོས་སྐུ་འདི། །ཡིད་ཀྱི་ཡུལ་དུ་མ་བསྒོམས་ཀྱང་། །ལྟ་བའི་དོན་དང་འབྲལ་མེད་ཕྱིར། །རྣལ་འབྱོར་སྤྱོད་པ་ཅི་བྱེད་ཀྱང་། །དེ་ཙམ་ཉིད་ན་འབྱུང་འཇུག་མེད། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཆོས་ཀྱི་སྐུའི་བསྒོམ་པ་ངོས་གཟུང་བ་བསྟན་པའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་ཀུན་རིག་རྒྱལ་པོ་ཡིས། །རང་སེམས་གནས་ཐབས་བཀའ་སྩལ་པ། །སྙིང་པོ་ཆོས་སྐུ་བསྒོམ་པ་ལ། །སྐྱོན་བསལ་ངང་ལ་གནས་ཐབས་ནི། །ཉམས་ཀྱི་འབྱུང་ལུགས་རིམ་པའི་དོན། །འདུས་པའི་འཁོར་ལ་ངས་བཤད་ཉོན། །ཏིང་འཛིན་མི་མཐུན་སྐྱོན་འབྱུང་བ། །བྱིང་རྒོད་ཞེན་འཛིན་བསྒོམ་པའི་དགྲ། །མདོར་ན་ཅི་ཡང་རུང་བ་ལ། །རང་རིག་སེམས་ཀྱིས་མྱོང་བ་འམ། །ཞེ་ལ་འཛིན་པའི་སྐྱོན་ཡིན་ནོ། །དེ་མེད་ངང་ལ་གནས་ཐབས་ནི། །ཡུལ་དང་སེམས་ཀྱི་ཆོས་རྣམས་ལ། །དང་པོར་ལྟ་བས་ངོས་ཟིན་ཕྱིར། །བརྟག་ཅིང་དཔྱད་དུ་མེད་རྟོགས་པས། །སྔ་ཕྱིའི་ ― DNG001_Page_0636 ―
[མ་དཔེ་གཟིགས་ན་འདིར་གནོན།]
དྲན་པ་རྒྱུན་བཅད་ལ། །རིག་པའི་རང་བཞིན་ཇི་ལྟ་བ། །གསལ་ལ་མི་རྟོག་མི་གཡོ་བ། །གྱི་ན་བཏང་སྙོམས་ངང་དུ་གཞག །དེ་ཚེ་ཏིང་འཛིན་རིག་པའི་ཡུལ། །སྒོ་ལྔའི་ཡུལ་ལ་ཕར་མི་དཔྱད། །ཡིད་ཀྱིས་ཏིང་འཛིན་ཚུར་མི་འཛིན། །ཀུན་གཞི་མ་རིག་མུན་མེད་གསལ། །དེ་ཚེ་བྱུང་ཚོར་རང་ཞི་ནས། །ཆོས་སྐུ་སང་ངེ་རིག་པ་ལ། །མ་བཅོས་ཤེས་པའི་ངང་ལ་གཞག །དེར་བརྟན་ཏིང་འཛིན་གདེང་དུ་ཆུད། །དེ་ཡང་རྡོ་རྗེ་སེམས་དཔའ་ཉོན། །དེ་ཚེ་ཉམས་ཀྱི་རིམ་པ་ཡང་། །ཡིད་ཀྱི་འགྱུ་བ་རྒྱུན་ཆད་དེ། །ཞེན་པའི་སྣང་བ་དང་བྲལ་ནས། །ནམ་ལངས་པ་ཡི་ནམ་མཁའ་བཞིན། །འཛིན་མེད་ཡེ་ཤེས་རང་ལ་གསལ། །ཉིན་དང་མཚན་མོ་དབྱེ་རུ་མེད། །རེས་འགའ་སྔ་ཕྱིར་རྒྱུ་ན་ཡང་། །དོན་དྲན་ཆོས་སྐུར་ལྷན་གྱིས་འགྲོ། །རེས་རྒྱུ་གཉེན་པོའི་དོན་དྲན་པས། །འཁོར་བ་རང་སར་གྲོལ་ཞེས་བྱ། །དེ་ཕྱིར་ཉམས་ཀྱི་གདེང་དང་ལྡན། །དངོས་པོ་ཡུལ་དུ་རང་སྣང་ཡང་། །འཛིན་ཅིང་དམིགས་པ་མེད་པའི་ཕྱིར། །གནོད་རྒྱུ་ཉམ་ང་གང་ཡང་མེད། །སྣང་བ་མི་སྐྱོན་ཐོབ་པའི་གདེང་། །མདོར་ན་གང་རུང་ཅི་ལ་ཡང་། །མི་བརྟག་མི་གཟུང་མི་དཔྱད་པར། །གཟུགས་བརྙན་གཡོ་བ་ཡོད་གྱུར་ཀྱང་། །ཆུ་ལ་གཡོ་བ་མེད་བཞིན་ནོ། །དེ་ཡང་འདུས་པའི་སྙིང་པོ་ཉོན། །ད་ལྟར་ལས་སུ་རུང་བ་ལ། །བྱ་བཙལ་བྲལ་བའི་རྣལ་འབྱོར་པར། །རང་བཞིན་མ་བཅོས་ངང་གིས་གསལ། །དེ་ལ་རྟག་ཏུ་འབྲལ་མེད་པར། །འོད་གསལ་ཆོས་ཉིད་མཐོང་ཞེས་བྱ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཆོས་སྐུ་རྟོགས་པའི་རང་ལ་གནས་ཐབས་བསྟན་པའི་ལེའུ་སྟེ་ཉི་ཤུ་རྩ་དྲུག་པའོ།། །།རྡོ་རྗེ་སེམས་དཔའ་ཡང་ཉོན་ཅིག །ངོས་ཟིན་དོན་ལ་གནས་ཐབས་ནི། །མར་མེས་མུན་སེལ་སྣང་བ་བཞིན། །སྐད་ཅིག་གཅིག་གི་ཏིང་འཛིན་གྱིས། །བག་ཆགས་བརླག་པས་མ་རིག་སངས། །དོན་ཉིད་ཡེ་ཤེས་དྲན་པ་ཡིན། །ཉོན་མོངས་ལས་ཀྱིས་གོས་ ― DNG001_Page_0637 ―
[མ་དཔེ་གཟིགས་ན་འདིར་གནོན།]
པ་མེད། །དེ་བས་གདམས་ངག་དྲན་པས་ནི། །སྒྱུ་མ་སངས་ནས་འཁྲུལ་བྲལ་བཞིན། །མཚན་མའི་རྟོག་བྲལ་དོན་ཤེས་པས། །སྤྲོས་བྲལ་ཡེ་ཤེས་སྙིང་པོར་གནས། །དེ་ཡང་འདུས་པའི་སྙིང་པོ་ཉོན། །འཁོར་འདས་གཞི་ཤེས་རང་བྱུང་དེ། །བསྒོམ་དང་མི་བསྒོམ་སྒྲོ་སྐུར་བྲལ། །དེ་ཉིད་ཉམས་སུ་བླངས་ཐབས་ནི། །ཐིགས་པས་སྣོད་ཆེན་ཁེངས་པ་བཞིན། །ངོ་བོ་ཉིད་ཀྱི་ཆོས་སྐུ་ལ། །ཡང་ཡང་རིག་པས་གསལ་ཐེབས་ན། །གོལ་ས་མི་འབྱུང་སངས་རྒྱས་འགྲུབ། །དཔེར་ན་བུད་མེད་སྦྲུམ་མ་ནི། །སྐྱེ་བའི་དུས་སུ་ཟས་བསྟེན་བཞིན། །ལུང་ལྡན་གདམས་ངག་ཡོད་པའི་མིས། །རྐྱེན་གྱི་རྟོག་པ་ཅི་བྱུང་ཡང་། །དེ་དུས་ངེས་དོན་ལྟ་དྲན་པས། །མ་བསྒོམས་དོན་དང་འབྲལ་བ་མེད། །རྒས་པས་ཉམ་ཆུང་བསྟེན་པ་བཞིན། །བླ་མ་མཁས་པ་དོན་ལྡན་ལ། །རྟག་ཏུ་བསྙེན་ཅིང་གུས་བྱས་ན། །འབྲས་བུ་ཆོས་སྐུ་མྱུར་དུ་སྟོན། །དེ་ཡང་རྡོ་རྗེ་སེམས་དཔའ་ཉོན། །ངེས་པའི་དོན་གྱི་གདེངས་ལྡན་ཀྱང་། །དུས་དྲུག་རྐྱེན་ཐུབ་བར་དུ་ནི། །འཁོར་འདས་ཡུལ་གྱིས་མི་བསླད་ཕྱིར། །ཡེ་ཡིན་དོན་ལ་བརྗེད་མི་བྱ། །རྒྱལ་པོ་མི་འགྲོ་འཁོར་སྡུད་བཞིན། །ཆོས་ཉིད་མ་བསྒོམས་སྐུ་གསུམ་འབྱུང་། །ཆེ་བའི་ཡོན་ཏན་ལྷུན་གྱིས་གྲུབ། །དཔེར་ན་སྒྱུ་མ་མཁས་པ་ཡིས། །སྤྲུལ་པའི་སྲོག་ནི་གཅོད་ཙམ་ན། །སྲོག་མེད་སྒྱུ་མ་ཡིན་ཤེས་ལྟར། །རང་རིག་ལྟ་བའི་དོན་ཡོད་པས། །དུག་ལྔ་སྤྱོད་ཚེ་ཡེ་ཤེས་འཆར། །ངོ་བོ་ཉིད་ལས་སྒྲིབ་མེད་ཤེས། །དེ་ཚེ་ཉོན་མོངས་ཅི་སྤྱད་ཀྱང་། །སྐྱོན་གྱིས་མི་གོས་རང་བྱུང་འཆར། །དེ་ཉིད་མི་བརྗེད་རྟོགས་པའི་ཕྱིར། །ཆེད་དུ་བྱས་ལ་བསྒོམ་མི་དགོས། །དེ་ཡང་རྡོ་རྗེ་སེམས་དཔའ་ཉོན། །རང་སེམས་རྟོགས་པའི་བསྒོམས་པ་ལ། །གཅིག་ཆར་བསྟུན་ཏེ་འཇུག་ནུས་ན། །བསྒོམ་པའི་ཐུན་ལ་རིང་ཐུང་མེད། །ནམ་འགྲུབ་སྙམ་པའི་ཁར་མ་ལུས། །དེ་ཡང་འདུས་པའི་སྙིང་པོ་ཉོན། །སངས་རྒྱས་དགོངས་པ་ཇི་ལྟ་བ། །ད་ལྟ་ཉིད་དུ་བླང་བའི་ཕྱིར། །རང་སེམས་ཀུན་གཞི་ ― DNG001_Page_0638 ―
[མ་དཔེ་གཟིགས་ན་འདིར་གནོན།]
གཞི་ཡི་དོན། །ཡང་དག་ཉིད་དུ་ངོས་ཟིན་པས། །རང་བྱུང་ཆོས་སྐུ་རྒྱལ་བའི་ཐུགས། །སེམས་ཅན་བློ་ཡིས་གོ་བའི་ཕྱིར། །མ་རིག་སངས་པས་གཏི་མུག་བྲལ། །དེ་ཕྱིར་ཚེགས་མེད་རྒྱལ་བའི་བཀའ། །དེ་རྒྱུད་ལུང་ལྡན་སྒྲོན་མ་འདི། །དད་ལྡན་བློ་ལ་ཤར་བའི་ཕྱིར། །ཡིད་ཆེས་གདེང་དང་བྲལ་མེད་པས། །བྱང་ཆུབ་ཆོས་སྐུ་ཐག་མི་རིང་། །མ་ནོར་སངས་རྒྱས་ཆོས་ཉིད་དུ། །ད་ལྟ་ཉིད་དུ་ངེས་པར་ཤེས། །དེ་ཕྱིར་འཁོར་བ་མིང་ཡང་མེད། །བླ་མེད་བྱང་ཆུབ་སྨོས་ཅི་དགོས། །དུས་གསུམ་སངས་རྒྱས་ངེས་པའི་དོན། །བསྟན་པ་ཙམ་གྱིས་རྟོགས་པའི་ཆོས། །དུས་འདིར་ཡིད་ཆེས་གདེང་དུ་འགྱུར། །རིག་འཛིན་ཀུན་དང་ད་ལྟ་མཉམ། །དེ་ཡང་རྡོ་རྗེ་སེམས་དཔའ་ཉོན། །སེམས་ཅན་མ་རིག་གློ་བུར་དེ། །ལུང་ལྡན་རྐྱེན་གྱིས་དུས་འདིར་བརླག །དེ་ཕྱིར་རང་བྱུང་རྟོགས་པའི་རྩལ། །ཐ་མལ་ལུས་ལ་རྒྱལ་བའི་ཐུགས། །ཀུན་འབྱུང་རིན་ཆེན་གཏེར་ཆེན་འདི། །དད་ལྡན་སེམས་ལ་གསལ་བའི་ཕྱིར། །བསྒྱུར་དུ་མི་འདོད་ཡིད་ཆེས་བློས། །རྟག་ཏུ་འབྲལ་མེད་ཡེ་ཤེས་གསལ། །དེ་ཕྱིར་ལུང་ལྡན་དགོངས་པ་འདི། །ཕྱི་མ་མ་ཡིན་དུས་འདི་རང་། །ད་ལྟ་ཉིད་དུ་ཡིན་ཤེས་ན། །རྟོགས་པ་མངོན་གྱུར་སངས་རྒྱས་ཡིན། །ཆོས་སྐུ་ཡང་དག་བྱ་བ་ནི། །ཀུན་གཞིའི་ནང་ན་རང་རིག་གསལ། །དེ་ཉིད་ཡོད་པར་ངོ་ཤེས་ཕྱིར། །དམན་པའི་ལུས་ལ་ཡེ་ཤེས་ཐུགས། །དེ་ཡང་འདུས་པའི་སྙིང་པོ་ཉོན། །ད་ལྟའི་ཤེས་པ་འདི་ཉིད་ལ། །ངོས་གཟུང་མེད་པར་རང་ལུགས་སུ། །དེ་ཉིད་མ་བཅོས་རང་གསལ་བ། །ཀུན་བཟང་རྒྱལ་བའི་དགོངས་པ་ཡིན། །རང་རིག་ཡེ་གནས་བསྒོམ་པ་ནི། །མ་བྲལ་མ་བྱིང་ཤེས་པ་ལ། །དོན་གསལ་ཡིད་ལ་མི་རྟོགས་པས། །རྒྱུན་དུ་མི་འབྲལ་ཡེ་ཤེས་སྐུ། །ཡུལ་འདི་གཞི་ལ་མེད་ཤེས་ཕྱིར། །ཡང་དག་ལྟ་བ་བལྟ་རུ་མེད། །དེ་ཕྱིར་བསྒོམ་པའི་ཡུལ་ལས་འདས། །དེ་ཉིད་རང་བྱུང་བྱང་ཆུབ་སེམས། །སྣང་མེད་རིག་པའི་བལྟ་བ་ལ། །བརྗེད་མེད་ཡེ་ཤེས་ ― DNG001_Page_0639 ―
[མ་དཔེ་གཟིགས་ན་འདིར་གནོན།]
རྒྱུན་མི་འཆད། །དེ་ཕྱིར་འབྲལ་མེད་སྤྱོད་པའི་གཟུངས། །འབྲས་བུའི་ཆོས་སྐུ་ད་ལྟ་རྟོགས། །དེ་ཡང་འདུས་པའི་སྙིང་པོ་ཉོན། །འགྱུར་མེད་ཏིང་འཛིན་ད་ལྟའི་སེམས། །རང་བྱུང་ཡིན་ཕྱིར་རྒྱུ་རྐྱེན་མེད། །འདུས་མ་བྱས་ཕྱིར་རིག་པའི་རྒྱུན། །དུས་གསུམ་མི་འགྱུར་རྒྱལ་བའི་ཐུགས། །རང་གསལ་རིག་པ་ཆོས་སྐུ་ལ། །བཅོས་ཐབས་གཉེན་པོ་མི་དགོས་ཕྱིར། །ཆེད་དུ་གཏད་ལ་བསྒོམ་མི་དགོས། །དེ་ཕྱིར་འབྲལ་མེད་ཏིང་འཛིན་མཆོག །ཡང་དག་ཆོས་ཉིད་ཞེས་བྱ་བ། །སེམས་ཅན་རིག་པའི་དོན་ཤེས་ན། །དེ་ཉིད་རྒྱལ་བའི་དགོངས་པ་སྟེ། །དེ་ལས་གཞན་དུ་བཙལ་དུ་མེད། །དེ་ཡང་རྡོ་རྗེ་སེམས་དཔའ་ཉོན། །ལན་གཅིག་དུས་ཀྱི་དེང་སང་ན། །གདམས་ངག་མེད་པར་བསྒོམ་ཚུལ་སྟོན། །དོན་དང་མཐུན་པའི་ཉམས་མེད་ཕྱིར། །ལུང་ལྡན་རྣམས་ལ་སྒྲོ་སྐུར་འདེབས། །དེ་ཕྱིར་ངེས་དོན་གསང་བ་གཅེས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། འབྲལ་མེད་རྒྱུན་གྱི་ཏིང་ངེ་འཛིན་བསྟན་པའི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་ཀུན་རིག་རྒྱལ་པོ་དེས། །འབྲལ་མེད་རིག་སྤྱོད་བཀའ་སྩལ་པ། །རང་བྱུང་ཡེ་ཤེས་ནམ་མཁའ་ཆེ། །མ་འདྲེས་ཡོངས་རྫོགས་ཆོས་ཀྱི་སྐུ། །མི་སྐྱེ་མི་འགག་རྒྱུན་དུ་སྤྱོད། །དེ་ཡང་རྡོ་རྗེ་སེམས་དཔའ་ཉོན། །བསམ་འདས་དོན་གསལ་ཡིད་ལ་གནས། །གསང་སྔགས་ངོ་བོ་ཉིད་ཀྱི་སྐུ། །སངས་རྒྱས་སེམས་ཅན་གཉིས་ཀྱི་གསང་། །རང་གསལ་དམ་པའི་སྙིང་པོ་འདི། །སངས་རྒྱས་ཀུན་གྱི་ངེས་པའི་དོན། །ཡང་དག་བྱང་ཆུབ་སེམས་ལ་ནི། །མི་དམིགས་པ་ཡང་སྤྱད་དུ་མེད། །མི་གནས་པར་ཡང་བསམ་དུ་མེད། །དེ་ཕྱིར་བྱ་བྲལ་ནམ་མཁའ་ཆེ། །དེ་ཡང་འདུས་པའི་སྙིང་པོ་ཉོན། །མ་བཅོས་རང་བྱུང་དེ་བཞིན་ཉིད། །སྤྱད་དུ་མེད་པའི་ཆོས་ཉིད་ལ། །མ་བསྒོམས་དམིགས་སུ་མེད་པ་སྟེ། །ཏིང་ངེ་འཛིན་ཞེས་བཏགས་པ་ཙམ། །མ་རྟོགས་པར་ཡང་མི་སེམས་པར། །ཀུན་ལ་ཁྱབ་པའི་ཡེ་ཤེས་ལ། །ཀུན་ཤོང་བྱར་མེད་སྤྱོད་པའི་མཆོག ། ― DNG001_Page_0640 ―
[མ་དཔེ་གཟིགས་ན་འདིར་གནོན།]
དེ་ཡང་རྡོ་རྗེ་སེམས་དཔའ་ཉོན། །རང་གི་ངོ་བོ་ཉིད་རྟོགས་ཕྱིར། །ཡུལ་འདི་སེམས་སུ་མི་སྡུད་པས། །སྤྱད་པའི་ཡུལ་ཡང་མེད་པར་འགྱུར། །གང་གིས་གང་ལ་བསམ་ཞིང་དཔྱད། །དཔེར་ན་ནམ་མཁའ་སྟོང་པ་ལ། །དམིགས་པར་མི་བྱེད་སྡུད་མི་བྱེད། །དེ་བཞིན་སེམས་ཀྱིས་སེམས་བསྒོམ་དུ། །ངོ་བོ་འདི་འདྲ་དམིགས་སུ་མེད། །སྐྱོན་ཡོན་གང་ཡང་མ་དཔྱད་ན། །གོལ་དང་སྒྲིབ་པར་ཅི་ལ་འགྱུར། །སྤྱོད་པའི་མཆོག་ཏུ་འདི་ཉིད་གསུངས། །དེ་ཡང་རྡོ་རྗེ་སེམས་དཔའ་ཉོན། །ཡང་དག་རྟོགས་པའི་རིག་སྤྱོད་ནི། །འགྲོ་འཆག་འདུག་དང་ཉལ་ལ་སོགས། །རྐྱེན་ཐུབ་དྲུག་གི་གདམས་ངག་གིས། །དུས་དང་རྣམ་པ་ཐམས་ཅད་དུ། །རང་བྱུང་རིག་པའི་ཡེ་ཤེས་སྤྱོད། །ད་ལྟའི་ལུས་བཅས་རིག་པའི་རྒྱུན། །མ་བརྗེད་རྟག་ཏུ་དོན་དྲན་ན། །བྱ་བ་མེད་པའི་སྤྱོད་པ་སྟེ། །ངང་ངམ་ཤུགས་ལ་རྒྱུན་དུ་སྤྱད། །དེ་ཡང་རྡོ་རྗེ་སེམས་དཔའ་ཉོན། །ཤེས་རབ་སྤྱོད་པ་ལྟ་བའི་གཟུངས། །ལུས་ངག་ལས་ཀྱི་བྱ་བ་རྣམས། །གང་ཡང་མི་འགལ་དོན་དྲན་ཕྱིར། །དགག་སྒྲུབ་མེད་ཤེས་སྤྱོད་པའི་མཆོག །ཐབས་ཀྱི་སྤྱོད་པ་མཐུན་འཇུག་སྟེ། །དགེ་བཅུ་ཆོས་སྤྱོད་ལུས་ངག་ལས། །གཞན་དག་དགེ་ལ་གཟུད་པའི་ཕྱིར། །རྟོག་ལྡན་རྣམས་ཀྱིས་ཆེད་དུ་བྱ། །དེ་ཡང་འདུས་པའི་སྙིང་པོ་ཉོན། །ཤེས་རབ་ཐབས་ཀྱི་སྤྱོད་པ་ཡང་། །རིག་སྤྱོད་ལྟ་བ་དྲན་པའི་གཟུངས། །ཡུལ་མེད་ཕྱིར་ན་སྐྱོན་དང་བྲལ། །མངོན་རྟག་འཛིན་མེད་རྒྱུན་དུ་སྤྱད། །ལྟ་བས་ཟིན་པའི་ཆོས་སྤྱོད་རྣམས། །ཡེ་ཤེས་རྫོགས་ཆེན་ཆོས་ཀྱི་སྐུ། །རྣལ་འབྱོར་རིག་པའི་དོན་ལྡན་ལ། །ད་ལྟ་ཉིད་དུ་རྫོགས་པར་གསུངས། །དེ་ཡང་འདུས་པའི་སྙིང་པོ་ཉོན། །རྒྱུན་དུ་མི་འབྲལ་རང་རིག་འདི། །ཉམས་མྱོང་མེད་པར་རང་གསལ་བ། །དེ་ཉིད་ཉམས་ཀྱི་དམ་པའི་མཆོག །མི་འཛིན་མི་སྤྱོད་རང་གསལ་ཙམ། །འབྲལ་མེད་རྒྱུན་གྱི་སྤྱོད་པར་བཤད། །གལ་ཏེ་མཚན་མ་རྒྱུ་ན་ཡང་། །དོན་དྲན་དགག་སྒྲུབ་མེད་ཤེས་པས། ། ― DNG001_Page_0641 ―
[མ་དཔེ་གཟིགས་ན་འདིར་གནོན།]
སངས་རྒྱས་ལྟ་སྒོམ་ངོ་བོར་གཅིག །རྣལ་འབྱོར་སྤྱོད་ལམ་ཐམས་ཅད་དུ། །དོན་དྲན་སྤྱོད་པ་ཡིན་པའི་ཕྱིར། །མ་དྲན་གཉིད་དང་ཉོན་མོངས་པ། །རང་དགར་སོང་ཚེ་དེ་ཉིད་ལ། །ངོ་བོ་ཉིད་དྲན་གནོད་མི་ནུས། །དེ་ལྟ་ཉིད་ནི་ཡིན་ཤེས་ཕྱིར། །ཆེད་དུ་བྱས་ལ་སྤྱོད་དུ་མེད། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། འབྲལ་མེད་རྒྱུན་གྱི་སྤྱོད་པ་བསྟན་པའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །དུག་ལྔ་རང་གྲོལ་བཀའ་སྩལ་པ། །རང་སེམས་དོན་རྟོགས་སྤྱོད་པ་ཡང་། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་འཁོར་བ་དེ། །ངེས་པའི་གདེངས་ལྡན་རྣལ་འབྱོར་པས། །རྒྱུ་མཐུན་བག་ཆགས་མི་གསོག་གོ། །དེ་ཡང་རྡོ་རྗེ་སེམས་དཔའ་ཉོན། །ཕོ་མོ་དུས་གསུམ་སྦྱར་གྱུར་ཀྱང་། །རོ་མྱགས་འདམ་དུ་མི་སྐྱེ་སྟེ། །ཀུ་མཱ་ར་ཡི་དཔེ་བཞིན་དུ། །ལུང་ལྡན་འདོད་ཆགས་ཅི་སྤྱད་ཀྱང་། །དེ་ཉིད་དུས་ན་རང་གྲོལ་ནས། །འབྲས་བུ་མི་འབྱུང་མངོན་སངས་རྒྱས། །ཕྱི་རོལ་མི་ཡི་ཟས་ནོར་ལ། །རྐུ་འཕྲོག་སྣ་ཚོགས་བྱས་གྱུར་ཀྱང་། །ཡི་དྭགས་གནས་སུ་མི་སྐྱེ་སྟེ། །འཇོམས་བྱེད་འཕྲེང་བའི་དཔེ་བཞིན་དུ། །ངེས་དོན་རྐྱེན་ཕྲད་དུས་དེ་རུ། །མངོན་པར་བྱང་ཆུབ་འབྲས་བུ་ཐོབ། །དེ་ཡང་འདུས་པའི་སྙིང་པོ་ཉོན། །འགྲོ་དྲུག་སེམས་ཅན་མ་ལུས་པ། །ཞེ་སྡང་མནར་སེམས་སྲོག་བཅད་ཀྱང་། །དམྱལ་བའི་སྡུག་བསྔལ་ཡ་མི་ང་། །རྒྱལ་པོ་གཏུམ་པོའི་དཔེ་བཞིན་དུ། །གདམས་ངག་ངེས་པའི་དོན་གོ་ཕྱིར། །སྐྱེ་འཆི་མེད་པར་མངོན་སངས་རྒྱས། །མ་རིག་འཁྲུལ་པའི་བག་ཆགས་ཀྱིས། །གཏི་མུག་མུན་པ་འཐིབས་པ་ཡིས། །བྱོལ་སོང་གནས་སུ་མི་སྐྱེ་སྟེ། །ཆུ་ནས་བཏོན་པའི་མི་ངན་བཞིན། །ལས་ངན་རྐྱེན་གྱིས་རང་སེམས་རྟོགས། །གཞན་གྱིས་མཐོང་བར་མངོན་སངས་རྒྱས། །དེ་ཡང་འདུས་པའི་སྙིང་པོ་ཉོན། །ང་རྒྱལ་ལས་ངན་བསྐྱེད་གྱུར་ཀྱང་། །ལྷ་མིའི་སྡུག་བསྔལ་མི་འབྱུང་སྟེ། །རྒྱན་པོ་རྒྱལ་བའི་དཔེ་བཞིན་དུ། །དགེ་སློང་རྐྱེན་ ― DNG001_Page_0642 ―
[མ་དཔེ་གཟིགས་ན་འདིར་གནོན།]
གྱིས་རང་སེམས་རྟོགས། །དེ་ཉིད་དུས་སུ་མངོན་སངས་རྒྱས། །གཞན་ལ་ཕྲག་དོག་ལས་བྱས་ཀྱང་། །ལྷ་མིན་འཐབ་བརྩོད་ལས་མི་འབྱུང་། །དབང་ཕྱུག་འཁོར་བཅས་དཔེ་བཞིན་དུ། །བྲིད་བསྡིགས་རྐྱེན་གྱིས་རང་བྱུང་ངོ་། །དེ་ཉིད་དུས་ན་མངོན་སངས་རྒྱས། །དེ་ཡང་རྡོ་རྗེ་སེམས་དཔའ་ཉོན། །སེམས་ཅན་ལོག་རྟོག་ཚན་པོ་ཆེ། །གཞན་གྱི་རྐྱེན་གྱིས་མི་བཟློག་ཕྱིར། །དུག་ལྔ་རང་ལ་བརྟེན་ཏེ་བཟློག །མཐུན་པར་བསྟན་པས་ངེས་པར་བཟློག །ངེས་དོན་རྟོགས་པའི་རྣལ་འབྱོར་པས། །དུག་ལྔ་སྤྱད་ཀྱང་རང་གྲོལ་བ། །ཐ་མལ་པ་ཡང་དེ་འདྲ་ན། །སྦྱངས་པའི་འཕྲོ་ཅན་སྨོས་ཅི་དགོས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། དུག་ལྔ་རང་གྲོལ་དུ་བསྟན་པའི་ལེའུ་སྟེ་ཉི་ཤུ་རྩ་དགུ་པའོ།། །།དེ་ནས་ཀུན་རིག་རྒྱལ་པོ་ཡིས། །མཐུན་འཇུག་ཐབས་ཀྱི་སྤྱོད་པའི་དོན། །འདུས་པའི་འཁོར་ལ་བཀའ་སྩལ་པ། །ཐེག་དམན་རྣམས་དང་སྒོ་བསྟུན་ཕྱིར། །ཤེས་རབ་རིག་པའི་སྤྱོད་པ་དང་། །སྙིང་རྗེ་ཐབས་ཀྱི་སྤྱོད་པ་དང་། །ལུས་ངག་མཐུན་འཇུག་སྤྱོད་པ་བྱ། །དེ་ཡང་འདུས་པའི་སྙིང་པོ་ཉོན། །དེ་རྟོགས་ཤེས་རབ་སྤྱོད་པ་ནི། །ཕྱི་ནང་དངོས་པོ་ཅིར་མཐོང་ཡང་། །འཁྲུལ་པ་ཡིན་པར་ཡིད་ཆེས་པས། །དམ་པར་མི་བལྟ་དྲན་པའི་གཟུངས། །ཅི་གོམས་ལས་སུ་རུང་བའི་བར། །རྩོལ་བ་མེད་པའི་བརྩོན་འགྲུས་ཀྱིས། །ངེས་པའི་དོན་དང་མཐུན་པར་སྤྱད། །དེ་ཡང་རྡོ་རྗེ་སེམས་དཔའ་ཉོན། །མཐུན་འཇུག་ཐབས་ཀྱི་སྤྱོད་པ་ཡང་། །ཡེ་ཤེས་སྙིང་རྗེ་ཆེན་པོ་ཡིས། །མ་རིག་ལོག་པའི་སེམས་ཅན་ལ། །བསམ་པ་བཟང་པོའི་ངེས་དོན་གྱིས། །རང་གི་ཏིང་འཛིན་མ་ཉམས་པར། །སེམས་ཅན་ཀུན་ལ་ཕན་དོན་དུ། །མདོ་རྒྱུད་སྨོན་ལམ་རྒྱ་ཆེར་གདབ། །སྒྲིབ་སྦྱོང་ཚོགས་བསགས་སྣ་ཚོགས་བྱ། །གཞན་དག་དགེ་ལ་གཟུད་པ་དང་། །ཐེག་དམན་སྐུར་པ་སྤང་བའི་ཕྱིར། །དགེ་སྡིག་ཤན་ཐང་ཕྱེད་པར་བྱ། །དངོས་པོར་མི་བྱ་ལྟ་བས་གཟུང་། །མི་དམིགས་གསང་བར་རྒྱུན་དུ་སྤྱད། ། ― DNG001_Page_0643 ―
[མ་དཔེ་གཟིགས་ན་འདིར་གནོན།]
དེ་ཡང་འདུས་པའི་སྙིང་པོ་ཉོན། །སྒོ་གསུམ་རྣལ་འབྱོར་སྤྱོད་པ་ཡང་། །བདེ་སྡུག་ན་ཚ་སྣ་ཚོགས་དང་། །གཞན་གྱི་ནོར་འཕྲོག་བརྡེག་པ་དང་། །གཤེ་སྤྱོ་མཚང་འབྲུ་ལ་སོགས་པར། །གཉེན་པོའི་གདམས་ངག་དྲན་བྱས་ལ། །ཉོན་མོངས་དབང་དུ་མི་གཏང་བར། །ལས་ངན་བག་ཆགས་ཡིན་བསམ་ལ། །ཆོས་སྐུ་དྲན་པ་བརྗེད་མི་བྱ། །དེ་ཡང་རྡོ་རྗེ་སེམས་དཔའ་ཉོན། །དོན་དམ་རེག་པའི་རྣལ་འབྱོར་པས། །གཞན་གྱི་སྐྱོན་དང་ཡོན་ཏན་ལ། །སྨད་བསྟོད་མི་བྱ་བཏང་སྙོམས་གཞག །འཇིག་རྟེན་དྲེ་མོའི་གཏམ་རྣམས་ལ། །འདུ་འཛི་འཕྱར་གཡེང་ཅི་ཆུང་འབད། །ང་རྒྱལ་ཁེངས་བསྐྱུངས་ཤེས་འཕང་སྨད། །དུས་རྣམས་ཀུན་ཏུ་ཞི་བར་བྱ། །ཆེ་ཚིག་རང་བསྟོད་མི་བྱ་བར། །བག་མ་གསར་པའི་ཚུལ་བཞིན་དུ། །འཇམ་ཞིང་ཞི་བར་རྟག་ཏུ་བྱ། །དེ་ཡང་རྡོ་རྗེ་སེམས་དཔའ་ཉོན། །མདོར་ན་སྤྱོད་པ་དེ་དག་གིས། །སྔ་ཕྱིའི་རྟོག་པ་བརྟས་པ་ཡང་། །ཇེ་ཞི་ཇེ་ཕྲ་རང་བརླག་ནས། །ཆོས་སྐུ་ཡེ་ཤེས་ལྷུན་གྱིས་གྲུབ། །ཉི་མ་ལ་ནི་ཟེར་འབྱུང་བཞིན། །ཞིང་ཁམས་ཡོངས་སུ་དག་པ་ལ། །སྐུ་གསུང་ཡོན་ཏན་ཕྲིན་ལས་སོགས། །ཆེ་བའི་ཡོན་ཏན་མ་ལུས་འབྱུང་། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མཐུན་འཇུག་ཐབས་ཀྱི་སྤྱོད་པ་བསྟན་པའི་ལེའུ་སྟེ་སུམ་ཅུ་པའོ།། །།དེ་ཡང་འདུས་པའི་སྙིང་པོ་ཉོན། །འབྲས་བུ་རིམ་འབྱུང་ངས་བཤད་ཀྱིས། །ལེགས་པར་ཉོན་ལ་ཡིད་ལ་ཟུང་། །དེ་ཡང་འཁོར་རྣམས་ལེགས་པར་ཉོན། །གནས་པའི་ཏིང་འཛིན་དོན་ལྡན་པས། །ཡེ་ཤེས་བག་ཆགས་ཆ་བསྙམ་ཕྱིར། །གསལ་ལ་མི་རྟོག་དུས་མཉམ་པས། །འདོད་ཁམས་ལྷར་ནི་སྐྱེ་དབང་ཡོད། །དེ་ཚེ་འཕོས་ནས་ཆོས་ཉིད་མཐོང་། །མི་གཡོ་བ་ཡི་ཏིང་འཛིན་གྱིས། །རྣམ་རྟོག་དེ་ཉིད་ཟིལ་ནོན་པས། །གཙང་མ་རིས་ཀྱི་ལྷར་སྐྱེས་ནས། །དེ་ཉིད་དུས་ན་མངོན་སངས་རྒྱས། །མཉམ་ཉིད་ལྡན་པའི་ཏིང་འཛིན་གྱིས། །ལུས་བྲལ་སྐད་ཅིག་དེ་ཉིད་ལ། །འབྲས་བུ་སངས་རྒྱས་ཆོས་ཀྱི་སྐུ། ། ― DNG001_Page_0644 ―
[མ་དཔེ་གཟིགས་ན་འདིར་གནོན།]
དེ་ཡང་དཔེ་མེད་ཀུན་བཟང་ཐུགས། །དེ་ཡང་འཁོར་གྱི་སྙིང་པོ་ཉོན། །མཉམ་པའི་དོན་ལ་ཡེ་གནས་པས། །འབྲས་བུའི་རིག་པ་ད་ལྟ་ཉིད། །དེ་དོན་མི་བརྗེད་ཡེ་དྲན་ཕྱིར། །མཚན་མའི་ཡུལ་ལ་མ་ཞེན་པས། །ཡུལ་ཉིད་སེམས་སུ་སྡུད་བྱེད་པ། །གཟུགས་ཁམས་གནས་སུ་ལྷུང་མི་འགྱུར། །རང་སེམས་རྟོགས་པ་མངོན་གྱུར་པས། །རེ་དང་དོགས་པའི་བློ་བྲལ་ཕྱིར། །གང་ཡང་འཛིན་མེད་ཐུགས་ལ་གསལ། །ཉན་ཐོས་ས་རུ་ལྟུང་མི་འགྱུར། །དང་པོ་བལྟ་བ་བདག་མེད་ཕྱིར། །མཚན་མའི་ཡུལ་ལ་མ་ཞེན་པས། །ཡུལ་ཉིད་སེམས་སུ་སྡུད་པ་མེད། །འདོད་ཁམས་གནས་སུ་ལྟུང་མི་འགྱུར། །དེ་ཡང་འདུས་པའི་སྙིང་པོ་ཉོན། །ནམ་མཁའ་ཉི་ཤར་མུན་པ་མེད། །དེ་བཞིན་རང་རིག་ཆོས་སྐུ་ལ། །མ་རིག་མེད་པས་ཡེ་ཤེས་ཤར། །སངས་རྒྱས་ཐུགས་ལ་འཆར་ནུབ་མེད། །དེ་ཕྱིར་འབྲས་བུ་སངས་རྒྱས་ཆོས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། འབྲས་བུ་ལྟུང་མེད་བསྟན་པའི་ལེའུ་སྟེ་སོ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ཐུགས་ཀྱི་གདེང་ཆུད་སྐལ་ལྡན་ལ། །མི་ནུབ་ཕྱོགས་ཀྱི་གཏེར་དུ་ནི། །དུས་གསུམ་རྒྱལ་བའི་ཆོས་ཀྱི་སྐུ། །རང་བྱུང་ཐུགས་ལ་གསལ་བའི་དོན། །མཉམ་ཉིད་འགྲོ་དོན་བྱེད་པའི་ལམ། །ཚད་མ་རང་གི་དབང་ཕྱུག་གིས། །རྗེས་གསོབ་ཐུགས་ཀྱི་སྲས་མཆོག་ལ། །སྐྱེ་འགགས་འཁོར་བའི་སྤོང་ལེན་མིན། །བདག་དང་བྲལ་བ་རྒྱལ་བའི་ཐུགས། །དེ་ཡང་འདུས་པའི་སྙིང་པོ་ཉོན། །འདུ་འབྲལ་མེད་པའི་ཡེ་ཤེས་ལུས། །རིག་པ་ཕྱོགས་མེད་བྱང་ཆུབ་འཆར། །སོ་སོ་མ་ཡིན་ཡེ་ནས་གཅིག །དེ་ཕྱིར་ཡོན་ཏན་བསྟན་པ་བཀའ། །བྱང་ཆུབ་ངང་དུ་ཐམས་ཅད་འདུས། །མཁའ་མཉམ་དབང་ཕྱུག་ཆེན་པོའི་ཐུགས། །ཡེ་ཤེས་སངས་རྒྱས་ཀུན་དང་མཉམ། །སྡེ་སྣོད་ཆོས་རྣམས་ཐུགས་ལ་རྫོགས། །དེ་ཡི་ཡོན་ཏན་ཆེན་པོ་ནི། །ཞེ་འདོད་རིགས་ལྔར་མ་གྲུབ་ཀྱང་། ། ― DNG001_Page_0645 ―
[མ་དཔེ་གཟིགས་ན་འདིར་གནོན།]
རང་གི་སེམས་ལ་སངས་རྒྱས་ཚང་། །དེ་ཉིད་འབྲས་བུ་དམ་པར་གསུངས། །དེ་ཡང་རྡོ་རྗེ་སེམས་དཔའ་ཉོན། །སྔོན་ཚེ་རྣམ་གཟིགས་བསྟན་པ་ལ། །བྲམ་ཟེ་དཔལ་ལྡན་བྱ་བའི་ལུས། །རང་སེམས་རྟོགས་པའི་དོན་མེད་པར། །གཞན་ནས་འབྲས་བུ་ཞེ་འདོད་ཀྱིས། །རིགས་ལྔའི་སངས་རྒྱས་ནམ་འགྲུབ་ཅེས། །ཡིད་ལ་བསམས་ཤིང་ལྷ་བསྒོམ་པས། །འབྲས་བུ་མེད་ཅིང་འཁོར་བར་སྐྱེས། །དེ་ཕྱིར་རེ་དོགས་མེད་པར་བྱ། །དེ་ཡང་འདུས་པའི་སྙིང་པོ་ཉོན། །རེ་མེད་དོན་ནི་དྲན་བྱས་ན། །ཆོས་ཉིད་སངས་རྒྱས་ས་ལ་གནས། །དོགས་མེད་དོན་ལ་མ་ཡེངས་ན། །སྒྲིབ་པ་སྦྱངས་པའི་ཐབས་མི་དགོས། །དེ་ཡང་རྡོ་རྗེ་སེམས་དཔའ་ཉོན། །ངོ་བོ་ཉིད་ཀྱི་ཆོས་སྐུ་ལ། །གང་ཡང་མ་འགགས་ནམ་མཁའ་བཞིན། །འཁོར་འདས་ཞེན་མེད་འབྲས་བུ་ཡིན། །དེ་ཉིད་རང་སེམས་སྙིང་པོར་ཤར། །འགྲོ་དྲུག་སེམས་ཅན་ཐམས་ཅད་ལ། །ཆོས་ཉིད་རང་ཆས་དོན་རྟོགས་ན། །བསྒོམ་ཞིང་བསྒྲུབ་པའི་ནད་དང་བྲལ། །ཡེ་ཤེས་ངོ་བོ་ད་ལྟའི་སེམས། །རེ་དོགས་མེད་ཤེས་འབྲས་བུའི་མཆོག །དུས་གསུམ་རང་སེམས་འགྱུར་མེད་དོན། །མེད་ལ་མི་ཟད་རང་བྱུང་ཐུགས། །སངས་རྒྱས་ཞེས་ནི་དེ་ལ་བྱ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། རེ་དོགས་མེད་པའི་འབྲས་བུ་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །བདག་དོན་རྟོགས་པའི་འབྲས་བུ་ནི། །ངེས་པར་འཁོར་ལ་བཀའ་སྩལ་པ། །ཡེ་ནས་རང་ལ་གནས་པའི་དོན། །རང་བྱུང་སྙིང་པོ་ཆོས་སྐུ་འདི། །ལུང་ལྡན་རྐྱེན་གྱིས་རྟོགས་ཙམ་ན། །འཁོར་བའི་མིང་མེད་ཡེ་ཤེས་རྒྱས། །དེ་ཡང་འདུས་པའི་སྙིང་པོ་ཉོན། །རང་བྱུང་སེམས་ལ་དབང་ཐོབ་པས། །ཅི་སྤྱོད་ཆོས་སྐུར་གསལ་བ་ལས། །ཞེན་འཁྲུལ་རྟོག་པ་མིང་ཡང་མེད། །ཐམས་ཅད་ཡེ་ཤེས་ཟང་ཐལ་ཉིད། །དེ་ལྟར་རྟོགས་པའི་རྣལ་འབྱོར་ལ། །མ་རིག་མེད་ཕྱིར་འཁོར་བ་བྲལ། །ཉོན་མོངས་རྩ་བ་གཏན་ནས་ ― DNG001_Page_0646 ―
[མ་དཔེ་གཟིགས་ན་འདིར་གནོན།]
བརླག །ཕྱི་མར་སྐྱེ་བའི་རྒྱུ་མི་གསོག །དེ་ཡང་རྡོ་རྗེ་སེམས་དཔའ་ཉོན། །སྐྱེ་བ་མི་ལེན་རང་བྱུང་སྐུ། །དེ་ལ་ཡོན་ཏན་བརྗོད་མི་ལངས། །དེ་ཕྱིར་འབྲས་བུ་དུས་འདིར་སྨིན། །རྐྱེན་གྱིས་མི་འཇིག་བརླག་པ་མེད། །སེམས་རྟོགས་ཤེས་པ་འདི་ལས་ནི། །བྱང་ཆུབ་ཐོབ་ཏུ་རེ་བ་མེད། །སངས་རྒྱས་ཡོན་ཏན་ཐམས་ཅད་ཀྱང་། །རྟོགས་པ་འདི་ཡི་རྩལ་ཡིན་ཕྱིར། །རེ་བའི་རྩོལ་བས་བསྒྲུབ་མི་དགོས། །དེ་ཡང་འདུས་པའི་སྙིང་པོ་ཉོན། །སེམས་རྟོགས་འཁོར་བ་མེད་པའི་ཕྱིར། །འགྲོ་དྲུག་སེམས་ཅན་ཡེ་ནས་མེད། །དེ་ཕྱིར་འཁོར་བ་དོང་སྤྲུག་ཆོས། །དེ་རྟོགས་རང་རིག་ཡེ་ཤེས་སྐུ། །དེ་ཡི་འབྲས་བུ་ད་ལྟ་འབྱུང་། །ཤིན་ཏུ་དད་ལྡན་རྣལ་འབྱོར་ལ། །ཚོགས་བསགས་སྒྲིབ་སྦྱངས་ཐབས་མི་དགོས། །ནོར་བུ་རིན་ཆེན་རྙེད་པ་ལ། །འཇིག་རྟེན་སོ་ནམ་མི་དགོས་བཞིན། །རང་སེམས་ཆོས་སྐུར་སངས་རྒྱས་ནས། །གཞན་ནས་བསྒྲུབ་ཅིང་བསྣན་མི་དགོས། །དེ་ཕྱིར་ལས་མེད་སྤྱོད་ཡུལ་མེད། །དེ་ཡང་རྡོ་རྗེ་སེམས་དཔའ་ཉོན། །སེམས་ཅན་ལུས་ལ་རྒྱལ་བའི་ཐུགས། །ཟབ་ལ་རྒྱ་ཆེ་གཏིང་ཟབ་པས། །བློ་ཡི་གཏིང་དུ་ངེས་པར་གོ། །དེ་ལ་འབྲས་བུ་དུས་འདིར་རྟོགས། །དེ་ཕྱིར་རྟོགས་པ་མངོན་གྱུར་པའི། །སངས་རྒྱས་ཞེས་ནི་དེ་ལ་བྱ། །དེ་ཡིས་མཐོང་སྣང་སྣ་ཚོགས་ཏེ། །རང་རིག་ཆོས་སྐུ་གཅིག་གཅིག་ལ། །བྱང་ཆུབ་སེམས་དཔའ་ལས་དག་པས། །ལོངས་སྤྱོད་རྫོགས་པའི་སྐུ་རུ་མཐོང་། །ཉན་ཐོས་སྒྲིབ་པ་ཆུང་བ་ལ། །སྤྲུལ་སྐུ་ཐུབ་པ་ཆེན་པོར་མཐོང་། །ངེས་དོན་རྟོགས་པའི་རྣལ་འབྱོར་པས། །རང་རིག་སྐྱོན་བྲལ་ཆོས་སྐུར་མཐོང་། །དེ་ཕྱིར་རང་སེམས་རྟོགས་པ་གཅེས། །དེ་ཡང་འདུས་པའི་སྙིང་པོ་ཉོན། །དེ་ལྟར་མཐོང་བ་སོ་སོ་ཡང་། །རྟོགས་པ་ཆེ་ཆུང་བྱེ་བྲག་ལས། །ལོགས་ན་ཡོད་པ་མ་ཡིན་ཏེ། །ཉི་མ་དང་ནི་ཟེར་བཞིན་དུ། །དུས་འདིར་རྟོགས་པས་སངས་རྒྱས་ཏེ། །ད་ལྟ་ཉིད་དུ་འབྲས་བུ་ཐོབ། །དེ་ཕྱིར་ལུང་ལྡན་རྟོགས་པ་ལ། །རང་ ― DNG001_Page_0647 ―
[མ་དཔེ་གཟིགས་ན་འདིར་གནོན།]
དོན་ཆོས་སྐུ་སངས་རྒྱས་འབྱུང་། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། བདག་དོན་རྟོགས་པའི་འབྲས་བུ་བསྟན་པའི་ལེའུ་སྟེ་སོ་གསུམ་པའོ།། །།ཀུན་རིག་རྒྱལ་པོས་ཡང་གསུངས་པ། །སྣང་མེད་བལྟ་བའི་རིག་པ་ལས། །མ་བཙལ་འགྱུར་མེད་ཆོས་ཀྱི་སྐུ། །བག་ཆགས་མེད་པས་ཡུལ་དང་བྲལ། །ད་ལྟ་ཉིད་དུ་རང་བྱུང་སྐུ། །དངོས་མེད་ནམ་མཁའི་མཐའ་དང་མཉམ། །ཤེས་རིག་གསལ་བས་ཁྱད་པར་འཕགས། །དེ་ལ་འགྲན་ཟླ་གང་ཡང་མེད། །རྟོགས་པའི་ཡོན་ཏན་བརྗོད་མི་ལངས། །དེ་ཡང་རྡོ་རྗེ་སེམས་དཔའ་ཉོན། །རང་སེམས་རིག་པ་རང་བྱུང་དེ། །ཡེ་མེད་དོན་ཤར་བྱང་ཆུབ་སྐུ། །སྤྱི་མཐུན་ཉི་མ་སྟོང་བས་གསལ། །དེ་ཉིད་རྟོགས་པས་གོམས་མི་དགོས། །ཡེ་ཤེས་རིག་པ་གསལ་བ་དེས། །མ་རིག་མུན་པ་གདོད་ནས་མེད། །བག་ཆགས་ཉོན་མོངས་རྩད་ནས་བརླག །དགོངས་པ་སངས་རྒྱས་ཀུན་དང་མཉམ། །དེ་ཡང་འདུས་པའི་སྙིང་པོ་ཉོན། །དཔེར་ན་རྒྱ་མཚོར་རླབས་སུ་འབྱུང་། །དེ་བཞིན་དོན་རྟོགས་རྣལ་འབྱོར་པས། །སྤྱོད་པ་འབྲལ་མེད་ཡེ་ཤེས་ཀློང་། །དུས་བཞིར་ཡེ་ཤེས་རྒྱུན་མི་འཆད། །དོན་འདི་རྟོགས་པའི་སྤྱོད་པ་སྟེ། །ཚོགས་བསགས་སྒྲིབ་སྦྱང་ས་བཅུ་པས། །སྐད་ཅིག་འདི་དྲན་ཁྱད་པར་འཕགས། །ལུས་ངག་རྩོལ་མེད་རིག་སྤྱོད་བདེ། །དེ་ཡང་འཁོར་གྱི་སྙིང་པོ་ཉོན། །རང་དྲིན་འབྲས་བུ་རང་ལ་ཆེ། །གཟུགས་དང་བྲལ་བས་སྐྱེ་འཆི་མེད། །རང་ལས་བྱུང་བའི་ཡེ་ཤེས་སྐུ། །ཡུལ་མེད་རིག་པ་མངོན་སངས་རྒྱས། །འདི་རྟོགས་འབྲས་བུ་ལྷུན་གྲུབ་བདེ། །བསམ་པ་ཙམ་གྱིས་ལྷུན་གྱིས་གྲུབ། །མཆིང་བུ་རིན་ཆེན་ཁྱད་པར་ལྟར། །སྐྱེ་བ་མི་ལེན་མངོན་སངས་རྒྱས། །དེ་ཡང་རྡོ་རྗེ་སེམས་དཔའ་ཉོན། །དེ་རྟོགས་མི་ཟད་རིན་ཆེན་གཏེར། །དེ་ཡི་འབྲས་བུ་ཡོན་ཏན་ནི། །གཟུགས་མེད་རིག་པ་ང་ཡི་སྐུ། །ཐ་མལ་རང་སེམས་ང་ཡི་ཐུགས། །སྟོང་རིག་དྲན་པ་ང་ཡི་གསུང་། །རིག་པའི་ཡོན་ཏན་གང་ཡང་འགྲུབ། ། ― DNG001_Page_0648 ―
[མ་དཔེ་གཟིགས་ན་འདིར་གནོན།]
ཡེ་ནས་ཕྲིན་ལས་རང་བྱུང་བས། །རིག་པ་སྤྲོས་བྲལ་ཆོས་ཀུན་རྫོགས། །དེ་ཡང་འདུས་པའི་འཁོར་རྣམས་ཉོན། །འགྱུར་མེད་ལྷུན་གྱིས་གྲུབ་པའི་གཞི། །ཆོས་ཉིད་བདེ་ཆེན་ཀློང་ཡངས་ལམ། །སྐྱེ་འཆི་མེད་པས་འབྲས་བུར་སྨིན། །དེ་དག་གཅིག་ཕྱིར་རྒྱལ་བའི་ཐུགས། །གསེར་གླིང་ས་རྡོ་མེད་པ་བཞིན། །སེམས་ཅན་དུས་ནས་སངས་རྒྱས་ལ། །ཡོན་ཏན་མཚན་དང་དཔེ་བྱད་ཀྱང་། །ཡེ་ཤེས་སྐུ་ལ་ཀུན་ཀྱང་རྫོགས། །ད་ལྟ་ཐ་མལ་ལུས་སེམས་ཀྱིས། །སེམས་ལས་མ་བྱུང་སངས་རྒྱས་རྙེད། །རྒྱུ་ལས་མ་བྱུང་འབྲས་བུ་རྟོགས། །ལུང་ལ་མ་བརྟེན་ཆོས་རྣམས་རྙེད། །ཐེག་དགུའི་ཆོས་རྣམས་གཅིག་ལས་མེད། །དུག་ལྔ་མྱ་ངན་འདས་པར་དག །ཐུགས་ཀྱི་ཀློང་རྡོལ་ཆོས་ཀྱི་སྐུ། །འཁོར་བའི་ནང་ན་ལུས་ཡོད་ཀྱང་། །པདྨ་དང་ནི་འདམ་བཞིན་དུ། །ཉོན་མོངས་ལས་ཀྱིས་གོས་པ་མེད། །དེ་ཕྱིར་སངས་རྒྱས་ཀུན་དང་མཉམ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། རྟོགས་པའི་ཡོན་ཏན་བསྟན་པའི་ལེའུ་སྟེ་སོ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་སེམས་ཀྱི་རྒྱལ་པོ་ལ། །ཡང་དག་ངེས་དོན་འདི་སྐད་གསོལ། །ཐེག་པ་གཞན་ལས་ཇི་ལྟར་ཆེ། །ངེས་དོན་ལ་ནི་ཇི་ལྟར་བཟླ། །སངས་རྒྱས་ཆོས་ཀུན་ཇི་ལྟར་རྫོགས། །དེ་སྐད་ཞུས་པའི་དོན་གསན་ནས། །ཀུན་རིག་རྒྱལ་པོས་བཀའ་སྩལ་པ། །རང་བྱུང་རིག་པ་ཆོས་སྐུ་ནི། །སེམས་ཅན་ཀུན་ལ་ཁྱབ་པས་ཆེ། །ངེས་པའི་དོན་གྱི་ལྟ་བ་ཡིས། །འགྲོ་དྲུག་དབང་དུ་བསྡུས་པས་ཆེ། །སངས་རྒྱས་ཀུན་གྱི་དགོངས་པ་ནི། །ཀུན་གྱི་དུར་ས་ཡིན་པས་ཆེ། །འཁོར་བ་མྱ་ངན་འདས་པ་ནི། །ཀུན་གྱི་རྟེན་གཞི་ཡིན་པས་ཆེ། །འཁོར་བ་ཐོག་མ་ཐ་མ་ཡིས། །ཀུན་གྱི་ཐོག་མ་ཡིན་པས་ཆེ། །སྡེ་སྣོད་ཐེག་པའི་ཆོས་རྣམས་ནི། །ཀུན་གྱི་འབྱུང་ས་ཡིན་པས་ཆེ། །སངས་རྒྱས་བསྟན་པ་མ་ལུས་པ། །ཀུན་གྱི་རྩ་བ་ཡིན་ ― DNG001_Page_0649 ―
[མ་དཔེ་གཟིགས་ན་འདིར་གནོན།]
པས་ཆེ། །དུས་གསུམ་བདེར་གཤེགས་ཐམས་ཅད་ཀྱི། །ཀུན་གྱི་ལམ་མཆོག་ཡིན་པས་ཆེ། །ཡེ་ཤེས་རང་བྱུང་ཆེན་པོ་ནི། །ཀུན་གྱི་སྡོང་པོ་ཡིན་པས་ཆེ། །ཆོས་རྣམས་ཀུན་གྱི་རྩ་བ་ཡི། །མྱང་འདས་སྙིང་པོ་ཡིན་པས་ཆེ། །རང་བྱུང་རིག་པའི་ཡེ་ཤེས་ནི། །ལྟ་བ་ཡེ་གསལ་གོལ་མེད་ཆེ། །དོན་རྟོག་འགྱུར་མེད་རང་རིག་ལ། །ཡེ་ཀློང་བསྒོམ་དུ་མེད་པས་ཆེ། །ཆོས་ཀུན་རྩ་བ་བྱང་ཆུབ་སེམས། །ཡེ་གྲུབ་བཙལ་དུ་མེད་པས་ཆེ། །འཁོར་འདས་གཞི་འཁོར་གཉིས་མེད་ཕྱིར། །ཀུན་གྱི་སྲོག་ཤིང་ཡིན་པས་ཆེ། །དེ་ལྟར་ངེས་པའི་དོན་རྟོགས་ནས། །གདེང་དུ་གྱུར་པས་ཆེ་བ་ཡིན། །དུས་གསུམ་སངས་རྒྱས་ཐམས་ཅད་པས། །ཀུན་བཟང་དགོངས་པ་ཆེ་བ་ཡིན། །ཐེག་གཞན་ཆོས་ཀུན་སྤྱད་པ་བས། །རྫོགས་ཆེན་མོས་པ་ཁྱད་པར་འཕགས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཆེ་བ་བསྟན་པའི་ལེའུ་སྟེ་སོ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཆོས་ཉིད་ལ་བཟླ་བཀའ་སྩལ་པ། །ངོ་བོ་རྣམ་རྟོག་སྐྱོན་དང་བྲལ། །རྟོག་པའི་ཡོན་ཏན་དཔག་མི་ལངས། །ཡེ་ཤེས་དོན་ལ་འཕེལ་འགྲིབ་མེད། །རྒྱལ་བའི་སྐུ་ནི་བགྲང་མི་ལངས། །རང་བྱུང་གཅིག་དང་གཉིས་སུ་མེད། །གསུང་གི་བརྗོད་པ་མཐའ་ལས་འདས། །ཡང་དག་དོན་ནི་ཚིག་དང་བྲལ། །མཁྱེན་པའི་ཡེ་ཤེས་དཔག་ཏུ་མེད། །རྩ་བ་ཐམས་ཅད་གཅིག་གི་ངང་། །སྣང་བའི་མཐའ་ལ་ཐུག་པ་མེད། །ངོ་བོ་རང་བཞིན་གཅིག་ཏུ་འདྲིལ། །རྒྱལ་བའི་ཞིང་ཁམས་བསམ་མི་ཁྱབ། །དོན་དུ་ཐིག་ལེ་གཅིག་གི་རྩལ། །ཆོས་ཀྱི་དབྱིངས་ལ་མུ་མཐའ་མེད། །ཀུན་ཀྱང་ཆོས་ཀྱི་སྐུ་ལ་འདུས། །དེ་རྟོགས་རྫོགས་ཆེན་ལྟ་བ་ཡིན། །དེ་ཡང་རྡོ་རྗེ་སེམས་དཔའ་ཉོན། །གདལ་ནི་འཁོར་འདས་ཀུན་ཏུ་གདལ། །འདུས་ནི་ཐིག་ལེ་ཉིད་དུ་འདུས། །སྣང་ནི་ཁམས་གསུམ་ཡོངས་ལ་སྣང་། །འདུས་ནི་རང་བཞིན་སྣང་བར་འདུས། །སྤྲོས་ནི་བརྒྱད་ཁྲི་བཞི་སྟོང་སྤྲོས། །འདུས་ནི་ཨ་ཏི་ཡོ་གར་འདུས། །གཏན་ལ་སྣང་སྟོང་ ― DNG001_Page_0650 ―
[མ་དཔེ་གཟིགས་ན་འདིར་གནོན།]
གཉིས་ཀ་ཕབ། །ཉམས་སུ་བདེ་བ་ཆེན་པོར་བླང་། །བཤད་ནི་ཐེག་པ་དགུ་རུ་བཤད། །བཙལ་ནི་རང་བྱུང་ཡེ་ཤེས་བཙལ། །སྤེལ་ནི་སྐུ་དང་ཡེ་ཤེས་སྤེལ། །མངོན་དུ་བྱང་ཆུབ་ཆོས་སྐུར་བྱ། །འདོད་ནི་རྒྱལ་བའི་ཞིང་ཁམས་འདོད། །མངོན་དུ་ཡེ་ཤེས་རོལ་པ་བྱ། །བསྒྲུབ་ནི་སངས་རྒྱས་ཡོན་ཏན་བསྒྲུབ། །དོན་དུ་མི་བསམ་མི་བསྒོམ་མོ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཆོས་ཉིད་ལ་བཟླ་བའི་ལེའུ་སྟེ་སོ་དྲུག་པའོ།། །།དེ་ཡང་འདུས་པའི་ཚོགས་རྣམས་ལ། །ཆོས་ཀུན་རྫོགས་པར་བཀའ་སྩལ་པ། །ཨ་ཏི་རྫོགས་ཆེན་མཚན་ཉིད་ནི། །དཔེར་ན་ནོར་བུ་རིན་ཆེན་བཞིན། །བདག་གཞན་དགོས་འདོད་ཚང་བ་ལ། །མ་རྟོགས་དུས་ན་མེད་འདྲ་ཡང་། །རྟོགས་ནས་གཞུང་བཞིན་སྤྱོད་པ་ལས། །བདག་གཞན་དོན་འགྲུབ་རེ་བ་བསྐྱུང་། །དེ་བཞིན་ཆོས་སྐུའི་སྙིང་པོ་ལ། །མྱང་འདས་ས་དང་རྒྱལ་བའི་ཞིང་། །སྐུ་དང་ཡེ་ཤེས་ཇི་སྙེད་པ། །བདག་གཞན་འབྲས་བུ་མཐར་ཕྱིན་པས། །རང་རིག་ཡེ་ཤེས་འདི་ལ་རྫོགས། །དོན་འདི་རྣལ་འབྱོར་བདག་གིས་སྤྱད། །གཏན་ལ་ཀུན་གཞིའི་དངོས་པོ་དབབ། །དོན་དུ་འཁོར་བ་རྩད་ནས་ཆོད། །རྟོགས་པ་ཐིག་ལེ་ཉག་གཅིག་གསལ། །ལྟ་བ་རང་བྱུང་ཡེ་སངས་རྒྱས། །སྒོམ་པ་ཆོས་ཉིད་ཀློང་ན་འཕྱོ། །སྤྱོད་པ་ཐམས་ཅད་བྱར་མེད་སྤྱོད། །རོལ་པ་ཅིར་ཡང་ཐོགས་པ་མེད། །འབྲས་བུ་མ་ལུས་ཡོངས་སུ་རྫོགས། །དེ་ལྟར་རྟོགས་ན་རྫོགས་ཆེན་ཡིན། །དེ་ཡང་འདུས་པའི་སྙིང་པོ་ཉོན། །སྟེང་འོག་མཐོ་དམན་མེད་པར་རྫོགས། །ཕྱོགས་མཚམས་དབྱེ་བ་མེད་པར་རྫོགས། །མཐའ་དབུས་ཉེ་རིང་མེད་པར་རྫོགས། །སྣང་སྟོང་ཉེ་རིང་མེད་པར་རྫོགས། །ཡེ་ཤེས་བརྡལ་བ་ཆེན་པོར་རྫོགས། །སྐུ་མཆོག་ཅིར་ཡང་སྣང་བར་རྫོགས། །གསུང་ནི་བསྟན་པ་སྒྲོག་པར་རྫོགས། །ཐུགས་ནི་ཐམས་ཅད་མཁྱེན་པར་རྫོགས། །མཚན་མ་ཆོས་ཀྱི་དབྱིངས་སུ་རྫོགས། །ཆོས་ཉིད་དག་པའི་ངང་དུ་རྫོགས། །དུག་ལྔ་ཡེ་ཤེས་ཆེན་པོར་ ― DNG001_Page_0651 ―
[མ་དཔེ་གཟིགས་ན་འདིར་གནོན།]
རྫོགས། །ཡེ་ཤེས་རང་བྱུང་ཉིད་དུ་རྫོགས། །འཁྲུལ་པ་རང་བཞིན་མེད་པར་རྫོགས། །རང་བཞིན་བདེ་བ་ཆེན་པོར་རྫོགས། །གཟུང་འཛིན་མཉམ་པ་ཉིད་དུ་རྫོགས། །སྣང་བ་འབྱུང་བ་ལྔ་རུ་རྫོགས། །འབྱུང་བ་ཀུན་བཟང་རྩལ་དུ་རྫོགས། །སེམས་ཅན་བྱང་ཆུབ་སེམས་སུ་རྫོགས། །བྱང་སེམས་ཆོས་ཀྱི་སྐུ་རུ་རྫོགས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་ཆོས་ཀུན་རྫོགས་པར་བསྟན་པའི་ལེའུ་སྟེ་སོ་བདུན་པའོ།། །།དེ་ནས་འདུས་པའི་སེམས་དཔའ་ཡིས། །འཁོར་གྱི་ཐེ་ཚོམ་བསལ་བའི་ཕྱིར། །བདེན་པའི་ཡིད་ཀྱིས་འདི་སྐད་ཞུས། །རང་བྱུང་ཡེ་ཤེས་ངོ་བོ་ལ། །གཞལ་བྱ་མི་དམིགས་དོན་ཅི་ལགས། །སྣང་བའི་མཚན་མ་འདི་ཉིད་ཀྱི། །གཏན་ཚིགས་མ་གྲུབ་གསུངས་པ་ཅི། །དེ་དོན་གང་གིས་རྟོགས་པའི་ཐབས། །བལྟ་མེད་གསུངས་པ་ཅི་ཡི་ཕྱིར། །གོལ་དང་ལྟུང་མེད་བསྟན་པ་ཡི། །མཐུན་དཔེ་གང་གིས་གང་ལ་མཚོན། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་ཚོགས་ལ་བཀའ་སྩལ་པ། །དངོས་ཉིད་ལ་སོགས་ཆོས་རྣམས་ཀུན། །བྱ་བ་མེད་པར་རང་ཤར་ཅིང་། །ཡུལ་མེད་ངོ་བོ་རང་ཤར་ཕྱིར། །ཡེ་ནས་མ་བསྒྲིབས་འོད་གསལ་བས། །གང་ཡང་གཞན་དུ་མི་དམིགས་ན། །གཞི་ལས་མ་གྲུབ་ངོ་བོར་སོན། །ཆོས་ཅན་མེད་པས་གཞལ་བྱ་བྲལ། །དེ་ཡང་རྡོ་རྗེ་སེམས་དཔའ་ཉོན། །སྣང་བྱེད་ཆོས་སྐུར་གསལ་བ་ལ། །ཇི་སྙེད་པ་ཡི་རྣམ་གྲངས་ཀུན། །དགག་བསྒྲུབ་བྱ་བ་མེད་པའི་ཕྱིར། །ཡེ་ནས་མ་གྲུབ་འོད་གསལ་བར། །རང་གི་ས་ན་ཡེ་ནས་གནས། །གཞན་ལ་བདག་ཏུ་མ་གྲུབ་ཕྱིར། །ཕྱོགས་གཉིས་བྲལ་བའི་བྱང་ཆུབ་སེམས། །མཐའ་བཞིའི་ཐ་སྙད་བྲལ་བ་ལ། །འཇལ་བྱེད་གཏན་ཚིགས་ཅི་ཞིག་དགོས། །དེ་ཡང་རྡོ་རྗེ་སེམས་དཔའ་ཉོན། །མཚོན་པའི་ཐ་སྙད་མི་བརྗོད་དོ། །ཆོས་རྣམས་མ་ལུས་ཐམས་ཅད་ཀུན། །ལོག་པའི་རྗེས་སུ་འབྲང་བའི་ཕྱིར། །ཡུལ་མེད་ཐིག་ལེར་རང་ཤར་བས། ། ― DNG001_Page_0652 ―
[མ་དཔེ་གཟིགས་ན་འདིར་གནོན།]
ཇི་བཞིན་མ་ནོར་སྙིང་པོ་ཡི། །ངེས་པར་གཞན་དུ་བལྟ་ལས་གྲོལ། །དེ་ཡང་རྡོ་རྗེ་སེམས་དཔའ་ཉོན། །ཀུན་བཟང་བརྡལ་ཁྱབ་རང་བཞིན་ལ། །ཐོག་མཐའ་ཆོད་ཕྱིར་གོལ་ས་མེད། །དེ་ཡང་ཡེ་ཤེས་རང་ཤར་བས། །གོལ་ས་ཉིད་ཀྱང་ཆོས་ཉིད་ཡིན། །ཡེ་ཤེས་ངང་དུ་གྱུར་པའི་ཕྱིར། །དམིགས་ཞེན་མེད་པས་གོལ་མེད་གསུངས། །དེ་ཡང་འཁོར་གྱི་སྙིང་པོ་ཉོན། །དཔེར་ན་གང་གིས་མི་ནུས་ཀྱང་། །ནམ་མཁའ་ཉི་ཤར་རང་གསལ་བཞིན། །རང་བྱུང་ཡེ་ཤེས་ངོ་བོ་ཡང་། །རང་རིག་ཡེ་ཤེས་བདེ་གསལ་བས། །སྣང་བས་ཕན་མེད་གནོད་མེད་ཕྱིར། །ཕྱོགས་ཀྱི་ཐ་སྙད་བཤད་མི་དགོས། །རྡོ་རྗེ་སེམས་དཔས་ཡང་གསོལ་པ། །མ་བསྒོམས་དོན་དང་འབྲལ་མེད་པའི། །དེ་དོན་རྟོགས་ཐབས་གང་གིས་བགྱི། །མ་བསྒོམས་ཀློང་དུ་གྱུར་པ་ཡི། །རང་གི་ཐ་སྙད་གང་ལ་གདགས། །དེ་དོན་བསྒོམ་དུ་མེད་པའི་དཔེར། །མཚན་མ་བྱུང་ན་ཅིས་མི་གོས། །ལྟ་བ་རང་ཤར་ཆེན་པོ་ལ། །མ་བསྒོམས་གོལ་སར་ཅིས་མི་འགྱུར། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སྙིང་པོ་རང་གི་རྟོགས་དང་ནི། །མན་ངག་དགོངས་པའི་ཐུགས་བརྟོལ་ནས། །ཤེས་རྒྱུད་རྟོགས་པའི་བླ་མ་ཡིས། །ཇི་བཞིན་ཉིད་དུ་ཤར་བ་ལ། །སྣང་བྱེད་ཆོས་སྐུ་ཉིད་སོན་པས། །མཚན་མའི་དངོས་པོ་མི་འབྱུང་ཕྱིར། །སྨན་དང་སྨན་པའི་ཐབས་བཞིན་དུ། །སེམས་མེད་མི་འདོད་ཅི་ཞིག་བྲལ། །དེ་ཡང་འདུས་པའི་སྙིང་པོ་ཉོན། །ཐིག་ལེ་ཆོས་སྐུས་ཁྱབ་པའི་ཕྱིར། །ཇི་བཞིན་ཉིད་དུ་རང་ཤར་བས། །གང་ཡང་དམ་པར་མི་བལྟ་བས། །ཐམས་ཅད་ཇི་བཞིན་རང་སར་གྲོལ། །དེ་ཕྱིར་མཐའ་ལ་མི་གནས་པས། །གཏང་གཞག་མེད་པའི་ཏིང་ངེ་འཛིན། །མ་བསྒོམས་ཀློང་དུ་གྱུར་པར་གདགས། །དེ་ཡང་འདུས་པའི་སྙིང་པོ་ཉོན། །བསྒོམ་དུ་མེད་པའི་ཆོས་ཉིད་ལ། །རྣམ་རྟོག་མཚན་མ་མི་འབྱུང་བས། །དམིགས་ནས་བསལ་བ་བསྒྲུབ་མི་བྱ། །དཔེར་ན་ནམ་མཁའ་འདི་ཉིད་ལ། །སྤྲིན་དང་ཁུ་རླངས་ལ་སོགས་ནི། །ཇི་སྙེད་གཞི་ན་མེད་པ་ལྟར། །ཇི་བཞིན་ཉིད་དུ་ ― DNG001_Page_0653 ―
[མ་དཔེ་གཟིགས་ན་འདིར་གནོན།]
རང་དྲན་པས། །དུས་མཉམ་གསལ་བས་ཡང་དག་སྟེ། །དེ་ལ་གཉེན་པོས་བཅོས་སུ་མེད། །ཐ་སྙད་རང་གསལ་བཅོས་པར་ཟད། །དེ་ཡང་འདུས་པའི་སྙིང་པོ་ཉོན། །ཡུལ་མེད་ཐིག་ལེ་རང་ཤར་བས། །ཡང་དག་དོན་ལ་མི་འཇུག་ཕྱིར། །ངོ་བོ་ཉིད་དུ་གྱུར་པས་ན། །དོན་དུ་གཉེར་པ་གང་ཡང་མེད། །སྔ་ཕྱི་གཞན་དུ་དངོས་མེད་ཕྱིར། །ཆེད་དུ་བསྒོམ་དུ་མེད་པ་སྟེ། །དམིགས་པ་གཏད་པའི་དོན་དང་བྲལ། །དོན་མི་གཉེར་ལ་དགྲ་མེད་འདྲ། །དེ་ནས་འདུས་པས་ཡང་ཞུས་པ། །གཏང་གཞག་མེད་པའི་བསྒོམ་པ་ལ། །མི་འདུན་མི་འབྱུང་གསུངས་པ་ཅི། །རྣལ་འབྱོར་རྩོལ་བྲལ་མ་ཡེངས་ན། །བྱ་བྱེད་འགོག་མེད་གསུངས་པ་ཅི། །དེ་ཉིད་འཆིང་བར་མི་འགྱུར་བའི། །ཕྱོགས་བྲལ་བསྟན་པ་ཇི་ལྟར་ལགས། །ཀུན་རིག་སྟོན་པས་བཤད་དུ་གསོལ། །འདུས་པའི་ཚོགས་ལ་བཀའ་སྩལ་པ། །དུས་གསུམ་རྣམ་པ་ཐམས་ཅད་དུ། །སྐྱེ་འཆི་མེད་པར་ཡེ་ཤར་བས། །སྣང་མེད་ཞེན་རྟོག་ཐམས་ཅད་ཀྱང་། །གང་ཡང་ཆོས་སྐུར་གསལ་བ་ལས། །གཏང་གཞག་རྩོལ་སེམས་ཅི་ལ་འབྱུང་། །གཞན་དུ་མི་འགྱུར་ཀློང་གནས་པས། །མི་མཐུན་མཚན་མ་གང་ཡང་མེད། །དེ་ཡང་རྡོ་རྗེ་སེམས་དཔའ་ཉོན། །དབྱིབས་དང་མཚན་མ་ཐམས་ཅད་ཀུན། །གཞི་ལ་མ་གྲུབ་དོན་ཤེས་ཕྱིར། །རང་གསལ་ཡུལ་ལ་རྟོག་པ་མེད། །དག་དང་མ་དག་ཐམས་ཅད་ཀུན། །གང་ཡང་དགག་བསྒྲུབ་མེད་པའི་ཕྱིར། །གཞག་དང་བླང་བར་ཡེ་མེད་དོན། །འབྱུང་འཇུག་མེད་པས་བསྒོམ་མི་དགོས། །རྩོལ་བ་མེད་ཕྱིར་སྤྱོད་པའི་མཆོག །དེ་ཡང་འདུས་པའི་སྙིང་པོ་ཉོན། །བདག་གཞན་ཀ་ནས་མ་གྲུབ་ཕྱིར། །བྱ་བྱེད་མ་ལུས་ཐམས་ཅད་ཀུན། །འགྲོ་དྲུག་ལས་ཀྱང་བདེར་གཤེགས་མཛད། །ཅི་སྤྱོད་ཆོས་སྐུར་ཡེ་ཤར་བས། །གང་ཡང་མཚན་ཉིད་དབྱེར་མེད་དེ། །བྱེད་པ་ཉིད་ན་གྲོལ་བར་ངེས། །བླང་དང་དོར་བ་ངང་གིས་མེད། །དེ་ཡིས་འཆིང་བར་ཅི་ལ་འགྱུར། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། རྡོ་རྗེ་སེམས་དཔའི་ཐུགས་བརྟོལ་ ― DNG001_Page_0654 ―
[མ་དཔེ་གཟིགས་ན་འདིར་གནོན།]
གསལ་བའི་ལེའུ་སྟེ་སོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ཐེ་ཚོམ་གེགས་ཆེན་བསལ་བའི་ཕྱིར། །གདམས་ངག་མདོར་ནི་ཇི་ལྟར་བསྡུ། །བསྒོམ་པའི་དོན་ནི་དབྱེ་བ་གང་། །རྟོགས་པའི་སེམས་ཉམས་ཇི་ལྟར་འབྱུང་། །ཀུན་རིག་སྟོན་པས་བཤད་དུ་གསོལ། །དེ་སྐད་གསོལ་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མདོར་བསྡུས་གདམས་ངག་ངེས་པའི་དོན། །ཁྱོད་ལ་བསྟན་གྱིས་ཡིད་ཀྱིས་ཟུང་། །ཡུལ་མེད་མ་ཡེངས་སྤང་བླང་མེད། །རེ་དོགས་གཉིས་མེད་རྣལ་འབྱོར་ལ། །ད་ལྟ་ཉིད་དུ་ཡིད་ཆེས་གདེང་། །སངས་རྒྱས་ས་ལ་ངེས་པར་གནས། །དེ་ཡང་འདུས་པའི་སྙིང་པོ་ཉོན། །རང་བྱུང་ཆོས་ཉིད་གནས་ལུགས་ནི། །བཟོ་བཅོས་མེད་པའི་ཤེས་པ་ལ། །སྒྲོ་སྐུར་གང་ཡང་མ་བཏགས་ན། །ལྟ་བའི་གཞི་ཉིད་དེ་ལ་བྱ། །དེ་ཡི་ངང་ལ་གནས་ཐབས་ནི། །སྔ་ཕྱི་མེད་པའི་གཉུག་མའི་རྒྱུན། །ཆེད་དུ་མ་བྱས་རང་གསལ་ཙམ། །དེ་ལས་མ་འདས་བསྒོམ་པ་ཡིན། །སྤང་བླང་མེད་པའི་སྤྱོད་པ་ནི། །ཡིན་མིན་བཟང་ངན་ལ་སོགས་པའི། །བཀོད་པ་གང་ཡང་མེད་པའི་ཕྱིར། །རིས་སུ་མི་བྱེད་སྤྱོད་པའི་མཆོག །རེ་དོགས་མེད་པའི་འབྲས་བུ་ནི། །ལུང་ལྡན་རྐྱེན་གྱིས་རྟོགས་པ་དེས། །ལན་གཅིག་ཐོབ་ཏུ་མི་རེ་སྟེ། །ད་ལྟའི་རང་སེམས་ཆོས་སྐུར་རྟོགས། །དེ་ཡང་འཁོར་གྱི་སྙིང་པོ་ཉོན། །བལྟ་བསྒོམ་སྤྱོད་པ་འབྲས་བུ་རྣམས། །ཚིག་ལ་ཐ་དད་ཕྱེ་བ་ལས། །དོན་ལ་དབྱེར་མེད་ངོ་བོ་གཅིག །དེ་ལྟར་ལྷུན་གྱིས་གྲུབ་པ་ཡིན། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མདོར་བསྡུས་པའི་གདམས་ངག་བསྟན་པའི་ལེའུ་སྟེ་སོ་དགུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །གསལ་ལ་མི་རྟོག་མི་གཡོ་བའི། ། ― DNG001_Page_0655 ―
[མ་དཔེ་གཟིགས་ན་འདིར་གནོན།]
རིག་པའི་ཉམས་ཀྱི་དབྱེ་བའི་དོན། །ཡང་དག་ངེས་དོན་གདེང་གི་བཀའ། །མ་ནོར་མ་བཅོས་ཁྱོད་ལ་བཤད། །རྣལ་འབྱོར་དམ་པ་མཉམ་བཞག་ཚེ། །གསལ་ལ་མི་རྟོག་མི་གཡོ་བའི། །ངོ་བོ་རྩལ་དང་དཔེ་དང་ནི། །ཚད་དང་ངེས་ཚིག་ཡུལ་དང་འབྲས། །སྐྱོན་དང་གོལ་ས་སྒོ་དགུ་སྟེ། །ཆོས་སྐུ་ངོ་སྤྲོད་སྡོམ་ཚིག་ཡིན། །དེ་ཡང་རྡོ་རྗེ་སེམས་དཔའ་ཉོན། །རང་བྱུང་ཆོས་སྐུ་གསལ་བ་ཡི། །ངོ་བོ་རང་རིག་ཡེ་ཤེས་ཡིན། །རྩལ་ནི་སྒོ་ལྔའི་རྣམ་ཤེས་གསལ། །དབྱེ་བ་འདོད་པའི་ཡོན་ཏན་ལ། །དཔེ་ནི་ཏིལ་གྱི་མར་མེ་འདྲ། །ཚད་ནི་ཤེས་པ་མ་བསྒྲིབས་པ། །ངེས་ཚིག་གདམས་ངག་མ་བརྗོད་གསལ། །ཡུལ་ནི་སྣང་བ་ཆོས་ཀྱི་དབྱིངས། །འབྲས་བུ་ལོངས་སྤྱོད་རྫོགས་པའི་སྐུ། །སྐྱོན་ནི་དབང་པོ་ཡན་དྲགས་པས། །གོལ་ས་བྱིང་རྨུགས་འགོག་པ་ཡིན། །དེ་ཡང་འདུས་པའི་འཁོར་ཉོན་ཅིག །གང་ལ་རྣམ་པར་མི་རྟོག་པའི། །ངོ་བོ་སྔ་ཕྱི་མ་དྲན་པ། །རྩལ་ནི་བདེ་ལ་མི་རྟོག་པ། །ཡུལ་ནི་འཛིན་མེད་མ་འགགས་པ། །དཔེ་ནི་བྱ་བ་བཏང་བ་འདྲ། །ངེས་ཚིག་ཡུལ་ལ་མ་ཡེངས་པ། །ཚད་ནི་དྲན་མེད་མ་བྱིང་བའི། །འབྲས་བུ་སྤྲུལ་སྐུ་ཐུབ་དྲུག་འབྱུང་། །སྐྱོན་ནི་གོམས་པར་མ་བྱས་པ། །གོལ་ས་རྒོད་འཕྲོ་ཡུལ་ལ་ཞེན། །དེ་ཡང་རྡོ་རྗེ་སེམས་དཔའ་ཉོན། །སངས་རྒྱས་དགོངས་པ་མི་གཡོ་བ། །ངོ་བོ་དུས་གསུམ་མི་འགྱུར་བ། །རྩལ་ནི་ཡེ་ཤེས་འཕེལ་འགྲིབ་མེད། །ཡུལ་ནི་ཤེས་པ་མི་གཡོ་བརྟན། །དཔེ་ནི་རྒྱ་མཚོའི་གཏིང་དང་འདྲ། །ངེས་ཚིག་མཉམ་ཉིད་རྐྱེན་མི་ཚུགས། །གསལ་དང་མི་རྟོག་དུས་མཉམ་ཚད། །འབྲས་བུ་རང་བྱུང་ཆོས་སྐུར་རྟོགས། །སྐྱོན་ནི་ཐེ་ཚོམ་ཡིད་མ་ཆེས། །གོལ་ས་ལོག་རྟོག་མི་གཡོ་གསུམ། །དེ་ཡང་འདུས་པའི་སྙིང་པོ་ཉོན། །དེ་དག་རྩ་བ་མདོར་བསྡུས་ན། །ཡིད་ལ་ཆོས་སྐུ་ཝལ་གྱིས་དྲན། །དེ་ཉིད་ངང་ལ་ཅོག་གིས་ཞོག །ཡུལ་ལ་འཛིན་མེད་རྟོག་པ་སངས། །རང་རིག་ཡིད་ཆེས་གདེང་དུ་ལྡན། །འབྲས་བུ་མངོན་གྱུར་སངས་རྒྱས་ཡིན། །རྫོགས་ ― DNG001_Page_0656 ―
[མ་དཔེ་གཟིགས་ན་འདིར་གནོན།]
པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། དོན་གྱི་བསྒོམ་པའི་དབྱེ་བ་བསྟན་པའི་ལེའུ་སྟེ་བཞི་བཅུ་པའོ།། །།དེ་ནས་ཀུན་རིག་རྒྱལ་པོ་ཡིས། །དད་ལྡན་འཁོར་ལ་བཀའ་སྩལ་པ། །དེ་ལྟར་རྟོགས་པའི་རྣལ་འབྱོར་རྣམས། །ངེས་པའི་དོན་ལ་དམིགས་པའི་ཚེ། །དབང་པོ་ཡུལ་གྱི་མཚན་མ་རྣམས། །གཞི་ལ་མ་གྲུབ་དོན་རྟོགས་ཕྱིར། །དངོས་པོ་གྱི་ནར་རང་སྣང་ཡང་། །མཚན་མར་ཤེས་པས་གཟུང་དུ་མེད། །དེ་ཕྱིར་འདི་དང་འདིའོ་ཞེས། །ཡིད་ལ་གང་ཡང་མི་འགྱུ་བས། །སྣང་བ་ཆོས་ཀྱི་དབྱིངས་སུ་རྟོགས། །དེ་ཡང་རྡོ་རྗེ་སེམས་དཔའ་ཉོན། །འོན་ཀྱང་སྔར་གྱི་བག་ཆགས་ཀྱིས། །ཆུ་ཡི་ནང་གི་གཟུགས་བརྙན་བཞིན། །ཁ་དོག་དབྱིབས་ཀྱིས་བསྡུས་པ་ནི། །བུན་ནེ་ལོང་ངེ་འོད་དེ་ཙམ། །སྣང་ཡང་འདུ་ཤེས་མི་འཇུག་པས། །རང་གི་ཡིད་ཀྱི་ངོ་གང་ལ། །ཡུལ་མེད་ནམ་མཁའ་སྟོང་པ་ལྟར། །སང་ངེ་སལ་ལེ་རིག་པ་གསལ། །བདག་གཞན་གང་དུ་མཐོང་བ་མེད། །མི་དང་སེམས་ཅན་དངོས་པོ་ཀུན། །དཔེར་ན་སྒྱུ་མའི་གཟུགས་བརྙན་བཞིན། །སྣང་ཙམ་ཉིད་ན་དངོས་མེད་ཤེས། །དེ་ཕྱིར་འཛིན་པའི་བློ་མི་འབྱུང་། །དེ་ཡང་འཁོར་གྱི་སྙིང་པོ་ཉོན། །ལངས་ནས་སྤྱོད་ལམ་གང་བྱས་ཀྱང་། །དངོས་པོར་མི་འཛིན་རང་སར་གྲོལ། །གལ་ཏེ་ཡུལ་ལ་བརྟགས་པ་ན། །བླང་དོར་མེད་པའི་རྟོགས་པ་སྐྱེ། །བདེ་སྡུག་བཟང་ངན་གཙང་སྨེ་དང་། །ཡིན་མིན་སོར་མཐོང་ཇི་སྙེད་པ། །གང་ལའང་འདུ་ཤེས་བློ་མི་འཇུག །དེ་ཕྱིར་སྤང་ཐོབ་མེད་པར་རྟོགས། །དེ་རྟོགས་ངང་ལ་གནས་པ་ལ། །ཕ་རོལ་ཕྱིན་བཅུ་ཆོས་སྤྱོད་སོགས། །ཐབས་ཀྱི་སྤྱོད་པ་མ་ལུས་ཀུན། །མ་སྤངས་ཀུན་ཀྱང་ཚང་ཞིང་རྫོགས། །དེ་ཡང་འདུས་པའི་སྙིང་པོ་ཉོན། །དེ་ཤེས་མངོན་དུ་མ་གྱུར་ཀྱང་། །ཟླ་བ་ཚེས་པ་ཉར་འཕེལ་ལྟར། །དེ་རྟོགས་ཁད་ཀྱིས་སངས་རྒྱས་ཀྱི། །ཡོན་ཏན་མ་ལུས་མངོན་དུ་འབྱུང་། །དེ་ལྟར་ཤེས་ཤིང་རྟོགས་ ― DNG001_Page_0657 ―
[མ་དཔེ་གཟིགས་ན་འདིར་གནོན།]
གྱུར་ཀྱང་། །ཉམས་སྣང་མི་ལ་མི་བསྟན་ཏེ། །སྒྲོ་སྐུར་བར་ཆད་དངོས་གྲུབ་ཉམས། །དེ་ཕྱིར་རང་ཉམས་གསང་བར་གསུངས། །དེ་རྟོགས་ཉམས་དང་ལྡན་པ་ལ། །དགའ་བྲོད་བདེ་བ་སྣ་ཚོགས་འབྱུང་། །དེ་ཚེ་རྣལ་འབྱོར་སེམས་འཕང་སྐྱེ། །ང་རྒྱལ་དབང་གིས་བདུད་རྣམས་འབྱུང་། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། རྟོགས་པའི་སེམས་ཉམས་བསྟན་པའི་ལེའུ་སྟེ་ཞེ་གཅིག་པའོ།། །།དེ་ནས་འཁོར་གྱི་དོན་ཆེད་དུ། །རྡོ་རྗེ་སེམས་དཔས་དོན་ཞུས་པ། །ཏིང་འཛིན་ཉམས་དང་ལྡན་པ་ལ། །ལྟ་སྒོམ་སྤྱོད་པ་ཉམས་ཀྱི་བདུད། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མཉམ་གཞག་རྗེས་ཐོབ་བར་དོ་ལ། །སྣང་བ་འོད་དང་གྲག་པ་སྒྲ། །འཇིགས་པའི་གཟུགས་དང་བསླུ་བའི་རྫུན། །ལྟ་བར་ཤེས་ན་དམ་པའི་ལམ། །དེ་ཡང་འདུས་པའི་འཁོར་རྣམས་ཉོན། །རྣལ་འབྱོར་དམ་པ་མཉམ་བཞག་ཚེ། །མཚན་མོ་མུན་ནག་སྤྲིན་རུམ་ན། །ནམ་ལངས་ཉི་ཤར་བཞིན་དུ་གསལ། །ཁམས་གསུམ་སེམས་ཅན་དགེ་སྡིག་ལས། །གང་ཡང་མ་ལུས་སྔ་ཕྱི་ཤེས། །དེ་ཚེ་སྙིང་རྗེའི་བདུད་ཞུགས་ཏེ། །སེམས་ཅན་སྙིང་རྗེའི་གདུང་བ་སྐྱེ། །ཏིང་འཛིན་བཏང་ནས་གཞན་དོན་བྱེད། །དེ་ཕྱིར་བདུད་ཀྱི་དབང་འགྱུར་ལྟུང་། །དེ་ཡང་རྡོ་རྗེ་སེམས་དཔའ་ཉོན། །ནམ་མཁའ་སྟོང་ལས་སྒྲ་བྱུང་ནས། །བདེར་གཤེགས་ཆོས་རྣམས་སྣ་ཚོགས་སྟོན། །ཞིང་ཁམས་རྒྱན་གྱིས་བརྒྱན་པ་དང་། །ཡིད་དུ་འོང་བའི་སྒྲ་ཐོས་འགྱུར། །ཏིང་འཛིན་བཏང་ནས་གླུ་གར་བྱེད། །ངོམས་ཤིང་ངོ་མཚར་མགུ་སེམས་ཀྱིས། །དེ་ལ་ཞེན་གྱུར་ཉམས་དང་བྲལ། །དགའ་བའི་བདུད་ཀྱིས་རང་བསླུས་འགྱུར། །དེ་ཡང་འདུས་པའི་སྙིང་པོ་ཉོན། །བསྒོམ་ཉམས་རྨི་ལམ་གང་ཡང་རུང་། །འཇིགས་པའི་གཟུགས་སོགས་མི་དགེ་བས། །ངང་ལ་གནས་པར་བསྡིག་ ― DNG001_Page_0658 ―
[མ་དཔེ་གཟིགས་ན་འདིར་གནོན།]
འགྱུར་བས། །ཏིང་འཛིན་བཏང་ནས་མྱ་ངན་བདུད། །མི་དགའ་སྡུག་བསྔལ་ཉམ་ཐག་འབྱུང་། །དེ་ཚེ་ལས་ལ་ཡི་ཆད་དེ། །ལྕེབ་དང་གཅིག་པུར་ཕག་ཏུ་ངུ་། །གཟུགས་ཀྱི་བདུད་ཀྱི་དབང་འགྱུར་ལྟུང་། །དེ་ཡང་རྡོ་རྗེ་སེམས་དཔའ་ཉོན། །ཉམས་དང་རྨི་ལམ་གང་དུ་ཡང་། །ཡིད་དུ་འོང་བའི་གཟུགས་བསྟན་ཏེ། །དུས་གསུམ་ཉེས་ལེགས་ཐམས་ཅད་སྟོན། །གཞན་ལ་སྨྲས་པ་བདེན་པར་འབྱུང་། །ངའོ་སྙམ་པའི་བདུད་ཞུགས་ཏེ། །ཏིང་འཛིན་བཏང་ནས་གྲོད་ཁ་ཡན། །བར་དུ་ཕྱེད་བདེན་ཕྱེད་མི་བདེན། །ཐ་མ་སྨྲས་པ་ཐམས་ཅད་རྫུན། །བསླུ་བའི་བདུད་ཀྱིས་རང་བསླུས་ལྟུང་། །དེ་ཡང་འདུས་པའི་སྙིང་པོ་ཉོན། །ལྟ་བའི་བདུད་ནི་དེ་དག་ཀྱང་། །ཡུལ་འདི་གོལ་སར་མ་ཤེས་ཕྱིར། །སྣང་བ་གཟུགས་སོགས་ཞེན་པ་སྟེ། །ཡུལ་ལ་སེམས་ཞུགས་ཅི་སྤྱད་བདུད། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ལྟ་བའི་བདུད་བསྟན་པའི་ལེའུ་སྟེ་ཞེ་གཉིས་པའོ།། །།དེ་ཡང་རྡོ་རྗེ་སེམས་དཔའ་ཉོན། །སྒོ་ལྔ་བྱིང་བ་གསལ་བའི་བདུད། །རྐྱེན་གྱིས་རྒོད་པ་མི་རྟོག་བདུད། །འཕྲོ་བ་མི་གཡོའི་བདུད་རྣམས་འབྱུང་། །དེ་ཡང་འདུས་པའི་སྙིང་པོ་ཉོན། །ཏིང་འཛིན་མྱུར་དུ་ཐོབ་འདོད་ནས། །ཡུན་རིང་བསྒོམས་པས་ཚད་མ་ཟིན། །མྱོས་པའི་བདུད་ཞུགས་གསལ་བ་བྱིང་། །མ་རིག་དབང་གིས་གཉིད་དུ་སོང་། །གསལ་བ་བོར་ནས་བྱིང་བར་སོང་། །དེ་ཉིད་རྩོལ་བས་ཏིང་འཛིན་ཉམས། །མ་བཙལ་རྨི་ལམ་བཟང་ངན་འབྱུང་། །དེ་ཕྱིར་བྱིང་བའི་བདུད་ཀྱིས་བསླུས། །དེ་ཡང་རྡོ་རྗེ་སེམས་དཔའ་ཉོན། །རང་རིག་ཆོས་སྐུ་མ་ཟིན་པས། །མ་རིག་དབང་གིས་ཡེ་ཤེས་བསྒྲིབས། །དྲན་པ་མེད་པའི་བདུད་ཞུགས་ཏེ། །ངང་བསྒོམ་རྨུགས་པས་བདེ་བ་ཉམས། །རང་རིག་མེད་པས་ཞི་གནས་བྱིང་། །ལྷག་མཐོང་མེད་པས་དོན་དང་བྲལ། །བསྒོམས་ཀྱང་དོན་མེད་བདུད་ཀྱིས་བསླུས། །དེ་ཕྱིར་ལུང་ལྡན་མན་ངག་གཅེས། །དེ་ཡང་འཁོར་གྱི་སྙིང་པོ་ཉོན། ། ― DNG001_Page_0659 ―
[མ་དཔེ་གཟིགས་ན་འདིར་གནོན།]
གཅིག་པུར་མི་དགའ་འདུས་ལ་དགའ། །གཞན་གྱི་རྐྱེན་བྱས་བདུད་ཞུགས་ཏེ། །ཏིང་འཛིན་བཏང་ནས་ཡིན་མིན་གྱི། །ཡུལ་ལ་ཞེན་པ་སྣ་ཚོགས་སྐྱེ། །མི་རྟོག་མེད་པར་ཉོན་མོངས་འབྱུང་། །སྤོང་སྡུད་ཞེན་པས་རང་སྡུག་བྱེད། །དེ་ཕྱིར་གཡེང་བའི་བདུད་ཀྱིས་བསླུས། །དེ་ཡང་རྡོ་རྗེ་སེམས་དཔའ་ཉོན། །ཡང་ཡང་གོམས་པར་མ་བྱས་པས། །འཕྲོ་བ་རྐུན་བུའི་བདུད་ཞུགས་ཏེ། །གང་ཡང་རུང་བའི་ཚིག་རེ་ཙམ། །ཡིད་ལ་བྱས་པས་མི་གཡོ་བྲལ། །ནན་ཏན་ཆུང་བས་ཉམས་མེད་ཕྱིར། །ལང་ཅན་རྐུན་བུ་ཡང་ཡང་ལྡང་། །ངེས་པའི་གདེང་དང་མ་ལྡན་པས། །འཕྲོ་བའི་བདུད་ཀྱིས་རང་བསླུས་ལྟུང་། །དེ་ཡང་རྡོ་རྗེ་སེམས་དཔའ་ཉོན། །བསྒོམ་པའི་བདུད་ནི་དེ་དག་ཀྱང་། །གདམས་ངག་མེད་པ་རྣམས་ལ་འབྱུང་། །ལུང་ལྡན་རྣམས་ལ་གནོད་མི་ཚུགས། །མ་རྟོགས་ཅི་བསྒོམ་བདུད་དུ་འགྱུར། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཏིང་ངེ་འཛིན་གྱི་བདུད་བསྟན་པའི་ལེའུ་སྟེ་ཞེ་གསུམ་པའོ།། །།དེ་ཡང་རྡོ་རྗེ་སེམས་དཔའ་ཉོན། །བྱ་བ་འདུ་འཛི་ལོངས་སྤྱོད་བདུད། །ཉམས་དགའ་ཞེན་པ་གནས་ཀྱི་བདུད། །བསླབ་པའི་ཡོན་ཏན་གཡེང་བའི་བདུད། །སེམས་འཁྲུགས་འཁོར་ངན་བདུད་རྣམས་འབྱུང་། །དེ་ཡང་རྡོ་རྗེ་སེམས་དཔའ་ཉོན། །དགོན་པར་གནས་ན་དད་ལྡན་འདུ། །ལོངས་སྤྱོད་འདུ་འཛིའི་བདུད་ཞུགས་ཏེ། །ཏིང་འཛིན་བཏང་ནས་གཞན་སེམས་འཛིན། །དེ་ཚེ་དོན་བྲལ་ནོར་ཟས་འདོད། །འདོད་བློས་མཚན་མའི་ཆོས་ལ་སྤྱོད། །བསྒོམ་པའི་དོན་བོར་གཡེང་བའི་བདུད། །འཇིག་རྟེན་པ་ལ་ཁ་ལན་བྱེད། །འདུ་འཛིའི་བདུད་ཀྱིས་རང་བསླུས་ལྟུང་། །དེ་ཡང་རྡོ་རྗེ་སེམས་དཔའ་ཉོན། །རང་འཐད་པ་ཡི་གནས་ལ་ནི། །བཀྲ་ཤིས་འདྲེ་མེད་ལྷ་གཉན་ཡོད། །རང་འདོད་ཞེན་པའི་བདུད་ཞུགས་ཏེ། །ཏིང་འཛིན་བཏང་ནས་ཉམས་དགའ་བརྩིག །སྲུང་མས་གཞན་དུ་འགྲོ་དབང་མེད། །ཟེར་ཞིང་བདག་རྟོགས་དོན་དང་བྲལ། །རང་སེམས་ཞེན་པ་ ― DNG001_Page_0660 ―
[མ་དཔེ་གཟིགས་ན་འདིར་གནོན།]
བདུད་དུ་ལངས། །གཞན་གྱི་བདུད་ཀྱིས་རང་བསླུས་ལྟུང་། །དེ་ཡང་འདུས་པའི་སྙིང་པོ་ཉོན། །རྣལ་འབྱོར་མཁས་པ་བསྒོམ་འདོད་ལ། །གཡེང་བའི་བདུད་ནི་ཁོང་ཞུགས་ཏེ། །གཞན་གྱིས་བསྟོད་པས་ཏིང་འཛིན་བཏང་། །ཆོས་འཆད་སྨན་དང་བཟོ་རྣམས་བྱེད། །འདོད་པའི་རྫས་ལ་ཞེན་པ་སྐྱེས། །གཞན་དོན་བྱང་ཆུབ་ཡིན་ཟེར་ནས། །བྱ་བའི་གཡེང་བ་ཆེད་དུ་བྱེད། །དོན་དང་བྲལ་བས་རང་བསླུས་ལྟུང་། །དེ་ཡང་རྡོ་རྗེ་སེམས་དཔའ་ཉོན། །རྣལ་འབྱོར་འཁོར་ངན་གདུང་དྲགས་པས། །སེམས་འཁྲུགས་བདུད་ནི་ཁོང་ཞུགས་ཏེ། །འཁོར་ངན་ཆོག་སེམས་མེད་པར་འདོད། །དྲིན་དུ་མི་གཟོ་ཕྱར་ཀ་གཏོང་། །དེ་ཚེ་དད་ལྡོག་མི་རྣམས་འཕྱ། །སྒྲོ་སྐུར་འདེབས་ལ་ཞེ་སྡང་འབྱུང་། །འཁོར་ངན་བདུད་ཀྱིས་རང་བསླུས་ལྟུང་། །དེ་ཡང་འདུས་པའི་སྙིང་པོ་ཉོན། །སྤྱོད་པའི་བདུད་ནི་དེ་དག་ཀྱང་། །འཇིག་རྟེན་ཆོས་བརྒྱད་ཞེན་ལས་འབྱུང་། །དེ་ཕྱིར་གཡེང་བ་དོན་དུ་གཉེར། །འཁོར་བ་དང་བླངས་རང་བསླུས་ལྟུང་། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སྤྱོད་པའི་བདུད་བསྟན་པའི་ལེའུ་སྟེ་ཞེ་བཞི་པའོ།། །།དེ་ཡང་འདུས་པའི་སྙིང་པོ་ཉོན། །འཇིག་རྟེན་མཁའ་འགྲོའི་ལུང་སྟོན་བདུད། །ཉམས་སུ་མྱོང་བ་ཞེན་པའི་བདུད། །ཞེ་འདོད་ཚུལ་འཆོས་བདུད་དང་ནི། །བརྐམ་ཆགས་བདེ་བ་བོགས་འདོན་བདུད། །གདེང་མེད་སྐུར་འདེབས་ཞེ་སྡང་བདུད། །ང་རྒྱལ་སྒྲོ་འདོགས་བདུད་རྣམས་འབྱུང་། །དེ་ཡང་འདུས་པའི་འཁོར་རྣམས་ཉོན། །རྣལ་འབྱོར་བལྟ་བར་མཉམ་གཞག་ཚེ། །ལྷ་མོའི་ལུས་སུ་མངོན་བྱུང་སྟེ། །ཕུག་ཏུ་མ་སྡོད་འགྲོ་དོན་གྱིས། །གཞན་དོན་བྱས་པའི་ཡོན་ཏན་བརྗོད། །དེ་ཚེ་མཁའ་འགྲོའི་བདུད་ཞུགས་ཏེ། །ཏིང་འཛིན་བཏང་ནས་གཞན་དོན་བརྩམས། །ཆོས་སུ་མིང་བཏགས་ཅི་ཡང་བྱེད། །དོན་དང་བྲལ་ཕྱིར་བདུད་བསླུས་ལྟུང་། །དེ་ཡང་འདུས་པའི་འཁོར་རྣམས་ཉོན། །རྣལ་ ― DNG001_Page_0661 ―
[མ་དཔེ་གཟིགས་ན་འདིར་གནོན།]
འབྱོར་དོན་ལྡན་བསྒོམ་པ་ལ། །ཟབ་ཅིང་ཆ་ཕྲ་ཉམས་མྱོང་བ། །ལྟ་བའི་དོན་ཆེན་མ་ཟིན་པས། །ཞི་གནས་ཞེན་པའི་བདུད་ཞུགས་པས། །རྐྱེན་ཐུབ་མེད་ཕྱིར་འཕེལ་འགྲིབ་ཡོད། །བག་ལ་ཉལ་བའི་མ་རིག་པས། །རང་རིག་ཆོས་སྐུ་མ་ཤེས་ཕྱིར། །ལྟ་མེད་པ་ལ་བདུད་བསླུས་ལྟུང་། །དེ་ཡང་འདུས་པའི་སྙིང་པོ་ཉོན། །དོན་མེད་བསྒོམ་པའི་གང་ཟག་ཀུན། །གདེང་མེད་ཚུལ་འཆོས་གསོབ་ཅན་དེར། །ཁ་འཇམ་དོན་འཁྲིའི་བདུད་ཞུགས་ཏེ། །གཞན་དག་ཁྲིད་ཕྱིར་དགེ་ལ་བརྩོན། །མན་ངག་མེད་པར་གསང་བ་སྐད། །རང་ཉིད་བསླུས་ཕྱིར་བདུད་ཞུགས་ལྟུང་། །ཕྱི་མར་ཡི་དྭགས་ལྟོ་འཕྱེར་སྐྱེ། །དེ་ཡང་འཁོར་གྱི་སྙིང་པོ་ཉོན། །ལྟ་མེད་ཐབས་ཀྱི་རྣལ་འབྱོར་པས། །དབང་གསུམ་པ་ཡི་བདེ་བ་ལ། །དགའ་བ་བཞི་ལ་ཞེན་པ་ཡིས། །འདོད་ཆགས་སྲེད་པའི་བདུད་ཞུགས་ཏེ། །བྱི་ཤུགས་ཕོ་མོ་ཀུན་ཚོགས་ནས། །འདོད་ཆགས་སྤྱད་པས་ཏིང་འཛིན་འཕེལ། །དེ་ཕྱིར་དབང་ལ་བརྟེན་དགོས་ཟེར། །ཆགས་པའི་བདུད་ཀྱིས་རང་བསླུས་ལྟུང་། །དེ་ཡང་རྡོ་རྗེ་སེམས་དཔའ་ཉོན། །ངེས་པའི་ལུང་ལྡན་རྣལ་འབྱོར་ལ། །མཉམ་དུ་རེ་ནས་འགྲན་པའི་ཕྱིར། །སྨད་སེམས་ཞེ་སྡང་བདུད་ཞུགས་ཏེ། །རང་ཉམས་ངན་པས་གཞན་ལ་རྒོལ། །གདམས་ངག་ཅན་ལ་སྐུར་པ་འདེབས། །རྣལ་འབྱོར་པ་ལ་གནོད་མི་ཚུགས། །དེ་ཕྱིར་དམ་ཉམས་རང་ཉིད་ལྟུང་། །ཕྱི་མར་ཚ་བའི་དམྱལ་བར་ལྟུང་། །དེ་ཡང་འདུས་པའི་སྙིང་པོ་ཉོན། །ངེས་པའི་དོན་ལྡན་རྣལ་འབྱོར་པས། །ངེས་དོན་ཡང་དག་བཀའ་ལ་ནི། །གང་ཟག་སྨད་ཕྱིར་སྒྲོ་བཏགས་ཏེ། །མི་ཚིག་བསླད་ཟེར་ཕྱར་ཀ་གཏོང་། །ང་རྒྱལ་བདུད་ནི་ཁོང་ཞུགས་ཏེ། །བཀའ་རྐུན་དྷརྨ་འོག་བྲུས་བྱེད། །ཞེ་ལ་འདོད་ཅིང་ཆེ་ཆུང་བྱེད། །དེ་ཕྱིར་བདུད་བསླུས་དམྱལ་བར་ལྟུང་། །དེ་ཡང་འདུས་པའི་སྙིང་པོ་ཉོན། །བདུད་ཀྱི་སྤྱོད་པ་བཅོ་བརྒྱད་ཀྱང་། །སོ་སོར་སྣང་བ་མ་ཡིན་ཏེ། །ལྟ་བའི་བདུད་ཉིད་གཅིག་པུ་ཡིན། །དེ་ཕྱིར་ལྟ་བ་དམན་པའི་བདུད། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་ ― DNG001_Page_0662 ―
[མ་དཔེ་གཟིགས་ན་འདིར་གནོན།]
རྒྱུད་ལས། ཉམས་ཀྱི་བདུད་བསྟན་པའི་ལེའུ་སྟེ་ཞེ་ལྔ་པའོ།། །།རྡོ་རྗེ་སེམས་དཔས་ཡང་ཞུས་པ། །ལྟ་བསྒོམ་སྤྱོད་པ་ཉམས་ཀྱི་བདུད། །དེ་དག་ཟིལ་གྱིས་ཇི་ལྟར་མནན། །ཟིལ་གྱིས་ནོན་པའི་རྟགས་ནི་གང་། །འབྲས་བུ་ཡོན་ཏན་ཇི་ལྟར་འབྱུང་། །ཀུན་རིག་རྒྱལ་པོས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །ཕྱི་ནང་ཆོས་ཀུན་རང་བྱུང་སྐུ། །བདུད་ཉིད་རྟོགས་ན་ཆོས་ཉིད་དང་། །དེ་ཕྱིར་ལུང་ལྡན་བསྟན་ལ་ཞུགས། །རང་སེམས་རྟོགས་ན་བདུད་མེད་དོ། །དེ་ཡང་རྡོ་རྗེ་སེམས་དཔའ་ཉོན། །མ་ནོར་དོན་ལ་བསྒོམས་པའི་ཚེ། །སྣང་བ་འོད་ཀྱི་བདུད་བྱུང་ན། །ཆོས་སྐུ་ཁ་དོག་བྲལ་བའི་ཕྱིར། །གསལ་ལ་མི་རྟོག་ཟིལ་གྱིས་མནན། །གྲགས་པ་སྒྲ་ཡི་བདུད་བྱུང་ན། །ཆོས་ཉིད་སྒྲ་དང་བྲལ་བའི་ཕྱིར། །རྗེས་སུ་འབྲང་མེད་རང་བཞིན་གྱིས། །ལྟ་བའི་རིག་པས་ཟིལ་གྱིས་མནན། །འཇིགས་པ་གཟུགས་ཀྱི་བདུད་བྱུང་ན། །གཞི་ལ་སྣང་བ་མེད་པའི་ཕྱིར། །དངོས་མེད་རྟོགས་པའི་ཤེས་པ་ཡིས། །གཟུགས་ཅན་མཚན་མ་ཟིལ་གྱིས་མནན། །བསླུ་བ་རྫུན་གྱི་བདུད་བྱུང་ན། །ཆོས་ཉིད་ཚིག་ལས་འདས་པའི་ཕྱིར། །བདེན་པར་འཛིན་པའི་སྐྱོན་བྲལ་བས། །རྫུན་ལ་བདེན་མེད་ཟིལ་གྱིས་མནན། །དེ་ཡང་རྡོ་རྗེ་སེམས་དཔའ་ཉོན། །གསལ་བ་བྱིང་བའི་བདུད་བྱུང་ན། །རྒྱུད་གསུམ་བསྲེས་པའི་གདམས་ངག་གིས། །གཏི་མུག་ཆོས་སྐུར་རང་བརླག་པས། །ཡེ་གནས་ལྟ་བའི་ཟིལ་གྱིས་མནན། །རྨུགས་པ་བདེ་བའི་བདུད་བྱུང་ན། །འཕེལ་འགྲིབ་མེད་པའི་དོན་ཤེས་ཕྱིར། །རང་བྱུང་རིག་པའི་བལྟ་བ་ལ། །མཉམ་ཉིད་དྲན་པས་ཟིལ་གྱིས་མནན། །རྒོད་པ་མི་རྟོག་བདུད་བྱུང་ན། །སྣང་བའི་བག་ཆགས་བརྟས་པ་ལས། །རང་རིག་བག་ཆགས་མེད་པའི་ཕྱིར། །སྤོང་སྡུད་ཞེན་མེད་ཟིལ་གྱིས་མནན། །འཕྲོ་བ་མི་གཡོའི་བདུད་བྱུང་ན། །ཡེ་ནས་མི་འགྱུར་རང་བྱུང་ལ། །གོམས་པའི་དབང་གིས་ཏིང་འཛིན་གསལ། །མི་བརྗེད་གཟུངས་ཀྱི་ཟིལ་ ― DNG001_Page_0663 ―
[མ་དཔེ་གཟིགས་ན་འདིར་གནོན།]
གྱིས་མནན། །དེ་ཡང་འདུས་པའི་སྙིང་པོ་ཉོན། །ལྟ་བསྒོམ་བདུད་ནི་དེ་དག་ཀྱང་། །རང་བྱུང་ཆོས་སྐུ་འདི་རྟོགས་པས། །གང་བྱུང་ཟིལ་ནོན་རང་བརླག་པས། །འབྲས་བུ་ཡེ་ཤེས་ལྷུན་གྱིས་འགྲུབ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ལྟ་བསྒོམ་གྱི་བདུད་ཟིལ་གྱིས་མནན་པའི་ལེའུ་སྟེ་ཞེ་དྲུག་པའོ།། །།དེ་ཡང་འདུས་པའི་སྙིང་པོ་ཉོན། །འདུ་འཛི་ལོངས་སྤྱོད་བདུད་བྱུང་ན། །ཏིང་འཛིན་དགྲ་རུ་ཤེས་པའི་ཕྱིར། །འདོད་ཆུང་ཆོག་ཤེས་ཟིལ་གྱིས་མནན། །ཞེན་པ་གནས་ཀྱི་བདུད་བྱུང་ན། །ཡུལ་ལ་ངེས་མེད་མ་ཆགས་པས། །ལྟ་བ་རང་རིག་ཡུལ་མེད་ཕྱིར། །ཞེན་པ་མེད་པར་ཟིལ་གྱིས་མནན། །ཡོན་ཏན་གཡེང་བའི་བདུད་བྱུང་ན། །བདག་དོན་མ་གྲུབ་བར་དུ་ཡང་། །མི་དབང་མི་བཏང་དོན་དྲན་པས། །གཞན་དོན་མི་བྱའི་ཟིལ་གྱིས་མནན། །འཁོར་ངན་སེམས་འཁྲུགས་བདུད་བྱུང་ན། །མཐར་ཐུག་འདྲེལ་བ་མེད་པའི་ཕྱིར། །གནས་སྐབས་འདྲེལ་བ་ཏིང་འཛིན་དགྲ། །གདུང་སེམས་བསྐྱུངས་ལ་ཟིལ་གྱིས་མནན། །དེ་ཡང་རྡོ་རྗེ་སེམས་དཔའ་ཉོན། །མཁའ་འགྲོའི་ལུང་སྟོན་བདུད་བྱུང་ན། །རང་རིག་མི་འགྱུར་རྟོགས་པ་ལས། །གཞན་དུ་ལུང་སྟོན་བསླུ་བར་ཤེས། །རེ་དོགས་མེད་པར་ཟིལ་གྱིས་མནན། །ཉམས་མྱོང་ཞེན་པའི་བདུད་བྱུང་ན། །སྔ་ཕྱི་མེད་པའི་ཆོས་སྐུ་ནི། །ཏིང་འཛིན་རྐྱེན་གྱིས་མི་འགྱུར་ཕྱིར། །ཞེན་མེད་ལྟ་བའི་ཟིལ་གྱིས་མནན། །ཞེ་འདོད་ཚུལ་འཆོས་བདུད་བྱུང་ན། །གང་ཡང་མ་བཅོས་དོན་དྲན་པས། །རང་བྱུང་ཆོས་སྐུ་གདེང་ལྡན་ཕྱིར། །རྟོགས་པ་དྲང་པོའི་ཟིལ་གྱིས་མནན། །བདེ་བ་བོགས་འདོན་བདུད་བྱུང་ན། །རང་བྱུང་ཡེ་ཤེས་རྟེན་མེད་ཕྱིར། །དབང་ལ་མི་ལྟོས་འཕེལ་འགྲིབ་མེད། །རྒྱུ་རྐྱེན་འབྱུང་འདོད་ཟིལ་གྱིས་མནན། །བདེན་མེད་སྐུར་འདེབས་བདུད་བྱུང་ན། །ཆོས་སྐུ་སྒྲོ་སྐུར་བྲལ་བའི་ཕྱིར། །ལུང་ལྡན་རྣམས་ལ་གནོད་མི་ནུས། །ལྟ་སྤྱོད་མཁན་གྱིས་ཟིལ་གྱིས་མནན། །ང་རྒྱལ་སྒྲོ་འདོགས་བདུད་ ― DNG001_Page_0664 ―
[མ་དཔེ་གཟིགས་ན་འདིར་གནོན།]
བྱུང་ན། །རང་བྱུང་དོན་ལ་སྐྱོན་བྲལ་བས། །དེ་དོན་ངེས་པའི་གདམས་ངག་ནི། །སྣོད་ངན་གསང་བའི་ཟིལ་གྱིས་མནན། །དེ་ཡང་རྡོ་རྗེ་སེམས་དཔའ་ཉོན། །ཟིལ་གྱིས་མནན་ཐབས་དེ་དག་ཀྱང་། །སྤང་ལེན་དགག་བསྒྲུབ་མེད་པར་འདུས། །དེ་ཕྱིར་དོན་རྟོགས་དམ་པའི་ལམ། །དེ་ཡང་སངས་རྒྱས་དགོངས་པ་ཡིན། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སྤྱོད་པ་ཉམས་ཀྱི་བདུད་ཟིལ་གྱིས་མནན་པའི་ལེའུ་སྟེ་ཞེ་བདུན་པའོ།། །།དེ་ཡང་འདུས་པའི་སྙིང་པོ་ཉོན། །ཆོས་ཀུན་རྩ་བ་བྱང་ཆུབ་སེམས། །དེ་རྟོགས་བདུད་ནི་ཟིལ་ནོན་རྟགས། །ཀུན་བཟང་སྟོན་པ་ངས་བཤད་ཀྱིས། །ལེགས་པར་ཉོན་ལ་ཡིད་ཀྱིས་ཟུང་། །རྣལ་འབྱོར་སྣང་བའི་འོད་བྱུང་ན། །གཞའ་ཚོན་རང་བཞིན་མེད་ཤེས་བཞིན། །དམ་པར་ཞེན་པའི་བློ་མི་འབྱུང་། །འོད་གསལ་བདུད་ནི་ཟིལ་ནོན་རྟགས། །དོན་རྟོགས་རྣལ་འབྱོར་དམ་པ་ཡིས། །སྒྲ་ཡི་རྣམ་པ་ཐོས་པའི་ཚེ། །སྒྲ་བརྙན་རྟག་པ་མེད་ཤེས་པས། །རྗེས་འབྲངས་འཛིན་པའི་སེམས་བྲལ་ཕྱིར། །སྒྲ་གྲག་བདུད་ནི་ཟིལ་གནོན་རྟགས། །རྣལ་འབྱོར་འཇིགས་གཟུགས་མཐོང་བའི་ཚེ། །ལྦུ་བ་སྙིང་པོ་མེད་ཤེས་ལྟར། །གཞི་ལ་འཇིགས་པའི་ཡུལ་མེད་རྟོགས། །གཟུགས་བདུད་ཟིལ་གྱིས་ནོན་པའི་རྟགས། །རྣལ་འབྱོར་བསླུ་བའི་རྫུན་བྱུང་ཚེ། །རྨི་ལམ་བཞིན་དུ་རྫུན་དུ་ཤེས། །གང་ལ་བདེན་པར་མི་ལྟ་བས། །བསླུ་བའི་བདུད་ནི་ཟིལ་ནོན་རྟགས། །དེ་ཡང་རྡོ་རྗེ་སེམས་དཔའ་ཉོན། །རྣལ་འབྱོར་ཡུལ་དྲན་རྒོད་པའི་ཚེ། །དུག་ལ་སྔགས་ཀྱིས་བཏབ་པ་ལྟར། །སྔ་ཕྱི་རྗེས་འབྲངས་མེད་ཤེས་པས། །མི་རྟོག་བདུད་ནི་ཟིལ་གནོན་རྟགས། །རྣལ་འབྱོར་ཤེས་པ་འཕྲོ་བའི་ཚེ། །བ་མོ་ལ་ནི་ཉི་ཤར་ལྟར། །རང་བྱུང་རང་དོན་དྲན་པའི་ཕྱིར། །མི་གཡོའི་བདུད་ནི་ཟིལ་ནོན་རྟགས། །རྣལ་འབྱོར་གསལ་བ་བྱིང་གྱུར་ཚེ། །རིན་ཆེན་གའུར་བཅུག་པ་ལྟར། །ཆོས་ཉིད་གསལ་ ― DNG001_Page_0665 ―
[མ་དཔེ་གཟིགས་ན་འདིར་གནོན།]
བ་རང་ཐིམ་ཚེ། །གསལ་འདོད་བདུད་ནི་ཟིལ་ནོན་རྟགས། །བསྒོམ་པ་རྨུགས་ཤིང་བདེ་མེད་ཚེ། །དཔེར་ན་རི་བྱ་རྩིས་མེད་ལྟར། །རྨུགས་པ་བདེ་བ་ཆེན་པོར་ཤེས། །བདེ་འདོད་བདུད་ནི་ཟིལ་ནོན་རྟགས། །དེ་ཡང་འདུས་པའི་སྙིང་པོ་ཉོན། །ལྟ་སྒོམ་འཕེལ་འགྲིབ་མེད་ཤེས་པས། །བདག་ཉིད་རང་བྱུང་ཡེ་ཤེས་སུ། །དོན་རྟོགས་སངས་རྒྱས་རྟགས་སུ་གསུངས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ལྟ་སྒོམ་གྱི་བདུད་ཟིལ་གྱིས་ནོན་པའི་རྟགས་བསྟན་པའི་ལེའུ་སྟེ་ཞེ་བརྒྱད་པའོ།། །།དེ་ནས་འཁོར་ལ་བཀའ་སྩལ་པ། །སྤྱོད་པའི་ཉམས་བདུད་ཟིལ་ནོན་རྟགས། །ངེས་དོན་བཤད་ཀྱིས་ཡིད་ལ་ཟུང་། །ལོངས་སྤྱོད་འདུ་འཛིའི་བདུད་བྱུང་ཚེ། །བུང་བ་བཅུད་ལེན་ཞེན་མེད་ལྟར། །གང་ལ་ཆགས་པ་མེད་རྟོགས་པ། །ལོངས་སྤྱོད་འདུ་འཛི་ཟིལ་ནོན་རྟགས། །རྣལ་འབྱོར་གནས་ལ་ཞེན་པའི་ཚེ། །མགྲོན་པོ་ཡུལ་སླེབས་འཇིགས་མེད་ལྟར། །མ་བཀོལ་ཏིང་འཛིན་གྲོགས་སུ་ཤེས། །ཞེན་གནས་བདུད་ནི་ཟིལ་ནོན་རྟགས། །རྣལ་འབྱོར་གཡེང་བའི་བདུད་བྱུང་ཚེ། །མེ་ལ་ཤིང་བསྣན་ཇི་བཞིན་དུ། །རྣམ་རྟོག་ཡེ་ཤེས་སྐུལ་མར་ཤེས། །གཡེང་བདུད་ཟིལ་གྱིས་ནོན་པའི་རྟགས། །རྣལ་འབྱོར་འཁོར་ངན་བདུད་བྱུང་ཚེ། །ཕག་གླང་འདྲེལ་བ་མེད་ཤེས་ལྟར། །གཉེན་ལ་ཆགས་པས་འཆིང་བར་རྟོགས། །འཁོར་ངན་བདུད་ནི་ཟིལ་ནོན་རྟགས། །དེ་ཡང་རྡོ་རྗེ་སེམས་དཔའ་ཉོན། །འདྲེ་བཀྲེན་ལྷར་བཟུང་ལུང་སྟོན་པ། །བདེན་པར་མི་འཛིན་རེ་དོགས་བྲལ། །བླ་མའི་ལུང་ལ་ཡིད་ཆེས་ཕྱིར། །ལུང་སྟོན་བདུད་ནི་ཟིལ་ནོན་རྟགས། །རྣལ་འབྱོར་ཉམས་མྱོང་སྐྱེས་པའི་ཚེ། །བདེ་མཐོང་ཉམས་ལ་མ་ཞེན་ལྟར། །ཉམས་ལ་ཞེན་པ་སྐྱོན་དུ་རྟོགས། །ཞེན་བདུད་ཉམས་ནི་ཟིལ་ནོན་རྟགས། །རྣལ་འབྱོར་སྤྱོད་པའི་ཚུལ་འཆོས་ཚེ། །དྲང་སྲོང་གཡོ་སྒྱུ་མེད་པ་ལྟར། །ཚུལ་འཆོས་སྤྱོད་པ་འཁྲུལ་བར་ཤེས། །ཞེ་འདོད་བདུད་ནི་ཟིལ་ནོན་ ― DNG001_Page_0666 ―
[མ་དཔེ་གཟིགས་ན་འདིར་གནོན།]
རྟགས། །རྣལ་འབྱོར་བསྒོམ་པ་བོགས་འདོན་ཚེ། །འདོད་ཆགས་བྲལ་བའི་དགེ་སློང་བཞིན། །ངེས་དོན་བལྟ་བར་དབང་མི་དགོས། །བདེ་འདོད་བདུད་ནི་ཟིལ་ནོན་རྟགས། །རྣལ་འབྱོར་ཞེ་སྡང་བསྐུར་འདེབས་ཚེ། །སྐུར་བྲལ་ཉམས་མྱོང་བཙུན་མོ་བཞིན། །དམན་སེམས་མེད་པའི་གདེང་ལྡན་པས། །སྐུར་འདེབས་བདུད་ནི་ཟིལ་ནོན་རྟགས། །རྣལ་འབྱོར་ང་རྒྱལ་སྒྲོ་འདོགས་ཚེ། །རིན་ཆེན་ནོར་ལ་བསྙད་མི་དགོས། །དེ་བཞིན་ངེས་དོན་གསང་ཐུབ་ན། །ང་རྒྱལ་བདུད་ནི་ཟིལ་ནོན་རྟགས། །དེ་ཡང་འདུས་པའི་སྙིང་པོ་ཉོན། །དེ་དག་སྤྱོད་པ་ཉམས་ཀྱི་བདུད། །རྟོགས་ན་རང་བྱུང་ཆོས་སྐུ་ཡིན། །དེ་ཕྱིར་དོན་དྲན་བདུད་མེད་པས། །ཟིལ་གྱིས་མནན་པའི་ཐབས་མི་དགོས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སྤྱོད་པ་ཉམས་ཀྱི་བདུད་ཟིལ་གྱིས་ནོན་པའི་རྟགས་བསྟན་པའི་ལེའུ་སྟེ་ཞེ་དགུ་པའོ།། །།དེ་ཡང་འདུས་པའི་སྙིང་པོ་ཉོན། །ངེས་དོན་རྟོགས་པའི་རྣལ་འབྱོར་པས། །ལན་གཅིག་སྐྱེ་ཤིའི་བདུད་བྱུང་ཚེ། །ཡེ་ཤེས་ཆོས་སྐུའི་གཟུགས་བརྙན་ནི། །ལོངས་སྤྱོད་རྫོགས་དང་སྤྲུལ་སྐུ་འབྱུང་། །དེ་ཡང་འདུས་པའི་སྙིང་པོ་ཉོན། །འཇིག་རྟེན་དག་པར་རྟོགས་པའི་ཚེ། །དམྱལ་བའི་བཙོ་བསྲེག་འཇིགས་པའི་སྒྲ། །ངུ་འབོད་ཙེར་ལྷང་ལ་སོགས་པ། །གསང་སྔགས་གསུང་གི་འཁོར་ལོར་ཤེས། །ལྕགས་བསྲེག་ས་གཞི་མེ་འོད་ཀྱང་། །རྣམ་པར་དག་པའི་ཞིང་ཁམས་ལ། །འཁོར་བའི་སྐྱོན་མེད་འོད་ཟེར་འགྱེད། །དེ་ཕྱིར་འོད་གསལ་ཡེ་ཤེས་སྐུ། །འཇིགས་པའི་གཤིན་རྗེའི་གཤེད་པོ་ཡང་། །ཐུབ་དྲུག་གཟུགས་སྐུར་རྣམ་པར་མཐོང་། །དེ་ཕྱིར་ལས་དག་འཁོར་བ་མེད། །སངས་རྒྱས་ས་ཉིད་ད་ལྟ་ནོན། །རྫུན་ཟེར་ལྷ་ཡིས་བསླུས་པའི་བདུད། །ངེས་དོན་སྙིང་པོ་རྟོགས་པ་ཡིས། །ས་བཅུའི་བྱང་ཆུབ་སེམས་དཔར་མཐོང་། །སེམས་ཅན་དོན་བྱེད་ ― DNG001_Page_0667 ―
[མ་དཔེ་གཟིགས་ན་འདིར་གནོན།]
རྒྱལ་བའི་བཀའ། །དེ་ཡང་འདུས་པའི་སྙིང་པོ་ཉོན། །སྤྲུལ་སྐུའི་འཁོར་ནི་འགྲོ་དྲུག་ཀྱང་། །བདེན་པར་འཛིན་པའི་རྟོགས་མེད་ཕྱིར། །དུས་གསུམ་སངས་རྒྱས་སྤྲུལ་པའི་འཁོར། །ལུས་མེད་བསྒོམ་བདུད་འབྱུང་མི་སྲིད། །ལྟ་བསྒོམ་བདུད་མེད་འབྲས་བུ་ནི། །མེ་ལོང་ནང་གི་གཟུགས་བརྙན་བཞིན། །ཆོས་ཀུན་གཟུགས་བརྙན་ཆོས་ཀྱི་དབྱིངས། །དེ་ལ་ཞེན་མེད་རྒྱལ་བའི་གནས། །དེ་ཡང་འཁོར་གྱི་སྙིང་པོ་ཉོན། །སྦྱོད་པའི་བདུད་མེད་འབྲས་བུ་ནི། །རིག་པ་རང་གསལ་ཆོས་སྐུར་ཤེས། །དེ་ཡི་ཡོན་ཏན་འཇིག་རྟེན་དུ། །གཟུགས་སྐུ་རྣམ་གཉིས་འགྲོ་དོན་མཛད། །དེ་དུས་སྐྱོན་མེད་ཡེ་ཤེས་ནི། །པདྨ་དང་ནི་འདམ་བཞིན་དུ། །གོས་མེད་རང་རིག་ཏིང་འཛིན་གསལ། །མ་རིག་མེད་ཕྱིར་སྐྱོན་མི་གོས། །རྣམ་སྨིན་ལུས་ཀྱི་སྒོ་ལྔ་ཡིས། །འཁོར་བའི་གཟུགས་བྲལ་སྤང་སྡུད་མེད། །བག་ཆགས་དག་ཕྱིར་ཞེན་པ་མེད། །སྤྱོད་པའི་བདུད་ནི་འབྱུང་མི་སྲིད། །མཉམ་བཞག་རྗེས་ཐོབ་དབྱེར་མེད་པས། །ཡིན་མིན་བཟང་ངན་བདེ་སྡུག་གི། །ཉམས་ཀྱི་བདུད་མེད་འབྲས་བུ་ནི། །བསམ་གཏན་རི་མོའི་ཡོན་ཏན་ལ། །དམ་པར་བལྟ་བ་མེད་པའི་ཕྱིར། །འབྱུང་འཇུག་མེད་པའི་ཉམས་དང་ལྡན། །ལུས་མེད་ཡེ་ཤེས་ཆོས་སྐུར་གསལ། །དེ་ཕྱིར་ལུས་བྲལ་གདམས་ངག་གཅེས། །དེ་ཡང་རྡོ་རྗེ་སེམས་དཔའ་ཉོན། །རང་བྱུང་ཆོས་སྐུ་རྟོགས་པ་ལ། །རྒྱ་མཚོར་ཉི་ཟླའི་གཟུགས་བརྙན་བཞིན། །རང་རང་མོས་པ་སོ་སོ་ལ། །གཞན་དོན་མ་བཙལ་ཤུགས་ལས་འབྱུང་། །དཔེར་ན་ཆང་གིས་ར་རོ་བཞིན། །བྱང་ཆུབ་སེམས་དཔའ་ལས་དག་ལ། །ལོངས་སྤྱོད་རྫོགས་པའི་སྐུར་མཐོང་ནས། །ལྡེམ་དགོངས་ཆོས་རྣམས་སྐུ་ཡིས་སྟོན། །དད་ལྡན་ཉན་ཐོས་རང་རྒྱལ་ལ། །ཅིར་ཡང་སྤྲུལ་པའི་སྐུར་མཐོང་ནས། །གསུང་གི་སྒོ་ནས་དྲང་དོན་དུ། །བཀྲི་དྲང་ཐབས་ཀྱིས་ཆོས་རྣམས་སྟོན། །དེ་ཡང་འདུས་པའི་སྙིང་པོ་ཉོན། །འཁོར་འདས་གཞི་ ― DNG001_Page_0668 ―
[མ་དཔེ་གཟིགས་ན་འདིར་གནོན།]
ལ་མེད་པ་ཡི། །ངེས་དོན་ཡེ་ཤེས་ཆོས་སྐུ་འདི། །ཐམས་ཅད་སངས་རྒྱས་དགོངས་པའི་ཆོས། །སེམས་ཅན་མིང་མེད་བདེ་གཤེགས་ལ། །བྱིན་རླབས་ཆོས་ཀུན་ཐུགས་ཀྱིས་སྟོན། །དེ་ཡང་རྡོ་རྗེ་སེམས་དཔའ་ཉོན། །སྐུ་གསུམ་གསུངས་པ་དེ་དག་ཀྱང་། །གདུལ་བྱའི་འཁོར་ལ་ཕྱེ་བ་ལས། །དོན་ལ་དབྱེར་མེད་ཆོས་སྐུར་གཅིག །དེ་ཕྱིར་ཐིག་ལེ་ཉག་གཅིག་ཡིན། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། བདུད་ཟིལ་གྱིས་ནོན་པའི་འབྲས་བུ་བསྟན་པའི་ལེའུ་སྟེ་ལྔ་བཅུ་པའོ།། །།དེ་ནས་ཀུན་རིག་སྟོན་པ་ལ། །རྡོ་རྗེ་སེམས་དཔས་ཡང་ཞུས་པ། །ཀུན་གཞི་ལྡོག་དུས་ཐབས་དང་ནི། །ལོག་པའི་འབྲས་བུ་མཐར་ཕྱིན་གང་། །སངས་རྒྱས་རྣམ་བཞི་ཇི་ལྟར་དབྱེ། །བར་དོར་སངས་ནི་ཇི་ལྟར་རྒྱ། །སངས་རྒྱས་མཛད་སྤྱོད་ཇི་ལྟར་འབྱུང་། །ཀུན་རིག་སྟོན་པས་བཤད་དུ་གསོལ། །དེ་ནས་འདུས་པའི་འཁོར་རྣམས་ལ། །ཞུས་པའི་དོན་གསན་བཀའ་སྩལ་པ། །ལྡོག་པའི་དུས་དང་ལྡོག་པའི་ཐབས། །དང་པོ་ཀུན་གཞི་ལྡོག་དུས་ནི། །ཀུན་གཞིའི་མཚན་ཉིད་འགྲོ་ལྡོག་མེད། །རེ་ཤིག་མ་རིག་བག་ཆགས་ཟད། །དེ་ལ་ལྡོག་ཅེས་བཏགས་པ་སྟེ། །ལྡོག་དུས་རིམ་དང་ཡོངས་སུ་དག །དང་པོ་གཉིས་ནས་དགུ་བར་དུ། །ལྷན་ཅིག་སྐྱེས་དང་ཀུན་བརྟགས་པའི། །མ་རིག་སྒྲིབ་པ་ཡོངས་སྦྱངས་ནས། །རྡོ་རྗེ་ལྟ་བུའི་ཏིང་འཛིན་གྱིས། །ཐམས་ཅད་མེ་ལོང་གཡའ་དག་ལྟར། །གྱུར་པས་ལྡོག་དུས་དེ་ཉིད་ཡིན། །དེ་ཡང་འདུས་པའི་སྙིང་པོ་ཉོན། །ལུས་ངག་ཡིད་གསུམ་མ་སྦྱངས་པར། །ཡེ་ཤེས་ལྷ་ལ་མི་སྤྲོ་སྟེ། །དངོས་གྲུབ་བསླང་བའི་འོས་མེད་པས། །དེ་ཉིད་དག་པར་སྦྱངས་པ་ནི། །དངོས་གྲུབ་བསླང་བའི་འོས་གནས་ཡིན། །བདག་ཉིད་དག་པས་དམ་ཚིག་སེམས། །བྲན་དང་ཁོལ་ཚུལ་དངོས་གྲུབ་བསླང་། །ཡེ་ཤེས་སེམས་དཔའ་བླ་མ་ཡིས། །བདག་ལ་དངོས་གྲུབ་སྟེར་ཚུལ་གྱིས། །མཚན་ ― DNG001_Page_0669 ―
[མ་དཔེ་གཟིགས་ན་འདིར་གནོན།]
བཅས་མཚན་མེད་གཉིས་སྒོ་ནས། །ཀུན་གཞི་བག་ཆགས་ཡོངས་སྦྱངས་ནས། །ལྕང་ལོ་ཅན་གྱི་ཕོ་བྲང་དུ། །ཕྱག་ན་རྡོ་རྗེའི་སྐུར་རྫོགས་པས། །རྡོ་རྗེ་འཛིན་པའི་ས་ཞེས་བྱ། །དེ་ཡང་རྡོ་རྗེ་སེམས་དཔའ་ཉོན། །ཐམས་ཅད་སྤྲོས་བྲལ་རྣམ་པར་དག །ད་ལྟའི་རིག་པའི་ཡེ་ཤེས་འདི། །རྟོགས་པའི་མཚན་ཉིད་རྣལ་འབྱོར་ལ། །ཆུ་ཟླ་ལྟ་བུར་བསྐྱེད་པའི་གཞི། །བྱང་ཆུབ་ལྔ་ཡི་ལྷ་ཚོགས་གསལ། །མཚན་མ་ལྷ་ཡི་རྣལ་འབྱོར་ལ། །སྦྱོར་བ་ལྡན་པའི་ས་ཞེས་བྱ། །དམ་ཚིག་སེམས་དཔར་གསལ་བ་ལ། །ཡེ་ཤེས་སྤྱན་དྲངས་སྤུན་དང་གྲོགས། །འབྲས་བུ་མངོན་དུ་མ་གྱུར་བར། །མཆོད་ཅིང་བླང་བས་མཉམ་ཉིད་པ། །དེ་ལྟར་བསྒོམ་པས་མཐར་ཕྱིན་ནས། །ཡེ་ཤེས་ལྷ་དང་སྤུན་གྲོགས་ཚུལ། །བསྒོམ་པས་མཐར་ཕྱིན་གྱུར་པའི་སར། །ཚོགས་ཆེན་རྣམ་གཉིས་ཡོངས་རྫོགས་ནས། །བདེ་གཤེགས་སྣང་བ་སྤྲུལ་སྐུ་ཉིད། །སེམས་དཔའི་ཚུལ་སྟོན་འཁོར་བསྐོར་ཏེ། །སྐུ་ཡི་སྒོ་ནས་ཆོས་སྟོན་མཛད། །དེ་དག་སླར་ཡང་ཡིག་འབྲུར་གྱུར། །བདེ་གཤེགས་སྐུ་ལ་འདུས་པར་བསྒོམ། །ཡི་གེ་འཁོར་ལོ་ཚོགས་ཆེན་ས། །དེ་དག་ཀུན་གཞི་བཟློག་པའི་དུས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཕྱི་པ་ཀྲི་ཡོག་གི་ཀུན་གཞི་ལྡོག་པའི་དུས་བསྟན་པའི་ལེའུ་སྟེ་ང་གཅིག་པའོ།། །།ཀུན་རིག་རྒྱལ་པོས་བཀའ་སྩལ་པ། །ཐབས་དང་ཤེས་རབ་གཉིས་སྒོ་ནས། །གསང་ཆེན་ངང་ལ་སྐུ་གསུང་ཐུགས། །རྒྱན་གྱི་དཀྱིལ་འཁོར་རྫོགས་བསྐྱེད་ནས། །ཕྱི་ནང་ལྷ་དང་གཞལ་ཡས་ཁང་། །གསལ་བར་རྫོགས་པར་བསྐྱེད་པ་ནི། །སྦྱོར་བ་ཐབས་ཀྱི་ས་ཞེས་བྱ། །བདག་ཉིད་ཏིང་འཛིན་གསལ་བ་ལ། །རང་བཞིན་རེ་ཞིག་སྤྱན་དྲངས་ཏེ། །རྗེ་གྲོགས་ཁོལ་སྤུན་མི་བལྟ་ཞིང་། །གཉིས་མེད་གཅིག་ཏུ་གྱུར་པ་ལ། །ཉོན་མོངས་དུག་གསུམ་དུག་ལྔ་དང་། །མང་ས་རཀྟ་ལ་སོགས་མཆོད། །སྐྱོན་རྣམས་སྐུ་གསུང་ཐུགས་སུ་དག །འདོད་པའི་ཡོན་ ― DNG001_Page_0670 ―
[མ་དཔེ་གཟིགས་ན་འདིར་གནོན།]
ཏན་ཡེ་ཤེས་རྒྱན། །མཉམ་པ་ཉིད་དུ་ཀུན་གྱུར་པས། །དེ་ཉིད་དབྱེ་བ་མེད་པའི་ས། །མཆོད་བསྟོད་བསྙེན་པ་མཐར་ཕྱིན་ནས། །དེ་ཉིད་ངེས་པར་མངོན་གྱུར་ཏེ། །སྐུ་གསུང་ཡོན་ཏན་ཕྲིན་ལས་ཀྱིས། །འགྲོ་བ་མ་ལུས་རྫོགས་པར་མཛད། །གྲོགས་དང་གཉེན་པོའི་ཚུལ་གྱིས་འདུལ། །དེ་ཉིད་ཡོངས་སུ་རྫོགས་པའི་ས། །ཀུན་གཞི་ལྡོག་པའི་དུས་ཉིད་ཡིན། །དེ་ཡང་རྡོ་རྗེ་སེམས་དཔའ་ཉོན། །ཡེ་ནས་ལྷུན་གྱིས་གྲུབ་པའི་སྐུ། །གཞན་ནས་སྤྱན་དྲངས་མེད་པ་སྟེ། །དབྱིངས་ལ་རིག་པ་དྲང་བ་ལས། །དེ་ལ་དབྱིངས་ཉིད་ཇི་བཞིན་པར། །རིག་པས་དེ་ལྟར་གཉིས་མེད་པར། །རྟོགས་པས་སྤྱན་དྲངས་བྱོན་པ་ཡིན། །དེ་ལྟར་ངེས་པར་གྱུར་པ་ནི། །དེ་ཉིད་གཉིས་སུ་མེད་པའི་ས། །ཕུང་པོ་ལྷ་རུ་རྫོགས་པ་ཡང་། །ཡེ་ནས་ལྷ་ཡི་རང་བཞིན་ལ། །ད་གཟོད་རྩོལ་བ་མ་ཡིན་ཏེ། །དབྱིངས་ཉིད་སྐྱེ་བ་མེད་པ་ལས། །སྐྱེ་བའི་ཆོ་འཕྲུལ་ལྷ་ཡི་སྐུ། །རྫོགས་པར་དེ་ཉིད་སྣང་བ་ལས། །ཏིང་འཛིན་རིམ་གྱིས་བསྐྱེད་པ་མེད། །མ་བསྐྱེད་རང་བཞིན་རྫོགས་གསལ་བ། །དེ་ཉིད་བཀོད་པ་མེད་པའི་ས། །མ་བསྐྱེད་རྫོགས་པར་གསལ་བ་ལས། །བདག་གཞན་གཉིས་སུ་མེད་པས་ནི། །དབྱིངས་ལས་རིམ་འཇུག་མ་གཡོས་པར། །འབྲས་བུ་ཆེ་བའི་ཡོན་ཏན་རྫོགས། །གཞན་ནས་བྱས་དང་བཙལ་མེད་པས། །ཆེ་བའི་ཡོན་ཏན་རྫོགས་པ་ལ། །ལྷུན་གྱིས་གྲུབ་པའི་ས་ཡིན་པས། །དེ་ཉིད་ཀུན་གཞི་ལྡོག་དུས་ཡིན། །དེ་ཡང་རྡོ་རྗེ་སེམས་དཔའ་ཉོན། །ཐམས་ཅད་ཆོས་ཉིད་མཉམ་པའི་ངང་། །མ་བཙལ་ཡེ་ནས་ལྷུན་གྲུབ་རྫོགས། །དུས་གསུམ་མི་འགྱུར་ཆེན་པོ་ཡིན། །ཐམས་ཅད་ཡེ་ནས་སངས་རྒྱས་པས། །འཁོར་གྱི་ཚིག་ནི་མིང་མེད་ཏེ། །བསྐྱེད་ཅིང་རྩོལ་བས་ཕྲལ་མི་དགོས། །རང་རིག་ཡེ་ཤེས་མངོན་སྣང་བས། །དེ་ཉིད་མངོན་དུ་སྣང་གྱུར་ཏེ། །དེ་ཚེ་ཉིད་ན་འཁོར་བ་སྟོངས། །ཀུན་གཞི་མིང་མེད་ལྡོག་པའི་དུས། །དེ་ཡང་ ― DNG001_Page_0671 ―
[མ་དཔེ་གཟིགས་ན་འདིར་གནོན།]
འདུས་པའི་སྙིང་པོ་ཉོན། །དོན་དུ་རྣམ་པ་ཐམས་ཅད་དུ། །སངས་རྒྱས་ཉིད་ལས་མ་གཏོགས་པ། །རྫོགས་ཆེན་ཨ་ཏིའི་ཨ་ཏི་ལ། །གཞན་པ་གང་ཡང་མེད་པའི་ཕྱིར། །ས་དང་ཀུན་གཞི་ལྡོག་དུས་གཅིག །ཡེ་ནས་སངས་རྒྱས་རང་བཞིན་ལ། །དེ་ལས་མི་འགྱུར་རྩོལ་དང་བྲལ། །ཡེ་རྫོགས་ཉིད་ལས་མ་གཏོགས་པ། །ཀུན་གཞིའི་མིང་ཡང་མི་སྲིད་པས། །འཁོར་བ་ཡོད་པ་མ་ཡིན་ཏེ། །ལྡོག་རྒྱུ་མེད་ཕྱིར་ལྡོག་དུས་གང་། །ཐམས་ཅད་ཡེ་སངས་རྒྱས་པའི་ཕྱིར། །རྟོགས་མ་རྟོགས་སུ་གང་གིས་གདགས། །རང་བྱུང་ཡེ་ཤེས་ཆེན་པོ་ལས། །མ་རྟོགས་འཁོར་བ་མིང་ཡང་མེད། །མ་རྟོགས་འཁོར་བར་སྣང་ཞེ་ན། །ལྟར་སྣང་ཡང་དག་དོན་མེད་དེ། །སངས་རྒྱས་ཉིད་ལ་ལྟར་སྣང་མེད། །ཐམས་ཅད་ཆོས་སྐུ་བརྡལ་བ་ལ། །གང་ཡང་མེད་ཕྱིར་ཅི་ཞིག་འཁོར། །དེ་ཕྱིར་མ་བཙལ་ཡེ་རྫོགས་ཡིན། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ནང་པ་བསྐྱེད་རྫོགས་གཉིས་ཀྱི་ཀུན་གཞི་ལྡོག་པའི་དུས་བསྟན་པའི་ལེའུ་སྟེ་ང་གཉིས་པའོ།། །།དེ་ནས་ཀུན་རིག་རྒྱལ་པོ་ཡིས། །ཀུན་གཞི་ལྡོག་ཐབས་བཀའ་སྩལ་པ། །ས་དང་ཕ་རོལ་ཕྱིན་པ་བཅུ། །རིམ་གྱིས་ཡོངས་སུ་སྦྱངས་ནས་ནི། །སྒྲིབ་པ་ཡོངས་སུ་བྱང་གྱུར་ནས། །ས་བཅུ་རིམ་གྱིས་བགྲོད་པ་ནི། །ཀུན་གཞི་ལྡོག་པའི་ཐབས་སུ་བསྟན། །དེ་ཡང་འདུས་པའི་སྙིང་པོ་ཉོན། །སློབ་དཔོན་ལུང་དང་ལྡན་པ་ཡིས། །སེམས་ཅན་བདེ་གཤེགས་སྙིང་པོ་ཅན། །ཡེ་ནས་སངས་རྒྱས་རང་བཞིན་པས། །ས་དང་ཕ་རོལ་ཕྱིན་པ་ཡིས། །ད་གཟོད་རྩོལ་བ་མ་ཡིན་ཏེ། །ཕུང་པོ་ཁམས་དང་སྐྱེ་མཆེད་སོགས། །སྐུ་དང་ཡེ་ཤེས་རང་ཆས་ལ། །བླ་མའི་ལུང་དང་ལྡན་པས་འགྲུབ། །བསྐལ་པའི་དུས་ལ་མི་ལྟོས་པར། །མྱུར་དུ་སངས་རྒྱས་ཐབས་ཆེན་པོ། །སློབ་དཔོན་ལུང་དང་ལྡན་པས་ན། །ལྡོག་ཐབས་བླ་མ་དམ་པ་ཡིན། །དེ་ཡང་འཁོར་རྣམས་ཡང་ཉོན་ཅིག ། ― DNG001_Page_0672 ―
[མ་དཔེ་གཟིགས་ན་འདིར་གནོན།]
ཆོས་སྐུ་ཉིད་ལས་མ་གཏོགས་པའི། །ཀུན་གཞི་བྱ་བ་མིང་མེད་པས། །ལྡོག་རྒྱུ་མེད་ཕྱིར་ལྡོག་ཐབས་ཅི། །ཡེ་ནས་མེད་ཕྱིར་ལྡོག་དང་བྲལ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཀུན་གཞི་ལྡོག་པའི་ཐབས་བསྟན་པའི་ལེའུ་སྟེ་ང་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ཀུན་གཞི་ལྡོག་པའི་འབྲས་བུ་ནི། །ཡིད་གཉིས་གནས་འགྱུར་མཉམ་ཉིད་དང་། །སོ་སོར་རྟོག་པའི་ཡེ་ཤེས་ཏེ། །སྐུ་ནི་ལོངས་སྤྱོད་རྫོགས་པའི་སྐུ། །སྒོ་ལྔ་བྱ་བ་ནན་ཏན་དང་། །སྤྲུལ་པའི་སྐུར་ནི་གྱུར་པ་ན། །ཆོས་ཀྱི་སྐུ་དང་ལོངས་སྤྱོད་སྐུ། །མེ་ལོང་ཐམས་ཅད་མཁྱེན་པ་ཉིད། །མཚན་ཉིད་དབུ་མའི་བྱེ་བྲག་གིས། །རང་བཞིན་སྒྱུ་མར་སྣང་བ་ཡི། །ཚོགས་བསགས་སྨོན་ལམ་གདབ་པ་ཡིས། །མི་ཐོགས་འགྲོ་དོན་བྱེད་པར་སྣང་། །རང་བཞིན་སྟོང་པའི་ཡེ་ཤེས་ཡིན། །དེ་ཡང་འདུས་པའི་སྙིང་པོ་ཉོན། །ཀུན་གཞི་ཡོངས་སུ་གནས་འགྱུར་བས། །མེ་ལོང་ཡེ་ཤེས་གྱུར་པའི་ཚེ། །དེ་ཉིད་ངང་གིས་ཀུན་འགྱུར་ཏེ། །སྐུ་ལྔ་ཡེ་ཤེས་ལྔ་རྫོགས་ནས། །རིགས་ལྔ་ཡབ་ཡུམ་སེམས་དཔར་བཅས། །ཞིང་ཁམས་གཞལ་ཡས་ཡོངས་རྫོགས་པ། །ཀུན་གཞི་ལོག་པའི་འབྲས་བུ་ཡིན། །ཡང་ནི་འཁོར་རྣམས་ཡིད་ཀྱིས་ཟུང་། །ཆོས་རྣམས་ཡེ་ནས་སངས་རྒྱས་པས། །ད་གཟོད་རྩོལ་ཞིང་བསྒྲུབ་པ་དང་། །གནས་འགྱུར་བཟང་ངན་ཡོངས་མེད་དེ། །ཆོས་སྐུ་བདེ་ཆེན་རྟོགས་པ་ལས། །མ་གཡོས་གནས་པས་སྒྲིབ་པའི་ཚོགས། །མ་སྦྱངས་རང་བཞིན་རྣམ་དག་ནས། །ཇི་ལྟར་གནས་པ་མངོན་གྱུར་ཏོ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཀུན་གཞི་ལྡོག་པའི་འབྲས་བུ་བསྟན་པའི་ལེའུ་སྟེ་ང་བཞི་པའོ།། །།ཀུན་རིག་རྒྱལ་པོས་བཀའ་སྩལ་པ། །ཡེ་ཤེས་འབྲས་བུ་མཐར་ཕྱིན་པས། །ཆོས་དང་ལོངས་སྐུའི་བདག་ཉིད་ལས། ། ― DNG001_Page_0673 ―
[མ་དཔེ་གཟིགས་ན་འདིར་གནོན།]
སྤྲུལ་སྐུ་ཇི་ལྟར་འཐད་བསྟན་ཏེ། །སོ་སོའི་གཞུང་དང་མཐུན་པ་རུ། །འགྲོ་དོན་མ་ལུས་རྫོགས་པར་མཛད། །སླར་ཡང་ཆོས་སྐུར་མྱ་ངན་འདས། །ལོག་པའི་འབྲས་བུ་མཐར་ཕྱིན་པས། །དེ་དག་རེ་ཞིག་བསྟན་པར་ཟད། །རིམ་པ་བརྒྱད་ནི་དྲང་བའི་དོན། །འགྲོ་དོན་རྒྱས་ཞེས་གསུངས་མོད་ཀྱང་། །སྐུ་དང་ཡེ་ཤེས་ཡོངས་མེད་པས། །དེ་ལ་མཐར་ཐུག་འབྲས་བུ་མེད། །ཐེག་པ་བརྒྱད་ཀྱིས་སངས་མི་རྒྱ། །དེ་ཡང་འདུས་པའི་སྙིང་པོ་ཉོན། །རིམ་པ་བརྒྱད་ཀྱིས་བསྒྲུབ་པའི་ལམ། །བྱ་བྱེད་འབད་རྩོལ་མཚན་མ་སྟེ། །མཚན་མ་སངས་རྒྱས་གེགས་ཡིན་པས། །རིམ་པ་བརྒྱད་ཀྱི་གོལ་ས་ཡིན། །དེ་ཡང་རྡོ་རྗེ་སེམས་དཔའ་ཉོན། །ཡེ་ནས་སངས་རྒྱས་ཨ་ཏི་ལ། །སངས་རྒྱས་ཉིད་ལས་གཞན་མེད་ཅིང་། །ཀུན་གཞི་རྒྱུ་འབྲས་གཏིང་ནས་མེད། །ཇི་ལྟར་གནས་པའི་དོན་ཉིད་ལས། །མཐར་ཕྱིན་འབྲས་བུ་བརྗོད་ལས་འདས། །ལོག་ལྟ་བྲལ་བ་ཇི་བཞིན་པ། །བློ་ལ་མངོན་སྣང་མཐར་ཕྱིན་པའོ། །སངས་རྒྱས་མྱང་འདས་འབྲས་བུ་རྫོགས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཡེ་ཤེས་མཐར་ཕྱིན་པའི་འབྲས་བུ་བསྟན་པའི་ལེའུ་སྟེ་ང་ལྔ་པའོ།། །།དེ་ནས་འདུས་པའི་འཁོར་རྣམས་ལ། །སངས་རྒྱས་དབྱེ་བ་བཀའ་སྩལ་པ། །དང་པོ་རྒྱུ་ཡི་སངས་རྒྱས་ནི། །རང་བྱུང་ངོ་བོ་ཉིད་ཀྱི་སྐུ། །སེམས་ནི་ཀུན་གཞིའི་མུན་གསེབ་ན། །རང་བྱུང་མ་རིག་བསྒྲིབས་ཏེ་གནས། །དེ་ཡི་གཏན་ཚིགས་ངེས་པ་ནི། །རྟག་ཆད་བྲལ་དང་ངོ་མ་ཤེས། །རང་བྱུང་ངོ་བོ་རྒྱུན་དུ་གནས། །འཁོར་འདས་གཉིས་ཀ་སེམས་ལ་རྫོགས། །དེ་ཡི་དེ་ཉིད་མཚོན་པའི་དཔེ། །ཏིལ་ལ་མར་གྱིས་ཁྱབ་པ་དང་། །ནམ་མཁའ་ཨ་དང་རྡོ་རྗེ་ཡིས། །ཕྱོགས་འགའ་འདྲ་བའི་དཔེ་ཡིས་མཚོན། །འབྲས་བུ་རང་ལ་ཡོད་པའི་ཕྱིར། །རྒྱུ་རྐྱེན་གཞན་ལ་རག་མ་ལུས། །དེ་ཕྱིར་རང་བྱུང་ཀུན་ཁྱབ་དེས། །གཞན་དོན་བྱས་ཕྱིར་བཙལ་མི་དགོས། ། ― DNG001_Page_0674 ―
[མ་དཔེ་གཟིགས་ན་འདིར་གནོན།]
དེ་ཡང་འདུས་པའི་སྙིང་པོ་ཉོན། །རྟོགས་པ་སྐད་ཅིག་སངས་རྒྱས་ནི། །ངོ་བོ་ཀུན་གཞིའི་གཞི་ཆ་ལ། །ལུང་ལྡན་བླ་མས་དོན་བསྟན་པས། །མ་རིག་སངས་པས་རིག་པ་རྒྱས། །དེ་ཡང་ཡིད་ཆེས་གཏན་ཚིགས་ནི། །འཁོར་འདས་འབྱུང་བ་གློ་བུར་ཏེ། །གཞི་ལ་མེད་པར་རང་ཡིད་ཆེས། །དེ་ཕྱིར་རྩོལ་བའི་ནད་དང་བྲལ། །དེ་ཡིས་དེ་ཉིད་མཚོན་པ་ནི། །མུན་ཁུང་སྒྲོན་མེ་བཏེགས་པ་དང་། །ནམ་ལངས་ཉི་མ་ཤར་བ་དང་། །ལོང་བས་རིན་ཆེན་རྙེད་པ་འདྲ། །དེ་ཡི་འབྲས་བུ་ངེས་པ་ནི། །བག་ཆགས་ཉོན་མོངས་ཟིལ་གྱིས་གནོན། །ཡུལ་མེད་རང་རིག་ཆོས་སྐུར་བསྟན། །དེ་ཡང་ཡིད་ཆེས་འབྲས་བུ་མཆོག །དེ་ཡང་རྡོ་རྗེ་སེམས་དཔའ་ཉོན། །ལམ་ལ་གནས་པའི་སངས་རྒྱས་དེ། །ངོ་བོ་ལྟ་བའི་གཞིར་ངེས་ཕྱིར། །རྒྱུན་དུ་འབྲལ་མེད་ལྷག་མཐོང་གསལ། །ཡེ་ཤེས་ངོས་ཟིན་ཡེངས་པ་མེད། །དེ་ཕྱིར་ལམ་ཆེན་ཆོས་སྐུའི་ཀློང་། །དེ་ཡི་ཡིད་ཆེས་གཏན་ཚིགས་ནི། །ཉོན་མོངས་མི་འབྱུང་བག་ཆགས་བྲལ། །སྤོང་སྡུད་ཞེན་པའི་རྟོག་པ་སངས། །མ་རིག་སྒྲིབ་མེད་ཡེ་ཤེས་རྒྱས། །དེ་ཡི་དོན་ཉིད་མཚོན་པའི་དཔེ། །མར་མེ་རླུང་གིས་མ་བསྐྱོད་དང་། །སྤྲིན་མེད་ཉི་མ་རང་གསལ་ལྟར། །མི་གཡོ་རྒྱ་མཚོ་དྭངས་པ་འདྲ། །འབྲས་བུའི་ཡེ་ཤེས་དེ་ཉིད་ཡིན། །ལྟ་བ་གདེང་ལྡན་ཡིད་ཆེས་པས། །རང་རིག་ཡེ་ཤེས་ཉམས་ཤར་ཏེ། །འཁོར་བར་ལྷུང་མེད་འབྲས་བུ་མཆོག །དེ་ཡང་འདུས་པའི་སྙིང་པོ་ཉོན། །འབྲས་བུ་མངོན་གྱུར་སངས་རྒྱས་ནི། །རང་གི་ངོ་བོ་ཆོས་ཀྱི་སྐུ། །ཡེ་ཤེས་ཐུགས་ཀྱིས་ཐམས་ཅད་མཁྱེན། །ངེས་པའི་དོན་ལ་འཕོ་འགྱུར་མེད། །ཡིད་ཆེས་ངེས་པའི་གཏན་ཚིགས་ནི། །ལུས་དང་བྲལ་བའི་བར་དོ་ལ། །མ་རིག་སྒྲིབ་པ་ཐམས་ཅད་སངས། །རང་བྱུང་རིག་པའི་ཡེ་ཤེས་རྒྱས། །དེ་ཡི་མཐུན་དཔེ་མཚོན་དཔེ་ནི། །ཡིད་བཞིན་ནོར་བུ་རིན་པོ་ཆེ། །དགོས་འདོད་ཐམས་ཅད་འབྱུང་བ་དང་། །ཅི་བསམ་འགྲུབ་པའི་དཔེ་ ― DNG001_Page_0675 ―
[མ་དཔེ་གཟིགས་ན་འདིར་གནོན།]
དང་འདྲ། །དེ་ཡི་འབྲས་བུ་ངེས་པ་ནི། །རང་རིག་ཆོས་སྐུ་ཡེ་ཤེས་ལ། །གཟུགས་སྐུ་རྣམ་གཉིས་དུས་གཅིག་འབྱུང་། །འགྲོ་དོན་མཛད་ཀྱང་སྐྱོན་མི་གོས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་ཀྱི་དབྱེ་བ་བསྟན་པའི་ལེའུ་སྟེ་ང་དྲུག་པའོ།། །།ཀུན་རིག་སྟོན་པས་ཡང་གསུངས་པ། །རྣལ་འབྱོར་རྟོགས་པའི་གདེང་ལྡན་པས། །ཚེ་ཡི་ཐ་མ་འཆི་ཀའི་དུས། །ས་ཆུ་མེ་རླུང་རིམ་ཐིམ་སྟེ། །དབུགས་ནི་ཐུམ་ཐུམ་བྱེད་པའི་ཚེ། །ཚེ་འདིའི་སྣང་བ་ནུབ་ཁ་རུ། །ཕྱི་མའི་སྣང་བ་འཆར་ཁ་རུ། །རྣམ་ཤེས་སྣང་བ་སྐྱེས་པའི་ཚེ། །དུ་བ་སྨིག་རྒྱུ་ལྟ་བུར་མཐོང་། །འབྱུང་བ་དངོས་མེད་ཞིག་པ་སྙམས། །དེ་ཚེ་སྣང་བ་འདི་ནུབ་ནས། །རང་སྣང་མཆེད་པ་སྲིན་བུའི་མེ། །བག་ཙམ་གསལ་བའི་དོན་མཐོང་སྟེ། །སྣང་བ་ཐོབ་པའི་དུས་སུ་ནི། །མར་མེའི་རྩེ་ལྟར་བརྟག་པར་དཀའ། །དེ་ནས་ཡེ་ཤེས་བརྟན་པའི་དུས། །ནམ་ལངས་ཉི་མ་ཤར་བ་བཞིན། །རང་རིག་ཆོས་སྐུ་ཝལ་གྱིས་གསལ། །ཡུལ་མེད་རིག་པ་རང་བྱུང་ཐུགས། །ས་ཟིན་ངེས་པའི་རང་བྱུང་དེ། །སྔར་གོམས་དབང་གིས་འགྱུར་བ་མེད། །དཔེར་ན་ཁབ་ལེན་ལྕགས་བཞིན་དུ། །རང་རིག་ཆོས་སྐུ་ངོས་ཟིན་པས། །མངོན་ཤེས་དྲུག་ལྡན་རྗེས་དྲན་དྲུག །བར་དོ་ཡོན་ཏན་ལྔ་ལྡན་པས། །མ་རིག་སངས་ནས་ཡེ་ཤེས་རྒྱས། །སངས་རྒྱས་ཡོན་ཏན་ཐམས་ཅད་སྡུད། །དེ་ཡང་རྡོ་རྗེ་སེམས་དཔའ་ཉོན། །རང་བྱུང་རང་རིག་ཡེ་ཤེས་ནི། །སང་ངེ་སལ་ལེ་ཡེ་ཤེས་གསལ། །དེ་ཕྱིར་རང་བྱུང་ཡེ་ཤེས་སྐུ། །ཕྱིས་ནི་བར་དོར་ལུས་མི་ལེན། །ཡུལ་ལ་མི་འཇུག་ཆགས་སྡང་མེད། །དེ་ཕྱིར་མངལ་དུ་འཇུག་པ་མེད། །སངས་རྒྱས་ཞེས་ནི་དེ་ལ་བྱ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་པའི་དུས་བསྟན་པའི་ལེའུ་སྟེ་ང་བདུན་པའོ།། །།འཁོར་ལ་སྟོན་པས་ཡང་གསུངས་པ། །སངས་རྒྱས་ཆོས་སྐུའི་མཛད་སྤྱོད་ཀྱང་། །ཡེ་ཤེས་ལུས་ཅན་ཆོས་སྐུ་ནི། ། ― DNG001_Page_0676 ―
[མ་དཔེ་གཟིགས་ན་འདིར་གནོན།]
རྣམ་དག་རང་བྱུང་ཡེ་ཤེས་ཐུགས། །ཐམས་ཅད་མཁྱེན་པའི་རིག་པ་གསལ། །སངས་རྒྱས་ཀུན་གྱི་ཐུགས་སུ་བཤད། །རང་བྱུང་མིག་གིས་ཐམས་ཅད་གཟིགས། །ཡེ་ཤེས་སྤྱན་གཅིག་དྲི་མ་མེད། །མཐོང་ལ་མི་རྟོག་མཉམ་ཉིད་ཕྱིར། །ཆོས་ཀྱི་སྐུ་ཡི་སྤྱན་ཞེས་བྱ། །དེ་ཡང་རྡོ་རྗེ་སེམས་དཔའ་ཉོན། །མཉམ་ཉིད་མི་གཡོ་རང་བྱུང་སྙན། །དངོས་མེད་སྒྲ་ཐོས་རྗེས་འབྲང་མེད། །དེ་དུས་ཆོས་ཉིད་རང་བྱུང་སྐུ། །དེ་ལས་འགྱུར་མེད་ཡེ་ཤེས་སྙན། །གདངས་གསལ་འགྱུར་མེད་ཉམས་ཀྱི་དྲི། །རྟོག་མེད་ཚོར་བ་བྱང་ཆུབ་སྐུ། །ཡེ་ཤེས་སྣ་ལ་དྲི་མཆོག་ཐིམ། །དེ་ལ་ཞེན་མེད་སངས་རྒྱས་ཤངས། །དེ་ཡང་འདུས་པའི་སྙིང་པོ་ཉོན། །ཆོས་སྐུ་རོ་མཆོག་ཉམས་སུ་བསྟར། །སྨྲ་མེད་བདེ་གསལ་སངས་རྒྱས་ལྗགས། །ཡེ་ཤེས་ལྗགས་ཀྱིས་རང་རིག་མྱང་། །དེ་དོན་དགོངས་པ་རང་བྱུང་སྐུ། །དེ་ཡང་རྡོ་རྗེ་སེམས་དཔའ་ཉོན། །དངོས་མེད་རིག་གསལ་ཡེ་ཤེས་ལུས། །ཡེ་ཤེས་སྐུ་ལ་སྐྱེ་འཆི་མེད། །དེ་དོན་མི་འགྱུར་ཡོན་ཏན་རྫོགས། །དེ་ཕྱིར་སངས་རྒྱས་ཆོས་ཀྱི་སྐུ། །དེ་ལྡན་སྐད་ཅིག་དུས་དེ་རུ། །གཟའ་སྐར་གཟུགས་བརྙན་རྒྱ་མཚོ་བཞིན། །དུས་གཅིག་འཛམ་གླིང་ཕྲག་བརྒྱ་རུ། །འགྲོ་དོན་གཟུགས་སྐུ་དུས་གཅིག་ཁྱབ། །ཅི་རིགས་པ་ཡི་ཆོས་རྣམས་སྟོན། །དཔེ་ནི་ནམ་མཁའི་དཀྱིལ་དང་འདྲ། །རྟགས་ནི་སངས་རྒྱས་ཆོས་ཀུན་མཁྱེན། །དེ་ཡི་ཡོན་ཏན་བརྗོད་མི་ལངས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་ཀྱི་མཛད་སྤྱོད་བསྟན་པའི་ལེའུ་སྟེ་ང་བརྒྱད་པའོ།། །།དེ་ནས་ཀུན་རིག་རྒྱལ་པོ་ལ། །འདུས་པའི་འཁོར་གྱིས་ཡང་ཞུས་པ། །མ་རྟོགས་འཁོར་བར་ཇི་ལྟར་འཁྱམས། །གདམས་ངག་མེད་པའི་སྐྱོན་ནི་གང་། །དེ་ཡི་ལྟུང་སྒོ་གང་དུ་ལྟུང་། །ཀུན་བཟང་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རྒྱུད་ལུང་མན་ ― DNG001_Page_0677 ―
[མ་དཔེ་གཟིགས་ན་འདིར་གནོན།]
ངག་ཆོས་རྣམས་ཀུན། །སྣང་བ་བཞི་རུ་བློས་བྱས་པས། །སྒྲོ་སྐུར་གཉིས་ལ་ཞེན་པའི་ཕྱིར། །བྱས་པ་དོན་མེད་སྡུག་བསྔལ་སྣོན། །དེ་ཡང་འདུས་པའི་སྙིང་པོ་ཉོན། །དཔེར་ན་བྱ་སྒྲོ་རླུང་ཁྱེར་ལྟར། །ངེས་མེད་གཞི་ལ་བློ་གཏད་ནས། །མ་རྟོགས་རྩོལ་སྒྲུབ་ཅི་སྤྱད་ཀྱང་། །མི་རྟོགས་དུག་ལྔ་རྒྱས་པར་འགྱུར། །དམུས་ལོང་བྱང་ཐང་འཁོར་བ་བཞིན། །ངེས་དོན་མ་རྟོགས་ཅི་བསྒོམས་ཀྱང་། །ཤེས་རབ་མིག་མེད་བག་ཆགས་བརྟས། །གོལ་ས་མ་ཆོད་འཁྲུལ་པའི་ལས། །དེ་ཡང་རྡོ་རྗེ་སེམས་དཔའ་ཉོན། །དཔེར་ན་བྱ་རྒོད་གཤོག་ཆག་ལྟར། །བལྟ་སྤྱོད་གཅིག་ཏུ་མ་ཤེས་པར། །རེས་འཇོག་བླང་དོར་བྱས་ཕྱིར་ནོར། །མ་རྟོགས་ཆོས་སྤྱོད་ལས་རྣམས་འཁྲུལ། །ས་བོན་མ་བཏབ་སོ་ནམ་བཞིན། །ངེས་དོན་མ་རྟོགས་ཆོས་སྤྱད་ཀྱང་། །འབྲས་བུ་མེད་ཅིང་རང་བརླག་ནས། །མཐའ་མེད་འཁོར་བའི་རྒྱ་མཚོར་ལྟུང་། །དེ་ཕྱིར་གདམས་ངག་མེད་པའི་ཆོས། །ལུས་ངག་ལས་སུ་སྦྱང་གྱུར་ཀྱང་། །སྡུག་བསྔལ་རྒྱུ་ལས་ཕན་མི་ནུས། །མ་རྟོགས་ཆོས་ཀུན་དེ་བཞིན་ནོ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མ་རྟོགས་པའི་སྐྱོན་བསྟན་པའི་ལེའུ་སྟེ་ང་དགུ་པའོ།། །།ཀུན་རིག་སྟོན་པས་ཡང་གསུངས་པ། །འཁོར་འདས་གཉིས་ཀྱི་བར་དོའི་རྒྱུན། །ཐོག་མཐའ་གཅོད་ནི་མ་ཤེས་ན། །ས་མཁན་མེད་པའི་ཚོང་པ་བཞིན། །སྐྱེ་འཆིའི་སྡུག་བསྔལ་ལས་མི་ཐར། །སྐྱེ་ཤི་གཉིས་ཀྱི་བར་དོར་ནི། །ཆོས་སྐུ་ངོ་སྤྲོད་མ་ཤེས་ན། །སྒྲོན་མེ་མེད་པའི་མུན་ཁུང་ལྟར། །མ་རིག་མུན་པ་སངས་དུས་མེད། །དེ་ཡང་རྡོ་རྗེ་སེམས་དཔའ་ཉོན། །མཉམ་བཞག་རྗེས་ཐོབ་བར་དོར་ནི། །རྒྱུན་དུ་འབྲལ་མེད་མ་ཤེས་ན། །ཆུ་བྲན་ཐན་པས་བསྐམས་པ་བཞིན། །ལྟ་སྒོམ་གཉིས་ཀྱིས་རྐྱེན་མི་ཐུབ། །ཡུལ་སེམས་གཉིས་ཀྱི་བར་དོར་ནི། །ཕྱི་ཡི་གོལ་ས་མ་ཆོད་ན། །བུ་ལོན་འདྲེལ་ཐག་མ་ཆོད་ལྟར། །རང་སེམས་ཆོས་སྐུར་རྟོགས་མི་ ― DNG001_Page_0678 ―
[མ་དཔེ་གཟིགས་ན་འདིར་གནོན།]
སྲིད། །སྲིད་པ་དག་གི་བར་དོར་ནི། །སངས་རྒྱས་ཀུན་གྱི་དོན་མེད་ན། །རིན་ཆེན་འདམ་དུ་སྟོར་བ་བཞིན། །འབྲས་བུ་མི་འབྱུང་མངལ་དུ་འཇུག །དེ་ཡང་འདུས་པའི་སྙིང་པོ་ཉོན། །ཐེག་པ་གཞན་དང་རྩོད་དུས་སུ། །གལ་མདོ་ངེས་པའི་དོན་མེད་ན། །གོ་མཚོན་མེད་པའི་དཔའ་བོ་བཞིན། །མན་ངག་ཟབ་མོའི་ཁྱད་མི་ཐོན། །དེ་ཡང་འདུས་པའི་སྙིང་པོ་ཉོན། །དེ་ཕྱིར་གོལ་ས་དེ་དག་ཀྱང་། །རང་སེམས་སྙིང་པོ་མ་རྟོགས་ཕྱིར། །ལུང་ལྡན་བཀའ་མེད་འཁོར་བའི་སྐྱོན། །བསྐལ་པར་བགྲངས་ཀྱང་བདེ་མི་ཐོབ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། གདམས་ངག་མེད་པའི་ཉེས་པ་བསྟན་པའི་ལེའུ་སྟེ་དྲུག་ཅུ་པའོ།། །།དེ་ནས་ཀུན་རིག་རྒྱལ་པོ་ཡིས། །དད་ལྡན་འཁོར་ལ་བཀའ་སྩལ་པ། །མ་རྟོགས་དབྱིག་གུའི་ཐུན་ཚོད་ཀྱིས། །མདོ་སྡེ་ཁ་ཏོན་གདོན་འགྱུར་ཀྱང་། །བདག་བསྟོད་གཞན་ལ་སྨོད་པའི་ཕྱིར། །ངན་སོང་སྒོར་ནི་ངེས་པར་ལྟུང་། །གཞན་གྱི་བསམ་སྦྱོར་བཟང་པོ་ལ། །བར་ཆོད་བྱེད་པ་བདུད་ཡིན་ཏེ། །མ་རྟོགས་སེར་སྣ་བྱེད་པ་ནི། །བདུད་ཀྱི་སྒོར་ལྟུང་འཁོར་བར་འཁྱམས། །གཞན་གྱི་འཁོར་ལ་ཕྲག་དོག་པས། །ཡོན་ཏན་མང་པོ་ཤེས་གྱུར་ཀྱང་། །རང་སེམས་སྙིང་པོ་མ་རྟོགས་ན། །གནོད་སྦྱིན་སྒོར་ལྟུང་རྟག་ཏུ་འཁོར། །མཉམ་ཉིད་མ་རྟོགས་རང་རྒྱུད་དུ། །ཆགས་སྡང་ཕོ་ཚོད་སྤྱོད་པའི་ལས། །དུག་ལྔ་རང་གར་སྤྱད་ཉེས་པས། །སྲིན་པོའི་སྒོར་ལྟུང་རྟག་ཏུ་འཁོར། །རང་དབང་ཏིང་འཛིན་མ་ཐོབ་པར། །འཁོར་དང་རིས་སུ་བཅད་བསམས་པས། །བདག་ཉིད་ཆེ་འདོད་འཁོར་སྡུད་པ། །ཤོ་གམ་ཅན་ཆེན་དག་ཏུ་ལྟུང་། །དེ་ཡང་རྡོ་རྗེ་སེམས་དཔའ་ཉོན། །ཇི་བཞིན་མ་ནོར་མ་རྟོགས་པར། །ལྟ་ལོག་གཞན་གྱི་སློབ་དཔོན་བྱེད། །རང་གིས་མི་ཤེས་གཞན་སྒྲོལ་བ། །རཱུ་ཏྲའི་སྐོར་ལྟུང་རྟག་ཏུ་འཁོར། །ཚིག་ཚོགས་ཕྲིན་ལས་ཅི་མཁས་ཀྱང་། །མ་རྟོགས་དངོས་པོར་འཛིན་པ་ཡིས། ། ― DNG001_Page_0679 ―
[མ་དཔེ་གཟིགས་ན་འདིར་གནོན།]
རང་རྒྱུད་དམ་རྫས་མངོན་ཞེན་ཕྱིར། །བགེགས་དང་བྱ་རོག་སྒོར་ལྟུང་འཁོར། །ཐབས་ལམ་དབང་ལ་ཁུངས་ཕྱུང་སྟེ། །འདོད་ཆགས་རང་དགར་རྟག་སྤྱད་པས། །ལྟ་བས་མ་ཟིན་བདེ་ལ་ཞེན། །ལྷ་ཆེན་སྒོར་ལྟུང་འཁོར་བར་འཁྱམས། །མ་རྟོགས་ང་དང་བདག་འཛིན་པས། །གསང་སྔགས་ལྟ་སྤྱོད་ཡིན་ཟེར་ནས། །སེམས་ཅན་ཀུན་ལ་བརྩེ་མེད་གསོད། །མུ་སྟེགས་རྟག་ཆད་སྒོར་ལྟུང་འཁོར། །དེ་ཡང་འདུས་པའི་སྙིང་པོ་ཉོན། །མ་རྟོགས་དབང་གིས་ཅི་སྤྱོད་པ། །ལུས་ངག་འདི་ཡིས་ལན་པའི་ཕྱིར། །ལས་ངན་དགུ་པོ་གང་སྤྱད་ཀྱང་། །དམྱལ་བར་ངེས་འགྲོ་གཏན་དུ་འཁྱམས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། མ་རྟོགས་པ་ལྟུང་བའི་སྒོ་བསྟན་པའི་ལེའུ་སྟེ་རེ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །དད་ལྡན་འཁོར་ལ་ཕན་དོན་དུ། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ཀུན་བཟང་རང་སེམས་ཇི་ལྟར་རྟོགས། །དོན་གྱི་ངེས་དོན་ཇི་ལྟར་བསྡུ། །སྔ་ཕྱི་ལོག་གནོན་གང་གིས་བྱ། །རང་སེམས་གསལ་བ་ཇི་ལྟར་ཡིན། །དེ་སྐད་ཞུས་པའི་དོན་གསན་ནས། །ཀུན་རིག་རྒྱལ་པོས་བཀའ་སྩལ་པ། །ང་ཡིས་རྟོགས་པའི་དོན་བཤད་ཀྱིས། །གཞན་དུ་མ་ཡེངས་སེམས་ལ་ཟུངས། །དེ་སྐད་ཅེས་ནི་གསུངས་པ་དང་། །འཁོར་ཀུན་དད་པས་ཡིད་དགའ་ནས། །རྩེ་གཅིག་ངེས་པར་དོན་ལ་ཞུགས། །དེ་ཚེ་སྟོན་པས་བཀའ་སྩལ་པ། །འཁོར་འདས་འབྱུང་བས་མ་བསླད་ཚེ། །རང་བྱུང་ངོ་བོ་ཉིད་ཀྱི་སྐུ། །འཁྲུལ་དང་རྟོགས་པ་མེད་པའི་དུས། །མཚོན་ཚིག་སྤྱོད་པའི་ཡུལ་མེད་པས། །གང་ཞིག་འཛིན་བློ་མ་ཞུགས་ཕྱིར། །དེ་ཉིད་དོན་དུ་རང་རིག་སྟེ། །སྒྲོ་སྐུར་མ་བཏགས་རང་གསལ་བ། །དེ་ལས་མི་འགྱུར་ཆོས་སྐུར་ཤེས། །སྔར་མ་འཁྲུལ་པས་བསྟན་མི་དགོས། །མ་བསྟན་རིག་པ་རང་ལ་ཤར། །དེ་ཉིད་དུས་ན་མ་རིག་སངས། །བག་ཆགས་མེད་ཕྱིར་ཡེ་ཤེས་རྒྱས། །རང་གིས་རང་རིག་ ― DNG001_Page_0680 ―
[མ་དཔེ་གཟིགས་ན་འདིར་གནོན།]
ཡེ་ཤེས་སྐུ། །དེ་ལས་མ་གཡོས་ལྷུན་གྱིས་གྲུབ། །དེ་ཕྱིར་རང་བྱུང་རྒྱུ་རྐྱེན་མེད། །དེ་ལས་ཡིད་ཆེས་གདེང་ལྡན་པས། །རྐྱེན་བཞི་བསྐྱེད་པས་མ་རིག་བྲལ། །དེ་ཕྱིར་འཁོར་བར་ལྷུང་མ་མྱོང་། །དེ་ཡང་རྡོ་རྗེ་སེམས་དཔའ་ཉོན། །སེམས་མེད་རང་རིག་ཆོས་སྐུར་ཤེས། །ཆེ་བའི་ཡོན་ཏན་བསྒྲུབ་མི་དགོས། །རང་དོན་བདེ་སྐྱིད་སངས་རྒྱས་མེད། །དེ་ཕྱིར་མྱ་ངན་འདས་མ་མྱོང་། །ཀུན་བརྟགས་མེད་ཕྱིར་སྒྲིབ་པ་མེད། །དེ་དོན་རང་བྱུང་སྙིང་པོ་ལ། །སྤང་ཐོབ་མེད་པས་རེ་དོགས་བྲལ། །གང་གི་སྐྱོན་གྱིས་མ་གོས་ལ། །མ་བསྒྲུབས་ཡོན་ཏན་མཐའ་དག་རྫོགས། །ཀུན་ཏུ་བཟང་པོ་རང་ལ་བལྟ། །རྒྱུ་རྐྱེན་སྙིང་པོ་མེད་པའི་ཕྱིར། །དམིགས་མེད་ཆོས་ཀྱི་སྐུ་ཞེས་བྱ། །དེ་ཡང་རྡོ་རྗེ་སེམས་དཔའ་ཉོན། །སངས་རྒྱས་སེམས་ཅན་གཞི་ལ་མེད། །སེམས་མེད་རང་བྱུང་ཀུན་བཟང་ལ། །སློབ་དཔོན་མེད་ཕྱིར་རང་བྱུང་སྐུ། །ཐོས་བསམ་མ་བྱས་རང་རིག་རྟོགས། །མ་རིག་མེད་ཕྱིར་སེམས་དང་བྲལ། །ངོ་མཚར་རིག་པ་རྒྱལ་བའི་གསུང་། །སེམས་མེད་རྣམ་པ་ཐམས་ཅད་མཁྱེན། །འབྱུང་བཞི་མེད་ཕྱིར་འདུས་མ་བྱས། །དེ་ཕྱིར་གཟུགས་མེད་ཡེ་ཤེས་སྐུ། །འཁོར་བ་མེད་པས་རྣམ་པར་དག །སངས་རྒྱས་ཀུན་གྱི་ངེས་པའི་དོན། །ཕྱི་རབས་ཀུན་གྱི་ལུང་དུ་ཆེ། །དེ་རྟོགས་ང་ཡི་བྱིན་རླབས་ལས། །དུས་གསུམ་སངས་རྒྱས་གསན་པར་མཛད། །མྱང་འདས་ཐོག་མ་མེད་ནས་བྱུང་། །འགྲོ་དོན་གཟུགས་སྐུ་རྣམ་གཉིས་སྟོན། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཀུན་ཏུ་བཟང་པོའི་རྟོགས་པ་བསྟན་པའི་ལེའུ་སྟེ་རེ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །འཁོར་བ་མྱ་ངན་འདས་པའི་ཆོས། །རང་རིག་ཆོས་སྐུ་མ་ཡིན་ཏེ། །ཡུལ་ལ་ཞེན་པའི་བློ་ཞུགས་པས། །དེ་ཕྱིར་དོན་གྱི་གནས་ལུགས་མིན། །དེ་ཡང་རྡོ་རྗེ་སེམས་དཔའ་ཉོན། ། ― DNG001_Page_0681 ―
[མ་དཔེ་གཟིགས་ན་འདིར་གནོན།]
མ་རིག་རྒྱུ་རྐྱེན་ལས་བསྐྱེད་པའི། །རང་རྟོག་འཁྲུལ་པའི་བག་ཆགས་བརྟས། །དེ་ལས་སྡུག་བསྔལ་སྣ་ཚོགས་བྱུང་། །ཆུ་བོ་བཞི་ལས་ཐར་བ་མེད། །དེ་ཡང་འདུས་པའི་འཁོར་རྣམས་ཉོན། །མྱ་ངན་འདས་པའི་བདེ་བ་ཡང་། །རྒྱུ་རྐྱེན་ཚོགས་བསགས་ནུས་མཐུ་ཡིས། །གནས་སྐབས་བདེ་བའི་འབྲས་བུ་འབྱུང་། །དེ་ཕྱིར་མཐར་ཐུག་འབྲས་བུ་མིན། །དེ་ཡང་འཁོར་རྣམས་ཡང་ཉོན་ཅིག །འཁོར་འདས་མ་རིག་ཆོས་ཀྱི་སྐུ། །ཐ་མལ་ལུས་བཅས་ཤེས་པ་ཡིས། །གཞི་ཆ་ཡེ་ཤེས་ངོས་ཟིན་ནས། །རང་རིག་འགྱུར་མེད་ཡིད་ཆེས་པས། །དེ་ལྡན་སངས་རྒྱས་དགོངས་པ་ཡིན། །དེ་རྟོགས་བསྒོམ་དུ་རྡུལ་ཙམ་མེད། །དེ་ཉིད་རང་བྱུང་སྙིང་པོ་ཡིན། །དེ་ལྡན་རྣལ་འབྱོར་གང་ཡང་རུང་། །ལུས་ངག་ཡིད་ཀྱི་བྱ་བ་རྣམས། །ཅི་སྤྱོད་ཡེ་ཤེས་ཆེན་པོ་ཉིད། །གང་ཡང་འགལ་མེད་རིག་སྤྱོད་ཡིན། །དེ་ཕྱིར་རང་སེམས་རྟོགས་པ་ཡིན། །དེ་ཡང་རྡོ་རྗེ་སེམས་དཔའ་ཉོན། །རང་རིག་ཡེ་ཤེས་འགྱུར་མེད་དེ། །མ་བྱས་མ་བཅོས་གདོད་ནས་དག །དེ་ལ་གང་གནས་འཕོ་འགྱུར་མེད། །དེ་ཕྱིར་ངེས་པའི་གདེང་ལྡན་པས། །ཅི་བྱས་ཆོས་སྐུའི་སྙིང་པོ་ཉིད། །དེ་ལྡན་མི་ལུས་འདི་ཉིད་ལ། །སངས་རྒྱས་ཀུན་དང་དགོངས་པ་གཅིག །དེ་ཡང་རྡོ་རྗེ་སེམས་དཔའ་ཉོན། །ངེས་དོན་འདི་རྟོགས་རྣལ་འབྱོར་ལ། །འབྱུང་བཞི་མེད་པས་ཞེན་པ་ཆུང་། །སངས་རྒྱས་མེད་པས་མཆོད་མི་དགོས། །སེམས་ཅན་མེད་པས་སྙིང་རྗེ་བྲལ། །དེ་ཕྱིར་རེ་དོགས་མེད་པའི་དོན། །གང་ཡང་མེད་པས་བཙལ་དུ་མེད། །དེ་ཕྱིར་དོན་ལ་ཡེངས་པ་མེད། །མེད་པ་མ་ཡིན་སྙིང་པོ་འདི། །རྒྱུ་རྐྱེན་མེད་པའི་རིག་པ་ལ། །ཀུན་དང་མི་མཐུན་ཡེ་ནས་གསལ། །དེ་ལྡན་ཆོས་སྐུ་འགྱུར་བ་མེད། །དེ་ཡང་འདུས་པའི་སྙིང་པོ་ཉོན། །དེ་དོན་ངེས་ལྡན་རྣལ་འབྱོར་ལ། །དགེ་བ་མི་དགོས་སྒྲིབ་པ་མེད། །སྡིག་པ་མི་སྤྱོད་མ་རིག་མེད། །ཆོས་སྐུ་ངོ་ཤེས་རང་ ― DNG001_Page_0682 ―
[མ་དཔེ་གཟིགས་ན་འདིར་གནོན།]
བྱུང་དེ། །ལུང་མ་བསྟན་པའི་སྐྱོན་མི་གོས། །དེ་ཕྱིར་ཡོན་ཏན་ཀུན་ལྡན་པས། །སངས་རྒྱས་ཀུན་དང་ཡེ་ནས་མཉམ། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ངེས་དོན་སྙིང་པོ་བསྡུས་པ་བསྟན་པའི་ལེའུ་སྟེ་རེ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །སེམས་ཀྱི་ལོག་གནོན་བཀའ་སྩལ་པ། །ད་ལྟར་རིག་པ་འདི་ཉིད་ནི། །མ་བསྒྲིབས་ཡེ་གསལ་རང་བྱུང་དེ། །དུས་འདིར་དོན་གྱི་ཉམས་དང་ལྡན། །དེ་ཡང་འདུས་པའི་སྙིང་པོ་ཉོན། །འབྲས་བུ་ད་ལྟའི་ཤེས་པ་ལ། །མ་རིག་བྲལ་བའི་རྟོགས་པ་དེ། །རང་གསལ་ཡིད་ཆེས་ངེས་པའི་དོན། །དེ་ཉིད་སངས་རྒྱས་ཡེ་ཤེས་གདེངས། །དེ་ཡང་རྡོ་རྗེ་སེམས་དཔའ་ཉོན། །མཐོ་རིས་ངན་སོང་མེད་པས་བདེ། །བྱིང་རྒོད་མེད་ཕྱིར་བསྒོམ་མི་དགོས། །དེ་ལྡན་ཡང་དག་གོལ་ས་མེད། །དེ་ཕྱིར་འཁོར་འདས་ཀ་ནས་དག །ཆོས་སྐུའི་ངང་ལ་གནས་པའི་ཚེ། །སྔར་གོམས་བག་ཆགས་དྲན་གྱུར་ཀྱང་། །ཆོས་སྐུ་ཞེན་མེད་གོལ་ས་མེད། །དུག་ཏུ་ངོ་ཤེས་མི་ཟ་འདྲ། །དེ་ཡང་འདུས་པའི་སྙིང་པོ་ཉོན། །ཕྱིས་ཀྱི་ཉོན་མོངས་སྐྱེས་པའི་ཚེ། །ཏུར་བྱུང་ཉོན་མོངས་ཡིན་ཤེས་ན། །རང་བྱུང་ཆོས་སྐུ་ཤུགས་ལ་གསལ། །དེ་ཚེ་བླང་དོར་མེད་པར་ཞི། །མདོར་ན་སྔ་ཕྱི་གཞི་ཉིད་ལས། །གང་ཡང་མེད་པར་དོན་གོ་བས། །དེ་ཚེ་ཆོས་སྐུ་གསལ་འདེབས་ཕྱིར། །དྲན་པ་འགགས་མེད་རང་བྱུང་སྐུ། །དེ་ཡང་འདུས་པའི་སྙིང་པོ་ཉོན། །གདོད་ནས་རང་བྱུང་སྙིང་པོ་འདི། །འཁོར་འདས་མ་རེག་ཆོས་ཀྱི་སྐུ། །རང་གསལ་འགྱུར་མེད་ཡེ་ཤེས་ནི། །རིན་པོ་ཆེ་ཡི་འོད་དང་འདྲ། །དེ་ཕྱིར་རང་གསལ་འོད་པོ་ཆེ། །དེ་ལྡན་རང་བྱུང་རྣལ་འབྱོར་པས། །གང་ཡང་ཆོས་སྐུར་ཤེས་པའི་ཕྱིར། །ཅི་དྲན་སྐྱོན་མེད་ནམ་མཁའ་འདྲ། །དེ་ཕྱིར་བླ་མའི་དོན་འདི་གཅེས། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ངེས་དོན་ལོག་གནོན་དུ་བསྟན་ ― DNG001_Page_0683 ―
[མ་དཔེ་གཟིགས་ན་འདིར་གནོན།]
པའི་ལེའུ་སྟེ་རེ་བཞི་པའོ།། །།དེ་ནས་འཁོར་ལ་བཀའ་སྩལ་པ། །སེམས་ནི་འཁྲུལ་པ་ཡིན་པའི་ཕྱིར། །ཆོས་ཀུན་གོལ་སེམས་ཡིན་པས་ན། །ཡང་དག་ཉིད་ནི་སེམས་དང་བྲལ། །སེམས་མེད་རང་བྱུང་རིག་པའི་སྐུ། །དེ་ཡང་རྡོ་རྗེ་སེམས་དཔའ་ཉོན། །ཡང་དག་སངས་རྒྱས་ལམ་འདི་ལ། །ཚོགས་བརྒྱད་མེད་ཕྱིར་སེམས་དང་བྲལ། །སྣ་ཚོགས་ཡུལ་ལ་ཞེན་པའི་བར། །རང་གི་སེམས་ཞེས་དེ་ལ་བྱ། །གང་ཡང་རུང་བ་གཅིག་ལ་ཡང་། །ཡིད་དང་སྒོ་ལྔ་ཡུལ་དྲན་པས། །ངེས་དོན་མ་ཡིན་རང་གི་སེམས། །རིགས་དྲུག་བསྐྱེད་པའི་སེམས་ཡིན་ཕྱིར། །ཡང་དག་འཁྲུལ་པ་སེམས་ལས་བྱུང་། །དེ་ཕྱིར་སེམས་ནི་གོལ་བར་གསུངས། །དེ་ཡང་འདུས་པའི་སྙིང་པོ་ཉོན། །སེམས་ནི་འཁོར་བའི་གཞི་ཡིན་པས། །རང་བྱུང་ཆོས་སྐུ་འབྱུང་མི་སྲིད། །རང་སེམས་རྟོགས་ན་སེམས་མེད་ཕྱིར། །དུས་གསུམ་སངས་རྒྱས་ཀུན་བཟང་ལ། །ཀུན་གཞི་མེད་ཕྱིར་སེམས་དང་བྲལ། །དེ་ཕྱིར་སེམས་ཀྱིས་སངས་མི་རྒྱ། །སེམས་ནི་རྒྱུ་རྐྱེན་བསྐྱེད་པའི་ཕྱིར། །ངེས་དོན་མ་ཡིན་འཁྲུལ་པའི་བློས། །དེ་ཡང་འདུས་པའི་སྙིང་པོ་ཉོན། །ཐེག་བརྒྱད་སེམས་སུ་འདོད་པའི་ཕྱིར། །ངེས་དོན་ཨ་ཏིའི་གོལ་སར་བཤད། །དེ་ཕྱིར་འཁོར་བའི་ཆོས་ཡིན་ཏེ། །དཔེར་ན་དམུས་ལོང་ནོར་མི་མཐོང་། །དེ་ཕྱིར་ཡུལ་སེམས་དབྱེར་མེད་འདོད། །གང་ཡང་རུང་བ་གཅིག་ལ་ཡང་། །རང་སེམས་ཡིན་ཟེར་རྨོངས་པ་རྣམས། །འབྲས་བུ་ཆོས་ཉིད་དོན་དང་བྲལ། །དེ་ཕྱིར་སེམས་ལ་སངས་རྒྱས་མེད། །སེམས་རྟོགས་སེམས་མེད་ཆོས་སྐུར་ཤེས། །དེ་ཕྱིར་རང་སེམས་ཆོས་སྐུ་མིན། །དེ་ཡང་རྡོ་རྗེ་སེམས་དཔའ་ཉོན། །མ་རིག་རྨོངས་པའི་གང་ཟག་རྣམས། །ཆོས་སྐུ་རང་ཡང་སེམས་ཡིན་ཟེར། །དེ་ཕྱིར་ཚིག་ལས་དོན་མ་གོ། །མིང་ལས་ངེས་དོན་ཤེས་པ་དཀོན། །དེ་ཕྱིར་སེམས་ཀྱིས་སངས་མི་རྒྱ། །རྗེས་ལས་བཙལ་བས་གླང་པོ་རྙེད། །སེམས་ཀྱི་ཕྱོགས་ནས་དོན་བཙལ་ན། །རང་རིག་ ― DNG001_Page_0684 ―
[མ་དཔེ་གཟིགས་ན་འདིར་གནོན།]
རྒྱལ་པོ་ཡེ་ཤེས་རྙེད། །དེ་རྙེད་སེམས་སུ་འཛིན་པ་བྲལ། །འཛིན་བྲལ་སེམས་མེད་རང་བྱུང་སྐུ། །སེམས་ལས་མ་བྱུང་སངས་རྒྱས་རྙེད། །སེམས་ཀྱིས་རང་རིག་ཆོས་སྐུ་བསྒྲིབས། །དེ་ཕྱིར་མ་རིག་ཞེས་སུ་གདགས། །མ་རིག་མེད་པས་རང་སེམས་བརླག །སེམས་ནི་མ་རིག་རྒྱུ་ལས་བྱུང་། །ཀུན་བརྟགས་རྐྱེན་གྱིས་བསྐྱེད་པའི་ཕྱིར། །འབྲས་བུ་ཀུན་གཞི་འཁོར་བའི་སེམས། །དེ་ཕྱིར་སངས་རྒྱས་འབྱུང་མི་སྲིད། །དེ་ཡང་འདུས་པའི་སྙིང་པོ་ཉོན། །མུན་པ་འཐིབས་པས་སྣང་བ་བྲལ། །རང་གི་སེམས་ཀྱིས་མ་རིག་འཕེལ། །དེ་ཕྱིར་འཁོར་བའི་རྩ་བ་ནི། །རང་སེམས་འཁྲུལ་པའི་སེམས་འདི་ཡིན། །དེ་ཕྱིར་དུག་ལྔ་རྒྱས་པར་བྱེད། །འབྲས་བུ་ངན་སོང་རྣམས་སུ་སྨིན། །དེ་ཕྱིར་སེམས་ནི་སངས་རྒྱས་མིན། །སེམས་ལས་སངས་རྒྱས་འདོད་པ་ནི། །མོ་གཤམ་བུ་དང་གཉེན་བྱེད་འདྲ། །ར་གན་གསེར་ཡིན་ཟེར་བ་འདྲ། །དེ་ཡང་འདུས་པའི་སྙིང་པོ་ཉོན། །སེམས་ནི་གློ་བུར་སྐྱེ་འགག་ཅན། །རྐྱེན་དབང་འགྱུར་བས་དོན་མི་རྟོགས། །དེ་ཕྱིར་རང་སེམས་མ་རིག་པས། །ཚོགས་བསགས་སྒྲིབ་པ་སྦྱངས་གྱུར་ཀྱང་། །ཐར་པ་མི་ཐོབ་འཁོར་བར་ལྟུང་། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། སེམས་ལས་སངས་རྒྱས་མི་འབྱུང་བར་བསྟན་པའི་ལེའུ་སྟེ་རེ་ལྔ་པའོ།། །།དེ་ནས་སྟོན་པ་ཀུན་བཟང་གིས། །དེ་ན་འདུས་པའི་འཁོར་རྣམས་ལ། །རྒྱུད་ཀྱི་མཇུག་བསྡུ་ལ་བཟླ་འདི། །ངེས་པར་ཆེད་དུ་བཀའ་སྩལ་པ། །དུས་གསུམ་སངས་རྒྱས་ཁྱོད་ཀྱིས་ཀྱང་། །ང་ཡི་རྒྱུད་ཆེན་ངེས་དོན་འདིའི། །རྩ་བ་རང་བྱུང་ཡེ་ཤེས་དོན། །ཀུན་ལ་ཡོད་ཀྱང་རྟོགས་པར་དཀའ། །དེ་ཡང་རྡོ་རྗེ་སེམས་དཔའ་ཉོན། །དོན་གྱི་གནས་ལུགས་ངོ་བོ་ནི། །ད་ལྟའི་ཤེས་པ་སོ་མ་ལ། །ཅི་ཡང་མ་བསམས་མ་འགགས་པ། །དེ་ནི་དོན་གྱི་སྙིང་པོ་བསྡུ། །དེ་དོན་རྟོགས་ཐབས་ལུང་ལྡན་གྱིས། །ངེས་དོན་མ་ནོར་བསྟན་པས་གོ། །དེ་ཕྱིར་སངས་ ― DNG001_Page_0685 ―
[མ་དཔེ་གཟིགས་ན་འདིར་གནོན།]
རྒྱས་ཆོས་དང་ཕྲད། །རྟོགས་ཐབས་རྒྱལ་བའི་བཀའ་རུ་བསྡུ། །དེ་ཡང་འདུས་པའི་སྙིང་པོ་ཉོན། །ངེས་དོན་གདམས་ངག་མ་ནོར་བར། །བལྟ་བ་བསྒོམ་པ་སྤྱོད་པ་དང་། །འབྲས་བུ་ངེས་པའི་ཡོན་ཏན་སོགས། །རྟོགས་པས་ངེས་པར་ཆོག་པར་བསྡུ། །དེ་ཡང་འདུས་པའི་སྙིང་པོ་ཉོན། །ངེས་དོན་གདམས་ངག་མ་ནོར་བར། །གང་བྱུང་ཟིལ་གནོན་གདམས་ངག་བསྟན། །སངས་རྒྱས་དུས་ནི་བར་དོ་སྟེ། །དེ་ཚེ་རང་རིག་ཡེ་ཤེས་གྲོགས། །དེ་ཤེས་བདུད་མེད་དོན་ལྡན་བསྡུ། །དེ་ཡང་རྡོ་རྗེ་སེམས་དཔའ་ཉོན། །ཐེ་ཚོམ་ཟ་བ་བྱུང་ན་ཡང་། །རྩ་བ་གོལ་དང་ལྟུང་བཤགས་གཉིས། །གདེང་ཟིན་རེ་དོགས་ཕྲལ་བ་ནི། །གང་ཡང་ཐེ་ཚོམ་སེལ་བར་བསྡུ། །སངས་རྒྱས་དུས་ན་བར་དོ་མེད། །ངེས་པའི་གདམས་ངག་གདེང་ཟིན་ཕྱིར། །རྣམ་སྨིན་ལུས་དང་བྲལ་མ་ཐག །ཡེ་ཤེས་ལུས་ཅན་མངོན་སངས་རྒྱས། །སངས་རྒྱས་འབྲས་བུ་འབྱུང་བར་བསྡུ། །དེ་ཡང་འདུས་པའི་སྙིང་པོ་ཉོན། །དེ་ལྟར་མ་རྟོགས་ལྟུང་བའི་སྒོ། །མ་རྟོགས་དབང་གིས་ལས་ངན་སྤྱད། །སྒོ་དགུར་ལོག་པར་འཁྱམས་པ་ཡིས། །ལམ་ལོག་མ་རྟོགས་སྐྱོན་དུ་བསྡུ། །དང་པོ་རྟོགས་ཚུལ་མ་ཤེས་ན། །སེམས་ཀྱི་ལོག་གནོན་ཤེས་མི་སྲིད། །དེ་ཕྱིར་རང་སེམས་ཆོས་ཉིད་མིན། །སེམས་ནི་འཁོར་བ་ཡིན་པར་བསྡུ། །དེ་ཡང་རྡོ་རྗེ་སེམས་དཔའ་ཉོན། །དེ་དག་བསྡུ་བ་རྣམ་བརྒྱད་ཀྱང་། །རང་སེམས་སྙིང་པོ་རྟོགས་པའི་ཐབས། །དེ་ཕྱིར་ངེས་ལུང་རྩ་བར་བསྟན། །སངས་རྒྱས་ངེས་དོན་དེ་ལས་མེད། །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཆེད་དུ་ངེས་པར་བསྡུ་བའི་ལེའུ་སྟེ་རེ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་དོན་གཏད་པ། །ཡང་དག་གསང་བའི་རྒྱུད་ཆེན་འདི། །སངས་རྒྱས་ཀུན་གྱི་ཐུགས་ལ་སྦས། །རིག་འཛིན་རྣམས་ཀྱིས་བདག་ལ་གཏད། །དེ་ཕྱིར་ངེས་དོན་གསང་བ་འདི། །གང་ཞིག་རྒྱུད་ལ་འཆང་ནུས་ན། །མཆོག་གི་དངོས་གྲུབ་ཐོབ་ ― DNG001_Page_0686 ―
[མ་དཔེ་གཟིགས་ན་འདིར་གནོན།]
པར་ངེས། །དེ་ཕྱིར་རིན་ཆེན་གཏེར་རྙེད་འདྲ། །དེ་ཡང་འདུས་པའི་སྙིང་པོ་ཉོན། །རྒྱལ་བའི་གསང་ཆེན་བླ་མེད་འདི། །ཚིག་ཏུ་མི་འདོད་ཞེ་ལ་འཆང་། །དེ་བཅངས་ཡོན་ཏན་བསམ་མི་ཁྱབ། །ཀུན་རིག་རྒྱལ་པོས་ངེས་པའི་དོན། །ཐེག་པའི་རྒྱལ་པོ་ལྷུན་རྫོགས་འདི། །དད་ལྡན་འཁོར་མང་ཁྱེད་ཀྱིས་ཀྱང་། །རྒྱུད་འདི་ཡིད་ལ་བཅང་བར་གྱིས། །ཡང་དག་ངེས་དོན་རྒྱུད་ཆེན་འདི། །དད་མེད་སྨོད་པ་རྣམས་ལ་ནི། །འདི་སྤེལ་སློབ་དཔོན་བསྒྲལ་བའི་གནས། །ཡིད་དུ་མི་འོང་རྐྱེན་རྣམས་འབྱུང་། །དེ་ཡང་རྡོ་རྗེ་སེམས་དཔའ་ཉོན། །སྣོད་དང་མི་ལྡན་མི་ངན་ནི། །ཚུལ་འཆོས་བྱེད་ཅིང་སློབ་དཔོན་སྨོད། །ནོར་ཕོངས་ཆོས་འདོད་ཐབས་ཀྱིས་བསླུ། །དེ་འདྲའི་སྣོད་ངན་གང་ལ་ཡང་། །ཡེ་ཤེས་བལྟ་བའི་རྒྱུད་ཆེན་འདི། །ནམ་ཡང་བསྟན་པར་མ་གསུངས་སོ། །དེ་ཡང་འདུས་པའི་སྙིང་པོ་ཉོན། །བསྟན་པ་འཇིག་པའི་དུས་དེར་ནི། །རྫོགས་ཆེན་ཡང་སྙིང་བསྟན་པ་འབྱུང་། །དེ་ཚེ་སྣོད་ལྡན་འབྱུང་སྲིད་ན། །ངེས་དོན་མ་ནོར་རྒྱུད་འདི་གཏོད། །དེ་ལྟར་མ་བྱས་ཡང་སྙིང་འདི། །ནོར་འདོད་ཕྱིར་ནི་འདི་སྤེལ་ན། །སངས་རྒྱས་བཀའ་ཆད་འབྱུང་ངེས་པས། །མཁའ་འགྲོ་ཆོས་སྐྱོང་དགྲར་ལངས་ནས། །སྲིན་མོས་སྲོག་བཅད་མནར་མེད་ལྟུང་། །དེ་ཡང་འཁོར་རྣམས་ཡང་ཉོན་ཅིག །གལ་ཏེ་དད་ལྡན་སྣོད་རྙེད་ན། །འཇིག་རྟེན་ཟས་ནོར་ཕངས་མེད་པ། །ཡིད་འཐད་ཕུལ་ན་ངེས་དོན་འདི། །གཞན་ལ་མི་སྤེལ་མནའ་བོར་ལ། །སྦས་སྐྱིལ་མི་བྱ་ལྷུག་པར་གཏད། །སྣོད་ལྡན་མ་ཕྲད་དུས་ཉེ་ན། །ཆོས་སྐྱོང་ཡོད་པའི་ལྷ་ཁང་ངམ། །ལྷ་འདྲེ་ཡོད་པའི་བྲག་དཀྱིལ་དུ། །སྨོན་ལམ་བཏབ་ལ་སྦས་ལ་བཞག །རྫོགས་པ་ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། ཐ་མ་རྒྱུད་གཏད་པའི་ལེའུ་སྟེ་དྲུག་ཅུ་རྩ་བདུན་པའོ།། །།རྫོགས་པ་ཆེན་པོ་ཤིན་ཏུ་རྣལ་འབྱོར་སངས་རྒྱས་ཐམས་ཅད་འབྱུང་བའི་རྒྱུད་ཡེ་ཤེས་ཆོས་ཀྱི་སྐུ། དོན་འདུས་རིག་པའི་ རྫོགས་པ་ཆེན་པོ་ངེས་དོན་འདུས་པའི་ཡང་སྙིང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ཞེས་བྱ་བ།― DNG001_Page_0687 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། སནྟི་མ་ཧཱ་ནི་ཡཱ་མཱརྠ་ས་མ་དཱ་ཡཱ་ཏི་གརྦྷ་ས་མནྟ་བྷ་དྲ་ཛྙཱ་ན་ཨཱ་བརྟྟ་ཏནྟྲ་རཏྣ་སྭརྞྞཱ་ཏི་ཤྲྀ་ཏ་ནཱ་མ། བོད་སྐད་དུ། རྫོགས་པ་ཆེན་པོ་ངེས་དོན་འདུས་པའི་ཡང་སྙིང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ཞེས་བྱ་བ། བཅོམ་ལྡན་འདས་མཉམ་པ་ཉིད་ཀྱི་རྒྱལ་པོ། དཔལ་གྱི་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། །ཀུན་རིག་ཆོས་ཀྱི་རྒྱལ་པོ་དེ། །འོག་མིན་ཆོས་དབྱིངས་གནས་ཀྱི་མཆོག །ངེས་པའི་དོན་ལ་རབ་བཞུགས་ཏེ། །འཁོར་རྣམས་འདུས་ནས་རབ་ཏུ་འཁོད། །དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་ཆོས་ཀྱི་རྗེ་ལ་ནི། །རིག་པའི་ཡིད་ཀྱིས་འདི་སྐད་གསོལ། །ངེས་དོན་གནས་ལུགས་སྙིང་པོའི་དོན། །རིག་འཛིན་སྤྲུལ་པས་བསྐུལ་པ་ཡི། །སངས་རྒྱས་བཀའ་རྣམས་བགྲོས་པའི་མདོ། །མ་རིག་མུན་པ་བསལ་བའི་ཕྱིར། །སྐུ་གསུམ་ཆོས་རྣམས་ཇི་ལྟར་གསུངས། །སྣོད་ཀྱི་རིམ་པ་གང་ལ་བསྟན། །དེ་སྐད་ཅེས་ནི་གསུང་མ་ཐག །ཁབ་ལེན་ལ་ནི་ལྕགས་འདུ་བཞིན། །བྱིན་རླབས་དབང་མེད་དད་པས་ནི། །འདུས་པ་རྣམ་བཞི་འདུས་ཤིང་བསྐོར། །ཉིད་ལས་མི་གཞན་སངས་རྒྱས་དང་། །རྡོ་རྗེ་འཆང་གི་རིག་འཛིན་དང་། །རྒྱལ་སྲས་སྤྲུལ་པའི་མགོན་པོ་དང་། །དམ་ཅན་མཁའ་འགྲོ་སྡེ་ལྔ་དང་། །དད་ཉན་ ― DNG001_Page_0688 ―
[མ་དཔེ་གཟིགས་ན་འདིར་གནོན།]
ལྷ་མི་ལས་ཅན་ཀུན། །ལས་དང་ཐུགས་རྗེར་འཛོམ་ནས་འཁོད། །དེ་སྐད་ཞུས་པའི་དོན་གསན་ནས། །ཀུན་རིག་ཆོས་ཀྱི་རྒྱལ་པོ་དེས། །མཉམ་པའི་དོན་ལ་རབ་ཞུགས་ནས། །འདུས་པའི་འཁོར་ལ་བཀའ་སྩལ་པ། །ངེས་དོན་གནས་ལུགས་སྙིང་པོ་ནི། །འཁོར་འདས་འབྱུང་བས་མ་རེག་ཕྱིར། །མཛད་དང་སྤྱོད་པའི་རྒྱུད་མ་བསྐྱོད། །རང་བྱུང་གཞི་ཡི་སྙིང་པོ་ཡིན། །དེ་ཡང་འདུས་པའི་སྙིང་པོ་ཉོན། །རིག་འཛིན་སྤྲུལ་པས་བསྐུལ་པ་ཡི། །སེམས་དག་ལྷ་དབང་རིག་འཛིན་དེས། །རྨི་ལམ་རྣམ་གསུམ་བརྡ་ཤེས་ནས། །མངོན་དགའི་ཕུགས་ནས་ཚིག་གིས་བསྐུལ། །སངས་རྒྱས་བཀའ་རྣམས་བགྲོས་པའི་མདོ། །དེ་གཞི་ངེས་དོན་ཆོས་དྲུག་གིས། །སངས་རྒྱས་ཀུན་ཏུ་བཟང་པོ་བྱུང་། །ང་ཡིས་ང་ཉིད་བགྲོ་བ་ལས། །སངས་རྒྱས་གཞན་གྱིས་བགྲོ་མི་ནུས། །ཀུན་བཟང་ང་ཡི་སྒྲོན་མ་ཡི། །ཐོག་མའི་བྱུང་ཚུལ་སུས་ཤེས་པ། །མ་རིག་མུན་པ་རྩད་ནས་སེལ། །ཆོས་རྣམས་ཀུན་གྱི་སྒྲོན་མེའི་མཆོག །སྐུ་གསུམ་ཆོས་རྣམས་གསུངས་པ་ནི། །ཀུན་བཟང་ང་ཡི་བྱིན་རླབས་ཀྱིས། །སྐུ་གསུང་ཐུགས་ཀྱི་ཡོན་ཏན་ལས། །སྤྲུལ་པ་རྣམ་གསུམ་བྱུང་ནས་ནི། །ངེས་དོན་ལྡེམ་དགོངས་དྲང་དོན་བཤད། །དེ་ཡང་རྡོ་རྗེ་སེམས་དཔའ་ཉོན། །ཆོས་སྐུ་ངེས་དོན་གསུངས་པ་ནི། །རང་བྱུང་ངོ་བོ་ཉིད་ཀྱི་སྐུ། །ཚིག་དང་ཡི་གེ་བརྗོད་ལས་འདས། །ངེས་དོན་ཡེ་ཤེས་ཐུགས་ལ་གསལ། །དྲང་སྲོང་མངོན་ཤེས་དཔེ་བཞིན་དུ། །དུས་གསུམ་སངས་རྒྱས་འཁོར་བཅས་ལ། །མཉམ་པར་བཞག་པའི་ཡིད་ཀྱིས་གོ། །ངེས་དོན་རྟོགས་ཕྱིར་ཡང་སངས་རྒྱས། །དེ་ནས་སྟོན་པ་ཀུན་བཟང་གིས། །རྒྱུད་དག་རྡོ་རྗེ་སེམས་དཔའ་ལ། །དོན་གྱི་རང་བྱུང་གནས་ཆེན་དུ། །ཚིག་ཏུ་མ་བསྟན་ཡིད་ཀྱིས་གོ། །བྱིན་གྱི་རླབས་ཀྱིས་བཤད་ཅེས་བྱ། །དེ་ཡང་རྡོ་རྗེ་སེམས་དཔའ་ཉོན། །ལོངས་སྐུ་རྡོ་རྗེ་སེམས་དཔའ་ཡིས། །གཙང་རིས་ལྷ་ཡི་གནས་ཆེན་དུ། ། ― DNG001_Page_0689 ―
[མ་དཔེ་གཟིགས་ན་འདིར་གནོན།]
རིག་འཛིན་འཁོར་ལ་བརྩེར་དགོངས་ཏེ། །རིག་འཛིན་ཀུན་དགའ་ལྷ་དབང་ལ། །དབང་བསྐུར་བཀའ་དྲང་རྒྱུད་སྨིན་བྱས། །ལྡེམ་དགོངས་ངེས་དོན་ངོ་བོ་བཤད། །དེ་ཚེ་རིག་འཛིན་སེམས་དག་དེས། །མོས་གུས་དད་པས་རྩེ་གཅིག་ཏུ། །ཕྱོགས་བཅུའི་འདུས་པའི་སངས་རྒྱས་ལ། །ཞུ་བ་ཞུས་ཅིང་ཐེ་ཚོམ་བཅད། །དེ་ཡི་ངེས་པའི་འབྲས་བུ་ནི། །ཆོས་སྐུ་རིག་པའི་དོན་མཐོང་ལ། །རྟོགས་པ་མངོན་གྱུར་སངས་རྒྱས་ཕྱིར། །ད་ལྟ་ཉིད་དུ་ཐམས་ཅད་མཁྱེན། །ཡང་ནི་རིག་འཛིན་སེམས་དག་དེས། །སྔོན་གྱི་མངོན་དགའི་ཕུགས་སུ་ཕྱིན། །ནང་དུ་མཉམ་བཞག་འབྲལ་མེད་བཅིངས། །དོན་དེ་ལྷ་ཡི་དབང་པོ་བསྐུལ། །དེ་ལན་བཀའ་ཡིས་བགྲོ་དཀའ་སྟེ། །ལྷ་དབང་བཀའ་གཉན་དྲིན་ཆེ་བས། །ངེས་དོན་རིག་པའི་མན་ངག་གིས། །འཛམ་གླིང་མུན་བསལ་བྱིན་གྱིས་རློབས། །དེ་ཚེ་ལྷ་དབང་ཐུགས་དགྱེས་ཏེ། །ཁྱོད་ཀྱིས་དད་ལྡན་འཁོར་རྣམས་ལ། །མ་བཅོས་མ་ནོར་འཆད་ནུས་ན། །བདེ་གཤེགས་འཁོར་བཅས་བྱིན་གྱིས་རློབས། །དེ་སྐད་ཞལ་བཞེས་ངོ་མཚར་ནས། །སེམས་དག་གསེར་ལྡན་སྐུར་སྤྲུལ་ཏེ། །དུས་ཚོད་ཟེར་ལ་མངོན་བྱུང་ནས། །བྱང་ཆུབ་མོ་ཡི་ལྷུམས་ཞུགས་ཏེ། །གསུམ་ལ་བཀའ་རྟགས་དང་བཅས་ཏེ། །ཙར་གྱིས་སྐྱེས་ཏེ་ངེས་དོན་སྒྲོགས། །མི་རྣམས་ཀྱིས་མཐོང་ཡ་མཚན་སྐྱེས། །མངོན་ཤེས་དྲུག་ལྡན་ཡ་མཚན་ཅན། །ལྷ་མི་ཀུན་གྱིས་བཀུར་བར་མཐོང་། །དེ་ནི་སྤྱན་དྲངས་གནས་བཞུགས་ནས། །ནང་དུ་འབྲལ་མེད་དགོངས་པ་ལ། །གནོད་སྦྱིན་བདུད་ཀྱིས་བྲིད་བསྡིགས་པས། །བར་དུ་མ་ཆོད་ཟིལ་གྱིས་ནོན། །དྲེད་མོས་གདུང་བཏོན་སྐྱབས་སུ་ཞུས། །དམ་བཏགས་རང་སྲོག་སྙིང་པོ་ཕུལ། །ཆོས་འདིའི་སྲུང་མར་དམ་ལ་བཏགས། །དེ་ནས་ཤཱཀ་ཐུབ་སྤྲུལ་པ་དེས། །བདེ་ལྡན་བཀྲ་ཤིས་གནས་དག་ཏུ། །དེ་ལྟའི་དུས་ཀྱི་དེང་སང་ན། །གསང་བདག་སྤྲུལ་པ་དད་ཉན་ལ། །སྡེབ་སྦྱོར་ ― DNG001_Page_0690 ―
[མ་དཔེ་གཟིགས་ན་འདིར་གནོན།]
ལེགས་པའི་ཚིག་ཏུ་གསུངས། །དེ་ཡང་འདུས་པའི་སྙིང་པོ་ཉོན། །སྐུ་གསུམ་ཆོས་རྣམས་གང་གསུངས་ཀྱང་། །གདུལ་བྱའི་འཁོར་ལ་ཐ་དད་ཀྱང་། །ཤེས་རབ་བློ་ཡི་ཁྱད་པར་ལས། །དོན་ལ་དབྱེར་མེད་ངོ་བོ་གཅིག །རྫོགས་པ་ཆེན་པོ་ངེས་དོན་ཐམས་ཅད་འདུས་པའི་ཡང་སྙིང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ལས། ངེས་དོན་འབྱུང་བའི་རྒྱུ་གླེང་གཞི་བསྟན་པའི་ལེའུ་སྟེ་དང་པོའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །སྣོད་བཅུད་རིམ་པ་ངས་བསྟན་གྱིས། །འདུས་པའི་འཁོར་རྣམས་ཡིད་ཀྱིས་ཉོན། །དེ་བསྟན་སྣོད་འཛོམ་ཤིན་ཏུ་དཀའ། །དེ་ཕྱིར་ངེས་ལུང་བཅུད་ལྡན་ནི། །ཨུ་དུམ་ཝ་རའི་མེ་ཏོག་བཞིན། །འཇིག་རྟེན་འདི་ན་ཤིན་ཏུ་དཀོན། །དེ་ཡང་རྡོ་རྗེ་སེམས་དཔའ་ཉོན། །དབང་གཉིས་རིམ་པར་རྫོགས་པ་ཡི། །དམ་པའི་ཆོས་ཀུན་མ་འདྲེས་པ། །ཀུན་མཁྱེན་སྲིད་པར་ཟད་མེད་པའི། །ལུང་ལྡན་གདམས་ངག་དག་ཏུ་ལྡན། །སྣོད་རྟོགས་ཕྱིར་ན་ནོར་འདོད་ཀྱང་། །སངས་རྒྱས་དགོངས་པ་གདེང་ལྡན་ལ། །ཚུལ་འཆོས་མེད་པར་སྙིང་རྗེ་ཆེ། །འཇམ་ཞིང་དུལ་ལ་ངེས་དོན་ཞུ། །སྣོད་ལྡན་དད་པ་བརྩོན་འགྲུས་ཀྱིས། །སྨིན་པར་བྱེད་པའི་དབང་མནོས་ནས། །དམ་ཚིག་ལྡན་པ་ཆོས་འདོད་ཕྱིར། །གསང་ཐུབ་སྤྲོ་རིང་གཏོང་ཕོད་ཅན། །གཞན་ལ་མི་སྤེལ་ཕྱི་ཐག་རིང་། །སྤྱོ་བ་བྱས་ཀྱང་མངན་རྣམས་ཐེག །ཁོན་དུ་མི་འཛིན་གཞུང་རྣམས་འཛིན། །གདམས་ངག་བསྟན་པའི་སྣོད་དུ་གསུངས། །གསང་སྔགས་དོན་ཟབ་ངེས་པའི་དོན། །རྟ་དང་གླང་པོ་རིན་ཆེན་བདུན། །ཁ་གསེར་ཁ་གཡུ་བེར་ཆེན་སོགས། །སེར་སྣ་མེད་པར་འབུལ་ནུས་ན། །ཚེགས་མེད་དོན་གོ་བསྟན་པར་བྱ། །དེ་དག་མི་ལྡན་ཁ་གསག་ཅན། །སློབ་དཔོན་མཆེད་ཀྱི་སྤྱོད་རྩིང་ལ། །ཡ་མཚན་ཆེ་ནས་ཕྱར་ཁ་གཏོང་། །ཐབས་ཀྱིས་སྨོད་པ་སྣ་ཚོགས་བྱེད། །བཀའ་རྐུན་ ― DNG001_Page_0691 ―
[མ་དཔེ་གཟིགས་ན་འདིར་གནོན།]
བྱས་ནས་ཀུན་ལ་སྤེལ། །ང་ལས་ལྷག་པ་གཞན་ན་མེད། །བཀའ་བརྐུ་བཅོས་ཤིང་ཟས་ནོར་འཚོལ། །དེ་ནི་དམྱལ་བ་ཆེན་པོར་ལྟུང་། །འདི་ལ་ངོ་ཚ་ཁྲེལ་རྣམས་ཤོར། །རང་གིས་རང་བསླུས་སྣོད་ངན་ལ། །ནམ་ཡང་བསྟན་པར་མི་བྱའོ། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། སྣོད་བཅུད་བསྟན་པའི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །ངེས་པའི་དགོངས་དོན་འདི་སྐད་གསོལ། །ཆོས་ཀུན་འབྱུང་བའི་གཞི་གསུམ་གྱི། །འཁོར་བའི་གཞི་ནི་གང་གིས་བགྱི། །དེ་ལྟར་འགྲོ་དྲུག་ཇི་ལྟར་འཁྲུལ། །དོན་གྱི་དབྱེ་བ་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་རྒྱལ་པོས་བཀའ་སྩལ་པ། །ངེས་དོན་དབྱེ་བ་ངས་བཤད་ཀྱིས། །དད་ལྡན་འཁོར་རྣམས་ད་ཉོན་ཅིག །འཁོར་གཞི་ཤེས་པ་ལུང་མ་བསྟན། །རང་བཞིན་ལུས་ཀྱི་རྩལ་སྣང་བ། །གང་ལ་མི་རྟོག་དོན་ཤེས་ཟིན། །ཤེས་པ་རང་སྣང་དྲི་མས་འཚོལ། །མ་རིག་རྒྱུ་ནི་ངེས་མེད་ཕྱིར། །ཤེས་གཞི་ལུང་མ་བསྟན་ཞེས་བྱ། །དེ་ཡང་འདུས་པའི་སྙིང་པོ་ཉོན། །རང་བཞིན་ངོ་བོའི་ལུས་དང་ནི། །ཤེས་གཞི་ལུང་མ་བསྟན་པ་གཉིས། །གནས་སྐབས་འདྲེལ་ཡོད་མཐར་ཐུག་མེད། །ཡེངས་དང་མ་ཡེངས་ཆ་མེད་པའི། །ཧད་དེ་བུན་ནེ་ཙམ་དུ་གནས། །རང་བྱུང་རྣམ་ཤེས་རྐྱེན་དབང་འགྱུར། །དེ་ཕྱིར་ལུང་མ་བསྟན་ཞེས་བྱ། །གཞི་ནི་དྲན་དང་མ་དྲན་གྱི། །བློ་མི་འཇུག་པས་དོན་མི་ཤེས། །མ་རིག་གཞི་ནི་ལུང་མ་བསྟན། །དེ་ཕྱིར་འཁོར་བའི་གཞི་ཞེས་བྱ། །ཡིད་བྱུང་རིམ་འགྲིབས་ལོག་པའི་རྒྱུ། །གྱ་གྱུ་ཙམ་དུ་དྲན་ཡོད་ཀྱང་། །དོན་དུ་མ་ཤེས་དེ་ཁོ་ན། །མ་རིག་སྐྱེ་བའི་གཞི་བྱེད་ཕྱིར། །དང་པོ་འཁོར་བ་དེ་ལས་བྱུང་། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། འཁོར་བའི་ཤེས་གཞི་ལུང་མ་བསྟན་པའི་ལེའུ་སྟེ་གསུམ་པའོ།། །། ― DNG001_Page_0692 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །འགྲོ་དྲུག་འཁྲུལ་ཚུལ་བཀའ་སྩལ་པ། །དང་པོ་འཁོར་འདས་བར་དོ་ལ། །ཤེས་གཞི་ལུང་མ་བསྟན་པ་ལ། །མ་རིག་ལྷན་ཅིག་རྣམ་གསུམ་གྱི། །རྒྱུ་དང་དེ་མ་ཐག་འཛོམ་ནས། །སེམས་ཀྱི་ཀུན་གཞི་སྨིན་པ་བྱུང་། །དེ་ལས་ཀུན་བརྟག་རྣམ་གསུམ་གྱིས། །དམིགས་པ་བདག་པོའི་རྐྱེན་གཉིས་ཀྱིས། །བག་ཆགས་ལུས་ཀྱི་ཀུན་གཞི་བྱུང་། །གཉིས་པ་བག་ཆགས་ལྔ་རུ་སྨིན། །དེ་ཡང་འདུས་པའི་སྙིང་པོ་ཉོན། །འཁྲུལ་གཞི་ལ་སོགས་རྣམ་དགུ་ཡིས། །དེ་འཁྲུལ་མ་བཟློག་ཉེས་པ་ནི། །གཡེང་བའི་ལས་སྤྱད་འཆི་དུས་འབྱུང་། །དེ་ཚེ་འབྱུང་བ་རིམ་ཐིམ་ནས། །དབུགས་ཐུམ་བྱེད་ཅིང་གནང་གཅད་དེ། །ཞེན་པའི་དབང་གིས་ཁ་ཆེམས་འབོར། །འཁོར་བའི་སྡུག་བསྔལ་བསམ་མི་ཁྱབ། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། འཆི་ལྟས་བསྟན་པའི་ལེའུ་སྟེ་བཞི་པའོ།། །།དེ་ཡང་རྡོ་རྗེ་སེམས་དཔའ་ཉོན། །དེའི་ཚེ་འཆི་བའི་དུས་བྱུང་ཚེ། །འདི་ནུབ་ཕྱི་མ་མུན་ལྟར་འབྱུང་། །སྣང་བ་མཆེད་དང་བསྐྱེད་པ་ཡི། །མ་བཅོས་དོན་དེ་ཡོད་གྱུར་ཀྱང་། །མ་རིག་བསྒྲིབས་པས་ལྟུང་བའི་ཕྱིར། །གསོན་གཤིན་ས་མཚམས་དེ་ལ་བྱ། །དེ་ཡང་སྲིད་པ་བར་དོ་ལ། །གཞི་གནས་འཕྲལ་བྱུང་བག་ཆགས་ཀྱིས། །རས་དཀར་ལ་ནི་སྣུམ་ཞེན་ལྟར། །གཞི་གནས་མ་རིག་བག་ཆགས་གོས། །མ་རིག་རྐྱེན་སླ་ཁ་བྲོད་དང་། །རྩོམ་པ་རྗེས་འཇུག་ཉོན་མོངས་པ། །སྔ་ཕྱིའི་གོལ་ས་ཡིན་པའི་ཕྱིར། །དང་པོར་ཤན་མ་ཕྱེད་པས་གོལ། །དེ་ཡང་འདུས་པའི་སྙིང་པོ་ཉོན། །སྲིད་པ་དག་གི་བར་དོ་ལ། །ཞག་གསུམ་ལོན་ནས་བག་ཆགས་ལུས། །སྔོན་གྱི་དྲན་པ་སྣ་ཚོགས་འབྱུང་། །ཀུན་རྫོབ་རྒྱུ་འབྲས་མི་བསླུ་ཞེས། །ཡང་ནི་ཡིད་ཀྱི་ལུས་སྣང་འགྱུར། །ཀུན་ཚང་ཐོགས་མེད་སྣ་ཚོགས་སེམས། །རང་གི་ཤེས་པས་ས་མ་ཟིན། ། ― DNG001_Page_0693 ―
[མ་དཔེ་གཟིགས་ན་འདིར་གནོན།]
དེ་ཕྱིར་ཡིད་ནི་ལུང་མ་བསྟན། །ཡང་འགྱུར་གནས་ངན་ལུས་ལེན་ཕྱིར། །ཁྱིམ་སོགས་གང་རུང་མངལ་དུ་འཇུག །རྗེས་དྲན་ཡོན་ཏན་མེད་པའི་ཕྱིར། །ཆགས་སྡང་སྐྱེས་ནས་འཁོར་བར་འཁྱམས། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། མ་རྟོགས་པ་འཁོར་བར་འཁྱམས་པ་བསྟན་པའི་ལེའུ་སྟེ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་སྟོན་པ་ཆོས་རྗེ་ལ། །ངེས་པའི་དགོས་དོན་འདི་སྐད་གསོལ། །འཁོར་འདས་གཞི་ནི་གང་ལ་བགྱི། །དེ་ལས་མུ་སྟེགས་ཇི་ལྟར་འཁྲུལ། །ཐེག་དགུའི་འཁྲུལ་གཞི་ཇི་ལྟར་བྱུང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་གྱི་དད་ཉན་ལ། །ཞུས་པའི་ལན་དེ་བཀའ་སྩལ་པ། །ལེགས་པར་ཉོན་ལ་ཡིད་ལ་ཟུང་། །འཁོར་འདས་གཉིས་ཀྱི་གཞིར་གྱུར་པ། །གང་ཡང་མེད་པའི་སྔོན་རོལ་དུ། །སངས་རྒྱས་མེད་ཕྱིར་ལུང་ལྡན་མེད། །ཐེག་དགུ་མྱ་ངན་འདས་མ་རེག །མ་རིག་མེད་ཕྱིར་སེམས་ཅན་མེད། །སྒྲིན་བཅོས་བག་ཆགས་སྐྱོན་མ་གོས། །དུག་ལྔ་སྐྱེ་བའི་གཞི་མེད་ཕྱིར། །འཁོར་བའི་སྐྱོན་གྱི་མཐས་མ་རེག །ཞེན་པའི་བག་ཆགས་མེད་པའི་ཕྱིར། །ཕྲ་རགས་བསྐྱེད་པའི་ཡུལ་མ་གྲུབ། །འབྱུང་བ་ལྔ་ལ་རག་མ་ལུས། །གཉེན་པོས་མི་ཚུགས་རང་བཞིན་ལུས། །དེ་ཡང་རྡོ་རྗེ་སེམས་དཔའ་ཉོན། །དེ་གསུམ་མེད་པའི་ཤེས་པ་དེ། །ནམ་ལངས་ཉི་མ་མ་ཤར་བཞིན། །ཡེ་ནས་གནས་ཕྱིར་ཀུན་གྱི་གཞི། །རང་བཞིན་ངོ་བོའི་ལུས་ཞེས་བྱ། །འཁོར་འདས་གཉིས་ཀྱི་བར་དོ་ལ། །སྐྱེ་བ་མ་བླངས་དུས་ན་ཡང་། །རྒྱུ་རྐྱེན་མ་བསྐྱེད་ཡང་དག་ཡོད། །སྒྲོ་སྐུར་བྲལ་དང་མ་བྲལ་གྱིས། །རྟོགས་དང་འཁྲུལ་པ་གཉིས་མ་མྱོང་། །རིག་དང་མ་རིག་ཤན་མ་ཕྱེད། །ཡེངས་དང་མ་ཡེངས་ངོས་མ་ཟིན། །ཇི་ཞིག་ལྟར་ལ་ཡེངས་ཚུལ་གྱིས། །རང་ཡིད་ཧད་དེ་ཙམ་ཡོད་ཀྱང་། །གང་གི་འདུ་ཤེས་མ་ ― DNG001_Page_0694 ―
[མ་དཔེ་གཟིགས་ན་འདིར་གནོན།]
ཞུགས་པ། །བྱ་བ་བཏང་བའི་མི་དང་འདྲ། །དེ་ཡང་འདུས་པའི་སྙིང་པོ་ཉོན། །དེ་ཕྱིར་འཁོར་འདས་གཉིས་ཀྱི་གཞི། །རང་བཞིན་ངོ་བོའི་ལུས་དང་ནི། །རྟོགས་པའི་ངོ་བོ་ཉིད་སྐུ་གཉིས། །གནས་སྐབས་འདྲེལ་མེད་མཐར་ཐུག་ཡོད། །དེ་ཕྱིར་ལྷུན་གྲུབ་སངས་རྒྱས་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པའི་ཡང་སྙིང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་རིན་པོ་ཆེ་གསེར་གྱི་ཡང་ཞུན་ལས། འཁོར་འདས་གཉིས་ཀྱི་གཞི་རང་བཞིན་གྱི་ལུས་བསྟན་པའི་ལེའུ་སྟེ་དྲུག་པའོ།། །།དེ་ཡང་རྡོ་རྗེ་སེམས་དཔའ་ཉོན། །མུ་སྟེགས་རྟག་པའི་འཁྲུལ་དཔེ་ནི། །འཁྲུལ་སྨན་ཆེན་པོ་དང་འདྲ་སྟེ། །གཞི་དང་འཁྲུལ་པའི་ཉེས་པ་དེ། །སུན་འདོན་ལ་ཟློ་གྲངས་བསྟན་པ། །འཁྲུལ་གཞི་མེད་པའི་འཁྲུལ་པ་དེ། །རི་བོང་རྭ་བཞིན་ཡོད་མི་སྲིད། །འཁྲུལ་གཞི་ལས་ནི་འཁྲུལ་པ་བྱུང་། །དེ་ཕྱིར་དབྱེ་བ་ཤིན་ཏུ་གཅེས། །དེ་ཡང་འདུས་པའི་སྙིང་པོ་ཉོན། །ངོ་བོ་མི་འགྱུར་གཞི་བྱས་ནས། །ཁ་དོག་དབྱིབས་ཅན་དག་ཏུ་འཁྲུལ། །ལོག་པའི་དཀའ་ཐུབ་དམྱལ་བར་ལྟུང་། །རིག་པས་བརྟགས་ན་བདག་མ་གྲུབ། །དེ་ཉིད་དོན་ཤེས་ལ་ཟློའོ། །དེ་ཡང་འཁོར་གྱི་སྙིང་པོ་ཉོན། །མུ་སྟེགས་ཆད་པའི་དབྱེ་བ་ནི། །ཁ་དོག་དབྱིབས་མེད་ཆད་གཞི་བྱས། །སྔ་ཕྱི་རྒྱུ་འབྲས་མེད་པར་འཁྲུལ། །སྐུར་བཏབ་དམྱལ་བ་ཆེན་པོར་ལྟུང་། །ཆད་དུ་མིན་སྟེ་རིག་པར་ཡོད། །དེ་ཕྱིར་གཞི་ལ་གོལ་མེད་པས། །རང་བྱུང་ཡེ་ཤེས་ཀློང་ན་གནས། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། མུ་སྟེགས་འཁྲུལ་ཚུལ་བསྟན་པའི་ལེའུ་སྟེ་བདུན་པའོ།། །།ཀུན་རིག་སྟོན་པས་ཡང་གསུངས་པ། །གཞི་ནི་མེ་ལོང་ལྟ་བུ་ལ། །གཟུགས་བརྙན་ཐེག་པ་རིམ་དགུ་བྱུང་། །ཕྱོགས་ཙམ་འཁྲུལ་ཚུལ་ངས་བཤད་ཉོན། །མཚན་ཉིད་ཐེག་པ་རྣམ་གསུམ་གྱི། །ཉན་ཐོས་རང་རྒྱལ་མདོ་སྡེ་ཡི། །དབྱེ་བའི་རྣམ་གྲངས་མདོར་བསྟན་པ། །སྣང་བའི་ཕྲ་ ― DNG001_Page_0695 ―
[མ་དཔེ་གཟིགས་ན་འདིར་གནོན།]
རགས་ཡུལ་གྱི་གཞི། །གང་ཟག་བདག་མེད་ཆོས་བདག་ཡོད། །ཞི་བ་ཕྱོགས་གཅིག་ཐར་མི་ཐོབ། །ལྷག་མཐོང་མེད་ཕྱིར་སྐྱེ་བོ་རང་། །དོན་རྟོགས་ཡུལ་འདི་ཆོས་ཀྱི་དབྱིངས། །དེ་ཡང་རྡོ་རྗེ་སེམས་དཔའ་ཉོན། །སེམས་ཙམ་ཀུན་གཞི་རྟོགས་པ་ཡི། །གོང་འོག་ཤེས་པ་སྐད་ཅིག་འདོད། །རིག་པ་རང་རྐྱང་གྲངས་ཅན་གོལ། །རྟག་དང་ཁྱད་མེད་སྒྲོ་འདོགས་ནོར། །ཆོས་སྐུ་རིག་པ་འགྱུར་བ་མེད། །དེ་ཡང་རྡོ་རྗེ་སེམས་དཔའ་ཉོན། །དབུ་མ་པ་ཡི་འདོད་གཞུང་དེ། །ངོ་བོ་དངོས་མེད་གཞི་བྱས་ཏེ། །ཡུལ་སེམས་གཞིག་པས་སྟོང་པར་འཁྲུལ། །ཅི་ཡང་མེད་པའི་སྐྱེ་མཆེད་ལྟུང་། །ཆད་དང་ཁྱད་མེད་སྟོང་པར་གོལ། །སྟོང་ཤེས་རང་བྱུང་ཆོས་སྐུ་ཡིན། །དེ་ཡང་འདུས་པའི་སྙིང་པོ་ཉོན། །དེ་དག་མཚན་ཉིད་ཐེག་པ་གསུམ། །ཕྱོགས་ཙམ་རྟོགས་ཀྱང་གཞི་མི་ཤེས། །དེ་ཕྱིར་ངེས་དོན་མི་མཐོང་བས། །ཚིག་ཏུ་བརྟེན་ཏེ་དོན་ལས་གོལ། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། རྒྱུ་མཚན་ཉིད་ཀྱི་འཁྲུལ་ཚུལ་བསྟན་པའི་ལེའུ་སྟེ་བརྒྱད་པའོ།། །།ཀུན་རིག་སྟོན་པས་ཡང་གསུངས་པ། །ཕྱི་པ་ཀྲི་ཡོག་རྣམ་གསུམ་གྱིས། །དབྱེ་བའི་རྣམ་གྲངས་ངས་བཤད་ཀྱིས། །དད་ལྡན་འཁོར་རྣམས་ལེགས་པར་ཉོན། །ནམ་མཁའ་སྨིག་རྒྱུའི་དཔེ་བཞིན་དུ། །དག་པ་ཆོས་ཉིད་ཀྲི་ཡའི་གཞི། །བཟང་ངན་གཙང་སྨེ་དངོས་གྲུབ་རེ། །གྲུབ་པ་མ་ཐོབ་བྱོལ་སོང་རྒྱུ། །གཙང་སྦྲས་མི་གྲོལ་རྟོག་པ་ཉིད། །སྤྱོད་པ་མ་ཡིན་གཞི་དག་སྐུ། །དེ་ཡང་རྡོ་རྗེ་སེམས་དཔའ་ཉོན། །ཡོ་ག་རྣལ་འབྱོར་སེམས་དཔའ་ཡི། །དབྱེར་མེད་ཆོས་དབྱིངས་གཞི་བྱས་ཏེ། །བྱང་ཆུབ་རྣམ་ལྔ་མཉམ་པར་འདོད། །བསྒོམ་ཀྱང་མི་གྲོལ་འདོད་ཁམས་ལྷ། །སེམས་ཙམ་པ་དང་ཁྱད་མེད་གོལ། །ལ་བཟླ་རིག་པ་ཆོས་སྐུར་ཤེས། །དེ་ཡང་རྡོ་རྗེ་སེམས་དཔའ་ཉོན། །དེ་དག་ཡོ་ག་རྣམ་གསུམ་ཀྱང་། །གཞི་ཉིད་མ་ཤེས་བློས་ ― DNG001_Page_0696 ―
[མ་དཔེ་གཟིགས་ན་འདིར་གནོན།]
བསྒྱུར་ཕྱིར། །ནམ་མཁའ་དག་ལ་འཛིན་པ་འདྲ། །དོན་ལ་འཁྲུལ་པར་ཐེ་ཚོམ་མེད། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། ཕྱིའི་འཁྲུལ་ཚུལ་བསྟན་པའི་ལེའུ་སྟེ་དགུ་པའོ།། །།ཀུན་རིག་རྒྱལ་པོས་ཡང་གསུངས་པ། །ནང་པ་བསྐྱེད་རྫོགས་རྣམ་གཉིས་ཀྱིས། །དོན་གྱི་དབྱེ་བ་བསྟན་པའི་ལུང་། །ནམ་མཁའ་སྤྲིན་དང་ཁུ་རླངས་བཞིན། །རྣལ་འབྱོར་མ་ཧཱ་ཡོ་ག་ཡི། །བདེན་པ་དབྱེར་མེད་འདོད་པའི་གཞི། །རྟོག་ཚོགས་ལྷར་བསྒྱུར་བསྒོམ་པས་འཁྲུལ། །དེ་ཕྱིར་བགེགས་དང་རཱུ་ཏྲར་ལྟུང་། །དབུ་མ་དང་འདྲ་འབྲས་བུ་གོལ། །ལམ་ལ་མི་བརྟེན་རྟོགས་པས་ཆོག །དེ་ཡང་རྡོ་རྗེ་སེམས་དཔའ་ཉོན། །ཨ་ནུ་ཡོ་གའི་དབྱེ་བ་ནི། །ཀུན་གཞི་མཁའ་ཀློང་གཞི་བྱས་ཏེ། །སྣང་བ་ཀུན་བཟང་རོལ་པར་འཁྲུལ། །ཡོད་མིན་མེད་མིན་སྐྱེ་མཆེད་ལྟུང་། །མཁའ་ཀློང་དབུ་མ་ཆད་དང་འདྲ། །ལ་ཟློ་ཆོས་ཀྱི་དབྱིངས་ཉིད་ཡིན། །དེ་ཡང་འདུས་པའི་སྙིང་པོ་ཉོན། །དེ་དག་རྒྱུད་ལུང་རྣམ་གཉིས་ཀྱང་། །རང་བཞིན་ལུས་བཞིན་འཁྲུལ་པའི་ཕྱིར། །ཉི་མ་སྤྲིན་གྱིས་བསྒྲིབས་དང་འདྲ། །སྣང་བ་ལྷར་བསྒོམས་ཆོས་སྐུ་བསྒྲིབས། །རྫོགས་པ་ཆེན་པོ་ངེས་དོན་འདུས་པའི་ཡང་སྙིང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ལས། རྒྱུད་ལུང་འཁྲུལ་ཚུལ་བསྟན་པའི་ལེའུ་སྟེ་བཅུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་རིག་སྟོན་པ་ཆོས་རྗེ་ལ། །བདེན་པའི་དགོངས་དོན་འདི་སྐད་གསོལ། །རྫོགས་ཆེན་སྤྱི་དང་ཁ་འབྱམས་དང་། །ཀུན་བརྟགས་ལྷ་དང་ཚིག་ཟིན་གྱིས། །འཁྲུལ་པའི་དབྱེ་བའི་རིམ་པ་ནི། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རྫོགས་ཆེན་སྤྱི་ཡི་འཁྲུལ་པ་ནི། །རིན་ཆེན་གསེར་སྦྲུལ་མཐོང་སྟོངས་བཞིན། །སྤྱི་དང་ཁ་ ― DNG001_Page_0697 ―
[མ་དཔེ་གཟིགས་ན་འདིར་གནོན།]
འབྱམས་ཀུན་བརྟགས་ཀྱིས། །ལུང་ཚིག་ཙམ་ལ་ངེས་འཆའ་བ། །དེ་དག་གོལ་བར་ངས་བཤད་ཉོན། །མིང་ནི་ཚིག་ཙམ་ཤེས་པའི་གཞིས། །མཁས་སུ་རེ་ནས་ཐ་སྙད་འདོགས། །དོན་མེད་ནམ་མཁའི་མཐའ་ཚོལ་འདྲ། །ཚིག་ཏུ་ཤེས་པས་དོན་མི་རྟོགས། །ཚིག་ཉིད་དོན་ཡིན་ཟེར་བ་འཁྲུལ། །དེ་ཡང་འདུས་པའི་སེམས་དཔའ་ཉོན། །ཁ་འབྱམས་དཔའ་བོའི་འཁྲུལ་པ་དེ། །སྣང་བ་སེམས་སྡུད་གཞི་རུ་བྱེད། །འཁྲུལ་པའི་དབྱེ་བ་ལྷུན་གྲུབ་བཅུ། །འབྲས་བུ་མི་འབྱུང་ལོག་པར་གོལ། །གཞི་དང་མི་མཐུན་ལུང་རིག་འགལ། །གཞི་ཉིད་མ་ཤེས་སྐྱེ་བོ་རང་། །དེ་ཡང་རྡོ་རྗེ་སེམས་དཔའ་ཉོན། །ཀུན་བརྟགས་ལྷར་ནི་འཁྲུལ་པ་ཡི། །ཕྱི་ནང་གསང་སྔགས་སྣང་བའི་གཞི། །བསྐྱེད་དང་རྫོགས་འདོད་རིམ་པ་འཁྲུལ། །དོན་མ་ཟིན་པས་འབྲས་བུ་མེད། །གཞི་ལ་ལྷ་མེད་བསྐྱེད་མི་དགོས། །མ་བསྐྱེད་ཆོས་སྐུ་ཡེ་ནས་ཡིན། །དེ་ཡང་འདུས་པའི་སྙིང་པོ་ཉོན། །ཚིག་ཟིན་ལུང་གི་འཁྲུལ་ཚུལ་དེ། །ཚིག་ཙམ་ལུང་ལ་ཁུངས་བྱེད་པས། །དགོངས་པ་རྣམ་གསུམ་མ་ཤེས་འཁྲུལ། །ཚིག་ཙམ་ལུང་གིས་དོན་མི་རྟོགས། །དོན་མེད་ཚིག་གིས་དགོས་པ་མེད། །ལུང་མེད་དོན་གོ་ཡེ་སངས་རྒྱས། །དེ་ཡང་འདུས་པའི་སྙིང་པོ་ཉོན། །དེ་དག་འཁྲུལ་ཚུལ་རྣམ་བཞི་ཡང་། །སྤྱི་ཡི་མཚན་ཉིད་ཡིན་པའི་ཕྱིར། །གཞི་དང་འགལ་ཕྱིར་དོན་ལས་གོལ། །དེ་ཕྱིར་ལུང་ལྡན་གདམས་ངག་དགོས། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་རིན་པོ་ཆེ་གསེར་གྱི་ཡང་ཞུན་ལས། རྫོགས་ཆེན་སྤྱིའི་འཁྲུལ་ཚུལ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །འཁོར་གྱི་དད་ལྡན་དོན་དུ་ཡང་། །ཀུན་རིག་སྟོན་པ་ཆོས་རྗེ་ལ། །བདེན་པའི་དགོངས་དོན་འདི་སྐད་གསོལ། །འཁོར་རྣམས་འཁྲུལ་པ་ལྡོག་པའི་ཐབས། །ཚེགས་མེད་རྟོགས་ ― DNG001_Page_0698 ―
[མ་དཔེ་གཟིགས་ན་འདིར་གནོན།]
ཐབས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །འོག་མའི་འཁྲུལ་པ་ལྡོག་ཐབས་དང་། །ཡང་ཏི་ངེས་དོན་ལྡོག་པ་གཉིས། །ང་ཡིས་བསྟན་གྱིས་ལེགས་པར་ཉོན། །འོག་མའི་ཆོས་ཀྱི་འཁྲུལ་ལྡོག་ཐབས། །གཉེན་པོ་དང་ནི་ཡེ་ཤེས་ཀྱིས། །ཀུན་རྫོབ་ཉོན་མོངས་སྒྲིབ་སྦྱངས་ཏེ། །དོན་དམ་ཤེས་བྱའི་སྒྲིབ་སྦྱངས་ལ། །ཚོགས་བསགས་པ་ཡི་སངས་རྒྱས་ནི། །ལམ་ལྔ་ས་བཅུ་རིམ་བགྲོད་ཏེ། །ཕ་རོལ་ཕྱིན་བཅུ་མཐར་ཕྱིན་ནས། །སྒྲིབ་དག་འཁྲུལ་པ་ལྡོག་པའི་དུས། །དྲང་དོན་ཡིན་ཕྱིར་སངས་མི་རྒྱ། །དེ་ཕྱིར་ངེས་དོན་བཀའ་འདི་དགོས། །དེ་ཡང་འདུས་པའི་སྙིང་པོ་ཉོན། །མཚན་ཉིད་རྣམ་གསུམ་ཆོས་ཀྱིས་ནི། །འཁྲུལ་པ་མི་བཟློག་རེ་དོགས་མཐའ། །རྣམ་རྟོག་རྒྱར་ཆུད་འཁོར་བར་འཁྱམས། །དེ་ཕྱིར་སླུ་བྲིད་ཆོས་འདིས་ཕུང་། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། ཐེག་པ་འོག་མ་པའི་ཆོས་ཀྱིས་འཁྲུལ་པ་མི་ལྡོག་པར་བསྟན་པའི་ལེའུ་སྟེ་བཅུ་གཉིས་པའོ།། །།ཀུན་རིག་སྟོན་པས་ཡང་གསུངས་པ། །ཡང་ཅིག་རྫོགས་ཆེན་ངེས་དོན་གྱིས། །འཁྲུལ་པ་ཟློག་པའི་ཐབས་ཆེན་ནི། །ལུང་ལྡན་གདམས་ངག་ལྡན་པ་ཡི། །བླ་མ་རྡོ་རྗེ་སློབ་དཔོན་དེ། །གདམས་ངག་མཁས་ལ་ཐུགས་རྗེ་ཆེ། །དམ་ཚིག་ལྡན་པའི་སློབ་དཔོན་ལ། །སློབ་མས་ཡོན་ནི་མ་ཕུལ་བར། །དེ་ལྟའི་གདམས་ངག་ཞུ་མི་བྱ། །དེ་ཡང་རྡོ་རྗེ་སེམས་དཔའ་ཉོན། །སྨིན་པར་བྱེད་པའི་དབང་ཆེན་ནི། །ཐུན་མོང་མ་ཡིན་ཁྱད་འཕགས་པའི། །ངོ་བོ་དབྱེ་བ་དཔེ་དང་གནས། །རྫས་དང་ངེས་ཚིག་ལས་དང་སྐལ། །རྟགས་དང་མཐར་ཐུག་ཀུན་རྫོགས་པའི། །རིག་པ་ཐུགས་ཀྱི་དབང་གསུམ་ནི། །རིམ་གྱིས་མ་ཡིན་ཅིག་ཅར་དུ། །དད་ལྡན་གྱིས་ནི་མནོས་གྱུར་ན། །སྐྱེ་བ་འདི་ཡིས་སངས་རྒྱས་འགྲུབ། །དེ་ཡི་དམ་ཚིག་ ― DNG001_Page_0699 ―
[མ་དཔེ་གཟིགས་ན་འདིར་གནོན།]
མདོར་བསྡུས་ན། །རྟོགས་ཐབས་དམ་ཚིག་རྣམ་ལྔ་ཡང་། །རྩ་བ་རང་སེམས་འདི་ཉིད་ལས། །གཞན་ན་ཡོད་པ་མ་ཡིན་ནོ། །རང་རིག་རྟོགས་ན་དམ་ཚིག་མཆོག །དེ་ཡང་འདུས་པའི་སྙིང་པོ་ཉོན། །ཆེད་དུ་བྱ་བའི་དམ་ཚིག་དྲུག །རྩ་བ་སྐུ་གསུང་ཐུགས་སུ་འདུས། །དེ་ཕྱིར་བརྩེ་གདུང་དམ་ཚིག་སྟེ། །ཆོས་རྣམས་ཀུན་གྱི་རྩ་བ་ཡིན། །བསྲུང་བའི་དམ་ཚིག་རྣམ་ལྔ་ཡང་། །རྩ་བ་འདོད་ཆུང་གདེང་ཟིན་ཉིད། །དེ་ཕྱིར་བསྲུང་བྱའི་དམ་ཚིག་སྟེ། །བར་ཆད་མི་འབྱུང་དངོས་གྲུབ་ཐོབ། །སྤང་བར་བྱ་བའི་དམ་ཚིག་བཞི། །འཁོར་བ་བསྐྱེད་པའི་རྟེན་གཞི་སྟེ། །དེ་མ་སྤངས་པར་གྲོལ་མི་སྲིད། །དེ་ཕྱིར་མ་རྟོགས་རྣམས་ཀྱིས་སྤང་། །གནང་བར་བྱ་བའི་དམ་ཚིག་བཞི། །ལྟ་བ་གདེང་ལྡན་རྣམས་ཀྱིས་བྱ། །ཐ་མལ་ཀུན་གྱིས་བྱར་མི་རུང་། །དེ་ཕྱིར་རྟོགས་ལྡན་རྣམས་ཀྱིས་སྤྱད། །དེ་ཡང་རྡོ་རྗེ་སེམས་དཔའ་ཉོན། །གཡོ་སྒྱུ་མེད་པའི་སྐལ་ལྡན་གྱིས། །རྩེད་འཇོ་ལེ་ལོ་རྣམ་གཡེང་སྤང་། །འཁོར་མཁས་སློབ་གུས་དད་ལྡན་ལ། །སྣོད་ལྡན་ཡིན་ཕྱིར་འཁྲུལ་པ་བཟློག །དེ་ཡང་འདུས་པའི་སྙིང་པོ་ཉོན། །སྣོད་ལྡན་ལས་དང་སྐལ་བར་འཛོམ། །ངེས་དོན་རྒྱུད་ཆེན་བསྟན་པའི་སྣོད། །ཕྱི་མར་མི་སྡོད་དུས་འདི་རུ། །མན་ངག་སྙིང་པོ་བསྟན་པར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པའི་སྙིང་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ལས། ཡང་ཏི་རྫོགས་ཆེན་གྱིས་འཁྲུལ་པ་ལྡོག་པའི་ཐབས་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །སྣོད་ལྡན་དམ་བཅས་དོན་ཆེད་དུ། །ཀུན་རིག་ཐམས་ཅད་མཁྱེན་པ་ལ། །ངེས་དོན་གདམས་ངག་འདི་སྐད་ཞུས། །རིག་འཛིན་གྲུབ་ཐོབ་བཀའ་རྟགས་གང་། །རིག་པ་བྱིན་གྱིས་ཇི་ལྟར་བརླབ། །དེ་དོན་ཉམས་སུ་ཇི་ལྟར་མྱོང་། །ལ་ཟློ་སྤྱོད་པ་ཇི་ལྟར་སྤྱད། །ངེས་དོན་རྒྱུད་ཀྱི་བཀའ་རྟགས་གང་། །ཀུན་མཁྱེན་ ― DNG001_Page_0700 ―
[མ་དཔེ་གཟིགས་ན་འདིར་གནོན།]
སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འབྲལ་མེད་ཆོས་ལས་རབ་བཞེངས་ཏེ། །ཡེ་ཤེས་རིག་པའི་ཀློང་བརྟོལ་ནས། །སྣོད་ལྡན་འཁོར་ལ་བཀའ་སྩལ་པ། །རིག་འཛིན་གྲུབ་ཐོབ་བཀའ་རྟགས་ནི། །དོན་གྱིས་བརྒྱུད་དང་བྱིན་གྱིས་བརླབས། །བརྡའ་ཡིས་བསྟན་དང་ཚིག་གིས་མཚོན། །སྒྱུར་རྒྱལ་སྲས་ལ་སྲིད་གཏོད་འདྲ། །དེ་ཡང་རྡོ་རྗེ་སེམས་དཔའ་ཉོན། །དོན་གྱིས་ཁྱབ་དང་རྟོགས་པ་ཡི། །དབྱེ་བ་རྣམ་པ་གཉིས་བསྟན་པའི། །ཏིལ་ལ་མར་གྱིས་ཁྱབ་པ་བཞིན། །སངས་རྒྱས་སེམས་ཅན་མ་ལུས་ལ། །རང་བཞིན་ངོ་བོའི་ལུས་ཀྱིས་ཁྱབ། །དེ་ཕྱིར་དོན་གྱིས་ཁྱབ་པར་གསུངས། །དེ་དོན་རྟོགས་པས་བརྒྱུད་པ་ཡི། །སྔོན་གྱི་སངས་རྒྱས་ཀུན་བཟང་དེས། །འཁྲུལ་མ་མྱོང་ལ་རྟོགས་མྱོང་བའི། །གཞི་དང་ཡེ་ཤེས་དུས་མཉམ་ཤར། །དེ་ཕྱིར་ཀུན་ཏུ་བཟང་པོ་བྱ། །དེ་ཡང་རྡོ་རྗེ་སེམས་དཔའ་ཉོན། །སངས་རྒྱས་མྱ་ངན་འདས་པའི་གཞི། །རང་བྱུང་ངོ་བོ་ཉིད་སྐུ་དེ། །མ་མཛད་མ་བཅོས་རྒྱུས་མ་བསྐྱེད། །ནམ་མཁའི་མཐོངས་སུ་ཉི་ཤར་འདྲ། །གདོད་ནས་མ་རིག་སྐྱོན་མ་གོས། །ལུང་ལ་མ་བརྟེན་རིག་ཅིང་རྟོགས། །སངས་མ་རྒྱས་པའི་རིག་པ་ལ། །རང་བྱུང་ཡེ་ཤེས་དེ་ལ་བྱ། །དེ་ཡང་འདུས་པའི་སྙིང་པོ་ཉོན། །གང་ལ་ཡེངས་མེད་ཡང་དག་ཡོད། །སྒྲོ་སྐུར་མེད་པའི་རིག་པ་ནི། །དུས་གསུམ་གཅིག་པའི་ཆོས་སྐུ་ལ། །རང་ལ་རང་དུ་ཆོས་སྐུར་ཤེས། །ད་ལྟའི་རིག་པ་འདི་ཡིན་ཏེ། །དུས་རྣམས་ཀུན་ཏུ་འབྲལ་བ་མེད། །སྒྲོ་སྐུར་མེད་པའི་རིག་པ་གསལ། །ངོ་བོ་ཉིད་ཀྱི་སྐུ་ཞེས་བྱ། །ཀུན་བཟང་རྟོགས་པ་ངེས་པའི་དོན། །མིང་དང་དཔེ་དོན་ཉམས་ཀྱི་གྲངས། །དྲུག་གསུམ་ཆོས་སྐུ་གཅིག་ལ་རྫོགས། །དེ་ཡང་འདུས་པའི་སྙིང་པོ་ཉོན། །དེ་ཚེ་འཁོར་འདས་བར་དོ་ལ། །རྒྱུ་དང་འབྲས་བུ་ལུང་མ་བསྟན། །སེམས་ལས་མ་བྱུང་སངས་རྒྱས་ནི། །རང་བྱུང་ཀུན་ཏུ་བཟང་པོ་བྱ། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། ― DNG001_Page_0701 ―
[མ་དཔེ་གཟིགས་ན་འདིར་གནོན།]
རྟོགས་པའི་བརྒྱུད་པ་བསྟན་པའི་ལེའུ་སྟེ་བཅུ་བཞི་པའོ།། །།ཀུན་རིག་སྟོན་པས་ཡང་གསུངས་པ། །ངེས་དོན་བྱིན་རླབས་བརྒྱུད་པའི་དོན། །གང་ཕྱིར་བྱིན་རླབས་དཔེ་དང་ནི། །སྤྲུལ་པའི་དགོངས་པ་བརྡའ་ཡིས་ནི། །ཚིག་བརྒྱུད་ཡོན་ཏན་བཤད་ཀྱིས་ཉོན། །སེམས་དག་རིག་འཛིན་བསྐུལ་པའི་ཕྱིར། །སངས་རྒྱས་བཀའ་བགྲོས་ངེས་པའི་དོན། །ཡེ་ཤེས་རིག་པ་རང་གནས་ཕྱིར། །བྱིན་རླབས་སངས་རྒྱས་ཀུན་ལ་ཤར། །དེ་ཡི་མཚོན་དཔེ་བསྟན་པ་ནི། །ནམ་མཁའི་གཟའ་སྐར་ཤར་ཙམ་ན། །རྒྱ་མཚོའི་ནང་དུ་གཟུགས་བརྙན་འབྱུང་། །དེ་ཙམ་ཉིད་ན་ཐ་དད་མེད། །དེ་བཞིན་ཀུན་བཟང་བྱིན་རླབས་ཀྱིས། །སྐུ་གསུང་ཐུགས་ཀྱི་ཡོན་ཏན་ལས། །སྤྲུལ་པ་རྣམ་གསུམ་ཤུགས་ལས་འབྱུང་། །དེ་ཉིད་ཆོས་སྐུ་ཉིད་ཀྱི་རྩལ། །དེ་དོན་དགོངས་པ་རྣམ་གསུམ་གྱིས། །བསྟན་པའི་འཁོར་ནི་རྣམ་གསུམ་ལ། །དྲང་དོན་ལྡེམ་དགོངས་ངེས་པའི་ཆོས། །འདུས་པའི་འཁོར་ལ་ཅི་རིགས་བཤད། །དེ་ཡང་འདུས་པའི་སྙིང་པོ་ཉོན། །དང་པོ་ཆོས་སྐུའི་རྩ་བ་ནི། །རང་བྱུང་ངོ་བོ་ཉིད་སྐུ་དང་། །ས་བཅུའི་འཁོར་ལ་དགོངས་པས་བཤད། །ཚེགས་མེད་ངེས་དོན་རིག་པས་གོ། །དེ་དོན་ངེས་པར་དབྱེ་བ་ནི། །ལྔ་བཅུ་བདུན་གྱི་བརྡའ་བསྟན་ཕྱིར། །ཚིག་ཏུ་མ་བརྗོད་ཡིད་ལ་རྟོགས། །རིག་འཛིན་སྤྲུལ་པའི་སྤྱོད་ཡུལ་ཡིན། །དེ་ཡང་འདུས་པའི་སྙིང་པོ་ཉོན། །དགོངས་དང་རིག་པ་རྣ་བར་བརྒྱུད། །ཚིག་གི་སྒྲོན་མས་དོན་གོ་ཕྱིར། །ཕྱི་རབས་དད་ལྡན་རྣམས་ཀྱིས་གོ། །དེ་ཕྱིར་སངས་རྒྱས་ད་ལྟ་ཉིད། །དེ་ཡང་འདུས་པའི་སྙིང་པོ་ཉོན། །སྐྱེ་ཤི་གཉིས་ཀྱི་བར་དོ་ལ། །ཀུན་ཏུ་བཟང་པོའི་ཆོས་དྲུག་གིས། །དཔེ་དོན་རིག་པ་ཉམས་ལྡན་པས། །མ་རིག་དྲུག་བཅོམ་བདེན་པ་མཐོང་། །རྟོག་གཞི་ལ་སོགས་བཅུ་གཅིག་གིས། །འཁྲུལ་གཞི་ལ་སོགས་དགུ་པོ་ཡང་། །བརླག་ཅིང་སྟོངས་ཏེ་འཁོར་བ་མེད། །དེ་ཕྱིར་གོལ་སྒྲིབ་ ― DNG001_Page_0702 ―
[མ་དཔེ་གཟིགས་ན་འདིར་གནོན།]
མིང་མེད་དོ། །དེ་ཡང་འཁོར་གྱི་སྙིང་པོ་ཉོན། །ལུང་བསྟན་གདམས་ངག་མངོན་བསྟན་པས། །དེ་མ་ཐག་ཏུ་ཆོས་སྐུར་ཤེས། །རྣམ་སྨིན་ལུས་དང་མ་བྲལ་ཀྱང་། །སངས་རྒྱས་ས་ལ་ངེས་པར་འགྲོ། །རྫོགས་པ་ཆེན་པོ་ངེས་དོན་འདུས་པའི་ཡང་སྙིང་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ལས། རིག་འཛིན་གྲུབ་པ་ཐོབ་པའི་བཀའ་རྟགས་བསྟན་པའི་ལེའུ་སྟེ་བཅོ་ལྔ་པའོ།། །།ཀུན་རིག་སྟོན་པས་ཡང་གསུངས་པ། །ངེས་དོན་རིག་པའི་བྱིན་རླབས་ཀྱིས། །ངེས་དོན་གདམས་ངག་བསྟན་པ་དང་། །མི་རྟོག་ཙམ་དུ་བྱིན་རླབས་དང་། །ཐབས་ཀྱི་བདེ་བས་བྱིན་རླབས་དང་། །ཉམས་ཀྱི་བདུད་ཀྱིས་བྱིན་རླབས་ཕྱིར། །དེ་དོན་དབྱེ་བ་ཤིན་ཏུ་གཅེས། །དེ་ཡང་འདུས་པའི་སྙིང་པོ་ཉོན། །ངེས་དོན་གདམས་ངག་རྣམ་བཞི་སྟེ། །དང་པོ་གཞི་ངེས་ལྟ་བ་ལ། །སྣང་བ་མ་བཅོས་ཆོས་ཀྱི་དབྱིངས། །གོལ་ས་སྤོང་སྡུད་ཞེན་པ་སྟེ། །སྤོང་བ་དུག་དང་ཚེར་མ་འདྲ། །རང་ལུས་འབྱུང་བའི་དུག་ལྔ་ལ། །མི་རུང་བློ་ཡིས་སྤོང་བྱེད་པ། །གཉེན་པོ་མི་རྟག་བདག་མེད་དུ། །ཆེད་དུ་སྡུག་བསྔལ་སྤོང་བར་འདོད། །ཉོན་མོངས་རིས་སུ་སྤོང་བྱེད་པ། །རང་ལ་ཉོན་མོངས་གང་ཆེ་བ། །ཁ་བཀའ་གཉེན་པོས་སྤོང་བར་བྱེད། །གཉེན་ལ་ཉེ་རིང་བྱེད་པ་འདྲ། །ཉོན་མོངས་རྒྱུ་འབྲས་སྤོང་བྱེད་པ། །དགེ་བསྒྲུབ་སྡིག་སྤོང་འབྲས་བུ་ཚོལ། །བླང་དོར་རེ་དོགས་རྩོལ་བ་བྱེད། །འཇིག་རྟེན་སོ་ནམ་བྱེད་པ་འདྲ། །དེ་ཡང་འདུས་པའི་སྙིང་པོ་ཉོན། །སྡུད་པའི་རྟོག་པ་བསྟན་པ་ནི། །ཡུལ་སེམས་གཉིས་མེད་འདོད་པའི་ཆོས། །ཐམས་ཅད་རང་གི་སེམས་སུ་བསྡུ། །ཡུལ་སེམས་གཅིག་ཏུ་འདྲེ་མི་སྲིད། །བུ་རམ་རང་གིས་རོ་མི་མྱོང་། །སེམས་ཉིད་རང་སྣང་འདོད་པ་དེ། །ཕྱི་ནང་སེམས་ཀྱི་ཆོ་འཕྲུལ་གྱིས། །སྣང་བ་མ་ངེས་སྣ་ཚོགས་པ། །ཆུ་ནང་ཟླ་བ་ངོས་ཟིན་འདྲ། །ཆོས་ཀུན་སྟོངས་པར་འདོད་པ་དེ། །རང་གི་ ― DNG001_Page_0703 ―
[མ་དཔེ་གཟིགས་ན་འདིར་གནོན།]
སེམས་ཀྱིས་ཡུལ་གཞིག་ཀྱང་། །སྟོང་པར་སོང་བ་ཅི་ཡང་མེད། །སྲིན་འབུས་རི་རབ་བསྲེག་པ་འདྲ། །ཆོས་ཉིད་དོན་ནི་གང་རུང་ལ། །སྨྲར་མེད་བརྗོད་དུ་མེད་པར་འདོད། །གཡོ་སྒྱུ་ཅན་ནི་ཁས་མི་ལེན། །ཚུལ་འཆོས་ཅན་གྱི་སེམས་དང་འདྲ། །དེ་ཡང་འདུས་པའི་སྙིང་པོ་ཉོན། །ཡུལ་ལ་ཞེན་པའི་རྟོག་པ་དེ། །དང་པོ་གྲུབ་མཐའི་བློས་མ་བསྒྱུར། །མ་རིག་དབང་གིས་འཁྲུལ་པ་རྒྱས། །འཁོར་འདས་མི་ཤེས་གཏི་མུག་གིས། །ངོ་མི་ཤེས་པ་ཕྲད་པ་འདྲ། །ཡུལ་ལ་ཡེངས་པའི་རྟོག་པ་ནི། །ལྷ་མི་རྣམས་ནི་ཤེས་པ་རྩིང་། །ཁ་དོག་དབྱིབས་ཀྱི་འདོད་ཡོན་ལ། །རྟོག་པ་མང་བས་སྤྱོད་པ་ཡེངས། །རྨ་བྱས་མདངས་ལ་བལྟ་བ་འདྲ། །ཆོས་བརྒྱད་དམ་པར་བལྟ་བ་དེ། །བསྟོད་སྨད་ལ་སོགས་ཆོས་རྣམས་ལ། །དམ་པར་ཞེན་པའི་བློ་འཛིན་པས། །རང་རྒྱུད་གོལ་ས་ཡིན་པར་ངེས། །བུ་གཅིག་པ་ཡི་ཕ་མ་འདྲ། །སྐྱེ་རྒ་ན་འཆིས་མི་འཇིགས་པའི། །མ་རིག་བླུན་པོ་ཞེ་སྡང་ཅན། །གཟུང་འཛིན་འདི་ཡི་རྟོག་པས་ཕུང་། །ཕྱི་མ་དམྱལ་བས་མི་འཇིགས་པས། །རྒྱལ་པོས་བསྒོ་བའི་གཤེད་མ་འདྲ། །དེ་ཡང་འདུས་པའི་སྙིང་པོ་ཉོན། །སྤོང་སྡུད་ཞེན་པ་དེ་དག་ཀྱང་། །གཞི་ལ་མེད་པར་མ་ཤེས་པས། །འཁྲུལ་པའི་ཆོས་ལ་བདེན་འཛིན་ཕྱིར། །སྣང་བ་ཆོས་དབྱིངས་གོལ་སར་གསུངས། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། ཆོས་ཀྱི་དབྱིངས་ཀྱི་གོལ་ས་བསྟན་པའི་ལེའུ་སྟེ་བཅུ་དྲུག་པའོ།། །།ཀུན་རིག་སྟོན་པས་ཡང་གསུངས་པ། །སྣང་བ་མ་བཅོས་ཆོས་དབྱིངས་ནི། །སྟེང་འོག་བར་གྱི་དབྱེ་བའི་ཕྱིར། །ཆོས་ཀྱི་དབྱིངས་ནི་བསྟན་པ་ཡིན། །དེ་ཡང་འདུས་པའི་སྙིང་པོ་ཉོན། །སྟེང་གི་ཆོས་དབྱིངས་ཆོས་སྐུར་གཅིག །བར་དུ་ཡེ་ཤེས་སྒྱུ་མའི་དབྱིངས། །འོག་ཏུ་སྣང་བ་འབྱུང་བའི་དབྱིངས། །གཅིག་ལ་ཐ་དད་ངོས་ཟིན་ན། །འགལ་བ་མེད་དེ་ཀུན་ཀྱང་དབྱིངས། །ད་ལྟ་སྣང་བའི་ཆོས་རྣམས་ལ། །མི་བརྟག་མི་གཟུང་མི་འབྲང་བར། ། ― DNG001_Page_0704 ―
[མ་དཔེ་གཟིགས་ན་འདིར་གནོན།]
སྒོ་ལྔ་མི་དགག་རང་ཡན་ལ། །རིག་པ་གང་དྲན་དབྱིངས་ནས་འཕྱོ། །གང་ཡང་རུང་བ་ཅི་ལ་ཡང་། །སྒྲོ་སྐུར་མེད་པ་ཆོས་དབྱིངས་ཡིན། །དེ་ཡང་འདུས་པའི་སྙིང་པོ་ཉོན། །རིག་པ་དངོས་མེད་ཆོས་སྐུ་ཡི། །གནས་ནི་ནམ་མཁའི་ཀློང་ན་འཕྱོ། །ཡིན་དང་མིན་གྱིས་ཅི་ཞིག་བྱ། །ཆོས་ཀྱི་དབྱིངས་ཞེས་དེ་ལ་གདགས། །འཁྲུལ་པའི་རྟོག་པས་གཞི་མི་འགྱུར། །བཙལ་བའི་བསམ་པས་དབྱིངས་མི་བསྐྱོད། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ལས། གོལ་མེད་སྣང་བ་མ་བཅོས་ཆོས་ཀྱི་དབྱིངས་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །རིག་པ་མ་བསླད་ཆོས་སྐུ་ཡི། །རང་བཞིན་ངོ་བོ་ཉིད་ཀྱི་སྐུ། །རྒྱུ་རྐྱེན་མ་བསྐྱེད་འགྱུར་བ་མེད། །འདུས་མ་བྱས་པའི་ནམ་མཁའ་འདྲ། །དེ་ཡི་རྟོགས་ཚུལ་ཡེ་ཤེས་ཏེ། །བསྒོམ་སྒྲིན་སྒྲོ་སྐུར་མ་བཏགས་པ། །ཀུན་བཟང་རང་རིག་ཆོས་སྐུར་རྟོགས། །རི་བོ་ཏ་ལའི་ཉི་ཤར་འདྲ། །དེ་ཡིས་དེ་ཉིད་མཚོན་པའི་དང་། །མཐའ་དབུས་མེད་པས་ནམ་མཁའ་འདྲ། །རྣམ་རྟོག་འཇོམས་པས་རྡོ་རྗེ་འདྲ། །སྐྱེ་བ་མེད་པས་ཨ་དང་འདྲ། །དེ་ཡི་ངེས་པའི་གཏན་ཚིགས་ནི། །རང་བྱུང་འཁོར་བར་འཁྱམས་མ་མྱོང་། །དེ་རྟོགས་ད་ལྟ་ཉིད་དུ་ཡང་། །མཐའ་བྲལ་མངོན་གྱུར་བདེན་པ་མཐོང་། །དེ་ཡི་ལྡོག་ཐབས་ངེས་པ་ནི། །མཐུན་དང་མི་མཐུན་གཉིས་ལོག་པས། །གོལ་སྒྲིབ་སྐྱོན་གྱིས་མ་གོས་ཕྱིར། །སེམས་ལས་མ་བྱུང་ཆོས་སྐུར་གསུངས། །དེ་ཡི་མཚན་ཉིད་ངེས་པ་ནི། །གང་དང་འདྲ་མེད་ཡིན་པ་མེད། །ཡིན་ནི་ད་ལྟའི་ཤེས་པ་ལ། །དེ་ཡི་དོན་ཀུན་གནས་པའི་དོན། །དེ་ཕྱིར་འབྲལ་བ་མེད་པའི་མཆོག །ལ་བཟླས་སྤང་བླང་མེད་ཤེས་པས། །སྐྱོན་ཡོན་ཐམས་ཅད་མེད་པར་དག །དེ་ཕྱིར་དུས་འདིར་འབྲས་བུ་འགྲུབ། །ཕྱི་མར་སངས་རྒྱས་སྨོས་ཅི་དགོས། ། ― DNG001_Page_0705 ―
[མ་དཔེ་གཟིགས་ན་འདིར་གནོན།]
དེ་ཡང་འདུས་པའི་སྙིང་པོ་ཉོན། །ཆོས་དབྱིངས་ཆོས་སྐུ་གཅིག་གི་ངང་། །རང་བྱུང་རིག་པའི་ཡེ་ཤེས་དེ། །ཉི་ཟླ་གཟས་ཟིན་དཔེ་བཞིན་དུ། །དོན་ཀུན་དུས་གཅིག་ཡོན་ཏན་རྫོགས། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། རིག་པ་མ་བསླད་ཆོས་ཀྱི་སྐུར་བསྟན་པའི་ལེའུ་སྟེ་བཅོ་བརྒྱད་པའོ།། །།ཀུན་རིག་སྟོན་པས་ཡང་གསུངས་པ། །མ་བསྒོམས་འབྲལ་མེད་བསྟན་པའི་དོན། །དང་པོ་ཀུན་གཞི་ཤན་ཕྱེ་ལ། །བར་དུ་ཆོས་སྐུ་ངོས་གཟུང་བ། །ཐ་མ་ལ་ཟློས་བདེན་པ་མཐོང་། །དེ་ཡང་འདུས་པའི་སྙིང་པོ་ཉོན། །དང་པོ་རང་རིག་ཀུན་གཞི་ནི། །སྔ་ཕྱི་རྟོགས་དང་ཆོས་སྐུ་རུ། །ལུང་ལྡན་བླ་མས་ཤན་ཕྱེ་ལ། །ཐ་མས་བརྟེན་བཅས་མ་བསྒྲིབས་པའི། །མཚན་ཉིད་བཞི་ལྡན་ཆོས་སྐུར་ཤེས། །གོལ་ས་བཞི་ཆོད་གདེང་དང་ལྡན། །དེ་ཕྱིར་ལྷག་མཐོང་ངེས་པ་རྙེད། །ཡེ་ནས་གནས་པའི་རང་བྱུང་དེ། །ངོ་ཤེས་དོན་དང་འབྲལ་མེད་ཕྱིར། །རྒྱུན་དུ་གནས་པས་སངས་རྒྱས་ས། །དེ་ཡང་འདུས་པའི་སྙིང་པོ་ཉོན། །དེ་དག་བསྒོམ་པའི་དབྱེ་བ་ནི། །གསལ་བ་མི་རྟོག་མི་གཡོ་བ། །དབྱེ་བ་རྣམ་པ་དགུ་དགུར་ནི། །རྒྱུན་དུ་འབྲལ་མེད་གཏན་ལ་འབེབས། །དེ་དག་རྩ་བ་མདོར་བསྡུ་ན། །སྒོ་ལྔ་གསལ་བ་མར་མེ་འདྲ། །རིག་པ་མི་གཡོ་མཚོ་གཏིང་འདྲ། །མི་རྟོག་བྱ་བ་བཏང་བ་འདྲ། །དེ་གསུམ་ཆོས་ཉིད་གཅིག་ལ་རྫོགས། །གང་མཐོང་དྲན་པ་མ་འཁྲུལ་པ། །ཆོས་སྐུ་ངོས་ཟིན་དོན་ལྡན་པས། །དེ་ཕྱིར་ཐིག་ལེ་ཉག་གཅིག་ལ། །མ་འདུས་པ་ནི་གཅིག་ཀྱང་མེད། །རྫོགས་པ་ཆེན་པོ་ངེས་དོན་འདུས་པའི་ཡང་སྙིང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་རིན་པོ་ཆེ་གསེར་གྱི་ཡང་ཞུན་ལས། རྒྱུན་ཏུ་འབྲལ་མེད་ཀྱི་བསྒོམ་པ་ངོས་གཟུང་བསྟན་པའི་ལེའུ་སྟེ་བཅུ་དགུ་པའོ།། །།ཀུན་རིག་སྟོན་པས་ཡང་གསུངས་པ། །རྒྱུན་དུ་འབྲལ་མེད་རིག་སྤྱོད་ནི། །དུས་ནི་བཞི་གསུམ་གསུངས་པ་ཡང་། །སྤྱི་ཡི་མཚན་ཉིད་ཡིན་པའི་ཕྱིར། །ཚིག་ཏུ་བདེན་ཏེ་དོན་ལས་གོལ། །དེ་ཡང་ ― DNG001_Page_0706 ―
[མ་དཔེ་གཟིགས་ན་འདིར་གནོན།]
རྡོ་རྗེ་སེམས་དཔའ་ཉོན། །ཡེ་ཤེས་རང་ཤར་གདམས་ངག་གིས། །ཡུལ་ནི་མ་ཡེངས་དྲན་པ་དེ། །མ་འཁྲུལ་རིག་པ་ཆོས་སྐུར་ཤེས། །དེ་ཕྱིར་གདམས་ངག་དུས་འདིར་རྟོགས། །མངོན་གྱུར་སངས་རྒྱས་ད་ལྟ་ཉིད། །དེ་ཡང་འདུས་པའི་སྙིང་པོ་ཉོན། །དང་པོ་རིག་སྤྱོད་དབྱེ་བའི་དོན། །རྒྱུ་དང་གོལ་ས་གདམས་ངག་དང་། །ཉམས་དང་ལ་བཟླ་འབྲས་བུ་སྟེ། །རེ་རེ་ལ་ནི་དྲུག་དྲུག་ཏུ། །ཕྱེ་ལ་བསྟན་གྱིས་ཡིད་ལ་ཟུང་། །བདེ་བའི་ཡེ་ཤེས་རྣམ་གསུམ་གྱི། །ནང་གི་བདེ་བ་རྐྱེན་ཐུབ་གྲངས། །བལྟ་མེད་ཞི་གནས་འགོག་པ་ལ། །བདག་མེད་མི་གཡོ་རྣམ་གསུམ་གྱི། །རང་ཡན་ལྷག་མཐོང་མི་བརྗེད་གཟུང་། །མཐའ་བྲལ་ཡེ་གསལ་གདེང་གིས་ཟིན། །བདག་ཉིད་གཞི་ལ་མེད་པར་ཤེས། །དེ་ཉིད་བདེ་གསལ་ཡེ་ཤེས་སྐུ། །འདུ་འཛི་ལོངས་སྤྱོད་བདེ་བ་ནི། །ཡོ་བྱད་རྣམ་གསུམ་ལྡན་པ་སྟེ། །འདོད་ཡོན་ལྔ་ལ་རང་རྒྱུད་ཞེན། །གང་མཐོང་མ་འཁྲུལ་དོན་ཤེས་པས། །གང་ཡང་མྱོང་བ་རིག་པར་ཤེས། །བདག་གཞན་གཞི་ལ་མ་གྲུབ་པས། །བདེ་བ་ལོངས་སྤྱོད་ཆོས་ཉིད་རྒྱན། །ཕོ་མོ་བདེ་བའི་གྲངས་བསྟན་པ། །འགྲོ་བ་བཟང་མོར་ཡིད་ཆགས་པ། །ཐབས་དང་རང་རྒྱུད་ཆགས་སྤྱོད་གོལ། །སྔ་ཕྱིར་མ་ངེས་དོན་ཟིན་པའི། །དེ་ཚེ་བདེ་བའི་མཐར་མ་ལྟུང་། །ཕོ་མོ་གཞི་ལ་གྲུབ་པ་མེད། །ལུས་བདེ་ལོངས་སྤྱོད་རིག་པའི་སྐུ། །དེ་ཡང་འདུས་པའི་སྙིང་པོ་ཉོན། །དེ་དག་བདེ་བ་རྣམ་གསུམ་ཀྱང་། །སྤྱོད་བདེ་དོན་དངོས་སྤྱད་གྱུར་ཀྱང་། །གནས་སྐབས་འདྲེལ་ཡོད་མཐར་ཐུག་མེད། །དེ་ཕྱིར་གདེང་ཟིན་ཀུན་གྱིས་སྤྱོད། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། བདེ་བ་ཡེ་ཤེས་སུ་རྐྱེན་ཐུབ་པར་བསྟན་པའི་ལེའུ་སྟེ་ཉི་ཤུ་པའོ།། །།ཀུན་རིག་སྟོན་པས་ཡང་གསུངས་པ། །སྡུག་བསྔལ་སྣ་ཚོགས་འབྱུང་བ་གསུམ། །དེ་ལ་ ― DNG001_Page_0707 ―
[མ་དཔེ་གཟིགས་ན་འདིར་གནོན།]
ཕྱི་ལུས་སྡུག་བསྔལ་གྲངས། །ནད་ནི་བཞི་བརྒྱ་རྩ་བཞི་ལ། །ཡེ་འགྲོག་འཁད་པ་རྣམ་གསུམ་ཡིན། །གང་ན་ལྷག་མཐོང་དོན་གྱིས་ཟིན། །དེ་ཚེ་མཐའ་བྲལ་ཆོས་སྐུར་མཐོང་། །ལུས་དང་ན་ཚ་གཞི་ལ་མེད། །སྡུག་བསྔལ་དེ་ཉིད་སྤྲུལ་སྐུར་ཤར། །སེམས་ཀྱི་སྡུག་བསྔལ་གྲངས་གསུངས་པ། །ཆགས་སྡང་རྣམ་གཉིས་ཡིན་པའི་ཕྱིར། །གོལ་སར་སྐྱོན་བཞི་དམ་པར་འཛིན། །མི་གཞིག་མི་བཅོམ་དྲན་པས་ཟིན། །གང་ལ་ཞེན་ཙམ་རིག་པས་ཟིན། །དེ་ཙམ་ཉིད་ན་གཞི་ལ་མེད། །དེ་ཚེ་སྡུག་བསྔལ་སྤྲུལ་པར་ཤེས། །སྤྱི་ཡི་སྡུག་བསྔལ་རྣམ་བཞིའོ། །མ་རིག་རྐྱེན་བཞིས་བསྐྱེད་པ་ཡི། །ཉོན་མོངས་བག་ཆགས་བསགས་པས་གོལ། །སྔ་ཕྱི་མེད་ཤེས་གདམས་ངག་གིས། །མཚན་ཉིད་བཞི་ལྡན་ཉམས་སུ་མྱོང་། །གཞི་ལ་སྔ་ཕྱི་དོན་ལ་མེད། །དེ་ཕྱིར་འབྲས་བུ་ཆོས་ཀྱི་སྐུ། །དེ་ཡང་འདུས་པའི་སྙིང་པོ་ཉོན། །སྡུག་བསྔལ་ཉིད་ཀྱང་བདེ་བའི་ཀློང་། །དོན་ལ་ཡེ་ཤེས་འདུ་འབྲལ་མེད། །ད་ལྟའི་རིག་པ་འདི་ཉིད་ཡིན། །དེ་ཕྱིར་སྡུག་བསྔལ་བདེ་བའི་ཀློང་། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། སྡུག་བསྔལ་ཞི་བྱེད་ཆོས་སྐུར་རྐྱེན་ཐུབ་པར་བསྟན་པའི་ལེའུ་སྟེ་ཉེར་གཅིག་པའོ།། །།དེ་ཡང་རྡོ་རྗེ་སེམས་དཔའ་ཉོན། །བཏང་སྙོམས་རང་བཞིན་རྐྱེན་ཐུབ་གྲངས། །ལེ་ལོ་སྙོམས་ལས་ལུང་མ་བསྟན། །བཏང་སྙོམས་ཤེས་པ་མ་རིག་བསྒྲིབས། །ཤན་ཕྱེད་ངོས་ཟིན་ཡིད་ཆེས་པས། །རང་རིག་འབྲལ་མེད་ཉམས་དང་ལྡན། །མ་རིག་མེད་ཕྱིར་བཏང་སྙོམས་མེད། །ལྷག་མཐོང་འབྲས་བུ་བདེན་པ་མཐོང་། །དེ་ཡང་འདུས་པའི་སྙིང་པོ་ཉོན། །གཉིད་ནི་ཆོས་སྐུ་ཀློང་ཐིམ་གྱིས། །བག་ཉལ་གཞི་གནས་མ་རིག་པས། །རྨི་ལམ་རྣམ་གསུམ་ཡུལ་ལ་ཞེན། །ལྡོག་ཀ་སད་དུས་དེ་ཉིད་ཤེས། །དེ་ཙམ་ཉིད་ན་ཉམས་མྱོང་གསལ། །དོན་ལ་རྨི་ལམ་གྲུབ་མེད་རྟོགས། ། ― DNG001_Page_0708 ―
[མ་དཔེ་གཟིགས་ན་འདིར་གནོན།]
འབྲས་བུ་མི་རྟོག་ཆོས་སྐུར་ཤར། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། བཏང་སྙོམས་གཉིད་ཡེ་ཤེས་ཀློང་ཐིམ་དུ་བསྟན་པའི་ལེའུ་སྟེ་ཉེར་གཉིས་པའོ།། །།ཀུན་རིག་རྒྱལ་པོས་ཡང་གསུངས་པ། །གཏི་མུག་རང་གྲོལ་བསྟན་པའི་གྲངས། །མ་རིག་ཤེས་གཞི་ལུང་མ་བསྟན། །གང་ཡང་མི་ཤེས་གཏི་མུག་སེམས། །ལུང་ལྡན་སྒྲོན་མས་དོན་བསྟན་པས། །རང་རིག་ཆོས་སྐུ་ཡིད་ལ་བསྟར། །གཞི་དང་ཕྲད་པས་མུན་པ་བརླག །འབྲས་བུ་ཆོས་ཉིད་ཐམས་ཅད་མཁྱེན། །དེ་ཡང་རྡོ་རྗེ་སེམས་དཔའ་ཉོན། །ཞེ་སྡང་རང་གྲོལ་གྲངས་བསྟན་པ། །ཡུལ་ངན་ཁ་དོག་སྨྲ་བ་ལ། །ཞེ་སྡང་སེམས་དཀྲུགས་བཟོད་པ་ཉམས། །མི་བསམ་ཡུལ་གྱི་རྗེས་མི་གཅོད། །དེ་དུས་རྟག་ཆད་མཐའ་བྲལ་ཉམས། །བདག་གཞན་གཞི་ལ་གྲུབ་པ་མེད། །འབྲས་བུ་རང་རིག་སྤྲུལ་སྐུར་ཤར། །ང་རྒྱལ་རེངས་བྱེད་གྲངས་བསྟན་པ། །གཞན་དག་བརྡེག་བསད་སྨྲ་བ་ལས། །ང་བདེན་རྨོངས་པ་ཆེད་དུ་བྱེད། །གང་ཡང་བདེན་མེད་དོན་དྲན་པས། །དེ་ཉིད་རིག་པར་ཤེས་པའི་ཉམས། །ཚིག་གིས་ཆེས་ཆུང་གཞི་ལ་མེད། །དོན་ལྡན་ང་རྒྱལ་ཆོས་སྐུར་ཤར། །དེ་ཡང་འདུས་པའི་སྙིང་པོ་ཉོན། །ཕྲག་དོག་རང་གྲོལ་གྲངས་བསྟན་པ། །གཞན་གྱི་ཕུན་སུམ་ཚོགས་པ་ལ། །གཡོ་སྒྱུས་གཞན་ལ་ཐབས་ཀྱིས་སྨོད། །བདག་དང་གཞན་མེད་ཆོས་ཀྱི་སྐུ། །ཕྲག་དོག་རང་གྲོལ་ཆོས་སྐུར་མྱོང་། །དེ་ཙམ་ཉིད་ན་བདག་གཞན་མེད། །གཡོ་སྒྱུ་མ་བྲལ་ལོངས་སྤྱོད་རྒྱན། །དེ་ཡང་འདུས་པའི་སྙིང་པོ་ཉོན། །དངོས་པོ་མ་འཁྲུལ་གནས་ལུགས་ལ། །ཚོར་བ་བདེ་སྡུག་ཅི་བྱུང་ཡང་། །དེ་དུས་ཆོས་སྐུར་ཉམས་སུ་མྱོང་། །དེ་ཚེ་ཡུལ་དང་འདྲེལ་མེད་ཤེས། །དེ་ཕྱིར་རྐྱེན་ཐུབ་བསྒོམ་མི་དགོས། །རྫོགས་པ་ཆེན་པོ་ངེས་དོན་འདུས་པའི་ཡང་སྙིང་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། དུག་ལྔ་རང་ ― DNG001_Page_0709 ―
[མ་དཔེ་གཟིགས་ན་འདིར་གནོན།]
གྲོལ་དུ་བསྟན་པའི་ལེའུ་སྟེ་ཉེར་གསུམ་པའོ།། །།ཀུན་རིག་སྟོན་པས་ཡང་གསུངས་པ། །སྲིད་པའི་བར་དོ་རྣམ་ལྔ་ལ། །མ་རིག་འཁྲུལ་པའི་བར་དོ་དང་། །ཀུན་བརྟགས་དགེ་བའི་བར་དོ་དང་། །གནས་འགྱུར་ལྷ་ཡི་བར་དོ་དང་། །རྣམ་ཤེས་རླུང་ཞོན་བར་དོ་དང་། །མངོན་གྱུར་ཡེ་ཤེས་བར་དོའོ། །མ་རིག་འཁྲུལ་པའི་བར་དོ་ནི། །རྒྱུ་ནི་མ་རིག་རྣམ་གསུམ་སྟེ། །རྐྱེན་ནི་ཆགས་སྡང་གཉིས་ཀྱིས་གོལ། །གོལ་ས་བར་དོར་ལུས་གསུམ་འདུས། །སྡུག་བསྔལ་སྣ་ཚོགས་ཉམས་སུ་མྱོང་། །སྐྱེ་རྒས་སྡུག་བསྔལ་ཟད་དུས་མེད། །དེ་ལས་ཐར་ཅིང་ལྡོག་འདོད་པས། །ཀུན་བརྟགས་དགེ་རྩ་འདིར་བྱས་པས། །དགེ་བཅུ་སྦྱིན་སོགས་དད་པས་སྤྱད། །ཕྱི་མར་འབྲས་བུ་འདོད་པའི་བློས། །རྒྱུ་མཐུན་བག་ཆགས་མཐུ་བརྟས་པས། །ལྷ་དང་མི་ཡི་གོ་འཕང་ཙམ། །སྨོན་ལམ་དབང་གིས་མཐའ་བཙན་ཀྱང་། །དགེ་བའི་སྟེགས་ཟད་འཁོར་བར་འཁྱམས། །དེ་ཡང་འདུས་པའི་སྙིང་པོ་ཉོན། །གནས་འགྱུར་ལྷ་ཡི་བར་དོ་ལ། །རྟོགས་དང་ལྷ་གསལ་དུས་མཉམ་ནས། །སྐུ་གསུམ་གཅིག་ལ་གཅིག་ཚང་ནས། །འབྲས་བུའི་སངས་རྒྱས་དུས་དེ་ཉིད། །མ་རྟོགས་ལྷ་བསྒོམ་རཱུ་ཏྲར་སྐྱེ། །དེ་ཡང་འདུས་པའི་སྙིང་པོ་ཉོན། །རྣམ་ཤེས་རླུང་ཞོན་བར་དོ་ལ། །ཕྱི་ནང་རླུང་གི་བདེ་གོམས་པས། །ཕག་མོ་ལ་སོགས་འཕོ་བ་བདུན། །འོད་གསལ་ཡེ་ཤེས་སྐུར་འདོད་པ། །ཐབས་ལམ་ཡིན་ཕྱིར་ངེས་དོན་མིན། །དེ་ཡང་འདུས་པའི་སྙིང་པོ་ཉོན། །མངོན་གྱུར་ཡེ་ཤེས་བར་དོ་ལ། །རྒྱུ་ནི་ལུང་ལྡན་གདམས་ངག་སྟེ། །བྱིན་རླབས་རྗེས་དྲན་རྣམ་དྲུག་གིས། །མ་རིག་སངས་ལ་རིག་པ་རྒྱས། །ཐམས་ཅད་མཁྱེན་པའི་འབྲས་བུར་ལྡན། །འགྲོ་དོན་གཟུགས་སྐུ་ཤུགས་ལ་འཆར། །བཙལ་བ་མེད་པར་དོན་རྣམས་གྲུབ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ལས། སྲིད་ ― DNG001_Page_0710 ―
[མ་དཔེ་གཟིགས་ན་འདིར་གནོན།]
པ་བར་དོ་ལ་སྐྱེ་བ་ཕྱིས་མི་ལེན་པར་བསྟན་པའི་ལེའུ་སྟེ་ཉེར་བཞི་པའོ།། །།དེ་ཡང་རྡོ་རྗེ་སེམས་དཔའ་ཉོན། །དེ་ལྟར་མ་རྟོགས་བྱིན་བརླབས་པས། །དབུ་མ་མན་ཆད་ལྟ་སྒོམ་སྟེ། །འཁོར་འདས་ཆོས་ཀུན་སེམས་སུ་བསྡུས། །རིག་པས་རྟག་ཆད་མཐའ་བསལ་ཏེ། །མི་དམིགས་ཙམ་ལ་བསྒོམ་པའི་ཐབས། །བྱིང་རྒོད་གཉིས་ཀྱི་སྐྱོན་བསལ་ལ། །ཏིང་ངེ་མེར་རེ་རང་གསལ་ཙམ། །ཡང་ནས་ཡང་དུ་གོམས་པར་བྱེད། །མཐུན་འཇུག་ཐབས་ཀྱི་སྤྱོད་པ་ཡང་། །འོག་མའི་ཆོས་དང་སྒོ་བསྟུན་ཕྱིར། །དགེ་སྡིག་ཤན་མདངས་ཕྱེད་པར་སྤྱོད། །དེ་ཚེ་དོན་གྱིས་ཟིན་པར་བྱ། །ལྟ་སྒོམ་སྤྱོད་པ་འཛོམ་པའི་ཚེ། །འབྲས་བུ་ཚོགས་གཉིས་ནམ་རྫོགས་ན། །སྒྲིབ་གཉིས་སྦྱངས་ནས་སངས་རྒྱས་འདོད། །དེ་ལས་ལྷག་པའི་ཆོས་མེད་ཟེར། །རི་དྭགས་སྨིག་རྒྱུ་བསྙེགས་ལྟར་འཁྲུལ། །དེ་ཡང་འདུས་པའི་སྙིང་པོ་ཉོན། །ཐབས་ཀྱིས་རིག་པ་བྱིན་བརླབས་པ། །སྨན་དང་ཡིག་འབྲུ་དབང་གི་དུས། །རྩ་དང་ཐིག་ལེ་བདེ་བསྒོམ་པས། །ཤེས་པ་འགྱུར་ནས་བདེ་ལ་ཞེན། །དེ་ཕྱིར་མི་གྲོལ་ཤིན་ཏུ་འཆིང་། །མི་རྟོག་ཐབས་ཀྱིས་བདེ་འདོད་གོལ། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། འོག་མའི་བསྒོམ་པ་གོལ་བར་བསྟན་པའི་ལེའུ་སྟེ་ཉེར་ལྔ་པའོ།། །།ཀུན་རིག་སྟོན་པས་ཡང་གསུངས་པ། །ལྟ་མེད་ཞི་གནས་ཞེན་པ་ལ། །བདུད་བྱུང་བར་ཆད་ཞེན་ལས་བྱུང་། །ཟིལ་གནོན་གདམས་ངག་ངས་བཤད་ཉོན། །རྣལ་འབྱོར་ལྟ་མེད་ཉམས་ཞེན་པ། །བདུད་ཀྱི་ཆོ་འཕྲུལ་མངོན་ཤེས་འབྱུང་། །དེ་ཚེ་ལྟ་སྒོམ་སྤྱོད་ཉམས་བདུད། །བར་དུ་བཅད་ནས་འཁོར་བར་འཁྱམས། །དེ་བཟློག་དོན་དུ་གདམས་ངག་གིས། །བཅོ་བརྒྱད་ཡོན་ཏན་ཆེན་པོ་ནི། །ཟིལ་ནོན་རྟོགས་དང་འབྲས་བུ་ཡིས། །དོན་ལྡན་ངེས་པའི་སངས་རྒྱས་འབྱུང་། །དེ་ཡང་འདུས་པའི་སྙིང་པོ་ཉོན། །ལྟ་བའི་བདུད་ནི་རྣམ་བཞི་སྟེ། །སྣང་བ་འོད་དང་གྲག་པ་སྒྲ། ། ― DNG001_Page_0711 ―
[མ་དཔེ་གཟིགས་ན་འདིར་གནོན།]
འཇིགས་པ་གཟུགས་དང་བསླུ་བ་རྫུན། །རེ་རེ་ལ་ནི་དྲུག་དྲུག་ཏུ། །རྒྱུ་དང་ཞུགས་པ་ཉེས་དམིགས་དང་། །ཟིལ་གནོན་རྟགས་དང་འབྲས་བུར་གསུངས། །སྣང་བ་འོད་ཀྱི་བདུད་བྱུང་ན། །ལྟ་བ་མུན་ལས་སྣང་འབྱུང་བས། །དགེ་སྡིག་མཐོང་བས་སྙིང་རྗེ་ཞུགས། །འགྲོ་དོན་བྱ་མནོ་ཏིང་འཛིན་བཏང་། །དངོས་མེད་ལྷག་མཐོང་མི་གཡོ་དྲན། །གཞི་ལ་མེད་པས་གཞའ་ཚོན་འདྲ། །དམྱལ་བའི་གནས་ཀྱང་སངས་རྒྱས་ཞིང་། །དེ་ཡང་འདུས་པའི་སྙིང་པོ་ཉོན། །གྲག་པ་སྒྲ་ཡི་བདུད་བྱུང་ན། །མཁའ་ལ་སྒྲ་དང་ཆོས་སྟོན་འབྱུང་། །དགའ་བས་ངོམས་ཞིང་ཏིང་འཛིན་བཏང་། །གདེང་བྲལ་བསྡུ་ཞིང་བདུད་དབང་སོང་། །བཀའ་འགལ་ཆོས་བརྒྱད་འཁོར་བར་ལྟུང་། །ལྟ་བའི་གདེང་ཟིན་སྒྲ་དང་བྲལ། །སྒྲ་སྙན་རྟགས་མེད་རྗེས་མི་འབྲང་། །ཚེར་ལྷང་གསུང་གི་འཁོར་ལོ་བདེ། །འཇིགས་པ་གཟུགས་ཀྱི་བདུད་བྱུང་ན། །རྨི་ལམ་དངོས་སུ་འཇིགས་པའི་གཟུགས། །མི་དགའ་དོན་བྲལ་མོ་ཆོག་བྱེད། །སེམས་ངན་ཚེ་ཐུང་མི་ཆད་ལྟུང་། །སྣང་གཟུགས་གཞི་ལ་མེད་པར་ཤེས། །སྙིང་པོ་མེད་ཤེས་ཉམ་མི་ང་། །དེ་ཉིད་ཐུབ་དྲུག་སྤྲུལ་སྐུར་ཤེས། །ད་ཡང་འདུས་པའི་སྙིང་པོ་ཉོན། །བསླུ་བ་རྫུན་གྱི་བདུད་བྱུང་ན། །དུས་གསུམ་ཉེས་ལེགས་སྟོན་པ་འབྱུང་། །བདེན་དང་མི་བདེན་ཐ་མ་རྫུན། །མངོན་ཤེས་རྡུགས་པས་ཞེ་སྡང་སྐྱེ། །ཚིག་ལས་འདས་ཕྱིར་རྫུན་མ་གྲུབ། །རྨི་ལམ་བཞིན་དུ་འཁྲུལ་པར་ཤེས། །དོན་རྟོགས་ཅི་སྨྲས་རྒྱལ་བའི་བཀའ། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། ལྟ་བའི་བདུད་ཟིལ་གྱིས་ནོན་པའི་རྟགས་དང་འབྲས་བུ་བསྟན་པའི་ལེའུ་སྟེ་ཉེར་དྲུག་པའོ།། །།ཀུན་རིག་སྟོན་པས་ཡང་གསུངས་པ། །བསྒོམ་པའི་བདུད་ནི་རྣམ་བཞི་ཡི། །བྱིང་བ་གསལ་བའི་བདུད་བྱུང་ན། །དོན་མེད་ནན་ཏན་འབད་ནས་བསྒོམ། །མྱོས་པའི་དབང་གིས་གསལ་བ་བྱིང་། །གཉེན་པོ་གསལ་བའི་དོན་དང་བྲལ། །གཉིད་གསུམ་བསྲེས་པས་གཏི་མུག་བརླག ། ― DNG001_Page_0712 ―
[མ་དཔེ་གཟིགས་ན་འདིར་གནོན།]
ཆོས་ཉིད་ཀློང་དུ་གཉིད་ཐིམ་ཤེས། །སངས་རྒྱས་ཡེ་ཤེས་ཀློང་དུ་བྱིང་། །རྨུགས་པ་བདེ་བའི་བདུད་བྱུང་ན། །ལུང་ལྡན་ཆོས་སྐུ་ངོས་མ་ཟིན། །ཤེས་པ་རྨུན་པོ་ལྷག་མཐོང་མེད། །བསྒོམ་པ་བྱས་ཀྱང་གཏི་མུག་འཕེལ། །རང་རིག་དྲན་པས་ཡེ་ཤེས་གསལ། །ལྟ་བས་ཟིན་ཕྱིར་བདེ་བར་ཤར། །འབྲས་བུ་ཡེ་ཤེས་འགྱུར་མེད་ཀློང་། །དེ་ཡང་འདུས་པའི་སྙིང་པོ་ཉོན། །རྒོད་པ་མི་རྟོག་བདུད་བྱུང་ན། །གདམས་ངག་མེད་ཕྱིར་འདུས་པར་དགའ། །དོན་བཏང་ནས་ནི་མི་ཆོས་བྱེད། །སྤོང་སྡུད་ཞེན་པ་སྣ་ཚོགས་བྱེད། །སྔ་ཕྱི་རིག་པའི་དོན་ཟིན་ཕྱིན། །བ་མོར་ཉི་ཤར་བཞིན་དུ་སྟོངས། །གདེང་ཟིན་ཆོས་དབྱིངས་གནས་ཀྱི་མཆོག །འཕྲོ་བ་མི་གཡོའི་བདུད་བྱུང་ན། །དོན་ལ་གོམས་པར་མ་བྱས་པས། །རིག་ཚོར་དྲན་པ་ཕྲ་མོ་རྒྱུ། །དོན་མེད་རྐུན་བུ་ཡང་ཡང་ལྡང་། །མི་བརྗེད་དྲན་པའི་གཟུངས་ཀྱིས་ཟིན། །རྣམ་རྟོག་རང་ཞི་རིག་པ་གསལ། །ཐམས་ཅད་ཆོས་སྐུ་འབྲས་བུ་མཆོག །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། སྒོམ་པའི་བདུད་ཟིལ་གྱིས་ནོན་པའི་རྟགས་དང་འབྲས་བུ་བསྟན་པའི་ལེའུ་སྟེ་ཉེར་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །བྱ་བ་འདུ་འཛི་ལོངས་སྤྱོད་བདུད། །ཉམས་དགར་ཞེན་པ་གནས་ཀྱི་བདུད། །བསླབ་པའི་ཡོན་ཏན་གཡེང་བའི་བདུད། །འཁོར་ངན་སེམས་བཀྲུགས་བདུད་དང་ནི། །དེ་དག་སྤྱོད་པའི་བདུད་བཞིར་གསུངས། །དེ་ཡང་འདུས་པའི་སྙིང་པོ་ཉོན། །འདུ་འཛི་ལོངས་སྤྱོད་བདུད་དབྱེ་ན། །མན་ངག་མེད་པར་ཚུལ་འཆོས་བྱེད། །མི་རྣམས་སྨོན་འདོད་གཞན་སེམས་འཛིན། །དོན་བོར་བདག་འཛིན་ཕྲག་དོག་ལྟུང་། །དེ་དག་དགྲར་ཤེས་ཞེན་པ་ཆུང་། །བུ་བཞིན་ཆགས་མེད་དོན་གྱིས་ཟིན། །ལོངས་སྤྱོད་རང་གྲོལ་རོལ་པར་རྟོགས། །དེ་ཡང་འདུས་པའི་སྙིང་པོ་ཉོན། །ཞེན་ཆགས་གནས་བདུད་དབྱེ་བ་ནི། །ཐོས་ཆུང་མཁས་ཆེས་ཉམས་དགའ་བརྩིག ། ― DNG001_Page_0713 ―
[མ་དཔེ་གཟིགས་ན་འདིར་གནོན།]
བཀྲ་ཤིས་འདྲེ་མེད་ལྷ་ཡོད་ཟེར། །འདྲེ་བརྟེན་མཐུ་ཡོད་གཞན་ལ་བསྡིགས། །གནས་ལ་མ་ཆགས་ངེས་མེད་ཤེས། །བདག་གཞན་གཞི་ལ་མེད་པར་རྟོགས། །གང་དུ་འདུག་པ་འོག་མིན་གནས། །དེ་ཡང་རྡོ་རྗེ་སེམས་དཔའ་ཉོན། །ཡོན་ཏན་གཡེང་བདུད་དབྱེ་བ་ནི། །རིག་པ་ལྔ་ལྡན་བཀུར་སྡི་ཞེན། །དོན་བོར་རང་དོན་རང་རྒྱུད་གོལ། །ཞེན་ལོག་དྲན་ཟིན་ཟིལ་གྱིས་མནན། །བདུད་མེད་ཡེ་ཤེས་སྐུལ་མར་ཤེས། །གཡེང་བས་བདག་གཞན་ཆོས་སྐུར་གྲུབ། །དེ་ཡང་འདུས་པའི་སྙིང་པོ་ཉོན། །འཁོར་ངན་སེམས་དཀྲུགས་བདུད་དབྱེ་ན། །ལྟ་དམན་འཁོར་ལ་གདུང་དྲགས་པས། །འགྲན་སེམས་ཆོག་ཤེས་མེད་པར་འདོད། །དད་ལོག་སྒྲོ་སྐུར་ཞེ་སྡང་སྐྱེ། །གདུང་སེམས་བསྐྱུངས་ལ་འདྲེལ་པ་གཅད། །བདུད་ཉིད་ཆོས་སྐུར་ཤེས་པ་ལས། །སྤོང་ཞིང་དོར་དུ་རྡུལ་ཙམ་མེད། །རྫོགས་པ་ཆེན་པོ་ངེས་དོན་འདུས་པའི་ཡང་སྙིང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། སྤྱོད་པའི་བདུད་ཟིལ་གྱིས་ནོན་པའི་རྟགས་དང་འབྲས་བུ་བསྟན་པའི་ལེའུ་སྟེ་ཉེར་བརྒྱད་པའོ།། །།དེ་ཡང་རྡོ་རྗེ་སེམས་དཔའ་ཉོན། །ཉམས་ཀྱི་བདུད་དྲུག་དོན་བསྟན་པ། །མཁའ་འགྲོའི་ལུང་སྟོན་བདུད་བྱུང་ན། །ཁྱོད་ནི་མ་འདུག་ཕན་གདགས་ཟེར། །འདོད་པ་སྙིང་ཞུགས་ཞེན་པ་ཚོལ། །མི་འགྲུབ་དཀའ་བ་སྣ་ཚོགས་བྱེད། །ཞེན་པ་ཉིད་ནས་འདོད་པ་སྟོངས། །ལུང་སྟོན་བསླུ་བ་རྫུན་དུ་ཤེས། །གཞི་ལ་མེད་ཤེས་རེ་དོགས་མེད། །དེ་ཡང་འདུས་པའི་སྙིང་པོ་ཉོན། །ཉམས་མྱོང་ཞེན་པའི་བདུད་བྱུང་ཆེ། །མི་རྟོག་ཞེན་པའི་བདེ་བ་འབྱུང་། །འཕེལ་འགྲིབ་ཡོད་པས་མ་ངེས་པ། །ངོས་མ་ཟིན་པས་ལུང་མ་བསྟན། །ལྷག་མཐོང་དྲན་པའི་གདེང་དང་ལྡན། །དོན་ལ་འགྱུར་མེད་ནམ་མཁའ་བཞིན། །དམ་པར་ལྟ་མེད་སྒྲིབ་གཉིས་དག །ཞེ་འདོད་ཚུལ་འཆོས་བདུད་བྱུང་ཚེ། །གདམས་ངག་མེད་པར་བསྒོམ་ཚུལ་སྟོན། །དད་ཅན་གླེན་པ་ཐབས་ཀྱིས་བསླུ། །ཆགས་ཆུང་ཚུལ་འཆོས་ཆོས་པར་འཆེས། །གཞི་ ― DNG001_Page_0714 ―
[མ་དཔེ་གཟིགས་ན་འདིར་གནོན།]
ཉིད་མ་བཅོས་དྲན་པ་གཅེས། །ཞེ་འདོད་མེད་ན་ཚུལ་འཆོས་བྲལ། །འདོད་མེད་གདེང་ལྡན་འབྲས་བུའི་མཆོག །དེ་ཡང་རྡོ་རྗེ་སེམས་དཔའ་ཉོན། །བརྐམ་ཆགས་བདེ་བའི་བདུད་བྱུང་ན། །འདོད་ཆགས་དབང་ལ་བྱང་ཆུབ་རེ། །རང་གི་ཞེན་པས་འདོད་ཆགས་སྲེད། །དོན་དུ་མ་ཤེས་བྱང་མི་ཆུབ། །རང་རིག་དོན་ལྡན་དབང་མི་དགོས། །འདོད་སྤྱད་རྐྱེན་ཐུབ་ཆོས་སྐུར་ཤེས། །བོགས་མེད་ཡེ་ཤེས་སངས་རྒྱས་ཡིན། །དེ་ཡང་འདུས་པའི་སྙིང་པོ་ཉོན། །ཡོན་ཏན་ཕྲག་དོག་ཞེ་སྡང་བྱེད། །དེ་ལ་ལན་འདེབས་རྨོངས་པ་ནི། །མཁས་ལ་སྐུར་འདེབས་དམྱལ་བར་ལྷུང་། །གཞི་རྟོགས་དོན་ལ་སྐུར་དང་བྲལ། །ཞེ་སྡང་རང་གྲོལ་ཆོས་ཉིད་རྟོགས། །དེ་ཉིད་དུས་ན་བདུད་མེད་ཤེས། །ང་རྒྱལ་སྒྲོ་འདོགས་བདུད་བྱུང་ཚེ། །གང་ཟག་སྨད་ཕྱིར་ཆོས་ལ་སྨོད། །ཆེས་ཆུང་བྱད་ཅིང་བཀའ་རྐུན་བྱེད། །བསོད་ནམས་ཆེས་ཆུང་དམྱལ་བར་ལྟུང་། །མན་ངག་གསང་ཐུབ་ཟིལ་གྱིས་མནན། །ཡིད་ཆེས་རང་རིག་དོན་གྱིས་ཟིན། །ད་ལྟ་ཉིད་དུ་བདེན་པ་མཐོང་། །དེ་ཡང་འདུས་པའི་སྙིང་པོ་ཉོན། །དེ་དག་བདུད་ཀྱི་དབྱེ་བ་ཡང་། །ལྟ་མེད་རྣམས་ལ་འབྱུང་བ་ལས། །ལུང་ལྡན་ཀུན་གྱི་ཡོན་ཏན་ཏེ། །སངས་རྒྱས་ཆོས་ནི་བཅོ་བརྒྱད་ཡིན། །རྫོགས་པ་ཆེན་པོ་ངེས་དོན་འདུས་པའི་ཡང་སྙིང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་རིན་པོ་ཆེ་གསེར་གྱི་ཡང་ཞུན་ལས། ཉམས་ཀྱི་བདུད་ཀྱི་རྟགས་དང་འབྲས་བུ་བསྟན་པའི་ལེའུ་སྟེ་ཉེར་དགུ་པའོ།། །།རྡོ་རྗེ་སེམས་དཔས་ཡང་ཞུས་པ། །ཀུན་རིག་སྟོན་པས་བདག་ལ་གསོན། །རྣལ་འབྱོར་ཉམས་སུ་མྱོང་བའི་བཀའ། །དོན་དང་མཐུན་པར་བཤད་དུ་གསོལ། །དེ་སྐད་ཞུས་པའི་དོན་དགོངས་ནས། །འདུས་པའི་འཁོར་ལ་བཀའ་སྩལ་པ། །ཉམས་མྱོང་རིམ་པ་རྣམ་བཞི་སྟེ། །སྣང་བ་ཆོས་དབྱིངས་ཉམས་མྱོང་དང་། །རང་རྒྱུད་ཟིལ་གནོན་ཉམས་མྱོང་དང་། །ངེས་ལུང་སྤྱོད་པའི་ཉམས་མྱོང་དང་། ། ― DNG001_Page_0715 ―
[མ་དཔེ་གཟིགས་ན་འདིར་གནོན།]
ལྟ་བ་གདེང་ཟིན་ཉམས་མྱོང་ངོ་། །དེ་ཡང་རྡོ་རྗེ་སེམས་དཔའ་ཉོན། །སྣང་བ་ཆོས་དབྱིངས་ཉམས་མྱོང་ནི། །བྱ་བ་བཏང་བའི་མི་འདྲ་སྟེ། །མཐོང་སྣང་གཟུགས་སྒྲ་ལ་སོགས་པ། །གང་མཐོང་ཅི་དྲན་ཅིར་སྣང་ཡང་། །བརྟག་དཔྱད་མ་བྱས་གྱི་ན་ཙམ། །ཡུལ་ནི་བུན་ནེ་ལོང་འདུག་ཀྱང་། །སྤོང་སྡུད་ཞེན་པར་མ་སོང་ན། །ཆོས་དབྱིངས་གདེང་ལྡན་ཉམས་ཀྱི་མཆོག །དེ་ཡང་འདུས་པའི་སྙིང་པོ་ཉོན། །རང་རྒྱུད་ཉོན་མོངས་ཟིལ་ནོན་རྟགས། །བསྒོམ་ཐབས་སྐྱོན་དང་བཅོས་པའི་ཐབས། །ཐུན་ཚད་ཉམས་དང་རྣམ་ལྔ་སྟེ། །བསྒོམ་ཐབས་ལྟ་བའི་རྒྱུན་ལ་བསྒོམ། །སྐྱོན་ནི་བྱིང་དང་རྒོད་པ་སྟེ། །བཅོས་ཐབས་རབ་འབྲིང་ཐ་མ་ཡིས། །ཐུན་ཚད་ཉམས་ཀྱི་ཚོད་དང་སྦྱར། །དེ་དོན་ངེས་པར་ལ་བཟླ་ན། །གསེར་འགྱུར་རྩི་ཡིས་ཐེབས་པ་བཞིན། །རྟོགས་དང་མི་རྟོག་ཐམས་ཅད་དུ། །རང་སེམས་ལྟ་བའི་ཆོས་ཉིད་གསལ། །རང་རྒྱུད་ཟིལ་གྱིས་ནོན་པའི་ཉམས། །དེ་ཡང་འདུས་པའི་སྙིང་པོ་ཉོན། །དེ་དོན་མཐར་ཐུག་རིམ་པའི་དོན། །གོས་ཀྱི་འཇམ་རྩུབ་སྣ་ཚོགས་དང་། །ཟས་ཀྱི་རོ་མཆོག་གང་མྱོང་བ། །གང་དྲན་མཐོང་བྲལ་ཆོས་སྐུར་ཤེས། །དེ་ཙམ་ཉིད་ན་ཡེ་ཤེས་ཤར། །ཡུལ་ཉིད་མ་ཡིན་གང་དྲན་པ། །ཆོས་སྐུར་ཤེས་པས་ཡུལ་དང་བྲལ། །དེ་ཙམ་ཡུལ་དང་རིག་པ་གཉིས། །གནས་སྐབས་མཐར་ཐུག་འདྲེལ་བ་མེད། །དེ་ཡང་འདུས་པའི་སྙིང་པོ་ཉོན། །རྟོགས་པ་མངོན་གྱུར་གདེང་གི་ཉམས། །གཡོ་དང་གོམས་པ་བརྟན་པ་ནི། །ཅིག་ཅར་རིམ་གྱིས་འབྱུང་བ་ནི། །ཤེས་རབ་བློ་ཡི་ཁྱད་པར་ལས། །ལུས་ངག་ཡིད་ཀྱི་ཉམས་རྟགས་ཀུན། །རྣལ་འབྱོར་པ་ལ་ངེས་པར་འབྱུང་། །དེ་ཉིད་རྣལ་འབྱོར་ཉམས་ཀྱི་མཆོག །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། རྣལ་འབྱོར་ཉམས་སུ་མྱོང་བའི་བཀའ་རྟགས་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་ཡང་ ― DNG001_Page_0716 ―
[མ་དཔེ་གཟིགས་ན་འདིར་གནོན།]
གསུངས་པ། །ལ་ཟློ་སྤྱོད་པའི་བཀའ་རྟགས་ནི། །འཁོར་ལ་བཤད་ཀྱི་ཡིད་ཀྱིས་ཉོན། །ཁོ་ན་ཉིད་དང་སྒྲོ་འདོགས་གཅོད། །རྟོགས་པས་གཞིག་དང་ཡེ་ཤེས་སྤྱོད། །གདེང་ལྡན་རྣམས་ཀྱིས་སྤྱད་པར་བྱ། །དེ་ཡང་འདུས་པའི་སྙིང་པོ་ཉོན། །ལུས་ཀྱི་དེ་ཁོ་ན་སྤྱོད་པ། །རྒྱལ་པོ་གཏན་མ་ཟིན་པ་བཞིན། །ལུས་ནང་ཆོས་སྐུ་རྒྱུན་དུ་གནས། །དེ་ཕྱིར་མི་འབྲལ་གཟུངས་དང་ལྡན། །ངག་གི་དེ་ཁོ་སྤྱོད་ཆེན་ནི། །དཔེ་ནི་དག་པའི་བརྟུལ་ཞུགས་བཞིན། །ངེས་པའི་དོན་གྱིས་སྐྱོན་བྲལ་བས། །ངག་ཏུ་མ་བརྗོད་ཆོས་སྐུར་གསལ། །སེམས་ཀྱི་དེ་ཁོ་སྤྱོད་པ་ནི། །ནགས་ཀྱི་རི་དྭགས་བག་ཕེབས་བཞིན། །ཤེས་རབ་རྣམ་གསུམ་ཐག་ཆོད་པས། །ལྷག་མཐོང་རིག་པའི་གདེང་གིས་ཟིན། །ཆོས་ཀྱི་དེ་ཁོ་དམིགས་པ་ནི། །ནོར་རྙེད་གསང་ནི་ཐུབ་པ་བཞིན། །གདེང་ལྡན་ཉམས་ཀྱི་གསང་ཐུབ་པས། །ངེས་དོན་མཆོག་གི་དངོས་གྲུབ་ཐོབ། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། དེ་ཁོ་ན་ཉིད་ལ་དམིགས་པའི་སྤྱོད་པ་བསྟན་པའི་ལེའུ་སྟེ་སོ་གཅིག་པའོ།། །།དེ་ཡང་འདུས་པའི་སྙིང་པོ་ཉོན། །ཕྱི་ཡི་སྒྲོ་འདོགས་གཅོད་པ་ནི། །དྲེད་མོ་གདོས་ཀྱིས་བཏགས་པ་བཞིན། །ཡུལ་དང་འབྲལ་མེད་ཆོས་སྐུར་ཤེས། །སྣང་བས་མི་གནོད་ཕན་མི་ནུས། །ནང་གི་སྒྲོ་འདོགས་གཅོད་པ་ནི། །མི་ཤི་སླར་ལ་མི་ལྡོག་བཞིན། །མཐའ་བྲལ་ངེས་པའི་གདེང་གིས་ཟིན། །རང་རིག་བདེན་མཐོང་ཕྱིར་མི་ལྡོག །གཉིས་ཀའི་སྒྲོ་འདོགས་ཆོད་སྤྱོད་པ། །གཉིད་སད་འཇིགས་པ་བྲལ་བ་བཞིན། །མ་རིག་སངས་ཕྱིར་ཡུལ་དང་བྲལ། །དེ་ཕྱིར་ཡིད་ཆེས་གདེང་གིས་ཟིན། །ལུང་གི་སྒྲོ་འདོགས་ཆོད་སྤྱོད་ནི། །ནོར་སྟོར་སླར་ལ་རྙེད་པ་བཞིན། །དྲང་དོན་མདོ་རྒྱུད་སུན་བཏོན་ནས། །ངེས་དོན་རྙེད་པས་ཆོས་སྐུར་རྟོགས། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། སྒྲོ་འདོགས་ཆོད་པའི་སྤྱོད་པ་བསྟན་པའི་ལེའུ་སྟེ་སོ་གཉིས་པའོ།། །།རྡོ་རྗེ་སེམས་དཔས་ཡང་ཞུས་པ། །ཟས་ནོར་དགྲ་གཉེན་རྟོག་གཞོམ་ཕྱིར། །ཡེ་ཤེས་སྤྱོད་པ་བསྟན་དུ་གསོལ། །ཀུན་རིག་སྟོན་པས་ཐུགས་གསོལ་ཏེ། །འདུས་པའི་ ― DNG001_Page_0717 ―
[མ་དཔེ་གཟིགས་ན་འདིར་གནོན།]
འཁོར་ལ་བཀའ་སྩལ་པ། །ཟས་ཀྱི་རྟོག་པ་གཞོམ་པའི་ཕྱིར། །ཁྱི་ཕག་བཞིན་དུ་གཙང་དམེ་མེད། །དོན་ཟིན་རྟོག་པ་བཅོས་གྱུར་ན། །ཡོན་ཏན་དྲུག་ལྡན་སྤྱོད་པའི་མཆོག །གོས་ཀྱི་རྟོག་པ་བཅོམ་པའི་ཕྱིར། །སྨྱོན་པ་བཞིན་དུ་ངན་དགུ་གོན། །གཉེན་སྡང་ཡོན་ཏན་ལྔ་ལྡན་ཕྱིར། །ཆགས་མེད་ཡོན་ཏན་མཆོག་ཏུ་ལྡན། །གཉེན་གྱི་རྟོག་པ་གཞོམ་པའི་ཕྱིར། །ངོ་ཚ་མེད་པར་ཆགས་སྤྱོད་དང་། །གཉེན་ལ་སྡང་བ་བྱས་གྱུར་ན། །འཁོར་ངན་བདུད་བཅོམ་བདེ་བ་འཕེལ། །དགྲ་ཡི་རྟོག་པ་གཞོམ་པའི་ཕྱིར། །གྲི་བོ་གཤེད་ལ་འཁོར་བ་བཞིན། །ཆགས་སྡང་གཞི་ལ་མེད་པར་ཤེས། །དགྲ་ཉིད་ཆོས་སྐུར་ཤེས་པར་བྱ། །དེ་ཡང་འདུས་པའི་སྙིང་པོ་ཉོན། །དེ་དག་སྤྱོད་པ་གང་སྤྱོད་དང་། །རིགས་སྤྱོད་རྒྱུན་དུ་བྱ་བ་ནི། །བྲམ་ཟེའི་དམ་ཚིག་འགལ་བའི་ཕྱིར། །ལུང་ལྡན་ཀུན་གྱིས་བྱར་མི་རུང་། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། རྟོག་པ་གཞོམ་པའི་སྤྱོད་པ་བསྟན་པའི་ལེའུ་སྟེ་སོ་གསུམ་པའོ།། །།ཀུན་རིག་སྟོན་པས་ཡང་གསུངས་པ། །གཞི་ཤེས་བློ་དངོས་གཅིག་པ་དང་། །བརྟུལ་ཞུགས་མཆོག་དང་བགེགས་མེད་པའི། །ཡེ་ཤེས་རང་ཤར་ངས་བཤད་ཀྱིས། །འདུས་པའི་འཁོར་རྣམས་ཡིད་ཀྱིས་ཉོན། །ལུང་ལྡན་གདམས་ངག་གཞི་ཤེས་པས། །ངོ་བོ་ཉིད་ལ་བློ་ལྡན་ཕྱིར། །གང་ཡང་ཆོས་སྐུར་རང་གསལ་བས། །འདུས་མ་བྱས་པའི་ནམ་མཁའ་འདྲ། །བློ་དངོས་གཅིག་པར་ཤེས་པ་ཡིས། །གང་མཐོང་ཉིད་འཁྲུལ་མེད་ཤེས་ཕྱིར། །སྣང་མཐོང་གང་དྲན་ཆོས་སྐུར་ཤེས། །སྨིག་རྒྱུ་ནམ་མཁར་ཤེས་པ་འདྲ། །བརྟུལ་ཞུགས་མཆོག་གི་སྤྱོད་པ་ནི། །མཚམས་མེད་ལྔ་དང་མི་དགེ་བཅུ། །ཆགས་སྡང་ལྔ་ལ་ལོངས་སྤྱད་ཀྱང་། །ལྟ་བ་རྟོགས་པའི་གྲངས་སུ་འགྱུར། །ལུང་རིགས་མི་འགལ་རྒྱུད་གནས་དང་། །འབོལ་ཞིང་ཞི་ལ་འཇམ་འདོད་པས། །ངེས་པའི་གདམས་ངག་མ་གོ་ན། །མཁས་ཀྱང་རྨོངས་པ་སྙིང་རེ་རྗེ། །དེ་ཡང་འདུས་པའི་སྙིང་པོ་ཉོན། །བགེགས་མེད་ཡེ་ཤེས་རང་ཤར་བ། །རང་གི་རྣམ་རྟོག་ཡོད་ཀྱི་བར། །བགེགས་ ― DNG001_Page_0718 ―
[མ་དཔེ་གཟིགས་ན་འདིར་གནོན།]
ཀྱི་མཐའ་ལ་ཟད་པ་མེད། །དངོས་སུ་མེད་ཕྱིར་འཁྲུལ་པའི་བློ། །མུ་སྟེགས་ཅན་ལ་འདྲེ་ཡོད་ཕྱིར། །འདྲེར་འཛིན་སྐྱེ་བོ་མ་རིག་པ། །མོ་མའི་རྫུན་གྱིས་གླེན་པ་བསླུས། །དམ་པ་ཀུན་གྱིས་འདྲེ་སུན་བཏོན། །ཡུལ་དང་གོལ་ས་ཆོད་གྱུར་ན། །འདྲེ་མེད་རིག་པ་ཆོས་སྐུར་ཤེས། །གཞི་ལ་ལྷ་འདྲེ་མེད་རྟོགས་པས། །ཕན་གནོད་བྱ་བ་མིང་ཡང་མེད། །དེ་ཡང་འདུས་པའི་སྙིང་པོ་ཉོན། །དེ་དག་ཡེ་ཤེས་རང་ཤར་བ། །ཀུན་བརྟགས་ཟད་ན་འདྲེ་རྣམས་སྟོངས། །འདྲེ་ནི་ཉིད་འཁྲུལ་ཡིན་པའི་ཕྱིར། །རི་བོང་རྭ་ལ་ཡོད་རྟོག་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པའི་ཡང་སྙིང་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད། རིན་པོ་ཆེ་གསེར་གྱི་ཡང་ཞུན་ལས། ཡེ་ཤེས་རང་ཤར་གྱི་སྤྱོད་པ་བསྟན་པའི་ལེའུ་སྟེ་སོ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་ཡང་གསུངས་པ། །དམ་ཚིག་ལྟུང་མེད་ངས་བཤད་ཉོན། །རྟོགས་ཐབས་ལྔ་ཡིས་མ་ཉམས་ན། །རང་སེམས་མི་རྟོག་ལུང་མི་ལྡན། །འཁོར་བར་འཁྱམས་ཀྱང་འཇིགས་པ་མེད། །ད་བུ་ལ་ནི་ལས་ནོར་འདྲ། །ཆེད་དུ་མ་བྱས་དྲུག་ཉམས་ན། །བྱས་པ་ཐམས་ཅད་མི་འགྲུབ་ཅིང་། །འདིར་སྡུག་ཕྱི་མར་དམྱལ་བར་ལྟུང་། །རྒྱལ་པོས་ཆབ་བསལ་མི་ངན་འདྲ། །བསྲུང་བའི་དམ་ཚིག་ལྔ་ཉམས་ན། །མ་རུངས་ལས་རྣམས་སྤྱད་པའི་ཕྱིར། །མ་རིག་མུན་པ་མ་སོལ་བས། །རང་གི་མིག་ནི་རང་བཏོན་འདྲ། །སྲུང་བའི་དམ་ཚིག་བཞི་ཉམས་ན། །འོག་མའི་སེམས་བསྐྱེད་སྡོམ་ཞིག་པས། །ཁ་ན་མ་ཐོ་རྣམ་གསུམ་ལྟུང་། །བཙོན་རར་ཆུད་པའི་མི་ངན་འདྲ། །དེ་ཡང་འདུས་པའི་སྙིང་པོ་ཉོན། །དེ་དག་དམིགས་ཀྱིས་དབྱེ་བ་ནི། །ལྟུང་བའི་སྒོ་དགུར་ལྟུང་ངེས་ཀྱིས། །དེ་ཡི་སྡུག་བསྔལ་སྨོས་ཐག་ཆད། །ལས་ཀྱིས་ཚེ་ཚད་བརྗོད་མི་ལངས། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། མ་རྟོགས་པའི་དམ་ཚིག་ཉམས་པའི་ལྟུང་བའི་སྒོ་བསྟན་པའི་ལེའུ་སྟེ་སོ་ལྔ་པའོ།། །།དེ་ནས་ཀུན་རིག་རྒྱལ་པོ་ཡིས། །མཐར་ཐུག་ཡེ་ཤེས་འབྲས་བུ་སོགས། །འདུས་པའི་འཁོར་གྱི་དོན་ཆེད་དུ། །མངོན་གྱུར་སངས་རྒྱས་བཀའ་སྩལ་པ། །ལུས་མེད་ཡེ་ཤེས་སྒོ་ལྔ་ཡིས། །སྔར་མ་མཐོང་བའི་ཞིང་ ― DNG001_Page_0719 ―
[མ་དཔེ་གཟིགས་ན་འདིར་གནོན།]
ཁམས་སུ། །ཡེ་ཤེས་མིག་གིས་དུས་གཅིག་མཐོང་། །འཆར་ནུབ་མེད་པའི་ཉི་ཟླ་ཤར། །ཟོས་པ་མེད་པའི་རོ་མཆོག་མྱོང་། །མ་བསམས་པ་ཡི་དྲན་པ་ལ། །མི་བརྗེད་པ་ཡི་གཟུངས་དང་ལྡན། །བསྒྲུབས་པ་མེད་པའི་འབྲས་བུ་འབྱུང་། །རྐྱེན་དབང་མི་འགྱུར་ཡུལ་གཅིག་རྙེད། །སངས་རྒྱས་ཀུན་དང་དགོངས་པ་གཅིག །བཙལ་མེད་འགྲོ་དོན་ད་ལྟ་བྱེད། །དེ་ཡང་རྡོ་རྗེ་སེམས་དཔའ་ཉོན། །རྣམ་སྨིན་ལུས་མེད་ཡེ་ཤེས་སྐུ། །རིག་པ་གསལ་ལ་ཁ་མིག་ཅན། །སྔར་མ་མཐོང་བའི་ཆོས་དབྱིངས་ལ། །ཞིང་ཁམས་སངས་རྒྱས་ཡེ་ཤེས་ཀློང་། །ཆོས་སྐུ་རིག་པ་འཆར་ནུབ་མེད། །རང་སེམས་རྟོགས་པས་ཆོས་སྐུར་ཤར། །ཏིང་འཛིན་ཟས་ནི་ཉམས་སུ་བསྟེན། །རོ་མཆོག་ཉམས་མྱོང་ཆོས་སྐུར་ཤེས། །དེ་ལ་བསྒོམ་པ་སྒྲུབ་བྱ་མི་དགོས། །འཁོར་འདས་གཉིས་སུ་མ་བསམས་པའི། །ལྷག་མཐོང་དྲན་པའི་ཡེ་ཤེས་ལ། །མི་བརྗེད་གཟུངས་ལྡན་རིག་པའི་སྐུ། །གང་དྲན་རང་རིག་ཀུན་ཁྱབ་ཕྱིར། །དུས་གསུམ་སྐྱེ་འགག་མེད་པ་ཡི། །འབྲས་བུ་བར་དོར་ཡེ་ཤེས་ལྡན། །མ་རིག་བག་ཆགས་ཤེས་པའི་ཕྱིར། །རྐྱེན་བཞིས་བསྐྱེད་པའི་དབང་མི་འགྱུར། །སྤྱིར་ཆིབ་ས་ལ་ངེས་པར་འགྲོ། །ལྷུན་གྲུབ་མངོན་གྱུར་དུས་དེར་འགྲུབ། །སངས་རྒྱས་ཀུན་དང་མཉམ་པའི་ཕྱིར། །དགོངས་པ་ཀུན་བཟང་ང་དང་མཉམ། །དེ་ཡང་རྡོ་རྗེ་སེམས་དཔའ་ཉོན། །ཆོས་སྐུའི་གཟུགས་བརྙན་གཟུགས་སྐུ་འབྱུང་། །གཟའ་སྐར་གཟུགས་བརྙན་མེ་ལོང་བཞིན། །མ་བཙལ་ལྷུན་གྱིས་ཆོས་སྐུར་གྲུབ། །དེ་ཉིད་དོན་ལྡན་ད་ལྟ་བྱས། །ཡེ་ཤེས་ལུས་ལ་རིག་པའི་ཐུགས། །ཡེ་ཤེས་རང་ཤར་དོན་རྟོགས་པས། །རང་བྱུང་ཆོས་སྐུ་ཁ་མིག་ཅན། །ཡེ་ཤེས་སྒོ་ལྔ་གསལ་བར་འདུས། །ཐེག་གཞན་སངས་རྒྱས་འདོད་པ་དེ། །བློས་བྱས་རྣམ་གསུམ་ངེས་དོན་མེད། །དེ་ཕྱིར་ཡང་ཏི་སངས་རྒྱས་ཀྱི། །འབྲས་བུ་བར་དོར་སངས་རྒྱས་སྐུ། །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། ངེས་དོན་གྱི་སངས་རྒྱས་བསྟན་པའི་ལེའུ་སྟེ་སོ་དྲུག་པའོ།། །།དེ་ནས་སྟོན་པ་ཀུན་བཟང་གིས། །འདུས་པའི་འཁོར་ལ་དོན་གཏད་པ། །ངེས་དོན་འདུས་པའི་ཡང་སྙིང་འདི། །སངས་རྒྱས་ཀུན་གྱིས་གསུངས་པའི་ཆོས། །རིག་འཛིན་རྣམས་ཀྱིས་ཐུགས་ལ་སྦས། །ཆོས་ ― DNG001_Page_0720 ―
[མ་དཔེ་གཟིགས་ན་འདིར་གནོན།]
སྐྱོང་ཀུན་གྱིས་གཏེར་ལྟར་བསྲུང་། །མཁའ་འགྲོ་རྣམས་ཀྱིས་མིག་ལྟར་འཚོ། །དེ་ཕྱིར་རྒྱུད་འདི་ཤིན་ཏུ་གཉན། །དེ་དོན་མན་ངག་ངེས་དོན་འདི། །ལོག་སྲེད་ཆགས་ཞེན་མ་ངེས་ལ། །ནམ་ཡང་བསྟན་པར་མ་གསུངས་སོ། །དེ་ཡང་རྡོ་རྗེ་སེམས་དཔའ་ཉོན། །ཡང་དག་ངེས་དོན་ཁྱད་པར་ཅན། །འབྲས་བུ་མངོན་འབྱུང་ངེས་པ་འདི། །སྣོད་ངན་རྣམས་ལ་མ་གསང་ན། །ཚེ་ཐུང་སྡུག་བསྔལ་ནད་འབྱུང་ཞིང་། །ཕྱི་མ་ཐར་མེད་དམྱལ་བར་ལྟུང་། །དེ་ཕྱིར་མི་བསྟན་སྣོད་ངན་ནི། །བླ་མར་མི་གུས་ང་རྒྱལ་ཅན། །ཚུལ་འཆོས་བྱེད་ཅིང་སློབ་དཔོན་སྨོད། །དབུལ་བ་མེད་པར་གདམས་ངག་འདོད། །བཀའ་རྐུན་བྱས་ནས་ཡོད་ཚུལ་སྟོན། །དོན་མ་གོ་བས་ཆོས་ལ་སྡང་། །དཔེ་རྐུན་བྱས་པས་ཕྱི་ཐག་ཐུང་། །འགྲན་སེམས་བཅུག་པས་མཆེད་དང་འཁོན། །གནས་ལུགས་མ་ཤེས་རང་མཐོང་ཆེ། །ང་རང་མཁས་ཞེས་བླ་མ་སྨོད། །སྔོན་ནས་ཡོད་ཟེར་རྫུན་དུ་སྨྲ། །གཞན་ནས་རྙེད་ཟེར་ཐབས་ཀྱིས་ཚོལ། །ཕྱི་ནས་དབུལ་ཞེས་སློབ་དཔོན་བྲིད། །ཆོས་རྗེས་བྱ་ཞེས་ཐབས་ཀྱིས་བསླུ། །གཡོ་སྒྱུ་སྐྱོན་གྱིས་ཆོས་འཚོལ་ལ། །ནམ་ཡང་བསྟན་པར་མི་བྱའོ། །དེ་ཡང་འཁོར་གྱི་སྙིང་པོ་ཉོན། །གལ་ཏེ་འཁོར་གྱིས་ཆོས་བསྟན་ན། །ཕྱི་ནང་ཆོས་སྐྱོང་ཀུན་ཁྲོས་ནས། །མ་ཉེས་ཁ་ཡོགས་སྣ་ཚོགས་འོང་། །བྱས་པ་མེད་པར་མི་རྣམས་སྡང་། །སེར་སྣས་བསགས་པའི་རྫས་རྣམས་བརླག །རང་ཉིད་སྨྱོ་འབོག་སྒུར་པོར་འགྲོ། །རྒྱལ་འགོང་ཆགས་ནས་གནས་མི་རྙེད། །ཕྱི་མར་དམྱལ་བ་ཆེན་པོར་ལྟུང་། །དེ་ཕྱིར་ཤིན་ཏུ་གསང་བར་བྱ། །དེ་ཚེ་ངེས་དོན་ཡང་སྙིང་འདི། །གུ་ལང་གསེར་བཞིན་མི་ནུབ་ཙམ། །སྣོད་ལྡན་འགའ་ལ་བསྟན་པ་ལས། །སྣང་དགུ་ཀུན་གྱི་སྤྱོད་ཡུལ་མིན། །འཁོར་རྣམས་ངེས་པ་དེ་ལྟར་ཞོག །ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། རྒྱུད་གཏད་པའི་ལེའུ་སྟེ་སོ་བདུན་པའོ།། །།རྒྱ་གར་གྱི་མཁན་པོ་བི་མ་ལ་མི་ཏྲ་དང་། བོད་ཀྱི་ལོཙྪ་བ་ཨཱ་ཙརྱ་དྲན་པ་ཡེ་ཤེས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ་རྫོགས་སོ། །རྫོགས་པ་ཆེན་པོ་ངེས་དོན་འདུས་པའི་ཡང་སྙིང་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་རིན་པོ་ཆེ་གསེར་གྱི་ཡང་ཞུན་ཞེས་བྱ་བ། ཤང་པ་ཆེ་ཆུང་བ་ཡེ་ཤེས་རྒྱལ་མཚན་གྱི་ཐུགས་དམ། བླ་མ་གཉན་ཆུང་བ་ལ་གནང་བ། གཉན་ཆུང་བས་འབྲོམ་ཞང་འབར་ལ་གནང་བ། རྗེ་བཙུན་ཞང་འབར་གྱིས། སྐྱེ་སྒོམ་ལ་གནང་བ། སྐྱེ་སྒོམ་གྱིས། སྒྱེར་བན་འོད་དེ་ལ་གནང་བའོ།། །། |
