 རྙིང་མ་རྒྱུད་འབུམ་པོད་གཉིས་པ། ཁ༽སྡེ་དགེའི་ཤིང་པར་རྙིང་མ་རྒྱུད་འབུམ།རྩོམ་མཁན།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད།― DNG002_Page_0001 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྟི་ནི་ཡཱ་མཱརྠ་སརྦ་ས་མུ་དཱ་ཡ། ཛྙཱ་ན་ག་ག་ན་ས་མཱ་ན་ཏནྟྲ། དྲྀཥྚི་བྷཱ་བ་ན་སརྦ་གརྦྷ། རཏྣ་བྱཱུ་ཧ་ནཱ་མ། བོད་སྐད་དུ། རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད། ལྟ་བསྒོམ་ཐམས་ཅད་ཀྱི་སྙིང་པོ། རིན་པོ་ཆེ་རྣམ་པར་བཀོད་པ་ཞེས་བྱ་བ། བཅོམ་ལྡན་འདས་མཉམ་པ་ཉིད་ཀྱི་རྒྱལ་པོ་རང་བྱུང་རིག་པའི་ཡེ་ཤེས། རྟོགས་པའི་དོན་དང་ལྡན་པ། དཔལ་གྱི་དཔལ་གྱུར་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། ཀུན་རིག་སེམས་ཀྱི་རྒྱལ་པོ་དེ། །འོག་མིན་ཆོས་ཀྱི་དབྱིངས་གནས་ན། །ངེས་པའི་དོན་ལ་རབ་ཞུགས་ཏེ། །རྡོ་རྗེ་སེམས་དཔའ་ལ་སོགས་པའི། །འཁོར་རྣམས་འདུས་ནས་རབ་ཏུ་འཁོད། །དེ་ཚེ་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་དོན་དུ། །ཀུན་རིག་ཆོས་ཀྱི་རྒྱལ་པོ་ལ། །རང་གི་རིག་པས་འདི་སྐད་གསོལ། །ངེས་ ― DNG002_Page_0002 ―
[མ་དཔེ་གཟིགས་ན་འདིར་གནོན།]
དོན་གནས་ལུགས་སྙིང་པོ་ཡི། །དེ་འཁོར་སྤྲུལ་པ་གང་གིས་བསྐུལ། །སངས་རྒྱས་བཀའ་རྣམས་ཇི་ལྟར་བགྲོས། །མ་རིག་མུན་པ་གང་གིས་སེལ། །དེ་དོན་ཆོས་རྣམས་ཇི་ལྟར་གསུངས། །དེ་སྐད་ཅེས་ནི་ཞུས་མ་ཐག །ཁབ་ལེན་ལ་ནི་ལྕགས་འདུ་བཞིན། །དད་པས་རང་དབང་མེད་པར་ནི། །འཁོར་རྣམས་འདུད་ཅིང་བསྐོར་ཞིང་བསྐོར། །དེ་ཚེ་འདུས་པ་རྣམ་བཞི་ཡང་། །རྡོ་རྗེ་གསང་བ་རིན་ཆེན་སྙིང་། །དྲི་མེད་གྲགས་པ་ལས་རབ་གྲུབ། །རྒྱལ་བའི་དབང་པོ་བསོད་ནམས་སྙིང་། །ཞི་བ་བདེ་དང་ཉི་མའི་འོད། །ནམ་མཁའི་སྙིང་པོ་འབུམ་གཟིགས་དང་། །ཕྱོགས་བཅུའི་སངས་རྒྱས་རྣམས་ཀྱང་བཞུགས། །རིག་འཛིན་སེམས་དཔའ་ཆེན་པོ་ཡང་། །བློ་གྲོས་གཙོ་དང་རྣམ་དག་སྙིང་། །དམ་པའི་ཡོན་ཏན་འོད་རླབས་ཅན། །ཤེས་རབ་བླ་མ་རྒྱལ་མཚན་འཛིན། །རྣམ་པར་གྲོལ་བ་ཏིང་འཛིན་དབང་། །ཆོས་དབང་དང་ནི་སྤོབས་པ་བརྩེགས། །བདུད་འཇོམས་དང་ནི་སེང་གེའི་སྒྲ། །རིན་ཆེན་མཐོང་དང་བརྩེ་བ་ཅན། །དབང་ཕྱུག་གཙོ་དང་བརྩེགས་དགེ་དང་། །མཐོང་ན་དགའ་དང་བདེ་མོས་དང་། །གསུང་བརྩེགས་ལ་སོགས་འཁོར་རྣམས་ཀུན། །རང་རང་གཙོ་ལ་བསྐོར་ནས་ནི། །མི་བརྗེད་ ― DNG002_Page_0003 ―
[མ་དཔེ་གཟིགས་ན་འདིར་གནོན།]
པ་ཡི་གཟུངས་ཀྱིས་འཁོད། །རྒྱལ་སྲས་སྤྲུལ་པའི་འཁོར་རྣམས་དང་། །ཚངས་པ་བརྒྱ་བྱིན་རྒྱལ་ཆེན་བཞི། །ཐགས་བཟང་རིས་དང་གང་བ་བཟང་། །ཆོས་ཀྱི་རྒྱལ་པོ་རྟ་མགོ་ཅན། །ཟུར་ཕུད་ལྔ་པ་ནོར་སྲུང་དང་། །མགྲིན་བཅུ་དང་ནི་ཀླུ་རྒྱལ་དང་། །དེ་འཁོར་ལ་སོགས་ཀུན་ཀྱང་གནས། །མཁའ་འགྲོ་སྡེ་ལྔ་སྲིན་མོའི་ཚོགས། །ཡེ་ཤེས་མཁའ་འགྲོ་རིག་པ་འཛིན། །རྡོ་རྗེ་མཁའ་འགྲོ་རིགས་ཀྱི་ཡུམ། །རིན་ཆེན་མཁའ་འགྲོ་འདོད་དགུ་བསྒྱུར། །པདྨ་མཁའ་འགྲོ་བདེ་ཆེན་རྒྱས། །ལས་ཀྱི་མཁའ་འགྲོ་ལུས་སྒྲིབ་སྦྱངས། །འཇིག་རྟེན་མཁའ་འགྲོ་དམ་བཏགས་པའི། །འཁོར་གྱི་གཏོར་ཟན་ཕོ་མོ་ཀུན། །སྙིང་རྗེ་མེད་པར་གསོད་ལ་དགའ། །སྐྱོན་མཐོང་ཙ་ན་ཆད་པ་གཅོད། །ཀུན་ཀྱང་སྲིན་པོའི་ཆ་བྱད་ཅན། །རྔམས་པའི་ང་རོ་འཇིགས་པའི་ཚུལ། །བསྟན་པ་བསྲུང་ཕྱིར་དུས་དེར་འདུས། །སྤྲུལ་སྐུ་སྣང་བའི་འཁོར་རྣམས་ནི། །དད་ལྡན་ལྷ་མི་ལས་ཅན་ཀུན། །མོས་ཤིང་དད་པས་འདུས་པ་ཡི། །ལས་དང་ཐུགས་རྗེས་འཛོམ་ནས་འཁོད། །དེ་ཚེ་ཞུས་པའི་དོན་གསན་ནས། །ཀུན་རིག་ཆོས་ཀྱི་རྒྱལ་པོ་ཡིས། །མཉམ་པའི་དོན་ལ་ཐུགས་ཞུགས་ནས། །འདུས་པའི་ཚོགས་ལ་བཀའ་སྩལ་པ། །ལེགས་སོ་དད་ལྡན་འཁོར་རྣམས་ཀུན། །དེ་དོན་གསལ་བར་ངས་བཤད་ཀྱི། །ཡིད་ནི་གཞན་དུ་མ་ཡེངས་པར། །ངེས་པར་ཉོན་ལ་ཡིད་ཀྱིས་ཟུང་། །དེ་སྐད་ཅེས་ནི་གསུངས་མ་ཐག །འཁོར་རྣམས་དགའ་མགུ་ཡི་རང་སྟེ། །དད་པས་རྩེ་གཅིག་ཡིད་བསྡུས་ནས། །གུས་པའི་རིག་པས་ཆོས་ཉན་ཏོ། །དེ་ཚེ་འཁོར་གྱི་དོན་ཆེད་དུ། །མཉམ་པའི་དོན་ལས་རབ་བཞེངས་ཏེ། །ཡེ་ཤེས་ཆོས་སྐུའི་དགོངས་པ་ཡིས། །ཀུན་རིག་སྟོན་པས་བཀའ་སྩལ་པ། །ངེས་དོན་གནས་ལུགས་སྙིང་པོ་དེ། །འཁོར་འདས་འབྱུང་བས་མ་རེག་ཕྱིར། །མ་སྐྱེས་མ་བཅོས་རྒྱུས་མ་མཛད། །དེ་ཉིད་མ་ཡེངས་རིག་པར་ཤེས། །དེ་ལ་འགྲོ་དང་འོང་བ་མེད། །དེ་ཕྱིར་རང་བྱུང་ངོ་བོའི་སྐུ། །ད་ཡང་རྡོ་རྗེ་སེམས་དཔའ་ཉོན། །དེ་འཁོར་སྤྲུལ་པ་བསྐུལ་བ་ནི། །སེམས་དག་ལྷ་དབང་རིག་འཛིན་དེས། །རྨི་ལམ་རྣམ་གསུམ་བརྡ་ཤེས་པས། །མངོན་དགའ་ཕུག་ནས་ ― DNG002_Page_0004 ―
[མ་དཔེ་གཟིགས་ན་འདིར་གནོན།]
འདི་སྐད་བསྐུལ། །དུས་གསུམ་སངས་རྒྱས་མ་ལུས་ཀུན། །གསུང་གི་མངའ་བདག་ཁྱེད་ཡིན་པས། །རྩོལ་བཅས་ཐེག་པ་མཐར་བཏོན་ནས། །རྩོལ་མེད་ཐེག་པ་མི་གསུངས་ནས། །ཐུགས་རྗེ་ཆེན་པོ་ཡལ་ལམ་ཅི། །སྐལ་ལྡན་གདུལ་བྱ་མ་མཆིས་སམ། །ལྷུན་གྲུབ་ཐེག་པ་བཤད་དུ་གསོལ། །དེ་སྐད་ཅེས་ནི་གསུངས་པ་དང་། །དུས་གསུམ་སངས་རྒྱས་ཀུན་འདུས་ཏེ། །དོན་གྱིས་བགྲོ་བ་མཛད་པའི་ཕྱིར། །བཀའ་ཡི་མདོ་འདི་མ་བཀྲོལ་ན། །ཀུན་བཟང་ཐུགས་ཀྱི་ངེས་པའི་དོན། །རྡོ་རྗེ་སེམས་དཔའ་ཁྱོད་ཡིན་པས། །ཚིག་གཅིག་དོན་ཀུན་རྟོགས་པའི་ཆོས། །བཙལ་མེད་དོན་དང་འཕྲད་པར་ཞུས། །དེ་སྐད་བསྐུལ་བའི་དོན་དེ་ནི། །རྡོ་རྗེ་སེམས་དཔའ་ཡིས་རིག་ནས། །ངོ་བོ་ཉིད་ཀྱི་ཀུན་བཟང་ལ། །ངེས་པའི་ཡིད་ཀྱིས་འདི་སྐད་ཞུས། །ཆོས་ཉིད་གནས་ལུགས་ཇི་ལྟ་བ། །སེམས་ཉིད་བློ་ཡིས་རྟོགས་པའི་དོན། །ངེས་དོན་ཀུན་ཏུ་བཟང་པོ་ཡིས། །དུས་འདིར་བདག་ལ་བཤད་དུ་གསོལ། །དེ་སྐད་ཅེས་ནི་བསྐུལ་བ་དང་། །ཀུན་བཟང་ཐུགས་ཀྱིས་གསན་ནས་ནི། །ཏིང་འཛིན་རིག་པའི་གསུང་གིས་ནི། །དད་ལྡན་འཁོར་ལ་བཀའ་སྩལ་པ། །ཡང་དག་ངེས་དོན་རྒྱུད་ཆེན་འདི། །སྣོད་ལྡན་རྣམས་ལ་ངས་བཤད་དེ། །རྫོགས་ཆེན་སྐྱེ་མེད་དོན་ཟབ་ཀྱང་། །མ་རྟོགས་པ་ལ་སྡིག་མོར་ཆེ། །དེ་སྐད་ཅེས་ནི་གསུངས་མ་ཐག །འཁོར་རྣམས་དད་པས་འདུས་པ་རྣམས། །སྣོད་དང་ལྡན་པར་དམ་བཅས་ནས། །སེམས་ཀྱི་གདུང་བ་འདི་སྐད་བཏོན། །འཁོར་བའི་གཡང་སར་ལྟུང་བ་ལ། །ཐུགས་རྗེ་ཆེན་པོས་མི་འཛིན་ནས། །རེ་དོགས་འཛིན་པའི་རྒྱར་ཆུད་ན། །རྣམ་རྟོག་དྲ་བ་མི་གཅོད་དམ། །སེམས་ཅན་ལས་ལ་ཐུགས་ཆད་ན། །འགྲོ་དོན་སྙིང་རྗེ་མི་མཛད་དམ། །མ་རིག་མུན་པའི་སྨག་རུམ་དུ། །དམུས་ལོང་བཞིན་དུ་རང་སེམས་འཐིབ། །ཡེ་ཤེས་ཉི་མ་མི་འཆར་རམ། །ཞེ་སྡང་མེ་ཆེན་འབར་བ་ལ། །ལས་ཀྱི་རླུང་དམར་ཆེན་པོས་བུས། །ཆོས་ཉིད་རླན་གྱིས་མི་འཇིལ་ལམ། །འདོད་ཆགས་ཆུ་ལྟར་འབྲུབ་ནས་ཀྱང་། །བསེ་རྩི་ལྟ་བུར་ཞེན་པ་ལ། །ཡེ་ཤེས་མེ་ཡིས་མི་བསྲེག་གམ། །དོན་སྟོར་ལུས་ཀྱི་ནང་དུ་སྟོར། །ལམ་སྟོར་བདག་ལ་ས་མཁན་མཛོད། །དེ་སྐད་གདུང་བས་བསྐུལ་བ་དང་། །ཀུན་བཟང་སྟོན་པའི་ཐུགས་རྗེ་ཡིས། །སྣོད་དང་ལྡན་པར་ཐུགས་ ― DNG002_Page_0005 ―
[མ་དཔེ་གཟིགས་ན་འདིར་གནོན།]
གཟིགས་ནས། །འདུས་པའི་འཁོར་ལ་བཀའ་ཡིས་གནང་། །འདུས་པའི་དོན་དུ་བཀའ་བགྲོས་ཏེ། །དང་པོ་རྟོགས་ཐབས་ཆོས་དྲུག་གི། །སངས་རྒྱས་ཀུན་ཏུ་བཟང་པོ་བྱུང་། །དེ་ཕྱིར་རང་བྱུང་སྙིང་པོ་ལ། །ང་ཡིས་ང་ཉིད་འགྲོལ་བ་ལས། །གཞན་གྱིས་བཀའ་འདི་འགྲོལ་དུ་མེད། །རྡོ་རྗེ་སེམས་དཔའ་ཁྱོད་ཉོན་ཅིག །ངེས་དོན་ཚིག་གི་དོན་འགྲོལ་ན། །ཀུན་བཟང་ང་ཡི་བྱིན་རླབས་ཀྱིས། །སྐུ་གསུང་ཐུགས་ཀྱི་བྱིན་རླབས་ལས། །སྤྲུལ་པ་རྣམ་གསུམ་བྱུང་ནས་ནི། །དེས་དང་ལྡེམ་དགོངས་དྲང་དོན་དུ། །འཁོར་གྱི་བློ་ཡི་ཁྱད་པར་ལས། །ཅི་རིགས་པ་ནི་བཤད་པར་བགྲོ། །ད་ཡང་འདུས་པའི་སྙིང་པོ་ཉོན། །མ་རིག་མུན་པ་སེལ་བ་ནི། །གཞན་གྱིས་སེལ་བར་ནུས་མིན་ཕྱིར། །ངེས་དོན་བཀའ་ཡི་སྒྲོན་མ་འདི། །མ་རིག་མུན་སེལ་ཉི་ཟླ་ཆེ། །མ་རིག་མུན་པ་རྩད་ནས་འཇོམས། །འཁོར་འདས་འབྱུང་བའི་རྩ་བ་ནི། །ཡེ་ཤེས་མ་རིག་ཡིན་པའི་ཕྱིར། །ཐོག་མའི་བྱུང་ཚུལ་སུས་ཤེས་པ། །མ་རིག་མུན་པ་སེལ་བའི་མཆོག །ད་ཡང་རྡོ་རྗེ་སེམས་དཔའ་ཉོན། །མ་རིག་མུན་སེལ་ཉི་ཟླ་ཆེ། །འཆར་ནུབ་ཡོད་ཕྱིར་ཉི་ཟླ་ཆེ། །དེ་བཞིན་ཐེག་བརྒྱད་ཆོས་ཀུན་སྤང་། །གཞི་ཉིད་མ་ཤེས་འཇོམས་མི་ནུས། །ཡང་ཏི་ཐེག་ཆེན་སྙིང་པོ་འདི། །ངེས་ཤེས་དོན་ལྡན་ལུང་རྟོགས་ན། །མ་རིག་མུན་པ་སེལ་ཞེས་བྱ། །རིན་ཆེན་འོད་ལ་འཆར་ནུབ་མེད། །གཞི་ཡི་ཡེ་ཤེས་ངོས་ཟིན་ན། །ཆོས་སྐུའི་དོན་དང་བྲལ་བ་མེད། །དེ་ཕྱིར་མ་རིག་མུན་པ་བརླག །མ་རིག་རྣམ་གསུམ་འཇོམས་པའི་ཕྱིར། །ལུང་ལྡན་སྟོན་པའི་བཀའ་འདི་བགྲོས། །དེ་ཕྱིར་ངེས་དོན་རྒྱུད་འདི་ལ། །ཤེས་རབ་རྣམ་གསུམ་མཐའ་རུ་གཏུག །ད་ཡང་འདུས་པའི་སྙིང་པོ་ཉོན། །དོན་དང་མཐུན་པའི་གཞི་ཤེས་ཕྱིར། །མ་རིག་སངས་པས་ཡེ་ཤེས་རྒྱས། །དེ་ཕྱིར་རྟོགས་དང་སངས་རྒྱས་པ། །ལུས་དང་མ་བྲལ་དུས་འདིར་བྱུང་། །མ་རིག་མུན་སེལ་ཡེ་ཤེས་སྐུ། །ཆོས་རྣམས་ཀུན་གྱི་རྩ་བ་སྟེ། །སངས་རྒྱས་དགོངས་པ་ད་ལྟ་ཉིད། །ཕྱི་མ་མ་ཡིན་དུས་འདིར་ཡིན། །དེ་ཕྱིར་མུན་སེལ་རིག་པ་འདི། །ཆོས་རྣམས་ཀུན་གྱི་སྙིང་པོ་ལ། །རང་བྱུང་ཡེ་ཤེས་སུས་ཤེས་པ། །མ་རིག་མེད་པས་ཆོས་སྐུར་ཤར། །ད་ཡང་རྡོ་རྗེ་སེམས་དཔའ་ཉོན། །དེ་དོན་ཆོས་རྣམས་གསུངས་པ་ནི། །དུས་གསུམ་སངས་རྒྱས་ཐམས་ཅད་ཀྱང་། །རྩ་བ་ཆོས་སྐུ་རྟོགས་པའི་ཕྱིར། །གཟི་ལྡན་ནོར་བུ་རིན་ཆེན་ ― DNG002_Page_0006 ―
[མ་དཔེ་གཟིགས་ན་འདིར་གནོན།]
བཞིན། །ཆོས་རྗེ་སྟོན་པ་ཀུན་བཟང་གིས། །ཐམས་ཅད་ཡེ་ཤེས་ཆེན་པོར་མཁྱེན། །ད་ཡང་འདུས་པའི་སྙིང་པོ་ཉོན། །དེ་དོན་རང་རིག་ཆོས་ཀྱི་སྐུ། །ཚིག་དང་རང་གིས་བརྗོད་ལས་འདས། །རང་བྱུང་ཡེ་ཤེས་ཐུགས་ལ་གསལ། །དྲང་སྲོང་མངོན་ཤེས་དཔེ་བཞིན་དུ། །དུས་གསུམ་སངས་རྒྱས་འཁོར་བཅས་ཀྱི། །མཉམ་བཞག་པས་ནི་ཡིད་ཀྱི་གོ། །ངེས་དོན་རྟོགས་ཕྱིར་ཡང་སངས་རྒྱས། །རང་རིག་ཆོས་སྐུའི་བྱིན་རླབས་བཤད། །དེ་ནས་ལོངས་སྤྱོད་རྫོགས་པའི་སྐུ། །རྒྱུད་དག་མངོན་དུ་གྱུར་པ་ཡིས། །སྟོན་པ་རྡོ་རྗེ་སེམས་དཔའ་དེས། །བྱིན་གྱིས་བརླབས་པའི་དོན་རིག་ནས། །གཙང་མ་རིས་ཀྱི་ལྷ་གནས་ཀྱང་། །ཡངས་དོག་མེད་པའི་གཞལ་ཡས་ཁང་། །ཕྱི་ནང་མེད་པར་འོད་གསལ་བའི། །གྲངས་ཀྱི་འོག་མིན་གནས་དེ་རུ། །ལོངས་སྐུ་ཐུགས་ཀྱིས་འདུལ་བའི་དུས། །རིག་འཛིན་འཁོར་ལ་བརྩེར་དགོངས་ཏེ། །སྔ་ཕྱི་མིན་པའི་རིག་པ་འདི། །ད་ལྟའི་དུས་འདི་ཡིན་པར་གསུངས། །རིག་འཛིན་ཀུན་དགའ་ལྷ་དབང་ལ། །ཐུན་མོང་མ་ཡིན་དབང་བསྐུར་ནས། །དབུ་རྒྱན་བཀའ་རྟགས་ཕྱག་ཤིང་བྱིན། །གསང་མཚན་བཏགས་ནས་རྒྱུད་སྨིན་བྱས། །གསང་སྔགས་ཡང་ཏི་ངེས་དོན་ཆོས། །འཁོར་འདས་མ་རེག་ཆོས་ཀྱི་སྐུ། །རང་རིག་ཡེ་ཤེས་རིག་པ་དེ། །ལྡེམ་དགོངས་རང་རིག་ངོ་བོས་བཤད། །དེ་ནས་རིག་འཛིན་སེམས་དག་གིས། །ཕྱོགས་བཅུ་འདུས་པའི་སངས་རྒྱས་ལ། །ཞུ་བ་ཐེ་ཚོམ་བཅད་པའི་ཕྱིར། །ལུས་ངག་གུས་པའི་དད་པ་ཡིས། །ཤར་ཕྱོགས་མངོན་དགའི་ཞིང་ཁམས་ན། །སངས་རྒྱས་རྡོ་རྗེ་གསང་བ་ནི། །རྡོ་རྗེ་རབ་འབར་གདན་ལ་བཞུགས། །འཁོར་ལ་བཙལ་མེད་ཆོས་རྣམས་སྟོན། །དེ་ལ་བསྐོར་བ་བྱས་ནས་ནི། །ཀུན་ནས་དང་བའི་དད་པ་ཡིས། །ངེས་དོན་ཞུ་བའི་རྟེན་དུ་ཡང་། །བདུད་རྩི་ཟ་མ་ཏོག་གང་ཕུལ། །དེ་ལ་ངེས་པའི་དོན་ཞུས་པ། །ཡང་དག་དགོངས་པའི་ཆོས་ཉིད་ཀྱི། །སེམས་ཉིད་མི་འགྱུར་རྡོ་རྗེ་ལ། །སྐྱེ་འཆི་འབྱུང་བ་ཇི་ལྟར་ལགས། །ངེས་དོན་ཞུས་པའི་ ― DNG002_Page_0007 ―
[མ་དཔེ་གཟིགས་ན་འདིར་གནོན།]
དོན་གསན་ནས། །སངས་རྒྱས་རྡོ་རྗེ་གསང་བ་དེས། །ལྷ་ཡི་བདུད་རྩིས་ཐུགས་མཉེས་ཏེ། །ཞུས་པའི་ལན་དུ་བཀའ་སྩལ་པ། །གཞི་ཉིད་མི་འགྱུར་རྡོ་རྗེ་ལ། །སྐྱེ་འཆི་ཡོད་པ་མ་ཡིན་ཏེ། །རང་གི་རྣམ་རྟོག་གཟུང་འཛིན་གྱིས། །ཐ་མལ་ལུས་ལ་སྐྱེ་འཆི་བྱུང་། །དེ་སྐད་ཅེས་ནི་གསུངས་པ་ཡིས། །རང་གི་སེམས་ཀྱི་ཐེ་ཚོམ་ཆོད། །ཞུ་བ་ཞུས་ནས་ངེས་པ་རྙེད། །དེ་ཕྱིར་རྟོགས་པ་མངོན་དུ་གྱུར། །ད་ཡང་འཁོར་གྱི་སྙིང་པོ་ཉོན། །ལྷོ་ཕྱོགས་འདུ་འབྲལ་མེད་པ་ཡི། །རིན་ཆེན་བརྩེགས་པའི་ཞིང་ཁམས་ན། །རིན་ཆེན་སྙིང་པོ་རིན་ཆེན་ལྡན། །འཁོར་ལ་རྒྱ་ཆེར་བཙལ་མེད་སྟོན། །དེ་ལ་བསྐོར་བ་བྱས་ནས་ཀྱང་། །ཀུན་ནས་འདོད་པའི་དད་པ་ཡིས། །ངེས་དོན་ཞུ་བའི་རྟེན་དུ་ཡང་། །མ་གི་ཟ་མ་ཏོག་གང་ཕུལ་ནས་ནི། །དེ་ལ་ངེས་པའི་དོན་ཞུས་པ། །སངས་རྒྱས་ངེས་པའི་ཆོས་སྐུ་ལ། །དེ་དོན་རྩོལ་བས་མ་བསྒྲུབས་པར། །ཡོན་ཏན་འབྲས་བུ་ཇི་ལྟར་འཆར། །དེ་དོན་ཞུས་པའི་དོན་གསན་ནས། །སངས་རྒྱས་རིན་ཆེན་སྙིང་པོ་དེ། །མ་གི་ཏ་ཡིས་ཐུགས་མཉེས་ནས། །ཞུས་པའི་ལན་དེ་བཀའ་སྩལ་པ། །ཏཀྵ་ཀ་ཡི་རྒྱན་བཞིན་དུ། །ཡེ་ནས་གནས་པའི་ཆོས་ཉིད་ལ། །རྒྱུ་འབྲས་མཐར་ཕྱིན་གཞི་ནས་རྫོགས། །ཉི་མའི་འོད་ལྟར་འབྲས་བུ་འབྱུང་། །དེ་སྐད་ཅེས་ནི་གསུངས་པ་དང་། །རང་བཞིན་གཞི་ཡི་ཐེ་ཚོམ་ཆོད། །ཞུ་བ་ཞུས་ཕྱིར་ངེས་པ་རྙེད། །དེ་ཕྱིར་ལྷག་མཐོང་མངོན་དུ་གྱུར། །ད་ཡང་འདུས་པའི་སྙིང་པོ་ཉོན། །ནུབ་ཕྱོགས་སྒྲིབ་པ་མེད་པ་ཡི། །པདྨ་ཅན་གྱི་ཞིང་ཁམས་ན། །སངས་རྒྱས་དྲི་མེད་གྲགས་པ་དེ། །པདྨའི་གདན་ལ་འབྲས་བུ་སྟོན། །དེ་ལ་བསྐོར་བ་བྱས་ནས་ཀྱང་། །ཀུན་ནས་ཡིད་ཆེས་དད་པ་ཡིས། །ངེས་དོན་ཞུ་བའི་རྟེན་དུ་ཡང་། །པཉྩཱ་ལི་ཀའི་ན་བཟའ་ཕུལ། །དེ་ལ་ངེས་པའི་དོན་ཞུས་པ། །སེམས་ཉིད་པད་ལྟར་དག་པ་ལ། །གཟུང་འཛིན་དྲི་ ― DNG002_Page_0008 ―
[མ་དཔེ་གཟིགས་ན་འདིར་གནོན།]
མས་ཇི་ལྟར་གོས། །དེ་སྐད་ཞུས་པའི་དོན་གསན་ནས། །སངས་རྒྱས་དྲི་མེད་གྲགས་པ་དེ། །པཉྩཱ་ལི་ཀས་ཐུགས་མཉེས་ནས། །ཞུས་པའི་ལན་དེ་བཀའ་སྩལ་པ། །པདྨ་འདམ་གྱིས་མ་གོས་ལྟར། །བྱང་ཆུབ་སེམས་ཀྱི་ངོ་བོ་ལ། །གཟུང་འཛིན་དྲི་མ་གཞི་ལ་མེད། །འཁྲུལ་པའི་བློ་ལ་དྲི་མ་བྱུང་། །དེ་སྐད་ཅེས་ནི་གསུངས་པ་ཡི། །རང་གི་བློ་ཡི་ཐེ་ཚོམ་ཆོད། །ཞུ་བ་ཞུས་ཕྱིར་ངེས་པ་རྙེད། །ངེས་པའི་ཡེ་ཤེས་མངོན་དུ་གྱུར། །ད་ཡང་འཁོར་གྱི་སྙིང་པོ་ཉོན། །བྱང་ཕྱོགས་རྣམ་དག་ཞིང་ཁམས་ན། །སངས་རྒྱས་ལས་རབ་གྲུབ་པ་དེ། །ཨིནྡྲ་ནཱི་ལའི་གདན་བཞུགས་ཏེ། །ངེས་དོན་བཙལ་མེད་འབྲས་བུ་སྟོན། །དེ་ལ་བསྐོར་བ་བྱས་ནས་ནི། །ཀུན་ནས་ཉམས་མྱོང་དད་པ་ཡིས། །ངེས་དོན་ཞུ་བའི་རྟེན་དུ་ཡང་། །ཏ་པ་ལ་ཡི་འབྲས་བུ་ཕུལ། །དེ་ལ་ངེས་པའི་དོན་ཞུས་པ། །ཆོས་སྐུ་གཅིག་ལས་མེད་པའི་ཕྱིར། །བཙལ་མེད་སེམས་ཀྱི་རང་བཞིན་ལ། །འགྲོ་དོན་མཛད་པ་ཅི་ལྟར་ལགས། །དེ་སྐད་ཞུས་པའི་དོན་གསན་ནས། །སངས་རྒྱས་ལས་རབ་གྲུབ་པ་དེ། །མེ་ཏོག་ཏ་བས་ཐུགས་དགྱེས་ཏེ། །ཞུས་པའི་ལན་དེ་བཀའ་སྩལ་པ། །རང་བྱུང་ཆོས་སྐུ་རྟོགས་གྱུར་ན། །བྱ་བའི་ལས་རྣམས་མི་དགོས་ཏེ། །ནོར་བུ་རིན་ཆེན་རྙེད་པ་འདྲ། །མཛད་པ་ཕྲིན་ལས་རང་ལས་འབྱུང་། །དེ་སྐད་ཅེས་ནི་གསུངས་པ་ཡིས། །རང་གི་འཁྲུལ་པའི་ཐེ་ཚོམ་ཆོད། །ཞུ་བ་ཞུས་ཕྱིར་ངེས་པ་རྙེད། །དེ་ཕྱིར་འབྲས་བུ་མངོན་དུ་གྱུར། །ད་ཡང་འདུས་པའི་སྙིང་པོ་ཉོན། །ཤར་ལྷོ་འཚེ་མེད་ཞིང་ཁམས་ན། །སངས་རྒྱས་རྒྱལ་བའི་དབང་པོ་དེས། །དད་ལྡན་ཉིད་ཀྱི་འཁོར་རྣམས་ལ། །བཙལ་མེད་འབྲས་བུའི་ཆོས་རྣམས་སྟོན། །དེ་ལ་བསྐོར་བ་བྱས་ནས་ནི། །ཀུན་ནས་རང་རིག་དད་པ་ཡིས། །ངེས་དོན་ཞུ་བའི་རྟེན་དུ་ཡང་། །དཔག་བསམ་ཤིང་གི་འབྲས་བུ་ཕུལ། །དེ་དོན་ཡང་དག་དོན་ཞུས་པ། །ཡེ་ནས་རང་བྱུང་སྙིང་པོ་དེ། །ཆོས་ཉིད་ཡེ་ནས་རང་ཆས་ལ། །ཐོས་བསམ་དགོས་པ་ཇི་ལྟར་ལགས། །དེ་སྐད་ཞུས་པའི་དོན་གསན་ནས། །སངས་རྒྱས་རྒྱལ་བའི་དབང་པོ་དེ། །དཔག་བསམ་འབྲས་བུས་ཐུགས་མཉེས་ཏེ། །ཞུས་པའི་ལན་དེ་བཀའ་སྩལ་པ། །ཡེ་ནས་ཆོས་ཉིད་རང་ཆས་ལ། །ཐོས་བསམ་དགོས་པ་མ་ཡིན་ཏེ། །མ་རིག་མུན་པ་བསལ་བའི་ཕྱིར། །ལུང་ལྡན་རྐྱེན་ ― DNG002_Page_0009 ―
[མ་དཔེ་གཟིགས་ན་འདིར་གནོན།]
གྱིས་ཡིད་ཆེས་བསྐྱེད། །དེ་སྐད་ཅེས་ནི་གསུངས་པ་དང་། །ཐོས་བསམ་དགོས་པར་ཐེ་ཚོམ་ཆོད། །ཞུ་བ་ཞུས་ཕྱིར་ངེས་པ་རྙེད། །དེ་ཕྱིར་ཡེ་ཤེས་མངོན་དུ་གྱུར། །ད་ཡང་འདུས་པའི་སྙིང་པོ་ཉོན། །ལྷོ་ནུབ་རྣམ་དག་ཞིང་ཁམས་ན། །སངས་རྒྱས་བསོད་ནམས་སྙིང་པོ་དེས། །དད་ལྡན་རང་གི་འཁོར་རྣམས་ལ། །བཙལ་མེད་འབྲས་བུའི་ཆོས་རྣམས་སྟོན། །དེ་ལ་བསྐོར་བ་བྱས་ནས་ནི། །ཀུན་ནས་ཤེས་རབ་དད་པ་ཡིས། །ངེས་དོན་ཞུ་བའི་རྟེན་དུ་ནི། །ཤིང་ཏོག་བ་མེན་རྭ་གང་ཕུལ། །དེ་ལ་དགོས་པའི་དོན་ཞུས་པ། །ཡེ་ནས་རྒྱུན་གྱི་ཏིང་འཛིན་གྱིས། །ཆོས་ཉིད་ཡེ་ནས་འོད་གསལ་ལ། །བྱིང་རྒོད་འབྱུང་བ་ཇི་ལྟར་ལགས། །དེ་སྐད་ཞུས་པའི་དོན་གསན་ནས། །སངས་རྒྱས་བསོད་ནམས་སྙིང་པོ་དེ། །ཤིང་ཏོག་ལ་ནི་ཐུགས་མཉེས་ཏེ། །ཞུས་པའི་ལན་དེ་བཀའ་སྩལ་པ། །ཆོས་ཉིད་ཡེ་ནས་འོད་གསལ་ལ། །རྣམ་སྨིན་ལུས་དང་མ་བྲལ་ཕྱིར། །ལོག་གནོན་གདམས་ངག་མེད་པ་ལ། །ཚོགས་བརྒྱད་རྐྱེན་གྱིས་བྱིང་རྒོད་འབྱུང་། །དེ་སྐད་ཅེས་ནི་གསུངས་པ་ཡིས། །རང་གི་བསྒོམ་པའི་ཐེ་ཚོམ་ཆོད། །ཞུ་བ་ཞུས་ཕྱིར་ངེས་པ་རྙེད། །དེ་ཕྱིར་ཏིང་འཛིན་མངོན་དུ་གྱུར། །ད་ཡང་འདུས་པའི་སྙིང་པོ་ཉོན། །ནུབ་བྱང་འཁོར་མེད་ཞིང་ཁམས་ན། །སངས་རྒྱས་ཞི་བའི་དབང་པོ་དེ། །དད་ལྡན་ཉིད་ཀྱི་འཁོར་རྣམས་ལ། །བཙལ་མེད་འབྲས་བུ་རྒྱ་ཆེར་སྟོན། །དེ་ལ་བསྐོར་བ་བྱས་ནས་ནི། །ཡིད་ཆེས་པ་ཡི་དད་པ་ཡིས། །ངེས་དོན་ཞུ་བའི་རྟེན་དུ་ཡང་། །སྦྲང་རྩི་ཕྲུ་བ་གང་ཕུལ་ནས། །དེ་ལ་ངེས་པའི་དོན་ཞུས་པ། །རང་རིག་ཀུན་གཞི་གཞི་ཆ་ནི། །ཡེ་ནས་རང་བྱུང་རྒྱུ་མེད་ལ། །འཕེལ་འགྲིབ་འབྱུང་བ་ཇི་ལྟར་ལགས། །དེ་སྐད་ཞུས་པའི་དོན་གསན་ནས། །སངས་རྒྱས་ཞི་བའི་དབང་པོ་དེ། །སྦྲང་རྩི་ཕུལ་བས་ཐུགས་མཉེས་ནས། །ཞུས་པའི་ལན་དེ་བཀའ་སྩལ་པ། །རང་བྱུང་ཡེ་ཤེས་སྙིང་པོ་ལ། །འཕེལ་འགྲིབ་ཡོད་པ་མ་ཡིན་ཏེ། །མ་རིག་མུན་པ་མ་སེལ་ཕྱིར། །ཀུན་གཞིའི་རྐྱེན་གྱིས་འཕེལ་འགྲིབ་བྱུང་། །དེ་སྐད་ཅེས་ནི་གསུངས་པ་ཡིས། །འཕེལ་འགྲིབ་མེད་པར་ཐེ་ཚོམ་ཆོད། ། ― DNG002_Page_0010 ―
[མ་དཔེ་གཟིགས་ན་འདིར་གནོན།]
ཞུ་བ་ཞུས་ནས་ངེས་པ་རྙེད། །དེ་ཕྱིར་ཡེ་ཤེས་མངོན་དུ་གྱུར། །ད་ཡང་འདུས་པའི་སྙིང་པོ་ཉོན། །བྱང་ཤར་ལས་དག་ཞིང་ཁམས་ན། །སངས་རྒྱས་ཞི་བའི་སྙིང་པོ་དེ། །དད་ལྡན་རང་གི་འཁོར་རྣམས་ལ། །སེམས་ཀྱི་འབྲས་བུའི་ཆོས་རྣམས་སྟོན། །དེ་ལ་བསྐོར་བ་བྱས་ནས་ཀྱང་། །ཀུན་ནས་དད་པའི་གདེངས་ཀྱིས་ནི། །ངེས་དོན་ཞུ་བའི་རྟེན་དུ་ཡང་། །རིན་ཆེན་ཀེ་ཏའི་འབྲས་བུ་ཕུལ། །དེ་ལ་ངེས་པའི་དོན་ཞུས་པ། །རང་གི་སེམས་ཉིད་གཉུག་མ་ལ། །གཞི་ལ་ཐོག་མཐའ་མེད་པ་ལ། །འཁོར་འདས་ཐོག་མཐའ་འོང་བ་ཅི། །དེ་སྐད་ཞུས་པའི་དོན་གསན་ནས། །སངས་རྒྱས་ཉི་མའི་འོད་ཟེར་དེ། །རིན་ཆེན་ཀེ་ཏས་ཐུགས་མཉེས་ཏེ། །ཞུས་པའི་ལན་ནི་བཀའ་སྩལ་པ། །གཞི་ཉིད་དུས་གསུམ་འགྱུར་མེད་ལ། །བློ་ཡིས་བཅོས་སུ་མི་འདོད་ཕྱིར། །ཡེ་ཤེས་མ་རིག་ཁྱད་པར་ལས། །འཁོར་འདས་གཉིས་ལ་ཐོག་མཐའ་བྱུང་། །དེ་སྐད་ཅེས་ནི་གསུངས་པ་ཡིས། །ཐོག་མཐའ་ཡོད་མེད་ཐེ་ཚོམ་ཆོད། །ཞུ་བ་ཞུས་ཕྱིར་ངེས་པ་རྙེད། །དེ་ཕྱིར་འབྲས་བུ་མངོན་དུ་གྱུར། །ད་ཡང་འདུས་པའི་སྙིང་པོ་ཉོན། །མཐའ་དབུས་མེད་པའི་ཞིང་ཁམས་ན། །སངས་རྒྱས་ནམ་མཁའི་སྙིང་པོ་དེ། །དད་ཉན་རྣམས་ཀྱི་འཁོར་རྣམས་ལ། །བཙལ་མེད་འབྲས་བུའི་ཆོས་རྣམས་སྟོན། །དེ་ལ་བསྐོར་བ་བྱས་ནས་ནི། །ཀུན་ནས་མཐར་ཐུག་དད་པ་ཡིས། །ངེས་དོན་ཞུ་བའི་རྟེན་དུ་ཡང་། །ཨུཏྤ་ལ་ཡི་མེ་ཏོག་ཕུལ། །དེ་ལ་ངེས་པའི་དོན་ཞུས་པ། །རང་བཞིན་དག་པའི་ངོ་བོ་ལ། །གཞི་ལ་སྣང་བ་མེད་པ་ལ། །གློ་བུར་འཁྲུལ་སྣང་ཇི་ལྟར་བྱུང་། །དེ་སྐད་ཅེས་ནི་ཞུས་མ་ཐག །སངས་རྒྱས་ནམ་མཁའི་སྙིང་པོ་དེ། །ཨུཏྤ་ལ་ཡིས་ཐུགས་དགྱེས་ཏེ། །ཞུས་པའི་ལན་དེ་བཀའ་སྩལ་པ། །གཞི་ལ་སྣང་མེད་ནམ་མཁའ་འདྲ། །མ་རིག་རྐྱེན་བྱས་གཟུང་འཛིན་གྱིས། །རང་གི་གཞན་སྣང་འཁྲུལ་པའི་ཕྱིར། །བག་ཆགས་སྣང་བ་སྤྲིན་ལྟར་བྱུང་། །དེ་སྐད་ཅེས་ནི་གསུངས་པ་ཡིས། །སྣང་བ་ཡོད་མེད་ཐེ་ཚོམ་ཆོད། །ཞུ་བ་ཞུས་ཕྱིར་ངེས་པ་རྙེད། །དེ་ཕྱིར་འབྲས་བུ་མངོན་དུ་གྱུར། །ད་ཡང་འདུས་པའི་སྙིང་ ― DNG002_Page_0011 ―
[མ་དཔེ་གཟིགས་ན་འདིར་གནོན།]
པོ་ཉོན། །ཡོན་ཏན་རྒྱས་པའི་ཞིང་ཁམས་ན། །སངས་རྒྱས་འབུམ་གཟིགས་བྱ་བ་དེ། །ཉིད་ཀྱིས་དད་ཉན་འཁོར་རྣམས་ལ། །བཙལ་མེད་འབྲས་བུའི་ཆོས་རྣམས་སྟོན། །དེ་ལ་བསྐོར་བ་བྱས་ནས་ནི། །ཀུན་ནས་ཡིད་ཆེས་དད་པ་ཡིས། །ངེས་དོན་ཞུ་བའི་རྟེན་དུ་ཡང་། །པདྨ་གསེར་གྱི་མདོག་ཅན་ཕུལ། །དེ་ལ་ངེས་པའི་དོན་ཞུས་པ། །འབྲལ་མེད་རྒྱུན་གྱི་ཏིང་འཛིན་གྱིས། །རིག་པ་ཕྱི་ནང་མེད་པ་ལ། །མཉམ་བཞག་རྗེས་ཐོབ་འོང་བ་ཅི། །དེ་སྐད་ཞུས་པའི་དོན་གསན་ནས། །སངས་རྒྱས་འབུམ་གཟིགས་བཞུགས་པ་དེ། །གསེར་གྱི་པདྨོས་ཐུགས་དགྱེས་ནས། །ཞུས་པའི་ལན་དེ་བཀའ་སྩལ་པ། །ཡེ་ཤེས་རིག་པ་འདི་ཉིད་ལ། །མཉམ་བཞག་རྗེས་ཐོབ་གདོད་ནས་མེད། །ངེས་དོན་འདི་མེད་སྒོམ་ཆེན་ལ། །སྒོ་ལྔའི་ཡུལ་ལ་རྗེས་ཐོབ་བྱུང་། །དེ་སྐད་ཅེས་ནི་གསུངས་པ་ཡིས། །མཉམ་བཞག་རྗེས་ཐོབ་ཐེ་ཚོམ་ཆོད། །ཞུ་བ་ཞུས་ཕྱིར་ངེས་པ་རྙེད། །དེ་ཕྱིར་ཡེ་ཤེས་མངོན་དུ་གྱུར། །དེ་ནས་རིག་འཛིན་སེམས་དག་དེ། །སྔོན་གྱི་གནས་ནི་རྗེས་དྲན་ནས། །སུམ་ཅུ་རྩ་གསུམ་ཤར་ཕྱོགས་ཀྱི། །རིན་ཆེན་མངོན་དགའ་ཕུག་ཏུ་ཕྱིན། །ནང་དུ་འབྲལ་མེད་མཉམ་བཞག་པས། །སེམས་ཅན་ཀུན་གྱི་དོན་ཆེད་དུ། །ལྷ་དབང་བརྒྱ་བྱིན་དྲུང་བྱོན་ནས། །ལྷ་ཡི་བུ་ལ་འདི་སྐད་བསྐུལ། །ཁྱོད་ནི་ཤཱཀ་ཐུབ་སྤྲུལ་པ་སྟེ། །འཇིག་རྟེན་གསུམ་ན་འགྲན་ཟླ་མེད། །སངས་རྒྱས་ཆོས་ཀུན་ཐུགས་ལ་རྫོགས། །འདོད་ཁམས་འཛམ་གླིང་སྣོད་ལྡན་ལ། །བསྟན་པ་ཙམ་གྱིས་རྟོགས་པའི་ཆོས། །སྡེབ་སྦྱོར་ལེགས་པའི་ཚིག་ཏུ་གསུངས། །དེ་སྐད་ཅེས་ནི་བསྐུལ་བ་དང་། །ལྷ་དབང་ལ་ནི་ལན་གསོལ་པ། །ངེས་དོན་གསང་བའི་རྒྱུད་ཆེན་འདི། །རང་གི་སེམས་ལ་གསལ་བ་ལས། །ཚིག་གི་ཐོག་ཏུ་མི་ཕེབས་པས། །བདག་གིས་བགྲོ་བ་ཤིན་ཏུ་དཀའ། །དེ་སྐད་ཅེས་ནི་སྨྲས་པ་དང་། །དེ་ཡིས་དགོངས་པའི་དོན་གོ་ནས། །ལྷ་དབང་གིས་ནི་དོན་ཞུས་པ། །ཕྱི་རབས་དད་ལྡན་དོན་ཆེད་དུ། །ཡང་དག་ངེས་དོན་དགོངས་པ་དེ། །མ་རྟོགས་པ་ལ་ཚིག་སྒོ་ནས། །མཚོན་ནས་ ― DNG002_Page_0012 ―
[མ་དཔེ་གཟིགས་ན་འདིར་གནོན།]
རྟོགས་པར་བྱ་བའི་ཕྱིར། །ཅི་རིགས་པ་ནི་ཁྱོད་ཀྱིས་བགྲོས། །དེ་སྐད་ཅེས་ནི་ཞུས་པ་དང་། །རིག་འཛིན་ཀུན་གྱི་དོན་ཆེད་དུ། །རིག་འཛིན་ཀུན་དགས་ཐུགས་གསན་ནས། །སྐུ་དྲིན་ཆེ་བར་ལན་བཏབ་པ། །ལྷ་དབང་བཀའ་གཉན་དྲིན་ཆེ་བས། །མི་ཡུལ་འཛམ་གླིང་དད་ལྡན་གྱི། །མ་རིག་མུན་པ་བདག་གིས་བསལ། །བདེ་གཤེགས་རྣམས་ཀྱིས་བྱིན་གྱིས་བརླབས། །དེ་སྐད་ཅེས་ནི་གསུངས་པ་དང་། །རིག་འཛིན་ཆེན་པོ་ལྷ་དབང་དེ། །ཤིན་ཏུ་ཐུགས་ནི་དགྱེས་གྱུར་ཏེ། །ལྷ་དབང་གིས་ནི་ཞལ་བཞེས་པ། །ངེས་པའི་དོན་ལྡན་སློབ་མ་ལ། །ངེས་དོན་གསང་བའི་རྒྱུད་ཆེན་འདི། །མ་བཅོས་མ་བསླད་འཆད་ནུས་ན། །བདེ་གཤེགས་འཁོར་གྱིས་བྱིན་གྱིས་བརླབས། །དེ་སྐད་ཞལ་བཞེས་དམ་བཅས་ནས། །དེ་ཡང་འདུས་པའི་སྙིང་པོ་ཉོན། །དེ་ནས་ལྷ་ཡི་བུ་ཡིས་བསམས་པ་ལ། །མི་ལ་མངོན་ཤེས་རྫུ་འཕྲུལ་མེད། །དེ་ཕྱིར་ངེས་པའི་སྣོད་ལྡན་ལ། །འཛམ་གླིང་མི་ལ་བཤད་དགོངས་ནས། །སྤྲུལ་པ་སྐྱེ་བའི་རྟེན་བཙལ་བ། །རིགས་བཟང་རིགས་ངན་བུད་མེད་དེ། །གནོད་སྦྱིན་ཀུན་གསོས་བྱང་ཆུབ་མ། །དེ་ཡི་བུར་སྐྱེས་ཐུགས་དགོངས་ནས། །བྱ་ནི་ངང་པ་གསེར་ལུས་ཅན། །དངུལ་གྱི་གཤོག་པ་ལྕགས་སྡེར་ཅན། །གཡུ་ཡི་སྨིན་མ་རྡོ་རྗེའི་མཆུ། །རིན་ཆེན་མིག་ཅན་གཅིག་ཏུ་སྤྲུལ། །ནམ་ལངས་ཉི་མ་ཤར་མཚམས་སུ། །ཉི་ཟེར་ལ་ནི་བྱ་བྱུང་ནས། །བྱང་ཆུབ་སྙིང་གར་མཆུ་གཏུགས་ནས། །སྙིང་གར་ཐིམ་ནས་ཞག་གསུམ་ནས། །ཁྱེའུ་ཆུང་ཕྱག་ཤིང་རྡོ་རྗེ་ཅན། །ཙར་གྱིས་སྐྱེས་ནས་འདི་སྐད་སྨྲས། །ཆོས་ཀུན་བྱང་ཆུབ་ཡེ་ཤེས་ཡིན། །འཁོར་བ་མ་རིག་ཡེ་ནས་མིན། །རྒྱུ་རྐྱེན་མ་བསྐྱེད་ངོ་བོ་ཉིད། །རང་གི་རིག་པ་ཆོས་སྐུ་ཡིན། །དེ་ལྟར་སྒྲོགས་པ་ཞིག་བྱུང་བས། །འཇིག་རྟེན་འདི་ན་ཡ་མཚན་ཅན། །མཚན་ཡང་དགའ་རབ་རྡོ་རྗེར་བཏགས། །ཡོན་ཏན་རིག་པ་ལྔ་ལྡན་ལ། །མངོན་ཤེས་དྲུག་གིས་དུས་གཅིག་མཁྱེན། །མི་རྣམས་ཀུན་གྱིས་བཀུར་བར་མཐོང་། །ཡོན་ཏན་ལགས་ཀྱིས་སྤྱན་དྲངས་ནས། །བདེ་ལྡན་གནས་སུ་བཞུགས་སུ་གསོལ། །དེ་ཚེ་སྤྲུལ་པ་དགའ་རབ་དེ། །ནང་ ― DNG002_Page_0013 ―
[མ་དཔེ་གཟིགས་ན་འདིར་གནོན།]
དུ་ཏིང་འཛིན་དགོངས་པ་ལ། །འབྲལ་མེད་རྒྱུན་དུ་ཐུགས་ཞུགས་པས། །གནོད་སྦྱིན་བདུད་ཀྱིས་མཐོ་བཙམས་ཏེ། །བར་ཆོད་བྱ་ཕྱིར་ཕུང་ཕྱེད་བཞིས། །བསྡིགས་དང་བྲིད་པའི་ལས་རྣམས་བྱས། །ལྷ་ཡི་བདུད་དུ་ཤེས་པ་ཡིས། །མྱ་ཞིང་སྨྱོ་ལ་དྲན་པ་བརླག །སྙིང་རྗེའི་དོན་དུ་ཏིང་འཛིན་གློད། །བྲིད་བསྡིགས་གཉིས་ཀྱིས་མ་བསླུས་ནས། །བདུད་ནི་ཡི་མུག་ཟིལ་ནོན་ནས། །གདུང་བ་བཏོན་ཅིང་སྐྱབས་ཞུས་པ། །སྙིང་རྗེ་ཆེན་པོས་བདག་ལ་གཟིགས། །མ་རིག་ལས་ཀྱིས་སྲིན་པོར་སྐྱེས། །སེམས་ཅན་ལུས་སྲོག་ཟས་སུ་ཟོས། །ལས་ངན་འགྱོད་པའི་ཡིད་ཀྱིས་བཤགས། །ཉིད་ཀྱི་བསྟན་པ་བདག་གིས་བསྲུང་། །དམ་ཉམས་ལུས་སྲོག་ཟས་སུ་ལེན། །བདག་གི་སྲོག་གི་སྙིང་པོ་འདི། །འབུལ་གྱིས་ཐུགས་རྗེ་མ་ཆུང་ཞིག །དེ་སྐད་ཅེས་ནི་སྐྱབས་གསོལ་ནས། །རིག་འཛིན་ཆེན་པོ་དགའ་རབ་ལ། །རང་སྲོག་སྙིང་པོ་ཕུལ་ནས་ནི། །བསྟན་པ་བསྲུང་བར་ཞལ་བཞེས་ནས། །དམ་ལ་བཏགས་ཏེ་བྲན་དུ་བྱས། །གསང་བའི་མན་ངག་རྣམ་བཞི་མཛད། །དེ་ནས་ཤཱཀ་ཐུབ་སྤྲུལ་པ་དེས། །བཀྲ་ཤིས་བདེ་ལྡན་གནས་དག་ཏུ། །ད་ལྟ་དུས་ཀྱི་དེང་སང་ན། །གསང་བདག་སྤྲུལ་པ་དང་ཉན་ལ། །སྡེབ་སྦྱོར་ལེགས་པའི་ཚིག་ཏུ་གསུངས། །ད་ཡང་རྡོ་རྗེ་སེམས་དཔའ་ཉོན། །ཤེས་རབ་བློ་ཡི་ཁྱད་པར་ལས། །སྐུ་གསུམ་ཆོས་རྣམས་གཅིག་གསུངས་པའི། །བཤད་ལུགས་རྣམ་པ་དེ་དག་ཀུན། །གདུལ་བྱའི་འཁོར་ལ་ཐ་དད་ཀྱང་། །དུས་གསུམ་གཅིག་ཕྱིར་ཁྱད་མེད་པས། །དོན་ལ་དབྱེར་མེད་ངོ་བོ་གཅིག །རྫོགས་པ་ཆེན་པོ་ངེས་དོན་ཐམས་ཅད་འདུས་པའི་སྙིང་པོ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ངེས་དོན་འབྱུང་བའི་རྒྱུ་གླེང་གཞི་བསྟན་པའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་གདགས་ཕྱིར། །གུས་པའི་སེམས་ཀྱིས་རབ་སྦྱར་ཏེ། །བདེན་པའི་ཚིག་ནི་འདི་སྐད་གསོལ། །ཆོས་ཉིད་གནས་ལུགས་ངེས་པ་འདི། །སྣོད་ ― DNG002_Page_0014 ―
[མ་དཔེ་གཟིགས་ན་འདིར་གནོན།]
ཀྱི་རིམ་པ་གང་ལ་བསྟན། །ཆོས་རྣམས་གཏན་ལ་ཅི་ལྟར་དབབ། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་འཁོར་རྣམས་ལ། །ཆོས་ཉིད་གནས་ལུགས་བཀའ་སྩལ་པ། །འཁོར་བ་མྱ་ངན་འདས་པའི་ཆོས། །གཞི་ལ་གང་ཡང་མེད་པའི་ཕྱིར། །རང་རིག་རྟོགས་པའི་ཆོས་སྐུ་ལ། །འཁོར་འདས་གཞི་ལ་མེད་ཤེས་ཕྱིར། །ཆོས་ཉིད་ངེས་པའི་གནས་ལུགས་ཡིན། །ད་ཡང་འདུས་པའི་སྙིང་པོ་ཉོན། །དོན་བསྟན་སྣོད་བཅུད་རིམ་པ་ནི། །ཡང་དག་སངས་རྒྱས་ངེས་པའི་དོན། །གསང་སྔགས་ཀུན་གྱི་རྩ་བ་ཡིན། །དབང་རྣམས་རིམ་པར་རྫོགས་བྱས་ནས། །ཆོས་ཀྱི་གཞུང་དང་མི་འགལ་བ། །ཐོས་བསམ་བསྒོམ་ལ་རག་མ་ལུས། །ངེས་དོན་བཀའ་རྒྱུད་གསང་བ་ཡི། །དམ་པ་མཛོད་ཀྱི་གཉེར་ལྡན་ཞིང། །སྲིད་པར་ཞུས་ཀྱང་ཟད་མེད་པའི། །བླ་མ་རྡོ་རྗེ་སློབ་དཔོན་དེ། །ཚུལ་འཆོས་མེད་པར་གདེང་དང་ལྡན། །དཔེར་ན་གངས་ཀྱི་སེང་གེ་བཞིན། །གཅིག་པུར་གནས་ཀྱང་དོན་ལྡན་པ། །སངས་རྒྱས་དགོངས་པ་ཐུགས་ལ་འཆང་། །ད་ཡང་རྡོ་རྗེ་སེམས་དཔའ་ཉོན། །སྐལ་ལྡན་སློབ་མའི་མཚན་ཉིད་ནི། །བླ་མ་ལ་གུས་དད་པ་ལྡན། །སེར་སྣ་ཆུང་ལ་བརྩོན་འགྲུས་ཆེ། །བརྩེ་དང་དམ་ཚིག་མི་འགལ་བསྲུང་། །དོན་གསལ་ཐུབ་པའི་ཤེས་རབ་ཟབ། །ཚུལ་ཤིས་ངང་བཟང་རྣམས་ཀྱི་དོན། །ཡོན་ཏན་ཟག་མེད་རྣམས་ཀྱི་གཏེར། །ཐམས་ཅད་འབྱུང་བའི་གཞི་རུ་བསྟན། །ད་ཡང་འདུས་པའི་སྙིང་པོ་ཉོན། །དང་པོ་དད་པ་སྔོན་སོང་བའི། །ལུས་སྲོག་མི་བལྟ་གཏོང་ཕོད་ཅན། །འཁོར་འདས་གཅིག་ཏུ་བསྟན་པ་ལ། །སྐྲག་ཅིང་འཇིགས་པ་མེད་པ་ཡི། །ཐེ་ཚོམ་མེད་པར་དུས་ཚོད་ཟིན། །རྟོགས་པར་བྱ་བའི་ཐབས་སུ་བསྟན། །དཔའ་གཏུམ་སེང་གེའི་བརྩོན་འགྲུས་ཀྱིས། །སྔགས་དང་མཚན་ཉིད་མ་འདྲེས་པའི། །ཁྱད་པར་འཕགས་པའི་གདམས་ངག་གི། །ངེས་པ་དོན་གྱི་གདམས་ངག་ཞུ། །གླང་ཆེན་མི་ལྡོག་དགྲ་འཇོམས་ལྟར། །བླ་མ་རྡོ་རྗེ་སློབ་དཔོན་གྱིས། ། ― DNG002_Page_0015 ―
[མ་དཔེ་གཟིགས་ན་འདིར་གནོན།]
སྤྱོད་པ་མི་བརྟགས་ཆོས་ལ་བརྟགས། །མཚམས་མེད་ལྔ་ཡང་ཆོས་སྐུར་ཤེས། །ས་ཀུ་ཙི་ཡི་རྐང་ལག་བཞིན། །ངེས་དོན་རང་རིག་ཆོས་སྐུ་ལ། །རྒྱུན་དུ་མི་འབྲལ་གདམས་ངག་ནི། །མི་བརྗེད་གཟུངས་ཀྱིས་ཟིན་པར་བྱ། །ད་ཡང་རྡོ་རྗེ་སེམས་དཔའ་ཉོན། །ངེས་དོན་གསང་ཐུབ་ཞེ་ལ་འཆང་། །སྤྱོད་པ་འཇམ་པའི་ཚུལ་དང་ལྡན། །ཁྲམ་མེད་སྤྲོ་རིང་ངང་བཟང་ལ། །ངེས་དོན་བསྟན་པའི་སྣོད་དུ་རུང་། །ད་ཡང་འདུས་པའི་སྙིང་པོ་ཉོན། །དེ་དང་མི་ལྡན་འདི་བསྟན་ན། །སངས་རྒྱས་རྣམས་ཀྱི་བཀའ་བཅག་སྟེ། །མཚམས་མེད་སྡིག་པའི་ཆར་མི་ཕོད། །དམྱལ་བའི་འོག་གཞི་བྱེད་པར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྣོད་བཅུད་བསྟན་པའི་ལེའུ་སྟེ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །ཆོས་རྣམས་གཏན་ལ་དབབ་པའི་ཕྱིར། །དོན་གྱི་དབྱེ་བ་འདི་གསུངས་པ། །ཡང་དག་ངེས་དོན་རྟོགས་པའི་ཐབས། །ཀུན་གཞི་རྣམ་གསུམ་ལས་འཁྲུལ་ཕྱིར། །ཐེག་གཞན་ལྔ་ཡི་ཁྱད་པར་དབྱེ། །སེམས་ཀྱི་སྐྱོན་དྲུག་ངོས་བཟུང་ལ། །སུན་གདོན་བདུན་གྱིས་ཤན་དབྱེ་བའོ། །ད་ཡང་འདུས་པའི་སྙིང་པོ་ཉོན། །ཁྱད་འཕགས་དབང་ལྔས་རང་རྒྱུད་སྨིན། །ཡོན་ཏན་གཞི་ཡི་དོན་ཤེས་ཕྱིར། །དམ་ཚིག་ལྔ་ཡིས་གཞི་བཟུང་ལ། །སྐབས་དབྱེ་ལྔ་ཡིས་གོ་ཕྱེ་ནས། །དཔེ་དོན་ཁྱད་པར་རྣམ་པ་བཞིས། །འདུས་པ་ལྔ་ཡི་དོན་བརྩོན་ཕྱིར། །བར་དོ་ལྔ་ཡིས་གཏན་ལ་དབབ། །ད་ཡང་འདུས་པའི་སྙིང་པོ་ཉོན། །རྩ་བ་བཞི་ཡིས་མདོར་བསྡུས་ཏེ། །བསྒོམ་ཡོད་བཞི་ཡིས་ཉམས་སུ་བླངས། །ཆེད་སྤྱོད་གསུམ་ནི་དོན་དུ་སྤྱོད། །ཆོ་འཕྲུལ་བཞི་བྱུང་ཟིལ་གྱིས་མནན། །སྙིང་པོ་ལྔ་ཡིས་ངོས་བཟུང་ལ། །གོ་ལས་ལྔ་ཡི་སྐྱོན་བསྟན་ཏེ། །ཉམས་པ་དྲུག་ནི་ལྟུང་བའི་ཕྱིར། །ཡེ་ཤེས་བཞི་ཡིས་ཤན་ཕྱེ་ནས། །བཀའ་རྟགས་བཞི་ཡིས་ངེས་མཚོན་ནས། །གདམས་ངག་དྲུག་གིས་ཐག་བཅད་དེ། །ངེས་དོན་གསུམ་གྱི་དོན་གོ་ནས། །ཐེ་ཚོམ་ ― DNG002_Page_0016 ―
[མ་དཔེ་གཟིགས་ན་འདིར་གནོན།]
གསང་བཞི་ངེས་བསལ་ནས། །རང་ཤར་དྲུག་གིས་བསྒོམས་མི་དགོས། །ཐིག་ལེ་བརྒྱད་ཀྱི་ཁྱད་པར་བསྟན། །ས་ལམ་རིམ་པ་དུས་གཅིག་རྫོགས། །ད་ཡང་འདུས་པའི་སྙིང་པོ་ཉོན། །ངེས་དོན་བདུན་གྱིས་ཉམས་སུ་བླངས། །ཉམས་མྱོང་བཞི་ཡིས་གཏིང་དུ་གོ། །རིག་དཔྱོད་བཞི་ཡིས་ལ་བཟླ་ལ། །ཀློང་ཆེན་དྲུག་གིས་ངེས་པ་རྙེད། །རྐྱེན་ཐུབ་དྲུག་གིས་འབྲལ་མེད་ཤེས། །ད་ཡང་རྡོ་རྗེ་སེམས་དཔའ་ཉོན། །སྐུ་གསུམ་ཐམས་ཅད་མཁྱེན་པའི་ཚད། །ཡོན་ཏན་ལྔ་ཡི་འབྲས་བུ་འབྱུང་། །ངེས་པ་བཞི་ཡིས་ཁྱད་པར་འཕགས། །ཟིལ་གནོན་རྟགས་བཞི་འབྲས་བུར་ལྡན། །ཆེ་བ་ལྔ་ཡིས་དངོས་འཛིན་དག །རང་གནས་དྲུག་གིས་གཞན་དོན་བྱ། །ད་ཡང་རྡོ་རྗེ་སེམས་དཔའ་ཉོན། །གཉིས་མེད་གསུམ་གྱིས་ལ་བཟླ་ལ། །གཏན་ཚིགས་བཞི་ཡིས་ཡིད་ཆེས་བྱ། །འབྲས་བུ་རྒྱུ་ཡི་མཐའ་རུ་གཏུག །རྟོགས་པ་བཞི་ཡི་གདེང་ལྡན་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་རྣམས་གཏན་ལ་དབབ་པ་སྡོམ་དུ་བསྡུས་ཏེ་བསྟན་པའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་རིག་ཆོས་ཀྱི་རྒྱལ་པོ་ལ། །ངེས་པའི་དགོས་དོན་འདི་སྐད་གསོལ། །སེམས་ཀྱི་ཀུན་གཞི་ཇི་ལྟར་བྱུང་། །བག་ཆགས་ཀུན་གཞི་ཇི་ལྟར་བགོས། །ལུས་ཀྱི་ཀུན་གཞི་ཇི་ལྟར་སྨིན། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པ་ཆོས་རྗེ་ཡིས། །ཀུན་གཞི་རྣམ་གསུམ་དབྱེ་བའི་དོན། །སེམས་ཀྱི་ཀུན་གཞི་བཀའ་སྩལ་པ། །ཐོག་མ་ཐ་མ་ད་ལྟ་དང་། །ངོ་བོ་ངེས་ཚིག་ཆེ་ཆུང་ཤས། །མཚན་ཉིད་གཉེན་པོ་ལས་དང་རྩལ། །ཡུལ་དཔེ་རྟགས་ཀྱི་སྒོ་ནས་བསྟན། །ད་ཡང་རྡོ་རྗེ་སེམས་དཔའ་ཉོན། །སེམས་ཀྱི་ཀུན་གཞི་ཐོག་མར་ཀྱང་། །གང་ལ་མི་རྟོག་ས་མ་ཟིན། །མ་ཤེས་ལྷན་ཅིག་མ་རིག་པ། །རྟོག་ཞུགས་སེམས་ཀྱི་ཀུན་གཞི་བྱུང་། །ད་ལྟ་གང་ན་གནས་པའི་རྟེན། །འགྲོ་དྲུག་སེམས་ཅན་མ་ལུས་ཀྱང་། །ཉན་ཐོས་རང་རྒྱལ་སེམས་དཔའ་ལ། །ཐུན་ ― DNG002_Page_0017 ―
[མ་དཔེ་གཟིགས་ན་འདིར་གནོན།]
མོང་དང་ནི་མ་ཡིན་ཚུལ། །ད་ཡང་འདུས་པའི་སྙིང་པོ་ཉོན། །ཐ་མར་གར་འགྲོ་ངེས་པ་ནི། །གཉེན་པོ་ལུང་ལྡན་རང་ཤར་ནས། །རིམ་གྱིས་ཅིག་ཆར་ངེས་པར་ངེས། །དོན་མ་ཕྲད་ན་ངེས་པ་མེད། །ངོ་བོ་གཞི་ཉིད་མ་ཤེས་ཕྱིར། །བག་ཆགས་གཉིད་ལོག་ཀུན་གཞི་སྟེ། །མ་རིག་རྟོག་པའི་ངོ་བོར་གནས། །ད་ཡང་འཁོར་གྱི་སྙིང་པོ་ཉོན། །ངེས་ཚིག་ཡུལ་གྱི་སྣང་བ་ལ། །སྣ་ཚོགས་ཡུལ་ལ་སེམས་པའི་ཕྱིར། །མིན་པའི་ཆོས་ལ་བདེན་པར་འཛིན། །ཐག་པ་སྦྲུལ་དུ་འཁྲུལ་དང་འདྲ། །སེམས་ཅན་ཤས་ནི་ཆེ་ཆུང་ཡོད། །ཉོན་མོངས་སེམས་པ་གཉེན་པོས་ནི། །བག་ཉལ་ཕྲ་དང་ཤིན་ཏུ་ཕྲ། །མངོན་རྒྱུ་མེད་པས་ཉོན་མོངས་ཆུང་། །རྒྱུ་མེད་མཚན་མེད་འཇིག་པའི་ཕྱིར། །ཐ་མ་དངོས་པོ་མེད་པར་དེངས། །ད་ལྟ་ཀུན་གཞི་ཡོད་ཀྱི་བར། །རྒྱུན་གྱིས་དུས་གསུམ་འགགས་ཏེ་མེད། །ད་ཡང་འདུས་པའི་སྙིང་པོ་ཉོན། །ཐུན་མོང་སྙིང་པོ་དབྱིངས་སོགས་ཀྱི། །ཉོན་མོངས་བག་ཆགས་རང་བཞིན་ཏེ། །ཤེས་རབ་མ་རིག་ལོག་ལྟ་འཇོམས། །ཐུན་མོང་མ་ཡིན་ཅིག་ཅར་དེངས། །ལས་ཀྱི་རྒྱུ་མཐུན་གང་རུང་སྟེ། །རྣམ་སྨིན་རིམ་གྱིས་མ་ཡིན་ཏེ། །བར་མ་ཆོད་པར་འབྲས་བུ་སྨིན། །ལུང་དུ་མ་བསྟན་ངེས་པ་མེད། །ད་ཡང་རྡོ་རྗེ་སྙིང་པོ་ཉོན། །བག་ཆགས་རྩལ་ནི་རིགས་དྲུག་སྟེ། །བདེ་སྡུག་བྱེ་བྲག་སོ་སོར་སྣང་། །ཆ་ཕྲ་རྩལ་ནི་ཉན་སེམས་ལ། །མེ་ལོང་ལྟ་བུར་རང་སྣང་ནས། །མཚོན་པ་དཔེ་ཡིས་རིས་དང་ལྡན། །ནམ་མཁའ་ཆུ་དང་མེ་ལོང་སོགས། །གཞི་ལ་རྒྱུ་རྐྱེན་མ་རིག་པ། །མེད་པར་བྱུང་བ་ཡ་མཚན་ཆེ། །ད་ཡང་འདུས་པའི་སྙིང་པོ་ཉོན། །དེ་དག་དབྱེ་བ་བློ་དམན་ལ། །ཡིད་ཆེས་བྱ་ཕྱིར་བསྟན་པ་ཡིན། །མ་རིག་པ་ལ་སེམས་སུ་བཏགས། །འཁོར་བ་བསྐྱེད་ཕྱིར་ཀུན་གཞི་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། གཞི་གནས་སེམས་ཀྱི་ཀུན་གཞི་བསྟན་པའི་ལེའུ་སྟེ་བཞི་པའོ། །དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །བག་ཆགས་ ― DNG002_Page_0018 ―
[མ་དཔེ་གཟིགས་ན་འདིར་གནོན།]
ཀུན་གཞི་བཀའ་སྩལ་པ། །དང་པོ་ད་ལྟ་ཐ་མ་དང་། །ངོ་བོ་མཚན་ཉིད་ངེས་ཚིག་དང་། །དཔེ་བརྟགས་གཉེན་པོ་དབྱེ་བ་རྩལ། །རྣམ་གྲངས་དེ་དག་བསྡུས་ཏེ་གསུངས། །ད་ཡང་རྡོ་རྗེ་སེམས་དཔའ་ཉོན། །ཐོག་མར་མཐའ་དྲུག་རྟོག་ལས་བྱུང་། །གང་ལ་མི་རྟོག་དོན་མ་ཟིན། །ཡེངས་པའི་ཚུལ་ལས་རྟོག་པ་བྱུང་། །རང་སྣང་སྒྲིབ་པ་བག་ཆགས་བརྟས། །བག་ཆགས་སྔ་ཕྱིའི་རྒྱུ་ལ་བརྟེན། །འགག་པ་མ་རིག་སྡུག་བསྔལ་བྱུང་། །ཆོས་སྐུ་མི་འགྱུར་འཁོར་བར་བརྟེན། །དེ་ཕྱིར་ལུས་སེམས་བག་ཆགས་ཡོད། །ད་ཡང་འདུས་པའི་སྙིང་པོ་ཉོན། །གང་འགྲོ་དུས་ལ་ངེས་མེད་རྐྱེན། །ཡེ་ཤེས་འཕྲད་ན་བག་ཆགས་བརླག །དེ་མེད་དག་པའི་ཐབས་མེད་དོ། །ཉི་མེད་མུན་པར་མི་འགྲོ་འདྲ། །ངོ་བོ་བརྫུན་ལ་བདེན་འཛིན་པ། །རྟོག་པ་ཞེན་རྒྱུད་བརྟས་པ་ན། །ད་ལྟ་བག་ཆགས་རྒྱུན་མི་ཆད། །དེ་ཕྱིར་འཁོར་བར་ཡང་ཡང་བསྐྱེད། །མཚན་ཉིད་གཅིག་གིས་བསྐྱེད་གྱུར་པས། །འབྲས་བུ་རིགས་དང་སོ་སོར་སྨིན། །རྒྱུ་རྐྱེན་ཚོགས་དང་གཉེན་པོས་འཇོམས། །ཆེ་ཆུང་ཇི་འདྲ་བརྟེན་པར་སྣང་། །ད་ཡང་འདུས་པའི་སྙིང་པོ་ཉོན། །བག་ཆགས་ཀུན་གཞི་རྟོག་པ་སྟེ། །ངེས་ཚིག་རྟོག་རྒྱུ་ཆ་ཕྲ་དེ། །བག་ཙམ་རྟེན་རྟོག་བརྟས་པ་ལས། །བག་ཆགས་ཀུན་གཞི་ཡུལ་དུ་བྱས། །འབྲས་བུ་ལས་ཀྱིས་སྨིན་པར་བྱེད། །ཐོག་མར་བཅས་དང་ཐོག་མ་མེད། །གར་སྨིན་ཟིལ་གནོན་བག་ཆགས་ཆུང་། །ལུང་དུ་མ་བསྟན་སྨིན་མི་ནུས། །ནམ་མཁའ་སྤྲིན་དང་ས་གཞི་བཞིན། །གཡའ་རྡུལ་ལྦུ་བ་བག་ཆགས་དཔེ། །འདྲ་ཡང་དོན་མིན་མཚོན་པར་ཟད། །གློ་བུར་ཡུལ་བྱུང་གཞི་ལ་མེད། །ད་ཡང་རྡོ་རྗེ་སེམས་དཔའ་ཉོན། །བག་ཆགས་ཀུན་འདུས་ཕུང་བོ་ལ། །རྒྱུ་མཐུན་རྣམ་པར་སྨིན་པ་སྟེ། །ཕུང་ལྔ་དུས་གསུམ་མི་འབྲལ་འབྱུང་། །འཁྲུལ་བརྟས་རྟག་ཏུ་བརྟན་པ་ཡིན། །གཉེན་པོ་ཐུན་མོང་ཐུན་མིན་གཉིས། །ཐུན་མོང་དད་པ་བརྩོན་འགྲུས་དང་། །མོས་དྲན་ཏིང་འཛིན་སོགས་རྣམས་སོ། །ཐུན་མོང་མ་ཡིན་ཡེ་ཤེས་དག །བག་ ― DNG002_Page_0019 ―
[མ་དཔེ་གཟིགས་ན་འདིར་གནོན།]
ཉལ་སྔོན་དུ་རྒྱུ་གཅིག་གིས། །བསྐྱེད་དང་བསྒྲུབ་དང་གཞན་དུ་འགྱུར། །གཞན་ལྟོས་ངོ་བོ་གྲུབ་པར་འདོད། །དབྱེ་བ་མ་ནོར་བརྟགས་པ་ཡིན། །ད་ཡང་འདུས་པའི་སྙིང་པོ་ཉོན། །རྩལ་དང་ཤས་ནི་ཆེ་ཆུང་སྟེ། །སྡུག་བསྔལ་སྐྱེ་རྒ་ན་འཆི་སྟེ། །བྱམས་བྲལ་དགྲ་འཕྲད་མེད་ཚོལ་རྙེད། །འཁོར་བའི་བག་ཆགས་རྩལ་དུ་བྱུང་། །གྲངས་ལ་མང་དུ་ཡོད་མོད་ཀྱང་། །བག་ཉོན་རྟོག་པ་སྐྱོན་དང་གཡོག །སྒྲིབ་ལྟུང་གོལ་ས་འཁྲུལ་པ་སྟེ། །ཡུལ་ཡོད་བར་དུ་གྲངས་ཐུག་མེད། །ད་ཡང་རྡོ་རྗེ་སེམས་དཔའ་ཉོན། །དེ་དག་འཁྲུལ་པ་ཡུལ་ལས་བྱུང་། །ཡུལ་སེམས་བར་དོར་གོལ་ས་ཆོད། །བག་ཆགས་གཞི་ལ་གོས་པ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། འཕྲལ་བྱུང་གི་བག་ཆགས་ཀྱི་ཀུན་གཞི་བསྟན་པའི་ལེའུ་སྟེ་ལྔ་པའོ། །དེ་ནས་ཀུན་རིག་སྟོན་པ་དེས། །སྐལ་ལྡན་དད་ལྡན་འཁོར་རྣམས་ལ། །ལུས་ཀྱི་ཀུན་གཞི་བཀའ་སྩལ་པ། །དབྱེ་བ་ངོ་བོ་མཚན་ཉིད་དང་། །ལས་དང་དཔེ་ལྡན་རྟོགས་པར་གསུངས། །ད་ཡང་འདུས་པའི་སྙིང་པོ་ཉོན། །རང་བཞིན་བག་ཆགས་ཡིད་ཀྱི་ལུས། །ཐོག་མ་ཐ་མ་ད་ལྟའི་ཁྱད། །ངེས་པར་གཏན་ལ་དབབ་པའི་ཕྱིར། །ཐ་དད་ལུས་ཀྱི་གཞི་ལས་བྱུང་། །ངོ་བོ་རྩལ་ཤུགས་ཐ་དད་པའི། །སྣང་དང་ཐིག་ལེའི་རྩལ་མེད་ཀྱང་། །གོང་གི་ལུས་ཉིད་དེ་ལ་བརྟེན། །ལུས་དང་བག་ཆགས་དབང་གིས་སྣང་། །དེ་ཡི་མཚན་ཉིད་ཆོས་སྐུ་དང་། །བག་ལུས་རང་བཞིན་ལུས་ལ་བརྟེན། །གཅིག་དང་ཐ་དད་གཉིས་ཀ་མིན། །འཁོར་འདས་རྟེན་ཡང་དེ་ལྟར་གནས། །ད་ཡང་འདུས་པའི་སྙིང་པོ་ཉོན། །ཉན་ཐོས་སེམས་དཔའ་སངས་རྒྱས་ལའང་། །རྫུ་འཕྲུལ་མཚན་ཉིད་དཔེ་བྱད་ཀུན་གྱི་གཞི། །སེམས་ཅན་སྒོ་གསུམ་དེ་ལ་བརྟེན། །ལུས་ཀྱི་ཀུན་གཞི་རྟེན་པའི་ལས། །དེ་ཡི་མཚོན་པའི་དཔེ་གསུངས་པ། །ལུས་ཀྱི་ཀུན་གཞི་ཁྱིམ་དང་འདྲ། །ཉི་མ་འཇུག་པའི་བདེ་བརྡལ་འདྲ། །གཟའ་སྐར་འཆར་བའི་ནམ་མཁའ་འདྲ། །ད་ཡང་འདུས་པའི་སྙིང་པོ་ཉོན། །དེ་དག་ཀུན་གཞི་རྣམ་གསུམ་ཡང་། །ཀུན་བརྟགས་བག་ཆགས་ཀུན་གཞི་ ― DNG002_Page_0020 ―
[མ་དཔེ་གཟིགས་ན་འདིར་གནོན།]
བྱུང་། །ཟུང་དུ་འཛོམ་པས་ཀུན་གཞི་གྲུབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཉོན་མོངས་ལུས་ཀྱི་ཀུན་གཞི་བསྟན་པའི་ལེའུ་སྟེ་དྲུག་པའོ། །སྡོམ་དུ་བསྡུས་ཏེ་བསྟན་པ་གཉིས་པའོ། །དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །རྩ་བ་གཅིག་པའི་ཆོས་ཉིད་ལ། །འཁོར་བའི་གཞི་ནི་གང་གིས་བྱས། །འགྲོ་དྲུག་སྡུག་བསྔལ་ཅི་ལས་བྱུང་། །མུ་སྟེགས་རྟག་ཆད་ཇི་ལྟར་འཁྲུལ། །ཐེག་པའི་རིམ་པ་གང་ལས་བྱུང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །འཁོར་གཞི་ཤེས་པ་ལུང་མ་བསྟན། །རང་བཞིན་ལུས་ཀྱི་རྩལ་སྣང་བ། །གང་ལ་མི་རྟོག་དོན་མ་ཟིན། །ཤེས་པ་རང་སྣང་དོན་མ་བཅོས། །མ་རིག་རྒྱུ་ཡི་ངེས་མེད་ཕྱིར། །ཤེས་བཞིན་ལུང་མ་བསྟན་ཞེས་བྱ། །ད་ཡང་འདུས་པའི་སྙིང་པོ་ཉོན། །རང་བཞིན་ངོ་བོའི་ལུས་དེ་ནི། །ཡེངས་དང་མ་ཡེངས་ཆ་མེད་པའི། །ཧད་དེ་བུན་ནེ་ཙམ་དུ་གནས། །རང་བྱུང་རྣམ་ཤེས་རྐྱེན་དབང་འགྱུར། །དེ་ཕྱིར་ལུང་མ་བསྟན་ཞེས་བྱ། །གཞི་ནི་དྲན་དང་མ་དྲན་གྱི། །བློ་ནི་འཇུག་ཅིང་དོན་མི་ཤེས། །མ་རིག་གཞི་ནི་ལུང་མ་བསྟན། །དེ་ཕྱིར་འཁོར་བའི་གཞི་ཞེས་བྱ། །ཡིད་བྱུང་རིམ་འགྲིབ་ལོག་པའི་རྒྱུས། །གྱ་གྱུ་ཙམ་དུ་དྲན་ཡོད་ཀྱང་། །དོན་དུ་མ་ཤེས་དེ་ཁོ་ན། །མ་རིག་བསྐོར་བའི་གཞི་མེད་ཕྱིར། །དང་པོ་འཁོར་བ་དེ་ལས་བྱུང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། འཁོར་བའི་གཞི་བསྟན་པའི་ལེའུ་སྟེ་བདུན་པའོ། །དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །འགྲོ་དྲུག་སྡུག་བསྔལ་བྱུང་བ་ནི། །དང་པོ་འཁོར་འདས་བར་དོ་ལ། །མེད་ལ་ཡོད་དྲན་ཡིད་ཙམ་བྱུང་། །ལུང་མ་བསྟན་ཕྱིར་རིམ་གྱིས་འགྲིབ། །ཤེས་པ་མུན་པོ་ཐིབ་ཀྱིས་འཐིབ། །དཔྱད་ཀྱང་ངོ་མི་ཤེས་པ་དང་། །གང་ཡང་མི་ཤེས་གཏི་མུག་ལ། །བག་ཉལ་ཞེན་པ་ཕྲ་མོ་བྱུང་། །དེ་མ་ཐག་ཏུ་འཛིན་པ་ཡིས། །མ་རིག་ལྷན་ཅིག་རྣམ་གསུམ་ལ། །ཀུན་བརྟགས་གསུམ་གྱིས་ ― DNG002_Page_0021 ―
[མ་དཔེ་གཟིགས་ན་འདིར་གནོན།]
རྐྱེན་བྱས་པས། །ཐག་པ་སྦྲུལ་དུ་འཛིན་པ་བཞིན། །དཔའ་བོ་ཡུལ་ཡན་གཟུང་འཛིན་གྱིས། །འཇིག་རྟེན་ལྷ་མི་ཤེས་པ་རྩིངས། །ཐར་ལམ་མི་ཐོབ་སྐྱེ་འཆིར་བརྟགས། །ད་ཡང་འདུས་པའི་སྙིང་པོ་ཉོན། །མ་རིག་ཞོན་པ་ངེས་པ་ནི། །ལེ་ལོ་སྙོམ་ལས་དམན་ལ་སྦྱར། །ཆགས་སྡང་ལྔ་ལ་ལོངས་སྤྱོད་པས། །དེ་ཡི་རྣམ་སྨིན་འབྲས་བུ་འབྱུང་། །དམྱལ་བས་རང་བཞིན་མེ་སོགས་མཐོང་། །ཡི་དྭགས་མི་གཙང་མཐོང་ཡུལ་སྣང་། །བྱོལ་སོང་ངམ་གྲོག་གྱེན་མཐུར་མཐོང་། །མི་ཡིས་མཐོང་ཡུལ་བཞི་རུ་སྣང་། །ལྷ་མ་ཡིན་གྱིས་གོ་མཚོན་མཐོང་། །ལྷ་ཡིས་རིན་ཆེན་སྣ་བདུན་མཐོང་། །དེ་དག་འགྲོ་དྲུག་སྡུག་བསྔལ་ཡིན། །ད་ཡང་རྡོ་རྗེ་སེམས་དཔའ་ཉོན། །མ་རིག་པ་ལས་བྱུང་བ་ཡི། །འགྲོ་དྲུག་སྡུག་བསྔལ་དེ་དག་ཀྱང་། །འཁྲུལ་ངོར་བདེན་ཀྱང་དོན་ལ་མེད། །དེ་ཕྱིར་མ་རིག་སྐྱོན་དུ་ཆེ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། འགྲོ་དྲུག་སྡུག་བསྔལ་བྱུང་ཚུལ་བསྟན་པའི་ལེའུ་སྟེ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །མུ་སྟེགས་འཁྲུལ་ལུགས་བཀའ་སྩལ་པ། །འཁྲུལ་སྨན་ཆེན་པོ་དང་འདྲ་སྟེ། །གཞི་དང་འཁྲུལ་པའི་ཉེས་པ་དེ། །སུན་བཏོན་ལ་ཟློས་གྲངས་བསྟན་པའི། །འཁྲུལ་གཞི་མེད་པའི་འཁྲུལ་པ་དེ། །རི་བོང་རྭ་བཞིན་ཡོད་མི་སྲིད། །འཁྲུལ་གཞི་ལས་ནི་འཁྲུལ་པ་བྱུང་། །ད་ཡང་འཁོར་གྱི་སྙིང་པོ་ཉོན། །ངོ་བོ་མི་འགྱུར་གཞི་བྱས་ནས། །ཁ་དོག་དབྱིབས་ཅན་བདག་ཏུ་འཁྲུལ། །ལོག་པའི་དཀའ་ཐུབ་དམྱལ་བར་ལྷུང་། །རིག་པས་བརྟགས་ན་བདག་མ་གྲུབ། །དེ་ཉིད་དོན་ཤེས་ལ་བཟླའོ། །ད་ཡང་འཁོར་གྱི་སྙིང་པོ་ཉོན། །ཡང་མཐའ་འཛིན་པའི་ལྟ་བ་ནི། །འགྱུར་བ་བཞི་དང་རྟག་པ་ལྔ། །ཐམས་ཅད་བདག་གིས་བྱས་པར་འདོད། །དེ་ཕྱིར་མུ་སྟེགས་རྟག་པ་འཁྲུལ། །ས་ཆུ་མེ་རླུང་འབྱུང་བ་བཞི། །དབྱར་དགུན་སྟོན་དཔྱིད་དུས་ ― DNG002_Page_0022 ―
[མ་དཔེ་གཟིགས་ན་འདིར་གནོན།]
ཀྱིས་འགྱུར། །དེ་ཕྱིར་དོན་མེད་བག་ཆགས་རྟག །འཁྲུལ་པ་ཡིན་མིན་འདུས་བྱས་ཡིན། །དེ་ཕྱིར་འགྱུར་བ་གཞི་ཞེས་བྱ། །རང་སེམས་ཁ་དོག་དབྱིབས་ཡོད་རྟག །དེ་ཕྱིར་བདག་ལ་སྐྱེ་འཆི་མེད། །རྒྱུན་དུ་རྟག་པས་རང་བྱུང་སེམས། །དཔེ་ནི་ཐམས་ཅད་བྱས་ཤིང་སྐྱེད། །དེ་ལས་བྱུང་བའི་ཡིད་རྟག་པ། །སྔོན་བྱས་དྲན་ཕྱིར་བག་ཆགས་རྟག །ཡོན་ཏན་བསླབ་པ་ཀུན་ཤེས་པས། །དེ་ཕྱིར་ཡིད་ནི་རྟག་ཅེས་བྱ། །དུས་གསུམ་རྣམ་པ་ཐམས་ཅད་དུ། །ཉི་མ་འཆར་ནུབ་རྟག་པའི་ཕྱིར། །བདག་ཀྱང་དུས་གསུམ་མི་འགྱུར་རྟག །དེ་ཕྱིར་ཕྱོགས་བཞི་མཚམས་བཞི་ཡང་། །ཡེ་ནས་མི་འགྱུར་རྟག་པར་ངེས། །དེ་ཕྱིར་རང་སེམས་བདག་གིས་ཀྱང་། །གནས་སྐབས་འགྱུར་ཡང་གཞི་མི་འགྱུར། །དུས་ནི་མི་འགྱུར་རྟག་པ་ཡང་། །དཔྱིད་དུས་སྟོན་དུས་མི་འགྱུར་དང་། །དགུན་ནི་དབྱར་དུ་མི་འགྱུར་ཕྱིར། །དུས་ནི་རྟག་པ་ཆེན་པོར་བཟུང་། །ད་ཡང་འདུས་པའི་སྙིང་པོ་ཉོན། །དེ་ལྟར་འདོད་པའི་འཁྲུལ་པ་ཡིས། །རྒྱུ་འབྲས་ལོག་པའི་བརྟུལ་ཞུགས་ཀྱིས། །ཐར་ལམ་མི་ཐོབ་འཁོར་བར་ལྟུང་། །མར་འདོད་བྱེ་མ་བཙིར་བ་བཞིན། །ད་ཡང་འདུས་པའི་སྙིང་པོ་ཉོན། །ཡེ་མེད་ཆད་པར་འདོད་པ་ནི། །ཁ་དོག་དབྱིབས་མེད་ཆད་གཞི་བྱས། །སྔ་ཕྱི་རྒྱུ་འབྲས་མེད་པར་འཁྲུལ། །སྐུར་བཏབ་དམྱལ་བ་ཆེན་པོར་ལྟུང་། །ཆད་དུ་མ་སྟེར་རིག་པར་ཡོད། །དེ་ཕྱིར་གཞི་ལ་གོལ་མེད་པས། །རང་བྱུང་ཡེ་ཤེས་ཀློང་ན་གནས། །ད་ཡང་འཁོར་གྱི་སྙིང་པོ་ཉོན། །ཕུང་པོས་བསྡུས་པའི་ཆོས་རྣམས་ཀུན། །དང་པོ་ཡེ་མེད་སྟོང་པ་ལས། །གློ་བུར་ཟིལ་ཙམ་ཕྲ་རགས་སྐྱེད། །དེ་ལས་ཡིད་སེམས་ཆ་ཕྲ་བྱུང་། །རྒྱུ་རྐྱེན་དག་ལས་བྱུང་བ་སྟེ། །བྱུང་ཡང་འབྱུང་བ་བཞི་ལས་བྱུང་། །ལས་ཀྱི་རྒྱུ་འབྲས་མེད་པར་ནི། །འབྱུང་བ་ལྔ་ཞིག་རང་ཐིམ་ནས། །མེ་ཤི་ཐལ་བ་རླུང་ཁྱེར་འདྲ། །ད་ཡང་འཁོར་གྱི་སྙིང་པོ་ཉོན། །གཉིས་ཀའི་གཞིར་འདོད་མུ་སྟེགས་ནི། །རིག་བྱེད་སྨྲ་བའི་བལྟ་བ་སྟེ། །རང་སེམས་ཤེས་པ་ལུང་མ་བསྟན། །གཞི་ནི་ངེས་པ་མེད་པ་ལས། །སྣང་བ་གང་ཡང་མི་འགོག་འདོད། །གདོན་གྱིས་ཟིན་པའི་སྨྱོན་པ་འདྲ། །དེ་ ― DNG002_Page_0023 ―
[མ་དཔེ་གཟིགས་ན་འདིར་གནོན།]
ཡི་འབྲས་བུ་ངེས་པར་ནི། །སེམས་ཀྱི་རྩ་བ་མ་ཤེས་པས། །འབྱུང་ཆེན་གཏོས་ཀྱི་མུན་པ་བཞིན། །ཐུགས་རྗེའི་ཉི་ཟེར་ཞགས་ཐག་ཆད། །དམྱལ་བའི་འབྲས་བུར་ཐེ་ཚོམ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། མུ་སྟེགས་ཀྱི་འཁྲུལ་ཚུལ་བསྟན་པའི་ལེའུ་སྟེ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཐེག་པའི་རིམ་པ་བཀའ་སྩལ་པ། །གཞི་ནི་ངོ་བོ་ཉིད་སྐུ་དེ། །མཐུན་དཔེ་མེ་ལོང་ལྟ་བུ་ལ། །གཟུགས་བརྙན་ཐེག་པ་རིམ་དགུ་བྱུང་། །ད་ཡང་རྡོ་རྗེ་སེམས་དཔའ་ཉོན། །དེ་དོན་རྣམ་པར་ཕྱེ་བ་ནི། །དང་པོ་ཉན་ཐོས་ལྟ་བ་ཡང་། །མདོ་སྡེ་པ་དང་བྱེ་བྲག་པ། །གང་ཟག་བདག་མེད་ཆོས་བདག་ཡོད། །ཡུལ་ལ་དངོས་པོར་འཛིན་ཕྱིར་གོལ། །ད་ཡང་འཁོར་གྱི་སེམས་དཔའ་ཉོན། །སྣང་བ་ཕྲ་རགས་ཡུལ་གྱི་གཞི། །ཆོས་ལ་བདག་ཏུ་འཛིན་པ་ཡོད། །ཞི་བ་ཕྱོགས་གཅིག་ཐར་མི་འཐོབ། །ལྷག་མཐོང་མེད་ཕྱིར་སྐྱེ་བོ་རང་། །དོན་རྟོགས་ཡུལ་འདི་ཆོས་ཀྱི་དབྱིངས། །ད་ཡང་འཁོར་གྱི་སྙིང་པོ་ཉོན། །བདེན་པ་བཞི་ཡི་སྒོར་ཞུགས་ནས། །དབུགས་ལ་སེམས་ཞུགས་འགོག་པར་བསྒོམ། །སྔོན་གྱི་བསྟན་པ་ལ་ཞུགས་ནས། །ད་ལྟའི་བསྟན་ལ་མཉམ་པར་བཞག །ད་ལྟའི་བསྟན་པ་ལ་ཞུགས་ནས། །མཁན་སློབ་སྡོམ་པའི་ཁྱད་པར་གྱིས། །རེ་དོགས་སྤྱོད་པ་ཆེད་བྱེད་པའི། །དཀའ་ཐུབ་ལུས་གདུང་བཟོད་པ་ཡི། །སེམས་ཀྱིས་ལུས་ངག་བཙོན་དུ་བཟུང་། །མ་འོངས་སྨོན་ལམ་རྗེས་འདེབས་ཀྱང་། །རྡུལ་དང་ཤེས་པ་གཉིས་འདོད་པས། །གླང་ཆེན་འདམ་དུ་བྱིང་བ་ལྟར། །ལུས་ངག་ལས་ཀྱི་རྩོལ་བ་ཡིས། །འབྲས་བུ་མི་ཐོབ་སྙིང་རྗེའི་གནས། །ད་ཡང་འདུས་པའི་སྙིང་པོ་ཉོན། །བླ་མ་དག་ལ་མི་བསྟེན་པར། །རང་སེམས་དོན་ལ་བློ་སྦྱངས་ཕྱིར། །རྟེན་འདྲེལ་ཕྱི་ནང་རྩད་བཅད་ནས། །ཡུལ་རྣམས་ཕྱོགས་ཆ་བཅད་གཞིག་ནས། །བསེ་རུ་ཁྱུ་ལྡིང་དཔེ་བཞིན་དུ། །སྒོ་ལྔ་མི་འགེག་རྒྱུ་བ་འགེག །རྗེས་འདྲེང་མེད་པ་ཙམ་དུ་བསྒོམ། །ནན་བསྒོམ་ཡིན་ཕྱིར་དོན་དང་འགལ། །སྟོང་པ་ཉིད་ལ་རྟེན་འཆའ་བས། །སྤང་ ― DNG002_Page_0024 ―
[མ་དཔེ་གཟིགས་ན་འདིར་གནོན།]
སྡུད་ཞེན་པ་ཡོད་ཕྱིར་གོལ། །བཙན་པར་མི་འགྱུར་ཉམས་པ་ཡིས། །ནོང་བུས་རྒྱལ་སྲིད་བསྒོམ་པ་འདྲ། །ད་ཡང་རྡོ་རྗེ་སེམས་དཔའ་ཉོན། །ཆོས་རྣམས་སེམས་སུ་བསྡུས་ནས་ནི། །སེམས་ཙམ་ཀུན་གཞིའི་རྟོག་པ་ཡི། །གོང་འོག་ཤེས་དག་སྐད་ཅིག་འདོད། །རིག་པ་རང་རྒྱལ་གྲངས་ཅན་གོལ། །རྟག་དང་ཁྱད་མེད་སྒྲོ་འདོགས་ནོར། །ཆོས་སྐུ་རང་རིག་འགྱུར་བ་མེད། །དབུ་མ་པ་ཡི་འདོད་གཞུང་དེ། །ངོ་བོ་དངོས་མེད་གཞི་བྱས་ཏེ། །ཡུལ་སེམས་གཞིག་པ་སྟོང་པར་འཁྲུལ། །ཅི་ཡང་མེད་པའི་སྐྱེ་མཆེད་ལྟུང་། །ཆད་དང་ཁྱད་མེད་སྟོང་པར་འཁྲུལ། །སྟོང་ཞེས་རང་བྱུང་ཆོས་སྐུ་ཡིན། །ད་ཡང་འདུས་པའི་སྙིང་པོ་ཉོན། །སེམས་ཙམ་དབུ་མའི་མཚན་ཉིད་དེ། །ཀུན་རྫོབ་དང་ནི་དོན་དམ་དུ། །སོ་སོར་རྟོག་པའི་ཤེས་རབ་ཀྱིས། །བདེན་པ་གཉིས་གཉིས་དོན་དག་ཏུ། །ཀུན་རྫོབ་སྒྱུ་མ་ཙམ་དུ་ཤེས། །དོན་དམ་སྤྲོས་དང་བྲལ་བ་ལ། །མི་དམིགས་ཞི་གནས་ལྷག་མཐོང་དུ། །རྩེ་གཅིག་སེམས་ཀྱིས་ཏིང་འཛིན་བསྒོམ། །སྤྱོད་པ་སྙིང་རྗེས་གཞི་བཟུང་ནས། །ཕ་རོལ་ཕྱིན་བཅུ་ལམ་ལྔ་ལ། །སེམས་བསྐྱེད་གཞན་དོན་ཆེད་དུ་བྱེད། །བདག་གཞན་སྒྱུ་མ་ཙམ་དུ་འཛིན། །འབྲས་བུ་ངེས་པར་འདོད་པ་ནི། །ཀུན་རྫོབ་སྒྲིབ་སྦྱངས་དོན་དམ་གྱིས། །བདེན་པ་མཐོང་བ་ཆེད་དུ་བྱེད། །གཅིག་བོར་ནས་ནི་གཅིག་ཚོལ་བ། །ཆུ་བཞག་ཟླ་བ་ངོས་འཛིན་འདྲ། །ད་ཡང་འདུས་པའི་སྙིང་པོ་ཉོན། །ཐམས་ཅད་རྩ་བ་གཅིག་པའི་ཕྱིར། །རང་རིག་སེམས་ཀྱི་སྙིང་པོའི་དོན། །ཟབ་ལ་རྒྱ་ཆེ་མི་ཤེས་པར། །བསམ་མེད་དག་ཏུ་གང་འཇོག་པའི། །བྱིས་པ་དེ་ནི་བླུན་པ་སྟེ། །མུན་པའི་སྐྱེ་མཆེད་ཉིད་དུ་ལྟུང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱུ་མཚན་ཉིད་ཀྱི་ལྟ་བ་བསྟན་པའི་ལེའུ་སྟེ་བཅུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ཕྱི་བ་ཀྲི་ཡོག་རྣམ་གསུམ་ནི། །ནམ་མཁའ་སྨིག་རྒྱུའི་དཔེ་བཞིན་དུ། །དག་པ་ཆོས་ ― DNG002_Page_0025 ―
[མ་དཔེ་གཟིགས་ན་འདིར་གནོན།]
ཉིད་ཀྲི་ཡའི་གཞི། །བཟང་ངན་གཙང་སྦྲས་དངོས་གྲུབ་རེ། །གྲུབ་པ་མི་ཐོབ་བྱོལ་སོང་རྒྱུ། །གཙང་སྦྲས་མི་གྲོལ་རྟོག་པ་ཉིད། །སྤྱོད་པ་མ་ཡེངས་གཞི་དག་སྐུ། །ད་ཡང་རྡོ་རྗེ་སེམས་དཔའ་ཉོན། །ཡུལ་མེད་རིག་པ་རང་གསལ་གྱི། །ཆོས་ཉིད་སྟོང་པའི་ངང་ལས་ནི། །དག་པ་བཞི་ཡི་སྒོར་ཞུགས་ནས། །མ་ཉམས་མ་སྨེ་གཙང་སྦྲ་བཅས། །ཡོ་བྱད་ཕྱི་ལ་གཙོར་འཛིན་ཅིང་། །བདག་དང་ཡེ་ཤེས་རྗེ་འབངས་ཚུལ། །ཀུན་རྫོབ་ལྷ་ཡི་དཀྱིལ་འཁོར་དུ། །རྒྱུད་དག་པ་ཡི་ཏིང་འཛིན་གྱིས། །སྐུ་ཡི་གཟུགས་བརྙན་ཕྱག་རྒྱ་ཡང་། །བཟླས་བརྗོད་གཙང་སྦྲ་དུས་ཚོད་ཀྱི། །རྒྱུ་རྐྱེན་ཚོགས་པའི་ནུས་མཐུ་ཡིས། །འབྲས་བུ་གཞན་ལ་རེ་བའི་ཕྱིར། །རིགས་གསུམ་དཀྱིལ་འཁོར་ལྷར་གསལ་ཀྱང་། །དངོས་གྲུབ་གཞན་ལ་རེ་བའི་ཕྱིར། །ཁྱི་རྒན་འདབ་ཆགས་བསྙེགས་པ་འདྲ། །ད་ཡང་འདུས་པའི་སྙིང་པོ་ཉོན། །རང་སེམས་དབྱེ་བ་མེད་པ་ལ། །ཨུ་པ་ཡ་ཡི་ཐེག་པ་ནི། །གོང་འོག་ལྟ་སྤྱོད་གཉིས་འཛིན་པས། །ནེ་ཙོ་མི་ལྟར་ཟློས་པ་འདྲ། །ད་ཡང་འདུས་པའི་སྙིང་པོ་ཉོན། །ཡོ་ག་རྣལ་འབྱོར་སེམས་དཔའ་དེས། །དབྱེར་མེད་སངས་རྒྱས་གཞི་བྱས་ཏེ། །བྱང་ཆུབ་རྣམ་ལྔར་མཉམ་པར་འདོད། །བསྒོམས་ཀྱང་མི་གྲོལ་འདོད་ཁམས་ལྷ། །སེམས་ཙམ་པ་དང་ཁྱད་མེད་གོལ། །ལ་བཟླ་རིག་པ་ཆོས་སྐུར་ཤེས། །ད་ཡང་འདུས་པའི་སྙིང་པོ་ཉོན། །ལྟ་བ་ཆོས་ཉིད་རྣམ་དག་ལ། །རྣམ་པར་སྣང་མཛད་ཆེན་པོ་རུ། །དོན་རྟོགས་ངང་ལ་དབྱེར་མེད་ཕྱིར། །ཕྱག་རྒྱ་བཞི་ཡི་སྒོར་ཞུགས་ནས། །ཡོ་བྱད་གཙོ་རུ་མི་འཛིན་པ། །དོན་དམ་སྐྱེ་འགག་མེད་པ་ཡིས། །ལྷ་ཡི་དཀྱིལ་འཁོར་འཕགས་པའི་སྐུ། །ཆོས་དབྱིངས་དག་གི་བྱིན་རླབས་ལས། །སྤུན་དང་གྲོགས་པོའི་ཚུལ་དུ་ནི། །ལྷ་དང་བདག་ཏུ་མཉམ་པ་ཡིས། །དམ་ཚིག་ཡེ་ཤེས་ལྷར་གསལ་ཀྱང་། །རྒྱལ་སྲིད་མེད་པའི་བློན་པོ་འདྲ། །ད་ཡང་འདུས་པའི་སྙིང་པོ་ཉོན། །བླ་མའི་དོན་མེད་ནན་བརྟགས་ཀྱིས། །དམིགས་པ་ཅན་ལ་སེམས་བརྟགས་ཀྱང་། །རྣམ་པར་གྲོལ་བར་མི་ནུས་ཏེ། །ནམ་མཁའ་དག་ལ་འཛིན་པ་འདྲ། །རྫོགས་ ― DNG002_Page_0026 ―
[མ་དཔེ་གཟིགས་ན་འདིར་གནོན།]
པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཕྱི་པ་རྒྱུད་ཀྱི་ལྟ་བ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །རྣལ་འབྱོར་མ་ཧཱ་ཡོ་ག་ཡིས། །ནམ་མཁའི་སྤྲིན་དང་ཁུ་རླངས་བཞིན། །བདེན་པ་དབྱེར་མེད་འདོད་པའི་གཞི། །རྟོག་ཚོགས་ལྷར་བསྒྱུར་བསྒོམ་པས་འཁྲུལ། །དེ་ཕྱིར་བགེགས་དང་རུ་དྲར་ལྟུང་། །དབུ་མ་དང་འདྲ་འབྲས་བུ་གོལ། །ལམ་ལ་མི་བརྟེན་རྟོག་པས་ཆོད། །ད་ཡང་འདུས་པའི་སྙིང་པོ་ཉོན། །འཁོར་འདས་ཡེ་ནས་སངས་རྒྱས་ལ། །སེམས་ཀྱི་རྣམ་རྟོག་ཅི་སྐྱེས་ཀྱང་། །མཚན་མ་དངོས་པོར་མ་གྲུབ་ཅིང་། །དཔེར་ན་ནམ་མཁའི་བསེར་བུ་བཞིན། །ད་ཡང་འདུས་པའི་སྙིང་པོ་ཉོན། །ཡོད་མེད་དབུས་ལ་མི་གནས་པས། །སྐུ་གསུམ་ཡེ་ཤེས་ལྷུན་གྲུབ་ཀྱི། །ཡུལ་སེམས་དབྱེ་བ་མེད་པར་འདོད། །དེ་ཕྱིར་བདེན་པ་གཉིས་མེད་གཞི། །ད་ཡང་འདུས་པའི་སྙིང་པོ་ཉོན། །དེ་དོན་ལམ་གྱི་རིམ་པ་ནི། །ཐབས་དང་ཤེས་རབ་སྒོར་ཞུགས་ནས། །ཏིང་འཛིན་གསུམ་གྱིས་ལྷར་བསྒོམ་པ། །གྲིབ་མ་གཟུགས་སུ་བསྒྱུར་བ་འདྲ། །ད་ཡང་འདུས་པའི་སྙིང་པོ་ཉོན། །ཡང་དག་ངེས་པའི་འབྲས་བུ་ནི། །བསྙེན་བསྒྲུབ་ཚད་དུ་བྱས་པ་ཡིས། །སྐུ་གསུམ་ཡེ་ཤེས་ལྷུན་གྲུབ་འདོད། །དེ་ཕྱིར་ཡེ་ཤེས་བསྲེས་པས་ནོར། །རྩོལ་བསྒྲུབ་ཡོད་ཕྱིར་དོན་དང་འགལ། །ད་ཡང་རྡོ་རྗེ་སེམས་དཔའ་ཉོན། །ཨ་ནུ་ཡོ་གའི་འདོད་པ་དེ། །ཀུན་གཞི་མཁའ་ཀློང་གཞི་བྱས་ཏེ། །སྣང་བ་ཀུན་བཟང་རོལ་པར་འཁྲུལ། །ཡོད་མིན་མེད་མིན་སྐྱེ་མཆེད་དང་། །མཁའ་ཀློང་དབུ་མ་ཆད་དང་འདྲ། །ལ་བཟླ་ཆོས་ཀྱི་དབྱིངས་ཉིད་ཡིན། །ད་ཡང་འདུས་པའི་སྙིང་པོ་ཉོན། །ཕྱི་ནང་ཆོས་རྣམས་མ་ལུས་ཀུན། །ཡིད་དང་ཀུན་གཞི་གཉིས་འདུས་པས། །ཡང་དག་བདེ་ཆེན་ཐུགས་ཀྱི་སྲས། །ཕྱི་ནང་ཆོས་ཀུན་མཉམ་པ་ཉིད། །དྲན་པ་ཙམ་གྱིས་ལྷར་གསལ་གྱིས། །ངང་འཇོག་ཆེད་བྱ་རྩོལ་བ་ཡོད། །དེ་ཕྱིར་ཀུན་ཏུ་ ― DNG002_Page_0027 ―
[མ་དཔེ་གཟིགས་ན་འདིར་གནོན།]
བཟང་པོ་ཡི། །ཀུན་གཞི་མཁའ་ཀློང་རྣམ་དག་ཏུ། །རྣམ་རྟོག་མཚན་མ་གང་སྤྱོད་ཀྱང་། །ནམ་མཁར་གཟའ་སྐར་བཙལ་མེད་བཞིན། །ཀུན་བཟང་བདེ་ཆེན་ཐབས་ཀྱི་གཙོ། །ཀུན་ཏུ་བཟང་མོ་གཉིས་མེད་མཁར། །འདུ་འབྲལ་མེད་པ་ཆོས་ཀྱི་སྐུ། །བདེ་ཆེན་གཉིས་མེད་རིག་པའི་རྩལ། །ངེས་པའི་གསང་སྒོ་མ་ཤེས་པས། །ཀུན་བཟང་སྤྱོད་པའི་དོན་མི་རྟོགས། །ཉི་མ་སྤྲིན་གྱིས་བསྒྲིབས་པ་འདྲ། །ད་ཡང་འདུས་པའི་སྙིང་པོ་ཉོན། །སེམས་ཉིད་རྩོལ་བ་མེད་པ་ལ། །བསམ་པའི་དབང་གིས་བསྒྱུར་བྱས་པས། །འཁོར་བའི་རྒྱ་མཚོར་གཡེང་གྱུར་ཏེ། །མི་ཤེས་པ་ལ་དེ་ལྟར་སྣང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསྐྱེད་རྫོགས་གཉིས་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །རྫོགས་ཆེན་སྤྱི་ཡི་འཁྲུལ་ཚུལ་ནི། །འཁོར་ལ་ཆེད་དུ་བཀའ་སྩལ་པ། །སྤྱི་དང་ཁ་འབྱམས་ཀུན་བརྟགས་དང་། །ཚིག་ཟིན་ལུང་གི་འཁྲུལ་ཚུལ་ནི། །ང་ཡིས་ཁྱོད་ལ་དོན་བཤད་ཀྱིས། །ལེགས་པར་ཉོན་ལ་ཡིད་ཀྱིས་ཟུང་། །རྫོགས་ཆེན་སྤྱི་ཡི་འཁྲུལ་ཚུལ་ནི། །རིན་ཆེན་གསེར་སྦྲུལ་མཐོང་སྟོང་བཞིན། །སྤྱི་དང་ཁ་འབྱམས་ཀུན་བརྟགས་དང་། །ལུང་ཚིག་ཙམ་ལ་ཁུངས་ངེས་པ། །དེ་དག་གོལ་བར་ངས་བཤད་ཉོན། །མིང་ནི་ཚིག་ཙམ་ཤེས་པའི་གཞི། །མཁས་སུ་རེ་ནས་ཐ་སྙད་འདོགས། །དོན་མེད་ནམ་མཁའི་མཐའ་འཚོལ་འདྲ། །ཚིག་ཏུ་ཤེས་པས་དོན་མི་རྟོགས། །ཚིག་ཉིད་དོན་ཡིན་ཟེར་བ་འཁྲུལ། །ད་ཡང་རྡོ་རྗེ་སེམས་དཔའ་ཉོན། །ཁ་འབྱམས་དཔའ་བོའི་འཁྲུལ་པ་དེ། །སྣང་བས་སེམས་སྡུད་གཞི་རུ་བྱེད། །འཁྲུལ་པའི་དབྱེ་བ་ལྷུན་གྲུབ་བཅུ། །འབྲས་བུ་མི་འབྱུང་ལོག་པར་གོལ། །གཞི་དང་མ་མཐུན་ལུང་རིག་འགལ། །གཞི་ཉིད་མི་ཤེས་སྐྱེ་བོ་རང་། །ད་ཡང་འདུས་པའི་སྙིང་པོ་ཉོན། །ཀུན་བརྟགས་ལྷར་ནི་འཁྲུལ་པ་ ― DNG002_Page_0028 ―
[མ་དཔེ་གཟིགས་ན་འདིར་གནོན།]
ཡི། །ཕྱི་ནང་གསང་སྔགས་སྣང་བ་བཞིན། །བསྐྱེད་དང་རྫོགས་འདོད་རིམ་པར་འཁྲུལ། །དོན་མ་ཟིན་པས་འབྲས་བུ་མེད། །གཞི་ལ་ལྷ་མེད་བསྐྱེད་མི་དགོས། །མ་སྐྱེས་ཆོས་སྐུ་ཡེ་ནས་ཡིན། །ད་ཡང་འདུས་པའི་སྙིང་པོ་ཉོན། །ཚིག་ཟིན་ལུང་གི་འཁྲུལ་ཚུལ་དེ། །ཚིག་ཙམ་ལུང་ལ་ཁུངས་མེད་བཞིས། །དགོངས་པ་རྣམ་གསུམ་མ་ཤེས་འཁྲུལ། །ཚིག་ཙམ་ལུང་གིས་དོན་མ་རྟོགས། །དོན་མེད་ཚིག་ནི་འདི་དག་གིས། །ལུང་མེད་དོན་གོ་ཡེ་སངས་རྒྱས། །ད་ཡང་འདུས་པའི་སྙིང་པོ་ཉོན། །དེ་དག་འཁྲུལ་པ་རྣམ་བཞི་ཡང་། །སྤྱི་ཡི་མཚན་ཉིད་ཡིན་པའི་ཕྱིར། །གཞི་དང་འགལ་ཕྱིར་དོན་ལས་གོལ། །དེ་ཕྱིར་ལུང་ལྡན་གདམས་ངག་དགོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྫོགས་ཆེན་སྤྱིའི་འཁྲུལ་ཚུལ་བསྟན་པའི་ལེའུ་སྟེ་བཅུ་གསུམ་པའོ། །སྡོམ་དུ་བསྡུས་ཏེ་བསྟན་པ་ལས་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་རང་བྱུང་སྟོན་པ་ལ། །དད་པའི་ཡིད་ཀྱིས་འདི་སྐད་གསོལ། །ཀྲི་ཡ་རྫོགས་པ་ཆེན་པོ་ཨ་ཏི་ཡི། །ཆོས་རྣམས་སེམས་སུ་ཇི་ལྟར་འདུས། །མུན་པའི་སེམས་ཀྱིས་ཇི་ལྟར་བསྒྲིབས། །སེམས་འདོད་ལྟ་བ་ཇི་ལྟར་གོལ། །རང་སེམས་ངེས་དོན་ཇི་ལྟར་མིན། །སེམས་ངན་དཔེ་ཡི་དབྱེ་བ་གང་། །ཚོགས་བརྒྱད་སྐྱོན་དུ་ཇི་ལྟར་ཆེ། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སེམས་སུ་ཆོས་རྣམས་གཅིག་པ་ནི། །འཁོར་བ་མྱ་ངན་འདས་པའི་ཆོས། །སྒྱུ་མ་རྣམ་གཉིས་སྤྱོད་ཡུལ་ཏེ། །ལོག་རྟོག་ཡེ་ཤེས་ཐ་དད་ཀྱང་། །སེམས་ཀྱི་ཆོས་ཉིད་ངང་དུ་གཅིག །ད་ཡང་རྡོ་རྗེ་སེམས་དཔའ་ཉོན། །དེ་ཡང་དེ་ཉིད་མཚོན་པའི་དཔེ། །སྤྲིན་དང་གཞའ་ཚོན་ཁུ་རླངས་དང་། །འབྱུང་བའི་ཆོ་འཕྲུལ་སྣ་ཚོགས་པ། །ནམ་མཁའི་ངང་དུ་རོ་གཅིག་བཞིན། །ཡུལ་གྱི་ཐ་སྙད་མཚན་མ་རྣམས། ། ― DNG002_Page_0029 ―
[མ་དཔེ་གཟིགས་ན་འདིར་གནོན།]
རང་གི་སེམས་ཀྱིས་རྟོག་པའི་ཕྱིར། །ཕྱི་ནང་ཆོས་ཀུན་སེམས་སུ་གཅིག །དེ་ཕྱིར་ཆོས་རྣམས་མ་ལུས་ཀུན། །རིགས་རྒྱུད་མེད་ཕྱིར་སེམས་སུ་གཅིག །ད་ཡང་རྡོ་རྗེ་སེམས་དཔའ་ཉོན། །མ་རིག་འཁྲུལ་པའི་སེམས་འདི་ཡིས། །བྱང་ཆུབ་ཐོབ་འདོད་སྙིང་རེ་རྗེ། །ཉིད་ལ་ཉིད་འཁྲུལ་ཡིན་པའི་ཕྱིར། །སྨྱོན་པས་གྲིབ་མ་བསྙེགས་པ་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་ཐམས་ཅད་སེམས་སུ་འདུས་པར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །མ་རིག་སེམས་ཀྱི་མུན་པ་འདི། །སྤང་སྡུད་ཞེན་པའི་རྟོག་པ་དང་། །བག་ཆགས་ཉོན་མོངས་འཁོར་བ་སྟེ། །དེ་བྲལ་ཆོས་སྐུའི་ཐིག་ལེ་ཡིན། །ད་ཡང་རྡོ་རྗེ་སེམས་དཔའ་ཉོན། །སྤང་བའི་རྟོག་པ་སྐྱེས་པའི་ཚེ། །འདུ་བྱེད་ལྔ་བཅུ་སྐར་ཕྲན་འདྲ། །ཚོགས་བརྒྱད་སྐྱེ་འགག་ཟླ་བ་འདྲ། །ཀུན་གཞི་ནམ་མཁའི་སྤྲིན་དང་འདྲ། །དེ་ཀློང་ཐིག་ལེ་ཉག་གཅིག་ཡོད། །དཔེར་ན་ཉི་མའི་འོད་བསྒྲིབ་འདྲ། །རང་ལ་སྐྱེས་པའི་སྒྲིབ་པ་རྣམས། །སྤང་བས་མི་སྤོང་གྲིབ་མ་འདྲ། །དེ་ཕྱིར་སྤང་བའི་རྟོག་པ་གོལ། །ད་ཡང་འདུས་པའི་སྙིང་པོ་ཉོན། །སྡུད་པའི་རྟོག་པ་སྐྱེས་པའི་ཚེ། །འདུ་བྱེད་མཚོ་ཁའི་ངང་ངུར་འདྲ། །ཚོགས་བརྒྱད་ཉ་ལ་སྲམ་ལྡང་འདྲ། །ཀུན་གཞི་རྒྱ་མཚོ་ཆེན་པོ་འདྲ། །ནང་ན་ཐིག་ལེ་ཉག་གཅིག་བཞུགས། །དཔེ་ནི་ཨུ་དུམ་ཝ་ར་འདྲ། །ཁ་ན་མི་མངོན་གཏིང་ན་གནས། །དེ་བཞིན་ཡུལ་དང་འབྲལ་མེད་ཕྱིར། །དེ་བསད་ཤ་ལ་ཟོས་པ་མེད། །སེམས་ཡིན་ཆོས་ཀྱིས་སངས་མི་རྒྱ། །དེ་ཕྱིར་སྡུད་པའི་རྟོག་པ་གོལ། །ད་ཡང་འདུས་པའི་སྙིང་པོ་ཉོན། །ཞེན་པའི་རྟོག་པ་སྐྱེས་པའི་ཚེ། །འདུ་བྱེད་ལྔ་བཅུ་ནགས་ཚལ་འདྲ། །རྣམ་ཤེས་ཚོགས་བརྒྱད་རི་དྭགས་འདྲ། །ཀུན་གཞིའི་བག་ཆགས་རྩ་གྲངས་འདྲ། །དེ་ཡི་གསེབ་ན་ཆོས་སྐུ་བཞུགས། །དཔེ་ནི་སེང་གེ་དཀར་མོ་འདྲ། ། ― DNG002_Page_0030 ―
[མ་དཔེ་གཟིགས་ན་འདིར་གནོན།]
གཞན་གྱིས་མཐོང་བ་མེད་པ་བཞིན། །དངོས་པོའི་ཡུལ་ལ་བྱང་ཆུབ་མེད། །དེ་ཕྱིར་ཞེན་པའི་རྟོག་པ་གོལ། །ད་ཡང་འདུས་པའི་སྙིང་པོ་ཉོན། །སྔར་གྱི་བག་ཆགས་དྲན་པའི་ཚེ། །འདུ་བྱེད་ལྔ་བཅུ་ཆུ་ལྟར་འབྲུབ། །རྣམ་ཤེས་ཚོགས་བརྒྱད་མེ་ལྟར་འབར། །ཀུན་གཞིའི་བག་ཆགས་གཟིངས་ལྟར་འཛིངས། །དེ་གསེབ་ཐིག་ལེ་ཉག་གཅིག་བཞུགས། །དཔེ་ནི་རིན་ཆེན་གསེར་དང་འདྲ། །དེ་དོན་རྙེད་པ་དཀའ་བའི་ཕྱིར། །བག་ཆགས་དགེ་སྡིག་བསགས་པའི་ལས། །སེམས་ལ་འཛིན་པ་ཡོད་ཕྱིར་གོལ། །ད་ཡང་འཁོར་གྱི་སྙིང་པོ་ཉོན། །ཕྱིས་ཀྱི་ཉོན་མོངས་སྐྱེས་པའི་ཚེ། །འདུ་བྱེད་ལྔ་བཅུ་རླུང་ལྟར་འཚུབས། །རྣམ་ཤེས་ཚོགས་བརྒྱད་རྦབ་ལྟར་རྒོད། །ཀུན་གཞིའི་ཉོན་མོངས་མུན་ལྟར་གཏིབས། །དེ་ནང་ཐིག་ལེ་ཆོས་སྐུ་ཡོད། །དཔེར་ན་རིན་ཆེན་འདམ་བྱིང་འདྲ། །ཁ་ནས་མི་མཐོང་གཏིང་ན་གནས། །མ་རིག་ཉོན་མོངས་གཏིང་ན་གནས། །མ་རིག་ཉོན་མོངས་སྐྱེས་པའི་ཚེ། །འཁོར་བའི་མཐའ་ལ་ཟད་པ་མེད། །དེ་ཕྱིར་ཕྱི་མའི་རྒྱུར་བྱུང་གོལ། །ད་ཡང་འཁོར་གྱི་སྙིང་པོ་ཉོན། །སྔ་ཕྱིའི་རྟོག་པ་སྐྱེས་པ་ཡི། །སེམས་དང་སེམས་བྱུང་ལ་སོགས་པ། །མ་རིག་འཁྲུལ་པས་རྟག་ཏུ་མྱོས། །དེ་ཕྱིར་ཀུན་གཞི་འཁོར་བའི་ཆོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། སེམས་ཀྱི་མུན་པས་ཐིག་ལེ་ཉག་གཅིག་བསྒྲིབ་པར་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་འདུས་པའི་འཁོར་རྣམས་ལ། །སེམས་འདོད་གོལ་བར་བཀའ་སྩལ་པ། །སེམས་ཀྱིས་ཆོས་སྐུ་བསྒྲིབས་པའི་ཕྱིར། །འཁོར་འདས་གཉིས་ཀྱི་བར་དོ་ནི། །ཐོག་མཐའ་གཅོད་ནི་མ་ཤེས་ན། །སྐྱེ་རྒ་ན་འཆི་ལས་མི་ཐར། །ས་མཁན་མེད་པའི་ཚོང་པ་འདྲ། །སྐྱེ་འཆི་གཉིས་ཀྱི་བར་དོར་ནི། །ཆོས་སྐུའི་ངོ་སྤྲོད་མ་ཤེས་ན། །མ་རིག་མུན་པ་སངས་དུས་མེད། །སྒྲོན་མ་མེད་པའི་མུན་ཁུང་འདྲ། །ད་ཡང་རྡོ་རྗེ་སེམས་དཔའ་ཉོན། །ལུས་སེམས་གཉིས་ཀྱི་བར་དོ་ན། །གོལ་ས་གཅོད་ནི་མ་ཤེས་ ― DNG002_Page_0031 ―
[མ་དཔེ་གཟིགས་ན་འདིར་གནོན།]
ན། །ཉོན་མོངས་ཞེན་པ་ལྡོག་མི་སྲིད། །དྲེད་མོང་གདོས་ཀྱིས་ཟིན་པ་འདྲ། །མཉམ་བཞག་རྗེས་ཐོབ་བར་དོ་ན། །རྒྱུན་དུ་འབྲལ་མེད་མ་ཤེས་ན། །བལྟ་བསྒོམ་གཉིས་ཀྱིས་རྐྱེན་མི་ཐུབ། །ཆུ་བྲན་ཐན་པས་སྐམ་པ་འདྲ། །སྲིད་པ་དག་གི་བར་དོ་ནི། །སངས་རྒྱས་དུས་ནི་མ་ཤེས་ན། །གཟུགས་སྐུ་རྣམ་གཉིས་འབྱུང་མི་སྲིད། །རིན་ཆེན་འདམ་དུ་སྟོར་བ་འདྲ། །བདག་གཞན་རྩོད་པའི་བར་དོར་ནི། །གལ་མདོ་ཚིག་གི་འཕྲང་མེད་ན། །ཐེག་པ་གཞན་ལས་བོགས་མི་ཐོབ། །གཡུལ་ངོ་ཕམ་པའི་བློན་པོ་འདྲ། །ད་ཡང་འདུས་པའི་སྙིང་པོ་ཉོན། །དེ་དག་གདམས་ངག་མེད་པའི་སྐྱོན། །སེམས་ཀྱི་རྩ་བ་མ་རིག་པས། །འཁྲུལ་པ་སྣ་ཚོགས་འབྱུང་བའི་ཕྱིར། །འཁོར་བའི་རྩ་བ་ཆགས་སྡང་ལྔས། །ངན་སོང་གསུམ་དུ་རྟག་ཏུ་འཁོར། །དེ་ཕྱིར་མ་རིག་སེམས་ཀྱིས་འཁྲུལ། །ད་ཡང་རྡོ་རྗེ་སེམས་དཔའ་ཉོན། །སེམས་ཀྱི་འདོད་ལུགས་རྣམ་པ་བཅུ། །ནན་བརྟགས་ལྟ་བ་ལོག་པར་བསྟན། །དེ་ཕྱིར་སྣང་བ་སེམས་སུ་བྱས། །ངེས་དོན་ཤེས་པ་བློ་ཡིས་བཅོས། །ཡང་དག་སེམས་མེད་ཆོས་མ་ཤེས། །དེ་ཕྱིར་ལུང་མེད་རིགས་པས་དཔྱད། །ཡུལ་སེམས་གཅིག་པར་བློ་ཡིས་བསྲེས། །ད་ཡང་འདུས་པའི་སྙིང་པོ་ཉོན། །བདེ་གཤེགས་སྙིང་པོ་མ་མཐོང་བར། །ལུང་ལྡན་ངེས་པའི་དོན་ཆེན་ནི། །མ་རྙེད་བར་དུ་སངས་མི་རྒྱ། །དེ་ཕྱིར་ཆོས་ཀུན་རྩ་བ་ནི། །ཆོས་སྐུ་རང་གི་སེམས་ཀྱིས་བསྒྲིབས། །ད་ཡང་འདུས་པའི་སྙིང་པོ་ཉོན། །སེམས་ནི་དོན་མེད་འཁྲུལ་པའི་ཕྱིར། །ཆོས་སྐུའི་གོལ་ས་སེམས་ཡིན་པས། །རང་བྱུང་ཆོས་ཉིད་སེམས་དང་བྲལ། །སེམས་མེད་རང་བྱུང་ཆོས་ཀྱི་སྐུ། །ད་ཡང་རྡོ་རྗེ་སེམས་དཔའ་ཉོན། །གང་ཡང་རུང་བས་ཅི་ལ་ཡང་། །ཡིད་ནི་སྒོ་ལྔའི་རྗེས་འབྲངས་པས། །བལྟ་བསྒོམ་མ་ཡིན་མ་རིག་སེམས། །རིགས་དྲུག་བསྐྱེད་པའི་སེམས་ཡིན་ཕྱིར། །མ་རིག་འཁྲུལ་པ་སེམས་ལས་བྱུང་། །དེ་ཕྱིར་སེམས་ནི་གོལ་བར་གསུངས། །ད་ཡང་འདུས་པའི་སྙིང་པོ་ཉོན། །རང་བྱུང་སྙིང་པོ་ཆོས་སྐུ་ལ། །ཚོགས་བརྒྱད་མེད་ཕྱིར་སེམས་དང་བྲལ། །སྣ་ ― DNG002_Page_0032 ―
[མ་དཔེ་གཟིགས་ན་འདིར་གནོན།]
ཚོགས་ཡུལ་ལ་ཞེན་གྱི་བར། །རང་གི་སེམས་ཞེས་དེ་ལ་བྱ། །སྐྱོན་གྱི་རྩ་བ་སེམས་ཡིན་པས། །དེ་ཕྱིར་སེམས་ཀྱིས་སངས་མི་རྒྱ། །སེམས་ནི་རྒྱུ་རྐྱེན་བསྐྱེད་པའི་ཕྱིར། །ངེས་དོན་མ་ཡིན་འཁྲུལ་པའི་བློ། །ད་ཡང་འདུས་པའི་སྙིང་པོ་ཉོན། །ཐེག་དགུ་སེམས་སུ་འདོད་པའི་ཕྱིར། །ངེས་དོན་ཨ་ཏིའི་གོལ་སར་གསུངས། །དེ་ཕྱིར་སེམས་ནི་འཁོར་བའི་ཆོས། །དམུས་ལོང་རིན་ཆེན་མི་མཐོང་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། རང་སེམས་གོལ་བར་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སེམས་ནི་འཁོར་བའི་རྩ་བ་སྟེ། །ཡུལ་ནི་སྣ་ཚོགས་སྣང་བ་ལ། །སེམས་ཀྱི་རྟོག་པ་སྣ་ཚོགས་ཞེན། །དེ་ཕྱིར་སེམས་ནི་འཁོར་བའི་རྒྱུ། །རྟག་ཆད་འཛིན་པའི་སེམས་ཡིན་པས། །ལྟ་བ་ལོག་པ་སེམས་ལས་བྱུང་། །གང་དྲན་རང་སེམས་འཁྲུལ་པ་སྟེ། །སེམས་ལས་བྱུང་བའི་འཁྲུལ་རྟོག་གིས། །ཆགས་སྡང་ཐམས་ཅད་བསྐྱེད་པར་བྱེད། །དེ་ཕྱིར་འཁོར་བ་སེམས་ཀྱིས་བྱས། །དེ་ནས་འཁོར་བའི་སྡུག་སེམས་གོལ། །ད་ཡང་འདུས་པའི་སྙིང་པོ་ཉོན། །སེམས་ཀྱིས་བྱས་པའི་རྟོག་པ་ཡིས། །སྐྱེ་བ་བརྒྱུད་པ་གྲངས་མེད་པ། །སེམས་ཀྱིས་བྱས་ཕྱིར་རང་བྱུང་མེད། །དེ་ཕྱིར་སེམས་འདི་གློ་བུར་འཁྲུལ། །དེ་བརྟས་ཆོས་བརྒྱད་དམ་པར་ཞེན། །ད་ཡང་རྡོ་རྗེ་སེམས་དཔའ་ཉོན། །ངེས་དོན་མ་མཐོང་གླེན་པ་ཀུན། །སེམས་ལས་མ་གཏོགས་ཆོས་མེད་ཟེར། །དེ་ཕྱིར་རྨོངས་པའི་བློ་རེ་ནོར། །གླེན་བསྒོམ་མུན་པ་བསྒོམས་པས་ཕུང་། །གང་དྲན་སེམས་ཀྱི་ཆོས་འདི་ལོག །ཡིད་ལ་བྱེད་པའི་ལས་ངན་ཀུན། །བླང་དོར་སེམས་འདི་ཤིན་ཏུ་འཚོལ། །དྲང་དོན་སེམས་སུ་བསྟན་པས་ཕུང་། །དཔྱད་བཟོ་བྱས་པས་སེམས་འདི་དཀྲུགས། །མཁྱེན་དུ་རེ་བའི་སྒྲིན་ཚིག་གིས། །ངེས་དོན་མ་ནོར་བཀའ་འདི་བསླད། །ད་ཡང་འདུས་པའི་སྙིང་པོ་ཉོན། །མ་རིག་རྨོངས་པའི་གང་ཟག་ཀུན། །ཆོས་སྐུ་རང་ ― DNG002_Page_0033 ―
[མ་དཔེ་གཟིགས་ན་འདིར་གནོན།]
ཡན་སེམས་ཡིན་ཟེར། །དེ་ཕྱིར་ཚིག་ལས་དོན་མ་གོ། །མིང་ལས་ངེས་དོན་ཤེས་པ་དཀོན། །དེ་ཕྱིར་སེམས་ཀྱིས་བྱང་མི་ཆུབ། །དེ་ཉིད་བཙལ་བའི་མཐུན་དཔེ་ནི། །རྗེས་ནས་བཙལ་བས་གླང་པོ་རྙེད། །སེམས་ཀྱི་ཕྱོགས་ནས་དོན་བཙལ་ན། །རང་རིག་རྒྱལ་པོ་ཡེ་ཤེས་རྙེད། །དེ་རྙེད་སེམས་སུ་འཛིན་པ་བྲལ། །འཛིན་བྲལ་སེམས་མེད་རང་རིག་སྐུ། །དེ་དོན་འབྲལ་མེད་བྱང་ཆུབ་ཀློང་། །སེམས་བྲལ་ཏིང་འཛིན་རྒྱུན་དུ་གནས། །ད་ཡང་འདུས་པའི་སྙིང་པོ་ཉོན། །སེམས་ལས་སངས་རྒྱས་འདོད་པ་ནི། །མོ་གཤམ་བུ་དང་གཉེན་བྱེད་བཞིན། །སྣང་བ་སེམས་ཡིན་ཟེར་བ་དེ། །ར་གན་གསེར་དུ་འཛིན་དང་འདྲ། །དེ་བས་ལུང་ལྡན་དོན་རྙེད་ན། །རང་བྱུང་སྙིང་པོའི་དོན་རྟོགས་པས། །མ་རིག་སངས་ནས་རང་སེམས་བརླག །དེ་ཕྱིར་ཆོས་སྐུ་འགྱུར་བ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རང་སེམས་ངེས་དོན་མེད་པར་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་ཀུན་རིག་རྒྱལ་པོ་ཡི། །སེམས་ཀྱི་རྣམ་གྲངས་མཚོན་པའི་དཔེ། །འདུས་པའི་འཁོར་ལ་བརྩེར་དགོངས་ནས། །ཆེད་དུ་དབྱེ་བ་བཀའ་སྩལ་པ། །སེང་གེ་ལྟ་བུའི་སེམས་དང་། གཟིག་ལྟ་བུའི་སེམས་དང་། དོམ་ལྟ་བུའི་སེམས་དང་། དྲེད་མོ་ལྟ་བུའི་སེམས་དང་། སྤྱང་ཀི་ལྟ་བུའི་སེམས་དང་། གཡི་སྤྱང་ལྟ་བུའི་སེམས་དང་། འཕར་བ་ལྟ་བུའི་སེམས་དང་། ཁྱི་རྒོད་ལྟ་བུའི་སེམས་དང་། གསའ་ལྟ་བུའི་སེམས་དང་། དུག་སྦྲུལ་ལྟ་བུའི་སེམས་ལ་སྩོགས་པ་གདུག་པ་ཅན་བཞིན་ནོ། །བྱ་ཁྱུང་ལྟ་བུའི་སེམས་དང་། གླག་ལྟ་བུའི་སེམས་དང་། བྱ་རྒོད་ལྟ་བུའི་སེམས་དང་། ངང་པ་ལྟ་བུའི་སེམས་དང་། རྨ་བྱ་ལྟ་བུའི་སེམས་དང་། ཁྲ་ལྟ་བུའི་སེམས་དང་། བྱ་རོག་ལྟ་བུའི་སེམས་དང་། བྱ་ཀང་ཀ་ལྟ་བུའི་སེམས་དང་། ནེ་ཙོ་ལྟ་བུའི་སེམས་དང་། ཕ་ཝང་ལྟ་བུའི་སེམས་དང་། སྲིན་བྱ་ལྟ་བུའི་སེམས་དང་། འུག་པ་ལྟ་བུའི་སེམས་དང་། ཁྱིམ་བྱ་ལྟ་བུའི་སེམས་ལ་སྩོགས་པ་སྲེད་པ་ཅན་བཞིན་ནོ། །ད་ཡང་འདུས་པའི་སྙིང་པོ་ཉོན། གླང་པོ་ཆེ་ལྟ་བུའི་སེམས་དང་། མ་ ― DNG002_Page_0034 ―
[མ་དཔེ་གཟིགས་ན་འདིར་གནོན།]
ཧེ་ལྟ་བུའི་སེམས་དང་། བ་ལང་ལྟ་བུའི་སེམས་དང་། ཕག་རྒོད་ལྟ་བུའི་སེམས་དང་། རྟ་ལྟ་བུའི་སེམས་དང་། རྔ་མོ་ལྟ་བུའི་སེམས་དང་། བོང་བུ་ལྟ་བུའི་སེམས་དང་། ཁུར་བུ་ལྟ་བུའི་སེམས་དང་། གཞན་གྱིས་དབང་བྱས་པ་ལ་སོགས་པ་བཀོལ་སྤྱད་ཅན་གྱི་སེམས་བཞིན་ནོ། །ད་ཡང་འདུས་པའི་སྙིང་པོ་ཉོན། སྲིན་པོ་ལྟ་བུའི་སེམས་དང་། ཉ་ཆེན་ལྟ་བུའི་སེམས་དང་། སྡོམ་ལྟ་བུའི་སེམས་དང་། སྲེ་མོང་ལྟ་བུའི་སེམས་དང་། བྱི་ལ་ལྟ་བུའི་སེམས་དང་། གྲོག་མ་ལྟ་བུའི་སེམས་དང་། སྲིན་བུ་ལྟ་བུའི་སེམས་དང་། སྤང་བུ་ཏྲེ་ལ་ཏ་ལ་སོགས་པའི་གནོད་འཚེ་ཅན་གྱི་སེམས་བཞིན་ནོ། །ད་ཡང་འདུས་པའི་སྙིང་པོ་ཉོན། སྙན་དངགས་པའི་སེམས་དང་། སྤྲེའུ་ལྟ་བུའི་སེམས་དང་། བྱི་ལ་ལྟ་བུའི་སེམས་དང་། སྤྲང་པོ་ལྟ་བུའི་སེམས་དང་། སྨད་འཚོང་མ་ལྟ་བུའི་སེམས་དང་། ཚོང་པ་ལྟ་བུའི་སེམས་དང་། སྨྱོན་པ་ལྟ་བུའི་སེམས་དང་། ཚེར་མ་ལྟ་བུའི་སེམས་དང་། རྡོ་ཟླུམ་ལྟ་བུའི་སེམས་དང་། ཤིང་ལྟ་བུའི་སེམས་དང་། ལུག་ལྟ་བུའི་སེམས་དང་། བྱི་བ་ལྟ་བུའི་སེམས་དང་། མགྲོན་ཁྱི་ལྟ་བུའི་སེམས་དང་། ཝ་ལྟ་བུའི་སེམས་ལ་སྩོགས་པ་དམན་པར་ཞེན་པའི་སེམས་དང་ལྡན་པའོ། །དེ་ཡང་རྣམ་གྲངས་མདོ་ཙམ་ལས། །བགྲང་གིས་མི་ལངས་བརྗོད་ལས་འདས། །སེམས་ངན་སྐྱོན་གྱི་ཕུང་པོ་ལ། །དཔེ་ཡི་དབྱེ་བ་བསྟན་པ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། སེམས་ཀྱི་དཔེ་དབྱེ་བསྟན་པའི་ལེའུ་སྟེ་བཅྭ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ཚོགས་བརྒྱད་འཁྲུལ་པ་ཡིན་པར་ནི། །དད་ཉན་འཁོར་ལ་བཀའ་སྩལ་པ། །འཁོར་བ་རྣམས་ཀྱི་རྩ་བ་ནི། །ཡུལ་དང་སེམས་ནི་གཉིས་སུ་འདུས། །ཡུལ་ཀྱང་རང་སེམས་འཁྲུལ་པ་སྟེ། །སེམས་ནི་རྣམ་ཤེས་ཚོགས་བརྒྱད་ལ། །སེམས་ལས་བྱུང་བ་ལྔ་བཅུ་གཅིག །རྩ་བ་ཀུན་གཞི་ཉིད་དུ་འདུས། །ད་ཡང་རྡོ་རྗེ་སེམས་དཔའ་ཉོན། །སེམས་ཅན་ཀུན་ལ་ཡོད་ལུགས་ནི། །ཕྱི་བལྟས་ ― DNG002_Page_0035 ―
[མ་དཔེ་གཟིགས་ན་འདིར་གནོན།]
པ་དང་ནང་བལྟས་དང་། །གཉིས་ཀར་བལྟས་པའི་ཤེས་པ་དང་། །བཅོས་དགོས་པ་དང་མི་དགོས་དང་། །རྟག་ཆད་བྲལ་དང་ངོ་བོར་གནས། །ཡང་དག་ཡོད་དང་བྱིན་བརླབ་ཏུ། །ལེན་དུ་ཕྱེ་ནས་བསྟན་པའི་དོན། །ཚོགས་བརྒྱད་སེམས་སུ་སྣང་བ་དང་། །འཁོར་བའི་བག་ཆགས་བརྟགས་པའི་ཕྱིར། །ངེས་དོན་སྙིང་པོ་མ་ཡིན་པས། །ད་ཡང་འདུས་པའི་སྙིང་པོ་ཉོན། །སྒོ་ལྔའི་རྣམ་ཤེས་ངོ་བོ་ནི། །ཡུལ་སྣང་ཙམ་ན་ཤེས་པ་སྐྱེ། །ཡུལ་མི་སྣང་ན་ཤེས་པ་འགགས། །ཡིད་ཀྱི་རྣམ་ཤེས་ངོ་བོ་ནི། །ཡུལ་སྣང་སྣ་ཚོགས་སེམས་པའི་ཕྱིར། །ཆགས་སྡང་ལོག་རྟོག་དག་ཏུ་འཛིན། །རྣམ་རྟོག་སྣ་ཚོགས་ངོ་བོར་སྣང་། །ཉོན་མོངས་ཡིད་ཀྱི་ངོ་བོ་ནི། །ནང་དུ་ཞེན་པ་དམ་པར་འཛིན། །རྟག་ཏུ་འཛིན་པ་ངར་འཛིན་བྱེད། །ཀུན་གཞིའི་རྣམ་ཤེས་ངོ་བོ་ནི། །མ་རྟོགས་ཐ་མལ་དུས་ཙམ་ན། །རྣམ་རྟོག་རྒྱས་ཤིང་རིག་པ་བསྒྲིབ། །རྟོགས་པ་མངོན་དུ་གྱུར་ཙམ་ན། །མ་རིག་བསྒྲིབས་ཤིང་ཡེ་ཤེས་རྒྱས། །གཞན་དུ་དེ་དང་མཚུངས་པར་ནི། །ཚོགས་བདུན་སྐྱེས་ན་འཕེལ་བར་སྣང་། །ཚོགས་དྲུག་འགགས་ན་བསྒྲིབས་པར་སྣང་། །དེས་ན་ཤེས་པའི་ཚོགས་བརྒྱད་ཀྱང་། །ཡང་དག་མ་ཡིན་འཁོར་བའི་ཆོས། །ད་ཡང་འདུས་པའི་སྙིང་པོ་ཉོན། །སེམས་ཅན་མོས་པ་ཐ་དད་པས། །གང་ཟག་བློ་ཡི་རིམ་པ་ལ། །གནས་འགྱུར་ཆོས་སུ་བསྟན་པ་ཡང་། །བཀྲི་དྲང་ལྡེམ་དགོངས་ཙམ་དུ་བསྟན། །དེའི་སྐྱོན་ཡོན་ཁྱད་པར་ནི། །འབྱུང་བ་མེ་ཆུའི་དཔེ་བཞིན་དུ། །ཡེ་ཤེས་ལོག་རྟོག་ཁྱད་པར་གྱིས། །ཤེས་པ་ཀུན་གཞི་མཚན་ཉིད་ནི། །རྒྱུ་རྐྱེན་གཉེན་པོས་འཇིག་པ་དང་། །དུས་གསུམ་མི་རྟག་འགྱུར་བ་དང་། །བག་ཆགས་མཚན་མའི་རྟེན་བྱེད་པས། །ཡང་དག་མ་ཡིན་འཁོར་བའི་རྒྱུ། །ད་ཡང་འཁོར་གྱི་སྙིང་པོ་ཉོན། །དེ་དག་རྣམ་ཤེས་ཚོགས་བརྒྱད་ཀུན། །མ་རིག་རྐྱེན་ལས་བསྐྱེད་པའི་ཕྱིར། །སྡུག་བསྔལ་འབའ་ཞིག་བདེ་བ་མེད། །དེ་ཕྱིར་ཆོས་སྐུའི་གོལ་སར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཚོགས་བརྒྱད་གོལ་སར་བསྟན་པའི་ལེའུ་སྟེ་བཅུ་ ― DNG002_Page_0036 ―
[མ་དཔེ་གཟིགས་ན་འདིར་གནོན།]
དགུ་པའོ། །སྡོམ་དུ་བསྡུས་ཏེ་བསྟན་པ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །ཡིད་ཀྱི་དྲན་པས་འདི་སྐད་གསོལ། །མཚན་ཉིད་ཐེག་པ་ཇི་ལྟར་འཁྲུལ། །ཕྱི་ནང་གསང་སྔགས་སྒྲིབ་པ་གང་། །ཐབས་མེད་ཡོན་ཏན་ཇི་ལྟར་རྫོགས། །ཐེག་ཆེན་ཀུན་དང་མི་འགལ་གང་། །རྫོགས་ཆེན་རང་བྱུང་དབྱེ་བ་གང་། ལམ་དང་འབྲས་བུའི་ཁྱད་པར་ཅི། །ཐེག་གཞན་སུན་ནི་ཇི་ལྟར་འདོན། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །འགྲོ་དྲུག་སེམས་ཅན་ཐམས་ཅད་ལ། །ཕུང་པོ་ལྔ་ཡིས་ཀུན་ཁྱབ་སྟེ། །སྤྱི་དང་རང་གི་མཚན་ཉིད་ཀྱིས། །སོ་སོར་དབྱེ་བ་ངས་བཤད་དོ། །དང་པོ་སྤྱི་ཡི་མཚན་ཉིད་ནི། །ཕུང་པོ་ལྔ་རུ་འདོད་པའི་གཞུང་། །སེམས་ཙམ་ཐེག་ཆེན་པ་ན་རེ། །ཕུང་པོ་ལྔ་ལས་མ་གཏོགས་པའི། །ཆོས་ཉིད་གཞན་ན་ཡོད་མིན་ཕྱིར། །ཕུང་པོ་ལྔ་ནི་གང་དག་ཡོད། །དེ་ཡང་འདུས་པའི་སྙིང་པོ་ཉོན། །རྒྱུ་ནི་ཕུང་པོ་རྣམ་ལྔ་ཡང་། །ལྷར་ནི་མ་ཤེས་དང་པོ་ཡིས། །ས་དང་ཕ་རོལ་ཕྱིན་པ་ཡི། །ལམ་ལྔ་རིམ་གྱིས་བགྲོད་བྱས་ནས། །བསོད་ནམས་ཀྱི་ནི་ཚོགས་བསགས་ཏེ། །རྣམ་པར་མི་རྟོག་ཏིང་འཛིན་ལ། །སྒྲིབ་པ་རྣམ་པ་གཉིས་སྦྱངས་ནས། །ཐབས་དང་ཤེས་རབ་གཉིས་ལྡན་ནས། །རང་རིག་དོན་དམ་ངེས་པ་ཡིས། །འབྲས་བུ་ཐོབ་པའི་དུས་ན་ནི། །སྐུ་གསུམ་ཡེ་ཤེས་བཞི་རུ་འདོད། །ད་ཡང་རྡོ་རྗེ་སེམས་དཔའ་ཉོན། །ཕུང་པོ་ལྔ་རུ་འདོད་པ་དེ། །ཡང་དག་དོན་དམ་མ་ཡིན་ཏེ། །དུ་མར་སྣང་དང་རྐྱེན་གྱིས་བསྐྱེད། །གཉེན་པོས་འཇིག་ཅིང་བསྒྱུར་ཡོད་ཕྱིར། །ཀུན་རྫོབ་སྒྱུ་མ་ཙམ་ཡིན་པས། །ཡང་དག་ཉིད་དུ་འདོད་པ་འཁྲུལ། །མི་དང་ཐོ་ཡོར་ཐག་སྦྲུལ་བཞིན། །འཁྲུལ་པ་ཡིན་པར་ཐེ་ཚོམ་མེད། །ད་ཡང་རྡོ་རྗེ་སེམས་དཔའ་ཉོན། །ཕུང་པོ་ལྔ་ཡི་དབྱེ་བ་དང་། །མཚན་ཉིད་སོ་སོའི་ཐ་དད་པ། །སེམས་ཙམ་གཞུང་དུ་ཞིབ་བསྟན་ཕྱིར། །ངེས་དོན་སྐབས་ ― DNG002_Page_0037 ―
[མ་དཔེ་གཟིགས་ན་འདིར་གནོན།]
སུ་ངས་མ་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སེམས་ཙམ་གྱི་གཞུང་སུན་འདོན་པའི་ལེའུ་སྟེ་ཉི་ཤུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །གསང་སྔགས་ཕྱི་ནང་འདོད་པའི་གཞུང་། །ཕུང་པོ་ཁམས་དང་སྐྱེ་མཆེད་སྦྱངས། །སངས་རྒྱས་ཡིན་པར་བློས་བསྒྱུར་ནས། །ཡེ་ཤེས་སེམས་དཔའ་མཆོད་ལ་སྩོགས། །ཚོགས་ཀྱི་བསོད་ནམས་བསྐྱེད་ནས་ནི། །ཆོས་ཉིད་སྒྲིབ་པ་བྲལ་དུས་ནི། །འབྲས་བུ་འབྱུང་བའི་ངེས་པ་ནི། །སྐུ་གསུམ་ཡེ་ཤེས་ལྔར་འདོད་པས། །རང་རིག་ཆོས་སྐུ་ངེས་དོན་བསྒྲིབས། །ད་ཡང་རྡོ་རྗེ་སེམས་དཔའ་ཉོན། །ཨ་ནུ་ཡོ་གའི་འདོད་པ་ཡིས། །ཕུང་པོ་ལྔ་སོགས་རྟོག་ཚོགས་ཀུན། །མ་བསྐྱེད་རྫོགས་པར་འདོད་པ་དེས། །འབྲས་བུ་ཡེ་ཤེས་ལྔ་དང་ནི། །སྐུ་ལྔ་ལྷུན་གྲུབ་འདོད་པས་བསྒྲིབས། །ད་ཡང་འདུས་པའི་སྙིང་པོ་ཉོན། །རང་བཞིན་ལྷུན་གྲུབ་སངས་རྒྱས་ནི། །དུས་གསུམ་དག་ཏུ་མི་འགྱུར་ཞིང་། །གཉེན་པོ་ཅིས་ཀྱང་བསྒྱུར་དུ་མེད། །ཐབས་ནི་གང་ལ་མི་བརྟེན་ཅིང་། །རང་བྱུང་ཀུན་ཏུ་བཟང་པོས་བྱས། །ད་ཡང་འཁོར་གྱི་སྙིང་པོ་ཉོན། །ཕུང་པོ་རྣམ་པ་ལྔ་ལས་ནི། །སྐུ་ལྔ་ཡེ་ཤེས་ལྔ་རུ་འདོད། །ཕུང་པོ་གཅིག་ལས་མེད་པ་ལ། །འབྲས་བུ་ཐ་དད་འབྱུང་བ་ཡི། །གནས་འགྱུར་དུ་ནི་སངས་རྒྱས་ནས། །རིགས་ལྔ་ཡེ་ཤེས་རྫོགས་འདོད་པ། །ཤིན་ཏུ་མི་འཐད་འགལ་བའི་ཕྱིར། །མ་རིག་རྨོངས་པས་རང་ལ་བསྒྲིབས། །དེ་དོན་འགལ་ཞིང་སྒྲིབ་པ་ནི། །རྒྱུད་གཞན་དུ་ནི་ཞིབ་པར་བསྟན། །ངེས་དོན་སྐབས་སུ་ངས་མ་བཤད། །ད་ཡང་རྡོ་རྗེ་སེམས་དཔའ་ཉོན། །མིང་གི་རྣམ་གྲངས་ལྔ་བསྟན་ཀྱང་། །དོན་གྱི་ངོ་བོ་གཅིག་ཏུ་འདུས། །རྩལ་ཤུགས་ཚུལ་དུ་གཉིས་སུ་སྣང་། །དོན་ལ་དགོས་མེད་ཚིག་དང་འདྲེལ། །དེ་ཕྱིར་བྱིས་པའི་སྒྲིན་ཚིག་འདྲ། །ཕུང་པོ་ཁམས་དང་སྐྱེ་མཆེད་ཀུན། །སེམས་སུ་བྱས་ཤིང་བློ་ཡིས་བཅོས། །དེ་ཕྱིར་ཡང་དག་ཕུང་པོ་མིན། །དོན་དམ་ཆོས་ལ་སྨོས་ཅི་དགོས། །དེ་ཕྱིར་མ་རིག་རྨོངས་པ་ཀུན། །གནས་འགྱུར་སངས་ ― DNG002_Page_0038 ―
[མ་དཔེ་གཟིགས་ན་འདིར་གནོན།]
རྒྱས་འདོད་པས་ཕུང་། །གཏན་དུ་འཁྱམས་པ་སྙིང་རེ་རྗེ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྔགས་ཕྱི་ནང་གི་འདོད་གཞུང་སུན་བཏོན་པ་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་འདུས་པའི་འཁོར་ཀུན་ཉོན། །ཀུན་རིག་སྟོན་པས་བཀའ་སྩལ་པ། །མུ་སྟེགས་ཆད་ལ་སྐུར་བཏབ་ཀྱང་། །ངེས་དོན་སྙིང་པོ་མ་མཐོང་ཕྱིར། །ནན་ཚིག་སྒྲོ་སྐུར་སྐྱོན་བཀལ་ཀྱང་། །དོན་དང་མཐུན་པར་མི་འགྱུར་རོ། །ད་ཡང་རྡོ་རྗེ་སེམས་དཔའ་ཉོན། །ཐེག་པ་འོག་མའི་ཆོས་ཀུན་བཞིན། །ཤེས་རབ་ཐབས་ལ་བརྟེན་དགོས་ན། །བྱས་པ་ཡིན་ཕྱིར་གནས་ལུགས་མིན། །སྐུ་དང་ཡེ་ཤེས་འབྱུང་མི་སྲིད། །དེ་ཕྱིར་ཐབས་ལ་རག་ལུས་མེད། །རང་བྱུང་སྙིང་པོ་ཆོས་སྐུ་ནི། །ཉི་མ་དང་ནི་འོད་བཞིན་དུ། །ཤེས་རབ་ཆོས་སྐུ་གཅིག་པུ་ལ། །སྐུ་དང་ཡེ་ཤེས་ཀུན་ལ་རྫོགས། །ད་ཡང་རྡོ་རྗེ་སེམས་དཔའ་ཉོན། །ངེས་དོན་བཀའ་ཡིས་དྲང་དོན་ཀུན། །སུན་བཏོན་འདོད་ཐོབ་ཆེན་པོ་ཡིན། །ངེས་དོན་བཀའ་ལ་སུན་བཏོན་མེད། །དངོས་སུ་སྣང་ཡང་བྱུང་བ་མིན། །དོན་དམ་རང་བཞིན་ངོ་བོར་གནས། །དོན་དུ་བྱ་བ་མི་དམིགས་ཀྱང་། །རང་བྱུང་ཡོན་ཏན་ཤུགས་ལ་རྫོགས། །དངོས་སུ་མེད་ཀྱང་དོན་དུ་སྣང་། །ཆུ་ཟླའི་དཀྱིལ་འཁོར་ལྟ་བུ་ལ། །རང་བཞིན་ལྷུན་གྱིས་གྲུབ་པ་ཡིས། །རང་བྱུང་རང་ལ་ཤུགས་ཀྱིས་བྱུང་། །ད་ཡང་རྡོ་རྗེ་སེམས་དཔའ་ཉོན། །ཕུང་པོ་དབྱེ་བ་འདུས་ལུགས་ཀྱང་། །ཐུན་མོང་ཐེག་པར་སྒོ་བསྟུན་ཕྱིར། །ཀུན་དང་མི་འགལ་བསྟན་པ་ཡང་། །དྲང་དོན་ཡིན་གྱིས་ཡང་དག་མིན། །ཡང་དག་ངེས་དོན་ཡང་ཏིག་ནི། །དཔེར་ན་ཤིང་ཏོག་སྨིན་པ་ལ། །འབྲས་བུ་ཤུགས་ཀྱིས་འབྱུང་བ་ལྟར། །ཆོས་སྐུ་སྒྲིབ་པ་མེད་པ་ལ། །སྐུ་གསུམ་ཡེ་ཤེས་ལྔ་རྣམས་ཀྱང་། །མ་བཙལ་ཡེ་ནས་རང་བཞིན་རྫོགས། །རིགས་ལྔའི་སངས་རྒྱས་དོན་གྱིས་ཚང་། །ཐམས་ཅད་མཁྱེན་པའི་ཡེ་ཤེས་ཀུན། །མ་ལུས་ཐོགས་པ་མེད་པར་མཁྱེན། །རྫོགས་པ་ཆེན་པོ་ངེས་དོན་ཐམས་ ― DNG002_Page_0039 ―
[མ་དཔེ་གཟིགས་ན་འདིར་གནོན།]
ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐབས་ལ་བརྟེན་མི་དགོས་པར་ཡོན་ཏན་ཐམས་ཅད་རྫོགས་པར་བསྟན་པའི་ལེའུ་སྟེ་ཉེར་གཉིས་པའོ།། །།དེ་ནས་འདུས་པའི་འཁོར་རྣམས་ཀྱིས། །ཀུན་རིག་ཆོས་ཀྱི་རྒྱལ་པོ་ལ། །ཐེག་པ་གཞན་དང་སྒོ་བསྟུན་ཕྱིར། །ཕུང་པོ་རྒྱུ་འབྲས་དོན་ཞུས་པ། །ཕུང་པོ་རྣམ་པ་ལྔ་པོ་ཡང་། །ཡང་དག་ཡོད་དང་བྱིན་བརླབས་སུ། །རྟག་ཆད་བྲལ་དང་ངོ་བོར་གནས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རྣམ་ཤེས་ཕུང་པོ་ཡང་དག་ཡོད། །ཕུང་པོ་བཞི་ནི་བྱིན་རླབས་འབྱུང་། །རྟག་ཆད་བྲལ་བ་རྣམ་ཤེས་ཀྱི། །ཀུན་གཞི་རང་གི་ངོ་བོ་ཡིན། །རྟག་ཆད་ངོ་བོ་གནས་པ་ནི། །ཕུང་པོ་གཞན་དང་ཚོགས་བདུན་ཡིན། །ད་ཡང་འདུས་པའི་སྙིང་པོ་ཉོན། །དེ་ཡང་འབྲས་བུ་སྐུ་ལྔ་དང་། །ཡེ་ཤེས་ལྔ་རྣམས་ཡོད་ཚུལ་ནི། །འདུས་མ་བྱས་ཀྱི་ནམ་མཁའ་བཞིན། །དུས་གསུམ་འདུ་འབྲལ་མེད་པར་ནི། །ཆོས་སྐུ་ཡེ་ཤེས་ཡང་དག་ཡོད། །སྐུ་དང་ཡེ་ཤེས་གཞན་དག་ནི། །བྱིན་གྱིས་བརླབས་ལས་བྱུང་བ་སྟེ། །གཟའ་སྐར་རྒྱ་མཚོར་ཇི་བཞིན་དུ། །བཙལ་དུ་མེད་པའི་ཤུགས་ལས་བྱུང་། །ཆོས་སྐུ་མེ་ལོང་ལྟ་བུ་ནི། །རྟག་ཆད་གཉིས་དང་བྲལ་བར་གནས། །ཐེག་པ་གཞན་དུ་ཞིབ་བསྟན་ཕྱིར། །ངེས་དོན་སྐབས་སུ་ངས་མ་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐེག་པ་སྤྱི་དང་མི་འགལ་བར་བསྟན་པའི་ལེའུ་སྟེ་ཉེར་གསུམ་པའོ།། །།དེ་ནས་འདུས་པའི་འཁོར་རྣམས་ལ། །ཡང་ཏི་རང་གཞུང་བཀའ་སྩལ་པ། །རང་བྱུང་ཡེ་ཤེས་ཆོས་སྐུ་ལ། །མེ་ལོང་ལྟ་བུའི་ཡེ་ཤེས་ཀྱང་། །ཡང་དག་དོན་དུ་མི་འདོད་ཕྱིར། །ཡེ་ཤེས་གཞན་ལ་སྨོས་ཅི་དགོས། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཡེ་ཤེས་ཆེན་པོ་ནི། །དུས་གསུམ་དག་ཏུ་མི་འགྱུར་ལ། །མེ་ལོང་ལྟ་བུའི་ཡེ་ཤེས་ཀྱང་། །ཐོག་མ་མེད་ཀྱང་ཐ་མ་ཡོད། །དེ་ཕྱིར་རྐྱེན་ལས་བྱུང་བ་ཡིན། །ཁམས་གསུམ་ ― DNG002_Page_0040 ―
[མ་དཔེ་གཟིགས་ན་འདིར་གནོན།]
འཁོར་བའི་དུས་ཙམ་ན། །ཀུན་གཞིའི་རྣམ་པར་ཤེས་པ་ལ། །གཉེན་པོས་བསྐྱེད་པས་གནས་འགྱུར་གྱིས། །ཡེ་ཤེས་བྱ་བའི་མིང་ཡང་མེད། །ངེས་དོན་ཡང་ཏིའི་མིང་གིས་ནི། །ཁམས་གསུམ་འཁོར་བའི་དུས་ན་ཡང་། །རང་བྱུང་ངོ་བོ་ཉིད་ཀྱི་སྐུ། །ཆོས་སྐུ་ཁྱད་པར་ཡེ་གནས་ཕྱིར། །སངས་རྒྱས་འབྲས་བུ་ཐོབ་དུས་ན། །ཡེ་ཤེས་ཆོས་ཀྱི་སྐུ་ནི་གནས། །དང་པོ་རྒྱལ་བའི་བཀའ་འདི་ཡང་། །ཐོག་མའི་བྱུང་ཚུལ་མ་ཤེས་ན། །ད་ལྟ་བསྒྲུབ་པའི་ཐབས་མི་ཤེས། །ལམ་གྱི་ཐེ་ཚོམ་མི་ཆོད་བཞིན། །ཚི་ཆད་པ་ཡི་སེམས་སུ་འགྱུར། །དེ་ཡང་རྡོ་རྗེ་སེམས་དཔའ་ཉོན། །ཀུན་བཟང་ཐུགས་ཀྱི་ཉིང་ཁུ་འདི། །སྤྲུལ་པ་བཞི་ཡི་ཐུགས་བརྒྱུད་ནས། །གདམས་ངག་མ་ཆད་གསང་བའི་བཀའ། །ཨུ་རྒྱན་ཡུལ་ནས་རིམ་བརྒྱུད་ནས། །འབྲས་བུ་སངས་རྒྱས་ངེས་པ་གཅིག །དུས་ཀྱི་ཐ་མ་དེང་སང་ནས། །བོད་ཀྱི་མཐའ་འཁོབ་ཡུལ་དུ་འབྱུང་། །དེ་ཕྱིར་དོན་དམ་ཆོས་སྐུ་ལས། །ཆོས་ནི་གཞན་ན་ཡོད་མི་སྲིད། །དེ་ཡང་འདུས་པའི་སྙིང་པོ་ཉོན། །འོ་ན་ཁྱོད་ཀྱི་འདོད་པ་དེ། །སེམས་ཅན་ལས་ནི་སངས་རྒྱས་པ། །དེ་ཉིད་འགྱུར་བ་མ་ཡིན་ནམ། །ངེས་དོན་འགྱུར་བ་མ་ཡིན་ཏེ། །མ་རྟོགས་བག་ཆགས་བཅས་པ་དང་། །རྟོགས་པ་བག་ཆགས་བྲལ་བ་ཡང་། །ཁྱད་པར་ཐ་དད་སྣང་གྱུར་ཀྱང་། །དོན་ལ་རྒྱུ་འབྲས་རིམ་གྱིས་མེད། །ངོ་བོ་གཞི་ཡི་ཆོས་སྐུ་དང་། །རྟོགས་པའི་ཡེ་ཤེས་ཆོས་སྐུ་གཉིས། །ངོ་བོ་གཞི་ལ་ཐ་དད་མེད། །ཉི་མ་རང་གི་ངོ་བོ་ལ། །མུན་སྒྲིབ་གྲང་བ་གང་ཡང་མེད། །གློ་བུར་སྤྲིན་གྱིས་བསྒྲིབས་ཙམ་ན། །ཉི་འོད་མེད་པ་མ་ཡིན་ཏེ། །ངོ་བོ་འཕེལ་འགྲིབ་མེད་པ་ལྟར། །རྟོགས་མ་རྟོགས་ཀྱི་ཁྱད་པར་ལས། །སངས་རྒྱས་སེམས་ཅན་གཅིག་པའི་ཕྱིར། །གཞི་ལ་དུས་གསུམ་འགྱུར་མེད་ཡིན། །ད་ཡང་རྡོ་རྗེ་སེམས་དཔའ་ཉོན། །ལུང་ལྡན་བསྟན་པས་ཐམས་ཅད་མཁྱེན། །དེ་དུས་འབྲས་བུ་སངས་རྒྱས་ཕྱིར། །ངོ་བོ་དག་ལ་འཕེལ་འགྲིབ་མེད། །སྐྱེ་འགག་མེད་པར་རྒྱུན་དུ་གནས། །སེམས་ཅན་དུས་ཀྱི་ཆོས་སྐུ་ལ། །དེ་ལས་འཕེལ་བ་ ― DNG002_Page_0041 ―
[མ་དཔེ་གཟིགས་ན་འདིར་གནོན།]
རྡུལ་ཙམ་མེད། །དེ་ཕྱིར་ཡང་དག་ཡོད་པར་བཤད། །ད་ཡང་འདུས་པའི་སྙིང་པོ་ཉོན། །འོ་ན་དུས་གསུམ་མི་འགྱུར་ཡང་། །ཐམས་ཅད་ཆོས་སྐུར་འདོད་པ་དེ། །ལུང་རིགས་གཉིས་དང་འགལ་བ་དང་། །སྡུད་པའི་རྟོག་པར་འགྱུར་བའི་ཕྱིར། །ཡོད་ན་རྟག་པར་ཁྱད་ཅི་ཡོད། །དེ་ཡང་དོན་དང་མི་འགལ་ཏེ། །ཐམས་ཅད་ཆོས་སྐུར་འདུས་པ་དེ། །བསྡུས་ནས་འདུས་པ་མ་ཡིན་ཏེ། །ཉི་འོད་བུ་རམ་མངར་བ་བཞིན། །དུས་གཅིག་རྫོགས་པས་ཆོས་ཀྱི་སྐུ། །རང་བཞིན་ངང་གིས་གནས་པ་བཞིན། །རྒྱུ་རྐྱེན་ཚོགས་འདུས་མ་ཡིན་པས། །ལུང་དང་རིགས་པ་ཅི་ལ་འགལ། །ཁ་དོག་དབྱིབས་སུ་མེད་པ་ལ། །རྟག་པའི་སྐྱོན་གྱིས་ཅི་ལ་གོས། །མི་འགྱུར་ཡེ་ནས་གནས་པ་ལ། །རྟག་ཅེས་ཟེར་ན་རྟག་དཀའ་བས། །ཆོས་སྐུ་འགྱུར་མེད་འདོད་ཐོག་ཡིན། །ཆོས་སྐུ་རྒྱུན་དུ་ཡེ་ཡོད་ཕྱིར། །ཆད་པའི་སྐྱོན་གྱིས་ཡེ་མ་གོས། །དངོས་པོ་མཚན་མ་མེད་པའི་ཕྱིར། །རྟག་པ་ཐེར་ཟུག་ང་ལ་མེད། །དེ་ཕྱིར་སྐྱོན་མེད་གཉིས་ཀར་གནས། །ད་ཡང་རྡོ་རྗེ་སེམས་དཔའ་ཉོན། །ཆོས་འདི་མཆོག་ཏུ་གསང་བ་ཡིས། །སྒོ་ལྔ་དག་གིས་སྤྱོད་ཡུལ་མིན། །དེ་ཕྱིར་ཆོས་སྐུ་བརྗོད་ལས་འདས། །བརྟགས་པའི་ཐ་སྙད་ཀུན་དང་བྲལ། །དེ་ཕྱིར་སེམས་ཀྱི་ཡུལ་ལས་འདས། །རང་བྱུང་རིག་པའི་ཡེ་ཤེས་ལ། །ཚིག་གིས་མཚོན་པ་ཐམས་ཅད་ནོར། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡང་ཏི་ཤན་དབྱེ་བ་བསྟན་པའི་ལེའུ་སྟེ་ཉེར་བཞི་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །ཉན་ཐོས་ལམ་དང་འབྲས་བུའི་གཞུང་། །ཚེ་ནི་སྔ་མ་ཡང་སྔ་ལ། །དགེ་སྡིག་ལས་ནི་གང་བྱས་པ། །ད་ལྟ་ལུས་ནི་བླངས་པ་ལ། །བདེ་སྡུག་གཉིས་ནི་དུས་འདིར་འབྱུང་། །ཕྱི་མ་འཁོར་བར་ལྟུང་དོགས་ནས། །སྡིག་སྤང་དགེ་བ་སྤྱད་བྱས་ནས། །འབྲས་བུ་ལྷ་མིའི་གོ་འཕང་ཐོབ། །ད་ཡང་འདུས་པའི་སྙིང་པོ་ཉོན། །རྒྱུ་རྐྱེན་འཚོགས་པའི་དགེ་སྤྱད་ན། །ལས་དེས་འབྲས་བུ་ཐོབ་ ― DNG002_Page_0042 ―
[མ་དཔེ་གཟིགས་ན་འདིར་གནོན།]
དུས་ནི། །གཞན་དོན་མཐར་ཕྱིན་འགྲུབ་པ་ཡི། །འབྲས་བུ་སངས་རྒྱས་ཐོབ་བར་དུ། །མཐོ་རིས་གནས་ལ་རྟེན་བཅས་ཏེ། །ལྷ་དང་མི་ཡི་ཐེམ་སྐས་ལ། །རིམ་པར་འཛེགས་ནས་སངས་རྒྱས་འབྱུང་། །ད་ཡང་འདུས་པའི་སྙིང་པོ་ཉོན། །ཁྱེད་ནི་ཡང་ཏི་རྫོགས་ཆེན་པ། །གང་ལ་ཡང་ནི་མི་བརྟེན་པར། །རྟོགས་པ་གཅིག་པུས་ཆོག་ཟེར་བ། །རྒྱུ་རྐྱེན་མ་ཚང་འབྲས་བུ་འདོད། །སྟོང་པ་ཉིད་ཀྱི་མཐའ་རུ་ལྷུང་། །ལུང་རིགས་གཉིས་དང་ཤིན་ཏུ་འགལ། །དེས་ན་དགེ་བ་ཚོགས་པར་སྤྱད། །འབྲས་བུ་ལྷ་དང་མི་ཡི་ནི། །འབྲས་བུ་ཐོབ་པར་བྱ་བ་ལ། །རང་སེམས་རྟོགས་པས་མི་ཆོག་སྟེ། །བསོད་ནམས་ཚོགས་ནི་བསགས་ནས་ཀྱང་། །མྱ་ངན་འདས་པའི་མཐའ་བརྟེན་ཏེ། །ཏིང་འཛིན་རྩེ་གཅིག་བསྒོམ་གྱུར་ན། །འབྲས་བུ་ཐམས་ཅད་མཁྱེན་པ་ཡི། །ཡེ་ཤེས་ཐོབ་པར་འགྱུར་བ་ལ། །ཁྱེད་ནི་ཡང་ཏི་རྫོགས་ཆེན་པ། །སེམས་ཉིད་རྟོགས་པས་ཆོག་ཟེར་བ། །འཁོར་བ་ལས་ནི་ཐར་གྱུར་ཀྱང་། །མྱ་ངན་འདས་པའི་མཐའ་རུ་ལྷུང་། །ལམ་དེའི་འབྲས་བུས་སངས་མི་རྒྱ། །དེ་ཕྱིར་འབྲས་བུ་བླ་མེད་པའི། །བྱང་ཆུབ་ཐོབ་པར་བྱ་བ་ལ། །རྒྱུ་ནི་ས་དང་ཕ་རོལ་ཕྱིན། །ལམ་ལ་རིམ་གྱིས་བགྲོད་ནུས་ན། །གཞན་དོན་འབྲས་བུ་ཕུན་སུམ་ཚོགས། །གཟུགས་སྐུ་རྣམ་གཉིས་ཐོབ་པར་འགྱུར། །ཤེས་རབ་མི་རྟོག་རྩེ་གཅིག་ཏུ། །མ་ཡེངས་དོན་ལ་བསྒོམས་གྱུར་ཀྱང་། །བདག་དོན་ཆོས་སྐུ་འགྲུབ་པར་འགྱུར། །ད་ཡང་རྡོ་རྗེ་སེམས་དཔའ་ཉོན། །འབྲས་བུ་བདག་དང་གཞན་དོན་དུ། །ཕུན་སུམ་ཚོགས་པ་ཐོབ་པ་ནི། །འདི་ལས་ཐབས་ཆེན་ཉེ་བའི་ལམ། །ཆོས་ཉིད་གཞན་ན་མེད་དོ་ཟེར། །དེ་དག་དབྱེ་བ་ཚོགས་བསག་ཐབས། །སྙིང་རྗེ་ཆེན་པོས་གཞི་བཟུང་བ། །ཐེག་པ་གཞན་དུ་ཞིབ་བསྟན་ཕྱིར། །ངེས་དོན་སྐབས་སུ་ངས་མ་བཤད། །ད་ཡང་རྡོ་རྗེ་སེམས་དཔའ་ཉོན། །གསང་སྔགས་ཕྱི་ནང་འདོད་པའི་གཞུང་། །ལམ་དང་འབྲས་བུའི་ཁྱད་པར་ནི། །ཐབས་ ― DNG002_Page_0043 ―
[མ་དཔེ་གཟིགས་ན་འདིར་གནོན།]
དང་ཤེས་རབ་ཟུང་འདྲེལ་ན། །ཆེ་བའི་ཡོན་ཏན་འབྲས་བུ་རྙེད། །འབྲས་བུ་ཐམས་ཅད་མཁྱེན་པ་ཡི། །ཡེ་ཤེས་ཐོབ་པར་བྱ་བ་ལ། །ཐབས་དང་ཤེས་རབ་འཛོམ་པར་དགོས། །དེ་ཕྱིར་ཐབས་ནི་གང་ཞེ་ན། །ལན་ཅིག་དུས་ཀྱི་དེང་སང་ན། །ངེས་དོན་ཟབ་མོ་ཁྱད་བསད་ནས། །མ་རིག་གླེན་པས་ཀུན་བསླུས་ཕྱིར། །བྱི་བཤུགས་ཕོ་མོ་ཀུན་བསོགས་ནས། །སྨིན་པར་བྱེད་པའི་ལམ་ཡིན་ལ། །ཕྱི་ནང་གསང་བའི་དབང་དགོས་ཟེར། །འདོད་ཆགས་ལམ་དུ་ཁྲིད་བྱས་ནས། །ཕུང་པོ་ཁམས་དང་སྐྱེ་མཆེད་ཀུན། །ལྷ་དང་ལྷ་མོར་གནས་འགྱུར་ཕྱིར། །རིམ་གྱིས་བསྐྱེད་དང་མ་བསྐྱེད་རྫོགས། །ཆོ་ག་གསུམ་མམ་བདུན་གྱིས་ནི། །བསྐྱེད་ཅིང་བསྒྱུར་བྱས་ཡེ་ཤེས་སེམས། །སྤྱན་འདྲེན་བསྡིམ་དང་མཆོད་པ་སོགས། །གཞུང་དང་ལྡན་པར་བྱས་གྱུར་ཀྱང་། །མཐར་ཕྱིན་འབྲས་བུ་ཐོབ་དུས་ན། །གཟུགས་སྐུ་རྣམ་གཉིས་འབྱུང་ནས་ཀྱང་། །བྱང་ཆུབ་སེམས་དཔའ་མན་ཆད་ནས། །སེམས་ཅན་དམྱལ་བ་ཡན་ཆད་དུ། །རང་དོན་མཐར་ཕྱིན་གྲུབ་པ་ལ། །སྟོང་ཉིད་ཏིང་འཛིན་བག་ཆགས་སྦྱང་། །ཆོས་སྐུ་ཐམས་ཅད་མཁྱེན་པ་ཡི། །ཡེ་ཤེས་དོན་ལྡན་སྐུ་གསུམ་རྫོགས། །ད་ཡང་རྡོ་རྗེ་སེམས་དཔའ་ཉོན། །འདི་ལས་ལྷག་པའི་ངེས་དོན་ཆོས། །རྫོགས་པ་ཆེན་པོ་ཁྱོད་ལ་མེད། །དེ་ཕྱིར་ཐབས་ལ་བརྟེན་ནས་ནི། །ཤེས་རབ་ལྟ་བས་ཐག་བཅད་སྟེ། །འབྲས་བུ་ངེས་པར་འབྱུང་བར་འདོད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྔགས་མཚན་ཉིད་ཀྱི་ལམ་དང་འབྲས་བུའི་དབྱེ་བ་བསྟན་པའི་ལེའུ་སྟེ་ཉེར་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ཐེག་བརྒྱད་ལམ་གྱི་གོལ་ས་ནི། །ཁྱེད་ཅག་བློ་དམན་མ་རིག་པས། །ཐབས་དང་ཤེས་རབ་འདྲེལ་དགོས་ཟེར། །འཁྲུལ་པ་བརྟས་པའི་རྟོག་པ་ཡིན། །ད་ཡང་འདུས་པའི་སྙིང་པོ་ཉོན། །དཔེར་ན་མར་ནི་འདོད་པ་ལ། །ཆུ་བསྲུབས་ ― DNG002_Page_0044 ―
[མ་དཔེ་གཟིགས་ན་འདིར་གནོན།]
པས་ནི་མར་མེད་ལྟར། །ཐབས་ཀྱི་མཚན་མ་དངོས་སུ་སྤྱད། །ཞེན་པའི་སེམས་ཀྱིས་བྱང་མི་ཆུབ། །རང་སེམས་ཆོས་སྐུར་མ་རྟོགས་ན། །ཕྱི་ནང་གསང་བའི་དབང་བསྐུར་ཀྱང་། །འབྲས་བུ་སངས་རྒྱས་འབྱུང་མི་སྲིད། །ཤིན་ཏུ་རྣལ་འབྱོར་རྫོགས་ཆེན་ལ། །ཕོ་མོ་ལུས་རྟེན་དབང་མི་དགོས། །དེ་ཕྱིར་ཁྱད་འཕགས་རིག་པའི་དབང་། །བསྟན་མ་ཐག་ཏུ་གདམས་ངག་ཐོབ། །ཅིག་ཅར་ངེས་དོན་དབང་བསྐུར་བས། །དབང་དང་མཉམ་བཤད་གདམས་ངག་ཕོག །རང་རིག་ཆོས་སྐུ་དུས་འདིར་རྟོགས། །དེ་ལྟར་ཡིན་པར་མ་ཤེས་ཕྱིར། །དཔེར་ན་ཉི་མའི་སྙིང་པོ་ལ། །སྤྲིན་ནི་དཀར་ནག་གཉིས་ཀས་བསྒྲིབས། །དེ་བཞིན་ཐབས་ལ་བརྟེན་པ་ཡིས། །གང་ཟག་ཀུན་གྱིས་དངོས་པོར་བཟུང་། །དེ་ཕྱིར་ལམ་གྱི་གེགས་སུ་གསུངས། །ད་ཡང་རྡོ་རྗེ་སེམས་དཔའ་ཉོན། །དཔེར་ན་སྐྱེས་བུ་མི་རྣམས་ཀྱིས། །སྔགས་མེད་པ་ཡི་དུག་ཟོས་ན། །ཨ་ཤུ་ཀ་ཡི་རྐྱེན་ཡིན་ཕྱིར། །ཆེ་ཆུང་གང་ཟོས་གཉིས་ཀས་འཆི། །ངེས་པའི་ལུང་ལྡན་དོན་མེད་ཕྱིར། །ཐབས་ནི་ཆེ་ཆུང་གཉིས་ཀས་བསྒྲིབ། །རྩོལ་བ་བྱས་པ་ཐམས་ཅད་གོལ། །དེ་ཕྱིར་རང་རིག་ཆོས་སྐུ་ནི། །སེམས་ཀྱི་གསེབ་ནས་ངོས་ཟིན་ན། །ཐབས་ནི་གང་ལ་བརྟེན་པ་མེད། །དེ་ཕྱིར་མན་ངག་སྙིང་པོའི་ཆོས། །ད་ཡང་འདུས་པའི་སྙིང་པོ་ཉོན། །ཁྱེད་ཅག་ཐེག་པ་འོག་མ་པས། །མཚན་མ་དངོས་སུ་སྤྱོད་སྒོ་ནས། །འབྲས་བུ་ཐམས་ཅད་མཁྱེན་པ་ཡི། །ཡེ་ཤེས་ཐོབ་པར་འདོད་པ་ནི། །ཤིན་ཏུ་གཏི་མུག་རྨོངས་པའི་གནས། །ཀུན་བརྟགས་བསྒོམ་པའི་ཆོས་པ་ཀུན། །ལམ་གྱི་གེགས་ནི་ཐབས་ཡིན་ཕྱིར། །གོལ་ས་ཡིན་པར་ཀུན་ནས་བཤད། །དེ་ཕྱིར་ཐབས་ལ་བརྟེན་མི་དགོས། །ད་ཡང་འདུས་པའི་སྙིང་པོ་ཉོན། །སངས་རྒྱས་ཉིད་དུ་འགྲོ་བ་ཡི། །ངེས་པའི་ལམ་ནི་གང་ཡིན་པ། །ཐོག་མར་ལྟ་བའི་གདེང་དང་ནི། །ཏིང་འཛིན་སྤྱོད་པ་དུས་གཅིག་ཏུ། །རང་བྱུང་མཉམ་པའི་དོན་ ― DNG002_Page_0045 ―
[མ་དཔེ་གཟིགས་ན་འདིར་གནོན།]
རྟོགས་ཕྱིར། །བརྗོད་པའི་ཐ་སྙད་ཀུན་བྲལ་བའི། །ཐིག་ལེ་ཉག་གཅིག་ཆོས་ཀྱི་སྐུ། །ཤེས་དང་སངས་རྒྱས་དུས་མཉམ་ཕྱིར། །དེ་ལས་ལྷག་པའི་ཆོས་གཞན་མེད། །ད་ཡང་རྡོ་རྗེ་སེམས་དཔའ་ཉོན། །ཁྱེད་ནི་ཐེག་པ་འོག་མ་པ། །ཕྱེ་མ་ལས་ནི་མར་བཙིར་འདྲ། །བེམ་པོ་འབྱུང་བ་རྣམ་པ་ལྔ། །སངས་རྒྱས་འདོད་པའི་སྙིང་རུལ་ཀུན། །བསྐལ་པར་བསྒྲུབས་ཀྱང་འགྲུབ་མི་སྲིད། །བེམ་པོ་རང་ཡང་སེམས་ཡིན་ན། །ལུས་ལ་འཕོ་འགྱུར་ཡོད་པ་བཞིན། །སེམས་ལ་སྐྱེ་ཤི་ཡོད་པར་འགྱུར། །དེ་ཕྱིར་རང་བྱུང་ཡེ་ཤེས་མིན། །ད་ཡང་འདུས་པའི་སྙིང་པོ་ཉོན། །རྫོགས་ཆེན་ལམ་ནི་ཇི་ལྟར་འདོད། །ཡང་ཏི་དོན་ལམ་ཆེན་པོ་ནི། །ཁྱུང་ཆེན་ནམ་མཁར་ལྡིང་བ་བཞིན། །དྲན་པ་ཙམ་གྱིས་ཆོས་སྐུར་གསལ། །དེ་ཙམ་ཉིད་ན་ཡེ་ཤེས་ཐུགས། །དེ་ཕྱིར་མ་བགྲོད་དམ་པའི་ལམ། །དཔེར་ན་ནོར་བུ་རིན་ཆེན་བཞིན། །རྟོགས་པ་ཙམ་གྱིས་ཆོག་པའི་ཆོས། །བདག་གཞན་དོན་ནི་ལྷུན་གྱིས་གྲུབ། །དེ་ཕྱིར་ངེས་དོན་ཡ་མཚན་ཆེ། །ད་ཡང་རྡོ་རྗེ་སེམས་དཔའ་ཉོན། །ཁྱེད་ཅག་ཐེག་པ་འོག་མ་པ། །དཔེར་ན་ཏིལ་གྱི་མར་ཡོད་ཀྱང་། །མ་བཙིར་བར་དུ་མར་མི་འབྱུང་། །དེ་བཞིན་རང་ལ་ཡོད་མོད་ཀྱང་། །མ་བསྟན་བར་དུ་ཤེས་མི་སྲིད། །བསྐལ་པ་འབུམ་ཕྲག་བརྒྱ་ཡི་བར། །འདུས་བྱས་ཆོས་སྤྱོད་བྱས་གྱུར་ཀྱང་། །འབྲས་བུ་སངས་རྒྱས་འབྱུང་བ་མིན། །ད་ཡང་འདུས་པའི་སྙིང་པོ་ཉོན། །དེ་དག་གཞན་གྱི་ལམ་མང་ཡང་། །རང་ལ་ཡོད་པར་མ་ཤེས་ནས། །གཞན་ནས་ཚོལ་བ་རྨོངས་པའི་ཆོས། །དེ་ཕྱིར་རྩོལ་མེད་ཆོས་འདི་གཅེས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐེག་པ་གཞན་སུན་འདོན་པར་བསྟན་པའི་ལེའུ་སྟེ་ཉེར་དྲུག་པའོ། །སྡོམ་དུ་བསྡུས་ཏེ་བསྟན་པ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །འཁོར་གྱི་རྒྱུད་སྨིན་བྱ་བའི་ཕྱིར། །ངེས་དོན་ཆོས་ལ་འཇུག་དོན་དུ། །བདེན་པའི་ཡིད་ཀྱིས་འདི་སྐད་གསོལ། །ཐུན་མོང་ཁྱད་ ― DNG002_Page_0046 ―
[མ་དཔེ་གཟིགས་ན་འདིར་གནོན།]
འཕགས་དབང་ལྔ་ནི། །ཡང་དག་ཆོས་ཀྱི་རྩ་བའི་དབང་། །གོང་འོག་རིམ་པ་ཇི་ལྟར་བསྐུར། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །དད་ལྡན་འདུས་པའི་འཁོར་རྣམས་ལ། །ཐུན་མོང་ཁྱད་འཕགས་དབང་ལྔ་ནི། །ཀུན་བཟང་ང་ཡིས་བཤད་ཀྱིས་ཉོན། །ཐུན་མོང་སྔོན་འགྲོ་སྟ་གོན་དང་། །འཇུག་སྒོ་དབང་གི་རིམ་པ་ཡང་། །ངོ་བོ་དབྱེ་བ་དཔེ་དང་གནས། །རྫས་དང་ངེས་ཚིག་ལས་འདའ་དཀའ། །རྟགས་དང་མཐར་ཐུག་ཀུན་ལ་སྦྱར། །ད་ཡང་འདུས་པའི་སྙིང་པོ་ཉོན། །སྔོན་འགྲོ་ལས་ཀྱི་བྱ་བ་ནི། །ཡིད་འཐད་བར་ཆད་མི་འབྱུང་འགྲོ། །བཀྲ་ཤིས་བདེ་ལྡན་འདོད་དགུ་རྙེད། །ཉམས་དགའ་དབེན་པའི་གནས་དེ་རུ། །ཚད་ལྡན་པ་ཡི་དཀྱིལ་འཁོར་བཅའ། །ཐིག་གདབ་དཀྱིལ་འཁོར་བྲི་ལ་སོགས། །གཞུང་དང་མཐུན་པར་བསྐྱེད་བྲིས་ལ། །མཛེས་ལྡན་ཡིད་འཇུག་རྒྱན་དགོད་དེ། །དེ་རྗེས་དབང་རྫས་ཐུན་མོང་ནི། །བུམ་པ་ལྷ་གྲངས་བསྟུན་བྱས་ཏེ། །གཏོར་མ་ལ་སོགས་ཚོགས་ཀྱི་རྫས། །ཅི་འབྱོར་ནུས་ཚད་ཚོགས་པར་བྱ། །ད་ཡང་རྡོ་རྗེ་སེམས་དཔའ་ཉོན། །ཡེ་ཤེས་ལྷ་ཡི་དོན་བསྟན་ཕྱིར། །ཁྱད་པར་འཕགས་པའི་རྫས་ལྔ་དང་། །འཇུག་སྒོ་ལྔ་ཡི་རྫས་རྣམས་དང་། །རས་སམ་ཤིང་ཤུན་གྲོ་ག་ལ། །བྲིས་ཏེ་ལུང་ལྡན་བྱིན་གྱིས་བརླབས། །མཚམས་ཀྱི་དཀྱིལ་དུ་གཞུག་པར་བྱ། །དེ་ནས་དད་ལྡན་འཁོར་བསགས་ཏེ། །དམ་ཚིག་སེལ་མེད་བརྩོན་འགྲུས་ཅན། །བྱང་ཆུབ་དོན་དུ་གཉེར་བ་དེས། །མོས་གུས་དད་པས་ལུས་བཏུད་ནས། །བླ་མ་རྗེ་བཙུན་སྤྱན་སྔ་རུ། །ཐེག་པ་ཀུན་དང་སྒོ་བསྟུན་ཕྱིར། །སྒོ་གསུམ་སྨིན་པའི་ཚུལ་གྱིས་ནི། །སྡོམ་བཟུང་སེམས་ནི་བསྐྱེད་པར་བྱ། །ད་ཡང་འདུས་པའི་སྙིང་པོ་ཉོན། །དེ་རྗེས་དོན་ལ་འཇུག་ཆེད་དུ། །དང་པོ་སྟ་གོན་ལ་གནས་ཕྱིར། །སྒོ་ལྔ་མི་ཡེངས་བརྡའ་བཅིངས་པ། །བརྐྱང་ཕྱག་ལྷ་དང་དལ་དུ་གཞུག །ལས་ནི་དོན་དང་ལྡན་པའི་ཕྱིར། །གང་མཐོང་ཅི་ ― DNG002_Page_0047 ―
[མ་དཔེ་གཟིགས་ན་འདིར་གནོན།]
དྲན་དྲིས་པ་དང་། །ལན་དང་སྦྱར་ལ་དངོས་གྲུབ་བསྟན། །དེ་ཕྱིར་དད་པས་གནས་པར་བྱ། །ད་ཡང་འདུས་པའི་སྙིང་པོ་ཉོན། །ཤེས་རབ་སྟ་གོན་གནས་བྱའི་ཕྱིར། །དཀྱིལ་འཁོར་ལ་ནི་ཁ་བལྟས་ཏེ། །ཕྱོགས་བཞི་དབུས་དང་ལྔ་རུ་ནི། །ཕུང་པོ་ལ་ནི་སྟོང་རྒྱས་གདབ། །སྔོན་འགྲོ་ལས་དང་སྟ་གོན་གཉིས། །སྐལ་ལྡན་ཀུན་གྱི་ལམ་ཡིན་ཕྱིར། །ཆོས་རྣམས་ཀུན་གྱི་རྩ་བ་སྟེ། །འཇུག་སྒོ་ལམ་ལ་གཅེས་པར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དབང་གི་སྔོན་དུ་འགྲོ་བའི་ལས་བསྟན་པའི་ལེའུ་སྟེ་ཉེར་བདུན་པའོ།། །།དེ་ནས་འདུས་པའི་ཚོགས་རྣམས་ལ། །རྒྱུད་ནི་སྨིན་པར་བྱ་བའི་ཕྱིར། །ཐུན་མོང་དབང་གི་རིམ་པ་ཡང་། །ཀུན་རིག་སྟོན་པས་བཀའ་སྩལ་པ། །ལྟ་བ་ལམ་དུ་ཁྱེར་བའི་དབང་། །དཀྱིལ་འཁོར་བཅུག་ལ་དམ་ཆུ་བླུད། །འཕྲེང་བ་དོར་ཞིང་ནས་འབྲུ་གདགས། །དབུ་རྒྱན་ཐོད་པ་བརྟུལ་ཞུགས་དང་། །རྡོ་རྗེ་དྲིལ་བུ་མིང་གི་དབང་། །ལུས་ངག་ཡིད་གསུམ་ཕྱིར་མི་ལྡོག །ངེས་པའི་བླ་མར་ལུང་བསྟན་པ། །གོ་རིམ་བཞིན་དུ་ངས་བཤད་ཉོན། །མ་རིག་མུན་པ་བསལ་བའི་ཕྱིར། །ཕྱི་རོལ་ནས་ནི་མིག་བསྒྲིབས་ཏེ། །རྡོ་རྗེའི་ལམ་ནས་ཁྲིད་འོངས་ལ། །ལུང་ལྡན་དཀྱིལ་འཁོར་ལྟར་བཅུག་སྟེ། །དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །བུ་ཁྱོད་ཀྱིས་ནི་ཇི་ལྟར་མཐོང་། །གང་མཐོང་ཁྱོད་ཀྱི་དངོས་གྲུབ་ཡིན། །ད་ཡང་འདུས་པའི་སྙིང་པོ་ཉོན། །འཐུང་ཞིག་དམ་ཚིག་ཆུ་འདི་འཐུང་། །བླ་ན་མེད་ཀྱང་རྡོ་རྗེ་དམྱལ། །དམ་ཚིག་འདས་ནས་བསྲེག་པར་བྱ། །དམ་ཚིག་ཐུབ་ན་དངོས་གྲུབ་ཐོབ། །སྐྱེ་བོ་དང་ནི་ཐེག་པ་དམན། །སྣོད་དང་མི་ལྡན་འདི་བཟླས་ན། །མགོ་ལུས་ཚལ་པ་བརྒྱ་རུ་འགས། །ཕྱི་མ་རྡོ་རྗེ་དམྱལ་བར་ལྟུང་། །དེ་ཕྱིར་རབ་ཏུ་གསང་བར་གྱིས། །རིན་ཆེན་ཕྲེང་བ་འདི་དོར་བས། །ཡེ་ཤེས་ལྷ་ཡི་དངོས་གྲུབ་ནི། །གང་ལ་ཕོག་པ་ཡི་དམ་ལྷ། །དུས་འདིར་ཁྱོད་ལ་ ― DNG002_Page_0048 ―
[མ་དཔེ་གཟིགས་ན་འདིར་གནོན།]
དབང་ཞིག་བསྐུར། །རིག་པའི་དོན་རྟོགས་མེ་ཏོག་རྒྱུས། །ཆོས་ཉིད་རྟགས་ཀྱི་རྒྱན་བཏགས་པས། །ཡེ་ཤེས་ཆེན་པོ་མཆོག་གི་དབང་། །ཆེ་བའི་ཡོན་ཏན་རྫོགས་པར་ཤོག །ཆོས་སྐུའི་སྣང་བ་མཚོན་པའི་ཕྱིར། །རིགས་ལྔ་དབུ་ལ་རྒྱན་བཅིངས་པས། །ཡེ་ཤེས་རིགས་ལྔ་དབྱེར་མེད་པས། །དབུ་རྒྱན་དབང་མཆོག་ཐོབ་པར་ཤོག །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཐོད་པ་ཆོས་ཀྱི་དབྱིངས། །ཡེ་ཤེས་ལྔ་ཡི་རང་བཞིན་ལས། །ཉི་ཁྲི་ཆིག་སྟོང་ཆོས་རྣམས་འབྱུང་། །རང་བྱུང་གཞལ་ཡས་དབང་ཐོབ་ཤོག །རིན་ཆེན་ཐོད་པའི་སྣོད་འདི་རུ། །དམ་རྫས་སྣ་ཚོགས་སྦྱར་བ་འདི། །སྐལ་ལྡན་ཁྱོད་ཀྱིས་འདི་འཐུངས་པས། །དཔའ་བརྟུལ་མཆོག་གི་དབང་ཐོབ་ཤོག །རྡོ་རྗེ་དྲིལ་བུ་རིག་པ་འཛིན། །ཐབས་དང་ཤེས་རབ་དབང་ཆེན་ཏེ། །འཁོར་འདས་ཆོས་ལ་རང་དབང་ཡོད། །ཡེ་ཤེས་ཆེན་པོའི་དབང་ཐོབ་ཤོག །ཁྱོད་ནི་རྗེས་སུ་རྣལ་འབྱོར་ཏེ། །དུས་འདི་ཉིད་དུ་སངས་རྒྱས་པ། །འགྲོ་ལ་ཕན་ཕྱིར་སེམས་བསྐྱེད་ལ། །ཡི་དམ་ལྷ་ནི་རྟག་ཏུ་བསྒོམས། །ད་ཡང་འདུས་པའི་སྙིང་པོ་ཉོན། །ཨོཾ་ནི་ཡེ་ཤེས་ཆོས་ཀྱི་སྐུ། །བདེ་ཆེན་མཆོག་ཏུ་ལོངས་སྤྱོད་པའི། །མཁའ་དབྱིངས་ཀློང་ཡངས་བྷ་ག་ལ། །རབ་བརྗིད་སྐུ་ཡི་དབང་ཐོབ་ཤོག །དམ་ཚིག་ཅན་གྱི་ལྕེ་སྟེངས་སུ། །ཡི་གེ་ཅན་གྱི་ཨོཾ་བསྒོམས་པས། །སྐྱེ་མེད་ཚངས་པའི་གསུང་སྙན་ཆེ། །རིག་པ་གསུང་གི་དབང་ཐོབ་ཤོག །རང་བྱུང་ཆེན་པོ་ཡེ་ཤེས་ཐུགས། །རྒྱལ་བའི་དཔལ་གྱི་བེའུའི་ཐུགས་རྒྱུད་ནས། །ཆོས་ཉིད་རིག་པའི་འོད་འཕྲོས་པས། །སྐལ་ལྡན་ཐུགས་ཀྱི་དབང་ཐོབ་ཤོག །ད་ཡང་འདུས་པའི་སྙིང་པོ་ཉོན། །ཡང་དག་ངེས་དོན་དབང་བསྐུར་བས། །འཁོར་བའི་མཐར་ནི་མི་ལྟུང་ཞིང་། །མྱ་ངན་ལས་འདས་འབྲས་བུ་མཆོག །ཕྱིར་མི་ལྡོག་པའི་དབང་ཐོབ་ཤོག །སངས་རྒྱས་བཀའ་ཡི་དབང་གནས་པ། །ལུང་ལྡན་ངེས་པའི་དམ་པའི་ཆོས། །རྣ་བའི་དབང་པོར་དོན་གསལ་ ― DNG002_Page_0049 ―
[མ་དཔེ་གཟིགས་ན་འདིར་གནོན།]
བ། །ཉན་པའི་དབང་ནི་ཐོབ་པར་ཤོག །བདེ་གཤེགས་ཐུགས་ཀྱི་སྲས་པོ་མཆོག །སྔོན་གྱི་ཐུགས་དམ་མི་འདའ་བར། །སེམས་ཅན་ཀུན་ལ་ཆོས་སྟོན་པའི། །བླ་མའི་ལུང་ལྡན་དབང་ཐོབ་ཤོག །སངས་རྒྱས་དགོངས་པའི་དབང་བསྐུར་བས། །བསྙེན་བསྒྲུབ་རྣམ་བཞི་ལས་བསྒྲུབ་པའི། །ཕྱི་མར་མི་སྡོད་དུས་འདི་རུ། །རིག་འཛིན་གྲུབ་པའི་དབང་ཐོབ་ཤོག །དེ་དག་ཐུན་མོང་དབང་རྣམས་ཀྱི། །རིམ་པ་བཞིན་དུ་དབང་ཐོབ་ན། །དུས་འདིར་ཐུན་མོང་དངོས་གྲུབ་ཐོབ། །དེ་ཕྱིར་དད་པས་ཡང་དག་ཟུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐུན་མོང་དབང་བསྐུར་བའི་རིམ་པ་བསྟན་པའི་ལེའུ་སྟེ་ཉེར་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །ཐུན་མོང་མ་ཡིན་ཁྱད་འཕགས་པའི། །རྒྱལ་ཐབས་སྤྱི་བླུགས་བཀའ་སྩལ་པ། །ལུང་ལྡན་བླ་མ་ངེས་པ་ལ། །ཞུ་བ་འབུལ་དང་སྤྲོ་བ་དྲི། །ཕྱིར་མི་ལྡོག་པར་དམ་བཅའ་དང་། །གནང་བ་སྦྱིན་དང་སྐུ་གསུང་ཐུགས། །ཡོན་ཏན་ཕྲིན་ལས་དབང་བསྐུར་ཞུ། །དེ་སྐད་གསོལ་བཏབ་བརྟུལ་ཞུགས་ཕུལ། །རིམ་པ་བཞིན་དུ་བསྐོར་ཞིང་ནོད། །ད་ཡང་རྡོ་རྗེ་སེམས་དཔའ་ཉོན། །ཀུན་བཟང་རྗེ་བཙུན་བདག་ལ་དགོངས། །མ་རིག་དབང་གིས་དོན་མ་རྟོགས། །དེ་ཕྱིར་བཟློག་དོན་རྒྱལ་བའི་བཀའ། །ཡེ་ཤེས་རྒྱུད་སྨིན་རིག་པའི་དབང་། །ཐུགས་རྗེ་ཆེན་པོས་བདག་ལ་བསྐུར། །དད་ལྡན་ངེས་པའི་ཤེས་རབ་ཅན། །རྫོགས་ཆེན་ཆོས་ལ་འཇུག་སྤྲོའམ། །འཁོར་འདས་མ་རིག་ངེས་དོན་གྱི། །ཟབ་མོའི་ཆོས་ལ་མི་སྐྲག་གམ། །ཡང་དག་ང་ཡིས་བསྟན་པ་ཡི། །ལུང་ལྡན་དམ་ཚིག་གཟུང་ཐུབ་བམ། །ཐུགས་ནས་སྙན་དུ་བརྒྱུད་པ་ཡི། །ངེས་དོན་མན་ངག་གསང་ཐུབ་བམ། །ད་ཡང་འདུས་པའི་སྙིང་པོ་ཉོན། །བླ་མ་ཀུན་བཟང་སྤྱན་ལམ་དུ། །བཀའ་ལས་མི་འདའ་ཕྱིར་མི་ལྡོག །སངས་རྒྱས་ཆོས་སྐུ་རྟོགས་བར་དུ། །རྐྱེན་དབང་མི་བཏང་དམ་བཅའོ། ། ― DNG002_Page_0050 ―
[མ་དཔེ་གཟིགས་ན་འདིར་གནོན།]
སྐལ་ལྡན་རིགས་ཀྱི་བུ་ཁྱོད་ཉོན། །རང་གི་དམ་བཅའ་ཇི་བཞིན་དུ། །ངེས་དོན་སངས་རྒྱས་གསང་སྔགས་དབང་། །ཡང་དག་མ་ནོར་ཁྱོད་ནོས་ཤིག །ངེས་དོན་སངས་རྒྱས་ཆོས་ཀྱི་སྐུ། །ཐིག་ལེ་རང་བྱུང་འོད་གསལ་བ། །རིག་པའི་ཡེ་ཤེས་མངོན་དུ་འགྱུར། །ཡེ་ཤེས་སྐུ་མཆོག་བདག་ལ་སྐུར། །ངེས་དོན་ཡེ་ཤེས་ཚངས་པའི་གསུང་། །ཚིག་གི་དོན་མཚོན་ཡིད་ཀྱིས་གོ། །ངེས་དོན་གསལ་བར་རིག་པའི་གསུང་། །བརྡ་འཇལ་ངེས་པའི་དབང་ཐོབ་ཤོག །མ་རིག་སེམས་ཀྱི་མུན་གསེབ་ཏུ། །ལུང་ལྡན་ཐུགས་ཀྱི་སྒྲོན་མ་ཡི། །མ་རིག་རྟོག་མེད་ད་ལྟ་ཉིད། །འགྱུར་མེད་ཐུགས་ཀྱི་དབང་ཐོབ་ཤོག །དངོས་མེད་རིག་པའི་ཡེ་ཤེས་འདི། །ནང་གསལ་ཡེངས་མེད་ཆོས་ཀྱི་སྐུ། །རྒྱལ་བ་རྣམས་ཀྱི་ཡོན་ཏན་དབང་། །ཡེ་ཤེས་འགྱུར་མེད་བདག་ལ་སྐུར། །རང་བྱུང་མཛད་སྤྱོད་ཡེ་ཤེས་ལ། །རྒྱུན་དུ་མི་འབྲལ་ངེས་པའི་ལུང་། །དུས་འདིར་མི་བརྗེད་རང་གསལ་གྱི། །མཛད་སྤྱོད་དབང་ཞིག་བདག་ལ་སྐུར། །ད་ཡང་འདུས་པའི་སྙིང་པོ་ཉོན། །ནམ་མཁའ་ལྟ་བུར་དངས་པ་ཡི། །ཁྱབ་གསལ་རབ་བརྗིད་སྐུར་སྟོན་པའི། །མཁས་པ་རྒྱ་ཆེ་ཤིན་ཏུ་གསལ། །ཨེ་མ་བཅོམ་ལྡན་སངས་རྒྱས་གསུང་། །ཤེས་རབ་གཏིང་ཕྱིན་གཡོས་པ་མེད། །རྒྱུན་མི་འཆད་ལ་ཕྱག་འཚལ་བསྟོད། །མ་རྩོལ་བདུད་རྣམས་འཇོམས་མཛད་པ། །སྟོབས་ལྡན་དཔའ་བོ་ཆེན་པོ་སྟེ། །ཡོན་ཏན་ཕྲིན་ལས་རྫོགས་མཛད་པ། །ཅི་བསམ་འགྲུབ་ལ་ཕྱག་འཚལ་བསྟོད། །ད་ནི་ཁྱེད་ཀྱི་འབངས་སུ་མཆི། །དཔའ་བོ་ཆེན་པོས་བདག་ལ་དགོངས། །བཀའ་ལས་མི་འདའ་ཡིད་ཀྱིས་བཟུང་། །ངེས་དོན་གདམས་ངག་བསྟན་དུ་གསོལ། །རྒྱལ་ཐབས་སྤྱི་བླུག་ཡེ་ཤེས་དབང་། །རང་བྱུང་རིག་པའི་ཆུ་རྒྱུན་གྱིས། །མ་རིག་བག་ཆགས་དག་པའི་དབང་། །སྐལ་ལྡན་ཁྱོད་ཀྱིས་ཐོབ་པར་ཤོག །དེ་ལྟར་དབང་གི་རིམ་པ་ཡང་། །མ་ནོར་ངེས་པར་བསྐུར་ཐོབ་ན། །སངས་རྒྱས་གདམས་ངག་དུས་འདི་རུ། །ངེས་དོན་མཆོག་ནི་ ― DNG002_Page_0051 ―
[མ་དཔེ་གཟིགས་ན་འདིར་གནོན།]
ཐོབ་པར་འགྱུར། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱལ་ཐབས་སྤྱི་བླུགས་ཀྱི་རིམ་པ་བསྟན་པའི་ལེའུ་སྟེ་ཉེར་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །ངེས་དོན་རིག་པ་རང་གསལ་གྱི། །དབང་གི་རིམ་པ་བཀའ་སྩལ་པ། །ཡེ་ཤེས་རིག་པའི་དབང་ཆེན་ནི། །བལྟ་བསྒོམ་སྤྱོད་པ་འབྲས་བུ་དང་། །འོད་གསལ་ཡེ་ཤེས་དབང་བསྐུར་དང་། །བརྡའ་ཡིག་བྱིན་ལ་དམ་ཚིག་དབོག །ད་ཡང་འདུས་པའི་སྙིང་པོ་ཉོན། །རང་རིག་ཆོས་སྐུའི་ལྟ་བ་ནི། །ཡིད་ཆེས་ཐག་ཆོད་གདེང་དུ་ལྡན། །དེ་རྟོགས་ཀུན་བཟང་བྱིན་རླབས་ཀྱིས། །ཆོས་སྐུ་རིག་པའི་དབང་ཐོབ་ཤོག །འབྲལ་མེད་རང་གསལ་ཡེངས་པ་མེད། །ཉམས་མྱོང་ཞེན་མེད་རྒྱུན་དུ་གནས། །ཏིང་འཛིན་ལྷག་མཐོང་ཡེ་ཤེས་དབང་། །རྐྱེན་དབང་མི་འགྱུར་དབང་ཐོབ་ཤོག །བླང་དོར་དགག་བསྒྲུབ་མེད་པ་ཡིས། །ཉམ་ང་མེད་པའི་བརྟུལ་ཞུགས་མཆོག །དེ་ལ་རྟག་ཏུ་སྐྱོན་མི་གོས། །སྤྱོད་པ་ལ་སྤྱོད་དབང་ཐོབ་ཤོག །འབྲས་བུ་ཆོས་ཉིད་བྱང་ཆུབ་ཀློང་། །མ་བགྲོད་སངས་རྒྱས་སར་ཕྱིན་པའི། །ཆོས་སྐུའི་གཟུགས་བརྙན་གཟུགས་སྐུ་འབྱུང་། །འགྲོ་དོན་དབང་བྱིན་དབང་ཐོབ་ཤོག །ད་ཡང་འདུས་པའི་སྙིང་པོ་ཉོན། །མ་རིག་ཀུན་གཞི་གཞི་ཆ་ལ། །རང་བྱུང་རིག་པའི་དབང་བསྐུར་བས། །སངས་རྒྱས་ཀུན་གྱི་ཆོས་ཀྱི་སྐུ། །ཡེ་ཤེས་འོད་གསལ་དབང་ཐོབ་ཤོག །བླ་མ་རྗེ་བཙུན་ཀུན་བཟང་ནི། །སངས་རྒྱས་ཀུན་གྱི་སངས་རྒྱས་ཏེ། །ལུང་ལྡན་དམ་ཚིག་རྗེས་སུ་སྲུངས། །ཡོན་ཕུལ་གདམས་ངག་རྗེས་སུ་ལོངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་རིག་པ་གསལ་དབང་གི་རིམ་པ་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་ཀུན་རིག་ཆོས་རྗེ་ཡིས། །ཡེ་ཤེས་སྤྱི་བླུགས་དབང་ཆེན་ནི། །དད་ལྡན་འཁོར་ལ་ ― DNG002_Page_0052 ―
[མ་དཔེ་གཟིགས་ན་འདིར་གནོན།]
བཀའ་སྩལ་པ། །དང་པོ་སྐྱེ་ཤིའི་བར་དོ་ལ། །རང་སེམས་ཆོས་སྐུ་ངོ་སྤྲད་པས། །རྒྱུན་དུ་འབྲལ་མེད་གདམས་ངག་གིས། །རྐྱེན་དབང་མི་འགྱུར་དབང་བསྐུར་རོ། །ད་ཡང་འདུས་པའི་སྙིང་པོ་ཉོན། །ཡེ་ཤེས་རང་ཤར་དབང་བསྐུར་བས། །དངོས་པོ་མ་འཁྲུལ་རིག་པ་ལ། །ཚོར་བ་བདེ་སྡུག་དུག་ལྔ་ནི། །གང་ཕྲད་རྐྱེན་ཐུབ་ཆོས་ཀྱི་སྐུ། །ཉམས་མྱོང་འབྲལ་མེད་དབང་ཐོབ་ཤོག །དུས་འདིར་སངས་རྒྱས་ཐོབ་བར་དུ། །བདེ་བ་ཕྱི་ནང་གསང་བ་གསུམ། །གོལ་མེད་རྐྱེན་ཐུབ་ལ་ཟློས་པའི། །ཞེན་མེད་ཡེ་ཤེས་དབང་ཐོབ་ཤོག །སྡུག་བསྔལ་རྣམ་གསུམ་གང་བྱུང་ཡང་། །དེ་དུས་ཆོས་སྐུ་དྲན་ནས་ནི། །མི་བདེ་སྡུག་བསྔལ་རང་ཞི་ནས། །ཡེ་ཤེས་རང་ཤར་དབང་ཐོབ་ཤོག །གཏི་མུག་ལས་བྱུང་བཏང་སྙོམས་གསུམ། །ཤན་དབྱེ་ངོས་བཟུང་ལ་ཟློས་པའི། །གོལ་མེད་རྐྱེན་ཐུབ་ལྷག་མཐོང་དུ། །མི་བརྗེད་གཟུངས་ཀྱི་དབང་ཐོབ་ཤོག །ད་ཡང་རྡོ་རྗེ་སེམས་དཔའ་ཉོན། །དགེ་སྡིག་རྨི་ལམ་རྣམ་གསུམ་དུ། །གོལ་མེད་རྐྱེན་ཐུབ་ཀློང་ཐིམ་པའི། །ཡེ་ཤེས་ཉིད་ཀྱི་ཏིང་འཛིན་དུ། །གསལ་ཐེབ་རིག་པའི་དབང་ཐོབ་ཤོག །ཉོན་མོངས་དུག་ལྔ་སྐྱེས་པའི་ཚེ། །གོལ་མེད་ལོག་ནོན་གསལ་ཐེབ་པས། །ཡེ་ཤེས་རྐྱེན་ཐུབ་གདེང་གིས་ཟིན། །དུག་ལྔ་རང་གྲོལ་དབང་ཐོབ་ཤོག །འདི་ནས་ཚེ་འཕོས་བར་དོ་ལ། །མ་རིག་སྒྲིབ་མེད་གདེང་གིས་ནི། །མངོན་ཤེས་རྗེས་དྲན་ཡོན་ཏན་ལྡན། །སྐྱེ་བ་མི་ལེན་དབང་ཐོབ་ཤོག །སྐལ་ལྡན་རིགས་ཀྱི་བུ་ཁྱོད་ཉོན། །འབྲལ་མེད་རྐྱེན་ཐུབ་དབང་བསྐུར་བས། །མི་ཡི་ལུས་ལ་སངས་རྒྱས་ཐུགས། །དུས་འདིར་མངོན་གྱུར་ཡེ་ཤེས་ཏེ། །འབྲལ་མེད་སངས་རྒྱས་དུས་འདིར་ཐོབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་སྤྱི་བླུགས་ཀྱི་དབང་གི་རིམ་པ་བསྟན་པའི་ལེའུ་སྟེ་སོ་གཅིག་པའོ། །སྡོམ་དུ་བསྡུས་ཏེ་བསྟན་པ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །དབང་བཞིའི་ཡོན་ཏན་བཀའ་སྩལ་པ། །དང་པོ་ཐུན་མོང་ཡོན་ཏན་ནི། །དཀྱིལ་འཁོར་ ― DNG002_Page_0053 ―
[མ་དཔེ་གཟིགས་ན་འདིར་གནོན།]
འཇུག་སྒོའི་དབང་བསྐུར་བས། །ཕྲིན་ལས་རྣམ་བཞིའི་དངོས་གྲུབ་ཐོབ། །ཕྱི་མ་མ་ཡིན་དུས་འདིར་འབྱུང་། །དེ་ཕྱིར་དཀྱིལ་འཁོར་འཇུག་པ་གཅེས། །དམ་ཆུ་ལྕེ་ཐོག་བཞག་པ་གཅེས། །བླ་ན་མེད་དང་རྡོ་རྗེའི་དམྱལ། །ཕྱི་མ་དང་ནི་དུས་འདིར་སྨིན། །དེ་ཕྱིར་དམ་ཚིག་ཤིན་ཏུ་གཉན། །རིན་ཆེན་ཕྲེང་བ་འདི་དོར་བས། །སྔོན་ནས་བསྒྲུབས་ཤིང་བསྟེན་པའི་ལྷ། །གང་ཕོག་རང་གི་ཡི་དམ་ལྷ། །དུས་འདིར་ཞལ་མཐོང་དངོས་གྲུབ་ཐོབ། །ད་ཡང་འདུས་པའི་སྙིང་པོ་ཉོན། །རིག་པའི་དོན་རྟོགས་འབྲུ་བརྒྱད་པ། །རང་ལ་བཏགས་པས་ཡེ་ཤེས་མཆོག །ཐུན་མོང་མཆོག་གི་ལས་རྫོགས་ནས། །མཚན་དང་དཔེ་བྱད་དངོས་གྲུབ་ཐོབ། །རིན་ཆེན་དབུ་རྒྱན་དབང་བསྐུར་བས། །རིགས་ལྔ་ཡེ་ཤེས་དབང་ཐོབ་ནས། །ལོངས་སྐུའི་ཡེ་ཤེས་དུས་འདིར་ནི། །སྐུ་ལྔ་ལྷུན་གྱིས་གྲུབ་པར་འགྱུར། །རང་བྱུང་ཐོད་པའི་དབང་བསྐུར་བས། །ཡེ་ཤེས་ལྔ་རྫོགས་ཐམས་ཅད་མཁྱེན། །བརྒྱད་ཁྲི་བཞི་སྟོང་ཆོས་རྣམས་ནི། །མི་བརྗེད་པ་ཡི་གཟུངས་རྣམས་ཐོབ། །བརྟུལ་ཞུགས་མཆོག་གི་དབང་བསྐུར་བས། །ཐབས་དང་ཤེས་རབ་དོན་ལྡན་ཕྱིར། །བླང་དོར་མེད་པའི་ཡེ་ཤེས་ཀྱིས། །ཉམ་ང་མེད་པའི་བརྟུལ་ཞུགས་བྱུང་། །དེ་ཕྱིར་རྟོག་བཅོམ་བགེགས་རྣམས་འདུལ། །རྡོ་རྗེ་དྲིལ་བུའི་དབང་བསྐུར་བས། །ཐབས་དང་ཤེས་རབ་དོན་ལྡན་ཕྱིར། །འཁོར་འདས་ཆོས་ལ་རང་དབང་ཐོབ། །དེ་ཕྱིར་རིག་འཛིན་ས་ལ་གནས། །ད་ཡང་འདུས་པའི་སྙིང་པོ་ཉོན། །ཡང་དག་མིང་གི་དབང་བསྐུར་བས། །ཡི་དམ་ལྷ་ཡིས་ལུང་བསྟན་ནས། །འགྲོ་དོན་མཐར་ཕྱིན་སེམས་བསྐྱེད་པས། །འཁོར་བའི་མིང་མེད་མངོན་སངས་རྒྱས། །ལུས་ལ་སྐུ་ཡི་དབང་བསྐུར་བས། །ཆོས་སྐུ་བདེ་ཆེན་རིག་པ་ཡི། །གཟུགས་སྐུ་རྣམ་གཉིས་དུས་འདིར་ནི། །རབ་བརྗིད་སྐུ་ཡི་དངོས་གྲུབ་ཐོབ། །དམ་ཚིག་གསུང་གི་དབང་བསྐུར་བས། །སྐྱེ་མེད་རིག་པའི་ཡེ་ཤེས་ཀྱི། །ཚངས་པའི་གསུང་གི་དངོས་གྲུབ་ཀྱི། །དུས་འདིར་སྐྱེ་འགག་མེད་པ་ཐོབ། །རང་བྱུང་བུམ་པའི་དབང་བསྐུར་བས། ། ― DNG002_Page_0054 ―
[མ་དཔེ་གཟིགས་ན་འདིར་གནོན།]
རང་རིག་མི་འགྱུར་ཐུགས་ཀྱི་གདེང་། །དུས་འདིར་སངས་རྒྱས་ཆོས་ཀྱི་སྐུ། །སྐྱེ་འཆི་མེད་པའི་དངོས་གྲུབ་ཐོབ། །ད་ཡང་རྡོ་རྗེ་སེམས་དཔའ་ཉོན། །ཕྱིར་མི་ལྡོག་པའི་དབང་བསྐུར་བས། །འཁོར་བའི་མཐའ་ལས་རྣམ་ཐར་ནས། །སངས་རྒྱས་ཆོས་ཀྱི་ཡོན་ཏན་རྫོགས། །སྐྱེ་རྒ་ན་འཆིའི་སྡུག་བསྔལ་ཐར། །ལུང་བསྟན་ཉན་པའི་དབང་བསྐུར་བས། །སངས་རྒྱས་མདོ་རྒྱུད་ངེས་པའི་ཆོས། །སྐད་ཅིག་ལ་ནི་ངེས་ཤེས་ཕྱིར། །གཏི་མུག་མེད་པའི་དངོས་གྲུབ་ཐོབ། །བཤད་པའི་དབང་མཆོག་འདི་བསྐུར་བས། །རྡོ་རྗེའི་ལྕེ་དང་ལྡན་གྱུར་ནས། །ངག་གསལ་ལུང་ལྡན་དམ་པར་འཛིན། །བླ་མར་འཛིན་པའི་དབང་ཐོབ་འགྱུར། །བསྒོམ་བསྒྲུབ་མཆོག་གི་དབང་བསྐུར་བས། །ཕྱི་མར་མི་སྡོད་དུས་འདིར་འབྱུང་། །ལས་བཞིའི་དངོས་གྲུབ་ཐོབ་ནས་ནི། །རང་བཞིན་གྲུབ་པའི་ས་ལ་གནས། །ད་ཡང་འདུས་པའི་སྙིང་པོ་ཉོན། །དེ་དག་དབང་གི་ཡོན་ཏན་ཡིན། །དགོས་དོན་མ་ནོར་ངེས་པའི་ལུང་། །མཆོག་དང་ཐུན་མོང་ངོ་བོའི་ལུང་། །སངས་རྒྱས་རྒྱུད་སྨིན་དེ་ལས་འབྱུང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐུན་མོང་དབང་གི་ཡོན་ཏན་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་ཀུན་རིག་སྟོན་པ་ཆོས་རྗེ་ཡིས། །རྒྱལ་ཐབས་སྤྱི་བླུགས་དབང་གི་ནི། །ཡོན་ཏན་འཁོར་ལ་བཀའ་སྩལ་པ། །དང་པོ་ལུང་བསྟན་ཞུ་ཕུལ་བས། །རྗེས་སུ་གནང་བས་དད་མི་ལྡོག །དེ་ཕྱིར་བཀའ་གསང་དོན་ལ་འཇུག །མ་རིག་སེལ་ཞིང་རང་རྒྱུད་སྨིན། །སྤྲོ་བ་དྲི་བའི་ཚིག་བརྗོད་པས། །མཉན་ཞིང་གུས་པའི་བློ་བྱུང་སྟེ། །དམ་ཚིག་གསང་བ་ངེས་པར་འཛིན། །ལུང་ལྡན་གོང་མས་བྱིན་གྱིས་རློབས། །སློབ་མས་མི་ལྡོག་དམ་བཅས་པས། །ཆོས་སྐྱོང་དམ་བཏགས་ཀུན་གྱིས་བསྲུང་། །ཚེ་རིང་ཅི་བསམ་འགྲུབ་པར་བྱེད། །དེ་མི་ནུས་ན་བར་ཆད་འབྱུང་། །གནང་བ་བྱིན་པའི་ཡོན་ཏན་ནི། །དད་ལྡན་ཡིད་ ― DNG002_Page_0055 ―
[མ་དཔེ་གཟིགས་ན་འདིར་གནོན།]
ཆེས་བློ་བདེ་ནས། །ཚོགས་ཀྱི་ལམ་གྱི་ཡེ་ཤེས་ཏེ། །འབྲས་བུ་བརྩོན་འགྲུས་མྱུར་དུ་བྱ། །ད་ཡང་འདུས་པའི་སྙིང་པོ་ཉོན། །ཆོས་ཀྱི་སྐུ་ཡི་དབང་བསྐུར་བས། །རང་རིག་ཐིག་ལེའི་དོན་ཤར་ཕྱིར། །རྟོགས་པ་མངོན་གྱུར་ཡེ་ཤེས་མཆོག །ཆོས་ཉིད་བཙལ་མེད་དུས་འདིར་འཐོབ། །ངེས་དོན་གསུང་གི་དབང་བསྐུར་བས། །ཚིག་གིས་མཚོན་པ་ཡིད་ཀྱིས་གོ། །དོན་གསལ་ཡིད་ཆེས་ཚངས་པའི་དབྱངས། །སྐྱེ་འགག་མེད་པའི་དངོས་གྲུབ་འཐོབ། །རིག་པ་ཐུགས་ཀྱི་དབང་ཐོབ་པས། །མ་རིག་སེལ་ཞིང་རིག་པ་རྟོགས། །ཡེ་ཤེས་འགྱུར་མེད་ཆོས་སྐུ་ཐོབ། །ད་ལྟ་ཉིད་དུ་དངོས་གྲུབ་ཐོབ། །ཡོན་ཏན་རིག་པའི་དབང་བསྐུར་བས། །གཟུགས་སྐུའི་ཞིང་ཁམས་སྣ་ཚོགས་ལ། །མངའ་མཛད་སངས་རྒྱས་འགྲོ་དོན་བྱེད། །གཟུང་འཛིན་ཞེན་པའི་སྐྱོན་མི་གོལ། །ཕྲིན་ལས་རིག་པའི་དབང་བསྐུར་བས། །འཛམ་གླིང་བྱེ་བ་ཕྲག་བརྒྱ་རུ། །སྤྲུལ་པ་བྱེ་བ་སྣ་ཚོགས་འགྱེད། །འགྲོ་དོན་མཐར་ཕྱིན་དངོས་གྲུབ་ཐོབ། །ད་ཡང་རྡོ་རྗེ་སེམས་དཔའ་ཉོན། །སྐུ་གསུང་ཐུགས་དང་ཡོན་ཏན་ལས། །དད་པའི་ཡིད་ཀྱིས་བསྟོད་བྱས་པས། །སྟོབས་དང་མི་འཇིགས་ཡོན་ཏན་འབྱུང་། །གསོལ་བཏབ་རྒྱལ་ཐབས་དབང་བསྐུར་བས། །ཡེ་ཤེས་ཆུ་རྒྱུན་ངེས་པའི་བརྡའ། །བག་ཆགས་ཉོན་མོངས་དུས་འདིར་དག །ཆོས་སྐུ་ངོ་སྤྲོད་དངོས་གྲུབ་ཐོབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱལ་ཐབས་སྤྱི་བླུགས་དབང་གི་ཡོན་ཏན་བསྟན་པའི་ལེའུ་སྟེ་སོ་གསུམ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །རིག་པ་རང་གསལ་དབང་ཡོན་ཏན། །འདུས་པའི་འཁོར་ལ་བཀའ་སྩལ་པ། །ལྟ་བ་ངེས་པའི་དབང་བསྐུར་བས། །སངས་རྒྱས་སེམས་ཅན་མ་ལུས་ཀུན། །ཆོས་ཀྱི་སྐུ་ལས་གཞན་མེད་པས། །འཁོར་བའི་སྐྱོན་ནི་ཀ་ནས་མེད། །མ་བསྒྲུབས་འབྲལ་མེད་དབང་བསྐུར་བས། །ཞི་གནས་ལྷག་མཐོང་ཟུང་དུ་འདྲེལ། །ཉམས་མྱོང་ཞེན་ ― DNG002_Page_0056 ―
[མ་དཔེ་གཟིགས་ན་འདིར་གནོན།]
མེད་རྒྱུན་མི་ཆད། །ཏིང་འཛིན་རང་གསལ་དངོས་གྲུབ་ཐོབ། །སྤྱོད་པ་མཆོག་གི་དབང་བསྐུར་བས། །ཉོན་མོངས་མི་འབྱུང་ཡེ་ཤེས་འབྱུང་། །སྐྱོན་གྱིས་མི་གོས་བླང་དོར་མེད། །བརྟུལ་ཞུགས་མཆོག་གི་དངོས་གྲུབ་ཐོབ། །འབྲས་བུ་མཆོག་གི་དབང་བསྐུར་བས། །ས་དང་ལམ་ལ་མ་བགྲོད་པར། །ཉོན་མོངས་དུག་ལྔ་རང་གྲོལ་ནས། །དུས་འདིར་སྐུ་གསུམ་སངས་རྒྱས་འབྱུང་། །དེ་ཡི་ཡོན་ཏན་བརྗོད་མི་ལངས། །འོད་གསལ་ཆེན་པོའི་དབང་བསྐུར་བས། །ཡེ་ཤེས་རིག་པའི་འོད་ཤར་བས། །འཇིག་རྟེན་གསུམ་གྱི་བྱང་ཆུབ་སེམས། །ཀུན་ཀྱང་སངས་རྒྱས་ས་རུ་ཤེས། །ད་ཡང་རྡོ་རྗེ་སེམས་དཔའ་ཉོན། །དེ་དག་རང་གསལ་ཡོན་ཏན་གྱི། །བརྡ་ཡིག་བྱིན་ལ་དབང་ཡོན་ཕུལ། །དེ་ཡི་བསོད་ནམས་བསམ་མི་ཁྱབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རིག་པ་རང་གསལ་གྱི་དབང་གི་ཡོན་ཏན་བསྟན་པའི་ལེའུ་སྟེ་སོ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ཡེ་ཤེས་སྤྱི་བླུགས་དབང་གི་ནི། །ཡོན་ཏན་ངེས་པར་བཀའ་སྩལ་པ། །བདེ་བ་ཡེ་ཤེས་དབང་བསྐུར་བས། །ཕྱི་ནང་གསང་བའི་བདེ་བ་ནི། །བདེ་བ་རྐྱེན་ཐུབ་ཆོས་སྐུར་ཤར། །ལོངས་སྤྱོད་རྫོགས་པའི་འབྲས་བུ་འབྱུང་། །སྡུག་བསྔལ་ཞི་བྱེད་དབང་བསྐུར་བས། །སྡུག་བསྔལ་སྣ་ཚོགས་གང་བྱུང་ཡང་། །རང་ཞི་བྱང་ཆུབ་སེམས་སུ་རྟོགས། །ཁང་གཞི་གསུམ་འབྲས་བདེ་བར་གནས། །བཏང་སྙོམས་ལྷག་མཐོང་དབང་བསྐུར་བས། །གཏི་མུག་རང་བྲལ་རྐྱེན་རྣམས་ཐུབ། །ལེ་ལོ་མི་འབྱུང་ཆོས་ཀྱི་སྐུ། །དེ་ཙམ་ཉིད་ན་ཆོས་སྐུ་གསལ། །དུག་ལྔ་རང་གྲོལ་དབང་བསྐུར་བས། །ཉོན་མོངས་ཞེན་པ་གང་སྐྱེས་ཀྱང་། །དེ་ཉིད་གསལ་ཐེབ་ཆོས་སྐུ་ཉིད། །རྐྱེན་དབང་མི་འགྱུར་གདེང་གིས་ཟིན། །སྐྱེ་བ་མི་ལེན་དབང་བསྐུར་བས། །ལུས་བོར་སྲིད་པ་བར་དོ་ལ། །རྗེས་དྲན་དྲུག་གི་དོན་ཤེས་ནས། །སྐྱེ་བ་མི་ལེན་ཡེ་ཤེས་སུ། །བག་ཆགས་ ― DNG002_Page_0057 ―
[མ་དཔེ་གཟིགས་ན་འདིར་གནོན།]
མི་འབྱུང་རྐྱེན་རྣམས་ཐུབ། །ད་ཡང་རྡོ་རྗེ་སེམས་དཔའ་ཉོན། །དེ་དག་དབང་གི་རིམ་པ་ཡང་། །དོན་ལ་དབྱེར་མེད་ངོ་བོ་གཅིག །ཡོན་ཏན་གྲངས་རྣམས་ཅི་གསུངས་ཀྱང་། །སྒྲིབ་པས་མི་གོས་སངས་རྒྱས་ཉིད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་སྤྱི་བླུགས་ཀྱི་དབང་གི་ཡོན་ཏན་བསྟན་པའི་ལེའུ་སྟེ་སོ་ལྔ་པའོ། །སྡོམ་དུ་བསྡུས་ཏེ་བསྟན་པ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་རིག་ཆོས་ཀྱི་རྒྱལ་པོ་ལ། བདེན་པའི་ཡིད་ཀྱིས་འདི་སྐད་གསོལ། །རྟོགས་པར་བྱ་བའི་དམ་ཚིག་གང་། །ཆེད་དུ་བྱ་བའི་དམ་ཚིག་གང་། །བསྲུང་བར་བྱ་བའི་དམ་ཚིག་གང་། །སྤང་བར་བྱ་བའི་དམ་ཚིག་གང་། །སྤྱད་པར་བྱ་བའི་དམ་ཚིག་གང་། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །དམ་ཚིག་ལྔ་ཡིས་གཞི་གཟུང་བ། །ང་ཡིས་བཤད་ཀྱིས་ལེགས་པར་ཉོན། །དམ་ཚིག་བཅུ་གཉིས་གཞི་བསྟན་པ། །ལུས་ངག་ཡིད་གསུམ་ལས་སྤྱོད་པའི། །ཡོན་ཏན་སྐྱོན་གྱི་རྩ་བ་སྟེ། །གནང་དང་བཀག་པ་ཤེས་པར་གཅེས། །དེ་ཡང་འདུས་པའི་སྙིང་པོ་ཉོན། །རྟོགས་པར་བྱ་བའི་དམ་ཚིག་ནི། །མ་མེད་བུ་ནི་མི་འབྱུང་བཞིན། །ཀུན་གཞི་ནང་གི་ཆོས་སྐུ་ལས། །སངས་རྒྱས་མི་བཙལ་དམ་ཚིག་སྟེ། །དེ་ཉིད་ངོས་ཟིན་རྟོགས་པས་ཆོག །གཟུགས་སྤངས་གྲིབ་མ་མི་རྙེད་བཞིན། །དུག་ལྔ་སྤངས་པའི་ཕ་རོལ་ན། །སངས་རྒྱས་གཞན་ན་མེད་པ་ཡིན། །དུག་ལྔ་མི་སྤངས་དམ་ཚིག་མཆོག །གསེར་འགྱུར་རྩི་ཡིས་ཐེབ་པ་བཞིན། །དུག་ལྔ་ཆོས་ཉིད་དོན་ཤེས་ན། །སྤང་བླང་མེད་པའི་ཆོས་སྐུར་གསལ། །དེ་ལས་མི་འགྱུར་འཁོར་མི་སྲིད། །སྔགས་ཀྱིས་དུག་བསད་དཔེ་བཞིན་དུ། །དུག་ལྔ་རང་གྲོལ་དོན་ཤེས་ན། །ཆེད་དུ་མི་བསྒོམ་དམ་ཚིག་སྟེ། །ཡིད་ཀྱི་བསམ་པས་བསྒོམ་མི་དགོས། །རིན་ཆེན་རྙེད་པས་ལས་མི་དགོས། །དེ་བཞིན་དོན་རྟོགས་དམ་ཚིག་ ― DNG002_Page_0058 ―
[མ་དཔེ་གཟིགས་ན་འདིར་གནོན།]
མཆོག །བསྒོམ་མི་དགོས་པའི་ཆོས་ཡིན་ཕྱིར། །མ་བསྒོམས་སྟོར་བྲལ་གོལ་ས་མེད། །ད་ཡང་རྡོ་རྗེ་སེམས་དཔའ་ཉོན། །དེ་དག་རྟོགས་ཐབས་དམ་ཚིག་ཀྱང་། །རྩ་བ་རང་སེམས་འདི་ཉིད་ལས། །གཞན་ན་ཡོད་པ་མ་ཡིན་ཏེ། །རང་རིག་རྟོགས་ན་དམ་ཚིག་མཆོག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྟོགས་པར་བྱ་བའི་དམ་ཚིག་བསྟན་པའི་ལེའུ་སྟེ་སོ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །འཆད་བྱའི་དམ་ཚིག་བཀའ་སྩལ་པ། །དཔེར་ན་མིག་གི་འབྲས་བུ་བཞིན། །ལུང་ལྡན་རྡོ་རྗེ་སློབ་དཔོན་ལ། །བརྩེ་གདུང་དམ་ཚིག་རྒྱུན་དུ་བཀུར། །ངེས་དོན་མཆོག་གི་དངོས་གྲུབ་ཐོབ། །ད་ཡང་འདུས་པའི་སྙིང་པོ་ཉོན། །དཔེར་ན་རང་གི་ལུས་བསྲུང་བཞིན། །ངེས་དོན་གཅིག་པའི་གྲོགས་དག་ལ། །གདུང་སེམས་མི་འབྲལ་གུས་བྱེད་ན། །དངོས་གྲུབ་ཚེ་རིང་ལོངས་སྤྱོད་འཕེལ། །དཔེར་ན་རང་གི་སྙིང་བཞིན་དུ། །དམ་ཚིག་གདམས་ངག་མ་ནོར་བ། །སྣོད་མེད་གཞན་ལ་མི་སྤེལ་བར། །ཆེད་དུ་དམ་བྱས་ཅི་བསམ་འགྲུབ། །ཀ་ལ་པིང་ཀའི་དབྱངས་སྙན་བཞིན། །རང་གི་བལྟ་བསྒོམ་ངེས་པའི་དོན། །རྒྱུན་དུ་མི་འབྲལ་ཆེད་དུ་ནི། །རིག་པ་སོ་ཐུབ་དམ་ཚིག་བསྲུང་། །བདེན་མཐོང་རྐྱེན་ཁར་མི་བཏང་ཞིང་། །ལུང་ལྡན་ངེས་པའི་གདམས་ངག་ལ། །བདུད་ཀྱི་ཆོ་འཕྲུལ་གང་བྱུང་ཡང་། །ཟིལ་གནོན་གདམས་ངག་དྲན་པ་གཅེས། །བུ་ལ་མི་ཆགས་ནི་ཏི་བཞིན། །དམ་ལྡན་དམ་ཚིག་གདེང་ལྡན་ནས། །ཆོས་བརྒྱད་སྤང་བླང་མེད་ཤེས་ཕྱིར། །ཆེད་དུ་མི་ཞེན་གཉེན་པོ་དགོས། །དེ་ཡང་རྡོ་རྗེ་སེམས་དཔའ་ཉོན། །དེ་དག་ཆེད་བྱའི་དམ་ཚིག་ཀྱང་། །རྩ་བ་སྐུ་གསུང་ཐུགས་སུ་འདུས། །དེ་ཕྱིར་རྩ་དགུ་དམ་ཚིག་སྟེ། །ཆོས་རྣམས་ཀུན་གྱི་གཞི་མ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆེད་དུ་བྱེད་པའི་དམ་ ― DNG002_Page_0059 ―
[མ་དཔེ་གཟིགས་ན་འདིར་གནོན།]
ཚིག་བསྟན་པའི་ལེའུ་སྟེ་སོ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །བསྲུང་བའི་དམ་ཚིག་བཀའ་སྩལ་པ། །སྤྲེ་དང་སྟག་འཐབ་ཇི་བཞིན་དུ། །རྡོ་རྗེ་སློབ་དཔོན་སྐུ་དགྲ་དང་། །བཤེས་འདྲིས་མི་བྱ་བསྲུང་གྱུར་ན། །རིན་ཆེན་སྐུ་ཡི་དངོས་གྲུབ་ཐོབ། །མཐོང་བའི་དུག་ཅན་དཔེ་བཞིན་དུ། །ནག་མོར་འཛིངས་དང་དམ་ཉམས་ཀྱིས། །འཐབ་བརྡུང་ཤུགས་མ་སྤངས་འགྱུར་ན། །བགེགས་ཀྱིས་མི་ཚུགས་བྱིན་རླབས་འབྱུང་། །དུག་ཏུ་ངོ་ཤེས་མི་ཟ་བཞིན། །རྨིག་ཟླུམ་ཤ་ནི་མ་ཟོས་ན། །བྲམ་ཟེ་གཙང་མའི་རིགས་འཛིན་སྐྱོབ། །མཁའ་འགྲོས་ཐུན་མོང་དངོས་གྲུབ་སྟེར། །གསེར་དང་བྱེ་མ་མི་བརྗེ་བཞིན། །ངེས་དོན་རྒྱུད་དྲུག་ཆོས་དང་ནི། །བཀའ་རྐུན་ཆོས་གཞན་མ་བརྗེས་ན། །ཐུགས་ཀྱི་དངོས་གྲུབ་སངས་རྒྱས་ཐོབ། །དར་དཀར་ལ་ནི་སྣུམ་ཞེན་བཞིན། །ནལ་བུ་བསད་དང་ངོས་ནལ་ལ། །འཁྲིག་པའི་འདོད་ཆགས་སྤྱོད་སྤངས་ན། །གཙང་རིས་ཆོས་སྐྱོང་ཀུན་གྱིས་སྐྱོབ། །ད་ཡང་རྡོ་རྗེ་སེམས་དཔའ་ཉོན། །དེ་དག་བསྲུང་བའི་དམ་ཚིག་ཀྱང་། །རྩ་བ་འདོད་ཆུང་ཉིད་དུ་འདུས། །དེ་ཕྱིར་ཞེན་པ་མེད་ཤེས་ན། །བར་ཆད་མི་འབྱུང་དངོས་གྲུབ་ཐོབ། རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསྲུང་བར་བྱ་བའི་དམ་ཚིག་བསྟན་པའི་ལེའུ་སྟེ་སོ་བརྒྱད་པའོ།། །།དེ་ནས་ཡང་ཀུན་རིག་སྟོན་པ་ཡིས། །སྤང་བར་བྱ་བའི་དམ་ཚིག་ནི། །འདུས་པའི་ཚོགས་ལ་བཀའ་སྩལ་པ། །རྣལ་འབྱོར་ངེས་ལུང་ལྡན་པ་ཡིས། །དམ་བཟུང་མི་ཤིགས་བསྲུངས་དགོས་ནི། །སེམས་ཅན་ཐ་མལ་འགྲོ་བ་ཡི། །སྲོག་གཅད་དམ་ཚིག་ཅན་གྱིས་སྤངས། །ཏིལ་གྱི་ཕུབ་མ་ཙམ་ཡང་ནི། །མ་བྱིན་བླང་བར་མི་བྱ་སྟེ། །མི་དང་མི་མ་ཡིན་པའི་རྫས། །རྣལ་འབྱོར་པ་ཡིས་རྐུ་སེམས་སྤངས། །རེག་པ་དུག་ཅན་དཔེ་བཞིན་དུ། །སྲུང་མ་ལྔ་ལྡན་གཞན་གྱི་ལ། །ཆགས་སེམས་ཙམ་ཡང་མི་ ― DNG002_Page_0060 ―
[མ་དཔེ་གཟིགས་ན་འདིར་གནོན།]
བྱ་སྟེ། །རྣལ་འབྱོར་དམ་ཚིག་ལྡན་པས་སྤངས། །ཁ་རླངས་དུག་ཅན་དཔེ་བཞིན་དུ། །མི་ཆོས་བླ་མའི་རྫུན་ལ་སོགས། །རང་འདོད་འདུ་ཤེས་བསྒྱུར་སྨྲ་སྤང་། །དེ་དག་རྩ་བ་བཞི་པོ་ནི། །འཁོར་བར་འཁྲུལ་པའི་རྟེན་གཞི་སྟེ། །དེ་མ་སྤང་བར་གྲོལ་མི་སྲིད། །དེ་ཕྱིར་རྣལ་འབྱོར་ཀུན་གྱིས་སྤངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤང་བར་བྱ་བའི་དམ་ཚིག་བསྟན་པའི་ལེའུ་སྟེ་སོ་དགུ་པའོ།། །།དེ་ནས་ཀུན་རིག་རྒྱལ་པོ་ཡིས། །གནང་བའི་དམ་ཚིག་རྣམ་པ་བཞི། །འདུས་པའི་འཁོར་ལ་བཀའ་སྩལ་པ། །དུག་སྦྲུལ་ཉེས་བྱེད་གསོད་པ་བཞིན། །སྐུ་དགྲ་ཉེས་བྱེད་ཞིང་བཅུ་དང་། །སྔགས་ལ་སྐུར་བ་ལ་སོགས་པའི། །སྡིག་ཅན་བསྒྲལ་བས་དངོས་གྲུབ་ཐོབ། །དཔེར་ན་སྦྲང་བུ་བཅུད་ལེན་བཞིན། །རྣལ་འབྱོར་ཐབས་རྣམས་སྣ་ཚོགས་ཀྱིས། །སེར་སྣ་ཅན་གྱི་ཟས་ནོར་ནི། །མ་བྱིན་བླངས་ལ་ཚོགས་སུ་འབུལ། །ཤིང་ཏོག་སྨིན་པའི་བཅུད་འཇིབས་བཞིན། །སྔ་ཕྱི་མ་སོང་གདེང་ལྡན་པས། །ཕོ་མོ་ཆགས་པ་ཅི་སྤྱད་ཀྱང་། །དོན་ལས་མ་འདས་བདེ་བའི་གྲོགས། །བྱིས་པ་ལག་གཏོད་འདྲིད་པ་བཞིན། །ངེས་དོན་བཀའ་ལ་ཞུགས་ཆེད་དུ། །དྲང་དོན་ཆོས་ཀུན་རྫུན་དུ་སྨྲ། །གོལ་སྒྲིབ་ཕྱིར་ནི་ཉེས་བྱེད་དགེ། །ད་ཡང་འདུས་པའི་སྙིང་པོ་ཉོན། །གནང་བའི་དམ་ཚིག་དེ་དག་ཀྱང་། །ལྟ་བའི་གདེང་ལྡན་བྱ་བ་ལས། །ཐ་མལ་ཀུན་གྱིས་བྱར་མི་རུང་། །དེ་ཕྱིར་གདེང་ལྡན་བློ་ཡིས་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གནང་བར་བྱ་བའི་དམ་ཚིག་བསྟན་པའི་ལེའུ་སྟེ་བཞི་བཅུ་པའོ། །སྡོམ་དུ་བསྡུས་ཏེ་བསྟན་པ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཚིག་གིས་འདི་སྐད་གསོལ། །མ་ ― DNG002_Page_0061 ―
[མ་དཔེ་གཟིགས་ན་འདིར་གནོན།]
རིག་ཡེ་ཤེས་དབྱེ་བ་གང་། །ཡུལ་སེམས་གཞི་མ་གཅིག་མི་གཅིག །རྒྱུ་འབྲས་དོན་གྱི་དབྱེ་བ་གང་། །བསྒོམ་དུ་ཡོད་མེད་ཇི་ལྟར་ཡིན། །རྟོགས་མ་རྟོགས་ཀྱི་ཁྱད་པར་གང་། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སེམས་ཅན་ཀུན་ལ་གནས་པ་ཡི། །མ་རིག་ཡེ་ཤེས་ཁྱད་པར་ནི། །ང་ཡིས་བཤད་ཀྱིས་ད་ཉོན་ཅིག །དང་པོ་འཁོར་འདས་བར་དོ་ལ། །ཤེས་བཞིན་ལུང་མ་བསྟན་དུ་གཡོས། །དེ་ཉིད་རང་དུ་ངོ་མ་ཤེས། །དེ་ཕྱིར་གང་གི་བློ་མི་འཇུག །དེ་ནི་གཏི་མུག་འཁོར་བའི་གཞི། །དེ་ལ་དཔྱད་ཀྱང་མ་ཤེས་པས། །ཞི་གནས་མ་རིག་པ་ཞེས་བྱ། །ད་ཡང་འདུས་པའི་སྙིང་པོ་ཉོན། །དེ་ལས་ཡུལ་མེད་འཛིན་པ་ནི། །བག་ལ་ཉལ་བ་ཆ་ཕྲ་བྱུང་། །དེ་ཕྱིར་རང་ལ་རང་གིས་བསྒྲིབས། །ལྷན་ཅིག་སྐྱེས་པའི་མ་རིག་པ། །རྒྱུ་ཡི་རྐྱེན་ཞེས་དེ་ལ་བྱ། །རྒྱུ་དེ་ཤིན་ཏུ་མྱུར་བར་ནི། །དེ་མ་ཐག་ཏུ་འཛིན་པས་བརྟགས། །བག་ཉལ་ལངས་ལ་ཉེ་བས་འཛིན། །དེ་མ་ཐག་པའི་རྐྱེན་ཞེས་བྱ། །རྒྱུ་དང་དེ་མ་ཐག་པ་ཡི། །རྐྱེན་གཉིས་ཟུང་དུ་འཇུག་པ་ཡི། །ལྷན་ཅིག་སྐྱེས་པའི་མ་རིག་པ། །དེས་བསྐྱེད་ཤེས་པ་མངལ་དུ་འཇུག །ངེས་འཛིན་ཆགས་སྡང་ཕྲ་མོ་སྐྱེས། །ནང་གི་བཟུང་བས་ཀུན་ཏུ་བརྟགས། །དེ་ཕྱིར་དམིགས་པའི་རྐྱེན་ཞེས་བྱ། །ཆགས་སྡང་དེ་བས་རགས་སྐྱེས་པས། །ཁོང་ནས་བྱུང་ནས་ཕྱི་རོལ་གྱི། །བག་ཆགས་ཡུལ་གྱི་སྣང་བ་ཡང་། །རང་གི་ཡིད་ཀྱིས་དོན་རྟོག་ཞུགས། །ཡུལ་དང་ཆོས་བརྒྱད་རྣམ་པར་བརྟགས། །ང་བདག་ནན་ཏན་གཟུང་འཛིན་བརྟས། །མངོན་རྒྱུར་ཆགས་སྡང་ཁ་ཚང་ཕྱིར། །དམིགས་པ་བདག་པོའི་རྐྱེན་གཉིས་ཚང་། །ཀུན་བརྟགས་མ་རིག་པ་ཞེས་བྱ། །ད་ཡང་འདུས་པའི་སྙིང་པོ་ཉོན། །ལྷན་ཅིག་ཀུན་བརྟགས་གཉིས་འཛོམ་པས། །ཀུན་གཞིའི་རྣམ་པར་ཤེས་པ་ཡིན། །དེས་བསྐྱེད་ཚོགས་བརྒྱད་ཁ་ཚང་བས། །འཁོར་བར་འཁྱམས་ཞེས་དེ་ལ་བྱ། །ད་ཡང་རྡོ་རྗེ་སེམས་དཔའ་ཉོན། །སངས་ ― DNG002_Page_0062 ―
[མ་དཔེ་གཟིགས་ན་འདིར་གནོན།]
རྒྱས་ཀུན་གྱི་ཡེ་ཤེས་ནི། །རང་སེམས་ངོ་བོ་རྟོགས་ལས་བྱུང་། །ཡེ་ནི་རང་བྱུང་ཀུན་གྱི་གཞི། །ཤེས་ནི་ཁུང་ལྡན་ངེས་པའི་དོན། །ཟུང་དུ་འཛེམ་ཕྱིར་ཡེ་ཤེས་ཡིན། །སྨན་དང་སྨན་པ་འཛོམ་པ་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མ་རིག་ཡེ་ཤེས་དབྱེ་བ་བསྟན་པའི་ལེའུ་སྟེ་ཞེ་གཅིག་པའོ།། །།དེ་ནས་ཀུན་རིག་རྒྱལ་པོ་ཡིས། །ཡུལ་སེམས་དབྱེ་བ་བཀའ་སྩལ་པ། །སྣང་ཞིང་སྲིད་པའི་ཆོས་རྣམས་ཀུན། །འཁྲུལ་སེམས་བག་ཆགས་ཡིན་པའི་ཕྱིར། །སྣང་བའི་ཞེན་པ་སྣ་ཚོགས་ཀྱང་། །ངོ་བོ་ཡུལ་དུ་གྲུབ་པ་མེད། །དེ་ཕྱིར་སྣང་བ་ལོག་འཁྲུལ་ཡིན། །ད་ཡང་འདུས་པའི་སྙིང་པོ་ཉོན། །རང་གི་སེམས་ནི་འཁྲུལ་པའི་དཔེ། །ཐག་སྦྲུལ་ཐོ་ཡོར་མི་བཞིན་དུ། །མེད་ལ་ཡོད་འཛིན་ཀུན་ཏུ་བརྟགས། །ས་ཆུ་མེ་རླུང་འབྱུང་བ་བཞི། །འཁྲུལ་པའི་བག་ཆགས་བརྟས་པ་ཡིན། །དངོས་སུ་སྣང་ཡང་དོན་དུ་མེད། །དེ་ཕྱིར་ཡུལ་འདི་རྟེན་མེད་པར། །རྨོངས་པ་ཀུན་ནི་དམ་པར་འཛིན། །ལོག་པའི་རྗེས་སུ་འབྲངས་པས་ཕུང་། །སྤྲེ་འདྲའི་ལུང་གིས་བསླད་པས་ཕུང་། །ད་ཡང་རྡོ་རྗེ་སེམས་དཔའ་ཉོན། །རང་རིག་ཆོས་སྐུ་ཡེ་ཤེས་ལ། །འཁྲུལ་པའི་རྐྱེན་བཞིས་མ་བསྐྱེད་པས། །ཀུན་གཞི་མེད་ཕྱིར་སེམས་ཀྱང་མེད། །ཡུལ་སེམས་གཉིས་ཀ་གཞི་མེད་དེ། །དེ་ཕྱིར་གཞི་མེད་ཆོས་སྐུ་ལ། །རང་རིག་ཡེ་ཤེས་ཀློང་ལྡན་པས། །སྣང་བ་མེད་ཕྱིར་འཛིན་པ་བྲལ། །གསལ་ལ་འཛིན་མེད་མི་གཡོ་བ། །སངས་རྒྱས་ཀུན་གྱི་དགོངས་པར་བཤད། །ད་ཡང་རྡོ་རྗེ་སེམས་དཔའ་ཉོན། །རང་སེམས་ཡུལ་དུ་འཛིན་པའི་རྒྱུ། །འཁོར་བའི་ས་བོན་མ་རིག་པས། །རྒྱུ་རྐྱེན་བྱས་ནས་སྡུག་བསྔལ་བྱུང་། །དེ་ཕྱིར་རང་འཁྲུལ་རྨོངས་པའི་སེམས། །གཟུང་འཛིན་བྱིང་རྒོད་ཞེན་པའི་རྒྱུ། །ཡུལ་ལ་བརྟེན་ནས་ཆགས་སྡང་སྐྱེ། །འཁོར་བའི་རྒྱུ་རྐྱེན་འཁྲུལ་སེམས་གཉིས། །གཅིག་དང་མི་གཅིག་རྩོལ་བའི་ཕྱིར། །འཁོར་བའི་ ― DNG002_Page_0063 ―
[མ་དཔེ་གཟིགས་ན་འདིར་གནོན།]
མཐའ་ལ་ཟད་མེད་ཕྱིར། །དེ་ཕྱིར་རང་རིག་དོན་རྟོགས་ན། །སེམས་མེད་ཡུལ་འདི་ཅི་ལ་སྲིད། །དེ་བས་རང་སེམས་སྙིང་པོ་འདི། །སེམས་ཀྱི་ཡུལ་ལས་འདས་པའི་ཕྱིར། །གཅིག་དང་མི་གཅིག་བརྗོད་ཀྱི་བར། །མ་རིག་བློ་ལ་ཡུལ་སེམས་ཡོད། །ལོག་ལྟ་ཅན་རྣམས་དམ་པར་འཛིན། །དེ་ཕྱིར་སྒྲ་དང་ཚད་མའི་ཆོས། །སྤྲེའུ་འདྲའི་བློ་ཡིས་ནན་བརྟགས་ནས། །ཡུལ་སེམས་རྩོད་པས་ཆོས་ཀུན་བྱུང་། །ད་ཡང་འདུས་པའི་སྙིང་པོ་ཉོན། །ངེས་ལུང་གདམས་ངག་ལྡན་པ་ཡི། །ཡང་དག་ཤེས་པའི་སངས་རྒྱས་ལ། །རང་རིག་ཆོས་སྐུ་སེམས་དང་བྲལ། །དེ་ཕྱིར་ཡུལ་མེད་རིག་པ་འཕྱོ། །ངེས་ལུང་གོ་བས་ཡུལ་སེམས་བརླག །ད་ཡང་འདུས་པའི་སྙིང་པོ་ཉོན། །དེ་ཡང་རྩ་བ་མདོར་བསྡུས་ན། །ཉི་ཤར་མུན་གྲིབ་མེད་པ་བཞིན། །རང་བྱུང་ཆོས་སྐུའི་དོན་རྟོགས་པས། །གོལ་སྒྲིབ་ཡུལ་སེམས་གཞི་ནས་དག །དེ་ཕྱིར་རང་བྱུང་ཡེ་ཤེས་སྐུ། །དུས་གསུམ་འཕོ་འགྱུར་མེད་པའི་ཕྱིར། །འཁྲུལ་མེད་ཡང་དག་མངོན་སངས་རྒྱས། །དེ་ཕྱིར་ངེས་དོན་རྟོགས་པས་ཆོག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡུལ་སེམས་གཞི་ལ་སྐབས་དབྱེ་བ་བསྟན་པའི་ལེའུ་སྟེ་ཞེ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །རྒྱུ་འབྲས་སྐབས་དབྱེ་བཀའ་སྩལ་པ། །ཡང་དག་ངེས་དོན་སྙིང་པོ་ལ། །མཛད་སྤྱོད་འབྱང་བས་མ་བསླད་ཕྱིར། །རྒྱུ་དང་འབྲས་བུ་ངོ་བོ་གཅིག །རང་བྱུང་རིག་པའི་ངོ་བོ་དེ། །དཔེར་ན་ནོར་བུ་རིན་ཆེན་ལ། །དགོས་འདོད་འབྲས་བུ་དུས་གཅིག་རྫོགས། །དེ་བཞིན་ཆོས་སྐུ་ངེས་དོན་ལ། །རྟོགས་པ་ཙམ་གྱིས་ངེས་དོན་རྫོགས། །དེ་ཡང་འདུས་པའི་སྙིང་པོ་ཉོན། །ཐེག་པ་གཞན་དང་སྒོ་བསྟུན་ན། །རེ་ཞིག་རྒྱུ་རྐྱེན་བརྗོད་པ་ནི། །རྒྱུ་ནི་རང་བྱུང་ངོ་བོ་ཉིད། །རྐྱེན་ནི་ལུང་ལྡན་བླ་མས་ཚོལ། །འབྲས་བུ་ཡེ་ཤེས་རྟོགས་པའི་ཚེ། །ཐ་དད་མེད་ཕྱིར་རྒྱུ་འབྲས་གཅིག །ད་ ― DNG002_Page_0064 ―
[མ་དཔེ་གཟིགས་ན་འདིར་གནོན།]
ཡང་རྡོ་རྗེ་སེམས་དཔའ་ཉོན། །ཐེག་གཞན་ཆོས་ཀུན་རྒྱུ་འབྲས་དེ། །དུས་གཅིག་མ་ཡིན་རིམ་གྱིས་ཚོལ། །རྩོལ་སྒྲུབ་ཡིན་ཕྱིར་འཁོར་བའི་རྒྱུ། །གནས་སྐབས་བདེ་ཐོབ་མཐར་ཐུག་མེད། །རྒྱུ་འབྲས་རིམ་བསྐྱེད་གོལ་སར་གསུངས། །དཔེར་ན་བྱས་པའི་རྫས་རྣམས་ནི། །མི་རྟག་མྱུར་དུ་འཇིག་པ་བཞིན། །རྒྱུ་རྐྱེན་བྱས་པའི་ཆོས་ཀུན་ནོར། །འབྲས་བུ་མི་འབྱུང་ཆུ་ཤིང་འདྲ། །ད་ཡང་འཁོར་གྱི་སྙིང་པོ་ཉོན། །དེ་དོན་རྩ་བ་མདོར་བསྡུས་ན། །ཏཀྵ་ཀ་ཡི་རྒྱན་བཞིན་དུ། །རྒྱུ་འབྲས་མཐར་ཕྱིན་གཞི་ནས་རྫོགས། །དེ་བཞིན་ཆོས་ཀུན་སྙིང་པོ་ལ། །ཆེ་བའི་ཡོན་ཏན་ངང་ལ་འཆར། །རྒྱུ་འབྲས་གཅིག་ཕྱིར་ལྷུན་གྱིས་གྲུབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱུ་འབྲས་དོན་གྱི་སྐབས་དབྱེ་བསྟན་པའི་ལེའུ་སྟེ་ཞེ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །བསྒོམ་དུ་ཡོད་མེད་སྐབས་དབྱེ་བ། །ཆེད་དུ་དགོངས་ཏེ་བཀའ་སྩལ་པ། །ངེས་དོན་མ་ནོར་དོན་ཕྲད་ན། །མ་བསྒོམས་སངས་རྒྱས་ད་ལྟ་འབྱུང་། །རང་བྱུང་ཆོས་སྐུ་ཡེ་གནས་པ། །བྱང་ཆུབ་སྙིང་པོར་བསྒོམ་དུ་མེད། །ད་ཡང་འདུས་པའི་སྙིང་པོ་ཉོན། །དེ་ཕྱིར་ཆོས་ཉིད་གདོད་ནས་དག །ཀུན་བཟང་ང་ཡི་དགོངས་པའི་དོན། །མ་ནོར་གདམས་ངག་རྣམ་པ་ལྔ། །ཚེགས་མེད་རང་སེམས་སྙིང་པོའི་དོན། །སྐལ་ལྡན་རྣམས་ཀྱིས་རྟོགས་པར་བཤད། །ད་ཡང་རྡོ་རྗེ་སེམས་དཔའ་ཉོན། །སངས་རྒྱས་དགོངས་པ་ཇི་ལྟ་བ། །སེམས་ཅན་བློ་ཡིས་རྟོགས་པའི་ཐབས། །དཔེས་མི་མཚོན་ཅིང་མ་བསྐྱེད་པར། །གདམས་ངག་བསྟན་པ་ཙམ་གྱིས་ཀྱང་། །མ་བསྒོམས་ད་ལྟ་ཉིད་དུ་ཡང་། །ངེས་དོན་རྟོགས་ཕྱིར་བསྒོམ་མེད་དོན། །མ་བསྒོམ་འབྲལ་མེད་སངས་རྒྱས་ཐུགས། །ཀུན་བཟང་ཐུགས་དང་མཉམ་པར་ནི། །འབྲལ་མེད་རྐྱེན་ཐུབ་གདམས་ངག་ནི། །བསྒོམ་མི་དགོས་པར་གདམས་ངག་གིས། །དད་ལྡན་ཕྱི་རབས་རྟོགས་པར་གྱིས། །ད་ཡང་རྡོ་རྗེ་ ― DNG002_Page_0065 ―
[མ་དཔེ་གཟིགས་ན་འདིར་གནོན།]
སེམས་དཔའ་ཉོན། །ངེས་དོན་གདམས་ངག་སྐལ་མེད་ལ། །ཞི་གནས་བློ་ནི་མ་ངེས་པ། །བསྒོམ་དུ་ཡོད་པ་གནས་པའི་ལམ། །འཁོར་ལ་བསྟན་གྱིས་ཡིད་ལ་ཉོན། །བསྒོམ་དུ་མེད་ལ་སུ་སྐྲག་པ། །མཚན་ཉིད་དབང་གསུམ་རིམ་གྱིས་བསྐུར། །ངེས་དོན་ཉམས་སུ་མྱོང་བ་དང་། །ཡིད་ཆེས་གདེང་དང་ལྡན་པར་འགྱུར། །དེ་ཕྱིར་རང་སེམས་དགོངས་པ་སྟེ། །དེར་གནས་ཤེས་རབ་ཤིན་ཏུ་ཆེ། །ཉམས་ནི་ཕྱི་ནས་རིམ་གྱིས་འབྱུང་། །དེ་བྱུང་དགའ་བྲོད་སེམས་མི་བྱ། །ད་ཡང་རྡོ་རྗེ་སེམས་དཔའ་ཉོན། །རྣམ་གྲངས་མཚོན་པའི་དོན་རྣམས་ལས། །ལོག་སྟེ་བརྗོད་མེད་ངང་ལ་བཞག །ཐ་མལ་རྗེས་སུ་མ་འབྲངས་པར། །བསྒོམ་དུ་ཡོད་པའི་ཆོས་བཤད་པས། །དེ་ཕྱིར་མ་ཡེངས་བསྒོམ་པ་ནི། །ཉིད་ལས་མི་གཞན་འཁོར་རྣམས་ལ། །དོན་གྱི་སྒོ་ནས་ཤེས་པར་གནས། །རིག་འཛིན་སེམས་དཔའ་རྣམས་ཀྱང་ནི། །ཏིང་འཛིན་གོམས་པས་བརྟན་པ་ཐོབ། །འཁོར་ན་གནས་པའི་དད་ཉན་ཀྱང་། །མོས་པའི་ལྟ་བ་གོམས་པར་བྱེད། །ཤེས་རབ་དམན་པའི་རྣལ་འབྱོར་གྱིས། །གནས་དང་མི་གཡོ་ལྷུན་གྲུབ་འདོད། །དེ་ཕྱིར་རང་སེམས་རྟོགས་པར་དཀའ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསྒོམ་དུ་ཡོད་མེད་སྐབས་དབྱེ་བ་བསྟན་པའི་ལེའུ་སྟེ་ཞེ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །ཡེ་ནས་ཡོད་པའི་ཆོས་ཀྱི་སྐུ། །རྟོགས་མ་རྟོགས་ཀྱི་ཁྱད་པར་ལས། །ལེགས་པར་ཉོན་ལ་ཡིད་ལ་ཟུང་། །རང་སེམས་མ་རྟོགས་སེམས་ཅན་ནི། །འཁོར་བ་གང་ནས་གང་དུ་འཁྲུལ། །ཅིས་འཁྲུལ་ལྡོག་ཐབས་མ་ཤེས་པས། །ཡོད་མེད་གཟུང་འཛིན་ཕྲ་རགས་ལ། །འཁྲུལ་པ་རྣམས་ནི་དམ་པར་འཛིན། །འཁོར་ལན་ཆོས་ལ་བརྟགས་པས་ལན། །དེ་ཡང་འདུས་པའི་སྙིང་པོ་ཉོན། །གང་ལ་རྟོག་མེད་མ་ཤེས་ཕྱིར། །ལོག་ལྟ་གང་ཞིག་ནོར་བའི་ལམ། །གཉིས་མེད་དོན་ལ་མ་རིག་འཁྲུལ། །དེ་ཕྱིར་གཉིས་ ― DNG002_Page_0066 ―
[མ་དཔེ་གཟིགས་ན་འདིར་གནོན།]
མེད་མ་རྟོགས་ན། །ལུས་ངག་རྩོལ་བས་སྡུག་བསྔལ་ནོན། །དེ་ཕྱིར་ངེས་དོན་ལུང་མེད་ན། །ཐེག་དགུའི་ཤེས་པས་གྲོལ་མི་སྲིད། །ད་ཡང་རྡོ་རྗེ་སེམས་དཔའ་ཉོན། །ཡེ་ནས་ཡོད་པའི་ཆོས་ཉིད་ལ། །ལུང་ལྡན་ངེས་པའི་དོན་ཕྲད་ན། །རྟོགས་དུས་ད་ལྟའི་ཚེ་འདི་ལ། །རང་སེམས་སྙིང་པོ་རྟོགས་པར་གྱིས། །ཀུན་བཟང་ང་ལ་ཐོག་མཐའ་ཡོད། །དུས་ཅིག་ཆོད་ཕྱིར་མངོན་སངས་རྒྱས། །འདས་པའི་སངས་རྒྱས་ཀུན་གྱིས་ཀྱང་། །ང་ཡོད་ཕྱིར་ན་ཐོག་མཐའ་ཡོད། །སྐྱེ་བ་མི་ལེན་ཐ་མ་འབྱུང་། །ད་ལྟ་མ་བྱོན་སེམས་དཔའ་ཡིས། །ཐོག་མཐའ་མ་ཆོད་རྩོལ་བ་མེད། །དེ་ཕྱིར་རང་སེམས་རྟོགས་པར་དཀའ། །སེམས་ཅན་ཀུན་ལ་སྨོས་ཅི་དགོས། །ད་ཡང་འདུས་པའི་སྙིང་པོ་ཉོན། །དེ་ཕྱིར་འདུས་པའི་ལུང་ལྡན་གྱིས། །འཁྲུལ་པ་ལྡོག་ཐབས་ཤེས་པ་དེས། །ངེས་པ་ཚིག་གི་གདམས་ངག་འདི། །བསྟན་པས་དོན་རྟོགས་སྐད་ཅིག་ལ། །སངས་རྒྱས་ཀུན་དང་དགོངས་པ་མཉམ། །ཐོག་མཐའ་ཆོད་ཕྱིར་ཐམས་ཅད་མཁྱེན། །ད་ཡང་ངེས་པའི་རྒྱུད་ཆེན་འདི། །རྟོགས་པས་ཆོག་ཕྱིར་ཡ་མཚན་ཅན། །དེས་ན་ཚེགས་མེད་དོན་པོ་ཆེ། །ཆོས་རྣམས་ཀུན་གྱི་མཆོག་ཏུ་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྟོགས་མ་རྟོགས་ཀྱི་ཁྱད་པར་གྱི་སྐབས་དབྱེ་བ་བསྟན་པའི་ལེའུ་སྟེ་ཞེ་ལྔ་པའོ། །སྡོམ་དུ་བསྡུས་ཏེ་བསྟན་པ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་ཆོས་ཀྱི་རྒྱལ་པོ་ལ། །ངེས་པའི་དགོས་དོན་འདི་སྐད་གསོལ། །ནམ་མཁའ་ཆོས་ཉིད་ཇི་ལྟར་འདྲ། །དེ་ལས་ཆོས་སྐུ་ཇི་ལྟར་འཕགས། །འཇིག་རྟེན་དཔེ་ནི་གང་དང་འདྲ། །དེ་ལས་དོན་ནི་ཇི་ལྟར་འཕགས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ཞུས་པ་ལེགས་སོ་ངས་བཤད་ཀྱིས། །ཡིད་ལ་ཟུང་ལ་ ― DNG002_Page_0067 ―
[མ་དཔེ་གཟིགས་ན་འདིར་གནོན།]
དོན་ལ་གཉེར། །དེ་དོན་རྟོགས་ཐབས་མཐུན་དཔེ་ནི། །ནམ་མཁའི་མཚན་ཉིད་དངོས་པོ་མེད། །དེ་དང་འདུ་ཕྱིར་སྤྲོས་མེད་པས། །ཆོས་ཉིད་ངོ་བོ་དེ་བཞིན་ནོ། །ད་ཡང་རྡོ་རྗེ་སེམས་དཔའ་ཉོན། །ནམ་མཁའི་མཚན་ཉིད་གཟུང་དུ་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་འགྲོ་འོང་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་འདུ་འབྲལ་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་བྱ་བཙལ་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་མཐའ་དབུས་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་སྟེང་འོག་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་སྣང་སྟོང་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་བཟང་ངན་མེད། །ཆོས་ཉིད་ངོ་བོ་དེ་བཞིན་ནོ། །ད་ཡང་རྡོ་རྗེ་སེམས་དཔའ་ཉོན། །ནམ་མཁའི་མཚན་ཉིད་བྱ་རྩོལ་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་སྐྱེ་ཤི་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའི་མཚན་ཉིད་འཕེལ་འགྲིབ་མེད། །ཆོས་ཉིད་ངོ་བོ་དེ་བཞིན་ནོ། །ནམ་མཁའ་འབྱུང་བ་ཀུན་གྱི་གཞི། །ཆོས་ཉིད་ངོ་བོ་དེ་བཞིན་ནོ། །ནམ་མཁའ་མ་ལུས་ཀུན་གྱི་གཞི། །ཆོས་ཉིད་ངོ་བོ་དེ་བཞིན་ནོ། །ད་ཡང་འདུས་པའི་སྙིང་པོ་ཉོན། །དེ་ལྟར་འདྲ་བའི་དཔེས་མཚོན་ཀྱང་། །དོན་གྱི་ཁྱད་པར་བསམ་ཡས་པས། །དེ་ལས་བཟློག་སྟེ་བསྟན་དགོས་ཕྱིར། །དཔེ་དོན་ཁྱད་པར་ཤིན་ཏུ་ཆེ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དཔེ་ནམ་མཁའ་དང་འདྲ་བར་བསྟན་པའི་ལེའུ་སྟེ་ཞེ་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །དཔེ་དོན་ཁྱད་པར་བཀའ་སྩལ་པ། །ནམ་མཁའ་སྐྱེ་བ་མེད་པ་ཙམ། །ཆོས་ཉིད་ཡོན་ཏན་ཅིར་ཡང་སྐྱེ། །ནམ་མཁའ་སྣང་བ་མེད་པ་ཙམ། །ཆོས་ཉིད་ཡེ་ཤེས་ཡུལ་དུ་སྐྱེ། །ནམ་མཁའ་སྣང་བ་མེད་པ་ཙམ། །ཆོས་ཉིད་ཡེ་ཤེས་ ― DNG002_Page_0068 ―
[མ་དཔེ་གཟིགས་ན་འདིར་གནོན།]
ཡུལ་དུ་སྣང་། །ནམ་མཁའ་བརྟག་ཏུ་མེད་པ་ཙམ། །ཆོས་ཉིད་བརྟགས་པས་ཡོན་ཏན་གཏེར། །ནམ་མཁའ་སོང་བ་མེད་པ་སྟེ། །ཆོས་ཉིད་མྱ་ངན་འདས་པར་སོང་། །ནམ་མཁའ་འགག་པ་མེད་པ་སྟེ། །ཆོས་ཉིད་ངང་དུ་ལོག་རྟོག་འགགས། །ནམ་མཁའ་ཅིར་ཡང་མ་གྲུབ་སྟེ། །ཆོས་ཉིད་བདེ་བ་ཆེན་པོར་གྲུབ། །ནམ་མཁའ་མེད་པའི་མེད་པ་སྟེ། །ཆོས་ཉིད་ཡོད་པའི་ཡོད་པའོ། །ནམ་མཁའ་ཆད་པའི་ཆད་པ་སྟེ། །ཆོས་ཉིད་མི་འགྱུར་རྟག་པ་ཡིན། །ནམ་མཁའ་སྟོང་པ་ཕྱལ་བ་སྟེ། །ཆོས་ཉིད་སངས་རྒྱས་ཀུན་གྱི་བཅུད། །ནམ་མཁའ་སྟོང་པ་སྟོང་པ་སྟེ། །ཆོས་ཉིད་ཡེ་ཤེས་འོང་བའི་བཅུད། །ད་ཡང་རྡོ་རྗེ་སེམས་དཔའ་ཉོན། །དེ་ལྟར་བཟློག་ནས་དོན་བསྟན་པ། །ཕྱོགས་འགའ་པ་ཡི་དཔེར་མཚོན་ཏེ། །དོན་མ་ཡིན་ཕྱིར་དེ་ལས་བཟློག །ཆོས་ཉིད་བརྡལ་བ་ཆེན་པོ་ལ། །དཔེས་མཚོན་པ་ཡི་ཡུལ་ལས་འདས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དཔེ་དོན་ཁྱད་པར་འཕགས་པ་བསྟན་པའི་ལེའུ་སྟེ་ཞེ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །དཔེ་ཡིས་མཚོན་ཏེ་དོན་འདྲ་བ། །ཆེད་དུ་འཁོར་ལ་བཀའ་སྩལ་པ། །ནམ་མཁའ་ཉི་ཟླ་སྐར་མ་དང་། །རྒྱ་མཚོ་རི་བོ་ཨུ་དུམ་ཝར། །ས་གཞི་ཆུ་བོ་དུས་ཀྱི་འབྲུག །ཆོས་རྒྱལ་གྱད་དང་དེད་དཔོན་དང་། །ཆུ་ཤེལ་བཻ་ཌཱུརྱ་པདྨ་དང་། །ཏིལ་འབྲུ་མེ་ལོང་སྒྲོན་མ་དང་། །རིན་ཆེན་མ་གི་གསེར་ལ་སོགས། །ཐུན་མོང་དཔེ་ཡིས་མཚོན་བྱས་ནས། །ང་ཡིས་བསྟན་གྱིས་ཁྱོད་ཀྱིས་ལེགས་པར་ཉོན། །ནམ་མཁའ་ཡངས་མཐོ་མཐའ་དབུས་མེད། །དངོས་མེད་ཀུན་ཁྱབ་འབྱུང་བཞིའི་སྣོད། །འགྲོ་འོང་མེད་པས་འདུས་མ་བྱས། །ཆོས་ཉིད་ངོ་བོ་དེ་བཞིན་ནོ། །ཉི་མ་རང་གསལ་ཀུན་ལ་དྲོ། །ཉིན་ཞག་གཅིག་གིས་གླིང་བཞི་ཁྱབ། །མུན་པ་སེལ་བའི་སྒྲོན་མར་གྲགས། །ཆོས་ཉིད་ངོ་བོ་དེ་བཞིན་ནོ། །ཟླ་བ་བསིལ་ ― DNG002_Page_0069 ―
[མ་དཔེ་གཟིགས་ན་འདིར་གནོན།]
ལ་དཀར་བ་སྟེ། །རྒྱུ་སྐར་ཚེས་གྲངས་དུས་ཚོད་འཛིན། །ལོ་དང་ཟླ་བ་འཕེལ་འགྲིབ་ཅན། །རྒྱུ་འབྲས་ཆོས་ཀྱང་དེ་བཞིན་ནོ། །སྐར་མ་མ་འདྲེས་ཡོངས་རྫོགས་པས། །བར་སྣང་ལམ་ལ་ཤུགས་ཀྱིས་འགྲོ། །རྙོག་མེད་ཆུ་ལ་གཟུགས་བརྙན་འབྱུང་། །ཆོས་ཉིད་ངོ་བོ་དེ་བཞིན་ནོ། །ད་ཡང་རྡོ་རྗེ་སེམས་དཔའ་ཉོན། །རྒྱ་མཚོ་གཏིང་ཟབ་འཕེལ་འགྲིབ་མེད། །སྲོག་ཆགས་བྱིངས་མང་བསམ་མི་ཁྱབ། །རིན་ཆེན་ལ་སོགས་འདོད་དགུ་ཡོད། །ཆོས་ཉིད་ངོ་བོ་དེ་བཞིན་ནོ། །རི་བོ་མི་འགྱུར་བརྟན་པ་སྟེ། །གླིང་བཞི་གླིང་ཕྲན་ཀུན་གྱི་རྟེན། །ཉི་ཟླ་གཟའ་སྐར་ཀུན་གྱི་རྟེན། །ཆོས་ཉིད་ངོ་བོ་དེ་བཞིན་ནོ། །ཨུ་དུམ་ཝ་ར་མཚོ་གཏིང་གནས། །ས་སྟེང་རྙེད་ན་དགོས་པ་ནི། །ནད་སེམས་བསམ་པ་འགྲུབ་པ་ཡིན། །ལུང་ལྡན་གདམས་ངག་དེ་བཞིན་ནོ། །ད་ཡང་འདུས་པའི་སྙིང་པོ་ཉོན། །ས་གཞིར་སྨན་དུག་ཀུན་སྐྱེ་ཞིང་། །འགྲོ་བ་ཡོངས་ཀྱི་རྟེན་ནམ་གཞི། །འབྱུང་བ་བཞི་ཡི་གཉེན་པོ་ཡིན། །ཆོས་ཉིད་ངོ་བོ་དེ་བཞིན་ནོ། །ཆུ་བོ་ཆེན་པོ་རྟག་ཏུ་ནི། །རྒྱུན་མི་ཆད་པར་འབབ་པ་ལ། །ངལ་དུབ་མེད་པར་འཁོར་ཞིང་འགྲོ། །ཆོས་ཉིད་ངོ་བོ་དེ་བཞིན་ནོ། །འབྲུག་གི་སྒྲ་སྒྲོགས་དུས་ཚོད་ནི། །དབྱར་དགུན་གཉིས་ཀྱི་ཤན་ཕྱེས་ནས། །སེམས་ཅན་ཉལ་ལངས་བྱེད་པ་བཞིན། །འཁོར་བའི་ཆོས་ཀྱང་དེ་བཞིན་ནོ། །ཆོས་ཀྱི་རྒྱལ་པོ་ཆེན་པོ་ནི། །དད་པ་སྐྱོ་སུན་མེད་པར་ནི། །རྟག་ཏུ་ཚོགས་གཉིས་རྒྱུན་དུ་གསོག །ཆོས་ཉིད་ངོ་བོ་དེ་བཞིན་ནོ། །གྱད་ཆེན་དཔའ་བོ་ཆེན་པོ་ནི། །རང་ལ་གཞན་གྱིས་མི་ཚུགས་པ། །དགྲ་འཇོམས་དམག་དཔུང་ཟིལ་གྱིས་གནོན། །ཆོས་ཉིད་ངོ་བོ་དེ་བཞིན་ནོ། །དེད་དཔོན་བཟང་པོ་ས་མཁན་དེས། །རྒྱ་མཚོར་ནོར་ལེན་འཇིགས་པ་མེད། །ས་མཁན་དམག་དང་ཚོང་དཔོན་བཞིན། །འདུས་བྱས་དགེ་བ་དེ་བཞིན་ནོ། །ད་ཡང་འདུས་པའི་སྙིང་པོ་ཉོན། །ཆུ་ཤེལ་ཕྱི་ནང་མེད་པ་ནི། །གཟུགས་བརྙན་གསལ་ཀྱང་དོན་ལ་མེད། །ཁ་དོག་ངེས་མེད་རྐྱེན་ལས་བྱུང་། །ཆོས་ཉིད་ངོ་བོ་དེ་བཞིན་ནོ། །བཻ་ཌཱུརྱ་འོད་སྔོ་ལས་གྱུར། །འཛམ་གླིང་ནམ་མཁའ་ ― DNG002_Page_0070 ―
[མ་དཔེ་གཟིགས་ན་འདིར་གནོན།]
ཀུན་ལ་ཁྱབ། །དེ་ཕྱིར་རིན་ཆེན་སྙིང་པོ་བླངས། །ཆོས་ཉིད་སྙིང་པོ་དེ་བཞིན་ནོ། །པདྨ་སྐྱེ་ས་འདམ་ཡིན་ཀྱང་། །ཁ་དོག་དབྱིབས་ནི་ཇི་ལྟར་ཡང་། །ཉེས་པས་མི་གོས་གསལ་ལ་འཚེར། །ཆོས་ཉིད་ངོ་བོ་དེ་བཞིན་ནོ། །ད་ཡང་འཁོར་གྱི་སྙིང་པོ་ཉོན། །ཏིལ་ལ་མར་གྱི་རྒྱུན་གནས་ཁྱབ། །རྩོལ་བའི་རྐྱེན་གྱིས་མར་ཁུ་འབྱུང་། །སེམས་ཅན་ཀུན་ལ་གནས་པ་ཡིན། །རང་བྱུང་ཆོས་ཉིད་དེ་བཞིན་ནོ། །མེ་ལོང་བྱད་གཟུགས་འབྱུང་བ་ཡང་། །གཟུགས་བརྙན་བྱད་ནི་དངོས་མ་ཡིན། །དོན་ལ་མེད་ཀྱང་སྣང་དུ་རུང་། །ཆོས་ཉིད་ངོ་བོ་དེ་བཞིན་ནོ། །སྒྲོན་མེ་ཇི་ལྟར་མུན་སེལ་བ། །སྐྱེས་བུའི་ཐབས་ཀྱི་རྐྱེན་གྱིས་ནི། །མར་མེ་ལ་སོགས་འོད་ཀྱིས་སེལ། །ཆོས་ཉིད་ངོ་བོ་དེ་བཞིན་ནོ། །ད་ཡང་འཁོར་གྱི་སྙིང་པོ་ཉོན། །རིན་ཆེན་ཡོན་ཏན་ཀུན་འབྱུང་ཡང་། །བསོད་ནམས་ཅན་ལ་འབྱུང་བ་ལས། །ཚོགས་མ་བསགས་ལ་འབྱུང་བ་མིན། །ཆོས་ཉིད་ངོ་བོ་དེ་བཞིན་ནོ། །སྨན་མཆོག་རྒྱལ་པོ་མ་གི་ཏ། །དུག་རྣམས་སྨན་དུ་འགྱུར་བ་དེ། །ཐབས་མཁས་བཟའ་ལེགས་ཀུན་གྱི་སྨན། །ཆོས་ཉིད་ངོ་བོ་དེ་བཞིན་ནོ། །གསེར་ནི་ས་ཡི་གསེབ་ནས་འབྱུང་། །ཐུན་མོང་རིན་ཆེན་ཀུན་གྱི་གཏེར། །རྩོལ་བས་བསོད་ནམས་ལྡན་པས་རྙེད། །ཆོས་ཉིད་ངོ་བོ་དེ་བཞིན་ནོ། །དཔེ་ཡི་དབྱེ་བ་རྣམ་མང་ཡང་། །རེ་ཞིག་མཚོན་ཚིག་ཙམ་དུ་བས། །དེ་ཉིད་ཤེས་ན་དཔེ་མི་དགོས། །དེ་ཕྱིར་དཔེ་དོན་དབྱེ་བ་གཅེས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཁྱད་པར་གྱི་དཔེ་མཚོན་ཚིག་སྟོན་པའི་ལེའུ་སྟེ་ཞེ་བརྒྱད་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་དད་ལྡན་འཁོར་རྣམས་ལ། །དཔེ་ལས་དོན་ནི་འཕགས་པར་ནི། །འཆད་དུ་དགོངས་ཏེ་བཀའ་སྩལ་པ། །ནམ་མཁའ་ཡངས་མཐོ་འདུས་མ་བྱས། །རིས་མེད་ཕྱལ་པ་སྟོང་བ་ཡིན། །ཆོས་སྐུ་རིག་པ་འབྲལ་མེད་ཀློང་། །དེ་ཕྱིར་ཆོས་ཉིད་ཁྱད་པར་འཕགས། །ཉི་མ་རང་གསལ་ཀུན་དྲོ་ཡང་། །འཆར་ནུབ་ཡོད་ཕྱིར་འདུས་བྱས་ཡིན། ། ― DNG002_Page_0071 ―
[མ་དཔེ་གཟིགས་ན་འདིར་གནོན།]
ཡེ་ཤེས་རིག་པ་རྒྱུན་དུ་གནས། །དེ་ཕྱིར་ཆོས་ཉིད་ཁྱད་པར་འཕགས། །ཟླ་བ་གསལ་ཞིང་བསིལ་ཀྱང་ནི། །འཕེལ་འགྲིབ་ཡོད་ཕྱིར་མི་རྟག་པ། །རང་བྱུང་ཡེ་ཤེས་འགྱུར་མེད་ཕྱིར། །ཆོས་སྐུའི་ངོ་བོ་ཁྱད་པར་འཕགས། །སྐར་མ་མ་འདྲེས་ཡོངས་རྫོགས་ཀྱང་། །རི་རབ་འཁོར་ཕྱིར་ཆོས་ཉིད་མིན། །རང་རིག་འགྲོ་འོང་མེད་པར་གནས། །དེ་ཕྱིར་ཆོས་སྐུ་ཁྱད་པར་འཕགས། །ད་ཡང་རྡོ་རྗེ་སེམས་དཔའ་ཉོན། །རྒྱ་མཚོ་བྱིངས་མང་ནོར་ཡོད་ཀྱང་། །འདུས་བྱས་ལས་ལས་བསྐྱེད་པ་ཡིན། །རང་བྱུང་རིག་པ་འདུས་མ་བྱས། །བག་ཆགས་འཛིན་མེད་ཁྱད་པར་འཕགས། །རི་བོ་མི་འགྱུར་ཀུན་རྟེན་ཡང་། །རྡུལ་ཕྲན་རྒྱུ་ལས་སྐྱེས་པ་ཡིན། །རྒྱུ་དང་རྐྱེན་ལས་མ་བྱུང་བའི། །རང་གསལ་རིག་པ་ཁྱད་པར་འཕགས། །ཨུ་དུམ་ཝ་ར་མཚོ་ལ་གནས། །བཙལ་གྱིས་མི་རྙེད་ཤིན་ཏུ་དཀའ། །རང་ལ་གནས་པའི་ཆོས་སྐུ་ནི། །ལུང་ལྡན་སྟོན་ཡོད་ཁྱད་པར་འཕགས། །ད་ཡང་འཁོར་གྱི་སྙིང་པོ་ཉོན། །ས་གཞི་ཀུན་བསྐྱེད་རྟེན་བྱེད་ཀྱང་། །འཇིག་ཆགས་སྟོངས་པ་ཡོད་པ་ཡིན། །ཡེ་ཤེས་དུས་གསུམ་འགྱུར་བ་མེད། །ཆོས་སྐུའི་རིག་པ་ཁྱད་པར་འཕགས། །ཆུ་བོ་རྒྱུན་དུ་འབབ་འགྱུར་ཡང་། །འགྲོ་འོང་ཡོད་ལ་རིག་པ་མེད། །ཡེ་ཤེས་རིག་པའི་ཆོས་སྐུ་ནི། །གར་ཡང་མི་འགྲོ་ཁྱད་པར་འཕགས། །དུས་ཀྱི་འབྲུག་ཀྱང་རྐྱེན་ལས་བྱུང་། །དུས་བཞི་ཉལ་ལངས་འཁྲུལ་པའི་བློ། །ཡེ་ཤེས་འཁོར་འདས་ཐིག་ལེར་གཅིག །དབྱེར་མེད་ཆོས་སྐུ་ཁྱད་པར་འཕགས། །ད་ཡང་འདུས་པའི་སྙིང་པོ་ཉོན། །ཆོས་སྐྱོང་དད་ལྡན་ཚོགས་གསོག་ཀྱང་། །དྲང་དོན་ཆོས་ལ་སྤྱོད་པ་ཡིན། །ངེས་དོན་ཡང་ཏི་རྫོགས་པ་ལ། །ཚོགས་གཉིས་ཆིག་རྫོགས་ཁྱད་པར་འཕགས། །གྱད་ལ་མི་ཚུགས་ཀུན་འཇོམས་ཀྱང་། །ཆོས་བརྒྱད་ཡོད་ཕྱིར་འཁོར་བར་ལྟུང་། །རང་རིག་ཡེ་ཤེས་གྱད་ཆེན་ནི། །འཁོར་འདས་རྫོགས་ཕྱིར་ཁྱད་པར་འཕགས། །དེད་དཔོན་ས་མཁན་ཚོང་ ― DNG002_Page_0072 ―
[མ་དཔེ་གཟིགས་ན་འདིར་གནོན།]
པ་ཡང་། །ཞེན་པའི་ཆགས་པས་ཡེ་ཤེས་མེད། །ལུང་ལྡན་བླ་མས་དོན་བསྟན་ན། །ཞེན་པའི་དོན་ཤེས་ཁྱད་པར་འཕགས། །ད་ཡང་འདུས་པའི་སྙིང་པོ་ཉོན། །ཆུ་ཤེལ་གཟུགས་བརྙན་གསལ་གྱུར་ཀྱང་། །ཁ་དོག་རྐྱེན་གྱིས་འགྱུར་ཕྱིར་འཁྲུལ། །ཆོས་སྐུ་ཕྱི་ནང་མེད་པར་ནི། །འགྱུར་མེད་གསལ་བས་ཁྱད་པར་འཕགས། །བཻ་ཌཱུར་ཁ་དོག་གསལ་དྭངས་ཀྱང་། །འཁྲུལ་བློ་ཡིན་ཕྱིར་བཏགས་པ་ཙམ། །རིག་པ་གསལ་དངས་དངོས་པོ་མེད། །ལྷག་མཐོང་དོན་ནི་ཁྱད་པར་འཕགས། །པདྨ་སྐྱོན་གྱིས་མ་གོས་པར། །དུས་ཟད་རྐྱེན་གྱིས་རང་བརླག་ཀྱང་། །རང་རིག་ཆོས་སྐུ་གོལ་སྒྲིབ་མེད། །དུས་དང་རྐྱེན་མེད་ཁྱད་པར་འཕགས། །ད་ཡང་འདུས་པའི་སྙིང་པོ་ཉོན། །ཏིལ་འབྲུ་མར་གྱིས་ཁྱབ་ཀྱང་ནི། །རྐྱེན་གྱིས་བསྐྱེད་ཕྱིར་ཆོས་སྐུ་མིན། །རང་རིག་ཡེ་ཤེས་གདམས་ངག་ལ། །རྩོལ་བ་མི་དགོས་ཁྱད་པར་འཕགས། །མེ་ལོང་གཟུགས་བརྙན་དངོས་མེད་བཞིན། །སྣང་ལ་དོན་མེད་འཁྲུལ་པ་ཡིན། །གཞི་ཉིད་རང་གསལ་རིག་པར་ཤེས། །དེ་ཕྱིར་ཆོས་སྐུ་ཁྱད་པར་འཕགས། །སྒྲོན་མས་འཇིག་རྟེན་མུན་སེལ་ཀྱང་། །མ་རིག་མུན་པ་སེལ་མི་ནུས། །རང་རིག་ལུང་གི་སྒྲོན་མ་ཡིས། །ཆོས་སྐུའི་རྟོགས་པ་ཁྱད་པར་འཕགས། །ད་ཡང་འདུས་པའི་སྙིང་པོ་ཉོན། །རིན་ཆེན་ཡོན་ཏན་ཀུན་ལྡན་ཡང་། །སྤྲུལ་པའི་སྐུ་མིན་ཡོད་མེད་སྲིད། །ངེས་དོན་གདམས་ངག་ཁྱད་པར་འཕགས། །སྐལ་ལྡན་ཅན་ལ་ཁྱད་པར་འཕགས། །མ་གི་ཏ་ཡིས་དུག་འཇོམས་ཀྱང་། །མ་རིག་སྒྲིབ་པ་འཇོམས་མི་ནུས། །བླ་མ་ལུང་ལྡན་སྨན་མཆོག་གིས། །དུག་ལྔའི་ནད་འཇོམས་ཁྱད་པར་འཕགས། །གསེར་ནི་རྩོལ་བས་རྙེད་གྱུར་ཀྱང་། །བེམ་པོའི་ནོར་ལ་བྱང་ཆུབ་མེད། །ཀུན་གཞི་མུན་གསེབ་དོན་རྙེད་ན། །རྟོགས་མ་ཐག་ཏུ་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །དཔེ་ལས་དོན་གྱི་ཁྱད་པར་འཕགས། །བེམ་རིག་ཤན་འབྱེད་ ― DNG002_Page_0073 ―
[མ་དཔེ་གཟིགས་ན་འདིར་གནོན།]
ཡེ་ཤེས་ཡིན། །བེམ་པོ་བྱ་བའི་མིང་མེད་དོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐུན་མོང་དཔེ་ལས་དོན་ཁྱད་པར་དུ་འཕགས་པར་བསྟན་པའི་ལེའུ་སྟེ་ཞེ་དགུ་པའོ། །སྡོམ་དུ་བསྡུས་ཏེ་བསྟན་པ་བཅུ་པའོ།། །།དེ་ནས་འདུས་པའི་སྙིང་པོ་ཡི། །དད་ལྡན་འཁོར་གྱི་དོན་ཆེད་དུ། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་དོན་ནི་འདི་སྐད་གསོལ། །སངས་རྒྱས་དགོངས་པ་གང་དུ་ཡང་། །རྒྱུ་འབྲས་ངེས་ཚིག་ཇི་ལྟར་འདུས། །ཤེས་རབ་རྣམ་གསུམ་ཇི་ལྟར་དབྱེ། །དཔེ་དང་དོན་དུ་ཇི་ལྟར་འདུས། །རྫོགས་ཆེན་རང་གཞུང་ཇི་ལྟར་འདུས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སངས་རྒྱས་ཀུན་གྱི་དགོངས་པའི་ཆོས། །ངེས་དོན་བླ་མ་དམ་པ་ཡི། །གདམས་ངག་ཁྱད་པར་ཅན་དུ་འདུས། །དཔེ་ཡིས་འདུས་ལ་དོན་གྱིས་འདུས། །རྟོགས་དང་གཏན་ཚིགས་འདུས་པ་ཡི། །དོན་ནི་རང་བྱུང་ཆོས་སྐུར་འདུས། །ད་ཡང་རྡོ་རྗེ་སེམས་དཔའ་ཉོན། །སངས་རྒྱས་ཀུན་གྱི་དགོངས་པ་ནི། །ཀུན་ཏུ་བཟང་པོའི་དགོངས་པར་འདུས། །འཕོ་འགྱུར་མེད་པའི་ལྟ་བ་ལ། །སྐྱེ་འགག་མེད་པའི་བསྒོམ་པ་ཤར། །བླང་དོར་མེད་པའི་སྤྱོད་པ་ལ། །རེ་དོགས་མེད་པའི་འབྲས་བུར་གནས། །རིགས་ལྔའི་སངས་རྒྱས་དགོངས་འདུས་པ། །རང་བྱུང་སྐྱེ་མེད་རང་གསལ་བ། །འགག་མེད་མི་འགྱུར་རིག་པ་དེ། །དེ་ཡང་གནས་པའི་དོན་ཤེས་པས། །རྡོ་རྗེ་སེམས་དཔའི་དགོངས་པ་ཡིན། །མི་ཤིགས་ཡེ་ཤེས་རྡོ་རྗེའི་སྐུ། །ཆོས་ཉིད་མ་བཅོས་མ་བསླད་པ། །མི་ཟད་གཏེར་གྱིས་དགོངས་པ་དེ། །འདུ་འབྲལ་མེད་པའི་ཡེ་ཤེས་ཐུགས། །རིན་ཆེན་འབྱུང་ལྡན་དགོངས་པར་འདུས། །ཆོས་ཉིད་མཐའ་ཡས་ཁྱབ་གདལ་ལ། །མ་བྱུང་མ་སྐྱེས་ཆོས་ཉིད་ལ། །འཕེལ་འགྲིབ་མེད་པར་རང་སྣང་བ། །སྣང་བ་མཐའ་ཡས་དགོངས་པར་འདུས། །སངས་རྒྱས་ཡེ་ཤེས་ད་ལྟ་ཉིད། །དེ་རྟོགས་རང་བྱུང་ཆོས་ཉིད་གསལ། །དོན་ཡོད་གྲུབ་པའི་དགོངས་པ་ ― DNG002_Page_0074 ―
[མ་དཔེ་གཟིགས་ན་འདིར་གནོན།]
སྟེ། །དེ་ལས་འགྱུར་མེད་སངས་རྒྱས་ཐུགས། །ཡེ་ཤེས་ལུས་ཅན་ཆོས་ཀྱི་སྐུ། །དེ་ལྡན་སྣང་བ་ཡུལ་རྣམས་ལ། །ཞེན་མེད་རང་བྱུང་ཡེ་ཤེས་གསལ། །རྣམ་པར་སྣང་མཛད་དགོངས་པར་འདུས། །ད་ཡང་རྡོ་རྗེ་སེམས་དཔའ་ཉོན། །དཔེ་ནི་ཀུན་དཔེ་ནམ་མཁར་འདུས། །དོན་ནི་ཀུན་འདུས་ཆོས་སྐུར་འདུས། །རྟགས་ནི་བྱང་ཆུབ་སེམས་སུ་འདུས། །གཏན་ཚིགས་རང་བྱུང་སྙིང་པོར་འདུས། །ད་ཡང་འདུས་པའི་སྙིང་པོ་ཉོན། །དུས་གསུམ་སངས་རྒྱས་དགོངས་འདུས་པ། །འདུས་མ་བྱས་པའི་ཡེ་ཤེས་ཏེ། །རྒྱུ་དང་རྐྱེན་གྱིས་མ་བསྐྱེད་པར། །ཆོས་རྣམས་ཀུན་གྱི་སྙིང་པོ་རུ། །རང་བྱུང་ལྷུན་གྱིས་གྲུབ་པའི་སྐུ། །སངས་རྒྱས་ཀུན་གྱི་དགོངས་པ་འདུས། །དགོངས་པ་དེ་དག་མཚོན་པའི་ཕྱིར། །རང་སེམས་བླ་མར་གསུངས་པ་ལ། །དབྱེ་བ་རྣམ་པ་གསུམ་ཡོད་དེ། །སེམས་ཉིད་རྒྱུ་ཡི་བླ་མ་དང་། །འབྲས་བུ་ཡེ་ཤེས་བླ་མ་དང་། །སྣང་བ་ཆོས་དབྱིངས་བླ་མའོ། །ད་ཡང་འདུས་པའི་སྙིང་པོ་ཉོན། །སེམས་ཉིད་རྒྱུ་ཡི་བླ་མ་ནི། །ལོག་སྲེད་ཅན་ནི་མ་ཡིན་ཏེ། །ལུང་རིགས་ལྡན་པའི་གང་ཟག་གིས། །སེམས་ཅན་ཆོས་ལ་བློ་གཏད་པས། །བདེ་དང་སྡུག་བསྔལ་གཉིས་སུ་མཐོང་། །བདེ་སྡུག་གཉིས་ཀྱི་དོན་བརྟགས་པས། །དགེ་སྡིག་གཉིས་ལས་བྱུང་བར་ངེས། །དད་པ་བརྩོན་འགྲུས་ཤེས་རབ་ཀྱིས། །རྣམ་པར་རྟོག་པའི་བློ་སྦྱངས་ཕྱིར། །དྲང་བའི་དོན་ལ་དགོངས་ནས་ནི། །སྒྲིབ་སྦྱངས་ཚོགས་རྫོགས་བྱེད་པར་གསུངས། །ད་ཡང་འཁོར་གྱི་སྙིང་པོ་ཉོན། །འབྲས་བུ་ཡེ་ཤེས་བླ་མ་ནི། །ངེས་པའི་དོན་ལ་དགོངས་པའི་ཕྱིར། །འཁོར་འདས་འབྱུང་བས་མ་རེག་ཀྱང་། །ཤེས་པ་ངོས་ཟིན་མ་བཅོས་པ། །རང་རིག་ཆོས་སྐུ་ད་ལྟའི་ཐུགས། །ངོ་བོ་ལོངས་སྤྱོད་རྫོགས་སྐུར་སྣང་། །ཐུགས་རྗེས་སྤྲུལ་པའི་སྐུ་རུ་བྱུང་། །གཞི་ཡི་ཆོས་སྐུ་གཅིག་པ་ལ། །གདུལ་བྱ་ཡོན་ཏན་གསུམ་དུ་བཤད། །ད་ཡང་འདུས་པའི་སྙིང་པོ་ཉོན། །སྣང་བ་ཆོས་དབྱིངས་བླ་མ་ནི། །འབྱུང་ ― DNG002_Page_0075 ―
[མ་དཔེ་གཟིགས་ན་འདིར་གནོན།]
ཆེན་ལྔ་ཡིས་བླ་མ་སྟེ། །འདོད་ཡོན་ལ་སོགས་རྣམ་ལྔ་ནི། །ཚིག་དང་ཡི་གེར་མི་མཚོན་པ། །ལྡེམ་དགོངས་རང་གི་ངོ་བོར་ནི། །སྣང་བ་ཆོས་ཀྱི་དབྱིངས་སུ་བསྟན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སངས་རྒྱས་ཀྱི་དགོངས་པ་ཆོས་ཀུན་བླ་མ་དམ་པའི་གདམས་ངག་ཏུ་འདུས་པར་བསྟན་པའི་ལེའུ་སྟེ་ལྔ་བཅུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །འཁོར་འདས་གཞི་ནི་གཅིག་མོད་ཀྱང་། །སེམས་ནི་སྣང་བ་མི་འདྲ་བས། །སྣོད་ནི་བྱེ་བྲག་དབྱེ་བ་བསྟན། །དབང་པོ་རབ་འབྲིང་གསུམ་དུ་བསྟན། །ད་ཡང་འདུས་པའི་སྙིང་པོ་ཉོན། །དབང་པོ་ཐ་མའི་དོན་དུ་ནི། །དགེ་བའི་ལས་དང་རྒྱུ་འབྲས་ཀྱི། །འབྲས་བུ་བདེ་དང་སྡུག་བསྔལ་ལ། །གཉེན་པོ་དགེ་བ་ཅི་བྱས་ཀྱང་། །ཆོས་སྤྱོད་ལམ་དུ་ཁྱེར་བའི་མི། །སྡེ་སྣོད་གསུམ་གྱི་ཆོས་བསྟན་པས། །རྒྱུ་ཡི་འཁོར་ལོར་བསྟན་ཅིང་འདུས། །ད་ཡང་རྡོ་རྗེ་སེམས་དཔའ་ཉོན། །དབང་པོ་འབྲིང་གི་དོན་དུ་ནི། །འབྲས་བུ་རྡོ་རྗེ་ཐེག་པ་སྟེ། །ཀྲི་ཡོག་རྒྱུད་ལུང་མན་ཆད་ཆོས། །ཕྱག་རྒྱའི་དཀྱིལ་འཁོར་ལམ་བྱས་ནས། །འབྲས་བུ་དེ་ཉིད་ཡེ་ཤེས་གསུང་། །རང་གི་ལུས་ངག་ཡིད་གསུམ་ནི། །སྐུ་གསུང་ཐུགས་སུ་སྦྱར་བའི་ཕྱིར། །རྡོ་རྗེ་ཐེག་པར་གདགས་ཤིང་འདུས། །ད་ཡང་འདུས་པའི་སྙིང་པོ་ཉོན། །དབང་པོ་རབ་ཀྱི་བསྒོམ་པ་ནི། །བསྟན་པ་ཙམ་གྱིས་ཆོག་པའི་ཆོས། །ཐིག་ལེ་ཉག་གཅིག་ཆོས་ཀྱི་སྐུ། །ཤེས་པ་ཙམ་གྱིས་སངས་རྒྱས་ངེས། །པ་ན་སེ་ཡི་འབྲས་བུ་བཞིན། །རྒྱུ་འབྲས་རོ་གཅིག་ཐེག་པར་འདུས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱུ་འབྲས་འདུས་པའི་ངེས་ཚིག་བསྟན་པའི་ལེའུ་སྟེ་ང་གཅིག་པའོ།། །།དེ་ནས་ཀུན་རིག་སྟོན་པ་དེས། །འདུས་པའི་འཁོར་ལ་བཀའ་སྩལ་པ། །ཀུན་གྱི་གཞི་ནི་ནམ་མཁའ་ལ། །མུན་པ་ནམ་ལངས་ཉི་ཤར་བཞིན། ། ― DNG002_Page_0076 ―
[མ་དཔེ་གཟིགས་ན་འདིར་གནོན།]
གཞི་སེམས་རིག་པའི་ཡེ་ཤེས་ནི། །གཅིག་པ་མ་ཡིན་ཁྱད་པར་ཆེ། །དེ་དོན་ངས་བཤད་ལེགས་པར་ཉོན། །འཁོར་འདས་གཉིས་ཀྱི་ངོ་བོ་དང་། །དེ་ལས་བསྐྱེད་པའི་ཆོས་རྣམས་ནི། །དེ་ཙམ་ཉིད་ན་ངང་གིས་སྟོང་། །གཞི་ལ་གཉིས་མེད་ནམ་མཁའ་འདྲ། །ད་ཡང་འཁོར་གྱི་སྙིང་པོ་ཉོན། །མ་རིག་སྐྱེད་པ་གཏི་མུག་ཡིན། །དེ་ཕྱིར་འཁོར་བའི་རྩ་བ་སྟེ། །ཉོན་མོངས་བག་ཆགས་སྐྱེད་པའི་ཕྱིར། །སེམས་ནི་ཚོགས་བརྒྱད་མུན་པ་འདྲ། །སྤྲེའུ་འདྲ་ལུང་གི་སློབ་མ་ཡིས། །རིག་པའི་གཏན་ཚིགས་རྣམ་བཞི་ནི། །ཡུལ་གྱི་སྣང་བ་འདི་ཉིད་ལ། །རིག་པ་རང་བཞིན་མེད་པར་ཤེས། །གསལ་ལ་མི་རྟོག་གང་བསྒོམས་པ། །ཐོས་པའི་ཤེས་རབ་ཡིན་པའི་ཕྱིར། །རིག་པ་ཡིན་ཏེ་ཡེ་ཤེས་མིན། །ད་ཡང་འདུས་པའི་སྙིང་པོ་ཉོན། །སེམས་དང་རིག་པའི་བར་དུ་ནི། །ལུང་ལྡན་ངེས་པའི་གདམས་ངག་གིས། །སྣང་བའི་གཏན་ཚིགས་མ་གཞིག་པར། །འཁོར་འདས་མ་རིག་ཆོས་ཀྱི་སྐུ། །གཞི་ཞེས་རང་གི་རིག་པ་སྟེ། །བསམ་པའི་ཤེས་རབ་ཡིན་པའི་ཕྱིར། །རང་བྱུང་ཡིན་ལ་ཡེ་ཤེས་མིན། །ནམ་ལངས་མུན་པ་མེད་པ་འདྲ། །ད་ཡང་རྡོ་རྗེ་སེམས་དཔའ་ཉོན། །ཡེ་ཤེས་སྐུ་ཡི་བར་དོ་ནི། །རྣལ་འབྱོར་རིག་པའི་བློ་ལྡན་པས། །སེམས་ལ་རྒྱུ་བ་རྒྱུན་བཅད་ནས། །ཡེ་ཤེས་འགག་པ་མེད་པར་གསལ། །བསྒོམ་པའི་ཤེས་རབ་ཡིན་པའི་ཕྱིར། །མཉམ་བཞག་ངང་ལ་གཡེང་བ་མེད། །རྗེས་ཐོབ་མ་ཡེངས་གཏེར་བཞིན་དུ། །ཡེ་ཤེས་ངང་ལ་ཆོས་སྐུ་བཙལ། །ངེས་ཤེས་གདེང་གིས་ཟིན་པ་ནི། །ཉི་ཤར་མུན་གྲིབ་མེད་པ་འདྲ། །ད་ཡང་འདུས་པའི་སྙིང་པོ་ཉོན། །ཤེས་རབ་རྣམ་གསུམ་མདོར་བསྡུ་ན། །ཐོས་བསམ་བསྒོམ་པ་ཡིད་ཆེས་པས། །འབྲལ་མེད་རྒྱུན་གྱི་ཏིང་འཛིན་གྱིས། །འབྲས་བུ་དུས་འདིར་མངོན་སངས་རྒྱས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཤེས་རབ་རྣམ་གསུམ་འདུས་པར་བསྟན་པའི་ལེའུ་སྟེ་ང་གཉིས་པའོ།། །། ― DNG002_Page_0077 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །དཔེ་དང་དོན་དུ་བཀའ་སྩལ་པ། །དཔེར་ན་ཝཱ་ར་ཎཱ་སིའི་རས། །ཚོན་གྱིས་སོ་སོར་བསྒྱུར་བྱས་པར། །ཁ་དོག་སྣ་ཚོགས་ཅིར་ཡང་སྣང་། །རས་སུ་དབྱེར་མེད་ངོ་བོ་གཅིག །དེ་བཞིན་སེམས་ཀྱི་རྣམ་རྟོག་པ། །ཡུལ་དབང་རྐྱེན་གྱིས་སོ་སོར་སྣང་། །སྣང་ཡུལ་འཁྲུལ་པའི་སེམས་སུ་འདུས། །དེ་ཕྱིར་སྣང་བ་ངེས་མེད་ཡིན། །ཤེལ་སྒོང་དག་གི་མདུན་དུ་ནི། །ཁ་དོག་སྣ་ཚོགས་རས་བཞག་པས། །ཤེལ་སྒོང་ཉིད་ཀྱང་དེ་ལྟར་སྣང་། །སྣང་ཡང་ཤེལ་ལས་གཡོས་པ་མེད། །དེ་ཕྱིར་རང་བྱུང་ངོ་བོ་ལ། །གཟུང་འཛིན་རྐྱེན་གྱིས་རིགས་དྲུག་བྱུང་། །འཁྲུལ་པའི་ངོ་བོ་ཅིར་སྣང་ཡང་། །སྣང་ཡང་གཞི་ལས་འགྱུར་བ་མེད། །ད་ཡང་འདུས་པའི་སྙིང་པོ་ཉོན། །གསེར་བཟང་ལག་གིས་བསྒྱུར་ཙམ་ན། །ཆོལ་ཟངས་དྲི་ཆུའི་སྣོད་བྱས་ན། །གསེར་ཡང་ངན་པའི་རྫས་སུ་སྣང་། །དེ་བཞིན་འཁྲུལ་པས་བརྟགས་ཙ་ན། །ཡུལ་ཡང་མ་དག་འཇིག་རྟེན་ཁམས། །ངམ་གྲོག་གཡང་ས་ཚེར་དོང་མཐོང་། །གསེར་སྐུ་མཆོད་རྟེན་བྱས་ཙ་ན། །ཚོགས་བསགས་རྟེན་དུ་འགྱུར་བའི་ཕྱིར། །གསེར་ཡང་བཟང་པོའི་རྫས་སུ་མཐོང་། །ཡེ་ཤེས་ཅན་གྱི་ངོ་གང་ལ། །ཡུལ་ཡང་ཞིང་ཁམས་རྣམ་པར་དག །རིན་ཆེན་གསེར་གྱི་ངོ་བོ་ལ། །གསེར་གྱི་རྒྱུ་ལ་བཟང་ངན་མེད། །དེ་བཞིན་ཆོས་སྐུའི་ངོ་གང་ལ། །སྣང་དང་མི་སྣང་གཞི་ལ་མེད། །ད་ཡང་འདུས་པའི་སྙིང་པོ་ཉོན། །སྣ་ཚོགས་དར་གྱི་རྣམ་པ་ལ། །ཟ་འོག་སྣམ་བུ་བྱས་ཙམ་ན། །སྣ་ཚོགས་དར་གྱི་མིང་དང་བྲལ། །ཟ་འོག་སྣམ་བུར་གཅིག་པའི་ཕྱིར། །ཆོས་སྐུ་རང་རིག་སེམས་ཡིན་ཀྱང་། །ལུང་ལྡན་རྐྱེན་གྱིས་བསྟན་ཙམ་ན། །སྣ་ཚོགས་འཛིན་པའི་སེམས་དང་བྲལ། །ཐིག་ལེ་ཉག་གཅིག་ཆེན་པོར་འདུས། །དཔེར་ན་སྨན་དུག་གཞི་གཅིག་ལ། །ལ་ལའི་སྨན་དེ་ལ་ལའི་དུག །དེ་ཕྱིར་ངེས་དོན་ཆོས་འདི་ལ། །ལ་ལའི་བྱང་ཆུབ་ལ་ལའི་དམྱལ། །ཧ་ལ་ནག་པོའི་དུག་དང་འདྲ། །ཐབས་མཁས་བཟའ་ལེགས་ ― DNG002_Page_0078 ―
[མ་དཔེ་གཟིགས་ན་འདིར་གནོན།]
སྨན་གྱི་མཆོག །དེ་བཞིན་འདོད་ཆགས་ཞེ་སྡང་ཡང་། །ཉོན་མོངས་རང་སར་གྲོལ་ཙམ་ན། །དེ་ནི་རང་བྱུང་ཡེ་ཤེས་ཡིན། །སྨན་གྱི་རྒྱལ་པོ་བཅུད་ལེན་བཞིན། །ཐབས་ལ་མི་མཁས་བཟའ་ཉེས་ན། །ཧ་ལ་ནག་པོའི་དུག་དང་འདྲ། །རང་ལ་གནས་པའི་ཆོས་ཀྱིས་ཀྱང་། །ལུང་དུ་མེད་པའི་དབང་ཡོད་ཚེ། །འདོད་ཆགས་ལ་སོགས་དུག་ལྔ་ཡིན། །ད་ཡང་རྡོ་རྗེ་སེམས་དཔའ་ཉོན། །ས་འོག་གནས་པའི་རིན་ཆེན་གསེར། །ངོ་མ་ཤེས་ན་རྡོ་དང་འདྲ། །དེ་བཞིན་རང་ལ་ཡོད་པའི་དོན། །རྟོགས་པ་མེད་ན་འཁྲུལ་རྟོག་སེམས། །ངོ་ཤེས་འཕྲད་ན་མི་ཟད་གཏེར། །དགོས་འདོད་རེ་བ་རང་ལས་འབྱུང་། །ངེས་དོན་ཆོས་སྐུ་རྟོགས་ཙམ་ན། །བྱིན་རླབས་ནོར་བུའི་ཚུལ་དུ་འབྱུང་། །ད་ཡང་འདུས་པའི་སྙིང་པོ་ཉོན། །མཁའ་ལ་ནམ་མཁའི་གཟའ་སྐར་དང་། །ཆུ་ནང་དག་གི་གཟུགས་བརྙན་བཞིན། །གཅིག་པ་མ་ཡིན་སོ་སོར་མེད། །དེ་བཞིན་རིག་པའི་རྒྱལ་པོ་དང་། །རིག་པ་རྩལ་དུ་སྣང་བ་གཉིས། །ལྡོག་པ་ཐ་དད་ངོ་བོ་གཅིག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ངེས་དོན་འདུས་པར་བསྟན་པའི་ལེའུ་སྟེ་ང་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །རྫོགས་ཆེན་རང་གཞུང་གསུངས་པའི་དོན། །ཆེད་དུ་དགོངས་ཏེ་བཀའ་སྩལ་པ། །ང་ཡི་རང་བཞིན་བརྟགས་དཀའ་སྟེ། །འཇུག་སྒོ་ལྟ་བ་བསྒོམ་པ་དང་། །དམ་ཚིག་སྤྱོད་པ་ཕྲིན་ལས་དང་། །ལམ་དང་གནས་དང་ཡེ་ཤེས་ཆོས། །རྣམ་པ་བཅུ་ནི་ངས་བཤད་ཉོན། །འཇུག་སྒོ་བཙལ་དུ་མེད་པ་ཡི། །ལུང་ལྡན་གདམས་ངག་རྗེས་སུ་འཇུག །དེ་ཕྱིར་ཡུལ་ལ་རག་མ་ལུས། །སྣང་མེད་ཆོས་ལ་ངེས་ཤེས་སྐྱེ། །ལྟ་བ་གཞི་ངེས་རང་བྱུང་ལ། །རིག་པ་ཁྱབ་གདལ་འགྱུར་བ་མེད། །དེ་ཕྱིར་རང་རིག་ཆོས་ཀྱི་སྐུ། །དེ་ལ་གོལ་སྒྲིབ་སྐྱོན་མི་གོལ། །བསྒོམ་པ་རང་གསལ་རྟོག་པ་མེད། ། ― DNG002_Page_0079 ―
[མ་དཔེ་གཟིགས་ན་འདིར་གནོན།]
བྱིང་རྒོད་མེད་པའི་ཏིང་འཛིན་གསལ། །ཆེད་དུ་མི་བསྒོམ་རང་ལུགས་ཙམ། །དེ་ཕྱིར་ཡེངས་མེད་ཉམས་དང་ལྡན། །མ་བསྲུངས་འབྲལ་མེད་དམ་པའི་མཆོག །མི་འདའ་ཆོས་ཉིད་དམ་ཚིག་སྟེ། །སངས་རྒྱས་ཀུན་གྱི་ཐུགས་དམ་ཡིན། །ཕྲིན་ལས་རྩོལ་དུ་མེད་པ་སྟེ། །གང་ཡང་རུང་བ་ཅི་ལ་ཡང་། །མ་ཆགས་མི་གཡོ་ཕྲིན་ལས་ཡིན། །ལུས་ངག་བྱ་བའི་ལས་མི་དགོས། །སྤྱོད་པ་བླང་དོར་མེད་པར་སྤྱོད། །གང་ཡང་མི་རྒྱུ་རྒྱུན་དུ་ནི། །ཆེད་དུ་བྱར་མེད་ཡང་བྱ་ལ། །དེ་ཕྱིར་སྤྱོད་པ་མ་བཅོས་མཆོག །ལམ་ལ་བགྲོད་དུ་མི་ཡོད་སྟེ། །ས་ལ་སྦྱང་མེད་མཐར་མི་ལྟུང་། །དེ་ཕྱིར་ས་དང་ལམ་མེད་ཕྱིར། །ཡེ་ཤེས་ཆེན་པོའི་ཀློང་ནི་ལམ། །གནས་ལ་མཐོ་དམན་མེད་པ་སྟེ། །སྟེང་འོག་མཐའ་དབུས་མེད་པ་ཡི། །རང་བྱུང་ཆོས་སྐུ་གནས་ཀྱི་མཆོག །དེ་ཕྱིར་ཡེ་ཤེས་རང་གནས་ཡིན། །ཡེ་ཤེས་མི་རྟོག་སྐྱེ་མེད་པ། །སེམས་ཅན་ཀུན་གྱི་རྒྱུད་ལ་གནས། །དེ་རྟོགས་ཡེ་ཤེས་ཆོས་ཀྱི་སྐུ། །དེ་ཕྱིར་སངས་རྒྱས་དགོངས་པ་ཡིན། །ཆོས་ནི་ཇི་བཞིན་རྒྱལ་བའི་བཀའ། །དྲི་མེད་ཚིག་ནི་གསུང་སྙན་གྱིས། །མ་རིག་མུན་སེལ་ཆོས་ཀྱི་མཆོག །དེ་ཕྱིར་ངེས་དོན་ཆོས་འདི་གཅེས། །ད་ཡང་རྡོ་རྗེ་སེམས་དཔའ་ཉོན། །དེ་དག་རང་གཞུང་དབྱེ་བ་ཡང་། །གདུལ་བྱའི་འཁོར་ལ་བསྟན་པ་ལས། །དོན་དུ་ཆོས་སྐུ་གཅིག་ལས་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡང་ཏིའི་རང་གཞུང་འདུས་པར་བསྟན་པའི་ལེའུ་སྟེ་ང་བཞི་པའོ། །སྡོམ་དུ་བསྡུས་ཏེ་བསྟན་པ་བཅུ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡི། །འདུས་པའི་འཁོར་ལ་ཕན་དོན་དུ། །སངས་རྒྱས་ཀུན་རིག་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །འཁོར་འདས་བར་དོའི་ལུས་ནི་གང་། །སྐྱེ་ཤི་བར་དོའི་གདམས་ངག་གང་། །ཡུལ་སེམས་བར་དོ་ཅིས་མི་འགལ། །ཏིང་འཛིན་བར་དོ་འབྲལ་མེད་གང་། །སྲིད་པ་བར་དོ་འབྲས་ ― DNG002_Page_0080 ―
[མ་དཔེ་གཟིགས་ན་འདིར་གནོན།]
བུ་ཅི། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །དང་པོ་འཁོར་འདས་བར་དོ་ལ། །རང་བྱུང་ངོ་བོ་ཉིད་ཀྱི་སྐུ། །རང་བྱུང་ལུས་ལ་རིག་པའི་ཐུགས། །འཁོར་འདས་མེད་ཕྱིར་གཞི་ཉིད་མིན། །ད་ཡང་རྡོ་རྗེ་སེམས་དཔའ་ཉོན། །གཞི་ལ་སངས་རྒྱས་མེད་པའི་ཕྱིར། །ལུང་ལྡན་གདམས་ངག་བསྟན་པ་མེད། །དེ་ཕྱིར་རྟོགས་པ་མངོན་གྱུར་མིན། །སངས་རྒྱས་སྒམ་པོས་མ་མཛད་པས། །ཐེག་པ་རིམ་དགུར་དབྱེ་བ་མེད། །དེ་ཕྱིར་མྱ་ངན་འདས་མ་རིག །རང་བཞིན་གཞི་ཡི་ངོ་བོ་ལ། །མ་རིག་བག་ཆགས་མ་གཡོས་ཤིང་། །ཞེན་པའི་རྟོག་པ་མེད་པའི་ཕྱིར། །སེམས་ཅན་སྒྲིན་པོས་མ་བཅོས་པས། །ཉོན་མོངས་དུག་ལྔ་མེད་པའི་ཕྱིར། །འཁོར་བའི་མཐའ་ཡིས་སྐྱོན་མ་གོས། །ད་ཡང་འདུས་པའི་སྙིང་པོ་ཉོན། །རང་བྱུང་ངོ་བོ་གཞི་ཉིད་ལས། །རྡུལ་ཕྲན་དག་གི་རྒྱུས་མ་བསྐྱེད། །འབྱུང་བ་ལྔ་ལ་རག་མ་ལུས། །དེ་ཕྱིར་གཉེན་པོ་ཅིས་མི་ཚུགས། །སྣང་བ་གཞི་ལ་མེད་ཅེས་བྱ། །ཡང་དག་ཆོས་སྐུ་ངེས་པར་ཡོད། །སེམས་ཉིད་སྐྱེ་ཤི་མེད་པའི་ཕྱིར། །ཐོག་མ་ཐ་མ་མེད་པར་གནས། །དེ་ཕྱིར་དུས་གསུམ་མི་འགྱུར་བས། །དངོས་མེད་ཁྱབ་པས་ནམ་མཁའ་འདྲ། །མཐའ་ནི་སྒྲོ་སྐུར་བྲལ་བ་དང་། །ཡོད་པ་བྲལ་ཕྱིར་རྟག་པ་མེད། །མེད་པ་མ་ཡིན་ཆད་པ་མིན། །ཡོད་མེད་མཐའ་བྲལ་རང་བྱུང་གཞི། །རིག་པ་རང་གི་ངོ་བོ་ལ། །སྐྱེ་འགག་མེད་ཕྱིར་རང་གསལ་སྐུ། །ས་ལེ་སིང་ངེ་ཕྱི་ནང་མེད། །དེ་ཕྱིར་རང་རིག་ཆོས་སྐུ་ཉིད། །ད་ཡང་འདུས་པའི་སྙིང་པོ་ཉོན། །རང་བྱུང་ངོ་བོ་ཉིད་སྐུ་ནི། །འདུ་འབྲལ་མེད་ཕྱིར་མྱང་འདས་གཞི། །ཆོས་རྣམས་ཀུན་གྱི་རྩ་བ་ནི། །ཡེ་ནས་རང་བཞིན་ལྷུན་གྱིས་གྲུབ། །ད་ཡང་རྡོ་རྗེ་སེམས་དཔའ་ཉོན། །རང་བཞིན་ལུས་ཞེས་བྱ་བ་ནི། །འཁྲུལ་མ་མྱོང་བས་མ་རིག་མེད། །རྟོགས་མ་མྱོང་བས་ཡེ་ཤེས་མེད། །དེ་ཕྱིར་ཡུལ་ལ་ཡེངས་པ་དང་། །མ་ཡེངས་རང་དུ་ཤན་མ་ ― DNG002_Page_0081 ―
[མ་དཔེ་གཟིགས་ན་འདིར་གནོན།]
ཕྱེད། །གང་གི་མཐས་ཀྱང་མ་རེག་ཕྱིར། །འཁོར་འདས་གཞི་ཞེས་དེ་ལ་བྱ། །ད་ཡང་འདུས་པའི་སྙིང་པོ་ཉོན། །འཁྲུལ་པའི་གཞི་ཞེས་ལུང་མ་བསྟན། །གང་ལ་མི་རྟོག་དོན་མ་ཟིན། །ཡིད་ཙམ་དྲན་ཀྱང་རིམ་གྱིས་འགྲིབས། །མུན་དཀྱིལ་སོང་ཕྱིར་དྲན་པ་ཆུང་། །ཐིབས་ཀྱིས་འཐིབ་པས་ལུང་མ་བསྟན། །རྐྱེན་དབང་འགྱུར་ཕྱིར་འཁོར་བའི་གཞི། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འཁོར་འདས་བར་དོ་བསྟན་པའི་ལེའུ་སྟེ་ང་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །སྐྱེ་ཤི་བར་དོ་བཀའ་སྩལ་པ། །དང་པོ་ཤི་བའི་དུས་བྱུང་ཚེ། །གདམས་ངག་མེད་པའི་སྐྱེ་བོ་དང་། །ལྟ་མེད་སྔགས་བཙུན་གང་ལའང་རུང་། །འཆི་ལྟས་རིམ་པར་འབྱུང་བ་ནི། །ས་ནི་ཆུ་ལ་ཐིམ་པ་ཡིས། །ཕུང་པོའི་ཟུངས་ནི་མི་ཐུབ་ལྕི། །ལུས་ཀྱི་བཀྲག་ཉམས་མོག་པོར་འགྱུར། །ཆུ་ནི་མེ་ལ་ཐིམ་འགྱུར་ཚེ། །ཁ་སྐོམ་མཆུ་དང་ལྕེ་རྡིབ་འོང་། །ཉམ་ཆུང་སྨྲ་ནི་མི་ནུས་འབྱུང་། །དེ་ནས་མེ་ལ་རླུང་ཐིམ་ཚེ། །ལུས་ཀྱི་དྲོད་ཤོར་གྲང་བར་འབྱུང་། །འཆི་ལྟས་མིག་ལྡོག་ཤི་འབྲས་གདོན། །རླུང་ནི་རྣམ་ཤེས་ཐིམ་འགྱུར་ཚེ། །དབུགས་བརྩེགས་ཐུམ་ཐུམ་བྱེད་པ་འབྱུང་། །དེ་ཚེ་མི་མནོ་དགུ་ཅིག་བསམ། །སྡུག་བསྔལ་དྲགས་ནས་དྲན་པ་ཉམས། །གནད་གཅོད་དྲགས་ནས་བག་ཆགས་སོག །དེ་དག་སེམས་ཅན་འཆི་ལྟས་ཡིན། །འཆི་ལྟས་ཕྱི་མ་གསལ་བའི་ཚེ། །སྣང་བ་སྐྱེ་དང་མཆེད་འགྱུར་ནས། །རང་གིས་རང་བསྒྲིབ་འཁོར་བར་འཁྱམས། །ད་ཡང་རྡོ་རྗེ་སེམས་དཔའ་ཉོན། །བར་དོ་ལུས་གསུམ་ལེན་འགྱུར་ཏེ། །ཐ་མ་གནས་ངན་ལུས་ལེན་པ། །དང་པོ་རང་བྱུང་རྣམ་ཤེས་དེ། །ཕོ་མོའི་རྐྱེན་གྱིས་ལུས་འཇུག་ཚེ། །རླུང་གཡོས་བག་ཙམ་བྱུང་བའི་དུས། །ཉེར་ལེན་འདུ་བྱེད་བག་ཙམ་བྱུང་། །དྲོད་ཙམ་གྱིས་ནི་མེ་བྱུང་ ― DNG002_Page_0082 ―
[མ་དཔེ་གཟིགས་ན་འདིར་གནོན།]
བས། །འདུ་ཤེས་ཕོ་མོ་བསྐྱེད་པའི་ཚེ། །རླན་ཙམ་གྱིས་ནི་ཆུ་བྱུང་བས། །ཉེར་ལེན་གྱི་ནི་ཚོར་བ་དྲན། །ནུར་ནུར་པོ་ལ་སྲ་བ་ཡིས། །དེ་ལ་གཟུགས་ཆགས་མ་རིག་པས། །ནང་ནི་ཀུན་བརྟགས་རྒྱུ་བ་དེས། །སྒོ་ལྔའི་རྣམ་ཤེས་ཤུགས་ལས་བྱུང་། །མངལ་དུ་ཆུད་དང་རགས་སྐྱེས་པས། །འབྱུང་བ་བཞི་དུས་སྨིན་པའི་ཕྱིར། །ལུགས་ནས་བྱུང་བས་ཀུན་བརྟགས་པས། །སྣང་བ་ལུགས་ལ་ངན་རྟོག་ཞུགས། །ཕ་མས་ངན་བརླག་ངན་རྟོག་ཞེན། །ཆོས་བརྒྱད་དམ་པར་བལྟས་ནས་ནི། །མངོན་རྒྱུད་བག་ཆགས་གཉིས་ཚང་ནས། །རྐྱེན་བཞི་ཚང་ཕྱིར་འཁོར་བར་སྨིན། །ད་ཡང་འདུས་པའི་སྙིང་པོ་ཉོན། །སྐྱེ་ཤི་གཉིས་ཀྱི་བར་དོ་ལ། །ཐར་བར་འདོད་པའི་དད་ལྡན་གྱིས། །ལས་དང་ཐུགས་རྗེ་འཛོམ་པ་ཡི། །ལུང་ལྡན་ངེས་པའི་གདམས་ངག་གིས། །ལུང་ལྡན་ངེས་པའི་བླ་མ་ལ། །ངེས་དོན་རྒྱུད་འདི་ངོ་སྤྲད་ཕྱིར། །གདམས་ངག་ཞུ་ཕྱིར་ཆགས་མེད་པས། །ལུས་སྲོག་རྫས་ལ་མི་ལྟོས་པས། །བླ་མ་མཉེས་པར་བྱས་གྱུར་ན། །གདམས་ངག་ཅན་ཀུན་རང་སེམས་རྟོགས། །ད་ཡང་འདུས་པའི་སྙིང་པོ་ཉོན། །མ་ཤི་མ་སྐྱེས་བར་དོ་ནི། །ད་ལྟ་ལུས་འདི་བླང་བའི་ཚེ། །ངེས་དོན་ཆོས་འདི་འཕྲད་གྱུར་ན། །སྐྱེ་བ་འདི་ཡིས་སངས་རྒྱས་འགྲུབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྐྱེ་ཤི་བར་དོ་བསྟན་པའི་ལེའུ་སྟེ་ང་དྲུག་པའོ།། །།དེ་ནས་ཀུན་རིག་ཆོས་རྗེ་ཡིས། །འདུས་པའི་འཁོར་ལ་བཀའ་སྩལ་པ། །ཡུལ་སེམས་གཉིས་ཀྱི་བར་དོ་ལ། །ཕྱི་ཡི་གོལ་ས་བཅད་པའི་ཕྱིར། །ཡུལ་གྱི་སྣང་བ་ཅིར་སྣང་ཡང་། །སྣང་བ་མི་འགོག་ཞེན་པ་འགོག །དེ་ཕྱིར་ཞེན་མེད་ཆོས་ཀྱི་དབྱིངས། །ད་ཡང་འདུས་པའི་སྙིང་པོ་ཉོན། །སྤང་སྡུད་མེད་ཕྱིར་ཅིར་སྣང་ཡང་། །དགག་གཞི་ཀུན་དང་བྲལ་བའི་ཕྱིར། །དབང་པོ་རང་ཡན་བཏང་གྱུར་ཀྱང་། །སྒྲོ་སྐུར་མེད་ཕྱིར་གནས་ལུགས་ཡིན། །སྔོན་གྱི་སངས་རྒྱས་རྣམས་ཀྱིས་ཀྱང་། །དབང་པོ་རང་ཡན་མ་བརྟུལ་ཀྱང་། ། ― DNG002_Page_0083 ―
[མ་དཔེ་གཟིགས་ན་འདིར་གནོན།]
ནམ་མཁའ་འདྲ་སྟེ་མཐར་མ་ལྷུང་། །དེ་ཕྱིར་གཞི་ལ་སྣང་བ་མེད། །སྣང་མེད་ཆོས་ལ་བསྒོམ་དུ་མེད། །མ་བསྒོམས་གོལ་ས་མེད་པའི་ཕྱིར། །ཅིར་སྣང་གང་ཡང་གྲུབ་པ་མེད། །འཁྲུལ་ངོར་ཡོད་ཀྱང་དོན་མི་འཛིན། །ད་ཡང་རྡོ་རྗེ་སེམས་དཔའ་ཉོན། །ཡུལ་སེམས་བར་གྱི་རྟོག་པ་འདི། །རང་ཡན་བཞག་ཀྱང་ཡེངས་མི་སྲིད། །ལུང་ལྡན་ངེས་པའི་གདམས་ངག་གིས། །གོལ་ས་ཆོད་ཕྱིར་སྐྱོན་མི་གོས། །རང་རིག་ཤེས་པ་ཀུན་ཏུ་གཅེས། །དེ་ཙམ་ཉིད་ན་དོན་གྱིས་ཟིན། །ལྷག་མཐོང་འབྲལ་མེད་ཡེ་ཤེས་གསལ། །དགག་གཞི་བྲལ་བའི་སྣང་བ་ལ། །ཤེས་པ་མ་ཞེན་རང་གསལ་བ། །ཆོས་སྐུ་ཆོས་དབྱིངས་འཛོམ་ཞེས་བྱ། །ད་ཡང་རྡོ་རྗེ་སེམས་དཔའ་ཉོན། །ད་ལྟ་ཡུལ་སེམས་བར་དོ་ལ། །རང་རིག་རྒྱལ་པོ་ཡེ་ཤེས་འཕྱོ། །འདུ་ཤེས་མ་བཟུང་རིག་པ་འཆར། །དེ་ཙམ་ཉིད་ན་ཆོས་སྐུ་གསལ། །ད་ལྟ་ཉིད་ན་ཡུལ་མེད་ཤེས། །ཆད་ནས་མེད་པ་མ་ཡིན་ཏེ། །སྒྲོ་སྐུར་མིང་ནི་མི་རྟོག་པས། །ཞེན་འཛིན་སྤྲོས་པ་བྲལ་བ་ཡིན། །ཐེག་བརྒྱད་ཡུལ་ནི་གཞིར་བྱེད་ཀྱང་། །ཡང་ཏིར་ཡུལ་འདི་ཡོད་ཀྱི་བར། །དེ་ཚེ་གོལ་བའི་སྒྲོ་སྐུར་ཡོད། །དེ་ཕྱིར་ཡེ་མེད་ཤེས་གྱུར་ན། །སྣང་བ་དག་ཕྱིར་གོལ་ས་ཆོད། །ད་ཡང་རྡོ་རྗེ་སེམས་དཔའ་ཉོན། །དེ་དག་གདམས་ངག་མདོར་བསྡུ་ན། །ཡུལ་ནི་འཁྲུལ་པའི་བག་ཆགས་བརྟས། །སེམས་ནི་མ་རིག་ཡིད་ལ་རྒྱུ། །དེ་གཉིས་བར་ན་རང་རིག་གནས། །དེ་ཉིད་ལུང་ལྡན་གདམས་ངག་གིས། །ངེས་དོན་ཤེས་པས་ཡུལ་སེམས་སྟོར། །དེ་ཕྱིར་ཆོས་སྐུ་སྐྱེ་འགག་མེད། །དེ་དོན་ངེས་ཤེས་གོལ་ས་ཆོད། །དེ་ཉིད་ཆོས་ཉིད་གཞི་དང་མཐུན། །དེ་ཕྱིར་གོལ་མེད་ཆོས་ཀྱི་སྐུ། །དེ་ལ་བཙལ་དུ་རྡུལ་ཙམ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡུལ་སེམས་བར་དོ་བསྟན་པའི་ལེའུ་སྟེ་ང་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ཏིང་འཛིན་བར་དོ་བཀའ་སྩལ་པ། །ཤེས་རབ་རྣམས་ཀྱིས་བར་དོར་དཔྱོད་པ་ནི། ། ― DNG002_Page_0084 ―
[མ་དཔེ་གཟིགས་ན་འདིར་གནོན།]
རིག་དཔྱོད་བལྟ་བའི་གཟུང་ཆེན་ནི། །རྒྱུན་དུ་མི་བརྗེད་འབྲལ་མེད་ཀྱིས། །ངེས་དོན་རིག་པའི་རྣལ་འབྱོར་པས། །མཉམ་བཞག་རྗེས་ཐོབ་གདམས་ངག་སྐྱེ། །མངལ་ཉིད་བར་དོ་དུས་ཀྱི་ཚེ། །རིག་པའི་ཡེ་ཤེས་གདམས་ངག་གིས། །ནང་གི་སེམས་ལ་བརྟེན་ནས་ནི། །མཉམ་ཉིད་ཡེ་ཤེས་ཀློང་དུ་ཐིམ། །ད་ཡང་འདུས་པའི་སྙིང་པོ་ཉོན། །སངས་རྒྱས་སེམས་ཅན་དུས་དང་ནི། །གཉིས་ཀ་མ་ཡིན་གང་གི་དུས། །དེ་དོན་ལུང་ལྡན་དམ་ཚིག་གི། །གཅིག་ཏུ་གསལ་ཐེབ་གདམས་ངག་གིས། །རིག་དཔྱོད་དུས་གསུམ་ངེས་པ་ཡིན། །ཆོས་སྐུ་ཐིག་ལེ་མངོན་སངས་རྒྱས། །ད་ཡང་འདུས་པའི་སྙིང་པོ་ཉོན། །ཡང་དག་གསང་བའི་རིག་དཔྱོད་ནི། །དུས་དང་རྣམ་པ་ཐམས་ཅད་དུ། །ལྟ་བ་ངེས་པའི་དོན་གྱིས་བཟུང་། །མ་བརྗེད་འབྲལ་མེད་གདམས་ངག་དོན། །ཡིད་ལ་དྲན་པ་ལྷག་མཐོང་ལ། །ཞེན་པ་མེད་པ་ཆོས་ཀྱི་སྐུ། །དེ་དོན་སངས་རྒྱས་ཆོས་ཀྱི་མཆོག །ལུས་འདི་མ་བྲལ་དུས་འདིར་གྲུབ། །དེ་ཕྱིར་ཏིང་འཛིན་བར་དོ་ལ། །རྒྱུན་དུ་མི་འབྲལ་ཏིང་འཛིན་འགྲུབ། །ད་ཡང་འདུས་པའི་སྙིང་པོ་ཉོན། །རྗེས་ལ་ཐོབ་པའི་དུས་དག་ཏུ། །མཉམ་བཞག་དོན་ལ་རིག་པས་ལྟོས། །དེ་ཕྱིར་སྐྱོན་གྱིས་མ་གོས་ན། །ལྷག་མཐོང་དོན་གྱི་གདེང་གིས་ཟིན། །དེ་ཕྱིར་སྲིད་པའི་བར་དོ་ལ། །སངས་རྒྱས་ངེས་པར་འབྱུང་བའི་དོན། །འབྲས་བུའི་སྐབས་སུ་ངས་བཤད་ཀྱི། །ཕྱི་རབས་རྣལ་འབྱོར་རྟོགས་པར་གྱིས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཏིང་འཛིན་བར་དོ་བསྟན་པའི་ལེའུ་སྟེ་ང་བརྒྱད་པའོ། །སྡོམ་དུ་བསྡུས་ཏེ་བསྟན་པ་བཅུ་གཉིས་པའོ།། །།དེ་ནས་འདུས་པའི་ཚོགས་རྣམས་ཆེད། །ཀུན་རིག་སེམས་ཀྱི་རྒྱལ་པོ་ལ། །རྡོ་རྗེ་སེམས་དཔས་ཡང་ཞུས་པས། །ལྟ་སྒོམ་སྤྱོད་པ་འབྲས་བུ་འདི། །རྩ་བ་མདོར་ནི་ཇི་ལྟར་འདུས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། ། ― DNG002_Page_0085 ―
[མ་དཔེ་གཟིགས་ན་འདིར་གནོན།]
འདུས་པའི་འཁོར་ལ་བཀའ་སྩལ་པ། །དངོས་མེད་རིག་པའི་ལྟ་བ་ནི། །རང་བྱུང་སྐུ་ཉིད་ཡིན་པའི་ཕྱིར། །དེ་རྟོགས་དོན་དུ་གང་གནས་པ། །ལྟ་བའི་ནང་ནས་དམ་པའི་མཆོག །དེ་ཕྱིར་དོན་ལ་རིག་པ་ལྟ། །ད་ཡང་རྡོ་རྗེ་སེམས་དཔའ་ཉོན། །ཤེས་པ་རང་གསལ་ལྟ་བ་ནི། །ངོ་བོ་དབྱེ་བ་རྣམ་དྲུག་གིས། །རང་གི་མཚན་ཉིད་དེ་བཞིན་ནོ། །དེ་ཉིད་དུས་མེད་ཆོས་ཀྱི་སྐུ། །ཕྱི་ནང་མེད་པའི་རྣམ་དག་དབྱིངས། །དེ་ཉིད་མཐོང་མེད་ལྟད་མོར་ཆེ། །ཉི་མ་ཤར་ནས་མུན་མེད་ལྟར། །རང་བྱུང་ངོ་བོ་རིག་པ་ཤར། །དེ་ཙམ་ཉིད་ན་ད་ལྟའི་ཐུགས། །གསང་བ་དམ་པ་ལྟ་བའི་མཆོག །ད་ཡང་འདུས་པའི་སྙིང་པོ་ཉོན། །རང་བྱུང་རིག་པའི་ལྟ་བ་ལ། །དེ་ལ་མ་ནོར་ངེས་ཤེས་སྐྱེས། །སྐྱེས་ཀྱང་དམ་པར་མི་འཛིན་པར། །འདི་ལྟར་འཛིན་པ་མེད་པར་གསལ། །ཡང་དག་དོན་ལ་གོལ་ས་མེད། །དེ་ཕྱིར་དངོས་མེད་འཛིན་བྲལ་གྱིས། །ཡང་དག་ལྟ་བའི་དགོངས་པ་འདི། །ངེས་པའི་ལུང་དང་མཐུན་གྱུར་ན། །ཀུན་བཟང་ང་དང་ལྟ་བ་མཐུན། །ད་ཡང་རྡོ་རྗེ་སེམས་དཔའ་ཉོན། །གཞི་ངེས་སྣང་བ་མ་ངེས་པ། །གར་མཁན་ལག་པ་ཇི་བཞིན་དུ། །སྣ་ཚོགས་སྣང་ཡང་ངོས་གཟུང་མེད། །དེ་ཙམ་ཉིད་ན་གཞི་མི་འགྱུར། །དེ་དོན་མ་ནོར་རྟོགས་པའི་ཚེ། །རང་གི་མཚན་ཉིད་འགྱུར་བ་མེད། །ཇི་སྐད་བཏགས་ཀྱང་དོན་དང་མཐུན། །རང་བྱུང་ངེས་པའི་ལྟ་བ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྟ་བ་ངེས་པ་མདོར་བསྡུས་བསྟན་པའི་ལེའུ་སྟེ་ང་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་ཡང་གསུངས་པ། །རང་རིག་ཡེ་ཤེས་གསལ་བ་ཡི། །དོན་དང་མི་འབྲལ་ཏིང་འཛིན་ནི། །གསལ་ལ་མི་རྟོག་མི་གཡོ་བའི། །ངོ་བོ་ལ་སོགས་དབྱེ་བ་ཡི། །བརྒྱད་ཚན་གསུམ་གྱི་མན་ངག་གིས། །གཉིད་གསུམ་བསྲེས་པའི་ཆོས་ཉིད་འདི། །ཡེ་ཤེས་རང་བྱུང་ཆེན་པོའི་དོན། །མི་རྟོག་ཡེ་ཤེས་ལྷུན་གྲུབ་སྟེ། །རྩོལ་བསྒྲུབ་ ― DNG002_Page_0086 ―
[མ་དཔེ་གཟིགས་ན་འདིར་གནོན།]
འདས་པའི་བྱང་ཆུབ་སེམས། །གཟུང་འཛིན་མེད་པའི་ཆོས་སྐུ་ལ། །གསལ་ཙམ་ཉིད་ན་དམིགས་པ་མེད། །དེ་བཞིན་ཉིད་དུ་ཀུན་རིག་པས། །དེ་ཁྱབ་གར་གནས་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །ནམ་མཁའི་ངང་དུ་སྤྲིན་སངས་ལྟར། །ང་ཡི་ཆོས་སྐུ་ངོས་ཟིན་ན། །ཐོག་མ་མེད་ནས་བསགས་པ་ཡི། །རྣམ་རྟོག་སྤྲིན་ནི་དཔག་ཏུ་མེད། །དངོས་མེད་ཆོས་སྐུ་རིག་པ་ཡིས། །རྣམ་རྟོག་སྟོང་པའི་ངང་དུ་སངས། །འདི་ཤེས་རང་རིག་བསྒོམ་པའི་མཆོག །ཆོས་སྐུ་སྙིང་པོ་བྱང་ཆུབ་ལ། །མཚོན་དུ་མེད་པས་རྐྱེན་དང་བྲལ། །དེ་བཞིན་ཉིད་དུ་ཀུན་རིག་པས། །དེས་ཁྱབ་ཆོས་སྐུ་ཀུན་གསལ་བའི། །ཀུན་ལ་དབང་བསྒྱུར་ཐོབ་པ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ངེས་དོན་བསྒོམ་པ་མདོར་བསྡུས་ནས་བསྟན་པའི་ལེའུ་སྟེ་དྲུག་ཅུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །བྱ་བ་མེད་པའི་སྤྱོད་པ་ནི། །ད་ལྟའི་ལུས་འདི་བླང་བའི་ཚེ། །སྤྱོད་པའི་དབྱེ་བ་རྣམ་དྲུག་གིས། །དོན་རྟོགས་སྤངས་པ་མེད་པ་ཡིས། །ཐེག་པ་ཀུན་ལས་ཁྱད་པར་འཕགས། །དེ་ཡང་རང་སེམས་རྟོགས་པའི་ཚེ། །དུས་དང་རྣམ་པ་ཐམས་ཅད་དུ། །རང་གསལ་རིག་པ་འདི་ཉིད་ལས། །དེ་ལས་གཞན་དུ་བོགས་མི་འདོན། །ད་ཡང་རྡོ་རྗེ་སེམས་དཔའ་ཉོན། །ད་ལྟ་ལུས་ངག་ཡིད་ཀྱིས་ཀྱང་། །གཞན་ནས་མ་ཚོལ་དུས་འདི་ལ། །མ་ཡེངས་རིག་སྤྱོད་དོན་དྲན་ན། །འཁོར་བ་མེད་པའི་མཛད་སྤྱོད་ཡིན། །གང་ཡང་རུང་བ་ཅི་ལ་ཡང་། །སྐྱོན་ཡོན་དགག་སྒྲུབ་མེད་རྟོགས་ནས། །འཇིག་རྟེན་ཐ་སྙད་མེད་རྟོགས་པས། །འཇིག་རྟེན་ཐ་སྙད་འཛིན་པ་ནུབ། །དོན་གསལ་བརྗེད་ངས་ཆགས་པ་ཆུང་། །རྩིང་ཆོས་ང་རྒྱལ་ཆོས་མི་འབྱུང་། །དེ་ཕྱིར་སྤྱོད་པའི་གདེངས་སུ་བཤད། །ད་ཡང་འདུས་པའི་སྙིང་པོ་ཉོན། །ཤེས་རབ་ལྟ་བའི་གདེང་སྤྱོད་ཀྱིས། །དུག་ལྔ་རང་གྲོལ་ཡེ་ཤེས་ནི། །གང་དུ་སྐྱེས་ཚེ་དེ་ཉིད་གསལ། །རང་བྱུང་རིག་པའི་གོལ་ས་མེད། །དེ་ཕྱིར་རྣལ་འབྱོར་སྤྱོད་པ་སྟེ། །འདུ་ ― DNG002_Page_0087 ―
[མ་དཔེ་གཟིགས་ན་འདིར་གནོན།]
ཤེས་རྟོགས་པའི་ཐབས་ཀྱིས་ཀྱང་། །དོན་ཟིན་ངེས་པའི་གདེང་ལན་ཞིང་། །རྐྱང་པ་དུས་མཉམ་ཡུལ་སྣང་ལ། །ཉི་ཟླ་གཟས་ཟིན་ཇི་བཞིན་དུ། །ཡེ་ཤེས་སྤྱོད་པ་མཆོག་ཏུ་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྱོད་པ་མདོར་བསྡུས་བསྟན་པའི་ལེའུ་སྟེ་རེ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ངེས་པའི་དོན་ལ་ཡིད་ཆེས་པའི། །དབྱེ་བ་རྣམ་པ་དྲུག་གིས་ནི། །ཕྱི་མ་མ་ཡིན་དུས་འདི་རུ། །ཡེ་ཤེས་མངོན་གྱུར་འབྲས་བུ་ཡིན། །ད་ཡང་རྡོ་རྗེ་སེམས་དཔའ་ཉོན། །དཔེར་ན་ཆུ་དངས་རྙོག་མེད་ལྟར། །རེ་དོགས་མེད་པའི་འབྲས་བུ་ལ། །གོལ་སྒྲིབ་བྱ་བའི་མིང་ཡང་མེད། །ཉམ་ང་མེད་པའི་གདེང་གིས་ཟིན། །ཞེན་འདོད་མེད་པའི་ཉམ་ཞིག་འབྱུང་། །ཉམས་མེད་རིག་པ་ཉམས་ཀྱི་མཆོག །དེ་དོན་ཡིད་ཆེས་འབྲས་བུ་མཆོག །དཔེར་ན་བརྩི་འཚལ་ཡོད་པའི་ཕྱིར། །འབྲས་བུ་གསེར་ལ་སྨོས་ཅི་དགོས། །དེ་ཕྱིར་ངེས་པའི་གདེང་ལྡན་པས། །འབྲས་བུ་སངས་རྒྱས་སྨོས་ཅི་དགོས། །ངེས་དོན་བྱང་ཆུབ་དུས་འདིར་འགྲུབ། །ད་ཡང་འདུས་པའི་སྙིང་པོ་ཉོན། །ཆོས་སྐུ་གཟུགས་བརྙན་འབྱུང་བའི་དཔེ། །ཉི་ཟླ་གཟའ་སྐར་བཙལ་མེད་པས། །རྒྱ་མཚོར་གཟུགས་བརྙན་འཆར་བ་ལྟར། །ཆོས་སྐུ་རྟོགས་པའི་འབྲས་བུ་ལ། །སེམས་ཅན་མོས་པ་ཐ་དད་པ། །གཟུགས་སྐུ་རྣམ་གཉིས་དུས་གཅིག་འབྱུང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འབྲས་བུ་ངེས་པར་བསྡུས་པ་བསྟན་པའི་ལེའུ་སྟེ་རེ་གཉིས་པའོ། །སྡོམ་དུ་བསྡུས་ཏེ་བསྟན་པ་བཅུ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །འཁོར་གྱི་དོན་དུ་ཡང་ཞུས་པ། །མཚན་མ་ཟིལ་གྱིས་ཅི་ལྟར་མནན། །འགྲོ་དྲུག་གཡང་ས་ཇི་ལྟར་བཅད། །ཡེ་ཤེས་འབྲལ་མེད་ཅི་ལྟར་བསྒོམ། །ཉམས་ཀྱི་གོ་རིམ་ཇི་ལྟར་འབྱུང་། །ཀུན་རིག་རྒྱལ་པོས་བཤད་དུ་གསོལ། ། ― DNG002_Page_0088 ―
[མ་དཔེ་གཟིགས་ན་འདིར་གནོན།]
དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མཚན་མ་ཟིལ་གྱིས་མནན་པའི་ཕྱིར། །མ་རིག་མུན་པ་ལྟ་བུ་ལ། །རིག་པའི་དབང་ཆེན་བཀའ་སྩལ་པ། །དེ་ཡང་དབང་པོའི་དཔེ་བསྟན་པ། །བྲམ་ཟེ་གཙང་མས་ཁྲུས་གསོལ་ཏེ། །རྒྱལ་སྲིད་དག་ལ་དབང་བསྐུར་ཞིང་། །དོན་གྱི་ཟིལ་མནན་རང་བྱུང་འཚལ། །དེ་དོན་ཤེས་པ་དྲང་ཐད་ཀྱི། །འདུས་མ་བྱས་ཀྱི་ནམ་མཁའ་ལ། །རང་གི་ཚད་དང་ལྡན་པ་ལ། །སེམས་ནི་དྲག་ཏུ་གཏད་པར་བྱ། །དཔེར་ན་གྱི་ལིང་རྟ་འདུལ་བཞིན། །རང་གི་ཤེས་པ་མ་ཡེངས་བཞིན། །དྲག་ཞན་བར་ནས་རྩོལ་བ་འདོན། །ཆད་ཟིན་དོན་ལ་གནས་པར་བྱ། །དེ་ཡང་ཁམས་དང་སྦྱར་བྱས་ནས། །ཁམས་བདེ་ཐུན་ནི་རིང་བར་བྱ། །མི་བདེ་ཐུན་ནི་ཐུང་བར་བྱ། །ཡང་ན་ལངས་ལ་ཅུང་ཟད་བཅག །རྟགས་ནི་ལུས་སེམས་གཉིས་འབྱུང་སྟེ། །ལུས་ནི་འདར་ཞིང་མཆི་མ་འབྱུང་། །སེམས་ནི་བདེ་ཞིང་དངས་དགའ་སྟེ། །ཏིང་འཛིན་རྩལ་གྱིས་རྟགས་རྣམས་འབྱུང་། །རྟོག་པ་མེད་པར་གནས་པ་ནི། །བྱ་བ་བཏང་བའི་སྐྱེས་བུ་བཞིན། །མ་ཡེངས་གསལ་ལ་ལྷུག་པར་བཞག །རྒོད་ན་ནམ་མཁའི་སྤྲིན་བཞིན་དུ། །བྱུང་ཡང་གཞི་ལ་གནོད་མེད་ལྟར། །སེམས་ཀྱི་ཚོལ་བ་ཚང་ཟིན་ན། །རྟོག་པ་མི་བསྒྲིམ་བཅོས་མི་དགོས། །དེ་ཡི་བསྒོམ་ཉམས་བསྟན་པ་ནི། །དམིགས་པའི་དོན་ལ་སེམས་གནས་ཀྱང་། །ཤེས་པ་གཏད་དུ་མི་ཆུད་པས། །ཡུལ་ལ་མི་རྟོག་བདེ་བར་གནས། །ཞེན་པའི་རྟོག་པ་སྐྱེས་ན་ཡང་། །བ་མོ་ལ་ནི་ཉི་ཤར་བཞིན། །རྗེས་སུ་མི་འདྲེང་ལྷན་གྱིས་འགྲོ། །དེ་ཚེ་གཞི་ལ་ཡིད་ཆེས་འབྱུང་། །དེ་དུས་ཉིད་དུ་སེམས་ཉམས་ནི། །སྣང་མེད་འཁྲུལ་སྣང་ལོག་ཙ་ན། །སྣང་བཅས་ཏིང་འཛིན་དོན་ཟིན་ཉམས། །དེ་ཉིད་གོམས་པའི་ལམ་དུ་བདེ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མཚན་མ་ཟིལ་གྱིས་གནོན་པའི་བསྒོམ་ ― DNG002_Page_0089 ―
[མ་དཔེ་གཟིགས་ན་འདིར་གནོན།]
པའི་ལེའུ་སྟེ་རེ་གསུམ་པའོ།། །།དེ་ནས་ཀུན་རིག་སྟོན་པ་ཡིས། །འགྲོ་དྲུག་གཡང་ས་བཅད་པའི་ཕྱིར། །རྩ་བ་སེམས་ལས་འདས་པའི་ཕྱིར། །ཡེ་ཤེས་ངོས་བཟུང་བཀའ་སྩལ་པ། །ཀུན་གཞི་གཞི་ཆ་ངོ་བོ་ལ། །ཆོས་སྐུ་ངོས་བཟུང་མཐུན་དཔེ་ནི། །རྩ་ཆུ་བརྟགས་ནས་ངོས་བཟུང་པའི། །སྨན་པ་མཁས་པའི་དཔེ་བཞིན་དང་། །ནོར་བུ་ཆུ་འདངས་དཔེ་བཞིན་ནོ། །བྱང་ཆུབ་སེམས་ཀྱི་རིག་པའི་དོན། །སྔ་མ་འཕྲོ་བ་ཡིད་ཡིན་ཏེ། །ཕྱི་མ་སྐྱེས་པ་ཉོན་མོངས་ཡིན། །སྒོ་ལྔ་སྐྱེས་པ་རྟོག་པའི་ཡིད། །དམིགས་འཛིན་མེད་པ་ངང་གིས་གསལ། །གཉུག་མར་གནས་ལ་འཕེལ་འགྲིབ་མེད། །ཡེ་ཤེས་ཟང་ཐལ་འདི་ཡིན་ཏེ། །རང་གི་ངོ་བོ་ཆོས་ཀྱི་སྐུ། །ཤེས་པ་བཅོས་མེད་དྲང་པོར་གནས། །དཔེར་ན་ཐི་བུ་ཚང་འཇུག་བཞིན། །རང་གི་ཤེས་པ་ཆོས་སྐུ་ལ། །བསྒོམ་དུ་མེད་པའི་དགོངས་བྱའོ། །དེ་དོན་རྟོགས་ན་དངས་ཤིང་བདེ། །ཤེས་པ་མི་འགྱུར་དཀྲིར་མི་འདོད། །ཆུ་ལས་མི་འདའ་ཉ་བཞིན་དུ། །དོན་ལས་མི་འདའ་ཆོས་ཉིད་རྟགས། །དེ་རྟགས་ལྡན་པའི་རྣལ་འབྱོར་པས། །རྒྱལ་པོའི་མངའ་བྱེད་བཙུན་མོ་བཞིན། །སྔ་ཕྱི་གཉིས་པོ་སྐྱེས་པའི་ཚེ། །དེ་རྗེས་མི་གཅོད་ཆོས་ཀྱི་སྐུ། །འཕྲོ་ན་རྐུན་པོ་ཚོར་མ་ཐག །མ་བསྐྲད་རང་བཞིན་བྲོས་པ་ལྟར། །རང་བྱུང་རྩོལ་བ་མེད་པ་ལ། །མི་གཡོ་མཉམ་པའི་དོན་ལ་བཞག །དེ་དོན་རྟོགས་པའི་རྣལ་འབྱོར་པས། །ཤིང་བལ་ལྟ་བུར་ལུས་ཡང་ཞིང་། །ཕྱི་ནང་འབྱུང་འཇུག་དབུགས་རྣམས་སྙོམས། །ཆོས་རྣམས་བདེ་ཆེན་གསང་བའི་ཉམས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འགྲོ་དྲུག་གཡང་ས་བཅད་པའི་བསྒོམ་པ་བསྟན་པའི་ལེའུ་སྟེ་རེ་བཞི་པའོ།། །།དེ་ནས་ཀུན་རིག་སྟོན་པ་ཡིས། །བསྒོམ་པ་རྒྱུན་གྱི་རྩ་བའི་དོན། །རང་བྱུང་ཆོས་སྐུ་གསལ་བའི་དོན། །ཡེ་ཤེས་འབྲལ་མེད་བཀའ་སྩལ་པ། །ཐིག་ལེ་གཅིག་ཏུ་རྫོགས་པ་ཡི། །ཡེ་ཤེས་ཆེན་པོའི་ ― DNG002_Page_0090 ―
[མ་དཔེ་གཟིགས་ན་འདིར་གནོན།]
མཐུན་དཔེ་ནི། །རང་བྱུང་ངོ་བོ་ཉིད་ཁྱབ་ཕྱིར། །མཐའ་དབུས་མེད་པས་ནམ་མཁའ་འདྲ། །དེ་དོན་རང་བྱུང་ཡེ་ཤེས་གསལ། །སྣང་སྲིད་གསལ་བའི་སྒོ་ལྔ་ནི། །རྟོག་པ་གསལ་བ་ཆོས་ཀྱི་སྐུ། །འཛིན་པ་མེད་པར་ལྷུན་གྱིས་གྲུབ། །ཁྱུང་ཆེན་ནམ་མཁར་ལྡིང་བའི་ཚེ། །འཕུར་རླབས་འོག་ཏུ་ཀུན་ཚུད་ལྟར། །ངེས་དོན་རྟོགས་པས་སྐུ་གསུམ་རྫོགས། །འབྱུང་འཇུག་མེད་པར་གནས་པར་བྱ། །ཇི་བཞིན་ཉམས་ཀྱི་གནས་ལུགས་ནི། །རྣམ་པར་མི་རྟོག་ས་ལེ་བ། །ས་ལེ་གསལ་ལ་རྟོག་པ་མེད། །དེ་ནི་རང་བྱུང་ཡེ་ཤེས་ཡིན། །ནོར་བུ་རིན་ཆེན་ཡོན་ཏན་ལ། །དགོས་འདོད་ཐམས་ཅད་ཤུགས་ཀྱིས་འབྱུང་། །དེ་བཞིན་ཡེ་ཤེས་ངོས་ཟིན་ན། །བྱིང་རྒོད་མི་འབྱུང་ཆོས་ཉིད་གསལ། །དཔེར་ན་དུག་ལ་སྔགས་བཏབ་པས། །ནད་རྣམས་སེལ་ཞིང་སྨན་འགྱུར་ལྟར། །ཆགས་སྡང་དུག་སོགས་དུག་རྣམས་ལ། །ཆོས་ཉིད་གསལ་ཐེབས་རང་སར་གྲོལ། །དེ་རྟགས་སྒྲ་ཐོས་རྨི་ལམ་བཟང་། །གཟུགས་རྣམས་མཐོང་ཞིང་བསྐོར་བ་བྱེད། །བདུད་རྩི་འདྲེན་ཞིང་ཆོས་སྟོན་པ། །བདུད་ཀྱི་ཆོ་འཕྲུལ་བཅོ་བརྒྱད་འབྱུང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་འབྲལ་མེད་ཀྱི་དགོངས་པ་བསྟན་པའི་ལེའུ་སྟེ་རེ་ལྔ་པའོ།། །།དེ་ནས་ཀུན་རིག་སྟོན་པ་ཡིས། །བསྒོམ་ཉམས་རིམ་པར་འབྱུང་བ་ནི། །འདུས་པའི་འཁོར་ལ་བཀའ་སྩལ་པ། །གནས་དང་མི་གཡོ་མཉམ་པ་ཉིད། །འབྲས་བུ་ཡེ་ཤེས་ཡོན་ཏན་ནི། །ང་ཡིས་བསྟན་གྱིས་ལེགས་པར་ཉོན། །དང་པོ་གནས་པའི་ཏིང་འཛིན་ནི། །གོལ་སྒྲིབ་རྟོག་ཞེན་སྤང་ནས་ནི། །ལུས་ཀྱི་དགོན་པར་སེམས་བཞག་པས། །རང་རིག་ཡེ་ཤེས་ངང་དུ་གནས། །དཔེར་ན་འཇིགས་མེད་ལམ་བགྲོད་ཀྱང་། །རང་ལུས་དང་འདྲ་ཉམ་ང་མེད། །དེ་བཞིན་ཆོས་ཉིད་རང་གནས་པས། །རེ་དོགས་གོལ་སྒྲིབ་མེད་པར་གནས། ། ― DNG002_Page_0091 ―
[མ་དཔེ་གཟིགས་ན་འདིར་གནོན།]
ཕྱི་དྲོད་ཡུལ་དང་ཁ་དོག་རྫོགས། །མཚན་མའི་ཞེན་པ་མི་སྐྱེ་ན། །ཆགས་བྲལ་ཆོས་དབྱིངས་དྲོད་ཅེས་བྱ། །ཕྱི་རྟགས་ཡུལ་དྲུག་མ་ཞེན་པར། །ཞིང་ཁམས་མཐོང་དང་དབང་བསྐུར་དང་། །ཆོས་བསྟན་འོད་ཀྱིས་གང་བར་འབྱུང་། །དེ་ཚེ་འཁོར་བའི་ཞེན་པ་ལྡོག །འབྲས་བུ་རྣལ་འབྱོར་ཚེ་འཕོས་ཏེ། །རིགས་བཙུན་མི་ལུས་ཐོབ་ནས་ནི། །ལུང་ལྡན་རྐྱེན་འཕྲད་ཤེས་པ་འཆར། །དེ་ཚེ་ཆོས་སྐུའི་བདེན་པ་མཐོང་། །ད་ཡང་འདུས་པའི་སྙིང་པོ་ཉོན། །ལྷག་མཐོང་རིག་པའི་ངང་བཞག་ཚེ། །སྔ་ཕྱི་གོལ་སྒྲིབ་རང་དེངས་ནས། །ཡེ་ཤེས་རང་ཤར་དོན་དང་ལྡན། །ཉིན་མཚན་འདས་ཀྱི་བར་དོར་གནས། །ངང་ལ་གནས་པའི་མཐུན་དཔེ་ནི། །མ་བསྐྱོད་རྒྱ་མཚོ་དངས་པ་དང་། །གསལ་ལ་མི་གཡོ་མར་མེ་འདྲ། །རང་བྱུང་རིག་པའི་ཆོས་ཉིད་གསལ། །ནང་དྲོད་ཡེ་ཤེས་རང་སར་གནས། །ཐེ་ཚོམ་བྱུང་ཚོར་རྐྱེན་དང་བྲལ། །དེ་ཡི་ངང་དུ་ཉོན་མོངས་དེངས། །ཉིན་མཚན་འདས་པའི་རྟོག་པ་མེད། །ནང་རྟགས་མངོན་ཤེས་དྲུག་འབྱུང་ནས། །ཟས་ནོར་ཆགས་ཆུང་ཉོན་མོངས་མེད། །སྙིང་རྗེ་ཕན་སེམས་རབ་ཏུ་ལྡན། །ལྷས་བསྟན་རྨི་ལམ་བཟང་པོ་འབྱུང་། །རྣལ་འབྱོར་ཆོས་ཉིད་དབང་ཐོབ་མི། །འབྱུང་བ་རིམ་ཐིམ་ཤི་བའི་ཚེ། །ཚེ་སྟོད་ཚངས་རིས་ལྷར་སྐྱེས་ནས། །ཚེ་དེ་ཉིད་ལ་མངོན་འཚང་རྒྱ། །ད་ཡང་འདུས་པའི་སྙིང་པོ་ཉོན། །འཁོར་བ་མྱ་ངན་འདས་པའི་ཆོས། །ཇི་ལྟ་བུར་ཀྱང་མི་གཟིགས་ཏེ། །ཐམས་ཅད་ཡེ་ཤེས་ཉིད་དུ་གསལ། །ལོ་ཟླ་ཐུན་མཚམས་མེད་པར་གནས། །རང་རིག་ཆོས་སྐུ་བལྟ་རུ་ཡོད། །གཟུང་དུ་མེད་པས་ཆུ་ཟླ་འདྲ། །ཆོས་སྐུ་མཉམ་པ་ཉིད་དེ་ནི། །ཁྱུང་ལྡིངས་ཉམ་ང་མེད་པ་འདྲ། །གསང་བའི་དྲོད་ནི་ཡེ་ཤེས་སྟེ། །གཅིག་པུར་འདུག་ཀྱང་སྐྱོ་བ་མེད། །ཆོས་བརྒྱད་ཆོས་སྐུར་ཤེས་པའི་ཕྱིར། །འཇིག་རྟེན་འདྲེ་ཡིས་གནོད་མི་ནུས། །གསང་བའི་རྟགས་ནི་མ་འཁྲུལ་པ། །ཚོར་བ་བདེ་སྡུག་བཏང་སྙོམས་ལ། །རྐྱེན་ནི་གར་བྱུང་ཆོས་སྐུར་ཤེས། །དེ་ཕྱིར་ཡེ་ཤེས་གཏང་བཞག་ ― DNG002_Page_0092 ―
[མ་དཔེ་གཟིགས་ན་འདིར་གནོན།]
མེད། །འབྲས་བུ་རང་གི་ངོ་བོ་ལ། །ས་ལམ་མ་བགྲོད་སྒྲིབ་པ་དག །རྟོགས་པ་མངོན་གྱུར་ཡེ་ཤེས་ཀྱི། །བར་དོར་ཐོགས་མེད་མངོན་སངས་རྒྱས། །ད་ཡང་འདུས་པའི་སྙིང་པོ་ཉོན། །སངས་རྒྱས་ས་ཡིས་བཅིངས་ན་ནི། །རྣམ་སྨིན་ལུས་མེད་ཡེ་ཤེས་སྐུ། །ཡེ་ཤེས་རིག་པ་ཁ་མིག་ཅན། །ཐམས་ཅད་མཁྱེན་པའི་ཆོས་སྐུ་གནས། །མཐུན་དཔེ་གཟའ་སྐར་ཤར་བ་ནི། །རྒྱ་མཚོའི་ནང་དུ་གཟུགས་བརྙན་འབྱུང་། །དེ་བཞིན་ཆོས་སྐུ་གཅིག་པུ་ལ། །དྲོད་རྟགས་གཟུགས་སྐུ་རྣམ་གཉིས་འབྱུང་། །འབྲས་བུ་སངས་རྒྱས་ཡོན་ཏན་ནི། །བརྗོད་དུ་མེད་ལ་བསམ་མི་ཁྱབ། །གཞི་དང་འཕྲད་པས་སྐྱེ་འཆི་མེད། །དེ་ཕྱིར་སངས་རྒྱས་ཡང་དག་ཡོད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསྒོམ་པའི་ཉམས་བསྟན་པའི་ལེའུ་སྟེ་རེ་དྲུག་པའོ། །སྡོམ་དུ་བསྡུས་ཏེ་བསྟན་པ་བཅུ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་སྟོན་པ་ཆོས་རྗེ་ལ། །བདེན་པའི་ཡིད་ཀྱིས་འདི་སྐད་གསོལ། །ངེས་དོན་རྟོགས་པའི་རྣལ་འབྱོར་པས། །དེ་ཁོ་ན་ཉིད་ཇི་ལྟར་སྤྱོད། །ཕྱི་ནང་སྒྲོ་འདོགས་ཆོས་སྤྱོད་གང་། །རྣམ་པར་རྟོག་པ་ཇི་ལྟར་གཞོམ། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལ་ཟློ་སྤྱོད་པ་བཀའ་སྩལ་པ། །ཡིད་ལ་ཟུང་ལ་ངེས་པར་སྤྱོད། །དེ་དོན་ངེས་པར་དབྱེ་བ་ནི། །ལུས་ངག་ཡིད་ཀྱིས་ཆོས་ཀྱི་ནི། །དེ་ཁོ་ན་ཉིད་ལ་དམིགས་པའོ། །སྤྱོད་པ་ལ་ཟློ་ཡིན་པར་གསུངས། །ད་ཡང་འདུས་པའི་སྙིང་པོ་ཉོན། །ལུས་ངག་རིག་པ་ཟོ་ཐུབ་ལ། །སྒོ་ལྔ་ཡུལ་ལ་མི་འཇུག་སྟེ། །རང་རིག་དགོན་པར་གསལ་བ་ཡིས། །རྒྱུན་དུ་འབྲལ་མེད་གནས་དེ་ན། །ལུས་ཀྱི་སྐྱོན་གསུམ་རང་སར་གྲོལ། །དེ་ཚེ་གཡེངས་པ་མི་འབྱུང་བར། །གོལ་མེད་ཆོས་སྐུ་ཡེ་ཤེས་ལྡན། །རང་ཉིད་གར་འདུག་དགོན་པར་ཤེས། །རྒྱལ་པོས་གདན་ས་འཛིན་པ་འདྲ། ། ― DNG002_Page_0093 ―
[མ་དཔེ་གཟིགས་ན་འདིར་གནོན།]
གང་ན་གནས་པ་ཆོས་དབྱིངས་ལ། །ཞེན་ཆགས་ཀྱིས་ནི་བདུད་དང་བྲལ། །མཚམས་གཅོད་མེད་པས་ནམ་མཁའ་འདྲ། །ལུས་ཀྱི་དེ་ཉིད་སྤྱོད་པར་གསུངས། །དེ་ཡང་འདུས་པའི་སྙིང་པོ་ཉོན། །ངེས་ལུང་གདམས་ངག་ཁོང་ཆུད་ནས། །ངག་གི་སྨྲ་བ་ཉུང་བྱས་ཏེ། །འཇིག་རྟེན་གཏམ་ལ་མ་ཡེངས་པར། །ངག་གི་སྐྱོན་བཞི་རང་སར་གྲོལ། །མི་སྨྲ་དགོས་པ་གསུམ་ཡོད་ཕྱིར། །ངག་གི་དེ་ཉིད་སྤྱོད་པ་སྟེ། །སྡིག་པ་བཞིན་དུ་སྨྲ་མི་བྱ། །སྨྲ་བཅད་མཚམས་ཀྱི་དམ་པར་གསུངས། །ཞུས་འཆད་དོན་བསྟན་མི་འགལ་བར། །ཆོས་དང་མཐུན་པར་བླ་མས་གསུངས། །སྐབས་ལ་ཕོག་པའི་དུས་དག་ལས། །གཞན་དུ་སྨྲ་བར་མི་བྱའོ། །ད་ཡང་རྡོ་རྗེ་སེམས་དཔའ་ཉོན། །ལུང་ལྡན་ངེས་པའི་གདེང་གིས་ནི། །ཤེས་རབ་རྣམ་གསུམ་ཡིད་ཆེས་པས། །རྣམ་རྟོག་ཐ་མལ་རྒྱུ་མེད་པས། །ཡིད་ལ་གང་དྲན་ཆོས་སྐུར་ཤེས། །ལྷག་མཐོང་རིག་པས་རང་བལྟས་པས། །འབྲལ་མེད་མི་བརྗེད་གཟུངས་དང་ལྡན། །སྐྱོན་ཡོན་གསུམ་ནི་རང་སར་གྲོལ། །ནགས་ཀྱི་རི་དགས་བག་ཕེབས་འདྲ། །དེ་ཚེ་འཇིག་རྟེན་འཁྲུལ་མེད་འདྲ། །ཆོས་ཉིད་ཆོས་སྐུ་རིག་པ་གསལ། །མ་རིག་བྲལ་བའི་ལྷག་མཐོང་ལ། །ཡིད་དེ་ཁོ་ནར་སྤྱོད་པར་བཤད། །ད་ཡང་འཁོར་གྱི་སྙིང་པོ་ཉོན། །ངེས་པའི་རྒྱུད་ལུང་མན་ངག་ཆོས། །གདེང་ལྡན་ཉམས་སུ་ལེན་པ་ཡི། །སངས་རྒྱས་དངོས་ཡིན་ང་ཡི་བཀའ། །ཆོས་ཀྱི་མཁའ་ལ་སྤྱོད་པ་ཡིན། །མི་མ་ཡིན་དང་ལྷ་ཀུན་གྱིས། །ཡིད་བཞིན་རིན་ཆེན་ལྟ་བུར་མཐོང་། །དེ་བཞིན་བླ་མའི་གདམས་ངག་འདི། །སྣོད་མེད་ཀུན་ལ་མི་སྦྱིན་ནོ། །རིན་ཆེན་ནོར་རྙེད་གསང་བ་བཞིན། །ཆོས་ཀྱི་སྐུ་ཉིད་སྙིང་པོ་འདི། །ཤིན་ཏུ་སྦས་ན་དངོས་གྲུབ་ཐོབ། །རིག་འཛིན་གོང་མས་བྱིན་གྱིས་རློབས། །མཁའ་འགྲོས་ལས་བྱེད་ཅི་བསམ་འགྲུབ། །ཆོས་ལ་དམིགས་པའི་སྤྱོད་པ་ཡིས། །རྒྱལ་བ་ཀུན་དང་དགོངས་པ་གཅིག །དེ་ཕྱིར་ལ་ཟློའི་སྤྱོད་པར་གསུངས། །རྫོགས་པ་ཆེན་པོ་ངེས་དོན་ཐམས་ཅད་ ― DNG002_Page_0094 ―
[མ་དཔེ་གཟིགས་ན་འདིར་གནོན།]
འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དེ་ཁོ་ན་ཉིད་དམིགས་པའི་སྤྱོད་པ་བསྟན་པའི་ལེའུ་སྟེ་རེ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །སྒྲོ་འདོགས་སྤྱོད་པ་ཆེན་པོ་ནི། །ཕྱི་ནང་གཉིས་མེད་ལུང་གིས་ནི། །སྒྲོ་འདོགས་གཅོད་པའི་ཐབས་ཀྱི་དོན། །ལུང་ལྡན་ཆོས་འདི་ངེས་པར་སྤྱོད། །ད་ཡང་འདུས་པའི་སྙིང་པོ་ཉོན། །ཕྱི་ཡི་སྒྲོ་འདོགས་གཅོད་པའི་ཕྱིར། །སྣང་བའི་ཡུལ་ལ་བློས་བརྟགས་པས། །མ་རིག་བག་ཆགས་བརྟས་པ་ལ། །གཞི་ལ་ཡུལ་ནི་གྲུབ་པ་མེད། །དེ་ཕྱིར་ལུང་ལྡན་གདམས་ངག་གིས། །མ་རིག་མེད་པར་ཐག་ཆོད་པས། །ཡུལ་གྱི་ཞེན་པ་དང་བྲལ་ན། །གང་ལ་འཛིན་པའི་བློ་མི་འཇུག །དྲེད་མོང་གདོས་ཐག་བཅད་པ་འདྲ། །ཡུལ་ནི་ཡོད་མེད་མཐའ་དབུས་བྲལ། །དེ་ཡིས་ཉམས་སུ་མྱོང་བ་བཞིན། །ཆུ་ནང་གཟུགས་བརྙན་སྨིག་རྒྱུ་བཞིན། །སྣང་ཡང་ཞེན་པའི་བློ་མི་འཇུག །རྣལ་འབྱོར་ཡུལ་གྱི་སྒྲོས་མི་གདགས། །གང་ལྟར་ཡོད་ཀྱང་དབྱིངས་ལ་སྦྱོར། །དེ་ཕྱིར་གོལ་མེད་ཀློང་ན་འཕྱོ། །ཕྱི་ཡི་སྒྲོ་འདོགས་ཆོད་ཅེས་བྱ། །ད་ཡང་རྡོ་རྗེ་སེམས་དཔའ་ཉོན། །རང་གི་ཡིད་ཀྱིས་སེམས་བཙལ་བས། །ཡང་དག་ཡིད་ཀྱིས་མཐོང་བ་མེད། །ཅི་ཡང་ཆ་མེད་ལུང་མ་བསྟན། །ཚོགས་བརྒྱད་མེད་ཅེས་སྒྲོ་འདོགས་ཆོད། །མི་ཤི་སླར་ལ་མི་ལྡོག་འདྲ། །དེ་ཉིད་ལུང་ལྡན་བསྟན་ཙམ་ན། །ཆོས་ཉིད་ཡིན་ཕྱིར་ལྟུང་མི་སྲིད། །དེ་ཕྱིར་སེམས་ཀྱི་ཡུལ་ལས་འདས། །དེ་དོན་རང་བྱུང་རིག་པ་འདི། །ཆོས་སྐུར་གཞན་ལ་ཞེན་མེད་པས། །ནང་གི་སྒྲོ་འདོགས་ཆོད་པའི་ཕྱིར། །སྤྱོད་པ་ཀུན་གྱི་མཆོག་ཏུ་གསུངས། །ད་ཡང་འདུས་པའི་སྙིང་པོ་ཉོན། །ཡུལ་སེམས་གཉིས་མེད་སྤྱོད་པ་ནི། །གཞི་ཉིད་ལུང་ལྡན་ངེས་པ་ཡིས། །རང་བྱུང་ཆོས་སྐུའི་དོན་ཤེས་པས། །ཀུན་བརྟགས་མ་རིག་མེད་པ་ཡིས། །ཡུལ་སེམས་གཉིས་ལ་བརྟགས་པ་ལས། །ཞེན་པའི་བག་ཆགས་རྟེན་མེད་སྟོང་། །འཁོར་འདས་ ― DNG002_Page_0095 ―
[མ་དཔེ་གཟིགས་ན་འདིར་གནོན།]
ཀ་ནས་མེད་རྟོགས་ཕྱིར། །འཇིགས་པའི་རྨི་ལམ་སད་པ་འདྲ། །ལྷན་ཅིག་མ་རིག་མེད་པའི་ཕྱིར། །ཀུན་གཞི་སྐྱེད་པའི་སེམས་དང་བྲལ། །སེམས་མེད་ཡུལ་འདི་གཏན་དུ་སྟོངས། །མེ་མེད་དུ་བ་མེད་པ་འདྲ། །ངོ་བོ་ཉིད་ཀྱི་གཞི་རྟོགས་ན། །ཡུལ་སེམས་དུས་གསུམ་མེད་པ་སྟེ། །གང་ཡང་མེད་པའི་མངོན་དུ་བྱུང་། །རང་བྱུང་སྒྲོ་འདོགས་ཆོད་པ་ཡིས། །ཡེ་ཤེས་ཆེན་པོ་སྤྱོད་པར་གསུངས། །ད་ཡང་འཁོར་རྣམས་ཡིད་ཀྱིས་ཉོན། །ངེས་ལུང་བཀའ་ལས་གསུངས་པ་ཡི། །དྲང་དོན་ལུང་གི་དགེ་སྡིག་གཉིས། །བསྐྱེད་རིམ་ལྷ་བསྒོམ་དྲང་དོན་ཏེ། །དྲང་དོན་མདོ་རྒྱུད་ལྡེམ་དགོངས་ཀྱིས། །དོན་ལ་སྒྲོ་བཏགས་ཆོས་ཉིད་མིན། །ངེས་དོན་ལུང་གིས་སུན་བཏོན་ཕྱིར། །གོལ་སྒྲིབ་མེད་པར་ཐེ་ཚོམ་ཆོད། །ངེས་དོན་ལུང་གིས་གཏན་ཕབས་པས། །མ་རིག་མེད་ཕྱིར་རྒྱུ་འབྲས་མེད། །མ་རིག་ཀུན་གཞིའི་མུན་གསེབ་ནས། །ཆོས་སྐུ་རྙེད་པས་མུན་པ་སངས། །རྟོགས་པ་མངོན་འགྱུར་སངས་རྒྱས་འབྱུང་། །རིན་ཆེན་སྟོར་བ་སླར་རྙེད་འདྲ། །དེ་ཕྱིར་རང་ལ་དད་པ་སྐྱེས། །དུས་དང་རྣམ་པ་ཐམས་ཅད་དུ། །ཆོས་ཀྱི་སྐུ་དང་འབྲལ་མེད་པས། །མཚན་མ་ལུང་གི་སྒྲོ་འདོགས་ཆོད། །ལུང་དང་རིགས་པ་མཐུན་པར་སྤྱོད། །རྫོགས་པ་ཆེན་པོ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྒྲོ་འདོགས་གཅོད་པའི་སྤྱོད་པ་བསྟན་པའི་ལེའུ་སྟེ་རེ་བརྒྱད་པའོ།། །།དེ་ནས་ཀུན་རིག་སྟོན་པ་ཡིས། །དད་ལྡན་འདུས་པའི་འཁོར་རྣམས་ལ། །རྣལ་འབྱོར་ཞེན་པ་ལྡོག་པའི་ཕྱིར། །རྟོག་འཇོམས་སྤྱོད་པ་བཀའ་སྩལ་པ། །ཟས་གོས་དགྲ་གཉེན་འཁོར་བའི་ཆོས། །དེ་ལ་ཞེན་ལོག་བྱ་བའི་ཕྱིར། །སྤྱོད་པ་མ་ཆགས་བརྟུལ་ཞུགས་ཀྱིས། །རྟོག་མེད་སྤྱོད་པ་ཆེད་དུ་བྱ། །ད་ཡང་འདུས་པའི་སྙིང་པོ་ཉོན། །ཟས་ཀྱི་རྟོག་པ་གཞོམ་པའི་ཕྱིར། །གཙང་དང་མི་གཙང་མེད་པར་ཡང་། །བབ་འབགས་སྨེ་གཙང་མ་སྨེ་རུ། །ཁྱི་བོང་ཤ་དང་མཛེ་ཤ་དང་། །རུལ་དང་བཤང་གཅི་ལ་སོགས་པ། །ཚམ་ཚོམ་རྟོག་པ་མེད་བཞིན་ཟ། །ངན་རྟོག་སྐྱུགས་བྲོ་སྙམ་བྱེད་ན། །བརྟུལ་ཞུགས་བསྐྱེད་ལ་ཆེད་དུ་བཟའ། །དེ་ཟོས་ཡོན་ཏན་ ― DNG002_Page_0096 ―
[མ་དཔེ་གཟིགས་ན་འདིར་གནོན།]
དྲུག་འབྱུང་ཞིང་། །ཟས་ཀྱི་རྣམ་རྟོག་ཆེད་དུ་གཞོམ། །མདོར་ན་ཞིམ་དང་མི་ཞིམ་དང་། །གང་ལ་རྟོག་མེད་གོམས་པར་བྱ། །དེ་གོམས་བླང་དོར་མེད་ངོས་ཀྱིས། །ཟས་ཀྱི་རྟོག་པ་གཞོམ་པར་བྱ། །ད་ཡང་འདུས་པའི་སྙིང་པོ་ཉོན། །གོས་ཀྱི་རྟོག་པ་གཞོམ་པའི་ཕྱིར། །ཁྱི་ཐུལ་རྩི་བོར་ཕྱག་དར་ཁྲོད། །རད་རོད་ཤིང་ཤུན་ལ་སོགས་པའི། །ཁ་དོག་དབྱིབས་ནི་མི་སྡུག་པ། །ཞེན་པ་བཟློག་ཕྱིར་སྣ་ཚོགས་གོས། །ངོ་ཚ་ཡ་ང་མེད་པར་ནི། །མི་སྡུག་བགོ་བས་བརྒྱན་པར་བྱ། །སྨྱོན་པ་བཞིན་དུ་རྟོག་པ་གཞོམ། །བླང་དོར་མེད་པའི་གོས་གོན་ན། །ཡོན་ཏན་ལྔ་ཡོད་ཏིང་འཛིན་གྲོགས། །དེ་སྤྱོད་གོས་ཀྱི་རྟོག་པ་ཆོམས། །ད་ཡང་རྡོ་རྗེ་སེམས་དཔའ་ཉོན། །དགྲ་གཉེན་རྟོག་པ་གཞོམ་པའི་ཕྱིར། །མ་དང་སྲིང་མོ་གང་ལ་ཡང་། །ངོ་ཚ་མེད་པར་ཆགས་སྤྱོད་པས། །གཉེན་ཀུན་བླ་འཚོང་ངོ་ཚར་སེམས། །འདི་ཀ་མེད་ན་ཤིར་རུང་སྙམ། །གཉེན་ཀུན་འཁོར་ངན་བདུད་ཀུན་ཆོམས། །ད་ཡང་རྡོ་རྗེ་སེམས་དཔའ་ཉོན། །དགྲ་ཀུན་སྙིང་རྗེའི་སར་མཐོང་བས། །ཕྲད་ཀྱང་མི་བརྡེག་གསོད་དང་བྲལ། །གྲི་བོ་གཤེད་ལ་འཁོར་བ་བཞིན། །སྤྱོད་པ་བྱེད་ཀྱང་ངན་ཐེག་འདྲ། །དེ་བྱས་དགྲ་གཉེན་ཉེ་རིང་མེད། །ཐམས་ཅད་བླང་དོར་མེད་ཤེས་པས། །དགྲ་གཉེན་གཉིས་ཀྱི་ཆགས་སྡང་བྲལ། །ད་ཡང་འདུས་པའི་སྙིང་པོ་ཉོན། །དེ་ལྟར་སྤྱོད་པ་ཆེད་བྱེད་པ། །མ་ཧཱ་མན་ཆད་སྤྱོད་པ་ཡིན། །རྟོག་པ་ཆེད་དུ་འཇོམས་པ་དེ། །རྫོགས་ཆེན་ཡང་ཏིའི་གོལ་སར་གསུངས། །དེ་སྤྱོད་ཚུལ་འཆོས་དོན་དང་ལྡན། །དེ་ཕྱིར་ཆེད་བྱ་མེད་པའི་མཆོག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྟོག་པ་འཇོམས་པའི་སྤྱོད་པ་བསྟན་པའི་ལེའུ་སྟེ་རེ་དགུ་པའོ། །སྡོམ་དུ་བསྡུས་ཏེ་བསྟན་པ་བཅོ་ལྔ་པའོ།། །།དེ་ནས་འཁོར་གྱི་དོན་ཆེད་དུ། །རྡོ་རྗེ་སེམས་དཔས་དོན་ཞུས་པ། །ཏིང་འཛིན་ཉམས་དང་ལྡན་པ་ཡི། །ལྟ་སྒོམ་སྤྱོད་པ་ཉམས་ཀྱི་བདུད། །རྣལ་འབྱོར་པ་ལ་འབྱུང་ལུགས་ནི། །མཉམ་པའི་ ― DNG002_Page_0097 ―
[མ་དཔེ་གཟིགས་ན་འདིར་གནོན།]
རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མཉམ་བཞག་རྗེས་ཐོབ་བར་དོ་ལ། །སྣང་བ་འོད་དང་གྲག་པ་སྒྲ། །འཇིགས་པ་གཟུགས་དང་བསླུ་བ་རྫུན། །རེ་རེ་ལ་ནི་དྲུག་དྲུག་ཏུ། །རྒྱུ་དང་ཞུགས་པ་ཉེས་དམིགས་རྣམས། །ཟིལ་གནོན་རྟོགས་དང་འབྲས་བུ་རྣམས། །ལྟ་བ་མ་ཤེས་བདུད་དུ་འབྱུང་། །ད་ཡང་འདུས་པའི་སྙིང་པོ་ཉོན། །སྣང་བ་འོད་ཀྱི་བདུད་བྱུང་ན། །ལྟ་མེད་མུན་ལས་འོད་བྱུང་བས། །དགེ་སྡིག་མཐོང་བས་སྙིང་རྗེ་ཞུགས། །འགྲོ་དོན་བྱ་མནོ་ཏིང་འཛིན་བཏང་། །དངོས་མེད་ལྷག་མཐོང་ཡོ་ག་དྲན། །གཞི་ལ་མེད་པས་གཞའ་ཚོན་འདྲ། །དམྱལ་བའི་གནས་ཀྱང་སངས་རྒྱས་ཞིང་། །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་རྣམ་པ་མཉམ་བཞག་ཚེ། །མཚན་མོ་མུན་ནག་སྤྲིན་རུམ་ནས། །ནམ་ལངས་ཉི་ཤར་ཤིན་ཏུ་གསལ། །ཉམ་ཆུང་འོད་གསལ་ཡིན་སྙམ་ནས། །རྣལ་འབྱོར་པ་ནི་ངར་འཕང་སྐྱེས། །དེ་ཚེ་འགྲོ་དྲུག་སེམས་ཅན་གྱིས། །དགེ་སྡིག་མ་ལུས་སྔ་ཕྱི་ཤེས། །འཁྲུལ་པའི་སྡུག་བསྔལ་སྣ་ཚོགས་མཐོང་། །དེ་ཚེ་སྙིང་རྗེའི་བདུད་ཞུགས་ཏེ། །སེམས་ཅན་སྙིང་རྗེ་གདུང་སེམས་སྐྱེ། །བྱམས་དང་སྙིང་རྗེ་བྱ་མནོ་ནས། །ཏིང་འཛིན་བཏང་ནས་གཞན་དོན་བྱེད། །དེ་ཕྱིར་གདེང་ལྡན་ཤེས་པ་དེས། །མཆི་མ་འདོན་ཅིང་སེམས་མི་དགའ། །ཏིང་འཛིན་བྲལ་ནས་ཤེས་པ་འཕྱོ། །དེ་ཕྱིར་བདུད་ཀྱི་དབང་གྱུར་ལྟུང་། །ད་ཡང་རྡོ་རྗེ་སེམས་དཔའ་ཉོན། །གྲག་པ་སྒྲ་ཡི་བདུད་བྱུང་གང་། །མཁའ་ལ་སྒྲ་དང་ཆོས་སྟོན་འབྱུང་། །དགའ་བས་ངོམས་ཤིང་ཏིང་འཛིན་བཏང་། །བཀའ་འགལ་ཆོས་བརྒྱད་འཁོར་བར་ལྟུང་། །ལྟ་བའི་རྩིས་ཟིན་སྒྲ་དང་བྲལ། །སྒྲ་བརྙན་བརྟག་མེད་རྗེས་མི་འབྲངས། །སྒྲར་གྲག་གསུང་གི་འཁོར་ལོར་བདེ། །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་དོན་ལ་གནས་པའི་ཚེ། །ནམ་མཁའ་སྟོང་པར་སྒྲ་བྱུང་ནས། །བདེ་གཤེགས་ཆོས་རྣམས་སྣ་ ― DNG002_Page_0098 ―
[མ་དཔེ་གཟིགས་ན་འདིར་གནོན།]
ཚོགས་སྟོན། །ཞིང་ཁམས་རྒྱན་གྱིས་བརྒྱན་པ་དང་། །ཡིད་དུ་འོང་བའི་སྒྲ་ཐོས་འགྱུར། །དེ་ཚེ་དགའ་བའི་བདུད་ཞུགས་ཏེ། །ཏིང་འཛིན་བཏང་ནས་གླུ་གར་བྱེད། །ངོམ་ཞིང་ངོ་མཚར་དགའ་སེམས་སྐྱེས། །མངོན་ཤེས་ཡོད་ཟེར་གཞན་ལ་སྨྲ། །དེ་ལ་ཞེན་པས་ཏིང་འཛིན་བྲལ། །དགའ་བའི་བདུད་ཀྱིས་བསླུས་པར་འགྱུར། །འཇིག་རྟེན་ཆོས་ལ་དམ་པར་གཟུང་། །བཀའ་དང་འགལ་ཀྱང་བདེན་པར་བྱེད། །གེགས་ཞུགས་ཕྱི་མ་འཁོར་བར་ལྟུང་། །ད་ཡང་རྡོ་རྗེ་སེམས་དཔའ་ཉོན། །འཇིགས་པ་གཟུགས་ཀྱི་བདུད་བྱུང་གང་། །རྨི་ལམ་དངོས་སུ་འཇིགས་པའི་གཟུགས། །མི་དགའ་དོན་བྲལ་མོ་ཆོག་བྱེད། །སེམས་ངན་ཚེ་ཐུང་ཡི་ཆད་ལྟུང་། །སྣང་གཟུགས་གཞི་ལ་མེད་པར་ཤེས། །སྙིང་པོ་མེད་ཅེས་ཉམ་མི་ང་། །དེ་ཉིད་ཐུབ་དྲུག་སྐུར་ཡང་མཐོང་། །ད་ཡང་འདུས་པའི་སྙིང་པོ་ཉོན། །བསྒོམ་ཉམས་རྨི་ལམ་གང་ཡང་རུང་། །ལྷ་བདུད་ལྟས་ངན་འབྱུང་གྱུར་ནས། །འཇིགས་པའི་གཟུགས་སོགས་མི་དགེ་བས། །རང་ལ་གནས་ནས་སྡིག་གྱུར་ཚེ། །མྱ་ངན་བདུད་ནི་ཁྱིམ་ཞུགས་ཏེ། །ཏིང་འཛིན་བཏང་ནས་མོ་ཆོག་བྱེད། །མི་དགའ་འཆི་བའི་སྡུག་བསྔལ་སྐྱེ། །དེ་བཞིན་ཆོས་ལ་ཡི་ཆད་འབྱུང་། །ལྟ་དམན་གཅེར་བུར་ཕག་ཏུ་རྒྱུག །ལྕེབས་དང་བསམ་ངན་སྣ་ཚོགས་ཀྱིས། །མི་དགེ་ལྟས་ངན་སྣ་ཚོགས་འོང་། །དེ་ཕྱིར་ཚེ་ཐུང་ངན་སོང་ལྟུང་། །ད་ཡང་རྡོ་རྗེ་སེམས་དཔའ་ཉོན། །བསླུ་བ་རྫུན་གྱི་བདུད་བྱུང་གྲང་། །དུས་གསུམ་ཉེས་ལེགས་སྟོན་པ་འབྱུང་། །བདེན་དང་མི་བདེན་ཐ་མ་རྫུན། །མངོན་ཤེས་རྡུགས་པས་ཞེ་སྡང་སྐྱེ། །ཚིག་ལས་འདས་ཕྱིར་རྫུན་མ་གྲུབ། །རྨི་ལམ་བཞིན་དུ་འཁྲུལ་པར་ཤེས། །དོན་རྟོགས་མི་མངའ་རྒྱལ་བའི་བཀའ། །ད་ཡང་རྡོ་རྗེ་སེམས་དཔའ་ཉོན། །ཉམས་དང་རྨི་ལམ་གང་ཡང་རུང་། །ཡིད་དུ་འོང་བའི་བདེན་ཚིག་གིས། །དུས་གསུམ་ཉེས་ལེགས་ཐམས་ཅད་སྟོན། །གཞན་ལ་སྨྲས་པས་བདེན་པ་འབྱུང་། །དེ་ཚེ་སླུ་བའི་བདུད་ཞུགས་ཏེ། །ལྷ་ཡི་ལུང་བསྟན་ཡིན་སྙམས་ནས། །ཏིང་འཛིན་བཏང་ ― DNG002_Page_0099 ―
[མ་དཔེ་གཟིགས་ན་འདིར་གནོན།]
ནས་གྲོང་ཁར་ཡན། །ཆོས་ཉིད་བྲལ་བས་རང་རྒྱུད་གོལ། །ཉམས་ཀྱིས་བསླུས་པ་ཕྱིར་གྱེས་ནས། །བར་དུ་ཕྱེད་བདེན་ཕྱེད་མི་བདེན། །ཐ་མར་སྨྲ་བ་ཐམས་ཅད་རྫུན། །དེ་ཕྱིར་གེགས་ཡིན་ངན་སོང་ལྟུང་། །ད་ཡང་འདུས་པའི་སྙིང་པོ་ཉོན། །ལྷ་ཡི་བདུད་ནི་དེ་དག་ཀྱང་། །ཡུལ་འདི་གོལ་སར་མ་ཤེས་ཕྱིར། །སྣང་བ་གཟུགས་སོགས་ཞེན་པ་སྟེ། །ཡུལ་ལ་སེམས་ཞུགས་ཅི་སྤྱད་བདུད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྟ་བའི་བདུད་བསྟན་པའི་ལེའུ་སྟེ་བདུན་ཅུ་པའོ།། །།ད་ཡང་རྡོ་རྗེ་སེམས་དཔའ་ཉོན། །སྒོ་ལྔ་བྱིང་བ་གསལ་བའི་བདུད། །དྲན་མེད་རྨུགས་པ་བདེ་བའི་བདུད། །རྐྱེན་གྱིས་རྒོད་པ་མི་རྟོག་བདུད། །འཕྲོ་བ་མི་གཡོའི་བདུད་རྣམས་བྱུང་། །ད་ཡང་རྡོ་རྗེ་སེམས་དཔའ་ཉོན། །བྱིང་བ་གསལ་བའི་བདུད་བྱུང་གང་། །དོན་མེད་ནན་ཏན་འབད་ནས་བསྒོམ། །མོས་པའི་དབང་གིས་གསལ་བར་བྱིང་། །གཉེན་པོ་གསལ་བའི་དོན་དང་བྲལ། །གཉིད་གསུམ་བསྲེས་པས་གཏི་མུག་རླབ། །ཆོས་ཉིད་ཀློང་དུ་གཉིད་ཐིམ་ཞེས། །སངས་རྒྱས་ཡེ་ཤེས་ཀློང་དུ་ཐིམ། །ད་ཡང་འདུས་པའི་སྙིང་པོ་ཉོན། །གདམས་ངག་མེད་པའི་དད་ལྡན་གྱིས། །ཏིང་འཛིན་མྱུར་དུ་འགྲུབ་འདོད་ནས། །ཡུན་རིང་བསྒོམ་པས་ཚོད་མ་ཟིན། །འབྱུང་བ་ཁམས་ཀྱི་སྐྱོན་བྱུང་སྟེ། །མོས་པའི་བདུད་ཞུགས་གསལ་བར་བྱིང་། །མ་རིག་དབང་གིས་གཉིད་བྱུང་སྟེ། །ཐ་མར་རྨི་ལམ་བཟང་ངན་བྱུང་། །རེ་དོགས་མཐར་ལྷུང་འཁོར་བར་འཁྱམས། །དེ་ལ་གཉེན་པོའི་ཆེད་བྱས་ནས། །གསལ་བར་འདོད་ན་བྱིང་བ་བསལ། །ཆེད་དུ་བྱས་པས་ཏིང་འཛིན་ཉམས། །མོས་པའི་དབང་གྱུར་བྱོལ་སོང་ལྟུང་། །ད་ཡང་རྡོ་རྗེ་སེམས་དཔའ་ཉོན། །རྨུགས་པ་བདེ་བའི་བདུད་བྱུང་ན། །ལུང་ལྡན་ཆོས་སྐུ་ངོས་མ་ཟིན། །ཤེས་པ་མུན་པ་ལྷག་མཐོང་མིན། །བསྒོམ་པར་བྱས་ཀྱང་གཏི་མུག་འཕེལ། །རང་རིག་དྲན་པའི་ཡེ་ཤེས་གསལ། །ལྟ་བས་ཟིན་ཕྱིར་བདེན་པར་ཤར། །འབྲས་བུ་ཡེ་ཤེས་འགྱུར་མེད་ཀློང་། ། ― DNG002_Page_0100 ―
[མ་དཔེ་གཟིགས་ན་འདིར་གནོན།]
ད་ཡང་རྡོ་རྗེ་སེམས་དཔའ་ཉོན། །རང་རིག་ཆོས་སྐུ་ངོས་མ་ཟིན། །ཡེ་ཤེས་ཆོས་སྐུ་མ་མཐོང་ཕྱིར། །མ་རིག་དབང་གིས་ཡེ་ཤེས་བསྒྲིབས། །དེ་ཕྱིར་ཀུན་གཞི་ལུང་མ་བསྟན། །དེ་ཚེ་དྲན་མེད་བདུད་ཞུགས་ཏེ། །དང་བསྒོམ་རྨུགས་པས་བདེ་བ་ཉམས། །ཤེས་པ་མུན་ལོང་ལྷག་མཐོང་བྲལ། །རང་རིག་མེད་པས་ཞི་གནས་བྱིང་། །ཇི་ཙམ་བསྒོམས་ཀྱང་དོན་དང་བྲལ། །སྡུག་བསྔལ་ཉིད་ལས་བདེ་བ་མེད། །མ་རིག་རྨོངས་པའི་བློ་ཡིས་ནི། །བསྒོམས་ཀྱང་དོན་མེད་བདུད་ཀྱིས་བསླུས། །དེ་ཕྱིར་ལུང་ལྡན་གདམས་ངག་གཅེས། །ད་ཡང་རྡོ་རྗེ་སེམས་དཔའ་ཉོན། །རྒོད་པ་མི་རྟོག་བདུད་བྱུང་ན། །གདམས་ངག་མེད་ཕྱིར་འདུ་སར་དགའ། །རང་དོན་བཏང་ནས་མི་ཆོས་བྱེད། །སྤང་སྡུད་ཞེན་པ་སྣ་ཚོགས་བྱེད། །སྔ་ཕྱི་རིག་པས་དོན་ཟིན་བྱེད། །བ་མོར་ཉི་ཤར་བཞིན་དུ་བཏང་། །གདེང་ཟིན་ཆོས་དབྱིངས་གནས་ཀྱི་མཆོག །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་དམ་པར་ཁས་འཆེས་ནས། །གཅིག་པུར་མི་དགའ་འདུ་ལ་དགའ། །ཆོས་བརྒྱད་དམ་པར་གཉེར་བའི་མི། །ཁ་ཚིག་ཙམ་ལ་ངེས་ཤེས་སྐྱེ། །གཞན་གྱིས་རྐྱེན་བྱས་བདུད་ཞུགས་ཏེ། །ཏིང་འཛིན་བཏང་ནས་ཡིན་མིན་གྱི། །ཡུལ་ལ་ཤེས་པ་སྣ་ཚོགས་ཞེན། །མི་རྟོག་མེད་པས་ཉོན་མོངས་རྒོད། །ཆོས་ལ་མི་བལྟ་གྲགས་པ་བསྒྲུབ། །སྤང་སྡུད་ཞེན་པས་རང་རྒྱུད་བྱེད། །ཏིང་ངེ་འཛིན་ལ་གོལ་བའི་ཕྱིར། །དེ་ཕྱིར་གཡེང་བའི་བདུད་ཀྱིས་བསླུས། །ད་ཡང་རྡོ་རྗེ་སེམས་དཔའ་ཉོན། །འཕྲོ་བ་མང་པོའི་བདུད་བྱུང་གང་། །དོན་ལ་གོམས་པར་མ་བྱས་པས། །རིག་ཚོར་དྲན་པ་ཕྲ་མོ་རྒྱུ། །དེ་དོན་རྐུན་བུ་ཡང་ཡང་སྡང་། །མི་བརྗེད་དྲན་པའི་གཟུངས་ཀྱིས་ཟིན། །རྣམ་རྟོག་རང་བཞིན་རིག་པ་གསལ། །ཐམས་ཅད་ཆོས་སྐུ་འབྲས་བུ་མཆོག །ད་ཡང་རྡོ་རྗེ་སེམས་དཔའ་ཉོན། །ལས་ནི་དང་པོའི་རྣལ་འབྱོར་པས། །ཡང་ཡང་གོམས་པར་མ་བྱས་ཤིང་། །ཞི་གནས་ལས་སུ་མ་རུངས་པས། །ཞེན་པ་རང་ལོག་ཉམས་དང་ ― DNG002_Page_0101 ―
[མ་དཔེ་གཟིགས་ན་འདིར་གནོན།]
བྲལ། །འཕྲོ་བ་རྐུན་བུའི་བདུད་ཞུགས་ཏེ། །གང་ཡང་རུང་བའི་ཚིག་རེ་ཙམ། །ཡིད་ལ་བྱས་པས་མི་གཡོ་བྲལ། །དེ་ཕྱིར་རང་རྒྱུད་སེམས་སུ་གོལ། །དད་པ་ཆུང་བས་གདམས་ངག་མེད། །ནན་ཏན་ཆུང་བས་ཉམས་དང་བྲལ། །མང་ཆད་རྐུན་བུ་ཡང་ཡང་ལྡང་། །ངེས་པའི་གདེང་དང་མ་ལྡན་ཕྱིར། །ཕྲ་མོའི་བདུད་ཀྱིས་བསླུས་པས་ལྟུང་། །ད་ཡང་རྡོ་རྗེ་སེམས་དཔའ་ཉོན། །བསྒོམ་པའི་བདུད་ནི་དེ་དག་ཀྱང་། །ངེས་དོན་མེད་པ་རྣམས་ལ་འབྱུང་། །ལུང་ལྡན་རྣམས་ལ་གནོད་མི་ཚུག །མ་རྟོགས་ཅི་བསྒོམས་བདུད་དུ་འགྱུར། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསྒོམ་པའི་བདུད་བསྟན་པའི་ལེའུ་སྟེ་དོན་གཅིག་པའོ།། །།ད་ཡང་རྡོ་རྗེ་སེམས་དཔའ་ཉོན། །བྱ་བ་འདུ་འཛི་ལོངས་སྤྱོད་བདུད། །ཉམས་དགའ་ཞེན་པ་གནས་ཀྱི་བདུད། །བསླབ་པ་ཡོན་ཏན་གཡེང་བའི་བདུད། །འཁོར་ངན་སེམས་འཁྲུལ་བདུད་རྣམས་འབྱུང་། །ད་ཡང་རྡོ་རྗེ་སེམས་དཔའ་ཉོན། །འདུ་འཛི་ལོངས་སྤྱོད་བདུད་བྱུང་ན། །མན་ངག་མེད་པར་ཚུལ་འཆོས་བྱེད། །མི་རྣམས་སྨོན་འདོད་གཞན་སེམས་འཛིན། །དོན་བྲལ་བདག་འཛིན་ཕྲག་དོག་ལྟུང་། །དེ་དག་དགྲ་ཞེས་ཞེན་པ་ཆུང་། །བུ་བཞིན་ཆགས་མེད་དོན་གྱིས་ཟིན། །ལོངས་སྤྱོད་རང་གྲོལ་རོལ་པར་རྟོགས། །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་རང་བྱུང་ངེས་པ་སྟེ། །དགོན་པར་གནས་ན་དད་ལྡན་འདུས། །ཚུལ་འཆོས་ཁ་གསག་མི་རྣམས་བརྟེན། །ཁ་ལན་པས་ནི་ཀུན་ལ་བསྟན། །འདུ་འཛི་ལོངས་སྤྱོད་བདུད་ཞུགས་ནས། །ཏིང་འཛིན་བཏང་ནས་གཞན་སེམས་འཛིན། །ཕུལ་དུ་རེ་བས་མཐོ་ལ་འཐམས། །ཆོས་པ་ཡིན་ཟེར་སྨོན་འདོད་ནས། །འདོན་ཀློག་མཚན་མའི་ཆོས་ལ་དགའ། །བསྒོམ་པའི་དོན་བོར་གཡེང་བའི་བདུད། །ཡོན་བདག་རྣམས་ལ་ང་བདག་འཛིན། །འདུ་འཛི་ཆེ་བས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །ཞེན་ཆགས་གནས་བདུད་དབྱེ་བ་ནི། །ཐོས་ ― DNG002_Page_0102 ―
[མ་དཔེ་གཟིགས་ན་འདིར་གནོན།]
ཆུང་མཁས་ཆེས་ཉམས་དགའ་རྩིགས། །བཀྲ་ཤིས་ཉམས་དགའ་འདྲེ་མེད་ཕྱིར། །འདྲེ་བསྟེན་མཐུ་ཡོད་གཞན་ལ་བསྡིགས། །གནས་ལ་མ་ཆགས་ཞེན་མེད་ཤེས། །བདག་གཞན་གཞི་ལ་མེད་ཤེས་པས། །གང་ལ་འདུག་པ་འོག་མིན་གནས། །ད་ཡང་རྡོ་རྗེ་སེམས་དཔའ་ཉོན། །དབེན་པ་འདོད་པའི་རྣལ་འབྱོར་པས། །རང་འཐད་པ་ཡི་གནས་ལ་ནི། །དབང་པོ་ཡུལ་ལ་བདག་ཏུ་འཛིན། །བཀྲ་ཤིས་འདྲེ་མེད་ལྷ་གཉན་པོ། །རང་བསྟོད་ཞེན་པའི་བདུད་ཞུགས་ཏེ། །ཏིང་འཛིན་བཏང་ནས་ཉམས་དགའ་བརྩིགས། །བསྲུང་མས་བསྲུངས་ནས་འགྲོ་དབང་མེད། །ཟེར་ཞིང་བདག་བསྟོད་དོན་མི་ལྡན། །དེ་ཕྱིར་འབྲས་བུ་དོན་མེད་པས། །རང་ཉམས་བདེ་བའི་བདུད་དུ་ལངས། །འཁོར་བའི་མཐར་ལྷུང་ཐར་པ་མེད། །གནས་ཀྱི་བདུད་ཀྱིས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །ཡོན་ཏན་གཡེངས་བདུད་དབྱེ་བ་ནི། །རིག་པ་ལྔ་ལྡན་བཀུར་སྡི་དྲན། །དོན་བོར་གཞན་དོན་རང་རྒྱུད་གོལ། །ཞེན་ལོག་དོན་དྲན་ཟིལ་གྱིས་གནོན། །བདུད་མེད་ཡེ་ཤེས་སྐུལ་མར་ཤེས། །གཡེང་བ་བདག་གཞན་ཆོས་སྐུར་གྲུབ། །ད་ཡང་འདུས་པའི་སྙིང་པོ་ཉོན། །རྣལ་འབྱོར་ཆོས་ལ་མོས་ལྡན་པས། །ཡོན་ཏན་སྣ་ཚོགས་ཤེས་པའི་མི། །རིག་པ་རྣམ་ལྔ་ལྡན་པས་ཀྱང་། །ཆེད་དུ་བྱས་པས་གཞན་དོན་བྱེད། །གཡེང་བའི་བདུད་ནི་ཁོང་དུ་ཞུགས། །གཞན་གྱིས་བསྟོད་པས་ཏིང་འཛིན་བཏང་། །ཆོས་འཆད་སྨན་དང་བཟོ་རྣམས་བྱེད། །འདོད་པའི་རྫས་ལ་ཞེན་པ་སྐྱེ། །བྱ་བའི་ལས་ཀུན་ཆེད་དུ་བྱེད། །གཡེང་བས་རང་སེམས་བདུད་དུ་ལངས། །དོན་དང་བྲལ་བས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །འཁོར་ངན་སེམས་འཁྲུགས་བདུད་བྱུང་ན། །བལྟ་དམན་འཁོར་ངན་སེམས་གདུང་དྲགས། །འགྲན་སེམས་ཆོག་ཤེས་མེད་པར་གནས། །དད་ལོག་སྒྲོ་སྐུར་ཞེ་སྡང་སྐྱེས། །གདུང་སེམས་བསྐྱུངས་པས་འདྲེལ་པ་བཅད། །བདུད་ཉིད་ཆོས་སྐུར་ཤེས་པ་ལས། །སྤངས་ཞིང་དོར་དུ་རྡུལ་ཙམ་མེད། །ད་ཡང་རྡོ་རྗེ་སེམས་ ― DNG002_Page_0103 ―
[མ་དཔེ་གཟིགས་ན་འདིར་གནོན།]
དཔའ་ཉོན། །ཐོས་ཆུང་རྣལ་འབྱོར་ཞེན་པ་ཅན། །འཁོར་ངན་གཉེན་ལ་གདུང་དྲགས་པས། །གཟུང་འཛིན་ཞེན་པས་རང་རྒྱུད་བྱེད། །ཕག་ཏུ་བསགས་ནས་ནོར་རྣམས་སྟེར། །དེ་ཚེ་སེམས་འཁྲུལ་བདུད་ཞུགས་ཏེ། །གསང་ཞིང་ཉེ་འཁོར་རྣམས་ལ་བྱིན། །འཁོར་ངན་གཅིག་ལ་གཅིག་འགྲན་ནས། །ཆོག་ཤེས་མེད་པར་རྟག་ཏུ་འདོད། །དེ་ཚེ་ཡོན་ཏན་དང་པ་ལྡོག །སྒྲོ་སྐུར་འདེབས་པས་ཞེ་སྡང་སྐྱེས། །དྲིན་དུ་མི་བཟོ་འཕྱར་ཀ་གཏོང་། །འཁོར་ངན་བདུད་ཀྱིས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །སྤྱོད་པའི་བདུད་ནི་དེ་དག་ཀྱང་། །འཇིག་རྟེན་ཆོས་བརྒྱད་ཞེན་ལས་འབྱུང་། །དེ་ཕྱིར་གཡེང་བ་དོན་དུ་གཉེར། །འཁོར་བ་དང་བླངས་རང་བསླུས་ལྟུང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། །ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྱོད་པའི་བདུད་བསྟན་པའི་ལེའུ་སྟེ་དོན་གཉིས་པའོ།། །།ད་ཡང་འདུས་པའི་སྙིང་པོ་ཉོན། །འཇིག་རྟེན་མཁའ་འགྲོའི་ལུང་བསྟན་བདུད། །ཉམས་སུ་མྱོང་བ་ཞེན་པའི་བདུད། །ཞེན་འདོད་ཚུལ་འཆོས་བདུད་དང་ནི། །བརྐམ་ཆགས་བདེ་བ་བོགས་འདོན་བདུད། །གདེང་མེད་སྐུར་འདེབས་ཞེ་སྡང་བདུད། །ང་རྒྱལ་སྒྲོ་འདོགས་བདུད་རྣམས་འབྱུང་། །ད་ཡང་རྡོ་རྗེ་སེམས་དཔའ་ཉོན། །མཁའ་འགྲོའི་ལུང་བསྟན་བདུད་བྱུང་ཚེ། །ཁྱོད་ནི་མ་འདུག་ཕན་གདག་ཟེར། །འདོད་པ་སྙིང་ཞུགས་ཞེན་པ་ཚོལ། །མི་འགྲུབ་དཀའ་བ་སྣ་ཚོགས་བྱེད། །ཞེན་པ་ཉིད་ན་འདོད་པ་སྟོངས། །ལུང་སྟོན་སླུ་བ་རྫུན་དུ་ཤེས། །གཞི་ལ་ངེས་མེད་རེ་དོགས་བྲལ། །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་དམ་པ་མཉམ་བཞག་ཚེ། །མཁའ་འགྲོའི་ལུས་སུ་མངོན་འབྱུང་སྟེ། །ཕུག་ཏུ་མ་འདུག་འགྲོ་དོན་གྱིས། །གཞན་དོན་བྱས་པའི་ཡོན་ཏན་བརྗོད། །དེ་ཚེ་མཁའ་འགྲོའི་བདུད་ཞུགས་སྟེ། །ཏིང་འཛིན་བཏང་ནས་གཞན་དོན་བརྩམ། །གཡེང་བའི་ལས་སྤྱོད་ང་རྒྱལ་ཅན། །ཆོས་སུ་མིང་བཏགས་ཅི་ཡང་བྱེད། །དེ་ཕྱིར་ལུང་སྟོན་བདུད་མ་ཤེས། ། ― DNG002_Page_0104 ―
[མ་དཔེ་གཟིགས་ན་འདིར་གནོན།]
རྫུན་ལ་བདེན་འཛིན་རྨོངས་པའི་མི། །རང་གིས་རང་བསླུས་སྙིང་རེ་རྗེ། །དོན་བྲལ་ཕྱིར་ན་བདུད་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །ཉམས་མྱོང་ཞེན་པའི་བདུད་བྱུང་ཚེ། །མི་རྟོག་ཞེན་པའི་བདེ་བ་འབྱུང་། །འཕེལ་འགྲིབ་ཡོད་པས་མ་ངེས་པ། །ངོས་མ་ཟིན་པས་ལུང་མ་བསྟན། །ལྷག་མཐོང་དྲན་པའི་གདེང་དང་ལྡན། །དོན་ལ་འགྱུར་མེད་ནམ་མཁའ་བཞིན། །དེ་ལྟར་ལྷག་མེད་སྒྲིབ་གཉིས་དག །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་དད་ལྡན་བསྒོམ་པར་བྱ། །གང་ལ་རྣམ་པར་མི་རྟོག་པའི། །ཟབ་ཅིང་ཆ་ཕྲ་ཉམས་མྱོང་ཡང་། །ལྟ་བའི་དོན་ཆེན་མ་ཟིན་པས། །ཞི་གནས་ཞེན་པའི་བདུད་ཞུགས་པས། །བསམ་གཏན་རོ་ལ་ཞེན་ཆགས་ཕྱིར། །བག་ལ་ཉལ་གྱི་མ་རིག་པས། །རྐྱེན་མི་ཐུབ་ཕྱིར་འཕེལ་འགྲིབ་མེད། །ཀུན་གཞི་ལུང་མ་བསྟན་ཡིན་ཕྱིར། །རང་གི་ཆོས་སྐུ་ངོ་མ་ཤེས། །དེ་ཕྱིར་བཏང་སྙོམས་རྙོག་པ་ཅན། །ལྟ་མེད་ཞེན་པའི་བདུད་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །ཞེ་འདོད་ཚུལ་འཆོས་བདུད་བྱུང་ཚེ། །གདམས་ངག་མེད་པར་བསྒོམ་ཚུལ་སྟོན། །དད་ཅན་གླེན་པ་ཐབས་ཀྱིས་བསླུས། །ཆགས་ཆུང་ཚུལ་འཆོས་ཆོས་པར་འཆོས། །གཞི་ཉིད་མ་བཅོས་དྲན་པ་གཅེས། །ཞེ་འདོད་མེད་ན་ཚུལ་འཆོས་བྲལ། །འདོད་མེད་གདེང་ལྡན་འབྲས་བུའི་མཆོག །ད་ཡང་རྡོ་རྗེ་སེམས་དཔའ་ཉོན། །དོན་མེད་བསྒོམ་པའི་གང་ཟག་ཀུན། །ངེས་པའི་གདམས་ངག་མེད་པར་ནི། །གདེང་མེད་ཚུལ་འཆོས་གཡོན་ཅན་དེ། །གཡོ་སྒྱུ་ཅན་ལ་འཕགས་ལམ་རིང་། །ཁ་གསགས་དོན་འཁྲིའི་བདུད་ཞུགས་ཏེ། །དད་ལྡན་གླེན་པ་ངང་བཟང་ལ། །ཚུལ་འཆོས་བྱེད་ཅིང་ཆོས་པར་འཆོས། །མན་ངག་མེད་པ་གསང་བར་སྐད། །བསྟན་རྒྱུ་ཡོད་ཀྱིས་ཕྱི་ནས་བྱ། །ཟེར་ཞིང་ཟས་ནོར་སྲེད་པ་ཆེ། །རང་གིས་རང་བསླུ་སྙིང་རེ་རྗེ། །ཕྱི་མ་ཡི་དྭགས་ལྟོ་འཕྱེར་སྐྱེ། །ད་ཡང་འདུས་པའི་སྙིང་པོ་ཉོན། །བརྐམ་ཆགས་བདེ་བའི་བདུད་བྱུང་ཚེ། །འདོད་ཆགས་དབང་ལ་བྱང་ཆུབ་རེ། །རང་གི་ཞེན་པ་འདོད་ཆགས་སྲེད། ། ― DNG002_Page_0105 ―
[མ་དཔེ་གཟིགས་ན་འདིར་གནོན།]
དོན་དུ་མི་ཤེས་བྱང་མི་ཆུབ། །རང་རིག་དོན་ལྡན་དབང་མི་དགོས། །འདོད་སྤྱད་རྐྱེན་ཐུབ་ཆོས་སྐུར་ཤེས། །བོགས་མེད་ཡེ་ཤེས་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །ལྟ་མེད་ཐབས་ཀྱི་བདེ་བ་ལ། །ཞེན་པའི་རྣལ་འབྱོར་པ་ཡིས་ནི། །དབང་གསུམ་པ་ཡི་བདེ་བ་ལ། །དགའ་བ་བཞི་རུ་མིང་བཏགས་ཏེ། །འདོད་ཆགས་སྲེད་པའི་བདུད་ཞུགས་ནས། །བྱི་ཤུགས་ཕོ་མོ་ཀུན་འདུས་ནས། །ཐབས་ཀྱི་བདེ་བ་སྣ་ཚོགས་བྱེད། །ཞེན་པའི་ཆོས་ལ་དམ་པར་བལྟ། །ཐབས་ལམ་འདོད་ཆགས་མེ་ལྟར་སྐྱེ། །ཆགས་སྤྱོད་ཏིང་འཛིན་འཕེལ་སྙམ་ནས། །དེ་ཕྱིར་དབང་རྟེན་དགོས་ཟེར་བ། །འདོད་ཆགས་བདུད་ཀྱིས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །ངེས་པའི་ལུང་མེད་རྣལ་འབྱོར་པས། །ཡོན་ཏན་བརྗོད་པ་སྙིང་ལ་གནས། །ཐོས་བསམ་མ་བྱས་ང་རྒྱལ་གྱིས། །མཉམ་དུ་རེ་ནས་འགྲན་དོན་ཕྱིར། །སྨད་སེམས་ཞེ་སྡང་བདུད་ཞུགས་སྟེ། །རང་ཉམས་ངན་པས་གཞན་དག་གི། །གདམས་ངག་ཅན་ལ་སྐུར་པ་འདེབས། །དེ་ཕྱིར་རང་ཕུང་དམ་ཚིག་ཉམས། །དོན་དང་ལྡན་ལ་གནོད་མི་ཚུག །དེ་ཕྱིར་དམ་ཉམས་ཞེ་སྡང་ཅན། །མི་སྡུག་ལས་ཀྱིས་མནར་ནས་ནི། །ཕྱི་མར་དམྱལ་བ་ཆེན་པོར་ལྟུང་། །ད་ཡང་རྡོ་རྗེ་སེམས་དཔའ་ཉོན། །ང་རྒྱལ་སྒྲོ་འདོགས་བདུད་བྱུང་ཚེ། །གང་ཟག་སྨད་ཕྱིར་ཆོས་ལ་སྨོད། །ཆེས་ཆུང་བྱེད་ཅིང་བཀའ་རྐུན་བྱེད། །བསོད་ནམས་ཆེ་ཆུང་དམྱལ་བར་ལྟུང་། །མན་ངག་གསང་ཐུབ་ཟིལ་གྱིས་གནོན། །ཡིད་ཆེས་རང་རིག་དོན་གྱིས་ཟིན། །ད་ལྟ་ཉིད་དུ་བདེན་པ་ཐོབ། །ད་ཡང་འདུས་པའི་སྙིང་པོ་ཉོན། །ངེས་དོན་མི་ལྡན་རྣལ་འབྱོར་པས། །ཡང་དག་ངེས་པའི་བཀའ་འདི་ལ། །གང་ཟག་སྨོད་ཕྱིར་སྒྲོ་བཏགས་ཏེ། །མི་ཚིག་བསླད་ཟེར་འཕྱར་ཀ་བཏང་། །ང་རྒྱལ་བདུད་ནི་ཁོང་ཞུགས་ཏེ། །བཀའ་རྐུན་དྷརྨ་འོག་བྲུས་བྱེད། །སློབ་དཔོན་མ་བསྟེན་ཆོས་ཤེས་འདོད། །ཆེ་ཆུང་བྱེད་ཅིང་ཐབས་ཀྱིས་འཚོལ། །ངེས་དོན་བརྒྱུད་པའི་བླ་མ་ལས། །ཤིན་ཏུ་འགལ་ཕྱིར་དམ་ཚིག་ ― DNG002_Page_0106 ―
[མ་དཔེ་གཟིགས་ན་འདིར་གནོན།]
ཉམས། །བྱིན་རླབས་མི་འབྱུང་བསོད་ནམས་ཆུང་། །ཕྱི་མར་དམྱལ་བར་ཤིན་ཏུ་ལྟུང་། །ད་ཡང་འདུས་པའི་སྙིང་པོ་ཉོན། །བདུད་ཀྱི་སྤྱོད་པ་བཅོ་བརྒྱད་ཀྱང་། །སོ་སོར་སྣང་བ་མ་ཡིན་ཏེ། །ལྷ་ཡི་བུའི་བདུད་གཅིག་པུ་ཡིན། །དེ་ཕྱིར་ལྟ་མེད་རྣམས་ཀྱི་བདུད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཉམས་ཀྱི་བདུད་བསྟན་པའི་ལེའུ་སྟེ་དོན་གསུམ་པའོ། །སྡོམ་དུ་བསྡུས་ཏེ་བསྟན་པ་བཅུ་དྲུག་པའོ།། །།རྡོ་རྗེ་སེམས་དཔས་ཡང་ཞུས་པ། །ལྟ་སྒོམ་སྤྱོད་པ་ཉམས་ཀྱི་བདུད། །དེ་དག་ཟིལ་གྱིས་ཇི་ལྟར་མནན། །ཀུན་རིག་རྒྱལ་པོས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །ཆོས་རྣམས་ཕྱི་ནང་རང་བྱུང་སྐུ། །བདུད་ཉིད་རྟོགས་པ་ཆོས་ཉིད་རང་། །དེ་ཕྱིར་ལུང་ལྡན་བསྟེན་ཞུས་དང་། །རང་སེམས་རྟོགས་ན་བདུད་མེད་དོ། །དེ་ཡང་རྡོ་རྗེ་སེམས་དཔའ་ཉོན། །མ་ནོར་དོན་ལ་བསྒོམ་པའི་ཚེ། །སྣང་བ་འོད་ཀྱི་བདུད་བྱུང་ན། །ཆོས་སྐུ་ཁ་དོག་བྲལ་བའི་ཕྱིར། །གསལ་ལ་མི་རྟོག་ཟིལ་གྱིས་མནན། །གྲག་པ་སྒྲ་ཡི་བདུད་བྱུང་ན། །ཆོས་ཉིད་སྒྲ་དང་བྲལ་བའི་ཕྱིར། །རྗེས་སུ་འབྲངས་མེད་རང་བཞིན་དུ། །ལྟ་བའི་རིག་པས་ཟིལ་གྱིས་མནན། །འཇིགས་པ་བདུད་ཀྱི་གཟུགས་བྱུང་ན། །གཞི་ལས་སྣང་བ་མེད་པའི་ཕྱིར། །དངོས་མེད་རྟོགས་པའི་ཤེས་པ་ཡིས། །གཟུགས་ཅན་མཚན་མ་ཟིལ་གྱིས་མནན། །སླུ་བ་བརྫུན་གྱི་བདུད་བྱུང་ན། །ཆོས་ཉིད་ཚིག་ལས་འདས་པས་ན། །བདེན་པར་འཛིན་པའི་སྐྱོན་དང་བྲལ། །བརྫུན་ལ་བདེན་མེད་ཟིལ་གྱིས་མནན། །ད་ཡང་རྡོ་རྗེ་སེམས་དཔའ་ཉོན། །བྱིང་བ་གསལ་བའི་བདུད་བྱུང་ན། །གཉིད་གསུམ་བསྲེས་པའི་གདམས་ངག་གིས། །གཏི་མུག་ཆོས་སྐུར་རང་བརླག་པའི། །ཡེ་ཤེས་ལྟ་བས་ཟིལ་གྱིས་མནན། །རྨུགས་པ་བདེ་བའི་བདུད་བྱུང་ན། །འཕེལ་འགྲིབ་མེད་པའི་དོན་ཤེས་ཕྱིར། །རང་བྱུང་ ― DNG002_Page_0107 ―
[མ་དཔེ་གཟིགས་ན་འདིར་གནོན།]
རིག་པའི་བལྟ་བ་ལ། །མཉམ་ཉིད་དྲན་པས་ཟིལ་གྱིས་མནན། །རྒོད་པ་མི་རྟོག་བདུད་བྱུང་ན། །སྣང་བ་བག་ཆགས་བརྟས་པ་ལ། །རང་རིག་བག་ཆགས་མེད་པའི་ཕྱིར། །སྤང་སྡུད་ཞེན་མེད་ཟིལ་གྱིས་མནན། །འཕྲོ་བ་མི་གཡོའི་བདུད་བྱུང་ན། །ཡེ་ནས་མི་འགྱུར་རང་བྱུང་ལ། །གོམས་པའི་དབང་གིས་ཏིང་འཛིན་གསལ། །མི་བརྗེད་གཟུངས་ཀྱི་ཟིལ་གྱིས་མནན། །ད་ཡང་འདུས་པའི་སྙིང་པོ་ཉོན། །ལྟ་སྒོམ་བདུད་ནི་དེ་དག་ཀྱང་། །རང་བྱུང་ཆོས་སྐུའི་དོན་རྟོགས་པས། །རང་བྱུང་ཟིལ་གནོན་རང་བརླག་པས། །འབྲས་བུ་ཡེ་ཤེས་ལྷུན་གྱིས་གྲུབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྟ་སྒོམ་གྱི་བདུད་ཟིལ་གྱིས་མནན་པའི་ལེའུ་སྟེ་དོན་བཞི་པའོ།། །།ད་ཡང་འདུས་པའི་སྙིང་པོ་ཉོན། །འདུ་འཛི་གཡེངས་པའི་བདུད་བྱུང་ན། །ཏིང་འཛིན་དགྲ་རུ་ཤེས་པའི་སེམས། །འདོད་ཆུང་ཆོག་ཤེས་ཟིལ་གྱིས་མནན། །ཞེན་པ་གནས་ཀྱི་བདུད་བྱུང་ན། །ཡུལ་ལ་ངེས་མེད་ཆགས་པ་ཡི། །ལྟ་བ་རང་རིག་ཡུལ་མེད་ཕྱིར། །ཞེན་པ་མེད་པས་ཟིལ་གྱིས་གནོན། །ཡོན་ཏན་གཡེང་བའི་བདུད་བྱུང་ན། །བདག་དོན་མ་གྲུབ་བར་དུ་ཡང་། །མི་དབང་མི་བཏང་དོན་དྲན་པས། །གཞན་དོན་མི་བྱ་ཟིལ་གྱིས་མནན། །འཁོར་ངན་སེམས་འཁྲུགས་བདུད་བྱུང་ན། །མཐར་ཐུག་འདྲེལ་བ་མེད་པའི་ཕྱིར། །གནས་སྐབས་འདྲེལ་བ་ཏིང་འཛིན་དགྲ། །གདུང་སེམས་བསྐྱུངས་ལ་ཟིལ་གྱིས་མནན། །དེ་ཡང་རྡོ་རྗེ་སེམས་དཔའ་ཉོན། །མཁའ་འགྲོའི་ལུང་བསྟན་བདུད་བྱུང་ན། །རང་རིག་མི་འགྱུར་རྟོགས་པ་ལ། །གཞན་དུ་ལུང་སྟོན་བསླུ་བར་ཤེས། །རེ་དོགས་མེད་པར་ཟིལ་གྱིས་མནན། །ཉམས་མྱོང་ཞེན་པའི་བདུད་བྱུང་ན། །སྔ་ཕྱི་མེད་པའི་ཆོས་སྐུ་ནི། །ཏིང་འཛིན་རྐྱེན་གྱིས་མི་འགྱུར་ཕྱིར། །ཞེན་མེད་ལྟ་བས་ཟིལ་གྱིས་མནན། །ཞེ་འདོད་ཚུལ་འཆོས་བདུད་བྱུང་ན། །གང་ཡང་མ་བཅོས་དོན་དྲན་པས། །རང་བྱུང་ཆོས་སྐུ་དོན་དྲན་པའི། ། ― DNG002_Page_0108 ―
[མ་དཔེ་གཟིགས་ན་འདིར་གནོན།]
རྟོགས་པ་དྲང་པོའི་ཟིལ་གྱིས་མནན། །བདེ་བ་དགོས་འདོད་བདུད་བྱུང་ན། །རང་བྱུང་ཡེ་ཤེས་རྟེན་མེད་ཕྱིར། །དབང་ལ་མི་ལྟོས་འཕེལ་འགྲིབ་མེད། །རྒྱུ་རྐྱེན་འབྱུང་འདོད་ཟིལ་གྱིས་མནན། །གདེང་མེད་སྐུར་འདེབས་བདུད་བྱུང་ན། །ཆོས་སྐུ་སྒྲོ་སྐུར་བྲལ་བའི་ཕྱིར། །ལུང་ལྡན་ཅན་ལ་གནོད་མི་ཚུགས། །ལྟ་སྤྱོད་ལམ་གྱིས་ཟིལ་གྱིས་མནན། །ང་རྒྱལ་སྒྲོ་འདོགས་བདུད་བྱུང་ན། །རང་བྱུང་དོན་ནི་སྐྱོན་བྲལ་བས། །དེ་དོན་ངེས་པའི་གདམས་ངག་གིས། །སྣོད་ངན་གསང་ལ་ཟིལ་གྱིས་གནོན། །ད་ཡང་རྡོ་རྗེ་སེམས་དཔའ་ཉོན། །ཟིལ་གྱིས་གནོན་ཐབས་དེ་དག་ཀྱང་། །སྤང་ལེན་དགག་སྒྲུབ་མེད་པར་འདུས། །དེ་ཕྱིར་དོན་འདུས་དམ་པའི་ལམ། །དེར་གནས་སངས་རྒྱས་དགོངས་པ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྱོད་པ་ཉམས་ཀྱི་བདུད་ཟིལ་གྱིས་གནོན་པ་བསྟན་པའི་ལེའུ་སྟེ་དོན་ལྔ་པའོ། །སྡོམ་དུ་བསྡུས་ཏེ་བསྟན་པ་བཅུ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །དད་ལྡན་འདུས་པའི་དོན་ཆེད་དུ། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །སེམས་ཅན་སེམས་ཀྱི་སྙིང་པོ་དང་། །སངས་རྒྱས་དགོངས་པའི་སྙིང་པོ་དང་། །འཁོར་འདས་གཞི་ཡི་སྙིང་པོ་དང་། །འབྱུང་བ་གནས་པའི་སྙིང་པོ་དང་། །ཆོས་ཀྱི་སྙིང་པོ་ངེས་དོན་རྣམས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །སྙིང་པོ་རྣམ་ལྔ་ངས་བཤད་ཀྱིས། །ལེགས་པར་ཉོན་ལ་ཡིད་ལ་ཟུངས། །སེམས་ཀྱི་སྙིང་པོ་རིག་པ་ཡིན། །སངས་རྒྱས་སྙིང་པོ་ཡེ་ཤེས་ཡིན། །འཁོར་འདས་སྙིང་པོ་ངོ་བོ་ཡིན། །འབྱུང་བའི་སྙིང་པོ་ཉི་ཟླ་ཡིན། །ཆོས་ཀྱི་སྙིང་པོ་རྫོགས་ཆེན་ཡིན། །ད་ཡང་རྡོ་རྗེ་སེམས་དཔའ་ཉོན། །མ་རིག་གཏི་མུག་ལས་བྱུང་བའི། །ཀུན་གཞི་ཚོགས་བརྒྱད་འཁྲུལ་པའི་སེམས། །ཚོར་བ་བདེ་སྡུག་སྣ་ཚོགས་པ། །བག་ཆགས་བརྟས་པས་སེམས་ཞེས་བྱ། །ཉིད་ལས་ཉིད་འཁྲུལ་འཁོར་བའི་ཆོས། །ཕྱི་ ― DNG002_Page_0109 ―
[མ་དཔེ་གཟིགས་ན་འདིར་གནོན།]
ནང་སྣོད་བཅུད་བཟང་ངན་ཆོས། །ཅི་འཕྲད་ཅི་མཐོང་ཅི་བསྟན་པ། །འཁྲུལ་པ་ཡིན་པར་ཐེ་ཚོམ་མེད། །དེ་ཕྱིར་སེམས་ནི་ཡང་དག་མིན། །དཔེར་ན་རྨི་ལམ་བདེ་སྡུག་ནི། །སད་པ་ཙམ་གྱིས་འཁྲུལ་པ་ཡི། །རྨི་ལམ་བཟང་ངན་དམ་པར་འཛིན། །དེ་བཞིན་རང་བཞིན་སྣ་ཚོགས་པ། །རྨོངས་པ་རྣམས་ནི་དམ་པར་བལྟ། །མེད་པའི་ཡུལ་ལ་དངོས་པོར་ཞེན། །དེ་ཕྱིར་སེམས་ནི་སྒྱུ་མ་འདྲ། །སྒྱུ་མ་དེ་ལ་དངོས་གཞི་མེད། །མེད་ལ་ཡོད་འཛིན་འཁོར་བའི་གཞི། །དེ་ཕྱིར་སེམས་ནི་ཡང་དག་མིན། །སེམས་སུ་བྱས་པ་ཐམས་ཅད་གོལ། །གང་ཡང་རུང་བ་ཅི་ལ་ཡང་། །འཛིན་ཅིང་ཞེན་ཕྱིར་སེམས་འདིས་ཕུང་། །ད་ཡང་རྡོ་རྗེ་སེམས་དཔའ་ཉོན། །མཚན་ཉིད་སེམས་ཀྱི་རིག་པ་འདི། །ཉན་ཐོས་རིག་པ་སྐད་ཅིག་དེ། །ལམ་སྲང་མི་རེངས་རྒྱུ་བ་བཞིན། །རིག་པ་ཕོ་རེངས་རང་རེ་འདོད། །འདྲེལ་པ་མེད་ཕྱིར་དོན་ལ་གོལ། །ཕྱི་ཡི་སེམས་ཙམ་རིག་པ་དེ། །ཆུ་བོ་རང་གཞུང་དང་འདྲ་སྟེ། །རིག་པ་ང་རྒྱལ་འགྲོ་འོང་ཅན། །དེ་ཕྱིར་འབྲས་མེད་དོན་ལས་གོལ། །སྣང་བའི་ཡུལ་འདི་རིག་པ་ཡིས། །གཞིག་ན་རིགས་པས་མ་གྲུབ་པ། །དབུ་མའི་དོན་དང་འགལ་བ་དེ། །གཞི་ལ་སྐུར་བཏབ་གྲོལ་བའོ། །ད་ཡང་རྡོ་རྗེ་སེམས་དཔའ་ཉོན། །གསང་སྔགས་ཕྱི་ནང་རིག་པ་དེ། །རང་སེམས་དབྱེར་མེད་སྣང་སྟོང་ལ། །འདྲ་སྣང་ངང་དུ་ཤེས་པར་བྱ། །ཀུན་བརྟགས་ཡིན་ཕྱིར་ངེས་དོན་མིན། །ད་ཡང་རྡོ་རྗེ་སེམས་དཔའ་ཉོན། །ཡང་ཏི་རྫོགས་ཆེན་རིག་པ་ནི། །འདུས་མ་བྱས་ཀྱི་ནམ་མཁའ་འདྲ། །ཆོས་སྐུ་རིག་པ་རང་གསལ་དེ། །འགྲོ་འོང་མེད་ཕྱིར་དུས་གསུམ་དུ། །རྒྱུ་རྐྱེན་མ་བསྐྱེད་རང་བྱུང་སྐུ། །ཡང་དག་ཡོད་ཕྱིར་ཤེས་ཤིང་རིག །སྐྱེ་འགག་མེད་ཕྱིར་རྒྱུན་དུ་གནས། །དཔེར་ན་མིག་དང་འབྲས་བུ་བཞིན། །སང་ངེ་རིག་གེ་བརྟག་པ་དཀའ། །དེ་དོན་ཡེ་ཡོད་བལྟ་མི་ཤེས། །དེ་ཕྱིར་དྲན་མེད་རིག་པས་གསུངས། །སེམས་ཀྱི་མུན་སེལ་རིག་པ་དེ། །སྤྲིན་གསེབ་ཉི་མའི་སྙིང་པོ་འདྲ། །དེ་དོན་རིག་པ་ངོས་བཟུང་བསྒོམས། །རྫོགས་པ་ཆེན་པོ་ངེས་ ― DNG002_Page_0110 ―
[མ་དཔེ་གཟིགས་ན་འདིར་གནོན།]
དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སེམས་ཀྱི་སྙིང་པོ་ངོས་བཟུང་བསྟན་པའི་ལེའུ་སྟེ་དོན་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །སངས་རྒྱས་སྙིང་པོས་བཀའ་སྩལ་པ། །སངས་རྒྱས་བྱ་བའི་དོན་བསྟན་ན། །རང་བཞིན་ལྷུན་གྲུབ་ཇི་བཞིན་པ། །སེམས་ཅན་ཀུན་ལ་ཡེ་ནས་ཡོད། །ཡོད་ཀྱང་མ་ཤེས་སེམས་ཅན་ལ། །ལུང་ལྡན་མེད་ཕྱིར་མ་རྟོགས་འཁོར། །ད་ཡང་འདུས་པའི་སྙིང་པོ་ཉོན། །རྟོགས་པ་མངོན་གྱུར་སངས་རྒྱས་ཡིན། །མ་རིག་སངས་རྒྱས་ཆོས་ཀྱི་སྐུ། །དེ་ཕྱིར་སངས་རྒྱས་ཆོས་ཀྱི་སྐུ། །རང་ལ་ཡེ་ནས་ངོ་བོ་དེ། །ལུང་ལྡན་རྐྱེན་གྱིས་དོན་རྟོགས་པས། །དྲན་མེད་ཚོར་བ་ཡེ་ཤེས་ཡིན། །ཡིད་ཀྱིས་མ་ནོར་རང་གསལ་བ། །ངོས་བཟུང་མེད་པར་ཡིད་ཆེས་པས། །ཡེ་ཤེས་ཞེས་ནི་དེ་ལ་བྱ། །ད་ཡང་འདུས་པའི་སྙིང་པོ་ཉོན། །སངས་རྒྱས་སྙིང་པོ་ཡེ་ཤེས་ནི། །ཡེ་ནས་གནས་པའི་ཆོས་ཉིད་དེ། །རིག་པས་ཤེས་པས་ཡེ་ཤེས་ཡིན། །ཀུན་བཟང་ང་ཡིས་བཤད་པ་ཡིན། །ད་ཡང་རྡོ་རྗེ་སེམས་དཔའ་ཉོན། །རང་བྱུང་རིག་པའི་ཡེ་ཤེས་དེ། །འདུ་འབྲལ་མེད་པར་བྱེད་པའི་གཟུགས། །དང་པོར་རྒྱུད་དང་ལུང་ལས་བྱུང་། །བར་དུ་སེམས་རྟོགས་རྣལ་འབྱོར་ཀུན། །ཐ་མ་སངས་རྒྱས་ཉིད་དུ་འགྲོ། །དེ་ཕྱིར་ལུང་ལྡན་ཡེ་ཤེས་རྐྱེན། །ཡེ་ནས་ཡོད་ཀྱང་ངོ་སྤྲོད་པས། །རང་བྱུང་ཡེ་ཤེས་དམ་པ་ཡིན། །དེ་ཕྱིར་རང་བྱུང་ལྷུན་གྲུབ་ནི། །སྙིང་པོ་ཡེ་ཤེས་ཡིན་པར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སངས་རྒྱས་སྙིང་པོ་ངོས་བཟུང་བ་བསྟན་པའི་ལེའུ་སྟེ་དོན་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །འཁོར་བ་མ་རིག་ལས་སྐྱེས་པའི། །སྐྱེ་རྒ་ན་འཆིའི་སྡུག་བསྔལ་ཏེ། །མྱང་འདས་ལམ་གྱི་འབད་རྩོལ་གྱིས། །སྡུག་བསྔལ་མེད་པར་བདེ་བ་འདོད། །མ་རིག་ཡོད་ཕྱིར་ངེས་དོན་མེད། ། ― DNG002_Page_0111 ―
[མ་དཔེ་གཟིགས་ན་འདིར་གནོན།]
ད་ཡང་རྡོ་རྗེ་སེམས་དཔའ་ཉོན། །འཁོར་འདས་སྙིང་པོ་ངེས་པ་ནི། །ངེས་འབྱུང་རྒྱུ་མེད་འབྲས་བུ་ནི། །ཡང་དག་སྙིང་པོ་ཡེ་ཤེས་ཏེ། །ཀུན་ཁྱབ་མི་འགྱུར་རིག་པའི་སྐུ། །དཔེར་ན་ནོར་བུ་རིན་ཆེན་བཞིན། །ཡེ་ནས་གནས་པའི་རིག་པའི་དོན། །འཕེལ་འགྲིབ་མེད་པར་རྒྱུན་དུ་ཡོད། །དེ་ལ་ཅིས་ཀྱང་བསྐྱོད་མི་ནུས། །ད་ཡང་འདུས་པའི་སྙིང་པོ་ཉོན། །དུས་དང་རྣམ་པ་ཐམས་ཅད་དུ། །འཕོ་འགྱུར་མེད་པར་ཐམས་ཅད་སྐྱེ། །དེ་ཉིད་རང་བྱུང་ཡེ་ཤེས་དོན། །དེ་ཕྱིར་ཀུན་གྱི་གཞིར་ནི་གསུངས། །རང་བྱུང་སྙིང་པོ་དེ་ཉིད་ནི། །ཆོས་རྣམས་ཀྱི་ནི་རྩ་བ་སྟེ། །དེ་དོན་མ་གཏོགས་སངས་རྒྱས་མེད། །དེ་ཉིད་མ་འཁྲུལ་སེམས་ཅན་མེད། །བག་ཆགས་མ་བརྟགས་འབྱུང་བ་མེད། །གང་ཡང་མེད་པའི་སྔོན་རོལ་དུ། །རང་བྱུང་རིག་པའི་རྒྱལ་པོ་དེ། །འདུས་མ་བྱས་ཀྱི་ཀློང་དཀྱིལ་ན། །རང་བྱུང་རང་གསལ་འོད་པོ་ཆེ། །དེ་ཉིད་རྟོགས་པས་ཀུན་ཏུ་བཟང་། །དེ་ཕྱིར་ཀུན་གྱི་ཡང་མེས་པོ། །འཁོར་འདས་མེད་པའི་དོན་འདི་ཡོད། །དེ་ཕྱིར་རང་བྱུང་ངོ་བོ་ཉིད། །འཁོར་འདས་ཀུན་གྱི་སྙིང་པོར་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འཁོར་འདས་ཀྱི་སྙིང་པོ་ངོས་བཟུང་བར་བསྟན་པའི་ལེའུ་སྟེ་དོན་བརྒྱད་པའོ།། །།དེ་ནས་ཀུན་རིག་སྟོན་པ་ཡིས། །འབྱུང་བའི་སྙིང་པོ་བཀའ་སྩལ་པ། །ས་ཡི་སྙིང་པོ་གསེར་ཡིན་ཏེ། །ས་ཞེས་མིང་དུ་བཏགས་པ་ནི། །བཟུང་བ་བརྟས་པས་སྲ་ཞིང་བརྟན། །དེ་ལ་རྩི་ཐོག་ཐམས་ཅད་སྐྱེ། །སྙིང་པོར་གསེར་འོང་འདོད་དགུ་འབྱུང་། །འབྱུང་ཡང་རང་བྱུང་ཆོས་སྐུ་མིན། །དེ་ཕྱིར་མཚོན་པའི་དཔེ་ཟབ་ཀྱང་། །ངེས་དོན་སྙིང་པོ་མ་ཡིན་ནོ། །ད་ཡང་འདུས་པའི་སྙིང་པོ་ཉོན། །ཆུ་ཡི་སྙིང་པོ་ག་པུར་ཤེལ། །ཆུ་ཤེལ་མིང་དུ་བཏགས་པ་ཡང་། །འཛིན་པ་བརྟས་པས་གཤེར་བ་སྡུད། །དེ་བཞིན་ཐམས་ཅད་དག་པར་བྱེད། །ག་པུར་ཤེལ་ཚྭ་སྨན་བཞིན་དུ། །གང་ལ་ཕན་པའི་སྨན་ཡིན་ཏེ། །མཚོན་པའི་དཔེ་ནི་དེ་ཟབ་ཀྱང་། ། ― DNG002_Page_0112 ―
[མ་དཔེ་གཟིགས་ན་འདིར་གནོན།]
ངེས་དོན་འབྲས་བུ་ཆུ་ལ་མེད། །རླུང་གི་སྙིང་པོ་དངས་སྙིགས་འབྱེད། །རླུང་ཞེས་མིང་དུ་བཏགས་པ་ཡང་། །ཞེན་པའི་བག་ཆགས་བརྟས་པ་ལས། །ཡང་ཞིང་འདེགས་པའི་སྟོབས་ལྡན་དེ། །མཚོན་པའི་དཔེ་རུ་ཟབ་གྱུར་ཀྱང་། །རླུང་ནི་རྐྱེན་ལས་འབྱུང་བ་སྟེ། །གཡོ་བསྐྱོད་སྐྱེ་འགགས་བྱེད་པའི་ཕྱིར། །འབྱུང་བ་རླུང་ལ་བྱང་ཆུབ་མེད། །མེ་ཡི་སྙིང་པོ་རྡོ་སྟང་ཟིལ། །མེ་ཞེས་མིང་དུ་བཏགས་པ་ཡང་། །ཀུན་སློང་ཞེ་སྡང་བརྟས་པ་ཡིན། །རྡོ་སྟག་འཕྲོས་པས་དུས་ཀྱི་མེས། །འཇིག་རྟེན་མ་ལུས་ཀུན་བསྲེགས་ཀྱང་། །དཔེ་རུ་ཟབ་ཀྱང་དོན་དུ་མིན། །ཐབས་སྲེད་ཕྱིར་ནི་འདུས་བྱས་ཏེ། །ངེས་དོན་སྙིང་པོ་མེ་ལ་མེད། །ད་ཡང་འདུས་པའི་སྙིང་པོ་ཉོན། །ནམ་མཁའ་ཞེས་ནི་བཏགས་པ་ཡང་། །ནམ་མཁའི་སྙིང་པོ་ཉི་ཟླ་ཡིན། །ནམ་མཁའ་ཞེས་ནི་བཏགས་པ་ཡང་། །རྒྱ་དང་རིས་སུ་མ་ཆད་པར། །དངོས་མེད་ཀུན་ཁྱབ་མཐའ་དབུས་མེད། །འབྱུང་བཞིའི་སྣོད་དུ་དེ་ཟབ་ཀྱང་། །དཔེ་རུ་ཟབ་ཀྱང་དོན་དུ་མེད། །ཉི་ཟླ་འཆར་ནུབ་རྐྱེན་གྱིས་གོས། །དེ་ཕྱིར་རྐྱེན་ལས་བྱུང་བའི་ཕྱིར། །ནམ་མཁའ་རིས་མེད་ཆོས་སྐུ་མིན། །སྙིང་པོ་ལྔ་ཡང་རྟོགས་པའི་ཐབས། །དེ་ཡོད་དགོངས་པའི་ངེས་དོན་འདི། །ཚིག་མེད་གོལ་ས་ཤུགས་ལས་ཆོད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འབྱུང་བའི་སྙིང་པོ་ངོས་བཟུང་བ་བསྟན་པའི་ལེའུ་སྟེ་དོན་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཆོས་ཀྱི་སྙིང་པོ་བཀའ་སྩལ་པ། །ཉན་ཐོས་རང་རྒྱལ་མདོ་སྡེ་དང་། །ཀྲི་ཡ་ཡོ་ག་ཨུ་པ་རྣམས། །དྲང་དོན་བསླུ་བྲིད་ཆོས་ཡིན་ཕྱིར། །ཐེག་བརྒྱད་ཐབས་ནི་ཆེ་ཡང་ནི། །ངེས་དོན་ཆོས་ཀྱི་སྙིང་པོ་མིན། །ད་ཡང་འདུས་པའི་སྙིང་པོ་ཉོན། །ཆོས་ཀྱི་སྙིང་པོ་རྫོགས་ཆེན་ནི། །རྒྱུ་རྐྱེན་མ་བསྐྱེད་འདུས་བྱས་མིན། །དེ་ཕྱིར་རང་བྱུང་སྙིང་པོ་འདི། །སུས་ཀྱང་མ་བྱས་མཛད་བཅོས་མིན། །རང་བྱུང་རིག་པའི་རྒྱལ་ ― DNG002_Page_0113 ―
[མ་དཔེ་གཟིགས་ན་འདིར་གནོན།]
པོ་ཡིན། །དེ་ཕྱིར་འདུས་མ་བྱས་པའི་ཐུགས། །དེ་ལ་གཉེན་པོས་མི་ཤིགས་ཕྱིར། །བཞག་ཅིང་བླང་བར་ནུས་པ་མེད། །དེ་དོན་རྟོགས་པའི་རྣལ་འབྱོར་དེ། །མི་ཡི་ལུས་ལ་སངས་རྒྱས་ཐུགས། །རང་བྱུང་སྐུ་ལ་ཚངས་པའི་གསུང་། །དེ་མ་ཐག་ཏུ་ཀུན་བཟང་ཉིད། །ཐེག་པ་ཀུན་གྱི་ཡང་སྙིང་ཆོས། །ཡང་དག་རྒྱལ་བའི་དགོངས་པ་ཡིན། །ངོ་བོ་ཉིད་ཀྱི་སྐུ་མཆོག་ཀྱང་། །དུས་འདིར་ཤེས་པས་ཆོས་ཀྱི་སྐུ། །དཔེ་ནི་སྡིག་ལས་བྱས་གྱུར་ཀྱང་། །ངེས་པར་མི་འགྱུར་དཔལ་དུ་ཆེ། །ངེས་དོན་རང་བྱུང་རྒྱལ་བའི་བཀའ། །དེ་ལས་ཞེན་པའི་སྙིང་པོ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་ཀྱི་སྙིང་པོ་ངོས་བཟུང་བ་བསྟན་པའི་ལེའུ་སྟེ་བརྒྱད་ཅུ་པའོ། །སྡོམ་དུ་བསྡུས་སྟེ་བསྟན་པ་བཅོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་གྱི་དོན་ཆེད་དུ། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ལྟ་བའི་རྣམ་གྲངས་གོལ་ས་དུ། །སྣང་བ་ཆོས་དབྱིངས་གོལ་ས་གང་། །སྒོམ་པའི་གོལ་ས་སྐྱོན་ནི་ཅི། །སྤྱོད་པ་རྩིང་བའི་ཉེས་པ་ཅི། །འབྲས་བུ་གོལ་བའི་ཉེས་པ་ཅི། །དེ་དག་ལྷུང་བའི་གོལ་ས་གང་། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་རྒྱལ་པོས་བཀའ་སྩལ་པ། །ལྟ་བའི་གོལ་ས་རྣམ་གྲངས་ནི། །གཞི་བསམ་ལྷུན་གྲུབ་ངེས་མེད་དང་། །སེམས་ཡིན་སྤྲོས་མེད་ཐལ་དྲག་བསྒྲུབ། །རྣམ་དག་དགོས་མེད་གོལ་སར་གསུངས། །ད་ཡང་རྡོ་རྗེ་སེམས་དཔའ་ཉོན། །འཁོར་འདས་ཀུན་ཁྱབ་ལྷུན་གྲུབ་དེ། །བདེ་གཤེགས་སྙིང་པོ་ཆོས་སྐུ་སྟེ། །རང་ཆས་ཡོད་ཕྱིར་ཡེ་སངས་རྒྱས། །དེ་ཕྱིར་ཆོས་རྣམས་ཀུན་གྱི་གཞི། །བསམ་པ་ཡིད་སྨོན་ལྷུན་གྲུབ་འདོད། །ས་རྡོ་གསེར་དུ་བསྒྱུར་བ་བཞིན། །གནས་འགྱུར་ལྷར་འདོད་ཀུན་ཏུ་བརྟགས། །སྣང་བ་མ་བཅོས་མ་བསྒྱུར་ཡང་། །མ་ཤེས་མ་ཕན་ཞེན་ཕྱིར་འཁོར། །མཐུན་སྣང་ཡུལ་ལ་ནན་བརྟགས་ཏེ། །སྣང་ ― DNG002_Page_0114 ―
[མ་དཔེ་གཟིགས་ན་འདིར་གནོན།]
བ་ཝ་ལེ་འདུག་པ་ལ། །ཇི་བཞིན་ཆོས་ཉིད་ཡིན་ཟེར་བ། །གཞི་ནི་མ་བྱུང་འདོད་པ་འཁྲུལ། །ངེས་མེད་ལྷུན་གྲུབ་ཡིན་ཟེར་ནས། །གཞི་ནི་ངེས་མེད་ས་མ་ཟིན། །སྣ་ཚོགས་ཕྱིར་ན་ཆོས་ཉིད་མིན། །དེ་ཕྱིར་རིག་བྱེད་ལྟ་བ་གོལ། །ད་ཡང་འདུས་པའི་སྙིང་པོ་ཉོན། །གང་ཡང་སེམས་ཡིན་འདོད་པ་དེ། །ཕྱི་ནང་ཆོས་རྣམས་སེམས་སུ་འདུས། །ཡུལ་ལ་ཞེན་ཕྱིར་རང་སེམས་འཁྲུལ། །ཀ་ཏ་རི་པའི་ལྟ་བར་གོལ། །རྒྱུན་ཆད་སྤྲོས་མེད་འདོད་པ་དེ། །ཤིང་ཟད་མེ་བཞིན་འདོད་པ་དེ། །གཉིས་ཀ་མེད་ཕྱིར་ཆད་པ་སྟེ། །གཉེན་པོ་ཡེ་ཤེས་མེད་པའི་ཕྱིར། །ཆོས་སྐུ་མེད་ཕྱིར་ཤིན་དུ་གོལ། །ད་ཡང་རྡོ་རྗེ་སེམས་དཔའ་ཉོན། །ཐལ་དྲགས་གང་ལྟར་འདོད་པ་དེ། །ཆོས་ཅན་ཁ་ཡར་གཅིག་གཅིག་ལ། །དུས་གསུམ་ཚང་ཕྱིར་འདོད་པ་འདོད། །གཅིག་ལ་གཅིག་མེད་གྲངས་ཅན་གོལ། །གྲུབ་པ་པོ་ནི་གྲུབ་ཟིན་འདོད། །སངས་རྒྱས་ཡོན་ཏན་སེམས་ཅན་སྐྱོན། །རང་ངོར་ལྷུན་གྲུབ་མེད་པའི་ཕྱིར། །ཐ་དད་གཉིས་འཛིན་དོན་ལ་གོལ། །སྣང་སྲིད་ཐམས་ཅད་ཆོས་ཀྱི་སྐུ། །ཡེ་ནས་བདེ་བ་ཆེན་པོར་དག །རང་གི་སེམས་ཉིད་ཀློང་ན་གསལ། །དེ་རུ་མ་འདུས་རྡུལ་ཙམ་མེད། །གོས་པ་མེད་པའི་ལྷུན་གྲུབ་དེ། །རང་སེམས་སྙིང་པོར་མ་རྟོགས་པར། །རྐྱེན་ཙམ་ཐུན་མོང་མངོན་གྱུར་ཀྱང་། །སྡིག་ཅན་ཚོགས་སུ་མི་འགྱུར་གོལ། །ད་ཡང་རྡོ་རྗེ་སེམས་དཔའ་ཉོན། །དེ་དག་ལྷུན་གྲུབ་བཅུར་གསུངས་པ། །ངེས་དོན་ལྷུན་གྲུབ་མེད་པའི་ཕྱིར། །ནན་བརྟགས་བྱེད་ཕྱིར་ལྟ་ལོག་པ། །ལུང་མེད་བློས་བྱས་ཤིན་ཏུ་གོལ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྟ་བའི་གོལ་ས་བསྟན་པའི་ལེའུ་སྟེ་གྱ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །སྣང་བ་ཆོས་དབྱིངས་གོལ་ས་ནི། །ཀུན་རིག་སྟོན་པས་བཀའ་སྩལ་པ། །འཁོར་བའི་རྒྱུ་ནི་ཞེན་རྟོག་སྟེ། །ལུང་ལྡན་གྲུབ་མཐའ་བློས་མ་བསྒྱུར། །དབང་པོ་ཡུལ་ལ་རྟག་ཏུ་ཡེངས། །ཆོས་བརྒྱད་ཡུལ་ལ་རྟག་པར་ ― DNG002_Page_0115 ―
[མ་དཔེ་གཟིགས་ན་འདིར་གནོན།]
ཞེན། །ཆུ་བོ་བཞི་ཡི་མཐའ་ལ་ཚུད། །འཁོར་བར་འཁྱམས་པའི་རྟེན་གཞི་ཡིན། །ཕྲ་རགས་ཡུལ་ནི་གཉེན་པོས་སྤོངས། །རིས་སུ་འབྱེད་པའི་དབྱེ་བ་སྤང་། །ཡོད་མེད་འཇལ་བའི་རྒྱུ་འབྲས་སྤང་། །བློ་ཡིས་གཞི་ཉིད་འཆོས་པའི་ཕྱིར། །ཉན་ཐོས་རང་རྒྱལ་གོལ་སར་གསུངས། །ད་ཡང་རྡོ་རྗེ་སེམས་དཔའ་ཉོན། །ཆོས་རྣམས་སེམས་སུ་སྡུད་པའི་ཕྱིར། །ཡུལ་སེམས་གཉིས་མེད་འདོད་པ་དང་། །སེམས་ཉིད་རང་སྣང་འདོད་པ་དང་། །ཡུལ་སེམས་སྟོང་པར་འདོད་པ་དང་། །ཅིར་ཡང་ཁས་མི་ལེན་པའི་ཕྱིར། །དབུ་མ་སེམས་ཙམ་བལྟ་བ་ཡི། །སྡུག་པའི་རྟོག་པ་གོལ་བར་བཤད། །ད་ཡང་འདུས་པའི་སྙིང་པོ་ཉོན། །ཕྱི་ཡི་འབྱུང་བ་རྣམ་ལྔ་ནི། །རྒྱུ་དང་རྐྱེན་ལས་འབྱུང་བའི་ཕྱིར། །གཞན་འབྱུང་ཡིན་ཕྱིར་ཡེ་ཤེས་མིན། །དེ་ཕྱིར་ཆོས་དབྱིངས་གོལ་སར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྣང་བ་ཆོས་དབྱིངས་ཀྱི་གོལ་ས་བསྟན་པའི་ལེའུ་སྟེ་གྱ་གཉིས་པའོ།། །།དེ་ནས་འདས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །བསྒོམ་པའི་གོལ་ས་བཀའ་སྩལ་པ། །གང་ཟག་བདག་མེད་མི་གཡོ་དང་། །ཆོས་ལ་བདག་མེད་མི་གཡོ་དང་། །འཇིག་རྟེན་དགའ་བར་མི་གཡོ་དང་། །ཏིང་འཛིན་ཆོས་སྐུའི་གོལ་སར་གསུངས། །ད་ཡང་འདུས་པའི་སྙིང་པོ་ཉོན། །གང་ཟག་བདག་མེད་མི་གཡོ་བ། །ཚོགས་དྲུག་འགགས་ཀྱང་སྐད་ཅིག་མ། །ང་རྒྱལ་ཡིན་ཕྱིར་དོན་མ་རེག །སྒོ་ལྔ་བཀག་པ་དོན་ཡིན་ན། །ཉན་ཐོས་བསྒོམ་པས་རྫོགས་ཆེན་འགྱུར། །བྱུང་ཚོར་བཀག་པས་དོན་ཡིན་ན། །རང་རྒྱལ་བསྒོམ་པས་རྫོགས་ཆེན་འགྱུར། །ད་ཡང་འདུས་པའི་སྙིང་པོ་ཉོན། །ཆོས་ལ་བདག་མེད་མི་གཡོ་བ། །རང་བཞིན་མེད་ཕྱིར་ཡིད་ལ་དྲན། །ཞི་གནས་བསམ་གཏན་དོན་ཡིན་ན། །ལྷག་མཐོང་བཀའ་ལ་དོན་མེད་འགྱུར། །འདུ་ཤེས་བཟུང་བ་དོན་ཡིན་ན། །སྐྱེ་མཆེད་མུ་བཞི་ཅི་ལས་གོལ། ། ― DNG002_Page_0116 ―
[མ་དཔེ་གཟིགས་ན་འདིར་གནོན།]
སེམས་ཀྱི་བཞག་ཐབས་བློ་འཇུག་ན། །འབྱུང་འཇུག་ཡོད་ཕྱིར་ཅི་ལ་རྫོགས། །རྟོགས་དང་མི་རྟོགས་འདྲེས་གྱུར་ན། །འཁོར་འདས་གཉིས་བསྒོམ་ཅི་ལ་རིག །རྟག་ཆད་གཉིས་ལ་མི་རྟོག་པས། །མ་ནོར་དོན་ལ་རེག་གྱུར་ན། །དབུ་མ་རྫོགས་ཆེན་ཅི་ལ་ཡིན། །ད་ཡང་འདུས་པའི་སྙིང་པོ་ཉོན། །འཇིག་རྟེན་དགའ་བདེ་མི་གཡོ་བ། །འཁོར་འདས་མི་རྟོག་རྒྱུ་མེད་ན། །ས་རྡོ་ཤིང་ཡང་རྟོག་པར་འགྱུར། །རྟོག་དཔྱོད་འདས་པས་དོན་རེག་ན། །བསམ་གཏན་གསུམ་སོགས་ཅི་ལ་གོལ། །སྣང་བ་འདི་ལ་མི་རྟོག་ཙམ། །དེས་ནི་རྣལ་འབྱོར་དོན་རེག་ན། །ཡུལ་འདི་འཁྲུལ་པར་ཅི་ལ་འཇོག །སྟོང་པས་དོན་ལ་རེག་གྱུར་ན། །རྒྱུ་དང་འབྲས་བུ་སྟོང་པའི་ཕྱིར། །ཆད་པ་ཡིན་ཕྱིར་གོལ་སར་བཤད། །ད་ཡང་རྡོ་རྗེ་སེམས་དཔའ་ཉོན། །ཕྱོགས་མཐུན་བདུན་དང་འདྲ་བ་ལས། །ཞེན་པ་སྤངས་ཕྱིར་བསྒོམ་པ་མིན། །དེ་ཕྱིར་མཚོ་དབུས་གྲུ་ཞིག་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསྒོམ་པའི་གོལ་ས་བསྟན་པའི་ལེའུ་སྟེ་གྱ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །སྤྱོད་རྩིང་ཉེས་དམིགས་བཀའ་སྩལ་པ། །གསང་སྔགས་གསང་བའི་སྒོར་ཞུགས་ནས། །རང་གིས་མ་རྟོགས་གཞན་ལ་འཆད། །མཁས་པ་སྨོད་ཅིང་མཉམ་ལ་འགྲན། །དྲེགས་ཤིང་ང་རྒྱལ་མཁས་འདོད་ནས། །ཚིག་ཙམ་ཆོས་ལ་ཁུངས་ཕྱུང་སྟེ། །རྩལ་བཤད་ཐེ་ཚོམ་གཞུང་ཉམས་བྱེད། །ཕྱི་མ་དམྱལ་བ་ཆེན་པོར་ལྟུང་། །ད་ཡང་རྡོ་རྗེ་སེམས་དཔའ་ཉོན། །རྩལ་དང་སྟོབས་ནི་ཡོད་གྱུར་ཀྱང་། །ལུས་ཀྱི་སྤྱོད་པ་མ་བསྲུངས་པས། །ཐོ་ཆོ་སྤྱོད་པའི་ལས་བྱས་ན། །འབྲས་བུ་སྡུག་བསྔལ་རྐྱེན་དུ་འགྱུར། །ཡིད་ཀྱི་དྲན་པས་མ་བཟུང་བས། །ངག་གི་འཆལ་པ་སྨྲས་གྱུར་པས། །གཞན་གྱི་ཆོས་ལ་སྒྲོ་སྐུར་འབྱུང་། །ཕྱི་ ― DNG002_Page_0117 ―
[མ་དཔེ་གཟིགས་ན་འདིར་གནོན།]
མར་ཚ་བའི་དམྱལ་བར་སྐྱེ། །ལྟ་བའི་དྲན་པས་གཟུང་མེད་པར། །ཡིད་ཀྱི་སྤྱོད་པ་མ་བསྲུངས་པར། །བདག་ཏུ་རྟོག་པའི་གཟུང་འཛིན་གྱིས། །ཕྱི་མར་མུན་པའི་སྐྱེ་མཆེད་ལྟུང་། །ད་ཡང་རྡོ་རྗེ་སེམས་དཔའ་ཉོན། །དེ་བཞིན་ལུས་ངག་ཡིད་ཀྱིས་ཀྱང་། །དོན་མ་གོ་བར་སྤྱོད་གཟབ་སྟེ། །བྲན་མོའི་ཚུལ་དུ་བྱས་གྱུར་ཀྱང་། །ཚུལ་འཆོས་ཡིན་ཕྱིར་དོན་ལས་གོལ། །དེ་ཕྱིར་ངེས་དོན་མ་རྟོགས་ན། །ཅི་སྤྱོད་ནོར་ཕྱིར་སྐྱོན་ཆེ་བས། །མ་རྟོགས་དགེ་སྡིག་གང་སྤྱོད་ཀྱང་། །འཁོར་བའི་མཐར་ནི་ལྟུང་བར་ངེས། །ད་ཡང་འདུས་པའི་སྙིང་པོ་ཉོན། །བྱ་བ་མ་ལུས་ཐམས་ཅད་ནི། །གང་བྱས་རེ་དོགས་ཡོད་པའི་ཕྱིར། །ཅི་སྤྱོད་བདུད་དུ་འགྲོ་བར་ངེས། །དེ་ཕྱིར་སྤྱོད་པ་ཆེད་དུ་འགལ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྱོད་པའི་གོལ་ས་བསྟན་པའི་ལེའུ་སྟེ་གྱ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །འབྲས་བུའི་གོལ་ས་བཀའ་སྩལ་པ། །ལྷ་དང་མི་ཡི་འབྲས་བུ་དེ། །བསྙེན་གནས་སྡོམ་པ་ལ་བརྟེན་ནས། །བསོད་ནམས་ཚོགས་ནི་བསགས་གྱུར་ཀྱང་། །ཡིད་སྨོན་བྱེད་ཕྱིར་དོན་ལས་གོལ། །ད་ཡང་འདུས་པའི་སྙིང་པོ་ཉོན། །མུ་སྟེགས་རྟག་པའི་འབྲས་བུ་ཡང་། །མཐུ་ཆེན་མངོན་ཤེས་རྣོ་མྱུར་ཀྱང་། །བདག་ཏུ་ལྟ་ཕྱིར་འཁོར་བའི་རྒྱུ། །སྡུག་བསྔལ་འབའ་ཞིག་ཐར་པ་མེད། །ཉན་ཐོས་རང་རྒྱལ་འབྲས་བུ་ཡང་། །དཀའ་ཐུབ་མཐར་ཕྱིན་བདེན་སྤྱོད་ཀྱང་། །ཆོས་ལ་བདག་མེད་ཞེན་པའི་ཕྱིར། །འབྲས་བུ་ཅི་ཐོབ་ལྷ་མི་ཙམ། །མཚན་ཉིད་ཐེག་པ་རྣམ་གཉིས་ཀྱང་། །མཐའ་བྲལ་ཞེན་འདོད་དོན་ལ་གོལ། །དུས་ལ་ལྟོས་ཕྱིར་སྒྲིབ་སྦྱངས་པས། །འབྲས་བུ་མི་ཐོབ་སྙིང་རྗེའི་གནས། །ད་ཡང་རྡོ་རྗེ་སེམས་དཔའ་ཉོན། །ཕྱི་རྒྱུད་རྣམ་གསུམ་འབྲས་བུ་ཡང་། །རང་བྱུང་སྙིང་པོ་མ་ཤེས་པས། །དངོས་གྲུབ་གཞན་ནས་རེ་བའི་ཕྱིར། །སངས་རྒྱས་མི་འབྱུང་རེ་དོགས་མཐའ། །བསྐྱེད་རྫོགས་རྣམ་གཉིས་འབྲས་བུ་ཡང་། །འདོད་པ་དབྱེར་མེད་འདོད་པ་དེས། །རྩོལ་ ― DNG002_Page_0118 ―
[མ་དཔེ་གཟིགས་ན་འདིར་གནོན།]
སྒྲུབ་ཏིང་འཛིན་ཅི་བསྒོམ་ཀྱང་། །རིག་འཛིན་མི་ཐོབ་རུ་དྲར་སྐྱེ། །ད་ཡང་འཁོར་གྱི་སྙིང་པོ་ཉོན། །དེ་དག་བརྟགས་པའི་འབྲས་བུ་ཀུན། །རྣམ་པ་དུ་མ་ཡོད་གྱུར་ཀྱང་། །མི་རྟོག་ཆོས་སྤྱོད་ཅི་བྱས་ཀྱང་། །མི་གྲོལ་འཆིང་བའི་རྒྱུ་རུ་འགྱུར། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འབྲས་བུའི་གོལ་ས་བསྟན་པའི་ལེའུ་སྟེ་གྱ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །དམ་ཚིག་ཉམས་པའི་དབྱེ་བ་ནི། །ཆེད་དུ་དགོངས་ནས་བཀའ་སྩལ་པ། །ཉམས་པའི་ཉེས་དམིགས་རྣམ་དྲུག་ནི། །ཁྱོད་ལ་བཤད་ཀྱིས་ཡིད་ཀྱིས་ཉོན། །ཉན་པའི་དབང་ནི་མ་མནོས་པར། །གསང་སྔགས་རྒྱུད་ནི་ཉན་པ་ན། །ཚེ་ཐུང་བར་ཆད་སྣ་ཚོགས་འོང་། །ནལ་བུས་བློན་གྲལ་མི་ཟིན་འདྲ། །ལུང་ལྡན་འཆད་པའི་དབང་མེད་པར། །གསང་སྔགས་ཐེ་ཚོམ་བཤད་གྱུར་ན། །སྨྱོ་དང་འབོགས་པའི་ནད་ཟིན་ནས། །ཕྱི་མ་ལྕེ་རྨོ་དམྱལ་བར་ལྟུང་། །བསྒོམ་བསྒྲུབ་དབང་ནི་མ་མནོས་པར། །དམ་རྫས་བསོགས་ནས་བསྒྲུབ་བྱེད་པ། །ཡི་དྭགས་འདྲེ་བཀྲེན་མྱོང་བར་འགྱུར། །གདོལ་པས་རྒྱལ་ས་མི་ཟིན་འདྲ། །ད་ཡང་རྡོ་རྗེ་སེམས་དཔའ་ཉོན། །ལུང་ལྡན་ངེས་པའི་བླ་མ་ལ། །དབང་མ་མནོས་པར་མཁས་སུ་རེ། །ངེས་དོན་རྒྱུད་ཀྱི་མན་ངག་ནི། །མཁྱེན་དུ་རེ་བས་ཁ་ཚབས་བྱེད། །ཕྱི་མ་རྡོ་རྗེ་དམྱལ་བར་ལྟུང་། །དབང་མེད་སྔགས་སྤྱོད་སྡིག་པ་ཆེ། །དེ་ཕྱིར་བཀའ་ལ་དམ་པར་དགོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དབང་མ་མནོས་པའི་ཉེས་དམིགས་བསྟན་པའི་ལེའུ་སྟེ་གྱུ་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །རྟོགས་ཐབས་མེད་པའི་ཉེས་དམིགས་ནི། །འདུས་པའི་འཁོར་ལ་བཀའ་སྩལ་པ། །རང་ལ་ཡོད་བོར་ ― DNG002_Page_0119 ―
[མ་དཔེ་གཟིགས་ན་འདིར་གནོན།]
གཞན་བཙལ་ན། །མཐའ་ལས་འདས་པའི་སྐྱོན་དུ་འགྱུར། །སྡུག་བསྔལ་འབའ་ཞིག་བདེ་བ་མེད། །ཁྱུང་ཕྲུག་ནམ་མཁའི་མཐའ་འཚོལ་འདྲ། །འཁྲུལ་གཞི་ངོ་ནི་མ་ཤེས་པར། །དུག་ལྔ་སྤངས་ནས་བདེ་ཚོལ་བ། །འཁྲུལ་པ་ཡིན་ཕྱིར་རྙེད་མི་འགྱུར། །ཆུར་འཁྲུལ་སྨིག་རྒྱུ་སྙོག་པ་འདྲ། །མ་རིག་རྩ་བ་མ་ཆོད་པར། །དུག་ལྔ་ཆོས་ཉིད་ཡིན་ཟེར་བ། །ཕོ་ཚོད་བལྟ་བ་བདུད་ཡིན་ཕྱིར། །དུག་ཉིད་སྨན་དུ་བྱེད་པ་འདྲ། །གཞི་ལ་འཁོར་མེད་མ་ཤེས་པར། །རྩོལ་སྒྲུབ་དད་པ་ཆེར་བསྐྱེད་དང་། །གཉེན་པོས་དུག་ལྔ་གྲོལ་འདོད་ནི། །རྭ་ལ་འོ་མ་འཇོ་བ་འདྲ། །ལུང་ལྡན་ངེས་པའི་དོན་མེད་པར། །བསྒོམ་མེད་བྱེད་པའི་ང་རྒྱལ་ཅན། །ལྷག་མཐོང་མེད་ཕྱིར་དོན་ལས་གོལ། །ཞ་བོས་རི་རྩེ་བསྙེག་པ་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྟོགས་པར་བྱ་བའི་དམ་ཚིག་ཉམས་པའི་ཉེས་དམིགས་བསྟན་པའི་ལེའུ་སྟེ་གྱ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ཆེད་དུ་བྱས་པའི་དམ་ཚིག་ནི། །ལུང་ལྡན་བླ་མ་དྲིན་ཆེན་ལ། །བརྙས་ཤིང་ངན་སེམས་བསྐྱེད་བྱས་ན། །རྡོ་རྗེ་དམྱལ་བར་ཐར་མེད་ལྟུང་། །ཆ་མེད་དུག་ནི་འཐུང་བ་འདྲ། །གྲོགས་ལ་ཕྲག་དོག་གདུག་བྱེད་པ། །མཆེད་ལྕམ་ཐུགས་དཀྲུག་ཉེས་བྱས་ཏེ། །ཅི་བསམ་མི་འགྲུབ་བསྲེག་ཅིང་སྒྲིབས། །རྒྱབ་བརྟེན་མེད་པའི་མི་དང་འདྲ། །སྦས་པ་གཞན་ལ་བཤད་པ་ན། །ཡུན་རིངས་ནད་ཐེབས་རྫས་དང་བྲལ། །ཕྱི་མ་ན་རག་དམྱལ་བར་ལྟུང་། །ངོ་མ་ཤེས་པར་གཉེན་གསོད་འདྲ། །རྣལ་འབྱོར་ཁས་འཆེས་ལེ་ལོ་ཅན། །དབང་པོ་ཡུལ་ལ་ཡེངས་པའི་ཕྱིར། །ཞི་གནས་ལྷག་མཐོང་གང་ཡང་མེད། །བྱིའུ་ཁྲ་སྙི་ལ་ཟིན་པ་འདྲ། །ངེས་པའི་གདམས་ངག་ཁྱད་བསད་ནས། །བསྒྲུབས་རྟགས་ཕྲ་མོ་དམ་པར་བལྟ། །རང་གིས་རང་ཕུང་བྱེད་པའི་མི། །ཉེས་མེད་རྒྱལ་པོས་ཆབ་བསྩལ་འདྲ། །དོན་བོར་འཁོར་ལ་གདུང་དྲགས་པ། །ཞན་ ― DNG002_Page_0120 ―
[མ་དཔེ་གཟིགས་ན་འདིར་གནོན།]
པའི་ཆོས་ལ་དམ་པར་འཛིན། །གཉེན་པོ་མེད་ཕྱིར་རང་རྒྱུད་གོལ། །བོང་རྒན་རྫབས་སུ་ཚུད་པ་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དམ་ཚིག་ཆེད་དུ་མ་བྱས་པའི་སྐྱོན་བསྟན་པའི་ལེའུ་སྟེ་གྱ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །བསྲུང་བའི་དམ་ཚིག་བཀའ་སྩལ་པ། །སློབ་དཔོན་སྐུ་དགྲར་འདྲིས་བཤེས་ན། །རིག་འཛིན་ཐམས་ཅད་ཁྲོས་འགྱུར་ནས། །ཐར་བའི་སྲོག་གཅོད་དམྱལ་བར་ལྟུང་། །རང་གིས་རང་མིག་བཏོན་པ་འདྲ། །དམ་ཉམས་འཐབ་སྡུམ་བྱས་འགྱུར་ན། །རྒྱལ་སྲས་གཙང་རིགས་ཀུན་ཁྲོས་ནས། །ལྷ་དང་བྲལ་བས་གོད་ཁ་འབྱུང་། །སྐྱེལ་མ་མེད་པའི་ཚོང་པ་འདྲ། །གཙང་སྨེ་མེད་པར་བཟའ་ཟེར་ནས། །རྨིག་ཟླུམ་ཤ་ནི་ཡོགས་སྤྱད་ན། །དགྲ་རྐུན་བར་ཆད་བསོད་ནམས་འགྲིབ། །སད་སེར་ཁྱེར་བའི་ལོ་ཏོག་འདྲ། །རྒྱུད་དྲུག་གཞན་ལ་སྤེལ་བྱས་ན། །མཁའ་འགྲོའི་ནད་ཀྱིས་ཐེབས་འགྱུར་ཏེ། །ཡུན་རིང་སྡུག་བསྔལ་ཐམས་ཅད་འོང་། །ཕྱི་མར་ལྐུགས་པའི་དམྱལ་བར་ལྟུང་། །བཙོན་ནི་ལྕགས་འོག་ཤི་བ་འདྲ། །ནལ་བསད་ངོ་ནག་ལ་སྤྱད་ན། །འགོ་བའི་ནད་ཀྱིས་ཐེབས་གྱུར་ནས། །ཕྱི་མ་དུད་འགྲོ་སྦུར་བར་སྐྱེ། །རིན་ཆེན་འདམ་དུ་བྱིང་བ་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསྲུང་བར་བྱ་བའི་དམ་ཚིག་ཉམས་པའི་སྐྱོན་བསྟན་པའི་ལེའུ་སྟེ་གྱ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །སྤང་བའི་དམ་ཚིག་བཀའ་སྩལ་པ། །ཐ་མལ་སེམས་ཅན་སྲོག་བཅད་ན། །སྐྱབས་འགྲོ་ཉམས་ཤིང་སྙིང་རྗེ་བྲལ། །སྐྱེ་བོ་བདུན་འགྱུར་སྡིག་པ་ཆེ། །སྲིན་པོའི་ལག་ཏུ་བུ་ཁྱེར་འདྲ། །རྣལ་འབྱོར་མ་བྱིན་བླང་གྱུར་ན། །ཡི་དྭགས་གནས་སུ་སྐྱེ་བ་དང་། །སྐྱེ་བོ་ཀུན་གྱིས་སྤྱད་གྱུར་ན། །རབ་ཏུ་ཚ་བའི་དམྱལ་བར་སྐྱེ། །སྲུང་མ་ལྔ་ལྡན་ ― DNG002_Page_0121 ―
[མ་དཔེ་གཟིགས་ན་འདིར་གནོན།]
ཆགས་སྤྱད་ན། །དགའ་བྲལ་སྲོག་གི་བར་ཆད་འོང་། །ཕྱི་མ་ངུ་འབོད་སྲིན་བུར་སྐྱེ། །སྲིན་པོ་བྱི་ལའི་མངལ་དང་འདྲ། །རང་འདོད་བློ་བསྒྱུར་རྫུན་སྨྲས་ན། །འདི་རུ་ཡིད་ཆེས་བློ་མི་འཇོག །ཕྱི་མ་ལྕེ་འབིགས་དིག་པར་སྐྱེ། །ཁ་མེད་ལྟོ་འཕྱེ་ཉམས་པ་འདྲ། །ད་ཡང་འདུས་པའི་སྙིང་པོ་ཉོན། །ཉམས་པའི་ཉེས་དམིགས་དེ་དག་ཀྱང་། །རྩ་བ་མ་རིག་འཁྲུལ་པས་བསྐྱེད། །དེ་ཕྱིར་ལུང་ལྡན་མེད་པའི་སྐྱོན། །འཁོར་བའི་མཐའ་ལ་ཟད་པ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤང་བར་བྱ་བའི་དམ་ཚིག་ཉམས་པའི་སྐྱོན་བསྟན་པའི་ལེའུ་སྟེ་དགུ་བཅུ་པའོ།། །།དེ་ནས་འདུས་པའི་ཚོགས་རྣམས་ལ། །དབང་དམ་ཉམས་པའི་ཉེས་པ་ནི། །ལྟུང་བའི་སྒོ་དག་བཀའ་སྩལ་པ། །རང་སེམས་ཆོས་སྐུ་མ་རྟོགས་པར། །མདོ་རྒྱུད་མང་པོ་ཤེས་བཤད་ཀྱང་། །བདག་བསྟོད་གཞན་ལ་སྨོད་པའི་ཕྱིར། །ངན་སོང་གསུམ་གྱི་སྒོར་ལྟུང་འཁོར། །གཞན་གྱི་བསམ་སྦྱོར་བཟང་པོ་ལ། །བར་ཆད་བྱེད་པ་བདུད་ཡིན་ཏེ། །གཞན་གྱི་རྫས་ལ་སེར་སྣ་བྱེད། །མ་རྟོགས་བདུད་ཀྱི་སྒོར་ལྟུང་འཁྱམས། །མ་རྟོགས་མཐུ་ཆེ་ཚད་མེད་ཀྱང་། །ང་རྒྱལ་དྲེགས་པའི་ཉོན་མོངས་ཅན། །འཇིག་རྟེན་འདི་རུ་བཙན་ཕྱུག་ཀྱང་། །གནོད་སྦྱིན་སྒོར་ལྟུང་རྟག་ཏུ་འཁྱམས། །ད་ཡང་འདུས་པའི་སྙིང་པོ་ཉོན། །མཉམ་ཉིད་ཆོས་སྐུ་མ་རྟོགས་པར། །རང་རྒྱུད་ཆགས་སྡང་ཕོ་ཚོད་སྤྱོད། །སྙིང་རྗེ་མེད་པར་གསོད་ལ་དགའ། །སྲིན་པོའི་སྒོར་ལྟུང་དམྱལ་བར་སྐྱེ། །རང་དབང་ཏིང་འཛིན་མ་ཐོབ་པར། །སྡིག་པས་འཁོར་དང་རིས་སུ་བཅད། །བདག་ཉིད་ཆེ་འདོད་འཁོར་སྡུད་པ། །གཅན་ཆེན་ཤོ་གམ་རྟག་ཏུ་འཁོར། །ཇི་བཞིན་མ་ནོར་མ་རྟོགས་པར། །ལོག་རྟོག་སྤྱོད་རྩིང་སྣ་ཚོགས་སྤྱོད། །རང་གིས་མི་ཤེས་གཞན་བགྲོ་བ། །རུ་ཏྲའི་སྒོར་ལྟུང་དམྱལ་བར་སྐྱེ། །ད་ཡང་རྡོ་རྗེ་སེམས་དཔའ་ཉོན། །མ་རྟོགས་ཕྲིན་ལས་ཅི་མཁས་ཀྱང་། ། ― DNG002_Page_0122 ―
[མ་དཔེ་གཟིགས་ན་འདིར་གནོན།]
ཚིག་ལ་དངོས་པོར་འཛིན་པ་ཡིན། །བགེགས་དང་བྱ་རོག་སྒོར་ལྟུང་འཁོར། །ཐབས་ལམ་དབང་ལ་ཁུངས་ཕྱུང་སྟེ། །འདོད་ཆགས་རང་དགར་རྟག་སྤྱོད་པ། །ལྟ་བས་མ་ཟིན་བདེ་ལ་ཞེན། །ལྷ་ཆེན་འདོད་ཆགས་མངལ་སྒོར་ལྟུང་། །མ་རྟོགས་ང་དང་བདག་འཛིན་པས། །གསང་སྔགས་ལྟ་སྤྱོད་ལོག་པའི་ཕྱིར། །བརྩེ་མེད་སྡིག་པ་ཀུན་སྤྱད་པས། །མུ་སྟེགས་སྒྲོ་སྐུར་རྟག་ཏུ་འཁྱམས། །ད་ཡང་རྡོ་རྗེ་སེམས་དཔའ་ཉོན། །མ་རྟོགས་དབང་གིས་རྩིངས་སྤྱོད་པ། །ལུས་ངག་ཡིད་ཀྱིས་ལེན་པའི་ཕྱིར། །ལས་ངན་དགུ་པོ་ཀུན་སྤྱད་པས། །དམྱལ་བར་ངེས་འགྲོ་རྟག་ཏུ་འཁྱམས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྟུང་བའི་སྒོ་དགུ་བསྟན་པའི་ལེའུ་སྟེ་གོ་གཅིག་པའོ། །སྡོམ་དུ་བསྡུས་ཏེ་བསྟན་པ་བཅུ་དགུ་པའོ།། །།དེ་ནས་འདུས་པའི་ཚོགས་རྣམས་ཀྱིས། །ཀུན་རིག་སྟོན་པ་ཆོས་རྗེ་ལ། །ལམ་གྱི་དབྱེ་བ་ཞུ་བའི་ཕྱིར། །བདེན་པའི་ཡིད་ཀྱིས་འདི་སྐད་གསོལ། །ཡེ་ཤེས་མེད་པའི་རང་བྱུང་གང་། །གཉིས་ཀ་མེད་པ་གང་གི་བློ། །རང་བྱུང་ཡེ་ཤེས་འཛོམ་པ་གང་། །དེ་སྐད་ཅེས་ནི་ཞུས་པ་ཡིས། །དོན་གསན་འཁོར་ལ་བཀའ་སྩལ་པ། །རང་བྱུང་ཡེ་ཤེས་ཆེན་པོ་ཡིས། །ཡིན་མིན་དབྱེ་བ་ངས་བཤད་ཀྱི། །ཡིད་ཀྱིས་ཉོན་ལ་ལེགས་པར་ཟུངས། །ཡེ་ཤེས་མེད་པའི་རང་བྱུང་དེས། །འཁོར་འདས་གཉིས་ཀྱི་གཞིར་གྱུར་པ། །རང་བཞིན་ལུས་ལ་མཛད་སྤྱོད་མེད། །སྟོང་གསལ་རིག་པ་ཁྱབ་གདལ་དེ། །རྒྱུ་རྐྱེན་མ་བསྐྱེད་རང་བྱུང་སྟེ། །རིག་དང་མ་རིག་ཡེངས་མ་ཡེངས། །གང་དུ་ཡང་ནི་ངོས་མ་ཟིན། །ལུང་ལྡན་མེད་ཕྱིར་ཡེ་ཤེས་ལ། །འཁོར་འདས་བར་དོར་རང་འབྱུང་སྟེ། །གང་ཡིན་ཆ་མེད་ཤེས་པ་གཅིག །ཤན་མ་ཕྱེད་ཅིང་ངོས་མ་ཟིན། །རང་ལ་རང་གི་དོན་མ་རྟོགས། །སྔོན་གྱི་ལྷུན་གྲུབ་དོན་གྱི་གཞི། །ཆོས་རྣམས་ཀུན་གྱི་རྩ་བ་སྟེ། །རང་ལ་ཡེ་ཤེས་ཡོད་མོད་ཀྱང་། །མ་རྟོགས་ཕྱིར་ན་ཡེ་ཤེས་མིན། །མ་རིག་མ་གོལ་སེམས་ཅན་མིན། །གཉིས་ཀ་མེད་པའི་དྲན་པ་དེ། །ཤེས་པ་ཧད་དེ་ཡོད་པ་ལ། །ཚོར་དང་མ་ཚོར་དྲན་པས་ཟིན། །སེམས་ཅན་ཀུན་ལ་གནས་གྱུར་ཀྱང་། །མ་བསྟན་ཕྱིར་ན་ཡེ་ཤེས་མིན། །ལོང་བ་མིག་མཁན་མ་རྙེད་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་ ― DNG002_Page_0123 ―
[མ་དཔེ་གཟིགས་ན་འདིར་གནོན།]
པའི་རྒྱུད་ལས། རང་བྱུང་ཡིན་ཏེ་ཡེ་ཤེས་མིན་པར་བསྟན་པའི་ལེའུ་སྟེ་གོ་གཉིས་པའོ།། །།དེ་ནས་འཁོར་གྱི་སྙིང་པོ་ཉོན། །རང་བྱུང་མེད་པའི་ཡེ་ཤེས་ནི། །ཆེད་དུ་དགོངས་ཏེ་བཀའ་སྩལ་པ། །རང་བྱུང་མེད་པའི་ཡེ་ཤེས་དེ། །ཚོགས་བརྒྱད་གནས་འགྱུར་ཡེ་ཤེས་ལྔ། །བསྐྱེད་པའི་རྐྱེན་ལས་བྱུང་བའི་ཕྱིར། །ཡེ་ནས་གནས་པའི་རང་བྱུང་མིན། །ད་ཡང་འཁོར་གྱི་སྙིང་པོ་ཉོན། །ལུང་མ་བསྟན་གྱི་དུས་ཙམ་ལ། །ཡེ་ཤེས་བྱ་བའི་མིང་ཡང་མེད། །སྐྱེ་ཤི་གཉིས་ཀྱི་བར་དོ་ལ། །ངེས་ལུང་ལྡན་པའི་ཡེ་ཤེས་དེ། །ཐོག་མ་མེད་པར་ཐ་མ་ཡོད། །མེ་ལོང་ཡེ་ཤེས་བྱ་བ་ནི། །མ་རྟོགས་མེད་ལ་རྟོགས་ན་ཡོད། །རྐྱེན་ལས་བྱུང་ན་རང་བྱུང་མིན། །དེ་ཕྱིར་མེ་ལོང་ཡེ་ཤེས་ཀྱང་། །གློ་བུར་བྱུང་ཡང་ཡེ་ཤེས་མིན། །མཉམ་ཉིད་སོ་སོར་རྟོག་པ་དང་། །བྱ་བ་གྲུབ་པའི་ཡེ་ཤེས་བཞི། །ཉི་མ་དང་ནི་ཟེར་བཞིན་དུ། །ཆོས་དབྱིངས་ཡེ་ཤེས་མངོན་གྱུར་པའི། །རྩལ་དུ་ཡེ་ཤེས་བཞི་པོ་བྱུང་། །གཞི་ལ་ཡེ་ཤེས་རྣམ་ལྔ་མེད། །དེ་ཕྱིར་རང་བྱུང་རིག་པ་མིན། །ད་ཡང་རྡོ་རྗེ་སེམས་དཔའ་ཉོན། །སེམས་ཅན་མོས་པ་དྲངས་པ་ལས། །གྲངས་ཀྱི་ཡེ་ཤེས་རྣམ་ལྔ་ནི། །ཚིག་ཏུ་ཡོད་དེ་དོན་ལ་མེད། །གཞི་ཡི་ཡེ་ཤེས་མ་ཤེས་ན། །ར་གན་གསེར་དུ་འཛིན་པ་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རང་བྱུང་མེད་པའི་ཡེ་ཤེས་བསྟན་པའི་ལེའུ་སྟེ་གོ་གསུམ་པའོ།། །།དེ་ནས་ཀུན་རིག་སྟོན་པ་ཡིས། །ཡེ་ཤེས་རང་བྱུང་གཉིས་ཀ་མེད། །འདུས་པའི་འཁོར་ལ་བཀའ་སྩལ་པ། །ཐོག་མ་ཤེས་གཞི་ལུང་མ་བསྟན། །དེ་ལས་མ་རིག་རྐྱེན་བཞིས་བསྐྱེད། །ལུང་ལྡན་མེད་ཕྱིར་ཡེ་ཤེས་མིན། །ད་ཡང་འདུས་པའི་སྙིང་པོ་ཉོན། །སྐྱེ་ཤི་བར་དོར་དོན་མ་ཤེས། །ཀུན་གཞི་ལས་བྱུང་ཡིད་གཉིས་ཀྱི། །བག་ཆགས་མི་དགེ་སྣ་ཚོགས་བསགས། །གཞི་ལ་གནོད་བྱེད་མ་ཤེས་པར། །ཡེ་ཤེས་རང་བྱུང་གཉིས་ཀ་མིན། །དེ་ལས་ངེས་པའི་སྐྱོན་ཅན་ནི། །གཞི་ལས་འཁྲུལ་ཕྱིར་གཞི་ལ་ཞེན། །མེད་པ་ལ་ནི་བདེན་པར་འཛིན། །ཆོས་བརྒྱད་ཡུལ་ལ་དམ་པར་བལྟ། །མེད་པ་ལ་ནི་ཡོད་པར་བལྟ། །རི་བོང་རྭ་ཡི་ཁ་དོག་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་ ― DNG002_Page_0124 ―
[མ་དཔེ་གཟིགས་ན་འདིར་གནོན།]
པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་རང་བྱུང་གཉིས་ཀ་མེད་པར་བསྟན་པའི་ལེའུ་སྟེ་གོ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །རང་བྱུང་ཡེ་ཤེས་འཛོམ་པར་ནི། །དད་ལྡན་འཁོར་ལ་བཀའ་སྩལ་པ། །དང་པོ་ངོ་བོ་ཉིད་ཀྱི་སྐུ། །ཀུན་ཏུ་བཟང་པོའི་ཆོས་དྲུག་གིས། །འཁྲུལ་མ་མྱོང་ལ་རྟོགས་པའི་ཕྱིར། །ཡེ་ཤེས་རང་བྱུང་དུས་མཉམ་འཛོམ། །ད་ཡང་རྡོ་རྗེ་སེམས་དཔའ་ཉོན། །ད་ལྟ་སྐྱེ་ཤིའི་བར་དོ་ལ། །ལུང་ལྡན་ངེས་པའི་གདམས་ངག་གིས། །ཡུལ་སེམས་གཞི་ལ་མེད་པའི་དོན། །ཤེས་རབ་རྣམ་གསུམ་ལས་བྱུང་བའི། །ལྷག་མཐོང་རིག་པའི་ཡེ་ཤེས་ཤར། །ཡེ་ནས་རྒྱུ་དང་རྐྱེན་མེད་ཕྱིར། །རང་བྱུང་རིག་པའི་རྒྱལ་པོ་དེ། །ལུང་ལྡན་ངེས་པའི་གདམས་ངག་གིས། །ཡེ་ནས་རང་བྱུང་རིག་པ་ལ། །ཤེས་ནས་ལུང་ལྡན་དོན་གོ་བ། །དེ་ཕྱིར་དེ་གཉིས་འཛེམ་པ་ཡིན། །ད་ཡང་འདུས་པའི་སྙིང་པོ་ཉོན། །གཞི་དང་ངེས་ལུང་འཛོམ་པ་ལ། །གོལ་དང་སྒྲིབ་པའི་སེལ་མེད་ཤེས། །དེ་ཕྱིར་རྟོག་པ་མངོན་གྱུར་ནི། །མར་གྱི་ཡང་ཞུན་ལྟ་བུར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རང་བྱུང་ཡེ་ཤེས་འཇོམ་པར་བསྟན་པའི་ལེའུ་སྟེ་གོ་ལྔ་པའོ། །སྡོམ་དུ་བསྡུས་ཏེ་བསྟན་པ་ཉི་ཤུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཆེད་དུ་གསུངས་པའི་དོན་གོ་ནས། །འཁོར་རྣམས་ལ་ནི་བརྩེར་དགོངས་ཏེ། །རྫོགས་སངས་རྒྱས་ལ་འདི་སྐད་གསོལ། །གཞི་ཉིད་དགེ་སློང་གང་གིས་མཚོན། །དང་པོ་སངས་རྒྱས་ཇི་ལྟར་བྱུང་། །དེ་ཡི་བྱིན་རླབས་ཇི་ལྟར་བྱུང་། །བརྡ་དང་ཚིག་གིས་ཇི་ལྟར་མཚོན། །རྫོགས་སངས་རྒྱས་ཀྱིས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་ངེས་པའི་དོན། །མ་ནོར་ངེས་པའི་སངས་རྒྱས་བཀའ། །ང་ཡིས་བཤད་ཀྱིས་ལེགས་པར་ཉོན། །རང་བཞིན་གཞི་ཡི་མཚོན་དཔེ་ནི། །འདུས་མ་བྱས་ཀྱི་ནམ་མཁའ་འདྲ། །གང་ནས་མ་འོངས་ཡེ་ནས་ཡོད། །གར་ཡང་མི་འགྲོ་དུས་གསུམ་གཅིག །ད་ལྟ་ཀུན་ཁྱབ་ངོས་བཟུང་བྲལ། །ཐོག་མཐའ་མེད་པའི་ནམ་མཁའ་ལ། །རིག་མེད་སྟོང་པ་ཡིན་པའི་ཕྱིར། །དཔེ་རུ་ཟབ་སྟེ་དོན་དུ་མེད། ། ― DNG002_Page_0125 ―
[མ་དཔེ་གཟིགས་ན་འདིར་གནོན།]
ད་ཡང་རྡོ་རྗེ་སེམས་དཔའ་ཉོན། །དེ་བཞིན་ངོ་བོའི་གནས་ལུགས་ནི། །འཁོར་འདས་མ་རེག་སྔར་བཞིན་འདུས། །སངས་རྒྱས་གཉིས་སུ་མེད་པ་ཡི། །འཁོར་འདས་གཉིས་ཀྱི་གཞིར་གྱུར་པ། །མ་ཡེངས་པར་ནི་ཡོད་གྱུར་ཀྱང་། །དོན་གྱིས་མ་ཟིན་རང་སྣང་སེམས། །ངོས་མ་ཟིན་ཞིང་ཤན་མ་ཕྱེད། །འགྲོ་འོང་མེད་པར་རྒྱུན་དུ་གནས། །ཐོག་མཐའ་མེད་ཕྱིར་ངོ་མ་ཤེས། །ད་ལྟ་ཀུན་གཞི་སེམས་ལ་གནས། །འདུས་མ་བྱས་ཕྱིར་སྐྱེ་འཇིག་མེད། །སེམས་ཅན་ཀུན་གྱི་བརྟེན་གནས་གཞི། །མོས་གུས་མེད་ཕྱིར་རྟོགས་པར་དཀའ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གཞི་ཡི་དཔེ་དོན་བསྟན་པའི་ལེའུ་སྟེ་གོ་དྲུག་པའོ།། །།དེ་ནས་ཀུན་རིག་སྟོན་པ་ཡིས། །དང་པོ་སངས་རྒྱས་རྟོགས་ཚུལ་ནི། །དད་ལྡན་འདུས་པའི་འཁོར་རྣམས་ལ། །ང་ཡི་རྟོགས་ཉམས་བཀའ་སྩལ་པ། །འཁོར་འདས་མེད་པའི་གོང་རོལ་དུ། །ས་ཆུ་མེ་རླུང་གང་ཡང་མེད། །སྲིད་པ་མ་ཆགས་སྟོང་པ་ཉིད། །དེ་ཚེ་རང་བཞིན་ལུས་དེ་ནི། །ཡེ་ནས་ཡོད་པའི་ཆོས་ཉིད་དེ། །དེ་དོན་མ་འཁྲུལ་རིག་པ་ཡིས། །ད་ལྟ་མ་འཁྲུལ་ངེས་བསྟན་ཕྱིར། །གཞི་དང་རིག་པ་གཅིག་ཏུ་ཤེས། །རྟོགས་དང་སངས་རྒྱས་དུས་མཉམ་བྱུང་། །ནམ་ལངས་ཉི་ཤར་དུས་མཉམ་པ། །རི་བོ་ཏ་ལའི་དཔེ་བཞིན་དུ། །འཁོར་འདས་ཐོག་མཐའ་དུས་གཅིག་ཆོད། །ད་ཡང་རྡོ་རྗེ་སེམས་དཔའ་ཉོན། །ཀུན་བཟང་རྒྱལ་བའི་དགོངས་པ་དེ། །རང་བྱུང་ངོ་བོ་ཉིད་ཀྱི་སྐུ། །རྒྱུ་རྐྱེན་མ་བསྐྱེད་འདུས་མ་བྱས། །ཀུན་ལ་ཁྱབ་པ་ཆོས་ཀྱི་སྐུ། །རང་གི་རིག་པ་ཡེ་ཤེས་ཐུགས། །དེ་ཉིད་ཡིན་པར་ངོ་ཤེས་པས། །ལྷག་མཐོང་ཡེ་ཤེས་རང་ཤར་ཕྱིར། །ཡོད་མེད་གཉིས་ཀྱི་སྐུར་བྲལ་བས། །དུས་གསུམ་མི་འགྱུར་ངས་བསྟན་པ། །ཐིག་ལེ་ཉག་གཅིག་ཆོས་ཀྱི་སྐུ། །དེ་ལས་སངས་རྒྱས་ཆོས་རྣམས་འབྱུང་། །དེ་ཕྱིར་ཀུན་ཏུ་བཟང་ཞེས་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ ― DNG002_Page_0126 ―
[མ་དཔེ་གཟིགས་ན་འདིར་གནོན།]
ནམ་མཁའ་དང་མཉམ་པའི་རྒྱུད་ལས། ཀུན་ཏུ་བཟང་པོའི་རྟོགས་ཚུལ་བསྟན་པའི་ལེའུ་སྟེ་གོ་བདུན་པའོ།། །།ཀུན་རིག་སྟོན་པས་ཡང་གསུངས་པ། །འོག་མིན་ཆོས་དབྱིངས་གནས་དེ་རུ། །ཇི་བཞིན་རྡོ་རྗེ་སེམས་དཔའ་དེས། །མ་འཁྲུལ་རིག་པ་གསལ་བ་ནི། །རང་ལ་ཡེ་ནས་ཡོད་མོད་ཀྱང་། །གཞི་ནི་མི་འགྱུར་ངེས་པ་ནི། །འདི་ཉིད་ཁོ་ན་ཡིན་ནམ་མིན། །ཡིད་ལ་ཐེ་ཚོམ་ཆ་ཕྲ་ཡོད། །དེ་དག་བསལ་ཕྱིར་མོས་གུས་སྤྱོད། །དེ་ཕྱིར་ཀུན་བཟང་དེ་ཆེད་དུ། །མཉམ་བཞག་དགོངས་པ་ཐུགས་གཏད་ནས། །ཐེ་ཚོམ་མེད་པར་ཆོས་ཉིད་རྟོགས། །དེ་ཕྱིར་ཡེ་ཤེས་རྒྱུད་དག་པའི། །རྡོ་རྗེ་སེམས་དཔའ་མངོན་གྱུར་གོ། །ཚིག་ཏུ་མ་གོ་དོན་དུ་ཤར། །ད་ཡང་འདུས་པའི་སྙིང་པོ་ཉོན། །དེ་ཕྱིར་བྱིན་གྱིས་བརླབས་ལུགས་ནི། །ཀུན་བཟང་ཐུགས་ཀྱི་ངེས་དོན་དེ། །ཆོས་དྲུག་མིང་དང་དོན་ཤེས་པས། །དུས་གསུམ་ཅིག་ཅར་རིམ་གྱིས་ཉམས། །གང་ལ་མ་བརྟེན་ཡིད་ཀྱིས་ནི། །ལྷག་མཐོང་ཆོས་སྐུར་ད་ལྟ་ཤེས། །དེ་ཕྱིར་དགོངས་པར་བརྒྱུད་པའི་ཕྱིར། །རྟོགས་པ་མངོན་གྱུར་སངས་རྒྱས་པའི། །ཕྱིས་མི་ལེན་པར་རིག་པས་གོ། །ཉིད་ལས་མི་གཞན་སངས་རྒྱས་འབྱུང་། །དེ་ཕྱིར་བྱིན་གྱིས་བརླབས་ཞེས་བྱ། །ད་ཡང་འདུས་པའི་སྙིང་པོ་ཉོན། །སྟོན་པ་ཀུན་བཟང་བྱིན་རླབས་ཀྱི། །སྐུ་གསུང་ཐུགས་ཀྱི་སྤྲུལ་པ་གསུམ། །གཟའ་སྐར་རྒྱ་མཚོར་ཇི་བཞིན་དུ། །དེ་དོན་ཉིད་ཀྱི་རྩལ་དུ་བྱུང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྡོ་རྗེ་སེམས་དཔའ་བྱིན་གྱིས་བརླབས་ཀྱིས་བཤད་པའི་ལེའུ་སྟེ་གོ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །སྤྲུལ་སྐུ་ལྔ་ཡི་བསྟན་པ་ཡང་། །ཚིག་གི་བརྡ་ཡི་སྒྲོན་མ་ཡིས། །མ་རིག་མུན་པ་བསལ་བའི་ཕྱིར། །ལུང་ལྡན་ངེས་པའི་གདམས་ངག་གིས། །སྙན་ནས་རྣ་བར་བརྒྱུད་ཅེས་བྱ། །ད་ཡང་འདུས་པའི་སྙིང་པོ་ཉོན། །དོན་གྱི་བཀའ་ཡི་མན་ངག་གིས། །ཡེ་ཤེས་རིག་པ་ཁོང་ནས་ཤར། །དེ་ཙམ་ཉིད་ན་སྐྱེ་འགགས་མེད། །ད་ལྟ་ཉིད་དུ་མངོན་འགྱུར་གོ། །ལུས་ཀྱི་བརྡ་ཡི་སྤྲུལ་པ་འགྱེད། །སྟོང་གསུམ་མ་ལུས་ཐམས་ཅད་དུ། །སྤྲུལ་པ་ ― DNG002_Page_0127 ―
[མ་དཔེ་གཟིགས་ན་འདིར་གནོན།]
གྲངས་མེད་ཐམས་ཅད་པ། །ལྔ་བཅུ་རྩ་བརྒྱད་བདུན་ཡང་འདུག་བརྡ་ཡིས་ནི། །སྐྱོན་གྱིས་མ་གོས་འགྲོ་དོན་གྲུབ། །ད་ཡང་འདུས་པའི་སྙིང་པོ་ཉོན། །རྟགས་ཀྱི་བརྡ་ཡིས་བསྟན་པའི་ཕྱིར། །སྐུ་མདོག་ཕྱག་མཚན་སྣ་ཚོགས་པ། །བྱིན་རླབས་སངས་རྒྱས་དངོས་གྲུབ་ཐོབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཚིག་ལས་འདས་པ་བསྟན་པའི་ལེའུ་སྟེ་གོ་དགུ་པའོ། །སྡོམ་དུ་བསྡུས་ཏེ་བསྟན་པ་ཉི་ཤུ་རྩ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་དོན་དུ། །ཀུན་རིག་ཆོས་ཀྱི་རྒྱལ་པོ་ལ། །ངེས་པའི་དགོས་དོན་འདི་སྐད་གསོལ། །སྣང་བ་ཆོས་དབྱིངས་ཇི་ལྟར་ཡིན། །འཁོར་འདས་གཉིས་ཀྱི་གཞི་ནི་གང་། །རང་བཞིན་ལྷུན་གྲུབ་ལྟ་བ་གང་། །མ་རིག་མུན་སེལ་ལྟ་བ་གང་། །ཏིང་འཛིན་དབྱེ་བའི་གདམས་ངག་གང་། །དོན་དམ་མི་འབྲལ་ཏིང་འཛིན་གང་། །གནས་ལུགས་འགྱུར་མེད་བལྟ་བ་གང་། །ཀུན་རིག་ཆོས་རྗེས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སྣང་བ་མ་བཅོས་ཆོས་དབྱིངས་ནི། །རང་བྱུང་ཆོས་སྐུ་གཅིག་གཅིག་ལ། །ཡོན་ཏན་ཐམས་ཅད་འབྱུང་བ་ནི། །དཔེར་ན་ཡིད་བཞིན་ནོར་བུ་ལྟར། །དེ་ནི་ལྷུན་གྲུབ་ཀུན་གྱི་གཞི། །ད་ཡང་རྡོ་རྗེ་སེམས་དཔའ་ཉོན། །དང་པོ་གང་ལ་མ་བརྟགས་པར། །བར་དུ་བཟུང་བའི་ཡུལ་མ་ཞེན། །ཐ་མ་རྗེས་སུ་མ་འབྲང་ཕྱིར། །སྒོ་ལྔ་རང་ཡན་བཏང་གྱུར་ཀྱང་། །ཆོས་ཉིད་ཆོས་ཀྱི་དབྱིངས་ཞེས་བྱ། །ནང་གི་རིག་པ་ཆོས་སྐུར་ཤེས། །དེ་ཕྱིར་ཡེ་ཤེས་ཕྱི་ནང་མེད། །ཆོས་ཉིད་རིག་པ་ཀུན་ཏུ་ཞལ། །གང་ལ་ཐོགས་མེད་ཆོས་སྐུར་འཕྱོ། །གནས་ནི་ཆོས་སྐུའི་ཀློང་ན་ཡོད། །རྐྱེན་གྱིས་མི་ཚུགས་ནམ་མཁའ་འདྲ། །དེ་ཕྱིར་རང་བྱུང་འདུས་མ་བྱས། །ད་ཡང་འདུས་པའི་སྙིང་པོ་ཉོན། །གང་ལ་མི་གནས་རིག་པ་འདི། །ནམ་མཁའི་དཀྱིལ་གྱི་ཉི་ཟླ་བཞིན། །སང་ངེ་ས་ལེར་མི་རྟོག་པར། །ཕྱོད་དེ་སེང་ངེ་ཡ་ལེ་བ། །ཆོས་དབྱིངས་གནས་ཀྱི་ནམ་མཁའ་ ― DNG002_Page_0128 ―
[མ་དཔེ་གཟིགས་ན་འདིར་གནོན།]
སྟེ། །ཡུལ་དང་སྒོ་ལྔ་མ་འདྲེས་གསལ། །དེ་ཙམ་ཉིད་ན་མ་འདྲེས་གསལ། །སྣང་བ་མ་འགགས་ཅིར་ཡང་གསལ། །དེ་ལྟར་རྟོག་མེད་ཆོས་ཀྱི་དབྱིངས། །ད་ཡང་འདུས་པའི་སྙིང་པོ་ཉོན། །ཕྱི་ཡི་འབྱུང་བ་རྣམ་ལྔ་ནི། །གཞན་འབྱུང་ཡིན་ཕྱིར་ཡེ་ཤེས་མིན། །དེ་ཕྱིར་མི་སྤང་གནོད་མི་ནུས། །སེམས་སུ་མི་བསྡུ་ཕན་མི་ནུས། །འདི་ཡིན་ཁོ་ན་ཞེན་མེད་པ། །སྣང་བའི་ཡུལ་འདི་ཅིར་སྣང་ཀྱང་། །སྒྲོ་སྐུར་མ་བཏགས་རང་གསལ་བར། །ཆོས་ཀྱི་དབྱིངས་ཞེས་དེ་ལ་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གོལ་མེད་ཆོས་ཀྱི་དབྱིངས་སུ་བསྟན་པའི་ལེའུ་སྟེ་བརྒྱ་ཐམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །འཁོར་འདས་གཞི་ལ་མེད་པ་ཡི། །སངས་རྒྱས་ཀུན་གྱི་ངེས་པའི་དོན། །རིག་པ་མ་བསླད་ཆོས་སྐུ་ལ། །ངོ་བོ་རྟོགས་ཚུལ་དཔེ་དང་ནི། །གཏན་ཚིགས་ལྡོག་བཅས་མཚན་ཉིད་དང་། །ལ་བཟླ་བ་དང་རྣམ་པ་བདུན། །ཆོས་ཉིད་ཆོས་སྐུའི་དཔེར་ཡང་གསུངས། །ད་ཡང་རྡོ་རྗེ་སེམས་དཔའ་ཉོན། །ངོ་བོ་གནས་ལུགས་ཆོས་སྐུ་ལ། །ཐོག་མཐའ་མེད་པར་ཡེ་ཤེས་གནས། །དེ་ཕྱིར་རྒྱུ་རྐྱེན་མ་བསྐྱེད་ཕྱིར། །གཉེན་པོས་མི་ཚུགས་ནམ་མཁའ་འདྲ། །རྟོགས་ཚུལ་སྒྲོ་སྐུར་མ་བཏབ་ཕྱིར། །མ་བཅོས་ཆོས་སྐུ་རིག་པས་ཤེས། །མ་དཔྱད་མ་མཚོན་མ་བསམས་པར། །ཆོས་སྐུ་གསལ་བས་ཉི་ཤར་འདྲ། །རྣམ་རྟོག་འཇོམས་པས་རྡོ་རྗེ་འདྲ། །སྐྱེ་བ་མེད་པས་ཨ་དང་འདྲ། །དཔེ་རུ་ཟབ་སྟེ་དོན་དུ་མེད། །ལུང་ཐོབ་མ་མྱོང་གཏན་ཚིགས་དེ། །གདམས་ངག་ཡིད་ཆེས་གདེང་དང་ནི། །ལྷག་མཐོང་ཆོས་སྐུ་གཞན་ན་མེད། །དེ་ཕྱིར་རལ་གྲི་རིན་ཆེན་འདྲ། །རྟོག་བཅས་ངོ་བོ་བྱང་ཆུབ་སྐུ། །མཐུན་དང་མི་མཐུན་ཡུལ་ལས་ལོག །ཞེན་པ་ལོག་ཕྱིར་ཆོས་ཀྱི་སྐུ། །དེ་ཕྱིར་རང་བྲལ་ཆོས་སྐུར་ཤེས། །མཚན་ཉིད་འདྲ་ཕྱིར་ཡིན་པ་མིན། །ད་ལྟ་འགྲོ་བ་ཀུན་ལ་གནས། །འཆར་ནུབ་མེད་ཕྱིར་ཡེ་གནས་ཕྱིར། །སྒྲོ་སྐུར་མ་བཏབ་ཡེ་ཤེས་ཀློང་། །ལ་བཟླ་སྣང་བ་མེད་པ་ལ། །ཞེན་པའི་ལོག་དོན་གདམས་ངག་གིས། །དུག་ལྔ་རང་གྲོལ་ཆོས་སྐུར་ཤེས། །རྡོ་རྗེ་སེམས་དཔའ་ ― DNG002_Page_0129 ―
[མ་དཔེ་གཟིགས་ན་འདིར་གནོན།]
ད་ཉོན་ཅིག །ཡིན་པ་མི་བླང་མིན་མི་སྤངས། །མི་བསྡུ་མི་བསྲེ་མི་དབྱེ་བར། །བསམ་པའི་ཡུལ་ལས་འདས་པས་ན། །ཕྱོད་དེ་སེང་ངེ་རང་རིག་ལ། །མཐའ་དབུས་མེད་ཕྱིར་ཀུན་ཏུ་ཁྱབ། །དེ་ཕྱིར་ཐིག་ལེ་ཉག་གཅིག་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འཁོར་འདས་གཞི་ལ་མེད་པའི་བལྟ་བ་བསྟན་པའི་ལེའུ་སྟེ་བརྒྱ་དང་གཅིག་པའོ།། །།དེ་ནས་འཁོར་གྱི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ནང་གི་རིག་པ་འགྲིབ་མེད་དོན། །ད་ལྟའི་ཆོས་སྐུ་འདི་ཉིད་ནི། །འདུས་མ་བྱས་ཕྱིར་རྟག་ཆད་མེད། །ཡེ་ཤེས་རྣལ་མ་ཉིད་ཡིན་ནོ། །ད་ཡང་རྡོ་རྗེ་སེམས་དཔའ་ཉོན། །ཀུན་གྱི་མཉམ་ཉིད་རྒྱལ་བའི་ཐུགས། །མ་ལུས་སེམས་ཅན་ཐམས་ཅད་ལ། །རྟག་མིན་བདག་བྲལ་ཆོས་སྐུར་ཤེས། །དངོས་མེད་ཁྱབ་པས་ནམ་མཁའ་འདྲ། །ཆད་པ་མ་ཡིན་གཉུག་མར་གནས། །འཛིན་མེད་ཤེས་པ་ངང་གིས་གསལ། །ངོ་བོར་མེད་ལ་ཆོས་སྐུར་ཡོད། །རང་བྱུང་ཉི་མའི་སྙིང་པོ་འདྲ། །དབུ་མར་མི་གནས་ཡེ་ཤེས་ནི། །སྒྲོ་སྐུར་བྲལ་བས་ཉོན་མོངས་སེལ། །མཐའ་དབུས་མེད་པའི་ཆོས་ཉིད་ནི། །བརྒྱད་པ་མི་གཡོ་སེམས་དཔའ་འདྲ། །བླ་མས་དོན་བསྟན་རྣལ་འབྱོར་པས། །ཐེ་ཚོམ་མེད་པར་རང་སེམས་རྟོགས། །ཡུལ་དང་ཆོས་སྐུར་མ་རྟོགས་པར། །ཀ་ཤིའི་རས་ཀྱིས་རིན་ཆེན་འདྲ། །ད་ཡང་འདུས་པའི་སྙིང་པོ་ཉོན། །ངེས་དོན་རྟོགས་ཕྱིར་ཡིད་ཆེས་པས། །ཆོས་སྐུ་འགྱུར་མེད་ངང་ལ་གནས། །དེ་ཙམ་ཉིད་ན་གདེང་གིས་ཟིན། །ལོང་བ་མིག་མེད་གསལ་བ་འདྲ། །དཔེར་ན་ནམ་མཁའི་ཉི་མ་བཞིན། །མ་རིག་མུན་པ་འཇོམས་པའི་ཐབས། །ལྟ་བ་གཞི་ངེས་དོན་ཉིད་ལ། །མ་ནོར་རིག་པ་གཅིག་ཡིན་ཏེ། །འབྲས་བུ་ལྷུན་གྲུབ་གཅིག་ཏུ་བསྟན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མཐའ་བྲལ་ལྷུན་གྱིས་གྲུབ་པའི་ལྟ་བ་བསྟན་པའི་ལེའུ་སྟེ་བརྒྱ་དང་གཉིས་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་ཚོགས་ལ་བཀའ་སྩལ་པ། །རང་བྱུང་སྙིང་པོ་ལྟ་བ་ནི། །ཉི་མ་ཤར་ནས་མུན་པ་སངས། །ངེས་ལུང་བསྟན་པས་མ་རིག་བརླག །ཐིག་ལེ་གདལ་ཁྱབ་ཆོས་སྐུ་དེ། །རིག་པ་རང་ ― DNG002_Page_0130 ―
[མ་དཔེ་གཟིགས་ན་འདིར་གནོན།]
གསལ་བཅོས་པ་མེད། །དེ་དོན་ལྷུན་གྲུབ་ཡེ་ནས་གསལ། །རང་བྱུང་སྙིང་པོ་རང་གསལ་ཐུགས། །ཡེ་ནས་ཐ་སྙད་ཀུན་དང་བྲལ། །ཇི་བཞིན་གསལ་ལ་ངན་རྟོག་མེད། །དོན་དམ་སྤྲོས་བྲལ་ལྟ་བའི་མཆོག །རྩལ་མེད་སྤྱོད་པའི་ཡུལ་ལས་འདས། །ཡང་དག་ཀློང་འགྱུར་དོན་ལ་མཁས། །དེ་ཉིད་ལས་སུ་འབྱོར་བ་ཡིས། །ཚོགས་བརྒྱད་ཅེས་པའི་ཡུལ་ལས་འདས། །མངོན་དུ་གྱུར་པས་ཐུགས་ལ་བཀྲ། །ཀུན་གྱིས་རྟོགས་དཀའ་བྱང་ཆུབ་དེས། །མི་གཡོ་ཆོས་སྐུ་མི་རྟོག་ལམ། །རང་རིག་བདེ་བ་ཆོས་སྐུའི་ཀློང་། །གཅིག་ཏུ་རྫོགས་པས་ཀུན་ལ་གསལ། །ལྟ་བ་དབུས་དང་མཐའ་མེད་པས། །སྤོང་ལེན་མ་བཙལ་ལྷུན་གྱིས་གྲུབ། །སྐྱེ་མེད་ངང་དུ་རིག་པ་འཕྱོ། །བརྟེན་མེད་ཆགས་པའི་ཡུལ་ལས་འདས། །བསྒོམ་མེད་ལྟ་བ་ངང་གིས་གསལ། །མཚོན་པའི་ཚིག་གིས་བཀྲི་དྲང་བྲལ། །སྐྱེ་མེད་གདེང་དུ་འདུ་འབྲལ་མེད། །སྣང་མེད་རིག་པ་དངོས་པོ་བྲལ། །ཡང་དག་ཐུགས་ལ་སྤྲོ་བསྡུ་མེད། །མ་བཅོས་ལྷུན་གྲུབ་རིག་པར་ཤར། །ཀུན་ཁྱབ་དོན་བསྡུས་མཐའ་མ་རེག །ཡེ་ཤེས་སྐུ་མཆོག་ཆོས་སྐུ་གདལ། །ད་ཡང་རྡོ་རྗེ་སེམས་དཔའ་ཉོན། །འགྲོ་དྲུག་སེམས་ཅན་རང་བྱུང་སྐུ། །འདི་ལྟར་སྣང་བ་མ་ལུས་ཀུན། །གདོད་ནས་མེད་པའི་དོན་རྟོགས་ནས། །ཡེ་ཤེས་གཅིག་གི་ངང་དུ་རྫོགས། །ལུས་ངག་ཡིད་ཀྱི་བྱ་བ་རྫོགས། །བྱས་ན་འཆིང་བའི་ལས་ཡིན་ལས། །གཞི་ལ་མེད་ཤེས་བཙལ་མི་དགོས། །མ་བསྒོམས་འདུ་འབྲལ་མེད་པར་བལྟ། །རྫོགས་པ་ཆེན་པོ་ངེས་དོན་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མ་རིག་མུན་སེལ་གྱི་ལྟ་བ་བསྟན་པའི་ལེའུ་སྟེ་བརྒྱ་དང་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་རྗེས་བཀའ་སྩལ་པ། །རྣལ་འབྱོར་དམ་པ་མཉམ་བཞག་ཚེ། །གསལ་ལ་མི་རྟོག་མི་གཡོ་བའི། །ངོ་བོ་རྩལ་དང་དཔེ་དང་ནི། །ཚད་དང་ངེས་ཚིག་ཡུལ་དང་བྲལ། །སྐྱོན་དང་གོལ་ས་དགུ་དགུ་བསྟན། །ཆོས་སྐུ་འབྲལ་མེད་སྡོམ་ཚིག་ཡིན། །དེ་ཡང་འདུས་པའི་སྙིང་པོ་ཉོན། །ངང་གིས་གསལ་བ་ཡེ་ཤེས་ཡིན། །རང་རིག་པ་ཡི་ཡེ་ཤེས་ཡིན། །རྩལ་ནི་སྒོ་ལྔར་གསལ་བ་ཡིན། །དཔེར་ན་ཏིལ་གྱི་མར་མེ་འདྲ། །ཚད་ནི་ཤེས་པ་མ་བསྒྲིབས་པ། །ངེས་ཚིག་གདམས་ངག་མ་བརྗེད་པ། །ཡུལ་ནི་སྣང་བ་ཆོས་ཀྱི་དབྱིངས། །འབྲས་བུ་ལོངས་སྤྱོད་རྫོགས་པའི་སྐུ། །སྐྱོན་ནི་ཡུལ་ལ་ཡན་གྲངས་པ། །གོལ་ས་བྱིང་རྨུགས་འགོག་པ་ཡིན། །དེ་ཡང་རྡོ་རྗེ་སེམས་དཔའ་ཉོན། །དམིགས་འཛིན་མེད་པའི་ངོ་བོ་ཉིད། ། ― DNG002_Page_0131 ―
[མ་དཔེ་གཟིགས་ན་འདིར་གནོན།]
སྔ་ཕྱི་གང་ཡང་མ་དྲན་པ། །རྩལ་ནི་བདེ་ལ་མ་ཞེན་པ། །ཡུལ་ནི་འཛིན་མེད་མ་འགགས་པ། །དཔེ་ནི་བྱ་བ་བཏང་བ་འདྲ། །ཚད་ནི་དྲན་བྱེད་མ་བྱིང་ལ། །ངེས་ཚིག་ཡུལ་ལ་མ་ཡེངས་ཡིན། །འབྲས་བུ་སྤྲུལ་སྐུ་ཐུབ་དྲུག་འབྱུང་། །སྐྱོན་ནི་གོམས་པར་མ་བྱས་ཡིན། །གོལ་ས་རྒོད་འཕྲོ་ཡུལ་ལ་ཞེན། །དེ་ཕྱིར་གཉིས་འཛིན་མེད་ཅེས་བྱ། །དེ་ཡང་རྡོ་རྗེ་སེམས་དཔའ་ཉོན། །གཉུག་མར་གནས་པ་མི་གཡོ་བའི། །ངོ་བོ་དུས་གསུམ་མི་འགྱུར་བ། །རྩལ་ནི་ཡེ་ཤེས་འཕེལ་འགྲིབ་མེད། །དཔེ་ནི་རྒྱ་མཚོའི་གཏིང་དང་འདྲ། །ཡུལ་ནི་རིག་པ་སོ་ཐུབ་བསྟན། །ཚད་ནི་གསལ་ལ་མི་གཡོ་བ། །ངེས་ཚིག་སྐྱོན་གྱིས་མ་གོས་པ། །འབྲས་བུ་རིག་པ་ཆོས་སྐུ་ཡིན། །སྐྱོན་ནི་ཐེ་ཚོམ་ཡིད་མ་ཆེས། །གོལ་ས་མི་གཡོ་འགོག་པ་ཡིན། །ད་ཡང་རྡོ་རྗེ་སེམས་དཔའ་ཉོན། །དེ་དག་བསྒོམ་པའི་དབྱེ་བ་ཡང་། །དད་ལྡན་དྲང་ཕྱིར་གསུངས་པ་ལས། །དོན་ལ་རང་རིག་ཆོས་སྐུ་ལ། །དབྱེ་བར་བྱ་བ་རྡུལ་ཙམ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཏིང་ངེ་འཛིན་གྱི་དབྱེ་བ་མདོར་བསྡུས་ནས་བསྟན་པའི་ལེའུ་སྟེ་བརྒྱ་དང་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །མ་བསྒོམས་དོན་དང་མི་འབྲལ་བས། །ཐིག་ལེ་གཅིག་ཏུ་རྫོགས་པ་ཡིས། །ཀུན་གཞི་གཞི་ཆ་ཆོས་སྐུ་ལ། །སྣ་ཚོགས་སྣང་ཡང་འགྱུར་བ་མེད། །ད་ཡང་རྡོ་རྗེ་སེམས་དཔའ་ཉོན། །སེམས་ནི་བསྒོམ་དུ་མེད་པའི་དཔེ། །ནམ་མཁའ་བསྒོམ་དུ་སེམས་དང་བྲལ། །དེ་བཞིན་སེམས་ཀྱི་སེམས་བསྒོམ་དུ། །ཆོས་ཉིད་སེམས་ཀྱི་ཡུལ་ལས་འདས། །སྟོང་རིག་སེམས་ཀྱི་ཡུལ་ལས་འདས། །ངེས་པར་འགྱུར་མེད་ལྟ་བའི་གཟུངས། །དོན་དུ་མི་བརྗེད་ཏིང་འཛིན་གསལ། །རང་སེམས་རྟོགས་ཕྱིར་བསྒོམ་མི་དགོས། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཆོས་སྐུ་ངོས་ཟིན་ན། །ཤེས་པ་གཏད་ལ་བསྒོམ་མི་དགོས། །དེ་ཕྱིར་རང་བྱུང་ཡེ་ནས་གསལ། །ཆོས་ཉིད་མ་བསྒོམས་འབྲལ་བ་མེད། །ཡང་དག་སངས་རྒྱས་དགོངས་པ་ལ། །འཕོ་འགྱུར་མེད་ཕྱིར་འདུས་མ་བྱས། །དེ་རྟོགས་རྣལ་འབྱོར་སྐལ་ལྡན་གྱིས། །མ་བསྒོམས་ཆོས་ཉིད་རང་བྱུང་ཐུགས། །དེ་ལ་རྟོགས་པ་སྐྱེ་མི་ནུས། །ད་ཡང་རྡོ་རྗེ་སེམས་དཔའ་ཉོན། །མ་ཡེངས་པ་ཞེས་བཏགས་པ་ཙམ། །དོན་ལ་ཆོས་སྐུ་དེ་ཉིད་ཡིན། །དེ་ཕྱིར་འབྲལ་མེད་བསྒོམ་པ་མེད། །གཞན་དུ་གཡོས་པ་རྡུལ་ཙམ་མེད། །དེ་ཕྱིར་ཆོས་ཉིད་རྒྱུན་དུ་གནས། །ཤེས་པས་ཆོག་ཕྱིར་རྩོལ་བ་མེད། །ད་ ― DNG002_Page_0132 ―
[མ་དཔེ་གཟིགས་ན་འདིར་གནོན།]
ཡང་འདུས་པའི་སྙིང་པོ་ཉོན། །ལུང་ལྡན་ངེས་པའི་དོན་ཟིན་ན། །ཐམས་ཅད་རང་བྱུང་ཉིད་ཀྱི་དོན། །མཁའ་ལྟར་ཁྱབ་ཅིང་ཉི་ལྟར་གསལ། །གསལ་ཙམ་ཉིད་ན་ནུབ་པ་མེད། །དངོས་མེད་ཀུན་ཁྱབ་ཆོས་སྐུ་དེ། །མེད་པར་མ་ཡིན་ཤེས་ཤིང་རིག །སྟོང་ཙམ་ཉིད་ན་ངང་གིས་སྟོང་། །སྟོང་ཙམ་ཉིད་ན་མཐའ་དབུས་མེད། །ད་ཡང་འདུས་པའི་སྙིང་པོ་ཉོན། །ཡེ་ཤེས་ལྷུན་གྲུབ་ཆེན་པོ་ལ། །བྱིང་རྒོད་ཞེན་འཛིན་སྐྱོན་དང་བྲལ། །གསལ་བདེ་སྟོང་པ་ཆེན་པོ་ལ། །ངང་དུ་བཞག་པ་ཅི་ཡང་མེད། །མཉམ་གཞག་མེད་པས་རྗེས་ཐོབ་མེད། །ཐམས་ཅད་རང་བྱུང་ཆེན་པོ་ལས། །གཞན་དུ་གཡོས་པ་རྡུལ་ཙམ་མེད། །ད་ཡང་རྡོ་རྗེ་སེམས་དཔའ་ཉོན། །དེ་ལྟར་རྟོགས་པའི་རྣལ་འབྱོར་ངས། །ལམ་མེད་ལམ་ལྔ་མ་སྦྱངས་ཤིག །ས་མེད་ས་བཅུ་མ་བགྲོད་ཅིག །རྟེན་མེད་དམིགས་པ་མ་འཆང་ཞིག །སྒྲིབ་མེད་ཚོགས་གཉིས་མ་སོགས་ཤིག །ངེས་དོན་འདི་ཉིད་བསྒྲུབ་མི་དགོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མ་བསྒོམས་དོན་དང་མི་འབྲལ་བར་བསྟན་པའི་ལེའུ་སྟེ་བརྒྱ་དང་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཀུན་ཏུ་བཟང་པོ་ཡིས། །གནས་ལུགས་འགྱུར་མེད་བཀའ་སྩལ་པ། །ཆོས་སྐུས་ཁྱབ་པའི་ཕྱི་ནང་ཆོས། །མཐའ་དབུས་མེད་པ་ཐམས་ཅད་པའི། །གནས་དང་གཞི་ཡི་རྟེན་བྱེད་པའི། །རང་བྱུང་ཐིག་ལེ་ཉག་གཅིག་སྟེ། །འདི་ནི་བདེ་གཤེགས་ཐམས་ཅད་ཀྱི། །ཐུགས་ཀྱི་དམ་པ་དཀྱིལ་འཁོར་ཡིན། །ད་ཡང་རྡོ་རྗེ་སེམས་དཔའ་ཉོན། །རང་བྱུང་སྙིང་པོ་འགྱུར་མེད་ལ། །བློ་ཡིས་བཅོས་པས་གཞི་མི་འགྱུར། །དེ་ཕྱིར་རྐྱེན་གྱིས་བཅོས་སུ་མེད། །རང་བྱུང་ངོ་བོ་ཉིད་ཀྱི་སྐུ། །ཆོས་རྣམས་ཀུན་གྱི་རྩ་བའི་གཞིར། །དུས་གསུམ་སངས་རྒྱས་ཀུན་གྱིས་གསུངས། །དེ་ཕྱིར་གཞི་ལ་འཕོ་འགྱུར་མེད། །ད་ཡང་རྡོ་རྗེ་སེམས་དཔའ་ཉོན། །རང་བཞིན་ལྷུན་གྱིས་གྲུབ་པའི་ཕྱིར། །སངས་རྒྱས་ཉག་གཅིག་ཆོས་ཀྱི་སྐུ། །འདི་ནི་འཁོར་འདས་གཉིས་ཀྱི་གཞི། །མ་རྟོགས་ཕྱིར་ན་འཁོར་བ་ལ། །རྟོགས་ན་མྱ་ངན་འདས་ཞེས་བྱ། །གཞི་ལ་སངས་རྒྱས་སེམས་ཅན་མེད། །དེ་ཕྱིར་གཉིས་མེད་གཅིག་གི་ངང་། །ཐམས་ཅད་དེ་ཡི་ངོ་བོར་གནས། །ད་ཡང་འདུས་པའི་སྙིང་པོ་ཉོན། །འཁོར་འདས་གཉིས་པས་གཞི་སྔ་ཕྱིར། །བློ་ཡིས་མ་བཅོས་འཁོར་འདས་མེད། །བག་ཆགས་མ་བརྟས་འཁོར་བ་མེད། །གང་ཡང་མེད་ཕྱིར་ཀུན་གྱི་གཞི། །རང་ ― DNG002_Page_0133 ―
[མ་དཔེ་གཟིགས་ན་འདིར་གནོན།]
བྱུང་རྟོགས་པས་བཅོམ་ལྡན་འདས། །ས་རྣམས་མ་བགྲོད་ངང་གིས་རྫོགས། །ལམ་ལ་མི་བརྟེན་ས་ལམ་བྲལ། །མེད་པར་མ་ཡིན་ཡེ་ཤེས་ཉིད། །རྫོགས་ཆེན་མཉམ་ཉིད་ཀུན་ཏུ་ཁྱབ། །ཆོས་རྣམས་ཀུན་གྱི་ཆོས་ཆེན་པོ། །ཐམས་ཅད་ངོ་བོར་ལྷུན་གྱིས་གྲུབ། །དེ་བསྐྱེད་ཆོས་རྣམས་ཐམས་ཅད་འབྱུང་། །འཁྲུལ་པའི་རྟོག་མེད་གཞི་དང་མཐུན། །དེ་ཕྱིར་ལུང་ལྡན་རྐྱེན་གྱིས་ཀྱང་། །བློ་དངོས་གཅིག་པའི་དགོངས་པ་ལ། །གཞི་ཤེས་པ་ལ་རྟོགས་ཞེས་བྱ། །ད་ཡང་འདུས་པའི་སྙིང་པོ་ཉོན། །ཆོས་ཀྱི་རྒྱལ་པོར་རབ་བསྔགས་ཕྱིར། །འཁོར་འདས་བྱུང་བ་ཐམས་ཅད་ཀྱང་། །བཙལ་བ་མེད་པར་ཤུག་ལས་བྱུང་། །དེ་ཕྱིར་ཀུན་གྱི་གཞིར་གྱུར་ཞེས། །ཀུན་བཟང་ཉིད་ཀྱིས་གསུངས་པ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གནས་ལུགས་འགྱུར་མེད་བསྟན་པའི་ལེའུ་སྟེ་བརྒྱ་དང་དྲུག་པའོ། །སྡོམ་དུ་བསྡུས་ཏེ་བསྟན་པ་ཉེར་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཡེ་ཤེས་མངོན་གྱུར་རྟོགས་པའི་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ཆོས་རྣམས་ཀུན་གྱི་རྩ་བ་ཡི། །གཞི་གསུམ་འདྲེལ་བ་ཡོད་དམ་མེད། །ཀུན་གཞི་སེམས་ཀྱི་མུན་གསེབ་ནས། །ཆོས་སྐུ་ངོས་ནི་ཇི་ལྟར་བཟུང་། །ད་ལྟའི་གཟུགས་དང་མ་བྲལ་བར། །གཟུགས་སྐུ་མི་འབྱུང་གང་གིས་བསྒྲིབས། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །དོན་གྱི་རྩ་བ་མདོར་བསྡུས་ན། །གཞི་གསུམ་མ་ནོར་ངེས་པ་ཡིས། །འདྲེལ་བ་ངེས་མེད་ངས་བཤད་ཀྱིས། །ལེགས་པར་ཉོན་ལ་ཡིད་ཀྱིས་ཟུང་། །དེ་དྲུག་ཡོད་མེད་གཅིག་ཏུ་རྟོགས། །འཁོར་འདས་གཉིས་གཞི་རང་བཞིན་ལུས། །འཁོར་གྱི་ཤེས་པ་ལུང་མ་བསྟན། །གནས་སྐབས་འདྲེལ་མེད་མཐར་ཐུག་མེད། །གནས་སྐབས་འདྲེལ་པ་ཡོད་པ་ནི། །ལུང་མ་བསྟན་པ་རྣམ་གསུམ་ལ། །རང་བཞིན་ལུས་ཀྱིས་ཁྱབ་པའི་ཕྱིར། །བདེ་གཤེགས་སྙིང་པོ་ཡོད་ཅེས་བྱ། །ད་ཡང་འདུས་པའི་སྙིང་པོ་ཉོན། །མཐར་ཐུག་འདྲེལ་པ་མེད་པ་ནི། །ཤེས་བཞིན་ལུང་མ་བསྟན་པ་ལ། །ཡིད་འགྲིབས་ཡོད་ཕྱིར་མོས་གུས་བྱེད། །བྱིན་རླབས་རྟོགས་དང་ལུང་ལྡན་ཞིང་། །བསྟན་ཐབས་མེད་ཕྱིར་འཁོར་བའི་རྒྱུ། །དེས་བསྐྱེད་འཁོར་བ་འབའ་ཞིག་ཡིན། །དེ་ཕྱིར་མཐར་ཐུག་འདྲེལ་པ་མེད། །མུན་དང་ཉི་མ་དུས་མི་མཚུངས། །མ་རིག་ཡེ་ཤེས་དེ་བཞིན་ནོ། །ད་ཡང་འདུས་པའི་སྙིང་ ― DNG002_Page_0134 ―
[མ་དཔེ་གཟིགས་ན་འདིར་གནོན།]
པོ་ཉོན། །མཐར་ཐུག་འདྲེལ་པ་ཡོད་པ་ནི། །ལན་ཅིག་སྐྱེ་ཤི་བར་དོ་ལ། །ལུང་ལྡན་གདམས་ངག་འཕྲད་སྲིད་ན། །མོས་གུས་དད་པས་རྟོགས་འགྱུར་ཚེ། །རང་རིག་ཆོས་སྐུར་ཤེས་པའི་ཕྱིར། །ལུང་མ་བསྟན་པ་བརླག་ཅིང་སྟོང་། །མཐར་ཐུག་འདྲེལ་བ་ཡོད་པ་ནི། །ནམ་ལངས་ཉི་མ་ཤར་བ་འདྲ། །ད་ཡང་འདུས་པའི་སྙིང་པོ་ཉོན། །མྱང་འདས་ཀུན་བཟང་གཞི་དང་ནི། །འཁོར་གཞི་ལུང་མ་བསྟན་པ་གཉིས། །ལྷན་ཅིག་མི་གནས་འགལ་བའི་ཕྱིར། །གནས་སྐབས་མཐར་ཐུག་འདྲེལ་བ་མེད། །ཉི་མའི་དཀྱིལ་ན་མུན་མེད་ལྟར། །དེ་ཕྱིར་ཡེ་ཤེས་ཟང་ཐལ་ཉིད། །ད་ཡང་འདུས་པའི་སྙིང་པོ་ཉོན། །འཁོར་གཞི་ལུང་མ་བསྟན་ལ་སོགས། །ཤན་དབྱེའི་སྐབས་སུ་ངས་བཤད་ཀྱིས། །ལ་བཟླའི་སྐབས་སུ་ངས་མ་བཤད། །ཕྱི་རབས་རྣལ་འབྱོར་དེ་བཞིན་ནོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གཞི་གསུམ་འདྲེལ་མེད་བསྟན་པའི་ལེའུ་སྟེ་བརྒྱ་དང་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་མུན་གསེབ་ནས། །འཁྲུལ་དང་མ་འཁྲུལ་བཀའ་སྩལ་པ། །འཁྲུལ་པ་རྣམ་བཞི་དབྱེ་བའི་ཕྱིར། །གསུམ་བྲལ་བཞི་ལྡན་གོལ་ས་མེད། །དེ་ཕྱིར་ཆོས་སྐུ་གཞི་དང་གཅིག །ད་ཡང་འདུས་པའི་སྙིང་པོ་ཉོན། །ཆགས་སྡང་འབྱུང་བའི་རྒྱུད་བྱུང་བའི། །འཁྲུལ་དང་མ་འཁྲུལ་ཤན་དབྱེ་ན། །ཐོག་མེད་ལས་ཉོན་གྱིས་བསགས་པའི། །སྔར་གྱི་བག་ཆགས་བཟང་ངན་ནི། །དུས་དང་གནས་སྐབས་འགྱུར་བའི་ཕྱིར། །ཤེས་པ་མ་འཁྲུལ་དངོས་པོ་འཁྲུལ། །ཞེན་པ་བརྟས་ཕྱིར་བག་ཆགས་སྐྱེ། །མི་ཤིའི་ཁ་དོག་དྲན་པ་འདྲ། །ད་ཡང་འདུས་པའི་སྙིང་པོ་ཉོན། །ཆགས་སྡང་འབྱུང་བའི་རྒྱུར་གྱུར་པ། །ཕྱིས་ཀྱི་ཉོན་མོངས་སྐྱེས་པ་ཡང་། །དགའ་དང་མི་དགའ་ལ་སོགས་པ། །གློ་བུར་རྐྱེན་གྱིས་འབྱུང་བའི་ཕྱིར། །དངོས་པོ་མ་འཁྲུལ་ཤེས་པ་འཁྲུལ། །ཐག་པ་སྦྲུལ་དུ་འཛིན་པ་འདྲ། །ད་ཡང་འཁོར་གྱི་སེམས་དཔའ་ཉོན། །སྣང་བ་གཞི་ལ་མེད་པ་ལ། །སྤོང་སྡུད་ཞེན་པ་བྱེད་པ་ནི། །བློ་དངོས་གཉིས་ཀ་འཁྲུལ་པའི་ཕྱིར། །མེད་པ་ལ་ནི་ཡོད་རྟོགས་པ། །རི་བོང་རྭ་ལ་ཡོད་རྟོགས་འདྲ། །ད་ཡང་འཁོར་གྱི་སེམས་དཔའ་ཉོན། །སྐྱེ་བོ་ཐ་མལ་ཤེས་པ་ལ། །བྱ་བ་མ་འགགས་གང་བྱེད་ཀྱང་། །བློ་དངོས་ ― DNG002_Page_0135 ―
[མ་དཔེ་གཟིགས་ན་འདིར་གནོན།]
མ་འཁྲུལ་ཆོས་ཉིད་མིན། །ལུང་ལྡན་གདམས་ངག་མེད་པའི་ཕྱིར། །གཞི་ཉིད་མ་ཤེས་མ་རིག་ཡིན། །ཟླ་བ་དཀར་ཀྱང་མུན་པའི་བག །ད་ཡང་འདུས་པའི་སྙིང་པོ་ཉོན། །དེ་དག་རྩ་བ་མདོར་བསྡུས་ན། །འཁྲུལ་པའི་གཟུང་འཛིན་ཡ་བདུན་ཀྱང་། །སྣང་བ་ཤེས་པར་མ་ཤེས་ཕྱིར། །སྒྲོ་སྐུར་ཞེན་པས་རང་བསླུས་ཏེ། །གདམས་ངག་མེད་ཕྱིར་ཆོས་སྐུ་མིན། །དེ་ཕྱིར་གྲུབ་མཐའི་བློ་མ་བསྒྱུར། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྔ་ཕྱིའི་རྟོག་པ་འཁྲུལ་པར་བསྟན་པའི་ལེའུ་སྟེ་བརྒྱ་དང་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །མ་རིག་སེམས་ཀྱི་མུན་གསེབ་ནས། །ཆོས་སྐུ་ངོ་སྤྲོད་དོན་འདུས་པ། །སྔ་ཕྱི་རྟོག་པ་གསུམ་བྲལ་བའི། །རང་རིག་ཆོས་སྐུ་ངོ་ཤེས་ན། །འཁྲུལ་མེད་ད་ལྟའི་ཤེས་པ་ལ། །ཐ་མལ་ལུས་ཀྱི་རྟེན་བཅས་པའི། །ཤེས་པ་མ་བསྒྲིབས་གསལ་བ་ནི། །རང་བྱུང་ཆོས་སྐུ་ཡིན་པའི་ཕྱིར། །དེ་ལ་མ་རིག་མུན་པ་མེད། །ད་ཡང་འདུས་པའི་སྙིང་པོ་ཉོན། །དེ་ལ་ཡོན་ཏན་བཞི་ལྡན་པ། །སྐྱེ་བོ་མུ་སྟེགས་ཡུལ་འདི་ལ། །ང་དང་བདག་ཏུ་རང་རྒྱུད་བྱེད། །ཞེན་པའི་དམིགས་འཛིན་མེད་པའི་ཕྱིར། །སྣང་བ་མེད་པའི་ཡེ་ཤེས་ནི། །གོལ་མེད་ཆོས་དབྱིངས་ནམ་མཁའ་འདྲ། །ངང་གིས་གསལ་བའི་ཡེ་ཤེས་ནི། །ཚོགས་དྲུག་འགགས་པའི་འགོག་པ་དང་། །འདུ་ཤེས་མེད་པའི་ལྷ་རུ་གོལ། །གོལ་ས་ཀ་ནས་མེད་པའི་ཕྱིར། །རིན་ཆེན་འོད་འདྲ་འཆར་ནུབ་མེད། །ད་ཡང་འདུས་པའི་སེམས་དཔའ་ཉོན། །ཡེ་ཤེས་གཉུག་མར་གནས་པ་ནི། །དབུ་མ་སེམས་ཙམ་ཐུན་བསྒོམ་དང་། །ཐབས་ཀྱི་རྩ་དང་ཐིག་ལེ་སོགས། །འབྱུང་འཇུག་ཅན་གྱི་གོལ་ས་མིན། །བསྐྱེད་རིམ་ཀུན་གཞི་ལ་སོགས་པའི། །ཞི་ཁྲོའི་ལྷ་རུ་བསྒོམ་པ་དང་། །འཕེལ་འགྲིབ་ཅན་གྱི་གོལ་ས་མེད། །དེ་ཕྱིར་རྒྱུན་དུ་འབྲལ་མེད་ཡིན། །ད་ཡང་འདུས་པའི་སྙིང་པོ་ཉོན། །གཏན་ལ་འབེབས་པའི་ཡིད་ཀྱིས་ནི། །ལྷག་མཐོང་རིག་པར་རྟོགས་ཙམ་ན། །དམིགས་འཛིན་མེད་ལ་ངང་གིས་གསལ། །གཉུག་མར་གནས་ལ་འཕེལ་འགྲིབ་མེད། །ད་ལྟའི་ཤེས་པ་འདི་ཉིད་ལ། །རང་རིག་ཆོས་སྐུ་གཅིག་ཏུ་རྫོགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་སྐུ་ངོས་བཟུང་བ་བསྟན་པའི་ལེའུ་སྟེ་བརྒྱ་དང་དགུ་པའོ།། །། ― DNG002_Page_0136 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །རྣམ་སྨིན་ལུས་དང་བཅས་དུས་འདིར། །གཟུགས་སྐུ་མི་འགྱུར་བཀའ་སྩལ་པ། །ད་ལྟ་མངལ་གྱི་སྒྲིབ་གཡོགས་ཀྱིས། །གཟུགས་སྐུ་ངོ་སྤྲད་མི་འདོད་སྟེ། །ཆེ་བའི་ཡོན་ཏན་མི་འབྱུང་ཕྱིར། །ནམ་སྲོད་ཉི་མ་ནུབ་པ་འདྲ། །ད་ཡང་འདུས་པའི་སྙིང་པོ་ཉོན། །ལན་གཅིག་དུས་ཀྱི་དེང་སང་ན། །ལུང་མེད་རྨོངས་པའི་ང་རྒྱལ་ཅན། །དཔྱད་བཟོ་རིག་པ་བྱེད་པ་ཀུན། །གཟུགས་སྐུ་ད་ལྟ་ངོ་སྤྲོད་ཡོད། །ཁ་ཚབས་རྫུན་ཚིག་སྨྲ་བ་ལ། །རྨོངས་པ་བདེན་པར་འཛིན་པ་མང་། །ད་ཡང་འདུས་པའི་སྙིང་པོ་ཉོན། །མ་རིག་རྫུན་དེ་སུན་འདོན་ཏེ། །ད་ལྟ་མངལ་གྱི་སྒྲིབ་གཡོགས་པས། །ལོངས་སྐུ་དང་ནི་སྤྲུལ་པའི་སྐུ། །ཆུ་ཤེལ་སྒྲོན་མེའི་དཔེས་མཚོན་ཀྱང་། །ད་ལྟ་རང་ལ་འབྱུང་མི་སྲིད། །ཁྱུང་སྒོང་རང་གིས་བཅག་མི་ནུས། །དེ་ཕྱིར་གཟུགས་བརྙན་ཡེ་ཤེས་ནི། །རིས་སུ་བྲིས་དང་ལུགས་སུ་བླུགས། །འབུར་དུ་བཀོད་ལ་སོགས་པ་ཡི། །གཟུགས་སྐུ་རང་ལ་བྱུང་བ་དང་། །དངོས་སུ་སྤྲད་དུ་མི་འདོད་པས། །དེ་ཕྱིར་དྲང་དོན་ལྡེམ་དགོངས་སུ། །ཞི་ཁྲོ་བསྒོམ་པ་ལྷ་ཚོགས་བསྟན། །ད་ཡང་འདུས་པའི་སྙིང་པོ་ཉོན། །སྔོན་དུ་གཟུགས་སྐུ་འབྱུང་བ་ཡང་། །རང་རྒྱུད་ལུས་བཅས་མ་ཡིན་ཏེ། །རྒྱུད་དག་སྤྲུལ་པ་ཁ་ཅིག་ལས། །སངས་རྒྱས་བྱང་ཆུབ་སེམས་དཔའ་ནི། །ཆགས་སྡང་ལྔ་དང་བཅས་པ་ཡི། །ཐ་མལ་རང་རྒྱུད་སེམས་འདི་ལ། །གཟུགས་སྐུ་ད་ལྟ་འབྱུང་མི་སྲིད། །ནམ་མཁའ་དངས་པར་ཉི་མ་འཆར། །ད་ཡང་རྡོ་རྗེ་སེམས་དཔའ་ཉོན། །ད་ལྟ་གཟུགས་སྐུ་སྤྲོད་འདོད་ན། །མཚན་དང་དཔེ་བྱད་མ་ལུས་ཀུན། །རང་གི་ལུས་དང་ཚད་རྫོགས་པ། །ཞིང་ཁམས་ཡོན་ཏན་ཚད་མཐོང་དགོས། །དུས་གསུམ་སངས་རྒྱས་ཐམས་ཅད་ཀྱང་། །སྐུ་གསུང་ཐུགས་ནི་མཉམ་དགོས་ན། །དེ་མེད་ཡོན་ཏན་ངོ་སྤྲོད་མིན། །ད་ཡང་འདུས་པའི་སྙིང་པོ་ཉོན། །མངལ་གྱི་སྒྲིབ་གཡོགས་མ་བྲལ་བར། །ལུང་ལྡན་རྐྱེན་དང་འཕྲད་སྲིད་ན། །རང་སེམས་ཆོས་སྐུར་རྟོགས་པ་ལ། །གཟུགས་སྐུ་མི་འབྱུང་ལུས་ཀྱིས་བསྒྲིབས། །ཉི་མ་སྤྲིན་གྱིས་བསྒྲིབས་པ་འདྲ། །ད་ཡང་འཁོར་གྱི་སྙིང་ ― DNG002_Page_0137 ―
[མ་དཔེ་གཟིགས་ན་འདིར་གནོན།]
པོ་ཉོན། །སྤྲུལ་སྐུ་ངོ་སྤྲོད་ཡོད་ཟེར་ན། །ད་ལྟ་ཐ་མལ་ལུས་འདི་ཡིས། །འཛམ་གླིང་བྱེ་བ་ཕྲག་བརྒྱ་རུ། །སྤྲུལ་པ་བྱེ་བ་ཕྲག་བརྒྱ་འགྱེད། །སངས་རྒྱས་དམྱལ་བ་ཡན་ཆད་དུ། །ལུས་ཕྱིན་མིག་གིས་མཐོང་བ་དགོས། །རྣམ་སྨིན་ལུས་དང་བཅས་དུས་འདིར། །ཇི་ལྟར་གཟུགས་སྐུར་ངོ་སྤྲོད་ཀྱང་། །མཐའ་འཁོབ་ཆུ་དང་ཕྲད་པ་ཡང་། །མི་ཐར་སྡུག་བསྔལ་འབྱུང་བའི་ཕྱིར། །སྤྲུལ་སྐུ་ངོ་སྤྲོད་ཡོད་ཟེར་འཁྲུལ། །ལྷ་མོ་ཀུན་གྱི་སྨད་གསད་རིགས། །ད་ཡང་རྡོ་རྗེ་སེམས་དཔའ་ཉོན། །ཡིད་སྨོན་ཙམ་དུ་ཡོད་ཟེར་ན། །ཞི་ཁྲོ་ལ་སོགས་བསྒོམ་པ་ཡང་། །རྒྱུད་ལུང་ཆོས་སྐུ་ལྡེམ་དགོངས་བསྟན། །དེ་ཕྱིར་གཟུགས་སྐུ་གནས་འགྱུར་ལས། །དངོས་སུ་འབྱུང་བར་ངས་མ་བཤད། །ད་ཡང་འདུས་པའི་སྙིང་པོ་ཉོན། །གཟུགས་སྐུའི་ཡོན་ཏན་འབྱུང་འདོད་པ། །དེ་ལྟར་རྟགས་ཆེན་འདི་འབྱུང་ཚེ། །སེང་གེ་ཁྱུང་དང་ཨུ་དུམ་བར། །རིན་ཆེན་ལ་སྩོགས་དུས་འདིར་འབྱུང་། །འཇིག་རྟེན་སངས་རྒྱས་འབྱུང་བའི་རྟགས། །དེ་མེད་འཇིགས་གཟུགས་འཇིག་རྟེན་དུ། །སེམས་ཅན་ལུས་དང་མ་བྲལ་བར། །གཟུགས་སྐུའི་ཡོན་ཏན་འབྱུང་འདོད་ན། །མུ་སྟེགས་ཀ་པ་རི་པར་གོལ། །མ་རིག་རྨོངས་པ་སྙིང་རེ་རྗེ། །མནར་མེད་རྨོངས་པ་སྙིང་རེ་རྗེ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལུས་དང་མ་བྲལ་བར་གཟུགས་སྐུ་མི་འབྱུང་བར་བསྟན་པའི་ལེའུ་སྟེ་བརྒྱ་དང་བཅུ་པའོ། །སྡོམ་དུ་བསྡུས་ཏེ་བསྟན་པ་ཉི་ཤུ་རྩ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་རིག་སྟོན་པ་ཆོས་རྗེ་ལ། །ངེས་པའི་དགོས་དོན་འདི་སྐད་གསོལ། །རྣམ་རྟོག་རང་སར་ཅི་ལྟར་གྲོལ། །མཐའ་མ་རེག་པའི་གདམས་ངག་དང་། །ཐེ་ཚོམ་གེགས་རྣམས་ཅི་ལྟར་བསལ། །འདྲ་བ་ལས་ནི་གོལ་བ་གང་། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །དཔེར་ན་ཉི་མའི་སྙིང་པོ་ལ། །གཞན་གྱིས་མ་བྱས་རང་གསལ་བ། །ཐམས་ཅད་ཡེ་ཤེས་ཆོས་སྐུར་གསལ། །མ་རིག་མུན་པ་གདོད་ནས་སངས། །ད་ཡང་རྡོ་རྗེ་སེམས་དཔའ་ཉོན། །དཔེར་ན་རྒྱལ་པོ་མཐོང་བའི་ཚེ། །གཉན་ཞིང་གུས་པར་བློ་སྐྱེ་བཞིན། །ཆོས་ཉིད་དྲན་པར་རྟོག་པ་ ― DNG002_Page_0138 ―
[མ་དཔེ་གཟིགས་ན་འདིར་གནོན།]
མེད། །རིག་པ་རྒྱུན་ཆགས་དག་ཏུ་གནས། །ད་ཡང་འདུས་པའི་སྙིང་པོ་ཉོན། །དཔེར་ན་ནམ་མཁའ་སྤྲིན་མེད་བཞིན། །རང་བྱུང་རང་རིག་གནོད་མེད་ལྟར། །རྣམ་རྟོག་རང་གྲོལ་འཛིན་མེད་བཞིན། །ཡེ་ཤེས་ངོ་བོ་ཆོས་སྐུར་གསལ། །ད་ཡང་འཁོར་གྱི་སྙིང་པོ་ཉོན། །དཔེར་ན་དགུན་ཟླ་འབྲིང་པོ་ལ། །སྤང་ལ་མེ་མཆེད་ཇི་བཞིན་དུ། །ཅི་དྲན་ཆོས་སྐུའི་དོན་དྲན་པས། །ཐམས་ཅད་ཡེ་ཤེས་ཉིད་དུ་གསལ། །ད་ཡང་འཁོར་གྱི་སྙིང་པོ་ཉོན། །དཔེར་ན་རིན་ཆེན་གསེར་གླིང་དུ། །ས་རྡོ་བཙལ་གྱིས་མི་རྙེད་ལྟར། །གང་དྲན་ཆོས་ཉིད་རང་གསལ་ཕྱིར། །ཏིང་འཛིན་དག་ལ་འབྱུང་འཇུག་མེད། །ད་ཡང་རྡོ་རྗེ་སེམས་དཔའ་ཉོན། །འཁོར་བ་མྱ་ངན་འདས་པའི་ཆོས། །ཐམས་ཅད་ཆོས་ཉིད་འགྱུར་མེད་ལ། །བསྒོམ་པའི་ཐ་སྙད་བྲལ་བའི་དོན། །རང་རིག་ཡེ་ཤེས་ཉིད་དུ་གསལ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྣམ་རྟོག་ཐམས་ཅད་རང་གྲོལ་དུ་བསྟན་པའི་ལེའུ་སྟེ་བརྒྱ་དང་བཅུ་གཅིག་པའོ།། །།ད་ཡང་འདུས་པའི་སྙིང་པོ་ཉོན། །སངས་རྒྱས་སེམས་ཅན་འབྱུང་བ་ཀུན། །གློ་བུར་ཡིན་ཕྱིར་གནས་ལུགས་མིན། །འཇིག་རྟེན་ཆོས་ལ་བློ་མི་བླང་། །འཁོར་འདས་གཞི་ལ་དོན་མ་རེག །ད་ཡང་རྡོ་རྗེ་སེམས་དཔའ་ཉོན། །ཕ་མེད་མ་མེད་ནགས་ཀྱི་བྱིའུ། །ནམ་མཁའི་མཐོངས་སུ་ཐོན་པ་ལྟར། །གློ་བུར་འཁོར་འདས་གཉིས་མ་ཆད། །ཆོས་སྐུ་རྟོགས་པས་མ་རིག་སངས། །གདོད་མའི་མ་རིག་འདི་ཉིད་ལ། །བལྟ་བར་ཤེས་པས་ཆོག་པའི་ཕྱིར། །འཁོར་འདས་གཉིས་ཀ་གདོད་ནས་དག །ཡུལ་དང་མ་འདྲེལ་ངོ་བོ་ཉིད། །དེ་དོན་རྟོགས་པའི་དོན་ལ་གནས། །ཡེ་རྫོགས་ཆོས་སྐུའི་སྙིང་པོ་ཡིན། །རེ་དོགས་མཐའ་ཀུན་རྣམ་པར་ཞི། །ཚིག་ཏུ་འཛིན་མེད་ཡེ་ནས་དག །གཅིག་དང་དུ་མ་མཐའ་ཡི་ཆོས། །དེ་ཕྱིར་འཁོར་འདས་གཉིས་ལས་འདས། །འདི་ཐོས་མི་སྐྲག་ལྷག་པའི་ཆོས། །ད་ཡང་འདུས་པའི་སྙིང་པོ་ཉོན། །དངོས་པོ་མེད་ཕྱིར་རྟག་པ་བྲལ། །ཀུན་ལ་ཁྱབ་པས་ཆད་པ་བྲལ། །མཐའ་དབུས་བྲལ་བས་རང་བྱུང་སྐུ། །ཆོས་སྐུ་ནམ་མཁའ་ལྟ་ ― DNG002_Page_0139 ―
[མ་དཔེ་གཟིགས་ན་འདིར་གནོན།]
བུ་ལ། །བརྗེད་མེད་ལྟ་བ་དྲན་པའི་གཟུངས། །ངེས་དོན་ཕྱིན་ཅི་མ་ལོག་པ། །ཡེ་ཤེས་ལམ་ལ་གནས་པ་འདྲ། །རང་རིག་ངེས་པའི་ལྟ་བ་ལ། །ཡེངས་པ་མེད་པར་ཡིད་ཀྱིས་བལྟ། །དེ་ཡང་ཡུལ་ཅན་མ་ཡིན་ཏེ། །རང་ལ་རང་ལྟས་ཤིན་ཏུ་གསལ། །དེ་གོམས་མཐར་ཕྱིན་ཡེ་ཤེས་ཐུགས། །ཆོས་ཉིད་སྤྲོས་བྲལ་འགྱུར་བ་མེད། །རང་བྱུང་ཡེ་ཤེས་གཉུག་མར་གནས། །དེ་ཉིད་མི་འབྲལ་ལྟ་བའི་མཆོག །དེ་ཡང་རྡོ་རྗེ་སེམས་དཔའ་ཉོན། །འཁོར་འདས་གཉིས་ཀྱི་ཆས་འདི་ལ། །ཇི་སྲིད་བག་ཆགས་ཡོད་ཀྱི་བར། །འདི་ལྟར་སྣང་བའི་ཆོས་རྣམས་ལ། །སྣང་བའི་ཡུལ་རྣམས་གདོད་ནས་མེད། །ཅི་སྲིད་བག་ཆགས་དེ་དག་ནི། །ཐག་སྦྲུལ་ཐོ་ཡོར་ཇི་བཞིན་ནོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མཐའ་མ་རེག་པའི་རྟགས་བསྟན་པའི་ལེའུ་སྟེ་བརྒྱ་དང་བཅུ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཀུན་བཟང་གིས། །ཐེ་ཚོམ་འགག་ཆེན་བཀའ་སྩལ་པ། །རྩོད་པ་ཚིག་གི་འཕྲང་ཆེན་ནི། །གཞི་ངེས་སྣང་བ་མ་ངེས་ཕྱིར། །ལུང་ལྡན་གདམས་ངག་མི་འགལ་བའི། །གཏན་ཚིགས་ཆེན་པོར་བསྟན་པ་ཡིན། །དཔེར་ན་ཉི་མའི་སྙིང་པོ་ལ། །མུན་སྣང་གཉིས་ཀ་མི་འགལ་ཕྱིར། །གཞི་གཅིག་གང་ཡང་མི་འགལ་བར། །དེ་ཉིད་དུས་ན་ངོས་བཟུང་བྲལ། །ད་ཡང་འདུས་པའི་སྙིང་པོ་ཉོན། །ཆུ་བྲན་རྒྱ་མཚོར་གཅིག་པ་བཞིན། །གང་ཕྲད་ཡེ་ཤེས་ཆེན་པོ་ལ། །བྱིས་པ་རྣམས་ནི་ཐ་དད་གཟུང་། །དེ་ཕྱིར་བློ་ཡི་སྣང་བ་ཡིན། །ཆོས་རྣམས་སེམས་སུ་འདུས་པའི་ཕྱིར། །བློས་བཞག་ཐེག་པ་རིམ་དགུ་བྱུང་། །གཞི་ལ་ཆོས་སྐུ་གཅིག་ལས་མེད། །ད་ཡང་རྡོ་རྗེ་སེམས་དཔའ་ཉོན། །ཡུལ་ཉིད་སེམས་སྡུད་སྡུག་བསྔལ་ཡིན། །རང་སེམས་ཡུལ་ན་བེམས་པོར་འགྱུར། །གཅིག་ལས་སྐྱེ་ཤི་མེད་པར་རིགས། །འཆི་འཕོ་ཡོད་ཕྱིར་བློས་འགྱེལ་ཡིན། །གཉིས་ཀ་ཞེ་ན་བསྲེ་མར་འགྱུར། །ཐམས་ཅད་མ་ལུས་སེམས་ཡིན་ན། །སེམས་ཙམ་ཀ་ཏ་རི་པར་གོལ། །ད་ཡང་འདུས་པའི་སྙིང་པོ་ཉོན། །ཕར་འགྱེལ་ཚུར་འགྱེལ་ ― DNG002_Page_0140 ―
[མ་དཔེ་གཟིགས་ན་འདིར་གནོན།]
སེམས་པ་ནི། །དེ་ཤེས་མ་ཕན་འཁོར་བ་དང་། །དེ་ཕྱིར་སེམས་རྟོགས་རྩིས་སུ་ཆེ། །དེ་ཕྱིར་ལུང་ལྡན་གདམས་ངག་དགོས། །ད་ཡང་འཁོར་གྱི་སྙིང་པོ་ཉོན། །ང་ཡི་ངེས་དོན་ཆོས་འདི་ལ། །བསྒོམ་དུ་ཡོད་མེད་མཐའ་ཡི་ཆོས། །སངས་རྒྱས་སེམས་ཅན་གཞི་གཅིག་ཕྱིར། །རྒྱུ་འབྲས་ཡོད་མེད་ལྷུན་གྱིས་གྲུབ། །རྟོགས་ན་མ་བསྒོམས་འབྲལ་མེད་པར། །ཆོས་སྐུ་རང་བྱུང་དེ་ཉིད་ལ། །དུས་གསུམ་དག་ཏུ་འབྲལ་མེད་པས། །དེ་ཕྱིར་ངེས་དོན་བསྒོམ་མི་དགོས། །ད་ཡང་འདུས་པའི་སྙིང་པོ་ཉོན། །ཕུང་པོ་སངས་རྒྱས་ལྷ་ཚོགས་ན། །བསྒོམ་པས་མ་ཕན་རྣལ་འབྱོར་འཆིང་། །སྣང་བ་བོར་ནས་སངས་རྒྱས་ན། །རྟོག་ཚོགས་སངས་རྒྱས་ཅི་ལ་ཡིན། །ད་ལྟ་ཆོས་སྐུ་མ་ཤེས་ན། །གསང་སྔགས་མན་ངག་ཅི་ལ་ཆེ། །དེ་ཕྱིར་བསྟན་ཤས་བསྒོམ་མི་དགོས། །ད་ཡང་འདུས་པའི་སྙིང་པོ་ཉོན། །སངས་རྒྱས་སེམས་ཅན་འདྲེལ་བ་ཡང་། །མ་རྟོགས་ཐུགས་རྗེས་ཕན་མི་ནུས། །ཡོད་ན་སེམས་ཅན་ཅི་ལ་འཁོར། །གནས་སྐབས་འདྲེལ་བ་མེད་པ་ལ། །མཐར་ཐུག་ཅི་ཡི་འདྲེལ་བ་ཡོད། །རྒྱུ་འབྲས་ཚོགས་ནི་འོག་མའི་ཆོས། །འདི་ཉིད་ལྟོས་པ་རྒྱུ་འབྲས་ཆོས། །གཞི་ལ་གཅིག་པ་སྣང་ལུགས་གཉིས། །དོན་ལ་གཉིས་ཀ་གང་ཡང་མེད། །དེ་ཡང་འཁོར་འདས་མ་རིག་ཆོས། །ནམ་མཁའི་ཆོས་ནི་དངོས་མེད་ཕྱིར། །འཁོར་བའི་རྣམ་རྟོག་ཅི་ལ་ཡོད། །མ་སྤངས་གྲོལ་ཕྱིར་བསྒོམ་དུ་མེད། །ད་ཡང་འདུས་པའི་སྙིང་པོ་ཉོན། །ཞི་གནས་བསམ་གཏན་ཉམས་མྱོང་ཕྱིར། །ཡིད་ལ་ཉམས་སུ་མྱོང་བ་ནི། །ཞི་གནས་ཡིན་ཕྱིར་ལྷག་མཐོང་མིན། །ཉམས་མྱོང་མེད་པ་གདེང་དང་བྲལ། །དེ་ཕྱིར་བླུན་པོའི་སྤྱོད་ཡུལ་མིན། །གཞི་ཉིད་རྟོགས་ན་ཉམས་མི་དགོས། །དེ་ཕྱིར་རྟོགས་པ་ཤིན་ཏུ་གཅེས། །གར་ལྟར་དྲན་པ་ཉམས་ཀྱི་མཆོག །དེ་ལ་འདི་ཞེས་སྨྲ་མི་ནུས། །དེ་ཕྱིར་མ་བསྒོམས་ང་ཡི་ཉམས། །ད་ཡང་འདུས་པའི་སྙིང་པོ་ཉོན། །འཁོར་འདས་གཉིས་ལས་ང་སྔ་ཕྱིར། །སངས་རྒྱས་ཀུན་ལས་ལུང་འདི་སྔ། །ཀུན་ཏུ་བཟང་པོ་འདི་རྟོགས་པས། །སངས་རྒྱས་ཐམས་ཅད་ཕྱི་ནས་རྒྱས། །དེ་ཕྱིར་སངས་རྒྱས་མ་གསུངས་ ― DNG002_Page_0141 ―
[མ་དཔེ་གཟིགས་ན་འདིར་གནོན།]
ཆོས། །སངས་རྒྱས་སེམས་ཅན་ང་ལས་བྱུང་། །གཞི་ལ་གཉིས་ཀ་མེད་པའི་ཕྱིར། །སེམས་ཅན་ཐ་མལ་ལུས་སྲོག་ལ། །དེ་ཤེས་གཅོད་སྤང་ལ་སོགས་བྱེད། །ཕོ་ཚོད་ལྟ་བ་བདུད་ཀྱི་ལས། །ད་ཡང་འདུས་པའི་སྙིང་པོ་ཉོན། །རང་བྱུང་ཡེ་ཤེས་རྩ་བ་ནི། །དངོས་པོ་མེད་པར་ཤེས་པ་ཡོད། །ཡིད་སྣང་སེམས་ཀྱི་རང་བཞིན་ལ། །ངེས་དོན་བཀའ་དང་དྲང་དོན་ལས། །ངོ་བོ་གཞི་གཅིག་མི་འགལ་ཀྱང་། །རྣམ་སྣང་ཤཱཀ་ཐུབ་ཞིང་ཁམས་བཞིན། །ཡུལ་གྱི་སྣང་བ་ཐ་དད་པ། །གཏན་ཚིགས་བཞི་ཡི་རང་བཞིན་གསལ། །སྣང་བའི་ཞེན་པ་གང་འགོག་པ། །བལྟ་བའི་ཡུལ་ནི་རྣམ་བཞི་ཡིས། །ཐམས་ཅད་བློ་ཡི་སྣང་བ་དེ། །གང་ཡང་མི་འགལ་ཞེན་པ་འགོགས། །དེ་ཕྱིར་ངེས་དོན་གདམས་ངག་ཆེ། །བདེ་བས་རང་སེམས་རྟོགས་པའི་ཐབས། །ཀུན་གཞི་གཞི་ཆ་ངོས་ཟིན་ན། །ཡེ་ཤེས་ལྷུན་གྲུབ་རྫོགས་ཆེད་དུ། །རང་རིག་རྒྱལ་པོ་ཡེ་ཤེས་འཕྱོ། །མ་རྟོགས་ལོག་རྟོགས་འགོག་པའི་ཕྱིར། །མདོ་སྡེ་དང་ནི་རྒྱུད་སྡེ་ལ། །ཚད་མ་བཞི་ཡི་གཏན་ཚིགས་ཀྱིས། །ཐེག་པ་གོང་འོག་ཁྱད་པར་གྱི། །མིང་དང་ཐ་སྙད་བསམ་ཡས་ནི། །ཞེན་པ་ལོག་པའི་ཐབས་སུ་ཟད། །རྡོ་རྗེ་ཐེག་པ་འདི་ལས་མེད། །ད་ཡང་རྡོ་རྗེ་སེམས་དཔའ་ཉོན། །སྣང་བ་མི་འགོགས་ཆོས་དབྱིངས་ལ། །ཞེན་པ་མེད་པའི་ཡེ་ཤེས་ཏེ། །ཀུན་གྱི་རང་བཞིན་མ་བཅོས་ཏེ། །དེ་ཉིད་དོན་དང་གང་ལྡན་པ། །མི་ཡི་ལུས་ལ་སངས་རྒྱས་ཐུགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐེ་ཚོམ་གྱི་གནས་བསལ་བའི་ལེའུ་སྟེ་བརྒྱ་དང་བཅུ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ངེས་དོན་སངས་རྒྱས་དགོངས་པ་ལ། །ནོར་དང་གོལ་གྱི་དོགས་པ་ཡི། །གོང་འོག་ཁྱད་པར་ངས་བཤད་ཉོན། །མུ་སྟེགས་རྟག་པ་ཐེར་ཟུག་དང་། །རྫོགས་ཆེན་འགྱུར་མེད་ཆོས་སྐུ་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་ཡུལ་དང་གོལ་ས་ཆོད། །མུ་སྟེགས་རྟག་ཆད་དངོས་མེད་དང་། །ཆོས་སྐུ་དབྱིངས་ ― DNG002_Page_0142 ―
[མ་དཔེ་གཟིགས་ན་འདིར་གནོན།]
རིག་དབྱེར་མེད་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་ནང་གི་སྒྲོ་འདོགས་ཆོད། །སོ་སོ་སྐྱེ་བོ་ཐ་མལ་དང་། །རྫོགས་ཆེན་ཁ་འབྱམས་བསྒོམ་མེད་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་གྲུབ་མཐའ་བློ་བསྒྱུར་དགོས། །ད་ཡང་རྡོ་རྗེ་སེམས་དཔའ་ཉོན། །སེམས་ཅན་རང་རིག་རང་གསལ་དང་། །ཆོས་སྐུའི་རིག་པ་གསལ་བ་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་ཀུན་གཞི་ཤན་དབྱེ་དགོས། །ཐུན་མོང་དག་གི་དབང་གསུམ་དང་། །ཁྱད་པར་འཕགས་པའི་དབང་གསུམ་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་ཡེ་རྫོགས་དབང་གསུམ་དགོས། །དབུ་མ་སྤྲོས་དང་བྲལ་བ་དང་། །རྫོགས་ཆེན་གོལ་སྒྲིབ་མེད་པ་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་འཁོར་འདས་མ་རེག་དགོས། །རང་བྱུང་ངོ་བོའི་ལུས་དང་ནི། །དང་པོའི་ཤེས་བཞིན་ལུང་མ་བསྟན། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་ཐོག་མཐའ་བཅད་པ་དགོས། །དང་པོ་འཁོར་འདས་བར་དོ་དང་། །ཐ་མ་སྲིད་པ་བར་དོ་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་འཆི་ཁའི་གདམས་ངག་དགོས། །ཞི་གནས་བྱིང་རྒོད་བྲལ་བ་དང་། །རྫོགས་ཆེན་སྔ་ཕྱི་བྲལ་བ་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་ཆོས་སྐུ་ཆེན་པོར་དགོས། །བསམ་གཏན་ཤེས་བཞི་དབྱེར་མེད་དང་། །རྫོགས་ཆེན་ལྷག་མཐོང་རིག་པ་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་རྐྱེན་ཐུབ་གདམས་ངག་དགོས། །སྣང་སྟོང་དབྱེར་མེད་ལྟ་བ་དང་། །རང་བྱུང་སྣང་བ་ཆོས་དབྱིངས་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་ཡུལ་སེམས་ཤན་དབྱེ་དགོས། །ཐབས་ཀྱི་རོ་སྙོམས་འབྲལ་མེད་དང་། །རྫོགས་ཆེན་ཆོས་སྐུ་འབྲལ་མེད་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་དང་པོ་གཞི་ཤེས་དགོས། །ཐོས་ཆུང་ཉམས་མྱོང་ཞེན་པ་དང་། །བདུད་ཀྱི་ཆོ་འཕྲུལ་བཅོ་བརྒྱད་གཉིས། །འདྲ་བ་ལས་ནི་ནོར་བས་གོལ། །དེ་ཕྱིར་ཟིལ་གནོན་མན་ངག་གཅེས། །ལྷུན་གྲུབ་སེམས་སུ་འདོད་པ་དང་། །སེམས་ལས་ ― DNG002_Page_0143 ―
[མ་དཔེ་གཟིགས་ན་འདིར་གནོན།]
བྱུང་བའི་ཆོས་སྐུ་གཉིས། །འདྲ་བ་ལས་ནི་ནོར་བས་གོལ། །དེ་ཕྱིར་ཐེག་པ་ཤན་དབྱེ་དགོས། །ཐབས་ཀྱིས་ཟིན་པའི་བདེ་བ་དང་། །ལྟ་བ་རྟོགས་པའི་བདེ་བ་གཉིས། །འདྲ་དང་ནོར་བས་གོལ་ཏེ་འགྲོ། །དེ་ཕྱིར་ཡེ་ཤེས་རྐྱེན་ཐུབ་དགོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསྒོམ་པ་ཤན་དབྱེ་བ་བསྟན་པའི་ལེའུ་སྟེ་བརྒྱ་དང་བཅུ་བཞི་པའོ། །སྡོམ་དུ་བསྡུས་ཏེ་བསྟན་པ་ཉེར་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །རང་རིག་ཆོས་ཉིད་ལ་བཟླའི་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །མ་བསྒོམས་དོན་དང་མི་འབྲལ་བའི། །ཡེ་ཤེས་རང་ཤར་གདམས་ངག་དགོས། །རྣམ་པར་རྟོག་པ་མི་འགོག་པའི། །རང་ཤར་སྤྱོད་པ་ཇི་ལྟར་སྦྱང་། །ཡེ་ཤེས་ལ་ནི་ཇི་ལྟར་སྦྱང་། །དེ་ཡི་འབྲས་བུ་ཇི་ལྟར་སྦྱང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །མ་བསྒོམས་འབྲལ་བ་མེད་པ་ཡི། །ཡེ་ཤེས་རང་ཤར་ངེས་པའི་དོན། །ཀུན་རིག་སྟོན་པས་བཀའ་སྩལ་པ། །དངོས་པོ་མ་འཁྲུལ་རིག་པ་ལ། །ཚོར་བ་བདེ་སྡུག་ཅི་བྱུང་ཡང་། །ལུང་ལྡན་རིན་ཆེན་བྱིན་གྱིས་ནི། །དེ་ཉིད་ཆོས་སྐུར་ཉམས་སུ་མྱོང་། །ད་ཡང་རྡོ་རྗེ་སེམས་དཔའ་ཉོན། །ཡུལ་གྱི་སྣང་བ་གང་བྱུང་ཡང་། །མ་འཁྲུལ་པ་ཡི་རིག་པ་ཡི། །དོན་གྱིས་ཟིན་པའི་ཡེ་ཤེས་དེ། །ཆོས་ཉིད་དག་གི་གནས་ལུགས་ཡིན། །དེ་ཉིད་ལུང་ལྡན་སྒྲོན་མ་ཡིས། །མ་རིག་མུན་པ་མེད་པའི་ཕྱིར། །སྒྲོ་སྐུར་བྲལ་བའི་ཡེ་ཤེས་ལ། །ཆོས་ཀྱི་སྐུ་ཞེས་དེ་ལ་བྱ། །ད་ཡང་རྡོ་རྗེ་སེམས་དཔའ་ཉོན། །ལས་དང་པོ་ཡི་དད་ལྡན་ལ། །དངོས་པོ་ཡུལ་ལ་བརྟེན་ཏེ་བསྟན། །སྣང་བ་མི་འགོག་ཐབས་ཡིན་པས། །དེ་བསྟན་ཡུལ་དང་འབྲལ་མེད་དགོས། །ཚོར་བ་བདེ་བ་འཇམ་དང་ཞིམ། །དགའ་བ་རང་ཉམས་མྱོང་བའི་ཚེ། །ཡུལ་མེད་ཉམས་སུ་མྱོང་ཚད་ནི། །མན་ངག་ལུང་གི་ཆོས་སྐུར་ཤེས། །དེ་ཕྱིར་ཡེ་ཤེས་རང་ཤར་ཡིན། །ད་ཡང་ ― DNG002_Page_0144 ―
[མ་དཔེ་གཟིགས་ན་འདིར་གནོན།]
འདུས་པའི་སྙིང་པོ་ཉོན། །ཚོར་བ་བདེ་སྡུག་སྡུག་བསྔལ་དང་། །ན་ཚ་མི་ཞིམ་རྩུབ་པ་དང་། །དགའ་དང་མི་དགའ་ཅི་བྱུང་ཡང་། །ལུང་ལྡན་རིན་ཆེན་རྐྱེན་གྱིས་ནི། །ཆོས་སྐུར་ཉམས་སུ་མྱོང་བའི་ཕྱིར། །ལུང་ལྡན་གནས་སྐབས་མཐར་ཐུག་གི། །འདྲེལ་བ་མེད་ཤེས་ཉམས་ཀྱི་ཚད། །ད་ཡང་འདུས་པའི་སྙིང་པོ་ཉོན། །ཡུལ་འདི་རིག་མེད་འཁྲུལ་པར་ཤེས། །འདུས་བྱས་ཡིན་ཕྱིར་ཆོས་སྐུ་མིན། །སྡུག་བསྔལ་ཚོར་བ་གང་བྱུང་ཡང་། །དེ་དག་རྟག་ཆད་མཐའ་མར་ལྟུང་། །བྱིང་རྒོད་བླང་དོར་སྐྱོན་མ་གོས། །དེ་ཕྱིར་ཆོས་སྐུ་བསྒོམ་མི་དགོས། །ད་ཡང་རྡོ་རྗེ་སེམས་དཔའ་ཉོན། །ཡུལ་གྱི་དྲན་རྟོག་ཅིར་སྣང་ཡང་། །གང་འཕྲད་ཆོས་སྐུར་ཉམས་སུ་མྱོང་། །ད་ཡང་ཡུལ་དྲུག་འདྲེལ་མེད་ཤེས། །གྲངས་ནི་རྣམ་པ་དགུར་ནི་བསྟན། །གང་མཐོང་གང་དྲན་ལྷག་མཐོང་ལ། །རྐྱེན་ཐུབ་དྲུག་ནི་དོན་གྱིས་རྫོགས། །ད་ཡང་འདུས་པའི་སྙིང་པོ་ཉོན། །མཐའ་རུ་མི་འཛིན་ལྟ་བ་ལ། །རིག་པ་རྒྱ་ཡན་ཆོས་སྐུར་གསལ། །ཡོད་ལ་གདེང་གིས་ཟིན་པ་ལ། །ཉམས་དང་ལྡན་པའི་ཚད་ཅེས་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་རང་ཤར་བསྟན་པའི་ལེའུ་སྟེ་བརྒྱ་དང་བཅོ་ལྔ་པའོ།། །།དེ་ནས་ཀུན་རིག་ཆོས་རྗེ་ཡིས། །ཐ་མལ་རྣམ་རྟོག་མི་འགག་པའི། །ལ་ཟློའི་སྤྱོད་པ་བཀའ་སྩལ་པ། །གཞི་ཤེས་བློ་དངོས་གཅིག་པ་དང་། །བརྟུལ་ཞུགས་མཆོག་དང་བགེགས་མེད་པའི། །ལ་ཟློའི་སྤྱོད་པ་དམ་པར་ཟུང་། །གཞི་ཤེས་རང་སར་སྤྱོད་པ་ནི། །ལུང་ལྡན་ངེས་པའི་གདམས་ངག་གིས། །ཡུལ་མེད་ཆོས་སྐུ་ངོས་ཟིན་པས། །ལུས་ངག་བྱ་བྱེད་རྗེས་མེད་པའི། །གཞན་དུ་འཛིན་མེད་རང་རིག་སྐུ། །སྔ་ཕྱི་མ་བསླད་མ་བཅོས་པའི། །འདུ་འབྲལ་མེད་པའི་ཡེ་ཤེས་ནི། །སུས་ཀྱང་མ་བྱས་རང་བྱུང་བདེ། །གཞི་ཉིད་ཤེས་པས་ནམ་མཁའ་འདྲ། །ད་ཡང་འདུས་པའི་སྙིང་པོ་ཉོན། །ཆོས་སྐུ་རིག་པ་འགྲོ་འོང་མེད། །རྟག་ཆད་མཐའ་ཡི་སྒྲོ་སྐུར་ ― DNG002_Page_0145 ―
[མ་དཔེ་གཟིགས་ན་འདིར་གནོན།]
བྲལ། །རང་རིག་སྤྱོད་པ་གང་སྤྱོད་ཀྱང་། །ཆོས་ཀྱི་སྐུ་ལས་མ་གཏོགས་པར། །རྡུལ་ཙམ་གཞན་ནས་ཡོད་མི་སྲིད། །དེ་ཕྱིར་ཤེས་པ་རང་ཡན་ལ། །ལྷག་མཐོང་དྲན་པའི་གདེང་གིས་ཟིན། །ཡེངས་དང་མ་ཡེངས་མེད་པར་ནི། །ལྟ་བའི་གདེང་ཀྱིས་འབྲལ་མེད་ཕྱིར། །ཆོས་སྐུ་གཞིར་ཤེས་སྤྱོད་པ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གཞི་ཤེས་པའི་སྤྱོད་པ་བསྟན་པའི་ལེའུ་སྟེ་བརྒྱ་དང་བཅུ་དྲུག་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །བློ་དངོས་སྤྱོད་པ་བསྟན་པའི་ཕྱིར། །གཞི་ཉིད་དེ་ལྟར་རྟོགས་པ་ལ། །སྣང་བ་ངེས་མེད་སེམས་ལ་རྒྱུ། །དེ་རྒྱུ་ཙམ་ན་ཆོས་སྐུ་ཉིད། །དེ་ལྟར་ཐག་ཆོད་ངེས་པ་ཡིས། །བསྒོམ་དང་མི་བསྒོམ་རང་སར་གྲོལ། །གང་ཡང་ཆོས་སྐུར་འགྱུར་བ་མེད། །བློ་དང་དངོས་པོར་བྱེད་མི་བྱེད། །ནམ་མཁར་འཇའ་ཚོན་མ་འདྲེས་རྫོགས། །བློ་དང་སྣང་བ་དངོས་པོའི་ཆོས། །སེམས་ཀྱི་སྣང་བ་ཅིར་སྣང་ཡང་། །དངོས་མེད་རིག་པ་ཆོས་སྐུར་ཤེས། །བསྒོམ་དང་མི་བསྒོམ་ཐ་སྙད་བྲལ། །དེ་ཕྱིར་བློ་དངོས་ཡེ་ཤེས་ཤར། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་རང་ཤར་གྱི་སྤྱོད་པ་བསྟན་པའི་ལེའུ་སྟེ་བརྒྱ་དང་བཅུ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །བརྟུལ་ཞུགས་མཆོག་སྤྱོད་བཀའ་སྩལ་པ། །ལྟ་བ་ལ་ནི་བཟླ་བའི་ཕྱིར། །སྤྱོད་པ་རྩིང་པོ་ཆེད་དུ་དགོས། །དེས་མི་འཆིང་བའི་གདམས་ངག་ཡོད། །དེ་ཕྱིར་རང་གྲོལ་རྟོགས་པ་གཅེས། །ད་ཡང་འདུས་པའི་སྙིང་པོ་ཉོན། །ངེས་ལུང་ལྡན་པའི་རྣལ་འབྱོར་པས། །མ་དང་སྲིང་མོ་ཀུན་སྤྱད་ཀྱིས། །གཞན་གྱི་བུད་མེད་སྨོས་ཅི་དགོས། །སེམས་ཅན་མནར་སྦྱངས་བསད་གྱུར་ཅིང་། །དགེ་འདུན་མཆོད་རྟེན་དཀོར་ཕྲོག་ཀྱང་། །སྐྱོན་སྒྲིབ་མེད་པར་ཡེ་ཤེས་ཤར། །དམྱལ་དཔོན་ལྟུང་བ་མེད་པ་བཞིན། །བརྟུལ་ཞུགས་མཆོག་གི་སྤྱོད་པ་ལ། །བསྲུང་བའི་དམ་ཚིག་མི་འགལ་ཏེ། །ལུང་རིགས་ལྡན་པའི་ཆོས་ ― DNG002_Page_0146 ―
[མ་དཔེ་གཟིགས་ན་འདིར་གནོན།]
འདི་དགོས། །ད་ཡང་རྡོ་རྗེ་སེམས་དཔའ་ཉོན། །དེང་སང་དུས་ཀྱི་ཆོས་བྱེད་རྣམས། །ཞི་འཇམ་རྒྱུད་ནི་འབོལ་བ་དེ། །གདམས་ངག་མེད་ཕྱིར་བྱོལ་སོང་རྒྱུ། །དེ་ཕྱིར་རྨོངས་པ་སྙིང་རེ་རྗེ། །ཞི་འབོལ་འབྲས་བུ་ཐོབ་པ་མེད། །ལྷ་རྣམས་འཇིག་རྟེན་ལྟུང་བ་མེད། །ལྟ་བ་མ་རྟོགས་ཐམས་ཅད་ལྟུང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བརྟུལ་ཞུགས་མཆོག་གི་སྤྱོད་པ་བསྟན་པའི་ལེའུ་སྟེ། བརྒྱ་དང་བཅོ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །གཞི་ལ་འདྲེ་མེད་བསྟན་པའི་ཕྱིར། །ཀུན་རིག་སྟོན་པ་ཆོས་རྗེ་ཡིས། །འདྲེ་ཡོད་སུན་འདོན་བཀའ་སྩལ་པ། །གཞི་ལ་ལྷ་འདྲེ་མེད་པ་ལ། །མུ་སྟེགས་སྐྱེ་བོ་བདེན་འཛིན་པས། །འདྲེ་ཡོད་སུན་འདོན་ལ་ཟློ་དགོས། །ང་ཡིས་བཤད་ཀྱིས་ལེགས་པར་ཉོན། །ད་ཡང་རྡོ་རྗེ་སེམས་དཔའ་ཉོན། །ཡུལ་གྱི་རྟོག་པ་མ་ཟད་པར། །གནོད་པའི་བགེགས་ལ་ཟད་པ་མེད། །བགེགས་རིགས་སྟོང་ཕྲག་བརྒྱད་ཅུ་ཡང་། །གཞི་ལ་གང་ཡང་མེད་པ་ཡི། །བཙུན་པ་ཁྲིམས་འཆལ་ཨུ་ལི་ཡིས། །མུ་སྟེགས་ལོག་ལྟའི་ལྷ་བསྒྲུབས་པས། །ཁ་ཆེ་བྱེ་བྲག་སྨྲ་བ་ཡི། །ཐོལ་ཐོལ་སྨྲ་ལ་ལབ་ལབ་འབར། །བདུད་ཀྱི་བྱིན་རླབས་གློ་བུར་བྱུང་། །ལྷ་མེད་ལྷར་འཛིན་འདྲེ་རྣམས་གནོད། །འདུ་བ་རྣམ་བཞིའི་ནད་དང་ནི། །ཡེ་འདྲོག་སུམ་བརྒྱ་དྲུག་གིས་བྱས། །དེ་ཡང་རྫུན་དུ་སྨྲ་བ་ལ། །རྨོངས་པའི་སྐྱེ་བོས་བདེན་སྙམ་ནས། །མོ་ཆོག་བྱས་པས་དགེ་བ་ཉམས། །འདྲེ་མཆོད་བདུད་དུ་སླར་ལ་ཆེ། །འབྱུང་བ་བཞི་ལ་འདྲེ་ཡོད་ཟེར། །སྲིད་པའི་སྤྱི་བགེགས་མི་ལ་གནོད། །མི་ཤི་འདྲེ་བྱུང་གནོད་ཟེར་ཏེ། །རྒྱབ་མཆོད་འདྲེ་ནི་བརྟགས་བྱས་པས། །ན་ཚ་གོད་ཁ་སླར་ལ་འོང་། །ད་ཡང་འདུས་པའི་སྙིང་པོ་ཉོན། །སྲིད་པ་སྤྱི་བགེགས་ཆེན་པོ་ནི། །སྐྱེ་བོ་རྒྱང་འཕེན་པ་ལ་ཡོད། །སངས་རྒྱས་ཆོས་ལ་འདྲེ་མེད་ཕྱིར། །ཆོས་དང་གང་ཟག་བདག་དང་བྲལ། །དེ་ཕྱིར་སྣང་བ་མེད་པའི་ཕྱིར། །སྲིད་པ་སྤྱི་ ― DNG002_Page_0147 ―
[མ་དཔེ་གཟིགས་ན་འདིར་གནོན།]
འདྲེ་གཞི་ལ་མེད། །འདྲེ་ཡོད་ཟེར་བ་ལྟ་བ་ལོག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གཞི་ལ་འདྲེ་མེད་པར་བསྟན་པའི་ལེའུ་སྟེ། བརྒྱ་དང་བཅུ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །འདྲེ་ནི་སུན་འདོན་བཀའ་སྩལ་པ། །འཇིག་རྟེན་ཞིག་ན་འདྲེ་ཡང་མེད། །ཀུན་བརྟགས་མ་རིག་ཡུལ་དུ་བརྟགས། །མ་རིག་མེད་ན་འདྲེ་ཡང་མེད། །འདྲེ་ནི་གློ་བུར་བཏགས་པ་ཙམ། །མི་ལས་གྱུར་པར་འདྲེ་གདོན་ན། །ལུས་ཅན་གནོད་ན་མ་ཤི་རིགས། །ལུས་མེད་སྟོང་པས་གནོད་མི་ནུས། །དེ་ཕྱིར་འདྲེ་གནོད་རྫུན་པོ་ཆེ། །ལྷ་བཀའ་མི་ཀུན་རྫུན་གྱིས་བསླུས། །ཐ་མལ་ལས་ཀྱི་དུས་ཟད་ན། །མོ་ཆོག་བྱས་དང་མ་བྱས་མེད། །རྐྱེན་མི་བཟློག་སྟེ་ཀུན་ཀ་འཆི། །ད་ཡང་འདུས་པའི་སྙིང་པོ་ཉོན། །དེ་ཕྱིར་ལྷ་འདྲེ་ཀུན་མེད་དེ། །འཁྲུལ་པའི་བློ་ཡིས་བརྟགས་པ་ལས། །རྟོགས་པས་འདྲེ་མེད་ལ་བཟླས་ན། །འཁོར་འདས་མ་རིག་ཆོས་འདི་ལ། །ལྷ་འདྲེ་བྱ་བའི་མིང་མི་ཤེས། །ཐམས་ཅད་ཐིག་ལེ་ཉག་གཅིག་སྐུ། །དུག་ཤེས་སྨན་དུ་སྦྱར་ཤེས་ལྟར། །འདྲེ་ཉིད་ཡེ་ཤེས་ཀློང་དུ་ཤེས། །དགག་བསྒྲུབ་མེད་ཕྱིར་འདྲེ་རྣམས་སྟོངས། །རྐྱེན་གྱིས་མི་ཚུགས་ནམ་མཁའ་འདྲ། །ད་ཡང་རྡོ་རྗེ་སེམས་དཔའ་ཉོན། །ཡང་དག་དོན་གྱི་ངོ་བོ་ལ། །ལྷ་འདྲེ་མེད་པས་ཡེ་ཤེས་སྐུ། །གང་ལ་རྟོག་མེད་རང་བྱུང་ལ། །ངེས་དོན་མན་ངག་རྟོགས་པའི་ཕྱིར། །བསླུ་བྲིད་ཆོས་ཀྱི་གོལ་སྒྲིབ་མེད། །འདྲེ་མེད་ཡེ་ཤེས་ལ་བཟླའོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འདྲེ་མེད་སུན་འདོན་བསྟན་པ། ཡེ་ཤེས་རང་ཤར་གྱི་སྤྱོད་པ་བསྟན་པའི་ལེའུ་སྟེ། བརྒྱ་དང་ཉི་ཤུ་པའོ།། །།དེ་ནས་ཀུན་རིག་སྟོན་པ་ཡིས། །ཡེ་ཤེས་ལ་བཟླའ་བཀའ་སྩལ་པ། །རྒྱུ་དང་འབྲས་བུ་རོ་གཅིག་ཕྱིར། །རིམ་པར་དབྱེར་མེད་ངོ་བོ་གཅིག །སངས་རྒྱས་མ་ཚོལ་རང་ལ་གནས། །དེ་ཕྱིར་རྒྱུ་འབྲས་དབྱེ་ ― DNG002_Page_0148 ―
[མ་དཔེ་གཟིགས་ན་འདིར་གནོན།]
རུ་མེད། །ད་ཡང་འདུས་པའི་སྙིང་པོ་ཉོན། །འཁོར་འདས་རྩ་བ་གཅིག་པའི་ཕྱིར། །རང་བཞིན་ལུས་དེ་ངོ་ཤེས་པས། །ཐར་པ་ཐོབ་ཅེས་བསྟན་པའི་ཕྱིར། །འཁོར་འདས་མེད་པར་ཆོས་སྐུར་རྟོགས། །ཕྱི་ནང་སྣོད་བཅུད་མ་ལུས་ཀུན། །མ་བྱུང་མ་སྐྱེས་ཆོས་དབྱིངས་ལ། །དུས་གསུམ་འཕོ་འགྱུར་མེད་པའི་ཕྱིར། །ཕྱི་ནང་མ་བསལ་ཡེ་ནས་ཡིན། །ད་ཡང་རྡོ་རྗེ་སེམས་དཔའ་ཉོན། །མ་རིག་ལས་སྐྱེས་སེམས་ཅན་དང་། །ཡེ་ཤེས་ལས་བྱུང་སངས་རྒྱས་གཉིས། །ངེས་ལུང་ལྡན་པས་ཆོས་སྐུར་གཅིག །མ་བཙལ་ལ་ཟློ་ཆེན་པོ་ཡི། །བདེ་དང་སྡུག་བསྔལ་འཁོར་འདས་ཆོས། །རྟོགས་དང་མ་རྟོགས་གཉིས་མེད་ཕྱིར། །ཡུལ་དང་འཛིན་པ་བློ་མེད་པས། །མ་བཙལ་ཡེ་ཤེས་རང་གནས་ཡིན། །ད་ཡང་འདུས་པའི་སྙིང་པོ་ཉོན། །གཙང་སྨེ་གཞི་ལ་མེད་པའི་ཕྱིར། །བློ་ཡིས་བྱས་པ་ཐམས་ཅད་འཁྲུལ། །མ་བྱས་མ་བཅོས་རང་རིག་ཉམས། །ལ་བཟླ་བཟང་ངན་མེད་པར་གྱིས། །ད་ཡང་འདུས་པའི་སྙིང་པོ་ཉོན། །མཐོ་དམན་ཆེ་ཆུང་མ་ལུས་ཀུན། །མན་ངག་ཅན་ལ་ཆེ་ཆུང་མེད། །ཡེ་ཤེས་རང་ལ་གནས་པ་ལ། །མཐོ་དམན་མེད་པར་རྟོགས་པར་གྱིས། །རང་བྱུང་སྐྱེ་འཆི་མེད་པའི་ཕྱིར། །དུས་གསུམ་གཅིག་ལ་ཡེ་ཤེས་སྐུ། །གྲངས་དང་ཚེ་ཚད་བགྲང་དུ་མེད། །དེ་ཕྱིར་མི་འགྱུར་ཡེ་ཤེས་ཡིན། །ད་ཡང་འདུས་པའི་སྙིང་པོ་ཉོན། །ཡེ་ཤེས་རང་ཤར་ལ་ཟློས་ན། །གང་ལྟར་སྣང་དྲན་ཆོས་ཉིད་ལ། །མ་བཙལ་ཡེ་ཤེས་རང་གནས་ཕྱིར། །བསྒོམ་མི་དགོས་པ་ལ་བཟླའོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་རང་ཤར་ལ་བཟླ་བ་བསྟན་པའི་ལེའུ་སྟེ། བརྒྱ་དང་ཉེར་གཅིག་པའོ།། །།དེ་ནས་ཀུན་རིག་ཆོས་རྗེ་ཡིས། །དད་ལྡན་འདུས་པའི་འཁོར་རྣམས་ལ། །རྟོགས་པའི་འབྲས་བུ་བཀའ་སྩལ་པ། །རྟོགས་པའི་ཡོན་ཏན་དུས་འདིར་ནི། །ལུས་མེད་སྒོ་ལྔའི་རིག་པས་ཀྱང་། །སྔར་མ་མཐོང་བའི་ཞིང་ཁམས་གསུམ། །ཡེ་ཤེས་སྤྱན་གྱིས་དུས་གཅིག་མཐོང་། ། ― DNG002_Page_0149 ―
[མ་དཔེ་གཟིགས་ན་འདིར་གནོན།]
འཆར་ནུབ་མེད་པའི་ཉི་ཟླ་ཤར། །ད་ཡང་རྡོ་རྗེ་སེམས་དཔའ་ཉོན། །མ་བསམས་པ་ཡི་ལྷག་མཐོང་ལ། །མ་བརྗེད་པ་ཡི་གཟུངས་ཀྱིས་ཟིན། །མ་ཟོས་བདུད་རྩིའི་རོ་མཆོག་མྱོང་། །མ་བསྒྲུབས་པ་ཡི་འབྲས་བུ་ཐོབ། །མ་བཙལ་པ་ཡི་དོན་ཞིག་གྲུབ། །ད་ཡང་རྡོ་རྗེ་སེམས་དཔའ་ཉོན། །དེ་ཕྱིར་ངེས་དོན་འདི་བཙལ་ན། །དུས་འདིར་ཆོས་ཉིད་བདེན་པ་མཐོང་། །ཐུན་མོང་དངོས་གྲུབ་ཅི་བསམ་འགྲུབ། །རྗེས་དྲན་ཡོན་ཏན་བར་དོར་འོངས། །དུས་དེར་སངས་རྒྱས་སྨོས་ཅི་དགོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འབྲས་བུ་མངོན་དུ་འབྱུང་བར་བསྟན་པའི་ལེའུ་སྟེ། བརྒྱ་དང་ཉེར་གཉིས་པའོ། །སྡོམ་དུ་བསྡུས་ཏེ་བསྟན་པ་ཉེར་དྲུག་པའོ།། །།དེ་ནས་འདུས་པའི་ཚོགས་རྣམས་ཀྱིས། །ཀུན་རིག་སྟོན་པ་ཆོས་རྗེ་ལ། །བདེན་པའི་ཡིད་ཀྱིས་འདི་སྐད་གསོལ། །ཐིག་ལེ་བརྒྱད་ཀྱིས་དབྱེ་བ་གང་། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ཕྱི་ནང་མ་བཅོས་མྱ་ངན་འདས། །མྱང་འདས་དོན་ནི་ཆོས་ཀྱི་སྐུ། །ཆོས་ཀྱི་དབྱིངས་ནི་སྐུ་ཡི་འོད། །སྙིང་པོའི་འབྲས་བུ་ཡེ་ཤེས་སྐུ། །སྙིང་པོ་ཀུན་ལ་ཁྱབ་ཅིང་འདུས། །ཐུགས་ཀྱི་ཉིང་ཁུ་ཡིན་པའི་ཕྱིར། །ཐིག་ལེ་འགྱུར་བ་མེད་པའི་དོན། །ཀུན་བཟང་རྡོ་རྗེའི་བྱིན་རླབས་ཀྱིས། །ཚིག་ཏུ་མ་བཀོད་ཐུགས་ལ་བརྒྱུད། །དོན་གྱི་གཏིང་ཕྱིན་བསྟན་པའི་ཕྱིར། །ཚིག་ཉུང་དོན་དུ་བགྲང་བའི་ཕྱིར། །ཐིག་ལེ་ལ་ཤན་དབྱེ་བ་ནི། །མཚན་ཉིད་བརྟགས་པའི་ཐིག་ལེ་དང་། །གསང་སྔགས་སྤྱི་ཡི་ཐིག་ལེ་དང་། །རྫོགས་པ་ཆེན་པོའི་ཐིག་ལེ་དང་། །ཡང་ཏི་ཐིག་ལེ་ཉག་གཅིག་ལ། །རེ་རེ་ལ་ནི་བཞི་བཞི་སྟེ། །ངོ་བོ་དཔེ་དང་གཏན་ཚིགས་ཀྱིས། །འགྲོ་ས་ལ་ཤན་དབྱེ་བ་དང་། །རྩལ་གྱི་སྒོ་ནས་གསུམ་བསྟན་པ། །སྣང་བ་ཆོས་ཀྱི་སྐུ་ལ་རྫོགས། །ད་ཡང་འདུས་པའི་སྙིང་པོ་ཉོན། །བཏགས་པ་མིང་གི་ཐིག་ལེ་ཡི། །མཚན་ཉིད་ཐེག་པ་རྣམ་གསུམ་ལ། །ངོ་བོ་རྣམ་ཤེས་ཚོགས་བརྒྱད་ལ། །དཔེ་ནི་དམུས་ལོང་གཡུ་རྡོ་འདྲ། །གཏན་ཚིགས་ངེས་པ་གང་ ― DNG002_Page_0150 ―
[མ་དཔེ་གཟིགས་ན་འདིར་གནོན།]
ཡིན་པ། །ཐིག་ནི་ཚོགས་བརྒྱད་སེམས་སུ་གཅིག །ལེ་ནི་ཁམས་གསུམ་ཡོངས་ལ་ཁྱབ། །འགྲོ་ས་སྲིད་པའི་ཡང་རྩེ་ཡིན། །གཞི་ཡི་ཐིག་ལེ་བསྟན་པ་ནི། །གསང་སྔགས་ཕྱི་རྒྱུད་རྣམ་པ་གསུམ། །ངོ་བོ་ཀུན་གཞིའི་རྣམ་ཤེས་ལ། །དཔེ་ནི་ས་དང་ཆུ་འདྲེས་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་ཀུན་གྱི་སེམས་ཀྱི་གཞི། །ལེ་ནི་འགྲོ་དྲུག་ཡོངས་ལ་ཁྱབ། །འགྲོ་ས་འདས་དང་མ་འདས་པ། །དོན་གྱི་ཐིག་ལེ་བསྟན་པ་ནི། །རྫོགས་ཆེན་ཨ་ཏི་སྤྱི་ཡི་གཞུག །ངོ་བོ་ཀུན་གཞི་ལུང་མ་བསྟན། །དཔེ་ནི་ཞོ་དང་འོ་མ་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་ཀུན་གཞི་གཉུག་མ་ལ། །ལེ་ནི་ཐམས་ཅད་སེམས་སུ་སྣང་། །འགྲོ་ས་གར་འགྲོ་ངེས་པ་མེད། །ད་ཡང་འཁོར་གྱི་སེམས་དཔའ་ཉོན། །དེ་ལྟར་ཐིག་ལེ་ཉག་བཞི་བསྟན། །ཐེག་པ་ཀུན་དང་སྒོ་བསྟུན་ཕྱིར། །ཤན་གྱི་སྒོ་ནས་བཏགས་པ་ཡིན། །དོན་ལ་དབྱེར་མེད་ངོ་བོ་གཅིག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐིག་ལེ་ལ་ཤན་དབྱེ་བ་བསྟན་པའི་ལེའུ་སྟེ། བརྒྱ་དང་ཉི་ཤུ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་བཟང་རྒྱལ་པོས་བཀའ་སྩལ་པ། །ཆོས་ཉིད་ཐིག་ལེ་ཞེས་བྱ་བ། །སྤྲོ་བསྡུ་མེད་པར་རང་གསལ་བ། །ཆོས་ནི་སྙིང་པོ་མི་འགྱུར་བའི། །ཀུན་བཟང་ཐུགས་ཀྱི་སྒྲོན་མ་ཡིན། །ད་ཡང་རྡོ་རྗེ་སེམས་དཔའ་ཉོན། །དེ་ཕྱིར་མ་ནོར་དྲང་ཕྱིར་ཐིག །དངོས་མེད་ཀུན་ཁྱབ་བརྡལ་བས་ལེ། །འཁོར་འདས་གཞི་གྱུར་རང་བྱུང་སྐུ། །ཉིད་ནི་སྤྲོས་བྲལ་འདུས་མ་བྱས། །ཀུན་གྱི་འབྱུང་གནས་ཡིན་པའི་ཕྱིར། །མ་འམ་རྟེན་དུ་གཞིར་གྱུར་པ། །ཏིལ་ལ་མར་གྱིས་ཁྱབ་པ་བཞིན། །སངས་རྒྱས་ཐུགས་དང་སེམས་ཅན་སེམས། །ཀུན་ཁྱབ་ཡེ་ནས་བཙལ་མི་དགོས། །དེ་ཕྱིར་ཆོས་ཉིད་སྤྲོས་བྲལ་བ། །འཁྲུལ་རྟོག་སེམས་ནི་གཞི་ལ་མེད། །དེ་ཕྱིར་འཁོར་འདས་མ་རེག་སྐུ། །དུས་དང་རྣམ་པ་ཐམས་ཅད་དུ། །རྟོགས་དང་མ་རྟོགས་མེད་པར་གནས། ། ― DNG002_Page_0151 ―
[མ་དཔེ་གཟིགས་ན་འདིར་གནོན།]
དེ་ཕྱིར་སྒྲིབ་ཚོགས་མི་དགོས་པ། །ས་ལམ་མེད་ཕྱིར་རིམ་པ་མེད། །འདུས་མ་བྱས་ཀྱི་ནམ་མཁའ་འདྲ། །ད་ཡང་འདུས་པའི་སྙིང་པོ་ཉོན། །རང་བྱུང་བྱ་བྲལ་བདེ་བའི་ལས། །ཡེ་ཤེས་ཀློང་དུ་ཡེ་གནས་ཕྱིར། །འདུ་འབྲལ་མེད་པའི་ཆོས་ཉིད་ལ། །རེ་དོགས་མེད་པར་མཐར་མ་ལྷུང་། །དེ་ཕྱིར་ཆོས་ཉིད་དབྱེ་རུ་མེད། །དེ་དོན་ངོ་བོ་ཀུན་གྱི་གཞི། །དེ་ལས་མ་བྱུང་གང་ཡང་མེད། །དེ་ཕྱིར་ཆོས་ཉིད་ཐིག་ལེ་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་ཉིད་ཀྱི་ཐིག་ལེ་བསྟན་པའི་ལེའུ་སྟེ། བརྒྱ་དང་ཉེར་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །དབྱིངས་ཀྱི་ཐིག་ལེ་བཀའ་སྩལ་པ། །རང་བྱུང་ཡེ་ཤེས་ཐིག་ལེ་ལས། །ཆེ་བའི་ཡོན་ཏན་ཀུན་འབྱུང་ཕྱིར། །མ་བཙལ་ཡོན་ཏན་ཀུན་འབྱུང་བས། །དབྱིངས་ཀྱི་ཐིག་ལེ་དེ་ལ་བྱ། །ད་ཡང་འདུས་པའི་སྙིང་པོ་ཉོན། །ཕ་རོལ་ཕྱིན་བཅུ་ལ་སོགས་པའི། །ཆོས་རྣམས་ཀུན་གྱི་གཞིར་གྱུར་ཕྱིར། །ཇི་སྙེད་བཤད་པ་ཐམས་ཅད་ཀྱང་། །རང་གྲོལ་ཉིད་དུ་བསྟན་པ་ལས། །བདེ་གཤེགས་སྐྱེད་པའི་ཡུམ་ཡིན་ཕྱིར། །ཀུན་གྱིས་མཚུངས་པའི་ལམ་དུ་བསྟན། །ཆོས་ཉིད་དེ་མེད་ཡོན་ཏན་ནི། །གང་ཡང་མི་འབྱུང་དེ་ཡིན་ཕྱིར། །ཆོས་སྐུ་རང་རིག་རྩལ་དུ་ནི། །ཆེ་བའི་ཡོན་ཏན་དགོས་པའི་ཕྱིར། །ཤིན་ཏུ་རྣལ་འབྱོར་མཆོག་གི་ལམ། །ད་ཡང་རྡོ་རྗེ་སེམས་དཔའ་ཉོན། །ཆུ་ཆེན་རྒྱུན་མི་འཆད་པའི་དཔེས། །སངས་རྒྱས་མཚན་དང་དཔེ་བྱད་ཀྱང་། །མ་བཙལ་ལྷུན་རྫོགས་ངང་ལས་བྱུང་། །དེ་ཕྱིར་དབྱིངས་ནི་རིག་པའི་རྩལ། །ཐིག་ནི་མ་བཅོས་ཡེ་ནས་དག །ལེ་ནི་ཡོན་ཏན་རྒྱུན་མི་ཆད། །དེ་ཕྱིར་རང་བྱུང་ཆོས་སྐུ་རྒྱན། །ཕྱི་ནང་ཆོས་ཀྱི་རོལ་པ་ཀུན། །དབྱིངས་ནི་ཐིག་ལེ་འདི་ལ་ཚང་། །དེ་ཕྱིར་ཆོས་ཉིད་རང་བྱུང་ལས། །སངས་རྒྱས་ཆེ་བའི་ཡོན་ཏན་འབྱུང་། །དེ་ཕྱིར་དབྱིངས་ནི་རིག་པའི་རྩལ། །ཐིག་ནི་མ་བཅོས་ཡེ་ནས་གནས། །ལེ་ནི་ཡོན་ཏན་རྒྱུན་མི་འཆད། །དེ་ཕྱིར་རང་བྱུང་ ― DNG002_Page_0152 ―
[མ་དཔེ་གཟིགས་ན་འདིར་གནོན།]
ཆོས་སྐུ་རྒྱན། །ཕྱི་ནང་ཆོས་ཀྱི་རོལ་པ་ཀུན། །མ་བཙལ་ཡེ་ནས་རང་ལ་འཆར། །དབྱིངས་ཀྱི་ཐིག་ལེ་དེ་ལ་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དབྱིངས་ཀྱི་ཐིག་ལེ་བསྟན་པའི་ལེའུ་སྟེ། བརྒྱ་དང་ཉེར་ལྔ་པའོ།། །།དེ་ནས་ཀུན་རིག་ཆོས་རྗེ་ཡིས། །དད་ལྡན་འདུས་པའི་འཁོར་རྣམས་ལ། །དབྱིངས་ནི་རྣམ་པར་དག་པ་ཡི། །ཐིག་ལེ་ཆེན་པོ་བཀའ་སྩལ་པ། །ཡུལ་དང་སེམས་ཀྱིས་བསྡུས་པ་ཡི། །རང་འཁྲུལ་ཞེན་པའི་བློ་བརྟས་པའི། །མཚན་མའི་སྒྲིབ་པ་སྦྱང་མི་དགོས། །དེ་ཕྱིར་དབྱིངས་དང་ཐིག་ལེ་བྱ། །ད་ཡང་འདུས་པའི་སྙིང་པོ་ཉོན། །ཆོས་ཉིད་ཕྲ་ཞིང་ཤེས་དཀའ་ཕྱིར། །ལུང་ལྡན་རྐྱེན་གྱིས་དོན་རྟོགས་ནས། །མི་གནས་དམིགས་པའི་ཡུལ་ལས་འདས། །དེ་ཕྱིར་ཚིག་གིས་མི་ཕེབས་ཕྱིར། །དབྱིབས་དང་ཁ་དོག་དབང་པོ་ཡིས། །ཤིན་ཏུ་བརྟག་དཀའ་སྤྱོད་ཡུལ་མིན། །རང་བྱུང་ཡེ་ཤེས་བློ་ལྡན་ན། །མ་རིག་མེད་ཕྱིར་སྒྲིབ་པ་མེད། །དེ་ཕྱིར་གཉེན་པོ་ཅི་ལ་འཚོལ། །དེ་ཡང་རང་གསལ་རིག་པ་ལ། །ཡིད་ཆེས་ངེས་པའི་དོན་ཟིན་པས། །མ་རིག་བག་ཆགས་གོས་པ་མེད། །ད་ཡང་རྡོ་རྗེ་སེམས་དཔའ་ཉོན། །ཆོས་ཉིད་གཞི་ལ་དངོས་མེད་པས། །དེ་ཕྱིར་དོན་ཤེས་སྒྲིབ་པ་མེད། །ད་ལྟའི་ཤེས་པ་འདི་ཉིད་ལ། །ལུང་ལྡན་ངེས་ཤེས་གདེང་ལྡན་ཕྱིར། །ཉི་ཤར་མུན་སྒྲིབ་མེད་པ་འདྲ། །དབྱིངས་ནི་རིག་པའི་རྩལ་ཡིན་ཕྱིར། །དོན་ནི་འཁོར་འདས་རྣམ་པར་དག །ཐིག་ནི་སྒྲིབ་པ་སྦྱང་དུ་མེད། །ལེ་ནི་ཡེ་ཤེས་ཀློང་དུ་གདལ། །ངེས་པར་རང་བྱུང་དབྱིངས་སུ་དག །དེ་ཕྱིར་ཆོས་སྐུ་འདི་ཤེས་པས། །སངས་རྒྱས་ཐམས་ཅད་དུས་འདིར་འགྲུབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དབྱིངས་རྣམ་པར་དག་པའི་ཐིག་ལེ་བསྟན་པའི་ལེའུ་སྟེ། བརྒྱ་དང་ཉེར་དྲུག་པའོ།། །།དེ་ནས་ཀུན་རིག་ཆོས་རྗེ་ཡིས། །དད་ལྡན་འདུས་པའི་འཁོར་རྣམས་ ― DNG002_Page_0153 ―
[མ་དཔེ་གཟིགས་ན་འདིར་གནོན།]
ལ། །ཡེ་ཤེས་ཐིག་ལེ་བཀའ་སྩལ་པ། །ཆོས་ཉིད་རིག་པའི་རྣལ་འབྱོར་ལ། །མ་བསྒྲིབས་འོད་གསལ་ཡེ་ཤེས་དེ། །ལུང་ལྡན་དོན་བསྟན་ཡེ་ཤེས་པས། །ཡེ་ཤེས་ཆེན་པོ་ཐིག་ལེ་བྱ། །ད་ཡང་འདུས་པའི་སྙིང་པོ་ཉོན། །ཆོས་སྐུ་བྱང་ཆུབ་སེམས་སུ་གཅིག །དེ་ཕྱིར་ཡེ་ནས་བྱང་ཆུབ་སྐུ། །དེ་རྟོགས་མ་རིག་མེད་པའི་ཕྱིར། །ཤེས་པ་འཁྲུལ་པ་གཏིང་ནས་དག །དེ་ཕྱིར་རང་བཞིན་འོད་གསལ་བ། །འཁོར་བའི་སྐྱོན་མེད་ཆོས་སྐུ་ཉིད། །དེ་ལ་སྒྲིབ་མེད་རང་བྱུང་ཐུགས། །དུས་གསུམ་མི་འགྱུར་ནམ་མཁའ་འདྲ། །ད་ཡང་རྡོ་རྗེ་སེམས་དཔའ་ཉོན། །ཆོས་སྐུ་རིག་པར་རྟོགས་པར་བྱེད། །དེ་ཕྱིར་རིག་པ་ཆོས་སྐུའི་རྒྱུ། །དེ་ཤེས་མ་བསྒྲིབས་འོད་གསལ་ཕྱིར། །རིག་པ་སང་ངེ་གདེང་གིས་ཟིན། །ཡེ་ཤེས་ཆེན་པོ་རྒྱུན་མི་འཆད། །དབང་པོས་མ་མཐོང་རིག་པས་མཐོང་། །དེ་མཐོང་ཡེ་ཤེས་ཆོས་ཀྱི་སྐུ། །ཐམས་ཅད་མཁྱེན་པས་ཡེ་ཤེས་སྤྱན། །འཕེལ་འགྲིབ་མེད་པར་གཉུག་མར་གནས། །རབ་ཏུ་དགའ་བའི་བདེན་མཐོང་དང་། །རྣལ་འབྱོར་ངེས་ལུང་ལྡན་པ་གཉིས། །ཁྱད་མེད་འཁོར་བར་མི་ལྡོག་ངེས། །དེ་ཕྱིར་གདམས་ངག་རྩིས་སུ་ཆེ། །ཡེ་ནི་གནས་ལུགས་མ་བཅོས་པ། །ཤེས་ནི་དོན་ལྡན་ཡིད་ཆེས་འབྱུང་། །ཐིག་ནི་ཐམས་ཅད་སྐྱོན་དང་བྲལ། །ལེ་ནི་ཉོན་མོངས་རྣམ་པར་དག །དེ་ཕྱིར་ཡེ་ཤེས་ཐིག་ལེ་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་ཆེན་པོ་ཐིག་ལེ་ཉག་གཅིག་བསྟན་པའི་ལེའུ་སྟེ། བརྒྱ་དང་ཉེར་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ཀུན་བཟང་ཐིག་ལེ་བཀའ་སྩལ་པ། །འཁོར་འདས་མ་འགགས་ཆོས་སྐུ་ལ། །ཕྱི་ནང་རོལ་པ་ཅིར་སྣང་ཡང་། །མཐའ་དང་དབུས་མེད་ཡངས་པ་ལ། །ཀུན་ཏུ་བཟང་པོའི་ཐིག་ལེ་བྱ། །ད་ཡང་འདུས་པའི་སྙིང་པོ་ཉོན། །ངོ་བོ་ཉིད་ཀྱི་སྐུ་ཤེས་པས། །མི་ལེན་མི་སྤང་ཡེ་མཉམ་ཕྱིར། །རེ་དོགས་མེད་པས་རང་བྱུང་སྐུ། །དེ་ཕྱིར་ཀུན་བཟང་ ― DNG002_Page_0154 ―
[མ་དཔེ་གཟིགས་ན་འདིར་གནོན།]
གདལ་བ་ལ། །གང་ཡང་མི་འགག་རོལ་པར་ཤར། །སྲོག་གཅོད་མ་བྱིན་ལེན་པ་དང་། །མི་ཚངས་སྤྱོད་དང་རྫུན་དུ་སྨྲ། །མཚམས་མེད་ལ་སོགས་སྡིག་བྱས་ཀྱང་། །ཉེས་པར་མི་འགྱུར་དཔལ་དུ་ཆེ། །སྟོང་གསུམ་མ་ལུས་ཚིག་གྱུར་ཀྱང་། །ནམ་མཁའ་མེ་ཆུས་མི་ཚུགས་འདྲ། །ད་ཡང་རྡོ་རྗེ་སེམས་དཔའ་ཉོན། །ཀུན་ནི་འཁོར་འདས་ཆོས་རྣམས་ལ། །བཟང་ནི་ཡེ་ཤེས་ཆོས་སྐུར་འཆར། །པོ་ནི་རོལ་པ་སྣ་ཚོགས་འབྱུང་། །ཐིག་ནི་རང་བྱུང་ཀུན་གྱི་གཞི། །ལེ་ནི་སེམས་ཅན་སངས་རྒྱས་གཞི། །དེ་ཕྱིར་ཀུན་བཟང་ཐིག་ལེ་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཀུན་ཏུ་བཟང་པོའི་ཐིག་ལེ་བསྟན་པའི་ལེའུ་སྟེ། བརྒྱ་དང་ཉེར་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ལྷུན་གྲུབ་ཐིག་ལེ་བཀའ་སྩལ་པ། །ཡེ་ནས་གནས་པའི་ཆོས་ཉིད་ལ། །ལས་ཀྱི་རྒྱུ་འབྲས་གང་རུང་ཀུན། །རག་མ་ལུས་ཕྱིར་འདུས་མ་བྱས། །དེ་ཕྱིར་ཆོས་ཀྱི་སྙིང་པོར་གནས། །ད་ཡང་འདུས་པའི་སྙིང་པོ་ཉོན། །ཡེ་ཤེས་ལྷུན་གྲུབ་ཆེན་པོ་ལ། །རྒྱུ་རྐྱེན་མེད་ཕྱིར་རང་བྱུང་སྐུ། །དེ་ལས་ཀུན་འབྱུང་ལྷུན་གྱིས་གྲུབ། །ཆོས་ཀུན་སྤྲོས་པ་སྣ་ཚོགས་ཀྱང་། །དེ་ཙམ་ཉིད་ན་དངོས་པོ་མེད། །ཡོད་མེད་འབྲས་བུ་ཡུལ་ལས་འདས། །དེ་དོན་རྟོག་མེད་རིག་པ་གསལ། །གང་ཡང་མི་འགལ་དོན་ཤེས་ཕྱིར། །ཆོས་སྐུ་ཡེ་ནས་ལྷུན་གྱིས་གྲུབ། །ཆོས་སྐུ་ཅི་སྣང་འཛིན་མ་གྲུབ། །དེ་ཕྱིར་རྣམ་པ་གང་ལ་ཡང་། །ཞེན་པའི་འཛིན་པ་མེད་པར་གནས། །དེ་ཕྱིར་ལྷུན་གྲུབ་ཡེ་ཤེས་ཀློང་། །ད་ཡང་འདུས་པའི་སྙིང་པོ་ཉོན། །རང་བྱུང་ཡེ་ཤེས་གདལ་ཁྱབ་ལ། །ཀུན་ཀྱང་ཡིན་ཕྱིར་གང་ཡང་མེད། །དེ་ཕྱིར་འཁོར་འདས་གཉིས་མེད་ངང་། །ལྷུན་ནི་རྩ་བ་བྱང་ཆུབ་སེམས། །གྲུབ་ནི་སྐུ་དང་ཡེ་ཤེས་འབྱུང་། །པ་ནི་རང་བྱུང་རིག་པ་གསལ། །ཐིག་ནི་འཁོར་འདས་གཞི་ལ་མེད། །ལེ་ནི་ཐམས་ཅད་ཆོས་ཀྱི་ཀློང་། །དེ་ཕྱིར་ལྷུན་གྲུབ་ཐིག་ལེ་བྱ། །རྫོགས་ ― DNG002_Page_0155 ―
[མ་དཔེ་གཟིགས་ན་འདིར་གནོན།]
པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྷུན་གྱིས་གྲུབ་པའི་ཐིག་ལེ་བསྟན་པའི་ལེའུ་སྟེ། བརྒྱ་དང་ཉེར་དགུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །ལ་བཟླའི་ཐིག་ལེ་བཀའ་སྩལ་པ། །རང་གི་རིག་པ་ཆོས་སྐུ་ལ། །སྒྲ་མཐུན་དོན་དཔག་གཏན་ཚིགས་ཀྱིས། །དོན་གྱི་ངོ་བོ་གཉིས་སུ་འདུས། །ལ་བཟླ་གཅིག་གི་ངང་དུ་རྫོགས། །ད་ཡང་རྡོ་རྗེ་སེམས་དཔའ་ཉོན། །བརྟགས་པའི་ཐིག་ལེ་ལ་བཟླ་ན། །ངོ་བོ་སྣང་ལ་རང་བཞིན་མེད། །དཔེ་ནི་ཉི་མའི་འོད་བརྡལ་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་དངོས་པོ་ཡུལ་དང་བྲལ། །ལེ་ནི་ཐམས་ཅད་རྒྱལ་བའི་ཞིང་། །འགྲོ་ས་ཐིག་ལེ་སྤྱི་ཡི་རྩལ། །གཞི་ཡི་ཐིག་ལེ་ལ་བཟླ་ན། །ངོ་བོ་རང་བཞིན་ཆོས་ཀྱི་སྐུ། །དཔེ་ནི་དུག་ཉིད་སྨན་གྱི་ངང་། །གཏན་ཚིགས་ངེས་པ་གང་ཡིན་པ། །ཐིག་ནི་ཐམས་ཅད་མཁྱེན་པའི་སྐུ། །ལེ་ནི་འགྲོ་དྲུག་ཡོངས་ལ་ཁྱབ། །ཡེ་ཤེས་ཀུན་གྱི་རྩ་བའོ། །སྤྱི་ཡི་རྫོགས་ཆེན་ལ་བཟླ་ན། །ངོ་བོ་སྐུ་གསུང་ཐུགས་ཀྱི་རྒྱུད། །དཔེ་ནི་ནོར་བུ་རིན་ཆེན་འདྲ། །གཏན་ཚིགས་ངེས་པ་གང་ཡིན་པ། །ཐིག་ནི་མ་ནོར་དྲང་བའི་ལམ། །ལེ་ནི་གདལ་བ་ཆེན་པོའི་ངང་། །འགྲོ་ས་ཐིག་ལེ་ཉག་གཅིག་རྩལ། །ཡང་ཏི་རྫོགས་ཆེན་ལ་བཟླ་ན། །འཁོར་འདས་མ་རིག་རང་བྱུང་གཞི། །ངོ་བོ་ཐིག་ལེ་ཉག་གཅིག་ཉིད། །དཔེ་ནི་ཉི་མའི་སྙིང་པོ་འདི། །གཏན་ཚིགས་ངེས་པ་གང་ཡིན་པ། །ཐིག་ནི་བག་ཆགས་སྐྱོན་དང་བྲལ། །ལེ་ནི་ཉོན་མོངས་རྣམ་པར་དག །འགྲོ་བ་ཀུན་ལ་སངས་རྒྱས་ཉིད། །དེ་ཡང་འདུས་པའི་སྙིང་པོ་ཉོན། །ཕྱི་ནང་མེད་པར་ཐིག་ལེ་ལ། །འཁོར་འདས་མེད་པར་ཉག་མ་གཅིག །སྣང་སྟོང་མེད་པར་ཕྲ་ལ་ཟབ། །ཐམས་ཅད་ཐིག་ལེར་སངས་རྒྱས་པས། །སྟེང་འོག་མཐའ་དབུས་མེད་པ་དང་། །ཕྱི་ནང་འཁོར་འདས་མེད་པ་དང་། །ཐམས་ཅད་ཐིག་ལེ་ཆེན་པོ་ལས། །གཞན་གྱི་ཆོས་ནི་རྡུལ་ཙམ་མེད། །དེ་ཡང་འདུས་པའི་སྙིང་པོ་ཉོན། །ང་ལ་སྐུ་གསུང་ཐུགས་ཉིད་ཚང་། །ཡེ་སངས་ ― DNG002_Page_0156 ―
[མ་དཔེ་གཟིགས་ན་འདིར་གནོན།]
རྒྱས་པའི་རང་བཞིན་ལ། །ཡོན་ཏན་ནམ་མཁའི་མཐའ་དང་མཉམ། །གཞལ་ཡས་ཆོས་ཀྱི་ཀློང་དང་མཉམ། །རྫོགས་ནི་ལྷག་མ་མེད་པར་རྫོགས། །འཁོར་ནི་དུས་གསུམ་རྒྱལ་བར་ལྡན། །ཐམས་ཅད་ཀུན་ཏུ་བཟང་པོ་ཡིས། །སྐད་ཅིག་རྟོགས་པས་མངོན་སངས་རྒྱས། །རྟོགས་ཐབས་བཞི་ནི་བསྟན་པར་ཟད། །དེ་ལས་མང་དུ་དབྱེ་བ་ནི། །ཐིག་ལེ་མ་ཡིན་འཆལ་ཚིག་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐིག་ལེ་ཉག་གཅིག་ལ་བཟླ་བ་བསྟན་པའི་ལེའུ་སྟེ། བརྒྱ་དང་སུམ་ཅུ་པའོ།། །།དེ་ནས་འདུས་པའི་འཁོར་རྣམས་ལ། །ས་ལམ་གཞི་རུ་རྫོགས་པའི་དོན། །ཀུན་རིག་རྒྱལ་པོས་བཀའ་སྩལ་པ། །མེད་ལ་ཡོད་འཛིན་འཁྲུལ་པའི་བློ། །འཁྲུལ་པ་བཟློག་ཕྱིར་འཇིག་ཚོགས་ཏེ། །རང་གིས་རང་བསླུས་ཞེན་པའི་རྒྱུ། །དེ་བཟློག་དོན་ཕྱིར་ལམ་ལྔ་གསུངས། །དེ་ནས་རྡོ་རྗེ་སེམས་དཔའ་ཉོན། །དད་ལྡན་ལས་ཅན་འགྱུར་མེད་ཀྱི། །ལུང་ལྡན་རྡོ་རྗེ་སློབ་དཔོན་ལ། །ཡིད་འཐད་ཕངས་མེད་འབུལ་བ་ནི། །ཚོགས་ཀྱི་ལམ་དུ་བསྟན་པ་ཡིན། །ལུང་ལྡན་རྡོ་རྗེ་སློབ་དཔོན་ལ། །ཡིད་གཉིས་ཐེ་ཚོམ་བློ་སྤངས་ནས། །མཁའ་འགྲོ་མཆོད་ཅིང་དོན་ཞུས་ན། །སྦྱོར་བའི་ལམ་ཞེས་དེ་ལ་བྱ། །ད་ཡང་འདུས་པའི་སྙིང་པོ་ཉོན། །ངེས་པའི་བཅུད་ལྡན་སློབ་དཔོན་གྱིས། །ཡང་དག་གདམས་ངག་ལུང་བསྟན་པས། །སྣོད་ལྡན་ཡིད་ཆེས་ངེས་པར་རྟོགས། །མཐོང་བའི་ལམ་ནི་ཡིན་པར་གསུངས། །དོན་དེ་གོ་ན་རྒྱུན་དུ་ནི། །ངེས་དོན་ཆོས་སྐུ་ཡེངས་པ་མེད། །རང་རིག་ཡེ་ཤེས་དབང་ཐོབ་ཕྱིར། །བསྒོམ་པའི་ལམ་དུ་བསྟན་པ་ཡིན། །ཡང་དག་ངེས་དོན་གསང་བ་འདི། །རང་གི་ཐུགས་ལ་དོན་གོ་ན། །འགྱུར་མེད་གདེང་ཆུད་ཡེ་ཤེས་ཀློང་། །མཐར་ཕྱིན་ལམ་དུ་བཤད་པ་ཡིན། །དེ་ཡང་འདུས་པའི་སྙིང་པོ་ཉོན། །ཡང་དག་དོན་གྱི་ཆོས་ཉིད་ལ། །ལམ་གྱི་དབྱེ་བ་མེད་མོད་ཀྱང་། །རྣལ་འབྱོར་བློ་ཡི་རིམ་པ་ལས། །ཐེག་པའི་བྱེ་བྲག་ཐ་དད་པས། །ལམ་ལྔར་ཕྱེ་བ་གཅིག་ཏུ་རྫོགས། །རྫོགས་པ་ཆེན་པོ་ངེས་དོན་ཐམས་ ― DNG002_Page_0157 ―
[མ་དཔེ་གཟིགས་ན་འདིར་གནོན།]
ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལམ་ལྔ་རྫོགས་པར་བསྟན་པའི་ལེའུ་སྟེ། བརྒྱ་དང་སོ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །མ་ཡི་དབྱེ་བ་དཔེ་དང་ནི། །རྩལ་གྱི་སྒོ་ནས་བཞི་བཞི་རུ། །ཕ་རོལ་ཕྱིན་བཅུ་ས་དང་སྦྱར། །ངེས་པའི་ཡོན་ཏན་རྫོགས་པར་གསུངས། །ད་ཡང་རྡོ་རྗེ་སེམས་དཔའ་ཉོན། །ས་ནི་དང་པོ་རབ་དགའ་བ། །རྟེན་ནི་སྦྱིན་པའི་ཕ་རོལ་ཕྱིན། །དཔེ་ནི་མི་ཟད་གཏེར་དང་འདྲ། །རྩལ་ནི་མ་རིག་ཟིལ་གྱིས་གནོན། །ས་ནི་གཉིས་པ་དྲི་མེད་པའི། །རྟེན་ནི་ཚུལ་ཁྲིམས་ཕ་རོལ་ཕྱིན། །དཔེ་ནི་རིན་ཆེན་མྱུ་གུ་འདྲ། །རྩལ་ནི་རང་རིག་ཡེ་ཤེས་གསལ། །ད་ཡང་འདུས་པའི་སྙིང་པོ་ཉོན། །ས་ནི་གསུམ་པ་རིན་ཆེན་འཕྲོ། །རྟེན་ནི་བཟོད་པའི་ཕ་རོལ་ཕྱིན། །དཔེ་ནི་རྒྱ་མཚོ་ཆེན་པོ་འདྲ། །རྩལ་ནི་ཉོན་མོངས་རྩད་ནས་དག །ས་ནི་བཞི་པ་འོད་བྱེད་པ། །རྟེན་ནི་བརྩོན་འགྲུས་ཕ་རོལ་ཕྱིན། །དཔེ་ནི་རྡོ་རྗེ་ཕ་ལམ་འདྲ། །རྩལ་ནི་བག་ཆགས་ཞེན་པ་རྫོགས། །ས་ནི་ལྔ་པ་སྦྱང་དཀའ་བ། །རྟེན་ནི་བསམ་གཏན་ཕ་རོལ་ཕྱིན། །དཔེ་ནི་རི་བོ་ལྷུན་པོ་འདྲ། །རྩལ་ནི་བྱིང་རྒོད་སྐྱོན་དང་བྲལ། །ས་ནི་དྲུག་པ་མངོན་གྱུར་པ། །རྟེན་ནི་ཤེས་རབ་ཕ་རོལ་ཕྱིན། །དཔེ་ནི་མ་གིའི་སྨན་དང་འདྲ། །རྩལ་ནི་རང་རིག་ལྷག་མཐོང་རྟོགས། །ད་ཡང་རྡོ་རྗེ་སེམས་དཔའ་ཉོན། །ས་ནི་བདུན་པ་རིང་སོང་ལ། །རྟེན་ནི་ཐབས་ཀྱི་ཕ་རོལ་ཕྱིན། །དཔེ་ནི་དགེ་བའི་བཤེས་གཉེན་འདྲ། །རྩལ་ནི་དུག་ལྔ་སྨན་དུ་སྒྱུར། །ས་ནི་བརྒྱད་པ་མི་གཡོ་བ། །རྟེན་ནི་སྨོན་ལམ་ཕ་རོལ་ཕྱིན། །དཔེ་ནི་ཡིད་བཞིན་ནོར་བུ་འདྲ། །རྩལ་ནི་འཇིག་རྟེན་ཆོས་བརྒྱད་བྲལ། །ས་ནི་དགུ་པ་ལེགས་པའི་ས། །རྟེན་ནི་སྟོབས་ཀྱི་ཕ་རོལ་ཕྱིན། །དཔེ་ནི་ཉི་མའི་སྙིང་པོ་འདྲ། །རྩལ་ནི་ལོག་ལྟ་དབྱིངས་སུ་བསྒྲལ། །ས་ནི་བཅུ་པ་ཆོས་ཀྱི་སྤྲིན། །རྟེན་ནི་ཡེ་ཤེས་ཕ་རོལ་ཕྱིན། །དཔེ་ནི་ཚངས་པའི་དབྱངས་དང་འདྲ། །རྩལ་ནི་སྒྲིབ་དག་ཐམས་ཅད་མཁྱེན། །དེ་ཡང་འདུས་པའི་སྙིང་པོ་ཉོན། །དེ་དག་ཕ་རོལ་ཕྱིན་བཅུ་ལ། །ངོ་བོ་ཐིག་ལེ་གཅིག་ཏུ་ ― DNG002_Page_0158 ―
[མ་དཔེ་གཟིགས་ན་འདིར་གནོན།]
འདུས། །གདུལ་བྱར་རིམ་པ་བཅུ་བསྟན་པ། །ཡང་དག་ཡེ་ཤེས་ངོ་བོ་ཉིད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ས་དང་ཕ་རོལ་ཕྱིན་པའི་ཡོན་ཏན་བསྟན་པའི་ལེའུ་སྟེ། བརྒྱ་དང་སོ་གཉིས་པའོ། །སྡོམ་དུ་བསྡུས་ཏེ་བསྟན་པ་ཉེར་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །བདེན་པ་ཉིད་ཀྱིས་འདི་སྐད་གསོལ། །ངེས་པ་བདུན་གྱིས་ཉམས་བླང་བའི། །ལྟ་བ་བསྒོམ་པ་སྤྱོད་པ་དང་། །དམ་ཚིག་ཕྲིན་ལས་འབྲས་བུ་དང་། །རང་གཞན་ཉམས་སུ་བླང་བའི་ཐབས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་རྒྱལ་པོས་བཀའ་སྩལ་པ། །གཞི་ངེས་ལྟ་བ་ཉམས་བླངས་པ། །སངས་རྒྱས་པ་ཡི་ཆོས་སྐུ་ལ། །འཁོར་འདས་མེད་པར་རིག་པའི་ཀློང་། །གཞི་ལ་འགྱུར་མེད་ལྟ་བའི་གདེང་། །ཡུལ་ལ་མི་ལྟོས་རང་བྱུང་སྐུ། །ཡེ་ཤེས་ནམ་མཁའ་དང་མཉམ་པའི། །དོན་ལ་འགྱུར་མེད་ནམ་མཁའ་འདྲ། །སྐྱོན་གྱིས་མ་གོས་ལྟ་བའི་གཟུངས། །འགྱུར་མེད་ཆོས་ཉིད་གདལ་བའི་ཀློང་། །ད་ཡང་རྡོ་རྗེ་སེམས་དཔའ་ཉོན། །མི་སྐྱེ་མི་འགག་ལྟ་བ་ལ། །སྒོམ་པས་མ་རྙེད་རྟོགས་པས་ཆོག །འབྲལ་མེད་ད་ལྟར་ཀུན་བཟང་ཐུགས། །དུས་དང་རྣམ་པ་ཐམས་ཅད་དུ། །སྐྱེ་འཆི་མེད་པར་ལྟ་བའི་མཆོག །དོན་དུ་ཡེ་ཤེས་མཐར་ཕྱིན་ལམ། །རེ་དོགས་མེད་ཕྱིར་ལྟུང་མི་སྲིད། །གདོད་ནས་འགྱུར་མེད་སྙིང་པོ་གཞི། །དེ་ཉིད་རང་རིག་ཆོས་སྐུ་ལ། །རང་རིག་རང་བལྟས་ངོ་མཚར་ཆེ། །དེ་ཕྱིར་ཆོས་སྐུ་སངས་རྒྱས་ཐུགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གཞི་ངེས་པའི་བལྟ་བ་ཉམས་སུ་བླང་བ་བསྟན་པའི་ལེའུ་སྟེ། བརྒྱ་དང་སོ་གསུམ་པའོ།། །།དེ་ནས་ཀུན་རིག་སྟོན་པ་ཡིས། །དོན་དང་མི་འབྲལ་ཏིང་འཛིན་ནི། །འདུས་པའི་འཁོར་ལ་བཀའ་སྩལ་པ། ། ― DNG002_Page_0159 ―
[མ་དཔེ་གཟིགས་ན་འདིར་གནོན།]
ཆོས་ཉིད་མི་འགྱུར་ཡེ་ཤེས་ཀློང་། །མ་བཅོས་ཡེ་ནས་གནས་པ་ཡི། །རྒྱུ་རྐྱེན་མ་བསྐྱེད་རང་བྱུང་སྐུ། །དངོས་མེད་རང་གསལ་འབྲས་བུ་ལ། །རྐྱེན་བྲལ་གཉེན་པོས་གཞིག་ཏུ་མེད། །བསམ་དུ་མེད་པ་བསྒོམ་མི་དགོས། །ད་ཡང་འདུས་པའི་སྙིང་པོ་ཉོན། །དབྱིངས་དང་བྲལ་བ་བྱང་ཆུབ་སེམས། །ཁ་དོག་མེད་པས་མཚོན་དུ་མེད། །སེམས་ཀྱི་ཡུལ་ལས་འདས་པ་འདི། །སྐྱེ་འཆི་མེད་པས་འགྱུར་བ་མེད། །རྟག་པ་མེད་པས་འཁོར་བ་བྲལ། །མཐོ་དམན་མེད་པས་ཀུན་གྱི་རྩེ། །ཆེ་ཆུང་མེད་པས་དམིགས་པ་བྲལ། །ཀུན་གཞི་མེད་པས་ཆོས་སྐུའི་ཀློང་། །ཡངས་དོག་མེད་པས་བཟང་མོའི་མཁའ། །མཐའ་དབུས་མེད་པས་ཀུན་ལ་ཁྱབ། །ཡེ་ཤེས་ཟང་ཐལ་ཕྱི་ནང་མེད། །མཚོན་དུ་མེད་པས་ཚད་དང་བྲལ། །ད་ཡང་འདུས་པའི་སྙིང་པོ་ཉོན། །སྣང་བ་མེད་ཕྱིར་ཆོས་ཉིད་ནི། །མ་བཅོས་ཡེ་ནས་ངང་གིས་གནས། །རྩོལ་བསྒྲུབ་ཅིས་ཀྱང་བཙལ་དུ་མེད། །རྟོགས་པ་དགོས་པའི་ཉམས་བླངས་པས། །མ་བཅོས་ཆོས་སྐུ་དག་པའི་ཀློང་། །འབྲས་བུ་སངས་རྒྱས་དེ་ཉིད་ཀློང་། །ད་ཡང་འདུས་པའི་སྙིང་པོ་ཉོན། །གདོད་ནས་འགྱུར་མེད་ཏིང་ངེ་འཛིན། །རང་བྱུང་རིག་པའི་ཡེ་ཤེས་ཀྱིས། །མ་བཅོས་རང་གསལ་རང་བཞག་པས། །ཉམས་སུ་བླངས་པའི་དགོས་པ་སྟེ། །དེ་ལ་རྣལ་འབྱོར་གང་གནས་པ། །ད་ལྟ་ཉིད་དུ་སངས་རྒྱས་ཐུགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དོན་དམ་འབྲལ་མེད་ཀྱི་དགོངས་པ་ཉམས་སུ་བླང་བར་བསྟན་པའི་ལེའུ་སྟེ། བརྒྱ་དང་སོ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སེམས་ཅན་དུས་ན་གསང་སྤྱོད་ནི། །གང་ཡང་མ་བཅོས་དེ་བཞིན་ཉིད། །ཆོས་སྐུར་རྟོགས་ནས་འགྲོ་དོན་དུ། །ཅིར་ཡང་སྣང་བ་སྤྲུལ་པའི་སྐུ། །མཛད་པ་བཅུ་གཉིས་མཐར་ཕྱིན་པ། །ཐུགས་རྗེ་སྤྲུལ་པ་ཀུན་འདུས་ཀྱང་། །ཆེད་དུ་བྱ་བའི་རློམ་སེམས་མེད། །ད་ཡང་འདུས་པའི་སྙིང་པོ་ཉོན། །སངས་རྒྱས་མཛད་སྤྱོད་གང་ཡིན་པ། །སེམས་ཅན་དུས་ན་སྤྱོད་པ་ ― DNG002_Page_0160 ―
[མ་དཔེ་གཟིགས་ན་འདིར་གནོན།]
ཡིས། །ཡེ་ཤེས་རང་བྱུང་ཐུགས་གནས་པ། །ད་ལྟ་ལུས་ངག་ཡིད་བླངས་པས། །སངས་རྒྱས་ཡེ་ཤེས་ད་ལྟའི་སེམས། །དེ་ལས་གཞན་དུ་སྤྱོད་དུ་མེད། །རིག་པ་ཆོས་སྐུར་དྲན་པ་ལ། །ཡེ་ཤེས་ལྷག་མཐོང་ཤར་ཞེས་བྱ། །ད་ཡང་རྡོ་རྗེ་སེམས་དཔའ་ཉོན། །ཆོས་ཉིད་འདི་ལས་མ་གཡོས་པས། །ལུས་ངག་ཡིད་གསུམ་ཅི་སྤྱོད་པ། །སངས་རྒྱས་མཛད་སྤྱོད་ཡིན་པར་གསུངས། །དེ་ཕྱིར་གང་དུ་ཅི་ལ་ཡང་། །མ་ཆགས་ཞེན་མེད་ཤུགས་ལས་འབྱུང་། །རིག་སྤྱོད་ལྡན་པས་མ་བརྗེད་པ། །ཆོས་རྣམས་ཀུན་གྱི་རྩ་བར་བཤད། །དེ་ཕྱིར་ཉམས་དང་འདྲེ་ལྡན་ན། །ཡེ་ཤེས་སྤྱོད་པའི་མཆོག་ཡིན་ནོ། །ད་ཡང་འདུས་པའི་སྙིང་པོ་ཉོན། །བདག་གཞན་རྟོག་པ་མེད་པའི་ཕྱིར། །གཉིས་མེད་དོན་ཚིག་ཆོས་ཀྱི་སྐུ། །མཐུན་འཇུག་སྤྱོད་པ་རྒྱ་མཚོར་ནི། །སྤྱོད་པ་སྣ་ཚོགས་ཅི་བདེར་སྤྱོད། །པདྨ་སྐྱེ་ས་འདམ་ཡིན་ཏེ། །དེ་ལ་སྐྱོན་གྱིས་གོས་པ་མེད། །ཆོས་ཉིད་བླང་དོར་མེད་པར་རྟོགས། །ཏིང་འཛིན་ཉམས་པ་རྡུལ་ཙམ་མེད། །ཐུན་མོང་མ་ཡིན་རྣལ་འབྱོར་པས། །འཆིང་གྲོལ་མེད་ཕྱིར་གོལ་ས་ཆོད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྱོད་པ་བླང་དོར་མེད་པར་བསྟན་པའི་ལེའུ་སྟེ་བརྒྱ་དང་སོ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཀུན་བཟང་གིས། །དམ་ཚིག་བསྲུང་ཉམ་མེད་པ་ནི། །ངེས་པའི་དོན་དུ་བཀའ་སྩལ་པ། །གདེང་ལྡན་ངེས་པའི་ཡེ་ཤེས་ཀྱིས། །བསྲུང་དུ་མེད་པའི་དམ་ཚིག་སྟེ། །ཡེ་བསྲུང་ཆེན་པོའི་ངང་དུ་བསྡམ། །སྡོམ་པ་ཕྱི་ནང་དམ་ཚིག་ཀྱང་། །གདུལ་བྱ་ཇི་ལྟར་འདོད་པ་འཕྲུལ། །ཐ་སྙད་ཙམ་དུ་གདུལ་མོད་ཀྱང་། །དམ་དུ་བཅས་པ་རྡུལ་ཙམ་མེད། །ཆོས་སྐུ་ཐུགས་ཀྱི་དམ་ཚིག་སྟེ། །དེ་ཡི་ངང་དུ་མི་འབྲལ་ན། །ཡེ་བསྲུངས་ཆེན་པོའི་གདེང་ལྡན་ཡིན། །དམ་དུ་བཅའ་བའི་སྐྱོན་མེད་ཕྱིར། །དངོས་པོ་མེད་པས་ནམ་མཁའ་འདྲ། །ད་ཡང་རྡོ་རྗེ་སེམས་ ― DNG002_Page_0161 ―
[མ་དཔེ་གཟིགས་ན་འདིར་གནོན།]
དཔའ་ཉོན། །སྡོམ་དང་དམ་ཚིག་རྣམ་མང་བ། །སྐུ་གསུང་ཐུགས་ཀྱི་དམ་ཚིག་སྟེ། །སྐུ་ནི་ཆོས་སྐུར་མ་བྲལ་ན། །རྩ་བའི་དམ་ཚིག་བསྲུང་བ་ཡིན། །གསུང་ནི་རང་རིག་ཡེ་ཤེས་ཏེ། །མི་བརྗེད་དོན་ལ་མ་ཡེངས་ན། །རང་བྱུང་རིག་པའི་ཐུགས་ལ་གསལ། །གསུང་གི་དམ་ཚིག་བསྲུང་བ་ཡིན། །ཐུགས་ནི་སྐྱེ་འགག་མེད་པར་གསལ། །དེ་ལས་མི་འདའ་ལྷག་མཐོང་ལ། །མི་འབྲལ་གཟུངས་ཀྱིས་ཟིན་པ་ཡིས། །ཐུགས་ཀྱི་དམ་ཚིག་བསྲུང་བ་ཡིན། །དེ་ཡང་འདུས་པའི་སྙིང་པོ་ཉོན། །དེ་དག་སྐུ་གསུང་ཐུགས་ཀྱི་ནི། །རང་བྱུང་ཆོས་སྐུ་ཉིད་དུ་འདུས། །དེ་ཕྱིར་རྩ་བ་བྱང་ཆུབ་སེམས། །ཆོས་རྣམས་ཀུན་གྱི་སྙིང་པོར་བཤད། །དེ་ཕྱིར་དམ་ཚིག་བསྲུང་ཉམས་མེད། །རྟོགས་པའི་བློ་ལ་དེ་ལྟར་སྣང་། །ད་ཡང་རྡོ་རྗེ་སེམས་དཔའ་ཉོན། །ང་ཡི་ཆོས་ཉིད་དམ་ཚིག་ནི། །མ་བཅོས་མཁའ་ལ་ཉི་ཤར་ལ། །མུན་པ་མེད་པར་གསལ་བ་ནི། །ལྷན་གྱིས་རྟོགས་ལ་བལྟ་བ་ཡིན། །རང་གི་ཤེས་པ་གཉུག་མ་ཡི། །དོན་ལ་མ་ཡེངས་ཏིང་འཛིན་ལ། །སྣང་བའི་ཡུལ་ལ་མ་ཞེན་པར། །གང་ཡང་མ་བཀག་སྤྱོད་པའི་ཡུལ། །ངེས་དོན་རྟོགས་པའི་ཆོས་ཉིད་ལས། །མི་འདའི་དམ་ཚིག་བསྲུང་བ་སྟེ། །བསྲུང་དུ་ཡོད་ལ་ཉམས་པ་མེད། །དེ་ཕྱིར་ཡེ་ཤེས་འབྲལ་མེད་པའི། །དབྱིངས་དང་རིག་པ་རང་ལ་ཤར། །སྣ་ཚོགས་བསགས་པས་ཀུན་གྱི་གཞི། །སྔ་ཕྱི་གྲུབ་པ་ག་ལ་ཡོད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དམ་ཚིག་བསྲུང་ཉམས་མེད་པར་བསྟན་པའི་ལེའུ་སྟེ། བརྒྱ་དང་སོ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཀུན་བཟང་གིས། །ཕྲིན་ལས་རྫོགས་པར་བཀའ་སྩལ་པ། །དཔེར་ན་ནོར་བུ་ཡིད་བཞིན་ལས། །དགོས་འདོད་ཐམས་ཅད་འབྱུང་བ་བཞིན། །ཡེ་ཤེས་རིག་པའི་དབང་ཐོབ་ན། །ཕྱི་ནང་དབང་རྣམས་དེ་ལ་རྫོགས། །ཕྱོགས་བཅུ་ཡེ་ཤེས་ལྷུན་གྲུབ་པས། །མི་རྟོག་ཡེ་ཤེས་གེགས་བསལ་ཕྱིར། ། ― DNG002_Page_0162 ―
[མ་དཔེ་གཟིགས་ན་འདིར་གནོན།]
གནོད་བྱེད་མཚམས་བརྟོལ་མིང་ཡང་མེད། །ཕྱི་ནང་མཚམས་བཅད་དེ་ལ་རྫོགས། །རང་བཞིན་དག་པའི་ངོ་བོ་ལ། །འཁོར་བའི་སྐྱོན་གྱིས་མི་གོས་ཕྱིར། །མ་རིག་རྣམ་རྟོག་སྒྲིབ་མེད་པས། །དོན་གྱི་བཤགས་པ་དེ་ལ་རྫོགས། །ཡེ་ནས་རང་བྱུང་ཆོས་སྐུ་ལ། །འཁོར་འདས་གཞི་ལ་མེད་པའི་ཕྱིར། །གཉིས་མེད་དོན་ལ་བློ་གཏད་ནས། །བྱིན་ཆེན་དབབ་པ་དེ་ལ་རྫོགས། །དུག་ཉིད་སྦྱོར་ཤེས་སྨན་གྱི་མཆོག །དུག་ལྔ་རང་གྲོལ་ཡེ་ཤེས་ཀྱི། །ཉོན་མོངས་བདུད་རྩི་ཆེན་པོ་ལ། །ཡེ་ཤེས་བྱིན་རླབས་དེ་ལ་རྫོགས། །ཆགས་སྡང་རྟོག་པའི་སྣང་བ་ལ། །མོས་པའི་ཏིང་འཛིན་གནས་གྱུར་པས། །འབྱུང་བ་ལྔ་ཡིས་ཀུན་ཁྱབ་ཕྱིར། །དབང་རིམ་ཕྲིན་ལས་དེ་ལ་རྫོགས། །ཕྱོགས་བཅུ་རང་བཞིན་ལྷུན་གྲུབ་པས། །རིན་ཆེན་སྣ་ལྔ་ལས་སྦྱངས་པའི། །གཞལ་ཡས་ཁང་ཆེན་དེ་ལ་རྫོགས། །རྟོག་ཚོགས་ལྷར་ནི་གནས་བསྒྱུར་བས། །འཁྲུལ་སྣང་ངེས་པར་མི་གནས་ཕྱིར། །རིག་ཚོར་དོན་གྱི་ལྷ་ཡིན་པས། །ཡེ་ཤེས་ལྷ་རྣམས་དེ་ལ་རྫོགས། །འཁོར་འདས་གཞི་ལ་མེད་པའི་ཕྱིར། །ཀུན་ཏུ་བཟང་པོའི་ངོ་བོ་ལ། །སངས་རྒྱས་སེམས་ཅན་དབྱེར་མེད་པས། །སྤྱན་དྲངས་བསྡིམ་པ་དེ་ལ་རྫོགས། །ཡེ་ནས་གནས་པའི་རང་བྱུང་དེ། །རང་ཆས་ཡོད་ཕྱིར་མ་བཙལ་བའི། །ཆོས་ཉིད་བལྟ་བ་མི་འགྱུར་བས། །བརྟན་པར་བཞུགས་པའི་ཕྲིན་ལས་རྫོགས། །གཞི་ལ་སྐྱོན་ཡོན་མེད་པའི་ཕྱིར། །རང་བྱུང་ཕྱི་ནང་མེད་པ་ལ། །བཟང་ངན་བླང་དོར་མེད་པ་ཡིས། །ཟིལ་གྱིས་མནན་པའི་འབྲས་བུ་རྫོགས། །ཡང་དག་སངས་རྒྱས་དགོངས་པ་ལ། །དབྱེར་མེད་གཅིག་ཏུ་རྟོགས་པའི་ཕྱིར། །ཐམས་ཅད་འདྲེས་པ་ཆེན་པོ་སྟེ། །ནན་ཏན་ཕྱག་རྒྱ་དེ་ལ་རྫོགས། །ད་ཡང་འདུས་པའི་སྙིང་པོ་ཉོན། །ཡེ་ཤེས་ལྷ་ཡི་ང་རྒྱལ་གྱིས། །ལུས་ངག་ཡིད་ཀྱི་རྩོལ་བ་ཀུན། །བསྒུལ་བསྐྱོད་ཐབས་དང་ཡེ་ཤེས་ལ། །ཕྱག་རྒྱའི་ཕྲིན་ལས་དེ་ལ་རྫོགས། །ལྟ་བ་ཤེས་པ་ངོ་བོ་ལ། །སྒོམ་པའི་ཐབས་ཀྱིས་རོལ་པའི་ཕྱིར། ། ― DNG002_Page_0163 ―
[མ་དཔེ་གཟིགས་ན་འདིར་གནོན།]
སེམས་དང་ཆོས་སུ་དོན་སྦྱོར་བས། །སྦྱོར་སྒྲོལ་ཕྲིན་ལས་དེ་ལ་རྫོགས། །ད་ཡང་རྡོ་རྗེ་སེམས་དཔའ་ཉོན། །ཆོས་སྐུར་རང་བྱུང་རིག་པའི་གསུང་། །གང་ལ་སྨོན་དུ་མེད་རྟོགས་པས། །ཡོན་ཏན་ཐམས་ཅད་ལྷུན་གྱིས་གྲུབ། །ཚོགས་རྣམས་སྣོད་བཅུད་ཡོད་མིན་ཕྱིར། །རང་བྱུང་ཆོས་སྐུའི་དོན་རྟོགས་པས། །མ་བརྗོད་དགོངས་པ་སྦྱོར་བྱས་པའི། །སྐུ་གསུང་ཐུགས་ཀྱི་དོན་ཚང་བས། །བཟླས་བརྗོད་འཕྲོ་འདུ་དེ་ལ་རྫོགས། །དགའ་ལྡན་ངེས་དོན་སྦྱོར་ལྡན་འདི། །སྣང་སྲིད་བདེ་ཆེན་རོལ་རྟོགས་པས། །ཚོགས་རྣམས་ཐམས་ཅད་ཡེ་ཡིན་ཕྱིར། །ཚོགས་ཀྱི་ཕྲིན་ལས་དེ་ལ་རྫོགས། །གཙོ་དང་འཁོར་དུ་མི་འབྱེད་པས། །རང་རིག་བཟང་ངན་མི་འབྱེད་ཕྱིར། །བདེན་པ་གཉིས་མེད་ངོ་བོ་ལ། །ལྷག་མའི་ཕྲིན་ལས་དེ་ལ་རྫོགས། །བྱ་བ་མེད་པའི་ལས་རྣམས་ནི། །གང་ཡང་འཛིན་མེད་རང་གསལ་བའི། །མི་བཟུང་ཡེ་ཤེས་ཆེན་པོ་ལ། །མནན་པའི་ཕྲིན་ལས་དེ་ལ་རྫོགས། །འཁོར་བ་མྱ་ངན་འདས་པའི་ཆོས། །ཡེ་ནས་རང་བྱུང་རང་གསལ་ལ། །ཐིག་ལེ་ཉག་གཅིག་འདུས་པའི་དོན། །དཀྱིལ་འཁོར་ཕྲིན་ལས་དེ་ལ་རྫོགས། །རང་བཞིན་མི་ཤིགས་རྡོ་རྗེ་ཡིས། །ལུས་ངག་ལྷར་ནི་དོན་གསལ་བས། །ཡེ་ཤེས་ལྷུན་གྲུབ་གོ་བའི་ཕྱིར། །རང་ལུས་བསྲུང་བའི་ཕྲིན་ལས་རྫོགས། །མ་རིག་རྐྱེན་བཞི་མེད་པའི་ཕྱིར། །གཉིས་མེད་དོན་དུ་སངས་རྒྱས་པས། །མི་རྟོག་དོན་དུ་ངེས་པའི་ཕྱིར། །དགེ་རྩ་བསྔོ་བའི་ཕྲིན་ལས་རྫོགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མཛད་པའི་ཕྲིན་ལས་ཉམས་སུ་བླང་བར་བསྟན་པའི་ལེའུ་སྟེ་བརྒྱ་དང་སོ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ངོ་བོ་རང་བཞིན་ངེས་པའི་དོན། །གང་ཡང་རུང་བ་ཅི་ལ་ཡང་། །དངོས་པོ་མེད་ཕྱིར་རྟག་ཏུ་མེད། །མེད་པ་ལ་ནི་ཡོད་རྟོག་པ། །འཁྲུལ་པ་རྣམས་ཀྱིས་ཤེས་པ་ལས། །དམ་པ་ཀུན་གྱིས་མི་མཁྱེན་ནོ། །ད་ཡང་རྡོ་རྗེ་སེམས་དཔའ་ཉོན། ། ― DNG002_Page_0164 ―
[མ་དཔེ་གཟིགས་ན་འདིར་གནོན།]
ནམ་མཁའ་དངོས་མེད་སེམས་དང་བྲལ། །དེ་བཞིན་རང་བྱུང་ངོ་བོ་ཉིད། །ཁ་དོག་དབྱིབས་མེད་སེམས་ལས་འདས། །དེ་ཕྱིར་རང་བཞིན་རྟོགས་པར་དཀའ། །ཆོས་སྐུ་སྐྱེ་མེད་རིག་པའི་སྐུ། །ཡིད་ཀྱི་ལུས་སུ་བསམ་དུ་མེད། །གང་ཡང་མ་བསམས་རིག་པ་དེ། །གང་ཡང་ཀུན་ལྡན་རང་བྱུང་སྐུ། །དེ་ཡང་འདུས་པའི་སྙིང་པོ་ཉོན། །དེ་ལ་ལས་དང་རྐྱེན་མི་ཚུགས། །དེ་ཕྱིར་རང་བཞིན་ཇི་བཞིན་ལ། །བཅོས་པ་མེད་ཕྱིར་རང་ལུས་ཆོས། །འདུས་མ་བྱས་པ་ནམ་མཁའ་འདྲ། །ཆོས་ཉིད་རང་བཞིན་དམིགས་པ་མེད། །དེ་དོན་རང་བྱུང་རིག་པ་དེས། །སེམས་ཀྱི་ཀུན་གཞི་རྩད་ནས་བརླག །བག་ཆགས་ཀུན་གཞི་སྤྲིན་ལྟར་དེངས། །ལུས་ཀྱི་ཀུན་གཞི་ལེན་མི་སྲིད། །དེ་ཕྱིར་རང་བྱུང་རྟོགས་པས་ཆོག །ད་ཡང་རྡོ་རྗེ་སེམས་དཔའ་ཉོན། །དེ་ལ་བཙལ་དུ་མེད་པའི་དོན། །དུས་གསུམ་འགྱུར་མེད་ཡེ་ཤེས་ཀློང་། །དེ་ཉིད་རྒྱུན་དུ་འབྲལ་མེད་པ། །ཡང་དག་སངས་རྒྱས་དགོངས་པ་ཡིན། །དེ་ཡང་འདུས་པའི་སྙིང་པོ་ཉོན། །རང་བཞིན་རྣམ་དག་ཆོས་དབྱིངས་ལ། །སྤྲོས་པ་མེད་པར་ཉམས་སུ་ལོངས། །དེ་བླངས་འབྲས་བུ་སངས་རྒྱས་འཐོབ། །དེ་ཕྱིར་རང་བཞིན་རྟོགས་པ་གཅེས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རང་བཞིན་ལྷུན་རྫོགས་ཉམས་སུ་བླངས་ཐབས་ཀྱི་ལེའུ་སྟེ་བརྒྱ་དང་སོ་བརྒྱད་པའོ། །སྡོམ་དུ་བསྡུས་ཏེ་བསྟན་པ་ཉེར་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སྟོན་པ་ཆོས་རྗེ་ལ། །ངེས་པའི་ཉམས་ཀྱི་དོན་གསོལ་པ། །ཉོན་མོངས་ཟིལ་གནོན་ཉམས་ནི་གང་། །ཆོས་དབྱིངས་ཉམས་སུ་ཇི་ལྟར་མྱོང་། །ལྟ་བའི་གདེང་གིས་ཇི་ལྟར་ཟིན། །ལུས་ངག་ཡིད་ཀྱི་རྟགས་ནི་གང་། །ཀུན་རིག་སྟོན་པས་བཤད་དུ་གསོལ། །ཀུན་རིག་སྟོན་པ་ཆོས་རྗེ་དེས། །དེ་སྐད་ཞུས་པའི་དོན་གསན་ནས། །ཡང་དག་དགོངས་ཉམས་ངེས་པའི་དོན། །འདུས་པའི་འཁོར་ལ་བཀའ་སྩལ་པ། །ཆོས་ཉིད་རང་རིག་དོན་ཤེས་པས། །དུག་ལྔ་ཡེ་ཤེས་ ― DNG002_Page_0165 ―
[མ་དཔེ་གཟིགས་ན་འདིར་གནོན།]
རྩིས་ཟིན་ཕྱིར། །ཉོན་མོངས་རང་རྒྱུད་ཟིལ་ནོན་ཉམས། །བ་མོ་ལ་ནི་ཉི་ཤར་འདྲ། །སྣང་བ་ཆོས་དབྱིངས་ཉམས་མྱོང་ནི། །སྒྱུ་མ་འདྲ་སྟེ་དངོས་མེད་ཤེས། །ལྟ་བ་གདེང་ལྡན་ཉམས་མྱོང་བ། །སྤྲིན་དང་ཆུ་བུར་ཉམས་མྱོང་འདྲ། །ཉམས་ལྡན་ལུས་ངག་ཡིད་ཀྱི་རྟགས། །བཟོད་ཐོབ་བཀྲག་གསལ་ཆོས་བརྒྱད་བྲལ། །དེ་ཡང་འདུས་པའི་སྙིང་པོ་ཉོན། །འགྲོ་དྲུག་སེམས་ཅན་ཐམས་ཅད་ལ། །ལུང་ལྡན་གདམས་ངག་རྩི་ཡིས་ནི། །གསེར་འགྱུར་རྩི་ཡིས་ཐེབས་པ་བཞིན། །ད་ལྟ་དུས་ཀྱི་སེམས་ཅན་གྱི། །མ་རིག་རྟོག་པ་རང་རྒྱུད་ལ། །ཟིལ་གནོན་བསྒོམ་པ་བསྟན་པར་བྱ། །སྒོམ་ཐབས་སྐྱོན་དང་བཅོས་པའི་ཐབས། །ཐུན་ཚད་ཉམས་དང་རྣམ་ལྔ་སྟེ། །ང་ཡི་བཀའ་ལས་གསུངས་པ་སྟེ། །དད་ལྡན་སེམས་ལ་གོ་བར་གྱིས། །དང་པོ་བསྒོམ་པའི་བཅོས་ཐབས་ནི། །ལུས་ངག་ཡིད་ཀྱི་གདམས་ངག་གིས། །གཞི་ཤེས་ལྟ་བས་ཐག་ཆོད་ལ། །དེ་ཡི་ངང་ལ་མི་འབྲལ་བའི། །ཚད་ནི་གསལ་ལ་མི་གཡོ་བ། །མི་རྟོག་རང་བྱུང་ཉམས་པ་མེད། །དེ་ལ་ཡིད་ཆེས་གདེང་གིས་ཟིན། །གཞི་ཤེས་པ་ལ་ཉོན་མོངས་མེད། །དེ་ཡི་སྐྱོན་ནི་ངོས་བཟུང་ན། །བྱིང་རྒོད་གོལ་སྒྲིབ་རྣམ་བཞི་སྟེ། །ཆེད་དུ་བྱས་དང་རྐྱེན་དང་ཤུགས། །བློ་ཆུང་ཤེས་རབ་དམན་ལ་འབྱུང་། །རྒྱུ་དང་དབྱེ་བ་གསུམ་གསུམ་མོ། །དབང་པོ་འབྲིང་དང་ཐ་མ་ལ། །བཅོས་ལ་ཉམས་སུ་མྱོང་དུ་གཞུག །དེ་ཕྱིར་རྒྱུན་དུ་འབྲལ་མེད་ལ། །གོམས་པའི་དབང་གིས་ཏིང་འཛིན་གསལ། །ཐུན་མཚམས་ཉམས་དང་སྦྱར་བྱས་ལ། །འབྲིང་དང་ཐ་མ་ཁམས་དང་བསྟུན། །རབ་ལ་རྒྱུན་དུ་འབྲལ་མེད་ལ། །ཐུན་ཚད་གཟུང་མེད་ནམ་མཁའ་འདྲ། །དེ་དོན་ཉམས་ནི་འཐོར་བསྡུས་ན། །ཤེས་པ་རང་གསལ་ཉམས་པ་མེད། །རིག་པ་རྒྱ་ཡན་འཛིན་པ་བྲལ། །ཡེ་ཤེས་ཟང་ཐལ་བྱིང་རྒོད་མེད། །ཆོས་ཉིད་ཚིག་ཆུགས་འགྱུར་མེད་ཤེས། །ལྟ་བ་རང་ཤར་འཁོར་བ་སྟོང་། །གདམས་ངག་དྲན་པས་མཐའ་དབུས་མེད། །ཆོས་སྐུ་འཕྱོས་པས་ངང་གིས་སྟོང་། །ཅི་དྲན་ལྷག་མཐོང་ཕྱོགས་རིས་བྲལ། །རང་བྱུང་རང་གསལ་གོས་པ་ ― DNG002_Page_0166 ―
[མ་དཔེ་གཟིགས་ན་འདིར་གནོན།]
མེད། །ཕྱལ་བ་ཡིད་ཆེས་བློ་བདེའོ། །བདེ་ལ་ཞེན་མེད་ཀུན་ཏུ་འཕྱོ། །འཛིན་མེད་ཁྱབ་གདལ་མཐའ་དབུས་མེད། །འཁོར་བ་རང་རླག་ཆོས་སྐུར་གསལ། །ད་ཡང་འདུས་པའི་སྙིང་པོ་ཉོན། །དེ་ལྔ་ལྡན་པའི་རྣལ་འབྱོར་ལ། །གཞན་གྱི་ཆགས་སྡང་སྤྱོད་མཐོང་ཡང་། །རང་གྲོལ་ཆགས་སྡང་རྡུལ་ཙམ་མེད། །དེ་ཕྱིར་རྟོགས་ལྡན་ཉམས་ཀྱི་ཆོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཉོན་མོངས་རང་རྒྱུད་ཟིལ་གྱིས་གནོན་པའི་ཉམས་བསྟན་པའི་ལེའུ་སྟེ་བརྒྱ་དང་སོ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ཡུལ་དང་གོལ་ས་བཅད་པའི་ཕྱིར། །ཆོས་དབྱིངས་གདེང་ཉམས་བཀའ་སྩལ་པ། །བྱ་བ་བཏང་བའི་སྐྱེས་བུ་བཞིན། །སྣང་བའི་ཡོན་ཏན་རྣམ་ལྔ་དང་། །བརྟག་དཔྱད་མ་བྱས་སྒོ་ལྔ་གསལ། །སྣང་བ་ཆོས་ཉིད་འགྱུར་མེད་ཉམས། །ད་ཡང་འདུས་པའི་སྙིང་པོ་ཉོན། །ལྷག་མཐོང་རིག་པ་རང་ཡན་ཏེ། །ཕྱོད་དེ་རྒྱང་ངེ་ཉམས་སུ་བདེ། །ནམ་མཁའ་དངས་པའི་ཀློང་ན་བདེ། །ཀོ་རེ་ལྡེམ་མེ་ཉམས་སུ་བདེ། །ཁྱུང་ཆེན་མཁའ་ལྡིང་ཉམས་སུ་བདེ། །གསལ་ལ་བསིལ་བ་ཉམས་སུ་བདེ། །བཅོ་ལྔའི་ཟླ་གསལ་ཀློང་ན་བདེ། །བདེ་ལ་མི་རྟོག་ཉམས་རེ་གསལ། །སྟོན་ཀའི་ཉི་གསལ་ཀློང་ན་བདེ། །ལུང་ལྡན་རིག་པ་འཕྱོ་ན་བདེ། །གཟའ་གཏད་མེད་པའི་ཀློང་ན་བདེ། །འདུས་མ་བྱས་པའི་ཀློང་དཀྱིལ་ན། །རང་བྱུང་རིག་པའི་ཡེ་ཤེས་བདེ། །ལྷག་མཐོང་རིག་པའི་ཡེ་ཤེས་ཀྱི། །རྣལ་འབྱོར་ཤེས་པ་གསལ་ན་བདེ། །ལུང་ལྡན་ཟས་ནོར་མེད་ན་བདེ། །ཞེན་མེད་ཆོས་སྐུའི་ཀློང་ན་བདེ། །རྣལ་འབྱོར་གྲོགས་དང་བྲལ་ན་བདེ། །ལུས་ཀྱི་དགོན་པའི་ནང་ན་བདེ། །རིག་པ་རང་གསལ་ཀློང་ན་བདེ། །གོལ་ས་ཆོད་པའི་ཆོས་ལ་བདེ། །སྤྲོས་དང་བྲལ་བའི་ཀློང་ན་བདེ། །སྐུར་འདེབས་ཕྱར་ཀ་མང་ན་བདེ། །དུག་ལྔ་རང་གྲོལ་ཀློང་ན་བདེ། །ཆོས་ལ་སྒྲོ་འདོགས་ཤིན་ཏུ་བདེ། །ཆོས་བརྒྱད་བྲལ་བའི་ ― DNG002_Page_0167 ―
[མ་དཔེ་གཟིགས་ན་འདིར་གནོན།]
ཀློང་ན་བདེ། །རང་ལ་རང་ཡིད་ཆེས་པས་བདེ། །ལུང་ལྡན་གདམས་ངག་ཀློང་ན་བདེ། །ཡུལ་མེད་འཁྱམས་པའི་ཀློང་ན་བདེ། །སྣང་བ་ཆོས་དབྱིངས་ཀློང་ན་བདེ། །ད་ཡང་འདུས་པའི་སྙིང་པོ་ཉོན། །གདམས་ངག་སྤྱོད་ན་ཕུན་སུམ་ཚོགས། །ལུང་རིགས་ལྡན་ན་ཐམས་ཅད་མཁྱེན། །ཉམས་སུ་མྱོང་ན་གོལ་ས་ཆོད། །གཅིག་པུར་གནས་ན་ཆོས་བརྒྱད་བྲལ། །བླ་མ་ཁུར་དང་དངོས་གྲུབ་ཐོབ། །བཀའ་བརྒྱུད་བལྟས་ན་རང་ཡིད་ཆེས། །ཕྱི་ནང་ཡུལ་གྱི་རྣམ་པ་ལ། །ཡིན་མིན་སྤོང་སྡུད་མེད་ལ་ནི། །གང་ཡང་མ་བསྡུས་ཆོས་ཀྱི་དབྱིངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྣང་བ་ཆོས་དབྱིངས་ཀྱི་ཉམས་བསྟན་པའི་ལེའུ་སྟེ་བརྒྱ་དང་བཞི་བཅུ་པའོ།། །།དེ་ནས་ཀུན་རིག་རྒྱལ་པོ་ཡིས། །ལྟ་བ་གདེང་ལྡན་ཉམས་ཆེན་ནི། །གཡོ་དང་གོམས་པ་བརྟན་པའི་ཉམས། །འདུས་པའི་འཁོར་ལ་བཀའ་སྩལ་པ། །རང་བྱུང་ནམ་མཁའ་སྟོང་པ་ལས། །སྤྲིན་ལས་ཆར་ཆུ་རྒྱུན་དུ་བབས། །དེ་བཞིན་རང་རིག་ཆོས་སྐུར་རྟོགས། །ཉོན་མོངས་རང་རྒྱུད་ཟིལ་གྱིས་གནོན། །འདུ་ལ་མི་དགའ་གཅིག་པུར་གནས། །དེ་ཚེ་ཏིང་འཛིན་ཉམས་པ་མེད། །རང་རིག་ཆོས་སྐུ་ལོངས་སྤྱོད་ཆེ། །དེ་ལ་ཞེན་མེད་ཀློང་ན་མཆིའོ། །ཏིང་འཛིན་གཡོ་བ་ཉམས་ཀྱིས་རྟོགས། །ད་ཡང་འདུས་པའི་སྙིང་པོ་ཉོན། །ཆུ་བོ་དལ་དྲག་སྙོམས་པ་ལྟར། །ལྟ་བས་ཐག་ཆོད་རྣལ་འབྱོར་དེ། །ཆོས་སྐུ་འོད་གསལ་ཤུགས་ལ་འབྱུང་། །འཁོར་བའི་ཆོས་ལ་ཤིན་ཏུ་སྐྱོ། །རང་ལ་ཡིད་ཆེས་དད་པ་སྐྱེ། །གདེང་མེད་གཞན་ལ་སྙིང་རྗེ་ཡིས། །ཕན་གནོད་བྱ་བའི་རྒྱུ་མང་མཐོང་། །གཞི་ལ་སེམས་ཅན་མེད་ཤེས་པས། །དུག་ལྔ་རང་བརླག་འཁོར་བ་སྟོངས། །ཏིང་འཛིན་གོམས་པའི་ཉམས་ཀྱི་རྟགས། །ད་ཡང་རྡོ་རྗེ་སེམས་དཔའ་ཉོན། །རྒྱ་མཚོའི་གཏིང་གི་ཆུ་བཞིན་དུ། །ཆོས་ཉིད་རྟོགས་པའི་རྣལ་འབྱོར་ལ། །འཁོར་འདས་གཞི་ལ་མེད་པའི་ཕྱིར། ། ― DNG002_Page_0168 ―
[མ་དཔེ་གཟིགས་ན་འདིར་གནོན།]
ཆོས་སྐུའི་ངང་ལས་གཡོས་པ་མེད། །ཉོན་མོངས་སྐྱེ་བའི་ཡུལ་མི་དམིགས། །ཡེངས་པར་བྱ་བ་མིང་མི་སྲིད། །དེ་ལྟ་དུས་འདི་འབྱུང་བའི་ཕྱིར། །ཏིང་འཛིན་ཉམས་ཐོབ་བརྟན་པའི་ཕྱིར། །དེ་ཡང་འཁོར་གྱི་སེམས་དཔའ་ཉོན། །གཡོ་དང་གོམས་པ་བརྟན་པ་ནི། །གང་ཟག་བློ་ཡི་རིམ་པ་ལས། །རིམ་གྱིས་དང་ནི་ཅིག་ཅར་དུ། །རང་གི་རྒྱུད་ལ་རྫོགས་ཤེས་པས། །ས་བོན་འཁོར་བ་སྟོངས་ཞེས་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྟ་བ་གདེང་ལྡན་གྱི་ཉམས་རྟགས་བསྟན་པའི་ལེའུ་སྟེ་བརྒྱ་དང་ཞེ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ལུས་ཀྱིས་བཟོད་པ་ཐོབ་པ་དང་། །ངག་གི་རྒྱུ་བ་ཚོད་ཟིན་ན། །གསང་བ་ཆོས་སྐུ་ཉམས་མྱོང་རྟགས། །འདུས་པའི་འཁོར་ལ་བཀའ་སྩལ་པ། །ཕྱི་ཡི་ལུས་ཀྱིས་བཟོད་ཐོབ་པ། །ཕྲ་མོའི་སྲོག་ཆགས་མི་ཚུགས་དང་། །ཤ་མཐའ་སྲིན་བུ་ཉི་ཚེ་དང་། །ནད་ཉུང་རིམས་ནད་མི་ཚུགས་དང་། །ཞི་གནས་ལས་སུ་རུང་བའི་རྟགས། །ཁ་ཟས་ངན་ཀྱང་མ་ཞེན་པས། །བཀྲག་གསལ་པས་ན་མདོག་ནི་ལེགས། །ཁ་ཆུ་མིག་ཆུ་ལུས་མི་འདར། །ལུས་ཀྱིས་བཟོད་པ་ཐོབ་པའི་རྟགས། །ནམ་མཁའ་ལ་ནི་འདུག་སྙམ་དང་། །ལུས་ནི་ཤིན་ཏུ་ཡང་བ་དང་། །མལ་ནང་ཆུང་བ་བྱུང་གྱུར་ན། །ལུས་ཀྱིས་བཟོད་པ་ཐོབ་པའི་རྟགས། །ད་ཡང་འདུས་པའི་སྙིང་པོ་ཉོན། །ནང་གི་དམ་པའི་རྟགས་ཆེན་ནི། །རྣམ་རྟོག་རྒྱུན་ཆད་ངེས་པའི་རྟགས། །རང་དབུགས་མི་རྒྱུ་ཆོས་ཉིད་གསལ། །ཏིལ་གྱི་མར་མེ་མི་བསྐྱོད་འདྲ། །ཤེས་པ་གསལ་ལ་དབུགས་མི་རྒྱུ། །ཆེད་དུ་མ་བྱས་ཤུགས་ལ་འབྱུང་། །ན་དང་མི་ན་མེད་པར་ཡང་། །རྐྱེན་ཐུབ་རང་རིག་ཆོས་སྐུར་གསལ། །ནང་གི་ཚད་ཟིན་དམ་པའི་རྟགས། །ད་ཡང་འཁོར་གྱི་སྙིང་པོ་ཉོན། །གསང་བ་སེམས་ཀྱི་རྟགས་བསྟན་པ། །ལུང་ལྡན་ཆོས་ལ་ཡིད་ཆེས་པས། །ཐེག་གཞན་ཆོས་ནི་ཅི་བསྟན་ཀྱང་། །དད་ ― DNG002_Page_0169 ―
[མ་དཔེ་གཟིགས་ན་འདིར་གནོན།]
ཅིང་མོས་པའི་སེམས་མི་འབྱུང་། །ཚུལ་འཆོས་བྱེད་པའི་ཁ་གསགས་ལ། །དེ་ལ་གདེང་མེད་ཡིད་མི་ཆེས། །གཞི་ལ་ཆོས་བརྒྱད་མེད་ཤེས་ཕྱིར། །སྣང་བ་གཞི་ལ་ཡིད་ཕྱུང་སྟེ། །དོན་མེད་གོལ་བ་ཡིད་ཆེས་པས། །སྐྱོན་ཡོན་ཐམས་ཅད་རང་སར་གྲོལ། །ཆོས་སྐུ་ཉིད་ལས་གཞན་མེད་ཤེས། །ཆོས་རྣམས་ཆོས་སྐུར་བྱུང་ཐོབ་ཕྱིར། །ཞེ་ལ་རང་ཉམས་ཡིད་ཆེས་པས། །རང་གི་སྙིང་བས་ཕངས་པ་ཡིས། །གཞན་ལ་མི་སྤེལ་བློ་འབྱུང་སྟེ། །ཤིན་ཏུ་ཕངས་ཤིང་སྦེད་པར་བྱེད། །དེ་དོན་ངེས་པའི་བཀའ་དང་མཐུན། །ཉམས་ལ་དཀའ་ཐུབ་གསང་བ་རྟོགས། །རྟོགས་པ་མངོན་གྱུར་སངས་རྒྱས་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལུས་ངག་ཡིད་གསུམ་གདེང་དུ་གྱུར་པའི་རྟགས་བསྟན་པའི་ལེའུ་སྟེ་བརྒྱ་དང་ཞེ་གཉིས་པའོ། །སྡོམ་དུ་བསྡུས་ཏེ་བསྟན་པ་ཉེར་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །དད་ལྡན་འཁོར་གྱི་དོན་དུ་ནི། །ཀུན་རིག་ཆོས་ཀྱི་རྒྱལ་པོ་ལ། །ངེས་དོན་སྙིང་པོའི་དོན་གསོལ་པ། །ལྷག་མཐོང་དྲན་པའི་རིག་སྤྱོད་གང་། །མི་བརྗེད་གཟུངས་ཀྱིས་ཅི་ལྟར་གཟུངས། །རྟོག་མེད་ཡེ་ཤེས་རིག་སྤྱོད་དམ། །འབྲལ་མེད་རིག་སྤྱོད་ཇི་ལྟར་འཆར། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལྷག་མཐོང་དྲན་པའི་རིག་སྤྱོད་ནི། །སྣང་གྲག་ཡིད་ཀྱི་རྣམ་པ་ལ། །གང་མཐོང་རྣམ་པ་ཅིར་སྣང་ཡང་། །གཞི་ལ་མེད་ཤེས་ལྷག་མཐོང་སྟེ། །གདགས་གཞི་ཀུན་དང་བྲལ་བའི་ཕྱིར། །དེ་ཕྱིར་སྣང་བ་ཆོས་དབྱིངས་མཐོང་། །རང་གི་རིག་པར་རང་བལྟས་པས། །མ་བྱུང་མ་སྐྱེས་འགྲོ་འོང་མེད། །དུས་གསུམ་མི་འགྱུར་ཆོས་སྐུར་དྲན། །འདུས་མ་བྱས་ཀྱི་ནམ་མཁའ་འདྲ། །ད་ཡང་རྡོ་རྗེ་སེམས་དཔའ་ཉོན། །ཡུལ་སེམས་གཉིས་ལ་མི་དཔྱོད་པར། །དྲན་པས་ཟིན་ན་ལྷག་མཐོང་སྟེ། །དེ་ལ་ཡོད་མེད་རིག་དཔྱོད་ཆད། །དྲན་དཔྱོད་མེད་པ་ཆོས་སྐུ་ཡིན། །གཞི་ལ་ ― DNG002_Page_0170 ―
[མ་དཔེ་གཟིགས་ན་འདིར་གནོན།]
ཡུལ་སེམས་རྟེན་མེད་ཀྱང་། །འཁྲུལ་པ་སྦྱངས་ཕྱིར་དྲང་བའི་ཆོས། །མ་འགགས་རིག་པའི་དོན་ཤེས་པས། །ལྷག་མཐོང་དྲན་པ་ཆོས་སྐུར་གསལ། །ད་ཡང་འདུས་པའི་སྙིང་པོ་ཉོན། །དོན་ལྡན་ལྷག་མཐོང་རིག་སྤྱོད་ལ། །དེ་ཡང་ཡིད་ཆེས་སྐུར་ཤེས་པ། །དེ་ཚེ་ཡེ་ཤེས་ཟང་ཐལ་ཀློང་། །གང་དྲན་སྐྱོན་མེད་རིག་པ་གསལ། །དེ་ཙམ་ཉིད་ན་གཡོས་པ་མེད། །རང་བྱུང་དོན་ལྡན་ལྷག་མཐོང་ལ། །གོལ་སྒྲིབ་བྱ་བ་རྡུལ་ཙམ་མེད། །དེ་ཚེ་ཆོས་ཉིད་རིག་སྤྱོད་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྷག་མཐོང་དྲན་པའི་རིག་སྤྱོད་ལ་བཟླ་བསྟན་པའི་ལེའུ་སྟེ་བརྒྱ་དང་ཞེ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །མི་བརྗེད་རིག་སྤྱོད་བཀའ་སྩལ་པ། །ངེས་ལུང་ལྡན་པའི་བླ་མ་ཡིས། །དོན་བསྟན་ངེས་པར་གོ་ནས་ནི། །སེམས་རྟོག་མི་བྱེད་ལྟ་བ་ལ། །རང་བྱུང་ཡེ་ཤེས་སྙིང་པོ་ལ། །བརྩོན་འགྲུས་མ་ཡིན་གུས་པའི་ཐབས། །ལུང་ལྡན་ངེས་པའི་གདམས་ངག་གིས། །གཡོ་སྒྱུ་མེད་པའི་རིག་སྤྱོད་ཀྱིས། །འགལ་སེམས་རྡུལ་ཙམ་མེད་པའི་ཕྱིར། །སྤྱོད་པ་མ་ཆགས་ཁོང་ཁྲེལ་མེད། །མཆེད་དང་ལྕམ་དྲལ་ལ་སོགས་པ། །བརྩེ་གདུངས་ཆེད་བྱེད་མི་འགྱོད་པ། །ངེས་དོན་རྟོགས་པའི་ཡེ་ཤེས་གསལ། །རིག་པ་སོ་ཐུབ་དགོན་པའི་མཆོག །ད་ཡང་འདུས་པའི་སྙིང་པོ་ཉོན། །དུས་དང་སྤྱོད་པ་ཐམས་ཅད་དུ། །རྒྱུན་དུ་གསལ་ཐེབས་ཆོས་སྤྱོད་ཡིན། །རིག་སྤྱོད་ཆེན་པོ་ཆོས་སྐུ་ལ། །རྒྱུན་དུ་འབྲལ་མེད་དོན་དྲན་ཕྱིར། །མཚམས་མེད་བྱས་ཀྱང་ངེས་དོན་ལས། །དེ་ལྡན་ཉེས་པ་རྡུལ་ཙམ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མི་བརྗེད་གཟུངས་ཀྱི་རིག་སྤྱོད་བསྟན་པའི་ལེའུ་སྟེ་བརྒྱ་དང་ཞེ་བཞི་པའོ།། །།དེ་ནས་ཀུན་རིག་སྟོན་པ་ཡིས། །ཉམས་ལྡན་རིག་སྤྱོད་བཀའ་སྩལ་པ། ། ― DNG002_Page_0171 ―
[མ་དཔེ་གཟིགས་ན་འདིར་གནོན།]
གོལ་ས་བྱིང་རྒོད་མེད་པ་ཡི། །རྟོག་སྤྱོད་ཉམས་ཀྱི་རིམ་པ་ལས། །རང་གསལ་ཞེན་མེད་ཡིད་ཆེས་པས། །བདེ་གཤེགས་དགོངས་པ་ཀུན་དང་མཐུན། །ད་ཡང་འདུས་པའི་སྙིང་པོ་ཉོན། །མི་གཡོ་རང་གསལ་ཆོས་ཀྱི་སྐུ། །དེ་ལ་སྐྱོན་གྱིས་གོས་པ་མེད། །ལྷག་མཐོང་དྲན་པས་ངེས་དོན་གསལ། །དེ་ཙམ་ཉིད་ན་གཟུང་འཛིན་མེད། །མེད་དེ་རང་ལུས་མ་བཅོས་པར། །ཡེ་གསལ་རྐྱེན་མེད་རིག་པས་ཟིན། །བརྩོན་ལ་སོས་དལ་གྱི་ན་ཙམ། །ཐུན་མཚམས་མེད་པར་རྒྱུན་དུ་གནས། །ཆེད་དུ་བྱེད་མེད་མི་གཡོ་བར། །འདུས་མ་བྱས་པའི་རིག་པ་ལ། །ཡེ་ཤེས་ཆོས་སྐུ་གདེང་ན་གསལ། །དེ་ཕྱིར་བཙལ་མེད་འབྲས་བུ་སྟེ། །དེ་ལྟར་ལུང་ལྡན་རྣལ་འབྱོར་པས། །མི་ཡི་ལུས་ནི་མ་བོར་བར། །ཀུན་བཟང་ང་དང་དགོངས་པ་མཉམ། །ད་ཡང་རྡོ་རྗེ་སེམས་དཔའ་ཉོན། །སྤྲིན་མེད་ནམ་མཁར་ཉི་མ་བཞིན། །སང་ངེ་རིག་གེ་རྟོག་མེད་གསལ། །དར་ཅིག་མ་ཡིན་རྒྱུན་དུ་གནས། །དེ་ལ་སྐྱོན་གྱིས་གོས་པ་མེད། །རྣལ་འབྱོར་ཉམས་ཀྱི་གདེང་ལྡན་ཕྱིར། །གང་ཡང་རུང་བ་ཅི་ལ་ཡང་། །ཉམ་ང་མེད་པ་བདེ་བའི་དོན། །དུས་དང་རྣམ་པ་ཐམས་ཅད་དུ། །ཆོས་སྐུ་གདེང་དང་བྲལ་བ་མེད། །ད་ལྟའི་ཤེས་པ་འདི་ཉིད་ལས། །འཕེལ་འགྲིབ་མེད་པར་སུས་རྟོགས་པར། །རང་བྱུང་ཡེ་ཤེས་ཤར་བར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྟོག་མེད་རིག་སྤྱོད་བསྟན་པའི་ལེའུ་སྟེ་བརྒྱ་དང་ཞེ་ལྔ་པའོ།། །།དེ་ནས་འདུས་པའི་འཁོར་རྣམས་ལ། །རྒྱུན་གྱི་སྤྱོད་པ་བཀའ་སྩལ་པ། །ཆོས་རྣམས་ཀུན་གྱི་རྩ་བ་ནི། །གཞི་ཉིད་ཤེས་ན་འབྲལ་མེད་ཕྱིར། །རྒྱུན་ནི་རྣལ་འབྱོར་ཀློང་དུ་གསལ། །དེ་ཕྱིར་རང་རིག་སྐྱེ་འགག་མེད། །དེ་ཉིད་དོན་ལ་ཡེ་གནས་པས། །ཆེད་དུ་བྱར་མེད་རིག་པ་གསལ། །དེ་དང་རྒྱུན་དུ་འབྲལ་མེད་ཕྱིར། །དུས་གསུམ་དག་ཏུ་འཕེལ་འགྲིབ་མེད། །དེ་ཕྱིར་གཞི་ཤེས་ཆོས་སྐུའི་ཀློང་། །དེ་དང་མི་འབྲལ་རིག་པའི་གཟུངས། །སངས་རྒྱས་ཀུན་གྱི་ ― DNG002_Page_0172 ―
[མ་དཔེ་གཟིགས་ན་འདིར་གནོན།]
དགོངས་པ་ཡིན། །ད་ཡང་འདུས་པའི་སྙིང་པོ་ཉོན། །ཐོག་མ་ཐ་མ་ད་ལྟའི་དུས། །གཞི་ཉིད་ཤེས་པས་འབྲལ་མེད་ཕྱིར། །ལམ་དང་འབྲས་བུ་ཤུགས་ལ་ཚངས། །དེ་ཕྱིར་རྒྱུ་འབྲས་རོ་གཅིག་པས། །ལམ་དང་གཉེན་པོ་བསྒྲུབ་མི་དགོས། །དེ་ཕྱིར་བྱ་བྲལ་འཛིན་མེད་ཀློང་། །དེ་ལ་མ་རིག་སྐྱོན་མ་གོས། །དེ་ལ་ཆོས་སྐུ་ཟང་ཀ་མ། །དེ་ལ་ཡོན་ཏན་དུས་གཅིག་རྫོགས། །དེ་ཡང་འདུས་པའི་སྙིང་པོ་ཉོན། །རང་གི་རིག་པས་དོན་འཆར་ཕྱིར། །གང་ཡང་མི་འགག་ཆོས་སྐུར་འཆར། །དེ་ཙམ་ཉིད་ན་གོལ་སྒྲིབ་མེད། །དེ་ཕྱིར་གཞི་ཞེས་བསྒོམ་མི་དགོས། །དེ་ལས་གཞན་མེད་ཡེ་ཤེས་ཀློང་། །དེ་ཕྱིར་ཡེ་ཤེས་བཤད་པ་ལ། །དུས་གསུམ་བྱས་པ་གང་ཡང་མེད། །དེ་ཕྱིར་འབྲལ་མེད་ཆོས་སྐུར་ཤར། །དེ་ལས་མ་གཏོགས་འབྲལ་མེད་དོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱུན་གྱི་རིག་སྤྱོད་འཆར་བར་བསྟན་པའི་ལེའུ་སྟེ་བརྒྱ་དང་ཞེ་དྲུག་པའོ། །དོན་དུ་བསྡུས་ཏེ་བསྟན་པ་ཉེར་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཀུན་རིག་ཆོས་ཀྱི་རྒྱལ་པོ་ལ། །ངེས་པའི་དགོངས་དོན་འདི་སྐད་གསོལ། །ཡེ་གནས་ཆོས་དབྱིངས་ཀློང་ནི་གང་། །རོལ་པ་མི་འགག་གང་གི་ཀློང་། །ཡུལ་སེམས་གཉིས་མེད་ཀློང་ནི་གང་། །དེ་ལྟར་མི་ཤེས་གང་གི་ཀློང་། །བརྗོད་མེད་གསལ་བ་གང་གི་ཀློང་། །རང་ཡན་མཉམ་པ་གང་གི་ཀློང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ཀློང་ཆེན་དྲུག་ནི་ངས་བཤད་ཀྱི། །ངེས་པའི་དད་པས་ཡང་ཉོན་ཅིག །རང་བྱུང་ཀུན་བཟང་ཆོས་ཉིད་ཀློང་། །སངས་རྒྱས་སེམས་ཅན་ཀུན་ལ་གནས། །ཆོས་ཉིད་ཡངས་པས་གདལ་ཁྱབ་པས། །ནམ་མཁའ་བཞིན་དུ་ཡེ་གནས་པའི། །ཆོས་ཉིད་ཀློང་ཞེས་དེ་ལ་བྱ། །ད་ཡང་རྡོ་རྗེ་སེམས་དཔའ་ཉོན། །རིག་པ་རང་བྱུང་སྔ་ཕྱི་བྲལ། །དེ་དོན་སྐྱོན་མེད་ནམ་མཁའ་ནི། །ཆོས་སྐུ་ཀུན་བཟང་ཡེ་ ― DNG002_Page_0173 ―
[མ་དཔེ་གཟིགས་ན་འདིར་གནོན།]
ཤེས་ཏེ། །འདུས་མ་བྱས་པའི་ཡེ་ཤེས་ཀློང་། །སངས་རྒྱས་ཐུགས་དང་སེམས་ཅན་སེམས། །ཆོས་ཉིད་ཀློང་ཁྱབ་ཡངས་པའི་ལམ། །ཡེ་ཤེས་གདལ་ཁྱབ་བྱང་ཆུབ་སེམས། །གདོད་ནས་ཡེ་གནས་ནམ་མཁའ་བཞིན། །འདུ་འབྲལ་མེད་པའི་ཆོས་ཉིད་ཀློང་། །རིག་པ་སྒྲིབ་མེད་རྣམ་པར་དག །མ་རིག་དག་ཕྱིར་བག་ཆགས་ཀུན། །ཡེ་ཤེས་ཀློང་དུ་ཀུན་བསྒྲལ་ནས། །བྱིང་དང་རྨུགས་པ་མི་འགག་ཕྱིར། །ཡོན་ཏན་འབྱུང་བ་ཆོས་ཀྱི་ཀློང་། །འཁོར་འདས་གཉིས་ལ་མི་དགོངས་པ། །གང་ཡང་མི་བསམ་ཏིང་འཛིན་མཆོག །ད་ཡང་འདུས་པའི་སྙིང་པོ་ཉོན། །ཆོས་མེད་རང་བྱུང་ཡུལ་མེད་པས། །འཁོར་བ་མྱོང་མེད་ཀློང་གི་ངང་། །དོན་འདི་རྟོགས་པས་སྒྲིབ་པ་སྦྱངས། །སེམས་ཅན་མེད་ཕྱིར་སྙིང་རྗེ་འཇུག །ནམ་མཁའ་ལྟ་བུའི་ཀློང་དེ་རུ། །ཉི་མ་ལྟ་བུའི་ཡེ་ཤེས་འཆར། །ཆེ་བ་འབྱུང་བའི་རོལ་པ་སྟེ། །ངེས་དོན་ཟབ་མོའི་དོན་གྱི་ཕྱིར། །སངས་རྒྱས་བྱང་ཆུབ་གུད་ན་མེད། །རང་ལ་ཚང་བས་བཙལ་མི་དགོས། །ཆོས་ཉིད་དོན་ནི་མ་བཅོས་པ། །ཅིས་ཀྱང་མི་བསྐྱོད་རང་བྱུང་སྐུ། །བྱ་བཙལ་བྲལ་བས་སྡུག་བསྔལ་ཟད། །དེ་ཕྱིར་ཡེ་ཡོད་རང་བྱུང་ཀློང་། །རང་ལ་ཡོད་པས་རང་གྲོལ་དོན། །ངོ་ཤེས་ཕྱིར་ན་གཉིས་ཀ་གྲོལ། །དེ་ཕྱིར་བདག་གཞན་དུས་གཅིག་ཏུ། །སངས་རྒྱས་ས་རུ་དུས་འདིར་རྟོགས། །ཡེ་ཤེས་ལམ་ཆེན་ཀུན་ལ་སྟོན། །ད་ཡང་རྡོ་རྗེ་སེམས་དཔའ་ཉོན། །ཡོད་མེད་དབུས་ལ་མི་གནས་པས། །རང་བྱུང་ཡེ་ཤེས་ཆོས་སྐུའི་ཀློང་། །དེ་ཉིད་རྟོགས་པས་ཡེ་ཤེས་ཐུགས། །རེ་དོགས་བྲལ་བས་སྡུག་བསྔལ་སྤངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ནས་གནས་པའི་ཆོས་ཉིད་ཀྱི་ཀློང་བསྟན་པའི་ལེའུ་སྟེ་བརྒྱ་དང་ཞེ་བདུན་པའོ།། །།དེ་ནས་ཀུན་རིག་སྟོན་པ་ཡིས། །རོལ་པ་མི་འགག་ཀློང་ཆེན་ནི། །འདུས་པའི་འཁོར་ལ་བཀའ་སྩལ་པ། །འབྱུང་བ་རྣམ་ལྔ་ཅིར་སྣང་ཡང་། །ཀུན་བཟང་རོལ་པ་ཡིན་པར་ཤེས། །རང་བྱུང་ནམ་མཁའ་བརྗོད་ལས་འདས། །སྣང་ཙམ་ཉིད་ནས་གཞི་ལ་མེད། །ད་ཡང་འདུས་ ― DNG002_Page_0174 ―
[མ་དཔེ་གཟིགས་ན་འདིར་གནོན།]
པའི་སྙིང་པོ་ཉོན། །ཆུ་བོ་བཞི་ཡང་རྒྱ་མཚོའི་ཀློང་། །དེ་བཞིན་སེམས་ཀྱི་མཚན་མ་ཡང་། །ཡེ་ཤེས་ཆོས་ཉིད་རང་གི་ཀློང་། །བཅུད་ཀྱི་རྩི་ཐོག་ནགས་ཚལ་དང་། །སྐྱེ་འགྲོ་སེམས་ཅན་ཐམས་ཅད་ཀུན། །སྣོད་ཀྱི་འཇིག་རྟེན་ཀློང་ན་འཕྱོ། །དེ་བཞིན་ཐེག་དགུའི་ཆོས་ཀུན་ཀྱང་། །ཡང་ཏིའི་ཐེག་པ་འདི་ཡི་ཀློང་། །ཐོས་བསམ་བསྒོམ་གསུམ་མ་ལུས་ཀུན། །ད་ལྟའི་རྟོགས་པ་འདི་ཡི་ཀློང་། །འགྲོ་དྲུག་སེམས་ཅན་མ་ལུས་ཀུན། །ཕ་མ་གཉིས་ཀྱི་ཀློང་ནས་བྱུང་། །དུས་གསུམ་རྒྱལ་བ་མ་ལུས་ཀུན། །ངེས་དོན་ཆོས་སྐུ་འདི་རུ་འདུས། །ས་ཆུ་མེ་རླུང་མ་ལུས་ཀུན། །ནམ་མཁའ་སྟོང་པའི་ངང་དུ་འདུས། །རེ་དང་དོགས་པའི་ཆོས་ཀུན་ནི། །གཞི་ལ་མེད་པས་རང་གྲོལ་ཀློང་། །བདེ་དང་སྡུག་བསྔལ་ཅི་བྱུང་ཡང་། །རྐྱེན་ཐུབ་ཕྱིར་ན་ཡེ་ཤེས་ཀློང་། །སངས་རྒྱས་ཆེ་བའི་ཡོན་ཏན་ཀྱང་། །ཆོས་ཉིད་རྟོགས་པའི་ཀློང་ན་འཕྱོ། །འདོད་པའི་ཡོན་ཏན་རྣམ་ལྔ་ཡང་། །ཡེ་ཤེས་རིག་པ་འདི་ཡི་ཀློང་། །འདོད་དགུར་བསྒྱུར་བ་ཐམས་ཅད་ཀྱང་། །འཕྲུལ་གྱི་མེ་ལོང་འདི་ཡི་ཀློང་། །སྒོ་ལྔའི་ཡུལ་འདི་ཅི་མཐོང་ཡང་། །སྣང་བ་ཆོས་དབྱིངས་ཀློང་ན་འཕྱོ། །ད་ཡང་འདུས་པའི་སྙིང་པོ་ཉོན། །ཆོས་སྐུ་རང་རིག་འདིར་འདུས་ཕྱིར། །གོམས་ལྡན་གདེང་ལྡན་རིན་ཆེན་གསེར། །དལ་འབྱོར་དབྱིངས་ན་ལྷག་མཐོང་འཕྱོ། །དེ་ཕྱིར་ངེས་པའི་ལུང་འདི་ཡིས། །ཁམས་གསུམ་སེམས་ཅན་ཀུན་བསད་ཀྱང་། །སྡིག་ཏུ་མི་འགྱུར་གྲོལ་བར་ངེས། །དེ་ཕྱིར་སྡིག་ཉིད་ཡེ་ཤེས་ཀློང་། །མ་བཅོས་ཡེ་ནས་གནས་པའི་ཕྱིར། །རེ་དོགས་བྲལ་བས་དགེ་སྡིག་མེད། །དྲང་དོན་ཆོས་ཀྱིས་ཀུན་བསླུས་ཕྱིར། །མ་རིག་རྨོངས་པ་སྙིང་རེ་རྗེ། །ནམ་མཁའི་ཀློང་དུ་འབྱུང་བཞི་བདེ། །སེམས་ཉིད་ཀློང་དུ་རྟོག་པ་བདེ། །ཡེ་ཤེས་ཀློང་དུ་སངས་རྒྱས་བདེ། །འགྱུར་མེད་ཀློང་དུ་རང་བྱུང་བདེ། །ད་ཡང་འདུས་པའི་སྙིང་པོ་ཉོན། །དེ་ཕྱིར་རོལ་པ་མི་འགག་པའི། །ནམ་མཁའ་རང་སེམས་ཉིད་དུ་ཤར། །དཔེ་དོན་གཉིས་སུ་ཡེ་ནས་བསྟན། །དེ་ལ་བརྟགས་ཤིང་བསམ་དུ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ― DNG002_Page_0175 ―
[མ་དཔེ་གཟིགས་ན་འདིར་གནོན།]
ཡེ་ཤེས་ནམ་མཁའ་དང་མཉམ་པའི་རྒྱུད་ལས། རོལ་པ་འགགས་པ་མེད་པའི་ཀློང་བསྟན་པའི་ལེའུ་སྟེ་བརྒྱ་དང་ཞེ་བརྒྱད་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ཡུལ་སེམས་གཉིས་མེད་བཀའ་སྩལ་པ། །ནམ་མཁའ་འབྱུང་བཞི་གཉིས་སུ་མེད། །ཆུ་དང་རླན་དུ་གཉིས་སུ་མེད། །མེ་དང་ཚ་བ་གཉིས་སུ་མེད། །རླུང་དང་གཡོ་བ་གཉིས་སུ་མེད། །ནམ་མཁའ་དངོས་མེད་གཉིས་སུ་མེད། །ས་དང་སྲ་བ་གཉིས་སུ་མེད། །ད་ཡང་འདུས་པའི་སྙིང་པོ་ཉོན། །སེམས་དང་མ་རིག་གཉིས་སུ་མེད། །འཁྲུལ་དང་ནོར་བ་གཉིས་སུ་མེད། །ཡུལ་དང་ཞེན་པ་གཉིས་སུ་མེད། །མ་ཤེས་མ་གོ་གཉིས་སུ་མེད། །བྱ་དང་བྱེད་པ་གཉིས་སུ་མེད། །སྒྱུ་མ་མི་རྟག་གཉིས་སུ་མེད། །སྐྱེ་རྒ་ན་འཆི་གཉིས་སུ་མེད། །ཡུལ་དང་ཆོས་དབྱིངས་གཉིས་སུ་མེད། །བློ་དང་ཀུན་བརྟགས་གཉིས་སུ་མེད། །གོལ་དང་སྒྲིབ་པ་གཉིས་སུ་མེད། །དེ་ཕྱིར་གཉིས་མེད་ཀློང་ཞེས་བྱ། །ད་ཡང་འདུས་པའི་སྙིང་པོ་ཉོན། །དོན་དམ་ཆོས་སྐུ་གཉིས་མེད་ཀློང་། །རང་བྱུང་རྟོགས་པ་གཉིས་མེད་ཀློང་། །ལྟ་བ་སྒོམ་པ་གཉིས་མེད་ཀློང་། །སངས་རྒྱས་སེམས་ཅན་གཉིས་མེད་ཀློང་། །སྐུ་གསུམ་ཡེ་ཤེས་གཉིས་མེད་ཀློང་། །མི་དགེ་བཅུ་སྤངས་དགེ་བའི་ཀློང་། །ཅི་དྲན་ལྷག་མཐོང་ངེས་དོན་ཀློང་། །ཅི་ཕྱིར་རང་རིག་རོལ་པའི་ཀློང་། །སྒོ་ལྔ་ཆོས་དབྱིངས་སྐྱོ་བསངས་པ། །དུག་ལྔ་གང་སྤྱོད་ཡེ་ཤེས་དྲན། །དྲན་དང་མ་དྲན་གཉིས་མེད་མཉམ། །དང་པོ་ངེས་པའི་དོན་རྟོགས་ཕྱིར། །ལྟ་བ་གདེང་ཟིན་དོན་གོ་བས། །གསལ་ནི་བཏབ་དང་མ་བཏབ་མེད། །དེ་ཕྱིར་དང་པོ་རྟོགས་པས་ཆོག །ཡང་ཡང་དྲན་པར་བྱ་དགོས་ན། །ནམ་མཁའི་མཐའ་བཞིན་ཐུག་པ་མེད། །ཡང་དང་ཡང་དུ་ཡེངས་གྱུར་ན། །སངས་རྒྱས་བྱ་བ་འབྱུང་མི་སྲིད། །དེ་ཡང་འདུས་པའི་སྙིང་པོ་ཉོན། །གཉིས་སུ་མེད་ཅེས་བྱ་བ་ནི། །འཁྲུལ་པ་གཞི་ལ་མེད་པའི་ཕྱིར། །ཆོས་རྣམས་ཐམས་ཅད་སྟོང་པའི་ཕྱིར། ། ― DNG002_Page_0176 ―
[མ་དཔེ་གཟིགས་ན་འདིར་གནོན།]
དེ་ལ་དངོས་པོ་ག་ལ་ཡོད། །དེ་ཕྱིར་གང་མེད་དོན་ཤེས་ན། །ཆོས་རྣམས་ཀུན་གྱི་རྩ་བར་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡུལ་སེམས་གཉིས་མེད་ཀློང་བསྟན་པའི་ལེའུ་སྟེ་བརྒྱ་དང་ཞེ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །དེ་ལྟར་མི་ཤེས་མུན་པའི་ཀློང་། །དང་པོ་གདམས་ངག་མེད་པའི་སྐྱོན། །མཉམ་དུ་མི་སྟེར་སྐྱོན་ལྔ་སྟེ། །བྱུང་ཚོར་ཅན་གྱིས་སེམས་གཡེངས་པས། །ཕྱི་རོལ་ལུས་ལ་ཞེན་པའི་ཚེ། །གདམས་ངག་མ་དྲན་རང་རྒྱུད་འཛིན། །གོལ་ས་མ་ཆོད་མ་རིག་ཀློང་། །བྱིང་རྨུགས་གཅོང་གིས་རང་སེམས་རྨོངས། །ཀློང་ཐིམ་མ་ཤེས་གཏི་མུག་སྟེ། །རྨུགས་པའི་དབང་གིས་བསམ་པ་ཉམས། །དེ་ཕྱིར་ཀུན་གཞི་ལུང་མ་བསྟན། །འཛིན་ཆགས་དབང་གིས་ཡུལ་ལ་ཞེན། །དུག་ལྔ་རྒྱས་པས་འདོད་ཆགས་སྐྱེ། །ཇི་ལྟར་ཉོན་མོངས་ཞི་གྱུར་ཀྱང་། །གཉེན་པོས་བཅུན་ཕྱིར་དོན་ལས་གོལ། །ཡོད་མེད་དབུས་ཀྱི་མཐའ་རྣམས་ལ། །གོལ་ས་མ་ཆོད་རང་རྨོངས་པས། །བླང་དོར་ཡོད་མེད་མཐའ་མི་སེལ། །གོལ་སྒྲིབ་ཞེན་པ་མུན་པའི་ཀློང་། །ལུང་ལྡན་ངེས་པའི་དོན་མེད་པས། །བློ་རྒྱ་ཆུང་བས་རི་སུལ་ཕྱིན། །ཆོས་དང་མི་བསྟུན་མི་ཁ་བསྟུན། །བསྒོམ་པ་འཁོར་བའི་བག་ཆགས་བརྟས། །སྔ་ཕྱི་ཡང་ཡང་དྲན་པ་ནི། །བསྒོམ་པ་མེད་པས་དད་པ་ཕོག །ཀུན་ཀྱང་དེ་དང་འདྲ་སྙམ་ནས། །གདམས་ངག་ཅན་ལ་སྐུར་བ་འདེབས། །སྣང་ཞིང་སྲིད་པའི་ཆོས་ཀུན་ནི། །སེམས་སུ་བསྡུས་པའི་འཛིན་པས་འབྱུང་། །གཟུང་བའི་ཡུལ་ལ་ཞེན་པའི་ཕྱིར། །ཉོན་མོངས་རང་རྒྱུད་བློ་མི་འགྱུར། །དེ་ཕྱིར་གཟུང་འཛིན་འཁྲུལ་པའི་ཀློང་། །དེ་ཕྱིར་གྲུབ་མཐར་བློ་མ་འགྱུར། །ད་ཡང་འདུས་པའི་སྙིང་པོ་ཉོན། །གང་ཞིག་མ་རིག་འཁྲུལ་པ་དེ། །གཞི་སྟོང་བདེ་འདོད་ང་རྒྱལ་ཅན། །ཆགས་པ་ཆུང་འདོད་ཀུན་ལ་སྟེར། །གཞན་ལ་རེ་འདོད་ཀུན་ལ་རེ། །ངག་འཇམ་ཁ་གསགས་མཐོ་ལ་ ― DNG002_Page_0177 ―
[མ་དཔེ་གཟིགས་ན་འདིར་གནོན།]
འཇབ། །བྱི་ལའི་ཚུལ་དུ་སྐྱོན་ལ་བསྣོལ། །བཟོད་པ་ཆེ་བར་ཚུལ་བཅོས་ནས། །ཁོང་རྡུག་ཐབས་ངན་སྣ་ཚོགས་བྱེད། །ད་ཡང་རྡོ་རྗེ་སེམས་དཔའ་ཉོན། །སྣང་བ་སེམས་སྡུག་ཡིད་མ་ཆེས། །ཡུལ་སེམས་དེ་ལ་དང་མ་སྤྲོ། །ངེས་མེད་འདི་ཡིས་བསླུས་པའི་ཕྱིར། །སྤྲེ་འདྲའི་ལུང་འདི་གོལ་སར་ངེས། །ཐུན་བསྒོམ་འདི་ལ་ཡིད་མ་ཆེས། །རང་མཆོག་འདི་ལ་དང་མ་སྤྲོ། །གཞི་ནས་བསྒོམ་པས་བསླུ་བར་ངེས། །ཉམས་མྱོང་བློ་ལ་ཞེན་པས་ཕུང་། །ཚུལ་འཆོས་འདི་ལ་ཡིད་མ་ཆེས། །ཐོ་ཅོ་སྤྱོད་ལ་དང་མ་སྤྲོས། །གཡོ་སྒྱུ་འདི་ཡིས་བསླུ་བར་ངེས། །བཅོས་མའི་སྤྱོད་པས་བདག་གཞན་ཕུང་། །རེ་དོགས་འདི་ལ་ཡིད་མ་ཆེས། །སྤངས་ཐོབ་འབྲས་བུ་དང་མ་སྤྲོ། །ཕྱིས་འབྱུང་འདོད་པས་བདག་ཉིད་ཕུང་། །ད་ཡང་རྡོ་རྗེ་སེམས་དཔའ་ཉོན། །དེ་ལྟའི་དུས་ཀྱི་རྣལ་འབྱོར་པས། །རང་ལ་མེད་པར་ཡོད་ཚུལ་འཆོས། །གཞན་གྱི་ཆོས་ལ་སྒྲོ་སྐུར་འདོགས། །ཕྲག་དོག་དབང་གིས་མངའ་རིས་འགོགས། །ང་བསྒོམ་བྱེད་ཟེར་བཤད་ལ་དགའ། །ཕུག་ཏུ་འདུག་ནས་མི་ཁ་གནོན། །ལྟོ་འདུན་ཞེན་པས་ཀུན་ལ་འཁང་། །འཇིག་རྟེན་ཕྲག་དོག་ཀུན་ལ་བྱེད། །སློབ་དཔོན་བས་ཀྱང་ཆེ་བ་སྐད། །ཞེན་པའི་ཉམས་ལ་དམ་པར་འཛིན། །ཐབས་ཀྱི་ཟིལ་གནོན་སྲེད་པ་ཆེ། །ཡོན་བདག་ཕོ་མོ་ཟས་ཀྱིས་བྲིད། །བྱིས་ཕྲུག་ཕོ་མོ་སྒྱུ་མ་ཡི། །འཕྲུལ་སྙིང་སྡུག་དགུའི་རྒྱན་གྱིས་བསླུ། །ད་ཡང་འདུས་པའི་སྙིང་པོ་ཉོན། །དེ་ལྟ་བུ་ཡི་གསེག་ཅན་དེ། །འདིར་ཕུང་ཕྱི་མ་ངན་སོང་ལྟུང་། །དེ་ཕྱིར་སེམས་ཅན་སྙིང་རེ་རྗེ། །བདག་གཞན་གཉིས་ཀ་བསླུ་སྟེ་སྡུག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དེ་ལྟར་མི་ཤེས་གཏི་མུག་ཀློང་བསྟན་པའི་ལེའུ་སྟེ་བརྒྱ་དང་ལྔ་བཅུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །བརྗོད་མེད་ཀློང་ཆེན་བཀའ་སྩལ་པ། །ལྟ་བ་གདེང་ཐོབ་ཉིད་ཀྱི་དབྱིངས། །འབྲས་བུ་སངས་རྒྱས་ ― DNG002_Page_0178 ―
[མ་དཔེ་གཟིགས་ན་འདིར་གནོན།]
ཉིད་ཀྱི་ཀློང་། །སྐལ་ལྡན་རྣམས་ཀྱིས་རྟོགས་བྱའི་ཕྱིར། །རང་བྱུང་རྟོགས་པའི་ཀློང་འདི་བསྟན། །ད་ཡང་རྡོ་རྗེ་སེམས་དཔའ་ཉོན། །ཐ་སྙད་ཀུན་བྲལ་ཆོས་ཉིད་ཀློང་། །མ་འགགས་རང་བྱུང་ཡེ་ཤེས་གསལ། །བརྟགས་ན་ཆོས་སྐུ་ཚིག་དང་བྲལ། །ཚིག་མེད་དོན་ལ་ཆོས་སྐུར་གདགས། །སེམས་རིག་པ་ཡི་བར་དུ་ནི། །ཐོས་པའི་ཤེས་རབ་ཐག་ཆོད་པས། །ལྟ་བ་ཡིད་ཆེས་གདེང་དུ་བལྟ། །དེ་ལྟར་རིག་པ་ཆོས་སྐུ་གསལ། །དེ་ཕྱིར་འདུ་འབྲལ་མེད་ཅེས་བྱ། །ད་ཡང་འདུས་པའི་སྙིང་པོ་ཉོན། །རང་རིག་ཆོས་སྐུའི་ཀློང་དེ་ལ། །བལྟར་མེད་ཚུལ་གྱིས་དོན་བལྟས་ན། །མཐོང་རྒྱུ་མེད་པའི་ཆོས་སྐུ་མཐོང་། །དེ་ཕྱིར་ཡེ་ཤེས་ཀློང་ཞེས་བྱ། །བདེ་གསལ་དོན་ལས་མི་འདའ་ན། །ཆུ་བོའི་རྒྱུན་བཞིན་མ་ཆད་ཕྱིར། །གཞན་ནི་གཟུགས་སྐུ་བཙལ་དུ་མེད། །བྱུང་ཡང་འགྱུར་མེད་ཡེ་ཤེས་ཀློང་། །ད་ཡང་རྡོ་རྗེ་སེམས་དཔའ་ཉོན། །སྤྲོ་བསྡུ་མེད་པའི་བལྟ་བ་ལ། །ཡུལ་སེམས་བསྲེ་བའི་ཞེན་མེད་ཕྱིར། །གཞི་ངེས་ཆོས་སྐུར་རང་ཡིད་ཆེས། །རང་བྱུང་ངེས་དོན་བལྟ་བའི་མཆོག །རྒྱུན་དུ་མི་འབྲལ་བསྒོམ་པ་ལ། །ངང་འཇོག་མི་དགོས་སེམས་མི་འཛིན། །རང་གསལ་ཡེ་ནས་རྒྱུན་མི་ཆད། །ཐེ་ཚོམ་མེད་པར་སྤྱོད་པ་ནི། །གཡོ་སྒྱུ་མེད་པར་དྲང་པོར་བྱེད། །ཚུལ་འཆོས་མེད་པར་རིག་པར་ཤར། །དེ་ཙམ་ཉིད་ན་ཡ་ང་མེད། །བྱ་བཙལ་བྲལ་བའི་འབྲས་བུ་ལ། །རེ་དོགས་མེད་པར་མངོན་དུ་གྱུར་། །ཕྱིས་དུས་མི་ལྟོས་ད་ལྟར་འབྱུང་། །ཡོན་ཏན་འབྲས་བུ་དུས་འདིར་རྫོགས། །བསྲུང་ཉམས་མེད་པའི་དམ་ཚིག་ལ། །ཕྱི་ནང་དོན་གྱི་དཀོན་མཆོག་གསུམ། །མི་སྐུར་མི་ཡངས་མི་བྲལ་བ། །རྣལ་འབྱོར་པ་ལ་ཤིན་ཏུ་གཅེས། །དེ་ཡི་ཡོན་ཏན་གདུལ་བྱ་ཡང་། །མ་རིག་སངས་ལ་ཡོན་ཏན་རྒྱས། །གཞན་དོན་ཕྲིན་ལས་ཤུགས་ལ་འབྱུང་། །དེ་ཕྱིར་ཆོས་རྣམས་ལྷུན་གྱིས་གྲུབ། །ད་ཡང་འདུས་པའི་སྙིང་པོ་ཉོན། ། ― DNG002_Page_0179 ―
[མ་དཔེ་གཟིགས་ན་འདིར་གནོན།]
དེ་དག་རྩ་བ་ཆོས་སྐུ་ལ། །སྤྲོ་བསྡུ་ཐམས་ཅད་ཆོས་ཉིད་ཀློང་། །དེ་རུ་མ་འདུས་གང་ཡང་མེད། །དེ་ཕྱིར་རང་བྱུང་འགྱུར་མེད་ཀློང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བརྗོད་མེད་རང་བྱུང་གསལ་བའི་ཀློང་བསྟན་པའི་ལེའུ་སྟེ་བརྒྱ་དང་ང་གཅིག་པའོ།། །།དེ་ནས་ཀུན་རིག་སྟོན་པ་ཡིས། །ཡང་ནི་འདུས་པའི་འཁོར་རྣམས་ལ། །རང་ཡན་འཛིན་མེད་བཀའ་སྩལ་པ། །དོན་ཉིད་རྟོགས་པའི་ངང་དེ་ལ། །དབང་པོ་རང་ཡན་གཏང་གྱུར་ཀྱང་། །གཟུང་འཛིན་མེད་པར་རང་གསལ་བ། །འགྱུར་ཕྱིར་མེད་པ་བརྗོད་མེད་ཀློང་། །དེ་ཡང་འདུས་པའི་སྙིང་པོ་ཉོན། །མ་ནོར་ཆོས་སྐུ་ཏིང་འཛིན་ལ། །བདེན་པའི་ཚིག་ལས་འདས་པ་ཡིས། །རང་བཞིན་གདོད་ནས་མ་སྐྱེས་ཕྱིར། །འཁོར་འདས་ཐ་སྙད་ཚིག་གི་ཡུལ། །སེམས་དང་བྲལ་བ་ངེས་པའི་གདེང་། །ཡུལ་དང་བྲལ་དེ་བདེ་ཡིས་མཚོན། །རྣམ་རྟོག་ཡིད་དང་བྲལ་བའི་ཕྱིར། །ལུང་དང་ལྡན་པའི་ཚད་མ་ཀློང་། །མ་རིག་འཇིག་ཚོགས་རི་བོ་ལ། །དེ་འཇོམས་ཤེས་རབ་ཀློང་དུ་གདལ། །དེ་ཕྱིར་གདམས་ངག་སྙིང་པོ་ལྡན། །གྲོལ་ཐར་གཞན་ནས་བཙལ་མི་དགོས། །རེ་དོགས་བྲལ་བ་འབྲས་བུ་ལ། །དང་པོ་ངེས་པའི་གདེང་རྙེད་ན། །དྲེལ་དང་ཡེངས་པ་ཅི་བྱུང་ཡང་། །ཐ་མལ་སེམས་སུ་འགྲོ་མི་སྲིད། །ད་ཡང་རྡོ་རྗེ་སེམས་དཔའ་ཉོན། །སེམས་ཉིད་ཀློང་ན་རིག་པ་འཕྱོ། །རྣམ་རྟོག་མཚན་མ་རང་སར་གྲོལ། །དུག་ལྔ་བྱ་བའི་མིང་ཡང་མེད། །ལྟ་བ་ཐག་ཆོད་བློ་རེ་བདེ། །བསྒོམ་མེད་ཀློང་ན་འབྲལ་མེད་འཕྱོ། །བྱིང་རྒོད་མཚན་མ་རང་སར་གྲོལ། །མཉམ་བཞག་རྗེས་ཐོབ་མིང་ཡང་མེད། །བསྒོམ་པའི་གདེང་རྙེད་བློ་རེ་བདེ། །བྱར་མེད་ཀློང་ན་ཤུགས་འབྱུང་འཕྱོ། །བློ་དངོས་མཚན་མ་རང་སར་གྲོལ། །རྩོལ་བསྒྲུབ་བྱ་བ་མིང་ཡང་མེད། །སྤྱོད་པ་ལ་དོར་བློ་རེ་བདེ། །སྐྱེ་མེད་ཀློང་ན་འཆི་མེད་འཕྱོ། །རེ་དོགས་མཚན་མ་རང་སར་གྲོལ། །འདི་དང་ཕྱི་མའི་མིང་ཡང་མེད། ། ― DNG002_Page_0180 ―
[མ་དཔེ་གཟིགས་ན་འདིར་གནོན།]
འབྲས་བུ་ངེས་ཐོབ་བློ་རེ་བདེ། །ད་ཡང་འདུས་པའི་སྙིང་པོ་ཉོན། །དེ་ལྟར་རྟོགས་པའི་རྣལ་འབྱོར་པས། །དབང་པོ་རང་ཡན་སྐྱོ་ངལ་བསངས། །རང་སེམས་འཕྱོ་བའི་ཡེ་ཤེས་ཀློང་། །གང་ན་འདུག་ཀྱང་ཆོས་ཀྱི་དབྱིངས། །དང་པོ་ངེས་པའི་ལུང་ལྡན་ཕྱིར། །ཡང་དང་ཡང་བསམ་མི་དགོས་པས། །གཞི་ཤེས་དྲན་པ་བརྟེན་དུ་མེད། །དེ་ཕྱིར་ངེས་པའི་ལུང་ལྡན་ལ། །ཐ་མལ་འཁོར་བ་མིང་ཡང་མེད། །འཁོར་བ་བྱ་བ་ཀ་ནས་དག །འཁྲུལ་པ་བྱ་བ་གདོད་ནས་མེད། །ད་ཡང་འདུས་པའི་སྙིང་པོ་ཉོན། །དེ་དག་ཀུན་གྱི་རྩ་བ་སྟེ། །སེམས་ལས་འདས་པའི་རིག་པ་འདི། །རང་བྱུང་ཆོས་སྐུར་ཤེས་པ་ལས། །གཞན་ནས་བསྒྲུབ་ཅིང་བཙལ་དུ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རང་སྣང་འཛིན་མེད་ཀློང་བསྟན་པའི་ལེའུ་སྟེ་བརྒྱ་དང་ང་གཉིས་པའོ། །སྡོམ་དུ་བསྡུས་ཏེ་བསྟན་པ་སུམ་ཅུ་ཐམ་པའོ།། །།དེ་ནས་རྡོ་རྗེ་སེམས་དཔའ་ཡིས། །དད་ལྡན་འཁོར་ལ་ཕན་གདགས་ཕྱིར། །ཀུན་རིག་སྟོན་པ་ཆོས་རྗེ་ལ། །བདེན་པའི་ཡིད་ཀྱིས་འདི་སྐད་གསོལ། །འབྲལ་མེད་རིག་སྤྱོད་རྒྱུན་དུ་ནི། །བདེ་བ་ཡེ་ཤེས་རྐྱེན་ཐུབ་དང་། །སྡུག་བསྔལ་ཞི་བྱེད་རྐྱེན་ཐུབ་དང་། །བཏང་སྙོམས་ལྷག་མཐོང་རྐྱེན་ཐུབ་དང་། །རྨི་ལམ་ཀློང་ཐིམ་རྐྱེན་ཐུབ་དང་། །དུག་ལྔ་རང་གྲོལ་རྐྱེན་ཐུབ་དང་། །སྐྱེ་བ་མི་ལེན་རྐྱེན་ཐུབ་རྣམས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །བདེ་བ་ཡེ་ཤེས་རྐྱེན་ཐུབ་པ། །ཕྱི་ནང་གསང་བའི་དུས་གསུམ་དུ། །ངེས་དོན་གདམས་ངག་མ་ནོར་བ། །གོལ་མེད་ཤེས་ཕྱིར་རྐྱེན་རྣམས་ཐུབ། །ད་ཡང་རྡོ་རྗོ་སེམས་དཔའ་ཉོན། །དང་པོ་རིག་སྤྱོད་དབྱེ་བའི་ཕྱིར། །རྒྱུ་དང་གོལ་ས་གདམས་ངག་དང་། །ཉམས་དང་ལ་ཟློ་འབྲས་བུ་སྟེ། །རེ་རེ་ལ་ནི་དྲུག་དྲུག་སྟེ། །ཕྱེ་ལ་བསྟན་གྱིས་ཡིད་ལ་ཟུང་། །འདུ་འཛི་ལོངས་སྤྱོད་བདེ་ ― DNG002_Page_0181 ―
[མ་དཔེ་གཟིགས་ན་འདིར་གནོན།]
བ་ནི། །ཡོ་བྱད་རྣམ་པ་གསུམ་པོ་སྟེ། །འདོད་ཡོན་ལྔ་ལ་རང་རྒྱུད་ཞེན། །གང་མཐོང་མ་འཁྲུལ་དོན་ཤེས་པས། །གང་ཡང་མྱོང་བར་རིག་པར་ཤེས། །བདག་གཞན་གཞི་ལ་མ་གྲུབ་པས། །བདེ་བ་ལོངས་སྤྱོད་ཆོས་ཉིད་རྒྱན། །ཕྱི་ནི་ལོངས་སྤྱོད་ཆེ་བ་སྟེ། །བདག་གཞན་གཉིས་ཀྱི་ཟས་ནོར་ལ། །འདོད་ཡོན་ལྔ་ལ་ཆགས་ཤིང་ཞེན། །ཆགས་སྡང་དབང་གིས་འཁོར་བར་ལྟུང་། །དེ་མིན་གོལ་བའི་གདམས་ངག་གཞི། །གཞན་གྱི་ལོངས་སྤྱོད་མཐོང་བའི་ཚེ། །ཆོས་བརྒྱད་མ་ཞེན་ལྷག་མཐོང་གསལ། །དེ་ཕྱིར་ཡེ་ཤེས་རྐྱེན་ཐུབ་མཆོག །བདག་ཉིད་འདུ་འཛི་ལོངས་སྤྱོད་ཚེ། །ཆོས་སྐུ་མ་བརྗེད་གཟུངས་ལྡན་ཕྱིར། །སྣང་བས་མི་གནོད་ཞེན་མེད་པར། །མྱུར་བྱུང་གང་དྲན་ལྟ་བར་ཤེས། །དེ་ཉིད་ངེས་དོན་ལ་བཟླ་ན། །གཡེངས་པ་རང་སར་གྲོལ་བའི་ཕྱིར། །ཅིར་སྣང་གཞི་ལ་མ་གྲུབ་ཤེས། །ཀུན་བཟང་དགོངས་པ་ཆོས་ཀྱི་དབྱིངས། །ད་ཡང་རྡོ་རྗེ་སེམས་དཔའ་ཉོན། །གང་ཟག་བདག་མེད་ཆོས་བདག་མེད། །འཇིག་རྟེན་མི་གཡོའི་བདེ་བ་གསུམ། །རྐྱེན་ཐུབ་བྱ་ཕྱིར་གདམས་ངག་དགོས། །ད་ཡང་འདུས་པའི་སྙིང་པོ་ཉོན། །གང་ཞིག་བདེ་བའི་རྐྱེན་ཐུབ་གྲངས། །བལྟ་མེད་ཞི་གནས་འགོག་པ་ལ། །བདག་མེད་མི་གཡོ་རྣམ་པ་གསུམ། །རང་ཡན་ལྷག་མཐོང་མི་བརྗེད་གཟུངས། །མཐའ་བྲལ་ཤེས་གསལ་གདེང་གིས་ཟིན། །བདག་ཉིད་དོན་ལ་མེད་པར་ཤེས། །དེ་ཉིད་བདེ་གསལ་ཡེ་ཤེས་སྐུ། །ད་ཡང་འདུས་པའི་སྙིང་པོ་ཉོན། །ཉན་ཐོས་རང་རྒྱལ་མདོ་སྡེ་ནི། །གང་ཟག་བདག་མེད་བདེ་བ་ནི། །སྒོ་བཀག་སེམས་ལ་དབུགས་བསྡུས་ནས། །རྒྱུ་བ་རྒྱུན་ཆད་འདུ་ཤེས་མེད། །དེར་མི་གོལ་བའི་གདམས་ངག་ནི། །སྒོ་ལྔ་རང་གསལ་ལྷག་མཐོང་དྲན། །མ་བརྗེད་གཟུངས་ལྡན་ཡེ་ཤེས་གདེང་། །འགོག་པར་མི་གོལ་རྐྱེན་རྣམས་ཐུབ། །དེ་དོན་མན་ངག་ལ་བཟླ་ན། །གསལ་ལ་མི་རྟོག་ཤེས་པ་ཙམ། །དེ་ཉིད་གོལ་མེད་ཆོས་ཉིད་དུ། །རང་བྱུང་ཆོས་སྐུར་རྟོགས་པས་མཆོག ། ― DNG002_Page_0182 ―
[མ་དཔེ་གཟིགས་ན་འདིར་གནོན།]
ད་ཡང་འདུས་པའི་སྙིང་པོ་ཉོན། །ཆོས་ལ་བདག་མེད་བདེ་བ་དེ། །དབུ་མ་སེམས་ཙམ་བསྒོམ་པ་དེ། །སེམས་སྡུད་སྟོང་པ་རེས་འཇོག་བྱེད། །དེ་ཕྱིར་གོལ་མེད་ཆོས་ཉིད་མིན། །དེར་མི་གོལ་བའི་གདམས་ངག་ནི། །མི་སྡུད་མི་གཞིག་ཞེན་མེད་པས། །གཉིས་མེད་དུ་ནི་མི་བསྲེ་བར། །ཡུལ་སེམས་མེད་པའི་ཡེ་ཤེས་གསལ། །དེ་ཡིས་དེ་ཉིད་ལ་བཟླས་ན། །ཡུལ་མེད་རིག་པ་ཆོས་སྐུར་ཤེས། །གཞི་ལ་འཁོར་བ་མེད་པའི་ཕྱིར། །རྟོགས་པ་མངོན་གྱུར་ད་ལྟ་ཉིད། །ད་ཡང་འདུས་པའི་སྙིང་པོ་ཉོན། །དགའ་བདེ་མི་གཡོའི་འཇིག་རྟེན་ན། །གཟུགས་ཁམས་ལྷ་ཡི་ཞི་གནས་ཏེ། །བསམ་གཏན་རོ་ལ་མངོན་ཞེན་པས། །ལྷག་མཐོང་མེད་ཕྱིར་ཆོས་སྐུ་བསྒྲིབས། །དེར་མི་གོལ་བའི་གདམས་ངག་ནི། །ལུང་བསྟན་གདེང་གིས་ཟིན་པའི་ཕྱིར། །ཤན་འབྱེད་ངེས་ཟིན་ཡིད་ཆེས་པས། །བདེ་ལ་ཞེན་མེད་ཆོས་སྐུར་གསལ། །དེ་ཉིད་ངེས་པའི་ལ་བཟླ་ཕྱིར། །འགལ་རྐྱེན་མི་འབྱུང་ཡེ་ཤེས་གསལ། །དེ་ཕྱིན་དགའ་བདེ་འཇིག་རྟེན་བདེ། །གདམས་ངག་གདེང་གི་རྐྱེན་ཐུབ་མཆོག །ད་ཡང་རྡོ་རྗེ་སེམས་དཔའ་ཉོན། །ཕོ་མོ་བདེ་བའི་གྲངས་བསྟན་པ། །འགྲོ་བ་བཟང་མོར་ཡིད་ཆགས་པས། །ཐབས་ལམ་རང་རྒྱུད་ཚོགས་སྤྱོད་གོལ། །སྔ་ཕྱི་མ་སོང་དོན་ཟིན་པའི། །དེ་ཚེ་བདེ་བ་མཐར་མ་ལྟུང་། །ཕོ་མོ་གཞི་ནས་གྲུབ་པ་མེད། །ལུས་བདེ་ལོངས་སྤྱོད་རིག་པའི་སྐུ། །གསལ་བ་ལུས་ཀྱི་བདེ་བ་ནི། །ཐ་མལ་ཕོ་མོའི་བདེ་བ་དང་། །དབང་གི་ཐབས་ཀྱི་བདེ་བ་དང་། །རྟོགས་པ་གདེང་ཟིན་བདེ་བ་ཀུན། །རྐྱེན་ཐུབ་བྱ་ཕྱིར་གདམས་ངག་དགོས། །ད་ཡང་འདུས་པའི་སྙིང་པོ་ཉོན། །སྐྱེ་བོ་རང་རྒྱུད་ཆགས་སེམས་ཀྱིས། །ཕོ་མོ་འཁྲིག་པ་སྤྱོད་པ་ནི། །ཞེན་པ་ཡོད་ཕྱིར་འཁོར་བའི་རྒྱུར། །དེ་ཕྱིར་ངེས་དོན་གོལ་བར་གསུངས། །ཐབས་ཀྱིས་ཟིན་པའི་བདེ་བ་ཡང་། །ཤེས་རབ་ཡེ་ཤེས་དབང་ཡིན་ཏེ། །རྒྱུ་རྐྱེན་ཐབས་ཀྱིས་བྱས་པའི་ཕྱིར། །དཔེ་རུ་མཚོན་དང་དོན་ལས་གོལ། །བལྟ་བ་རྟོགས་པའི་གདེང་ཟིན་པས། །ཕོ་མོ་འདོད་ཆགས་ཅི་སྤྱད་ཀྱང་། །སྔ་ཕྱི་མ་སོང་དོན་དྲན་ཕྱིར། ། ― DNG002_Page_0183 ―
[མ་དཔེ་གཟིགས་ན་འདིར་གནོན།]
དུས་གསུམ་རྐྱེན་ཐུབ་ཉིད་ལས་མེད། །དེ་ཡང་འདུས་པའི་སྙིང་པོ་ཉོན། །ཐབས་ལམ་ཐབས་དང་གདེང་ཟིན་ཀུན། །བསྲུང་མ་ལྔ་ཡིས་བསྲུངས་པ་ལ། །རྣལ་འབྱོར་བློ་ལྡན་རྣམས་ཀྱིས་ཀྱང་། །ནམ་ཡང་སྤྱོད་པར་མ་གསུངས་སོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བདེ་བ་ཡེ་ཤེས་རྐྱེན་ཐུབ་པར་བསྟན་པའི་ལེའུ་སྟེ་བརྒྱ་དང་ང་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །སྡུག་བསྔལ་ཞི་བྱེད་བཀའ་སྩལ་པ། །སེམས་ཅན་ཀུན་ལ་གནས་པ་ཡི། །སྤྱི་དང་སྡུག་བསྔལ་ཕྱི་ནང་ཀུན། །མ་རིག་རྒྱུ་ལས་འབྱུང་བའི་ཕྱིར། །གདམས་ངག་ངེས་པར་རྐྱེན་ཐུབ་དགོས། །ད་ཡང་འདུས་པའི་སྙིང་པོ་ཉོན། །ཕྱི་ཡི་ལུས་ཀྱི་སྡུག་བསྔལ་གྲངས། །ནད་ནི་བཞི་བརྒྱ་རྩ་བཞི་ལ། །ཡེ་འདྲོག་འཁང་བ་རྣམ་གསུམ་ཡིན། །གང་ལ་ལྷག་མཐོང་དོན་ཟིན་པས། །དེ་ཚེ་མཐའ་བྲལ་ཆོས་སྐུར་མྱོང་། །ལུས་དང་ན་ཚ་གཞི་ལ་མེད། །སྡུག་བསྔལ་དེ་ཉིད་སྤྲུལ་སྐུར་ཤར། །ཕྱི་ནི་ལུས་ཀྱི་སྡུག་བསྔལ་ཏེ། །ནད་ནི་བཞི་བརྒྱ་རྩ་བཞི་ཡང་། །འདུ་བ་རྣམ་བཞིའི་ནད་དུ་འདུས། །སྡུག་བསྔལ་སྣ་ཚོགས་བསྐྱེད་པར་བྱེད། །དེ་ཚེ་གཉེན་དང་ལས་དང་ལྷ། །མ་རིག་རྨོངས་པ་ཀུན་ལ་མཁས། །འཁོར་བའི་ཉེས་སྐྱོན་ཡིན་པའི་ཕྱིར། །རང་བྱུང་མ་ཡིན་གོལ་སར་བཤད། །དེ་ཕྱིར་མི་གོལ་གདམས་ངག་ནི། །ན་ཚ་ལུས་ཀྱིས་བཟོད་དཀའ་བ། །འཁང་གཞི་མེད་པའི་རང་སེམས་ཀྱིས། །གང་ན་བློ་ཡིས་མི་གཟུང་བར། །ཕྱིར་མ་གཏང་དང་ད་ལྟ་བ། །ལྷག་མཐོང་དྲན་པའི་ཡེ་ཤེས་ཀྱིས། །ནད་དེ་ཡང་ནི་ཆོས་སྐུར་ཤེས། །སྡུག་བསྔལ་རང་བཞིན་རྐྱེན་རྣམས་ཐུབ། །དེ་ཉིད་ལ་བཟླ་ངེས་པ་ནི། །ན་ཚ་དྲག་པོ་ཅི་བྱུང་ཡང་། །སྔ་ཕྱིའི་ལས་དང་རྐྱེན་ཡིན་པས། །གང་ཡང་མི་བསམས་མི་མནོ་བར། །ལུས་ལ་རང་བཞིན་མེད་ཤེས་ཕྱིར། །བདེ་དང་སྡུག་མེད་སྨོས་ཅི་དགོས། །ད་ཡང་རྡོ་རྗེ་སེམས་དཔའ་ཉོན། །སེམས་ཀྱི་སྡུག་བསྔལ་གྲངས་ ― DNG002_Page_0184 ―
[མ་དཔེ་གཟིགས་ན་འདིར་གནོན།]
གཟུང་བ། །ཆགས་སྡང་རྣམས་ཀྱིས་ཡིན་པའི་ཕྱིར། །གོལ་ས་སྐྱོན་བཞི་དམ་པར་ཞེན། །མི་གཞིག་མི་བསམ་དྲན་པས་ཟིན། །གང་ལ་ཞེན་ཙམ་རིག་པས་གཟིར། །དེ་ཙམ་ཉིད་ན་གཞི་ལ་མེད། །དེ་ཚེ་སྡུག་བསྔལ་སྤྲུལ་པར་ཤེས། །རང་གིས་སྡུག་བསྔལ་འབྱུང་བ་ནི། །བྱམས་བྲལ་སྡང་ཕྲད་དོགས་པ་དང་། །ཡོད་སྐྱོང་མེད་ཚོལ་ཞེན་པ་ཀུན། །རང་རྒྱུད་སྐྱེ་བོར་གོལ་བར་གསུངས། །དེར་མེ་གོལ་པའི་གདམས་ངག་ནི། །ནང་གི་སྡུག་བསྔལ་རྣམ་བཞི་ལ། །མིང་བསམ་གཞི་ལ་མེད་པའི་ཕྱིར། །ལུས་སེམས་བར་དོ་རྐྱེན་རྣམས་ཐུབ། །དེ་དོན་ངེས་པར་ལ་བཟླ་ན། །གང་ཡང་གཞི་ལ་མེད་ཤེས་པས། །ལྷག་མཐོང་དེ་ཉིད་རང་སར་གྲོལ། །ཞེན་མེད་ཆོས་བརྒྱད་རྐྱེན་རྣམས་ཐུབ། །ད་ཡང་རྡོ་རྗེ་སེམས་དཔའ་ཉོན། །ཕྱི་ཡི་སྡུག་བསྔལ་རྣམ་བཞི་པོ། །མ་རིག་རྐྱེན་བཞིས་བསྐྱེད་པ་ཡིན། །ཉོན་མོངས་བག་ཆགས་བསམ་པས་གོལ། །སྔ་ཕྱི་མེད་ཤེས་གདམས་ངག་གིས། །མཚན་ཉིད་བཞི་ལྡན་ཉམས་སུ་མྱོང་། །གཞི་ལ་སྔ་ཕྱི་དོན་ལ་མེད། །དེ་ཕྱིར་འབྲས་བུ་ཆོས་ཀྱི་སྐུ། །ད་ཡང་རྡོ་རྗེ་སེམས་དཔའ་ཉོན། །ཕྱི་ཡི་སྡུག་བསྔལ་བཞི་འབྱུང་བ། །ལས་དང་རྐྱེན་ལས་སྲིད་པའི་ཕྱིར། །སྐྱེ་རྒ་ན་འཆིའི་རྩ་བ་སྟེ། །མ་རིག་མ་སེལ་སྡུག་བསྔལ་འབྱུང་། །དེར་མི་གོལ་བའི་གདམས་ངག་ནི། །ལུང་ལྡན་ངེས་པར་བསྟན་པ་ཡི། །མ་རིག་རྩ་བའི་ཐོག་མཐའ་ཆོད། །དེ་ཤེས་སྐྱེ་འཆི་རྐྱེན་མེད་ཐུབ། །དེ་ཡང་འདུས་པའི་སྙིང་པོ་ཉོན། །དེ་དག་སྡུག་བསྔལ་རྣམ་པ་གསུམ། །རྩ་བ་མ་རིག་བློས་བྱས་ཕྱིར། །དེ་ཡི་གཉེན་པོ་ལུང་ལྡན་རྐྱེན། །གདམས་ངག་བསྟན་པས་མ་རིག་སངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྡུག་བསྔལ་ཞི་བྱེད་རྐྱེན་ཐུབ་པར་བསྟན་པའི་ལེའུ་སྟེ་བརྒྱ་དང་ང་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །མ་རིག་ལས་བྱུང་ ― DNG002_Page_0185 ―
[མ་དཔེ་གཟིགས་ན་འདིར་གནོན།]
བཏང་སྙོམས་ནི། །ལྷག་མཐོང་གསལ་བར་བཀའ་སྩལ་པ། །བཏང་སྙོམས་རང་ཉིད་རྐྱེན་ཐུབ་གྲངས། །ལེ་ལོ་སྙོམས་པར་ལུང་མ་བསྟན། །བཏང་སྙོམས་ཤེས་རབ་མ་རིག་བསྒྲིབས། །ཤན་ཕྱེད་ངོས་ཟིན་ཡིད་ཆེས་པས། །རང་རིག་འབྲལ་མེད་ཉམས་དང་ལྡན། །མ་རིག་མེད་ཕྱིར་བཏང་སྙོམས་མེད། །ལྷག་མཐོང་འབྲས་བུ་བདེན་པར་མཐོང་། །ད་ཡང་རྡོ་རྗེ་སེམས་དཔའ་ཉོན། །ཤེས་བཞིན་ཀུན་གཞི་ཤེས་པ་གསུམ། །ལུང་མ་བསྟན་ཕྱིར་འཁོར་བའི་རྒྱུ། །དེ་ཕྱིར་མ་རིག་བག་ཉལ་གྱི། །དེ་ནི་ལུང་མེད་གོལ་སར་གསུངས། །ད་ཡང་རྡོ་རྗེ་སེམས་དཔའ་ཉོན། །དང་པོ་ཤེས་བཞིན་ལུང་མ་བསྟན། །ཞི་གནས་མ་རིག་གསུམ་བསྒྲིབས་པས། །འཁོར་བའི་རྩ་བ་དེ་ཡིན་ཕྱིར། །ཆོས་རྣམས་ཀུན་གྱི་གོལ་སར་གསུངས། །དེར་མི་གོལ་བའི་གདམས་ངག་ནི། །ཐོག་མ་རང་བྱུང་ངོ་ཤེས་པར། །མ་རིག་སངས་ལ་ངེས་ལུང་ལྡན། །བཏང་སྙོམས་རྐྱེན་ཐུབ་ལྷག་མཐོང་ལྡན། །དེ་ཉིད་ལ་བཟླས་ཡེ་ཤེས་ནི། །ཐོག་མའི་གཞི་ནི་ངོ་ཤེས་པས། །མ་རིག་རྣམ་གསུམ་ཀ་ནས་དག །འཁོར་བའི་གཞི་ནི་སྐྱེ་མེད་ཕྱིར། །བག་ཆགས་ཉོན་མོངས་སྤྲིན་ལྟར་དེངས། །ད་ཡང་འདུས་པའི་སྙིང་པོ་ཉོན། །གཉིས་པ་ཀུན་གཞི་ལུང་མ་བསྟན། །ལུས་བཅས་འཇིག་རྟེན་ཧད་དེ་བ། །ཞི་གནས་ལྷག་མཐོང་གཉིས་ཀ་མེད། །གཏི་མུག་ཡིན་ཕྱིར་བྱོལ་སོང་རྒྱུ། །དེར་མི་གོལ་བའི་གདམས་ངག་ནི། །ཤན་འབྱེད་ངོ་སྤྲོད་དོན་ཟིན་ན། །དགེ་སྡིག་མ་དྲན་ཆོས་སྐུ་དྲན། །ཐིག་ལེར་རྐྱེན་ཐུབ་ཡེ་ཤེས་ཤར། །དེ་ཉིད་ངེས་པར་ལ་ཟློའི་ཕྱིར། །སྔ་ཕྱིའི་རྟོག་པ་ཀ་ནས་དག །མི་ལུས་འདིར་བརྟེན་ཆོས་སྐུར་ཤེས། །མ་རིག་མེད་པར་རྐྱེན་རྣམས་ཐུབ། །ད་ཡང་རྡོ་རྗེ་སེམས་དཔའ་ཉོན། །བར་དོར་ཤེས་པ་ལུང་མ་བསྟན། །ལུས་མེད་མ་རིག་ཡོད་པའི་ཕྱིར། །རིགས་དྲུག་མེད་ཕྱིར་ཐ་མལ་པ། །བག་ཆགས་རྟེན་བྱེད་འཁོར་བའི་རྒྱུ། །ལུས་ལེན་ཕྱིར་ན་གོལ་སར་གསུངས། །དེར་མི་གོལ་བར་ངས་བསྟན་གྱིས། །དད་པ་མི་ལུས་ལྡན་དུས་སུ། །ཆོས་སྐུ་ ― DNG002_Page_0186 ―
[མ་དཔེ་གཟིགས་ན་འདིར་གནོན།]
ལུང་ལྡན་ཡིད་ཆེས་པས། །གོལ་མེད་རྐྱེན་ཐུབ་འགྱུར་བ་མེད། །དེ་ཉིད་ལ་བཟླས་ངེས་པའི་དོན། །གདམས་ངག་ཤེས་པ་ཙམ་གྱིས་ཀྱང་། །ཡུལ་སེམས་འདས་པའི་ཆོས་སྐུ་འཆར། །རྐྱེན་གྱིས་མི་འགྱུར་ནམ་མཁའ་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སེམས་ཅན་བཏང་སྙོམས་ལྷག་མཐོང་རིག་པའི་ཡེ་ཤེས་སུ་རྐྱེན་ཐུབ་པར་བསྟན་པའི་ལེའུ་སྟེ་བརྒྱ་དང་ང་ལྔ་པའོ།། །།དེ་ནས་ཀུན་རིག་སྟོན་པ་ཡིས། །དད་ལྡན་འདུས་པའི་སྙིང་པོ་ལ། །ཡེ་ཤེས་ཀློང་ཐིམ་བཀའ་སྩལ་པ། །གཉིད་ནི་ཆོས་སྐུ་ཀློང་ཐིམ་གྱིས། །བག་ཉལ་ཞི་གནས་མ་རིག་པས། །རྨི་ལམ་རྣམ་གསུམ་ཡུལ་ལ་ཞེན། །ལྡོག་ཀ་སད་དུས་དེ་ཉིད་ཤེས། །དེ་ཙམ་ཉིད་ན་ཉམས་མྱོང་གསལ། །དོན་ལ་རྨི་ལམ་གྲུབ་མེད་རྟོགས། །འབྲས་བུ་མི་རྟོག་ཆོས་སྐུར་ཤར། །ད་ཡང་འདུས་པའི་སྙིང་པོ་ཉོན། །རྣལ་འབྱོར་དམ་པ་གཉིད་བྱུང་ཚེ། །རྨི་ལམ་དགེ་སྡིག་ལུང་མ་བསྟན། །བག་ཆགས་མཚམས་སྦྱོར་བསྟན་པ་ནི། །རྨི་ལམ་སྣ་ཚོགས་བྱུང་བའི་ཚེ། །ཡེ་ཤེས་ཀློང་ཐིམ་ཤེས་པ་གཅེས། །ད་ཡང་རྡོ་རྗེ་སེམས་དཔའ་ཉོན། །ཚེ་སྟོད་སྔར་བྱས་གང་སྨོས་པ། །བག་ཆགས་ཡིན་པར་མ་ཤེས་པས། །དེ་རྗེས་དྲན་པའི་བློ་བཞག་ཕྱིར། །དེ་ལ་ཞེན་ཕྱིར་གོལ་བར་གསུངས། །འདི་ལ་མ་མཐོང་བྱེད་པོ་མྱོང་། །གང་རྨིས་མཚམས་སྦྱོར་དོན་མ་ཤེས། །བག་ལ་ཉལ་གྱི་མ་རིག་པར། །ཞེན་པའི་རྟོག་པ་སྣ་ཚོགས་འབྱུང་། །འཇིག་རྟེན་ལྷ་ཡི་ལུང་བསྟན་པ། །བཟང་ངན་གང་རྨིས་བདེན་པར་བྱེད། །དམ་པར་བལྟས་ན་བདུད་ཡིན་ཕྱིར། །ཞེན་པའི་དབང་གིས་རྐྱེན་མི་ཐུབ། །ད་ཡང་འདུས་པའི་སྙིང་པོ་ཉོན། །དེར་མི་གོལ་བའི་གདམས་ངག་ནི། །རྨི་ལམ་རྣམ་གསུམ་གང་བྱུང་ཡང་། །བག་ཆགས་མཚམས་སྦྱོར་ལུང་བསྟན་པ། །སྔོན་གྱི་བག་ཉལ་ཡིན་ཤེས་པས། །དེ་རྗེས་མི་བཅད་ཆོས་སྐུར་དྲན། ། ― DNG002_Page_0187 ―
[མ་དཔེ་གཟིགས་ན་འདིར་གནོན།]
ཡེ་ཤེས་ཀློང་དུ་རྐྱེན་རྣམས་ཐུབ། །དེ་ཉིད་སེམས་པར་ལ་བཟླས་ན། །ལྡོག་ཀ་སད་ཀའི་དུས་དག་ཏུ། །གང་རྨིས་རྗེས་ནི་མི་བཅད་པར། །ཡེ་ཤེས་རིག་པ་རང་གསལ་གྱིས། །ཆོས་སྐུ་དྲན་པའི་ངང་བཞག་ན། །ཞེན་ལོག་རྐྱེན་ཐུབ་ཡེ་ཤེས་ཀློང་། །ད་ཡང་འདུས་པའི་སྙིང་པོ་ཉོན། །དེ་དག་གདམས་ངག་མདོར་བསྡུས་ན། །རྣལ་འབྱོར་དམ་པ་གཉིད་སད་ཚེ། །གང་གི་རྟོགས་པ་མ་ཞུགས་ནས། །ངེས་དོན་ཆོས་སྐུའི་དོན་དྲན་པས། །དེ་ཉིད་རྐྱེན་ཐུབ་ཆོས་སྐུར་གནས། །དེ་ཕྱིར་གདམས་ངག་དྲན་པར་གཅེས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གཉིད་ཡེ་ཤེས་ཀློང་ཐིམ་དུ་རྐྱེན་ཐུབ་པར་བསྟན་པའི་ལེའུ་སྟེ་བརྒྱ་དང་ང་དྲུག་པའོ།། །།དེ་ནས་འདུས་པའི་དད་ལྡན་ལ། །ཀུན་རིག་སྟོན་པ་ཆོས་རྗེ་ཡིས། །སྡུག་བསྔལ་རང་གྲོལ་བཀའ་སྩལ་པ། །གཏི་མུག་ཞེ་སྡང་འདོད་ཆགས་དང་། །ང་རྒྱལ་ཕྲག་དོག་སྡུག་བསྔལ་ལ། །མན་ངག་རྩི་ཡིས་ཐེབས་པ་ཡིས། །དུག་ལྔ་རང་གྲོལ་རྐྱེན་ཐུབ་བྱ། །ད་ཡང་འདུས་པའི་སྙིང་པོ་ཉོན། །གཏི་མུག་གིས་ནི་རང་སེམས་འཐིབས། །དཔྱད་ཀྱང་མ་ཤེས་གཞི་ལ་འཆོལ། །ཉི་མ་སྤྲིན་གྱིས་བསྒྲིབས་པ་འདྲ། །གང་ཡང་མ་རིག་འཁོར་བའི་རྒྱུ། །དེར་མི་གོལ་བའི་གདམས་ངག་ནི། །ལུང་བསྟན་མ་རིག་རྩད་ནས་གཅོད། །ངོ་བོ་ཆོས་ཉིད་རིག་པར་ཤར། །མ་རིག་མེད་པས་གཏི་མུག་སངས། །དེ་ཉིད་ལ་བཟླ་ངེས་པའི་དོན། །གཏི་མུག་མེད་པས་ཡེ་ཤེས་རྒྱས། །འཁོར་བ་འབྱུང་བ་རྩད་ནས་བཅོམ། །ཡེ་ཤེས་སྒྲོན་མ་ཉི་ཤར་འདྲ། །ད་ཡང་རྡོ་རྗེ་སེམས་དཔའ་ཉོན། །ཞེ་སྡང་གིས་ནི་སེམས་འཁྲུགས་པ། །ཡུལ་མེད་ཁ་དོག་དབྱིབས་ལ་ནི། །མནར་སེམས་ངན་པས་ཞེ་སྡང་སྐྱེད། །དེ་ལ་ཞེན་པས་རང་རྒྱུད་གོལ། །དེར་མི་གོལ་བའི་གདམས་ངག་ནི། །སྒྲ་ལ་མི་བསམ་རྗེས་མི་བཅད། །ཆོས་སྐུ་དྲན་པས་ཞེ་སྡང་བྲལ། །ལོག་ནོན་དྲན་པས་རང་སར་གྲོལ། །དེ་ཉིད་ངེས་པར་ལ་བཟླ་ན། །བདག་གཞན་གཞི་ ― DNG002_Page_0188 ―
[མ་དཔེ་གཟིགས་ན་འདིར་གནོན།]
ལ་མེད་ཤེས་པས། །ཞེ་སྡང་ཡུལ་མེད་རྐྱེན་ཐུབ་ཕྱིར། །མ་གི་ཏ་ལ་གང་རེག་འདྲ། །ད་ཡང་འདུས་པའི་སྙིང་པོ་ཉོན། །འདོད་ཆགས་ཀྱིས་ནི་སེམས་བསྡུས་པ། །ཞེན་པའི་དབང་གིས་ཡང་ཡང་གོལ། །གདེང་མེད་འཁོར་བ་བསྐྱེད་པའི་ཕྱིར། །གང་ལ་ཆགས་པས་ལྟུང་ཕྱིར་གོལ། །དེ་ཕྱིར་གོལ་བ་སེམས་པའི་དོན། །ལུང་ལྡན་ངེས་པའི་གདམས་ངག་གིས། །སྔ་ཕྱིར་མ་སོང་ཆོས་སྐུར་དྲན། །ཕོ་མོ་ཆགས་པ་ཅི་སྤྱད་ཀྱང་། །རྐྱེན་གྱིས་མ་གོས་པདྨ་འདྲ། །དེ་ཉིད་ངེས་པར་ལ་བཟླ་ན། །རྨི་ལམ་འཆལ་མེད་འདོད་ཆགས་བཞིན། །ལུས་ལ་ཕོ་མོ་ཡོད་མོད་ཀྱང་། །སེམས་ལ་ཕོ་མོ་མེད་ཤེས་ཕྱིར། །དེ་ཕྱིར་བདེ་བ་ཆོས་ཉིད་གྲོགས། །ད་ཡང་རྡོ་རྗེ་སེམས་དཔའ་ཉོན། །ང་རྒྱལ་ཀྱིས་ནི་སེམས་རེངས་པ། །བདེ་བ་གཞན་མེད་རྨོངས་པ་བདེ། །མཐོང་རྒྱ་མེད་པར་ང་རྒྱལ་ཆེ། །དེ་ལ་བརྟེན་ཕྱིར་ཉོན་མོངས་འབྱུང་། །དེར་མི་གོལ་བའི་ངེས་དོན་ནི། །གཞི་ལ་མཐོ་དམན་ཆེ་ཆུང་མེད། །བལྟ་བ་དྲན་པས་ང་རྒྱལ་བརླག །ང་རྒྱལ་རང་གྲོལ་རྐྱེན་རྣམས་ཐུབ། །དེ་ཉིད་ངེས་པར་ལ་བཟླ་ན། །ཆོས་སྐུ་གསལ་བའི་ང་རྒྱལ་གྱིས། །ལྷག་མཐོང་རིག་པའི་རྟོག་པ་འཆར། །རི་བོ་ཆེན་པོའི་ཁར་ཕྱིན་འདྲ། །ད་ཡང་རྡོ་རྗེ་སེམས་དཔའ་ཉོན། །ཕྲག་དོག་གཡོ་སྒྱུས་གནོད་བྱེད་པ། །གཞན་གྱི་ཡོན་ཏན་མ་རྟོགས་ནས། །ཐབས་ཀྱིས་སྨད་ཐབས་སྣ་ཚོགས་བྱེད། །ངན་སེམས་ལྡན་པ་མནར་མེད་ལྟུང་། །དེར་མི་གོལ་བའི་ངེས་དོན་ནི། །མ་རིག་མེད་པའི་དོན་ཤེས་ཕྱིར། །ཕྲག་དོག་ཡུལ་མེད་རྐྱེན་ཐུབ་ཕྱིར། །རང་བྱུང་རིག་པའི་ཡེ་ཤེས་གསལ། །དེ་ཉིད་ངེས་པར་ལ་བཟླ་ན། །ངེས་དོན་ཤེས་པས་གཏི་མུག་བྲལ། །རང་རིག་བརྟན་པས་ཞེ་སྡང་བྲལ། །བདེ་ལ་ཞེན་མེད་འདོད་ཆགས་བྲལ། །ཡིད་ཆེས་འཛིན་མེད་ང་རྒྱལ་བཅོམ། །ངེས་ལུང་དྲན་པས་ཕྲག་དོག་བྲལ། །ད་ཡང་རྡོ་རྗེ་སེམས་དཔའ་ཉོན། །དེ་དོན་གདམས་ངག་མདོར་བསྡུས་ན། །དུག་ལྔ་རང་ ― DNG002_Page_0189 ―
[མ་དཔེ་གཟིགས་ན་འདིར་གནོན།]
གྲོལ་རྐྱེན་ཐུབ་ཚེ། །སྒྲོ་སྐུར་གཉིས་ཀྱི་རྟོག་མེད་པས། །དུག་ལྔ་རང་གྲོལ་ཀུན་རྟོག་མེད། །དེ་ཕྱིར་ཆོས་སྐུའི་སྙིང་པོར་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། དུག་ལྔ་རང་གྲོལ་རྐྱེན་ཐུབ་པར་བསྟན་པའི་ལེའུ་སྟེ་བརྒྱ་དང་ང་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །བར་དོ་རྐྱེན་ཐུབ་བཀའ་སྩལ་པ། །ངེས་དོན་རྟོགས་པའི་རྣལ་འབྱོར་ལ། །དུས་ཀྱི་ཐ་མ་བྱུང་བའི་ཚེ། །སྣང་བ་སྐྱེ་དང་མཆེད་པ་དང་། །སྣང་བ་འགྱུར་མེད་འབྱུང་བའི་ཚེ། །ལུང་བསྟན་ངེས་པའི་གདམས་ངག་གིས། །བར་དོར་སྐྱེ་བ་མི་ལེན་པའི། །རྐྱེན་ཐུབ་འབྲས་བུ་སངས་རྒྱས་འབྱུང་། །ད་ཡང་འདུས་པའི་སྙིང་པོ་ཉོན། །སྲིད་པའི་བར་དོ་རྣམ་ལྔ་ལ། །མ་རིག་འཁྲུལ་པའི་བར་དོ་དང་། །ཀུན་བརྟགས་གྱེས་པའི་བར་དོ་དང་། །གནས་འགྱུར་ལྷ་ཡི་བར་དོ་དང་། །རྣམ་ཤེས་རླུང་གི་བར་དོ་དང་། །རྟོགས་པ་མངོན་འགྱུར་བར་དོ་ཡིན། །ད་ཡང་འདུས་པའི་སྙིང་པོ་ཉོན། །མ་རིག་འཁྲུལ་པའི་བར་དོ་ནི། །རྒྱུ་ནི་མ་རིག་རྣམ་པ་གསུམ། །རྐྱེན་ནི་བག་ཆགས་གཉིས་ཀྱིས་གོལ། །གོལ་ས་བར་དོ་དེ་ཡི་ལུས། །གསུམ་འདུས་སྡུག་བསྔལ་སྣ་ཚོགས་ཉམས་སུ་མྱོང་། །སྐྱེ་རྒས་སྡུག་བསྔལ་ཟད་དུས་མེད། །དེ་ལས་ཐར་ཅིང་ལྡོག་འདོད་པས། །ཀུན་བརྟགས་དགེ་རྩ་འདིར་བྱས་པ། །དགེ་བཅུ་སྦྱིན་སྩོགས་དད་པས་སྤྱད། །ཕྱི་མར་འབྲས་བུ་འདོད་པའི་བློས། །རྒྱུ་མཐུན་བག་ཆགས་མཐུ་བརྟས་པས། །ལྷ་དང་མི་རུ་གོལ་བ་ཙམ། །སྨོན་ལམ་ཙམ་གྱིས་མཐའ་བཙན་གྱིས། །དགེ་བའི་སྟེགས་ཟད་འཁོར་བར་འཁྱམ། །ད་ཡང་འདུས་པའི་སྙིང་པོ་ཉོན། །གནས་འགྱུར་ལྷ་ཡི་བར་དོ་ཡང་། །རྟོགས་དང་ལྷར་གསལ་དུས་མཉམ་ན། །སྐུ་གསུམ་གཅིག་ལ་ཚང་ནས་ནི། །འབྲས་བུ་སངས་རྒྱས་དུས་ཉེ་ཉིད། །མ་རྟོགས་ལྷར་བསྒོམ་རུ་ཏྲར་སྐྱེ། ། ― DNG002_Page_0190 ―
[མ་དཔེ་གཟིགས་ན་འདིར་གནོན།]
ད་ཡང་འདུས་པའི་སྙིང་པོ་ཉོན། །རྣམ་ཤེས་རླུང་ཞོན་བར་དོ་ནི། །ཕྱི་ནང་རླུང་གི་བདེ་བསྒོམས་པས། །ཕོ་མོ་ལ་སོགས་འཕོ་བ་བདུན། །འོད་གསལ་ཡེ་ཤེས་སྐུར་འདོད་པ། །ཐབས་ལམ་ཡིན་ཕྱིར་བར་དོ་མིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱུན་གྱི་སྲིད་པ་བར་དོ་བསྟན་པའི་ལེའུ་སྟེ་བརྒྱ་དང་ང་བརྒྱད་པའོ།། །།ད་ཡང་རྡོ་རྗེ་སེམས་དཔའ་ཉོན། །མངོན་འགྱུར་ཡེ་ཤེས་བར་དོ་ལ། །རྒྱུ་ནི་ལུང་བསྟན་གདམས་ངག་གིས། །བྱིན་རླབས་རྗེས་དྲན་རྣམ་དྲུག་གིས། །མ་རིག་སངས་ལ་ཡེ་ཤེས་རྒྱས། །ཐམས་ཅད་མཁྱེན་པའི་འབྲས་བུར་ལྡན། །འགྲོ་དྲུག་གཟུགས་སྐུ་ཤུགས་ལ་འཆར། །བཙལ་བ་མེད་པར་དོན་རྣམས་འགྲུབ། །ད་ཡང་འདུས་པའི་སྙིང་པོ་ཉོན། །སྣང་བ་འགྱུར་ཞིང་ཡ་ངའི་ཕྱིར། །བར་དོར་ལུས་གསུམ་ལེན་པས་ནི། །རྐྱེན་བཞིས་མ་བསྐྱེད་ལུས་མི་ལེན། །གཞི་གནས་མ་རིག་མེད་པའི་ཕྱིར། །དེ་ཚེ་ཆོས་སྐུ་མངོན་གྱུར་པའི། །རྗེས་སུ་དྲན་པ་དྲུག་བྱུང་ཚེ། །ལུང་ལྡན་བླ་མ་རྗེས་དྲན་དང་། །ངེས་དོན་ཡི་དམ་ཆོས་སྐུར་ཤེས། །དེ་ཡི་གདམས་ངག་མ་ནོར་དྲན། །བདག་ཉིད་སངས་རྒྱས་ཡིན་པར་ཤེས། །གནས་ནི་འོག་མིན་ནམ་མཁའ་འདྲ། །མངལ་དུ་མི་འདུག་དྲན་པའི་ཕྱིར། །ཆོས་སྐུ་མི་འགྱུར་བརྟན་པ་ཐོབ། །ད་ཡང་འདུས་པའི་སྙིང་པོ་ཉོན། །བར་དོར་ཡོན་ཏན་རྣམ་ལྔ་འབྱུང་། །མ་རིག་སངས་པས་སྒྲིབ་གཉིས་དག །ཡེ་ཤེས་རྒྱས་པས་འགྱུར་བ་མེད། །ཐམས་ཅད་ལས་ལ་མཁྱེན་པས་ནི། །སངས་རྒྱས་ཆོས་སྐུ་ཐུགས་ལ་རྫོགས། །གཟུགས་སྐུ་རྣམ་གཉིས་དུས་གཅིག་འབྱུང་། །ད་ཡང་རྡོ་རྗེ་སེམས་དཔའ་ཉོན། །དེ་ཚེ་ཡེ་ཤེས་སྣང་བ་ལས། །བག་ཆགས་བྲལ་བས་ཆགས་སྡང་མེད། །སྣང་བ་མེད་པས་ཞེན་པ་བྲལ། །རིག་པ་གསལ་བས་ཆོས་སྐུར་ཤེས། །ཕོ་མོ་མེད་པས་མངལ་མི་འཇུག །དེ་ཕྱིར་སྐྱེ་བ་མི་ལེན་ངེས། ། ― DNG002_Page_0191 ―
[མ་དཔེ་གཟིགས་ན་འདིར་གནོན།]
ངེས་པའི་འབྲས་བུ་སངས་རྒྱས་ནི། །རྣམ་དག་ཆོས་སྐུ་རང་རིག་ཤེས། །དེ་ཙམ་ཉིད་ལ་སངས་རྒྱས་སུ། །ཀུན་བཟང་ཉིད་ཀྱིས་བཏགས་པ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བར་དོ་སྐྱེ་བ་མེད་པ་བསྟན་པའི་ལེའུ་སྟེ་བརྒྱ་དང་ང་དགུ་པའོ། །སྡོམ་དུ་བསྡུས་ཏེ་བསྟན་པ་སོ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཆེད་དུ་འདི་སྐད་གསོལ། །ཀུན་བཟང་ངེས་པའི་གནས་ལུགས་དོན། །ཡོན་ཏན་ཆེ་བ་ཇི་ལྟར་འབྱུང་། །རང་གནས་ལ་ནི་ཇི་ལྟར་བཟླ། །ཀུན་བཟང་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལྟ་སྒོམ་སྤྱོད་པ་ཕྲིན་ལས་དང་། །དམ་ཚིག་འབྲས་བུའི་རང་བཞིན་དང་། །རྣམ་པ་བདུན་དུ་ངས་བཤད་དོ། །ལྟ་བ་རྟག་ཆད་མཐའ་བྲལ་བའི། །རང་བྱུང་རིག་པ་འདི་ཉིད་ལ། །སྐྱེ་མེད་མི་འགྱུར་ཡེ་ཤེས་ཀློང་། །ཀུན་ཏུ་བཟང་པོའི་ལྟ་བ་མཆོག །ཆོས་སྐུའི་ངང་ལས་མ་གཡོས་པའི། །གསལ་ལ་རྟོག་མེད་མི་གཡོ་བ། །རྒྱུན་དུ་མི་འབྲལ་རང་རིག་དེ། །བསྒོམ་པ་ཀུན་ཏུ་བཟང་པོར་གསུངས། །ད་ཡང་རྡོ་རྗེ་སེམས་དཔའ་ཉོན། །བླང་དོར་ཕྱོགས་རིས་མེད་པ་ལ། །གཟུང་འཛིན་བྱ་བའི་ཡུལ་མེད་ཕྱིར། །རིག་པ་ཆགས་མེད་ཀློང་དུ་འཕྱོ། །ཀུན་ཏུ་བཟང་པོའི་སྤྱོད་པ་མཆོག །ཕྱི་ནང་ལས་ནི་གང་རུང་ལ། །སྦྱོར་སྒྲོལ་ལ་སོགས་ཅི་བདེར་སྤྱོད། །ཕྲིན་ལས་ཡིན་ཕྱིར་འགལ་བ་མེད། །ཀུན་བཟང་ང་ཡི་ཕྲིན་ལས་ཡིན། །ཡེ་ཤེས་སྙིང་པོ་རང་བྱུང་ལ། །རྟག་ཏུ་མི་འདའ་དྲན་པས་ཟུང་། །བདེ་སྡུག་གང་བྱུང་ཟིལ་གྱིས་ནོན། །དམ་ཚིག་ཀུན་ཏུ་བཟང་པོར་བསྟན། །ད་ཡང་འདུས་པའི་སྙིང་པོ་ཉོན། །ངེས་དོན་རིག་པའི་དབང་ཐོབ་ཕྱིར། །དུས་གསུམ་སངས་རྒྱས་ཐུགས་དང་མཉམ། །དེ་ཕྱིར་ཡེ་ཤེས་ཆེན་པོའི་ལས། །འབྲས་བུ་ཀུན་ཏུ་བཟང་པོར་གསུངས། །གཙང་སྨེ་བཟང་ངན་ཀུན་ཀྱང་ནི། །ཡེ་ནས་མཉམ་པར་ ― DNG002_Page_0192 ―
[མ་དཔེ་གཟིགས་ན་འདིར་གནོན།]
འདིར་ཤེས་པས། །ཆོས་ཉིད་རང་སར་མཐའ་དང་བྲལ། །དེ་ཕྱིར་རང་བཞིན་ཀུན་ཏུ་བཟང་། །ད་ཡང་འདུས་པའི་སྙིང་པོ་ཉོན། །དེ་དག་ཀུན་བཟང་དབྱེ་བ་ཡང་། །ཚིག་ལ་ཁྱད་ཡོད་དོན་ལ་མེད། །དེ་ཕྱིར་ཆོས་སྐུ་གཅིག་གི་ངང་། །ཐམས་ཅད་རང་བྱུང་ཀློང་དུ་འདུས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཀུན་ཏུ་བཟང་པོ་བསྟན་པའི་ལེའུ་སྟེ་བརྒྱ་དང་དྲུག་ཅུ་པའོ།། །།ད་ཡང་འདུས་པའི་སྙིང་པོ་ཉོན། །ཆོས་སྐུ་ཆེ་བའི་རྩལ་བྱུང་བ། །སེམས་དང་ཆོས་ཉིད་འབྱུང་བ་དང་། །ཡེ་ཤེས་སྐུ་དང་སྐུ་གསུང་ཐུགས། །ཡོན་ཏན་ངན་སོང་མཐོ་རིས་ལམ། །ཐབས་དང་ཤེས་རབ་སྐྱོན་གྱི་རྒྱུ། །ཡོན་ཏན་རྒྱུ་དང་སངས་རྒྱས་ཆེ། །སེམས་ཅན་རྟོགས་ཐབས་ངས་བཤད་ཉོན། །ད་ཡང་རྡོ་རྗེ་སེམས་དཔའ་ཉོན། །སེམས་ཅན་མ་རིག་ལས་སྐྱེས་ཡིན། །དུག་ལྔ་འཁོར་བའི་རྩ་བ་སྟེ། །འདི་ཉིད་རང་བཞིན་མེད་པར་ཤེས། །སེམས་ཉིད་ཡེ་ནས་ཆེ་བར་བྱུང་། །ཆོས་ནི་འཁོར་འདས་ཀུན་ཡིན་ཏེ། །ཉིད་ནི་སྤྲོས་པའི་དངོས་པོ་དང་། །བཙལ་མེད་ཡེ་ནས་ཆེ་བར་གནས། །ཆོས་ཉིད་ཡེ་ནས་ཆེ་བའི་མཆོག །ཆོས་སྐུའི་རྩལ་ནི་འབྱུང་བ་ལྔ། །ཡེ་ནས་རྒྱུད་ལ་སངས་རྒྱས་ཏེ། །དེ་ཕྱིར་སྣང་བ་ཆོས་ཀྱི་སྐུ། །འབྱུང་བ་ཡེ་ཤེས་ཆེ་བར་བསྡུ། །ཡེ་ནི་རང་བྱུང་ངོ་བོ་ཉིད། །ཤེས་ནི་བློ་ཡི་རྟོག་ཏུ་གོ། །ཟུང་དུ་འདྲེལ་བས་ཡེ་ཤེས་ཏེ། །དེ་ཕྱིར་ཡེ་ཤེས་ཆེ་བར་གསུངས། །ད་ཡང་འདུས་པའི་སྙིང་པོ་ཉོན། །སྐུ་ཡི་སྐུ་ལྔ་ལྷུན་གྱིས་གྲུབ། །མ་བཙལ་ཡེ་ནས་ཆོས་སྐུར་འདུས། །ཆེ་བའི་ཡོན་ཏན་ཐམས་ཅད་རྫོགས། །སྐུ་ནི་ཡེ་ནས་ཆེ་བའི་མཆོག །སྐུ་གསུང་ཐུགས་ཀྱི་ཡོན་ཏན་ཀྱང་། །ཕྲིན་ལས་དཀྱིལ་འཁོར་རང་གི་སྐུ། །དེ་ལས་གཞན་དུ་བསྒྲུབ་མི་དགོས། །ཡོན་ཏན་ཕྲིན་ལས་ཆེ་བར་བསྡུ། །སྐྱོན་ཡོན་གཉིས་ཀ་གཞི་ལ་མེད། །དེ་ཕྱིར་གོ་བ་སངས་རྒྱས་རྒྱུ། །རང་བྱུང་ཡེ་ནས་དག་པའི་སྐུ། ། ― DNG002_Page_0193 ―
[མ་དཔེ་གཟིགས་ན་འདིར་གནོན།]
སྐྱོན་ཡོན་ཡེ་ནས་ཆེ་བ་ཡིན། །སྡུག་བསྔལ་འཁོར་བ་ངན་སོང་སྟེ། །དག་པར་ཡེ་ནས་རྟོགས་པ་ལ། །སྡུག་བསྔལ་ཉིད་ཀྱང་བདེ་བར་འཆར། །དེ་ཕྱིར་འཁོར་བ་ངན་སོང་ཆོས། །ད་ཡང་འཁོར་གྱི་སྙིང་པོ་ཉོན། །སངས་རྒྱས་སེམས་ཅན་རྩ་བ་གཅིག །མཐོ་རིས་ངན་སོང་གཞི་ལ་མེད། །དེ་ཕྱིར་ཡེ་ནས་རང་བྱུང་སྐུ། །མཐོ་རིས་ངན་སོང་ཆེ་བར་གསུངས། །ཐབས་ཀྱིས་སངས་རྒྱས་སེམས་ཅན་འདྲེལ། །དེ་ཕྱིར་ངེས་དོན་ཐབས་ལས་བྱུང་། །ལུང་ལྡན་གདམས་ངག་ངེས་པར་ཆེ། །ཐབས་ནི་ཡེ་ནས་ཆེ་བར་ངེས། །ཤེས་ནི་ཆོས་སྐུ་སྤྲོས་དང་བྲལ། །རབ་ནི་དོན་རྣམས་ཁོང་དུ་ཆུད། །ཡེ་ནས་དབང་བསྐུར་རྒྱལ་པོ་སྟེ། །ཤེས་རབ་ཡེ་ནས་ཆེ་བ་ཡིན། །སྐྱོན་ནི་མ་རིག་འགྱུ་བ་སྟེ། །ལུང་ལྡན་རྐྱེན་གྱིས་སྐྱོན་དང་བྲལ། །དེ་ཕྱིར་སྐྱོན་རྟོགས་ཡེ་ཤེས་འབྱུང་། །སྐྱོན་རྒྱུ་ཡེ་ནས་ཆེ་བ་ཡིན། །ད་ཡང་འཁོར་གྱི་སྙིང་པོ་ཉོན། །ང་ཡི་སྐུ་གསུང་ཐུགས་རྣམས་ནི། །མ་བཅོས་མ་འགྱུར་མ་གཡོས་པས། །ང་ཡི་རོལ་པ་ཐམས་ཅད་ལ། །དེ་ཕྱིར་སྤོང་ལེན་བཟང་ངན་མེད། །ཡོན་ཏན་རྒྱུ་ནི་ཡེ་ནས་ཆེ། །འཁོར་བ་སངས་པས་ཆོས་སྐུ་རྒྱས། །ཡོན་ཏན་ཀུན་ལྡན་སངས་རྒྱས་ཏེ། །མ་བཙལ་འབྲས་བུ་རང་གནས་པ། །སངས་རྒྱས་ཡེ་ནས་ཆེ་བར་བསྡུ། །སངས་རྒྱས་རྒྱུ་ནི་སེམས་ཅན་ཏེ། །སེམས་ཅན་སེམས་རྟོགས་ཆོས་སྐུ་ཡིན། །རྟོགས་པས་སངས་རྒྱས་ད་ལྟ་ཉིད། །དེ་ཕྱིར་སེམས་ཅན་ཤིན་ཏུ་མེད། །ངེས་དོན་རྟོགས་པས་སངས་རྒྱས་འབྱུང་། །ངེས་དོན་རྟོགས་པས་མ་རིག་སངས། །ཡེ་ནས་ཡོད་པས་ཡེ་ཤེས་སྐུ། །དེ་ཕྱིར་རྟོགས་པས་ཆེ་བའི་ཐུགས། །ད་ཡང་འདུས་པའི་སྙིང་པོ་ཉོན། །ཆོས་སྐུའི་རྩལ་དུ་ཡོན་ཏན་འབྱུང་། །གང་ཡང་མི་འགགས་རོལ་པ་ཡི། །ཆེ་བ་དྲུག་ཅུ་མ་འདྲེས་རྫོགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆེ་བའི་ཡོན་ཏན་རྩལ་འབྱུང་བར་བསྟན་པའི་ལེའུ་སྟེ་བརྒྱ་དང་རེ་གཅིག་པའོ།། །། ― DNG002_Page_0194 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །དབྱེར་མེད་མ་བཙལ་ཕྱི་དང་ནང་། །ཡེ་ཤེས་མ་རིག་བཟང་ངན་ལས། །བདེ་སྡུག་ཆེ་ཆུང་སྐྱེ་འཆི་དང་། །བླང་དོར་མེད་པ་མ་བཙལ་བ། །རང་གནས་ཆེན་པོར་ལ་བཟླའོ། །ད་ཡང་འདུས་པའི་སྙིང་པོ་ཉོན། །ཡེ་ནས་རྒྱུ་དང་འབྲས་བུ་ནི། །རིམ་པར་དབྱེར་མེད་རང་གནས་ཕྱིར། །སངས་རྒྱས་མ་ཚོལ་རང་ལ་གནས། །དེ་ཕྱིར་རྒྱུ་འབྲས་དབྱེར་མེད་ཡིན། །རྩ་བ་འཁོར་འདས་གཅིག་པའི་ཕྱིར། །ངོ་བོ་ཉིད་སྐུ་ཡེ་ཤེས་གནས། །ཐར་པ་ཐོབ་ཅེས་བསྟན་པ་ཡང་། །འཁོར་འདས་རྩ་བ་རང་གནས་ཡིན། །ཕྱི་ནང་སྣོད་བཅུད་མ་ལུས་ཀུན། །མ་བྱུང་མ་སྐྱེས་ཆོས་ཀྱི་དབྱིངས། །དུས་གསུམ་འཕོ་འགྱུར་མེད་པའི་གནས། །ཕྱི་ནང་མ་བཙལ་ཡེ་གནས་ཡིན། །ད་ཡང་འདུས་པའི་སྙིང་པོ་ཉོན། །མ་རིག་ལས་སྐྱེས་སེམས་ཅན་ཀུན། །ཡེ་ཤེས་ལས་འབྱུང་སངས་རྒྱས་ཉིད། །རང་བྱུང་ངེས་དོན་ཆོས་སྐུར་གཅིག །མ་བཙལ་ལ་བཟླ་ཆེན་པོ་ཡིན། །ལུས་ངག་བདེ་སྡུག་མ་བཅོས་ཕྱིར། །རྟོགས་དང་མ་རྟོགས་གཞི་ལ་མེད། །ཡུལ་ལ་འཛིན་པའི་བློ་མེད་ཕྱིར། །མ་བཙལ་རང་གནས་ལ་བཟླའོ། །གཙང་སྨེ་གཞི་ལ་གཉིས་མེད་པས། །བློ་ཡིས་བྱིས་པ་ཐམས་ཅད་གོལ། །མ་བཅོས་མ་བྱས་རང་རིག་སྐུ། །བཟང་ངན་མེད་པར་ལ་བཟླའོ། །ཆེ་ཆུང་མཐོ་དམན་ལ་སོགས་པ། །རྟོགས་པ་ཅན་ལ་ཆེ་ཆུང་མེད། །ཡེ་ནས་མ་བྱུང་མ་སྐྱེས་ཏེ། །དུས་གསུམ་གཅིག་པས་ཡེ་ཤེས་སྐུ། །རང་བྱུང་ངོ་བོ་རྟོགས་པ་ལ། །དུས་གསུམ་དབྱེར་མེད་གཅིག་པའི་ཕྱིར། །གྲངས་དང་ཚེ་ཚད་བགྲང་དུ་མེད། །མི་འགྱུར་ཡེ་ཤེས་ལ་བཟླའོ། །ད་ཡང་འདུས་པའི་སྙིང་པོ་ཉོན། །རང་བྱུང་ཡེ་ཤེས་ཀུན་བཟང་ལ། །ཕྱོགས་རིས་བླང་དོར་གང་ཡང་མེད། །ཡེ་ཤེས་མ་བཙལ་རང་གནས་པས། །ཆོས་རྣམས་ཀུན་གྱི་ལ་བཟླའོ། །ད་ཡང་རྡོ་རྗེ་སེམས་དཔའ་ཉོན། །རང་གནས་ཆེན་པོ་དེ་དགུ་ལ། །རྩ་བ་རང་བྱུང་ཆོས་སྐུར་ ― DNG002_Page_0195 ―
[མ་དཔེ་གཟིགས་ན་འདིར་གནོན།]
འདུས། །དེ་ཕྱིར་ཡེ་ཤེས་ཟང་ཐལ་ལ། །འདུ་འབྲལ་བ་ཡི་མིང་ཡང་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རང་གནས་ཆེན་པོར་ལ་བཟླ་བར་བསྟན་པའི་ལེའུ་སྟེ་བརྒྱ་དང་དྲུག་ཅུ་རྩ་གཉིས་པའོ། །སྡོམ་དུ་བསྡུས་ཏེ་བསྟན་པ་སོ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་ཏུ་བཟང་པོར་དོན་ཞུས་པས། །སྐུ་གསུམ་དོན་གྱི་གདུལ་བྱ་ཡི། །མཁྱེན་ཚད་འཁོར་ལ་བཤད་དུ་གསོལ། །དེ་སྐད་པ་ཡི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སྤྲུལ་པ་དྲང་དོན་ཁམས་གསུམ་ཀྱང་། །རྒྱུ་འབྲས་བདེ་སྡུག་མ་ལུས་དང་། །ལས་དང་ཉོན་མོངས་མ་ལུས་པ། །མཁྱེན་ཕྱིར་ཐམས་ཅད་མཁྱེན་ཞེས་བྱ། །ད་ཡང་རྡོ་རྗེ་སེམས་དཔའ་ཉོན། །འདོད་ཁམས་གནས་རིགས་ཉི་ཤུ་ཡི། །ལས་དང་རྐྱེན་ནི་གང་ལས་བྱུང་། །ཉེས་ལེགས་མ་ལུས་དུས་གཅིག་ཏུ། །གང་ཡང་ཤེས་ཕྱིར་མནོ་མི་དགོས། །ཆུ་བུར་མིག་དང་ཤ་ཡི་མིག །ལྷ་ཡི་མིག་དང་ཆོས་ཀྱི་སྤྱན། །ཡེ་ཤེས་སྤྱན་དང་རྣམ་ལྔ་སྟེ། །ཐམས་ཅད་མཁྱེན་པའི་ཚད་དུ་གསུངས། །ད་ཡང་རྡོ་རྗེ་སེམས་དཔའ་ཉོན། །ཆུ་བུར་མིག་གིས་དཔག་ཚད་དང་། །རྒྱང་གྲགས་རིང་ཐུང་ཚུན་ཆད་མཐོང་། །ཤ་མིག་གླིང་བཞི་གླིང་ཕྲན་མཐོང་། །ལྷ་ཡི་མིག་གིས་ནམ་མཁའི་ཁམས། །ཁྱབ་ཚད་མ་ལུས་དུས་གཅིག་མཐོང་། །སྤྲུལ་སྐུའི་མཁྱེན་ཚད་དེ་དང་འདྲ། །ད་ཡང་འདུས་པའི་སྙིང་པོ་ཉོན། །དམྱལ་ཁམས་བཅོ་བརྒྱད་སྡུག་བསྔལ་དང་། །ཚེ་ཚད་རིང་ཐུང་རིམ་པ་ཡང་། །ལས་ངན་བྱས་པའི་ཉེས་པ་ཡིན། །རྣམ་སྨིན་སྡུག་བསྔལ་རིམ་པ་མཁྱེན། །དུས་གསུམ་གང་ཡང་དུས་གཅིག་མཁྱེན། །ད་ཡང་འཁོར་གྱི་སྙིང་པོ་ཉོན། །ཕྱི་ནང་མེ་ལྕེ་མཁའ་ལ་རྒྱུ། །དེ་དག་ལས་ཀྱི་རྣམ་སྨིན་གྱིས། །བཀྲེས་སྐོམ་སྡུག་བསྔལ་སྣ་ཚོགས་པ། །ཡི་དྭགས་ལུས་ཀྱི་རྣམ་པ་དག །ལས་ངན་བསགས་ཕྱིར་རང་ལ་སྨིན། །ཚེ་ཚད་མནར་མེད་ཡིད་ལ་ ― DNG002_Page_0196 ―
[མ་དཔེ་གཟིགས་ན་འདིར་གནོན།]
བྱུང་། །དེ་ཡི་གཉེན་པོ་གང་དགོས་མཁྱེན། །གང་ཡང་མཁྱེན་པས་སྤྲུལ་པའི་སྐུ། །ད་ཡང་འདུས་པའི་སྙིང་པོ་ཉོན། །བྱོལ་སོང་གནས་རིགས་དག་ན་ཡང་། །རྐང་གཉིས་དང་ནི་རྐང་བཞི་དང་། །རྐང་མང་དང་ནི་རྐང་མེད་ཚོགས། །གླེན་ལྐུགས་ཚེ་ཚད་སྡུག་བསྔལ་ནི། །ངེས་མེད་ངེས་ཅན་གྲངས་མེད་ཀྱང་། །དེ་ཡི་གཉེན་པོ་གང་དགོས་མཁྱེན། །གླིང་བཞི་བྱོལ་སོང་གླིང་བར་དང་། །མུན་གླིང་ཡོད་པའི་གྲངས་བཅས་མཁྱེན། །ད་ཡང་རྡོ་རྗེ་སེམས་དཔའ་ཉོན། །ཕྱི་ནི་སྣོད་དང་བཅུད་ཀྱིས་བསྡུས། །འབྱུང་བ་བཞི་ཡི་རྣམ་པ་ཡང་། །ས་གཞི་རི་རབ་རྒྱ་མཚོ་དང་། །མེ་རླུང་འབྱུང་བ་སྣ་ཚོགས་པ། །རྡུལ་ཕྲན་དག་གི་གྲངས་རྣམས་ཀྱང་། །བགྲང་མི་དགོས་པར་དུས་གཅིག་མཁྱེན། །ཕྱི་ཡི་ཁ་དོག་དབྱིབས་དང་ནི། །གླིང་བཞི་གླིང་ཕྲན་མ་ལུས་པའི། །དབྱིབས་དང་ཚེ་ཚད་ལུས་ཀྱི་ཚད། །མ་ལུས་གང་ཡང་དུས་གཅིག་མཁྱེན། །ད་ཡང་འདུས་པའི་སྙིང་པོ་ཉོན། །གཟུགས་ཁམས་གནས་རིགས་བཅུ་བདུན་པོའི། །ལོངས་སྤྱོད་ཆེ་ཆུང་གང་ཡང་རུང་། །དགེ་བའི་ལས་ནི་གང་ཡང་རུང་། །འབྲས་བུ་འབྱུང་བའི་རིམ་པ་ཡང་། །འདིར་བསགས་ཕྱི་མར་སྨིན་པ་མཁྱེན། །ལྷ་ཡི་ཚེ་ཚད་རིང་ཐུང་ཡང་། །འོག་ལས་གྱུར་པའི་འགྱུར་རྩིས་ཏེ། །བྱ་བ་མང་ཉུང་དུས་ཚོད་མཁྱེན། །དེ་ཕྱིར་ཆགས་འཇིག་སྟོང་དང་གསུམ། །ཆོ་འཕྲུལ་མངོན་འབྱུང་བསྟན་པའི་ཚེ། །འཇིག་དང་མི་འཇིག་རྣམ་པ་ཡང་། །བསམ་གཏན་རོ་མྱོང་ཞེན་པ་དང་། །བག་ལ་ཉལ་གྱི་མ་རིག་པས། །བསྒྲིབ་ཕྱིར་ཐ་མལ་ལྟུང་བའི་ཕྱིར། །དེ་ཡི་གཉེན་པོའི་ཆོས་རྣམས་ཀྱང་། །གང་ལ་གང་འདོད་རིམ་པར་མཁྱེན། །ལོངས་སྤྱོད་གཡེངས་ཕྱིར་གདུལ་བར་དཀའ། །ད་ཡང་འདུས་པའི་སྙིང་པོ་ཉོན། །གཟུགས་མེད་ཁམས་བཞིའི་རིམ་པ་ཡང་། །ཞི་གནས་རོ་ལ་ཞེན་པའི་ཕྱིར། །བལྟ་མེད་བསྒོམས་པས་རང་ཉིད་འཁོར། །དེ་ཡང་རང་གིས་མ་རིག་པས། །ཅི་ཡང་ཡོད་མིན་མེད་མིན་ ― DNG002_Page_0197 ―
[མ་དཔེ་གཟིགས་ན་འདིར་གནོན།]
དང་། །རྣམ་ཤེས་མཐའ་དང་ནམ་མཁའ་ཡི། །ལྟ་ལོག་ཞེན་ཕྱིར་ཤིན་ཏུ་འཁྲུལ། །དེ་ལ་ངེས་མེད་གང་འབྱུང་བའི། །ཏིང་འཛིན་གོལ་བའི་ཉམས་དེ་ཡི། །དུས་གསུམ་ལས་ནི་མ་ལུས་དང་། །ལས་ཀྱི་འཁོར་བའི་རྣམ་སྨིན་དེ། །དེ་ཡི་གཉེན་པོ་གང་བསྒོམ་པ། །གཉེན་པོ་མེད་ན་ལྟུང་དུས་དང་། །ཚེ་ཚད་རིང་ཡང་ཐ་མ་ལྟུང་། །དེ་དུས་སྐུར་བཏབ་དམྱལ་བར་ལྟུང་། །དེ་དག་སྤྲུལ་སྐུའི་མཁྱེན་པའི་ཚད། །ད་ཡང་འདུས་པའི་སྙིང་པོ་ཉོན། །སྤྲུལ་པ་དེ་ཡིས་སྤྲུལ་པ་འགྱེད། །འཛམ་གླིང་བྱེ་བ་ཕྲག་བརྒྱ་ལ། །སྤྲུལ་པ་བྱེ་བ་ཕྲག་བརྒྱ་འགྱེད། །གཉེན་པོ་སྒོ་མོ་བརྒྱད་ཁྲི་སྟོང་། །གང་གིས་གང་འདུལ་རིགས་པ་མཁྱེན། །ལྷ་ཡི་མིག་གིས་གཟིགས་ཚད་དུ། །རྣ་བ་ལ་སོགས་དེ་བཞིན་ནོ། །མ་ལུས་མཁྱེན་པ་སྤྲུལ་པའི་སྐུ། །དེ་ཕྱིར་ཐམས་ཅད་མཁྱེན་ཞེས་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྲུལ་པའི་སྐུ་ཡིས་ཐམས་ཅད་མཁྱེན་པའི་ཚད་བསྟན་པའི་ལེའུ་སྟེ་བརྒྱ་དང་རེ་གསུམ་པའོ།། །།ད་ཡང་རྡོ་རྗེ་སེམས་དཔའ་ཉོན། །སངས་རྒྱས་ཆོས་སྐུ་ལས་བྱུང་བའི། །ལོངས་སྐུའི་མཁྱེན་ཚད་བསམ་མི་ཁྱབ། །རེ་ཞིག་དྲང་པའི་དོན་དུ་ནི། །ས་བཅུའི་བྱང་ཆུབ་སེམས་དཔའ་ཡིས། །ལམ་ལྔ་ས་བཅུ་སྦྱངས་པའི་ཕྱིར། །ཞིང་ཁམས་སྐྱེ་བ་བརྗོད་མི་ལངས། །དེ་དག་ཀུན་གྱི་གྲངས་དབྱེ་བ། །མ་ལུས་ཀུན་གྱི་རྣམ་གྲངས་ནི། །ལོངས་སྤྱོད་རྫོགས་པས་མཁྱེན་པའི་ཚད། །དེ་ཡང་འདུས་པའི་སྙིང་པོ་ཉོན། །དག་པའི་འཇིག་རྟེན་མང་བའི་ཕྱིར། །རིགས་ལྔ་ལ་སོགས་སངས་རྒྱས་ཀྱི། །རིན་ཆེན་གཞལ་ཡས་ཁང་དང་ནི། །དཀྱིལ་འཁོར་ལྷ་ཚོགས་གྲངས་དང་ནི། །སེམས་དཔའ་སེམས་མ་བརྗོད་ལས་འདས། །རྒྱན་དང་ཁ་དོག་སྨོས་ཐག་ཆོད། །དེ་ཡི་ཡོན་ཏན་མ་ལུས་པ། །དུས་གཅིག་ཚང་ཞིང་རྫོགས་པར་མཁྱེན། །ད་ཡང་འདུས་པའི་སྙིང་པོ་ཉོན། །ཆོས་ཀྱི་མིག་གིས་མཁྱེན་པའི་ཚད། །གདུལ་བྱའི་ ― DNG002_Page_0198 ―
[མ་དཔེ་གཟིགས་ན་འདིར་གནོན།]
འཁོར་དུ་བསྟན་པ་ཡང་། །དྲང་བའི་དོན་དུ་བསྟན་པ་ལས། །ངེས་དོན་ལོངས་སྤྱོད་རྫོགས་པ་ཡི། །མཁྱེན་ཚད་འཁོར་འདས་མ་ལུས་པ། །སྐུ་ཡི་སྒོ་ནས་འདུལ་མཛད་མཁྱེན། །ལྡེམ་དགོངས་བརྡ་ཡིས་ཆོས་རྣམས་སྟོན། །ས་བཅུའི་བྱང་ཆུབ་སེམས་དཔའ་ཡང་། །འགྲོ་བའི་དོན་དུ་སྤྲུལ་པ་ལས། །ས་ཟིན་བྱང་ཆུབ་སེམས་དཔའ་མེད། །དེ་ཡང་འདུས་པའི་སྙིང་པོ་ཉོན། །ལྷག་མཐོང་རིག་པའི་དོན་ལྡན་པ། །ཆོས་ཀྱི་མིག་དང་ལྡན་ཞེས་གསུངས། །དེ་ཕྱིར་ལོངས་སྤྱོད་རྫོགས་པ་ཡི། །མཚན་དང་དཔེ་བྱད་མ་ལུས་པ། །སངས་རྒྱས་ཉིད་ཀྱི་མཛད་པ་ལས། །བྱང་ཆུབ་སེམས་དཔའ་ལོགས་ན་མེད། །ས་དང་ས་ཡི་ཁྱད་པར་ལས། །སྒྲིབ་བྱང་ཏིང་འཛིན་ཁྱད་པར་ལས། །གོང་ནས་གོང་དུ་འགྲོ་ས་མེད། །མཛད་པ་ཡོན་ཏན་ལྡེམ་དགོངས་ཆོས། །གང་ཡང་མཁྱེན་པས་ལོངས་སྤྱོད་འཁོར། །དེ་ཕྱིར་དག་པ་སངས་རྒྱས་ཉིད། །ད་ཡང་རྡོ་རྗེ་སེམས་དཔའ་ཉོན། །འགྲོ་དོན་ཕན་པར་བྱ་བའི་ཕྱིར། །ཕ་རོལ་ཕྱིན་པ་བསྟན་པ་ཡང་། །བྱམས་དང་སྙིང་རྗེས་གཞི་བཟུང་ནས། །སེམས་ཅན་ཀུན་ལ་བརྩེར་དགོངས་ཏེ། །གཞན་ལ་ཕན་གདགས་བསོད་ནམས་འཕེལ། །དྲང་བའི་དོན་དུ་གསུངས་པ་ལས། །དོན་ལ་ཕན་པ་རྡུལ་ཙམ་མེད། །ལོངས་སྤྱོད་མཁྱེན་ཚད་ས་བཅུར་བཤད། །ད་ཡང་འདུས་པའི་སྙིང་པོ་ཉོན། །ཆོས་སྐུ་ངེས་དོན་བཀའ་མདོ་ཡང་། །དྲང་དོན་བསླུ་བྲིད་མ་ཡིན་ཏེ། །དབུ་མ་ཤེས་རབ་ཕ་རོལ་ཕྱིན། །རྫོགས་ཆེན་ཆོས་སྐུའི་སྙིང་པོ་ནི། །ལོངས་སྤྱོད་རྫོགས་པའི་མཁྱེན་པའི་ཚད། །དེ་ཕྱིར་བསྟན་པའི་རྩལ་གྱིས་རྫོགས། །གང་ཕྱིར་ལོངས་སྐུ་ཆོས་སྐུར་བརྟེན། །འཁོར་ནི་བྱང་ཆུབ་སེམས་དཔའི་ཚུལ། །ཆོས་ཉིད་དག་ལ་ལོངས་སྤྱོད་པས། །ལོངས་སྤྱོད་རྫོགས་པའི་མཁྱེན་ཚད་ཡིན། །ད་ཡང་འདུས་པའི་སྙིང་པོ་ཉོན། །ཆོས་སྐུ་ཐུགས་ལ་མ་འདྲེས་མཁྱེན། །སངས་རྒྱས་མ་ལུས་དགོངས་པ་གཅིག །དཔེར་ན་མར་ ― DNG002_Page_0199 ―
[མ་དཔེ་གཟིགས་ན་འདིར་གནོན།]
མེ་སྟོང་དག་ཀྱང་། །འོད་ཀྱི་ངོ་བོ་གཅིག་པ་བཞིན། །དུས་གསུམ་སངས་རྒྱས་སྟོང་ལ་སོགས། །དེ་དག་དགོངས་པ་ཆོས་སྐུར་གཅིག །གདུལ་བྱ་འཁོར་བ་ཐ་དད་ཀྱང་། །སྐུ་གསུང་ཐུགས་ལ་འཕེལ་འགྲིབ་མེད། །དེ་ཕྱིར་ལོངས་སྤྱོད་རྫོགས་པའི་ཚད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལོངས་སྤྱོད་རྫོགས་པའི་སྐུ་ཡི་མཁྱེན་པ་བསྟན་པའི་ལེའུ་སྟེ་བརྒྱ་དང་རེ་བཞི་པའོ།། །།ད་ཡང་རྡོ་རྗེ་སེམས་དཔའ་ཉོན། །ཆོས་སྐུ་ངེས་ཟིན་ཐམས་ཅད་མཁྱེན། །དག་པའི་འཇིག་རྟེན་མེད་པའི་ཕྱིར། །འཁོར་བའི་མུན་པ་ཀ་ནས་དག །ཡོད་མེད་མཐའ་དང་འདོད་པ་བྲལ། །ཆོས་སྐུ་ཡེ་ཤེས་ཀློང་གནས་པ། །ད་ལྟའི་ཤེས་པ་འདི་ཉིད་ལ། །ཆོས་སྐུ་ངོས་ཟིན་ཐམས་ཅད་མཁྱེན། །དེ་ཕྱིར་རང་བྱུང་ངོ་བོར་གནས། །ད་ཡང་རྡོ་རྗེ་སེམས་དཔའ་ཉོན། །མཚན་ཉིད་ཆོས་སྐུ་སྟོང་པ་ཉིད། །དམིགས་པ་མེད་ཕྱིར་འགྲོ་དོན་བྲལ། །སྟོང་པར་འདོད་པ་ཆད་ལྟ་ཡིན། །དེ་ཕྱིར་ངེས་དོན་ཆོས་སྐུ་མིན། །ཡང་ཏི་ངེས་དོན་ཆོས་སྐུ་ནི། །རིག་པ་ངོ་ཤེས་གསལ་བ་ལ། །རྟོག་མེད་གདེང་ལྡན་རང་བྱུང་སྟེ། །སང་ངེ་ས་ལེ་གདེང་གིས་ཟིན། །ཆོས་སྐུ་མཁྱེན་པས་རང་གི་ཐུགས། །སྐུ་ནི་ཆོས་སྐུ་ཡེ་ཤེས་ལུས། །ཡེ་ཤེས་སྤྱན་གྱིས་ལྷག་མཐོང་གསལ། །ཡེ་ཤེས་གཟུགས་བརྙན་ལ་སོགས་པ། །མ་འགགས་གང་ལ་རྟོག་པ་མེད། །དེ་ཕྱིར་ཆོས་སྐུ་ཁ་མིག་ཅན། །རིག་པ་ཆོས་སྐུར་གསལ་ཕྱིར་རོ། །དེ་དོན་གདམས་ངག་མདོར་བསྡུ་ན། །རྣམ་རྟོག་མི་མངའ་ཆོས་སྐུ་དེ། །ཅི་ཡང་རང་བྱུང་ས་ལེར་མཁྱེན། །མི་གཡོ་གདེང་ལྡན་འགྱུར་བ་མེད། །དེ་ནི་ཆོས་སྐུའི་མཁྱེན་པའི་ཚད། །ད་ཡང་འདུས་པའི་སྙིང་པོ་ཉོན། །ལུས་འདིའི་ནང་ན་ཆོས་སྐུ་བདེ། །འཁོར་འདས་མེད་ཕྱིར་བཙལ་མི་དགོས། །དེ་ཕྱིར་ལུས་འབྲལ་ཆོས་སྐུ་བདེ། །ཡེ་ཤེས་ནམ་མཁའི་མཐའ་དང་མཉམ། །ཐམས་ཅད་མཁྱེན་པའི་ཡེ་ཤེས་མཆོག །ད་ཡང་ ― DNG002_Page_0200 ―
[མ་དཔེ་གཟིགས་ན་འདིར་གནོན།]
རྡོ་རྗེ་སེམས་དཔའ་ཉོན། །སྐུ་གསུམ་ཐམས་ཅད་མཁྱེན་པ་ཡང་། །དྲང་བའི་དོན་དུ་ཕྱེ་བ་ལས། །དོན་ལ་དབྱེ་བ་རྡུལ་ཙམ་མེད། །མ་ལུས་མཁྱེན་པས་མཁྱེན་ཅེས་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་ཀྱི་སྐུའི་ཐམས་ཅད་མཁྱེན་པའི་ཚད་བསྟན་པའི་ལེའུ་སྟེ་བརྒྱ་དང་རེ་ལྔ་པའོ། །སྡོམ་དུ་བསྡུས་ཏེ་བསྟན་པའི་ལེའུ་སོ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་དོན་དུ། །ཆོས་ཀྱི་རྗེ་ལ་འདི་སྐད་གསོལ། །བསམ་གཏན་མ་གོལ་འབྲས་བུ་གང་། །རྒྱུ་ཡི་ཐེག་འོག་འབྲས་བུ་དང་། །ཆོས་རྣམས་རྫོགས་པའི་འབྲས་བུ་དང་། །ཕྱི་ནང་མི་གོལ་འབྲས་བུ་རྣམས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རྩོལ་བ་མེད་པའི་འབྲས་བུ་ནི། །གོལ་སྒྲིབ་མེད་པའི་འབྲས་བུ་ལ། །དབྱེ་བ་རྣམ་པ་བཅུ་ཚན་གསུམ། །ཡིད་ལ་མི་བྱེད་གོལ་སྒྲིབ་མེད། །དེ་ཕྱིར་ངེས་པའི་འབྲས་བུ་བསྟན། །ད་ཡང་འདུས་པའི་སྙིང་པོ་ཉོན། །སྔ་ཕྱི་ཞེན་པའི་རྟོག་པ་ཡིས། །བྱུང་ཚོར་རྗེས་སུ་མ་འབྲངས་པས། །འཇིག་རྟེན་ཕལ་པའི་སར་མ་གོལ། །དེ་ཡང་ངེས་པའི་འབྲས་བུ་ཡིན། །ང་དང་བདག་མེད་དོན་རྟོགས་ཕྱིར། །ཡོད་མེད་ཡུལ་དུ་མི་བསྒོམ་པས། །རྟག་ཆད་མཐར་ནི་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྒྱལ་བའི་བཀའ་དང་མན་ངག་གི། །ཤེས་རབ་ཟབ་མོའི་དོན་ཟིན་པས། །ལུང་དུ་མ་བསྟན་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ལྷག་མཐོང་རིག་པའི་གདེང་ཟིན་པས། །ཞི་གནས་རོ་ལ་མ་ཆགས་ཕྱིར། །འཇིག་རྟེན་བསམ་གཏན་སར་མི་གོལ། །དེ་ཡང་ངེས་པའི་འབྲས་བུ་ཡིན། །སྣང་བའི་ཡུལ་རྣམས་མཐོང་བའི་ཚེ། །སྒོ་ལྔའི་རྣམ་ཤེས་མི་འགོག་པས། །འདུ་ཤེས་མེད་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྫོགས་པ་ཆེན་པོ་ངེས་དོན་ཐམས་ཅད་ ― DNG002_Page_0201 ―
[མ་དཔེ་གཟིགས་ན་འདིར་གནོན།]
འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འཇིག་རྟེན་པའི་གོལ་མེད་འབྲས་བུར་བསྟན་པའི་ལེའུ་སྟེ་བརྒྱ་དང་རེ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སྤང་བའི་རྟོག་པ་མེད་པའི་ཕྱིར། །རྣམ་རྟོག་མ་སྤངས་རང་ཞི་བས། །ཉན་ཐོས་འགོག་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྟེན་འདྲེལ་བཅུ་གཉིས་ཡུལ་མེད་ཕྱིར། །རྟོག་བཀག་སྟོང་པར་མ་བསྒོམས་ཕྱིར། །རང་སངས་རྒྱས་སུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །སྣང་བ་སེམས་སུ་མི་སྡུད་ཕྱིར། །རང་རིག་གསལ་བར་མི་བསྒོམས་པས། །སེམས་ཙམ་པར་ནི་དེར་མི་གོལ། །དེ་ཡང་ངེས་པའི་འབྲས་བུ་ཡིན། །བདེན་པ་གཉིས་སུ་མི་དབྱེའི་ཕྱིར། །མཚན་མ་སྟོང་པར་མ་བསྒོམ་པ། །དབུ་མ་ཉིད་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཕོ་མོ་རྩ་དང་ཐིག་ལེ་ཡིས། །ཐབས་ཀྱི་བདེ་བ་མ་བསྒོམས་པས། །ཆགས་པའི་ལམ་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཚོགས་གཉིས་རྩོལ་བ་མེད་པའི་ཕྱིར། །རྒྱུ་འབྲས་རྐྱེན་ལ་མི་ལྟོས་པས། །འདུས་བྱས་ཆོས་སྐུར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །བག་ཆགས་བཟང་ངན་མིང་མེད་ཕྱིར། །དགེ་སྡིག་རེ་དོགས་རྩོལ་མེད་པས། །ལས་ཀྱི་དབང་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །སྣང་སྟོང་གཞི་ལ་མེད་ཤེས་ཕྱིར། །དབྱེ་བ་བསྟན་པའི་ཡུལ་མེད་པས། །ཕྲ་བའི་ལམ་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །གཞི་ལ་གོང་འོག་མེད་པའི་ཕྱིར། །ལམ་ལྔ་རིམ་གྱིས་མ་སྦྱངས་པས། །ས་བཅུའི་ངེས་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱུ་མཚན་ཉིད་དུ་གོལ་བ་མེད་པར་བསྟན་པའི་ལེའུ་སྟེ་བརྒྱ་དང་རེ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སྐྱོན་ ― DNG002_Page_0202 ―
[མ་དཔེ་གཟིགས་ན་འདིར་གནོན།]
མེད་ཡོན་ཏན་ཀུན་ལྡན་དེ། །ཕྱི་ནང་ཆོས་རྣམས་རྫོགས་པར་ནི། །ང་ཡིས་བཤད་ཀྱི་ལེགས་པར་ཉོན། །ལྟ་སྒོམ་གཉིས་སུ་དོན་གནས་པའི། །རྣལ་འབྱོར་ངེས་པའི་སྐལ་ལྡན་དེ། །དད་པས་ཀུན་ནས་བསླང་བའི་ཕྱིར། །སྙིང་རྗེའི་རླན་དང་མ་བྲལ་བས། །སེམས་བསྐྱེད་རྣམ་གཉིས་དེ་ལ་རྫོགས། །གང་ལ་མི་རྟོག་རང་གསལ་བའི། །ཆོས་ཉིད་ངང་ཚུལ་གསལ་བ་ལ། །བྱིང་རྒོད་གཉིས་ཀྱི་སྐྱོན་བྲལ་བས། །ཞི་གནས་བདེ་བ་དེ་ལ་རྫོགས། །ཕྱི་ནང་ཆོས་རྣམས་མ་ལུས་ཀུན། །སོ་སོར་རྟོག་པའི་ཡེ་ཤེས་ཀྱིས། །སྒྱུ་མ་ལྟ་བུར་ཤེས་པའི་ཕྱིར། །དངོས་མེད་རྟོགས་པས་ལྷག་མཐོང་རྫོགས། །ད་ཡང་རྡོ་རྗེ་སེམས་དཔའ་ཉོན། །ལྟ་བའི་ངང་ལ་མཉམ་བཞག་ཚེ། །སེར་སྣ་འཛིན་པའི་སེམས་མེད་པས། །ཆོས་དང་བདག་ཏུ་མ་མཆིས་པས། །སྦྱིན་པའི་ཕ་རོལ་ཕྱིན་པ་རྫོགས། །ངེས་དོན་རྟོགས་པའི་རྣལ་འབྱོར་པས། །ལུས་ངག་ཡིད་ཀྱི་སྤྱོད་པ་ཡི། །མི་དགེ་ཉེས་བྱས་མི་འབྱུང་བས། །ཚུལ་ཁྲིམས་ཕ་རོལ་ཕྱིན་པ་རྫོགས། །རང་བྱུང་རིག་པའི་རྣལ་འབྱོར་པས། །ལྟ་བ་ངེས་པའི་གདེང་ཟིན་པས། །ཆོས་ཀྱི་དབྱིངས་སུ་ཀུན་ཤོང་ཕྱིར། །བཟོད་པའི་ཕ་རོལ་ཕྱིན་པ་རྫོགས། །ངེས་པའི་ལུང་ལ་ཡིད་ཆེས་པས། །རང་བྱུང་རིག་པ་ཤེས་པའི་ཕྱིར། །ལྟ་བའི་དོན་ལ་མ་ཡེངས་པས། །བརྩོན་འགྲུས་ཕ་རོལ་ཕྱིན་པ་རྫོགས། །སྔ་ཕྱིས་མ་བསླད་གཉུག་མ་ལ། །གཞན་དུ་འཛིན་བྲལ་རང་གསལ་སྐུ། །ཆོས་ཉིད་དོན་ལས་མི་གཡོ་ཕྱིར། །བསམ་གཏན་ཕ་རོལ་ཕྱིན་པ་རྫོགས། །ཐོས་པའི་ཤེས་རབ་བློ་སྦྱངས་ནས། །ངེས་པའི་དོན་ནི་མཐར་ཕྱིན་པས། །ཆོས་རྣམས་ལྟ་བས་ཐག་ཆོད་པས། །ཤེས་རབ་ཕ་རོལ་ཕྱིན་པ་རྫོགས། །ད་ཡང་རྡོ་རྗེ་སེམས་དཔའ་ཉོན། །ལུང་ལྡན་ངེས་པའི་གདམས་ངག་གིས། །ཆོས་ཀྱི་དབྱིངས་སུ་ཤེས་པའི་ཕྱིར། །རྣམ་པ་གང་ཡང་མི་འགོག་པས། །ཐབས་ཀྱི་ཕ་རོལ་ཕྱིན་པ་རྫོགས། །སྔོན་ནས་དགེ་བའི་ཚོགས་བསགས་པས། །བླ་མ་སངས་རྒྱས་ཀུན་དང་ཕྲད། །མི་གནས་བླ་མེད་དོན་རྟོགས་པས། །སྨོན་ལམ་ཕ་རོལ་ཕྱིན་ ― DNG002_Page_0203 ―
[མ་དཔེ་གཟིགས་ན་འདིར་གནོན།]
པ་རྫོགས། །ཐོག་མཐའ་མ་རིག་སངས་པ་ལས། །ལུང་ལྡན་རང་རིག་དོན་ཤར་བས། །མ་རིག་མུན་པ་ཀུན་བཅོམ་ཕྱིར། །སྟོབས་ཀྱི་ཕ་རོལ་ཕྱིན་པ་རྫོགས། །རང་བྱུང་ངོ་བོ་ཉིད་ཀྱི་སྐུ། །ཆོས་ཀུན་རྩ་བར་རབ་རྟོགས་པས། །ཡོན་ཏན་མ་ལུས་ཀུན་འདུས་ཕྱིར། །ཡེ་ཤེས་ཕ་རོལ་ཕྱིན་པ་རྫོགས། །ད་ཡང་འདུས་པའི་སྙིང་པོ་ཉོན། །སངས་རྒྱས་ཀུན་གྱི་མཛད་སྤྱོད་ལ། །ཐ་མལ་སྤྱོད་པའི་མིང་མེད་པས། །ལུས་ངག་དགེ་བ་མི་ཉམས་ཕྱིར། །ཚོགས་ཆེན་མ་ལུས་རྣམ་གཉིས་རྫོགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་རྣམས་ལྷུན་གྱིས་གྲུབ་པའི་འབྲས་བུ་བསྟན་པའི་ལེའུ་སྟེ་བརྒྱ་དང་རེ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །བདག་དང་ཡེ་ཤེས་གཉིས་མེད་ཕྱིར། །དག་པའི་ལྷར་ནི་མ་བསྒོམས་པས། །ཀྲི་ཡའི་ཐེག་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །གོང་འོག་གཉིས་སུ་མི་བལྟའི་ཕྱིར། །ལྟ་སྤྱོད་ཡ་ཆར་མི་བསྒོམ་པས། །ཨུ་པ་ཡར་ནི་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཡང་དག་ངེས་པའི་དོན་རྟོགས་ཕྱིར། །བྱང་ཆུབ་རྣམ་ལྔ་མ་བསྒོམས་པས། །ཡོ་ག་སེམས་དཔར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ད་ཡང་རྡོ་རྗེ་སེམས་དཔའ་ཉོན། །སྣང་བ་གཞི་ལ་མེད་པའི་ཕྱིར། །རྣམ་རྟོག་ལྷ་རུ་མ་བསྒྱུར་བས། །མ་ཧཱ་ཡོ་གར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །དབྱིངས་དང་ཡེ་ཤེས་གཉིས་མེད་པས། །འདུ་འབྲལ་མེད་འཇོག་ཡོངས་མེད་ཕྱིར། །ཨ་ནུ་ཡོ་གར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །སྣང་བ་སེམས་ཉིད་ཡིན་པའི་ཕྱིར། །ཆོས་ཉིད་མཚོན་དུ་མེད་རྟོགས་པས། །མཚན་མའི་སྐྱོན་དུ་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཕྱི་ནང་གསང་བའི་ཆོས་ཀུན་གྱི། །བརྟུལ་ཞུགས་གང་ཡང་མི་དགོས་པས། །བླང་དོར་སྤྱོད་པར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །རྣམ་རྟོག་གཞི་ལ་མེད་པའི་ ― DNG002_Page_0204 ―
[མ་དཔེ་གཟིགས་ན་འདིར་གནོན།]
ཕྱིར། །གཉིས་མེད་དོན་ལ་མི་རྟོག་པས། །ཕྱོགས་ཅན་ལྟ་བར་དེ་མི་གོལ། །དེ་ཡང་ངེས་པའི་འབྲས་བུ་ཡིན། །ཚོགས་བརྒྱད་གོལ་སར་ཤེས་པའི་ཕྱིར། །སེམས་ཉིད་དོན་ལ་མི་རྩོལ་བས། །མཉམ་ཉིད་དོན་ལ་མི་འགྱུར་ཕྱིར། །ཆོས་ཀྱི་སྐུ་ལ་གོལ་ས་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྔགས་ཕྱི་ནང་དུ་མི་གོལ་བར་བསྟན་པའི་ལེའུ་སྟེ་བརྒྱ་དང་རེ་དགུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སྒྲིབ་པ་མེད་པའི་འབྲས་བུ་ནི། །ངེས་པའི་ལུང་ལྡན་བླ་མ་ཡིས། །ཡེ་ཤེས་ཆེན་པོར་ངོས་ཟིན་ཕྱིར། །སྐབས་དབྱེའི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །ནམ་ལངས་མུན་སྒྲིབ་མེད་པ་བཞིན། །མ་རིག་བག་ཆགས་མེད་པའི་ཕྱིར། །བསླད་པའི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །གང་ཡང་དམ་པར་ལྟ་མེད་ཕྱིར། །ཆེད་དུ་བྱས་ནས་སྒོམ་མེད་པས། །ཕྱོགས་ལྷུང་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །གང་དྲན་ཆོས་སྐུར་རབ་ཤེས་པའི། །ལྟ་བ་ངེས་པའི་གདེང་ཟིན་པས། །ཚོགས་ཀྱི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །གསང་སྔགས་མཛད་སྤྱོད་ཐམས་ཅད་ལ། །བྱ་བ་མེད་པའི་དོན་རྟོགས་ཕྱིར། །ལས་བཞིའི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །འཁོར་འདས་ཆོས་ནི་གང་ལ་ཡང་། །མ་ཆགས་མི་གཡོའི་རྟོགས་ལྡན་ཕྱིར། །མཆོད་པའི་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །ཡང་དག་སངས་རྒྱས་རྣམས་གསུངས་པའི། །ངེས་པའི་ལུང་ལ་ཡིད་ཆེས་པས། །ཐེ་ཚོམ་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །གོལ་སྒྲིབ་མེད་པའི་དོན་ཤེས་ན། །རྒྱལ་བ་ཉིད་དང་དགོངས་པ་མཉམ། །དེ་ཕྱིར་ཆོས་སྐུ་ད་ལྟ་ཉིད། །སངས་རྒྱས་ཞེས་ནི་དེ་ལ་བྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་ ― DNG002_Page_0205 ―
[མ་དཔེ་གཟིགས་ན་འདིར་གནོན།]
དང་མཉམ་པའི་རྒྱུད་ལས། སྒྲིབ་པ་མེད་པའི་འབྲས་བུ་ཉམས་སུ་བླང་བ་བསྟན་པའི་ལེའུ་སྟེ་བརྒྱ་དང་བདུན་ཅུ་པའོ། །སྡོམ་དུ་བསྡུས་ཏེ་བསྟན་པ་སོ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་གདགས་ཕྱིར། །ཀུན་རིག་སྟོན་པ་ཆོས་རྗེ་ལ། །ངེས་པའི་དགོངས་དོན་འདི་སྐད་གསོལ། །སེམས་ལས་མ་བྱུང་སངས་རྒྱས་དང་། །རྒྱུ་ལས་མ་བྱུང་འབྲས་བུ་དང་། །ལུང་ལས་མ་བསྟན་གདམས་ངག་དང་། །ཁྱད་པར་འཕགས་པའི་གདམས་ངག་རྣམས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །ངེས་པ་བཞི་ཡི་ཁྱད་འཕགས་པ། །ཁྱོད་ལ་ལེགས་པར་ངེས་བསྟན་གྱིས། །ཡིད་ལ་ཟུངས་ལ་ངེས་པར་ཆོང་། །ད་ཡང་རྡོ་རྗེ་སེམས་དཔའ་ཉོན། །སེམས་ལས་མ་བྱུང་སངས་རྒྱས་ནི། །རང་བྱུང་ངེས་པའི་ཆོས་སྐུ་ནི། །སངས་རྒྱས་ཀུན་གྱི་ངེས་པའི་དོན། །རྣལ་འབྱོར་ཀུན་གྱི་དམ་པའི་ལམ། །ཐམས་ཅད་མཁྱེན་པའི་ཡེ་ཤེས་མཆོག །ད་ཡང་རྡོ་རྗེ་སེམས་དཔའ་ཉོན། །མཚན་ཉིད་སེམས་སུ་འདོད་པ་ནི། །མ་རིག་ཆོས་ནི་བདེན་གཉིས་སུ། །བློ་ཡིས་ནན་བརྟགས་སེམས་ཀྱིས་བཅོས། །ཚོགས་བསགས་སྒྲིབ་སྦྱངས་ཀུན་བརྟགས་པའི། །སེམས་བྲལ་རང་བྱུང་ཆོས་ཀྱི་སྐུ། །སེམས་ལས་མ་བྱུང་སངས་རྒྱས་འདི། །ཐེག་པ་ཀུན་ལས་ཁྱད་པར་འཕགས། །ཕྱི་ནང་གསང་སྔགས་བསྐྱེད་རྫོགས་ནི། །ཏིང་འཛིན་གསུམ་གྱིས་ལྷར་བསྒོམས་ནས། །ཕྲིན་ལས་རྣམ་བཞིའི་ལས་སྤྱོད་ཀུན། །འབྲས་བུ་མི་ཐོབ་ཀུན་བརྟགས་པས། །ཡིད་སྨོན་ཀུན་བརྟགས་དཀྱིལ་འཁོར་ཀུན། །དྲང་དོན་ཡིན་ཕྱིར་འཁྲུལ་པའི་སེམས། །གསལ་བརྟན་ཏིང་འཛིན་གོམས་གྱུར་ཀྱང་། །སེམས་ལས་མ་བྱུང་སངས་རྒྱས་མིན། །ད་ཡང་འདུས་པའི་སྙིང་པོ་ཉོན། །ཡང་དག་ངེས་དོན་སངས་རྒྱས་ནི། །ཡིད་ཀྱིས་མ་བསྒོམས་མ་བསྐྱེད་པའི། །རྩོལ་མེད་རང་གསལ་འདི་ཉིད་ལ། །སེམས་ ― DNG002_Page_0206 ―
[མ་དཔེ་གཟིགས་ན་འདིར་གནོན།]
ལས་མ་བྱུང་སངས་རྒྱས་ཡིན། །སྣང་མེད་རང་བྱུང་ཆོས་ཉིད་ལ། །ཡུལ་དུ་བྱས་པ་མེད་པའི་ཕྱིར། །ལྷ་མེད་བསྒོམ་རྒྱུ་ག་ལ་ཡོད། །དེ་ཕྱིར་སེམས་ནི་ཀུན་བརྟགས་ཡིན། །གང་ཡང་མ་བསྒོམས་ཆོས་ཉིད་ནི། །སེམས་ཀྱི་ཡུལ་ལས་འདས་པའི་ཕྱིར། །སེམས་ལས་མ་བྱུང་རང་བྱུང་སྟེ། །སངས་རྒྱས་ཀུན་གྱི་དགོངས་པ་ཡིན། །ད་ཡང་རྡོ་རྗེ་སེམས་དཔའ་ཉོན། །སེམས་ནི་མ་རིག་མུན་པ་ཡིན། །སངས་རྒྱས་སེམས་བྲལ་ཡེ་ཤེས་སྐུ། །མ་རིག་སེམས་སངས་སྒྲིབ་པ་དག །ཐམས་ཅད་མཁྱེན་པའི་ཡེ་ཤེས་རྒྱས། །རྟག་ཆད་འཛིན་པ་མ་རིག་སེམས། །དེ་ལས་མ་བྱུང་སྒྲོ་སྐུར་བྲལ། །རྟག་ཆད་སེམས་མེད་ཆོས་ཀྱི་སྐུ། །སེམས་ལས་མ་བྱུང་སངས་རྒྱས་ཡིན། །སངས་ནི་འཁྲུལ་པ་འཛིན་པ་སངས། །རྒྱས་ནི་ཆོས་སྐུ་མི་གཡོ་རྒྱས། །སངས་ནི་སེམས་སུ་འཛིན་པ་སངས། །རྒྱས་ནི་རང་བྱུང་ཡེ་ཤེས་རྒྱས། །སངས་ནི་གོལ་སྒྲིབ་སེམས་རྣམས་སངས། །རྒྱས་ནི་ཡེ་ཤེས་མི་རྟོག་རྒྱས། །སངས་ནི་བྱིང་དང་རྨུགས་པ་སངས། །རྒྱས་ནི་ལྷག་མཐོང་ཡེ་ཤེས་རྒྱས། །དེ་ཕྱིར་སེམས་ལས་མ་བྱུང་བའི། །ཡེ་ཤེས་རང་སངས་རྒྱས་པ་ཡིན། །ད་ཡང་འདུས་པའི་སྙིང་པོ་ཉོན། །སངས་ནི་རྒོད་འཕྲོ་གཡེང་བ་སངས། །རྒྱས་ནི་རང་རིག་ཡེ་ཤེས་རྒྱས། །སངས་ནི་འཁོར་འདས་འཛིན་པ་སངས། །རྒྱས་ནི་ཆོས་སྐུ་གསལ་བ་རྒྱས། །སངས་ནི་བག་ཆགས་ཉོན་མོངས་སངས། །རྒྱས་ནི་རང་གི་ངོ་བོ་རྒྱས། །སངས་ནི་བདུད་བཞིའི་ཆོ་འཕྲུལ་སངས། །རྒྱས་ནི་ཟིལ་གནོན་ལྟ་བ་རྒྱས། །དེ་ཕྱིར་རང་བྱུང་རིག་པ་འདི། །སེམས་ལས་མ་བྱུང་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །དུས་གསུམ་སངས་རྒྱས་སེམས་དང་བྲལ། །ཚོགས་བརྒྱད་མེད་ཕྱིར་སེམས་ཀྱང་མེད། །རང་བྱུང་སྙིང་པོ་ཆོས་ཀྱི་སྐུ། །སེམས་ལས་མ་བྱུང་སངས་རྒྱས་ཡིན། །མ་རིག་ལས་བྱུང་སེམས་ཅན་ཀུན། །སེམས་སུ་འཛིན་ཕྱིར་སྡུག་བསྔལ་འབྱུང་། །དེ་ཕྱིར་སེམས་བྲལ་སྤྲོས་ལ་ ― DNG002_Page_0207 ―
[མ་དཔེ་གཟིགས་ན་འདིར་གནོན།]
མེད། །སྤྲོས་མེད་ཆོས་སྐུ་རང་བྱུང་ལ། །རང་སེམས་བྲལ་བས་དམིགས་པ་མེད། །དམིགས་མེད་ཆོས་ཀྱི་སྐུ་ཞེས་བྱ། །སེམས་ལ་དུས་གསུམ་ཡོད་པའི་ཕྱིར། །ཚེ་ལ་སྔ་ཕྱི་ད་ལྟ་འབྱུང་། །སེམས་ལ་འཕོ་འགྱུར་ཡོད་པའི་ཕྱིར། །དེ་ཕྱིར་ལུས་ལ་སྐྱེ་འཆི་འབྱུང་། །ན་ཚ་བདེ་སྡུག་སྣ་ཚོགས་པ། །རང་སེམས་ཡིན་ཕྱིར་འཁོར་བར་སྨིན། །དེ་ཕྱིར་སེམས་ནི་སངས་རྒྱས་མིན། །ད་ཡང་རྡོ་རྗེ་སེམས་དཔའ་ཉོན། །སྐྱེ་ཤི་མེད་ཕྱིར་སེམས་དང་བྲལ། །སྐྱེ་མེད་རང་བྱུང་ཡེ་ནས་གནས། །དེ་ཉིད་ལམ་གྱི་ཡེ་ཤེས་ནི། །ཐོག་མཐའ་ཆོད་ན་དུས་གསུམ་གཅིག །ཆོས་སྐུ་གཅིག་ཕྱིར་འཕོ་འགྱུར་མེད། །དོན་ལ་འགྱུར་མེད་སྡུག་བསྔལ་བྲལ། །སྔ་ཕྱི་མེད་པར་རང་བྱུང་སྐུ། །སེམས་ལས་མ་བྱུང་སངས་རྒྱས་ཡིན། །འཕོ་འགྱུར་མེད་པས་སྡུག་བསྔལ་བྲལ། །བརྗོད་མེད་རང་གི་ངོ་བོ་ལ། །ཚོར་བ་བདེ་སྡུག་གང་ཡང་མེད། །དེ་ཕྱིར་ཆོས་ཉིད་བདེན་པའི་ངང་། །སེམས་ལས་མ་བྱུང་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །དུས་དང་སྤྱོད་ལམ་ཐམས་ཅད་དུ། །ངེས་དོན་འབྲལ་མེད་ཡེ་སངས་རྒྱས། །དེ་ཕྱིར་ལྟ་བ་འགྱུར་བ་མེད། །འགྱུར་མེད་ཆོས་ཉིད་རང་བྱུང་ཀློང་། །མ་ཡེངས་སེམས་མེད་ད་ལྟ་ཉིད། །སྒོམ་པ་ཀུན་གྱི་མཆོག་ཏུ་ནི། །ཀུན་བཟང་རྒྱལ་བས་གསུངས་པ་དེ། །སེམས་ལས་མ་བྱུང་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །ངེས་དོན་སངས་རྒྱས་ཁྱད་པར་ཅན། །ཀུན་གཞི་མེད་ཕྱིར་སངས་རྒྱས་མེད། །དེ་ཕྱིར་ཡུལ་མེད་རིག་པ་འདི། །སེམས་ལས་མ་བྱུང་སངས་རྒྱས་ཡིན། །སེམས་བྲལ་ལྷག་མཐོང་ཆོས་ཉིད་ལ། །དེ་ལ་ཡིད་ཆེས་ངེས་པའི་གདེང་། །སངས་རྒྱས་དགོངས་པ་མ་ནོར་བ། །དམ་པའི་ཐུགས་ལ་གསལ་བ་ནི། །སེམས་ལས་མ་བྱུང་སངས་རྒྱས་འདི། །ཐེག་པ་ཀུན་ལས་ཁྱད་པར་འཕགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སེམས་ལས་མ་བྱུང་བའི་ ― DNG002_Page_0208 ―
[མ་དཔེ་གཟིགས་ན་འདིར་གནོན།]
སངས་རྒྱས་བསྟན་པའི་ལེའུ་སྟེ་བརྒྱ་དང་དོན་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །རྒྱུ་ལས་མ་བྱུང་འབྲས་བུ་དེ། །ཀུན་རིག་རྒྱལ་པོས་བཀའ་སྩལ་པ། །རྒྱུ་རྐྱེན་མེད་པའི་མཐུན་དཔེ་ནི། །ནོར་བུ་རིན་ཆེན་ཀུན་ལྡན་བཞིན། །ཆོས་སྐུ་རྒྱུ་ལ་རག་མ་ལུས། །རྐྱེན་ལ་མི་ལྟོས་སྨོས་ཅི་དགོས། །ད་ཡང་འདུས་པའི་སྙིང་པོ་ཉོན། །རྒྱུ་ནི་འདུས་བྱས་མི་རྟག་ཕྱིར། །གཉེན་པོས་འཇིག་ཕྱིར་རྐྱེན་ཁར་འགྲོ། །དེ་ཕྱིར་རྐྱེན་གྱིས་མ་བསྐྱེད་པའི། །རང་བྱུང་ཆོས་སྐུ་འགྱུར་མེད་དེ། །ཆོས་རྣམས་ཀུན་གྱི་སྙིང་པོ་ཡིན། །ཕྱི་ནང་ཀུན་གྱི་བག་ཆགས་ཀྱི། །རྒྱུ་རྐྱེན་ངན་པས་བསྐྱེད་པའི་ཕྱིར། །རང་གིས་རང་བསླུས་འཛིན་པ་ཡིས། །འཁྲུལ་པ་ཡིན་པར་ཐེ་ཚོམ་མེད། །དེ་ཕྱིར་འཁོར་འདས་མ་རེག་པའི། །ངེས་དོན་ཆོས་སྐུ་སྙིང་པོ་ནི། །རྒྱུ་ལས་མ་བྱུང་རང་བྱུང་སྐུ། །རྐྱེན་གྱིས་མ་བསྐྱེད་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །མ་རིག་རྒྱུ་ལས་མ་སྐྱེས་པའི། །རང་བྱུང་ངོ་བོ་ཉིད་ཀྱི་སྐུ། །ཀུན་བརྟགས་རྐྱེན་གྱིས་མ་བསྐྱེད་ཕྱིར། །འབྱུང་བ་བཞི་ལ་བརྟེན་མི་དགོས། །ནམ་མཁའ་སྟོང་ལ་རྒྱུ་མེད་ཕྱིར། །རིག་པ་སྟོང་ལ་རྒྱུས་མ་བསྐྱེད། །ནམ་མཁའ་འབྱུང་བཞིའི་རྐྱེན་མི་ཚུགས། །དེ་བཞིན་ཆོས་སྐུ་འགྱུར་བ་མེད། །དེ་ཕྱིར་རྐྱེན་ལས་མ་སྐྱེས་པའི། །འབྲས་བུ་ངེས་པར་ཡོད་མ་ཡིན། །ད་ཡང་འདུས་པའི་སྙིང་པོ་ཉོན། །རྒྱུ་མེད་འབྲས་བུ་ཡོད་མ་ཡིན། །རྒྱ་མཚོའི་གསེར་ལ་རྒྱུ་མེད་ལྟར། །རིག་པ་རང་གྲོལ་རྒྱུས་མ་བསྐྱེད། །གསེར་དེ་གཡའ་ཡིས་མི་གོས་བཞིན། །ཆོས་སྐུ་རྐྱེན་གྱིས་མི་འགྱུར་བས། །དེ་ཕྱིར་རྒྱུ་ལས་མ་བྱུང་བའི། །འབྲས་བུ་ངེས་པར་ཡོད་པ་ཡིན། །སེམས་ཅན་རྒྱུ་ལས་མ་སྐྱེས་པའི། །ཀུན་བཟང་སངས་རྒྱས་ཡོད་པར་ངེས། །སྔོན་གྱི་སངས་རྒྱས་རྒྱུས་མ་སྐྱེད། །རྐྱེན་མེད་རང་བྱུང་ཡིན་པའི་ཕྱིར། །ཡེ་ནས་སངས་རྒྱས་ཡིན་པར་བཤད། །ད་ཡང་འདུས་པའི་སྙིང་པོ་ཉོན། །དྲང་དོན་སངས་རྒྱས་རྒྱུ་རྐྱེན་ནི། །ཐབས་ ― DNG002_Page_0209 ―
[མ་དཔེ་གཟིགས་ན་འདིར་གནོན།]
དང་ཤེས་རབ་ཡིན་ཞེས་ཟེར། །ཇི་སྲིད་ཐབས་ལ་བརྟེན་གྱི་བར། །ཆང་དང་དུག་བསྲེས་འཆི་བ་འདྲ། །དེ་ཕྱིར་རང་བྱུང་ཐབས་མི་དགོས། །ཐབས་ནི་མ་རིག་དྲང་བ་ཙམ། །ཡེ་ཤེས་ཟང་ཐལ་རྒྱུས་མ་བསྐྱེད། །རྒྱུ་མེད་འབྲས་བུ་ཤེས་པས་ཆོག །ད་ཡང་རྡོ་རྗེ་སེམས་དཔའ་ཉོན། །རང་བྱུང་སྟོབས་ཀྱི་འབྱུང་བའི་དཔེ། །ལྷ་ཡི་པཉྩཱ་ལི་ཀ་བཞིན། །རྒྱུ་རྐྱེན་མ་བསྐྱེད་རང་བྱུང་སྐུ། །སུས་ཀྱང་མ་བྱས་བྱེད་པ་མེད། །དེ་ཕྱིར་ཆོས་ཉིད་བརྡལ་པའི་སྐུ། །རང་བྱུང་ཡེ་ཤེས་རྒྱུས་མ་བསྐྱེད། །རྐྱེན་མེད་རང་གསལ་རྒྱུན་མ་ཆད། །གཉེན་པོའི་རྐྱེན་གྱིས་བཅོས་སུ་མེད། །རྒྱུ་ལས་མ་བྱུང་སངས་རྒྱས་ཡིན། །ད་ཡང་འདུས་པའི་སྙིང་པོ་ཉོན། །སྐྱེ་མེད་རང་བྱུང་དོན་རྟོགས་པས། །ཚོགས་གཉིས་བསགས་པས་ཁྱད་པར་འཕགས། །དེ་ཕྱིར་ཚོགས་བསགས་རྩེད་མོ་འདྲ། །དྲང་དོན་ཚོགས་གསོག་གཡེངས་པས་ཕུང་། །གཟུགས་སྐུ་ཚོགས་གཉིས་ལས་མ་བྱུང་། །དེ་ཕྱིར་ཆོས་སྐུ་རྟོགས་གྱུར་ནས། །ཚོགས་མ་བསགས་པའི་གཟུགས་སྐུ་བྱུང་། །དེ་ཕྱིར་རྒྱུ་མེད་འབྲས་བུ་ཡིན། །དེ་ཡང་འདུས་པའི་སྙིང་པོ་ཉོན། །ངོ་བོ་གཅིག་ལ་ཐ་དད་མེད། །བྱད་དང་མེ་ལོང་གཟུགས་བརྙན་བཞིན། །ཆོས་སྐུའི་རྩལ་ནི་གཟུགས་སྐུ་གཉིས། །ཚོགས་མ་བསགས་པར་ཤུགས་ལ་བྱུང་། །སྐུ་གསུམ་འགྲོ་དོན་ཐ་དད་ཀྱང་། །རྒྱུ་རྐྱེན་མ་སྐྱེས་ཡེ་ནས་གནས། །དེ་ཕྱིར་ཆོས་སྐུའི་རང་རྩལ་ནི། །མཐོང་སྣང་སྣ་ཚོགས་ཅིར་ཡང་འཆར། །དེ་ཙམ་ཉིད་ན་རྒྱུ་རྐྱེན་བྲལ། །དཔེར་ན་ནམ་མཁའ་ཇི་བཞིན་ནོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱུ་ལས་མ་བྱུང་བའི་འབྲས་བུ་བསྟན་པའི་ལེའུ་སྟེ་བརྒྱ་དང་དོན་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །ལུང་ལ་མ་བརྟེན་གདམས་ངག་ནི། །དད་ལྡན་འཁོར་ལ་བཀའ་སྩལ་ ― DNG002_Page_0210 ―
[མ་དཔེ་གཟིགས་ན་འདིར་གནོན།]
པ། །སངས་རྒྱས་ཀུན་གྱི་ཡེ་ཤེས་སྐུ། །རང་བྱུང་ངོ་བོ་རྟོགས་ལས་བྱུང་། །འདུས་མ་བྱས་ཀྱི་ནམ་མཁའ་འདྲ། །གང་ཡང་མེད་པའི་སྔོན་རོལ་དུ། །རང་བྱུང་ངོ་བོ་ཉིད་ཀྱི་གཞི། །ལུང་ལས་མ་བརྟེན་གདམས་ངག་ཆོས། །རང་གི་རིག་པས་རང་རྟོགས་ཕྱིར། །འཁྲུལ་མ་མྱོང་ལ་རྟོགས་མ་མྱོང་། །དེ་ཚེ་འཁོར་འདས་འབྱུང་བ་མེད། །གཞི་ཤེས་རང་བྱུང་རིག་པ་ལ། །གཞི་ནས་མ་རིག་མེད་པའི་ཕྱིར། །རྐྱེན་གྱིས་སྔོན་འཁྲུལ་མ་མྱོང་བས། །ལུང་ལྡན་གྱིས་ནི་བསྟན་མི་དགོས། །དེ་ཕྱིར་ལུང་ལས་མ་བྱུང་ཆོས། །ཡ་མཚན་རྨད་དུ་བྱུང་བའི་བཀའ། །སངས་རྒྱས་ཐམས་ཅད་དེ་ལས་སྐྱེས། །ད་ཡང་འདུས་པའི་སྙིང་པོ་ཉོན། །རང་བྱུང་ཀུན་ཏུ་བཟང་པོ་ལ། །ཡུལ་མེད་འཛིན་པ་མེད་པའི་ཕྱིར། །ཡེ་ནས་རིག་པ་རང་ལ་ཤར། །དུས་དེ་ཉིད་དུ་མ་རིག་སངས། །དེ་ཕྱིར་ལུང་ལས་མ་བྱུང་བའི། །ངེས་དོན་སྙིང་པོའི་ཆོས་ཞེས་བྱ། །ད་ཡང་འདུས་པའི་སྙིང་པོ་ཉོན། །ཀུན་བཟང་སློབ་དཔོན་མེད་པའི་ཕྱིར། །ཕྱི་ནང་ཆོས་ཀུན་བཤད་ལུང་མེད། །དེ་ཕྱིར་གཞན་ལ་མ་བརྟེན་པའི། །རང་གི་རིག་པས་ཤེས་པའི་ཕྱིར། །ལུང་ལ་མ་བརྟེན་མན་ངག་ཆོས། །རྒྱལ་བ་རྣམས་ཀྱི་རྟོགས་ཚུལ་ཡིན། །ད་ཡང་འདུས་པའི་སྙིང་པོ་ཉོན། །ལུང་ལ་མ་བརྟེན་ཆོས་སྐུ་ལ། །འཁོར་བ་བཙལ་གྱིས་མི་རྙེད་པས། །སངས་རྒྱས་ཀུན་ཏུ་བཟང་པོ་བྱ། །བག་ཆགས་ཀུན་གྱིས་མ་གོས་ཕྱིར། །རྟོག་པ་མེད་ཕྱིར་ཡེ་ཤེས་རྒྱས། །ལུང་ལ་མ་བརྟེན་གདམས་ངག་ཡིན། །དེ་ཕྱིར་དུས་གསུམ་སངས་རྒྱས་ཀྱི། །ཡོན་ཏན་ཐམས་ཅད་མ་ལུས་པར། །སྐྱེད་པར་བྱེད་པའི་མེས་པོ་ཡིན། །ད་ཡང་རྡོ་རྗེ་སེམས་དཔའ་ཉོན། །ཀུན་བཟང་སྤྲུལ་པ་རྣམ་གསུམ་གྱིས། །སྐུ་གསུང་ཐུགས་ཀྱི་སྒོ་ནས་ནི། །ཐེག་དགུའི་ཆོས་རྣམས་བཤད་པ་ཡང་། །ལུང་ལ་མ་བརྟེན་ཆོས་འདི་ཡི། །བྱིན་གྱི་བརླབས་ཀྱིས་འབྱུང་བ་ཡིན། །ཐུགས་ནས་ངེས་པར་བརྒྱུད་པ་ཡིན། །མན་ངག་སྙིང་པོ་འདི་རྟོགས་ན། །རྟོགས་པ་མངོན་འགྱུར་ ― DNG002_Page_0211 ―
[མ་དཔེ་གཟིགས་ན་འདིར་གནོན།]
སངས་རྒྱས་ཡིན། །དེ་མེད་ཆོས་རྣམས་མ་ལུས་ཀུན། །སྤྲེའུ་འདྲའི་ལུང་གིས་བསླད་པ་ཡིན། །ཐེག་དགུའི་ཆོས་ཀུན་རྐྱེན་གྱིས་བྱས། །དེ་ཕྱིར་ངེས་དོན་བཀའ་མ་ཡིན། །དེར་བརྟེན་སྒྲུབ་ཐབས་བསྟན་ཆོས་སོགས། །བྱས་པའི་ཆོས་ཀུན་ཤིན་ཏུ་ནོར། །དེས་བརྩམས་མཁས་པའི་ཡིན་ཟེར་ནས། །བསྟོད་ར་ལོ་རྒྱུས་མང་བཤད་ཀྱང་། །སྤྲེའུ་འདྲའི་ལུང་གིས་དམ་ཆོས་བསླད། །ཆུ་དང་འོ་མ་འདྲེས་པ་འདྲ། །དེ་ཕྱིར་སྤྲེལ་འདྲ་ལུང་ངན་ལ། །བརྟེན་པས་ལམ་ནོར་རྟོག་པ་ཟིན། །དེ་ཕྱིར་སྡུག་བསྔལ་སྣ་ཚོགས་མྱོང་། །འཁོར་བའི་མཐའ་ལ་ཟད་པ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལུང་ལ་མ་བརྟེན་པའི་གདམས་ངག་བསྟན་པའི་ལེའུ་སྟེ་བརྒྱ་དང་དོན་གསུམ་པའོ།། །།ཀུན་རིག་སྟོན་པ་ཆོས་རྗེ་ཡིས། །ངེས་དོན་གདམས་ངག་འདི་སྐད་གསུངས། །སངས་རྒྱས་དགོངས་པ་མ་ནོར་བར། །སེམས་ཅན་ཀུན་ལ་གནས་པ་ཡི། །རྒྱུ་རྐྱེན་མ་སྐྱེས་རང་བྱུང་བ། །ལུང་ལྡན་ངེས་པའི་གདམས་ངག་ནི། །འཕེལ་འགྲིབ་མེད་པའི་ཡེ་ཤེས་ཡིན། །ད་ཡང་འདུས་པའི་སྙིང་པོ་ཉོན། །དང་པོ་འཁོར་འདས་བར་དོ་ལ། །ཀུན་བཟང་ཡེ་ཤེས་རྟོགས་དོན་དེ། །རང་བྱུང་ངོ་བོ་ཉུག་ཙམ་བྱུང་། །ངེས་དོན་རིག་པ་ཙམ་གྱིས་ཤར། །ཡིད་ཆེས་དོན་ལ་འགྱུར་བ་མེད། །རྟོགས་དང་སངས་རྒྱས་དུས་མཉམ་བྱུང་། །འཁོར་འདས་ཐོག་མཐའ་དུས་གཅིག་ཆོད། །དེ་ཕྱིར་སངས་རྒྱས་མེས་པོ་ཡིན། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ངོ་བོ་ཉིད་ཀྱི་སྐུ། །དད་པ་དང་ནི་ཤེས་རབ་ཀྱི། །སྐྱེ་ཤི་གཉིས་ཀྱི་བར་དོ་ལ། །ལུང་ལྡན་བླ་མ་དམ་པ་ཡིས། །བསྟན་པའི་དོན་ལ་རང་ཡིད་ཆེས། །ནོར་བུ་རིན་ཆེན་རྙེད་པ་འདྲ། །སྣོད་དང་སྐལ་བ་ལྡན་པས་རྟོགས། །ངེས་པའི་བཀའ་དང་མི་འགལ་མཐུན། །ཆོས་ཀྱི་སྐུ་དང་མི་འབྲལ་བས། །སྐྱེ་བ་མི་ལེན་ཡེ་ཤེས་ལྡན། །གཟུགས་སྐུ་རྣམ་གཉིས་འགྲོ་དོན་བྱེད། །ད་ཡང་རྡོ་རྗེ་སེམས་དཔའ་ཉོན། །རྩོལ་བསྒྲུབ་དག་ལས་མ་བྱུང་བར། །རང་བྱུང་ ― DNG002_Page_0212 ―
[མ་དཔེ་གཟིགས་ན་འདིར་གནོན།]
ལམ་ལ་རག་མ་ལུས། །ཡུལ་ལས་མ་སྐྱེས་ཆོས་སྐུ་དེ། །ལུང་ལྡན་རྐྱེན་གྱིས་རྟོགས་པས་ཆོག །རྡོ་རྗེ་སེམས་ལ་བརྟེན་པའི་ཕྱིར། །ད་ཡང་རྡོ་རྗེ་སེམས་དཔའ་ཉོན། །རང་ལ་ཡོད་ཀྱིས་གཞན་མ་བལྟ། །གང་གི་རྟོགས་པ་མ་ཞུགས་ཤིང་། །ཤེས་པ་རང་གསལ་འདི་ཉིད་ནི། །ཆོས་སྐུར་ཤེས་པས་ཆོག་པའི་ཕྱིར། །ཆོས་ཉིད་ངང་ལ་ཐུག་མ་གཅོད། །ལྟ་བའི་རྒྱུན་ལ་བརྗེད་མ་ངེས། །སྒོམ་པའི་ངང་ལ་དྲན་མ་གསལ། །སྤྱོད་པའི་ཆོས་ལ་བཅོས་མ་བསླད། །དམ་ཚིག་གཞུང་ལ་ཚུར་མ་རྐྱེན། །འབྲས་བུའི་ཆོས་ལ་རྟོགས་མ་རིང་། །ངེས་པའི་ལུང་ལྡན་གདམས་ངག་གི། །ཡིད་ཆེས་གདེང་རྙེད་དགོངས་པར་ལྡན། །ཐ་མལ་མ་ཡིན་བརྩོན་འགྲུས་ཀྱི། །འདུག་ཚུག་རྐྱེན་ཐུབ་སྒོམ་ཆེན་ཡིན། །རྡོ་རྗེ་སེམས་དཔའ་ཁྱོད་ཉིད་ཀྱང་། །རང་བྱུང་ཆོས་ཀྱི་སྙིང་པོར་བཤད། །སྤྲོ་བསྡུ་མེད་པའི་ཤེས་པ་ལ། །སྐྱེ་འགག་མེད་པའི་ཏིང་འཛིན་གསལ། །འབྱུང་འཇུག་མེད་པའི་ཡེ་ཤེས་ཤར། །ད་ཡང་རྡོ་རྗེ་སེམས་དཔའ་ཉོན། །ཡེ་ནས་ཡིན་གྱིས་གཟོད་མ་ཚོལ། །འགྲོ་ས་མེད་ཀྱིས་ཅན་ནི་འདུག །ཡེངས་ས་མེད་ཀྱིས་ཤེས་པ་ཀློད། །གསལ་ལ་རྟོག་མེད་ཆོས་ཀྱི་སྐུ། །ཡིད་ཆེས་ངེས་པའི་གདེང་གིས་ཟིན། །ཤེས་གསལ་རིག་པ་སངས་རྒྱས་ཐུགས། །ད་ཡང་འདུས་པའི་སྙིང་པོ་ཉོན། །ལུང་ལྡན་ངེས་དོན་གསལ་བ་ཡི། །རང་གསལ་འདི་ལ་བོགས་མི་འདོན། །སོ་ཐུབ་རིག་པ་ངང་གི་རྩལ། །དེ་ཤེས་ཡེངས་པ་མེད་ཅེས་བྱ། །ད་ཡང་འདུས་པའི་སྙིང་པོ་ཉོན། །འགྲོ་དྲུག་ཡུལ་ལ་མི་རྟོག་ན། །འགྲོ་དྲུག་སྐྱེ་གནས་འཁོར་མི་སྲིད། །དེ་ཕྱིར་རྟོག་མེད་རིག་པ་ལ། །ཡིད་ཆེས་མི་གཡོ་རྒྱུན་དུ་གནས། །ཐ་མལ་ཤེས་པ་གཞི་ཆ་ལ། །རྒྱལ་བ་ཀུན་གྱི་དགོངས་པ་འདུས། །དེ་དོན་ངེས་ལུང་བསྟན་པ་ལ། །སངས་རྒྱས་ཀུན་དང་དགོངས་པ་མཉམ། །ད་ཡང་རྡོ་རྗེ་སེམས་དཔའ་ཉོན། །ཁོང་ནས་ཡེ་ཤེས་རང་ཤར་བ། །དཔྱད་ནས་བྱུང་བ་མ་ཡིན་ཏེ། །གདམས་ངག་ ― DNG002_Page_0213 ―
[མ་དཔེ་གཟིགས་ན་འདིར་གནོན།]
བསྟན་པས་བྱུང་བ་ཡིན། །དེ་ཕྱིར་བླ་མའི་བཀའ་འདི་གཅེས། །རང་བྱུང་སྙིང་པོ་བྱང་ཆུབ་ལ། །རྩོལ་བར་བྱ་བ་མིང་ཡང་མེད། །བྱ་དགོས་འཁོར་བ་ལུང་མ་བསྟན། །སེམས་ཀྱིས་ཆོས་སྐུ་ཁྱོད་ལ་བྱེད། །ད་ཡང་འཁོར་གྱི་སྙིང་པོ་ཉོན། །ནམ་མཁའི་ཆ་ལ་བགོས་མ་བྱེད། །བརྫུན་གྱིས་བདེན་པ་མ་བསླུ་བར། །ཚིག་མང་བཤད་པས་ཆོས་མ་བསླད། །ཚིག་ཏུ་ཉུང་ལ་དོན་དུ་འདྲིལ། །ལུང་ལྡན་མ་ནོར་གདམས་ངག་གིས། །སློབ་མ་ཡིད་ཆེས་གདེང་ལྡན་ལ། །གདམས་ངག་ཕོག་ཅེས་དེ་ལ་བྱ། །ད་ཡང་རྡོ་རྗེ་སེམས་དཔའ་ཉོན། །སངས་རྒྱས་ཡོན་ཏན་སྒྲོ་མི་གདགས། །སེམས་ཅན་སྐྱོན་ཞེས་སྐུར་མི་གདབ། །ཡུལ་ལ་མ་སྤྱད་ཞེན་མི་བྱ། །སྒྲོ་སྐུར་ཞེན་མེད་ཆོས་ཀྱི་སྐུ། །རྒྱུན་དུ་འབྲལ་མེད་གདམས་ངག་གིས། །དེ་ཕྱིར་ལུང་ལྡན་བཀའ་འདི་གཅེས། །ད་ཡང་འདུས་པའི་སྙིང་པོ་ཉོན། །མཁས་པའི་ཡོན་ཏན་ཁྱད་མི་གསད། །འཁོར་བའི་ཆོས་ལ་ངོས་མ་འཛིན། །སྣང་བའི་ཡུལ་ལ་ཞེན་མ་ཆེ། །འཇིག་རྟེན་ཆོས་ལ་བློ་མ་རྣོ། །རྒྱལ་བའི་བཀའ་ལ་ཤེད་མ་ཆུང་། །སློབ་དཔོན་དག་ལ་འགྲན་མ་འཛུགས། །ཚུལ་འཆོས་ཅན་ལ་བཀུར་མི་བྱ། །གདམས་ངག་མེད་པར་ཆོས་མི་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གདམས་ངག་ཁྱད་པར་འཕགས་པ་རྡོ་རྗེ་སེམས་དཔའ་ལ་ལུང་མངོན་དུ་ཕོག་པ་བསྟན་པའི་ལེའུ་སྟེ་བརྒྱ་དང་དོན་བཞི་པའོ། །སྡོམ་དུ་བསྡུས་ཏེ་བསྟན་པ་སོ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །དགོས་པའི་དོན་ཆེན་འདི་སྐད་གསོལ། །རྣལ་འབྱོར་བར་དུ་གཅོད་པ་ཡི། །བདུད་ཀྱི་ཆོ་འཕྲུལ་ཟིལ་གནོན་པའི། །རྟགས་དང་འབྲས་བུ་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་རྒྱལ་པོས་བཀའ་སྩལ་པ། །ཆོས་ཀུན་རྩ་བ་བྱང་ཆུབ་སེམས། །དེ་རྟོགས་ཟིལ་གྱིས་གནོན་པའི་རྟགས། །ཀུན་བཟང་སྟོན་པ་ངས་བཤད་ཀྱིས། །ལེགས་པར་ཉོན་ལ་ཡིད་ལ་ཟུངས། ། ― DNG002_Page_0214 ―
[མ་དཔེ་གཟིགས་ན་འདིར་གནོན།]
རྣལ་འབྱོར་སྣང་བའི་འོད་བྱུང་བ། །གཞའ་ཚོན་རང་བཞིན་མེད་ཤེས་ལྟར། །དམ་པར་ཤེས་པའི་བློ་མི་འབྱུང་། །འོད་གསལ་བདུད་ནི་ཟིལ་གནོན་རྟགས། །དོན་རྟོགས་རྣལ་འབྱོར་དམ་པ་ཡིས། །སྒྲ་ཡི་རྣམ་པ་གང་ཐོས་ཚེ། །སྒྲ་བརྙན་རྟག་པ་མེད་ཤེས་པས། །རྗེས་འབྲང་འཛིན་པའི་སེམས་བྲལ་ཕྱིར། །གྲགས་སྒྲ་བདུད་ནི་ཟིལ་གནོན་རྟགས། །རྣལ་འབྱོར་འཇིགས་གཟུགས་མཐོང་བའི་ཚེ། །ལྦུ་བ་སྙིང་པོ་མེད་ཤེས་ལྟར། །གཞི་ལ་འཇིགས་པའི་ཡུལ་མེད་རྟོགས། །གཟུགས་བདུད་ཟིལ་གྱིས་ནོན་པའི་རྟགས། །རྣལ་འབྱོར་བསླུ་བའི་རྫུན་བྱུང་ཚེ། །རྨི་ལམ་བཞིན་དུ་བརྫུན་ཏུ་ཤེས། །གང་ལ་བདེན་པར་མི་བལྟ་བས། །བསླུ་བའི་བདུད་ནི་ཟིལ་གནོན་རྟགས། །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་ཡུལ་དྲན་རྒོད་པའི་ཚེ། །དུག་ལ་སྔགས་ཀྱིས་བཏབ་པ་ལྟར། །སྔ་ཕྱི་རྗེས་འབྲང་མེད་ཤེས་པས། །མི་རྟོག་བདུད་ནི་ཟིལ་གནོན་རྟགས། །རྣལ་འབྱོར་ཤེས་པ་འཕྲོ་བའི་ཚེ། །བ་མོ་ལ་ནི་ཉི་ཤར་ལྟར། །རང་བྱུང་རང་གྲོལ་དྲན་པའི་ཕྱིར། །མི་གཡོ་བདུད་ནི་ཟིལ་གནོན་རྟགས། །རྣལ་འབྱོར་གསལ་བ་བྱིང་གྱུར་ཚེ། །རིན་ཆེན་ག་བུར་བཅུག་པ་ལྟར། །ཆོས་ཉིད་གསལ་བ་རང་ཐིམ་ཤེས། །གསལ་བའི་བདུད་ནི་ཟིལ་གནོན་རྟགས། །སྒོམ་པ་རྨུགས་ཤིང་བདེ་མེད་ཚེ། །དཔེར་ན་ཏི་བྱ་རྩིས་མེད་ལྟར། །རྨུགས་མེད་བདེ་བ་ཆེན་པོར་ཤེས། །བདེ་འདོད་བདུད་ནི་ཟིལ་གནོན་རྟགས། །ད་ཡང་འདུས་པའི་སྙིང་པོ་ཉོན། །ལྟ་སྒོམ་འཕེལ་འགྲིབ་མེད་ཤེས་ཕྱིར། །བདུད་ཉིད་རང་བྱུང་ཡེ་ཤེས་སུ། །དོན་རྟོགས་སངས་རྒྱས་རྟགས་སུ་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྟ་སྒོམ་གྱི་བདུད་ཟིལ་གྱིས་གནོན་པའི་རྟགས་བསྟན་པའི་ལེའུ་སྟེ་བརྒྱ་དང་དོན་ལྔ་པའོ།། །།དེ་ནས་འཁོར་ལ་བཀའ་སྩལ་པ། །སྤྱོད་པ་ཉམས་བདུད་ཟིལ་གནོན་རྟགས། །ངེས་དོན་བཤད་ཀྱིས་ཡིད་ལ་ཟུངས། །འདུ་འཛི་ལོངས་སྤྱོད་བདུད་བྱུང་ཚེ། །བུང་བ་བཅུད་ལེན་ཞེན་མེད་ལྟར། །གང་ལ་ཆགས་པ་ ― DNG002_Page_0215 ―
[མ་དཔེ་གཟིགས་ན་འདིར་གནོན།]
མེད་རྟོགས་ཕྱིར། །ལོངས་སྤྱོད་བདུད་ནི་ཟིལ་གནོན་རྟགས། །རྣལ་འབྱོར་གནས་ལ་ཞེན་པའི་ཚེ། །མགྲོན་པོ་ཡུལ་སླེབ་འཇིགས་མེད་ལྟར། །མ་བཀོལ་ཏིང་འཛིན་གྲོགས་སུ་ཆེ། །ཞེན་པའི་བདུད་ནི་ཟིལ་གནོན་རྟགས། །རྣལ་འབྱོར་གཡེང་བའི་བདུད་བྱུང་ཚེ། །མེ་ལ་ཤིང་བསྣན་ཇི་བཞིན་དུ། །རྣམ་རྟོག་ཡེ་ཤེས་སྐུལ་མར་ཤེས། །གཡེངས་བདུད་ཟིལ་གྱིས་གནོན་པའི་རྟགས། །རྣལ་འབྱོར་འཁོར་ངན་བདུད་བྱུང་ཚེ། །ཕག་དང་གླང་པོ་འདྲེལ་མེད་ལྟར། །གཉེན་ལ་ཆགས་པས་འཆིང་བར་རྟོགས། །འཁོར་ངན་བདུད་ནི་ཟིལ་གནོན་རྟགས། །ད་ཡང་རྡོ་རྗེ་སེམས་དཔའ་ཉོན། །འདྲེ་བཀྲེན་ལྷར་བཟུང་གིས་བསྟན་ལ། །བདེན་པར་མི་འཛིན་རེ་དོགས་བྲལ། །བླ་མའི་ལུང་ལ་ཡིད་ཆེས་ཕྱིར། །ལུང་བསྟན་བདུད་ནི་ཟིལ་གནོན་རྟགས། །རྣལ་འབྱོར་ཉམས་མྱོང་སྐྱེས་པའི་ཚེ། །བདེན་མཐོང་ཉམས་ལ་མ་ཞེན་པར། །ཉམས་ལ་ཞེན་པ་སྐྱོན་དུ་རྟོགས། །ཞེན་ཉམས་བདུད་ནི་ཟིལ་གནོན་རྟགས། །རྣལ་འབྱོར་སྤྱོད་པ་ཚུལ་འཆོས་ཚེ། །དྲང་སྲོང་གཡོ་སྒྱུ་མེད་པ་ལྟར། །ཚུལ་འཆོས་སྤྱོད་པ་འཁྲུལ་པར་ཤེས། །ཞེ་འདོད་བདུད་ནི་ཟིལ་གནོན་རྟགས། །རྣལ་འབྱོར་བསྒོམ་པ་བོགས་འདོན་ཚེ། །འདོད་ཆགས་བྲལ་བའི་དགེ་སློང་བཞིན། །ངེས་དོན་ལྟ་བར་དབང་མི་དགོས། །བདེ་འདོད་བདུད་ནི་ཟིལ་གནོན་རྟགས། །རྣལ་འབྱོར་ཞེ་སྡང་སྐུར་འདེབས་ཚེ། །སྐུར་བྲལ་ཉམས་མྱོང་བཙུན་མོ་བཞིན། །སྨད་སེམས་མེད་པའི་གདེང་ལྡན་པས། །སྐུར་འདེབས་བདུད་ནི་ཟིལ་གནོན་རྟགས། །རྣལ་འབྱོར་ང་རྒྱལ་སྒྲོ་འདོགས་ཚེ། །རིན་ཆེན་ནོར་ལ་བསྙད་མི་དགོས། །དེ་བཞིན་ངེས་དོན་གསང་ཐུབ་ན། །ང་རྒྱལ་བདུད་ནི་ཟིལ་གནོན་རྟགས། །ད་ཡང་འདུས་པའི་སྙིང་པོ་ཉོན། །དེ་དག་སྤྱོད་པ་ཉམས་ཀྱི་བདུད། །རྟོགས་ན་རང་བྱུང་ཆོས་སྐུ་ཡིན། །དེ་ཕྱིར་དོན་དྲན་བདུད་མེད་པས། །ཟིལ་གྱིས་གནོན་པའི་ཐབས་མི་དགོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྱོད་པའི་ཉམས་ཀྱི་བདུད་ཟིལ་གྱིས་མནན་པའི་ལེའུ་སྟེ་ ― DNG002_Page_0216 ―
[མ་དཔེ་གཟིགས་ན་འདིར་གནོན།]
བརྒྱ་དང་དོན་དྲུག་པའོ།། །།ད་ཡང་འདུས་པའི་སྙིང་པོ་ཉོན། །ངེས་དོན་རྟོགས་པའི་རྣལ་འབྱོར་པ། །ལན་ཅིག་སྐྱེ་འཆིའི་བདུད་བྱུང་ཚེ། །ཡེ་ཤེས་ཆོས་སྐུའི་གཟུགས་བརྙན་ནི། །ལོངས་སྤྱོད་རྫོགས་དང་སྤྲུལ་སྐུ་འབྱུང་། །ད་ཡང་འདུས་པའི་སྙིང་པོ་ཉོན། །འཇིག་རྟེན་དག་པར་རྟོགས་པའི་ཚེ། །དམྱལ་བའི་བཙོ་བསྲེགས་འཇིགས་པའི་སྒྲ། །ངུ་འབོད་ཙེར་ལྷང་ལ་སོགས་པ། །གསང་སྔགས་གསུང་གི་འཁོར་ལོར་ཤེས། །ལྕགས་བསྲེགས་ས་གཞི་མེ་འོད་ཀྱང་། །རྣམ་པར་དག་པའི་ཞིང་ཁམས་ལ། །འཁོར་བའི་སྐྱོན་མེད་འོད་ཟེར་འགྱེད། །དེ་ཕྱིར་འོད་གསལ་ཡེ་ཤེས་སྐུ། །འཇིགས་པའི་གཤིན་རྗེ་གཤེད་པོ་ཡང་། །ཐུབ་དྲུག་གཟུགས་སྐུར་རྣམ་པར་མཐོང་། །དེ་ཕྱིར་ལས་དག་འཁོར་བ་མེད། །སངས་རྒྱས་ས་ནི་ད་ལྟ་ནོན། །བརྫུན་ཟེར་ལྷ་ཡིས་སླུ་བའི་བདུད། །ངེས་དོན་སྙིང་པོ་རྟོགས་པ་ཡིས། །ས་བཅུའི་བྱང་ཆུབ་སེམས་དཔར་མཐོང་། །སེམས་ཅན་དོན་བྱེད་རྒྱལ་བའི་བཀའ། །རྣལ་འབྱོར་རྒོད་པ་ཟིལ་ནོན་པས། །སྣང་བ་ཆོས་དབྱིངས་དོན་ལྡན་ཕྱིར། །འགོག་མེད་རྟག་ཏུ་ངེས་རྟོགས་པས། །རྒོད་པ་ལྷག་མཐོང་འབྲས་བུར་མཐོང་། །རྣལ་འབྱོར་འཕྲོ་བ་ཟིལ་ནོན་པས། །རིག་པ་འཕྲོ་བས་ཐམས་ཅད་གཉེན། །དེ་ཕྱིར་རང་རིག་ཆོས་སྐུར་ཤེས། །དེ་ལྟར་རྟོགས་པས་འབྲས་བུའི་མཆོག །ལུང་ལྡན་བྱ་བ་ཟིལ་གནོན་པས། །རྟོག་པའི་ཉོན་མོངས་ཀུན་དང་བྲལ། །ཀློང་ཐིམ་ཤེས་པ་ཆོས་སྐུར་གསལ། །སངས་རྒྱས་འབྲས་བུ་ཡེ་ཤེས་ཀློང་། །རྣལ་འབྱོར་རྨུགས་པ་ཟིལ་ནོན་པས། །མི་གཡོ་རང་བྱུང་བདེ་བ་དེ། །ཏིང་འཛིན་ཀུན་གྱི་མཆོག་ཏུ་ནི། །རྒྱལ་བ་ཀུན་གྱི་འབྲས་བུར་བསྔགས། །ད་ཡང་རྡོ་རྗེ་སེམས་དཔའ་ཉོན། །སྤྲུལ་སྐུ་འཁོར་བའི་འགྲོ་དྲུག་ཀྱང་། །བདེན་པར་འཛིན་པའི་རྟོག་མེད་ཕྱིར། །དུས་གསུམ་སངས་རྒྱས་སྤྲུལ་པའི་འཁོར། །ལུས་མེད་བདུད་ནི་འབྱུང་མི་སྲིད། །བདུད་མེད་ངེས་པའི་འབྲས་བུ་ནི། །མེ་ལོང་དང་ནི་གཟུགས་བརྙན་ལྟར། །ཆོས་ཀུན་གཟུགས་བརྙན་ཆོས་ཀྱི་དབྱིངས། ། ― DNG002_Page_0217 ―
[མ་དཔེ་གཟིགས་ན་འདིར་གནོན།]
དེ་ལས་ཞེན་མེད་ཀྱང་བྱུང་ཉམས་མེད་རྒྱལ་བའི་གནས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལྟ་སྒོམ་གྱི་བདུད་ཟིལ་གྱིས་གནོན་པའི་རྟགས་དང་འབྲས་བུ་བསྟན་པའི་ལེའུ་སྟེ་བརྒྱ་དང་དོན་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །རྣམ་སྨིན་ལུས་ཀྱི་སྒོ་ལྔ་ཡི། །འཁོར་བའི་སྡུག་བསྔལ་སྤང་སྡུད་མེད། །བག་ཆགས་བྲལ་ཕྱིར་ཞེན་པ་མེད། །སྤྱོད་པའི་བདུད་ནི་འབྱུང་མི་སྲིད། །ད་ཡང་རྡོ་རྗེ་སེམས་དཔའ་ཉོན། །འདུ་འཛི་ལོངས་སྤྱོད་ཟིལ་ནོན་པས། །ཞེན་མེད་བྱས་པ་གང་བྱས་ཀྱང་། །ཀུན་བཟང་རོལ་པ་ཡིན་པར་ཤེས། །དེ་ཙམ་ཉིད་ན་ཆགས་མེད་གྲོལ། །གནས་ལ་ཞེན་པ་ཟིལ་གྱིས་གནོན། །གང་ལ་འདུག་པ་འོག་མིན་གནས། །ཏིང་ངེ་འཛིན་ལས་མ་ཉམས་ཕྱིར། །འབྲས་བུ་ཆོས་ཀྱི་དབྱིངས་སུ་གསལ། །ཡོན་ཏན་གཡེང་བདུད་ཟིལ་ནོན་ན། །གང་བྱས་དོན་ལ་མ་གོལ་པས། །རྣམ་རྟོག་ཡེ་ཤེས་རང་སར་གྲོལ། །ཆེད་དུ་མ་བྱས་ལྷུན་གྱིས་གྲུབ། །འཁོར་ངན་བདུད་ནི་ཟིལ་ནོན་ན། །དགྲ་གཉེན་མེད་པའི་རིགས་སྤྱོད་ཀྱིས། །ཀུན་ཀྱང་ཡེ་ཤེས་ལྷ་རུ་ཤེས། །འཁོར་བའི་མིང་མེད་འབྲས་བུ་ཡིན། །ད་ཡང་འདུས་པའི་སྙིང་པོ་ཉོན། །སྤྱོད་པའི་བདུད་མེད་འབྲས་བུ་ནི། །རང་རིག་འགྱུར་མེད་ཆོས་སྐུར་ཤེས། །དེ་ཡི་ཡོན་ཏན་འཇིག་རྟེན་དུ། །གཟུགས་སྐུ་རྣམ་གཉིས་འགྲོ་དོན་མཛད། །དེ་ཕྱིར་སྐྱོན་མེད་ཡེ་ཤེས་ནི། །པདྨ་དང་ནི་འདམ་བཞིན་དུ། །གོས་མེད་རང་རིག་ཏིང་འཛིན་གསལ། །མ་རིག་མེད་ཕྱིར་སྐྱོན་མི་གོས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྱོད་པའི་བདུད་ཟིལ་གྱིས་ནོན་པའི་འབྲས་བུ་བསྟན་པའི་ལེའུ་སྟེ་བརྒྱ་དང་དོན་བརྒྱད་པའོ།། །།དེ་ནས་འདུས་པའི་སྙིང་པོ་ལ། །ཀུན་རིག་ཆོས་རྗེས་བཀའ་སྩལ་པ། །ལྷ་ལས་ཟིལ་གནོན་བདེ་སྡུག་ཉམས། །བསམ་གཏན་རོ་ལ་ཞེན་པ་མེད། །རང་ ― DNG002_Page_0218 ―
[མ་དཔེ་གཟིགས་ན་འདིར་གནོན།]
བྱུང་འཇིགས་མེད་ཉམས་དང་ལྡན། །ལུས་མེད་ཡེ་ཤེས་ཆོས་སྐུར་གསལ། །ད་ཡང་འདུས་པའི་སྙིང་པོ་ཉོན། །ལུང་བསྟན་བདུད་ནི་ཟིལ་ནོན་ན། །ཡང་དག་བཀའ་ལ་ཡིད་ཆེས་པས། །ལུང་སྟོན་རང་བྱུང་རོལ་པར་ཤེས། །བླང་དོར་མེད་པའི་འབྲས་བུ་ཡིན། །ཉམས་ལ་ཞེན་པ་ཟིལ་ནོན་ན། །ཡོན་ཏན་བལྟར་མེད་འབྲས་བུ་སྟེ། །བདེན་པ་ངེས་པར་མཐོང་བའི་ཕྱིར། །ས་ནོན་སྒྲིབ་པ་ངེས་པར་དག །ཚུལ་འཆོས་བདུད་ནི་ཟིལ་ནོན་པས། །གཡོ་སྒྱུ་མེད་པའི་ཉམས་ལྡན་ཕྱིར། །ཞེ་སྡང་བྲལ་བས་རེ་དོགས་མེད། །ངེས་པའི་གདེང་ལྡན་འབྲས་བུའི་མཆོག །བོགས་འདོན་བདུད་ནི་ཟིལ་ནོན་ན། །བདེ་བ་ཞེན་བྲལ་ཆོས་སྐུར་ཤེས། །དབང་ལ་མི་བརྟེན་རྟོགས་པ་ཤར། །དེ་ཕྱིར་སངས་རྒྱས་མངོན་དུ་གྲུབ། །སྐུར་འདེབས་བདུད་ནི་ཟིལ་ནོན་པས། །ཞེ་སྡང་རང་གྲོལ་ཅིར་མི་རྟོག །ཐུགས་རྗེ་ལྡན་པས་འགྲོ་དོན་འབྱུང་། །དེ་ཕྱིར་གཡོ་མེད་འབྲས་བུ་ཡིན། །སྒྲོ་འདོགས་བདུད་ནི་ཟིལ་གནོན་པས། །ངེས་དོན་ཐུགས་གསལ་འཆང་བའི་ཕྱིར། །ང་རྒྱལ་མེད་ཕྱིར་དོན་ཉིད་གསལ། །འབྲས་བུ་རང་བྱུང་ངོ་བོ་ཉིད། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཆོས་སྐུ་རྟོགས་པ་ལ། །རྒྱ་མཚོར་ཉི་ཟླའི་གཟུགས་བརྙན་བཞིན། །རང་རང་མོས་པ་སོ་སོ་ལ། །གཞན་དོན་མ་བཙལ་ཤུགས་ལས་འབྱུང་། །དཔེར་ན་ཆང་གི་ར་རོ་བཞིན། །བྱང་ཆུབ་སེམས་དཔའ་ལས་དག་ལ། །ལོངས་སྤྱོད་རྫོགས་པའི་སྐུར་མཐོང་ནས། །ལྡེམ་དགོངས་ཆོས་རྣམས་སྐུ་ཡིས་སྟོན། །དད་ལྡན་ཉན་ཐོས་རང་རྒྱལ་ལ། །ཅིར་ཡང་སྤྲུལ་པའི་སྐུར་མཐོང་ནས། །གསུང་གི་སྒོ་ནས་ངེས་དོན་དུ། །བཀྲི་དྲང་ཐབས་ཀྱི་ཆོས་རྣམས་སྟོན། །ད་ཡང་འདུས་པའི་སྙིང་པོ་ཉོན། །འཁོར་འདས་གཞི་ལ་མེད་པའི་ཕྱིར། །ངེས་དོན་ཡེ་ཤེས་ཆོས་སྐུ་འདི། །ཐམས་ཅད་སངས་རྒྱས་དགོངས་པའི་ཆོས། །སེམས་ཅན་མིང་མེད་བདེ་གཤེགས་ལ། །བྱིན་རླབས་ཆོས་ཀུན་ཐུགས་ཀྱིས་སྟོན། །ད་ཡང་རྡོ་རྗེ་སེམས་དཔའ་ཉོན། །སྐུ་ ― DNG002_Page_0219 ―
[མ་དཔེ་གཟིགས་ན་འདིར་གནོན།]
གསུམ་གསུངས་པ་དེ་དག་ཀྱང་། །གདུལ་བྱའི་འཁོར་ལ་ཕྱེ་བ་ལས། །དོན་ལ་དབྱེར་མེད་ངོ་བོ་གཅིག །དེ་ཕྱིར་ཐིག་ལེ་ཉག་གཅིག་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཉམས་ཀྱི་བདུད་ཟིལ་གྱིས་ནོན་པའི་འབྲས་བུ་བསྟན་པའི་ལེའུ་སྟེ་བརྒྱ་དང་དོན་དགུ་པའོ། །སྡོམ་དུ་བསྡུས་ཏེ་བསྟན་པ་སོ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ཆེ་བ་སྣ་ལྔའི་དབྱེ་བ་ཇི་ལྟར་ཡིན། །ཆོས་སྐུའི་འཁོར་ནི་ཇི་ལྟར་དག །ལོངས་སྐུའི་འཁོར་གྱི་རོལ་པ་གང་། །སྤྲུལ་སྐུའི་འཁོར་གྱི་བརྟག་ཐབས་ཅི། །བྱང་ཆུབ་ཆེ་བ་ཇི་ལྟར་འབྱུང་། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སངས་རྒྱས་རྣམས་ཀྱི་ལྟ་བ་ནི། །ནམ་མཁའ་ཉི་མ་རྒྱ་མཚོ་བཞིན། །མ་སྤྲོས་མ་བསྡུས་རང་སྣང་ལ། །ཆོས་སྐུ་གསལ་བ་མ་གཡོས་པ། །ཀུན་ལ་ཁྱབ་པའི་རིག་པ་གསལ། །དེ་སྐད་འདུས་པའི་སྙིང་པོ་ཉོན། །རང་རིག་ཆོས་སྐུ་གསལ་བའི་དོན། །ངེས་པར་རང་རིག་དབང་ཐོབ་པས། །དེ་ལ་བརྩོན་འགྲུས་བྱ་མི་དགོས། །དེ་ཕྱིར་སངས་རྒྱས་ཆོས་ཀྱི་སྐུ། །འབབ་ཆུ་མར་མེ་དུག་སྔགས་བཞིན། །དམིགས་པ་དྲག་ལ་སྒོ་ལྔ་གསལ། །རྣམ་རྟོག་ཉིད་ཀྱང་ཡེ་ཤེས་ཏེ། །གསལ་ཙམ་ཉིད་ནས་ནུབ་པ་མེད། །ད་ཡང་འདུས་པའི་སྙིང་པོ་ཉོན། །རྒྱལ་ཐབས་སྤྱི་བླུགས་ཆེ་བ་ཡིས། །མཚན་མ་ཟིལ་གྱིས་གནོན་པའི་ཕྱིར། །རིག་པ་དབང་གི་ཆེ་བ་ཡིས། །འདོད་ཁམས་ཉི་ཤུ་ཟིལ་གྱིས་ནོན། །ས་གཞི་ཆུ་ཟླ་གང་གཱ་བཞིན། །སྣ་ཚོགས་སྣང་ལ་གཟུང་དུ་མེད། །ཆེ་བའི་ཡོན་ཏན་རྒྱུན་མི་འཆད། །མེད་ལ་མི་ཟད་འབྱུང་བའི་གཏེར། །ད་ཡང་འདུས་པའི་སྙིང་པོ་ཉོན། །རིག་པ་རང་གྲོལ་ཆེ་བ་ཡིས། །འགྲོ་དྲུག་གཡང་ས་གཅོད་པའི་ཕྱིར། །རང་བྱུང་ཆོས་སྐུ་ངོས་ཟིན་པས། ། ― DNG002_Page_0220 ―
[མ་དཔེ་གཟིགས་ན་འདིར་གནོན།]
གཟུགས་ཁམས་བཅུ་བདུན་དེ་མི་འཁོར། །ཁྱུང་དང་རིན་ཆེན་ཀླུ་བདག་བཞིན། །ལུང་ལྡན་ངེས་པའི་གདམས་ངག་གིས། །ཆོས་སྐུ་རང་རིག་ངོས་ཟིན་ཕྱིར། །ཀུན་གཞི་དུག་གསུམ་རྩད་ནས་བཅད། །དེ་ཕྱིར་རང་བྱུང་དོན་འདི་གཅེས། །ད་ཡང་རྡོ་རྗེ་སེམས་དཔའ་ཉོན། །ཡེ་ཤེས་སྤྱི་བླུགས་ཆེ་བ་ཡིས། །གོལ་ས་ཕྱི་ནང་ཆོད་པའི་ཕྱིར། །ངེས་པའི་དོན་ལ་བསྒོམ་མི་དགོས། །གཟུགས་ཁམས་བཞིར་ནི་དེ་མི་སྐྱེ། །ད་ཡང་འདུས་པའི་སྙིང་པོ་ཉོན། །རྒྱུན་དུ་འབྲལ་མེད་ཏིང་འཛིན་གྱིས། །ཡེ་ཤེས་ཆེན་པོར་ལ་ཟློས་པས། །ས་བཅུ་རིམ་གྱིས་ངེས་མི་བགྲོད། །དེ་ཕྱིར་ངེས་དོན་རབ་ཏུ་གཅེས། །ད་ཡང་འདུས་པའི་སྙིང་པོ་ཉོན། །ངེས་པའི་དབང་རྣམས་གཅིག་ཏུ་རྟོགས། །དེ་དོན་མ་བཅོས་ཆོས་ཉིད་ཀྱིས། །བཅོས་པའི་མཚན་མ་ཟིལ་གྱིས་གནོན། །དམིགས་པ་མེད་པའི་ནམ་མཁའ་ཡིས། །དམིགས་པའི་འབྱུང་བ་ཟིལ་གྱིས་གནོན། །སྐྱེ་བ་མེད་པའི་ཡེ་ཤེས་ཀྱིས། །སྐྱེ་བའི་ཕུང་པོ་ཟིལ་གྱིས་གནོན། །ད་ཡང་འདུས་པའི་སྙིང་པོ་ཉོན། །རིག་པ་ཆོས་ཀྱི་སྐུ་ཉིད་དུ། །དུས་གསུམ་སངས་རྒྱས་ཐམས་ཅད་ཀྱི། །འབྱུང་གནས་ཐམས་ཅད་ང་ཡི་ཐུགས། །འདི་ལས་མ་གཏོགས་སངས་རྒྱས་མེད། །རིག་པའི་ངེས་དོན་ཐམས་ཅད་འདི། །སངས་རྒྱས་ཀུན་གྱི་མེས་པོ་ཡིན། །འདི་ལས་མ་བྱུང་སངས་རྒྱས་མེད། །དེ་ཕྱིར་དབང་གསུམ་རབ་ཏུ་གཅེས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རིག་པ་དབང་གི་ཆེ་བ་བསྟན་པའི་ལེའུ་སྟེ་བརྒྱ་དང་བརྒྱད་ཅུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ཆོས་སྐུའི་འཁོར་གྱི་ཆེ་བ་ཡིས། །བསྒོམ་པའི་སྐྱོན་ནི་མ་དག་ན། །རང་རིག་ཡེ་ཤེས་ངོས་ཟིན་ཕྱིར། །ཆོས་སྐུ་རྟོག་པ་མེད་པར་བཤད། །འབྱུང་བའི་འདོད་ཡོན་ལྔ་སྤྱོད་ཚེ། །ལོངས་སྤྱོད་རྫོགས་པའི་སྐུ་ཡི་ངང་། །འགྲོ་དྲུག་གནས་སུ་སྣང་བའི་ཚེ། །སྤྲུལ་སྐུ་ ― DNG002_Page_0221 ―
[མ་དཔེ་གཟིགས་ན་འདིར་གནོན།]
ཐུབ་པ་ཆེན་པོའི་ངང་། །ད་ཡང་རྡོ་རྗེ་སེམས་དཔའ་ཉོན། །དཔེར་ན་ཟངས་དང་ལྕགས་རྣམས་ལ། །གསེར་འགྱུར་རྩི་ཡིས་ཐེབས་གྱུར་ནས། །ཐམས་ཅད་གསེར་དུ་འགྱུར་བ་ལས། །ཟངས་དང་ལྕགས་སུ་མི་འགྱུར་བཞིན། །མ་རིག་རྟོག་པའི་མཚན་མ་ལ། །ཡེ་ཤེས་ཆོས་སྐུའི་རྩིས་ཐེབས་ན། །ཁམས་གསུམ་འཁོར་བའི་མིང་མེད་ཕྱིར། །གདོད་ནས་མ་སྤངས་ཡེ་སངས་རྒྱས། །བཙལ་བ་མེད་པ་ཡེ་ནས་གྲུབ། །ད་ཡང་འདུས་པའི་སྙིང་པོ་ཉོན། །མི་ནུབ་པ་ཡི་འོད་གསལ་ཕྱིར། །དེ་ཉིད་ལྷུན་གྲུབ་དོན་རྟོགས་ན། །རྟག་ཀྱང་ཡེ་ཤེས་ཆེན་པོར་རྟག །ཆད་ན་འཁོར་བ་རྩད་ནས་ཆད། །ལྡན་ན་སྐུ་གསུང་ཐུགས་སུ་ལྡན། །སྣང་ན་རང་རིག་ཡེ་ཤེས་སྣང་། །ཡིན་ན་ཡེ་ཤེས་སངས་རྒྱས་ཡིན། །མིན་ན་ཁམས་གསུམ་འཁོར་བ་མིན། །དག་ན་རྣམ་རྟོག་མཚན་མ་དག །ད་ཡང་འདུས་པའི་སྙིང་པོ་ཉོན། །གོལ་ན་ཆོས་ཀྱི་སྐུ་རུ་གོལ། །འཕྲོས་ན་ཆོས་ཀྱི་དབྱིངས་སུ་འཕྲོས། །བྱིང་ན་ཡེ་ཤེས་ཀློང་དུ་བྱིང་། །གསལ་ན་རང་སེམས་ཆོས་སྐུར་གསལ། །འཕྱོས་ན་ཆོས་ཀྱི་ཀློང་དུ་འཕྱོས། །དེ་སོགས་ཡོན་ཏན་སྐྱོན་རྣམས་ཀུན། །ཆོས་སྐུར་འདུས་པའི་དོན་རྟོགས་ན། །མ་རྟོགས་ཉིད་ཀྱང་ཡེ་ཤེས་ཡིན། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཡེ་ཤེས་ཆོས་སྐུ་ནི། །མ་བསྒོམས་ཡེ་ཤེས་ཆེན་པོའི་དོན། །བརྗོད་པ་མེད་པའི་ཡེ་ཤེས་ལ། །དམིགས་པ་མེད་པའི་ཏིང་འཛིན་གསལ། །ཤེས་པ་དྲང་ཐད་སོ་མ་ལ། །འདུ་ཤེས་མ་བསྒོམས་བརྟུལ་ཞུགས་བསྐྱེད། །ཅི་ཡང་མི་བསྒོམ་གང་ཡང་མེད། །ཡེ་ཤེས་ཟང་ཐལ་ཉིད་དུ་བཞག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་སྐུའི་འཁོར་གྱི་ཆེ་བའི་སྣང་བ་དག་པར་བསྟན་པའི་ལེའུ་སྟེ་བརྒྱ་དང་གྱ་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ལོངས་སྐུའི་འཁོར་གྱི་ཆེ་བ་ནི། །ཀུན་བཟང་རོལ་པར་དག་པའི་ཕྱིར། །སྡུག་བསྔལ་སྣ་ཚོགས་བསྐྱེད་པའི་ཕྱིར། ། ― DNG002_Page_0222 ―
[མ་དཔེ་གཟིགས་ན་འདིར་གནོན།]
ཡེ་ཤེས་ཆེན་པོ་བདེ་བའི་ངང་། །ཕྱི་ནང་སྒྲ་སྐད་སྣ་ཚོགས་པ། །གསང་སྔགས་གསུང་གི་འཁོར་ལོ་ཡིན། །རྐྱེན་གྱིས་ཆགས་སྡང་སྐྱེས་པའི་ཕྱིར། །རང་བྱུང་ཡེ་ཤེས་ཤར་བ་ཡིན། །ཤྭ་དང་སེར་བ་ལ་སོགས་པ། །ཀུན་བཟང་ཐུགས་རྗེའི་རོལ་པ་ཡིན། །ངམ་གྲོག་ཚེར་དོང་གཡང་ས་ཡང་། །རྣམ་པར་དག་པའི་ཞིང་ཁམས་ཡིན། །ད་ཡང་འདུས་པའི་སྙིང་པོ་ཉོན། །མཚན་མ་སྤངས་པའི་ཕ་རོལ་ན། །བསྒོམ་པ་བྱ་བ་ལོགས་ན་མེད། །སྡུག་བསྔལ་སྤངས་པའི་ཕ་རོལ་ན། །བདེ་བ་བྱ་བ་ལོགས་ན་མེད། །མ་རིག་སྤངས་པའི་ཕ་རོལ་ན། །རང་རིག་ཡེ་ཤེས་ལོགས་ན་མེད། །གཏི་མུག་སྤངས་པའི་ཕ་རོལ་ན། །ཆོས་ཉིད་ཡེ་ཤེས་ལོགས་ན་མེད། །འདོད་ཆགས་སྤངས་པའི་ཕ་རོལ་ན། །བདེ་ཞིང་སྐྱིད་པ་ལོགས་ན་མེད། །ཞེ་སྡང་སྤངས་པའི་ཕ་རོལ་ན། །སྙིང་རྗེ་བྱ་བ་ལོགས་ན་མེད། །འཁོར་བ་སྤངས་པའི་ཕ་རོལ་ན། །མྱ་ངན་འདས་པ་ལོགས་ན་མེད། །ད་ཡང་འདུས་པའི་སྙིང་པོ་ཉོན། །མ་རིག་སངས་པའི་ཕ་རོལ་ན། །སངས་རྒྱས་རྟོགས་པ་ལོགས་ན་མེད། །ཆོས་ཅན་སྤངས་པའི་ཕ་རོལ་ན། །ཆོས་དབྱིངས་རྣམ་དག་ལོགས་ན་མེད། །ཆོས་དབྱིངས་ཡེ་ནས་བསྒོམ་མེད་པས། །སེམས་ལ་དམིགས་པའི་སྐྱོན་མེད་པས། །རང་གསལ་སྙིང་པོ་ཡེ་ཤེས་འདི། །སངས་རྒྱས་ཀུན་གྱི་ངེས་པའི་དོན། །ཡང་དག་རང་བྱུང་ཆོས་ཀྱི་སྐུ། །མི་དམིགས་པར་ཡང་བསྒོམ་དུ་མེད། །བྱ་བྲལ་ནམ་མཁའ་ཇི་བཞིན་ནོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལོངས་སྐུའི་འཁོར་གྱི་རོལ་པའི་ཆེ་བ་བསྟན་པའི་ལེའུ་སྟེ་བརྒྱ་དང་གྱ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སྤྲུལ་སྐུའི་འཁོར་གྱི་ཆེ་བ་ནི། །རྟོག་མེད་དག་པ་ངས་བཤད་ཀྱིས། །ལེགས་པར་ཉོན་ལ་ཡིད་ལ་ཟུངས། །རང་བྱུང་ངེས་དོན་ཐམས་ཅད་འདི། །ལུང་ལྡན་རྟོགས་པའི་ཡེ་ཤེས་ཀྱིས། །གལ་ཏེ་མཚན་མ་འགྱུ་ན་ཡང་། །དོན་ ― DNG002_Page_0223 ―
[མ་དཔེ་གཟིགས་ན་འདིར་གནོན།]
དྲེག་འགལ་སྒྲུབ་མེད་པའི་ཕྱིར། །རྣལ་འབྱོར་སྤྱོད་ལམ་ཐམས་ཅད་དུ། །མ་དྲན་གཉིད་དང་དུབ་ལ་སྩོགས། །གར་དགར་སོང་ཚེ་དེ་ཉིད་ལ། །ངོ་བོ་ཉིད་དྲན་གནོད་མི་ནུས། །ད་ཡང་རྡོ་རྗེ་སེམས་དཔའ་ཉོན། །གདམས་ངག་ཅན་དང་འཕྲད་གྱུར་ན། །ཐ་མས་མི་རྟོག་གདམས་ངག་མིན། །དབང་པོ་རབ་ཀྱིས་བཙལ་དུ་མེད། །སྒྱུ་མའི་ཡུལ་ལ་སྤྱད་པར་བྱ། །དང་པོ་ཀུན་བཟང་ཐུགས་རྗེས་ཀྱང་། །དོན་ཉིད་ཚིག་ཏུ་ཕྱུང་བའི་ཕྱིར། །ཚིག་གིས་དོན་ནི་མཚོན་པར་ནུས། །ཚིག་ཉིད་དོན་ཡིན་ཟེར་བ་འཁྲུལ། །དེ་ཡང་འདུས་པའི་སྙིང་པོ་ཉོན། །གང་དག་བཀྲི་དོན་བདེན་གཉིས་བྲལ། །ཡང་དག་སྙིང་པོ་ཆོས་ཉིད་ལ། །བསྒོམ་དུ་ཡོད་དང་མེད་པ་ཡི། །ཚིག་ཏུ་འཛིན་མེད་ཡེ་གནས་བདེན། །སྣང་བའི་ཡུལ་ལ་རྟོག་མེད་ཕྱིར། །སེམས་ལ་གཏད་ཅིང་གཟུང་དུ་མེད། །ཇི་སྲིད་བར་དུ་གཏད་ཡོད་ན། །དེ་སྲིད་བར་དུ་འཁྲུལ་པ་ཡིན། །དེ་ཕྱིར་གཏད་ནས་གཟུང་དུ་མེད། །དེ་ལ་སྐྱོན་གྱིས་གོས་པ་མེད། །ད་ཡང་འདུས་པའི་སྙིང་པོ་ཉོན། །རང་རིག་ཆོས་སྐུའི་དགོངས་པ་འདི། །སེམས་ལས་འདས་པའི་སངས་རྒྱས་ཉིད། །གང་ཡང་མ་བསམས་རིག་པ་གསལ། །དེ་དོན་སངས་རྒྱས་དགོངས་པ་ཡིན། །སེམས་མིན་ཆོས་སྐུའི་དོན་རྟོགས་ཕྱིར། །ཡུལ་ཉིད་སེམས་སུ་མི་བསྒོམ་ཕྱིར། །སྒོམ་པ་པོ་ཡང་མེད་པར་འགྱུར། །གང་གིས་གང་ལ་བསམ་ཞིང་བསྒོམ། །དེ་ཕྱིར་རང་སེམས་རྟོགས་པས་ཆོག །ད་ཡང་འདུས་པའི་སྙིང་པོ་ཉོན། །རང་གསལ་སྙིང་པོ་ཞེན་མེད་པས། །རྒྱུན་དུ་ཡོད་པའི་ཆོས་ཉིད་ལ། །མ་ཡེངས་དོན་ལ་གང་གནས་པ། །དེ་ནི་རྣལ་འབྱོར་ངེས་པའི་མཆོག །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྲུལ་སྐུའི་འཁོར་གྱི་རོལ་པ་ཆེ་བར་བསྟན་པའི་ལེའུ་སྟེ་བརྒྱ་དང་གྱ་གསུམ་པའོ།། །།དེ་ནས་ཀུན་རིག་རྒྱལ་པོ་ཡིས། །བྱང་ཆུབ་སེམས་དཔའ་ཆེ་བའི་མཆོག །འདུས་པའི་འཁོར་ལ་བཀའ་སྩལ་པ། །མ་རྟོགས་སྐྱོན་རྣམས་དག་པ་ཡི། །སྙིང་པོ་དོན་གྱི་ ― DNG002_Page_0224 ―
[མ་དཔེ་གཟིགས་ན་འདིར་གནོན།]
འབྲས་བུ་ཆོས། །གང་ཞིག་སྣོད་དང་ལྡན་པ་ཡིས། །ཤེས་ནས་དེ་ལ་གང་གནས་པ། །རང་རིག་ཉིད་ལ་དབང་ཐོབ་ཕྱིར། །སྐྱེ་བ་གཞན་དུ་མི་ལེན་པར། །སངས་རྒྱས་རིན་ཆེན་འཛིན་པ་ཐོབ། །ད་ཡང་རྡོ་རྗེ་སེམས་དཔའ་ཉོན། །རང་བྱུང་ཆོས་སྐུ་དེ་ཉིད་ནི། །ཇི་བཞིན་མ་བཅོས་མ་བསླད་པར། །དེ་བཞིན་ཉིད་དུ་བློ་བཞག་པས། །ཡེ་ཤེས་དེ་ཉིད་མ་ཡིན་པ། །བསྒྲུབ་དང་སྒྲུབ་པ་ག་ལ་ཡོད། །དེ་ཕྱིར་ཡེ་ཤེས་མངོན་འགྱུར་ན། །མེད་ལ་མི་ཟད་རིན་ཆེན་གཏེར། །ཁམས་གསུམ་རིན་ཆེན་རྙེད་པའི་མི། །ཇི་ལྟར་འདོད་པ་ཉིད་དུ་འབྱུང་། །དེ་བཞིན་ཡེ་ཤེས་ཆོས་སྐུ་ནི། །རྟོགས་པས་ཆོག་ཕྱིར་རང་བྱུང་སྐུ། །ཆེ་བའི་ཡོན་ཏན་རྒྱུན་མི་འཆད། །ཅི་ཡང་ཀུན་འབྱུང་ཆོས་ཀྱི་རྟེན། །དེ་བཞིན་ཉིད་དུ་ཀུན་རིག་ན། །འཁོར་བ་དང་ནི་མྱ་ངན་འདས། །སོ་སོར་ཡོད་པ་མ་ཡིན་ཏེ། །ཇི་བཞིན་ཆོས་དེ་རྟོགས་ངེས་ན། །དེ་ལ་འཁོར་བའི་རང་བཞིན་མེད། །ད་ཡང་རྡོ་རྗེ་སེམས་དཔའ་ཉོན། །བྱང་ནི་བག་ཆགས་ཉོན་མོངས་བྱང་། །ཆུབ་ནི་ཆོས་སྐུ་ཐིག་ལེ་ཆུབ། །སེམས་དཔའ་སྐྱོན་བསལ་འགྱུར་བ་མེད། །ཆེ་བ་རང་བྱུང་ཡེ་ཤེས་ཆེ། །དེ་ཕྱིར་བྱང་སེམས་ཆེ་བར་གསུངས། །ད་ཡང་འདུས་པའི་སྙིང་པོ་ཉོན། །མ་བཅོས་པ་ཡི་གདམས་ངག་གིས། །བལྟ་བ་ཡངས་པའི་ནམ་མཁའ་ལ། །འཛིན་པ་མེད་པའི་ཡེ་ཤེས་གདལ། །གང་ཡང་མ་སྤངས་ལྷུན་གྱིས་གྲུབ། །མི་གཡོ་མི་རྟོག་དེ་ཉིད་ལྟར། །དེ་མཐོང་མུན་པ་རྣམ་པར་སངས། །སངས་རྒྱས་ཀུན་གྱིས་མཆོག་ཏུ་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བྱང་ཆུབ་སེམས་ཀྱི་ཆེ་བ་བསྟན་པའི་ལེའུ་སྟེ། བརྒྱ་དང་གྱ་བཞི་པའོ། །སྡོམ་དུ་བསྡུས་ཏེ་བསྟན་པ་སོ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་བཀའ་སྩལ་པ། །ཀུན་རིག་ཆོས་ཀྱི་རྒྱལ་པོ་ལ། །ངེས་པའི་དགོས་དོན་འདི་སྐད་གསོལ། །རྣལ་འབྱོར་དོན་ལ་ཚོགས་སོགས་ཕྱིར། །ཡེ་ཤེས་རང་གནས་ཆེ་བ་དང་། །བདག་དོན་ཡེ་ཤེས་རང་གནས་དང་། །ཡེ་ཤེས་ཀློང་གི་ཚོགས་འཁོར་དང་། །དེ་དོན་འཛིན་སྤྱོད་ཕྲིན་ལས་དང་། །ཆོས་ ― DNG002_Page_0225 ―
[མ་དཔེ་གཟིགས་ན་འདིར་གནོན།]
སྐུའི་གཟུགས་བརྙན་གདབ་པ་དང་། །ཕྱི་ཡི་མཆོད་གཏོར་གཏོང་བ་རྣམས། །ཀུན་རིག་སྟོན་པས་གསུང་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རྣལ་འབྱོར་རང་གནས་ཆེ་བའི་དོན། །ངོ་བོ་དབྱེ་བ་ངེས་ཚིག་དང་། །ཏིང་འཛིན་ལམ་དང་འབྲས་བུ་དང་། །སྐྱོན་དང་ཡོན་ཏན་བརྒྱད་དུ་གསུངས། །ད་ཡང་རྡོ་རྗེ་སེམས་དཔའ་ཉོན། །ངོ་བོ་འཁོར་འདས་རྣམ་གཉིས་ལ། །བྱང་ཆུབ་སྙིང་པོས་ཁྱབ་པའི་ཕྱིར། །ཡེ་ཤེས་རང་བྱུང་གནས་ཡིན་ཏེ། །ལུང་ལྡན་ཡེ་ཤེས་ངེས་པའི་གནས། །རང་གནས་དབྱེ་བ་བདག་གཞན་གཉིས། །བར་དོ་རྣམ་གཉིས་གང་རུང་དུ། །ལུང་ལྡན་དེས་པའི་གདམས་ངག་གིས། །ཐུན་མོང་མ་ཡིན་གནས་མཆོག་བྱ། །ངེས་ཚིག་སངས་རྒྱས་བདེན་ལྡན་གནས། །སྐྱེ་ཤི་མེད་པ་རང་བྱུང་སྐུ། །འཕོ་འགྱུར་མེད་ཕྱིར་ཡེ་ཤེས་གནས། །དེ་ལྡན་འདུ་འབྲལ་མེད་པའི་ཆོས། །ཏིང་འཛིན་རིམ་གྱིས་མ་བསྐྱེད་པ། །རང་བྱུང་ཆོས་སྐུ་དྲན་ཙམ་ན། །དེ་ཡི་ངང་ལ་གནས་པ་ཡིན། །དགོངས་པ་དེ་དག་རྒྱལ་བས་གསུངས། །ངང་ངམ་རང་རིག་རྒྱུན་དུ་ནི། །ཆེད་དུ་བྱར་མེད་ལམ་གྱི་མཆོག །དེ་ཡང་འབྲལ་མེད་བགྲོད་མི་དགོས། །དེ་ཡི་འབྲས་བུ་སངས་རྒྱས་ཏེ། །དེ་ལ་ཡིད་ཆེས་གདེང་ཟིན་པས། །སྒྲིབ་སྦྱོང་མི་དགོས་རང་བྱུང་སྐུ། །ཕྱི་མ་མ་ཡིན་ད་ལྟ་ཡིན། །ཡོན་ཏན་ཐུན་མོང་མཆོག་གི་ནི། །མ་བཙལ་དངོས་གྲུབ་ཆེན་པོར་ཐོབ། །དེ་ཕྱིར་ཕྱོགས་འདིར་ཡོན་ཏན་འབྱུང་། །དུས་གཅིག་རྟག་པས་རེ་དོགས་བྲལ། །སྐྱོན་ནི་གནས་མ་འབྱོངས་པ་ཡིས། །ཅི་སྤྱོད་གོལ་བས་གདེང་དང་བྲལ། །དེ་ཕྱིར་སྐྱོན་ནི་དུག་ལྔ་རྒྱས། །རྣམ་སྨིན་བདག་གཞན་གཉིས་ཀ་བརླག །ད་ཡང་འདུས་པའི་སྙིང་པོ་ཉོན། །དེ་དག་གནས་ཀྱང་དབྱེ་བ་ནི། །ཆོས་སྐུ་རྟོགས་པའི་གནས་ཀྱི་མཆོག །དེ་ཕྱིར་སངས་རྒྱས་དགོངས་པའི་དོན། །འབྲས་བུ་དུས་དེ་ཉིད་དུ་འགྲུབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་རང་གནས་ཀྱི་ཆེ་བ་བསྟན་པའི་ལེའུ་སྟེ་བརྒྱ་དང་གྱ་ལྔ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །བདག་དོན་རང་གནས་མཆོག་ཏུ་གསུངས། །བདག་ཉིད་འཆི་བའི་དུས་བྱུང་ནས། །འཆི་ ― DNG002_Page_0226 ―
[མ་དཔེ་གཟིགས་ན་འདིར་གནོན།]
ལྟས་ཚང་ནས་ཉམ་ཐག་ཚེ། །མི་དགའ་མི་བསམ་གཉེན་མི་ཆགས། །དགྲ་ལ་མི་བསམ་དོན་མི་བསམ། །ཁ་ཆེམས་མི་བོར་དོན་ལ་བཞག །གལ་ཏེ་བོར་ན་ཆོས་དང་བསྟུན། །སྔ་ཕྱི་མི་བསམ་ཆོས་དོན་དྲན། །བདག་དོན་རང་གནས་མཆོག་ཏུ་གསུངས། །ད་ཡང་འདུས་པའི་སྙིང་པོ་ཉོན། །འདི་ནུབ་ཕྱི་མ་ཡ་ངའི་ཚེ། །ལུས་མཉེན་རྩ་དྲོད་མེད་པ་ལ། །བཀྲག་མདངས་གསལ་ལ་དྲི་མ་མེད། །ཡ་ཡོ་མེད་པར་ཟུང་ཐུབ་འབྱུང་། །དེ་ཚེ་འཆི་ལྟས་བཟང་པོ་ནི། །སྨད་ནས་དྲོད་ཡལ་སྙིང་གར་འདུས། །སྤྱི་བོར་བུན་གྱིས་མཐོངས་སུ་ཡལ། །བར་དོ་ཆོས་སྐུ་དྲན་པའི་རྟགས། །ད་ཡང་འདུས་པའི་སྙིང་པོ་ཉོན། །འཆི་ཁར་བླ་མའི་དོན་གསལ་ན། །རྟོག་པ་རང་གི་དུས་དེར་ནི། །སྐད་ཅིག་དོན་དྲན་འཁྲུལ་མིན་གསལ། །དེ་དྲན་མི་འགྱུར་ལྷག་མེད་བསྟན། །དེ་ཚེ་ཡིད་ཆེས་ཡ་ང་མེད། །ངེས་དོན་བསྟན་པ་དེ་མ་ཐག །ཡེ་ཤེས་ཟང་ཐལ་ཆོས་སྐུ་ཉིད། །སྐད་ཅིག་གཅིག་ལ་མངོན་འགྱུར་ཏེ། །རྗེས་དྲན་དྲུག་གི་ངེས་རྙེད་ནས། །སངས་རྒྱས་དགོངས་པར་ངེས་པར་གྲོལ། །དེ་ཕྱིར་རང་གནས་བདག་དོན་གྲུབ། །ད་ཡང་འདུས་པའི་སྙིང་པོ་ཉོན། །མདོར་ན་འཆི་ཁར་དངོས་མེད་པའི། །ངེས་དོན་མ་རྙེད་གཟུངས་ལྡན་ན། །རང་གནས་ཆེན་པོ་རང་ལ་གནས། །ཡེ་ཤེས་རང་གནས་ཆོས་སྐུར་དྲན། །ཤི་མ་ཐག་ཏུ་མངོན་སངས་རྒྱ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བདག་གི་ཡེ་ཤེས་མན་ངག་རང་གནས་བསྟན་པའི་ལེའུ་སྟེ་བརྒྱ་དང་གྱ་དྲུག་པའོ།། །།དེ་ནས་ཀུན་རིག་སྟོན་པ་ཡིས། །དད་ལྡན་འདུས་པའི་འཁོར་རྣམས་ལ། །གཞན་དོན་རང་གནས་བཀའ་སྩལ་པ། །སློབ་མ་དད་ལྡན་གང་ཡང་རུང་། །ཡེ་ཤེས་རང་གནས་བྱ་བའི་ཕྱིར། །ཏིང་འཛིན་དཀྱིལ་འཁོར་དངོས་ཀྱང་རུང་། །ལུང་ལྡན་རྣལ་འབྱོར་དམ་པ་ཡིས། །གཞུང་དུ་བསྐྱེད་ཅིང་བྲིས་ནས་ཀྱང་། །གཞན་དོན་ཚེ་འདས་བར་དོ་ལ། །ལུང་ལྡན་བྱིན་རླབས་ཕན་དོན་དུ། །གོས་ ― DNG002_Page_0227 ―
[མ་དཔེ་གཟིགས་ན་འདིར་གནོན།]
ལྷམ་གདུགས་དང་རྨྱུག་ལྡེམ་ལ། །ཚེ་འདས་སེམས་ཀྱི་རྟེན་དུ་བྱ། །ད་ཡང་རྡོ་རྗེ་སེམས་དཔའ་ཉོན། །ལུང་ལྡན་ངེས་པའི་རྣལ་འབྱོར་པས། །ཤེས་པ་གཟུགས་ཀྱི་རྟེན་ལ་བསྡིམས། །དབང་བསྐུར་གདམས་ངག་ངེས་དོན་བསྟན། །ཆོས་སྐུ་ཡོད་ཕྱིར་རྟོགས་ངེས་པས། །ཡང་དང་ཡང་དུ་བཏུད་ཀྱིན་བསྟན། །དེ་ལྟས་གཟུགས་ནི་ལྡེག་པ་དང་། །སྤྱན་གྱི་ཡིད་ཀྱིས་མཐོང་བ་དང་། །བདེན་པར་ཆོས་ཉིད་ཉན་བསམ་པས། །དེ་ལུང་བསྟན་པས་བྱིན་གྱིས་བརླབས། །དེ་ནས་འདི་སྐད་བརྗོད་བྱ་སྟེ། །ཚེ་འདས་རིགས་ཀྱི་བུ་ཁྱོད་ཉོན། །སྔོན་ཚེ་ཐོག་མ་མེད་པ་ནས། །ད་ལྟ་ལུས་བརྗེས་ཕན་ཆད་དུ། །མ་རིག་དབང་གིས་ལས་ངན་བྱས། །འཁོར་བའི་སྡུག་བསྔལ་ཉམ་ཐག་པ། །དེ་བཟློག་དོན་དུ་རྒྱལ་བའི་བཀའ། །དུས་འདིར་ཡིད་ཀྱིས་ཚུར་ཉོན་ཅིག །ཅི་ལ་ཅི་བསྟན་སེམས་དཔའ་ཉོན། །བག་ཆགས་ཡིད་ཀྱི་རྟེན་བྱེད་པར། །གོས་ལྷམ་མེ་ཆུ་ཟས་ཀྱི་རྟེན། །ཁྱོད་ཀྱི་ཡིད་ནི་གནས་པར་གྱིས། །ཁྱོད་ཀྱི་སེམས་ཀྱི་མུན་གསེབ་དུ། །རང་རིག་སྒྲོན་མ་ངས་འདེགས་ཀྱིས། །སྔ་ཕྱིར་མ་བཏང་ཡིད་ཀྱིས་ཟུངས། །ཡོད་མེད་མཐའ་བྲལ་ཆོས་ཀྱི་སྐུ། །ཞེན་འཛིན་བྱིང་རྒོད་རྐྱེན་དང་བྲལ། །རྒྱུན་དུ་མི་གཏང་ཏིང་འཛིན་གསལ། །དེ་ལ་རྟག་ཏུ་གནས་པར་གྱིས། །དེ་སྐད་ཅེས་ནི་ལན་གསུམ་བརྗོད། །ད་ཡང་རྡོ་རྗེ་སེམས་དཔའ་ཉོན། །དེ་ཚེ་ལུང་ལྡན་ཐུགས་དང་ནི། །ཚེ་འདས་སེམས་ནི་གཅིག་ཏུ་འགྱུར། །དེ་ནས་རང་བྱུང་ངོ་བོ་ལ། །ལུང་ལྡན་ལྷག་མཐོང་དོན་གསལ་བས། །རྗེས་དྲན་དྲུག་དང་ཡོན་ཏན་ལྔ། །དུས་གཅིག་དྲན་པའི་ཡེ་ཤེས་ཏེ། །ཚེ་འདས་སེམས་ལྡན་ལྷག་མཐོང་བཤད། །ཡོན་ཏན་རྫོགས་པའི་ཆོས་སྐུ་ལ། །དུས་གསུམ་མི་འགྱུར་ཆོས་སྐུ་ལ། །གང་བྱམས་ཕ་མ་ལ་སོགས་དང་། །སློབ་དཔོན་མཆེད་དང་གང་གསུངས་པ། །ཚེ་འདས་ཤི་བ་མི་བཟོད་ཚེ། །མྱ་ངན་སྨྲེ་སྔགས་མ་འདོན་པར། །སྙིང་རྗེ་ཟུང་ལ་དགོངས་པ་ཡིས། །ཁ་དོག་དབྱིབས་ལ་རྟེན་བཅས་པར། །ངེས་དོན་སྙིང་པོ་ཆོས་སྐུ་བསྟན། །ཡེ་ཤེས་ཆོས་སྐུ་རྩེ་གཅིག་པའི། །ཡིད་གཉིས་གཅིག་ཏུ་གྱུར་བསམ་ལ། །དེ་ལྟའི་གདེང་གི་ངང་བཞག་ན། །ཚེ་འདས་ལུས་ཀྱི་དོན་རྟོགས་ནས། །ཆོས་སྐུའི་ངང་ལ་གནས་པར་ངེས། །དེ་ ― DNG002_Page_0228 ―
[མ་དཔེ་གཟིགས་ན་འདིར་གནོན།]
ཚེ་རིག་པ་ཆོས་སྐུར་འགྱུར། །ངེས་དོན་གཅིག་ཤེས་གནས་ཀྱི་མཆོག །ད་ཡང་འདུས་པའི་སྙིང་པོ་ཉོན། །ཐོས་བསམ་མ་བྱས་སྐྱེ་བོ་ཡང་། །རྣལ་འབྱོར་པ་ཡི་བྱིན་རླབས་ཀྱིས། །སངས་རྒྱས་ས་ལ་ངེས་འགྲོ་ན། །སྔོན་སྦྱངས་འཕྲོ་ཅན་སྨོས་ཅི་དགོས། །དེ་བཞིན་རྣལ་འབྱོར་ངེས་ལུང་གིས། །ངེས་པར་ཐུགས་རྗེས་བཟུང་གྱུར་ན། །ལྟ་བའི་ངང་དུ་ཚོགས་མཆོད་ནས། །ཚེ་འདས་འབྲས་བུ་མངོན་སངས་རྒྱས། །དེ་ཕྱིར་ཚེགས་མེད་དོན་པོ་ཆེ། །རྒྱལ་བའི་བཀའ་ལས་དེ་སྐད་གསུངས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གཞན་གྱི་དོན་བྱེད་ཡེ་ཤེས་རང་གནས་བསྟན་པའི་ལེའུ་སྟེ་བརྒྱ་དང་གྱ་བདུན་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །ཡེ་ཤེས་ཀློང་ཚོགས་བཀའ་སྩལ་པ། །གཞུང་དང་མཐུན་པའི་གནས་མཆོག་ཏུ། །དམ་ཚིག་སེལ་མེད་འཁོར་ཚོགས་པ། །དབང་དང་གདམས་ངག་རྫོགས་པ་ལ། །ཡེ་ཤེས་ཚོགས་ཀྱི་འཁོར་ལོ་བསྐོར། །ད་ཡང་འདུས་པའི་སྙིང་པོ་ཉོན། །རྣལ་འབྱོར་ཡོ་བྱད་ཚོགས་པ་ཡི། །ལོ་དང་ཟླ་བ་ཞག་གྲངས་ལ། །ཡེ་ཤེས་འཁོར་ལོ་བསྐོར་བའི་ཕྱིར། །ནང་ནུབ་གུང་གཉིས་ཚོགས་ཀྱིས་མཆོད། །དེ་རྗེས་མི་ཚིག་མ་ཆོད་པར། །ཆོས་སྐུ་དྲན་པ་མ་ཡེངས་པར། །ཉམས་དང་རྟགས་ནི་འབྱུང་བའི་ཕྱིར། །རྒྱུན་དུ་འབྲལ་བ་མེད་པར་བསྒོམ། །ལུང་ལྡན་ངེས་པའི་བླ་མས་ཀྱང་། །མི་ཚིག་བླ་འོས་མ་བསླད་པར། །བར་བར་དང་ནི་སྐབས་སྐབས་སུ། །ངེས་དོན་རྒྱུད་དང་གདམས་ངག་བསྟན། །དེ་རྗེས་དད་ལྡན་འཁོར་གྱིས་ཀྱང་། །གཞན་དུ་མ་ཡེངས་ཡང་ཡང་བསྒོམས། །ཉམས་དང་ཚད་དུ་མ་གྱུར་བར། །རྐྱེན་དབང་མི་བཏང་ཚད་དུ་བྱ། །ད་ཡང་རྡོ་རྗེ་སེམས་དཔའ་ཉོན། །ཕྱི་ནང་གསང་བ་རྣམ་གསུམ་གྱི། །ཉམས་དང་ ― DNG002_Page_0229 ―
[མ་དཔེ་གཟིགས་ན་འདིར་གནོན།]
རྟགས་ནི་རྫོགས་ལྡན་ན། །སངས་རྒྱས་ངེས་པར་འབྱུང་བའི་ཕྱིར། །རྣལ་འབྱོར་ཚད་དང་ལྡན་པ་ཡིན། །དེ་མ་བྱུང་གི་བར་དུ་ནི། །གདམས་ངག་ཅན་གྱིས་ནན་ཏན་བྱ། །མ་བྱུང་མ་བསྒོམས་གདེང་དང་ལྡན། །མི་ཡི་ལུས་ལ་སངས་རྒྱས་ཐུགས། །འབྲས་བུ་ཐམས་ཅད་དུས་འདིར་སྨིན། །ད་ཡང་འདུས་པའི་སྙིང་པོ་ཉོན། །དེ་ཚེ་དད་ལྡན་འཁོར་གྱིས་ཀྱང་། །དཔྱད་བཟོ་རིག་པ་མ་ཡིན་པའི། །ཉམས་མྱོང་རྟོགས་པའི་གདེང་ཡང་དབུལ། །དོན་དང་མཐུན་པའི་གདེང་བྱུང་ན། །བཀྲ་ཤིས་ཚོགས་ནི་བསྐོར་བར་བྱ། །རྐྱེན་དབང་མ་བཏང་ཏིང་འཛིན་ནི། །ལོ་ལྔ་བར་ནི་མ་ཆད་ན། །ཚེ་ལ་དབང་ཐོབ་རིག་འཛིན་ཐོབ། །ཕྱི་མ་སངས་རྒྱས་སྨོས་ཅི་དགོས། །ལུང་ལྡན་ངེས་པའི་རྣལ་འབྱོར་པས། །ལོ་གསུམ་བར་ནི་མ་ཆོད་པར། །སྔ་ཕྱི་མ་བཏང་དོན་གསལ་ན། །མངོན་ཤེས་དྲུག་འབྱུང་བདེན་པ་མཐོང་། །ཆོས་སྐུ་དྲན་པས་ངེས་པའི་དོན། །ཟླ་གསུམ་བར་ནི་མ་ཆད་ན། །ཆོ་འཕྲུལ་བཅོ་བརྒྱད་ཟིལ་གནོན་པས། །དངོས་གྲུབ་ཐོབ་ནས་གེགས་མི་ཚུགས། །ཆོས་སྐུ་དྲན་པའི་ལྷག་མཐོང་ནི། །ཟླ་གཅིག་བར་ནི་མ་ཆད་དུ། །གོམས་པ་ཀློང་དུ་འགྱུར་བར་ངེས། །དེ་ཕྱིར་ལྷ་ཡི་རིག་འཛིན་ཐོབ། །གདམས་ངག་ཡོད་པའི་རྣལ་འབྱོར་པས། །ཞག་བདུན་བར་ནི་མ་ཆོད་པར། །ཚིག་ཙམ་མ་ཡིན་ཉམས་སུ་མྱང་། །འཁོར་བར་མི་ལྟུང་དངོས་གྲུབ་ཐོབ། །ད་ཡང་རྡོ་རྗེ་སེམས་དཔའ་ཉོན། །ཡེ་ཤེས་མཁའ་དང་མཉམ་པ་ལས། །སྒྲིབ་པ་མ་ལུས་ཅིག་ཅར་བྱང་། །ཚོགས་གཉིས་ཀུན་རྫོགས་རྫོགས་སངས་རྒྱས། །གནོད་བྱེད་མུ་སྟེགས་བྱད་རྣམས་བཟློག །ཉམས་ཆག་ཐམས་ཅད་འདི་ཡིས་སྐོང་། །ཟས་ནོར་དངོས་གྲུབ་འདི་ཡིས་ཐོབ། །བསམ་པ་ཐམས་ཅད་འདི་ཡིས་འགྲུབ། །འདི་ཡི་བསོད་ནམས་བརྗོད་མི་ནུས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡེ་ཤེས་ཀྱི་ཚོགས་ཀྱི་འཁོར་ལོ་བསྟན་པའི་ལེའུ་སྟེ་བརྒྱ་དང་གྱ་བརྒྱད་པའོ།། །།དེ་ནས་འདུས་པའི་ཚོགས་ ― DNG002_Page_0230 ―
[མ་དཔེ་གཟིགས་ན་འདིར་གནོན།]
རྣམས་ལ། །ཀུན་རིག་རྒྱལ་པོས་བཀའ་སྩལ་པ། །གང་གི་མཛད་སྤྱོད་རྫོགས་ཆེན་ཀྱང་། །ཕྲིན་ལས་རྣམ་པ་བཞི་ཡི་ནི། །དོན་ལྡན་དབང་བསྐུར་དབྱེ་ལ་སོགས། །ཚོགས་མཆོད་རིམ་པ་གང་བྱེད་ཀྱང་། །ཡིད་དང་མཐུན་པའི་གནས་དག་ཏུ། །དམ་ཚིག་སེལ་མེད་འཁོར་བསགས་ཏེ། །དཀྱིལ་འཁོར་མཎྜལ་གཞུང་བཞིན་བྱ། །ཡེ་ཤེས་ཚོགས་ཆེན་བསགས་པའི་ཕྱིར། །དགའ་ལྡན་ལྷ་ཡི་ལོངས་སྤྱོད་དང་། །འབྱོར་ལྡན་མི་ཡི་ལོངས་སྤྱོད་དང་། །དགོས་ལྡན་འཕྲུལ་གྱི་ལོངས་སྤྱོད་རྣམས། །ཡིད་དང་དངོས་འགྲུབ་བསགས་བྱས་ལ། །སྔོན་དུ་འགྲོ་བའི་ལས་བྱས་ཏེ། །གནས་ཁང་བྱིན་གྱིས་བརླབས་པ་དང་། །ཏིང་འཛིན་ཞལ་ཟས་སྤྲོས་བསྐྱེད་ནས། །དམ་ཅན་འདུ་བར་བསྒོ་བ་དང་། །ཐུགས་དམ་བསྐུལ་དང་ཚར་བཅད་ནས། །གསང་བའི་ལྷ་མོས་མཚམས་བཅད་སྟེ། །རྣལ་འབྱོར་གནོང་བཤགས་བྱས་ནས་ནི། །དཀྱིལ་འཁོར་བསྐྱེད་དང་དབང་བསྐུར་ཏེ། །དོན་རྟོགས་བྱིན་གྱིས་བརླབ་མི་དགོས། །མ་རྟོགས་སྔགས་དང་ཡིག་འབྲུས་བརླབ། །ད་ཡང་འདུས་པའི་སྙིང་པོ་ཉོན། །ཡིད་ཀྱིས་མདུན་གྱི་ནམ་མཁའ་ལ། །དུས་གསུམ་བཞུགས་པའི་སངས་རྒྱས་དང་། །བླ་མེད་ཁྲག་འཐུང་རིགས་ལྔའི་ཚོགས། །རིག་འཛིན་རྗེ་བཙུན་བླ་མ་རྣམས། །མཁའ་འགྲོ་འཁོར་བཅས་སྤྱན་དྲངས་ནས། །ཅི་འབྱོར་བ་ཡི་ཚོགས་དྲངས་སྟེ། །དེ་ནས་རྣལ་འབྱོར་དད་ལྡན་གྱིས། །སྣང་བ་གཟུགས་ཀྱི་མཆོད་པ་དང་། །བསྒྲལ་བ་སྲོག་གི་མཆོད་པ་དང་། །ཐབས་དང་ཤེས་རབ་བདེ་བ་ཡིས། །ཡེ་ཤེས་ལྷ་ལ་རྫོགས་པར་མཆོད། །ལྷག་མ་རོལ་དང་ལྷ་གཤེགས་ནས། །སྐྱེ་ཤི་དུས་ཀྱི་སྨོན་ལམ་བཏབ། །ད་ཡང་རྡོ་རྗེ་སེམས་དཔའ་ཉོན། །དེ་ལྟར་ཚོགས་ཆེན་གཉིས་རྫོགས་ཀྱིས། །སྟོང་གསུམ་སངས་རྒྱས་སར་ཤེས་ཀྱང་། །གྲོང་ཡུལ་གནས་ལ་ཆགས་མི་བྱེད། །ཅི་སྤྱོད་རྒྱལ་བའི་མཛད་སྤྱོད་ཀྱང་། །འདུ་འཛི་གཡེང་བའི་དབང་མི་བཏང་། །རྣམ་སྨིན་ལུས་དང་མ་བྲལ་ཀྱང་། །སེམས་ལ་ཆོས་སྐུ་ཤིན་ཏུ་གསལ། །ཉིན་ ― DNG002_Page_0231 ―
[མ་དཔེ་གཟིགས་ན་འདིར་གནོན།]
དང་མཚན་མོ་དབྱེ་རུ་མེད། །ཅི་སྤྱོད་རང་བྱུང་ཡེ་ཤེས་ལ། །མ་ཆགས་དང་དུ་བླང་བ་མེད། །རྟོག་པ་སྐྱོན་དུ་དོར་བ་མེད། །དཀའ་ཐུབ་ཚུལ་གྱིས་བསྡམ་པ་མེད། །གང་ཡང་བློ་ཡི་རྟེན་མེད་ཀྱང་། །འོན་ཀྱང་མ་དད་དྲང་བའི་ཕྱིར། །རེ་ཞིག་ཙམ་དུ་དཀའ་ཆོས་སྤྱད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གསང་སྔགས་ཚོགས་དབུལ་བའི་ལེའུ་སྟེ་བརྒྱ་དང་གྱ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །རྣལ་འབྱོར་རིག་འཛིན་བསྒྲུབ་བྱའི་ཕྱིར། །ཆོས་སྐུའི་གཟུགས་བརྙན་བཀའ་སྩལ་པ། །རྟེན་མེད་དམ་ནི་རྟེན་ཅན་ལ། །སྐུ་གདུང་རིང་སྲེལ་གདབ་པའི་ཕྱིར། །ལྟ་བའི་ངང་དུ་རྫོགས་པར་ནི། །རྣལ་འབྱོར་པ་ཡི་ཏིང་འཛིན་གྱིས། །ལུང་ལྡན་བཀའ་དང་མཐུན་པར་གདབ། །ད་ཡང་རྡོ་རྗེ་སེམས་དཔའ་ཉོན། །ཡེ་ཤེས་སྟོང་ཉིད་བློ་ལྡན་པས། །སྣང་ཞིང་སྲིད་པའི་ཆོས་རྣམས་ནི། །གཟུགས་སྐུ་ཡིན་སེམས་ཁེངས་པར་གདབ། །སྤྲོས་བྲལ་མི་དམིགས་ལྟ་བའི་ངང་། །ཆོས་སྐུ་ཐག་ཆོད་རིག་པ་ཡིས། །ཅིར་ཡང་སྣང་བ་ལོངས་སྤྱོད་སྐུ། །འགྲོ་དོན་མཛད་པ་སྤྲུལ་པའི་སྐུ། །སྐད་ཅིག་གཅིག་ལ་རྫོགས་པར་གདབ། །ད་ཡང་འདུས་པའི་སྙིང་པོ་ཉོན། །ཉི་མ་དང་ནི་ཟེར་བཞིན་དུ། །རང་གི་ཆོས་སྐུ་ལྷག་མཐོང་ལས། །སངས་རྒྱས་ངེས་པར་འབྱུང་བ་ནི། །བརྐོས་ཕོར་དང་ནི་རྒྱ་བཞིན་དུ། །ཅི་བཏབ་སྤྲུལ་སྐུ་བསམ་མི་ཁྱབ། །ཕྱི་ནང་སྣོད་བཅུད་མ་ལུས་པ། །སྤྲུལ་སྐུ་ཐུབ་པ་དྲུག་ཏུ་གདབ། །དེ་ཡིས་སྤྲུལ་པ་སྣ་ཚོགས་འགྱེད། །འགྲོ་དོན་མཛད་པས་འཁོར་བ་སྟོངས། །མ་ལུས་སངས་རྒྱས་ཉིད་དུ་འགྱུར། །དེ་ཡང་མི་དམིགས་ཆོས་སྐུ་ཉིད། །ད་ཡང་འདུས་པའི་སྙིང་པོ་ཉོན། །རྟེན་ཅན་འབྱུང་ལྔའི་རྟེན་དེ་ཡང་། །སྣང་སྲིད་རྡུལ་ཕྲན་གྲངས་བཞིན་དུ། །གཟུགས་སྐུ་རིང་བསྲེལ་བསམ་མི་ཁྱབ། །དེ་སྙེད་སེམས་ཅན་མ་ལུས་ཀུན། །ལོངས་སྐུ་གྲངས་མེད་བརྗོད་མི་ལངས། །ས་བཅུའི་སེམས་དཔའ་ཉིད་དུ་འགྱུར། །སེམས་ཅན་མིང་ ― DNG002_Page_0232 ―
[མ་དཔེ་གཟིགས་ན་འདིར་གནོན།]
མེད་གཟུགས་ཀྱི་སྐུ། །ཐམས་ཅད་སངས་རྒྱས་ཉིད་དུ་བརྡལ། །ཅི་བཏབ་བྱེ་བ་སྟོང་དང་འདྲ། །ནམ་མཁའ་ཁེངས་པར་རང་བྱུང་སྐུ། །མཚན་ཉིད་དཔེ་བྱད་ལ་སོགས་པ། །མ་བཙལ་རང་བཞིན་ལྷུན་གྲུབ་ཚང་། །གཟུགས་སྣང་སྐུ་ལ་གྲག་པ་གསུང་། །དྲན་རྟོག་ཐུགས་ལ་ཡེ་ཤེས་ཀློང་། །ད་ཡང་འདུས་པའི་སྙིང་པོ་ཉོན། །དེ་ལྡན་རྣལ་འབྱོར་དམ་པ་ནི། །ཆོས་སྐུའི་ངང་ལ་གདུང་རྣམས་འབྱུང་། །གཟུགས་སྐུ་བསྒོམ་པས་རིང་བསྲེལ་འབྱུང་། །སྙིང་རྗེ་ལྡན་པས་མཆོད་རྟེན་འབྱུང་། །བླ་མ་མཉེས་ན་འོད་སྒྲ་འབྱུང་། །སྣང་སྲིད་མ་ལུས་སངས་རྒྱས་སྐུ། །དེ་ཡི་ཡོན་ཏན་བརྗོད་མི་ལང་། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་སྐུའི་ངང་ལ་ཚ་ཚ་གདབ་པར་བསྟན་པའི་ལེའུ་སྟེ་བརྒྱ་དང་དགུ་བཅུ་པའོ།། །།དེ་ནས་ཀུན་རིག་སྟོན་པ་ཡིས། །རྣལ་འབྱོར་ཚོགས་ནི་བསགས་པའི་ཕྱིར། །ཕྱི་ཡི་མཆོད་གཏོར་བཀའ་སྩལ་པ། །རྣལ་འབྱོར་ལྟ་བ་རྟོགས་པ་ཡིས། །རྟེན་ཅན་དང་ནི་རྟེན་མེད་པའི། །བླ་མེད་མཆོད་གཏོར་གཏོང་བའི་ཚེ། །དང་པོ་རྟེན་ཅན་རིམ་པ་ནི། །ཕྱི་ཡི་འཇིག་རྟེན་སྣོད་ནང་དུ། །བདུད་རྩིའི་རྒྱ་མཚོ་གཏིང་ཟབ་གྱུར། །དེ་སྟེང་འབྲུ་ཡི་ཕྱེ་བཏབ་པས། །གསེར་གྱི་ས་གཞི་ཆེན་པོར་གྱུར། །མེ་ཏོག་སྣ་ཚོགས་གཏོར་བ་ཡིས། །འཛམ་གླིང་བྱེ་བ་ཕྲག་བརྒྱར་བསམ། །རིན་ཆེན་སྣ་ལྔ་བརྡར་བ་ཡིས། །རིན་ཆེན་རི་བདུན་མ་བསྐྱེད་རྫོགས། །ས་དང་འདྲ་བའི་སྙིང་པོ་ལྔ། །འབྲས་བུ་ཡོན་ཏན་བགྲོད་མེད་པ། །མི་བརྗེད་དྲན་པའི་གཟུངས་ཐོབ་འགྱུར། །སྨན་ལྔ་འབྲུ་ལྔ་བླུགས་པ་ཡིས། །ནད་དང་མུ་གེའི་བསྐལ་པར་ཐར། །ལྟ་བའི་ངང་དུ་བྱིན་བརླབ་ཕྱིར། །མགྲོན་བཞིར་རིམ་གྱིས་བསྔོ་མི་དགོས། །བསྔོ་བ་མེད་པའི་བསྔོ་བ་ནི། །བླ་མེད་མྱ་ངན་འདས་པ་ནས། །འཇིག་ཚོགས་དམྱལ་བ་ཡན་ཆད་དུ། །བླ་མེད་མཆོད་སྦྱིན་འདི་བསྔོས་པས། །སེམས་ཅན་བསམ་པ་འགྲུབ་གྱུར་ནས། །ལྷུན་གྲུབ་ས་ལ་གནས་པར་ཤོག །ད་ཡང་འདུས་པའི་སྙིང་པོ་ཉོན། །རྟེན་མེད་མཆོད་གཏོར་གཏང་བ་ ― DNG002_Page_0233 ―
[མ་དཔེ་གཟིགས་ན་འདིར་གནོན།]
ནི། །སེམས་ཉིད་ནམ་མཁའི་ཀློང་ཡངས་སུ། །བདུད་རྩི་ཆུར་བསྐྱིལ་རིག་པ་ཡིས། །སངས་རྒྱས་སེམས་ཅན་ཀུན་མཆོད་ནས། །དམིགས་མེད་ཡེ་ཤེས་ཚོགས་སུ་བསྔོ། །དེ་ཕྱིར་དམིགས་མེད་ཡེ་ཤེས་ཀྱིས། །རྟེན་མེད་མཆོད་གཏོར་འདི་བཏང་བས། །ཀུན་ཀྱང་རང་བྱུང་ཡེ་ཤེས་སུ། །ཡེ་གནས་དོན་ནི་རྟོགས་འགྱུར་ནས། །སྐྱེ་མེད་མི་འགྱུར་འཐོབ་པར་ངེས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཕྱིའི་མཆོད་གཏོར་གཏང་བའི་ལེའུ་སྟེ་བརྒྱ་དང་གོ་གཅིག་པའོ། །སྡོམ་དུ་བསྡུས་ཏེ་བསྟན་པ་སོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཀུན་རིག་སྟོན་པ་ཆོས་རྗེ་ལ། །བདེན་པའི་ཡིད་ཀྱིས་འདི་སྐད་གསོལ། །གཉིས་མེད་གསུམ་གྱི་ལ་བཟླ་ཡི། །སངས་རྒྱས་སེམས་ཅན་ཇི་ལྟར་གཅིག །སྐྱོན་ཡོན་གཞི་ལ་ཇི་ལྟར་མེད། །འཁྲུལ་པ་མ་རིག་གང་ལྟར་ལགས། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལ་བཟླ་བ་ཡི་ངེས་ཚིག་ནི། །དུས་གསུམ་སངས་རྒྱས་ཐམས་ཅད་ལ། །ཡང་དག་རྩ་བའི་ངོ་བོ་གཅིག །དེ་ཉིད་རྟོགས་པའི་ཡེ་ཤེས་ནི། །སེམས་ཅན་ཀུན་ལ་གནས་པ་ཡི། །བདེ་གཤེགས་སྙིང་པོ་ཆོས་སྐུར་བདེ། །ཀུན་ཁྱབ་རང་བྱུང་ངོ་བོར་མཐུན། །དེ་ཕྱིར་སེམས་ཅན་སངས་རྒྱས་གཅིག །རིག་དང་མ་རིག་གཉིས་ཀ་ནི། །རང་བྱུང་ངོ་བོ་ཉིད་ཀྱི་སྐུ། །དེ་ཕྱིར་གཉིས་སུ་མེད་པར་ནི། །ངེས་པའི་དོན་དུ་ལ་བཟླའོ། །ད་ཡང་རྡོ་རྗེ་སེམས་དཔའ་ཉོན། །རང་རིག་ངོ་བོ་ཉིད་ཀྱི་གཞི། །སངས་རྒྱས་སེམས་ཅན་གཉིས་ལ་གནས། །དེ་ཕྱིར་ངོ་བོ་གཅིག་པར་ནི། །རྒྱལ་བ་ཀུན་གྱིས་རབ་ཏུ་བསྔགས། །ཆོས་ཀྱི་སྙིང་པོ་རང་བྱུང་སྐུ། །འཁོར་འདས་རྩ་བ་དེ་ཡིན་ཕྱིར། །དེ་ལས་སངས་རྒྱས་སེམས་ཅན་བྱུང་། །དེ་ཕྱིར་རང་བྱུང་ཀུན་གྱི་གཞི། །དཔེར་ན་མར་མེ་སྟོང་བཏང་ཡང་། །འོད་ཀྱི་ངོ་བོ་གཅིག་ལས་མེད། །དེ་བཞིན་སངས་རྒྱས་རྣམ་མང་ཡང་། །ཐུགས་ནི་ཐིག་ ― DNG002_Page_0234 ―
[མ་དཔེ་གཟིགས་ན་འདིར་གནོན།]
ལ་གཅིག་ཏུ་གཅིག །སེམས་ཅན་ལས་ཀྱི་རྣམ་སྨིན་གྱི། །མ་རིག་རྐྱེན་གྱིས་བསྐྱེད་པའི་ཕྱིར། །སྐྱེ་འགྲོ་གཟུགས་སྩོགས་མང་གྱུར་ཀྱང་། །དོན་མ་ཤེས་པས་སེམས་ཅན་ཏེ། །བསྐལ་པར་འཁྱམས་ཀྱང་སྟོང་བྲལ་མེད། །དེ་ཕྱིར་སངས་རྒྱས་སེམས་ཅན་གཅིག །གཅིག་ལས་འཁོར་འདས་སྣ་ཚོགས་བསྐྱེད། །དེ་ཕྱིར་རང་བྱུང་ངོ་བོ་སྟེ། །རྟོགས་པར་བྱ་བ་ཤིན་ཏུ་གཅེས། །ད་ཡང་འདུས་པའི་སྙིང་པོ་ཉོན། །སངས་རྒྱས་ཐུགས་དང་སེམས་ཅན་སེམས། །སོ་སོར་སྣང་བ་མ་ཡིན་ཏེ། །རྩ་བ་ཆོས་སྐུ་རོ་གཅིག་པ། །གཉིས་སུ་མེད་པར་ལ་བཟླའོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སངས་རྒྱས་ཐམས་ཅད་གཞི་ལ་གཅིག་པར་བསྟན་པའི་ལེའུ་སྟེ་བརྒྱ་དང་གོ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །སྐྱོན་ཡོན་གཞི་ལ་མེད་པའི་ཕྱིར། །འཁོར་བ་དག་གི་སྡུག་བསྔལ་ནི། །ཉོན་མོངས་བརྒྱད་ཁྲི་བཞི་སྟོང་དང་། །ནད་ནི་བཞི་བརྒྱ་རྩ་གཅིག་དང་། །ཡེ་འདྲོག་སུམ་བརྒྱ་དྲུག་ཅུ་ཡང་། །སྐྱེ་རྒ་ན་འཆི་བཞི་རུ་འདུས། །སངས་རྒྱས་རྣམས་ཀྱི་ཆེ་བ་ཡང་། །དཔེ་བྱད་བཟང་པོ་བརྒྱད་ཅུ་དང་། །མཚན་ནི་སུམ་ཅུ་རྩ་གཉིས་དང་། །སྟོབས་དང་མི་འཇིགས་ལ་སོགས་པ། །ཐིག་ལེ་ཆོས་སྐུ་རྟོགས་པར་འདུས། །ད་ཡང་རྡོ་རྗེ་སེམས་དཔའ་ཉོན། །བསོད་ནམས་ཚོགས་བསྐྱེད་འབྲས་བུ་ནི། །སངས་རྒྱས་ཆེ་བའི་ཡོན་ཏན་ཡིན། །མ་རིག་ཉོན་མོངས་ལ་སོགས་པ། །སེམས་ཅན་ལུས་དང་བག་ཆགས་ཡིན། །དགེ་སྡིག་གཉིས་ཀྱི་འབྲས་བུ་ནི། །དྲང་དོན་ཆོས་ལ་བདེན་འཛིན་ཀྱང་། །གཞི་ལ་སྐྱོན་ཡོན་གཉིས་མེད་ཕྱིར། །བླང་དོར་མེད་པར་ལ་བཟླའོ། །ད་ཡང་འདུས་པའི་སྙིང་པོ་ཉོན། །དཔེར་ན་འཁྲུལ་པའི་སྣང་བ་ནི། །གཙང་དང་མི་གཙང་གཉིས་ཀའི་གཞི། །ལུད་པ་ལ་སོགས་གང་རུང་ལ། །བྱ་ཁྱི་རྣམས་ཀྱིས་ཟས་སུ་མཐོང་། །མི་རྣམས་ཀྱིས་ནི་མི་གཙང་མཐོང་། །དེ་བས་སྣང་བ་མ་ངེས་ཕྱིར། །དོན་ལ་ ― DNG002_Page_0235 ―
[མ་དཔེ་གཟིགས་ན་འདིར་གནོན།]
བླང་དོར་མེད་པ་ཡིན། །ད་ཡང་འདུས་པའི་སྙིང་པོ་ཉོན། །གཞི་ལ་སྣང་བ་མེད་པ་ཡང་། །རང་གི་རང་སེམས་འཁྲུལ་པའི་ཕྱིར། །འཇིག་རྟེན་ཆོས་ལ་བླང་དོར་བྱས། །དེ་ཕྱིར་མ་རིག་རྨོངས་པས་ནོར། །དེ་བས་སྣང་ཞིང་སྲིད་པའི་ཆོས། །མེད་ལ་ཡོད་འཛིན་བག་ཆགས་བློ། །ཆོས་བརྒྱད་བཟང་ངན་གཙང་སྨེ་རྣམས། །སྤང་སྡུད་བླང་དོར་མེད་པར་ནི། །མ་ཞེན་དམ་པར་བལྟར་མེད་ན། །སྣང་བ་རང་སར་གྲོལ་བའི་ཕྱིར། །བླང་དོར་མེད་པར་ལ་བཟླའོ། །ད་ཡང་འདུས་པའི་སྙིང་པོ་ཉོན། །ཡང་དག་ཆོས་སྐུ་གཅིག་གཅིག་ལ། །གང་ཡང་མེད་ཕྱིར་སྤང་བླང་མེད། །དེ་ཕྱིར་ངེས་དོན་སྙིང་པོ་ལ། །བསྒོམ་དུ་མེད་ཕྱིར་འབྲལ་བ་མེད། །ངེས་དོན་སངས་རྒྱས་དགོངས་པ་ལ། །ཉི་ཤར་མུན་གྲིབ་མེད་པ་ལྟར། །ངེས་དོན་རྟོགས་པས་སྐྱོན་ཡོན་མེད། །དེ་ཕྱིར་བླང་དོར་མེད་པ་ཡིན། །ད་ཡང་རྡོ་རྗེ་སེམས་དཔའ་ཉོན། །ཆོས་སྐུར་ཡེ་ཤེས་ངོས་ཟིན་ན། །གང་ཡང་རང་བྱུང་ལྷུན་གྲུབ་ཆོས། །དེ་ལས་གཞན་པའི་ཆོས་མེད་ཕྱིར། །བླང་དོར་མེད་པར་ལ་བཟླའོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྐྱོན་ཡོན་གཞི་ལ་མེད་པར་བསྟན་པའི་ལེའུ་སྟེ་བརྒྱ་དང་གོ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ཆོས་སྐུ་གཞི་ངེས་རྟོག་པ་ལ། །མ་རིག་མེད་པས་དུག་ལྔ་གྲོལ། །ཐམས་ཅད་རང་བྱུང་ཆོས་སྐུར་གསལ། །ལུང་ལྡན་རྐྱེན་གྱིས་མ་རིག་དག །དུག་ལྔ་བྱང་ཆུབ་ལམ་ཡིན་ཕྱིར། །སྐུ་ལྔ་ལྷུན་གྲུབ་ཡེ་ནས་རྫོགས། །འདོད་ཆགས་ལོངས་སྤྱོད་རྫོགས་པའི་སྐུ། །ཞེ་སྡང་སྤྲུལ་སྐུ་ཡེ་སངས་རྒྱས། །གཏི་མུག་ཆོས་སྐུ་མ་རིག་སངས། །ང་རྒྱལ་ངོ་བོ་ཉིད་སྐུ་དག །ཕྲག་དོག་གསང་བའི་སྐུ་རུ་རྫོགས། །དུག་ལྔ་གཅིག་ཤེས་བྱང་ཆུབ་སྐུ། །ད་ཡང་འདུས་པའི་སྙིང་པོ་ཉོན། །ཡེ་ཤེས་ཡོད་ན་མ་རིག་སེལ། །དེ་ཕྱིར་ལུང་ལྡན་ངེས་པའི་དོན། །བཀའ་རྒྱུད་ཆོས་ ― DNG002_Page_0236 ―
[མ་དཔེ་གཟིགས་ན་འདིར་གནོན།]
འདི་སངས་རྒྱས་གསུངས། །མ་རིག་སེལ་བའི་སྒྲོན་མེ་ཡིན། །ཉི་ཟླས་དེ་ལ་འགྲན་མི་ཚུགས། །མ་རིག་མེད་ཕྱིར་སངས་རྒྱས་འགྲུབ། །ཡེ་ཤེས་ཤར་བས་ཐམས་ཅད་མཁྱེན། །ད་ཡང་རྡོ་རྗེ་སེམས་དཔའ་ཉོན། །ཐིག་ལེ་རྟོགས་པས་གང་ཡང་འགྲུབ། །ཀུན་གཞི་བརླགས་པས་ཡོན་ཏན་རྫོགས། །སྣང་བ་མེད་པས་ཞིང་ཁམས་དག །སེམས་དང་བྲལ་བས་ཆོས་སྐུ་གསལ། །མ་རིག་མེད་པས་གཞི་དང་ཕྲད། །རྟེན་པ་མེད་པས་རེ་བ་མེད། །གོལ་ས་མེད་པས་ལྟུང་བ་མེད། །འཁོར་བ་མེད་པས་དོགས་པ་བྲལ། །ད་ཡང་འཁོར་གྱི་སྙིང་པོ་ཉོན། །བསྒོམ་དུ་མེད་པས་ཡེངས་མི་སྲིད། །སྐྱེ་འགགས་མེད་ཕྱིར་བྱིང་རྒོད་སངས། །རང་བྱུང་རིག་པའི་ཡེ་ཤེས་འདི། །སུས་ཀྱང་མ་བྱས་བྱེད་པ་མེད། །དེ་ཕྱིར་ཆོས་ཀྱི་སྙིང་པོ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། མ་རིག་པ་གཞི་ལ་མེད་ཅིང་དག་པར་བསྟན་པའི་ལེའུ་སྟེ་བརྒྱ་དང་གོ་བཞི་པའོ། །སྡོམ་དུ་བསྡུས་ཏེ་བསྟན་པ་སོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ཆོས་རྣམས་སྐྱེ་བ་ཇི་ལྟར་མེད། །རོལ་པ་འགག་མེད་ཇི་ལྟར་འཆར། །མཚན་ཉིད་གཉིས་མེད་གཏན་ཚིགས་གང་། །རང་བློ་ངོ་བོ་ཇི་ལྟར་གྲོལ། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རང་བཞིན་སྐྱེ་མེད་གཏན་ཚིགས་ནི། །གཞི་ལ་སྣང་བ་མེད་པའི་ཕྱིར། །ཆོས་རྣམས་ཐམས་ཅད་སྤྲོས་དང་བྲལ། །དེ་ཕྱིར་རང་བཞིན་སྐྱེ་བ་མེད། །ཚིག་ཏུ་སྨྲ་བརྗོད་ཡུལ་ལས་འདས། །བརྗོད་མེད་དོན་ལ་ཡིད་ཆེས་ཕྱིར། །རང་གསལ་སྐྱེ་མེད་ཆོས་ཀྱི་སྐུ། །དེ་དོན་ངེས་པར་རྟོགས་པས་ཆོག །ད་ཡང་འདུས་པའི་སྙིང་པོ་ཉོན། །ཆོས་སྐུ་སྟོང་པའི་རང་བཞིན་ལ། །ངོ་བོ་ཉིད་ཀྱིས་ ― DNG002_Page_0237 ―
[མ་དཔེ་གཟིགས་ན་འདིར་གནོན།]
དམིགས་སུ་མེད། །དེ་ཕྱིར་ཡེ་ཤེས་ཀློང་གི་ལམ། །རྟོགས་པས་སྨྲ་བསམ་ཡུལ་ལས་འདས། །དངོས་གཞི་མེད་ཕྱིར་སྐྱེ་བ་མེད། །སྐྱེ་མེད་དོན་འདི་སུས་རྟོགས་པ། །དེ་ནི་རྣལ་འབྱོར་དམ་པའི་ཐུགས། །སྐྱེ་མེད་དོན་ལ་ཡིད་ཆེས་པས། །རང་བྱུང་ཐུགས་ལ་ཡེ་ཤེས་ལུས། །ཁ་དོག་དབྱིབས་སུ་མེད་པའི་ཕྱིར། །དངོས་པོ་ཡུལ་གྱི་མཐའ་ལས་འདས། །སྐྱེ་མེད་ཆོས་ནི་དེ་བཞིན་གཤེགས། །རང་གི་ངོ་བོ་བརྗོད་དུ་མེད། །རྒྱུ་མེད་ཕྱིར་ན་སྐྱེ་བ་མེད། །རྐྱེན་མེད་ཕྱིར་ན་འཇིག་པ་མེད། །དེ་ཕྱིར་སེམས་དང་བྲལ་བའི་ཐུགས། །ད་ཡང་འདུས་པའི་སྙིང་པོ་ཉོན། །རང་བཞིན་སྐྱེ་མེད་སྤྲོས་དང་བྲལ། །བརྗོད་དུ་མེད་པས་རང་ཡིད་ཆེས། །རྒྱུ་རྐྱེན་མ་བསྐྱེད་དོན་གྱི་ཕྱིར། །ལྷུན་གྱིས་གྲུབ་པས་ཐག་བཅད་དོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རང་བཞིན་སྐྱེ་བ་མེད་པའི་གཏན་ཚིགས་བསྟན་པའི་ལེའུ་སྟེ་བརྒྱ་དང་གོ་ལྔ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །རོལ་པ་གང་ཡང་མི་འགག་པས། །སྐྱེ་མེད་སྐྱེ་བའི་ཆོ་འཕྲུལ་འབྱུང་། །དེ་ཕྱིར་རོལ་པ་འགག་མེད་པ། །སངས་རྒྱས་ཀུན་གྱི་ཆེ་བར་བཤད། །ད་ཡང་འདུས་པའི་སྙིང་པོ་ཉོན། །ཕྱི་ནང་འབྱུང་བ་སྣ་ཚོགས་པ། །སྣང་སྟོང་དབྱེར་མེད་ཀུན་ཁྱབ་མཁའ། །མཐའ་དབུས་མེད་ལས་ཐམས་ཅད་འབྱུང་། །དེ་ཕྱིར་ནམ་མཁའ་ཀུན་གྱི་གཞི། །རྩི་ཤིང་ནགས་ཚལ་ཐམས་ཅད་བསྐྱེད། །ཐེག་ཆེན་སྤོ་ལ་ཀུན་གནས་ནས། །བྱང་ཆུབ་དཔེར་ནི་བསྟན་པའི་ཕྱིར། །དེས་ན་རོལ་པ་འགག་པ་མེད། །ཐམས་ཅད་སྡུད་པར་བྱེད་པའི་ཕྱིར། །གཞི་གནས་རྣམ་དག་ཆུ་ཆེན་པོ། །མི་གཙང་གོལ་སྒྲིབ་འཁྲུད་པའི་དཔེ། །དེ་ཕྱིར་རོལ་པ་འགག་པ་མེད། །གང་ཡང་ཆགས་པའི་རྟེན་བྱེད་ཕྱིར། །ཤེས་བྱ་ཐོགས་མེད་ཡེ་ཤེས་རླུང་། །མ་རིག་རྣམ་རྟོག་འཐོར་བའི་དཔེ། །དེ་ཕྱིར་ཀུན་བཟང་རོལ་པར་བསྟན། །ཐམས་ཅད་མ་ལུས་ཀུན་བསྲེག་ཕྱིར། །ལྷག་ ― DNG002_Page_0238 ―
[མ་དཔེ་གཟིགས་ན་འདིར་གནོན།]
༼༢༣༨༽མཐོང་ཡེ་ཤེས་འོད་འབར་མེ། །བྱིང་རྒོད་མཐར་འཛིན་འཇོམས་པའི་དཔེ། །དེ་ཕྱིར་རོལ་པ་འགག་པ་མེད། །དེ་ཡང་འདུས་པའི་སྙིང་པོ་ཉོན། །ཆོས་སྐུ་ངོ་བོ་ཉིད་ཀྱི་རྩལ། །སྣང་བ་འདི་ནི་ཆོས་ཀྱི་དབྱིངས། །དེ་ཡང་རང་གསལ་ཆོས་ཉིད་རྩལ། །འབྱུང་བ་ཡེ་ཤེས་ལྔ་རུ་དག །དེ་ཕྱིར་འགག་མེད་རོལ་པ་ཡིན། །དེ་ཡང་རྡོ་རྗེ་སེམས་དཔའ་ཉོན། །ཐེག་པའི་ཆོས་རྣམས་ཐམས་ཅད་ནི། །མ་འདྲེས་ཡོངས་རྫོགས་གསལ་སྟོང་གཟུགས། །ཅིར་ཡང་སྣང་བ་སྤྲུལ་པའི་སྐུ། །དེ་ཕྱིར་རོལ་པ་འགག་མེད་ཤར། །སྣང་སྲིད་འབྱུང་བའི་སྒྲ་སྐད་ཀུན། །ཁྱབ་གསལ་རང་བཞིན་གོ་བའི་སྒྲ། །གསང་སྔགས་གསུང་གི་འཁོར་ལོར་ཤར། །དེ་ཕྱིར་འགག་མེད་རོལ་པ་ཡིན། །ད་ཡང་འདུས་པའི་སྙིང་པོ་ཉོན། །རང་རིག་ངེས་པའི་ཡེ་ཤེས་ཀྱི། །ངང་པས་ཚིམ་བྱེད་ཆོས་ཀྱི་དྲི། །ལྷག་མཐོང་ཚོར་བ་རང་བྱུང་སྐུ། །དེ་ཡང་ཆོས་ཉིད་རོལ་པ་ཡིན། །ཆོས་སྐུ་ཐིག་ལེ་ཉག་གཅིག་ལ། །རྩལ་ནི་ཆོས་དབྱིངས་ཉམས་སུ་མྱོང་། །མྱོང་ཡང་དོན་དུ་འཛིན་པ་མེད། །དེ་ཡང་འགག་མེད་རོལ་པ་ཡིན། །རང་བྱུང་སངས་རྒྱས་ཡེ་ཤེས་ཏེ། །བདེ་མཆོག་དོན་ལ་རེག་པའི་ཆོས། །དེ་རྩལ་དོན་ལ་རེག་པ་མེད། །དེ་ཡང་འགག་མེད་རོལ་པ་ཡིན། །ད་ཡང་འདུས་པའི་སྙིང་པོ་ཉོན། །ཅིར་ཡང་མི་སེམས་གཏི་མུག་ལ། །ལྷག་མཐོང་རང་རིག་ཡེ་ཤེས་ཤར། །དེ་ཙམ་ཉིད་ན་བསྒོམ་མི་དགོས། །དེ་ཡང་རོལ་པ་འགག་མེད་ཡིན། །སྔ་ཕྱི་རྟོག་པ་དངོས་འཛིན་བྲལ། །དངོས་པོ་ཀུན་བཅོམ་ཞེ་སྡང་ཉིད། །དེ་ཡི་དོན་ལ་འགྱུར་མེད་ཕྱིར། །འགག་མེད་པ་ཡི་རོལ་པ་ཡིན། །ངེས་པའི་ལུང་ལྡན་གདམས་ངག་གིས། །གདེང་ཉམས་ཆེ་བའི་དོན་ཉིད་ལ། །ཡེ་ཤེས་ང་རྒྱལ་དོན་ཉིད་ཆེ། །ངེས་པའི་དོན་དང་འབྲལ་མི་ཕོད། །སྡུག་བསྔལ་གང་ཡང་མེད་པའི་ཕྱིར། །བདེ་ཆེན་རང་བཞིན་སྙིང་རྗེ་ཆགས། །ཞེན་པ་གང་ཡང་མེད་པའི་ཕྱིར། །དེ་ཡང་རོལ་པ་འགག་མེད་ཡིན། །གོལ་དང་ལྟུང་བ་མེད་པའི་ཕྱིར། ། ― DNG002_Page_0239 ―
[མ་དཔེ་གཟིགས་ན་འདིར་གནོན།]
༼༢༣༩༽ཆོས་ཉིད་གཞན་ལ་ཕྲག་དོག་མེད། །དེ་ཕྱིར་རང་བྱུང་ཡེ་ཤེས་ཤར། །དེ་ཡང་འགག་མེད་རོལ་པ་ཡིན། །ད་ཡང་འདུས་པའི་སྙིང་པོ་ཉོན། །འབྱུང་བ་འདོད་ཡོན་དུག་ལྔ་ཀུན། །ཐམས་ཅད་ཡེ་ཤེས་ཆོས་སྐུར་ཤར། །ཀུན་གྱི་རང་བཞིན་དེ་ཤེས་པས། །ཀུན་ལ་དབང་བསྐུར་ཐོབ་པ་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རོལ་པ་འགག་མེད་ཀྱི་གཏན་ཚིགས་བསྟན་པའི་ལེའུ་སྟེ་བརྒྱ་དང་གོ་དྲུག་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །མཚན་ཉིད་གཉིས་མེད་གཏན་ཚིགས་ཀྱིས། །ངེས་དོན་རྩ་བ་ཆོས་སྐུ་ལ། །ལུང་ལྡན་རྐྱེན་གྱིས་ཡིད་ཆེས་བྱ། །སངས་རྒྱས་སེམས་ཅན་ངོ་བོ་ལ། །རང་བྱུང་ཡིན་ཕྱིར་གཉིས་སུ་མེད། །ད་ཡང་རྡོ་རྗེ་སེམས་དཔའ་ཉོན། །དེ་ཉིད་རྟོགས་པས་འཁོར་འདས་དག །མེད་ཕྱིར་མཚན་ཉིད་གཉིས་སུ་མེད། །ཕྱི་དང་ནང་དང་སྣོད་དང་བཅུད། །མཐོ་རིས་ངན་སོང་དགེ་དང་སྡིག །དག་དང་མ་དག་གཙང་སྨེ་དང་། །ཡིན་དང་མིན་དང་བླང་དོར་དང་། །བྱ་དང་མི་བྱ་སྐྱོན་ཡོན་སོགས། །ཐ་སྙད་གཉིས་སུ་བསྡུས་པ་ཀུན། །དཔེར་ན་རི་བོང་རྭ་བཞིན་དུ། །ཚིག་ཏུ་ཡོད་ཀྱང་དོན་ལ་མེད། །དེ་ཕྱིར་མཚན་ཉིད་གཉིས་མེད་པའི། །གཏན་ཚིགས་ཆེན་པོར་བཞག་པ་ཡིན། །ད་ཡང་འདུས་པའི་སྙིང་པོ་ཉོན། །མཐའ་དང་བྲལ་བའི་ཆོས་སྐུ་ནི། །མེད་པ་མ་ཡིན་དྲན་ཞིང་ཚོར། །ཆད་པ་མ་ཡིན་རིག་ཅིང་གསལ། །རྟག་པ་མ་ཡིན་དངོས་པོ་མེད། །གཉིས་སུ་མ་སོང་ཟླ་བོ་མེད། །གཅིག་ཏུ་མ་ངེས་ཀུན་ལ་ཁྱབ། །ད་ཡང་རྡོ་རྗེ་སེམས་དཔའ་ཉོན། །ཆོས་ཅན་རང་གི་མཚན་ཉིད་ནི། །གདོད་ནས་གཉིས་སུ་མེད་པ་ཡི། །ཆོས་རྣམས་རྩ་བ་གཅིག་པའི་དོན། །གཏན་ཚིགས་དག་གིས་ཡིད་ཆེས་བྱ། །གཉིས་མེད་ཞེན་པའི་རྟག་པ་ནི། །འདྲེས་པའི་གཉིས་མེད་མ་ཡིན་ཏེ། །གང་ཡང་མ་འདྲེས་རང་བྱུང་སྐུ། །ཆད་ནས་གཉིས་མེད་མ་ཡིན་ཏེ། །སངས་རྒྱས་སྙིང་པོ་ཆོས་སྐུར་ཡོད། །དེ་ཕྱིར་གཞི་ལ་འཁོར་འདས་ནི། །གཉིས་ཀ་མེད་ཕྱིར་མཐར་མ་རེག །རང་བྱུང་ཆོས་སྐུ་ནམ་མཁའ་འདྲ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ― DNG002_Page_0240 ―
[མ་དཔེ་གཟིགས་ན་འདིར་གནོན།]
༼༢༤༠ཡེ་ཤེས་ནམ་མཁའ་དང་མཉམ་པའི་རྒྱུད་ལས། མཚན་ཉིད་གཉིས་སུ་མེད་པའི་གཏན་ཚིགས་བསྟན་པའི་ལེའུ་སྟེ་བརྒྱ་དང་གོ་བདུན་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་ཡང་གསུངས་པ། །ངོ་བོ་ཉིད་དུ་བློ་གྲོལ་བའི། །གཏན་ཚིགས་ངེས་པར་ཡིད་ཆེས་དོན། །ལུས་ངག་རྩོལ་བ་མེད་པའི་ཕྱིར། །རང་བྱུང་བློ་ལ་འཆིང་གྲོལ་མེད། །དེ་ཕྱིར་ངོ་བོ་ཉིད་དུ་གནས། །ད་ཡང་རྡོ་རྗེ་སེམས་དཔའ་ཉོན། །གཟུང་འཛིན་སྐྱོན་གྱིས་མ་གོས་པས། །རྣམ་རྟོག་བློ་ནི་རང་སར་གྲོལ། །དེ་ཕྱིར་ངེས་དོན་ཡེ་ཤེས་ཀློང་། །རྒྱུ་དང་རྐྱེན་ལས་མ་བྱུང་བའི། །རང་བྱུང་ངོ་བོ་ཉིད་ཀྱི་སྐུ། །དེ་ཉིད་རྟོགས་པས་ཆོས་སྐུར་གྲོལ། །ཡང་དག་སངས་རྒྱས་འདི་ལས་མེད། །ད་ཡང་རྡོ་རྗེ་སེམས་དཔའ་ཉོན། །ཆོས་ཉིད་དུས་གསུམ་མི་འགྱུར་ཕྱིར། །ལས་ཀྱི་དབང་དུ་གཞི་མི་འགྱུར། །དེ་ཕྱིར་ཆོས་ཉིད་རྟོགས་པས་གྲོལ། །དེ་ལ་སོགས་པ་གང་ཡང་མེད། །ངེས་པའི་ལུང་ལྡན་ཡིད་ཆེས་པས། །ངེས་པའི་གདེང་རྙེད་རྣལ་འབྱོར་དེ། །མི་ཡི་ལུས་ནི་འདི་ཉིད་ལས། །སངས་རྒྱས་འབྲས་བུ་ད་ལྟ་ཐོབ། །དེ་ཕྱིར་རང་བློ་ངོ་བོ་ཉིད། །དུས་འདིར་གྲོལ་བས་བཙལ་དུ་མེད། །འཛིན་མེད་གསལ་བས་བསྒོམ་མི་དགོས། །དེ་ཕྱིར་ཡང་དག་དགོངས་པའི་གདེང་། །དེ་དང་སུ་ལྡན་བསྒོམ་པའི་མཆོག །ད་ཡང་འདུས་པའི་སྙིང་པོ་ཉོན། །བྱང་ཆུབ་སེམས་ནི་རྣམ་པར་དག །དེ་དོན་རང་བྱུང་དོན་རྟོགས་པས། །སངས་རྒྱས་གཞན་དུ་བསྒྲུབ་མི་དགོས། །དེ་ཕྱིར་ལུང་ལྡན་གདམས་ངག་གཅེས། །ཆོས་ཉིད་དག་ཏུ་བློ་གྲོལ་ཕྱིར། །ཉོན་མོངས་སྡུག་བསྔལ་རང་སར་གྲོལ། །དེ་ལ་སྐྱོན་གྱིས་མི་གོས་ཏེ། །རང་བྱུང་ལུས་ལ་ཡེ་ཤེས་ཐུགས། །སེམས་ཅན་རང་བློར་འཛིན་པ་མེད། །དེ་ཕྱིར་ཉམས་པ་རྡུལ་ཙམ་མེད། །ད་ཡང་འདུས་པའི་སྙིང་པོ་ཉོན། །འཇིག་རྟེན་ཁམས་ཀུན་མ་ལུས་པ། །བསམ་གྱིས་མི་ཁྱབ་ཚིག་གྱུར་ཀྱང་། ། ― DNG002_Page_0241 ―
[མ་དཔེ་གཟིགས་ན་འདིར་གནོན།]
༼༢༠༡༽ནམ་མཁའ་ཚིག་པར་མི་འགྱུར་བཞིན། །ངེས་དོན་རྟོགས་པའི་རྣལ་འབྱོར་ལ། །ལྷ་སྲིན་མཁའ་འགྲོ་དགྲར་ལངས་ཀྱང་། །གནོད་པས་མི་ཚུགས་བཀའ་བཞིན་བྱེད། །དེ་ཕྱིར་ལུང་ལྡན་ཤིན་ཏུ་གཉན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། བློ་ངོ་བོ་ཉིད་དུ་གྲོལ་བའི་གཏན་ཚིགས་བསྟན་པའི་ལེའུ་སྟེ་བརྒྱ་དང་གོ་བརྒྱད་པའོ། །སྡོམ་དུ་བསྡུས་ཏེ་བསྟན་པ་སོ་དགུ་པའོ།། །།དེ་ནས་ཀུན་རིག་སྟོན་པ་ལ། །འདུས་པའི་འཁོར་གྱི་དོན་ཆེད་དུ། །རྡོ་རྗེ་སེམས་དཔས་འདི་སྐད་གསོལ། །ངེས་དོན་གདུལ་བྱའི་འབྲས་བུ་ནི། །སྐུ་གསུམ་སྟོན་པ་ཇི་ལྟར་འབྱུང་། །དེ་འཁོར་ལས་ཅན་གང་ལ་གསུང་། །འགྱུར་མེད་རྒྱུན་གྱི་དཔེ་དོན་གང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །སངས་རྒྱས་ངོ་བོ་སྐུ་གསུམ་ལས། །ཆོས་སྐུ་རང་བྱུང་རིག་པ་དེ། །དུས་གསུམ་དག་ཏུ་སྐྱེ་འགག་མེད། །འགྲོ་འོང་མེད་ཕྱིར་ཡེ་ནས་གནས། །ད་ཡང་འདུས་པའི་སྙིང་པོ་ཉོན། །ངེས་དོན་ཆོས་སྐུའི་མཐུན་དཔེ་ནི། །འདུས་མ་བྱས་ཀྱི་ནམ་མཁའ་ཆེ། །དངོས་མེད་ཀུན་ཁྱབ་དུས་གསུམ་གཅིག །མཐའ་དབུས་རིས་སུ་དབྱེ་རུ་མེད། །དེ་དོན་རང་བྱུང་ངོ་བོ་དེ། །ཚིག་ཏུ་བརྗོད་མེད་རང་རིག་སྐུ། །ཐུགས་ལ་གསལ་ཕྱིར་ངེས་ཤེས་པས། །དེ་ཕྱིར་ཀུན་བཟང་ཆོས་ཀྱི་སྐུ། །ཞིང་ཁམས་ཆོས་ཉིད་བདེ་བའི་ཀློང་། །རང་བཞིན་འོག་མིན་བྱང་ཆུབ་ཐུགས། །དེ་ལ་འགྱུར་བ་རྡུལ་ཙམ་མེད། །རང་བྱུང་རིག་པ་རྣམ་པར་དག །སྙིང་པོ་ཆོས་སྐུའི་ཐུགས་ཀ་ནི། །རྒྱུ་འབྲས་གཞི་ལ་མེད་པའི་དོན། །ཆོས་ཉིད་སྤྲོས་བྲལ་སྙིང་པོ་ཡི། །འཁོར་འདས་མ་ལུས་ལྷུན་གྱིས་རྫོགས། །ཆོས་སྐུ་སྟོན་པ་ཀུན་བཟང་གི། །དགོངས་པའི་ངེས་དོན་བྱིན་རླབས་ཀྱིས། །ཕྱོགས་བཅུར་ཉིད་ལས་མི་གཞན་འཁོར། །དུས་ ― DNG002_Page_0242 ―
[མ་དཔེ་གཟིགས་ན་འདིར་གནོན།]
གསུམ་སངས་རྒྱས་རྣམས་ལ་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཆོས་ཀྱི་སྐུའི་གདུལ་བྱ་བསྟན་པའི་ལེའུ་སྟེ་བརྒྱ་དང་གོ་དགུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སངས་རྒྱས་ལོངས་སྤྱོད་རྫོགས་པའི་སྐུ། །དེ་ཡི་གདུལ་བྱ་ངེས་པར་འབྱུང་། །དེ་དོན་ལེགས་པར་བཤད་ཀྱིས་ཉོན། །ལོངས་སྐུ་འབྱུང་བའི་མཐུན་དཔེ་ནི། །ནམ་མཁའ་དངོས་མེད་སྟོང་པ་ལ། །གཞའ་ཚོན་སྣ་ལྔ་མ་འདྲེས་གསལ། །དེ་ཙམ་ཉིད་ན་དངོས་མེད་ཡིན། །དེ་བཞིན་རང་གི་ངོ་བོ་ལ། །སྐྱེ་མེད་ཆོས་སྐུ་ཉིད་ཀྱི་རྩལ། །རིགས་ལྔ་སྐུ་མདོག་བརྒྱན་པ་བྱུང་། །དེ་ཕྱིར་ལོངས་སྐུ་སངས་རྒྱས་ཡིན། །ཀུན་གཞི་ཆོས་སྐུ་གཞི་ཆ་ལ། །སྔ་ཕྱི་བག་ཆགས་མེད་པར་གསལ། །འབྱུང་ལྔ་རོལ་པ་སྣ་ཚོགས་ཀྱང་། །ཞེན་པ་མེད་པ་ཆོས་ཀྱི་དབྱིངས། །ཡང་དག་ངེས་པའི་འབྲས་བུ་རྙེད། །ལོངས་སྤྱོད་རྫོགས་པའི་སྐུའི་སྒོ་ནས། །ལྡེམ་དགོངས་ཕྱི་ནང་གསང་བའི་དོན། །ས་བཅུའི་རིག་འཛིན་སེམས་དཔའ་ལ། །གསང་སྔགས་རང་གི་ངོ་བོས་བསྟན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ལོངས་སྐུའི་འཁོར་གྱི་གདུལ་བྱ་བསྟན་པའི་ལེའུ་སྟེ་ཉིས་བརྒྱ་ཐམ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །སྤྲུལ་པའི་སྐུ་ཡི་སངས་རྒྱས་ནི། །ཅིར་ཡང་སྟོན་ཕྱིར་སྤྲུལ་པའི་སྐུ། །འགྲོ་བའི་དོན་ཕྱིར་གདུལ་བྱ་ལ། །ཅི་རིགས་པར་ནི་དོན་མཛད་དེ། ད་ཡང་འདུས་པའི་སྙིང་པོ་ཉོན། །གཞན་དོན་སྤྲུལ་སྐུའི་མཐུན་དཔེ་ནི། །ངེས་མེད་བྲག་ཆ་ཁྱུང་དང་ནི། །སེང་གེ་ཆུ་ཟླ་གཟུགས་བརྙན་དང་། །ཨུ་དུམ་ཝ་རའི་མེ་ཏོག་འདྲ། །སྤྲུལ་སྐུ་རང་གི་ངོ་བོ་ནི། །ཐུབ་པ་དྲུག་ཏུ་སྐུ་སྤྲུལ་ཏེ། །མི་ཡི་ཤཱཀྱ་ཐུབ་པར་སྤྲུལ། །ལྷ་མི་རྣམས་ཀྱི་སྟོན་པ་ཡིན། །ད་ཡང་རྡོ་རྗེ་སེམས་དཔའ་ཉོན། །ཞིང་ཁམས་སྲིད་གསུམ་ ― DNG002_Page_0243 ―
[མ་དཔེ་གཟིགས་ན་འདིར་གནོན།]
གནས་རིས་འདིར། །འགྲོ་དྲུག་སེམས་ཅན་ལས་དག་ལ། །ཚོགས་གཉིས་གསོག་པའི་ཐབས་བསྟན་ནས། །སྒྲིབ་སྦྱངས་འབྲས་བུ་རིམ་གྱིས་འབྱུང་། །སྤྲུལ་སྐུའི་གསུང་གི་སྒོ་ནས་ནི། །གང་ལ་གང་འོས་དྲང་དོན་དུ། །དགེ་སྡིག་རྒྱུ་འབྲས་གཉིས་ཀྱི་ཆོས། །སྡེབ་སྦྱོར་ལེགས་པའི་ཚིག་ཏུ་སྟོན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། སྤྲུལ་པའི་སྐུའི་གདུལ་བྱ་བསྟན་པའི་ལེའུ་སྟེ་ཉིས་བརྒྱ་དང་གཅིག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །འབྲས་བུ་ངེས་པར་མཐར་ཐུག་ཕྱིར། །ཆེ་བའི་ཡོན་ཏན་གཏན་ལ་དབབ། །དེ་དོན་ལེགས་པར་བཤད་ཀྱིས་ཉོན། །འཁོར་འདས་གཉིས་ཀྱི་གཞིར་གྱུར་པ། །རང་བྱུང་ངོ་བོ་ཉིད་ཀྱི་སྐུ། །དེ་ལས་འཁོར་འདས་ཐམས་ཅད་བསྐྱེད། །གཞི་ལ་འཁོར་འདས་གྲུབ་པ་མེད། །གཞི་ལ་མཐོང་སྣང་སྣ་ཚོགས་པས། །འཁྲུལ་ངོར་བདེན་ཀྱང་དོན་ལ་མེད། །དེ་ཕྱིར་རང་བྱུང་ཀུན་གྱི་གཞི། །དེ་ལ་བསྐྱེད་པར་ནུས་པ་མེད། །དེ་ཡང་རྡོ་རྗེ་སེམས་དཔའ་ཉོན། །དཔེར་ན་གསེར་རྒྱུ་གཅིག་པ་ལ། །དབྱིབས་དང་གཟུགས་ནི་ཐ་དད་པར། །བྱས་པ་དེ་དག་མིང་རེར་གྲགས། །གྲགས་ཀྱང་གསེར་གྱི་ངོ་བོར་གཅིག །དེ་བཞིན་འཁོར་འདས་སྣ་ཚོགས་ལ། །བླུན་པོ་རྣམས་ཀྱིས་ཐ་དད་བཟུང་། །དེ་ཕྱིར་སྤོང་སྡུད་ཞེན་པ་བྱས། །གཞི་ལ་ངོ་བོ་གཅིག་ལས་མེད། །ད་ཡང་འདུས་པའི་སྙིང་པོ་ཉོན། །དཔེར་ན་ནོར་བུ་རིན་ཆེན་ལ། །རྙེད་པ་ཡོད་ལ་སྟོར་བ་མེད། །རང་བྱུང་ངོ་བོ་རྟོགས་པ་ལ། །མ་བཙལ་ཡོན་ཏན་ཐམས་ཅད་འབྱུང་། །དེ་ཕྱིར་ཆོས་སྐུ་ཉིད་ཀྱི་རྩལ། །རྟོགས་པའི་བྱིན་རླབས་སྐུ་གསུམ་འབྱུང་། །ཆོས་སྐུ་ཀུན་བཟང་ངེས་དོན་ལ། །རྟོགས་པས་ཆོག་ཕྱིར་ཡེ་སངས་རྒྱས། །ད་ཡང་རྡོ་རྗེ་སེམས་དཔའ་ཉོན། །སྐུ་ཡི་སྤྲུལ་པ་སྣང་མཛད་ཀྱིས། །དག་པར་སྤྱོད་པའི་རྣལ་འབྱོར་ལ། །ཕྱི་རྒྱུད་རྣམ་གསུམ་ཆོས་བསྟན་ཏེ། །རྡོ་རྗེ་འཛིན་པའི་ས་རུ་བཏགས། །དཔེར་ན་གསེར་སྦྲུལ་མིག་གིས་ནི། །འདོད་པའི་ཡོན་ཏན་རྣམ་ལྔ་ ― DNG002_Page_0244 ―
[མ་དཔེ་གཟིགས་ན་འདིར་གནོན།]
ཡང་། །དུས་གཅིག་ཉམས་སུ་མྱོང་བ་དང་། །དར་ཡ་ཀན་གྱི་སྨན་མཆོག་བཞིན། །སྐུ་དང་ཡེ་ཤེས་མ་ལུས་པའི། །ཆེ་བའི་ཡོན་ཏན་འབྱུང་འདོད་པས། །གཞན་དོན་སྨོན་ལམ་མཐར་ཕྱིན་པས། །ལོངས་སྤྱོད་རྫོགས་སྐུས་འགྲོ་དོན་བྱེད། །ད་ཡང་འདུས་པའི་སྙིང་པོ་ཉོན། །ཐུགས་ཀྱི་སྤྲུལ་པ་བྱུང་བ་ནི། །རྡོ་རྗེ་སེམས་དཔའ་ཉིད་ཡིན་ཏེ། །སྣོད་དང་ལྡན་པའི་རིག་འཛིན་ལ། །རྒྱུད་ལུང་གཉིས་ཀྱི་ངེས་པའི་ཆོས། །སྐྱེ་བ་ཚེ་གཅིག་བསྒྲུབ་གྱུར་ན། །རྡོ་རྗེ་འཆང་གི་ས་ལ་གཏུགས། །དེ་ཡང་འདུས་པའི་སྙིང་པོ་ཉོན། །སྨན་མཆོག་རྒྱལ་པོ་ཆེན་པོའི་དཔེ། །ལྷ་ཡི་བདུད་རྩི་མ་གི་ཏས། །ཤི་བ་ཀུན་སློང་སྨན་གྱི་མཆོག །གང་ལ་རེག་པས་འཚོ་བ་ལྟར། །ཡང་ཏི་ཐིག་ལེ་ཉག་གཅིག་ལ། །ངེས་པའི་ལུང་ལྡན་དོན་བསྟན་ན། །ལུས་ངག་རྩོལ་བ་མི་དགོས་པར། །བསྟན་དང་སངས་རྒྱས་དུས་མཉམ་འབྱུང་། །དེ་ཕྱིར་མན་ངག་ཤེས་པ་མཆོག །ད་ཡང་འདུས་པའི་སྙིང་པོ་ཉོན། །གསུང་གི་སྤྲུལ་པ་ཤཱཀ་ཐུབ་ཀྱིས། །སེམས་ཅན་སྐྱེ་བོ་ལས་དག་ལ། །སྡེ་སྣོད་རྣམ་པ་གསུམ་གྱི་ཆོས། །བསྐལ་པ་གྲངས་མེད་རྣམ་གསུམ་ན། །འབྲས་བུ་བཅུ་གཅིག་ས་གནོན་འདོད། །ད་ཡང་འདུས་པའི་སྙིང་པོ་ཉོན། །དཔེར་ན་དཔག་བསམ་ལྗོན་ཤིང་ལ། །བསོད་ནམས་ཆེ་ཆུང་རིམ་པ་ཡིས། །འབྲས་བུ་སྣ་ཚོགས་རབ་འབྲིང་འབྱུང་། །དེ་ཕྱིར་ལས་དང་རྐྱེན་ལས་འབྱུང་། །དེ་བཞིན་དྲང་དོན་ཆོས་རྣམས་ཀུན། །གང་ཟག་བློ་ཡི་རིམ་པ་ལས། །ཅི་རིགས་པ་ཡི་ཆོས་བསྟན་པས། །འབྲས་བུ་ལྷ་དང་མི་རུ་སྐྱེ། །ད་ཡང་འདུས་པའི་སྙིང་པོ་ཉོན། །དྲང་དོན་ཆོས་ཀྱིས་སངས་མི་རྒྱ། །ཨ་མྲའི་འབྲས་བུ་སྨིན་མི་སྲིད། །མ་རྟོགས་ཆོས་ཀུན་ཅི་སྤྱད་ཀྱང་། །རྣམ་པར་གྲོལ་བར་མི་འགྱུར་རོ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འབྲས་བུ་མཐར་ཐུག་བསྟན་པའི་ལེའུ་སྟེ་ཉིས་བརྒྱ་དང་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །འགྱུར་མེད་དོན་གྱི་དཔེ་དོན་ནི། །ཀུན་རིག་ ― DNG002_Page_0245 ―
[མ་དཔེ་གཟིགས་ན་འདིར་གནོན།]
སྟོན་པས་བཀའ་སྩལ་པ། །ཆུ་བོ་ཆེན་པོའི་དཔེ་བཞི་ཡིས། །མི་འགྱུར་དོན་ཆེན་ངེས་མཚོན་པ། །བཤད་ཀྱིས་འཁོར་རྣམས་ལེགས་པར་ཉོན། །ཆུ་གཞན་སྐྱེ་འབྲི་ཡོད་མོད་ཀྱང་། །ཆུ་བོ་ཆེན་པོ་གངྒཱ་ལ། །དབྱར་སྐྱེ་དགུན་འབྲི་མེད་པར་ནི། །རྒྱུན་མི་འཆད་པར་རྟག་པ་བཞིན། །རང་བྱུང་སྐྱེ་མེད་རྣལ་འབྱོར་ལ། །དུས་དང་རྣམ་པ་ཐམས་ཅད་དུ། །ལྟ་བ་འཕེལ་འགྲིབ་མེད་པར་ནི། །ཡེ་ཤེས་ཆེན་པོ་རྒྱུན་མི་འཆད། །ད་ཡང་འདུས་པའི་སྙིང་པོ་ཉོན། །ཆུ་གཞན་མཚོ་རབ་ཡོད་མོད་ཀྱང་། །ཆུ་བོ་ཆེན་པོ་པཀྵུ་ཡི། །གཏིང་ལ་རིང་ཐུང་མེད་འབབ་ཅིང་། །དྲག་དལ་མེད་པར་སྙོམས་པ་བཞིན། །ཐེག་གཞན་རེས་འཇོག་ཡོད་གྱུར་ཀྱང་། །ངེས་དོན་ཆོས་ཉིད་ཏིང་འཛིན་ལ། །ཐུན་མཚམས་མེད་པར་རྒྱུན་དུ་གནས། །དེ་ཕྱིར་འབྱུང་འཇུག་མེད་པར་གསལ། །ད་ཡང་འདུས་པའི་སྙིང་པོ་ཉོན། །ཆུ་གཞན་འགྱར་འགྱུར་ཡོད་མོད་ཀྱང་། །ཆུ་ཆེན་ནཻ་རཉྫ་ན་ལ། །ཀྱག་ཀྱོག་མེད་པར་དལ་འབབ་ཅིང་། །དྲང་པོར་འགྱུར་བ་མེད་པ་བཞིན། །ཐེག་གཞན་བླང་དོར་ཆེད་བྱེད་ཀྱང་། །ངེས་དོན་ཡང་ཏི་རྫོགས་ཆེན་ལ། །བཟང་ངན་ཆེ་ཆུང་མེད་པར་མཉམ། །འགྱུར་མེད་བླང་དོར་མེད་པར་སྤྱོད། །ད་ཡང་འཁོར་གྱི་སྙིང་པོ་ཉོན། །ཆུ་གཞན་སྨན་དུག་གཉིས་ཡོད་ཀྱང་། །སི་ཏའི་ཆུ་བོ་ཆེན་པོ་ལ། །དུག་མེད་སྨན་གྱིས་ནད་ཀུན་སེལ། །ཀུན་ལ་སྨན་པའི་སྨན་མཆོག་བཞིན། །ངེས་དོན་རྟོགས་པའི་འབྲས་བུ་ནི། །གོལ་སྒྲིབ་ལྟ་སྤྱོད་ངེས་པའི་མཆོག །འགྲོ་བ་ཀུན་ལ་ཕན་པའི་ཆོས། །ཕྱི་མ་མ་ཡིན་དུས་འདིར་འབྱུང་། །ད་ཡང་རྡོ་རྗེ་སེམས་དཔའ་ཉོན། །ཆུ་བོ་བཞི་འདུས་རྒྱ་མཚོ་རུ། །ཆུ་བྲན་མང་པོ་ཀུན་འདུས་པ། །རྒྱ་མཚོ་ཆེན་པོར་རོ་གཅིག་བཞིན། །ཆོས་སྐུ་ཐིག་ལེ་ཉག་གཅིག་ཏུ། །བལྟ་བསྒོམ་སྤྱོད་པ་འབྲས་བུར་འདུས། །དེ་ཕྱིར་རང་རིག་ཆོས་སྐུ་ཉིད། །དེ་རྩལ་སྣང་བ་ཆོས་དབྱིངས་ལ། །གང་ཡང་མ་འགགས་ལྷུན་གྱིས་འགྲུབ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། འགྱུར་བ་མེད་པའི་དཔེ་དོན་མཐར་ཐུག་བསྟན་པའི་ལེའུ་སྟེ་ཉིས་བརྒྱ་དང་གསུམ་པའོ། །སྡོམ་དུ་བསྡུས་ཏེ་བསྟན་པ་སོ་དགུ་པའོ།། །།དེ་ནས་ ― DNG002_Page_0246 ―
[མ་དཔེ་གཟིགས་ན་འདིར་གནོན།]
རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཀུན་རིག་ཆོས་ཀྱི་རྒྱལ་པོ་ལ། །ངེས་པའི་དགོས་དོན་འདི་སྐད་གསོལ། །མཚན་ཉིད་སངས་རྒྱས་ཇི་ལྟར་བཞེད། །ཀྲི་ཡོག་སངས་རྒྱས་ཇི་ལྟར་འདོད། །བསྐྱེད་རྫོགས་གཉིས་ཀྱི་སངས་རྒྱས་གང་། །ཨ་ཏིའི་སངས་རྒྱས་ཅི་ལྟར་གང་། །ཡང་ཏིའི་སངས་རྒྱས་ཇི་ལྟར་གནས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ཉན་ཐོས་རང་རྒྱལ་མདོ་སྡེ་ནི། །བསྐལ་པ་གྲངས་མེད་གསུམ་དུ་ནི། །ཚོགས་ནི་རྣམ་པ་གཉིས་བསགས་ཏེ། །ལམ་ལྔ་རིམ་གྱིས་བགྲོད་བྱེད་དེ། །དཀའ་ཐུབ་མཐར་ཕྱིན་འབྲས་བུར་ངེས། །བུད་མེད་ལུས་བོར་ཕོ་ལུས་འཐོབ། །བདེན་བཞི་སྤང་བླང་ཉན་ཐོས་ཀྱི། །ས་རྣམས་གནོན་པའི་འབྲས་བུ་ནི། །དགྲ་བཅོམ་ཆེན་པོ་སྡུག་བསྔལ་བྲལ། །ཚངས་པར་སྤྱོད་པའི་དགེ་སློང་ཚོགས། །བདེ་སྐྱིད་ལྡན་པ་སྤྲུལ་སྐུའི་ཚུལ། །བྱ་བ་བྱས་ཤིང་ཨརྷན་པ། །ཟག་པ་ཟད་ཅིང་འཁོར་བ་སྟོངས། །ད་ཡང་རྡོ་རྗེ་སེམས་དཔའ་ཉོན། །ཡང་ཏི་རྫོགས་ཆེན་ཡས་བལྟས་ན། །འགྲོ་དོན་མི་བྱེད་ཐབས་དང་བྲལ། །ཆོས་སྐུ་མ་རྟོགས་ཤེས་རབ་བྲལ། །ལུང་ལྡན་ངེས་པའི་དོན་མ་མཐོང་། །ཐབས་མེད་ཤེས་རབ་བྲལ་བའི་ཕྱིར། །ཉན་ཐོས་རང་རྒྱལ་ཉིད་དུ་ལྟུང་། །དེ་ཕྱིར་ངེས་པའི་སངས་རྒྱས་མིན། །བྱང་ཆུབ་སེམས་དཔའི་འབྲས་བུ་ཡང་། །བྱང་ཆུབ་མཆོག་ཏུ་སེམས་བསྐྱེད་ནས། །འགྲོ་བའི་དོན་དུ་དཀའ་སྤྱད་ཕྱིར། །ཐབས་ནི་ཕ་རོལ་ཕྱིན་པ་བཅུས། །སྒྲིབ་གཉིས་སྦྱངས་ནས་ཚོགས་གཉིས་རྫོགས། །ད་ཡང་འདུས་པའི་སྙིང་པོ་ཉོན། །ཀུན་ཏུ་འོད་ཀྱི་ས་ལ་ནི། །མི་ལུས་མེད་པར་ལོངས་སྐུའི་ཚུལ། །མཚན་དང་དཔེ་བྱད་ཐམས་ཅད་ལྡན། །དོན་དམ་རང་བཞིན་མེད་པ་ཡི། །སངས་རྒྱས་ཆེ་བའི་ཆོས་ཀུན་མཁྱེན། །གདུལ་བྱ་འཁོར་གྱིས་ལོངས་སྐུར་མཐོང་། །ད་ཡང་འཁོར་གྱི་སྙིང་པོ་ཉོན། །བྱང་ཆུབ་སེམས་དཔའི་སངས་རྒྱས་ཀྱང་། །ཡང་ཏི་རྫོགས་ཆེན་ཡས་བལྟས་ན། །ངེས་དོན་སྙིང་པོ་མ་མཐོང་ཕྱིར། །གཞི་ན་མ་རིག་ ― DNG002_Page_0247 ―
[མ་དཔེ་གཟིགས་ན་འདིར་གནོན།]
ཡོད་པས་ནས། །རྩོལ་བ་བྱས་པས་ཆོས་སྐུ་བསྒྲིབས། །དེ་ཕྱིར་ཡང་དག་སངས་རྒྱས་མིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱུ་མཚན་ཉིད་ཀྱི་སངས་རྒྱས་འདོད་ལུགས་བསྟན་པའི་ལེའུ་སྟེ་ཉིས་བརྒྱ་དང་བཞི་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །ཀྲི་ཡ་ལྷ་དང་ལྷ་མོ་དང་། །ཕོ་མོ་གཉིས་ཀྱི་ཚུལ་དུ་གནས། །མིང་སྲིང་ལྕམ་དྲལ་ཚུལ་དུ་ཡོད། །ཐབས་དང་ཤེས་རབ་བདེ་བ་ཡང་། །བལྟ་བའི་ཚུལ་དུ་བལྟས་པས་ཚིམ། །མི་ཚེ་བདུན་དུ་བསྒྲུབས་པའི་མཐུས། །དྲང་སྲོང་རིག་འཛིན་ས་ཐོབ་སྟེ། །སྐྱེ་བ་མེད་པའི་རྡོ་རྗེ་འཛིན། །རིགས་གསུམ་མགོན་པོར་སངས་རྒྱས་པ། །བྲམ་ཟེའི་ཚུལ་དུ་གཙང་སྤྱད་པས། །དག་པའི་སངས་རྒྱས་འབའ་ཞིག་ཡོད། །ད་ཡང་འདུས་པའི་སྙིང་པོ་ཉོན། །ཀུན་ཀྱང་ལོངས་སྤྱོད་རྫོགས་སྐུ་ལ། །གཟུགས་བརྙན་ཆུ་ཟླ་ལྟ་བུ་ལ། །འགྲོ་དོན་སྨོན་ལམ་སྟོབས་ཀྱིས་བྱེད། །དེ་ཕྱིར་དག་པའི་སངས་རྒྱས་འདོད། །ད་ཡང་རྡོ་རྗེ་སེམས་དཔའ་ཉོན། །ཡོ་ག་རྣལ་འབྱོར་སེམས་དཔའ་ཡིས། །འབྲས་བུ་ཕྱག་རྒྱ་བཞི་བསྒྲུབ་སྟེ། །འབྲས་བུ་སྟུག་པོ་བཀོད་པའི་སར། །ཆོས་ཀྱི་དབྱིངས་སུ་སངས་རྒྱས་འདོད། །ད་ཡང་འདུས་པའི་སྙིང་པོ་ཉོན། །ཐབས་དང་ཤེས་རབ་བདེ་སྤྱོད་ནི། །ལྷ་དང་ལྷ་མོ་ཀུན་ཀྱང་ནི། །ལོངས་སྤྱོད་རྫོགས་པའི་ཆ་བྱད་ཅན། །སེམས་དཔའ་སེམས་མ་མང་པོ་ཀུན། །འཇིག་འབྲལ་མེད་པའི་ཡེ་ཤེས་ལྷ། །ཆགས་པའི་ཚུལ་གྱིས་བསྟན་པའི་ཚུལ། །ལག་བཅངས་འཁྱུད་པ་ཙམ་གྱིས་ཀྱང་། །བདེ་བ་ཆོས་ཀྱི་དབྱིངས་སུ་སྨིན། །གསང་སྔགས་ཐབས་ཆེན་འབྲས་བུའི་མཆོག །སངས་རྒྱས་ས་ནི་གཞའ་ཚོན་བཞིན། །རང་བཞིན་མེད་པར་སྐྱེ་འཆི་བྲལ། །རྣམ་པར་སྣང་མཛད་ལ་སོགས་པའི། །སངས་རྒྱས་བདེ་སྐྱིད་ཀུན་ལྡན་ཕྱིར། །གཞལ་ཡས་དཀྱིལ་འཁོར་ཞིང་ཁམས་རྣམས། །བསམ་པ་ཙམ་གྱིས་རང་བཞིན་འབྱུང་། །དཔེར་ན་འཕྲུལ་དགའི་ལོངས་སྤྱོད་འདྲ། །ད་ཡང་འདུས་པའི་སྙིང་པོ་ཉོན། །དེ་དག་ཀྲི་ཡོག་སངས་རྒྱས་ཀྱང་། །ཡང་ཏི་ ― DNG002_Page_0248 ―
[མ་དཔེ་གཟིགས་ན་འདིར་གནོན།]
རྫོགས་ཆེན་ཡས་བལྟས་ན། །རྩེད་མོ་འདྲ་སྟེ་ཨ་ཏི་སློབ། །ཡང་དག་ངེས་དོན་མ་ཤེས་པས། །རེ་དོགས་ཡོད་ཕྱིར་ལྷུན་གྲུབ་མིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། གསང་སྔགས་ཕྱི་རྒྱུད་ཀྱིས་སངས་རྒྱས་འདོད་ལུགས་བསྟན་པའི་ལེའུ་སྟེ་ཉིས་བརྒྱ་དང་ལྔ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །རྣལ་འབྱོར་ཆེན་པོའི་སངས་རྒྱས་ནི། །ཕུང་པོ་ཁམས་དང་སྐྱེ་མཆེད་སོགས། །ཡེ་ནས་སངས་རྒྱས་ཡིན་པའི་ཕྱིར། །དཀྱིལ་འཁོར་མ་ལུས་རང་ལ་རྫོགས། །ད་ཡང་རྡོ་རྗེ་སེམས་དཔའ་ཉོན། །དེ་བསྒྲུབ་སངས་རྒྱས་སྐྱེ་བ་འདིར། །རྡོ་རྗེ་འཆང་གི་ས་ནོན་ཚེ། །ཐབས་དང་ཤེས་རབ་བདེ་སྤྱོད་པ། །དགའ་འདུས་ཕོ་མོའི་དཔེ་བཞིན་དུ། །འཁྲིག་པའི་སྦྱོར་བའི་ཐབས་ཀྱིས་ཀྱང་། །སངས་རྒྱས་ཐམས་ཅད་བསྐྱེད་པར་བྱེད། །ད་ཡང་འདུས་པའི་སྙིང་པོ་ཉོན། །ཞི་ཁྲོའི་ལྷ་ཚོགས་རྒྱན་དང་བཅས། །འདོད་ཆགས་འཁྲིག་པའི་ཚུལ་དུ་གནས། །དེས་བསྐྱེད་སངས་རྒྱས་ངོ་བོ་ལ། །ཡེ་ནས་ལྷ་ཡི་དཀྱིལ་འཁོར་ཉིད། །བགྲང་གིས་མི་ལངས་ཕོ་མོ་ཀུན། །འགྲོ་དོན་མ་ལུས་དུས་གཅིག་བྱེད། །ད་ཡང་འཁོར་གྱི་སྙིང་པོ་ཉོན། །ཆོས་རྣམས་སྣང་སྟོང་དབྱེར་མེད་པར། །ནམ་མཁའ་སྟོང་ལ་གཞའ་ཚོན་འདྲ། །སྐྱེ་ཤི་མེད་པ་སྨོས་ཅི་དགོས། །དུས་འདིར་འབྱུང་བས་ཁྱད་པར་འཕགས། །དེ་ཕྱིར་ཐབས་ལ་བསྟེན་པའི་མིས། །འབྲས་བུ་བྱང་ཆུབ་ཆུད་མི་འཛའ། །ཐབས་ཀྱི་ནང་ན་དམ་པའི་མཆོག །ད་ཡང་རྡོ་རྗེ་སེམས་དཔའ་ཉོན། །རྗེས་སུ་རྣལ་འབྱོར་སངས་རྒྱས་ནི། །མ་བསྐྱེད་རྫོགས་པའི་ཡེ་ཤེས་ཀློང་། །ལྷ་ཡི་དཀྱིལ་འཁོར་རང་བྱུང་སྐུ། །ད་ཡང་འདུས་པའི་སྙིང་པོ་ཉོན། །ཀུན་བཟང་རོལ་པ་ཐབས་ཀྱི་ཡབ། །ཀུན་ཏུ་བཟང་མོ་ཤེས་རབ་ཡུམ། །བདེ་ཆེན་གཉིས་མེད་རོལ་པའི་རྩལ། །གཞའ་ཚོན་རིས་འདྲ་དངོས་མེད་གསལ། །ཐུགས་ནི་རིག་པའི་ཡེ་ཤེས་ཅན། །ཕྱི་ནང་བཙལ་དུ་གང་ཡང་མེད། །ནམ་མཁའི་དཀྱིལ་དུ་ཉི་ཤར་ལྟར། །རང་ལ་རྫོགས་པས་བསྐྱེད་མི་དགོས། །བཙལ་དུ་མེད་པས་སྐྱེ་ཤི་མེད། །འདུ་འབྲལ་མེད་པའི་སངས་རྒྱས་ལ། །ཀུན་ཏུ་བཟང་པོའི་ས་ཞེས་གདགས། །ད་ཡང་རྡོ་རྗེ་ ― DNG002_Page_0249 ―
[མ་དཔེ་གཟིགས་ན་འདིར་གནོན།]
སེམས་དཔའ་ཉོན། །དེ་དག་རྒྱུད་ལུང་སངས་རྒྱས་ཀྱང་། །ཡང་ཏི་རྫོགས་ཆེན་ཡས་བལྟས་ན། །རང་བྱུང་ངེས་དོན་མ་ཤེས་པར། །ཆེད་དུ་བྱེད་པའི་རྩོལ་བས་སྒྲིབས། །རེ་དོགས་ཕྲ་མོ་ཡོད་པའི་ཕྱིར། །ངེས་ལུང་མ་ཤེས་སྣང་བར་འཆེལ། །གཟུགས་ཅན་སངས་རྒྱས་འདོད་པའི་ཕྱིར། །ཆོས་སྐུའི་སངས་རྒྱས་དོན་ལ་སྒྲིབས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐིག་ལེ་རྒྱུད་ལུང་གི་སངས་རྒྱས་འདོད་ལུགས་བསྟན་པའི་ལེའུ་སྟེ་ཉིས་བརྒྱ་དང་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་སྟོན་པས་བཀའ་སྩལ་པ། །ཐིག་ལེ་ཉག་གཅིག་མངོན་བྱུང་ནས། །ལུང་ལྡན་ངེས་པའི་དོན་ཕྱིར་དུ། །རྣམ་སྨིན་ལུས་དང་བྲལ་མ་ཐག །མངོན་ཤེས་དྲུག་དང་རྗེས་དྲན་དྲུག །ཐོག་མཐའ་མེད་པར་སངས་རྒྱས་ཚེ། །སྐད་ཅིག་གཅིག་ལ་མ་རིག་སངས། །ལུས་མེད་རིག་པའི་ཡེ་ཤེས་རྒྱས། །རང་བྱུང་ཐུགས་ལ་སྐྱེ་འཆི་མེད། །ཐམས་ཅད་མཁྱེན་པའི་ཡེ་ཤེས་ལྡན། །ནམ་མཁའ་ཉི་མའི་སྙིང་པོ་འདྲ། །ད་ཡང་འདུས་པའི་སྙིང་པོ་ཉོན། །ཡེ་ཤེས་ལུས་ཅན་སངས་རྒྱས་ལ། །སེམས་ཅན་མེད་ཕྱིར་དོན་མི་དགོས། །རང་བྱུང་རིག་པའི་ཆོས་སྐུ་ལ། །རང་ལ་ཡོད་པ་ངེས་ཤེས་ཕྱིར། །ཆེད་དུ་རྩོལ་བས་བསྒྲུབ་མི་དགོས། །རང་བྱུང་རིག་པའི་ཆོས་སྐུ་ལ། །དུས་གསུམ་འཁྲུགས་ཀྱང་འཕོ་འགྱུར་མེད། །སྟོང་གསུམ་ཞིག་ཀྱང་ཉམས་མི་སྲིད། །རང་བྱུང་ཆོས་སྐུ་ཁ་མིག་ཅན། །དེ་ཡི་གཟུགས་བརྙན་གཟུགས་སྐུ་གཉིས། །མ་བཙལ་རང་བྱུང་ཆོས་སྐུར་སྟོན། །ད་ཡང་དོ་རྗེ་སེམས་དཔའ་ཉོན། །རྒྱུད་ལུང་ཉན་ཐོས་ཡན་ཆད་ལ། །འབྲས་བུ་གཟུགས་སྐུ་འབྱུང་མི་སྲིད། །ཡིད་སྨོན་གྱིས་ནི་སངས་རྒྱས་ཀྱང་། །ངེས་དོན་ཡང་ཏིའི་སངས་རྒྱས་མིན། །ད་ཡང་འདུས་པའི་སྙིང་པོ་ཉོན། །ངེས་དོན་རྫོགས་པའི་སངས་རྒྱས་ནི། །དུས་དང་རྣམ་པ་ཐམས་ཅད་དུ། །འདུས་མ་བྱས་པའི་སངས་རྒྱས་ནི། །དངོས་མེད་རང་བྱུང་རིག་པའི་སྐུ། །ངེས་དོན་ཆོས་སྐུར་ཤེས་པ་ལ། །དྲང་བའི་དོན་དུ་གཟུགས་སྐུར་འབྱུང་། །ཐབས་ལ་མི་བརྟེན་ཡོན་ཏན་རྫོགས། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཡང་དག་ངེས་ ― DNG002_Page_0250 ―
[མ་དཔེ་གཟིགས་ན་འདིར་གནོན།]
དོན་གྱི་སངས་རྒྱས་བསྟན་པའི་ལེའུ་སྟེ་ཉིས་བརྒྱ་དང་བདུན་པའོ། །སྡོམ་དུ་བསྡུས་ཏེ་བསྟན་པ་བཞི་བཅུ་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་ཚོགས་ལ་ཕན་གདགས་ཕྱིར། ཀུན་རིག་རང་བྱུང་སྟོན་པ་ལ། །བདེན་པའི་ཡིད་ཀྱིས་འདི་སྐད་གསོལ། །རིག་འཛིན་སེམས་དཔའི་དོན་ཆེད་དུ། །སངས་རྒྱས་རྟོགས་པ་བཤད་དུ་གསོལ། །རྒྱལ་སྲས་སྤྲུལ་པའི་དོན་ཆེད་དུ། །རིག་འཛིན་རྟོགས་པ་བཤད་དུ་གསོལ། །དད་ལྡན་འཁོར་གྱི་དོན་ཆེད་དུ། །རྒྱལ་སྲས་རྟོགས་པ་བཤད་དུ་གསོལ། །ཕྱི་རབས་རྣལ་འབྱོར་དོན་ཆེད་དུ། །མཁའ་འགྲོ་སྡེ་ལྔ་འཁོར་བཅས་པས། །རང་རང་རྟོགས་པ་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཀུན་རིག་སྟོན་པས་བཀའ་སྩལ་པ། །ད་ཡང་འདུས་པའི་འཁོར་བཞི་ཀུན། །ཕྱི་རབས་རྣལ་འབྱོར་དོན་ཆེད་དུ། །རང་སེམས་ཆོས་སྐུར་རྟོགས་པའི་དོན། །རང་རང་ཐུགས་ལ་མངའ་བ་ཡི། །ཚིག་ཏུ་མཚོན་པ་འདིར་བརྗོད་ཅིག །དེ་སྐད་གསུངས་པའི་དོན་གོ་ནས། །ཀུན་རིག་སྟོན་པའི་སྤྱན་སྔ་རུ། །འདུས་པའི་འཁོར་ནི་རྣམ་བཞི་ཡིས། །རང་རང་རྟོགས་པ་བརྗོད་པའི་ཕྱིར། །ཉིད་ལས་མི་གཞན་འཁོར་རྣམས་ནི། །ཕྱོགས་བཅུ་དག་པའི་སངས་རྒྱས་ནི། །རྡོ་རྗེ་གསང་བ་རིན་ཆེན་སྙིང་། །དྲི་མེད་གྲགས་དང་ལས་རབ་གྲུབ། །རྒྱལ་བའི་དབང་པོ་བསོད་ནམས་སྙིང་། །ཞི་བ་བདེན་དང་ཉི་མའི་འོད། །ནམ་མཁའི་སྙིང་པོ་འབུམ་གཟིགས་རྣམས། །རིག་འཛིན་སེམས་དཔའི་དོན་ཆེད་དུ། །རང་རང་རྟོགས་པའི་གདེང་ཉམས་ནི། །གོ་རིམ་བཞིན་དུ་རྟོགས་བརྗོད་པ། །དངོས་པོ་མེད་པའི་ཆོས་ཉིད་ལ། །རིག་པ་སྐྱེ་འགག་མེད་པའི་གནས། །དེ་ཡི་ངང་ལས་མ་གཡོས་ན། །ལྷུན་གྲུབ་ཡེ་ཤེས་ཆོས་ཀྱི་སྐུ། །ཡང་ནི་གདེང་ཉམས་འདི་གསུངས་པ། །རྟོག་མེད་མ་བཅོས་འགྱུར་བ་མེད། །ཡེ་ཤེས་ཆེན་པོ་རྒྱུན་མི་ཆད། །དེ་ནི་རང་བྱུང་ཆེན་པོ་སྟེ། །སྐྱོན་གྱིས་མ་གོས་ལྷུན་གྱིས་གྲུབ། །ཡང་ནི་གདེང་ཉམས་འདི་གསུངས་པ། །རིག་པ་སྐྱེ་འགག་མེད་པ་ལ། །སྔ་ཕྱི་བྲལ་བས་བྱང་ཆུབ་སེམས། །འབྲལ་བ་མེད་པས་སྐྱེ་མི་ཚུགས། །མ་བཙལ་མ་གྲུབ་ཆོས་ཀྱི་སྐུ། །ཡང་ནི་གདེང་ཉམས་འདི་གསུངས་པ། །ཕུང་པོ་མེད་ཕྱིར་སྐྱེ་ཤི་བྲལ། །རྒྱུ་རྐྱེན་མ་བསྐྱེད་རང་བྱུང་སྐུ། །མ་འགགས་དོན་ལ་བཙལ་དུ་མེད། །ངེས་དོན་དགོངས་པ་སངས་རྒྱས་ཐུགས། ། ― DNG002_Page_0251 ―
[མ་དཔེ་གཟིགས་ན་འདིར་གནོན།]
ཡང་ནི་གདེང་ཉམས་འདིར་གསུངས་པ། །གདོད་ནས་འགྱུར་མེད་ངོ་བོ་ལ། །སྐྱོན་མེད་དག་པས་བཅོས་མི་དགོས། །དེ་དོན་རང་བྱུང་རིག་པ་ལ། །ཡེ་ཤེས་སྐུ་ལ་གཡོས་པ་མེད། །ཡང་ནི་གདེང་ཉམས་འདིར་གསུངས་པ། །རྒྱུ་ལས་མ་བྱུང་ཆོས་ཉིད་ལ། །སྐྱོན་མེད་དོན་ལ་མ་ཡེངས་པས། །ཆེད་དུ་མ་བྱས་རྩོལ་བ་གྲོལ། །དེ་ཉིད་རང་རིག་ཆོས་སྐུར་རྟོགས། །ཡང་ནི་དོན་རྟོགས་འདིར་གསུངས་པ། །ཆོས་སྐུ་ཐིག་ལེ་ཉག་གཅིག་ལ། །ཡེངས་མེད་རྒྱུན་དུ་མི་འབྲལ་བས། །དེ་ཉིད་བསྒོམ་པའི་མཆོག་ཏུ་བཤད། །རང་ལ་ཤར་བའི་ཡེ་ཤེས་སྐུ། །ཡང་ནི་གདེང་ཉམས་འདིར་གསུངས་པ། །ཡུལ་མེད་རིགས་པའི་ཡེ་ཤེས་ལ། །བལྟས་པས་ཐིག་ལེ་དངོས་མེད་མཐོང་། །གཞན་ནས་མི་འབྱུང་རང་ལ་རྙེད། །དེ་ལ་མ་ཡེངས་ངེས་དོན་མཆོག །ཡང་ནི་རྟོགས་དོན་འདིར་གསུངས་པ། །གང་ལ་མི་གནས་རང་བྱུང་བ། །མ་འགགས་རིག་པ་རང་ལ་ཤར། །འཕེལ་འགྲིབ་མེད་པ་ནམ་མཁའ་འདྲ། །དེ་ཉིད་རྟོགས་པས་ཆོས་སྐུར་ཤེས། །ཡང་ནི་རྟོགས་དོན་འདིར་གསུངས་པ། །དྲན་མེད་རིག་པའི་དོན་གསལ་ནས། །དེ་ལ་ཡིད་ཆེས་དོན་ལ་གནས། །ཡེ་ཤེས་རང་ཤར་བཅོས་པ་མེད། །འགྱུར་མེད་རང་གསལ་ཆོས་ཀྱི་སྐུ། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཉིད་ལས་མི་གཞན་པའི་འཁོར་རྣམས་ཀྱི་རྟོགས་པ་བརྗོད་པའི་ལེའུ་སྟེ་ཉིས་བརྒྱ་དང་བརྒྱད་པའོ།། །།དེ་ནས་ཀུན་བཟང་སྤྱན་སྔར་ནི། །རིག་འཛིན་རྟོགས་པ་བརྗོད་པའི་ཕྱིར། །བློ་གྲོས་གཙོ་དང་རྣམ་དག་སྙིང་། །ནམ་མཁའི་ཡོན་ཏན་འོད་རླབས་ཅན། །ཤེས་རབ་བླ་མ་རྒྱལ་མཚན་འཛིན། །རྣམ་པར་གྲོལ་བའི་ཏིང་འཛིན་དབང་། །ཆོས་དབང་དང་ནི་བསོད་ནམས་བརྩེགས། །བདུད་བཅོམ་དང་ནི་སེང་གེའི་སྒྲ། །རིན་ཆེན་མཐོང་དང་བརྩེ་བ་ཅན། །དབང་ཕྱུག་གཙོ་དང་ཡིད་དགེ་དང་། །མཐོང་ན་དགའ་དང་བདེན་མོས་དང་། །གསུང་བརྩེགས་ལ་སོགས་འཁོར་རྣམས་ཀུན། །རྒྱལ་སྲས་སྤྲུལ་པའི་དོན་ཆེད་དུ། །གོ་རིམ་བཞིན་དུ་རྟོགས་པ་བརྗོད། །ཡང་ནི་གདེང་ཉམས་འདིར་གསུངས་པ། །རྩ་བ་ཆོས་སྐུའི་དོན་བཙལ་བ། །བསམས་པས་མི་རྙེད་བཞག་པས་རྙེད། །དྲན་པ་རང་གསལ་བྱིང་རྒོད་བྲལ། །སྐྱེ་མེད་མི་འགྱུར་བྱ་བཙལ་བྲལ། །ཉམ་ང་མེད་པའི་བདེ་བའི་མཆོག །ཡང་ནི་གདེང་ཉམས་འདིར་གསུངས་པ། །གསལ་བ་མ་ ― DNG002_Page_0252 ―
[མ་དཔེ་གཟིགས་ན་འདིར་གནོན།]
ཡེངས་ཆོས་ཀྱི་སྐུ། །མ་བསྒོམས་འབྲལ་མེད་ཏིང་ངེ་འཛིན། །དམིགས་སུ་མེད་པས་ནམ་མཁའ་འདྲ། །འདུ་འབྲལ་མེད་པར་རྒྱུན་དུ་གནས། །ཡང་ནི་གདེང་ཉམས་འདིར་གསུངས་པ། །སེམས་ལ་གཉེན་པོ་མེད་པས་ན། །བསམ་པའི་ཡུལ་ལས་འདས་པའི་ཕྱིར། །གཞན་ནས་མ་འོངས་རྒྱུན་མི་འཆད། །དེ་ཉིད་རང་རིག་ཆོས་སྐུར་རྟོགས། །ཡང་ནི་གདེང་ཉམས་འདིར་གསུངས་པ། །རང་བྱུང་རིག་པ་རང་ཤར་ཕྱིར། །མ་རིག་མུན་པ་རྩད་ནས་གཅོད། །དེ་ལ་གཉེན་པོས་བཅོས་སུ་མེད། །གདོད་ནས་རང་བྱུང་སངས་རྒྱས་ཐུགས། །ཡང་ནི་གདེང་ཉམས་འདིར་གསུངས་པ། །ཆོས་ཉིད་ཡེ་ནས་མ་བཅོས་པ། །དེ་ཉིད་ནམ་མཁའི་རང་བཞིན་ལྟར། །སྐྱེ་མེད་རང་གསལ་ཆོས་ཉིད་ལ། །རྒྱུན་དུ་འབྲལ་མེད་བྱང་ཆུབ་ཀློང་། །ཡང་ནི་གདེང་ཉམས་འདིར་གསུངས་པ། །རང་བྱུང་དག་པ་པདྨ་འདྲ། །འཁོར་བའི་སྐྱོན་གྱིས་གོས་པ་མེད། །དེ་ཕྱིར་ཆོས་ཉིད་ངང་ལ་ནི། །འབྲལ་མེད་བྱང་ཆུབ་སེམས་སུ་གསལ། །ཡང་ནི་གདེང་ཉམས་འདིར་གསུངས་པ། །ཟབ་མོའི་ཚིག་ལ་ཇི་ལྟར་ཀྱང་། །དཔེས་ཀྱང་མཚོན་མེད་བརྗོད་ལས་འདས། །དམིགས་པའི་ཡུལ་བྲལ་ཆོས་ཀྱི་སྐུ། །དེ་ལས་མི་འགྱུར་མཉམ་པའི་མཆོག །ཡང་ནི་གདེང་ཉམས་འདིར་གསུངས་པ། །རང་བྱུང་ཆོས་སྐུ་མཐའ་དབུས་མེད། །དེ་ལ་མ་ཡེངས་རྩོལ་བསྒྲུབ་འདས། །མཚོན་དུ་མེད་པས་རྐྱེན་མི་ཚུགས། །དེ་ཕྱིར་དུས་གསུམ་འབྲལ་བ་མེད། །ཡང་ནི་གདེང་ཉམས་འདིར་གསུངས་པ། །སྙིང་པོ་ཆོས་སྐུའི་རིག་འཛིན་དེ། །ལྷུན་གྱིས་གྲུབ་ཕྱིར་ཡེ་ཤེས་ཀློང་། །དེ་ཡི་ངང་ལ་འཁོར་བ་མེད། །དེ་ཕྱིར་སངས་རྒྱས་དགོངས་པ་ཡིན། །ཡང་ནི་གདེང་ཉམས་འདིར་གསུངས་པ། །འབྱུང་བཞི་ཞིག་པའི་ནམ་མཁའ་བཞིན། །ཆོས་ཉིད་སྙིང་པོ་རིག་པ་ནི། །ཡེ་ཤེས་རང་གསལ་འགྱུར་བ་མེད། །དེ་ཕྱིར་བསྒོམ་མེད་བྱང་ཆུབ་སྐུ། །ཡང་ནི་གདེང་ཉམས་འདིར་གསུངས་པ། །མཚན་མའི་ཡུལ་མེད་བྱང་ཆུབ་ལམ། །དེ་ལས་མ་བཙལ་རང་བཞག་ན། །ཡང་དག་དོན་གྱིས་དགོངས་པ་སྟེ། །དེ་ཉིད་མི་འབྲལ་བསྒོམ་པའི་མཆོག །ཡང་ནི་གདེང་ཉམས་འདིར་གསུངས་པ། །མངོན་སུམ་མི་གནས་ཆོས་སྐུ་ལ། །ཐ་དད་བྲལ་བའི་ཡེ་ཤེས་ཤར། །དེ་ལས་མཚོན་པའི་མིང་མ་རྙེད། །དེ་ལས་མ་གཡོས་བསྒོམ་པ་ཡིན། །ཡང་ནི་གདེང་ཉམས་འདིར་གསུངས་པ། །རང་བྱུང་ ― DNG002_Page_0253 ―
[མ་དཔེ་གཟིགས་ན་འདིར་གནོན།]
ངོ་བོ་ཉིད་ཀྱི་སྐུ། །བསྒོམ་པས་རྙེད་པར་མི་འགྱུར་ཏེ། །མ་བསྒོམས་པས་ཀྱང་སྟོར་བྲལ་མེད། །དེ་ཕྱིར་ཆོས་ཉིད་འབྲལ་བ་མེད། །ཡང་ནི་གདེང་ཉམས་འདིར་གསུངས་པ། །རང་བྱུང་ཆོས་ཉིད་ནམ་མཁའ་འདྲ། །དེ་ཕྱིར་ཏིང་འཛིན་སྤྲོས་མེད་གསལ། །དེ་ལ་གཉེན་པོས་བཅོས་སུ་མེད། །དེ་ཕྱིར་འབྲལ་མེད་དགོངས་པ་ཡིན། །ཡང་ནི་གདེང་ཉམས་འདིར་གསུངས་པ། །ཡུལ་གྱི་མཚན་མ་སྣ་ཚོགས་པ། །དེ་ཙམ་ཉིད་ན་རང་བཞིན་ཤེས། །དེ་ཕྱིར་སེམས་རྟོགས་ཆོས་སྐུར་གསལ། །དེ་ལ་སྐྱོང་དུ་རྡུལ་ཙམ་མེད། །ཡང་ནི་གདེང་ཉམས་འདིར་གསུངས་པ། །མ་བཙལ་པ་ཡི་ཆོས་ཉིད་ལ། །རྟོག་དཔྱོད་མེད་པ་བསྒོམ་པ་སྟེ། །ཉམས་ནི་ཤེས་རིག་གསལ་བ་ལ། །དེ་ལས་མ་ཡེངས་བསྒོམ་པ་ཡིན། །ཡང་ནི་གདེང་ཉམས་འདིར་གསུངས་པ། །གང་ཡང་མ་སྤངས་སྐྱོན་མ་གོས། །འགྲོ་འོང་མེད་པར་རྒྱུན་དུ་གནས། །བྱིང་རྒོད་སྐྱོན་གྱི་དབང་མི་འགྲོ། །དེ་ལ་སྒྲིབ་མེད་སངས་རྒྱས་ཐུགས། །ཡང་ནི་གདེང་ཉམས་འདིར་གསུངས་པ། །མ་བཙལ་རང་ལས་རྙེད་པའི་ཕྱིར། །ལྷག་མཐོང་ལྟ་བ་དྲན་པས་བཟུང་། །དེ་དང་མི་འབྲལ་སྒོམ་པའི་གདེང་། །ཡེ་ནས་ཡོད་པས་སྟོར་བྲལ་མེད། །ཡང་ནི་གདེང་ཉམས་འདིར་གསུངས་པ། །སྐུ་མེད་དམིགས་དང་བྲལ་བའི་ཕྱིར། །ཕྱག་རྒྱ་བསྒྱུར་མི་དགོས་པར་ངེས། །གསུང་མེད་རིག་པའི་དགོངས་པ་ཡིན། །ཡེ་ཤེས་ཐུགས་ལ་འགྱུར་བ་མེད། །དེ་ཡང་རྡོ་རྗེ་སེམས་དཔའ་ཉོན། །གཞན་ཡང་རིག་འཛིན་སེམས་དཔའི་ཚོགས། །བསམ་གྱིས་མི་ཁྱབ་གྲངས་ལས་འདས། །རང་རང་གདེང་ཉམས་མངོན་དུ་གསུངས། །དེ་དོན་ངེས་པའི་ཆོས་སྐུར་གཅིག །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། རིག་འཛིན་སེམས་དཔའི་འཁོར་གྱིས་རྟོགས་པ་བརྗོད་པའི་ལེའུ་སྟེ་ཉིས་བརྒྱ་དང་དགུ་པའོ།། །།དེ་ནས་རྒྱལ་སྲས་སྤྲུལ་པའི་ཚོགས། །ཚངས་པ་བརྒྱ་བྱིན་རྒྱལ་ཆེན་བཞི། །ཐགས་བཟང་རིས་དང་གང་བ་བཟང་། །མཁའ་ལྡིང་རྒྱལ་པོ་རྟ་མགོ་ཅན། །ཟུར་ཕུད་ལྔ་པ་ནོར་སྲུང་དང་། །མགྲིན་བཅུ་དང་ནི་ཀླུ་རྒྱལ་རྣམས། །ཀུན་རིག་སྟོན་པའི་སྤྱན་སྔར་ནི། །རང་རང་རྟོགས་པ་བརྗོད་པའི་ཕྱིར། །ངེས་དོན་གདེང་ཉམས་འདིར་གསུངས་པ། །རྩོལ་ ― DNG002_Page_0254 ―
[མ་དཔེ་གཟིགས་ན་འདིར་གནོན།]
སྒྲུབ་བྲལ་བ་བྱང་ཆུབ་ཐུགས། །རེ་དོགས་མེད་པས་གོལ་ས་མེད། །དེ་དོན་མ་བྲལ་ཆོས་ཉིད་ལ། །རྒྱུན་དུ་མི་འབྲལ་ཡེ་ནས་གནས། །ཡང་ནི་རྟོགས་དོན་འདིར་གསུངས་པ། །སྣང་བ་ཆོས་དབྱིངས་རྟོགས་མེད་ལ། །སྒྲོ་སྐུར་བྲལ་བས་ཆོས་ཀྱི་དབྱིངས། །དེ་ཉིད་དུས་མཉམ་རང་གསལ་བ། །སངས་རྒྱས་ཀུན་གྱི་དགོངས་པར་གོ། །ཡང་ནི་རྟོགས་དོན་འདིར་གསུངས་པ། །གོལ་ས་མེད་པའི་བལྟ་བ་ལ། །བྱིང་རྒོད་བྲལ་བའི་བསྒོམ་པ་གསལ། །ཕྲག་དོག་མེད་པའི་སྤྱོད་པ་བདེ། །དེ་ཉིད་ཡེ་ཤེས་ཆོས་ཉིད་ཀློང་། །ཡང་ནི་རྟོགས་དོན་འདིར་གསུངས་པ། །ནོར་བུ་ཆུ་དྭངས་དཔེ་བཞིན་དུ། །དྲན་པ་ཙམ་གྱིས་མ་རིག་སངས། །བཙལ་དུ་མེད་པས་ཡེ་སངས་རྒྱས། །དེ་ཉིད་དུས་ནས་གཟུགས་སྐུ་འབྱུང་། །ཡང་མི་རྟོགས་དོན་འདིར་གསུངས་པ། །ངེས་དོན་ལུང་ལ་ཡིད་ཆེས་པས། །ཐེ་ཚོམ་མེད་པར་རང་བྱུང་གསལ། །རིག་པ་མ་འགགས་བདེ་ཆེན་ཀློང་། །དེ་ལས་མི་འགྱུར་དགོངས་པར་ཤེས། །ཡང་ནི་རྟོགས་དོན་འདིར་གསུངས་པ། །ཡུལ་གྱི་མཚན་ཉིད་ཅིར་སྣང་ཡང་། །ཡིད་ཀྱིས་དགག་བསྒྲུབ་མེད་པར་ནི། །ཆོས་དབྱིངས་གདེང་ལྡན་ངེས་དོན་ལ། །སྤང་དང་སྡུད་པའི་ཞེན་མེད་བདེ། །ཡང་ནི་རྟོགས་དོན་འདིར་གསུངས་པ། །ལུང་ལ་ཡིད་ཆེས་དགོངས་པ་བདེ། །ཟབ་ལ་རྒྱ་ཆེ་དགོངས་པ་གསལ། །དེ་དོན་རྟོགས་གོམས་འབྲས་བུ་ལ། །སངས་རྒྱས་ངེས་པ་དེ་ལ་བྱ། །ཡང་ནི་རྟོགས་དོན་འདིར་གསུངས་པ། །ཚེ་རབས་སྔོན་ནས་མཐུ་བརྟས་པའི། །སྔ་ཕྱི་ཞེན་པའི་རྟོགས་པ་ལ། །མ་ཡེངས་ཆོས་ཉིད་རང་གསལ་བ། །དེ་ལ་བསྒོམ་དུ་རྡུལ་ཙམ་མེད། །ཡང་ནི་རྟོགས་དོན་འདིར་གསུངས་པ། །རང་བྱུང་ངེས་དོན་རྒྱུན་མི་ཆད། །དེ་ལ་རྟག་ཏུ་ཡིད་བརྟས་ན། །བག་ཆགས་སྒྲིབ་པ་ཤུགས་ལ་དག །ཡེ་ཤེས་མཚོ་ཆེན་སངས་རྒྱས་ཡིན། །ཡང་ནི་རྟོགས་དོན་འདིར་གསུངས་པ། །དུས་དང་རྣམ་པ་ཐམས་ཅད་དུ། །ཆོས་སྐུའི་དོན་ལས་མི་འདའ་ཕྱིར། །ཡང་དག་ཏིང་འཛིན་རྒྱུན་མི་འཆད། །དེ་ཕྱིར་ངེས་དོན་འགྱུར་བ་མེད། །ཡང་ནི་རྟོགས་དོན་འདིར་གསུངས་པ། །འཁོར་བས་མ་བསླད་ཏིང་འཛིན་ལ། །མ་བསྒོམས་ཆོས་ཉིད་ད་ལྟའི་ཐུགས། །བསྒོམ་དང་མི་བསྒོམ་ཅི་ཕྱིར་འཇུག །མཉམ་རྗེས་མེད་པར་རྒྱུན་དུ་གནས། །ཡང་ནི་རྟོགས་དོན་འདིར་གསུངས་པ། །རང་སེམས་མ་བཅོས་རང་ལུགས་ལ། །མ་བཙལ་ངང་བཞག་བསྒོམ་པ་ ― DNG002_Page_0255 ―
[མ་དཔེ་གཟིགས་ན་འདིར་གནོན།]
སྟེ། །བརྗོད་དུ་མེད་པའི་ཉམ་མྱོང་གསལ། །དེ་དོན་རང་བྱུང་རྟོགས་པ་ཡིན། །ཡང་ནི་དོན་རྟོགས་འདིར་གསུངས་པ། །ངེས་དོན་ཆོས་ཉིད་འགྱུར་མེད་ལ། །བློ་ཡིས་བརྟགས་པ་ཐམས་ཅད་མེད། །གང་ཡང་མ་སྤངས་རང་བྱུང་ལ། །དེ་ལ་བསྒོམ་དུ་རྡུལ་ཙམ་མེད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། རྒྱལ་སྲས་སྤྲུལ་པའི་འཁོར་གྱིས་རྟོགས་པ་བརྗོད་པའི་ལེའུ་སྟེ་ཉིས་བརྒྱ་དང་བཅུ་པའོ།། །།དད་ཉན་འཁོར་ལ་ཕན་དོན་དུ། །མཁའ་འགྲོ་སྡེ་ལྔ་འཁོར་བཅས་ཀྱིས། །ཀུན་རིག་སྟོན་པའི་སྤྱན་སྔར་ནི། །རང་རང་རྟོགས་པ་བརྗོད་པའི་ཕྱིར། །ངེས་པའི་དོན་རྟོགས་འདིར་གསུངས་པ། །གཏི་མུག་མུན་པ་འཐིབ་པ་ལ། །ཐོག་མཐའ་ཆོད་པས་མ་རིག་སངས། །ཡུལ་འདི་མ་བཤིགས་ཆོས་ཀྱི་དབྱིངས། །དེ་རྙེད་རང་སེམས་རྟོགས་པ་ཡིན། །ཡང་ནི་རྟོགས་དོན་འདིར་གསུངས་པ། །ཞེ་སྡང་ཁ་དོག་ཡུལ་ལ་སྐྱེ། །ཕྱི་ཡི་གོལ་ས་གཅོད་ཤེས་ན། །ཞེ་སྡང་རང་གྲོལ་རྒྱལ་བའི་ཐུགས། །དེ་དུས་ཉིད་ན་ཆོས་ཀྱི་སྐུ། །ཡང་ནི་རྟོགས་དོན་འདིར་གསུངས་པ། །དོན་རྟོགས་བདེ་བའི་ཡེ་ཤེས་ཤར། །ང་རྒྱལ་ངོ་བོ་ཉིད་ཀྱི་སྐུ། །དེ་དོན་མི་འབྲལ་ཆོས་ཀྱི་སྐུ། །དེ་ལ་རྐྱེན་གྱིས་གནོད་མི་ཚུགས། །ཡང་ནི་རྟོགས་དོན་འདིར་གསུངས་པ། །ཕོ་མོ་ཆགས་པ་ཅི་སྤྱད་ཀྱང་། །གོལ་མེད་ཡེ་ཤེས་རྒྱུན་མི་འཆད། །སྔ་ཕྱིར་མ་སོང་ཞེན་མེད་ཕྱིར། །བདེ་ཆེན་ལོངས་སྤྱོད་ཆེན་པོར་ཤར། །ཡང་ན་རྟོགས་དོན་འདི་གསུངས་པ། །ལྟ་དམན་ཆོས་ལ་ཕྲག་དོག་ཀྱང་། །གོལ་ས་ཡིན་ཕྱིར་ངེས་མེད་དག །དེ་ཕྱིར་བྱང་ཆུབ་བདེ་བའི་ཀློང་། །དེ་ལ་སྐྱོན་གྱིས་གོས་མི་སྲིད། །ད་ཡང་འདུས་པའི་སྙིང་པོ་ཉོན། །སངས་རྒྱས་རིག་འཛིན་སྤྱན་ལམ་དུ། །འཇིག་རྟེན་མཁའ་འགྲོས་འདི་སྐད་གསོལ། །དམ་བཅས་དོན་ལས་བདག་མི་འདའ། །བཀའ་བཞིན་བགྱི་བའི་དོན་ཆེད་དུ། །ངེས་དོན་འདུས་པའི་རྒྱུད་ཆེན་འདི། །མི་ནུབ་པ་རུ་བདག་གིས་བསྲུང་། །འདི་ལ་འགལ་བྱེད་སྡིག་ཅན་ཀུན། །མྱུར་དུ་བསྒྲལ་ལ་ཞལ་དུ་རྔུབས། །དེ་ཡང་སྟོན་པའི་འཁོར་ཀུན་ཉོན། །བདག་ཅག་ཡིད་ཀྱིས་དམ་བཅས་པས། །སངས་རྒྱས་བསྟན་པ་བསྲུང་བའི་ཕྱིར། །སྡིག་ཅན་བསད་ན་གྲོལ་བར་ངེས། །རྣམ་སྨིན་ལུས་ལ་ལོངས་ ― DNG002_Page_0256 ―
[མ་དཔེ་གཟིགས་ན་འདིར་གནོན།]
སྤྱོད་ཀྱི། །སངས་རྒྱས་རིག་འཛིན་རྣམས་ཀྱིས་ཀྱང་། །རང་སེམས་ཆོས་སྐུར་བྱིན་གྱིས་བརླབ། །དེ་སྐད་བརྗོད་པའི་དོན་གསན་ནས། །ཀུན་རིག་སྟོན་པས་འཁོར་རྣམས་ལ། །རྩ་བ་ངེས་པའི་དོན་འདི་གསུངས། །ལེགས་སོ་དད་ལྡན་འཁོར་རྣམས་ཉོན། །ཤེས་རབ་བློ་ཡི་ཁྱད་པར་ལས། །ཚིག་ཏུ་མཚོན་པ་སྣ་ཚོགས་ཀྱང་། །དོན་ལ་དབྱེར་མེད་ངོ་བོ་གཅིག །དེ་ཕྱིར་འཁོར་རྣམས་ཆོས་སྐུར་རྟོགས། །སངས་རྒྱས་འབྲས་བུ་དེ་ཉིད་ཡིན། །རྫོགས་པ་ཆེན་པོ་ངེས་དོན་ཐམས་ཅད་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། མཁའ་འགྲོ་མས་རྟོགས་པ་བརྗོད་པའི་ལེའུ་སྟེ་ཉིས་བརྒྱ་དང་བཅུ་གཅིག་པའོ། །སྡོམ་དུ་བསྡུས་ཏེ་བསྟན་པ་ཞེ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །ལྟ་བའི་སྙིང་པོའི་དོན་གཏད་པ། །ཆོས་ཀྱི་རྒྱལ་པོ་ཀུན་རྫོགས་འདི། །སྐལ་ལྡན་འདུས་པའི་འཁོར་རྣམས་ཀྱིས། །ཡིད་ལ་བརྣགས་ཤིང་བཅང་བར་གྱིས། །དེ་ཡང་འདུས་པའི་སྙིང་པོ་ཉོན། །ང་ཡི་བསྟན་པའི་སྙིང་པོ་འདི། །སངས་རྒྱས་ཀུན་གྱི་གསང་བའི་ཆོས། །རིག་འཛིན་རྣམས་ཀྱིས་ཐུགས་ལ་སྦོས། །ཆོས་སྐྱོང་རྣམས་ཀྱིས་གཏེར་དུ་བཙས། །དེ་དོན་མན་ངག་ངེས་དོན་འདིའི། །ངེས་དོན་གསང་བའི་རྒྱུད་གཏད་པས། །རྒྱུད་འདི་ཐོས་པའི་ཡོན་ཏན་ནི། །དོན་ཐོས་སངས་རྒྱས་ལག་ཏུ་ཐོབ། །ཆོས་སྐུ་ཡེ་ཤེས་དུས་འདིར་རྟོགས། །ཆོས་རྣམས་རྩ་ནས་དུས་གཅིག་ཤེས། །རྒྱུད་འཛིན་པས་ནི་དངོས་གྲུབ་ཐོབ། །ཀུན་ཏུ་བཟང་པོ་ད་ལྟ་ཡིན། །གང་ཞིག་སངས་རྒྱས་དངོས་འདོད་པ། །རྒྱུད་ཆེན་འདི་ལ་བལྟ་བར་གྱིས། །སངས་རྒྱས་བསྟན་པ་ནུབ་ཀ་རུ། །ང་ཡི་ཆོས་འདི་དུས་དེ་རུ། །མན་ངག་སྙིང་པོ་འབྱུང་ངེས་ཀྱིས། །ཕྱི་རབས་རྣལ་འབྱོར་དོན་ལ་ཆོངས། །ད་ཡང་རྡོ་རྗེ་སེམས་དཔའ་ཉོན། །ལན་ཅིག་དུས་ཀྱི་དེང་སང་ན། །འདྲ་མིན་བསླུ་ཆོས་དར་བའི་ཚེ། །འཕྱར་འཚགས་འཚོང་ལ་འདི་བསྟན་ན། །འདིར་སྡུག་ཕྱི་མ་དམྱལ་བར་ལྟུང་། །འདུས་པའི་སྙིང་པོ་ཡང་ཉོན་ཅིག །རང་བྱུང་ཆོས་སྐུའི་དོན་སྟོན་པའི། །གདམས་ངག་འདི་ནི་ལྷ་མི་ཀུན། །ཕྱི་ནང་སྡེ་སྣོད་བཀའ་རྒྱུད་རྣམས། །ཇི་ལྟར་མཁས་ཀྱང་རྨོངས་པ་ཡིས། །ངེས་དོན་ཆོས་ལ་འཕྱ་སྐུར་འདེབས། །ད་ཡང་འདུས་པའི་སྙིང་པོ་ཉོན། །ལོག་སྲེད་ཞེན་ཆགས་མ་ངེས་ལ། །ནམ་ཡང་བསྟན་པར་མ་གསུངས་སོ། །ཉན་ཐོས་ལ་སོགས་ལྟ་དམན་ལ། །བསྟན་ཀྱང་གོ་བར་མི་འགྱུར་ཏེ། །མི་ཐེག་ཁལ་ཆེན་བཀལ་བ་ ― DNG002_Page_0257 ―
[མ་དཔེ་གཟིགས་ན་འདིར་གནོན།]
བཞིན། །དོན་མ་གོ་བས་ངན་སོང་ལྟུང་། །ད་ཡང་འདུས་པའི་སྙིང་པོ་ཉོན། །དེ་བས་རང་སེམས་སྔོན་སྦྱངས་པའི། །རྣལ་འབྱོར་གང་ཞིག་དད་ལྡན་ལ། །འཆི་ཀ་སྙིང་པོ་དོན་མཚོན་ནས། །ངེས་དོན་རྒྱུད་འདི་གཏད་པར་གྱིས། །དེ་ཡང་རྡོ་རྗེ་སེམས་དཔའ་ཉོན། །ཡང་དག་ངེས་དོན་ཁྱད་པར་ཅན། །འབྲས་བུ་ངེས་པའི་དོན་ཆེན་འདི། །བླ་མར་མི་གུས་ང་རྒྱལ་ཅན། །ཚུལ་འཆོས་བྱེད་ཅིང་སློབ་དཔོན་སྨོད། །འབུལ་བ་མེད་པར་གདམས་ངག་འདོད། །བཀའ་རྐུན་བྱས་པས་ཕྱི་ཐག་ཐུང་། །དོན་མ་གོ་བས་ཆོས་ལ་སྡང་། །འགྲན་སེམས་བཙུག་པས་མཆེད་དང་མཁོན། །ལྟ་བ་མེད་པས་གཟུང་འཛིན་ཆེ། །བདག་མེད་མ་ཤེས་རང་མཐོང་བྱེད། །ང་རང་མཁས་ཟེར་བླ་མ་སྨད། །སྔོན་ནས་ཡོད་ཟེར་ང་རྒྱལ་ཆེ། །གཞན་ནས་རྙེད་ཟེར་བཀའ་རྐུན་བྱེད། །གདམས་ངག་མེད་པར་ཡོད་ཚུལ་སྟོན། །ཕྱི་ནས་འབུལ་ཟེར་ཐབས་ཀྱིས་འབྲིད། །ནོར་ཕོངས་གཞོག་ངོམས་ཁ་གསགས་ཅན། །གཡོ་སྒྱུ་ཐབས་ཀྱིས་ཆོས་འདོད་པར། །ངེས་དོན་འདུས་པའི་རྒྱུད་ཆེན་འདི། །ནམ་ཡང་བསྟན་པར་མ་གསུངས་སོ། །དེ་ཡང་རྡོ་རྗེ་སེམས་དཔའ་ཉོན། །འགལ་བྱེད་ཀུན་ལ་འདི་བསྟན་ན། །ཀུན་བཟང་ང་ཡི་བཀའ་བཅག་པས། །མཁའ་འགྲོའི་དམོད་མོ་དུག་ལྟར་གཏོང་། །གཙང་རིས་མགོན་པོ་ཐོག་ལྟར་བརྡེག །གྱིང་ཆེན་སྙིང་ལ་ཕུར་ལྟར་འདེབས། །རྒྱལ་ཆེན་བཞི་ནི་ཐོག་ལྟར་བརྡེག །དམ་ཅན་རྣམས་ནི་ཁྱི་ལྟར་ཟུག །མི་གཡེང་བ་བཙའ་བཙའ་གཞི་ཉམས་པ་ལ། །ནད་དང་མུ་གེ་རྟག་ཏུ་འོང་། །མི་དགེ་སྡུག་བསྔལ་སྣ་ཚོགས་འབྱུང་། །མ་ཉེས་མི་རྣམས་ཀུན་ཀྱང་སྡང་། །མནོས་པ་མི་འགྲུབ་ཆོམ་རྐུན་འོང་། །འགོང་འདྲེ་ཆགས་ནས་བསོད་ནམས་བསྣུབ། །ཡི་མུག་འདུག་པའི་གནས་མི་རྙེད། །ད་ཡང་འདུས་པའི་སྙིང་པོ་ཉོན། །སློབ་དཔོན་བསླུས་པས་འཁོར་མི་འདུ། །རང་ཆེ་འདོད་པས་མཆེད་དང་འཁོན། །བླ་མ་སྤངས་པས་ཆོས་མི་བཙུན། །བཀའ་རྐུན་བྱས་པས་གདམས་ངག་མེད། །ཚུལ་འཆོས་བྱས་པས་མི་རྣམས་འཕྱ། །འདོད་པ་ཆེ་བས་དད་པ་ལོག །རྩལ་བཤད་བྱས་པས་གཞུང་མ་ཚུགས། །ངེས་དོན་བཅོས་པས་རང་རྒྱུད་བསྲེག །བླ་མ་སྨད་པས་མནར་མེད་ལྟུང་། །རང་གིས་རང་བསླུ་སྙིང་རེ་རྗེ། །ད་ཡང་རྡོ་རྗེ་སེམས་དཔའ་ཉོན། །ངེས་དོན་འདུས་པའི་རྒྱུད་ཆེན་འདི། །མར་མེ་འཆི་ཀའི་འོད་བཞིན་དུ། །བསྟན་ ― DNG002_Page_0258 ―
[མ་དཔེ་གཟིགས་ན་འདིར་གནོན།]
པ་འཇིག་ཀའི་དུས་དག་ཏུ། །ཀུན་བཟང་ཐུགས་རྗེའི་བྱིན་རླབས་ཀྱིས། །རྣལ་འབྱོར་སྐལ་ལྡན་རྣམས་ལ་འབྱུང་། །ད་ཡང་འདུས་པའི་སྙིང་པོ་ཉོན། །ལན་གཅིག་དུས་ཀྱི་དེང་སང་ན། །གསང་སྔགས་དར་དྲགས་ནུབ་ཀ་རུ། །ཤཱཀ་ཐུབ་སྤྲུལ་པ་ཡིན་ངེས་ཤིག །བྱང་ཆུབ་མྱུ་གུ་སྐྱེས་ནས་ནི། །བསྟན་པ་ཙམ་གྱིས་སངས་རྒྱ་བ། །དུས་དེར་སྐལ་ལྡན་རྣམས་ལ་འབྱུང་། །ད་ཡང་འདུས་པའི་སྙིང་པོ་ཉོན། །སྔགས་དང་མཚན་ཉིད་རྩོད་དུས་སུ། །རྣམ་པར་སྣང་མཛད་སྤྲུལ་པ་ནི། །ཤྲཱི་སིདྷ་ཞེས་བྱ་བ། །རང་རིག་མཚན་ཉིད་སྟོན་པ་འབྱུང་། །དེ་ལ་ཉེ་འཁོར་དམ་པ་ནི། །མི་གཡོ་མགོན་གྱི་སྤྲུལ་པ་ནི། །བི་མ་ལ་མི་ཏྲ་བྱ་བ། །སངས་རྒྱས་དགོངས་པ་འཛིན་པ་འབྱུང་། །དེ་ཡིས་མི་ལས་སྐལ་ལྡན་འགར། །དུས་འདིར་སངས་རྒྱས་མངོན་འགྱུར་བྱེད། །ད་ཡང་འདུས་པའི་སྙིང་པོ་ཉོན། །དེ་ཡང་ངེས་དོན་འབྲས་བུ་ནི། །གུ་ལང་གསེར་བཞིན་མི་ནུབ་ཙམ། །སྣོད་ལྡན་འགའ་ལ་བསྟན་པ་ལས། །སྣང་དགུ་རྣམས་ཀྱི་སྤྱོད་ཡུལ་མིན། །ཀུན་ཀྱང་ངེས་པར་དེ་ལྟར་ཞོག །ད་ཡང་འདུས་པའི་སྙིང་པོ་ཉོན། །དེ་ལྟར་མ་རྟོགས་ལྟ་དམན་གྱིས། །ལམ་ལྔ་སྦྱངས་ཤིང་ཚོགས་བསགས་ཀྱང་། །ངེས་དོན་མ་ཤེས་འབྲས་བུ་མེད། །དེ་བས་རང་བྱུང་སྙིང་པོ་འདི། །ལུང་ལྡན་བསྟན་ལ་རྟོགས་པར་གྱིས། །དེ་རྟོགས་འབྲས་བུ་སངས་རྒྱས་འབྱུང་། །འགྲོ་བའི་མགོན་པོས་འདི་སྐད་གསུངས། །ད་ཡང་རྡོ་རྗེ་སེམས་དཔའ་ཉོན། །གསང་བའི་མན་ངག་རྒྱུད་ཆེན་འདི། །ལན་གཅིག་དུས་ཀྱི་དེང་སང་ན། །འདྲ་མིན་བསླུ་ཆོས་དར་བའི་ཚེ། །དམ་ཉམས་ཁ་གསགས་ཅན་གྱིས་བསླུས། །གསང་བཤད་མ་ནོར་ཡོད་ཟེར་ནས། །ཞི་འབོལ་ཆགས་ཆུང་ཚུལ་འཆོས་ཏེ། །སྣོད་དང་ལྡན་ལ་བཤད་ཀྱི་ཟེར། །རང་ལ་ངེས་པའི་གདེང་མེད་པར། །མཁས་བཙུན་དག་ལ་ཁུངས་ཕྱུང་སྟེ། །ནོར་ཟས་དཔག་མེད་ངས་ཕུལ་ཟེར། །རྫུན་གྱི་དཔེ་ཆུང་བྲིས་ནས་བཀྲམ། །འབྱོར་ཚད་ཕུལ་ཅིག་ཟེར་ནས་བསླུས། །མཁས་པ་རྣམས་ནི་བསླུར་མི་ཚུགས། །བླུན་པོས་བླུན་བསླུས་སྙིང་རེ་རྗེ། །ཁ་ཙམ་བརྫུན་ཚིག་སྨྲས་ནས་ ― DNG002_Page_0259 ―
[མ་དཔེ་གཟིགས་ན་འདིར་གནོན།]
ཀྱང་། །བསྟན་རྒྱུ་མེད་ཕྱིར་ཕྱིས་བསྟན་ཟེར། །རང་མེད་གདམས་ངག་གཞན་འཚོལ་འགྲོ། །མ་རྙེད་འཕྱར་ཀ་སྟོང་ཞིང་འཕྱ། །རྙེད་ན་བསྟན་གྱིས་ནོར་ཕུལ་ཟེར། །ཀུན་བསླུས་སུན་བཏོན་ཆོས་དང་བྲལ། །གཅིག་བསླུས་སེམས་ཅན་བརྒྱ་བསད་པས། །སྡིག་པ་ཤིན་ཏུ་ཆེ་བ་ཡིན། །དེ་ཕྱིར་རང་འདོད་ཆོས་མི་བཤད། །ད་ཡང་འདུས་པའི་སྙིང་པོ་ཉོན། །ལན་གཅིག་དུས་ཀྱི་དེང་སང་ན། །སྣོད་ལྡན་ཀུན་ལ་ཆོས་འདི་གསུངས། །དེ་ཚེ་ཐེག་དམན་སྒྲོ་སྐུར་འདེབས། །རང་གིས་རང་བསླུས་འཁོར་བར་ལྟུང་། །ད་ཡང་འདུས་པའི་འཁོར་ཀུན་ཉོན། །འདི་ལ་སྨོན་ཅིང་འཛིན་པ་ལ། །སངས་རྒྱས་རྣམས་ཀྱི་བྱིན་གྱིས་རློབས། །རིག་འཛིན་རྣམས་ཀྱིས་ཐུགས་རྗེ་བསྐྱེད། །མཁའ་འགྲོ་རྣམས་ཀྱིས་བར་ཆད་བསྲུངས། །བསོད་ནམས་མི་ཟད་གཏེར་དང་མཇལ། །ཕྱི་མའི་འབྲས་བུ་དུས་འདིར་སྨིན། །ཀུན་ཏུ་བཟང་པོས་དེ་སྐད་བཤད། །རྫོགས་པ་ཆེན་པོ་ངེས་དོན་ཐམས་ཅད་འདུས་པ། ལྟ་སྒོམ་ཐམས་ཅད་ཀྱི་སྙིང་པོ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཐ་མ་རྒྱུད་གཏད་ཅིང་བཟུང་བའི་ལེའུ་སྟེ་ཉིས་བརྒྱ་དང་བཅུ་གཉིས་སོ།། །།ཆོས་དང་ཐེག་པ་ཐམས་ཅད་ཀྱི་ཡང་རྩེ། ལྟ་བ་ཐམས་ཅད་ཀྱི་མེ་ལོང་། སྒོམ་པ་ཐམས་ཅད་ཀྱི་འབྲལ་མེད། སྤྱོད་པ་ཐམས་ཅད་ཀྱི་ལ་ཟློ། དམ་ཚིག་ཐམས་ཅད་ཀྱི་བསྲུང་མཚམས། འབྲས་བུ་ཐམས་ཅད་ཀྱི་ཡང་སྙིང་། ཐེག་པ་ཐམས་ཅད་ཀྱི་ཟིལ་གནོན། ཤེས་རབ་ཐམས་ཅད་ཀྱི་རྒྱང་ཤིང་། དམན་པ་རྣམས་ནི་སྐྲག་པར་བྱེད་པ། ཡེ་ཤེས་ནམ་མཁའ་དང་མཉམ་པའི་སྤྱི་རྒྱུད་རྫོགས་སོ།། །།རྒྱ་གར་གྱི་མཁན་པོ་བི་མ་ལ་མི་ཏྲ་དང་། བོད་ཀྱི་ལོ་ཙཱ་བ་གཉགས་ཛྙཱ་ན་ཀུ་མཱ་ར་དྲན་པའི་ཡེ་ཤེས་ཀྱིས་ཞུས་ཏེ་གཏན་ལ་ཕབ་པའོ། །ཉང་ཏིང་འཛིན་བཟང་པོས་ལྕགས་སྒྲོམ་ནག་པོའི་ནང་དུ་བྲམ་ཟེའི་རྒྱུད་དྲུག་གདམས་ངག་དང་བཅས་པ། བསེ་སྒྲོམ་སྨུག་པོར་བཅུག །དབུ་རུ་རྡོ་རྗེའི་རྫ་གཟོང་ཕུག་མོའི་བྲག་ལ། མཁའ་འགྲོ་མ་རྡོ་རྗེ་སྤྱན་གཅིག་མ་དང་། བཛྲ་སཱདྷུ་ལེགས་པ་རྩལ་ལ་གཏད། ཡེ་ཤེས་ནམ་མཁའ་དང་མཉམ་པའི་རྒྱུད་རིན་པོ་ཆེ་གསེར་གྱི་དྲིལ་ཤིང་ཅན་འདི་གཏད་ནས་སྦས་པ་འབྲོམ་ཡེ་ཤེས་སྙིང་པོས་བཏོན།། །། རྫོགས་པ་ཆེན་པོ་དོན་འདུས་རིག་པའི་གསུང་རང་བྱུང་བདེ་བའི་འཁོར་ལོ་ཞེས་བྱ་བ།― DNG002_Page_0260 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། སན་དྷི་མ་ཧཱ་ཨརྠ་ས་མུ་དཱ་ཡ་བིཛྙོ་ཧྲཱིཾ་ཡ་སཱུ་ཁ་ཙཀྲ་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོ་དོན་འདུས་རིག་པའི་གསུང་རང་བྱུང་བདེ་བའི་འཁོར་ལོ་ཞེས་བྱ་བ། བཅོམ་ལྡན་འདས་དཔལ་རང་བྱུང་རིག་པའི་རྒྱལ་པོ་ཡེ་ཤེས་ཀྱི་སྐུ་དང་ལྡན་པ་དེ་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། །ངོ་བོ་ཉིད་རྟོགས་ཀུན་བཟང་དེ། །བདེ་གཤེགས་འོག་མིན་གནས་མཆོག་ཏུ། །རིགས་ལྔའི་རྒྱལ་བ་ལ་སོགས་ལ། །རང་བྱུང་ཆོས་སྐུའི་བྱིན་རླབས་བཤད། །དེ་ཚེ་སེམས་དཔས་དོན་རིག་ནས། །གཙང་རིས་ལྷ་ཡི་གནས་ཆེན་ཏུ། །བརྩེར་དགོངས་དུས་ལ་བབ་གྱུར་ནས། །རིག་འཛིན་སེམས་དཔའི་འཁོར་རྣམས་ལ། །ངེས་དོན་རང་གི་ངོ་བོས་བཤད། །དེ་དུས་ཕྱོགས་བཅུའི་སངས་རྒྱས་ལ། །སྤྲུལ་པའི་རིག་འཛིན་སེམས་དག་གིས། །ཞུ་བ་ཞུས་ནས་ཐེ་ཚོམ་བཅད། །ངེས་རྙེད་མངོན་དགའི་ཕུག་ཏུ་ཞུགས། །དེས་སྤྲུལ་ཤཱཀ་ཐུབ་སྤྲུལ་པ་ཡིས། །འཛམ་གླིང་བདེ་ལྡན་གནས་དག་ཏུ། །ད་ལྟ་དུས་ཀྱི་དེང་སང་ན། །གསང་བདག་སྤྲུལ་པ་དད་ཉན་ལ། །སྡེབ་སྦྱོར་ལེགས་པའི་ཚིག་ཏུ་གསུངས། །དེ་ཡང་སྟོན་པའི་འཁོར་རྣམས་ཉོན། །སྐད་ཅིག་ཡུད་ཙམ་ཐང་གཅིག་ལ། །གདུལ་བྱ་འཁོར་བ་ཐ་དད་ཀྱང་། །དུས་གསུམ་གཅིག་སྟེ་ཁྱད་མེད་ཕྱིར། །རིམ་པར་འབྱེད་མེད་ངོ་བོ་གཅིག །དེ་སྐད་གསུངས་པའི་དོན་གོ་ནས། །སྐལ་ལྡན་འདུས་པ་རྣམས་ཀྱིས་ཀྱང་། །གུས་ཉན་དད་པ་རྩེ་གཅིག་ཏུ། །དད་ཅིང་གུས་པའི་ཡིད་ཀྱིས་འཁོར། །དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ངེས་དོན་བཤད་དུས་གང་ལ་བབ། །སྣོད་ཀྱི་རིམ་པ་གང་ལ་བསྟན། །ཚིག་དང་ཡི་གེར་ཇི་ལྟར་མཚོན། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །ལེགས་སོ་དད་ལྡན་འཁོར་རྣམས་ཉོན། །དེ་དོན་ངས་བཤད་ཡིད་ཀྱིས་ཟུང་། །དུས་ཀྱི་ཐ་མ་ལྔ་བརྒྱ་ན། །མནའ་ཟ་ཁྲིམས་འཆལ་དམ་ཉམས་འབྱུང་། །མཚོན་དང་མུ་གེས་ཚེ་ཐུང་དུས། །རྫོགས་ཆེན་སྙིང་པོ་དེར་བཤད་བྱ། ། ― DNG002_Page_0261 ―
[མ་དཔེ་གཟིགས་ན་འདིར་གནོན།]
ད་ཡང་རྡོ་རྗེ་སེམས་དཔའ་ཉོན། །དེ་ཡང་དུས་ཀྱི་དེང་སང་ན། །སངས་རྒྱས་བསྟན་པ་འཇིག་ཀའི་ཚེ། །ཛམ་གླིང་བོད་ཀྱི་བྱང་ཕྱོགས་སུ། །རྒྱུད་དང་ཏན་ཏྲ་མང་པོ་འབྱུང་། །ལུང་དང་སེམས་ཀྱི་ཆོས་དར་སྟེ། །སྡེ་སྣོད་ཆོས་ཀུན་ནུབ་གྱུར་ཅིང་། །དེ་ཚེ་སྐལ་ལྡན་འགའ་ཞིག་ལ། །རང་སེམས་རྟོགས་པ་ཙམ་གྱིས་ནི། །འབྲས་བུ་སངས་རྒྱས་དུས་འདིར་འབྱུང་། །ད་ཡང་འདུས་པའི་འཁོར་རྣམས་ཉོན། །དད་ལྡན་སློབ་མ་བརྩེ་གདུང་ཅན། །མངགས་པའི་ལས་ལ་གུས་པར་བྱེད། །ཡིད་འཐད་རྫས་ལ་ཕོངས་མེད་དབུལ། །མི་སྤེལ་གཉེར་ཐུབ་རྣམས་ལ་བཤད། །དེ་དང་མི་ལྡན་སྣོད་ངན་ནི། །གྱོང་ལ་ཁེངས་པའི་ང་རྒྱལ་ཅན། །སེར་སྣ་ཆེ་ལ་གཏོང་ཕོད་ཆུང་། །མན་ངག་སྲེད་ཆེ་ཀུན་ལ་སྤེལ། །ཕྱི་ཐག་ཐུང་ཞིང་བླ་མ་སྨོད། །ཟས་ལ་ངན་ཞིང་ནོར་དད་ཆེ། །རྣམ་སྨིན་མི་བལྟ་གྲགས་པ་སྒྲུབ། །ཕྱི་ནང་མེད་པར་འཕྱར་ཁ་གཏོང་། །དེ་འདྲའི་སྣོད་ངན་མི་རྣམས་ལ། །ཡང་དག་ངེས་དོན་འདི་བསྟན་ན། །མཁའ་འགྲོ་རྣམས་ཀྱིས་སྲོག་གཅད་དེ། །ཕྱི་མར་མནར་མེད་དམྱལ་བར་ལྟུང་། །དེ་ཕྱིར་མ་བརྟགས་ཆོས་མི་བཤད། །དེ་ཡང་རྡོ་རྗེ་སེམས་དཔའ་ཉོན། །ཚིག་དང་ཡི་གེས་དོན་མཚོན་ཏེ། །མན་ངག་སྙིང་པོས་ཁོག་ཕུབ་ནས། །དོན་དང་མི་འགལ་ས་བཅད་ལ། །ཚིག་ཉུང་དོན་ཆེན་རྫོགས་པར་བཤད། །དེ་ལྟར་མི་ཤེས་གང་ཟག་གིས། །དོན་མེད་ཚིག་གིས་གོང་འོག་དཀྲུགས། །རྩལ་བཤད་ཐོ་ཆོས་གཞུང་ཉམས་བྱེད། །མཚམས་མེད་སྡིག་པས་ཆར་མི་ཕོད། །རྫོགས་པ་ཆེན་པོ་དོན་འདུས་རིག་པའི་གསུང་རང་བྱུང་བདེ་བའི་འཁོར་ལོའི་རྒྱུད་ལས། དོན་གྱི་གླེང་གཞི་བསྟན་པའི་ལེའུ་སྟེ་དང་པོའོ།། །།དེ་ནས་ཀུན་རིག་སྟོན་པ་དེས། །ངེས་དོན་རྩ་བ་འདི་གསུངས་པ། །ངོ་བོ་གཞི་ཡི་གནས་ལུགས་དང་། །བལྟ་བསྒོམ་སྤྱོད་པ་འབྲས་བུའི་དོན། །རྟོགས་པའི་ཡོན་ཏན་ད་ལྟའི་དུས། །མངོན་དུ་གྱུར་པས་ངས་བཤད་ཉོན། །ཡུལ་མེད་ངོ་བོ་རང་བྱུང་སྐུ། །འཁོར་འདས་མ་རིག་གདོད་ནས་བྱུང་། །དེ་དོན་ཀུན་ལ་ཡེ་ནས་གནས། །འདུས་མ་བྱས་པའི་ནམ་མཁའ་འདྲ། །ད་ཡང་འདུས་པའི་སྙིང་པོ་ཉོན། །དཔེར་ ― DNG002_Page_0262 ―
[མ་དཔེ་གཟིགས་ན་འདིར་གནོན།]
ན་ཁྱུང་ཆེན་ལྡིང་བ་བཞིན། །ངེས་པའི་ལྟ་བ་གདེང་ལྡན་པས། །འཁོར་འདས་དངོས་པོ་ཅིར་སྣང་ཡང་། །གཟུང་འཛིན་ཞེན་ལྡོག་གཞི་ལ་མེད། །མ་ཀི་ཏ་ཡིས་གང་ཐེབས་བཞིན། །ལྟ་བ་ངོ་བོ་ཉིད་རྟོགས་པས། །ཅི་དྲན་མ་བསྒོམས་ཆོས་ཉིད་གསལ། །བཞག་ས་མེད་པར་རྒྱུན་དུ་གནས། །བི་ཤྭས་གང་བྱས་ལེགས་པ་བཞིན། །རྣལ་འབྱོར་སྤྱོད་ལམ་ཐམས་ཅད་དུ། །ཡེ་ཤེས་རྩ་བ་དོན་གྱིས་ཟིན། །ཉེས་པའི་སྐྱོན་གྱིས་གོས་པ་མེད། །ཡིད་བཞིན་ནོར་བུའི་ཡོན་ཏན་བཞིན། །རང་སེམས་ཆོས་སྐུར་དོན་རྟོགས་པས། །མི་ཡི་ལུས་ལ་སངས་རྒྱས་ཐུགས། །གདུལ་བྱ་གཟུགས་སྐུ་ཤུགས་ལས་འབྱུང་། །དེ་ཡང་རྡོ་རྗེ་སེམས་དཔའ་ཉོན། །དེ་དག་ངོ་བོ་གཅིག་པ་ལ། །ཚིག་གི་མཚོན་པ་ཐ་དད་ཀྱང་། །ཡུལ་མེད་རང་གསལ་ཉིད་དུ་འདུས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ངེས་དོན་རྩ་བ་གཅིག་པར་བསྟན་པའི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །འདུས་པའི་འཁོར་ལ་ཕན་དོན་དུ། །ཡིད་ཀྱི་དྲན་པས་འདི་སྐད་གསོལ། །སྣང་མེད་ངོ་བོའི་གནས་ལུགས་གང་། །གཞི་ལ་འཕོ་འགྱུར་ཇི་ལྟར་མེད། །སེམས་ཅན་ཀུན་ལ་ཇི་ལྟར་ཡོད། །ཀུན་རིག་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །སྣང་མེད་ངོ་བོའི་གནས་ལུགས་ནི། །དུས་གསུམ་མེད་པའི་སྔོན་རོལ་དུ། །འདས་པ་བས་ཀྱང་རང་བྱུང་སྔ། །རྒྱུ་རྐྱེན་མེད་པའི་སྔོན་རོལ་དུ། །འབྲས་བུ་རང་བྱུང་སྙིང་པོ་བྱུང་། །འབྱུང་བ་མེད་པའི་སྔོན་རོལ་དུ། །ང་དང་ནམ་མཁའ་དུས་མཉམ་ཕྱིར། །བསྟན་པ་མེད་པའི་སྔོན་རོལ་དུ། །སངས་རྒྱས་བས་ཀྱང་རང་བྱུང་སྔ། །ཐེག་པ་མེད་པའི་སྔོན་རོལ་དུ། །ལྟ་བའི་ཆོས་སུ་རང་སེམས་བྱུང་། །སྐྱེ་ཤི་མེད་པའི་སྔོན་རོལ་དུ། །མྱང་འདས་པས་ཀྱང་ཡེ་ཤེས་སྔ། །ཆོས་ཉིད་མེད་པའི་སྔོན་རོལ་དུ། །སྟོང་པ་ཉིད་པས་རང་རིག་སྔ། །བདེ་གཤེགས་མེད་པའི་སྔོན་རོལ་དུ། །སེམས་ཅན་བས་ཀྱང་ཆོས་སྐུ་སྔ། །མཚོན་ཚིག་མེད་པའི་ ― DNG002_Page_0263 ―
[མ་དཔེ་གཟིགས་ན་འདིར་གནོན།]
སྔོན་རོལ་དུ། །ཐ་སྙད་བས་ཀྱང་དོན་འདི་སྔ། །ང་ནི་རྒྱུ་མེད་འབྲས་བུ་སྟེ། །རང་བྱུང་རྒྱུ་མེད་སྙིང་པོ་ཡིན། །དེ་ཕྱིར་མི་སྐྱེ་དོན་མི་འགག །སྐྱེ་ཤི་མེད་པའི་རྡོ་རྗེ་འཆང་། །དེ་ནི་ནམ་མཁའི་རང་བཞིན་ཏེ། །བག་ཆགས་མ་བརྟས་ས་ཆུ་མེད། །གཟུགས་མེད་ཡེ་ཤེས་ངོ་བོ་ལ། །རླུང་མེད་མེ་ནི་ཅི་ལས་བྱུང་། །དེ་ཕྱིར་ངོ་བོ་ཉིད་ཀྱི་སྐུ། །དེ་ཡང་རྡོ་རྗེ་སེམས་དཔའ་ཉོན། །རང་བྱུང་ངོ་བོ་ཉིད་ལ་ནི། །རྒྱུ་རྐྱེན་མ་སྐྱེས་ཡང་དག་ཡོད། །སྒྲོ་སྐུར་བྲལ་བའི་རིག་པ་ལ། །འཕེལ་འགྲིབ་མེད་པར་རྒྱུན་དུ་གནས། །ཡང་དག་བྱང་ཆུབ་སྙིང་པོ་ལ། །ཐོབ་པ་མེད་ཅིང་སྤང་བ་མེད། །འཁོར་འདས་གཉིས་ཀྱི་འཛིན་པ་དེ། །ཐ་སྙད་ཡིན་གྱིས་དོན་དུ་མེད། །ཆོས་སྐུའི་མཚན་ཉིད་རྣམ་པར་དག །བདག་མེད་ཆོས་ལ་སྐྱེ་ཤི་མེད། །ངོ་བོ་ཉིད་ལ་བསྒོམ་མི་དགོས། །ཡོད་མེད་ཡུལ་གྱི་མཐའ་ལས་འདས། །དེ་དོན་རང་བཞིན་འོད་གསལ་བས། །གདོད་ནས་དག་པས་ནམ་མཁའ་འདྲ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོ་ལས། སྣང་མེད་དོན་གྱི་གནས་ལུགས་བསྟན་པའི་ལེའུ་སྟེ་གསུམ་པའོ།། །།རྡོ་རྗེ་སེམས་དཔའ་ཡང་ཉོན་ཅིག །རང་རིག་རྩ་བ་ཆོས་སྐུ་ལ། །ཡོན་ཏན་ལྷག་མ་མེད་པར་རྫོགས། །རང་བྱུང་སངས་རྒྱས་ཡེ་ཤེས་སྐུ། །མ་སྐྱེས་ཡོངས་སུ་གྲུབ་པའི་ལྷ། །ཆོས་རྣམས་ཀུན་གྱི་འབྱུང་གནས་ཏེ། །ངོ་བོ་དམིགས་མེད་བརྗོད་ལས་འདས། །ཡང་དག་ལྟ་བ་མཐར་ཕྱིན་པས། །ཕ་རོལ་ཕྱིན་པ་ཡེ་ནས་གནས། །སངས་རྒྱས་ཀུན་གྱི་སངས་རྒྱས་ལ། །འགྲོ་བ་ཡོངས་ཀྱི་ཁ་ལོ་བསྒྱུར། །བསྐྱེད་པ་མེད་པའི་འབྲས་བུ་ལ། །བྱས་པ་མེད་པའི་ཆོ་འཕྲུལ་འབྱུང་། །ཐམས་ཅད་འབྱུང་བ་ང་ཡི་རྩལ། །དེ་ཡང་རྡོ་རྗེ་སེམས་དཔའ་ཉོན། །དོན་ལ་འགྱུར་མེད་བལྟ་བའི་གཞི། །ཡུལ་ལ་མི་ལྟོས་རང་བྱུང་སྐུ། །ཡེ་ཤེས་ནམ་མཁའི་མཐའ་དང་མཉམ། །གཞི་ལ་འགྱུར་མེད་བྱང་ཆུབ་སེམས། །སྐྱོན་གྱིས་མི་གོས་དྲན་པ་ལ། །འཕོ་འགྱུར་མེད་པ་གདལ་བའི་སྐུ། །མི་སྐྱེ་མི་འགག་རང་རིག་ཀློང་། །བསྒོམས་པས་མི་རྙེད་འགྱུར་མེད་ཕྱིར། །འབྲལ་མེད་ ― DNG002_Page_0264 ―
[མ་དཔེ་གཟིགས་ན་འདིར་གནོན།]
ད་ལྟ་ང་ཡི་ཐུགས། །བསྐལ་པར་འཁྱམས་ཀྱང་སྐྱེ་ཤི་མེད། །དེ་རྟོགས་རིག་པ་ཀུན་གྱི་གཞི། །མ་བསྒོམས་ཡེ་ཤེས་མཐར་ཕྱིན་པ། །རེ་བ་མེད་ཕྱིར་ལྟུང་མི་སྲིད། །གདོད་ནས་འགྱུར་མེད་ཡེ་ཤེས་སྐུ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། གཞི་ལ་འཕོ་འགྱུར་མེད་པར་བསྟན་པའི་ལེའུ་སྟེ་བཞི་པའོ།། །།ད་ཡང་རྡོ་རྗེ་སེམས་དཔའ་ཉོན། །རང་བྱུང་ངོ་བོ་ཉིད་ཀྱི་སྐུ། །སེམས་ཅན་ཀུན་གྱི་ལུས་ནང་ན། །རང་རིག་རྒྱལ་པོ་ཡེ་ཤེས་དེ། །རང་གི་སེམས་ལ་ཡེ་ནས་གནས། །དེ་ཡང་འདུས་པའི་སྙིང་པོ་ཉོན། །ཡང་དག་ངེས་པའི་ཆོས་སྐུ་ནི། །དངོས་པོར་མ་གྲུབ་ཡུལ་ལས་འདས། །རིག་པ་རྒྱུན་ཆགས་དེ་ཉིད་ནི། །འགྲོ་དྲུག་ཀུན་གྱི་སེམས་ལ་གནས། །སྐྱེ་མེད་རང་བྱུང་ཡེ་ཤེས་སྐུ། །ཆེད་དུ་མ་བྱས་རང་གསལ་བ། །དེ་ཉིད་རང་རིག་ཙམ་ལས་ནི། །བཅོས་སུ་མེད་པས་ནམ་མཁའ་འདྲ། །སེམས་ཅན་ཀུན་གཞི་གཞི་ཆ་ལ། །རང་བྱུང་ཆོས་སྐུ་ཡོད་མོད་ཀྱང་། །ལུང་མེད་རྐྱེན་གྱིས་རང་བཞིན་བསྒྲིབས། །དེ་ཕྱིར་ཡེ་ཡོད་རྟོགས་པར་བྱ། །དེ་ཡང་རྡོ་རྗེ་སེམས་དཔའ་ཉོན། །སེམས་ཅན་ལུས་ཀྱི་ཚོར་བ་ལས། །རང་བྱུང་ཡེ་ཤེས་རྒྱུན་མི་འཆད། །དེ་ཉིད་མི་གཡོ་རང་གསལ་བས། །འདུ་འབྲལ་མེད་པར་ཡེ་ནས་གནས། །དེ་ཕྱིར་ཉོན་མོངས་སྦུབས་ནང་ན། །ཀུན་བཟང་ཡེ་ཤེས་སེམས་དཔའ་གནས། །ངེས་དོན་ལུང་ལྡན་དོན་རྟོགས་ན། །དེ་དོན་གཞན་ནས་བསྒྲུབ་མི་དགོས། །སེམས་ཅན་བྱང་ཆུབ་སུ་འདོད་པ། །ཀུན་གཞིའི་གསེབ་ནས་དོན་ཚོལ་བ། །དེ་ཡི་ངང་ལ་གནས་པར་གྱིས། །དེ་དོན་རྒྱལ་བའི་དགོངས་པ་ཡིན། །བདེ་གཤེགས་རྣམས་ཀྱི་སྙིང་པོ་ཡང་། །སེམས་ཅན་ཀུན་ལ་ཡོད་མོད་ཀྱང་། །ཤེས་པས་མ་མཐོང་ཙམ་དུ་བས། །དེ་མཐོང་ངེས་པའི་གདམས་ངག་ལ། །ཤེས་པས་རྟག་ཏུ་འབྲལ་བ་མེད། །དེ་ཡང་འདུས་པའི་སྙིང་པོ་ཉོན། །མ་རིག་འཁྲུལ་པ་ཡོད་བཞིན་དུ། །འབྲས་བུ་སངས་རྒྱས་ཐུགས་ལ་གནས། །དེ་ཕྱིར་གཞན་ནས་འབྱུང་བ་མེད། །ཐོག་མ་མ་ཡིན་དུས་འདི་རང་། །དེ་ཡང་རང་རིག་ཡེ་ཤེས་ནི། །ཏིལ་ལ་ ― DNG002_Page_0265 ―
[མ་དཔེ་གཟིགས་ན་འདིར་གནོན།]
མར་གྱིས་ཁྱབ་པ་བཞིན། །འགྲོ་དྲུག་ཀུན་ལ་རང་རིག་ཁྱབ། །སྐྱེ་འགག་མེད་པར་རྒྱུན་དུ་གནས། །དཔེར་ན་ས་གཏིང་ནམ་མཁའ་བཞིན། །འགྲོ་འོང་མེད་པར་ཆོས་སྐུར་གནས། །དེ་དོན་མ་རྟོགས་བློས་བསླད་ནས། །འཁོར་བར་འཁྱམས་ཀྱང་ཉམ་ང་མེད། །རང་བྱུང་རིག་པའི་ཡེ་ཤེས་དེ། །སྤྲིན་མེད་ནམ་མཁའི་ཉི་མ་བཞིན། །འདུས་མ་བྱས་པའི་ཀློང་དཀྱིལ་ན། །རང་རིག་ཡེ་ཤེས་ཆོས་སྐུ་བཞུགས། །རིན་ཆེན་ག་འུར་གང་བུ། འོད་ཐིམ་ལྟར། །ལུས་ཀྱི་ནང་ན་ཆོས་སྐུ་ཡོད། །ལུས་ཞིག་དྲན་པ་ལུགས་སུ་འཇུག །དེ་ཕྱིར་འཁོར་བའི་རྒྱུད་ཁ་འཁོར། །དོན་རྟོགས་རང་རིག་གནས་སུ་ཆེ། །རིག་པ་རང་བྱུང་ངོ་བོ་དེ། །སེམས་ཅན་ཀུན་གྱི་ཡིད་ལ་གནས། །དེ་ཕྱིར་འཁོར་འདས་ཀུན་གྱི་གཞི། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སེམས་ཅན་ཀུན་ལ་གནས་ལུགས་བསྟན་པའི་ལེའུ་སྟེ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་རིག་རྗེ་ལ་ཡང་ཞུས་པ། །དོན་གྱི་གནས་ལུགས་རྟོགས་ཐབས་གང་། །མ་བགྲོད་ལམ་ལྔ་ཇི་ལྟར་རྫོགས། །ས་དང་ཕ་རོལ་ཡོན་ཏན་གང་། །ཀུན་བཟང་སྟོན་པས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །དེ་དོན་ངས་བཤད་ཡིད་ཀྱིས་ཉོན། །ངེས་པའི་ལུང་ལྡན་བླ་མ་ལ། །དད་པ་བརྩོན་འགྲུས་དམ་ཚིག་གིས། །བཀུར་སྡི་རིམ་གྲོ་གུས་བྱས་ན། །མན་ངག་སྙིང་པོ་གནང་བར་འགྱུར། །དེ་ཡང་འདུས་པའི་སྙིང་པོ་ཉོན། །དཔེར་ན་བྲམ་ཟེ་གླང་ཆེན་བཞིན། །རྒྱལ་པོའི་བཀའ་ཡི་བཙན་ཕུལ་གྱིས། །བྲིད་བསྡིག་གཡོ་སྒྱུས་ནོར་འདོད་པས། །སྲོག་སྙིང་མེད་པར་ཕན་མི་ཐོགས། །དེ་བཞིན་ངེས་པའི་ལུང་ལྡན་གྱིས། །མན་ངག་ཆོས་སྐུ་མ་བསྟན་ན། །ཐབས་དང་གཡོ་སྒྱུ་སྣ་ཚོགས་ཀྱིས། །བཀའ་རྐུན་སྐྱོན་གྱིས་ཆོས་བཙལ་ཀྱང་། །རང་སེམས་མི་རྟོགས་ངན་སོང་ལྟུང་། །དེ་ཡང་འདུས་པའི་སྙིང་པོ་ཉོན། །ཕྲག་དོག་མེད་པར་བཟང་སེམས་ཀྱིས། །སྲོག་སྙིང་རྒྱལ་པོ་ལ་བྱིན་པས། །བྲམ་ཟེ་གསེར་གླང་འདྲ་གཉིས་བྱུང་། །གཉིས་ཀ་མངའ་ཐང་ཅི་བསམ་ ― DNG002_Page_0266 ―
[མ་དཔེ་གཟིགས་ན་འདིར་གནོན།]
འགྲུབ། །དེ་བཞིན་བླ་མ་ལུང་ལྡན་ལ། །ཡིད་འཐད་ཕུལ་ཅིང་ཅི་གསུང་ཉོན། །ཤེས་རབ་རྣོ་ཞིང་གསང་ཐུབ་ལ། །མན་ངག་སྙིང་པོ་གནང་བའི་ཕྱིར། །སློབ་མས་རང་སེམས་རྟོགས་པར་ངེས། །དེ་ཕྱིར་བླ་མ་བཀུར་བར་གཅེས། །ངེས་དོན་གསང་བའི་སྐབས་སུ་བཤད། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ངེས་དོན་རྟོགས་པར་བྱ་བའི་ཐབས་བསྟན་པའི་ལེའུ་སྟེ་དྲུག་པའོ།། །།དེ་ནས་ཀུན་རིག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །མེད་ལ་ཡོད་འཛིན་ཀུན་བརྟགས་ཡུལ། །འཁྲུལ་པ་ལྡོག་དཀའ་འཇིག་ཚོགས་རི། །རང་གིས་རང་བསླུས་ཞེན་པའི་རྒྱུན། །དེ་ལྡོག་དོན་ཕྱིར་ལམ་ལྔ་གསུངས། །དེ་ཡང་འདུས་པའི་སྙིང་པོ་ཉོན། །དད་ལྡན་འགྱུར་མེད་ལས་ཅན་གྱིས། །ལུང་ལྡན་རྡོ་རྗེ་སློབ་དཔོན་ལ། །ཡིད་འཐད་ཕངས་མེད་དབུལ་བ་ནི། །ཚོགས་ཀྱི་ལམ་དུ་བསྟན་པ་ཡིན། །བླ་མས་གནང་བ་བྱིན་འགྱུར་ཏེ། །ཡིད་གཉིས་ཐེ་ཚོམ་བློ་སྤངས་ཏེ། །མཁའ་འགྲོ་མཆོད་ཅིང་དོན་ཞུ་ཚེ། །སྦྱོར་བའི་ལམ་ཞེས་དེ་ལ་བྱ། །དེ་ཡང་རྡོ་རྗེ་སེམས་དཔའ་ཉོན། །ངེས་པའི་རྡོ་རྗེ་སློབ་དཔོན་གྱིས། །ཡང་དག་མན་ངག་ལུང་བསྟན་པས། །སྣོད་ལྡན་ཡིད་ཆེས་དོན་རྟོགས་ཕྱིར། །མཐོང་བའི་ལམ་ནི་ཡིན་པར་གསུངས། །དེ་དོན་གོ་བས་རྒྱུན་དུ་ནི། །ངེས་དོན་ཆོས་སྐུ་ཡེངས་པ་མེད། །རང་རིག་ཡེ་ཤེས་དབང་ཐོབ་ཕྱིར། །བསྒོམ་པའི་ལམ་དུ་བསྟན་པ་ཡིན། །ཡང་དག་ངེས་དོན་གདམས་ངག་འདི། །རང་གི་ཐུགས་ལ་དོན་རྫོགས་པས། །འགྱུར་མེད་གདེང་ཆུད་ཡེ་ཤེས་ཀློང་། །མཐར་ཕྱིན་ལམ་དུ་བཤད་པ་ཡིན། །དེ་ཡང་འདུས་པའི་སྙིང་པོ་ཉོན། །ཡང་དག་དོན་གྱི་ཆོས་ཉིད་ལ། །ལམ་གྱི་དབྱེ་བ་མེད་མོད་ཀྱང་། །རྣལ་འབྱོར་བློ་ཡི་རིམ་པ་ལ། །ཐེག་པའི་བྱེ་བྲག་ཐ་དད་པས། །ལམ་ལྔའི་དབྱེ་བ་གཅིག་ཏུ་རྫོགས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། མ་བགྲོད་ལམ་ལྔ་རྫོགས་པར་བསྟན་པའི་ལེའུ་སྟེ་བདུན་པའོ།། །། ― DNG002_Page_0267 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །ས་ཡི་དབྱེ་བ་རྟེན་དང་དཔེ། །རྩལ་གྱི་སྒོ་ནས་བཞི་རུ་བསྟན། །ཕ་རོལ་ཕྱིན་བཅུ་ས་དང་སྦྱར། །ངེས་པའི་ཡོན་ཏན་རྫོགས་པར་གསུངས། །དེ་ཡང་འདུས་པའི་སྙིང་པོ་ཉོན། །ས་ནི་དང་པོ་རབ་དགའ་བ། །རྟེན་ནི་སྦྱིན་པའི་ཕ་རོལ་ཕྱིན། །དཔེ་ནི་མི་ཟད་གཏེར་དང་འདྲ། །རྩལ་ནི་མ་སྦྱངས་ཟིལ་གྱིས་གནོན། །ས་ནི་གཉིས་པ་དྲི་མེད་ལ། །རྟེན་ནི་ཚུལ་ཁྲིམས་ཕ་རོལ་ཕྱིན། །དཔེ་ནི་རིན་ཆེན་མྱུ་གུ་འདྲ། །རྩལ་ནི་རང་རིག་ཡེ་ཤེས་གསལ། །ད་ཡང་འདུས་པའི་སྙིང་པོ་ཉོན། །ས་ནི་གསུམ་པ་འོད་འཕྲོ་བ། །རྟེན་ནི་བཟོད་པའི་ཕ་རོལ་ཕྱིན། །དཔེ་ནི་རྒྱ་མཚོ་ཆེན་པོ་འདྲ། །རྩལ་ནི་ཉོན་མོངས་རྩད་ནས་བརླག །ས་ནི་བཞི་པ་འོད་བྱེད་པ། །རྟེན་ནི་བརྩོན་འགྲུས་ཕ་རོལ་ཕྱིན། །དཔེ་ནི་རྡོ་རྗེ་ཕ་ལམ་འདྲ། །རྩལ་ནི་བག་ཆགས་ཞེན་པ་འཇོམས། །ས་ནི་ལྔ་པ་སྦྱང་དཀའ་བ། །རྟེན་ནི་བསམ་གཏན་ཕ་རོལ་ཕྱིན། །དཔེ་ནི་རི་བོ་ལྷུན་པོ་འདྲ། །རྩལ་ནི་བྱིང་རྒོད་སྐྱོན་དང་བྲལ། །ས་ནི་དྲུག་པ་མངོན་གྱུར་ལ། །རྟེན་ནི་ཤེས་རབ་ཕ་རོལ་ཕྱིན། །དཔེ་ནི་མ་ཀི་སྨན་དང་འདྲ། །རྩལ་ནི་རང་རིག་ལྷག་མཐོང་རྟོགས། །དེ་ཡང་རྡོ་རྗེ་སེམས་དཔའ་ཉོན། །ས་ནི་བདུན་པ་རིང་སོང་བ། །རྟེན་ནི་ཐབས་ཀྱི་ཕ་རོལ་ཕྱིན། །དཔེ་ནི་དགེ་བའི་བཤེས་གཉེན་འདྲ། །རྩལ་ནི་དུག་ལྔ་སྨན་དུ་འགྱུར། །ས་ནི་བརྒྱད་པ་མི་གཡོ་བ། །རྟེན་ནི་སྨོན་ལམ་ཕ་རོལ་ཕྱིན། །དཔེ་ནི་ཡིད་བཞིན་ནོར་བུ་འདྲ། །རྩལ་ནི་འཇིག་རྟེན་ཆོས་བརྒྱད་བྲལ། །ས་ནི་ལེགས་པའི་བློ་གྲོས་ལ། །རྟེན་ནི་སྟོབས་ཀྱི་ཕ་རོལ་ཕྱིན། །དཔེ་ནི་ཉི་མའི་སྙིང་པོ་འདྲ། །རྩལ་ནི་ལོག་ལྟ་དབྱིངས་སུ་གྲོལ། །ས་ནི་བཅུ་པ་ཆོས་ཀྱི་སྤྲིན། །རྟེན་ནི་ཡེ་ཤེས་ཕ་རོལ་ཕྱིན། །དཔེ་ནི་ཚངས་པའི་དབྱངས་དང་འདྲ། །རྩལ་ནི་སྒྲིབ་དག་ཐམས་ཅད་མཁྱེན། །དེ་ཡང་འདུས་པའི་སྙིང་པོ་ཉོན། །དེ་དག་ཕ་རོལ་ཕྱིན་བཅུ་ཡང་། །ངོ་བོ་ཐིག་ལེ་གཅིག་ཏུ་འདུས། །གདུལ་བྱར་རིམ་པ་བཅུར་ནི་བསྟན། །ཡང་དག་ངོ་བོ་ཡེ་ཤེས་ཉིད། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་ ― DNG002_Page_0268 ―
[མ་དཔེ་གཟིགས་ན་འདིར་གནོན།]
འཁོར་ལོའི་རྒྱུད་ལས། ས་དང་ཕ་རོལ་ཕྱིན་པའི་ཡོན་ཏན་བསྟན་པའི་ལེའུ་སྟེ་བརྒྱད་པའོ།། །།འདུས་པའི་འཁོར་གྱིས་ཡང་གསོལ་པ། །ངེས་པའི་དོན་གྱི་གདམས་ངག་གིས། །མ་རིག་མུན་སེལ་ལྟ་བ་དང་། །འཁོར་འདས་མཐའ་ཡིས་མ་རེག་དང་། །ཡེ་ཤེས་ལྷུན་གྲུབ་ལྟ་བ་གང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །ཡང་དག་འཁོར་ལ་བཀའ་སྩལ་པ། །རང་བྱུང་སྙིང་པོ་གནས་ལུགས་ནི། །ཉི་མ་ཤར་བས་མུན་པ་སངས། །ངེས་ལུང་བསྟན་པས་མ་རིག་བརླག །ཐིག་ལེ་བརྡལ་ཁྱབ་ཆོས་སྐུ་དེ། །རིག་པ་རང་རྩལ་བཅོས་པ་མེད། །དེ་དོན་ལྷུན་གྲུབ་ཡེ་ནས་གསལ། །རང་བྱུང་སྙིང་པོ་རང་གསལ་ཐུགས། །ཡེ་ནས་ཐ་སྙད་ཀུན་དང་བྲལ། །ཇི་བཞིན་གསལ་ལ་ངན་རྟོག་མེད། །དོན་དམ་སྤྲོས་བྲལ་ལྟ་བའི་མཆོག །རྩལ་མེད་སྤྱོད་པ་ཡུལ་ལས་འདས། །ཡང་དག་ཀློང་གྱུར་དོན་ལ་མཁས། །དེ་ཉིད་དོན་ལ་སུ་སྦྱོར་བ། །ཚོགས་བརྒྱད་ཤེས་པའི་ཡུལ་ལས་འདས། །མངོན་དུ་གྱུར་པས་ཐུགས་ལ་བཀྲ། །ཀུན་གྱིས་རྟོགས་དཀའ་བྱང་ཆུབ་དེ། །གཡོ་མེད་མི་རྟོག་ཆོས་སྐུ་ལམ། །རང་རིག་བདེ་བ་ཡེ་ཤེས་ཀློང་། །གཅིག་ཏུ་རྟོགས་རྫོགས་པས་ཡང་པ་ཐིག་ལེ་གསལ། །ལྟ་བ་དབུས་དང་མཐའ་མེད་པས། །སྤང་ལེན་མ་བཙལ་ལྷུན་གྱིས་གྲུབ། །སྐྱེ་མེད་ངང་དུ་རིག་པ་འཕྱོ། །རྟེན་མེད་ཆགས་པའི་ཡུལ་དང་བྲལ། །བསྒོམ་མེད་ལྟ་བ་ངང་གིས་གསལ། །མཚོན་པ་ཚིག་གིས་བཀྲི་དྲང་བྲལ། །སྐྱེ་མེད་གདེང་ཆུད་འདུ་འབྲལ་མེད། །སྣང་མེད་རིག་པའི་དངོས་པོ་བྲལ། །ཡང་དག་ཐུགས་ལ་སྤྲོ་བསྡུ་མེད། །མ་སྤྲོས་ལྷུན་གྲུབ་རིག་པར་ཤར། །ཀུན་ཁྱབ་དོན་འདུས་མཐའ་མི་རིག །ཡེ་ཤེས་སྐུ་མཆོག་ཆོས་སྐུར་བརྡལ། །དེ་ཡང་རྡོ་རྗེ་སེམས་དཔའ་ཉོན། །འགྲོ་དྲུག་སེམས་ཅན་རང་བྱུང་སྐུ། །འདི་ལྟར་སྣང་བ་མ་ལུས་ཀུན། །གདོད་ནས་མེད་པའི་དོན་རྟོགས་པས། །ཡེ་ཤེས་གཅིག་གི་ངང་དུ་འདུས། །ལུས་ངག་ཡིད་ཀྱི་བྱ་བ་རྣམས། །བྱས་ན་འཆིང་བའི་ལས་ཡིན་པས། །གཞི་ ― DNG002_Page_0269 ―
[མ་དཔེ་གཟིགས་ན་འདིར་གནོན།]
ལ་མེད་ཤེས་བཙལ་མི་དགོས། །མ་བསྒོམས་འདུ་འབྲལ་མེད་པར་བལྟ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། མ་རིག་མུན་སེལ་གྱི་ལྟ་བ་བསྟན་པའི་ལེའུ་དགུ་པའོ།། །།དེ་ཡང་འདུས་པའི་འཁོར་རྣམས་ཉོན། །སངས་རྒྱས་སེམས་ཅན་འབྱུང་བ་ཀུན། །གློ་བུར་ཡིན་ཕྱིར་གནས་ལུགས་མིན། །དེ་ཕྱིར་འཇིག་རྟེན་དཔེ་མི་བླངས། །འཁོར་འདས་གཞི་ལ་དོན་མ་རེག །དེ་ཡང་འདུས་པའི་སྙིང་པོ་ཉོན། །ཕ་མེད་མ་མེད་ནགས་ཀྱི་བྱེའུ། །ནམ་མཁའི་མཐོངས་སུ་ཐོན་པ་ལྟར། །གློ་བུར་འཁོར་འདས་གཉིས་བོར་ནས། །ཆོས་སྐུ་རྟོགས་པས་མ་རིག་སངས། །གདོད་མའི་རང་བྱུང་འདི་ཉིད་ནི། །ལྟ་བར་ཤེས་པས་ཆོག་པའི་ཕྱིར། །འཁོར་འདས་གཉིས་པོ་གདོད་ནས་མེད། །ཡུལ་དང་མ་འདྲེལ་ངོ་བོ་ཉིད། །དེ་དོན་རྟོགས་པའི་དོན་ལ་གནས། །ཡེ་རྫོགས་ཆོས་སྐུ་ཆེན་པོ་ཡིན། །རེ་དོགས་མཐའ་ཀུན་རྣམ་པར་ཞི། །ཚིག་ཏུ་མཚོན་མེད་ཡེ་ནས་བདེན། །གཅིག་དང་དུ་མ་མཐའ་ཡི་ཆོས། །དེ་ཕྱིར་འཁོར་འདས་གཉིས་ལས་འདས། །འདི་ཐོས་མི་སྐྲག་ལྟ་བའི་མཆོག །དེ་ཡང་འདུས་པའི་སྙིང་པོ་ཉོན། །དངོས་པོ་མེད་ཕྱིར་རྟོག་པ་བྲལ། །ཀུན་ལ་ཁྱབ་པས་ཆད་པ་བྲལ། །དབུས་མཐའ་བྲལ་བས་རང་བྱུང་སྐུ། །ཆོས་སྐུ་ནམ་མཁའ་ལྟ་བུ་ལ། །བརྗོད་མེད་ལྟ་བས་དྲན་པའི་གཟུངས། །དེ་དོན་ཕྱིན་ཅི་མ་ལོག་པར། །ཡེ་ཤེས་ལམ་ལ་གནས་པར་བྱ། །རང་རིག་ངེས་པའི་ལྟ་བ་ལ། །ཡེངས་པ་མེད་པར་ཡིད་ཀྱིས་བལྟ། །དེ་ཡང་ཡུལ་ཅན་མ་ཡིན་ཏེ། །རང་ལ་རང་བལྟས་ནང་དུ་གསལ། །དེ་གོམས་མཐར་ཕྱིན་ཡེ་ཤེས་ཐུགས། །ཆོས་ཉིད་སྤྲོས་བྲལ་འགྱུར་བ་མེད། །རང་བྱུང་ཡེ་ཤེས་གཉུག་མར་གནས། །དེ་ཉིད་མི་འབྲལ་ལྟ་བའི་མཆོག །དེ་ཡང་འཁོར་གྱི་སྙིང་པོ་ཉོན། །འཁོར་འདས་གཉིས་ཀྱི་ཆོས་འདི་ལ། །ཇི་སྲིད་བག་ཆགས་ཡོད་ཀྱི་བར། །འདི་ལྟར་སྣང་བའི་ཆོས་རྣམས་ཡོད། །ཇི་སྲིད་བག་ཆགས་དག་ན་ནི། །སྣང་བའི་ཡུལ་རྣམས་གདོད་ནས་མེད། །ཐག་སྦྲུལ་ཐོ་ཡོར་མི་བཞིན་ནོ། །རྫོགས་པ་ཆེན་པོ་དོན་འདུས་རིག་པའི་གསུང་། རང་ ― DNG002_Page_0270 ―
[མ་དཔེ་གཟིགས་ན་འདིར་གནོན།]
བྱུང་བདེ་བའི་འཁོར་ལོའི་རྒྱུད་ལས། མཐའ་མ་རེག་པའི་ལྟ་བ་བསྟན་པའི་ལེའུ་སྟེ་བཅུ་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །རང་སེམས་ཆོས་སྐུར་བལྟ་བ་ནི། །ཀུན་ལ་ཁྱབ་པའི་རིག་པ་ཡིས། །འདུས་མ་བྱས་པའི་དོན་རྟོགས་པས། །མཐའ་བྲལ་རིག་པ་གཅིག་ཡིན་ནོ། །དེ་ཡང་རྡོ་རྗེ་སེམས་དཔའ་ཉོན། །ཀུན་གྱི་མཉམ་ཉིད་རྒྱལ་བའི་ཐུགས། །མ་ལུས་སེམས་ཅན་ཐམས་ཅད་ལ། །ཆོས་སྐུ་ཁྱབ་པར་བརྡལ་བའི་སྐུ། །མཐའ་དབུས་མེད་པས་ནམ་མཁའ་འདྲ། །རིག་པ་མ་བསླད་གཉུག་མར་གནས། །དམིགས་འཛིན་མེད་ལ་ངང་གིས་གསལ། །དངོས་པོར་མེད་ལ་ཤེས་པར་ཡོད། །ནམ་མཁར་ཉི་མའི་འོད་ཤར་འདྲ། །འདུས་མ་བྱས་པའི་ཡེ་ཤེས་ཀྱིས། །རྟེན་འཆའ་མེད་པར་ཉོན་མོངས་སེལ། །འབྱུང་བ་ལྔ་ལ་རག་མ་ལུས། །མི་འགྱུར་འཇོམས་པས་རྡོ་རྗེ་འདྲ། །བླ་མས་དོན་བསྟན་རྣལ་འབྱོར་པས། །ཐེ་ཚོམ་མེད་པར་རང་སེམས་རྟོགས། །ཐམས་ཅད་གཅིག་ལ་རྫོགས་པར་ཤེས། །མ་རིག་ལོང་བའི་མིག་ཕྱེད་འདྲ། །ཡེ་ཤེས་རིག་པ་དེ་ཉིད་ནི། །ཡོད་མེད་དབུས་ཀྱི་མཐའ་བྲལ་བར། །སང་ངེ་ས་ལེ་འཕོ་འགྱུར་མེད། །ཀ་ཤིའི་རས་ཀྱིས་རིན་ཆེན་འདྲ། །ད་ཡང་རྡོ་རྗེ་སེམས་དཔའ་ཉོན། །མ་བཅོས་ལྟ་བའི་རང་བཞིན་ལ། །ཡུལ་མེད་ཆོས་སྐུ་རང་བྱུང་དེ། །རེ་དོགས་རྡུལ་ཙམ་མེད་པའི་ཕྱིར། །ལྷུན་གྲུབ་ཡེ་ཤེས་ཆེན་པོ་ཡིན། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ཡེ་ཤེས་ལྷུན་གྲུབ་ཀྱི་ལྟ་བ་བསྟན་པའི་ལེའུ་སྟེ་བཅུ་གཅིག་པའོ།། །།རྡོ་རྗེ་སེམས་དཔས་ཡང་ཞུས་པ། །མ་བསྒོམས་ཏིང་འཛིན་ཇི་ལྟར་ལགས། །འབྲལ་མེད་རྒྱུན་གྱི་སྤྱོད་པ་གང་། །རེ་དོགས་མེད་པའི་འབྲས་བུ་རྣམས། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །མ་བསྒོམས་འབྲལ་མེད་ཏིང་འཛིན་ནི། །རྣམ་སྨིན་ལུས་ཀྱི་རྟེན་བཅས་པའི། །ཐ་མལ་ཀུན་ ― DNG002_Page_0271 ―
[མ་དཔེ་གཟིགས་ན་འདིར་གནོན།]
གཞི་གཞི་ཆ་ལ། །ལུང་ལྡན་རྐྱེན་གྱི་གདམས་ངག་གིས། །རང་སེམས་ཆོས་སྐུར་ངོ་སྤྲད་པས། །དམིགས་འཛིན་མེད་པར་ངང་གིས་གསལ། །གཉུག་མར་གནས་ལ་འཕེལ་འགྲིབ་མེད། །ཡུལ་སེམས་གཉིས་ལ་སྤྱོད་དང་བྲལ། །མཐའ་དབུས་མི་དམིགས་དྲན་ལས་འདས། །ཡེ་ནས་དག་ཕྱིར་བྱ་བ་མེད། །བཙལ་དུ་མེད་པས་སེམས་ལས་འདས། །ཀུན་ལ་ཁྱབ་པས་བཙལ་མི་དགོས། །འགག་པ་མེད་ལ་རིག་པ་སྟོང་། །མ་བྱས་ཕྱིར་ན་འཇིག་པ་མེད། །རིག་པ་གསལ་བས་རང་ངོ་ཤེས། །ཇི་བཞིན་པ་ལ་མ་སྐྱེས་པ། །མ་བཅོས་རྐྱེན་གྱིས་མི་འགྱུར་བ། །རྟག་ཆད་མ་ཡིན་བསྡུས་པ་མེད། །སོ་སོ་མ་ཡིན་འདྲེས་པ་མེད། །དངོས་མེད་སེམས་ཀྱི་ཏིང་འཛིན་གསལ། །གཏང་གཞག་མེད་པའི་ཆོས་སྐུ་ལ། །བྱིང་རྒོད་མི་འབྱུང་རྒྱུན་དུ་གནས། །ཡེ་ཤེས་དོན་ལ་འཆར་ནུབ་མེད། །དེ་ཡང་འདུས་པའི་སྙིང་པོ་ཉོན། །རང་རིག་ཡེ་ཤེས་འདི་ཉིད་ལས། །བསྒོམ་དུ་མེད་ཕྱིར་ཡེངས་པ་མེད། །གཟུང་དུ་མེད་པས་ཞེ་ལ་གསལ། །རང་ཡིད་ཆེས་ལ་ཁར་མི་ཐོན། །སྣང་སྲིད་གསལ་ལ་ཞེན་པ་མེད། །རང་རིག་བྱ་ར་དངོས་མེད་གྲོལ། །དྲན་པ་མེད་བརླག་འགྲོ་འོང་མེད། །དྲན་པའི་རིག་པ་ཅི་བྱུང་ཡང་། །དེ་ཉིད་དུས་ནས་ངོས་གཟུང་མེད། །དེ་ཡང་འདུས་པའི་སྙིང་པོ་ཉོན། །ཡིད་ཀྱི་ཡུལ་དུ་མ་བསྒོམས་ཀྱང་། །ལྟ་བའི་དོན་དང་འབྲལ་མེད་ཕྱིར། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ཡེ་ཤེས་ཀྱི་བསྒོམ་པ་ངོས་བཟུང་བའི་ལེའུ་སྟེ་བཅུ་གཉིས་པའོ།། །།རྡོ་རྗེ་སེམས་དཔའ་ཡང་ཉོན་ཅིག །ངོས་ཟིན་དོན་ལ་གནས་ཐབས་ནི། །མར་མེས་མུན་བསལ་སྣང་བ་བཞིན། །སྐད་ཅིག་མ་ཡི་ཏིང་འཛིན་དེས། །བག་ཆགས་བརླགས་པས་མ་རིག་སངས། །དོན་ཉིད་ཡེ་ཤེས་དྲན་པ་ཡིས། །ཉོན་མོངས་ལས་ཀྱིས་གོས་པ་མེད། །དེ་བས་གདམས་ངག་དྲན་པས་ནི། །སྒྱུ་མ་སངས་ནས་འཁྲུལ་བྲལ་བཞིན། །མཚན་མའི་རྟོག་བྲལ་དོན་ཤེས་པས། །སྤྲོས་བྲལ་ཡེ་ཤེས་སྙིང་པོར་གནས། །དེ་ཡང་འདུས་པའི་སྙིང་པོ་ཉོན། །འཁོར་འདས་གཞིར་ཤེས་ ― DNG002_Page_0272 ―
[མ་དཔེ་གཟིགས་ན་འདིར་གནོན།]
རང་བྱུང་སྟེ། །བསྒོམ་དང་མི་བསྒོམ་སྒྲོ་སྐུར་བྲལ། །དེ་ཉིད་ཉམས་སུ་བླང་ཐབས་ནི། །ཐིགས་པས་སྣོད་ཆེན་ཁེངས་པ་བཞིན། །ངོ་བོ་ཉིད་ཀྱི་ཆོས་སྐུ་ལ། །ཡང་ཡང་རིག་པས་གསལ་ཐེབས་ན། །གོལ་ས་མི་འབྱུང་སངས་རྒྱས་འགྲུབ། །དཔེར་ན་བུད་མེད་སྦྲུམ་མ་ནི། །སྐྱེ་བའི་དུས་སུ་ཟས་བསྟེན་བཞིན། །ལུང་བསྟན་གདམས་ངག་ཡོད་པའི་མིས། །རྐྱེན་གྱི་རྟོག་པ་ཅི་བྱུང་ཡང་། །དེ་དུས་ངེས་དོན་བལྟ་དྲན་པས། །མ་བསྒོམས་དོན་དང་འབྲལ་བ་མེད། །རྒས་པས་ཉམ་ཆུང་བསྟེན་པ་བཞིན། །བླ་མ་མཁས་པ་དོན་ལྡན་ལ། །རྟག་ཏུ་བསྙེན་ཅིང་གུས་བྱས་ན། །འབྲས་བུ་ཆོས་སྐུ་མྱུར་དུ་འགྲུབ། །དེ་ཡང་རྡོ་རྗེ་སེམས་དཔའ་ཉོན། །ངེས་པ་དོན་གྱི་གདེང་རྙེད་པས། །བསྒོམ་དུ་མེད་ཕྱིར་ཡེངས་པ་མེད། །དུས་བཞི་རྐྱེན་ཐུབ་བར་དུ་ནི། །འཁོར་འདས་ཡུལ་གྱིས་མི་བསླད་ཕྱིར། །ཡེ་ཡོད་དོན་ལ་བརྗོད་མི་བྱ། །རྒྱལ་པོ་མི་འགྲོ་འཁོར་སྡུད་བཞིན། །ཆོས་ཉིད་མ་བསྒོམས་སྐུ་གསུམ་འབྱུང་། །ཆེ་བའི་ཡོན་ཏན་ལྷུན་གྱིས་གྲུབ། །དཔེར་ན་སྒྱུ་མ་མཁས་པ་ཡིས། །སྤྲུལ་པའི་སྲོག་ནི་བཅད་ཙམ་ན། །སྲོག་མེད་སྒྱུ་མ་ཡིན་ཤེས་ལྟར། །རང་རིག་ལྟ་བའི་དོན་ཡོད་པས། །དུག་ལྔ་སྤྱོད་ཚེ་ཡེ་ཤེས་འཆར། །ངོ་བོ་ཉིད་ལས་འགྲིབ་མེད་ཤེས། །དེ་ཚེ་ཉོན་མོངས་ཅི་སྤྱད་ཀྱང་། །སྐྱོན་གྱིས་མ་གོས་རང་བྱུང་གསལ། །དེ་ཉིད་མི་བརྗེད་རྟོགས་པའི་ཕྱིར། །ཆེད་དུ་བྱས་ལ་བསྒོམ་མི་དགོས། །དེ་ཡང་འདུས་པའི་འཁོར་རྣམས་ཉོན། །རང་སེམས་རྟོགས་པའི་བསྒོམ་པ་ལ། །ཅིག་ཆར་བརྟུན་ཏེ་འཇུག་ནུས་ན། །བསྒོམ་པའི་ཐུན་ལ་རིང་ཐུང་མེད། །ནམ་འགྲུབ་སྙམ་པའི་ཁར་མ་ལུས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། འབྲལ་མེད་རྒྱུན་གྱི་ཏིང་ངེ་འཛིན་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་ཀུན་རིག་རྒྱལ་པོ་དེས། །འབྲལ་མེད་རིག་སྤྱོད་བཀའ་སྩལ་པ། །རང་བྱུང་ཡེ་ཤེས་ནམ་མཁའ་ཆེ། །མ་འདྲེས་ཡོངས་རྫོགས་ཆོས་ཀྱི་སྐུ། །མི་སྐྱེ་མི་འགག་རྒྱུན་དུ་སྤྱོད། །དེ་ཡང་རྡོ་རྗེ་སེམས་དཔའ་ ― DNG002_Page_0273 ―
[མ་དཔེ་གཟིགས་ན་འདིར་གནོན།]
ཉོན། །བསམ་འདས་འོད་གསལ་ཡིད་ལ་གནས། །གསང་སྔགས་ངོ་བོ་ཉིད་ཀྱི་སྐུ། །སངས་རྒྱས་སེམས་ཅན་གཉིས་ཀྱི་གསང་། །རང་གསང་དམ་པའི་སྤྱོད་པ་འདིས། །སངས་རྒྱས་ཀུན་གྱི་ངེས་པའི་དོན། །ཡང་དག་བྱང་ཆུབ་སེམས་ལ་ནི། །མི་དམིགས་པར་ཡང་བསྐྱེད་དུ་མེད། །མི་གནས་པར་ཡང་བསམ་དུ་མེད། །དེ་ཕྱིར་བྱ་བྲལ་ནམ་མཁའ་འདྲ། །དེ་ཡང་འདུས་པའི་སྙིང་པོ་ཉོན། །མ་བཅོས་རང་བྱུང་དེ་བཞིན་ཉིད། །སྤྱད་དུ་མེད་པའི་ཆོས་ཉིད་ལ། །མ་བསྒོམས་དམིགས་སུ་མེད་པ་སྟེ། །ཏིང་ངེ་འཛིན་ཅེས་བཏགས་པ་ཙམ། །མི་རྟོག་པར་ཡང་མི་སེམས་པར། །ཀུན་ལ་ཁྱབ་པའི་ཡེ་ཤེས་ལ། །ཀུན་ཤོང་བྱར་མེད་སྤྱོད་པའི་མཆོག །འདུས་པའི་འཁོར་རྣམས་ད་ཡང་ཉོན། །རང་སེམས་ངོ་བོ་ཉིད་རྟོགས་ཕྱིར། །ཡུལ་འདི་སེམས་སུ་མི་སྡུད་པས། །སྤྱད་པའི་ཡུལ་ཡང་མེད་པར་འགྱུར། །གང་གིས་གང་ལ་བསམས་ཤིང་སྤྱད། །དཔེར་ན་ནམ་མཁའ་སྟོང་པ་ལ། །དམིགས་པར་མི་བྱེད་སྡུད་མི་བྱེད། །དེ་བཞིན་སེམས་ཀྱིས་སེམས་བསྒོམ་དུ། །ངོ་བོ་འདི་འདྲར་དམིགས་སུ་མེད། །སྐྱོན་ཡོན་གང་ཡང་མ་སྤྱད་ན། །གོལ་དང་སྒྲིབ་པར་ཅི་ལ་འགྱུར། །སྤྱོད་པའི་མཆོག་ཏུ་དེ་ཉིད་གསུངས། །དེ་ཡང་རྡོ་རྗེ་སེམས་དཔའ་ཉོན། །རྒྱུན་དུ་མི་འབྲལ་རང་རིག་འདི། །ཉམས་མྱོང་མེད་པར་རང་གསལ་བས། །དེ་ཉིད་ཉམས་ཀྱི་དམ་པའི་མཆོག །མི་འཛིན་མི་སྤྱོད་རང་གསལ་ཙམ། །འབྲལ་མེད་རྒྱུན་གྱི་སྤྱོད་པར་བཤད། །གལ་ཏེ་མཚན་མ་རྒྱུ་ན་གང་། །དོན་དྲན་དགག་བསྒྲུབ་མེད་པར་ཤེས། །སངས་རྒྱས་ལྟ་སྒོམ་ངོ་བོ་གཅིག །རྣལ་འབྱོར་སྤྱོད་ལམ་ཐམས་ཅད་དུ། །དོན་དྲན་སྤྱོད་པ་ཡིན་པའི་ཕྱིར། །མ་དྲན་གཉིད་དང་ཉོན་མོངས་པ། །རང་དགར་སོང་ཚེ་དེ་ཉིད་ལ། །ངོ་བོ་ཉིད་དྲན་གནོད་མི་ནུས། །དེ་ལྟ་ཉིད་ནི་ཡིན་ཤེས་ཕྱིན། །ཆེད་དུ་བྱས་ལ་སྤྱད་དུ་མེད། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། འབྲལ་མེད་རྒྱུན་གྱི་སྤྱོད་པ་བསྟན་པའི་ལེའུ་སྟེ་བཅུ་བཞི་པའོ།། །།འདུས་པའི་འཁོར་ལ་དུག་ལྔ་ནི། །རང་གྲོལ་སྟོན་པས་བཀའ་སྩལ་པ། །རང་སེམས་ ― DNG002_Page_0274 ―
[མ་དཔེ་གཟིགས་ན་འདིར་གནོན།]
དོན་རྟོགས་སྤྱོད་པ་ཡང་། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་འཁོར་བ་དེ། །ངེས་པའི་དོན་ལྡན་རྣལ་འབྱོར་པས། །རྒྱུ་མཐུན་བག་ཆགས་མི་སོག་གོ། །དེ་ཡང་རྡོ་རྗེ་སེམས་དཔའ་ཉོན། །ཕོ་མོ་དུས་གསུམ་སྦྱར་གྱུར་ཀྱང་། །བསླབ་པའི་ཚུལ་ཁྲིམས་ཉམས་པ་མེད། །བག་ཆགས་ཡི་དྭགས་གནས་མི་སྐྱེ། །མཐོ་རིས་ཐར་པར་རྟེན་མི་འཆའ། །རང་སེམས་སྙིང་པོ་རྟོགས་པ་ཡིས། །འཆི་མེད་སྲོག་ལ་གཅད་དུ་མེད། །ཞེ་སྡང་མནར་སེམས་རིག་པའི་དོན། །དམྱལ་བའི་སྡུག་བསྔལ་ཡ་མི་ང་། །རང་རིག་ཡེ་ཤེས་དོན་ལྡན་པས། །མ་རིག་སྣ་ཚོགས་དོན་དུ་ཤེས། །ཡེ་ནས་ཆོས་ཉིད་གདལ་བ་ལ། །མ་རིག་སྒྲིབ་པ་སྦྱང་དུ་མེད། །དོན་རྟོགས་ང་རྒྱལ་ཡེ་ཤེས་ལ། །ཡིད་ཆེས་ཆོས་སྐུ་རང་བྱུང་ཐུགས། །འགྲན་ཟླ་འཇིག་རྟེན་གསུམ་ན་མེད། །དེ་ཉིད་ང་རྒྱལ་ངོ་བོ་ཉིད། །ཕྲག་དོག་གོལ་སྒྲིབ་སྐྱོན་མེད་པས། །དེ་ཕྱིར་མ་སྤངས་རང་སར་དག །ལྟ་བ་ངན་ལ་ཕྲག་དོག་གསལ། །དེ་ཕྱིར་ཕྲག་དོག་གསང་བའི་སྐུ། །དེ་ཡང་འདུས་པའི་སྙིང་པོ་ཉོན། །སེམས་ཅན་ལོག་རྟོག་ཚན་པོ་ཆེ། །གཞན་གྱི་རྐྱེན་གྱིས་མི་བཟློག་ཕྱིར། །དུག་ལྔ་རང་ལ་བརྟེན་ཏེ་བཟློག །མཐུན་པར་བསྟན་པས་ངེས་པར་བཟློག །ད་ཡང་འདུས་པའི་སྙིང་པོ་ཉོན། །བཟློག་ཏུ་མི་འདོད་གང་ཟག་ལ། །སྡིག་ཅན་མུ་སྟེགས་མཐོང་བའི་ཚེ། །གཤེ་སྤྱོ་མཚང་རྣམས་འབྲུ་བའི་ཚེ། །བདག་ཉིད་གཞན་དུ་བྱོལ་བར་བྱ། །གལ་ཏེ་སྤོང་བའི་ཐབས་མེད་ན། །ངག་གི་སྨྲས་ཚིག་མི་གོ་བས། །སྙིང་རྗེ་ཆེན་པོའི་སེམས་བསྐྱེད་ལ། །ལོག་གནོན་གདམས་ངག་དྲན་བྱས་ལ། །བཟོད་པའི་ཡུལ་དུ་ཤེས་པར་བྱ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། དུག་ལྔ་རང་གྲོལ་དུ་བསྟན་པའི་ལེའུ་སྟེ་བཅོ་ལྔ་པའོ།། །།དེ་ཡང་འདུས་པའི་འཁོར་རྣམས་ཉོན། །འབྲས་བུ་རིམ་འབྱུང་ངས་བཤད་ཀྱིས། །ལེགས་པར་ཉོན་ལ་ཡིད་ཀྱིས་ཟུངས། དེ་ཡང་འདུས་པའི་འཁོར་རྣམས་ཉོན། །གནས་པའི་ ― DNG002_Page_0275 ―
[མ་དཔེ་གཟིགས་ན་འདིར་གནོན།]
ཏིང་འཛིན་དོན་ལྡན་པས། །ཡེ་ཤེས་བག་ཆགས་ཆ་སྙོམས་ཕྱིར། །གསལ་ལ་མི་རྟོག་དུས་མཉམ་པས། །འདོད་ཁམས་ལྷར་ནི་སྐྱེ་དབང་ཡོད། །དེ་ཚེ་འཕོས་ནས་ཆོས་ཉིད་མཐོང་། །མི་གཡོ་བ་ཡི་ཏིང་འཛིན་གྱིས། །རྣམ་རྟོག་དེ་ཉིད་ཟིལ་གནོན་པས། །གཙང་མ་རིས་ཀྱི་ལྷར་སྐྱེས་ནས། །དེ་ཉིད་དུས་ན་མངོན་སངས་རྒྱས། །མཉམ་ཉིད་ལྡན་པའི་ཏིང་འཛིན་གྱིས། །ལུས་བྲལ་སྐད་ཅིག་དེ་ཉིད་ལ། །འབྲས་བུ་སངས་རྒྱས་ཆོས་ཀྱི་སྐུ། །དཔེ་མེད་ཡེ་ཤེས་ཀུན་བཟང་ཐུགས། །དེ་ཡང་འཁོར་གྱི་སྙིང་པོ་ཉོན། །མཉམ་པའི་དོན་ལ་ཡེ་ཤེས་པས། །འབྲས་བུ་རིག་པ་ད་ལྟ་ཉིད། །དེ་དོན་མི་བརྗེད་ཡེ་དྲན་ཕྱིར། །གཟུགས་ཁམས་གནས་སུ་ཅི་ལ་ལྟུང་། །ཉམས་མྱོང་ཉིད་ལ་མ་ཞེན་ཅིང་། །སྟོང་པ་འཛིན་མེད་དོན་གསལ་བར། །རང་རིག་ཡེ་ཤེས་མཐུ་བརྟས་ཕྱིར། །གཟུགས་མེད་ཁམས་སུ་ཅི་ལ་ལྟུང་། །རང་སེམས་རྟོགས་པ་མངོན་གྱུར་པས། །རེ་དང་དོགས་པའི་བློ་བྲལ་ཕྱིར། །གང་ཡང་འཛིན་མེད་ཐུགས་ལ་གསལ། །ཉན་ཐོས་ས་རུ་ལྟུང་མི་འགྱུར། །དང་པོ་ལྟ་བ་བདག་མེད་པས། །མཚན་མའི་ཡུལ་ལ་མ་ཞེན་ཕྱིར། །ཡུལ་ཉིད་སེམས་སུ་བསྡུས་པ་མེད། །འདོད་ཁམས་གནས་སུ་ལྟུང་མི་འགྱུར། །དེ་ཡང་འདུས་པའི་སྙིང་པོ་ཉོན། །ནམ་མཁའ་ཉི་ཤར་མུན་པ་མེད། །དེ་བཞིན་རང་རིག་ཆོས་སྐུ་ལ། །མ་རིག་མེད་པས་ཡེ་ཤེས་ཤར། །སངས་རྒྱས་ཐུགས་ལ་འཆར་ནུབ་མེད། །དེ་ཕྱིར་འབྲས་བུ་སངས་རྒྱས་མཆོག །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། འབྲས་བུ་ལྟུང་མེད་འབྱུང་བར་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ཐུགས་ཀྱི་གདེང་ཆུད་སྐལ་ལྡན་ལ། །མི་ནུབ་ཡོངས་ཀྱི་གཏེར་དུ་ནི། །དུས་གསུམ་རྒྱལ་བ་ཆོས་ཀྱི་སྐུའི། །རང་བྱུང་ཐུགས་ལ་གསལ་བའི་དོན། །མཉམ་ཉིད་འགྲོ་དོན་བྱེད་པའི་ལམ། །ཚད་མར་རང་རིག་དབང་ཕྱུག་གིས། །རྗེས་འཚོབ་ཐུགས་ཀྱི་སྲས་མཆོག་ལ། །སྐྱེ་འགག་ ― DNG002_Page_0276 ―
[མ་དཔེ་གཟིགས་ན་འདིར་གནོན།]
འཁོར་བའི་སྤང་ལེན་མེད། །བདག་དང་བྲལ་བས་རྒྱལ་བའི་ཐུགས། །དེ་ཡང་འདུས་པའི་འཁོར་རྣམས་ཉོན། །འདུ་འབྲལ་འཆི་མེད་ཡེ་ཤེས་ལུས། །རིག་པ་ཕྱོགས་མེད་བྱང་ཆུབ་འཆར། །སོ་སོ་མ་ཡིན་ཡེ་ནས་གཅིག །དེ་ཕྱིར་ཡོན་ཏན་རྙེད་པར་དཀའ། །བྱང་ཆུབ་ངང་དུ་ཐམས་ཅད་འདུས། །མཁའ་མཉམ་དབང་ཕྱུག་ཆེན་པོའི་ཐུགས། །ཡེ་ཤེས་སངས་རྒྱས་ཀུན་དང་མཉམ། །སྡེ་སྣོད་ཆོས་རྣམས་ཐུགས་ལ་རྫོགས། །འཇིག་རྟེན་ཁམས་ན་འགྲན་ཟླ་མེད། །ཞེ་འདོད་རིག་པས་མ་བསྒྲུབས་ཀྱང་། །རང་རིག་སེམས་ལ་སངས་རྒྱས་ཚང་། །དེ་ཉིད་འབྲས་བུ་དམ་པར་གསུངས། །དེ་ཡང་འདུས་པའི་འཁོར་རྣམས་ཉོན། །སྔོན་ཚེ་རྣམ་གཟིགས་བསྟན་པ་ལ། །བྲམ་ཟེ་དཔལ་ལྡན་བྱ་བའི་བུས། །རང་སེམས་རྟོགས་པའི་དོན་མེད་པའི། །གཞན་ནས་འབྲས་བུ་ཞེ་འདོད་ཀྱིས། །རིགས་ལྔའི་སངས་རྒྱས་ནམ་འགྲུབ་ཅེས། །ཡིད་ལ་བསམ་ཞིང་ལྷར་བསྒོམས་པས། །འབྲས་བུ་མེད་ཅིང་འཁོར་བར་སྐྱེས། །དེ་ཕྱིར་རེ་དོགས་མེད་པར་བྱ། །ད་ཡང་རྡོ་རྗེ་སེམས་དཔའ་ཉོན། །རེ་མེད་དོན་འདི་དྲན་བྱས་ལ། །ཆོས་ཉིད་སངས་རྒྱས་ས་ལ་གནས། །དོགས་མེད་དོན་ལ་མ་ཡེངས་ན། །སྒྲིབ་པ་སྦྱང་བའི་ཐབས་མི་དགོས། །དེ་ཡང་བློ་གྲོས་དམ་པ་ཉོན། །ངོ་བོ་ཉིད་ཀྱི་ཆོས་སྐུ་ལ། །གང་ཡང་མ་འགགས་ནམ་མཁའ་བཞིན། །འཁོར་འདས་ཞེན་མེད་འབྲས་བུ་ཡིན། །དེ་ཉིད་རང་སེམས་སྙིང་པོར་བཤད། །འགྲོ་དྲུག་སེམས་ཅན་ཐམས་ཅད་ལ། །ཆོས་སྐུ་རང་ཆས་དོན་རྟོགས་ནས། །བསྒོམ་ཞིང་བསྒྲུབ་པའི་ནད་དང་བྲལ། །ཡེ་ཤེས་ངོ་བོ་ད་ལྟའི་སེམས། །རེ་དོགས་མེད་ཤེས་འབྲས་བུའི་མཆོག །དུས་གསུམ་འགྱུར་མེད་རང་སེམས་དོན། །མེད་ལ་མི་ཟད་རང་བྱུང་ཐུགས། །སངས་རྒྱས་ཞེས་ནི་དེ་ལ་བྱ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། རེ་དོགས་མེད་པའི་འབྲས་བུ་བསྟན་པའི་ལེའུ་སྟེ་བཅུ་བདུན་པའོ།། །།ཀུན་རིག་རྒྱལ་པོས་བཀའ་སྩལ་པ། །སྣང་མེད་ལྟ་བའི་རིག་པ་ལ། །མ་བཙལ་འགྱུར་ ― DNG002_Page_0277 ―
[མ་དཔེ་གཟིགས་ན་འདིར་གནོན།]
མེད་ཆོས་ཀྱི་སྐུ། །བག་ཆགས་མེད་པས་ཡུལ་དང་བྲལ། །ད་ལྟ་ཉིད་དུ་རང་བྱུང་སྐུ། །དངོས་མེད་ནམ་མཁའི་མཐའ་དང་བྲལ། །ཤེས་རིག་གསལ་བས་ཁྱད་པར་འཕགས། །དེ་ལ་འགྲན་ཟླ་གང་ཡང་མེད། །རྟོགས་པའི་ཡོན་ཏན་བརྗོད་མི་ལངས། །ད་ཡང་རྡོ་རྗེ་སེམས་དཔའ་ཉོན། །རང་སེམས་རིག་པ་རང་བྱུང་དེ། །ཡེངས་མེད་དོན་ཤར་བྱང་ཆུབ་ཐུགས། །སྤྱི་མཐུན་ཉི་མ་སྟོང་བས་གསལ། །དེ་ཉིད་རྟོགས་པས་བསྒོམ་མི་དགོས། །ཡེ་ཤེས་རིག་པ་གསལ་བ་ལ། །མ་རིག་མུན་པ་གདོད་ནས་མེད། །བག་ཆགས་ཉོན་མོངས་རྩད་ནས་བརླག །དགོངས་པ་སངས་རྒྱས་ཀུན་དང་མཉམ། །ད་ཡང་འདུས་པའི་སྙིང་པོ་ཉོན། །དཔེར་ན་རྒྱ་མཚོ་རླབས་སུ་བྱུང་། །དེ་བཞིན་དོན་རྟོགས་སྤྱོད་པ་ཡང་། །འབྲལ་མེད་རིག་པའི་ཡེ་ཤེས་ཀློང་། །དུས་བཞིར་ཡེ་ཤེས་རྒྱུན་མི་འཆད། །དོན་འདི་རྟོགས་པའི་སྤྱོད་པ་དེ། །ཚོགས་བསགས་སྒྲིབ་སྦྱང་ས་བཅུ་པས། །སྐད་ཅིག་འདི་དྲན་ཁྱད་པར་འཕགས། །ལུས་ངག་རྩོལ་མེད་རིག་སྤྱོད་བདེ། །ད་ཡང་འཁོར་གྱི་སྙིང་པོ་ཉོན། །རང་རིག་འབྲས་བུ་རང་ལ་ཆེ། །གཟུགས་དང་བྲལ་བས་སྐྱེ་ཤི་མེད། །རང་ལས་བྱུང་བས་ཡེ་ཤེས་སྐུ། །ཡུལ་མེད་རིག་པ་མངོན་སངས་རྒྱས། །འདི་རྟོགས་འབྲས་བུ་ལྷུན་གྲུབ་དེ། །བསམ་པ་ཙམ་གྱིས་ཀུན་འགྲུབ་སྟེ། །མཆིང་བུ་རིན་ཆེན་ཁྱད་པར་ལྟར། །སྐྱེ་བ་མི་ལེན་མངོན་སངས་རྒྱས། །ད་ཡང་རྡོ་རྗེ་སེམས་དཔའ་ཉོན། །དེ་རྟོགས་མི་ཟད་རིན་ཆེན་གཏེར། །དེ་ཡི་འབྲས་བུ་ཡོན་ཏན་ནི། །གཟུགས་མེད་རིག་པ་ང་ཡི་སྐུ། །ཐ་མལ་རང་སེམས་ང་ཡི་ཐུགས། །སྟོང་ཉིད་དྲན་པ་ང་ཡི་གསུང་། །རིག་པའི་ཡོན་ཏན་གང་ཡང་འགྲུབ། །ཡེ་ནས་ཕྲིན་ལས་རང་བྱུང་བས། །རིག་པ་སྤྲོས་བྲལ་ཆོས་སྐུར་རྫོགས། །ད་ཡང་འདུས་པའི་འཁོར་རྣམས་ཉོན། །འགྱུར་མེད་ལྷུན་གྱིས་གྲུབ་པའི་གཞི། །ཆོས་ཉིད་བདེ་ཆེན་ཀློང་ཡངས་ལམ། །སྐྱེ་ཤི་མེད་པའི་འབྲས་བུ་སྨིན། །དེ་དག་གཅིག་ཕྱིར་རྒྱལ་བའི་ཐུགས། །གསེར་གླིང་ས་རྡོ་མེད་པ་བཞིན། །སེམས་ཅན་དུས་ནས་སངས་རྒྱས་ལ། །ཡོན་ཏན་མཚན་དང་དཔེ་བྱད་ཀྱང་། ། ― DNG002_Page_0278 ―
[མ་དཔེ་གཟིགས་ན་འདིར་གནོན།]
ཡེ་ཤེས་སྐུ་ལ་ཀུན་ཀྱང་རྫོགས། །ད་ལྟ་ཐ་མལ་ལུས་སེམས་ཀྱིས། །སེམས་ལས་མ་བྱུང་སངས་རྒྱས་རྙེད། །རྒྱུ་ལས་མ་བྱུང་འབྲས་བུ་རྟོགས། །ལུང་ལ་མ་བརྟེན་ཆོས་རྣམས་ཤེས། །ཐེག་དགུའི་ཆོས་རྣམས་གཅིག་ལས་མེད། །དུག་ལྔ་མྱ་ངན་འདས་པར་དག །ཐུགས་ཀྱི་ཀློང་བརྟོལ་ཆོས་ཀྱི་སྐུ། །འཁོར་བའི་ནང་ལ་ལུས་ཡོད་ཀྱང་། །པདྨ་དང་ནི་འདམ་བཞིན་དུ། །ཉོན་མོངས་ལས་ཀྱིས་གོས་པ་མེད། །དེ་ཕྱིར་སངས་རྒྱས་ཀུན་དང་མཉམ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བ་འཁོར་ལོའི་རྒྱུད་ལས། ཆེ་བའི་ཡོན་ཏན་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །འཁོར་གྱི་ཐེ་ཚོམ་བསལ་བའི་ཕྱིར། །བདེན་པའི་ཡིད་ཀྱིས་འདི་སྐད་གསོལ། །རང་བྱུང་ཡེ་ཤེས་ངོ་བོ་ལ། །གཞལ་བྱ་མི་དམིགས་དོན་ཅི་ལགས། །སྣང་བའི་མཚན་མ་འདི་ཉིད་ཀྱི། །གཏན་ཚིགས་མ་གྲུབ་གསུངས་པ་ཅི། །དེ་ནི་གང་གིས་རྟོགས་པའི་ཐབས། །ལྟ་མེད་གསུངས་པ་ཅི་ཡི་ཕྱིར། །གོལ་ས་ལྟུང་མེད་བསྟན་པ་ཡི། །མཐུན་དཔེ་གང་གིས་གང་ལ་མཚོན། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །དངོས་ཉིད་ལ་སོགས་ཆོས་རྣམས་ཀུན། །བྱ་བ་མེད་པར་རང་ཤར་གཅིག །ཡུལ་མེད་ངོ་བོར་རང་གནས་ཕྱིར། །དེས་ན་མ་བསྒྲིབས་རང་གསལ་བས། །གང་ཡང་གཞན་དུ་མི་དམིགས་ན། །གཞི་ལས་མ་འགྱུར་ངོ་བོར་སོན། །ཆོས་ཅན་མེད་པས་གཞལ་བྱར་བྲལ། །ད་ཡང་རྡོ་རྗེ་སེམས་དཔའ་ཉོན། །སྣང་མེད་ཆོས་སྐུར་གསལ་བ་ལ། །ཇི་སྙེད་པ་ཡི་རྣམ་གྲངས་ཀུན། །དགག་བསྒྲུབ་བྱ་བ་མེད་པའི་ཕྱིར། །རང་གི་ས་ན་ལེགས་གནས་པས། །གཞན་པ་དག་ཏུ་མི་འགྲུབ་པས། །ཕྱོགས་གཉིས་བྲལ་བའི་བྱང་ཆུབ་སེམས། །མཐའ་བཞིའི་ཐ་སྙད་བྲལ་བ་ལ། །འཇལ་བྱེད་གཏན་ཚིགས་ཅི་ཞིག་དགོས། །འདུས་པ་རྡོ་རྗེ་སྙིང་པོ་ཉོན། །མཚོན་པའི་ཐ་སྙད་མི་བརྗོད་དོ། །ཆོས་རྣམས་མ་ལུས་ཐམས་ཅད་ཀུན། །ལོག་པའི་ ― DNG002_Page_0279 ―
[མ་དཔེ་གཟིགས་ན་འདིར་གནོན།]
རྗེས་སུ་འབྲང་བའི་ཕྱིར། །ཡུལ་མེད་ཐིག་ལེ་རང་ཤར་བས། །ཇི་བཞིན་མ་ནོར་སྙིང་པོ་ཡིས། །ངེས་པར་གཞན་དུ་བལྟ་བར་གྲོལ། །དེ་ཡང་རྡོ་རྗེ་སེམས་དཔའ་ཉོན། །ཀུན་བཟང་གདལ་ཁྱབ་རང་བཞིན་ལ། །ཐོག་མཐའ་ཆོད་ཕྱིར་གོལ་མེད་པས། །དེ་ཉིད་ཡེ་ཤེས་རང་ཤར་བས། །གོལ་ས་ཉིད་ཀྱང་ཆོས་ཉིད་དག །ཡེ་ཤེས་ངང་དུ་འགྱུར་བའི་ཕྱིར། །དམིགས་ཞེན་མེད་པས་གོལ་མེད་གསུངས། །ད་ཡང་འཁོར་གྱི་སྙིང་པོ་ཉོན། །དཔེར་ན་གང་གིས་མི་ནུས་ཀྱང་། །ནམ་མཁའི་ཉི་མ་རང་གསལ་བཞིན། །རང་བྱུང་ངོ་བོ་ཡེ་ཤེས་ཀྱང་། །རང་རིག་ཡེ་ཤེས་བདེ་གསལ་བས། །སྣང་བས་ཕན་མེད་གནོད་མེད་ཕྱིར། །ཕྱོགས་ཀྱི་ཐ་སྙད་བཤད་ཅི་དགོས། །རྡོ་རྗེ་སེམས་དཔས་ཡང་གསོལ་པ། །མ་བསྒོམས་དོན་དང་འབྲལ་མེད་པའི། །དེ་དོན་རྟོགས་ཐབས་གང་གིས་བགྱི། །མ་བསྒོམས་ཀློང་དུ་འགྱུར་བ་ཡིས། །རང་གི་ཐ་སྙད་གང་ལ་གདགས། །དེ་དོན་བསྒོམ་དུ་མེད་པའི་ཕྱིར། །མཚན་མ་བྱུང་ན་བཅོས་མི་དགོས། །ལྟ་བ་རང་ཤར་ཆེན་པོ་ལ། །མ་བསྒོམས་གོལ་སར་ཅིས་མི་འགྱུར། །དེ་སྐད་ཞུས་པས་བཀའ་སྩལ་པ། །སྙིང་པོ་རང་གི་སྟོབས་དང་ནི། །མན་ངག་དགོངས་པའི་ཐུགས་བརྟོལ་ནས། །ཤེས་རྒྱུད་རྟོགས་པའི་བླ་མ་ཡིས། །ཇི་བཞིན་ཉིད་དུ་ཤར་བ་ལ། །སྣང་མེད་ཆོས་སྐུ་ཉིད་མཚོན་པས། །མཚན་མའི་དངོས་པོ་མི་འབྱུང་ཕྱིར། །སྨན་དང་སྨན་པའི་ཐབས་བཞིན་དུ། །སེམས་མེད་མི་འདོད་ཅི་ཞིག་བྲལ། །དེ་ཡང་འདུས་པའི་སྙིང་པོ་ཉོན། །ཐིག་ལེ་ཆོས་སྐུས་ཁྱབ་པའི་ཕྱིར། །དེ་བཞིན་ཉིད་དུ་རང་ཤར་བས། །གང་ཡང་དམ་པར་མི་བལྟ་ན། །ཐམས་ཅད་ཇི་བཞིན་རང་སར་གྲོལ། །དེ་ཕྱིར་མཐའ་ལ་མི་གནས་པས། །གཏང་བཞག་མེད་པའི་ཏིང་འཛིན་གྱིས། །མ་བསྒོམས་ཀློང་དུ་གྱུར་པར་གནས། །ད་ཡང་འདུས་པའི་སྙིང་པོ་ཉོན། །བསྒོམ་དུ་མེད་པའི་ཆོས་ཉིད་ལས། །རྣམ་རྟོག་མཚན་མ་ཅི་བྱུང་ཡང་། །དམིགས་ནས་གསལ་བར་བསྒྲུབ་མི་བྱ། །དཔེར་ན་ནམ་མཁའ་འདི་ཉིད་ལ། །སྤྲིན་དང་ཁུ་རླངས་ལ་སོགས་ནི། །ཇི་སྙེད་ཞིག་ནས་མེད་པ་ལྟར། །ཇི་ ― DNG002_Page_0280 ―
[མ་དཔེ་གཟིགས་ན་འདིར་གནོན།]
བཞིན་ཉིད་དུ་རང་དྲན་པས། །དུས་མཉམ་གསལ་བས་ཡང་དག་སྟེ། །དེ་ལ་གཉེན་པོས་བཅོས་སུ་མེད། །ཐ་སྙད་ངང་གསལ་བཅོས་པར་བཤད། །ད་ཡང་འདུས་པའི་སྙིང་པོ་ཉོན། །ཡུལ་མེད་ཐིག་ལེར་རང་ཤར་བས། །ཡང་དག་དོན་ལ་མི་འཇིགས་ཕྱིར། །ངོ་བོ་ཉིད་དུ་གྱུར་པས་ན། །དོན་དུ་གཉེར་བ་གང་ཡང་མེད། །སྔ་ཕྱི་གཞན་དུ་གཡོས་མེད་ཕྱིར། །ཆེད་དུ་བསྒོམ་དུ་མེད་པ་སྟེ། །དམིགས་པ་གཏད་པའི་དོན་དང་བྲལ། །དོན་མི་གཉེར་བར་དགྲ་མེད་འདྲ། །དེ་ཡང་འདུས་པས་ཡང་གསོལ་པ། །གཏང་གཞག་མེད་པའི་བསྒོམ་པ་ལ། །མི་མཐུན་མི་འབྱུང་གསུངས་པ་ཅི། །རྣལ་འབྱོར་རྩོལ་བྲལ་མ་ཡེངས་ན། །བྱར་མེད་འགག་མེད་གསུངས་པ་ཅི། །དེ་ཉིད་བཅིངས་པར་མི་འགྱུར་བའི། །ཕྱོགས་བྲལ་བསྟན་པ་ཇི་ལྟར་ལགས། །ཀུན་རིག་སྟོན་པས་བཤད་དུ་གསོལ། །ཀུན་རིག་ཆོས་རྗེས་བཀའ་སྩལ་པ། །དུས་གསུམ་རྣམ་པ་ཐམས་ཅད་དུ། །སྐྱེ་ཤི་མེད་པར་ཡེ་ཤར་བས། །སྣང་མེད་ཞེན་རྟོག་ཐམས་ཅད་ཀྱང་། །གང་ཡང་ཆོས་སྐུར་གསལ་བ་ལ། །གཏང་བཞག་རྩོལ་སེམས་ཅི་ལ་འབྱུང་། །གཞན་དུ་མི་འགྱུར་ཀློང་གནས་པས། །མི་མཐུན་མཚན་མ་གང་ཡང་མེད། །ད་ཡང་རྡོ་རྗེ་སེམས་དཔའ་ཉོན། །དབྱིབས་དང་མཚན་མ་ཐམས་ཅད་ཀུན། །གཞི་ལ་མ་གྲུབ་དོན་ཤེས་ཕྱིར། །རང་གསལ་ཡུལ་ལ་རྟོག་པ་མེད། །དག་དང་མ་དག་ཐམས་ཅད་ཀུན། །གང་ཡང་དགག་བསྒྲུབ་མེད་པའི་ཕྱིར། །བཞག་དང་བླང་བར་ཡོངས་མེད་དོན། །འབྱུང་འཇུག་མེད་པར་བསྒོམ་མི་དགོས། །རྩོལ་བ་མེད་ཕྱིར་སྤྱོད་པའི་མཆོག །ད་ཡང་འདུས་པའི་སྙིང་པོ་ཉོན། །བདག་གཞན་ཀ་ནས་མ་གྲུབ་ཕྱིར། །བྱ་བྱེད་མ་ལུས་ཐམས་ཅད་ཀུན། །འགྲོ་དྲུག་ལས་དང་བདེ་གཤེགས་མཛད། །ཅི་སྤྱོད་ཆོས་སྐུར་ཡེ་ཤར་བས། །གང་ཡང་མཚན་ཉིད་དབྱེར་མེད་དེ། །བྱེད་པ་ཉིད་ནས་གྲོལ་བར་བྱེད། །བླང་དང་དོར་བར་ངང་གིས་མེད། །དེ་ཡིས་འཆིང་བར་ཅི་ལ་འགྱུར། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། རྡོ་ ― DNG002_Page_0281 ―
[མ་དཔེ་གཟིགས་ན་འདིར་གནོན།]
རྗེ་སེམས་དཔའི་ཐུགས་བརྟོལ་བའི་ལེའུ་སྟེ་བཅུ་དགུ་པའོ།། །།རྡོ་རྗེ་སེམས་དཔས་ཡང་གསོལ་པ། །ཏིང་འཛིན་ཉམས་དང་ལྡན་པ་ལ། །ལྟ་སྒོམ་སྤྱོད་པ་ཉམས་ཀྱི་བདུད། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་ཚོགས་ལ་བཀའ་སྩལ་པ། །ཏིང་འཛིན་ཉམས་དང་ལྡན་པ་ལ། །སྣང་བ་འོད་དང་གྲག་པ་སྒྲ། །འཇིགས་པ་གཟུགས་དང་བསླུ་བ་བརྫུན། །ལྟ་བར་ཤེས་ན་དམ་པའི་ལམ། །ད་ཡང་འདུས་པའི་སྙིང་པོ་ཉོན། །རྣལ་འབྱོར་དམ་པ་མཉམ་བཞག་ཚེ། །མཚན་མོ་མུན་ནག་སྤྲིན་རུམ་ན། །ནམ་ལངས་ཉི་ཤར་བཞིན་དུ་གསལ། །ཁམས་གསུམ་སེམས་ཅན་དགེ་སྡིག་ལས། །གང་ཡང་མ་ལུས་སྔ་ཕྱི་ཤེས། །དེ་ཚེ་སྙིང་རྗེའི་བདུད་ཞུགས་ཏེ། །སེམས་ཅན་སྙིང་རེ་རྗེ་སྙམ་བྱེད། །ཏིང་འཛིན་བཏང་ནས་གཞན་དོན་བརྩམ། །དེ་ཕྱིར་བདུད་ཀྱི་དབང་དུ་འགྱུར། །དེ་ཡང་རྡོ་རྗེ་སེམས་དཔའ་ཉོན། །ནམ་མཁའ་སྟོང་ལས་སྒྲ་བྱུང་ནས། །བདེ་གཤེགས་ཆོས་རྣམས་སྣ་ཚོགས་སྟོན། །ཞིང་ཁམས་རྒྱན་གྱིས་བརྒྱན་པ་དང། །ཡིད་དུ་འོང་བའི་སྒྲ་ཐོས་ནས། །ཏིང་འཛིན་བཏང་ནས་གླུ་གར་བྱེད། །ངོམ་ཞིང་ངོ་མཚར་དགའ་སེམས་སྐྱེད། །དེ་ལ་ཞེན་གྱུར་ཉམས་དང་བྲལ། །དགའ་བའི་བདུད་ཀྱིས་རང་བསླུས་འགྱུར། །དེ་ཡང་འདུས་པའི་སྙིང་པོ་ཉོན། །བསྒོམ་ཉམས་རྨི་ལམ་གང་ཡང་རུང་། །འཇིགས་པའི་གཟུགས་སོགས་མི་དགེ་བས། །ངང་ལ་གནས་ལ་བསྡིག་འགྱུར་བས། །ཏིང་འཛིན་བཏང་ནས་མྱ་ངན་བདུད། །མི་དགའ་སྡུག་བསྔལ་ཉམ་ཐག་འབྱུང་། །དེ་ཚེ་ལས་ལ་ཡི་མུག་སྟེ། །ལྕེབ་དང་གཅིག་པུར་ཕག་ཏུ་ངུ་། །གཟུགས་ཀྱི་བདུད་དབང་གྱུར་ནས་ལྟུང་། །ད་ཡང་རྡོ་རྗེ་སེམས་དཔའ་ཉོན། །ཉམས་དང་རྨི་ལམ་གང་དུ་ཡང་། །ཡིད་དུ་འོང་བའི་གཟུགས་བསྟན་ཏེ། །དུས་གསུམ་ཉེས་ལེགས་ཐམས་ཅད་སྟོན། །གཞན་ལ་བསྟན་པས་བདེན་པ་འབྱུང་། །དེ་ཚེ་ང་རྒྱལ་བདུད་ཞུགས་ཏེ། །ཏིང་འཛིན་བཏང་ནས་གྲོང་ཁ་ཡན། །བར་དུ་ཕྱེད་བདེན་ཕྱེད་མི་བདེན། །ཐ་མ་སྨྲ་བ་ཐམས་ཅད་ ― DNG002_Page_0282 ―
[མ་དཔེ་གཟིགས་ན་འདིར་གནོན།]
རྫུན། །བསླུ་བའི་བདུད་ཀྱིས་རང་བསླུས་ལྟུང་། །ད་ཡང་འདུས་པའི་སྙིང་པོ་ཉོན། །ལྟ་བའི་བདུད་ནི་དེ་དག་ཀྱང་། །ཡུལ་གྱི་གོལ་སར་མ་ཤེས་ཕྱིར། །སྣང་བ་གཟུགས་སོགས་ཞེན་པ་སྟེ། །ཡུལ་ལ་སེམས་ཞུགས་ཅི་སྤྱོད་བདུད། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། རྣལ་འབྱོར་ལྟ་བའི་བདུད་བསྟན་པའི་ལེའུ་སྟེ་ཉི་ཤུ་པའོ།། །།ད་ཡང་རྡོ་རྗེ་སེམས་དཔའ་ཉོན། །སྒོ་ལྔ་བྱིང་བ་གསལ་བའི་བདུད། །དྲན་མེད་རྨུགས་པ་བདེ་བའི་བདུད། །རྐྱེན་གྱིས་རྒོད་པ་མི་རྟོག་བདུད། །འཕྲོ་བ་མི་གཡོའི་བདུད་རྣམས་འབྱུང་། །དེ་ཡང་འདུས་པའི་སྙིང་པོ་ཉོན། །ཏིང་འཛིན་མྱུར་དུ་འགྲུབ་འདོད་ནས། །ཡུན་རིང་བསྒོམས་པས་ཚད་མ་ཟིན། །མྱོས་པའི་བདུད་ཞུགས་བསལ་བའི་ཕྱིར། །མ་རིག་དབང་གིས་གཉིད་དུ་སོང་། །གསལ་བ་བོར་ནས་བྱིང་པོར་སོང་། །དེ་ཉིད་བཙལ་བས་ཏིང་འཛིན་ཉམས། །མ་བཙལ་རྨི་ལམ་བཟང་ངན་བྱུང་། །དེ་ཕྱིར་བྱིང་བའི་བདུད་ཀྱིས་བསླུས། །དེ་ཡང་འདུས་པའི་སྙིང་པོ་ཉོན། །རང་རིག་ཆོས་སྐུར་མ་ཟིན་པས། །མ་རིག་དབང་གིས་ཡེ་ཤེས་བསྒྲིབས། །དྲན་པ་མེད་པའི་བདུད་ཞུགས་ཏེ། །ངང་བསྒོམ་རྨུགས་པས་བདེ་བ་ཉམས། །རང་རིག་མེད་པས་ཞི་གནས་བྱིང་། །ལྷག་མཐོང་མེད་པས་དོན་དང་བྲལ། །བསྒོམས་ཀྱང་དོན་མེད་བདུད་ཀྱིས་བསླུས། །དེ་ཕྱིར་ལུང་ལྡན་མན་ངག་གཅེས། །ད་ཡང་འཁོར་གྱི་སྙིང་པོ་ཉོན། །གཅིག་པུར་མི་དགའ་འདུས་ལ་དགའ། །གཞན་གྱི་རྐྱེན་བྱས་བདུད་ཞུགས་ཏེ། །ཏིང་འཛིན་བཏང་ནས་ཡིན་མིན་གྱི། །ཡུལ་ལ་ཞེན་པ་སྣ་ཚོགས་ཞེན། །མི་རྟོག་མེད་པར་ཉོན་མོངས་འབྱུང་། །སྤང་སྡུད་ཞེན་པ་རང་རྒྱུད་བྱེད། །དེ་ཕྱིར་གཡེང་བའི་བདུད་ཀྱིས་བསླུས། །ད་ཡང་འཁོར་གྱི་སྙིང་པོ་ཉོན། །ཡང་ཡང་གོམས་པར་མ་བྱས་པས། །འཕྲོ་བ་རྐུན་བུའི་བདུད་ཞུགས་ཏེ། །གང་ཡང་རུང་བའི་ཚིག་རེ་ཙམ། །ཡིད་ལ་བྱས་པས་མི་གཡོ་བྲལ། །ནན་ཏན་ཆུང་བས་ཉམས་མེད་ཕྱིར། །ལང་ཅན་རྐུན་བུ་ཡང་ཡང་ལྡང་། །ངེས་པའི་གདེང་དང་མི་ལྡན་ ― DNG002_Page_0283 ―
[མ་དཔེ་གཟིགས་ན་འདིར་གནོན།]
པས། །འཕོ་བའི་བདུད་ཀྱིས་བསླུས་ཕྱིར་ལྟུང་། །ད་ཡང་འཁོར་རྣམས་ལེགས་པར་སོམས། །བསྒོམ་པའི་བདུད་ནི་དེ་དག་ཀྱང་། །གདམས་ངག་མེད་པ་རྣམས་ལ་འབྱུང་། །ལུང་ལྡན་རྣམས་ལ་གནོད་མི་ཚུགས། །མ་རྟོགས་ཅི་བསྒོམ་བདུད་དུ་འགྱུར། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། བསྒོམ་པ་ཉམས་ཀྱི་བདུད་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།ད་ཡང་རྡོ་རྗེ་སེམས་དཔའ་ཉོན། །བྱ་བ་འདུ་འཛི་ལོངས་སྤྱོད་བདུད། །ཉམས་དགའ་ཞེན་པ་གནས་ཀྱི་བདུད། །བསླབ་པ་ཡོན་ཏན་གཡེང་བའི་བདུད། །སེམས་དཀྲུགས་འཁོར་ངན་བདུད་རྣམས་འབྱུང་། །ད་ཡང་འདུས་པའི་སྙིང་པོ་ཉོན། །དགོན་པར་གནས་ན་དད་ལྡན་འདུ། །ལོངས་སྤྱོད་འདུ་འཛིའི་བདུད་ཞུགས་ཏེ། །ཏིང་འཛིན་བཏང་ནས་གཞན་སེམས་འཛིན། །དེ་ཚེ་དོན་བྲལ་ནོར་རྫས་ཞེན། །འདོད་བློས་མཚན་མའི་ཆོས་ལ་སྤྱོད། །བསྒོམ་པའི་དོན་བོར་གཡེང་བའི་བདུད། །འཇིག་རྟེན་པ་ལ་ཁ་ལེན་བྱེད། །འདུ་འཛིའི་བདུད་ཀྱིས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །རང་འཐད་པ་ཡི་གནས་ལ་ནི། །བཀྲ་ཤིས་འདྲེ་མེད་ལྷ་གཉན་ཡོད། །རང་འདོད་ཞེན་པའི་བདུད་ཞུགས་ཏེ། །ཏིང་འཛིན་བཏང་ནས་ཉམས་དགའ་བརྩིག །གཞན་དུ་སྲུང་མས་འགྲོ་དབང་མེད། །ཟེར་ཞིང་བདག་བརྩོན་དོན་དང་བྲལ། །རང་སེམས་ཞེན་པ་བདུད་དུ་ལངས། །གནས་ཀྱི་བདུད་ཀྱིས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་མཁས་པ་བསྒོམ་འདོད་པས། །གཡེང་བའི་བདུད་ནི་ཁོང་ཞུགས་ཏེ། །གཞན་གྱིས་བསྟོད་པས་ཏིང་འཛིན་བཏང་། །ཆོས་འཆད་སྨན་དང་བཟོ་རྣམས་བྱེད། །འདོད་པའི་རྫས་ལ་ཞེན་པ་སྐྱེས། །གཞན་དོན་བྱང་ཆུབ་ཡིན་ཟེར་ནས། །བྱ་བ་གཡེངས་པ་ཆེད་དུ་བྱེད། །དོན་དང་བྲལ་བས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །རྣལ་འབྱོར་འཁོར་ངན་གདུང་དྲགས་པས། །སེམས་འཁྲུགས་བདུད་ནི་ཁོང་ཞུགས་ཏེ། །འཁོར་ངན་ཆོག་ཤེས་མེད་པར་འདོད། །དྲིན་དུ་མི་ ― DNG002_Page_0284 ―
[མ་དཔེ་གཟིགས་ན་འདིར་གནོན།]
གཟོ་འཕྱར་ཁ་གཏོང་། །དེ་ཚེ་དད་ལོག་མི་རྣམས་འཕྱ། །ད་ཡང་འདུས་པའི་སྙིང་པོ་ཉོན། །སྤྱོད་པའི་བདུད་ནི་དེ་དག་ཀྱང་། །འཇིག་རྟེན་ཆོས་བརྒྱད་ཞེན་ལས་འབྱུང་། །དེ་ཕྱིར་གཡེངས་པ་དོན་དུ་གཉེར། །འཁོར་བ་དང་བླངས་རང་བསླུས་ལྟུང་། །སྒྲོ་སྐུར་འདེབས་ལ་ཞེ་སྡང་འབྱུང་། །འཁོར་ངན་བདུད་ཀྱིས་རང་བསླུས་ལྟུང་། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སྤྱོད་པའི་བདུད་བསྟན་པའི་ལེའུ་སྟེ་ཉེར་གཉིས་པའོ།། །།ད་ཡང་རྡོ་རྗེ་སེམས་དཔའ་ཉོན། །འཇིག་རྟེན་མཁའ་འགྲོས་ལུང་བསྟན་བདུད། །ཉམས་སུ་མྱོང་བ་ཞེན་པའི་བདུད། །ཞེན་འདོད་ཚུལ་འཆོས་བྱེད་པའི་བདུད། །བརྐམ་ཆགས་བདེ་བའི་བོགས་འདོན་བདུད། །གདེང་མེད་སྐུར་འདེབས་ཞེ་སྡང་བདུད། །ང་རྒྱལ་སྒྲོ་འདོགས་བདུད་རྣམས་འབྱུང་། །དེ་ཡང་འདུས་པའི་འཁོར་རྣམས་ཉོན། །རྣལ་འབྱོར་ལྟ་བར་མཉམ་བཞག་ཚེ། །ལྷ་མོའི་ལུས་སུ་མངོན་ཕྱུང་སྟེ། །ཕུག་ཏུ་མ་འདུག་འགྲོ་དོན་གྱིས། །གཞན་དོན་བྱས་པའི་ཡོན་ཏན་བརྗོད། །དེ་ཚེ་མཁའ་འགྲོའི་བདུད་ཞུགས་ཏེ། །ཏིང་འཛིན་བཏང་ནས་གཞན་དོན་རྩོལ། །ཆོས་སུ་མིང་བཏགས་ཅི་ཡང་བྱེད། །དོན་དང་བྲལ་ཕྱིར་བདུད་བསླུས་ལྟུང་། །ད་ཡང་འདུས་པའི་སྙིང་པོ་ཉོན། །རྣལ་འབྱོར་དོན་ལྡན་བསྒོམས་པ་ལ། །ཟབ་ཅིང་བདེ་བ་ཉམས་མྱོང་ཟེར། །ལྟ་བའི་གདེང་ཆེན་མ་ཟིན་པར། །ཞི་གནས་ཞན་པའི་བདུད་ཞུགས་ཏེ། །རྐྱེན་མ་ཐུབ་ཕྱིར་འཕེལ་འགྲིབ་ཡོད། །བག་ལ་ཉལ་བའི་མ་རིག་པས། །རང་རིག་ཡེ་ཤེས་མ་རིག་ཕྱིར། །ལྟ་མེད་ཞེན་པས་རང་བསླུས་ལྟུང་། །དེ་ཡང་འདུས་པའི་སྙིང་པོ་ཉོན། །དོན་མེད་བསྒོམ་པའི་གང་ཟག་ཀུན། །གདེང་མེད་ཚུལ་འཆོས་གསོག་ཅན་ཏེ། །ཁ་འཇམ་དོན་འཁྲིའི་བདུད་ཞུགས་ཏེ། །གཞན་དག་བྲིད་ཕྱིར་དགེ་བར་བརྩོན། །མན་ངག་མེད་པར་གསང་བ་སྐད། །རང་ཉིད་སླུ་བའི་བདུད་བསླུས་ལྟུང་། །ཕྱི་མར་ཡི་དྭགས་ལྟོ་འཕྱེར་སྐྱེས། །ད་ཡང་འདུས་པའི་སྙིང་པོ་ཉོན། །ལྟ་མེད་ཐབས་ཀྱི་རྣལ་འབྱོར་པས། །དབང་གསུམ་པ་ཡི་ ― DNG002_Page_0285 ―
[མ་དཔེ་གཟིགས་ན་འདིར་གནོན།]
བདེ་བ་ལ། །དགའ་བ་བཞི་ལ་ཞེན་པ་ཡིས། །འདོད་ཆགས་སྲེད་པའི་བདུད་ཞུགས་ཏེ། །དེ་མེད་འབྲས་བུ་མི་དབང་བས། །འདོད་ཆགས་སྤྱད་ཀྱང་ཏིང་འཛིན་འཕེལ། །བྱི་ཤུག་ཕོ་མོ་ཀུན་བསོགས་ཏེ། །ཆགས་པའི་བདུད་ཀྱིས་རང་བསླུས་ལྟུང་། །ད་ཡང་རྡོ་རྗེ་སེམས་དཔའ་ཉོན། །ངེས་པའི་ལུང་ལྡན་རྣལ་འབྱོར་ལ། །མཉམ་དུ་རེ་ནས་འགྲན་པའི་ཕྱིར། །སྨད་སེམས་ཞེ་སྡང་བདུད་ཞུགས་ཏེ། །རང་ཉམས་ངན་པས་གཞན་དག་ལ། །གདམས་ངག་ཅན་ལ་སྐུར་པ་འདེབས། །རྣལ་འབྱོར་ལུང་ལྡན་གནོད་མི་ཚུགས། །དེ་ཕྱིར་དམ་ཉམས་རང་ཉིད་ལྟུང་། །ཕྱི་མར་ཚ་བའི་དམྱལ་བར་སྐྱེ། །དེ་ཡང་འདུས་པའི་སྙིང་པོ་ཉོན། །ངེས་པའི་དོན་ལྡན་རྣལ་འབྱོར་གྱིས། །ངེས་དོན་ཡང་དག་བཀའ་ལ་ནི། །གང་ཟག་སྨད་ཕྱིར་སྒྲོ་བཏགས་ཏེ། །མི་ཚིག་ཡིན་ཟེར་འཕྱར་ཁ་གཏོང་། །ང་རྒྱལ་བདུད་ནི་ཁོང་ཞུགས་ཏེ། །ཕག་ཏུ་བརྐུ་དང་འོག་བྲུས་བྱེད། །ཞེ་ལ་འདོད་ཅིང་ཆེ་ཆུང་བྱེད། །དེ་ཕྱིར་བདུད་བསླུས་དམྱལ་བར་ལྟུང་། །ད་ཡང་འདུས་པའི་སྙིང་པོ་ཉོན། །བདུད་ཀྱི་སྤྱོད་པ་བཅོ་བརྒྱད་ཀྱང་། །སོ་སོར་སྣང་བ་མ་ཡིན་ཏེ། །ལྷ་ཡི་བུའི་བདུད་གཅིག་པུ་ཡིན། །དེ་ཕྱིར་ལྟ་བ་དམན་པའི་བདུད། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ཉམས་ཀྱི་བདུད་བསྟན་པའི་ལེའུ་སྟེ་ཉེར་གསུམ་པའོ།། །།རྡོ་རྗེ་སེམས་དཔས་ཡང་ཞུས་པ། །ལྟ་སྒོམ་སྤྱོད་པ་ཉམས་ཀྱི་བདུད། །དེ་དག་ཟིལ་གྱིས་ཇི་ལྟར་མནན། །ཀུན་རིག་སྟོན་པས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །ཕྱི་ནང་ཆོས་རྣམས་རང་བྱུང་སྐུ། །བདུད་ཉིད་རྟོགས་ན་ཆོས་ཉིད་རང་། །དེ་ཕྱིར་ལུང་ལྡན་བསྟན་ལ་ཞུགས། །རང་སེམས་དོན་རྟོགས་བདུད་མེད་དོ། །ད་ཡང་འདུས་པའི་སྙིང་པོ་ཉོན། །མ་ནོར་དོན་ལ་བསྒོམ་པའི་ཚེ། །སྣང་བའི་འོད་བདུད་བྱུང་བ་ལ། །ཆོས་སྐུ་ཁ་དོག་དང་བྲལ་ཕྱིར། །གསལ་ལ་མི་རྟོག་ཟིལ་གྱིས་མནན། །གྲགས་པ་སྒྲ་ཡི་བདུད་བྱུང་ན། །ཆོས་ཉིད་སྒྲ་དང་བྲལ་བའི་ཕྱིར། །རྗེས་སུ་འབྲང་མེད་རང་བཞིན་ནི། །ལྟ་བའི་རིག་པས་ཟིལ་གྱིས་ ― DNG002_Page_0286 ―
[མ་དཔེ་གཟིགས་ན་འདིར་གནོན།]
མནན། །འཇིགས་པ་གཟུགས་ཀྱི་བདུད་བྱུང་ན། །གཞི་ལ་སྣང་བ་མེད་པའི་ཕྱིར། །དངོས་མེད་ཤེས་པའི་ཏིང་འཛིན་གྱིས། །གཟུགས་ཅན་མཚན་མ་ཟིལ་གྱིས་མནན། །བསླུ་བ་རྫུན་གྱི་བདུད་བྱུང་ན། །ཆོས་སྐུ་ཚིག་ལས་འདས་པའི་ཕྱིར། །བདེན་པར་འཛིན་པའི་སྐྱོན་དང་བྲལ། །རྫུན་ལ་བདེན་མེད་ཟིལ་གྱིས་གནོན། །ད་ཡང་འདུས་པའི་སྙིང་པོ་ཉོན། །བྱིང་བ་བསལ་བའི་བདུད་བྱུང་ན། །གཉིད་གསུམ་བསྲེས་པའི་གདམས་ངག་གིས། །གཏི་མུག་ཆོས་སྐུར་རབ་ཐིམ་པས། །ཡེ་གནས་ལྟ་བའི་ཟིལ་གྱིས་གནོན། །རྨུགས་པ་བདེ་བའི་བདུད་བྱུང་ན། །འཕེལ་འགྲིབ་མེད་པའི་དོན་ཤེས་ཕྱིར། །བདེ་ཆེན་ཡེ་གནས་ལྟ་བ་ལ། །མཉམ་ཉིད་རིག་པས་ཟིལ་གྱིས་མནན། །རྒོད་པ་མི་རྟོག་བདུད་བྱུང་ན། །སྣང་བའི་བག་ཆགས་བརྟས་པ་ལས། །རང་རིག་བག་ཆགས་མེད་པའི་ཕྱིར། །སྤང་སྡུད་ཞེན་མེད་ཟིལ་གྱིས་མནན། །འཕྲོ་བ་མི་གཡོའི་བདུད་བྱུང་ན། །ཡེ་ནས་མི་གཡོ་ཆོས་སྐུ་ལ། །གོམས་པའི་དབང་གིས་ཏིང་འཛིན་གསལ། །མི་བརྗེད་གཟུངས་ཀྱི་ཟིལ་གྱིས་མནན། །ད་ཡང་འདུས་པའི་སྙིང་པོ་ཉོན། །ལྟ་སྒོམ་བདུད་ནི་དེ་དག་ཀྱང་། །རང་བྱུང་ཆོས་སྐུའི་དོན་རྟོགས་པས། །གང་བྱུང་ཟིལ་མནན་རང་བརླགས་པས། །འབྲས་བུ་ཡེ་ཤེས་ལྷུན་གྱིས་གྲུབ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ལྟ་སྒོམ་གྱི་བདུད་ཟིལ་གྱིས་མནན་པའི་ལེའུ་སྟེ་ཉེར་བཞི་པའོ།། །།ད་ཡང་འདུས་པའི་སྙིང་པོ་ཉོན། །དེ་དོན་ངང་ལ་གནས་པའི་ཚེ། །འདུ་འཛི་ལོངས་སྤྱོད་བདུད་བྱུང་ན། །ཏིང་འཛིན་དགྲ་རུ་ཤེས་པ་ཡིས། །འདོད་ཆུང་ཆོག་ཤེས་ཟིལ་གྱིས་མནན། །ཞེན་པ་གནས་ཀྱི་བདུད་བྱུང་ན། །ཡུལ་ལ་ངེས་མེད་མ་ཆགས་པས། །ལྟ་བ་རང་རིག་ཡུལ་མེད་ཕྱིར། །ཞེན་པ་མེད་པའི་ཟིལ་གྱིས་མནན། །ཡོན་ཏན་གཡེང་བའི་བདུད་བྱུང་ན། །བདག་དོན་མ་གྲུབ་བར་དུ་ཡང་། །མི་དབང་མི་བཏང་དོན་དྲན་པས། །གཞན་དོན་མི་བྱ་ཟིལ་གྱིས་མནན། །འཁོར་ངན་སེམས་འཁྲུགས་བདུད་བྱུང་ན། །མཐར་ཐུག་འདྲེལ་པ་མེད་པའི་ཕྱིར། །གནས་སྐབས་འདྲེལ་པ་ཏིང་འཛིན་དགྲ། །གདུང་སེམས་བསྐྱུངས་པའི་ཟིལ་གྱིས་མནན། །ད་ ― DNG002_Page_0287 ―
[མ་དཔེ་གཟིགས་ན་འདིར་གནོན།]
ཡང་འདུས་པའི་སྙིང་པོ་ཉོན། །ཟིལ་གྱིས་མནན་ཐབས་དེ་དག་ཀྱང་། །སྤང་ལེན་དགག་བསྒྲུབ་མེད་པར་འདུས། །ལྟ་སྒོམ་སྤྱོད་པ་གཅིག་གི་ངང་། །དེ་ཕྱིར་འབྲས་བུ་ལྷུན་གྱིས་གྲུབ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སྤྱོད་པའི་བདུད་ཟིལ་གྱིས་མནན་པའི་ལེའུ་སྟེ་ཉེར་ལྔ་པའོ།། །།དེ་ཡང་རྡོ་རྗེ་སེམས་དཔའ་ཉོན། །མཁའ་འགྲོའི་ལུང་སྟོན་བདུད་བྱུང་ན། །རང་རིག་འགྱུར་མེད་རྟོགས་པ་ལས། །གཞན་དུ་ལུང་སྟོན་བསླུ་བར་ཤེས། །རེ་དོགས་མེད་པར་ཟིལ་གྱིས་མནན། །ཉམས་མྱོང་ཞེན་པའི་བདུད་བྱུང་ན། །སྔ་ཕྱི་མེད་པའི་ཆོས་སྐུ་ནི། །ཏིང་འཛིན་རྐྱེན་གྱིས་མི་འགྱུར་ཕྱིར། །ཞེན་མེད་ལྟ་བའི་ཟིལ་གྱིས་མནན། །ཞེ་འདོད་ཚུལ་འཆོས་བདུད་བྱུང་ན། །གང་ཡང་མ་བཅོས་དོན་དྲན་ནས། །རང་བྱུང་ཆོས་སྐུའི་གདེང་ལྡན་པས། །རྟོག་པ་དྲང་པོས་ཟིལ་གྱིས་མནན། །བདེ་བ་བོགས་འདོན་བདུད་བྱུང་ན། །རང་བྱུང་ཡེ་ཤེས་རྟེན་མེད་ཕྱིར། །དབང་ལ་མི་ལྟོས་འཕེལ་འགྲིབ་མེད། །རྐྱེན་ལས་མི་འབྱུང་ཟིལ་གྱིས་མནན། །གདེང་མེད་སྐུར་འདེབས་བདུད་བྱུང་ན། །ཆོས་སྐུར་སྒྲོ་སྐུར་བྲལ་བའི་ཕྱིར། །ལུང་ལྡན་ཅན་ལ་གནོད་མི་ནུས། །ལྟ་སྤྱོད་མཁན་གྱི་ཟིལ་གྱིས་མནན། །ང་རྒྱལ་སྒྲོ་འདོགས་བདུད་བྱུང་ན། །རང་བྱུང་དོན་ལ་སྒྲོ་འདོགས་བྲལ། །ངེས་པའི་གདམས་ངག་དམ་པ་འདི། །སྣོད་ངན་གསང་བས་ཟིལ་གྱིས་མནན། །ད་ཡང་འདུས་པའི་སྙིང་པོ་ཉོན། །དེ་དག་ཉམས་ཀྱི་བདུད་དྲུག་ཀྱང་། །རྟོགས་ན་རྣལ་འབྱོར་དམ་པའི་ལམ། །དེ་ཕྱིར་ལྟ་བ་བརྗེད་མེད་བྱ། །དེ་དོན་སངས་རྒྱས་དགོངས་པ་ཡིན། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ཉམས་ཀྱི་བདུད་ཟིལ་གྱིས་གནན་པར་བསྟན་པའི་ལེའུ་སྟེ་ཉེར་དྲུག་པའོ།། །།རྡོ་རྗེ་སེམས་དཔས་ཡང་ཞུས་པ། །སངས་རྒྱས་རྣམ་བཞི་ཇི་ལྟར་དབྱེ། །བར་དོར་སངས་ནི་ཇི་ལྟར་རྒྱ། །སངས་རྒྱས་མཛད་སྤྱོད་ཇི་ལྟར་འབྱུང་། །ཀུན་རིག་རྒྱལ་པོས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །དང་པོ་རྒྱུ་ཡི་སངས་རྒྱས་ནི། །རང་བྱུང་ངོ་བོ་ཉིད་ཀྱི་སྐུ། །སེམས་ཅན་ཀུན་གཞིའི་མུན་གསེབ་ན། །རང་བྱུང་མ་རིག་སྒྲིབ་པ་སྟེ། །དེ་ཡི་གཏན་ཚིགས་ངེས་པ་ནི། །རྟག་ཆད་བྲལ་ཀྱང་ངོ་མ་ཤེས། །འཁོར་འདས་གཉིས་ཀ་སེམས་ ― DNG002_Page_0288 ―
[མ་དཔེ་གཟིགས་ན་འདིར་གནོན།]
ལ་རྫོགས། །དེ་ཡིས་དེ་ཉིད་མཚོན་པའི་དཔེ། །ཏིལ་ལ་མར་གྱིས་ཁྱབ་པ་ལྟར། །ནམ་མཁའ་ཨ་དང་རྡོ་རྗེ་ཡིས། །ཕྱོགས་འགའ་འདྲ་བའི་དཔེ་ཡིས་མཚོན། །འབྲས་བུ་རང་ལ་ཡོད་པའི་ཕྱིར། །རྒྱུ་རྐྱེན་གཞན་ལ་རག་མ་ལུས། །དེ་ཕྱིར་རང་བྱུང་ཀུན་ཁྱབ་དེས། །གཞན་དོན་བྱས་ཟིན་བཙལ་མི་དགོས། །དེ་ཡང་འདུས་པའི་སྙིང་པོ་ཉོན། །རྟོགས་པ་སྐད་ཅིག་སངས་རྒྱས་དེ། །ངོ་བོ་ཀུན་གཞི་གཞི་ཆ་ལ། །ལུང་ལྡན་བླ་མས་དོན་བསྟན་པས། །མ་རིག་སངས་ནས་རིག་པ་རྒྱས། །དེ་ཡི་ཆེད་དུ་གཏན་ཚིགས་ནི། །འཁོར་འདས་འབྱུང་བའི་གློ་བུར་ངེས། །གཞི་ལ་མེད་པས་རང་ཡིད་ཆེས། །དེ་ཕྱིར་རྩོལ་བའི་ནད་དང་བྲལ། །དེ་ཡིས་དེ་ཉིད་མཚོན་པའི་དཔེ། །མུན་ཁང་སྒྲོན་མ་བཏེག་པ་དང་། །ནམ་ལངས་ཉི་མ་ཤར་བ་དང་། །ལོང་བས་རིན་ཆེན་རྙེད་པ་འདྲ། །དེ་ཡི་འབྲས་བུ་ངེས་པ་ནི། །བག་ཆགས་ཉོན་མོངས་ཟིལ་གྱིས་མནན། །ཡུལ་མེད་རང་རིག་ཆོས་སྐུར་ལྡན། །དེ་ལ་ཡིད་ཆེས་འབྲས་བུའི་མཆོག །དེ་ཡང་རྡོ་རྗེ་སེམས་དཔའ་ཉོན། །ལམ་ལ་གནས་པའི་སངས་རྒྱས་དེ། །ངོ་བོ་ལྟ་བ་གཞི་དེས་ཕྱིར། །རྒྱུན་དུ་འབྲལ་མེད་ལྷག་མཐོང་གསལ། །ཡེ་ཤེས་ངོས་ཟིན་ཡེངས་པ་མེད། །དེ་ཕྱིར་ལམ་ཆེན་ཆོས་སྐུའི་ཀློང་། །དེ་ཡི་ཡིད་ཆེས་གཏན་ཚིགས་ནི། །ཉོན་མོངས་མི་འབྱུང་བག་ཆགས་བྲལ། །སྤང་སྡུད་ཞེན་པའི་རྟོག་པ་སངས། །རང་རིག་སྒྲིབ་མེད་ཡེ་ཤེས་རྒྱས། །དེ་ཡིས་དེ་ཉིད་མཚོན་པའི་དཔེ། །མར་མེ་རླུང་གིས་མ་བསྐྱོད་དང་། །སྤྲིན་མེད་ཉི་མ་རང་གསལ་དང་། །མི་གཡོ་རྒྱ་མཚོ་དྭངས་པ་འདྲ། །འབྲས་བུ་ཡེ་ཤེས་དེ་ཉིད་ནི། །ལྟ་བ་གདེང་ལྡན་ཡིད་ཆེས་པའི། །རང་རིག་ཡེ་ཤེས་ཉམས་ཤར་བས། །འཁོར་བར་ལྟུང་མེད་འབྲས་བུའི་མཆོག །ད་ཡང་འདུས་པའི་སྙིང་པོ་ཉོན། །འབྲས་བུ་མངོན་གྱུར་སངས་རྒྱས་ཏེ། །རང་རིག་ངོ་བོ་ཉིད་ཀྱི་སྐུ། །ཡེ་ཤེས་ཐུགས་ཀྱིས་ཐམས་ཅད་མཁྱེན། །ངེས་པའི་དོན་ལ་འགྱུར་བ་མེད། །ཡིད་ཆེས་ངེས་པའི་གཏན་ཚིགས་ནི། །ལུས་དང་བྲལ་བའི་བར་དོ་ལ། །མ་རིག་སྒྲིབ་པ་ཐམས་ཅད་སངས། །རང་བྱུང་རིག་པའི་ཡེ་ ― DNG002_Page_0289 ―
[མ་དཔེ་གཟིགས་ན་འདིར་གནོན།]
ཤེས་རྒྱས། །དེ་ཡི་མཐུན་དཔེ་མཚོན་པ་ནི། །ཡིད་བཞིན་ནོར་བུ་རིན་པོ་ཆེ། །དགོས་འདོད་ཐམས་ཅད་འབྱུང་བ་དང་། །ཅི་བསམ་འགྲུབ་པའི་དཔེ་དང་འདྲ། །དེ་ཡི་འབྲས་བུ་ངེས་པ་ནི། །རང་རིག་ཆོས་སྐུ་ཡེ་ཤེས་ལ། །གཟུགས་སྐུ་རྣམ་གཉིས་དུས་གཅིག་འབྱུང་། །འགྲོ་དོན་མཛད་ཀྱང་སྐྱོན་མི་གོས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་རྣམ་པ་བཞིའི་དབྱེ་བ་བསྟན་པའི་ལེའུ་སྟེ་ཉེར་བདུན་པའོ།། །།ཀུན་རིག་སྟོན་པས་བཀའ་སྩལ་པ། །རྣལ་འབྱོར་རྟོགས་པའི་གདེང་ལྡན་པས། །ཚེ་ཡི་ཐ་མ་འཆི་བའི་དུས། །ས་ཆུ་མེ་རླུང་རིམ་ཐིམ་སྟེ། །དབུགས་ནི་ཐུམ་ཐུམ་བྱེད་པའི་ཚེ། །འདི་ཡི་སྣང་བ་ནུབ་ཀ་དང་། །ཕྱི་མའི་སྣང་བ་འཆར་ཀ་རུ། །རྣམ་ཤེས་སྣང་བ་སྐྱེས་པའི་ཚེ། །དུ་བ་སྨིག་རྒྱུ་ལྟ་བུར་མཐོང་། །འབྱུང་བ་དངོས་མེད་ཞིག་པ་སྙམ། །དེ་ཚེ་སྣང་བ་འདི་ནུབ་ནས། །རང་སྣང་མཆེད་པ་སྲིན་བུ་མེ། །བག་ཙམ་གསལ་བའི་དོན་མཐོང་སྟེ། །སྣང་བ་ཐོབ་པའི་དུས་སུ་ནི། །མར་མེའི་རྩེ་ལྟར་རྟག་པ་དཀའ། །དེ་ནས་ཡེ་ཤེས་བརྟན་པའི་དུས། །ནམ་ལངས་ཉི་མ་ཤར་བ་ལྟར། །རང་རིག་ཆོས་སྐུར་ཝལ་གྱིས་གསལ། །ཡུལ་མེད་རིག་པ་རང་བྱུང་ཐུགས། །ས་ཟིན་ངེས་པའི་ཡེ་ཤེས་དེ། །སྔར་གོམས་དབང་གིས་འགྱུར་བ་མེད། །དཔེར་ན་ཁབ་ལེན་ལྕགས་འདུ་བཞིན། །རང་རིག་ཆོས་སྐུ་ངོས་ཟིན་པས། །སངས་རྒྱས་ཡོན་ཏན་ཐམས་ཅད་འདུས། །ད་ཡང་རྡོ་རྗེ་སེམས་དཔའ་ཉོན། །རང་བྱུང་རང་རིག་ཡེ་ཤེས་ནི། །སང་ངེས་ལ་ལེ་ཡེ་རང་གསལ། །དེ་ཕྱིར་རང་བྱུང་ཡེ་ཤེས་སྐུ། །ཕྱིས་ནི་བར་དོར་ལུས་མི་ལེན། །ཡུལ་ལ་མི་འཇུག་ཆགས་སྡང་མེད། །མངལ་དུ་འཇུག་པ་མེད་པའི་ཕྱིར། །སངས་རྒྱས་ཞེས་ནི་དེ་ལ་བྱ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་པའི་དུས་བསྟན་པའི་ལེའུ་སྟེ་ཉེར་བརྒྱད་པའོ།། །།སྟོན་པས་འཁོར་ལ་ཡང་གསུངས་པ། །སངས་རྒྱས་ཆོས་སྐུའི་མཛད་སྤྱོད་ཀྱང་། །ཡེ་ཤེས་ལུས་ཅན་ཆོས་སྐུ་ནི། །རྟོག་མེད་རང་བྱུང་ཡེ་ཤེས་ཐུགས། །ཐམས་ཅད་མཁྱེན་པའི་རིག་པ་གསལ། །སངས་རྒྱས་ཀུན་གྱི་ཐུགས་སུ་བཤད། །རང་བྱུང་མིག་གིས་ཐམས་ཅད་གསལ། །ཡེ་ཤེས་སྤྱན་གཅིག་དྲི་མ་མེད། །མཐོང་ལ་མི་རྟོག་དུས་མཉམ་ཕྱིར། །ཆོས་ཀྱི་སྐུ་ཡི་སྤྱན་ཞེས་བྱ། །ད་ཡང་རྡོ་རྗེ་སེམས་དཔའ་ཉོན། །མཉམ་ཉིད་མི་གཡོ་རང་བྱུང་སྙན། །དངོས་མེད་སྒྲ་ཐོས་རྗེས་འབྲངས་བྲལ། །དེ་ཐོས་ཆོས་ཉིད་རང་བྱུང་སྒྲ། །དེ་ཡང་འགྱུར་མེད་ཡེ་ཤེས་སྙན། ། ― DNG002_Page_0290 ―
[མ་དཔེ་གཟིགས་ན་འདིར་གནོན།]
གདངས་གསལ་འགྱུར་མེད་ཉམས་ཀྱི་དྲི། །རྟོག་མེད་ཚོར་བ་བྱང་ཆུབ་སྐུ། །ཡེ་ཤེས་སྣ་ཡིས་དྲི་མཆོག་ཚོར། །དེ་ལ་ཞེན་མེད་སངས་རྒྱས་ཤངས། །ད་ཡང་རྡོ་རྗེ་སེམས་དཔའ་ཉོན། །ཆོས་སྐུ་རོ་མཆོག་ཉམས་སུ་བསྟར། །སྨྲ་མེད་བདེ་གསལ་སངས་རྒྱས་ལྗགས། །ཡེ་ཤེས་ལྗགས་ཀྱིས་རང་རིག་མྱོང་། །དེ་དོན་དགོངས་པ་རང་བྱུང་སྐུ། །ད་ཡང་འདུས་པའི་སྙིང་པོ་ཉོན། །དངོས་མེད་རིག་གསལ་ཡེ་ཤེས་ལུས། །ཡེ་ཤེས་སྐུ་ལ་སྐྱེ་ཤི་མེད། །དེ་དོན་མི་འགྱུར་ཡོན་ཏན་རྫོགས། །དེ་ཕྱིར་སངས་རྒྱས་ཆོས་ཀྱི་སྐུ། །དེ་ལྡན་སྐད་ཅིག་དུས་དེ་རུ། །གཟའ་སྐར་གཟུགས་བརྙན་རྒྱ་མཚོ་བཞིན། །དུས་གཅིག་འཛམ་གླིང་ཕྲག་བརྒྱ་རུ། །འགྲོ་དོན་གཟུགས་སྐུ་དུས་གཅིག་ཁྱབ། །ཅི་རིགས་པ་ཡི་ཆོས་རྣམས་སྟོན། །དཔེ་ནི་སྤྲིན་མེད་ནམ་མཁའ་འདྲ། །རྟགས་ནི་སངས་རྒྱས་ཆོས་སྐུ་མཁྱེན། །དེ་ཡི་ཡོན་ཏན་བརྗོད་མི་ལངས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་ཀྱི་མཛད་སྤྱོད་བསྟན་པའི་ལེའུ་སྟེ་ཉེར་དགུ་པའོ།། །།རྡོ་རྗེ་སེམས་དཔས་ཡང་ཞུས་པ། །མ་རྟོགས་འཁོར་བར་འཁྱམས་པ་དང་། །གདམས་ངག་མེད་པའི་སྐྱོན་ནི་གང་། །དེ་ཡི་ལྟུང་སྒོ་གང་དུ་ལྟུང་། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འཁོར་གྱི་ཚོགས་ལ་བཀའ་སྩལ་པ། །རྒྱུད་ལུང་མན་ངག་ཆོས་རྣམས་ཀུན། །སྣང་བ་བཞི་རུ་བློས་བྱས་ནས། །སྒྲོ་སྐུར་གཉིས་ལ་ཞེན་པའི་ཕྱིར། །བྱས་པའི་དོན་མེད་སྡུག་བསྔལ་སྣོན། །ད་ཡང་རྡོ་རྗེ་སེམས་དཔའ་ཉོན། །དཔེར་ན་བྱ་སྒྲོ་རླུང་ཁྱེར་ལྟར། །ངེས་མེད་གཞི་ལ་བློ་གཏད་ནས། །མ་རྟོགས་རྩོལ་བསྒྲུབ་ཅི་སྤྱད་ཀྱང་། །མི་གྲོལ་དུག་ལྔ་རྒྱས་པར་འགྱུར། །དམུས་ལོང་བྱང་ཐང་འཁོར་བ་བཞིན། །ངེས་དོན་མ་རྟོགས་ཅི་བསྒོམས་ཀྱང་། །ཤེས་རབ་མིག་མེད་བག་ཆགས་བརྟས། །གོལ་ས་མི་ཆོད་ནོར་བའི་ལམ། །དེ་ཡང་འདུས་པའི་སྙིང་པོ་ཉོན། །དཔེར་ན་འདབ་ཆགས་གཤོག་ཆག་ལྟར། །ལྟ་སྤྱོད་གཅིག་ཏུ་མ་ཤེས་པས། །རེས་འཇོག་བླང་དོར་བློས་བྱས་ཕྱིར། །མ་རྟོགས་ཆོས་སྤྱོད་ལས་རྣམས་ ― DNG002_Page_0291 ―
[མ་དཔེ་གཟིགས་ན་འདིར་གནོན།]
འཁྲུགས། །ས་བོན་མ་བཏབ་སོ་ནམ་བཞིན། །ངེས་དོན་མ་རྟོགས་ཆོས་སྤྱོད་ཀྱང་། །འབྲས་བུ་མེད་ཅིང་རང་བརླག་ནས། །མནར་མེད་འཁོར་བའི་རྒྱ་མཚོར་ལྟུང་། །དེ་ཕྱིར་མན་ངག་མེད་པའི་ཆོས། །ལུས་ངག་ལས་སུ་སྤྱད་གྱུར་ཀྱང་། །སྡུག་བསྔལ་རྒྱུ་ལས་ཕན་མི་ནུས། །མ་རྟོགས་ཆོས་སྐུ་དེ་བཞིན་ནོ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། མ་རྟོགས་པ་འཁྱམས་པའི་ལེའུ་སྟེ་སུམ་ཅུ་པའོ།། །།ཀུན་རིག་སྟོན་པས་བཀའ་སྩལ་པ། །འཁོར་འདས་གཉིས་ཀྱི་བར་དོ་ཡི། །ཐོག་མཐའ་གཅོད་པའི་དོན་མེད་ན། །ས་མཁན་མེད་པའི་ཚོང་པ་བཞིན། །སྐྱེ་ཤིའི་སྡུག་བསྔལ་ལས་མི་ཐར། །སྐྱེ་ཤི་གཉིས་ཀྱི་བར་དོ་རུ། །ཆོས་སྐུ་ངོ་སྤྲོད་དོན་མེད་ན། །སྒྲོན་མེ་མེད་པའི་མུན་པ་བཞིན། །མ་རིག་པ་ལ་སངས་དུས་མེད། །ད་ཡང་རྡོ་རྗེ་སེམས་དཔའ་ཉོན། །དུས་བཞི་མཉམ་པར་སྤྱོར་བ་ཡི། །རྒྱུན་དུ་འབྲལ་མེད་དོན་མེད་ན། །ཆུ་བྲན་ཐན་པས་སྐམས་པ་བཞིན། །ལྟ་བ་སྒོམ་པས་རྐྱེན་མི་ཐུབ། །སྲིད་པ་དག་གི་བར་དོ་ནི། །སངས་རྒྱས་དུས་ཀྱི་དོན་མེད་ན། །རིན་ཆེན་འདམ་དུ་སྟོར་བ་འདྲ། །འབྲས་བུ་མི་འབྱུང་མངལ་དུ་འཇུག །ད་ཡང་འདུས་པའི་སྙིང་པོ་ཉོན། །ཐེག་པ་གཞན་དང་རྩོད་དུས་སུ། །གལ་མདོ་ངེས་པའི་དོན་མེད་ན། །གོ་མཚོན་མེད་པའི་དཔའ་བོ་བཞིན། །མན་ངག་ཟབ་མོའི་ཁྱད་མི་ཐོན། །དེ་ཕྱིར་གོལ་ས་དེ་དག་གིས། །རང་སེམས་སྙིང་པོ་མ་རྟོགས་ཕྱིར། །གདམས་ངག་མེད་ཕྱིར་འཁོར་བའི་སྐྱོན། །བསྐལ་པར་བགྲངས་ཀྱང་དེ་མི་ཐོབ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། གདམས་ངག་མེད་པའི་སྐྱོན་བསྟན་པའི་ལེའུ་སྟེ་སོ་གཅིག་པའོ།། །།དེ་ནས་ཀུན་རིག་རྒྱལ་པོ་ཡིས། །དད་ལྡན་འཁོར་ལ་བཀའ་སྩལ་པ། །མི་རྟོག་དབྱིག་གུའི་ཐུན་ཚོད་ཀྱིས། །མདོ་སྡེ་ཁ་ཏོན་བཏོན་གྱུར་ཀྱང་། །བདག་བསྟོད་གཞན་ལ་སྨད་པ་ཡིས། །ངན་སོང་སྒོ་རུ་ངེས་པར་ལྟུང་། །གཞན་གྱི་བསམ་སྦྱོར་བཟང་པོ་ལ། །བར་ཆོད་བྱེད་པའི་བདུད་ཡིན་ཏེ། །མ་རྟོགས་སེར་སྣ་བྱེད་པ་ཡིས། །བདུད་ཀྱི་སྒོར་ལྟུང་འཁོར་བར་འཁྱམས། ། ― DNG002_Page_0292 ―
[མ་དཔེ་གཟིགས་ན་འདིར་གནོན།]
གཞན་གྱི་ཆོས་ལ་ཕྲག་དོག་པས། །ཡོན་ཏན་མང་དུ་ལྡན་གྱུར་ཀྱང་། །རང་སེམས་སྙིང་པོ་མ་རྟོགས་ན། །གནོད་སྦྱིན་སྒོར་ལྟུང་རྟག་ཏུ་འཁོར། །མཉམ་ཉིད་མ་རྟོགས་རང་རྒྱུད་དུ། །ཆགས་སྡང་ཕོ་ཚོད་སྤྱོད་པའི་ལས། །དུག་ལྔ་རང་ཁར་སྤྱད་ཉེས་པས། །སྲིན་པོའི་སྒོར་ལྟུང་རྟག་ཏུ་འཁོར། །རང་དབང་ཏིང་འཛིན་མ་ཐོབ་པར། །འཁོར་དང་རིས་སུ་གཅད་བསམ་པས། །བདག་ཉིད་ཆེ་འདོད་འཁོར་སྡུད་པ། །ཤོ་གམ་གཅན་ཆེན་རྟག་ཏུ་འཁོར། །ཇི་བཞིན་མ་ནོར་མ་རྟོགས་པར། །ལྟ་ལོག་གཞན་གྱི་སློབ་དཔོན་བྱེད། །རང་ཉིད་མི་ཤེས་གཞན་གྲོལ་བ། །རུ་ཏྲའི་སྒོར་ལྟུང་རྟག་ཏུ་འཁོར། །ཚིག་ཚོགས་ཕྲིན་ལས་ཅི་མཁས་ཀྱང་། །མ་རྟོགས་དངོས་པོར་འཛིན་པ་ཡིས། །རང་རྒྱུད་དམ་རྫས་མངོན་ཞེན་ཕྱིར། །བགེགས་དང་བྱ་རོག་སྒོར་ལྟུང་འཁོར། །ཐབས་ལམ་དབང་ལ་ཁུངས་ཕྱུང་སྟེ། །འདོད་ཆགས་རང་ཁར་བསྟེན་བྱས་པས། །ལྟ་བས་མ་ཟིན་བདེ་ལ་ཞེན། །ལྷ་ཆེན་སྒོར་ལྟུང་འཁོར་བར་འཁྱམས། །མ་རྟོགས་ང་དང་བདག་འཛིན་པས། །གསང་སྔགས་ལྟ་སྤྱོད་ཡིན་ཟེར་ནས། །སེམས་ཅན་སྲོག་ལ་བརྩེ་མེད་གཅོད། །མུ་སྟེགས་རྟག་ཆད་སྒོར་ལྟུང་འཁྱམས། །ད་ཡང་འདུས་པའི་སྙིང་པོ་ཉོན། །མ་རྟོགས་དབང་གིས་རྩིང་སྤྱོད་པ། །ལུས་ངན་འདི་ཡིས་ལེན་པའི་ཕྱིར། །ལས་ངན་དགུ་པོ་གང་སྤྱད་ཀྱང་། །དམྱལ་བར་ངེས་འགྲོ་གཏན་དུ་འཁྱམས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། མ་རྟོགས་པའི་ལྟུང་སྒོ་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་དོན་གཏད་པ། །ཐེག་པའི་རྒྱལ་པོ་ལྷུན་རྫོགས་འདི། །དད་ལྡན་འཁོར་རྣམས་ཁྱེད་ཀྱིས་ཀྱང་། །རྒྱུད་འདི་ཡིད་ལ་བརྣགས་ཤིང་བཅང་བར་གྱིས། །ཡང་དག་ངེས་པའི་རྒྱུད་ཆེན་འདི། །དད་མེད་སྣང་འཚོང་ཉམས་པ་ལ། །འདི་སྤེལ་སློབ་དཔོན་བསྒྲལ་བའི་གནས། །འདི་ལ་ཡིད་དུ་མི་འོང་རྐྱེན་རྣམས་འབྱུང་། །དེ་ཡང་རྡོ་རྗེ་སེམས་དཔའ་ཉོན། །སྣོད་དང་མི་ལྡན་མི་ངན་ནི། །ཚུལ་ རྫོགས་པ་ཆེན་པོ་མ་རིག་མུན་པ་རབ་ཏུ་སེལ་བར་བྱེད་པའི་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ཅེས་བྱ་བ།― DNG002_Page_0293 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྡྷྱ་བིདྱཱ་ཏ་མཿཔྲ་ཏྱཱ་དེ་ཤ་དྲྀཥྚི་ཛྙཱ་ན་ནི་མྣ་པཱུ་ར་ཎ་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོ་མ་རིག་མུན་པ་རབ་ཏུ་སེལ་བར་བྱེད་པའི་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ཅེས་བྱ་བ། བཅོམ་ལྡན་འདས་དཔལ་ཀུན་རིག་ཆོས་ཀྱི་རྗེ་ཡེ་ཤེས་ཀྱི་སྐུ་དང་ལྡན་པ་དེ་ལ་ཕྱག་འཚལ་ལོ། །འདི་སྐད་གོ་ཞིང་རྟོགས་པའི་དུས་གཅིག་ན། །ཡེ་ནས་རང་བྱུང་ཀུན་རིག་རྒྱལ་པོ་དེ། །འཁོར་འདས་དོན་གྱི་གནས་ཆེན་དུ། །རང་གིས་རིག་ཅིང་ཡིད་ཆེས་དད་ལྡན་འཁོར། །གང་ཡང་མི་བརྗོད་བསྟན་པ་ལྷུན་གྱིས་བཞུགས། །སངས་རྒྱས་སེམས་ཅན་ངོ་བོ་ཉིད་ལས་བྱུང་། །ཆོས་རྣམས་ཀུན་གྱི་ཡོད་མེད་རང་བྱུང་སྐུ། །དེ་ཉིད་རང་རིག་རྟོགས་པས་ཀུན་ཏུ་བཟང་། །རང་གི་ངོ་བོ་ཡེ་ཤེས་སྟོན་པའི་མཆོག །རྣལ་འབྱོར་སྐལ་ལྡན་དམ་པ་ངེས་པའི་དོན། །ཡངས་དོག་སྔ་ཕྱི་ ― DNG002_Page_0294 ―
[མ་དཔེ་གཟིགས་ན་འདིར་གནོན།]
མེད་པའི་ཡེ་ཤེས་དེ། །སྐྱེ་འགག་མཐའ་དབུས་མེད་པའི་འོག་མིན་གྱི། །རང་བྱུང་ཀུན་ཁྱབ་ཆོས་དབྱིངས་གནས་ཀྱི་མཆོག །དེར་འདུས་ཆོས་སྐུ་ལྔ་ཡི་བྱིན་རླབས་ཀྱིས། །བདེ་གཤེགས་རྒྱལ་བ་རིགས་ལྔ་ལ་སོགས་པ། །རིག་འཛིན་སྤྲུལ་པ་དད་ལྡན་འཁོར་རྣམས་ནི། །མ་ལུས་ཡེ་ནས་འདུས་པའི་འཁོར་གྱི་མཆོག །དུས་གསུམ་གང་ཡང་མི་སེམས་ངོ་བོ་ལ། །སྔར་མེད་ཕྱིས་མིན་ཡེ་ནས་ད་ལྟ་ཉིད། །སེམས་ཉིད་གདོད་ནས་མ་བཅོས་རང་རིག་ལ། །དུས་ཀྱི་ནང་ན་གཅིག་པ་དམ་པའི་མཆོག །རང་བྱུང་ཆོས་སྐུ་སེམས་ལ་གནས་པའི་ཕྱིར། །ཡང་དག་དོན་གྱི་ངེས་དོན་ཡེ་ཤེས་དེ། །ཚིག་གིས་མི་མཚོན་གོ་བའི་གདམས་ངག་ནི། །སངས་རྒྱས་ཀུན་གྱི་ཆོས་ཉིད་བསྟན་པའི་མཆོག །དེ་ཚེ་རྡོ་རྗེ་སེམས་དཔས་དོན་ཞུས་པ། །སངས་རྒྱས་ཀུན་གྱི་དགོངས་པ་ངེས་པའི་དོན། །མ་ནོར་མ་བཅོས་རང་བྱུང་ཆོས་སྐུ་དེ། །སེམས་ཅན་བློ་ཡིས་ངེས་པར་རྟོགས་པའི་ཐབས། །ཀུན་རིག་སྟོན་པ་ཆོས་རྗེས་བཤད་དུ་གསོལ། །ཞུས་པའི་དོན་གསན་ཐུགས་ཀྱིས་བཀའ་སྩལ་པ། །ངེས་དོན་མ་ནོར་ངེས་དོན་ངས་བཤད་དོ། །སྲིད་གསུམ་མི་རྣམས་མ་ལུས་ཐམས་ཅད་ཀུན། །ངེས་པའི་དོན་གྱིས་མི་འདུལ་དྲང་དོན་གྱིས། །གནོད་བཞིན་སྲོག་སེར་སྡིག་ལ་ཕངས་མེད་འབུང་། །དམ་ལོག་མང་བས་ཚེ་ཐུང་བཀྲ་མི་ཤིས། །དེ་དུས་རྫོགས་ཆེན་སྙིང་པོའི་དོན་བཤད་ན། །ཉན་ཐོས་རང་རྒྱལ་བྱང་ཆུབ་སེམས་དཔའ་སྐྲག །རྒྱུད་ལུང་རྣལ་འབྱོར་སྒྲོ་སྐུར་འདེབས་ཤིང་འཕྱ། །ཚུལ་འཆོས་སྡེ་སངས་ཞེ་སྡང་ཕྲག་དོག་བྱེད། །ངེས་དོན་འདི་ལ་འགལ་སེམས་སྡིག་ཅན་རྣམས། །དམྱལ་བར་ངེས་འགྲོ་གཏན་དུ་སྙིང་རེ་རྗེ། །རྒྱ་མཚོ་ཀུན་བཙལ་རིན་ཆེན་རྙེད་དཀའ་བཞིན། །སྣོད་ལྡན་སློབ་མ་དད་ལྡན་ཤིན་ཏུ་དཀོན། །དེ་ཕྱིར་ཤིན་ཏུ་གསང་བའི་གཏེར་དུ་བཞག །རྫོགས་པ་ཆེན་པོ་མ་རིག་མུན་པ་རབ་ཏུ་སེལ་བར་བྱེད་པའི་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། དོན་གྱི་གླེང་གཞི་གསང་བར་གསུངས་པའི་ལེའུ་སྟེ་དང་པོའོ།། །།དེ་སྐད་གསུངས་པས་འཁོར་གྱིས་དོན་གོ་ནས། ། ― DNG002_Page_0295 ―
[མ་དཔེ་གཟིགས་ན་འདིར་གནོན།]
གདུང་བ་འདོན་ཕྱིར་ཡིད་ཀྱིས་དོན་གསོལ་པ། །མ་རིག་ལས་ཀྱིས་སྡུག་བསྔལ་འཁྱམས་པའི་སེམས། །གཟུང་འཛིན་བག་ཆགས་དབང་གིས་ཞེན་པ་ལ། །རྣམ་རྟོག་དྲ་བ་གང་གིས་བཅད་པའི་ཐབས། །ཐུགས་རྗེ་ཆེན་པོས་མི་འཛིན་ཡི་རེ་ཆད། །ཤིན་ཏུ་རྣལ་འབྱོར་བཀའ་དོན་འབྱུང་བ་དཀའ། །སེམས་ཅན་ཚེ་ཐུང་སྐྱེ་རྒས་གཏིང་ནས་ཐུག །མ་རིག་མུན་པས་གཏིབས་པ་སྙིང་རེ་རྗེ། །འགྲོ་དྲུག་འཁོར་བ་མི་སྒྲོལ་ཡི་རེ་མུག །རང་སེམས་ས་འཁོར་བདག་ལ་ས་མཁན་མཛོད། །སེམས་ཅན་ལས་ལ་ཐུགས་རྗེས་ཡི་ཆད་ཀྱང་། །སྙིང་རྗེས་འགྲོ་དོན་ཐུགས་རྗེ་མི་མཛད་དམ། །སེམས་ཅན་ལྷ་མི་རྣམས་ནི་ཤེས་པ་རྩིང་། །དབང་པོ་ཡུལ་ལ་གཡེངས་པའི་གཟུང་འཛིན་གྱིས། །འཚོ་བ་དཀོན་ལ་ནད་དང་རྐྱེན་མང་བས། །ཐར་ལམ་མི་འཐོབ་འཁོར་བར་ལྷུང་ཞིང་འཁྱམས། །ངེས་དོན་མན་ངག་རྟོགས་པར་བྱ་བའི་དོན། །བཀའ་བཞིན་སྣོད་དང་ལྡན་པར་དམ་བཅས་པས། །མ་བསྒོམས་འབྲལ་མེད་ངེས་དོན་ཐུགས་རྗེས་གསུངས། །རྫོགས་པ་ཆེན་པོའི་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། འཁོར་གྱིས་གདུང་བ་བཏོན་པའི་ལེའུ་སྟེ་གཉིས་པའོ།། །།དེ་ནས་འདུས་པའི་རྡོ་རྗེ་སེམས་དཔའ་ལ། །ཐུགས་ཀྱིས་གཟིགས་ནས་ངེས་པར་བཀའ་སྩལ་པ། །བསྒོམ་དུ་མེད་པ་མི་འབྲལ་གདམས་ངག་རྒྱུན། །ཀུན་བཟང་ང་ཡི་ཐུགས་ནས་བརྒྱུད་པ་ཡི། །ངེས་དོན་བྱིན་གྱིས་བརླབས་པའི་མཁས་པ་ལ། །རང་སེམས་རྟོགས་འདོད་སློབ་མ་ལས་ཅན་གྱིས། །དད་པས་རང་ཉིད་ཤིན་ཏུ་གུས་བྱས་ནས། །ལུས་དང་ལོངས་སྤྱོད་སྲོག་ལ་མི་བལྟ་བར། །སྲིང་མོ་བུ་མོ་ལ་སོགས་རབ་བརྒྱན་ཏེ། །རྟ་དང་གླང་པོ་ནོར་གྱི་དབྱིག་རྣམས་ཀྱང་། །སེར་སྣ་མེད་པར་བླ་མ་དག་ལ་འབུལ། །ད་ཡང་འཁོར་གྱི་སྙིང་པོ་ཉོན། །ཆོས་ཕྱིར་བརྩོན་འགྲུས་ཆེ་ལ་དམ་ཚིག་ལྡན། །བློ་བརྟན་ཤེས་རབ་ཆེ་ཞིང་དོན་གསང་ཐུབ། །ཚུལ་ཤིས་ངང་བཟང་རྣམས་ཀྱི་དོན་གྱི་གཏེར། །དེ་དག་ཡོན་ཏན་བརྒྱ་ལྡན་སློབ་མ་ལ། །རབ་ཏུ་གསང་ ― DNG002_Page_0296 ―
[མ་དཔེ་གཟིགས་ན་འདིར་གནོན།]
སྟེ་དོན་ཉིད་སྟོན་པ་ཡི། །བླ་མ་མཁས་པ་མཐའ་བཅུ་རྫོགས་པ་ལ། །མཉེན་ཞིང་དུལ་བ་ཐུགས་རྗེ་རབ་ལྡན་ཞིང་། །སྲིད་པར་ཞུས་ཀྱང་དོན་རྣམས་ཟད་མེད་པའི། །དམ་པའི་མཛོད་ཀྱི་གཏེར་ལྡན་སྟོན་ལ་མཁས། །དཔེར་ན་སེང་གེས་འཇིགས་པ་རྩད་གཅོད་བཞིན། །བློ་དངོས་གཅིག་ལ་གཏོད་ལ་གུས་པར་ཞུས། །དེ་ཡང་རྡོ་རྗེ་སེམས་དཔའ་འཁོར་རྣམས་ཉོན། །ཡང་དག་དོན་གྱི་ལྟ་བ་གསང་བ་འདི། །གང་ཟག་ཕྱིན་ཅི་ལོག་དང་ལྟ་བ་དམན། །ཐོས་པ་ཆུང་ལ་བློ་བརྟུལ་ཤེས་རབ་མེད། །ནོར་ཕོངས་ཁ་རལ་ལ་སོགས་སྣོད་མེད་ལ། །འདི་བསྟན་གཉིས་ཀ་བསྲེག་ཕྱིར་རབ་ཏུ་གསང་། །དེ་སྐད་གསུངས་མ་ཐག་ཏུ་ཡིད་དགའ་ནས། །འཁོར་རྣམས་སྣོད་ཀྱི་དོན་དང་ལྡན་པ་ནི། །ཁས་བླངས་དམ་བཅས་ནས་ནི་ཡིད་བསྡུས་ཏེ། །མགྲིན་གཅིག་གསོལ་ཏེ་ལྷགས་ནས་འཁོད་གྱུར་ཏོ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། སྣོད་བཅུད་བསྟན་པའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་ཀུན་རིག་རྒྱལ་པོ་ཡིས། །ཆེད་དུ་བརྗོད་པའི་དོན་འདི་གསུངས་པ་ནི། །འགྲོ་དྲུག་སེམས་ཅན་མེད་པའི་གོང་རོལ་དུ། །སངས་རྒྱས་མེད་པས་ཡེ་ཤེས་མིང་ཡང་མེད། །རང་བཞིན་ལྷུན་གྲུབ་སངས་རྒྱས་མ་རིག་མེད། །དེ་ཕྱིར་ཀུན་བཟང་ཉིད་ཀྱང་གློ་བུར་སངས་རྒྱས་ཏེ། །མ་བཅོས་གདོད་ནས་མི་རྟོག་བློས་བསྒོམས་ཀྱང་། །བག་ལ་ཉལ་གྱི་བག་ཆགས་ཡོད་པའི་ཕྱིར། །བྱང་ཆུབ་སེམས་དཔའ་མན་ཆད་གདེང་མེད་གོལ། །མ་རིག་སེམས་ཅན་རྣམས་ནི་ཤེས་པ་རྩིང་། །ཀུན་གཞི་རྣམ་གསུམ་བག་ཆགས་མངོན་རྒྱུ་བས། །འོག་མའི་ཕྲ་མོའི་རྣལ་འབྱོར་ཤིན་ཏུ་གོལ། །དེ་སྐད་གསང་བའི་དོན་གསུངས་མ་ཐག་ཏུ་འཁོར་རྣམས་སེམས་འགྲོགས་ནས་ཡིད་མ་རངས་ཏེ་སེམས་ཀྱི་དོན་ལ་ཐེ་ཙོམ་དུ་གྱུར་ནས། ཏིང་ངེ་འཛིན་ལ་ཡིད་འབྱུང་བར་འགྱུར་རོ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཆེད་དུ་བརྗོད་པའི་ལེའུ་སྟེ་བཞི་པའོ།། །།དེ་ནས་འདུས་ ― DNG002_Page_0297 ―
[མ་དཔེ་གཟིགས་ན་འདིར་གནོན།]
པའི་རྡོ་རྗེ་སེམས་དཔའ་ཡིས། །འཁོར་བའི་ཞེན་རྟོག་བསལ་བའི་དོན་ཆེད་དུ། །ཀུན་རིག་ཆོས་ཀྱི་རྗེ་ལ་འདི་སྐད་གསོལ། །དང་པོ་སེམས་ཀྱི་ཀུན་གཞི་ཇི་ལྟར་གནས། །དེ་ལས་བག་ཆགས་ཀུན་གཞི་ཇི་ལྟར་བྱུང་། །ལས་ཀྱི་ཀུན་གཞི་བླང་ཚུལ་ཇི་ལྟར་འཁོར། །མ་རྟོགས་སེམས་ཅན་བར་དོར་ཇི་ལྟར་འཁྱམས། །ཀུན་རིག་ཆོས་སྐུས་ངེས་པར་བཤད་དུ་གསོལ། །དེ་དོན་ཞུས་པ་ཐུགས་ཆུད་བཀའ་སྩལ་པ། །དང་པོ་སེམས་ཀྱི་ཀུན་གཞི་གནས་ཚུལ་ནི། །ཐོག་མའི་ཁུངས་དང་ད་ལྟ་ཐ་མ་ཡི། །ངོ་བོ་ངེས་ཚིག་ཆེ་ཆུང་ཤས་སུ་དབྱེ། །མཚན་ཉིད་གཉེན་པོ་ལས་དང་རྩལ་དང་ཡུལ། །དཔེ་རྟགས་སྒོ་ནས་བསྟན་པ་ཤིན་ཏུ་གསུངས། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །དང་པོ་སེམས་ཀྱི་ཀུན་གཞི་ཐོག་མར་ཡང་། །གང་ལ་མི་རྟོག་དོན་གྱིས་མ་ཟིན་པ། །དེ་ཉིད་མ་ཤེས་ལྷན་ཅིག་མ་རིག་པ། །དེར་རྟོག་ཞུགས་པས་སེམས་ཀྱི་ཀུན་གཞི་བྱུང་། །དེ་ཉིད་ད་ལྟ་ག་ན་གནས་པའི་རྟེན། །འགྲོ་དྲུག་སེམས་ཅན་ཐམས་ཅད་མ་ལུས་དང་། །ཉན་ཐོས་རང་རྒྱལ་བྱང་ཆུབ་སེམས་དཔའ་ལ། །ཀུན་དང་ཐུན་མོང་མ་ཡིན་ཚུལ་དུ་གནས། །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །སེམས་ཀྱི་ཀུན་གཞི་ཐ་མ་གར་འགྲོ་ན། །གཉེན་པོ་ཡེ་ཤེས་ལུང་ལྡན་རང་ཤར་ནས། །ཅིག་ཅར་རིམ་གྱིས་ངེས་པར་ངེས་པ་སྟེ། །དེ་དོན་མ་སྤྲད་ས་ཟིན་ངེས་པ་མེད། །ངོ་བོ་བཞི་ཡི་དོན་ཉིད་མ་ཤེས་ཕྱིར། །ཤེས་པ་བག་ཆགས་གཉིད་ལོག་ཀུན་གཞི་སྟེ། །རས་དཀར་ལ་ནི་སྣུམ་ཞེན་དཔེ་བཞིན་དུ། །ཆོས་ཉིད་མ་རིག་རྟོག་པའི་ངོ་བོར་གནས། །དེ་ཡང་འཁོར་གྱི་སྙིང་པོ་ཡང་ཉོན་ཅིག །སེམས་ཀྱི་ཀུན་གཞི་ངེས་ཚིག་སྣང་བ་ལ། །རྣམ་ཤེས་སྣ་ཚོགས་ཡུལ་ལ་སེམས་པའི་ཕྱིར། །མེད་པའི་ཆོས་ལ་ཡང་དག་ངེས་པར་འཛིན། །ཐག་པ་ལ་ནི་སྦྲུལ་སྙམ་སེམས་འཁྲུལ་འདྲ། །སེམས་ཅན་ཀུན་ལ་ཤས་ནི་ཆེ་ཆུང་ཡོད། །ཉན་ཐོས་བྱང་ཆུབ་སེམས་ལ་གཉེན་པོ་ནི། །བག་ཉལ་ཕྲ་བ་ཤིན་ཏུ་ཕྲ་བར་གནས། །མངོན་དུ་རྒྱུ་བ་མེད་པ་ཉོན་མོངས་དག །རྒྱུ་རྐྱེན་མཚན་ཉིད་གཉེན་པོས་འཇིག་ ― DNG002_Page_0298 ―
[མ་དཔེ་གཟིགས་ན་འདིར་གནོན།]
པའི་ཕྱིར། །ཐ་མ་སོ་སོར་དེངས་པ་དངོས་པོ་མེད། །ད་ལྟ་ཀུན་གཞི་ཇི་སྲིད་ཡོད་ཀྱི་བར། །རྒྱུན་མི་འཆད་དང་དུས་གསུམ་འགག་པ་མེད། །དེ་ཡང་འཁོར་གྱི་འདུས་པའི་སྙིང་པོ་ཉོན། །ཐུན་མོང་གཉེན་པོའི་རིགས་ནི་སྦྱིན་སོགས་བཞིས། །ཉོན་མོངས་བག་ཆགས་ཁད་ཀྱིས་རང་ཞི་སྟེ། །བསམ་གཏན་ཤེས་རབ་མ་རིག་ལོག་ལྟ་འཇོམས། །ཐུན་མོང་མ་ཡིན་ཡེ་ཤེས་ཅིག་ཆར་རྫོགས། །དགེ་སྡིག་ལས་ཀྱིས་རྒྱུ་མཐུན་གང་རུང་སྐྱེ། །རྣམ་སྨིན་ལས་ནི་རིམ་གྱིས་མ་ཡིན་ཏེ། །མྱུར་དུ་བར་མ་ཆོད་ནས་འབྲས་བུ་སྨིན། །ལུང་དུ་མ་བསྟན་འབྲས་བུ་ངེས་པ་མེད། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །བག་ཆགས་བཟང་ངན་རྩལ་ནི་རིགས་དྲུག་སྟེ། །བདེ་སྡུག་བྱེ་བྲག་སོ་སོར་མྱོང་བ་ལ། །ཆ་ཕྲ་རྩལ་ནི་ཉན་ཐོས་སེམས་དཔའ་ལ། །ཡེ་ཤེས་མེ་ལོང་ལྟ་བུར་རང་སྣང་གནས། །མཚོན་དཔེ་རས་དང་མར་དང་ནམ་མཁའ་དང་། །ཆུ་དང་མེ་ལོང་ཁ་དོག་ལ་སོགས་རྣམས། །གཞི་ལ་རྒྱུ་ཡི་རྐྱེན་བྱུང་མ་རིག་པ། །མེད་ལས་བྱུང་བ་ཡ་མཚན་ཆེར་གྱུར་ཏོ། །ཀུན་གཞི་དངོས་པོར་མེད་ལ་སེམས་སུ་འདོད། །དུ་ཡོད་ཕྱིར་ན་མེ་ཡོད་ངེས་པ་བཞིན། །དེ་ལས་སྐྱེ་བའི་འབྲས་བུ་དགེ་སྡིག་ལ། །སེམས་པའི་རྟགས་སུ་ལུས་ངག་ཡིད་གསུམ་འགྲུབ། །ད་ཡང་འདུས་པའི་འཁོར་རྣམས་ཡང་ཉོན་ཅིག །དེ་དག་དབྱེ་བ་བསྟན་པ་བློ་དམན་ལ། །ཡིད་ཆེས་བྱ་ཕྱིར་མཚོན་པར་བསྟན་པ་ཡིན། །དོན་ལ་མ་རིག་པ་ལ་སེམས་སུ་གདགས། །གཟུང་འཛིན་འཁོར་བ་བསྐྱེད་ཕྱིར་ཀུན་གཞི་ཡིན། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། གཞི་གནས་སེམས་ཀྱི་ཀུན་གཞི་བསྟན་པའི་ལེའུ་སྟེ་ལྔ་པའོ།། །།དེ་ནས་འདུས་པའི་འཁོར་གྱི་སྙིང་པོ་ལ། །ཀུན་རིག་སྟོན་པ་ཆོས་རྗེས་ཡང་གསུངས་པ། །བག་ཆགས་ཀུན་གཞི་འཕྲལ་བྱུང་དང་པོའི་ཁུངས། །ད་ལྟ་གནས་དང་ཐ་མར་གར་འགྲོ་བའི། །ངོ་བོ་མཚན་ཉིད་ངེས་ཚིག་ལས་དང་དཔེ། །རྟགས་དང་གཉེན་པོ་དབྱེ་བ་རྩལ་དང་གྲངས། །དེ་དག་དོན་དུ་བསྡུས་ཏེ་གསུངས་པ་ ― DNG002_Page_0299 ―
[མ་དཔེ་གཟིགས་ན་འདིར་གནོན།]
ཡིན། །དེ་ཡང་རྡོ་རྗེ་སེམས་དཔའ་ད་ཡང་ཉོན། །ཐོག་མ་མཐའ་དྲུག་རྟོག་པ་ལས་བྱུང་བ། །གང་ཡང་མི་རྟོག་ཤེས་པ་དོན་མ་རིག །རང་ཉིད་ཡེངས་པའི་ཚུལ་གྱིས་རྟོག་པ་འཕྲོས། །མི་རྟོག་རང་སྣང་སྒྲིབ་པ་བག་ཆགས་བརྟས། །མ་རིག་བག་ཆགས་སྔ་མའི་རྒྱུ་ལ་བརྟེན། །འགེག་པ་མ་རིག་པས་ནི་སྡུག་བསྔལ་འབྱུང་། །ཆོས་སྐུ་མི་འགྱུར་བ་ལ་འཁོར་བ་བརྟེན། །དེ་ཕྱིར་ལུས་དང་སེམས་ལ་བག་ཆགས་ཡོད། །དེ་ཡང་འདུས་པའི་སྙིང་པོ་ཡིད་ཀྱིས་ཉོན། །ཐ་མ་གར་འགྲོ་དུས་ལ་ངེས་མེད་རྐྱེན། །ཡེ་ཤེས་ཕྲད་ན་མ་རིག་བག་ཆགས་བརླག །དེ་མེད་བག་ཆགས་དག་པའི་ཐབས་མེད་དེ། །ཉི་མའི་སྣང་མེད་མུན་པ་མི་འབྲོས་འདྲ། །ངོ་བོ་རྫུན་ལ་ཐོག་མར་བདེན་བཟུང་ནས། །རྟོག་རྟོག་ཞེན་ཞེན་བློ་བརྟས་རྒྱུད་ལ་གནས། །དེ་ལྟར་ཐ་མར་བག་ཆགས་རྒྱུན་མི་འཆད། །དེ་ཕྱིར་འཁོར་བ་འབའ་ཞིག་ཡང་ཡང་སྐྱེ། །མཚན་ཉིད་གཅིག་གིས་གཅིག་བསྐྱེད་ཡོངས་སུ་འགྱུར། །དེ་ཡི་འབྲས་བུ་རིམ་དང་སོ་སོར་སྨིན། །རྒྱུ་རྐྱེན་ཚོགས་དང་ཡེ་ཤེས་གཉེན་པོས་འཇིག །བཟང་ངན་ཆེ་ཆུང་ཅི་འདྲ་དེ་ལྟར་བརྟེན། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །བག་ཆགས་ཀུན་གྱི་གཞི་ནི་རྟོག་པ་སྟེ། །ངེས་ཚིག་རྟོག་རྒྱུན་ཤིན་ཏུ་ཆ་ཕྲ་སྟེ། །བག་ཙམ་ལ་བརྟེན་རྟོག་པ་རགས་བརྟས་པས། །བག་ཆགས་ཀུན་གཞི་སྣང་བ་ཡུལ་དུ་འབྱུང་། །ལས་ནི་འབྲས་བུ་གང་རུང་སྨིན་པར་བྱེད། །དེ་ཡང་ཐོག་མར་བཅས་དང་ཐོག་མ་མེད། །གང་སྨིན་ཕྲ་རགས་ཟིལ་གནོན་བག་ཆགས་ཆུང་། །ལུང་དུ་མ་བསྟན་འབྲས་བུ་སྨིན་མི་ནུས། །དེ་དཔེ་ནམ་མཁའ་སྤྲིན་དང་ས་ཞག་སྣུམ། །གཡའ་རྡུལ་ལྦུ་བ་ལ་སོགས་བག་ཆགས་དཔེར། །འདྲ་བ་ཡོད་ཀྱང་དོན་མིན་མཚོན་པར་ཟད། །གློ་བུར་འབྱུང་ཕྱིར་ཡུལ་ནི་གཞི་ལ་མེད། །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །བག་ཆགས་ཀུན་གཞིའི་རྟགས་ནི་ཕུང་པོ་ལྔ། །བག་ཆགས་རྒྱུ་མཐུན་རྣམ་པར་སྨིན་པ་སྟེ། །ཕུང་པོ་ལྔ་དང་དུས་གསུམ་མི་འབྲལ་ཕྱིར། །འཁྲུལ་པ་བརྟས་པའི་རྟགས་སུ་བསྟན་པ་ཡིན། །གཉེན་ ― DNG002_Page_0300 ―
[མ་དཔེ་གཟིགས་ན་འདིར་གནོན།]
པོ་ཐུན་མོང་བ་དང་མ་ཡིན་གཉིས། །ཐུན་མོང་དད་པ་བརྩོན་འགྲུས་བཟོད་པ་དང་། །མོས་པས་དྲངས་པའི་ཏིང་འཛིན་ལ་སོགས་རྣམས། །ཐུན་མོང་མ་ཡིན་ཡེ་ཤེས་མ་རིག་དག །དབྱེ་བ་བག་ལ་ཉལ་དག་མངོན་གྱུར་གྱིས། །བསྐྱེད་པས་ངེས་པར་འགྲུབ་དང་གཞན་དུ་གྱུར། །གཞན་དུ་ལྟོས་དང་ངོ་བོས་འགྲུབ་པར་འདོད། །དབྱེ་བ་མ་ནོར་མི་འགལ་བསྟན་པ་ཡིན། །དེ་ཡང་འདུས་པའི་སྙིང་པོ་སེམས་དཔའ་ཉོན། །བག་ཆགས་རྩལ་ཀྱང་ཤས་ནི་ཆེ་ཆུང་སྟེ། །སྤྱི་ཡི་སྡུག་བསྔལ་སྐྱེ་རྒ་ན་འཆི་ཡིན། །བྱམས་བྲལ་དགྲ་ཕྲད་མེད་བཙལ་མི་རྙེད་པ། །གང་བྱུང་འཁོར་བའི་བག་ཆགས་རྩལ་དུ་གསུངས། །མིང་ནི་གྲངས་ལ་མང་དུ་ཡོད་མོད་ཀྱང་། །བག་ཆགས་ཉོན་མོངས་རྟོག་པ་སྐྱོན་དང་གསོག །སྒྲིབ་པ་ལྟུང་བ་གོལ་ས་འཁྲུལ་པ་སྟེ། །ཡུལ་ཡོད་བར་དུ་གྲངས་ལ་ཐུག་པ་མེད། །ད་ཡང་རྡོ་རྗེ་སེམས་དཔའ་ཡང་ཉོན་ཅིག །དེ་དབྱེ་སྣང་བའི་འཁྲུལ་པ་ཡུལ་ལས་འབྱུང་། །དེ་ཕྱིར་ཡུལ་སེམས་བར་དུ་གོལ་ས་གཅད། །དེས་ཆོད་བག་ཆགས་གཞི་ལ་གོས་པ་མེད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། འཕྲལ་བྱུང་བག་ཆགས་ཀུན་གཞི་བསྟན་པའི་ལེའུ་སྟེ་དྲུག་པའོ།། །།དེ་ནས་འདུས་པའི་འཁོར་ལ་བཀའ་སྩལ་པ། །ལུས་ཀྱི་ཀུན་གཞི་དབྱེ་བའི་དོན་བསྟན་པ། །ལུས་ཀྱི་དབྱེ་བ་ངོ་བོ་མཚན་ཉིད་དང་། །དེ་ཡི་ལས་དཔེ་བསྟན་པས་རྟོགས་པར་གསུངས། །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །དབྱེ་བ་རང་བཞིན་བག་ཆགས་ཡིད་ཀྱི་ལུས། །ཐོག་མ་ཐ་མ་ད་ལྟ་སོ་སོའི་ཁྱད། །ངེས་པར་གཏན་ལ་ཕབ་པའི་དོན་བསྟན་ཕྱིར། །གཟུགས་ནི་ཐ་དད་ལུས་ཀྱི་གཞི་ལས་བྱུང་། །ངོ་བོ་རྩལ་ཤུགས་ཐ་དད་ལྟ་བུར་ནི། །དངོས་པོར་སྣང་དང་ཐིག་ལེའི་རྩལ་དེ་ལ། །གོང་གི་ལུས་གཉིས་ཀྱང་ནི་དེ་ལ་བརྟེན། །རེ་ཞིག་ལུས་ཀྱང་བག་ཆགས་དབང་གིས་སྣང་། །དེ་ཡི་མཚན་ཉིད་ངེས་པར་ཆོས་སྐུ་དང་། །བག་ཆགས་ལུས་ཀྱང་རང་བཞིན་ལུས་ལ་བརྟེན། །གཅིག་དང་ཐ་དད་གཉིས་ཀ་ཡིན་པའི་ ― DNG002_Page_0301 ―
[མ་དཔེ་གཟིགས་ན་འདིར་གནོན།]
ཕྱིར། །འཁོར་འདས་བརྟེན་པ་དེ་ཡང་དེ་ལྟར་གནས། །ད་ཡང་འདུས་པའི་སྙིང་པོ་ཡང་ཉོན་ཅིག །སངས་རྒྱས་བྱང་ཆུབ་ཉན་ཐོས་ལས་ཀྱི་ནི། །རྫུ་འཕྲུལ་མཚན་དང་དཔེ་བྱད་ཀུན་གྱི་གཞི། །སེམས་ཅན་ལུས་ངག་ཡིད་ཀྱང་དེ་ལ་བརྟེན། །ལུས་ཀྱི་ཀུན་གཞི་ཐམས་ཅད་བརྟེན་པའི་ལས། །དེ་ཡིས་དེ་ཉིད་མཚོན་པའི་དཔེར་གསུངས་པ། །ལུས་ཀྱི་ཀུན་གཞི་རང་གནས་ཁྱིམ་དང་འདྲ། །ཉི་མ་འཇུག་པའི་དཔེ་གདལ་དམིགས་པ་འདྲ། །ཉི་ཟླ་གཟའ་སྐར་འཆར་བའི་ནམ་མཁའ་འདྲ། །ད་ཡང་རྡོ་རྗེ་སེམས་དཔའ་ཡང་ཉོན་ཅིག །དེ་དག་ཀུན་གཞི་རྣམ་གསུམ་བསྟན་པ་ཡང་། །ནང་གི་ཀུན་བརྟགས་སེམས་ཀྱི་ཀུན་གཞི་བསྟན། །ཕྱི་ཡི་ཀུན་བརྟགས་བག་ཆགས་ཀུན་གཞི་བྱུང་། །ཟུང་དུ་འཛོམ་པས་ལུས་ཀྱི་ཀུན་གཞིར་འགྲུབ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཉོན་མོངས་ལུས་ཀྱི་ཀུན་གཞི་བསྟན་པའི་ལེའུ་སྟེ་བདུན་པའོ།། །།ད་ཡང་འདུས་པའི་འཁོར་རྣམས་ཡང་ཉོན་ཅིག །ལུང་ལྡན་ངེས་པའི་གདམས་ངག་མེད་པའི་མི། །སྐྱེ་བོ་སྔགས་པ་བཙུན་པ་གང་ཡང་རུང་། །ཀུན་གཞི་རྣམ་གསུམ་བག་ཆགས་མཐུ་བརྟས་པས། །དགེ་བའི་ཆོས་སྤྱོད་ལས་རྣམས་ཅི་སྤྱད་ཀྱང་། །དོན་མེད་ཁམས་གསུམ་འཁོར་བར་འཁྱམས་པའི་སྐྱོན། །དེ་དོན་བཤད་ཅིང་ངེས་པར་འགྲོལ་གྱིས་ཉོན། །སེམས་ཅན་འཆི་ལྟས་རིམ་པར་འབྱུང་བ་ནི། །དང་པོ་འབྱུང་བ་ས་ནི་ཆུ་ལ་ཐིམ། །དེ་རྟགས་ཕུང་པོ་གཟུགས་ནི་མི་ཐེག་ལྕི། །ལུས་ཀྱི་བཀྲག་མདངས་ཉམས་ཕྱིར་ཁ་དོག་ལོག །དེ་ནས་ཆུ་ནི་མེ་ལ་ཐིམ་འགྱུར་ཏེ། །ཁ་སྐམས་མཆུ་དང་ལྕེ་ནི་རྭ་བཞིན་འགྱུར། །ཉམ་ཆུང་སྨྲ་བ་མི་ནུས་ཁར་མི་ཐོན། །དེ་ནས་མེ་ནི་རླུང་ལ་ཐིམ་འགྱུར་ཏེ། །ལུས་ཀྱི་དྲོད་ཤོར་ཤིན་ཏུ་གྲང་བ་འབྱུང་། །དེ་ཚེ་ཤི་འདྲེད་གདོན་ཅིང་མིག་རྩ་ཟློག །དེ་ནས་རླུང་བཞི་རྣམ་ཤེས་ཐིམ་འགྱུར་ཏེ། །དབུགས་ནི་བརྩེགས་མ་ཐུམ་ཐུམ་བྱེད་པ་འབྱུང་། །དེ་ཚེ་ཆགས་སྡང་མི་མནོ་དགུ་གཅིག་བསམ། །གནད་གཅོད་དྲགས་ནས་དྲན་པ་བརླག་པར་འགྱུར། །འདི་ནི་སྣང་བ་ནུབ་ཁའི་དུས་ཡིན་ཏེ། ། ― DNG002_Page_0302 ―
[མ་དཔེ་གཟིགས་ན་འདིར་གནོན།]
དེ་ཚེ་སྣང་བ་གཉིས་ནི་ཉམས་སུ་མྱོང་། །དང་པོ་སྣང་བ་སྨིག་རྒྱུ་དུ་བ་ལྟར། །བུན་ནེ་ལོང་ལོང་འཇིག་རྟེན་ཞིག་པར་མཐོང་། །དེ་ཚེ་འཕོས་མ་ཐག་ཏུ་སྣང་བ་མཆེད། །སྲིན་འབུ་མེ་ཁྱེར་ལྟ་བུར་ཧྲབ་ཧྲིབ་ཙམ། །སྣང་བ་ཐོབ་པ་མར་མེའི་རྩེ་མོ་ལྟར། །ཤིན་ཏུ་བརྟག་དཀའ་རབ་རིབ་འབྱུང་བའི་ཚེ། །ཡེ་ཤེས་ཉུག་གིས་བྱུང་སྟེ་མ་རིག་བསྒྲིབས། །ད་ཡང་འདུས་པའི་རྡོ་རྗེ་སེམས་དཔའ་ཉོན། །དེ་ཚེ་བར་དོའི་འདྲེལ་བྱུང་བག་ཆགས་ཀྱིས། །སྔ་མའི་ལུས་དང་བཅས་ཡོད་སྙམ་པ་འབྱུང་། །བར་དོའི་སྣང་བ་འགྱུར་བ་ཡིད་ཀྱི་ལུས། །འཁོར་ལོས་སྒྱུར་རྒྱལ་ཆ་ལུགས་རང་ཡིད་ཀྱིས། །དབང་པོ་ཀུན་ཚང་ཐོགས་མེད་ཀུན་ཏུ་འགྲོ། །དེ་ནས་ཤེས་པའི་སྣང་བ་ཡང་འགྱུར་ཏེ། །ཕྱི་མ་གང་ལེན་ལུས་སུ་ཡོད་སྙམ་ནས། །རྩྭ་སྤྱིལ་ཁྱིམ་སོགས་བླ་གབ་གང་རུང་དུ། །རང་དབང་མེད་པར་ཤེས་པ་མངལ་དུ་འཇུག །ཞུགས་ནས་ཆགས་སྡང་སྐྱེས་ཏེ་ལུས་བླངས་པས། །སྐྱེ་རྒ་ན་འཆི་ཅན་གྱི་འཁོར་བར་འཁྱམས། །ཡང་ནས་ཡང་དུ་འཁོར་བར་སྡུག་བསྔལ་བསྐྱེད། །དེ་ཕྱིར་འཁོར་བའི་མཐའ་ལ་ཟད་པ་མེད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། མ་རྟོགས་པ་བར་དོར་འཁོར་བར་འཁྱམས་པའི་ལེའུ་སྟེ་བརྒྱད་པའོ།། །།དེ་ནས་འཁོར་གྱི་སྙིང་པོས་ཡང་གསོལ་པ། །དད་ལྡན་འདུས་པའི་ཚོགས་ལ་ཕན་གདགས་ཕྱིར། །ཀུན་རིག་ཆོས་ཀྱི་རྗེ་ལ་འདི་སྐད་གསོལ། །མྱང་འདས་འོག་མའི་ལྟ་སྒོམ་ཇི་ལྟར་དབྱེ། །ཐེག་པའི་བྱེ་བྲག་ས་ལམ་ཇི་ལྟར་སྦྱར། །ལྷུན་གྱིས་གྲུབ་པའི་འདོད་གཞུང་དབྱེ་བ་གང་། །མཉམ་པའི་རྒྱལ་པོས་ངེས་པར་བཤད་དུ་གསོལ། །དེ་སྐད་ཞུས་པའི་དོན་གསན་འཁོར་རྣམས་ལ། །སྟོན་པས་ཐེག་པའི་དབྱེ་བ་བཀའ་སྩལ་པ། །མུ་སྟེགས་རྟག་ཆད་ལོག་ལྟ་འཛིན་པ་དང་། །ཉན་ཐོས་རང་རྒྱལ་མདོ་སྡེའི་མཚན་ཉིད་དང་། །ཕྱི་པ་ཀྲི་ཡ་ཨུ་པ་ཡོ་ག་དང་། །ནང་པ་མ་ཧཱ་ཨ་ནུ་ཡོ་ག་རྣམས། །དེ་ཡི་དབྱེ་བ་ངས་བཤད་ ― DNG002_Page_0303 ―
[མ་དཔེ་གཟིགས་ན་འདིར་གནོན།]
ལེགས་པར་ཉོན། །ཉན་ཐོས་གང་ཟག་བདག་མེད་བློས་བྱས་ནས། །ལམ་དུ་ཀུན་འབྱུང་བ་དང་སྡུག་བསྔལ་སྤང་། །ཕྱི་ནང་དབུགས་ལ་སེམས་གཏད་འགོག་པ་བསྒོམ། །སྔོན་གྱི་མར་མེའི་བསྟན་པ་ལ་ཞུགས་ནས། །ཤཱཀྱ་ཐུབ་པའི་བསྟན་ལ་མཉམ་པར་བཞག །མ་འོངས་བྱམས་པར་སེམས་བསྐྱེད་དགྲ་བཅོམ་འདོད། །རེ་བ་ཡོད་ཕྱིར་ཆོས་ཉིད་གནས་ལུགས་འཁྲུལ། །ད་ཡང་འདུས་པའི་རྡོ་རྗེ་སེམས་དཔའ་ཉོན། །རང་རྒྱལ་འདོད་པ་ཡུལ་རྣམས་ཕྱོགས་ཆས་སྟོང་། །སེམས་སུ་སྣང་བའི་ཆོས་རྣམས་མ་རྟོགས་པར། །ནེ་ཙོ་ཁྱུ་ལྡིང་བསེ་རུ་དཔུང་བཅས་ནས། །སྒོ་ལྔའི་ཡུལ་ནི་མི་འགེག་རྒྱུ་བ་འགེག །རྗེས་འབྲངས་མེད་པར་སྟོང་པ་བློས་བཟུང་བསྒོམ། །ལུང་ལྡན་མན་ངག་མེད་ཕྱིར་རང་སེམས་གོལ། །ཐེན་ཚོར་མིག་གི་ནམ་མཁའ་ཆུང་བ་ལ། །ཕྲ་རགས་འཐེན་ཐག་ནན་གྱིས་འཛུད་པ་བཞིན། །ཡུལ་ལ་སྤང་སྡུད་ཞེན་པ་བྱེད་པའི་ཕྱིར། །ཡུལ་སེམས་ཐ་དད་བདག་མེད་བློས་བཏགས་ནོར། །ད་ཡང་འདུས་པའི་འཁོར་གྱི་སྙིང་པོ་ཉོན། །མདོ་སྡེའི་ལྟ་སྒོམ་རྣམ་པ་གཉིས་གསུངས་པ། །སེམས་ཙམ་སྣང་བ་སེམས་སུ་བློས་སྡུད་བྱེད། །བདེན་གཉིས་བཟང་ངན་རིས་སུ་འབྱེད་པའི་ཕྱིར། །ཡང་དག་སེམས་སུ་འཛིན་པ་རགས་པར་གསུངས། །རྣམ་རིག་བླང་དོར་ཆེད་དུ་ཡང་དག་བྱེད། །ཡུལ་རྣམས་འཁྲུལ་པ་གཉེན་པོས་སྦྱང་བར་འདོད། །དོན་དམ་འཁྲུལ་མེད་ཉམས་མྱོང་རང་གསལ་བ། །བླང་དོར་ཡོད་ཕྱིར་ངེས་པའི་དོན་དང་འགལ། །ད་ཡང་འདུས་པའི་རྡོ་རྗེ་སེམས་དཔའ་ཉོན། །ཐེག་ཆེན་དབུ་མའི་ཀུན་རྫོབ་སྒྱུ་མའི་ཡུལ། །དོན་དམ་མཐའ་གཉིས་བྲལ་བའི་དམིགས་མེད་དེ། །ཞི་གནས་དང་ནི་ལྷག་མཐོང་ཟུང་འདྲེལ་བསྒོམ། །རྗེས་ཐོབ་མཉམ་བཞག་རིམ་གྱིས་ཡོད་ཕྱིར་གོལ། །ཡུལ་ལ་རྟོག་པ་ཞུགས་ནས་སེམས་ཀྱིས་གཞིག །ཡིད་ཀྱིས་དམིགས་པ་ཞུགས་ནས་འཛིན་པ་སྐྱེས། །དེ་ཕྱིར་མ་རྟོགས་བདུད་ཀྱི་སྤྱོད་ཡུལ་ཏེ། །ལམ་ལ་རིམ་པར་བགྲོད་པའི་གྲངས་བྱུང་ན། །ཆོས་སྐུ་ཡང་དག་དོན་དུ་ག་ལ་འགྱུར། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་ ― DNG002_Page_0304 ―
[མ་དཔེ་གཟིགས་ན་འདིར་གནོན།]
རྒྱུད་ལས། ཕྱོགས་མཚམས་འཛིན་པའི་ལེའུ་སྟེ་དགུ་པའོ།། །།དེ་ནས་ཀུན་རིག་ཆོས་རྗེས་ཡང་གསུངས་པ། །ཀྲི་ཡའི་བལྟ་བ་ཆོས་ཉིད་སྟོང་བསྒོམ་ནས། །སྣང་བ་ཀུན་རྫོབ་ཆོ་འཕྲུལ་རིགས་གསུམ་ལྷ། །རྗེ་འབངས་རིམ་པ་བཞིན་དུ་དངོས་གྲུབ་རེ། །གཞི་ལ་གཅིག་པར་མ་རྟོགས་དོན་དང་འགལ། །གཉིས་ཀ་རྒྱུད་ཀྱིས་ལྟ་སྤྱོད་ཡ་འགལ་སྟེ། །གོང་འོག་གཟུང་འཛིན་ཐེག་པས་མ་ཟིན་པས། །རྩ་བ་གཅིག་ཏུ་མ་ཤེས་དོན་དང་བྲལ། །ལྟ་སྤྱོད་གོང་འོག་གཉིས་འདོད་རང་ཉིད་འཁྲུལ། །རྣལ་འབྱོར་ཡོ་གས་ཆོས་དབྱིངས་དཀྱིལ་འཁོར་དུ། །སྤུན་དང་གྲོགས་པོ་མཉམ་ཉིད་ལྷར་བསྒོམས་པས། །ལུས་ངག་རྩོལ་བ་ཡོད་ཕྱིར་གོལ་བ་སྟེ། །ཇི་ལྟར་ནན་གྱིས་བསྒོམས་ཀྱང་ཆོས་སྐུ་མིན། །ད་ཡང་འདུས་པའི་རྡོ་རྗེ་སེམས་དཔའ་ཉོན། །ཆེད་དུ་བསྒྲུབ་དང་རྩོལ་བ་ཅི་སྤྱད་ཀྱང་། །བྱས་པ་དོན་མེད་སྡུག་བསྔལ་གྱི་ནར་འཁྱམས། །རྩོལ་སེམས་བྱས་པས་ཐམས་ཅད་དོན་མེད་འཁྲུལ། །བླ་མེད་བྱང་ཆུབ་ཆེན་པོའི་གེགས་སུ་ཆེ། །ཇི་སྲིད་དངོས་པོ་མཚན་མ་རགས་ཀྱི་བར། །དེ་བཞིན་ལྷ་ཡི་སྐུ་ཡང་ཤིན་ཏུ་རགས། །དེ་ཕྱིར་དངོས་པོ་མཚན་མ་མེད་ན་ནི། །ལྷ་ཡི་སྐུ་ཡང་གཞི་ལ་མེད་པའི་ཕྱིར། །བློ་དམན་དྲང་བའི་དོན་གྱི་གསང་སྔགས་ལ། །ངེས་དོན་སྙིང་པོ་དོན་གྱི་བལྟ་བ་མེད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། རྩོལ་བ་ཕྲ་རགས་ཀྱི་གོལ་ས་བསྟན་པའི་ལེའུ་སྟེ་བཅུ་པའོ།། །།དེ་ཡང་རྡོ་རྗེ་སེམས་དཔའ་ལེགས་པར་ཉོན། །གཉིས་སུ་མེད་པའི་རྒྱུད་ཀྱི་ལྟ་བའི་གཞི། །སྣང་བ་འདི་ཉིད་ཡེ་ནས་སྐྱེ་བ་མེད། །སྐྱེ་མེད་ཉིད་ན་གང་ཡང་ཐམས་ཅད་སྐྱེས། །སྐྱེས་ཙམ་ཉིད་ན་རང་སེམས་ངང་གིས་སྟོང་། །དཔེར་ན་ཆུ་དང་མེ་ལོང་གཟུགས་བརྙན་བཞིན། །སྣང་དང་སྟོང་པ་དབྱེར་མེད་གདོད་ནས་དག །ད་ཡང་འཁོར་གྱི་སྙིང་པོ་ལེགས་པར་ཉོན། །ཆགས་གྲོལ་གཉིས་ཀྱི་ལམ་དུ་བསྟན་པ་ཡང་། །ཏིང་འཛིན་རྣམ་གསུམ་ལ་སོགས་དམིགས་བསྒོམ་པ། །གཞི་ལ་རྩོལ་མེད་ལམ་ལ་རྩོལ་ཡོད་ཕྱིར། །རྟོག་ཚོགས་ལྷར་བསྒྱུར་དོན་དང་འགལ་ ― DNG002_Page_0305 ―
[མ་དཔེ་གཟིགས་ན་འདིར་གནོན།]
བར་གསུངས། །དེ་ཕྱིར་ལམ་ནོར་འབྲས་བུ་མི་འབྱུང་བས། །ཡེ་སངས་རྒྱས་སུ་འདོད་པ་ཆོས་སྐུ་བྲལ། །དེ་བས་མ་ཧཱ་ལྟ་བ་ཡུལ་སེམས་བསྲེས། །ནན་གྱིས་གཉིས་མེད་ལྟ་བ་འབྲས་བུ་མེད། །ད་ཡང་རྡོ་རྗེ་སེམས་དཔའ་ཆེན་པོ་ཉོན། །ཨ་ནུ་ཡོ་ག་སྣང་བ་སྐྱེ་མེད་ལ། །ཀུན་ཏུ་བཟང་མོའི་མཁའ་དབྱིངས་བྷ་གར་བརྟགས། །ཡུལ་ལ་རྣམ་རྟོག་འཛིན་པ་ཅིར་སྣང་བ། །ཀུན་ཏུ་བཟང་པོའི་རོལ་པ་ཡིན་པར་བརྟགས། །གཉིས་མེད་བདེ་ཆེན་སྲས་དང་རྩལ་དུ་འགྱུར། །དེ་ལ་རང་གིས་རྒྱུན་དུ་མ་ཡེངས་བསྒོམ། །དེ་ཉམས་བདེ་གསལ་རྩལ་ནི་བཏང་མི་བྲ། །ཇི་བཞིན་པ་ཡི་དོན་གྱི་ཆོས་ཉིད་ལ། །མ་བཅོས་མ་ཡེངས་ཆེད་དུ་བློ་བཞག་གོ། །དེ་དོན་མི་བརྗེད་སྤྱོད་པའི་འབྲས་བུ་ཡང་། །ཆེད་དུ་བྱར་མེད་ངང་ངམ་ཤུགས་ལས་གསལ། །དེ་ལ་ཡིད་འཇོག་རྩོལ་བ་ཕྲ་མོ་ཡོད། །དེ་ཕྱིར་ལུང་གིས་ཡུལ་སེམས་གཅིག་འདོད་གོལ། །དེ་དག་རྒྱུད་ལུང་ཡུལ་གྱིས་བསྒྲིབས་པའི་ཕྱིར། །རང་བྱུང་ཡེ་ཤེས་དོན་མ་རིག་པའི་ལམ། །དེ་དོན་རིམ་གྱིས་དད་དུ་བཞག་དགོས་པས། །ཡེངས་པ་འབྱུང་ཕྱིར་མ་ནོར་དོན་དང་བྲལ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། རྒྱུད་ལུང་དང་བསྒོམ་གྱིས་དོན་མ་རེག་པར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ཀུན་རིག་རྒྱལ་པོས་བཀའ་སྩལ་པ། །ཐེག་བརྒྱད་མྱ་ངན་འདས་པར་བསྟན་པ་ཡང་། །གོང་འོག་ས་ལམ་རིམ་པར་ཕྱེ་བ་སྟེ། །ལ་ཤན་དྲང་དོན་ཡིན་ཏེ་ངས་བཤད་ཉོན། །ཉན་ཐོས་རང་རྒྱལ་མདོ་སྡེ་བྱེ་བྲག་པ། །མུན་ལས་ནམ་ལངས་བྱང་ལྟས་ཉི་མེད་བཞིན། །བསྐལ་པར་ལམ་ལྔར་རིམ་གྱིས་བགྲོད་གྱུར་ཀྱང་། །ཕྱོགས་ཙམ་རྟོགས་ཀྱང་བག་ལ་ཉལ་ཡོད་ཕྱིར། །གནས་སྐབས་བདེ་ཙམ་མཐར་ཐུག་འབྲས་བུ་མེད། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །བྱང་ཆུབ་སེམས་དཔའི་ཐེག་པ་ཆེན་པོ་ལ། །ཉི་མའི་སྙིང་པོ་མ་མཐོང་ཟེར་མཐོང་བཞིན། །བདག་གཞན་དོན་དུ་ས་ལམ་རིམ་སྦྱངས་པས། །འོག་མ་དག་ལས་ཁྱད་པར་འཕགས་གྱུར་ཀྱང་། །ཡང་དག་མ་རྟོགས་བག་ཉལ་ཕྲ་ཡོད་ ― DNG002_Page_0306 ―
[མ་དཔེ་གཟིགས་ན་འདིར་གནོན།]
ཕྱིར། །ཤེས་བྱའི་སྒྲིབ་པ་ཡོད་པས་ཆོས་སྐུར་བསྒྲིབས། །ད་ཡང་རྡོ་རྗོ་སེམས་དཔའ་ལེགས་པར་ཉོན། །ཏིང་འཛིན་ཁྱད་པར་འཕེལ་བའི་རིམ་པ་ལས། །ས་ཡི་ངོ་བོ་ངེས་ཚིག་དབྱེ་བ་དང་། །རྟེན་དཔེ་རྩལ་གྱི་སྒོ་ནས་སྟོན་པར་གསུངས། །ས་དང་ལམ་ལྔ་རིམ་གྱིས་བསྟན་པ་ཡང་། །ཕ་རོལ་ཕྱིན་པ་བཅུ་དང་སྦྱར་བ་སྟེ། །ཤེས་རབ་ཆེ་ཆུང་ཁྱད་པར་ཕྱེ་བ་ལས། །ལོག་ནས་འགྲན་ཐུབ་ཡོད་པ་མ་ཡིན་ནོ། །ད་ཡང་འདུས་པའི་འཁོར་རྣམས་ཡང་ཉོན་ཅིག །གསང་སྔགས་གསང་ཆེན་ལམ་ནི་ཕྱི་ནང་ལྔ་། །སྒྲ་མཐུན་དོན་དང་ངེས་པའི་གཏན་ཚིགས་ཀྱིས། །ལམ་ལྔ་པ་ལ་ཁྱད་ཡོད་ཐབས་ཆེན་ཡང་། །རྒྱལ་སྲིད་མེད་པའི་རྒྱལ་པོ་འཁོར་སྡུད་བཞིན། །བལྟ་བ་ཁྱད་མེད་སྣང་བ་སེམས་སུ་སྡུད། །དེ་ཕྱིར་རང་བྱུང་ཆོས་སྐུའི་གེགས་སུ་ཆེ། །རྫོགས་པ་ཆེན་པོ་བལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཐེག་པ་ཐུན་མོང་གི་ལམ་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་འདུས་པའི་འཁོར་གྱི་སྙིང་པོ་ལ། །ཀུན་རིག་སྟོན་པ་ཆོས་རྗེ་ཀུན་བཟང་གིས། །ལྷུན་གྲུབ་ལ་ཤན་དབྱེ་བ་བཀའ་སྩལ་པ། །གཞི་དང་བསམ་པ་མཐུན་སྣང་ངེས་མེད་དང་། །སེམས་ཡིན་སྤྲོས་མེད་ཐལ་དྲགས་གྲུབ་ལ་བསྒྲུབ། །རྣམ་དག་དགོས་མེད་རྣམ་པ་མང་ཕྱེ་ཡང་། །དེ་དག་ཆོས་ཉིད་གནས་ལུགས་མིན་ཕྱིར་གོལ། །ད་ཡང་འདུས་པའི་རྡོ་རྗེ་སེམས་དཔའ་ཉོན། །འཁོར་འདས་གཞི་ལ་གནས་པའི་ལྷུན་གྲུབ་ནི། །རང་སེམས་སྙིང་པོ་བྱང་ཆུབ་ཆོས་ཉིད་དེ། །ཀུན་ལ་རང་ཆས་ཡོད་ཕྱིར་ཡེ་སངས་རྒྱས། །རྟོགས་དང་མ་རྟོགས་མེད་པར་ཀུན་གྱི་གཞི། །བསམ་པ་ལྷུན་གྲུབ་ཡིད་སྨོན་བློ་ཡི་ཆོས། །ས་རྡོ་གསེར་དུ་བྱེད་བཞིན་མེད་དེ་ཡོད་པར་འདོད། །གནས་འགྱུར་ལྷ་བསྒོམ་གྲོལ་འདོད་ཀུན་བརྟགས་ཏེ། །མེད་ལས་ཡོད་འཚོལ་སྨིག་རྒྱུ་བསྙེག་པ་འདྲ། །ད་ཡང་འཁོར་གྱི་སྙིང་པོ་ལེགས་པར་ཉོན། །འཇིག་རྟེན་མཐུན་སྣང་ལྷུན་གྲུབ་འཁྲུལ་པ་སྟེ། །སྣང་སྲིད་ཡུལ་སྣང་བློ་ཡིས་འདི་ལྟར་བརྟགས། །གཞི་ནི་ལམ་ལ་ ― DNG002_Page_0307 ―
[མ་དཔེ་གཟིགས་ན་འདིར་གནོན།]
མ་བསྒྱུར་སངས་རྒྱས་སུ། །ལོག་ལྟ་ཡེ་ཡིན་མི་ཕན་འཁོར་བར་སྨིན། །ངེས་མེད་སྣ་ཚོགས་ལྷུན་གྲུབ་ཡིན་ཟེར་ནས། །གཞི་ནི་ངེས་མེད་བལྟ་བ་ཕྱོགས་མེད་འདོད། །རང་སེམས་སྣ་ཚོགས་ཕྱིར་ན་ཆོས་ཉིད་མིན། །དེ་ཕྱིར་རིག་བྱེད་སྨྲ་བའི་བལྟ་བར་གོལ། །ད་ཡང་རྡོ་རྗེ་སེམས་དཔའ་ཆེན་པོ་ཉོན། །གང་ཡང་སེམས་ཡིན་ལྷུན་གྲུབ་འདོད་པ་དེ། །ཕྱི་ནང་ཆོས་རྣམས་སེམས་སུ་བློས་བསྡུས་པས། །དབང་པོ་ཡུལ་ཡེངས་ཕྱིར་ན་རང་སེམས་འཁྲུལ། །སེམས་ཙམ་ཀ་ཏ་རི་ཡི་ལྟ་བར་གོལ། །སྤྲོས་མེད་རྒྱུན་ཆད་ལྷུན་གྲུབ་འདོད་པ་དེ། །མེ་ཤི་ཤིང་ཟད་དཔེ་བཞིན་འདོད་པའི་ཕྱིར། །ཡེ་ཤེས་རྣམ་རྟོག་རྒྱུན་ཆད་སྤང་བྱ་མེད། །དེ་ཕྱིར་གཉེན་པོ་མེད་པས་གྲུབ་བྱ་བྲལ། །ཡེ་ཤེས་མེད་པར་འདོད་ཕྱིར་དོན་ལས་འཁྲུལ། །ད་ཡང་འདུས་པའི་རྡོ་རྗེ་སེམས་དཔའ་ཉོན། །ཐལ་དྲགས་གོང་རྒལ་ལྷུན་གྲུབ་འདོད་པ་དེ། །ཆོས་ཅན་ཁ་དཀར་རྫས་ཅིག་གང་རུང་བ། །འཁོར་འདས་དུས་གསུམ་ཚང་ཞིང་རྫོགས་འདོད་པས། །གཅིག་ལ་གཅིག་མེད་གྲངས་ཅན་ལྟ་བར་གོལ། །གྲུབ་ཟིན་པ་ལ་བསྒྲུབ་པའི་ལྷུན་གྲུབ་དེ། །སངས་རྒྱས་ཡོན་ཏན་གྲུབ་ལ་སེམས་ཅན་སྐྱོན། །རང་ངོར་ལྷུན་གྱིས་གྲུབ་པ་ཡིན་པའི་ཕྱིར། །སྐྱོན་ཡོན་ཐ་དད་གཉིས་འཛིན་དོན་ལས་གོལ། །ཆོས་ཉིད་རྣམ་དག་ལྷུན་གྲུབ་འདོད་པ་དེ། །ངོ་བོ་ཉིད་ཀྱི་གཞི་ལ་དགོངས་ནས་ནི། །དཔེ་ནི་རིན་པོ་ཆེ་ཡི་གསེར་གླིང་ལྟར། །སངས་རྒྱས་རྣམས་ཀྱི་དགོངས་པའི་ངོ་བོ་ལ། །བསྒོམ་དུ་རྡུལ་ཙམ་དུ་ཡང་མེད་དོ་ཟེར། །རང་གི་སེམས་ཀྱིས་ཆོས་སྐུ་མ་རྟོགས་པར། །མི་ལྟོགས་ཕྱུག་པོའི་ནོར་རྣམས་བགྲང་བ་དང་། །སེམས་ཅན་སངས་རྒྱས་ཡོན་ཏན་བརྗོད་དང་འདྲ། །ཡེ་ནས་རྣམ་པར་དག་པར་འདོད་པ་དེ། །གནས་ལུགས་བདེན་སྟེ་རང་བློ་འཁྲུལ་སྣང་ཚུལ། །ད་ཡང་འཁོར་གྱི་སྙིང་པོ་ཡང་ཉོན་ཅིག །དགོས་པ་མེད་པའི་ལྷུན་གྲུབ་འདོད་པ་དང་། །རང་སེམས་སྙིང་པོ་ཡེ་ཤེས་མ་རྟོགས་པར། །དགེ་རྩ་ཀུན་ལ་ཐུན་མོང་བསྔོ་བའི་ཕྱིར། །སྡིག་ཅན་སྒྲིབ་སྦྱང་ཚོགས་སུ་འགྱུར་འདོད་གོལ། ། ― DNG002_Page_0308 ―
[མ་དཔེ་གཟིགས་ན་འདིར་གནོན།]
དེ་ནས་ལྷུན་གྲུབ་བཅུར་གསུང་གོལ་ས་སྟེ། །དོན་གྱི་ངེས་དོན་ལྷུན་གྲུབ་མེད་པའི་ཕྱིར། །དེ་ཡང་དུས་ཀྱི་ལྟ་ལོག་ནན་བརྟགས་པས། །ངེས་པའི་ལུང་མེད་བློས་དཔྱད་ཤིན་ཏུ་འཁྲུལ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། སྤྱིའི་མཚན་ཉིད་ལྷུན་གྲུབ་ཏུ་འདོད་པ་ཤན་དབྱེ་བའི་ལེའུ་སྟེ་བཅུ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །འཁོར་རྣམས་བསམ་པ་ཐུགས་ཆུད་ནས། །སེམས་རྟོག་བསལ་ཕྱིར་དོན་འདི་ཞུས། །དོན་འདི་སངས་རྒྱས་རྒྱུ་འདི་གང་ལས་བྱུང་། །གཞི་ལ་འཕོ་འགྱུར་མེད་པའི་ལྟ་བ་གང་། །སྣང་བ་ངེས་མེད་སྣ་ཚོགས་ཅི་ལས་བྱུང་། །མ་བསྒོམས་སྐྱེ་བོར་མི་གོལ་ཐབས་ཅི་ལགས། །ཡིད་ཀྱིས་ཞུས་པའི་དོན་གསན་ཐུགས་ཆུད་ནས། །སྟོན་པ་ཀུན་རིག་རྒྱལ་པོ་ཆོས་རྗེ་ཡི། །ཐུགས་ཀྱི་དཀྱིལ་འཁོར་རིན་ཆེན་སྒོ་ཕྱེ་ནས། །སངས་རྒྱས་དཔལ་གྱི་མགུར་ནས་བཀའ་སྩལ་པ། །འཁོར་འདས་གཞི་ནི་ངོ་བོ་ཉིད་ཀྱི་སྐུ། །དོན་གྱི་སངས་རྒྱས་རང་བྱུང་དོན་རྟོགས་ན། །ཀུན་ཏུ་བཟང་པོ་རང་བྱུང་བཅོམ་ལྡན་འདས། །ཡེ་ཤེས་རབ་ཏུ་ཆེ་མཆོག་ཆོས་ཀྱི་སྐུ། །མི་སྐྱེ་མི་འགག་ནམ་མཁའི་རང་བཞིན་ལ། །འཁྲུལ་རྟོག་ཉིད་ཀྱང་ཡེ་ཤེས་བདེ་བའི་ཀློང་། །དཔེར་ན་ཁྱུང་ཆེན་ཆུ་ཀླུང་གྱེན་མཐུར་ཀྱང་། །ཉམ་ང་མེད་པར་ནམ་མཁར་སྤྱོད་པའི་ལམ། །དེ་བཞིན་ཡེ་ནས་བློ་སྦྱངས་རྣལ་འབྱོར་ཐུགས། །སངས་རྒྱས་སྙིང་པོ་རྟོགས་པའི་སྐལ་ལྡན་རྣམས། །ཆོས་སྐུ་མངོན་དུ་གྲུབ་པའི་གདམས་ངག་ཅན། །དོན་རྟོགས་ཡེ་ཤེས་ཡོན་ཏན་དེ་ལས་བྱུང་། །དེ་ཕྱིར་གཞི་ལས་འགྱུར་མེད་རྒྱལ་བའི་བཀའ། །དེ་ལ་འཕེལ་འགྲིབ་མེད་པ་རྟོགས་པའི་མཆོག །མངོན་གྱུར་སངས་རྒྱས་ད་ལྟ་ཉིད་དུ་འགྲུབ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། སངས་རྒྱས་ཡེ་ཤེས་འབྱུང་བར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་འདུས་པའི་འཁོར་ལ་བཀའ་སྩལ་པ། །སངས་རྒྱས་རྒྱལ་པོ་ཆོས་ཀྱི་སྐུ་མཆོག་ལ། །འཁོར་འདས་མ་གྲུབ་རིག་པའི་ཀློང་དུ་རྫོགས། ། ― DNG002_Page_0309 ―
[མ་དཔེ་གཟིགས་ན་འདིར་གནོན།]
གཞི་ལ་འགྱུར་བ་མེད་པས་ལྟ་བའི་གདེང་། །ཡུལ་ལ་མི་ལྟོས་རང་རིག་ཆོས་ཀྱི་སྐུ། །ནམ་མཁའ་བཞིན་དུ་ཡེ་ཤེས་མཐའ་མཉམ་པས། །དོན་ལ་འགྱུར་མེད་རང་རིག་ཡེ་ཤེས་ལ། །སྐྱོན་གྱིས་མི་གོས་ལྟ་བ་ངན་པ་ལ། །འཕོ་འགྱུར་མེད་པས་ཆོས་ཉིད་གདལ་བའི་ཀློང་། །མི་སྐྱེ་མི་འགག་ལྟ་བ་རང་བྱུང་ལ། །བསྒོམ་པས་མི་རྙེད་རྟོགས་པས་འགྱུར་མེད་དོན། །མ་བསྒོམས་འདུ་འབྲལ་མེད་ལྟར་རང་རིག་ཐུགས། །བསྐལ་པར་འཁྱམས་ཀྱང་ངོ་བོ་ཉིད་ལ་ནི། །སྐྱེ་འཆི་མེད་པ་རིག་པ་ལྟ་བའི་མཆོག །དོན་དུ་མ་བསྒོམས་ཡེ་ཤེས་མཐར་ཕྱིན་ལམ། །རེ་དོགས་མེད་ཕྱིར་འཁོར་བར་ལྷུང་མི་སྲིད། །གདོད་ནས་འགྱུར་མེད་བྱང་ཆུབ་སྙིང་པོ་ཡིན། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། དོན་ལ་འགྱུར་བ་མེད་པར་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་ཀུན་རིག་སྟོན་པས་ཡང་གསུངས་པ། །འཁོར་འདས་སྣང་བ་གཅིག་ཏུ་མ་ངེས་པས། །འཁྲུལ་པའི་ཡུལ་རྣམས་ཇི་ལྟར་སྣང་བ་དེ། །བག་ཆགས་སྣ་ཚོགས་བརྟས་ཕྱིར་འཁྲུལ་ངོར་བདེན། །དོན་ལ་མི་བདེན་གཟུང་འཛིན་མཐུ་བརྟས་པས། །ཇི་ལྟར་གོམས་པ་དེ་ལྟར་སྣང་བའི་ཕྱིར། །སྣང་བ་བློ་ཡིས་བརྟགས་ལས་ཡོད་མིན་ཏེ། །ཡོད་ན་འགྲོ་དྲུག་ཀུན་ལ་མཐུན་སྣང་རིགས། །ད་ཡང་འདུས་པའི་སེམས་དཔའ་ཡིད་ཀྱིས་ཉོན། །གདོད་མ་རང་འཁྲུལ་ཀུན་གཞི་རྣམ་གསུམ་གྱིས། །རང་སེམས་མཐོང་སྣང་སོ་སོ་སྣ་ཚོགས་པས། །དེ་ཕྱིར་བག་ཆགས་སེམས་ནི་སོ་སོར་སྣང་། །ངོ་བོ་ཉིད་ཀྱི་སྐུ་ལ་འགྱུར་མེད་ཕྱིར། །བློ་ཡིས་བཏགས་པ་གཅིག་ཡུལ་གཅིག་མིན་པས། །རང་སེམས་འཁྲུལ་པར་སྣང་བར་ཐེ་ཚོམ་མེད། །དེ་ཕྱིར་དབང་པོ་ཡུལ་རྣམས་གཞི་ལ་མེད། །འཁྲུལ་པའི་རྟོགས་སེམས་འགྲོ་བ་སོ་སོའི་སེམས། །གཅིག་ན་དགེ་སྡིག་རྣམ་སྨིན་འབྲས་བུ་ཡང་། །མ་སྤྱད་སེམས་ཅན་ཀུན་གྱིས་མྱོང་བར་རིགས། །ལས་ཀྱི་རྣམ་སྨིན་ཐུན་མོང་མ་གྲུབ་ཕྱིར། །བག་ཆགས་བརྟས་པས་འཁྲུལ་པའི་སྡུག་བསྔལ་ཡིན། །ད་ཡང་རྡོ་རྗེ་སེམས་དཔའ་ཆེན་པོ་ཉོན། །གཞི་དང་སྣང་ ― DNG002_Page_0310 ―
[མ་དཔེ་གཟིགས་ན་འདིར་གནོན།]
བ་འདྲེལ་མེད་ཡིན་པའི་ཕྱིར། །ཡུལ་ནི་འཁྲུལ་པའི་བག་ཆགས་བརྟས་པའི་ཕྱིར། །ངེས་མེད་བློ་ཡི་སྤྱོད་ཡུལ་སྣ་ཚོགས་པ། །མ་རིག་མེད་ན་གནོད་མི་ནུས་པར་གསུངས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། སྣང་བ་ངེས་མེད་དོན་དང་མི་འགལ་བར་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་ཀུན་རིག་ཆོས་རྗེས་བཀའ་སྩལ་པ། །མ་བསྒོམས་ཤེས་པ་རང་ཡན་བཞག་གྱུར་ཀྱང་། །ཕྱི་རོལ་ཡུལ་གྱི་རྣམ་པ་གང་ལ་ཡང་། །འཁྲུལ་པ་ཡིན་པར་ཤེས་ཕྱིར་ཞན་པ་མེད། །ཆོས་བརྒྱད་རང་སར་གྲོལ་བ་མཉམ་པའི་ཕྱིར། །སྐྱེ་བོ་ཉིད་ཀྱང་མ་སྤངས་ཆོས་ཀྱི་སྐུ། །དཔེར་ན་ཨ་ཤུ་ཀ་ཉིད་བདུད་རྩིར་ཤེས། །དེ་བཞིན་སྐྱེ་བོའི་རང་སེམས་འདི་ཉིད་ནི། །བླ་མས་དོན་བསྟན་ཐ་མལ་བྱང་ཆུབ་སེམས། །བདག་ཉིད་སྙིང་པོ་དོན་ཉིད་ཡེ་ནས་ཡིན། །ད་ཡང་འདུས་པའི་རྡོ་རྗེ་སེམས་དཔའ་ཉོན། །ཆོས་ཉིད་དོན་མ་རྟོགས་པས་སྐྱེ་བོ་སྟེ། །དེ་ཉིད་ལུང་དང་མན་ངག་དོན་སྟོབས་ཀྱིས། །རང་སེམས་རྟོགས་པས་སྐྱེ་བོ་མིན་པའི་ཕྱིར། །མ་བསྒོམས་གོལ་བ་མེད་པར་མཁས་པས་གསུངས། །ངོ་བོ་ཉིད་ལ་རྟག་ཆད་མེད་པའི་ཕྱིར། །སེམས་ཉིད་རང་གསལ་དོན་གྱིས་མ་བརྗེད་པས། །ཕྱལ་པ་ལུང་མ་བསྟན་དུ་གོལ་ས་མེད། །དཔེར་ན་གསེར་འགྱུར་རྩི་ཡིས་གང་ཐེབས་རྣམས། །ཐམས་ཅད་གསེར་ལས་གཞན་དུ་མི་འགྱུར་བཞིན། །དེ་བཞིན་མུ་སྟེགས་སྐྱེ་བོའི་སེམས་ཉིད་ཀྱང་། །མན་ངག་གསེར་འགྱུར་རྩི་ཡིས་ཐེབས་པའི་སེམས། །མུ་སྟེགས་རྣམས་ཀྱང་ཡེ་ཤེས་བདེ་བའི་ངང་། །ཡུལ་ལ་མི་ཞེན་ཕྱིར་ན་བསྒོམ་དུ་མེད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། མ་བསྒོམས་ཀྱང་གོལ་ས་མེད་པར་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་རྡོ་རྗེ་སེམས་དཔས་ཡང་ཞུས་པ། །རང་སེམས་སྙིང་པོ་དོན་རྫོགས་བལྟ་བ་ཡི། །ངེས་དོན་གདམས་ངག་རྟོགས་པའི་འབྲས་བུ་གང་། །ངོ་བོ་ཉིད་ཀྱང་ལྷུན་གྲུབ་བལྟ་བ་གང་། །སྣང་མེད་བློ་དངོས་དོན་ནི་ཅི་ལྟར་གཅིག །མ་བསྒོམས་འབྲལ་མེད་དོན་ནི་ཇི་ལྟར་འགྲུབ། ། ― DNG002_Page_0311 ―
[མ་དཔེ་གཟིགས་ན་འདིར་གནོན།]
ཡེ་ཤེས་དོན་ནི་ཇི་ལྟར་མཚོན་དུ་མེད། །ཉམས་དང་རྟགས་ཀྱི་རིམ་པ་ཇི་ལྟར་འབྱུང་། །དེ་སྐད་གསོལ་པས་ཐུགས་ཆུད་བཀའ་སྩལ་པ། །ས་མཁན་ལྡན་པའི་ཀུན་ཏུ་རྒྱུ་བ་ལྟར། །འཁོར་བ་མྱང་འདས་གཉིས་ཀྱི་བར་དོ་རུ། །ཐོག་མཐའ་ངེས་པར་གཅོད་པའི་གདམས་ངག་གིས། །རང་བྱུང་ཡེ་ཤེས་ངོ་བོ་ཉིད་དུ་རྟོགས། །འབྲས་བུ་སྐྱེ་ཤི་མེད་པར་མངོན་སངས་རྒྱས། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །སྒྲོན་བཏགས་མུན་པ་ངེས་པར་སངས་པ་བཞིན། །སྐྱེ་ཤི་རྣམ་གཉིས་འབྱུང་བའི་བར་དོ་རུ། །རང་སེམས་ཆོས་སྐུ་ངོ་སྤྲད་མན་ངག་གིས། །མ་རིག་འཁོར་བ་སངས་ནས་རིག་པ་རྒྱས། །ཉོན་མོངས་བག་ཆགས་རྣམ་རྟོག་གཞི་ནས་མེད། །ཆུ་བོ་ཆེན་པོ་གཞུང་འདྲིལ་ཉམས་མེད་བཞིན། །ཏིང་འཛིན་མཉམ་བཞག་རྗེས་ཐོབ་བར་དོ་རུ། །རྒྱུན་དུ་འབྲལ་མེད་ངེས་པའི་གདམས་ངག་གིས། །བར་ཆད་རྐྱེན་ཐུབ་དོན་ལ་འབྲལ་བ་མེད། །གཞན་དུ་ཀ་ནས་ཡེངས་པ་འབྱུང་མི་སྲིད། །ད་ཡང་འདུས་པའི་འཁོར་གྱི་སྙིང་པོ་ཉོན། །ངང་པས་ཆུ་འདྲེས་འོ་མ་བཅུད་ལེན་བཞིན། །ཞེན་པའི་ལུས་སེམས་གཉིས་ཀྱི་བར་དོ་རུ། །ཕྱི་ཡི་གོལ་ས་བཅད་པའི་མན་ངག་གིས། །སྤང་སྡུད་ཞེན་པའི་ཡུལ་འདི་མེད་པའི་ཕྱིར། །ཡུལ་མེད་རྒོད་འཕྲོ་བྱིང་རྨུགས་གཞི་ནས་དག །དཔེར་ན་ཡིད་བཞིན་ནོར་བུ་རིན་ཆེན་ལྟར། །སྲིད་པ་དག་གི་ལས་ཀྱི་བར་དོ་རུ། །སངས་རྒྱས་འབྱུང་བའི་དུས་ཀྱི་མན་ངག་གིས། །མཐར་ཐུག་འབྲས་བུ་ངེས་པའི་ཡོན་ཏན་འབྱུང་། །ཕྱིས་ནི་སྐྱེ་བ་གཞན་དུ་ལེན་མི་སྲིད། །ད་ཡང་འདུས་པའི་འཁོར་རྣམས་ལེགས་པར་ཉོན། །གཡུལ་ངོ་ལེགས་པར་རྒྱལ་བའི་དཔའ་བོ་བཞིན། །བདག་གཞན་རྩོད་པ་བྱེད་པ་ཀུན་ལས་རྒྱལ། །གལ་མེད་རྩོད་པའི་ཚིག་གིས་མན་ངག་གི། །རང་གཞུང་ཟབ་པར་ངེས་པའི་ཁྱད་ཆེན་འཕགས། །དེ་ཕྱིར་འཇིག་རྟེན་གསུམ་ན་འགྲན་ཟླ་མེད། །ད་ཡང་འདུས་པའི་རྡོ་རྗེ་སེམས་དཔའ་ཉོན། །དེ་ཡང་གདམས་ངག་དོན་བསྟན་འབྲས་བུ་ཡང་། །ཕྱི་མ་མ་ཡིན་དུས་འདི་ཉིད་དུ་རྟོགས། །དེ་ཕྱིར་འབྲས་བུ་ངེས་པའི་སངས་རྒྱས་ཐོབ། །ཆེ་བའི་ཡོན་ཏན་ ― DNG002_Page_0312 ―
[མ་དཔེ་གཟིགས་ན་འདིར་གནོན།]
ལྷུན་གྱིས་ཐམས་ཅད་རྫོགས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ངེས་དོན་རྟོགས་པའི་འབྲས་བུ་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་འདུས་པའི་འཁོར་ལ་བཀའ་སྩལ་པ། །རང་སེམས་ངོ་བོ་ཉིད་ཀྱིས་ལྷུན་གྲུབ་ནི། །ཆོས་རྣམས་ཀུན་གྱི་རྩ་བ་རང་རིག་སྐུ། །དེ་ཉིད་ཡེ་ཤེས་ཆོས་སྐུར་བལྟ་བའི་ཕྱིར། །རྒྱལ་བའི་ཐུགས་ནས་དམྱལ་བ་ཡན་ཆོད་ཀྱི། །ཀུན་གྱི་གཞི་ནི་རང་བྱུང་ངོ་བོ་ཉིད། །རང་སེམས་གཉུག་མར་གནས་པ་འདི་ཉིད་ནི། །རྒྱུ་རྐྱེན་མ་བསྐྱེད་ཡང་དག་ཡོད་པའི་ཕྱིར། །མཐའ་ཡི་སྒྲོ་སྐུར་བྲལ་བས་རིག་པ་གསལ། །དེ་ལྡན་ཆོས་སྐུ་གཞི་ངེས་ཡིན་པར་བཤད། །ད་ཡང་འཁོར་གྱི་རྡོ་རྗེ་སེམས་དཔའ་ཉོན། །ངེས་པའི་གདེང་ཆེན་བལྟ་བསྒོམ་སྤྱོད་པ་དང་། །འབྲས་བུ་འབྱུང་མེད་ཡིད་ཆེས་གདེང་ལྡན་པས། དེ་ལ་བལྟ་བའི་གདེང་གིས་ངེས་པའི་དོན། །ཟིན་ཕྱིར་ཀུན་བཟང་ཡེ་ཤེས་རྒྱལ་བའི་ཐུགས། །དགེ་ལ་དད་ཅིང་མོས་པའི་རྒྱུ་མི་དམིགས། །བསྒོམ་པའི་གདེང་ཆེན་དོན་ལས་མ་ཡེངས་ན། །ཆེད་དུ་གཏད་ལ་བསྒོམ་ནི་མི་དགོས་པས། །རང་བྱུང་གདོད་ནས་སྙིང་པོ་སྐྱེ་འགགས་མེད། །དེ་ཕྱིར་རང་གསལ་ཡེ་ཤེས་ཆོས་ཀྱི་སྐུ། །འཁོར་འདས་ཆོས་ལ་སྤྱོད་པའི་གདེང་ལྡན་ཕྱིར། །ཅི་སྤྱོད་དོན་ལྡན་ཚམ་ཚོམ་མེད་པར་བསྟན། །ཉམ་ང་མེད་པར་བརྟུལ་ཞུགས་མཆོག་སྤྱོད་པ། །ཡེ་ཤེས་འབྲལ་མེད་སངས་རྒྱས་དགོངས་པ་ཡིན། །དེ་ཡི་འབྲས་བུ་ངེས་པའི་ཆོས་ཉིད་དེ། །སྡུག་བསྔལ་མི་འབྱུང་མྱ་ངན་འདས་པ་སྟེ། །སྐྱེ་འཆི་མེད་པའི་ཡེ་ཤེས་རིག་པའི་སྐུ། །དེ་ཕྱིར་ད་ལྟ་ཆོས་སྐུ་ཁ་མིག་ཅན། །རྫོགས་པ་ཆེན་པོ་མ་རིག་མུན་པ་སེལ་བར་བྱེད་པ་ཡེ་ཤེས་གཏིང་ནས་རྫོགས་པའི་རྒྱུད་ལས། ངོ་བོ་ཉིད་ཀྱི་ལྷུན་གྲུབ་རང་གཞུང་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་འདུས་པའི་འཁོར་ལ་བཀའ་སྩལ་པ། །སེམས་ཅན་མ་འཁྲུལ་སངས་རྒྱས་མེད་པའི་གོང་། །ངོ་བོ་ཉིད་ཀྱི་སྐུ་ལ་རང་བྱུང་སེམས། །དེ་ཉིད་དོན་གྱི་གནས་ལུགས་ཡིན་པའི་ཕྱིར། །དེ་རྟོགས་ ― DNG002_Page_0313 ―
[མ་དཔེ་གཟིགས་ན་འདིར་གནོན།]
ཆོས་སྐུ་མྱ་ངན་འདས་པའི་ཆོས། །ཀུན་ཏུ་བཟང་པོ་རང་བྱུང་ཡེ་ཤེས་ཐུགས། །རང་སེམས་རང་གིས་རིག་པ་ཆོས་ཀྱི་རྗེ། །རང་སེམས་རང་བྱུང་འགྲོ་དྲུག་སེམས་ཅན་གྱི། །ཀུན་གྱི་གཞི་ཆ་ཆོས་སྐུ་ཡེ་ཤེས་ལ། །གསུམ་ལྡན་འཁོར་བས་བསྒྲིབས་པ་ལུས་ཡིན་ཕྱིར། །དུས་ཚོད་བླ་མའི་གདམས་ངག་བསྟན་པའི་དོན། །གཞི་ཆ་ཆོས་སྐུ་རང་བྱུང་དེ་ཉིད་དང་། །དང་པོ་སེམས་ཉིད་ངོ་བོ་ཉིད་ཀྱི་སྐུ། །སྔ་ཕྱིར་མ་བསླད་ཆོས་སྐུར་གཅིག་པའི་ཕྱིར། །བློ་དངོས་གཅིག་པའི་དོན་ལ་བསྒོམ་མི་དགོས། །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །སངས་རྒྱས་ཡེ་ཤེས་ཐུགས་དང་སེམས་ཅན་སེམས། །འབྲལ་མེད་སོ་སོར་སྣང་བ་མ་ཡིན་ཏེ། །བཙལ་མེད་རང་སེམས་ཆོས་སྐུར་གཅིག་པའི་ཕྱིར། །བློ་དངོས་གཅིག་པར་ཡིད་ཆེས་སེམས་ཉིད་ཡིན། །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །འཁོར་བའི་སྡུག་བསྔལ་ལུས་འདི་སྒྲིབ་གཡོགས་དང་། །སངས་རྒྱས་སྐུ་དང་སེམས་ཅན་དོན་གཅིག་ཕྱིར། །ཐ་མལ་འདི་ཉིད་ཡིན་རྟོགས་ཆོས་སྐུ་ལ། །བླང་དོར་མེད་པར་བློ་དངོས་ངོ་བོ་གཅིག །དཔེར་ན་ཆུ་ཉིད་ཆང་དུ་རྐྱེན་གྱིས་འགྱུར། །དེ་བཞིན་སྐྱེ་བོ་རང་སེམས་འདི་ཉིད་ལ། །བླ་མའི་རྐྱེན་གྱིས་རྟོགས་པས་བསྒོམ་མི་དགོས། །མ་བསྒོམས་ཕྱིར་ན་གོལ་མེད་བློ་དངོས་གཅིག །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །ཡེ་ཤེས་རྟོགས་ནས་མཉམ་པའི་དོན་ཉིད་ལ། །རྒྱུན་དུ་མ་བརྗེད་རིག་པས་གསལ་ཐེབས་ནས། །བག་ཆགས་ཉོན་མོངས་རྟོག་པའི་སྐྱོན་གྱིས་ཀྱང་། །དེ་ལ་རྡུལ་ཙམ་མི་བསྒྲིབ་ཡེ་ཤེས་གསལ། །དཔེར་ན་སྐྱེས་བུ་སྔགས་ཀྱི་གདེང་ལྡན་པས། །དུག་མ་བསལ་བར་དུག་ཉིད་སྨན་འགྱུར་ལྟར། །སྔ་ཕྱི་མ་སོང་ཆོས་སྐུ་ཡིན་ཤེས་ནས། །སྔ་ཕྱིར་མ་སྤངས་གློ་བུར་རང་སྟོང་ཕྱིར། །བློ་དངོས་དབྱེར་མེད་རྟོགས་པའི་ཚད་ཡིན་ནོ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། བློ་དངོས་གཅིག་པར་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་འདུས་པའི་འཁོར་ལ་བཀའ་སྩལ་པ། །རང་སེམས་དོན་རྟོགས་སྙིང་ ― DNG002_Page_0314 ―
[མ་དཔེ་གཟིགས་ན་འདིར་གནོན།]
པོ་ཆོས་སྐུ་ལས། །བསྒོམ་བྱའི་ཡེ་ཤེས་ཆོས་སྐུ་གུད་ན་མེད། །སྔ་ཕྱི་སེམས་ཀྱི་ཡེ་ཤེས་མཐའ་བྲལ་ཕྱིར། །མ་ནོར་སྒོམ་པ་པོ་ཡང་ག་ལ་ཡོད། །དེ་ལྟར་སྒོམ་ཆེན་སེམས་ལ་དངོས་མེད་ན། །མི་གནས་མི་རྟོག་འཇོག་པ་རྣལ་འབྱོར་ཡིན། །རྡོ་རྗེ་སེམས་དཔའ་སྙིང་པོ་ད་ཡང་ཉོན། །ཨ་ཏི་རྫོགས་ཆེན་ཆོས་སྐུ་བདེན་གཉིས་བྲལ། །ངོ་བོ་ཉིད་ཀྱི་རང་ཤར་ཡེ་ཤེས་ནི། །ཡོད་མེད་དབུས་ཀྱི་ཡེ་ཤེས་མཐའ་གསུམ་བྲལ། །ཡུལ་ལ་སྤང་སྡུད་གཉིས་པོ་གདོད་ནས་མེད། །དཔེར་ན་ནམ་མཁའ་རང་དུ་ཤེས་པ་བཞིན། །ཇི་བཞིན་མ་ནོར་རང་སེམས་རྟོགས་པ་ཡིས། །ལུས་ངག་མ་སྐྱེས་རྟོགས་པའི་གཞི་མེད་ཕྱིར། །སྐྱིལ་ཀྲུང་དྲང་འདུག་སྨྲ་བཅད་ཁ་ན་མེད། །དེ་ཕྱིར་སེམས་ཀྱང་དངོས་མེད་རྟག་ཆད་བྲལ། །རྟོག་སྤངས་མི་རྟོག་བསྒོམ་པའི་ཁར་མི་འོང་། །ཡེ་ཤེས་ལྟ་བའི་ཤུགས་ལས་བྱུང་བའི་ཕྱིར། །རྣལ་འབྱོར་དམིགས་པའི་སེམས་ཀྱིས་བསྒོམ་མི་དགོས། །རྣམ་རྟོག་རང་སེམས་མ་སྐྱེས་ཡེ་ཤེས་ཕྱིར། །དད་ལྡན་ཆེད་དུ་བསྒོམ་པ་བསྟེན་མི་དགོས། །སེམས་དཔའ་འདུས་པའི་སྙིང་པོ་ད་ཡང་ཉོན། །ཡུལ་གྱི་སྣང་བ་སྤྱོད་ཡུལ་མ་གྲུབ་ཕྱིར། །ནམ་མཁའ་ལྟ་བུར་ཡེ་ཤེས་རང་ཤར་བས། །རང་སེམས་ཆོས་སྐུའི་ངང་དུ་དོན་རྟོགས་པས། །རྣལ་འབྱོར་ཅི་ཡང་ཡིད་ལ་མི་བསྒོམ་ན། །ཡང་དག་ལྟ་བའི་དོན་དང་མཐུན་པར་འགྲུབ། །རྡོ་རྗེ་སེམས་དཔའ་སྙིང་པོ་ད་ཡང་ཉོན། །རྫོགས་ཆེན་གོལ་ས་བཅད་ཕྱིར་བསྒོམ་མེད་དེ། །ཡེ་ཤེས་བསྒོམ་མེད་དག་ཏུ་རབ་རྟོགས་ན། །བསྒོམས་ཀྱང་སྐྱོན་མེད་ཆོས་དབྱིངས་ནམ་མཁའ་འདྲ། །བསྒོམ་མེད་དེས་ནི་ཀུན་གྱི་རེ་བ་བསྐངས། །ཀུན་ལ་ཁྱབ་ཕྱིར་མ་རྫོགས་མེད་མོད་ཀྱིས། །ཀུན་གྱིས་གདམས་ངག་མ་ཕྲད་རྟོགས་པར་དཀའ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། མ་བསྒོམས་འབྲལ་བ་མེད་པའི་ལེའུ་སྟེ་ཉི་ཤུ་གཅིག་པའོ།། །།ཀུན་རིག་རྒྱལ་པོ་ཆོས་རྗེས་བཀའ་སྩལ་པ། །རང་སེམས་ངོ་བོ་ཉིད་ཀྱི་ཆོས་སྐུ་ནི། །དབང་པོ་མངོན་སུམ་མི་གནས་ ― DNG002_Page_0315 ―
[མ་དཔེ་གཟིགས་ན་འདིར་གནོན།]
ཀུན་ལ་ཁྱབ། །ཆོས་སྐུ་ཚིག་ཏུ་འདི་ཞེས་བསྟན་པ་ནི། །རྡོ་རྗེ་སེམས་དཔའ་ཉིད་ཀྱིས་མཚོན་དུ་མེད། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །འཁོར་འདས་ཚིག་ལས་འདས་པའི་ཡེ་ཤེས་ནི། །དབྱིབས་དང་ཁ་དོག་དབང་པོའི་སྤྱོད་ཡུལ་དུ། །སངས་རྒྱས་ཉིད་ཀྱིས་བསྟན་ཅིང་མཚོན་དུ་མེད། །མཚོན་ཅིང་བརྟག་པར་དཀའ་བའི་རང་སེམས་དོན། །ཡོད་མེད་དབུས་ལས་འདས་པའི་བྱང་ཆུབ་དེ། །དངོས་མེད་ཡིད་ལ་དྲན་པའི་ཡེ་ཤེས་ནི། །ཀུན་བཟང་ཉིད་ཀྱིས་མི་གཟིགས་བལྟ་བའི་མཆོག །གཟུང་འཛིན་མཐུ་བརྟས་རྣམ་སྨིན་ལུས་འདི་ལ། །དབང་པོ་ཡུལ་རྣམས་མིང་དུ་རྗོད་བྱེད་ཀྱང་། །དོན་ལ་ཕན་པར་རྡུལ་ཙམ་མཚོན་མི་ནུས། །དཔེར་ན་བུམ་པའི་ནང་གི་ནམ་མཁའ་ལ། །དངོས་མེད་བརྗོད་ཀྱི་ནམ་མཁའ་ཆེན་པོ་མིན། །དེ་བཞིན་རྩེ་གཅིག་མི་རྟོག་དོན་བསྒོམས་ཀྱང་། །ཡེ་ཤེས་རང་ཤར་ཆེན་པོའི་བལྟ་བ་མིན། །བུམ་ཆག་ནམ་མཁའ་ཆེན་པོར་ཐིམ་པ་བཞིན། །ལུས་བྲལ་རང་སེམས་ངོ་བོ་ཉིད་ཀྱི་སྐུ། །དེ་ཉིད་རིག་པར་གསལ་བཏབ་བདེ་བའི་ཀློང་། །དེ་ཙམ་ཉིད་ལས་ཀུན་ཏུ་བཟང་པོས་ཀྱང་། །ངོ་བོ་ཉིད་ཀྱི་ཆོས་སྐུ་མཚོན་མི་མཁྱེན། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། མཚོན་དུ་མེད་པའི་ལེའུ་སྟེ་ཉེར་གཉིས་པའོ།། །།ད་ཡང་འདུས་པའི་རྡོ་རྗེ་སེམས་དཔའ་ཉོན། །ཉམས་དང་རྟགས་ཀྱི་རིམ་པ་ངས་བཤད་ཀྱིས། །ལེགས་པར་ཟུངས་ལ་ཡིད་ཀྱིས་ངར་ཉོན་ཅིག །ཞེན་མེད་རང་གསལ་བདེ་ལ་མི་གཡོ་བ། །དེ་ཉིད་རང་རིག་ཆོས་སྐུ་ཡེ་ཡིན་ཞེས། །དེ་ཕྱིར་གོལ་བ་མེད་པ་ཡེ་ཤེས་ཀློང་། །ད་ལས་མི་འདའ་གདེང་ཆུད་མཆོག་གི་ཉམས། །ད་ཡང་རྡོ་རྗེ་སེམས་དཔའ་ཆེན་པོ་ཉོན། །ངེས་དོན་ནང་དུ་གསལ་བ་ཞེན་མེད་བདེ། །ཆོས་ཉིད་དོན་རྟོགས་ཡེ་ཤེས་མི་གཡོ་བ། །རྒྱུན་དུ་འབྲལ་མེད་རང་གསལ་མི་རྟོག་ཉམས། །དེ་དོན་རྐྱེན་གྱིས་མི་འགྱུར་རང་རིག་སྐུ། །ཐོག་མཐའ་ཆོད་པས་མ་རིག་མུན་པ་མེད། །དེ་ཕྱིར་རང་བྱུང་ཆོས་སྐུ་ཉམས་ཆེན་ལ། །དུས་གསུམ་གཅིག་པར་བྱིང་རྒོད་འཕེལ་འགྲིབ་ ― DNG002_Page_0316 ―
[མ་དཔེ་གཟིགས་ན་འདིར་གནོན།]
མེད། །དེ་ཡི་ཡོན་ཏན་རང་བྱུང་མཁའ་དང་མཉམ། །ད་ཡང་འདུས་པའི་འཁོར་གྱི་སྙིང་པོ་ཉོན། །གདམས་ངག་གནད་ཆུད་དོན་ལ་ཉམས་པ་མེད། །ཆོས་ཉིད་དོན་ལས་མི་འདའ་རྒྱལ་བའི་ཐུགས། །ཆེད་དུ་མི་དམིགས་ངང་ལ་གནས་པའི་ཚེ། །ལུས་ངག་སྤྱོད་པ་གང་ཡང་ཉམས་པ་མེད། །དེ་ཉིད་སངས་རྒྱས་དགོངས་པ་ཉམས་སུ་མྱོང་། །ལྟ་བའི་གདེང་ལྡན་ཡེ་ཤེས་རང་གསལ་ཐུགས། །དེ་ཡི་ཡོན་ཏན་སངས་རྒྱས་ཆོས་ཀུན་རྫོགས། །ཕྱི་མ་མ་ཡིན་དུས་འདིར་འབྲས་བུ་སྨིན། །ད་ཡང་འཁོར་གྱི་སྙིང་པོ་ལེགས་པར་ཉོན། །རང་བྱུང་གདལ་ཁྱབ་བདེ་ལྡན་དགོངས་པའི་ཉམས། །སེམས་ཅན་དུས་ན་སངས་རྒྱས་འབྲས་བུར་ལྡན། །དེ་ཡི་ཡེ་ཤེས་ད་ལྟ་ཉིད་ཀྱི་སེམས། །དེ་ལྟར་རྟོགས་པ་དགོངས་པའི་ཉམས་སུ་གསུངས། །ཉམས་ཀྱི་རིམ་པ་དེ་དག་གསུངས་པ་ཡང་། །ངོ་བོ་ཆོས་སྐུ་དོན་གཅིག་རང་བྱུང་སྐུ། །དེ་དོན་ཡང་དག་འབྲས་བུ་གཞི་ལ་གཅིག །དུས་གསུམ་རྒྱལ་བའི་ཡོན་ཏན་མ་ལུས་པ། །རྣལ་འབྱོར་དམ་པ་དེ་ལ་ཚང་ཞིང་རྫོགས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ངེས་པ་དོན་གྱི་ལྟ་བའི་གདེང་ཉམས་བསྟན་པའི་ལེའུ་སྟེ་ཉེར་གསུམ་པའོ།། །།དེ་ནས་ཀུན་རིག་སེམས་ཀྱི་རྒྱལ་པོ་ཡིས། །དོན་གྱི་རྟགས་ཆེན་འཁོར་ལ་བཀའ་སྩལ་པ། །རྨི་ལམ་བག་ཆགས་བྱང་རྟགས་འབྱུང་བ་དང་། །ས་ཐོབ་ལྟས་དང་ས་ནོན་ལྟས་རྣམས་དང་། །ནང་རྟགས་ཀློང་གསུམ་ལྡན་པའི་ཡོན་ཏན་དང་། །འབྲས་བུ་ད་ལྟ་ཉིད་གྲུབ་ངེས་པར་གསུངས། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །དེ་དོན་ངེས་རྙེད་ཉམས་ནི་གསལ་བ་ལ། །རྨི་ལམ་བག་ཆགས་དག་རྟགས་འབྱུང་བ་ནི། །རྟག་ཏུ་གཅེར་བུར་ཕྱུང་དང་མེ་དཔུང་སྲེག །ཆུ་བོའི་ཕ་རོལ་ཆོད་པར་རྐྱལ་བ་དང་། །བུམ་ཆུས་སྤྱི་ནས་དག་པར་འཁྲུ་འདོད་དང་། །ནམ་མཁའ་དག་ལ་འཕུར་དང་སྐྱིལ་ཀྲུང་འཆའ། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །རྣལ་འབྱོར་དམ་པས་ས་ཐོབ་འབྱུང་བ་ཡང་། །ལྗོན་ཤིང་འཛེགས་དང་མཆོད་རྟེན་ཁར་ཕྱིན་དང་། །ཁམས་ ― DNG002_Page_0317 ―
[མ་དཔེ་གཟིགས་ན་འདིར་གནོན།]
གསུམ་དུས་གཅིག་མཐོང་འགྱུར་མ་ཞེན་འབྱུང་། །ཏིང་ངེ་འཛིན་གྱིས་ས་ནི་ངེས་པར་ནོན། །དེ་རྟོགས་ལྟས་ནི་འབྱུང་བར་གསུངས་པ་ནི། །ནམ་མཁར་སེང་གེ་ཞོན་འགྲོ་ཉམ་ང་མེད། །དཔུང་པ་གཡས་གཡོན་ཉི་ཟླ་འཆར་བ་དང་། །རི་རབ་ཁར་ཁྱེར་མཁའ་ལ་ངེས་པར་འགྲོ། །སྤྲིན་ལྡིང་སྟེང་ན་འདུག་པ་ལ་སོགས་འབྱུང་། །ད་ཡང་འདུས་པའི་ཚོགས་ཀྱི་སྙིང་པོ་ཉོན། །རྣལ་འབྱོར་དམ་པ་སྐྱེས་མཆོག་དམ་ཅན་ལ། །རྟོག་པས་བར་མ་ཆོད་པས་ཡེ་ཤེས་ཀློང་། །མཉམ་ཉིད་མཐར་ཕྱིན་ལམ་ཆེན་ཀུན་བསྒྲལ་བས། །ཅི་སྤྱོད་ཏིང་འཛིན་ལས་ནི་མ་ཉམས་ཀློང་། །གོམས་པའི་ཀློང་དུ་ཤིན་ཏུ་གསལ་འགྱུར་ཏེ། །རྒྱལ་བའི་དགོངས་པ་ཆོས་ཉིད་རང་བྱུང་ཀློང་། །བདག་གཞན་གཉིས་སུ་མཐོང་བ་ཅི་ཡང་མེད། །དེ་ཕྱིར་ཀློང་གསུམ་ལྡན་པའི་ཡེ་ཤེས་བཤད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། རྟགས་བསྟན་པའི་ལེའུ་སྟེ་ཉེར་བཞི་པའོ།། །།དེ་ནས་འདུས་པའི་འཁོར་གྱིས་ཡང་ཞུས་པ། །རང་སེམས་དོན་རྟོགས་རྣལ་འབྱོར་སྤྱོད་པ་ལ། །འཆིང་གྲོལ་མེད་པའི་སྤྱོད་པའི་དོན་ནི་གང་། །ས་ལམ་སྦྱང་དུ་མེད་པའི་དོན་ནི་ཅི། །དམ་ཚིག་བསྲུང་དང་ཉམས་པ་ཇི་ལྟར་མེད། །ལ་བཟླ་དོན་གྱི་ལྟ་བ་གང་ལ་བགྱི། །དེ་སྐད་གསོལ་པའི་དོན་གསན་བཀའ་སྩལ་པ། །སངས་རྒྱས་རྣམས་ཀྱི་དགོངས་པ་ཇི་ལྟ་བ། །རང་གི་མཚན་ཉིད་མ་བཅོས་དེ་བཞིན་ཉིད། །ཆོས་སྐུ་སྐྱེ་མེད་རྟོགས་ནས་འགྲོ་དོན་དུ། །ཇི་ལྟར་སྣང་བའི་གཟུགས་ཅན་སྤྲུལ་པའི་སྐུ། །མཛད་པ་བཅུ་གཉིས་འགྲོ་དོན་མཐར་ཕྱིན་པ། །ཐུགས་རྗེའི་སྤྲུལ་པས་གདུལ་བྱ་ཀུན་འདུལ་ཡང་། །ཡེ་ཤེས་བློ་ལྡན་རློམ་སེམས་རྡུལ་ཙམ་མེད། །བདག་དང་གཞན་དུ་རྟོག་པ་མེད་པའི་ཕྱིར། །ཡེ་ནས་གཉིས་མེད་དོན་གཅིག་ཆོས་ཀྱི་སྐུ། །མཐུན་འཇུག་མཚན་མར་སྤྱོད་པ་རྒྱ་མཚོར་ནི། །ཐུགས་རྗེ་ཆེན་པོའི་འགྲོ་དོན་རྫོགས་པར་མཛད། །རང་བྱུང་ཡེ་ཤེས་དབྱིངས་ལས་མ་གཡོས་ཀྱང་། །འགྲོ་བའི་དཔལ་མགོན་ཀུན་ཏུ་བཟང་པོ་སྟེ། །བདག་དང་གཞན་དོན་བླང་དོར་མེད་པའི་ཕྱིར། །སྤྱོད་པ་ ― DNG002_Page_0318 ―
[མ་དཔེ་གཟིགས་ན་འདིར་གནོན།]
རྒྱ་མཚོར་སྣ་ཚོགས་ཅི་བདེར་སྤྱོད། །པདྨོ་སྐྱེ་བའི་རྒྱུ་ནི་འདམ་ཡིན་ཏེ། །དེ་ལ་འདམ་གྱི་སྐྱོན་གྱིས་མ་གོས་བཞིན། །ཆོས་ཉིད་བླང་དོར་མེད་པར་རྟོགས་གྱུར་ན། །ཡེ་ཤེས་རྟོག་མེད་ཉམས་པ་རྡུལ་ཙམ་མེད། །ཐུན་མཚམས་མི་བསྒོམ་རྒྱུན་གྱི་རྣལ་འབྱོར་ལ། །འཆིང་གྲོལ་སྤྱོད་པ་མེད་ཕྱིར་གོལ་ས་མེད། །རྫོགས་པ་ཆེན་པོ་བལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། སྤྱོད་པ་འཆིང་གྲོལ་མེད་པར་བསྟན་པའི་ལེའུ་སྟེ་ཉེར་ལྔ་པའོ།། །།ཀུན་རིག་སྟོན་པ་ཆོས་རྗེས་བཀའ་སྩལ་པ། །བདེ་གཤེགས་མྱ་ངན་འདས་པ་ངེས་པའི་དོན། །ས་ལམ་ཡང་དག་ཆོས་སྐུ་གཅིག་ལས་མེད། །གོང་འོག་ཉེ་རིང་ཡོད་པར་གསུངས་པ་ཡང་། །བློ་དམན་དྲང་བའི་དོན་དུ་བཤད་པ་ཡིན། །འདུས་པའི་འཁོར་རྣམས་ཡིད་ཀྱིས་ད་ཉོན་ཅིག །ས་མེད་རྫོགས་ཆེན་ཆོས་སྐུ་ཡེ་ཤེས་ས། །གར་ཡང་མི་འགྲོ་ས་མཆོག་སྦྱོར་ཆོད་པ། །བགྲོད་མེད་སེམས་ཉིད་ཡེ་ཤེས་མཆོག་གི་ལམ། །ཡེ་ཤེས་ཆོས་སྐུ་མཐར་ཕྱིན་ཆོས་ཉིད་ས། །རྡོ་རྗེ་སེམས་དཔའ་སྙིང་པོ་ད་ཉོན་ཅིག །ས་ནི་དང་པོ་འཁོར་བར་མི་ལྡོག་ས། །སྙིང་པོ་བྱང་ཆུབ་མཆོག་ནི་ཡིན་ཤེས་ན། །གཟའ་ཞིང་བགྲོད་པའི་ཡུལ་ནི་ག་ལ་ཡོད། །བྱར་མེད་རྫོགས་པའི་ངང་དུ་རབ་རྟོགས་ན། །ལམ་ལ་གཟའ་ཞིང་ས་སྦྱངས་ཡུལ་ལས་འདས། །བགྲོད་མེད་སྙིང་པོ་ལམ་གྱི་མཆོག་སྟོན་པ། །གཞན་ནས་བཙལ་བས་རྙེད་པའི་གནས་མེད་དེ། །ཡེ་ཤེས་ཆེན་པོ་ཀུན་ཏུ་ཁྱབ་གནས་པ། །རང་བྱུང་ཡེ་ཤེས་རང་རིག་འོད་གསལ་བ། །ས་ལམ་བཙལ་དུ་མེད་དེ་སྙིང་པོའི་དོན། །རྣམ་པར་སྣང་མཛད་ཆེ་མཆོག་ཀུན་ཏུ་བཟང་། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །དཔེར་ན་རྒྱལ་པོ་གཞན་དུ་མི་འགྲོ་བཞིན། །རང་སེམས་ཡུལ་ལ་མི་སྤྱོད་དོན་ལ་གནས། །དེ་ཙམ་ཉིད་ནི་ཆོས་སྐུ་བདེ་བའི་ཀློང་། །ས་ལམ་མ་བགྲོད་ཆོས་ཉིད་ཡེ་ཤེས་སྐུ། །ས་དང་ལམ་ལ་ལྟོས་ན་བྱང་ཆུབ་གེགས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ས་ལམ་སྦྱང་དུ་མེད་ ― DNG002_Page_0319 ―
[མ་དཔེ་གཟིགས་ན་འདིར་གནོན།]
པའི་ལེའུ་སྟེ་ཉེར་དྲུག་པའོ།། །།དེ་ནས་འདུས་པའི་འཁོར་ལ་བཀའ་སྩལ་པ། །དམ་ཚིག་བསྲུང་ཉམས་མེད་པའི་ཡེ་ཤེས་ནི། །འོག་མ་བཞིན་དུ་དམ་དུ་མ་བཅས་པས། །ཉམས་པ་མེད་ཕྱིར་ཡེ་བསྲུངས་ཆེན་པོ་ཡིན། །གདེང་ལྡན་བལྟ་བའི་དམ་ཚིག་རྒྱུན་དུ་དྲན། །ཆེད་དུ་མ་ཡིན་རང་རིག་དོན་གསལ་བས། །ཡེ་བསྲུངས་ཆེན་པོའི་བལྟ་བ་དམ་ཚིག་ཡིན། །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །ཐེག་པའི་ཁྱད་པར་ཇི་སྙེད་བགྲངས་པ་དང་། །ཚུལ་ཁྲིམས་སྡོམ་དང་ཕྱི་ནང་དམ་ཚིག་ཀྱང་། །འགྲོ་བ་གདུལ་བྱའི་ཇི་ལྟར་འདོད་པར་སྟོན། །ཐ་སྙད་ཙམ་དུ་འདུལ་ཞེས་བྱ་མོད་ཀྱི། །དམ་དུ་བཅའ་བར་དོན་ལ་རྡུལ་ཙམ་མེད། །དམ་དུ་བཅའ་བ་མེད་པའི་ངང་རྟོགས་ན། །དམ་དུ་བཅས་ཀྱང་སྐྱོན་མེད་ནམ་མཁའ་འདྲ། །འདུས་པའི་རྡོ་རྗེ་སེམས་དཔའ་ད་ཡང་ཉོན། །ཆོས་སྐུ་མི་གཡོ་ཐུགས་ཀྱི་དམ་ཚིག་སྟེ། །བླང་དོར་མེད་པ་སྤྱོད་པའི་དམ་ཚིག་ཡིན། །རང་སེམས་མི་སྤང་ཡེ་ཤེས་ཆེན་པོར་གནས། །དུས་གསུམ་དོན་དང་མ་བྲལ་ཉམས་པ་མེད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། དམ་ཚིག་བསྲུང་ཉམས་མེད་པར་བསྟན་པའི་ལེའུ་སྟེ་ཉེར་བདུན་པའོ།། །།དེ་ནས་འདུས་པའི་འཁོར་ལ་བཀའ་སྩལ་པ། །ལ་བཟླའ་བ་ཡི་ཡེ་ཤེས་ཆེན་པོ་ནི། །ཀུན་གཞི་གཞི་ཆ་མཁའ་ལ་ཉི་ཤར་འདྲ། །ཐམས་ཅད་ཀུན་འདུས་རང་སྣང་ཡེ་ཤེས་གསལ། །ཡེ་ནས་བཙལ་མེད་འབྲས་བུ་མངོན་སངས་རྒྱས། །རྒྱལ་བ་ཀུན་གྱི་སྤྱི་མེས་ཆེན་པོ་སྟེ། །གོལ་མེད་གདོད་ནས་དག་པ་ཆོས་ཀྱི་སྐུ། །རང་བྱུང་འགག་པ་མེད་པ་ཡེ་ཤེས་ཀློང་། །ལམ་ལྔ་མ་བགྲོད་སངས་རྒྱས་ས་ཡི་མཆོག །ཅིར་སྣང་དམིགས་སུ་མེད་པས་རང་བྱུང་སྐུ། །གཞན་ལ་སྨོན་དུ་མེད་པར་རང་ལ་རྫོགས། །ཆོས་སྐུ་འདི་ནི་གཞན་ལས་མི་རྙེད་པས། །རྟོགས་པར་འདོད་ན་རང་གི་སེམས་ལ་ཚོལ། །སེམས་ལ་དོན་རྙེད་ནུས་པའི་རྣལ་འབྱོར་པ། །འཁྲུལ་པ་མེད་ཕྱིར་སེམས་ཅན་འཁོར་བ་མེད། །རང་རིག་རྟོགས་པའི་དོན་ལས་མ་རྟོགས་པ། །བདེ་ ― DNG002_Page_0320 ―
[མ་དཔེ་གཟིགས་ན་འདིར་གནོན།]
ཞིང་སྐྱིད་པའི་སངས་རྒྱས་ལོགས་ན་མེད། །དེ་ཕྱིར་རྒྱུ་ལས་མི་རྩོལ་འབྲས་བུ་ལ། །རེ་དོགས་རྩོལ་བ་རྒྱ་མཚོའི་ཆུ་བོར་ནས། །སྨིག་རྒྱུར་རི་དྭགས་ཆུར་མཐོང་བསྙེགས་པ་བཞིན། །བསྒོམ་མེད་དོན་ཉིད་བོར་ནས་སུ་བསྒོམ་པ། །བྱང་ཆུབ་མེད་པར་རང་གི་སྡུག་བསྔལ་སྣོན། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །རང་རིག་འདི་ཉིད་རྟོགས་པའི་རྣལ་འབྱོར་པ། །ཡེ་ཤེས་བཅུད་ཉིད་ཆོས་ཀྱི་གཏེར་དུ་སྨིན། །ནམ་མཁའ་གོ་ཡངས་འབྱུང་བའི་ལམ་དུ་བདེ། །རྟོགས་པའི་གོ་ཡངས་སངས་རྒྱས་ལམ་དུ་བདེ། །གདམས་ངག་གོ་ཡངས་བསྒོམ་པའི་ལམ་དུ་བདེ། །དུས་གསུམ་འགྱུར་མེད་རང་རིག་ལྟ་བའི་དབྱིངས། །འདོད་དགུ་རང་ལས་ཡོན་ཏན་འཆར་བའི་ཕྱིར། །རྒྱུ་འབྲས་གཞན་ལ་རག་མ་ལུས་པས་ཟབ། །ཡེ་ནས་ཆོས་ཉིད་ཡེ་ཤེས་རང་བྱུང་ལ། །འཁོར་བར་གནས་ཀྱང་སྒྲིབ་པས་གོས་པ་མེད། །དེ་ཕྱིར་དོན་རྟོགས་ད་ལྟ་ཉིད་ནས་ནི། །ཆོས་སྐུ་མངོན་དུ་གྱུར་པས་སངས་རྒྱས་ཡིན། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཡེ་ཤེས་དོན་ལ་ལ་བཟླ་བའི་ལེའུ་སྟེ་ཉེར་བརྒྱད་པའོ།། །།དེ་ནས་རྡོ་རྗེ་སེམས་དཔས་ཡང་ཞུས་པ། །ངེས་དོན་ཆོས་སྐུ་རྟོགས་པའི་རྣལ་འབྱོར་ལ། །དུག་ལྔ་མ་སྤངས་རང་གྲོལ་ཇི་ལྟར་འབྱུང་། །ཚོགས་མ་བསགས་པར་གཟུགས་སྐུ་གང་ལས་འབྱུང་། །གོང་འོག་ཐེ་ཚོམ་གེགས་ནི་ཇི་ལྟར་སེལ། །དེ་སྐད་ཞུས་པའི་དོན་གསན་བཀའ་སྩལ་པ། །དུག་ལྔ་མ་སྤངས་རང་སར་གོལ་བ་ཡང་། །དཔེར་ན་རིན་ཆེན་འོད་ཀྱིས་མུན་སེལ་ལྟར། །འཁོར་བའི་ཐོག་མཐའ་རྩད་ནས་ཆོད་པའི་ཕྱིར། །ངོ་བོ་ཉིད་ཀྱི་སྐུ་རུ་རང་རྟོགས་ན། །གདོད་ནས་མ་རིག་དག་པས་གཏི་མུག་བྲལ། །ད་ཡང་འདུས་པའི་རྡོ་རྗེ་སེམས་དཔའ་ཉོན། །མ་རིག་མེད་ཕྱིར་ཞེ་སྡང་ཡུལ་མེད་པས། །ཁ་དོག་ཡུལ་ལ་མནར་སེམས་བྱེད་པ་ཡང་། །བ་མོ་ལ་ནི་ཉི་ཤར་དངོས་མེད་ལྟར། །ཡུལ་དང་འདྲེལ་མེད་དྲན་པས་ཞེ་སྡང་གྲོལ། །ཕོ་མོ་ཆགས་པ་ལས་ཀྱིས་སྐྱེ་གྱུར་ཚེ། །སྔ་ཕྱི་མ་སོང་དེ་དུས་ ― DNG002_Page_0321 ―
[མ་དཔེ་གཟིགས་ན་འདིར་གནོན།]
ཆོས་སྐུར་ཤེས། །གཟུགས་བརྙན་བརྡའ་ཡིས་ཆགས་མེད་རྨི་ལམ་བཞིན། །ཆགས་པ་ཉིད་ནས་རང་བྱུང་སྐྱོན་མི་གོས། །ད་ཡང་འདུས་པའི་སྙིང་པོ་ཡིད་ཀྱིས་ཉོན། །ང་རྒྱལ་ཆེན་པོ་རང་སེམས་རྟོག་པ་འཆར། །དེ་ཕྱིར་ལྷག་མཐོང་རིག་པའི་ང་རྒྱལ་དེས། །ལོག་རྟོག་འཁོར་བ་རྩད་ནས་གཅོད་པའི་དོན། །དྲན་པའི་ཡེ་ཤེས་ང་རྒྱལ་རང་བྱུང་ཐུགས། །ལྟ་བ་མངོན་པར་མན་ངག་གདེང་གི་འཕྲང་། །གོལ་སྒྲིབ་སྐྱོན་མེད་རང་རིག་ཆོས་ཉིད་ལ། །དགག་བསྒྲུབ་མེད་པས་ཕྲག་དོག་རང་སར་གྲོལ། །དུག་ལྔ་སྤྱད་ཀྱང་རང་བྱུང་ཡེ་ཤེས་ཐུགས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། དུག་ལྔ་རང་གྲོལ་བསྟན་པའི་ལེའུ་སྟེ་ཉེར་དགུ་པའོ།། །།དེ་ནས་འདུས་པའི་འཁོར་ལ་བཀའ་སྩལ་པ། །རང་སེམས་ཆོས་སྐུ་ཆེན་པོར་གསལ་གྱུར་ན། །ཡེ་ཤེས་ཚོགས་ཆེན་རང་རིག་བྱང་ཆུབ་ཐུགས། །དཔེར་ན་རྒྱ་མཚོ་རྙོག་མེད་དངས་གྱུར་ན། །ནམ་མཁའི་གཟའ་སྐར་འབྱུང་བ་མི་འགག་བཞིན། །ཆོས་ཉིད་ངང་ལ་ལོངས་སྤྱོད་རིག་པའི་རྒྱུན། །དེ་ཡི་སྤྲུལ་པ་སྣ་ཚོགས་སྤྲུལ་པའི་སྐུ། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །ཆུ་ཉིད་ཚགས་ཀྱིས་བཙགས་ཀྱང་གཟུགས་བརྙན་མེད། །དེ་བཞིན་ངོ་བོ་ཉིད་རྟོགས་ཆོས་སྐུ་ལ། །ཀུན་བཟང་ཉིད་ཀྱིས་ཤེས་བཞིན་གཟུགས་བཅོས་ཀྱང་། །རྡོས་པའི་ལུས་ཅན་སངས་རྒྱས་ཉིད་མི་རྙེད། །བསོད་ནམས་ཚོགས་ཀྱིས་སངས་རྒྱས་འབྱུང་བ་མིན། །རིམ་དགུ་སྟོན་པའི་སངས་རྒྱས་གཟུགས་ཀྱི་སྐུ། །མོས་པ་སོ་སོར་འདུལ་ཕྱིར་སྣང་མོད་ཀྱང་། །བརྒྱུད་ནས་ཆོས་སྐུ་རྟོགས་པའི་ཐབས་སུ་བསྟན། །སྨོན་ལམ་དབང་གིས་འགྲོ་དོན་བྱེད་འདོད་པ། །འོག་མའི་བློས་བཞག་སངས་རྒྱས་ཆོས་སྐུ་མིན། །དེ་ཕྱིར་རང་སེམས་མ་རྟོགས་དགེ་བ་ཡིས། །རྒྱུ་མེད་འབྲས་བུ་མི་འབྱུང་དཔེ་བཞིན་དུ། །བསྐལ་པ་སྟོང་དུ་ཚོགས་བསགས་སྒྲིབ་སྦྱངས་ཀྱང་། །འབྲས་བུ་གཟུགས་སྐུ་སངས་རྒྱས་འབྱུང་མི་འགྱུར། །ད་ཡང་འདུས་པའི་དད་ལྡན་འཁོར་ཀུན་ཉོན། །གསེར་སྦྲུལ་ ― DNG002_Page_0322 ―
[མ་དཔེ་གཟིགས་ན་འདིར་གནོན།]
མིག་གིས་འདོད་པའི་ཡོན་ཏན་ལྔ། །དུས་གཅིག་ཉམས་སུ་མྱོང་བའི་དཔེ་བཞིན་དུ། །ངོ་བོ་ཉིད་ཀྱི་དོན་རྟོགས་ཆོས་ཀྱི་སྐུ། །དེ་དོན་རིག་པ་ལོངས་སྤྱོད་རྫོགས་པའི་སྐུ། །སྣ་ཚོགས་ཉིད་ན་གསལ་ཐེབས་སྤྲུལ་པའི་སྐུ། །སྐལ་མེད་རྟོགས་པ་དཀའ་ཕྱིར་གསང་བའི་སྐུ། །བློ་དངོས་གཅིག་ཕྱིར་མངོན་པར་བྱང་ཆུབ་སྐུ། །དེ་རྣམས་གཅིག་གི་ཡོན་ཏན་ལྔར་སྣང་བས། །སངས་རྒྱས་འགྲོ་བའི་དོན་བཙལ་མི་དགོས་ཕྱིར། །སེམས་ཅན་ཉིད་ནས་རང་བྱུང་ཆོས་ཀྱི་སྐུ། །རྫོགས་པ་ཆེན་པོ་བལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཆོས་སྐུ་རྟོགས་ནས་གཟུགས་སྐུ་འབྱུང་བ་བསྟན་པའི་ལེའུ་སྟེ་སུམ་ཅུ་པའོ།། །།དེ་ནས་འདུས་པའི་འཁོར་རྣམས་ཀྱིས། །ཐེ་ཚོམ་གེགས་ཆེན་དོན་ཞུས་པ། །ཆད་དམ། འཁོར་འདས་སྤྱི་མཚན་སེམས་ཡིན་ཕྱིར། །རྟོགས་ན་ཀུན་ཀྱང་ཡིན་ཏེ་མ་རྟོགས་མིན། །ཨ་ཏི་ཐེག་ཆེན་སྙིང་པོ་རྫོགས་གཞི་ལ། །ཡོད་མེད་གང་ཡང་རྟག་ཆད་སྐྱོན་ཡིན་ཕྱིར། །མ་ངེས་རྒྱུ་འབྲས་ལམ་པའི་ཁ་རྗེ་ལ། །སངས་རྒྱས་འབྲས་བུ་མི་ཐོབ་སྙིང་རྗེའི་གནས། །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །འཇིག་རྟེན་པ་དང་འདས་པའི་ཆོས་རྣམས་ཀྱི། །གཉིས་ཀའི་གཞི་ནི་ངོ་བོ་ཆོས་སྐུར་ངེས། །ཡུལ་གྱི་སྣང་བ་མ་ངེས་སྣ་ཚོགས་པ། །བླང་དོར་མེད་ཅིང་ཆོས་རྣམས་ལྷུན་གྱིས་གྲུབ། །འདུས་པའི་སྙིང་པོས་དོན་གསོལ་པ། །ཡུལ་ཉིད་སེམས་སམ་སེམས་ཉིད་ཡུལ། །ཡུལ་ཉིད་ཡིན་ཕྱིར་ཡུལ་ལ་སྡུག་བསྔལ་རིགས། །སེམས་ཉིད་ཡུལ་ན་རང་སེམས་བེམ་པོར་ཐལ། །སྤང་སྡུད་མི་ཤེས་ཞེན་པ་སྐྱེ་བོའི་བློ། །དེ་ཕྱིར་རྫོགས་ཆེན་ཆོས་སྐུ་བླ་མེད་གང་། །ད་ཡང་འདུས་པའི་འཁོར་གྱི་སྙིང་པོ་ཉོན། །ཡུལ་ཉིད་སྤང་སྡུད་ཞེན་པ་རྣམས་ཀྱི་སྐྱོན། །བླང་དོར་མེད་ཕྱིར་གཉེན་པོས་བཙལ་མི་དགོས། །དེ་ཙམ་ཉིད་ན་བསམ་གཏན་མཆོག་གི་ལམ། །དེ་ལ་གཉེན་པོ་མེད་ཕྱིར་བླ་མེད་ཆོས་ཀྱི་སྐུ། །འདུས་པའི་གཙོ་བོས་ཡང་ཞུས་པ། །བསྒོམ་དུ་ཡོད་མེད་སྒྲོ་སྐུར་མཐར་ལྷུང་ཕྱིར། །བསྒོམ་ཡོད་ཞི་ ― DNG002_Page_0323 ―
[མ་དཔེ་གཟིགས་ན་འདིར་གནོན།]
གནས་མཐའ་ལ་ཞེན་པ་སྟེ། །མ་རྟོགས་བསྒོམ་མེད་དོན་གྱི་གདེང་དང་བྲལ། །དེ་ཕྱིར་མཐའ་ཡི་བལྟ་བ་ནོར་བའི་བློ། །ད་ཡང་དད་ལྡན་འཁོར་རྣམས་ཡིད་ཀྱིས་ཉོན། །ཨ་ཏིའི་མན་ངག་ཆོས་སྐུའི་སྙིང་པོ་འདི། །བསྒོམས་ཀྱང་འགལ་མེད་རང་སེམས་ནམ་མཁའ་འདྲ། །མ་བསྒོམས་པས་ཀྱང་ཆོས་སྐུ་སྟོར་བྲལ་མེད། །བྱང་ཆུབ་ལམ་དུ་སེམས་ཉིད་རྟོགས་པ་གཅེས། །རྡོ་རྗེ་སེམས་དཔས་ཡིད་ཀྱིས་དོན་ཞུས་པ། །སངས་རྒྱས་སེམས་ཅན་གཅིག་གམ་ཐ་དད་ལགས། །ཐ་དད་འདྲེལ་མེད་ཐུགས་རྗེས་ཕན་མི་ནུས། །གཅིག་ན་འགྲོ་དྲུག་སྡུག་བསྔལ་ཅི་ཕྱིར་འབྱུང་། །ཀུན་རིག་སྟོན་པས་བཀའ་སྩལ་ཡིད་ཀྱིས་ཉོན། །དེ་གཉིས་སོ་སོར་སྣང་བ་མ་ཡིན་ཏེ། །རྟོགས་ན་ངོ་བོ་གཅིག་ཕྱིར་ཐུགས་རྗེ་འབྱུང་། །རང་སེམས་མ་རིག་རྣམ་རྟོག་སྡུག་བསྔལ་ཡིན། །དོན་ལ་དབྱེར་མེད་སེམས་ཉིད་ལྷུན་གྱིས་གྲུབ། །འདུས་པའི་ཚོགས་ཀྱིས་རང་དོན་ཡིད་ཀྱིས་ཞུས། །སངས་རྒྱས་སེམས་ཅན་རྒྱུ་འབྲས་ཡིན་གྱུར་ན། །སངས་རྒྱས་ལས་བྱུང་རྣམ་གསུམ་དོན་མེད་འགྱུར། །སེམས་ཅན་ལས་བྱུང་ཚོགས་གཉིས་འདུས་མི་རྟག །ཀུན་རིག་སྟོན་པས་བཀའ་སྩལ་པ། །སངས་རྒྱས་སེམས་ཅན་རྒྱུ་འབྲས་རོ་གཅིག་ཕྱིར། །ལྟོས་པའི་གཅིག་ལ་གཅིག་འབྱུང་མ་ཡིན་ཏེ། །གཉིས་ཀའི་ངོ་བོ་རང་སེམས་ཆོས་སྐུར་གཅིག །སངས་རྒྱས་སེམས་ཅན་སྐྱོན་ཡོན་རྣམ་པ་གཉིས། །ཆོས་ཉིད་འཁྲུལ་པ་གང་རུང་གཞིར་བཞག་ལ། །གཉིས་ཀ་ལྟར་ཡང་རྩོད་ན་མི་འགལ་ཕྱིར། །མ་རིག་ཡེ་ཤེས་གང་ཟག་ཕྱོགས་བཟུང་ན། །ཀུན་ཀྱང་ཡིན་ལ་ཐམས་ཅད་མེད་པའི་ཕྱིར། །རྒྱུ་ཡོད་དང་ནི་རྒྱུ་མེད་གང་འཁྲུལ་པ། །གཞི་འཇོག་མ་ནོར་ཤིན་ཏུ་གཅེས་པར་གསུངས། །རྡོ་རྗེ་སེམས་དཔས་འཁོར་གྱི་དོན་ཞུས་པ། །རང་ལ་ཡོད་ན་མཁས་པས་ཇི་ལྟར་སྟོན། །ཡེ་ནས་ཡོད་ན་མན་ངག་བསྟན་མི་དགོས། །མེད་ན་རི་བོང་རྭ་བཞིན་རྒྱུ་མི་དམིགས། །ཀུན་རིག་རྒྱལ་པོས་འཁོར་ལ་བཀའ་སྩལ་པ། །ཡེ་ནས་རང་ལ་ཡོད་པའི་ཆོས་སྐུ་ནི། །བླ་མས་མཚོན་ནས་རང་སེམས་དོན་བསྟན་པས། ། ― DNG002_Page_0324 ―
[མ་དཔེ་གཟིགས་ན་འདིར་གནོན།]
མ་རིག་རྣམ་རྟོག་ཆོས་སྐུར་ཤེས་པ་ལས། །ལོགས་ནས་བཙལ་བས་རྙེད་པ་མ་ཡིན་ནོ། །དད་ཉན་འཁོར་གྱི་དོན་ཆེད་ཡིད་ཀྱིས་ཞུས། །བླ་མའི་གདམས་ངག་ཡུལ་ལ་མི་རྟོག་པ། །རྩལ་དུ་ཉམས་མྱོང་ཞི་གནས་སྐྱོན་ཡིན་ཕྱིར། །རྟོགས་ན་རང་རྒྱུད་ཡིན་ཕྱིར་མན་ངག་མིན། །མ་དྲན་འདུ་ཤེས་འགགས་ཕྱིར་གཉིད་དུ་ཉལ། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །ཡུལ་ལ་མི་རྟོག་དེ་ཉིད་བསམ་གཏན་ཏེ། །རྟོགས་དང་མི་དྲན་གཉིས་ཀའི་གཞི་ཡིན་ཏེ། །ཐོག་མཐའ་ཆོད་ན་ཆོས་ཉིད་བྱང་ཆུབ་སེམས། །དེ་ཉིད་རང་བྱུང་ཡེ་ཤེས་དོན་རྟོགས་ན། །ཡུལ་ཉིད་མི་རྟོག་བསྒོམ་པའི་དོན་ཉིད་ཤར། །མན་ངག་གིས་ནི་བཅོས་ན་དོན་དང་འགལ། །མ་བཅོས་མན་ངག་བཀའ་ལ་དགོས་པ་མེད། །ད་ཡང་འདུས་པའི་འཁོར་རྣམས་ཡིད་ཀྱིས་ཉོན། །ལུང་ལྡན་མཁས་པའི་མན་ངག་དོན་ཟབ་ཀྱིས། །ཀུན་གྱི་གཞི་ཆ་ཆོས་སྐུ་ངོ་བོ་ཉིད། །བཅོས་སུ་མེད་པར་རང་སེམས་ནམ་མཁའ་འདྲ། །སྒོ་ལྔ་ཡུལ་ཉིད་འཁྲུལ་ཕྱིར་འདྲེལ་པ་ཆོད། །ཡིད་ལ་བལྟ་བ་བསྟན་པས་ཉོན་མོངས་གྲོལ། །དེ་ཕྱིར་བཀའ་དོན་རྟོགས་པ་ཤིན་ཏུ་གཅེས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཐེ་ཚོམ་གེགས་སེལ་བསྟན་པའི་ལེའུ་སྟེ་སོ་གཅིག་པའོ།། །།དེ་ནས་འདུས་པའི་ཆེད་དུ་ཡང་ཞུས་པ། །བར་ཆད་མི་འབྱུང་སྤྱོད་པའི་དམ་ཚིག་གང་། །རྣལ་འབྱོར་བལྟ་བ་ཉམས་པའི་སྐྱོན་ནི་གང་། །དེ་ལ་སྐོང་ཐབས་ཇི་ལྟར་བསྟན་པར་བགྱི། །བསྐངས་པའི་འབྲས་བུ་ཇི་ལྟར་འབྱུང་བ་ལགས། །མཉམ་པའི་རྒྱལ་པོས་ལུང་ནི་བསྟན་དུ་གསོལ། །ཞུས་པའི་དོན་གསན་ཐུགས་ཀྱིས་བཀའ་སྩལ་པ། །བར་ཆད་མི་འབྱུང་སྤྱོད་པའི་དམ་ཚིག་ནི། །ངེས་པའི་ལུང་ལྡན་མན་ངག་འཆང་བ་ཡིས། །རྡོ་རྗེ་སློབ་དཔོན་སྐུ་དགྲ་བརྙས་བྱེད་དང་། །སྐད་ཅིག་ཙམ་ཡང་མི་འགྲོགས་སྤང་རྒྱུ་ལ། །འདྲིས་ཤིང་གུས་པར་བྱེད་པའི་སློབ་མ་དེར། །མཁའ་འགྲོས་བར་གཅོད་ཚེ་ཐུང་ནད་མང་ ― DNG002_Page_0325 ―
[མ་དཔེ་གཟིགས་ན་འདིར་གནོན།]
འབྱུང་། །འཆི་ལ་རབ་ཏུ་ཚ་བའི་དམྱལ་བར་སྐྱེ། །སྐུ་དགྲ་བསྒྲལ་ཞིང་སྤངས་ན་དངོས་གྲུབ་འབྱུང་། །ད་ཡང་འདུས་པའི་སྙིང་པོ་ཡང་ཉོན་ཅིག །དེ་ཡི་ཕྱོགས་མཐུན་དམ་ཚིག་བསྲུང་བའི་ཕྱིར། །དམ་ཉམས་འཐབ་དང་ནག་མོ་འཛིངས་པ་ཡི། །ཤུགས་སྡུམ་མི་བྱ་བཀའ་ལས་འདས་པར་གསུངས། །བྱས་ན་གཙང་རིས་ཆོས་སྐྱོང་མགོན་ཁྲོས་ནས། །གོད་ཀ་འབྱུང་ཞིང་སྒྲུབ་པའི་ལྷ་དང་འབྲལ། །ཕྱི་མ་དྲན་ཉམས་ལྐུགས་པའི་དམྱལ་བར་སྐྱེ། །དེ་ཕྱིར་བྱ་བ་བསྐྱུངས་ལ་དོན་ལ་བཞག །ད་ཡང་འདུས་པའི་སྙིང་པོ་ཡང་ཉོན་ཅིག །ངེས་པའི་རྣལ་འབྱོར་ལུང་ལྡན་པས། །རིག་འཛིན་སྤྱོད་པ་བསྟན་པའི་ཕྱིར། །རྟ་བོང་རྨིག་ཟླུམ་ཤ་རྣམས་རྟག་ཏུ་སྤངས། །མ་སྤངས་དགྲ་རྐུན་རྣམས་ཀྱིས་བར་ཆད་ཡོང་། །ཕྱི་མར་ཡི་དྭགས་འདྲེ་སྲིན་གནས་སུ་སྐྱེ། །དེ་ཕྱིར་ངེས་པའི་རྣལ་འབྱོར་ལུང་ལྡན་གྱིས། །དེ་བས་གཙང་སྦྲ་བྲམ་ཟེ་བཞིན་དུ་སྤྱད། །དེ་ལ་རིག་འཛིན་བྱིན་གྱིས་བརླབས་པར་ངེས། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །བླ་མའི་ཐུགས་ཀྱི་དམ་ཚིག་བསྲུང་བའི་ཕྱིར། །ཡང་དག་ངེས་པའི་བཀའ་དོན་འདི་ཡི་ཆོས། །སྣོད་ལྡན་ལས་ཅན་སློབ་མ་དད་པ་ཡིས། །ངེས་དོན་མ་ནོར་རྒྱལ་བའི་བཀའ་ཡི་ལུང་། །ཆད་དམ་དཔྱད་ཐེག་དམན་བསྟན་བསྲུང་ཆོས་དང་འདི་བརྗེས་ན། །འདི་ལ་བར་ཆད་ཚན་ཅན་བརྗོད་མི་ལངས། །ཕྱི་མར་རྡོ་རྗེ་དམྱལ་བ་ཆེན་པོར་ལྟུང་། །དེ་ཕྱིར་རང་གི་སེམས་ལ་བཅང་བར་གྱིས། །ད་ཡང་འདུས་པའི་རྡོ་རྗེ་སེམས་དཔའ་ཉོན། །འཇིག་རྟེན་མཁའ་འགྲོའི་དམ་ཚིག་བསྲུང་བའི་ཕྱིར། །རྣལ་འབྱོར་ཏིང་འཛིན་མི་གཡོ་དོན་ལྡན་པས། །ཁྱོ་ཤི་ཡུགས་ས་ངོ་གནག་དེ་མ་ཐག །གཞན་གྱིས་མ་སྤྱད་ཁྲུས་ནས་མ་བཏོན་ལ། །འཁྲིག་པ་སྤྱད་ན་བར་ཆད་འགོ་བའི་ནད། །ཡུན་རིང་ཐེབས་ཏེ་དུད་འགྲོ་སྦུར་བར་སྐྱེ། །དེ་ཕྱིར་མཁའ་འགྲོ་རྟག་ཏུ་མཆོད་པར་བྱ། །དེས་ནི་ཐུན་མོང་མཆོག་གི་དངོས་གྲུབ་མྱུར། །ད་ཡང་འདུས་པའི་རྡོ་རྗེ་སེམས་དཔའ་ཉོན། །དེ་དག་བར་ཆད་མི་འོང་དམ་ཚིག་ལ། །སྲོག་ལ་བབས་ཀྱང་མ་ ― DNG002_Page_0326 ―
[མ་དཔེ་གཟིགས་ན་འདིར་གནོན།]
ཉམས་བསྲུང་གྱུར་ན། །རྒྱལ་བ་རྣམས་ཀྱིས་བྱིན་རླབས་ཡེ་ཤེས་ཚོགས། །འབྲས་བུ་ཅི་བསམ་འགྲུབ་ཅིང་ཆོས་སྐུར་སྨིན། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། སྤྱོད་པའི་དམ་ཚིག་བསྲུང་བར་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་ཀུན་རིག་སྟོན་པས་ཡང་གསུངས་པ། སྣོད་ངན་དམ་ཉམས་ཁ་གསག་གཡོ་སྒྱུ་ཅན། །ལུང་ལྡན་ངེས་པའི་དོན་གྱི་གདེང་མེད་པར། །བཀའ་ལ་གཟུ་ལུམས་བྱེད་ཅིང་ནན་བརྟགས་ཀྱིས། །བློས་བྱས་ཚིག་ཙམ་མང་དུ་སྨྲ་བྱེད་ཅིང་། །དོན་མེད་ང་རྒྱལ་དྲེགས་པའི་མཁས་འདོད་པས། །རང་གི་ལྟ་བ་ཡ་རབས་མཐོ་བཞེད་ནས། །ཚིག་ལ་མཉམ་སྦྱོར་མཁས་པའི་ཟླ་མེད་ཀྱང་། །དམ་ཚིག་འཆལ་པོར་བྱང་ཆུབ་སེམས་སྤངས་ནས། །ལོག་འདྲེན་ཁོང་གསོག་བདེན་ཚིག་ཅི་སྤྲས་ཀྱང་། །འཁྲུལ་པའི་སེམས་ཉིད་ལོག་འདྲེན་དབང་དུ་འགྱུར། །གནམ་ལྕགས་མཁའ་ལས་འདམ་དུ་བྱིང་བ་བཞིན། །དམྱལ་བར་གཏན་དུ་ངེས་འགྲོ་སྙིང་རེ་རྗེ། །ད་ཡང་འདུས་པའི་རྡོ་རྗེ་སེམས་དཔའ་ཉོན། །གསང་བའི་གསང་སྔགས་ལྟ་བའི་སྒོར་ཞུགས་ནས། །ཡང་དག་ཆོས་ཉིད་དོན་ལ་མི་འདུད་པར། །མི་ཆོས་ལུས་ངག་གཡེང་བའི་ལས་བྱེད་པ། །རི་བོས་སྲོག་ཆགས་ཆུང་ངུ་མནན་པ་ལྟར། །མི་ཤེས་རང་གི་ཆོས་བསྙེམས་བྱེད་པ་དེ། །ནམ་ཡང་སངས་རྒྱས་ཐར་པ་ཐོབ་མི་སྲིད། །དེ་ཡང་རྡོ་རྗེ་སེམས་དཔའ་ད་ཉོན་ཅིག །རྒྱ་མཚོའི་འཇིང་གི་ཕ་བོང་དཀྱིལ་བསྐམ་ལྟར། །ཐེག་པ་འོག་མའི་སྡེ་སྣོད་ཆོས་མཉན་ཀྱང་། །ཡང་དག་དོན་གྱི་ལྟ་བའི་གདེང་མེད་པར། །དམ་ཚིག་ལུང་ལས་ཆོས་ཀྱི་ཁུངས་ཕྱུང་ནས། །བྱར་མེད་ཆོས་ཀྱིས་ང་རྒྱལ་བློ་སྐྱེས་ནས། །ལུས་ངག་རྩིང་ཆོས་ཕད་དྲལ་སྤྱོད་བྱེད་ལ། །སངས་རྒྱས་བཀས་ཀྱང་འཁོར་བར་མི་སྐྱོ་བས། །སྡུག་བསྔལ་ཡ་ངའི་འབྲས་བུར་ཐེ་ཚོམ་མེད། །ལྟ་བ་ཉམས་པའི་ཉེས་སྐྱོན་ཆེན་པོ་ནི། །ཐར་མེད་རྡོ་རྗེ་དམྱལ་བ་ཆེན་པོར་ལྟུང་། །ལས་དབང་སྒྲོ་སྐུར་ངན་པས་རྐྱེན་བྱས་ནས། །ཐར་མེད་སྡུག་བསྔལ་ ― DNG002_Page_0327 ―
[མ་དཔེ་གཟིགས་ན་འདིར་གནོན།]
བསམ་འདས་བརྗོད་མི་ལངས། །ལོག་ལྟའི་དབང་གིས་བྱང་ཆུབ་སེམས་ནི་འཆར་མི་སྲིད། །ཉེས་པའི་སྐྱོན་དུ་བཤད་པ་ཡིན་པའི་ཕྱིར། །ཤིན་ཏུ་རྣལ་འབྱོར་དོན་ཉིད་རྟོགས་པ་མེད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། རྣལ་འབྱོར་ལྟ་བ་ཉམས་པའི་སྐྱོན་བསྟན་པའི་ལེའུ་སྟེ་སོ་གསུམ་པའོ།། །།དེ་ནས་ཀུན་རིག་སྟོན་པ་ཆོས་རྗེ་ཀུན་བཟང་གིས། །རྣལ་འབྱོར་ལྟ་བ་ཉམས་པ་སྐོང་བའི་ཐབས། །འདུས་པའི་ཚོགས་ལ་ཆེད་དུ་བཀའ་སྩལ་པ། །རང་གི་བྱང་ཆུབ་སེམས་ཉིད་མ་རྟོགས་ན། །མ་ཧཱ་ཡོ་གའི་ཆོས་ཀྱི་ཚོགས་མཆོད་ཀྱིས། །སྐོང་བཤགས་ཕྲིན་ལས་གཞུང་དུ་བྱས་གྱུར་ཀྱང་། །རྣལ་འབྱོར་ལྟ་བ་ཉམས་པ་སྐོང་མི་འགྱུར། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །བླ་མ་བརྒྱུད་པའི་མན་ངག་དོན་ལྡན་ལ། །རང་སེམས་དཔང་བཙུགས་དོན་ཞུས་ནས། །རྒྱུན་དུ་མི་གཏོང་ལྟ་བ་དྲན་བྱས་ན། །སྙིང་པོ་མཆོག་ནི་སངས་རྒྱས་ཆོས་ཀྱི་སྐུ། །བདེ་ཆེན་ཐུགས་ལ་གསལ་བའི་དམ་ཚིག་སྟེ། །ཡན་ལག་དམ་ཚིག་ཉམས་ཀྱང་བསྒྲིབ་མི་ནུས། །རྒྱུན་དུ་མི་གཏོང་ཏིང་འཛིན་དོན་ལྡན་ན། །མཚམས་མེད་ལ་སོགས་བྱས་ཀྱང་ཆོས་ཀྱི་སྐུ། །འགྱོད་པ་དྲག་པོ་ཡིད་ལ་བྱས་ནས་ལྟ་བ་ནི། །མི་བརྗེད་གཟུངས་ཐོབ་དོན་ལ་གུས་པའི་ཆོས། །སེམས་ལ་གསལ་བས་རྣམ་རྟོག་མིང་ཡང་མེད། །དེ་ཕྱིར་རང་བྱུང་ཡེ་ཤེས་ཐུགས་ལ་ཤར། །དེ་ཙམ་ཉིད་ནི་ངེས་དོན་ཆོས་ཀྱི་སྐུ། །དེ་རྟོགས་སངས་རྒྱས་རང་བྱུང་བཅོམ་ལྡན་འདས། །ཐམས་ཅད་མཁྱེན་པའི་ཡེ་ཤེས་ཐུགས་ལ་བཀྲ། །དེ་ཕྱིར་མན་ངག་ངེས་དོན་སྙིང་པོ་འདི། །སྐྱབས་དང་མགོན་དུ་ལྟ་བ་མཆོག་ཏུ་གསུངས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ལྟ་བ་ཉམས་པ་སྐོང་བའི་ཐབས་བསྟན་པའི་ལེའུ་སྟེ་སོ་བཞི་པའོ།། །།དེ་ནས་འདུས་པའི་འཁོར་རྣམས་ལ། །ཀུན་བཟང་སྟོན་པ་ཆོས་རྗེས་བཀའ་སྩལ་པ། །ལྟ་བ་ཉམས་པ་བསྐངས་པའི་འབྲས་བུ་ནི། །རང་སེམས་ ― DNG002_Page_0328 ―
[མ་དཔེ་གཟིགས་ན་འདིར་གནོན།]
སངས་རྒྱས་སྙིང་པོ་ཡེ་ཤེས་འབྱུང་། །རྟོགས་པ་ཙམ་གྱིས་རང་རིག་ཆོས་ཀྱི་སྐུ། །འབྲས་བུ་གཞན་ནས་བཙལ་མི་དགོས་པའི་མཆོག །རང་བྱུང་གདོད་ནས་དག་པའི་ངོ་བོ་ཉིད། །ཆོས་སྐུ་འགྱུར་བ་མེད་པས་ཡེ་ཤེས་བདེ། །འབྲས་བུ་དུས་ལ་མི་ལྟོས་ད་ལྟ་ཉིད། །ཡེ་དབང་ཐོབ་ནས་སངས་རྒྱས་ཀུན་དང་མཉམ། །རྣམ་སྨིན་ལུས་འདི་བྲལ་ནས་ཀུན་བཟང་ཐུགས། །སྐྱེ་བ་མི་ལེན་འབྲས་བུ་མངོན་དུ་གྱུར། །བྱང་ཆུབ་མཆོག་ཉིད་རང་བྱུང་མཐར་ཕྱིན་པས། །མི་ཚེ་འདི་ཡིས་བྱང་ཆུབ་མཆོག་ཐོབ་པས། །རྒྱུ་ལས་མི་ལྟོས་འབྲས་བུ་ཡེ་ཤེས་ཚོགས། །ད་ལྟ་ཉིད་ནི་རང་རིག་ཀུན་ཏུ་བཟང་། །ལུས་འདི་བྲལ་བས་སངས་རྒྱས་ཆོས་ཀྱི་སྐུ། །སྐྱེ་བ་མི་ལེན་འབྲས་བུ་མངོན་དུ་གྲུབ། །དངོས་པོ་ལུས་མེད་སྙིང་པོ་བྱང་ཆུབ་སེམས། །སྤྲིན་མེད་མཁའ་ལ་གཟའ་སྐར་ཤར་བ་བཞིན། །རང་སེམས་རྟོགས་པས་འགྲོ་དོན་བཙལ་མི་དགོས། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །མ་རིག་འཁྲུལ་པའི་མུན་པ་གཏན་ནས་སངས། །རིག་པའི་ཡེ་ཤེས་ཡང་དག་ངེས་པར་རྒྱས། །རྣམ་པ་ཐམས་ཅད་མཁྱེན་པའི་ཡེ་ཤེས་རབ་ཏུ་ལྡན། །འགྲོ་དྲུག་སེམས་ཅན་ལུས་འདི་ལེན་མི་སྲིད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ལྟ་བ་ཉམས་པ་བསྐང་བའི་འབྲས་བུ་བསྟན་པའི་ལེའུ་སྟེ་སོ་ལྔ་པའོ།། །།དེ་ནས་འདུས་པའི་འཁོར་གྱི་སྙིང་པོ་ཡིས། །སྟོན་པ་ཀུན་བཟང་རྡོ་རྗེ་ཆེན་པོ་ལ། །བདེན་པའི་དགོས་དོན་ཡིད་ཀྱིས་འདི་སྐད་གསོལ། །ཆོས་རྣམས་ཀུན་གྱི་མཐའ་ནི་གང་ལ་ཐུག །ཐེག་དགུའི་འབྲས་བུའི་རིམ་པ་ཇི་ལྟར་འབྱུང་། །རྩོལ་མེད་ངང་དུ་ཡིད་ཆེས་ཇི་ལྟར་འདུས། །དོན་གྱི་དབྱེ་བའི་བྱེ་བྲག་ངོ་བོ་གང་། །ཐུན་མོང་ཆོས་རྣམས་ཟིལ་གྱིས་ཇི་ལྟར་གནོན། །ཀུན་རིག་སྟོན་པ་ཆོས་རྗེས་བཤད་དུ་གསོལ། །དེ་སྐད་ཞུས་པའི་དོན་ཆེན་ངེས་བསྟན་ནས། །ཀུན་རིག་སྟོན་པ་ཆོས་རྗེས་བཀའ་སྩལ་པ། །ལམ་གྱི་མཐར་ཐུག་འགྲོ་འོང་ངེས་པའང་། །གྲོང་ཁྱེར་ནང་དུ་ ― DNG002_Page_0329 ―
[མ་དཔེ་གཟིགས་ན་འདིར་གནོན།]
མཐར་ཐུག་འགྲོ་འོང་བཞིན། །ཆོས་ཀུན་རྩ་བ་རང་གི་སེམས་ཡིན་པས། །དེ་ཡི་རྩ་བ་མ་རིག་སེམས་ལ་ཐུག །ཆུ་བྲན་ཀུན་གྱི་འགྲོ་འོང་དུས་བཞིར་ནི། །རྒྱ་མཚོ་ཆེན་པོར་མཐའ་གཏིང་མེད་པར་ཐུག །དེ་བཞིན་འཁོར་བའི་སྡུག་བསྔལ་ཆེན་པོ་ཡང་། །སྐྱེ་རྒ་ན་འཆི་ལས་ངན་མཐའ་རུ་ཐུག །འབྱུང་བཞི་སྣང་བའི་ཆོ་འཕྲུལ་ཅིར་སྣང་ཡང་། །ནམ་མཁའ་མཐའ་དབུས་མེད་པའི་ངང་ལ་ཐུག །དེ་ཕྱིར་ཡུལ་སེམས་འདོད་གཞུང་ཅིར་བཤད་ཀྱང་། །འཁྲུལ་པའི་རྣམ་པར་རྟོག་པའི་མཐའ་རུ་ཐུག །ད་ཡང་འདུས་པའི་སེམས་དཔའ་ཆེན་པོ་ཉོན། །ཆོས་ཀྱི་སྒོ་མོ་བརྒྱད་ཁྲི་བསམ་ཡས་དག །ཡོངས་བསྡུས་ཐེག་དགུའི་ཆོས་སུ་བསྟན་པ་ཡང་། །རྫོགས་པ་ཆེན་པོའི་ཆོས་ཀྱི་མཐའ་རུ་ཐུག །དེ་ཕྱིར་ངེས་པ་ཀུན་གྱི་རྩ་བ་ཡིན། །ཡེ་ཤེས་རྣམ་ལྔ་ལ་སོགས་མདོར་བསྡུས་པ། །རང་བྱུང་ཡེ་ཤེས་ཆེན་པོར་འདུས་པའི་ཕྱིར། །རིག་པར་འདུས་པ་ཆོས་ཀུན་རྩ་བ་སྟེ། །རང་རིག་ཡེ་ཤེས་མི་ཟད་ཆོས་སྐུར་ཐུག །ཡུལ་གྱིས་བསྡུས་པའི་ཆོས་རྣམས་མ་ལུས་པ། །ཡིན་མིན་བློ་ཡིས་བྱས་པའི་ཞེན་པ་ལ། །བདག་ལ་མཐར་ཐུག་ཡོད་པ་མཐའ་ཡིན་ཀྱང་། །ངེས་དོན་ཆོས་ཉིད་ཟབ་མོའི་མཐར་ཐུག་མཆོག །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཆོས་ཉིད་ཀྱི་མཐར་ཐུག་བསྟན་པའི་ལེའུ་སྟེ་སོ་དྲུག་པའོ།། །།དེ་ཡང་འདུས་པའི་འཁོར་གྱི་ཚོགས་རྣམས་ལ། །སྟོན་པ་ཀུན་བཟང་རྡོ་རྗེས་བཀའ་སྩལ་པ། །སྡུག་བསྔལ་ཆེད་དུ་སྤང་བའི་ཉན་ཐོས་དང་། །མ་རིག་རྒྱུ་བ་འགེག་པའི་རང་རྒྱལ་དང་། །རྣམ་རྟོག་རིམ་གྱིས་སྦྱངས་པའི་མདོ་སྡེ་གསུམ། །རང་རང་བསྒོམ་པ་ཆེད་དུ་གཞུང་དུ་བྱས། །བསྐལ་པ་ཆེན་པོ་གསུམ་དུ་སྒྲིབ་སྦྱངས་ནས། །ཐ་མ་སངས་རྒྱས་ས་ལ་ངེས་པར་སྦྱོར། །ད་ཡང་འདུས་པའི་སེམས་དཔའ་ཆེན་པོ་ཉོན། །ལུས་ངག་ལས་ཀྱི་བྱ་བ་གཙོར་བྱེད་པའི། །ཀྲི་ཡ་བྱ་བ་རྒྱུད་ཀྱི་ཐེག་པ་ནི། །རང་གཞུང་ཆོས་ཀྱི་ཡན་ལག་ཚང་བ་ཡིས། །མི་ཚེ་བདུན་གྱིས་རིག་འཛིན་ས་ལ་སྦྱོར། །ཕྱག་རྒྱ་བཞི་ལ་བརྩོན་འགྲུས་བྱེད་པའི་ ― DNG002_Page_0330 ―
[མ་དཔེ་གཟིགས་ན་འདིར་གནོན།]
ཕྱིར། །བྱང་ཆུབ་ལམ་ལྔ་ལྷར་རྫོགས་ཆོ་འཕྲུལ་གྱིས། །འདི་ནས་ཕྲེང་གཅིག་ཆད། རྣལ་འབྱོར་ཡོ་གའི་ཐེག་པ་ནི། །མི་ཚེ་གསུམ་གྱིས་རིག་འཛིན་ས་ལ་སྦྱོར། །ད་ཡང་འཁོར་གྱི་སེམས་དཔའ་ཆེན་པོ་ཉོན། །ནང་པ་མ་ཧཱ་ཡོ་གའི་ཐེག་པ་ནི། །ཆོ་ག་ལྔ་ཡི་རིམ་པས་རྫོགས་བྱས་ནས། །གསང་སྔགས་ཡན་ལག་ལྔ་ཚང་ནས། །རྣལ་འབྱོར་ཞག་ནི་སུམ་ཅུ་ཕྲག་དྲུག་ན། །ཚེ་ལ་དབང་བའི་དངོས་གྲུབ་ཐོབ་པར་ངེས། །ལོ་ནི་ཉིས་སྟོང་ལྔ་བརྒྱར་རང་གནས་པས། །ལོངས་སྤྱོད་རྫོགས་པའི་ཚུལ་དུ་ལུས་བཟུང་ནས། །དུས་དེར་སངས་རྒྱས་ས་ལ་ངེས་པར་འགྲོ། །སྐུ་ལྔ་ཡེ་ནས་ལྷུན་གྱིས་གྲུབ་པར་འགྱུར། །ཨ་ནུ་རྗེས་སུ་ཡོ་གའི་ཐེག་པ་ནི། །སྙིང་པོ་དྲན་ཙམ་མ་བསྐྱེད་རྫོགས་པའི་ཕྱིར། །གཞན་གྱི་བར་མ་ཆོད་ཀྱི་ཚེ་གཅིག་གི། །འབྲས་བུ་སངས་རྒྱས་ས་ལ་ངེས་པར་འགྲོ། །ད་ཡང་རྡོ་རྗེ་སེམས་དཔའ་འཆང་བ་ཉོན། །རྫོགས་ཆེན་ངེས་དོན་ཨ་ཏི་ཡོ་ག་ནི། །གྲངས་དང་དུས་ལ་མི་ལྟོས་རང་བྱུང་ཐུགས། །ཆོས་སྐུ་ཇི་བཞིན་མ་ནོར་རྟོགས་པ་ཡིས། །འབྲས་བུ་སངས་རྒྱས་སྐུ་གསུམ་དུས་གཅིག་རྫོགས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཐེག་དགུའི་འབྲས་བུ་བསྟན་པའི་ལེའུ་སྟེ་སོ་བདུན་པའོ།། །།དེ་ནས་འདུས་པའི་འཁོར་གྱི་སེམས་དཔའ་ལ། །སྟོན་པ་ཀུན་རིག་ཆོས་ཀྱི་རྗེ་བོ་ཡིས། །རྩོལ་མེད་ངང་དུ་ཡིད་ཆེས་བཀའ་སྩལ་པ། །མ་བཅོས་རྣལ་དུ་བཞག་པ་ཆེན་པོ་དེར། །ཐེག་དམན་རྩོལ་བསྒྲུབ་མ་ལུས་ཀུན་འདུས་ཏེ། །ཕ་རོལ་ཕྱིན་བཅུ་གསང་སྔགས་ཕྲིན་ལས་མ་ལུས་ཀུན། །བྱས་པ་མེད་པར་ཆོས་ཉིད་ངང་དུ་རྫོགས། །ཇི་ལྟར་སྣང་བའི་ཆོས་ཅན་ཆོས་ཉིད་ཀུན། །རྩོལ་བ་མ་བྱས་བྱང་ཆུབ་མི་འགྱུར་དབྱིངས། །མི་སྣང་བ་ལ་མངོན་དུ་འབྱིན་ནུས་ཕྱིར། །ཆོས་ཀྱི་སྙིང་པོ་ཡིན་པར་ཡིད་ཀྱང་ཆེས། །ཡེ་ནས་གནས་པའི་རང་བྱུང་སྙིང་པོ་འདི། །རྒྱུ་ལས་མ་བྱུང་རང་བྱུང་རྐྱེན་གྱིས་མ་བསྐྱེད་པས། །རྩོལ་བ་གང་ཡང་བྱེད་དོ་ཆོས་སྐུ་རུ། །རང་ ― DNG002_Page_0331 ―
[མ་དཔེ་གཟིགས་ན་འདིར་གནོན།]
བྱུང་ཡེ་ཤེས་ཡིན་པར་ཡིད་ཀྱང་ཆེས། །གཞན་ལས་མ་བཙལ་རང་ལས་རྙེད་པའི་ཕྱིར། །གཉེན་པོས་མ་བསྐྱེད་རང་བཞིན་གནས་པས་ན། །ལུས་ངག་ཆེད་དུ་རྩོལ་བ་མེད་པས་ན། །མ་བཙལ་ལྷུན་གྱིས་གྲུབ་པར་ཡིད་ཀྱང་ཆེས། །ཕྱི་ནང་ཐེག་པ་མ་ལུས་བཀའ་ཡི་དོན། །ཆོས་རྣམས་ཐམས་ཅད་གཏན་ལ་འབེབས་པའི་ཕྱིར། །རྩོལ་བས་རྩོལ་མེད་དོན་འདི་བསྟན་པ་ཡིས། །ཡེ་ཤེས་སྒྲོན་མ་ཡིན་པར་ཡིད་ཀྱང་ཆེས། །སྡེ་སྣོད་ཆོས་རྣམས་མན་ངག་ཀུན་ཀྱང་ནི། །འབྱུང་གནས་གཏན་ལ་འབེབས་པའི་ཆོས་ཡིན་པས། །བསྟན་པས་གོ་ཞིང་རྟོགས་པར་འགྱུར་བའི་ཕྱིར། །ཀུན་གྱི་སྤྱི་འགྲེལ་ཡིན་པར་ཡིད་ཀྱང་ཆེས། །དྲང་དོན་བློ་བྲིད་ཆོས་ཀྱི་རྣམ་གྲངས་ཀྱི། །རྒྱུ་འབྲས་ཐེག་པ་ཀུན་ལས་ཁྱད་འཕགས་ཕྱིར། །ཐེག་པའི་ཡང་རྩེ་ཡིན་པར་ཡིད་ཀྱང་ཆེས། །ངེས་དོན་སྙིང་པོ་མན་ངག་གསང་ཆེན་འདི། །དུས་གསུམ་སངས་རྒྱས་ཀུན་གྱི་ལམ་ཡིན་པས། །ངེས་དོན་ཆོས་སྐུ་རྟོགས་པས་ཆོག་པའི་ཕྱིར། །རྣམ་དག་ལམ་ཆེན་ཡིན་པར་ཡིད་ཀྱང་ཆེས། །ཀུན་གྱི་གཞི་མ་ཆོས་ཉིད་རང་བྱུང་བས། །འཁོར་འདས་གཉིས་ཀྱི་མ་རིག་དོན་ཆེན་འདི། །ཀུན་གྱི་རྩ་བ་ཡིན་པར་ཡིད་ཀྱང་ཆེས། །སེམས་ཅན་ཀུན་ལ་ཁྱབ་པའི་སྙིང་པོ་འདི། །ཐམས་ཅད་རང་ལས་བྱུང་བའི་ཡེ་ཤེས་ཏེ། །ལུང་ལྡན་བསྟན་པས་ཤེས་ཕྱིར་ངེས་པའི་དོན། །ངེས་པའི་སངས་རྒྱས་ཡིན་པར་ཡིད་ཀྱང་ཆེས། །ཡེ་ནས་གནས་པའི་ཆོས་ཉིད་སྙིང་པོ་འདི། །སྣང་བ་མེད་པར་ཀུན་ལ་ཁྱབ་པའི་ཕྱིར། །རྩོལ་མེད་ངང་དུ་རྩོལ་བ་འདུས་པས་ན། །ཆོས་སྐུ་བརྡལ་བ་ཡིན་པར་ཡིད་ཀྱང་ཆེས། །རང་བྱུང་ངོ་བོ་ཉིད་སྐུ་ཡེ་གནས་ལ། །གཅིག་དང་དུ་མར་བགྲང་དུ་མེད་པ་སྟེ། །གཅིག་ཤེས་པས་ནི་ཆོག་པའི་དོན་ཡིན་ཕྱིར། །ཐིག་ལེ་ཉག་གཅིག་ཡིན་པར་ཡིད་ཀྱང་ཆེས། །རང་ལ་ཡོད་ཀྱང་རྟོགས་པར་དཀའ་བ་ཡིས། །མ་བསྟན་རབ་ཏུ་མི་ཤེས་ངེས་པའི་ཕྱིར། །ཆོས་རྣམས་ཀུན་གྱི་སྙིང་པོ་ཆེན་པོ་འདི། །གསང་བའི་མན་ངག་ཡིན་པར་ཡིད་ཀྱང་ཆེས། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། རྩོལ་མེད་ངང་དུ་ཡིད་ཆེས་ ― DNG002_Page_0332 ―
[མ་དཔེ་གཟིགས་ན་འདིར་གནོན།]
པའི་ལེའུ་སྟེ་སོ་བརྒྱད་པའོ།། །།དེ་ནས་འདུས་པའི་འཁོར་ཚོགས་དང་ལྡན་ལ། །ཀུན་རིག་སྟོན་པ་ཀུན་བཟང་ཆོས་རྗེ་ཡིས། །དོན་གྱི་དབྱེ་བའི་བྱེ་བྲག་བཀའ་སྩལ་པ། །ཆོས་ཀྱི་སྐུ་དང་ཆོས་ཀྱི་དབྱིངས་གཉིས་ནི། །ཉི་མའི་སྙིང་པོ་དང་ནི་ཟེར་བཞིན་དུ། །གཅིག་པ་མ་ཡིན་ཐ་དད་མིན་པའི་ཕྱིར། །ལྡོག་བཅས་ཐ་དད་ངོ་བོ་གཅིག་པར་གསུངས། །ཆོས་ཉིད་སྐུ་དང་གཟུགས་སྐུ་འབྱུང་བ་གཉིས། །ནམ་མཁའི་ཟླ་བ་དང་ནི་ཆུ་ཟླ་བཞིན། །ཆོས་སྐུ་ལས་ནི་གཟུགས་སྐུ་འབྱུང་བ་ལས། །གཟུགས་སྐུ་ལས་ནི་ཆོས་སྐུ་འབྱུང་བ་མེད། །ཆོས་ཀྱི་སྐུ་དང་ཡེ་ཤེས་རྣམ་གཉིས་ནི། །ཏིལ་དང་མར་མེ་དང་ནི་འོད་བཞིན་དུ། །ཆོས་སྐུ་ཀུན་ལ་དོན་གྱིས་ཁྱབ་པ་ལས། །དེ་དོན་རྟོགས་པས་ཡེ་ཤེས་ངེས་པར་ཤེས། །ད་ཡང་རྡོ་རྗེ་སེམས་དཔའ་ཆེན་པོ་ཉོན། །མ་རིག་པ་དང་ཡེ་ཤེས་རྣམ་པ་གཉིས། །མེ་དང་ཆུ་གཉིས་མི་མཐུན་དཔེ་བཞིན་དུ། །གཅིག་ཡོད་ན་ནི་གཅིག་མེད་རྐྱེན་གྱིས་འགྱུར། །དེ་ཕྱིར་ལུང་ལྡན་མན་ངག་གཅེས་པར་གསུངས། །ཆོས་ཅན་དང་ནི་ཆོས་ཉིད་རྣམ་པ་གཉིས། །རྟོགས་དང་མ་རྟོགས་ཁྱད་པར་རྣམ་གཉིས་ཀྱིས། །སྣང་བ་དག་དང་མ་དག་གཉིས་སུ་འབྱུང་། །དེ་ཕྱིར་གཞི་ལ་ཆོས་ཅན་ཆོས་ཉིད་མེད། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། དོན་གྱི་བྱེ་བྲག་བསྟན་པའི་ལེའུ་སྟེ་སོ་དགུ་པའོ།། །།དེ་ནས་འདུས་པའི་འཁོར་གྱི་ཚོགས་རྣམས་ལ། །སྟོན་པ་ཀུན་རིག་ཆོས་རྗེ་ཆེན་པོ་ཡིས། །ཐུན་མོང་ཆོས་རྣམས་ཟིལ་གནོན་བཀའ་སྩལ་པ། །ཁྱུང་ཆེན་གཤོག་རྒྱས་མཁའ་ལ་ལྡིང་བ་ལ། །ངམ་གྲོག་གཡང་ས་རྒྱ་མཚོར་ཉམ་མི་ང་། །དེ་བཞིན་རང་གི་སེམས་རྟོགས་རྣལ་འབྱོར་པས། །འཁོར་བའི་སྡུག་བསྔལ་ཟིལ་གནོན་གནོད་མི་ནུས། །སེང་གེ་རྩལ་རྫོགས་གངས་གོང་ཉལ་བ་ལ། །གཅན་གཟན་ཆར་ལྷག་ཟིལ་གནོན་གནོད་མི་ནུས། །དེ་བཞིན་རྣལ་འབྱོར་གདེང་ཆེན་ལྡན་པ་ཡིས། །ཁམས་གསུམ་འཁོར་བའི་གོལ་སྒྲིབ་ཟིལ་གྱིས་གནོན། །ད་ཡང་འདུས་པའི་རྡོ་རྗེ་སེམས་དཔའ་ཉོན། །སྣང་མེད་ཆོས་སྐུ་ངེས་ ― DNG002_Page_0333 ―
[མ་དཔེ་གཟིགས་ན་འདིར་གནོན།]
དོན་རྟོགས་པ་ལ། །མཚན་མ་སྣ་ཚོགས་སྣང་རུང་མི་སྣང་རུང་། །སྐྱེ་འཆི་མེད་པའི་ཡེ་ཤེས་དོན་རྟོགས་ན། །རྒྱུ་རྐྱེན་འདུས་བྱས་རྟག་རུང་མི་རྟག་རུང་། །ཡེ་ནས་ཆོས་སྐུ་ཡིན་པའི་དོན་རྟོགས་ན། །ད་གཟོད་རྩོལ་བ་བྱེད་རུང་མི་བྱེད་རུང་། །གཞི་ལ་གཉིས་མེད་ངེས་པའི་དོན་མཐོང་ན། །གཅིག་དང་དུ་མར་བྱེད་རུང་མི་བྱེད་རུང་། །མཉམ་པ་ཉིད་ཀྱི་ཡེ་ཤེས་དོན་རྟོགས་ན། །མཐོ་དམན་བཟང་ངན་བྱེད་རུང་མི་བྱེད་རུང་། །རང་བྱུང་བགྲོད་པ་མེད་པའི་དོན་རྟོགས་ན། །ས་ལམ་རིམ་པར་བགྲོད་རུང་མི་བགྲོད་རུང་། །ཡེ་ཤེས་གསལ་སྒྲིབ་མེད་པའི་དོན་རྟོགས་ན། །སྣང་བ་མུན་པ་སྲོས་རུང་མི་སྲོས་རུང་། །ད་ཡང་འདུས་པའི་འཁོར་ཀུན་ཉོན། །རང་བྱུང་རིག་པ་འདི་ཡི་དོན་རྟོགས་ན། །སངས་རྒྱས་ཡེ་ཤེས་སྙིང་པོ་ཆོས་སྐུ་ཡང་། །ད་ལྟ་བསྒྲུབས་ནས་འབྱུང་བ་མ་ཡིན་ཏེ། །ཡེ་ནས་རང་ལ་གནས་པའི་སྙིང་པོའི་ཆོས། །འཁོར་བའི་མིང་མེད་སངས་རྒྱས་འབའ་ཞིག་ཡིན། །ད་ཡང་འདུས་པའི་སྙིང་པོའི་སེམས་དཔའ་ཉོན། །དེ་ཉིད་དུས་འདིར་ཤེས་པས་རྟོགས་པ་ནི། །ཡང་དག་སངས་རྒྱས་ངེས་པའི་དོན་ཆེན་གྱིས། །ཡེ་ཤེས་མངོན་གྱུར་སངས་རྒྱས་དུས་གཅིག་བྱུང་། །དེ་ཕྱིར་ལུང་ལྡན་མན་ངག་གཅེས་སུ་ཆེ། །རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། ཐུན་མོང་ཆོས་རྣམས་ཟིལ་གྱིས་གནོན་པའི་ལེའུ་སྟེ་བཞི་བཅུ་པའོ།། །།དེ་ནས་འདུས་པའི་སྙིང་པོ་འཁོར་རྣམས་ལ། །སྟོན་པ་ཀུན་རིག་རྒྱལ་པོས་དོན་གཏད་པ། །ཐེག་པའི་རྒྱལ་པོ་ཆོས་ཉིད་ལྷུན་རྫོགས་འདི། །སྐལ་ལྡན་འདུས་པའི་འཁོར་རྣམས་ཁྱེད་ཀྱིས་ཀྱང་། །རྒྱུད་འདི་ཡིད་ལ་བརྣགས་ཤིང་བཅང་བར་གྱིས། །ད་ཡང་འདུས་པའི་རྡོ་རྗེ་སྙིང་པོ་ཉོན། །སྤྱོད་པ་ཚུལ་འཆོས་བྱེད་ཅིང་སློབ་དཔོན་སྨོད། །ནོར་ཕངས་ཆོས་འདོད་ཐབས་ཀྱིས་འདྲུ་བ་ལ། །ཡེ་ཤེས་གཏིང་རྫོགས་རྒྱུད་ཆེན་ལྟ་བ་འདི། །སྣོད་ངན་རྣམས་ལ་ནམ་ཡང་བསྟན་པར་མ་གསུངས་སོ། །བཀའ་བཞིན་མ་བྱས་དོན་གྱི་སྙིང་པོའི་ཆོས། །འཇིག་རྟེན་ནོར་འདོད་དོན་སྟོན་རྣལ་འབྱོར་ལ། །སངས་རྒྱས་བཀའ་མཆོག་བཀའ་ཆད་འབྱུང་ངེས་ ― DNG002_Page_0334 ―
[མ་དཔེ་གཟིགས་ན་འདིར་གནོན།]
ཕྱིར། །འཇིག་རྟེན་མཁའ་འགྲོ་དམ་ཅན་རྣམས་དང་ནི། །གནོད་སྦྱིན་སྲིན་པོས་སྲོག་བཅད་མནར་མེད་ལྟུང་། །ད་ཡང་འཁོར་གྱི་སེམས་དཔའ་ཡིད་ཀྱིས་ཉོན། །བསྟན་པ་འཇིག་ཀའི་དུས་དེར་ཆོས་རྣམས་ཀྱི། །སྙིང་པོ་རྫོགས་ཆེན་དོན་འདི་འབྱུང་འགྱུར་བས། །སྣོད་ལྡན་རྣལ་འབྱོར་འགའ་ལ་གཏད་པ་ལས། །དད་མེད་སྣང་དགུ་རྣམས་ཀྱི་སྤྱོད་ཡུལ་མིན། །འཁོར་རྣམས་ཀུན་ཀྱང་ངེས་པ་དེ་ལ་ཞོག །ལན་ཅིག་རྣལ་འབྱོར་ཁས་འཆེའི་ཆོས་པ་རྣམས། །དོན་མེད་ཚིག་མཁས་ཉམས་སུ་ལེན་པ་མེད། །འདུས་བྱས་ཆོས་སྤངས་དོན་ལ་མི་འདུད་པར། །བསོད་ནམས་འདོད་ཕྱིར་གྲོང་དུ་ཆོས་འཆད་འབྱུང་། །ད་ཡང་རྡོ་རྗེ་སེམས་དཔའ་ཡིད་ཀྱིས་ཉོན། །རྣལ་འབྱོར་ལས་ཅན་དད་ལྡན་ཚེ་འདི་ལ། །གཞུང་བཞིན་དོན་ལས་མི་འདའི་བསམ་པ་ཅན། །དཀའ་དགུར་བརྡོས་ནས་མན་ངག་རྒྱུད་འདི་ཚོལ། །དེ་ཚེ་རྣལ་འབྱོར་ལས་ཅན་ཀུན་གྱི་དོན་གྱི་ཕྱིར། །སྲ་བསྐྱིལ་མི་བྱ་རྒྱུད་འདི་བསྟན་པར་གྱིས། །གལ་ཏེ་སྣོད་ལྡན་མ་རྙེད་དུས་ཉེ་ན། །ཆོས་སྐྱོང་ཡོད་པའི་གཙུག་ལག་ཁང་ཆེན་ནམ། །དྲེགས་པ་ལྷ་འདྲེ་ཡོད་པའི་བྲག་དཀྱིལ་དུ། །ས་ཕྱོགས་བརྟགས་ལ་དད་ལྡན་ཕྱི་རབས་ལ། །ཕན་ཕྱིར་སྨོན་ལམ་བཏབ་ལ་སྦས་ལ་བཞག །རྫོགས་པ་ཆེན་པོ་ཡེ་ཤེས་གཏིང་ནས་རྫོགས་པའི་རྒྱུད་ལས། འཁོར་ལ་རྒྱུད་གཏད་པའི་ལེའུ་སྟེ་ཞེ་གཅིག་པའོ།། །།རྫོགས་པ་ཆེན་པོ་མ་རིག་མུན་པ་སེལ་བར་བྱེད་པའི་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་རིན་པོ་ཆེ་དངུལ་གྱི་དྲིལ་ཤིང་ཅན་འདི་རྒྱ་གར་གྱི་མཁན་པོ་བི་མ་ལ་མི་ཏྲ་དང་། བོད་ཀྱི་ལོཙྪ་བ་ཨཱ་ཙརྱ་དྲན་པ་ཡེ་ཤེས་ཀྱིས་སྐད་རང་རྒྱུད་ཀྱིས་བསྒྱུར་ནས་གཏན་ལ་ཕབ་ནས། ཉང་ཏིང་འཛིན་བཟང་པོས་ལྕགས་སྒྲོམ་ནག་པོའི་ནང་དུ། བསེ་སྒྲོམ་སྨུག་པོར་བཅུག་སྟེ། དབུ་རུ་གཟོང་ཕུག་མོའི་བྲག་ཕུག་ཏུ། མཁའ་འགྲོ་མ་རྡོ་རྗེ་རྒྱན་གཅིག་མ་དང་། བཛྲ་སཱ་དྷུ་ལེགས་པ་རྩལ་ལ་གཏད་ནས་སྦས་པ། འབྲོམ་ཡེ་ཤེས་སྙིང་པོས་བཏོན་ནས། ཉང་དབང་ཕྱུག་རྒྱ་མཚོ་ལ་གཏད་པའོ། །དེས་ཤངས་པ་ལྕེ་ཆུང་བ་ཡེ་ཤེས་ལ་གཏད་པ་ལགས་སོ།། །། རྫོགས་པ་ཆེན་པོའི་ལྟ་བ་ཐམས་ཅད་ཀྱི་སྙིང་པོའི་རྒྱུད་ཅེས་བྱ་བ།― DNG002_Page_0335 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྟི་སརྦ་དྲྀཥྚི་གརྦྷ་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོའི་ལྟ་བ་ཐམས་ཅད་ཀྱི་སྙིང་པོའི་རྒྱུད་ཅེས་བྱ་བ། བཅོམ་ལྡན་འདས་མཉམ་པ་ཉིད་ཀྱི་རྒྱལ་པོ་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། །ཀུན་རིག་སེམས་ཀྱི་རྒྱལ་པོ་དེས། །འོག་མིན་ཆོས་ཀྱི་དབྱིངས་དག་ན། །མཉམ་ཉིད་དོན་ལ་རབ་བཞུགས་ཏེ། །གསང་སྔགས་བདག་པོ་ལ་སོགས་པའི། །འཁོར་རྣམས་འདུས་ནས་རབ་ཏུ་འཁོད། །དེ་ནས་སེམས་དཔའ་རྡོ་རྗེ་ཡིས། །འདུས་པའི་ཚོགས་ལ་ཕན་གདགས་ཕྱིར། །གུས་པའི་ཚུལ་གྱིས་ཐལ་སྦྱར་ཏེ། །བདེན་པའི་ཚིག་གིས་འདི་སྐད་གསོལ། །རྩ་བ་གཅིག་པའི་སེམས་ཉིད་ལ། །སངས་རྒྱས་ཆོས་རྣམས་ཅི་ལྟར་གསུངས། །དེ་དོན་དགོངས་པ་ཅི་ལྟར་ཡིན། །ཆོས་རྣམས་གཏན་ལ་ཇི་ལྟར་དབབ། །སྣོད་ཀྱི་རིམ་པ་ཇི་ལྟར་བསྟན། །མཉམ་ཉིད་རྒྱལ་པོས་ལུང་བསྟན་གསོལ། །དེ་སྐད་གསོལ་པའི་ཚིག་གསན་ནས། །ཀུན་རིག་སེམས་ཀྱི་རྒྱལ་པོ་ཡིས། །འདུས་པའི་ཚོགས་ལ་བཀའ་སྩལ་པ། །ལེགས་སོ་ལེགས་སོ་སེམས་དཔའ་རྡོ་རྗེ་ཁྱོད། །དད་ལྡན་བུ་ལ་ངས་བསྟན་གྱིས། །ལེགས་པར་ཉོན་ལ་ཡིད་ལ་ཟུངས། །དུས་གསུམ་སངས་རྒྱས་ཐམས་ཅད་ཀྱང་། །རྩ་བ་སེམས་ཉིད་རྟོགས་པའི་ཕྱིར། །གཟི་ལྡན་ནོར་བུ་རིན་ཆེན་བཞིན། །སངས་རྒྱས་ང་ཡི་སྐུ་གསུང་སྟེ། །ཆོས་སྐུ་ནམ་མཁའ་ལྟ་བུ་ལ། །རང་གི་ངོ་བོ་བརྗོད་དུ་མེད། །ཞིང་ཁམས་ཀུན་གཞི་སེམས་ཉིད་ལ། །ཐུགས་ཀྱི་སྒོ་ནས་ངེས་པའི་དོན། །རྒྱུ་འབྲས་དབྱེར་མེད་ལྷུན་རྫོགས་ཆོས། །བྱིན་རླབས་བདེ་གཤེགས་འཁོར་ལ་གསུངས། །ལོངས་སྐུ་འཇའ་ཚོན་ལྟ་བུ་ལ། །ངོ་བོ་རིགས་ལྔའི་སངས་རྒྱས་ཏེ། །ཞིང་ཁམས་འདུས་པ་ཆེན་པོ་ལ། །དབུས་སུ་ཕྱི་ནང་གསང་བའི་ཆོས། །སྐུ་ཡི་སྒོ་ནས་ལྡེམ་དགོངས་ཀྱིས། །སྐུ་ཡི་སྒོ་ནས་འཁོར་ལ་ངོ་བོར་གསུངས། །སྤྲུལ་སྐུའི་དཔེ་ནི་ངེས་མེད་ལ། །ཐུབ་དྲུག་ངོ་བོ་ཤཱཀྱ་ཐུབ། །ཞིང་ཁམས་ཁམས་གསུམ་སེམས་ཅན་ལ། །རྒྱུ་འབྲས་དགེ་སྡིག་གཉིས་ཀྱི་ཆོས། །གསུང་གི་སྒོ་ནས་དྲང་དོན་གྱིས། །སྡེབ་ ― DNG002_Page_0336 ―
[མ་དཔེ་གཟིགས་ན་འདིར་གནོན།]
སྦྱོར་ལེགས་པའི་ཚིག་ཏུ་གསུངས། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། མན་ངག་འབྱུང་བའི་རྒྱུ་སྐུ་གསུམ་གྱི་གླེང་གཞི་བསྟན་པའི་ལེའུ་སྟེ་དང་པོའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སངས་རྒྱས་རྣམས་ཀྱི་དགོངས་པ་ནི། །ཤེས་རབ་བློ་ཡི་ཁྱད་པར་ལས། །སྐུ་གསུམ་ཆོས་རྣམས་ཅིར་གསུངས་ཀྱང་། །དབྱེར་མེད་ངོ་བོ་ཉིད་དུ་གནས། །འཁོར་དང་མྱ་ངན་འདས་པའི་ཆོས། །ཐམས་ཅད་རྩ་བ་གཅིག་པའི་དོན། །རང་སེམས་རྟོགས་པའི་ཆོས་སྐུ་ལ། །སྣང་སྲིད་གཟུགས་བརྙན་མི་འགོག་པ། །སངས་རྒྱས་རྣམས་ཀྱི་དགོངས་པ་ཡིན། །ཡེ་ནས་དག་པ་ངོས་ཟིན་པས། །བྱ་བ་མེད་ཅིང་བསྒྲུབ་ཏུའང་མེད། །དེ་ཡང་སངས་རྒྱས་དགོངས་པ་ཡིན། །གཞན་ནས་མི་འབྱུང་རང་གི་སེམས། །རྒྱུ་ལས་མ་བྱུང་བདག་མེད་པ། །དེ་ཡང་སངས་རྒྱས་དགོངས་པ་ཡིན། །མ་བཅོས་མ་བསླད་དོན་ཡིན་པས། །མ་ནོར་ཇི་བཞིན་མ་འགགས་པ། །དེ་ཡང་སངས་རྒྱས་དགོངས་པ་ཡིན། །མ་སྐྱེས་མི་ནུབ་ཡེ་ཤེས་ནི། །མི་འབྱུང་མི་འགྲོ་ཡེ་གནས་པ། །དེ་ཡང་སངས་རྒྱས་དགོངས་པ་ཡིན། །ཀུན་ལ་ཁྱབ་པ་མི་འབྱེད་པས། །བལྟ་རུ་མེད་པས་ཐ་སྙད་མེད། །དེ་ཡང་སངས་རྒྱས་དགོངས་པ་ཡིན། །མཚོན་མེད་དཔེ་མེད་རྟོག་ལས་འདས། །བསམ་དུ་མེད་ལ་བསམ་མི་ཁྱབ། །དེ་ཡང་སངས་རྒྱས་དགོངས་པ་ཡིན། །རྒྱུ་ལས་མ་བྱུང་རྐྱེན་མེད་པས། །དངོས་པོ་མ་ཡིན་རྟག་ཆད་མེད། །དེ་ཡང་སངས་རྒྱས་དགོངས་པ་ཡིན། །སྤྱོད་དང་བྲལ་བས་སྒྲོ་སྐུར་བྲལ། །མཐའ་དབུས་མེད་པར་རྒྱུ་འབྲས་གཅིག །དེ་ཡང་སངས་རྒྱས་དགོངས་པ་ཡིན། །ད་ཡང་སེམས་དཔའ་རྡོ་རྗེ་ཉོན། །གཅིག་ལ་སརྦ་རྫོགས་པ་དེ། །སངས་རྒྱས་རྣམས་ཀྱི་དགོངས་པ་ཡིན། །ཚིག་ཏུ་མཚོན་ན་བསླད་ཅིང་བཅོས། །ཐམས་ཅད་རང་བྱུང་ཡེ་ཤེས་ཉིད། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། སངས་རྒྱས་ཐམས་ཅད་ཀྱི་དགོངས་པ་བསྟན་པའི་ལེའུ་སྟེ་གཉིས་པའོ།། །། ― DNG002_Page_0337 ―
[མ་དཔེ་གཟིགས་ན་འདིར་གནོན།]
དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །ཆོས་རྣམས་གཏན་ལ་དབབ་པའི་ཕྱིར། །དོན་གྱི་སྙིང་པོ་འདི་གསུངས་པ། །རྩ་བ་བཞི་ཡིས་མདོར་བསྡུས་ནས། །འཕྲང་ཆེན་དྲུག་གིས་གཏན་ལ་དབབ། །མན་ངག་ལྔ་ཡིས་ལ་བཟླས་ལ། །གཏན་ཚིགས་བཞི་ཡིས་ཡིད་ཆེས་བྱ། །ད་ཡང་སེམས་དཔའ་རྡོ་རྗེ་ཁྱོད། །རྩ་བ་བཞི་ཡིས་མདོར་བསྡུ་བ། །གཞི་ངེས་ལྟ་བ་ཕྱོགས་མེད་དང་། །དོན་དང་མི་འབྲལ་ཏིང་འཛིན་དང་། །སྤང་ལེན་མེད་པའི་སྤྱོད་པ་དང་། །རེ་བ་མེད་པའི་འབྲས་བུ་དང་། །རྣམ་པ་བཞི་རུ་བསྡུས་པ་ཡིན། །འཁོར་གྱི་སྙིང་པོ་ད་ཉོན་དང་། །གཏན་ལ་དབབ་པའི་འཕྲང་དྲུག་ནི། །ལྟ་བ་སྐྱེ་མེད་དོན་གྱི་འཕྲང་། །བཙལ་བ་མེད་པར་ལྷུན་གྱིས་གྲུབ། །རང་སྣང་འགྱུར་མེད་ཏིང་འཛིན་འཕྲང་། །བསྒོམ་པ་མེད་པར་ཡེ་ཤེས་གསལ། །ཉམས་ཀྱིས་རིམ་པའི་གདམས་ངག་འཕྲང་། །གོ་རིམ་མ་འཁྲུགས་དབྱིངས་སུ་སླེབ། །ལྟ་བ་ཤེས་རབ་རྟོགས་པའི་འཕྲང་། །ཆོས་རྣམས་ཀུན་གྱི་ཁྱད་པར་དབྱེ། །ལྟ་བ་གདེང་མེད་གོལ་བའི་འཕྲང་། །ཅི་ཙམ་བསྒོམས་ཀྱང་དོན་མེད་འཁྱམས། །ཕྱིར་རྒོལ་རྩད་གཅོད་ཚིག་གི་འཕྲང་། །དམ་ཚིག་སྐྱོན་ལ་རང་གཞུང་བས། །དེ་དག་དྲུག་གིས་གཏན་ལ་དབབ། །དེ་ཡང་སེམས་དཔའ་རྡོ་རྗེ་ཉོན། །མན་ངག་ལྔ་ཡིས་ལ་བཟླ་ལ། །སངས་རྒྱས་སེམས་ཅན་རྒྱུ་གཅིག་ཕྱིར། །གཉིས་སུ་མེད་པར་ལ་བཟླའོ། །འཁོར་འདས་རྩ་བ་གཅིག་པའི་ཕྱིར། །ལྷུན་གྱིས་གྲུབ་པར་ལ་བཟླའོ། །གཙང་དང་མི་གཙང་གཞི་གཅིག་པས། །བླང་དོར་མེད་པར་ལ་བཟླའོ། །སྐྱོན་དང་ཡོན་ཏན་དབྱེར་མེད་པས། །བསྒོམ་དུ་མེད་པར་ལ་བཟླའོ། །འཁྲུལ་དང་མ་རིག་དངོས་མེད་པས། །དུག་ལྔ་ཡེ་ཤེས་ལ་བཟླའོ། །ད་ཡང་འདུས་པའི་ཚོགས་རྣམས་ཀུན། །ཡིད་ཆེས་པ་ཡི་གཏན་ཚིགས་ནི། །རང་སེམས་སྐྱེ་མེད་གཏན་ཚིགས་ཀྱིས། །ལྷུན་གྱིས་གྲུབ་པར་ཡིད་ཆེས་བྱ། །རོལ་པ་འགག་མེད་གཏན་ཚིགས་ཀྱིས། །གང་ཡང་མི་འགག་ཡིད་ཆེས་བྱ། །མཚན་ཉིད་གཉིས་མེད་གཏན་ཚིགས་ཀྱིས། ། ― DNG002_Page_0338 ―
[མ་དཔེ་གཟིགས་ན་འདིར་གནོན།]
ཆོས་རྣམས་གཅིག་པར་ཡིད་ཆེས་བྱ། །ངོ་བོ་བློ་བྲལ་གཏན་ཚིགས་ཀྱིས། །རྩོལ་བ་མེད་པར་ཡིད་ཆེས་བྱ། །སྙིང་པོའི་དོན་འདི་རྟོགས་འདོད་པས། །དམ་པའི་རྒྱུད་དོན་གནས་པར་གྱིས། །རྫོགས་པ་ཆེན་པོ་བལྟ་བ་ཐམས་ཅད་ཀྱི་སྙིང་པོ་ལས། ཆོས་རྣམས་ཀྱི་རང་བཞིན་གཏན་ལ་དབབ་པའི་ལེའུ་སྟེ་གསུམ་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་ཚོགས་ལ་བཀའ་སྩལ་པ། །དོན་བསྟན་སྣོད་བཅུད་རིམ་པ་ནི། །གསང་སྔགས་རྣམས་ཀྱི་རྩ་བ་ཡིན། །དབང་རྣམས་རིམ་པར་རྫོགས་བྱས་ནས། །ཐོས་བསམ་བསྒོམ་ལ་རབ་སྦྱངས་ནས། །དམ་པའི་མཛོད་ཀྱི་གཏེར་ལྡན་ཞིང་། །སྲིད་པར་ཞུས་ཀྱང་ཟད་མེད་པའི། །བླ་མ་རྡོ་རྗེ་སློབ་དཔོན་དེ། །དཔེར་ན་གངས་ཀྱི་སེང་གེ་བཞིན། །གཅིག་པུར་གནས་ཀྱང་དོན་ལྡན་ལ། །སྐལ་ལྡན་སློབ་མའི་མཚན་ཉིད་ནི། །བླ་མ་ལ་གུས་དད་དང་ལྡན། །སེར་སྣ་ཆུང་ལ་བརྩོན་འགྲུས་ཆེ། །དོན་གསང་ཐུབ་ལ་ཤེས་རབ་ཟབ། །ཚུལ་ཤེས་ངང་བཟང་རྣམས་ལ་སྟེར། །དེ་དང་མི་ལྡན་འདི་བསྟན་ན། །སངས་རྒྱས་རྣམས་ཀྱི་བཀའ་བཅག་སྟེ། །མཚམས་མེད་སྡིག་པས་ཆར་མི་ཕོད། །དམྱལ་བའི་འོག་གཞི་བྱེད་པར་གསུངས། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། སྣོད་བཅུད་བསྟན་པའི་ལེའུ་སྟེ་བཞི་པའོ།། །།དེ་ནས་ཀུན་རིག་རྒྱལ་པོ་ལ། །ཞེན་པའི་སྙོམས་ལས་དམན་པའི་ཕྱིར། །བག་ཆགས་ལྔ་ལ་ལོངས་སྤྱོད་ནས། །དམྱལ་བས་རང་སེམས་མེ་སོགས་མཐོང་། །ཡི་དྭགས་མི་གཙང་མཐོང་ཡུལ་སྣང་། །མི་ཡི་མཐོང་ཡུལ་བཞི་རུ་མཐོང་། །བྱོལ་སོང་ངམ་གྲོག་གྱེན་ཐུར་སྣང་། །ལྷ་མ་ཡིན་གྱི་གོ་མཚོན་སྣང་། །ལྷ་རྣམས་རིན་ཆེན་སྣ་བདུན་མཐོང་། །དེ་དག་འགྲོ་དྲུག་སྡུག་བསྔལ་ཡིན། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། འགྲོ་དྲུག་གི་སྡུག་བསྔལ་བསྟན་པའི་ལེའུ་སྟེ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །མུ་སྟེགས་འཁྲུལ་ལུགས་བཀའ་སྩལ་ ― DNG002_Page_0339 ―
[མ་དཔེ་གཟིགས་ན་འདིར་གནོན།]
པ། །ཡོད་པར་འཛིན་པའི་ལྟ་བ་ནི། །འགྱུར་བ་བཞི་དང་རྟག་པ་ལྔ་། །ཐམས་ཅད་བདག་གིས་བྱས་པར་འདོད། །རྒྱུ་འབྲས་ལོག་པའི་བརྟུལ་ཤུགས་ཀྱིས། །ཐར་ལམ་མི་ཐོབ་འཁོར་བར་ལྟུང་། །མར་འདོད་བྱེ་མ་བཙིར་བ་འདྲ། །ཡོད་མེད་ཆད་པར་འདོད་པ་ཡིན། །ཕུང་པོས་བསྡུས་པའི་ཆོས་རྣམས་ཀྱང་། །རྡུལ་ཕྲན་དག་ལས་བྱུང་བའི་ཕྱིར། །འབྱུང་བ་ལྔ་ཞིག་རང་ཐིམ་ནས། །མེ་ཤི་ཐལ་བ་རླུང་ཁྱེར་འདྲ། །དེ་ཡང་སེམས་དཔའ་རྡོ་རྗེ་ཉོན། །གཉིས་ཀའི་གཞིར་འདོད་མུ་སྟེགས་ནི། །རིག་བྱེད་གསང་བར་སྨྲ་བའི་ལྟ་བ་ནི། །གཞི་ནི་ངེས་པ་མེད་པ་ལ། །སྣང་བ་གང་ཡང་མི་འགོག་འདོད། །གདོན་གྱིས་ཟིན་པའི་ནད་པ་བཞིན། །སེམས་ཀྱི་རང་བཞིན་མ་ཤེས་ནས། །འབྱུང་ཆེན་གཏོས་ཀྱི་མུན་པ་བཞིན། །ཐུགས་རྗེའི་ཟེར་ཞགས་ཐག་བཅད་ནས། །དམྱལ་བའི་འབྲས་བུར་ཐེ་ཚོམ་མེད། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། མུ་སྟེགས་འཁྲུལ་པའི་ཚུལ་བསྟན་པའི་ལེའུ་སྟེ་དྲུག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །སེམས་ཉིད་ངོ་བོ་ཉིད་ཀྱི་སྐུ། །མཐུན་དཔེ་མེ་ལོང་ལྟ་བུ་ལ། །གཟུགས་བརྙན་ཐེག་པ་རིམ་དགུ་བྱུང་། །དེ་ཡང་གང་དང་གང་ཞེ་ན། །འཕགས་པ་ཉན་ཐོས་ལྟ་བ་ནི། །མདོ་སྡེ་བྱེ་བྲག་རྣམ་གཉིས་པོ། །ཆོ་ག་ཡུལ་གྱི་ཁྱད་པར་ལས། །ལུས་གདུང་སེམས་ཀྱིས་བཙོན་བཟུང་ཡང་། །རྡུལ་དང་ཤེས་པ་ཉིད་འདོད་པས། །གླང་ཆེན་འདམ་བུ་བྱིང་བ་བཞིན། །ལུས་ངག་ཡིད་ཀྱི་རྩོལ་བ་ཡིས། །འབྲས་བུ་མེད་པའི་སྙིང་པོར་གནས། །བླ་མ་དག་ལ་མི་བརྟེན་པར། །རང་སེམས་དོན་ལ་བློ་སྦྱོང་ཕྱིར། །རྟེན་འདྲེལ་ཕྱི་ནང་རྩད་བཅད་ནས། །རང་བཞིན་མེད་ལ་རྟེན་བཅའ་བ། །བརྩོན་པར་མི་འགྱུར་ཉམས་པའི་ཕྱིར། །ནོད་བུ་རྒྱལ་སྲིད་བསྒོམ་པ་འདྲ། །ཆོས་རྣམས་སེམས་ཀྱི་རང་བཞིན་ལ། །སོ་སོར་རྟོགས་པའི་ཤེས་རབ་ཀྱིས། །བདེན་པ་གཉིས་སུ་རྣམ་པར་དབྱེ། །གཅིག་བཤིགས་ནས་ནི་གཅིག་ཚོལ་བ། །ཆུ་ཟླ་ཟླ་བར་ངོས་འཛིན་འདྲ། ། ― DNG002_Page_0340 ―
[མ་དཔེ་གཟིགས་ན་འདིར་གནོན།]
དེ་ཡང་སེམས་དཔའ་རྡོ་རྗེ་ཁྱོད། །ཐམས་ཅད་རྩ་བ་གཅིག་པའི་ཕྱིར། །རང་གི་སེམས་ཀྱི་སྙིང་པོའི་དོན། །བསམ་གྱིས་མི་ཁྱབ་མི་ཤེས་པར། །བསམ་མེད་ངང་དུ་གང་འཛིན་པ། །བྱིས་པ་དེ་ནི་བླུན་པ་སྟེ། །མུན་པའི་སྐྱེ་མཆེད་ཉིད་དུ་འགྱུར། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། རྒྱུ་མཚན་ཉིད་ཀྱི་ལྟ་བ་བསྟན་པའི་ལེའུ་སྟེ་བདུན་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་ཚོགས་ལ་བཀའ་སྩལ་པ། །ཆོས་ཉིད་སྟོང་པའི་ངང་ལས་ནི། །དག་པ་བཞི་ཡི་སྒོར་ཞུགས་པས། །ཡོ་བྱད་ཕྱི་རོལ་གཙོར་འཛིན་པ། །ཀུན་རྫོབ་ལྷ་ཡི་དཀྱིལ་འཁོར་དུ། །རྒྱུད་དག་པ་ཡི་ཏིང་འཛིན་གྱིས། །སྐུ་ཡི་གཟུགས་བརྙན་ཕྱག་མཚན་དང་། །བཟླས་བརྗོད་གཙང་སྦྲ་དུས་ཚིགས་ཀྱི། །རྒྱུ་རྐྱེན་ཚོགས་པའི་ནུས་མཐུ་ཡིས། །རིག་གསུམ་དཀྱིལ་འཁོར་ལྷར་གསལ་ཡང་། །དངོས་གྲུབ་གཞན་ནས་རེ་བ་ནི། །ཁྱི་རྒན་འདབ་ཆགས་བསྙེག་པ་འདྲ། །རང་སེམས་དབྱེ་བ་མེད་པ་ལ། །ཨུ་པ་ལ་ཡི་ཐེག་པ་ནི། །གོང་འོག་ལྟ་སྤྱོད་གཉིས་འཛིན་པ། །ནེ་ཙོ་མི་སྐད་སྨྲ་བ་འདྲ། །ཡོ་ག་རྣལ་འབྱོར་སེམས་དཔའ་ཡིས། །ཕྱག་རྒྱ་བཞི་ཡི་སྒོར་ཞུགས་ནས། །ཡོ་བྱད་གཙོ་རུ་མི་འཛིན་པར། །དོན་དམ་སྐྱེ་འགག་མེད་པ་ཡིས། །ལྷ་ཡི་དཀྱིལ་འཁོར་འཕགས་པའི་སྐུ། །རྣམ་པར་སྣང་མཛད་ཆེན་པོ་ཡི། །ཆོས་དབྱིངས་དག་པས་བྱིན་བརླབ་པས། །ལྷ་དང་བདག་ཏུ་མཉམ་པ་ཡིས། །དམ་ཚིག་ཡེ་ཤེས་ལྷར་གསལ་ཀྱང་། །རྒྱལ་སྲིད་མེད་པའི་བློན་པོ་འདྲ། །དེ་ཡང་འདུས་པའི་ཚོགས་རྣམས་ཀུན། །བླ་མའི་དོན་མིན་ནན་བརྟགས་ཀྱིས། །དམིགས་པ་ཅན་ལ་སེམས་གཏད་ཀྱང་། །རྣམ་པར་གྲོལ་བར་མི་འགྱུར་ཏེ། །ནམ་མཁའ་དག་ལ་འཛིན་པ་འདྲ། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། ཕྱི་བརྒྱུད་ཀྱི་ལྟ་བ་བསྟན་པའི་ལེའུ་སྟེ་བརྒྱད་པའོ།། །།དེ་ནས་འདུས་པའི་ཚོགས་ཆེན་ལ། །ཀུན་རིག་རྒྱལ་པོས་བཀའ་སྩལ་པ། །འཁོར་བ་མྱ་ངན་ ― DNG002_Page_0341 ―
[མ་དཔེ་གཟིགས་ན་འདིར་གནོན།]
འདས་པའི་ཆོས། །སེམས་ཀྱི་རྣམ་རྟོག་ཅི་སྐྱེས་ཀྱང་། །མཚན་མའི་དངོས་པོ་མ་གྲུབ་པས། །དཔེར་ན་ནམ་མཁའི་བསེར་བུ་བཞིན། །ཡོད་མེད་དབུས་ལ་མི་གནས་པས། །སྐུ་དང་ཡེ་ཤེས་ལྷུན་གྱིས་གྲུབ། །ཡུལ་སེམས་དབྱེ་བ་མེད་པ་ལ། །ཐབས་དང་ཤེས་རབ་སྒོར་ཞུགས་ནས། །ཏིང་འཛིན་གསུམ་གྱིས་ལྷར་བསྒོམ་པ། །གྲིབ་མ་གཟུགས་སུ་རློམ་པ་འདྲ། །ཕྱི་ནང་ཆོས་རྣམས་མ་ལུས་ཀུན། །ཡིད་དང་ཀུན་གཞི་གཉིས་འདུས་ནས། །ཀུན་གཞིའི་མཁའ་ཀློང་རྣམ་དག་ཏུ། །རྣམ་རྟོག་མཚན་མ་གང་སྤྱོད་ཀྱང་། །ནམ་མཁའ་གཟའ་སྐར་བཙལ་མེད་བཞིན། །ཀུན་བཟང་བདེ་ཆེན་ཐབས་ཀྱི་གཙོ། །ཀུན་ཏུ་བཟང་མོ་གཉིས་མེད་མཁའ། །འདུ་འབྲལ་མེད་པའི་ཆོས་སྐུ་ནི། །བདེ་ཆེན་གཉིས་མེད་རིག་པའི་རྩལ། །ངེས་པའི་གསང་སྒོ་མ་ཤེས་པས། །ཀུན་བཟང་སྤྱོད་པས་དོན་མི་རྟོག །ཉི་མ་སྤྲིན་གྱིས་བསྒྲིབས་པ་འདྲ། །སེམས་ཉིད་རྩོལ་བ་མེད་པ་ལ། །བསམ་པའི་དབང་གིས་བསྒྱུར་བྱས་ནས། །འཁོར་བའི་རྒྱ་མཚོར་གཡེངས་གྱུར་ཏེ། །མི་ཤེས་པ་ལ་དེ་ལྟར་སྣང་། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། བསྐྱེད་རྫོགས་གཉིས་མེད་བསྟན་པའི་ལེའུ་སྟེ་དགུ་པའོ།། །།དེ་ནས་སེམས་དཔའ་རྡོ་རྗེ་ཡིས། །འདུས་པའི་ཚོགས་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །ཡིད་ཀྱི་དྲན་པས་འདི་སྐད་གསོལ། །ཆོས་རྣམས་སེམས་སུ་འདུས་པ་ཡི། །ལྷུན་གྱིས་གྲུབ་པའི་ལྟ་བ་གང་། །མཚན་མ་ཟིལ་གྱིས་ཇི་ལྟར་གནན། །འགྲོ་དྲུག་གཡང་ས་ཅི་ལྟར་བཅད། །ཡེ་ཤེས་དོན་ལ་ཇི་ལྟར་བསྒོམ། །མཉམ་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་ཚིག་གསན་ནས། །ཀུན་རིག་སེམས་ཀྱི་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །སེམས་སུ་ཆོས་རྣམས་གཅིག་པ་ལ། །འཁོར་བ་མྱ་ངན་འདས་པའི་ཆོས། །སྒྱུ་མ་རྣམ་གཉིས་སྤྱོད་ཡུལ་ཏེ། །ལོག་རྟོག་ཡེ་ཤེས་ཐ་དད་ཀྱང་། །སེམས་ཀྱི་ཆོས་ཉིད་ངང་དུ་གཅིག །དེ་ཡིས་དེ་ཉིད་མཚོན་པའི་དཔེ། །ནམ་མཁའ་འཇའ་ཚོན་ཇི་བཞིན་དུ། ། ― DNG002_Page_0342 ―
[མ་དཔེ་གཟིགས་ན་འདིར་གནོན།]
ཡུལ་གྱི་ཐ་སྙད་མཚན་མ་རྣམས། །རང་གི་སེམས་ཀྱིས་བརྟགས་པའི་ཕྱིར། །ཕྱི་ནང་ཆོས་རྣམས་མ་ལུས་པ། །རིགས་རྒྱུད་མེད་ཕྱིར་སེམས་སུ་གཅིག །དེ་ཉིད་ལྷུན་གྱིས་གྲུབ་པ་ནི། །འགྲོ་ལ་སེམས་ཉིད་གཉིས་མེད་དེ། །ཇི་ལྟར་དམིགས་ཤིང་བསམ་པར་སྣང་། །དཔེར་ན་ཡིད་བཞིན་ནོར་བུ་བཞིན། །དེ་ནི་ལྷུན་གྲུབ་ཀུན་གྱི་གཞི། །དེ་ཡང་སེམས་དཔའ་རྡོ་རྗེ་ཁྱོད། །ཀུན་ལ་ཁྱབ་པའི་རིག་པ་ཡིས། །འདུས་མ་བྱས་པའི་དོན་རྟོགས་པས། །ཡེ་ཤེས་རིག་པ་གཅིག་ཡིན་ཏེ། །དེ་ཡང་གང་དང་གང་ཞེ་ན། །ཀུན་གཞི་མཉམ་ཉིད་རྒྱལ་བའི་ཐུགས། །མ་ལུས་སེམས་ཅན་ཐམས་ཅད་ལ། །ཆོས་སྐུ་ཁྱབ་པས་བརྡལ་བའི་སྐུ། །མཐའ་དབུས་མེད་པས་ནམ་མཁའ་འདྲ། །རིག་པས་མ་བསླད་གཉུག་མར་གནས། །འཛིན་མེད་ཤེས་པ་ངང་གིས་གསལ། །དངོས་པོ་མེད་ལ་ཤེས་པར་ཡོད། །ནམ་མཁར་ཉི་མའི་འོད་ཤར་འདྲ། །འདུས་མ་བྱས་པའི་ཡེ་ཤེས་ཀྱི། །རྟེན་འཆང་མེད་པར་ཉོན་མོངས་སེལ། །འབྱུང་བ་ལྔ་ལ་རག་མ་ལུས། །མི་འགྱུར་འཇོམས་བྱེད་རྡོ་རྗེ་འདྲ། །བླ་མས་དོན་བསྟན་རྣལ་འབྱོར་པས། །ཐེ་ཚོམ་མེད་པར་སེམས་ཉིད་རྟོགས། །ཐམས་ཅད་གཅིག་ལ་མ་འདྲེས་པ། །ཀ་ཤིའི་རས་ཀྱི་རིན་ཆེན་འདྲ། །དེ་ཡང་སེམས་དཔའ་རྡོ་རྗེ་ཁྱོད། །སྙིང་པོ་འདི་ཡི་དོན་རྟོགས་ནས། །སེམས་སུ་སྣང་བའི་མཚན་མ་རྣམས། །རང་བྱུང་ཡེ་ཤེས་ཡང་དག་ཤར། །སྤྲོས་མེད་ངོ་བོ་ལྷུན་གྱིས་གྲུབ། །སྲིད་པ་གསུམ་ནི་རང་གི་རྐྱེན། །མ་བཅོས་རིག་པའི་ཡེ་ཤེས་ཡིན། །བཙལ་དུ་མེད་པའི་ཆོས་ཉིད་ལ། །རྒྱུ་འབྲས་གཉིས་ཀ་མྱ་ངན་འདས། །ཁམས་གསུམ་སྤྲོས་མེད་དབྱིངས་སུ་གཅིག །ཡུལ་དུ་སྣང་བ་ཐམས་ཅད་ཀྱང་། །ཡེ་ནས་དབྱེར་མེད་མཉམ་པར་གནས། །ཐམས་ཅད་རང་བྱུང་འགག་པ་མེད། །གདོད་ནས་མ་སྐྱེས་ལྷུན་གྱིས་གྲུབ། །ཐམས་ཅད་ཡེ་ནས་དབྱེར་མེད་པར། །དབྱིངས་ཉིད་ནམ་མཁའ་ལྟ་བུའི་ངང་། །དེ་ཡི་ངང་དུ་ཐམས་ཅད་འདུས། །རྒྱུ་དང་རྐྱེན་ལ་མི་ལྟོས་ཤིང་། །དུས་གསུམ་དབྱེར་མེད་ ― DNG002_Page_0343 ―
[མ་དཔེ་གཟིགས་ན་འདིར་གནོན།]
མཉམ་པར་བལྟ། །དཔེར་ན་ནམ་མཁའི་ཉི་མ་བཞིན། །མ་རིག་མུན་པ་ཐམས་ཅད་འཇོམས། །དེ་ཉིད་རྟོགས་པར་བྱ་བའི་ཕྱིར། །བལྟ་བ་ཡིན་པའི་དོན་ཉིད་ལ། །མ་ནོར་རིག་པ་གཅིག་ཡིན་ཏེ། །ལྷུན་གྲུབ་འབྲས་བུ་གཅིག་ཏུ་བལྟ། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། ལྷུན་གྲུབ་ལྟ་བ་བསྟན་པའི་ལེའུ་སྟེ་བཅུ་པའོ།། །།དེ་ནས་སེམས་དཔའ་རྡོ་རྗེ་ལ། །ཀུན་རིག་སེམས་ཀྱི་རྒྱལ་པོ་ཡིས། །མཚན་མ་ཟིལ་གྱིས་གནན་པའི་ཕྱིར། །མ་རིག་མུན་པ་ལྟ་བུ་ལ། །རིག་པ་ཡེ་ཤེས་བསྟན་པའི་ཐབས། །རིག་པའི་དབང་ཆེན་བཀའ་སྩལ་པ། །དེ་ལ་དབང་གི་དཔེ་བསྟན་པ། །བྲམ་ཟེ་གཙང་མས་ཁྲུས་གསོལ་ཏེ། །རྒྱལ་སྲིད་དག་ལ་དབང་བསྐུར་བཞིན། །དོན་གྱི་སྣོད་ནང་རང་བྱུང་འཆང་། །དེ་དོན་ཤེས་རབ་དྲན་ཐད་ཀྱིས། །འདུས་མ་བྱས་པའི་དཔེ་ཉིད་ལ། །རང་གི་ཚད་དང་ལྡན་པ་ཡིས། །སེམས་ནི་དྲག་ཏུ་གཏད་པར་བྱ། །དཔེར་ན་གྱི་ལིང་རྟ་འདུལ་བཞིན། །རང་གི་ཤེས་པ་མ་ཡེངས་པ། །དྲག་ཞན་བར་ན་རྩོལ་བས་ནོན། །ཆད་ཟིན་དོན་ལ་གནས་པར་བྱ། །དེ་ཡང་ཁམས་དང་སྦྱར་བྱས་ལ། །ཁམས་བདེ་ཐུན་ནི་རིང་བར་བྱ། །ཡང་ན་ལངས་ལ་ཅུང་ཟད་བཅག །རྟགས་ནི་ལུས་སེམས་གཉིས་འབྱུང་སྟེ། །ལུས་ནི་འདར་དང་མཆི་མ་འབྱུང་། །སེམས་ནི་བདེ་ལ་གཏང་དཀའ་སྟེ། །རང་སེམས་རྩལ་གྱི་རྟགས་རྣམས་འབྱུང་། །རྟོག་པ་མེད་པར་གནས་པར་ནི། །བྱ་བ་བཏང་བའི་སྐྱེས་བུ་བཞིན། །ཅི་ལ་མི་གནས་རང་བཞིན་ལ། །མ་ཡེངས་གསལ་བར་ལྷུག་པར་བཞག །གདོད་ནས་ནམ་མཁའི་སྤྲིན་བཞིན་དུ། །བྱུང་ཡང་གཞི་ལ་གནོད་མེད་ལྟར། །སེམས་ཀྱི་རྩོལ་བ་ཆད་ཟིན་ན། །རྟོག་མེད་མི་སྒྲིབ་བཅོས་སུ་མེད། །དེ་ཡི་སེམས་ཉམས་བསྟན་པ་ནི། །དམིགས་པའི་དོན་ལ་སེམས་གཏད་ཀྱང་། །ཤེས་པ་གཏན་དུ་མི་ཆུད་པར། །ཡུལ་ལ་མི་རྟོག་བདེ་བར་གནས། །ཞེན་པའི་རྟོག་པ་སྐྱེས་ན་ཡང་། །བ་མོ་དག་ལ་ཉི་ཤར་བཞིན། །རྗེས་སུ་མི་འབྲངས་ལྷན་ཅིག་འགྲོ། །དེ་ཙམ་ ― DNG002_Page_0344 ―
[མ་དཔེ་གཟིགས་ན་འདིར་གནོན།]
ཉིད་ན་མཚན་མ་རྣམས། །སྣང་མེད་འཁྲུལ་སྣང་ལོག་ཙ་ན། །སྣང་བཅས་དོན་ཟིན་ཏིང་འཛིན་ཉམས། །དེ་ཉིད་གོམས་པས་ལམ་དུ་བདེ། །སེམས་དཔའ་རྡོ་རྗེ་སྙིང་པོ་ཁྱོད། །ང་ཡིས་བྱས་པའི་ཆོས་ཉིད་འདི། །སངས་རྒྱས་ཀུན་གྱི་ལམ་ཡིན་ཏེ། །ཆོས་རྣམས་ཀུན་གྱི་མཚན་ཉིད་ནི། །རྒྱས་འདེབས་བཞི་ཡི་རང་བཞིན་གྱིས། །འདུ་ཤེས་རྟོག་པ་ཐམས་ཅད་ས། །རྐྱང་པ་དུས་མཉམ་ཡུལ་འཛིན་པ། །ཉི་ཟླ་གཟས་ཟིན་ཇི་བཞིན་དུ། །ཕྱི་ནང་གསང་བ་གསུམ་བསྟན་པ། །ཐབས་ཀྱི་ལམ་དུ་བསྟན་པ་ཡིན། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། ནམ་མཁའི་མཚན་ཉིད་ལ་རིག་པ་རྩལ་གྱི་དབང་བསྐུར་བའི་ལེའུ་སྟེ་བཅུ་གཅིག་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །འགྲོ་དྲུག་གཡང་ས་བཅད་པའི་ཕྱིར། །རྩ་བ་སེམས་ལས་འདས་པའོ། །ཡེ་ཤེས་ངོས་བཟུང་བཀའ་སྩལ་པ། །ཀུན་གཞི་དགེ་སྡིག་རྣམ་བཞི་ལ། །ཆོས་སྐུ་ངོས་བཟུང་མཐུན་དཔེ་ནི། །རྩ་ཆུ་བརྟགས་ནས་ངོས་འཛིན་པའི། །སྨན་པ་མཁས་པ་ཇི་བཞིན་དུ། །ནོར་བུ་ཆུ་དང་དཔེ་བཞིན་དུ། །བྱང་ཆུབ་སེམས་ཀྱི་རིག་པའི་དོན། །སྔ་མའི་བག་ཆགས་ཡིད་ཡིན་ཏེ། །ཕྱི་མ་སྐྱེ་བ་ཉོན་མོངས་ཡིད། །རྟོག་པ་སྐྱེ་བ་སྒོ་ལྔ་སྟེ། །གསུམ་དུ་མ་སོང་གཉུག་མར་གནས། །དམིགས་འཛིན་མེད་ལ་ངང་གིས་གསལ། །ཡེ་ཤེས་ཟང་ཐལ་གཅིག་ཡིན་ཏེ། །རང་གི་ངོ་བོ་ཆོས་ཀྱི་སྐུ། །ཤེས་པ་རྩིས་མེད་དྲང་པོར་འཇུག །དཔེར་ན་ཐི་བྱ་ཚང་འཇུག་བཞིན། །རང་གི་སེམས་ཀྱི་ཆོས་ཉིད་ལ། །བསྒོམ་དུ་མེད་པའི་བསྒོམ་པ་བྱ། །དེ་དོན་རྟོགས་ན་ངང་ལ་བདེ། །ཤེས་པ་མི་འགྱུར་བཀྲིར་མི་བཏུབ། །ཆུ་ལས་མི་འདའ་ཉ་བཞིན་དུ། །དོན་ལས་མི་འདའ་ཆོས་ཉིད་རྟོགས། །དེ་དང་མི་ལྡན་རྣལ་འབྱོར་པས། །རྒྱལ་པོས་མངའ་བྱས་བཙུན་མོ་ལྟར། །སྔ་ཕྱི་གཉིས་པོ་སྐྱེས་པའི་ཚེ། །སྔ་རྗེས་མི་གཅོད་བྱང་ཆུབ་སེམས། །འཕྲོས་པ་རྐུན་པོ་ཚོར་མ་ཐག །ས་བསྐྲད་རང་བཞིན་དེངས་པ་ལྟར། །རང་ ― DNG002_Page_0345 ―
[མ་དཔེ་གཟིགས་ན་འདིར་གནོན།]
སེམས་རྩོལ་བ་མེད་པ་ཡིས། །མི་གཡོ་མཉམ་པའི་དོན་ལ་ཞོག །དེ་ལྟར་རྟོགས་པའི་རྣལ་འབྱོར་ཉམས། །ཤིང་བལ་ལྟ་བུར་ལུས་འཇམ་པ། །ཕྱི་ནང་འབྱུང་འཇུག་དབུགས་རྣམས་སྙོམས། །སེམས་དཔའ་ཆེན་པོ་ད་ཉོན་ཅིག །ང་ཡི་ཆོས་ཉིད་འབྲས་བུ་འདི། །མ་བཅོས་ནམ་མཁའ་ཉི་ཤར་བཞིན། །མུན་པ་མེད་པར་གསལ་བ་ཡིས། །ལྷངས་ཀྱིས་རྟོགས་ན་ལྟ་བའི་མཆོག །དོན་ལ་མ་ཡེངས་སྒོམ་པ་ཡིན། །གང་ཡང་མ་བཀག་སྤྱོད་པའི་ཡུལ། །དེ་ལས་མི་འདའ་དམ་ཚིག་ཡིན། །དབྱིངས་ནས་རིག་པ་རང་ལ་ཤར། །སྔ་ཕྱི་ནུབ་པ་ག་ལ་ཡོད། །ཉོན་མོངས་བག་ཆགས་རྟོག་པ་ཡིས། །ཇི་བཞིན་པ་ལ་གཉིས་ཀ་བསྒྲིབས། །རང་བཞིན་དབྱེར་མེད་ཉིད་པས་ན། །གཉིས་མེད་ཤེས་པ་གཅིག་ཏུ་རྫོགས། །སྔ་ཕྱི་གཉིས་འདྲེངས་རྟོག་པ་ཡིས། །མཁའ་ལ་གློ་བུར་སྤྲིན་གཏིབ་ལྟར། །མཁའ་དག་ནང་དུ་སྤྲིན་སོང་ལྟར། །ང་ཡི་ཡེ་ཤེས་ངོས་ཟིན་ན། །ཐོག་མ་མེད་པར་བསམས་པ་ཡི། །རྣམ་རྟོག་སྤྲིན་ཕུང་དཔག་མེད་པ། །སྟོང་ཉིད་སྐད་ཅིག་རིག་པ་ཡིས། །རྣམ་རྟོག་སྟོང་པའི་ངང་དུ་སངས། །སངས་རྒྱས་སེམས་ཅན་ལ་སོགས་པའི། །ཀུན་ཀྱང་རང་བྱུང་ཡེ་ཤེས་ཉིད། །སྟོང་ཉིད་ནམ་མཁའི་ངང་དུ་གཅིག །སྟོང་ཉིད་ནམ་མཁའི་ངང་དུ་སངས། །མི་མཐུན་པ་དང་གཉེན་པོ་གཉིས། །ཡེ་ནས་གཉིས་མེད་གཅིག་པས་ན། །གདོད་ནས་འཇིག་པ་ག་ལ་ཡོད། །སེམས་དཔའ་ཆེན་པོ་རིག་འཛིན་ཁྱོད། །འཇིག་རྟེན་འཁོར་བའི་ཁ་བརྒྱུད་པ། །མ་རིག་ངོ་བོ་དེ་བཞིན་པས། །གཞི་མེད་པ་ཡི་སྐད་ཅིག་པར། །དེ་ཉིད་རིག་ན་བདེ་ཆེན་གནས། །བསམ་གྱིས་མི་ཁྱབ་ཆོས་ཉིད་རྣམས། །དེ་བཞིན་ཉིད་དུ་གཅིག་པས་ན། །གང་གི་ཡེ་ཤེས་དོན་རྟོགས་པས། །ཀུན་ལ་དབང་བསྒྱུར་ཐོབ་པ་ཡིན། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། སེམས་ཀྱི་སེམས་ཉིད་ལས་རིག་པ་རྩལ་གྱི་དབང་བསྐུར་བའི་ལེའུ་སྟེ་བཅུ་གཉིས་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་ ― DNG002_Page_0346 ―
[མ་དཔེ་གཟིགས་ན་འདིར་གནོན།]
རིག་སེམས་ཀྱི་རྒྱལ་པོ་ཡིས། །ཡེ་ཤེས་སྤྱི་བླུགས་བཀའ་སྩལ་པ། །ཐིག་ལེ་གཅིག་ཏུ་རྫོགས་པ་ཡི། །ཡེ་ཤེས་ཆེན་པོའི་མཐུན་དཔེ་ནི། །མཐའ་དང་དབུས་མེད་ནམ་མཁའ་འདྲ། །མི་གཡོ་བས་ན་རྒྱ་མཚོ་འདྲ། །ཕར་འཇོམས་པས་ན་རྡོ་རྗེ་འདྲ། །དེ་དོན་རང་བྱུང་ཡེ་ཤེས་ལ། །སྣང་སྲིད་གསལ་བ་སྒོ་ལྔའི་ཡུལ། །ཤེས་པ་རང་གསལ་ཆོས་ཀྱི་སྐུ། །འཛིན་པ་མེད་པས་ལྷུན་གྱིས་གྲུབ། །ཁྱུང་ཆེན་ནམ་མཁར་ལྡིང་བའི་ཚེ། །འཕུར་རླབས་འོག་ཏུ་ཀུན་ཆུད་ལྟར། །རྫོགས་ཆེན་རྟོགས་པས་སྐུ་གསུམ་རྫོགས། །འབྱུང་འཇུག་མེད་པར་བཞག་པར་བྱ། །ཇི་བཞིན་ཉམས་ཀྱི་གནས་ལུགས་ནི། །རྣམ་པར་མི་རྟོག་ས་ལེ་བ། །ས་ལེ་བ་ལ་རྟོག་པ་མེད། །དེ་ནི་རང་བྱུང་ཡེ་ཤེས་ཏེ། །མིང་དུ་མི་ཐོག་ཉམས་མྱོང་ཞིང་། །འཁུར་བར་ཆུ་བླུགས་ཇི་བཞིན་དུ། །ཡེ་ཤེས་སྣང་བའི་དོན་ལ་ཕེབས། །ནོར་བུ་རིན་ཆེན་ཡོན་ཏན་ལ། །དགོས་འདོད་ཐམས་ཅད་ཤུགས་ཀྱིས་འབྱུང་། །དེ་བཞིན་ཡེ་ཤེས་ངོས་ཟིན་པར། །བྱིང་རྒོད་མི་འབྱུང་ཡེ་ཤེས་གསལ། །དཔེར་ན་དུག་ལ་སྔགས་བཏབ་པས། །ནད་རྣམས་སེལ་ཞིང་སྨིན་འགྱུར་ལྟར། །ཆགས་སྡང་ལ་སོགས་དུག་རྣམས་ལ། །དེ་ཉིད་གསལ་གདབ་བལྟ་བའི་སྟོང་། །དེ་རྟགས་སྒྲ་ཐོས་རྨི་ལམ་བཟང་། །གཟུགས་རྣམས་མཐོང་ཞིང་བསྐོར་བ་བྱེད། །བདུད་རྩི་འདྲེན་དང་ཆོས་སྟོན་པ། །རྟོག་པ་བཟང་ངན་ཅི་སྐྱེས་ཀྱང་། །བླང་དོར་དགའ་བྲོད་སེམས་མི་བྱེད། །སྣང་བ་མི་འགག་རང་བྱུང་ཉིད། །ཁྱད་བྲོ་ལན་ཚ་ཉིད་བཞིན་དུ། །སེམས་ལས་མི་རྟོག་དག་པའི་རྟགས། །སེམས་དཔའ་ཆེན་པོ་ད་ཉོན་ཅིག །གསལ་ལ་མི་རྟོག་མི་གཡོ་བའི། །གཉིད་གསུམ་བསྲེས་པའི་ཆོས་ཉིད་ནི། །ཡེ་ཤེས་རང་བྱུང་ཆེན་པོའི་དོན། །རྒྱུ་དང་འབྲས་བུ་དབྱེར་མེད་པས། །མི་རྟོག་ཡེ་ཤེས་ལྷུན་གྲུབ་སྟེ། །རྩོལ་བསྒྲུབ་འདས་པའི་བྱང་ཆུབ་སེམས། །གཟུང་འཛིན་འདས་པའི་ཡེ་ཤེས་གསལ། །གསལ་ཙམ་ཉིད་ནས་དམིགས་པ་མེད། །དེ་བཞིན་ཉིད་དུ་ཀུན་ ― DNG002_Page_0347 ―
[མ་དཔེ་གཟིགས་ན་འདིར་གནོན།]
རིག་པ། །དེ་ཁྱབ་གར་གནས་སངས་རྒྱས་ཡིན། །ཡོན་ཏན་རིན་ཆེན་སྤྲིན་བཀོད་པ། །དམིགས་པར་བྱ་བ་ཅི་ཡང་མེད། །ཆོས་སྐུ་སྙིང་པོ་བྱང་ཆུབ་ལ། །མཚོན་དུ་མེད་པས་རྐྱེན་དང་བྲལ། །མེད་པ་མ་ཡིན་ཆོས་ཉིད་འདི། །དཀའ་དགུ་བརྡོས་པའི་དད་ལྡན་གྱིས། །ཀུན་གྱི་རྩ་བ་འདི་བཅད་པས། །འདི་དོན་གང་རིག་ཐོས་པའི་མཆོག །ཐམས་ཅད་འདི་ལས་བྱུང་བ་ཡིན། །འདི་ཤེས་པ་ཀུན་ཤེས་པའི་མཆོག །གསང་བའི་ནང་ནས་གསང་ཆེན་འདི། །ཉིད་ཀྱིས་ཉིད་ཀྱང་མི་མཐོང་བས། །གཞན་གྱིས་མཐོང་བ་ག་ལ་འགྱུར། །ཇི་སྙེད་བསམ་གྱིས་མི་ཁྱབ་པའང་། །ཆོས་ཉིད་རྟོགས་པར་རབ་ངེས་པས། །སངས་རྒྱས་ཀུན་དང་མཉམ་སྦྱོར་བ། །རྣལ་འབྱོར་ཆེན་པོའི་བསམ་གཏན་ཡིན། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། ཡེ་ཤེས་སྤྱི་བླུགས་ཀྱི་ཆོས་ཀྱི་ཆོས་ཉིད་ལ་རིག་པ་རྩལ་གྱི་དབང་བསྐུར་བའི་ལེའུ་སྟེ་བཅུ་གསུམ་པའོ།། །།དེ་ནས་ཀུན་རིག་རྒྱལ་པོ་ལ། །སེམས་དཔའ་རྡོ་རྗེས་དོན་ཞུས་པས། །མ་བསྒོམ་ཡེ་ཤེས་ཇི་ལྟར་གསལ། །ཕྱི་ནང་ཆོས་རྣམས་ཇི་ལྟར་རྫོགས། །དབང་ཆེན་འབྲས་བུ་ཇི་ལྟ་བུ། །ཆེ་བའི་ཡོན་ཏན་ཇི་ལྟར་འབྱུང་། །དེ་སྐད་གསོལ་བའི་ཚིག་གསན་ནས། །འདུས་པའི་ཚོགས་ལ་བཀའ་སྩལ་པ། །མ་བསྒོམས་དོན་དང་མི་འབྲལ་བའི། །ཐིག་ལེ་གཅིག་ཏུ་རྫོགས་པ་ཡི། །ཀུན་གཞི་མ་བཅོས་ཆོས་སྐུ་ལ། །སྣ་ཚོགས་སྣང་མེད་འགྱུར་བ་མེད། །ལྷ་དང་ལྷ་མིན་མི་རྣམས་ཀྱིས། །སྐྱེ་བར་བྱེད་པ་སྔ་མ་ཡིན། །དམྱལ་བ་ཡི་དྭགས་བྱོལ་སོང་གིས། །སྐྱེ་བར་བྱེད་པ་ཉོན་མོངས་ཡིད། །སྒོ་ལྔ་རྗེས་འབྲངས་རྣམ་རྟོག་སྟེ། །ཐག་པ་སྦྲུལ་དུ་བློ་སྣང་བ། །སྦྲུལ་སྣང་ཙམ་ཉིད་ཐག་པ་བཞིན། །ཡུལ་དུ་སྣང་བཞི་མཚན་མ་རྣམས། །རང་རིག་ཡེ་ཤེས་ངོས་ཟིན་པས། །ཐམས་ཅད་རང་བྱུང་ཉིད་ཀྱི་དོན། །མཁའ་ལྟར་ཁྱབ་ཅིང་ཉི་ལྟར་གསལ། །གསལ་ཙམ་ཉིད་ན་ནུབ་པ་མེད། །ཁྱབ་ཙམ་ཉིད་ན་དངོས་པོ་མེད། །མེད་པ་མ་ཡིན་ཤེས་ཤིང་ ― DNG002_Page_0348 ―
[མ་དཔེ་གཟིགས་ན་འདིར་གནོན།]
རིག །རིག་ཙམ་ཉིད་ན་ངང་གིས་སྟོང་། །སྟོང་པ་ཉིད་ན་མཐའ་དབུས་མེད། །ཡེ་ཤེས་ལྷུན་གྲུབ་ཆེན་པོ་ལ། །བྱིང་རྒོད་ཞེན་འཛིན་སྐྱོན་བྲལ་བས། །གསལ་བདེ་སྟོང་པ་ཆེན་པོ་ལ། །ངང་དུ་བཞག་པ་ཅི་ཡང་མེད། །མཉམ་བཞག་མེད་པས་རྗེས་ཐོབ་མེད། །སངས་རྒྱས་མེད་པས་སེམས་ཅན་མེད། །ཐམས་ཅད་རང་བྱུང་ཆེན་པོ་ལ། །གཞན་དུ་གཡོ་བ་རྡུལ་ཙམ་མེད། །དེ་ཡང་སེམས་དཔའ་རྡོ་རྗེ་ཁྱོད། །དཔེར་ན་ཉི་མའི་སྙིང་པོ་ལ། །གཞན་གྱིས་མ་བྱས་རང་གསལ་ཞིང་། །ཐམས་ཅད་ཡེ་ཤེས་ངོ་བོ་ལ། །མ་རིག་མུན་པ་གདོད་ནས་སངས། །དེ་ཡང་འདུས་པའི་སྙིང་པོ་ཁྱོད། །དགེ་བའི་ཆོས་སྤྱོད་མཐོང་བའི་ཚེ། །མཉམ་ཉིད་གུས་པའི་བློ་སྐྱེས་ཤིང་། །ཆོས་ཉིད་གསལ་བས་རྟོག་པ་མེད། །རིག་པ་རྒྱུན་ཆད་རྟག་ཏུ་གནས། །དེ་ཡང་སེམས་དཔའ་རྡོ་རྗེ་ཁྱོད། །དཔེར་ན་ནམ་མཁའ་སྤྲིན་བཞིན་དུ། །འགྱུར་ཡང་གཞི་ལ་གནོད་མེད་ལྟར། །རྣམ་རྟོག་ཐམས་ཅད་སེམས་ཡིན་ཏེ། །ཡེ་ཤེས་ཉིད་དུ་ཐམས་ཅད་གསལ། །དེ་ཡང་སེམས་དཔའ་རྡོ་རྗེ་ཁྱོད། །དཔེར་ན་དགུན་ཟླ་འབྲིང་པོ་ཡི། །སྤང་ལ་མེ་མཆེད་ཇི་བཞིན་དུ། །རྣམ་རྟོག་མཚན་མ་ཐམས་ཅད་ཀྱང་། །ཐམས་ཅད་ཡེ་ཤེས་ཉིད་དུ་གསལ། །དཔེར་ན་རིན་ཆེན་གསེར་གླིང་དུ། །ས་རྡོ་བཙལ་གྱིས་མི་རྙེད་བཞིན། །ཐམས་ཅད་སེམས་སུ་དོན་རྟོགས་པས། །ཏིང་འཛིན་དག་ལ་འབྱུང་འཇུག་མེད། །འཁོར་དང་མྱ་ངན་འདས་པའི་ཆོས། །ཐམས་ཅད་ཆོས་ཉིད་འགྱུར་མེད་ལ། །བསྒོམ་པའི་ཐ་སྙད་བྲལ་བའི་དོན། །ཐམས་ཅད་ཡེ་ཤེས་ཉིད་དུ་གསལ། །ཐུགས་ལས་འདས་པས་བསམ་དུ་མེད། །སྐུ་ལས་འདས་པས་བཟུང་དུ་མེད། །སྒྲ་ལས་འདས་པས་བརྗོད་དུ་མེད། །རྟོག་པ་མེད་པས་ལྷུན་གྱིས་གྲུབ། །དེ་ཡང་རྡོ་རྗེ་སྙིང་པོ་ཁྱོད། །རྣམ་རྟོག་མཚན་མ་སྐྱེས་པའི་ཚེ། །ཆོས་སྐུ་རྟོག་པ་མེད་པའི་ངང་། །འབྱུང་བའི་ཡོན་ཏན་ལྔ་སྤྱོད་ཚེ། །ལོངས་སྤྱོད་རྫོགས་པ་སྐུ་ཡི་ངང་། །འགྲོ་དྲུག་གཟུགས་ ― DNG002_Page_0349 ―
[མ་དཔེ་གཟིགས་ན་འདིར་གནོན།]
སུ་སྣང་བའི་ཚེ། །སྤྲུལ་སྐུ་ཐུབ་པ་ཆེན་པོའི་ངང་། །སྡུག་བསྔལ་སྣ་ཚོགས་སྐྱེས་པའི་ཚེ། །ཡེ་ཤེས་བདེ་བ་ཆེན་པོའི་དང་། །ཕྱི་ནང་སྒྲ་སྐད་སྣ་ཚོགས་པ། །གསང་སྔགས་གསུང་གི་འཁོར་ལོ་ཡིན། །རྐྱེན་གྱིས་ཆགས་སྡང་སྐྱེས་པའི་ཚེ། །རང་བྱུང་ཡེ་ཤེས་ཤར་བ་ཡིན། །ཤྭ་དང་སེར་བ་ལ་སོགས་པ། །ཀུན་བཟང་ཐུགས་རྗེའི་རོལ་པ་ཡིན། །ངམ་གྲོག་གཡང་ས་ཚེར་དོང་ཡང་། །རྣམ་པར་དག་པའི་ཞིང་ཁམས་ཡིན། །མཚན་མ་སྤང་བའི་ཕ་རོལ་ན། །བསྒོམ་པ་བྱ་བ་ལོགས་ན་མེད། །སྡུག་བསྔལ་སྤང་བའི་ཕ་རོལ་ན། །བདེ་བ་བྱ་བ་ལོགས་ན་མེད། །གཏི་མུག་སྤང་བའི་ཕ་རོལ་ན། །ཡེ་ཤེས་བྱ་བ་ལོགས་ན་མེད། །རང་སེམས་སྤང་བའི་ཕ་རོལ་ན། །སངས་རྒྱས་བྱ་བ་ལོགས་ན་མེད། །ཆོས་ཅན་སྤང་བའི་ཕ་རོལ་ན། །ཆོས་ཉིད་བྱ་བ་ལོགས་ན་མེད། །གནོད་པ་སྤང་བའི་ཕ་རོལ་ན། །སྙིང་རྗེ་བྱ་བ་ལོགས་ན་མེད། །འཁོར་བ་སྤང་བའི་ཕ་རོལ་ན། །མྱ་ངན་འདས་པ་ལོགས་ན་མེད། །དེ་ཡང་སེམས་དཔའ་རྡོ་རྗེ་ཁྱོད། །དཔེར་ན་ཟངས་ལྕགས་ལ་སོགས་པ། །གསེར་འགྱུར་རྩི་ཡིས་བཏབ་གྱུར་ན། །ཐམས་ཅད་གསེར་དུ་འགྱུར་བ་ལས། །ཟངས་དང་ལྕགས་སུ་མི་འགྱུར་བཞིན། །མ་རིག་རྣམ་རྟོག་མཚན་མ་ལ། །ཡེ་ཤེས་ཆེན་པོའི་རྒྱས་ཐེབ་ན། །སྐུ་གསུམ་ཡེ་ཤེས་རང་བཞིན་ལས། །ཁམས་གསུམ་འཁོར་བར་མི་འགྱུར་ཏེ། །གདོད་ནས་མ་སྐྱེས་ཡེ་སངས་རྒྱས། །བཙལ་བ་མེད་པར་ཡེ་ནས་གྲུབ། །མི་ནུབ་པ་ལ་དོན་གསལ་བ། །དེ་ཉིད་ལྷུན་གྲུབ་དོན་རྟོགས་ན། །རྟག་ཀྱང་ཡེ་ཤེས་ཆེན་པོར་རྟག །ཆད་ཀྱང་འཁོར་བ་རྩད་ནས་ཆད། །ལྡན་ན་སྐུ་གསུང་ཐུགས་སུ་ལྡན། །ཡིན་ན་ཡེ་ནས་སངས་རྒྱས་ཡིན། །མེད་ན་ཁམས་གསུམ་འཁོར་བ་མེད། །གོལ་ན་ཆོས་ཀྱི་སྐུ་རུ་གོལ། །འཕྲོས་ན་ཆོས་ཀྱི་དབྱིངས་སུ་འཕྲོས། །བྱིང་ན་ཡེ་ཤེས་ཀློང་དུ་བྱིང་། །གསལ་ན་རང་སེམས་ཆོས་སྐུར་གསལ། །དེ་ལ་ཡོན་ཏན་སྐྱོན་རྣམས་ཀུན། །སེམས་སུ་འདུས་པའི་དོན་རྟོགས་ན། །རྣམ་རྟོག་ཉིད་ཀྱང་ཡེ་ཤེས་ ― DNG002_Page_0350 ―
[མ་དཔེ་གཟིགས་ན་འདིར་གནོན།]
ཡིན། །ཡུལ་དུ་སྣང་བའི་མཚན་མ་རྣམས། །མ་བསྒོམས་ཡེ་ཤེས་ཆེན་པོའི་དོན། །བརྗོད་པ་མེད་པའི་ཤེས་རབ་ལ། །དམིགས་པ་མེད་པའི་ཏིང་འཛིན་གསལ། །ཤེས་རབ་དྲང་ཐང་སོ་མ་ལ། །འདུ་ཤེས་མི་བསྐུལ་བརྟུལ་ཤུགས་བསྐྱེད། །ཅིར་ཡང་མི་བསྒོམ་ཅི་ཡང་མིན། །ཡེ་ཤེས་ཟང་ཐལ་ཉིད་དུ་གཞུག །ཐམས་ཅད་ཡེ་ནས་མཉམ་ཉིད་ལ། །རྒྱུ་དང་འབྲས་བུ་དབྱེ་རུ་མེད། །ཐ་སྙད་གང་ཡང་མི་གནས་པ། །བཙལ་དུ་མེད་པས་དངོས་པོ་མེད། །དེ་ཉིད་མི་གནས་བྱང་ཆུབ་སེམས། །སེམས་ཞེས་བྱ་བའི་དོན་རྟོགས་ན། །སེམས་ལ་གཏད་དང་བཟུང་དུ་མེད། །ཇི་སྲིད་བར་དུ་གཏད་ཡོད་ན། །དེ་སྲིད་བར་དུ་འཁྲུལ་པ་ཡིན། །མི་ཤེས་མ་གྲོལ་དྲན་ཙམ་ན། །དེ་ལྟར་རྟོགས་པའི་རྣལ་འབྱོར་ཐུགས། །ང་ཡི་རིག་པ་འདི་སྤྱོད་ན། །རང་བྱུང་ཡེ་ཤེས་རྩ་བ་ནི། །བྱང་ཆུབ་སེམས་དཔའ་ཉིད་ཡིན་པས། །དེ་ཉིད་རྟོགས་པར་བྱ་བའི་ཐབས། །ཕྱི་ནང་ཆོས་རྣམས་མ་ལུས་པ། །ཇི་སྲིད་རང་བྱུང་ཉིད་ཀྱི་དོན། །དེ་ལས་གཞན་པའི་ཆོས་མེད་དོ། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། མ་བསྒོམས་དོན་དང་བྲལ་བའི་ལེའུ་སྟེ་བཅུ་བཞི་པའོ།། །།དེ་ཡང་སེམས་དཔའ་རྡོ་རྗེ་ལ། །ཀུན་རིག་རྒྱལ་པོས་བཀའ་སྩལ་པ། །ཆོས་རྣམས་ལྷུན་གྱིས་གྲུབ་པར་ནི། །རྣལ་འབྱོར་ཆེན་པོ་སྐལ་ལྡན་ཏེ། །སྙིང་རྗེའི་རླན་དང་མ་བྲལ་བས། །སེམས་བསྐྱེད་རྣམ་གཉིས་དེ་ལ་རྫོགས། །བྱིང་རྒོད་གཉིས་ཀྱི་སྐྱོན་བྲལ་བས། །ཞི་གནས་བདེ་བ་དེ་ལ་རྫོགས། །སྒྱུ་མ་ལྟ་བུར་ངེས་ཤེས་པས། །དངོས་མེད་རྟོགས་པས་ལྷག་མཐོང་རྫོགས། །སེར་སྣ་འཛིན་པའི་སེམས་མེད་པས། །སྦྱིན་པའི་ཕ་རོལ་ཕྱིན་པ་རྫོགས། །མི་དགེ་ཉེས་བྱས་མི་འབྱུང་བས། །ཚུལ་ཁྲིམས་ཕ་རོལ་ཕྱིན་པ་རྫོགས། །ཆོས་ཀྱི་དབྱིངས་ལ་ཀུན་ཤོང་བས། །བཟོད་པའི་ཕ་རོལ་ཕྱིན་པ་རྫོགས། །ལྟ་བའི་དོན་ལ་མ་གཡོས་པས། །བརྩོན་འགྲུས་ཕ་རོལ་ཕྱིན་པ་རྫོགས། །སེམས་ཉིད་དོན་ལ་མི་གཡོ་བས། །བསམ་གཏན་ཕ་རོལ་ཕྱིན་པ་ ― DNG002_Page_0351 ―
[མ་དཔེ་གཟིགས་ན་འདིར་གནོན།]
རྫོགས། །ཆོས་རྣམས་ལྟ་བས་ཐག་བཅད་པས། །ཤེས་རབ་ཕ་རོལ་ཕྱིན་པ་རྫོགས། །སྣང་བ་གང་ཡང་མི་འགོག་པས། །ཐབས་ཀྱི་ཕ་རོལ་ཕྱིན་པ་རྫོགས། །མི་གནས་བླ་མེད་དོན་རྟོགས་པས། །སྨོན་ལམ་ཕ་རོལ་ཕྱིན་པ་རྫོགས། །མ་རིག་མུན་པ་ཀུན་བཅོམ་པས། །སྟོབས་ཀྱི་ཕ་རོལ་ཕྱིན་པ་རྫོགས། །འཁོར་འདས་ཡེ་ཤེས་ལྷུན་རྫོགས་པས། །ཡེ་ཤེས་ཕ་རོལ་ཕྱིན་པ་རྫོགས། །ལུས་ངག་དེ་ལས་མ་ཉམས་པས། །རྫོགས་ཆེན་མ་ལུས་ཐམས་ཅད་རྫོགས། །དེ་ཡང་སེམས་དཔའ་རྡོ་རྗེ་ཁྱོད། །དཔེར་ན་ཡིད་བཞིན་ནོར་བུ་ལ། །དགོས་འདོད་ཐམས་ཅད་རྫོགས་པ་བཞིན། །ཆོས་ཉིད་རིག་པའི་དབང་ཐོབ་པས། །ཕྱི་ནང་དབང་རྣམས་དེ་ལ་རྫོགས། །མི་རྟོག་ཡེ་ཤེས་བགེགས་བསལ་བས། །ཕྱི་ནང་མཚམས་གཅོད་དེ་ལ་རྫོགས། །མ་རིག་རྣམ་རྟོག་སྒྲིབ་མེད་པས། །དོན་གྱི་བཤགས་པ་དེ་ལ་རྫོགས། །གཉིས་མེད་དོན་ལ་རང་གནས་པས། །བྱིན་ཆེན་དབབ་པ་དེ་ལ་རྫོགས། །ཉོན་མོངས་བདུད་རྩི་ཆེན་པོ་ལ། །ཡེ་ཤེས་བྱིན་རླབས་དོན་གྱིས་རྫོགས། །འབྱུང་བ་ལྔ་ཡིས་ཀུན་ཁྱབ་པས། །དབང་ཆེན་རིག་པ་དོན་གྱིས་རྫོགས། །ཕྱོགས་བཅུ་རང་བཞིན་ལྷུན་གྲུབ་པས། །གཞལ་ཡས་ཁང་ཆེན་དེ་ལ་རྫོགས། །རིག་ཚོར་དོན་གྱི་ལྷ་ཡིན་པས། །ཡེ་ཤེས་ལྷ་རྣམས་དེ་ལ་རྫོགས། །སངས་རྒྱས་སེམས་ཅན་དབྱེར་མེད་པས། །སྤྱན་དྲངས་བསྡིམ་པ་དེ་ལ་རྫོགས། །ཆོས་ཉིད་དོན་ལས་མི་འགྱུར་བས། །བརྟན་པར་བཞུགས་པ་དེ་ལ་རྫོགས། །ཐམས་ཅད་བཟང་ངན་མིང་མེད་པས། །ཟིལ་གྱིས་མནན་པ་དེ་ལ་རྫོགས། །ཐམས་ཅད་འདྲེས་པ་ཆེན་པོ་ལ། །ནན་ཏན་ཕྱག་རྒྱ་དེ་ལ་རྫོགས། །བསྒྲུབ་སྤྱོད་ཐམས་ཅད་ཡེ་ཤེས་པས། །ཕྱག་རྒྱའི་མཆོད་པ་དེ་ལ་རྫོགས། །སེམས་ཅན་ཆོས་ཉིད་དོན་འབྱོར་བས། །སྦྱོར་སྒྲོལ་མཆོད་པ་དེ་ལ་རྫོགས། །ཡོན་ཏན་ཐམས་ཅད་ལྷུན་གྲུབ་པས། །མཐར་ཕྱིན་སྨོན་ལམ་དེ་ལ་རྫོགས། །སྐུ་གསུང་ཐུགས་ཀྱི་དོན་རྟོགས་པས། ། ― DNG002_Page_0352 ―
[མ་དཔེ་གཟིགས་ན་འདིར་གནོན།]
བཟླས་བརྗོད་འཕྲོ་འདུ་དེ་ལ་རྫོགས། །ཚོགས་རྣམས་སྣོད་བཅུད་ཡིན་པའི་ཕྱིར། །ཚོགས་ཀྱི་མཆོད་པ་དེ་ལ་རྫོགས། །བདེ་ཆེན་གཉིས་མེད་ངོ་བོ་ལ། །ལྷག་མའི་མཆོད་པ་དེ་ལ་རྫོགས། །མི་བཟུང་ཡེ་ཤེས་ཆེན་པོ་ལ། །གཏོར་མའི་མཆོད་པ་དེ་ལ་རྫོགས། །ཐིག་ལེ་གཅིག་ཏུ་འདུས་པ་ལ། །དཀྱིལ་འཁོར་བསྡུ་བ་དེ་ལ་རྫོགས། །ཡེ་ཤེས་ལྷུན་གྲུབ་གོ་ལྡན་པས། །བཀའ་ནན་ལུས་སྲུང་དེ་ལ་རྫོགས། །གཉིས་མེད་དོན་དུ་སངས་རྒྱས་པས། །དགེ་བ་བསྔོ་བ་དེ་ལ་རྫོགས། །མཚན་དང་དཔེ་བྱད་ཐམས་ཅད་ཀྱི། །ཡེ་ཤེས་ལྷུན་གྲུབ་དེ་ལ་རྫོགས། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། ཆོས་རྣམས་ལྷུན་གྱིས་རྫོགས་པའི་ལེའུ་སྟེ་བཅོ་ལྔ་པའོ།། །།དེ་ནས་སེམས་དཔའ་རྡོ་རྗེ་ལ། །ཀུན་རིག་སེམས་ཀྱི་རྒྱལ་པོ་ཡིས། །དབང་གི་ཆེ་བ་བཀའ་སྩལ་པ། །སངས་རྒྱས་རྣམས་ཀྱི་དགོངས་པ་འདི། །ནམ་མཁའ་རྒྱ་མཚོ་ཉི་མ་བཞིན། །མ་སྤྲོས་མ་བསྡུས་རང་སྣང་བཞིན། །བྱང་ཆུབ་སེམས་ལས་མ་གཡོས་པའི། །ཀུན་ལ་ཁྱབ་པའི་རིག་པ་གསལ། །འབབ་ཆུ་མར་མེ་དུག་སྔགས་བཞིན། །དམིགས་པ་དྲུག་ལ་སྒོ་ལྔ་གསལ། །རྣམ་རྟོག་ཉིད་ཀྱང་ཡེ་ཤེས་གསལ། །གསལ་ཙམ་ཉིད་ནས་ནུབ་པ་མེད། །ས་གཞི་ཆུ་ཟླ་གང་བ་བཞིན། །སྣ་ཚོགས་སྣང་ལ་བཟུང་དུ་མེད། །ཆེ་བ་ཡེ་ཤེས་རྒྱུན་མ་ཆད། །མེད་ལ་མི་ཟད་འབྱུང་བའི་རྗེ། །མཚན་མ་ཟིལ་གྱིས་གནོན་པ་ཡིས། །སེམས་ཀྱི་དབང་ཆེན་དམ་པ་ཡིས། །འདོད་ཁམས་གནས་རིས་ཟིལ་གྱིས་གནོན། །འགྲོ་དྲུག་གཡང་ས་བཅད་པའི་ཕྱིར། །ཡེ་ཤེས་ཆེན་པོ་ངོས་ཟིན་པས། །གཟུགས་ཁམས་བཅུ་བདུན་དེ་མི་འཁོར། །ཡེ་ཤེས་སྤྱི་བླུགས་དོན་བསྒོམས་པས། །གཟུགས་ཁམས་བཞི་རུ་དེ་མི་སྐྱེ། །ཡེ་ཤེས་ཆེན་པོར་ལ་ཟློས་པས། །ས་བཅུ་རིམ་གྱིས་དེ་མི་བགྲོད། །དབང་གསུམ་གཅིག་ཏུ་རྟོགས་པ་ཡི། །མ་བཅོས་པ་ཡི་ཆོས་ཉིད་ཀྱིས། །བཅོས་པའི་མཚན་མ་ཟིལ་གྱིས་གནོན། །དམིགས་པ་ ― DNG002_Page_0353 ―
[མ་དཔེ་གཟིགས་ན་འདིར་གནོན།]
མེད་པའི་ནམ་མཁའ་ཡིས། །དམིགས་པའི་འབྱུང་བ་ཟིལ་གྱིས་མནན། །སྐྱེ་བ་མེད་པའི་ཡེ་ཤེས་ཀྱིས། །སྐྱེ་བའི་ཕུང་པོ་ཟིལ་གྱིས་མནན། །རིག་པའི་ཆོས་ཀྱི་ཆོས་ཉིད་འདི། །དུས་གསུམ་སངས་རྒྱས་ཐམས་ཅད་ཀྱི། །དུར་ཁྲོད་ཆེན་པོ་ང་ཡི་སེམས། །སེམས་ལས་མ་རྟོགས་སངས་རྒྱས་མེད། །རིག་པ་སེམས་ཀྱི་དབང་ཆེན་ནི། །སངས་རྒྱས་ཀུན་གྱི་མེས་པོ་ཡིན། །འདི་ལས་མ་བྱུང་སངས་རྒྱས་མེད། །དེ་ཕྱིར་དབང་གསུམ་རབ་ཏུ་བསྔགས། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། རིག་པའི་དབང་གི་ཆེ་བ་བསྟན་པའི་ལེའུ་སྟེ་བཅུ་དྲུག་པའོ།། །།ཀུན་རིག་སེམས་ཀྱི་རྒྱལ་པོ་ཡིས། །ཆེ་བའི་ཡོན་ཏན་བཀའ་སྩལ་པ། །སྙིང་པོ་དོན་གྱི་འབྲས་བུའི་ཆོས། །གང་ཞིག་སྣོད་དང་ལྡན་པ་ཡིས། །ཤེས་ནས་དེ་ལ་གང་གནས་པ། །རང་རིག་ཉིད་ལ་དབང་ཐོབ་ནས། །སྐྱེ་བ་གཞན་དུ་མི་ལེན་པར། །སངས་རྒྱས་རིག་འཛིན་ཆེན་པོ་ཐོབ། །སེམས་དཔའ་ཆེན་པོ་ང་ཡི་དོན། །ཇི་བཞིན་མ་བཅོས་དེ་ཉིད་ལ། །ཇི་བཞིན་པ་ཡི་རང་བཞིན་བཞག །ཡེ་ཤེས་དེ་ཉིད་མ་ཡིན་པར། །སྒྲུབ་དང་བསྒྲུབ་བྱ་ག་ལ་ཡོད། །དེ་ལ་ཡེ་ཤེས་མངོན་གྱུར་ན། །མེད་ལ་མི་ཟད་འབྱུང་བའི་གཏེར། །ཁམས་གསུམ་རིན་ཆེན་རྙེད་པའི་མི། །ཅི་ལྟར་འདོད་པ་བཞིན་དུ་འབྱུང་། །ཡེ་ཤེས་ཆེན་པོ་འདི་རྟོགས་པས། །ཆེ་བའི་ཡོན་ཏན་རྒྱུན་མི་ཆད། །མིང་ཡང་ཀུན་འབྱུང་རིན་ཆེན་གཏེར། །དེ་བཞིན་ཉིད་དུ་ཀུན་རིག་ན། །འཁོར་བ་དང་ནི་མྱ་ངན་འདས། །སོ་སོར་སྣང་བ་མ་ཡིན་ཏེ། །ཇི་བཞིན་པ་དེ་རྟོགས་ངེས་ན། །དེ་ལ་འཁོར་བའི་རང་བཞིན་མེད། །རྡོ་རྗེ་སྙིང་པོ་དེ་ཉོན་ཅིག །མ་བཅོས་པ་ཡི་མན་ངག་གི། །ལྟ་བ་ཡངས་པའི་ནམ་མཁའ་ལ། །འཛིན་རྟོག་མེད་པའི་ཡེ་ཤེས་གསལ། །གང་ཡང་མ་སྤངས་ལྷུན་གྱིས་གྲུབ། །མུན་པ་འཐིབ་པ་དེ་དག་གིས། །མི་གཡོ་མི་རྟོག་ཡེ་ཉིད་བལྟ། །དེ་མཐོང་མུན་པ་རྣམ་དག་སངས། །སངས་རྒྱས་ཀུན་གྱི་མཆོག་ཏུ་བཤད། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། ― DNG002_Page_0354 ―
[མ་དཔེ་གཟིགས་ན་འདིར་གནོན།]
བྱང་ཆུབ་སེམས་ཀྱི་ཆེ་བ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་སེམས་དཔའ་རྡོ་རྗེ་ཡིས། །འདུས་པའི་ཚོགས་ལ་ཕན་གདགས་ཕྱིར། །ཀུན་རིག་སེམས་ཀྱི་རྒྱལ་པོ་ལ། །དེ་ལྟར་རྟོགས་པའི་རྣལ་འབྱོར་ལ། །གོལ་ས་སྒྲིབ་པ་ཅི་ལྟར་མེད། །བསྒོམ་དུ་ཡོད་མེད་ཇི་ལྟ་བུ། །འབྱུང་བ་ཉོན་མོངས་ཇི་ལྟར་དག །ཡོན་ཏན་གདུལ་བྱ་ཅི་ལྟར་འབྱུང་། །ལ་བཟླ་བ་ཡི་གཏན་ཚིགས་གང་། །མཉམ་པའི་རྒྱལ་པོས་བཤད་དུ་གསོལ། །དེ་སྐད་གསོལ་བའི་ཚིག་གསན་ནས། །ཀུན་རིག་རྒྱལ་པོས་བཀའ་སྩལ་པ། །ལྟ་བ་ལྷུན་གྲུབ་ཆེན་པོ་ལ། །གོལ་སྒྲིབ་མེད་པར་བསྟན་པ་ཡིས། །བཅུ་གཉིས་གསུམ་དང་བདུན་བསྟན་པ། །ཡིད་ལ་མི་བྱེད་གོལ་སྒྲིབ་མེད། །དེ་དོན་རྣམ་པར་དབྱེ་བ་ནི། །བྱུང་ཚོར་རྗེས་སུ་མི་འབྲངས་པས། །འཇིག་རྟེན་ཕལ་བའི་སར་མི་གོལ། །ཡོད་མེད་ཡུལ་དུ་མི་བསྒོམ་པས། །རྟག་ཆད་མཐར་ནི་དེ་མི་གོལ། །ཤེས་རབ་ཟབ་མོའི་དོན་ཟིན་པས། །ལུང་དུ་མ་བསྟན་དེ་མི་གོལ། །ཞི་གནས་རོ་ལ་མ་ཆགས་པས། །འཇིག་རྟེན་བསམ་གཏན་སར་མི་གོལ། །སྒོ་ལྔའི་རྣམ་ཤེས་མི་འགོག་པས། །འདུ་ཤེས་མེད་པར་དེ་མི་གོལ། །རྣམ་རྟོག་མ་སྤངས་མ་ཞི་བས། །ཉན་ཐོས་འགོག་པར་དེ་མི་གོལ། །རྣམ་རྟོག་སྟོང་པར་མ་བསྒོམས་པས། །རང་རྒྱལ་སེམས་སུ་དེ་མི་གོལ། །རང་རིག་གསལ་བར་མ་བསྒོམས་པས། །སེམས་ཙམ་དུ་ནི་དེ་མི་གོལ། །མཚན་མ་སྟོང་པར་མ་བསྒོམས་པས། །དབུ་མ་ཉིད་དུ་དེ་མི་གོལ། །ཐབས་ཀྱི་བདེ་བ་མ་བསྒོམས་པས། །ཆགས་པའི་ལམ་དུ་དེ་མི་གོལ། །རྒྱུ་འབྲས་རྐྱེན་ལ་མི་ལྟོས་པས། །འདུས་བྱས་ཆོས་སུ་དེ་མི་གོལ། །དགེ་སྡིག་རེ་དོགས་རྩོལ་མེད་པས། །ལས་ཀྱི་དབང་དུ་དེ་མི་གོལ། །སེམས་ལ་དབེན་པའི་ཡུལ་མེད་པས། །འབྲས་བུའི་ལམ་དུ་དེ་མི་འགྲོ། །ལམ་ལྔ་རིམ་གྱིས་མ་སྦྱངས་པས། །ས་བཅུ་བགྲོད་པར་དེ་མི་གོལ། །དག་པའི་ལྷ་ལྟར་མི་བསྒོམ་པས། །ཀྲི་ཡའི་ཐེག་པར་དེ་མི་གོལ། །ལྟ་སྤྱོད་གཉིས་འཛིན་མི་བསྒོམ་པས། །ཨུ་པ་ཡར་ནི་དེ་མི་གོལ། །བྱང་ཆུབ་རྣམ་ལྔ་མི་བསྒོམ་ ― DNG002_Page_0355 ―
[མ་དཔེ་གཟིགས་ན་འདིར་གནོན།]
པས། །ཡོ་གའི་སེམས་དཔར་དེ་མི་གོལ། །རྣམ་རྟོག་ལྷར་ནི་མ་བསྒྱུར་བས། །མ་ཧཱ་ཡོ་གར་དེ་མི་གོལ། །འདུ་འབྲལ་མེད་འཛོམ་ཡོད་མེད་པས། །ཨ་ནུ་ཡོ་གར་དེ་མི་གོལ། །ཆོས་ཉིད་མཚོན་དུ་མེད་རྟོགས་པས། །མཚན་མའི་སྐྱོན་དུ་དེ་མི་གོལ། །བརྟུལ་ཞུགས་ཕྱི་ནང་མི་གོལ་བས། །བླང་དོར་མེད་པར་དེ་མི་གོལ། །གཉིས་མེད་དོན་ལ་མི་གཏོད་པས། །ཕྱོགས་ཅན་ལྟ་བར་དེ་མི་གོལ། །སེམས་ཉིད་དོན་ལ་མི་རྩོལ་བས། །མཉམ་ཉིད་དོན་ལས་དེ་མི་གོལ། །དེ་ལས་གཞན་པར་གོལ་ས་མེད། །དེ་ཡང་སེམས་དཔའ་རྡོ་རྗེ་ཁྱོད། །སྒྲིབ་པ་གང་ཡིན་མཚན་ཉིད་ནི། །ཡེ་ཤེས་ཆེན་པོར་ངོས་ཟིན་པས། །སྐབས་འབྱེད་སྒྲིབ་པ་དེ་ལ་མེད། །སྔ་ཕྱི་རྗེས་སུ་མི་འབྲངས་པས། །བསླབ་པའི་སྒྲིབ་པ་དེ་ལ་མེད། །སྔ་ཕྱིའི་གློ་བུར་དངོས་མེད་པས། །ཕྱོགས་ལྷུང་སྒྲིབ་པ་དེ་ལ་མེད། །ལྟ་བ་ངེས་པའི་གདེང་ཟིན་པས། །ཚོགས་ཀྱི་སྒྲིབ་པ་དེ་ལ་མེད། །བྱ་བ་མེད་པའི་དོན་རྟོགས་པས། །ལམ་བཞིའི་སྒྲིབ་པ་དེ་ལ་མེད། །བག་ཆགས་མི་གཡོའི་སྟོབས་ལྡན་པས། །མཆོད་པའི་སྒྲིབ་པ་དེ་ལ་མེད། །ངེས་པའི་ལུང་ལ་ཡིད་ཆེས་པས། །ལུང་གི་སྒྲིབ་པ་དེ་ལ་མེད། །དེ་དག་གོལ་ས་སྒྲིབ་པ་ཀུན། །ངང་དུ་རྫོགས་ནས་རང་ཡན་ལ། །བརྒྱ་དང་བརྒྱད་ཅུ་ལ་སོགས་པ། །གོལ་སའི་སྒྲིབ་པ་མུ་མཐའ་ཡས། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། གོལ་སྒྲིབ་མེད་པར་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་ཚོགས་ལ་བཀའ་སྩལ་པ། །ང་ཡིས་བྱས་པའི་ཆོས་རྣམས་ལ། །བསྒོམ་དུ་ཡོད་མེད་མཐའ་ཡི་ཆོས། །སེམས་ཅན་སངས་རྒྱས་ཚུལ་གཅིག་ཕྱིར། །རྒྱུ་འབྲས་དབྱེར་མེད་ལྷུན་གྱིས་གྲུབ། །དེ་ཡང་འདུས་པའི་སྙིང་པོ་ཁྱོད། །སྐྱོན་དང་ཡོན་ཏན་རྣམ་གཉིས་ཀྱིས། །ཆོས་ཉིད་འཁྲུལ་པ་གཞིར་བཞག་ན། །གཉིས་ཀ་ལྟར་ཡང་མི་འགལ་ཕྱིར། །ཀུན་ཀྱང་ཡིན་ལ་ཐམས་ཅད་མིན། །དཔེར་ན་ཉི་མའི་སྙིང་པོ་ལ། །མུན་སྣང་གཉིས་ཀ་མི་འགལ་བཞིན། ། ― DNG002_Page_0356 ―
[མ་དཔེ་གཟིགས་ན་འདིར་གནོན།]
གཞི་གཅིག་གང་ཡང་མ་འགགས་པ། །དེ་ཉིད་དུས་ན་ངོས་བཟུང་མེད། །ད་ཡང་རྡོ་རྗེ་སྙིང་པོ་ཁྱོད། །ཆུ་བྲན་རྒྱ་མཚོར་རོ་གཅིག་ཕྱིར། །སྣང་སྲིད་ཡེ་ཤེས་ཆེན་པོ་ལ། །བྱིས་པ་རྣམས་ཀྱིས་ཐ་དད་བཟུང་། །དེ་ཕྱིར་བློ་ཡི་རྣམ་པ་ཡིན། །འབྱུང་བ་ནམ་མཁར་གཅིག་པ་བཞིན། །ཆོས་རྣམས་སེམས་སུ་གཅིག་པ་ལ། །བློ་བཞག་ཐེག་པ་རིམ་དགུ་བྱུང་། །འབྱུང་བ་ལྷུན་གྲུབ་གཅིག་ལས་མེད། །དེ་ཡང་སེམས་དཔའ་རྡོ་རྗེ་ཁྱོད། །རང་བྱུང་ཡེ་ཤེས་རྩ་བ་ནི། །དངོས་པོ་མེད་ལ་ཤེས་པར་ཡོད། །ཡིད་སྣང་སེམས་ཀྱི་རང་བཞིན་ལ། །ངེས་དོན་དྲང་དོན་བསྟན་པ་ལས། །ངོ་བོ་གཞི་གཅིག་མ་འགལ་ཡང་། །ཤཱཀ་ཐུབ་རྣམ་སྣང་མི་འགལ་བཞིན། །དྲུག་ནི་སྣང་བ་ཐ་དད་པས། །གཉེན་པོ་གཞི་ཡི་རང་བཞིན་ལས། །སྣང་བ་ཞེན་པ་གང་འགོག་པ། །བལྟ་བའི་ཡུལ་ནི་རྣམ་བཞི་སྟེ། །གཉིས་མེད་སྣང་སྟོང་ཁས་མི་ལེན། །ཐམས་ཅད་བློ་ཡི་སྣང་བ་སྟེ། །དེ་བས་སེམས་ཉིད་རྟོགས་པའི་ཐབས། །རང་རིག་རྒྱལ་པོའི་ཤེས་པ་འཕྱོ། །ད་ཡང་འདུས་པའི་ཚོགས་རྣམས་ཉོན། །མ་རྟོགས་ལོག་རྟོག་དག་པའི་ཕྱིར། །མདོ་སྡེ་དང་ནི་རྒྱུད་སྡེ་ལ། །ཚད་མ་བཞི་ཡི་གཏན་ཚིགས་ཀྱིས། །ཐེག་པ་གོང་འོག་ཁྱད་པར་གྱིས། །མིང་དང་ཐ་སྙད་བསམ་ཡས་ཀྱང་། །ཞེན་པ་བཟློག་པའི་ཐབས་སུ་ཟད། །རྡོ་རྗེའི་ཐེག་པ་འདི་ལས་མེད། །དེ་བཞིན་རྟོགས་པའི་རྣལ་འབྱོར་པས། །ཡལ་བར་འདུག་པ་ནམ་ཡང་མིན། །དེ་དོན་རྒྱུད་དུ་མ་ཡེངས་ན། །དགོངས་པ་ཀུན་བཟང་ང་དང་མཉམ། །ད་ཡང་སེམས་དཔའ་རྡོ་རྗེ་ཁྱོད། །སྣང་བ་མི་འགག་རང་བཞིན་ལས། །ཞེན་པ་མེད་པའི་ཡེ་ཤེས་ཏེ། །ཐམས་ཅད་རང་བྱུང་མ་བཅོས་པ། །དེ་ཉིད་དོན་དང་གང་ལྡན་པ། །དམན་པའི་ལུས་ལ་སངས་རྒྱས་ཡིན། །ཆོས་ཉིད་འབྲས་བུར་ཡེ་རྫོགས་པ། །རེ་དོགས་གཉིས་མེད་དེ་ཁོ་ན། །དོར་བར་བྱ་བའི་དངོས་མེད་པར། །བླང་བར་བྱ་བ་ག་ལ་ཡོད། །སེམས་དཔའ་རྡོ་རྗེ་ང་ལ་ནི། །ལམ་མེད་ལམ་ལྟར་མ་སྦྱོར་ ― DNG002_Page_0357 ―
[མ་དཔེ་གཟིགས་ན་འདིར་གནོན།]
ཅིག །ས་མེད་ས་བཅུར་མ་བགྲོད་ཅིག །རྟེན་མེད་དམིགས་ཀྱང་མ་འཆའ་ཞིག །སྒྲིབ་མེད་སྒྲིབ་གཉིས་མ་སྦྱོངས་ཤིག །ཡུལ་མེད་ཚོགས་གཉིས་མ་གསོག་ཅིག །སེམས་ལ་གཉེན་པོ་མེད་པར་སྦྱོར། །ལུང་ལས་མ་བཏུས་མན་ངག་གིས། །སེམས་ལས་མ་རྟོག་སངས་རྒྱས་བརྙེས། །རྒྱུ་ལས་མ་བྱུང་འབྲས་བརྩོན་འདྲ། །དེ་ཡང་སེམས་དཔའ་རྡོ་རྗེ་ཁྱོད། །ཇི་བཞིན་པ་ཡི་དེ་ཉིད་ལ། །སངས་རྒྱས་ཉིད་ཀྱིས་བྱར་མེད་པས། །བློ་དང་བློ་ཡི་སྣང་བ་ཡིས། །གང་གིས་བཅོས་ཏེ་སུ་ཡིས་བྱས། །བྱེད་པ་པོ་ཡང་ག་ལ་ཡོད། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། ཐེ་ཚོམ་བསལ་བའི་ལེའུ་སྟེ་བཅུ་དགུ་པའོ།། །།ཀུན་རིག་སེམས་ཀྱི་རྒྱལ་པོ་ཡིས། །འདུས་པའི་ཚོགས་ལ་བཀའ་སྩལ་པ། །སེམས་དཔའ་རྡོ་རྗེ་ང་ཡི་ཆོས། །འབྱུང་བ་ལྔ་དག་ཉོན་མོངས་དག་པ་ནི། །སྣང་སྟོང་གོ་འབྱེད་ཀུན་ཁྱབ་མཁའ། །ཐེག་ཆེན་པོ་ལ་ཀུན་གནས་པས། །ཞི་གནས་རྣམ་དག་ཆུ་ཆེན་པོ། །ལྷག་མཐོང་ཡེ་ཤེས་འོད་འབར་མེ། །ཤེས་བྱ་ཐོགས་མེད་ཡེ་ཤེས་རླུང་། །ཀུན་ལ་ཁྱབ་པས་ནམ་མཁའི་དབྱིངས། །འབྱུང་བ་ཡེ་ཤེས་ལྔ་རུ་དག །དེ་ཡང་སེམས་དཔའ་རྡོ་རྗེ་ཁྱོད། །མ་འདྲེས་ཡོངས་རྫོགས་གསལ་སྟོང་གཟུགས། །ཁམས་གསུམ་རང་བཞིན་གོ་བའི་སྒྲ། །དམ་པའི་ཚིམས་བྱེད་ཆོས་ཀྱི་དྲི། །སྣོད་བཅུད་ཉམས་སུ་མྱོང་བའི་རོ། །བདེ་མཆོག་དོན་ལ་རེག་པའི་ཐུགས། །ད་ཡང་འདུས་པའི་ཚོགས་རྣམས་ཀུན། །ཅི་ཡང་མི་སེམས་གཏི་མུག་ལ། །དངོས་པོ་ཀུན་བཅོམ་ཞེ་སྡང་ཉིད། །ཡེ་ཤེས་ང་རྒྱལ་བདག་ཉིད་ཆེ། །རང་བཞིན་སྙིང་རྗེ་འདོད་ཆགས་ཆེ། །སེམས་ཉིད་མི་འགྱུར་གཞན་ཕྲག་དོག །འབྱུང་བ་འདོད་ཡོན་དུག་ལྔ་ཡང་། །ཐམས་ཅད་ཡེ་ཤེས་ཆེན་པོར་དག །ཀུན་གྱི་རང་བཞིན་དེ་ཤེས་པས། །དེ་ཉིད་དབང་དུ་ཐམས་ཅད་འདུས། །ཀུན་ལ་དབང་བསྒྱུར་ཐོབ་པས་ན། །ཡེ་དབང་ཆེན་པོར་རྫོགས་པ་ཡིན། །ཡེ་ཤེས་སེམས་དཔའ་ཆེན་པོ་ཁྱོད། །འཇིག་རྟེན་མ་ལུས་ཁམས་རྣམས་ཀྱང་། །བསམ་གྱིས་མི་ཁྱབ་ཚིམ་གྱུར་ཀྱང། ། ― DNG002_Page_0358 ―
[མ་དཔེ་གཟིགས་ན་འདིར་གནོན།]
ནམ་མཁའ་ཚིམ་པར་མི་འགྱུར་བཞིན། །ཆོས་སྐུ་ངོ་བོ་འགྱུར་མེད་པ། །བློ་ཡི་སྣང་བ་སྣ་ཚོགས་པ། །རྟོགས་པའི་དོན་ལ་དབྱེར་མེད་པས། །དེ་ཉིད་ཡེ་ཤེས་ལྷུན་གྲུབ་སྟེ། །བདག་དང་གཞན་དུ་སྣང་བ་མེད། །མེད་པ་མ་ཡིན་རིག་ཅིང་ཚོར། །ཆད་པར་མ་སོང་རིག་ཅིང་གསལ། །རྟག་པར་མ་སོང་དངོས་པོ་མེད། །གཉིས་སུ་མ་སོང་ཟླ་བོ་མེད། །གཅིག་ཏུ་མ་སོང་ཀུན་ལ་ཁྱབ། །སྟོང་ཉིད་རྣམ་དག་ནམ་མཁའ་འདྲ། །གཙང་སྨེ་བྱ་བ་རྡུལ་ཙམ་མེད། །རྫོགས་པ་ཆེན་པོ་བལྟ་བ་ཐམས་ཅད་ཀྱི་སྙིང་པོ་ལས། འབྱུང་བ་འདོད་པའི་ཡོན་ཏན་ལྔ་དང་ཆགས་སྡང་ལ་སོགས་དུག་ལྔ་ཡང་མ་སྤངས་གནས་སུ་དག་པར་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་རྒྱལ་པོས་བཀའ་སྩལ་པ། །ང་ཡིས་བཤད་པའི་ཆོས་རྣམས་ལ། །གང་ཟག་བློ་ཡི་རབ་འབྲིང་གིས། །ས་དང་ལམ་གྱི་ཁྱད་པར་དང་། །དབང་དང་དམ་ཚིག་ལྟ་བ་དང་། །བསྒོམ་པ་སྤྱོད་པ་ལ་སོགས་པ། །ཐ་དད་སྤྲོས་ཀྱང་གཅིག་ལས་མེད། །གཅིག་ལས་སྤྲོས་པ་ཀུན་གྱི་མིང་། །སེམས་ཉིད་རྣམ་པ་སྣ་ཚོགས་པས། །སྣ་ཚོགས་སྣང་ཡང་ངོ་བོར་གཅིག །དཔེར་ན་གསེར་རྒྱུ་གཅིག་པ་ལ། །དབྱིབས་སུ་གཟུགས་རྣམས་ཐ་དད་པ། །བྱས་པ་དེ་དག་མིང་རེར་གྲགས། །གྲགས་ཀྱང་གསེར་དང་ངོ་བོར་གཅིག །འདུས་པའི་རྡོ་རྗེ་སྙིང་པོ་ཁྱོད། །ཤེས་རབ་ཐབས་ཀྱིས་སྤྱོད་པ་ཡིས། །ཆོས་སྐུ་ཡེ་ནས་དག་པ་ལ། །ཀློང་གསུམ་ལྡན་པའི་སྐྱེས་མཆོག་གིས། །རྒྱུན་དུ་མ་ཡེངས་རྒྱལ་བའི་སྲས། །དེ་ལ་སྐྱོན་གྱིས་གོས་མི་འགྱུར། །ད་ཡང་འདུས་པའི་སྙིང་པོ་ཁྱོད། །རང་སེམས་ཆོས་སྐུར་རྟོགས་པ་ཡིས། །མ་ངལ་མི་ཟད་འབྱུང་བའི་གཏེར། །གཞན་དོན་སྨོན་ལམ་མཐར་ཕྱིན་པའི། །ཐོགས་མེད་གཟུགས་སྐུ་རྣམ་གཉིས་པོ། །གསེར་སྦྲུལ་མིག་བཞིན་དུས་གཅིག་འབྱུང་། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། ཡོན་ཏན་གྱི་གདུལ་བྱ་བསྟན་པའི་ལེའུ་སྟེ་ཉེར་གཅིག་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་ ― DNG002_Page_0359 ―
[མ་དཔེ་གཟིགས་ན་འདིར་གནོན།]
པའི་ཚོགས་ལ་བཀའ་སྩལ་པ། །ལ་བཟླ་བ་ཡི་གཏན་ཚིགས་ནི། །སངས་རྒྱས་ཐུགས་དང་སེམས་ཅན་སེམས། །སོ་སོར་སྣང་བ་མ་ཡིན་ཏེ། །རྩ་བ་ཆོས་སྐུར་གཅིག་པ་ཡིས། །གཉིས་སུ་མེད་པར་ལ་བཟླའོ། །འཁོར་བ་དག་གི་སྡུག་བསྔལ་དང་། །སངས་རྒྱས་རྣམས་ཀྱི་བདེན་པ་དང་། །གཉིས་ཀ་རྩ་བ་གཅིག་པ་ཡིས། །ལྷུན་གྲུབ་དག་ཏུ་ལ་བཟླའོ། །གཙང་དང་མི་གཙང་གཉིས་ཀ་བཞིན། །ལུད་པ་ལ་སོགས་གང་རུང་ལ། །བྱ་ཁྱི་ཡིས་ནི་ཟས་སུ་མཐོང་། །དེ་ཕྱིར་བླང་དོར་མེད་པའོ། །མཚན་དང་དཔེ་བྱད་ཡོན་ཏན་དང་། །ལུས་དང་བག་ཆགས་སྐྱོན་རྣམས་ཀུན། །ངང་འཇོག་མེད་པར་ལ་བཟླའོ། །གཞི་ལ་འཁྲུལ་པ་མ་རིག་མེད། །ཐམས་ཅད་བྱང་ཆུབ་སེམས་སུ་གསལ། །དུག་ལྔ་བྱང་ཆུབ་ལམ་ཡིན་པས། །སྤང་དུ་མེད་པར་ལ་བཟླའོ། །ད་ཡང་རྡོ་རྗེ་སེམས་དཔའ་ཁྱོད། །རང་བཞིན་སྐྱེ་མེད་སྤྲོས་བྲལ་བས། །བརྗོད་དུ་མེད་པར་ཡིད་ཆེས་བྱ། །རྒྱུ་རྐྱེན་མེད་པའི་དོན་གོ་བས། །ལྷུན་གྱིས་གྲུབ་པར་ཐག་ཆོད་དོ། །ཕྱི་ནང་འབྱུང་བ་སྣ་ཚོགས་པ། །ཀུན་བཟང་རོལ་པ་ཡིན་པས་ན། །གང་ཡང་མི་འགལ་ཡིད་ཆེས་པས། །གཏན་ཚིགས་ཆེན་པོར་བཞག་པ་ཡིན། །ཆོས་ཅན་རང་གི་མཚན་ཉིད་ནི། །གདོད་ནས་གཉིས་སུ་མེད་པ་ཡིས། །ཆོས་རྣམས་རྩ་བ་གཅིག་པའི་དོན། །གཏན་ཚིགས་དག་གིས་ཡིད་ཆེས་བྱ། །ངོ་བོ་ཉིད་དུ་རང་གྲོལ་བས། །གཏན་ཚིགས་དག་གིས་ཡིད་ཆེས་བྱ། །ད་ཡང་སེམས་དཔའ་རྡོ་རྗེ་ཉོན། །ཆོས་རྣམས་ཀུན་གྱི་རྩ་བ་ནི། །ཡེ་ཤེས་ལྷུན་གྲུབ་དག་ཏུ་བསྟན། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། མན་ངག་གཏན་ཚིགས་ཀྱི་ལེའུ་སྟེ་ཉེར་གཉིས་པའོ།། །།དེ་ནས་ཀུན་རིག་རྒྱལ་པོ་ལ། །འཁོར་རྣམས་གུས་པའི་ཚུལ་གྱིས་ནི། །རང་རང་རྟོགས་པ་བརྗོད་པའི་ཕྱིར། །སྤྱན་སྔར་འདུག་ནས་འདི་སྐད་གསོལ། །རིང་ནས་འདུས་པ་བདག་ཅག་ནི། །རྩ་བ་རང་སེམས་དོན་གསལ་བས། །བཙལ་བས་མི་རྙེད་རང་སེམས་ནི། །དམིགས་སུ་མེད་པའི་ཆོས་སྐུ་ལ། །གང་ཡང་མ་བཀག་ནམ་མཁའ་བཞིན། །མ་བསྒོམས་མ་ཡེངས་འབྲས་བུ་རྣམས། །ཞལ་མཐོང་སྤྲུལ་པ་བདག་གིས་ནི། །དུས་གསུམ་ ― DNG002_Page_0360 ―
[མ་དཔེ་གཟིགས་ན་འདིར་གནོན།]
རང་སེམས་འགྱུར་མེད་དོན། །མེད་ལ་མི་ཟད་མཐའ་བྲལ་བས། །གང་ཡང་མ་སྤངས་གནས་སུ་དག །མ་བཙལ་རྙེད་པ་ནོར་བུ་བཞིན། །རང་སེམས་ཆོས་ཀྱི་དབྱིངས་སུ་དག །དད་ཉན་འཁོར་གྱི་རྟོགས་པ་འདི། །འགྲོ་དྲུག་སེམས་ཅན་ཐམས་ཅད་ཀྱིས། །ཆོས་སྐུ་རང་ཆས་དེ་རྟོགས་ན། །རྩོལ་ཞིང་བསྒྲུབ་པའི་ནད་བྲལ་བས། །ཡེ་ཤེས་ངོ་བོར་སངས་རྒྱས་ཏེ། །རེ་དོགས་མེད་པར་ལམ་དུ་རྟོགས། །དེ་སྐད་བརྗོད་པའི་དོན་རྟོགས་ནས། །ཀུན་རིག་རྒྱལ་པོས་བཀའ་སྩལ་པ། །ལེགས་སོ་དད་ལྡན་འཁོར་རྣམས་ཉོན། །ཚིག་ཏུ་མཚོན་པ་སྣ་ཚོགས་ཀྱང་། །དོན་ལ་དབྱེར་མེད་ངོ་བོ་གཅིག །གཅིག་ལས་སྤྲོས་པས་ཀུན་གྱི་ངང་། །དབྱེར་མེད་དོན་དུ་སངས་རྒྱས་ན། །འཕོ་ཞིང་འགྱུར་བའི་ཆོས་མེད་དོ། །རྫོགས་པ་ཆེན་པོ་ལྟ་བ་ཐམས་ཅད་ཀྱི་སྙིང་པོ་ལས། འཁོར་གྱི་རྟོགས་པ་བརྗོད་པའི་ལེའུ་སྟེ་ཉི་ཤུ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སེམས་ཀྱི་རྒྱལ་པོ་ཡིས། །ལྟ་བ་སྙིང་པོའི་དོན་གཏད་པ། །ཐེག་པའི་རྒྱལ་པོ་ལྷུན་རྫོགས་འདི། །སྐལ་ལྡན་འདུས་པ་རྣམས་ཀྱིས་ཀྱང་། །ཡིད་ལ་བཏག་ཅིང་བཅང་བར་གྱིས། །ད་ཡང་རྡོ་རྗེ་སྙིང་པོ་ཁྱོད། །ང་ཡི་བསྟན་པའི་སྙིང་པོ་འདི། །ལོག་སྲེད་ཞེན་ཆགས་མ་ངེས་པར། །ནམ་ཡང་བསྟན་པར་མ་བྱེད་ཅིག །ཉན་ཐོས་ལ་སོགས་ལྟ་དམན་ལ། །བསྟན་ཀྱང་གོ་བར་མི་འགྱུར་ཏེ། །མི་ཐེག་ཁལ་ཆེན་བཀལ་བ་བཞིན། །དོན་མ་གོ་བས་ངན་སོང་ལྟུང་། །དེ་བས་རང་སེམས་སྔོན་སྦྱངས་པའི། །རྣལ་འབྱོར་གང་ཞིག་དད་ལྡན་ལ། །སྙིང་པོ་འདི་ཡི་དོན་མཚོན་ནས། །ལྟ་བའི་སྙིང་པོ་རྟོགས་པར་གྱིས། །ད་ཡང་འདུས་པའི་སྙིང་པོ་ཁྱོད། །ཚུལ་འཆོས་བྱེད་ཅིང་སློབ་དཔོན་སྨད། །ནོར་ཕངས་གཞོག་ངོམས་ཁ་གསགས་ཅན། །གཡོ་སྒྱུ་ཐབས་ཀྱིས་ཆོས་འདོད་པ། །རྒྱུད་ཀྱི་སྙིང་པོ་ལྟ་བ་ནི། །ནམ་ཡང་བསྟན་པར་མ་གསུངས་སོ། །གལ་ཏེ་སྙིང་པོའི་དོན་བསྟན་ན། །འཕགས་པ་རྣམས་ཀྱང་དགྲར་ལྡང་ན། །མཁའ་འགྲོ་དམ་ཅན་ རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཅེས་བྱ་བ།― DNG002_Page_0361 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྟི་ས་མནྟ་བྷ་དྲ་ཛྙཱ་ན་པྲ་ཀ་ཊ་ཤཱསྟུ་སྟ་ནྟྲ་ནཱ་མ། བོད་སྐད་དུ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཅེས་བྱ་བ། བཅོམ་ལྡན་འདས་དཔལ་ཀུན་ཏུ་བཟང་པོ་མཉམ་ཉིད་ཆོས་ཀྱི་སྐུ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དཔལ་ཀུན་ཏུ་བཟང་པོ་གསང་བ་མཆོག་གི་བདག་པོ། དུས་གསུམ་པ་ཉིད་ཀྱི་ངོ་བོ། སྐུ་གསུམ་གྱི་རང་བཞིན། ཡེ་ཤེས་ལྔའི་བདག་ཉིད་ཅན། རོལ་པའི་རྫུ་འཕྲུལ་ལ་མངའ་བརྙེས་པ་དེ་ཉིད། དོན་ཆོས་ཉིད་སྐྱེ་བ་མེད་པ་ལས་རྟགས་ཡེ་ཤེས་འགག་པ་མེད་པའི་ཆོ་འཕྲུལ་དུ་བཞུགས་སོ། །དེ་ཡང་འོག་མིན་གྱི་གནས་གསང་བ་མཆོག་གི་དཀྱིལ་འཁོར་ ― DNG002_Page_0362 ―
[མ་དཔེ་གཟིགས་ན་འདིར་གནོན།]
ཆེན་པོ། དུས་གསུམ་གྱི་སངས་རྒྱས་རྒྱལ་བ་རྣམས་གཤེགས་ཤིང་བཞུགས་ཏེ། བཞུགས་པར་གྱུར་པའི་གནས། དབྱིབས་དང་ཁ་དོག་ཐ་དད་པ་ལས་ངོ་བོ་ཉིད་གཅིག་པ་སྟེ། དེ་དག་དབྱིངས་ལས་ཡེ་ཤེས་གསལ་བའི་གཞལ་ཡས་ཁང་། ཁྱབ་པ་གདལ་བ་ཆེན་པོ་དེ་ན། འཁོར་རྡོ་རྗེ་འཛིན་པ་དང་། འཁོར་ལོ་འཛིན་པ་དང་། རིན་ཆེན་འཛིན་པ་དང་། པད་མ་འཛིན་པ་དང་། རྒྱ་གྲམ་འཛིན་པ་ལ་སོགས་པ་ཏིལ་མར་ཁྱབ་པ་ལྟར་གནས་སོ། །དེའི་ཚེ་དེའི་དུས་ན་རྡོ་རྗེ་འཛིན་པ་ལ། སངས་རྒྱས་ཀུན་གྱི་ཞུ་བ་པོར། བཀའ་བསྒོས་ཏེ་ཐབས་ཅིག་ཏུ་བཞུགས་སོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་དཔལ་གསང་བ་མཆོག་གི་བདག་པོ་དུས་གསུམ་དང་འཁོར་བ་དང་མྱ་ངན་ལས་འདས་པའི་བདག་པོ་དེས་ཆོས་ཐམས་ཅད་ལ་རྫུ་འཕྲུལ་གྱིས་ཀུན་ལ་ཁྱབ་པར་གཟིགས་པས་རྣམ་པར་གཟིགས་སོ། །དེ་བཞིན་དུ་གཟིགས་པས། ཆོས་ཐམས་ཅད་བྱང་ཆུབ་སེམས་ཀྱི་མཚན་ཉིད། སྟོང་གསལ་ཆེན་པོའི་རང་བཞིན། སྨྲ་བསམ་ལས་འདས་པའི་དེ་བཞིན་ཉིད། དེ་ཁོ་ན་ཉིད་ཀྱི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་རྡོ་རྗེ་འཛིན་པ་རང་གི་སྟན་ལས་ལངས་ཏེ། འདི་སྐད་ཅེས་གསོལ་ཏོ། །ཀྱེ་ཀྱེ་བཅོམ་ལྡན་འདས་གསང་བ་མཆོག་གི་བདག་ཉིད་ཀྱིས། ཡེ་ཤེས་གསལ་བར་སྟོན་པའི་དོན། །གསལ་སྟོང་ཆེན་པོའི་བདག་ཉིད་དེ། །རིམ་པས་བདག་འདུད་བཤད་དུ་གསོལ། །ཞེས་གསོལ་པས། བཅོམ་ལྡན་འདས་དཔལ་ཀུན་ཏུ་བཟང་པོས། གསང་བ་མཆོག་གི་བདག་པོ་ལ་བཀའ་སྩལ་པ། །ཉོན་ཅིག་རྡོ་རྗེ་འཛིན་པ་ཁྱོད། །གུས་པས་ཉོན་ལ་ཡིད་ལ་ཟུངས། །ཆོས་ཉིད་ཡེ་ཤེས་གསལ་བ་ནི། །འཁོར་འདས་ཀུན་གྱི་རྩ་བ་བྱང་ཆུབ་སེམས་ཉིད་དེ། །རྩ་བ་དེ་ཡི་དོན་རྟོགས་ན། །ལྟ་བ་སེམས་ཉིད་ནམ་མཁའ་ཡིན། །སྒོམ་པ་སེམས་ཉིད་ཡུལ་མེད་གསལ། །སྤྱོད་པ་སེམས་ཉིད་རྒྱ་མཚོའི་འཇིང་། །འབྲས་ ― DNG002_Page_0363 ―
[མ་དཔེ་གཟིགས་ན་འདིར་གནོན།]
བུ་སེམས་ཉིད་སྐུ་དང་ཡེ་ཤེས་ངང་། །དེ་ཉིད་མ་རྟོགས་འཁོར་བར་སྣང་། །ཞེས་གསུངས་སོ། །ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས། གླེང་བསླང་ནས་ལན་གསུངས་པའི་ལེའུ་སྟེ་གཉིས་པའོ།། །།དེ་ནས་ཡང་བཅོམ་ལྡན་འདས་དཔལ་ཀུན་ཏུ་བཟང་པོ་དེས། རྡོ་རྗེ་འཛིན་ལ་སོགས་པ་རིགས་ལྔའི་སངས་རྒྱས་ལ་བཀའ་སྩལ་པ། སེམས་ཉིད་རྟོགས་དང་མ་རྟོགས་ལས། །འཁོར་བ་དང་ནི་མྱ་ངན་འདས། །གཞི་ནི་སྟོང་གསལ་མིང་མ་ཐོགས། །གང་དུ་མ་གྲུབ་ག་པུར་ཚུལ། །མཉམ་པ་ཉིད་ཀྱི་རང་བཞིན་ལས། །མཚན་མ་རང་སར་གྲོལ་བ་ཡིས། །སྟོང་གསལ་ཀུན་ཏུ་སངས་རྒྱས་ཏེ། །སྐུ་གསུམ་ཞིང་ཁམས་དག་ཏུ་གནས། །མ་རྟོགས་པ་ལ་འཁྲུལ་པའི་ཡེ་ཤེས་ཏེ། །ཀུན་གཞི་འོད་ཀྱི་ཁང་བུ་ནས། །མ་རིག་པ་ཡི་འཁྲུལ་པ་ནི། །དྲན་པ་ཕྲ་མོའི་རྒྱུན་བྱུང་ནས། །འགྱུ་བ་དྲན་པས་ངར་འཛིན་བྱུང་། །ངར་འཛིན་དག་ལས་འཁོར་བར་འཁྱམས། །མིང་མ་ཐོགས་ཀྱི་ཆོས་ཉིད་ནས། །འཆར་སྒོ་རྣམ་པ་གཉིས་སུ་བྱུང་། །དེ་ཡང་མ་རིག་ཡེ་ཤེས་ཏེ། །མ་རིག་ཡེ་ཤེས་ཐ་དད་མེད། །སོ་སོར་དབྱེ་བ་རྣམ་པ་ཙམ། །མ་རྟོགས་པ་ལ་ལམ་དུ་གཅིག །རྟོགས་ན་བྱང་ཆུབ་ཆེན་པོའི་ལམ། །ཞེས་གསུངས་སོ། །ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས། འཁོར་འདས་གྱེས་པའི་ལུགས་བསྟན་པའི་ལེའུ་སྟེ་གསུམ་པའོ།། །།དེ་ནས་ཡང་རྡོ་རྗེ་འཛིན་པས་བཀའ་སྩལ་པ། དེ་ལྟར་གསུངས་པའི་དོན་དེ་ལ། །མིང་མ་ཐོགས་ཀྱི་གཞི་ཉིད་ནས། །འཆར་སྒོ་གཉིས་སུ་བྱུང་བ་ཡང་། །གཞི་དང་འཁྲུལ་པའི་མཚན་ཉིད་སྟེ། །གཞི་ལས་འཁྲུལ་པ་གྲུབ་མ་གྲུབ། །མཐུན་པའི་དཔེ་ནི་ཅི་ཡིས་མཚོན། །འཁྲུལ་པ་རྩད་ནས་ཇི་ལྟར་བཅད། །ཅེས་གསོལ་པས། ཀུན་བཟང་ཉིད་ཀྱིས་བཀའ་སྩལ་པ། །གཞི་ནི་ངེས་པར་ཆོས་སྐུ་སྟེ། །འཁྲུལ་པ་ཡིད་རྟོག་གློ་བུར་ཡིན། །དེས་ན་འཁྲུལ་པ་གཞི་ལ་ཡང་། །གདོད་ནས་མ་གྲུབ་གློ་བུར་ཡིན། །གཞི་ནི་རིག་པའི་རྒྱུན་ཡིན་ཏེ། །འཁྲུལ་པ་རྣམ་རྟོག་དུམ་བུར་སྣང་། །དཔེར་ན་སྨིག་ཐག་ཐོ་ཡོར་བཞིན། །ཆུ་སྦྲུལ་མི་རུ་འཛིན་བཞིན་ནོ། །འཁྲུལ་པ་རྩད་ནས་བཅད་པ་ནི། །བལྟ་བསྒོམ་སྤྱོད་པའི་རིམ་པ་ཡིས། །འཁྲུལ་པ་ལོག་སྟེ་འབྲས་བུ་ཡང་། །སྐུ་གསུམ་ཡེ་ཤེས་ལྔ་ལྡན་འགྱུར། །ཞེས་གསུངས་སོ། ། ― DNG002_Page_0364 ―
[མ་དཔེ་གཟིགས་ན་འདིར་གནོན།]
རྫོགས་པ་ཆེན་པོ་ཡེ་ཤེས་གསལ་བར་སྟོན་པའི་རྒྱུད་ལས། འཁྲུལ་པ་ལྡོག་ཐབས་ཀྱི་ལེའུ་སྟེ་བཞི་པའོ།། །།དེ་ནས་གཞན་ཡང་བཀའ་སྩལ་པ། །བལྟ་བསྒོམ་སྤྱོད་པའི་རིམ་པ་ཡང་། །བལྟ་བ་དབྱེར་མེད་རང་གྲོལ་ཏེ། །ཁྱུང་ཆེན་ནམ་མཁར་ལྡིང་དང་འདྲ། །དེ་ཡང་ཇི་ལྟར་འདུག་ཅེ་ན། །སྣང་སྲིད་ངེས་མེད་ཕྱི་ནང་སེམས། །སེམས་ལ་ངོས་བཟུང་མེད་པའོ། །དེ་ཉིད་འཛིན་མེད་རང་ཤར་དུ། །ངང་གིས་གྲོལ་ཏེ་བློ་ལས་འདས། །ལྟ་བ་དེ་ཉིད་མི་ལྡན་ན། །བྱ་སྒྲོ་རླུང་གིས་ཁྱེར་དང་མཚུངས། །ཚིག་ཏུ་མ་སོང་དོན་ལ་སྦྱར་བས་ན། །བསྒོམ་པ་འཛིན་མེད་རང་གྲོལ་དེ། །གར་སྦྱིན་སྦྲང་མ་ཆགས་དང་འདྲ། །བྲམ་ཟེ་སྐུད་པ་འཁལ་བ་བཞིན། །ཤེས་པ་ཀློད་ལ་གར་བདེར་བཞག །བསྒོམ་པ་དེ་ལྟར་མ་ལྡན་ན། །ལག་རྡུམ་བྲག་ལ་འཛེགས་པ་འདྲ་བའོ། །མཉམ་བཞག་དང་ནི་རྗེས་ཐོབ་མེད། །དེ་ལྟར་གྱུར་ན་བསྒོམ་པའི་མཆོག །བྱིང་རྨུགས་རྒོད་པའི་དགྲ་བྱུང་ཡང་། །རང་གི་དེ་ཉིད་ཤེས་པས་སེལ། །ཞེས་གསུངས་སོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས་བལྟ་བསྒོམ་བསྟན་པའི་ལེའུ་སྟེ་ལྔ་པའོ།། །།དེ་ནས་སྤྱོད་པ་བཤད་པར་བྱ་སྟེ། །སྤྱོད་པ་རང་བྱུང་ལྷུག་པ་སྟེ། །བི་ཤྭ་ཀརྨའི་བཟོ་དང་འདྲ། །ཚུལ་འཆོས་མེད་པའི་ངང་ཉིད་དེ། །ཐབས་དང་ཤེས་རབ་མཐུན་པར་བྱ། །སྤྱོད་པ་དེ་དང་མ་ལྡན་ན། །དམུས་ལོང་བྲག་ལ་འཛེགས་དང་མཐུན། །ཇི་བཞིན་པ་ཡི་ལྟ་བ་ལ། །དེ་བཞིན་པ་ཡི་བློ་བཞག་སྟེ། །དེ་ཡི་ངང་ལས་མ་ཡེངས་པ། །སངས་རྒྱས་ས་ལ་གནས་པ་ཡིན། །ཞེས་གསུངས་སོ། །རྫོགས་པ་ཆེན་པོ་ཀུན་ཏུ་བཟང་པོ། ཡེ་ཤེས་གསལ་བར་སྟོན་པའི་རྒྱུད་ལས། སྤྱོད་པའི་མན་ངག་དང་བཅས་པའི་ལེའུ་སྟེ་དྲུག་པའོ།། །།དེ་ལྟར་གསང་བ་མཆོག་གི་བདག་པོས་བཀའ་སྩལ་པ། རིགས་ལྔའི་སངས་རྒྱས་ཀྱིས། བཅོམ་ལྡན་འདས་ལ་རང་རང་གི་སེམས་ཀྱི་རྟོགས་ཚད་འདི་སྨྲས་སོ། །ཨེ་མ་བདེ་གཤེགས་བཅོམ་ལྡན་འདས། །སངས་རྒྱས་ཀུན་གྱི་བྱང་ཆུབ་སེམས། །ཚིག་དང་ཡི་གེའི་སྤྱོད་ཡུལ་མིན། །དེ་ལ་གདོད་ནས་རྟོགས་པའི་གནས་མེད་དོ། །ཞེས་རྡོ་རྗེ་སེམས་དཔས་སྨྲས་སོ། ། ― DNG002_Page_0365 ―
[མ་དཔེ་གཟིགས་ན་འདིར་གནོན།]
ཨེ་མ་ཆོས་ཀུན་སྟོང་པའི་བདག །རང་གི་ངོ་བོ་བརྗོད་དུ་མེད། །བརྗོད་མེད་དེ་ནི་སྣ་ཚོགས་པའི། །ཆོས་རྣམས་ཀུན་ལ་ཁྱབ་པར་གནས། །ཞེས་འཁོར་ལོ་འཛིན་པས་སྨྲས་སོ། །ཨེ་མ་མཉམ་ཉིད་བྱང་ཆུབ་སེམས། །མིང་དུ་བཏགས་པའི་ཆོས་རྣམས་ཀུན། །མཉམ་པ་ཉིད་ལ་གནས་བྱས་ཕྱིར། །མཉམ་པ་ཉིད་ལས་གཞན་མེད་དོ། །ཞེས་རིན་ཆེན་འཛིན་པས་སྨྲས་སོ། །ཨེ་མ་ཆོས་སུ་སྣང་བ་ཀུན། །རང་གི་ངོ་བོ་ཡུལ་ལས་འདས། །དེ་ཉིད་བྱང་ཆུབ་སེམས་ཉིད་ནི། །མཁས་པས་བསྒོམ་ན་རྟོགས་པར་འགྱུར། །ཞེས་པདྨ་འཛིན་པས་སྨྲས་སོ། །ཨེ་མ་ཆོས་ཀུན་སེམས་ཉིད་དེ། །ངེས་པ་མེད་དེ་དངོས་རྟོགས་བྲལ། །དེ་ཉིད་དག་པའི་ཡེ་ཤེས་རང་བཞིན་ཏེ། །མཁས་པས་ཅི་དགའ་བསྒོམས་ན་འགྲུབ། །ཅེས་རྒྱ་གྲམ་འཛིན་པས་སྨྲས་སོ། །དེ་ནས་དཔལ་གསང་བ་མཆོག་གི་བདག་པོས་བཀའ་སྩལ་པ། རང་གི་སེམས་གསལ་བའི་ངང་ཉིད་ཤིན་ཏུ་རྫོགས་པ་ཤིན་ཏུ་ལེགས། ཕྱོགས་བཅུའི་འཇིག་རྟེན་གང་ནས་ཀྱང་། །སངས་རྒྱས་རྙེད་པར་མི་འགྱུར་རོ། །སེམས་ཉིད་རྟོགས་པ་སངས་རྒྱས་མཆོག །ཅེས་གསུངས་སོ། །རྫོགས་པ་ཆེན་པོ་ཀུན་ཏུ་བཟང་པོ། ཡེ་ཤེས་གསལ་བར་སྟོན་པའི་རྒྱུད་ལས། བྱིན་རླབས་ཀྱིས་འཁོར་རྣམས་ཀྱིས་རང་རང་གི་རྟོགས་ཚད་ཕུལ་བའི་ལེའུ་སྟེ་བདུན་པའོ།། །།དེ་ནས་རྡོ་རྗེ་འཛིན་པས་ཡང་གསོལ་པ། །ཀྱེ་ཀྱེ་བཅོམ་ལྡན་རྡོ་རྗེ་འཆང་། །ལྟ་བསྒོམ་སྤྱོད་པ་དེ་དག་ལ། །འབྲས་བུའི་རིམ་པ་ཇི་ལྟར་ལགས། །དེ་དག་བསྒོམ་པའི་རྣལ་འབྱོར་པའི། །འཆི་ཀའི་རྟགས་དང་བར་དོའི་དུས། །རིམ་པ་བདག་ལ་བཤད་དུ་གསོལ། །ཉོན་ཅིག་དཔལ་ལྡན་རྡོ་རྗེ་འཛིན། །མ་འོངས་པ་ཡི་དོན་ཆེད་དུ། །ཁྱོད་ཀྱིས་དོན་ཞུས་ཡ་མཚན་ཆེ། །གུས་པས་རབ་ཏུ་ཉོན་ལ་ཡིད་ལ་ཟུང་། །འབྲས་བུ་སྐུ་གསུམ་ཡེ་ཤེས་ལྔ། །ཆོས་སྐུ་སྟོང་གསལ་ཟུང་དུ་འཇུག །ཆོས་སྐུ་བདེ་ཆེན་རྡོ་རྗེ་འཆང་། །སྤྲུལ་སྐུས་འགྲོ་བ་རིགས་དྲུག་འདུལ། །ཡེ་ཤེས་ལྔ་ལྡན་ཡོན་ཏན་ཆ་ནས་ལྡན། །དེ་ཉིད་རང་གི་སེམས་ཉིད་དེ། །ལོགས་ནས་འབྱུང་བ་མ་ཡིན་ནོ། །འཆི་རྟགས་རིམ་པ་བསྟན་པ་ནི། །ཉམས་ལེན་རྣལ་འབྱོར་ཉིད་ཀྱི་རྟགས། །ས་ནི་ཆུ་ལ་ཐིམ་ ― DNG002_Page_0366 ―
[མ་དཔེ་གཟིགས་ན་འདིར་གནོན།]
པ་ཡིས། །ལུས་ནི་མི་ཐེག་ལྡང་མི་ནུས། །ཆུ་ཉིད་མེ་ལ་ཐིམ་པའི་དུས་སུ་ནི། །ཁ་སྣ་སྐམས་ཏེ་ནང་བཀྲག་ཤོར། །མེ་ཉིད་རླུང་ལ་ཐིམ་དུས་སུ། །ལུས་ཀྱི་དྲོད་སྟོར་ཡལ་བར་འགྱུར། །རླུང་ནི་རྣམ་ཤེས་ལ་ཐིམ་ཚེ། །དབུགས་སྡུད་མི་ཤེས་རྔམ་པ་བརྩེགས། །དེ་ཡི་དུས་སུ་དྲན་པ་བསྐྱེད་པར་བྱ། །དེ་ནས་དབུགས་ནི་ཆད་པ་དང་། །རྣམ་ཤེས་སྣང་བ་དག་ལ་ཐིམ། །སྣང་བ་མཆེད་པ་དག་ལ་ཐིམ། །མཆེད་པ་ཐོབ་པ་དག་ལ་ཐིམ། །ཐོབ་པ་ཆོས་སྐུ་དག་ལ་ཐིམ། །དེ་དུས་ཆོས་སྐུ་དེ་ཉིད་ནི། །ཤིན་ཏུ་གསལ་ལ་ངོས་བཟུང་བྲལ། །སྟོང་གསལ་འཛིན་མེད་རང་གསལ་དེ། །ངོ་ཡིས་ཟིན་པས་མངོན་ཤེས་དྲུག །ཤར་ནས་རིག་པའི་དབང་མཆོག་ཐོབ། །མན་ངག་དམ་པ་ལྡན་གྱུར་ན། །དེ་ནི་སངས་རྒྱས་ས་ལ་གནས། །བཅུ་བཞི་སྤྱིར་ཆིབ་ས་ཡང་ནོན། །བགྲོད་དུ་མེད་པའི་ལམ་མཆོག་ཡིན། །གལ་ཏེ་སྟོང་གསལ་མ་ཟིན་ཅིང་། །འགྱུ་བ་བྱུང་ན་འགྲོ་དྲུག་ཏུ། །རང་གི་ལས་ཀྱིས་ལུས་ལེན་ཏེ། །འཁོར་བའི་མཐའ་ལ་ཟད་པ་མེད། །ཅེས་གསུངས་སོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས། ཕྱི་རབས་རྣལ་འབྱོར་པའི་འཆི་རྟགས་བསྟན་པའི་ལེའུ་སྟེ་བརྒྱད་པའོ།། །།དེ་ནས་ཡང་རྡོ་རྗེ་འཛིན་པས་གསོལ་པ། ཀྱེ་ཀྱེ་རྡོ་རྗེ་གསང་བ་མཆོག་གི་བདག །སྟོང་གསལ་རིག་པའི་ཡེ་ཤེས་དེ། །ངོ་ཡིས་གཟུང་ན་ཇི་ལྟར་གཟུང་། །དེ་ཉིད་ལ་ནི་གང་དུ་བཟླ། །ཞེས་གསོལ་པས། བཅོམ་ལྡན་འདས་གསང་བ་མཆོག་གིས་བཀའ་སྩལ་པ། སྟོང་གསལ་རིག་པ་ཆེན་པོ་དེ། །ཀུན་གཞི་གཉིས་ཀྱི་ངོས་ནས་བཟུང་། །ཡེ་ཉིད་དོན་གྱི་ཀུན་གཞི་དང་། །སྦྱོར་བ་རྐྱེན་གྱི་ཀུན་གཞི་ནི། །སེམས་ཅན་ཐམས་ཅད་ལ་ཡིན་ཏེ། །སྔར་གྱི་བག་ཆགས་དག་དང་ནི། །ཕྱིས་ཀྱི་ཉོན་མོངས་རྣམ་རྟོག་དང་། །དཔེར་ན་ས་དང་ཆུ་འདྲེས་ལ། །རྙོག་མར་གྱུར་པ་དག་དང་མཐུན། །དེ་གསུམ་དག་དང་ཆོས་སྐུ་འདྲེས། །ད་ནི་ཆོས་སྐུ་མ་ཡིན་ཏེ། །དེ་ཉིད་དོན་གྱི་ཀུན་གཞི་ནི། །དཔེར་ན་ཆུ་ནི་རྙོག་མ་དངས་པ་བཞིན། །བག་ཆགས་རྟོག་པ་ཉོན་མོངས་ཀྱིས། །མ་བསླད་པ་ཡི་ཤེས་པ་དེ། །མ་རྟོགས་པ་ཡི་ཟུག་རྔུ་མེད། །འཛིན་མེད་རང་ཤར་ཆོས་ཀྱི་སྐུ། །ཤེས་པ་ ― DNG002_Page_0367 ―
[མ་དཔེ་གཟིགས་ན་འདིར་གནོན།]
རང་ལུགས་གློད་བྱས་པས། །ཤེས་པ་དངས་སངས་བདེ་བ་ལ། །མ་ཞེན་རྟོག་པའི་ཟུག་རྔུ་མེད། །དབེན་པའི་གནས་སུ་ཐུན་བཅད་ལ། །དང་པོ་ཁོ་ན་བསྒོམ་པར་བྱ། །དེ་ལ་ངང་གིས་གནས་པ་ལ། །སྒོ་ལྔ་གསལ་ལ་འཛིན་པ་མེད། །དེ་ཡི་ངང་ལ་གནས་པར་བྱ། །དེ་ནས་བརྟན་པར་གྱུར་པ་དང་། །ཡུལ་གྱི་སྙིང་པོ་ཐམས་ཅད་ཀུན། །ལྟར་སྣང་བུན་ནེ་ལོང་ངེ་ཙམ། །དེ་ཡི་ངང་དུ་གནས་ཙམ་ན། །འབྱམས་ཐུབ་པ་ཡི་རྣལ་འབྱོར་ཏེ། །དེ་ལ་བསྒོམ་དུ་ག་ལ་ཡོད། །ཡེ་ཤེས་འགྱུ་བ་མ་ཟིན་ན། །བསྒོམས་ཀྱང་སྒོམ་པར་ག་ལ་འགྱུར། །མ་བསྒོམས་རང་སྒོམ་བྱུང་ཙམ་ན། །བསྒོམ་དུ་མེད་པའི་སྒོམ་པ་ཡིན། །དེ་ཉིད་གདེང་དུ་གྱུར་པ་ནི། །བལྟ་རུ་མེད་པའི་ལྟ་བ་ཡིན། །དེ་ཉིད་ངང་དུ་གནས་པ་ནི། །སྤྱད་དུ་མེད་པའི་སྤྱོད་པ་ཡིན། །དེ་ལྟར་གྱུར་ན་སངས་རྒྱས་ཡིན། །ཞེས་གསུངས་སོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས། ཡེ་ཤེས་ངོས་བཟུང་བའི་ལེའུ་སྟེ་དགུ་པའོ།། །།དེ་ནས་གཞན་ཡང་བཤད་ཀྱིས་ཉོན། །དེ་ཉིད་ལ་བཟླའི་རིམ་པ་ནི། །སངས་རྒྱས་ས་ལ་གནས་འདོད་ན། །ཟུང་འཇུག་ཉིད་དུ་ལ་ཆེན་བཟླ། །སྟོང་གསལ་ངང་ལ་གནས་ཙ་ན། །སྙིང་རྗེ་ངང་གིས་འབྱུང་བ་ནི། །སྟོང་དང་སྙིང་རྗེ་ཟུང་འཇུག་ཡིན། །དེ་ཉིད་འཛིན་མེད་རང་ཤར་གནས་པ་ནི། །བདེ་སྟོང་ཟུང་དུ་འཇུག་པ་ཡིན། །གསལ་བ་དང་ནི་སྟོང་པ་དག །གཉིས་སུ་མེད་ན་ཟུང་འཇུག་ཡིན། །ལྟ་བ་དང་ནི་སྤྱོད་པ་དག །གཉིས་མེད་ཟུང་འཇུག་ཉིད་དུ་ལ་བཟླའོ། །ཐབས་དང་ཤེས་རབ་ཟུང་དུ་འཇུག །མ་ཞེན་བློ་ལས་འདས་པ་ནི། །སྟོང་གསལ་ཆོས་སྐུ་བདེ་ཆེན་ཡིན། །རིག་པ་སྟོང་གསལ་བདེ་བ་ལ། །སྣང་བ་འཛིན་མེད་རང་ཤར་ན། །གཉིས་མེད་བདེ་བ་ཆེན་པོ་ལ། །ཐུན་དུ་བཅད་ལ་བསྒོམ་དུ་མེད། །བར་བར་སེམས་ཀྱིས་སེམས་ལ་བྱ་ར་བྱ། །བྱ་ར་བ་ལ་ངོས་གཟུང་མེད། །དེ་ཡི་ངང་ལ་གནས་པ་དེ། །མཐའ་དབུས་མེད་པའི་དགོངས་པ་སྟེ། །གང་ལྟར་སྣང་བ་ཆོས་ཀྱི་སྐུ། །གང་མྱོང་རིག་པ་ལོངས་སྐུ་ཡིན། །སྣ་ཚོགས་ཤར་བ་སྤྲུལ་སྐུ་ཡིན། །དེ་གསུམ་དབྱེར་མེད་རྡོ་རྗེའི་ ― DNG002_Page_0368 ―
[མ་དཔེ་གཟིགས་ན་འདིར་གནོན།]
སྐུ། །སྣང་ཚད་སྐུ་ལ་གྲག་ཚད་གསུང་། །དྲན་རྟོག་ཐུགས་ཀྱི་དཀྱིལ་འཁོར་ཡིན། །བགྲོད་དུ་མེད་པའི་ས་ཆེན་ནོན། །ཞེས་གསུངས་སོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས། ལ་བཟླ་བའི་ལེའུ་སྟེ་བཅུ་པའོ།། །།དེ་ནས་གཞན་ཡང་གུས་པས་ཉོན་ལ་ཡིད་ལ་ཟུངས། རྫོགས་པ་ཆེན་པོའི་གདམས་ངག་འདི། །ཐེག་པ་ཀུན་ལས་ཁྱད་པར་འཕགས། །ཀུན་གྱི་དངོས་གཞིར་ཤར་བས་ན། །ལྟ་བ་ཁྱད་པར་འཕགས་པ་ནི། །འཛིན་མེད་རང་ཤར་ཟུང་འཇུག་ཡིན། །བསྒོམ་པ་ཁྱད་པར་འཕགས་པ་ནི། །རིག་པ་ཡུལ་མེད་བློ་ལས་འདས། །སྤྱོད་པ་ཁྱད་པར་འཕགས་པ་ནི། །སྤྱོད་པ་རང་བྱུང་ལྷུག་པའི་ངང་། །ཀུན་ལས་ཁྱད་འཕགས་བསམ་མི་ཁྱབ། །འབྲས་བུ་ཁྱད་པར་འཕགས་པ་ནི། །དབྱེར་མེད་སྐུ་ལས་ཁྱད་འཕགས་བགྲོད་དུ་མེད། །ས་ལས་ཁྱད་པར་ཐོབ་མེད་པ། །རང་བྱུང་ཡེ་ཤེས་བློ་ལས་གྲོལ། །འདི་ལྟར་སྣང་བའི་སེམས་ཉིད་དེ། །སེམས་ལས་ལོགས་ན་རྡུལ་ཙམ་མེད། །ཕྱི་ཡི་སྒྲོ་འདོགས་ཆོད་པ་ཡིན། །དེ་དག་འཛིན་མེད་རང་ཤར་ལས། །སེམས་ནི་ཁ་དོག་དབྱིབས་དང་བྲལ། །རྟག་པ་མ་ཡིན་དངོས་པོ་མེད། །ཆད་པ་མ་ཡིན་རིག་ཅིང་གསལ། །ནང་གི་སྒྲོ་འདོགས་ཆོད་པ་ཡིན། །སྟོང་དང་གསལ་བ་དབྱེར་མེད་པས། །ཟུང་འཇུག་བདེ་ཆེན་ཆོས་སྐུ་སྟེ། །གསང་བའི་སྒྲོ་འདོགས་ཆོད་པ་ཡིན། །དེ་དག་འཛིན་མེད་རང་ཤར་བས། །བློ་ཡི་སྤྱོད་ཡུལ་དག་ལས་འདས། །རང་བྱུང་ཡེ་ཤེས་བཙལ་མེད་པ། །མཐར་ཐུག་སྒྲོ་འདོགས་ཆོད་པ་ཡིན། །དེ་ནི་ཁྱད་འཕགས་ལྟ་བའི་དོན། །དེ་ཡི་ངང་ལ་གནས་པ་ནི། །བསྒོམ་པའི་ཁྱད་འཕགས་དོན་ཉིད་ཡིན། །དེ་ཡི་ངང་ལ་མ་ཡེངས་ནས། །གང་བདེར་རིག་པ་གནས་པ་ནི། །སྤྱོད་པ་ཁྱད་པར་འཕགས་པའི་དོན། །དེ་ཡི་དོན་ལ་སླེབས་པ་ནི། །འབྲས་བུ་ཁྱད་པར་འཕགས་པའི་དོན། །དེ་ལ་བགྲོད་དང་ཐོབ་རྒྱུ་མེད། །ལམ་དང་ས་ཡི་ཁྱད་པར་ ― DNG002_Page_0369 ―
[མ་དཔེ་གཟིགས་ན་འདིར་གནོན།]
འཕགས་པ་ཡིན། །འདི་ནི་ལམ་མཆོག་དམ་པ་སྟེ། །རི་བྲན་ཐམས་ཅད་ལྟ་འདོད་ན། །རི་བོའི་རྩེ་ལ་འཛེགས་པ་བཞིན། །ཐེག་པ་འོག་མ་ཤེས་འདོད་ན། །ཨ་ཏི་ཡོ་གའི་དོན་ལ་བལྟ། །ཞེས་གསུངས་སོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས། ཁྱད་པར་འཕགས་པའི་ལེའུ་སྟེ་བཅུ་གཅིག་པའོ།། །།དེ་ནས་ཡང་དཔལ་ཀུན་ཏུ་བཟང་པོ་ཆོས་ཀྱི་སྐུ་དེས། འཁོར་རྣམས་ལ་བཀའ་སྩལ་པ། ངའི་རྒྱུད་འདི་ནི་རྒྱུད་ཐམས་ཅད་ལས་ཁྱད་པར་འཕགས་པ་ཡིན་ཏེ། དེ་ཅིའི་ཕྱིར་ཞེ་ན། ལོག་པའི་ལམ་ནི་རྟག་ཆད་དུ་ཞེན་པ། ཉན་ཐོས་ལ་སོགས་པ་ཨ་ནུ་མན་ཆད་ནི་ཕྱོགས་སུ་འཛིན་ཏེ། ཡང་དག་པའི་དོན་དང་འགལ་ཏེ། རྒྱུད་འདི་ནི་སྟོང་གསལ་བདེ་བ་ཆེན་པོ། དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་དྲིལ་ཏེ་གཅིག་ཏུ་བསྟན་པ་ཡིན་པས། ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཅེས་བྱ་བར་ཟུངས་ཤིག །ངའི་རྒྱུད་འདི་ནི་རྟགས་ཙམ་འཛིན་པའི་དུས་སུ། གང་ཟག་སྐལ་བ་དང་ལྡན་པ་རྣམས་ཀྱིས་སྤྱོད་པར་འགྱུར་རོ། །དེ་ཡང་རྒྱུད་འདི་སྟོན་པའི་དུས་སུ། གང་ཟག་སྐལ་བ་དང་ལྡན་པ་རྣམས་ལ། རིག་པ་རྩལ་གྱི་དབང་གསུམ་བསྐུར་ལ། དམ་ཚིག་ལ་གནས་པར་བྱའོ་ཞེས་བཀའ་སྩལ་པ་དང་། རྡོ་རྗེ་འཛིན་པ་ལ་སོགས་པ་རྣམས་ཡི་རངས་ཏེ། རང་རང་གིས་སྟོང་གསལ་ཆེན་པོའི་དོན་རྟོགས་ནས། སྐུ་གསུམ་ཡེ་ཤེས་ལྔའི་ངང་དུ་སངས་རྒྱས་པར་གྱུར་ཏོ། །དེ་ལྟར་དུ་གྱུར་ནས། དཔལ་རྡོ་རྗེ་འཆང་ལ་འཁོར་རྣམས་ཀྱིས་རྡོ་རྗེའི་ཚིག་ཏུ་བསྟོད་པ་ནི། ཨེ་མ་ཧོ་བདུད་བཞི་བཅོམ་ནས་ཡོན་ཏན་ལྡན། མཚན་མའི་དངོས་པོ་ཀུན་ལས་འདས། །སྟོང་གསལ་བདེ་བའི་བདག་ཉིད་ཅན། །ཐམས་ཅད་མཁྱེད་ལ་དད་པས་བསྟོད། །ཅེས་རྡོ་རྗེའི་ཚིག་གིས་བསྟོད་པར་གྱུར་ཏོ། །རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས། རྒྱུད་ཡོངས་སུ་གཏད་པའི་ལེའུ་སྟེ་བཅུ་གཉིས་པའོ།། །།དུས་གསུམ་སངས་རྒྱས་ཀྱི་དགོངས་པ་གཅིག་ཏུ་དྲིལ་བའི་རྒྱུད་ཅེས་བྱ་བ་རྫོགས་སོ།། །།བདག་འདྲ་སངས་རྒྱས་ཡེ་ཤེས་ཀྱིས། །གུ་རུ་ཤྲཱི་སིངྷ་ལ། །དད་པས་མཉེས་བྱས་རྒྱུད་འདི་གནང་། ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཕྱི་མ་ཞེས་བྱ་བ།― DNG002_Page_0370 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྟི་ས་མནྟ་བྷ་དྲ་ཛྙཱ་ན་པྲ་ཀ་ཊ་ཤསྟུ་སྟཱནྟྲ་པཤྩི་མ་ནཱ་མ། བོད་སྐད་དུ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཕྱི་མ་ཞེས་བྱ་བ། བཅོམ་ལྡན་འདས་དཔལ་ཀུན་ཏུ་བཟང་པོ་རྡོ་རྗེ་འཆང་གི་སངས་རྒྱས་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྡོ་རྗེ་འཆང་གི་སངས་རྒྱས་ཀུན་ཏུ་བཟང་པོ་ཉིད་ཆོས་ཀྱི་དབྱིངས་ཀྱི་ཕོ་བྲང་ནས། སྟོང་གསལ་ཆེན་པོའི་ཏིང་ངེ་འཛིན་ལ་བཞུགས་སོ། །དེ་ནས་རྡོ་རྗེ་འཛིན་པས་གསོལ་པ། ཀྱེ་ཀྱེ་བཅོམ་ལྡན་འདས་བདེ་ཆེན་ཀུན་ཏུ་བཟང་པོ་ཉིད་ཀྱིས། སྟོང་གསལ་བདེ་ཆེན་བཤད་དུ་གསོལ། །དེ་སྐད་གསོལ་པ་གསན་ནས་ཀྱང་། །ཀུན་ཏུ་བཟང་པོས་བཀའ་སྩལ་པ། །སྟོང་གསལ་རིག་པ་བཤད་ཀྱིས་ཉོན། །གཞི་ཉིད་སྟོང་པ་གསལ་བ་སྟེ། །དེ་ཉིད་མ་རྟོགས་འཁྲུལ་པ་ཡིན། །དེས་ན་སྟོང་གསལ་ངོ་ཡིས་བཟུང་། །ཞེས་གསུངས་སོ། །གཞི་གཏན་ལ་དབབ་པའི་ལེའུ་སྟེ་དང་པོའོ།། །།དེ་ནས་གཞན་ཡང་བཀའ་སྩལ་པ། །ལམ་ནི་རྣམ་པ་གཉིས་ཡིན་ཏེ། །ཐུན་མོང་སྤྱི་རུ་བསྟན་པ་དང་། །ཁྱད་པར་ལམ་དུ་བཀྲི་བའོ། །དེ་ལ་སྤྱི་རུ་བསྟན་པ་ནི། །ལྟ་བ་དབྱེར་མེད་རང་གྲོལ་ཡིན། །སྒོམ་པ་འཛིན་མེད་རང་གསལ་ཏེ། །སྤྱོད་པ་རང་བྱུང་ལྷུག་པའོ། །ཁྱད་པར་ལམ་དུ་བཀྲི་བ་ནི། །རང་བཞིན་གནས་པའི་བར་དོ་ལ། །དྭ་ཕྲུག་མ་དང་ཕྲད་པ་བཞིན། །ཐིག་ལེ་སྟོང་གསལ་ངོ་ཡིས་སྤྲད། །ཏིང་ངེ་འཛིན་གྱི་བར་དོ་ལ། །སྒེག་མོ་མེ་ལོང་བལྟ་བ་ལྟར། །རྟོགས་པའི་དོན་ལ་གནས་པར་བྱ། །རྨི་ལམ་དག་གི་བར་དོ་ལ། །བག་ཆགས་ཉིང་མཚམས་སྦྱོར་བ་ནི། །ཆུ་བོའི་གཞུང་ལྟར་ཤེས་པར་བྱ། །སྐྱེ་ཤི་དག་གི་བར་དོ་ལ། །ཡེ་ཤེས་ངོ་ཡིས་བཟུང་བ་ནི། །རྐང་ཆད་པ་ལ་ཝ་ནི་འཛུགས་པ་བཞིན། །ལུས་དང་སེམས་ནི་གཅུན་བྱས་ལ། །རབ་ནི་ཆོས་སྐུ་དག་ལ་འཕོ། །འབྲིང་ནི་གཟུགས་སྐུ་དག་ལ་འཕོ། །ཐ་མ་ཞིང་ཁམས་དག་ཏུ་འཕོ། །དེ་ནས་ཡེ་ཤེས་རྒྱུན་ཉིད་དེ། །སྲིད་ རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཕྱི་མའི་ཡང་ཕྱི་མ་ཞེས་བྱ་བ།― DNG002_Page_0371 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སནྟི་ས་མནྟ་བྷ་དྲ་ཛྙཱ་ན་པྲ་ཀ་ཊ་ཤཱསྟྲྀ་ཏནྟྲ་པཤྩི་མ་ཙ་པཤྩི་མ་ནཱ་མ། བོད་སྐད་དུ། རྫོགས་པ་ཆེན་པོ་ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ཕྱི་མའི་ཡང་ཕྱི་མ་ཞེས་བྱ་བ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ནས་བཅོམ་ ― DNG002_Page_0372 ―
[མ་དཔེ་གཟིགས་ན་འདིར་གནོན།]
ལྡན་འདས་དཔལ་ཀུན་ཏུ་བཟང་པོས་འཁོར་རྣམས་ལ་བཀའ་སྩལ་པ། ཀྱེ་ཉོན་ཅིག་རྡོ་རྗེ་འཛིན་པ་རྣམས། རིག་པ་སྟོང་གསལ་རྟོགས་འདོད་ན། །དང་པོ་སེམས་ཉིད་བཟུང་བ་དང་། །དེ་ནས་ལམ་དུ་བསླང་བར་བྱ། །ཞེས་བཀའ་སྩལ་ཏོ། །དེ་ནས་རྡོ་རྗེ་སེམས་དཔས་གསོལ་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་། །རིག་པ་སྟོང་གསལ་རྟོགས་འདོད་པ། །སེམས་བཟུང་རིམ་པ་ཇི་ལྟར་ལགས། །དེ་སྐད་ཅེས་ནི་གསོལ་པའི་ཚིག་གསན་ནས། །རྡོ་རྗེ་འཛིན་པས་བཀའ་སྩལ་པ། །སེམས་བཟུང་རིམ་པ་འདི་ལྟ་སྟེ། །མཐོ་དང་རི་མོ་འཇམ་རླུང་དང་། །ཐིག་ལེ་གདུགས་དང་འཁོར་ལོ་དང་། །ཡིག་འབྲུ་དང་ནི་ཤེས་རབ་མ། །སློབ་དཔོན་འགྲན་རླུང་ནམ་མཁའོ། །ཞེས་གསུངས་སོ། །རྒྱུད་ཕྱི་མའི་ཕྱི་མ་ལས་ལེའུ་སྟེ་དང་པོའོ།། །།དེ་ནས་གཞན་ཡང་བཀའ་སྩལ་པ། །དང་པོ་མཐོ་ལ་བཟུང་བ་ནི། །མདུན་དུ་མཐོ་ལ་གཏད་སྟེ་བཟུང་། །རི་མོ་དག་ལ་བཟུང་བ་ནི། །བདེ་བའི་སྟན་ལ་འདུག་པ་དང་། །མདུན་དུ་རི་མོའི་ནང་དུ་བཟུང་། །འཇམ་རླུང་དག་ལ་བཟུང་བ་ནི། །སྟེང་འོག་བར་རླུང་གང་བདེར་བཟུང་། །ཐིག་ལེ་དག་ལ་བཟུང་བ་ནི། །སྨིན་མཚམས་དག་གམ་སྣ་རྩེ་རུ། །ཐིག་ལེ་དག་ལ་གཏད་ལ་བཟུང་། །དེ་བཞིན་གདུགས་ལ་བཟུང་བ་ནི། །འོག་ཏུ་རྒྱ་གདུགས་འཁོར་ལོ་བཟུང་། །འཁོར་ལོ་དག་ལ་བཟུང་བ་ནི། །ཤོ་གུའི་གདུག་བྱ་བླ་ན་བསྐོར། །སྣ་རུ་བདུག་པ་རྣ་བར་སྒྲ། །མ་ཡེངས་གཏད་ལ་བཟུང་བར་བྱ། །ཡིག་འབྲུ་དག་ལ་བཟུང་བ་ནི། །སེམས་ཀྱི་གནས་པ་བཞི་རུ་ཡང་། །ཨ་ལ་སོགས་པའི་ཡིག་འབྲུ་དག་ལ་གཟུང་བར་བྱ། ཤེས་རབ་མ་ལ་བཟུང་བ་ནི། །མཁའ་གསང་བརླབས་ཤིང་དབང་པོ་སྤྲད། །ཐིག་ལེ་གཅིག་ཤོར་གཉིས་ལ་བཟུང་། །སློབ་དཔོན་དག་ལ་བཟུང་བ་ནི། །སྤྱི་བོའི་གཙུག་ཏུ་བསམ་ལ་བཟུང་། །བྲང་རླུང་དག་ལ་བཟུང་བ་ནི། །ཤེས་པའི་འགྲན་རྟེན་བྱས་ལ་བཟུང་། །ནམ་མཁའ་དག་ལ་བཟུང་བ་ནི། །ཁྲུ་གང་དག་ལ་གཏད་ལ་བཟུང་། །ཞེས་གསུངས་སོ། །རྒྱུད་ཕྱི་མའི་ཕྱི་མ་ལས། སེམས་བཟུང་བའི་ལེའུ་སྟེ་ ཡེ་ཤེས་འཁོར་ལོའི་རྒྱུད།― DNG002_Page_0373 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཛྙཱ་ན་ཙཀྲ་ཏནྟྲ། བོད་སྐད་དུ། ཡེ་ཤེས་འཁོར་ལོའི་རྒྱུད། བཅོམ་ལྡན་ཀུན་ཏུ་བཟང་པོ་ཡིས། །འོག་མིན་བརྡལ་བའི་ཕོ་བྲང་དུ། །འཁོར་གྱི་རྡོ་རྗེ་སེམས་དཔའ་ལ། ། ― DNG002_Page_0374 ―
[མ་དཔེ་གཟིགས་ན་འདིར་གནོན།]
ཡང་ཏི་ནག་པོ་འཆད་པའི་དུས། །བྱིན་རླབས་བསྟན་པ་རང་ཤར་དུས། །ཐིག་ལེ་གཅིག་ཏུ་བསྡུས་པའི་ཚེ། །ངོ་སྤྲོད་བཞི་ཡི་གདམས་ངག་གསུངས། །མེ་མར་མེ་ལོང་དཀྱིལ་འཁོར་དང་། །རིན་ཆེན་མན་ཤེལ་བཞི་པོ་ལ། །རྡོ་རྗེ་སེམས་དཔར་ངོ་སྤྲད་པས། །རང་གྲོལ་ཉིད་དུ་མངོན་སངས་རྒྱས། །གླུར་བླངས་པའི་ལེའུ་ལས་ཀྱང་། །ཚིག་བདེན་བདེན་པར་སྨྲ་བ་སྟེ། །བདེན་པ་བཞི་ནི་སྟོན་པའོ། །ཕྱིར་མི་ལྡོག་པ་ཕྱིར་མི་འོང་། །ཞེས་གསུངས་སོ། །རྩ་བ་མདོར་བསྡུས་པའི་ལེའུ་སྟེ་དང་པོའོ།། །།བཅོམ་ལྡན་རོ་ལངས་བདེ་བ་ཡིས། །བཅོམ་ལྡན་རྡོ་རྗེ་སེམས་དཔའ་ལ། །ངོ་སྤྲོད་བཞི་ཡི་རྒྱུད་ཞུས་པར། །ལེགས་པར་ཉོན་ལ་ཐུགས་ལ་ཆོངས། །གླུར་བླངས་པའི་ལེའུ་ལས་ཀྱང་། །ཁྱོད་ནི་རྩེ་གཅིག་ཡིད་ཀྱིས་ཉོན། །ཞེས་གསུངས་སོ། །ངོ་སྤྲོད་བཞི་པོ་མ་ལུས་པར། །བདག་ལ་གནང་བར་མཛད་དུ་གསོལ། །བཅོམ་ལྡན་དེ་ནི་ལེགས་ཞེས་གསོལ། །ཞེས་གསུངས་སོ། །རྡོ་རྗེ་སེམས་དཔས་བཀའ་སྩལ་པ། །མར་མེའི་ངོ་སྤྲད་རྣམ་གསུམ་སྟེ། །ཚོགས་དྲུག་ཡུལ་ངོ་སྤྲད་པ་དང་། །སྙིང་པོ་ཡེ་ཤེས་ལ་ངོ་སྤྲད་པ་དང་། ཐུགས་རྗེ་སྐུ་གསུམ་དུ་ངོ་སྤྲད་པ་དང་། ལུང་ལས། གསུམ་རིག་གཙང་མ་དག་པ་སྟེ། །ཞེས་གསུངས་སོ། །ངོ་སྤྲོད་དང་པོའི་ལེའུ་སྟེ་གཉིས་པའོ།། །།རྡོ་རྗེ་སེམས་དཔས་བཀའ་སྩལ་པ། །མེ་ལོང་གསུམ་གཏུགས་ངོ་སྤྲད་པས། །སྐུ་གསུམ་གཅིག་པའི་རོལ་པ་ལ། །འཁྲུལ་སྣང་ལོངས་སྐུའི་ངོ་སྤྲོད་དང་། །བདེ་ཆེན་ཆོས་སྐུའི་ངོ་སྤྲོད་དོ། །ལུང་ལས་ཀྱང་། ཡེ་ཤེས་སྐུ་སྟེ་རང་བྱུང་བ། ཞེས་འབྱུང་ངོ་། །ངོ་སྤྲོད་གཉིས་པའི་ལེའུ་སྟེ་གསུམ་པའོ།། །།རྡོ་རྗེ་སེམས་དཔས་བཀའ་སྩལ་པ། །རིན་ཆེན་མན་ཤེལ་ངོ་སྤྲད་པས། །རིག་པ་གོས་དང་དབྲལ་བ་དང་། །རིག་པ་རྐྱང་བ་ཟང་ཐལ་དང་། །ལྷག་མཐོང་རིག་པའི་འཁོར་ལོ་དང་། །གཟུང་འཛིན་ཞགས་པ་བཅད་པ་དང་། །ཡིད་ཀྱི་ཕུ་ཐག་བཅད་པའོ། །ལུང་ལས་ ― DNG002_Page_0375 ―
[མ་དཔེ་གཟིགས་ན་འདིར་གནོན།]
བདག་རིག་གཞན་རིག་ཐམས་ཅད་པ། །ཀུན་ལ་ཕན་པའི་གང་ཟག་མཆོག །ཡིད་བཞིན་ནོར་བུ་ཆེན་པོ་འཆང་། །ཞེས་གསུངས་སོ། །ངོ་སྤྲོད་གསུམ་པའི་ལེའུ་སྟེ་བཞི་པའོ།། །།རྡོ་རྗེ་སེམས་དཔས་བཀའ་སྩལ་པ། །དཀྱིལ་འཁོར་བཞི་ལ་ངོ་སྤྲད་པ། །སྣང་བྱེད་ཕྱི་ཡི་དཀྱིལ་འཁོར་ནི། །གདུལ་བྱའི་དོན་དུ་གསུངས་པ་ཡིན། །རང་ལུས་དཀྱིལ་འཁོར་བསྟན་པ་ནི། །རྫོགས་པའི་དོན་དུ་བསྟན་པ་ཡིན། །ཡེ་ཤེས་དཀྱིལ་འཁོར་བསྟན་པ་ནི། །ཐིག་ལེ་ཆོས་སྐུར་བཤད་པ་ཡིན། །གཉིས་མེད་ཆོས་སྐུར་བཤད་པ་ཡིན། །ལྟ་བའི་དོན་དུ་བསྟན་པའོ། །ལུང་ལས་ཀྱང་། དཀྱིལ་འཁོར་ཆེན་པོ་ཡངས་པ་ཡིན། །གཉིས་མེད་གཉིས་སུ་མེད་པར་སྟོན། །ཡང་དག་མཐའ་ལ་རྣམ་པར་གྲོལ། །ཞེས་གསུངས་སོ། །ངོ་སྤྲོད་བཞི་པའི་ལེའུ་སྟེ་ལྔ་པའོ།། །།རྡོ་རྗེ་སེམས་དཔས་བཀའ་སྩལ་པ། །ངོ་སྤྲོད་བཞི་ཡི་དོན་ཆོད་ནས། །རྟགས་ཀྱང་རྣམ་པ་གསུམ་འབྱུང་སྟེ། །ཕྱི་ཡི་རྟགས་དང་ནང་གི་རྟགས། །གསང་བའི་རྟགས་དང་གསུམ་དུ་འབྱུང་། །ཕྱི་ཡི་རྟགས་ལ་རྣམ་གསུམ་སྟེ། །སྣང་བས་གནོད་པར་མི་ནུས་ན། །དེ་ནི་རྟགས་ཀྱི་དང་པོ་ཡིན། །ལུས་ལ་འབྱུང་བས་མི་ཚུགས་ན། །དེ་ནི་རྟགས་མཆོག་གཉིས་པ་ཡིན། །རྐྱེན་རྣམས་ཐིག་ལེར་ཤེས་པ་ནི། །དེ་ནི་རྟགས་མཆོག་གསུམ་པ་ཡིན། །ཕྱི་རྟགས་ཀྱི་ལེའུ་སྟེ་དྲུག་པའོ།། །།ནང་གི་རྟགས་ལ་རྣམ་གསུམ་སྟེ། །མཁའ་འགྲོའི་ལུང་སྟོན་དང་པོ་ཡིན། །ཆོས་ཀྱི་སྐད་སྟེར་གཉིས་པ་ཡིན། །རིག་པའི་དབང་ཐོབ་གསུམ་པ་ཡིན། །ཞེས་འབྱུང་ངོ་། །གསང་བའི་རྟགས་ལ་རྣམ་གཉིས་ཏེ། །གསང་བའི་རྟགས་དང་ཡང་གསང་རྟགས། །གསང་བའི་རྟགས་ལ་རྣམ་ལྔ་སྟེ། །རིག་པས་གཟུང་འཛིན་མི་ནུས་ཏེ། །རིག་པ་ཡེ་ཤེས་རང་ཤར་ལ། །དུག་ལྔ་ཡེ་ཤེས་ཐུག་ཕྲད་ཤེས། །ཤེས་པ་རྐྱེན་གྱིས་འགྱུར་མི་ནུས། །ཡེ་ཤེས་ཟང་ཐལ་སྐྱེ་བ་ནི། །དེ་ནི་གསང་རྟགས་རྣམ་ལྔ་ཡིན། །ཡང་ རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ཅེས་བྱ་བ།― DNG002_Page_0376 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་སན་དྷི་ཛྙཱ་ན་ཙཀྲ་གུ་ཧྱ་ཙེཏྟ་ཏནྟྲ་ནཱ་མ། བོད་སྐད་དུ། རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ཅེས་བྱ་བ། དཔལ་རང་བྱུང་རིག་པའི་ཆོས་སྐུ་དེ་ཁོ་ན་ཉིད་ལ་ཕྱག་འཚལ་ལོ། །འདི་སྐད་གསུངས་པའི་དུས་གཅིག་ན། །རང་བྱུང་ངོ་བོ་སྟོན་པ་དེ། །ཡེ་ཤེས་ཀློང་གི་གནས་མཆོག་ན། །ཉིད་ལས་མི་གཞན་རྟོགས་པའི་འཁོར། །དོན་གཅིག་བསྟན་པ་མངོན་གྱུར་ཏོ། །དེ་ཚེ་ཆོས་ཀུན་སྙིང་པོ་འདི། །དཔལ་གྱི་དཔལ་གྱུར་ཀུན་བཟང་གིས། །རྒྱུད་དག་རྡོ་རྗེ་སེམས་དཔའ་ལ། །བཀའ་རྟགས་ལྔ་ཡི་དོན་བསྡུས་ནས། །ངེས་དོན་གདམས་ངག་བཀའ་སྩལ་པ། །སངས་རྒྱས་ཀུན་གྱི་ངེས་པའི་དོན། །དོན་གྱི་ཁྱབ་དང་རྟོགས་པ་ཡི། །བྱིན་རླབས་བརྡའ་དང་ཚིག་གི་དོན། །སྣོད་ལྡན་བློ་དང་ལྡན་པ་ལ། །མ་ནོར་ངེས་པ་ངས་བཤད་ཀྱིས། །བརྗོད་མེད་དད་པའི་ཡིད་ཀྱིས་ཉོན། །དེ་སྐད་ཅེས་ནི་གསུངས་པ་དང་། །ཁབ་ལེན་ལ་ནི་ལྕགས་འདུ་བཞིན། །བྱིན་གྱི་རླབས་ཀྱི་སྣང་བ་ཡིས། །འཁོར་རྣམས་དགའ་མགུ་མོས་པས་ཉན། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། གསུང་བར་ཞལ་གྱིས་བཞེས་ཏེ། གླེང་གཞི་བསྟན་པའི་ལེའུ་སྟེ་དང་པོའོ།། །།དེ་ནས་ཀུན་ ― DNG002_Page_0377 ―
[མ་དཔེ་གཟིགས་ན་འདིར་གནོན།]
རིག་སྟོན་པ་དེས། །སྔོན་གྱི་ཐུགས་དམ་ཞལ་བཞེས་པས། །འགྲོ་དོན་ཐུགས་རྗེ་རྫོགས་མཛད་ཕྱིར། །ཆེད་དུ་དགོངས་ནས་བཀའ་སྩལ་པ། །བདེ་གཤེགས་སྙིང་པོ་ཆོས་ཀྱི་སྐུ། །འགྲོ་དྲུག་སེམས་ཅན་ཐམས་ཅད་ལ། །ཀུན་ལ་ཁྱབ་པས་ནམ་མཁའ་བཞིན། །རང་བྱུང་ངོ་བོ་ཡེ་ནས་ཡོད། །དེ་ཡང་འཁོར་གྱི་སྙིང་པོ་ཉོན། །འཁོར་འདས་མེད་པའི་གོང་རོལ་དུ། །ཡེ་ནས་གནས་པའི་ཆོས་ཉིད་ལ། །མ་འཁྲུལ་ཕྱིར་ན་ངང་གིས་རྟོགས། །ཡོན་ཏན་ལྔ་ལྡན་ཤེས་པ་དང་། །སངས་རྒྱས་དུས་མཉམ་ཀུན་བཟང་བྱུང་། །ཉིད་ལས་མི་གཞན་འཁོར་རྣམས་བཅས། །འོག་མིན་གནས་སུ་ཀུན་བཟང་གིས། །རྒྱུད་དག་རྡོ་རྗེ་སེམས་དཔའ་ལ། །ཚིག་ཏུ་མ་གསུངས་དོན་རྣམས་གོ། །རང་གིས་རིག་ཅིང་དགོངས་པས་བརྒྱུད། །དེ་ཕྱིར་བྱིན་གྱིས་བརླབས་ཞེས་བྱ། །སྤྲུལ་སྐུས་བརྡའ་ཡིས་བརྒྱུད་པ་ཡང་། །ཚིག་དོན་ལུས་དང་རྟགས་ཀྱི་བརྡའ། །ཤཱཀ་ཐུབ་སྤྲུལ་པ་བཞད་རྩལ་གྱིས། །ལྷ་གནས་མི་ཡི་ཡུལ་དུ་བྱུང་། །རིག་འཛིན་འཕྲུལ་གྱི་ཐེག་པ་ནི། །ཡང་ཞུན་གསེར་གྱི་ཡི་གེར་བྲིས། །ལག་ན་རྡོ་རྗེའི་སྤྲུལ་པ་ལ། །ངེས་དོན་དགོངས་དོན་མངོན་ཕྱུང་ནས། །སྡེབ་སྦྱོར་ཚིག་གིས་བཀྲོལ་ནས་བཤད། །དེ་ཡང་རྡོ་རྗེ་སེམས་དཔའ་ཉོན། །རིགས་བཙུན་ཁྱད་འཕགས་སྣོད་ལྡན་ནི། །གང་ཟག་རྗེས་སུ་མི་འབྲང་བར། །ལུང་རིགས་གཉིས་ལ་རྟོགས་པ་མཁས། །མན་ངག་ཆོས་ཕྱིར་ཤིན་ཏུ་མོས། །བླ་མ་ལ་གུས་ཕྱི་ཐག་རིང་། །ཕངས་མེད་དབུལ་ནུས་སྣོད་ལྡན་ལ། །འབྲལ་མེད་ཡེ་ཤེས་རང་ཤར་དོན། །རྒྱུད་དྲུག་ཡང་སྙིང་ཡིན་པའི་ཕྱིར། །བསྟན་མ་ཐག་ཏུ་ཤེས་པའི་ཆོས། །སྣོད་ལྡན་གསང་ཐུབ་འགའ་ལ་བསྟན། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། ཚུལ་དུ་གསུངས་པ་མདོར་བསྟན་པའི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཆེད་དུ་གསུངས་པའི་དོན་གོ་ནས། །འཁོར་རྣམས་ལ་ནི་བརྩེར་དགོངས་ནས། །རྫོགས་སངས་རྒྱས་ལ་འདི་སྐད་ ― DNG002_Page_0378 ―
[མ་དཔེ་གཟིགས་ན་འདིར་གནོན།]
གསོལ། །གཞི་ཉིད་དཔེ་དོན་གང་གིས་མཚོན། །དང་པོ་སངས་རྒྱས་ཇི་ལྟར་བྱུང་། །དེ་ཡི་བྱིན་རླབས་ཇི་ལྟར་རྟོགས། །བརྡའ་དང་ཚིག་གིས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་ངེས་པའི་དོན། །མ་ནོར་ངེས་པའི་སངས་རྒྱས་བཀའ། །ང་ཡིས་བཤད་ཀྱིས་ངེས་པར་ཉོན། །རང་བཞིན་གཞི་ཡི་མཚོན་དཔེ་ནི། །འདུས་མ་བྱས་ཀྱི་ནམ་མཁའ་ནི། །གང་ནས་མ་འོངས་ཡེ་ནས་ཡོད། །གར་ཡང་མི་འགྲོ་དུས་གསུམ་གཅིག །དེ་ལྟར་ཀུན་ཁྱབ་ངོས་གཟུང་མེད། །ཐོག་མཐའ་མེད་པས་ནམ་མཁའ་འདྲ། །རིག་མེད་སྟོང་པ་ཡིན་པའི་ཕྱིར། །དཔེ་རུ་ཟབ་སྟེ་དོན་དུ་མེད། །ད་ཡང་རྡོ་རྗེ་སེམས་དཔའ་ཉོན། །དེ་བཞིན་ངོ་བོའི་གནས་ལུགས་ནི། །འཁོར་འདས་མ་རིག་རང་བཞིན་ལུས། །སངས་རྒྱས་སེམས་ཅན་གཉིས་མེད་པའི། །འཁོར་འདས་གཉིས་ཀྱི་གཞིར་གྱུར་པ། །མ་ཡེངས་པར་ནི་ཡོད་གྱུར་ཀྱང་། །དོན་གྱིས་མ་ཟིན་རང་སྣང་བ། །ངོས་མ་ཟིན་ཅིང་ཤན་མ་ཕྱེད། །འགྲོ་འོང་མེད་པར་རྒྱུན་དུ་གནས། །ཐོག་མཐའ་མེད་ཕྱིར་ངོ་མ་ཤེས། །ད་ལྟ་ཀུན་གཞིའི་སེམས་ལ་གནས། །འདུས་མ་བྱས་ཕྱིར་སྐྱེ་འཇིག་མེད། །སེམས་ཅན་ཀུན་གྱི་རྟེན་གནས་གཞི། །མོས་གུས་མེད་ཕྱིར་རྟོགས་པར་དཀའ། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། གཞིའི་དཔེ་བསྟན་པའི་ལེའུ་སྟེ་གསུམ་པའོ།། །།དེ་ནས་ཀུན་རིག་སྟོན་པ་ཡིས། །དང་པོ་སངས་རྒྱས་རྟོགས་ཚུལ་ནི། །དད་ལྡན་འདུས་པའི་འཁོར་རྣམས་ལ། །ང་ཡི་རྟོགས་ཉམས་བཀའ་སྩལ་པ། །འཁོར་འདས་མེད་པའི་གོང་རོལ་དུ། །ས་ཆུ་མེ་རླུང་གང་ཡང་མེད། །སྲིད་པ་མ་ཆགས་སྟོང་པ་ཉིད། །དེ་ཚེ་རང་བཞིན་ལུས་དེ་ནི། །ཡེ་ནས་ཡོད་པའི་ཆོས་ཉིད་དེ། །དོན་དེ་མ་འཁྲུལ་རིག་པ་ཡིས། །ད་ལྟ་མ་འཁྲུལ་ངེས་བསྟན་ཕྱིར། །གཞི་དང་རིག་པ་གཅིག་ཏུ་ཤེས། ། ― DNG002_Page_0379 ―
[མ་དཔེ་གཟིགས་ན་འདིར་གནོན།]
རྟོགས་དང་སངས་རྒྱས་དུས་མཉམ་བྱུང་། །ནམ་ལངས་ཉི་མ་ཤར་དུས་མཉམ། །རི་བོ་ཏ་ལའི་དཔེ་བཞིན་དུ། །འཁོར་འདས་ཐོག་མཐའ་དུས་གཅིག་ཚོད། །ད་ཡང་རྡོ་རྗེ་སེམས་དཔའ་ཉོན། །ཀུན་བཟང་རྒྱལ་བའི་རྟོགས་པ་དེ། །རང་བྱུང་ངོ་བོ་ཉིད་ཀྱི་སྐུ། །རྒྱུ་རྐྱེན་མ་བྱས་འདུས་མ་བྱས། །ཀུན་ལ་ཁྱབ་པས་ཆོས་ཀྱི་སྐུ། །རང་གི་རིག་པ་ཡེ་ཤེས་ཐུགས། །དེ་ཉིད་ཡིན་པར་ངོ་ཤེས་པས། །ལྷག་མཐོང་ཡེ་ཤེས་རང་ཤར་ཕྱིར། །ཡོད་མེད་གཉིས་ཀྱི་སྒྲོ་སྐུར་བྲལ། །དུས་གསུམ་མི་འགྱུར་བརྟན་ངེས་པར། །ཐིག་ལེ་ཉག་གཅིག་ཆོས་ཀྱི་སྐུ། །དེ་ལས་སངས་རྒྱས་ཆོས་རྣམས་བྱུང་། །དེ་ཕྱིར་ཀུན་ཏུ་བཟང་པོ་བྱ། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། ཀུན་ཏུ་བཟང་པོའི་རྟོགས་པ་བསྟན་པའི་ལེའུ་སྟེ་བཞི་པའོ།། །།དེ་ནས་ཀུན་རིག་སྟོན་པ་ཡིས། །འོག་མིན་ཆོས་དབྱིངས་གནས་དེ་རུ། །ཇི་བཞིན་རྡོ་རྗེ་སེམས་དཔའ་ཡིས། །མ་འཁྲུལ་རིག་པ་གསལ་བ་ནི། །རང་ལ་ཡེ་ནས་ཡོད་མིན་ཡང་། །གཞི་ནི་མི་འགྱུར་ངེས་པ་ནི། །འདི་ཉིད་ཁོ་ན་ཡིན་ནམ་མིན། །ཡིད་ལ་ཐེ་ཚོམ་ཆ་ཕྲ་ཡོད། །དེ་རྟོག་བསལ་ཕྱིར་མོས་གུས་བྱེད། །དེ་ཕྱིར་ཀུན་བཟང་དེ་ཆེད་དུ། །མཉམ་བཞག་དགོངས་པ་ཐུགས་བརྟན་པས། །ཐེ་ཚོམ་མེད་པར་ཆོས་ཉིད་རྟོགས། །དེ་ཕྱིར་ཡེ་ཤེས་རྒྱུད་དག་པའི། །རྡོ་རྗེ་སེམས་དཔས་མངོན་གྱུར་གོ། །ཚིག་ཏུ་མ་བསྟན་དོན་དུ་ཤར། །ད་ཡང་འདུས་པའི་སྙིང་པོ་ཉོན། །དེ་ཕྱིར་བྱིན་གྱིས་བརླབས་ལུགས་ནི། །ཀུན་བཟང་ཐུགས་ཀྱི་ངེས་དོན་དེ། །ཆོས་དྲུག་མིང་དང་དོན་དཔེ་གཉིས། །དྲུག་གསུམ་གཅིག་ཕྱིར་རིམ་གྱིས་ཀྱང་། །གང་ལ་མ་བརྟེན་ཡིད་ཀྱིས་ནི། །ལྷག་མཐོང་ཆོས་སྐུ་དེ་ལྟར་ཤེས། །དེ་ཕྱིར་དགོངས་པས་བརྒྱུད་པའི་ཕྱིར། །རྟོགས་པ་མངོན་གྱུར་སངས་རྒྱས་པའི། །ཕྱིས་མི་ལེན་པའི་རིག་པས་གོ། །ཉིད་ལས་མི་གཞན་སངས་རྒྱས་འབྱུང་། །དེ་ཕྱིར་བྱིན་གྱིས་བརླབས་ཞེས་བྱ། །ད་ཡང་འདུས་པའི་སྙིང་པོ་ཉོན། ། ― DNG002_Page_0380 ―
[མ་དཔེ་གཟིགས་ན་འདིར་གནོན།]
སྟོན་པ་ཀུན་བཟང་བྱིན་རླབས་ཀྱིས། །སྐུ་གསུང་ཐུགས་ཀྱི་སྤྲུལ་པ་གསུམ། །གཟའ་སྐར་རྒྱ་མཚོ་ཇི་བཞིན་དུ། །ངེས་དོན་ཉིད་ཀྱི་རྩལ་དུ་བྱུང་། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། རྡོ་རྗེ་སེམས་དཔས་བྱིན་གྱིས་བརླབས་བཤད་པའི་ལེའུ་སྟེ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པས་བཀའ་སྩལ་པ། །སྤྲུལ་སྐུའི་བརྡའ་ཡིས་བསྟན་པ་ཡང་། །ཚིག་གི་བརྡ་ཡི་སྒྲོན་མེ་ཡིས། །མ་རིག་མུན་པ་བསལ་བའི་ཕྱིར། །ལུང་དང་ལྡན་པའི་གདམས་ངག་གིས། །བསྟན་པ་རྣ་བའི་བརྒྱུད་ཅེས་བྱ། །དེ་ཡང་འདུས་པའི་སྙིང་པོ་ཉོན། །དོན་གྱི་བརྡ་ཡི་གདམས་ངག་གིས། །ཡེ་ཤེས་རིག་པ་ཁོང་ནས་ཤར། །དེ་ཙམ་ཉིད་ན་སྐྱེ་འགག་མེད། །ད་ལྟ་ཉིད་ན་མངོན་གྱུར་རྟོགས། །ལུས་ཀྱི་བརྡའ་ཡིས་སྤྲུལ་པ་འགྱེད། །སྟོང་གསུམ་མ་ལུས་ཐམས་ཅད་ཀུན། །སྤྲུལ་པ་གྲངས་མེད་ཀུན་ཏུ་ཁྱབ། །ལྔ་བཅུ་རྩ་བདུན་བརྡའ་ཡིས་ནི། །སྐྱོན་གྱིས་མ་གོས་འགྲོ་དོན་འགྲུབ། །དེ་ཡང་འདུས་པའི་སྙིང་པོ་ཉོན། །རྟགས་ཀྱི་བརྡའ་ཡིས་བསྟན་པའི་ཕྱིར། །སྐུ་མདོག་ཕྱག་མཚན་སྣ་ཚོགས་ལ། །གང་འདུལ་ཕྲིན་ལས་རྫོགས་མཛད་པ། །བྱིན་རླབས་སངས་རྒྱས་དངོས་གྲུབ་ཐོབ། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། ཚིག་དང་བརྡའ་བསྟན་པའི་ལེའུ་སྟེ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཡེ་ཤེས་མངོན་དུ་རྟོགས་བྱའི་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་ཡིད་ཀྱིས་འདི་སྐད་གསོལ། །ཆོས་རྣམས་ཀུན་གྱི་རྩ་བ་ཡི། །གཞི་གསུམ་འདྲེལ་བ་ཡོད་དམ་མེད། །ཀུན་གཞི་སེམས་ཀྱི་མུན་གསེབ་ནས། །ཆོས་སྐུ་ངོས་ནི་ཇི་ལྟར་བཟུང་། །ད་ལྟའི་ལུས་དང་མ་བྲལ་བར། །གཟུགས་སྐུ་མི་འབྱུང་གང་གིས་བསྒྲིབས། །མཉམ་པའི་རྒྱལ་པོས་བཤད་དུ་གསོལ། །དེ་སྐད་གསུངས་པའི་དོན་གསན་ནས། །འདུས་པའི་ ― DNG002_Page_0381 ―
[མ་དཔེ་གཟིགས་ན་འདིར་གནོན།]
འཁོར་ལ་བཀའ་སྩལ་པ། །དེ་དོན་རྩ་བ་མདོར་བསྡུ་ན། །གཞི་གསུམ་མ་ནོར་ངེས་པ་ཡིས། །འདྲེལ་བ་ཡོད་མེད་ངས་བཤད་ཀྱིས། །དེ་གསུམ་ཡོད་མེད་གཅིག་ཏུ་རྟོགས། །འཁོར་འདས་གཞི་ཡི་རང་བཞིན་ལུས། །འཁོར་གཞི་ཤེས་པ་ལུང་མ་བསྟན། །གནས་སྐབས་འདྲེལ་ཡོད་མཐར་ཐུག་མེད། །གནས་སྐབས་འདྲེལ་བ་ཡོད་པ་ནི། །ལུང་མ་བསྟན་པ་རྣམ་གསུམ་ལ། །རང་བཞིན་ལུས་ཀྱིས་ཁྱབ་པའི་ཕྱིར། །ད་ཡང་འདུས་པའི་སྙིང་པོ་ཉོན། །མཐར་ཐུག་འདྲེལ་བ་མེད་པ་ནི། །ཤེས་གཞི་ལུང་མ་བསྟན་པ་ལ། །ཡིད་སྒྲིབ་ཡོད་ཕྱིར་མོས་གུས་མེད། །བྱིན་རླབས་རྟོགས་དང་ལུང་ལྡན་གྱིས། །བསྟན་ཐབས་མེད་ཕྱིར་འཁོར་བའི་རྒྱུ། །དེས་བསྐྱེད་འཁོར་བ་འབའ་ཞིག་ཡིན། །དེ་ཕྱིར་མཐར་ཐུག་འདྲེལ་བ་མེད། །མུན་དང་ཉི་མ་དུས་མི་མཚུངས། །མ་རིག་ཡེ་ཤེས་དེ་བཞིན་ནོ། །ད་ཡང་འདུས་པའི་སྙིང་པོ་ཉོན། །འཁོར་འདས་གཞི་ཡི་རང་བཞིན་ལུས། །མྱང་འདས་ཀུན་བཟང་གཞི་དང་ནི། །མཐར་ཐུག་འདྲེལ་ཡོད་གནས་སྐབས་མེད། །མཐར་ཐུག་འདྲེལ་བ་ཡོད་པ་ནི། །ལན་ཅིག་སྐྱེ་ཤི་བར་དོ་ལ། །ལུང་བསྟན་གདམས་ངག་ཕྲད་སྲིད་ན། །མོས་གུས་དད་པས་རྟོགས་འགྱུར་ཚེ། །ལུང་མ་བསྟན་པ་དག་ཅིང་སྟོང་། །མཐར་ཐུག་ཡེ་ཤེས་འདྲེལ་བ་ཡོད། །ནམ་ལངས་ཉི་མ་ཤར་བ་འདྲ། །དེ་ཡང་འདུས་པའི་སྙིང་པོ་ཉོན། །མྱང་འདས་ཀུན་བཟང་གཞི་དང་ནི། །འཁོར་གཞི་ལུང་མ་བསྟན་པ་གཉིས། །ལྷན་ཅིག་མི་གནས་འགལ་བའི་ཕྱིར། །གནས་སྐབས་མཐར་ཐུག་འདྲེལ་བ་མེད། །ཉི་མའི་དཀྱིལ་འཁོར་མུན་མེད་བཞིན། །དེ་ཕྱིར་ཡེ་ཤེས་ཟང་ཐལ་ཉིད། །ད་ཡང་འདུས་པའི་འཁོར་རྣམས་ཉོན། །འཁྲུལ་གཞི་ལུང་མ་བསྟན་ལ་སོགས། །ཤན་ཕྱེའི་སྐབས་སུ་ངས་བཤད་ཀྱིས། །ལ་ཟློའི་དུས་སུ་ངས་མ་གསུངས། །ཕྱི་རབས་རྣལ་འབྱོར་དེ་བཞིན་ནོ། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། གཞི་གསུམ་འདྲེལ་བ་ཡོད་མེད་བསྟན་ ― DNG002_Page_0382 ―
[མ་དཔེ་གཟིགས་ན་འདིར་གནོན།]
པའི་ལེའུ་སྟེ་བདུན་པའོ།། །།དེ་ནས་ཀུན་རིག་སྟོན་པ་ཡིས། །ཀུན་གཞི་སེམས་ཀྱི་མུན་གསེབ་ནས། །འཁྲུལ་དང་མ་འཁྲུལ་བཀའ་སྩལ་པ། །འཁྲུལ་པ་རྣམ་བཞི་དབྱེ་བའི་ཕྱིར། །གསུམ་འདྲེལ་བཞི་ལྡན་གོལ་བ་མེད། །དེ་ཕྱིར་ཆོས་སྐུ་གཞི་དང་གཅིག །ད་ཡང་འདུས་པའི་སྙིང་པོ་ཉོན། །འཁྲུལ་དང་མ་འཁྲུལ་ཤན་ཕྱེད་པས། །ཐོག་མ་ཉིད་ནས་བསགས་པ་ཡི། །སྔར་གྱི་བག་ཆགས་བཟང་ངན་ནི། །དུས་དང་གནས་སྐབས་འགྱུར་བའི་ཕྱིར། །ཤེས་པ་མ་འཁྲུལ་དངོས་པོ་འཁྲུལ། །ཞེན་པ་བརྟས་ཕྱིར་བག་ཆགས་ཏེ། །མི་ཤི་ཁ་དོག་དྲན་པ་འདྲ། །ད་ཡང་འདུས་པའི་སྙིང་པོ་ཉོན། །ཆགས་སྡང་འབྱུང་བའི་རྒྱུར་གྱུར་པའི། །ཕྱིས་ཀྱི་ཉོན་མོངས་སྐྱེ་བ་ཡང་། །དགའ་དང་མི་དགའ་ལ་སོགས་པའི། །གློ་བུར་རྐྱེན་གྱིས་འབྱུང་བའི་ཕྱིར། །དངོས་པོ་མ་འཁྲུལ་ཤེས་པ་འཁྲུལ། །ཐག་པ་སྦྲུལ་དུ་འཛིན་པ་འདྲ། །ད་ཡང་འཁོར་གྱི་སེམས་དཔའ་ཉོན། །སྣང་བ་གཞི་ལ་མེད་པ་ལ། །སྤང་སྡུད་ཞེན་པ་བྱེད་པ་ནི། །བློ་དངོས་གཉིས་ཀ་འཁྲུལ་པའི་ཕྱིར། །མེད་པ་ལ་ནི་ཡོད་བརྟག་པ། །རི་བོང་རྭ་ལ་རྟོག་དཔྱོད་འདྲ། །ད་ཡང་འཁོར་གྱི་སྙིང་པོ་ཉོན། །སྐྱེ་བོ་ཐ་མལ་ཤེས་པ་ཡང་། །བྱ་བ་མ་འཁྲུལ་གང་བྱེད་ཀྱང་། །བློ་དངོས་མ་འཁྲུལ་ཆོས་ཉིད་མེད། །ལུང་ལྡན་གདམས་ངག་མེད་པའི་ཕྱིར། །གཞི་ཉིད་མ་ཤེས་མ་རིག་ཡོད། །ཟླ་བ་དཀར་ཀྱང་མུན་ཡོད་འདྲ། །ད་ཡང་འདུས་པའི་སྙིང་པོ་ཉོན། །དེ་དག་རྩ་བ་མདོར་བསྡུ་ན། །འཁྲུལ་པ་ཟུང་བཞི་ཡ་བདུན་དག །སྣང་བ་མེད་པར་མ་ཤེས་ཕྱིར། །སྒྲོ་སྐུར་ཞེན་པས་རང་བསླུས་ཏེ། །གདམས་ངག་མེད་ཕྱིར་ཆོས་སྐུ་མིན། །དེ་ཕྱིར་གྲུབ་མཐས་བློ་མ་བསྒྱུར། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། སྔ་ཕྱིའི་རྟོག་པ་འཁྲུལ་པ་བསྟན་པའི་ལེའུ་སྟེ་བརྒྱད་པའོ།། །།དེ་ནས་འདུས་པའི་ཚོགས་རྣམས་ལ། །ཆོས་སྐུ་ངོ་སྤྲོད་ ― DNG002_Page_0383 ―
[མ་དཔེ་གཟིགས་ན་འདིར་གནོན།]
དོན་གསུངས་པ། །སྔ་ཕྱིའི་རྟོག་གསུམ་བྲལ་བ་ཡི། །རང་རིག་ཆོས་སྐུའི་ཡེ་ཤེས་ནི། །འཁྲུལ་མེད་ད་ལྟའི་ཤེས་པ་ལ། །ཐ་མལ་ལུས་ལ་རྟེན་བཅས་པའི། །ཤེས་པ་མ་བསྒྲིབས་གསལ་བ་འདི། །རང་བྱུང་ཆོས་སྐུ་དག་པའོ། །དེ་ལ་མ་རིག་མུན་པ་མེད། །ད་ཡང་འདུས་པའི་སྙིང་པོ་ཉོན། །དེ་ལ་ཡོན་ཏན་བཞི་ལྡན་པས། །དམ་ཚིག་འཛིན་པའི་ཡེ་ཤེས་ཀྱིས། །སྐྱེ་བོ་མུ་སྟེགས་ཡུལ་འདི་ལ། །ང་དང་བདག་ཏུ་རང་རྒྱུད་བྱེད། །ཞེན་པའི་གཉིས་འཛིན་མེད་པའི་ཕྱིར། །སྣང་བ་མེད་པའི་ཡེ་ཤེས་ནི། །གོལ་མེད་ཆོས་དབྱིངས་ནམ་མཁའ་འདྲ། །ངང་གིས་གསལ་བའི་ཡེ་ཤེས་ཀྱིས། །ཚོགས་དྲུག་བཀག་པའི་འགོག་པ་དང་། །ལུས་མེད་མེད་པའི་ལྟ་རྒྱུ་ནི། །གོལ་ས་ཀ་ནས་མེད་པའི་ཕྱིར། །རིན་ཆེན་འོད་འདྲ་འཆར་ནུབ་མེད། །ད་ཡང་རྡོ་རྗེ་སེམས་དཔའ་ཉོན། །ཡེ་ཤེས་གཉུག་མར་གནས་པ་ཡིས། །དབུ་མ་སེམས་ཙམ་ཐུན་བསྒོམ་དང་། །ཐབས་ཀྱི་རྩ་དང་ཐིག་ལེ་སོགས། །འབྱུང་འཇུག་ཅན་གྱི་གོལ་ས་མེད། །བསྐྱེད་རིམ་ཀུན་གཞི་ལ་སོགས་པ། །ཞི་ཁྲོའི་ལྷ་རུ་བསྒོམ་པ་དང་། །འཕེལ་འགྲིབ་ཅན་གྱི་གོལ་ས་མེད། །དེ་ཕྱིར་རྒྱུན་དུ་འབྲལ་མེད་ཡིན། །ད་ཡང་འདུས་པའི་སྙིང་པོ་ཉོན། །གཏན་ལ་འབེབས་པའི་ཡིད་ཀྱིས་ནི། །ལྷག་མཐོང་རིག་པ་རྟོགས་ཙམ་ན། །དམིགས་འཛིན་མེད་པར་ངང་གིས་གསལ། །གཉུག་མར་གནས་དང་འཕེལ་འགྲིབ་མེད། །ད་ལྟའི་ཤེས་པ་འདི་ཉིད་ལ། །རང་རིག་ཆོས་སྐུ་གཅིག་ཏུ་འདུས། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། ཆོས་ཀྱི་སྐུའི་བསྒོམ་པ་ངོས་བཟུང་བའི་ལེའུ་སྟེ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་སྟོན་པ་ཆོས་རྗེ་ཡིས། །རྣམ་སྨིན་ལུས་དང་བཅས་དུས་འདིར། །གཟུགས་སྐུ་མི་འབྱུང་བཀའ་སྩལ་པ། །ལྷ་མིན་མངལ་གྱིས་བསྒྲིབས་པ་འདྲ། །གཟུགས་སྐུ་ངོ་སྤྲོད་མི་འདོད་དོ། །ཆེ་བའི་ཡོན་ཏན་མི་འབྱུང་ཕྱིར། །ནམ་སྲོས་ཉི་མ་མི་འཆར་ ― DNG002_Page_0384 ―
[མ་དཔེ་གཟིགས་ན་འདིར་གནོན།]
འདྲ། །ད་ཡང་འདུས་པའི་སྙིང་པོ་ཉོན། །ལན་ཅིག་དུས་ཀྱི་དེང་སང་ནི། །ལུང་མེད་རྨོངས་པའི་ང་རྒྱལ་ཅན། །དཔྱད་བཟོ་རིག་པ་བྱེད་པ་ཀུན། །གཟུགས་སྐུ་ད་ལྟ་ངོ་སྤྲོད་ཡོད། །ཁ་ཚབ་རྫུན་ཚིག་སྨྲ་བ་ལ། །རྨོངས་པ་བདེན་པར་འཛིན་པ་འབྱུང་། །ད་ཡང་འདུས་པའི་སྙིང་པོ་ཉོན། །མ་རིག་རྫུན་དེ་སུན་འདོན་ཕྱིར། །ད་ལྟ་མངལ་གྱིས་བསྒྲིབས་གཡོགས་པས། །ལོངས་སྐུ་དང་ནི་སྤྲུལ་པའི་སྐུ། །བཞུགས་ཚུལ་སྒྲོན་མའི་དཔེ་མཚོན་ཀྱང་། །ད་ལྟ་རང་ལ་འབྱུང་མི་སྲིད། །ཁྱུང་སྒོང་མ་ཆག་འཕུར་མི་ནུས། །དེ་ཕྱིར་གཟུགས་སྐུའི་གཟུགས་བརྙན་ནི། །རིས་སུ་བྲིས་དང་ལུགས་སུ་བླུགས། །འབུར་དུ་བརྐོས་པ་ལ་སོགས་པའི། །གཟུགས་སྐུའི་ལྷ་རུ་བྱུང་བ་ཡང་། །དངོས་སུ་སྤྲད་དུ་མི་འདོད་པས། །དེ་ཕྱིར་དྲང་དོན་ལྡེམ་དགོངས་སུ། །ཁྲོ་བོ་བསྒོམ་པའི་ལྷ་ཚོགས་བསྟན། །ད་ཡང་འདུས་པའི་སྙིང་པོ་ཉོན། །སྔོན་བྱུང་གཟུགས་སྐུ་བྱུང་བ་ཡང་། །རང་རྒྱུད་ལུས་ཅན་མ་ཡིན་ཏེ། །རྒྱུད་དག་སྤྲུལ་པ་གཞི་གཅིག་ལས། །སངས་རྒྱས་བྱང་ཆུབ་སེམས་དཔའ་ཡིན། །ཆགས་སྡང་ལྔ་དང་བཅས་པའི་ཡིད། །ཐ་མལ་རང་ལུས་སེམས་འདི་ལ། །གཟུགས་སྐུ་ད་ལྟར་འབྱུང་མི་སྲིད། །ནམ་མ་ལངས་པར་ཉི་མི་འཆར། །ད་ཡང་རྡོ་རྗེ་སེམས་དཔའ་ཉོན། །ད་ལྟ་གཟུགས་སྐུ་སྤྲད་འདོད་ན། །མཚན་དང་དཔེ་བྱད་མ་ལུས་ཀུན། །རང་གི་ལུས་ལ་ཚང་དགོས་ན། །ཞིང་ཁམས་ཡོན་ཏན་ཀུན་མཐོང་དགོས། །དུས་གསུམ་སངས་རྒྱས་ཐམས་ཅད་དང་། །སྐུ་གསུང་ཐུགས་ནི་མཉམ་དགོས་ན། །དེ་མེད་ཡིད་སྨོན་ངོ་སྤྲོད་མེད། །ད་ཡང་འདུས་པའི་སྙིང་པོ་ཉོན། །མངལ་གྱི་སྒྲིབ་གཡོགས་མ་བྲལ་བར། །ལུང་ལྡན་རྐྱེན་དང་ཕྲད་སྲིད་ན། །རང་སེམས་ཆོས་སྐུར་རྟོགས་པ་ལས། །གཟུགས་སྐུ་མི་འབྱུང་ལུས་ཀྱིས་བསྒྲིབས། །ཉི་མ་སྤྲིན་གྱིས་བསྒྲིབས་པ་འདྲ། །ད་ཡང་འཁོར་གྱི་སྙིང་པོ་ཉོན། །སྤྲུལ་སྐུ་ངོ་སྤྲོད་ཡོད་ཟེར་ན། །ད་ལྟ་ཐ་མལ་ལུས་འདི་ཡིས། །འཛམ་གླིང་བྱེ་བ་ཕྲག་བརྒྱ་རུ། ། ― DNG002_Page_0385 ―
[མ་དཔེ་གཟིགས་ན་འདིར་གནོན།]
སྤྲུལ་པ་བྱེ་བ་ཕྲག་བརྒྱ་དགོས། །སངས་རྒྱས་དམྱལ་བ་ཡན་ཆད་དུ། །ལུས་ཀྱི་མིག་གིས་མཐོང་བ་དགོས། །རྣམ་སྨིན་ལུས་དང་བཅས་དུས་འདིར། །ཇི་ལྟར་གཟུགས་སྐུ་ངོ་སྤྲད་ཀྱང་། །མཐའ་འཁོབ་ཆུ་དང་བྲག་ལ་ཡང་། །མི་ཐར་སྡུག་བསྔལ་འབྱུང་བའི་ཕྱིར། །སྤྲུལ་སྐུ་ངོ་སྤྲོད་ཡོད་ཟེར་རྫུན། །ལྷ་མི་ཀུན་གྱིས་སྨད་བསད་རིགས། །ད་ཡང་རྡོ་རྗེ་སེམས་དཔའ་ཉོན། །ཡིད་སྨོན་ཙམ་དུ་སྤྲོད་ཟེར་ནས། །ཞི་ཁྲོ་ལ་སོགས་བསྒོམ་པ་ཡང་། །རྒྱུད་ལུང་ཆོས་སུ་ལྡེམ་དགོངས་བསྟན། །དེ་ཕྱིར་གཟུགས་སྐུ་གནས་འགྱུར་ལས། །དངོས་སུ་འབྱུང་བར་ངས་མ་བཤད། །དེ་ཡང་འདུས་པའི་སྙིང་པོ་ཉོན། །གཟུགས་སྐུ་ངོ་ནི་སྤྲད་འདོད་ན། །དེ་ལ་རྟགས་ཆེན་འདི་འབྱུང་སྟེ། །སེང་གེ་ཁྱུང་དང་ཨུ་དུམ་ཝར། །རིན་ཆེན་ལ་སོགས་དུས་འདིར་འབྱུང་། །འཇིག་རྟེན་སངས་རྒྱས་འབྱུང་བའི་རྟགས། །དེ་མེད་གཟུགས་སྐུ་འཇིག་རྟེན་དུ། །སེམས་ཅན་ལུས་དང་མ་བྲལ་བར། །གཟུགས་སྐུའི་ཡོན་ཏན་འབྱུང་འདོད་པ། །མུ་སྟེགས་ཀ་ཏ་རི་པ་ཟེར། །མ་རིག་རྨོངས་པ་སྙིང་རེ་རྗེ། །མནར་མེད་དམྱལ་བ་ཆེན་པོར་འགྱུར། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། ལུས་དང་མ་བྲལ་བར་གཟུགས་སྐུ་མི་འབྱུང་བར་བསྟན་པའི་ལེའུ་སྟེ་བཅུ་པའོ།། །།དེ་ནས་རྡོ་རྗེ་སེམས་དཔའ་ཡིས། །རང་རིག་ཆོས་སྐུ་ལ་བཟླའི་ཕྱིར། །ཀུན་རིག་ཆོས་ཀྱི་རྒྱལ་པོ་ལ། །བདེན་པའི་དོན་གྱིས་འདི་སྐད་གསོལ། །མ་བསྒོམས་དོན་དང་མི་འབྲལ་བའི། །ཡེ་ཤེས་རང་ཤར་མན་ངག་གང་། །ཐ་མལ་རྣམ་རྟོག་མི་གོས་པའི། །རང་ཤར་སྤྱོད་པ་ཇི་ལྟར་སྤྱོད། །མཉམ་པའི་རྒྱལ་པོས་བཤད་དུ་གསོལ། །དེ་སྐད་གསོལ་བའི་དོན་གསན་ནས། །མ་བསྒོམས་འབྲལ་བ་མེད་པ་ཡི། །ཡེ་ཤེས་རང་ཤར་ངེས་པའི་དོན། །ཀུན་རིག་སྟོན་པས་བཀའ་སྩལ་པ། །དངོས་པོ་མ་འཁྲུལ་རིག་པ་ལ། །ཚོར་བ་བདེ་སྡུག་ཅི་བྱུང་ཡང་། །ལུང་ལྡན་རིན་ཆེན་རྐྱེན་གྱིས་ཀྱང་། །དེ་ཉིད་ ― DNG002_Page_0386 ―
[མ་དཔེ་གཟིགས་ན་འདིར་གནོན།]
ཆོས་སྐུར་ཉམས་སུ་མྱོང་། །ད་ཡང་རྡོ་རྗེ་སེམས་དཔའ་ཉོན། །ཡུལ་གྱི་རྣམ་པ་གང་བྱུང་ཡང་། །དངོས་པོ་མ་འཁྲུལ་རིག་པ་ཡིས། །དོན་གྱིས་ཟིན་པའི་ཡེ་ཤེས་ཏེ། །ཆོས་ཉིད་ཡང་དག་གནས་ལུགས་ཡིན། །དེ་ཉིད་ལུང་ལྡན་སྒྲོན་མ་ཡིས། །མ་རིག་མུན་པ་མེད་པའི་ཕྱིར། །སྒྲོ་སྐུར་བྲལ་བའི་ཤེས་པ་ལ། །ཆོས་ཀྱི་སྐུ་ཞེས་དེ་ལ་བྱ། །ད་ཡང་རྡོ་རྗེ་སེམས་དཔའ་ཉོན། །དང་པོ་པ་ཡི་དད་ལྡན་ལ། །དངོས་པོའི་ཡུལ་ལ་བརྟེན་ཏེ་བསྟན། །སྣང་བ་མི་འགོག་ཐབས་ཡིན་ཏེ། །དེ་རྟེན་ཡུལ་དང་འདྲེལ་མེད་ཤེས། །དེ་ཚོར་བདེ་བ་འཇམ་དང་ཞིམ། །དགའ་བ་ཉམས་སུ་མྱོང་བའི་ཕྱིར། །ཡུལ་མེད་ཉམས་སུ་མྱོང་ཚད་ནི། །མན་ངག་ལུང་ནི་ཆོས་སྐུར་ཤེས། །དེ་ཕྱིར་ཡེ་ཤེས་རང་ཤར་ཡིན། །དེ་ཡང་འདུས་པའི་སྙིང་པོ་ཉོན། །ཚོར་བ་མི་བདེ་སྡུག་བསྔལ་ཡང་། །ན་ཚ་མི་ཞིམ་རྩུབ་པ་དང་། །མི་དགའ་ལ་སོགས་ཅི་བྱུང་ཚེ། །ལུང་ལྡན་རིན་ཆེན་རྐྱེན་གྱིས་ནི། །ཆོས་སྐུར་ཉམས་སུ་མྱོང་བའི་ཕྱིར། །ཡུལ་དང་གནས་སྐབས་མཐར་ཐུག་གི། །འདྲེལ་བ་མེད་ཤེས་ཉམས་ཀྱི་ཚད། །ད་ཡང་འདུས་པའི་སྙིང་པོ་ཉོན། །ཡུལ་འདི་རིག་མེད་འཁྲུལ་པར་ཤེས། །འདུས་བྱས་ཡིན་ཕྱིར་ཆོས་སྐུ་མེད། །སྡུག་བསྔལ་ཚོར་བ་གང་བྱུང་ཡང་། །དེ་དུས་རྟག་ཆད་མཐར་མ་ལྟུང་། །བྱིང་རྒོད་གཉིས་ཀྱི་རྐྱེན་མ་གོས། །དེ་ཕྱིར་ཆོས་སྐུ་བསྒོམ་མི་དགོས། །ད་ཡང་རྡོ་རྗེ་སེམས་དཔའ་ཉོན། །ཡུལ་གྱི་དྲན་རྟོག་ཅི་བྱུང་ཡང་། །གང་ཕྱིར་ཆོས་སྐུ་ཉམས་སུ་མྱོང་། །ཡང་དྲུག་ཉམས་དང་འདྲེལ་མེད་ཤེས། །རྟོགས་ཐབས་རྣམ་པ་དགུར་ནི་བརྟེན། །རྐྱེན་ཐུབ་གང་གྲག་ལྷག་མཐོང་ལ། །རྐྱེན་ཐུབ་དྲུག་ཏུ་དབྱེ་མི་དགོས། །ད་ཡང་འདུས་པའི་སྙིང་པོ་ཉོན། །མཐའ་རུ་མི་འཛིན་ལྟ་བ་ལ། །རིག་པ་རྒྱ་ཡན་ཆོས་སྐུར་གསལ། །ཡིད་ཆེས་གདེང་གིས་ཟིན་པ་ལ། །ཉམས་དང་ལྡན་པའི་ཚད་ཅེས་གསུངས། །རྫོགས་པ་ཆེན་པོ་ཡེ་ཤེས་འཁོར་ལོ་ ― DNG002_Page_0387 ―
[མ་དཔེ་གཟིགས་ན་འདིར་གནོན།]
གསང་བ་ཐུགས་ཀྱི་རྒྱུད་ལས། ཡེ་ཤེས་རང་ཤར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ཀུན་རིག་ཆོས་རྗེ་ཡིས། །ཐ་མལ་རྣམ་རྟོག་མི་གོས་པའི། །ལ་ཟློའི་སྤྱོད་པ་བཀའ་སྩལ་པ། །གཞི་ཤེས་བློ་དངོས་གཅིག་པ་དང་། །བརྟུལ་ཞུགས་མཆོག་དང་གེགས་མེད་པའི། །ལ་ཟློའི་སྤྱོད་པ་བཀའ་སྩལ་པ། །གཞི་ཤེས་རང་ཤར་སྤྱོད་པའི་དུས། །ལུང་ལྡན་ངེས་པའི་གདམས་ངག་གིས། །ཡུལ་མེད་ཆོས་སྐུར་ངོས་ཟིན་པས། །ལུས་ངག་བྱར་མེད་བརྗེད་པ་ཡི། །གཞན་དུ་འཛིན་མེད་རང་རིག་སྐུ། །སྔ་ཕྱིས་མ་བསླད་མ་བཅོས་ཤིང་། །འདུ་འབྲལ་མེད་པའི་ཡེ་ཤེས་ནི། །སུས་ཀྱང་མ་བྱས་རང་བྱུང་སྟེ། །གཞི་ཉིད་ཤེས་པས་ནམ་མཁའ་འདྲ། །ད་ཡང་འདུས་པའི་སྙིང་པོ་ཉོན། །ཆོས་སྐུའི་རིག་པ་འགྲོ་འོང་མེད། །རྟག་ཆད་མཐའ་ཡི་སྒྲོ་སྐུར་བྲལ། །རང་གི་སྤྱོད་པ་གང་སྤྱོད་ཀྱང་། །ཆོས་ཀྱི་སྐུ་ལས་མ་གཏོགས་པ། །རྡུལ་ཙམ་གཞན་ན་ཡོད་མི་སྲིད། །དེ་ཕྱིར་ཤེས་པ་རང་ཡན་ལ། །ལྷག་མཐོང་དྲན་པའི་གདེང་གིས་ཟིན། །ཡེངས་དང་མ་ཡེངས་མེད་པར་ནི། །བལྟ་བའི་གདེང་འབྲལ་མེད་པའི་ཕྱིར། །ཆོས་སྐུ་གཞི་ཞེས་སྤྱོད་པ་ཡིན། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། གཞི་ཤེས་པའི་སྤྱོད་པ་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་ཀུན་རིག་རྒྱལ་པོ་ཡིས། །འདུས་པའི་འཁོར་ལ་བཀའ་སྩལ་པ། །བློ་དངོས་སྤྱོད་པ་བསྟན་པའི་ཕྱིར། །གཞི་ཉིད་དེ་ལྟར་རྟོགས་པ་ལ། །སྣང་བ་ངེས་མེད་སེམས་ལ་རྒྱུ། །དེ་རྒྱུ་ཙམ་ན་ཆོས་སྐུ་ཡིན། །དེ་ལྟར་ཐག་ཆོད་ངེས་པ་ཡིས། །བསྒོམ་དང་མ་བསྒོམས་རང་སར་གྲོལ། །གང་ཡང་ཆོས་སྐུར་གྱུར་པ་ལས། །བློ་དང་དངོས་པོ་དབྱེར་མེད་ཕྱིར། །ནམ་མཁའི་གཞའ་ཚོན་མ་ངེས་རྫོགས། །བློ་དང་སྣང་བ་དངོས་པོའི་ཆོས། །སེམས་ཀྱི་དྲན་པ་ཅི་སྣང་ཡང་། །དངོས་མེད་རིག་པ་ཆོས་སྐུར་གསལ། །བསྒོམ་དང་མི་བསྒོམས་ཐ་སྙད་བྲལ། །དེ་ཕྱིར་བློ་དངོས་ཡེ་ཤེས་ཤར། ། ― DNG002_Page_0388 ―
[མ་དཔེ་གཟིགས་ན་འདིར་གནོན།]
རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། བློ་དངོས་ཡེ་ཤེས་རང་ཤར་གྱི་སྤྱོད་པ་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་འདུས་པའི་ཚོགས་རྣམས་ལ། །བརྟུལ་ཞུགས་མཆོག་སྤྱོད་བཀའ་སྩལ་པ། །ལྟ་བ་ལ་ནི་བཟླ་བའི་ཕྱིར། །སྤྱོད་པ་རྩིང་མོ་ཆེད་དུ་དགོས། །ངེས་མི་འཆིང་བའི་གདམས་ངག་ཡོད། །དེ་ཕྱིར་རང་གྲོལ་རྟོགས་པ་གཅེས། །ད་ཡང་འདུས་པའི་སྙིང་པོ་ཉོན། །ངེས་ལུང་བསྟན་པའི་རྣལ་འབྱོར་པས། །མ་དང་སྲིང་མོ་ཀུན་ཀྱང་སྤྱད། །གཞན་གྱི་བུད་མེད་སྨོས་ཅི་དགོས། །སེམས་ཅན་མནར་ཅིང་བསད་གྱུར་ཀྱང་། །དགེ་འདུན་མཆོད་རྟེན་དཀོར་འཕྲོག་ནའང་། །རྐྱེན་སྒྲིབ་མེད་པར་ཡེ་ཤེས་ཤར། །དམྱལ་དཔོན་ལྟུང་བ་མེད་པ་བཞིན། །བརྟུལ་ཞུགས་མཆོག་གི་སྤྱོད་པ་ལ། །བསྲུང་བའི་དམ་ཚིག་མི་འགལ་ཏེ། །ལུང་རིགས་མཐུན་པའི་ཆོས་འདི་དགོས། །ད་ཡང་རྡོ་རྗེ་སེམས་དཔའ་ཉོན། །དེང་སང་དུས་ཀྱི་ཆོས་བྱེད་རྣམས། །ཞི་འཇམ་རྒྱུད་འབོལ་འདོད་པ་དེ། །གདམས་ངག་མེད་ཕྱིར་བྱོལ་སོང་རྒྱུ། །དེ་ཕྱིར་རྨོངས་པ་སྙིང་རེ་རྗེ། །ཞི་འབོལ་འབྲས་བུ་ཐོབ་པ་མེད། །ལྷ་རྣམས་འཇིག་རྟེན་དུ་ལྟུང་ཞིང་། །ལྟ་བ་མ་རྟོགས་ཐམས་ཅད་ལྟུང་། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། བརྟུལ་ཞུགས་མཆོག་གི་ཡེ་ཤེས་རང་ཤར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་འདུས་པའི་ཚོགས་རྣམས་ལ། །གཞི་ལ་འདྲེ་མེད་བསྟན་པའི་ཕྱིར། །སྟོན་པ་ཀུན་རིག་ཆོས་རྗེ་ཡིས། །འདྲེ་སུན་འདོན་པ་བཀའ་སྩལ་པ། །གཞི་ལ་ལྷ་འདྲེ་མེད་པ་ལ། །མུ་སྟེགས་སྐྱེ་བོ་བདེན་འཛིན་པ། །འདྲེ་ཡོད་སུན་འདོན་ལ་བཟླའི་དོན། །ང་ཡིས་བཤད་ཀྱིས་སེམས་ལ་ཞོག །ད་ཡང་རྡོ་རྗེ་སེམས་དཔའ་ཉོན། །ཡུལ་གྱི་རྟོག་པ་མ་ཟད་པར། །གནོད་པའི་བགེགས་ལ་ཟད་པ་མེད། །བགེགས་རིགས་སྟོང་ཕྲག་བརྒྱད་ཅུ་དང་། །ཡེ་འདྲོག་སུམ་བརྒྱ་དྲུག་ཅུ་རྣམས། །གཞི་ལ་གང་ཡང་མེད་ ― DNG002_Page_0389 ―
[མ་དཔེ་གཟིགས་ན་འདིར་གནོན།]
པ་ལ། །བཙུན་པ་ཁྲིམས་འཆལ་ཨུ་ལི་ཡིས། །མུ་སྟེགས་ལོག་ལྟའི་ལྷ་བསྒྲུབས་ནས། །ཁ་ཆེ་བྱེ་བྲག་སྨྲ་བ་ཡིས། །ཐོལ་ཐོལ་སྨྲ་ཞིང་ལམ་ལམ་བོར། །བདུད་ཀྱི་བྱིན་རླབས་གློ་བུར་འབྱུང་། །ལྷ་མེད་ལྷར་འཛིན་འདྲེ་རྣམས་གནོད། །འདུ་བ་རྣམ་བཞིའི་ནད་དང་ནི། །ཡེ་འདྲོག་སུམ་བརྒྱ་འདྲེ་ཡིས་བྱས། །ལྷ་མཆོད་འདྲེ་བརྡུང་ནད་ལ་ཕན། །དེ་སྐད་རྫུན་དུ་སྨྲ་བ་ལ། །རྨོངས་པའི་སྐྱེ་བོ་བདེན་སྙམ་ནས། །བོན་ཆོག་བྱས་པས་ཕན་པ་སྙམ། །འདྲེ་མཆོད་བདུད་དུ་ཕྱི་མར་ཆེ། །འབྱུང་བ་ལྔ་ལ་འདྲེ་ཡོད་ཟེར། །སྲིད་པའི་སྤྱི་བགེགས་མི་ལ་གནོད། །མི་ཤི་འདྲེ་རུ་གནོད་ཟེར་ཏེ། །རྒྱབ་མཆོད་འདྲེ་ནི་བཏགས་བྱས་པས། །ན་ཚ་གོད་ཁ་སླར་ལ་འོང་། །ད་ཡང་འདུས་པའི་སྙིང་པོ་ཉོན། །སྲིད་པའི་སྤྱི་བགེགས་ཆེན་པོ་འདི། །སྐྱེ་བོ་རྒྱང་འཕེན་པ་ལ་ཡོད། །སངས་རྒྱས་ཆོས་ལ་འདྲེ་མེད་ཕྱིར། །ཆོས་དང་གང་ཟག་བདག་དང་བྲལ། །དེ་ཕྱིར་སྣང་བ་མེད་པའི་ཕྱིར། །སྲིད་པའི་སྤྱི་འདྲེ་གཞི་ལ་མེད། །འདྲེ་ཡོད་ཟེར་བ་ལྟ་བ་ལོག །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། གཞི་ལ་འདྲེ་མེད་པར་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་འདུས་པའི་ཚོགས་རྣམས་ལ། །ཀུན་རིག་ཆོས་ཀྱི་རྒྱལ་པོ་ཡིས། །འདྲེ་སུན་འདོན་པ་བཀའ་སྩལ་པ། །འཇིག་རྟེན་ཞིག་ན་འདྲེ་ཡང་མེད། །ཀུན་བརྟགས་མ་རིག་ཡུལ་དུ་བརྟགས། །མ་རིག་མེད་ན་འདྲེ་ཡང་མེད། །འདྲེ་ནི་གློ་བུར་བཏགས་ཙམ་པ། །མི་ལས་གྱུར་པའི་འདྲེ་གནོད་ན། །ལུས་ཅན་གནོད་ན་མ་ཤིར་རིགས། །ལུས་མེད་སྟོང་པས་གནོད་མི་ནུས། །དེ་ཕྱིར་འདྲེ་གནོད་རྫུན་པོ་ཆེ། །ལྷབ་ཀའི་མོ་མ་ཀུན་གྱིས་བསླུས། །ཐ་མལ་ལས་ཀྱིས་དུས་ཟད་ན། །མོ་ཆོག་བྱས་དང་མ་བྱས་མེད། །རྐྱེན་མི་བཟློག་སྟེ་ཀུན་ཀ་འཆི། །ད་ཡང་འདུས་པའི་སྙིང་པོ་ཉོན། །དེ་ཕྱིར་ལྷ་འདྲེ་ཀུན་མེད་དེ། །འཁྲུལ་པའི་བློ་ཡིས་བཏགས་པ་ལས། །རྟོག་པས་འདྲེ་མེད་ལ་ཟློ་ན། །འཁོར་འདས་མ་རིག་ཆོས་འདི་ལ། །ལྷ་འདྲེ་བྱ་བའི་མིང་མེད་ ― DNG002_Page_0390 ―
[མ་དཔེ་གཟིགས་ན་འདིར་གནོན།]
ཤེས། །ཐམས་ཅད་ཐིག་ལེ་ཉག་གཅིག་ལ། །དུག་ཉིད་སྨན་དུ་སྦྱོར་ཤེས་ལྟར། །འདྲེ་ཉིད་ཡེ་ཤེས་ཀློང་དུ་ཤེས། །དགག་བསྒྲུབ་མེད་ཕྱིར་འདྲེ་རྣམས་སྟོང་། །རྐྱེན་གྱིས་མི་ཚུགས་ནམ་མཁའ་འདྲ། །ད་ཡང་འདུས་པའི་སྙིང་པོ་ཉོན། །སྔགས་དང་དོན་གྱི་ངོ་བོ་ལ། །ལྷ་འདྲེ་མེད་ཤེས་ཡེ་ཤེས་སྐུ། །གང་ལ་རྟོག་མེད་རང་བྱུང་ལ། །ངེས་དོན་གདམས་ངག་གསལ་ཐེབས་ཕྱིར། །བསླུ་བྲིད་ཆོས་ཀྱི་གོལ་སྒྲིབ་མེད། །འདྲེ་མེད་ཡེ་ཤེས་ལ་བཟླའོ། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། འདྲེ་སུན་འབྱིན་པར་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །རྟོགས་ལྡན་འཁོར་གྱི་དོན་ཆེད་དུ། །ཀུན་རིག་སྟོན་པ་ཆོས་རྗེ་ལ། །བདེན་པའི་དགོངས་དོན་འདི་སྐད་གསོལ། །ཡེ་ཤེས་ལ་ནི་ཇི་ལྟར་བཟླ། །དེ་ཡི་འབྲས་བུ་ཇི་ལྟར་འབྱུང་། །ངེས་དོན་རྒྱུད་འདི་གང་ལ་གཏད། །མཉམ་པའི་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འདུས་པའི་འཁོར་ལ་བཀའ་སྩལ་པ། །རྒྱུ་དང་འབྲས་བུ་རོ་གཅིག་ཕྱིར། །རིམ་པར་དབྱེར་མེད་ངོ་བོ་གཅིག །སངས་རྒྱས་མ་ཚོལ་རང་ལ་གནས། །དེ་ཕྱིར་རྒྱུ་འབྲས་དབྱེ་རུ་མེད། །དེ་ཡང་འདུས་པའི་སྙིང་པོ་ཉོན། །འཁོར་འདས་རྩ་བ་གཅིག་པའི་ཕྱིར། །རང་བཞིན་ལུས་དེ་ངོ་ཤེས་པས། །ཐར་པ་ཐོབ་ཅེས་བསྟན་པའི་ཕྱིར། །འཁོར་འདས་མེད་པའི་ཆོས་སྐུ་རྟོགས། །ཕྱི་ནང་སྣོད་བཅུད་མ་ལུས་ཀུན། །མ་བྱུང་མ་སྐྱེས་ཆོས་དབྱིངས་ལ། །དུས་གསུམ་སངས་རྒྱས་འགྱུར་མེད་ཕྱིར། །ཕྱི་ནང་མ་བཙལ་ཡེ་ནས་ཡིན། །ད་ཡང་རྡོ་རྗེ་སེམས་དཔའ་ཉོན། །མ་རིག་ལས་སྐྱེས་སེམས་ཅན་དང་། །ཡེ་ཤེས་ལས་བྱུང་སངས་རྒྱས་གཉིས། །ངས་ལུང་བསྟན་པས་ཆོས་སྐུར་གཅིག །མ་བཙལ་ལ་ཟློ་ཆེན་པོ་ཡིན། །བདེ་དང་སྡུག་བསྔལ་འཁོར་འདས་ཆོས། །རྟོགས་དང་མ་རྟོགས་གཉིས་མེད་ཕྱིར། །ཡུལ་དུ་འཛིན་པའི་བློ་མེད་པས། །མ་བཙལ་རང་གནས་ཡེ་ཤེས་ཡིན། །ད་ཡང་འདུས་པའི་སྙིང་པོ་ཉོན། ། ― DNG002_Page_0391 ―
[མ་དཔེ་གཟིགས་ན་འདིར་གནོན།]
གཙང་སྨེ་གཞི་ལ་མེད་པའི་ཕྱིར། །བློ་ཡིས་བྱས་པ་ཐམས་ཅད་འཁྲུལ། །མ་བྱས་མ་བཅོས་རང་བྱུང་ཐུགས། །ལ་བཟླ་བཟང་ངན་མེད་པར་གྱིས། །ད་ཡང་འདུས་པའི་སྙིང་པོ་ཉོན། །མཐོ་དམན་ཆེ་ཆུང་མ་ལུས་ཀུན། །མན་ངག་ཅན་ལ་ཆེ་ཆུང་མེད། །ཡེ་ཤེས་རང་ལ་གནས་པ་ལ། །མཐོ་དམན་མེད་པར་རྟོགས་པར་གྱིས། །རང་བྱུང་སྐྱེ་ཤི་མེད་པའི་ཕྱིར། །དུས་གསུམ་གཅིག་པས་ཡེ་ཤེས་སྐུ། །གྲངས་དང་ཚེ་ཚད་བགྲང་དུ་མེད། །དེ་ཕྱིར་མི་འགྱུར་ཡེ་ཤེས་ཡིན། །དེ་ཡང་འདུས་པའི་སྙིང་པོ་ཉོན། །ཡེ་ཤེས་རང་ཤར་ལ་ཟློ་ལ། །གང་ལྟར་སྣང་དྲན་ཆོས་ཉིད་ལ། །མ་བཙལ་ཡེ་ཤེས་རང་གནས་ཕྱིར། །བསྒོམ་མི་དགོས་པར་ལ་བཟླའོ། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། ཡེ་ཤེས་རང་ཤར་དུ་ལ་བཟླ་བའི་ལེའུ་སྟེ་བཅུ་བདུན་པའོ།། །།དེ་ནས་ཀུན་རིག་རྒྱལ་པོ་ཡིས། །དད་ལྡན་འདུས་པའི་འཁོར་རྣམས་ལ། །རྟོགས་པའི་འབྲས་བུ་བཀའ་སྩལ་པ། །རྟོགས་པའི་ཡོན་ཏན་དུས་འདིར་ནི། །ལུས་མེད་སྒོ་ལྔའི་རིག་པ་འདི། །སྔར་མ་མཐོང་བའི་ཞིང་ཁམས་གསུམ། །ཡེ་ཤེས་མིག་གིས་དུས་གཅིག་མཐོང་། །འཆར་ནུབ་མེད་པའི་ཉི་ཟླ་ཤར། །ད་ཡང་རྡོ་རྗེ་སེམས་དཔའ་ཉོན། །མ་བསམས་པ་ཡི་ལྷག་མཐོང་ལ། །མི་བརྗེད་པ་ཡི་གཟུངས་ཀྱིས་གཟུང་། །མ་ཟོས་བདུད་རྩིའི་རོ་མཆོག་མྱང་། །མ་བསྒྲུབ་པ་ཡི་འབྲས་བུ་འཐོབ། །མ་བསམས་པ་ཡི་དོན་ཅིག་འགྲུབ། །ད་ཡང་རྡོ་རྗེ་སེམས་དཔའ་ཉོན། །དེ་ཕྱིར་ངེས་དོན་འདི་བཅངས་ན། །དུས་འདིར་ཆོས་ཉིད་བདེན་པ་མཐོང་། །ཐུན་མོང་དངོས་གྲུབ་ཅི་བསམ་འགྲུབ། །རྗེས་དྲན་ཡོན་ཏན་བར་དོར་འོང་། །དུས་དེར་སངས་རྒྱས་སྨོས་ཅི་དགོས། །རྫོགས་པ་ཆེན་པོ་ཡེ་ཤེས་འཁོར་ལོ་གསང་བ་ཐུགས་ཀྱི་རྒྱུད་ལས། འབྲས་བུ་མངོན་དུ་འབྱུང་བར་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་ཀུན་རིག་ཆོས་རྗེ་ཡིས། །འདུས་པའི་འཁོར་ནི་དད་ལྡན་ལ། །ངེས་དོན་གསང་བའི་རྒྱུད་གཏད་པ། །རྒྱུད་འདི་ ― DNG002_Page_0392 ―
[མ་དཔེ་གཟིགས་ན་འདིར་གནོན།]
ཐོས་པའི་ཕན་ཡོན་ནི། །དོན་མཐོང་སངས་རྒྱས་ལག་ཏུ་ཐོབ། །ཆོས་སྐུའི་ཡེ་ཤེས་དུས་འདིར་རྟོགས། །ཆོས་རྣམས་རྩ་བ་དུས་གཅིག་ཤེས། །རྒྱུད་འདི་འཛིན་པས་དངོས་གྲུབ་ཐོབ། །ཀུན་ཏུ་བཟང་པོ་ད་ལྟ་ཡིན། །གང་ཞིག་སངས་རྒྱས་དངོས་འདོད་པ། །རྒྱུད་ཆེན་འདི་ལ་བལྟ་བར་གྱིས། །སངས་རྒྱས་བསྟན་པ་ནུབ་ཀ་རུ། །ང་ཡི་ཆོས་འདི་དུས་དེ་རུ། །མན་ངག་སྙིང་པོ་འབྱུང་ངེས་ཀྱི། །ཕྱི་རབས་རྣལ་འབྱོར་སེམས་ལ་ཆོངས། །ད་ཡང་རྡོ་རྗེ་སེམས་དཔའ་ཉོན། །ལན་ཅིག་དུས་ཀྱི་དེང་སང་ན། །འདྲ་མིན་བསླུ་ཆོས་དར་བའི་ཚེ། །འཕྱར་འཇིག་ཚོང་ལ་འདི་བསྟན་ན། །འདིར་སྡུག་ཕྱི་མར་དམྱལ་བར་ལྟུང་། །འདུས་པའི་འཁོར་རྣམས་ཡང་ཉོན་ཅིག །རང་བྱུང་ཆོས་སྐུ་ཉག་གཅིག་གི། །མན་ངག་འདི་མེད་ལྷ་མི་ཀུན། །ཕྱི་ནང་སྣོད་བཅུད་བཀའ་རྒྱུད་ཆོས། །མཁས་ཀྱང་རྨོངས་པའི་ང་རྒྱལ་གྱིས། །ངེས་དོན་རྒྱུད་ཆེན་དོན་འདི་ལ། །སྒྲོ་སྐུར་འདེབས་ཤིང་འཆིང་བར་འགྱུར། །དེ་ཚེ་དུས་ཀྱི་དེང་སང་ན། །འདྲ་མིན་བསླུ་ཆོས་དར་བའི་ཚེ། །ཁ་གསག་ཅན་གྱིས་ཀུན་བསླུས་ཏེ། །མན་ངག་གསང་བཤད་ཡོད་ཟེར་ནས། །གཞི་འབོལ་ཆགས་ཆུང་ཚུལ་འཆོས་ཏེ། །སྣོད་དང་ལྡན་ལ་བསྟན་ཟེར་ནས། །རང་ལ་ངེས་ལུང་ལྡན་པའི་བློ་མེད་པར། །གཞན་གྱི་མཁས་བཙུན་དག་ལ་ཁུངས་ཕྱུང་སྟེ། །རིན་ཆེན་གསེར་ནི་དཔག་མེད་ངས་ཕུལ་ཞེས། །རྫུན་གྱི་དཔེ་ཆུང་ར་རི་མདུན་བཀྲམ་ནས། །ཁྱོད་ཀྱིས་འབྱོར་ཚད་ཕུལ་ནི་ཟེར་ནས་སླར། །མཁས་པ་ཤེས་རབ་ཅན་ནི་བསླུར་མི་ཚུགས། །དད་ལྡན་བླུན་པོ་ཀུན་ནི་རབ་བསླུས་ཏེ། །ཁ་ཚབ་རྫུན་ཚིག་ཆེན་པོ་སྨྲས་ནས་ཀྱང་། །བསྟན་རྒྱུ་མེད་པར་ཕྱི་ནས་བསྟན་ཟེར་ནས། །རང་ལ་གདམས་ངག་མེད་པར་གཞན་ལ་ཚོལ་དུ་འགྲོ། །གཞན་ནས་མ་རྙེད་ཕྱིར་མི་འོང་ཞིང་འཕྱར་ཀ་འོང་། །བརྒྱ་ལ་རྙེད་ན་གཏན་གྱི་ནོར་ཕུལ་ཟེར། །དད་ལྡན་ཀུན་བསླུས་སུས་བསྟེན་ཆོས་དང་བྲལ། །དད་ལྡན་གཅིག་བསླུས་སེམས་ཅན་བརྒྱ་བསད་ འཇམ་དཔལ་འདུས་པའི་རྒྱུད།― DNG002_Page_0393 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཤྲཱི་མཉྫུ་ས་མུ་དཱ་ཡ་ཏནྟྲ། བོད་སྐད་དུ། འཇམ་དཔལ་འདུས་པའི་རྒྱུད། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། །འོག་མིན་དུ་ནི་བཞུགས་ནས་ནི། །སངས་རྒྱས་སེམས་ཅན་རྒྱབ་གྱེས་དུས། །འཁོར་གྱི་རྡོ་རྗེ་སེམས་དཔའ་ལ། །ཡང་ཏི་ནག་པོའི་བསྟན་པ་ཤར། །སྡུད་བྱེད་རོ་ལངས་བདེ་བས་བསྡུས། །འཇམ་དཔལ་འདུས་པའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་ཡིས། །ཀྱེ་ཀྱེ་སྟོན་པ་ཀུན་ཏུ་བཟང་པོ་ལགས། །རྫོགས་པ་ཆེན་པོའི་དོན་ཆེན་ལ། །དབང་ལ་བསྐུར་བའི་དོན་རྣམས་དང་། །ལམ་སྦྱངས་བགྲོད་ཚོགས་བསགས་པ་དང་། །སྒྲིབ་སྦྱང་དམ་ཚིག་དཀྱིལ་འཁོར་དང་། །ལྷ་བསྒོམ་སྔགས་བཟླས་ཏིང་འཛིན་དང་། །སྦྱིན་དང་ཚུལ་ཁྲིམས་སྨོན་ལམ་དང་། །དེ་རྣམས་དོན་ཀྱང་བཤད་དུ་གསོལ། །ཞེས་ཞུས་སོ། །འཇམ་དཔལ་འདུས་པའི་རྒྱུད་ལས། ཞུས་པའི་ལེའུ་སྟེ་གཉིས་པའོ།། །།ཀུན་ཏུ་བཟང་པོས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཆེ། །དབང་ལ་བསྐུར་མི་དགོས་པ་ནི། །བུམ་པ་ཐབས་དང་གསང་དབང་དང་། །ཚིག་གི་དབང་དུ་ཐམས་ཅད་འདུས། །རང་ལུས་བུམ་པར་ཤེས་པ་ནི། །དེ་ནི་དབང་བསྐུར་དང་པོ་ཡིན། །རིག་སྣང་གཉིས་སུ་སྦྱོར་བ་ནི། །དེ་ནི་དབང་མཆོག་གཉིས་པ་ཡིན། །ཡེ་ཤེས་སྐུ་ཡི་དོན་མཆོད་པས། །དེ་ནི་དབང་བསྐུར་གསུམ་པ་ཡིན། །ཚིག་རྣམས་ཐམས་ཅད་དོན་ལ་བསྡུས། །དེ་ནི་དབང་བསྐུར་བཞི་པ་ཡིན། །དབང་རྫས་རང་ལ་རབ་རྫོགས་པས། །སྣང་བ་རྫས་ཀྱི་ཁར་མ་ལུས། ། ― DNG002_Page_0394 ―
[མ་དཔེ་གཟིགས་ན་འདིར་གནོན།]
ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། དབང་གི་ལེའུ་སྟེ་གསུམ་པའོ།། །།ལམ་སྦྱང་མི་དགོས་པའི་དོན་འདིའོ། །འབྱུང་བ་ལྔ་ལ་ལོངས་སྤྱད་པས། །དེ་ནི་ཚོགས་ཀྱི་ལམ་པའོ། །དེ་ཉིད་འོད་གསལ་ཉིད་དུ་ཤར། །དེ་ནི་སྦྱོར་བའི་ལམ་པ་ཡིན། །གཉིས་སྣང་མེད་པའི་ཡེ་ཤེས་གསལ། །དེ་ནི་མཐོང་བའི་ལམ་པའོ། །དེ་རྣམས་གཉིས་སུ་མེད་པར་གནས། །དེ་ནི་མཐར་ཕྱིན་ལམ་པའོ། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། ལམ་གྱི་ལེའུ་སྟེ་བཞི་པའོ།། །།ས་ལམ་མི་བགྲོད་དོན་འདིའོ། །ས་རྣམས་མི་བགྲོད་རང་ལ་རྫོགས། །མཉམ་པར་ཤེས་ནས་ས་རྣམས་ཀུན་དང་མཉམ། །བགྲོད་མེད་དོན་ལ་གང་གནས་པ། །དེ་ནི་ས་རྣམས་ནོན་པ་སྟེ། །གང་ཞིག་ས་རྣམས་བགྲོད་འདོད་པ། །ཕྱིན་པའི་དུས་མེད་ནོན་པའི་ཐབས་མེད་དེ། །དཔེར་ན་རི་དྭགས་སྨིག་རྒྱུ་བསྙེགས་དང་མཚུངས། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། སའི་ལེའུ་སྟེ་ལྔ་པའོ།། །།ཚོགས་རྣམས་མི་གསོག་དོན་འདིའོ། །ཚོགས་བསག་དོན་ལ་རྣམ་གཉིས་ཏེ། །རྒྱུ་ཡི་ཚོགས་དང་འབྲས་བུའི་འོ། །རྒྱུ་ནི་ཐིག་ལེ་ལྷུན་གྲུབ་ལ། །འབྲས་བུ་ཐམས་ཅད་མཁྱེན་པའི་ཡེ་ཤེས་སོ། །གཉིས་སུ་མེད་པའི་ཆོས་སྐུ་ལ། །ཚོགས་གཉིས་རྣམ་པ་གཉིས་རྫོགས་པས། །ཚོགས་རྣམས་མི་གསོག་ཡེ་ནས་རྫོགས། །གཉིས་སྣང་མེད་པས་བསག་ཏུ་མེད། །ཅེས་གསུངས་སོ། །འཇམ་དཔལ་འདུས་པའི་རྒྱུད་ལས། ཚོགས་ཀྱི་ལེའུ་སྟེ་དྲུག་པའོ།། །།སྒྲིབ་པ་སྦྱང་བའི་དོན་འདིའོ། །སྒྲིབ་པ་ལ་ཡང་རྣམ་བཞི་སྟེ། །རིག་པ་སྤྲུལ་པའི་སྐུར་གྲུབ་པས། །ཤེས་བྱའི་སྒྲིབ་པ་དེ་ལ་མེད། །སྣང་བ་རང་སྣང་ལོངས་སྐུ་ལ། །ཉོན་མོངས་སྒྲིབ་པ་སྦྱང་དུ་མེད། །གཉིས་སྣང་མེད་པའི་ཐིག་ལེ་ལ། །ལས་ཀྱི་སྒྲིབ་པ་སྦྱང་དུ་མེད། །ཆགས་པ་རང་བྱུང་ཡེ་ཤེས་ལ། །བག་ཆགས་སྒྲིབ་པ་སྦྱང་དུ་མེད། །ཐམས་ཅད་ཐིག་ལེ་ཆོས་སྐུ་ལ། ། ― DNG002_Page_0395 ―
[མ་དཔེ་གཟིགས་ན་འདིར་གནོན།]
སྒྲིབ་པ་བཞི་པོ་གང་དུ་སྦྱང་། །སྦྱང་བའི་ས་དང་སྦྱོང་བའི་རྒྱུ། །གཉིས་སྤྱོད་ཕྱིར་ན་ཡང་ཏི་མིན། །ཇི་སྙེད་ཐེག་པ་འོག་མར་གོལ། །གོལ་ས་བཅད་ཕྱིར་དོན་འདི་བསྟན། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། སྒྲིབ་པ་སྦྱང་བའི་ལེའུ་སྟེ་བདུན་པའོ།། །།དམ་ཚིག་བསྲུང་དུ་མེད་པའི་དོན་འདིའོ། །ཆོས་སྐུས་ཁྱབ་པས་གཅིག་པའི་ཕྱིར། །སྲུང་བའི་དམ་ཚིག་ས་མ་ཡ། །འབུམ་སྡེ་བཀོད་པ་ཚིག་ཡིན་ཏེ། །ཚིག་ལ་མི་བརྟེན་རང་བྱུང་བས། །དེ་རྣམས་ཐིག་ལེར་འདུས་པས་ན། །ཐམས་ཅད་བསྲུང་བྱ་གང་ཡང་མེད། །བསྲུང་བྱ་སྲུང་བྱེད་གཉིས་བྱུང་ན། །དེ་ནི་ཡང་ཏི་ནག་པོ་མིན། །ཡུལ་དང་ཡུལ་ཅན་ཡིན་པའི་ཕྱིར། །ཐེག་པ་འོག་མའི་ཁྱུ་རུ་གོལ། །དེ་ཕྱིར་ཡེ་བསྲུངས་དོན་འདི་བསྟན། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། དམ་ཚིག་བསྲུང་བའི་ལེའུ་སྟེ་བརྒྱད་པའོ།། །།དཀྱིལ་འཁོར་བསྐྱེད་དུ་མེད་པའི་དོན་འདིའོ། །ལྟེ་བ་མུ་ཁྱུད་འཁོར་ལོ་འཕགས། །ཟླ་གམ་རིན་ཆེན་ཟུར་གསུམ་རྣམས། །རང་ལས་སྣང་བ་ཕྱི་རུ་ཤར། །དེ་ལ་དམ་པར་འཛིན་པ་ནི། །ཐེག་པ་འོག་མའི་འདོད་གཞུང་ངོ་། །ཡང་ཏི་ནག་པོ་འདི་ལྟར་འདོད། །ཕྱི་ཡི་དཀྱིལ་འཁོར་རང་སྣང་ཡིན། །ནང་གི་དཀྱིལ་འཁོར་རང་བྱུང་ཡིན། །གསང་བའི་དཀྱིལ་འཁོར་གཉིས་མེད་ཡིན། །ཡང་ཏིའི་དཀྱིལ་འཁོར་བསྟན་པ་ནི། །ཐམས་ཅད་ཡེ་ནས་སངས་རྒྱས་ཡིན། །ཡིན་པར་ཤེས་པས་བསྐྱེད་དུ་མེད། །ཅེས་གསུངས་སོ། །འཇམ་དཔལ་འདུས་པའི་རྒྱུད་ལས། ཡང་ཏི་ནག་པོའི་དཀྱིལ་འཁོར་གྱི་ལེའུ་སྟེ་དགུ་པའོ།། །།ལྷ་ལ་བསྒོམ་དུ་མེད་པའི་དོན་བསྟན་པ། །དབྱིངས་ཕྱུག་ལ་སོགས་ཡུམ་རྣམས་ནི། །རང་སྣང་ཡུལ་དུ་གཟུང་བས་འཁྲུལ། །ཧེ་རུ་ཀ་སོགས་ཡབ་རྣམས་ནི། །རང་ཤར་བརྟག་སྟེ་ཡབ་ཏུ་གཟུང་། །ཐུགས་ལས་སྐྱེས་པའི་སྲས་མཆོག་ནི། །ཡབ་ཀྱི་རང་བྱུང་ཆ་ལས་གཟུང་། །ད་ཡི་ཡུམ་རྣམས་ཐམས་ཅད་ཀྱིས། ། ― DNG002_Page_0396 ―
[མ་དཔེ་གཟིགས་ན་འདིར་གནོན།]
ཡུམ་གྱི་སྣང་བའི་ཆ་ལས་གཟུང་། །གཉིས་མེད་ཟེར་གྱིས་གཉིས་སུ་བསྒྲུབ། །དེས་ན་བསྒྲུབ་པའི་གོལ་ས་ཡིན། །ཡང་ཏི་ནག་པོའི་ལྷ་བསྒོམ་ནི། །རིག་པའི་ཡེ་ཤེས་ཐམས་ཅད་ལྷ། །རིག་པའི་ལྷ་ལ་མདུན་རྒྱབ་མེད། །ཡབ་ཡུམ་གཉིས་སུ་ཕྱི་ནང་མེད། །ཕྱི་ནང་མེད་པའི་ཐིག་ལེའོ། །དེ་ནི་དོན་གྱི་དཀྱིལ་འཁོར་ཡིན། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། ལྷ་བསྒོམ་པའི་ལེའུ་སྟེ་བཅུ་པའོ།། །།གསང་སྔགས་བཟླའ་རུ་མེད་པ་ནི། །མི་གསུང་མཉམ་པར་ཤེས་པ་ནི། །དེ་ནི་སྔགས་ཀྱི་ཏིང་འཛིན་ཡིན། །ཐིག་ལེ་གཅིག་ཏུ་གནས་པ་ནི། །དེ་ནི་སྔགས་ཀྱི་འཕྲོ་འདུའོ། །ཐམས་ཅད་མཁྱེན་པའི་ཡེ་ཤེས་ཤར། །དེ་ནི་སྔགས་ཀྱི་གྲངས་ཚད་དོ། །ལྷུན་གྱིས་གྲུབ་ནས་རང་ལ་རྫོགས། །དེ་ནི་སྔགས་ཀྱི་འབྲས་བུའོ། །བཟླས་པའི་དུས་དང་གྲངས་རྣམས་དང་། །དངོས་གྲུབ་གཞན་ནས་རེ་བ་ནི། །དེ་ནི་ཡང་ཏི་ནག་པོ་མིན། །བརྗོད་མེད་དོན་ལ་གང་གནས་པ། །གསང་སྔགས་ཀུན་གྱི་བདག་པོའི་མཆོག །ཅེས་གསུངས་སོ། །འཇམ་དཔལ་འདུས་པའི་རྒྱུད་ལས། སྔགས་བཟླས་པའི་ལེའུ་སྟེ་བཅུ་གཅིག་པའོ།། །།སྨོན་ལམ་གདབ་ཏུ་མེད་པ་ནི། །ཐམས་ཅད་ཡང་ཏི་ནག་པོ་ལ། །ཤིས་པའི་ཡུལ་བརྗོད་ག་ལ་ཡོད། །ཐམས་ཅད་བཀྲ་ཤིས་ཆེན་པོ་ཡིན། །ཡེ་ནས་ཤིས་པའི་འདུག་ཚུལ་ལ། །ད་གདོད་ཤིས་པ་བརྗོད་མི་དགོས། །ཡེ་ནས་ལྷུན་གྲུབ་ཆོས་སྐུ་ལ། །ད་ལྟ་སྨོན་ལམ་གདབ་ཏུ་མེད། །ཡིན་ཕྱིར་སྨོན་ལམ་གདབ་མི་དགོས། །མིན་པར་བཏབ་པས་དགོས་པ་མེད། །ཅི་སྟེ་ནམ་མཁའི་མེ་ཏོག་འདྲ། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། སྨོན་ལམ་དང་ཤིས་པ་བརྗོད་མེད་བསྟན་པའི་ལེའུ་སྟེ་བཅུ་གཉིས་པའོ།། །།ཚུལ་ཁྲིམས་བསྲུང་དུ་མེད་པའི་དོན་བསྟན་པ། །ཚུལ་ཁྲིམས་དུས་རྣམས་ཐམས་ཅད་དུ། །མ་བསྲུངས་མ་ཉམས་ཡེ་ནས་བསྲུངས། །ཡེ་བསྲུངས་གདེང་དང་ལྡན་པ་ལ། །དེ་བསྲུང་ཞེས་ནི་གང་འཆད་པ། །དེ་ནི་ཉན་ཐོས་ ― DNG002_Page_0397 ―
[མ་དཔེ་གཟིགས་ན་འདིར་གནོན།]
སྡེ་བར་གོལ། །ཡང་ཏི་ནག་པོའི་ཚུལ་ཁྲིམས་ནི། །ལྷུན་གྲུབ་ཐིག་ལེ་ཆོས་སྐུ་ལ། །བསྲུང་དུ་མེད་སྣང་མེད་པའི་ཕྱིར། །ཐམས་ཅད་ཡེ་བསྲུངས་ཆེན་པོར་འདུས། །དེ་ནི་ཚུལ་ཁྲིམས་ཆེན་པོ་ཡིན། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། ཚུལ་ཁྲིམས་དང་དམ་ཚིག་བསྲུང་བའི་ལེའུ་སྟེ་བཅུ་གསུམ་པའོ།། །།སྦྱིན་པ་མེད་པར་བསྟན་པ་ནི། །སྦྱིན་པ་ཀུན་གྱི་རྩ་བ་ནི། །སྣང་བ་འོད་གསལ་དོན་རྟོགས་པས། །ལོངས་སྐུའི་སྦྱིན་པ་ཆེན་པོ་ཐོངས། །རིག་པ་རང་བྱུང་སྤྲུལ་སྐུ་ལ། །སྦྱིན་པ་ལེན་པའི་ཡུལ་ཀྱང་རྫོགས། །སྣང་བ་མེད་པའི་ཆོས་སྐུ་ལ། །རང་གི་རིག་པའི་སྦྱིན་པ་རྫོགས། །སྣང་བྱ་སྣང་བྱེད་གཉིས་མེད་ཅིང་། །གཏང་བྱ་གཏོང་བྱེད་གཉིས་མེད་པས། །ཡང་ཏི་ནག་པོའི་སྦྱིན་པ་རྫོགས། །གྲགས་སྣང་གཞན་གྱི་སྦྱིན་པ་རྫོགས། །ཡུལ་དང་ཡུལ་ཅན་སྦྱིན་པ་གཏང་། །གཉིས་མེད་གཉིས་སུ་བཏང་བས་གོལ། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། སྦྱིན་པ་ཡོངས་སུ་གཏོང་བར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །དངོས་པོའི་གནས་ལས་བྱུང་བ་ཡི། །ཡང་ཏི་ནག་པོའི་དོན་རྫོགས་ཀྱང་། །སེམས་ཅན་དབང་པོ་དམན་པ་དང་། །ངང་གིས་ཤེས་རབ་ཆུང་བ་དག །གྲོལ་བའི་ཐབས་ཆེན་བསྟན་དུ་གསོལ། །ཞེས་ཞུས་སོ། །ཀུན་ཏུ་བཟང་པོས་བཀའ་སྩལ་པ། །སེམས་ཅན་དབང་པོ་ཞན་པ་ལ། །ངོ་སྤྲོད་བཞི་ཡང་སྐྱོར་དུ་ཆུག་ངོ་སྤྲོད་དང་པོ་ཡོད་དམ ། འཁྲུལ་པའི་རྩ་བ་གཏིང་ནས་ཐོན། །ལྷག་མཐོང་རིག་པའི་འཁོར་ལོ་བསྐོར། །དེ་ནི་ངོ་སྤྲོད་གཉིས་པའོ་ངོ་སྤྲོད་གསུམ་པ་ཡོད་དམ ། །ཡིད་ཕུང་ཐག་པ་ནག་པོ་རྩད་ནས་ཆོད། །རིག་པ་གོས་དང་དབྲལ་བའོ། །དེ་ནི་ངོ་སྤྲོད་བཞི་པའོ། །ཡང་ནི་བར་དོའི་རྐྱེན་གསུམ་བསྟན། །སྣང་བ་ངོ་སྤྲོད་བླ་མའི་ངག །རིག་པ་གཅེར་བུར་བཟུང་བ་དང་། །རིག་པ་གོས་དང་དབྲལ་བ་དང་། །གཟུང་འཛིན་ཞགས་པ་བཅད་པའོ། །འབྲིང་དང་ཐ་མའི་མན་ངག་གོ། །རབ་ཀྱི་དཔེ་ཡང་རྣམ་ འཕགས་པ་སྤྱན་རས་གཟིགས་ཏིང་འཛིན་རྩེ་གཅིག་གི་རྒྱུད་ཅེས་བྱ་བ།― DNG002_Page_0398 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤྭ་ར་ས་མཱ་དྷྱེ་ཀ་ཏནྟྲ་ནཱ་མ། བོད་སྐད་དུ། འཕགས་པ་སྤྱན་རས་གཟིགས་ཏིང་འཛིན་རྩེ་གཅིག་གི་རྒྱུད་ཅེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དཔལ་ཀུན་ཏུ་བཟང་པོ། སྤྱན་རས་གཟིགས་སེང་གེ་རྣམ་པར་རྩེ་བ་དང་མཁའ་འགྲོ་རྣམས་ཀྱིས་རབ་ཏུ་བསྐོར། རང་བྱུང་བྱིན་རླབས་སྟོན་པའི་དུས་བྱིན་གྱིས་རླབས་ཀྱི་ཡེ་ཤེས་ཤར་བའི་ཚེ། ― DNG002_Page_0399 ―
[མ་དཔེ་གཟིགས་ན་འདིར་གནོན།]
བསྟན་པ་རང་སྣང་ཤུགས་ཆོད་ལ། །ཏིང་འཛིན་རྩེ་གཅིག་བརྒྱུད་པའོ། །དེ་ནས་མཁའ་འགྲོ་ཉི་མའི་ཕྲེང་བ་ཡིས། །ཆོས་ཉིད་བརྡལ་བའི་ཕོ་བྲང་དུ། །བཅོམ་ལྡན་ཀུན་ཏུ་བཟང་པོ་ལ། །བལྟ་བ་རྐྱེན་ཐུབ་ཇི་ལྟར་ལགས། །བསམ་གཏན་རྐྱེན་ཐུབ་ཇི་ལྟར་ལགས། །སྤྱོད་པ་རྐྱེན་ཐུབ་ཇི་ལྟར་ལགས། །གཉིད་ལོག་རྐྱེན་ཐུབ་ཇི་ལྟར་ལགས། །རྨི་ལམ་རྐྱེན་ཐུབ་ཇི་ལྟར་ལགས། །བར་དོ་རྐྱེན་ཐུབ་ཇི་ལྟར་ལགས། །ཡེ་ཤེས་རྐྱེན་ཐུབ་ཇི་ལྟར་ལགས། །འབྲས་བུ་རྐྱེན་ཐུབ་ཇི་ལྟར་ལགས། །བག་ཆགས་རྐྱེན་ཐུབ་ཇི་ལྟར་ལགས། །འཁྲུལ་པ་རྐྱེན་ཐུབ་ཇི་ལྟར་ལགས། །ཞེས་ཞུས་པས། སྟོན་པས་བཀའ་སྩལ་པ། ཉོན་ཅིག་མཁའ་འགྲོ་ཉི་མའི་ཕྲེང་། །ང་ཡིས་ཁྱོད་ལ་བསྟན་པར་བྱ། །ཞེས་གསུངས་སོ། །ཏིང་ངེ་འཛིན་རྩེ་གཅིག་གི་རྒྱུད་ལས། ཞུས་པ་དང་ལན་གནང་བའི་ལེའུ་སྟེ་དང་པོའོ།། །།ཀུན་ཏུ་བཟང་པོས་བཀའ་སྩལ་པ། །ཉོན་ཅིག་རྡོ་རྗེ་མཁའ་འགྲོ་མ། །ལྟ་བ་རྐྱེན་ཐུབ་མི་ཐུབ་གཉིས། །རྐྱེན་ཐུབ་འདི་ལྟར་ཤེས་པར་གྱིས། །རང་སྣང་ཐིག་ལེའི་ཀློང་ཆེན་ལ། །རྒྱུ་མེད་པ་ལ་རྐྱེན་མེད་པས། །ཕྱི་ནང་མེད་པར་ལྟ་བའི་གདེང་། །ཟང་ཐལ་ཤར་བས་གཉེན་པོ་མེད། །སྐྱེ་མེད་རྡོ་རྗེ་རང་སྣང་བ། །གཉེན་པོས་ཆོམས་པའི་སྐབས་མེད་པས། །ལྟ་བ་ཀློང་ཆེན་རྩོལ་བསྒྲུབ་གྲོལ། །ཡེ་གྲོལ་ཐིག་ལེ་རང་ལ་ཤར། །མ་བྱས་རང་སྒོ་ལྟ་བའི་མཆོག །རྐྱེན་མེད་རྣམ་དག་འུབ་ཆུབ་ཀློང་། །ཕྱི་ནང་མེད་པས་མན་ཤེལ་འདྲ། །དཔེ་ཟླ་མེད་པས་ནམ་མཁའ་འདྲ། །རྒྱུ་རྐྱེན་མེད་པས་ཉི་མ་འདྲ། །ཐམས་ཅད་རྫོགས་པས་ནོར་བུ་འདྲ། །ལྟ་བ་ལྐོག་འགྱུར་སྟོང་ཉིད་མཁན། །ད་ལྟ་སྦྱངས་ནས་ཕྱི་དུས་འདེབས། །སངས་རྒྱས་ཕྱི་དུས་མཁན་པོ་དེ། །ལྟ་བ་རྐྱེན་ཁར་ཤོར་བ་ཡིན། །རྐྱེན་ཐུབ་རྐྱེན་ཉིད་ལས་གྲོལ་བ། །གཉིས་མེད་ལྟ་བ་རང་ལ་སྣང་། །དེ་ནི་ལྟ་བ་རྐྱེན་ཐུབ་ཡིན། །ཞེས་གསུངས་སོ། །ཏིང་ངེ་འཛིན་རྩེ་གཅིག་གི་རྒྱུད་ལས། ལྟ་བ་རྐྱེན་མེད་ངོ་སྤྲོད་ཀྱི་ལེའུ་སྟེ་གཉིས་པའོ།། །། ― DNG002_Page_0400 ―
[མ་དཔེ་གཟིགས་ན་འདིར་གནོན།]
བཅོམ་ལྡན་ཀུན་ཏུ་བཟང་པོ་ཡིས། །རྡོ་རྗེ་མཁའ་འགྲོའི་ཚོགས་རྣམས་ལ། །བསམ་གཏན་རྐྱེན་ཐུབ་བསྟན་པ་ནི། །བསམ་གཏན་ཆེན་པོ་ཐུན་གཅིག་པོ། །བསམ་གཏན་རང་སྒོ་བྱིང་རྨུགས་སེལ། །རང་བྱུང་ཉམས་ལས་གྲོལ་བ་ཡིན། །རྩེ་གཅིག་ཡེ་ཤེས་ཉམས་ལས་གྲོལ། །ཉམས་མྱོང་བག་ཆགས་ཕྲག་དོག་ཆུང་། །ཕྲ་མོའི་རྟོག་པ་རང་སར་དག །ཡེངས་པ་མེད་པ་རིག་པའི་གནད། །བྱིང་རྨུགས་རྒོད་དང་འཕྲོ་བ་རྣམས། །དགུག་པ་བསེང་བར་བྱ་མི་དགོས། །ཡེ་ཤེས་རང་ཤར་བྱིང་རྒོད་ཀྱང་། །རང་གྲོལ་འུབ་ཆུབ་རྩེ་མོར་ཕྱིན། །ཐུན་ཚད་གཟུང་དུ་གཅིག་པོར་འདུས། །ཉག་གཅིག་རྟོགས་བསྒོམ་ཉམས་ལས་འདས། །ཡེ་ཤེས་བསྒོམ་པ་མ་ཡིན་ཏེ། །ཡེ་ཤེས་བསྒོམ་དུ་བློ་སྣང་མེད། །བློ་སྣང་བསྒོམས་པས་རྐྱེན་མི་ཐུབ། །ངོ་བོ་བློ་སྣང་རང་སྒོ་དེ། །ཡེ་ཤེས་རང་ཤར་ཏིང་འཛིན་རྐྱེན་ཐུབ་ཡིན། །ཞེས་གསུངས་སོ། །ཏིང་ངེ་འཛིན་རྩེ་གཅིག་གི་རྒྱུད་ལས། རྩེ་གཅིག་རང་སྒོའི་ལེའུ་མཐའ་གྲོལ་རྐྱེན་ཐུབ་ཀྱི་ལེའུ་སྟེ་གསུམ་པའོ།། །།བཅོམ་ལྡན་ཀུན་ཏུ་བཟང་པོ་ཡིས། །རྡོ་རྗེ་མཁའ་འགྲོ་འཁོར་བཅས་ལ། །སྤྱོད་པ་རྐྱེན་ཐུབ་བསྟན་པ་ནི། །རང་བྱུང་ཤུགས་བྱུང་སྤྱོད་པ་ནི། །སྣང་སྲིད་ཐུག་ཕྲད་ཤེས་པ་ནི། །ཤེས་རབ་ཐབས་ཀྱི་སྤྱོད་པ་སྟེ། །བྱས་སྤྱོད་མ་ཡིན་རང་ཤར་ལ། །བཟང་རྟོག་ངན་རྟོག་ཚོགས་སུ་སྤྱོད། །སྤྱོད་མེད་རང་ཤར་འུབ་ཆུབ་དང་། །མཉམ་པར་ཤེས་པས་ཡུལ་མེད་དེ། །སྤྱོད་པ་སྤང་ལེན་རྐྱེན་མི་ཐུབ། །དུག་ལྔ་རང་ཤར་བདེ་བར་སྤྱོད། །རང་བྱུང་གྲོགས་སུ་ཤར་བས་རྐྱེན་རྣམས་ཐུབ། །སྣང་བ་འོད་གསལ་ཕྱི་ཡི་རྐྱེན་ཐུབ་ཡིན། །ཚོགས་དྲུག་རང་དག་ནང་གི་རྐྱེན་ཐུབ་ཡིན། །འགྱུ་བ་དྭངས་སངས་གསང་བའི་རྐྱེན་ཐུབ་ཡིན། །རོལ་པ་རང་གྲོལ་ངོ་བོའི་རྐྱེན་ཐུབ་ཡིན། །ཞེས་གསུངས་སོ། །ཏིང་ངེ་འཛིན་རྩེ་གཅིག་གི་རྒྱུད་ལས། སྤྱོད་པ་རྐྱེན་ཐུབ་ཀྱི་ལེའུ་སྟེ་བཞི་པའོ།། །།བཅོམ་ལྡན་ཀུན་ཏུ་བཟང་པོ་ཡིས། །གཉིད་ལོག་རྐྱེན་ཐུབ་བསྟན་པ་ནི། །ཉོན་ཅིག་རྡོ་རྗེ་མཁའ་འགྲོ་མ། །ལུང་མ་བསྟན་ ― DNG002_Page_0401 ―
[མ་དཔེ་གཟིགས་ན་འདིར་གནོན།]
གྱི་གཉིད་དང་ནི། །དེ་ཉིད་གཉིད་ཀྱི་རྩ་བའོ། །རྩ་བའི་གཉིད་ནི་འདི་ལྟ་སྟེ། །ཐོག་མར་རང་ལུས་གྲུབ་ཙ་ན། །མཛོད་སྤུའི་སྒོ་རུ་བག་ཆགས་གཉིད། །མ་ཡི་ཤེས་རབ་དེ་ཡིས་རྩར། །འགྱུ་བའི་ཤེས་པ་བྱིང་བར་བྱེད། །གཉིད་ཀྱི་གདམས་པ་དེ་ལྟར་ཤེས། །གཉིད་ལོག་རྟོག་པ་མེད་པ་ཡི། །ལྷུན་གྱིས་གྲུབ་པའི་སྤྱན་ཡིན་པས། །གཉིད་དེ་ཐིག་ལེའི་ཀློང་དུ་གྲོལ། །ཐིག་ལེ་སྟོང་པར་ངོ་སྤྲད་ན། །གཉིད་ལོག་རྐྱེན་ཐུབ་ཞེས་བྱའོ། །ལུང་མ་བསྟན་གྱི་གཉིད་དག་ནི། །གཏི་མུག་མ་རྟོགས་ཤེས་པ་བག་ལ་ཞ། །ཡེ་ཤེས་མ་ཤར་འཁྲུལ་པར་མི་སྣང་བས། །ལུང་དུ་མ་བསྟན་རང་གྲོལ་མ་ཤེས་པས། །གཉིད་ལོག་ལམ་བྱུང་རྨིས་པ་གསུམ། །རྨི་བ་འཁྲུལ་པ་བག་ཆགས་ཡིན། །འཁྲུལ་པའི་ངོ་བོ་འགྱུ་བ་རང་ཤར་ཡིན། །གཉིད་ཀྱི་གཞི་མ་མཛོད་སྤུར་ལོག །རྩ་ཡི་རྒྱལ་པོ་ཤེལ་གྱི་སྦུ་གུ་ཅན། །ཁྲག་གི་དྲོད་དང་ཐིག་ལེའི་རླུང་། །དེ་གསུམ་འདུས་པ་གཉིད་ཀྱི་རྒྱུ། །རྩ་དེ་སྙིང་ལ་ཟུག་པས་ན། །ངོ་བོ་རང་བཞིན་ཐུགས་རྗེ་ཡི། །འཁྲུལ་པའི་ངོ་བོ་འགྱུ་བ་རང་ཤར་ཡིན། །འགྱུ་བའི་གསང་ལམ་འགྱུས་ནས་ནི། །མཛོད་སྤུར་གཉིད་ནི་ཕེབས་པ་ནི། །སྙིང་སྨད་ཁྲག་གི་རྩ་དང་ནི། །སྙིང་སྟོད་ཐིག་ལེའི་རྩ་དང་ནི། །དབུས་ན་རླུང་གི་རྩ་གསུམ་གནས། །ཁྲག་གི་རྩ་ཡིས་རླུང་རྩ་མནན། །ཐིག་ལེའི་སྟེང་དུ་འགྱུ་བ་ལོག །བསམ་གཏན་རང་ས་རྩ་རླུང་མནན། །ཤེས་རབ་ཡེ་ཤེས་རླུང་དུ་ངོ་སྤྲད་པས། །གཉིས་མེད་ཐིག་ལེ་རང་གྲོལ་ནས། །གཉིད་ལོག་རྐྱེན་ཐུབ་ཞེས་བྱའོ། །ཞེས་གསུངས་སོ། །བསམ་གཏན་རྩེ་གཅིག་གི་རྒྱུད་ལས། གཉིད་ཐིག་ལེ་རང་སྣང་གི་ལེའུ་སྟེ་ལྔ་པའོ།། །།བཅོམ་ལྡན་ཀུན་ཏུ་བཟང་པོ་ཡིས། །རྨི་ལམ་རྨིས་པ་རྐྱེན་ཐུབ་བསྟན་པ་ནི། །ཉོན་ཅིག་རྡོ་རྗེ་མཁའ་འགྲོ་མ། །ལམ་ནི་མཛོད་སྤུ་གསང་སྒོ་ཡིན། །ཤེས་རབ་ཡེ་ཤེས་རླུང་གི་ལམ་མི་སྣང་། །རྨི་བ་རྣམ་པ་བཞི་ཡིན་ཏེ། །བག་ཆགས་གཉིད་ནི་མཐུན་པའི་རྨི་ལམ་ཡིན། །འཁྲུལ་པའི་གཉིད་ནི་དང་པོའི་དུས་ནས་ལྡང་། །མཚམས་སྦྱོར་ཚེ་སྔའི་གཉིད་རྨིའོ། །ཡེ་ཤེས་གཉིད་ཀྱི་ངོ་སྤྲོད་རྐྱེན་ཐུབ་པ། །འཁྲུལ་པའི་གཉིད་ནི་ཡེ་ཤེས་རླུང་གིས་གྲོལ། །མཚམས་སྦྱོར་ཚེ་སྔའི་རྨི་བས་གྲོལ། །བག་ནི་རྨིས་པ་རང་བྱུང་ཡེ་ཤེས་ཀྱི། །ཆགས་པ་རང་ ― DNG002_Page_0402 ―
[མ་དཔེ་གཟིགས་ན་འདིར་གནོན།]
བྱུང་ཆེན་པོར་སྤྲོད། །ཡེ་ཤེས་རྨིས་པ་རང་བྱུང་རླུང་དང་སྤྲོད། །ཤེས་རབ་རླུང་སྟེ་ཡེ་ཤེས་ཟང་ཐལ་རླུང་། །བག་ནི་ཐིག་ལེ་དཀར་དམར་རོ། །ཆགས་པ་འགྱུ་བའི་ཐིག་ལེ་ལ། །དེ་ནས་རང་བྱུང་རྐྱེན་ལས་གྲོལ། །ཞེས་གསུངས་སོ། །བསམ་གཏན་རྩེ་གཅིག་གི་རྒྱུད་ལས། རྨི་ལམ་རྨིས་པ་རྐྱེན་ཐུབ་པའི་ལེའུ་སྟེ་དྲུག་པའོ།། །།བཅོམ་ལྡན་ཀུན་ཏུ་བཟང་པོ་ཡིས། །བར་དོ་རྐྱེན་ཐུབ་བསྟན་པ་ནི། །ཉོན་ཅིག་རྡོ་རྗེ་མཁའ་འགྲོ་མ། །དྲན་པ་བཞི་པོ་རྐྱེན་ཐུབ་ལ། །མངོན་ཤེས་དྲུག་ལྡན་རྗེས་དྲན་དྲུག །བར་མ་དོ་ཡི་འོད་སྣང་དེ། །རང་འོད་རང་སྣང་རྐྱེན་ཐུབ་ཡིན། །འགྱུ་བ་ཡེ་ཤེས་རླུང་ཡིན་པས། །ཡེ་ཤེས་རྐྱེན་ཐུབ་ཞེས་ཀྱང་བྱ། །ཡིད་འཇུག་ཤེས་རབ་ངོ་སྤྲད་པས། །ངོ་སྤྲོད་རྐྱེན་ཐུབ་ཞེས་ཀྱང་བྱ། །བར་དོ་ཡིན་པ་དྲན་པ་དང་། །ཚེ་འཕོས་པ་ནི་དྲན་པ་དང་། །འགྲོ་དྲུག་རང་སྣང་དྲན་པ་དང་། །ཀུན་བཟང་རང་ས་དྲན་པའོ། །མངོན་ཤེས་དྲུག་ནི་འདི་ལྟ་སྟེ། །འགྱུ་བའི་སྤྱན་གྱིས་སྔ་ཕྱི་མཐོང་། །བར་དོ་འོད་ཀྱི་སྣང་བ་མཐོང་། །དགེ་སྡིག་ལས་ཀྱི་འབྲས་བུ་མཐོང་། །ངོ་སྤྲོད་སངས་རྒྱས་ས་ཡང་མཐོང་། །རིགས་མཐུན་དག་པའི་ལྷ་མི་མཐོང་། །འབྱུང་པོ་མི་མིན་འཇིག་རྟེན་མཐོང་། །སྤྱིར་ནི་འགྲོ་དྲུག་ལོངས་སྐུར་མཐོང་། །རྗེས་དྲན་དྲུག་ནི་འདི་སྟ་སྟེ། །རྣམ་པར་ཤེས་པ་འགག་པར་དྲན། །འབྱུང་བ་ལྔ་པོ་ནུབ་པར་དྲན། །རང་གི་སྲོག་དབུགས་སྡུད་ཆད་དྲན། །བར་དོ་ལུས་པོ་མེད་པ་དྲན། །འགྱུ་བ་སྲོག་རྟེན་མེད་པ་དྲན། །བླ་མའི་ངོ་སྤྲོད་གདམས་པ་དྲན། །དྲན་པ་དྲུག་པོ་རང་སྣང་བས། །སངས་རྒྱས་ས་ལས་མི་འདའ་བས། །བར་དོ་རྐྱེན་ཐུབ་ཅེས་བསྟན་ནོ། །ཞེས་གསུངས་སོ། །རྩེ་གཅིག་ཟང་ཐལ་གྱི་རྒྱུད་ལས། རྨི་ལམ་རྨིས་པ་རྐྱེན་ཐུབ་དང་བར་དོ་སྦྱར་བ་རྐྱེན་ཐུབ་ཀྱི་ལེའུ་སྟེ་བདུན་པའོ།། །།བཅོམ་ལྡན་ཀུན་ཏུ་བཟང་པོ་ཡིས། །རྡོ་རྗེ་མཁའ་འགྲོ་འཁོར་བཅས་ལ། །ཡེ་ཤེས་རྐྱེན་ཐུབ་བསྟན་པ་ནི། །ཡེ་ཤེས་ཡེ་ཤེས་ཁྱད་པར་ཆེ། །ཡེ་ཤེས་ཟང་ཐལ་རྐྱེན་མེད་དེ། །འབྱུང་བ་ལྔ་པོ་ཡེ་ཤེས་ལྔ། །ཆགས་སྡང་མེད་པས་ཡེ་ཤེས་འཇིག །གནས་དང་སྟོང་པའི་རྐྱེན་ཐུབ་ཡིན། །ཕུང་པོ་སྒོ་ལྔ་ཡེ་ཤེས་ལྔ། །རང་བྱུང་ཡེ་ཤེས་ཁོ་ན་ ― DNG002_Page_0403 ―
[མ་དཔེ་གཟིགས་ན་འདིར་གནོན།]
ལ། །སྐྱེ་རྒ་ན་འཆི་བཞི་པོ་ལ། །རྐྱེན་ཐུབ་བར་དོར་གདོད་ནས་དག །དུག་ལྔ་ཡེ་ཤེས་ལྔ་རུ་སྣང་། །རང་སྣང་ཡེ་ཤེས་འཕེལ་འགྲིབ་མེད། །ཆགས་སྡང་རྐྱེན་ཐུབ་རང་སྣང་གསལ། །རང་བྱུང་རྩ་ལྔ་ཡེ་ཤེས་ལྔ། །ཁ་དོག་ལྔ་ལས་གྲུབ་པའི་རྩ། །དབུས་མཐིང་གཡས་དཀར་གཡོན་དམར་བ། །མདུན་དང་རྒྱབ་ནི་སེར་དང་ལྗང་། །སྐུད་པ་ལྔ་ཡང་ཡེ་ཤེས་ལྔ། །གསལ་བྱེད་སྤྱན་ལྔས་རབ་ཏུ་མཛེས། །ཤེལ་གྱི་སྦུ་གུ་ཞེས་ཀྱང་བྱ། །ལོངས་སྐུ་འོད་གསལ་ཞེས་ཀྱང་བྱ། །ཚངས་པའི་སྐུད་པ་ཞེས་ཀྱང་བྱ། །ཡེ་ཤེས་རྒྱུ་སྲང་ཞེས་ཀྱང་བྱ། །གསང་བའི་ལམ་ཆེན་དེ་ཡིན་ནོ། །དེ་ཡི་ནང་ན་འདས་པ་ལྔ། །མུ་ཏིག་དཀར་པོ་དྲི་མ་མེད། །རཱ་ག་དམར་པོ་ཤིན་ཏུ་དྭངས། །གསེར་འདྲ་སེར་པོ་ཡོན་ཏན་རྒྱས། །བཻ་ཌཱུར་མཐིང་ག་འགྱུར་མེད་སྟོན། །ནཱི་ལ་ལྗང་གུ་རབ་ཏུ་འཕྲོ། །ཚངས་པའི་སྐུད་པའི་ནང་ན་གསལ། །རིན་ཆེན་སྣ་ལྔ་ལས་གྲུབ་པའི། །ཡེ་ཤེས་ཁོ་ན་ཆོས་མིན་ཏེ། །གསང་བའི་ཡེ་ཤེས་རྐྱེན་ཐུབ་ཡིན། །བར་ཆད་མེད་པས་རྒྱུན་མི་འཆད། །བྱེད་པས་མ་བྱས་འདུས་བྱས་མིན། །ཡེ་ཤེས་ཆད་མེད་རྐྱེན་ཐུབ་པོ། །རྐྱེན་མེད་ཡེ་ཤེས་རང་སྣང་གཅེས། །ཞེས་གསུངས་སོ། །ཏིང་ངེ་འཛིན་རྩེ་གཅིག་གི་རྒྱུད་ལས། ཡེ་ཤེས་རྐྱེན་ཐུབ་ཀྱི་ལེའུ་སྟེ་བརྒྱད་པའོ།། །།བཅོམ་ལྡན་ཀུན་ཏུ་བཟང་པོ་ཡིས། །མཁའ་འགྲོ་མ་ཡི་ཚོགས་རྣམས་ལ། །ངེས་ཤེས་རྐྱེན་ཐུབ་བསྟན་པ་ནི། །གཞི་ངེས་སངས་རྒྱས་གཞི་རུ་ཤེས། །ལམ་ངེས་གཞི་ཤེས་ཆོས་ཀྱི་མཆོག །འབྲས་བུ་གཞི་འདས་ངོ་ཤེས་ཕྱིར་མི་ལྡོག །རྒྱུ་མེད་རང་ཤར་ངེས་ཤེས་རང་བྱུང་བ། །ལྟ་བ་རང་བལྟ་སྣང་སྲིད་ངེས་ཤེས་བརྟས། །བསྒོམ་པ་རང་ཤར་ངེས་ཤེས་ཕྱོགས་རིས་མེད། །སྤྱོད་པ་ངེས་ཤེས་རང་བྱུང་རྒྱུ་རྐྱེན་མེད། །འབྲས་བུ་ངེས་ཤེས་མི་ལྡོག་རང་ས་ནོན། །སྐྱེ་མེད་ངེས་ཤེས་སྣང་སྲིད་རང་བྱུང་བས། །རང་བྱུང་ཡེ་ཤེས་རང་ལ་ཤར། །མ་རིག་རང་བྱུང་གཟུང་འཛིན་ཁོ་ནར་འཆར། །གཞི་རུ་ངེས་ཤེས་གཉིས་མེད་ཟང་ཐལ་ཡིན། །ལམ་དུ་ངེས་ཤེས་གཟུང་འཛིན་ལམ་དུ་སློངས། །འབྲས་བུ་ངེས་ཤེས་གཟུང་འཛིན་ཡེ་ཤེས་གྲོལ། །ཡེ་ཤེས་རྐྱེན་ཐུབ་གཟུང་འཛིན་ཀ་ནས་དག །ཅེས་གསུངས་སོ། །ཏིང་ ― DNG002_Page_0404 ―
[མ་དཔེ་གཟིགས་ན་འདིར་གནོན།]
ངེ་འཛིན་རྩེ་གཅིག་གི་རྒྱུད་ལས། ངེས་ཤེས་རྐྱེན་ཐུབ་ཀྱི་ལེའུ་སྟེ་དགུ་པའོ།། །།བཅོམ་ལྡན་ཀུན་ཏུ་བཟང་པོ་ཡིས། །རྡོ་རྗེ་མཁའ་འགྲོ་འཁོར་བཅས་ལ། །འབྲས་བུ་རྐྱེན་ཐུབ་བསྟན་པ་ནི། །ཕྱི་དང་ནང་དང་གསང་བ་གསུམ། །དེ་ལ་ཕྱི་ཡི་རྐྱེན་ཐུབ་བསྟན་པ་ནི། །ཕྱི་ཡི་འབྲས་བུ་འབྱུང་བ་ལྔ། །རང་སྣང་ལོངས་སྐུ་རྒྱུན་ཆད་མེད། །ལྷ་མོ་ལྔ་ལ་སྐྱེ་ཤི་མེད། །ཕྱི་ཡི་འབྲས་བུ་རྐྱེན་ཐུབ་ཡིན། །ནང་གི་འབྲས་བུ་ཕུང་པོ་ལྔ། །དབྱེར་མེད་ཆོས་སྐུ་རྒྱུན་ཆད་མེད། །ཡེ་ཤེས་ལྔ་ལ་སྐྱེ་ཤི་མེད། །ནང་གི་འབྲས་བུ་རྐྱེན་ཐུབ་ཡིན། །གསང་བའི་འབྲས་བུ་ཆགས་སྡང་ལྔ། །རང་བྱུང་ཡེ་ཤེས་རང་རིག་དང་། །ལྷག་མཐོང་ཉིད་དང་ཐམས་ཅད་མཁྱེན། །ཡེ་ཤེས་ལྔ་ལ་རྒྱུན་ཆད་མེད། །དེ་ནི་གསང་བའི་འབྲས་བུ་ཡིན། །ཡང་གསང་འབྲས་བུ་རྩ་ལྔ་ལ། །རླུང་དང་ཐིག་ལེ་རྩ་དང་ནི། །ལྷན་ཅིག་སྐྱེས་པའི་ཡེ་ཤེས་དང་། །ཐིག་ལེ་ཆོས་ཉིད་འདུ་འབྲལ་མེད། །འདུ་འབྲལ་འབྲས་བུའི་རྐྱེན་ཐུབ་ཡིན། །འདུ་འབྲལ་མེད་པ་འབྲས་བུའི་མཆོག །རྒྱུན་ཆད་མེད་པས་རྐྱེན་ཐུབ་ཡིན། །བར་ཆད་མེད་ན་འབྲས་བུའི་རྒྱལ་པོ་ཡིན། །ཕྱིར་མི་ལྡོག་ན་འབྲས་བུའི་ངེས་ཤེས་ཡིན། །ཞེས་གསུངས་སོ། །ཏིང་ངེ་འཛིན་རྩེ་གཅིག་གི་རྒྱུད་ལས། འབྲས་བུ་རྐྱེན་ཐུབ་ཀྱི་ལེའུ་སྟེ་བཅུ་པའོ།། །།དེ་ནས་ཀུན་ཏུ་བཟང་པོ་ཡིས། །བག་ཆགས་རྐྱེན་ཐུབ་བསྟན་པ་ནི། །བག་ཆགས་རྣམ་པ་གསུམ་ཡིན་ཏེ། །ཐོག་མའི་འོད་ཀྱི་བག་ཆགས་དང་། །བར་དུ་ལུས་ཀྱི་བག་ཆགས་དང་། །ཐ་མ་འཁྲུལ་པའི་གནས་སྐབས་བག་ཆགས་གསུམ། །ཐོག་མ་འོད་ཀྱི་བག་ཆགས་དེ་ལ་ནི། །རང་བྱུང་རང་ལ་ཤར་བས་རྐྱེན་ཐུབ་བོ། །འགྱུ་བ་ཡེ་ཤེས་གསལ་བ་བག་རྐྱེན་ཐུབ། །བར་དུ་ལུས་ཀྱི་བག་དང་ཆགས། །རང་ལུས་ཆོས་སྐུ་བག་རྐྱེན་ཐུབ། །ཆགས་པ་རང་བྱུང་ཤེས་པས་ཆགས་རྐྱེན་ཐུབ། ཐ་མ་འཁྲུལ་པ་གནས་སྐབས་ཆོས། །ཆོས་ཉིད་ཡེ་ཤེས་འབར་བས་བག་རྐྱེན་ཐུབ། །རང་རྐྱེན་རང་ལ་ཤར་བས་ཆགས་པ་མེད། །གཉིས་མེད་རང་ལ་ཤར་བས་བག་རྐྱེན་ཐུབ། །བག་ཆགས་རྐྱེན་ཁར་མི་སྣང་རང་བྱུང་ཡེ་ཤེས་གསལ། །བག་ཆགས་ ― DNG002_Page_0405 ―
[མ་དཔེ་གཟིགས་ན་འདིར་གནོན།]
རྐྱེན་ཐུབ་སྲིད་པ་རང་བྱུང་སེལ། །ཞེས་གསུངས་སོ། །ཏིང་ངེ་འཛིན་རྩེ་གཅིག་གི་རྒྱུད་ལས། འབྲས་བུ་རྐྱེན་ཐུབ་ཀྱི་ལེའུ་སྟེ་བཅུ་གཅིག་པའོ།། །།བཅོམ་ལྡན་ཀུན་ཏུ་བཟང་པོ་ཡིས། །འཁྲུལ་པ་རྐྱེན་ཐུབ་བསྟན་པ་ནི། །ཐོག་མ་འཁྲུལ་པ་རླུང་གིས་འཁྲུལ། །བར་དུ་འཁྲུལ་པ་ཆགས་སྡང་འཁྲུལ། །ཐ་མ་རང་སྣང་འོད་ལ་འཁྲུལ། །ལྷུན་གྲུབ་མ་ནིང་འཁྲུལ་པའི་རླུང་། །རླུང་གིས་ཐམས་ཅད་གྲུབ་པ་ཡིན། །འབྲས་བུ་འཁྲུལ་པ་སྣ་ཚོགས་སྨིན། །རླུང་དེའི་ཡེ་ཤེས་ཤེས་པ་དེ། །མི་འགག་པ་ལ་རླུང་ཞེས་བྱ། །རང་ལུས་རླུང་གི་དཀྱིལ་འཁོར་ན། །རྩ་ལྔ་ཚངས་པའི་སྐུད་པ་ལ། །རླུང་རྒྱུ་རླུང་ལ་དྲོད་ཡོད་པས། །ཚངས་པའི་སྐར་ཁུང་རླངས་པ་དེ། །ཉིན་ཞག་གཅིག་ལ་བརྒྱད་ཁྲི་བཞི་སྟོང་རྒྱུ། །ཆོས་ཉིད་མེ་ལོང་གསལ་བ་ན། །རླུང་ནི་འགག་མེད་གསལ་བར་རྒྱུ། །སྟོད་ནི་མྱ་ངན་འདས་པའི་རླུང་། །ཤེས་རབ་དག་ལ་རྒྱུ་བའོ། །སྨད་ནི་འཁོར་བ་དག་གི་རླུང་། །ཐིག་ལེ་དཀར་དམར་གཉིས་ལ་རྒྱུ། །ལྟེ་བ་རླུང་གི་འཁོར་ལོ་ན། །ངན་འགྲོ་གསུམ་གྱི་སྒོ་ཡང་ཡོད། །སྙིང་ག་ཆོས་ཀྱི་འཁོར་ལོ་ན། །མཐོ་རིས་གསུམ་གྱི་སྒོ་ཡང་ཡོད། །ཐེག་དགུ་སྒོ་དགུ་སྟོད་ན་གསུམ། །ཐེག་གསུམ་སྤྱན་གསུམ་དག་ལ་སྣང་། །ཐེག་གཅིག་མིག་གཅིག་དྲི་མ་མེད། །མཛོད་སྤུ་རང་གསལ་སྒྲོན་མེ་ཡང་། །དེ་ལ་ངོ་སྤྲོད་འཁྲུལ་པ་རྐྱེན་ཐུབ་ཡིན། །ངན་འགྲོའི་སྒོ་གསུམ་དཀར་དམར་དང་། །དྲི་ཆེན་སྒོ་རུ་བྱུང་བ་ཡིན། །དཀར་པོ་དམྱལ་བ་དམར་པོ་ཡི་དྭགས་སྒོ། །བཤང་ཁ་བྱོལ་སོང་སྒོ་ཡིན་ནོ། །ཕོ་དང་མོ་ལ་གསུམ་ཀ་ཚང་། །དུས་ཚོད་འབྱུང་བས་རང་བྱུང་ཡིན། །ཞེས་གསུངས་སོ། །སྤྱན་རས་གཟིགས་ཏིང་ངེ་འཛིན་རྩེ་གཅིག་གི་རྒྱུད་ལས་འཁྲུལ་པ་རྐྱེན་ཐུབ་ཀྱི་ལེའུ་སྟེ་བཅུ་གཉིས་པའོ།། །།སྟོན་པ་ཆོས་སྐུ་ཀུན་ཏུ་བཟང་པོའོ། །སྡུད་པ་པོ་སྤྱན་རས་གཟིགས་སེང་གེ་རྣམ་པར་རྩེ་བའོ། །ཞུ་བ་པོ་མཁའ་འགྲོ་མ་ཉི་མའི་ཕྲེང་བའོ། །སྤྱན་རས་གཟིགས་ཏིང་ངེ་འཛིན་རྩེ་གཅིག་གི་རྒྱུད་ཆེན་པོ་ཞེས་བྱ་བ་འཁོར་མཁའ་འགྲོ་མ་ལ་རབ་ཏུ་གཏད་པའི་ལེའུ་སྟེ་བཅུ་གསུམ་པའོ།། །།རྩེ་གཅིག་གི་རྒྱུད་ཆེན་པོ་ཞེས་བྱ་བ་རྫོགས་སོ།། །། སྣང་སྲིད་ཁ་སྦྱོར་བདུད་རྩི་བཅུད་ཐིགས་འཁོར་བ་ཐོག་མཐའ་གཅོད་པའི་རྒྱུད།― DNG002_Page_0406 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། རྒྱ་ཚིག་བཀྲོལ་བ། ཨཱ་ལོ་ཀ་བྷ་བ་སཾ་པུ་ཊཱ་མྲྀ་ཏ་སུར་བིནྡུ་སཾ་སཱརཱ་དྱནྟ་ཙྪེ་ད་ན་ཏནྟྲ། བོད་སྐད་དུ། སྣང་སྲིད་ཁ་སྦྱོར་བདུད་རྩི་བཅུད་ཐིགས་འཁོར་བ་ཐོག་མཐའ་གཅོད་པའི་རྒྱུད། བཅོམ་ལྡན་འདས་མཚོན་མེད་བརྗོད་ལས་འདས་པའི། སེམས་ཉིད་སྐྱེ་མེད་ཀུན་བཟང་ཀློང་ལ་ཕྱག་འཚལ་ལོ། །བརྟགས་སྣང་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བདག་གིས་གོ་ཞིང་བཤད་པའི་དུས་གཅིག་ན། འོག་མིན་གྱི་གནས་མཐའ་དང་དབུས་མེད་པའི་གཞལ་ཡས་ཁང་ན། ཆོས་ཉིད་སྟོང་ར་ཀུན་གཞི་གདལ་ཁྱབ་ཆེན་པོའི་དཀྱིལ་འཁོར་དེར། རིན་པོ་ཆེ་འོད་སྤུངས་པ་འོད་འཕྲོ་འདུ་དང་འཕེལ་འགྲིབ་མེད་པའི་གནས་དེ་ན། སྙིང་པོ་དོན་གྱི་སྐུ་གསུམ་འདི་ལྟར་བཞུགས། །བསམ་བརྗོད་བློ་ལས་འདས་པའི་མཚོན་མེད་ཆོས་སྐུ་དང་། །འགག་མེད་བསམ་ལས་འདས་པའི་ལོངས་སྤྱོད་རྫོགས་སྐུ་དང་། །ཐུགས་རྗེ་ཀུན་ཁྱབ་དྲན་མེད་སྤྲུལ་སྐུ་གསུམ། །སྟོན་པ་ཕུན་སུམ་ཚོགས་པའོ། །དེ་ཡི་དྲུང་དུ་འཁོད་པའི་འཁོར་ཡང་འདི་ལྟ་སྟེ། དོན་གྱི་འཁོར་དང་། ཡེ་ནས་གནས་པའི་འཁོར་དང་། དུས་གསུམ་གྱི་འཁོར་རོ། །དོན་གྱི་འཁོར་ནི་འདི་ལྟར་ཏེ། སེམས་ཉིད་སྐྱེ་བ་མེད་པ་ལ། །རིག་པ་འགག་པ་མེད་པའི་འཁོར་དང་། ཆོས་ཉིད་འགྱུར་བ་མེད་པ་ལ། ཡིད་འགྱུ་སྣ་ཚོགས་ཀྱི་འཁོར་དང་། སེམས་ཉིད་གཉིས་སུ་མེད་པ་ལ། གཟུང་འཛིན་གཉིས་སྣང་བརྟགས་ཞེན་གྱི་འཁོར་རོ། །ཡེ་ནས་གནས་པའི་འཁོར་ཡང་འདི་ལྟར་ཏེ། །ས་དང་ཆུ་དང་མེ་དང་རླུང་དང་ནམ་མཁའ་འོ། །དུས་གསུམ་གྱི་འཁོར་ཡང་འདི་ལྟ་སྟེ། འདས་པའི་སངས་རྒྱས་དང་། མ་འོངས་པའི་སངས་རྒྱས་དང་། ད་ལྟར་གྱི་སངས་རྒྱས་སོ། །གཞན་ཡང་འཁོར་གྱི་ཚོགས་འདི་ལྟ་སྟེ། རྗེས་ཀྱི་རྣལ་འབྱོར་དང་། ཤིན་ཏུ་རྣལ་འབྱོར་དང་། རྣལ་འབྱོར་ཆེན་པོའོ། །ཉིད་ཀྱི་རང་བཞིན་གྱི་དཀྱིལ་འཁོར་དང་། རང་བཞིན་གྱི་ལྟ་བའི་འཁོར་དང་། རང་བཞིན་གྱི་རྟོགས་པའི་འཁོར་རོ། །དེ་རྣམས་འཁོར་ཕུན་སུམ་ཚོགས་པའོ། །བསྟན་པའི་དོན་ཡང་འདི་ལྟ་སྟེ། ཡེ་ནས་མཚོན་དུ་མེད་པའི་བསྟན་པ་དང་། དེ་ལ་མཚོན་པའི་ཆོས་ཀྱི་སངས་མི་རྒྱ་བའི་བསྟན་པ་དང་། མཚན་མ་དང་མཚོན་བྱེད་གཉིས་མེད་དེ། ― DNG002_Page_0407 ―
[མ་དཔེ་གཟིགས་ན་འདིར་གནོན།]
ཚིག་དང་ཡི་གེའི་མིང་བཏགས་ལས་གྲོལ་བའི་བསྟན་པའོ། །དེ་ནི་བསྟན་པ་ཕུན་སུམ་ཚོགས་པའོ། །དུས་བསྟན་པ་ཡང་འདི་ལྟར་ཏེ། འདས་པའི་རྗེས་མི་བཅད། མ་འོངས་པའི་མདུན་མི་བསུ། ད་ལྟའི་རྐྱེན་ཁར་མ་ཤོར་ཏེ། དུས་གསུམ་དབྱེར་མེད་ཀྱི་དུས་སོ། །སྔོན་བྱུང་རྗེས་འཇུག་གདུང་སོབ་གསུམ་སྟེ། དུས་ཕུན་སུམ་ཚོགས་པའོ། །དེ་ནས་འཁོར་ཚོགས་དེའི་ནང་ནས་རྡོ་རྗེ་སེམས་དཔས་འདི་སྐད་ཞུས། ཀྱེ་ཀྱེ་ཀྱེ། སྟོན་པའི་རྒྱལ་པོ་སེམས་ཉིད་ཀུན་བཟང་ལགས། །ཕུན་སུམ་ཚོགས་པའི་དོན་ནི་དེ་ལྟར་ན། །ཐོག་མ་གཞི་ཡི་གནས་ལུགས་དང་། །སངས་རྒྱས་སེམས་ཅན་གཉིས་ཀྱི་ས་མཚམས་དང་། །ཡར་རྒྱས་མར་འཁྲུལ་གཉིས་ཀྱི་བྱེ་བྲག་དང་། །ཅིས་ལེན་ཅིས་ཕན་གཉིས་ཀྱི་གཏན་ཚིགས་དང་། །དེ་ཉིད་རྟོགས་པར་བྱེད་པའི་ཐབས་རྣམས་དང་། །རྟོགས་ནས་འབྲས་བུ་ཐོབ་ལུགས་དང་། །མི་འགྱུར་གདེང་གིས་ཟིན་ལུགས་དང་། །སྤྱི་ཏི་ཡོ་གའི་བསྟན་ལུགས་དང་། །གང་ཟག་རྗེས་འཇུག་རྣམས་ཀྱིས་རྟོགས་པའི་ཐབས། །དེ་རྣམས་སྟོན་པས་བཀའ་སྩོལ་ཅིག །བདག་ཅག་ཉན་པའི་འཁོར་རྣམས་ལ། །ཤིན་ཏུ་ཟབ་པར་གསུང་དུ་གསོལ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།ཨཱཿ། དེ་ནས་འཁོར་ནང་ནས་རྡོ་རྗེ་སེམས་དཔའ་སྟན་ལས་ལངས་ནས། པུས་བཙུགས་ཐལ་སྦྱར་འདི་སྐད་གསོལ། བཀའ་ཆེན་བཤད་ལུགས་ཅི་ལྟར་ལགས། སེམས་ཉིད་ཀུན་བཟང་གསུང་དུ་གསོལ། །ཞེས་གསོལ་པ་དང་། །སྟོན་པའི་རྒྱལ་པོ་སེམས་ཉིད་ཀུན་བཟང་གིས། །འདུས་པའི་ཚོགས་ལ་བསྟན་པའི་ཕྱིར། །རིན་ཆེན་འོད་འབར་གཞལ་ཡས་ཁང་། །དབྱིངས་ཆེན་ཆོས་ཉིད་སྟོང་ར་རུ། །ཆོས་ཐམས་ཅད་དབྱེ་བ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འདུས་པའི་ཚོགས་རྣམས་དྲུང་ན་འཁོད་པར་གཟིགས་ནས། ཏིང་ངེ་འཛིན་ལས་བཞེངས་ནས། འདི་སྐད་ཅེས་འཁོར་རྣམས་ལ་བཀའ་སྩལ་ཏོ། །ང་ཡི་སྤྱི་ཏི་ཡོ་ག་འདི། །འདུས་པའི་འཁོར་ལ་བཤད་བགྱི་ཡིས། །འཁོར་རྣམས་མ་ཡེངས་གོ་བར་ཟུང་། །སྤྱི་ཏི་ཡོ་ག་བཤད་ལུགས་འདི། ། ― DNG002_Page_0408 ―
[མ་དཔེ་གཟིགས་ན་འདིར་གནོན།]
ཐེག་པ་གཞན་ལས་འབྱུང་མི་འགྱུར། །མ་བྱུང་མི་འབྱུང་འབྱུང་མི་སྲིད། །བཀའ་ཆེན་བཤད་ལུགས་གསུམ་དུ་བཤད། །སྐྱེ་མེད་མཚན་མེད་བཤད་པ་དང་། །བླ་དགས་ཚིག་གིས་བཤད་ལུགས་དང་། །མཚོན་པའི་བརྡའ་འགྲོལ་བཤད་ལུགས་སོ། །ཐུན་མོང་བཤད་ལུགས་རྣམ་གསུམ་ནི། །བྱིན་གྱིས་བརླབས་ཀྱིས་བཤད་པ་དང་། །རང་གི་ངོ་བོས་བཤད་པ་དང་། །སྡེབ་སྦྱོར་གྱིས་བཤད་ལུགས་དང་གསུམ་མོ། །སྤྱི་ཏིའི་བཤད་ལུགས་རྣམ་གསུམ་ནི། །སྐྱེ་མེད་ཆོས་སྐུའི་བཤད་ལུགས་དང་། །འགག་མེད་ལོངས་སྐུའི་བཤད་ལུགས་དང་། །ཐུགས་རྗེ་སྤྲུལ་སྐུའི་བཤད་ལུགས་སོ། །ཕྱེ་བས་སུམ་ཅུ་དགུ་ཡིན་ཏེ། །སྤྱི་སྡོམ་སུམ་ཅུར་ཤེས་པར་བྱ། །སྐྱེ་མེད་མཚོན་མེད་བཤད་ལུགས་ནི། །མཚོན་པའི་ཆོས་ཀྱིས་སངས་མི་རྒྱ། །མཚོན་དུ་མེད་པའི་ཆོས་གཅིག་དགོས། །བཤད་པའི་ཆོས་ཀྱིས་སངས་མི་རྒྱ། །མ་བཤད་གོ་བའི་ཆོས་གཅིག་དགོས། །བསྟན་དུ་ཡོད་པས་སངས་མི་རྒྱ། །མ་བསྟན་བསྟན་མེད་ཆོས་ཤིག་དགོས། །བརྟགས་པའི་ཆོས་ཀྱི་སངས་མི་རྒྱ། །བརྟགས་སྣང་གྲོལ་བའི་ཆོས་ཤིག་དགོས། །བློས་བརྟགས་ཆོས་ཀྱིས་སངས་མི་རྒྱ། །བློ་ལས་འདས་པའི་ཆོས་ཤིག་དགོས། །བྱས་པའི་ཆོས་ཀྱིས་སངས་མི་རྒྱ། །མ་བྱས་བྱུང་བའི་ཆོས་ཤིག་དགོས། །བསྒྲུབ་པའི་ཆོས་ཀྱིས་སངས་མི་རྒྱ། །བྱར་མེད་སྤྲོས་བྲལ་ཆོས་ཤིག་དགོས། །དེ་ནི་སྐྱེ་མེད་མཚོན་མེད་བཤད་ལུགས་སོ། །བླ་དྭགས་ཚིག་གི་བཤད་ལུགས་ནི། །མཚན་ཉིད་སྡེ་གསུམ་བཤད་ལུགས་དང་། །ཀྲི་ཡོག་སྡེ་གསུམ་བཤད་ལུགས་དང་། །བསྐྱེད་རྫོགས་རྣམ་གསུམ་བཤད་ལུགས་སོ། །ཡང་ན་རྒྱུ་ཡི་བཤད་ལུགས་རྣམས། །འདི་རུ་བརྗོད་པས་མི་ལངས་ཏེ། །རང་རང་དཀྱུས་ནས་ཞིབ་པར་གསུངས། །བླ་དྭགས་ཚིག་གི་བཤད་ལུགས་སོ། །མཚོན་པའི་བརྡའ་འགྲོལ་བཤད་ལུགས་སོ། །ཨཱ་ཧོ་ཧེ་ཧེ་ཨ་ལ་ལ་ཧོ། ཤིན་ཏུ་ངོ་མཚར་ཆེ་བའི་བཀའ། །སྤྱི་ཏི་ཡོ་ག་འདི་ལྟ་བུ། །གཞན་ ― DNG002_Page_0409 ―
[མ་དཔེ་གཟིགས་ན་འདིར་གནོན།]
ན་མེད་དེ་ཨ་ལ་ལ། ང་ཡི་རང་བཞིན་འདི་ལྟར་ཏེ། །ཡོད་ནི་ཅི་ཡང་མེད་པ་སྟེ། །སྣང་ནི་ཅིར་ཡང་སྣང་བའོ། །དངོས་པོ་ཅི་ཡང་མེད་པ་སྟེ། །སྣ་ཚོགས་ཀུན་གྱི་གཞི་མ་བྱས། །མཚོན་དུ་རྡུལ་ཙམ་མེད་པ་སྟེ། །མཚོན་པ་སྣ་ཚོགས་རྩ་བ་བྱས། །ཚིག་གི་ཡུལ་དུ་མ་གྱུར་ཏེ། །ཚིག་ཚོགས་རྒྱ་མཚོའི་རྩ་བ་བྱས། །ངོས་ཟིན་བརྟགས་པ་མེད་པ་སྟེ། །བརྟགས་སྣང་ཀུན་གྱི་རྩ་བ་བྱས། །ཆགས་ཞེན་རྟེན་ས་མེད་པ་སྟེ། །ཆགས་ཞེན་ཀུན་གྱི་རྩ་བ་བྱས། །བརྗོད་པའི་ཡུལ་དུ་མ་གྱུར་ཏེ། །མིང་ཚིག་བརྗོད་གཞི་ཀུན་གྱི་རྩ་བ་བྱས། །ཐ་སྙད་གང་གིས་མ་གོས་ཏེ། །ཐ་སྙད་ཀུན་གྱི་རྩ་བ་བྱས། །སྐྱེ་ཤི་ཀུན་བྲལ་སྐྱེ་བ་སྟེ། །སྐྱེ་རྒ་ན་འཆིའི་གཞི་མ་བྱས། །བསྐྱེད་པ་ཀུན་དང་བྲལ་བ་སྟེ། །ཐམས་ཅད་བསྐྱེད་པའི་གཞི་མ་བྱས། །འབྱུང་བའི་གཞི་མ་མ་གྲུབ་སྟེ། །སྣང་སྲིད་སྐྱེ་འགུལ་འབྱུང་བའི་ཡུམ་ཆེན་བྱས། །ཕྱོགས་མཚམས་མཐའ་དབུས་ཀུན་དང་བྲལ་བ་སྟེ། །མཐའ་དབུས་ཕྱོགས་མཚམས་ཀུན་གྱིས་རྟེན་པ་བྱས། །དེ་ལ་སོགས་ཏེ་དབྱེ་ན་བསམ་ལས་འདས། །མནོ་བསམ་ཀུན་གྱི་རྩ་བ་བྱས། །བྱས་ཀྱང་དོན་གྱི་ངོ་བོ་འདི་ལྟར་ཏེ། །ཚོགས་བརྒྱད་ཡུལ་དུ་མ་གྱུར་སྙིང་པོ་ཅན། །རང་བཞིན་མི་དམིགས་བརྗོད་པ་ཀུན་དང་བྲལ། །གང་གིས་ཀྱང་ནི་མཚོན་པར་མི་ནུས་སོ། །རིན་ཆེན་འོད་འབར་རང་བཞིན་འདི་ལྟར་ཏེ། །མཚོན་དུ་ཅི་ཡང་མེད་པ་སྟེ། །བསྟན་ནི་རྣམ་པ་གཉིས་སུ་བསྟན། །བྱུང་ནི་བརྒྱད་ཁྲི་བཞི་སྟོང་བྱུང་། །འདུས་ནི་ཐེག་པ་དགུ་རུ་འདུས། །ལ་ནི་སྤྱི་ཏི་ཡོ་གར་བཟླ། །ཡིན་ནི་བྱང་ཆུབ་སེམས་ཡིན་ཏེ། །གནས་ནི་སྐྱེ་མེད་དབྱིངས་ན་གནས། །གསལ་ནི་འོད་ཀྱི་སྦུབས་ན་གསལ། །ཁྱབ་ནི་སྣང་སྲིད་ཀུན་ཏུ་ཁྱབ། །མཐོང་དུ་དངོས་པོའི་མཚན་མ་མེད། །བརྗོད་དུ་དམིགས་པའི་ཡུལ་ལས་འདས། །བསམ་དུ་བློ་ཡི་ཡུལ་ལས་འདས། །རིག་དང་རིག་ཚོར་རྩད་ནས་བཅད། །དྲན་དུ་སེམས་ཀྱི་གཞི་མ་རྙེད། །དེས་ན་མཚོན་བརྟགས་ཀུན་བྲལ་ལོ། །མཚོན་པ་ཀུན་བྲལ་བཤད་ལུགས་སོ། །སྐྱེ་མེད་དོན་གྱི་བཤད་ལུགས་ནི། །ཆོས་རྣམས་སྐྱེ་མེད་དབྱིངས་སུ་བཤད། །འགྱུར་མེད་ཆོས་སྐུའི་ངོ་བོར་བསྟན། །བརྗོད་མེད་ཀློང་དུ་བསྡིམས་ ― DNG002_Page_0410 ―
[མ་དཔེ་གཟིགས་ན་འདིར་གནོན།]
ནས་བཞག །ལོངས་སྤྱོད་རྫོགས་སྐུའི་བཤད་ལུགས་ནི། །ཆོས་རྣམས་འགག་པ་མེད་པར་བསྟན། །གདལ་ཁྱབ་འགག་མེད་ལོངས་སྐུའོ། །ལོངས་སྤྱོད་རྫོགས་སྐུའི་བཤད་ལུགས་སོ། །ཐུགས་རྗེ་སྤྲུལ་སྐུའི་བཤད་ལུགས་ནི། །སྣང་སྲིད་གཉིས་མེད་སྤྲུལ་པའི་སྐུ། །སྣ་ཚོགས་སྣང་ལ་ངོས་བཟུང་མེད། །གང་སྣང་ཡུལ་ལ་ཆགས་ཞེན་མེད། །དྲན་མེད་སྤྲུལ་སྐུའི་བཤད་ལུགས་སོ། །བྱིན་གྱིས་བརླབས་ཀྱིས་བཤད་ལུགས་ནི། །ཡེ་ཐོག་ཡེ་གནས་དབྱིངས་ནས་དབྱེར་མེད་བསྟན་པ་བཤད། །སྙིང་པོའི་ཀློང་ནས་ཀུན་ཏུ་བཟང་པོས་མཉན། །སྙིང་པོའི་ཀློང་ནས་ཀུན་ཏུ་བཟང་པོས་བཤད། །ཕྱོགས་མེད་ཀུན་གཞིའི་གནས་ནས་རྡོ་རྗེ་སེམས་དཔས་མཉན། །རྡོ་རྗེ་སེམས་དཔས་ཀུན་གཞིའི་ཀློང་ནས་བཤད། །སེམས་དཔའ་རྡོ་རྗེས་འོད་གསལ་གནས་ནས་མཉན། །སེམས་དཔའ་རྡོ་རྗེས་འོད་གང་ལ་གནས་ནས་བཤད། །རང་གསལ་ཁྱེའུ་ཆུང་གིས་འོད་ཀྱི་དབུས་ནས་མཉན། །རང་གསལ་ཁྱེའུ་ཆུང་གིས་འོད་ཀྱི་དབུས་ནས་བཤད། །ངང་དྭངས་ཆེན་པོས་ཀུན་གསལ་གནས་ནས་མཉན། །ངང་དྭངས་ཆེན་པོས་ཀུན་གསལ་ཀློང་ནས་བཤད། །དགའ་རབ་རྡོ་རྗེས་རི་རབ་རྩེ་ནས་མཉན། །དགའ་རབ་རྡོ་རྗེས་རི་རབ་རྩེ་ནས་བཤད། །འཇམ་དཔལ་བཤེས་གཉེན་རི་རབ་སྐེད་ནས་མཉན། །བསྟན་པས་གོ་བ་མ་ཡིན་ཏེ། །བྱིན་གྱི་བརླབས་ཀྱིས་གོ་བར་བཤད། །བྱིན་གྱི་རླབས་ཀྱིས་བཤད་ལུགས་སོ། །རང་གི་ངོ་བོས་བཤད་པ་ནི། །བྱང་ཆུབ་སེམས་ཀྱིས་ཡེ་ཤེས་དེ། །སྟོན་པ་ས་ཡི་སྐུར་བྱུང་ནས། །ཚིག་དང་ཡི་གེར་མི་སྟོན་ཏེ། །བདག་ཏུ་མི་རྟོག་གཞན་མི་རྟོག །མི་རྟོག་མཉམ་པའི་དགོངས་པར་སྟོན། །ཁམས་གསུམ་སེམས་ཅན་ཐམས་ཅད་ཀྱིས། །དེ་རྟོགས་སངས་རྒྱས་ཀུན་དང་མཉམ། །རྩོལ་བའི་བསམ་པས་དབྱིངས་མི་བསྐྱོད། །བྱང་ཆུབ་སེམས་ཀྱི་ཡེ་ཤེས་དེ། །སྟོན་པ་ཆུ་ཡི་སྐུར་བསྟན་ནས། །ཚིག་དང་ཡི་གེར་མི་སྟོན་ཏེ། །བདག་ཏུ་མི་འབྱེད་གཞན་མི་འབྱེད། །མི་འབྱེད་མཉམ་པའི་དགོངས་པ་སྟོན། །ཁམས་གསུམ་སེམས་ཅན་ཐམས་ཅད་ཀྱིས། །དེ་རྟོགས་ ― DNG002_Page_0411 ―
[མ་དཔེ་གཟིགས་ན་འདིར་གནོན།]
སངས་རྒྱས་ཀུན་དང་མཉམ། །རྩོལ་བའི་བསམ་པས་དབྱིངས་མི་བསྐྱོད། །བྱང་ཆུབ་སེམས་ཀྱི་ཡེ་ཤེས་དེ། །སྟོན་པ་མེ་ཡི་སྐུར་བྱུང་ནས། །བདག་ཏུ་མི་འཛིན་གཞན་མི་འཛིན། །གཟུང་འཛིན་གཉིས་མེད་དགོངས་པ་སྟོན། །ཁམས་གསུམ་སེམས་ཅན་ཐམས་ཅད་ཀྱིས། །དེ་རྟོགས་སངས་རྒྱས་ཀུན་དང་མཉམ། །རྩོལ་བའི་བསམ་པས་དབྱིངས་མི་བསྐྱོད། །བྱང་ཆུབ་སེམས་ཀྱི་ཡེ་ཤེས་དེ། །སྟོན་པ་རླུང་གི་སྐུར་བྱུང་ནས། །བདག་ཏུ་མི་བསྒྲུབ་གཞན་མི་སྤང་། །དགག་བསྒྲུབ་གཉིས་མེད་དགོངས་པ་སྟོན། །ཁམས་གསུམ་སེམས་ཅན་ཐམས་ཅད་ཀྱིས། །དེ་རྟོགས་སངས་རྒྱས་ཀུན་དང་མཉམ། །རྩོལ་བའི་བསམ་པས་དབྱིངས་མི་བསྐྱོད། །བྱང་ཆུབ་སེམས་ཀྱི་ཡེ་ཤེས་དེ། །སྟོན་པ་ནམ་མཁའི་སྐུར་བྱུང་ནས། །བཟང་པོ་མི་བསྒྲུབ་ངན་མི་འདོར། །དབྱེ་བསལ་མེད་པའི་དགོངས་པ་སྟོན། །ཁམས་གསུམ་སེམས་ཅན་ཐམས་ཅད་ཀྱིས། །དེ་རྟོགས་སངས་རྒྱས་ཀུན་དང་མཉམ། །རྩོལ་བའི་བསམ་པས་དབྱིངས་མི་བསྐྱོད། །དེ་བཞིན་སྣང་སྲིད་ཐམས་ཅད་ཀྱིས། །ཚིག་དང་ཡི་གེར་མི་སྟོན་ཏེ། །རང་རང་སྒོ་ནས་དབྱེར་མེད་ཆོས་སྟོན་ཏོ། །རང་གི་ངོ་བོའི་བཤད་ལུགས་སོ། །སྡེབ་སྦྱོར་ཚིག་གི་བཤད་ལུགས་ནི། །སྙན་ནས་སྙན་དུ་བརྒྱུད་ནས་བསྟན། །དེ་རྣམས་སྤྱི་ཏིའི་བཤད་ལུགས་སོ། །སྣང་སྲིད་ཁ་སྦྱོར་བདུད་རྩི་ཐིགས་པ་འཁོར་བ་ཐོག་མཐའ་གཅོད་པའི་རྒྱུད་ལས། གླེང་བསླང་བཤད་ལུགས་ཀྱི་ལེའུ་སྟེ་གཉིས་པའོ།། །།དེ་ནས་ཡང་སེམས་ཉིད་ཀུན་ཏུ་བཟང་པོ་ལ། རྡོ་རྗེ་སེམས་དཔས་འདི་སྐད་ཞུས། །སངས་རྒྱས་སེམས་ཅན་མ་བྱུང་བ། །དེ་ཡི་གོང་ནས་ཇི་ལྟར་གནས། །འདུས་པའི་འཁོར་ལ་གསུང་དུ་གསོལ། །ཞེས་གསོལ་པ་དང་། སེམས་ཉིད་ཀུན་ཏུ་བཟང་པོ་དེས། །རིན་ཆེན་འོད་སྤུངས་གཞལ་ཡས་ནས། །དབྱེ་བསལ་མེད་པའི་ཏིང་ངེ་འཛིན་ལ་བཞུགས། །འདུས་པའི་ཚོགས་རྣམས་འཁོད་པར་གཟིགས། །བཞེངས་ནས་སྟོན་པ་ཀུན་བཟང་གིས། །འདུས་པའི་ ― DNG002_Page_0412 ―
[མ་དཔེ་གཟིགས་ན་འདིར་གནོན།]
འཁོར་ལ་འདི་སྐད་གསུངས། །སངས་རྒྱས་སེམས་ཅན་མེད་པའི་སྔོན་རོལ་ན། །ཅི་ཡང་མ་ཡིན་ཅི་ཡང་མ་གྲུབ་པ། །ཐ་སྙད་གང་གིས་མཚོན་པར་མི་ནུས་སོ། །མིང་འདོགས་ཚིག་གི་མཐའ་ལས་གྲོལ་བ་ཡིན། །ཐོག་མ་གཞི་ལ་དབྱེར་མེད་པས། །སངས་རྒྱས་སེམས་ཅན་མིང་ཡང་མེད། །བརྡའ་དང་ཐ་སྙད་འདོགས་མཁན་མེད། །དཔེ་དང་དོན་དུ་སྟོན་མཁན་མེད། །ཚིག་དང་ཡི་གེར་འདོགས་མཁན་མེད། །བདེ་སྡུག་གཉིས་སུ་མྱོང་མཁན་མེད། །རྒྱུ་འབྲས་གཉིས་སུ་འདོགས་མཁན་མེད། །བདག་གཞན་གཉིས་སུ་འབྱེད་མཁན་མེད། །སངས་རྒྱས་སེམས་ཅན་གཉིས་མེད་གྲུབ་ཙམ་ན། །ཅིར་ཡང་མ་ཡིན་ངོ་བོར་གནས། །ཅི་ཡང་མི་སྣང་ངོ་བོར་གནས། །མཚོན་པ་བླ་དགས་ཚིག་ལས་གྲོལ། །བསམ་བརྗོད་བློ་ཡི་ཡུལ་ལས་འདས་པ་ཡིན། །ཇི་ལྟ་བུས་ཀྱང་བརྗོད་མཚན་མཐའ་ལས་འདས། །དེ་ཕྱིར་གཞི་ལ་དབྱེར་མེད་ཕྱིར། །བརྟགས་ཞེན་ཀུན་ལས་བྲལ་བར་གསུངས། །མཚོན་པའི་མཐའ་ལས་འདས་པར་གསུངས། །རྡོ་རྗེ་སེམས་དཔས་འདི་སྐད་གསོལ། །སྟོན་པ་སེམས་ཉིད་ཀུན་བཟང་ལ། །ཀུན་གཞིའི་གནས་ལུགས་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །བང་མཛོད་ཞིང་ས་དར་ཆགས་གསུམ། །གཞི་ཡི་དཔེ་རུ་ཤེས་པར་བྱ། །སངས་རྒྱས་སེམས་ཅན་གཞི་མོ་ཡང་། །འཁོར་བ་རུ་ཡང་རྒྱ་མ་ཆད། །མྱ་ངན་འདས་པར་རྒྱ་མ་ཆད། །གཉིས་མེད་དུ་ཡང་རྒྱ་མ་ཆད། །ཐ་དད་དུ་ཡང་རྒྱ་མ་ཆད། །ཡོད་མ་མྱོང་ལ་མེད་མ་མྱོང་། །སྟོང་མ་མྱོང་ལ་གསལ་མ་མྱོང་། །བདེ་མ་མྱོང་ལ་སྡུག་མ་མྱོང་། །སྣང་མ་མྱོང་ལ་སྟོང་མ་མྱོང་། །ཡིན་མ་མྱོང་ལ་མིན་མ་མྱོང་། །སྟོར་མ་མྱོང་ལ་རྙེད་མ་མྱོང་། །གང་མ་མྱོང་ལ་ལུད་མ་མྱོང་། །བོ་མ་མྱོང་ལ་ཟད་མ་མྱོང་། །འདོད་མ་མྱོང་ལ་རྩོལ་མ་མྱོང་། །ཞེན་མ་མྱོང་ལ་ཆགས་མ་མྱོང་། །ངན་མ་མྱོང་ལ་སྤང་མ་མྱོང་། །བཟང་མ་མྱོང་ལ་བསྒྲུབས་མ་མྱོང་། །བསྒོམས་མ་མྱོང་ལ་འཇོག་མ་མྱོང་། །གཟུང་མ་མྱོང་ལ་འཛིན་མ་མྱོང་། །འཁྲུལ་མ་མྱོང་ལ་ ― DNG002_Page_0413 ―
[མ་དཔེ་གཟིགས་ན་འདིར་གནོན།]
སྒྲིབ་མ་མྱོང་། །རྟོགས་མ་མྱོང་ལ་རྒྱས་མ་མྱོང་། །གཉིས་སུ་རྒྱ་ཆད་མེད་པ་ཡིན། །གཅིག་ཏུ་བསྡུ་མ་མྱོང་བ་ཡིན། །རྒྱུ་ཡིས་མ་བསྐྱེད་རྐྱེན་གྱིས་མི་འཇིག་པར། །ངོ་བོ་མི་འགྱུར་རང་བཞིན་མི་དམིགས་པས། །སྐྱེ་འཇིག་གང་དུ་རྒྱ་ཆད་མེད་པ་ཡིན། །མཚོན་མེད་ཚིག་གིས་བསྟན་པ་མེད། །ཆོས་མེད་སྟོན་མེད་ཉན་པ་མེད། །སྨྲར་མེད་ཚིག་མེད་བརྗོད་པ་མེད། །བདེ་མེད་སྡུག་མེད་སྐྱིད་པ་མེད། །བཟང་མེད་ངན་མེད་གཉིས་ཀ་མེད། །དབུས་མེད་མཐའ་མེད་ཕྱོགས་མཚམས་མེད། །སངས་མེད་ཆུབ་མེད་སེམས་ཅན་མེད། །རིགས་མེད་ཡིད་མེད་སེམས་མེད་བཏགས་པ་མེད། །གནས་མེད་ཆགས་མེད་ཞེན་མེད་བཟུང་བ་མེད། །ཅི་ཡང་མཚོན་དུ་མ་བཏུབ་པོ། །རྟོག་ཚོགས་བརྟག་པའི་ཚིག་ལས་གྲོལ། །རྣམ་པ་ཅིར་ཡང་མི་འབྱེད་སེམས་ཉིད་བརྗོད་མེད་ཀློང་། །ཀུན་གཞིའི་གནས་ལུགས་དེ་ལྟར་རོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། །འཁོར་བ་ཐོག་མཐའ་གཅོད་པའི་རྒྱུད་ལས། ཀུན་གཞིའི་གནས་ལུགས་བསྟན་པའི་ལེའུ་སྟེ་གསུམ་པའོ།། །།དེ་ནས་སྟོན་པའི་རྒྱལ་པོ་སེམས་ཉིད་ཀུན་བཟང་ལ། །སྡུད་པའི་རྡོ་རྗེ་སེམས་དཔའ་ཡིས། །སངས་རྒྱས་སེམས་ཅན་གཉིས་ཀྱི་སོ་མཚམས་དང་། །ཡར་རྒྱས་མར་འཁྲུལ་གཉིས་ཀྱི་བྱེ་བྲག་རྣམས། །ཤིན་ཏུ་ཟབ་པར་གསུང་དུ་གསོལ། །ཞེས་གསོལ་པ་དང་། སྟོན་པའི་རྒྱལ་པོ་སེམས་ཉིད་ཀུན་བཟང་དེ། རིན་པོ་ཆེའི་འོད་ཁ་སྦྱོར་དབྱེར་མེད་ཀྱི་ཏིང་ངེ་འཛིན་ལ་བཞུགས་སོ། །དེ་ནས་བཞེངས་ནས་འདི་སྐད་གསུངས། །ཁྱེད་ཀྱིས་དྲིས་པའི་དོན་རྣམས་བཤད། །འཁོར་རྣམས་མ་ཡེངས་ཡིད་ལ་ཟུང་། །སེམས་ཅན་སངས་རྒྱས་སོ་མཚམས་ནི། །རིག་དང་མ་རིག་སོ་མཚམས་དང་། །འགྱུ་དང་མི་འགྱུའི་སོ་མཚམས་དང་། །བརྟགས་དང་མ་བརྟགས་སོ་མཚམས་དང་། །ཟིན་དང་མ་ཟིན་སོ་མཚམས་དང་། །མཚོན་དང་མ་མཚོན་སོ་མཚམས་དང་། །རྟོགས་དང་མ་རྟོགས་སོ་མཚམས་དང་། །འགྱུར་དང་མི་འགྱུར་སོ་མཚམས་དང་། །འཆར་སྒོ་འཁྲུལ་སྒོའི་སོ་མཚམས་དང་། ལྡོག་བཅས་གཉིས་ཀྱི་སོ་མཚམས་སོ། །འདི་ནི་སངས་རྒྱས་སེམས་ཅན་གཉིས་ ― DNG002_Page_0414 ―
[མ་དཔེ་གཟིགས་ན་འདིར་གནོན།]
ཀྱི་སོ་མཚམས་སོ། །ཡར་རྒྱས་མར་འཁྲུལ་གཉིས་ཀྱང་འདི་ལྟ་སྟེ། །སྔོན་ནས་གདོད་མ་ཉིད་ནས་གནས། །སྟོང་ཉིད་ཡབ་ཀྱི་ཚུལ་དུ་གནས། །ཡེ་ནས་མཚོན་པ་མེད་པ་དེ། །ཆོས་ཉིད་ཡུམ་གྱི་ཚུལ་དུ་གནས། །སྐྱེ་མེད་འབྱེད་མེད་སྲས་གཅིག་འཁྲུངས། །འབྱེད་མེད་གཏི་མུག་ཆེན་པོ་དེ། །ཐབས་ཀྱི་རྒྱལ་པོ་ཡབ་ཏུ་གནས། །སྐྱེ་འགག་ཀུན་བྲལ་ཤེས་རབ་ཡུམ་གྱི་ཚུལ། །རྩིས་གདབ་མེད་པའི་སྲས་གཅིག་འཁྲུངས། །ཐོག་མ་མེད་པ་ཡབ་ཀྱི་ཚུལ་དུ་གནས། །མཐའ་མ་མེད་པ་ཡུམ་གྱི་ཚུལ་དུ་གནས། །དབྱེ་བསལ་མེད་པའི་སྲས་དེ་ཐོག་མཐའི་དྲས་ཐག་བཅད། །རང་བཞིན་ཡེ་གནས་ཡབ་ཀྱི་ཚུལ་དུ་གནས། །ཀུན་ཁྱབ་ཡེ་གནས་ཡུམ་གྱི་ཚུལ་དུ་གནས། །འོད་གསལ་ཆོས་ཉིད་སྲས་གཅིག་འཁྲུངས། །ཆོས་རྣམས་མཉམ་ཉིད་དབྱིངས་སུ་ཐིམ། །བག་ཙམ་གཡོ་བ་ཡབ་ཀྱི་ཚུལ། །ཀུན་ཏུ་གཡོ་བ་ཡུམ་གྱི་ཚུལ། །འགྱུ་བ་བུ་ཡི་ཚུལ་དུ་སྐྱེས། །ཀུན་གཞི་ཡབ་ཀྱི་ཚུལ་དུ་གནས། །ཀུན་ཁྱབ་ཀློང་ཆེན་ཡུམ་གྱི་ཚུལ། །རྒྱ་ཆད་སྐྱེ་འགག་མེད་པའི་སྲས་ཤིག་འཁྲུངས། །འབྱུང་ལྔ་ཡབ་ཀྱི་ཚུལ་དུ་གནས། །འོད་ལྔ་ཡུམ་གྱི་རང་བཞིན་ནོ། །རླུང་ལྔ་རྩལ་གྱི་སྲས་ཤིག་འཁྲུངས། །རྩལ་ལ་གདེང་རྙེད་རྟོགས་པར་ཤར། །བུ་ཉིད་ཡུམ་གྱི་ངང་དུ་ཐིམ། །མ་ལ་བུ་ཐིམ་དབྱེར་མི་ཕྱེད། །མ་བུ་ངོ་འཕྲད་འགྱུར་མེད་སྙིང་པོ་ཆོས་སྐུར་གནས། །ཡབ་ཡུམ་འགྱུར་མེད་དབྱིངས་སུ་ཐིམ། །སྙིང་པོ་ཡབ་ཡུམ་མཁའ་ཀློང་ནས། །རིག་པའི་རྩལ་མ་འགག་པའི་བུ་རྣམས་འཕྱོ། །འཕྱོ་ས་མ་རྙེད་སྙིང་པོའི་ཀློང་དུ་ཐིམ། །ཟེར་གྱི་ཤེས་པས་ཡབ་ཡུམ་ངང་ཐིམ་པས། །ཡབ་ཡུམ་སྲས་དང་དབྱེར་མེད་ཐོག་མར་ཡེ་སངས་རྒྱས། །ཆོས་ཉིད་གཞི་ལ་འཕྲད་པས་ཐོག་མར་ཡེ་ཤེས་རང་ས་ཟིན། །རྣམ་རྟོག་རྩད་ནས་བཅད་པས་འཁྲུལ་པ་རང་སར་གྲོལ། །འགྱུར་མེད་ཀློང་དུ་ཐིམ་པས་སྙིང་པོ་ཆོས་སྐུར་གྱུར། །མ་རིག་མུན་ཁང་བཅོམ་པས་ཡེ་ཤེས་རྒྱ་མ་ཆད། །ཡེ་ཤེས་འཆར་སྒོ་ཕྱེ་བས་མ་རིག་འཁྲུལ་སྒོ་བསྡམས། །འཁོར་བ་ཡོངས་སུ་སྤངས་པས་སྙིང་པོ་ཆོས་སྐུར་རྒྱས། །བྱ་བཙལ་དགག་ ― DNG002_Page_0415 ―
[མ་དཔེ་གཟིགས་ན་འདིར་གནོན།]
བསྒྲུབ་སྤངས་པས་བྱར་མེད་སྤྲོས་བྲལ་རྒྱས། །ཡར་རྒྱས་ཀུན་བཟང་དེ་ལྟར་ཤེས་པར་གྱིས། །ཅིས་ཕན་འདྲི་བའི་གཏན་ཚིགས་དེ། །བྱ་བཙལ་གང་གིས་ཕན་པ་མ་ཡིན་ཏེ། །རང་སར་ངང་ཉིད་ཐིམ་པ་ཡིན། །ངང་ཉིད་ངང་གིས་གྲོལ་བ་ཡིན། །རང་གིས་རང་ཉིད་རྟོགས་པ་ཡིན། །སྤང་ལེན་དགག་བསྒྲུབ་ཕན་པ་མ་ཡིན་ནོ། །རྣམ་རྟོག་སངས་པས་ཡེ་ཤེས་རྒྱས། །སུས་ཀྱང་རྒྱས་སུ་མ་བཅུག་གོ། །རང་ཉིད་རང་གིས་རྒྱས་པ་ཡིན། །རང་ཉིད་རང་གིས་རྟོགས་པ་ཡིན། །དེ་ལྟར་འགྱུར་མེད་སངས་རྒྱས་རྟོགས་ཙམ་ན། །མ་རིག་མེད་དེ་ངང་དྭངས་ཆེན་པོ་ཡིན། །ཡེ་ཤེས་ཡེ་ནས་གསལ་བའི་ངང་དྭངས་ཆེན་པོ་ཡིན། །རྣམ་རྟོག་མེད་དེ་ངང་དྭངས་ཆེན་པོ་ཡིན། །ཆོས་ཉིད་ཡེ་ནས་ཡིན་ཏེ་ངང་དྭངས་ཆེན་པོ་ཡིན། །དུག་གསུམ་མེད་དེ་ངང་དྭངས་ཆེན་པོ་ཡིན། །སྐུ་གསུམ་ཡེ་ནས་ཡིན་ཏེ་ངང་དྭངས་ཆེན་པོ་ཡིན། །དུག་ལྔ་མེད་དེ་ངང་དྭངས་ཆེན་པོ་ཡིན། །ཡེ་ཤེས་ལྔ་ལ་གནས་ཏེ་ངང་དྭངས་ཆེན་པོ་ཡིན། །འཁོར་བ་མེད་དེ་ངང་དྭངས་ཆེན་པོ་ཡིན། །ཡེ་ནས་མྱ་ངན་འདས་ཏེ་ངང་དྭངས་ཆེན་པོ་ཡིན། །སེམས་ཅན་མེད་དེ་ངང་དྭངས་ཆེན་པོ་ཡིན། །ཡེ་ནས་སངས་རྒྱས་ཡིན་ཏེ་ངང་དྭངས་ཆེན་པོ་ཡིན། །སྐྱེ་བ་མེད་དེ་ངང་དྭངས་ཆེན་པོ་ཡིན། །འགག་པ་མེད་དེ་ངང་དྭངས་ཆེན་པོ་ཡིན། །ན་བ་མེད་དེ་ངང་དྭངས་ཆེན་པོ་ཡིན། །རྒ་ཤི་མེད་དེ་ངང་དྭངས་ཆེན་པོ་ཡིན། །སྣང་བ་མེད་དེ་ངང་དྭངས་ཆེན་པོ་ཡིན། །སྟོང་པ་མེད་དེ་ངང་དྭངས་ཆེན་པོ་ཡིན། །གཉིས་སུ་མེད་དེ་ངང་དྭངས་ཆེན་པོ་ཡིན། །ཡུལ་སེམས་གཉིས་མེད་ངང་དྭངས་ཆེན་པོ་ཡིན། །གཟུང་འཛིན་གཉིས་མེད་ངང་དྭངས་ཆེན་པོ་ཡིན། །དགག་བསྒྲུབ་གཉིས་མེད་ངང་དྭངས་ཆེན་པོ་ཡིན། །བདག་གཞན་གཉིས་མེད་ངང་དྭངས་ཆེན་པོ་ཡིན། །རིག་པ་མྱོང་མེད་ངང་དྭངས་ཆེན་པོ་ཡིན། །སྤང་ལེན་གཉིས་མེད་ངང་དྭངས་ཆེན་པོ་ཡིན། །བླང་དོར་གཉིས་མེད་ངང་དྭངས་ཆེན་པོ་ཡིན། །བྱ་བཙལ་གཉིས་མེད་ངང་དྭངས་ཆེན་པོ་ཡིན། །ཕྱོགས་རིས་གཉིས་མེད་ངང་དྭངས་ཆེན་པོ་ཡིན། །དབྱེ་བསལ་གཉིས་མེད་ངང་དྭངས་ཆེན་པོ་ཡིན། །རྩིས་གདབ་གཉིས་མེད་ངང་དྭངས་ཆེན་པོ་ཡིན། །རིག་པ་མྱོང་མེད་ངང་དྭངས་ཆེན་པོ་ཡིན། །ཡིད་ཀྱི་འགྱུ་མེད་ངང་དྭངས་ཆེན་པོ་ཡིན། །སེམས་ཀྱི་མིང་མེད་ངང་དྭངས་ཆེན་པོ་ཡིན། །མཚོན་དུ་མེད་དོ་ངང་དྭངས་ཆེན་པོ་ཡིན། །མིང་ཚིག་བརྗོད་མེད་ངང་དྭངས་ཆེན་པོ་ཡིན། ། ― DNG002_Page_0416 ―
[མ་དཔེ་གཟིགས་ན་འདིར་གནོན།]
བརྟགས་ཞེན་མེད་དེ་ངང་དྭངས་ཆེན་པོ་ཡིན། །ཆགས་འཛིན་མེད་དེ་ངང་དྭངས་ཆེན་པོ་ཡིན། །བརྟགས་སྣང་ཀུན་ལས་གྲོལ་ཏེ་ངང་དྭངས་ཆེན་པོ་ཡིན། །རྟོག་ཚོགས་མཚན་མ་གྲོལ་ཏེ་ངང་དྭངས་ཆེན་པོ་ཡིན། །བརྗོད་གཞི་ཐམས་ཅད་ངང་དྭངས་ཆེན་པོར་གྲོལ། །སངས་རྒྱས་ཆེ་བའི་ཡོན་ཏན་དེ་ལྟར་རོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སངས་རྒྱས་སེམས་ཅན་གཉིས་ཀྱི་ས་མཚམས་དང་། སངས་རྒྱས་ཆེ་བའི་ཡོན་ཏན་དང་བཅས་པ་བསྟན་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །པུས་བཙུགས་ཐལ་སྦྱར་འདི་སྐད་གསོལ། །གཞི་ཉིད་མཉམ་པོར་གནས་པ་ན། །ཁམས་གསུམ་འཁོར་བ་ཅི་ཡིས་ཉེས། །འདུས་པའི་འཁོར་ལ་གསུང་དུ་གསོལ། །སྟོན་པ་ཀུན་ཏུ་བཟང་པོ་རིན་པོ་ཆེ་དབྱེ་བསལ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་བཞེངས་ནས་འདི་སྐད་གསུངས། །ཨཱ་ཡི་བར་ནས་མ་བ་ར། །ཨཱ་ལེ་ཨཱེ་མ། ཀྱེ་མ་ཀྱེ་མ་ཧོ། ཡང་དག་དོན་ལས་གོལ་བ་རྣམས། །རྣམ་རྟོག་བདག་ཏུ་བཟུང་བ་ཡིས། །ནན་གྱིས་ནམ་མཁར་མདུད་པ་བྱས། །རང་མགོ་རང་གི་རྐང་པས་མནན། །རང་གི་སྐེ་ལག་རང་གིས་བཅིངས། །རང་གི་རིན་ཆེན་རང་གིས་སྟོར། །རང་གི་སྒྲོན་མེ་རང་གིས་བསད། །རང་གི་ཉི་ཟླ་རང་གིས་བསྣུབས། །ཀྱེ་མ་བདག་ཏུ་འཛིན་པའི་སེམས་ཅན་ཉོན་རེ་མོངས། །མཉམ་པའི་དོན་ལ་ཕྱོགས་རིས་བྱུང་། །སངས་རྒྱས་སེམས་ཅན་གཉིས་ཀྱི་གཞི། །ངོ་བོ་སྤྱི་ལ་མཉམ་པར་གནས། །གཡོ་བའི་རླུང་ཡང་མཉམ་པར་གནས། །འཆར་བའི་ཟེར་ཡང་མཉམ་པར་གནས། །སྐྱེ་བའི་རིམ་པ་མཉམ་པར་གནས། །དཔེར་ན་མཚོ་ལ་དར་ཆགས་འདྲ། །འགྱུ་བའི་རླུང་དག་མཉམ་པ་ལ། །རང་ས་མ་ཟིན་གསུམ་གྱིས་ལན། །ཡར་རྒྱས་དོན་ལ་མི་རྟོགས་པས། །གཡོ་དང་འགྱུ་མི་འགྱུ་དང་ནི། །ཟེར་དང་འོད་དང་ཤེས་པ་དང་། །སང་ངེ་སིང་ངེ་རྟེན་མེད་དེ། །ཕྱོགས་མཚམས་ཀུན་ཏུ་འགྱུ་བའི་ས། །རྩལ་སྣང་བུ་ཡིས་ཤེས་པ་འཕྱོ་སར་ཁྱེར། །ཡིན་སྙམ་རིག་པ་ཆགས་སྡང་སྐྱེ། །ཆགས་ཞེན་སྐྱེས་པས་མིན་པར་འཁྲུལ། ། ― DNG002_Page_0417 ―
[མ་དཔེ་གཟིགས་ན་འདིར་གནོན།]
གནས་དོན་མ་ཤེས་དོན་མ་རིག །དེ་ལ་མ་རིག་མུན་པར་གསུངས། །འགྱུ་བ་རླུང་གིས་རྒྱུ་བྱས་ནས། །སྒྲིབ་གཡོགས་མུན་པ་རྐྱེན་དུ་བྱུང་། །ཡེ་ཤེས་འཆར་སྒོ་མ་ཤར་བར། །མུན་པའི་འཁོར་སྒོ་རྐྱེན་དུ་བྱུང་། །མ་རིག་འཁྲུལ་སྒོར་འཁྱམས་པ་ཡིན། །རིག་པས་ཀུན་ཏུ་འཚོལ་ཁྲོ་བྱས། །ཡིད་ནི་འགྱུ་བ་ཉིད་དང་བཅས། །སེམས་ནི་གསལ་ཆ་ལྔ་རུ་ཤར། །གསལ་དང་མི་གཡོ་རྒྱ་མ་ཆད། །མི་འགྱུར་གཡོ་ཞིང་འགྱུ་བ་སྟེ། །སེམས་ནི་སྣང་ཚུལ་ལྔ་རུ་ཤར། །འོད་གཟུགས་རིག་གཟུགས་ཤ་གཟུགས་སོ། །རིག་པའི་གཟུགས་ལ་ཤ་གཟུགས་ཉིད་དུ་འཁྲུལ། །ཕ་ཡིན་མ་ཡིན་སྙམ་བྱེད་ཀྱིས། །མངལ་གྱི་སྒོ་རུ་འཁྱམས་ནས་ནི། །ཤ་ཁྲག་པགས་པའི་གཟུགས་སུ་འཐུམ། །ཕ་ཡི་ཞེ་སྡང་རྒྱུ་ལས་ནི། །ཤ་ཁྲག་རུས་པའི་ཚུལ་དུ་ཆགས། །མ་ཡི་འདོད་ཆགས་རྐྱེན་ལས་ནི། །ཁྲག་དང་ཆུ་སེར་ཉིད་དུ་ཆགས། །དུག་གསུམ་རྒྱུ་ཡིས་ལུས་ངག་ཡིད་གསུམ་བསྡུས། །འཁྲུལ་པ་ཡི་ནི་འབྲས་བུ་ཡིན། །དངོས་པོ་རྐྱེན་སྣང་འདི་ལྟར་འཁྲུལ། །ཕ་རུ་སྣང་སྟེ་ཕ་རུ་བཟུང་། །ཕ་རུ་བརྟགས་ཏེ་ཕ་རུ་ཞེན། །མ་རུ་སྣང་སྟེ་མ་རུ་བཟུང་། །མ་རུ་བརྟགས་ཏེ་མ་རུ་ཞེན། །བུ་རུ་སྣང་སྟེ་བུ་རུ་བཟུང་། །བུ་རུ་བརྟགས་ཏེ་བུ་རུ་ཞེན། །ཡུལ་དུ་སྣང་སྟེ་ཡུལ་དུ་བཟུང་། །ཡུལ་དུ་བརྟགས་ཏེ་ཡུལ་དུ་ཞེན། །འཁྲུལ་པ་ཐམས་ཅད་བརྟགས་སྣང་ཞེན་གསུམ་མོ། །དང་པོ་རིག་པ་སྐྱེས་པས་ཡིད་ནི་འགྱུས། །སེམས་སུ་གསལ་བའི་མིང་དུ་བརྟགས། །མིང་ནི་དོན་མེད་ཚིག་ཡིན་ནོ། །ཚིག་ནི་བླ་དགས་བརྗོད་རྟོགས་ཚིག །ཀུན་ཏུ་ཚོལ་དང་གཏན་ལ་འབེབས། །ངེས་པར་བརྗོད་དང་འཁོར་ལོ་གསུམ་དུ་འཁྲུལ། །མཉམ་པ་ཆེན་པོའི་ཆོས་ཉིད་ལ། །ལོག་པར་བརྟགས་པའི་ཤེས་པ་སྣ་ཚོགས་ཀྱིས། །མི་མཉམ་པ་ཡི་ངོ་བོར་བཟུང་། །དེ་ཡིས་འཁྲུལ་པའི་འབྲས་བུ་བརྟས། །འཁྲུལ་དང་མ་འཁྲུལ་གཉིས་མེད་ལ། །ཞེན་རྟོག་མཚན་མ་བརྟས་པ་ཡིས། །མིན་པའི་ཆོས་ལ་ཡིན་པར་བཟུང་། །དེ་ཡིས་འཁྲུལ་པའི་འབྲས་བུར་སྨིན། །སྐྱེ་མེད་མཚོན་མེད་འགྱུར་མེད་ལ། །རྣམ་རྟོག་བློས་བརྟགས་ཤེས་པ་ཡིས། །སྐྱེ་རྒ་ན་ ― DNG002_Page_0418 ―
[མ་དཔེ་གཟིགས་ན་འདིར་གནོན།]
འཆི་བདེ་བའི་ཆོས་སུ་བཟུང་། །དེ་ཡིས་འཁྲུལ་པའི་འབྲས་བུར་སྨིན། །གཉིས་མེད་ངང་ལ་གཉིས་སུ་བཟུང་། །དེ་ཡིས་འཁྲུལ་པའི་འབྲས་བུར་སྨིན། །བདག་གཞན་མེད་ལ་བདག་ཏུ་བཟུང་། །དེ་ཡིས་འཁྲུལ་པའི་འབྲས་བུར་སྨིན། །དབྱེ་བསལ་མེད་ལ་དབྱེ་བསལ་བཟུང་། །དེ་ཡིས་འཁྲུལ་པའི་འབྲས་བུ་སྨིན། །རྩིས་གདབ་མེད་ལ་རྩིས་གདབ་བཟུང་། །དེ་ཡིས་འཁྲུལ་པའི་འབྲས་བུར་སྨིན། །དགག་བསྒྲུབ་མེད་ལ་སྤང་ལེན་བྱས། །དེ་ཡིས་འཁྲུལ་པའི་འབྲས་བུར་སྨིན། །བྱ་བཙལ་མེད་ལ་རྩོལ་བསྒྲུབ་བྱས། །དེ་ཡིས་འཁྲུལ་པའི་འབྲས་བུར་སྨིན། །དེ་ལྟར་མེད་ལ་ཡོད་བཟུང་གིས། །རྨི་ལམ་ཚུལ་དུ་སྡུག་བསྔལ་མྱོང་། །རིགས་དྲུག་སྐྱེ་འགུལ་དེ་ལས་བྱུང་། །མི་བདེན་བདེན་བཟུང་རྟོག་ཚོགས་ཀྱིས། །ཐམས་ཅད་འཁྲུལ་པའི་འབྲས་བུར་སྨིན། །གཞི་ལ་མེད་དེ་རྟོག་པས་བཟུང་། །བཟུང་བས་ཞེན་ནས་ཆགས་ཏེ་འཁྲུལ། །དེས་འཁྲུལ་རྟགས་གཏན་ལ་ཕབ་པའོ། །ཅིས་ལན་བྱ་བའི་ཚིག་དེ་ཡང་། །ཅིས་ཀྱང་མ་ལན་རང་གིས་ལན། །རང་ས་མ་ཟིན་གསུམ་གྱིས་ལན། །སུས་ཀྱང་མ་ལན་རང་གིས་ལན། །ཆོས་ཉིད་མ་དང་མ་འཕྲད་པས། །རང་ལ་རང་ཉིད་ཡི་རེ་མུག །ཡེ་ཤེས་རང་ས་མ་ཟིན་པས། །རང་ལ་རང་ཉིད་ཞེ་རེ་ཁྲེལ། །རྣམ་རྟོག་རང་སར་མ་སངས་པས། །རང་ལ་རང་ཉིད་སྐྱུགས་རེ་ལོག །སྙིང་པོ་ཀློང་ནས་མ་ཤར་བས། །རང་གིས་རང་འཐུམས་མུན་པར་འཐུམས། །འཁྲུལ་པ་རང་སར་མ་གྲོལ་བས། །རང་གིས་རང་མནར་རང་རེ་མནར། །སུས་ཀྱང་གནོད་པ་མ་བསྐྱལ་ཏེ། །ཆོས་དང་སེམས་སུ་མ་འདྲེས་ལན། །དུག་གསུམ་རྩ་བ་མ་ཆོད་ལན། །ཞེན་པ་རང་ལོག་མ་བྱུང་ལན། །དུག་ལྔ་རང་གྲོལ་མ་བྱུང་ལན། །ཆགས་སྡང་ལྔ་དང་མ་བྲལ་ལན། །གཏི་མུག་མུན་པ་མ་སངས་ལན། །ཡེ་ཤེས་ཉི་མ་མ་ཤར་ལན། །རང་གིས་རང་ཉིད་འཁོར་དུ་བཅུག །རང་གིས་རང་ཉིད་འཁྲུལ་དུ་བཅུག །ཅིས་ལན་ཅིས་ཕན་གཏན་ཚིགས་དེ་ལྟར་རོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། འཁྲུལ་པ་གཏན་ལ་ཕབ་པའི་ལེའུ་སྟེ་ལྔ་པའོ།། །། ― DNG002_Page_0419 ―
[མ་དཔེ་གཟིགས་ན་འདིར་གནོན།]
དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །ཆོས་སྐུ་རྟོགས་པར་བྱ་བའི་ཐབས། །བདག་ཅག་རྣམས་ལ་བསྟན་དུ་གསོལ། །སྟོན་པ་ཀུན་ཏུ་བཟང་པོ་དེ། རིན་པོ་ཆེའི་འོད་ནང་དུ་ཞི་བའི་ཏིང་ངེ་འཛིན་ལ་བཞུགས་སོ། །དེ་ནས་བཞེངས་ནས་འཁོར་ལ་འདི་སྐད་གསུངས། །ཨཱ་པཾ་ཀ་རི་མ་ཧཱ་ཨཱ་ཏི་ཏ་ཨཱཿ། ཐེག་པའི་རྒྱལ་པོ་སྤྱི་ཏི་ཡོ་ག་འདི། །ཐེག་པ་ཀུན་གྱི་སྤྱི་མེས་ཡིན་པར་གསུངས། །བཀའ་ཆེམས་མན་ངག་བསྟན་ལུགས་ཀྱིས། །སྐྱེ་མེད་ཚིག་མེད་མཚོན་མེད་བཏགས་མེད་ཡིན་པ་ལ། །ཨེ་མ་ཧོ། དེ་ལྟར་མ་གོའི་སེམས་ཅན་རྣམས། །དངོས་པོ་མེད་པར་མཚོན་པར་འདོད། །འདི་ཡང་སེམས་ཅན་ཉོན་རེ་མོངས། །སྐྱེ་མེད་དོན་ལ་བརྗོད་པར་འདོད། །འདི་ཡང་སེམས་ཅན་ཉོན་རེ་མོངས། །ཡེ་མེད་དོན་ལ་དངོས་པོར་འདོད། །འདི་ཡང་སེམས་ཅན་ཉོན་རེ་མོངས། །ང་ཡི་རང་བཞིན་ཅིར་ཡང་མ་གྲུབ་པར། །ཐེག་པ་ཆེན་པོར་ཁ་སྨྲས་འཛུགས། །འདི་ཡང་སེམས་ཅན་ཉོན་རེ་མོངས། །མཐར་ལྟ་མངོན་པར་ཞེན་པའི་ཐེག་བརྒྱད་ཀྱིས། །ང་མ་མཐོང་བས་སྙིང་རེ་རྗེ། །གཞན་ལྟ་རྒྱབ་ཀྱིས་ཕྱོགས་པའི་རིམ་པ་བརྒྱད། །ང་ཡི་རང་བཞིན་མ་ཤེས་ཉོན་རེ་མོངས། །ངོ་མཚར་ཆེ་བའི་ཀུན་བཟང་གིས། །དྲུང་ན་གནས་པའི་འཁོར་རྣམས་ལ། །དབྱེ་བསལ་མེད་ལ་དབྱེ་བའི་ས། །འཁོར་རྣམས་ཀུན་ལ་འདི་སྐད་གསུངས། །གཉིས་སུ་མེད་པར་གཉིས་སུ་ཕྱེ། །འདི་ཡང་སེམས་ཅན་ཉོན་རེ་མོངས། །སྐུ་གསུམ་མེད་པར་སྐུ་གསུམ་བསྒྲུབ་པར་འདོད། །འདི་ཡང་སེམས་ཅན་ཉོན་རེ་མོངས། །དུག་གསུམ་མེད་པར་སྤང་བར་འདོད། །འདི་ཡང་སེམས་ཅན་ཉོན་རེ་མོངས། །དུག་ལྔ་མེད་པར་སྤང་བར་འདོད། །འདི་ཡང་སེམས་ཅན་ཉོན་རེ་མོངས། །སྐུ་ལྔ་མེད་པར་བསྒྲུབ་པར་འདོད། །འདི་ཡང་སེམས་ཅན་ཉོན་རེ་མོངས། །སེམས་ཅན་མེད་པར་སྤང་བར་འདོད། །འདི་ཡང་སེམས་ཅན་ཉོན་རེ་མོངས། །སངས་རྒྱས་མེད་པར་བསྒྲུབ་པར་འདོད། །འདི་ཡང་སེམས་ཅན་ཉོན་རེ་མོངས། །མ་རིག་མེད་པར་སྤང་བར་འདོད། །འདི་ཡང་སེམས་ཅན་ཉོན་རེ་ ― DNG002_Page_0420 ―
[མ་དཔེ་གཟིགས་ན་འདིར་གནོན།]
མོངས། །ཡེ་ཤེས་མེད་པར་བསྒྲུབ་པར་འདོད། །འདི་ཡང་སེམས་ཅན་ཉོན་རེ་མོངས། །ཡུལ་སེམས་མེད་པར་སྤང་བར་འདོད། །འདི་ཡང་སེམས་ཅན་ཉོན་རེ་མོངས། །བཟུང་བ་མེད་པར་བསྒྲུབ་པར་འདོད། །འདི་ཡང་སེམས་ཅན་ཉོན་རེ་མོངས། །དེ་ལ་སོགས་པ་གཉིས་སྣང་ཐམས་ཅད་ཀུན། །སེམས་ཅན་བློ་ཡི་ཆོས་སུ་བསྟན་པ་ཆ་མེད་དམ། །བརྟགས་པ་སྣང་བ་ཡིན་པར་ཆ་མེད་དམ། །ཚིག་ནི་བླ་དགས་ཡིན་པར་ཆ་མེད་དམ། །ཚིག་ནི་ཐ་སྙད་ཡིན་པར་ཆ་མེད་དམ། །འདོད་གཞི་ཐ་སྙད་ཡིན་པར་ཆ་མེད་དམ། །བློ་དམན་ཆོས་སུ་བསྟན་པ་ཆ་མེད་དམ། །ཐམས་ཅད་བསླུ་བྲིད་ཡིན་པར་ཆ་མེད་དམ། དེས་ན་གང་བརྟགས་སྣང་བ་ཞེན་དང་གསུམ་གྱི་ཆོས་ཀྱིས་ཆོས་མི་བཏུབ། སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། གཉིས་སྣང་ཆོས་ཀྱིས་གྲོལ་བ་མི་ཐོབ་པར་བསྟན་པའི་ལེའུ་སྟེ་དྲུག་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །ཆོས་ཉིད་མཚོན་དུ་མེད་པའི་དོན། །བདག་ཅག་རྣམས་ལ་བསྟན་དུ་གསོལ། །ཞེས་གསོལ་པ་དང་། སེམས་ཉིད་སྟོན་པ་ཀུན་བཟང་དེ། རིན་པོ་ཆེ་འོད་འབར་བ། དོན་མཚོན་པ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་ལས་བཞེངས་ནས་ནི། འདུས་པའི་འཁོར་ལ་འདི་སྐད་གསོལ། །ཨ་ཏ་པ་ཏ་རི་ཨཱ་ཐིམ། །ང་ཡིས་མཚོན་པ་ཀུན་བྲལ་བཤད། །རྡོ་རྗེ་སེམས་དཔས་གོ་བར་ཟུང་། །སྐྱེ་མེད་དངོས་མེད་མཚོན་འདས་དངོས་མེད་ཡིན། །དེ་ལ་མཚོན་པའི་ཆོས་ཀྱིས་སངས་མི་རྒྱ། །མཚོན་དུ་མེད་པའི་ཆོས་ཤིག་དགོས། །སྐུ་གསུང་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །སྣང་བ་སྟོང་པ་སྐྱེ་མེད་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །སེམས་དང་རིག་པ་ཡིད་དང་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །སངས་རྒྱས་ཆོས་དང་དགེ་འདུན་གསུམ། །དེ་གསུམ་བསྒྲུབ་པས་སངས་མི་ ― DNG002_Page_0421 ―
[མ་དཔེ་གཟིགས་ན་འདིར་གནོན།]
རྒྱ། །དེ་དང་བྲལ་བའི་ཆོས་ཤིག་དགོས། །སེམས་དང་ཡེ་ཤེས་བག་ཆགས་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །རིག་པ་སྟོང་པ་གཉིས་མེད་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །ཚིག་དང་མཚོན་པ་བཏགས་པ་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །སྐྱེ་མེད་དམིགས་མེད་བརྗོད་མེད་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་གསུམ་བྲལ་བའི་ཆོས་ཤིག་དགོས། །བླང་བྱ་འཛིན་བྱ་དོར་བྱ་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །རྩོལ་བྱ་བསྒྲུབ་བྱ་འདོད་བྱ་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་གསུམ་བྲལ་བའི་ཆོས་ཤིག་དགོས། །བལྟ་བྱ་སྤྱོད་བྱ་བསྒྲུབ་བྱ་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །བསྲུང་བྱ་ཐོབ་བྱ་བགྲོད་བྱ་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །སྣང་བ་བཏགས་པ་ཞེན་པ་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །མིང་ལྟ་བདག་ལྟ་བློས་བཏགས་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །བློ་ཡུལ་ཡིད་སྨོན་མེད་བཟུང་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །རྩོལ་བཅས་བཅོས་མ་ཆགས་ཞེན་གསུམ། །དེ་གསུམ་སྤྱད་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །བསྒྲུབ་འདོད་རེ་དོགས་ཐོབ་རྒྱུ་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །རྟོག་ཚོགས་གཟུང་འཛིན་ཆགས་ཞེན་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །དགག་བསྒྲུབ་སྤང་ལེན་བླང་དོར་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །ཡི་གེ་ཚིག་ཚོགས་ ― DNG002_Page_0422 ―
[མ་དཔེ་གཟིགས་ན་འདིར་གནོན།]
བླ་དགས་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །སྣང་བ་ཕྱོགས་རིས་ཁ་དོག་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །གཉིས་སྣང་བརྟགས་ཞེན་ཕྱོགས་འཛིན་གསུམ། །དེ་གསུམ་བསྒྲུབ་པས་སངས་མི་རྒྱ། །དེ་དང་བྲལ་བའི་ཆོས་ཤིག་དགོས། །མིང་ཚིག་དབྱེ་བ་རྟག་ཆད་གསུམ། །བསམ་ལས་འདས་པ་མདོ་ཙམ་ཕྱེ། །བསྒྲུབ་པར་འདོད་པ་རྣམས་ལ་དེ་ཡིས་སུན་ཕྱུང་ཅིག །ཆོས་གཅིག་བྱ་བའི་མཚན་ཉིད་ནི། །ལ་ཆེན་བཟླ་བའི་གདམས་ངག་ཡིན། །དེ་ཡང་འདི་ལྟར་ཤེས་པར་བྱ། །ཆོས་གཅིག་བྱ་བའི་མིང་ཡང་མེད། །གཅིག་པོ་ཉིད་ཀྱང་གཅིག་ལས་འདས། །འདས་པའི་དོན་ལ་བརྗོད་དུ་མེད། །འདས་པའི་དོན་ལ་མཚོན་དུ་མེད། །འདས་པའི་དོན་ལ་བདེ་རུ་མེད། །འདས་པའི་དོན་ལ་གཟུང་དུ་མེད། །འདས་པའི་དོན་ལ་འདོད་དུ་མེད། །འདས་པའི་དོན་ལ་བྱ་རུ་མེད། །འདས་པའི་དོན་ལ་བཙལ་དུ་མེད། །འདས་པའི་དོན་ལ་དགག་ཏུ་མེད། །འདས་པའི་དོན་ལ་བསྒྲུབ་ཏུ་མེད། །འདས་པའི་དོན་ལ་བླང་བྱ་མེད། །འདས་པའི་དོན་ལ་དོར་བྱ་མེད། །འདས་པའི་དོན་ལ་སྤང་བྱ་མེད། །འདས་པའི་དོན་ལ་བསྒོམ་དུ་མེད། །འདས་པའི་དོན་ལ་སྤྱད་དུ་མེད། །འདས་པའི་དོན་ལ་བསྲུང་དུ་མེད། །འདས་པའི་དོན་ལ་བྱ་བཙལ་མེད། །འདས་པའི་དོན་ལ་བགྲོད་དུ་མེད། །འདས་པའི་དོན་ལ་ཐོབ་ཏུ་མེད། །མེད་པ་ཉིད་ཀྱང་དེ་ལས་འདས། །དེ་ལ་ཡིད་ལ་བྱ་རྒྱུ་མེད། །དེ་ལ་སེམས་ཀྱིས་གཟུང་དུ་མེད། །དེ་ལ་བློ་ཡིས་བཅོས་སུ་མེད། །དེ་ལ་འཕྲོས་དང་མ་འཕྲོས་མེད། །དེ་ལ་ཟིན་དང་མ་ཟིན་མེད། །དེ་ལ་བྱུང་དང་མ་བྱུང་མེད། །དེ་ལ་བཟའ་དང་ངན་པ་མེད། །དེ་ལ་དབྱེ་དང་བསལ་དུ་མེད། །དེ་ལ་བསལ་དང་མ་བསལ་མེད། །མཆོག་ཏུ་གསང་བའི་ཆོས་ཉིད་ནི། །རྣ་དབང་གཞན་ལས་ཐོས་མི་འགྱུར། །དེ་བཞིན་ལྕེ་ཡི་དབང་པོས་ཀྱང་། །དེ་ལ་བརྗོད་དུ་རྡུལ་ཙམ་མེད། །བརྗོད་པས་ཐོག་ཏུ་མི་ཕེབ་སྟེ། །བརྗོད་པ་ཐམས་ཅད་བླ་དགས་ཡིན། །བླ་དགས་ཚིག་གིས་སངས་མི་རྒྱ། །དེས་ན་བླ་དགས་ཚིག་ལས་འདས། །ཡེ་ནས་སྨྲ་བསམ་བརྗོད་ལས་འདས། །བརྗོད་འདས་རྟོག་པས་འགྱུར་བ་ ― DNG002_Page_0423 ―
[མ་དཔེ་གཟིགས་ན་འདིར་གནོན།]
མེད། །དྲན་པ་མེད་པས་ཡིད་ལ་གཞག་ཏུ་མེད། །བསམ་དུ་མེད་པས་བློ་ཡི་ཡུལ་ལས་འདས། །ཡེ་ནས་སངས་རྒྱས་མེད་པས་འདོད་པའི་བསྒྲུབ་བྱ་མེད། །སྐྱེ་མེད་འགྱུར་མེད་ཆོས་སྐུ་དེ། །ཡེ་ནས་ཡིན་པས་བསྒྲུབ་མི་དགོས། །ཆོས་སྐུ་ཡེ་ནས་འགྱུར་མེད་ལ། །སྐྱེ་མེད་སྙད་ཀྱི་སྒྲོས་མི་གདགས། །ནམ་མཁའ་འདི་ནི་མེད་དོ་ཞེས། །བླུན་པོ་གང་ཞིག་རྟོག་དཔྱོད་འཇུག །མཁས་པས་སྔོན་ནས་ཡོད་མི་འཛིན། །ཡེ་ནས་གཉིས་སུ་མེད་པ་ལ། །བདེན་པ་གཉིས་སུ་འབྱིན་པ་སུན་ཕྱུང་ཞིག །གཉིས་སུ་མེད་པའི་དོན་མཆོག་འདི། །ཀུན་བཟང་ང་ཡིས་སུན་དབྱུང་མ་བཏུབ་པོ། །དེ་བས་འཁོར་རྣམས་ཀུན་གྱིས་དེ་ལྟར་ཤེས་གྱིས་ཤིག །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཆོས་ཉིད་མཚོན་འདས་ཀྱི་ལེའུ་སྟེ་བདུན་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་གསོལ། །མཚོན་དུ་མེད་པའི་དོན་དེ། རྩོལ་བསྒྲུབ་བགྱི་རུ་འདོགས་ན་མི་འགལ་ལམ། ཞེས་གསོལ་པ་དང་། སྟོན་པ་ཀུན་ཏུ་བཟང་པོ་དེ། རིན་པོ་ཆེ་འོད་འགྱུར་བ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་བཞེངས་ནས་འདི་སྐད་གསུངས། །ང་ཡི་སྤྱི་ཏི་ཡོ་ག་ལ། །དགག་བསྒྲུབ་སྤང་ལེན་བྱུང་ན་བཀའ་དང་འགལ། །དུག་གསུམ་སྤངས་ཀྱང་ང་སྤངས་སོ། །སྐུ་ལྔ་བསྒྲུབས་ཀྱང་ང་སྤངས་སོ། །དུག་ལྔ་སྤངས་ཀྱང་ང་སྤངས་སོ། །མ་རིག་སྤངས་ཀྱང་ང་སྤངས་སོ། །ཡེ་ཤེས་བསྒྲུབས་པས་ང་སྤངས་སོ། །རྣམ་རྟོག་སྤངས་པས་ང་སྤངས་སོ། །ཆོས་ཉིད་བསྒྲུབས་པས་ང་སྤངས་སོ། །འཁོར་བ་སྤངས་ཀྱང་ང་སྤངས་སོ། །མྱང་འདས་སྤངས་ཀྱང་ང་སྤངས་སོ། །སེམས་ཅན་སྤངས་ཀྱང་ང་སྤངས་སོ། །སངས་རྒྱས་བསྒྲུབས་ཀྱང་ང་སྤངས་སོ། །བདག་གཞན་སྤངས་ཀྱང་ང་སྤངས་སོ། །བདག་མེད་བསྒྲུབས་ཀྱང་ང་སྤངས་སོ། །ཕྱོགས་མེད་བསྒྲུབས་ཀྱང་ང་སྤངས་སོ། །དགྲ་གཉེན་སྤངས་ཀྱང་ང་སྤངས་སོ། །དགྲ་གཉེན་གཉིས་མེད་བསྒྲུབས་ཀྱང་ང་སྤངས་སོ། །གསལ་བ་བསྒྲུབས་ཀྱང་ང་སྤངས་སོ། །ལྟ་བ་བལྟས་པས་ཆོས་ཉིད་སྤངས། །སྒོམ་པ་བསྒོམས་པས་ཆོས་ཉིད་སྤངས། །སྤྱོད་པ་སྤྱད་པས་ཆོས་ཉིད་སྤངས། །དམ་ ― DNG002_Page_0424 ―
[མ་དཔེ་གཟིགས་ན་འདིར་གནོན།]
ཚིག་བསྲུངས་པས་ཆོས་ཉིད་སྤངས། །ཕྲིན་ལས་བཙལ་བས་ཆོས་ཉིད་སྤངས། །ས་ལམ་བགྲོད་པས་ཆོས་ཉིད་སྤངས། །འབྲས་བུ་བསྒྲུབ་པས་ཆོས་ཉིད་སྤངས། །དེ་ཅིའི་ཕྱིར་ཞེ་ན། དེ་དག་ཐམས་ཅད་དགག་བསྒྲུབ་གཉིས་ཀྱི་ཆོས། །དེ་དག་སྤང་ལེན་གཉིས་ཀྱི་ཆོས། །དེ་དག་བལྟ་བྱ་ལྟ་བྱེད་གཉིས་ཀྱི་ཆོས། །དེ་དག་བསྒོམ་བྱ་སྒོམ་བྱེད་གཉིས་ཀྱི་ཆོས། །དེ་དག་སྤྱད་བྱ་སྤྱོད་བྱེད་གཉིས་ཀྱི་ཆོས། །དེ་དག་བཙལ་བྱ་རྩོལ་བྱེད་ཆོས། །དེ་དག་བསྲུང་བྱ་སྲུང་བྱེད་གཉིས་ཀྱི་ཆོས། །ས་ལམ་བགྲོད་བྱའི་ཆོས་དང་འབྲས་བུ་ཐོབ་བྱའི་ཆོས། །དེ་དག་ཐམས་ཅད་བྱ་བཙལ་ནད་ཡིན་ནོ། །དེ་ལ་སྤྱད་པས་ནམས་ཀྱང་སངས་མི་རྒྱ། །གཉིས་སྣང་ཞེན་པ་མ་ཆོད་པར། །ཕ་རོལ་ཕྱིན་པའི་སེམས་ཅན་ཉུང་། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། དགག་བསྒྲུབ་སྤང་ཐོབ་གཉིས་ཀྱིས་གྲོལ་བ་མེད་པར་བསྟན་པའི་ལེའུ་སྟེ་བརྒྱད་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །མ་འཁྲུལ་ཁམས་གསུམ་འཁོར་བའི་སེམས་ཅན་རྣམས། །འགྱུར་མེད་ཆོས་སྐུ་འཐོབ་པའི་ཐབས། །དེ་ཡི་གདམས་ངག་གསུང་དུ་གསོལ། །ཞེས་གསོལ་པ་དང་། སྟོན་པ་སེམས་ཉིད་ཀུན་བཟང་དེ། །རིན་པོ་ཆེ་རྩིས་གདབ་མེད་པའི་འོད་ནང་ན། །གསལ་བའི་ཏིང་ངེ་འཛིན་ལ་བཞུགས་སོ། །དེ་ནས་བཞེངས་ནས་འདི་སྐད་གསུངས། །ཆོས་སྐུ་འགྱུར་མེད་ཐོབ་ཐབས་ལ། །རྩོལ་བསྒྲུབ་བགྱི་ཡང་མི་འཚལ་ལོ། །བྱ་བ་ཐམས་ཅད་བཏང་ལ་ནི། །ངང་ཉིད་རང་སར་བཞག་པར་འཚལ། །སྤང་ལེན་ཆགས་འཛིན་ནད་དང་བྲལ། །ང་ཡི་བཀའ་ཆེམས་བསྟན་ལུགས་ནི། །གཞན་ལས་མ་བྱུང་མི་བྱུང་འབྱུང་མི་སྲིད། །ཨ་ལ་ལ་ཧོ། ང་ཡི་བདུད་རྩི་བཅུད་ཀྱི་སྙིང་ཁུ་འདི་ཡིན་ནོ། །ད་ནི་སྣང་སྲིད་ཀུན་ལ་སྣང་། །ཀུན་ལ་སྣང་སྟེ་ང་མི་མཐོང་། །མ་མཐོང་བ་ཡི་ངང་ལ་ཞོག །ད་ནི་སྣོད་བཅུད་ཀུན་ལ་ཁྱབ། །ཀུན་ལ་ཁྱབ་པས་ངོས་བཟུང་མེད། །ངོས་བཟུང་མེད་པའི་ངང་ལ་ཞོག །ད་ནི་ཀུན་གྱི་དངོས་གཞི་སྟེ། །དངོས་གཞི་མེད་པས་ ― DNG002_Page_0425 ―
[མ་དཔེ་གཟིགས་ན་འདིར་གནོན།]
གྲུབ་པ་མེད། །གྲུབ་པ་མེད་པའི་ངང་ལ་ཞོག །ང་ཡིས་ཐམས་ཅད་ཕྱེ་བ་སྟེ། །ཕྱེ་མཁན་རྟོག་པ་གཅིག་ཀྱང་མེད། །མ་ཕྱེ་བ་ཡི་ངང་ལ་ཞོག །ང་ནི་ཀུན་ལ་སྣང་བ་སྟེ། །ཀུན་གྱིས་ང་ནི་སྣང་མི་འགྱུར། །མི་སྣང་བ་ཡི་ངང་ལ་ཞོག །ང་ཡིས་ཐམས་ཅད་བྱས་པ་སྟེ། །ང་ནི་སུས་ཀྱང་མ་བྱས་སོ། །མ་བྱས་པ་ཡི་ངང་ལ་ཞོག །ང་ཡིས་ཐམས་ཅད་བཙལ་བ་སྟེ། །ང་ནི་སུས་ཀྱང་མ་བཙལ་ལོ། །མ་བཙལ་པ་ཡི་ངང་ལ་ཞོག །ང་ཡིས་ཐམས་ཅད་སྤངས་པ་སྟེ། །ང་ནི་སུས་ཀྱང་མ་སྤངས་སོ། །མ་སྤངས་པ་ཡི་ངང་ལ་ཞོག །ང་ཡིས་ཐམས་ཅད་བསྒྲུབ་པ་སྟེ། །ང་ནི་སུས་ཀྱང་མ་བསྒྲུབས་སོ། །མ་བསྒྲུབས་པ་ཡི་ངང་ལ་ཞོག །ང་ཡིས་ཐམས་ཅད་བརྟགས་པ་སྟེ། །ང་ནི་སུས་ཀྱང་མ་བརྟགས་སོ། །མ་བརྟགས་པ་ཡི་ངང་ལ་ཞོག །ང་ཡིས་ཐམས་ཅད་མཚོན་པ་སྟེ། །ང་ནི་སུས་ཀྱང་མ་མཚོན་ནོ། །མ་མཚོན་པ་ཡི་ངང་ལ་ཞོག །ང་ཡིས་ཐམས་ཅད་ཤེས་པ་སྟེ། །ང་ཡི་རང་བཞིན་སུས་ཀྱང་མ་ཤེས་སོ། །མ་ཤེས་པ་ཡི་ངང་ལ་ཞོག །ང་ཡིས་ཐམས་ཅད་བསྐྱེད་པ་སྟེ། །ང་ནི་སུས་ཀྱང་མ་བསྐྱེད་དོ། །མ་བསྐྱེད་རྫོགས་པའི་ངང་ལ་ཞོག །ང་ནི་ཀུན་ལ་སྐྱེ་བ་སྟེ། །ང་ཡི་རང་བཞིན་ཀུན་ལ་སྐྱེ་བ་མེད། །མ་སྐྱེས་སྐྱེ་བ་མེད་པའི་ངང་ལ་ཞོག །ང་ཡིས་ཐམས་ཅད་རྟོགས་པ་སྟེ། །ང་ནི་སུས་ཀྱང་མ་རྟོགས་སོ། །མ་རྟོགས་པ་ཡི་ངང་ལ་ཞོག །རིག་པ་སྐྱེ་བ་མེད་པ་ཡིས། །མྱང་བ་མེད་པའི་ངང་ལ་ཞོག །ཡིད་ལ་འགྱུ་བ་མེད་པ་ཡིས། །གཡོས་པ་མེད་པའི་ངང་ལ་ཞོག །སེམས་ལ་མིང་འདོགས་མེད་པ་ཡིས། །ཆགས་འཛིན་སྤྲོས་པ་རྟགས་ཞེན་མེད་པའི་ངང་ལ་ཞོག །གནས་ལུགས་འགྱུར་མེད་ངང་ལ་ཞོག །སྣང་བ་སོར་བཞག་ངང་ལ་ཞོག །དེ་གཉིས་དབྱེ་བསལ་མེད་པར་ཞོག །གནས་ལུགས་དངོས་པོ་མེད་པར་ཞོག །སྣང་བ་དགག་བསྒྲུབ་མེད་པར་ཞོག །དེ་གཉིས་རྩིས་གདབ་མེད་པར་ཞོག །ཕྱི་ཡི་དཀར་དམར་ཡུལ་རྣམས་ཀུན། །སྣང་ལ་རང་བཞིན་མེད་པར་ཞོག །གནས་ལུགས་སེམས་ཉིད་རྩལ་སྣང་ཀུན། །མི་ ― DNG002_Page_0426 ―
[མ་དཔེ་གཟིགས་ན་འདིར་གནོན།]
སྣང་རང་བཞིན་མེད་པར་ཞོག །བར་གྱི་གཉིས་སྣང་རང་བཞིན་ཀུན། །སྤྲོས་པ་ཐག་ཆོད་ངང་ལ་ཞོག །སྐྱེ་བ་མེད་པའི་ངང་དུ་ཞོག །སྨྲ་བསམ་བརྗོད་མེད་ངང་དུ་ཞོག །འགག་མེད་ཆོས་སྐུའི་ངང་དུ་ཞོག །བརྟགས་སྣང་རྣམ་རྟོག་ཐམས་ཅད་ཀྱང་། །གཉིས་མེད་ངང་དུ་ཐམས་ཅད་ཞོག །ཞོག་པའི་ཚིགས་ཀྱང་མཚོན་མེད་ངང་དུ་ཞོག །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཉམས་བླངས་ངང་བཞག་བདུད་རྩིའི་ཉིང་ཁུའི་ལེའུ་སྟེ་དགུ་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །མ་བཅོས་རྣལ་དུ་བཞག་པ་ཡི། །དེ་ཡི་བཞག་ཐབས་ཇི་ལྟར་ལགས། །བདག་ཅག་རྣམས་ལ་བསྟན་དུ་གསོལ། །ཞེས་གསོལ་པ་དང་། སྟོན་པ་ཀུན་ཏུ་བཟང་པོ་དེས། །རིན་པོ་ཆེ་འོད་འཕྲོ་འདུ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་ལས་བཞེངས་ནས། །ང་ཡི་མ་བཅོས་གནས་བཞག་བསྟན། །རྡོ་རྗེ་སེམས་དཔས་གོ་བར་གྱིས། །ང་ལ་བལྟ་བར་འདོད་པ་རྣམས། །བལྟ་བར་མ་བྱེད་དེ་བཞིན་ཉིད་དུ་ཞོག །བལྟས་པས་མཐོང་བའི་ཡུལ་མེད་ཀྱིས། །མ་བལྟས་བཞག་པས་ལྟ་བ་ཉིད་དང་མཇལ། །ང་ལ་བསྒོམ་པར་འདོད་པ་རྣམས། །བསྒོམ་པར་མ་བྱེད་གཡོ་མེད་ངང་ལ་ཞོག །འགྱུ་མེད་ངང་ལ་བཞག་པས་སྒོམ་པ་ཉིད་དང་མཇལ། །ང་ལ་སྤྱོད་པར་འདོད་པ་རྣམས། །སྤྱད་པར་མ་བྱེད་བྱར་མེད་ངང་ལ་ཞོག །བྱར་མེད་ངང་ལ་བཞག་པས་སྤྱོད་པ་ཉིད་དང་མཇལ། །ང་ལ་བསྲུང་བར་འདོད་པ་རྣམས། །བསྲུང་བར་མ་བྱེད་མི་འདའི་ངང་ལ་ཞོག །འདའ་མེད་ངང་ལ་བཞག་པས་དམ་ཚིག་ཉིད་དང་མཇལ། །ང་ལ་བཙལ་བར་འདོད་པ་རྣམས། །བཙལ་བར་མ་བྱེད་རྩོལ་མེད་ངང་ལ་ཞོག །རྩོལ་མེད་གདེང་ལ་བཞག་པས་ཕྲིན་ལས་ཉིད་དང་མཇལ། །ང་ལ་བགྲོད་པར་འདོད་པ་རྣམས། །བགྲོད་པར་མ་བྱེད་དབྱེར་མེད་ངང་ལ་ཞོག །ང་ལ་བསྒྲུབ་པར་འདོད་པ་རྣམས། །བསྒྲུབ་པར་མ་བྱེད་བསྒྲུབ་མེད་ངང་ལ་ཞོག །ང་ལ་ཐོབ་པར་ ― DNG002_Page_0427 ―
[མ་དཔེ་གཟིགས་ན་འདིར་གནོན།]
འདོད་པ་རྣམས། །ཐོབ་རྒྱུ་མེད་ཀྱིས་རང་སར་རང་ཉིད་ཞོག །བཞག་ཏུ་མེད་པས་འབྲས་བུ་ཆེན་པོ་ཐོབ། །ཐོབ་ཏུ་མེད་པས་ཐོབ་པའི་དོན་རང་མཇལ། །མཇལ་དུ་མེད་པས་འགྱུར་མེད་ངང་ལ་ཞོག །སྣང་བ་ཐམས་ཅད་སོར་བཞག་ངང་ལ་ཞོག །གནས་ལུགས་ཐམས་ཅད་འགྱུར་མེད་ངང་ལ་ཞོག །སྤྲོས་པ་ཐམས་ཅད་ཐག་ཆོད་ངང་ལ་ཞོག །སྙིང་པོ་ཆོས་སྐུའི་རང་བཞིན་ནི། །མི་སྣང་རང་བཞིན་མེད་པའི་ངང་ལ་ཞོག །རྟོག་ཚོགས་བློ་ལ་སྣང་བའི་ཡུལ་སྣང་རྣམས། །སྣང་ལ་རང་བཞིན་མེད་པའི་ངང་ལ་ཞོག །གཉིས་སྣང་གཟུང་འཛིན་གཉིས་ཀྱིས་བཅིངས་པ་རྣམས། །དབྱེ་བསལ་རྩིས་གདབ་མེད་པའི་ངང་ལ་ཞོག །ཡིད་དཔྱོད་སེམས་ཀྱི་དྲན་རིག་རྣམས། །རང་དྭངས་ཆེན་པོའི་ངང་ལ་ཞོག །རྟོག་ཚོགས་སེམས་ཀྱི་ཆོ་འཕྲུལ་རྣམས། །རང་སངས་ཆེན་པོའི་ངང་ལ་ཞོག །འགྱུ་བ་རིག་པ་བརྟག་པ་རྣམས། །གསལ་གདངས་ཆེན་པོའི་ངང་ལ་ཞོག །ངང་བཞག་ཐབས་ཀྱིས་དྲིལ་བས་གསུམ་དུ་འདུས། །རིག་པ་སྐྱེ་བ་མེད་པའི་ངང་ལ་ཞོག །ཡིད་ནི་འགྱུ་བ་མེད་པའི་ངང་ལ་ཞོག །སེམས་ནི་མིང་མེད་ངང་ལ་ཞོག །ཐམས་ཅད་གཅིག་ཏུ་དྲིལ་བའི་ངང་བཞག་རྣམ་གསུམ་འདི། །ཐོབ་ཏུ་མེད་པའི་སྐུ་གསུམ་འདིས། །སྲིད་གསུམ་ཟིལ་གནོན་ས་གསུམ་རང་སར་ནོན། །དུག་གསུམ་རྩད་བཅད་ཁམས་གསུམ་ཕྱགས་མས་བཏབ། །ངོ་བོ་རང་བཞིན་ཐུགས་རྗེའི་སྣང་བའོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མ་བཅོས་རྣལ་དུ་བཞག་པའི་ལེའུ་སྟེ་བཅུ་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །སྙིང་པོ་འགྱུར་མེད་ཆོས་སྐུ་ལ། །མིང་མེད་མིང་བཏགས་ཇི་ལྟར་ལགས། །སེམས་ཉིད་སྟོན་པ་ཀུན་བཟང་དེ། རིན་པོ་ཆེ་འོད་འབར་བའི་ཏིང་ངེ་འཛིན་ལ་ཞུགས་སོ། །དེ་ནས་བཞེངས་ནས་འདི་སྐད་གསུངས། །ཆོས་སྐུ་མིང་མེད་མཚོན་མེད་ལ། །མཚོན་པའི་མིང་གིས་གོལ་བར་བཤད། །གོལ་སྒྲིབ་མཚན་ཉིད་ངས་བཤད་ཀྱིས། །རྡོ་རྗེ་སེམས་དཔས་ཡིད་ལ་ཟུང་། །སངས་རྒྱས་མེད་པས་སངས་རྒྱས་མིང་ཡང་ ― DNG002_Page_0428 ―
[མ་དཔེ་གཟིགས་ན་འདིར་གནོན།]
མེད། །མེད་པར་འདོད་པས་སངས་རྒྱས་གོལ། །ཆོས་སྐུ་མེད་པས་ཆོས་སྐུའི་མིང་ཡང་མེད། །མེད་པར་འདོད་པས་ཆོས་སྐུ་གོལ། །ལོངས་སྐུ་མེད་པས་ལོངས་སྐུའི་མིང་ཡང་མེད། །མེད་པར་འདོད་པས་ལོངས་སྐུ་གོལ། །སྤྲུལ་སྐུ་མེད་པས་སྤྲུལ་སྐུའི་མིང་ཡང་མེད། །མེད་པར་འདོད་པས་སྤྲུལ་སྐུ་གོལ། །འཁོར་བ་མེད་པས་འཁོར་བའི་མིང་ཡང་མེད། །མེད་པར་འདོད་པ་རང་གིས་གོལ། །མྱང་འདས་མེད་པས་མྱང་འདས་མིང་ཡང་མེད། །མེད་པར་འདོད་པ་རང་གིས་གོལ། །མ་རིག་མེད་པས་མ་རིག་མིང་ཡང་མེད། །མེད་པར་འདོད་པ་རང་གིས་འཁྲུལ། །ཡེ་ཤེས་མེད་པས་ཡེ་ཤེས་མིང་ཡང་མེད། །མེད་པར་འདོད་པས་རང་གིས་འཁྲུལ། །རྣམ་རྟོག་མེད་པས་རྣམ་རྟོག་མིང་ཡང་མེད། །མེད་པར་འདོད་པ་རང་གིས་འཁྲུལ། །ཆོས་ཉིད་མེད་པས་ཆོས་ཉིད་མིང་ཡང་མེད། །མེད་པར་བསྒྲུབ་པར་འདོད་པ་རང་གིས་འཁྲུལ། །ཕྱོགས་རིས་མེད་པས་ཕྱོགས་རིས་མིང་ཡང་མེད། །མེད་པར་བསྒྲུབ་པར་འདོད་པ་རང་གིས་འཁྲུལ། །དེ་དག་ཐམས་ཅད་གཉིས་མེད་ལ། །གཉིས་སུ་བཟུང་བས་འཁྲུལ་པ་ཡིན། །དེ་དག་ཐམས་ཅད་དབྱེར་མེད་ལ། །དབྱེ་བ་བྱུང་བས་བསྒྲིབས་པ་ཡིན། །དེ་དག་ཐམས་ཅད་བརྗོད་མེད་ལ། །བརྗོད་པ་བྱུང་བས་བསྒྲིབས་པ་ཡིན། །དེ་དག་ཐམས་ཅད་མིང་མེད་ལ། །མིང་དུ་བཏགས་པས་འཁྲུལ་པ་ཡིན། །དེ་དག་ཐམས་ཅད་མཉམ་པ་ལ། །ཕྱོགས་སུ་བཟུང་བས་འཁྲུལ་པ་ཡིན། །དེ་དག་ཐམས་ཅད་ཆགས་མེད་ལ། །ཆགས་ཞེན་བྱུང་བས་འཁྲུལ་པ་ཡིན། །གནས་དོན་མ་རྟོགས་སྒྲིབ་པ་ཡིན། །འགྲོ་སྒོ་ནོར་བས་འཁྲུལ་པ་ཡིན། །སྒོ་ལྔར་འཁྱམས་པས་འཁྲུལ་པ་ཡིན། །གོལ་སྒྲིབ་གཉིས་སུ་མཉམ་པ་ལ། །ཕྱོགས་སུ་བཟུང་བས་འཁྲུལ་པ་ཡིན། །དེ་དག་ཐམས་ཅད་ཆགས་མེད་ལ། །ཆགས་ཞེན་བྱུང་བས་འཁྲུལ་པ་ཡིན། །གནས་དོན་མ་རྟོགས་སྒྲིབ་པ་ཡིན། །འགྲོ་སྒོ་ནོར་བས་གོལ་ས་ཡིན། །སྒོ་ལྔར་འཁྱམས་པས་འཁྲུལ་པ་ཡིན། །གོལ་སྒྲིབ་ཉིས་སྟོང་ལྔ་བརྒྱ་ཡང་། །དབྱེ་ན་བསམ་གྱིས་མི་ཁྱབ་སྟེ། །བསྡུས་པས་གསུམ་ ― DNG002_Page_0429 ―
[མ་དཔེ་གཟིགས་ན་འདིར་གནོན།]
པོ་དེ་རུ་འདུས། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། གོལ་སྒྲིབ་འཁྲུལ་གསུམ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །གོལ་སྒྲིབ་ལ་བཟླ་ཇི་ལྟར་ལགས། །ཞེས་གསོལ་པ་དང་། སྟོན་པ་ཀུན་ཏུ་བཟང་པོ་དེ། རིན་པོ་ཆེའི་འོད་ཐིག་ལེར་བསྡུས་པའི་ཏིང་ངེ་འཛིན་ལ་བཞུགས་སོ། །བཞེངས་ནས་འཁོར་ལ་འདི་སྐད་གསུངས། །ཐེག་པའི་གོལ་སྒྲིབ་འཁྲུལ་པ་ངས་མང་བསྟན། །བརྗོད་ཀྱིས་མི་ལངས་བསམ་གྱིས་མི་ཁྱབ་སྟེ། །ཡང་ན་རྒྱུད་ནས་ཞིབ་པར་གསུངས། །རང་རང་ནང་ན་རྒྱས་པར་བཞུགས། །སྤྱི་ཏི་ཡོ་གའི་གོལ་སྒྲིབ་འཁྲུལ་པ་ལ་བཟླ་བཤད། །རྡོ་རྗེ་སེམས་དཔས་གོ་བར་ཟུང་། །མ་རྟོགས་བློ་ལ་གོལ་སྒྲིབ་སྣང་མོད་ཀྱང་། །སྙིང་པོའི་དོན་རྟོགས་གོལ་སྒྲིབ་མེད། །མིང་མེད་མིང་བཏགས་གོལ་བ་ཡང་། །མིང་མེད་བརྗོད་ལས་འདས་པས་གོལ་བ་མེད། །གཟུང་འཛིན་གཉིས་ཀྱིས་བཅིངས་པའི་སྒྲིབ་པ་ཡང་། །དབྱེ་གསལ་རྩིས་གདབ་མེད་པས་སྒྲིབ་པ་མེད། །མཚོན་པ་རྣམ་རྟོག་བློ་ཡི་འཁྲུལ་པ་རྣམས། །སྨྲ་བསམ་བརྗོད་ལས་འདས་པས་འཁྲུལ་དུ་མེད། །གོལ་སྒྲིབ་བསམ་གྱིས་མི་ཁྱབ་ཀྱང་། །བསྡུས་པས་གོལ་སྒྲིབ་འཁྲུལ་གསུམ་སྟེ། །འཆར་བའི་སྒོ་ནོར་གོལ་ས་ཡང་། །ལྡོག་པའི་ཐབས་ཤེས་གོལ་དུ་མེད། །གནས་དོན་མ་ཤེས་སྒྲིབ་པ་ཡང་། །སྙིང་པོར་དོན་ཤར་སྒྲིབ་དུ་མེད། །སྒོ་ལྔར་འཁྱམས་པའི་འཁྲུལ་པ་ཡང་། །ཡིད་རྩད་ཆོད་པས་འཁྲུལ་དུ་མེད། །འགྲོ་སྒོ་མ་ནོར་ཡང་དག་ལ། །ངེས་པའི་དོན་མཐོང་ཡང་དག་ལམ། །ཐག་ཆོད་གདེང་ལྡན་རེ་དོགས་བྲལ། །སྙིང་པོའི་དོན་རྟོགས་གོལ་སྒྲིབ་མེད། །མཉམ་པའི་དོན་རྟོགས་འཁྲུལ་པ་མེད། །གཉིས་མེད་དོན་རྟོགས་ཕྱོགས་རིས་མེད། །དབྱེར་མེད་དོན་རྟོགས་གཟུང་འཛིན་མེད། །ཡེ་ཤེས་དོན་རྟོགས་མ་རིག་མེད། །སྐུ་གསུམ་དོན་རྟོགས་དུག་གསུམ་མེད། །སྐུ་ལྔའི་དོན་རྟོགས་དུག་ལྔ་མེད། །སངས་རྒྱས་དོན་རྟོགས་སེམས་ཅན་མེད། །མྱང་འདས་དོན་རྟོགས་འཁོར་བ་མེད། ། ― DNG002_Page_0430 ―
[མ་དཔེ་གཟིགས་ན་འདིར་གནོན།]
ཐག་ཆོད་དོན་རྟོགས་ཡུལ་སེམས་མེད། །རྟོགས་པ་ཀློང་ནས་ཤར་བས་མ་རྟོགས་མེད། །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། གོལ་སྒྲིབ་ལ་བཟླ་བའི་ལེའུ་སྟེ་བཅུ་གཉིས་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །རང་ལ་ཡེ་ནས་ཡོད་པ་ལ། །བྱ་བཙལ་རྩོལ་བསྒྲུབ་མི་འཚལ་ལམ། །ཞེས་གསོལ་པ་དང་། སེམས་ཉིད་ཀུན་ཏུ་བཟང་པོ་དེ། རིན་པོ་ཆེ་འོད་ལྔའི་ནང་ན་གསལ་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འདི་སྐད་གསུངས། །རང་ལ་ཡེ་ནས་ཡོད་པ་ལ། །རྩོལ་བསྒྲུབ་བྱ་བཙལ་མི་འཚལ་ཏེ། །ང་ཡིས་རེ་མེད་རང་གནས་བཤད། །རྡོ་རྗེ་སེམས་དཔས་ཡིད་ལ་ཟུང་། །ངང་དྭངས་ལྟ་བ་ཡིན་ཤེས་ལ། །ཁྱོད་ཀྱིས་བལྟ་བ་མ་ལྟ་ཅིག །ངང་དྭངས་སྒོམ་པ་ཡིན་ཤེས་ལ། །ཁྱོད་ཀྱིས་བསྒོམ་པ་མ་སྒོམས་ཤིག །ངང་དྭངས་སྤྱོད་པ་ཡིན་ཤེས་ལ། །ཁྱོད་ཀྱིས་སྤྱོད་པ་མ་སྤྱད་ཅིག །ངང་དྭངས་འབྲས་བུ་ཡིན་ཤེས་ལ། །ཁྱོད་ཀྱིས་འབྲས་བུ་མ་སྒྲུབས་ཤིག །ང་ཉིད་སྐུ་གསུམ་ཡིན་ཤེས་ལ། །ཁྱོད་ཀྱིས་སྐུ་གསུམ་མ་སྒྲུབས་ཤིག །རང་ཉིད་སངས་རྒྱས་ཡིན་ཤེས་ལ། །ཁྱོད་ཀྱིས་སངས་རྒྱས་མ་སྒྲུབས་ཤིག །སེམས་ཉིད་ཆོས་སྐུ་ཡིན་ཤེས་ལ། །ཆོས་སྐུ་གཞན་ནས་མ་བཙལ་ཅིག །བཙལ་བས་བསྐལ་པ་འབུམ་ཕྲག་དུ་ཡང་མི་རྙེད་དོ། །འདས་པའི་སངས་རྒྱས་རྣམས་ཀྱིས་མ་བཙལ་ཏོ། །ཕྱིས་འབྱུང་སངས་རྒྱས་རྣམས་ཀྱིས་མི་འཚོལ་ལོ། །ད་ལྟའི་རྒྱལ་བ་རྣམས་ཀྱིས་བཙལ་བས་མི་རྙེད་དོ། །བཙལ་བས་རྙེད་པའི་སངས་རྒྱས་སམ། །བསྒྲུབ་པས་འགྲུབ་པའི་སྐུ་གསུམ་མམ། །ལྟ་སྒོམ་སྤྱོད་འབྲས་བཙལ་བའི་བྱང་ཆུབ་བམ། །དེ་རྣམས་བརྒྱ་ལ་རྙེད་ཀྱང་རྣམ་རྟོག་གམ། །སྐྱེ་བའི་འཇིག་རྟེན་རྡོས་པའི་ཆོས་སུ་འགྱུར། །དེ་བས་གོང་ལྟར་ཤེས་པར་གྱིས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རང་གནས་རེ་མེད་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་སྟོན་པ་ཀུན་ ― DNG002_Page_0431 ―
[མ་དཔེ་གཟིགས་ན་འདིར་གནོན།]
བཟང་ལ། །རྡོ་རྗེ་སེམས་དཔས་འདི་སྐད་ཞུས། །རང་མདངས་ཆེན་པོ་ཅི་ལྟར་ལགས། །བདག་ཅག་རྣམས་ལ་བསྟན་དུ་གསོལ། །ཞེས་གསོལ་པ་དང་། སྟོན་པ་རིན་པོ་ཆེ་འོད་བཀོལ་བ་མེད་པའི་ཏིང་ངེ་འཛིན་ལ་བཞུགས་སོ། །བཞེངས་ནས་འཁོར་ལ་འདི་སྐད་གསུངས། །བདུད་རྩི་ཡང་ཞུན་རང་མདངས་བཤད། །འཁོར་རྣམས་མ་ཡེངས་གུས་པས་ཉོན། །ཨཱ་པ་ར་ཙིཏྟ་ཨཱ་སིམ། སྐུ་གསུམ་འགྱུར་བ་མེད་དེ་རང་མདངས་ཆེན་པོར་གདའ། །དུག་གསུམ་སྤང་བ་མེད་དེ་རང་དྭངས་ཆེན་པོར་གདའ། །ཡེ་ཤེས་བཙལ་བ་མེད་དེ་རང་དྭངས་ཆེན་པོར་གདའ། །མ་རིག་སངས་པ་མེད་དེ་རང་དྭངས་ཆེན་པོར་གདའ། །ཆོས་ཉིད་བཙལ་བ་མེད་དེ་རང་དྭངས་ཆེན་པོར་གདའ། །རྣམ་རྟོག་སྤང་བ་མེད་དེ་རང་དྭངས་ཆེན་པོར་གདའ། །སངས་རྒྱས་བསྒྲུབ་པ་མེད་དེ་རང་དྭངས་ཆེན་པོར་གདའ། །སེམས་ཅན་སྤང་བ་མེད་དེ་རང་དྭངས་ཆེན་པོར་གདའ། །མྱང་འདས་བསྒྲུབ་པ་མེད་དེ་རང་དྭངས་ཆེན་པོར་གདའ། །འཁོར་བ་སྤངས་པ་མེད་དེ་རང་དྭངས་ཆེན་པོར་གདའ། །ཕྱོགས་རིས་སྤངས་པ་མེད་དེ་རང་དྭངས་ཆེན་པོར་གདའ། །ཆོས་སྐུ་འགྱུར་བ་མེད་དེ་རང་དྭངས་ཆེན་པོར་གདའ། །སྙིང་པོ་འགྱུར་བ་མེད་དེ་རང་དྭངས་ཆེན་པོར་གདའ། །ངང་ཉིད་འགྱུར་བ་མེད་དེ་རང་དྭངས་ཆེན་པོར་གདའ། །ངང་དྭངས་གཡོ་འགུལ་མེད་དེ་རང་དྭངས་ཆེན་པོར་གདའ། །སེམས་ཉིད་བསླད་པ་མེད་དེ་རང་དྭངས་ཆེན་པོར་གདའ། །གཞི་ཉིད་འགྱུར་བ་མེད་དེ་རང་དྭངས་ཆེན་པོར་གདའ། །དེ་ལ་སོགས་པ་བརྟགས་སྣང་ཐམས་ཅད་རང་དྭངས་ཆེན་པོར་གདའ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བདུད་རྩི་ཡང་ཞུན་རང་དྭངས་ཀྱི་ལེའུ་སྟེ་བཅུ་བཞི་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །ཆོས་ཉིད་གཏིང་གསལ་ཆེན་པོའི་དོན། །འདུས་པའི་འཁོར་ལ་བསྟན་དུ་གསོལ། །ཞེས་གསོལ་པ་དང་། །སེམས་ཉིད་སྟོན་པ་ཀུན་བཟང་དེ། རིན་པོ་ཆེའི་འོད་གཏིང་ནས་འབར་བ་ཞེས་བྱ་བའི་ཏིང་ངེ་འཛིན་ལ་བཞུགས་སོ། །དེ་ནས་བཞེངས་ནས་འཁོར་ལ་འདི་སྐད་གསུངས། །ཨ་མུན་དྷ་རི་པེ་ཏ་ཨ་ཏི། བདུད་རྩི་བཅུད་ཀྱི་སྒྲོན་གསལ་བཤད། །རྡོ་རྗེ་སེམས་དཔས་ ― DNG002_Page_0432 ―
[མ་དཔེ་གཟིགས་ན་འདིར་གནོན།]
གོ་བར་ཟུང་། །སྙིང་པོ་འགྱུར་མེད་ཆོས་སྐུའི་ཀློང་ཡངས་དེར། །ཤེས་པ་མ་འགགས་སྣ་ཚོགས་ཀུན་ཏུ་རྒྱུ། །གར་ཡང་འགྲོ་ས་མ་རྙེད་སྙིང་པོའི་ཀློང་དུ་ཐིམ། །ཆོས་ཉིད་མ་ལམ་འགགས་རྩལ་སྣང་དུ་ཐིམ་པས། །མ་བུ་ངོ་འཕྲད་ཐོག་མར་ཡེ་སངས་རྒྱས། །དབྱེར་མེད་ངང་ཐིམ་ཡེ་ཤེས་རང་ས་ཟིན། །འཁྲུལ་པ་རང་སངས་རྣམ་རྟོག་རང་སར་གྲོལ། །སྐྱེ་མེད་དོན་རྟོགས་སྙིང་པོའི་ཀློང་ནས་ཤར། །བརྗོད་མེད་དོན་རྟོགས་འགྱུར་མེད་ངང་ལ་གནས། །དེ་ལ་ཀུན་ཀྱང་གང་གནས་པ། །སྣང་བ་ཡིད་ལ་མ་བྱས་གཏིང་གསལ་ཆེན་པོ་ཡིན། །སྟོང་པ་ཡིད་ལ་མ་བྱས་གཏིང་གསལ་ཆེན་པོ་ཡིན། །གཉིས་མེད་ཡིད་ལ་མ་བྱས་གཏིང་གསལ་ཆེན་པོ་ཡིན། །སྐུ་གསུམ་ཡིད་ལ་མ་བྱས་གཏིང་གསལ་ཆེན་པོ་ཡིན། །དུག་གསུམ་རྩད་ནས་གཅོད་པས་གཏིང་གསལ་ཆེན་པོ་ཡིན། །སྟོང་པ་ཡིད་ལ་མི་བྱེད་གཏིང་གསལ་ཆེན་པོ་ཡིན། །བདེ་བ་ཡིད་ལ་མི་བྱེད་གཏིང་གསལ་ཆེན་པོ་ཡིན། །སྐྱེ་མེད་ཡིད་ལ་མི་བྱེད་གཏིང་གསལ་ཆེན་པོ་ཡིན། །དེ་ལ་སོགས་པ་ཐམས་ཅད་གཏིང་གསལ་ཆེན་པོ་ཡིན། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས་བདུད་རྩི་བཅུད་ཀྱི་སྒྲོན་གསལ་གྱི་ལེའུ་སྟེ་བཅོ་ལྔ་པའོ།། །།དེ་ནས་ཀུན་ཏུ་བཟང་པོ་དེས། །རིན་པོ་ཆེ་བརྡའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་རྡོ་རྗེ་སེམས་དཔའ་ཡིས། །སྟོན་པ་ཀུན་ཏུ་བཟང་པོ་ལ། །ཆོས་རྣམས་བརྡ་ཡིས་ཇི་ལྟར་བཤད། །ཅེས་གསོལ་པ་དང་། སྡུད་པ་སེམས་དཔའ་རྡོ་རྗེ་ལ། །ཀུན་ཏུ་བཟང་པོས་ཏིང་ངེ་འཛིན་ལས་བཞེངས་ཏེ། དེ་ནས་འཁོར་ལ་འདི་སྐད་གསུངས། །ཨཱ་ཨཱ་འགས་ཡ། མ་ཧཱ་སུ་ཁ་ཧོ། སྤྱི་ཏི་བརྡ་ཡི་ལེའུ་བཤད། །རྡོ་རྗེ་སེམས་དཔས་ཡིད་ལ་ཟུང་། །ནམ་མཁར་བྲོ་བརྡུངས། རི་ཁར་བསོས་ཐོབ། གངས་ཁར་མདུང་ཚུགས། མཁར་ཁར་དར་ཕྱོར། རྒྱ་མཚོར་ཁྱིམ་གྱིས། ནམ་མཁས་ཡུལ་གྱིས། དབུས་ཀྱི་རི་བོས་མཁར་གྱིས། བར་སྣང་ལུས་ལ་གོན། ན་བུན་མགོ་ལ་གོན། སྐར་མདའ་སྐེད་ལ་ཆིངས། གཡས་སུ་ཉི་མ་ ― DNG002_Page_0433 ―
[མ་དཔེ་གཟིགས་ན་འདིར་གནོན།]
ཐོགས། གཡོན་དུ་ཟླ་བ་ཐོགས། སྤྲིན་གྱི་མ་གྱིས། འབྱུང་བ་ལྔ་གོས་ཀྱིས། སྣང་བ་ཟས་སུ་ཟོ། སྲིད་པ་ལྟོ་རུ་ཆུག །འཇའ་ཚོན་གྱི་རྒྱལ་མཚན་གྱིས། གཅིག་སོད། གཉིས་སྤོངས། གསུམ་རྟེན། གཅིག་ཡུལ་ཕྱུང་། གསུམ་སྙིང་ནས་དྲོངས། གཉིས་ཀྱི་སྐེ་ཆོད། གཅིག་ཡུལ་འཛིན་ཏུ་ཆུག །གསུམ་གྱི་དགྲ་དཔུང་ཆོམས། གཉིས་རོག་བྱེད་དུ་ཆུག །ལོང་བའི་མིག་ལ་ཉི་མ་ཁོབ། མེ་ཆེན་འབར་བ་ཆུ་ཡིས་སོད། མཚོ་ཆེན་ཁོལ་མ་མེ་ཡིས་སོད། ཀུན་གཞི་ལྕགས་སུ་ཆུག །ཡིད་ལ་མདས་རྒྱོབ། ཕུང་མཁན་ངོས་ཟུང་། ལྔ་པོ་ཁྱེར། གཅིག་པོ་སོང་། ཐོག་མཐའ་གཉིས་ཀྱི་གྲས་ཐག་ཆོད། །དགྲ་དཔུང་ཆོམས་ལ་རྫོངས་སུ་ཞུགས། །གནད་མཁར་བསྲུངས་ལ་ཟམ་འཕྲང་སྡོམས། ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བརྡའི་ལེའུ་སྟེ་བཅུ་དྲུག་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །ཐེག་པ་གཞན་ལ་མེད་པའི་སྤྱི་ཏིའི་བརྡའ་ཆོས་ཅི་ལྟར་ལགས། ཞེས་གསོལ་པ་དང་། དེ་ནས་སེམས་ཉིད་ཀུན་བཟང་དེ། རིན་པོ་ཆེ་འོད་བཀོལ་བ་མེད་པའི་ཏིང་ངེ་འཛིན་ལ་བཞུགས་སོ། །དེ་ནས་ཏིང་ངེ་འཛིན་དེ་ལས་བཞེངས་ནས། འདི་སྐད་ཅེས་གསུངས་སོ། །ང་ཡི་བརྡའ་ཆོས་འདི་ལྟ་བུ། །ཐེག་པ་གཞན་ལ་མི་འབྱུང་བས། །བརྡ་ཡི་ཆོས་རྣམས་ང་ཡིས་བཤད། །འཁོར་རྣམས་མ་ཡེངས་གུས་པས་ཉོན། །རི་བསྙིལ་མེ་སོད་བྲག་ཆོག་ལ། །མཚོ་སྐོམས་མདུད་ཁྲོལ་ཕྱགས་མས་ཐོབ། །རྒན་རྒོན་སོད་ལ་བུ་ཕྲུག་སྦོས། །ར་ཆོ་གང་སོད་རལ་གྲི་ཐོགས། །ཕག་སྦྲུལ་བྱ་དང་ཁྱི་སོད་ལ། །ནམ་མཁའི་དབྱིངས་སུ་སྦོས་ལ་ཞོག །ཁྱུང་ལ་ཞོན་ནས་སེང་གེ་ཁྲིད། ནམ་མཁའ་གོས་སུ་གོན། ས་གཞི་སྟན་ཏུ་ཐིང་། སྣང་སྲིད་ཁ་རུ་ཆུག་ལ་རྒྱ་མཚོ་ཁྲོགས་ཆོད་གྱིས། མཁའ་ལ་ལྟོས་ལ་སྤྲིན་ལ་ཚུགས། །མཚོ་གཏིང་ཉོལ་ལ་ཉི་ཟླ་མིག་ཏུ་ཆུག །རླུང་ཕོ་སྟོད་ལ་ནོན་ལ་སྨིག་རྒྱུ་དབྱིངས་སུ་སྐྱོལ། །སྤེའུ་སོད་ལ་ནམ་མཁར་སྡོད། རིག་པའི་ཁྱེའུ་ཆུང་ནམ་མཁར་ཕྱིན། །འགྲོ་ས་མ་རྙེད་ཡི་མུག་ནས། །ནམ་མཁའི་དབྱིངས་སུ་ངལ་ཅིག་སོས། །ཉི་ཟླའི་དབྱིངས་སུ་ ― DNG002_Page_0434 ―
[མ་དཔེ་གཟིགས་ན་འདིར་གནོན།]
ཤུལ་བཏོད་ལ། །འཇའ་ཚོན་ལྔ་ཡི་ལམ་དུ་ཞུགས། །རྒྱ་མཚོ་ཆེན་པོའི་གཏིང་དུ་ཕྱིན། །འགྲོ་ས་མ་རྙེད་ལྕེབས་ནས་བཏང་། །མུན་སྣང་གཉིས་སུ་གསལ་བའི་སྒོ་ཕྱེ་ལ། །དགྲ་ཟིན་གཉིས་ཀྱི་ས་མཚམས་སུ། །མི་འཇིགས་པ་ཡི་སྐྱེལ་མ་ཚོལ། །རྣོ་བའི་མཚོན་ཐོགས་སྲ་བའི་གོ་གོན་ལ། །མགྱོགས་པའི་རྟ་ཞོན་མི་བསླུའི་གྲོགས་པོ་ཚོལ། །འཕྲང་གསུམ་ནང་དུ་སྒུག་བཅུག་ལ། །དགྲ་ངོས་ཟུང་ལ་དགྲ་རྣམས་སོད། །གནད་གསུམ་ནང་དུ་གཙིགས་ལ་དབབ། །རྒྱལ་པོ་བཙོན་དུ་ཟིན་པ་དང་། །དགྲ་ཡི་བུ་རྣམས་བསད་པ་ཡིས། །རྒྱལ་ཁམས་ཆམ་ལ་འབབས་པ་ཡིན། །འཁོར་འདས་གཉིས་ཀྱི་འཁྲུག་པ་ཟིན། །གཏན་མཁར་བཙན་པོ་བསྲུང་བ་ལ། །རྫོང་གསུམ་ནང་དུ་ཉལ་ལ་བསྡད། །སོ་མཚམས་ཡུལ་སྲུངས་འཕྲང་གསུམ་སྡོམས། །ཉོན་མོངས་དམག་དཔུང་ཆེན་པོ་ནི། །མ་བཟློག་པ་རུ་གྱུར་པ་ན། །སྲིད་སྡེ་བཙལ་ལ་དམག་སོ་བལྟ། །གོ་ཆ་མཚོན་ལ་ནན་ཏན་བསྐྱེད། །བསྒོམ་པའི་ཁྲབ་ཆེན་ལུས་ལ་གོན། །མན་ངག་གནད་ཀྱི་སྐེ་རགས་བཅིངས། །བྱིན་རླབས་ཆེན་པོའི་ཁྲབ་ལག་བཅུག །བཀའ་ལུང་མ་ནོར་ཧེལ་སླག་གོན། །གཉིས་མེད་ཆེན་པོའི་རྐང་ཆས་བཅུག །འགྱུར་བ་མེད་པའི་ཐག་གུས་བཅིངས། །ལུང་རིགས་གཉིས་ཀྱི་འཁོར་གསུམ་བཏགས། །སྟོང་ཉིད་གཞུ་མོ་ལག་ཏུ་ཐོགས། །ཐབས་དང་ཤེས་རབ་མཆོག་མ་ལ། །ཆང་ཟུང་ཐིག་ལེ་ཉག་གཅིག་ཡིན། །རྒྱུད་ནི་འགྱུར་བ་མེད་པ་ཡིན། །བདེ་བ་ཆེན་པོའི་སྙུག་མ་ལ། །ལུང་རིགས་གཉིས་ཀྱི་སྟོང་ཞིག་བཏོད། །ཚད་མེད་བཞི་ཡི་སྒྲོ་ཞིག་བསྒྲོན། །འགྱུར་བ་མེད་པའི་གཅས་ཅིག་དཀྲིས། །ཤེས་རབ་རྣོན་པོའི་མདེའུ་བཅུག །མདའ་དེ་སྟོང་ཉིད་དང་པོར་གསལ། །བལྟ་བའི་ཕུབ་ཆུང་རྒྱབ་ཏུ་གོན། །སྒོམ་པའི་རྨོག་ཞུ་མགོ་ལ་གོན། །དེ་ལྟར་བྱས་ནས་དམག་ལ་འགྲོ། །དམག་དཔོན་ཆེན་པོ་འགྱུར་མེད་དང་། །དམག་དཔོན་ཆེན་པོ་སྐྱེ་མེད་དང་། །དམག་དཔོན་ཆེན་པོ་འགག་མེད་དང་། །སྐྱེ་འགག་གཉིས་མེད་དམག་དཔོན་བཞིས། །དཔའ་བོ་ཆེན་པོ་བཞི་བཙལ་ཏེ། །དཔའ་བོ་ཆེན་པོ་གྲོས་ཐག་ཆོད། ། ― DNG002_Page_0435 ―
[མ་དཔེ་གཟིགས་ན་འདིར་གནོན།]
དཔའ་བོ་ཆེན་པོ་ལམ་ལ་མཁས། །དཔའ་བོ་ཆེན་པོ་མངོན་ཤེས་ཅན། །དཔའ་བོ་ཆེན་པོ་མཐུ་བོ་ཆེ། །དཔའ་བོ་བཞི་དང་དམག་དཔོན་བཞི། །དེ་ཡིས་སྣ་གྲངས་བསམ་ལས་འདས། །འཁོར་འདས་གཉིས་ཀྱི་འཁྲུག་པ་བྱེད། །མ་རིག་ཡེ་ཤེས་འཁྲུག་པ་བྱེད། །སེམས་ཅན་སངས་རྒྱས་འཁྲུག་པ་བྱེད། །ཀུན་གཞིའི་སྟོང་ར་ཆེན་པོ་ན། །སེམས་ཀྱི་ནོར་བུ་རིན་ཆེན་འབར། །མ་འཆམས་འཁྲུག་པ་ཆེན་པོ་བྱུང་། །ཉོན་མོངས་འཁོར་བའི་དམག་དཔུང་ལ། །རང་དྭངས་དཔའ་བོས་མདའ་ཞིག་འཕེན། །སྟོང་ཉིད་གཞུ་མོ་ལྕོག་གིས་བརྡུངས། །བདེ་བ་ཆེན་པོའི་མདའ་ལྟོང་དེ། །ལུང་རིགས་གཉིས་ལ་མདའ་ལྟོང་སྦྱར། །སྟོང་པ་ཉིད་དུ་མདེལ་གྱིས་བཀང་། །ཉོན་མོངས་དམག་ལ་མདའ་གཅིག་བརྡེག །ང་བདག་གཉིས་ལ་གཟིར་གཟིར་ནས། །འགོང་པོ་ངར་འཛིན་སྙིང་ལ་བརྒྱབ། །ང་རྒྱལ་ང་བདག་ལྷན་གྱིས་ཤི། །ངང་དྭངས་ཆེན་པོའི་མདའ་འཕངས་པས། །མ་རིག་གཏི་མུག་སྙིང་ལ་བརྒྱབ། །ཡེ་ཤེས་གསལ་བའི་ཀློང་དུ་ཤི། །མུན་པ་མི་གསལ་སྒྲིབ་པ་བརླག །རང་དྭངས་ཆེན་པོའི་མདའ་འཕངས་པས། །གཟུང་འཛིན་སྤང་ལེན་སྙིང་ལ་བརྒྱབ། །དགག་བསྒྲུབ་མེད་པའི་ངང་དུ་ཤི། །གསལ་དྭངས་ཆེན་པོའི་མདའ་འཕངས་པས། །ང་བདག་ཕྱོགས་རིས་སྙིང་ལ་བརྒྱབ། །དབྱེ་བསལ་མེད་པའི་ངང་དུ་ཤི། །གཏིང་གསལ་ཆེན་པོའི་མདའ་འཕངས་པས། །དུག་ལྔ་ཆོས་བརྒྱད་སྙིང་ལ་བརྒྱབ། །ཡེ་ཤེས་མཐའ་བྲལ་ཀློང་དུ་ཤི། །སྤྲོས་པ་ཐག་ཆོད་མན་ངག་གིས། །ཉོན་མོངས་དམག་གི་གཡུལ་ངོ་བཟློག །མ་རིག་པ་ཡི་མཁར་ཁང་བཅོམ། །ཉོན་མོངས་བརྒྱད་ཁྲིའི་རྩ་བ་བརླགས། །དུག་གསུམ་རྩ་བ་གཏན་ནས་བཅད། །ཉོན་མོངས་དམག་རྣམས་ཕྱགས་མས་བཏབ། །ཡེ་ཤེས་ཟང་ཐལ་ཐོ་ལེས་བཏབ། །དམག་དཔུང་བཟློག་པ་ངོ་མཚར་ཆེ། །བདུད་རྩི་བཅུད་འཐུང་སྡོང་པོའི་རྩ་བ་ཆོད། །ཟས་ཀྱི་བྲོ་བ་མྱོངས་ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བརྡའི་ལེའུ་སྟེ་བཅུ་ ― DNG002_Page_0436 ―
[མ་དཔེ་གཟིགས་ན་འདིར་གནོན།]
བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཆོས་རྣམས་བརྡའ་ཡིས་ཇི་ལྟར་བཤད། །ཅེས་ཞུས་པ་དང་། དེ་ནས་སྟོན་པ་ཀུན་བཟང་དེས། རིན་པོ་ཆེ་འོད་འགྱེད་པ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །ཡུལ་ཁམས་གཅིག་ན་མི་ཅིག་བདོག །ནོར་ཅིག་པོ་ལ་མི་ཟད་གཏེར་ཆེན་ཡོད་དོ་སྐད། །ནོར་དེ་ཐོབ་པ་བདོག་ལགས་སམ། །ཐོབ་ཏུ་མི་སྟེར་འདྲེ་ཅིག་ཡོད། །འདྲེ་དེ་ངོ་ཡིས་ཤེས་ལགས་སམ། །ནོར་ལ་སྦས་པའི་ས་ཅིག་བདོག །སྦས་ས་གང་ཡིན་ཤེས་ལགས་སམ། །ནོར་ལ་ཕྱོགས་མེད་ཡུལ་ཅིག་ཡོད། །ཡུལ་གྱི་ངོས་ནི་ཟིན་ལགས་སམ། །ནོར་ལ་བདག་པོ་མི་གཉིས་ཡོད། །དེ་གཉིས་གང་ལགས་ཤེས་ལགས་སམ། །ནོར་ལ་ཐོབ་ཐབས་རྣམ་གསུམ་ཡོད། །དེ་གསུམ་གང་ལགས་ཤེས་ལགས་སམ། །ནོར་ལ་ཐོབ་རྟགས་རྣམ་བཞི་ཡོད། །དེ་བཞི་གང་ལགས་ཤེས་ལགས་སམ། །སྤྱི་ཡུལ་ཆེན་པོ་དེ་ན་དབང་ཡོད་མི་གཉིས་ལ། །སྤྱི་ཡི་ནོར་བུ་རིན་ཆེན་ཡོད། །མི་སྣ་སོང་ལ་མི་གཅིག་ཞོག །ནོར་དེ་རང་གིས་ཐོབ་པར་གྱིས། །མིག་དེ་ཕྱེ་ལ་མུན་པ་སོལ། །ཉི་ཟླ་གཉིས་ཀྱི་མཚམས་སུ་སྡོད་ལ། །སྣང་བའི་མེ་ལོང་ལྟོས། །ས་གཞི་སྟེང་དུ་ཁོབ་ལ། ནམ་མཁའ་གདན་དུ་ཐིང་། ན་བུན་ལ་ཞྭ་གྱིས་ལ། བར་སྣང་ལ་ཉལ་ས་ཆོས། སྣང་སྲིད་ལྟོར་ཆུག །སྤྲེའུ་དང་ཆུ་གཉེར་ལག་པས་བཟུང་། །རླུང་པོ་རྐང་པས་ནོན་ལ་འཇའ་ཚོན་མགོ་ལ་ཚུགས། །རི་རབ་ཁ་རུ་སྡོད་ལ་ཆུ་རྣམས་ཁ་རུ་ལུག །མུན་སྣང་གཉིས་ཀྱི་ས་མཚམས་ན། །ཅི་བཏབ་སྐྱེ་བའི་ལྡུམ་ར་ཡོད། །དེ་ན་ཐམས་ཅད་ཡིད་དུ་འོང་བའི་མེ་ཏོག་རྒྱས། །འབྲས་བུ་རང་འབར་ངང་དྭངས་རིན་པོ་ཆེ། །དེ་ལ་ཀུན་ཀྱང་འདོད་པ་སྐྱེས། །ཡོ་ཡིས་འདོད་ཀྱང་མ་ཐོབ་པས། །མ་འཆམ་སིད་ཚན་གཉིས་སུ་བྱེ། །ཁོང་ ― DNG002_Page_0437 ―
[མ་དཔེ་གཟིགས་ན་འདིར་གནོན།]
གཉིས་འཁྲུག་པ་ཆེན་པོ་བྱེད། ཁྱེའུ་ཆུང་ངང་དྭངས་སྣང་གསལ་ཀུན་རིག་འཕྲུལ་གྱི་མེ་ལོང་ཅན་ཁྱོད་དགྲ་ཟིན་གཉིས་ཀྱི་སོ་མཚམས་སྤྱི་བར་སོང་ལ་སྒྱེད་པུ་གསུམ་གསུམ་དྲུག་ཚུགས་ལ་ཟངས་པོ་ཆེ་ནི་གཉིས་བཙུགས་ཏེ། གཅིག་ཏུ་དུག་ཆུ་ཟངས་གང་སྐོལ། །གཅིག་ཏུ་བདུད་རྩི་ཟངས་གང་སྐོལ། །རྒན་པོ་རྒན་མོ་བུ་ཚ་མིང་སྲིང་གསུམ། །དམག་དཔོན་གསུམ་གྱིས་སྣ་དྲངས་པའི། །ཉི་མ་ནུབ་པའི་གྲིབ་སོ་ཙམ་འོང་གིས། །དེ་རྣམས་བྱུང་བར་གྱུར་པ་ལ། །ཟངས་སུ་བསྐོལ་པའི་དུག་ཆུ་ལུད་ལ། །དགྲ་དཔུང་ཆོམས་ལ་དགྲ་རྣམས་སོད། །དེ་མ་སོད་ན་གཏོ་ཆོས་སུ། །གངས་ཀྱི་རྩེ་མོར་སེང་གེ་ཞོན། །ནམ་མཁའི་ངང་དུ་མདུང་བསྐོར་གྱིས། །རི་རྒྱལ་ལྷུན་པོའི་ཁར་མེ་ཆེན་སྤོར། །རྒྱ་མཚོའི་ནང་དུ་མེ་ཆེན་སྤོར། །མུན་པའི་ནང་དུ་ཉི་ཟླ་ཐོགས། །རླུང་པོའི་གསེབ་ཏུ་རལ་གྲི་ཐོགས། །བདུད་རྩིའི་བཅུད་འཐུངས་སྤང་ལ་གསེར་ཕུར་ཐོབ། །གངས་ལ་ཉི་མ་ཤར་དུ་ཅུག །འོན་ཀྱང་ཟངས་སུ་བཀོལ་བའི་དུག་ཆུ་ཡིས། །དགྲ་ཡི་དཔུང་རྣམས་བཅོམ་གྱུར་ནས། །དགྲ་ཡི་དཔུང་རྣམས་རྩད་ཆོད་སོང་། །གཉེན་སྲིང་མ་གཏོགས་དགྲ་ནི་གཅིག་ཀྱང་མེད། །སྲིད་སྡེ་ཚོགས་པར་གྱུར་པ་ལ། །ཟངས་ཀྱི་བདུད་རྩི་སྨན་ལུད་ལ། །འོན་ཏང་ཐམས་ཅད་བདེ་བ་ཆེན་པོར་སངས་རྒྱས་སོ། །སྡུག་བསྔལ་ཀུན་གྲོལ་སངས་རྒྱས་ཆོས་སྐུ་ཐོབ། །ཀུན་ཀྱང་དབྱེ་བསལ་རྩིས་གདབ་མེད། །བདག་གཞན་གཉིས་མེད་དབྱེ་བསལ་རྩིས་གདབ་མེད། །ཅེས་གསུངས་སོ། །རང་སེམས་བརྡའ་རུ་བཀོད་པའི་ལེའུ་སྟེ་བཅོ་བརྒྱད་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །ཆོས་རྣམས་དཔེ་ཡིས་ཇི་ལྟར་མཚོན། །ཞེས་གསོལ་པ་དང་། དེ་ནས་སྟོན་པ་ཀུན་བཟང་དེས། རིན་པོ་ཆེ་གསལ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་ ― DNG002_Page_0438 ―
[མ་དཔེ་གཟིགས་ན་འདིར་གནོན།]
བཞེངས་ནས་འདི་སྐད་གསུངས། །འཁོར་རྣམས་མ་ཡེངས་གུས་པས་ཉོན། །སྙིང་པོ་དོན་གྱི་གནས་ལུགས་དེ། །མཚོན་པའི་ཡུལ་དུ་མ་གྱུར་ཀྱང་། །རེ་ཞིག་དཔེ་ཡི་སྒོ་ནས་མཚོན། །དར་ཆགས་བང་མཛོད་ས་གཞི་གསུམ། །ཀུན་གཞིའི་མཚོན་དཔེར་ཤེས་པར་བྱ། །ཆུ་དང་འཁྱགས་པ་ཏིལ་འབྲུ་གསུམ། །གནས་ལུགས་མཚོན་པའི་དཔེ་རུ་གསུངས། །ཕུག་རོན་སྐྱེ་དང་ཤེལ་སྒོང་ག་པུར་གསུམ། །སྣང་ཚུལ་མཚོན་པའི་དཔེ་རུ་གསུངས། །ཐོ་ཡོར་ཐག་པ་སྨིག་རྒྱུ་གསུམ། །འཁྲུལ་པ་མཚོན་པའི་དཔེ་རུ་གསུངས། །ཉི་ཟེར་སྤུ་གྲི་ཤེལ་བརྒྱུས་གསུམ། །རྩལ་སྣང་འདྲེལ་ཡོད་མཚོན་དཔེར་གསུངས། །ཙནྡན་གླ་རྩི་སྒོག་པ་གསུམ། །ཤུགས་འབྱུང་འགག་མེད་དཔེ་རུ་གསུངས། །རལ་གྲི་སྤུ་གྲི་གཟོང་དང་གསུམ། །ཤེས་རབ་མཚོན་པའི་དཔེ་རུ་གསུངས། །བྱིས་པ་ཟླ་མཛུབ་འོ་མ་གསུམ། །གདམས་ངག་མཚོན་པའི་དཔེ་རུ་གསུངས། །ནམ་ལངས་མིག་དང་ཉི་མ་གསུམ། །རྟོགས་པ་མཚོན་པའི་དཔེ་རུ་གསུངས། །སྤྲིན་དང་ལིང་ཏོག་མུན་པ་གསུམ། །སྒྲིབ་གཡོགས་མཚོན་པའི་དཔེ་རུ་གསུངས། །ལམ་ནོར་བྱ་མིག་འགྲོ་རྗེས་གསུམ། །གོལ་ས་མཚོན་པའི་དཔེ་རུ་གསུངས། །ཚེར་མ་མདུང་རྩེ་མདེལ་རྩེ་གསུམ། །རིག་པ་མཚོན་པའི་དཔེ་རུ་གསུངས། །བྱ་རྒོད་ནམ་མཁའ་ཁྱུང་དང་གསུམ། །ལྟ་བ་མཚོན་པའི་དཔེ་རུ་གསུངས། །མེ་ལོང་འཇའ་ཚོན་སྒྲོན་མེ་གསུམ། །སྒོམ་པ་མཚོན་པའི་དཔེ་རུ་གསུངས། །བུང་བ་གླང་ཆེན་སྨྱོན་པ་གསུམ། །སྤྱོད་པ་མཚོན་པའི་དཔེ་རུ་གསུངས། །སེང་གེ་ཐོག་དང་རྦབ་དང་གསུམ། །ཕྲིན་ལས་མཚོན་པའི་དཔེ་རུ་གསུངས། །ན་ཆུང་ཆུ་བུར་སྙི་རྡོལ་གསུམ། །ཉམས་ཀྱི་དཔེ་རུ་ཤེས་པར་བྱ། །ལྷ་ཁང་ནང་གི་ལྷ་ཚོགས་དང་། །བུམ་པ་ནང་གི་མར་མེ་དང་། །མེ་ལོང་ནང་གི་གཟུགས་བརྙན་གསུམ། །སེམས་ཉིད་སྣང་གསལ་དཔེ་རུ་བསྟན། ། ― DNG002_Page_0439 ―
[མ་དཔེ་གཟིགས་ན་འདིར་གནོན།]
སྟག་ལྤགས་གཟིག་ལྤགས་རྨ་བྱའི་མདོངས། །སེམས་ཉིད་མི་གསལ་དཔེ་རུ་བསྟན། །ཤེལ་སྒོང་གཟི་རྙིང་ཆུ་དང་གསུམ། །ཕྱི་ནང་གཉིས་མེད་དཔེ་རུ་བསྟན། །སོལ་ནག་བལ་ནག་དར་ནག་གསུམ། །འགྱུར་བ་མེད་པའི་དཔེ་རུ་བསྟན། །རླུང་དང་སྤྲིན་དང་སྨུག་པ་གསུམ། །མ་ཆགས་མ་ཞེན་བྱར་མེད་དང་། །གཟུང་འཛིན་མེད་པའི་དཔེ་རུ་བསྟན། །མེ་ཏོག་ལོ་ཏོག་རྩྭ་ཡི་ཟིལ། །མི་རྟག་པ་ཡི་དཔེ་རུ་བསྟན། །ཆུ་དང་རྙོག་མ་འདྲེས་པ་དང་། །ཆུ་ལ་ཆུ་རླབས་ཐིམ་པ་དང་། །འཇའ་ཚོན་མཁའ་ལ་ཐིམ་པ་གསུམ། །དབྱེར་མེད་དཔེ་རུ་ཤེས་པར་བྱ། །དུག་ལ་སྔགས་ཀྱིས་ཐེབས་པ་དང་། །ཡུར་ཆུས་རྒྱ་མཚོར་སླེབས་པ་དང་། །ལན་ཚྭ་ཆུ་ལ་ཐིམ་པ་གསུམ། །ཕྱིར་མི་ལྡོག་པའི་དཔེ་རུ་བསྟན། །པདྨ་རྨ་བྱ་དུག་དང་གསུམ། །དམ་ཚིག་མཚོན་དཔེར་ཤེས་པར་བྱ། །ཟླ་བ་འོད་དང་སྐར་ཆེན་གསུམ། །ཡེ་ཤེས་དཔེ་རུ་ཤེས་པར་བྱ། །མི་རྒྱུད་ཆུ་རྒྱུད་གཞུང་རྒྱུད་གསུམ། །རྒྱུན་ཆད་མེད་པའི་དཔེ་རུ་གསུངས། །གློག་དང་སྐར་མདའ་མདའ་འཕངས་གསུམ། །བར་དོའི་རྟགས་ཚད་དཔེ་རུ་གསུངས། །གསེར་དང་རི་བོ་རིན་ཆེན་གསུམ། །འབྲས་བུའི་དཔེ་རུ་ཤེས་པར་བྱའོ། །ཆོས་ཉིད་དོན་གྱི་གནས་ལུགས་ལ། །འདྲ་བཞི་ཡོད་པས་དཔེ་བཞིས་མཚོན། །དངོས་གཞི་མེད་པས་དམིགས་སུ་མེད། །སྐྱེ་མེད་བསམ་འདས་འགྱུར་མེད་ཡིན། །དམིགས་མེད་མཚོན་འདས་ཆོས་སྐུ་ཡིན། །མཚོན་དུ་མེད་པས་དཔེ་ལས་འདས། །རེ་ཞིག་མཚོན་ནས་གོ་ཕྱིར་བསྟན། །དོན་གྱི་ངོ་བོ་བརྗོད་ལས་འདས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཆོས་ཐམས་ཅད་དཔེར་བཤད་པའི་ལེའུ་སྟེ་བཅུ་དགུ་པའོ།། །།བུཌྜྷ་བོ་དྷི་ཨཱཿ། མ་ཧཱ་སུ་ཁ་ཧོཿ། མཎྜ་ལ། བ་ག་བེ་མ་ལ་པ་ཏ་ཨཱཿ། དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །རྫོགས་ཆེན་སྤྱི་ཏི་ཡོ་ག་ཡི། །མ་བྲིས་དཀྱིལ་འཁོར་ཆེན་པོ་ཇི་ལྟར་ལགས། །དེ་ནས་སྟོན་པའི་རྒྱལ་པོ་ཀུན་ཏུ་བཟང་པོ་དེ། རིན་པོ་ཆེ་འོད་གཡོས་པ་མེད་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་རྣམས་ལ་འདི་སྐད་ཅེས་ ― DNG002_Page_0440 ―
[མ་དཔེ་གཟིགས་ན་འདིར་གནོན།]
བཀའ་སྩལ་ཏོ། །བྷོ་ན་བྷེ་ཏྲ་དྷ་ན་མཎྜ་ལ། །ང་ཡིས་མ་བྲིས་རྫོགས་པའི་དཀྱིལ་འཁོར་བཤད། །འཁོར་རྣམས་མ་ཡེངས་གུས་པས་ཉོན། །སྙིང་པོའི་རང་བཞིན་འགྱུར་བ་མེད་པ་ཡང་། །ཀུན་གཞི་ཀློང་ཡངས་གདལ་ཁྱབ་ཆེན་པོ་ལ། །ཆོས་ཉིད་བྱང་ཆུབ་སེམས་ཀྱི་དཀྱིལ་འཁོར་བྲིས། །དཀྱིལ་འཁོར་ཆེན་པོ་བཞེངས་ལུགས་ཀྱང་། །ཆོས་ཉིད་གདལ་ཁྱབ་ས་གཞི་ལ། །ལུང་རིགས་གཉིས་ཀྱིས་ས་བརྟགས་ལ། །ཤེས་རབ་གསུམ་གྱིས་ས་བླང་ལ། །དད་པའི་འཇོར་གྱིས་ས་བརྐོས་ཏེ། །དམ་ཚིག་ཕད་ཚེར་ས་བླུགས་ནས། །ཕྱོགས་རིས་ཞེན་ཆགས་སངས་པའི་གནས་ཕྱོགས་སུ། །ཀུན་གཞི་ཆོས་ཉིད་གནས་དག་ཏུ། །ཆོས་དབྱིངས་དག་པའི་མཆོད་ཁང་དུ། །དམ་ཚིག་ཕད་ཚེའི་ས་བླུགས་ནས། །གདལ་ཁྱབ་ཆེན་པོར་ཁོད་སྙོམས་ཏེ། །རྣམ་རྟོག་བློ་ཡི་རྡུལ་བསལ་ནས། །བྱང་ཆུབ་ཆུ་ཡིས་ཆག་ཆག་གདབ། །མཉམ་པ་ཉིད་ཀྱི་བྱིལ་བྱིལ་བྱས། །མི་འགྱུར་དབྱིངས་ཀྱི་ཐིག་ཅིག་གདབ། །ཡེ་ཤེས་ལྔ་པོའི་ས་ཚོན་བཀྱེ། །སྙིང་པོ་འགྱུར་བ་མེད་པས་དབུས་སུ་ཟླུམ་པོར་བྱ། །རྣམ་ཤེས་ཚོགས་བརྒྱད་འཆར་བས་པདྨ་འདབ་བརྒྱད་བྱ། །ཡེ་ཤེས་ལྔ་ཡི་རྟགས་སུ་ཕྱོགས་བཞི་དབུས་དང་ལྔ། །ཚད་མེད་བཞི་ཡི་རྟགས་སུ་གྲུ་ཆད་བཞི། །གཏན་ཚིགས་བཞི་ཡི་རྟགས་སུ་སྒོ་བཞིར་བཏོད། །རིག་པ་བཞི་ཡི་རྟགས་སུ་ཟུར་བཞིའོ། །དཀར་དང་སེར་དང་དམར་དང་སྔོ། །ནག་པོ་ཡང་ནི་རྣམ་ལྔ་ཡང་། །གསལ་དང་མི་གཡོ་རྒྱ་མ་ཆད། །མི་འགྱུར་བརྟན་དང་ལྔ་ཡི་རྟགས། །རིན་ཆེན་ལྔ་ཡི་རྩིགས་པ་ཡང་། །ཡུམ་ལྔ་སྣང་ཚུལ་ལྔ་ཡི་རྟགས། །ལྷ་དང་ལྷ་མོས་བརྒྱན་པ་ཡང་། །མ་འགགས་རོལ་པས་བརྒྱན་པའི་རྟགས། །དྲྭ་བ་དྲ་ཕྱེད་དར་ཕྱང་བརྒྱན་པ་ཡང་། །ཆོས་དང་ཆོས་ཉིད་འདྲེས་པའི་རྟགས། །སྒོ་རྒྱན་ལ་སོགས་བརྒྱན་པ་ཡང་། །ཆོས་ཉིད་སྣང་ལ་གསལ་བའི་རྟགས། །སྒོ་བཞི་འཁོར་ལོ་བཞི་ཡིས་བརྒྱན་པ་ནི། །མཐའ་བཞི་བྲལ་ཞིང་སྤྲོས་པ་གཅོད། །ཀ་པ་ལ་སོགས་བཙུགས་པ་ཡང་། །སྙིང་པོ་མི་འགྱུར་བརྟན་པའི་རྟགས། །ཉི་མ་ཟླ་བས་བརྒྱན་པ་ཡང་། ། ― DNG002_Page_0441 ―
[མ་དཔེ་གཟིགས་ན་འདིར་གནོན།]
ངང་དྭངས་གསལ་འགྲིབ་མེད་པའི་རྟགས། །སྒོ་ལ་གདུགས་ནི་བཙུགས་པ་ནི། །སྤྱི་ཏིའི་ཆོས་འཁོར་བསྐོར་བའི་རྟགས། །རྡོ་རྗེའི་ར་བས་བསྐོར་བ་ཡང་། །ཨ་ནུ་མན་ཆད་ཟིལ་གྱིས་གནོན་པའི་རྟགས། །ཕྱི་རིམ་ནག་པོས་བསྐོར་བ་ཡང་། །སྤྱི་ཏི་ཡོ་ག་འདི་རྟོགས་ན། །ཨ་ནུ་མན་ཆོད་དགོས་པ་མེད་པའི་རྟགས། །རྡོ་རྗེའི་ར་བས་བསྐོར་བ་ཡང་། །མི་འགྱུར་བརྟན་པ་ཐོབ་པའི་རྟགས། །དེ་ལ་མེ་རིས་བསྐོར་བ་ཡང་། །ནན་བརྟགས་བལྟ་བ་སྲེག་པའི་རྟགས། །ཡིད་བཟུང་བསྒོམ་པ་བསྲེག་པའི་རྟགས། །ཆེད་བྱས་སྤྱོད་པ་བསྲེག་པའི་རྟགས། །རེ་དོགས་འབྲས་བུ་བསྲེག་པའི་རྟགས། །དེ་ལ་ཤིང་ལོས་བརྒྱན་པ་ཡང་། །ཐེག་པ་འོག་མ་ལོ་མ་ཡིན་པའི་རྟགས། །འདུས་བྱས་དཀྱིལ་འཁོར་འཇིག་པ་ལ། །དཀྱིལ་འཁོར་བཞེངས་ན་སེམས་ལ་བཞེངས། །ཆོས་ཉིད་བྱང་ཆུབ་སེམས་ཀྱི་དཀྱིལ་འཁོར་འདི། །ཐེག་པ་གཞན་ལས་འབྱུང་མི་འགྱུར། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བྱང་སེམས་དཀྱིལ་འཁོར་གྱི་ལེའུ་སྟེ་བཅུ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་ཀུན་ཏུ་བཟང་པོ་ལ། །དཀྱིལ་འཁོར་བྲི་ཐབས་དེ་ལྟར་ན། །དེ་ཡི་ངེས་ཚིག་ཇི་ལྟར་ལགས། །ཞེས་ཞུས་པ་དང་། ཀུན་ཏུ་བཟང་པོས་བཀའ་སྩལ་པ། །འཁོར་རྣམས་མ་ཡེངས་གུས་པས་ཉོན། །ངེས་ཚིག་རྒྱས་པར་བཤད་པ་ལ། །ཀུན་ཀློང་མཐའ་དབྱིངས་རྣམ་དག་དཀྱིལ་འཁོར་དེ། །ཆོས་ཉིད་བྱང་ཆུབ་སེམས་ལ་གནས་པར་བཤད། །དཀྱིལ་འཁོར་དཀྱིལ་འཁོར་ཞེས་བྱ་བ། །སྐུ་ཡི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །གསུང་གི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །ཐུགས་ཀྱི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །དཀྱིལ་ནི་ཆོས་སྐུ་འགྱུར་བ་མེད། །རིག་པའི་རྩལ་མ་འགགས་པའི་འཁོར་གྱིས་བསྐོར། །དེས་ན་དཀྱིལ་འཁོར་ཞེས་སུ་བཤད། །དཀྱིལ་འཁོར་མ་ལུས་སེམས་ ― DNG002_Page_0442 ―
[མ་དཔེ་གཟིགས་ན་འདིར་གནོན།]
ལ་རྫོགས། །རྫོགས་པའི་དོན་ནི་འདི་ལྟ་སྟེ། །དཀྱིལ་ནི་མ་ནོར་བ་ལ་བྱ། །མ་ནོར་མ་བཅོས་དཀྱིལ་འཁོར་དེ། །སེམས་ཉིད་སྐྱེ་མེད་ངང་ལ་རྫོགས། །དཀྱིལ་ནི་སྙིང་པོའི་དོན་ལ་བྱ། །འཁོར་ནི་སྣང་ཚུལ་བསམ་མི་ཁྱབ། །སྙིང་པོ་བསམ་མི་ཁྱབ་པ་དེ། །དབྱེར་མེད་སེམས་ཉིད་ངང་ལ་རྫོགས། །དཀྱིལ་ནི་འགྱུར་བ་མེད་པ་ལ། །འཁོར་ནི་མ་བཅོས་པ་ཡི་དོན། །འགྱུར་མེད་མ་བཅོས་སེམས་ལ་རྫོགས། །དཀྱིལ་ནི་ཆོས་ཉིད་སྐྱེ་བ་མེད། །འཁོར་ནི་སེམས་ཉིད་འགག་པ་མེད། །སྐྱེ་འགག་མེད་པའི་དཀྱིལ་འཁོར་ཡིན། །སྣང་སྲིད་མ་བཅོས་དཀྱིལ་ཡིན་ལ། །དབྱེ་བསལ་མེད་པ་འཁོར་ཡིན་ནོ། །དབྱེར་མེད་མ་བཅོས་དཀྱིལ་འཁོར་ཡིན། །མི་འཁོར་བ་ནི་དཀྱིལ་ཡིན་ལ། །ཁྱབ་གདལ་ཆེན་པོ་འཁོར་ཡིན་ནོ། །མི་འགྱུར་གདལ་ཁྱབ་དཀྱིལ་འཁོར་ཡིན། །དཀྱིལ་ནི་གཉིས་མེད་ཆེན་པོ་སྟེ། །འཁོར་ནི་རྩིས་གདབ་མེད་པ་ཡིན། །རྩིས་གདབ་གཉིས་མེད་དཀྱིལ་འཁོར་ཡིན། །མི་འགྱུར་དབྱིངས་ཀྱི་དཀྱིལ་འཁོར་གྱི། །ངེས་ཚིག་ཆེན་པོ་རྒྱས་པར་བཤད། །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། དཀྱིལ་འཁོར་གྱི་ངེས་ཚིག་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་གསོལ། །དཀྱིལ་འཁོར་ལྷ་ཡི་གྲངས་དགོད་ཕྱོགས། །འདུས་པའི་ཚོགས་ལ་བཤད་དུ་གསོལ། །ཞེས་གསོལ་པ་དང་། ཀུན་ཏུ་བཟང་པོ་འོད་ཡོངས་ལ་ཁྱབ་པའི་ཏིང་ངེ་འཛིན་ལ་བཞུགས་སོ། །བཞེངས་ནས་འཁོར་ལ་འདི་སྐད་གསུངས། །ཀུན་གཞི་མཁའ་དབྱིངས་མ་བཅོས་ཀློང་དཀྱིལ་དེ། །མི་འགྱུར་ཆོས་དབྱིངས་འཕོ་འགྱུར་མེད། །རྣམ་དག་བསམ་མི་ཁྱབ་པའི་དཀྱིལ་འཁོར་དེ། །རིན་ཆེན་འོད་འབར་གདལ་བའི་དཀྱིལ་འཁོར་དུ། །སྣང་སྲིད་ཐམས་ཅད་མ་བྲིས་དཀྱིལ་འཁོར་དེར། །སེམས་ཉིད་འགྱུར་བ་མེད་པའི་གཙོ་མཆོག་ལ། །རིག་པའི་རྩལ་མ་འགགས་པའི་འཁོར་གྱིས་བསྐོར། །མ་བསྐྱེད་ཡོངས་སུ་རྫོགས་པའི་ལྷ་ཚོགས་འདི་ལྟར་བཞུགས། །དབུས་ཕྱོགས་ནམ་མཁའི་ ― DNG002_Page_0443 ―
[མ་དཔེ་གཟིགས་ན་འདིར་གནོན།]
གདན་སྟེངས་སུ། །གཏི་མུག་རང་བཞིན་རྣམ་དག་པས། །བསམ་དུ་མེད་ཅིང་བློ་ཡི་ཡུལ་ལས་འདས། །སྐྱེ་མེད་ཆོས་སྐུར་དབུས་ན་བཞུགས། །ཤར་ཕྱོགས་ཉི་ཟླའི་གདན་སྟེངས་སུ། །ཞེ་སྡང་རང་བཞིན་རྣམ་དག་པས། །སྐྱེ་བ་མེད་ཅིང་འགག་པ་མེད། །ལོངས་སྐུ་རྫོགས་སྐུ་ཤར་ན་བཞུགས། །ལྷོ་ཕྱོགས་ཁྱུང་གི་གདན་སྟེངས་སུ། །ང་རྒྱལ་རང་བཞིན་རྣམ་དག་པས། །དྲན་མེད་ཡིད་ལ་བྱར་མེད་པའི། །མཉམ་ཉིད་རིན་ཆེན་འབྱུང་ལྡན་བཞུགས། །ནུབ་ཕྱོགས་རྒྱ་མཚོའི་གདན་སྟེངས་སུ། །འདོད་ཆགས་རང་བཞིན་རྣམ་དག་པས། །སྐུ་གསུམ་དབྱེ་རུ་མེད་པ་ཡི། །དབྱེར་མེད་སྣང་བ་མཐའ་ཡས་བཞུགས། །བྱང་ཕྱོགས་རླུང་གི་གདན་སྟེངས་སུ། །སྐུ་བཞི་བདེ་ཆེན་ཀློང་དུ་རྫོགས། །འོད་གསལ་དོན་ཡོད་གྲུབ་པ་བཞུགས། །བསྐྱེད་ནས་བཞུགས་པ་མ་ཡིན་ཏེ། །རྩོལ་སྒྲུབ་འདས་དེ་རང་སར་བཞུགས། །རིགས་ལྔ་ཆ་མཐུན་ཁྱད་པར་འཕགས། །དཀྱིལ་འཁོར་པདྨའི་གྲུ་བཞི་རུ། །མ་བསྐྱེད་ལྷ་མོའི་བཞུགས་ཚུལ་ནི། །ཤར་ལྷོ་པདྨའི་འདབ་མ་ལ། །འཁྲུལ་སེམས་བྱང་ཆུབ་སེམས་སུ་རིགས། །དྲི་ཡི་རྟོག་ཞེན་རྣམ་དག་པས། །དེ་ན་ལྷ་མོ་རིགས་ལྕམ་བཞུགས། །ལྷོ་ནུབ་པདྨའི་གདན་སྟེངས་སུ། །རིག་པ་འཛིན་མེད་གསལ་དྭངས་པ། །མེ་ལོང་ནང་གི་གཟུགས་བརྙན་བཞིན། །རེག་བྱའི་རང་བཞིན་རྣམ་དག་པས། །དེ་ལ་ལྷ་མོ་གསལ་ལྕམ་བཞུགས། །ནུབ་བྱང་མཚམས་ཀྱི་པདྨ་ལ། །དྲན་པ་ཡིད་ལ་བྱར་མེད་པས། །སྒྲ་ཡི་རང་བཞིན་རྣམ་དག་པས། །དེ་ན་ལྷ་མོ་བདེ་ལྕམ་བཞུགས། །བྱང་ཤར་མཚམས་ཀྱི་པདྨ་ལ། །ཡིད་ལ་འགྱུ་མེད་རང་དྭངས་པས། །རོ་ཡི་ལྷ་མོ་ཀུན་སངས་མ། །རོ་ཡི་རང་བཞིན་རྣམ་དག་པས། །སྣ་ཚོགས་གཉིས་མེད་སྟོང་ཉིད་ངང་། །དེ་ན་ལྷ་མོ་སྟོང་ལྕམ་བཞུགས། །ལྷ་མོ་ཆ་མཐུན་ཁྱད་པར་འཕགས། །མ་སྐྱེས་སྒོ་མའི་བཞུགས་ལུགས་ནི། །ཤར་སྒོར་སྤྲིན་གྱི་གདན་སྟེངས་སུ། །སྐྱེ་བའི་ཆོ་འཕྲུལ་རྩད་གཅོད་པའི། །སྒོ་སྲུང་སྐྱེ་མེད་གཏིང་གསལ་བཞུགས། །དེ་ཡིས་ཕུང་པོའི་བདུད་རྣམས་བཏུལ། །ལྷོ་སྒོ་འཇའ་ཚོན་གདན་ ― DNG002_Page_0444 ―
[མ་དཔེ་གཟིགས་ན་འདིར་གནོན།]
སྟེངས་སུ། །ན་ཚའི་སྡུག་བསྔལ་རྩད་གཅོད་པའི། །སྒོ་སྲུང་ངང་དྭངས་ཆེན་པོ་བཞུགས། །དེ་ཡིས་ཉོན་མོངས་བདུད་རྣམས་བཏུལ། །ནུབ་སྒོ་སྨིག་རྒྱུའི་གདན་སྟེངས་སུ། །རྒ་བའི་སྡུག་བསྔལ་རྩད་གཅོད་པའི། །སྒོ་སྲུང་རང་སངས་ཆེན་པོ་བཞུགས། །ལྷ་ཡི་བུ་ཡི་བདུད་རྣམས་བཏུལ། །བྱང་སྒོར་ན་བུན་གདན་སྟེངས་སུ། །འཆི་བའི་སྡུག་བསྔལ་རྩད་གཅོད་པའི། །སྒོ་སྲུང་ཆོས་ཉིད་གསལ་དྭངས་བཞུགས། །འཆི་བདག་བདུད་རྣམས་ཀུན་བཅོམ་ནས། །སྐྱེ་བ་དང་ནི་ན་བ་དང་། །རྒ་ཤི་མེད་པའི་ངང་ལ་གནས། །སྒོ་སྲུང་ཆེན་པོ་བཞི་པོ་ཡིས། །བདུད་བཞི་བཅོམ་ནས་མཐའ་བརྒྱད་བསྒྲལ། །ཆགས་འཛིན་ཞེན་པའི་མཚོ་ནས་ཐོན། །ཞེ་འདོད་གཟུང་འཛིན་སྒྲོག་ནས་ཁྲོལ། །དགག་བསྒྲུབ་སྤང་ལེན་འདམ་ནས་ཐར། །རིག་པའི་རྩལ་སྣང་ལྷ་ཚོགས་ཀྱང་། །རྩོལ་བསྒྲུབ་སྤྱན་དྲངས་མ་བསྐྱེད་པར། །ཐོག་མ་ཉིད་ནས་དེ་ལྟར་བཞུགས། །ལྷ་ཚོགས་ཆ་མཐུན་ཁྱད་པར་འཕགས། །སྤྱི་ཏི་ཡོ་ག་འདི་ཉིད་ལས། །ཐེག་པ་གཞན་ནས་འབྱུང་མི་འགྱུར། །ཞེས་གསུངས་སོ། །རིན་པོ་ཆེ་སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སེམས་ཉིད་ལྷ་རུ་བཀོད་པའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མཚམས་བཅད་ཆེན་པོ་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །མཚམས་གཅོད་ཆེན་པོ་རང་སེམས་ཆེན་པོ་སྟེ། །མཚམས་ཀྱི་རྒྱལ་པོ་མི་རྟོག་ཡེ་ཤེས་ཀྱིས། །བགེགས་ཀྱི་རྒྱལ་པོ་རང་གི་རྟོག་པ་བསལ། །བྱ་བ་མེད་པ་ལས་ཀྱི་རྒྱལ་པོ་འདིས། །གཟུང་འཛིན་ཆགས་ཞེན་ང་བདག་བགེགས་རྣམས་བསྐྲད། །ཁྲོ་བོའི་རྒྱལ་པོ་ངང་དྭངས་འགྱུར་མེད་ཀྱིས། །འཁྲུལ་པ་རྣམ་རྟོག་ཞེན་ཆགས་བདུད་རྣམས་བསྐྲད། །ཡེ་ཤེས་ཁྲོ་བོ་རང་ཤར་གྱིས། །རྣམ་པར་རྟོག་པའི་བགེགས་བསལ་ནས། །ཡེ་ཤེས་རང་ཤར་དགོངས་པར་གནས། །མཉམ་ཉིད་ཡེ་ཤེས་གསལ་བ་ཡིས། །གཟུང་འཛིན་ཕྱོགས་རིས་བགེགས་བསལ་ནས། ། ― DNG002_Page_0445 ―
[མ་དཔེ་གཟིགས་ན་འདིར་གནོན།]
ཆོས་རྣམས་མཉམ་ཉིད་ཀློང་ན་གནས། །མ་འདྲེས་ཡེ་ཤེས་དབྱེར་མེད་ཀྱིས། །དབྱེ་བསལ་རྩིས་གདབ་བགེགས་རྣམས་བསྐྲད། །དབྱེར་མེད་ཡོངས་གསལ་དགོངས་པར་གནས། །དོན་གྲུབ་རང་དྭངས་ཡེ་ཤེས་ཀྱིས། །མཚན་རྟོག་འདོད་པའི་བགེགས་བསྐྲད་ནས། །འགྱུར་མེད་དོན་གྲུབ་དགོངས་པར་གནས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མཚམས་བཅད་ཀྱི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །འདུས་བྱས་མཆོད་པ་མ་ཡིན་པའི། །མི་འགྱུར་སྙིང་པོའི་ལྷ་ཚོགས་ལ། །སེམས་ཉིད་མཆོད་པ་ཇི་ལྟར་དབུལ། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །ཟང་ཟིང་མཆོད་པ་མ་ཡིན་པའི། །རང་སེམས་རྫས་ཀྱི་རྒྱལ་པོའི་མཆོད་པ་བཤད། །རྡོ་རྗེ་སེམས་དཔས་ཡིད་ལ་ཟུང་། །ཆོས་ཉིད་དོན་ལ་བཞུགས་མཆོད་མི་མངའ་ཡང་། །རྩལ་སྣང་ཆོས་ཀྱི་རོལ་པར་བཤད། །སྙིང་པོ་དོན་གྱི་ཆོས་སྐུ་ཡང་། །མི་དམིགས་དབྱིངས་ནས་གཤེགས་སུ་གསོལ། །འོད་གསལ་ཆོས་ཉིད་ཀློང་ཆེན་དུ། །སྐྱེ་འགག་མེད་པའི་ལོངས་སྐུ་ཡང་། །འོག་མིན་གནས་ནས་གཤེགས་སུ་གསོལ། །སྣང་སྲིད་མཁའ་ཀློང་ཡངས་པ་ནས། །ཀུན་ཁྱབ་དྲན་མེད་སྤྲུལ་སྐུ་ཡང་། །འགྲོ་དོན་མི་སྤང་གཤེགས་སུ་གསོལ། །སེམས་ཀྱི་བརྟགས་སྣང་ལྷ་ཚོགས་རྣམས། །སྐྱེ་མེད་བསྟན་ཕྱིར་གཤེགས་སུ་གསོལ། །རྣམ་རྟོག་གཟུང་འཛིན་ཕྱག་ནས་ཀྱང་། །དོན་དམ་འགྱུར་བ་མེད་ལ་ཕྱག་འཚལ་ལོ། །མཁའ་ཀློང་ཡངས་པའི་གཞལ་ཡས་སུ། །མཉམ་པ་ཉིད་ཀྱི་ཁྲི་སྟེངས་སུ། །ཆོས་ཉིད་གདན་ལ་བཞུགས་སུ་གསོལ། །སྣང་བ་ཡུལ་གྱི་བྱེ་བྲག་ཀུན། །དགག་བསྒྲུབ་མེད་པར་མཆོད་པར་འབུལ། །ནང་འཛིན་སེམས་ཀྱི་དྲན་རྟོག་ཀུན། །དངོས་པོ་མེད་པར་མཆོད་པ་འབུལ། །ཕྱི་ནང་གཉིས་སུ་སྣང་བ་རྣམས། །དབྱེ་བསལ་མེད་པར་མཆོད་པ་འབུལ། །ཡུལ་དུ་སྣང་བའི་དཀར་དམར་ ― DNG002_Page_0446 ―
[མ་དཔེ་གཟིགས་ན་འདིར་གནོན།]
རྣམས། །སོར་བཞག་ཆེན་པོར་མཆོད་པར་འབུལ། །སེམས་ལས་བྱུང་བའི་དྲན་རྟོག་རྣམས། །རྩིས་གདབ་མེད་པར་མཆོད་པ་འབུལ། །གཟུང་འཛིན་གཉིས་ཀྱིས་བཅིངས་པ་རྣམས། །སྤྲོས་པ་ཐག་ཆོད་མཆོད་པ་འབུལ། །ཕྱི་རུ་སྣང་བའི་ཡུལ་སྣང་ཀུན། །སྣང་ལ་རང་བཞིན་མེད་པར་མཆོད་པར་འབུལ། །ནང་ལ་གསལ་བའི་སེམས་ཉིད་ཀུན། །མི་སྣང་རང་བཞིན་མེད་པར་མཆོད་པར་འབུལ། །སྣང་ཞིང་སྲིད་པས་བསྡུས་པའི་ཆོས་རྣམས་ཀུན། །མ་ཆགས་སེར་སྣ་མེད་པས་མཆོད་པར་མཆོད། །རྒྱ་ནས་འདེགས་ཀྱི་བཞེས་སུ་གསོལ། །ནང་འཛིན་སེམས་ཀྱི་དྲན་རྟོག་ཀུན། །ངང་དྭངས་ཆེན་པོར་མཆོད་པར་འབུལ། །མི་དམིགས་དབྱིངས་སུ་བཞེས་སུ་གསོལ། །རང་གི་ལྷར་ནི་རང་མཆོད་ན། །དངོས་གྲུབ་ཡ་མཚན་ཆེན་པོ་འབྱུང་། །མཆོད་པ་འབུལ་ན་སེམས་ལ་འབུལ། །བྱང་ཆུབ་སེམས་ཀྱི་མཆོད་པ་འདི། །ཐེག་པ་གཞན་དུ་ཡོངས་མ་གསུངས། །མཆོད་པ་ཆ་མཐུན་ཁྱད་པར་འཕགས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། །འཁོར་བ་ཐོག་མཐའ་གཅོད་པའི་རྒྱུད་ལས། མཆོད་པ་དབུལ་བའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །དཀྱིལ་འཁོར་ལྷ་ཚོགས་དེ་རྣམས་ལ། །བསྟོད་པའི་ལེའུ་གསུང་དུ་གསོལ། །ཀུན་བཟང་ཉིད་ལ་དེ་སྐད་གསོལ་པ་དང་། །ཀུན་ཏུ་བཟང་པོས་འཁོར་རྣམས་ལ་བཀའ་སྩལ་པ། དོན་ཉིད་དབྱེ་རུ་མེད་མོད་ཀྱང་། །དཀྱིལ་འཁོར་ལྷ་ཡི་བསྟོད་པ་བསྟན། །ཆོས་ཀྱི་དབྱིངས་ན་གཅིག་པུར་བཞུགས་པའི་ལྷ། །གཙོ་མཆོག་བྱང་ཆུབ་སེམས་ལ་ཕྱག་འཚལ་བསྟོད། །འགྱུར་མེད་ཀུན་ཁྱབ་ནམ་མཁའ་ལྟ་བུའི་སྐུ། །མ་རིག་མུན་སེལ་ཉི་ཟླ་ལྟ་བུའི་སྤྱན། །འདོད་པ་ཀུན་བྲལ་ཡིད་བཞིན་ནོར་བུའི་ཐུགས། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་བསྟོད། །དངོས་མེད་ཀུན་ཁྱབ་སྤྲོས་པ་མཐའ་དག་གཅོད། །ཐུགས་རྗེ་ཀུན་ཁྱབ་འགྲོ་བ་ཡོངས་ཀྱི་མགོན། །ཐུགས་རྗེ་སྤྲུལ་པའི་སྐུ་ལ་ཕྱག་ ― DNG002_Page_0447 ―
[མ་དཔེ་གཟིགས་ན་འདིར་གནོན།]
འཚལ་བསྟོད། ། མི་བསྐྱོད་རིན་འབྱུང་སོགས་ཆད་པ་ཡིན་ནམ་བརྟག་དབྱེར་མེད་གཅིག་ཏུ་འདྲིལ་མཛད་པ། །མཐའ་ཡས་ཆོས་ཉིད་ངང་དུ་སྡུད། །སངས་རྒྱས་སྣང་བ་མཐའ་ཡས་སྐུ་ལ་ཕྱག་འཚལ་བསྟོད། །རྩོལ་བསྒྲུབ་བྱ་བཙལ་ལས་རྣམས་ཀུན། །དབྱེར་མེད་སྤྲོས་བྲལ་ངང་དུ་སྡུད། །སངས་རྒྱས་དོན་ཡོད་གྲུབ་ལ་ཕྱག་འཚལ་བསྟོད། །ཆགས་འཛིན་སྤྲོས་པ་ཡོངས་ཆོད་ནས། །བྱམས་པ་ཆེན་པོས་ཀུན་ལ་ཁྱབ། །དྲི་ཡི་ཆགས་པ་སེལ་མཛད་པ། །རིགས་ལྕམ་སྐུ་ལ་ཕྱག་འཚལ་བསྟོད། །དགག་བསྒྲུབ་སྤང་ལེན་ཀུན་བྲལ་ནས། །རེག་བྱའི་ཡུལ་ལ་དབྱེ་བསལ་མེད། །གསལ་ལྕམ་སྐུ་ལ་ཕྱག་འཚལ་བསྟོད། །ཕྱི་ནང་གཉིས་མེད་ཆོས་ཉིད་དང་། །སྒྲ་ཡི་རང་བཞིན་སྤྲོས་དང་བྲལ། །སྒྲ་ཡི་ལས་རྣམས་ཡོངས་སུ་རྫོགས། །བདེ་ལྕམ་སྐུ་ལ་ཕྱག་འཚལ་བསྟོད། །སྤྲོས་པའི་མཐའ་བརྒྱད་ཀུན་དང་བྲལ། །རོ་ཡི་བརྟགས་ཞེན་རྣམ་པར་དག །བཏང་སྙོམས་ཡོངས་སུ་རྫོགས་པར་མཛད། །ལྷ་མོ་སྟོང་ལྕམ་སྐུ་ལ་ཕྱག་འཚལ་བསྟོད། །རྒྱུ་རྐྱེན་སྐྱེ་འགག་ཡོངས་དང་བྲལ། །རྩོལ་བསྒྲུབ་མཐའ་རྣམས་རྩད་ནས་གཅོད། །གཏིང་གསལ་ཤར་གྱི་སྒོ་སྲུངས་བསྟོད། །ཐམས་ཅད་མཉམ་ཉིད་ངང་དུ་སྡུད། །རིག་ཚོར་འགྱུ་བ་དང་སངས་པའི། །ལྷོ་ཡི་སྒོ་བར་ཕྱག་འཚལ་བསྟོད། །འཁྲུལ་པ་ཐམས་ཅད་རང་སར་དེངས། །རང་སངས་ནུབ་སྒོར་ཕྱག་འཚལ་བསྟོད། །བརྟགས་ཞེན་མཚན་མ་ཡོངས་དང་བྲལ། །གསལ་གདངས་བྱང་སྒོར་ཕྱག་འཚལ་བསྟོད། །བསྟོད་པ་ཆ་མཐུན་ཁྱད་པར་འཕགས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བསྟོད་པའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་ཀུན་ཏུ་བཟང་པོ་ལ། །གཤེགས་སུ་གསོལ་ན་ཇི་ལྟར་གསོལ། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། བརྗོད་མེད་བདེ་ཆེན་ཀློང་དུ་གཤེགས་སུ་གསོལ། །བསམ་མེད་འགྱུར་མེད་དབྱིངས་སུ་གཤེགས་སུ་གསོལ། །རང་བྱུང་ཆེན་པོའི་ཀློང་དུ་གཤེགས་ ― DNG002_Page_0448 ―
[མ་དཔེ་གཟིགས་ན་འདིར་གནོན།]
སུ་གསོལ། །མངོན་མེད་དབྱིངས་སུ་གཤེགས་སུ་གསོལ། །མཚོན་མེད་བརྗོད་འདས་དབྱིངས་སུ་གཤེགས་སུ་གསོལ། །རིན་ཆེན་འོད་འབར་ཆོས་ཉིད་ཀློང་དུ་གཤེགས་སུ་གསོལ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། གཤེགས་སུ་གསོལ་བའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རྫོགས་ཆེན་སྤྱི་ཏི་ཡོ་ག་ཡིས། །དབང་གི་སྒྲུབ་ཐབས་ཅི་ལྟར་ལགས། །ཞེས་གསོལ་པ་དང་། དེ་ནས་སྟོན་པ་ཀུན་བཟང་དེ། རིན་པོ་ཆེ་འོད་ཀྱི་བྱིན་རླབས་ནང་དུ་འབར་བའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་རྣམས་ལ། །དབང་གི་བསྐུར་ཐབས་འདི་ལྟར་གསུངས། །འཁོར་རྣམས་མ་ཡེངས་གུས་པས་ཟུང་། །སྙིང་པོ་དོན་གྱི་གནས་ལུགས་ལ། །བསྐུར་བྱ་སྐུར་བྱེད་གཉིས་མེད་ཀྱང་། །རེ་ཞིག་མ་རྟོགས་བློ་ཅན་ལ། །རིག་པ་སེམས་ཀྱི་རྩལ་དབང་བསྐུར། །ཀུན་གཞི་ཀློང་ཡངས་མཚོ་ཆེན་ལ། །འདུས་མ་བྱས་པའི་མཁའ་དབྱིངས་ཀློང་དཀྱིལ་དུ། །ཆོས་ཉིད་དོན་དབང་འདོད་པ་རྣམས། །རྩོལ་མེད་ཚུལ་གྱིས་འཇུག་པར་བྱ། །དང་པོ་བུམ་པའི་དབང་ཉིད་དང་། །གཉིས་པ་གསང་བའི་དབང་བསྐུར་དང་། །གསུམ་པ་ཤེས་རབ་ཡེ་ཤེས་དབང་། །བཞི་པ་རིན་ཆེན་ཚིག་དབང་ངོ་། །རྒྱལ་ཐབས་སྤྱི་བླུགས་དབང་གིས་ལ་བཟླའོ། །དང་པོ་བུམ་པའི་དབང་བསྐུར་ལ། །ལས་དང་སྐལ་བར་ལྡན་པའི་སློབ་མ་ཡིས། །སྙིང་པོ་དོན་གྱི་གདམས་ངག་ཡོད་པ་ཡི། །བླ་མ་དག་ལ་ཞུ་བ་དབུལ། །བླ་མས་གནང་བར་གྱུར་པ་ན། །རྫས་དང་ཡོ་བྱད་ལྡན་བྱས་ཏེ། །གཟུང་འཛིན་དག་པའི་ས་ཕྱོགས་སུ། །ཕྱོགས་རིས་སངས་པའི་དབེན་རྩ་རུ། །མཁའ་ཀློང་ཡངས་པའི་མཆོད་ཁང་དུ། །མི་འགྱུར་དབྱིངས་ཀྱི་དཀྱིལ་འཁོར་ནི། །མ་བྲིས་གསལ་བའི་དཀྱིལ་འཁོར་ན། །མ་བསྐྱེད་རྫོགས་པའི་ལྷ་ཚོགས་བཞུགས། །དེ་ལ་སློབ་མས་དབང་ནོད་དེ། །སྐལ་ལྡན་རིགས་ཆེན་སློབ་མ་དེ། ། ― DNG002_Page_0449 ―
[མ་དཔེ་གཟིགས་ན་འདིར་གནོན།]
འོག་མིན་གནས་མཆོག་དཀྱིལ་འཁོར་དུ། །ཚོགས་དང་གཏོར་མ་ལུགས་སུ་བཤམ། །བསྒྲུབ་པའི་རྫས་དང་དཀྱིལ་འཁོར་རྫས། །ཆད་པ་མེད་པར་བསགས་བྱས་ལ། །དོན་དམ་སློབ་མ་སྐལ་ལྡན་དེས། །བྱང་ཆུབ་ཆེན་པོའི་ཆུ་རྒྱུན་གྱིས། །སེམས་ཀྱི་དྲི་མ་དག་པར་བཀྲུས། །རྡོ་རྗེ་སློབ་དཔོན་བཞུགས་པ་ལ། །པུས་བཙུགས་ཐལ་སྦྱར་འདི་སྐད་ཞུས། །ཨེ་མ་ཧོ། ཡེ་ནས་བདེ་གཤེགས་སྙིང་པོ་ལ། །ཉོན་མོངས་མ་རིག་དབང་གིས་ནི། །རང་གི་དེ་ཉིད་ངོ་མ་ཤེས། །བསྐལ་པར་འགྲོགས་ཀྱང་དོན་མ་རྟོགས། །ལྷན་ཅིག་གནས་ཀྱང་ཞལ་མ་འཚོས། །ཉོན་མོངས་དུག་ལྔའི་བདག་ཉིད་ཀྱིས། །ཁམས་གསུམ་འཁོར་བའི་གནས་སུ་འཁྱམས། །ཐོག་མའི་སངས་རྒྱས་མ་དང་སྤྲོད། །ཆོས་ཉིད་མ་བུ་ངོ་སྤྲད་ཕྱིར། །མི་འགྱུར་ཆོས་ཉིད་དཀྱིལ་འཁོར་སྟོན། །འཁོར་བའི་ནང་ནས་གདོན་དུ་གསོལ། །སློབ་དཔོན་ཉིད་ཀྱིས་བྱིན་གྱིས་རློབས། །ཐར་བ་ཆེན་པོའི་གྲོང་མཆོག་ཏུ། །སྐྱབས་མེད་བདག་ནི་འཇུག་ཏུ་གསོལ། །ཞེས་གསོལ་པ་དང་། སློབ་དཔོན་གྱིས་གསུངས་པ། ཀྱེ་ཀྱེ་བུ་ཁྱོད་སྐལ་ལྡན་རིགས་ཀྱི་བུ། །མི་འགྱུར་དཀྱིལ་འཁོར་འཇུག་འདོད་ན། །གཟུང་འཛིན་གཉིས་ཀྱི་སྒྲོག་ཁྲོལ་ལ། །སེམས་ཀྱི་དྲི་མ་དག་པར་གྱིས། །སེམས་ལ་ཞེ་འདོད་མ་བྱེད་པར། །ཆགས་ཞེན་བྲལ་བས་འཇུག་པར་གྱིས། །དེ་ནས་སློབ་དཔོན་གྱིས་སློབ་མར་མིག་དར་བཀབ་ལ། ཡོལ་བའི་ཕྱི་རོལ་ནས་ནང་དུ་ཁྲིད་ལ། རྟོག་ཚོགས་ཀྱི་བགེགས་བསྐྲད་ལ། དེ་ནས་སློབ་མས་ཀྱང་རྟོག་པ་ཐམས་ཅད་ཕྱག་པའི་ཕྱག་བྱས་ལ། །མ་ཆགས་སེར་སྣ་མེད་པའི་རིན་པོ་ཆེ། ཆེ་བ་ལྔ་ཡི་ནོར་ཀུན་མི་ཕངས་པར་འབུལ་ལོ། །དེ་ནས་སློབ་མ་དེས། མི་འགྱུར་དབྱིངས་ཀྱི་དཀྱིལ་འཁོར་དེ། །བདག་ཅག་རྣམས་ཀྱིས་མཐོང་བྱའི་ཕྱིར། །མ་རིག་པ་ཡི་མིག་ཕྱེ་ལ། །སྙིང་པོ་དོན་གྱི་ལྷ་ཚོགས་བསྟན་དུ་གསོལ། །ཞེས་གསོལ་པ་དང་། དེ་ནས་སློབ་དཔོན་གྱིས། འདི་སྐད་གསུང་ངོ་། །བུ་ཁྱོད་སྐལ་ལྡན་རིགས་ཅན་ཁྱོད། །ཐོག་མ་མེད་པའི་དུས་ཉིད་ནས། །གནས་དོན་མ་ཤེས་དོན་མ་རིག ། ― DNG002_Page_0450 ―
[མ་དཔེ་གཟིགས་ན་འདིར་གནོན།]
མ་རིག་མུན་པས་མིག་ལོང་བས། །དེ་རིང་ཤེས་རབ་འོད་གསལ་གྱིས། །མ་རིག་པ་ཡི་མིག་དབྱེའོ། །མི་འགྱུར་ལྷ་ཚོགས་བལྟ་བར་གྱིས། །རང་གི་རིན་ཆེན་འོད་གསལ་བསྟན། །ཐོག་མའི་སངས་རྒྱས་ངོ་སྤྲད་དོ། །ཞེས་མིག་ཕྱེའོ། །དེ་ནས་སློབ་མ་དེས་མེ་ཏོག་དོར་ནས། མིག་ཕྱེ་ནས་ལྷ་ངོ་བལྟའོ། །རིགས་གང་ཡིན་གྱི་གསང་མཚན་གདགས་སོ། །དེ་ནས་སློབ་དཔོན་གྱིས་སློབ་མའི་སྤྱི་བོར་བུམ་པ་བཞག་ལ། འདི་སྐད་བརྗོད་པར་བྱའོ། །ཆོས་དབྱིངས་རྣམ་དག་བུམ་པ་འདི། །བུ་ཁྱོད་སྤྱི་གཙུག་བཞག་བྱས་ནས། །ཡེ་ཤེས་བུམ་པའི་དབང་བསྐུར་བས། །སྣང་སྲིད་མ་བཀག་ཆོས་སྐུ་རུ། །ཕྱོགས་རིས་བྲལ་བའི་དབང་ཐོབ་ཤོག །དེ་ནས་དབུ་རྒྱན་བསྐོན་བྱས་ཏེ། །རྒྱལ་བ་རིགས་ལྔའི་དབང་བསྐུར་བས། །ཡེ་ཤེས་རྣམ་ལྔ་གསལ་བ་དང་། །རང་ཉིད་རིགས་ལྔའི་སྐུར་གྱུར་ཅིག །དེ་ནས་རྡོ་རྗེ་སྦྱིན་བྱས་ཏེ། །རྡོ་རྗེ་འབར་བ་འདི་གཏད་པས། །མ་ནོར་མ་བཅོས་བྱར་མེད་པའི། །མི་འགྱུར་བརྟན་པའི་རྒྱས་ཐོབ་ཅིག །དེ་ནས་དྲིལ་བུ་སྦྱིན་བྱས་ལ། །སྟོང་ཉིད་དྲིལ་བུ་འདི་གཏད་པས། །དངོས་མེད་སྟོང་པའི་རང་བཞིན་ལ། །འགྱུར་བ་མེད་པར་རྒྱས་ཐོབ་ཅིག །ཅེས་བུམ་པའི་དབང་བསྐུར་རོ། །གཉིས་པ་གསང་བའི་དབང་བསྐུར་བ་ནི། །སྣང་གྲག་རྟགས་སྣང་ཐབས་ཡིན་ཏེ། །རང་བཞིན་དངོས་མེད་ཤེས་རབ་ཡུམ། །གཉིས་མེད་ཆེན་པོར་སྦྱོར་བ་ལས། །དབྱེ་བསལ་མེད་པའི་དབང་ཐོབ་ཤོག །གསུམ་པ་ཤེས་རབ་ཡེ་ཤེས་ནི། །ཡུལ་གྱིས་མ་ཕྱེ་ཆོས་ཀྱི་དབྱིངས། །སེམས་ཀྱིས་མ་བསམས་ཆོས་ཀྱི་དབྱིངས། །ཆོས་སྐུ་ཆོས་དབྱིངས་བརྗོད་མེད་ཀློང་། །ཤེས་རབ་ཡེ་ཤེས་དབང་བསྐུར་ཐོབ། །བཞི་པ་རིན་ཆེན་ཚིག་དབང་ཡང་། །སེམས་ཉིད་ངང་དྭངས་རིན་ཆེན་དེ། །རྣམ་རྟོག་མཚན་མའི་ཚོགས་ལས་བྱུང་། །ཆོས་ཉིད་རང་གསལ་རང་དབང་ཐོབ། །རིན་ཆེན་ཚིག་དབང་བསྐུར་བས་ཐོབ། །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། དབང་བསྐུར་ལུགས་ཀྱི་ལེའུ་སྟེ་ཉི་ཤུ་རྩ་དྲུག་པའོ།། །། ― DNG002_Page_0451 ―
[མ་དཔེ་གཟིགས་ན་འདིར་གནོན།]
དེ་ནས་རྡོ་རྗེ་སེམས་དཔའ་ཡིས། །སྟོན་པ་ཀུན་ཏུ་བཟང་པོ་ལ། །དབང་བསྐུར་ཐོབ་ལུགས་རྫོགས་ལུགས་རྣམས། །འདུས་པའི་འཁོར་ལ་གསུང་དུ་གསོལ། །སྟོན་པས་འཁོར་ལ་བཀའ་སྩལ་པ། །སྙིང་པོ་མིང་མེད་ངང་ལ་ཐོབ་དང་མ་ཐོབ་མེད། །དེ་ལྟར་མ་རྟོགས་ཐོབ་དང་མ་ཐོབ་བྱུང་། །དབང་ཐོབ་དབང་བཞི་རྫོགས་ལུགས་ན། །ཆོས་ཉིད་མ་བཅོས་ངང་གནས་པས། གནས་ཀྱི་དབང་བསྐུར་ཐོབ། འགྱུར་མེད་ཆོས་སྐུ་ཐོབ་པས། སྐུའི་དབང་ཐོབ། བརྗོད་མེད་ངང་ལ་གནས་པས་གསུང་གི་དབང་ཐོབ། གཡོ་མེད་དབྱིངས་སུ་ཐིམ་པས། ཐུགས་ཀྱི་དབང་བསྐུར་ཐོབ། མ་བསྐུར་རང་ལ་རྫོགས་པས། སྐུ་གསུང་ཐུགས་དབང་ཐོབ། དེ་ནི་དབང་བསྐུར་ལུགས་ཐོབ་ལུགས་སོ། །དབང་བསྐུར་རྫོགས་པའི་རྫོགས་ལུགས་ནི། །བུམ་པའི་དབང་ཡང་སེམས་ལ་རྫོགས། །བུམ་ནི་སྙིང་པོ་འོད་ཀྱི་བུམ། །པ་ནི་ཆོས་ཉིད་མ་འགགས་པ། །དབང་བ་སྐྱེ་མེད་དོན་ལ་དབང་། །བསྐུར་བ་གཉིས་སུ་མེད་པར་བསྐུར། །ཐོབ་ནི་སྙིང་པོའི་ཆོས་སྐུ་ཐོབ། །དེ་ཕྱིར་བུམ་པ་སེམས་ལ་རྫོགས། །གསང་བའི་དབང་གི་རྫོགས་ལུགས་ནི། །གསང་བ་བློ་ཡི་ཡུལ་མ་གྱུར། །སྨྲ་བསམ་བརྗོད་འདས་དོན་ཡིན་ནོ། །པ་ནི་སྙིང་པོའི་ཡེ་ཤེས་ཡིན། །དབང་ནི་བརྗོད་མེད་དོན་ལ་དབང་། །བསྐུར་ནི་མཚོན་དུ་མེད་པར་བསྐུར། །ཐོབ་ནི་བརྗོད་བྲལ་ངོ་བོར་ཐོབ། །དེ་ཕྱིར་གསང་དབང་སེམས་ལ་རྫོགས། །ཤེས་རབ་ཡེ་ཤེས་རྫོགས་ལུགས་ནི། །ཤེས་ནི་གཞི་ཡི་འོད་གསལ་ཤེས། །རབ་ནི་བུམ་པ་ངོ་སྤྲད་ཤེས། །ཡེ་ནི་ཐོག་མ་མེད་པར་བྱང་། །ཤེས་ནི་འགྱུར་བ་མེད་པར་ཤེས། །དབང་ནི་ཆོས་ཀྱི་སྐུ་ལ་དབང་། །བསྐུར་ནི་དམིགས་དང་བྲལ་བར་བསྐུར། །ཐོབ་ནི་ཆོས་ཉིད་འགྱུར་མེད་ཐོབ། །རྫོགས་ནི་རང་སེམས་རང་ལ་རྫོགས། །དེ་ཕྱིར་ཤེས་རབ་ཡེ་ཤེས་རྫོགས། །རིན་ཆེན་ཚིག་དབང་རྫོགས་ལུགས་ནི། །རིན་ནི་སེམས་ཉིད་རིན་པོ་ཆེ། །ཆེ་ནི་ཆེ་བ་ལྔ་ཡིས་འཕགས། །ཚིག་ནི་བརྗོད་དུ་མེད་པའི་ཚིག །དབང་ནི་ཆོས་ཉིད་འོད་གསལ་དབང་། །བསྐུར་ནི་མི་འགྱུར་དབྱིངས་སུ་ ― DNG002_Page_0452 ―
[མ་དཔེ་གཟིགས་ན་འདིར་གནོན།]
བསྐུར། །ཐོབ་ནི་སངས་རྒྱས་ལྔ་རྣམས་ཐོབ། །དེ་ཕྱིར་རིན་ཆེན་ཚིག་དབང་རྫོགས། །དབང་བཞི་རྫོགས་པའི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །དབང་བཞི་ཟིལ་གྱིས་གནོན་པ་ཡི། །རིག་པ་རྩལ་དབང་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །རིག་པ་སྤྱི་བླུགས་དབང་བསྐུར་ནི། །པ་ཐ་ཨ་ཐ་སཾ་ཀ་རི་ཞེས་བྱ་བ་སྟེ། སྤྱི་བླུགས་དབང་གི་བསྐུར་ཐབས་ནི། །ཆོས་སྐུ་གཅེར་མཐོང་མན་ངག་ཡིན། །སྣང་ཞིང་སྲིད་པས་བསྡུས་པ་རྣམས། །དགག་བསྒྲུབ་མེད་པར་དབང་བསྐུར་བས། །ཕྱོགས་རིས་མེད་པའི་དབང་ཆེན་ཐོབ། །ཡིད་འགྱུ་དྲན་རིག་རྣམ་རྟོག་རྣམས། །རྩིས་གདབ་མེད་པར་དབང་བསྐུར་བས། །ངང་དྭངས་ཆོས་ཉིད་གསལ་གདངས་ཐོབ། །གཟུང་འཛིན་གཉིས་སྣང་བདེན་གཉིས་རྣམས། །དབྱེར་མེད་སྤྲོས་པ་ཐག་ཆོད་པའི། །འཁྲུལ་སྣང་རྩད་བཅད་དབང་བསྐུར་བས། །རང་སངས་ཆེན་པོར་དབང་ཐོབ་བོ། །སྣང་སྲིད་རྣམ་དག་མཁའ་ཀློང་དཀྱིལ་ཡངས་སུ། །ཅི་སྤྱོད་ཐམས་ཅད་ཆོས་ཉིད་རོལ་པའི་རྒྱན། །ཆོས་ཅན་རོལ་པ་ཆོས་ཉིད་མ་དང་འཕྲད། །མ་བུ་དབྱེར་མེད་ཆེན་པོར་དབང་ཐོབ་པ། །དབང་བཞི་ཟིལ་གནོན་རིག་པ་སྤྱི་ཡི་ལུགས། །དབང་བཞི་རྒྱས་བཏབ་དབང་གི་རྒྱལ་པོ་ཡིན། །སྣང་སྲིད་སེམས་ལ་དབང་བས་དབང་གི་རྒྱལ་པོ་ཡིན། །སྐྱེ་མེད་རྒྱ་ཡིས་ཐེབས་པས་དབང་གི་རྒྱལ་པོ་ཡིན། །འགྱུར་མེད་རྟོད་ལ་ནོན་པས་དབང་གི་རྒྱལ་པོ་ཡིན། །དབྱེར་མེད་ས་ལ་གནས་པས་དབང་གི་རྒྱལ་པོ་ཡིན། །བྱ་བ་ཐམས་ཅད་བཏང་བས་དབང་གི་རྒྱལ་པོ་ཡིན། །དགག་བསྒྲུབ་ཡངས་དོག་བྲལ་བས་དབང་གི་རྒྱལ་པོ་ཡིན། །སངས་རྒྱས་སེམས་ལ་དབང་བས་དབང་གི་རྒྱལ་པོ་ཡིན། །ཆོས་སྐུ་སེམས་ལ་དབང་བས་དབང་གི་རྒྱལ་པོ་ཡིན། །སྣང་སྲིད་རྒྱ་ནས་འདེགས་པས་དབང་གི་རྒྱལ་པོ་ཡིན། །འཁོར་བ་རྩད་ནས་བཅད་པས་དབང་གི་རྒྱལ་པོ་ཡིན། །རང་དབང་རང་གིས་ཐོབ་པས་དབང་གི་རྒྱལ་པོ་ ― DNG002_Page_0453 ―
[མ་དཔེ་གཟིགས་ན་འདིར་གནོན།]
ཡིན། །བརྗོད་མེད་ཀློང་དུ་ཐིམ་པས་དབང་གི་རྒྱལ་པོ་ཡིན། །འགྱུར་མེད་ངང་ལ་གནས་པས་དབང་གི་རྒྱལ་པོ་ཡིན། །སྐྱེ་མེད་རང་ས་ཟིན་པས་དབང་གི་རྒྱལ་པོ་ཡིན། །ཆོས་ཉིད་བྱང་ཆུབ་སེམས་ཀྱི་དབང་བསྐུར་འདི། །ཐེག་པ་གཞན་ལས་འབྱུང་མི་སྲིད། །སྤྱི་ཏིའི་དབང་བསྐུར་ཁྱད་པར་འཕགས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། དབང་བསྐུར་རྒྱལ་པོའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །སེམས་ཉིད་སྟོན་པ་ཀུན་བཟང་ལ། །དཀྱིལ་འཁོར་ཆོས་ཉིད་ལྷ་ཚོགས་ལ། །བདུད་རྩི་སྨན་མཆོད་ཅི་ལྟར་བྱ། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །འཁོར་རྣམས་མ་ཡེངས་གུས་པས་ཉོན། །ང་ཡིས་བདུད་རྩི་སྨན་མཆོད་བཤད། །རང་བྱུང་གདོད་ནས་རྣམ་དག་པས། །རྩ་བརྒྱད་སྟོང་ལས་སྦྱར་བའི་སྨན། །རྩ་བ་འབུམ་ཕྲག་ཡངས་པའི་བཅུད། །འཆི་མེད་བདུད་རྩི་ར་ས་ཡན། །ཐམས་ཅད་འདུས་པའི་སྙིང་པོ་སྟེ། །འགྲོ་དྲུག་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་མཆོག །མི་འགྱུར་སྙིང་པོའི་ལྷ་ཚོགས་ལ། །སྨན་མཆོད་མི་དམིགས་དབྱིངས་ཉིད་འབུལ། །སྐྱེ་མེད་བདེ་ཆེན་དངོས་གྲུབ་སྩོལ། །སྙིང་པོའི་རང་བཞིན་འགྱུར་མེད་ཀྱང་། །ཆོས་རྣམས་ཐམས་ཅད་བདུད་རྩི་རྣམ་དག་དགོངས་པར་བསྟན། །རང་བྱུང་རྒྱུ་རྐྱེན་སྐྱེ་འཇིག་མེད། །གཞི་མ་འོད་གསལ་གདོད་མ་ནས། །འཁྲུལ་སྣང་མ་རིག་རྣམ་པར་དག །རྩ་བ་བྱང་ཆུབ་སེམས་ཉིད་ཡིན། །བརྒྱད་ནི་རྣམ་ཤེས་ཚོགས་བརྒྱད་ཡིན། །སྟོང་ནི་ཐེག་པ་བརྒྱད་ཁྲི་སྟོང་། །སྦྱར་ནི་མཉམ་ཉིད་ཀློང་དུ་སྦྱར། །སྨན་ནི་ཉོན་མོངས་བརྒྱད་ཁྲིའི་སྨན། །རྩ་བ་ཐིག་ལེ་ཉག་གཅིག་ཡིན། །འབུམ་ཕྲག་ཐིག་ལེ་རྩལ་སྣང་ཡིན། །ཡངས་པ་ཆོས་ཉིད་རོལ་པས་ཡངས། །བཅུད་ནི་སྙིང་པོ་འགྱུར་མེད་ཡིན། །སྙིང་པོ་ཆོས་སྐུ་སྐྱེ་འཆི་མེད། །བདུད་ནི་ཉོན་ ― DNG002_Page_0454 ―
[མ་དཔེ་གཟིགས་ན་འདིར་གནོན།]
མོངས་ལྔ་ལྡན་ཏེ། །རྩི་ནི་ཡེ་ཤེས་རྣམ་ལྔའོ། །ར་ནི་ང་བདག་རྣམ་གཉིས་ཏེ། །ས་ནི་བདག་བཅོམ་ཆོས་ཉིད་བསྟན། །ཡ་ནི་ཐེག་པ་རིམ་བརྒྱད་སྟེ། །ཐམས་ཅད་རྫོགས་པ་ཆེན་པོར་འདུས། །སྙིང་པོ་སྤྱི་ཏི་ཡོ་ག་ཡིན། །ཐོག་མཐའ་གཉིས་ཀྱི་གདམས་ངག་ཡིན། །འགྲོ་དྲུག་གཡང་ས་གཅོད་པ་ཡིན། །དྲས་ཐག་ཆོད་པའི་བཀའ་ལུང་གིས། །སེམས་ཅན་ཀུན་བསྒྲལ་དབྱིངས་སུ་བསྒྲལ། །སྐྱེ་མེད་ཆོས་ཉིད་ཀློང་དུ་བཞག །དུག་ལྔ་ཞེ་སྡང་འདོད་ཆགས་གཟུང་འཛིན་ལྔ། །ཤེས་རྟོགས་ལྟ་སྒོམ་སྤྱོད་འབྲས་སེལ། །བདུད་ནི་རྣམ་རྟོག་ཕྱོགས་རྣམས་ཡིན། །རིན་ཆེན་འོད་གསལ་ཤེས་པའི་མཆོག །བདུད་རྣམས་ཞེན་མེད་ངང་དུ་བཅོམ། །རྩི་ནི་རྣམ་གཉིས་འབྲང་གསུམ་སྟེ། །ཐབས་ནི་སྣང་སྲིད་བདེ་ཆེན་ཀློང་། །མཆོད་ནི་དམིགས་པ་མེད་པར་མཆོད། །ཕུལ་ནི་གཉིས་སུ་མེད་པར་ཕུལ། །དགྱེས་ནི་མཉམ་ཉིད་ཆེན་པོར་དགྱེས། །དངོས་ནི་རང་སེམས་སྐྱེ་བ་མེད། །གྲུབ་པ་རྟོགས་པའི་ཡེ་ཤེས་སོ། །འགྱུར་མེད་སེམས་ཉིད་ལྷ་ཚོགས་ལ། །མཆོད་འབུལ་དགྱེས་པའི་དངོས་གྲུབ་སྩོལ། ༔ཨཱ་སང་ཀ་ར་ཨཱ༔སི་ཏ་ཨཱ༔ ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སྣང་སྲིད་ཐམས་ཅད་བདུད་རྩི་རྣམ་དག་གི་ལེའུ་སྟེ་ཉི་ཤུ་རྩ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་སེམས་ཉིད་ཀུན་བཟང་ལ། །དཀྱིལ་འཁོར་ལྷ་ཚོགས་དེ་རྣམས་ལ། །ཟན་བྲུལ་ཟང་ཟིང་མ་ཡིན་པའི། །ཆོས་ཉིད་གཏོར་མ་ཇི་ལྟར་བཏང་། །ཞེས་གསོལ་པ་དང་། དེ་ནས་སྟོན་པ་ཀུན་བཟང་དེས། རིན་པོ་ཆེ་འོད་འཕེལ་འགྲིབ་དབྱེ་བསལ་མེད་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འདི་སྐད་གསུངས། །ཆོས་ཉིད་སེམས་ཀྱི་གཏོར་མ་བཤད། །འཁོར་རྣམས་མ་ཡེངས་གུས་པས་ཉོན། །སྙིང་པོའི་རང་བཞིན་འགྱུར་མེད་ལ། །རིག་པ་རྩལ་སྣང་མ་འགགས་གཏོར་མ་གཏོང་། །ཤ་ཁྲག་ཟན་བྲུལ་ ― DNG002_Page_0455 ―
[མ་དཔེ་གཟིགས་ན་འདིར་གནོན།]
འདུས་བྱས་རྫས་མིན་པའི། །སྣང་སྲིད་རྒྱས་འདེབས་ཆོས་སྐུའི་གཏོར་མ་གཏོང་། །སྣོད་ཀྱི་འཇིག་རྟེན་གསེར་དངུལ་ཟངས་ལྕགས་སྣོད། །ནང་བཅུད་འཇིག་རྟེན་གཏོར་མའི་རྫས་རྣམས་ལ། །སྐྱེ་འགྲོ་གཟུགས་སོགས་ཤ་ཆང་ཟན། །རང་ལས་འབྱུང་བའི་བདུད་རྩི་ལྔ། །དུག་ལྔ་ཀ་དག་ཡེ་ཤེས་ལྔ། །དུག་གསུམ་ཀ་དག་སྐུ་གསུང་ཐུགས། །རྣམ་ཤེས་རྣམ་ལྔ་གཏོར་མའི་རྒྱན། །དབང་པོ་ཡུལ་ལྔ་གཏོར་མའི་རྟེན། །དབང་པོ་རང་དག་རྒྱལ་བའི་དགོངས་པའི་བཅུད། །ཨོཾ་ཨཱཿཧཱུཾ་གསུམ་གྱི་བྱིན་རླབས་ཀྱིས། །དུག་གསུམ་ཀ་དག་སྣང་སྲིད་བདུད་རྩིར་བསྒྱུར། །དབྱེ་བསལ་རྩིས་གདབ་མེད་པའི་བྱིན་རླབས་ཀྱིས། །ཕྱི་ནང་སྣོད་བཅུད་བསྡུས་པ་ཡིས། །ཁམས་གསུམ་སྲིད་གསུམ་འགྲོ་དྲུག་རྣམས། །མཉམ་ཉིད་བདུད་རྩིའི་རྒྱ་མཚོར་གྱུར། །སྐྱེ་འགག་མེད་པའི་བྱིན་རླབས་ཀྱིས། །སྣང་ཞིང་སྲིད་པས་བསྡུས་པའི་ཆོས་རྣམས་ཀུན། །སྐྱེ་མེད་དབྱིངས་སུ་མཆོད་པར་འབུལ། །སྐྱེ་ཤི་རྩད་གཅོད་བྱིན་གྱིས་བརླབས། །སངས་རྒྱས་བསམ་ལས་འདས་པ་ལ། །སྣང་སྲིད་རྒྱས་འདེབས་མཆོད་པར་འབུལ། །འཕོ་འགྱུར་མེད་པར་བྱིན་གྱིས་རློབས། །སྐྱེ་བ་མེད་པར་བཞེས་སུ་གསོལ། །སྐུ་གསུམ་དཀོན་མཆོག་དུས་གསུམ་སངས་རྒྱས་ལ། །སེམས་ཀྱི་བརྟགས་སྣང་མཆོད་པར་འབུལ། །བརྗོད་མེད་བསམ་འདས་བཞེས་སུ་གསོལ། །བརྟགས་སྣང་གཟུང་འཛིན་གྲོལ་བར་བྱིན་གྱིས་རློབས། །བླ་མ་ཡི་དམ་མཁའ་འགྲོ་བྱེ་བ་ཁྲག་ཁྲིག་ལ། །སྣང་སྲིད་སྐྱེ་འགྲོ་ཐམས་ཅད་དང་། །ཉོན་མོངས་བརྒྱད་ཁྲི་བཞི་སྟོང་གཏོར་མར་འབུལ། །སྡུག་བསྔལ་ཀ་དག་བྱིན་གྱིས་རློབས། །བཀའ་སྲུང་ཆོས་སྐྱོང་མཁའ་འགྲོ་བསམ་འདས་ལ། །སྣང་སྲིད་སྐྱེ་འགྲོ་གཏོར་མའི་རྫས། །བློ་ཡིས་ཆུད་ཚད་གཏོར་མར་འབུལ། །ཆོས་ཀྱི་དབྱིངས་སུ་བཞེས་སུ་གསོལ། །སྐྱེ་བ་མེད་པར་བྱིན་གྱིས་རློབས། །དཀྱིལ་འཁོར་ལྷ་ཚོགས་མ་ལུས་ཐམས་ཅད་ལ། །སེམས་ཀྱི་དྲན་རྟོག་བརྟགས་ཞེན་ཀུན། །འགྱུར་མེད་ཀློང་དུ་མཆོད་པར་འབུལ། །རང་སངས་ཆེན་ ― DNG002_Page_0456 ―
[མ་དཔེ་གཟིགས་ན་འདིར་གནོན།]
པོར་བྱིན་གྱིས་རློབས། །སྙིང་པོ་དོན་གྱི་ལྷ་ཚོགས་ལ། །བྱུང་ཚོར་ཐམས་ཅད་གཏོར་མར་འབུལ། །སྤྲོས་པ་ཐག་ཆོད་བཞེས་སུ་གསོལ། །རྩིས་གདབ་མེད་པར་བྱིན་གྱིས་རློབས། །རིགས་ལྔ་སྐུ་ལྔ་ཡབ་ཡུམ་ལ། །ཕྱི་ནང་གཉིས་མེད་གཏོར་མར་འབུལ། །དབྱེ་བསལ་མེད་པར་བཞེས་སུ་གསོལ། །མ་ཕྱེ་མ་བཀོལ་བྱིན་གྱིས་རློབས། །བདེ་ལྕམ་གསལ་བའི་ལྷ་མོ་ལ་སོགས་ལ། །རིག་ཡིད་དྲན་སེམས་གཏོར་མར་འབུལ། །རིག་མེད་འགྱུ་མེད་སེམས་པ་མེད་པར་བཞེས་སུ་གསོལ། །གཡོས་པ་མེད་པར་བྱིན་གྱིས་རློབས། །ཤར་སྒོ་སྲུང་བ་ངང་དྭངས་ལ། །གཟུང་འཛིན་ཆགས་ཞེན་གཏོར་མར་འབུལ། །ཆགས་མེད་ཞེན་མེད་བཞེས་སུ་གསོལ། །ཤུགས་སྒྲོལ་ཆེན་པོར་བྱིན་གྱིས་རློབས། །ལྷོ་ཡི་སྒོ་སྲུང་རང་སངས་ལ། །ཡུལ་སེམས་གཉིས་ནི་མཆོད་པར་འབུལ། །དགག་བསྒྲུབ་མེད་པར་བཞེས་སུ་གསོལ། །གཉིས་སུ་མེད་པར་བྱིན་གྱིས་རློབས། །ནུབ་སྒོའི་སྒོ་སྲུང་རང་སངས་ལ། །མ་རིག་གཉིས་འཛིན་གཏོར་མར་འབུལ། །གསལ་བའི་ཀློང་དུ་བཞེས་སུ་གསོལ། །ཡེ་ཤེས་རང་ཤར་བྱིན་གྱིས་རློབས། །བྱང་སྒོའི་སྒོ་སྲུང་མཁའ་གསལ་ལ། །ལྟ་བསྒོམ་སྤྱོད་འབྲས་མཆོད་པར་འབུལ། །བལྟ་བྱ་ལྟ་བྱེད་མེད་པ་ཡི། །ཞེ་འདོད་མེད་པར་བཞེས་སུ་གསོལ། །སྤྲོས་ཆོད་ཀ་དག་ཆེན་པོར་བྱིན་གྱིས་རློབས། །མིང་འདོགས་མེད་པར་གཏོར་མ་འབུལ། །བརྟགས་སྣང་མེད་པར་བྱིན་གྱིས་རློབས། །བྱ་བཙལ་མེད་པར་གཏོར་མ་འབུལ། །བྱར་མེད་ཆེན་པོར་བྱིན་གྱིས་རློབས། །བཟང་ངན་ཐམས་ཅད་གཏོར་མར་འབུལ། །སྤང་ལེན་མེད་པར་བྱིན་གྱིས་རློབས། །གཞི་དང་རྩལ་སྣང་གཏོར་མར་འབུལ། །གཞི་དང་རྩལ་ཐིམ་བཞེས་སུ་གསོལ། །དབྱེར་མེད་འཕོ་འགྱུར་མེད་པར་བྱིན་གྱིས་རློབས། །ཟང་ཟིང་འདུས་རྫས་གཏོར་མ་མིན། །གཏང་བྱ་གཏོང་བྱེད་མེད་པ་ཡི། །བྱང་ཆུབ་སེམས་ཀྱི་གཏོར་མ་ཁྱད་པར་འཕགས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རང་སེམས་གཏོར་མར་བཀོད་པའི་ལེའུ་སྟེ་སུམ་ཅུ་ ― DNG002_Page_0457 ―
[མ་དཔེ་གཟིགས་ན་འདིར་གནོན།]
ཐམ་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་སེམས་ཉིད་ཀུན་བཟང་ལ། །གཏོར་མའི་ངེས་ཚིག་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །གཏོར་མའི་ངེས་ཚིག་བཤད་ཀྱིས་ཉོན། །གཏོར་མར་གཏོར་མ་ཞེས་བྱ་བ། །འཛིན་ཆགས་མེད་པས་གཏོར་ཞེས་བྱ། །ཀུན་ལ་ཁྱབ་པས་མ་ཞེས་བྱ། །སྣང་སྲིད་གཏོར་མར་ཕུལ་བས་གཏོར་ཞེས་བྱ། །དབྱེ་བསལ་མེད་པས་མ་ཞེས་བྱ། །འགྲོ་དྲུག་ཕུལ་བས་གཏོར་ཞེས་བྱ། །འགྲོ་དྲུག་གཡང་ས་གཅོད་པས་མ་ཞེས་བྱ། །གཉིས་སྣང་ཕུལ་པས་གཏོར་ཞེས་བྱ། །གཉིས་སུ་མེད་པས་མ་ཞེས་བྱ། །མ་འགགས་འབྱུང་བས་གཏོར་ཞེས་བྱ། །རྩིས་གདབ་མེད་པས་མ་ཞེས་བྱ། །རིག་པ་རྩལ་སྣང་གཏོར་ཞེས་བྱ། །གཞི་ལ་རྩལ་ཐིམ་མ་ཞེས་བྱ། །སྣ་ཚོགས་སྣང་བས་གཏོར་ཞེས་བྱ། །གཅིག་ཏུ་འདུས་པས་མ་ཞེས་བྱ། །བརྗོད་མཐའ་ཡས་པས་གཏོར་ཞེས་བྱ། །བརྗོད་དུ་མེད་པས་མ་ཞེས་བྱ། །ཆོས་རྣམས་གཅིག་ཏུ་ཤེས་པས་གཏོར་ཞེས་བྱ། །ཆོས་རྣམས་ཀུན་ལས་གྲོལ་བས་མ་ཞེས་བྱ། །གཅིག་ཤེས་ཀུན་གྲོལ་གཏོར་མའི་ངེས་ཚིག་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། གཏོར་མའི་ངེས་ཚིག་བསྟན་པའི་ལེའུ་སྟེ་སོ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །བྱ་བཙལ་རྩོལ་བསྒྲུབ་མི་དགོས་པའི། །ཆོས་ཉིད་ཚ་ཚ་ཇི་ལྟར་ལགས། ཞེས་གསོལ་པ་དང་། དེ་ནས་སྟོན་པ་ཀུན་ཏུ་བཟང་པོས་འོད་མི་འགྱུར་བའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས་སོ། །སྙིང་པོའི་རང་བཞིན་གཡོས་པ་མེད་པ་ལ། །ཡན་ལག་རྩལ་གྱིས་སེམས་ཀྱི་ཚ་ཚ་འདེབས། །འཁོར་རྣམས་མ་ཡེངས་གུས་པས་ཉོན། །འགྱུར་བ་མེད་པའི་ས་གཞི་ལ། །ཆོས་ཉིད་མི་འགྱུར་བསྟན་པ་བཙུགས། །ཐོགས་རྡུགས་མེད་པའི་འཇོར་རྣོན་གྱིས། །བརྒྱད་ཁྲི་བཞི་སྟོང་ས་བརྐོས་ ― DNG002_Page_0458 ―
[མ་དཔེ་གཟིགས་ན་འདིར་གནོན།]
ལ། །ཤེས་རབ་འབར་བའི་ཐོ་ཆེན་གྱིས། །ཉོན་མོངས་བརྒྱད་ཁྲི་བཞི་སྟོང་བརྡུངས། །སྐྱེ་རྒས་ན་འཆི་འདག་པར་བཏང་། །ང་བདག་གཟུང་འཛིན་རུ་ང་མེད་པར་བརྡུངས། །དྲན་རྟོག་བརྟགས་ཞེན་འདག་པར་བཏང་། །ཐིག་ལེ་ཆེན་པོ་གཅིག་ཏུ་དྲིལ། །མཉམ་པ་ཉིད་དུ་དགོངས་པ་གཅིག་ཏུ་དྲིལ། །འགྱུར་བ་མེད་པར་བྱིན་གྱིས་བརླབ། །ཆོས་ཉིད་མཁའ་ཀློང་ཡངས་པའི་བརྐོས་ཕོར་དུ། །རིག་པ་རྣོན་པོའི་ལག་པས་འཇིམ་པར་བཅད། །ཐབས་དང་ཤེས་རབ་ལག་པ་ཡིས། །ཐིག་ལེ་གཅིག་ཏུ་འབི་འབི་བྱས། །ཆོས་རྣམས་ཆོས་སྐུ་གཅིག་ཏུ་དྲིལ། །ཆོས་དབྱིངས་ཡངས་པའི་བརྐོས་ཕོར་དུ། །རིག་རྩལ་མ་འགགས་པ་ཡི་འདག་པ་བཅུག །ཕྱི་ནང་སྣང་སྲིད་གཉིས་སུ་མེད་པར་སྦྱར། །ཐབས་དང་ཤེས་རབ་ལག་པ་ཡིས། །ཁམས་གསུམ་འཁོར་བ་སྤྱི་ནས་གདབ། །མཁའ་དབྱིངས་རྣམ་དག་དཀྱིལ་འཁོར་ནས། །རྩལ་སྣང་རིག་པའི་མཆོད་རྟེན་ཕྱུང་། །སྙིང་པོ་ཡན་ལག་འདྲེས་པའི་ཆོས་སྐུ་དེ། །གཞི་ལ་རྩལ་ཐིམ་དབྱེར་མེད་མཆོད་རྟེན་དེ། །ཀུན་གཞི་སྟོང་ཉིད་གནས་སུ་བཞུགས། །མཁའ་ཀློང་ཡངས་པའི་ཁྲི་སྟེངས་སུ། །མི་འགྱུར་ཡངས་པའི་གདན་སྟེངས་སུ། །འགྱུར་བ་མེད་པར་བཞུགས་སུ་གསོལ། །སྐྱེ་བ་མེད་པར་བྱིན་གྱིས་བརླབ། །སྙིང་པོའི་ཀློང་ན་སྐྱེ་མེད་ཆོས་སྐུ་བཞུགས། །ཆོས་ཉིད་བྱང་ཆུབ་སེམས་ལ་ཕྱག་འཚལ་ལོ། །སྣང་སྲིད་ཀུན་གྱི་རྩ་བ་གཅིག་འདུས་པས། །སེམས་ཉིད་གཅིག་ཏུ་འདུས་ལ་ཕྱག་འཚལ་ལོ། །སྣ་ཚོགས་སྣང་ལ་ངོས་བཟུང་མེད། །སེམས་ཉིད་ངོས་བཟུང་མེད་ལ་ཕྱག་འཚལ་ལོ། །སྣང་སྲིད་ཐམས་ཅད་མཆོད་པར་འབུལ། །དབྱེ་བསལ་མེད་པར་བཞེས་སུ་གསོལ། །དྲན་རིག་ཐམས་ཅད་མཆོད་པར་འབུལ། །རིག་མེད་དྲན་མེད་འགྱུར་མེད་ཀློང་དུ་བཞེས་སུ་གསོལ། །གཉིས་སྣང་ཐམས་ཅད་མཆོད་པར་འབུལ། །སྤྲོས་གཅོད་གཉིས་མེད་ཀློང་དུ་བཞེས་སུ་གསོལ། །རང་བལྟ་མངོན་པར་ཞེན་པ་མཐོལ་ལོ་བཤགས། །བཞན་བལྟ་རྒྱབ་ཀྱིས་ཕྱོགས་པ་མཐོལ་ལོ་བཤགས། ། ― DNG002_Page_0459 ―
[མ་དཔེ་གཟིགས་ན་འདིར་གནོན།]
བདེན་པ་གཉིས་བཟུང་ཐམས་ཅད་མཐོལ་ལོ་བཤགས། །ཁམས་གསུམ་སེམས་ཅན་ཐམས་ཅད་ལ། །སྐྱེ་བ་མེད་པར་བྱིན་གྱིས་རློབས། །འགག་པ་མེད་པར་བྱིན་གྱིས་རློབས། །རང་གཞན་མེད་པར་བྱིན་གྱིས་རློབས། །མཐའ་ཡས་སེམས་ཅན་ཐམས་ཅད་ལ། །རྒྱ་ཆད་མེད་པར་བསྔོ་བར་བགྱི། །ཤུགས་འབྱུང་ཆེན་པོར་བསྔོ་བར་བགྱི། །ཐམས་ཅད་མཉམ་པ་ཉིད་དུ་བསྔོ་བར་བགྱི། །རྒྱལ་བ་དེ་དག་ཐམས་ཅད་ཀྱང་། །མངོན་མེད་དབྱིངས་སུ་གཤེགས་སུ་གསོལ། །མཚོན་མེད་བརྗོད་འདས་དབྱིངས་སུ་གཤེགས་སུ་གསོལ། །རིན་ཆེན་འོད་འབར་ཆོས་དབྱིངས་གཤེགས་སུ་གསོལ། །མཆོད་རྟེན་སྐུ་གཟུགས་མཚན་ཉིད་ནི། །དབྱིབས་ནི་ཟླུམ་པོར་གནས་པ་སྟེ། །གང་ཟག་དབང་པོའི་ཁྱད་པར་གྱིས། །བང་རིམ་རྒྱུ་རུ་གནས་པའོ། །མཆོད་རྟེན་ཚ་ཚའི་རྒྱ་ཁྱོན་ཡང་། །ནམ་མཁའ་དང་ནི་མཉམ་པར་གནས། །མཆོད་རྟེན་དེ་ཡི་སྐུ་གཟུགས་ཀྱང་། །མི་སྣང་ཀུན་གྱི་དངོས་གཞིར་གནས། །དུས་གསུམ་འཕོ་འགྱུར་མེད་པར་བཞུགས། །མཚན་ཉིད་ཅིར་ཡང་བཟུང་དུ་མེད། །རང་བཞིན་ཀུན་ལ་ཁྱབ་པར་གནས། །ངོ་བོ་དམིགས་པའི་ཡུལ་ལས་འདས། །སྨྲ་བསམ་བརྗོད་འདས་སྐུ་གདུང་ངོ་། །སེམས་ཉིད་མཆོད་རྟེན་འཇིག་འཕྲལ་མེད། །ཚ་ཚ་འདེབས་ན་སེམས་ལ་ཐོབ། །རྩོལ་བསྒྲུབ་མི་དགོས་ངོ་མཚར་ཆེ། །དེ་ནི་སེམས་ཉིད་ཚ་ཚའོ། །ཚ་ཚ་ཆ་མཐུན་ཁྱད་པར་འཕགས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སེམས་ཉིད་ཚ་ཚར་བཀོད་པའི་ལེའུ་སྟེ་སོ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སེམས་ཀྱི་ཚ་ཚ་གཞུག་པ་ཡི། །སེམས་ཉིད་མཆོད་རྟེན་ཇི་ལྟར་བརྩིག །དེ་ནས་ཀུན་ཏུ་བཟང་པོ་ཡིས། རིན་པོ་ཆེ་འོད་སྐུ་མི་འགྱུར་མི་ཤིགས་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། ། ― DNG002_Page_0460 ―
[མ་དཔེ་གཟིགས་ན་འདིར་གནོན།]
སྙིང་པོ་སྐྱེ་མེད་འགྱུར་བ་མེད་པ་ལ། །རྩལ་སྣང་མ་འགགས་མཆོད་རྟེན་བཞེངས་ལུགས་ནི། །ཁྱབ་གདལ་ཆེན་པོའི་ས་གཞི་ལ། །མི་འགྱུར་དབྱིངས་ཀྱི་ཐིག་བཏབ་ལ། །འགྱུར་མེད་བརྟན་པའི་འགྲམ་རྡོ་གདིང་། །སྣང་ཞིང་སྲིད་པས་བསྡུས་པའི་མཆོད་རྟེན་བརྩིགས། །མ་ལུས་རྒྱས་འདེབས་སྐུ་གདུང་བཞེངས། །བརྩོན་འགྲུས་དད་པའི་འཇོར་རྣོན་ནི། །བྱམས་དང་སྙིང་རྗེར་ལྡན་པའི་སྐྱེས་བུས་ཐོགས། །སྡུག་བསྔལ་ཆུ་བོ་བཞི་ཡི་ས་བརྐོས་ནས། །ཉོན་མོངས་བརྒྱད་ཁྲི་བཞི་སྟོང་འདག་པར་བསྣོས། །སྐྱེ་རྒས་ན་འཆི་དངོས་མེད་འཇིམ་པར་བཏང་། །ཉོན་མོངས་དུག་གསུམ་འོག་ཏུ་བཅུག །ང་བདག་གཉིས་ཀྱིས་ནང་ཁྲོལ་བྱས། །ཁམས་གསུམ་འཁོར་བ་རྨང་རྡོར་བཅུག །འགྲོ་བ་རིགས་དྲུག་གདན་ཁྲིར་བརྩིགས། །མཚན་ཉིད་སྡེ་གསུམ་ཐེག་པ་ཡང་། །མཆོད་རྟེན་བང་རིམ་ཐ་མ་བྱས། །ཕྱི་རྒྱུད་སྡེ་གསུམ་ཐེག་པ་ཡང་། །མཆོད་རྟེན་བང་རིམ་གཉིས་པ་བྱས། །བསྐྱེད་པ་མ་ཧཱ་ཡོ་ག་ཡང་། །མཆོད་རྟེན་བང་རིམ་གསུམ་པ་བྱས། །རྫོགས་པ་ཨ་ནུ་ཡོ་ག་ནི། །མཆོད་རྟེན་བང་རིམ་བཞི་པ་བྱས། །རྫོགས་པ་ཆེན་པོས་བུམ་རྟེན་བྱས། །སྤྱི་ཏི་ཡོ་གས་མཆོད་རྟེན་བུམ་པ་བྱས། །སྐྱེ་མེད་སེམས་ཉིད་མཆོད་རྟེན་བྱས། །སྙིང་པོ་འགྱུར་མེད་སྲོག་ཤིང་བཙུགས། །ཡེ་ཤེས་བཅུ་གསུམ་འཁོར་ལོ་བྱས། །མཁའ་གསལ་ཀློང་ཡང་ནམ་མཁའི་ཆར་ཁེབས་བྱ། །སྙིང་པོ་ཡན་ལག་བྱ་རུ་བཙུགས། །ཐབས་དང་ཤེས་རབ་གཉིས་ཀྱི་ཉི་ཟླས་བརྒྱན། །སེམས་ཉིད་ནོར་བུ་རིན་ཆེན་ཉི་ཟླའི་ཁ་ལ་བཞག །མ་འདྲེས་ཡོངས་སུ་རྫོགས་པའི་དར་དཔྱངས་བཏང་། །མཚོན་དུ་བརྗོད་ལས་འདས་པའི་སིལ་སྙན་བཏགས། །རིག་པའི་རྩལ་མ་འགགས་པའི་བྱེ་ཆུང་མང་པོ་བཏགས། །སྣང་ཚུལ་བཅུ་དགུའི་རྒྱན་ཆ་མང་པོ་བཏགས། །མཆོད་རྟེན་དབྱིབས་ནི་ནམ་མཁའ་ལྟ་བུར་གནས། །སྣང་སྲིད་ཀུན་ལ་ཁྱབ་པར་གནས། །མཆོད་རྟེན་ཆེ་ཆུང་ ― DNG002_Page_0461 ―
[མ་དཔེ་གཟིགས་ན་འདིར་གནོན།]
ཚད་ཉིད་ནི། །ཚོགས་བརྒྱད་ཡུལ་དུ་མ་གྱུར་བསམ་མི་ཁྱབ། །སྣང་བའི་ཡུལ་དུ་མ་གྱུར་དམིགས་དང་བྲལ། །དངོས་པོ་མཚན་མ་དག་གི་སྤྱོད་ཡུལ་མིན། །བྱིས་པ་མ་རབས་རྟོག་གེའི་བློ་ཡིས་འདི་མི་མཐོང་། །མཚན་ཉིད་མཐའ་ཡས་རྣམ་ཀུན་བྲལ། །ཅིར་ཡང་གཟུང་དུ་མེད་པ་ཡི། །མཆོད་རྟེན་དེ་ཡི་སྐུ་མདོག་ནི། །རིན་ཆེན་སྣ་ཚོགས་འོད་འཕྲོ་ཡང་། །ངོས་གཟུང་མ་བཏུབ་མཚོན་ལས་འདས། །རྩིས་གདབ་དབྱེར་མེད་ཞལ་ཞལ་བྱས། །གཟུང་འཛིན་དྲི་མས་མ་གོས་དཀར་རྩི་བསྐུས། །གཉིས་མེད་དབྱེ་བསལ་མེད་པར་གནས་པའོ། །སེམས་ཉིད་མཆོད་རྟེན་དུ་བཀོད་པའི་ལེའུ་སྟེ་སོ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མཆོད་རྟེན་ངེས་ཚིག་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་འདི་སྐད་གསུངས། །སྙིང་པོ་རང་བཞིན་གཡོས་པ་མེད་ན་ཡང་། །ཡན་ལག་རྩལ་གྱིས་རིག་པས་ངེས་ཚིག་བཤད། །མཆོད་རྟེན་བྱ་བའི་ངེས་ཚིག་ནི། །མཆོད་ནི་སྐུ་གསུམ་དབྱེར་མེད་མཆོད། །རྟེན་ནི་འདུ་འབྲལ་མེད་པ་ཡིན། །མཆོད་ནི་བསམ་དུ་མེད་པ་ཡིན། །རྟེན་ནི་བློ་ཡི་ཡུལ་ལས་འདས། །མཆོད་ནི་སྐྱེ་བ་མེད་པར་མཆོད། །རྟེན་ནི་འགག་པ་མེད་པར་རྟེན། །མཆོད་ནི་དྲན་པ་མེད་པར་མཆོད། །རྟེན་ནི་ཡིད་ལ་བྱ་རུ་མེད། །མཆོད་ནི་སྣང་ཞིང་སྲིད་པ་སྟེ། །རྟེན་ནི་རྩིས་གདབ་དབྱེ་བསལ་མེད། །མཆོད་ནི་སྒོ་ལྔའི་རྣམ་ཤེས་མཆོད། །རྟེན་ནི་མི་སྤྱོད་མི་འཇུག་གོ། །མཆོད་ནི་ཕྱི་ཡུལ་དཀར་དམར་སྟེ། །རྟེན་ནི་མ་ཆགས་ཞེན་མེད་དོ། །མཆོད་ནི་སྙིང་པོའི་ཀློང་ཡངས་ཏེ། །རྟེན་ནི་ཆོས་སྐུ་འགྱུར་བ་མེད། །མཆོད་ནི་ཀུན་གཞིའི་མཁའ་ཀློང་སྟེ། །རྟེན་ནི་རིག་པའི་རྩལ་སྣང་ངོ་། །མཆོད་ནི་མ་འགགས་རྩལ་སྣང་ཐིམ། །རྟེན་ནི་གཉིས་མེད་ངང་དུ་གནས། །མཆོད་ནི་ཐིག་ལེ་ཆེན་པོ་ཡིན། །རྟེན་ནི་སྤྲོས་པ་མཐའ་དག་བྲལ། །མཆོད་ནི་སྣ་ཚོགས་རྫོགས་པ་ཡིན། །རྟེན་ནི་ཅིར་མ་སྤངས་པ་ཡིན། །མཆོད་ནི་བདེ་བ་ཆེན་པོ་སྟེ། །རྟེན་ནི་སྡུག་བསྔལ་ཀུན་ ― DNG002_Page_0462 ―
[མ་དཔེ་གཟིགས་ན་འདིར་གནོན།]
བྲལ་ལོ། །མཆོད་ནི་རྟོག་ཚོགས་མཚན་མ་སྤངས། །རྟེན་ནི་མི་རྟོག་ཡེ་ཤེས་རྒྱས། །མཆོད་ནི་སྐྱེ་མེད་དོན་གྱི་ཆོས། །རྟེན་ནི་འགྱུར་བ་མེད་པའི་སྐུ། །མཆོད་ནི་གཉིས་སྣང་ཀུན་བྲལ་ཡིན། །རྟེན་ནི་གཉིས་མེད་ཆེན་པོར་ཆུབ། །དེ་ཕྱིར་མཆོད་རྟེན་བྱང་ཆུབ་ཡིན། །མི་འགྱུར་དབྱིངས་ཀྱི་མཆོད་རྟེན་འདི། །ཐེག་པ་གཞན་ལས་འབྱུང་མི་འགྱུར། །མཆོད་རྟེན་བཞེངས་ན་སེམས་ལ་བཞེངས། །མཆོད་རྟེན་ཆ་མཐུན་ཁྱད་པར་འཕགས། །སྐྱེ་འཇིག་མེད་པའི་མཆོད་རྟེན་ཡིན། ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རང་སེམས་མཆོད་རྟེན་དུ་བཀོད་པའི་ལེའུ་སྟེ་སོ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་སེམས་ཉིད་ཀུན་བཟང་ལ། །སྦྱིན་སྲེག་ཆེན་པོ་ཇི་ལྟར་ལགས། །ཞེས་གསོལ་པ་དང་། དེ་ནས་སྟོན་པ་ཀུན་བཟང་དེ། རིན་པོ་ཆེ་འོད་ཀྱི་སྤྲོས་པ་ཐམས་ཅད་སྲེག་པ་ཞེས་བྱ་བའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །སྙིང་པོ་མ་ཡི་རང་བཞིན་སྐྱེ་མེད་འགྱུར་མེད་ལ། །མ་འགགས་རྩལ་སྣང་བུ་ཡིས་སྦྱིན་སྲེག་བྱེད། །སྐྱེ་མེད་སེམས་ཀྱི་སྦྱིན་སྲེག་འདི་ལྟར་ཡིན། །ཕྲིན་ལས་རྣམ་བཞིའི་སྦྱིན་སྲེག་ནི། །ཞི་རྒྱས་དབང་དང་དྲག་པོ་བཞི། །གདུལ་བྱ་བཞི་ལ་དགོངས་ནས་གསུངས། །དང་པོ་ཞི་བའི་སྦྱིན་སྲེག་བྱ། །གཉིས་པ་དྲག་པོའི་སྦྱིན་སྲེག་བྱ། །གསུམ་པ་དབང་གི་སྦྱིན་སྲེག་བྱ། །བཞི་པ་རྒྱས་པའི་སྦྱིན་སྲེག་བྱ། །སྤྱི་ཏི་ཡོ་གའི་སྦྱིན་སྲེག་འདི། །རྡོ་རྗེ་སེམས་དཔས་གོ་བར་གྱིས། །དེ་ལ་ཞི་བའི་སྦྱིན་སྲེག་ནི། །མཁའ་ཀློང་ཡངས་པའི་ཐབ་ཁུང་ཟླུམ་པོར་བྱ། །ཐམས་ཅད་ཞི་བར་བྱ་བའི་ཕྱིར། །གཟུང་འཛིན་གཉིས་ཀྱིས་བཅིངས་པའི་སེམས་ཅན་ཀུན། །བཀུག་ནས་ཐབ་ཁུང་ནང་དུ་གཞུག །ཤེས་རབ་ཆེན་པོའི་མེ་སྦར་ཏེ། །ང་དང་བདག་ཏུ་བཅིང་པ་བསྲེག །དབྱེ་བསལ་མེད་པའི་ངང་དུ་ཞི། །སྲེག་རྫས་ ― DNG002_Page_0463 ―
[མ་དཔེ་གཟིགས་ན་འདིར་གནོན།]
མཆོད་པ་མི་དགོས་ཏེ། །སེམས་ཀྱི་སྲེག་རྫས་མཆོད་བསྟོད་བགྱིས། །ཞི་བ་གཉིས་མེད་ཆེན་པོར་ཞི། །དེ་ནི་ཞི་བའི་སྦྱིན་སྲེག་གོ། །གཉིས་པ་དྲག་པོའི་སྦྱིན་སྲེག་ནི། །ཨེ་ཡི་ཆོས་དབྱིངས་གྲུ་གསུམ་ཐབ་ཁུང་དུ། །ཐམས་ཅད་དྲག་པོས་ཚར་གཅོད་ཕྱིར། །བདེན་པ་གཉིས་ལ་ཞེན་པའི་སེམས་ཅན་ཀུན། །ཡེ་ཤེས་ཆེན་པོའི་མེ་སྦར་ཏེ། །གཉིས་སུ་འཛིན་པ་བསྲེག་པ་ཡིན། །གཉིས་མེད་ཆེན་པོའི་ངང་དུ་བསྒྲལ། །དངོས་འཛིན་ཐམས་ཅད་རྩིས་གདབ་མེད་པར་བསྲེག །མཆོད་རྫས་སྲེག་རྫས་བསྟོད་པ་ཡང་། །མ་ཕུལ་བསྙེན་པ་བྱ་མི་དགོས། །དེ་ནི་དྲག་པོའི་སྦྱིན་སྲེག་གོ། །གསུམ་པ་དབང་གི་སྦྱིན་སྲེག་ནི། །ཆོས་དབྱིངས་ཟླ་གམ་ཐབ་ཁུང་དུ། །ཐམས་ཅད་དབང་དུ་སྡུད་པ་ཡི། །སྐྱེ་རྒ་ན་འཆིས་བཅིངས་པའི་སེམས་ཅན་ཐམས་ཅད་བཀུག །སྤྲོས་པ་ཐམས་ཅད་གཅོད་པའི་མེ་སྦར་ཏེ། །གཉིས་སུ་འཛིན་པ་བསྲེག་པ་ཡིན། །སྐྱེ་ཤི་མེད་པའི་ངང་དུ་བསྒྲལ། །དགག་སྒྲུབ་གཉིས་མེད་དོན་ལ་དབང་། །དེ་ནི་དབང་གི་སྦྱིན་སྲེག་གོ། །བཞི་པ་རྒྱས་པའི་སྦྱིན་སྲེག་ནི། །ཐམས་ཅད་རྒྱས་པར་བྱ་བ་ཡི། །བལྟ་བསྒོམ་སྤྱོད་དང་འབྲས་བུ་བཞི་ལ་ཞེན་པའི་སེམས་ཅན་ཀུན། །ངང་དྭངས་རིན་ཆེན་འོད་འབར་མེ་སྦར་ཏེ། །བློས་བརྟགས་ལྟ་བ་ཐམས་ཅད་བསྲེག །ཡིད་བཟུང་བསྒོམ་པ་ཐམས་ཅད་བསྲེག །ཆེད་བྱས་སྤྱོད་པ་ཐམས་ཅད་བསྲེག །ཡིད་སྨོན་འབྲས་བུ་ཐམས་ཅད་བསྲེག །མི་ལྟ་བལྟར་མེད་ཆེན་པོར་རྒྱས། །མི་བསྒོམ་བསྒོམ་མེད་ཆེན་པོར་རྒྱས། །མི་སྤྱོད་སྤྱོད་མེད་བྱར་མེད་རྒྱས། །མི་བསྒྲུབ་བསྒྲུབ་མེད་ཐོབ་མེད་རྒྱས། །དེ་ནི་རྒྱས་པའི་སྦྱིན་སྲེག་གོ། །མཆོད་བསྟོད་སྲེག་རྫས་མི་དགོས་ཏེ། །སེམས་ཀྱི་མཆོད་བསྟོད་ཁྱད་པར་འཕགས། །ཕྲིན་ལས་རྣམ་བཞིའི་སྦྱིན་སྲེག་གོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སེམས་ཀྱི་དྲི་མ་རྟོག་ཚོགས་སྤྲོས་པ་མཐའ་དག་བསྲེག་པའི་ལེའུ་སྟེ་སོ་ལྔ་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་ ― DNG002_Page_0464 ―
[མ་དཔེ་གཟིགས་ན་འདིར་གནོན།]
དཔས་འདི་སྐད་ཞུས། །སྦྱིན་སྲེག་བྱ་ལུགས་དེ་ལྟར་ན། །སྦྱིན་སྲེག་ངེས་ཚིག་ཇི་ལྟར་ལགས། །ཞེས་ཞུས་པ་དང་། སྦྱིན་སྲེག་བྱ་བའི་ངེས་ཚིག་ནི། །སྦྱིན་ནི་སྙིང་པོའི་རང་བཞིན་ཡིན། །སྐྱེ་མེད་འགག་མེད་ངང་དུ་སྲེག །སྦྱིན་ནི་ཐུགས་རྗེ་སྤྲུལ་སྐུ་ཡིན། །དྲན་མེད་ཡིད་ལ་བྱར་མེད་ངང་དུ་སྲེག །སྦྱིན་ནི་སྣང་ཚུལ་མ་འགགས་པ། །སྲེག་ནི་རྒྱ་ཆད་མེད་པར་སྲེག །སྦྱིན་ནི་རིག་པ་མ་འགགས་པ། །སྲེག་ནི་རིག་མེད་ངང་དུ་སྲེག །སྦྱིན་ནི་དྲན་པ་སྣ་ཚོགས་པ། །སྲེག་པ་དྲན་མེད་ཀློང་དུ་སྲེག །སྦྱིན་ནི་སེམས་རྟོག་སྣ་ཚོགས་ལ། །སྲེག་ནི་རྟོག་མེད་བརྟགས་ཞེན་མེད་པར་སྲེག །སྦྱིན་ནི་སྣང་བའི་རང་བཞིན་ལ། །སྲེག་ནི་སྤོང་ལེན་མེད་པར་སྲེག །སྦྱིན་ནི་སྒོ་ལྔའི་རང་བཞིན་ལ། །མ་འདྲང་མི་འཇུག་དབྱིངས་སུ་སྲེག །སྦྱིན་ནི་ཕྱི་ཡུལ་དཀར་དམར་ལ། །སྲེག་ནི་རྩིས་གདབ་མེད་པར་སྲེག །སྦྱིན་ནི་གླིང་བཞི་རི་རབ་ལ། །སྲེག་ནི་དབྱེ་བསལ་མེད་པར་སྲེག །སྦྱིན་ནི་རྒྱ་ཆད་མེད་པ་ལ། །སྲེག་ནི་མཉམ་པ་ཉིད་དུ་སྲེག །སྦྱིན་ནི་ཡུལ་སེམས་གཉིས་ཡིན་ཏེ། །སྲེག་ནི་གཉིས་སུ་མེད་པར་སྲེག །སྦྱིན་ནི་ཕྱི་དང་ནང་ཡིན་ཏེ། །སྲེག་ནི་གཟུང་འཛིན་མེད་པར་སྲེག །སྦྱིན་ནི་ང་དང་བདག་ཡིན་ཏེ། །སྲེག་ནི་གཉིས་མེད་ངང་དུ་སྲེག །སྦྱིན་ནི་ཆོས་ཅན་མཚན་མ་སྟེ། །སྲེག་ནི་ཆོས་ཉིད་ཀློང་དུ་སྲེག །དེ་ནི་སྦྱིན་སྲེག་ངེས་ཚིག་གོ། །ཐེག་པ་གཞན་ལས་འབྱུང་མི་འགྱུར། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རང་སེམས་སྦྱིན་སྲེག་ཏུ་བཀོད་པའི་ལེའུ་སྟེ་སོ་དྲུག་པའོ།། །།དེ་ནས་སེམས་ཉིད་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །ཉོན་མོངས་དུག་གསུམ་སྲེག་པ་ཡི། །དེ་ཡི་ཐལ་བ་ཇི་ལྟར་མནན། །ཞེས་གསོལ་པ་དང་། དེ་ནས་སྟོན་པས་འདི་སྐད་གསུངས། དུག་ལྔ་དུག་གསུམ་གཉིས་འཛིན་ལངས་དོགས་ན། ། ― DNG002_Page_0465 ―
[མ་དཔེ་གཟིགས་ན་འདིར་གནོན།]
སྙིང་པོ་ཆོས་ཉིད་ངང་ལ་འགྱུར་མེད་ཀྱང་། །ཆོས་ཅན་རྩལ་གྱི་རིག་པས་མནན་པ་བྱེད། །རྡོ་རྗེ་སེམས་དཔས་ཡིད་ལ་ཟུང་། །རྫོགས་པ་ཆེན་པོའི་གཉན་ས་རུ། །འཁྲུལ་པ་རྩད་ཆོད་སྐྱེས་བུ་ཡིས། །ཐབས་དང་ཤེས་རབ་ལག་པ་རུ། །ཤེས་རབ་རིག་པའི་འཇོར་རྣོན་གྱིས། །ཆོས་དབྱིངས་རྣམ་དག་ཧོམ་ཁུང་བྲུས། །དུག་གསུམ་དུག་ལྔ་ཉོན་མོངས་རྣམས། །རྣམ་དག་རང་གྲོལ་རེ་བར་གཏུམ། །ཡེ་ཤེས་རྣམ་ལྔའི་ཚོན་སྐུད་ཀྱིས། །འགྱུར་མེད་རྒྱ་གྲམ་མདུད་པ་བྱས། །ང་བདག་གཉིས་འཛིན་ཐལ་བ་རྣམས། །གྲུ་གསུམ་དབྱིངས་ཀྱི་ཧོམ་ཁུང་ཉིད་དུ་བཅུག །ཆོས་ཉིད་གདེང་ཚོད་གཡམ་པས་བཀབ། །འགྱུར་མེད་རི་རྒྱལ་འོག་ཏུ་མནན། །སྐུ་གསུམ་རྒྱལ་བའི་ཕོ་བྲང་བཏབ། །མི་འགྱུར་དབྱིངས་ཀྱི་རྒྱ་ཡིས་གདབ། །སྟེང་དུ་ཆོས་ཉིད་བྲོ་ཡང་བརྡུང་། །འདི་སྐད་ཚིག་ཏུ་བརྗོད་པར་བྱ། །ཨེ་མ་ཧོ། ང་བདག་གཉིས་ཀྱིས་བཅིངས་པའི་སེམས་ཅན་ཀུན། །སྡང་ཡང་མ་གྲོལ་ད་རུང་མི་གྲོལ་བ། །དེ་ལ་འདྲེ་ཆེན་ཤིན་ཏུ་གནོད། །འདྲེ་ཡི་རྩ་བ་ང་བདག་ཉིད། །དེ་ཡི་རྒྱབ་བརྟེན་དུག་གསུམ་ཡིན། །སྡོང་ཟླ་ཉོན་མོངས་བརྒྱད་ཁྲི་བཞི་སྟོང་རྣམས། །མནན་ནོ་སྐྱེ་བ་མེད་པར་མནན། །སྐྱེ་བའི་མ་རིགས་མ་ལྡངས་ཤིག །བཅིང་ངོ་ཆོས་ཉིད་དབྱིངས་སུ་ཆིང་། །ཡིད་ཀྱི་དྲན་རྟོག་མ་འགྱུ་ཅིག །གདབ་པོ་འགྱུར་མེད་རྒྱ་ཡིས་གདབ། །སེམས་ཀྱི་ཆགས་སྡང་མ་སྐྱེ་ཞིག །བཅད་དོ་དུག་གསུམ་རྩད་ནས་གཅོད། །སེམས་དང་དུག་ལྔ་མ་ལྡངས་ཤིག །མནན་ནི་སྐུ་གསུམ་འོག་ཏུ་དུག་གསུམ་མནན། །བསྐལ་པ་བརྒྱར་ཡང་མ་ལྡངས་ཤིག །འདི་སྐད་བྱ་བའི་དབྱངས་ཀྱང་བླང་། །ལྟ་བ་ཕྱད་དེ་ཕྱོད་དེར་ཐོང་། །ཕྱོགས་མེད་འགྱུར་མེད་རྒྱ་ཡིས་ཐོབ། །བསྒོམ་པ་མེ་རེ་ལྷན་ནེར་ཐོང་། །གཡོ་འགུལ་མེད་པའི་རྒྱ་ཡིས་ཐོབ། །སྤྱོད་པ་རྦད་དེ་རྦུད་དེར་ཐོང་། །བྱར་མེད་སྤྲོས་བྲལ་རྒྱ་ཡིས་ཐོབ། །ཉམས་མྱོང་བན་ནེ་བུན་ནེར་ཐོང་། །སྐྱེ་འགག་མེད་པའི་རྒྱ་ཡིས་ཐོབ། །འབྲས་བུ་འབད་མེད་འབུང་མེད་ཞོག ། ― DNG002_Page_0466 ―
[མ་དཔེ་གཟིགས་ན་འདིར་གནོན།]
སྐུ་གསུམ་འདུ་འབྲལ་མེད་པའི་རྒྱ་ཡིས་ཐོབ། །རེ་མེད་རང་གནས་རྒྱ་ཡིས་ཐོབ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། དུས་གསུམ་དུག་ལྔར་བདག་མནན་པའི་ལེའུ་སྟེ་སོ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མནན་པའི་ངེས་ཚིག་ཇི་ལྟར་ལགས། །ཞེས་ཞུས་པ་དང་། སྟོན་པ་ཀུན་ཏུ་བཟང་པོ་ཡིས། །འདུས་པའི་འཁོར་ལ་འདི་སྐད་གསོལ། །ཆོས་ཉིད་གཞི་མོའི་དོན་ལ་དབྱེར་མེད་ཀྱང་། །སྣང་ཚུལ་ཟེར་གྱི་རིག་པས་ངེས་ཚིག་བཤད། །རྡོ་རྗེ་སེམས་དཔས་ཡིད་ལ་ཟུང་། །མནན་པ་བྱ་བའི་ངེས་ཚིག་ནི། །མནན་ནི་ང་བདག་དུག་གསུམ་མནན། །པ་ནི་སྐུ་གསུམ་འགྱུར་མེད་པ། །མནན་ནི་ཉོན་མོངས་དུག་ལྔ་མནན། །པ་ནི་སྐུ་ལྔ་བདེ་ཆེན་པ། །མནན་ནི་ཉོན་མོངས་བརྒྱད་ཁྲི་བཞི་སྟོང་མནན། །པ་ནི་ཆོས་སྒོ་བརྒྱད་ཁྲི་པ། །མནན་ནི་ཁམས་གསུམ་འཁོར་བ་མནན། །པ་ནི་ཞིང་ཁམས་རྣམ་གསུམ་པ། །མནན་ནི་འཁོར་བ་མ་ལུས་མནན། །པ་ནི་མྱ་ངན་ལས་འདས་པ། །མནན་ནི་སེམས་ཅན་ཐམས་ཅད་སྡུག་བསྔལ་མནན། །པ་ནི་སངས་རྒྱས་ཐམས་ཅད་པ། །མནན་ནི་སྲིད་པ་ཐམས་ཅད་མནན། །པ་ནི་དབྱེ་བསལ་མེད་པར་པ། །མནན་ནི་ཕྱི་ཡི་དཀར་དམར་མནན། །པ་ནི་རྩིས་གདབ་མེད་པར་པ། །མནན་ནི་སྒོ་ལྔའི་རྣམ་ཤེས་མནན། །པ་ནི་ཆགས་ཞེན་མེད་པར་པ། །མནན་ནི་ཕྱི་ཡི་ཡུལ་རྣམས་མནན། །པ་ནི་བླང་དོར་མེད་པར་པ། །མནན་ནི་བཟང་ངན་མེད་པར་མནན། །པ་ནི་སྔགས་བསྒྲུབ་མེད་པར་པ། །མནན་ནི་ཆོས་ཉིད་མ་བུ་འཕྲད། །པ་ནི་དབྱེར་མེད་རང་གྲོལ་པ། །མནན་པས་འཁྲུལ་རྟོག་རང་གྲོལ་སངས། །པ་བས་སྙིང་པོ་ཀློང་དུ་གྲོལ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མནན་ ― DNG002_Page_0467 ―
[མ་དཔེ་གཟིགས་ན་འདིར་གནོན།]
པའི་ངེས་ཚིག་བསྟན་པའི་ལེའུ་སྟེ་སོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སེམས་ཀྱི་སེར་བ་ཇི་ལྟར་དབབ། །ཞེས་གསོལ་པ་དང་། དེ་ནས་སྟོན་པ་ཀུན་བཟང་དེ། །སྙིང་པོ་ཆོས་ཉིད་རིན་པོ་ཆེའི་འོད་ཀུན་ཏུ་འཕྲོ་ཞིང་ཆོས་ཉིད་ཀློང་དུ་སྡུད་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་སྟོན་པས་འཁོར་ལ་འདི་སྐད་ཅེས་བཀའ་སྩལ་ཏོ། །སྙིང་པོ་ཆོས་ཉིད་མ་ལ་འགྱུར་མེད་ཀྱང་། །ཡན་ལག་བུ་ཡིས་ཉོན་མོངས་གཉིས་འཛིན་ལ། །ཆོས་ཉིད་བྱང་ཆུབ་སེམས་ཀྱི་སེར་ཆེན་འབེབས། །དུག་གསུམ་དུག་ལྔའི་འཛིན་ཆགས་ལ། །སྐུ་གསུམ་སྐུ་ལྔ་འཛིན་མེད་སེར་ཆེན་འབེབས། །ཉོན་མོངས་བརྒྱད་ཁྲི་བཞི་སྟོང་ལ། །ཆོས་སྒོ་བརྒྱད་ཁྲི་བཞི་སྟོང་སེར་ཆེན་འབེབས། །ཁམས་གསུམ་འཁོར་བའི་ས་གཞི་ལ། །ཉོན་མོངས་དུག་ལྔའི་ལོ་ཏོག་རྒྱས། །ང་བདག་གཉིས་འཛིན་འབྲས་བུ་སྨིན། །ཡུལ་སེམས་ཆགས་ཞེན་ལོ་ཐོག་རྒྱས་པ་ལ། །མ་རིག་ཞིང་ཟན་སྡུག་བསྔལ་ང་བདག་ལ། །མ་རྟོགས་མ་གོའི་སེམས་ཅན་རྣམས། །རང་དྭངས་ཡེ་ཤེས་སློབ་དཔོན་གྱིས། །ཕྱི་ནང་གཉིས་ཀྱི་ཐོད་པ་རུ། །ཡུལ་སེམས་འཛིན་ཆགས་གཟུང་འཛིན་བཅུག །སྙིང་པོ་རང་བྱུང་སྔགས་པ་ཡིས། །ཞེན་པ་རང་ལོག་རག་ཤ་བཤད། །ཤུགས་འབྱུང་རང་གྲོལ་དྲག་སྔགས་བཟླས། །ཐེག་ཆེན་སྤྱི་ཏིའི་གཉན་ས་རུ། །སྐུ་གསུམ་མི་འགྱུར་སྒྱེད་པུ་བཙུགས། །མཁའ་ཀློང་རྣམ་དག་ཟངས་བུ་རུ། །བལྟ་བྱ་བསྒོམ་བྱ་སྤྱོད་བྲལ་རྣམས། །ཁྲག་ཏུ་བསམ་ཏེ་བསྐོལ་བྱས་ལ། །བལྟར་མེད་བསྒོམ་མེད་བྱར་མེད་ཐབ་ཆེན་བྱས། །རང་བྱུང་རང་སངས་ཁྲོས་པ་ཡིས། །ཆོས་ཉིད་ཀློང་ཡངས་ནམ་མཁའ་ནས། །ལོངས་སྤྱོད་རྫོགས་པའི་སྤྲིན་ནག་གཏིབས། །འགག་མེད་སྤྲུལ་སྐུའི་སེར་ཆེན་འབེབས། །ཉོན་མོངས་དུག་ལྔའི་ལོ་ཐོག་བཅོམ། །ང་བདག་ཆགས་འཛིན་གཉིས་ཀ་བརླག །མཐའ་རྣམས་མ་རིག་ཐ་བར་བཏང་། །ཡུལ་སེམས་གཉིས་མེད་ ― DNG002_Page_0468 ―
[མ་དཔེ་གཟིགས་ན་འདིར་གནོན།]
དུ་མ་མེད། །དགག་སྒྲུབ་གཉིས་མེད་སྐྱོ་མར་བསྣུར། །བསྐལ་པ་སྟོང་དུ་བསགས་པའི་མ་རིག་ང་བདག་ཉིད། །ཁམས་གསུམ་སེམས་ཅན་རིགས་དྲུག་ལོ་ཐོག་རྒྱས། །སྐྱེ་རྒ་ན་འཆིའི་སྡུག་བསྔལ་འབྲས་བུར་སྨིན། །ཉོན་མོངས་བརྒྱད་ཁྲི་བཞི་སྟོང་ལོ་ཐོག་ལ། །ཐེག་པ་བརྒྱད་ཁྲི་བཞི་སྟོང་སེར་ཆེན་ཕབ། །སྡུག་བསྔལ་བསམ་གྱིས་མི་ཁྱབ་སྤར་བ་ལ། །བདེ་ཆེན་བསམ་གྱིས་མི་ཁྱབ་སེར་ཆེན་འབེབས། །འགོང་པོ་ང་བདག་གདོན་གཉིས་ལ། །ཆོས་སྐུ་རང་མདངས་སེར་བ་ཕབ། །མ་རིག་ལིང་ཐོག་ཐིབས་པོ་ལ། །ཡེ་ཤེས་གསལ་བའི་སེར་བ་ཕབ། །བྱང་ཆུབ་སེམས་ཉིད་སེར་བ་ཡིས། །ཉོན་མོངས་ལོ་ཏོག་གཏན་ནས་བརླག །སེམས་ཀྱི་སེར་བ་ཆེན་པོའོ། །སེར་བ་བྱ་བའི་ངེས་ཚིག་ཀྱང་། །སེར་ནི་སྣང་སྲིད་ཀུན་བཟང་ཡུམ། །བ་ནི་སྣང་རྩལ་སྣང་རིག་ཚོར་བ་ཡབ། །འབེབས་པ་ཀུན་བཟང་ཡབ་ཡུམ་དབྱེར་མེད་ཡིན། །ངེས་ན་སེར་བ་ཀུན་བཟང་ཡབ་ཡུམ་མོ། །སེར་ནི་སྙིང་པོ་ཆོས་ཉིད་མ། །བ་ནི་མཚན་ཉིད་རིག་པའི་བུ། །འབེབས་ནི་གཉིས་མེད་ངང་དུ་འབེབས། །དེས་ན་སེར་བ་མ་བུ་ཡིན། །སེར་ནི་ནང་གི་སེམས་ལ་བྱ། །བ་ནི་ཕྱི་ཡི་ཡུལ་ལ་བྱ། །འབེབས་ནི་ཡུལ་སེམས་དབྱེ་བསལ་མེད། །སེར་བ་ཡུལ་སེམས་གཉིས་མེད་ཡིན། །སེར་ནི་སྙིང་པོ་ཆོས་ཀྱི་སྐུ། །བ་ནི་རྒྱུ་རྐྱེན་སྐྱེ་འགག་འཕོ་འགྱུར་མེད། །འབེབས་པ་བརྩིས་གདབ་བརྗོད་མེད་ཡིན། །དེས་ན་སེར་བ་ཆོས་ཀྱི་སྐུ། །སེར་ནི་མ་འགགས་སྣ་ཚོགས་པ། །བ་ནི་མི་དམིགས་མིང་འདོགས་མེད། །འབེབས་པ་མ་འགགས་མི་དམིགས་གཉིས་སུ་མེད། །སེར་ནི་སྣ་ཚོགས་ཅིར་ཡང་བྱ། །བ་ནི་ཅི་ཡང་མ་སྤངས་ཅི་ཡང་མ་བསྒྲུབས་པ། །འབེབས་པ་རྫོགས་པ་ཆེན་པོ་ཡིན། །སེར་ནི་མཚན་ཉིད་མ་འགགས་རྫོགས། །བ་ནི་མི་དམིགས་སྙིང་རྗེ་ཆེན་པོའོ། །སེར་ནི་མ་འགགས་བུ་གསལ་རྫོགས། །པ་ནི་མི་དམིགས་སྟོང་པ་ཆེན་པོའོ། །འབེབས་པ་མ་བུ་དབྱེར་མེད་རྫོགས། །མ་འགགས་མི་དམིགས་དབྱེར་ ― DNG002_Page_0469 ―
[མ་དཔེ་གཟིགས་ན་འདིར་གནོན།]
མེད་སྤྱི་ཏི་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རྫོགས་ཆེན་སེམས་ཀྱི་སེར་བ་དབབ་པའི་ལེའུ་སྟེ་སོ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །དགྲ་ལ་སོད་དུས་མ་བྱུང་བས། །མཐུ་ཆེན་གཏོད་ཐབས་བསྟན་དུ་གསོལ། །ཞེས་ཞུས་པ་དང་། དེ་ནས་སེམས་ཉིད་ཀུན་བཟང་དེས། རིན་པོ་ཆེ་འོད་ཟེར་གྱིས་དགྲ་ཁ་ཕུང་དུ་གསོད་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །ཡེ་ཀློང་ཆོས་ཉིད་མ་ལ་དབྱེར་མེད་ཀྱང་། །རྩལ་སྣང་ཡན་ལག་བུ་ལ་དགྲར་སྣང་དགྲར་བཟུང་བས། །དགྲ་ཡི་རྩ་བ་འགོང་པོ་ང་བདག་ཡིན། །དགྲ་ཡི་ངོ་བོ་ཉོན་མོངས་དུག་གསུམ་ཡིན། །དགྲ་ཡི་སྡོང་ཟླ་ཉོན་མོངས་དུག་ལྔ་ཡིན། །དགྲ་ཡི་རྒྱབ་རྟེན་ཉོན་མོངས་བརྒྱད་ཁྲི་སྟོང་། །དམག་དཔོན་ལོག་མིན་ལམ་མཁན་དང་། །མི་བདེན་པ་ལ་བདེན་འཛིན་དང་། །མི་བྱེད་ལམ་དུ་འཇུག་མི་བྱེད། །དེ་གསུམ་མུན་པའི་འཁོར་སྒོ་བཅད། །མི་གསལ་མི་འཕང་མི་ཁོམ་འཁོར་བའི་ཡུལ་ན་གནས། །མ་རིག་གཉིད་ལོག་གཟུང་འཛིན་ཐུལ་ཆེན་གོན། །འདོད་ཆགས་ལོངས་སྤྱོད་གཟུང་འཛིན་སྒྲོག་ཏུ་བཅུག །རེ་དོགས་ལྕག་བྲབ་ཁམས་གསུམ་སྲིད་གསུམ་འཁྱམས། །ཐར་པའི་དུས་མེད་འོ་དོད་རྟག་ཏུ་འབོད། །ཐོན་པའི་དུས་མེད་འཁོར་བའི་ནང་ན་གནས། །ཐར་བའི་དུས་མེད་མ་རིག་མུན་ནག་གནས། །རྟོགས་པའི་དུས་མེད་མ་རྟོགས་སེམས་ཅན་ལ། །ང་བདག་ངར་འཛིན་དགྲར་ལངས་པས། །དགྲ་ཚོགས་དེ་རྣམས་བསད་ཐབས་ནི། །སྙིང་པོ་ཆོས་སྐུའི་སློབ་དཔོན་གྱིས། །གཅིག་ཤེས་ཀུན་གྲོལ་མན་ངག་བཙལ། །རང་དྭངས་ཆེན་པོའི་བསྒྲུབ་རོགས་བཙལ། །མི་འགྱུར་དབྱིངས་ཀྱི་ཕུར་པ་ཐོགས། །རང་བྱུང་རང་སངས་དྲག་སྔགས་བཟླས། །མཁའ་གསལ་ནམ་མཁའི་དབྱིངས་ནས་བཟླས། །རང་སངས་རང་དྭངས་ཟོར་འཕངས་པས། །འགོང་པོ་ང་བདག་སྙིང་ལ་བརྒྱབ། །བདག་མེད་ ― DNG002_Page_0470 ―
[མ་དཔེ་གཟིགས་ན་འདིར་གནོན།]
རང་གྲོལ་དབྱིངས་སུ་བསྒྲལ། །མི་འགྱུར་དབྱིངས་ཀྱི་ཕུར་པ་ཡིས། །ངོ་བོ་དུག་གསུམ་སྲོག་རྩ་བཅད། །སྐུ་གསུམ་རྒྱལ་བའི་ཀློང་དུ་བསྒྲལ། །རང་བྱུང་ཆེན་པོའི་ཐུན་བརྒྱབ་པས། །ཉོན་མོངས་དུག་ལྔ་གཏན་ནས་བརླག །དུག་ལྔ་སྐུ་ལྔའི་ཀློང་དུ་བསྒྲལ། །རང་སངས་ཆེན་པོའི་ཐུན་བརྒྱབ་པས། །ཉོན་མོངས་ཐམས་ཅད་དུས་གཅིག་བརླགས། །ཆགས་འཛིན་ཆགས་ཞེན་ཐམས་ཅད་སངས། །མ་སྤངས་མི་གནས་བདེ་ཆེན་ཀློང་དུ་བསྒྲལ། །དགྲ་ཡི་རྩ་བ་གཅིག་ཆོད་པས། །དགྲ་རྣམས་ཐམས་ཅད་དུས་གཅིག་སོད། །མཐུ་བོ་ཆེ་ཞེས་བྱ་བ་ཡིན། །མཐུ་ནི་སྣང་སྲིད་ཐམས་ཅད་སྟེ། །ཆེ་བ་མ་སྤངས་མི་གནས་ཆེ། །མཐུ་ནི་བུ་ཡི་རང་བཞིན་ཏེ། །ཆེ་བ་སྙིང་པོ་མ་ཡི་ཀློང་། །མཐུ་ནི་ཆོས་ཅན་བུ་ཡིན་ཏེ། །ཆེ་བ་ཆོས་ཉིད་མ་ཡི་ཆེ། །མ་འགགས་མི་དམིགས་མཐུ་བོ་ཆེ། །རྫོགས་པ་ཆེན་པོའི་མཐུ་ཆེན་ཡིན། །མཐུ་ཆེན་བཏང་ན་སེམས་ལ་མཐོང་། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རྫོགས་ཆེན་མཐུ་རུ་བཀོད་པའི་ལེའུ་སྟེ་བཞི་བཅུ་ཐམ་པའོ།། །།པ་ས་ཨ་ཐ་རི་བྷཱ་ཏ་ཀ ། དྷརྨ་ཀཱ་ཡ་ཝཱ་ཀ་སིདྡྷི་ཨཱཿ། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྣང་སྲིད་ཐམས་ཅད་རྒྱས་འདེབས་པའི། །བདེ་གཤེགས་བཀའ་ཡི་ཐེག་པ་ཐམས་ཅད་གཅིག་ཏུ་འདུས་པ། བདུད་རྩིའི་བཅུད་ཐིགས་རྒྱུད། དེའི་བཤད་ལུགས་ཇི་ལྟར་ལགས། ཞེས་ཞུས་པ་དང་། དེ་ནས་སྟོན་པ་ཀུན་ཏུ་བཟང་པོ་དེས། རིན་པོ་ཆེ་འོད་རྩིས་གདབ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། རྡོ་རྗེ་སེམས་དཔའ་ཡིད་ལ་ཟུང་། །སྣང་སྲིད་ཁ་སྦྱོར་བྱ་བ་ནི། །སྣང་བ་ཕྱི་ཡི་ཡུལ་ལ་བྱ། །སྲིད་པ་ནང་གི་སེམས་ལ་བྱ། །ཁ་སྦྱོར་གཉིས་སུ་མེད་པ་ཡིན། །སྣང་བ་སྒོ་ལྔའི་རྟགས་ཡུལ་ཡིན། །སྲིད་པ་རྣམ་ཤེས་རྣམ་ལྔ་ཡིན། །ཁ་སྦྱོར་མི་འགྱུར་རྩིས་གདབ་མེད། །སྣང་བ་ཕྱི་ཡི་དཀར་དམར་ཡུལ། ། ― DNG002_Page_0471 ―
[མ་དཔེ་གཟིགས་ན་འདིར་གནོན།]
སྲིད་པ་སེམས་ཀྱི་དྲན་རིག་གོ། །ཁ་སྦྱོར་དབྱེ་བསལ་མེད་པ་ཡིན། །སྣང་བ་སྒོ་ལྔའི་རྣམ་ཤེས་ཡིན། །སྲིད་པ་འགྱུ་ལུགས་རྣམ་ལྔ་ཡིན། །ཁ་སྦྱོར་མི་འགྱུ་མི་འཇུག་བརྟགས་ཆགས་མེད། །སྣང་བ་ཕྱི་སྣོད་གླིང་བཞི་ཆགས་ཚུལ་ཡུལ། །སྲིད་པ་སེམས་ཅན་སྐྱེ་འགྲོ་ཡིད་གཟུགས་ཡིན། །ཁ་སྦྱོར་བཟང་ངན་དགག་བསྒྲུབ་མེད། །བདུད་ནི་སེམས་ཀྱི་རྟོག་ཚོགས་ཡིན། །རྩི་ནི་ཡེ་ཤེས་ཆེན་པོ་ཡིན། །བདུད་ནི་མུན་པའི་འཁོར་སྒོ་ཡིན། །རྩི་ནི་ཡེ་ཤེས་རིག་པའི་འཆར་སྒོ་ཡིན། །བདུད་ནི་འཁྲུལ་ལུགས་རྣམ་གསུམ་ཡིན། །རྩི་ནི་ལྡོག་ལུགས་རྣམ་གསུམ་ཡིན། །བདུད་ནི་ཁམས་གསུམ་འཁྲུལ་པ་སྟེ། །རྩི་ནི་འཁྲུལ་གཞི་རྩད་གཅོད་ཡིན། །བདུད་ནི་ཉོན་མོངས་དུག་གསུམ་ཡིན། །རྩི་ནི་སྐུ་གསུང་ཐུགས་ཡིན་ནོ། །བདུད་ནི་ཉོན་མོངས་དུག་ལྔ་ཡིན། །རྩི་ནི་སྐུ་ལྔ་ཡེ་ཤེས་ལྔ། །བདུད་ནི་ཉོན་མོངས་བརྒྱད་ཁྲི་སྟོང་། །རྩི་ནི་ཆོས་སྒོ་བརྒྱད་ཁྲི་སྟོང་། །བདུད་ནི་ཁམས་གསུམ་འཁོར་བའི་སེམས། །རྩི་ནི་སྐུ་གསུམ་རྒྱལ་བའི་ཐུགས། །བདུད་ནི་འཁོར་བའི་སེམས་ཅན་ཏེ། །རྩི་ནི་མྱང་འདས་སངས་རྒྱས་སོ། །བཅུད་ནི་སྙིང་པོ་མ་ཡི་བཅུད། །ཐིགས་ནི་ཡན་ལག་བུ་ཡི་ཐིགས། །བཅུད་ནི་སྙིང་པོ་འགྱུར་མེད་བཅུད། །ཐིགས་ནི་སྐྱེ་མེད་བྱང་ཆུབ་སེམས། །བཅུད་ནི་སྙིང་པོ་ཆོས་ཉིད་ཀློང་། །ཐིགས་ནི་སྙིང་པོའི་ཀློང་དུ་ཐིགས། །བཅུད་ནི་རྩལ་སྣང་མ་འགགས་ལ། །ཐིགས་ནི་སྙིང་པོ་མི་དམིགས་པའོ། །འཁོར་བ་ཆགས་སྡང་སྡུག་བསྔལ་ཡིན། །འཁོར་བ་མུན་པ་མི་གསལ་ཡིན། །འཁོར་བ་མི་ཐར་འདམ་རྫབ་ཡིན། །འཁོར་བ་སྡུག་བསྔལ་བརྒྱད་ཁྲི་བཞི་སྟོང་ངོ་། །དེ་ལ་ཐོག་མཐའ་བཅད་ཐབས་དགོས། །ཐོག་མ་འགྱུར་མེད་ཀུན་ཁྱབ་ཡིན། །ཐ་མ་འགྱུར་བའི་ཆོས་ཅན་ཡིན། །ཐོག་མ་སྤྱི་ས་ཆེན་པོ་ཡིན། །ཐ་མ་སྣང་ཞིང་སྲིད་པའི་ཆོས། །ཐོག་མ་སྨྲ་བསམ་བརྗོད་ལས་འདས་པ་ཡིན། །ཐ་མ་བློ་ཡི་སྤྲོས་པ་ཡིན། །ཐོག་མ་སྐྱེ་བ་མེད་པ་ཡིན། །ཐ་མ་སྐྱེ་བའི་ཆོ་འཕྲུལ་བྱུང་། །ཐོག་མ་གཉིས་སུ་མེད་པ་ཡིན། །ཐ་མ་གཉིས་སྣང་ཤེས་པ་བྱུང་། །ཐོག་མ་ ― DNG002_Page_0472 ―
[མ་དཔེ་གཟིགས་ན་འདིར་གནོན།]
མཉམ་ཉིད་ཆེན་པོ་ཡིན། །ཐ་མ་ཕྱོགས་རིས་སྣ་ཚོགས་བྱུང་། །ཐོག་མ་དགག་བསྒྲུབ་སྤང་ལེན་མེད། །ཐ་མ་དགག་བསྒྲུབ་སྤང་ལེན་བྱུང་། །ཐོག་མ་འཁྲུལ་དང་མ་འཁྲུལ་མེད། །ཐ་མ་འཁྲུལ་སྣང་སྣ་ཚོགས་བྱུང་། །ཐོག་མ་དབྱེ་བསལ་རྩིས་གདབ་མེད། །ཐ་མ་དབྱེ་བསལ་རྩིས་གདབ་བྱུང་། །ཐོག་མ་བསྟན་བྱ་སྟོན་བྱེད་མེད། །ཐ་མ་བསྟན་བྱ་སྟོན་བྱེད་བྱུང་། །ཐོག་མ་མཚོན་བྱ་མཚོན་བྱེད་མེད། །ཐ་མ་མཚོན་བྱ་མཚོན་བྱེད་བྱུང་། །ཐོག་མ་བྱ་བའི་མཚན་ཉིད་ནི། །སྐྱེ་མེད་འགྱུར་མེད་དངོས་མེད་ཡིན། །མཚོན་འདས་སྨྲ་བསམ་བརྗོད་ལས་འདས་པ་ཡིན། །ཐ་མ་སེམས་ཀྱི་དྲན་རྟོག་ལ། །འོད་དང་འགྱུ་བ་ཟེར་རིག་ལས། །ཤེས་པ་ཕྱ་སངས་བན་བུན་ཁྱེར། །ཡིན་སྙམ་མིན་སྙམ་མིང་གི་རྣམ་ཤེས་ལས། །ཡིན་པ་མ་རིག་མིན་པ་རིག །གནད་དོན་མ་ཤེས་མར་མ་འཕྲད། །རང་ས་མ་ཟིན་འཁྲུལ་མ་ཆོད། །དེ་ཕྱིར་མ་རིག་འཁྲུལ་སྒོར་ཆུད། །འཁྲུལ་ཚུལ་གསུམ་དུ་འཁྲུལ་ནས་ནི། །ཁམས་གསུམ་འགྲོ་དྲུག་སྡུག་བསྔལ་མྱོང་། །གཟུང་འཛིན་བརྟགས་ཞེན་གཉིས་སྣང་དང་། །བདེན་པ་གཉིས་འཛིན་དགག་བསྒྲུབ་དང་། །རྩོལ་བསྒྲུབ་གཉིས་འཛིན་སྤང་ལེན་རྟོག་ཚོགས་རྣམས། །བསམ་གྱིས་མི་ཁྱབ་བརྗོད་མི་ལངས། །དེ་ནི་ཐ་མའི་ཤེས་པའོ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། འཁོར་བའི་ཐོག་མཐའ་གཏན་ལ་དབབ་པའི་ལེའུ་སྟེ་ཞེ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཐོག་མཐའ་རྩད་གཅོད་ཇི་ལྟར་ལགས། །ཞེས་ཞུས་པ་དང་། ཀུན་བཟང་ཉིད་ཀྱིས་འཁོར་ལ་འདི་སྐད་གསུངས། །ཨཱ་ཐ་གྷུའི་སིདྡྷི་གྷུ་ཡ་ཨཱ་ཨཱཿ། གཅོད་པ་བྱ་བའི་ཚིག་དེ་ཡིས། །ཐོག་མའི་དྲས་ཐག་གཅོད་པ་ཡི། །གནད་ཀྱི་མན་ངག་ཆེན་པོར་བསྟན། །རྡོ་རྗེ་སེམས་དཔས་ཡིད་ལ་ཟུང་། ། ― DNG002_Page_0473 ―
[མ་དཔེ་གཟིགས་ན་འདིར་གནོན།]
འོད་ཆེན་ངང་དུ་ཟེར་རིག་ཐིམ། །འདུ་འབྲལ་མེད་པར་སྤྲོས་པ་ཆོད། །འགྱུ་བ་ངན་པ་རིག་སེམས་རྣམས། །རང་དྭངས་འགྱུར་མེད་དྲན་རིག་སེམས་མེད་པས། །རང་སངས་ཡེ་ཤེས་ཆེན་པོ་ཡིས། །མ་རིག་པ་ཡི་མུན་ཁང་བཅོམ། །ཆོས་སྐུ་གསལ་གདངས་ཀློང་ནས་ཤར། །ཁམས་གསུམ་སྲིད་གསུམ་སངས་རྒྱས་པས། །འགྲོ་དྲུག་སེམས་ཅན་ཁམས་གསུམ་འཁྲུལ་པ་རྩད་ནས་གཅོད། །འཆར་སྒོ་ཡེ་ཤེས་ཟང་ཐལ་གྱིས། །མུན་པའི་འཁོར་སྒོ་རྩད་ནས་གཅོད། །མྱ་ངན་འདས་པའི་རྒྱས་ཐེབས་པས། །འཁོར་བའི་སྡུག་བསྔལ་མ་ལུས་ཕྱགས་མས་བཏབ། །ཀུན་ལ་ཁྱབ་པར་སྤྲོས་པ་ཆོད། །ངོས་བཟུང་མེད་པར་སྤྲོས་པ་ཆོད། །སྐྱེ་བ་མེད་པར་སྤྲོས་པ་ཆོད། །འགག་པ་མེད་པར་སྤྲོས་པ་ཆོད། །གཉིས་སུ་མེད་པར་སྤྲོས་པ་ཆོད། །དམིགས་སུ་མེད་པར་སྤྲོས་པ་ཆོད། །གདགས་སུ་མེད་པར་སྤྲོས་པ་ཆོད། །བརྗོད་དུ་མེད་པར་སྤྲོས་པ་ཆོད། །བསམ་དུ་མེད་པར་སྤྲོས་པ་ཆོད། །དངོས་པོ་མེད་པར་སྤྲོས་པ་ཆོད། །རིག་པ་མེད་པར་སྤྲོས་པ་ཆོད། །འགྱུ་བ་མེད་པར་སྤྲོས་པ་ཆོད། །བརྟགས་པ་མེད་པར་སྤྲོས་པ་ཆོད། །དབྱེ་བ་མེད་པར་སྤྲོས་པ་ཆོད། །རྩིས་གདབ་མེད་པར་སྤྲོས་པ་ཆོད། །དགག་བསྒྲུབ་མེད་པར་སྤྲོས་པ་ཆོད། །སྤོང་ལེན་མེད་པར་སྤྲོས་པ་ཆོད། །གཟུང་འཛིན་མེད་པར་སྤྲོས་པ་ཆོད། །བྱ་བཙལ་མེད་པར་སྤྲོས་པ་ཆོད། །བགྲོད་དུ་མེད་པར་སྤྲོས་པ་ཆོད། །བྱ་རྒྱུ་མེད་པར་སྤྲོས་པ་ཆོད། །གཞག་ཏུ་མེད་པར་སྤྲོས་པ་ཆོད། །ཡེ་གྲུབ་ཆེན་པོར་སྤྲོས་པ་ཆོད། །རང་གནས་ཆེན་པོར་སྤྲོས་པ་ཆོད། །ངང་གནས་ཆེན་པོར་སྤྲོས་པ་ཆོད། །ཡེ་གནས་ཆེན་པོར་སྤྲོས་པ་ཆོད། །རང་གདངས་ཆེན་པོར་སྤྲོས་པ་ཆོད། །རང་སངས་ཆེན་པོར་སྤྲོས་པ་ཆོད། །གསལ་གདངས་ཆེན་པོར་སྤྲོས་པ་ཆོད། །གཏིང་གསལ་ཆེན་པོར་སྤྲོས་པ་ཆོད། །ཡིད་ལ་བྱར་མེད་སྤྲོས་པ་ཆོད། །སེམས་ལ་བཞག་མེད་སྤྲོས་པ་ཆོད། །བློ་ཡིས་སྤྲོས་མེད་སྤྲོས་པ་ཆོད། །རྟོག་པས་མ་བསླད་སྤྲོས་པ་ཆོད། །མ་ནོར་མ་ ― DNG002_Page_0474 ―
[མ་དཔེ་གཟིགས་ན་འདིར་གནོན།]
བཅོས་སྤྲོས་པ་ཆོད། །བསྐྱེད་པ་མེད་པར་སྤྲོས་པ་ཆོད། །མ་ཕྱེ་མ་བཀྲོལ་སྤྲོས་པ་ཆོད། །མ་བཟུང་འཛིན་མེད་སྤྲོས་པ་ཆོད། །འཕེལ་བ་མེད་པར་སྤྲོས་པ་ཆོད། །འགྲིབ་པ་མེད་པར་སྤྲོས་པ་ཆོད། །རྒྱུ་རྐྱེན་མེད་པར་སྤྲོས་པ་ཆོད། །མི་བལྟ་བལྟར་མེད་སྤྲོས་པ་ཆོད། །མི་བསྒོམ་བསྒོམ་མེད་སྤྲོས་པ་ཆོད། །མི་སྤྱོད་བྱར་མེད་སྤྲོས་པ་ཆོད། །མི་བསྲུང་བསྲུང་མེད་སྤྲོས་པ་ཆོད། །མི་ཐོབ་ཐོབ་མེད་སྤྲོས་པ་ཆོད། །སྣང་བ་སོར་བཞག་སྤྲོས་པ་ཆོད། །གནས་ལུགས་རང་གནས་སྤྲོས་པ་ཆོད། །སྣང་སེམས་གཉིས་མེད་སྤྲོས་པ་ཆོད། །སེམས་ཀྱི་བརྟགས་ཚད་སྤྲོས་པ་ཆོད། །དྲན་བརྟགས་ཆགས་ཞེན་སྤྲོས་པ་ཆོད། །སྣང་སྲིད་འཁོར་བ་སྣ་ཚོགས་བསམ་ཡས་པ། །མི་འཇུག་མི་སྤྱོད་རྩིས་གདབ་མེད། །ཐམས་ཅད་སྤྲོས་པ་ཆོད་པ་ནི། །ལུས་ནི་འགྱུར་མེད་རྡོ་རྗེའི་སྐུ། །སྐྱེ་རྒས་ན་འཆིའི་སྡུག་བསྔལ་སྤངས། །ཡེ་ཤེས་ཆེན་པོའི་སྤྱན་གྱིས་ནི། །མ་རིག་པ་ཡི་མུན་པ་སངས། །རྣ་བ་ཐོགས་མེད་ཡེ་ཤེས་ཟང་ཐལ་གྱིས། །བརྗོད་པའི་རྣམ་རྟོག་མཐའ་དག་སངས། །སྣ་ནི་འགག་མེད་ཡེ་ཤེས་ཀྱིས། །གཟུང་འཛིན་དྲི་མ་ཐམས་ཅད་སངས། །ལྕེ་ནི་འགྱུར་མེད་ཡེ་ཤེས་ཀྱིས། །བདེན་པ་གཉིས་འཛིན་རོ་རྣམས་སངས། །ཡིད་ཀྱི་དབང་པོ་ཐོགས་མེད་ཀྱིས། །སྣང་སྲིད་སྐྱེ་མེད་དབྱིངས་སུ་སངས། །ཕྱག་གཉིས་ལུང་རིག་གཉིས་པོ་ཡིས། །ཆོས་རྣམས་ཐིག་ལེ་ཆེན་པོར་རྒྱས། །ཞབས་གཉིས་ཐབས་དང་ཤེས་རབ་ཀྱིས། །གཉིས་འཛིན་ཆགས་པ་མེད་པར་སངས། །ཐམས་ཅད་སྤྲོས་གཅོད་ཆོས་སྐུའི་ཀློང་དུ་རྒྱས། །ཕྱོགས་རིས་མཐའ་དག་གཉིས་མེད་པས། །འགྱུར་མེད་བདེ་ཆེན་ཀློང་དུ་རྒྱས། །མི་གསལ་མ་རིག་མུན་ནག་སངས། །གསལ་གདངས་ཡེ་ཤེས་ཆེན་པོར་རྒྱས། །སྡུག་བསྔལ་ངར་འཛིན་ཉོན་མོངས་རྒྱས། །བདེ་ཆེན་འཛིན་མེད་ཡེ་ཤེས་ཟང་ཐལ་རྒྱས། ། ― DNG002_Page_0475 ―
[མ་དཔེ་གཟིགས་ན་འདིར་གནོན།]
ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རིན་པོ་ཆེ་སྤྲོས་པ་གཅོད་པ་རྩ་བའི་རྒྱུད་ལེའུ་སྟེ་ཞེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་སེམས་ཉིད་ཀུན་བཟང་ལ། །འབྲས་བུ་ཐོབ་ལུགས་ཇི་ལྟར་ལགས། །ཞེས་གསོལ་པ་དང་། དེ་ནས་སེམས་ཉིད་ཀུན་བཟང་དེས། རིན་པོ་ཆེའི་འོད་རང་ལ་ཐིམ་པའི་ཏིང་ངེ་འཛིན་ལ་བཞུགས་སོ། །དེ་ནས་བཞེངས་ནས་འཁོར་རྣམས་ལ། །སྟོན་པའི་རྒྱལ་པོས་འདི་སྐད་གསུངས། །ང་ཡི་སྤྱི་ཏི་ཡོ་ག་ལ། །འབྲས་བུ་ཐོབ་དང་མི་ཐོབ་མི་མངའ་ཡང་། །སྙིང་པོ་རང་བཞིན་གཡོས་པ་མེད་ན་ཡང་། །བདུད་རྩི་བཅུད་ཐིགས་འབྲས་བུ་བཤད། །རྡོ་རྗེ་སེམས་དཔས་གོ་བར་ཟུང་། །ཀུན་གཞི་མཛོད་ཆེན་ཆོས་སྐུའི་ཀློང་ཡངས་དེ། །རྒྱུ་ཡིས་མ་བསྐྱེད་རྐྱེན་གྱིས་མི་འཇིག་པ། །ངོ་བོ་མི་འགྱུར་རང་བཞིན་མ་བཅོས་པ། །མིང་མེད་བརྟགས་མེད་བརྗོད་པའི་གཞི་ཡང་མེད། །སྒྲར་མེད་བརྗོད་མེད་མཚོན་པའི་དངོས་གཞི་མེད། །སངས་མེད་རྒྱས་མེད་སྐུ་ཡི་དངོས་གཞི་མེད། །མཐའ་མེད་དབུས་མེད་ཕྱོགས་མཚམས་ཡོངས་དང་བྲལ། །བདེ་མེད་སྡུག་མེད་སྡུག་བསྔལ་ཡོངས་སུ་བྲལ། །དེ་ལྟ་བུ་ཡི་རང་བཞིན་དེ། །ཆོས་ཉིད་གཞི་ཡི་རང་བཞིན་ཡིན། །སྣང་ཚུལ་ཟེར་གྱི་མཚན་ཉིད་ཀྱང་། །མེད་ལ་ཡོད་པའི་ངོ་བོ་བྱུང་། །མིན་པའི་དོན་ལ་ཡིན་པར་བཟུང་། །མེད་པའི་ཆོས་ལ་ཡོད་པར་བཟུང་། །མི་རྟག་པ་ལ་རྟག་པར་བཟུང་། །གཉིས་མེད་དོན་ལ་གཉིས་སུ་བཟུང་། །སྡུག་བསྔལ་རྣམས་ལ་བདེ་བར་བཟུང་། །ཕྱོགས་རིས་མེད་ལ་དགྲ་གཉེན་བཟུང་། །དེ་སོགས་མེད་ལ་ཡོད་བཟུང་གིས། །རྨི་ལམ་ཚུལ་དུ་སྡུག་བསྔལ་མྱོང་། །རིགས་དྲུག་ཁམས་གསུམ་འཁོར་བ་དེ་ལས་བྱུང་། །བྱུང་ཡང་གཞི་ལས་གཡོས་པ་མེད། །སྣང་ཚུལ་ཟེར་གྱི་ཤེས་པ་དེ་ལ་ཐིམ། །སྨྲ་བརྗོད་རྟོག་ཚོགས་ཐམས་ཅད་དེ་ ― DNG002_Page_0476 ―
[མ་དཔེ་གཟིགས་ན་འདིར་གནོན།]
རུ་ཐིམ། །བརྟག་སྣང་བློ་ཡུལ་ཐམས་ཅད་གཞི་ལ་ཐིམ། །གཟུང་འཛིན་དགག་བསྒྲུབ་ཐམས་ཅད་དབྱིངས་སུ་ཐིམ། །སེམས་ཀྱི་དྲན་རིག་ཐམས་ཅད་ཀློང་དུ་ཐིམ། །ཡིད་དཔྱོད་རྟོགས་སྣང་སྣ་ཚོགས་ཐམས་ཅད་དབྱིངས་སུ་ཐིམ། །ཡན་ལག་བུ་ཡི་མཚན་ཉིད་མ་ལ་ཐིམ། །ཟེར་གྱི་སྣང་ཚུལ་སྙིང་པོའི་ཀློང་དུ་ཐིམ། །ཡིད་ཀྱི་དྲན་སེམས་རིལ་པོ་དབྱིངས་སུ་ཐིམ། །མིང་ཚིག་བརྟགས་སྣང་བརྗོད་ཚད་ཆོས་དབྱིངས་ཀློང་དུ་ཐིམ། །དགག་བསྒྲུབ་སྤང་ལེན་ཆོས་ཉིད་དབྱིངས་སུ་ཐིམ། །གཉིས་འཛིན་ཆགས་ཞེན་ཐམས་ཅད་གཞི་མོའི་ཀློང་དུ་ཐིམ། །དྲན་ཚད་ཕྱེད་ཚད་བརྗོད་ཚད་བརྗོད་མེད་ཀློང་དུ་ཐིམ། །གཞི་ལ་རྩལ་སྣང་དབྱེར་མི་ཕྱེད། །སྙིང་པོ་ཡན་ལག་ཐིམ་པས་དབྱེར་མི་ཕྱེད། །མ་ལ་བུ་ཐིམ་དབྱེར་མི་ཕྱེད། །ཡིད་རིག་དྲན་བྱེད་དབྱེར་མི་ཕྱེད། །སེམས་རིག་རྩལ་སྣང་ཐིམ་པས་དབྱེར་མི་ཕྱེད། །དྲན་ཚད་བརྗོད་ཚད་ཐིམ་པས་དབྱེར་མི་ཕྱེད། །གཉིས་འཛིན་ཆགས་ཞེན་མཐའ་དག་ཐིམ་པས་དབྱེར་མི་ཕྱེད། །བསམ་ཚད་བརྟགས་སྣང་བློ་ཡུལ་མཐའ་དག་ཐིམ་པས་དབྱེར་མི་ཕྱེད། །དཔེར་ན་ཅི་དང་འདྲར་ཤེས་ན། །དྭ་ཕྲུག་མ་དང་འཕྲད་པ་འདྲ། །ལན་ཚྭ་ཆུ་ལ་ཐིམ་པ་འདྲ། །ཆུ་ལ་ཆུ་བུར་ཐིམ་པ་འདྲ། །ཡུར་ཆུ་རྒྱ་མཚོར་སླེབ་པ་འདྲ། །འཁྱགས་པ་ཆུ་རུ་ཞུ་བ་འདྲ། །ཆར་པ་མཚོ་ལ་འབབ་པ་འདྲ། །མཁའ་ལ་འཇའ་ཚོན་ཐིམ་པ་འདྲ། །སྤྲིན་རྣམས་ནམ་མཁར་དེངས་པ་འདྲ། །ཆུ་ནང་ཟླ་བ་ཤར་བ་འདྲ། །འོ་མ་ཆུ་དང་འདྲེས་པ་འདྲ། །སྙིང་པོའི་དབྱིངས་སུ་སྣང་ཚུལ་ཟེར་ཐིམ་པས། །གཞི་ལ་རྩལ་ཐིམ་ཐོག་མར་ཡེ་སངས་རྒྱས། །ཆོས་ཉིད་མ་དང་འཕྲད་པས་འཁྲུལ་པ་རང་སར་གྲོལ། །སྐྱེ་མེད་རང་ས་ཟིན་པས་སྙིང་པོའི་ཀློང་ནས་ཤར། །རྣམ་རྟོག་རང་སར་གྲོལ་བས་འགྱུར་མེད་ཆོས་སྐུར་གྱུར། །ངོ་བོ་རང་ས་ཟིན་པས་གསལ་དྭངས་ཆོས་སྐུའོ། །རང་བཞིན་རང་ས་ཟིན་པས་རང་དྭངས་ལོངས་སྐུའོ། །ཐུགས་རྗེ་རང་ས་ཟིན་པས་རང་སངས་སྤྲུལ་སྐུའོ། །སྐུ་གསུམ་དབྱེར་མེད་ ― DNG002_Page_0477 ―
[མ་དཔེ་གཟིགས་ན་འདིར་གནོན།]
གཅིག་པས་རང་གདངས་ཆེན་པོའོ། །སྐུ་ལྔ་བདེ་བ་ཆེ་བས་མཁའ་གསལ་དང་ཉིད་སྐུ། །སྐུ་ལྔ་འགྱུར་མེད་དབྱིངས་ཐིམ་པས། །དབྱེར་མེད་གཏིང་གསལ་ངོ་བོ་ཉིད་ཀྱི་སྐུ། །རང་སེམས་ཆོས་སྐུའི་འབྲས་བུ་ཡིན། །ཐོག་མ་མེད་པའི་དུས་མཐའ་ནས། །རང་ལ་རང་ཆས་ཡོད་རྟོགས་པས། །སྐུ་ལྔ་རྒྱལ་བའི་ཞིང་ཁམས་སོ། །འབྲས་བུའི་མཆོག་ཏུ་རྒྱལ་བས་གསུངས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩིའི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བདུད་རྩི་བཅུད་ཐིགས་འབྲས་བུ་བསྟན་པའི་ལེའུ་སྟེ་ཞེ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རང་གདངས་ཆེན་པོ་ཇི་ལྟར་ལགས། །ཞེས་གསོལ་པ་དང་། སེམས་ཉིད་སྟོན་པ་ཀུན་བཟང་དེ། རིན་པོ་ཆེ་འོད་འབར་བའི་ཏིང་ངེ་འཛིན་ལ་བཞུགས་སོ། །དེ་ནས་བཞེངས་ནས་འདི་སྐད་གསུངས། །སྙིང་པོའི་རང་བཞིན་སྐྱེ་མེད་འགྱུར་མེད་ལ། །སྐུ་གསུམ་ཡིད་ལ་མ་བྱས་རང་གསལ་ཆེན་པོ་ཡིན། །སྐུ་ལྔ་ཡིད་ལ་མ་བྱས་རང་གསལ་ཆེན་པོ་ཡིན། །སྣང་བ་ཡིད་ལ་མ་བྱས་རང་དྭངས་ཆེན་པོ་ཡིན། །སྟོང་པ་ཡིད་ལ་མ་བྱས་རང་གདངས་ཆེན་པོ་ཡིན། །སྐྱེ་མེད་ཡིད་ལ་མ་བྱས་གསལ་དྭངས་ཆེན་པོ་ཡིན། །ཆོས་སྐུ་ཡིད་ལ་མ་བྱས་གསལ་དྭངས་ཆེན་པོ་ཡིན། །ལོངས་སྐུ་ཡིད་ལ་མ་བྱས་གསལ་དྭངས་ཆེན་པོ་ཡིན། །སྤྲུལ་སྐུ་ཡིད་ལ་མ་བྱས་གསལ་དྭངས་ཆེན་པོ་ཡིན། །དབྱེར་མེད་ཡིད་ལ་མ་བྱས་གསལ་དྭངས་ཆེན་པོ་ཡིན། །མ་རིག་བློ་ཡིས་མ་སྤངས་གསལ་དྭངས་ཆེན་པོ་ཡིན། །འགྱུར་བ་མེད་དེ་གསལ་དྭངས་ཆེན་པོ་ཡིན། །སྐྱེ་ཤི་མེད་དེ་གསལ་དྭངས་ཆེན་པོ་ཡིན། །རྒྱུ་ཡིས་མ་བསྐྱེད་གསལ་དྭངས་ཆེན་པོ་ཡིན། །རྐྱེན་གྱིས་མི་འཇིག་གསལ་དྭངས་ཆེན་པོ་ཡིན། །ངོ་བོ་མི་འགྱུར་གསལ་དྭངས་ཆེན་པོ་ཡིན། །ཡུལ་ལ་དགག་བསྒྲུབ་མེད་དེ་གསལ་དྭངས་ཆེན་པོ་ཡིན། །སེམས་ལ་དངོས་པོ་མེད་ ― DNG002_Page_0478 ―
[མ་དཔེ་གཟིགས་ན་འདིར་གནོན།]
དེ་གསལ་དྭངས་ཆེན་པོ་ཡིན། །ཡུལ་སེམས་དབྱེ་བསལ་མེད་དེ་གསལ་དྭངས་ཆེན་པོ་ཡིན། །ཡིད་ལ་མ་བསམས་གསལ་དྭངས་ཆེན་པོ་ཡིན། །སེམས་ཀྱིས་མ་ཕྱེ་གསལ་དྭངས་ཆེན་པོ་ཡིན། །བློ་ཡིས་མ་བཅོས་གསལ་དྭངས་ཆེན་པོ་ཡིན། །རྟོག་པས་མ་བསླད་གསལ་དྭངས་ཆེན་པོ་ཡིན། །མ་ཕྱེ་མ་བཀོལ་གསལ་དྭངས་ཆེན་པོ་ཡིན། །མི་ལེན་མི་འདོར་གསལ་དྭངས་ཆེན་པོ་ཡིན། །མི་སྤང་མི་བསྒྲུབ་གསལ་དྭངས་ཆེན་པོ་ཡིན། །བྱར་མེད་བཙལ་མེད་གསལ་དྭངས་ཆེན་པོ་ཡིན། །མི་བལྟ་བལྟར་མེད་གསལ་དྭངས་ཆེན་པོ་ཡིན། །མི་བསྒོམ་རྟོག་མེད་གསལ་དྭངས་ཆེན་པོ་ཡིན། །མི་སྤྱོད་བྱར་མེད་གསལ་དྭངས་ཆེན་པོ་ཡིན། །མི་བསྲུང་བསྲུང་མེད་གསལ་དྭངས་ཆེན་པོ་ཡིན། །མི་རྩོལ་བཙལ་མེད་གསལ་དྭངས་ཆེན་པོ་ཡིན། །མི་བགྲོད་བགྲོད་མེད་གསལ་དྭངས་ཆེན་པོ་ཡིན། །མི་བསྒྲུབ་རང་བཞིན་གསལ་དྭངས་ཆེན་པོ་ཡིན། །བརྟག་སྣང་ཐམས་ཅད་གསལ་དྭངས་ཆེན་པོ་ཡིན། །སྣང་སྲིད་ཐམས་ཅད་གསལ་དྭངས་ཆེན་པོ་ཡིན། སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཆོས་སྐུ་གསལ་དྭངས་ཆེན་པོ་བསྟན་པའི་ལེའུ་སྟེ་ཞེ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རང་དྭངས་ཆེན་པོ་ཇི་ལྟར་ལགས། ཞེས་གསོལ་པ་དང་། སེམས་ཉིད་སྟོན་པ་ཀུན་བཟང་དེས། རིན་པོ་ཆེའི་འོད་རང་སངས་ཆེན་པོའི་ཏིང་ངེ་འཛིན་ལ་བཞུགས་སོ། །བཞེངས་ནས་འཁོར་ལ་འདི་སྐད་གསུངས། །ཆོས་སྐུ་ཀློང་ཡངས་ནམ་མཁའི་རང་བཞིན་ལས། །སྙིང་པོ་འགྱུར་བ་མེད་པའི་རྒྱས་ཐེབས་པས། །རྣམ་རྟོག་མཚན་མའི་རྐྱེན་གྱིས་ཅི་ལ་གོས། །གཡོས་པ་མེད་པའི་ཆོས་ཉིད་ཆེན་པོ་ལ། །ཆོས་སྐུ་འགྱུར་མེད་སྐྱེ་མེད་རྣམ་རྟོག་གྲུབ་པ་མེད། །འབྲས་བུ་གདེང་ཟིན་འདི་ལྟར་ཤེས་པར་གྱིས། །སྐྱོན་ཅན་གྲུབ་པ་མེད་པས་རང་སངས་ཆེན་པོ་ཡིན། ། ― DNG002_Page_0479 ―
[མ་དཔེ་གཟིགས་ན་འདིར་གནོན།]
མ་རིག་གྲུབ་པ་མེད་པས་རང་སངས་ཆེན་པོ་ཡིན། །ཡེ་ཤེས་འགྱུར་བ་མེད་པས་རང་སངས་ཆེན་པོ་ཡིན། །དུག་གསུམ་ཐུབ་པ་མེད་པས་རང་སངས་ཆེན་པོ་ཡིན། །སྐུ་གསུམ་འཕོ་འགྱུར་མེད་པས་རང་སངས་ཆེན་པོ་ཡིན། །དུག་ལྔ་གྲུབ་པ་མེད་པས་རང་སངས་ཆེན་པོ་ཡིན། །ཡེ་ཤེས་ལྔ་ལ་འདུ་འབྲལ་མེད་པས་རང་སངས་ཆེན་པོ་ཡིན། །འཁོར་བ་གྲུབ་པ་མེད་པས་རང་སངས་ཆེན་པོ་ཡིན། །མྱང་འདས་འགྱུར་བ་མེད་པས་རང་སངས་ཆེན་པོ་ཡིན། །རྣམ་རྟོག་གྲུབ་པ་མེད་པས་རང་སངས་ཆེན་པོ་ཡིན། །ཆོས་ཉིད་འགྱུར་བ་མེད་དེ་རང་སངས་ཆེན་པོ་ཡིན། །གཟུང་འཛིན་གྲུབ་པ་མེད་དེ་རང་སངས་ཆེན་པོ་ཡིན། །འཛིན་མེད་འགྱུར་བ་མེད་པས་རང་སངས་ཆེན་པོ་ཡིན། །གཉིས་འཛིན་གྲུབ་པ་མེད་པས་རང་སངས་ཆེན་པོ་ཡིན། །གཉིས་མེད་འགྱུར་བ་མེད་པས་རང་སངས་ཆེན་པོ་ཡིན། །ཕྱོགས་རིས་གྲུབ་པ་མེད་པས་རང་སངས་ཆེན་པོ་ཡིན། །ང་བདག་གྲུབ་པ་མེད་པས་རང་སངས་ཆེན་པོ་ཡིན། །བདག་མེད་འགྱུར་བ་མེད་དེ་རང་སངས་ཆེན་པོ་ཡིན། །ཆགས་འཛིན་གྲུབ་པ་མེད་དེ་རང་སངས་ཆེན་པོ་ཡིན། །ཆགས་མེད་འགྱུར་བ་མེད་དེ་རང་སངས་ཆེན་པོ་ཡིན། །རྩོལ་བསྒྲུབ་གྲུབ་པ་མེད་དེ་རང་སངས་ཆེན་པོ་ཡིན། །རྩོལ་མེད་འགྱུར་བ་མེད་དེ་རང་སངས་ཆེན་པོ་ཡིན། །བྱ་བ་གྲུབ་པ་མེད་དེ་རང་སངས་ཆེན་པོ་ཡིན། །བྱར་མེད་འགྱུར་བ་མེད་དེ་རང་སངས་ཆེན་པོ་ཡིན། །བལྟ་བྱ་གྲུབ་པ་མེད་དེ་རང་སངས་ཆེན་པོ་ཡིན། །བལྟར་མེད་འགྱུར་བ་མེད་དེ་རང་སངས་ཆེན་པོ་ཡིན། །བསྒོམ་བྱ་བསྒྲུབ་བྱ་མེད་དེ་རང་སངས་ཆེན་པོ་ཡིན། །བསྒོམ་མེད་འགྱུར་བ་མེད་དེ་རང་སངས་ཆེན་པོ་ཡིན། །སྤྱོད་པ་གྲུབ་པ་མེད་དེ་རང་སངས་ཆེན་པོ་ཡིན། །སྤྱོད་མེད་འགྱུར་བ་མེད་དེ་རང་སངས་ཆེན་པོ་ཡིན། །ཐོབ་བྱ་གྲུབ་པ་མེད་དེ་རང་སངས་ཆེན་པོ་ཡིན། །ཐོབ་མེད་རེ་དོགས་མེད་དེ་རང་སངས་ཆེན་པོ་ཡིན། །དེ་དག་ཀུན་གྱི་རང་བཞིན་ཀྱང་། །བློ་ཡིས་མ་བཅོས་ཡིད་ཀྱིས་མ་འགྱུས་སོ། །རིག་པས་མ་ཕྱེ་སེམས་ ― DNG002_Page_0480 ―
[མ་དཔེ་གཟིགས་ན་འདིར་གནོན།]
ཀྱིས་མ་བརྟགས་སོ། །ཡེ་ཇི་བཞིན་པའི་ངང་ཉིད་དོ། །མ་བསླད་པ་ཡི་ཆོས་ཉིད་ཡིན། །མ་བཅོས་པ་ཡི་སེམས་ཉིད་ཡིན། །གདལ་བ་ཆེན་པོའི་གནས་ཉིད་ན། །འགྱུར་བ་མེད་པའི་ཆོས་སྐུ་བཞུགས། །མ་ཡེངས་བྱ་བཏང་ས་མཱ་ཏི། །ཁོ་ན་ཉིད་ལ་འགྱུར་བ་མེད། །དབྱིངས་ཀྱི་སྟོང་ར་ཆེན་མོ་རུ། །འཕོ་འགྱུར་ཐམས་ཅད་བྲལ་བའི་སྐུ། །སྨྲ་བརྗོད་ཐམས་ཅད་བྲལ་བའི་དག །ཡིད་རིག་སེམས་དཔྱོད་བློ་ཡི་ཡུལ་ལས་འདས། །གཡོ་འགུལ་མེད་པའི་ཐུགས་ཡིན་ནོ། །མ་བཅོས་མ་བསླད་སོ་མ་ཉིད། །རང་དྭངས་ལྷུག་པ་དེ་བཞིན་ཉིད། །སྙིང་པོའི་དོན་ལས་མ་གཡོས་པར། །ཐ་མལ་རང་ལུགས་གནས་པ་ཡིན། །ཀུན་བཟང་རྒྱལ་བའི་དགོངས་པའོ། །ཞེས་གསུངས་སོ། །སྣད་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མ་བཅོས་རྣལ་དུ་བཞག་པས་འབྲས་བུ་གདེང་ཟིན་བསྟན་པའི་ལེའུ་སྟེ་ཞེ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སེམས་ཉིད་མཁའ་གསལ་ཇི་ལྟར་ལགས། ཞེས་གསོལ་པ་དང་། སེམས་ཉིད་སྟོན་པ་ཀུན་བཟང་དེ། རིན་པོ་ཆེ་འོད་མཁའ་གསལ་ཆེན་པོའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །ཆོས་སྐུ་འདུས་མ་བྱས་པས་མཁའ་གསལ་ཆེན་པོ་ཡིན། །སྙིང་པོ་འདུས་མ་བྱས་པས་མཁའ་གསལ་ཆེན་པོ་ཡིན། །ཀུན་གཞི་འདུས་མ་བྱས་པས་མཁའ་གསལ་ཆེན་པོ་ཡིན། །ཆོས་ཉིད་འདུས་མ་བྱས་པས་མཁའ་གསལ་ཆེན་པོ་ཡིན། །དབྱིངས་ཉིད་འདུས་མ་བྱས་པས་མཁའ་གསལ་ཆེན་པོ་ཡིན ། སྐྱེ་མེད་འདུས་མ་བྱས་པས་མཁའ་གསལ་ཆེན་པོ་ཡིན། །འགྱུར་མེད་འདུས་མ་བྱས་པས་མཁའ་གསལ་ཆེན་པོ་ཡིན། །ངང་ཉིད་འདུས་མ་བྱས་པས་མཁའ་གསལ་ཆེན་པོ་ཡིན། །གཡོ་མེད་འདུས་མ་བྱས་པས་མཁའ་གསལ་ཆེན་པོ་ ― DNG002_Page_0481 ―
[མ་དཔེ་གཟིགས་ན་འདིར་གནོན།]
ཡིན། །ཆགས་མེད་ཞེན་མེད་མཁའ་གསལ་ཆེན་པོ་ཡིན། །བསམ་བརྗོད་བློ་ལས་འདས་པའི་མཁའ་གསལ་ཆེན་པོ་ཡིན། །མིང་མེད་རྟོག་མེད་ཡུལ་མེད་མཚོན་ལས་འདས་པས་མཁའ་གསལ་ཆེན་པོ་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སེམས་ཉིད་མཁའ་གསལ་གྱི་ལེའུ་སྟེ་ཞེ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཆོས་ཉིད་གཏིང་གསལ་ཆེན་པོ་ཇི་ལྟར་ལགས། ཞེས་གསོལ་པ་དང་། དེ་ནས་སེམས་ཉིད་ཀུན་བཟང་དེ། །རིན་པོ་ཆེ་འོད་འཕྲོ་འདུ་ཐམས་ཅད་ཆོས་ཉིད་ཀྱི་ཀློང་དུ་ཐིམ་པའི་ཏིང་ངེ་འཛིན་ལ་སྙོམས་པར་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །ཆོས་ཉིད་དོན་གྱི་གནས་ལུགས་དེ། །ཚོགས་བརྒྱད་ཡུལ་དུ་མ་གྱུར་གཏིང་གསལ་ཆེན་པོ་ཡིན། །མིག་གི་ཡུལ་དུ་མ་གྱུར་གཏིང་གསལ་ཆེན་པོ་ཡིན། །རྣ་བའི་ཡུལ་དུ་མ་གྱུར་གཏིང་གསལ་ཆེན་པོ་ཡིན། །སྣ་ཡི་ཡུལ་དུ་མ་གྱུར་གཏིང་གསལ་ཆེན་པོ་ཡིན། །ལྕེ་ཡི་ཡུལ་དུ་མ་གྱུར་གཏིང་གསལ་ཆེན་པོ་ཡིན། །ཡིད་ཀྱི་ཡུལ་དུ་མ་གྱུར་གཏིང་གསལ་ཆེན་པོ་ཡིན། །ལུས་ཀྱི་དངོས་གཞི་མེད་དེ་གཏིང་གསལ་ཆེན་པོ་ཡིན། །རོ་ཡི་མྱང་རྒྱུ་མེད་དེ་གཏིང་གསལ་ཆེན་པོ་ཡིན། །མི་དམིགས་དམིགས་ལས་འདས་ཏེ་གཏིང་གསལ་ཆེན་པོ་ཡིན། །སྨྲ་བརྗོད་ཡོངས་ལས་འདས་པས་གཏིང་གསལ་ཆེན་པོ་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཆོས་ཉིད་གཏིང་གསལ་ཆེན་པོར་བསྟན་པའི་ལེའུ་སྟེ་ཞེ་བདུན་པའོ།། །།ཨ་ཐ་བཛྲ་པ་ཏ་ལི། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྤྱི་ཏིའི་འདོད་གཞུང་དེ་ལྟར་ན། །ཐེག་པ་གཞན་དང་མི་འགལ་བའི། །མ་འདྲེས་ཡོངས་རྫོགས་ཇི་ལྟར་ལགས། ། ― DNG002_Page_0482 ―
[མ་དཔེ་གཟིགས་ན་འདིར་གནོན།]
ཞེས་གསོལ་པ་དང་། སེམས་ཉིད་སྟོན་པ་ཀུན་བཟང་དེ། རིན་པོ་ཆེ་འོད་སྣ་ཚོགས་ཀུན་ཏུ་གསལ་བའི་ཏིང་ངེ་འཛིན་ལ་བཞུགས་སོ། །ཏིང་ངེ་འཛིན་དེ་ལས་བཞེངས་ནས། འཁོར་རྣམས་ལ་འདི་སྐད་ཅེས་བཀའ་སྩལ་ཏོ། །ང་ཡི་སྤྱི་ཏི་ཡོ་ག་འདིར། །ཐེག་པ་མཐའ་དག་འདི་ལ་རྫོགས། །སྙིང་པོ་ཆོས་སྐུའི་རང་བཞིན་ནི། །དུས་གསུམ་འཕོ་འགྱུར་མེད་པར་གནས། །མུ་སྟེགས་རྟག་ལྟ་འདི་ལ་རྫོགས། །དངོས་མེད་དམིགས་པའི་ཡུལ་ལས་འདས། །མུ་སྟེགས་ཆད་ལྟ་འདི་ལ་རྫོགས། །ཕྲ་རབ་རྡུལ་དུ་མ་གྲུབ་པ། །ཉན་ཐོས་ལྟ་བ་འདི་ལ་རྫོགས། །རྟེན་འདྲེལ་རྣམ་པར་རིག་བྱེད་པ། །རང་རྒྱལ་ལྟ་བ་འདི་ལ་རྫོགས། །ཡུལ་སེམས་གཉིས་མེད་གཟུང་འཛིན་བྲལ། །སེམས་ཙམ་ལྟ་བ་འདི་ལ་རྫོགས། །མཐའ་བཞི་བྲལ་བས་བདེན་གཉིས་ཆོམ། །དབུ་མའི་ལྟ་བ་འདི་ལ་རྫོགས། །དག་གསུམ་རིགས་གསུམ་དབྱེར་མེད་པས། །ཀྲི་ཡའི་ལྟ་བ་འདི་ལ་རྫོགས། །ལྟ་སྤྱོད་ཡ་འགལ་མ་གྱུར་པས། །ཨུ་པ་ཡ་ཡི་ལྟ་བ་རྫོགས། །ཀུན་རྫོབ་ལྷ་ཡི་དཀྱིལ་འཁོར་དང་། །རྣམ་ཤེས་ལྔ་ལ་ལྷར་འདོད་ཀྱང་། །དོན་གྱི་སྐྱེ་འགག་གཉིས་མེད་པས། །དེ་ཕྱིར་ཡོ་གའི་ལྟ་བ་རྫོགས། །ཐབས་དང་ཤེས་རབ་གཉིས་མེད་པས། །མ་ཧཱ་ཡོ་གའི་ལྟ་བ་རྫོགས། །དབྱིངས་དང་ཡེ་ཤེས་གཉིས་མེད་པས། །ཨ་ནུ་ཡོ་གའི་ལྟ་བ་རྫོགས། །ཐམས་ཅད་མ་འགགས་རོལ་པའི་རྒྱུན། །རྫོགས་ཆེན་ལྟ་བ་འདི་ལ་རྫོགས། །ང་ཡི་སྤྱི་ཏི་ཡོ་ག་ལ། །སྤྲོས་དང་བྲལ་བའི་སྒོར་ཞུགས་པས། །འཇུག་སྒོ་ཐ་དག་འདི་ལ་རྫོགས། །དོན་ལས་མི་འདའི་དོན་བསྲུངས་པས། །དམ་ཚིག་མཐའ་དག་འདི་ལ་རྫོགས། །དུག་ལྔ་རང་རྒྱུད་ངན་ཐུལ་བས། །འདུལ་ཁྲིམས་མཐའ་དག་འདི་ལ་རྫོགས། །བྱར་མེད་སྤྲོས་བྲལ་ཆོས་ཉིད་ངང་ལ་རྫོགས། །སྤྱོད་པའི་བྱ་བཙལ་མཐའ་དག་རྫོགས། །སྙིང་པོའི་དོན་ལ་འདུ་འཕྲོ་མེད། །འཕྲོ་འདུ་མ་ལུས་དེ་ལ་རྫོགས། །སྐྱེ་མེད་ངང་ལ་བསྐྱེད་ ― DNG002_Page_0483 ―
[མ་དཔེ་གཟིགས་ན་འདིར་གནོན།]
དུ་མེད། །བསྐྱེད་རིམ་མ་ལུས་འདི་ལ་རྫོགས། །སྙིང་པོ་དོན་གྱི་ལྷ་ཚོགས་ཉིད། །ལྷ་ཚོགས་མ་ལུས་འདི་ལ་རྫོགས། །བསྐྱེད་མེད་འགྱུར་མེད་ཡི་དམ་ལྷ། །ཡི་དམ་ལྷ་ཚོགས་འདི་ལ་རྫོགས། །མི་འགྱུར་གདལ་ཁྱབ་མ་འདྲེས་གསལ། །དཀྱིལ་འཁོར་མ་ལུས་འདི་ལ་རྫོགས། །ཕྱི་ནང་དབྱེ་བསལ་མེད་གཏོང་ལ། །གཏོར་མ་མ་ལུས་འདི་ལ་རྫོགས། །རང་གི་ལྷར་ནི་རང་མཆོད་པས། །མཆོད་པ་མ་ལུས་འདི་ལ་རྫོགས། །བྱར་མེད་བཙལ་མེད་དགག་བསྒྲུབ་མེད། །ཕྲིན་ལས་མ་ལུས་འདི་ལ་རྫོགས། །བགྲོད་མེད་སྦྱང་མེད་སྙིང་པོའི་ཀློང་། །ས་ལམ་མ་ལུས་འདི་ལ་རྫོགས། །ཡེ་ནས་ཡིན་པའི་དོན་རྟོགས་ན། །ཐམས་ཅད་མ་ལུས་འདི་ལ་རྫོགས། །རྒྱུ་ལ་མ་བརྟེན་འབྲས་བུའི་མཆོག །ཚོགས་ལམ་བགྲོད་དུ་མེད་པར་རྫོགས། །ཚིག་གསུམ་ཆད། བསྒོམ་ལམ་བགྲོད་དུ་མེད་པར་རྫོགས། །འདི་ཞེས་བྱ་བའི་མཐའ་ལས་འདས། །མཐོང་ལམ་བགྲོད་དུ་མེད་པར་རྫོགས། །དབུས་མཐའ་གཉིས་མེད་དེ་བཞིན་ཉིད། །མཐར་ཕྱིན་བགྲོད་དུ་མེད་པར་རྫོགས། །བགྲོད་དུ་མེད་པའི་ལམ་ལྔ་རྫོགས། །བླ་མེད་སྤྱི་ཏི་འདི་ཉིད་ནི། །ཤེས་པ་མེད་པས་ཤེས་རབ་མཆོག །སྙིང་རྗེ་མེད་པའི་ལམ་ལས་འདས། །གང་ཡང་མ་བཙལ་ལྷུན་གྲུབ་པས། །ས་བཅུ་ཐེག་པ་རིམ་དགུ་རྫོགས། །བླ་མེད་རྫོགས་ཆེན་འདི་ཉིད་ནི། །འཛིན་ཅིང་ཆགས་པ་མི་འབྱུང་བས། །སྦྱིན་པའི་ཕ་རོལ་ཕྱིན་པ་རྫོགས། །འདི་ལ་ཀུན་འབྱུང་སྡུག་བསྔལ་མེད། །ཚུལ་ཁྲིམས་ཕ་རོལ་ཕྱིན་པ་རྫོགས། །འདི་ལ་བདེ་སྡུག་བྱུང་ཚོར་མེད། །བཟོད་པའི་ཕ་རོལ་ཕྱིན་པ་རྫོགས། །འདི་ལ་ལེ་ལོ་བཏང་སྙོམས་མེད། །བརྩོན་འགྲུས་ཕ་རོལ་ཕྱིན་པ་རྫོགས། །འདི་ལ་འགྱུར་ཞིང་ལྡོག་ཏུ་མེད། །བསམ་གཏན་ཕ་རོལ་ཕྱིན་པ་རྫོགས། །འདི་ལ་ལྟུང་བའི་གཡང་ས་མེད། །སྟོབས་ཀྱི་ཕ་རོལ་ཕྱིན་པ་རྫོགས། །འདི་ལ་ཉོན་མོངས་སྡུག་བསྔལ་མེད། །ཤེས་རབ་ཕ་རོལ་ཕྱིན་པ་རྫོགས། །འདི་ལ་རེ་དོགས་གཉིས་མེད་དེ། །སྨོན་ ― DNG002_Page_0484 ―
[མ་དཔེ་གཟིགས་ན་འདིར་གནོན།]
ལམ་ཕ་རོལ་ཕྱིན་པ་རྫོགས། །འདི་ལ་འཁོར་ཞིང་ཆགས་སུ་མེད། །ཐབས་ཀྱི་ཕ་རོལ་ཕྱིན་པ་རྫོགས། །འདི་ལ་ཡེ་ནས་འཁྲུལ་པ་མེད། །ཡེ་ཤེས་ཕ་རོལ་ཕྱིན་པ་རྫོགས། །སྤྱི་ཏིའི་ནང་དུ་ཀུན་རྫོགས་པས། །འབྱུང་བ་ནམ་མཁའི་མཁའ་ཀློང་དུ། །ཉི་ཟླ་གཟའ་སྐར་ཡོངས་སུ་རྫོགས། །འབྱུང་བ་ཆེན་པོ་ནམ་མཁའ་རུ། །འབྱུང་ཆེན་བཞི་པོ་ཡོངས་སུ་རྫོགས། །ཕྱི་ཡི་རྒྱ་མཚོ་ཆེན་པོ་རུ། །ཆུ་བྲན་མ་ལུས་ཡོངས་སུ་རྫོགས། །དབུས་ཀྱི་རི་བོ་མཆོག་རབ་ལ། །རྩི་ཤིང་ནགས་ཚལ་ཡོངས་སུ་རྫོགས། །དཀྱིལ་འཁོར་ཆེན་པོའི་ནང་དུ་ནི། །ས་ཚོན་སྣ་ལྔ་ཡོངས་སུ་རྫོགས། །ཟ་འོག་སྣམ་བུའི་ནང་དུ་ནི། །དར་སྣ་རྣམ་ལྔ་ཡོངས་སུ་རྫོགས། །མཁའ་ལ་འཇའ་ཚོན་གསལ་བའི་ཚེ། །ཁ་དོག་རྣམ་ལྔ་ཡོངས་སུ་རྫོགས། །ནམ་མཁའ་ཕྱི་ཡི་རྒྱ་མཚོ་རུ། །གླིང་བཞི་གླིང་ཕྲན་མ་ལུས་ཡོངས་སུ་རྫོགས། །རིན་པོ་ཆེའི་ནང་དུ་རིན་པོ་ཆེ་སྣ་ལྔ་ཡོངས་སུ་རྫོགས། །ས་གཞི་ཀུན་ཁྱབ་ཡོངས་སུ་གདལ་བ་རུ། །སྐྱེ་འགྲོ་རྩི་ཤིང་ནགས་ཚལ་མ་ལུས་རྫོགས། །ཀུན་གཞི་གདལ་ཁྱབ་མཁའ་ཀློང་དུ། །སེམས་ལ་འཕྲོས་སྐྱེས་ཡོངས་སུ་རྫོགས། །རྫོགས་ཆེན་སྤྱི་ཏི་ཡོ་ག་རུ། །ཐེག་པ་མ་ལུས་མཐའ་དག་རྫོགས། །གཅིག་རྫོགས་གཉིས་རྫོགས་ཐམས་ཅད་རྫོགས། །ཡོད་མཐའ་རྫོགས་ལ་མེད་མཐའ་རྫོགས། །སྣང་བ་རྫོགས་ལ་སྟོང་པ་རྫོགས། །རྟག་པ་རྫོགས་ལ་ཆད་པ་རྫོགས། །མ་རིག་རྫོགས་ལ་ཡེ་ཤེས་རྫོགས། །འཆར་སྒོ་རྫོགས་ལ་འཁྲུལ་སྒོ་རྫོགས། །སེམས་ཅན་རྫོགས་ལ་སངས་རྒྱས་རྫོགས། །འཁོར་བ་རྫོགས་ལ་མྱང་འདས་རྫོགས། །བཟང་པོ་རྫོགས་ལ་ངན་པ་རྫོགས། །དགག་བྱ་རྫོགས་ལ་བསྒྲུབ་བྱ་རྫོགས། །འཛིན་ཆགས་རྫོགས་ལ་འཛིན་མེད་རྫོགས། །གཉིས་འཛིན་རྫོགས་ལ་གཉིས་མེད་རྫོགས། །སྐུ་ལྔ་རྫོགས་ལ་རིགས་དྲུག་རྫོགས། །བདེ་བ་རྫོགས་ལ་སྡུག་བསྔལ་རྫོགས། །རྫོགས་དང་མ་རྫོགས་གཉིས་ཀྱང་རྫོགས། ། ― DNG002_Page_0485 ―
[མ་དཔེ་གཟིགས་ན་འདིར་གནོན།]
ང་ཡི་སྤྱི་ཏི་ཡོ་ག་འདིར། །བརྗོད་ཚད་མནོས་ཚད་ང་ལ་རྫོགས། །སྐྱེས་ཚད་འཁོར་ཚད་ང་ལ་རྫོགས། །རྟོགས་ཚད་འཁྲུལ་ཚད་ང་ལ་རྫོགས། །འགྱུས་ཚད་དྲན་ཚད་ང་ལ་རྫོགས། །ཕྱེད་ཚད་གཉིས་སྣང་ང་ལ་རྫོགས། །སྣང་ཚད་བརྟགས་ཚད་ང་ལ་རྫོགས། །བརྟགས་བཟུང་ཞེན་ཆགས་ང་ལ་རྫོགས། །སངས་རྒྱས་སྐུ་དང་ཡེ་ཤེས་རྫོགས། །སེམས་དང་ལུས་དང་བག་ཆགས་རྫོགས། །བལྟ་བྱ་བསྒོམ་བྱ་འབྲས་བུ་རྫོགས། །བལྟར་མེད་བསྒོམ་མེད་སྤྱོད་མེད་རྫོགས། །བཙལ་བྱ་བགྲོད་བྱ་མཐའ་དག་རྫོགས། །བསྲུང་མེད་བཙལ་མེད་བགྲོད་མེད་སྦྱང་མེད་རྫོགས།། །།ཐམས་ཅད་རྫོགས་པའི་སྤྱི་ཏི་ཡོ་ག་ནི། །ཅི་ཡང་མ་བསྒྲུབས་ཅི་ཡང་མ་སྤངས་པའི། །ཕྱོགས་སུ་མ་ལྷུང་མཐའ་རུ་མ་རེག་པའོ། །ཀུན་དང་མཐུན་ལ་ཀུན་ལ་ཁྱབ་པས་ཁྱད་པར་འཕགས། །ཅི་ཡང་མ་ཡིན་བྱང་ཆུབ་སེམས། །གཞི་ནི་མ་བཅོས་ལྷུན་གྱིས་གྲུབ། །ཐ་མལ་རང་ལུགས་རང་དྭངས་པས། །སྙིང་པོ་ལྷུན་གྲུབ་ཆོས་སྐུར་གནས་པའོ། །ཅི་ཡང་མེད་ལ་ཅི་ཡང་བྱུང་། །བྱུང་ཡང་སེམས་ལས་བྱུང་ལ་སེམས་ལ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སྣ་ཚོགས་སེམས་ལ་བཀོད་ནས་སྤྱི་ཏི་རྫོགས་ལུགས་ཡོངས་སུ་བཀོད་པའི་ལེའུ་སྟེ་ཞེ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་ཀུན་ཏུ་བཟང་པོ་ལ། །སྤྱི་ཏིའི་རང་བཞིན་ཅི་ལྟར་ལགས། །ཞེས་ཞུས་པ་དང་། དེ་ནས་ཀུན་ཏུ་བཟང་པོས། འོད་ཟེར་རྩིས་གདབ་མེད་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་རྣམས་ལ་འདི་སྐད་གསུངས་སོ། །ཨ་ཐ་པ་ཏ་རི། ཀང་ཀ །ཀཱ་ཡ་སིདྡྷི་ཨཱཿང་ཡི་སྤྱི་ཏི་ཡོ་ག་འདི། །དཔེ་དོན་རྟགས་དང་རྣམ་པ་གསུམ། །དཔེ་ནི་ནམ་མཁའ་དང་འདྲ་སྟེ། །ཆོས་ཉིད་ཐོགས་མེད་གསལ་བའི་ནམ་མཁའ་ལ། །དངོས་པོ་ཡེ་ནས་མེད་པ་ལ། །དངོས་མེད་ཉིད་རང་སྣ་ཚོགས་པའོ། །བརྗོད་གཞིའི་སྒོ་ནས་སྣ་ཚོགས་ ― DNG002_Page_0486 ―
[མ་དཔེ་གཟིགས་ན་འདིར་གནོན།]
མཚོན། །དེ་བཞིན་ཆོས་ཉིད་ནམ་མཁའ་ལ། །བསྟོད་ར་བཏང་བས་བཟང་མི་འགྱུར། །སྨད་ར་བཏང་བས་ངན་མི་འགྱུར། །བསྟོད་ར་སྨད་ར་གཉིས་ལས་གྲོལ། །མཐའ་དབུས་མི་མངའ་ཁ་དོག་མེད། །དགག་བསྒྲུབ་མི་མངའ་སྤང་ལེན་མེད། །བཟང་ངན་མི་མངའ་བླང་དོར་མེད། །ཡུལ་སེམས་མི་མངའ་རྩིས་གདབ་མེད། །འཁོར་འདས་མི་མངའ་དབྱེ་བསལ་མེད། །དེ་བཞིན་སེམས་ཉིད་ནམ་མཁའ་ཡང་། །དངོས་མེད་མཚོན་མེད་བརྗོད་ལས་འདས། །གཞི་མེད་རླུང་མེད་འགྱུ་བ་མེད། །ཁ་དོག་མི་མངའ་དབྱིབས་ལས་འདས། །ཕོ་མོ་མ་ཡིན་མ་ནིང་མིན། །ཕོ་མོ་མ་ནིང་གཉིས་ལས་གྲོལ། །སེམས་ཉིད་མ་ཡིན་རང་བཞིན་ནི། །ཚད་མེད་ཚད་དུ་ཟུག་པ་མེད། །སྣང་མེད་བརྟག་མེད་ཡིད་རྟོག་མེད། །དབྱིབས་མེད་དབྱིབས་སུ་འཛིན་ལས་འདས། །ཕྱོགས་མེད་ཕྱོགས་སུ་འཛིན་ལས་འདས། །སྒྲ་མེད་གྲངས་མེད་མིང་ལས་འདས། །མཚོན་དུ་མེད་པས་མཚོན་ལས་འདས། །དཔག་ཏུ་མེད་པས་གཞི་ལས་འདས། །འཕེལ་བ་མེད་པས་འགྲིབ་ལས་འདས། །རྒྱུ་མེད་རྐྱེན་མེད་གཉེན་པོ་མེད། །སྐྱེ་རྒས་ན་འཆིའི་ཆུ་བོ་མེད། །ཡུལ་མེད་ཡུལ་ལ་ཆགས་པ་མེད། །གནས་མེད་གནས་ལ་གཏད་འཛིན་མེད། །ཡིད་མེད་འགྱུ་མེད་སེམས་པ་མེད། །གཉིས་མེད་གཉིས་སུ་བརྗོད་ལས་འདས། །ཨ་ལ་པའི་ཐིམ། །ཆོས་ཀྱི་དགོངས་པ་ཐམས་ཅད་གཅིག་ཏུ་འུབ་ཀྱི་བསྡུས། །དོན་གྱི་ཡང་སྙིང་གདམས་ངག་ནི། །ཀུན་གཞི་མེད་པས་ཀུན་གཞི་མིང་ལས་འདས། །ཆོས་སྐུ་མེད་པས་ཆོས་སྐུར་བཟུང་ལས་འདས། །དུག་གསུམ་མེད་པས་སྐུ་གསུམ་བསྒྲུབ་ལས་འདས། །དུག་ལྔ་མེད་པས་སྐུ་ལྔ་ཡེ་ཤེས་ལྔ་ནི་བསྒྲུབ་ལས་འདས། །མ་རིག་མེད་པས་ཡེ་ཤེས་བསྒྲུབ་ལས་འདས། །འཁྲུལ་སྒོ་མེད་པས་འཆར་སྒོ་བསྒྲུབ་ལས་འདས། །སེམས་ཅན་སྤང་དུ་མེད་པས་མྱང་འདས་བསྒྲུབ་ཏུ་མེད། །བློ་ཡིས་བཅོས་སུ་མེད་པས་བློ་ལས་འདས་པ་ཡིན། །ཡིད་ལ་བྱ་རུ་མེད་པས་བྱ་བའི་ཡུལ་ ― DNG002_Page_0487 ―
[མ་དཔེ་གཟིགས་ན་འདིར་གནོན།]
ལས་འདས་པ་ཡིན། །སེམས་ཀྱིས་བསམ་དུ་མེད་པས་བསམ་པའི་ཡུལ་ལས་འདས་པ་ཡིན། བླ་དྭགས་ཀྱི་ཚིག་གིས་གདགས་སུ་མེད་པས་མིང་འདོགས་བརྟགས་ཞེན་ལས་འདས་པ་ཡིན། ཇི་ལྟ་བུས་ཀྱང་གཏན་ལ་དབབ་དུ་མེད། དབབ་པ་དང་ཕེབས་པ་ལས་འདས་པ་ཡིན། དེ་ཅིའི་ཕྱིར་ཞེ་ན། འགྱུ་ཚད། སྤྲོས་ཚད། ཕྱེ་ཚད། བརྟགས་ཚད། བཟུང་ཚད། བརྗོད་ཚད། བསམ་ཚད། དྲན་ཚད། རིག་ཚད། ཚོར་ཚད། བརྟགས་ཞེན་གཉིས་སྣང་། ཆགས་ཞེན་ཡུལ་སེམས། དེ་དག་ཐམས་ཅད་ཀུན་རང་གི་སེམས་ཡིན་ནོ། །སེམས་ཅི་ཡང་མ་ཡིན་པའོ། མ་ཡིན་པ་དེ་རང་རང་སངས། རང་དངས། རང་འགྱུར། རང་གདངས། མཁའ་གསལ། གཏིང་གསལ། རང་ཆུབ། རང་རྒྱས། ཐ་མལ་རང་ལུགས་མ་བཅོས་ཤིང་། རང་བབ་ལྷུག་པ་བསྒྲུབ་རྩོལ་དང་བྲལ་བར་གནས་པ་ནི། ཀུན་བཟང་རྒྱལ་བའི་དགོངས་པའོ། །སྙིང་པོའི་ནང་ན་གནས་པའོ། །སྐྱེ་མེད་རང་གནས་བརྗོད་མེད་ངང་ལ་ཐིམ། ཞེས་གསུངས་སོ། །བདུད་རྩི་ཡང་ཞུན། བདུད་རྩི་ཐིགས་པའི་ལེའུ་སྟེ། སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བདུད་རྩི་ཡང་ཞུན་དངོས་བསྟན་པའི་ལེའུ་སྟེ་ཞེ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ངེས་པ་རྣམ་བཞི་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་འདི་སྐད་གསུངས། །བལྟ་བ་འགྱུར་བ་མེད་པར་ངེས། །བསྒོམ་པ་གཡོས་པ་མེད་པར་ངེས། །སྤྱོད་པ་ཆགས་ཞེན་མེད་པར་ངེས། །འབྲས་བུ་རེ་དོགས་མེད་པར་ངེས། །དེ་ནི་ངེས་པ་རྣམ་བཞིའོ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ངེས་པ་རྣམ་བཞིའི་ལེའུ་སྟེ་ལྔ་བཅུ་ཐམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ ― DNG002_Page_0488 ―
[མ་དཔེ་གཟིགས་ན་འདིར་གནོན།]
ལ་འདི་སྐད་ཞུས། །མེད་པ་རྣམ་གསུམ་ཇི་ལྟར་ལགས། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས། །ལྟ་བའི་ཕུགས་སུ་གཞུང་མེད་ཞེ་འདོད་མེད། །ཡིད་ལ་འགྱུར་མེད་བསྒོམ་བྱ་མེད། །ཉམས་ལས་སྐྱེ་མེད་འགག་པ་མེད། །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མེད་པ་རྣམ་གསུམ་བསྟན་པའི་ལེའུ་སྟེ་ང་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཡིན་པ་རྣམ་དགུ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་འདི་སྐད་གསུངས། །ལྟ་བ་ཡིན་པ་མེད་པ་ཡིན། །བསྒོམ་པ་ཡེངས་པ་མེད་པ་ཡིན། །སྤྱོད་པ་ངེས་པ་མེད་པ་ཡིན། །དམ་ཚིག་བསྲུང་དུ་མེད་པ་ཡིན། །ཕྲིན་ལས་བརྩམ་དུ་མེད་པ་ཡིན། །ལམ་ལ་བགྲོད་དུ་མེད་པ་ཡིན། །ས་ལ་སྦྱང་དུ་མེད་པ་ཡིན། །མན་ངག་ཞེན་འཛིན་མེད་པ་ཡིན། །འབྲས་བུ་བསྒྲུབ་ཏུ་མེད་པ་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཡིན་པ་རྣམ་པ་དགུའི་ལེའུ་སྟེ་ང་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མེད་པ་རྣམ་དགུ་ཇི་ལྟར་ལགས། །ཞེས་ཞུས་པ་དང་། སེམས་ཉིད་སྟོན་པ་ཀུན་བཟང་གིས། །འདུས་པའི་འཁོར་ལ་འདི་སྐད་གསུངས། །རྡོ་རྗེ་སེམས་དཔའ་ཡིད་ལ་ཟུང་། །སེམས་ལ་ཡེ་ནས་དངོས་པོ་མེད། །སེམས་ལ་ཡེ་ནས་མཚོན་དུ་མེད། །སེམས་ལ་ཡེ་ནས་དམིགས་སུ་མེད། །སེམས་ལ་ཡེ་ནས་ཁ་དོག་མེད། །སེམས་ལ་ཡེ་ནས་བརྗོད་དུ་མེད། །སེམས་ལ་ཡེ་ནས་ཡི་གེ་མེད། །སེམས་ཉིད་ཡེ་ནས་བརྟགས་པ་མེད། །སེམས་ཉིད་ཡེ་ནས་བསམ་དུ་མེད། །སེམས་ཉིད་ཡེ་ནས་བྱ་རུ་མེད། །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ ― DNG002_Page_0489 ―
[མ་དཔེ་གཟིགས་ན་འདིར་གནོན།]
ཐོག་མཐའ་གཅོད་པའི་རྒྱུད་ལས། མེད་པ་རྣམ་དགུ་བསྟན་པའི་ལེའུ་སྟེ་ང་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །འགྱུར་མེད་རྣམ་དྲུག་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །འཕོ་འགྱུར་མེད་པས་ཆོས་ཉིད་འགྱུར་བ་མེད། །སྐྱེ་ཤི་མེད་པས་ཆོས་ཉིད་འགྱུར་བ་མེད། །སྐྱེ་འགག་མེད་པས་ཆོས་ཉིད་འགྱུར་བ་མེད། །བསམ་ལས་འདས་པས་ཆོས་ཉིད་འགྱུར་བ་མེད། །དམིགས་ལས་འདས་པས་ཆོས་ཉིད་འགྱུར་བ་མེད། །བློ་ལས་འདས་པས་ཆོས་ཉིད་འགྱུར་བ་མེད། །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། འགྱུར་མེད་དྲུག་བསྟན་པའི་ལེའུ་སྟེ་ང་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཆོས་སྐུ་གཅེར་མཐོང་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །གཡོ་འགུལ་དྲན་རྟོག་ཀུན་སངས་པས། །དམིགས་མེད་བསམ་མེད་ཆོས་སྐུ་གཅེར་གྱིས་མཐོང་། །ལུས་ཀྱིས་ཅིར་ཡང་བྱར་མེད་པས། །རྩོལ་མེད་ཆོས་སྐུ་གཅེར་གྱིས་མཐོང་། །ངག་གིས་སྨྲ་བརྗོད་རྒྱུ་མེད་པས། །བརྗོད་མེད་ཆོས་སྐུ་གཅེར་གྱིས་མཐོང་། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཆོས་སྐུ་གཅེར་མཐོང་མཛུབ་ཚུགས་བསྟན་པའི་ལེའུ་སྟེ་ང་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །གདེང་ཟིན་རྣམ་དགུ་ཇི་ལྟར་འོག་ལ་བཅུ་བཞི་དང་ལེའུར་བཅོ་ལྔ་བྱུང་ལགས། །ཞེས་ཞུས་པ་དང་། །སྟོན་པས་འཁོར་ལ་བཀའ་སྩལ་པ། །ལྟ་བ་ཚིག་ལས་འདས་པས་གསལ་གདངས་གདེང་གིས་ཟིན། །བསྒོམ་པ་བསམ་ལས་འདས་པས་འགྱུར་མེད་གདེང་གིས་ཟིན། །བྱར་མེད་རྩོལ་བསྒྲུབ་འདས་པས་བྱར་མེད་གདེང་གིས་ཟིན། ། ― DNG002_Page_0490 ―
[མ་དཔེ་གཟིགས་ན་འདིར་གནོན།]
རྟོགས་པའི་དོན་ལས་མི་འདའ་དམ་ཚིག་གདེང་གིས་ཟིན། །བཙལ་དུ་ཡེ་མེད་ཕྲིན་ལས་གདེང་གིས་ཟིན། །སྤྱད་དུ་ཡེ་མེད་པ་ཡི་གདེང་གིས་ཟིན། །བགྲོད་དུ་ཡེ་མེད་ལམ་གྱི་གདེང་གིས་ཟིན། །བསྒྲུབ་ཏུ་ཡེ་མེད་བསྒྲུབ་མེད་གདེང་གིས་ཟིན། །བཟུང་དུ་ཡེ་མེད་མན་ངག་གདེང་གིས་ཟིན། །དབྱེ་བ་མེད་པས་ཤེས་རབ་གདེང་གིས་ཟིན། །ཐོབ་ཏུ་མེད་པས་འབྲས་བུའི་གདེང་གིས་ཟིན། །འཛིན་པ་མེད་པས་ཐེག་པའི་གདེང་གིས་ཟིན། །རང་བཞིན་བཞག་པས་ཏིང་འཛིན་གདེང་གིས་ཟིན། །གཞན་ལ་མི་སྨོན་སྤྱི་ཏིའི་གདེང་གིས་ཟིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། གདེང་ཟིན་བཅུ་བཞི་བསྟན་པའི་ལེའུ་སྟེ་ང་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །བཞག་པ་རྣམ་དྲུག་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གནས་ལུགས་རང་གནས་ཉིད་དུ་བཞག །སྣང་བ་རང་སོ་ཉིད་དུ་བཞག །སྣང་སེམས་དབྱེར་མེད་ཉིད་དུ་བཞག །སྒོ་ལྔ་འཁྲུལ་སྣང་ཡིན་པར་བཞག །ཡིད་གཉིས་འཛིན་པ་མེད་པར་བཞག །སྤྲོས་ཆོད་རྩིས་གདབ་མེད་པར་བཞག །ཅེས་གསུངས་སོ། སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བཞག་པ་རྣམ་པ་དྲུག་བསྟན་པའི་ལེའུ་སྟེ་ང་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །བདེ་གཤེགས་བཀའ་ཡི་དགོངས་འདུས་ཇི་ལྟར་ལགས། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས། །ཐེག་པ་བརྒྱད་ཁྲི་བཞི་སྟོང་དགོངས་པ་གཅིག་ཏུ་འདུས། །རྡོ་རྗེ་སེམས་དཔས་གོ་བར་ཟུང་། །དུས་གསུམ་རྒྱལ་བའི་དགོངས་འདུས་པ། །བརྗོད་མེད་ངང་དུ་འུབ་ཀྱིས་འདུས། །སངས་རྒྱས་རྣམས་ཀྱི་དགོངས་འདུས་པ། །སྐྱེ་བ་མེད་པར་འུབ་ཀྱིས་འདུས། ། ― DNG002_Page_0491 ―
[མ་དཔེ་གཟིགས་ན་འདིར་གནོན།]
ཆོས་ཉིད་དོན་གྱི་དགོངས་འདུས་པ། །འགྱུར་བ་མེད་པར་འུབ་ཀྱིས་འདུས། །དམ་ཆོས་རྣམས་ཀྱི་དགོངས་འདུས་པ། །ཆགས་འཛིན་མེད་པར་འུབ་ཀྱིས་འདུས། །མན་ངག་རྣམས་ཀྱི་དགོངས་འདུས་པ། །ཞེན་འཛིན་མེད་པར་འུབ་ཀྱིས་འདུས། །རྣལ་འབྱོར་རྣམས་ཀྱི་དགོངས་འདུས་པ། །གཟུང་འཛིན་མེད་པར་འུབ་ཀྱིས་འདུས། །བཀའ་རྒྱུད་རྣམས་ཀྱི་དགོངས་འདུས་པ། །རྒྱུད་སེམས་གཉིས་སུ་མེད་པ་ཡི། །ཆོས་དང་སེམས་འདྲེས་ངང་དུ་འདུས། །ཆོས་སྤྱོད་རྣམས་ཀྱི་དགོངས་འདུས་པ། །ཆོས་ཉིད་ཀློང་ནས་སྙིང་རྗེར་ལྡན། །འབད་རྩོལ་བྱར་མེད་ངང་དུ་འདུས། །ལྟ་བ་རྣམས་ཀྱི་དགོངས་འདུས་པ། །ཞེ་འདོད་མེད་པར་འུབ་ཀྱིས་འདུས། །སྒོམ་པ་རྣམས་ཀྱི་དགོངས་འདུས་པ། །ཞེན་མེད་གཡོ་མེད་ངང་དུ་འདུས། །སྤྱོད་པ་རྣམས་ཀྱི་དགོངས་འདུས་པ། །ཆགས་མེད་ངེས་མེད་བྱར་མེད་ངང་དུ་འདུས། །འབྲས་བུ་རྣམས་ཀྱི་དགོངས་འདུས་པ། །རེ་མེད་དོགས་མེད་ཡིད་སྨོན་མེད་པའི་ངང་དུ་འདུས། །དགོངས་པ་ཐམས་ཅད་གཅིག་ཏུ་འདུས། །གཅིག་པོ་སེམས་ཉིད་ངང་དུ་འདུས། །སེམས་ཉིད་དངོས་པོ་མེད་པར་འདུས། །དངོས་མེད་དམིགས་མེད་ངང་དུ་འདུས། །སྨྲ་བསམ་བརྗོད་འདས་ངང་དུ་འདུས། །སྐྱེ་མེད་ངང་དུ་འུབ་ཀྱིས་འདུས། །བརྗོད་མེད་ངང་དུ་འུབ་ཀྱིས་འདུས། །འགྱུར་མེད་ངང་དུ་ཡོད་ཚད་ཐིམ། །ཐིམ་པ་གང་ཡིན་ཆོས་སྐུ་ཡིན། །ཆོས་སྐུ་རང་ཡང་མཚན་ལས་འདས། །འདས་པའི་དོན་ལ་སྨྲ་རྒྱུ་མེད། །འདས་པའི་དོན་ལ་མིང་འདོགས་མེད། །འདས་པའི་དོན་ལ་འདོད་རྒྱུ་མེད། །འདོད་བྱ་གང་ཡང་མ་འགགས་ལ། །འདོད་རྒྱུ་ཅི་ཡང་མི་དམིགས་སོ། །ཇི་ལྟར་སྣང་ཡང་འདོད་ཞེན་མེད། །ཡང་དག་དོན་ལ་ཡི་གེ་མེད། །མེད་པ་དེ་ལ་མཚོན་པ་མེད། །མེད་པ་དེ་ལ་བརྟག་པ་མེད། །མེད་པ་དེ་ལ་དབྱེ་བ་མེད། །མེད་པ་དེ་ལ་གཉིས་སུ་མེད། །མེད་པ་དེ་ལ་འབད་པ་མེད། །མེད་པ་དེ་ལ་སྤང་ལེན་མེད། །མེད་པ་དེ་ལ་དགག་བསྒྲུབ་མེད། །མེད་པ་དེ་ལ་དབྱེ་བསལ་མེད། །མེད་པ་ ― DNG002_Page_0492 ―
[མ་དཔེ་གཟིགས་ན་འདིར་གནོན།]
དེ་ལ་རྩིས་གདབ་མེད། །ཇི་ལྟར་སྣང་ཡང་མ་འགགས་པ། །འཛིན་པ་མེད་པས་མི་དམིགས་སོ། །ཡོད་པ་རྒྱ་ཆད་མེད་པ་ཡིན། །མེད་པ་ཕྱོགས་ལྷུང་མེད་པ་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། དགོངས་པ་ཐམས་ཅད་གཅིག་ཏུ་འུབ་ཀྱིས་བསྡུས་པའི་ལེའུ་སྟེ་ང་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སངས་རྒྱས་མཛུབ་བཙུགས་ཇི་ལྟར་ལགས། །ཞེས་གསོལ་པ་དང་། དེ་ནས་སྟོན་པས་འཁོར་ལ་འདི་སྐད་གསུངས། །སངས་རྒྱས་ཡེ་ནས་སེམས་ལ་གྲུབ། །གྲུབ་ཟིན་དོན་ལ་མ་ཡེངས་ན། །གཞན་ནས་སངས་རྒྱས་བཙལ་མི་དགོས། །ཆོས་རྣམས་ཐམས་ཅད་སེམས་ལ་འདུས། །སེམས་ལས་མ་བསམས་སངས་རྒྱས་ཡིན། །ཆོས་རྣམས་ཐམས་ཅད་སེམས་ལས་གྲུབ། །སེམས་ཉིད་འདུས་མ་བྱས་པ་སངས་རྒྱས་ཡིན། །ཆོས་རྣམས་ཐམས་ཅད་སེམས་ལ་འདུས། །སེམས་ཉིད་དབྱེར་མེད་སངས་རྒྱས་ཡིན། །ཆོས་རྣམས་ཐམས་ཅད་སེམས་ལ་འདུས། །སེམས་ཉིད་གཡོ་མེད་སངས་རྒྱས་ཡིན། །ཆོས་རྣམས་ཐམས་ཅད་སེམས་ལ་འདུས། །སེམས་ཉིད་འགྱུར་མེད་སངས་རྒྱས་ཡིན། །ཆོས་རྣམས་ཐམས་ཅད་སེམས་ལ་འདུས། །སེམས་ཉིད་སྐྱེ་མེད་སངས་རྒྱས་ཡིན། །ཆོས་རྣམས་ཐམས་ཅད་སེམས་ལ་འདུས། །སེམས་ཉིད་བརྗོད་མེད་སངས་རྒྱས་ཡིན། །ཆོས་རྣམས་ཐམས་ཅད་སེམས་ལ་འདུས། །སེམས་ཉིད་བསྒྲུབ་མེད་སངས་རྒྱས་ཡིན། །གཡོ་རྩོལ་དགག་བསྒྲུབ་བྱ་བཙལ་སངས། །མ་བཅོས་བྱར་མེད་སྤྲོས་བྲལ་རྒྱས། །མ་བསམས་མ་བཅོས་མ་བསླད་ན། །ཡེ་ནས་སངས་རྒྱས་ཡིན་པར་གསུངས། །ཡིད་སྤྱོད་སེམས་ཀྱི་དྲན་རྟོག་མཚོན་པ་སངས། །རིག་དང་ཡིད་ཀྱིས་སེམས་པ་མེད་པར་རྒྱས། །ཆགས་མེད་ཞེན་མེད་འཛིན་པ་ཐམས་ཅད་སངས། །བསམ་མེད་འགྱུས་མེད་བདེ་ཆེན་ཀློང་དུ་རྒྱས། ། ― DNG002_Page_0493 ―
[མ་དཔེ་གཟིགས་ན་འདིར་གནོན།]
སེམས་ཀྱི་འབད་རྩོལ་བློ་ཡིས་བཅོས་ཐབས་སངས། །གཞི་གནས་མ་བཅོས་བྱར་མེད་སྤྲོས་བྲལ་རྒྱས། །སྣང་སྲིད་སེམས་ལ་འདུས་པས་སངས་རྒྱས་མཛུབ་བཙུགས་ཡིན། །དཔེ་ནི་ནམ་མཁར་གནས་པའི་བྱ། །ནམ་མཁའ་མཐའ་དབུས་ཕྱོགས་མཚམས་མེད། །ཐ་སྙད་ཀུན་ལ་གྲོལ་བར་གནས། །རྟགས་ནི་སེམས་ཉིད་འགག་པ་མེད། །སྣ་ཚོགས་ཅིར་སྣང་རྫོགས་པ་ལ། །མ་སྤངས་མ་བསྒྲུབས་ཆེན་པོ་ལ། །དོན་ནི་ཆོས་ཉིད་སྐྱེ་བ་མེད། །དངོས་མེད་བརྗོད་མེད་དམིགས་མེད་སྙིང་པོའི་ཀློང་ན་གནས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སངས་རྒྱས་མཛུབ་བཙུགས་གཅེར་མཐོང་དུ་བསྟན་པའི་ལེའུ་སྟེ་ང་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །དེ་ལྟར་གྱུར་ན་ཅི་བྱས་ལྟོ་མི་ལྟོ། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས། །སྙིང་པོ་མ་ལ་མཚན་ཉིད་བུ་ཐིམ་པས། །མ་བུ་ངོ་སྤྲད་དབྱེར་མེད་ཆོས་སྐུ་ཐོབ། །དེ་ཐོབ་བརྟན་པས་ཅི་བྱས་ཆོས་ཀྱི་ཀློང་། །ཡོན་ཏན་དཔག་མེད་སངས་རྒྱས་ཏེ། །འགྲོ་ཡང་མི་ལྟོ་ཆོས་ཉིད་ཀློང་། །འདུག་ཀྱང་མི་ལྟོ་འགྱུར་མེད་པ། །ཟ་ཡང་མི་ལྟོ་ཏིང་འཛིན་ཟས། །གོན་ཀྱང་མི་ལྟོ་བྱིན་རླབས་གོས། །གདན་ཡང་མི་ལྟོ་མི་འགྱུར་གདན། །སྔས་ཀྱང་མི་ལྟོ་དངོས་མེད་སྔས། །ཉལ་ཡང་མི་ལྟོ་སྙིང་པོའི་ཀློང་། །གཉིད་ཀྱང་མི་ལྟོ་བདེ་ཆེན་ཀློང་། །ནོར་ཡང་མི་ལྟོ་སེམས་ཉིད་ནོར་བུ་རིན་པོ་ཆེ། །ཡུལ་ཡང་མི་ལྟོ་བསམ་མི་ཁྱབ། །ཁྱིམ་ཡང་མི་ལྟོ་མཁའ་ཀློང་རྣམ་དག་ཁྱིམ། །གནས་ཀྱང་མི་ལྟོ་སྙིང་པོ་འགྱུར་མེད་གནས། །མཁར་ཡང་མི་ལྟོ་མ་འགགས་བསམ་གཏན་མཁར། །ཡུལ་ཡང་མི་ལྟོ་གཉིས་མེད་ཡུལ། །བུ་ཡང་མི་ལྟོ་རང་བྱུང་རང་དྭངས་ཡིན། །འཁོར་ཡང་མི་ལྟོ་མ་འགགས་སྐུ་ལྔ་སེམས་ཀྱི་འཁོར། །ཡུལ་ཡང་མི་ལྟོ་ཀུན་གཞི་སྤྱི་ཁྱབ་ཡུལ། །བསྟན་པའི་སྙིང་པོ་ཡང་ཏི་ཡོ་ག་འདི། །ཐེག་པ་ཀུན་གྱི་སྤྱི་ཡི་མེས་པོ་ཡིན་པར་ ― DNG002_Page_0494 ―
[མ་དཔེ་གཟིགས་ན་འདིར་གནོན།]
བཤད། །རིམ་པ་དགུ་ཡི་ཡང་རྩེ་ཡིན་པར་བཤད། །ལྟ་མཁན་རྣམས་ཀྱི་གཤེད་དུ་བཤད། །སྒོམ་མཁན་ཀུན་གྱི་གཉེན་པོར་བཤད། །སྤྱོད་མཁན་ཀུན་གྱི་བདུད་དུ་བཤད། །སྒྲུབ་མཁན་ཀུན་གྱི་ཕྱགས་མར་བཤད། །ཐེག་པའི་རྒྱལ་པོ་སྤྱི་ཏི་འདི། །བདེན་པ་གཉིས་སུ་བལྟ་བས་འདི་མི་མཐོང་། །ཡུལ་སེམས་གཉིས་ཀྱིས་བཅིངས་པས་འདི་མི་མཐོང་། །གཟུང་འཛིན་གཉིས་སུ་བལྟ་བས་འདི་མི་མཐོང་། །དག་པ་རྣམ་གསུམ་སྤྱོད་པས་འདི་མི་མཐོང་། །ལྟ་སྤྱོད་འདྲེལ་པ་མེད་པས་འདི་མི་མཐོང་། །སྐྱེ་འགག་གཉིས་སུ་བལྟ་བས་འདི་མི་མཐོང་། །ཐབས་དང་ཤེས་རབ་བལྟ་བས་འདི་མི་མཐོང་། །དབྱིངས་དང་ཡེ་ཤེས་བལྟ་བས་འདི་མི་མཐོང་། །ཐམས་ཅད་ཆོས་སྐུ་འདོད་པས་འདི་མི་མཐོང་། །རང་ལྟ་མཐོ་སར་ཞེན་པས་འདི་མི་མཐོང་། །གཞན་ལྟ་རྒྱབ་ཀྱིས་ཕྱོགས་པས་འདི་མི་མཐོང་། །གཟུང་འཛིན་གཉིས་ཀྱིས་བཅིངས་པས་འདི་མི་མཐོང་། །དགག་སྒྲུབ་གཉིས་ཀྱིས་བཅིངས་པས་འདི་མི་མཐོང་། །སྤང་ལེན་གཉིས་ཀྱིས་བཅིངས་པས་འདི་མི་མཐོང་། །ཤིན་ཏུ་རྣལ་འབྱོར་མིག་གིས་མཐོང་། །མཐོང་བའི་དུས་ན་ངོས་གཟུང་མེད། །མེད་པའི་དུས་ན་ཅིར་ཡང་སྣང་། །སྣང་བའི་དུས་ན་ངོ་ཤེས་པས། །ཐམས་ཅད་རང་སངས་རང་གྲོལ་གྱུར། །དེ་ལ་གནད་ཀྱི་མན་ངག་དགོས། །ཀུན་བཟང་ཉིད་དང་དབྱེར་མེད་གདམས་ངག་འདི། །རྡོ་རྗེ་སེམས་དཔས་ཡིད་ལ་ཟུང་། །ཡང་ཏི་ཡོ་གའི་གདམས་ངག་འདི། །བདེན་པ་གཉིས་སུ་མི་སྟོན་ཏེ། །ལྷུག་པ་ཆེན་པོའི་གདམས་ངག་བཤད། །བདེན་པ་གཉིས་ནི་སུན་ཕྱུང་ཞིག །ནམ་མཁའི་དབྱིངས་ནས་གདམས་ངག་བཤད། །སྙིང་པོ་རང་དྭངས་རང་བྱུང་ཡིན་ཤེས་ན། །ཡིད་ལ་བྱའོ་མ་སེམས་ཤིག །རང་དྭངས་རང་སངས་ཡིན་ཤེས་ལ། །སེམས་ལ་བསམ་མོ་མ་སེམས་ཤིག །བློ་ཡིས་བཅོས་སོ་མ་སེམས་ཤིག །རང་སེམས་སངས་རྒྱས་ཡིན་ཤེས་ལ། །རིག་པས་མིང་འདོགས་མ་བྱེད་ཅིག །བྱེད་བྱེད་པོ་རུ་ངས་མ་བསྟན། །རྩོལ་རྩོལ་པོ་རུ་ངས་མ་བསྟན། །གཟོ་གཟོ་པོ་རུ་ངས་མ་བསྟན། །འཛིན་འཛིན་པོ་ ― DNG002_Page_0495 ―
[མ་དཔེ་གཟིགས་ན་འདིར་གནོན།]
རུ་ངས་མ་བསྟན། །དམིགས་དམིགས་པོ་རུ་ངས་མ་བསྟན། །བལྟ་བལྟ་པོ་རུ་མ་སེམས་ཤིག །བསྒོམ་བསྒོམ་པོ་རུ་མ་སེམས་ཤིག །སྤྱོད་སྤྱོད་པོ་རུ་མ་སེམས་ཤིག །བསྒྲུབ་བསྒྲུབ་པོ་རུ་མ་བྱེད་ཅིག །བསྲུང་བསྲུང་པོ་རུ་མ་བྱེད་ཅིག །སྤྱོད་བྱ་སྤྱོད་བྱེད་མ་སེམས་ཤིག །བགྲོད་བགྲོད་པོ་རུ་མ་སེམས་ཤིག །བདེ་བདེ་པོ་རུ་མ་སེམས་ཤིག །ཡིན་ཡིན་པོ་རུ་མ་སེམས་ཤིག །ཕྱ་ཕྱ་པོ་རུ་མ་སེམས་ཤིག །གསལ་གསལ་པོ་རུ་མ་སེམས་ཤིག །སེང་སེང་པོ་རུ་མ་སེམས་ཤིག །ཙན་ཙན་པོ་རུ་མ་སེམས་ཤིག །གནས་གནས་པོ་རུ་མ་སེམས་ཤིག །ལྷན་ལྷན་པོ་རུ་མ་སེམས་ཤིག །རེ་རེ་པོ་རུ་མ་སེམས་ཤིག །དོགས་དོགས་པོ་རུ་མ་སེམས་ཤིག །རེ་དོགས་གཉིས་སུ་མ་འཛིན་ཅིག །དགག་བསྒྲུབ་སྤང་ལེན་གཉིས་འཛིན་ཆོས། །ཀུན་ཏུ་བཟང་པོས་མ་བཤད་དོ། །ཆོས་སྐུ་ལོངས་སྐུ་སྤྲུལ་སྐུའམ། །སངས་རྒྱས་ཆོས་དང་སྐུ་ལྔའམ། །ཇི་ལྟ་བུ་ལ་འདོད་རྒྱུ་མེད། །ཡིད་ལ་མི་བྱེད་བྱ་བ་བཏང་། །མི་བྱ་རྩོལ་བའི་ལས་མི་བྱ། །བསམ་མེད་ངང་ནས་འགྱུར་བ་མེད། །སྣང་བྱེད་དབྱེར་མེད་དོན་གྱི་གནས་ལུགས་ལ། །བཅོས་སུ་མེད་པའི་རིག་པ་རང་གནས་བཞག །བསམ་དུ་མེད་པའི་ཆོས་ཉིད་ཀློང་ཡངས་ལ། །བསྒོམ་དུ་མེད་པའི་དྲན་སེམས་རང་དྭངས་རང་སར་བཞག །ཀུན་ཏུ་བཟང་པོས་མ་བསྒོམས་མ་བསམས་ན། །རྡོ་རྗེ་སེམས་དཔས་དེ་ལ་ཅི་ཞིག་བསྒོམ། །བལྟ་རུ་མེད་པས་བལྟ་བ་ཁྱད་པར་འཕགས། །བསྒོམ་དུ་མེད་པས་ཏིང་འཛིན་ཆེན་པོ་ཡིན། །སྤྱད་དུ་མེད་པས་སྤྱོད་པ་ཁྱད་པར་འཕགས། །བསྒྲུབ་ཏུ་མེད་པས་ཆོས་སྐུ་རང་འཁྲུངས་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སྤྱི་ཏིའི་མན་ངག་བདུད་རྩིའི་ཉིང་ཁུ་བསྟན་པའི་ལེའུ་སྟེ་དྲུག་ཅུ་ཐམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རང་སེམས་བླ་མར་བཀོད་པ་ཡི། །དེ་ཡི་བཤད་ལུགས་ཇི་ལྟར་ལགས། ། ― DNG002_Page_0496 ―
[མ་དཔེ་གཟིགས་ན་འདིར་གནོན།]
ཞེས་ཞུས་པ་དང་། དེ་ནས་སྟོན་པ་ཀུན་བཟང་དེས། རིན་པོ་ཆེ་འགྱུར་བ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས་སོ། །སྙིང་པོའི་རང་བཞིན་སྐྱེ་མེད་འགྱུར་མེད་ཀྱང་། །ཡན་ལག་རིག་པའི་རྩལ་གྱིས་བླ་མར་བཤད། །རྡོ་རྗེ་སེམས་དཔས་ཡིད་ལ་ཟུང་། །རང་སེམས་བླ་མར་བཤད་པ་ལ། །དེ་ལ་བླ་མ་རྣམ་པ་དགུ་ཡོད་དེ། །ཡེ་ཐོག་གཞི་ཡི་བླ་མ་དང་། །ཡེ་ཀློང་ཀུན་ཁྱབ་གཉིས་མེད་བླ་མའོ། །ཐེག་ཁྱབ་གཉིས་མེད་བླ་མའོ། །ཐོག་མ་གཞི་ཡི་བླ་མ་དང་། །མ་འགགས་རྩལ་སྣང་བླ་མ་དང་། །གཞི་རྩལ་གཉིས་མེད་བླ་མའོ། །ཀུན་གཞི་ཡོངས་ཁྱབ་བླ་མ་དང་། །ཟེར་རིག་མ་འགགས་བླ་མ་དང་། །ཀུན་རིག་གཉིས་མེད་བླ་མའོ། །ཡེ་ཐོག་གཞི་ཡི་བླ་མ་དེས། །ཚོགས་བརྒྱད་ཡུལ་དུ་མ་གྱུར་པའི། །དམིགས་དང་བྲལ་བའི་ཆོས་རྣམས་སྟོན། །ཡེ་ཀློང་ཀུན་ཁྱབ་བླ་མ་དེས། །ཚིག་གཅིག་ཆད། ཐེག་ཁྱབ་གཉིས་མེད་བླ་མ་དེས། །མ་ཕྱེད་མ་གོལ་ཆོས་རྣམས་བསྟན། །ཐོག་མ་གཞི་ཡི་བླ་མ་དེས། །སྙིང་པོ་འགྱུར་མེད་ཆོས་རྣམས་བསྟན། །མ་འགགས་རྩལ་སྣང་བླ་མ་དེས། །སྐྱེ་འགག་མེད་པའི་ཆོས་རྣམས་བསྟན། །གཤིས་རྩལ་གཉིས་མེད་བླ་མ་དེས། །རྩིས་གདབ་མེད་པའི་ཆོས་རྣམས་བསྟན། །ཀུན་གཞི་སྤྱི་ཁྱབ་བླ་མ་དེས། །ཀུན་གཞི་འབྱུང་གནས་ཡུལ་དུ་བསྟན། །ཟེར་རིག་མ་འགགས་བླ་མ་དེས། །གཞི་ལ་རྒྱ་ཆད་ཕྱོགས་ལྷུང་མེད་པའི་ཆོས་རྣམས་བསྟན། །ཀུན་རིག་གཉིས་མེད་བླ་མ་དེས། །གཞི་ལ་རྩལ་ཐིམ་དབྱེར་མེད་ཐིམ་པར་བསྟན། །སྐྱེ་མེད་སེམས་ཀྱི་བླ་མ་དགུས། །སྙིང་པོ་རྩལ་སྣང་གཉིས་མེད་དགུ། །ཡན་ལག་རིག་པ་དགུ་རུ་བསྟན། །སེམས་ཉིད་གཞི་ཡི་བླ་མའོ། །སྣང་ཚུལ་ཟེར་སྣང་བླ་མ་ལ། །མ་ཧཱ་གུ་རུ་དྲུག་ཏུ་གསུངས། །ཡིད་རིག་འགྱུར་མེད་བླ་མ་དང་། །མ་བཅོས་སེམས་ཉིད་བླ་མ་དང་། །སྐྱེ་མེད་དོན་གྱི་བླ་མ་དང་། །གདལ་ཁྱབ་ཆེན་པོའི་བླ་མ་དང་། །འབྲས་བུ་སེམས་ཀྱི་བླ་མ་དང་། ། ― DNG002_Page_0497 ―
[མ་དཔེ་གཟིགས་ན་འདིར་གནོན།]
བརྡའ་དོན་སྤྲོད་པའི་བླ་མ་དང་། །དེ་ནི་བླ་མ་རྣམ་དྲུག་གོ། །ཡིད་རིག་འགྱུར་མེད་བླ་མ་དེས། །སྐྱེ་མེད་ཆོས་སྐུའི་ངོ་བོ་བསྟན། །མ་བཅོས་སེམས་ཉིད་བླ་མ་དེས། །ལོངས་སྤྱོད་རྫོགས་པའི་སྐུ་རུ་བསྟན། །སྐྱེ་མེད་དོན་གྱི་བླ་མ་དེས། །སྨྲ་བསམ་བརྗོད་ལས་འདས་པ་ཡི། །སྣ་ཚོགས་གཉིས་མེད་སྤྲུལ་སྐུར་བསྟན། །གདལ་ཁྱབ་ཆེན་པོའི་བླ་མ་དེས། །སྣང་སྲིད་དབྱེ་བསལ་མེད་པར་བསྟན། །དབྱེར་མེད་ངོ་བོ་ཉིད་སྐུ་བསྟན། །འབྲས་བུ་སེམས་ཀྱི་བླ་མ་དེས། །གདལ་ཁྱབ་འུབ་ཀྱིས་བསྡུས་པ་ཡི། །མཐའ་དབུས་མེད་པའི་ཀློང་ཆེན་དུ། །འབྲས་བུ་ཐམས་ཅད་གཅིག་ཏུ་བསྡུས། །སྙིང་པོ་འགྱུར་མེད་ངང་དུ་ཐིམ། །སྐྱེ་ཤི་མེད་པར་རྒྱ་ཡིས་བཏབ། །འཕོ་འགྱུར་མེད་པའི་རྟོད་ལ་མནན། །སྐུ་བཞི་དབྱེར་མེད་འབྲས་བུ་ཡང་། །མི་བྱ་བྱར་མེད་རྩོལ་བ་ཀུན་ལས་འདས། །བརྗོད་མེད་བདེ་ཆེན་དབྱིངས་སུ་ཐིམ། །བརྡའ་དོན་སྤྲོད་པའི་བླ་མ་ཡི། །ཚིག་གཅིག་ཆད། སློབ་དཔོན་མ་ཧཱ་གུ་རུ་རྣམ་དྲུག་ནི། །སངས་རྒྱས་གང་བས་གཉན་པར་གསུངས། །ཅི་ཕྱིར་ཞེ་ན་བསྐལ་པ་སྟོང་གི་སངས་རྒྱས་ཀྱང་། །གུ་རུ་དག་ལ་བརྟེན་ནས་རྒྱས། །དེ་ཕྱིར་མ་ཧཱ་གུ་རུ་རྣམས། །སྙིང་དང་མིག་བཞིན་བཀུར་བར་གྱིས། །ཕྱི་ཡི་གུ་རུ་བརྟེན་པ་ཡིས། །ནང་གི་བླ་མ་གསལ་བར་འགྱུར། །བྱིན་རླབས་དངོས་གྲུབ་མན་ངག་རྣམས། །མ་ཧཱ་གུ་རུ་དྲུག་ལ་གནས། །དེ་ཕྱིར་སློབ་དཔོན་གཉན་པར་གསུངས། །འོན་ཀྱང་བྱིན་རླབས་དངོས་གྲུབ་འབྱུང་། །དེ་བས་གོང་ལྟར་བཀུར་སྡི་གྱིས། །རང་སེམས་བླ་མར་བཀོད་པའོ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སེམས་ཉིད་བླ་མར་བཀོད་པའི་ལེའུ་སྟེ་རེ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །བླ་མའི་ངེས་ཚིག་ཇི་ལྟར་ལགས། །ཞེས་གསོལ་པ། སྟོན་པས་འཁོར་ལ་འདི་སྐད་གསུངས། །སྙིང་པོའི་རང་བཞིན་མིང་མེད་བརྗོད་མེད་ཀྱང་། །ཡན་ལག་ཕལ་གྱི་དབང་ ― DNG002_Page_0498 ―
[མ་དཔེ་གཟིགས་ན་འདིར་གནོན།]
གི་ངེས་ཚིག་བཤད། །བླ་མ་བྱ་བའི་ངེས་ཚིག་ནི། །བླ་ནི་ཡང་དག་སངས་རྒྱས་ཡིན། །མ་ནི་སྐྱེ་མེད་རྒྱུ་རུ་གསུངས། །བླ་ནི་རྩལ་སྣང་བུ་ཡིན་ཏེ། །མ་ནི་ཆོས་ཉིད་ཡུལ་དུ་གསུངས། །བླ་ནི་སྙིང་པོ་ཆོས་སྐུ་ཡིན། །མ་ནི་འགྱུར་མེད་སྐྱེ་བ་མེད། །བླ་ནི་རིག་པའི་སྣང་ཚུལ་ཏེ། །མ་ནི་ཀུན་གཞི་སྤྱི་ཁྱབ་བོ། །བླ་ནི་སྤྱི་ཡི་མཚན་ཉིད་སྟེ། །མ་ནི་འཆར་སྒོ་གཉིས་སུ་གསུངས། །བླ་ནི་འཁྲུལ་ལུགས་རྣམ་གསུམ་སྟེ། །མ་ནི་གཅོད་ལུགས་གསུམ་དུ་གསུངས། །བླ་ནི་དུག་གསུམ་ང་བདག་ཉིད། །མ་ནི་སྐུ་གསུམ་ཤེས་རབ་ཐབས། །བླ་ནི་ཁམས་གསུམ་འཁོར་བ་སྟེ། །མ་ཡིས་དེ་རྣམས་སྡུག་བསྔལ་སྒྲོལ། །བླ་ནི་སྡུག་བསྔལ་བརྒྱད་ཁྲི་སྟེ། །མ་ཡིས་དེ་རྣམས་བདེ་ཆེན་སྐྱོབས། །བླ་ནི་སྐྱེ་རྒས་ན་འཆི་སྟེ། །མ་ཡིས་ཆུ་བོའི་གཞི་རྩ་ཆོད། །བླ་ནི་གཉིས་འཛིན་ཐམས་ཅད་སྟེ། །མ་ཡིས་གཟུང་འཛིན་གཉིས་ལས་གྲོལ། །བླ་ཡིས་སྣང་སྲིད་ཡུལ་སེམས་གཉིས། །མ་ནི་གཉིས་མེད་དབྱེ་བསལ་མེད། །བླ་ནི་ཕྱི་ནང་གཉིས་མེད་སྟེ། །མ་ནི་བཟང་ངན་དགག་བསྒྲུབ་མེད། །བླ་ནི་སྒོ་ལྔ་ཡུལ་ལྔ་ཡིན། །མ་ནི་མི་འཇུག་མི་འབྲིད་ཡིན། །བླ་ནི་དཀར་དམར་སྣ་ཚོགས་ཏེ། །མ་ནི་སྣ་ཚོགས་མི་འཛིན་ཞེན་པ་མེད། །བླ་ནི་བདེན་པ་གཉིས་ཀྱི་ཆོས། །མ་ནི་བདེན་པ་གཉིས་མེད་དོ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བླ་མའི་ངེས་ཚིག་བསྟན་པའི་ལེའུ་སྟེ་རེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མ་ཧཱ་གུ་རུ་ཀུན་བཟང་གིས། །བསྡུས་པའི་གདམས་ངག་ཇི་ལྟར་ལགས། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས། །འདུས་པ་རྣམ་གསུམ་ངས་བཤད་ཀྱི། །འཁོར་རྣམས་མ་ཡེངས་ཡིད་ལ་ཟུང་། །སྙིང་པོའི་རང་བཞིན་གཡོ་བ་མེད་པ་ལ། །ཡན་ལག་རིག་པ་རྩལ་གྱིས་མིང་བཏགས་པས། །ཐེག་ ― DNG002_Page_0499 ―
[མ་དཔེ་གཟིགས་ན་འདིར་གནོན།]
པ་བརྒྱད་ཁྲི་བཞི་སྟོང་ཡང་། །སྤྱི་ཏི་ཡོ་གའི་ངང་དུ་འདུས། །དམ་ཆོས་བརྒྱད་ཁྲི་བཞི་སྟོང་ཡང་། །ཆགས་འཛིན་མེད་པའི་ངང་ལ་འདུས། །བསོད་ནམས་ཚོགས་ཀྱི་ཡན་ལག་བརྒྱད་ཁྲི་བཞི་སྟོང་ཡང་། །ཕྱོགས་མཚམས་མེད་པའི་སྙིང་རྗེ་ཆེན་པོར་འདུས། །ཨེ་མ་ཧོ། འདུས་པ་གསུམ་གྱི་མན་ངག་འདིས། །དུག་གསུམ་རྩད་ནས་གཅོད་པར་ངེས། །སྲིད་གསུམ་ཟིལ་གྱིས་གནོན་པར་ངེས། །ཁམས་གསུམ་འཁོར་ས་མེད་པར་ངེས། །སྐུ་གསུམ་རང་ལས་གྲུབ་པར་ངེས། །ས་གསུམ་མ་བགྲོད་སངས་རྒྱས་ས། །ཁམས་གསུམ་མ་སྤངས་སྐུ་གསུམ་ཞིང་། །འདི་ལྟ་བུ་ཡི་གདམས་ངག་ལ། །བལྟ་བས་མ་བལྟས་སེམས་ཉིད་དབྱིངས་སུ་ཐིམ། །བསྒོམས་པས་མ་བསྒོམས་རྟོག་མེད་འགྱུར་མེད་ངང་དུ་ཐིམ། །སྤྱོད་པས་མ་སྤྱད་ཆགས་མེད་ཞེན་མེད་བྱར་མེད་སྤྲོས་བྲལ་ངང་དུ་ཐིམ། །འབྲས་བུ་མ་བསྒྲུབས་རེ་མེད་རང་གནས་ཆིག་ཆོད་སྐུ་གསུམ་འགྱུར་མེད་ཀློང་དུ་ཐིམ། །དུས་གསུམ་ཐིམ་པས་གཞི་ཡི་གདམས་ངག་འདིས། །ཁམས་གསུམ་རྩད་བཅད་འགྲོ་དྲུག་གཡང་ས་ཆོད། །རྡོ་རྗེ་སེམས་དཔས་ཐུགས་ཀྱི་དཀྱིལ་དུ་ཆོངས། །དགའ་རབ་རྡོ་རྗེས་ཕྱིས་འབྱུང་ལ། །དོན་གྱི་གདམས་ངག་འདི་རྣམས་སྟོན། །གཞན་ལ་བསྟན་པའི་དུས་མ་ཡིན། །ཅི་ཕྱིར་ཞེ་ན་འཁོར་བའི་བདུད་ཀྱིས་བསླུས་པ་མང་། །གཟུང་འཛིན་གཉིས་ཀྱིས་བཅིངས་པ་མང་། །ཆགས་སྡང་གཉིས་ལ་ཞེན་པ་མང་། །རེ་དོགས་གཉིས་སུ་ཆུད་པ་མང་། །དེ་ཕྱིར་སྣོད་མེད་ཆོས་མ་ཡིན། །གང་གིས་ཉམས་སུ་བླངས་ཀྱང་སྐུ་གསུམ་རང་ལ་འཆར། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རང་སེམས་བླ་མར་བསྟན་པའི་ལེའུ་སྟེ་རེ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཆོས་རྣམས་བརྡའ་ཡིས་ཇི་ལྟར་བཤད། །ཅེས་ཞུས་པ་དང་། དེ་ནས་སྟོན་པ་ཀུན་བཟང་དེ། རིན་པོ་ཆེ་འོད་དབྱེ་བ་མེད་པའི་ཏིང་ངེ་འཛིན་ ― DNG002_Page_0500 ―
[མ་དཔེ་གཟིགས་ན་འདིར་གནོན།]
ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །ཡུལ་ཁམས་གཅིག་ན་མི་གཅིག་བདོག་པར་གདའ། །དེ་ལ་ནོར་གཅིག་ཡོད་པར་གདའ། །ནོར་གཅིག་པོ་དེ་མི་ཟད་གཏེར་ཡིན་སྐད། །ནོར་དེ་ཐོབ་པར་བདོག་ལགས་སམ། །ཐོབ་དུ་མི་སྟེར་འདྲེ་གཅིག་ཡོད། །འདྲེ་དེ་ངོ་ཤེས་སྐད་ལགས་སམ། །ནོར་ལ་སྦས་པའི་ས་གཅིག་བདོག །སྦས་ས་གང་ཡིན་ཤེས་ལགས་སམ། །ནོར་ལ་ཕྱོགས་མེད་ཡུལ་ཞིག་ཡོད། །ཡུལ་དེ་ངོས་ཤིག་ཟིན་ལགས་སམ། །ནོར་ལ་བདག་པོ་མི་གཉིས་ཡོད། །དེ་གཉིས་གང་ཡིན་ཤེས་ལགས་སམ། །ནོར་ལ་ཐོབ་ཐབས་རྣམ་གསུམ་ཡོད། །དེ་གསུམ་གང་ལགས་ཤེས་ལགས་སམ། །ནོར་ལ་ཐོབ་རྟགས་རྣམ་བཞི་ཡོད། །དེ་བཞི་གང་ལགས་ཤེས་ལགས་སམ། །སྤྱི་ཡུལ་ཆེན་པོ་དེ་ན། །དབང་ཡོད་མི་གཉིས་ཡོད། །སྤྱི་ཡི་ནོར་བུ་རིན་ཆེན་ཡིན། །མི་གཅིག་སོད་ལ་མི་གཅིག་ཞོག །ནོར་དེ་རང་གིས་ཐོབ་པར་གྱིས། །མིག་དེ་ཕྱེ་ནས་མུན་པ་སོལ། །ཉི་ཟླའི་མཚམས་སུ་སྡོད་ལ། །སྣང་བའི་མེ་ལོང་ལྟོས། །ས་གཞི་སྟེང་དུ་ཁོབ། །ནམ་མཁའ་གདན་དུ་ཐིང་། །ན་བུན་ཞྭ་གྱིས་ལ། །བར་སྣང་ལ་ཉལ་ས་ཆོས། །སྣང་སྲིད་ལྟོར་ཆུག །སྤྲེའུ་དང་ཆུ་གཉེར་ལག་པས་ཟུང་། །རླུང་པོ་རྐང་པས་ནོན་ལ། །འཇའ་ཚོན་འོག་ལ་ཆུག །རི་རབ་རྩེར་སྡོད་ལ་ཆུ་རྣམས་ཁ་རུ་ལུགས། །མུན་སྣང་གཉིས་ཀྱི་ས་མཚམས་ན། །ཅི་བཏབ་སྐྱེ་བའི་ལུང་པ་ཡོད། །དེ་ན་ཐམས་ཅད་ཡིད་འོང་མེ་ཏོག་རྒྱས། །འབྲས་བུ་རང་འབར་དང་དྭངས་རིན་པོ་ཆེ། །དེ་ལ་ཀུན་ཀྱང་འདོད་པ་སྐྱེས། །ཡོ་གས་འདོད་ཀྱང་མ་ཐོབ་པས། །མ་འཆམས་མི་ཚན་གཉིས་སུ་ཕྱེ། །ཁོང་གཉིས་འཁྲུག་པ་ཆེན་པོ་བྱེད། །ཁྱེའུ་ཆུང་ངང་དྭངས་སྣང་གསལ་ཀུན་རིག་འཕྲུལ་གྱི་མེ་ལོང་ཅན། ཁྱོད་རང་དགྲ་ཟིན་གཉིས་པོའི་མཚམས་སུ་སྤྱི་པར་སོང་ལ། སྒྱེད་བུ་གསུམ་གསུམ་དྲུག་ཚུགས་ལ། །ཟངས་པོ་ཆེ་ཡང་ སྣང་སྲིད་ཁ་སྦྱོར་བདུད་རྩི་བཅུད་ཐིགས་འཁོར་བ་ཐོག་མཐའ་གཅོད་པའི་རྒྱུད།― DNG002_Page_0501 ―
[མ་དཔེ་གཟིགས་ན་འདིར་གནོན།]
དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། བརྡའ་ཡི་ལེའུ་ཇི་ལྟར་ལགས་ཞེས་ཞུས་པ་དང་། དེ་ནས་ཀུན་ཏུ་བཟང་པོས་འདི་སྐད་ཅེས་བཀའ་སྩལ་ཏོ། །སྣོད་དང་སྐལ་བར་ལྡན་པའི་རྡོ་རྗེ་སེམས་དཔའ་ཉོན། །སྙན་ནས་སྙན་དུ་བརྒྱུད་པའི་སྙན་བརྒྱུད་བརྡའ་ཡི་མན་ངག་བཤད། །སྙིང་པོ་མ་ཡི་རང་བཞིན་གཡོ་མེད་འགྱུར་བ་མེད། །རྩལ་སྣང་ཡན་ལག་ངང་དངས་རིན་ཆེན་རྒྱལ་ཁང་བརྩིགས། །ཆོས་ཉིད་ཡངས་པའི་ས་གཞི་ལ། །དམ་ཚིག་དག་གི་འགྲམ་རྡོ་བཏིང་། །དམ་པའི་ཆོས་ཀྱི་ ― DNG002_Page_0502 ―
[མ་དཔེ་གཟིགས་ན་འདིར་གནོན།]
རྩིགས་པ་བརྩིགས། །སྙིང་རྗེ་ཆེན་པོའི་འདག་པས་སྦྱར། །མཚན་ཉིད་སྡེ་གསུམ་ཁང་པ་ལ། །གཏན་ཚིགས་སྒྲ་ཡི་ཐོག་གཅིག་ཕུབ། །དོན་དམ་བདེན་པའི་གདུང་གཅིག་བཏང་། །སྤྲོས་དང་བྲལ་བའི་ཀ་བ་བཙུགས། །སྒྲ་དང་གཏན་ཚིགས་མང་པོའི་ལྕམ་བཀོད་ལ། །མངོན་སུམ་རྗེས་དཔག་མང་པོའི་དྲལ་མ་བཏང་། །ཐ་སྙད་མང་པོའི་འདག་པས་མནན་པའོ། །ཁས་མི་ལེན་གྱི་སྒོ་བཏོད་ལ། །ཚད་མེད་བཞི་ཡི་རུ་བཞི་བཏང་། །རབ་ཏུ་མི་གནས་སྒོ་ཡིས་བསྡམས། །ཟུར་བཞི་ཚད་མ་བཞི་ཡི་ཀ་ཞུ་བཞིས། །ལོགས་བཞི་རབ་ཏུ་མི་གནས་བཞི། །མཚན་ཉིད་སྡེ་གསུམ་ཁང་པའོ། །བསྐྱེད་རྫོགས་རྣམ་གསུམ་མཁར་གཅིག་བརྩིགས། །ཟུར་བཞི་ཚད་མ་བཞི་ཡི་ཀ་ཞུ་བཞིས། །ལོགས་བཞིར་རབ་ཏུ་མི་འགྱུར་རྨང་ཞིག་བཙུགས། །ཆོས་ཉིད་བརྟན་པའི་གོར་མ་བརྩིགས། །ཆོས་ཉིད་རླན་དང་མ་བྲལ་འདག་པས་སྦྱར། །དག་པ་རྣམ་གསུམ་ཐོག་གཅིག་འབུབས། །དག་པ་ཆེན་པོའི་གདུང་ཞིག་བཏང་། །དོན་དམ་མི་འགྱུར་ཀ་བ་བཙུགས། །སུམ་ཅུ་རྩ་ལྔའི་ལྕམ་གཅིག་བཏང་། །ཁྲུས་དང་གཙང་སྦྲའི་དྲལ་ལྕམ་བཏང་། །དམ་ཚིག་རྣམ་ལྔའི་འདག་པས་མནན། །ཕྱི་རྒྱུད་སྡེ་གསུམ་འོག་ཁང་ལ། །བསྐྱེད་རྫོགས་གཉིས་ཀྱི་བར་ཁང་བརྩིགས། །ཐབས་དང་ཤེས་རབ་ཐོག་གཅིག་ཕུབ། །དོན་དམ་འགྱུར་བ་མེད་པའི་གདུང་ཞིག་བཏང་། །ཀུན་རྫོབ་ལྷ་དང་ལྷ་མོའི་ལྕམ་རྣམས་བཀོད། །ཐབས་དང་ཤེས་རབ་གཉིས་མེད་ཀ་བ་བཙུགས། །ཆོ་ག་ལྔ་གསུམ་བཅོ་ལྔའི་དྲལ་ལྕམ་བཏང་། །དམ་ཚིག་ས་མ་ཡ་ཡི་འདག་པས་མནན། །བསྐྱེད་རྫོགས་གཉིས་ཀྱི་བར་ཁང་ལ། །རྫོགས་པ་ཆེན་པོའི་སྟེང་ཁང་བརྩིགས། །སྐྱེ་བ་མེད་པའི་གདུང་བཏང་ལ། །མཉམ་པ་ཉིད་ཀྱི་བྱོ་ལེ་བྱས། །རྒྱ་ཆད་ཕྱོགས་ལྷུང་མེད་པའི་ཐོག་གཅིག་ཕུབ། །འགྱུར་བ་མེད་པའི་གདུང་ཞིག་བཏང་། །ཐིག་ལེ་ཉག་གཅིག་ཀ་བ་བཙུགས། ། ― DNG002_Page_0503 ―
[མ་དཔེ་གཟིགས་ན་འདིར་གནོན།]
མ་འདྲེས་ཡོངས་སུ་རྫོགས་པའི་ལྕམ་ཞིག་བཀོད། །ཐེག་དམན་རྣམས་ཀྱི་དྲལ་ཚག་བཏང་། །ཆོས་ཉིད་གདལ་བའི་འདག་པས་མནན། །སྤྱི་ཏི་ཡོ་གའི་པུ་ཤུ་ལ། །གཏན་ཚིགས་བཞི་ཡི་བ་གམ་བཏགས། །ཡེ་ཤེས་ཟང་ཐལ་མདའ་ཡབ་བཏོད། །ཟུར་བཞི་གཏན་ཚིགས་ཆེན་པོ་བཞི། །ལོངས་སྤྱོད་རྫོགས་པའི་རྫོགས་ལུགས་བཞི། །བསྐྱེད་རྫོགས་རྣམ་གསུམ་མི་འགྱུར་བསམ་གཏན་མཁར། །མཁར་ཁང་གཉིས་ཀྱི་བདག་པོ་བདག་མོ་བ། །ཀུན་བཟང་ཡབ་ཡུམ་ཕ་མ་ལ། །བུ་ནི་ངང་དངས་རིན་ཆེན་འོད། །བཟའ་མི་གསུམ་གྱི་མཁར་ཁང་ཡིན། །དེ་ལྟར་མཁར་དང་ཁང་པ་བརྩེགས། །མཁར་ཁང་བདོག་སྟེ་ནོར་མི་བདོག །ངང་དངས་ཁྱེའུ་ཆུང་ཚོང་ལ་འགྲོ། །ཟོང་ཞིག་དག་ནི་ཁྱེར་ནས་འགྲོ། །ཆོས་ཉིད་རྟ་ལ་ཞོན་ནས་འགྲོ། །སྦྱིན་པའི་བརྒྱགས་ཕྱེ་བཏགས་ནས་འགྲོ། །ངར་འཛིན་ཟས་སུ་ཟ་ཞིང་འགྲོ། །སྲ་བའི་གོ་ཆ་གོན་ནས་འགྲོ། །རྣོ་བའི་མཚོན་ཆ་ཐོགས་ནས་འགྲོ། །མི་འཇིགས་ཐུབ་ངེས་སྐྱེལ་མ་ཚོལ། །ཆོས་ཉིད་དབྱེ་ཐང་ཡངས་ལ་འགྲོ། །འཕྲང་ཆེན་བཞི་ནི་བརྒལ་ནས་འགྲོ། །ལ་ཆེན་བཞི་ཡང་བརྒལ་ནས་འགྲོ། །ཐང་ཆེན་བཞི་ཡང་བརྒལ་ནས་འགྲོ། །ཆུ་ཆེན་བཞི་ཡང་བརྒལ་ནས་འགྲོ། །འཕྲང་གསུམ་བསྡམས་ནས་ལམ་གསུམ་ཕྱེ། །རྫོང་ཆེན་བཞི་རུ་ཞུགས་ནས་འགྲོ། །མལ་ས་བཞི་རུ་ཉལ་གྱིན་འགྲོ། །ལངས་ས་བཞི་རུ་ལངས་ནས་འགྲོ། །འགྲོ་ས་བཞི་ཡི་ཕ་རོལ་ནས། །ཡུལ་མུན་སྣང་གཉིས་ཀྱི་སོ་མཚམས་ནས། །ཅི་བཏབ་སྐྱེ་བའི་ལྡུམ་ར་ན། །རིན་ཆེན་རང་སངས་ངང་དངས་བཞུགས། །སེམས་ཉིད་རིན་ཆེན་ངང་དངས་ལ། །མུན་པ་སེལ་བའི་ཉི་ཟླ་ཡོད། །འཁྲུལ་པ་གཅོད་པའི་སྤུ་གྲི་ཡོད། །ཀུན་འབྱུང་འཚོ་བའི་ནོར་བུ་རིན་ཆེན་ཡོད། །ཟད་མེད་གཏེར་ཆེན་དེ་ན་བདོག །ངང་དངས་རིག་གསལ་ཁྱེའུ་ཆུང་དེར་ཕྱིན་ནས། །ཕྱོགས་གཅིག་སྣང་བར་གདའོ་སྐད། །ཕྱོགས་གཅིག་མུན་པར་གདའ་ ― DNG002_Page_0504 ―
[མ་དཔེ་གཟིགས་ན་འདིར་གནོན།]
འོ་སྐད། །མུན་སྣང་གཉིས་ཀྱི་སོ་མཚམས་སུ། །སུས་ཀྱང་མ་རྙེད་མ་མཐོང་བ། །སུས་ཀྱང་མ་ཤེས་མ་མངོན་པ། །སུས་ཀྱང་མ་རྟོགས་མི་འགྱུར་བ། །སུས་ཀྱང་མ་ཐོབ་བརྗོད་མེད་པ། །མི་འགྱུར་ནོར་བུ་རིན་ཆེན་དེ། །ཀུན་འབྱུང་མི་ཟད་གཏེར་མཛོད་ཆེ། །སེམས་ཉིད་ནོར་བུ་རིན་ཐང་ཆེ། །ངང་དངས་ཁྱེའུ་ཆུང་འོད་གསལ་ནོར་དེ་ཉོ། །བདག་མོ་རྒན་མོ་ལོང་མ་གཅིག་ལས་ཉོ། །བར་མིར་ཤེས་རབ་རྣམ་གསུམ་བཏང་། །ལུང་རིགས་གཉིས་ཀྱི་ཚོང་ཞིག་བྱས། །བློས་བརྟགས་བལྟ་བ་རིན་དུ་འཇལ། །ཡིད་བཟུང་བསྒོམ་པ་རིན་དུ་འཇལ། །ཆེད་བྱས་སྤྱོད་པ་རིན་དུ་འཇལ། །ཡིད་སྨོན་འབྲས་བུ་རིན་དུ་འཇལ། །འདོད་པ་ངོམས་མེད་རིན་དུ་འཇལ། །འཛིན་པའི་ཕུར་པ་རིན་དུ་འཇལ། །ཞེན་པའི་མཚོ་མོ་རིན་དུ་འཇལ། །མུན་པའི་འཁོར་སྒོ་རིན་དུ་འཇལ། །རིན་བརྒྱད་བཅལ་ནས་ནོར་ཞིག་ཐོབ། །ནོར་ནི་ཀུན་འབྱུང་རིན་པོ་ཆེ། །གཉིས་མེད་ཆེན་པོར་ཚོང་ཞིག་ཟིན། །འཁོར་འདས་གཉིས་མེད་ཚོང་ཞིག་ཟིན། །སངས་རྒྱས་སེམས་ཅན་གཉིས་མེད་ཚོང་ཞིག་ཟིན། །མ་རིག་ཡེ་ཤེས་གཉིས་མེད་ཚོང་ཞིག་ཟིན། །དེ་རུ་ཚོང་ཟིན་ཁྱིམ་དུ་ཕྱིན། །ཆོས་ཉིད་དབྱིངས་ཀྱི་ཁྱིམ་ནང་དུ། །གདམས་ངག་ཟབ་མོའི་བྱོན་ཆང་འཐུངས། །ཏིང་འཛིན་བདུད་རྩི་ཆེན་པོ་ཟོས། །བདེ་བ་ཆེན་པོའི་གོས་ཤིག་གོན། །འགྱུར་བ་མེད་པའི་གདན་ཞིག་བཏིངས། །ཆོས་ཉིད་འགྱུར་མེད་སྔས་ཤིག་བཅུག །བདེ་ཆེན་ཀློང་དུ་ཁྱུར་གྱིས་ཉལ། །མི་བྱ་རྩོལ་བའི་ལས་མ་བྱས། །བྱ་བ་ཐམས་ཅད་བཏང་ལ་ཐ་མལ་རང་ལུགས་བཞུགས། །ཆོས་ཉིད་དབྱིངས་སུ་མནལ་ལོག་གོ། །བརྡ་ཡི་མན་ངག་དོན་གྱི་གནད། །རྡོ་རྗེ་སེམས་དཔའི་ཐུགས་ལ་ཆོངས། །དགའ་རབ་རྡོ་རྗེས་ཉམས་སུ་ལོངས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བརྡའ་ཡི་ལེའུ་སྟེ་རེ་ལྔ་པའོ།། །།དེ་ནས་རྡོ་རྗེ་ ― DNG002_Page_0505 ―
[མ་དཔེ་གཟིགས་ན་འདིར་གནོན།]
སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །བྱང་ཆུབ་སེམས་ཀྱི་སོ་ནམ་ཇི་ལྟར་བྱ། །ཞེས་ཞུས་པ་དང་། དེ་ནས་སྟོན་པ་ཀུན་བཟང་དེས། རིན་པོ་ཆེའི་འོད་འཕེལ་འགྲིབ་མེད་པའི་ཏིང་ངེ་འཛིན་ལ་སྙོམས་པར་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །སྙིང་པོའི་རང་བཞིན་འགྱུར་བ་མེད་པ་ལས། །ཡན་ལག་རིན་པའི་མཚན་ཉིད་ཞིང་ཞིག་འདེབས། །ཐམས་ཅད་སྐྱེ་འབྱུང་ཀུན་གཞིའི་ཞིང་ས་ལ། །མ་རིག་འཁྲུལ་སྒོའི་དབང་གི་ཉོན་མོངས་ཐ་རྒོད་ལ། །རིག་པ་རང་གདངས་འཆར་སྒོའི་ཆུ་ཡིས་སྦང་། །ཉོན་མོངས་དུག་ལྔའི་ཐ་རྒོད་བྱང་ཆུབ་ཆུ་ཡིས་སྦང་། །སེམས་ཉིད་ཀ་དག་ས་བོན་བཏབ། །ཉམ་ང་མེད་པའི་གླང་གཉིས་ལ། །སྙིང་པོ་མ་ཡི་གཤོལ་གུག་ལ། །ཡེ་ཤེས་ཟང་ཐལ་གཤོལ་མདའ་བཙུགས། །རྩལ་སྣང་ངང་དངས་སྤྲུལ་སྐུའི་ཐོང་ལྕགས་བཅུག །ཕྱི་ནང་གཉིས་མེད་གཉའ་ཤིང་བཀལ། །མི་འགྱུར་བརྟན་པའི་ཆུ་ཐག་བཅིངས། །ཡུལ་སེམས་གཉིས་མེད་རུ་ཐག་དཀྲིས། །རྩིས་གདབ་མེད་པའི་དོར་ཐག་བཏང་། །རང་འགྱུར་རང་སངས་ཐོང་མཁན་པས། །ཁམས་གསུམ་འགྲོ་དྲུག་ཉོན་མོངས་ཐ་བ་ལ། །ཤེས་རབ་ཟབ་མོའི་ཐོང་པ་བཙུགས། །སྡུག་བསྔལ་ཉོན་མོངས་ཐ་བ་རྨོས། །ཉོན་མོངས་བརྒྱད་ཁྲི་རྩད་ནས་ཕྱུང་། །འཁྲུལ་པའི་སྡུག་བསྔལ་རམ་པ་བཏོན། །འགོང་པོ་ངར་འཛིན་རུ་མ་མེད། །རྒྱུ་དྲུག་དུག་ལྔ་དུག་གསུམ་ཐ་རྒོད་ཐུལ། །མཉམ་པ་ཉིད་ཀྱི་བཤལ་བས་བཤལ། །འགྱུར་བ་མེད་པའི་ཐོག་བཏབ་ལ། །ཡེ་ཤེས་ཟང་ཐལ་གནང་མ་བཏོད། །ཐུགས་རྗེ་ཀུན་ཁྱབ་པེའུ་བྱས། །རྩིས་གདབ་མེད་པའི་གད་གཅིག་བྱས། །དེ་ནས་བྱང་ཆུབ་མྱུ་གུ་སྐྱེས། །འཁྲུལ་ཆོད་ཡེ་ཤེས་ལྗང་པ་སྐྱེས། །བག་ཙམ་ཉོན་མོངས་བག་ཆགས་ཀྱིས། །གཟུང་འཛིན་རྣམ་རྟོག་སྔོ་ཡང་སྐྱེས། །རང་རིག་འཕྲུལ་གྱི་ཁྱེའུ་ཆུང་གིས། །ཤེས་རབ་རྣོན་པོའི་རྐོ་མ་ཐོག །རྣམ་རྟོག་ཆགས་ཞེན་སྔོ་རུ་ཕྱེ། །འཁྲུལ་སྣང་མང་པོའི་སྔོ་རྣམས་རྩད་ནས་བཅད། །སྤྲོས་པ་ ― DNG002_Page_0506 ―
[མ་དཔེ་གཟིགས་ན་འདིར་གནོན།]
ཐག་ཆོད་ཡུར་མ་ཟིན། །གསང་སྔགས་བཀའ་ཡི་རྒྱ་མཚོ་ནས། །ཐེག་ཆེན་བདུད་རྩིའི་བྱང་ཆུབ་ཆུ་ཆེན་དེ། །ཐེག་པ་དགུ་ཡི་ཡུར་བར་དྲངས། །སྣང་སྲིད་འཁོར་འདས་ཞིང་རྣམས་བཅུས། །ཁ་གཏིང་མེད་པ་ཆོས་ཉིད་ཆུ་ཡིས་སྦངས། །མྱ་ངན་འདས་པའི་ལོ་ཐོག་རྒྱས། །སྐུ་གསུམ་སངས་རྒྱས་འབྲས་བུ་སྨིན། །སྐུ་གསུམ་ཡིད་ལ་མི་བྱེད་རྩས་མ་བྱེད། །སངས་རྒྱས་ཡིད་ལ་མི་བྱེད་རྩས་མ་བྱེད། །སྐུ་ལྔ་ལྟ་སྒོམ་དབྱིངས་དང་ཡེ་ཤེས་སངས་རྒྱས་ཞིང་ཁམས་རྣམས། །མ་འགྱུས་མི་བསྐྱོད་ཞེན་འཛིན་མེད། །དབྱེ་བསལ་རྩིས་གདབ་མེད་པའི་རྩས་མ་ཆོད། །སྙིང་པོ་འདུས་མ་བྱས་པའི་གཡུལ་དུ་བསྡུས། །འཁྲུལ་སྣང་རྩད་གཅོད་རྒྱ་ཟོར་གྱིས། །ཡན་ལག་བུ་ཡི་རྟོག་ཚོགས་སྙེ་མ་རྣམས། །སྒོ་ལྔ་ཡུལ་འཛིན་ཆགས་ཞེན་རྩད་ནས་གཅོད། །རང་བྱུང་རྒྱལ་བའི་རྒྱ་བརྡུང་གིས། །ཉོན་མོངས་སྙེ་མ་ཐལ་བ་རྡུལ་དུ་བརྡུངས། །ཉོན་མོངས་བརྒྱད་ཁྲི་བཞི་སྟོང་རླུང་ལ་བསྐུར། །སྡུག་བསྔལ་བརྒྱད་ཁྲི་བཞི་སྟོང་གཏན་ནས་བརླག །སྐུ་གསུམ་འདུ་འབྲལ་མེད་པའི་དཀར་མོ་ནས། །སྙིང་པོ་མཁའ་དབྱིངས་རྣམ་དག་མཛོད་དུ་བླུགས། །ངང་དངས་ཞེན་ཆགས་འཛིན་པ་རྩད་ནས་གཅོད། །སྙིང་པོ་འགྱུར་མེད་སྐྱེ་མེད་རྒྱ་ཡིས་བཏབ། །བྱང་ཆུབ་སེམས་ཀྱི་ལོ་ཏོག་བདུད་རྩིར་འཁྲུངས། །ཕུག་ཆུད་རྒྱས་ཐེབས་རྒྱུ་རྐྱེན་སྐྱེ་འཇིག་མེད། །གཉེན་པོས་མི་ཤིགས་གཞན་གྱིས་ཕྲོག་དབང་མེད། །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སོ་ནམ་སེམས་ལ་བྱ་བའི་ལེའུ་སྟེ་རེ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཆོས་སྐུ་བརྡའ་ཡི་ངོ་སྤྲོད་ཇི་ལྟར་ལགས། །ཞེས་ཞུས་པ་དང་། དེ་ནས་སྟོན་པ་ཀུན་བཟང་དེ། སྙིང་པོ་མ་བུ་དབྱེར་མེད་གདེང་ཟིན་གྱི་ཏིང་ངེ་འཛིན་ལ་སྙོམས་པར་ཞུགས་སོ། དེ་ལས་བཞེངས་ནས་འཁོར་ལ་འདི་སྐད་ཅེས་བཀའ་སྩལ་ཏོ། །སྙིང་པོ་མ་ཡི་རང་བཞིན་ ― DNG002_Page_0507 ―
[མ་དཔེ་གཟིགས་ན་འདིར་གནོན།]
གཡོས་པ་མེད། །ཡན་ལག་བུ་ཡིས་མ་རྟོགས་སྣ་ཚོགས་ཡུལ་ལ་འཇུག །དེ་ཡི་དབང་གིས་ཆོས་སྐུ་བརྡའ་ཡི་ངོ་སྤྲོད་བསྟན། །རྡོ་རྗེ་སེམས་དཔས་ཡིད་ལ་ཟུང་། །མི་འགྱུར་ངོ་སྤྲོད་རྣམ་གསུམ་ལ། །གནས་ལུགས་མི་འགྱུར་ངོ་སྤྲོད་དང་། །སྣང་ཚུལ་མ་ངེས་ངོ་སྤྲོད་དང་། །དེ་གཉིས་གཉིས་མེད་ངོ་སྤྲོད་དོ། །གནས་ལུགས་མི་འགྱུར་ངོ་སྤྲོད་བསྟན་པ་ལ། །རྒྱུ་ཡིས་མ་བསྐྱེད་རྐྱེན་གྱིས་མི་འཇིག་པ། །ངོ་བོ་མི་འགྱུར་རང་བཞིན་གཉིས་སུ་མེད། །དེ་ཡི་དོན་ཡང་འདི་ལྟ་སྟེ། །རིན་ཆེན་འོད་འབར་གཞལ་ཡས་ན། །གཟུགས་མེད་ཀུན་ཁྱབ་སྐུ་གཅིག་བཞུགས། །མིང་ནི་སྐྱེ་མེད་བརྗོད་བྲལ་དམིགས་མེད་ཀུན་གསལ་གྲགས། །དེ་དང་ངོ་སྤྲོད་བསྟན་པ་ནི། །བླ་མའི་ཞལ་ལས་ཤེས་པར་བྱ། །སྣང་ཚུལ་མ་ངེས་ངོ་སྤྲོད་ནི། །ཅེར་གྱི་སྣང་བ་དེ་ཉིད་དུ། །ཆོས་དབྱིངས་དཀྱིལ་འཁོར་ནང་དེ་ནས། །སོར་བཞག་དབྱེར་མེད་སྐུ་གཅིག་བཞུགས། །མིང་ནི་གཉིས་མེད་རང་གནས་འབར། །དེ་དང་ངོ་སྤྲོད་བསྟན་པ་ནི། །བླ་མའི་ཞལ་ལས་ཤེས་པར་བྱ། །གཉིས་མེད་ངོ་སྤྲོད་བསྟན་པར་བྱ། །འཕྲོ་འདུ་མེད་པའི་རིན་ཆེན་འོད་ཁང་ན། །ངང་དངས་དབྱེར་མེད་སྐུ་གཅིག་བཞུགས། །མིང་ནི་སྤྲོས་བྲལ་ཆོས་སྐུར་གྲགས། །དེ་དང་ངོ་སྤྲོད་བསྟན་པ་ནི། །བླ་མའི་ཞལ་ནས་ཤེས་པར་བྱ། །ངོ་སྤྲོད་རྣམ་གསུམ་དྲིལ་བས་གཅིག་ཏུ་འདུས། །སྙིང་པོ་འོད་ཀྱི་དཀྱིལ་འཁོར་ཅན། །འོད་མཐའ་མེད་པའི་གཞལ་ཡས་ཁང་། །སྙིང་པོ་དམིགས་མེད་བརྗོད་བྲལ་ཀུན་གྱི་དངོས། །འོད་འབར་དྲི་མེད་ཆོས་སྐུ་བཞུགས། །དེ་དང་ངོ་སྤྲོད་བསྟན་པ་ནི། །དཔེ་དང་དོན་དང་གཏན་ཚིགས་གསུམ། །དོན་ནི་འདི་བཞིན་ཤེས་པར་བྱ། །བརྗོད་བྱ་ཐམས་ཅད་བརྗོད་མེད་ངང་དུ་སྤྲོད། །མཚོན་བྱ་ཐམས་ཅད་མཚོན་མེད་ངང་དུ་སྤྲོད། །མིང་འདོགས་ཐམས་ཅད་མིང་མེད་ངང་དུ་སྤྲོད། །འདོད་ཞེན་ཐམས་ཅད་འདོད་མེད་ངང་དུ་སྤྲོད། །བྱ་བྱེད་གཉིས་འཛིན་རྟགས་ཞེན་རྣམས། །བྱར་མེད་འཛིན་མེད་རྟགས་ཞེན་མེད་པར་སྤྲོད། །དཔེ་ནི་འདི་བཞིན་ཤེས་པར་བྱ། །རྒྱ་ ― DNG002_Page_0508 ―
[མ་དཔེ་གཟིགས་ན་འདིར་གནོན།]
མཚོ་ཆུ་བྲན་ངོ་སྤྲོད་དབྱེར་མི་ཕྱེད། །འོ་མ་ཆུར་འདྲེས་དབྱེར་མི་ཕྱེད། །ཚྭ་དང་ཆུ་འདྲེས་དབྱེར་མི་ཕྱེད། །གཏན་ཚིགས་འདི་བཞིན་ཤེས་པར་བྱ། །མཚན་ཉིད་སྙིང་པོར་ཐིམ་པས་དབྱེར་མི་ཕྱེད། །སྙིང་པོ་ཡན་ལག་ཐིམ་པས་དབྱེར་མི་ཕྱེད། །འོད་དང་ཟེར་འཕྲད་དབྱེར་མི་ཕྱེད། །ཆོས་སྐུ་ལོངས་སྐུར་ཐིམ་པས་དབྱེར་མི་ཕྱེད། །རིག་པའི་སྙིང་པོར་ཐིམ་པས་དབྱེར་མི་ཕྱེད། །མ་ལ་བུ་ཐིམ་དབྱེར་མི་ཕྱེད། །ཡེ་ཤེས་རང་སར་ཐིམ་པས་རྣམ་རྟོག་རང་སར་གྲོལ། །སྙིང་པོ་ཀློང་ནས་ཤར་བས་སྐུ་གསུམ་འདུ་འབྲལ་མེད། །ཆུ་དང་མེ་ལོང་ཤེལ་སྒོང་གསུམ་ལ་དཔེ་ཡི་ངོ་སྤྲོད་བྱ། །ཆོས་སྐུ་ལོངས་སྐུ་སྤྲུལ་སྐུ་གསུམ་ལ་དོན་གྱི་ངོ་སྤྲོད་བྱའོ། །སེམས་ཉིད་ཆོས་ཉིད་རིག་པའི་ཡེ་ཤེས་གསུམ་ལ་རྟགས་ཀྱི་ངོ་སྤྲོད་བྱ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ངོ་སྤྲོད་རྣམ་གསུམ་བསྟན་པའི་ལེའུ་སྟེ་རེ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་གསོལ། །དེ་ལྟར་སངས་རྒྱས་ངོ་སྤྲོད་ནས། །རྩོལ་བསྒྲུབ་བཅས་བཅོས་མི་འཚལ་ལམ། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས། །སྙིང་པོ་མ་ཡིན་རང་བཞིན་འགྱུར་མེད་ལ། །རྩལ་སྣང་ཡན་ལག་མཚན་ཉིད་སྣ་ཚོགས་སྣང་། །སྣང་ཡང་སྣ་ཚོགས་ངང་ལས་གཡོས་པ་མེད། །གཞན་དུ་མ་བཀོལ་སྙིང་པོའི་ཀློང་དུ་ཐིམ། །ཐིམ་ནས་དབྱེར་མེད་སྐྱེ་མེད་རྟོགས་ཙ་ན། །ཅི་ལྟར་བྱས་ཀྱང་ཆོས་ཉིད་གྲོགས་སུ་འགྱུར། །བྱ་བ་ཐམས་ཅད་བཏང་ལ་ནི། །བྱར་མེད་ངང་ལ་གནས་པར་བྱ། །ཞི་གནས་མ་བཅོས་ལྷུན་གྱིས་གྲུབ། །ཐ་མལ་རང་ལུགས་གནས་པ་ནི། །སྙིང་པོ་ཆོས་ཉིད་ཀློང་ན་གནས། །མི་བྱ་བཙལ་བའི་ལས་མི་བྱ། །གཡོ་རྩོལ་དགག་བསྒྲུབ་སྤང་ལེན་མེད། །གཉིས་མེད་རྩིས་གདབ་མེད་པས་གནས་པར་གྱིས། །ཅོག་གེར་ཞོག་ཅིག་གནས་ལུགས་ལ། །བཞག་པ་མེད་པའི་ངོ་བོ་ལ། །འགྲོ་ས་མེད་པའི་སྙིང་པོ་ལ། །རང་ཉིད་ཡིན་གྱིས་རང་ ― DNG002_Page_0509 ―
[མ་དཔེ་གཟིགས་ན་འདིར་གནོན།]
སར་གནས། །བསྒྲུབ་རྒྱུ་མེད་ཀྱིས་ཡེ་ནས་གྲུབ། །རེ་ས་མེད་ཀྱིས་གཞན་ལ་རེ། །དེ་ཡང་རང་བཟོ་མ་ཡིན་ནམ། །མ་ཡིན་གཏན་ཚིགས་འདི་ཡིས་ཤེས། །སེམས་ཉིད་དངོས་པོ་མེད་པ་ཡིན། །འཁྲུལ་སེམས་ཅིར་ཡང་འཆར་བ་ཡིན། །དངོས་མེད་ཅིར་ཡང་འཆར་བ་ཡིན། །ངོ་བོ་ཉིད་ལ་དབྱེ་རུ་མེད། །ཐ་དད་མེད་དེ་ཆོས་སྐུ་ཡིན། །སྙིང་པོ་དངོས་པོ་མེད་པ་དང་། །རིག་པ་སྣ་ཚོགས་འཆར་བ་དང་། །ཆོས་སྐུའི་ངང་ལས་དབྱེ་རུ་མེད། །ཐ་དད་མེད་པས་ཆོས་ཉིད་ཡིན། །ངོ་བོ་མཐོང་དུ་མེད་པ་དང་། །མཚན་ཉིད་སྣ་ཚོགས་མཐོང་བ་གཉིས། །ཆོས་ཉིད་ངང་ལ་དབྱེ་རུ་མེད། །ཐ་དད་མེད་དེ་ཆོས་སྐུ་ཡིན། །གནས་ལུགས་སྐྱེ་བ་མེད་པ་དང་། །ཡིད་བྱེད་སྣ་ཚོགས་སྐྱེ་བ་གཉིས། །གནས་ལུགས་ངང་ལས་དབྱེ་རུ་མེད། །དབྱེར་མ་ཕྱེད་དེ་ཆོས་ཀྱི་སྐུ། །དེས་ན་འདི་ལྟར་ཤེས་པར་གྱིས། །གནས་ལུགས་ཡེ་ནས་འབྲས་བུ་ཡེ་གྲུབ་ཡིན། །ས་རྣམས་ཡེ་བགྲོད་འབྲས་བུ་ཡེ་སྦྱངས་ཡིན། །ལས་ཀྱང་བཞག་ཟིན་ལམ་ལྔ་ཐོབ་པ་ཡིན། །དེ་ལྟར་གོ་ན་འཁོར་བའི་ལས་རྣམས་ཟིན། །འདོད་པའི་སངས་རྒྱས་རང་ལ་རྙེད། །དེས་ན་དངོས་མེད་ཀུན་ཁྱབ་སྐུ། །ལུས་མེད་ལུས་ཏེ་ལུས་ཀྱི་མཆོག །རྡོ་རྗེ་གཡུང་དྲུང་ལྟ་བུར་གནས་པའོ། །གནས་ནི་མཁའ་ཀློང་རྣམ་དག་གནས། །ཡུལ་ནི་སྤྱི་ཡུལ་ཀུན་གཞིའི་ཡུལ། །གོས་མེད་སྣ་ཚོགས་སྟོང་ཉིད་གོས། །ཟས་མེད་སྣ་ཚོགས་ཏིང་འཛིན་ཟས། །ཡུལ་ནི་ནམ་མཁའ་ཁྱིམ་ནི་ཆོས་ཉིད་དོ། །ཕ་མ་ཀུན་བཟང་ཡབ་ཡུམ་བདེ་ཆེན་གྲོགས། །སྲས་ནི་ངང་དངས་ཡེ་ཤེས་ལྔ་ཡི་འཁོར། །ཉི་ཟླ་གཟའ་སྐར་འཇའ་ཚོན་ན་བུན་ཆུ་ཟླའི་ཚོགས། །ཆོས་ཉིད་རང་རྩལ་མ་འགགས་རིག་པའི་རྒྱན། །དེ་ཙམ་ཉིད་ན་འདི་ལྟ་སྟེ། །སངས་སུ་མེད་པའི་མ་རིག་མུན་པ་སངས། །ཤར་དུ་མེད་པའི་ཡེ་ཤེས་ཉི་མ་ཤར། །གསལ་དུ་མེད་པའི་རང་སེམས་ཆོས་སྐུ་གསལ། །ཕྱེད་དུ་མེད་པའི་རིག་པའི་འཆར་སྒོ་ཕྱེད། །ཟིན་དུ་མེད་པའི་རང་ས་ཟིན། །ཟིན་དུ་མེད་པའི་འཁོར་བའི་ལས་རྣམས་ཟིན། །ཐོང་དུ་མེད་པའི་འཁོར་བའི་བྱ་བ་ཐོང་། །ཐར་ ― DNG002_Page_0510 ―
[མ་དཔེ་གཟིགས་ན་འདིར་གནོན།]
དུ་མེད་པའི་འཁོར་བའི་སྒྲོག་ནས་ཐར། །ཐོན་དུ་མེད་པའི་འཁོར་བའི་རྫབ་ནས་ཐོན། །གྲུབ་ཏུ་མེད་པའི་སྐུ་གསུམ་རང་ལ་གྲུབ། །རྒྱས་སུ་མེད་པའི་ཡེ་ཤེས་ཆོས་ཉིད་རྒྱས། །ཟིན་དུ་མེད་པའི་ཆོས་ཉིད་རང་ས་ཟིན། །ཆོད་དུ་མེད་པའི་འཁྲུལ་པ་རྩད་ནས་ཆོད། །སངས་སུ་མེད་པའི་རྣམ་རྟོག་ཆགས་ཞེན་སངས། །གྲོལ་དུ་མེད་པའི་དུག་ལྔ་རང་སར་གྲོལ། །རྟོགས་སུ་མེད་པའི་སྙིང་པོ་ཆོས་སྐུ་རྟོགས། །རེ་བའི་ས་མེད་དོགས་པའི་ལྟུང་ས་མེད། །རིགས་དྲུག་རྩད་བཅད་ཁམས་གསུམ་སངས་རྒྱས་ས། །སྐྱེ་རྒས་ན་འཆིའི་སྒོ་བཅད་ཐོག་མཐའི་དྲས་ཐག་ཆོད། །སྲིད་གསུམ་ཟིལ་གནོན་སྣང་སྲིད་རྒྱ་ནས་འདེགས། །དུས་གསུམ་སངས་རྒྱས་རྣམས་ཀྱིས་ཀྱང་། །དགོངས་པའི་དོན་ནི་དེ་ལས་མ་གསུངས་སོ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སྤྱི་ཏི་རྟོགས་པའི་རྣལ་འབྱོར་པས་ཅི་ལྟར་སྤྱད་ཀྱང་ཆོས་ཉིད་ཀྱི་རྩིས་ཟིན་ན་ཆོས་ཉིད་ཀྱི་རོལ་པ་སྟེ་ལེའུ་སྟེ་རེ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རང་སེམས་གསལ་བའི་མེ་ལོང་དགུ་སྐོར་ཇི་ལྟར་ལགས། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས། །སྙིང་པོ་མ་ཡི་རང་བཞིན་གཡོ་མེད་འགྱུར་མེད་ཀྱང་། །རིན་ཆེན་གསལ་བའི་མེ་ལོང་རྣམ་དགུ་བཤད། །རྡོ་རྗེ་སེམས་དཔས་ཡིད་ལ་ཟུང་། །སྣང་བ་རང་གནས་མེ་ལོང་དང་། །རིག་པ་རང་ཤར་མེ་ལོང་དང་། །ཀུན་གཞི་སྤྲོས་བྲལ་མེ་ལོང་སྟེ། །དེ་རྣམས་ཕྱི་ཡི་མེ་ལོང་ངོ་། །ནང་གི་མེ་ལོང་བསྟན་པ་ནི། །སྣང་བ་བརྟགས་སྣང་མེ་ལོང་དང་། །རིག་པ་སྟོང་པའི་མེ་ལོང་དང་། །ཐམས་ཅད་སྐྱེ་འབྱུང་ཀུན་གཞི་སེམས་ཀྱི་མེ་ལོང་ངོ་། །གསང་བའི་མེ་ལོང་བསྟན་པ་ནི། །སྣང་སེམས་གཉིས་མེད་མེ་ལོང་དང་། །ཡིད་རིག་འགྱུར་མེད་མེ་ལོང་དང་། །སྙིང་པོ་དོན་རྟོགས་སྐྱེ་མེད་སེམས་ཀྱི་མེ་ལོང་ངོ་། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རིན་ཆེན་ ― DNG002_Page_0511 ―
[མ་དཔེ་གཟིགས་ན་འདིར་གནོན།]
འཕྲུལ་གྱི་མེ་ལོང་དགུ་སྐོར་བསྟན་པའི་ལེའུ་སྟེ་རེ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཀུན་ཏུ་བཟང་པོའི་གདམས་ངག་ཚིག་གསུམ་པོ། །བདག་ཅག་རྣམས་ལ་བཤད་དུ་གསོལ། །ཀུན་ཏུ་བཟང་པོས་འཁོར་ལ་འདི་སྐད་གསུངས། །ཕྱི་ཡི་ཡུལ་བརྟགས་སྣང་བ་ཐམས་ཅད་འཁྲུལ་པར་ཤེས་པར་གྱིས། །ཡིད་དཔྱོད་དྲན་རིག་འགྱུ་བ་མྱོང་བ་རྣམས། །སྤྲོས་པ་ཐག་ཆོད་ངང་དངས་རང་གྲོལ་འགྱུར་མེད་རྒྱ་ཡིས་ཐོབ། །སྤྲོས་པའི་མཐའ་བརྒྱད་ཆོས་བརྒྱད་བྲལ་བའི་ས་དེ་ལ། །སྨྲ་མེད་བརྗོད་མེད་འགྱུར་བ་མེད་པའི་དོན། །མི་འགྱུར་ཆོས་ཀྱི་དབྱིངས་ལ་སྐྱེ་མེད་ཆོས་སྐུ་གནས། །ཀུན་བཟང་བདག་གི་གདམས་ངག་ཚིག་གསུམ་འདི། །རྡོ་རྗེ་སེམས་དཔའི་ཐུགས་ཀྱི་དཀྱིལ་དུ་ཞོག །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། གདམས་ངག་ཚིག་གསུམ་བསྟན་པའི་ལེའུ་སྟེ་བདུན་ཅུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ངེས་པའི་ཚིག་བཞི་ཇི་ལྟར་ལགས། །ཞེས་ཞུས་པ་དང་། ཀུན་ཏུ་བཟང་པོས་འཁོར་ལ་འདི་སྐད་གསུངས། ལྟ་བའི་རྒྱལ་པོ་ཞེ་འདོད་མེད་པར་ངེས། །སྒོམ་པའི་རྒྱལ་པོ་བསྒྲུབ་བྱ་མེད་པར་ངེས། །སྤྱོད་པའི་རྒྱལ་པོ་བྱ་བཙལ་མེད་པར་ངེས། །འབྲས་བུའི་རྒྱལ་པོ་རེ་དོགས་མེད་པར་ངེས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ངེས་པ་རྣམ་བཞི་བསྟན་པའི་ལེའུ་སྟེ་དོན་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ལྷག་མཐོང་རྣམ་དྲུག་ཇི་ལྟར་ལགས། །ལྟ་བ་ངོས་གཟུང་མེད་པས་ཕྱོགས་མེད་ལྷག་གིས་མཐོང་། །སྒོམ་པ་འགྱུར་མེད་རྟོག་མེད་ལྷག་གིས་ཤར། །སྤྱོད་པ་བྱར་མེད་སངས་རྒྱས་དགོངས་པ་ལྷག་གིས་མཐོང་། །དམ་ཚིག་བསྲུང་མེད་སྐྱོན་མེད་དགོངས་པ་ལྷག་གིས་མཐོང་། །ཕྲིན་ལས་བཙལ་མེད་བགྲོད་མེད་ལྷག་གིས་ཤར། །འབྲས་བུ་བསྒྲུབ་མེད་རེ་མེད་དོགས་མེད་ལྷག་གིས་མཐོང་། །ཞེས་གསུངས་སོ། །སྣང་སྲིད་ཁ་ ― DNG002_Page_0512 ―
[མ་དཔེ་གཟིགས་ན་འདིར་གནོན།]
སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ལྷག་མཐོང་རྣམ་དྲུག་བསྟན་པའི་ལེའུ་སྟེ་དོན་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །འདས་པ་རྣམ་བཅུ་ཇི་ལྟར་ལགས། །ཞེས་ཞུས་པ་དང་། ཀུན་ཏུ་བཟང་པོས་འདི་སྐད་གསུངས། །ལྟ་བ་གཞུང་མེད་ཚིག་ལས་འདས། །སྒོམ་པ་བསམ་མེད་བློ་ལས་འདས། །སྤྱོད་པ་བྱར་མེད་འཁོར་བའི་ལས་ལས་འདས། །དམ་ཚིག་བསྲུང་མེད་འདའ་མེད་བསྲུང་ལས་འདས། །ཕྲིན་ལས་བཙལ་མེད་དབྱེར་མེད་ངང་ལས་འདས། །ལམ་རྣམས་མ་བགྲོད་བགྲོད་མེད་ངང་ལས་འདས། །ས་རྣམས་མ་སྦྱངས་སྦྱང་མེད་ངང་ལས་འདས། །ལུང་ནི་མ་ནོར་ཚིག་གི་ལུང་ལས་འདས། །མན་ངག་ཞེན་མེད་འཛིན་མེད་ངང་ལས་འདས། །འབྲས་བུ་ཡེ་ནས་ཡོད་སྨོན་ཡིད་ལས་འདས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། འདས་པ་རྣམ་བཅུ་བསྟན་པའི་ལེའུ་སྟེ་དོན་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །གནས་ལུགས་བརྡའ་ཡི་དོན་བཤད་དུ་གསོལ། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས་སོ། །ནམ་མཁའ་སྟོང་པ་དག་ལ་བསོས་ཀྱང་ཐོབ། །ནམ་མཁའ་ལ་ནི་བསོས་བཏབ་པས། །ཆུ་བོ་ཆེན་པོ་རྒྱུན་མི་འཆད། །ཆུ་བོ་རྒྱུན་ཆད་མེད་པ་ཡིས། །རྒྱལ་པོའི་དཀོར་སྲུང་པ་དང་འདྲ། །དྲན་པ་མི་འབྱུང་ཆོས་ཉིད་ཀློང་ན་གནས། །ཡེངས་ཀྱང་ཆོས་ཉིད་མ་ཡེངས་ཆོས་ཀྱི་དབྱིངས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཆོས་ཉིད་བརྡར་བསྟན་པའི་ལེའུ་སྟེ་དོན་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །དུག་ལྔ་སྐུ་ལྔའི་བརྡའ་ཆོས་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མ་བསྒྲུབས་ཀུན་ཏུ་གསལ་བའི་འོད་ཁང་ན། །རྒྱལ་པོ་ལྷ་གཅིག་བཞུགས་པ་ལ། ། ― DNG002_Page_0513 ―
[མ་དཔེ་གཟིགས་ན་འདིར་གནོན།]
བློན་པོ་དབང་ཆེན་མི་བཞིས་བསྐོར། །རྒྱལ་པོས་བློན་པོ་མི་བཞི་བཏུལ། །མི་བཞི་བཏུལ་ནས་སྐུ་བཞིར་བསྒྱུར། །རྒྱལ་པོ་མི་འགྱུར་ཆོས་ཀྱི་སྐུ། །མི་བཞི་ཡེ་ཤེས་རྣམ་པ་བཞི། །མི་གཅིག་ཆོས་དབྱིངས་ཡེ་ཤེས་སོ། །མ་རིག་པ་ཡི་མུན་ཁང་ཐིབ་པོ་ན། །མ་རིག་ལོང་མ་ཞེ་སྡང་ཕུང་རྒྱལ་ཡོད། །མཐོ་ལ་སྨྲ་མཆུ་དམའ་ལ་སྨོད། །འཕྲད་ཚད་ཆགས་ལས་བསོགས་པའི་བཟའ་མི་ལྔ། །ཁམས་གསུམ་འཁོར་བར་བསྐྱུར་བའི་མཁན་པོ་ཡིན། །སྐྱེ་རྒས་ན་འཆིའི་སྡུག་བསྔལ་ལས་སུ་སྤྱོད། །སྡུག་བསྔལ་དེ་ལས་བཟློག་འདོད་ན། །མུན་པའི་སྒོ་ཕྱེ་གསལ་པའི་ཡེ་ཤེས་ཐོབ། །མ་རིག་མིག་ཕྱེ་ཡེ་ཤེས་ཉི་མ་ཤར། །ཞེ་སྡང་རྩད་གཅོད་ཕུང་རྒྱལ་གཏན་ནས་རློགས། །ང་རྒྱལ་རང་བརླག་ཕྲག་དོག་མིང་ཡང་མེད། །ཁམས་གསུམ་མི་གནས་སྟོང་གསུམ་སངས་རྒྱས་པ། །སྡུག་བསྔལ་བཞི་ཡི་རྩད་གཅོད་སྐུ་བཞི་ཡེ་ཤེས་བཞི། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། དུག་ལྔ་ཡེ་ཤེས་ལྔར་བརྡར་བསྟན་པའི་ལེའུ་སྟེ་དོན་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཆོས་ཉིད་བྱང་ཆུབ་སེམས་ཀྱི་དོན་ནི་ཇི་ལྟར་ལགས། །དེ་ནས་སྟོན་པས་འཁོར་ལ་འདི་སྐད་གསུངས། །སྣང་བ་བཀག་པས་མི་ཁེགས་འོ་ན་ཁེགས་དང་ཡ། །སེམས་ཉིད་བལྟས་པས་མི་མཐོང་འོ་ན་ལྟོས་དང་ཡ། །གཉིས་མེད་བསྒྲུབས་པས་མི་འགྲུབ་འོ་ན་སྒྲུབ་དང་ཡ། །སངས་རྒྱས་བཙལ་བས་མི་རྙེད་འོ་ན་ཚོལ་དང་ཡ། །ཤེས་ན་མ་ཤེས་མ་བསྒོམས་ན་རྡོ་རྗེ་ཀུན་ཏུ་བཟང་པོ་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཆོས་ཉིད་གཏན་ལ་དབབ་པའི་ལེའུ་སྟེ་དོན་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྙིང་པོའི་དོན་འདི་བཤད་དུ་གསོལ། །ཞེས་ཞུས་པ་དང་། ཀུན་བཟང་ཉིད་ཀྱིས་འདི་སྐད་གསུངས། །སྙིང་པོ་འདུས་མ་བྱས་པ་ཡིན། །སྙིང་པོ་སྐྱེ་མེད་འགྱུར་མེད་ཡིན། །སྙིང་པོ་སྐྱེ་མེད་ ― DNG002_Page_0514 ―
[མ་དཔེ་གཟིགས་ན་འདིར་གནོན།]
ཆོས་ཀྱི་སྐུ། །སྙིང་པོ་སངས་རྒྱས་ཉག་གཅིག་ཡིན། །སྙིང་པོ་འགྱུར་བ་མེད་པ་ཡིན། །སྙིང་པོ་འགྱུར་མེད་གཡུང་དྲུང་གཉུག་མའི་ངང་། །སྙིང་པོ་འོད་གསལ་དྲི་མ་མེད། །སྙིང་པོ་ཀུན་གཞི་འདུས་མ་བྱས། །སྙིང་པོ་རིན་ཆེན་འོད་སྤངས་ཡིན། །དཔེར་ན་མར་ཁལ་གཅིག་ལ་བཞུ་བཏུལ་བྱས་པས་དྲེ་བཞིར་འདུས་པ་མར་གྱི་སྙིང་པོ་ཡིན། །དེ་བཞིན་ཆོས་རྣམས་ཐམས་ཅད་ཀྱང་། །ཐམས་ཅད་གཅིག་ཏུ་འདུས་པའི་སྙིང་པོ་ཆོས་སྐུ་ཡིན། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སྙིང་པོ་བཤད་པ་བསྟན་པའི་ལེའུ་སྟེ་དོན་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཆོས་སྐུའི་བཤད་ལུགས་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་འདི་སྐད་གསུངས། །ཆོས་སྐུ་དངོས་པོ་མེད་པ་ཡིན། །ཆོས་སྐུ་དམིགས་པའི་ཡུལ་ལས་འདས། །ཆོས་སྐུ་རྒྱུ་རྐྱེན་འཕོ་འགྱུར་མེད། །ཆོས་སྐུ་རྩོལ་བསྒྲུབ་བྱ་བཙལ་མེད། །ཆོས་སྐུ་བརྗོད་པའི་ཡུལ་ལས་འདས། །ཚིག་དང་ཡི་གེས་ཆོས་སྐུ་མཚོན་དུ་མེད། །ཐུགས་རྗེ་ཀུན་ལ་ཁྱབ་ཀྱང་ངོས་བཟུང་གཅིག་ཀྱང་མེད། །ཆོས་སྐུ་རྩོལ་བསྒྲུབ་སྤང་ལེན་མཐའ་དང་བྲལ། །ཆོས་སྐུ་མི་བསྒྲུབ་རང་སེམས་ཆོས་ཀྱི་སྐུ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཆོས་སྐུའི་ངེས་ཚིག་བསྟན་པའི་ལེའུ་སྟེ་དོན་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །བྱང་ཆུབ་དོན་འདི་བཤད་དུ་གསོལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བྱང་ནི་ཡུལ་སེམས་གཉིས་མེད་བྱང་། །ཆུབ་ནི་དབྱེར་མེད་ཆེན་པོར་ཆུབ། །བྱང་ནི་ནང་གི་རྣམ་རྟོག་བྱང་། །ཆུབ་ནི་སྤྲོས་པ་ཐད་ཀར་ཆུབ། །བྱང་ནི་གཟུང་འཛིན་གཉིས་སྣང་བྱང་། །ཆུབ་ནི་གཟུང་འཛིན་མེད་པར་ཆུབ། །བྱང་ནི་ ― DNG002_Page_0515 ―
[མ་དཔེ་གཟིགས་ན་འདིར་གནོན།]
མཚན་མའི་རྣམ་རྟོག་བྱང་། །ཆུབ་ནི་མཚན་མ་མེད་པར་ཆུབ། །བྱང་ནི་བརྟགས་ཚད་ཞེན་ཚད་འགྱུ་ཚད་བྱང་། །ཆུབ་ནི་བརྗོད་མེད་ཀློང་དུ་ཆུབ། །བྱང་ནི་དུག་ལྔ་དུག་གསུམ་བྱང་། །ཆུབ་ནི་སྐུ་ལྔ་ཡེ་ཤེས་ལྔ། །བྱང་ནི་རྟོག་ཚོགས་ཇི་སྙེད་བྱང་། །ཆུབ་ནི་རྟོག་མེད་ཡེ་ཤེས་ཆེན་པོར་ཆུབ། །ཅེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། བྱང་ཆུབ་ཀྱི་ངེས་ཚིག་བསྟན་པའི་ལེའུ་སྟེ་དོན་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སེམས་དཔའི་དོན་ནི་བཤད་དུ་གསོལ། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས་སོ། །སེམས་ནི་ཡང་དག་དོན་ལ་སེམས། །དཔའ་ནི་གཉིས་མེད་དོན་ལ་དཔའ། །སེམས་ནི་སྐྱེ་མེད་དོན་ལ་སེམས། །དཔའ་ནི་འགག་མེད་དོན་ལ་དཔའ། །སེམས་ནི་རྒྱུ་རྐྱེན་མེད་པར་སེམས། །དཔའ་ནི་འཕོ་འགྱུར་མེད་པར་དཔའ། །སེམས་ནི་འཁོར་འདས་གཉིས་ལ་སེམས། །དཔའ་ནི་གཉིས་མེད་ཆེན་པོར་དཔའ། །སེམས་ནི་འགྱུར་མེད་ངང་ལ་སེམས། །དཔའ་ནི་མི་བསྐྱེད་ཆགས་ཞེན་མེད། །སེམས་ནི་ཡུལ་སེམས་མེད་པར་སེམས། །དཔའ་ནི་བཟང་ངན་དགག་བསྒྲུབ་མེད། །སེམས་ནི་ཆོས་ཉིད་མ་ལ་སེམས། །དཔའ་ནི་མ་བུ་དབྱེར་མེད་དཔའ། །སེམས་ནི་འགྱུར་མེད་ཀློང་ནས་སེམས། །དཔའ་ནི་བརྗོད་མེད་བདེ་ཆེན་ཀློང་ན་དཔའ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སེམས་དཔའི་ངེས་ཚིག་བསྟན་པའི་ལེའུ་སྟེ་བརྒྱད་ཅུ་ཐམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རང་བྱུང་དོན་ཚིག་བཤད་དུ་གསོལ། །ཞེས་ཞུས་པ་དང་། དེ་ནས་སྟོན་པས་འཁོར་ལ་འདི་སྐད་གསུངས། །རང་ནི་ཐོག་མའི་ཡེ་ཡོད་གཞི། །བྱུང་ནི་ཡིད་ཙམ་ཡོད་དེ་ཙམ། །རང་ནི་དངོས་མེད་ཀུན་ཁྱབ་གཞི། །བྱུང་ནི་གཞི་ལ་གནས་པའི་རླུང་། །རང་ནི་ཡིད་ ― DNG002_Page_0516 ―
[མ་དཔེ་གཟིགས་ན་འདིར་གནོན།]
ཙམ་གཡོ་བའི་གཞི། །བྱུང་ནི་བག་ཙམ་འགྱུར་བས་བྱུང་། །རང་ནི་ཀུན་གཞི་སྤྱི་ཁྱབ་སྟེ། །བྱུང་ནི་རང་སྣང་འོད་ལྔར་བྱུང་། །རང་ནི་འོད་ཀྱི་དཀྱིལ་འཁོར་སྟེ། །བྱུང་ནི་འོད་གསལ་ཟེར་ལྔར་བྱུང་། །རང་ནི་ཟེར་ལྔའི་རང་བཞིན་ཏེ། །བྱུང་ནི་ཤེས་པའི་སྣང་ཚུལ་ལྔ། །རང་ནི་ཡེ་ཡི་ཤེས་པ་སྟེ། །བྱུང་ནི་གནས་པའི་དོན་མ་རིག །ཡེ་དོན་མ་ཤེས་དོན་མ་ཤེས། །དེ་ཕྱིར་མ་རིག་འཁྲུལ་པར་གསུངས། །རང་ནི་མ་རིག་འཁྲུལ་པའི་སྒོ། །བྱུང་ནི་རིག་ཡིད་སེམས་ཡིད་བྱུང་། །རང་ནི་འཁྲུལ་ལུགས་རྣམ་གསུམ་སྟེ། །བྱུང་ནི་རིགས་དྲུག་ཁམས་གསུམ་འཁོར་བ་བྱུང་། །རང་ནི་རང་གི་སེམས་ཡིན་ཏེ། །བྱུང་ནི་རྟོག་ཚོགས་བརྒྱད་ཁྲི་བཞི་སྟོང་བྱུང་། །རང་ནི་མ་རྟོགས་འཁོར་བའི་སེམས། །བྱུང་ནི་ཉོན་མོངས་བརྒྱད་ཁྲི་བཞི་སྟོང་བྱུང་། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། རང་བྱུང་གི་ངེས་ཚིག་མ་རྟོགས་འཁོར་བ་བྱུང་ཞིང་འཁྱམས་པའི་ལེའུ་སྟེ་གྱ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཀུན་གཞིའི་དོན་ནི་ཇི་ལྟར་ལགས། །ཞེས་ཞུས་པ་དང་། ཀུན་ཏུ་བཟང་པོས་བཀའ་སྩལ་པ། །ཀུན་ནི་སྣང་སྲིད་འཁོར་འདས་ཡིན། །གཞི་ནི་བྱང་ཆུབ་སེམས་ཡིན་ནོ། །ཀུན་ནི་སྐྱེ་འགྲོ་གཟུགས་བསྡུས་ཡིན། །གཞི་ནི་སེམས་ཀྱི་འབྱུང་གཞི་ཡིན། །ཀུན་ནི་འབྱུང་སྣང་ཆོས་ལ་བྱ། །གཞི་ནི་ཐོག་མའི་གཞི་ལ་བྱ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཀུན་གཞིའི་ངེས་ཚིག་བསྟན་པའི་ལེའུ་སྟེ་གྱ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡི། །ཀུན་བཟང་ཉིད་ལ་འདི་སྐད་ཞུས། །མ་ནོར་སངས་རྒྱས་ཇི་ལྟར་ལགས། །ཞེས་ཞུས་པ་དང་། ཀུན་ཏུ་བཟང་པོས་བཀའ་སྩལ་པ། །མ་ནོར་སངས་རྒྱས་ངོ་བོ་ནི། །བསྒྲུབས་པས་སངས་རྒྱས་མི་འགྲུབ་ཀྱི། །སེམས་ལ་སངས་རྒྱས་ཡེ་ནས་གྲུབ། །གྲུབ་ཟིན་དོན་ལས་ ― DNG002_Page_0517 ―
[མ་དཔེ་གཟིགས་ན་འདིར་གནོན།]
མ་གཡོས་ན། །ཐུན་མོང་རྩོལ་བསྒྲུབ་བྱ་མི་དགོས། །དྲང་པོར་འདུག་ལ་ལྷུན་གྲུབ་ལྟོས། །བལྟས་པས་མཐོང་བ་གཅིག་ཀྱང་མེད། །མེད་པ་དེ་ཀ་མཐོང་བ་ཡིན། །མ་རིག་འཁོར་བའི་མུན་པ་སངས། །ཡེ་ཤེས་རིག་པའི་འཆར་སྒོ་རྒྱས། །བདག་འཛིན་ཉོན་མོངས་འགྱུ་མཁན་སངས། །འཛིན་མེད་ཡེ་ཤེས་རྣམ་དག་རྒྱས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མ་ནོར་སངས་རྒྱས་བསྟན་པའི་ལེའུ་སྟེ་གྱ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མྱང་འདས་མ་ནོར་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། མ་ནོར་ངེས་པའི་མྱང་འདས་ནི། །སྐྱེ་འབྱུང་ཀུན་གཞིའི་ཀློང་དུ་འདུས། །ཡན་ལག་བུ་ཡི་ཤེས་པ་རྣམས། །སྙིང་པོ་མ་ཡི་ཀློང་དུ་འདུས། །མཚན་ཉིད་སྣང་ཚུལ་རྩལ་སྣང་རྣམས། །སྟོང་ཉིད་མཁའ་ཀློང་དབྱིངས་སུ་འདུས། །སེམས་ཀྱི་སྣང་ཚུལ་སྣ་ཚོགས་བརྟགས་ཞེན་རྣམས། །ཆོས་ཉིད་བྱང་ཆུབ་སེམས་སུ་འདུས། །བློ་ལ་སྣང་བའི་ཐེ་ཚོམ་རྣམས། །ཀུན་གཞི་ནམ་མཁའི་ཀློང་དུ་འདུས། །མ་རིག་དངོས་པོ་རིག་པར་འདུས། །སྣང་བའི་ངོ་བོ་སྟོང་པར་འདུས། །གཉིས་སྣང་ཐམས་ཅད་གཉིས་མེད་འདུས། །བདག་འཛིན་ཐམས་ཅད་འཛིན་མེད་འདུས། །ཕྱོགས་རིས་ཐམས་ཅད་ཞེན་མེད་འདུས། །ཞེན་ཆགས་ཐམས་ཅད་ཞེན་མེད་འདུས། །ཁམས་གསུམ་འཁོར་བའི་སྡུག་བསྔལ་རྣམས། །མྱ་ངན་འདས་པའི་ཀློང་དུ་འདུས། །སེམས་ཅན་ངན་རྟོག་བདག་འཛིན་རྣམས། །སངས་རྒྱས་བདེ་ཆེན་དབྱིངས་སུ་འདུས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མ་ནོར་ངེས་པར་མྱ་ངན་ལས་འདས་པའི་ལེའུ་སྟེ་གྱ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་གསོལ། །མ་ ― DNG002_Page_0518 ―
[མ་དཔེ་གཟིགས་ན་འདིར་གནོན།]
ནོར་སེམས་ཉིད་ཇི་ལྟར་ལགས། །ཀུན་ཏུ་བཟང་པོས་བཀའ་སྩལ་པ། །མ་ནོར་སེམས་ཉིད་རང་བཞིན་ནི། །བཅོས་པ་མེད་པའི་སེམས་ཉིད་དེ། །སོ་མ་རང་ལུགས་གྱི་ནར་འདུའོ། །བདག་འཛིན་བྲལ་བའི་སེམས་ཉིད་དེ། །འཛིན་མེད་གསལ་དངས་སངས་རྒྱས་སོ། །རྟགས་སྣང་གྲོལ་བའི་སེམས་ཉིད་དེ། །མ་ནོར་རྣམ་དག་ཡེ་ཤེས་སོ། །བློས་བཅུག་ཡིད་སྨོན་སངས་པ་དེ། །ཡིད་སྨོན་མེད་པའི་སེམས་ཉིད་དོ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མ་ནོར་སེམས་ཉིད་བསྟན་པའི་ལེའུ་སྟེ་གྱ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སེམས་ཀྱི་སྣང་ཚུལ་ཇི་ལྟར་ལགས། །ཀུན་ཏུ་བཟང་པོས་བཀའ་སྩལ་པ། །སེམས་ཀྱི་སྣང་ཚུལ་བསམ་ཡས་ཏེ། །འཁོར་འདས་གཉིས་ཀྱང་སེམས་ཀྱི་སྣང་ཚུལ་ཡིན། །སངས་རྒྱས་སེམས་ཅན་སེམས་ཀྱི་སྣང་ཚུལ་ཡིན། །སྣང་སྲིད་སྣོད་བཅུད་སེམས་ཀྱི་སྣང་ཚུལ་ཡིན། །སྐྱེ་འགྲོ་གཟུགས་བསྡུས་སེམས་ཀྱི་སྣང་ཚུལ་ཡིན། །བརྒྱད་ཁྲི་བཞི་སྟོང་སེམས་ཀྱི་སྣང་ཚུལ་ཡིན། །ཐེག་པ་རིམ་དགུ་སེམས་ཀྱི་སྣང་ཚུལ་ཡིན། །རྟོགས་དང་མ་རྟོགས་སེམས་ཀྱི་སྣང་ཚུལ་ཡིན། །རིག་དང་མ་རིག་སེམས་ཀྱི་སྣང་ཚུལ་ཡིན། །ཐམས་ཅད་གཉིས་མེད་དབྱེ་བསལ་མེད་པ་ལ། །མ་རིག་འཁྲུལ་པའི་བློ་ལ་གཉིས་སུ་སྣང་། །ཤེས་ལ་རྟོགས་ན་རང་བཞིན་ཡོངས་ཀྱིས་མཉམ། །སེམས་ཀྱི་སྣང་ཚུལ་བསམ་ཡས་ཀྱང་། །མཉམ་པར་ཤེས་ན་སངས་རྒྱས་ཀུན་དང་མཉམ། །ཞེས་གསུངས་སོ། །སེམས་ཀྱི་སྣང་ཚུལ་མདོ་ཙམ་བསྟན་པའི་ལེའུ་སྟེ་གྱ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྣང་ཚུལ་ཚིག་ཏུ་ཇི་ལྟར་སྡུད། །ཅེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། ། ― DNG002_Page_0519 ―
[མ་དཔེ་གཟིགས་ན་འདིར་གནོན།]
སྣང་ཚུལ་བསམ་ཡས་སེམས་ལ་སྡུད། །བལྟ་བྱ་ལྟ་བྱེད་སེམས་སུ་སྡུད། །བསྒོམ་བྱ་སྒོམ་བྱེད་སེམས་སུ་སྡུད། །སྤྱད་བྱ་སྤྱོད་བྱེད་སེམས་སུ་སྡུད། །བསྒྲུབ་བྱ་སྒྲུབ་བྱེད་སེམས་སུ་སྡུད། །བསྲུང་བྱ་སྲུང་བྱེད་སེམས་སུ་སྡུད། །བཙལ་བྱ་རྩོལ་བྱེད་སེམས་སུ་སྡུད། །བརྒྱད་ཁྲི་བཞི་སྟོང་སེམས་སུ་སྡུད། །ཐེག་པ་རིམ་དགུ་སེམས་སུ་སྡུད། །ཡིད་རིག་སེམས་ཀྱི་བརྟག་སྣང་སེམས་སུ་སྡུད། །རྩོལ་བས་བསྡུས་པ་མ་ཡིན་ཐོག་མ་ཉིད་ནས་དེ་ལྟར་བསྡུས། །དཔེར་ན་རྒྱ་མཚོར་ཆུ་བྲན་བཞིན། །མཚོ་ལས་བྱུང་ཞིང་མཚོ་རུ་བསྡུས། །བྱས་ནས་བསྡུས་པ་མ་ཡིན་ཏེ། །ཡེ་ནས་དེ་ལྟར་བསྡུས་པའོ། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། སེམས་ཀྱི་སྣང་ཚུལ་བསྡུས་པའི་ལེའུ་སྟེ་གྱ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མ་ནོར་ངེས་པའི་གདམས་ངག་གསུང་དུ་གསོལ། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །མ་ནོར་ངེས་པའི་གདམས་ངག་ནི། །མཚོན་དུ་མེད་པའི་བྱང་ཆུབ་སེམས། །སྨྲ་བརྗོད་མེད་པའི་ངང་ལ་ཞོག །བསྟན་དུ་མེད་པའི་བྱང་ཆུབ་སེམས། །བློ་ལས་འདས་པའི་ངང་དུ་ཞོག །བལྟ་རུ་མེད་པའི་བྱང་ཆུབ་སེམས། །བལྟ་བྱ་ལྟ་བྱེད་མེད་པའི་ངང་ལ་ཞོག །བསམ་དུ་མེད་པའི་བྱང་ཆུབ་སེམས། །བསྒོམ་དུ་མེད་པའི་ངང་ལ་ཞོག །སྤྱད་དུ་མེད་པའི་བྱང་ཆུབ་སེམས། །བྱ་བཙལ་མེད་པའི་ངང་ལ་ཞོག །བསྒྲུབ་ཏུ་མེད་པའི་བྱང་ཆུབ་སེམས། །ངང་དངས་རང་སངས་ངང་ལ་ཞོག །རེ་དོགས་བསྒྲུབ་མེད་ངང་ལ་ཞོག །སྤྲོས་པ་མེད་པའི་བྱང་ཆུབ་སེམས། །སྤྲོས་བྲལ་ཆེན་པོའི་ངང་ལ་ཞོག །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། མ་ནོར་ངེས་པའི་གདམས་ངག་བསྟན་པའི་ལེའུ་སྟེ་གྱ་བརྒྱད་པའོ།། །།དེ་ནས་ ― DNG002_Page_0520 ―
[མ་དཔེ་གཟིགས་ན་འདིར་གནོན།]
རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །དུག་ལྔ་སེམས་སུ་ཇི་ལྟར་དགྲོལ། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །དུག་ལྔ་སེམས་སུ་དགྲོལ་བ་ནི། །གཏི་ནི་ཆོས་ཉིད་བསྟན་པ་ལ། །མུག་ནི་མཚན་མའི་ཆོས་ལ་མུག །དེ་ཕྱིར་སེམས་ཉིད་གཏི་མུག་གོ། །འདོད་ནི་ཆོས་སྐུ་སྐྱེ་མེད་འདོད། །ཆགས་ནི་བདེ་ཆེན་ཀློང་དུ་ཆགས། །དེས་ན་སེམས་ཉིད་འདོད་ཆགས་ཡིན། །ཞེ་ནི་ཆོས་ཉིད་དབྱིངས་ནས་ཞེ། །སྡང་ནི་འཁོར་བའི་ཆོས་ལ་སྡང་། །དེ་ཕྱིར་སེམས་ཉིད་ཞེ་སྡང་ཡིན། །ང་ནི་སྐྱེ་མེད་བྱང་ཆུབ་སེམས། །རྒྱལ་ནི་འཁོར་བའི་དམག་ལས་རྒྱལ། །དེ་ཕྱིར་སེམས་ཉིད་ང་རྒྱལ་ཡིན། །ཕྲག་ནི་འགྱུར་མེད་དབྱིངས་ཀྱི་ཕྲག །དོག་ནི་ཆགས་སྡང་ལྔ་ལ་དོག །དེ་ཕྱིར་སེམས་ཉིད་ཕྲག་དོག་ཡིན། །དུག་ལྔ་སྐྱེ་མེད་བྱང་ཆུབ་སེམས། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། དུག་ལྔ་ཆོས་ཉིད་དུ་འགྲོལ་བའི་ལེའུ་སྟེ་གྱ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །འབྱུང་ལྔ་སེམས་སུ་ཇི་ལྟར་གྲོལ། །ཞེས་ཞུས་པ་དང་། ཀུན་ཏུ་བཟང་པོས་བཀའ་སྩལ་པ། །འབྱུང་ལྔ་སེམས་ཉིད་གྲོལ་བ་ནི། །ནམ་ནི་སྐྱེ་བ་མེད་པ་ནམ། །མཁའ་ནི་འགག་པ་མེད་པའི་མཁའ། །སྐྱེ་འགག་གཉིས་སུ་མེད་པའི་བྱང་ཆུབ་སེམས། །དེ་ཕྱིར་སེམས་ཉིད་ནམ་མཁའ་ཡིན། །ས་ནི་ཀུན་གཞི་སེམས་ཀྱི་གཞི། །སྣ་ཚོགས་ཐམས་ཅད་སྐྱེ་འབྱུང་ཡང་། །ཆོས་ཉིད་རང་བཞིན་སྲ་ཞིང་བརྟན། །ངེས་ན་སེམས་ཉིད་ས་ཡང་ཡིན། །བྱང་ཆུབ་སེམས་ཀྱི་མེ་ཆེན་གྱིས། །ཉོན་མོངས་དུག་ལྔའི་བུད་ཤིང་བསྲེག །དེ་ཕྱིར་སེམས་ཉིད་མེ་ཡང་ཡིན། །ཆོས་ཉིད་རླན་དང་མ་བྲལ་ཆུ། །གཉིས་མེད་སྡུད་པར་བྱེད་པས་ཆུ་ཡང་ཡིན། །དེ་ཕྱིར་སེམས་ཉིད་ཆུ་ལྟར་སྣང་། །རང་བྱུང་རྩལ་གྱི་རླུང་ཆེན་གྱིས། །ཉོན་ ― DNG002_Page_0521 ―
[མ་དཔེ་གཟིགས་ན་འདིར་གནོན།]
མོངས་བརྒྱད་ཁྲི་ཕྱགས་མས་བཏབ། །རྣམ་པར་རྟོག་པ་རླུང་ལ་བསྐུར། །དེ་ཕྱིར་སེམས་ཉིད་རླུང་ཡང་ཡིན། །འབྱུང་ལྔ་མ་ལུས་སེམས་ལ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། འབྱུང་ལྔ་སེམས་སུ་གྲོལ་བའི་ལེའུ་སྟེ་དགུ་བཅུ་ཐམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མཐའ་དབུས་ཕྱོགས་མཚམས་སེམས་སུ་ཇི་ལྟར་གྲོལ། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །ཕྱོགས་མཚམས་སེམས་ལ་གྲོལ་ལུགས་ནི། །ཆོས་སྐུ་མི་འགྱུར་བསྟན་པ་སྟེ། །བྱང་ཆུབ་སེམས་ནི་དབུས་ཀྱང་ཡིན། །སྙིང་པོའི་ཀློང་ནས་ཡེ་ཤེས་ཤར། །བྱང་ཆུབ་སེམས་ནི་ཤར་ཕྱོགས་ཡིན། །ཉོན་མོངས་ཆགས་སྡང་འཛིན་ཆགས་བཏོན། །བྱང་ཆུབ་སེམས་ནི་ལྷོ་ཕྱོགས་ཡིན། །རྣམ་པར་རྟོག་པའི་མཚན་མ་ཇི་སྙེད་རྣམས། །མི་རྟོག་སྐྱེ་བ་མེད་པའི་དབྱིངས་སུ་ནུབ། །བྱང་ཆུབ་སེམས་ནི་ནུབ་ཕྱོགས་ཡིན། །ཉོན་མོངས་དགག་བསྒྲུབ་གཟུང་འཛིན་བྱང་། །བྱང་ཆུབ་སེམས་ནི་བྱང་ཕྱོགས་ཡིན། །ཤར་ལྷོ་མཚམས་ནི་སྐྱེ་བ་མེད། །ལྷོ་ནུབ་མཚམས་ནི་འགག་པ་མེད། །ནུབ་བྱང་མཚམས་ནི་གཉིས་སུ་མེད། །བྱང་ཤར་མཚམས་ནི་རང་སར་གྲོལ། །སྟེང་འོག་གཉིས་ནི་གཉིས་མེད་དབྱེ་བསལ་མེད། །སྟེང་ཕྱོགས་ཐེག་དམན་ཐམས་ཅད་ཟིལ་གྱིས་གནོན། །འོག་ཕྱོགས་ཁྱབ་གདལ་འུབ་ཆུབ་ཡིན། །དེ་ཕྱིར་ཕྱོགས་མཚམས་མེད་པར་སེམས་སུ་གྲོལ། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། ཕྱོགས་མཚམས་སེམས་སུ་གྲོལ་བའི་ལེའུ་སྟེ་གོ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཁ་དོག་རྣམ་ལྔ་སེམས་སུ་ཇི་ལྟར་གྲོལ། །ཞེས་གསོལ་པ་དང་། ཀུན་ཏུ་བཟང་པོས་འདི་སྐད་གསུངས། །གཟུང་འཛིན་དྲི་མས་མ་གོས་དཀར་པོ་ཡིན། ། ― DNG002_Page_0522 ―
[མ་དཔེ་གཟིགས་ན་འདིར་གནོན།]
ཡོན་ཏན་མ་ལུས་ཀུན་འབྱུང་སེར་པོ་ཡིན། །སྣང་བ་དབང་དུ་འདུས་པས་དམར་པོ་ཡིན། །འཁོར་བའི་ལས་རྣམས་དག་པས་ལྗང་གུ་ཡིན། །ཆོས་ཉིད་འགྱུར་བ་མེད་པས་ནག་པོ་ཡིན། །ཁ་དོག་རྣམ་ལྔ་བྱང་ཆུབ་སེམས་སུ་གྲོལ། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། ཁ་དོག་རྣམ་ལྔ་སེམས་ལ་རྫོགས་པའི་ལེའུ་སྟེ་གོ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྐྱེས་པ་སེམས་སུ་ཅི་ལྟར་གྲོལ། །ཀུན་ཏུ་བཟང་པོས་འདི་སྐད་གསུངས། །སྐྱེས་པ་སེམས་སུ་གྲོལ་པ་ནི། །སྐྱེས་ནི་རང་བྱུང་ཡེ་ཤེས་སྐྱེས། །པ་ནི་ཀུན་གསལ་ཆེན་པོར་པ། །སྐྱེས་ནི་རང་རིག་ངང་དྭངས་སྐྱེས། །པ་ནི་རང་བརླག་རང་སངས་པ། །སྐྱེས་ནི་རྟོགས་པའི་ཤེས་རབ་སྐྱེས། །མ་རིག་མུན་སངས་ཤེས་རབ་པ། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། སྐྱེས་པ་སེམས་སུ་གྲོལ་བའི་ལེའུ་སྟེ་གོ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །བུད་མེད་སེམས་སུ་ཇི་ལྟར་གྲོལ། །ཞེས་ཞུས་པ་དང་། ཀུན་བཟང་འཁོར་ལ་འདི་སྐད་གསུངས། །བུད་མེད་སེམས་སུ་གྲོལ་བ་ནི། །བུད་ན་འཁོར་བའི་ཆོས་རྣམས་བུད། །མེད་ནི་མ་རིག་མུན་ནག་མེད། །དེ་ཕྱིར་བུད་མེད་བྱང་ཆུབ་སེམས། །བུད་ནི་ཉོན་མོངས་བརྒྱད་ཁྲི་བཞི་སྟོང་བུད། །མེད་ནི་ཆགས་སྡང་གཉིས་འཛིན་དགག་བསྒྲུབ་མེད། །དེ་ཕྱིར་བུད་མེད་སེམས་སུ་གྲོལ། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། བུད་མེད་སེམས་སུ་གྲོལ་བའི་ལེའུ་སྟེ་གོ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རྣལ་འབྱོར་སེམས་ལ་ཇི་ལྟར་རྫོགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །རྣལ་འབྱོར་སེམས་ལ་ ― DNG002_Page_0523 ―
[མ་དཔེ་གཟིགས་ན་འདིར་གནོན།]
རྫོགས་ལུགས་ནི། །སྤྱིར་ནི་རྣལ་འབྱོར་རྣམ་བཞི་སྟེ། །ལུང་ཆེན་ཐོབ་པའི་རྣལ་འབྱོར་དང་། །རྩལ་ཆེན་རྫོགས་པའི་རྣལ་འབྱོར་དང་། །མོས་པ་སྤྱོད་པའི་རྣལ་འབྱོར་དང་། །དོན་དམ་པ་ཡི་རྣལ་འབྱོར་བཞི། །ལུང་ཆེན་ཐོབ་པའི་རྣལ་འབྱོར་ནི། །ཀུན་ཏུ་བཟང་པོ་སྐྱེ་མེད་ཀློང་། །རྡོ་རྗེ་སེམས་དཔའི་ཐུགས་ཀྱིས་རྟོགས། །རྡོ་རྗེ་སེམས་དཔའི་ཐུགས་དགོངས་དེ། །ཨུ་རྒྱན་དགའ་རབ་རྡོ་རྗེས་ཐོབ། །ལུང་ཆེན་ཐོབ་པའི་རྣལ་འབྱོར་རོ། །རྩལ་ཆེན་རྫོགས་པའི་རྣལ་འབྱོར་ནི། །སྐྱེ་ཤི་མེད་པའི་རྩལ་རྣམས་རྫོགས། །རྒྱལ་བའི་བཀའ་ཡི་དབང་ཡང་རྫོགས། །རྩལ་ཆེན་རྫོགས་པའི་རྣལ་འབྱོར་རོ། །མོས་པ་སྤྱོད་པའི་རྣལ་འབྱོར་ནི། །དམ་པའི་བཀའ་ཕྱིར་འབྲང་བའི་འདུན་པ་དེ་ནི་རྣལ་འབྱོར་ཡིན། །ཆགས་སྡང་ལྔ་ལ་སྤྱོད་ཅིང་ཆགས། །དམ་པའི་རྣལ་འབྱོར་ཡང་མ་ཡིན། །ཡང་དག་དོན་གྱི་རྣལ་འབྱོར་ནི། །རྣལ་ནི་སྐྱེ་མེད་འགྱུར་མེད་རྣལ། །འབྱོར་ནི་སྙིང་པོའི་ཀློང་དུ་འབྱོར། །རྣལ་ནི་གཞི་གནས་རང་བཞག་པ། །འབྱོར་ནི་ཆོས་ཉིད་ཀློང་དུ་འབྱོར། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། རྣལ་འབྱོར་སེམས་ལ་རྫོགས་པའི་ལེའུ་སྟེ་གོ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྒོ་ལྔ་ཟང་ཐལ་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་འདི་སྐད་གསུངས། །སྒོ་ལྔ་ཡེ་ཤེས་ཟང་ཐལ་ནི། །གསལ་འགྲིབ་མེད་པའི་ཡེ་ཤེས་ནི། །མིག་གི་རྣམ་ཤེས་ཟང་ཐལ་ཡིན། །དྲི་མ་མེད་པའི་ཡེ་ཤེས་ནི། །སྣ་ཡི་རྣམ་ཤེས་ཟང་ཐལ་ཡིན། །སྒྲིབ་པ་མེད་པའི་ཡེ་ཤེས་ནི། །རྣ་བའི་རྣམ་ཤེས་ཟང་ཐལ་ཡིན། །འགྱུར་བ་མེད་པའི་བྱང་ཆུབ་སེམས། །ལྕེ་ཡི་རྣམ་ཤེས་ཟང་ཐལ་ཡིན། །སྐྱེ་འཇིག་མེད་པའི་བྱང་ཆུབ་སེམས། །ལུས་ཀྱི་རྣམ་ཤེས་ཟང་ཐལ་ཡིན། །སྒོ་ལྔ་བྱང་ཆུབ་སེམས་སུ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། སྒོ་ལྔ་ཟང་ཐལ་གྱི་ ― DNG002_Page_0524 ―
[མ་དཔེ་གཟིགས་ན་འདིར་གནོན།]
ལེའུ་སྟེ་གོ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །འགག་མེད་ཡེ་ཤེས་ཇི་ལྟར་ལགས། །ཀུན་ཏུ་བཟང་པོས་འཁོར་ལ་བཀའ་སྩལ་པ། །སྣང་བ་མ་འགགས་རང་སྣང་ཆོས་ཀྱི་དབྱིངས། །རིག་པ་མ་འགགས་རང་བྱུང་ཡེ་ཤེས་སོ། །ཕྱི་ནང་གཉིས་མེད་དབྱེར་མེད་ཡེ་ཤེས་སོ། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། མ་འགགས་རང་སྣང་བའི་ལེའུ་སྟེ་གོ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་གསོལ། །མཚན་ཉིད་སྡེ་གསུམ་ཇི་ལྟར་རྫོགས། །ཀུན་ཏུ་བཟང་པོས་བཀའ་སྩལ་པ། །མཚན་ཉིད་སྡེ་གསུམ་རྫོགས་ལུགས་ནི། །དེ་ལ་ཉན་ཐོས་རྫོགས་ལུགས་ནི། །ཉན་ནི་སྐྱེ་མེད་དོན་ལ་གནས། །ཐོས་ནི་འགྱུར་བ་མེད་པར་ཐོས། །གཟུང་འཛིན་གཉིས་མེད་དབྱེ་བསལ་མེད། །དེ་ཕྱིར་ཉན་ཐོས་སེམས་ལ་རྫོགས། །རང་རྒྱལ་རྫོགས་པའི་རྫོགས་ལུགས་ནི། །རང་ནི་ངང་དངས་ཆོས་ཀྱི་སྐུ། །རྒྱལ་ནི་ཆགས་སྡང་གཉིས་ལས་རྒྱལ། །དགག་བསྒྲུབ་གཉིས་མེད་བྱང་ཆུབ་སེམས། །དེ་ཕྱིར་རང་རྒྱལ་སེམས་ལ་རྫོགས། །མདོ་སྡེ་བྱང་སེམས་རྫོགས་ལུགས་ནི། །མདོ་ནི་ཐེག་པའི་སྤྱི་མདོ་དེ། །སྡེ་ནི་སེམས་ཀྱི་རྣམ་གྲངས་ཏེ། །བྱང་ནི་འུབ་ཆུབ་ཀློང་དུ་བྱང་། །སེམས་ནི་འགྱུར་མེད་དོན་ལ་སེམས། །ཐེག་ནི་བརྒྱད་ཁྲི་བཞི་སྟོང་ཐེག །པ་ནི་སྤྱི་ཏི་ཡོ་གར་པ། །དེ་ཕྱིར་མདོ་སྡེ་སེམས་ལ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས་ཀྱི་རྒྱུད་ལས། མཚན་ཉིད་སྡེ་གསུམ་སྤྱི་ཏིར་བསྟན་པའི་ལེའུ་སྟེ་གོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །གསང་སྔགས་ཕྱི་རྒྱུད་ཇི་ལྟར་རྫོགས། །ཞེས་ཞུས་པ་དང་། ཀུན་ཏུ་བཟང་པོས་བཀའ་སྩལ་པ། །ཀྲི་ཡའི་ཐེག་པའི་རྫོགས་ལུགས་ནི། །ཀྲི་ནི་སྙིང་པོའི་ཀློང་ན་འགྱུར་མེད་ཀྲི། །ཡ་ནི་སྐྱེ་བ་མེད་པའི་ཡ། །ཐེག་པ་བརྟན་ཞིང་མི་འགྱུར་ ― DNG002_Page_0525 ―
[མ་དཔེ་གཟིགས་ན་འདིར་གནོན།]
བའོ། །ཕྱི་དག་ནང་དག་གསང་བ་དག །ཀྲི་ཡའི་ཐེག་པ་སེམས་ལ་རྫོགས། །ཨུ་པ་ཡ་ཡི་ཐེག་པའི་རྫོགས་ལུགས་ནི། །ཨུ་ནི་སྐྱེ་བ་མེད་པ་ཡིན། །བ་ནི་འགག་པ་མེད་པ་ཡིན། །ཡ་ནི་ཡར་བལྟ་མར་སྤྱོད་སྐྱེ་འགག་མེད། །ཨུ་པ་བྱང་ཆུབ་སེམས་ལ་རྫོགས། །ཡོ་གའི་ཐེག་པའི་རྫོགས་ལུགས་ནི། །ཡོ་ནི་མ་ལུས་ཀུན་གཞིའི་ཀློང་། །ག་ནི་སྣང་ཚུལ་ཀློང་དུ་ཐིམ། །སྐྱེ་འགག་གཉིས་མེད་དབྱེ་བསལ་མེད། །སུམ་ཅུ་རྩ་ལྔའི་ལྷ་ཚོགས་རྣམས། །ཆོས་ཉིད་བྱང་ཆུབ་སེམས་ལ་རྫོགས། །ཕྱི་རྒྱུད་སྡེ་གསུམ་སེམས་ལ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། ཕྱི་རྒྱུད་སྡེ་གསུམ་རྫོགས་པའི་ལེའུ་སྟེ་གོ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ནང་རྒྱུད་སྡེ་གསུམ་བསྟན་པ་ཡི། །དེ་ཡི་རྫོགས་ལུགས་ཇི་ལྟར་ལགས། །ཞེས་ཞུས་སོ། །ཀུན་ཏུ་བཟང་པོས་བཀའ་སྩལ་པ། །མ་ཧཱ་ཡོ་གའི་རྫོགས་ལུགས་ནི། །མ་ནི་སྙིང་པོ་དོན་གྱི་མ། །ཧཱ་ནི་རྩལ་སྣང་བུ་ཡིན་ཏེ། །མ་འགགས་བུ་ཡི་ལྷ་ཚོགས་རྣམས། །མ་ནི་སྐྱེ་མེད་ཆོས་ཉིད་ལ། །ཧཱ་ནི་སྣང་བའི་ཐབས་ཡིན་ནོ། །ཡོ་གས་གཉིས་མེད་རྩིས་གདབ་མེད། །བཞི་བཅུ་རྩ་གཉིས་སེམས་ལ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། མ་ཧཱ་ཡོ་གའི་རྫོགས་ལུགས་བསྟན་པའི་ལེའུ་སྟེ་བརྒྱ་ཐམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། ཨ་ནུ་ཡོ་ག་ཇི་ལྟར་རྫོགས། །ཞེས་ཞུས་པ་དང་། ཀུན་ཏུ་བཟང་པོས་བཀའ་སྩལ་པ། །ཨ་ནུ་ཡོ་གའི་རྫོགས་ལུགས་ནི། །ཨ་ནི་སྐྱེ་མེད་བྱང་ཆུབ་སེམས། །ནུ་ནི་འགག་མེད་ཡེ་ཤེས་ཡིན། །ཡོ་ནི་སྣང་སྲིད་ཆོས་དབྱིངས་ལ། །ག་ནི་ཡེ་ཤེས་སྐྱེ་མེད་དོ། །དབྱིངས་དང་ཡེ་ཤེས་གཉིས་མེད་སྟེ། །ཆོས་ཉིད་བྱང་ཆུབ་སེམས་ལ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། ཨ་ནུ་ཡོ་ག་སེམས་ལ་རྫོགས་པའི་ལེའུ་ ― DNG002_Page_0526 ―
[མ་དཔེ་གཟིགས་ན་འདིར་གནོན།]
སྟེ་བརྒྱ་དང་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཨ་ཏི་ཡོ་གའི་ཐེག་པ་ཇི་ལྟར་རྫོགས། ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །ཨ་ཏི་ཡོ་ག་རྫོགས་ལུགས་ནི། །ཨ་ནི་མ་སྐྱེས་སྙིང་པོའི་ཀློང་། །ཏི་ནི་བསྟན་པ་མི་འགྱུར་བ། །ཡོ་ནི་ཐེག་པ་སྤྱི་བསྡུས་ཡིན། །ག་ནི་འགྱུར་མེད་ཆོས་ཀྱི་སྐུ། །ཐེག་པ་རྫོགས་པ་ཆེན་པོའོ། །རྫོགས་པ་འཁོར་འདས་སྣང་སྲིད་རྫོགས། །ཆེན་པོ་འགྲན་ཟླ་མེད་པས་ཆེ། །རྫོགས་ཆེན་བྱང་ཆུབ་སེམས་ལ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་ལས། སེམས་ལ་རྫོགས་ཆེན་རྫོགས་པའི་ལེའུ་སྟེ་བརྒྱ་དང་གཉིས་པའོ།། །།སས་སྟྭ་ཧ་ཨི་ལ་ཨ་སི་དྷརྨཱ་ཨ་ཏི་གྷ་ཨ། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྤྱི་ཏི་ཡོ་གའི་ཐེག་པ་རུ། །ཐེག་པ་ཐམས་ཅད་ཇི་ལྟར་རྫོགས། །ཞེས་གསོལ་པ་དང་། དེ་ནས་སྟོན་པ་ཀུན་བཟང་དེས། རིན་པོ་ཆེ་འོད་བརྡའ་སྦྱོར་དབྱེར་མེད་ཀྱི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །ང་ཡི་སྤྱི་ཏི་ཡོ་ག་འདིར། །ཐམས་ཅད་མ་ལུས་ཡོངས་སུ་འདི་ལྟར་རྫོགས། །སྙིང་པོ་རྩལ་སྣང་བརྟགས་ཞེན་མིང་ཚིག་རྫོགས། །སྣང་སྲིད་སྐྱེ་འགུལ་འཁོར་འདས་གཉིས་སྣང་རྫོགས། །ཐམས་ཅད་སྐྱེས་འབྱུང་འཁོར་བའི་ས་བོན་རྫོགས། །བྱས་པས་མ་ཟིན་འཁོར་བའི་ལས་རྣམས་རྫོགས། །བསྒྲུབས་པས་མི་འགྲུབ་ཡིད་སྨོན་རེ་དོགས་རྫོགས། །ཕྱི་ནང་དགག་བསྒྲུབ་སྤང་ལེན་གཟུང་འཛིན་གཉིས་སྣང་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། འཁོར་བའི་ལས་རྣམས་རྫོགས་པའི་ལེའུ་སྟེ་བརྒྱ་དང་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །བརྒྱད་ཁྲི་ ― DNG002_Page_0527 ―
[མ་དཔེ་གཟིགས་ན་འདིར་གནོན།]
བཞི་སྟོང་ཇི་ལྟར་རྫོགས། །ཞེས་གསོལ་པ་དང་། ཀུན་ཏུ་བཟང་པོས་འདི་སྐད་གསུངས། །བརྒྱད་ཁྲི་བཞི་སྟོང་ཐེག་པ་ཡང་། །ང་ཡི་སྤྱི་ཏི་ཡོ་གར་རྫོགས། །ཐེག་པ་རིམ་དགུའི་ལྟ་བ་གྲུབ་མཐའ་རྫོགས། །དཀྱིལ་འཁོར་དབང་དང་དམ་ཚིག་གྲུབ་མཐའ་རྫོགས། །སྡོམ་པ་བསླབ་པ་ཉན་ཐོས་འདུལ་ཁྲིམས་རྫོགས། །ས་དང་ལམ་དང་ཕ་རོལ་ཕྱིན་དྲུག་རྫོགས། །ས་བཅུ་སྨོན་ལམ་ཡིད་སྨོན་རེ་དོགས་རྫོགས། །བྱིན་རླབས་དངོས་གྲུབ་ཚོགས་དང་དབང་ཡང་རྫོགས། །མཆོད་དང་བསྟོད་དང་འགྱོད་ཚངས་སྒྲིབ་སྦྱངས་རྫོགས། །སྣང་བ་དབྱེ་བསལ་མེད་པར་རྫོགས། །སྲིད་པ་སྐྱེ་བ་མེད་པར་རྫོགས། །ཡིད་གཉིས་གཟུང་འཛིན་མེད་པར་རྫོགས། །རིག་པ་ངང་དངས་ཆེན་པོར་རྫོགས། །སེམས་རྟོགས་རང་བརླག་ཆེན་པོར་རྫོགས། །བློས་བཏགས་རང་སངས་ཆེན་པོར་རྫོགས། །ཡུལ་སེམས་རྩིས་གདབ་མེད་པར་རྫོགས། །ཕྱི་ནང་གཉིས་སུ་མེད་པར་རྫོགས། །ཚ་ཚ་བསྐོར་བ་མར་མེ་སྦྱིན་གཏོང་རྫོགས། །ཟ་འཆག་ཆུ་གཏོར་སྨོན་ལམ་ཡིད་སྨོན་རྫོགས། །མནོས་ཚད་ཤེས་ཚད་མ་ལུས་རྫོགས། །ཐམས་ཅད་སྤྱི་ཏི་ཡོ་གར་རྫོགས། །ཐམས་ཅད་ཡོད་ཚད་རྫོགས་པའི་སྤྱི་ཏི་ཡོ་ག་ཡིན། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། ཐམས་ཅད་སྤྱི་ཏི་ཡོ་གར་རྫོགས་པའི་ལེའུ་སྟེ་བརྒྱ་དང་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྤྱི་ཏི་སེམས་ལ་ཇི་ལྟར་རྫོགས། །ཞེས་གསོལ་པ་དང་། ཀུན་བཟང་འཁོར་ལ་འདི་སྐད་གསུངས། །སྤྱི་ཏི་སེམས་ལ་རྫོགས་ལུགས་ནི། །སྤྱི་ནི་ཡོད་ཚད་མ་ལུས་ལ། །ཏི་ནི་སྙིང་པོ་ཀློང་དུ་འགྱུར། །སྤྱི་ནི་རིག་ཡིན་སེམས་རྟོག་སྟེ། །ཏི་ནི་སྙིང་པོ་ཀློང་དུ་གྱུར། །ཡོ་ནི་མ་ལུས་དབྱེར་མེད་རྩིས་གདབ་མེད། །ག་ནི་སྙིང་པོ་ཆོས་ཉིད་ཀློང་ནས་འཆར། །དེ་ཕྱིར་ཐེག་པ་ཐམས་ཅད་ཟིལ་གྱིས་གནོན། །དེ་ཕྱིར་སྤྱི་ཏི་སེམས་ལ་རྫོགས། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། སེམས་ལ་སྤྱི་ཏི་རྫོགས་ལུགས་བསྟན་པའི་ལེའུ་སྟེ་བརྒྱ་དང་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སྤྱི་ཏི་ ― DNG002_Page_0528 ―
[མ་དཔེ་གཟིགས་ན་འདིར་གནོན།]
ཤེས་པས་ཡོ་ག་ཤེས་གྱུར་རམ། །སྟོན་པས་འཁོར་ལ་འདི་སྐད་གསུངས། །སྤྱི་ཏི་ཡོ་ག་ཤེས་རྟོགས་ན། །ཐམས་ཅད་མ་ལུས་ཤེས་པར་འགྱུར། །སྤྱི་ཏི་ཡོ་ག་ཤེས་ན་ཐེག་པ་མཐའ་དག་ཤེས། །སྤྱི་ཏི་ཡོ་ག་རྟོགས་ན་ལྟ་བ་མཐའ་དག་རྟོགས། །སྤྱི་ཏི་ཡོ་ག་གྲུབ་ན་དངོས་གྲུབ་ཐམས་ཅད་གྲུབ། །སྤྱི་ཏི་ཡོ་ག་གོ་ན་ཐེག་པའི་ལ་ཤན་གོ། །སྨོན་པའི་སངས་རྒྱས་ས་ལ་སླེབས། །དཔེར་ན་འདི་ལྟར་གོ་བར་གྱིས། །མཆོག་རབ་རྩེ་ནས་བལྟས་པས་རི་ཕྲན་རི་བོ་ཐམས་ཅད་མཐོང་། །རྒྱ་མཚོ་ཆེན་པོར་བལྟས་པས་ཆུ་བྲན་ཐམས་ཅད་མཐོང་། །སྡོང་པོ་རྩ་བ་ཆོད་པས་ཡལ་ག་ཡོ་ག་སྐམས། །འདམ་བུ་གཅིག་ཁོག་སྟོང་པས་ཐམས་ཅད་སྟོང་། །འབྱུང་བ་ནམ་མཁའི་ངང་ནས་འབྱུང་བ་བཞི་ཡང་གསལ། །སྐྱུ་རུ་ར་གཅིག་སྐྱུར་ན་ཀུན་ཀྱང་སྐྱུར་བར་གོ། །ཉི་ཟླ་གཉིས་མཐོང་གཟའ་སྐར་ཐམས་ཅད་གསལ། །གསེར་གཅིག་ངོ་ཤེས་པས་གསེར་ཐམས་ཅད་རྒྱུ་གཅིག་གོ། །ནོར་བུ་རིན་ཆེན་རྙེད་ན་དགོས་འདོད་ཐམས་ཅད་འབྱུང་། །ཟ་འོག་གཅིག་ཡོད་དར་སྣ་སྣ་ཚོགས་ཡོད། །ཐེག་པའི་རྒྱལ་པོ་སྤྱི་ཏི་འདི་འཆང་ན། །ཐེག་པ་མ་ལུས་མཐའ་དག་འཆང་བར་འགྱུར། །ཚིག་གཅིག་ཤེས་ན་ཚིག་ཀུན་ཤེས་པར་འགྱུར། །དོན་གཅིག་ཤེས་ན་ཡོན་ཏན་ཀུན་གྱི་བདག །ཅེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། སྤྱི་ཏི་ཡོ་ག་རྟོགས་པས་ཀུན་ཤེས་པར་བསྟན་པའི་ལེའུ་སྟེ་བརྒྱ་དང་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །སྤྱི་ཏིའི་འབྲས་བུ་ཇི་ལྟར་རྫོགས། །ཞེས་གསུངས་པ་དང་། སྟོན་པས་འཁོར་ལ་བཀའ་སྩལ་པ། །སྤྱི་ཏི་ཡོ་གའི་འབྲས་བུ་ལ། །བལྟ་རུ་མེད་པའི་ལྟ་བ་དེ་བལྟས་པས། །མཐོང་དུ་མེད་པའི་ཆོས་ཉིད་བྱང་སེམས་མཐོང་། །མཐོང་བའི་དུས་སུ་དངོས་མེད་རང་སར་དངས། །བསྒོམ་དུ་མེད་པའི་སྒོམ་པ་དེ་བསྒོམས་པས། །ཞི་རྒྱུ་མེད་པའི་རྣམ་རྟོག་གཟུང་འཛིན་ཞི། །སྤྱོད་དུ་མེད་པའི་དོན་ལ་རང་སྤྱོད་པས། །བྱ་བ་མེད་པའི་ལས་ ― DNG002_Page_0529 ―
[མ་དཔེ་གཟིགས་ན་འདིར་གནོན།]
རྣམས་ཐམས་ཅད་འགྲུབ། །བསྒྲུབ་ཏུ་མེད་པའི་འབྲས་བུ་དེ་བསྒྲུབས་པས། །ཐོབ་ཏུ་མེད་པའི་སྐུ་གསུམ་ལྷུན་གྲུབ་ཐོབ། །འགྱུར་དུ་མེད་པའི་སེམས་ཉིད་མངོན་དུ་འགྱུར། །སངས་སུ་མེད་པའི་མ་རིག་མུན་པ་སངས། །ཤར་དུ་མེད་པའི་ཡེ་ཤེས་ཉི་མ་ཤར། །རྒྱས་སུ་མེད་པའི་སྙིང་པོ་ཀློང་ན་རྒྱས། །རྩོལ་བསྒྲུབ་མེད་པའི་ངང་དངས་ཆོས་སྐུ་ཐོབ། །བསྟན་པའི་སྙིང་པོ་ཀློང་ཡངས་བསྟན། །མི་འགྱུར་གདེང་ལྡན་སྣང་སྲིད་རྒྱ་ཡིས་ཐེབ། །སྐྱེ་མེད་ཀློང་ནས་འགྱུར་མེད་ཆོས་སྐུ་ཐོབ། །སྣང་གསལ་དངོས་མེད་ལོངས་སྤྱོད་རྫོགས་སྐུར་འགྱུར། །སྣ་ཚོགས་གཉིས་མེད་ཐུགས་རྗེ་སྤྲུལ་སྐུའོ། །སྐུ་གསུམ་དབྱེར་མེད་གཅིག་སྟེ་ངོ་བོ་ཉིད་ཀྱི་སྐུ། །ཐམས་ཅད་དབྱེར་མེད་རྡོ་རྗེ་ལྟ་བུའི་སྐུ། །སྐུ་ལྔ་ཆོས་ཉིད་བྱང་ཆུབ་སེམས་ཀྱིས་ཐོབ། །ཐོབ་པ་དེ་ཡང་རེ་ཞིག་པའོ། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། སྤྱི་ཏིའི་འབྲས་བུ་ཐོབ་ལུགས་བསྟན་པའི་ལེའུ་སྟེ་བརྒྱ་དང་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མཚན་དང་གཏད་རྒྱ་གང་ལ་གཏད། །ཅེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །རྒྱུད་ཀྱི་རྒྱལ་པོའི་མཚན་དང་གཏད་རྒྱ་ནི། །སྣང་སྲིད་གཉིས་མེད་ཀློང་སྦྱོར་རྒྱུད་ཀྱི་རྒྱལ་པོ་ཡིན། །ཉོན་མོངས་བདུད་ལས་ཆོས་ཉིད་རྩིས་བཏུལ་བས། །བདུད་རྩི་ནད་སེལ་རྒྱུད་ཀྱི་རྒྱལ་པོ་ཡིན། །ཁམས་གསུམ་འཁོར་བའི་ནང་ལ་གདམས་ངག་བཅུད་ཐིགས་པས། །བཅུད་ཐིགས་སྨན་སྦྱོར་རྒྱུད་ཀྱི་རྒྱལ་པོ་ཡིན། །འཁོར་བ་ཐོག་མཐའ་མ་ལུས་གཅོད་མཛད་པའི། །གཟེང་ཆེན་སྤུ་གྲི་རྒྱུད་ཀྱི་རྒྱལ་པོ་ཡིན། །ཐེག་པ་སྤྱི་ཡི་དོན་རྣམས་སྟོན་པའི་ཕྱིར། །སྤྱི་ཏི་ཡོ་ག་རྒྱུད་ཀྱི་རྒྱལ་པོ་ཡིན། །ཐེག་པ་སྤྱི་ཡི་འཕྲང་རྣམས་སེལ་བའི་ཕྱིར། །འཕྲང་སོལ་གོ་འབྱེད་རྒྱུད་ཀྱི་རྒྱལ་པོ་ཡིན། །བརྒྱད་ཁྲི་བཞི་སྟོང་བལྟ་བསྒོམ་འབྱེད་པའི་ཕྱིར། །འཕྲུལ་གྱི་ལྡེ་མིག་རྒྱུད་ཀྱི་རྒྱལ་པོ་ཡིན། །དགོས་འདོད་མ་ལུས་འདི་ ― DNG002_Page_0530 ―
[མ་དཔེ་གཟིགས་ན་འདིར་གནོན།]
ལས་འབྱུང་བའི་ཕྱིར། །ནོར་བུ་རིན་ཆེན་རྒྱུད་ཀྱི་རྒྱལ་པོ་ཡིན། །རེ་ཞིག་རྒྱུད་ཀྱི་མཚན་ནི་དེ་ལྟར་རོ། །ཞེས་གསུངས་སོ། །རྒྱུད་འདི་གཏད་པའི་གང་ཟག་ནི། །ཕྱོགས་རིས་ཆུང་ལ་དད་པ་ཆེ། །སེར་སྣ་ཆུང་ལ་གཏོང་ཕོད་ཆེ། །ཉོན་མོངས་ཆུང་ལ་ཤེས་རབ་ཆེ། །ཆགས་ཞེན་ཆུང་ལ་དམ་ཚིག་ཆེ། །དེ་ལ་རྒྱུད་ཀྱི་རྒྱལ་པོ་གཏད། །སློབ་དཔོན་སྙིང་ལ་སེམས་པ་དང་། །གདམས་ངག་སྲོག་བཞིན་འཆང་བ་ལ། །རྒྱུད་ཀྱི་རྒྱལ་པོ་བཤད་ཅིང་གཏད། །དམ་ཚིག་གཞུང་བསྲང་རྣམ་སྨིན་འཛེམ། །དམ་པའི་ཆོས་ཀྱི་དོན་དུ་ནི། །ལུས་སྲོག་ཕངས་པ་མེད་པར་གཏོང་། །རིན་ཆེན་གསེར་ལ་སོགས་པ་འདོད་པའི་དོན། །མ་ཆགས་སེར་སྣ་མེད་པས་འབུལ། །དེ་ལ་རྒྱུད་ཀྱི་རྒྱལ་པོ་བཤད་ཅིང་གཏད། །བློ་ཆེ་བློ་ཡངས་བློ་རྣོ་བློ་ཟབ་ལ། །རྒྱུད་ཀྱི་རྒྱལ་པོ་བཤད་ཅིང་གདམས་ངག་གཏད། །དམ་ཚིག་མེད་ལ་སྙིང་རྗེ་ཆུང་། །ཤེས་རབ་མེད་ལ་འདོད་པ་ཆེ། །གདུང་སེམས་མེད་ལ་གྲོགས་མཆེད་བསླུ། །བརྩོན་འགྲུས་ཆུང་ལ་ཆགས་སྡང་ཆེ། །མ་ཐོབ་བར་དུ་ངོ་དགའ་ཁ་གསགས་རྒྱུ་ཡིས་འདྲེལ། །ལག་ཏུ་ཐོབ་ན་ཟོང་དུ་འཚོང་། །དམ་མེད་ཁྲེལ་མེད་ཐབས་ཀྱིས་འདོད་པ་ལ། །མ་སྦྱིན་སྡིག་པའི་གནས་སུ་འགྱུར། །དེ་ལྟ་བུ་ལ་བྱིན་གྱུར་ན། །ངམ་ཤོད་གླིང་གི་དུར་ཁྲོད་ན། །མཁའ་འགྲོ་བཀའ་སྲུང་ཆོས་སྐྱོང་ཚོགས། །དེ་ནི་མ་ཤིའི་སྔོན་རོལ་དུ། །ཤ་ཁྲག་རློན་པར་བཟའ་བར་བྱེད། །ཕྱི་མར་གཉིས་ཀ་དམྱལ་བར་ལྟུང་། །རྒྱ་མཚོར་དུག་སྦྱོར་སྡིག་པས་ཆར་མི་ཕོད། །དེ་བས་མི་བསྟན་གསང་བར་འོས། །སྣོད་མེད་རྣམས་ཀྱི་ཆོས་མ་ཡིན། །ཞེས་གསུངས་སོ། །སྣང་སྲིད་ཁ་སྦྱོར་གྱི་རྒྱུད་ལས། མཚན་དང་གཏད་རྒྱ་སྣོད་ཀྱི་ཁྱད་པར་ ― DNG002_Page_0531 ―
[མ་དཔེ་གཟིགས་ན་འདིར་གནོན།]
བསྟན་པའི་ལེའུ་སྟེ་བརྒྱ་དང་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ནམ་ཞིག་དུས་ནི་ཕྱི་མ་ལ། །རྒྱུད་འདི་འབྱུང་བའི་དུས་ནི་ཇི་ལྟར་ལགས། །ཞེས་གསོལ་པ་དང་། མ་འོངས་དུས་སུ་འབྱུང་བ་ཡི། །དེ་དུས་མངོན་པར་ཤེས་པས་མཁྱེན། །རྒྱུད་ཀྱི་རྒྱལ་པོ་འབྱུང་དུས་སུ། །སྐུ་དང་གསུང་གི་བསྟན་པ་ནུབ། །བདེ་གཤེགས་བཀའ་ཡི་བྱིན་རླབས་ཡལ། །ཐུགས་ཀྱི་བསྟན་པ་དར་བའི་ཚེ། །དེ་ཚེ་ང་ཡི་རྒྱུད་འདི་འབྱུང་། །གནས་གཞི་འཐབ་རས་བསྐོར་བ་དང་། །ཆེ་བཙུན་སྡེ་འཁྲུག་བྱེད་པ་དང་། །དགེ་སློང་ཚོང་དཔོན་བྱེད་པ་དང་། །ཆོས་གོས་འོག་ཏུ་གྲི་འཛུགས་དང་། །བཙུན་མ་བུ་ཆུང་འཚོ་བ་དང་། །བཙུན་ཆེན་ཆུང་མ་ལེན་པ་དང་། །ཆེ་བཙུན་དུག་སྦྱོར་བྱེད་པའི་དུས། །དེ་དུས་རྒྱུད་ཀྱི་རྒྱལ་པོ་འབྱུང་། །བན་མེད་སྐྱེ་མེད་ནག་པོ་གོན་པའི་དུས། །ལྷམ་བུ་རེ་བས་བྱེད་པའི་དུས། །ཕོ་རུ་ས་རུས་བྱེད་པའི་དུས། །གོས་ལ་སྣུམ་གྱི་ཐིག་ལེ་བྱུགས། །ཕ་ཟེར་བུ་ཡང་མི་ཉན་ཏེ། །མི་རྣམས་གཡོ་སྒྱུས་འཚོ་བའི་དུས། །ཆགས་སྡང་ལྔ་དང་མ་བྲལ་བར། །ལྟ་བ་ཁ་ཁྱེར་ཞེན་པ་མ་ལོག་པར། །རྣལ་འབྱོར་སྟོན་པ་བྱེད་པའི་དུས། །ད་ལྟ་སངས་རྒྱས་ཡིན་སྨྲ་བ། །ཆོས་སུ་རྫོགས་ཆེན་དར་བའི་དུས། །སྟོན་པ་རྣལ་འབྱོར་བྱེད་པའི་དུས། །དེ་དུས་རྒྱུད་ཀྱི་རྒྱལ་པོ་འབྱུང་། །བདེ་གཤེགས་བྱིན་གྱིས་བརླབ་མི་ཐུབ། །འབྱུང་བ་ས་ཡིས་གསེར་མི་ཐུབ། །མཁའ་འགྲོས་གཏད་པའི་གཏེར་མི་ཐུབ། །སྐྱེ་འགྲོས་བློ་གཏད་གཉེར་མི་ཐུབ། །དེ་དུས་རྒྱུད་ཀྱི་རྒྱལ་པོ་འབྱུང་། །ཞེས་གསུངས་སོ། །སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་རྫོགས་སོ།། །།སློབ་དཔོན་པདྨས་བཤད། ཞུ་ཆེན་གྱི་ལོཙྪ་བ་ཆེན་པོ་སྐ་བ་དཔལ་བརྩེགས་ཀྱིས་གཏན་ལ་ཕབ་པའོ།། །། རིན་པོ་ཆེ་བཅུད་ཀྱི་ཡང་སྙིང་ཐོག་ཐ་དྲས་ཐག་གཅོད་པ་སྤྲོས་གཅོད་རྩ་བའི་རྒྱུད།― DNG002_Page_0532 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། རཏྣ་ར་ས་ཨ་ཏི་ཧྲྀ་ད་ཡ་ཨཱ་དི་ཨནྟ་རཛྫུ་ཙྪེ་ད་པྲ་པཉྩ་ཙྪེ་ད་མཱུ་ལ་ཏནྟྲ། བོད་སྐད་དུ། རིན་པོ་ཆེ་བཅུད་ཀྱི་ཡང་སྙིང་ཐོག་ཐ་དྲས་ཐག་གཅོད་པ་སྤྲོས་གཅོད་རྩ་བའི་རྒྱུད། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བདག་གིས་རྟོགས་ཤིང་བཤད་པའི་དུས་གཅིག་ན། རིན་པོ་ཆེའི་གནས་ཡེ་ཤེས་ཀྱི་ཀློང་། མ་བྲིས་པའི་དཀྱིལ་འཁོར། མཐའ་དབུས་མེད་པའི་གནས་ན། རིན་པོ་ཆེ་འོད་སྣ་ཚོགས་ཀུན་ཏུ་འབར་བའི་གཞལ་ཡས་ཁང་ན། སྟོན་པའི་རྒྱལ་པོ་བསམ་མེད་བརྗོད་འདས་དང་། །སྟོན་པའི་རྒྱལ་པོ་མཚན་འདས་དམིགས་མེད་དང་། །སྟོན་པའི་རྒྱལ་པོ་སེམས་ཉིད་ཀུན་བཟང་གསུམ། །འབྱེད་པ་མེད་པའི་ཚུལ་གྱིས་བཞུགས་སོ། །འཁོར་གྱི་ཚོགས་ཀྱང་འདི་ལྟ་སྟེ། །རྩལ་སྣང་མཚན་ཉིད་ལྟ་བུའི་འཁོར་དང་། ཤུགས་འབྱུང་རིག་པ་བསམ་མི་ཁྱབ་ཀྱི་འཁོར་དང་། ཡིད་སེམས་རྟོག་ཚོགས་བསམ་འདས་ཀྱི་འཁོར་དང་། དེ་གསུམ་རང་བཞིན་གཞི་ཡི་འཁོར་རོ། །གཞན་ཡང་འཁོར་ཚོགས་འདི་ལྟ་སྟེ། རང་བཞིན་གྱི་འཁོར་དང་། དོན་གྱི་འཁོར་དང་། འདོད་པ་སྐུའི་འཁོར་རོ། །རྒྱུའི་བྱང་ཆུབ་སེམས་དཔའ་དང་། ལམ་གྱི་བྱང་ཆུབ་སེམས་དཔའ་དང་། འབྲས་བུའི་བྱང་ཆུབ་སེམས་དཔའ་དང་། དེ་ལ་སོགས་ཏེ་ཐབས་ཅིག་ཏུ་བཞུགས་སོ། །དེ་ནས་རྡོ་རྗེ་སེམས་དཔས་སེམས་ཉིད་ཀུན་བཟང་ལ་འདི་སྐད་ཅེས་གསོལ་ཏོ། །གསུང་གི་སངས་རྒྱས་ཐམས་ཅད་ཀྱིས། །རྒྱུ་ཡི་དོན་རྣམས་མཐར་ཕྱུང་ནས། །རྒྱུ་དང་རྐྱེན་གྱིས་མ་བསྐྱེད་པའི། །འབྲས་བུའི་ཐེག་པ་མི་གསུང་བར། །ཐུགས་རྗེའི་མཁྱེན་པ་མི་མངའ་འམ། །ངོ་བོའི་སངས་རྒྱས་ཐམས་ཅད་ཀྱིས། །ལམ་གྱི་དོན་རྣམས་མཐར་ཕྱུང་ནས། །བྱར་མེད་འབྲས་བུ་མི་གསུང་བ། །ཐུགས་རྗེའི་མཁྱེན་པ་ཡལ་ལམ་ཅི། །ཐུགས་ཀྱི་སངས་རྒྱས་ཐམས་ཅད་ཀྱིས། །འབྲས་བུའི་ཐེག་པ་མཐར་ཕྱུང་ནས། །རྒྱུ་འབྲས་འདས་པ་མི་གསུང་བ། །འགག་མེད་ཐུགས་རྗེ་མི་འཆར་རམ། ། ― DNG002_Page_0533 ―
[མ་དཔེ་གཟིགས་ན་འདིར་གནོན།]
རིན་ཆེན་ལྟ་བུའི་སྐལ་ལྡན་ལ། །རྒྱུ་འབྲས་འདས་པའི་གསུང་སྒོ་ཕྱེ། །ཞེས་གསོལ་པ་དང་། དེ་ནས་སེམས་ཉིད་ཀུན་བཟང་གིས། །འདུས་པའི་འཁོར་ལ་བཀའ་སྩལ་པ། །གསུང་གི་སངས་རྒྱས་ཐམས་ཅད་ཀྱི། །ཡེ་ཤེས་རང་བཞིན་ཁྱོད་ཡིན་པས། །མ་འགགས་རྩལ་སྣང་ཡེ་ཤེས་ཤར། །སྐུ་ཡི་སངས་རྒྱས་ཐམས་ཅད་ཀྱི། །ཡེ་ཤེས་འོད་གསལ་ཁྱོད་ཡིན་པས། །ཆོས་རྣམས་བྱང་ཆུབ་སེམས་ལ་སྣང་། །ཐུགས་ཀྱི་སངས་རྒྱས་ཐམས་ཅད་ཀྱི། །མ་གཡོས་ཡེ་ཤེས་བདེ་ལྡན་པས། །ཡེ་ཤེས་རིན་ཆེན་འོད་དུ་ཤར། །དོན་གཅིག་ཡོན་ཏན་ཀུན་གྱི་བདག །རིན་ཆེན་འོད་འབར་ཐབས་ཀྱི་སྒོ། །ཡང་སྙིང་བཅུད་ཀྱི་དོན་ལྡན་པས། །རྩོལ་མེད་ཡེ་ཤེས་ངོ་སྤྲོད་ཀྱིས། །རིན་ཆེན་བཅུད་ཀྱི་ཡང་སྙིང་ལ། །ཐ་སྙད་བརྗོད་པའི་ཚིག་བྲལ་ཡང་། །མ་རྟོགས་པ་ལ་མཚོན་པའི་ཕྱིར། །གསུང་གི་བརྗོད་པ་གསལ་བ་ཡིས། །མུན་ཁུང་གསལ་སྒྲོན་ལྟ་བུར་བཤད། །རང་བཞིན་ངོ་བོ་ཐུགས་རྗེ་གསུམ། །སྟོན་པ་ཕུན་སུམ་ཚོགས་པར་བཤད། །འདས་དང་མ་བྱོན་ད་ལྟ་གསུམ། །དུས་ནི་ཕུན་སུམ་ཚོགས་པར་བཤད། །ཐམས་ཅད་སྡུད་དང་ཁྱད་པར་འཕགས། །ཁང་བཟངས་སྤྲུལ་པ་བཞུགས་པ་གསུམ། །གནས་ནི་ཕུན་སུམ་ཚོགས་པར་བཤད། །རང་བཞིན་འདྲེལ་དང་དོན་གྱི་གཅིག །འདོད་པས་བསྡུས་པའི་འཁོར་རྣམས་ནི། །འཁོར་ནི་ཕུན་སུམ་ཚོགས་པར་བཤད། །གཅིག་དང་འདྲེལ་དང་གཏན་ལ་འབེབས། །མ་ཚང་མེད་དང་དགོས་པ་ཚང་། །རྒྱུད་ནི་ཕུན་སུམ་ཚོགས་པའོ། །རིན་ཆེན་བཅུད་ཀྱི་ཡང་སྙིང་འདི། །ཆོས་རྣམས་མ་ལུས་འདི་རུ་འདུས། །སྣ་ཚོགས་བསམ་ཡས་སེམས་ལ་འདུས། །སེམས་ཉིད་སྨྲ་བསམ་བརྗོད་འདས་པས། །ཅི་ཡང་མ་ཡིན་བྱང་ཆུབ་སེམས། །རྩིས་གདབ་བློ་དང་བྲལ་བ་ནི། །བལྟ་བ་ཡིན་གྱིས་སྤྲོས་པ་ཆོད། །ཡེ་ཤེས་རྒྱུན་ལ་བར་མ་ཆད། །དོན་ལས་གཞན་དུ་མ་བཀོལ་པ། །གཡོ་འགུལ་མེད་པའི་དགོངས་པ་ཡིན། །བསྒོམ་པ་ཡིན་གྱིས་སྤྲོས་པ་ཆོད། །བྱ་བའི་སྤྱོད་ ― DNG002_Page_0534 ―
[མ་དཔེ་གཟིགས་ན་འདིར་གནོན།]
པ་རྣམ་དག་ཅིང་། །བླང་བྱ་དོར་རྒྱུ་མེད་པ་དང་། །བྱར་མེད་གང་ལའང་ཆགས་ཞེན་མེད། །སྤྱོད་པ་ཡིན་གྱིས་སྤྲོས་པ་ཆོད། །ཡེ་ཤེས་དྲི་མ་མེད་པ་ལ། །རང་ལ་ཡོད་རྟོགས་འདུ་འབྲལ་མེད། །རེ་དོགས་བློ་དང་བྲལ་བ་ནི། །འབྲས་བུ་ཡིན་གྱིས་སྤྲོས་པ་ཆོད། །ཡེ་ཤེས་གང་དུ་རྒྱ་མ་ཆད། །ཐམས་ཅད་འབྱུང་བའི་གཞིར་གྱུར་པས། །གཞི་མ་ཡིན་གྱིས་སྤྲོས་པ་ཆོད། །ཐམས་ཅད་ཀུན་ཏུ་མ་བསྒྲིབས་པའི། །ཡེ་ཤེས་རང་དུ་སྣང་བ་དེ། །ཡེ་ཤེས་ཡིན་པས་སྤྲོས་པ་ཆོད། །རྟོག་པ་གཞན་གྱིས་གཡོག་ཏུ་མེད། །སྙིང་པོ་ཡིན་གྱིས་སྤྲོས་པ་ཆོད། །རྟོགས་པ་གཞན་ལ་རག་མ་ལས། །བསྒོམ་མེད་ཡིན་གྱིས་སྤྲོས་པ་ཆོད། །འདོད་པའི་དོན་འབྱུང་རིན་པོ་ཆེ། །ཡོན་ཏན་ཡིན་གྱིས་སྤྲོས་པ་ཆོད། །འཁོར་བ་རྩད་བཅད་མྱ་ངན་འདས། །འཁོར་འདས་མེད་ཀྱིས་སྤྲོས་པ་ཆོད། །རིན་ཆེན་བཅུད་ཀྱི་ཡང་སྙིང་འདི། །རང་སྣང་ཉི་མ་ལྟ་བུར་གསལ། །སྒྲིབ་པ་མེད་ཀྱིས་སྤྲོས་པ་ཆོད། །གསལ་བྱེད་རིན་ཆེན་སྣང་བ་འདི། །མཐའ་ཡས་སེམས་ཅན་ཐམས་ཅད་ལ། །ཁྱབ་པར་གནས་ཀྱིས་སྤྲོས་པ་ཆོད། །རིན་ཆེན་སྣང་བ་རང་འབར་འདི། །འགྲོ་བའི་བླ་མ་འདས་གྱུར་ཀྱང་། །འགྲོ་བ་མོས་པ་ལ་གནས་ན། །གཏིང་གསལ་མི་གཡོ་རིན་པོ་ཆེ། །རྟོག་མེད་ཡིན་གྱིས་སྤྲོས་པ་ཆོད། །རིན་ཆེན་བཅུད་ཀྱི་ཡང་སྙིང་འདི། །གཞི་ནི་མ་བཅོས་ལྷུན་གྱིས་གྲུབ། །བསམ་མེད་ངང་བཞག་བསྒོམ་མེད་ལ། །བསམ་དུ་མེད་ཀྱིས་སྤྲོས་པ་ཆོད། །བདེ་ཆེན་མི་རྟོག་འགྱུ་བ་བྲལ། །ཡིད་ལ་མི་བྱེད་སྣང་བ་དག །རྩིས་གདབ་མེད་ཀྱིས་སྤྲོས་པ་ཆོད། །ཡེ་ཤེས་རིན་ཆེན་མ་འགགས་གསལ། །རྩལ་སྣང་ཡིན་གྱིས་སྤྲོས་པ་ཆོད། །དབང་པོ་རབ་སྣང་རྒྱལ་བའི་སེམས། །འགྲོ་བ་ཀུན་ལ་རང་བཞིན་གནས། །མཐོང་བ་ལོག་པ་གཞན་ཡོད་ཀྱང་། །སངས་རྒྱས་ལོགས་ནས་མི་རྙེད་པས། །རང་སངས་རྒྱས་ཀྱིས་སྤྲོས་པ་ཆོད། །ཆོས་ཉིད་སྐུ་ལ་འགྱུར་བ་མེད། །རང་རིག་བདེ་བ་ཆེན་པོའི་ངང་། །རྒྱུ་ལ་མི་གནས་སྤྲོས་པ་ཆོད། །ཀུན་གྱི་བརྗོད་བྱ་སེམས་ཀྱི་དབྱིངས། །རང་རང་མོས་པའི་ཤེས་ ― DNG002_Page_0535 ―
[མ་དཔེ་གཟིགས་ན་འདིར་གནོན།]
པས་རྟོགས། །སྨོན་པར་འདོད་པ་རེ་ཞིག་གོ། །སྙིང་པོའི་ལམ་ལ་འདོད་པ་བྲལ། །རིག་པའི་རྩ་བ་བཅད་པ་ཡིས། །ཡིད་ལ་མི་བྱེད་རང་བཞིན་གནས། །ཐམས་ཅད་ཅིར་སྣང་རང་བཞིན་གྱིས། །རང་སྣང་ཆེན་པོར་སྤྲོས་པ་ཆོད། །ཡིད་ལ་བྱར་མེད་སྤྲོས་པ་ཆོད། །སེམས་ལ་བཞག་མེད་སྤྲོས་པ་ཆོད། །ཞེ་འདོད་ཀུན་བྲལ་སྤྲོས་པ་ཆོད། །ཅེས་གསུངས་སོ། །རིན་པོ་ཆེ་བཅུད་ཀྱི་ཡང་སྙིང་རྩ་བའི་རྒྱུད་ལས། གླེང་གཞི་ཕུན་སུམ་ཚོགས་པའི་ལེའུ་སྟེ་དང་པོའོ།། །།དེ་ནས་ཡང་སེམས་ཉིད་སྟོན་པ་ཀུན་བཟང་ལ། རྡོ་རྗེ་སེམས་དཔས་འདི་སྐད་གསོལ། །སངས་རྒྱས་སེམས་ཅན་གཉིས་ཀྱི་གཞི། །ཐོག་མའི་གནས་ལུགས་ཅི་ལྟར་གནས། །ཞེས་གསོལ་པ་དང་། ཀུན་ཏུ་བཟང་པོས་འདི་སྐད་གསུང་། །ཐོག་མཐའ་མེད་པའི་བར་དོ་ན། །མ་ཕྱེད་མི་ཕྱེད་སྙིང་པོ་མཉམ་པ་ཉིད། །རང་བཞིན་ཡོངས་ལ་ཁྱབ་པའི་སྟོང་ར་ན། །ཡེ་ནས་ཡོངས་སུ་བཀོད་པའི་གཞལ་ཡས་ཁང་། །མ་སྐྱེས་མི་འགག་ཆོས་སྐུ་ལྷུན་གྲུབ་དབྱིངས། །མ་མཚོན་མི་མཚོན་མཚོན་མེད་ཆོས་སྐུ་དེ། །སྨྲ་མེད་བརྗོད་མེད་མཚོན་པ་མེད། །བསྟན་མེད་སྟོན་མེད་ཉན་པ་མེད། །མིང་མེད་བཏགས་མེད་དངོས་པོ་མེད། །བསྒྲུབ་མེད་རྩོལ་མེད་སྨོན་པ་མེད། །བླང་མེད་དོར་མེད་དགག་བསྒྲུབ་མེད། །སྣང་མེད་སྲིད་མེད་སྐྱེ་བ་མེད། །ཡུལ་མེད་སེམས་མེད་དབྱེ་བ་མེད། །བདག་མེད་གཞན་མེད་གཉིས་སུ་མེད། །དགྲ་མེད་གཉེན་མེད་ཕྱོགས་རིས་མེད། །བདེ་མེད་སྡུག་མེད་གཉིས་ཀ་མེད། །རིག་མེད་འགྱུ་མེད་སེམས་པ་མེད། །དབུས་མེད་མཐའ་མེད་ཕྱོགས་མཚམས་མེད། །གསལ་དང་མི་གསལ་དབྱེ་རུ་མེད། །ཤེས་མེད་རང་གནས་རྟོག་པ་མེད། །འདི་ཞེས་བསྟན་པར་བྱ་བ་ནི། །ཀུན་ཏུ་བཟང་པོས་མཚོན་བརྗོད་མེད། །མཆོག་ཏུ་གསང་བའི་སྙིང་པོ་ནི། །རྣ་དབང་གཞན་ལས་ཐོས་མི་འགྱུར། །དེ་བཞིན་ལྕེ་ཡི་དབང་པོས་ཀྱང་། །དེ་ལ་བརྗོད་དུ་རྡུལ་ཙམ་མེད། །ཚོགས་བདུན་ཡུལ་མིན་སྙིང་པོ་དེ། །ཡོངས་ལ་ཁྱབ་པའི་སྙིང་པོ་ཡིན། །ཆགས་མེད་ཅིར་ཡང་སྣང་བ་དེ། །མ་འགགས་ ― DNG002_Page_0536 ―
[མ་དཔེ་གཟིགས་ན་འདིར་གནོན།]
རྩལ་གྱི་སྣང་བ་རྣམས། །མ་བཀོལ་ཆོས་སྐུའི་ཀློང་དུ་ཐིམ། །ཡན་ལག་སྙིང་པོ་ངང་ཐིམ་པས། །སྙིང་པོ་ཡན་ལག་འཕྲད་པ་ཡིས། །གཉིས་མེད་ཆོས་སྐུ་ཆེན་པོར་འགྱུར། །མ་རིག་ལོག་ནས་འགྱུ་སངས་པས། །རིག་མེད་ཆོས་སྐུ་རང་སངས་རྒྱས། །མ་རིག་འཁྲུལ་སྒོ་སངས་པས་ཡེ་ཤེས་རྒྱས། །གཉིས་འཛིན་རྟེན་མེད་རང་སངས་རྒྱས། །འཛིན་མེད་གདེང་མེད་འགྱུར་མེད་རྒྱས། །བྱ་བའི་ཆ་སངས་བྱར་མེད་རྒྱས། །ཤུགས་ལས་ཐོག་མར་ཡེ་སངས་རྒྱས། །ཐོག་མའི་སངས་རྒྱས་ཞེས་བྱའོ། །ཞེས་གསུངས་སོ། །རིན་པོ་ཆེའི་བཅུད་ཀྱི་ཡང་སྙིང་རྩ་རྒྱུད་ལས། ཐོག་མ་གཞིའི་གནས་ལུགས་དང་། ཀུན་བཟང་ཡེ་སངས་རྒྱས་པར་བསྟན་པའི་ལེའུ་སྟེ་གཉིས་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་གསོལ། །རང་བཞིན་གཞི་རུ་མཉམ་པ་ན། །ཀུན་བཟང་བྱ་བཙལ་མེད་སངས་རྒྱས། །ཁམས་གསུམ་སེམས་ཅན་ཅི་ལྟར་འཁྲུལ། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །ཡེ་ནས་ཡོངས་ཁྱབ་ཀུན་གཞིར་བརྗོད། །སྙིང་པོའི་རང་བཞིན་གཡོ་མེད་ལ། །སྣང་ཚུལ་རྒྱ་ཆད་མེད་པ་ཡི། །རྩལ་སྣང་ཟེར་རིག་མ་འགགས་པ། །འགྱུ་ལས་རླུང་གཡོས་རིག་ཡིད་འགྱུ། །ཟེར་ལས་འོད་ཀྱི་ཚུལ་དུ་ཤར། །ལྡོག་ཐབས་མ་ཤེས་མ་རིག་པ། །གནས་དོན་མ་ཤེས་དོན་མ་རིག །དེ་ཕྱིར་མ་རིག་མུན་པར་གསུངས། །འགྱུ་བ་རླུང་གིས་རྒྱུ་བྱས་ནས། །སྒྲིབ་གཡོགས་མུན་པས་བར་བཅད་དེ། །མ་རིག་འཁྲུལ་སྒོ་རྐྱེན་དུ་ཤར། །སུས་ཀྱང་བྱས་པ་མ་ཡིན་ཏེ། །ངང་ངམ་ཤུགས་ལས་གཡོས་པ་ཡིས། །ཡིད་ཀྱི་འཁོར་ལོ་གསུམ་དུ་འཁྲུལ། །ངོ་བོ་རང་ས་མ་ཟིན་པར། །རིག་པའི་ངོ་བོ་སྐྱེས་པ་ཡིས། །ཀུན་ཏུ་ཚོལ་བའི་ཡིད་དུ་འཁྲུལ། །རང་བཞིན་རང་ས་མ་ཟིན་པས། །དེ་ལས་ཡིད་དུ་འགྱུས་པ་ཡིས། །གཏན་ལ་འབེབས་པའི་ཡིད་དུ་འཁྲུལ། །ཐུགས་རྗེས་རང་ས་མ་ཟིན་པར། །དེ་ལས་སེམས་སུ་བཏགས་པ་ཡིས། །ངེས་པར་འཇོག་པའི་ཡིད་དུ་འཁྲུལ། །འཁོར་ལོ་གསུམ་དུ་འཁྲུལ་པ་ཡིས། །རིག་པའི་གཟུགས་དང་ ― DNG002_Page_0537 ―
[མ་དཔེ་གཟིགས་ན་འདིར་གནོན།]
འོད་ཀྱི་གཟུགས། །ཤ་ཡི་གཟུགས་དང་གསུམ་དུ་བྱུང་། །རིག་གཟུགས་བརྟེན་པ་མེད་པ་ཡིས། །ཡིད་སེམས་ཕྱྭ་སངས་ཁྱེར་ནས་ནི། །ཕྱོགས་མཚམས་ཀུན་ཏུ་འགྱུ་བ་ཡིས། །མ་ཡིན་ཕ་ཡིན་ཆགས་ཞེན་སྐྱེས། །དེ་ཡིས་མངལ་གྱི་ཁ་སྒོར་ཆུད། །ཕ་རྒྱུས་ཞེ་སྡང་རུས་སུ་སྨིན། །མ་རྒྱུས་འདོད་ཆགས་ཁྲག་ཏུ་སྨིན། །དུག་གསུམ་རྒྱུ་ལས་ལུས་ངག་ཡིད། །བརྒྱུད་པ་རིམ་འཁྲུལ་འབྲས་བུར་སྨིན། །མེད་པ་གློ་བུར་འཁྲུལ་པ་དང་། །དངོས་པོ་རྐྱེན་སྣང་གསུམ་དུ་འཁྲུལ། །ཕ་མར་སྣང་སྟེ་ཕ་མར་བཏགས། །ཕ་མར་བཟུང་ལ་ཕ་མར་ཞེན། །བུ་ཚ་སྣང་བས་བུ་ཚར་བཏགས། །བུ་ཚར་བཟུང་བས་བུ་ཚར་ཞེན། །ཡུལ་དང་ནོར་སྣང་ཡུལ་ནོར་བཏགས། །ཡུལ་ནོར་བཟུང་བས་ཡུལ་ནོར་ཞེན། །སྣང་བཏགས་བཟུང་ཞེན་འཁྲུལ་པ་ལས། །སྣང་སྲིད་ཐམས་ཅད་དེ་ལས་འཁྲུལ། །མེད་པར་ཡོད་བཟུང་ཡིད་སེམས་ཀྱིས། །རྨི་ལམ་ཚུལ་དུ་སྡུག་བསྔལ་མྱོང་། །ཁམས་གསུམ་འགྲོ་དྲུག་དེ་ཡིས་འཁྲུལ། །སྐྱེ་རྒས་ན་འཆིའི་སྡུག་བསྔལ་དང་། །མེད་པ་བཙལ་གྱིས་མ་རྙེད་སྡུག །ཡོད་པ་ཤོར་གྱིས་དོགས་པའི་སྡུག །སྡང་བའི་དགྲ་དང་འཕྲད་ཀྱིས་དོགས། །བྱམས་པའི་གཉེན་དང་བྲལ་གྱིས་དོགས། །ལུས་ཀྱི་ན་ཚའི་སྡུག་བསྔལ་དང་། །སེམས་ནི་ཞེ་འདོད་སྡུག་བསྔལ་དང་། །སྣང་བ་ཕྱོགས་རིས་སྡུག་བསྔལ་དང་། །དེ་སོགས་འབུམ་ཕྲག་མང་པོ་རྣམས། །སུས་ཀྱང་མ་ཉེས་རང་ཤུགས་ཡིན། །དཔེར་ན་སྲིན་གྱི་ཁ་ཆུ་དང་། །སྦུར་བ་བལ་དུ་འཐུམས་པ་འདྲ། །རང་ལས་བྱུང་ནས་རང་ཉིད་འཁྲུལ། །ཐོ་ཡོར་མི་མིན་མིར་བཟུང་དང་། །ཐག་པ་སྦྲུལ་མིན་སྦྲུལ་བཟུང་དང་། །སྨིག་རྒྱུ་ཆུ་མིན་ཆུར་བཟུང་གསུམ། །དཔེ་ཡིས་བསྟན་པ་དེ་བཞིན་དུ། །མེད་པར་ཡོད་བཟུང་འཁྲུལ་པ་ཡིན། །མི་བདེན་བདེན་བཟུང་འཁྲུལ་པ་ཡིན། །མི་རྟག་རྟག་བཟུང་འཁྲུལ་པ་ཡིན། །དེ་ལ་སོགས་པ་འཁྲུལ་སྣང་སྡུག་བསྔལ་རྣམས། །ལས་དབང་རང་རྐྱེན་ཡིན་མོད་ཀྱི། །གཞི་ལ་མེད་པར་སྤྲོས་པ་ཆོད། །དཔེར་ན་ཧ་ལ་ནག་པོའི་དུག །མ་ཤེས་ཟོས་པས་འཆི་གྱུར་ཏེ། །དུག་ཏུ་རོ་ཤེས་ཟ་མི་སྲིད། །ཐབས་དང་སྔགས་ལྡན་དུག་ངོ་ཤེས། །དེ་ཟོས་མི་འཆི་སྨན་དུ་འགྱུར། །དེ་བཞིན་འཁྲུལ་ ― DNG002_Page_0538 ―
[མ་དཔེ་གཟིགས་ན་འདིར་གནོན།]
པའི་དུག་ལྔ་རྣམས། །གཞི་ལ་མེད་པར་རྩད་ཆོད་པས། །འཁྲུལ་མེད་ཡེ་ཤེས་རྣམ་པར་དག །མུན་རུམ་ནམ་ལངས་ཉི་ཤར་བཞིན། །མུན་པ་མ་སངས་འོད་དུ་གསལ། །ཡེ་ཤེས་རིན་ཆེན་ཉི་ཤར་བས། །མ་རིག་འཁྲུལ་པའི་མུན་པ་སངས། །འཁྲུལ་སྣང་མ་སྤངས་འོད་གསལ་ཤར། །མ་རིག་འཁྲུལ་སྣང་ཐམས་ཅད་སངས། །ཡེ་ཤེས་མཁའ་གསལ་འཁྲུལ་མེད་རྒྱས། །འགྱུར་མེད་སངས་རྒྱས་ཆོས་སྐུར་གྱུར། །སྐྱེ་མེད་དབྱིངས་སུ་མངོན་སངས་རྒྱས། །འཁྲུལ་པ་མ་སྤངས་རྩད་ནས་ཆོད། །འགྱུར་བ་མེད་པར་རྒྱས་ཐོབ་ལ། །བསམ་མེད་བརྗོད་མེད་དབྱིངས་སུ་སྡོད། །འཁྲུལ་སྣང་ཐམས་ཅད་རྩད་བཅད་པས། །ཁམས་གསུམ་འཁོར་བ་ཕྱགས་མས་བཏབ། །མྱ་ངན་འདས་པའི་ཞིང་ཁམས་ལ། །ཐམས་ཅད་སངས་རྒྱས་ཆོས་སྐུར་སྣང་། །ཞེས་གསུངས་སོ། །རིན་པོ་ཆེ་བཅུད་ཀྱི་ཡང་སྙིང་སྤྲོས་གཅོད་རྩ་བའི་རྒྱུད་ལས། སེམས་ཅན་ཇི་ལྟར་འཁྲུལ་པ་དང་། དེའི་རྩད་གཅོད་ཐབས་བསྟན་པའི་ལེའུ་སྟེ་གསུམ་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་གསོལ། །སེམས་སྡེ་ཇི་སྙེད་ཡོད་པ་རྣམས། །དེ་ཡི་སྤྲོས་པ་ཇི་ལྟར་བཅད། །ཅེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །སེམས་སྡེ་སྤྲོས་གཅོད་བསྟན་པ་ལ། །ངོ་བོ་ཅིར་ཡང་གཟུང་མེད་ལ། །མཚན་ཉིད་ཅིར་ཡང་འཆར་བ་ལ། །སྣ་ཚོགས་ངེས་མེད་བསམ་འདས་ཏེ། །མ་བཅོས་མ་བསླད་མ་བསམས་པར། །མཐར་འཛིན་ཅིར་ཡང་སེམས་པ་མེད། །དེ་བཞིན་ཉིད་དུ་སྤྲོས་པ་ཆོད། །རིན་ཆེན་བཅུད་ཀྱི་ཡང་སྙིང་སྤྲོས་གཅོད་རྩ་བའི་རྒྱུད་ལས། སེམས་ཀྱི་སྤྲོས་པ་བཅད་པའི་ལེའུ་སྟེ་བཞི་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་གསོལ། །ཆོས་སྡེ་ཇི་སྙེད་ཡོད་པ་རྣམས། །དེ་ཡི་སྤྲོས་པ་གང་དུ་བཅད། །ཅེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །བརྒྱད་ཁྲི་བཞི་སྟོང་ཐེག་པ་རྣམས། །ཆོས་ཀྱི་སྡེ་ཚན་ཐམས་ཅད་ཀུན། །མཚན་ཉིད་ཅིར་ཡང་མ་ཡིན་པས། །འདི་ཞེས་བསྟན་དུ་མེད་པ་ལ། །བཤད་དུ་ ― DNG002_Page_0539 ―
[མ་དཔེ་གཟིགས་ན་འདིར་གནོན།]
མེད་པར་མང་པོར་བཤད། །མང་པོ་མ་ཡིན་བསྟན་དུ་མེད། །འདུས་རྒྱུ་གཅིག་ལས་མེད་པ་ལ། །བཤད་པ་མང་བས་གོལ་བར་བཤད། །དཔེ་ལ་དོན་ཉིད་མ་ཤོར་ལ། །དོན་ལ་དཔེ་ཉིད་མ་ལུས་ཏེ། །སེམས་ཆོས་གཉིས་སུ་དབྱེར་མེད་བསྟན། །ཆོས་དང་སེམས་སུ་འདྲེས་ཙ་ན། །ཆོས་ཀྱི་རྣམ་གྲངས་ཇི་སྙེད་རྣམས། །ཉན་བཤད་བསམ་དང་ཤེས་སུ་མེད། །བསྟན་དུ་མེད་པར་སྤྲོས་པ་ཆོད། །རིན་ཆེན་བཅུད་ཀྱི་ཡང་སྙིང་སྤྲོས་གཅོད་རྩ་བའི་རྒྱུད་ལས། ཆོས་སྡེའི་སྤྲོས་པ་གཅོད་པའི་ལེའུ་སྟེ་ལྔ་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་གསོལ། །རྒྱུད་སྡེ་ཇི་སྙེད་ཡོད་པ་རྣམས། །དེ་ཡི་སྤྲོས་པ་ཇི་ལྟར་བཅད། །ཅེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །གཞི་རྒྱུད་ལམ་རྒྱུད་འབྲས་བུའི་རྒྱུད། །དེ་སོགས་རྒྱུད་སྡེ་ཇི་སྙེད་རྣམས། །སེམས་རྒྱུད་གཉིས་སུ་མེད་པར་འདྲེལ། །རྒྱུད་ཅེས་གཞན་དུ་མ་བཀོལ་ལ། །སེམས་ཞེས་གཞན་དུ་མ་བཟུང་བར། །དབྱེ་བསལ་མེད་པར་དབྱེར་མེད་རྒྱུད། །རྩིས་གདབ་མེད་པར་བསམ་མེད་རྒྱུད། །དགག་བསྒྲུབ་མེད་པར་བྱར་མེད་རྒྱུད། །རྒྱུད་ཀྱི་རྣམ་གྲངས་ཇི་སྙེད་རྣམས། །ཡིད་ལ་བྱར་མེད་སྤྲོས་པ་ཆོད། །སེམས་ལ་བཞག་མེད་སྤྲོས་པ་ཆོད། །བློ་ཡི་མ་བཅོས་སྤྲོས་པ་ཆོད། །རིན་ཆེན་བཅུད་ཀྱི་ཡང་སྙིང་རྩ་བའི་རྒྱུད་ལས། རྒྱུད་ཀྱི་སྤྲོས་པ་གཅོད་པའི་ལེའུ་སྟེ་དྲུག་པའོ།། །།དེ་ནས་སེམས་ཉིད་ཀུན་བཟང་ལ། །རྡོ་རྗེ་སེམས་དཔས་འདི་སྐད་ཞུས། །དབང་སྡེ་ཇི་སྙེད་ཡོད་པ་རྣམས། དེ་ཡིས་སྤྲོས་པ་ཇི་ལྟར་བཅད། །ཅེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །དབང་བཞི་དབང་ནི་བཅོ་བརྒྱད་དང་། །དབང་སྡེ་ཇི་སྙེད་ཡོད་པ་རྣམས། །ཀུན་གྱི་སྤྱི་བསྡུས་སེམས་ཉིད་དབང་། །དབང་སེམས་གཉིས་སུ་མེད་པར་འདྲེལ། །གཉིས་མེད་གཅིག་ཏུ་འདྲེས་ཙ་ན། །དབང་ནི་ཆོས་སྐུ་སྐྱེ་འཇིག་མེད། །བསྐུར་ནི་འཕོ་འགྱུར་མེད་པར་བསྐུར། །ཐོབ་ནི་འགྱུར་མེད་སྙིང་པོ་ཐོབ། །དབང་ནི་སྣང་སྲིད་སེམས་ལ་དབང་། །བསྐུར་ནི་དབྱེ་བསལ་མེད་པར་བསྐུར། །ཐོབ་ནི་རྩིས་གདབ་མེད་པར་ཐོབ། །དབང་ ― DNG002_Page_0540 ―
[མ་དཔེ་གཟིགས་ན་འདིར་གནོན།]
ནི་དངོས་མེད་བྱང་ཆུབ་སེམས། །བསྐུར་ནི་བསམ་དུ་མེད་པར་བསྐུར། །ཐོབ་ནི་གཡོ་རྩོལ་མེད་པར་ཐོབ། །དབང་ནི་ལུས་ངག་སེམས་ལ་དབང་། །བསྐུར་ནི་བྱ་བཙལ་མེད་པར་བསྐུར། །ཐོབ་ནི་སྐུ་གསུམ་འགྱུར་མེད་ཐོབ། །དེ་སོགས་དབང་གི་སྡེ་ཚན་རྣམས། །ཡིད་ལ་བྱར་མེད་སྤྲོས་པ་ཆོད། །དབྱེ་བ་མེད་པར་སྤྲོས་པ་ཆོད། །བསྐུར་རྒྱུ་མེད་པར་སྤྲོས་པ་ཆོད། །རིན་ཆེན་བཅུད་ཀྱི་ཡང་སྙིང་སྤྲོས་གཅོད་རྩ་བའི་རྒྱུད་ལས། དབང་གི་སྤྲོས་པ་གཅོད་པའི་ལེའུ་སྟེ་བདུན་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔའ་འདི་སྐད་གསོལ། །ཀློང་སྡེ་ཇི་སྙེད་ཡོད་པ་རྣམས། །དེ་ཡི་སྤྲོས་པ་ཇི་ལྟར་བཅད། །ཅེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །ཀློང་གི་སྡེ་རྣམས་ཇི་སྙེད་རྣམས། །ཀུན་གཞི་མཁའ་ཀློང་ཡངས་པར་འདུས། །འཕོ་འགྱུར་མེད་པའི་ཀློང་ཆེན་དུ། །སྐྱེ་འགག་མེད་པར་ཐམས་ཅད་འདུས། །བྱང་ཆུབ་སེམས་ཀྱི་ཀློང་ཆེན་དུ། །སྨྲ་བསམ་བརྗོད་འདས་སྐྱེ་བ་མེད། །ཀ་དག་དབྱིངས་སུ་སྤྲོས་པ་ཆོད། །གང་ཡང་ཡིད་ལ་བྱར་མེད་པས། །བློ་ལས་འདས་པར་སྤྲོས་པ་ཆོད། །ཆོས་ཉིད་མ་བཅོས་ཀློང་ཆེན་དུ། །སེམས་ལ་བསམ་མེད་སྤྲོས་པ་ཆོད། །ཁ་གཏིང་མེད་པའི་ཀློང་ཆེན་དུ། །རྩིས་གདབ་བྱར་མེད་སྤྲོས་པ་ཆོད། །སྤྲོས་གཅོད་སྡེ་ལྔ་ཞེས་ནི་དེ་ལ་བྱ། །ཞེས་གསུངས་སོ། །རིན་ཆེན་བཅུད་ཀྱི་ཡང་སྙིང་སྤྲོས་པ་གཅོད་པ་རྩ་བའི་རྒྱུད་ལས། ཀློང་སྡེའི་སྤྲོས་པ་གཅོད་པའི་ལེའུ་སྟེ་བརྒྱད་པའོ།། །།དེ་ནས་ཀུན་ཏུ་བཟང་པོ་ལ། །རྡོ་རྗེ་སེམས་དཔས་འདི་སྐད་གསོལ། །སྤྲོས་གཅོད་སྡེ་ལྔ་དེ་ལྟར་ན། །ལྟ་སྒོམ་སྤྱོད་འབྲས་མན་ངག་སྤྲོས་པ་ཇི་ལྟར་བཅད། །ཅེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །ལྟ་བ་བརྒྱད་ཁྲི་བཞི་སྟོང་རྣམས། །བལྟ་ཡུལ་ལྟ་མཁན་མེད་པ་ཡིས། །བརྟགས་ཞེན་མེད་པར་སྤྲོས་པ་ཆོད། །སྒོམ་པའི་རྣམ་གྲངས་ཇི་སྙེད་པ། །བསྒོམ་ཡུལ་སྒོམ་མཁན་མེད་པ་ཡིས། །ཡིད་ཀྱིས་མ་བཟུང་མ་ཡེངས་པར། །བློ་ཡིས་མ་བཅོས་མ་བསམ་ཏེ། །དམིགས་མེད་རྟོག་པ་མེད་པ་ཡིས། །འགྱུར་མེད་ཀློང་ ― DNG002_Page_0541 ―
[མ་དཔེ་གཟིགས་ན་འདིར་གནོན།]
དུ་སྤྲོས་པ་ཆོད། །སྤྱོད་པ་བྱ་བྱེད་ཐམས་ཅད་ཀུན། །གང་ཡང་བྱ་བ་བཏང་ལ་ནི། །ལུས་ངག་ཡིད་གསུམ་བྱ་བཙལ་མེད། །གང་སྣང་ལུས་ལ་ཆགས་ཞེན་མེད། །སྒོ་ལྔ་ཅིར་སྣང་སེམས་མི་འཇུག །མ་ཆགས་མ་ཞེན་མེ་ཏོག་བུང་བ་བཞིན། །ཆགས་ཞེན་རྩོལ་བསྒྲུབ་མཐའ་དང་བྲལ། །བྱར་མེད་ཀློང་དུ་སྤྲོས་པ་ཆོད། །འབྲས་བུ་ཇི་སྙེད་ཡོད་པ་རྣམས། །ཡིད་སྨོན་འབྲས་བུ་ངས་མ་བཤད། །སྙིང་པོའི་ཀློང་ནས་རྟོགས་པའི་ཡེ་ཤེས་ཤར། །གཞི་མོའི་དོན་རྟོགས་རང་སར་རང་ཉིད་ཐིམ། །དབྱེར་མེད་གཅིག་ཏུ་འདྲེས་པས་སྙིང་པོ་ཆོས་སྐུར་གྱུར། །སྐྱེ་མེད་རང་ས་ཟིན་པས་སྙིང་པོ་ཀློང་ནས་ཤར། །འཁྲུལ་པ་རྩད་ནས་ཆོད་པས་རྣམ་རྟོག་རང་སར་གྲོལ། ། )བརྗོད་མེད་ཀློང་དུ་གྱུར་པས་སྐྱེ་མེད་རྒྱ་ཡིས་ཐེབས། །སྐུ་གསུམ་འདུ་འབྲལ་མེད་པའི་ཀློང་དུ་སྤྲོས་པ་ཆོད། །མན་ངག་ཇི་སྙེད་ཡོད་པ་རྣམས། །དྲན་པ་བཞིར་འགྱུར་ངས་མ་བཤད། །ཞེན་འཛིན་མེད་པའི་མན་ངག་ནི། །སྤྲོས་པའི་མཐའ་ལ་མི་ཞེན་ཏེ། །འཛིན་སེམས་མེད་པར་སྤྲོས་པ་ཆོད། །བདག་འཛིན་མེད་པར་སྤྲོས་པ་ཆོད། །གཟུང་འཛིན་མེད་པར་སྤྲོས་པ་ཆོད། །དགག་བསྒྲུབ་མེད་པར་སྤྲོས་པ་ཆོད། །དབྱེ་བསལ་མེད་པར་སྤྲོས་པ་ཆོད། །རྩིས་གདབ་མེད་པར་སྤྲོས་པ་ཆོད། །ཡིད་ལ་མ་འགྱུས་སྤྲོས་པ་ཆོད། །རིག་པས་རིག་མེད་སྤྲོས་པ་ཆོད། །བློ་ཡིས་མ་བཅོས་སྤྲོས་པ་ཆོད། །ཤེས་པས་མ་ཕྱེ་སྤྲོས་པ་ཆོད། །སེམས་ཀྱིས་བསམ་མེད་སྤྲོས་པ་ཆོད། །ལུས་ཀྱིས་བྱར་མེད་སྤྲོས་པ་ཆོད། །ངག་གིས་བརྗོད་མེད་སྤྲོས་པ་ཆོད། །ཡིད་ཀྱིས་གཡོ་མེད་སྤྲོས་པ་ཆོད། །གཡོ་རྩོལ་མེད་པར་སྤྲོས་པ་ཆོད། །འཕོ་འགྱུར་མེད་པར་སྤྲོས་པ་ཆོད། །སྐྱེ་བ་མེད་པར་སྤྲོས་པ་ཆོད། །འགག་པ་མེད་པར་སྤྲོས་པ་ཆོད། །སྐྱེ་འགག་གཉིས་མེད་སྤྲོས་པ་ཆོད། །དེ་སོགས་ཅིར་སྣང་རྩོལ་བསྒྲུབ་ཀྱི། །མཐའ་ལས་འདས་པ་སྤྲོས་པ་ཆོད། །དོན་གྱི་སྤྲོས་གཅོད་རྣམ་ལྔར་གསུངས། །ཞེས་གསུངས་སོ། །རིན་པོ་ཆེ་བཅུད་ཀྱི་ཡང་སྙིང་རྩ་བའི་རྒྱུད་ལས། དོན་གྱི་སྤྲོས་གཅོད་བསྟན་པའི་ལེའུ་སྟེ་དགུ་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་ ― DNG002_Page_0542 ―
[མ་དཔེ་གཟིགས་ན་འདིར་གནོན།]
གསོལ། །རྒྱུད་ཀྱི་མཚན་ནི་ཇི་ལྟར་བཟུང་། །མཚན་མིང་བཏགས་ཐབས་བཤད་དུ་གསོལ། །ཀུན་ཏུ་བཟང་པོས་འདི་སྐད་གསུངས། །དགོས་འདོད་མ་ལུས་འབྱུང་བའི་ཕྱིར། །རིན་པོ་ཆེ་ཡི་རྒྱུད་ཡིན་ནོ། །དུས་གསུམ་རྒྱལ་བའི་བཅུད་ཕྱུང་བས། །སེམས་ཉིད་བཅུད་ཀྱི་རྒྱུད་ཡིན་ནོ། །ཆོས་རྣམས་ཀུན་གྱི་ཡང་སྙིང་བསྡུས། །ཡང་སྙིང་ཉིང་ཁུའི་རྒྱུད་ཡིན་ནོ། །སྡེ་ལྔའི་རྩ་བ་གཅོད་པའི་ཕྱིར། །སྤྲོས་གཅོད་རྩ་བའི་རྒྱུད་དུ་ཟུང་། །ཞེས་གསུངས་སོ། །རིན་པོ་ཆེ་བཅུད་ཀྱི་ཡང་སྙིང་སྤྲོས་གཅོད་རྩ་བའི་རྒྱུད་ལས། རྒྱུད་ཀྱི་མཚན་བཏགས་པའི་ལེའུ་སྟེ་བཅུ་པའོ།། །།དེ་ནས་སྟོན་པ་ཀུན་བཟང་ལ། །རྡོ་རྗེ་སེམས་དཔས་འདི་སྐད་གསོལ། །རིན་ཆེན་བཅུད་ཀྱི་ཡང་སྙིང་མཆོག །སྤྲོས་གཅོད་རྩ་བའི་རྒྱུད་འདི་ནི། །གཏད་རྒྱ་གང་ཟག་གང་ལ་གཏད། །ཅེས་གསོལ་པ་དང་། ཀུན་ཏུ་བཟང་པོས་འདི་སྐད་གསུངས། །དཔེར་ན་སེང་གེའི་འོ་མ་ཡང་། །སྣོད་ངན་ཕལ་དུ་བླུགས་གྱུར་ན། །སྣོད་ཀྱང་འཇིག་ལ་བཅུད་ཀྱང་འབོ། །དེ་བཞིན་ཡང་སྙིང་རྩ་རྒྱུད་ཀྱང་། །སྣོད་ངན་ཕལ་ལ་གཏད་གྱུར་ན། །ཆོས་ཀྱང་འཆོལ་ལ་རང་ཡང་བརླག །རྒྱུད་ངན་སེར་སྣས་བཅིངས་པ་དང་། །ང་རྒྱལ་དྲེགས་པས་ཁེངས་པ་དང་། །མུ་ཅོར་སྨྲ་ཞིང་མཁས་འདོད་དང་། །མན་ངག་བསྒྲུབ་པར་མི་སེམས་པར། །ལག་ཏུ་ཐོབ་ན་ཟོང་དུ་འཚོང་། །དེ་ལྟ་བུ་ལ་བསྟན་གྱུར་ན། །དུར་ཁྲོད་ངམ་ཤོད་གནས་ཉིད་དུ། །མཁའ་འགྲོ་དམ་ཅན་བཀའ་སྲུང་གིས། །མ་ཤི་བ་ཡི་སྔོན་རོལ་དུ། །ཤ་ཁྲག་རློན་པ་ཟ་བར་བྱེད། །དེ་བས་སྣོད་ངན་མི་བསྟན་ནོ། །ངང་རྒྱུད་བཟང་ཞིང་དད་པ་ཆེ། །དམ་ཚིག་གཞུང་བསྲུངས་རྣམ་སྨིན་འཛེམ། །སེར་སྣ་ཆུང་ལ་གཏོང་ཕོད་ཆེ། །རིན་ཆེན་སྣོད་ལྡན་དེ་དག་ལ། །ཡང་སྙིང་རྩ་རྒྱུད་སྤྲོས་གཅོད་གཏད། །མན་ངག་གསང་ཚིག་ཐུབ་པ་དང་། །སྣོད་དང་ལྡན་པའི་སྐྱེས་བུ་ལ། །ཡང་སྙིང་སྤྲོས་གཅོད་རྩ་རྒྱུད་གཏད། །རིན་ཆེན་ལ་སོགས་འདོད་པའི་ཡོན། །མ་ཆགས་སེར་སྣ་མེད་ལ་གཏད། །ཅེས་གསུངས་སོ། །རིན་ཆེན་བཅུད་ཀྱི་ཡང་སྙིང་རྩ་བའི་རྒྱུད་ལས། སྣོད་ལྡན་ལ་གཏད་རྒྱ་བསྟན་པའི་ལེའུ་སྟེ་བཅུ་གཅིག་ སྤྲོས་པ་གཅོད་པ་སྡེ་ལྔའི་རྒྱུད།― DNG002_Page_0543 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། པྲ་པཉྩ་ཙྪེ་ད་པཉྩ་སེ་ན་ཏནྟྲ། བོད་སྐད་དུ། སྤྲོས་པ་གཅོད་པ་སྡེ་ལྔའི་རྒྱུད། སེམས་ཀྱི་རང་བཞིན་ཤེས་པའི་ཀུན་བཟང་རྡོ་རྗེ་སེམས་དཔའ་ལ་ཕྱག་འཚལ་ལོ། །ཡེ་ནས་ཡོངས་སུ་བརྡལ་བའི་གཞལ་ཡས་ན། །མཚོན་མེད་བརྗོད་ལས་འདས་པའི་ཆོས་སྐུ་བཞུགས། །འཁོར་གྱི་དམ་པ་རང་གསལ་ཁྱེའུ་ཆུང་གིས། །བསྟན་པའི་སྙིང་པོ་སྤྲོས་གཅོད་སྡེ་ལྔ་ཞུས། །དུས་གསུམ་དབྱེར་མེད་བྱིན་བརླབས་བཤད་པའི་དུས། །ཐོག་མ་ཐ་མ་མེད་པའི་ཁྱད་པར་དོན། །མ་ཕྱེད་མི་ཕྱེད་སྙིང་པོ་མཉམ་པ་ཉིད། །རང་བཞིན་ཡོངས་ལ་ཁྱབ་པའི་སྟོང་ར་ན། །མ་སྐྱེས་མི་འགག་ཆོས་སྐུ་ལྷུན་གྲུབ་དབྱིངས། །མ་མཚོན་མི་མཚོན་མཚོན་མེད་ཆོས་སྐུའོ། །མ་བསྒྲུབས་མི་བསྒྲུབ་བསྒྲུབ་པའི་ཡུལ་དང་བྲལ། །མ་བསྟན་མི་བསྟན་བསྟན་དུ་བཏུབ་པ་མེད། །མ་བལྟས་མི་བལྟ་བལྟར་མེད་ཞེ་འདོད་མེད། །མ་བསྒོམས་མི་བསྒོམ་བསམ་མེད་འགྱུར་མེད་ཀློང་། །མ་སྤྱོད་མི་སྤྱད་ཆགས་ཞེན་ཀུན་དང་བྲལ། །མ་ཐོབ་མི་ཐོབ་ཐོབ་རྒྱུ་རང་ལ་མེད། །མ་བསྟན་མི་སྟོན་གདམས་ངག་ཞེ་འཛིན་མེད། །མིང་མེད་ཤེས་མེད་འགྱུ་མེད་དངོས་དང་བྲལ། །མཚོན་མེད་ཚིག་མེད་བཤད་མེད་ཉན་པ་མེད། །མཐའ་མེད་དབུས་མེད་ཕྱོགས་མེད་དབྱིངས་དང་བྲལ། །ཡིན་མེད་མིན་མེད་མཚོན་པའི་ཡུལ་དང་བྲལ། །བདེ་མེད་སྡུག་མེད་སྡུག་བསྔལ་ཡོངས་དང་བྲལ། །རེ་མེད་དོགས་མེད་ཐོབ་མེད་ལྷུང་བ་ཡོངས་དང་བྲལ། །སྨྲར་མེད་བརྗོད་མེད་སྨྲ་བརྗོད་ཡོངས་དང་བྲལ། །གསལ་མེད་མི་གསལ་མེད་དེ་དབྱེར་མེད་ངང་། །རིག་དང་མ་རིག་ཉིད་ཀྱང་རིག་སྟོང་དབྱེར་མེད་ངང་། །མཚོན་མེད་མཚོན་མཁན་མེད་དེ་བརྗོད་མེད་ངང་། །ཤེས་མེད་རང་གནས་རྟོག་པ་མེད་པའི་དོན། །ཡེ་ནས་ཡོངས་ཁྱབ་ཀུན་གྱི་གཞལ་ཡས་ན། །སྙིང་པོ་རང་བཞིན་གཡོ་མེད་ཆོས་སྐུ་བཞུགས། །རང་བཞིན་ཡོངས་སུ་རྫོགས་པའི་ཆོས་སྐུའོ། །ཀུན་གཞི་མཛོད་ཆེན་ཆོས་སྐུའི་ཀློང་ཡངས་ལ། །ཤར་བའི་སྣང་ཚུལ་སྣ་ཚོགས་ཅིར་ཤར་ཀྱང་། །ཡུལ་ལ་མ་ཞེན་ཆོས་སྐུའི་ཀློང་དུ་ ― DNG002_Page_0544 ―
[མ་དཔེ་གཟིགས་ན་འདིར་གནོན།]
ཐིམ། །ཆོས་ཉིད་ཀློང་ན་ཆོས་ཅན་ལོངས་སྤྱོད་ལ། །གཉིས་མེད་རང་ས་ཟིན་ཏེ་ལོངས་སྤྱོད་རྫོགས་སྐུའོ། །སྙིང་པོའི་ངང་ལ་སྣང་ཚུལ་ཅིར་ཤར་ཡང་། །གཞན་དུ་མ་བཀོལ་ཆོས་སྐུའི་ཀློང་དུ་ཐིམ། །བྱ་བའི་ཆ་སངས་བྱར་མེད་སྤྲོས་བྲལ་རྒྱས། །སྣ་ཚོགས་སྤྲུལ་ཡང་གཉིས་མེད་སྤྲུལ་སྐུའོ། །སྐུ་གསུམ་དབྱེར་མེད་གཅིག་སྟེ་འགྱུར་མེད་སངས་རྒྱས་སོ། །སྐུ་གསུམ་ཞིང་ཁམས་ཞེས་ནི་དེ་ལ་གདགས། །སྙིང་པོ་སྣང་ཚུལ་རྒྱ་ཆད་མེད་པ་ལ། །མ་རིག་དབང་གིས་ཆོས་ཉིད་མ་རྟོགས་ཏེ། །ཡེ་དོན་མ་རིག་དོན་མི་གསལ། །དེ་ཕྱིར་མ་རིག་མུན་པར་གསུངས། །རང་རྐྱེན་གཡོ་བའི་དབང་དུ་སོང་བ་ཡིས། །ཡིད་དཔྱོད་རྟོག་པའི་རླུང་འཕྱོ་བསམ་མི་ཁྱབ། །རིག་ཡིད་སེམས་ཀྱི་སྣང་ཚུལ་རྣམ་ལྔ་ཡིས། །ཉོན་མོངས་དུག་ལྔའི་དབང་དུ་སོང་། །དེ་ཡི་དབང་གིས་མ་རྟོགས་སེམས་ཅན་རྣམས། །སྐྱེ་རྒ་ན་འཆིའི་སྡུག་བསྔལ་ལ་སོགས་ཏེ། །ལུས་ནི་ན་ཚ་སྡུག་བསྔལ་དང་། །སེམས་ནི་ཞེ་འདོད་སྡུག་བསྔལ་དང་། །སྣང་བ་ཕྱོགས་རིས་སྡུག་བསྔལ་ལོ། །རིག་པ་ཡིད་དང་སེམས་དང་གསུམ། །རང་ས་མ་ཟིན་རྣམ་གསུམ་གྱིས། །ཡིད་ནི་འཁོར་ལོ་གསུམ་གྱི་དབང་དུ་སོང་། །དེ་ཡི་དབང་གིས་སྡུག་བསྔལ་ནི། །ཉོན་མོངས་བརྒྱད་ཁྲི་བཞི་སྟོང་ངོ་། །དེ་ཡི་དོན་དུ་ཆོས་སྒོ་བརྒྱད་ཁྲི་བཞི་སྟོང་གསུངས། །གསུང་གི་དོན་ནི་ཨ་གཅིག་པུ། །སྐྱེ་མེད་ཡིན་པར་ཤེས་པར་བྱ། །ཆོས་སྒོ་བརྒྱད་ཁྲི་བཞི་སྟོང་རྣམས། །ཏྲ་ཐ་ཀེ་རུ་འདུས་པར་བསྟན། །སྙིང་པོ་ཐིག་ལེ་ཉག་གཅིག་ལ། །གཅད་བྱ་གཅོད་བྱེད་དོན་ལ་མི་བདོག་ཀྱང་། །ཆོས་སྐུའི་ཀློང་དུ་ཐམས་ཅད་གནས་བྱའི་ཕྱིར། །རྫོགས་ཆེན་སྙིང་པོ་སྤྲོས་གཅོད་སྡེ་ལྔ་གསུངས། །ཆོས་ཀྱི་སྙིང་པོ་ཡིན་པར་ཤེས་པར་གྱིས། །ཕུན་སུམ་ཚོགས་དང་གཞི་ཡི་གནས་ལུགས་དང་། །སངས་རྒྱས་སེམས་ཅན་གཉིས་ཀྱི་བྱེ་བྲག་དང་། །གླེང་གཞི་ཡོངས་སུ་བཀོད་པའི་ལེའུ་སྟེ་དང་པོའོ།། །།དེ་ནས་འཁོར་གྱི་དམ་པ་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་ ― DNG002_Page_0545 ―
[མ་དཔེ་གཟིགས་ན་འདིར་གནོན།]
འདས་པའི་ཆོས་སྐུ་ལ། །གླེང་གཞིའི་དོན་ནི་དེ་ལྟར་ན། །སྤྲོས་པ་གཅོད་པ་སྡེ་ལྔ་ཇི་ལྟར་ལགས། །ཞེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུས་བཀའ་སྩལ་པ། །རང་བཞིན་ལྷུན་གྲུབ་དོན་གྱི་སྙིང་པོ་ལ། །གཅད་བྱ་གཅོད་བྱེད་དོན་ལ་མི་བདོག་ཀྱང་། །དཔེར་ན་མེ་གཅིག་འདོད་པས་ཀྱང་། །མེ་མ་བརྗོད་པས་འཕྲད་མི་འགྱུར། །དེ་བཞིན་སྤྲོས་གཅད་དོན་འདོད་ལ། །མ་བརྗོད་སྤྲོས་པ་ཆོད་མི་འགྱུར། །སྙིང་པོ་རང་བཞིན་རྒྱ་ཆད་མེད་པ་ལ། །ཡན་ལག་རིག་པའི་དབང་གིས་མ་རྟོགས་ཏེ། །ལྷུན་གྲུབ་ཆོས་སྐུ་རྟོགས་པར་བྱ་བའི་ཕྱིར། །ནང་གི་སེམས་དང་ཕྱི་ཡི་ཡུལ། །སྣང་ཞིང་སྲིད་པའི་ཆོས་རྣམས་ཐམས་ཅད་དང་། །རིག་ཡིད་སེམས་ཀྱིས་བཏགས་པའི་དྲན་རྟོག་ཐམས་ཅད་དང་། །བློ་ཡུལ་ཐེག་པ་བརྒྱད་ཁྲི་བཞི་སྟོང་ཀུན། །དེ་དག་ཐམས་ཅད་སྤྲོས་པ་གཅོད་པ་ལ། །འཁོར་བའི་སྤྲོས་པ་ཡོངས་སུ་གཅོད་པ་དང་། །ཐེག་པའི་སྤྲོས་པ་ཡོངས་སུ་གཅོད་པ་དང་། །ལྟ་བ་རྣམས་ཀྱི་སྤྲོས་པ་ཡོངས་སུ་གཅོད་པ་དང་། །སྒོམ་སྤྱོད་འབྲས་དང་གསུམ་གྱི་སྤྲོས་པ་གཅོད་པ་དང་། །མན་ངག་རྣམས་ཀྱི་སྤྲོས་པ་ཡོངས་སུ་བཅད་པའོ། །སྤྲོས་པ་གཅོད་པ་སྡེ་ལྔ་སོ་སོར་དབྱེ་བའི་ལེའུ་སྟེ་གཉིས་པའོ།། །།དེ་ནས་འཁོར་གྱི་དམ་པ་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །འཁོར་བའི་སྤྲོས་གཅད་ཇི་ལྟར་ལགས། །ཞེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུས་བཀའ་སྩལ་པ། །སྙིང་པོ་རང་བཞིན་ལྷུན་གྲུབ་ཆོས་སྐུ་ལ། །འཁོར་བ་མྱང་འདས་གཉིས་སུ་མི་བདོག་ཀྱང་། །རིག་པའི་མཚན་ཉིད་རྒྱ་ཆད་མེད་པ་ཡིས། །སྣང་ཚུལ་མ་འགགས་འཁོར་བ་ཉིད་དུ་ཤར། །དེ་ཡི་དོན་དུ་སྤྲོས་གཅོད་སྡེ་ལྔ་བྱུང་། །ཁམས་གསུམ་འཁོར་བའི་སྤྲོས་པ་བཅད་པ་ནི། །མཐའ་འཁོབ་ཀླ་ཀློར་འཁོར་བ་དང་། །འབོག་ཆོལ་སྡེ་ཡི་གནས་སུ་འཁོར་བ་དང་། །དབང་པོ་མ་ཚང་གནས་སུ་འཁོར་བ་དང་། །ལྟ་བ་ལོག་པའི་གནས་སུ་འཁོར་བ་དང་། །དམྱལ་ཁམས་བཅོ་བརྒྱད་གནས་སུ་འཁོར་བ་དང་། །ཡི་དྭགས་ཡུལ་དུ་འཁོར་བ་དང་། །བྱོལ་སོང་ ― DNG002_Page_0546 ―
[མ་དཔེ་གཟིགས་ན་འདིར་གནོན།]
ཡུལ་དུ་འཁོར་བ་དང་། །མི་ཡི་ཡུལ་དུ་འཁོར་བ་དང་། །ལྷ་མིན་ཡུལ་དུ་འཁོར་བ་དང་། །ལྷ་ཡི་ཡུལ་དུ་འཁོར་བ་རྣམས། །དེ་སོགས་ཁམས་གསུམ་འཁོར་བའི་སྡུག་བསྔལ་རྣམས། །ལས་དབང་རང་ས་མ་ཟིན་གསུམ་གྱིས་ལན། །ཆོས་སྐུའི་ཀློང་ལ་འཁོར་དང་མ་འཁོར་མེད། །འཁོར་བའི་སྡུག་བསྔལ་ཇི་སྙེད་ཀུན། །མྱ་ངན་འདས་པར་སྤྲོས་པ་ཆོད། །དམྱལ་བའི་ཡུལ་དུ་སྐྱེ་བ་དང་། །ཡི་དྭགས་ཡུལ་དུ་སྐྱེ་བ་དང་། །བྱོལ་སོང་ཡུལ་དུ་སྐྱེ་བ་དང་། །མི་ཡི་ཡུལ་དུ་སྐྱེ་བ་དང་། །ལྷ་མིན་ཡུལ་དུ་སྐྱེ་བ་དང་། །ལྷ་ཡི་ཡུལ་དུ་སྐྱེ་བ་དང་། །དེ་ལ་སོགས་པ་སྐྱེ་བའི་སྡུག་བསྔལ་ཇི་སྙེད་རྣམས། །སྐྱེ་མེད་ཆོས་སྐུའི་ཀློང་དུ་སྤྲོས་པ་ཆོད། །ལུས་འདིར་ན་ཚའི་སྡུག་བསྔལ་ལ། །ཚ་བའི་ནད་དང་གྲང་བའི་ནད། །རླུང་གི་ནད་དང་མཁྲིས་པའི་ནད། །ལུས་ཀྱི་ན་ཚ་ཇི་སྙེད་ཀུན། །འདུ་བ་རྣམ་བཞིའི་ནད་ཡིན་ཏེ། །དབུགས་མི་བདེ་དང་མཁལ་མ་ན། །མགོ་ནད་མིག་ནད་ཡན་ལག་ནད། །མཛེ་དང་ཤུ་བ་གཡན་པ་དང་། །རིམས་ནི་ཉིན་གཅིག་པ་དང་ཉིན་གཉིས་པ། །དེ་དག་ལུས་ཀྱི་སྡུག་བསྔལ་ཏེ། །སྙིང་པོ་སྐྱེ་མེད་ཆོས་སྐུ་ལ། །བདེ་དང་སྡུག་བསྔལ་གཉིས་མེད་དེ། །འབྱུང་རྐྱེན་གློ་བུར་ནད་ཡིན་ཏེ། །ན་མེད་ཚ་མེད་ཆོས་ཉིད་དབྱིངས་སུ་སྤྲོས་པ་ཆོད། །སྐྲ་དཀར་གཉེར་འདུས་སོ་ཡང་དོན། །ལུས་ཀྱི་དཔའ་ཤོར་ཡན་ལག་འདར། །ཁ་སྣ་ཆུ་འཛག་ལུས་གྱོང་བ། །ཁ་དབང་ཤོར་ཏེ་ཉན་པ་སུ་ཡང་མེད། །བུ་ཚ་ཀུན་ཡང་སྡུག་རྒན་ཤི་འཕྱི་ཟེར། །དེ་ལ་སོགས་ཏེ་རྒས་པའི་སྡུག་བསྔལ་རྣམས། །ཐོག་མ་མེད་པའི་དུས་མཐའ་ནས། །ཐ་མར་ཐུག་གི་བར་དུ་གསལ། །བྱང་ཆུབ་སེམས་ལ་རྒན་གཞོན་མེད་པ་ལ། །མ་རྟོགས་འཁྲུལ་པའི་སེམས་ལ་རྒས་གཞོན་བྱུང་། །ལོ་མང་འོག་རུལ་ཡིན་མོད་ཀྱི། །ཆོས་སྐུ་རྒན་གཞོན་མེད་པའི་ཀློང་དུ་སྤྲོས་པ་ཆོད། །མེ་གྲིར་ཤི་དང་ཆུ་གྲིར་ཤི། །གཡང་ལ་ཤི་དང་མཚོན་གྲིར་ཤི། །དུས་མ་ཡིན་པར་འཆི་བ་བརྒྱད། །དེ་ལ་སོགས་པ་འཆི་བའི་སྡུག་བསྔལ་རྣམས། །ཆོས་སྐུའི་ངང་ལ་འཆི་འགྱུར་མི་བདོག་སྟེ། །འཆི་འགྱུར་མེད་ ― DNG002_Page_0547 ―
[མ་དཔེ་གཟིགས་ན་འདིར་གནོན།]
པར་སྤྲོས་པ་ཆོད། །འཁོར་བའི་སྡུག་བསྔལ་ཐམས་ཅད་ཀུན། །བདེ་བ་ཆེན་པོར་སྤྲོས་པ་ཆོད། །འཁོར་བ་སྤྲོས་པ་གཅོད་པའི་ལེའུ་སྟེ་གསུམ་པའོ།། །།དེ་ནས་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །ཐེག་པའི་སྤྲོས་པ་ཇི་ལྟར་གཅད། །ཅེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུས་བཀའ་སྩལ་པ། །སྙིང་པོའི་ངང་ལ་གཅོད་བྱ་གཅོད་བྱེད་གཉིས་མེད་ཀྱང་། །བྱང་ཆུབ་སེམས་ལ་ཤི་དང་མ་ཤི་མེད། །ཐོག་མ་མེད་པའི་དུས་མཐའ་ནས། །ཐེག་པའི་སྤྲོས་པ་ཡོངས་སུ་གཅོད་པ་ནི། །བརྒྱད་ཁྲི་བཞི་སྟོང་ཐེག་པའི་སྒོ། །བརྗོད་ཀྱིས་མི་ལངས་བསམ་མི་ཁྱབ། །མདོར་བསྡུས་སྤྲོས་པ་གཅོད་པ་ནི། །ཡུལ་སེམས་སོ་སོར་མཐོང་བའི་ཉན་ཐོས་དང་། །མ་རིག་རྟེན་འདྲེལ་སྣང་བའི་རང་རྒྱལ་དང་། །སྣང་བ་སེམས་སུ་འདུས་པའི་སེམས་ཙམ་དང་། །བདེན་པ་གཉིས་སུ་ལྟ་བའི་དབུ་མ་དང་། །དག་པ་རྣམ་གསུམ་སྤྱོད་པའི་ཀྲི་ཡ་དང་། །མར་སྤྱོད་ཡར་བལྟའི་ཨུ་པ་དང་། །དག་པ་ཆེན་པོར་སྤྱོད་པའི་ཡོ་ག་དང་། །ཐབས་དང་ཤེས་རབ་གཉིས་མེད་མ་ཧཱ་དང་། །དབྱིངས་དང་ཡེ་ཤེས་གཉིས་མེད་ཨ་ནུ་དགུ། །འདོད་ལུགས་མི་མཐུན་ལྟ་སྤྱོད་སོ་སོ་བ། །སྙིང་པོའི་རང་བཞིན་ཀུན་ལ་ཁྱབ་པ་ལ། །ཡན་ལག་སྣང་ཚུལ་མ་འགགས་དགུ་རུ་ཤར། །ཐེག་པ་དགུ་རུ་ཤར་ཡང་ངན་པར་མ་བོར་ཏེ། །སྙིང་པོ་རང་བཞིན་ཆོས་སྐུའི་ཀློང་ཡངས་སུ། །དགུ་འདུས་ཀུན་འདུས་བརྒྱད་ཁྲི་བཞི་སྟོང་འདུས་པར་ཆོད། །ཐེག་པའི་སྤྲོས་པ་གཅོད་པའི་ལེའུ་སྟེ་བཞི་པའོ།། །།དེ་ནས་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །ཐེག་པ་རྣམས་ཀྱི་ལྟ་བའི་སྤྲོས་པ་ཇི་ལྟར་གཅད། །ཞེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུས་བཀའ་སྩལ་པ། །ཐེག་པའི་ལྟ་བའི་སྤྲོས་གཅོད་བསྟན་པ་ལ། །ཉན་ཐོས་བྱེ་བྲག་ལྟ་བ་རྣམ་པ་གཉིས། །ཉན་ཐོས་བྱེ་བྲག་པ་དང་མདོ་སྡེ་པ། །བྱེ་བྲག་པ་ཡིས་འདོད་ལུགས་ནི། །ཆོས་སྐུ་ལྷུན་གྲུབ་སྤྲོས་པ་མེད་པ་ལ། །སྣང་ཚུལ་མ་འགགས་ཕྲ་བའི་ཤེས་པ་ ― DNG002_Page_0548 ―
[མ་དཔེ་གཟིགས་ན་འདིར་གནོན།]
དང་། །ཕྱི་ཡི་ཡུལ་དང་ནང་སེམས་སོ་སོར་མཐོང་། །མཐོང་བའི་ཚུལ་གྱིས་གཡག་རྔ་ནེ་སིང་སྣང་། །ཉན་ཐོས་མདོ་སྡེའི་ལྟ་བ་ནི། །རྡུལ་ཕྲན་གོང་བུ་གཅིག་པུར་སྣང་། །འདོད་པའི་བདག་མེད་ཚོགས་དྲུག་ཡུལ་འགེག་མེད། །ཉན་ཐོས་དེ་ལྟར་འདོད་ཀྱི་དགག་བསྒྲུབ་མེད་པའི་ངང་དུ་སྤྲོས་པ་ཆོད། །རང་རྒྱལ་ལྟ་བའི་འདོད་པ་ནི། །ཕྱི་ཡི་ཡུལ་ཡང་འབྱུང་བ་རྟེན་འདྲེལ་སྣང་། །ནང་གི་སེམས་ཀྱང་རྟེན་འདྲེལ་རིམ་པར་སྣང་། །བདག་མེད་རྣམ་པར་རིག་བྱེད་འདོད། །རྟེན་འདྲེལ་གཉིས་མེད་ཀློང་དུ་སྤྲོས་པ་ཆོད། །སེམས་ཙམ་ལྟ་བ་བསྟན་པ་ནི། །རྣམ་བདེན་རྣམ་མེད་གཉིས་སུ་འདོད། །རྣམ་པ་བདེན་པར་འདོད་པའི་ལྟ་བ་ནི། །རང་རིག་རྒྱུད་ཀྱི་རྟག་ལ་སྐད་ཅིག་ཆ་མི་རྟོག །སྣང་བའི་རྣམ་པ་སེམས་སུ་བདེན་པར་འདོད། །མཐའ་བཞི་བྲལ་བ་གཟུང་འཛིན་གཉིས་སྟོང་བ། །རང་རིག་གསལ་བའི་ངོ་བོ་གཅིག་ཏུ་འདོད། །རྣམ་པ་མེད་པའི་ལྟ་བའི་འདོད་ལུགས་ནི། །ཕྱི་རོལ་སེམས་ཀྱི་རྣམ་པ་མེད་པའི་རྡུལ། །རང་རིག་བདེན་པའི་ཤེས་པའི་ངོ་བོ་ལ། །དེ་ཉིད་གཞན་དུ་བརྗོད་དུ་མེད་པའི་དོན། །གསལ་བྱེད་གཞན་ལ་ལྟོས་པ་ཅི་ཡང་མེད། །གསལ་སྟོང་རྒྱ་ཆད་མེད་པར་སྤྲོས་པ་ཆོད། །དབུ་མའི་ལྟ་བའི་འདོད་ལུགས་ནི། །སྒྱུ་མར་འདོད་དང་རྣལ་འབྱོར་སྤྱོད་པའོ། །སྒྱུ་མ་ལྟ་བུའི་ལྟ་བའི་འདོད་ལུགས་ནི། །སྣང་སེམས་ཐམས་ཅད་སྒྱུ་མ་ཙམ་དུ་འདོད། །ཕྱི་ཡི་དངོས་པོ་འདི་དག་ཐམས་ཅད་ཀྱང་། །ཡང་དག་པར་ནི་རང་བཞིན་གྲུབ་པ་མེད། །ཡོད་དང་མེད་དང་དབུས་མ་ཡིན། །ཀུན་རྫོབ་ཆུ་ཟླ་ཙམ་དུ་འདོད་པའོ། །རྣལ་འབྱོར་སྤྱོད་པའི་ལྟ་བའི་འདོད་ལུགས་ནི། །ཆོས་རྣམས་ཐམས་ཅད་མཉམ་པ་ཉིད་དུ་འདོད། །ཡོད་དང་མེད་དང་ཅི་ཡང་འདོད་པ་མེད། །སྤང་ལེན་མེད་པའི་ཀློང་དུ་སྤྲོས་པ་ཆོད། །མཚན་ཉིད་སྡེ་གསུམ་སྤྲོས་པ་གཅོད་པའི་ལེའུ་སྟེ་ལྔ་པའོ།། །།དེ་ནས་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །ཀྲི་ཡོག་སྡེ་གསུམ་ལྟ་བ་ཇི་ལྟར་ལགས། །སྡེ་གསུམ་ལྟ་བའི་སྤྲོས་པ་གཅད་དུ་གསོལ། །ཞེས་གསོལ་པ་དང་། བརྗོད་ལས་འདས་ ― DNG002_Page_0549 ―
[མ་དཔེ་གཟིགས་ན་འདིར་གནོན།]
པའི་ཆོས་སྐུས་བཀའ་སྩལ་པ། །ཀྲི་ཡའི་ལྟ་བའི་འདོད་ལུགས་ནི། །ཆོས་སྐུའི་རང་བཞིན་དངོས་མེད་རྒྱ་ཆད་མེད་པ་ལ། །ཀུན་རྫོབ་འདི་ལྟར་སྣང་བ་ཐམས་ཅད་ཀུན། །རིགས་གསུམ་དལ་དུ་སྣང་བར་འདོད། །དོན་དམ་དག་པ་རྣམ་གསུམ་ཡིན་པར་བལྟ། །དག་པ་ཆེན་པོའི་ཀློང་དུ་སྤྲོས་པ་ཆོད། །ཨུ་པ་ཡ་ཡི་ལྟ་བའི་འདོད་ལུགས་ནི། །སྙིང་པོའི་རང་བཞིན་རྒྱ་ཆད་མེད་པ་ལ། །ཀུན་རྫོབ་རིགས་བཞི་ལྷ་ཡི་དཀྱིལ་འཁོར་དང་། །རྣམ་བཞི་ལས་རིགས་བཞི་ཡི་ལྷ་རུ་འདོད། །དོན་དམ་རང་བཞིན་སྐྱེ་འགག་མེད་པར་འདོད། །ཡོ་གའི་ལྟ་བའི་འདོད་ལུགས་བསྟན་པ་ནི། །སྙིང་པོའི་རང་བཞིན་རྒྱ་ཆད་མེད་པ་ལ། །ཀུན་རྫོབ་རིགས་ལྔ་ལྷ་ཡི་དཀྱིལ་འཁོར་འདོད། །རྣམ་ཤེས་ལྔ་ལས་རིགས་ལྔ་ལྷ་རུ་འདོད། །དོན་དམ་རང་བཞིན་སྐྱེ་འགག་མེད་པའོ། །རྣམ་རྟོག་བློ་ལ་དེ་ལྟར་སྣང་མོད་ཀྱང་། །དོན་དམ་ཆོས་ཀྱི་དབྱིངས་སུ་སྤྲོས་པ་ཆོད། །ཀྲི་ཡོག་སྡེ་གསུམ་སྤྲོས་པ་གཅོད་པའི་ལེའུ་སྟེ་དྲུག་པའོ།། །།འཁོར་གྱི་དམ་པ་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །མ་ཧཱ་ཨ་ནུའི་ལྟ་བ་སྤྲོས་བཅད་ཇི་ལྟར་གཅོད། །ཅེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུ་ཡིས། །འཁོར་གྱི་དམ་པ་རང་གསལ་ཁྱེའུ་ཆུང་ལ། །སྙིང་པོའི་རང་བཞིན་རྒྱ་ཆད་མེད་པ་ལ། །མ་ཧཱ་ཡོ་གའི་ལྟ་བའི་འདོད་ལུགས་ནི། །ཕྱི་དང་ནང་དང་སྣོད་བཅུད་སྣང་བ་ལ། །ཐབས་དང་ཤེས་རབ་གཉིས་སུ་འདོད་པ་ལ། །ཕྱི་དང་སྣོད་ནི་ཐབས་ཀྱི་རང་བཞིན་འདོད། །ནང་དང་བཅུད་ནི་ཤེས་རབ་རང་བཞིན་འདོད། །ཐབས་ཀྱི་རང་བཞིན་བསྐྱེད་པའི་རིམ་པའི་ཚུལ། །ཤེས་རབ་རང་བཞིན་རྫོགས་པའི་རིམ་པའི་ཚུལ། །ཐབས་དང་ཤེས་རབ་གཉིས་སུ་སྣང་བ་ཡང་། །སྣང་སྟོང་གཉིས་མེད་ཟུང་འཇུག་ལྟ་བར་འདོད། །མ་ཧཱ་ཡོ་གའི་ལྟ་བའི་འདོད་པ་སྟེ། །དབྱེ་བསལ་མེད་པའི་ཀློང་དུ་སྤྲོས་པ་ཆོད། །ཨ་ནུའི་ལྟ་བའི་འདོད་ལུགས་ནི། །སྙིང་པོའི་རང་བཞིན་རྒྱ་ཆད་མེད་པ་ལ། །ཕྱི་ཡི་ཡུལ་ནི་ཆོས་དབྱིངས་གཞལ་ཡས་ཁང་། །ནང་གི་བཅུད་ནི་ལྷ་ཡི་རང་བཞིན་ཡིན། །གཞལ་ཡས་ཁང་དང་ལྷ་ཡི་རང་བཞིན་དེ་ ― DNG002_Page_0550 ―
[མ་དཔེ་གཟིགས་ན་འདིར་གནོན།]
གཉིས་ལ། །དབྱིངས་དང་ཡེ་ཤེས་གཉིས་མེད་ལྟ་བར་འདོད། །ཨ་ནུའི་ལྟ་བའི་འདོད་པ་དེ། །སོར་བཞག་ཆེན་པོའི་ཀློང་དུ་སྤྲོས་པ་ཆོད། །མ་ཧཱ་ཨ་ནུའི་ལྟ་བའི་སྤྲོས་པ་གཅོད་པའི་ལེའུ་སྟེ་བདུན་པའོ།། །།དེ་ནི་གཞན་གཞུང་སྤྲོས་པ་གཅད་པའོ། །དེ་ནས་འཁོར་གྱི་དམ་པ་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་སྟོན་པ་ལ། །གཞན་གཞུང་སྤྲོས་གཅོད་སྡེ་ལྔ་དེ་ལྟར་ན། །རང་གི་གཞུང་གི་འདོད་པའི་སྤྲོས་པ་གཅོད་པའི་སྡེ་ལྔ་ཇི་ལྟར་ལགས། །ཞེས་གསོལ་པ་དང་། མཚོན་མེད་བརྗོད་ལས་འདས་པའི་སྟོན་པ་ཡིས། །འཁོར་གྱི་དམ་པ་རང་གསལ་ཁྱེའུ་ཆུང་ལ། །སྙིང་པོའི་རང་བཞིན་ལྷུན་གྲུབ་ཆོས་སྐུ་ལ། །མཚན་ཉིད་མ་འགགས་སྣང་ཚུལ་ཅིར་ཡང་འཆར། །འཆར་བའི་ཟེར་ལས་སྐྱེ་བའི་རིག་པ་སྐྱེས། །སྐྱེས་ཀྱང་སྙིང་པོའི་དོན་ལས་གཡོས་པ་མེད། །མ་འདས་སྙིང་པོ་མ་བཅོས་ཆོས་སྐུ་ལ། །རང་བྱུང་རྩལ་གྱིས་རིག་པས་སོ་སོར་ཕྱེ། །ཕྱེ་བས་སྤྲོས་པ་གཅོད་པའི་སྡེ་ལྔ་པོ། །རང་གཞུང་ཉམས་སུ་བླང་བའི་དོན་དུ་བཤད། །བལྟ་བའི་སྤྲོས་པ་གཅོད་པ་དང་། །བསྒོམ་པའི་སྤྲོས་པ་གཅོད་པ་དང་། །སྤྱོད་པའི་སྤྲོས་པ་གཅོད་པ་དང་། །འབྲས་བུའི་སྤྲོས་པ་གཅོད་པ་དང་། །མན་ངག་སྤྲོས་པ་གཅོད་པའོ། །སྤྲོས་པ་གཅོད་པ་སྡེ་ལྔ་སོ་སོར་ཕྱེ་བའི་ལེའུ་སྟེ་བརྒྱད་པའོ།། །།རང་གསལ་རིག་པའི་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །ལྟ་བའི་སྤྲོས་བཅད་ཇི་ལྟར་ལགས། །ཞེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུས་བཀའ་སྩལ་པ། །བརྒྱད་ཁྲི་བཞི་སྟོང་ཐེག་པའི་སྒོ། །མི་མཐུན་བལྟ་བ་སོ་སོ་བ། །བརྗོད་ཀྱིས་མི་ལངས་བསམ་མི་ཁྱབ། །དན་བརྟགས་ལྟ་བ་ངས་མ་བསྟན། །བསམ་བརྟགས་བློ་ཡུལ་ལྟ་བ་རྣམས། །བལྟ་བྱ་ལྟ་བྱེད་ཐམས་ཅད་ཀུན། །བརྗོད་བྱ་རྗོད་བྱེད་ཐམས་ཅད་ཀུན། །ཡུལ་སྣང་བློས་བཏགས་ཐམས་ཅད་ཀུན། །མཚོན་མེད་བརྗོད་ལས་འདས་པ་ཡིན། །ཞེ་འདོད་མེད་པར་སྤྲོས་པ་ཆོད། །ལྟ་བའི་སྤྲོས་པ་གཅོད་པའི་ལེའུ་སྟེ་དགུ་པའོ།། །། ― DNG002_Page_0551 ―
[མ་དཔེ་གཟིགས་ན་འདིར་གནོན།]
འཁོར་གྱི་དམ་པ་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །སྒོམ་པའི་སྤྲོས་བཅད་ཇི་ལྟར་ལགས། །བརྗོད་ལས་འདས་པའི་ཆོས་སྐུའི་བཀའ་སྩལ་པ། །བརྒྱད་ཁྲི་བཞི་སྟོང་ཐེག་པའི་སྒོ། །བསྒོམ་པ་མི་མཐུན་སོ་སོ་བ། །བརྗོད་ཀྱིས་མི་ལངས་བསམ་མི་ཁྱབ། །ཡིད་ཀྱིས་བཙོན་བཟུང་བསྒོམ་པ་དེ། །དྲན་པ་བཞི་འགྱུར་བསྒོམ་པ་ཡིན། །ཡིད་དཔྱོད་བློས་བསྒོམ་རྩོལ་བ་དང་། །བསྒོམ་ཡུལ་སྒོམ་མཁན་རྩོལ་བ་དང་། །བཅས་བཅོས་ཡིད་སྨོན་བསྒོམ་པ་དང་། །དེ་དག་སེམས་ཀྱི་རྩོལ་བ་སྟེ། །བསམ་དུ་མེད་པའི་དོན་མ་རྟོགས། །མ་བསམས་མ་བསྒོམས་དོན་གྱི་ཀློང་དཀྱིལ་དུ། །བསམ་བསྒོམ་ཅི་ཡང་མི་བྱ་སྟེ། །མ་བསམས་པ་དེ་ཆོས་ཀྱི་སྐུ། །རིག་མེད་འགྱུར་མེད་སེམས་མེད་རྟོག་པ་མེད། །ཡིད་སྨོན་མ་ཡིན་བློ་ཡི་ཡུལ་དང་བྲལ། །བསྒོམ་པ་མ་ཡིན་བསྒོམ་པའི་ཡུལ་མ་མཆིས། །བསམ་པས་མི་རྙེད་བསམ་རྒྱུ་ཅི་ཡང་མེད། །བསམ་མེད་རྟོག་མེད་འགྱུར་མེད་ཀློང་དུ་སྤྲོས་པ་ཆོད། །བསྒོམ་པའི་སྤྲོས་པ་གཅོད་པའི་ལེའུ་སྟེ་བཅུ་པའོ།། །།རང་གསལ་རིག་པའི་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །སྤྱོད་པའི་སྤྲོས་པ་གཅད་པ་ཇི་ལྟར་ལགས། །ཞེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུས་བཀའ་སྩལ་པ། བརྒྱད་ཁྲི་བཞི་སྟོང་ཐེག་པའི་སྒོ། །མི་མཐུན་སྤྱོད་པ་ཇི་སྙེད་པ། །བཅོས་བྱ་འདོད་པ་བསྒྲུབ་པ་སྟེ། །བརྗོད་ཀྱིས་མི་ལངས་བསམ་མི་ཁྱབ། །འདི་རུ་ཆོས་སྐུས་ཡོངས་མ་གསུངས། །སྣང་བའི་ཡུལ་དུ་ཅིར་སྣང་ཡང་། །ཆོས་དབྱིངས་སྣང་ལ་རང་བཞིན་མེད། །རིག་པའི་སེམས་ཀྱིས་གར་བརྟགས་ཀྱང་། །ཡིད་ཀྱིས་བསམ་པ་གློ་བུར་བ། །སྣང་སེམས་གཉིས་སུ་གར་སྣང་ཀྱང་། །མ་ཆགས་མ་ཞེན་སྤྱོད་པའི་མཆོག །གང་སྣང་ཡུལ་ལ་མ་ཞེན་ན། །དེ་ནི་སྤྱོད་པའི་རྒྱན་དུ་གསུངས། །གང་ཡང་མ་སྤངས་མ་བསྒྲུབས་པར། །དེ་ནི་སྤྱོད་པའི་མཆོག་ཏུ་གསུངས། །ཅིར་སྣང་ཅིར་རིག་ཅིར་བསམས་ཀྱང་། །ནང་དུ་བདག་འཛིན་མ་སྐྱེས་ ― DNG002_Page_0552 ―
[མ་དཔེ་གཟིགས་ན་འདིར་གནོན།]
ན། །དེ་ནི་སྤྱོད་པའི་སྙིང་པོར་གསུངས། །སྣང་བ་སྣ་ཚོགས་ཅིར་སྣང་ཡང་། །དེ་ལ་སེམས་ཀྱི་ཆགས་ཞེན་མེད། །དེ་ནི་སྤྱོད་པའི་མཆོག་ཏུ་གསུངས། །སྤྱོད་པའི་རྣམ་གྲངས་ཇི་སྙེད་པ། །སྤྱོད་པ་བྱ་བ་བཏང་བའི་ངང་དེ་ལ། །ལུས་ངག་ཡིད་གསུམ་རྩོལ་བསྒྲུབ་མི་བྱ་སྟེ། །བྱ་བའི་སྤྱོད་པ་མ་འགགས་ལ། །བྱ་རྒྱུ་གང་ཡང་མི་དམིགས་ཏེ། །གང་ལ་མ་ཆགས་མ་ཞེན་པ། །སྤྱོད་པའི་མཆོག་ནི་བྱར་མེད་ཡིན། །སྤྱོད་པ་བཅོས་བྱ་མ་ཡིན་བཅོས་པ་མེད། །གང་ཡང་བྱ་བ་བཏང་བ་ཡི། །བྱ་བྱེད་སྤྲོས་བྲལ་ཀློང་དུ་སྤྲོས་པ་ཆོད། །སྤྱོད་པའི་སྤྲོས་པ་གཅོད་པའི་ལེའུ་སྟེ་བཅུ་གཅིག་པའོ།། །།འཁོར་གྱི་དམ་པ་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །འབྲས་བུའི་སྤྲོས་གཅོད་ཇི་ལྟར་ལགས། །ཞེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུས་བཀའ་སྩལ་པ། །རང་བཞིན་ལྷུན་གྱིས་གྲུབ་པའི་ཆོས་སྐུ་ལ། །འབྲས་བུ་ཐོབ་དང་མ་ཐོབ་མི་མངའ་ཡང་། །ཆོས་སྐུ་རྒྱ་ཆད་མེད་པ་མ་རྟོགས་པས། །མ་འགགས་བརྒྱད་ཁྲི་བཞི་སྟོང་ཐེག་པའི་སྒོ། །འབྲས་བུའི་ཐོབ་ལུགས་ཇི་སྙེད་ཀུན། །སྤངས་ནས་ཐོབ་པའི་འབྲས་བུ་དེ། །ཡིད་སྨོན་འབྲས་བུ་ཡིན་པར་བཤད། །རེ་དོགས་འབྲས་བུ་ངས་མ་བཤད། །རྩོལ་བསྒྲུབ་འབྲས་བུ་ངས་མ་བཤད། །འདོད་པའི་འབྲས་བུ་ངས་མ་བཤད། །རེ་བའི་འབྲས་བུ་ངས་མ་བཤད། །ཡིད་སྨོན་འབྲས་བུ་ངས་མ་བཤད། །བསྒྲུབ་ནས་ཐོབ་པའི་འབྲས་བུ་ངས་མ་བཤད། །ཆོས་སྐུ་དམིགས་མེད་མཚོན་མེད་བརྗོད་ལས་འདས། །འབྲས་བུ་ཐོབ་བྱ་འཐོབ་བྱེད་གཉིས་མེད་ཀྱང་། །རང་བྱུང་རྩལ་སྣང་རྒྱ་ཆད་མེད་པ་ཡིས། །རེ་ཞིག་འབྲས་བུའི་མིང་བཏགས་འདི་ལྟར་རོ། །འབྲས་ནི་སྙིང་པོ་དོན་ལ་བྱ། །བུ་ནི་ཡན་ལག་མ་འགགས་པ། །འབྲས་ནི་ཆོས་ཉིད་དབྱིངས་ཡིན་ཏེ། །བུ་ནི་ཆོས་ཅན་མཚན་མའོ། །འབྲས་ནི་ཆོས་སྐུ་ལྷུན་གྲུབ་ལ། །བུ་ནི་རིག་པའི་སྣང་ཚུལ་ཡིན། །འབྲས་ནི་གཞི་མོའི་དོན་ལ་བྱ། །རྩལ་དང་ ― DNG002_Page_0553 ―
[མ་དཔེ་གཟིགས་ན་འདིར་གནོན།]
ཟེར་ནི་བུ་ཡིན་ནོ། །འབྲས་ནི་ཆོས་ཀྱི་དབྱིངས་ཡིན་ཏེ། །བུ་ནི་རིག་པའི་ཡེ་ཤེས་སོ། །འབྲས་ནི་ཐོག་མའི་དུས་ཡིན་ཏེ། །བུ་ནི་ད་ལྟའི་ཤེས་པའོ། །འབྲས་ནི་རང་གི་ཤེས་རབ་སྟེ། །བུ་ནི་བླ་མའི་གདམས་ངག་ཐོབ། །ཐོག་མ་མེད་པའི་དུས་ཉིད་ནས། །རང་ལ་རང་ཆས་ཡོད་པ་འབྲས་ཡིན་ཏེ། །ཐོས་བསམ་བསྒོམ་གསུམ་གྱིས་རྟོགས་བུ་ཡིན་ནོ། །འབྲས་བུ་དེ་དག་ཐམས་ཅད་ཀྱང་། །སྐུ་གསུམ་འདུ་འབྲལ་མེད་པའི་ཀློང་དུ་སྤྲོས་པ་ཆོད། །འབྲས་བུའི་སྤྲོས་པ་གཅོད་པའི་ལེའུ་སྟེ་བཅུ་གཉིས་པའོ།། །།འཁོར་གྱི་དམ་པ་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །ལྟ་སྒོམ་སྤྱོད་འབྲས་བཞི་ཡི་སྤྲོས་གཅོད་དེ་ལྟར་ན། །མན་ངག་རྣམས་ཀྱི་སྤྲོས་གཅོད་ཇི་ལྟ་བུ། །ཞེས་གསོལ་པ་དང་། བརྗོད་ལས་འདས་པའི་ཆོས་སྐུས་བཀའ་སྩལ་པ། །སྙིང་པོ་རང་བཞིན་ཆོས་སྐུ་ཀློང་ཡངས་ལ། །མཚོན་མེད་བརྗོད་ལས་འདས་པ་མ་རྟོགས་ཏེ། །ཡན་ལག་སྣང་ཚུལ་རྒྱ་ཆད་མེད་པ་ལ། །མཚོན་བྱ་མཚོན་བྱེད་དོན་ལ་མི་བདོག་སྟེ། །མ་མཚོན་གོ་ཞིང་རྟོགས་པར་མི་འགྱུར་བས། །མན་ངག་སྤྲོས་གཅོད་མཚོན་ཏེ་བསྟན། །བརྒྱད་ཁྲི་བཞི་སྟོང་ཐེག་པའི་སྒོ། །དེ་ཡི་མན་ངག་བརྗོད་མི་ལངས། །བསམ་གྱིས་མི་ཁྱབ་མཚོན་ལས་འདས། །དྲན་པ་བཞིར་འགྱུར་མན་ངག་སྟེ། །ཆོས་སྐུ་ཐོབ་པར་མ་གསུངས་སོ། །དོན་གྱི་མན་ངག་བསྟན་པ་ནི། །གཉིས་སྣང་མེད་པའི་མན་ངག་ལ། །སྤྲོས་པའི་མུ་ལས་གྲོལ་བ་ནི། །མན་ངག་རང་བཞིན་ཡིན་པར་བཤད། །སྒྲོ་སྐུར་བྲལ་བའི་མན་ངག་ལ། །སྤྲོས་པ་མེད་པར་རྟོགས་པ་ནི། །མན་ངག་མཚན་ཉིད་ཡིན་པར་བཤད། །སྒྲོ་སྐུར་བྲལ་བར་རྟོགས་པ་ནི། །སྤྲོས་པའི་མཐའ་ལ་མ་ཞེན་ན། །མན་ངག་ངོ་བོ་ཡིན་པར་བཤད། །སྙིང་པོ་དོན་གྱི་གནས་ལུགས་ལ། །སྨྲ་བསམ་བརྗོད་པའི་ཡུལ་ལས་འདས། །བསམ་འདས་བརྗོད་མེད་རྟོགས་པ་ནི། །མན་ངག་མཚན་ཉིད་ཡིན་པར་བཤད། །ཕྱོགས་རིས་སྤྲོས་པ་མེད་པའི་དོན། །སྒྲོ་སྐུར་མཐའ་ལས་གྲོལ་བ་ནི། །མན་ངག་འབྲས་བུ་ ― DNG002_Page_0554 ―
[མ་དཔེ་གཟིགས་ན་འདིར་གནོན།]
ཡིན་པར་བཤད། །མཐའ་དབུས་མེད་པའི་ཀློང་ཆེན་པོ། །རྒྱ་ཆད་མེད་པའི་མན་ངག་བསྡུས། །ཆོས་ཀྱི་དབྱིངས་སུ་རང་བཞིན་ཐིམ། །སྙིང་པོ་དོན་གྱི་ཀློང་དཀྱིལ་དུ། །མཚོན་མེད་བརྗོད་ལས་འདས་པའི་མན་ངག་ཐིམ། །གཞི་ཡི་རང་བཞིན་ཡོད་མེད་མཉམ་པའི་ངང་། །སྣང་སྲིད་འཁོར་འདས་ཐམས་ཅད་དེ་ལས་བྱུང་། །བྱུང་ཡང་སྣ་ཚོགས་གཞི་ཡི་ངང་དུ་ཐིམ། །མན་ངག་བརྒྱད་ཁྲི་བཞི་སྟོང་ཡང་། །ཞེན་འཛིན་མེད་པའི་ཀློང་དུ་སྤྲོས་པ་ཆོད། །སྤྲོས་པ་གཅོད་པ་སྡེ་ལྔ་ཞེས་ནི་དེ་ལ་གདགས། །སྤྲོས་པ་གཅོད་པའི་སྡེ་ལྔ་ལས། །མན་ངག་སྤྲོས་པ་གཅོད་པའི་ལེའུ་སྟེ་བཅུ་གསུམ་པའོ།། །།འཁོར་གྱི་དམ་པ་རང་གསལ་ཁྱེའུ་ཆུང་གིས། །མཚོན་མེད་བརྗོད་ལས་འདས་པའི་ཆོས་སྐུ་ལ། །མཚན་གྱི་རྣམ་གྲངས་ཇི་ལྟ་བུ། །ཞེས་གསོལ་པ་དང་། མཚོན་མེད་བརྗོད་ལས་འདས་པའི་ཆོས་སྐུས་བཀའ་སྩལ་པ། །སྙིང་པོའི་རང་ལ་གདགས་སུ་མེད་པ་ལ། །སྣང་ཚུལ་མ་འགགས་རྒྱ་ཆད་མང་བ་ལ། །ཡན་ལག་རིག་པའི་དབང་གིས་མཚན་བཏགས་པ། །ཐེག་པ་མ་ལུས་འདི་ནས་འབྱུང་བའི་ཕྱིར། །ཐེག་པ་སྤྱི་ཡི་རྒྱུད་ཆེན་ཞེས་ཀྱང་བྱ། །ཐེག་པ་ཐམས་ཅད་གཉའ་གཅོག་ཕྱིར། །གཉའ་གཅོག་ཆེན་པོའི་རྒྱུད་ནི་ཞེས་ཀྱང་བྱ། །ཐེག་པ་སྤྱི་ཡི་དོན་རྣམས་བསྡུ་བའི་ཕྱིར། །སྤྱི་ཏི་ཡོ་ག་ཞེས་ཀྱང་བྱ། །ལྟ་བ་ཡངས་པའི་དོན་རྣམས་སྟོན་པའི་ཕྱིར། །ཡང་ཏི་ཡོ་གའི་རྒྱུད་ཆེན་ཞེས་ཀྱང་བྱ། །ཐེག་པ་ཐམས་ཅད་ཉག་གཅིག་ཕྱིར། །ཉག་གཅིག་ཆེན་པོའི་རྒྱུད་ནི་ཞེས་ཀྱང་བྱ། །ལྟ་བསྒོམ་སྤྱོད་པ་ལ་བཟླའི་ཕྱིར། །ལ་ཟློ་ཆེན་པོའི་རྒྱུད་ཆེན་ཞེས་ཀྱང་བྱ། །ཐམས་ཅད་སྤྲོས་པ་ཡོངས་སུ་གཅད་པའི་ཕྱིར། །སྤྲོས་པ་གཅོད་པའི་སྡེ་ལྔ་ཞེས་ཀྱང་བྱ། །མཚན་གྱི་རྣམ་གྲངས་བསྟན་པའི་ལེའུ་སྟེ་བཅུ་བཞི་པའོ།། །།སྤྲོས་པ་གཅོད་པ་སྡེ་ལྔ་ཞེས་བྱ་བའི་རྒྱུད་རྫོགས་སོ།། །།རྒྱ་གར་གྱི་སློབ་དཔོན་གུ་རུ་པདྨ་སམ་བྷ་ཝ་དང་། བོད་ཀྱི་ལོཙྪ་བ་ཆེན་པོ་སྐ་བ་དཔལ་བརྩེགས་ཀྱིས་བསྒྱུར་ཅིང་གཏན་ལ་ཕབ་པའོ། །སྲོག་དང་བྲལ་བའི་ཁ་བཞིན་སྡོམ། །སྤེལ་བའི་གནས་མེད་གཏེར་དུ་སྦོས།། །། རིན་པོ་ཆེ་བདུད་རྩི་བཅུད་ཐིགས་ཀྱི་རྒྱུད་ཅེས་བྱ་བ།― DNG002_Page_0555 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། རཏྣ་ཨ་མྲྀ་ཏ་ར་ས་བིནྡུ་ཏནྟྲ་ནཱ་མ། བོད་སྐད་དུ། རིན་པོ་ཆེ་བདུད་རྩི་བཅུད་ཐིགས་ཀྱི་རྒྱུད་ཅེས་བྱ་བ། བཅོམ་ལྡན་འདས་གསང་བདག་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་རྟོགས་པའི་དུས་གཅིག་ན། འོག་མིན་གྱི་གནས་སེམས་ཉིད་གདལ་བ་ཆེན་པོ། མ་བྲིས་པའི་དཀྱིལ་འཁོར་འོད་ཁ་དོག་སྣ་ཚོགས་འབར་བར་རང་བྱུང་བ། མ་བརྩིགས་པའི་གཞལ་ཡས་ཁང་ཡེ་ཤེས་ཀྱི་འོད་ཟེར་རྣམ་ལྔ་འཕྲོ་བ། ཆོས་དབྱིངས་གཡོ་མེད་མཁའ་གསལ་དངས་པའི་གཞལ་ཡས་ཁང་དེ་ན། སྟོན་པའི་རྒྱལ་པོ་རང་བྱུང་གི་ཡེ་ཤེས་གསང་བདག་ཆེན་པོ་བཞུགས་སོ། །འཁོར་གྱི་ཚོགས་ནི་འདི་ལྟ་སྟེ། འབྱུང་བ་ལྔ་དང་། འདོད་ཡོན་ལྔ་དང་། ཕུང་པོ་ལྔ་དང་། ཡེ་ཤེས་ལྔ་དང་། དུག་ལྔ་དང་། སྐུ་ལྔ་དང་བཅས་ཏེ་འདུ་འབྲལ་མེད་པར་འཁོད་དོ། །དུས་ནི་འདི་ལྟ་སྟེ། འདས་མ་འོངས་ད་ལྟ་དུས་གསུམ་དུ་དབྱེར་མེད་པའི་ཚེ། བསྟན་པའི་རྒྱལ་པོ་སེམས་ཉིད་རྣལ་མ་སྐྱེ་མེད་ཀ་དག་བདུད་རྩི་བཅུད་ཐིགས་འདི་སྐད་དོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། གླེང་གཞི་ཡོངས་སུ་བཀོད་པའི་ལེའུ་སྟེ་དང་པོའོ།། །།དེ་ནས་འཁོར་གྱི་ནང་ནས་ཀུན་རིག་ཁྱེའུ་ཆུང་རང་བྱུང་གི་རྩལ་དུ་ལངས་ཏེ་སྟོན་པ་གསང་བདག་ཆེན་པོ་ལ་ཞུས་པ། ཨེ་མ་སྟོན་པ་གསང་བའི་བདག །དགུ་རྩེ་སེམས་ཉིད་སྤྱི་ཏི་འདིར། །ཀ་དག་ཕྱོགས་བྲལ་ཆེན་པོ་ལ། །མཚོན་བྱ་མཚོན་བྱེད་མ་གྲུབ་ན། །ཕྱི་རབས་བསྟན་པའི་ཐ་མ་ལ། །བློ་འདས་མཚོན་པར་བྱེད་པ་ཡི། །བརྡའ་དོན་སྟོན་བྱེད་དགོས་མི་དགོས། །དགོས་ན་བླ་མའི་མཚན་ཉིད་གང་། །དེ་མེད་ཇི་ལྟར་རྟོགས་པར་འགྱུར། །ཞེས་ཞུས་པ་དང་། དེ་ནས་སྟོན་པ་གསང་བའི་བདག་པོ་དེ་ཕྱོགས་མེད་ཡོངས་རྫོགས་ཀྱི་ཏིང་ངེ་འཛིན་ལ་སྙོམས་པར་བཞུགས་སོ། །དེ་ལས་བཞེངས་ནས་བཀའ་སྩལ་པ། །ང་ཡི་བླ་མེད་སྤྱི་ཏི་ལ། །མཚོན་བྱ་མཚོན་བྱེད་ཀ་དག་ཀྱང་། །མ་མཚོན་གོ་བར་མི་འགྱུར་བས། །མཚོན་བྱེད་ཕྱི་ཡི་བླ་མ་དགོས། །དེ་ཡི་མཚན་ཉིད་ངས་བཤད་ཀྱིས། །ཀུན་རིག་ཁྱེའུ་ཆུང་གུས་པས་ཉོན། །ཕྱི་རབས་བསྟན་པའི་ཐ་མ་ལ། །འབྲས་བུའི་བསྟན་པ་དར་ ― DNG002_Page_0556 ―
[མ་དཔེ་གཟིགས་ན་འདིར་གནོན།]
བའི་ཚེ། །སེམས་ཉིད་དགུ་རྩེ་སྤྱི་ཏི་འབྱུང་། །དེ་འཛིན་བླ་མའི་མཚན་ཉིད་ནི། །མི་མཇེད་ཛམ་གླིང་ས་ཕྱོགས་སུ། །རྣལ་འབྱོར་གཙང་མའི་ལུས་བླངས་ལ། །རིགས་བཟང་རྒྱུད་དུལ་དད་བརྩོན་ལྡན། །ཤེས་རབ་སྙིང་རྗེས་འགྲོ་དོན་བྱེད། །རྒྱུ་འབྲས་ཐེག་པའི་ཐོས་བསམ་རྫོགས། །སྤྱོད་པ་དབང་དང་བལྟ་བར་ལྡན། །རྒྱུད་ལུང་མན་ངག་ཀུན་ལ་མཁས། །བློ་ལྡན་ངེས་དོན་ཐུགས་སུ་ཆུད། །ཐབས་མཁས་རིན་ཆེན་ལྟ་བུ་ཡི། །བླ་མས་དགུ་རྩེ་སྟོན་པར་འགྱུར། །དེ་ལ་ཕྱི་རབས་སྐལ་ལྡན་གྱིས། །དད་བརྩོན་གུས་པས་བསྟེན་པར་གྱིས། །དེ་ལྟར་མི་ལྡན་སློབ་དཔོན་ནི། །རྒྱུད་ངན་མ་སྦྱངས་མུ་ཅོར་སྨྲ། །བློ་དམན་དམ་མེད་དོན་མ་རྟོགས། །དུག་ལྔ་ཤས་ཆེ་འཇིག་རྟེན་སྒྲུབ། །སྙིང་རྗེ་ཤེས་རབ་ཐབས་དང་བྲལ། །ཚད་མར་མ་གྱུར་སྤྲེའུ་འདྲ། །མ་རིག་ལོང་བ་ལྟ་བུ་ལ། །བསྟེན་པའི་ལམ་ནོར་ལོག་པར་འཁྲིད། །རྟོག་ཆོས་ཞེན་པའི་དུག་གིས་འཛིན། །འཁོར་བའི་རྒྱ་མཚོར་བསྐྱུར་བ་ཡི། །བདུད་དེ་ལེགས་པར་བརྟགས་ཏེ་སྤངས། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། བཅུད་ཀྱི་མཚན་ཉིད་བསྟན་པའི་ལེའུ་སྟེ་གཉིས་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །དགུ་རྩེ་ངེས་དོན་སྤྱི་ཏི་འདི། །ནམ་ཞིག་དར་བའི་དུས་ཀྱི་ཚེ། །དམན་པའི་རིགས་ཅན་བྱིས་པ་ཡིས། །སྤྱོད་ཡུལ་ཡིན་པར་མ་གསུངས་པས། །ཕྱི་རབས་སྣོད་ལྡན་མཚན་ཉིད་གང་། །སྤང་བར་བྱ་བ་ཇི་ལྟ་བུ། །ཞེས་ཞུས་པས། གསང་བདག་སྟོན་པས་བཀའ་སྩལ་པ། །ངེས་དོན་འདིར་འཇུག་སློབ་མ་ནི། །རིགས་བཟང་རྒྱུད་དུལ་སྙིང་རྗེ་ཅན། །འཁོར་བ་མངོན་འབྱུང་བྱང་ཆུབ་འདོད། །དད་དང་བརྩོན་འགྲུས་ཤེས་རབ་ཆེ། །རྒྱུད་སྦྱངས་དབང་ཐོབ་དམ་ཚིག་གཙང་། །གཏོང་ཕོད་ཁེངས་མེད་རྨོངས་པ་སངས། །དྲང་བརྟན་དྲི་མེད་ཐེ་ཚོམ་བྲལ། །ལུས་སྲོག་མི་ལྟོས་ངེས་དོན་ཚོལ། །བསྒྲུབ་རྩོལ་ཐོད་རྒལ་བློ་ལྡན་ནི། །ང་ཡི་བླ་མེད་སྤྱི་ཏིའི་སྣོད། །མཚོན་བྱེད་ ― DNG002_Page_0557 ―
[མ་དཔེ་གཟིགས་ན་འདིར་གནོན།]
སློབ་མ་དེ་ལ་བསྟན། །བསྟན་པའི་སྙིང་པོ་འཛིན་པར་འགྱུར། །དེ་དང་མི་ལྡན་སློབ་མ་ནི། །ཁ་འཇམ་ཁོང་གྱོང་གཡོ་སྒྱུ་ཅན། །རང་བཟོ་བཀའ་རྐུན་ཐབས་ཀྱི་འདོད། །བདག་བསྟོད་མཁས་སྨོད་ང་རྒྱལ་ཆེ། །ཐོས་ཆུང་བློ་དམན་ལོག་ལྟ་ཅན། །དད་བརྩོན་ཤེས་མེད་གཞན་ལ་སྐུར། །སྙིང་བརྩེ་སྡོམ་པ་དམ་ཚིག་བྲལ། །འཁྲུལ་པའི་ལས་བརྩོན་བསྒྲུབ་ལ་གཡེལ། །བླ་མར་གུས་བྲལ་ཐེ་ཚོམ་ཅན། །འཕྱར་སྲབ་ཁ་གསག་ཚིག་ལ་ཞེན། །གཞུང་ཐོག་བཀའ་སྨོད་སྐུར་བ་འདེབས། །དུག་སྦྲུལ་ལྟ་བུའི་སྐལ་མེད་པ། །སྲིད་པ་འཁྲུགས་ཀྱང་བསྟན་མི་བྱ། །དོན་འདིར་སྐྱོན་ཡོད་མ་ཡིན་ཏེ། །བློ་དམན་ལོག་རྟོག་སྒྲོ་སྐུར་འདོགས། །ཡང་དག་དོན་ལ་མ་མོས་པས། །འཁྲུལ་སྣང་དམྱལ་བར་འཕེན་པས་གསང་། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། སྣོད་ཀྱི་མཚན་ཉིད་བསྟན་པའི་ལེའུ་སྟེ་གསུམ་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །ཕྱི་རབས་སྐལ་ལྡན་དགུ་རྩེ་འདིར་དད་ནས། །འཇུག་སྒོ་གཡོ་བ་མེད་པར་བསྟན་པ་ལ། །རིམ་དང་ཅིག་ཅར་ཇི་ལྟར་འཇུག་པར་བྱ། །ཞེས་ཞུས་པས། གསང་བདག་སྟོན་པས་འཁོར་ལ་བཀའ་སྩལ་པ། །ང་ཡི་སྐྱེ་མེད་ཀ་དག་ཕྱོགས་བྲལ་ལ། །དེ་ལས་མ་གཡོས་འཇུག་པའི་རྩོལ་བ་མེད། །གར་ཡང་མ་ཞུགས་འཇུག་པའི་མཆོག་ཡིན་པས། །དེ་ཉིད་མ་མཚོན་གཡོ་མེད་མི་རྟོགས་པས། །རྩོལ་མེད་འཇུག་པའི་གདམས་པ་བསྟན་གྱིས་ཉོན། །ཕྱི་རབས་འདིར་འཇུག་རིགས་གཉིས་ཏེ། །བློ་ལྡན་ཐེག་པར་སྦྱངས་མ་སྦྱངས། །ཐེག་པར་སྦྱངས་པ་རྣམ་གཉིས་ཏེ། །རྒྱུ་དང་འབྲས་བུའི་ཐེག་པའོ། །རྒྱུ་ཡི་ཐེག་པར་སྦྱངས་པ་ལ། །འབྲས་བུའི་ཐེག་པ་ཀུན་བསྟན་ལ། །དེ་ནས་ཅིག་ཆར་དོན་འདིར་འཇུག །རྒྱུ་འབྲས་གཉིས་ཀར་སྦྱངས་པ་ལ། །ཅིག་ཆར་ཆོས་འདས་སྤྱི་ཏི་བསྟན། །བློ་ལྡན་གང་ཡང་མ་སྦྱངས་ན། །སྣོད་ངན་སྐྱོན་བཅོས་སྤྲོས་པ་བཅད། །དེ་ནས་བླ་མེད་དོན་ལ་སྦྱར། །སྣོད་ངན་ཐ་མལ་ལོག་ལྟ་དང་། ། ― DNG002_Page_0558 ―
[མ་དཔེ་གཟིགས་ན་འདིར་གནོན།]
ཐེག་དམན་གྲུབ་མཐའི་དྲི་མ་བསལ། །ཐ་མལ་གནས་ལུགས་མ་ཤེས་པས། །འཁྲུལ་སྣང་རང་རྒྱུད་གཟུང་འཛིན་སྤྱོད། །དེ་ལས་ལྡོག་ལ་ཐར་ལམ་དགོད། །ལོག་ལྟ་མུ་སྟེགས་རྟག་ཆད་དང་། །ཐུན་མོང་ཐེག་པའི་ལམ་ལ་ཞུགས། །དམན་པ་ཉན་ཐོས་རང་རྒྱལ་ཏེ། །རྒྱུ་ཡི་ཐེག་ཆེན་ལམ་ལ་ཞུགས། །སྤྲོས་པའི་འཆིང་བ་རྣམ་གསུམ་སྟེ། །སྤྱི་དང་བྱེ་བྲག་ཁྱད་པར་རོ། །སྤྱི་ནི་ཐེག་པ་གྲུབ་མཐའ་སྟེ། །བློས་བཏགས་གཟུང་ཞེན་སྤྲོས་པ་ཆོད། །བྱེ་བྲག་འབྲས་བུའི་ཐེག་པ་སྟེ། །རྩོལ་བསྒྲུབ་ཡིད་སྨོན་སྤྲོས་པ་ཆོད། །ཁྱད་པར་ཐེག་པའི་རྩེ་མོ་སྟེ། །ཨ་ཏི་སྡེ་གསུམ་སྤྲོས་པ་བཅད། །འདི་ནི་རིམ་འཇུག་མ་ཡིན་ཏེ། །དེ་ལྟར་མ་སྦྱངས་མ་བསྟན་ན། །ཆོས་འདས་ཀློང་ལས་མི་གྲོལ་བས། །ངེས་ཤེས་བསྟན་ཕྱིར་དེ་བསྟན་གཅེས། །དེ་ནས་བླ་མེད་དོན་ལ་སྦྱར། །བསྐུར་ཐོབ་མཐའ་སྟོངས་དབང་ལྡན་ཏེ། །སྐྱེ་མེད་ཆོས་འདས་རང་ངོ་སྤྲོད། །མ་བཙལ་རྫོགས་པར་མཐའ་ལས་འདས། །དེ་ནས་བྱ་བ་ཀུན་བཏང་ལ། །ཡོངས་རྫོགས་མཐའ་རླག་ཆོས་འདས་པའི། །གནས་ལུགས་སྤྱི་ཡི་རང་སར་ཞོག །རིམ་འཇུག་རྩོལ་བསྒྲུབ་ཀ་ནས་དག །ཅེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། རྒྱ་ཆད་མེད་པའི་འཇུག་ཚུལ་བསྟན་པའི་ལེའུ་སྟེ་བཞི་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །ཡང་དག་ཆོས་འདས་སྤྱི་ཏི་ཡི། །གནས་ལུགས་བསྟན་དུ་ཡོད་དམ་མེད། །ཡོད་ན་བློ་ཡི་ཡུལ་དུ་འགྱུར། །མེད་ན་ཇི་ལྟར་རྟོགས་པར་བྱེད། །ཅེས་ཞུས་པས། གསང་བདག་སྟོན་པས་བཀའ་སྩལ་པ། །གནས་ལུགས་ཆོས་འདས་མཚོན་མེད་ལ། །བསྟན་བྱ་སྟོན་བྱེད་མཐའ་ལས་གྲོལ། །འདི་ཞེས་གཅིག་ཏུ་མཚོན་དུ་མེད། །བསམ་འདས་བརྗོད་མེད་ཚུལ་དུ་མཚོན། །ཀ་དག་ང་ཡི་གནས་ལུགས་ནི། །རྒྱུ་རྐྱེན་མེད་པར་ཀུན་འཆར་བས། །རྒྱ་ཆད་ཕྱོགས་ལྷུང་གྲོལ་བར་གནས། །རྟོགས་ཐབས་མཚན་མ་མིང་མེད་པས། །མི་རེ་དོགས་པའི་གཞི་དང་བྲལ། །ཕྱི་ནང་བར་གསུམ་རང་ ― DNG002_Page_0559 ―
[མ་དཔེ་གཟིགས་ན་འདིར་གནོན།]
བརླག་པར། །གསལ་དག་ཡེ་ཤེས་འཆར་ནུབ་མེད། །ཅིར་སྣང་ཆོས་ཉིད་ཟང་ཀ་ལ། །གཉིས་འཛིན་རྟོག་པའི་སེལ་མ་ཞུགས། །ཤེས་པ་འཛིན་མེད་རྒྱ་ཡན་ལ། །ཏིང་འཛིན་བསམ་བཞག་གནས་པ་མེད། །སྲིད་གསུམ་རྒྱལ་བའི་ཞིང་ཁམས་ལ། །འཁོར་བའི་སྣོད་བཅུད་གདོད་ནས་དག །མཐོང་མེད་ཡེ་ཤེས་ཟང་ཐལ་ལ། །གསལ་འགྲིབ་གཉིས་འཛིན་མཐའ་ལས་གྲོལ། །མིང་མེད་ཆོས་དབྱིངས་ངང་གསལ་ལ། །འབྱུང་འཇུག་མེད་པར་ཡེ་ནས་གནས། །ས་ལམ་རྣམ་གྲོལ་གཅིག་རྫོགས་ལ། །འགྲོ་འཇུག་ལམ་ལ་བགྲོད་དང་བྲལ། །གྲུབ་མཐའ་འཛིན་མེད་དགོངས་པ་ལ། །ལྟ་བའི་འདོད་པ་ཉིད་མཐའ་སྟོང་། །བསྒོམ་མཁན་རིག་པ་རང་བཅུད་པས། །མཐོང་བྲལ་དངོས་མེད་ཟང་ཀར་དངས། །འགག་མེད་སྣང་ཚུལ་མ་ངེས་པས། །རང་རྒྱུད་རྟག་ཞེན་མཐའ་དང་བྲལ། །ཀ་དག་རིག་པ་གཞིར་སྨིན་པས། །རྩོལ་བསྒྲུབ་ཡིད་སྨོན་རེ་འདོད་ཆད། །ཆོས་རྣམས་རིག་པས་ཕར་བཏགས་པས། །ཝལ་པོ་འགག་མེད་ཚིག་ལས་འདས། །ཅིར་སྣང་སེམས་ཉིད་རང་སྣང་བས། །གཉིས་འཛིན་གོལ་ས་གདོད་ནས་དག །རང་བྱུང་རང་ཤར་རང་གསལ་བས། །གཉེན་པོས་བཅོས་མེད་རང་སར་སངས། །གནས་ལུགས་དོན་རྟོགས་སངས་རྒྱས་པས། །རྟོགས་པའི་ངང་ལ་བོགས་འདོན་མེད། །མ་བཅོས་ལྷུག་པར་ཡེ་གྲོལ་བས། །ཉམས་ལེན་གོམས་འདྲིས་ཀ་ནས་དག །རྟོགས་ཐོབ་དུས་གཅིག་གཅིག་ཏུ་རྫོགས། །བསག་སྦྱང་དགེ་ལ་རེ་ལྟོས་མེད། །འཁོར་འདས་རྒྱབ་ཤ་ཆོད་པ་ཡིས། །སྤྲོས་མཐའ་མ་བཅད་རང་སར་ཆོད། །ཕྱོགས་བྲལ་ཡེ་ཤེས་རང་ཤེས་པས། །བསྒོམ་བྱ་སྒོམ་བྱེད་རྩོལ་དང་བྲལ། །ཡེ་ནས་གདོད་དག་སྐྱོན་བྲལ་བས། །མཚན་མའི་བསྲུང་མཚམས་ཕྱོགས་རིས་མེད། །སེམས་ཉིད་ངོས་བཟུང་ཡུལ་མེད་པས། །དམིགས་པའི་གཟའ་གཏད་བསམ་དང་བྲལ། །གཟུང་ཡུལ་ཡེ་གྲོལ་ཆེན་པོ་བས། །སྣང་བའི་མཚན་མ་དགག་བྱ་སྟོང་། །སྣང་སྟོང་གཉིས་མེད་མཁའ་གསལ་བས། །ཤེས་རིག་ཡོངས་གྲོལ་ཀློང་དུ་གཏོར། །རང་འཛིན་རང་སར་རང་འགགས་པས། །འབྲས་བུའི་སྒྲུབ་བྱེད་རེ་སྨོན་མེད། ། ― DNG002_Page_0560 ―
[མ་དཔེ་གཟིགས་ན་འདིར་གནོན།]
མཐའ་མེད་ཕྱོགས་བྲལ་མཉམ་ཉིད་པས། །ཤེས་བརྗོད་མཚོན་པའི་ཚིག་དང་བྲལ། །ཡང་དག་དོན་གྱི་གནས་ལུགས་སོ། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། སེམས་ཉིད་ཡང་དག་དོན་གྱི་གནས་ལུགས་ཀྱིས་ཆོས་ཐམས་ཅད་ལ་བཟླ་བའི་ལེའུ་སྟེ་ལྔ་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །གནས་ལུགས་མཉམ་ཉིད་སྤྱི་ས་ན། །སངས་རྒྱས་སེམས་ཅན་གཞི་གཅིག་ལས། །འཁོར་འདས་གཉིས་སུ་སྣང་བ་ཅི། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སྤྱི་གཞི་གནས་ལུགས་ག་པུར་འདྲ། །སྨན་དུག་གར་ཡང་རྒྱ་མ་ཆད། །གཉིས་ཀ་ག་པུར་སྤྱི་སར་གཅིག །རྐྱེན་དང་གང་ཕྲད་གཉིས་སུ་སྣང་། །སྤྱི་གཞིའི་མིང་མེད་སྤྱི་ས་ན། །འཁོར་འདས་གང་དུ་རྒྱ་མ་ཆད། །སངས་རྒྱས་སེམས་ཅན་སྤྱི་སར་གཅིག །རྐྱེན་གྱི་འཆར་སྒོ་འཁྲུལ་སྒོར་སྣང་། །སྤྱི་གཞི་ནམ་མཁའ་ལྟ་བུ་ལས། །རྩལ་སྣང་སྐར་སྐྱེའི་ཚུལ་དུ་བྱུང་། །རླུང་གཡོས་ནམ་མཁའ་གོ་ཕྱེ་ནས། །རིག་ཡིད་བསྐྱོད་པའི་རྩལ་གཉིས་བྱུང་། །ཡེ་ཤེས་འཇམ་རླུང་རང་གྲོལ་གྱི། །རིག་པ་རང་ཤར་འཛིན་མེད་དུ། །རང་ངོ་ཤེས་པས་ཡེ་ཤེས་ཤར། །རང་ནི་རླུང་གིས་འགྱུ་མ་ནུས། །ཁུ་རླངས་ནམ་མཁར་ཡལ་བ་འདྲ། །ཡིད་གཉིས་རྟོག་པར་འཕྱོ་མ་ནུས། །སེར་བུ་བར་སྣང་དངས་པ་འདྲ། །སེམས་ཀྱིས་ཡུལ་ལ་འཛིན་མ་ནུས། །འཇའ་ཚོན་མཁའ་ལ་དག་པ་འདྲ། །རྩལ་སྣང་གར་ཡང་འགྲོ་བ་མེད། །རྦ་རླབས་རྒྱ་མཚོར་ཐིམ་པ་འདྲ། །ངོ་བོ་ཡེ་ནས་ཀ་དག་གི། །རང་ས་ཟིན་པ་ཆོས་ཀྱི་སྐུ། །རང་བཞིན་ལྷུན་གྲུབ་ཆེན་པོ་ཡི། །རང་ས་ཟིན་པ་ལོངས་སྤྱོད་སྐུ། །ཐུགས་རྗེ་ཀུན་ཁྱབ་ཕྱོགས་བྲལ་གྱི། །རང་ས་ཟིན་པ་སྤྲུལ་པའི་སྐུ། །གསུམ་དུ་དབྱེར་མེད་མཐའ་སྟོངས་པའི། །རང་ས་ཟིན་པ་ངོ་བོའི་སྐུ། །ཆོས་འདས་ཐོག་མའི་གནས་ལུགས་ཀྱིས། །རང་ས་གཟུང་འཛིན་མིང་མེད་པ། །བདེ་ཆེན་མངོན་པར་བྱང་ཆུབ་སྐུ། །སྔོན་ཐོག་ཡེ་ཤེས་སངས་རྒྱས་ཡིན། །སྲིད་པ་ ― DNG002_Page_0561 ―
[མ་དཔེ་གཟིགས་ན་འདིར་གནོན།]
ལས་ཀྱི་རྩུབ་རླུང་གིས། །རྣམ་པར་མ་གྱུར་རང་བཅས་ཉིད་མ་རིག །གནས་ལུགས་རང་ངོ་མ་ཤེས་པས། །མ་རིག་ཞེས་བྱའི་འཁྲུལ་འཁོར་བྱུང་། །ང་ཡིས་གནས་ལུགས་རིག་སྙམ་པའི། །ཤེས་པ་དེ་ཉིད་འཁྲུལ་པར་སོང་། །མིང་མེད་མིང་དུ་སོང་བ་འདྲ། །རིག་པས་ཡུལ་བཅད་གཉིས་འཛིན་ཞུགས། །རང་གཅིག་བྱུང་ན་གཞན་ཡོད་འདྲ། །གཞི་ལས་མ་གྲུབ་གློ་བུར་འཁྲུལ། །ནམ་མཁའ་སྤྲིན་གྱིས་འཁྲུགས་པ་འདྲ། །རིག་པ་རང་ས་མ་ཟིན་འཕྱོས། །ཡུལ་བྲལ་འཁྱམ་པའི་དབུལ་པོ་འདྲ། །ཡིད་ཀྱིས་རང་ས་མ་ཟིན་འགྱུས། །སྤྲིན་པ་རླུང་གིས་བསྐྱོད་པ་འདྲ། །སེམས་ཀྱིས་རང་ས་མ་ཟིན་རྟགས། །བྲ་བྱི་ཁུང་སྟོར་ཚོལ་བ་འདྲ། །དེ་ཡིས་འཁོར་བའི་འཁྲུལ་བར་སྣང་། །སྨིག་རྒྱུ་ཆུ་རུ་འཁྲུལ་པ་འདྲ། །བདག་འཛིན་དབང་གིས་དུག་ལྔར་སྤྱོད། །རང་སྲོག་རང་གིས་གཅོད་པ་འདྲ། །རིགས་དྲུག་གནས་སུ་སྡུག་བསྔལ་མྱོང་། །རི་དྭགས་རྒྱ་ལ་ཆུད་པ་འདྲ། །ཅི་བྱས་མར་འགྲོའི་གནས་སུ་སོང་། །གླང་ཆེན་འདམ་དུ་བྱིང་བ་འདྲ། །དེས་ན་ངར་འཛིན་རྩད་ཆོད་ལ། །ཡང་དག་ཆོས་འདས་ཀློང་དུ་སྡོད། །ཅེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། གནས་ས་སྤྱི་ས་ནས་འཁོར་འདས་སུ་སྣང་ཚུལ་གཏན་ལ་ཕབ་པའི་མཚན་མའི་ལེའུ་སྟེ་དྲུག་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །འཁྲུལ་པའི་ངོ་བོ་ངར་འཛིན་དེ། །དེ་མ་ཡིན་ལ་དེར་འཛིན་པས། །དེ་ཉིད་རྩད་ནས་གཅོད་པ་ལ། །ཀུན་བརྟགས་ཐེག་པ་ཇི་ལྟར་སྤྱོད། །ཅེས་ཞུས་པས། གསང་བདག་སྟོན་པས་བཀའ་སྩལ་པ། །ངར་འཛིན་རྩད་ནས་གཅོད་པ་ལ། །ཕྱི་ནང་ཐེག་པའི་ཆོས་སྒོ་ལ། །གཅོད་ཚུལ་བསམ་གྱིས་མི་ཁྱབ་སྟེ། །ཕྱི་པ་བསྡུས་པས་རྟག་ཆད་གཉིས། །ནང་པ་བསྡུས་པས་རིམ་པ་དགུ། །རང་རང་འདོད་པ་རྣམ་མང་སྟེ། །སྤྱི་ཏི་མ་རྟོགས་གོལ་བར་ཆད། །དེ་ཡང་མུ་སྟེགས་རྟག་པ་ནི། །གཞི་ཡི་ངོ་བོ་འགྱུར་མེད་ལ། །བརྟགས་པས་ཁ་དོག་དབྱིབས་སུ་མཐོང་། །སྒྲོ་ ― DNG002_Page_0562 ―
[མ་དཔེ་གཟིགས་ན་འདིར་གནོན།]
འདོགས་ལོག་པའི་ལམ་ལ་སྤྱོད། །ཆད་པར་བལྟ་བའི་མུ་སྟེགས་པ། །རང་བཞིན་ཁ་དོག་དབྱིབས་མེད་ལ། །རྒྱུ་འབྲས་རྟེན་མེད་སྟོང་པར་མཐོང་། །སྐུར་འདེབས་འཁྲུལ་པའི་ལས་ལ་སྤྱོད། །ནང་པ་ཐེག་པ་ཆུང་ངུ་ཡི། །ཉན་ཐོས་སྣང་བ་ཕྲ་རགས་ཡུལ། །གང་ཟག་བདག་མེད་པར་རྟོགས་ཀྱང་། །ཆོས་ཀྱི་བདག་མེད་མ་རྟོགས་འཁྲུལ། །དམན་པའི་དཀའ་ཐུབ་མཚན་མར་སྤྱོད། །རང་རྒྱལ་ཅང་མེད་ཅིར་སྣང་ལ། །མ་རིག་འཁོར་བའི་གཞིར་མཐོང་བས། །རྟེན་འདྲེལ་འབྱུང་ལྡོག་ངན་རྟོག་སྤོང་། །སེམས་ཙམ་འགག་མེད་རང་གསལ་ལ། །སྣང་བ་སེམས་སུ་མཐོང་བ་ཡིས། །རང་རིག་རང་གསལ་འདོད་པ་གོལ། །དབུ་མ་སེམས་ཉིད་དངོས་མེད་ལ། །གཏན་ཚིགས་ཀྱིས་དཔྱད་སྟོང་པར་མཐོང་། །ཅིར་ཡང་མེད་པའི་སྐྱེ་མཆེད་གོལ། །ཀྲི་ཡ་ཡེ་དག་ཆོས་ཉིད་ལ། །འཁོར་འདས་གཞི་མེད་མ་ཤེས་པས། །གཙང་སྦྲས་དངོས་གྲུབ་འདོད་པ་གོལ། །ཨུ་པ་རང་བཞིན་གནས་ལུགས་ལ། །འཁོར་འདས་གཉིས་མེད་ཡིན་པ་ལ། །མར་སྤྱོད་ཡར་ལ་བལྟ་བ་འཁྲུལ། །ཡོ་ག་གནས་ལུགས་ཡུལ་བྲལ་ལ། །སྐྱེ་འགག་གཉིས་སུ་མེད་བཟུང་ནས། །བྱང་ཆུབ་རྣམ་ལྔ་འདོད་པ་འཁྲུལ། །མ་ཧཱ་སྣང་སྟོང་དབྱེར་མེད་ལ། །རྟོག་ཚོགས་ལྷ་རུ་བསྒོམ་པས་གོལ། །ཨ་ནུ་ཀུན་གཞི་མཁའ་ཀློང་ལ། །དབྱིངས་དང་ཡེ་ཤེས་དབྱེར་མེད་མཐོང་། །བལྟ་སྤྱོད་རྩེ་གཉིས་རབ་ཏུ་གོལ། །ཨ་ཏི་ཕྱོགས་མེད་མཐའ་གྲོལ་ལ། །ལྷུན་གྲུབ་ཀ་དག་ངེས་མེད་མཐོང་། །བློས་བཏགས་ཁ་འཇམ་ཚིག་ཏུ་གོལ། །དེ་ལྟར་ཐེག་པའི་རིམ་པ་རྣམས། །ང་ལས་བྱུང་བའི་སྐུ་གསུམ་གྱིས། །རང་སྣང་འཁོར་གྱི་ངོ་བོ་ལ། །གང་འཐད་རིམ་པར་སྦྱར་ནས་བསྟན། །སྤྱི་ཏིའི་གནས་ལུགས་མ་རྟོགས་ན། །མཐོ་དམན་གྲུབ་མཐའ་གང་འདོད་ཀྱང་། །རྟག་ཆད་གཉིས་ལས་མ་འཕགས་པས། །ངར་འཛིན་སྤྱད་པས་སླར་ལ་འཛིན། །ང་ཡི་བླ་མེད་ཨ་ཏི་འདིར། །སྣ་ཚོགས་ཅིར་ཡང་སྣང་དུས་ན། །གང་ཡང་མ་བཀག་མ་ཞེན་པར། །རང་སྣང་རང་དག་ཆེན་པོར་གྲོལ། །གྲོལ་དང་མ་གྲོལ་མུ་མཐའ་སྟོངས། །ཞེས་གསུངས་སོ། །རིན་པོ་ ― DNG002_Page_0563 ―
[མ་དཔེ་གཟིགས་ན་འདིར་གནོན།]
ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། ཐེག་པའི་གྲུབ་མཐའ་བཟུང་བས་གོལ་བར་བསྟན་པའི་ལེའུ་སྟེ་བདུན་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །བློས་བཏགས་ཐེག་པ་ཀུན་གོལ་ན། །བཅུ་རྩེའི་འཁྲུལ་པ་ཇི་ལྟར་བཅད། །ཅེས་ཞུས་པ་དང་། གསང་བདག་སྟོན་པས་བཀའ་སྩལ་པ། །ང་ཡི་སེམས་ཉིད་སྤྱི་ཏི་འདིར། །གཅད་བྱ་གཅོད་བྱེད་མཐའ་སྟོངས་ཀྱང་། །དེ་ལྟར་མ་རྟོགས་བློ་ཅན་ལ། །རང་རིག་ཉིད་ཀྱི་རང་ངོ་དེ། །སྐྱེ་མེད་ཀ་དག་མཐོང་སྟོངས་སུ། །མ་ཤེས་ཤེས་པར་བྱ་བའོ། །མ་གོ་གོ་བར་བྱ་བ་ཙམ། །མ་རྟོགས་རྟོགས་པར་བྱ་བ་ཙམ། །མ་གྲོལ་གྲོལ་བར་བྱ་བ་ཙམ། །མ་མཐོང་མཐོང་བར་མཚོན་ཙམ་ལས། །བཙལ་བྱ་བསྒྲུབ་བྱ་ཐོབ་བྱའི་ཆོས། །རྡུལ་ཆ་ཙམ་ཡང་གུད་ན་མེད། །རྟོགས་བྱེད་ཐབས་སུ་ངས་མཚོན་གྱིས། །རང་དྭངས་རང་རིག་ངང་དུ་ལྟོས། །འཁྲུལ་པའི་གཞི་མ་ངར་འཛིན་འདི། །ཀ་དག་སྐྱེ་མེད་ཟང་ཀ་ཡིན། །ཡེ་ཤེས་ཆེན་པོ་རང་བྱུང་བས། །བསམ་བརྗོད་ཀུན་བྲལ་ཐོགས་རྡུགས་མེད། །རིན་ཆེན་གསེར་གྱི་ཐོག་མཐོངས་འདྲ། །འཁྲུལ་རྐྱེན་ཡུལ་གྱི་སྣང་བ་འདི། །ཡུལ་མེད་ཆོས་སྐུ་རང་དངས་པས། །སངས་རྒྱས་དགོངས་པ་རྒྱུན་ཆད་མེད། །ཆུ་བོ་ཆེན་པོའི་རྒྱུན་དང་འདྲ། །ལོག་པར་རྟོག་པའི་དྲི་མ་འདི། །གནས་ལུགས་ཀློང་དུ་རང་དག་པས། །ཀ་དག་ཡེ་ཤེས་ཟང་ཀའི་ངང་། །རིན་ཆེན་མན་ཤེལ་དངས་པ་འདྲ། །རྣམ་རྟོག་སྣང་སྲིད་འཁོར་འདས་འདི། །སྐུ་ལྔའི་ཞིང་དུ་རང་གྲུབ་པས། །བླང་དོར་དབྱེ་གསལ་སེལ་དང་བྲལ། །རིན་ཆེན་གསེར་གླིང་ཕྱིན་པ་འདྲ། །ཕྱི་ནང་གཉིས་སུ་སྣང་བ་འདི། །སེམས་ཉིད་ཡེ་ཤེས་རང་དངས་པས། །སྣང་སྟོང་གསལ་འགྲིབ་ཟང་ཐལ་འདི། །འཕྲུལ་གྱི་མེ་ལོང་བརྩེགས་པ་འདྲ། །བསྐལ་པར་བསགས་པའི་མུན་པ་འདིར། །ཤེས་རབ་སྒྲོན་མ་རང་ཤར་བས། །མ་རིག་མུན་པ་མ་བསལ་སངས། །གསལ་བའི་སྒྲོན་མེ་བཏེགས་པ་འདྲ། །མ་ངེས་སྣང་བ་དཀར་དམར་འདི། །མཁའ་གསལ་ཡེ་ཤེས་རང་གསལ་བས། །ཉིན་མཚན་མེད་པར་གསལ་འགྲིབ་མེད། ། ― DNG002_Page_0564 ―
[མ་དཔེ་གཟིགས་ན་འདིར་གནོན།]
མཁའ་ལ་ཉི་མ་ཤར་བ་འདྲ། །མཚན་མའི་དངོས་པོ་སྣ་ཚོགས་འདི། །ཆོས་ཉིད་སྐྱེ་མེད་རང་སྣང་བས། །མཐོང་ཡུལ་དམིགས་པའི་ངོས་གཟུང་མེད། །བར་སྣང་དག་པའི་སེར་བུ་འདྲ། །གཉིས་སྣང་མེད་པའི་ཆོས་ཉིད་འདི། །བཙལ་མེད་ངང་བཞག་རང་སོ་བས། །བྱ་བཙལ་སྤྲོས་པའི་སྣང་བ་མེད། །འབྱེད་མེད་མུན་པའི་སྨག་དང་འདྲ། །སེམས་ཉིད་རྣམ་དག་ཡེ་ཤེས་འདི། །མ་བཅོས་སོར་བཞག་རང་སྟོང་པས། །བརྟགས་ཞེན་མཚན་མའི་ཡུལ་ལས་འདས། །མཐའ་མེད་ནམ་མཁའ་ཆེན་པོ་འདྲ། །སངས་རྒྱས་སེམས་ཅན་གཉིས་འཛིན་འདི། །ལམ་གྱིས་བཅོས་མེད་རང་རིག་པས། །ཆེ་བའི་རེ་སྨོན་བསྒྲུབ་རྩོལ་མེད། །འཁོར་ལོས་སྒྱུར་བའི་རྒྱལ་པོ་འདྲ། །སྐྱེ་མེད་རང་བྱུང་ཡེ་ཤེས་འདི། །མ་བཙལ་མ་བསྒྲུབས་རང་ཉིད་ལས། །འགགས་མེད་གྲོལ་ནས་གྲོལ་ལམ་སྟོན། །བར་སྣང་འཁྲུལ་པའི་གློག་དང་འདྲ། །མ་བྱུང་མ་སྐྱེས་སྙིང་པོ་འདི། །མིང་དུ་བསྟན་མེད་རང་སར་སངས། །གཞན་ལ་བསྟན་ཅིང་སྨྲ་རུ་མེད། །གཞོན་ནུ་མ་ཡི་བདེ་བ་འདྲ། །ཀ་དག་ཆོས་སྐུ་ཀུན་ཁྱབ་འདི། །རྒྱ་ཆད་མེད་པར་རང་དངས་པས། །ཡོན་ཏན་ཀུན་རྫོགས་འཕེལ་འགྲིབ་མེད། །དགོས་འདོད་ཀུན་འབྱུང་ནོར་བུ་འདྲ། །བློ་འདས་མུ་མེད་ཆོས་འདས་འདི། །སློབ་དཔོན་མེད་པར་རང་གྲོལ་བས། །བཙལ་མེད་བདེ་ཆེན་རང་ལས་རྙེད། །རྟ་རྔ་སྦྲུལ་གྱི་མདུད་པ་འདྲ། །མ་རྟོགས་དམན་པའི་གོལ་སྒྲིབ་འདི། །ཐིག་ལེའི་ཀློང་དུ་རང་ཞི་བས། །བསྒྲིབ་བྱ་སྒྲིབ་བྱེད་ཀ་ནས་དག །ནམ་མཁར་ནམ་མཁའ་ཐིམ་པ་འདྲ། །གཉིས་འཛིན་གཟུང་ཡིད་ཞགས་པ་འདི། །དབྱེ་བསལ་མེད་པར་རང་ཆད་པས། །སྲིད་པའི་འཆིང་བ་མ་ལུས་གྲོལ། །མདུད་རྒྱའི་སྤྱི་མདུད་བཅད་པ་འདྲ། །ཉོན་མོངས་བརྒྱད་ཁྲིའི་དམག་དཔུང་འདི། །རྟེན་པ་མེད་པར་རང་བརླགས་པས། །འཁོར་བའི་གཡུལ་ངོ་མ་ལུས་བཟློག །རྡོ་ཚན་ཁ་བ་བབས་པ་འདྲ། །སྣང་བརྟགས་གཟུང་ཞེན་སྤྲོས་པ་འདི། །མཐའ་གསལ་བར་སྣང་རང་བཅད་དེ། །བདག་གཞན་ཕྱོགས་བྲལ་མིང་མེད་པ། །མཚོན་ཆའི་འཁོར་ལོ་བསྐོར་བ་འདྲ། །དྲང་དོན་ཐེག་པའི་བྱ་བཙལ་འདི། །བླང་དོར་མེད་པར་རང་བཞག་པས། ། ― DNG002_Page_0565 ―
[མ་དཔེ་གཟིགས་ན་འདིར་གནོན།]
དགེ་སྡིག་ལས་ཀྱི་མཐའ་ལས་གྲོལ། །མཁའ་ལ་མདུད་པ་བོར་བ་འདྲ། །བཙལ་མེད་ཤུགས་འབྱུང་ཐུགས་རྗེ་འདི། །འགག་པ་མེད་པར་རང་འཆར་བས། །རྩོལ་བའི་ཕྲིན་ལས་སྤྱད་དུ་མེད། །ནམ་མཁའི་ངང་ནས་ཆོ་འཕྲུལ་འདྲ། །ཡང་དག་ངེས་དོན་གནས་ལུགས་ལ། །འདྲ་བཞི་ཕྱོགས་མཐུན་དང་པོ་ཡི། །རང་ངོར་དཔེ་ཡིས་མཚོན་ཚུལ་འདས། །ང་ཡི་དགུ་རྩེ་སྤྱི་ཏི་འདིར། །སྤྲོས་པ་རང་གི་ཐོག་ཏུ་བཅད། །རང་ངོ་རང་གིས་རང་ལ་སྤྲད། །རང་གདང་རང་གྲོལ་ཐོག་ཏུ་བཅའ། །ཆོས་འདས་རང་ལ་རང་གིས་བཟླའོ། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། འཁྲུལ་པའི་རྩ་བ་སྤྲོས་པ་རང་ཐོག་ཏུ་བཅད་པའི་ལེའུ་སྟེ་བརྒྱད་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །དོན་ལ་འཁྲུལ་རྩད་མ་ཆོད་ན། །ཚིག་ཏུ་འབྱམས་པའི་ཉེས་པ་གང་། །ངོ་སྤྲོད་གནད་ཀྱིས་ཇི་ལྟར་སྤྲད། །དོན་གྱི་ཀློང་དུ་བཞག་ཐབས་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །ཁྱོད་ཀྱིས་དེ་ལྟར་ཞུས་པ་ལེགས། །ཚིག་ཏུ་མཚོན་གྱིས་ལེགས་པར་ཉོན། །མ་རྟོགས་ཚིག་ལ་འབྱམས་པ་འདིས། །སྤྱི་ཏི་མི་མཐོང་འཁོར་བར་འཁྱམས། །འཁོར་བའི་མཚན་ཉིད་མ་ཤེས་ན། །འཁྲུལ་སྣང་འདི་ལ་བློ་མི་བཟློག །འཇིག་རྟེན་བྱ་བ་མ་བཏང་ན། །བདེ་ཆེན་རྣམ་གྲོལ་ལམ་མི་རྙེད། །དུག་ལྔ་རང་སར་མ་ཟད་ན། །རིག་པ་འཆིང་བ་ལས་མི་གྲོལ། །དྲན་རིག་དབྱིངས་སུ་མ་ཐིམ་ན། །ཆེ་བའི་ཡེ་ཤེས་དོན་མི་རྙེད། །རང་སྣང་རང་སར་མ་གྲོལ་ན། །སྐྱེ་མེད་ཆོས་སྐུའི་ངོ་མི་མཐོང་། །འཁོར་འདས་ཀློང་དུ་མ་གྲོལ་ན། །སྣང་སྲིད་གཉིས་འཛིན་འཕྲང་དུ་ཆུད། །གནས་ལུགས་རང་ངོ་མ་ཤེས་ན། །བསྐལ་པར་བཙལ་ཡང་རང་ཚི་ཆད། །རང་བྱུང་རྟེན་དང་མ་བྲལ་ན། །ཕུག་པས་རི་རྡིབ་བརྟེན་རྗེ་ཕུང་། །འདུ་འབྲལ་མེད་པར་མ་རྟོགས་ན། །གཞན་ནས་ཐོབ་བྱེད་ནོར་བའི་ལམ། །ཀུན་བཟང་ཆོས་འདས་མ་ཤེས་ན། །བཟང་བརྩོན་སངས་རྒྱས་འཕྲང་དུ་ཆུད། །ཤེས་རིག་སྟོང་སངས་མ་གྲོལ་ན། །འཁོར་བ་དོང་ནས་སྤྲུག་མི་ནུས། །རྒྱལ་སྲས་རང་ ― DNG002_Page_0566 ―
[མ་དཔེ་གཟིགས་ན་འདིར་གནོན།]
རིག་མ་ཤེས་ན། །སྲིད་པའི་མཚོ་ལས་སྒྲོལ་མི་ནུས། །དོན་མེད་བསྒོམ་མེད་གཞིར་འཇོག་པ། །རང་རྒྱུད་ཐ་མལ་ལས་མི་འཕགས། །ཏིང་འཛིན་བསམ་གཏན་ལམ་འཛིན་པ། །གྲོལ་འདོད་ཆོས་ཀྱིས་རང་ཉིད་འཆིངས། །ཐོག་མཐའི་རྩིས་གདབ་མ་གྲོལ་ན། །ཆོས་ཉིད་འགྱུར་བའི་སྐྱོན་དུ་གོལ། །འཁོར་འདས་ཀ་ནས་མ་དག་ན། །སྣང་བ་ངེས་པ་མེད་པར་འགྱུར། །གདེང་དུ་མ་གྱུར་ཐེ་ཚོམ་ན། །གོལ་སྒྲིབ་འཁྲུལ་པའི་འཕྲང་མི་ཆོད། །རེ་དོགས་སྤང་བླང་མ་ཆོད་ན། །རྒྱུ་འབྲས་དམན་པའི་ལམ་དུ་གོལ། །ཡོད་མེད་ཕྱོགས་འཛིན་མ་སྟོང་ན། །ཇི་ལྟར་འབད་ཀྱང་རྟག་ཆད་ཉིད། །མིང་མེད་མཐའ་སྟོངས་མ་རྟོགས་པར། །རྒྱུ་འབྲས་རིམ་དགུར་སྤྱོད་པ་སྡུག །ངང་དྭངས་འབྲལ་མེད་མི་ཤེས་པར། །མཉམ་བཞག་རྗེས་ཐོབ་སྙིང་རྗེའི་ཡུལ། །སྐྱེ་ཤིའི་གཞི་རྩ་མ་ཆོད་ན། །ཚོགས་གཉིས་བསགས་སྦྱངས་བདག་འཛིན་གྲོགས། །བླ་མེད་སྤྱི་ཏི་མ་རྟོགས་ན། །སྣང་བརྟགས་ཞེན་གསུམ་ལས་མི་གྲོལ། །དེས་ན་ཀུན་རིག་ཁྱེའུ་ཆུང་ཁྱོད། །ཟད་ཐལ་འཛིན་མེད་ཆོས་འདས་སུ། །ཕྱོགས་འཛིན་སྤྲོས་ཐག་ཆོད་པར་གྱིས། །གཞི་ཡི་ཆོས་རྣམས་རླུང་ལ་བསྐུར། །ལམ་གྱི་ཆོས་རྣམས་ཕྱགས་མས་ཐོབ། །འབྲས་བུའི་ཆོས་རྣམས་ཆུ་ལ་འཕོས། །གྲུབ་མཐའ་སྤྱི་མེས་དུར་དུ་སྐྱོལ། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། སྤྱི་ཏི་མ་རྟོགས་པའི་སྐྱོན་ངོས་བཟུང་ཞིང་ལ་བཟླ་བའི་ལེའུ་སྟེ་དགུ་པའོ།། །།དེ་ནས་གསང་བདག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །ང་ཡི་བླ་མེད་སྤྱི་ཏི་འདིར། །ཡེ་གྲོལ་ཕྱོགས་མེད་ཀ་ནས་དག །ཡོངས་གྲོལ་ཀུན་རྫོབ་རང་བཞིན་ལ། །བསྟན་བྱ་སྟོན་བྱེད་གཉིས་མེད་ཀྱང་། །སྐལ་ལྡན་མ་རྟོགས་དོན་མཚོན་ཕྱིར། །ངོ་སྤྲོད་གདམས་པ་བསྟན་གྱིས་ཉོན། །སེམས་ཉིད་གདོད་ནས་ཆོས་སྐུ་འདི། །དང་པོའི་བྱུང་ས་མ་ཤེས་ན། །མ་བུ་རང་ངོ་མི་འཕྲོད་དེ། །དམུས་ལོང་སྣང་མེད་འཁྱམས་པ་འདྲ། །ད་ལྟ་གནས་ས་མ་ཤེས་ན། །སྙིང་ ― DNG002_Page_0567 ―
[མ་དཔེ་གཟིགས་ན་འདིར་གནོན།]
པོའི་ཁྱེར་ལུགས་མི་ཤེས་པས། །བྲ་བྱི་ཚང་སྒོ་སྟོང་པ་འདྲ། །ཐ་མ་ཐིམ་ས་མ་ཤེས་ན། །དོན་ལ་ངེས་ཤེས་མི་ཐོབ་སྟེ། །ཁ་དྲག་ལམ་དུ་ཕྱིན་པ་འདྲ། །དེས་ན་དང་པོ་བྱུང་ས་ནི། །ཆོས་དབྱིངས་བརྡལ་བ་ཆེན་པོ་ཡི། །རིན་ཆེན་འོད་འབར་གཞལ་ཡས་ཁང་། །སྐྱེ་མེད་ཀ་དག་ཉིད་དུ་བྱུང་། །བར་དུ་གནས་ས་བསྟན་པ་ནི། །ཙིཏྟ་རིན་ཆེན་གཞལ་ཡས་ཁང་། །རྩ་བརྒྱད་དྭངས་མ་ལྔ་ཡི་དབུས། །ཀུན་གཞི་འོད་ཀྱི་གཞལ་ཡས་ཁང་། །ཆོས་དབྱིངས་གཏིང་གསལ་གཡོ་མེད་ན། །ཕྱི་ནང་གསང་བའི་འཁོར་ཚོགས་དང་། །འདུ་འབྲལ་མིང་འདོགས་མི་བྱེད་པར། །དུས་གསུམ་དུས་མེད་རྒྱུན་གནས་སུ། །དོན་གྱི་སྟོན་པ་སྐུ་གསུམ་ནི། །གཡོ་མེད་རྩིས་གདབ་མེད་པར་བཞུགས། །དེ་ཉིད་རང་ངོ་སྤྲད་པའི་ཐབས། །སྣོད་བཅུད་ལྡན་པའི་དཔོན་སློབ་ཀྱིས། །རྐྱེན་མེད་དབེན་པའི་གནས་སུ་འགྲོ། །ལུས་ངག་ཡིད་གསུམ་བྱ་བ་བཏང་། །སྣང་ཚུལ་རོལ་པའི་སྐུར་གནས་མཆོད། །ལུས་ངག་ཡིད་གསུམ་རང་རིག་བཙལ། །སྒོ་ལྔ་གཡོ་མེད་ཧར་པོར་བཞག །ལྟ་སྟངས་མཁའ་གསལ་དག་པ་ལ། །དྲན་རིག་ནམ་མཁར་འཕང་སྟེ་བོར། །ཡིད་ཀྱི་འགྱུ་བ་རོལ་ཏུ་བསད། །སེམས་ཉིད་གཏིང་གསལ་དངས་པར་བཞག །ཐོག་མའི་སངས་རྒྱས་ངོ་སྤྲད་པ། །བསམ་གྱིས་མི་ཁྱབ་ལྷ་ཁང་ན། །ཀུན་ཁྱབ་དངོས་མེད་ཆོས་ཀྱི་སྐུ། །ཡང་དག་སངས་རྒྱས་རང་གནས་འབར། །དེ་ཉིད་རང་ངོ་སྤྲོད་པའི་ཐབས། །གཉིས་འཛིན་ཐམས་ཅད་སྤྲོས་བཅད་ལ། །བསམ་ཡས་ངང་དྭངས་རིན་ཆེན་སྐུ། །ཐིག་ལེ་ཁོང་ཤར་རང་ངོ་སྤྲད། །གསལ་དག་ལོངས་སྐུ་ངོ་སྤྲད་པ། །རང་དག་ཟང་ཐལ་གཞལ་ཡས་ན། །སྙིང་པོ་དྲི་མེད་ཀ་དག་བཞུགས། །དེ་དང་རང་ངོ་སྤྲད་པའི་ཐབས། །མ་རིག་མུན་པ་གཉིས་མེད་གསལ། །ཆོས་ཉིད་རིན་ཆེན་ཀ་དག་ལྷ། །རྣལ་མ་ཟང་ཀ་རང་ངོ་སྤྲད། །དེར་འདོད་ལོངས་སྤྱོད་རྫོགས་སྐུ་སྤྲད། །ཐ་མའི་སངས་རྒྱས་ངོ་སྤྲད་པ། །ཆོས་དབྱིངས་སྣང་གསལ་དཀྱིལ་འཁོར་ན། །གཉིས་མེད་སོར་བཞག་སྤྲུལ་སྐུ་བཞུགས། །དེ་དང་རང་ངོ་སྤྲད་པའི་ཐབས། །ཞེ་འདོད་ཐམས་ ― DNG002_Page_0568 ―
[མ་དཔེ་གཟིགས་ན་འདིར་གནོན།]
ཅད་སྤྲོས་བཅད་ལ། །རང་དག་རང་གྲོལ་དབྱེ་བསལ་མེད། །གང་སྣང་ཆགས་འཛིན་དགག་བསྒྲུབ་བྲལ། །གཉིས་མེད་སྤྲུལ་པའི་སྐུ་དང་ཕྲད། །རེ་མེད་རང་གནས་དོན་མཐོང་ནས། །བྱ་རྩོལ་རེ་དོགས་མཐའ་ལས་གྲོལ། །ཐ་མ་ཐིམ་ས་བསྟན་པ་ནི། །ཆོས་འདས་དངོས་མེད་ཟང་ཀའི་ངང་། །ཡུལ་མེད་མཁའ་གསལ་ཆེན་པོའི་ཀློང་། །གཞི་འདས་སྐྱེ་མེད་ཀུན་མཁྱེན་ཐུགས། །མཚོན་འདས་བསམ་རྡུགས་ཕྱོགས་བྲལ་དོན། །སྐུ་འདས་མིང་མེད་མཐའ་སྟོངས་སུ། །ཆོས་སྐུ་རྒྱ་ཆད་མེད་པར་ཐིམ། །རྩིས་གདབ་དབྱེ་བསལ་ཡུལ་ལས་འདས། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། ཆོས་འདས་དོན་གྱི་སྐུ་གསུམ་རང་ངོ་སྤྲད་པའི་ལེའུ་སྟེ་བཅུ་པའོ།། །།དེ་ནས་གསང་བདག་སྟོན་པ་ཡིས། །འདུས་པའི་འཁོར་ལ་བཀའ་སྩལ་པ། །སྤྱི་ཏིའི་དོན་ལ་གཞག་པ་ནི། །གཞག་བྱ་འཇོག་བྱེད་ཀ་དག་ཀྱང་། །རེ་ཞིག་མ་རྟོགས་བློ་ཅན་ལ། །ཆོས་འདས་དོན་ལ་བཞག་ཐབས་བསྟན། །མཁའ་གསལ་དཔེ་ནི་ནམ་མཁའ་ལ། །འཆར་སྒོ་གསལ་བྱེད་མི་བསྐྱོད་བགྲད། །ཀ་དག་དོན་གྱི་ཆོས་ཉིད་ལ། །སེམས་ཀྱིས་འཛིན་པ་མེད་པར་བཞག །ཆོས་དབྱིངས་གསལ་ཁྱབ་དྭངས་པ་ལ། །རིག་པ་གཏིང་གསལ་ཆེན་པོར་བཞག །མ་བཅོས་སྤྲོས་བྲལ་ཀློང་ཡངས་སུ། །འགྱུ་བ་དྭངས་སངས་ཆེན་པོར་བཞག །འགག་མེད་རྩལ་གྱི་རང་འོད་རྣམས། །ཚོར་བ་རྗེས་མེད་རང་སར་བཞག །ངང་དྭངས་ཀུན་ཁྱབ་ཟང་ཐལ་ལ། །ཆོས་སྐུ་གཅེར་བུ་ཀློང་དུ་བཞག །ཆོས་དབྱིངས་སྣང་གསལ་དཀྱིལ་འཁོར་དུ། །བསམ་བྲལ་སྟོང་པ་ཧར་པོར་བཞག །གཉིས་མེད་ཐིག་ལེ་ཉག་གཅིག་ལ། །ཤེས་རབ་རང་བརྡོལ་ཆེན་པོར་བཞག །ཅང་མེད་ཅིར་སྣང་རོལ་པ་རྣམས། །ཡུལ་མེད་སྣང་གྲོལ་རང་སར་བཞག །དབྱིངས་ལས་ཤར་བའི་རིག་པ་འདི། །མ་བུ་དབྱེར་མེད་རང་སོར་བཞག །སྒོ་ལྔའི་རྣམ་ཤེས་རང་བྱུང་འདི། །འཇའ་ལྟར་མཁའ་ལ་རང་ཡལ་བཞག །དགོངས་ ― DNG002_Page_0569 ―
[མ་དཔེ་གཟིགས་ན་འདིར་གནོན།]
པ་ཕྱོགས་མེད་མཐའ་གྲོལ་ལ། །ཡངས་དོག་རྒྱ་ཆད་མེད་པར་བཞག །ཀུན་གཞི་མཁའ་ལྟར་དག་པ་ལ། །ཡིད་གཉིས་འགྱུ་སྟོང་རྗེས་མེད་བཞག །སྣང་ཡུལ་མེ་ལོང་ལྟར་གསལ་ལ། །རྐྱེན་སྣང་སྐྱེ་མེད་རང་གྲོལ་བཞག །གནས་ལུགས་འདུ་འབྲལ་གནས་མེད་པས། །གང་ནས་བཙལ་མེད་ངང་དུ་བཞག །སྒྲིབ་གཉིས་ཡེ་ནས་རང་དག་པས། །བླང་དོར་དབྱེ་བསལ་མེད་པར་བཞག །རང་བྱུང་ཡེ་ཤེས་རང་ཤར་བས། །བཙལ་སེམས་སྒྲིབ་པ་མེད་པར་བཞག །འཁོར་འདས་ཆོས་ཀུན་ཡེ་གྲོལ་ལ། །གྲོལ་འདོད་འཆད་པ་མེད་རང་བཞག །གདོད་དག་སྐྱོན་བྲལ་མཐོང་མེད་ལ། །འདོད་རློམས་རྩིས་གདབ་མེད་པར་བཞག །སྐུ་གསུམ་རེ་མེད་རང་གནས་ལ། །བསྒྲུབ་འདོད་རེ་སྨོན་མེད་པར་བཞག །ས་ལམ་བགྲོད་མེད་གཅིག་རྫོགས་ལ། །བགྲོད་མེད་རང་བརླག་ཆེན་པོར་བཞག །སེམས་ཉིད་མཚོན་འདས་བླ་མེད་ལ། །དཔེ་དོན་མཚོན་བརྗོད་མེད་པར་བཞག །ཆོས་དབྱིངས་གཏིང་ཡངས་མཐའ་གྲོལ་ལ། །མཐར་ཐུག་རྩལ་དང་བྲལ་བར་བཞག །དམ་ཚིག་བསྲུང་མཚམས་ཕྱོགས་མེད་ལ། །གཉིས་འཛིན་སྒྲིབ་པ་མེད་པར་བཞག །སྣོད་བཅུད་རྒྱལ་བའི་ཞིང་ཁམས་ལ། །འཁོར་འདས་གཉིས་འཛིན་རང་སངས་བཞག །ཅིར་སྣང་སྐྱེ་མེད་ཆོས་སྐུ་ལ། །སྐྱེ་འཆི་འཕོ་འགྱུར་མེད་པར་བཞག །མཁའ་གསལ་རང་དངས་ཡེ་ཡིན་ལ། །དབང་བཞི་བསྐུར་ཐོབ་མེད་པར་བཞག །ཅིར་སྣང་གསལ་སྟོང་དུས་མཉམ་ལ། །སྐྱོན་ཡོན་སྤང་བླང་མེད་པར་བཞག །སྙིང་པོ་མཐོང་རྟོགས་དུས་མཉམ་ལས། །ཞེ་འདོད་ལྟོས་པ་མེད་པར་བཞག །འགག་མེད་ཐོལ་བྱུང་ཀློང་ཐིམ་ལ། །གོལ་སྒྲིབ་བྱིང་རྒོད་བསལ་བ་མེད། །གཞན་སྐྱོན་སེལ་མེད་ཀ་དག་ལ། །ངན་རྟོག་དགག་ཏུ་མེད་པར་བཞག །ངང་དངས་ཡེ་ཤེས་རྒྱུན་མ་ལ། །མཉམ་རྗེས་ཐུན་མཚམས་མེད་པར་བཞག །དམིགས་འཛིན་གཟའ་གཏད་བསམ་བྲལ་ལ། །བསྒོམ་བྱ་སྒོམ་བྱེད་མེད་པར་བཞག །ཕྱོགས་མེད་རང་ཤར་མཐའ་སྟོངས་ལ། །གཞན་དུ་བཀོལ་བ་མེད་པར་བཞག །ཡེ་ནས་གཏད་མེད་ཟང་ཐལ་ ― DNG002_Page_0570 ―
[མ་དཔེ་གཟིགས་ན་འདིར་གནོན།]
ལ། །གོམས་འདྲིས་ཀ་དག་རྣམ་པར་བཞག །རྒྱུ་རྐྱེན་འཕེལ་འགྲིབ་མིང་མེད་ལ། །དགེ་སྡིག་བློ་ལས་གྲོལ་བར་བཞག །གཞག་བྱ་འཇོག་བྱ་མཚོན་པ་ཉིད། །མིང་འདོགས་མཐའ་ལས་འདས་པ་སྟེ། །མཐའ་ལྔའི་རྒྱ་ལས་གྲོལ་བའོ། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། བཞག་ཏུ་མེད་པའི་བཞག་ཐབས་མཚོན་པའི་ལེའུ་སྟེ་བཅུ་གཅིག་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །གེགས་སེལ་ཤན་འབྱེད་ལ་བཟླ་བ། །དགུ་རྩེ་སྤྱི་ཡི་མན་ངག་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སྤྱི་ཡི་ཞུས་དོན་བཤད་ཀྱིས་ཉོན། །གནས་ལུགས་གཏན་ལ་མ་ཕེབས་ན། །བྱ་སྒྲོ་རླུང་གིས་ཁྱེར་བ་འདྲ། །ཀུན་གཞི་ཆོས་སྐུ་མ་ཕྱེད་ན། །ཆུ་དང་འོ་མ་འདྲེས་པ་འདྲ། །འཁྲུལ་པ་རྩད་ནས་མ་ཆོད་ན། །ལྗོན་ཤིང་ཡལ་ག་དྲེགས་པ་འདྲ། །སེམས་དང་སེམས་ཉིད་མ་ཕྱེད་ན། །བུ་རམ་སྦྲང་རྩི་འདྲེས་པ་འདྲ། །མ་རིག་ཡེ་ཤེས་མ་ཕྱེད་ན། །གསེར་དང་གཡའ་རུ་འདྲེས་པ་འདྲ། །སེམས་དང་བག་ཆགས་མ་ཕྱེད་ན། །དུག་དང་སྨན་དུ་འདྲེས་པ་འདྲ། །འཁོར་འདས་བྱེ་བྲག་མ་ཕྱེད་ན། །མཁའ་ལ་བགྲོད་པར་འདོད་པ་འདྲ། །བལྟ་མཁན་རང་ངོས་མ་ཟིན་ན། །དམུས་ལོང་ཐང་སྟོང་བོར་བ་འདྲ། །སྒོམ་མཁན་རང་ངོས་མ་ཟིན་ན། །རི་དགས་སྨིག་རྒྱུ་བསྙེགས་པ་འདྲ། །སྤྱོད་མཁན་རང་ངོ་མ་ཤེས་ན། །རི་དྭགས་རྒྱ་ལ་ཚུད་པ་འདྲ། །སྒྲུབ་མཁན་རང་ངོས་མ་ཟིན་ན། །ཁྱུང་ཆེན་ནམ་མཁའི་མཐའ་འཚོལ་འདྲ། །འབྲས་བུ་རང་ངོས་མ་ཟིན་ན། །རྒྱལ་བུ་རྐང་འཁྱམས་སྤྱོད་པ་འདྲ། །གནས་ལུགས་ཕྱོགས་བྲལ་ཀུན་རྫོགས་ཀྱང་། །རྒྱ་ཆད་མེད་པས་ནོར་བུ་འདྲ། །དབྱིངས་ཀྱི་ཀློང་ལས་འདས་པ་མེད། །མཁའ་ལ་བྱ་ཡིས་འཕུར་བ་འདྲ། །ཀུན་གཞི་འཁོར་འདས་འབྱུང་གཞིར་ཡོད། །ཀུན་འབྱུང་རྒྱལ་པོའི་བང་མཛོད་འདྲ། །ཆོས་སྐུ་སྐྱེ་མེད་མུ་མཐའ་སྟོངས། །ལྡོག་མེད་བསེ་ཤིང་འབྲས་བུ་འདྲ། །འཁྲུལ་ ― DNG002_Page_0571 ―
[མ་དཔེ་གཟིགས་ན་འདིར་གནོན།]
རྩ་རང་འཛིན་རྩད་ནས་བཅད། །སྡོང་པོ་རྩད་ནས་བཅད་པ་འདྲ། །སེམས་ནི་རྣམ་ཤེས་ཚོགས་བརྒྱད་དེ། །འགག་མེད་ནམ་མཁའི་ཆོ་འཕྲུལ་འདྲ། །སེམས་ཉིད་སྨྲ་བསམ་ཡུལ་འདས་ཏེ། །སྐྱོན་བྲལ་ནམ་མཁའ་དག་པ་འདྲ། །མ་རིག་འཛིན་བྱེད་ཤེས་པ་སྟེ། །མཐོང་མེད་འཛིན་ཡོད་ལོང་བ་འདྲ། །ཡེ་ཤེས་གསལ་དག་ཟང་ཀ་སྟེ། །མཁའ་ལ་ཉི་མ་ཤར་བ་འདྲ། །སེམས་ནི་འཁོར་འདས་གཉིས་ཀར་འགྱུར། །རས་དཀར་དྲི་མ་མེད་པ་འདྲ། །བག་ཆགས་འཁོར་བའི་ས་བོན་ཏེ། །མཐོང་མེད་གནོད་པ་འདྲེ་རྐུན་འདྲ། །གཉིས་འཛིན་རྟོག་པ་འཁོར་བ་སྟེ། །ཐོ་ཡོར་མི་རུ་འཁྲུལ་པ་འདྲ། །དེ་ཉིད་གྲོལ་བ་མྱང་འདས་ཏེ། །འཁྱག་རོམ་ཆུ་རུ་ཞུ་བ་དང་། །བལྟ་མཁན་ངོས་ཟིན་གྲུབ་མཐའ་སྟོར། །གཞི་མེད་བར་སྣང་ནམ་མཁའ་འདྲ། །སྒོམ་མཁན་ངོས་ཟིན་རང་སར་གྲོལ། །ཆུ་བུར་ཆུ་ལ་ཐིམ་པ་འདྲ། །སྤྱོད་མཁན་ངོས་ཟིན་མཚན་མ་སངས། །རང་གི་རོལ་པ་གར་མཁན་འདྲ། །སྒྲུབ་མཁན་ངོས་ཟིན་འདུ་འབྲལ་མེད། །མོ་གཤམ་བུ་ཡི་ཆུང་མ་འདྲ། །འབྲས་བུ་ངོས་ཟིན་རེ་དོགས་ཆད། །རྒྱལ་སྲིད་ཐོབ་པའི་རྒྱལ་པོ་འདྲ། །དེ་ལྟར་བསྟན་པ་ཐམས་ཅད་ཀྱང་། །ཅང་མེད་ཅིར་སྣང་རང་སར་གྲོལ། །དབྱིངས་ལས་མ་རྟོགས་ཡུལ་མེད་པས། །དངོས་པོའི་མཚན་མ་ཀ་ནས་དག །ཆོས་ཀུན་བཏགས་ཆགས་མིང་ཡིན་པས། །བདེན་རྫུན་ཆགས་སྡང་ཀ་ནས་དག །རང་ངོ་མཐོང་ལས་བལྟ་བ་མེད། །གོལ་སྒྲིབ་འཁྲུལ་པ་ཀ་ནས་དག །སེམས་ཉིད་མཐོང་ལས་བསྒོམ་པ་མེད། །བྱིང་རྒོད་བག་ཆགས་ཀ་ནས་དག །རང་སྣང་གྲོལ་ལས་སྤྱོད་པ་མེད། །བྱ་བཙལ་གཉིས་འཛིན་ཀ་ནས་དག །སྐྱེ་མེད་རྟོགས་པས་དབང་བསྐུར་མེད། །བསྐུར་ཐོབ་རིམ་པ་ཀ་ནས་དག །གཡོ་རྩོལ་བྲལ་ལ་ས་ལམ་མེད། །ལམ་ལྔ་ས་བཅུ་ཀ་ནས་དག །སྙིང་པོར་གནས་ལ་དམ་ཚིག་མེད། །བསྲུང་ཉམས་མཚན་མ་ཀ་ནས་དག །སྐུ་གསུམ་གཞིར་སྨིན་འབྲས་བུ་མེད། །རེ་དོགས་སྨོན་ཐོབ་ཀ་ནས་དག །རང་ངོ་སྤྲད་པས་སངས་རྒྱས་མེད། །སྐྱེ་ཤིའི་ཐ་སྙད་ཀ་ནས་དག །སྤྱི་ཏི་རྟོགས་ལ་ཐམས་ཅད་མེད། །མེད་པ་མ་ཡིན་ཐམས་ ― DNG002_Page_0572 ―
[མ་དཔེ་གཟིགས་ན་འདིར་གནོན།]
ཅད་རྫོགས། །ཡོད་མེད་གཉིས་མིན་གཅིག་མེད་མིན། །མཐའ་བཞིའི་རྒྱ་ལས་རྣམ་པར་གྲོལ། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། སྤྱིའི་གེགས་བསལ་ཞིང་ཤན་དབྱེ་ལ་བཟླ་བའི་ལེའུ་སྟེ་བཅུ་གཉིས་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །སེམས་ཉིད་བླ་མེད་སྤྱི་ཏི་འདིར། །ཆོས་རྣམས་དགོངས་པ་ཇི་ལྟར་འདུས། །ཞེས་ཞུས་པས། གསང་བདག་སྟོན་པས་བཀའ་སྩལ་པ། །ང་ཡི་བླ་མེད་སྤྱི་ཏི་འདིར། །ཆོས་རྣམས་འདུས་ལུགས་བསྟན་གྱིས་ཉོན། །སྣང་སྲིད་འཁོར་འདས་ཆོས་རྣམས་ཀུན། །བྱང་ཆུབ་སེམས་ཀྱི་ངང་དུ་འདུས། །འཁྲུལ་སྣང་འཁོར་བའི་སྡུག་བསྔལ་ཀུན། །མ་རིག་གཟུང་འཛིན་གཉིས་ལ་འདུས། །ལོག་པར་བལྟ་བ་མ་ལུས་པ། །རྟག་ཆད་གཉིས་ཀྱི་ནང་དུ་འདུས། །ཉན་ཐོས་རང་རྒྱལ་དགོངས་པ་ནི། །གཅིག་ཏུ་ཐར་པ་བསྒྲུབ་པར་འདུས། །རྒྱུ་ཡི་ཐེག་ཆེན་དགོངས་པ་ནི། །གཞན་དོན་གཉིས་མེད་སྤྱོད་པར་འདུས། །ཐེག་ཆེན་སྤྱི་ཡི་དགོངས་པ་ནི། །ཤེས་རབ་སྙིང་རྗེ་ཆེ་ལ་འདུས། །བྱང་ཆུབ་སེམས་དཔའི་ཏིང་འཛིན་རྣམས། །སྣང་ལ་རང་བཞིན་མེད་པར་འདུས། །སྤྲུལ་སྐུ་སངས་རྒྱས་དགོངས་པ་ནི། །མེད་ལས་འདོད་དགུ་འབྱུང་བར་འདུས། །བཀའ་ལུང་ཀུན་གྱི་ཕྱི་མོ་ནི། །རང་རིག་ཡེ་ཤེས་འདི་ལ་འདུས། །ཕྱི་ཡི་ཡུལ་རྣམས་མ་ལུས་པ། །མ་བཅོས་ཆོས་ཀྱི་དབྱིངས་ལ་འདུས། །ཕྱི་ནང་སྣོད་བཅུད་མ་ལུས་པ། །སྙིང་པོ་ཀུན་ཁྱབ་ཀློང་དུ་འདུས། །གསང་སྔགས་ཕྱི་ནང་དགོངས་པ་ཀུན། །སྣོད་བཅུད་ཞེན་པ་གྲོལ་ལ་འདུས། །ཁྱད་པར་སྣང་བའི་དགོངས་པ་ཀུན། །བླང་དོར་གཉིས་འཛིན་གྲོལ་ལ་འདུས། །སྐུ་དང་ཡེ་ཤེས་མ་ལུས་པ། །རང་རིག་གསལ་དག་འདི་ལ་འདུས། །ཆོས་རྣམས་སྤྱི་ཡི་རང་བཞིན་ནི། །སྟོང་ཞིང་བདག་དང་བྲལ་ལ་འདུས། །ཡང་དག་ངེས་དོན་གདམས་ངག་ཀུན། །གསལ་དང་ཡེངས་མེད་ངང་ལ་འདུས། །ཉོན་མོངས་བརྒྱད་ཁྲི་བཞི་སྟོང་རྣམས། །རྩ་བ་ངར་འཛིན་གཅིག་པུར་འདུས། །འདུལ་བྱེད་ཆོས་སྒོ་དཔག་མེད་རྣམས། ། ― DNG002_Page_0573 ―
[མ་དཔེ་གཟིགས་ན་འདིར་གནོན།]
བདག་འཛིན་རྩད་ནས་གཅོད་པར་འདུས། །གཅོད་ཚུལ་བསམ་གྱིས་མི་ཁྱབ་ཀྱང་། །བསྡུས་ན་ཐེག་པ་རིམ་དགུར་འདུས། །རིམ་དགུའི་འདོད་པ་རྣམ་མང་ཡང་། །ཡང་རྩེ་རྫོགས་པ་ཆེན་པོར་འདུས། །ཆོས་སྐུའི་བསྟན་པ་རྫོགས་ཆེན་རྣམས། །སྡེ་གསུམ་ནང་དུ་འདུས་པར་བསྟན། །སེམས་སྡེ་ཀློང་སྡེ་མན་ངག་སྡེ། །དེ་ཡང་རྫོགས་ཆེན་སེམས་སྡེ་ནི། །གཞི་ཉིད་མདུང་སྒྱུར་ཆེན་པོར་བསྟན། །ཀློང་སྡེའི་རྫོགས་པ་ཆེན་པོ་ནི། །འབྲས་བུ་ཡེ་གྲོལ་ཆེན་པོར་བསྟན། །མན་ངག་སྡེ་ཡི་རྫོགས་ཆེན་ནི། །ལམ་གསུམ་ཐ་དད་ཉིད་དུ་བསྟན། །དེ་དག་ཀུན་གྱི་སྤྱི་ཕུད་ནི། །བཅུ་རྩེ་སྤྱི་ཏི་འདིར་འདུས་ཏེ། །ཐེག་པའི་ཆོས་ཀུན་ལ་བཟླར་བཤད། །ལ་བཟླའི་ཕྱོགས་སུ་རྒྱ་མ་ཆད། །གཉིས་ཀའི་ཕྱོགས་སུ་རྒྱ་མ་ཆད། །གཉིས་མེད་དུ་ཡང་རྒྱ་མ་ཆད། །སྐྱེ་མེད་ཀ་དག་མཐའ་ལས་གྲོལ། །ཞེས་གསུངས་སོ། །རིན་པོ་ཆེ་བདུད་རྩི་བཅུད་ཐིགས་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། ཆོས་ཐམས་ཅད་ཀྱི་དགོངས་པ་འདུས་པར་ལ་བཟླ་བའི་ལེའུ་སྟེ་བཅུ་གསུམ་པའོ།། །།དེ་ནས་ཀུན་རིག་ཁྱེའུ་ཆུང་གིས། །གསང་བདག་སྟོན་པ་ལ་ཞུས་པ། །རྒྱུད་འདིའི་མཚན་དོན་ཇི་ལྟར་གཟུང་། །གཏད་པའི་གནས་ནི་གང་ལ་གཏད། །ཅེས་ཞུས་པས། གསང་བདག་སྟོན་པས་བཀའ་སྩལ་པ། །དགོས་འདོད་ཀུན་འབྱུང་རྒྱ་ཆད་མེད། །ཀུན་འབྱུང་རིན་ཆེན་རྒྱུད་ཅེས་བྱ། །བཏགས་ཆགས་བཟུང་ཞེན་ཀུན་བདུད་ལ། །ཀ་དག་ཕྱོགས་བྲལ་རྩིས་འདེབས་པས། །བླ་མེད་བདུད་རྩིའི་རྒྱུད་ཅེས་བྱ། །གསང་བདག་ང་ཡི་ཐུགས་ཀྱི་བཅུད། །ཀུན་རིག་འཁོར་ལ་འདིར་ཐིགས་པས། །སྙིང་པོ་བཅུད་ཐིགས་རྒྱུད་ཅེས་བྱ། །འདྲེལ་དང་མ་ཚང་མེད་རྫོགས་པས། །རྒྱ་མ་ཆད་པའི་རྒྱུད་ཅེས་བྱ། །ང་ཡི་སྐུ་གསུང་སངས་རྒྱས་ཀྱི། །དགོངས་པ་ཐམས་ཅད་འདིར་འདུས་པས། །དགོངས་འདུས་ཆེན་པོའི་རྒྱུད་ཅེས་བྱ། །ཐེག་དགུའི་འདོད་པ་ལ་ཟློས་པས། །བཅུ་རྩེ་སྤྱི་ཏིའི་རྒྱུད་ཅེས་བྱ། །ཕྱི་རབས་རྒྱུད་དག་སྐལ་བར་ལྡན། །ཐོད་རྒལ་བློ་ལྡན་རྣམས་ལ་གཏོད། །ཅེས་གསུངས་ རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་ཐམས་ཅད་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ཅེས་བྱ་བ།― DNG002_Page_0574 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། རཏྣ་དཱི་པ་ཀརྟ་རཱི་ཛྭ་ལ་སརྦ་བྷྲ་མ་མཱུ་ལ་ཙྪེ་ད་ཨཱ་ཀཱ་ཤ་ས་མ་ཏནྟྲ་ནཱ་མ། བོད་སྐད་དུ། རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་ཐམས་ཅད་ ― DNG002_Page_0575 ―
[མ་དཔེ་གཟིགས་ན་འདིར་གནོན།]
རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ཅེས་བྱ་བ། མཚོན་མེད་བརྗོད་འདས་ཆོས་ཀྱི་སྐུ་ལ་ཕྱག་འཚལ་ལོ། །འདི་སྐད་བདག་གིས་རྟོགས་ཤིང་བཤད་པའི་དུས་གཅིག་ན། འོག་མིན་གྱི་གནས་ཆོས་ཉིད་ཀྱི་ཀློང་། ཀུན་གཞིའི་མཁའ་དབྱིངས་ཡངས་པ་སེམས་ཀྱི་གཞལ་ཡས་ཁང་དབྱིངས་རྣམ་པར་དག་པའི་གནས། རིན་པོ་ཆེ་སྣ་ཚོགས་གཅིག་ཏུ་འདུས་པའི་འོད་ཁང་ཞེས་བྱ་བ་ན། སྟོན་པའི་རྒྱལ་པོ་བསམ་མེད་བརྗོད་འདས་དང་། །སྟོན་པའི་རྒྱལ་པོ་བརྗོད་མེད་བློ་འདས་དང་། །སྟོན་པའི་རྒྱལ་པོ་དྲན་མེད་ཡིད་ལ་བྱར་མེད་གསུམ། །ཡེ་ཐོག་ཡེ་གནས་སྟོན་པ་རྣམ་གསུམ་མོ། །དེ་གསུམ་ཐུགས་ཀྱི་སྤྲུལ་པ་ལས། །ཀུན་ཏུ་བཟང་པོ་རྡོ་རྗེ་སེམས། །དགའ་རབ་རྡོ་རྗེ་གསུམ་ཡིན་ནོ། །སྟོན་པའི་རྒྱལ་པོ་དྲུག་པོ་ལ། །དྲུང་ན་གནས་པའི་འཁོར་ཡང་འདི་ལྟ་སྟེ། །མ་འགགས་རྒྱ་ཆད་མེད་པའི་འཁོར་དང་། རྩལ་སྣང་ཡན་ལག་འོད་ཀྱི་འཁོར་དང་། སྣང་ཚུལ་ཟེར་གྱི་འཁོར་རྣམས་ནི། །ཡེ་ཐོག་སྟོན་གསུམ་འཁོར་ཡིན་ནོ། །དེ་གསུམ་ཐུགས་ཀྱི་སྤྲུལ་པ་ལས། །རིག་པའི་འཁོར་དང་ཡིད་ཀྱི་འཁོར། །སེམས་ཀྱི་འཁོར་དང་རྣམ་གསུམ་མོ། །དེ་གསུམ་རྩལ་སྣང་བསྟན་པ་ལས། །རང་བཞིན་འཁོར་དང་དོན་གྱི་འཁོར། །འདོད་པས་བསྡུས་པའི་འཁོར་དང་གསུམ། །གཞན་ཡང་འཁོར་ཚོགས་འདི་ལྟ་སྟེ། །རྒྱུ་ཡི་བྱང་ཆུབ་སེམས་དཔའ་དང་། །ལམ་གྱི་བྱང་ཆུབ་སེམས་དཔའ་དང་། །འབྲས་བུའི་བྱང་ཆུབ་སེམས་དཔའ་དང་། རྗེས་ཀྱི་རྣལ་འབྱོར་དང་། སེམས་དཔའི་རྣལ་འབྱོར་དང་། ཡོངས་སུ་རྣལ་འབྱོར་དང་། རྣལ་འབྱོར་ཆེན་པོ་དང་། ཤིན་ཏུ་རྣལ་འབྱོར་དང་། ཡེ་ནས་གནས་པའི་འཁོར་ཡང་འདི་ལྟ་སྟེ། །ས་དང་ཆུ་དང་མེ་དང་རླུང་དང་ནམ་མཁའོ། །དེ་དག་ལ་སོགས་པ་འཁོར་སྣ་ཚོགས་དང་ཐབས་ཅིག་ཏུ་བཞུགས་སོ། །དེ་ནས་ཡང་འཁོར་གྱི་ནང་ནས་རང་གསལ་ཁྱེའུ་ཆུང་སྟན་ལས་ལངས་ནས། པུས་བཙུགས་ཐལ་སྦྱར་གུས་པས་འདི་སྐད་གསོལ། ཨ་པི་ར་ཀ་ཏ་གང་ཀ་ཏད་ཨ་ཏི། སྟོན་པའི་རྒྱལ་པོ་སེམས་ཉིད་ཀུན་བཟང་ལགས། །བདག་ཅག་འདུས་པའི་འཁོར་ཚོགས་ཐམས་ཅད་ལ། །དངོས་པོ་ཇི་ལྟར་གནས་པའི་གནས་ལུགས་ ― DNG002_Page_0576 ―
[མ་དཔེ་གཟིགས་ན་འདིར་གནོན།]
དང་། །མ་རྟོགས་སེམས་ཅན་ཇི་ལྟར་འཁྲུལ་ཚུལ་དང་། །འཁྲུལ་སྣང་རྩད་ནས་བཅད་པའི་བཅད་ལུགས་དང་། །ཆོད་ནས་འབྲས་བུ་ཐོབ་པའི་ཐོབ་ལུགས་དང་། །ཐོབ་ནས་མི་འགྱུར་གདེང་གིས་ཟིན་ལུགས་དང་། །འཁྲུལ་པ་བསལ་ཞིང་ལྡོག་པའི་གདམས་ངག་དང་། །སངས་རྒྱས་རྣམས་ལ་ཡོན་ཏན་ཇི་ལྟ་བུ། །སེམས་ཅན་རྣམས་ལ་སྐྱོན་ནི་ཅི་ཞིག་མཆིས། །ཡེ་ཐོག་སངས་རྒྱས་རྣམས་ཀྱིས་བཟང་བྱས་ལྷ་གསོལ་ལམ། །རིགས་དྲུག་སེམས་ཅན་རྣམས་ཀྱིས་ངན་བྱེད་ཐབས་བྱས་སམ། །དེ་གཉིས་སྐྱོན་དང་ཡོན་ཏན་ཇི་ལྟར་ལགས། །ཐེག་པ་བརྒྱད་ཁྲི་བཞི་སྟོང་ཕྱེ་བ་གང་ལ་དགོངས། །ཐེག་པ་དགུ་རུ་བསྡུས་པ་དེ། །གདུལ་བྱ་གང་ལ་དགོངས་ནས་བསྡུས། །ཨ་ནུ་མན་ཆད་བརྒྱད་པོ་རྣམས། །སྤང་ངམ་འོན་ཏེ་ཇི་ལྟར་བགྱི། །ཕྱི་པ་མུ་སྟེགས་ཐེག་པ་དེ། །སྤངས་ན་རྫོགས་པར་ཅང་འགྱུར་རམ། །བསྒྲུབས་ན་ཕྱི་རོལ་གསུང་ལ་དགོས་པ་མེད། །ཐེག་པ་དག་ནི་ཐམས་ཅད་ཀྱི། །གོལ་སྒྲིབ་གདར་ཤ་ཇི་ལྟར་བཅད། །རང་གཞུང་ཉམས་སུ་ཇི་ལྟར་བླང་། །གཞན་གཞུང་ཤེས་པར་ཇི་ལྟར་བྱ། །རང་གཞན་གཉིས་སུ་གསུངས་པ་དེ། །ཁྱད་པར་གང་གིས་ཇི་ལྟར་འཐོན། །ཞུས་ཚིག་ཉི་ཤུ་རྩ་གཅིག་དེ། །སྟོན་པས་འཁོར་ལ་གསུང་དུ་གསོལ། །བདག་ཅག་འདུས་པའི་འཁོར་རྣམས་ལ། །ཤིན་ཏུ་ཟབ་པར་གསུང་དུ་གསོལ། །ཞེས་ཞུས་སོ། །རིན་ཆེན་སྣང་གསལ་སྤུ་གྲི་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །དངོས་པོ་གནས་པའི་གནས་ལུགས་དེ། །བདག་ཅག་རྣམས་ལ་བསྟན་དུ་གསོལ། །ཞེས་གསོལ་པ་དང་། དེ་ནས་མཚོན་མེད་ཀུན་བཟང་དེས། །རིན་པོ་ཆེ་འོད་འབྱེད་པ་མེད་པའི་ཏིང་ངེ་འཛིན་ལ་བཞུགས་སོ། །དེ་ནས་གཉིས་མེད་ཀུན་བཟང་གིས། །འཁོར་རྣམས་དྲུང་ན་ཚོགས་པར་གཟིགས། །བཞེངས་ནས་འཁོར་ལ་འདི་སྐད་གསུངས། །རྡོ་རྗེ་སེམས་དཔའ་ལ་སོགས་རྣམས། ། ― DNG002_Page_0577 ―
[མ་དཔེ་གཟིགས་ན་འདིར་གནོན།]
མ་ཡེངས་གུས་པར་ལྡན་པས་ཉོན། །ཨ་པ་དྷ་ཨི་ཨ་པི་ཐིཾ་ཨ། དངོས་པོ་གཤིས་ཀྱི་གནས་ལུགས་དེ། །མཚོན་བྱེད་ཡུལ་དུ་མི་འགྱུར་ཀྱང་། །རྟོག་པའི་ཤེས་རབ་གསལ་བ་ཡིས། །ཡེ་ཤེས་རིན་ཆེན་སྒྲོན་མེ་འདི། །གསུང་གིས་འགགས་མེད་གསལ་བ་ཡིས། །ཉི་ཟླ་བཞིན་དུ་གསལ་ཁྱབ་བཤད། །དཔེར་ན་མི་གཅིག་དོན་ཡོད་པས། །མ་བསྒྲུབ་དོན་དང་འཕྲད་མི་འགྱུར། །དེ་བཞིན་ཆོས་ཉིད་རྟོགས་འདོད་པས། །མ་མཚོན་བརྗོད་པ་མེད་ན་རྟོགས་མི་འགྱུར། །བརྗོད་བྲལ་མཐའ་ལ་བརྟེན་ཏེ་བཤད། །དཔེར་ན་སྐོམ་པ་ཆུ་འདོད་པས། །མེ་འདོད་བརྗོད་པས་ཆུ་མི་མྱོང་། །ཆུ་འདོད་བརྗོད་པས་ཕྲད་པར་ངེས། །དེ་བཞིན་དངོས་མེད་དོན་འདོད་ལ། །དངོས་པོར་བསྟན་པས་མི་རྟོགས་འགྱུར། །དངོས་མེད་བསྟན་པས་སྐྱེ་མེད་རྟོགས། །དེ་བཞིན་དངོས་པོའི་གནས་ལུགས་ཀྱང་། །དཔེ་དང་དོན་དུ་སྦྱར་ལ་བཤད། །རྡོ་རྗེ་སེམས་དཔའ་གོ་བར་ཟུངས། །མཚོ་ལ་དར་ཆགས་ཞིང་ས་དང་། །རྒྱལ་པོའི་བང་མཛོད་གསེར་དང་བཞི། །གཞི་ཡི་གནས་ལུགས་མཚོན་དཔེར་གསུངས། །མཚོ་ལ་དར་ཆགས་དུས་ཉིད་དུ། །འབར་འབུར་མཐོ་དམན་སྒང་གཤོང་མེད། །མཉམ་པ་ཉིད་དུ་གནས་པའོ། །གཞི་ལ་རྣམ་པ་བཞི་ཡོད་དེ། །ཁྱབ་པའི་གཞི་དང་གནས་པའི་གཞི། །གཡོ་བའི་གཞི་དང་འབྱུང་བའི་གཞིའོ། །མཚོ་ལ་དར་ཆགས་དཔེ་བཞིན་དུ། །གནས་པའི་གཞི་ཡང་འདི་ལྟར་གནས། །སེམས་ཅན་མ་ཡིན་སངས་རྒྱས་མིན། །འཁོར་བ་མ་ཡིན་མྱང་འདས་མིན། །མ་རིག་མ་ཡིན་ཡེ་ཤེས་མིན། །རྣམ་རྟོག་མ་ཡིན་ཆོས་ཉིད་མིན། །བདེ་བ་མ་ཡིན་སྡུག་བསྔལ་མིན། །མཚོན་མེད་ཚིག་མེད་མིང་བརྗོད་མེད། །བསྟན་མེད་སྟོན་མེད་ཉན་པ་མེད། །སྨྲར་མེད་དམིགས་མེད་བརྟགས་པ་མེད། །སྣང་མེད་སྲིད་མེད་ཆགས་པ་མེད། །ཡུལ་མེད་སེམས་མེད་དབྱེ་བསལ་མེད། །ང་མེད་བདག་མེད་ཕྱེ་བ་མེད། །ཕྱི་མེད་ནང་མེད་གཟུང་འཛིན་མེད། །དགྲ་མེད་གཉེན་མེད་ཕྱོགས་རིས་མེད། །ཕ་མེད་མ་མེད་སྐྱེས་པ་མེད། །ཡུལ་མེད་གནས་མེད་ཆགས་པ་མེད། །བཅུད་མེད་སྣོད་མེད་འཁོར་བ་མེད། །དབུས་མེད་མཐའ་མེད་ཕྱོགས་མཚམས་མེད། །དཀར་མེད་ ― DNG002_Page_0578 ―
[མ་དཔེ་གཟིགས་ན་འདིར་གནོན།]
ནག་མེད་ཁ་དོག་མེད། །དེ་དག་ལ་སོགས་ཐམས་ཅད་ལ། །རིག་མེད་ཡིད་མེད་སེམས་པ་མེད། །དམིགས་མེད་གཏད་མེད་ཆགས་ཞེན་མེད། །སྨྲ་བསམ་བརྗོད་འདས་ངོ་བོ་དེ། །ཡིད་ལ་བྱར་མེད་རྩིས་གདབ་མེད། །བློ་ཡིས་བཅོས་མེད་སེམས་ལ་གཞག་ཏུ་མེད། །དེ་དག་ཀུན་གྱི་རང་བཞིན་ནི། །དངོས་པོ་གཤིས་ཀྱི་གནས་ལུགས་ཡིན། །སངས་རྒྱས་སེམས་ཅན་བཏགས་པ་མེད། །བསྟན་བྱ་སྟོན་བྱེད་བཏགས་པ་མེད། །ཚིག་དང་ཡི་གེའི་མཐའ་ལས་འདས། །ཚོགས་བརྒྱད་ཡུལ་དུ་མ་གྱུར་གནས་ལུགས་དང་། །མ་རིག་ཡེ་ཤེས་མཉམ་པར་གནས། །འཆར་སྒོ་འཁྲུལ་སྒོ་མཉམ་པར་གནས། །རྣམ་རྟོག་ཆོས་ཉིད་མཉམ་པར་གནས། །སངས་རྒྱས་སེམས་ཅན་མཉམ་པར་གནས། །འཁོར་བ་མྱང་འདས་མཉམ་པར་གནས། །བདེ་དང་སྡུག་བསྔལ་མཉམ་པར་གནས། །མཉམ་པ་ཉིད་དུ་གནས་པའོ། །དེ་ནི་གནས་པའི་གཞི་ཞེས་བྱའོ། །ཁྱབ་པའི་གཞི་ནི་འདི་ལྟ་སྟེ། །ཏིལ་ལ་མར་གྱིས་ཁྱབ་པ་བཞིན། །ཡ་ཐ་རྒྱལ་བའི་དཀྱིལ་འཁོར་ནས། །མ་ཐ་དམྱལ་བའི་འཇིག་ཚོགས་རྣམས། །སྐྱེ་འགྲོའི་གཟུགས་ཀྱིས་བསྡུས་པ་ལ། །ཀུན་ལ་ཁྱབ་པར་གནས་པའོ། །དེ་ནི་ཁྱབ་པའི་གཞི་རུ་གསུངས། །གཡོ་བའི་གཞི་ནི་འདི་ལྟ་སྟེ། །སྔོན་གནས་གཞི་ལ་ཐོག་མར་གཡོས། །ཐོག་མའི་གཞི་ལ་ཡེ་ནས་གཡོས། །ཡེ་ནས་གཞི་ལ་རང་བཞིན་གཡོས། །རང་བཞིན་གཞི་ལ་ཁྱབ་གཞི་གཡོས། །ཁྱབ་པའི་གཞི་ལ་ཡེ་རླུང་གཡོས། །ཡེ་རླུང་གཞི་ལ་ཐོ་ལོང་གཡོས། །དེ་ནི་གཡོ་བའི་གཞི་རུ་གསུངས། །འབྱུང་བའི་གཞི་ནི་འདི་ལྟ་སྟེ། །ཡེ་རླུང་ཐོལ་ལོ་དེ་ལས་ནི། །བག་ཙམ་འགྱུ་བའི་ཆ་རུ་བྱུང་། །དེ་ལས་ཡིད་ཙམ་འགྱུ་བ་བྱུང་། །དེ་ལས་ཟེར་གྱི་ཚུལ་དུ་བྱུང་། །དེ་ལས་ཀུན་གཞི་སྤྱི་ཁྱབ་བྱུང་། །དེ་ལས་འབྱུང་བའི་རང་བཞིན་བྱུང་། །དེ་ལས་འོད་ཀྱི་ཚུལ་དུ་གྱུར། །འོད་ལ་མ་འགགས་ཟེར་ཤར་བས། །རྩལ་སྣང་ཡན་ལག་བུ་རུ་གྱུར། །རྩལ་སྣང་གཞན་དུ་མ་ཆགས་ཏེ། །སླར་ལ་འོད་ཀྱི་ནང་དུ་ཐིམ། །འོད་ལ་སྣང་གསལ་བུ་ཐིམ་པས། །མ་བུ་དབྱེར་མེད་ཡེ་སངས་རྒྱས། །ཐོག་མའི་རང་སར་རང་ཐིམ་པས། །འོད་དང་ཟེར་འཕྲད་རང་ས་ཟིན། །འཁྲུལ་ཆོད་སྐྱེ་མེད་རྒྱ་ཡིས་ ― DNG002_Page_0579 ―
[མ་དཔེ་གཟིགས་ན་འདིར་གནོན།]
ཐེབས། །སྙིང་པོ་ཀློང་ནས་ཤར་བ་ཡིན། །ཀུན་ཏུ་བཟང་པོ་ཡེ་སངས་རྒྱས། །རྒྱུ་རྐྱེན་རྩོལ་བསྒྲུབ་མ་བྱས་པར། །ཤུགས་འབྱུང་ཐོག་མ་ཡེ་སངས་རྒྱས། །དཔེར་ན་རིན་ཆེན་གསེར་བཞིན་དུ། །ཀུན་ཏུ་འགྱུར་བ་མེད་པར་གནས། །དེ་ལྟར་འབྱུང་བ་བཞི་ཡིས་ནི། །འབྱུང་བ་མ་ལ་ཞ་བ་དང་། །ཡེ་ཤེས་མཁའ་ལ་ཐིམ་པ་དང་། །ཆོས་ཉིད་མ་དང་འཕྲད་པ་དང་། །སྐྱེ་མེད་རང་ས་ཟིན་པ་དང་། །འགྱུར་མེད་རྒྱ་ཡིས་ཐེབས་དང་ལྔས། །བརྗོད་པ་མེད་དབྱིངས་མངོན་སངས་རྒྱས། །ཐོག་མ་གཞི་ཡི་སངས་རྒྱས་ཡིན། །དཔེར་ན་རྒྱལ་པོའི་བང་མཛོད་བཞིན། །ནོར་རྫས་ཆེ་བ་འབྱུང་ལ་ཆུང་བའང་འབྱུང་། །རིན་ཆེན་གསེར་དང་གཡུ་ཡང་འབྱུང་། །འབྲས་ཀྱང་འབྱུང་ལ་སྲན་མ་འབྱུང་། །རིན་ཐང་ཆེ་འབྱུང་ཆུང་བ་འབྱུང་། །དེ་བཞིན་ཀུན་གཞི་མཛོད་ཆེན་ནས། །མ་རིག་འབྱུང་ལ་ཡེ་ཤེས་འབྱུང་། །སངས་རྒྱས་འབྱུང་ལ་སེམས་ཅན་འབྱུང་། །འཁོར་བ་འབྱུང་ལ་མྱང་འདས་འབྱུང་། །རྣམ་རྟོག་འབྱུང་ལ་ཆོས་ཉིད་འབྱུང་། །བདེ་བ་འབྱུང་ལ་སྡུག་བསྔལ་འབྱུང་། །དགའ་བ་འབྱུང་ལ་མི་དགའ་འབྱུང་། །ང་བདག་འབྱུང་ལ་བདག་མེད་འབྱུང་། །ཡུལ་སེམས་འབྱུང་ལ་གཉིས་མེད་འབྱུང་། །ཕྱོགས་རིས་འབྱུང་ལ་ཕྱོགས་མེད་འབྱུང་། །དེ་སོགས་འབྱུང་བའི་གཞི་རུ་གསུངས། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། དངོས་པོ་གཞིའི་གནས་ལུགས་བསྟན་པའི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཁམས་གསུམ་འཁོར་བའི་སེམས་ཅན་དང་། །ཕྱི་ནང་སྣོད་བཅུད་ཇི་ལྟར་འཁྲུལ། །འདུས་པའི་འཁོར་ལ་གསུང་དུ་གསོལ། །ཞེས་གསོལ་པ་དང་། སྟོན་པས་འཁོར་ལ་འདི་སྐད་གསུངས། །སྙིང་པོ་མིང་མེད་བརྗོད་མེད་འགྱུར་མེད་མ་རྟོགས་པས། །ཡན་ལག་རྩལ་གྱི་ཤེས་པ་རང་ཤུགས་ལས། །མ་རྟོགས་སེམས་ཅན་འཁྲུལ་ལུགས་ངས་བཤད་ཀྱི། །རྡོ་རྗེ་སེམས་དཔའ་གུས་པས་ཡིད་ལ་ཟུངས། །མ་བྱུང་མ་སྐྱེས་སྔོན་ཐོག་ཡེ་ཡོད་ལས། །སྔོན་ ― DNG002_Page_0580 ―
[མ་དཔེ་གཟིགས་ན་འདིར་གནོན།]
གནས་གཞི་རུ་རང་བཞིན་གནས། །དེ་ཉིད་ཐོག་མའི་གཞི་རུ་གྱུར། །དེ་ཉིད་ཅང་མེད་གཞི་རུ་གྱུར། །ཅང་མེད་པ་ཡི་གཞི་དེ་ལས། །དེ་ཉིད་མིང་མེད་གཞི་རུ་གྱུར། །མིང་མེད་རང་བཞིན་མ་ཤེས་པས། །འབྱེད་པ་མེད་པའི་གཞི་རུ་གྱུར། །དེ་ཉིད་གཡོ་བའི་གཞི་རུ་འཁྲུལ། །གཡོ་བའི་རང་བཞིན་ཀུན་ལ་གནས། །དེ་ཉིད་ཁྱབ་པའི་གཞི་རུ་འཁྲུལ། །དེ་ལས་གཞི་ཡི་འདེགས་བྱེད་ཀྱི། །ཡེ་རླུང་གདེངས་མེད་བྱ་བར་གཡོས། །དེ་ཉིད་ཀུན་གནས་རླུང་གྱུར་འཁྲུལ། །དེ་ཉིད་ཐོལ་ཙམ་ལོང་ཙམ་འཁྲུལ། །སང་སང་སེང་སེང་ཙམ་དུ་འཁྲུལ། །བག་ཙམ་ཚོར་ཙམ་དག་ཏུ་འཁྲུལ། །དེ་ཉིད་བག་ཙམ་འགྱུ་བར་གྱུར། །དེ་ལས་ཟེར་ཙམ་ཚུལ་དུ་འཁྲུལ། །ཟེར་དེས་ཀུན་གྱི་གཞི་བྱས་པས། །དེར་སྡོད་ཀུན་གཞི་སྤྱི་ཁྱབ་འབྱུང་། །དངོས་པོ་མཚན་མ་ཀུན་གྱི་གཞི་མོ་བྱས། །གཞི་རྩ་མེད་པའི་ཆོས་ཉིད་ཀློང་ཆེན་འཁྲུལ། །ཆོས་རྣམས་ཀུན་གྱི་འཁྲུལ་པའི་རྩ་བ་བྱས། །དེ་ལས་རང་བྱུང་ཡེ་ཤེས་ལས། །ཡན་ལག་རྩལ་སྣང་ཟེར་འཕྲོས་པས། །གཡོ་མི་གཡོ་ལས་ཕྲ་རབ་ཟེར་གཡོས་པས། །ཟེར་གྱི་རང་བཞིན་མ་འགགས་འོད་ལྔར་འཁྲུལ། །དེ་ལས་འབྱུང་བའི་རང་བཞིན་འཁྲུལ། །འབྱུང་བ་འོད་ཀྱི་རང་བཞིན་ལས། །རྩལ་སྣང་ཡན་ལག་བུ་རུ་འཁྲུལ། །སྔར་གཡོས་མ་མྱོང་ཡིད་ཙམ་གཡོས་པ་ཡིས། །དེ་ལས་འགྱུ་བའི་རླུང་དུ་འཁྲུལ། །དེ་ལས་གསལ་བའི་ཤེས་པར་འཁྲུལ། །བདེ་སྙམ་མི་བདེ་སྙམ་བྱུང་བས། །མྱོང་རིག་གཉིས་སུ་དེ་ཡིས་འཁྲུལ། །མྱོང་ཞིང་རིག་པ་ཡོད་པ་དེས། །འགྱུ་མི་འགྱུ་ལས་ཡིད་གསུམ་ཡིན་པར་འགྱུར། །འགྱུ་བའི་ཟེར་ལས་རིག་པ་སྐྱེས། །རང་ས་མ་ཟིན་གཅོད་པའི་རླུང་དང་བཅས། །ཡིན་ནམ་མ་ཡིན་མིང་གིས་རྣམ་གྲངས་སྐྱེས། །ཡིན་པ་མ་མཐོང་མེད་པར་འཁྲུལ། །ཡིན་པ་མ་རིག་མིན་པ་རིག །དེ་ཕྱིར་མ་རིག་མུན་པར་འཁྲུལ། །འགྱུ་བ་རླུང་གིས་རྒྱུ་བྱས་ནས། །སྒྲིབ་གཡོགས་མུན་པས་བར་བཅད་དེ། །རྩལ་སྣང་བུ་ཡིས་རྐྱེན་བྱས་ནས། །མ་རིག་འཁྲུལ་སྒོ་འབྲས་བུ་སྨིན། །རིག་པ་ཡིད་དང་སེམས་སུ་འཁྲུལ། །དེ་ལ་ཡིད་གསུམ་རིམ་གྱིས་འཁྲུལ། །རིག་པ་ཀུན་ཏུ་ ― DNG002_Page_0581 ―
[མ་དཔེ་གཟིགས་ན་འདིར་གནོན།]
ཚོལ་བ་ཡིས། །ཕྱོགས་མཚམས་ཀུན་ཏུ་འགྱུ་བའོ། །ཀུན་ཏུ་ཚོལ་བའི་ཡིད་དུ་འཁྲུལ། །ཡིད་ཀྱི་མཚན་ཉིད་འགྱུ་བ་ཡིས། །ཡིད་ལ་རྟེན་མེད་མ་བདེ་སྟེ། །ཕྱ་སང་བན་བུན་ཕྱད་ཕྱོད་བྱེད། །སང་སང་སེང་སེང་རྟེན་མེད་ལ། །ཡིན་སྙམ་མིན་སྙམ་ཡིད་གཉིས་སྐྱེས། །ངེས་པར་འཇོག་པའི་ཡིད་དུ་འཁྲུལ། །ང་ལས་མེད་དམ་རང་སྙམ་མནོ། །དེ་ལས་སེམས་སུ་གསལ་བ་སྐྱེས། །གསལ་བའི་རང་བཞིན་རྣམ་པ་ལྔ། །གསལ་དང་མི་གཡོ་རྒྱ་མ་ཆད། །མ་འགགས་མི་འགྱུར་ལྔ་རུ་འཁྲུལ། །གཏན་ལ་འབེབས་པའི་ཡིད་དུ་འཁྲུལ། །དེ་ལ་རིག་པའི་གཟུགས་སུ་འཁྲུལ། །དེ་ལ་ཡིད་ཀྱི་གཟུགས་སུ་འཁྲུལ། །དེ་ལས་སེམས་ཉིད་གཟུགས་སུ་འཁྲུལ། །དེ་ལས་འོད་ཀྱི་གཟུགས་སུ་འཁྲུལ། །དེ་ཡིས་སྣང་ཚུལ་ལྔ་རུ་ཤར། །དེ་ཡིས་ཉོན་མོངས་ལྔ་རུ་འཁྲུལ། །དེ་ལས་འབྱུང་བ་ལྔ་རུ་འཁྲུལ། །དེ་ལས་ཁ་དོག་ལྔ་རུ་འཁྲུལ། །དེ་ལས་གཟུགས་སྣང་ལྔ་རུ་འཁྲུལ། །དེ་ལས་དོན་སྙིང་རྣམ་ལྔ་འཁྲུལ། །དེ་ལས་དབང་པོ་རྣམ་ལྔར་འཁྲུལ། །དེ་ལས་རྣམ་ཤེས་རྣམ་ལྔར་འཁྲུལ། །དེ་ལས་ཡན་ལག་རྣམ་ལྔར་འཁྲུལ། །དེ་ལས་ཡུལ་ལྔ་རིགས་ལྔར་འཁྲུལ། །འོད་གཟུགས་དེ་ནི་རྣམ་ཤེས་ལ། །རང་རང་བག་ཆགས་ཇི་ལྟར་བལྟས་མཐོང་སྟེ། །རང་རང་ལུས་ལ་བཟང་དང་ངན་པར་མཐོང་། །ལ་ལས་ཆེར་མཐོང་ལ་ལས་ཆུང་བར་མཐོང་། །ལ་ལས་རིང་མཐོང་ལ་ལས་ཐུང་བར་མཐོང་། །ལ་ལས་ཟླུམ་མཐོང་ལ་ལས་ནར་བར་མཐོང་། །མཐོང་བའི་དབང་གིས་རང་རང་གཟུགས་སུ་འཁྲུལ། །འོད་གཟུགས་ཤེས་པ་འདི་ལྟར་འཁྲུལ། །ཕྱི་ནང་སྣོད་བཅུད་དངོས་མེད་དངོས་སྣང་དང་། །འབྱུང་བ་རྣམ་ལྔ་དངོས་མེད་དངོས་སྣང་དང་། །ཉོན་མོངས་རྣམ་ལྔ་དངོས་མེད་དངོས་སྣང་དང་། །དབང་པོ་རྣམ་ལྔ་དངོས་མེད་དངོས་སྣང་དང་། །འདོད་ཡོན་རྣམ་ལྔ་དངོས་མེད་དངོས་སྣང་དང་། །ཕུང་པོ་རྣམ་ལྔ་དངོས་མེད་དངོས་སྣང་དང་། །ཁ་དོག་རྣམ་ལྔ་དངོས་མེད་དངོས་སྣང་དང་། །དབྱིབས་ཀྱི་བྱེ་བྲག་དངོས་མེད་དངོས་སྣང་དང་། །ཕོ་མོ་མ་ནིང་དངོས་མེད་དངོས་སྣང་དང་། །ཕྱོགས་མཚམས་དངོས་མེད་དངོས་པོར་སྣང་བ་དང་། །ཉིན་མཚན་དངོས་མེད་དངོས་པོར་ ― DNG002_Page_0582 ―
[མ་དཔེ་གཟིགས་ན་འདིར་གནོན།]
སྣང་བ་དང་། །ཉི་ཟླ་གཟའ་སྐར་དངོས་མེད་དངོས་སྣང་དང་། །འགྲོ་བ་རིགས་དྲུག་དངོས་མེད་དངོས་སྣང་དང་། །རི་རབ་གླིང་བཞི་དངོས་མེད་དངོས་སྣང་དང་། །རྩི་ཤིང་ནགས་ཚལ་དངོས་མེད་དངོས་སྣང་དང་། །ལོངས་སྤྱོད་སྣ་ཚོགས་དངོས་མེད་དངོས་སྣང་དང་། །ཡན་ལག་རྩལ་རྣམས་རིམ་གྱིས་འཁྲུལ་པ་ལས། །འོད་ཀྱིས་གཟུགས་ཀྱི་སྣང་བ་འཁྲུལ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་རྩད་གཅོད་ནམ་མཁའ་དང་མཉམ་པའི་རྒྱུད་ལས། བརྒྱུད་པ་རིམ་གྱིས་འཁྲུལ་པའི་འཁྲུལ་ལུགས་བསྟན་པའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་གསོལ། །འོད་ཀྱི་གཟུགས་ལས་འཁྲུལ་པ་ཡི། །དངོས་པོ་རྐྱེན་དུ་སྣང་བ་དང་། །མེད་སྣང་འཁྲུལ་པ་ཇི་ལྟར་འཁྲུལ། །ཞེས་གསོལ་པ་དང་། སྟོན་པས་འཁོར་ལ་འདི་སྐད་གསུངས། །རང་བྱུང་རྩལ་གྱི་ཡན་ལག་ཟེར་གཡོས་པས། །མདོ་རུ་བསྡུས་ན་ཡན་ལག་ལྔ་པོ་འདི་བྱུང་བས། །ལྔ་པོ་དག་ལས་ཕྱི་ནང་སྣོད་བཅུད་འཁྲུལ། །རིག་པ་མ་འགགས་འབྱུང་བ་རྣམ་ལྔར་འཁྲུལ། །སང་སང་མིང་དང་སེང་སེང་གསལ་བ་དང་། །སྣང་སྟོང་གོ་འབྱེད་འདུག་སྙམ་ནམ་མཁར་བཟུང་། །བཟུང་བའི་ཞེན་པ་འཁྲུལ་པའི་འབྲས་བུར་སྨིན། །བརྟས་འཐས་མཁྲང་དང་སྲ་བ་བརྟན་པ་དང་། །འདེགས་པ་ཡིན་ནོ་སྙམ་ནས་སར་བཟུང་བས། །བཏགས་ཞིང་ཞེན་པས་ས་རུ་འཁྲུལ་པའོ། །མེར་མེར་རླན་དང་སྦངས་དང་གཤེར་བ་དང་། །སྡུད་པ་ཆུ་ཡིན་སྙམ་ནས་ཆུ་རུ་བཟུང་། །བཟུང་བས་ཞེན་ནས་ཆུ་ཡི་དངོས་པོར་སྣང་། །ཚ་ཞིང་བསྲེག་དང་འབར་ཞིང་མཆེད་པ་ལ། །མེ་ཡིན་སྙམ་ནས་མེར་གཟུང་མེར་སྣང་བས། །མེ་རུ་བཟུང་བས་མེ་ཡི་འཁྲུལ་པར་སྨིན། །ཡང་ཞིང་གཡོ་དང་འགུལ་དང་ལྡེག་པ་དང་། །བསྐྱོད་བྱེད་རླུང་ཡིན་སྙམ་ནས་རླུང་དུ་བཟུང་། །བཟུང་བས་ཞེན་ནས་རླུང་གི་འཁྲུལ་པ་སྨིན། །དེ་ལྟར་འབྱུང་ལྔ་དངོས་ཡོད་མཚན་མ་ཡི། །རིགས་མཐུན་མིང་གི་འཁྲུལ་པ་སྨིན་པའོ། །རྩལ་གྱི་ཡན་ལག་རིག་པའི་ཟེར་གཡོས་པས། །འཁོར་ལོ་གསུམ་དུ་ཡིད་གཡོ་མོར་མཐོང་བས། །མཐོང་ ― DNG002_Page_0583 ―
[མ་དཔེ་གཟིགས་ན་འདིར་གནོན།]
བའི་མོར་བསྒྲིབས་མོ་རུ་སྣང་ཞིང་འཁྲུལ། །རང་གི་རིག་པ་ཕོར་སྣང་ཕོར་བཟུང་འཁྲུལ། །ཆོས་ཉིད་མི་རྟོག་དག་པའི་བདེ་བ་ལ། །ཕོ་མོར་བཟུང་བའི་རིག་པས་བདེ་མྱོང་བས། །ཕོ་མོས་འདོད་ཆགས་སྤྱད་པ་ཡིན་སྙམ་འཁྲུལ། །དེས་ནི་རིག་པ་སླར་ལ་ལངས་པ་དེས། །དེ་ལྟར་འདོད་ཅིང་ཆགས་པས་འདོད་ཆགས་བཟུང་། །བཟུང་བའི་ཞེན་པ་འདོད་ཆགས་འཁྲུལ་པ་སྨིན། །ཡན་ལག་རིག་སྐྱེས་འཁོར་ལོ་གསུམ་གཡོས་པས། །ཕོ་གཞན་མཐོང་སྟེ་རིག་པའི་བདེ་བཟུང་བས། །གཉིས་མེད་མ་རྟོགས་དགའ་བའི་བདེ་བ་དེ། །ངེས་སྤྱད་སྙམ་ནས་ཞེ་སྡང་སྐྱེས་པ་ལ། །སྐྱེས་པའི་ཞེ་སྡང་འཁྲུལ་པའི་འབྲས་བུར་སྨིན། །དེ་ནས་རང་གི་ལོག་རྟོག་ཕྲག་དོག་སྐྱེས། །སྐྱེས་པའི་ཕྲག་དོག་འཁྲུལ་པའི་འབྲས་བུར་སྨིན། །དེ་ནས་རང་གི་མིང་གི་གྲིབ་མས་བསྒྲིབས། །གཞན་མཐོང་གཞན་ལས་བདག་ཆེ་སྙམ་པའི་ང་རྒྱལ་སྐྱེས། །སྐྱེས་པའི་ང་རྒྱལ་འཁྲུལ་པའི་སྣང་བའོ། །ལོག་པར་ལྟ་བའི་མིང་གི་བག་ཆགས་བརྟས། །བརྟས་པའི་བག་ཆགས་མ་རིག་འཁྲུལ་པར་སྨིན། །དེ་ལྟར་ཉོན་མོངས་རྣམ་ལྔ་འཁྲུལ་པའོ། །ཡན་ལག་རྟོག་སྐྱེས་རིག་པའི་མིང་བཏགས་པ། །ནམ་མཁའ་གསལ་ལ་དངས་པའི་གཟུགས་སུ་འདུག །བལྟ་བའི་ཡུལ་ཡིན་སྙམ་སྟེ་གཟུགས་སུ་བཟུང་། །བཟུང་བས་མིང་གིས་བསྒྲིབས་ནས་གཟུགས་སུ་འཁྲུལ། །དེ་ནས་རང་གི་ལོག་རྟོག་སྐྱེས་པ་དེས། །མེ་ལ་ཚ་དང་དྲོ་བ་སྨིན་པ་དེ། །མཉན་པའི་ཡུལ་ཡིན་སྙམ་སྟེ་སྒྲ་རུ་བཟུང་། །བཟུང་བའི་མིང་གིས་བསྒྲིབས་ཏེ་སྒྲ་རུ་འཁྲུལ། །རྩལ་སྣང་རང་གི་ལོག་རྟོག་ཡང་སྐྱེས་པས། །ཆུ་ལས་རླན་དང་གཤེར་དང་སྦངས་པ་འདི། །རོར་འདུག་མྱོང་རྒྱུར་འདུག་སྙམ་རོ་རུ་བཟུང་། །བཟུང་བས་མིང་གི་བག་ཆགས་རོ་རུ་འཁྲུལ། །དེ་ནས་རང་གི་ལོག་རྟོག་ཡང་སྐྱེས་པས། །རླུང་ལས་ཡང་ཞིང་གཡོ་བའི་བསྐྱོད་པ་འདི། །དྲིར་འདུག་བསྣམ་པའི་ཡུལ་ཡིན་དྲི་རུ་བཟུང་། །བཟུང་བས་མིང་གིས་བག་ཆགས་དྲི་རུ་འཁྲུལ། །དེ་ནས་རང་གི་རྣམ་རྟོག་ལངས་པ་ནས། །ས་ལ་སྲ་ཞིང་བརྟན་ལ་འདེགས་པ་འདི། །འཇམ་རྩུབ་འདུག་སྙམ་རེག་བྱའི་ཡུལ་དུ་བཟུང་། །བཟུང་བས་མིང་གི་བག་ཆགས་རེག་བྱར་འཁྲུལ། །དེ་ ― DNG002_Page_0584 ―
[མ་དཔེ་གཟིགས་ན་འདིར་གནོན།]
ལྟར་འདོད་ཡོན་རྣམ་ལྔ་བག་ཆགས་ཏེ། །སྙིང་པོ་ཉིད་དང་ཡན་ལག་སེམས་ལ་ཆགས། །ཆགས་པའི་བག་ཆགས་འདོད་ཡོན་ལྔར་འཁྲུལ་པའོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། འབྱུང་ལྔ་དུག་ལྔ་འདོད་ཡོན་ལྔ་རུ་འཁྲུལ་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །མཚོན་མེད་སྟོན་པ་ཀུན་བཟང་ལ། །ཕུང་པོ་ཁམས་དང་རྟེན་འདྲེལ་འབྱུང་བ་དང་། །གཟུགས་ཀྱི་ཁྱད་པར་དབྱིབས་སུ་སྣང་བ་དང་། །ཕྱོགས་དང་ཁ་དོག་མཚན་མ་སྣ་ཚོགས་དང་། །ཁམས་གསུམ་འགྲོ་དྲུག་རིགས་མཐུན་མོས་མཐུན་འདི། །འདྲ་མཐུན་མིང་གི་བག་ཆགས་ཇི་ལྟར་འཁྲུལ། །ཞེས་གསོལ་པ་དང་། སྟོན་པས་འདུས་པའི་འཁོར་ལ་བཀའ་སྩལ་པ། །རང་བྱུང་རྩལ་གྱི་ཡན་ལག་རིག་པ་ཟེར་གཡོས་པས། །ཡུལ་ལྔའི་བག་ཆགས་གདོད་ནས་སྣང་བ་ཡིས། །ཡུལ་ལྔ་དེ་ལ་རིག་པས་རེག་པ་ཡི། །རེག་པས་ཚོར་ཏེ་ཉམས་སུ་མྱོང་བ་དེས། །ཚོར་བ་ཡིན་ནོ་སྙམ་ནས་ཚོར་བར་བཟུང་། །བཟུང་བས་མིང་གི་བག་ཆགས་ཚོར་བར་འཁྲུལ། །དེ་ལ་འདོད་པ་སྐྱེས་པས་འདུ་ཤེས་ཏེ། །ཤེས་སོ་སྙམ་ནས་འདུ་ཤེས་སུ་བཟུང་ནས། །བཟུང་བས་མིང་གི་བག་ཆགས་འདུ་ཤེས་འཁྲུལ། །འཁྲུལ་པ་དེ་ལ་བླང་བའི་ཤེས་པ་སྐྱེས། །རྣམ་པ་སྣ་ཚོགས་འདུ་བར་སྤྱོད་སྐྱེས་པས། །འདུ་ཞིང་བྱེད་འདུག་སྙམ་ཏེ་འདུ་བྱེད་དུ། །བཟུང་བས་མིང་གི་བག་ཆགས་ཡིད་དུ་འཁྲུལ། །སྣང་བའི་འོད་རྣམས་ཁ་དོག་གཅིག་ཏུ་བཞུགས། །འདུས་པའི་བག་ཆགས་བརྟས་པས་གཟུགས་སུ་འཁྲུལ། །སྣང་བ་དེ་ལྔ་གཅིག་ཏུ་འདུས་པ་ལས། །ཕུང་པོ་ལྔ་ཡི་མིང་བཏགས་བརྟས་པ་ལས། །ངོ་བོའི་ཆ་བཟུང་འོད་ཀྱི་གཟུགས་སུ་བྱུང་། །རང་རང་བག་ཆགས་ཇི་ལྟར་བརྟས་མཐོང་སྟེ། །རང་རང་ལུས་ལ་བཟང་དང་ངན་མཐོང་སྟེ། །ཆེ་དང་ཆུང་བའི་གཟུགས་སུ་འཁྲུལ། །རིང་དང་ཐུང་དང་གྲ་དང་ཟླུམ། །ཡན་ལག་མང་ཉུང་སྦོམ་དང་ཕྲ། །ལེགས་དང་མ་ལེགས་འོད་བཟུང་གིས། །རང་རང་མཐོང་སྟངས་ཇི་བཞིན་དུ། །བཟུང་བས་མིང་ ― DNG002_Page_0585 ―
[མ་དཔེ་གཟིགས་ན་འདིར་གནོན།]
གི་བག་ཆགས་འདུ་བྱེད་དྲུག་ཏུ་འཁྲུལ། །སྣང་བ་ཀུན་ལ་ང་དང་བདག་ཏུ་བཟུང་། །ཡིད་ཡིན་སྙམ་ཏེ་ཡིད་དུ་བཟུང་བ་ཡིས། །རང་བྱུང་ཡེ་ཡོད་རྩལ་སྣང་ཟེར་གཡོས་པས། །ཟེར་གྱི་སྣང་ཚུལ་འཁོར་ལོ་གསུམ་གཡོས་པས། །དེ་ཡི་རྐྱེན་གྱིས་ཕོ་མོའི་གཟུགས་སུ་འཁྲུལ། །དེ་ཡི་རྐྱེན་གྱིས་བྲལ་དང་ལེན་པར་མཐོང་། །མཐོང་བའི་དབང་གིས་བླང་དང་ལེན་པ་མཐོང་། །ལེན་པའི་དབང་གིས་འདོད་ཅིང་ཆགས་ཚུལ་སྤྱད། །སྤྱད་པའི་རྐྱེན་གྱིས་རང་བྱུང་ཡན་ལག་གིས། །རིག་པ་གཞན་ཞིག་འཁྲུལ་ནས་དེར་འབྱུང་སྟེ། །དེ་བྱུང་དེ་ལ་གོང་བཞིན་བརྟན་པ་དེས། །སྲིད་པ་སྤྱད་པས་འབྱུང་སྙམ་བཟུང་བས་བུ། །སྐྱེས་པའི་རྐྱེན་གྱིས་བུར་བཟུང་འཁྲུལ་པ་དེ། །ཆོས་ཉིད་རླན་གྱི་ཉལ་ཉལ་སོང་བ་ལ། །སྐྱེས་དེ་རྒས་པ་སྙམ་ནས་རྒས་པར་བཟུང་། །བཟུང་བས་མིང་གི་སྒྲིབ་པས་ཤི་བར་བཟུང་། །དེ་ལྟར་ཡན་ལག་ཆོས་ཉིད་ངང་སོང་ལ། །ན་བ་ཤི་བ་གཉིད་དང་ཉི་མ་ནུབ། །ས་སྲོས་པ་ཡི་རྣམ་པར་མཐོང་བས་འཁྲུལ། །ཡན་ལག་ཤེས་པ་སླར་ལ་ལངས་པ་དེས། །སྐྱེས་དང་གཉིད་སད་ནམ་ལངས་ཉི་ཤར་དང་། །ཡན་ལག་རྩལ་གྱི་འབྱུང་བ་འོད་ལྔ་དང་། །རྩལ་གྱི་ཡན་ལག་རིག་པ་སྐྱེས་པ་དེས། །གསལ་དང་མ་རྟོགས་གནས་པས་ནུབ་ཏུ་འཁྲུལ། །རྩལ་གྱི་ཡན་ལག་འབྱུང་བས་ཤར་དུ་འཁྲུལ། །ཡན་ལག་རྒྱ་མ་ཆད་པས་ལྷོ་རུ་བཟུང་། །བཟུང་བས་མིང་བཏགས་བག་ཆགས་ལྷོ་རུ་འཁྲུལ། །ཡན་ལག་མི་གཡོ་བ་ལས་བྱང་དུ་བཟུང་། །བཟུང་བས་མིང་གི་བག་ཆགས་བྱང་དུ་འཁྲུལ། །ཡན་ལག་མི་འགྱུར་དབུས་དང་མཚམས་སུ་བཟུང་། །བཟུང་བའི་མིང་བསྒྲིབས་དབུས་དང་མཚམས་སུ་འཁྲུལ། །དེ་ལྟར་མིང་བཏགས་ཕྱོགས་དང་རིས་སུ་འཁྲུལ། །དེ་ནས་ཡན་ལག་ལོག་རྟོག་ལས་བསྐྱེད་པས། །ཡན་ལག་རང་གསལ་ཁ་དོག་དཀར་པོ་བཟུང་། །བཟུང་བས་མིང་གིས་བསྒྲིབས་པས་དཀར་པོར་འཁྲུལ། །ཡན་ལག་རང་གསལ་མ་གཡོས་སྔོན་པོར་འཁྲུལ། །ཡན་ལག་རྒྱ་མ་ཆད་པས་དམར་པོར་འཁྲུལ། །ཡན་ལག་མི་འགྱུར་བ་ལས་སེར་པོར་འཁྲུལ། །ཡན་ལག་གཡོས་ཤིང་འགུལ་བས་ལྗང་གུར་འཁྲུལ། །དེ་ལྟར་ཡན་ལག་བག་ཆགས་བརྟས་སྣང་ལ། །ལ་ལས་སྣོད་མཐོང་ ― DNG002_Page_0586 ―
[མ་དཔེ་གཟིགས་ན་འདིར་གནོན།]
ལ་ལས་བཅུད་དུ་མཐོང་། །མཐོང་བའི་མིང་གིས་བག་ཆགས་སྣོད་བཅུད་འཁྲུལ། །ལ་ལས་བཟང་མཐོང་ལ་ལས་ངན་པར་མཐོང་། །བཟང་མཐོང་དེ་ལ་ཞེན་ཅིང་ཆགས་པ་སྐྱེས། །ངན་མཐོང་དེ་ལ་སྣང་དང་ང་རྒྱལ་སྐྱེས། །མཉམ་མཐོང་འདྲ་བ་དེ་ལ་ཕྲག་དོག་སྐྱེས། །སྐྱེས་པའི་བག་ཆགས་བཟང་ངན་མ་མཐོང་སྟེ། །དགེ་སྡིག་སྤྱད་པའི་དབང་ལས་འཁྲུལ་པར་བཟུང་། །བཟུང་བའི་གྲིབ་མ་དགེ་སྡིག་གཉིས་སུ་སྣང་། །དེ་ལྟར་རང་གི་བག་ཆགས་སྣ་ཚོགས་པ། །རང་བྱུང་ཆོས་སྐུའི་རྩལ་དང་ངང་ཉིད་དུ། །སོ་སོ་རང་རང་གསལ་བའི་མཚན་ཉིད་སྣང་། །དེ་ལྟར་གཟུགས་བརྙན་ཁ་མིག་སྣ་ལ་སོགས། །མཚན་དང་དཔེ་བྱད་རྒྱན་དང་ལྡན་པ་ཡི། །འོད་ཀྱི་རང་བཞིན་ལོངས་སྤྱོད་རྫོགས་སྐུར་འཁྲུལ། །སྒྲ་ཡི་ལོངས་སྤྱོད་འོད་ཀྱི་འདོད་ཡོན་སྤྱོད། །རང་བྱུང་རྩལ་གྱི་ཡིད་འཁོར་གསུམ་གཡོས་པས། །ཡོད་མིན་མེད་མིན་སེམས་ཀྱི་གཟུགས་སུ་བཟུང་། །བཟུང་བའི་རིགས་མཐུན་སེམས་ཅན་སྐྱེ་ཞིང་མཆེད། །སྐྱེ་ཞིང་མཆེད་པའི་སེམས་ཅན་དེ་རྣམས་ལས། །ཡོད་མིན་མེད་མིན་སྐྱེ་མཆེད་གཟུགས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་དེས། །ཅི་ཡང་མེད་པའི་སེམས་ཀྱི་རིགས་མཐུན་བཟུང་། །བཟུང་བའི་རིགས་མཐུན་སེམས་ཅན་སྐྱེ་ཞིང་མཆེད། །སྐྱེ་ཞིང་མཆེད་པའི་སེམས་ཅན་དེ་རྣམས་ལ། །ཅི་ཡང་མེད་པའི་སྐྱེ་མཆེད་མིང་དུ་བཏགས། །བཏགས་པའི་བག་ཆགས་མེད་པའི་སྐྱེ་མཆེད་འཁྲུལ། །རྩལ་སྣང་རིག་སྐྱེས་འཁོར་ལོ་གསུམ་གཡོས་པས། །རྣམ་ཤེས་མཐའ་ཡས་སེམས་ཀྱི་རིགས་སུ་བཟུང་། །བཟུང་བས་རྣམ་ཤེས་མཐའ་ཡས་ཉིད་དུ་འཁྲུལ། །རྩལ་གྱི་ཡན་ལག་འཁྲུལ་འཁོར་གསུམ་སྐྱེས་པས། །ནམ་མཁའ་མཐའ་ཡས་སྐྱེ་མཆེད་རིགས་མཐུན་བཟུང་། །བཟུང་བས་ནམ་མཁའ་མཐའ་ཡས་སྐྱེ་མཆེད་དག་ཏུ་འཁྲུལ། །གཟུགས་མེད་ཁམས་ཀྱི་སྐྱེ་མཆེད་མུ་བཞིར་འཁྲུལ་པའོ། །སྣོད་བཅུད་ཆགས་ཏེ་བག་ཆགས་བརྟས་སྣང་བའོ། །རྩལ་གྱི་ཡན་ལག་འོད་གཟུགས་བརྟས་པ་ལ། །འོག་མིན་ ― DNG002_Page_0587 ―
[མ་དཔེ་གཟིགས་ན་འདིར་གནོན།]
རིགས་ཀྱི་རིགས་མཐུན་གཟུགས་སུ་བཟུང་། །བཟུང་བའི་བག་ཆགས་འོག་མིན་ལྷ་རུ་འཁྲུལ། །རྩལ་གྱི་ཡན་ལག་འོད་གཟུགས་བརྟས་པ་ལས། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །ཤིན་ཏུ་མཐོང་བའི་འོད་གཟུགས་རིགས་གཟུང་བས། །བཟུང་བའི་བག་ཆགས་ཤིན་ཏུ་མཐོང་བར་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །གྱ་ནོམ་སྣང་བའི་འོད་གཟུགས་རིགས་སུ་བཟུང་། །བཟུང་བའི་བག་ཆགས་གྱ་ནོམ་སྣང་དུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །མི་གདུང་རིགས་ཀྱི་གཟུགས་སུ་འཛིན་པས་བཟུང་། །བཟུང་བའི་བག་ཆགས་མི་གདུང་གཟུགས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །མི་ཆེ་བ་ཡི་རིགས་ཀྱི་གཟུགས་སུ་བཟུང་། །བཟུང་བའི་བག་ཆགས་མི་ཆེའི་གཟུགས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །འབྲས་བུ་ཆེ་བའི་འོད་གཟུགས་རིགས་སུ་བཟུང་། །བཟུང་བའི་བག་ཆགས་འབྲས་བུ་ཆེ་རུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །བསོད་ནམས་འོད་ཀྱི་གཟུགས་ཀྱི་རིགས་སུ་བཟུང་། །བཟུང་བའི་བག་ཆགས་བསོད་ནམས་སྐྱེས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །སྤྲིན་མེད་འོད་ཀྱི་རིགས་མཐུན་གཟུགས་སུ་བཟུང་། །བཟུང་བའི་བག་ཆགས་སྤྲིན་མེད་གཟུགས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །དགེ་རྒྱས་རིས་ཀྱི་རིགས་མཐུན་གཟུགས་སུ་གཟུང་། །བཟུང་བའི་བག་ཆགས་དགེ་རྒྱས་གཟུགས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །ཚད་མེད་དགེ་བའི་རིགས་མཐུན་གཟུགས་སུ་བཟུང་། །བཟུང་བའི་བག་ཆགས་ཚད་མེད་དགེ་རུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །དགེ་ཆུང་རིས་ཀྱི་གཟུགས་མཐུན་རིགས་སུ་བཟུང་། །བཟུང་བའི་བག་ཆགས་དགེ་ཆུང་གཟུགས་སུ་འཁྲུལ། །རྩལ་གྱི་ཡན་ལག་འོད་ཀྱི་གཟུགས་བརྟས་ལས། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །འོད་གསལ་ལྷ་ཡི་གཟུགས་མཐུན་རིགས་སུ་བཟུང་། །བཟུང་བའི་བག་ཆགས་ ― DNG002_Page_0588 ―
[མ་དཔེ་གཟིགས་ན་འདིར་གནོན།]
འོད་གསལ་ལྷ་རུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །ཚད་མེད་འོད་ཀྱི་གཟུགས་མཐུན་རིགས་སུ་བཟུང་། །བཟུང་བའི་བག་ཆགས་ཚད་མེད་འོད་དུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །ཚངས་ཆེན་གཟུགས་ཀྱི་རིགས་མཐུན་གཟུགས་སུ་བཟུང་། །བཟུང་བའི་བག་ཆགས་ཚངས་ཆེན་གཟུགས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་གཡོས་པས། །ཚངས་པ་མདུན་ན་འདོན་པའི་གཟུགས་སུ་བཟུང་། །བཟུང་བའི་བག་ཆགས་མདུན་ན་འདོན་དུ་འཁྲུལ། །རྩལ་གྱི་ཡན་ལག་འོད་གསལ་གཟུགས་བརྟས་པས། །རྩལ་གྱི་ཡན་ལག་འཁོར་ལོ་གསུམ་གཡོས་པས། །ཚངས་རིགས་གཟུགས་མཐུན་ཚངས་རིགས་གཟུགས་སུ་བཟུང་། །བཟུང་བའི་བག་ཆགས་ཚངས་རིགས་གཟུགས་སུ་འཁྲུལ། །བསམ་གཏན་དང་པོར་བག་ཆགས་བརྟས་སྣང་བ། །དེ་ལྟར་གཟུགས་ཁམས་གནས་རིགས་བཅུ་བདུན་གྱི། །སྣོད་བཅུད་བག་ཆགས་འོད་གཟུགས་བརྟས་སྣང་བའོ། །རང་བྱུང་ཡན་ལག་དངོས་པོར་བརྟས་པ་ལ། །རྩལ་གྱི་ཡན་ལག་རྟོག་པའི་ཡིད་གཡོས་པས། །གཞན་འཕྲུལ་དབང་བྱེད་རིགས་མཐུན་གཟུགས་སུ་བཟུང་། །བཟུང་བའི་བག་ཆགས་གཞན་འཕྲུལ་དབང་བྱེད་དག་ཏུ་འཁྲུལ། །རྩལ་གྱི་ཡན་ལག་རྟོག་པའི་ཡིད་གཡོས་པས། །འཕྲུལ་དགའི་རིགས་ཀྱི་གཟུགས་མཐུན་གཟུགས་སུ་བཟུང་། །བཟུང་བའི་བག་ཆགས་འཕྲུལ་དགའི་གཟུགས་སུ་འཁྲུལ། །རང་བྱུང་རྩལ་གྱི་འཁོར་ལོ་ཡིད་གཡོས་པས། །དགའ་ལྡན་རིགས་ཀྱི་གཟུགས་མཐུན་ལྷ་རུ་བཟུང་། །བཟུང་བའི་བག་ཆགས་དགའ་ལྡན་ལྷ་རུ་འཁྲུལ། །རྩལ་གྱི་རིག་པ་འཁོར་ལོ་ཡིད་གཡོས་པས། །མཐའ་བྲལ་རིས་ཀྱི་གཟུགས་མཐོང་གཟུགས་སུ་འཁྲུལ། །བཟུང་བའི་བག་ཆགས་མཐའ་བྲལ་གཟུགས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་སྐྱེས་པས། །སུམ་ཅུ་རྩ་གསུམ་རིས་ཀྱི་ལྷ་རུ་བཟུང་། །བཟུང་བའི་བག་ཆགས་སུམ་ཅུ་རྩ་གསུམ་ལྷ་རུ་བཟུང་། །རྩལ་གྱི་ཡན་ལག་རིག་པའི་ཡིད་གཡོས་ ― DNG002_Page_0589 ―
[མ་དཔེ་གཟིགས་ན་འདིར་གནོན།]
པས། །རྒྱལ་ཆེན་རིགས་བཞིའི་རིགས་མཐུན་གཟུགས་སུ་བཟུང་། །བཟུང་བའི་བག་ཆགས་རྒྱལ་ཆེན་རིགས་བཞིར་འཁྲུལ། །དེ་ལྟར་འདོད་ཁམས་ལྷ་ཡི་རིགས་དྲུག་ནི། །སྣོད་བཅུད་བག་ཆགས་བརྟས་པས་འཁྲུལ་པ་ཡི། །རྩལ་གྱི་ཡན་ལག་རྟོག་པའི་ཡིད་གཡོས་པས། །རི་ཁོང་ལྷ་མིན་རིས་མཐུན་གཟུགས་སུ་བཟུང་། །བཟུང་བའི་བག་ཆགས་ལྷ་མ་ཡིན་དུ་འཁྲུལ། །རྩལ་གྱི་བག་ཆགས་རྟོག་པའི་ཡིད་གཡོས་པས། །གླིང་དང་མི་རྣམས་རིགས་མཐུན་སོ་སོར་བཟུང་། །བཟུང་བའི་བག་ཆགས་གླིང་དང་མི་རྣམས་འཁྲུལ། །ཡན་ལག་རྟོག་པའི་དངོས་པོ་ཡང་སྐྱེས་པས། །བྱོལ་སོང་རྣམས་ཀྱི་རིགས་མཐུན་བཟུང་བ་དང་། །ཡི་དྭགས་རྣམས་ཀྱི་རིགས་མཐུན་བཟུང་བ་དང་། །དམྱལ་བ་རྣམས་ཀྱི་རིགས་མཐུན་གཟུགས་སུ་བཟུང་། །བཟུང་བའི་བག་ཆགས་རྣམ་རྟོག་མཐུ་བརྟས་པས། །དམྱལ་བ་རྣམས་ཀྱི་རིགས་མཐུན་ཚ་གྲང་བ། །ཡང་སོས་ཐིག་ནག་བསྡུས་འཇོམ་ངུ་འབོད་དང་། །ངུ་འབོད་ཆེ་དང་ཚ་བ་རབ་ཏུ་ཚ། །མནར་མེད་པ་སྟེ་ཚ་བའི་དམྱལ་བརྒྱད་རིགས། །ཆུ་བུར་ཅན་དང་ཆུ་བུར་བརྡོལ་བ་ཅན། །ཨ་ཆུ་ཟེར་དང་སོ་ཐམ་ཐམ་པ་དང་། །ཀྱི་ཧུད་ཟེར་དང་ཨུཏྤལ་ལྟར་གས་དང་། །པདྨ་ལྟར་གས་པདྨ་ཆེར་གས་ཏེ། །བཟུང་བའི་བག་ཆགས་ཚ་གྲང་སོ་སོར་འཁྲུལ། །དེ་ལྟར་འདོད་ཁམས་གནས་རིགས་ཉི་ཤུར་འཁྲུལ་པའོ། །སོ་སོར་རྒྱས་པར་གྲངས་མེད་འཁྲུལ་པའོ། །རྩལ་གྱི་ཡན་ལག་རྟོག་པ་སྐྱེས་པ་ཡང་། །དེར་ཡེངས་ལེ་ལོ་སྔོན་བཏང་གཙོར་བཟུང་བས། །བཟུང་བའི་བག་ཆགས་མཐུ་བརྟས་ལྷ་རུ་འཁྲུལ། །རྩལ་གྱི་ཡན་ལག་རྟོག་པའི་ཡིད་གཡོས་པ། །བརྟས་པས་དངོས་པོའི་བག་ཆགས་ངན་པ་མཐོང་། །མཐོང་བས་ང་བཟང་སྙམ་ཏེ་ང་རྒྱལ་སྐྱེས། །ང་རྒྱལ་སྔོན་བཏང་ང་རྒྱལ་གཙོར་བཟུང་བས། །བཟུང་བའི་བག་ཆགས་མང་པོ་མཐུར་བརྟས་པས། །བརྟས་པའི་བག་ཆགས་ལྷ་མ་ཡིན་དུ་འཁྲུལ། །རྩལ་གྱི་ཡན་ལག་རྟོག་པ་ཡང་སྐྱེས་པས། །ཡན་ལག་དངོས་པོ་འདྲ་མཐུན་མཉམ་པར་མཐོང་། །མཐོང་བ་དེ་ལ་ང་རྒྱལ་ཕྲག་དོག་ ― DNG002_Page_0590 ―
[མ་དཔེ་གཟིགས་ན་འདིར་གནོན།]
སྐྱེས། །ཕྲག་དོག་སྔོན་དང་ཕྲག་དོག་གཙོར་བཟུང་བས། །བཟུང་བའི་བག་ཆགས་མང་པོ་མཐུར་བརྟས་ཏེ། །བརྟས་པས་བག་ཆགས་མི་ཡི་གཟུགས་སུ་འཁྲུལ། །རྩལ་གྱི་ཡན་ལག་རྟོག་པ་ཡང་སྐྱེས་པས། །རྩལ་གྱི་ཡན་ལག་དངོས་པོར་བརྟས་པ་ལ། །བརྟས་པས་རིག་པར་མ་མཐོང་ཤེས་པར་མཐོང་། །མ་ཤེས་མཐོང་བས་མ་རིག་གཏི་མུག་སྐྱེས། །གཏི་མུག་སྐྱེས་པ་སྔོན་བཏང་གཙོར་བཟུང་བས། །བཟུང་བའི་བག་ཆགས་མང་པོ་མཐུར་བརྟས་ཏེ། །བལྟས་པས་བག་ཆགས་འགྲོ་བ་བྱོལ་སོང་འཁྲུལ། །རྩལ་གྱི་ཡན་ལག་ལོངས་སྤྱོད་ནོར་དུ་མཐོང་། །མཐོང་བ་དེ་ལ་ཕོངས་སྙམ་སེར་སྣ་སྐྱེས། །སྐྱེས་པའི་སེར་སྣ་སྔོན་བཏང་གཙོར་བཟུང་བས། །བཟུང་བའི་བག་ཆགས་མང་པོ་མཐུར་བརྟས་ཏེ། །ཕྱི་སྒྲིབ་ནང་སྒྲིབ་ཡི་དྭགས་གཟུགས་སུ་འཁྲུལ། །རྩལ་གྱི་ཡན་ལག་འཁོར་ལོ་གསུམ་གཡོས་པས། །རྩལ་གྱི་ཡན་ལག་རིག་པ་དངོས་སྣང་ལ། །བལྟས་པས་ངན་སྐྱེས་གནོད་པ་བྱེད་པ་མཐོང་། །མཐོང་བའི་དེ་གནོད་སྙམ་ནས་ཞེ་སྡང་སྐྱེས། །སྐྱེས་པའི་ཞེ་སྡང་སྔོན་བཏང་གཙོར་བཟུང་བས། །བཟུང་བའི་བག་ཆགས་མང་པོ་མཐུར་བརྟས་ནས། །འགྲོ་བ་དམྱལ་བའི་གཟུགས་སུ་འཁྲུལ་པའོ། །དེ་ལྟར་འཇིག་རྟེན་ཁམས་འདི་གྲངས་མེད་ན། །འགྲོ་བ་རིགས་དྲུག་འཁྲུལ་ནས་དེ་བཞིན་སྣང་། །སྣང་བའི་འདྲ་མཐུན་བག་ཆགས་འཁྲུལ་པའོ། །ཁམས་གསུམ་འགྲོ་དྲུག་དངོས་པོར་སྣང་བ་དང་། །ཕྱི་ནང་སྣོད་བཅུད་སྲིད་པ་སྐྱེ་འགུལ་རྣམས། །ཇི་ལྟར་འཁྲུལ་ལུགས་འཁྲུལ་སྣང་གཏན་ལ་ཕབ་པའོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཇི་ལྟར་འཁྲུལ་ལུགས་གཏན་ལ་ཕབ་པའི་ལེའུ་སྟེ་ལྔ་པའོ།། །།ཨ་ཐ་བྷ་རི་ས་ཀ་ཏ་ཡ། བེ་མ་ལ་པ་ཏི། བཛྲ་ཨ་པ་ག་ཏ་ཏ་ཡ་ན། ཝ་ཀུ་བི་རི་བྷི་ལི་ཨི་བ་ར་ཡ། ཨ་ལ་ཨ་ཐིམ་ཀ་ཨི། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །གོང་གི་འཁྲུལ་པའི་འཁྲུལ་སྣང་དེ། །འཁྲུལ་གཞི་རྩད་ནས་ཇི་ལྟར་བཅད། །དེ་སྐད་ཅེས་གསོལ་པ་དང་། ― DNG002_Page_0591 ―
[མ་དཔེ་གཟིགས་ན་འདིར་གནོན།]
མཚོན་བྱེད་སྟོན་པ་ཀུན་བཟང་དེ། རིན་པོ་ཆེ་ཁ་སྦྱོར་དབྱེར་མེད་ཀྱི་ཏིང་ངེ་འཛིན་ལ་བཞུགས་སོ། །དེ་ནས་སྟོན་པ་ཀུན་བཟང་གིས། །བཞེངས་ནས་འཁོར་ལ་འདི་སྐད་གསུངས། །ང་ཡིས་འཁྲུལ་སྣང་རྩད་གཅོད་བཤད། །རྡོ་རྗེ་སེམས་དཔས་གོ་བར་ཉོན། །ཨ་ཏ་པ་ཏི་ཨ་གཱ་ས། བྷ་ཝ་ཨ་ལི་ཀང་ཀང་ཨ། འཁྲུལ་གཞི་རྩད་ནས་བཅད་ཐབས་ནི། །བློ་ལ་རབ་འབྲིང་ཐ་མ་གསུམ། །དེ་ཡི་བཅད་པའི་ཐབས་བསྟན་པའི། །དབང་པོ་རབ་ཀྱི་བཅད་ཐབས་ནི། །གཞི་རྩ་ཡིད་གཉིས་ཆོད་པས་ཆོག །གཞི་རྩ་ཆོད་པས་འཁྲུལ་སྣང་ཆོད། །གཞི་མོ་དོན་ཤེས་འཁྲུལ་དུ་མེད། །དུག་ངོ་ཤེས་ན་དུག་རྩ་ཆོད། །དཔེར་ན་ཧ་ལ་ནག་པོའི་དུག །སྔགས་དང་ཐབས་ལྡན་གང་ཟོས་པ། །མི་འཆི་སླར་ལ་སྨན་དུ་འགྱུར། །དེ་བཞིན་འཁྲུལ་གཞི་འཁྲུལ་སྣང་ཡང་། །གཞི་འཁྲུལ་རྩད་ཆོད་རྗེས་མི་འབྲང་། །རང་སངས་ཡེ་ཤེས་ངང་ཐིམ་པས། །གཅད་བྱ་གཅོད་བྱེད་གཉིས་མེད་དེ། །འཁྲུལ་གཞིའི་འཁྲུལ་སྣང་རྩད་ནས་གཅོད། །དབང་པོ་འབྲིང་གི་བཅད་ལུགས་ནི། །གཞི་ནི་ཀུན་ཁྱབ་སྤྱི་ཕུད་དེ། །མིང་འདོགས་མེད་པར་རྩད་ནས་ཆོད། །འཁྲུལ་པ་ཀུན་ཏུ་ཚོལ་བའི་ཡིད། །གཞི་ལ་ངེས་པར་སྤྲོས་པ་ཆོད། །གཞི་ནི་ཡེ་ནས་གནས་པ་སྟེ། །འཕོ་འགྱུར་མེད་པར་སྤྲོས་པ་ཆོད། །འགྱུ་བ་ཡིད་རྟོག་གློ་བུར་བ། །གཞི་ལ་མེད་ཀྱིས་སྤྲོས་པ་ཆོད། །གཞི་ནི་བློ་འདས་མཚོན་མེད་དེ། །འཁྲུལ་པ་བསམ་བརྗོད་རྟོག་པའི་ཚིག །མཚོན་བརྗོད་བསམ་འདས་རྩད་ནས་ཆོད། །གཞི་ནི་ཀུན་གཞིའི་རྣམ་ཤེས་ཏེ། །ཀུན་ཁྱབ་དངོས་མེད་རྩད་ནས་ཆོད། །འཁྲུལ་པ་འོད་ལྔ་འབྱུང་བ་སྟེ། །རང་བཞིན་གཞི་ལ་མ་གྲུབ་སྟེ། །རྩལ་སྣང་ཡིན་གྱིས་རྩད་ནས་ཆོད། །རྩལ་དང་ཟེར་དང་ཁྱབ་བྱེད་གསུམ། །ཤུགས་འབྱུང་ཡིན་གྱིས་རྩད་ནས་ཆོད། །ཡན་ལག་མཚན་ཉིད་བུ་དང་གསུམ། །རྒྱ་ཆད་མེད་ཀྱིས་རྩད་ནས་ཆོད། །ཤེས་པ་རིག་པ་མ་རིག་གསུམ། །འཁྲུལ་པའི་རྒྱུ་ཡིན་རྩད་ནས་ཆོད། །ཡིད་དང་རླུང་དང་སེམས་དང་གསུམ། །འཁྲུལ་པའི་རྐྱེན་ཡིན་རྩད་ནས་ཆོད། །འཁྲུལ་སྒོ་མིན་པ་མི་གསལ་གསུམ། །འཁྲུལ་པའི་དུས་ཡིན་རྩད་ནས་ཆོད། །ང་མེད་པ་ལ་ངར་ ― DNG002_Page_0592 ―
[མ་དཔེ་གཟིགས་ན་འདིར་གནོན།]
འཛིན་དང་། །མི་བདེན་པ་ལ་བདེན་འཛིན་དང་། །མི་རྟག་པ་ལ་རྟག་འཛིན་གསུམ། །འཁྲུལ་པའི་ངོ་བོ་རྩད་ནས་ཆོད། །སེམས་དང་ཡིད་དང་བག་ཆགས་གསུམ། །འཁྲུལ་ཚུལ་ཡིན་གྱིས་རྩད་ནས་ཆོད། །རིགས་གཟུགས་འོད་གཟུགས་ཤ་གཟུགས་གསུམ། །འཁྲུལ་འབྲས་ཡིན་གྱིས་རྩད་ནས་ཆོད། །སྦུར་བ་སྲིན་བུ་སྨིག་རྒྱུ་གསུམ། །འཁྲུལ་པའི་དཔེ་ཡིན་རྩད་ནས་ཆོད། །ལོག་པའི་མ་དག་བདུན་པོ་ཡི། །འཁྲུལ་པ་བདུན་པོ་རྩད་ནས་ཆོད། །དབང་པོ་ཐ་མའི་བཅད་ཚུལ་ནི། །འཁྲུལ་པའི་གཞི་ནི་རྩད་ཆོད་པས། །བཅོས་བསླད་འཕེལ་འགྲིབ་རྒྱུ་རྐྱེན་བྲལ། །འཕོ་འགྱུར་བྱ་བཙལ་འགྱུར་བ་མེད། །དངོས་མེད་མ་བཅོས་ལྷུན་གྱིས་གྲུབ། །གློ་བུར་ཆོས་ལ་རག་ལུས་མེད། །མ་བཅོས་མ་བསླད་མ་བཙལ་དོན། །འཛིན་བཅས་བློ་ལས་ཁྱད་པར་གྲོལ། །དེ་ཡིས་འཁྲུལ་གཞི་རྩད་ནས་ཆོད། །ལྷན་ཅིག་སྐྱེས་པའི་མ་རིག་དེ། །ཉོན་མོངས་ཅན་གྱི་ཡིད་ཀྱི་གཞི། །རང་གསལ་རིན་ཆེན་འོད་གསལ་འབར། །རང་སངས་སྙིང་པོའི་ཀློང་དུ་ཐིམ། །གང་གིས་འཁྲུལ་པ་འཁྲུལ་སྣང་དང་། །འཁྲུལ་གཞི་མ་རིག་རྩད་ནས་བཅད། །ཉོན་མོངས་འགྱུ་བ་ཤེས་པ་དེ། །ཡིད་ཀྱི་རྣམ་པར་ཤེས་པའི་གཞི། །རླུང་མེད་ཡིད་མེད་སེམས་མེད་པས། །འཁྲུལ་པའི་རྐྱེན་རྣམས་རྩད་ནས་བཅད། །འགྱུ་བ་སེམས་ཀྱི་ཤེས་པ་དེ། །སྒོ་ལྔའི་རྣམ་པར་ཤེས་པའི་གཞི། །འཆར་སྒོ་ཡེ་ཤེས་ཆེན་པོ་དང་། །ངང་དངས་ཡེ་ཤེས་ཟང་ཐལ་ཡིན། །འཁྲུལ་པའི་དུས་རྣམས་རྩད་ནས་བཅད། །བདེན་པའི་དོན་མཐོང་ཐེ་ཚོམ་མེད། །ཡུལ་སེམས་གཉིས་མེད་གཟུང་འཛིན་བྲལ། །རྟག་ཆད་གཉིས་མེད་གསལ་དངས་པས། །ང་བདག་མི་བདེན་འཛིན་མེད་དེ། །འཁྲུལ་པའི་ངོ་བོ་རྩད་ནས་བཅད། །སེམས་མེད་ཡིད་མེད་བག་ཆགས་མེད། །འཁྲུལ་པའི་ཚུལ་རྣམས་རྩད་ནས་བཅད། །རྒྱུ་མེད་རྐྱེན་མེད་གཟུགས་མེད་གསུམ། །འཁྲུལ་པའི་འབྲས་བུ་རྩད་ནས་བཅད། །གཞི་མེད་འཁྲུལ་མེད་ཡིད་གཉིས་མེད། །འཁྲུལ་དཔེ་གང་ཡིན་རྩད་ནས་བཅད། །འོད་ལ་འདོད་མེད་དབྱིངས་སུ་ཐིམ། །འདོད་ཁམས་ལྷར་འཁྲུལ་རྩད་ནས་ ― DNG002_Page_0593 ―
[མ་དཔེ་གཟིགས་ན་འདིར་གནོན།]
བཅད། །འོད་ལ་གཟུགས་མེད་ཆོས་ཉིད་ཀློང་དུ་ཐིམ། །གཟུགས་ཁམས་ལྷར་འཁྲུལ་རྩད་ནས་བཅད། །གནས་པའི་དོན་རྟོགས་དབྱིངས་སུ་ཐིམ། །གཟུགས་མེད་ལྷར་འཁྲུལ་རྩད་ནས་བཅད། །ཆོས་ཉིད་མ་དང་འཕྲད་པས་ཞེ་སྡང་མེད། །དམྱལ་བའི་འཁྲུལ་སྣང་རྩད་ནས་བཅད། །དབྱེར་མེད་ངང་དུ་ཐིམ་པས་སེར་སྣ་མེད། །ཡི་དྭགས་འཁྲུལ་སྣང་རྩད་ནས་བཅད། །མ་རིག་མུན་སངས་ཡེ་ཤེས་རང་ཤར་བས། །བྱོལ་སོང་འཁྲུལ་སྣང་རྩད་ནས་བཅད། །འཁྲུལ་པ་རང་སངས་ཕྲག་དོག་ཆོད། །མི་རྣམས་འཁྲུལ་སྣང་རྩད་ནས་བཅད། །རྣམ་རྟོག་རང་གྲོལ་ང་རྒྱལ་མེད། །ལྷ་མིན་འཁྲུལ་སྣང་རྩད་ནས་བཅད། །སྐྱེ་མེད་དོན་རྟོགས་ཆགས་ཞེན་མེད། །ལྷ་ཡི་འཁྲུལ་སྣང་རྩད་ནས་བཅད། །སྙིང་པོ་ཀློང་ཤར་སྐུ་གསུམ་འདུ་འབྲལ་མེད། །དུག་གསུམ་འཁྲུལ་པ་རྩད་ནས་བཅད། །ལུས་ངག་ཡིད་གསུམ་བྱ་རྩོལ་མེད། །ལུས་ངག་ཡིད་གསུམ་འཁྲུལ་སྣང་རྩད་ནས་བཅད། །ཕྱི་ཡི་ཡུལ་ལ་རྩིས་གདབ་དབྱེ་བསལ་མེད། །ཕྱི་སྣོད་གླིང་བཞིའི་འཁྲུལ་སྣང་རྩད་ནས་བཅད། །ནང་གི་སེམས་ཡིད་རྩིས་གདབ་མེད། །རིག་ཡིད་སེམས་ཀྱི་འཁྲུལ་པ་རྩད་ནས་བཅད། །ཕྱོགས་མཚམས་དབུས་ལྔ་མ་གྲུབ་པས། །ཁ་དོག་ཕྱོགས་མཚམས་འཁྲུལ་པ་བཅད། །ཕྱི་བལྟ་ནང་བལྟ་ཡིད་གཉིས་ལས། །འཁྲུལ་པ་དེ་དག་ཐམས་ཅད་སྣང་། །ཡིད་རྩད་ཆོད་པས་འཁྲུལ་དུ་མེད། །འཁྲུལ་པ་གཞི་ལ་མེད་པར་རྩད་ནས་བཅད། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། འཁྲུལ་པའི་འཁྲུལ་སྣང་རྩད་ནས་བཅད་པའི་ལེའུ་སྟེ་དྲུག་པའོ།། །།གྷ་ཏ་ཨ་ཏི་རི་ཨི་པ་དྷ་ནི་བི་མ་ལས་ཏ་ཨཱ། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །འཁྲུལ་པ་བསལ་ཞིང་ལྡོག་པའི་ཐབས། །བདག་ཅག་རྣམས་ལ་གསུང་དུ་གསོལ། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །འཁྲུལ་པ་བསལ་ན་ཐད་ཀར་བསལ། །འཁྲུལ་པ་ལྡོག་ན་རྒྱུ་ནས་ལྡོག །སྒོ་ལྔ་ཡུལ་ལ་གསལ་དུས་ ― DNG002_Page_0594 ―
[མ་དཔེ་གཟིགས་ན་འདིར་གནོན།]
སུ། །སྣང་བའི་མཚན་ཉིད་ཤེས་པ་ལྡོག །ཉོན་མོངས་རྣམ་ལྔར་གསལ་བའི་ཚེ། །གློ་བུར་འཁྲུལ་པར་ཤེས་པ་ལྡོག །ཡིད་ཀྱིས་ནང་དུ་བལྟས་པ་ཡིས། །བློ་ཡིས་འཛིན་པར་ཤེས་པ་ལྡོག །བདེན་པའི་ཆོས་ལ་ཐེ་ཚོམ་ཟ། །མི་བདེན་ཆོས་ལ་ཡང་དག་འཛིན། །བདེན་རྫུན་ཤེས་པ་འབྱུང་བའི་ཚེ། །མ་རིག་འཁྲུལ་པའི་ཤེས་པ་ལྡོག །ཉོན་མོངས་རྣམ་ལྔ་གསལ་བ་ཡོད། །ཅི་ཡང་མི་ཤེས་མི་གསལ་ཚེ། །གདམས་པ་རྒྱུད་ལ་ཐེབས་པས་ལྡོག །སྣང་ཡང་མི་འགེགས་མི་བསྒྲུབ་ན། །ཕྱི་ཡི་འཁྲུལ་པ་སོལ་བ་ཡིན། །གསལ་ཡང་ཡུལ་ལ་མི་འདུག་ན། །རྟེན་གྱི་འཁྲུལ་པ་སོལ་བ་ཡིན། །ནང་དུ་བདག་འཛིན་མ་སྐྱེས་ན། །འཕྲང་གི་འཕྲུལ་པ་སོལ་བ་ཡིན། །ཕྱི་ནང་ཤེས་པས་མ་བཟུང་ན། །བློ་ཡི་འཁྲུལ་པ་སོལ་བ་ཡིན། །ཡང་དག་དོན་ལ་གདེང་རྙེད་ཅིང་། །འཛིན་དང་ཐེ་ཚོམ་མི་སྐྱེ་ན། །མ་རིག་འཁྲུལ་པ་སོལ་བ་ཡིན། །རིག་མེད་སྟོང་པའི་སྙིང་པོ་ཅན། །སྙིང་པོ་ངོ་ཡིས་ཟིན་པའི་ཚེ། །རྩོལ་བསྒྲུབ་འཁྲུལ་པ་སོལ་བ་ཡིན། །རྒྱུད་ཀྱི་བྱ་བ་ཐོངས་པའི་ཚེ། །ཞེན་ཆགས་འཁྲུལ་པ་སོལ་བ་ཡིན། །གཉེན་པོ་ཀློང་དུ་གྱུར་པའི་ཚེ། །རྐྱེན་གྱི་འཁྲུལ་པ་སོལ་བ་ཡིན། །ཡེ་ཤེས་ཀློང་དུ་གྱུར་པའི་ཚེ། །མ་རྟོགས་འཁྲུལ་པ་སོལ་བ་ཡིན། །ཡེ་ཤེས་རྒྱུན་ཆད་མེད་པའི་ཚེ། །དུམ་བུའི་འཁྲུལ་པ་སོལ་བ་ཡིན། །རྟོགས་པ་རང་དང་མི་འབྲལ་ཚེ། །འཁྲུལ་པ་ཐམས་ཅད་མ་སྤངས་སོལ། །དཀར་དམར་གཉིས་ལ་མ་ཆགས་ན། །ཕྱི་ཡི་འཁྲུལ་པ་སོལ་བ་ཡིན། །རིག་ཡིད་འགྱུ་བ་ཆོད་པ་ནི། །ནང་གི་འཁྲུལ་པ་སོལ་བ་ཡིན། །དབྱེ་བསལ་ཤེས་པ་མ་སྐྱེས་ན། །བར་གྱི་གཟུང་འཛིན་སོལ་བ་ཡིན། །ཕྱི་ཡི་ཡུལ་ལ་མི་སྤྱོད་ན། །ཡུལ་གྱི་འཁྲུལ་པ་སོལ་བ་ཡིན། །ནང་དུ་སེམས་ལ་མ་བསམ་ན། །བདག་འཛིན་འཁྲུལ་པ་སོལ་བ་ཡིན། །ཕྱི་ནང་གཉིས་སུ་མ་བཟུང་ན། །དགག་བསྒྲུབ་འཁྲུལ་པ་སོལ་བ་ཡིན། །རྟོག་དཔྱོད་བློ་འདས་མཚན་མ་མེད། །དེ་ ― DNG002_Page_0595 ―
[མ་དཔེ་གཟིགས་ན་འདིར་གནོན།]
ལྟར་སུས་རྟོགས་གོ་ཡང་གནས། །འཁྲུལ་སྣང་ཐམས་ཅད་མ་སྤངས་སོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པའི་རྒྱུད་ལས། འཁྲུལ་པ་བསལ་ཐབས་ཀྱི་ལེའུ་སྟེ་བདུན་པའོ།། །།ཨ་ཏི་བ་ཏི་པྲད་ཏ་ཀ་ར་ཨ། །དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །འབྲས་བུ་ཇི་ལྟར་ཐོབ་ལུགས་རྣམས། །འདུས་པའི་འཁོར་ལ་གསུང་དུ་གསོལ། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །ཐོག་མ་མེད་པའི་དུས་མཐའ་ནས། །རང་ལ་རང་ཆས་ཡོད་པ་ཡི། །སེམས་ཉིད་བརྗོད་དུ་མེད་པ་དེ། །བརྗོད་མེད་དབྱིངས་ཐིམ་འབྲས་བུ་ཐོབ། །སེམས་ཉིད་སྐྱེ་བ་མེད་པ་དེ། །སྐྱེ་མེད་དབྱིངས་ཐིམ་འབྲས་བུ་ཡིན། །སེམས་ཉིད་དངོས་མེད་འགྱུར་མེད་དེ། །འཕོ་འགྱུར་མེད་ན་འབྲས་བུ་ཡིན། །སྣང་བ་གསུམ་གྱི་དཀྱིལ་འཁོར་ནས། །སྐུ་གསུམ་འབྲས་བུ་ཤུགས་ལས་འཆར། །གདུལ་བྱ་གསུམ་ལ་དགོངས་ནས་སུ། །ཞིང་ཁམས་མ་ལུས་བདེ་བར་སྤྱོད། །དོན་དམ་འབྲས་བུ་འཆར་བའི་གཞི། །ཡེ་ནས་རང་ལ་གནས་པ་ཡི། །རང་ས་ཟིན་ཅིང་གནས་པས་ཆོག །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། འབྲས་བུ་བསྟན་པའི་ལེའུ་སྟེ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་གསོལ། །འབྲས་བུའི་གདེང་ཟིན་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་འདི་སྐད་གསུངས། །འབྲས་བུའི་གདེང་ཟིན་འདི་ལྟར་ཤེས་པར་གྱིས། །སྙིང་པོའི་རང་བཞིན་མིང་མེད་བརྗོད་མེད་ལ། །ཟིན་དང་མ་ཟིན་དོན་ལ་གཉིས་མེད་ཀྱང་། །རེ་ཞིག་འབྲས་བུའི་གདེང་ཟིན་འདི་ལྟར་རོ། །ཆོས་སྐུ་གནས་པའི་གནས་ལུགས་མིང་མེད་ལ། །མ་འཁྲུལ་སྣང་བ་གནས་ལུགས་གདེང་ཟིན་ཡིན། །ཆོས་སྐུ་རང་བྱུང་ཡེ་ཤེས་དབྱེར་མེད་དེ། །ཆོས་སྐུ་མཚན་མ་བརྡ་ཡི་མིང་ལས་འདས། །འགྱུར་མེད་ངང་གནས་གདེང་ཟིན་ཆེན་པོ་ཡིན། །རང་བཞིན་ལྷུན་གྲུབ་འགྱུར་མེད་ཀློང་ན་གནས། །ཆོས་ཉིད་ངང་དང་གདེང་ཟིན་ཆེན་པོ་ཡིན། ། ― DNG002_Page_0596 ―
[མ་དཔེ་གཟིགས་ན་འདིར་གནོན།]
གསལ་ལ་དངས་པའི་སྙིང་པོ་འགག་མེད་ལ། །སྐྱེ་འཇིག་མེད་དེ་གདེང་ཟིན་ཆེན་པོ་ཡིན། །དངོས་པོ་མཚན་མེད་པ་ཡི་རང་བཞིན་དེ། །ཁ་དོག་དབྱིབས་དང་བྲལ་བས་གདེང་ཟིན་ཆེན་པོ་ཡིན། །རྒྱུ་དང་རྐྱེན་གྱིས་མ་བསྐྱེད་ཕྱོགས་རིས་མེད། །ཚོགས་བརྒྱད་ཡུལ་དུ་མ་ཟིན་སྐྱེ་མེད་གདེང་གིས་ཟིན། །ཡོད་མེད་སྟོང་དང་མི་སྟོང་རྟག་ཆད་མེད། །མཐའ་དང་དབུས་མེད་ཚིག་འདས་གདེང་གིས་ཟིན། །ཡི་གེ་བརྗོད་དུ་མེད་པའི་ངོ་བོ་སྟེ། །རང་གསལ་རིས་མེད་ཕྱོགས་མེད་གདེང་གིས་ཟིན། །ཆོས་ཉིད་མ་དང་འཕྲད་པས་གཉིས་མེད་གདེང་གིས་ཟིན། །ཡེ་ཤེས་རང་ས་ཟིན་པས་འགྱུར་མེད་གདེང་གིས་ཟིན། །འཁྲུལ་པ་རང་སངས་ཡེ་ཤེས་གདེང་གིས་ཟིན། །རྣམ་རྟོག་རང་གྲོལ་ཆོས་ཉིད་གདེང་གིས་ཟིན། །གཏི་མུག་ངང་དངས་འོད་གསལ་གདེང་གིས་ཟིན། །བློ་འདས་འབྱེད་མེད་ཆོས་སྐུ་གདེང་གིས་ཟིན། །ཞེ་སྡང་རང་སངས་ཁ་གསལ་གདེང་གིས་ཟིན། །སྐྱེ་མེད་འགག་མེད་ལོངས་སྐུའི་གདེང་གིས་ཟིན། །འདོད་ཆགས་ངང་དངས་ཡེ་ཤེས་ཟང་ཐལ་གདེང་གིས་ཟིན། །ཡིད་ལ་མ་བྱས་སྤྲུལ་སྐུའི་གདེང་གིས་ཟིན། །དུག་གསུམ་རྩད་གཅོད་སྐུ་གསུང་ཐུགས་སུ་འགྱུར། །སྐུ་གསུམ་འདུ་འབྲལ་མེད་པའི་གདེང་གིས་ཟིན། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པའི་རྒྱུད་ལས། འབྲས་བུའི་གདེང་ཟིན་བསྟན་པའི་ལེའུ་སྟེ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་གསོལ། །ས་ར་ཏ་ཡཱ། བུ་སུ་ད་རང་འགའ་ཡ། བ་ལ་མུ་པི་སི་ཏི་ཨ་ཨ། སངས་རྒྱས་ཆེ་བའི་ཡོན་ཏན་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །སྐྱེ་མེད་སྙིང་པོ་ཆོས་སྐུ་ལ། །སྐྱོན་དང་ཡོན་ཏན་གཉིས་མེད་ཀྱང་། །མ་རྟོགས་སེམས་ཅན་གོ་བ་བསྐྱེད་པའི་ཕྱིར། །ང་ཡིས་སངས་རྒྱས་ཡོན་ཏན་བཤད། །འཁོར་རྣམས་མ་ཡེངས་དད་ལྡན་གུས་པས་ཉོན། །སངས་རྒྱས་ཆེ་བའི་ཡོན་ཏན་བསམ་མི་ཁྱབ། །བདག་མེད་གཉིས་མེད་རྟོགས་པ་ཆོས་ཀྱི་སྐུ། །བློ་ཡི་ཡུལ་དུ་མ་གྱུར་ཡོན་ཏན་བསམ་ ― DNG002_Page_0597 ―
[མ་དཔེ་གཟིགས་ན་འདིར་གནོན།]
ལས་འདས། །གཟུགས་སྐུ་རྣམ་གཉིས་ལ་སོགས་ཡོན་ཏན་ཀུན། །ཉི་ཟླའི་འོད་བཞིན་ཀུན་ལ་ཡོན་ཏན་ཁྱབ། །དྲང་བའི་དོན་དུ་བྱེ་བྲག་བགྲང་བ་ཙམ། །བདག་ཏུ་འཛིན་པའི་ཤེས་པ་ལོག་པ་ཡིས། །སྐྱེ་རྒ་ན་འཆིའི་ཆུ་བོ་རྩད་ནས་བཅད། །སྐྱེ་ཤིའི་སྡུག་བསྔལ་མེད་དེ་ཡོན་ཏན་ཆེ། །ཆོས་སྐུ་སོང་བའི་ཡུལ་དེ་ལོག་པ་ཡིས། །ཉོན་མོངས་དུག་ལྔ་མ་བཅད་རང་བཞིན་ཆད། །སྐུ་བཞི་ཡེ་ཤེས་ལྔ་ཉིད་ལྷུན་གྱིས་གྲུབ། །སངས་རྒྱས་ཆེ་བའི་ཡོན་ཏན་བསམ་མི་ཁྱབ། །སྐུ་ཡི་དངོས་པོ་ཅི་ཡང་མི་མངའ་བར། །སྟོང་གསུམ་མ་ལུས་དབང་བསྡུས་ཟིལ་གྱིས་གནོན། །གསུང་གི་དངོས་པོ་ཅིར་ཡང་མི་མངའ་བར། །བསྟན་པ་མ་ལུས་ཐམས་ཅད་རྒྱས་པར་སྒྲོགས། །ཐུགས་ཀྱི་དངོས་པོ་ཅི་ཡང་མ་ཡིན་པར། །ཐམས་ཅད་རང་གི་ངོ་བོ་ཆོས་སྐུར་གསལ། །མཁྱེན་པ་མེད་པའི་མཁྱེན་པ་ཆེན་པོ་དེ། །ཇི་སྙེད་མཁྱེན་པའི་མཁྱེན་པ་མཆོག་ཏུ་གསུངས། །རྣམ་རྟོག་མི་མངའ་ཅི་ཡང་ས་ལེར་མཁྱེན། །ང་དང་གཞན་དང་བྱ་བྱེད་ལ་སོགས་པ། །རྣམ་རྟོག་མི་མངའ་སྣང་སྲིད་ཆོས་སྐུར་མཁྱེན། །ཇི་ལྟ་བ་ཉིད་མཁྱེན་པས་མཁྱེན་པའི་མཆོག །དེ་ནི་ཐམས་ཅད་མཁྱེན་པ་ཆེན་པོ་ཡིན། །སྐུ་གསུང་ཐུགས་ཀྱང་གཅིག་གི་ངོ་བོར་གསུངས། །སྐུ་གསུང་ཐུགས་ཀྱང་ཆོས་ཀྱི་དབྱིངས་ན་གནས། །སྐུ་གསུམ་ངོ་བོ་ཉིད་ཀྱི་ཀློང་དུ་ཐིམ། །ཐམས་ཅད་ངོ་བོ་བསམ་མེད་ངང་དུ་ཐིམ། །གཡོས་པ་མི་མངའ་སལ་ལེ་སང་ངེ་བ། །མཆོག་མཁྱེན་ཐམས་ཅད་མཁྱེན་པའི་ཡོན་ཏན་མཆོག་ཏུ་གསུངས། །དེ་ལྟ་བུ་ཡི་ཡོན་ཏན་ཆེན་པོ་དེ། །བསྒྲུབས་ནས་གཞན་ནས་བྱུང་བ་མ་ཡིན་ཏེ། །རང་གི་ངོ་བོ་ཡེ་ནས་དེ་ལྟར་གནས། །ཡེ་ནས་གནས་པ་རྟོགས་ནས་བསྟན་པ་ལ། །མཐར་ཐུག་སངས་རྒྱས་དེ་ལ་བྱ་བ་ཡིན། །ངང་དྭངས་སེམས་ཉིད་སྐུ་གསུམ་སངས་རྒྱས་པས། །ཕྱི་ནང་སྣོད་བཅུད་ང་ཡི་ཡོན་ཏན་ཡིན། །ཡོན་ཏན་མཆོག་ཏུ་གྱུར་པར་རྒྱལ་བས་གསུངས། །དྲང་དོན་ཨ་ནུ་མན་ཆད་མཁྱེན་པ་དེ། །བདག་གིས་གཞན་མཁྱེན་བྱ་དང་བྱེད་པ་དེ། །བདག་གཞན་གཉིས་མེད་རྟོགས་པའི་ ― DNG002_Page_0598 ―
[མ་དཔེ་གཟིགས་ན་འདིར་གནོན།]
མཁྱེན་པ་མེད། །དེ་ནི་ད་དུང་འདུས་བྱས་གཟུང་འཛིན་ཡིན། །ཡོན་ཏན་ཕྱོགས་ཆད་སངས་རྒྱས་ཡོན་ཏན་མེད། །དེ་ནི་སེམས་ཅན་བློ་ཡི་ཡོན་ཏན་ཡིན། །དེ་ནི་ང་ཡི་ཡོན་ཏན་མ་ཡིན་ནོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། སངས་རྒྱས་ཆེ་བའི་ཡོན་ཏན་བསྟན་པའི་ལེའུ་སྟེ་བཅུ་པའོ།། །།ཨ་ནུ་ཨ་ས་ཏ་ཡ། བི་བ་ས་ལ་རྟ་ཡི། ཀ་ཏ་མུ་རུས་ཏོ། ཨེ་མའོ་ཨ། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །སེམས་ཅན་རྣམས་ལ་སྐྱོན་དུ་ཅི་ཞིག་མཆིས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། སྙིང་པོ་མིང་མེད་བརྗོད་མེད་འགྱུར་མེད་མ་རྟོགས་པས། །རིག་པ་རྩལ་སྣང་སེམས་ཅན་རྣམས་ཀྱི་སྐྱོན། །བསམ་དང་བརྗོད་པའི་མཐའ་ལས་འདས་མོད་ཀྱང་། །རེ་ཞིག་བཤད་ཀྱིས་རྡོ་རྗེ་སེམས་དཔས་ཟུང་། །སེམས་ཅན་སྐྱོན་གྱི་རྩ་བ་གཅིག་པུ་ལ། །བདག་ཏུ་འཛིན་པའི་དུག་ལྔ་རང་ལས་བྱུང་། །སེམས་ཅན་ཞེས་ཀྱང་འཛིན་པས་བཏགས་པ་ཡིན། །ཉོན་མོངས་ཇི་སྙེད་ཐམས་ཅད་འབྱུང་བའི་གནས། །བདག་ཏུ་འཛིན་པ་ཐོག་མ་མེད་པ་ནས། །ད་ལྟའི་བར་དུ་སྡུག་བསྔལ་གསུམ་དུ་མནར། །ད་དུང་གཟུང་འཛིན་ཕུར་པ་མ་ཐོན་པར། །ཐར་བར་ཀུན་ཏུ་བཟང་པོས་མ་གསུངས་སོ། །མིང་མེད་ཆོས་ཉིད་ཟླ་དང་བྲལ་བ་ལ། །ང་དང་བདག་ཏུ་བཟུང་བས་གཏན་དུ་འཁྱམས། །ཇི་སྲིད་བདག་གཞན་འདུ་ཤེས་ཡོད་ཀྱི་བར། །དཀའ་བ་ཅི་སྤྱད་རང་ཉིད་འཆིང་བའི་རྒྱུ། །གྲོལ་བར་འདོད་པ་རང་གིས་འཆིང་བར་འགྱུར། །སྦུར་བ་བལ་དུ་འཐུམས་པ་ཇི་བཞིན་ནོ། །བདག་གཞན་གཉིས་ཀྱི་གོ་བ་མ་སྐྱེས་ན། །བདག་གཞན་ཡུལ་དང་སེམས་ལ་བྱེད་པ་སྟེ། །དེ་གཉིས་ཡོད་པས་བྱ་བྱེད་ཡོད་པ་དང་། །བླང་དོར་དགག་བསྒྲུབ་སྤོང་ལེན་རེ་དོགས་དང་། །ལེགས་ཉེས་བཟང་ངན་རྒྱུ་དང་འབྲས་བུ་དང་། །མཐོ་རིས་ངན་སོང་ཐམས་ཅད་ཡོད་པ་སྟེ། །ཇི་སྲིད་ཡུལ་སེམས་ ― DNG002_Page_0599 ―
[མ་དཔེ་གཟིགས་ན་འདིར་གནོན།]
གཉིས་མེད་མ་རྟོགས་པར། །བདག་གཞན་གཉིས་མེད་ཟེར་བའི་དམུས་ལོང་བྱ་ར་མཁན། །བདག་དང་གཞན་གྱི་ཤེས་པ་མི་འདྲ་བར། །ཡུལ་སེམས་གཉིས་མེད་ཟེར་བའི་རྨོངས་པ་ཡོད། །སྐྱོན་གྱི་རྩ་བ་གཟུང་འཛིན་གཉིས་དང་འགྲོགས། །ཁ་ཅིག་གྲུབ་མཐའ་འདི་སྐད་ཟེར་བ་ཡོད། །ང་དང་ཁྱོད་ཀྱང་ཡེ་ནས་སོ་སོ་སྟེ། །བདག་གི་སེམས་ཉིད་བཙལ་བས་མི་རྙེད་དེ། །ཡུལ་སེམས་གཉིས་མེད་ཟེར་བའི་རྨོངས་པ་ཡོད། །ཁ་ཅིག་ཆོས་ཉིད་ཙམ་དུ་གཅིག་པ་ལ། །ཆོས་ཉིད་ཐ་དད་ཡུལ་སེམས་གཉིས་མེད་ཟེར། །ཁ་ཅིག་ཆོས་ཉིད་ཙམ་དུ་གཅིག་པ་ལ། །སེམས་ཉིད་ཐ་དད་ཡུལ་སེམས་གཉིས་མེད་ཟེར། །ཁ་ཅིག་དམ་པའི་དོན་དང་མ་སྦྱོར་བར། །ཡིད་དཔྱོད་ཚིག་ཏུ་གཅིག་གོ་ཟེར་བ་ཡོད། །ཡོད་ཀྱང་སྐྱོན་གྱི་རྩ་བ་གཟུང་འཛིན་གཉིས་དང་འགྲོགས། །ཉེས་པ་འབྱུང་ཁུངས་དེ་དང་མ་བྲལ་བར། །འཁོར་བའི་མཐའ་ལས་གྲོལ་བར་མ་གསུངས་སོ། །དེ་ལྟར་སྐྱོན་གྱི་རྩ་བ་ཤེས་པར་གྱིས། །རྣམ་གྲངས་མཐའ་ཡས་རྒྱལ་བས་མཁྱེན་པར་གསུངས། །རེ་ཞིག་བསྡུ་ན་བརྒྱད་ཁྲི་བཞི་སྟོང་ངོ་། །ང་བདག་གཟུང་འཛིན་སྐྱོན་གྱི་རྩ་བ་ཡིན། །ཉོན་མོངས་དུག་ལྔ་སྐྱོན་གྱི་རྩ་བ་ཡིན། །མིང་མེད་མིང་འདོགས་སྐྱོན་གྱི་རྩ་བ་ཡིན། །ཡིད་རིག་རྟོག་པ་སྐྱོན་གྱི་རྩ་བ་ཡིན། །གཟུང་འཛིན་ཞེན་པ་སྐྱོན་གྱི་རྩ་བ་ཡིན། །ང་བདག་ཕྱོགས་རིས་སྐྱོན་གྱི་རྩ་བ་ཡིན། །བྱ་བཙལ་འཁྲུལ་པ་སྐྱོན་གྱི་རྩ་བ་ཡིན། །གཉིས་འཛིན་ཆགས་ཞེན་སྐྱོན་གྱི་རྩ་བ་ཡིན། །རྩལ་སྣང་ཕྱིར་འཕྲོས་སྐྱོན་གྱི་རྩ་བ་ཡིན། །ཅིར་སྣང་རིག་པའི་མཚན་ཉིད་ཡིན་ལགས་ཀྱང་། །རང་ས་མ་ཟིན་སྐྱོན་གྱི་རྩ་བ་ཡིན། །སེམས་དང་ཡིད་དང་མ་འགོགས་བུ་རྣམས་ཀྱང་། །མ་བུ་མ་འཕྲད་སྐྱོན་གྱི་རྩ་བ་ཡིན། །ཞེ་འདོད་ཕྱོགས་རིས་སྐྱོན་གྱི་རྩ་བ་ཡིན། །རིག་འགྱུ་ཡིད་སེམས་སྐྱོན་གྱི་རྩ་བ་ཡིན། །བྱ་བྱེད་འབད་རྩོལ་སྐྱོན་གྱི་རྩ་བ་ཡིན། །རྩིས་གདབ་དབྱེ་བསལ་ཡིད་སྨོན་རེ་དོགས་རྣམས། །མདོར་བསྡུས་སྐྱོན་གྱི་རྩ་བར་བསྟན་པ་ཡིན། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། སེམས་ཅན་སྐྱོན་གྱི་རྩ་བ་ ― DNG002_Page_0600 ―
[མ་དཔེ་གཟིགས་ན་འདིར་གནོན།]
བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཡེ་ཐོག་སངས་རྒྱས་རྣམས་ཀྱིས་བཟང་བྱས་སམ། །ཞེས་གསོལ་པ་དང་། མཚོན་བྱེད་ཀུན་ཏུ་བཟང་པོས་བཀའ་སྩལ་པ། གཞི་ཡི་རང་བཞིན་མིང་མེད་མཉམ་པ་ལ། །རྩལ་སྣང་མ་འགགས་ཡན་ལག་ཟེར་ཤར་བས། ཡེ་ཐོག་སངས་རྒྱས་རྣམས་ཀྱིས་བཟང་མ་བྱས། །ཡེ་ཤེས་རླུང་འགྱུས་ཡིད་རྟོག་སྐྱེ་མ་ནུས། །རིག་པ་ཟེར་ལ་ཐིམ་པས་བཅད་མ་ནུས། །རྩལ་སྣང་མ་འགགས་ཡན་ལག་བཞི་ཐིམ་པས། །རྩལ་སྣང་གཞི་ལ་ཐིམ་པས་ཐོག་མར་ཡེ་སངས་རྒྱས། །རིག་པ་མ་འགགས་མ་ལ་བུ་ཐིམ་པས། །མ་བུ་ངོ་འཕྲོད་དབྱེར་མེད་བླང་དོར་མེད། །ཡན་ལག་ཤེས་པས་སྙིང་པོ་ཀློང་ཐིམ་པས། །ཡན་ལག་སྙིང་པོ་གཉིས་མེད་དབྱེར་མི་ཕྱེད། །སྙིང་པོ་ཡན་ལག་འཕྲད་པས་ཡེ་ཤེས་རང་ས་ཟིན། །ཆོས་ཉིད་མ་བུ་འཕྲད་པས་རང་སར་གྲོལ། །ངང་དངས་འགྱུར་མེད་རྟོགས་པས་འཕོ་འགྱུར་བྱ་བཙལ་མེད། །ཡེ་ཤེས་རང་ས་ཟིན་པས་གསལ་དངས་ཀློང་ནས་ཤར། །རྒྱུ་དང་རྐྱེན་གྱི་སྒོ་ནས་བཟང་མ་བྱས། །རང་བཞིན་གཞི་ཡི་ཤུགས་ལས་གྱུར་པ་ཡིན། །རྒྱུ་རུ་ཡེ་ཤེས་གཞི་གནས་མནོ། །རྐྱེན་དུ་ཡེ་ཤེས་རླུང་རྐྱེན་མནོ། །དེ་ཡི་འབྲས་བུ་ཀུན་ཏུ་བཟང་པོའོ། །རང་བཞིན་ཀུན་བཟང་རྒྱུ་རྐྱེན་རྩོལ་ནད་བྲལ། །རྟོགས་པས་ཀུན་བཟང་རང་གི་དེ་ཉིད་རྟོགས་གྱུར་པ། །ཀུན་ཏུ་བཟང་པོ་དེ་ནི་དུག་གསུམ་སྐུ་གསུང་ཐུགས། །དེ་ལྟར་གྱུར་པས་ཀུན་བཟང་ཞེས་བྱའོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཡེ་ཐོག་སངས་རྒྱས་རྣམས་ཀྱིས་བཟང་མ་བྱས་པར་རང་བཞིན་ཤུགས་ཀྱིས་ཡེ་སངས་རྒྱས་པར་བསྟན་པའི་ལེའུ་སྟེ་བཅུ་གཉིས་པའོ།། །།ཨ་ཐ་བྷ་རི་ནུ་ཡ་བི་ཏ་ཡ། དྷརྨ་དྷཱ་ཏུ་ཨི་པ་དྷ་ནི། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རིགས་དྲུག་སེམས་ཅན་རྣམས་ཀྱིས་ངན་བྱས་སམ། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །འཁྲུལ་རྒྱུ་རླུང་གི་རང་བཞིན་དེ། །གཉིས་ཀའི་གཞི་རུ་ ― DNG002_Page_0601 ―
[མ་དཔེ་གཟིགས་ན་འདིར་གནོན།]
མཉམ་པ་ལ། །རང་ས་མ་ཟིན་རླུང་འགྱུས་པས། །ཆོས་ཉིད་མ་དང་མ་འཕྲད་འགྱུར་མེད་ཀློང་དུ་མ་གྱུར་པས། །ཡེ་ཤེས་རང་ས་མ་ཟིན་པར། །འཁྲུལ་པ་རང་དུ་མ་ཆོད་དེ། །སྙིང་པོ་ཀློང་ནས་མ་ཤར་བས། །སྐྱེ་བ་མེད་པར་སངས་མ་རྒྱས། །འཁྲུལ་པའི་འབྲས་བུ་རིག་པའོ། །རྒྱུ་ནི་རླུང་གི་ནུས་པ་ལ། །འབྲས་བུ་རིག་པ་ཡོད་པ་ཡི། །རིག་པའི་ཡེ་ཤེས་དོན་མ་རིག །མ་རྟོགས་མ་རིག་མུན་པར་འཐུམས། །དེ་རུ་ཡིད་འགྱུས་སེམས་སུ་འཁྲུལ། །འོད་གཟུགས་རིགས་གཟུགས་ཤ་གཟུགས་རྣམས། །རང་ས་མ་ཟིན་གསུམ་གྱིས་ལན། །ངན་མ་བྱས་ཤིང་ཐབས་ཀྱང་མ་བྱས་ཏེ། །རིག་པས་རང་ས་མ་ཟིན་འདོད་ཁམས་འཁྲུལ། །ཡིད་ཀྱིས་རང་ས་མ་ཟིན་གཟུགས་ཁམས་འཁྲུལ། །སེམས་ཀྱིས་རང་ས་མ་ཟིན་གཟུགས་མེད་འཁྲུལ། །རང་ས་མ་ཟིན་རྣམ་གསུམ་གྱིས། །ངན་པ་མ་བྱས་ཤུགས་ཀྱིས་འཁོར་བར་འཁྱམས། །དཔེར་ན་བཅུ་བདུན་མན་ཆད་ཀྱི། །ཟླ་བ་རྒྱུ་རྐྱེན་བྱེད་མེད་ཀྱང་། །ཤུགས་ཀྱིས་ཆུང་ངུ་འགྲོ་བ་ལྟར། །བྱེད་མཁན་མེད་པར་འཁོར་བར་འཁྱམས། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། སེམས་ཅན་གྱིས་ངན་མ་བྱས་པར་འཁོར་ཚུལ་བསྟན་པའི་ལེའུ་སྟེ་བཅུ་གསུམ་པའོ།། །།ཨ་བ་ཏ་ཡི་བྷ་ཏ་ས་ཀ་ཏ་ཡ་ཨ། །དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །དེ་ཉིད་སྐྱོན་ཡོན་ཇི་ལྟར་ལགས། །ཞེས་གསོལ་པ་དང་། ཀུན་བཟང་ཉིད་ཀྱིས་འདི་སྐད་གསུངས། །དཔེར་ན་ནས་ཀྱི་གཞི་གཅིག་ལ། །ཞིང་ས་གཅིག་ལ་བཏབ་པ་ལ། །བྱེད་མཁན་མེད་པར་བཟང་ངན་འབྱུང་། །དེ་བཞིན་རང་ཤུགས་ལས་བྱུང་བ། །མ་རིག་ཡེ་ཤེས་ཤུགས་ཀྱིས་བྱུང་། །ལྕགས་རྡོ་ལྕགས་སུ་གཞི་གཅིག་ལ། །བཟང་ངན་རྣོ་བརྟུལ་ཤུགས་ཀྱིས་འབྱུང་། །དེ་བཞིན་འཆར་སྒོ་འཁྲུལ་སྒོ་འབྱུང་། །དཔེར་ན་ཕ་མ་གཞི་གཅིག་ལ། །སྦྱོར་བར་མཉམ་པ་ཐིག་ལེར་མཉམ། །གནས་སུ་མཉམ་ལ་འབྱུང་བར་མཉམ། །དེ་ལྟར་མཉམ་པའི་རང་བཞིན་ལ། །ཁྱེའུ་བུ་མོར་འོང་བ་དང་། ། ― DNG002_Page_0602 ―
[མ་དཔེ་གཟིགས་ན་འདིར་གནོན།]
ལེགས་མ་ལེགས་སུ་འོང་བ་དང་། །བཟང་དང་ངན་དང་འོང་བ་ཡང་། །རང་བཞིན་ཤུགས་ཀྱིས་འབྱུང་བ་ལས། །བུ་མོ་ཁྱེའུ་ལྟ་བུར་བྱས་པ་མིན། །ཁྱེའུ་བུ་མོར་བྱས་པ་མིན། །མ་ལེགས་ལེགས་སུ་ལྟ་བུར་བྱས་པ་མིན། །བཟང་པོ་ངན་པར་ལྟ་བུར་བྱས་པ་མིན། །ཆེ་ཆུང་གཉིས་སུ་འོང་བ་དང་། །བཟང་ངན་གཉིས་སུ་འོང་བ་དང་། །བློ་ལ་རྣོ་བརྟུལ་འོང་བ་དང་། །སྤྱང་གླེན་གཉིས་སུ་འོང་བ་ཡང་། །རྒྱུ་རྐྱེན་རྩོལ་བསྒྲུབ་མ་བྱས་པར། །རང་བཞིན་ཤུགས་ཀྱིས་དེ་ལྟར་བྱུང་། །དེ་བཞིན་རིག་པར་གཞི་གཅིག་ལ། །སེམས་ཅན་སངས་རྒྱས་གཉིས་སུ་བྱུང་། །སངས་རྒྱས་ཡོན་ཏན་བསམ་མི་ཁྱབ། །སེམས་ཅན་སྐྱོན་ཀྱང་ཚད་ལས་འདས། །སྐྱོན་དང་ཡོན་ཏན་རྣམ་གཉིས་ཀྱང་། །གཞི་ཤུགས་དག་ལས་བྱུང་བ་ཡིན། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། སྐྱོན་ཡོན་གཏན་ཚིགས་བསྟན་པའི་ལེའུ་སྟེ་བཅུ་བཞི་པའོ།། །།ཨ་ཐ་ཨ་རི་ཤ་པ་རི། བྷ་ཏ་ཀི་བ་ཙིཏྟ་ཡ། བཱི་མ་ལ་ཡ་ཨ་ཏི་པ་རི། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཐེག་པ་བརྒྱད་ཁྲི་བཞི་སྟོང་དེ། །གང་ལ་དགོངས་ནས་ཕྱེ་བ་ལགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །སྙིང་པོ་རང་བཞིན་མིང་མེད་མཉམ་པ་ལ། །རྩལ་སྣང་ཡན་ལག་སྣང་ཚུལ་རིམ་པར་ཕྱེ། །དུག་གསུམ་ཆ་ནས་ཉོན་མོངས་བརྒྱད་ཁྲི་བཞི་སྟོང་བྱུང་། །འདོད་ཆགས་ལས་གྱུར་ཉི་ཁྲི་ཆིག་སྟོང་གཅིག །གཏི་མུག་ལས་གྱུར་ཉི་ཁྲི་ཆིག་སྟོང་གཅིག །ཞེ་སྡང་ལས་གྱུར་ཉི་ཁྲི་ཆིག་སྟོང་གཅིག །དུག་གསུམ་ཆ་མཉམ་ཉི་ཁྲི་ཆིག་སྟོང་གཅིག །དེ་ལ་སོགས་པ་ཉོན་མོངས་བརྒྱད་ཁྲི་བཞི་སྟོང་རྣམས། །དེ་འདུལ་ཆོས་སྒོ་བརྒྱད་ཁྲི་བཞི་སྟོང་ངོ་། །མདོ་སྡེ་ལས་གྱུར་ཉི་ཁྲི་ཆིག་སྟོང་གཅིག །འདུལ་བ་ལས་གྱུར་ཉི་ཁྲི་ཆིག་སྟོང་གཅིག །མངོན་པ་ལས་གྱུར་ཉི་ཁྲི་ཆིག་སྟོང་གཅིག །དེ་གསུམ་ཆ་ལས་གྱུར་པ་ཉི་ཁྲི་ཆིག་སྟོང་གཅིག ། ― DNG002_Page_0603 ―
[མ་དཔེ་གཟིགས་ན་འདིར་གནོན།]
ཐེག་པ་བརྒྱད་ཁྲི་བཞི་སྟོང་ཕྱེ་བ་སྟེ། །ཉོན་མོངས་བརྒྱད་ཁྲི་བཞི་སྟོང་དོན་ལ་དགོངས་ནས་གསུངས། །མུ་སྟེགས་ཉན་ཐོས་རང་རྒྱལ་དང་། །སེམས་ཙམ་དབུ་མ་གཉིས་ཀྱི་དོན། །ཀི་ཡ་ཨུ་ར་ཡོ་ག་དང་། །མ་ཧཱ་ཨ་ནུ་ཡོ་ག་རྣམས། །ཡན་ལག་མི་འདྲ་དབང་བོའི་རིམ་པར་ཕྱེ། །རྒྱུ་ལམ་འབྲས་བུ་གསུམ་ལ་ཐེག་པ་གསུམ། །གདུལ་བྱ་གང་ལ་གང་འདུལ་དོན་དུ་བསྟན། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཐེག་པ་བརྒྱད་ཁྲི་བཞི་སྟོང་དུ་ཕྱེ་བའི་ལེའུ་སྟེ་བཅོ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་གསོལ། །ཐེག་པ་དགུ་རུ་བསྡུས་པ་དེ། །གདུལ་བྱ་གང་ལ་དགོངས་ནས་གསུངས། །ཀུན་ཏུ་བཟང་པོས་བཀའ་སྩལ་པ། །སྙིང་པོའི་རང་བཞིན་གཅིག་མོད་ཀྱང་། །རྩལ་སྣང་ཡན་ལག་མི་འདྲ་བར། །དབང་པོ་རབ་འབྲིང་གསུམ་དུ་བྱུང་། །དབང་པོ་རབ་ཀྱི་དོན་དུ་ནི། །ནང་གི་བསྐྱེད་རྫོགས་རྣམ་གསུམ་བསྟན། །དབང་པོ་འབྲིང་གི་དོན་དུ་ནི། །ཕྱི་ཡི་ཀྲི་ཡོག་རྣམ་གསུམ་བསྟན། །དབང་པོ་ཐ་མའི་དོན་དུ་ནི། །མཚན་ཉིད་སྡེ་གསུམ་ཐེག་པ་བསྟན། །དེ་ལྟར་ཐེག་པ་རིམ་དགུ་དེ། །རབ་འབྲིང་དགུ་ལ་དགོངས་ནས་གསུངས། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཐེག་པ་དགུ་རུ་བསྡུས་ཏེ་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །གཞན་གཞུང་ཐེག་པ་ཇི་ལྟར་ཤེས་པར་བགྱི། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །སྙིང་པོའི་རང་བཞིན་མིང་མེད་མཉམ་པ་ལ། །ཡན་ལག་རྩལ་གྱིས་ཤེས་པས་མིང་བཏགས་པ། །ཐེག་དགུ་ཐེག་པ་གཉིས་སུ་བསྡུས། །འཇིག་རྟེན་པ་དང་འཇིག་རྟེན་འདས། །འཇིག་རྟེན་པ་ཡི་ཐེག་པ་ཕྱི་པ་མུ་སྟེགས་ཏེ། །ཡོད་མེད་གཙང་དང་རྟོག་དཔྱོད་སྒོ་ནས་འཇུག །ལུས་ལ་གསུམ་ལ་ངག་ལ་བཞི། །བསྲུང་བའི་ཚུལ་ཁྲིམས་བདུན་བསྲུང་ངོ་། །འཇིག་རྟེན་མུ་སྟེགས་བལྟ་བ་ནི། །སུམ་ ― DNG002_Page_0604 ―
[མ་དཔེ་གཟིགས་ན་འདིར་གནོན།]
བརྒྱ་དྲུག་ཅུའི་གྲངས་སྙེད་ཡོད། །དེ་ལས་ལྟ་བ་བསྡུས་པ་ནི། །འཇིག་ཚོགས་དྲུག་ཅུ་རྩ་གཉིས་ཡོད། །སྔོན་གྱི་མཐའ་རྟོག་བཅོ་བརྒྱད་དང་། །ཕྱི་མའི་མཐའ་ལ་རྟོག་པ་པོ། །བཞི་བཅུ་རྩ་བཞི་གྲངས་སུ་ཡོད། །བསྡོམས་པས་དྲུག་ཅུ་རྩ་བཞི་ཡོད། །དེ་ལས་བསྡུས་པས་ཉི་ཤུ་སྟེ། །དེ་ལས་བསྡུས་པ་རྣམ་བཞི་སྟེ། །རྟག་ཆད་ཐུན་མོང་རིག་བྱེད་གཙང་མ་བཞི། །རྟག་པར་ལྟ་བའི་བལྟ་ལུགས་ནི། །སྙིང་པོའི་རང་བཞིན་མིང་མེད་མ་རྟོགས་པས། །མ་རྟོགས་ཡན་ལག་སྣང་ཚུལ་རྟོགས་པར་འདོད། །རྒྱུ་མེད་འབྲས་བུ་ཡོད་པར་རང་རིག་འདོད། །ཐམས་ཅད་བྱེད་པའི་རྟག་པ་ཆེན་པོར་འདོད། །རྟག་པར་འདོད་པ་ཁ་དོག་དབྱིབས་ཀྱི་ཚད། །ཁ་དོག་ཚད་ནི་དཀར་འཚེར་སྣུམ་ལ་འདྲིལ། །ཚད་ནི་མཐེ་བོང་སྲན་མ་ཉུང་འབྲུ་ཙམ། །ཆེ་ཆུང་དག་ནི་ལུས་དང་སྦྱོར་ནས་ཡོད། །ཆད་པར་བལྟ་བའི་བལྟ་ལུགས་ནི། །སྙིང་པོ་རང་བཞིན་མ་རྟོགས་ཆད་ལྟ་ནི། །སྣང་ཚུལ་མ་འགགས་རིག་པ་ནི། །རིག་པ་གློ་བུར་སྣང་བ་ཡིན་པར་འདོད། །ཕྱི་མ་རིག་པ་སྐྱེ་ཞིང་མེད་པར་འདོད། །དགེ་སྡིག་འབྲས་བུ་ཚེ་འདི་ཉིད་ལ་ཡོད། །བདེ་སྐྱིད་ནད་ཉུང་ཚེ་འདི་ཉིད་ལ་འབྲས་བུའོ། །དགེ་བ་བྱས་པའི་འབྲས་བུ་དེ་རང་ཡིན། །མི་བདེ་སྡུག་བསྔལ་ནད་མང་ཚེ་ཐུང་ནི། །སྡིག་པ་བྱས་པའི་རྣམ་སྨིན་འབྲས་བུ་ཡང་། །ཚེ་འདི་ཉིད་ལ་འོང་བས་ཕྱི་མ་མེད། །ལུས་ངག་ཡིད་གསུམ་སྒོ་ནས་དགེ་དང་སྡིག་པ་སྤྱད། །ཚེ་འདི་ཉིད་ལ་སྨིན་ནས་འོང་བ་ལ། །མི་དགེ་སྤངས་ཤིང་དགེ་བ་སྤྱད་པར་བྱའོ། །དགེ་སྡིག་གཉིས་ཀྱི་འབྲས་བུ་སོ་སོ་ཡང་། །ཕྱི་མར་མི་སྡོད་འབྲས་བུ་ད་ལྟའོ། །ཐུན་མོང་མུ་སྟེགས་ལྟ་བའི་འདོད་པ་ཡང་། །ཆོས་སྐུ་འགྱུར་མེད་རང་བཞིན་མ་ཤེས་པས། །ཡན་ལག་རྩལ་གྱི་ཤེས་པའི་བྱེ་བྲག་ལས། །རིག་པ་གཡོ་བ་རླུང་གིས་གཡོ་བ་ཡིན། །རླུང་གིས་བཅུད་བྱས་རྩ་ཡི་སྣོད་དུ་ཆགས། །རླུང་གཡོས་བདེ་བ་མི་འཆར་མ་གཡོས་བདེ། །བདེ་བ་འདོད་པས་རླུང་བཀག་བདེ་བ་བསྒོམ། །རིག་བྱེད་གཙང་མའི་མུ་སྟེགས་ལྟ་བ་ནི། །སྙིང་པོའི་རང་བཞིན་མ་ཤེས་མ་རྟོགས་པས། །སྣང་ཚུལ་རྩལ་ ― DNG002_Page_0605 ―
[མ་དཔེ་གཟིགས་ན་འདིར་གནོན།]
གྱི་རིག་པ་གསལ་བ་ལ། །ཤེས་པའི་དངས་མ་གཅིག་ནི་ཡོད་པར་འདོད། །དོན་དམ་རང་བཞིན་ཤེས་པ་འགྱུར་བ་མེད། །རྟག་ཆད་རང་བཞིན་ཁ་དོག་དབྱིབས་ལས་འདས། །རྐྱེན་གྱིས་མི་ཤིགས་ཚིག་གིས་ཤེས་པར་དཀའ། །རིག་པས་བརྟགས་ན་ཤིན་ཏུ་ཤེས་པར་སླ། །རྟག་ཆད་མཐའ་དང་བྲལ་བའི་དངས་མ་གཅིག །དེ་ཉིད་དེ་ནི་དོན་དམ་རང་བཞིན་ལྟ་བ་ཡིན། །མེ་ལྔ་བསྟེན་དང་ཁྲུས་དང་གཙང་སྦྲ་སྤྱོད། །ཡོད་མེད་རྟག་ཆད་གཉིས་ཀྱི་མཐའ་ལ་བསྒོམ། །གྲུབ་ཚད་མི་དང་ལྷར་སྐྱེས་སྒྱུ་མ་ནམ་གྲུབ་པ། །མཐར་ཕྱིན་འབྲས་བུ་མི་དང་ལྷ་རུ་སྐྱེས། །སོ་སོའི་སྐྱེ་བོས་སྡིག་པ་ཆེ་ལས་སྦྲགས། །ལྷ་བརྒྱུད་མི་ཕམ་མགོན་པོས་ཤང་ཀ་བདུན་ཚེའོ། །བསྟན་པ་སྡེ་དྲུག་དག་གིས་གཞུང་བསྟན་ནོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། འཇིག་རྟེན་པ་མུ་སྟེགས་ཐེག་པ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཉན་ཐོས་ཐེག་པ་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་ཆོས་སྐུའི་རང་བཞིན་མ་རྟོགས་པས། །རྩལ་སྣང་རིག་པ་ཉན་ཐོས་ཐེག་པ་ནི། །འཕགས་པའི་བདེན་པ་བཞི་ཡི་སྒོ་ནས་འཇུག །བསྲུང་བའི་ཚུལ་ཁྲིམས་ཉིས་བརྒྱ་ལྔ་བཅུ་བསྲུང་། །འཕགས་པ་ཉན་ཐོས་ལྟ་བ་ནི། །ཉན་ཐོས་བྱེ་བྲག་པ་དང་མདོ་སྡེ་པ། །བྱེ་བྲག་དོན་དམ་རྡུལ་ཕྲན་ཆ། །ཆ་མེད་ཕྱོགས་དང་བྲལ་བར་འདོད། །མདོ་སྡེ་གཡག་རྔ་ནེའུ་སིང་ཚུལ། །ཀུན་རྫོབ་ཚུལ་དུ་འདོད་པ་ཡིན། །འཚོ་བའི་ཡོ་བྱད་བཅུ་གཉིས་དང་། །སྦྱངས་པའི་ཡོན་ཏན་བཅུ་གཉིས་དག་ལ་སྤྱོད། །སྤང་བྱ་སུམ་ཅུ་རྩ་གཅིག་དང་། །ཐོབ་བྱ་མཐོང་བ་བརྒྱད་ཅུ་ཐམ་པ་བསྒོམ། །གྲུབ་ཚད་བསྐལ་པ་བདུན་གྱིས་གྲུབ། །མཐར་ཕྱིན་དགྲ་བཅོམ་རྣམ་བཞིའི་འབྲས་བུ་འཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ ― DNG002_Page_0606 ―
[མ་དཔེ་གཟིགས་ན་འདིར་གནོན།]
ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཉན་ཐོས་ཐེག་པ་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རང་རྒྱལ་ཐེག་པ་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། སྙིང་པོའི་རང་བཞིན་མིང་མེད་མ་རྟོགས་པས། །སྣང་ཚུལ་ཡན་ལག་རིག་པའི་ཤེས་པ་ལས། །རང་རྒྱལ་ཐེག་པའི་འཇུག་སྒོ་ནི། །རྟེན་འདྲེལ་བཅུ་གཉིས་སྒོ་ནས་འཇུག །བསྲུང་བའི་ཚུལ་ཁྲིམས་ཉིས་བརྒྱ་ལྔ་བཅུ་བསྲུང་། །བསྒོམ་པའི་རིམ་པ་འགོག་པའི་སྙོམས་འཇུག་བསྒོམ། །ལྟ་བ་ཕྱོགས་གཅིག་ཉན་ཐོས་པ་དང་མཐུན། །དེ་ལས་ཁྱད་པར་སྤགས་བྱེད་ནི། །རྣམ་པར་རིག་བྱེད་མ་ཡིན་པའི། །གཟུགས་ལ་བདག་མེད་ཁྱད་པར་སྤགས། །ནང་གི་ཤེས་པ་སྐད་ཅིག་ལ། །སྐྱེ་འགག་ཅན་དེ་རྒྱུ་འབྲས་མེད། །རྫུ་འཕྲུལ་ཡ་མ་ཟུང་ལ་སྤྱོད། །གྲུབ་ཚད་བསྐལ་པ་ལྔ་ན་གྲུབ། །བྱ་བ་བྱས་དང་ཨར་ཧན་འབྲས་བུ་ཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། རང་རྒྱལ་བལྟ་བ་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མདོ་སྡེ་བྱང་ཆུབ་སེམས་དཔའི་ཐེག་པ་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་མིང་མེད་བརྗོད་མེད་མ་རྟོགས་པས། །རྩལ་སྣང་རིག་པ་ཕྲ་བའི་ཤེས་པ་ལས། །མདོ་སྡེ་བྱང་ཆུབ་སེམས་དཔའི་འཇུག་སྒོ་ནི། །བདེན་པ་གཉིས་ཀྱི་སྒོ་ནས་འཇུག །འདུལ་ཁྲིམས་བྱང་སེམས་སྡོམ་པ་ཉི་ཤུ་བསྲུང་། །མདོ་སྡེ་བྱང་ཆུབ་སེམས་དཔའི་ལྟ་བ་ནི། །མདོ་སྡེའི་ལྟ་བ་གསུམ་ཡོད་དེ། །རྣམ་པ་བདེན་རྫུན་གཉིས་སུ་འདོད། །སེམས་ཙམ་སྤྱོད་པའི་དབུ་མ་དང་། །མདོ་སྡེ་སྤྱོད་པའི་དབུ་མ་དང་། །རྣལ་འབྱོར་སྤྱོད་པའི་དབུ་མའོ། །སེམས་ཙམ་ལ་ཡང་གཉིས་ཡོད་དེ། །རྣམ་བཅས་དང་ནི་ ― DNG002_Page_0607 ―
[མ་དཔེ་གཟིགས་ན་འདིར་གནོན།]
རྣམ་མེད་དོ། །རྣམ་བཅས་ལ་ཡང་གཉིས་ཡོད་དེ། །རྣམ་པ་བདེན་རྫུན་གཉིས་སུ་འདོད། །རྣམ་པ་བདེན་པའི་ལྟ་བ་ནི། །ཕྱི་ཡི་ཡུལ་དང་ནང་གི་སེམས། །དོན་དམ་དུ་ནི་འདྲེལ་མེད་ཀྱང་། །ཀུན་རྫོབ་ཙམ་དུ་འདྲེལ་བར་འདོད། །ནང་གི་ཤེས་པ་སྐད་ཅིག་ལ། །སྐད་ཅིག་མ་ཡིས་མི་རྟག་ཏེ། །དེ་ཉིད་རྒྱུན་གྱིས་རྟག་པར་འདོད། །སྔ་མ་སྔ་མ་རྒྱུ་བྱས་ནས། །ཕྱི་མ་ཕྱི་མ་འབྲས་བུར་འདོད། །རྣམ་པ་རྫུན་པའི་ལྟ་བ་ནི། །ཤེས་པ་བདེན་ཏེ་རྣམ་པ་རྫུན། །རྣམ་པར་ཤེས་དང་གོ་མཉམ་དུས། །ཡང་དག་ཡོད་པ་མ་ཡིན་ཏེ། །དོན་ཙམ་དུ་ཡང་ཨ་ཅང་ཆེས། །ཀུན་རྫོབ་ཙམ་དུ་འདྲེལ་བར་འདོད། །ཤེས་པ་རང་རིག་གསལ་བ་ཙམ། །དེ་ལས་གཞན་པའི་ཆོས་མི་འདོད། །རྣམ་མེད་དག་གི་ལྟ་བ་ནི། །གཉིས་མེད་ཡེ་ཤེས་ཤེལ་ལྟ་བུ། །རང་རིག་གསལ་བའི་ངོ་བོར་འདོད། །མདོ་སྡེ་སྤྱོད་པའི་དབུ་མ་ནི། །ཆོས་རྣམས་ཡུལ་སེམས་གཉིས་སུ་འདོད། །ཡུལ་གྱི་རྒྱུ་ནི་ཕྲ་རབ་རྡུལ། །ཕྱོགས་ཆ་བཤིགས་ན་གཅིག་མ་གྲུབ། །གཅིག་མ་གྲུབ་པའི་གཏན་ཚིགས་ཀྱིས། །གཅིག་གིས་བསགས་པའི་དུ་མ་ཡང་། །ཡང་དག་ཉིད་དུ་མི་འདོད་དེ། །རང་གི་རང་བཞིན་སྟོང་བར་འདོད། །ནང་གི་ཤེས་པ་སྐད་ཅིག་མ། །སྔ་མ་འགགས་ཏེ་མི་གནས་སྟོང་། །ད་ལྟ་འགག་པར་གྱུར་པས་སྟོང་། །ཕྱིས་ནི་མི་འོང་མི་གནས་སྟོང་། །དུས་གསུམ་ཆ་ཡིས་སྟོང་བར་འདོད། །རྣལ་འབྱོར་སྤྱོད་པའི་ལྟ་བ་ནི། །ཕྱི་ཡི་ཡུལ་ལྟར་སྣང་བ་འདི། །ཀུན་རྫོབ་སྒྱུ་མའི་ཚུལ་དུ་སྣང་། །འཇའ་ཚོན་ལྟ་བུའི་ཚུལ་དུ་སྣང་། །སྟོང་ཞིང་སྣང་ལ་རང་བཞིན་སྟོང་། །སྣང་སྟོང་དབྱེ་བ་མེད་པར་འདོད། །བྱང་ཆུབ་སེམས་དཔའི་སྤྱོད་པ་ནི། །མི་དགེ་བཅུ་སྤངས་དགེ་བ་བཅུ། །གཞན་གྱི་དོན་དུ་སྤྱོད་པར་བྱེད། །ཕ་རོལ་ཕྱིན་པ་བཅུ་དག་ནི། །བདག་གཞན་གཉིས་ཀའི་དོན་དུ་སྤྱོད། །བྱང་ཆུབ་སེམས་དཔའི་བསྒོམ་པ་ནི། །སྒོ་ལྔ་གསལ་བའི་ཤེས་པ་ལ། །ཡིད་ནི་རྟོག་པ་མེད་པར་གནས། །གྲུབ་ཚད་བསྐལ་པ་གསུམ་ན་གྲུབ། །ཕ་རོལ་ཕྱིན་པ་བཅུ་དག་མཐར་ཕྱིན་འབྲས་བུའོ། །བཅུ་གཅིག་ ― DNG002_Page_0608 ―
[མ་དཔེ་གཟིགས་ན་འདིར་གནོན།]
ཀུན་ཏུ་འོད་ཀྱི་ས་ཡང་འཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། བྱང་སེམས་མདོ་སྡེའི་ཐེག་པ་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཀྲི་ཡའི་ཐེག་པ་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །སྙིང་པོ་མིང་མེད་འགྱུར་མེད་མ་རྟོགས་པས། །རྩལ་སྣང་རིག་པའི་ཤེས་པ་གཡོས་པ་ལས། །ཀྲི་ཡའི་ཐེག་པ་བསྟན་པ་ནི། །འཇུག་སྒོ་གཟའ་སྐར་དུས་བཟང་ངན་དང་དག་པ་གསུམ་ནས་འཇུག །བསྲུང་བའི་ཚུལ་ཁྲིམས་རྩ་བ་ཡན་ལག་གི། །མི་ཉམས་ཡན་ལག་བདུན་པོ་བསྲུང་། །ཀྲི་ཡོག་རྟོགས་པའི་ལྟ་བ་ནི། །ཆོ་ག་ཡན་ལག་བཅུ་གཅིག་གིས། །བྱིན་གྱིས་བརླབས་ནས་ལྷ་རུ་འདོད། །དེ་ཡང་རྗེ་དང་ཁོལ་གྱི་ཚུལ། །ཞི་རྒྱས་དབང་དྲག་མངོན་སྤྱོད་བཞི། །བདག་གཞན་གཉིས་ཀའི་དོན་དུ་སྤྱོད། །ཡན་ལག་བཅུ་གཅིག་ཆོ་ག་ཡིས། །བྱིན་གྱིས་བརླབས་ནས་ལྷ་རུ་བསྒོམ། །མི་ཚེ་བདུན་གྱིས་གྲུབ་པར་འདོད། །མཐར་ཕྱིན་རྡོ་རྗེ་འཛིན་པའི་ས་ཡང་ཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཀྲི་ཡའི་བལྟ་བ་ཐེག་པ་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཨུ་པ་ཡ་ཡི་ཐེག་པ་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །སྙིང་པོ་རང་བཞིན་མིང་མེད་མཉམ་པ་ལ། །ཡན་ལག་རྩལ་གྱི་རིག་པ་ཤེས་པ་ལས། །ཨུ་པ་ཡ་ཡི་ཐེག་པ་བསྟན་པ་ནི། །འཇུག་སྒོ་ཁྲུས་དང་གཙང་སྦྲའི་སྒོ་ནས་འཇུག །བསྲུང་བའི་ཚུལ་ཁྲིམས་དཀོན་མཆོག་གསུམ་མཆོད་དང་། །སློབ་དཔོན་མཆེད་ལྕམ་གདུང་སེམས་ཆེ་བ་དང་། །རྟོགས་པའི་ལྟ་བ་དཔོན་དང་གཡོག་གི་ཚུལ། །སྤྱོད་པའི་ཐབས་ནི་ཁྲུས་དང་ ― DNG002_Page_0609 ―
[མ་དཔེ་གཟིགས་ན་འདིར་གནོན།]
གཙང་སྦྲ་སྤྱོད། །སུམ་ཅུ་རྩ་གསུམ་ལྷ་རུ་བསྒོམ། །མི་ཚེ་ལྔ་ཡིས་གྲུབ་པར་བཤད། །འབྲས་བུ་རིགས་གསུམ་མགོན་པོའི་གོ་འཕང་འཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཨུ་པ་ཡའི་ཐེག་པ་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཡོ་གའི་ཐེག་པ་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །གཡོ་མེད་སྐྱེ་མེད་ཆོས་སྐུར་མ་རྟོགས་པས། །རྩལ་སྣང་ཟེར་གྱི་ཤེས་པ་ལས། །ཡོ་གའི་ཐེག་པ་བསྟན་པ་ནི། །འཇུག་སྒོ་ལྟ་སྤྱོད་གཉིས་དང་ནི། །རྣལ་འབྱོར་བཞི་ཡི་སྒོ་ནས་འཇུག །རྩ་བ་གསུམ་དང་ཡན་ལག་བདུན། །རྩ་བའི་ལྟུང་བ་བཅུ་བཞི་བསྲུང་། །ཡོ་གས་རྟོགས་པའི་ལྟ་བ་ནི། །བྱང་ཆུབ་ལྔ་དང་ཆོ་འཕྲུལ་བཞི། །ཡོངས་སུ་རྟོགས་ནས་ལྷ་རུ་བལྟ། །དེ་ཡང་སྤུན་དང་གྲོགས་པོའི་ཚུལ། །སྙིང་རྗེ་ལ་སོགས་ཚད་མེད་བཞི། །གཞན་གྱི་དོན་དུ་སྤྱོད་པར་བྱེད། །བྱང་ཆུབ་ལྔ་དང་ཆོ་འཕྲུལ་བཞི། །སུམ་ཅུ་རྩ་བདུན་ལྷ་རུ་བསྒོམ། །གྲུབ་ཚད་མི་ཚེ་གསུམ་གྱིས་འགྲུབ། །མཐར་ཕྱིན་འབྲས་བུ་སྟུག་པོ་བཀོད་པའི་ས་ཡང་འཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། སྔགས་ཀྱི་རྒྱུད་སྡེ་གསུམ་གྱི་ཐེག་པ་བསྟན་པའི་ལེའུ་སྟེ་ཉི་ཤུ་རྩ་གསུམ་པའོ།། །།ཨོ་ཐ་མ་ཧཱ་པ་ཏི་རི། ཨིད་པ་དྷ་ནི་བེ་མ་མ་ཡ་ཏ་ཡཱ། འབི་འབུ་རྔ་བི་དར་མ་འགའ་པ་ཡ། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །བསྐྱེད་རྫོགས་རྣམ་གསུམ་ཐེག་པ་ཡི། །དེ་ཡི་གནས་ལུགས་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོའི་རང་བཞིན་མིང་མེད་མ་རྟོགས་པས། །རྩལ་སྣང་རིག་པ་འཁོར་ལོའི་ཡིད་གཡོས་པས། །མཚན་ཉིད་རིག་པའི་དབང་གིས་མིང་བཏགས་ ― DNG002_Page_0610 ―
[མ་དཔེ་གཟིགས་ན་འདིར་གནོན།]
པ། །བསྐྱེད་པ་མ་ཧཱ་ཡོ་གའི་ཐེག་པ་ནི། །འཇུག་སྒོ་ཐབས་དང་ཤེས་རབ་གཉིས་ཀྱི་སྒོ་ནས་འཇུག །བསྲུང་བའི་དམ་ཚིག་ཉི་ཤུ་རྩ་བརྒྱད་བསྲུང་། །བསྲུང་བར་བྱ་བའི་དམ་ཚིག་གསུམ། །སྤྱད་པར་བྱ་བའི་དམ་ཚིག་ལྔ། །མི་སྤང་བ་ཡི་དམ་ཚིག་ལྔ། །དང་དུ་བླང་བའི་དམ་ཚིག་ལྔ། །ཤེས་པར་བྱ་བའི་དམ་ཚིག་ལྔ། །བསྒྲུབ་པར་བྱ་བའི་དམ་ཚིག་ལྔ། །ཕྱེ་བས་ཉི་ཤུ་རྩ་བརྒྱད་བསྲུང་། །མ་ཧཱ་ཡོ་གའི་ལྟ་བ་ནི། །ཏིང་འཛིན་གསུམ་དང་བསྙེན་བསྒྲུབ་བཞི། །ཡོངས་སུ་བརྟགས་ནས་ལྷ་རུ་བལྟ། །ཡེ་ཤེས་དམ་ཚིག་ཚུལ་མི་འཛིན། །སྣང་གྲགས་ཆོས་རྣམས་གདོད་མ་ནས། །རང་གི་སེམས་ཉིད་ཡིན་པ་ལ། །སེམས་དེར་སྣང་བ་མི་འགོག་ཐབས། །རང་བཞིན་མེད་པ་ཤེས་རབ་ཡིན། །ཐབས་ཀྱི་རང་བཞིན་སྟོང་པ་ལ། །ཤེས་རབ་རང་བཞིན་གཉིས་སུ་མེད། །སྣང་སྟོང་གཉིས་མེད་བྱང་ཆུབ་སེམས། །དོན་དམ་རང་བཞིན་དབྱེར་མེད་ཀྱང་། །དེ་ཉིད་ཡེ་ཤེས་སྒྱུ་མའི་རྩལ། །ཕུང་པོ་ལྔ་དང་རྣམ་ཤེས་ལྔ། །དབང་པོ་ལྔ་དང་རྣམ་ཤེས་ཚོགས། །སྣང་ཞིང་སྲིད་པས་བསྡུས་པ་རྣམས། །ཀུན་རྫོབ་ལྷ་དང་ལྷ་མོའི་དཀྱིལ་འཁོར་བལྟ། །དོན་དམ་རང་བཞིན་སྐྱེ་མེད་འགག་པ་མེད། །སྤྱོད་ཡུལ་ཀུན་དང་བྲལ་བ་ལ། །ཐམས་ཅད་གཉིས་སུ་མེད་པར་བལྟ། །བསྐྱེད་པ་མ་ཧཱའི་བསྒོམ་པ་ནི། །ཏིང་འཛིན་གསུམ་དང་བསྙེན་བསྒྲུབ་བཞིས། །རང་རྒྱུད་དག་པའི་ལྷ་རུ་བསྒོམ། །བསྒྲུབ་པའི་ཐབས་ནི་རྟོགས་པ་དང་། །ཏིང་འཛིན་རྣམ་གསུམ་སྒོ་ནས་སུ། །སྐུ་གསུང་ཐུགས་ཀྱི་དོན་དུ་བསྒྲུབ། །རྣལ་འབྱོར་མ་ཧཱའི་སྤྱོད་པ་ནི། །ཏ་ན་དང་ནི་ག་ཎ་དང་། །དམ་རྫས་བདུད་རྩི་ལྔ་པོ་ལ། །བདག་གཞན་གཉིས་ཀའི་དོན་དུ་སྤྱོད། །གྲུབ་ཚད་རིག་པ་འཛིན་པའི་ཚེ། །ཕྱག་རྒྱ་ཆེན་པོའི་རིག་འཛིན་འཐོབ། །མཐར་ཕྱིན་པ་ཡི་འབྲས་བུ་ནི། །རྡོ་རྗེ་འཆང་གི་སངས་རྒྱས་འཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། མ་ཧཱ་ཡོ་གའི་ཐེག་པ་བསྟན་པའི་ལེའུ་སྟེ་ཉི་ཤུ་རྩ་བཞི་པའོ།། །། ― DNG002_Page_0611 ―
[མ་དཔེ་གཟིགས་ན་འདིར་གནོན།]
དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཨ་ནུའི་ཐེག་པ་ཇི་ལྟར་ལགས། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །སྙིང་པོའི་རང་བཞིན་མིང་མེད་མ་ཤེས་པས། །ཡན་ལག་རྩལ་གྱི་འཁོར་དང་ཡིད་གཡོས་པས། །མཚན་ཉིད་རིག་པ་མིང་མེད་མིང་བཏགས་པས། །རྫོགས་པ་ཨ་ནུ་ཡོ་གའི་ཐེག་པ་ནི། །དབྱིངས་དང་ཡེ་ཤེས་སྒོར་ཞུགས་ནས། །འདི་ལྟར་སྣང་བའི་ཆོས་རྣམས་ལ། །ཐམས་ཅད་དབྱིངས་ཀྱི་དཀྱིལ་འཁོར་ཏེ། །དྲན་རིག་ཡིད་སེམས་ཅི་སྐྱེས་རྣམས། །དེ་ཉིད་ཡེ་ཤེས་ཆེན་པོ་སྟེ། །དེ་དག་གཉིས་མེད་སྒོ་ནས་འཇུག །བསྲུང་བར་བྱ་བའི་དམ་ཚིག་ནི། །སྐུ་གསུང་ཐུགས་ཀྱི་དམ་ཚིག་དང་། །སྙིང་པོ་ཆོས་ཉིད་ཐ་མི་དད་པར་བཟུང་། །སྣང་བ་ཐམས་ཅད་དབྱིངས་ཡིན་ཏེ། །ཤེས་པ་ཅི་སྐྱེས་ཡེ་ཤེས་ལ། །དབྱིངས་དང་ཡེ་ཤེས་ཆེན་པོ་སྟེ། །སྐྱེ་འགག་མེད་པའི་ཐབས་ལ་སྤྱོད། །བྱ་བྱེད་གང་ལ་མི་གནས་པའོ། །སྐུ་ནི་ལྷ་ཡི་སྐུ་རུ་བསྒོམ། །ལུས་ཀྱང་རྡོ་རྗེ་འཆང་དུ་བསྒོམ། །ངག་ནི་ཏིང་འཛིན་ཞི་བ་ཡིན། །ཡིད་ནི་ཏིང་འཛིན་སྤྲོ་བསྡུས་གཟུང་། །རྩ་བ་མི་རྟོག་ཏིང་འཛིན་བདེ་དང་བྲལ། །ཡབ་ཡུམ་ཐབས་དང་ཤེས་རབ་མི་རྟོག་པས། །སྙིང་པོ་ཙམ་གྱིས་དཀྱིལ་འཁོར་རྫོགས་བྱའི་ཕྱིར། །ཨ་ནུའི་ཏིང་འཛིན་ཆེན་པོར་ཤར། །གྲུབ་ཚད་ལྷག་པའི་ལུས་ཉིད་ཀྱིས། །ཚེ་ལ་དབང་བའི་རིག་འཛིན་འཐོབ། །མཐའ་རུ་ཕྱིན་པའི་འབྲས་བུ་ཡང་། །རྡོ་རྗེ་སེམས་དཔའ་མཚན་ཉིད་ཡོངས་སུ་རྫོགས་པའི་ས། །ཡེ་ཤེས་འཁོར་ལོ་པདྨ་ཅན་གྱི་སངས་རྒྱས་འཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཨ་ནུ་ཡོ་གའི་ཐེག་པ་བསྟན་པའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རྫོགས་ཆེན་ཨ་ཏི་ཡོ་ག་ཡི། །དེ་ཡི་ཐེག་པ་ཇི་ལྟར་ལགས། །ཞེས་གསོལ་པ་དང་། སྟོན་པས་ ― DNG002_Page_0612 ―
[མ་དཔེ་གཟིགས་ན་འདིར་གནོན།]
འཁོར་ལ་བཀའ་སྩལ་པ། །སྙིང་པོའི་རང་བཞིན་མིང་མེད་མ་ཤེས་པས། །ཡན་ལག་རྩལ་གྱི་རིག་པ་ཡིད་གཡོས་པས། །མིང་མེད་མིང་བཏགས་ཨ་ཏིའི་ལྟ་བ་ནི། །སེམས་ཉིད་སངས་རྒྱས་སྒོ་ནས་འཇུག །རྟོགས་པའི་ལྟ་བ་མཐར་ཐུག་སྐྱོན་དང་བྲལ། །སྣང་ཞིང་སྲིད་པའི་ཆོས་རྣམས་ལ། །རང་བཞིན་རྣམ་པར་དག་པར་བལྟ། །མེད་པ་དང་ནི་ཕྱལ་བ་དང་། །གཅིག་པུ་དང་ནི་ལྷུན་གྱིས་གྲུབ། །བསྲུང་དུ་མེད་པའི་དོན་མི་འདའ། །སྒོམ་པ་མ་བཅོས་མཉམ་གཞག་ནི། །སེམས་དང་ཆོས་ནི་ཅི་ཡང་མ་ཡིན་པས། །བསྒོམ་པའི་ཚེ་ནི་ཅི་ཡང་ཡིད་ལ་མེད། །བསྒོམ་དུ་མེད་པའི་ངང་ལ་བསྒོམ། །རྩོལ་བསྒྲུབ་མཐའ་དང་བྲལ་བ་དོན་ལ་བསྒྲུབ། །སྤྱོད་པའི་ཕྲིན་ལས་རྩོལ་དུ་མེད། །གང་ཡང་བྱ་བ་བཏང་བ་ལ། །བྱ་རྒྱུ་ཅི་ཡང་མ་མཆིས་སོ། །དུས་ནི་མི་ཚེ་གཅིག་གིས་འགྲུབ། །མཐར་ཕྱིན་འབྲས་བུ་ཐམས་ཅད་མཁྱེན་པའི་སངས་རྒྱས་འཐོབ། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། རྫོགས་པ་ཆེན་པོ་བསྟན་པའི་ལེའུ་སྟེ་ཉི་ཤུ་རྩ་དྲུག་པའོ།། །།ཨ་ཐཱ་མ་ཧཱ་སུ་ཁ་ཧོ། མ་ཧཱ་བྷུ་སི་ཏིཿཨ་ཏ་རི། སཾ་ཀ་རི་དྷརྨ་དྷཱ་ཏུ་ཀཱ་ཡ་ཝཱ་ཀ་སིདྡྷི་ཨཱཿཨ་ཨ་བྷི་བྷི་མ་ལ་ཨ་ཏི་ཏ་ཡཿ། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཐེག་པ་ཐམས་ཅད་གཅིག་བསྡུས་པའི། །རང་གཞུང་ཉམས་བླང་སྤྱི་ཏི་ཡང་ཏི་སྟེ། །སྤྱི་ཏི་ཡོ་གའི་ཐེག་པ་དེ། །འདུས་པའི་འཁོར་ལ་གསུང་དུ་གསོལ། །དེ་ནས་ཀུན་ཏུ་བཟང་པོ་ཡིས། །འདུས་པའི་འཁོར་ལ་འདི་སྐད་གསུངས། །ང་ཡི་སྤྱི་ཏི་ཡོ་ག་འདི། །ཐེག་པ་ཀུན་གྱི་གཉའ་གཅོག་ཡིན། །ཐེག་པ་སྤྱི་ཡི་བཅུད་ཕྱུང་ནས། །བཅུད་ཀྱི་སྙིང་པོ་ཡང་ཏི་ཡོ་ག་འདི། །གཅིག་ཐིག་བྱང་ཆུབ་སེམས་ཀྱི་ཐིག་པ་ཡི། །སྤྱི་བསྡུས་སྤྱི་ཏི་ཡོ་ག་འདི། །དབྱེ་བསལ་མེད་པའི་སྒོ་ནས་འཇུག །ཕྱོགས་མཚམས་མེད་པའི་དམ་ཚིག་བསྲུང་། །ཞེ་འདོད་མེད་པའི་ལྟ་བ་བལྟ། །གཡོ་རྩོལ་མེད་པའི་ཏིང་འཛིན་བསྒོམ། །བྱ་རྒྱུ་མེད་པའི་ངང་ལ་སྤྱོད། །རྩིས་གདབ་མེད་པའི་དོན་དུ་བསྒྲུབ། ། ― DNG002_Page_0613 ―
[མ་དཔེ་གཟིགས་ན་འདིར་གནོན།]
དུས་གསུམ་གཅིག་སྟེ་སྔ་ཕྱི་མེད། །འབྲས་བུ་ད་ལྟ་མངོན་སངས་རྒྱས། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། སྤྱི་ཏི་ཡོ་གའི་ཐེག་པ་བསྟན་པའི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཨ་ནུ་མན་ཆོད་ཐེག་པ་དེ། །སྤང་ངམ་འོན་ཏེ་ཇི་ལྟར་བགྱི། །ཞེས་གསོལ་པ་དང་། ཀུན་ཏུ་བཟང་པོས་འདི་སྐད་གསུངས། །སྙིང་པོའི་རང་བཞིན་མིང་མེད་མཉམ་པ་ལ། །རྩལ་གྱི་རིམ་པར་མིང་བཏགས་ཐེག་པ་བརྒྱད། །ང་ཡི་སྤྱི་ཏི་ཡོ་ག་འདིར། །ཐེག་པ་མ་ལུས་ངང་གིས་རྫོགས། །སྤངས་ན་ཉན་ཐོས་ལྟ་བར་འགྱུར། །ཨ་ནུ་མན་ཆད་རྫོགས་ལུགས་ཀྱང་། །དབྱིངས་དང་ཡེ་ཤེས་གཉིས་མེད་པས། །ཨ་ནུ་ཡོ་གའི་ཐེག་པ་རྫོགས། །ཐབས་དང་ཤེས་རབ་གཉིས་མེད་པས། །མ་ཧཱ་ཡོ་གའི་ཐེག་པ་རྫོགས། །སྤུན་དང་གྲོགས་པོ་གཉིས་མེད་པས། །ཡོ་གའི་ལྟ་བ་ཡོངས་སུ་རྫོགས། །ལྟ་སྤྱོད་ཡ་ཆར་འགལ་མེད་པས། །ཨུ་པ་ཡ་ཡི་ལྟ་བ་རྫོགས། །ཕྱི་དག་ནང་དག་ཐམས་ཅད་དག །ཀྲི་ཡའི་ལྟ་བ་ཡོངས་སུ་རྫོགས། །དོན་དམ་ཀུན་རྫོབ་གཉིས་མེད་པས། །བྱང་ཆུབ་སེམས་དཔའི་ལྟ་བ་རྫོགས། །ཡུལ་སེམས་གཉིས་སུ་མ་གྲུབ་པས། །སེམས་ཙམ་ལྟ་བ་ཡོངས་སུ་རྫོགས། །གཟུང་འཛིན་གཉིས་སུ་མ་གྲུབ་པས། །རང་རྒྱལ་ལྟ་བ་ཡོངས་སུ་རྫོགས། །རྣམ་པར་རིག་བྱེད་མ་གྲུབ་པས། །ཉན་ཐོས་ལྟ་བ་ཡོངས་སུ་རྫོགས། །རྟག་ཆད་གཉིས་ཀྱི་མཐའ་ལས་གྲོལ། །མུ་སྟེགས་ལྟ་བ་ཡོངས་སུ་རྫོགས། །སྤང་བར་བྱ་བ་མ་ཡིན་ཏེ། །རང་བཞིན་ཡོངས་སུ་རྫོགས་པའོ། །ཕྱི་པ་མུ་སྟེགས་ཐེག་པ་ཡང་། །རྟག་ཆད་མཐའ་རུ་གོལ་དགོས་པས། །རེ་ཞིག་ཕྱི་པར་བསྟན་པ་ཙམ། །བྱང་ཆུབ་སེམས་ཀྱི་ངང་གཅིག་པས། །སྤངས་ན་རྫོགས་པར་མི་འགྱུར་ཏེ། །དྲུག་གིས་བསྟན་པའི་ལོག་ཆོས་ཀྱང་། །ངན་དུ་མི་སྤང་མི་དོར་རོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་ ― DNG002_Page_0614 ―
[མ་དཔེ་གཟིགས་ན་འདིར་གནོན།]
པའི་རྒྱུད་ལས། མ་སྤངས་ངང་གིས་ཡོངས་སུ་རྫོགས་པར་བསྟན་པའི་ལེའུ་སྟེ་ཉི་ཤུ་རྩ་བརྒྱད་པའོ།། །།ཨ་ད་པ་ཏི་ད་ར་དུ། ཀཱ་ཡ་ཝཱ་ཀ་ཙིཏྟ། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཐེག་པ་དེ་དག་ཐམས་ཅད་ཀྱི། །གོལ་སྒྲིབ་གདར་ཤ་ཇི་ལྟར་གཅད། །ཅེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། སྙིང་པོའི་རང་བཞིན་མིང་མེད་མ་རྟོགས་པས། །ཡན་ལག་རྟོག་པའི་འཁོར་ལོ་ཡིད་གཡོས་པས། །མི་རྟོག་ཐེག་པའི་གོལ་སྒྲིབ་ངས་བཤད་ཀྱེ། །རྡོ་རྗེ་སེམས་དཔའ་ཡིད་ལ་ཟུང་། །ཐེག་པའི་གོལ་སྒྲིབ་འཁྲུལ་དང་གསུམ། །ཉན་ཐོས་བདག་མེད་བལྟ་བ་ཡང་། །བདག་མེད་མ་རྟོགས་མུ་སྟེགས་དག་ཏུ་གོལ། །ཉན་ཐོས་བདག་མེད་དག་ལ་བསྒྲིབ། །ཕྲག་དོག་དག་ཏུ་ཉན་ཐོས་འཁྲུལ། །ཆོས་ལ་བདག་མེད་རང་རྒྱལ་ཡང་། །བདག་ཏུ་འདོད་ན་རང་རྒྱལ་ཉིད་དུ་གོལ། །ཆོས་ལ་བདག་འདོད་ཉན་ཐོས་ཀྱིས། །རང་རྒྱལ་དག་ལ་ཉན་ཐོས་བསྒྲིབས། །རང་རྒྱལ་མ་རིག་དག་ཏུ་འཁྲུལ། །གཟུང་འཛིན་གཉིས་བྲལ་སེམས་ཙམ་ཡང་། །རང་རིག་གསལ་བར་འདོད་ན་ཡང་། །སེམས་ཙམ་རང་རྒྱལ་དག་ཏུ་གོལ། །རང་རྒྱལ་རྣམ་པར་རིག་བྱེད་ཀྱིས། །སེམས་ཙམ་གཟུང་འཛིན་བྲལ་ལ་བསྒྲིབས། །སེམས་ཙམ་ཞེ་སྡང་དག་ཏུ་འཁྲུལ། །རང་བཞིན་མེད་པའི་དབུ་མ་ཡང་། །སེམས་སུ་གསལ་བར་འདོད་ན་ཡང་། །དབུ་མ་སེམས་ཙམ་དག་ཏུ་གོལ། །གཟུང་འཛིན་གཉིས་བྲལ་སེམས་ཙམ་གྱིས། །དབུ་མ་རང་བཞིན་མེད་ལ་བསྒྲིབས། །དབུ་མ་ཞེ་སྡང་དག་ཏུ་འཁྲུལ། །སྐྱེ་འགག་མེད་པའི་ཀྲི་ཡོག་ཀྱང་། །ཀུན་རྫོབ་དོན་དམ་གཉིས་ཀ་ཡང་། །ཀྲི་ཡོག་དབུ་མ་དག་ཏུ་གྲོལ། །དབུ་མ་བདེན་པ་གཉིས་འདོད་ཀྱིས། །ཀྲི་ཡོག་སྐྱེ་འགག་མེད་ལ་བསྒྲིབས། །ཀྲི་ཡོག་ང་རྒྱལ་དག་ཏུ་འཁྲུལ། །སྣང་སྟོང་གཉིས་མེད་མ་ཧཱ་ཡང་། །དོན་དམ་སྐྱེ་ ― DNG002_Page_0615 ―
[མ་དཔེ་གཟིགས་ན་འདིར་གནོན།]
འགག་མེད་པར་བལྟ། །མ་ཧཱ་ཀྲི་ཡོག་དག་ཏུ་འཁྲུལ། །ཀྲི་ཡོག་སྐྱེ་འགག་མེད་པ་དེས། །མ་ཧཱ་སྣང་སྟོང་མེད་ལ་བསྒྲིབས། །མ་ཧཱ་འདོད་ཆགས་དག་ཏུ་འཁྲུལ། །སྣང་སྟོང་བཅུད་གཉིས་མེད་ཨ་ནུ་ཡང་། །སྣང་སྟོང་གཉིས་སུ་འདོད་ན་ཡང་། །ཨ་ནུ་མ་ཧཱ་དག་ཏུ་གོལ། །སྣང་སྟོང་གཉིས་མེད་མ་ཧཱ་ཡིས། །ཨ་ནུ་སྣོད་བཅུད་དག་ལ་བསྒྲིབས། །ཨ་ནུ་གཟུང་འཛིན་དག་ཏུ་འཁྲུལ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། ཐེག་པའི་གོལ་སྒྲིབ་འཁྲུལ་པ་བསྟན་པའི་ལེའུ་སྟེ་ཉི་ཤུ་རྩ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཨ་ཏི་ཡོ་གའི་སྙིང་པོ་ལ། །གོལ་སྒྲིབ་འཁྲུལ་པ་ཡོད་དམ་མེད། །ཞེས་གསོལ་པ་དང་། མཚོན་མེད་ཀུན་ཏུ་བཟང་པོས་བཀའ་སྩལ་པ། རྟོགས་ན་གོལ་སྒྲིབ་མེད་མོད་ཀྱང་། །མ་རྟོགས་གོལ་སྒྲིབ་འཁྲུལ་པར་སྣང་། །ངེས་པ་ཐོབ་པའི་ཐེག་པ་དྲུག །རྫོགས་པ་ཆེན་པོའི་གོལ་ས་སྟེ། །རྫོགས་ཆེན་ངེས་ཐོབ་སྒྲིབ་པ་བཤད། །མདོ་སྡེ་དང་ནི་ཀྲི་ཡ་དང་། །ཨུ་པ་དང་ནི་ཡོ་ག་དང་། །མ་ཧཱ་ཨ་ནུ་ཡོ་ག་དྲུག །རྫོགས་པ་ཆེན་པོའི་གོལ་སྒྲིབ་སྟེ། །མདོ་སྡེ་བྱང་ཆུབ་སེམས་དཔའ་ནི། །ཀུན་ཏུ་འོད་ཀྱི་ས་འདོད་པས། །བདེན་པ་གཉིས་ཀྱི་ས་འདོད་པ། །ཆོས་ཉིད་སྟོང་ལ་རྣམ་པར་རྟོག །ཨ་ཏི་སྟོང་པ་བདེ་ཆེན་ལ། །རྟོག་དཔྱོད་རྩིས་གདབ་མེད་པའི་དོན། །རྩིས་གདབ་མེད་ལ་མདོ་སྡེས་བསྒྲིབས། །རྟོག་དཔྱོད་རྩིས་གདབ་བྱེད་པ་ནི། །མདོ་སྡེ་དག་ཏུ་གོལ་བར་བཤད། །རྟོག་དཔྱོད་འཁྲུལ་པ་རྩད་ནས་མ་ཆོད་པས། །རྫོགས་ཆེན་གཏི་མུག་ངག་ཏུ་འཁྲུལ། །ཀྲི་ཡ་རྡོ་རྗེ་འཛིན་འདོད་པས། །དག་པ་རྣམ་གསུམ་སྒོར་ཞུགས་པས། །ཆོས་ཉིད་དག་ལ་འཛིན་པ་སྟེ། །གཟུང་འཛིན་དག་གི་ཡུལ་ལ་གནས། །གཟུང་འཛིན་འཁྲུལ་པ་མེད་པའི་དོན། །གཟུང་འཛིན་མེད་ལ་ཀྲི་ཡས་བསྒྲིབ། །རྫོགས་ཆེན་གཟུང་འཛིན་མེད་པ་ནི། །ཀྲི་ཡ་དག་ཏུ་གོལ་བར་བཤད། །གཟུང་འཛིན་འཁྲུལ་རྩད་མ་ཆོད་པས། །རྫོགས་ཆེན་ཀྲི་ཡ་དག་ཏུ་འཁྲུལ། །ཨུ་པ་ཡ་ཡི་བལྟ་བ་ནི། ། ― DNG002_Page_0616 ―
[མ་དཔེ་གཟིགས་ན་འདིར་གནོན།]
ཀྲི་ཡ་སྤྱོད་ལ་ཡོ་ག་བསྒྲུབ། །ལྟ་སྤྱོད་འདྲེལ་པའི་དོན་མེད་པས། །ཨ་ཏི་ཡོ་གའི་སྙིང་པོ་ནི། །ལྟ་སྤྱོད་གཉིས་པོ་བྱང་ཆུབ་སེམས། །གཉིས་སུ་མེད་ལ་ཨུ་པ་ཡ་ཡིས་བསྒྲིབ། །རྫོགས་ཆེན་གཉིས་སུ་འདོད་པ་ནི། །ཨུ་པ་ཡ་རུ་གོལ་བར་བཤད། །གཉིས་མེད་ཡེ་ཤེས་མ་ཤེས་པར། །རྫོགས་ཆེན་ཡ་བྲལ་དག་ཏུ་འཁྲུལ། །ཡོ་ག་སྟུག་པོ་བཀོད་འདོད་པས། །མཚན་མ་ཡོད་མེད་སྒོར་ཞུགས་ནས། །ཕྱག་རྒྱ་བཞི་ལ་གཙོར་བྱེད་པ། །དབྱེ་བསལ་མེད་ལ་འཇུག་མ་ནུས། །ཨ་ཏི་ཡོ་གའི་སྙིང་པོ་ནི། །དབྱེ་བསལ་མེད་པའི་བྱང་ཆུབ་སེམས། །དབྱེ་བསལ་མེད་ལ་ཡོ་གས་བསྒྲིབས། །རྫོགས་ཆེན་དབྱེ་བསལ་བྱེད་པ་ནི། །ཡོ་ག་དག་ཏུ་གོལ་བར་བཤད། །དབྱེ་བསལ་མེད་པར་མ་གོ་བས། །རྫོགས་ཆེན་གཉིས་སྣང་དག་ཏུ་འཁྲུལ། །མ་ཧཱ་རྡོ་རྗེ་འཆང་འདོད་པས། །ཏིང་འཛིན་རྣམ་གསུམ་སྒོར་ཞུགས་ནས། །རང་རྒྱུད་དག་པའི་དཀྱིལ་འཁོར་ལ། །བསྙེན་བསྒྲུབ་རྣམ་བཞི་སྒྲུབ་པར་བྱེད། །ཨ་ཏི་ཡོ་གའི་སྙིང་པོ་ནི། །རྩོལ་བསྒྲུབ་འདས་པའི་བྱང་ཆུབ་སེམས། །རྩོལ་བསྒྲུབ་འདས་ལ་མ་ཧཱས་བསྒྲིབས། །རྫོགས་ཆེན་རྩོལ་བསྒྲུབ་བྱེད་པ་ནི། །མ་ཧཱ་ཡོ་གར་གོལ་བར་བཤད། །ལུས་ངག་འཁྲུལ་པ་མ་ཞིག་པས། །རྫོགས་ཆེན་བྱ་བཙལ་དག་ཏུ་འཁྲུལ། །ཨ་ནུ་དབྱེར་མེད་དུ་འདོད་པས། །དབྱིངས་དང་ཡེ་ཤེས་སྒོར་ཞུགས་ནས། །རྒྱུ་ནི་དག་པའི་དབྱིངས་སུ་བལྟ། །འབྲས་བུ་ཡེ་ཤེས་དཀྱིལ་འཁོར་ལྟ། །ཨ་ཏི་ཡོ་གའི་སྙིང་པོ་ནི། །རྒྱུ་འབྲས་འདས་པའི་བྱང་ཆུབ་སེམས། །རྒྱུ་འབྲས་འདས་ལ་ཨ་ནུས་བསྒྲིབས། །རྫོགས་ཆེན་རྒྱུ་འབྲས་གཉིས་བལྟ་ན། །ཨ་ནུ་ཡོ་གར་གོལ་བར་བཤད། །རྒྱུ་འབྲས་འཁྲུལ་རྩད་མ་ཆོད་པས། །རྫོགས་ཆེན་བྱ་བཙལ་དག་ཏུ་འཁྲུལ། །ཐེག་པའི་གོལ་སྒྲིབ་འཁྲུལ་སྣང་གསུམ། །ཐེག་པ་གཅིག་གི་ལྟ་བ་ལ། །གོལ་སྒྲིབ་འཁྲུལ་པ་སུམ་ཅུ་ཡོད། །བལྟ་བའི་གོལ་སྒྲིབ་འཁྲུལ་དང་གསུམ། །དམ་ཚིག་གོལ་སྒྲིབ་འཁྲུལ་དང་གསུམ། །ཕྲིན་ལས་གོལ་སྒྲིབ་འཁྲུལ་དང་གསུམ། ། ― DNG002_Page_0617 ―
[མ་དཔེ་གཟིགས་ན་འདིར་གནོན།]
ཡེ་ཤེས་གོལ་སྒྲིབ་འཁྲུལ་དང་གསུམ། །ས་ཡི་གོལ་སྒྲིབ་འཁྲུལ་དང་གསུམ། །ལམ་གྱི་གོལ་སྒྲིབ་འཁྲུལ་དང་གསུམ། །ཕྲ་བའི་གོལ་སྒྲིབ་འཁྲུལ་དང་གསུམ། །རྒྱུད་ཀྱི་གོལ་སྒྲིབ་འཁྲུལ་དང་གསུམ། །ལུང་གི་གོལ་སྒྲིབ་འཁྲུལ་དང་གསུམ། །མན་ངག་གོལ་སྒྲིབ་འཁྲུལ་དང་གསུམ། །ཕྱེ་བས་སུམ་ཅུ་ཐམ་པའོ། །དེ་ཡི་མཚན་ཉིད་གང་དང་གང་། །ལྟ་བ་དག་གི་རང་བཞིན་ནི། །བསྒོམ་མེད་རང་བཞིན་དོན་ལ་བལྟ། །སྒོམ་མེད་རང་བཞིན་མ་ཤེས་ན། །ལྟ་བ་དག་གི་སྒྲིབ་པར་བཤད། །ཡེ་ནས་མཉམ་པའི་རང་བཞིན་ལ། །ཞེ་འདོད་མེད་པས་མི་བལྟ་སྟེ། །བསྒོམ་ནས་རྟོགས་པར་བལྟ་བ་ནི། །ལྟ་བ་དག་གི་གོལ་ས་ཡིན། །ཞེ་འདོད་རྩིས་གདབ་བྱེད་པ་ནི། །ལྟ་བའི་འཁྲུལ་པ་ཡིན་པར་བཤད། །བསྲུང་མཚམས་མེད་པའི་དམ་ཚིག་ལ། །བསྲུང་མཚམས་མེད་པར་མ་ཤེས་ན། །དམ་ཚིག་སྒྲིབ་པ་ཡིན་པར་བཤད། །བསྲུང་མཚམས་མེད་པར་མ་རྟོགས་ནས། །ཕྱོགས་མཚམས་དམ་ཚིག་བསྲུང་བ་ནི། །དམ་ཚིག་གོལ་ས་ཡིན་པར་བཤད། །ཕྱོགས་དང་བྱེ་བྲག་ཕྱེ་བ་ནི། །དམ་ཚིག་འཁྲུལ་པ་ཡིན་པར་བཤད། །ཕྲིན་ལས་རང་བཞིན་བཙལ་མེད་ལ། །རྩོལ་བསྒྲུབ་འདས་པའི་ཕྲིན་ལས་ལ། །བཙལ་དུ་མེད་པར་མ་ཤེས་ན། །ཕྲིན་ལས་སྒྲིབ་པ་ཡིན་པར་བཤད། །བཙལ་དུ་མེད་པའི་རང་བཞིན་ལ། །བཙལ་དུ་མེད་པར་མ་རྟོགས་ཏེ། །ཕྲིན་ལས་རྩོལ་བར་བྱེད་པ་ནི། །ཕྲིན་ལས་གོལ་ས་ཡིན་པར་བཤད། །ལུས་དག་འབད་རྩོལ་བྱེད་པ་ནི། །ཕྲིན་ལས་འཁྲུལ་པ་ཡིན་པར་བཤད། །ཡེ་ཤེས་དག་གི་རང་བཞིན་ནི། །ཡེ་ནས་སྒྲིབ་པ་མེད་པར་གསལ། །སྒྲིབ་པ་མེད་པར་མ་ཤེས་ན། །ཡེ་ཤེས་དག་གི་སྒྲིབ་པར་བཤད། །སྒྲིབ་པ་མེད་པའི་ཡེ་ཤེས་ལ། །སྒྲིབ་པ་མེད་པར་མ་རྟོགས་ཏེ། །མི་སྤྱོད་གསལ་བར་མ་རྟོགས་ན། །ཡེ་ཤེས་གོལ་ས་ཡིན་པར་བཤད། །གསལ་མི་གསལ་དུ་འདོད་པ་ནི། །ཡེ་ཤེས་འཁྲུལ་པ་ཡིན་པར་བཤད། །ས་དང་ཕ་རོལ་ཕྱིན་པ་ནི། །སྦྱང་ཞིང་བགྲོད་དུ་མེད་པར་མ་ཤེས་ན། །ས་དང་ཕ་རོལ་ཕྱིན་པའི་སྒྲིབ་པར་བཤད། །སྦྱང་བགྲོད་མ་དགོས་ས་ལམ་ལ། །སྦྱང་ ― DNG002_Page_0618 ―
[མ་དཔེ་གཟིགས་ན་འདིར་གནོན།]
བགྲོད་མི་དགོས་མ་རྟོགས་ཏེ། །སྦྱང་ཞིང་བགྲོད་པར་བྱེད་པ་ནི། །ས་དང་ཕ་རོལ་གོལ་སར་བཤད། །གོང་འོག་རིམ་པར་འདོད་པ་ནི། །ས་དང་ཕ་རོལ་འཁྲུལ་པར་བཤད། །ལམ་གྱི་རིམ་པའི་རང་བཞིན་ནི། །བགྲོད་དུ་མེད་པའི་རང་བཞིན་ཡིན། །བགྲོད་དུ་མེད་པར་མ་ཤེས་ན། །ལམ་གྱི་སྒྲིབ་པ་ཡིན་པར་བཤད། །བགྲོད་དུ་མེད་པའི་རང་བཞིན་ལ། །བགྲོད་དུ་མེད་པར་མ་རྟོགས་ཏེ། །ལམ་ལ་བགྲོད་དུ་ཡོད་འདོད་ན། །ལམ་གྱི་གོལ་ས་ཡིན་པར་བཤད། །བྱེ་བྲག་ལྔ་རུ་འདོད་པ་ནི། །ལམ་གྱི་འཁྲུལ་པ་ཡིན་པར་བཤད། །ཕྲ་བ་དག་གི་རང་བཞིན་ནི། །གཟུང་འཛིན་དག་གི་རང་བཞིན་ཡིན། །གཟུང་འཛིན་བྲལ་བར་མ་ཤེས་ན། །ཕྲ་བ་དག་གི་སྒྲིབ་པར་བཤད། །གཟུང་འཛིན་བྲལ་བར་མ་རྟོགས་ཏེ། །ཕྲ་རབ་རྡུལ་དུ་ཡོད་ལྟ་ན། །ཕྲ་རགས་གོལ་ས་ཡིན་པར་བཤད། །གཟུང་འཛིན་ཕྲ་རགས་གཉིས་སྣང་ན། །ཕྲ་བའི་འཁྲུལ་པ་ཡིན་པར་བཤད། །རྒྱུད་ཀྱི་རང་བཞིན་བསྟན་པ་ནི། །སེམས་ཆོས་གཉིས་སུ་མེད་པར་འདྲེལ། །གཉིས་མེད་འདྲེལ་བར་མ་ཤེས་ན། །རྒྱུད་ཀྱི་སྒྲིབ་པ་ཡིན་པར་བཤད། །གཉིས་སུ་མེད་པར་འདྲེལ་བ་ལ། །གཉིས་མེད་འདྲེལ་བར་མ་རྟོགས་ཏེ། །སེམས་ཆོས་གཉིས་སུ་ལྟ་བ་ནི། །རྒྱུད་ཀྱི་གོལ་ས་ཡིན་པར་བཤད། །ཐ་དད་རྩེ་གཉིས་སྐྱེས་པ་ནི། །རྒྱུད་ཀྱི་འཁྲུལ་པ་ཡིན་པར་བཤད། །ལུང་གི་རང་བཞིན་ཡིན་པ་ནི། །གཏན་ལ་འབེབས་ཤིང་ངེས་པར་སྟོན། །གཏན་ལ་འབེབས་པར་མ་ཤེས་ན། །ལུང་གི་སྒྲིབ་པ་ཡིན་པར་བཤད། །གཏན་ལ་འབེབས་པའི་ལུང་དེ་ལ། །ཐོག་ཏུ་ཕེབས་པར་མ་རྟོགས་ཏེ། །ཐོག་ཏུ་མི་ཕེབས་ཟེར་བ་ནི། །ལུང་གི་གོལ་ས་ཡིན་པར་བཤད། །སྒྲ་ཚིག་རང་ཐད་ཁྱེར་ནས་ནི། །དོན་དང་མི་མཐུན་ཚིག་རྗེས་འབྲང་། །ལུང་གི་འཁྲུལ་པ་ཡིན་པར་བཤད། །མན་ངག་རང་བཞིན་བསྟན་པ་ནི། །གཉིས་སྣང་མེད་པར་ལ་ཟློས་ནས། །སྤྲོས་པ་མེད་པར་མ་ཤེས་ན། །མན་ངག་དག་གི་སྒྲིབ་པ་ཡིན། །སྒྲོ་སྐུར་བྲལ་བའི་མན་ངག་ལ། །སྤྲོས་པ་མེད་པར་མ་རྟོགས་ཏེ། །སྒྲོ་སྐུར་ཡོད་པར་འདོགས་པ་ནི། །མན་ངག་དག་གི་གོལ་སར་བཤད། །སྤྲོས་པའི་མཐའ་ལ་མངོན་ཞེན་ན། །མན་ངག་འཁྲུལ་པ་ཡིན་པར་བཤད། །དབྱེ་ན་དེ་ལྟར་ཡོད་མོད་ཀྱང་། ། ― DNG002_Page_0619 ―
[མ་དཔེ་གཟིགས་ན་འདིར་གནོན།]
བསྡུ་ན་གསུམ་ལས་མེད་པར་བཤད། །འགྲོ་སྒོ་ནོར་བས་གོལ་ས་ཡིན། །གནས་དོན་མ་རྟོགས་སྒྲིབ་པ་ཡིན། །སྒོ་ལྔར་འཁྱམས་པས་འཁྲུལ་པ་ཡིན། །དཔེར་ན་དོན་ཡོད་ལམ་ཞུགས་ན། །ཤར་ན་དོན་ཡོད་ནུབ་ལ་ཕྱིན། །ནུབ་ཀྱིས་ཤར་གྱི་དོན་མི་འགྲུབ། །ལམ་རྒྱུས་མི་ཤེས་འཁྲུལ་པ་འབྱུང་། །ཞེ་འདོད་མེད་པའི་དོན་འདོད་པས། །ཞེ་འདོད་མཚན་མའི་ལམ་དུ་ཞུགས། །གོལ་ས་ཞེས་ནི་དེ་ལ་བཤད། །སྒྲོ་སྐུར་གཉིས་བྲལ་རང་བཞིན་ལ། །བརྗོད་ཡོད་རྟོག་པའི་སྒྲིབ་པ་ཡིན། །ཚིག་གི་སྒྲོ་འདོགས་མ་ཆོད་འཁྲུལ། །གང་ཟག་དབང་པོའི་ཁྱད་པར་ལས། །སེམས་ཁྱད་ཐེག་པ་རིམ་པ་དགུ། །མི་མཐུན་ལྟ་སྤྱོད་སོ་སོར་བཤད། །དེས་ནི་གོལ་སྒྲིབ་འཁྲུལ་པ་བྱུང་། །ཡང་དག་དོན་ལ་ཐེག་པ་མེད། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། སྤྱི་ཏི་ཡོ་ག་མ་རྟོགས་པ་རྣམས་ལ་གོལ་སྒྲིབ་འཁྲུལ་པ་བསྟན་པའི་ལེའུ་སྟེ་སུམ་ཅུ་པའོ།། །།ཨ་ཐ་ཨི་ཕ་དྷ་ནི་བ་ལ་མུ་སི། ས་ཀ་རི་ཨ་ཨ་སི་ཏིང་ཀ་ཡ། མ་ཧཱ་འབུ་ཏོ་ཨ་བྷ་རི་ཨ་ཏི། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རྫོགས་ཆེན་སྤྱི་ཏི་ཡོ་ག་ཡི། །གོལ་སྒྲིབ་འཁྲུལ་གསུམ་ལ་བཟླ་ཇི་ལྟ་བུ། །ཞེས་གསོལ་པ་དང་། ཀུན་ཏུ་བཟང་པོས་འདི་སྐད་གསུངས། །ཐོག་མའི་སྙིང་པོ་མ་འདི་ལ། །རྩལ་སྣང་རིག་པ་བུ་འཕྲད་པས། །མ་བུ་དབྱེར་མེད་འཕྲད་འདྲེས་པས། །སྐྱེ་མེད་ས་ཟིན་འགྱུར་མེད་རྒྱ་ཡིས་ཐེབས། །སྙིང་པོ་ཀློང་ནས་ཤར་ཙམ་ན། །སྤྱི་ཏི་ཡོ་གའི་དགོངས་པ་ལ། །ངེས་པའི་ཞེ་འདོད་མ་སྐྱེས་ན། །རྫོགས་ཆེན་སྒྲིབ་པ་མིན་པར་བཤད། །སྤྱི་ཏི་ཡོ་ག་འདི་རྟོགས་ན། །གོང་འོག་ཁྱད་པར་དབྱེ་རུ་མེད། །ཐེག་པ་དྲུག་གི་གོལ་སྒྲིབ་སྟེ། །བདེན་གཉིས་ཁ་མཚོན་བཅད་དུ་མེད། །སྙིང་པོའི་རང་བཞིན་རྩིས་གདབ་མེད། །རང་བཞིན་ཤེས་པས་སྒྲིབ་པ་མེད། །འཛིན་རྟོག་གཉིས་ལས་གྲོལ་བ་ནི། །དེ་ཡི་དོན་རྟོགས་གོལ་དུ་མེད། །འཛིན་རྟོག་ཡིད་གཉིས་འཁྲུལ་པར་ཤེས། །རྩིས་གདབ་མེད་ན་འཁྲུལ་དུ་མེད། །གཟུང་དང་འཛིན་པ་འཁྲུལ་པའི་ཆོས། །དེ་ལྟར་ཤེས་པས་སྒྲིབ་དུ་མེད། །གཟུང་འཛིན་ཡིད་གཉིས་མ་སྐྱེས་ན། །གོལ་དང་འཁྲུལ་པ་མེད་ ― DNG002_Page_0620 ―
[མ་དཔེ་གཟིགས་ན་འདིར་གནོན།]
པར་བཤད། །སྙིང་པོའི་རང་བཞིན་མ་ནོར་ཤར། །ལྟ་བ་གོལ་མེད་བྱང་ཆུབ་སེམས། །ཕྱོགས་ཆ་ཡ་བྲལ་མ་སྐྱེས་ན། །འཛིན་རྟོག་གོལ་སྒྲིབ་འཁྲུལ་པ་མེད། །དངོས་པོ་གང་ཡང་དབྱེ་བསལ་མེད། །དབྱེ་བསལ་གོལ་སྒྲིབ་འཁྲུལ་པ་མེད། །ལུས་ངག་ཡིད་གསུམ་རྩོལ་བསྒྲུབ་བྱར་མེད་པས། །བྱ་བཙལ་གོལ་སྒྲིབ་འཁྲུལ་པ་མེད། །རྒྱུ་ལས་མ་བྱུང་འབྲས་བུ་མཆོག །རྒྱུ་འབྲས་བྱ་བཙལ་གོལ་སྒྲིབ་མེད། །སྙིང་པོའི་རང་བཞིན་གཅིག་ཤེས་ནས། །ལྟ་བ་ལ་སོགས་བཅུ་པོ་ལ། །གོལ་སྒྲིབ་འཁྲུལ་པ་ག་ལ་ཡོད། །ལྟ་བ་རྟོགས་ནས་བསྒོམ་མེད་དོན། །བཀོལ་མེད་མཉམ་པའི་དོན་ཤར་ན། །ལྟ་བའི་གོལ་སྒྲིབ་འཁྲུལ་པ་མེད། །ཕྱོགས་དང་རིས་མེད་མཉམ་པའི་ངང་། །དེ་ཡི་དོན་ལས་མི་འདའ་ན། །དམ་ཚིག་གོལ་སྒྲིབ་འཁྲུལ་པ་མེད། །རྩོལ་བསྒྲུབ་མེད་པའི་སྙིང་པོ་ལ། །ལུས་ངག་འབད་རྩོལ་མེད་པས་ནི། །ཕྲིན་ལས་གོལ་སྒྲིབ་འཁྲུལ་པ་མེད། །མ་བསྒྲིབས་གསལ་བའི་ཡེ་ཤེས་ནི། །ཡེ་ནས་ཡིན་པས་བྱ་མི་དགོས། །ཡེ་ཤེས་གོལ་སྒྲིབ་འཁྲུལ་པ་མེད། །བསྐྱོད་མེད་ཡེ་ཤེས་མཐར་ཕྱིན་དོན། །རིམ་པ་གཉིས་སུ་མེད་པའི་མཆོག །ས་ཡི་གོལ་སྒྲིབ་འཁྲུལ་པ་མེད། །ཡང་དག་ལམ་ལ་གནས་པ་ལ། །བྱེ་བྲག་རིམ་པར་མི་བགྲོད་ན། །ལམ་གྱི་གོལ་སྒྲིབ་འཁྲུལ་པ་མེད། །གཟུང་འཛིན་གཉིས་བྲལ་བྱང་ཆུབ་སེམས། །ཕྲ་རགས་ཡིད་རྟོག་མེད་པ་ལ། །ཕྲ་བའི་གོལ་སྒྲིབ་འཁྲུལ་པ་མེད། །གཉིས་མེད་ཐིག་ལེ་གཅིག་གི་ངང་། །མཉམ་པའི་རང་བཞིན་རྒྱ་མ་ཆད། །རང་བཞིན་རྒྱུན་དུ་གནས་པའི་མཆོག །རྒྱུད་ཀྱི་གོལ་སྒྲིབ་འཁྲུལ་པ་མེད། །མ་ནོར་བྱང་ཆུབ་སེམས་ཀྱིས་ནི། །ཡང་དག་དོན་ནི་གཏན་ལ་འབེབས། །ལུང་གི་གོལ་སྒྲིབ་འཁྲུལ་པ་མེད། །ཕྱོགས་རིས་སྤྲོས་པ་མེད་པའི་དོན། །སྒྲོ་སྐུར་མཐའ་ལས་གྲོལ་པ་ནི། །མན་ངག་གོལ་སྒྲིབ་འཁྲུལ་པ་མེད། །གོལ་སྒྲིབ་འཁྲུལ་པ་བསམ་མི་ཁྱབ། །འཆར་བའི་སྒོ་ནོར་འཁྲུལ་པ་ཡང་། །ལྡོག་པའི་ཐབས་ཤེས་གོལ་དུ་མེད། །གནས་དོན་མ་རྟོགས་སྒྲིབ་པ་ཡང་། །སྙིང་པོའི་དོན་ཤར་བསྒྲིབ་ཏུ་མེད། །སྒོ་ལྔའི་ཡུལ་འཛིན་འཁྲུལ་པ་ཡང་། ། ― DNG002_Page_0621 ―
[མ་དཔེ་གཟིགས་ན་འདིར་གནོན།]
ཡིད་རྩད་ཆོད་པས་འཁྲུལ་དུ་མེད། །འཁྱེར་སྒོ་མ་ནོར་ཡང་དག་ལམ། །ངེས་པའི་དོན་མཐོང་ཐེ་ཚོམ་མེད། །ཐག་ཆོད་གདེང་ལྡན་རེ་དོགས་མེད། །རང་སེམས་མ་བཅོས་སངས་རྒྱས་པས། །སངས་རྒྱས་གཞན་ནས་བཙལ་དུ་མེད། །ཅེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། གོལ་སྒྲིབ་ལ་བཟླ་བའི་ལེའུ་སྟེ་སོ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །མཚོན་མེད་སྟོན་པ་ཀུན་བཟང་ལ། །བདག་གཞན་གཉིས་སུ་གསུངས་པ་དེ། །འདི་གཉིས་ཁྱད་པར་གང་གིས་འདོན། །ཞེས་གསོལ་པ་དང་། ཀུན་བཟང་འཁོར་ལ་བཀའ་སྩལ་པ། སྙིང་པོའི་རང་བཞིན་མིང་མེད་མཉམ་པ་མེད་པ་མ་རྟོགས་པར། །རྩལ་གྱི་འཁོར་ལ་རྟོག་པ་ཡིད་གཡོས་པས། །ཡན་ལག་མི་འདུ་ཐེག་པ་རིམ་དགུའོ། །རང་ལྟ་མངོན་པར་ཞེན་ལ་གཞན་ལྟ་རྒྱབ་ཀྱིས་ཕྱོགས། །ཉན་ཐོས་ཆོས་ཀྱི་བདག་ལ་ཞེན། །རང་རྒྱལ་རྟེན་འདྲེལ་གཉིས་ལ་ཞེན། །སེམས་ཙམ་གཟུང་འཛིན་གཉིས་ལ་ཞེན། །དབུ་མ་བདེན་པ་གཉིས་ལ་ཞེན། །ཀྲི་ཡ་དག་པ་གསུམ་ལ་ཞེན། །གཉིས་ཀ་རྒྱུད་ལ་གཞུང་ཚུགས་མེད། །ཡོ་ག་སྐྱེ་འགག་གཉིས་ལ་ཞེན། །མ་ཧཱ་སྣང་སྟོང་གཉིས་ལ་ཞེན། །ཨ་ནུ་རྒྱུ་འབྲས་གཉིས་ལ་ཞེན། །དབྱིངས་དང་ཡེ་ཤེས་གཉིས་ལ་ཆགས། །རྫོགས་ཆེན་རྩལ་སྣང་རིག་པ་ལ། །རང་བྱུང་ཡེ་ཤེས་ཡིན་ཟེར་ནས། །ཡིད་སྨོན་ཡེ་སངས་རྒྱས་ལ་གཏོང་། །རིག་པ་འགྱུ་བའི་རང་བཞིན་ལ། །སངས་རྒྱས་དགོངས་པ་ཡིན་ཞེས་ཟེར། །ཉོན་མོངས་ཁ་ནི་མ་བྲི་བར། །ཁ་ཚིག་ཡིད་སྨོན་ཚིག་ཙམ་ལ། །རྟོགས་ན་སངས་རྒྱས་ཡིན་སྨྲ་བའི། །གཟུང་འཛིན་ཆོས་བརྒྱད་མ་བྲལ་བར། །ཆགས་ཞེན་མཐའ་བརྒྱད་མ་ཆོད་པར། །དུག་ལྔ་སངས་རྒྱས་ཡིན་ཟེར་ནས། །ད་ལྟར་སངས་རྒྱས་ཡིན་སྨྲ་བ། །རྨི་ལམ་ན་ཡང་མི་སྲིད་དོ། །ལྟ་བ་ནན་བརྟགས་ཚིག་ལ་ཞེན། །བསྒོམ་པ་སྟོང་བ་ཧད་པོ་བསྒོམ། །སྤྱོད་པ་ཐོ་ཆོ་བབ་ཆོལ་སྤྱོད། །དམ་ཚིག་ཁྲེལ་མེད་གྲོགས་པོ་བསླུ། །ཕྲིན་ལས་བཅོལ་ཞིང་བསྒྲུབ་པར་བྱེད། །ས་ལ་སྦྱོར་ཞིང་ལམ་ལ་བགྲོད། ། ― DNG002_Page_0622 ―
[མ་དཔེ་གཟིགས་ན་འདིར་གནོན།]
འབྲས་བུ་ཡིད་སྨོན་རྩོལ་བས་སྒྲུབ། །སྒྲིབ་པ་མེད་པའི་ཡེ་ཤེས་ལ། །ད་གདོད་བཙལ་དུ་རེ་བ་དང་། །གཟུང་འཛིན་བྲལ་བའི་རང་བཞིན་ལ། །དུས་ལ་ཐོབ་ཏུ་རེ་བ་དང་། །དེ་ལྟར་ཐེག་པ་རིམ་དགུ་ཡིས། །རང་གི་གམ་པོར་གཞན་ནས་བཙལ། །བཙལ་བས་བསྐལ་པ་བརྒྱར་མི་རྙེད། །མདོངས་པས་ནམ་མཁར་བསྙེགས་པ་འདྲ། །ང་ཡི་སྤྱི་ཏི་ཡོ་ག་ལ། །བློས་བཏགས་བལྟ་བའི་ཚིག་དང་བྲལ། །ཡིད་སྨོན་བསྒོམ་པའི་སེམས་དང་བྲལ། །སྐྱོན་མེད་དམ་ཚིག་སེམས་དང་བྲལ། །ཆེད་བྱས་སྤྱོད་པའི་སེམས་དང་བྲལ། །རྩོལ་བསྒྲུབ་ཕྲིན་ལས་སེམས་དང་བྲལ། །སྤྱད་མེད་ས་ཐོབ་སེམས་དང་བྲལ། །བགྲོད་མེད་ལམ་གྱི་སེམས་དང་བྲལ། །ཐོབ་མེད་འབྲས་བུའི་སེམས་དང་བྲལ། །སྒྲིབ་མེད་གསལ་བའི་སེམས་དང་བྲལ། །གཟུང་འཛིན་གཉིས་མེད་ཕྲ་བའི་སེམས་དང་བྲལ། །དེས་ན་བདག་གཞན་ཁྱད་པར་རོ། །ཁྱད་པར་གང་གིས་སྤགས་ཞེས་ན། །བདེན་པའི་སྙིང་པོ་མཐོང་བ་ལྟ་བའི་རྒྱལ་པོ་ཡིན། །དུས་གསུམ་ཆ་ལས་གྲོལ་བ་བལྟ་བའི་རྒྱལ་པོ་ཡིན། །རྟོག་པ་མེད་པ་ལྟ་བའི་རྒྱལ་པོ་ཡིན། །འགྱུར་བ་མེད་པ་ལྟ་བའི་རྒྱལ་པོ་ཡིན། །འཁྲུལ་པ་རྣམ་པར་དག་པ་ལྟ་བའི་རྒྱལ་པོ་ཡིན། །ཞེ་འདོད་མེད་པ་ལྟ་བའི་རྒྱལ་པོ་ཡིན། །ཚིག་ལས་འདས་པ་ལྟ་བའི་རྒྱལ་པོ་ཡིན། །ཡིན་པ་མེད་པ་ལྟ་བའི་རྒྱལ་པོ་ཡིན། །ཕྱོགས་དང་མཐའ་བྲལ་ལྟ་བའི་རྒྱལ་པོ་ཡིན། །ཁྱུང་དང་ནམ་མཁའི་དཔེ་བཞིན་ནོ། །ངང་གནས་འགྲོ་འོང་མེད་པ་བསྒོམ་པའི་རྒྱལ་པོ་ཡིན། །ཡིད་ལ་བཞག་མེད་བསྒོམ་པའི་རྒྱལ་པོ་ཡིན། །བསམ་དང་བྲལ་བ་བསྒོམ་པའི་རྒྱལ་པོ་ཡིན། །བཅོས་བསླད་མེད་པ་བསྒོམ་པའི་རྒྱལ་པོ་ཡིན། །ཞེན་པ་མེད་པ་བསྒོམ་པའི་རྒྱལ་པོ་ཡིན། །གཟུང་འཛིན་རྟོག་མེད་བསྒོམ་པའི་རྒྱལ་པོ་ཡིན། །ཡིད་སྨོན་བྱར་མེད་བསྒོམ་པའི་རྒྱལ་པོ་ཡིན། །དཔེར་ན་ཉི་ཟླ་རྒྱ་མཚོ་འདྲ། །ལུས་ངག་ཡིད་གསུམ་བྱར་མེད་སྤྱོད་པའི་རྒྱལ་པོ་ཡིན། །བཅོས་སུ་མེད་དེ་སྤྱོད་པའི་རྒྱལ་པོ་ཡིན། །ངེས་པ་མེད་དེ་སྤྱོད་པའི་རྒྱལ་པོ་ཡིན། །ཤུགས་འབྱུང་ཆགས་མེད་སྤྱོད་པའི་རྒྱལ་པོ་ཡིན། །ཉམ་ང་བག་ཚ་མེད་པ་སྤྱོད་པའི་རྒྱལ་པོ་ཡིན། །བྱ་བཙལ་ཀུན་དང་བྲལ་བ་སྤྱོད་པའི་རྒྱལ་ ― DNG002_Page_0623 ―
[མ་དཔེ་གཟིགས་ན་འདིར་གནོན།]
པོ་ཡིན། །དཔེར་ན་མེ་ཏོག་བུང་བ་དང་། །སྨྱོན་པ་གླང་ཆེན་བུ་ཆུང་འདྲ། །ཐོབ་ཏུ་མེད་པ་འབྲས་བུའི་རྒྱལ་པོ་ཡིན། །རང་ཉིད་ཡིན་ཏེ་འབྲས་བུའི་རྒྱལ་པོ་ཡིན། །ཡིན་པའི་དོན་རྟོགས་འབྲས་བུའི་རྒྱལ་པོ་ཡིན། །སྐྱེ་མེད་འགྱུར་མེད་འབྲས་བུའི་རྒྱལ་པོ་ཡིན། །རང་སངས་རྒྱས་ཏེ་འབྲས་བུའི་རྒྱལ་པོ་ཡིན། །རེ་དོགས་མེད་པ་འབྲས་བུའི་རྒྱལ་པོ་ཡིན། །དཔེར་ན་རིན་ཆེན་རི་བོ་གསེར་དང་འདྲ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། རང་གཞན་གཉིས་ཀྱི་ཁྱད་པར་བསྟན་པའི་ལེའུ་སྟེ་སོ་གཉིས་པའོ།། །།ཨ་ཐ་བཛྲ་སཏྭ་ལི། དྷརྨ་ཀཱ་ཡ་དྷཱ་ཏུ་ཨ། དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རྒྱུད་ཀྱི་མཚན་ནི་ཇི་ལྟར་གཟུང་། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། །སྙིང་པོའི་རང་བཞིན་མཚན་མེད་ལ། །རྩལ་སྣང་རིག་པའི་དབང་གིས་མཚན་བཏགས་པ། །ཐེག་པ་སྤྱི་ཡི་དོན་སྟོན་ཕྱིར། །སྤྱི་ཏི་ཡོ་གའི་རྒྱུད་ཡིན་ནོ། །དགོས་འདོད་མ་ལུས་ཅི་འདོད་འབྱུང་བའི་ཕྱིར། །རིན་པོ་ཆེ་ཡི་རྒྱུད་ཡིན་ནོ། །སྣང་སྲིད་གསལ་བར་རྟོགས་པའི་ཕྱིར། །ཉི་ཟླ་ལྟ་བུའི་རྒྱུད་ཡིན་ནོ། །འཁྲུལ་གཞི་འཁྲུལ་སྣང་བཅད་པའི་ཕྱིར། །འཁྲུལ་སྣང་གཅོད་པའི་རྒྱུད་ཡིན་ནོ། །ཐེག་པ་སྤྱི་ཡི་དོན་སྟོན་ཕྱིར། །སྤྱི་ཏི་ཡོ་གའི་རྒྱུད་ཡིན་ནོ། །ཡིད་གཉིས་ལོག་ལྟ་གཅོད་པའི་ཕྱིར། །སྤུ་གྲི་འབར་བའི་རྒྱུད་ཡིན་ནོ། །ཀུན་ཁྱབ་ཕྱོགས་མཚམས་མེད་པའི་ཕྱིར། །ཡངས་པ་ནམ་མཁའི་རྒྱུད་ཡིན་ནོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། རྒྱུད་ཀྱི་མཚན་བསྟན་པའི་ལེའུ་སྟེ་སོ་གསུམ་པའོ།། །།ཨ་ཐ་བཛྲ་སཏྭ་ཨ་ས། དེ་ནས་རྡོ་རྗེ་སེམས་དཔའ་ཡིས། །རྒྱུད་ཀྱི་གཏད་རྒྱ་གང་ཟག་ཅི་ལྟ་བུ་ལ་གཏད། །ཅེས་གསོལ་པ་དང་། སྟོན་པ་ཀུན་ཏུ་བཟང་པོ་ཡིས། །རྡོ་རྗེ་སེམས་དཔར་འདི་སྐད་གསུངས། །སྙིང་པོ་མ་བཅོས་རིན་ཆེན་རྒྱུད། །རྩལ་གྱི་རང་བཞིན་ཁྱབ་པར་སྟོན། །གདུང་སོ་བརྒྱུད་འདི་གཏད་པའི་གནས། །ངང་རྒྱུད་བཟང་ཞིང་དད་པ་ཆེ། ། ― DNG002_Page_0624 ―
[མ་དཔེ་གཟིགས་ན་འདིར་གནོན།]
དམ་ཚིག་གཞུང་བསྲུང་རྣམ་སྨིན་འཇོམ། །སེར་སྣ་ཆུང་ལ་གཏོང་ཕོད་ཆེ། །རིན་ཆེན་སྣོད་ལྡན་དེ་དག་ལ། །སྤྱི་ཏི་ཡོ་གའི་རྒྱུད་འདི་གཏད། །མན་ངག་གསང་ཚིག་ཐུབ་པ་དང་། །འཁྲུལ་པ་རྩད་ཆོད་སྐྱེས་བུ་ལ། །རིན་པོ་ཆེ་ཡི་རྒྱུད་འདི་གཏད། །རིན་ཆེན་ལ་སོགས་འདོད་པའི་ཡོན། །མ་ཆགས་སེར་སྣ་མེད་པ་ལ། །འཁྲུལ་སྣང་གཅོད་པའི་རྒྱུད་འདི་གདམས། །དད་པ་མི་འགྱུར་རི་རབ་ལྟ་བུ་ལ། །སྙིང་རྗེ་ཕན་སེམས་ཆེ་ཞིང་དཀོན་མཆོག་མཆོད། །དགེ་བའི་སེམས་དང་ལྡན་པ་ལ། །སྤུ་གྲི་འབར་བའི་རྒྱུད་འདི་གཏད། །ངང་རྒྱུད་བཟང་ཞིང་བླ་མ་ཁུར། །མཆེད་ལ་བརྩེ་ཞིང་དམ་ཚིག་བསྲུངས། །བློ་ཆེ་བློ་ཡངས་བློ་ཟབ་བློ་རྣོ་ལ། །ནམ་མཁའ་ལྟ་བུའི་རྒྱུད་འདི་གཏད། །ང་རྒྱལ་དྲེགས་པས་ཁེངས་པ་དང་། །མུ་ཅོར་སྨྲ་ཞིང་ཁེ་འདོད་དང་། །དོན་དུ་མི་བསྒོམ་ཚིག་ཏུ་བསྒོམ། །ལག་ཏུ་ཐོབ་ན་ཟོང་དུ་འཚོང་། །ཁྲེལ་མེད་ཐབས་ཀྱིས་འདོད་པ་ལ། །ཡུལ་མཁར་སྟེར་ཡང་མི་སྦྱིན་ནོ། །དེ་ལྟ་བུ་ལ་བྱིན་གྱུར་ན། །ངམ་ཤོད་གླིང་གི་དུར་ཁྲོད་དུ། །མ་མོ་མཁའ་འགྲོ་ཚོགས་ས་རུ། །བཀའ་སྲུང་དམ་ཅན་ཆོས་སྐྱོང་གིས། །མ་ཤི་བ་ཡི་སྔོན་རོལ་དུ། །ཤ་ཁྲག་རློན་པ་ཟ་བར་བྱེད། །རྒྱ་མཚོ་དུག་ཆུར་གཡོས་པ་ཡི། །སྡིག་པས་ཆར་ཡང་མི་ཕོད་དོ། །རྡོ་རྗེ་དམྱལ་བར་ལྟུང་མཆིའོ། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། རྒྱུད་གཏད་པའི་གང་ཟག་བསྟན་པའི་ལེའུ་སྟེ་སོ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །རྒྱུད་འདི་འབྱུང་བའི་དུས་ནི་ཇི་ཙམ་ན། །ཞེས་གསོལ་པ་དང་། ཀུན་ཏུ་བཟང་པོས་བཀའ་སྩལ་པ། ནམ་ཞིག་དུས་ནི་ཕྱི་མ་ལ། །མ་འོངས་དུས་སུ་འབྱུང་བ་ནི། །མངོན་པར་ཤེས་པས་དེང་དུས་ཤེས། །ང་ཡི་བསྟན་པ་འབྱུང་དུས་སུ། །ཆོས་འཁོར་མི་བཙུན་རྒྱལ་ཁྲིམས་ཞིག་པའི་ཚེ། །སྐད་རིགས་མི་མཐུན་མཐའ་ཡི་རྒྱ་གར་རྣམས། །ཕུ་ཆུ་བྲུབ་བམ་ནམ་མཁའི་བྱ་བྲན་བཞིན། །བོད་ཀྱི་རྒྱལ་ཁམས་ཁེངས་ཏེ་མང་པོ་འབྱུང་། །སྐད་རིགས་མི་མཐུན་མཐའ་ཡི་རྒྱ་གར་རྣམས་ཀྱིས་ཀྱང་། །དམ་པའི་ཆོས་ནི་ཡིད་ ― DNG002_Page_0625 ―
[མ་དཔེ་གཟིགས་ན་འདིར་གནོན།]
བཞིན་བདུད་རྩི་འདྲ། །དེ་ལ་བརྟེན་ནས་ངན་སྤྱད་བྱས་ནས་ཀྱང་། །སྙན་ཚིག་ཡིད་ལ་བྱས་ནས་ཡི་གེར་བྲིས། །བོད་ཀྱི་གསེར་འདོད་ཕྱིར་ན་ཟོང་དུ་བྱས། །ཆོས་སྣ་བྱེད་པའི་ལོཙྪ་རྣམས་ཀྱིས་ཀྱང་། །ས་དང་ཕ་རོལ་ཕྱིན་ལ་བློ་མ་འབྱོངས། །ཆོས་སྐད་མ་ཤེས་འཕྲལ་སྐད་ཙམ་ཞིག་ཤེས། །འཕྲལ་སྐད་ཙམ་ཞིག་ཤེས་པས་ལོཙྪ་བྱས། །དམ་ཆོས་ཚོང་དུས་འོ་མ་བཞིན་དུ་བསླད། །དེ་དུས་ང་ཡི་རྒྱུད་འདི་འབྱུང་། །ཆོས་འཁོར་མདའ་བུག་འདོན་པ་དང་། །གནས་གཞི་འཐབ་རས་བསྐོར་བའི་དུས། །རྒྱལ་པོ་གྲོང་སྤྲང་བྱེད་པའི་དུས། །བློན་པོ་ལུག་རྫི་བྱེད་པའི་དུས། །བོད་འབངས་སིལ་བུར་འགྲོ་བའི་དུས། །ཆེ་བཙུན་དུག་ལ་སྤྱོད་པའི་དུས། །ཉན་ཐོས་ཁྲིམས་དང་བྲལ་བའི་དུས། །དགེ་སློང་ཚོང་དཔོན་བྱེད་པའི་དུས། །ཆོས་གོས་འོག་ཏུ་གྲི་འཛུག་དུས། །བཙུན་པ་ཁྱིམ་ཐབ་བྱེད་པའི་དུས། །བཙུན་མ་བུ་ཆུང་འཚོ་བའི་དུས། །དེ་དུས་སྤྲོས་གཅོད་སྡེ་ལྔ་འབྱུང་། །སྐྱེ་མིན་བན་མིན་ནག་པོ་གོན་པའི་དུས། །ཞྭ་མཐའ་རས་ལྕགས་བསྐོར་བའི་དུས། །ལྷམ་ཡུ་རེ་བས་བྱེད་པའི་དུས། །དེ་དུས་སྤྲོས་གཅོད་སྡེ་ལྔ་འབྱུང་། །ཕ་ཟེར་བུ་ཡང་མི་ཉན་ཏེ། །མི་རྣམས་གཡོ་སྒྱུས་འཚོ་བའི་དུས། །འབྱུང་བ་ས་ཡིས་གསེར་མི་ཐུབ། །སྐྱེ་འགྲོས་གཏད་པའི་གཉེར་མི་ཐུབ། །བདེ་གཤེགས་བྱིན་རླབས་མི་ཐུབ་སྟེ། །མཁའ་འགྲོས་གཏད་པའི་གཏེར་མི་ཐུབ། །བཙུན་པས་མདའ་རྒྱག་ཡིན་ནམ་རྩོད་པའི་འདབ་རྒྱས་བྱེད་པའི་དུས། །དེ་དུས་སྤྱི་ཏི་ཡོ་ག་འབྱུང་། །ཉོན་མོངས་དུག་ལྔའི་དབང་ཉིད་ཀྱིས། །ཆོས་དང་སེམས་སུ་མ་འདྲེས་པས། །བལྟ་བ་ཁ་ཁྱེར་ཞེན་མ་ལོག །ཆགས་ཞེན་ལྔ་དང་མ་བྲལ་བར། །ད་ལྟ་སངས་རྒྱས་ཡིན་ཟེར་དུས། །དེ་དུས་སྤྱི་ཏི་ཡོ་ག་འབྱུང་། །ཞེས་གསུངས་སོ། །རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་ལས། བསྟན་པ་འབྱུང་བའི་དུས་བསྟན་པའི་ལེའུ་སྟེ་སོ་ལྔ་པའོ།། །།རིན་པོ་ཆེ་སྣང་གསལ་སྤུ་གྲི་འབར་བས་འཁྲུལ་སྣང་རྩད་ནས་གཅོད་པ་ནམ་མཁའ་དང་མཉམ་པའི་རྒྱུད་རྫོགས་སོ།། །།རྒྱ་གར་གྱི་གུ་རུ་པདྨ་སམ་བྷ་ཝ་དང་། རིན་པོ་ཆེ་སྤྱི་གནད་སྐྱོན་སེལ་ཐིག་ལེ་ཀུན་གསལ་གྱི་རྒྱུད།― DNG002_Page_0626 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། རཏྣ་ནིཿསཱ་མཱ་ནྱཱ་དོ་ཥ་ནི་ར་ས་ན་བྷིནྡུ་ས་སརྦ་པྲ་ཀ་ཊ་ཏནྟྲ། བོད་སྐད་དུ། རིན་པོ་ཆེ་སྤྱི་གནད་སྐྱོན་སེལ་ཐིག་ལེ་ཀུན་གསལ་གྱི་རྒྱུད། བཅོམ་ལྡན་འདས་དཔལ་ཀུན་བཟང་ཀ་དག་གི་སྐུ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། །མཁའ་དབྱིངས་ཀུན་ཏུ་བཟང་གི་ཕོ་བྲང་ནི། །ཆོས་ཉིད་དཀྱིལ་འཁོར་རྣམ་དག་འོད་གསལ་ན། །ཀ་དག་ཟང་ཀ་ཆོས་སྐུ་དྲི་མེད་བཞུགས། །ཡན་ལག་རྩལ་ཟེར་ངང་དངས་འཁོར་གྱིས་བསྐོར། །དུས་གསུམ་གཅིག་སྟེ་སྔ་ཕྱི་ཁྱད་པར་མེད། །ཅེས་རིན་པོ་ཆེ་སྤྱི་གནད་སྐྱོན་སེལ་གྱི་རྒྱུད་ལས། ཕུན་སུམ་ཚོགས་པའི་ལེའུ་སྟེ་དང་པོའོ།། །།དེ་ནས་གསལ་དྭངས་རིན་ཆེན་གྱིས། །ཆོས་སྐུ་ཀ་དག་དྲི་མེད་ལ། །སྤྱི་ཡི་རྒྱུད་སྡེའི་དགོས་དོན་གང་། །དགུ་རྩེ་རྒྱུད་རྒྱལ་རྣམ་གྲངས་དུ། །གདམས་པའི་མན་ངག་གང་རྣམས་གཏད། །སྤྱི་གནད་སྐྱོན་སེལ་ཇི་ལྟར་བསལ། །ཐིག་ལེ་ཀུན་གསལ་ཇི་ལྟར་གསལ། །རྩོལ་བྲལ་བློ་འདས་ཇི་ལྟར་གསུངས། །ཐིག་ལེ་ཀུན་འདུས་གང་དུ་འདུས། །ཞེས་ཞུས་སོ། །འཁོར་གྱིས་གླེང་བསླང་བའི་ལེའུ་སྟེ་གཉིས་པའོ།། །།དེ་ནས་གསལ་དྭངས་རིན་ཆེན་གྱིས། ། ― DNG002_Page_0627 ―
[མ་དཔེ་གཟིགས་ན་འདིར་གནོན།]
སྤྱི་ཡི་རྒྱུད་སྡེའི་དགོས་དོན་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་ཀ་དག་བློ་ཡི་ཡུལ་ལས་འདས། །རྩལ་ཟེར་ངང་དྭངས་ཟང་ཐལ་གདོད་ནས་དག །མི་འགྱུར་ས་གནོན་ཐུགས་རྗེ་ཤུགས་ལས་འཆར། །ཆེད་དུ་མི་མཛད་ངང་ངམ་ཤུགས་ཀྱིས་འཆར། །དབང་པོའི་ཁྱད་པར་ཇི་བཞིན་དུ། །རྒྱལ་བའི་བཀའ་ཡང་དེ་བཞིན་སྒྲོག །དབང་པོ་རབ་འབྲིང་ཐ་མ་ལས། །ཐ་མ་སྡེ་གསུམ་འབྲིང་ལ་སྔགས། །རབ་ལ་བསྐྱེད་རྫོགས་ཡང་རབ་རྫོགས་ཆེན་གསུངས། །ཐོད་རྒལ་སྤྱི་ཏི་དགུ་རྩེར་བསྟན། །བྱར་མེད་བློ་འདས་རྒྱུད་སྡེ་ལ། །བྱ་བཙལ་བློ་ཆོས་མ་གསུངས་སོ། །སྙིང་པོ་རྩལ་ཟེར་འཕྲད་པས་དབྱེར་མེད་སྐུ། །ཡེ་ཤེས་ས་ཟིན་འཁྲུལ་ཆོད་ཀ་དག་རྟོགས། །དགོས་པའི་དོན་ནི་ཀ་དག་ཟང་ཀར་གནས། །ཞེས་གསུངས་སོ། །རྒྱུད་སྡེའི་དགོས་དོན་བསྟན་པའི་ལེའུ་སྟེ་གསུམ་པའོ།། །།དེ་ནས་གསལ་དྭངས་རིན་ཆེན་གྱིས། །དགུ་རྩེ་རྒྱུད་ཀྱི་རྣམ་གྲངས་དུ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སྤྲོས་གཅོད་རྩ་བའི་རྒྱུད་ཀྱིས་ནི། །སྡེ་ལྔའི་རྩ་བ་བསྟན་པ་ཡིན། །རིན་ཆེན་བཅུད་ཀྱི་ཡང་སྙིང་གིས། །ཐོག་མཐའི་དྲས་ཐག་གཅོད་པར་བསྟན། །རིན་ཆེན་བདུད་རྩི་བཅུད་ཐིགས་ཀྱིས། །རིགས་དྲུག་གཡང་ས་གཅོད་པར་བསྟན། །སྣང་གསལ་སྤུ་གྲིའི་རྒྱུད་ཆེན་གྱིས། །འཁྲུལ་གཞིའི་འཁྲུལ་སྣང་རྩད་གཅོད་བསྟན། །སྨད་སྲིད་ཁ་སྦྱོར་བཅུད་ཐིགས་ཀྱིས། །སྨད་སྲིད་འཁོར་འདས་བཏགས་ཆགས་རྣམས། །ཐམས་ཅད་སྤྱི་ཏིར་འདུས་པར་བསྟན། །ཕྱི་ནང་གསང་བའི་རྒྱུད་སྡེ་རྣམས། །རྒྱ་ཡིས་ཐོབ་ཀྱིས་ཨུ་ཡ་ཐམ། །སྡེ་ལྔས་རྩ་རྒྱུད་དོན་འགྲོལ་བསྟན། །རྒྱུད་སྡེས་རྒྱུད་ཀྱི་ཁ་བྱང་བསྟན། །སེམས་སྡེས་སེམས་ཀྱི་རྣམ་གྲངས་བསྟན། །ཀློང་སྡེས་སེམས་ཀྱི་ངོ་ ― DNG002_Page_0628 ―
[མ་དཔེ་གཟིགས་ན་འདིར་གནོན།]
བོ་བསྟན། །ཆོས་སྡེས་ཐེག་དགུའི་ལྟ་བསྒོམ་བསྟན། །ཆོས་རྣམས་ཐམས་ཅད་གསལ་བར་བཤད། །དབང་སྡེས་དབང་གི་བསྐུར་ཐབས་བསྟན། །མན་ངག་ལྔ་ཡིས་དོན་གྱིས་གསང་སྒོ་བསྟན། །སྒྲོན་མ་ལྔ་ཡིས་ལྟ་བསྒོམ་སྤྱོད་འབྲས་བསྟན། །དགོངས་ཉམས་ལྔ་ཡིས་དོན་གྱི་གསེར་དང་སྤྲད། །སྤྱིར་ན་འདི་ལ་འདི་བསྟན་བརྗོད་མི་རྫོགས། །བྱེ་མའི་ལའམ་སྐྲ་ཤད་ཕོ་ལྡོང་བཞིན། །དགུ་རྩེའི་ཕྱི་ནང་གསང་སྐོར་ཨུ་ཕག་ཐམ། །ཞེས་གསུངས་སོ། །ཆོས་སྡེ་མདོར་བསྟན་པའི་ལེའུ་སྟེ་བཞི་པའོ།། །།དེ་ནས་རྩལ་ཟེར་ངང་དྭངས་ཀྱིས། །ཀ་དག་ཆོས་སྐུ་དྲི་མེད་ལ། །སྤྱི་ཡི་གནད་དང་སྐྱོན་སེལ་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སྤྱི་ཡི་གནད་དང་སྐྱོན་བསལ་བ། །མན་ངག་རྣམས་ཀྱི་ནང་ནས་གསལ། །གཞི་འཁྲུལ་རྩད་གཅོད་བཟློག་ཐབས་ལ་བཟླའི་གནད། །གལ་འགེགས་གདམས་ངག་གསང་བའི་གནད་བསྟན་པ། །གཞི་ཕོབ་རྩད་ཆོད་བཟློག་ཐབས་ཉམས་སུ་ལོངས། །ཉམས་སུ་མི་ལེན་གཞི་ཐ་དད་ལ་དཔེ་ཟླ་མེད། །མེད་ལས་ཅིར་ཡང་བྱུང་ནས་རང་སར་ཐིམ། །ཐོལ་བྱུང་ངང་དྭངས་རང་གདངས་ཡིད་རྩད་ཆོད། །འཁྲུལ་པ་རྣམ་གསུམ་བཅད་པས་སྐུ་གསུམ་ཐོབ། །ཀ་དག་དངོས་མེད་སེམས་ཡིད་བློས་བཏགས་མེད། །འཁྲུལ་ལོག་རྩད་ཆོད་སྐྱེ་མེད་ཀ་དག་རྟོགས། །མེད་ལས་ཀུན་འབྱུང་ཅིར་ཡང་གྲུབ་པ་མེད། །ཅེས་གསུངས་སོ། །སྤྱིའི་སྐྱོན་སེལ་གྱི་ལེའུ་སྟེ་ལྔ་པའོ།། །།རྩལ་ཟེར་ངང་དྭངས་ཀྱིས་ཞུས་པ། །ཀ་དག་དྲི་མེད་ཀུན་བཟང་ལ། །ཐིག་ལེ་ཀུན་གསལ་ཇི་ལྟར་གསལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྐྱེ་མེད་ ― DNG002_Page_0629 ―
[མ་དཔེ་གཟིགས་ན་འདིར་གནོན།]
ཀ་དག་ཐིག་གསལ་ན། །སྣ་ཚོགས་ཐིག་ལེ་མ་འདྲེས་གསལ། །ཐིག་ནི་མི་འགྱུར་ལེ་ནི་ཁྱབ། །ཀ་དག་ཐིག་ལེ་ཀུན་གསལ་ལོ། །ཞེས་གསུངས་སོ། །ཐིག་ལེ་ཀུན་གསལ་བསྟན་པའི་ལེའུ་སྟེ་དྲུག་པའོ།། །།དེ་ནས་ངང་དྭངས་ཁྱེའུ་ཆུང་གིས། །རྩོལ་བྲལ་བློ་འདས་ཇི་ལྟར་གསུངས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། རྩོལ་བྲལ་བློ་འདས་ཉན་བཤད་སྨྲ་བརྗོད་མཚོན་དུ་མེད། །ཅེས་གསུངས་སོ། །བྱར་མེད་བློ་འདས་བཤད་པའི་སྐབས་སྟེ་ལེའུ་བདུན་པའོ།། །།དེ་ནས་ངང་དྭངས་རིན་ཆེན་གྱིས། །ཐིག་ལེ་ཀུན་འདུས་གང་དུ་འདུས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཀ་དག་དངོས་མེད་ཐིག་ལེ་ཡིས། །ཐིག་ཕྲན་མ་ལུས་ཀུན་འདུས་སོ། །ཐིག་ནི་སྐྱེ་བ་མེད་ལ་བྱ། །ལེ་ནི་འགག་པ་མེད་པ་ཡིན། །ཀུན་ནི་རྩལ་སྣང་ཐམས་ཅད་དེ། །འདུས་ནི་ཀ་དག་ཆེན་པོར་འདུས། །དེ་ནི་ཐིག་ལེ་ཀུན་འདུས་ཡིན། །ཞེས་གསུངས་སོ། །ཐིག་ལེ་ཀུན་འདུས་བསྟན་པའི་ལེའུ་སྟེ་བརྒྱད་པའོ།། །།དེ་ནས་གསལ་དྭངས་རིན་ཆེན་གྱིས། །ཀུན་གསལ་གདམས་ངག་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཀ་དག་ཉིད་ལ་སྨྲར་མེད་ཀྱང་། །བློ་དམན་རྟོགས་པར་བྱ་ཕྱིར་བཤད། །དངོས་མེད་ཀ་དག་རང་བཞིན་ནི། །བརྟག་པར་དཀའ་ཞིང་བསྟན་པར་དཀའ། །བརྗོད་པའི་ཐ་སྙད་བྲལ་ཕྱིར་རོ། །སེམས་ཉིད་ཀྱི་གཞི་རྩ་རྒྱུད་བཙལ་བའི་ཕྱིར། གང་གིས་རང་ལ་རང་བལྟས་པའི་དུས་ན། ནང་གི་སེམས་མ་མཐོང་། ཕྱིའི་སེམས་མ་མཐོང་། ཕུང་པོ་དང་། ཁམས་དང་། འདུ་བྱེད་ལ་སེམས་ ― DNG002_Page_0630 ―
[མ་དཔེ་གཟིགས་ན་འདིར་གནོན།]
མ་མཐོང་ངོ་། །དེས་སེམས་མ་མཐོང་བ་དང་། །སེམས་དེ་གང་ནས་བྱུང་བལྟས་པས། དེའི་ཚེ་སེམས་དེ་གང་ནས་ཀྱང་མ་བྱུང་། གང་དུ་ཡང་མ་སོང་། གང་དུ་ཡང་མི་གནས་པས་ཀ་དག་དངོས་པོ་མེད། སངས་རྒྱས་ཉག་གཅིག་གི་དགོངས་པ་དམ་པ། སྨྲར་མེད་པ་རྟོག་དཔྱོད་ཐམས་ཅད་དང་བྲལ་བ། འདི་ཞེས་མཚོན་དུ་མེད་པ། བརྟག་པར་དཀའ་ཞིང་། བརྟན་པར་དཀའ་ལ། རྗོད་པའི་ཐ་སྙད་རྣམས་དང་བྲལ་བ། དཔེ་དང་བྲལ་བ་ནམ་མཁའ་ལས་ཀྱང་བསྒྲུན་དུ་ཡོད་པ་མ་ཡིན་ནོ། །ཚད་མེད་པ། ཚད་དང་བྲལ་བ། ཚད་མའམ། གཏན་ཚིགས་སམ། དཔག་པས་མི་དཔོགས་པ་སྟེ། གང་ལའང་རག་མ་ལས་པས། སེམས་ལ་གནས་མེད་པ། རྟེན་མེད་པ། ཆད་པ་མ་ཡིན། རྟག་པ་མ་ཡིན། སྤུངས་པ་མ་ཡིན། རྒྱུ་ལས་མ་བྱུང་། རྐྱེན་གྱིས་མ་བསྐྱེད། དེ་ཡང་བདག་མ་ཡིན། གཞན་མ་ཡིན། དེ་ཉིད་མ་ཡིན། རིགས་མེད་པ། རྒྱུ་མེད་པ། མི་འཕྲོ་བ། མི་སྣང་བ། ངོ་བོ་མེད་པ། ཇི་ལྟ་བ་དེ་བཞིན་དུ་ཀ་དག་མ་མཐོང་ངོ་། །ཡང་དག་པ། མི་གཡོ་བ། དབེན་པ། ཅུང་ཟད་ཀྱང་མ་མཐོང་། རྣམ་པར་མི་མཐོང་། མི་རྟོག །རྣམ་པར་མི་རྟོག །མི་བསྐྱོད། མི་སེམས། མི་སྤྲོ། སེམས་ལ་གཟུགས་མེད་པས་བྱང་ཆུབ་ལ་གཟུགས་མེད་དོ། །སེམས་ཀྱི་རང་བཞིན་བྱང་ཆུབ་ལ་བྱང་ཆུབ་ཀྱི་རང་བཞིན་ཆོས་ཐམས་ཅད་དོ། །ཆོས་ཐམས་ཅད་ཀྱི་རང་བཞིན་ཐིག་ལེ་ཀ་དག་དེ་ཁོ་ན་ཉིད་དོ། །ཐིག་ལེ་ཀུན་གསལ་འགག་མེད་རྩལ་ཟེར་ཡན་ལག་སེམས་ཀྱི་སྣང་ཚུལ་ནི། འདི་ལྟར་མྱུར་བ། རབ་ཏུ་མྱུར་བ། མི་གནས་པ། རྒྱུ་བ། སྤྲེའུ་ལྟ་བུ། རླུང་ལྟ་བུ། སྨིག་རྒྱུ་ལྟ་བུ། ཆུའི་རྒྱུན་ལྟ་བུ། མར་མེ་ལྟ་བུ། ལུས་མེད་པ། རིང་དུ་འགྲོ་བ། གར་ཡང་མི་འགྲོ་བ། སླར་མི་ལྡོག་ ― DNG002_Page_0631 ―
[མ་དཔེ་གཟིགས་ན་འདིར་གནོན།]
པ། ཡུལ་ན་གནས་པ། དྲུག་གི་སྤྱོད་ཡུལ་པ། ཀུན་ཤེས་པ། གཅིག་ཏུ་ཐུབ་པ། མི་འབྱུང་བ། ཐམས་ཅད་འབྱུང་བ། ཞི་གནས་པ། ཐ་དད་པ། གཅིག་པ། མི་གཡེང་བ། ཀུན་ཏུ་གཡེང་བ། དེ་བཙལ་ན་མཚན་ཉིད་དང་རང་བཞིན་མེད་པའོ། །མི་དམིགས་པ། གོམས་པར་བྱ་བའོ། །ངེས་པར་རྟག་པ། ཡོངས་སུ་དཔྱད་པའོ། །ཅིར་ཡང་སྣང་ལ་ཡིན་པ་མེད་པའོ། །ཀུན་འབྱུང་ལ་ཐམས་ཅད་གཅིག་ཏུ་འདུས་པའོ། །ཡོངས་ལ་ཁྱབ་ཅིང་ཡོངས་ཀྱིས་སྐྱེ་བ་མེད་པའོ། །རྣམ་པར་དག་པ་ལ་གང་ཡང་མ་གྲུབ་པའོ། །ཐིག་ལེ་ཀུན་འདུས་ཀ་དག་གིས་ཁྱབ་པ་མེད་པ། མ་ཁྱབ་པ་མེད་པ། མཐོ་དམན་མེད་པ། ཆེ་ཆུང་མེད་པ། བཟང་ངན་མེད་པ། ཡངས་དོག་མེད་པ། རྒྱུ་འབྲས་མེད་པ། ཕོ་མོ་མེད་པ། རིགས་རྒྱུད་མེད་པ། གཟུགས་མེད་པ། ལས་རབ་རྣམ་སྨིན་མེད་པ། ཕྱི་ནང་མེད་པ། སྐྱེ་བ་མེད་པ། འཕོ་འགྱུར་མེད་པ། མུན་སྣང་མེད་པ། སྔ་ཕྱི་མེད་པ། མཐའ་དབུས་མེད་པ། བདག་གཞན་མེད་པ། རྩོལ་བསྒྲུབ་མེད་པ། བླང་དོར་མེད་པ། ངང་གིས་མ་བཅོས་པ། ཡོངས་ཀྱིས་འོད་གསལ་བ། མ་བསླད་པ། མ་བྱུང་བ། མ་སྐྱེས་པ་ཡིན་པའོ། །དེ་ནས་ངང་དྭངས་ཀྱིས་སྟོན་པ་ལ། ཆོས་སྤྱི་དང་ངང་གི་མཚན་ཉིད་ཅི་ཡིན་ཞུས་པ་དང་། སྟོན་པས་བཀའ་སྩལ་པ། སྙིང་པོ་སྐྱེ་མེད་ཀ་དག་ལ། སྣང་བ་དང་། མི་སྣང་བ་དང་། ཡོད་པ་དང་མེད་པ། རྟག་པ་དང་ཆད་པ། མཐའ་དང་དབུས། སྣང་སྲིད་འཁོར་འདས། སངས་རྒྱས་སེམས་ཅན། ཡུལ་དང་སེམས། བདག་དང་གཞན། དགྲ་དང་གཉེན། སྣང་བཏགས་ཆགས་སྡང་། སྣང་སྟོང་དེ་དག་ཐམས་ཅད་ཀྱང་མཚོན་དུ་མེད་པ། དཔེ་མེད་པ། སྨྲར་མེད་པ། བརྗོད་པ་ཚིག་གི་ཐ་སྙད་མེད་པ། མིང་ཙམ་འདི་ཞེས་བསྟན་པར་ནི། །ཀུན་ཏུ་བཟང་པོས་མཚོན་དུ་མེད། །དེ་ཡི་ཐིག་ལེ་ཀུན་འདུས་ ― DNG002_Page_0632 ―
[མ་དཔེ་གཟིགས་ན་འདིར་གནོན།]
རྟོགས། །ཞེས་གསུངས་སོ། །ཐིག་ལེ་གདམས་ངག་བསྟན་པའི་ལེའུ་སྟེ་དགུ་པའོ།། །།དེ་ནས་རྩལ་དྭངས་རིན་ཆེན་གྱིས། །ཀ་དག་དྲི་མེད་སྟོན་པ་ལ། །སྤྱི་ཏིའི་འབྲུ་དགུ་གསང་སྔགས་ཀྱི། །སྙིང་པོ་བཅུ་སེམས་འོད་གསལ་གྱི། །དཀྱིལ་འཁོར་གནད་རྣམས་ཇི་ལྟར་དགྲོལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དགུ་རྩེ་ཞེས་པ་ནི་ཐེག་དགུའི་རྒྱལ་པོ། །སྤྱི་ཏི་ཞེས་པ་ནི་བརྒྱད་ཁྲི་བཞི་སྟོང་གི་དཔྱིས་ཕྱིན་པར་སྟོན་པའོ། །ཀ་དག་ཅེས་པ་ནི་ཡེ་ནས་སྒྲིབ་གཡོགས་དང་། བག་ཆགས་ཀྱི་དྲི་མ་དང་། མ་རིག་པའི་མུན་པ་དང་། ཉོན་མོངས་པའི་དྲི་མ་ཀ་ནས་དག་པའོ། །དངོས་མེད་ཅེས་པ་ནི་སེམས་ཉིད་ལ་དངོས་པོ་གང་ཡང་མེད་པའོ། །བློ་འདས་ཞེས་པ་ནི་བློ་བྱེད་པ་པོ་ལས་འདས་པའོ། །ཟང་ཀ་ཞེས་པ་ནི་གཤིས་མ་བཅོས་པ་རྣལ་མར་གནས་པའོ། །སེམས་ཞེས་པ་ནི་མ་བྱས་མ་བཅོས་པར་སྣ་ཚོགས་སུ་འབྱུང་བའོ། །དཀྱིལ་ཞེས་པ་ནི་ཐིག་ལེ་གང་ཡིན་པའོ། །འཁོར་ཞེས་པ་ནི་རྩལ་མ་འགགས་པའོ། །འོད་ཅེས་པ་ནི་སྣང་བའོ། །གསལ་ཞེས་པ་ནི་མུན་པའི་སྒྲིབ་གཡོགས་གང་ཡང་མེད་པའོ། །གསང་བ་ནི་སྨྲར་མེད་པ་སྤྱོད་ཡུལ་དུ་མ་གྱུར་པའོ། །སྔགས་ཞེས་པ་ནི་ཡོན་ཏན་གྱི་འབྱུང་གནས་བརྗོད་པ་ལ་བྱའོ། །ངོ་བོ་ཉིད་ཅེས་པ་ནི་དངོས་པོ་མེད་པ་མི་དམིགས་པ་ཀུན་ཏུ་འབྱུང་བའི་གཞི་ལ་བྱའོ། །ཇི་བཞིན་ཞེས་པ་ནི་མ་བཅོས་མ་བསླད་པའོ། །དེ་བཞིན་ཞེས་བྱ་བ་ནི་མ་བྱས་མ་བརྟགས་པའོ། །དེ་ཁོ་ན་ཉིད་ཅེས་བྱ་བ་ནི་མ་ནོར་མི་འགྱུར་བ་ལ་བྱའོ། །སྙིང་པོ་ཞེས་པ་ནི་རྩལ་དང་རང་བཞིན་ལ་བྱའོ། །ཡང་སྙིང་ཞེས་པ་ནི་བྱེད་པ་པོ་མེད་པ་བྱ་བས་བཙལ་དུ་མེད་པས་ཡང་སྙིང་ངོ་། །བཅུད་ཅེས་པ་ནི་ཉིང་ཁུའམ་ གཏེར་སྙིང་རིན་པོ་ཆེ་སྤུངས་པའི་རྒྱུད།― DNG002_Page_0633 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ནི་དྷི་ཧྲྀ་ད་ཡ་རཏྣ་ཀུཊ་ཏནྟྲ། བོད་སྐད་དུ། གཏེར་སྙིང་རིན་པོ་ཆེ་སྤུངས་པའི་རྒྱུད། བཅོམ་ལྡན་འདས་ཐོག་མའི་སངས་རྒྱས་འོད་མི་འགྱུར་བ་ལ་ཕྱག་འཚལ་ལོ། །འདི་སྐད་བདག་གིས་རང་བཞིན་རྟོགས་ནས་བཤད་པའི་དུས་གཅིག་ན། རང་བཞིན་གྱིས་རྣམ་པར་དག་པའི་གནས། ཀུན་གཞིའི་ཕོ་བྲང་། ཀུན་གཞི་སེམས་ ― DNG002_Page_0634 ―
[མ་དཔེ་གཟིགས་ན་འདིར་གནོན།]
ཉིད་ཁྱབ་བརྡལ་ཆེན་པོའི་དཀྱིལ། འོད་གསལ་འགག་པ་མེད་པའི་ཀློང་། རིན་པོ་ཆེ་རྩལ་ཟེར་ཀུན་འབྱུང་གི་མཁའ། སྒྲིབ་པ་མེད་པར་འོད་གསལ་བ། དེ་ཉིད་དུ་རྣམ་པར་དག་པ། རྒྱུ་རྐྱེན་འཕོ་འགྱུར་མེད་པ། རྒྱ་ཆད་ཕྱོགས་ལྷུང་མེད་པའི་གནས་དེ་ན། སྔོན་ཐོག་སྤྱི་ཕུད་ཀྱི་སངས་རྒྱས་འོད་མི་འགྱུར་བ་བཞུགས་སོ། །དེའི་ཚེ་རྩལ་ཟེར་ཤེས་རིག་གི་འཁོར་ཡང་འདི་ལྟ་སྟེ། མ་འགགས་རྩལ་ཟེར་འོད་མདངས་འགྱུ་བའི་འཁོར་དང་། ཤེས་རིག་ཡིད་སེམས་དྲན་རྟོག་བློ་ཡི་འཁོར་དང་། རང་བཞིན་གྱི་འཁོར་ཡང་འདི་ལྟ་སྟེ། རང་བཞིན་གནས་པའི་འཁོར་དང་། རང་བཞིན་ལ་ལྟ་བའི་འཁོར་དང་། རང་བཞིན་རྟོགས་པའི་འཁོར་རོ། །གཞན་ཡང་སྨིན་པ་ཆེན་པོའི་འཁོར་ཡང་འདི་ལྟ་སྟེ། རྒྱུའི་བྱང་ཆུབ་སེམས་དཔའ་དང་། ལམ་གྱི་བྱང་ཆུབ་སེམས་དཔའ་དང་། འབྲས་བུའི་བྱང་ཆུབ་སེམས་དཔའོ། །བསྟན་པའི་རྒྱལ་པོ་གཏེར་སྙིང་རིན་པོ་ཆེ་སྤུངས་པའི་རྒྱུད་འདི། དུས་གསུམ་དབྱེར་མེད་སྔ་ཕྱི་མེད་པའི་དུས་སུ་གསུངས་སོ། །གཏེར་སྙིང་རིན་པོ་ཆེ་སྤུངས་པའི་རྒྱུད་ལས། གླེང་གཞི་ཕུན་སུམ་ཚོགས་པའི་ལེའུ་སྟེ་དང་པོའོ།། །།དེ་ནས་ཤེས་རིག་རྒྱལ་པོ་ཡིས། །སྔོན་ཐོག་སྤྱི་ཕུད་སངས་རྒྱས་ལ། །གཞི་འཁྲུལ་རྩད་གཅོད་རྟོགས་ཐབས་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གཞི་ནི་མིང་མ་ཐོགས་པ་ལ། །དངོས་མེད་ཀ་དག་བློ་ལས་འདས། །དཔེ་མེད་ཚིག་མེད་ཐ་སྙད་མེད། །ལྷུན་གྲུབ་ཀུན་ལྡན་གང་ཡང་མེད། །མི་འགྱུར་ཀུན་གཞི་ཕྱོགས་མེད་ཀློང་། །ཞེས་གསུངས་སོ། །གཏེར་སྙིང་རིན་པོ་ཆེ་སྤུངས་པའི་རྒྱུད་ལས། གཞི་བསྟན་པའི་ལེའུ་སྟེ་གཉིས་པའོ།། །།དེ་ནས་ཤེས་རིག་རྒྱལ་པོ་ཡིས། །སྔོན་ཐོག་སྤྱི་ཕུད་སངས་རྒྱས་ལ། །ཀ་དག་མ་རྟོགས་ཅི་ལྟར་འཁྲུལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གཞི་ལ་འཁྲུལ་དང་མ་འཁྲུལ་མེད། །རྩལ་ལ་འཁྲུལ་དང་མ་འཁྲུལ་བྱུང་། །ཀ་དག་མ་རྟོགས་འཁྲུལ་པ་ཡིན། །དངོས་མེད་མ་རྟོགས་སྡུག་བསྔལ་མྱོང་། །རྣལ་མ་མ་རྟོགས་འཁོར་བར་འཁྱམས། །དབྱེ་བསལ་མ་རྟོགས་མ་རིག་མུན། །རང་ས་མ་ཟིན་འགྲོ་དྲུག་འཁྲུལ། །ཐོ་ཡོར་ཐག་པ་སྨིག་རྒྱུ་གསུམ། ། ― DNG002_Page_0635 ―
[མ་དཔེ་གཟིགས་ན་འདིར་གནོན།]
མི་སྦྲུལ་ཆུར་འཁྲུལ་དཔེ་དང་མཚུངས། །གཞི་ལ་མེད་དེ་རྟོག་པས་བཟུང་། །ཉེས་སྐྱོན་སྡུག་བསྔལ་ཟད་མཐའ་ཡས། །ཞེས་གསུངས་སོ། །གཏེར་སྙིང་རིན་པོ་ཆེ་སྤུངས་པའི་རྒྱུད་ལས། འཁྲུལ་པ་བསྟན་པའི་ལེའུ་སྟེ་གསུམ་པའོ།། །།དེ་ནས་རིག་པའི་རྒྱལ་པོ་ཡིས། །སྔོན་ཐོག་སྤྱི་ཕུད་སངས་རྒྱས་ལ། །འཁྲུལ་པ་རྩད་ནས་ཇི་ལྟར་བཅད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གཞི་འཁྲུལ་རྩད་ཆོད་མ་བུ་འཕྲད། །འཁྲུལ་ཆོད་ཀློང་གྱུར་རྒྱ་ཡིས་ཐེབས། །ཁམས་གསུམ་འགྲོ་དྲུག་རྩད་ཆོད་པས། །མ་རིག་འཁོར་བའི་མིང་ཡང་མེད། །ལན་ཚྭ་ཆུ་རུ་ཐིམ་པའམ། །དུག་ལ་སྔགས་ཀྱིས་ཐེབས་པ་འདྲ། །ཞེས་གསུངས་སོ། །གཏེར་སྙིང་རིན་པོ་ཆེའི་རྒྱུད་ལས། རྩད་གཅོད་བསྟན་པའི་ལེའུ་སྟེ་བཞི་པའོ།། །།དེ་ནས་རིག་པའི་རྒྱལ་པོ་ཡིས། །སྔོན་ཐོག་སྤྱི་ཕུད་སངས་རྒྱས་ལ། །དངོས་མེད་ཀ་དག་གང་གིས་རྟོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་མེད་ཀ་དག་རྟོགས་ཐབས་ནི། །རྩོལ་མེད་བསམ་བྲལ་རྟོགས་པ་ལས། །ལྟ་སྒོམ་སྤྱོད་པས་མ་ཡིན་ནོ། །ཅང་མེད་ཅིང་སྣང་དངོས་མེད་ཀུན་གཞི་དེ། །འདོད་བྲལ་བློ་འདས་བསམ་མེད་དྭངས་སང་ངེ་། །སྟོང་གསལ་ཡེ་གདངས་སང་ངེ་དངོས་མེད་དབྱིངས། །གཏིང་གསལ་གདངས་ལ་གང་གི་ཐ་སྙད་མེད། །ཀ་དག་རྣལ་མ་བློ་འདས་རྟོགས། །ཞེས་གསུངས་སོ། །གཏེར་སྙིང་རིན་པོ་ཆེ་སྤུངས་པའི་རྒྱུད་ལས། རྟོགས་ཐབས་བསྟན་པའི་ལེའུ་སྟེ་ལྔ་པའོ།། །།དེ་ནས་རིག་པའི་རྒྱལ་པོ་ཡིས། །སྔོན་ཐོག་སྤྱི་ཕུད་སངས་རྒྱས་ལ། །ལ་བཟླ་ཆེན་པོ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཀ་དག་དངོས་མེད་རྣལ་མ་ལ། །སངས་རྒྱས་བྱང་ཆུབ་ཆོས་རྣམས་མེད། །སྐུ་དང་རིགས་ལྔ་ལྷ་བསྒོམ་མེད། །ཉམས་རྟགས་མངོན་ཤེས་ཐ་སྙད་མེད། །འཁོར་འདས་ཡོད་མེད་རྟག་ཆད་མེད། །ཆགས་སྡང་འཁོར་བའི་བྱ་བ་ལ། །ཡིད་ནི་འདྲེངས་ཀྱང་མ་བརྟགས་འཁྲུལ་སྣང་ཡིན། །འཁྲུལ་སྣང་ཆགས་སྡང་ནམ་ཡང་བསླུ། །དེ་བས་འཁོར་བའི་བྱ་བ་ཐོངས། ། ― DNG002_Page_0636 ―
[མ་དཔེ་གཟིགས་ན་འདིར་གནོན།]
ཆགས་ན་ལྷ་ལ་ཆགས་ཀྱང་ལྟུང་། །གང་ལའང་ཆགས་སྡང་མ་བྱེད་ཅིག །ཅེས་གསུངས་སོ། །གཏེར་སྙིང་རིན་པོ་ཆེ་སྤུངས་པའི་རྒྱུད་ལས། ལ་བཟླ་བའི་ལེའུ་སྟེ་དྲུག་པའོ།། །།དེ་ནས་རིག་པའི་རྒྱལ་པོ་ཡིས། །སྔོན་ཐོག་སྤྱི་ཕུད་སངས་རྒྱས་ལ། །གཞི་ཡི་འཁྲུལ་པ་རྩད་ཆོད་པས། །རྟོགས་ཐབས་གདམས་ངག་ཇི་ལྟར་བསྟན། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། གསང་སྔགས་བརྡས་བཤད་འཁོར་རྣམས་ཉོན། །ནམ་མཁའི་དབྱིངས་ལ་ཅི་འདུག་ལྟོས། །ཞེས་གསུངས་པ་དང་། འཁོར་གྱིས་ནམ་མཁའི་དབྱིངས་སུ་བལྟས། །ཅི་ཡང་མི་གདའ་གང་མ་མཐོང་། །དེ་ལ་སྟོན་པས་བཀའ་སྩལ་པ། །མ་མཐོང་བ་དེ་མཐོང་བ་ཡིན། །ཞེས་གསུངས་སོ། །སྟོན་པས་འཁོར་ལ་བཀའ་སྩལ་པ། །ནམ་མཁའི་མཐོངས་སུ་འཇའ་ཚོན་ཤར་བ་དེ། །དངོས་པོར་འདུག་ཟིན་ནམ་མཁའ་ཉིད་ལ་དྭངས། །ཞེས་གསུངས་པ་དང་། འཁོར་གྱིས་བལྟས་ནས་འདི་སྐད་ཞུས། གསལ་ལ་དངོས་གཞི་མི་གདའ་མཁའ་ལ་དྭངས། །ཞེས་གསོལ་པ་དང་། ཡང་སྟོན་པས་བཀའ་སྩལ་པ། ལ་ཀའི་ལ་བཙས་མི་ལ་ལྟོས། །ཐག་རིང་ཐང་ཆད་མགྲོན་པོ་ལ། །སྔོན་ན་ཁང་སྟོང་གཉིས་འདུག་པ། །སྒོ་གཉིས་གང་ཞིག་ཕྱེ་ནས་འགྲོ། །མགྲོན་པོ་སྐྱེལ་མེད་འཇིགས་སར་ཕྱིན། །མི་བྱུང་དགྲ་གཉེན་གང་ཡིན་ནོ། །མི་གཅིག་འགྲོ་ལ་བཤོལ་འདེབས་གཉིས། །ཐོག་མར་གང་དུ་ལྡོག་ལགས་ན། །ལོང་མའི་མིག་ཕྱེད་མུན་ནག་ཉི་ཤར་རམ། །ཤ་བཙོན་གདོས་འགྲོལ་དུག་ལ་སྔགས་ཐེབས་སམ། །ལན་ཚྭ་ཆུར་ཐིམ་གནད་ལ་མདའ་ཕོག་གམ། །གསེར་འགྱུར་རྩིར་ལྡན་ནད་པས་སྨན་སོས་སམ། །སྡོང་པོ་རྩད་ཆོད་དྭ་ཕྲུག་མ་ཕྲད་དམ། །ཟས་ཀྱི་བཅུད་འཐུངས་ནོར་གྱི་དབྱིག་རྙེད་དམ། །ཞེས་གསུངས་སོ། །གཏེར་སྙིང་རིན་པོ་ཆེ་སྤུངས་པའི་རྒྱུད་ལས། གསང་སྔགས་བརྡས་བསྟན་པའི་ལེའུ་སྟེ་བདུན་པའོ།། །།དེ་ནས་རིག་པའི་རྒྱལ་པོ་ཡིས། །སྔོན་ཐོག་སྤྱི་ཕུད་སངས་རྒྱས་ལ། །གནད་མཆོག་བཅུད་དགོངས་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །རྣམ་དག་ ― DNG002_Page_0637 ―
[མ་དཔེ་གཟིགས་ན་འདིར་གནོན།]
འོད་གསལ་དཀྱིལ་འཁོར་མཆོག །ཕྱོགས་མེད་ཀ་དག་དངོས་མེད་ལྷ་ཡི་མཆོག །བློ་འདས་བྱར་མེད་མཆོད་བསྟོད་བཤགས་པའི་མཆོག །ཀ་དག་རྣལ་མ་དབང་གི་མཆོག །སྣང་སྲིད་དབྱེར་མེད་གཏོར་ཚོགས་མཆོག །ཞེ་འདོད་རྩོལ་མེད་འཇུག་སྒོའི་མཆོག །འཛིན་མེད་བློ་ནི་གང་དུའང་སྐྱེ་མེད་བསྒོམ་པའི་མཆོག །གང་ཡང་ཞེ་འདོད་རྟེན་མེད་ལྟ་བའི་མཆོག །ཡིད་སེམས་གང་ཡང་མི་རྒྱུ་བསྒོམ་པའི་མཆོག །དྲན་རིག་གང་ལའང་མ་ཆགས་སྤྱོད་པའི་མཆོག །ཤེས་པ་གང་ལའང་མི་འཇུག་ཉམས་ཀྱི་མཆོག །དངོས་མེད་ཀ་དག་བློ་འདས་འབྲས་བུའི་མཆོག །སྨོན་པའི་ས་ནོན་ས་ལམ་འབྲས་བུའི་མཆོག །བཙལ་བསྒྲུབ་བྱ་བྱེད་མེད་པས་ཕྲིན་ལས་མཆོག །སྣང་སྲིད་ཡོད་མེད་ཀུན་རྫོགས་རྫོགས་ཆེན་མཆོག །ཅེས་གསུངས་སོ། །གཏེར་སྙིང་རིན་པོ་ཆེ་སྤུངས་པའི་རྒྱུད་ལས། མཆོག་བསྟན་པའི་ལེའུ་སྟེ་བརྒྱད་པའོ།། །།དེ་ནས་རིག་པའི་རྒྱལ་པོ་ཡིས། །དངོས་མེད་སངས་རྒྱས་སྤྱི་ཕུད་ལ། །མཚན་དང་གཏད་རྒྱ་ཇི་ལྟར་ལགས། །ཞེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །སྣ་ཚོགས་ཀུན་འབྱུང་སྙིང་པོར་འདུས། །སྙིང་པོ་གཏེར་སྙིང་རྒྱུད་དུ་ཟུང་། །དགོས་འདོད་མ་ལུས་འབྱུང་བ་ཡིས། །རིན་པོ་ཆེ་ཡི་རྒྱུད་དུ་ཟུང་། །དོན་གྱི་བཅུད་རྣམས་སྤུངས་པའི་ཕྱིར། །རིན་ཆེན་སྤུངས་པའི་རྒྱུད་དུ་ཟུང་། །རྒྱུད་འདི་གཏད་པའི་སྐལ་ལྡན་ནི། །རྒྱུད་བཟང་ངང་རིང་དད་པ་ཆེ། །གུས་དང་དམ་ཚིག་ཤེས་རབ་ལྡན། །དེ་ལྟ་བུ་ལ་རྒྱུད་འདི་གཏད། །དམ་མེད་ང་རྒྱལ་གཡོ་སྒྱུ་ཅན། །དེ་ལྟ་བུ་ལ་མི་སྦྱིན་ནོ། །ཞེས་གསུངས་སོ། །གཏེར་སྙིང་རིན་ཆེན་སྤུངས་པའི་རྒྱུད་ལས། མཚན་དང་སྣོད་བསྟན་པའི་ལེའུ་སྟེ་དགུ་པའོ།། །།གཏེར་སྙིང་རིན་པོ་ཆེ་སྤུངས་པའི་རྒྱུད་ཀྱི་རྒྱལ་པོ་རྫོགས་སོ།། །།ཨུ་རྒྱན་པདྨས་བཤད་ཅིང་ལོཙྪ་བ་སྐ་བ་དཔལ་བརྩེགས་ཀྱིས་བསྒྱུར་ནས། རྒྱལ་པོ་ཁྲི་སྲོང་ལྡེའུ་བཙན་ལ་གདམས་པའོ།། །།གཏེར་རྒྱ། ཟབ་རྒྱ། གཏད་རྒྱ་ལོ།། །། ཐིག་ལེ་ཡེ་ཤེས་བཅུད་སྤུངས་སྒྲོན་མ་འོད་འབར་བའི་རྒྱུད།― DNG002_Page_0638 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། བིན་དུ་ཛྙཱ་ན་སུ་ར་རཱ་ཤི་དཱ་རསྨི་ཛྭ་ལ་ཏནྟྲ། བོད་སྐད་དུ། ཐིག་ལེ་ཡེ་ཤེས་བཅུད་སྤུངས་སྒྲོན་མ་འོད་འབར་བའི་རྒྱུད། དངོས་མེད་ཀུན་གྱི་རྗེ་ལ་ཕྱག་འཚལ་ལོ། །འདི་སྐད་བདག་གིས་རྟོགས་ཤིང་བཤད་པའི་དུས་གཅིག་ན། དབྱིངས་རྣམ་པར་དག་པའི་གནས། སྣང་སྲིད་འཁོར་འདས་སྐྱེ་མེད་དུས་ཀྱི་ཀློང་། འོད་གསལ་འགག་པ་མེད་པའི་མཁའ། རིན་ཆེན་གསལ་དག་འོད་གསལ་སྒྲིབ་པ་མེད་པའི་གནས། ཀུན་ཁྱབ་ཕྱོགས་མེད་ཀུན་གཞིའི་ཕོ་བྲང་ན། །ཡེ་གསལ་དངོས་མེད་ཀ་དག་ཆོས་སྐུ་བཞུགས། །རང་བྱུང་ངང་དྭངས་འགག་མེད་འཁོར་གྱིས་བསྐོར། །བསྟན་པའི་རྒྱལ་པོ་བྱར་མེད་བློ་འདས་གསུངས། །དུས་ཀྱི་རྒྱལ་པོ་སྔ་ཕྱི་མེད་པའི་དུས། །སྡུད་པ་པོ་ནི་གསལ་དག་རིན་པོ་ཆེ། །དེ་ནས་གསལ་དག་རིན་ཆེན་དེས་ཞུས་པ། །ཨ་ཏི་བྷ་རང་གྷ་ཧ་རི། སྙིང་པོ་ཐིག་ལེའི་རང་བཞིན་ཇི་ལྟར་གནས། །ཡན་ལག་ཡེ་ཤེས་རང་བཞིན་ཇི་ལྟར་ཤར། །བཅུད་སྤུངས་གདམས་ངག་གནད་ཀྱིས་ཇི་ལྟར་རྟོགས། །སྒྲོན་མ་འོད་འབར་དཔེ་ཡིས་ཇི་ལྟར་བསྟན། །བྱར་མེད་བློ་འདས་བསྟན་པ་ཇི་ལྟར་གསུངས། །རྟོགས་པའི་འཆར་ལུགས་ཇི་ལྟར་འཆར་བར་འགྱུར། །མ་བསྒྲུབས་པར་ནི་འབྲས་བུ་ཇི་ལྟར་ཐོབ། །རིམ་པ་བརྒྱད་ཀྱིས་རྩོལ་བ་མི་འཚལ་ལམ། །ལྟ་བ་སྒོམ་པ་སྤྱོད་པ་འབྲས་བུ་བཞི། །དབང་པོ་ཡང་རབ་རྣམས་ལ་དགོས་མི་དགོས། །བྱ་དང་བཙལ་དང་རྩོལ་སྒྲུབ་མ་བྱས་པར། །དངོས་མེད་ཀ་དག་ཇི་ལྟར་ཐོབ་པར་འགྱུར། །ཞེས་ཞུས་སོ། །སྒྲོན་མ་འབར་བའི་རྒྱུད་ལས། ཕུན་སུམ་ཚོགས་པ་དང་གླེང་གཞིའི་ལེའུ་སྟེ་དང་པོའོ།། །།དེ་ནས་དངོས་མེད་ཀ་དག་ཆོས་སྐུ་ཡིས། །གསལ་དག་རིན་ཆེན་འཁོར་ལ་འདི་སྐད་གསུངས། །ཀྲ་ར་ཐ་ཀེ་ཛྙཱ་ན་ཐུང་ལ་ཨ་སི་ཐིམ། བྷ་ཡ་ཧྲི་ཏི་ཨ། སྙིང་པོ་ཐིག་ལེའི་རང་བཞིན་ངས་བཤད་ཀྱིས། །གསལ་དག་རིན་ཆེན་ཡིད་ལ་དེ་ལྟར་ཆོངས། །སྙིང་པོ་ཐིག་ལེའི་རང་བཞིན་དངོས་པོ་མེད། །དྲན་རྟོག་བློ་ལས་འདས་པས་མཚོན་དུ་མེད། །འོན་ཀྱང་མ་རྟོགས་པ་ཡི་སེམས་ཅན་ལ། །སྒྲོན་མ་འབར་བའི་དཔེ་ཡིས་མཚོན་ནས་ནི། །མུན་ཁུང་ ― DNG002_Page_0639 ―
[མ་དཔེ་གཟིགས་ན་འདིར་གནོན།]
གསེར་འཚོལ་ལྟ་བུ་བཤད་པར་བྱ། །སྙིང་པོའི་རང་བཞིན་མངོན་དུ་བསྟན་དུ་མེད། །དངོས་མེད་ཀུན་དངོས་ཅང་མེད་ཅིར་ཡང་སྣང་། །གཅིག་ལས་ཀུན་འབྱུང་སྣ་ཚོགས་གཅིག་འདུས་པ། །ཐ་སྙད་མཚོན་བྲལ་དཔེ་ཟླ་མེད་པའོ། །རྣམ་པ་ཀུན་ལྡན་གང་ཡང་གྲུབ་པ་མེད། །ཐིག་ལེ་ཆེན་པོ་མི་གཡོ་མི་འགྱུར་བ། །ཚོགས་བརྒྱད་ཡུལ་མིན་བློ་འདས་བྱར་མེད་པའོ། །ཀུན་ཁྱབ་ཕྱོགས་མེད་གར་ཡང་རྒྱ་མ་ཆད། །ཀ་དག་དངོས་མེད་རྣལ་མ་ཟང་ཀ་དེ། །མཚོན་བྱ་མ་འགགས་མཚོན་གཞི་མི་དམིགས་སོ། །སྣང་ཆ་མ་འགགས་སྣང་གཞི་མ་གྲུབ་བོ། །ཞེས་གསུངས་སོ། །སྙིང་པོ་བསྟན་པའི་ལེའུ་སྟེ་གཉིས་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་ཀ་དག་ཆོས་སྐུ་ལ། །ཡན་ལག་ཡེ་ཤེས་ཇི་ལྟར་འཆར། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་ཐིག་ལེ་མིང་མེད་བློ་འདས་ཀྱང་། །ཡན་ལག་མ་འགགས་ཡེ་ཤེས་འདི་ལྟར་ཤར། །ཡེ་ནི་ཡེ་ནས་གནས་པའི་རང་བཞིན་ལ། །རྩལ་ཟེར་ཡན་ལག་ངང་དྭངས་རང་བརླག་ཤེས། །དེས་ན་ཡེ་ཤེས་ཞེས་པར་བཤད་པ་ཡིན། །ཨ་ཏི་ཡོ་གའི་སྟོང་གསལ་ཁྱབ་གདལ་དེར། །རྩལ་གྱི་ཟེར་དེ་ཐིམ་པས་དབྱེར་མེད་ཤེས། །དེས་ན་དེ་ལ་ཡེ་ཤེས་ཞེས་པར་བཤད། །ཡེ་ནི་དངོས་མེད་ཀ་ནས་དག་པ་སྟེ། །ཤེས་རབ་གསུམ་གྱིས་ཤེས་པས་ཡེ་ཤེས་ཡིན། །ཡེ་ནི་རང་ལ་ཡེ་ནས་གནས་པ་ཡིན། །ཡེ་ནས་གནས་པར་ཤེས་པས་ཤེས་རབ་བོ། །ཡན་ལག་རྩལ་ཟེར་འགག་མེད་བྱུང་སར་ཐིམ། །དེས་ན་ཡན་ལག་ཡེ་ཤེས་རང་བཞིན་ནོ། །ཞེས་གསུངས་སོ། །སྒྲོན་མ་འབར་བའི་རྒྱུད་ལས། ཡེ་ཤེས་བསྟན་པའི་ལེའུ་སྟེ་གསུམ་པའོ།། །།དེ་ནས་གསལ་དག་རིན་ཆེན་གྱིས། །ཀ་དག་དངོས་མེད་ཆོས་སྐུ་ལ། །བཅུད་སྤུངས་གདམས་ངག་གནད་གང་ཡིན། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བཅུད་སྤུངས་མན་ངག་གནད་བསྟན་པ། །རང་དྭངས་རིན་ཆེན་ཡིད་ལ་ཆོངས། །བཅུད་ནི་སྙིང་པོ་དོན་གྱི་བཅུད། །སྤུངས་ནི་སྐྱེ་འགག་ ― DNG002_Page_0640 ―
[མ་དཔེ་གཟིགས་ན་འདིར་གནོན།]
མེད་པར་སྤུངས། །བཅུད་ནི་ཆོས་སྐུ་འགྱུར་མེད་བཅུད། །སྤུངས་ནི་རྒྱུ་རྐྱེན་འཕོ་འགྱུར་མེད། །བཅུད་ནི་ཆོས་ཉིད་སྙིང་པོའོ། །སྤུངས་ནི་རྩོལ་བསྒྲུབ་མེད་པར་སྤུངས། །ཐིག་ལེ་ཡེ་ཤེས་བཅུད་སྤུངས་པས། །མི་འགྱུར་ཡེ་ཤེས་རྒྱ་ཡིས་ཐེབས། །བརྡའ་ནི་བླ་མའི་སྙན་བརྒྱུད་བརྡའ། །ངག་ནི་སློབ་མའི་ངག་ལ་བརྒྱུད། །ཐིག་ལེ་ཡེ་ཤེས་གཉིས་མེད་གནད། །སྙིང་པོ་ཡན་ལག་གཉིས་མེད་གནད། །གསལ་སྟོང་ངོ་འཕྲོད་དབྱེར་མེད་རྟོགས། །ཞེས་གསུངས་སོ། །བཅུད་སྤུངས་མན་ངག་བསྟན་པའི་ལེའུ་སྟེ་བཞི་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་རྣལ་མ་ཀུན་བཟང་ལ། །སྒྲོན་མ་འབར་བའི་དཔེས་མཚོན་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་མེད་ཀ་དག་རང་བཞིན་དཔེ་མེད་ཀྱང་། །དངོས་མེད་བསྟན་ཕྱིར་དཔེ་ཡིས་མཚོན། །དཔེར་ན་མུན་ནག་རྫས་སྟོར་བ། །ལག་ནོམ་གྱིས་བཙལ་མི་རྙེད་དེ། །སྒྲོན་མའི་འོད་གསལ་མུན་རང་སངས། །རིན་ཆེན་རྫས་སྟོར་མོད་ལ་རྙེད། །དེ་བཞིན་སེམས་ཉིད་ནོར་བུ་ཡང་། །ཐོག་མ་མེད་ནས་བསགས་པ་ཡིས། །སྒྲིབ་གཡོགས་བག་ཆགས་མ་རིག་རྣམས། །ཡེ་ཤེས་འོད་འབར་སྒྲོན་མེས་སངས། །ཟང་ཀ་ངང་དྭངས་ཀ་དག་མཐོང་། །མཐོང་བའི་དངོས་མེད་དྭངས་སང་ངེ་། །གཉིས་མེད་གཅིག་གི་བློ་ལས་འདས། །དངོས་མེད་མཚོན་མེད་རྣལ་མ་དེ། །གང་ཡང་མི་སེམས་དགོངས་པ་རྟོགས། །ཀ་དག་ཟང་མའི་ཆོས་སྐུ་རྙེད། །ངོ་འཕྲད་ཐེ་ཚོམ་སོམ་ཉི་མེད། །ཐོག་མ་ནས་བསགས་མ་རིག་སངས། །འཁོར་བའི་འདམ་གྱི་རྫབ་ནང་ནས། །བསམ་གྲུབ་ངང་དྭངས་རིན་ཆེན་རྙེད། །མྱ་ངན་འདས་པའི་ཞིང་ཁམས་ན། །རྟོགས་པའི་ཡེ་ཤེས་ལོངས་སྤྱོད་དོ། །ཐོག་མ་མེད་ནས་ཐ་མ་རུ། །རང་བཞིན་རྒྱུན་དུ་གནས་པའི་ཕྱིར། །ཡེ་ཤེས་རྒྱུན་ཆད་མེད་པའི་རྒྱུ། །ཞེས་གསུངས་སོ། །སྒྲོན་མ་འབར་བའི་དཔེ་བསྟན་པའི་ལེའུ་སྟེ་ལྔ་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་ཀ་དག་ཆོས་སྐུ་ལ། །བྱར་མེད་བློ་འདས་ཐེག་པ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དགུ་རྩེ་སྤྱི་ཡིས་སྤྱི་ཏི་བཤད། །གསལ་ ― DNG002_Page_0641 ―
[མ་དཔེ་གཟིགས་ན་འདིར་གནོན།]
དག་རིན་ཆེན་ཡིད་ལ་ཆོངས། །ཐེག་དགུ་ཞེ་འདོད་བློ་ཡི་ཆོས། །དགུ་ལས་དཔག་པའི་སྤྱི་ཕུད་འདི། །བྱར་མེད་ཞེ་འདོད་བློ་ལས་འདས། །ཅང་མེད་དངོས་མེད་དྭངས་སང་ངེ་། །སྟོང་གསལ་གདངས་ལ་དངོས་གཞི་མེད། །ཐ་སྙད་མ་གོས་དཔེ་ལས་འདས། །ཀ་དག་ཡེ་ཤེས་ལྟ་བ་ཡིན། །ཇི་ལྟར་ཞེ་འདོད་ཕྱོགས་དང་བྲལ། །མི་བསྒོམ་རྒྱུན་ཆད་མེད་པར་གནས། །འབྱུང་འཇུག་མེད་པའི་ཀློང་སྒོམ་ཡིན། །བྱར་མེད་ལུས་ངག་ཡིད་གསུམ་གྱི། །བྱ་བ་དང་བྲལ་ཤུགས་འབྱུང་ལ། །ཞེན་པ་མེད་པ་སྤྱོད་པ་ཡིན། །མི་འགྱུར་རང་ཡན་ཟང་ཀ་མ། །གདོད་མ་ཡེ་ནས་གནས་པ་ཡི། །ཀ་དག་ཆེན་པོའི་འབྲས་བུ་ཡིན། །ཞེ་འདོད་བློ་ཆོས་འདིར་མ་བཤད། །ཅེས་གསུངས་སོ། །བྱར་མེད་བློ་འདས་བསྟན་པའི་ལེའུ་སྟེ་དྲུག་པའོ།། །།དེ་ནས་གསལ་དག་ཁྱེའུ་ཆུང་གིས། །དངོས་མེད་ཀ་དག་ཀུན་བཟང་ལ། །རྟོགས་པའི་ཡེ་ཤེས་ཇི་ལྟར་འཆར། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གདོད་དག་ཟང་ཀའི་དོན་རྟོགས་ན། །རྟོགས་པའི་ཡེ་ཤེས་འཆར་ལུགས་མང་། །བསྡུས་ནས་མདོ་ཙམ་བསྟན་པ་ནི། །དངོས་མེད་ཟང་ཀ་རྟོགས་ཙམ་ན། །བྱ་བཙལ་མེད་པའི་རྟོགས་པ་འཆར། །ཞེ་འདོད་རྩིས་གདབ་མེད་པར་གནས། །དབྱེ་བསལ་མེད་པའི་རྟོགས་པ་འཆར། །སྐུ་ཡི་དངོས་པོ་མི་མངའ་བར། །སྟོང་གསུམ་མ་ལུས་ཟིལ་གྱིས་ནོན། །གསུང་གི་དངོས་པོ་ཅིར་ཡང་མི་མངའ་བར། །བསྟན་པ་མ་ལུས་ཀུན་ལ་རྒྱས། །ཐུགས་ཀྱི་དངོས་པོ་མི་མངའ་བར། །སྣང་སྲིད་འཁོར་འདས་ས་ལེར་མཁྱེན། །སྐུ་གསུང་ཐུགས་ཀྱི་ཡོན་ཏན་ནི། །བྱེ་བྲག་བསམ་གྱིས་མི་ཁྱབ་འཆར། །ཞེས་གསུངས་སོ། །རྟོགས་པའི་འཆར་ལུགས་བསྟན་པའི་ལེའུ་སྟེ་བདུན་པའོ།། །།དེ་ནས་གསལ་དག་ཁྱེའུ་ཆུང་གིས། །དངོས་མེད་ཀ་དག་ཀུན་བཟང་ལ། །མ་བསྒྲུབས་འབྲས་བུ་ཇི་ལྟར་ཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཀ་དག་རང་ལ་ཡེ་ཡོད་དོན། །དངོས་མེད་ཟང་ཀ་མཐོང་བ་ཡིས། །མ་བསྒྲུབས་འབྲས་བུ་ཡོངས་སུ་གྲུབ། །ཐེག་པ་གཞན་གྱི་ཆོས་བཞིན་དུ། །རྩོལ་བསྒྲུབ་འབྲས་བུ་ཡིད་སྨོན་ཡིན། །དེ་བས་བློ་འདས་སྤྱི་ཏི་འདི། །དངོས་མེད་མཚོན་བྲལ་ཡེ་ནས་གནས། །གང་གིས་ ― DNG002_Page_0642 ―
[མ་དཔེ་གཟིགས་ན་འདིར་གནོན།]
མ་གོས་ཀ་དག་ཆོས་སྐུ་ཐོབ། །ངང་དྭངས་རྣལ་མ་གསལ་དྭངས་ཡང་། །རང་གནས་རང་སངས་རྒྱས་པ་སྟེ། །གདོད་མ་ཉིད་ནས་རྣམ་པར་དག །ཡེ་ནས་རང་རྟོགས་འདུ་འབྲལ་མེད། །ཅེས་གསུངས་སོ། །མ་བསྒྲུབས་འབྲས་བུ་བསྟན་པའི་ལེའུ་སྟེ་བརྒྱད་པའོ།། །།དེ་ནས་གསལ་དག་ཁྱེའུ་ཆུང་གིས། །དངོས་མེད་ཀ་དག་ཆོས་སྐུ་ལ། །ཐེག་བརྒྱད་རྩོལ་བ་མི་འཚལ་ལམ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་མེད་ཅིར་སྣང་སྣ་ཚོགས་གཅིག་རྟོགས་པས། །ཉན་ཐོས་དཀའ་ཐུབ་སྡོམ་པའི་རྩོལ་མི་དགོས། །རྒྱུ་རྐྱེན་སྐྱེ་འཇིག་འཕོ་འགྱུར་མེད་རྟོགས་པས། །རང་རྒྱལ་རྟེན་འདྲེལ་རྣམ་པར་རིག་བྱེད་མེད། །རང་བྱུང་ངང་དྭངས་ཡུལ་སེམས་གཉིས་མེད་པས། །རང་རིག་རང་གསལ་སེམས་ཙམ་འདོད་པ་མེད། །ཡིད་གཉིས་རྩད་གཅོད་བདེན་གཉིས་གཉིས་སྣང་མེད། །བྱང་སེམས་ཕར་ཕྱིན་བསླབ་པའི་བསྲུང་སྡོམ་མེད། །ཀ་དག་དངོས་མེད་ཟང་ཀ་འདི་ཡིན་པས། །ཁྲུས་དང་གཙང་སྦྲ་དུས་ཚིགས་མེད། །རང་རྒྱུད་དག་པའི་དཀྱིལ་འཁོར་ཆེན་པོ་ལ། །ཚུལ་ཁྲིམས་སྔགས་དང་ཕྱག་རྒྱ་སྐྱེ་འགག་མེད། །གཉིས་མེད་ཐིག་ལེ་ཆེན་པོའི་རང་བཞིན་ལས། །མར་སྤྱོད་ཡར་ལ་བལྟ་བའི་རྩེ་གཉིས་མེད། །ངང་དྭངས་རང་སངས་རང་སར་གྲོལ་བ་ཡིས། །ཏིང་འཛིན་རྣམ་གསུམ་བསྙེན་བསྒྲུབ་སྣང་སྟོང་མེད། །གང་ལ་མི་སེམས་སྣང་སྲིད་རང་གྲོལ་བས། །དབྱིངས་དང་ཡེ་ཤེས་གཉིས་ཀྱི་ཞེ་འདོད་མེད། །རང་བྱུང་གདོད་ནས་དངོས་མེད་ཟང་ཀ་བས། །རིག་པ་རང་རྒྱུད་སྣང་བ་ཆོས་སྐུའི་འདོད་པ་མེད། །ང་ཡི་སྐྱེ་མེད་ཀ་དག་ཆོས་སྐུ་ལ། །ཐེག་པ་རིམ་པ་བརྒྱད་ཀྱི་རྩོལ་བསྒྲུབ་མེད། །ཅེས་གསུངས་སོ། །ཐེག་པ་བརྒྱད་ཀྱི་རྩོལ་བསྒྲུབ་མི་དགོས་པར་བསྟན་པའི་ལེའུ་སྟེ་དགུ་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་ཀ་དག་ཆོས་སྐུ་ལ། །ལྟ་སྒོམ་སྤྱོད་པ་འབྲས་བུ་བཞི། །ཡང་རབ་རྣམས་ལ་དགོས་མི་དགོས། །ཞེས་ཞུས་པས། སྟོན་ ― DNG002_Page_0643 ―
[མ་དཔེ་གཟིགས་ན་འདིར་གནོན།]
པས་འཁོར་ལ་བཀའ་སྩལ་པ། །ཡང་རབ་དབང་པོ་ཐོད་རྒལ་གྱིས། །ཐིག་ལེ་བཅུད་སྤུངས་གནད་གོ་ན། །ལོགས་ནས་འབྱུང་བའི་བལྟ་བསྒོམ་བཞི། །དགོས་པ་ཡོད་པར་མ་གསུངས་སོ། །འོན་ཀྱང་རབ་འོག་བློ་ཅན་ལ། །ལྟ་སྒོམ་སྤྱོད་འབྲས་བཞི་རུ་བསྟན། །ཀ་དག་ལྟ་བ་བསམ་འདས་སྒོམ་པ་དང་། །རང་སངས་སྤྱོད་པ་གདོད་ནས་འབྲས་བུར་གྲུབ། །ཚིག་བྲལ་བློ་ལས་འདས་པས་ཞེ་འདོད་མེད། །ཀ་དག་ཕྱོགས་བྲལ་ལྟ་བའི་རྒྱལ་པོ་ཡིན། །སེང་གེ་རྩལ་རྫོགས་བྱ་རྒྱལ་ཁྱུང་དང་འདྲ། །དངོས་མེད་བློ་སྟོར་བསམ་བརླག་འཛིན་མེད་པོ། །གང་ལའང་མི་སེམས་མི་འགྱུ་བསྒོམ་པའི་རྒྱལ། །དཔེར་ན་ཉི་ཟླ་རྒྱ་མཚོ་ཤེལ་གོང་བཞིན། །རང་དྭངས་རང་སངས་རང་སར་གྲོལ་བ་ཡིས། །སྣ་ཚོགས་གང་ལའང་ཆགས་མེད་བྱ་བ་ཐོང་། །སྣང་སྲིད་དགྲ་གཉེན་དཀར་དམར་ཡུལ་རྣམས་ལ། །ཆགས་སྡང་མེད་པར་སྤྱོད་པའི་རྒྱལ་པོ་ཡིན། །གླང་ཆེན་སྨྱོན་པ་བུ་ཆུང་དཔེ་བཞིན་ནོ། །འཕོ་དང་འགྱུར་བ་མེད་པའི་ཀློང་ཡངས་ནས། །སྙིང་པོ་ཀ་དག་སྐྱེ་མེད་ཆོས་སྐུ་རྟོགས། །དངོས་མེད་ཀ་དག་བསམ་འདས་དགོངས་པ་འགྲུབ། །ཡེ་ཤེས་ཀློང་གྱུར་འབྲས་བུའི་རྒྱལ་པོ་ཡིན། །དཔེར་ན་རིན་ཆེན་རི་བོ་གསེར་བཞིན་ནོ། །ཞེས་གསུངས་སོ། །ལྟ་སྒོམ་སྤྱོད་འབྲས་བསྟན་པའི་ལེའུ་སྟེ་བཅུ་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་ཀ་དག་ཆོས་སྐུ་ལ། །བྱ་བཙལ་རྩོལ་བསྒྲུབ་མི་དགོས་པར། །དངོས་མེད་ཀ་དག་ཇི་ལྟར་འཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། སྙིང་པོའི་རང་བཞིན་བཙལ་བྱ་རྩོལ་བསྒྲུབ་མེད། །གཞི་ཡི་རང་བཞིན་འཕོ་འགྱུར་སྐྱེ་འགག་མེད། །ཐིག་ལེའི་རང་བཞིན་རྒྱུ་རྐྱེན་རྩོལ་བསྒྲུབ་མེད། །ཆོས་ཉིད་རང་བཞིན་སྒྲིབ་གཡོགས་དྲི་མ་མེད། །རྩལ་གྱི་རང་བཞིན་འགག་མེད་འཛིན་རྟོག་མེད། །དངོས་མེད་ཀ་དག་མཚོན་དུ་མེད་ན་ཡང་། །རང་བྱུང་ཡེ་ཤེས་ཀ་དག་མཐོང་ཚུལ་བཤད། །ངང་དྭངས་གསལ་དག་ཐུགས་ལ་ཆོངས། །དགུ་རྩེ་སྤྱི་ཏིར་རྩོལ་བསྒྲུབ་མི་འཚལ་ ― DNG002_Page_0644 ―
[མ་དཔེ་གཟིགས་ན་འདིར་གནོན།]
ཏེ། །བློས་བཅོས་བྱས་ཆོས་ཐམས་ཅད་སུན་ཕྱུང་ཞིག །བདེན་གཉིས་ཞེ་འདོད་ཐམས་ཅད་ལ་དོར་ཅིག །ཡེ་ནས་ལས་ཟིན་ད་གདོད་བྱ་མི་དགོས། །ཡེ་ནས་གསལ་བས་ལྟ་བས་བལྟ་མི་དགོས། །ཆགས་སྡང་ཡེ་གྲོལ་སངས་རྒྱས་བཤད་མི་དགོས། །དགོས་མེད་ཀ་དག་ཆེན་པོ་རང་ལས་གྲུབ། །རྩོལ་བསྒྲུབ་བསམ་པས་མི་འགྲུབ་རྟོགས་པས་འགྲུབ། །ཅེས་གསུངས་སོ། །བྱ་བཙལ་མ་བྱས་པར་དངོས་མེད་ཀ་དག་ཐོབ་པར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་ཀ་དག་ཀུན་བཟང་ལ། །གང་ཞུས་ལན་རྣམས་དེ་ལྟར་རྟོགས་ལགས་ན། །དཀྱིལ་འཁོར་ལྷ་དབང་ཕྲིན་ལས་དམ་ཚིག་དང་། །དངོས་གྲུབ་འབྲས་བུ་སྨོན་ལམ་ཇི་ལྟར་ལགས། །ཞེས་ཞུས་པ་དང་། ཀ་དག་སྟོན་པས་འཁོར་ལ་བཀའ་སྩལ་པ། །སྙིང་པོ་དངོས་མེད་མཚོན་ལས་འདས། །ཡན་ལག་ཡེ་ཤེས་གསལ་ཕྱིར་འཁོར་ལ་བཤད། །སེམས་ཉིད་ཁྱབ་གདལ་དཀྱིལ་འཁོར་ཆེན་པོ་ན། །འཁོར་འདས་ཀུན་འབྱུང་མཁའ་ཀློང་ཡངས་པའི་གནས། །མ་བཅོས་གདོད་དག་ཀུན་གཞིའི་དཀྱིལ་འཁོར་ན། །མ་བསྐྱེད་གདོད་གནས་ཆོས་སྐུ་རྣལ་མ་བཞུགས། །དབྱེར་མེད་གཏི་མུག་རྣམ་པར་སྣང་མཛད་དང་། །གསལ་ལ་དག་པ་ཞེ་སྡང་རྡོ་རྗེ་དང་། །ང་རྒྱལ་མཉམ་ཉིད་ཡེ་ཤེས་རིན་ཆེན་དང་། །འདོད་ཆགས་ཞེན་པ་ཆོད་པ་པདྨ་དང་། །ཕྲག་དོག་རང་སར་གྲོལ་བ་དོན་གྲུབ་ལྔ། །དུག་ལྔ་མ་སྦྱངས་ཀ་དག་བསྐྱེད་རྫོགས་ལྷ། །སྤྱན་འདྲེན་ཕྱག་འཚལ་བསྙེན་བསྒྲུབ་ཚོགས་གཏོར་མེད། །དངོས་མེད་ཀ་དག་རང་ལ་ཡེ་གནས་པས། །རང་དབང་རང་ཐོབ་དབང་གི་རྒྱལ་པོ་ཡིན། །སྟོང་ཞིང་གསལ་ལ་དངོས་མེད་དྭངས་སང་ངེ་། །བྱ་བྲལ་བློ་ལས་འདས་པའི་དབང་ཐོབ་པས། །མ་བསྐུར་རང་ཆས་ཀ་ནས་དག་པ་ཐོབ། །བསྐུར་བྱ་སྐུར་བྱེད་རྫས་ ― DNG002_Page_0645 ―
[མ་དཔེ་གཟིགས་ན་འདིར་གནོན།]
དང་བུམ་པ་མེད། །སྣ་ཚོགས་འུབ་འདུས་དབྱེ་བསལ་མེད་པའི་དབང་། །རྩིས་གདབ་གཉིས་མེད་ཆོས་སྐུ་རྣལ་མ་ཐོབ། །ཐིག་ལེ་བཅུད་སྤུངས་ཡང་གསང་འདུས་པའི་དབང་། །སྣང་སྲིད་རྩལ་ཟེར་ཐོབ་བྱུང་ཐིག་ལེར་ཐིམ། །སྙིང་པོ་ཟེར་འཕྲད་དབྱེར་མེད་དབང་བསྐུར་རོ། །མ་ཕྱེད་མི་ཕྱེད་དབང་གི་རྒྱལ་པོ་ཐོབ། །དངོས་གྲུབ་ཀ་དག་ཡེ་གསལ་བློ་འདས་དེ། །དངོས་མེད་བསམ་བྲལ་རང་ལ་གྲུབ་པ་ལས། །ལྷ་ཡིས་གནང་ཞིང་གཞན་ནས་ཐོབ་པ་མེད། །ཕྲིན་ལས་རྒྱལ་པོ་བྱ་རྩོལ་མེད་པ་ཡིན། །དམ་ཚིག་རྒྱལ་པོ་གདོད་དག་སྐྱོན་བྲལ་ཡིན། །འབྲས་བུའི་རྒྱལ་པོ་དངོས་མེད་ཟང་ཀ་ཡིན། །སྨོན་ལམ་རྒྱལ་པོ་ཡིད་སྨོན་མེད་པ་ཡིན། །དགོངས་པའི་རྒྱལ་པོ་ཡིད་ལ་བྱར་མེད་ཡིན། །དགོངས་པའི་རྒྱལ་པོ་གཡོ་འགུལ་མེད་པ་ཡིན། །ཞེས་གསུངས་སོ། །དཀྱིལ་འཁོར་ལྷ་དབང་དམ་ཚིག་ཕྲིན་ལས་དངོས་གྲུབ་འབྲས་བུ་སྨོན་ལམ་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་ཆོས་སྐུ་ལ་ཞུས་པ། །རྫོགས་ཆེན་སྤྱི་ཏི་ཡོ་ག་རུ། །སྣང་སྲིད་འཁོར་འདས་ཇི་ལྟར་རྫོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་ཐིག་ལེ་ཀུན་གཞི་ཁྱབ་གདལ་དུ། །མ་བཀག་རྩལ་ཟེར་ཡན་ལག་བུ་རྣམས་རྫོགས། །ཡེ་ཐོག་ཁྱབ་གཞི་དངོས་གཞི་མཁའ་ཀློང་དུ། །སྣང་སྲིད་འཁོར་འདས་ཡོད་མེད་རྟག་ཆད་རྫོགས། །སྙིང་པོ་ཡན་ལག་དབྱེར་མེད་གནད་ཆེན་དུ། །ངོ་སྤྲོད་གདམས་ངག་བརྒྱད་ཁྲི་བཞི་སྟོང་རྫོགས། །ཐིག་ལེ་ཡེ་ཤེས་བཅུད་འདུས་གཉིས་མེད་དུ། །རྩད་གཅོད་རྟོགས་ལུགས་བརྒྱད་ཁྲི་བཞི་སྟོང་རྫོགས། །བྱ་བྲལ་བློ་འདས་མཚོན་མེད་བསམ་བྲལ་དུ། །དགོངས་པ་ཏིང་འཛིན་བརྒྱད་ཁྲི་བཞི་སྟོང་རྫོགས། །དངོས་མེད་ཀ་དག་མཚོན་མེད་རྣལ་མ་རུ། །འབྲས་བུ་གདོད་དག་ཆོས་སྐུ་མ་ལུས་རྫོགས། །དཀྱིལ་འཁོར་དབང་དམ་ཕྲིན་ལས་མ་ལུས་རྫོགས། །ལྷ་མཆོད་ ― DNG002_Page_0646 ―
[མ་དཔེ་གཟིགས་ན་འདིར་གནོན།]
དངོས་གྲུབ་ཚོགས་གཏོར་སྨོན་ལམ་རྫོགས། །བལྟ་བསྒོམ་སྤྱོད་འབྲས་འདུལ་ཁྲིམས་སྡོམ་པ་རྫོགས། །ཕ་རོལ་ཕྱིན་དྲུག་ལམ་ལྔ་ས་བཅུ་རྫོགས། །ཁྲུས་དང་གཙང་སྦྲ་མཚན་མ་ཡོད་མེད་རྫོགས། །དམ་རྫས་ཏན་གཎ་མ་བསྐྱེད་རྫོགས་ཚུལ་རྫོགས། །མེད་པ་ཕྱལ་པ་གཅིག་པུ་ལྷུན་གྲུབ་རྫོགས། །དགུ་རྩེ་སྤྱི་ཏིར་བརྒྱད་ཁྲི་བཞི་སྟོང་རྫོགས། །སྣང་སྲིད་འཁོར་འདས་འུབ་ཆུབ་རྫོགས། །རྫོགས་ལུགས་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་ཀ་དག་ཀུན་བཟང་ལ། །ཐེག་པ་དགུ་རྩེ་སྤྱི་ཏི་ལ། །གོལ་སྒྲིབ་འཁྲུལ་པ་ཡོད་དམ་མེད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྤྱི་ཏི་ཡོ་ག་འདི་རྟོགས་ན། །གོལ་སྒྲིབ་འཁྲུལ་པ་གང་ཡང་མེད། །དངོས་མེད་ཀ་དག་རྣལ་མ་རྟོགས། །གོལ་སྒྲིབ་འཁྲུལ་པའི་མིང་ཡང་མེད། །མི་རྟོག་བློ་ལ་གོལ་སྒྲིབ་མེད། །ཅེས་གསུངས་སོ། །སྤྱི་ཏི་རྟོགས་ན་གོལ་སྒྲིབ་མེད་པར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་ངང་དྭངས་ཀྱིས་ཞུས་པ། །གདམས་པའི་གནད་ནི་ཇི་ལྟར་ལགས། །ཞེས་ཞུས་པ་དང་། དངོས་མེད་སྟོན་པས་བཀའ་སྩལ་པ། །ཤེས་རིག་ཡིད་སེམས་དྲན་རྟོག་ཅན་གྱི་བློ། །གང་ལའང་འཛིན་མེད་འདི་ཡིན་ཏེ། །སྣང་སྲིད་གང་སྣང་དབྱེ་དང་བཙལ་མེད་པར། །རང་སར་གྲོལ་ན་གནད་ཡིན་ངེས་འཚལ་ལོ། །ཞེས་གསུངས་སོ། །སྒྲོན་མ་འབར་བའི་རྒྱུད་ལས། གདམས་པའི་གནད་མཆོག་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་གསལ་དག་རིན་ཆེན་གྱིས། །དངོས་མེད་ཀ་དག་ཆོས་སྐུ་ལ། །རྒྱུད་འདིའི་མཚན་ནི་ཇི་ལྟར་གཟུང་། །ཞེས་ཞུས་པས། སྟོན་པས་འཁོར་ལ་བཀའ་ བདུད་རྩི་བཅུད་ཐིགས་སྒྲོན་མ་བརྩེགས་པའི་རྒྱུད།― DNG002_Page_0647 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཨ་མྲྀ་ཏ་ར་ས་བིནྡུ་དཱི་བ་ཀུ་ཊ་ཏནྟྲ། བོད་སྐད་དུ། བདུད་རྩི་བཅུད་ཐིགས་སྒྲོན་མ་བརྩེགས་པའི་རྒྱུད། ཐོག་མའི་སངས་རྒྱས་འོད་མི་འགྱུར་བ་ལ་ཕྱག་འཚལ་ལོ། ། ― DNG002_Page_0648 ―
[མ་དཔེ་གཟིགས་ན་འདིར་གནོན།]
འདི་སྐད་བདག་གིས་ཐོས་པའི་དུས་གཅིག་ན། རིན་པོ་ཆེའི་གནས་ཀྱི་ཀློང་། ཆོས་ཉིད་ཀྱི་དབྱིངས། འོད་གསལ་གྱི་མཁའ། རང་བྱུང་གི་གནས། ཀུན་གཞིའི་ཕོ་བྲང་། འོད་གསལ་རྣམ་དག །བསམ་གྱིས་མི་ཁྱབ་པའི་དཀྱིལ་འཁོར། སྒྲིབ་པ་མེད་པར་རང་བཞིན་གྱིས་འོད་གསལ་བ། རྒྱ་གར་ཡང་མ་ཆད་པ། ཕྱོགས་གང་དུ་ཡང་མ་ལྷུང་བ། མཐའ་གར་ཡང་མ་རེག་པ། རིན་པོ་ཆེ་རྣམ་དག་འོད་གསལ། ངང་དྭངས་རང་གསལ་གྱི་ལྷ་ཁང་ན། དམ་པ་དང་པོའི་སངས་རྒྱས་དབྱེར་མེད་སྔོན་ཐོག་ཡེའི་སངས་རྒྱས། རང་བཞིན་ཀུན་ཏུ་བཟང་པོ་བཞུགས་སོ། །དེའི་ཚེ་སྨིན་པ་ཆེན་པོའི་འཁོར་ཡང་འདི་ལྟ་སྟེ། རང་རྩལ་འོད་གསལ་གྱི་འཁོར་དང་། ངང་དྭངས་རྣམ་དག་གི་འཁོར་དང་། རང་དྭངས་རང་གསལ་གྱི་འཁོར་དང་། རང་བྱུང་རང་རླག་དབྱེར་མེད་པའི་འཁོར་རོ། །གཞན་ཡང་རྩལ་སྣང་ཟེར་གྱི་འཁོར་དང་། འོད་གསལ་ཀུན་ཁྱབ་ཀྱི་འཁོར་དང་། ཡན་ལག་བུའི་འཁོར་དང་། མཚན་ཉིད་རིག་པའི་འཁོར་དང་། འགྱུ་བ་ཡིད་ཀྱི་འཁོར་དང་། གསལ་བ་སེམས་ཀྱི་འཁོར་དང་། ཉིད་ཀྱི་རང་བཞིན་གྱི་འཁོར་དང་། རང་བྱུང་སྤྲོས་གཅོད་ཀྱི་འཁོར་དང་། རང་སངས་རྣམ་དག་རང་བཞིན་རྟོགས་པའི་འཁོར་རོ། །འཁོར་ཕུན་སུམ་ཚོགས་པའོ། །འདས་དང་མ་འོངས་ད་ལྟར་གྱི། །དུས་གསུམ་གཅིག་སྟེ་ཁྱད་པར་མེད། །དུས་ཕུན་སུམ་ཚོགས་པའོ། །བསྟན་པའི་རྒྱལ་པོ་དགུ་རྩེ་བློ་འདས་གསུངས། །བྱར་མེད་ལྷུན་རྫོགས་བསྒྲུབ་མེད་འབྲས་བུའོ། །བསྟན་པ་ཕུན་སུམ་ཚོགས་པའོ། །དེའི་ཚེ་འཁོར་གྱི་ནང་ནས། ངང་དྭངས་ཁྱེའུ་ཆུང་སྟན་ལས་ལངས་ཏེ། ཕྱག་འཚལ་ནས་གུས་པས་འདི་སྐད་ཞུས་སོ། །དམ་པ་དང་པོའི་སངས་རྒྱས་ཀུན་བཟང་ཁྱེད་ལ། བཤད་མེད་བྱར་མེད་བློ་འདས་དོན། །བསྒྲུབ་ཏུ་མེད་པའི་ཆོས་ཤིག་ཞུ། །ཞེས་ཞུས་པ་དང་། དེ་ནས་དམ་པ་དང་པོའི་སངས་རྒྱས་དེ། རང་བཞིན་ཡོངས་རྫོགས་དབྱེར་མེད་བློ་འདས་སྤྲོས་བྲལ་མཚོན་ ― DNG002_Page_0649 ―
[མ་དཔེ་གཟིགས་ན་འདིར་གནོན།]
མེད་ཀྱི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །བྱར་མེད་བློ་འདས་ཆོས་ཤིག་བཤད། །འཁོར་རྣམས་མ་ཡེངས་གུས་པས་ཉོན། །སྙིང་པོའི་རང་བཞིན་སྐྱེ་འགག་གཉིས་མེད་ཀྱང་། །རང་བྱུང་རྩལ་གྱི་ཤེས་པ་བུ་ལ་བཤད། །ཆོས་ཉིད་བཅུད་འདུས་མཚོན་དུ་མེད་པ་ལ། །བདུད་རྩིའི་མན་ངག་སྒྲོན་མ་བརྩེགས་པ་བཤད། །བཤད་པའི་ཆོས་ནི་ཐ་སྙད་ཡིན། །མཚོན་དུ་མེད་པའི་ཆོས་ཤིག་བཤད། །བྱས་པའི་ཆོས་ནི་འདུས་བྱས་ཡིན། །མ་བྱས་རང་བྱུང་ཆོས་ཤིག་བཤད། །བྱ་རྩོལ་ཆོས་ནི་རྩོལ་བསྒྲུབ་ཡིན། །བྱར་མེད་རྩོལ་བསྒྲུབ་བྲལ་བའི་ཆོས་ཤིག་དགོས། །བློས་བཏགས་ཆོས་ལ་མཐར་ཐུག་མེད། །བློ་འདས་མཐར་ཐུག་ཆོས་ཤིག་བཤད། །བསྒྲུབ་པའི་ཆོས་ནི་རེ་དོགས་ཡིད་སྨོན་ཡིན། །ཡེ་ཡིན་རང་སར་གནས་པའི་ཆོས་ཤིག་བཤད། །ཟད་སར་ཟད་ལ་ཐུག་པའི་ཐུག་པར་བཤད། །གཅིག་ཤེས་ཀུན་གྲོལ་ཆོས་ཤིག་ང་ཡིས་བཤད། །བརྡའ་གཅིག་བརྡའ་ཀུན་གྲོལ་བའི་ཆོས་ཤིག་བཤད། །གནད་གཅིག་གནད་ཀུན་གྲོལ་བའི་ཆོས་ཤིག་བཤད། །བློ་ཟད་ཐོག་མའི་སར་སྒྲེབས་ཆོས་ཤིག་བཤད། །བྱ་བྲལ་ཡེ་བཞག་སྙིང་པོའི་ཆོས་ཤིག་བཤད། །ཅེས་གསུངས་སོ། །བདུད་རྩི་བཅུད་བསྡུས་སྒྲོན་མ་བརྩེགས་པའི་རྒྱུད་ལས། ཕུན་སུམ་ཚོགས་པ་དང་གླེང་གཞིའི་ལེའུ་སྟེ་དང་པོའོ།། །།དེ་ནས་ངང་དྭངས་ཁྱེའུ་ཆུང་གིས། །ཡེ་ཐོག་སངས་རྒྱས་ལ་ཞུས་པ། །དངོས་པོ་གཤིས་ཀྱི་འདུག་ཚུལ་ཇི་ལྟར་ལགས། །འདུག་ཚུལ་མ་རྟོགས་འགྲོ་དྲུག་ཇི་ལྟར་ལགས། །འཁོར་བ་རྩད་ནས་ཇི་ལྟར་བཅད། །རྟོགས་ཐབས་གང་གིས་ཇི་ལྟར་རྟོགས། །རྟོགས་ན་འབྲས་བུ་ཇི་ལྟར་ཐོབ་པར་འགྱུར། །ཐོབ་ནས་མི་འགྱུར་བརྟན་པ་ཇི་ལྟར་ཐོབ། །འོག་མ་རྣམས་ལ་སྐྱོན་ནི་ཅི་ཞིག་མཆིས། །རིམ་པ་དགུ་ལས་སྤྱི་ཏི་གང་གིས་འཕགས། །མ་བསྐུར་དབང་དང་ཕྱོགས་བྲལ་དཀྱིལ་འཁོར་གང་། །ཕྲིན་ལས་སྤྱན་དྲངས་ལྷ་ཚོགས་མཆོད་བསྟོད་གང་། །དངོས་གྲུབ་དམ་ཚིག་སྨོན་ལམ་ཇི་ལྟར་ལགས། །ཐམས་ཅད་མ་འདྲེས་ཡོངས་སུ་ཇི་ལྟར་རྫོགས། །མ་བྱས་རང་བྱུང་བྱར་མེད་བཤད་མེད་གང་། །མཚོན་མེད་བློ་འདས་ཐེག་པ་ ― DNG002_Page_0650 ―
[མ་དཔེ་གཟིགས་ན་འདིར་གནོན།]
ཇི་ལྟར་གསུངས། །གཅིག་ཤེས་ཀུན་གྲོལ་ཆོས་གཅིག་ཇི་ལྟར་ལགས། །གནད་གཅིག་ཤེས་པས་གནད་ཀུན་ཇི་ལྟར་ཁྲོལ། །གཅིག་བརྡའ་ཀུན་བརྡའ་ཇི་ལྟར་ཤེས་པར་བྱ། །བདག་ཅག་རྣམས་ལ་ཟབ་པར་བཀའ་སྩོལ་ཅིག །ཅེས་ཞུས་སོ། །སྒྲོན་མ་བརྩེགས་པའི་རྒྱུད་ལས། འཁོར་གྱིས་གླེང་སློང་བའི་ལེའུ་སྟེ་གཉིས་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །དངོས་པོ་གཤིས་ཀྱི་གནས་ལུགས་གང་། །ཞེས་ཞུས་པ་དང་། དེ་ནས་དམ་པ་དང་པོའི་སངས་རྒྱས་དེ། །སྣ་ཚོགས་ཀློང་འོད་གསལ་འབར་བའི་ཏིང་ངེ་འཛིན་ལ་སྙོམས་པར་བཞུགས་སོ། །དེ་ལས་བཞེངས་ནས་བཀའ་སྩལ་པ། །འཁོར་ནས་ངང་དྭངས་ཁྱེའུ་ཆུང་ཉོན། །དངོས་པོ་གཤིས་ཀྱི་འདུག་ཚུལ་དེ། །མཚོན་བརྗོད་ཚིག་གིས་མི་ཕེབས་ཀྱང་། །དཔལ་གྱི་མགུར་གྱི་སྒྲོན་མ་ཡིས། །འཁོར་རྣམས་ཀུན་ལ་གསལ་བར་བཤད། །གནས་ལུགས་གཤིས་ཀྱི་འདུག་ཚུལ་ནི། །ཡོད་མེད་སྟོང་དང་མི་སྟོང་དང་། །མཚོན་བརྗོད་ཚིག་གིས་མཚོན་ལས་འདས། །སྐྱེ་འགག་གཉིས་མེད་ཐ་སྙད་གྲོལ། །སངས་མེད་རྒྱས་མེད་སྐུ་དངོས་མེད། །བྱང་ཆུབ་སེམས་མེད་རིགས་ལྔ་མེད། །བདེ་སྡུག་འཁོར་དང་མྱང་འདས་མེད། །རིག་འགྱུ་སེམས་མེད་དྲན་རྟོག་མེད། །ང་གཞན་ཕྱོགས་མེད་དགྲར་གཉེན་མེད། །ཡུལ་སེམས་བཟང་ངན་སྤང་ལེན་མེད། །ཡིན་མིན་དབྱེ་བསལ་ཕྱོགས་མཚམས་མེད། །ཤེས་འཁྲུལ་སྒོ་གཉིས་རང་བཞིན་མེད། །གཞི་ཡི་རང་བཞིན་ཡོད་མེད་མཉམ། །ཚོགས་བརྒྱད་ཡུལ་དུ་མ་གྱུར་པས། །རྒྱ་ཆད་ཕྱོགས་ལྷུང་ཀུན་ལས་གྲོལ། །གཉིས་འཛིན་འཁོར་འདས་ཀ་ནས་དག །འཁོར་འདས་ཕྱོགས་མེད་ལྷུན་གྱིས་གྲུབ། །གང་ཡང་མ་འགགས་འདི་ཡིན་མེད། །ཐོག་མ་རྒྱུ་ཡིས་མ་བསྐྱེད་པས། །མཐའ་བྲལ་དབྱིངས་ཀྱི་ནམ་མཁའ་འདྲ། །བར་དུ་རྫས་མེད་འདུས་མ་བྱས། །ཉི་མར་འོད་འཕྲོའི་འོད་ཟེར་ ― DNG002_Page_0651 ―
[མ་དཔེ་གཟིགས་ན་འདིར་གནོན།]
འདྲ། ཐ་མར་རྐྱེན་གྱིས་འཇིག་བྲལ་མེད། །གཉིས་མེད་མཁའ་ལྟར་མཉམ་ཉིད་གནས། །ངོ་བོ་སྟོང་པའི་རྩལ་དང་བྲལ། །འདི་ཞེས་ཅིས་ཀྱང་བསྟན་དུ་མེད། །མ་བསྒྲིབས་མཚོན་མེད་གསལ་དག་ངང་། །རྟོག་མེད་ཀུན་འབྱུང་ཟད་མི་ཤེས། །གང་ཡང་ཕྱོགས་མེད་མཐའ་བཞི་གྲོལ། །ཡུལ་སྣང་བག་དག་སངས་རྒྱས་ཉིད། །འགྱུ་མེད་དྲང་པོར་རྒྱུན་སར་གྲོལ། །བཅོས་མེད་བློ་འདས་ངོ་བོ་ཉིད། །བསླད་པས་མི་བསྒྲིབ་ཡང་དག་ངང་། །ཐམས་ཅད་གཞི་འཛིན་བྱང་ཆུབ་སེམས། །གཞན་ནས་མ་བཙལ་ཀ་ནས་དག །གང་ཡང་མ་བསྒྲུབས་ཕྱོགས་རིས་མེད། །དགག་བསྒྲུབ་གཅིག་འཛིན་རྒྱ་ཆད་མེད། །འཁོར་འདས་ལ་སོགས་གཉིས་དབྱེར་མེད། །རྩོལ་བསྒྲུབ་ལམ་གྱི་བཅོས་དང་བྲལ། །ལྟ་བྱེད་མིང་དང་རང་སངས་རྒྱས། །གཉིས་འཛིན་བློས་བཏགས་གྲུབ་མཐའ་སྟོངས། །སྒོམ་བྱེད་གཡོ་རྩོལ་ཡེ་གྲོལ་བས། །འབྱུང་འཇུག་བཏང་བཞག་དབྱིངས་སུ་དྭངས། །སྐྱོན་ཡོན་དཔྱོད་བྱེད་མིང་མེད་པས། །གཉིས་འཛིན་བླང་དོར་ལས་རྣམས་ཟིན། །དགེ་སྡིག་མཚན་མའི་ཆོས་འདས་པས། །དམ་ཚིག་སྡོམ་པའི་དགག་སྒྲུབ་སངས། །ཀ་དག་ཡེ་ཤེས་སྣང་མེད་པས། །དངོས་མེད་ཡུལ་གྱི་སྒྲིབ་བྱེད་སངས། །ཆོས་ཉིད་རྣམ་པ་ཡུལ་མེད་པས། །སྟོང་ཉིད་ངང་ལ་གནས་པ་སྟོང་། །གཉིས་འཛིན་མཚན་མ་དངོས་དག་པས། །གཟུང་འཛིན་དབྱེ་བསལ་ཆོས་ལས་འདས། །ཤེས་མེད་རྣལ་མ་གཏིང་ཡངས་པས། །མདོ་རྒྱུད་ཆོས་རྣམས་ཀློང་དུ་སངས། །མདོར་ན་གཉིས་འཛིན་ཆོས་རྣམས་ཀུན། །ཕྱོགས་སུ་ལྷུང་དང་མ་ལྷུང་དང་། །དེ་ལྟར་གཉིས་དང་གཉིས་མེད་ཀྱི། །མུ་མཐའི་ཚོགས་ལས་གཏན་གྲོལ་བས། །ཡེ་གྲོལ་ཆོས་ལས་འདས་པ་ལས། །རྒྱ་ཆད་མེད་པའི་ངོ་བོར་གནས། །ས་གསེར་བང་མཛོད་རྒྱ་མཚོ་བཞིན། །དངོས་པོ་གཤིས་ཀྱི་མཐུན་དཔེའོ། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། དངོས་པོ་གཤིས་ཀྱི་འདུག་ཚུལ་བསྟན་པའི་ལེའུ་སྟེ་གསུམ་པའོ།། །།དེ་ནས་ངང་དྭངས་ཁྱེའུ་ཆུང་ ― DNG002_Page_0652 ―
[མ་དཔེ་གཟིགས་ན་འདིར་གནོན།]
གིས། ཡེ་ཐོག་རང་བཞིན་ཀུན་བཟང་ལ། །འདུག་ཚུལ་མ་རྟོགས་ཇི་ལྟར་འཁྲུལ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །གནས་ལུགས་མ་རྟོགས་འཁོར་བ་བཤད། །འཁོར་རྣམས་མ་ཡེངས་གུས་པར་ཉོན། །མཁའ་ཀློང་རྣམ་དག་ཕོ་བྲང་ན། །གཞི་ཡི་རང་བཞིན་མཉམ་པའི་ངང་། །དེ་ནས་ཀུན་འབྱུང་མཛོད་པོ་ཆེ། །ཐོག་མར་ཡེ་ཤེས་འཆར་སྒོ་ནི། །མཁའ་ལས་བྱུང་བའི་ཆོ་འཕྲུལ་ལྟར། །དབྱིངས་ནས་རང་བྱུང་དབྱིངས་ལ་གནས། །ནམ་མཁའི་ངང་ནས་སྟོང་ཉིད་སྒྲ། །མཚུངས་མེད་རྒྱ་ཆེ་ཟབ་དོན་སྒྲོགས། །བརྒྱད་ཁྲི་བཞི་སྟོང་ལ་སོགས་པ། །ཚིག་ཏུ་བརྗོད་པ་མ་ལུས་པ། །དབྱིངས་ལས་གྲག་སྟོང་དབྱིངས་སུ་དྭངས། །ཚིག་ཏུ་བརྗོད་པའི་མཐའ་ལས་འདས། །བརྗོད་དང་མ་བརྗོད་གཉིས་ཀ་དང་། །གཉིས་མེད་འཛིན་པའི་རྒྱ་མ་ཆད། །ཁམས་གསུམ་ལ་སོགས་མ་ལུས་པའི། །མཚན་མའི་ཡུལ་ལས་རྣམ་གྲོལ་བས། །སྣང་སྟོང་གཟུང་འཛིན་ཕྱོགས་མ་ཆད། །ཕྱི་གྲོལ་ནང་དག་འཛིན་པ་བརླག །ལུས་དང་སྐུ་ཡི་མུ་མཐའ་སངས། །སྣང་དང་སྟོང་པ་གཉིས་ཀ་དྭངས། །གཉིས་མེད་འཛིན་པའི་རྒྱར་མ་ཆད། །འཁོར་འདས་བདག་གཞན་ལ་སོགས་པའི། །གཉིས་འཛིན་རྟོག་པ་མ་ལུས་ཀུན། །དབྱེར་མེད་ཤེས་རབ་ཡེ་ཤེས་མེ། །རྒྱུ་རྐྱེན་མེད་པར་རང་འབར་བས། །སྤང་ཐོབ་དགག་བསྒྲུབ་ཀུན་ལས་འདས། །རྣམ་རྟོག་ཆོས་ཉིད་གཉིས་ཀ་དྭངས། །གཉིས་མེད་འཛིན་པའི་རྒྱར་མ་ཆད། །དེ་ལྟར་གཅིག་གིས་གཅིག་བཀྲོལ་བས། །མུ་མཐའ་མ་ལུས་རང་སར་གྲོལ། །གྲོལ་དང་མ་གྲོལ་གཉིས་ལས་འདས། །དམ་པ་དང་པོར་ཡེ་སངས་རྒྱས། །ངོ་བོ་རང་བཞིན་ཐུགས་རྗེ་ལས། །ཀ་དག་ལྷུན་གྲུབ་ཀུན་ཁྱབ་གསུམ། །དང་པོར་སྐུ་གསུམ་མཆོག་གི་ས། །གསལ་དག་ཡེ་ཤེས་འཆར་སྒོ་ཡིན། །འདུག་ཚུལ་མ་རྟོགས་འཁྲུལ་པ་ཡང་། །གཞི་ཡི་རྩལ་ལས་ཟེར་གཡོས་པས། །མཁའ་ལ་འཇའ་ལྟར་ཡུལ་དུ་ཆད། །རང་བཞིན་རང་ངོར་ ― DNG002_Page_0653 ―
[མ་དཔེ་གཟིགས་ན་འདིར་གནོན།]
མ་ཐིམ་པས། །འོད་ལས་ཟེར་ཤར་ཤེས་པར་རིག །ཡེ་དོན་མ་ཤེས་གཉིས་འཛིན་ཞུགས། །གནས་ལུགས་མ་རྟོགས་ས་མ་ཟིན། །རིག་པའི་སྙིང་པོ་མ་རྟོགས་རྒྱུ། །རིག་པ་ཡིད་དང་སེམས་གསུམ་ལ། །རང་ས་མ་ཟིན་འཁོར་ལོ་གསུམ། །འགྱུ་བ་རླུང་གིས་རྒྱུ་བྱས་ནས། །སྒྲིབ་གཡོགས་མུན་པས་བར་བཅད་དེ། །འབྲས་བུ་མུན་པའི་འཁོར་སྒོར་ཆུད། །སྣ་ཚོགས་གཟུགས་ཅན་སེམས་ཅན་རྣམས། །གཅིག་འཛིན་འགྱུ་བའི་ཡིད་ལས་སྐྱེས། །སྣ་ཚོགས་རྣམ་རིག་གཟུགས་དོན་ཅན། །དངོས་པོའི་དོན་རྣམས་ཀུན་ལ་ཆགས། །སེམས་ཅན་ཀུན་གྱི་ཡིད་མགྱོགས་པས། །ཁམས་གསུམ་ཀུན་གྱི་ཡིད་ལ་འཇུག །ཕུང་པོ་ལྔ་པོ་ཀུན་ལ་རྟོག །སྲིད་པའི་དྲ་བར་འཐུམས་པ་ཡིས། །མ་རིག་སྒོ་ལྔའི་སྦུབས་སུ་ཆུད། །གཉིས་འཛིན་གཟུགས་བརྙན་མ་ལུས་འཆར། །དངོས་པོ་ཀུན་ལ་གཟུང་འཛིན་པས། །སྲིད་རྩའི་ཡན་ལག་བཅུ་གཉིས་སྟོན། །རྣམ་ཤེས་ཚོགས་བརྒྱད་ཆགས་སྡང་བས། །ཉོན་མོངས་ཉེ་བའི་ཉོན་མོངས་དྲུག །ཁམས་གསུམ་འཁོར་བའི་གནས་སུ་འཁྱམས། །མ་གྲུབ་བཞིན་དུ་འཁྲུལ་སྣང་བའི། །སྡུག་བསྔལ་བརྒྱད་ཁྲི་བཞི་སྟོང་མྱོང་། །ཞེས་གསུངས་སོ། །བདུད་རྩི་བཅུད་བསྡུས་སྒྲོན་མ་བརྩེགས་པའི་རྒྱུད་ལས། གནས་ལུགས་མ་རྟོགས་འཁྲུལ་པར་བསྟན་པའི་ལེའུ་སྟེ་བཞི་པའོ།། །།དེ་ནས་ངང་དྭངས་ཁྱེའུ་ཆུང་གིས། །ཀུན་བཟང་ཉིད་ལ་འདི་སྐད་ཞུས། །འདུག་ཚུལ་མ་རྟོགས་འཁྲུལ་པ་དེའི། །འཁྲུལ་གཞི་རྩད་ནས་ཇི་ལྟར་གཅད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་པོ་གཤིས་ཀྱི་གནས་ལུགས་ལ། །འཁྲུལ་དང་མ་འཁྲུལ་མིང་མེད་དེ། །གཉིས་འཛིན་བློ་ལ་འཁྲུལ་པ་བྱུང་། །མ་རྟོགས་རིགས་དྲུག་འཁྲུལ་བཅས་པ། །རབ་འབྲིང་ཐ་མ་གསུམ་དུ་བཤད། །སྐལ་ལྡན་རབ་ཀྱི་ཡང་རབ་ལ། །འཁྲུལ་པ་རྩད་གཅོད་མི་དགོས་ཏེ། །འཁྲུལ་པར་ ― DNG002_Page_0654 ―
[མ་དཔེ་གཟིགས་ན་འདིར་གནོན།]
ཤེས་པས་སྣང་བ་ལྡོག །ཀ་དག་རྣལ་མ་ཟང་ཀ་ལ། །སྒྲོ་སྐུར་ཆོས་རྣམས་ག་ལ་ཡོད། །སེམས་ཉིད་མུ་མེད་གཏིང་ཡངས་འདི། །ཤེས་ཤིང་རིག་པའི་ཡུལ་ལས་འདས། །སུས་ཀྱང་སྨྲ་བསམ་བསྟན་དུ་མེད། །རེ་ཞིག་ཙམ་དུ་མཚོན་པ་ནི། །རྒྱལ་པོའི་ཕོ་བྲང་མེ་ཡིས་བསྲེག །གླིང་བཞིའི་གྲོང་ཁྱེར་དམག་གིས་གཞོམ། །སེམས་ཅན་ཀུན་སྲོག་དུས་གཅིག་གཅད། །རི་བོ་ཆེན་པོ་ཁྱུར་མིད་བྱ། །གསལ་བའི་ཉི་ཟླ་གོས་སུ་གྱོན། །འབད་རྩོལ་ཆོས་ཀུན་ཆུ་ལ་འབོ། །ཕྱི་ནང་གྲུབ་མཐའ་ཀུན་གོ་ལྡོག །སྐུ་གསུམ་འབྲས་བུ་དུར་དུ་བསྐྱལ། །རྒྱ་ཆད་ཆོས་ཀུན་མཐའ་ལས་གྲོལ། །ཕོ་བྲང་ཕྱི་ནང་གསང་བ་གསུམ། །ཕྱི་ལྟར་ཡུལ་གྱི་སྣང་བ་འདི། །གཉིས་འཛིན་རྒྱལ་པོའི་ཕོ་བྲང་སྟེ། །མཚན་མ་རང་གྲོལ་མེ་ཡིས་བསྲེག །གཟུང་འཛིན་འབྱེད་མེད་ཡེ་ནས་གྲོལ། །ནང་ལྟར་ཟག་མེད་ཕུང་པོ་འདི། །རང་སེམས་རྒྱལ་པོའི་ཕོ་བྲང་སྟེ། །དངོས་མེད་ཟང་ཀའི་མེ་ཡིས་བསྲེག །ལུས་སེམས་དངོས་མེད་གདོད་ནས་དག །གསང་བར་རྩལ་གྱི་འཁོར་ལོ་གསུམ། །འགྱུ་བ་རྒྱལ་པོའི་ཕོ་བྲང་སྟེ། །འགྱུ་མེད་བློ་འདས་མེ་ཡིས་བསྲེག །བཏགས་ཆགས་ཞེན་གསུམ་མིང་ཡང་མེད། །གླིང་བཞིའི་གྲོང་ཁྱེར་ལ་ཡང་གསུམ། །སྤྱི་ཡི་གྲོང་ཁྱེར་འབྱུང་བ་ལྔ། །དམྱལ་བའི་གནས་སོགས་རིགས་དྲུག་གནས། །རང་སྣང་རང་དག་དམག་གིས་གཞོམ། །གདོད་ནས་རྣམ་དག་ཆོས་དབྱིངས་ངང་། །ནང་གི་གྲོང་ཁྱེར་འགྲོ་དྲུག་ལུས། །གསུམ་དང་བརྒྱད་སོགས་སྡུག་བསྔལ་རྣམས། །སྐྱེ་མེད་བདེ་ཆེན་དམག་གིས་གཞོམ། །ཡེ་ནས་སྤང་མེད་ཡེ་ཤེས་ཀློང་། །གསང་བའི་གྲོང་ཁྱེར་འཁོར་ལོ་གསུམ། །བཏགས་ཆགས་ཞེན་གསུམ་གྲུབ་མཐའ་རྣམས། །མུ་མེད་ཆོས་འདས་དམག་གིས་གཞོམ། །བསམ་བརྗོད་རྟོག་ཚོགས་མཐའ་ལས་གྲོལ། །ཀུན་སྲོག་དུས་གཅིག་གཅད་ལ་གསུམ། །ཕྱི་ཡི་ཚོགས་དྲུག་ངར་འཛིན་ཡུལ། ། ― DNG002_Page_0655 ―
[མ་དཔེ་གཟིགས་ན་འདིར་གནོན།]
རང་སངས་དབྱེར་མེད་རབ་རྟོགས་པས། །གཞན་མིན་ངས་རྟོགས་ང་རྒྱལ་ཏེ། །བདག་མེད་ཕྱོགས་བྲལ་མཚོན་གྱིས་བཅད། །ནང་གི་ངར་འཛིན་སེམས་རིག་ཡིད། །འགྱུ་མེད་ངང་ཐིམ་དོན་བསྒོམས་པས། །གཞན་མིན་ངས་བསྒོམ་ང་རྒྱལ་ཏེ། །བསམ་འདས་རིས་མེད་མཚོན་གྱིས་བཅད། །གསང་བའི་ངར་འཛིན་རང་གནས་དོན། །ཡེ་ཡིན་རེ་མེད་ངང་གྲོལ་བས། །གཞན་མིན་ངས་ཐོབ་ང་རྒྱལ་ཏེ། །ཆོས་ཟད་མུ་མེད་མཚོན་གྱིས་བཅད། །རི་བོ་ཁྱུར་མིད་བྱ་ལ་གསུམ། །ཇི་ལྟར་རི་བོ་སྣོད་འཇིག་རྟེན། །མི་འགྱུར་རྟག་ལྟའི་མངོན་ཞེན་ཏེ། །མཐའ་མེད་ནམ་མཁའི་ཀློང་དུ་མིད། །རྟག་ལྟའི་མངོན་ཞེན་རང་སར་དག །ནང་ལྟར་རི་བོ་འཇིག་ཚོགས་ལྟ། །མ་རྟོགས་ལོག་ལྟའི་བདེན་འཛིན་ཏེ། །གནས་ལུགས་ཀ་དག་ཀློང་དུ་མིད། །ལོག་ལྟ་མིང་མེད་རང་ངོར་སྟོར། །གསང་བ་རི་བོ་ཆོས་ཉིད་དོན། །ལྷུན་གྲུབ་ཀ་དག་ངེས་མེད་འཛིན། །མཐའ་བཞི་རྒྱ་གྲོལ་ཀློང་དུ་མིད། །བླ་མེད་བློ་འདས་དགུ་རྩེར་ཕྱིན། །ཉི་ཟླ་གོས་སུ་གྱོན་ལ་གསུམ། །ཕྱི་ཡི་ཉི་ཟླ་བསྟན་པ་ནི། །སྣང་གསལ་འོད་ཀྱི་དཀྱིལ་འཁོར་དུ། །སེམས་ཉིད་གསལ་དྭངས་ཉི་ཟླ་ཤར། །དགག་བསྒྲུབ་རིས་མེད་གོས་སུ་གྱོན། །ནང་གི་ཉི་ཟླ་བསྟན་པ་ནི། །འགག་མེད་རང་རྩལ་དཀྱིལ་འཁོར་དུ། །མུ་མེད་ངང་དྭངས་ཉི་ཟླ་ཤར། །བླང་དོར་འཛིན་མེད་གོས་སུ་གྱོན། །གསང་བའི་ཉི་ཟླ་བསྟན་པ་ནི། །སྙིང་པོ་ཀ་དག་དཀྱིལ་འཁོར་དུ། །བླ་མེད་སྤྱི་ཏིའི་ཉི་ཟླ་ཤར། །ཕྱོགས་ལྷུང་མེད་པར་གོས་སུ་གྱོན། །འབད་རྩོལ་ཆོས་ཀུན་ཆུར་འབོ་བ། །ཕྱི་ཡི་ཡུལ་ལ་འབད་རྩོལ་ནི། །རྒྱུ་ཡི་ཐེག་པའི་སྒོར་ཞུགས་ནས། །ས་ལམ་སྦྱངས་བགྲོད་བྱེད་པ་ནི། །བགྲོད་མེད་རྣམ་གྲོལ་དབྱིངས་སུ་འབོ། །ནང་ལྟར་ལུས་ངག་ཡིད་རྩོལ་ནི། །གསང་སྔགས་ཐེག་པའི་དཀྱིལ་འཁོར་དང་། །ལྟ་སྤྱོད་དབང་དང་བསྙེན་བསྒྲུབ་སོགས། །ཡེ་ཡིན་བསྒྲུབ་མེད་ཀློང་དུ་འབོ། །གསང་བ་སེམས་ལ་འབད་རྩོལ་ནི། །བློས་བྱས་ལྟ་སྒོམ་སྤྱོད་འབྲས་ཏེ། །མིང་མེད་ཆོས་འདས་ངང་དུ་འབོ། །ཕྱི་ནང་གྲུབ་མཐའ་ ― DNG002_Page_0656 ―
[མ་དཔེ་གཟིགས་ན་འདིར་གནོན།]
གོ་ལྡོག་པ། །གང་ཡང་བཟང་ངན་འབྱེད་མེད་པས། །བླ་མེད་དཀོན་མཆོག་གསུམ་པོ་བཀུར། །དགེ་སྡིག་གང་ལ་མ་སྤྱད་པས། །ཆོས་སྤྱོད་དགེ་སྦྱོར་མ་ལུས་རྫོགས། །འཇུག་སྒོ་གར་ཡང་མ་ཞུགས་པས། །དབང་རྣམས་མ་ལུས་དུས་གཅིག་ཐོབ། །མཚོན་པ་ཅི་ཡང་མ་བརྗོད་པས། །གྲུབ་མཐའི་ཐོས་པ་མ་ལུས་རྫོགས། །བྱ་བ་གང་ཡང་མ་བྱས་པས། །འཁོར་འདས་བྱ་བ་ཐམས་ཅད་རྫོགས། །ཚོགས་བརྒྱད་ཅིར་ཡང་མ་བསམ་པས། །སྤྲོས་པ་མ་ལུས་དབྱིངས་སུ་ཆོད། །འཁོར་བ་གར་ཡང་མ་བགྲོད་པས། །ཡང་དག་ཆོས་ཉིད་བྱང་ཆུབ་ས། །མཐའ་བཞི་གང་ཡང་མ་བལྟས་པས། །བླ་མེད་སྤྱི་ཏིའི་ལྟ་བ་རྫོགས། །ཆོས་ཀུན་གང་ཡང་མ་བསྒོམས་པས། །ཆོས་ཉིད་རྣལ་མ་ཟང་ཀའི་ངང་། །དུས་ཕྱོགས་གང་ནས་མ་བཙལ་བས། །ཡོན་ཏན་མ་ལུས་ལྷུན་གྱིས་གྲུབ། །སྨྲ་བརྗོད་ཅི་ཡང་མ་བཟླས་པས། །རྒྱལ་བ་མ་ལུས་ཀུན་སྲོག་ཐོན། །གཉིས་འཛིན་གང་ཡང་མ་བསྒྲུབས་པས། །བསྒྲུབ་བྱའི་ཆོས་ཀུན་མ་ལུས་རྫོགས། །བླ་མེད་ཨ་ཏིའི་དོན་རྟོགས་པས། །རེ་མེད་རང་གནས་འབྲས་བུར་གྲོལ། །སྐུ་གསུམ་དུར་དུ་བསྐྱལ་བ་ནི། །ཕྱི་ལྟར་འཁོར་འདས་ཆོས་རྣམས་ཀུན། །སྟོང་དང་སྣང་དང་གཉིས་མེད་གསུམ། །དབྱེར་མེད་དབྱིངས་ཀྱི་དུར་དུ་བསྐྱལ། །ནང་ལྟར་སངས་རྒྱས་འབྲས་བུ་ནི། །ཆོས་སྐུ་ལོངས་སྐུ་སྤྲུལ་སྐུ་གསུམ། །རེ་མེད་རང་གནས་དུར་དུ་བསྐྱལ། །གསང་བ་བླ་མེད་སྐུ་གསུམ་ནི། །སྙིང་པོ་འོད་གསལ་རང་དྭངས་གསུམ། །ཆོས་མེད་གཏིང་ཡངས་དུར་དུ་བསྐྱལ། །རྒྱ་ཆད་ཆོས་ཀུན་མཐའ་གྲོལ་བ། །དེ་ལྟར་བསྟན་པ་མ་ལུས་ཀུན། །ང་ཡི་བླ་མེད་སྤྱི་ཏི་འདིར། །སྣང་དང་སྟོང་པ་གཉིས་ཀ་དང་། །གཉིས་མེད་ཕྱོགས་སུ་རྒྱ་མ་ཆད། །དེ་ཡང་གཅིག་གིས་གཅིག་བཀྲོལ་བས། །བདེན་པ་མཐའ་མཉམ་ཕྱོགས་ལས་གྲོལ། །གདོད་ནས་རྣམ་དག་ཆོས་ཀྱི་སྐུ། །བསྒོམ་དུ་མེད་དེ་ཡེ་སངས་རྒྱས། །བྱུང་ཚོར་རྒྱུ་མེད་བསམ་དང་ ― DNG002_Page_0657 ―
[མ་དཔེ་གཟིགས་ན་འདིར་གནོན།]
བྲལ། །བདེ་ཆེན་ཀློང་བརྡལ་འཛིན་པ་བརླག །ཡིད་ལ་མི་བྱེད་སྣང་བ་དག །མ་བཙལ་མ་བཅོས་རང་བྱུང་བས། །ངང་དྭངས་བསམ་བྲལ་བློ་ལས་འདས། །སྣ་ཚོགས་བློ་བྲལ་རྒྱལ་བའི་ཐུགས། །རང་བྱུང་ངང་དྭངས་སྤྲོས་གཅོད་ལ། །བྱ་བཙལ་རྩོལ་བསྒྲུབ་མཐའ་ལས་འདས། །དཔེར་ན་ཧ་ལ་ནག་པོའི་དུག །དུག་ཏུ་ངོ་ཤེས་ཟ་མི་སྲིད། །སྔགས་ལྡན་ཟོས་ཀྱང་སྨན་དུ་འགྱུར། །དེ་བཞིན་འཁྲུལ་སྣང་འཁོར་བ་ཡང་། །རྟོགས་ལྡན་མི་འཆིང་གྲོགས་སུ་འགྱུར། །དབང་པོ་ཡང་རབ་གཅོད་ལུགས་སོ། །དབང་པོ་འབྲིང་གི་གང་ཟག་ལ། །དུས་གསུམ་དག་ཏུ་ངོས་བཟུང་ལ། །འཕྲང་གསུམ་ནང་དུ་ནན་བོར་ཏེ། །མཚན་ཉིད་གསུམ་གྱིས་རྒྱས་གདབ་པ། །བཅོ་བརྒྱད་དོན་གྱི་མན་ངག་ཡིན། །ཐེ་ཚོམ་མེད་པའི་དོན་གསུམ་བློས། །དུས་གསུམ་ཀུན་ཏུ་ཕུང་པོ་ལྔ། །དོན་ཀུན་ཡེ་ནས་དག་ཤེས་པས། །དངོས་པོ་ཀུན་གྱི་དོན་སངས་ཤིང་། །འདས་དང་མ་འོངས་ད་ལྟའི་དུས། །སེམས་དང་སེམས་བྱུང་ཆོས་སྐུར་ཤེས། །དེ་ཡིས་བདེ་སྡུག་མཐའ་སེལ་བས། །ཆགས་བྲལ་ཕྱི་ནང་ཡུལ་སེམས་མེད། །སྡུག་བསྔལ་གསུམ་པོ་མ་ལུས་ཞི། །ཉོན་མོངས་མ་ལུས་རང་སར་དྭངས། །སྣང་བ་གསུམ་སེལ་གྲོལ་གསུམ་རྟོགས། །ང་བདག་འཛིན་པའི་རྩ་བ་ཆོད། །གཉིས་མེད་ངང་ལས་མུ་མེད་སྟོན། །ཡང་དག་ཆོས་འདས་མཐའ་ལ་གནས། །མ་བཙལ་དངོས་མེད་ཡེ་ཤེས་འཆར། །རྟོག་བྲལ་ཟང་ཀ་ལྷུན་གྱིས་གྲུབ། །གྲོལ་སྒྲིབ་འཁྲུལ་པ་ཀུན་ལས་གྲོལ། །བདག་ཉིད་དེ་བཞིན་ཉིད་དུ་དག །མཉམ་ཉིད་ཕྱོགས་བྲལ་མཁའ་ལྟར་དྭངས། །དུས་གསུམ་མཚོན་བརྗོད་མེད་པར་རྟོགས། །འཕྲང་གསུམ་ནང་དུ་ནན་བོར་བས། །སྒོ་ལྔ་ཡུལ་ལྔ་གསལ་བ་ལ། །མ་བཀག་སྒྲིབ་བྲལ་ཟང་ཐལ་ཤེས། །སྣང་སྲིད་དགག་བསྒྲུབ་དབྱེ་བསལ་མེད། །ཡུལ་ལྔ་མ་བཀག་རང་སྣང་ལ། །ཤེས་རབ་ཆེན་པོས་སྐད་ཅིག་གིས། །སྣང་ཞེན་འཛིན་མེད་རང་སར་དྭངས། ། ― DNG002_Page_0658 ―
[མ་དཔེ་གཟིགས་ན་འདིར་གནོན།]
འགྱུ་བ་དྲན་རྟོག་ཡིད་གཉིས་ལ། །འབྱེད་མེད་སྙིང་རྗེའི་གོ་ཆ་གོན། །སྤྲོས་གཅོད་ཤེས་རབ་རལ་གྲི་དང་། །ཐབས་རྒྱལ་བྱར་མེད་མདའ་གཞུ་ཡིས། །མ་རིག་ཉོན་མོངས་གཡུལ་ངོ་བཟློག །ཡིད་གཉིས་དྲན་རྟོག་རྩད་ནས་བཅད། །སེམས་ཅན་ཀུན་གྱི་ཆགས་སྡང་གཅོད། །མཁའ་ལྟར་གཉིས་འཛིན་ཡུལ་ལས་འདས། །བླ་མེད་ཐེག་ཆེན་སྡུག་བསྔལ་གཅོད། །འགྱུ་བ་དྲན་རྟོག་འཕྲང་བཅད་པའོ། །ཀུན་གྱི་ཆོས་ཉིད་འཕྲང་དུ་ནི། །དེ་བཞིན་མ་ནོར་ཆོས་ཉིད་དང་། །རྩིས་གདབ་ཡོད་མེད་མཐའ་ལས་འདས། །སྙིང་པོ་བཅུད་འདུས་བསྟན་དུ་མེད། །རྩིས་གདབ་གཉིས་མེད་བརྗོད་མཐའ་འདས། །སོ་སོ་རང་རིག་མི་གཡོ་བས། །ཕྱི་གྲོལ་ནང་དྭངས་གཉིས་འཛིན་བརླག །མཁས་པས་རྣམ་གྲོལ་གསུམ་དུ་ཆོད། །མཚན་ཉིད་གསུམ་དུ་གཏན་ལ་དབབ། །སྣང་བའི་མཚན་ཉིད་རང་སྣང་ཡིན། །གནས་ལུགས་མཚན་ཉིད་སྐྱེ་བ་མེད། །རིག་པ་ཡིད་གཉིས་འཛིན་པ་ནི། །འཁྲུལ་པའི་མཚན་ཉིད་ཤེས་པར་བྱ། །སྣང་བ་མ་བཀག་རང་སོར་བཞག །གནས་ལུགས་སྐྱེ་འགག་གཉིས་སུ་མེད། །རིག་འགྱུ་སེམས་མེད་སྤྲོས་པ་ཆོད། །དཀྱིལ་འཁོར་གསུམ་དུ་ངོ་སྤྲོད་པ། །སྣང་བ་ཆོས་ཀྱི་དཀྱིལ་འཁོར་དུ། །རང་གྲོལ་རང་སངས་རང་ངོ་སྤྲོད། །འགྱུ་བ་རིག་པ་དྲན་སེམས་རྣམས། །ཐོལ་བྱུང་ངང་དྭངས་འཛིན་པ་མེད། །རིས་མེད་གསལ་དག་དལ་དུ་སྤྲད། །ཀུན་གཞི་འོད་གསལ་ཆོས་ཉིད་འདི། །རྣམ་དག་བསམ་གྱིས་མི་ཁྱབ་པའི། །དཀྱིལ་འཁོར་ཆེན་པོར་རང་ངོ་སྤྲད། །དུས་གསུམ་དུས་ལས་བཟློག་པ་ནི། །འདས་པའི་དུས་ལས་བཟློག་པ་ཡིས། །སྔར་ཞེན་བག་ཆགས་གནས་པ་མེད། །ད་ལྟའི་ཡིད་ལས་བཟློག་པ་ཡིས། །དེ་ལ་དེར་འཛིན་དམིགས་པ་མེད། །མ་འོངས་ཆ་ལས་བཟློག་པ་ཡིས། །ཐ་མལ་བཏང་སྙོམས་མུན་པ་མེད། །བཟློག་ཐབས་གསུམ་གྱིས་ཉམས་བླངས་པའོ། །མེད་པ་གསུམ་གྱིས་རྒྱས་གདབ་པ། །གཞི་ནི་སྐྱེ་བ་མེད་པ་ ― DNG002_Page_0659 ―
[མ་དཔེ་གཟིགས་ན་འདིར་གནོན།]
ཡིན། །ཡིད་རིག་དྲན་སེམས་འགྱུ་བ་མེད། །སྣང་སྲིད་ཆོས་རྣམས་དབྱེ་བསལ་མེད། །ཆོས་རྣམས་ཀུན་ལ་དེ་རྒྱས་གདབ། །ཀ་དག་ཡེ་ཤེས་སྣང་གསལ་ཆེ། །སངས་རྒྱས་ཀུན་གྱི་མངོན་སུམ་པ། །འགྲོ་བའི་མ་རིག་མུན་པ་སེལ། །ཡང་དག་ཡེ་ཤེས་ངང་དྭངས་པས། །བླ་མེད་ཡེ་ཤེས་ཆེན་པོ་གསལ། །མ་རིག་སྒོ་ལྔའི་སྦུབས་ནས་འཐོན། །སྲིད་པའི་དྲ་བ་གཏན་བཅོམ་པས། །རྣམ་གྲོལ་ཞི་བ་མཆོག་གི་ས། །འཁོར་བའི་མཐའ་ལས་ཕ་རོལ་ཕྱིན། །བྱ་བ་ཀུན་རྫོགས་ཟད་སར་སྐྱོལ། །གཟུགས་སོགས་དབྱེར་མེད་ཆོས་ཀྱི་སྐུ། །སྣང་ཡང་དངོས་མེད་མེ་ལོང་བཞིན། །ཡུལ་སེམས་གཉིས་མེད་རང་སོར་བཞག །དེ་ལྟར་སུས་རྟོགས་མྱ་ངན་འདས། །རེ་མེད་རང་གནས་བླ་མེད་པ། །དབང་པོ་ཐ་མའི་གང་ཟག་ལ། །ཐམས་ཅད་འཁྲུལ་ཞིང་བསླུ་བའི་ཆོས། །མི་བདེན་ངང་གིས་སྟོང་པས་ན། །ཆགས་སྡང་གཉིས་འཛིན་མ་བྱེད་ཅིག །ཅེས་བསྟན་ཐམས་ཉམས་བླངས་པས། །འཁྲུལ་སྣང་འགགས་ནས་ཡེ་ཤེས་སྐྱེ། །སྲིད་པ་བར་དོར་རྟོགས་ཐབས་རྫོགས། །སྒྲོན་མ་བརྩེགས་པའི་རྒྱུད་ལས། འཁྲུལ་པ་རྩད་ནས་བཅད་པའི་ལེའུ་སྟེ་ལྔ་པའོ།། །།དེ་ནས་ངང་དྭངས་ཁྱེའུ་ཆུང་གིས། །ཡེ་ཐོག་ཀུན་བཟང་ལ་ཞུས་པ། །བླ་མེད་སྤྱི་ཏིའི་རང་ངོ་འདི། །རྟོགས་ཐབས་གང་གིས་ཇི་ལྟར་རྟོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །རྟོགས་དང་མ་རྟོགས་གཉིས་མེད་ཀྱང་། །བློ་དམན་རྟོགས་ཐབས་མན་ངག་བཤད། །ཐེག་པ་དགུ་རྩེའི་མན་ངག་འདི། །གཞན་ནས་མི་འབྱུང་འབྱུང་མི་སྲིད། །བྱ་བྲལ་བསམ་བྲལ་ངང་བཞག་སྟེ། །ཅི་ཡང་མི་བསམ་མི་འདའ་བས། །གང་ཡང་མི་དམིགས་མི་རྟོག་ལ། །ཅི་བྱུང་རང་བྱུང་ངང་དྭངས་བདེ། །ཅི་སྐྱེས་ཞེན་མེད་རང་སར་གློད། །ཅི་ཡང་དགག་བསྒྲུབ་དབྱེ་བསལ་མེད། །རིག་པ་ཐོལ་བྱུང་བྱུང་སར་ཐིམ། །བདེ་ཆེན་མི་རྟོག་འགྱུ་བ་མེད། །རིག་པ་མ་འགགས་ཟང་ཐལ་ལ། །ཡིད་ལ་མི་བྱེད་སྣང་བ་དང་། །དབང་པོ་རང་སྣང་རྒྱལ་བའི་ཐུགས། ། ― DNG002_Page_0660 ―
[མ་དཔེ་གཟིགས་ན་འདིར་གནོན།]
མཐོང་བ་ལོག་པའི་འཁྲུལ་པ་ཡང་། །འཁྲུལ་པ་སངས་པས་མྱ་ངན་འདས། །རྟོགས་པས་སངས་རྒྱས་ཁོ་ན་སྟེ། །མ་རྟོགས་པ་ནི་སེམས་ཅན་ནོ། །ཡེ་ཡིན་ཀ་དག་རྣལ་མའི་སྐུ། །དངོས་མེད་ཡེ་ཤེས་ཟང་ཀ་མ། །བྱ་བྲལ་བསམ་མེད་དགོངས་པ་ཤེས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། རྟོགས་ཐབས་མན་ངག་བསྟན་པའི་ལེའུ་སྟེ་དྲུག་པའོ།། །།དེ་ནས་ངང་དྭངས་ཁྱེའུ་ཆུང་གིས། །ཡེ་ཐོག་རང་བཞིན་ཀུན་བཟང་ལ། །རྟོགས་ན་འབྲས་བུ་ཇི་ལྟར་འཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །འབྲས་བུ་ཐོབ་མ་ཐོབ་མེད་ཀྱང་། །བློ་དམན་བྲོད་པ་བསྐྱེད་ཕྱིར་བཤད། །འཁོར་རྣམས་མ་ཡེངས་གུས་པར་ཉོན། །སྙིང་པོ་བཅུད་འདུས་མ་ཡི་དབྱིངས། །མཁའ་གསལ་འོད་གསལ་བུ་ཡི་དྭངས། །སྙིང་པོའི་ཀློང་དུ་རང་བྱུང་བུ། །རྩལ་ཟེར་མ་འཕྲོས་མ་ལ་ཐིམ། །མ་བུ་ངོ་འཕྲོད་ཡེ་སངས་རྒྱས། །རང་བཞིན་སྐྱེ་མེད་ཆོས་ཀྱི་སྐུ། །ངོ་བོ་འགགས་མེད་ལོངས་སྤྱོད་སྐུ། །ཐུགས་རྗེ་གཉིས་མེད་སྤྲུལ་པའི་སྐུ། །ཡོན་ཏན་དབྱེར་མེད་ངོ་བོའི་སྐུ། །ཕྲིན་ལས་རང་གྲོལ་ཡོངས་རྫོགས་སྐུ། །ཡེ་ཡིན་ངོ་ཤེས་ཐོབ་ཅེས་བཤད། །ཡེ་ནས་ཡོད་པར་མ་ཤེས་པར། །ཡེ་ནས་ཐོབ་ཅེས་རེ་དོགས་ཡིན། །གཞི་ཤེས་ཐོག་མའི་སར་སླེབ་ཆོག །རང་བཞིན་ངོ་བོ་ཐུགས་རྗེ་ལས། །རྩོལ་མེད་ལྷུན་གྲུབ་ཐུགས་རྗེ་འབྱུང་། །ལས་ཀྱི་ཁམས་རྣམས་ཟད་པར་བྱས། །ཉོན་མོངས་མ་བསལ་རྣམ་པར་དག །འཁོར་བའི་རྒྱ་མཚོ་ཆེ་ལས་བརྒལ། །སྲིད་པའི་དྲ་བ་རང་སར་ཆོད། །ཁམས་གསུམ་རང་དག་སྐྱེ་གནས་མེད། །སྐྱེ་འགགས་ལས་གྲོལ་རྡོ་རྗེའི་བདག །བླ་མེད་ཤེས་རབ་སྐད་ཅིག་གིས། །ཆོས་ཀུན་མ་འདྲེས་ཡོངས་རྫོགས་རྟོགས། །སྐད་ཅིག་ཉིད་ལ་རྫོགས་སངས་རྒྱས། །མི་གནས་མྱ་ངན་འདས་དོན་གྲུབ། །ཅེས་གསུངས་སོ། །སྒྲོན་མ་བརྩེགས་པའི་རྒྱུད་ལས། འབྲས་བུ་ཐོབ་ཚུལ་བསྟན་པའི་ལེའུ་སྟེ་བདུན་ ― DNG002_Page_0661 ―
[མ་དཔེ་གཟིགས་ན་འདིར་གནོན།]
པའོ།། །།དེ་ནས་ངང་དྭངས་ཁྱེའུ་ཆུང་གིས། །ཐོག་མའི་སངས་རྒྱས་ཀུན་བཟང་ལ། །འབྲས་བུ་དེ་ལྟར་ཐོབ་ན་ཡང་། །མི་འགྱུར་བརྟན་པ་ཇི་ལྟར་འཐོབ། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བསམ་བརྗོད་བློ་ཡི་ཡུལ་མིན་ཐོབ། །དངོས་མེད་ཆོས་སྐུ་ཟང་ཀ་མ། །རྒྱུ་རྐྱེན་སྐྱེ་འཇིག་མེད་པ་ཡི། །འཕོ་འགྱུར་མེད་པར་བརྟན་པ་ཐོབ། །རྩལ་ཟེར་ཡན་ལག་འོད་གསལ་ངང་། །ངང་དྭངས་རང་གྲོལ་བརྟེན་པ་ཐོབ། །སྣ་ཚོགས་སྣང་ལ་ངོས་བཟུང་མེད། །དྲན་མེད་ཡིད་ལ་བྱར་མེད་པས། །དབྱེར་མེད་ངོ་བོ་ཉིད་ཀྱི་སྐུ། །མ་ཕྱེ་མ་བཀོལ་བརྟན་པ་ཐོབ། །དོན་དམ་བདེ་བ་ཆེན་པོའི་སྐུ། །རྩིས་གདབ་ཤུགས་སྒྲོལ་བརྟན་པ་ཐོབ། །ཆོས་ཟབ་མཐར་ཕྱིན་འཁྲུལ་པ་མེད། །ནོར་བའི་གཉིས་འཛིན་ཀ་ནས་དག །ཡེ་ཐོག་སངས་རྒྱས་དགོངས་པ་རིག །བདག་མེད་རྣམ་དག་ཕྱོགས་བྲལ་ཆོས། །མ་བྱས་རང་བྱུང་བློ་འདས་སྟོན། །རྒྱ་ཆད་མེད་པར་བརྟན་པ་ཐོབ། །ཅེས་གསུངས་སོ། །སྒྲོན་མ་བརྩེགས་པའི་རྒྱུད་ལས། འབྲས་བུ་མི་འགྱུར་བརྟན་པ་ཐོབ་པའི་ལེའུ་སྟེ་བརྒྱད་པའོ།། །།དེ་ནས་ངང་དྭངས་ཁྱེའུ་ཆུང་གིས། །རང་བཞིན་ཀུན་ཏུ་བཟང་པོ་ལ། །འོག་མ་རྣམས་ལ་སྐྱོན་ཅི་མཆིས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སྤྱི་ཏི་སྙིང་པོའི་ངང་ཉིད་ལ། །སྐྱོན་དང་ཡོན་ཏན་གཉིས་མེད་ཀྱང་། །མ་རྟོགས་བློ་ལ་སྐྱོན་དུ་བྱུང་། །གང་ཟག་དབང་པོའི་ཁྱད་པར་ལས། །སེམས་འཐད་ཐེག་པ་རིམ་པ་དགུ། །མི་མཐུན་འཇུག་སྒོ་ལྟ་བསྒོམ་འབྲས། །དེ་ཡི་སྐྱོན་ལ་ཐུག་པ་མེད། །མདོར་བསྡུས་སྐྱོན་བཤད་འཁོར་ལ་བཤད། །ཨ་ཏི་ཁ་འབྱམས་ཕྱོགས་ལྷུང་སྐྱོན། །ཨ་ནུ་དབྱིངས་དང་ཡེ་ཤེས་སྐྱོན། །མ་ཧཱ་སྣང་སྟོང་གཉིས་ཀྱི་སྐྱོན། །ཡོ་ག་སྐྱེ་འགག་གཉིས་ཀྱི་སྐྱོན། །ཨུ་པ་ཡར་བལྟ་མར་སྤྱོད་སྐྱོན། །ཀྲི་ཡ་དག་པ་རྣམ་གསུམ་སྐྱོན། །དབུ་མ་བདེན་པ་གཉིས་ཀྱི་སྐྱོན། །སེམས་ཙམ་རང་རིག་རང་གསལ་སྐྱོན། །རང་རྒྱལ་རྟེན་འདྲེལ་རིག་བྱེད་སྐྱོན། ། ― DNG002_Page_0662 ―
[མ་དཔེ་གཟིགས་ན་འདིར་གནོན།]
ཉན་ཐོས་ཡུལ་སེམས་བདག་མེད་སྐྱོན། །བྱ་རུ་བཞིན་དུ་གཉིས་བཟུང་བས། །ཀིམ་པ་ཀ་ཡི་འབྲས་བུ་བཞིན། །སྨིན་ཡང་འབྲས་བུ་མི་འབྱུང་ངོ་། །བལྟ་བསྒོམ་སྤྱོད་འབྲས་ས་ལམ་དམ། །ང་རྣམས་སྐྱོན་བརྗོད་ཟད་མཐའ་ཡས། །ལྡོང་པ་ནམ་མཁར་སྙེགས་པ་འདྲ། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། )ཐེག་པ་འོག་མ་པའི་སྐྱོན་བསྟན་པའི་ལེའུ་སྟེ་དགུ་པའོ།། །།དེ་ནས་ངང་དྭངས་ཁྱེའུ་ཆུང་གིས། །ཐོག་མའི་སངས་རྒྱས་ཀུན་བཟང་ལ། །ཐེག་པ་རིམ་པ་དགུ་པོ་ལས། །སྤྱི་ཏི་ཁྱད་པར་གང་གིས་སྤགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ང་ཡི་བླ་མེད་སྤྱི་ཏི་ལ། །སྤགས་དང་མ་སྤགས་གཉིས་མེད་ཀྱང་། །རྩལ་གྱི་རིག་པས་ཚིག་ཕྱེ་བས། །ཐེག་པ་དགུ་རྩེའི་སྤྱི་ཏི་འདི། །གདོད་ནས་དག་པའི་ཆོས་སྐུ་ལ། །བྱ་བཙལ་རྩོལ་བསྒྲུབ་མི་འཐད་དེ། །མཚོན་འདས་བློ་འདས་བསྒྲུབ་མེད་འདི། །བདེན་པ་གཉིས་སུ་མི་བལྟ་སྟེ། །གཉིས་བཟུང་ཆོས་རྣམས་སྤྲོས་པ་གཅོད། །དེས་ན་རྩེ་རྒྱལ་སྤྱི་ཏི་སྤགས། །དྲན་པའི་འཁོར་ལོ་ལས་འདས་པས། །འཛིན་རྟོགས་བློ་ལས་ཁྱད་པར་འཕགས། །དྲན་མེད་བསམ་པ་ལས་འདས་པས། །བེམ་པོ་རིག་མེད་རྣམས་ལས་སྤགས། །སྐྱེ་མེད་ཙམ་དུའང་མ་གྲུབ་པས། །སྐྱེ་བའི་འཁོར་ལོ་རྣམས་ལས་སྤགས། །ཡིད་ཀྱི་འགྱུ་བ་རང་དག་པས། །སེམས་ཀྱི་བརྟགས་ཞེན་རྣམས་ལས་སྤགས། །ཉོན་མོངས་མ་ལུས་ཀུན་འདས་པས། །མངོན་ཞེན་ཐ་དད་ཡུལ་ལས་སྤགས། །ཚིག་གིས་མཚོན་བརྗོད་ཡུལ་འདས་པས། །ཐེག་པའི་གྲུབ་མཐའ་རྣམས་ལས་སྤགས། །ཤེས་རྟོགས་སྤྱད་ཡུལ་མ་ཡིན་པས། །ཡིད་དཔྱོད་བྱས་བཅོས་ཆོས་ལས་སྤགས། །སྣང་སྟོང་ཕྱོགས་འཛིན་མཐའ་འདས་པས། །རྟག་ཆད་ལོག་ལྟའི་ཡུལ་ལས་སྤགས། །ཉོན་མོངས་མཐའ་ལས་རང་གྲོལ་བས། །བླང་དོར་དཀའ་སྤྱད་རྣམས་ལས་སྤགས། །ལས་དང་བག་ཆགས་མཐའ་སྤངས་པས། །རྒྱུ་རྐྱེན་ ― DNG002_Page_0663 ―
[མ་དཔེ་གཟིགས་ན་འདིར་གནོན།]
རྣམ་སྨིན་ཆོས་ལས་སྤགས། །གཅོད་པའི་ཤེས་རབ་ལས་འདས་པས། །རང་རིག་རང་གསལ་སེམས་ལས་སྤགས། །ས་ལམ་བདེན་གཉིས་དངོས་དག་པས། །སྤང་ཐོབ་རྒྱུ་ཡི་ཆོས་ལས་སྤགས། །སྐུ་དང་ཡེ་ཤེས་ལས་གྲོལ་བས། །བཟང་ངན་རེ་དོགས་ཆོས་ལས་སྤགས། །མ་བྱས་མ་བཅོས་དེ་ཁོ་ན། །མི་འཇུག་མི་བལྟ་བསྒོམ་མི་བྱེད། །མི་བཙལ་མི་སྤྱད་བསྲུང་སྡོམ་མེད། །དཀྱིལ་འཁོར་ལྷ་བོད་མཆོད་བསྟོད་མེད། །དབང་དང་དངོས་གྲུབ་སྨོན་འབྲས་མེད། །རྩོལ་སྒྲུབ་བྱ་བྱེད་ལས་འདས་པའི། །ཕྱི་ནང་འབྲས་བུའི་ཆོས་ལས་འདས། །ཀ་དག་ལྷུན་གྲུབ་ངེས་མེད་ཀྱི། །གཞི་ཡི་ཕྱོགས་ཆ་མིང་མེད་པས། །ཨ་ཏི་ཁ་འབྱམས་ཆོས་ལས་སྤགས། །རང་བྱུང་ཡེ་ཤེས་དངོས་སྟོང་པས། །སེམས་སྡེ་དགོངས་པའི་ཆོས་ལས་སྤགས། །ཀུན་བཟང་ཀློང་ཆེན་མུ་མེད་པས། །ཀློང་སྡེ་རབ་འབྱམས་དོན་ལས་སྤགས། །ལུས་ངག་གནད་ལ་མི་ལྟོས་པས། །མན་ངག་སྡེ་ཡི་ཐབས་ལས་སྤགས། །དེ་ལྟར་ཅིར་ཡང་སྣང་དུས་ན། །དེ་དག་གང་ལའང་མ་བཀག་ལ། །གྲངས་ཅན་དུམ་བུ་བསྒྲུབས་པས་ནི། །ཀུན་གྱི་མུ་མཐའ་རང་སར་གྲོལ། །རང་གྲོལ་ཕྱོགས་སུ་རྒྱ་མ་ཆད། །གཉིས་ཀའི་ཕྱོགས་སུ་རྒྱ་མ་ཆད། །གཉིས་མེད་ཕྱོགས་སུ་རྒྱ་མ་ཆད། །མ་གྲོལ་བ་ནི་གྲོལ་བས་བཀྲོལ། །གྲོལ་བ་མ་གྲོལ་བ་ཡིས་བཀྲོལ། །གཉིས་ཀ་གཉིས་སུ་མེད་པར་བཀྲོལ། །གཉིས་ཀ་མེད་པར་གཉིས་ཀ་བཀྲོལ། །དེ་ལྟར་གཅིག་གིས་གཅིག་བཀྲོལ་བས། །རང་གྲོལ་ཡེ་གྲོལ་ཡོངས་གྲོལ་དང་། །གཅེར་གྲོལ་མཐའ་གྲོལ་བླ་མེད་པས། །དགུ་རྩེ་སྤྱི་ཏི་ཡང་ཏི་སྤགས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། སྤྱི་ཏི་ཆོས་ཐམས་ཅད་ལས་སྤགས་པར་བསྟན་པའི་ལེའུ་སྟེ་བཅུ་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །སྤྱི་ཏིའི་དཀྱིལ་འཁོར་ཇི་ལྟར་སྤགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མ་བྲིས་ཁྱབ་བརྡལ་དཀྱིལ་ ― DNG002_Page_0664 ―
[མ་དཔེ་གཟིགས་ན་འདིར་གནོན།]
འཁོར་ནས། །མཁའ་དབྱིངས་རྣམ་དག་ཕྱོགས་བྲལ་དེར། །བརྡལ་ཁྱབ་རྟག་ཆད་ས་གཞི་ལ། །མི་འགྱུར་དྲང་པོའི་ཐིག་བཏབ་ནས། །དཀར་སེར་དམར་ལྗང་ཡེ་ནས་བཀོད། །ཕྱོགས་བཞི་མཚམས་བཞི་ཡེ་ནས་དག །སྐྱེ་ཤི་རྩད་གཅོད་སྒོ་བཞི་ལ། །བྱམས་དང་སྙིང་རྗེའི་དཀྱིལ་འཁོར་ཏེ། །ཚད་ལས་འདས་པའི་ཡངས་པ་ཆེ། །སྣང་སྟོང་སྐུ་ཡི་དཀྱིལ་འཁོར་ཏེ། །གྲག་སྟོང་གསུང་གི་དཀྱིལ་འཁོར་ཡིན། །དྲན་སྟོང་ཐུགས་ཀྱི་དཀྱིལ་འཁོར་ཡིན། །སྐུ་ཡི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །གསུང་གི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །ཐུགས་ཀྱི་དཀྱིལ་འཁོར་ཡང་དག་པ། །ཆོས་ཉིད་བྱང་ཆུབ་སེམས་ལ་གནས། །རང་བཞིན་ངོ་བོ་ཐུགས་རྗེ་གསུམ། །གདོད་ནས་མ་བཅོས་དཀྱིལ་འཁོར་ཡིན། །དཀྱིལ་འཁོར་དཀྱིལ་འཁོར་ཞེས་བྱ་བ། །དཀྱིལ་ནི་སྔོན་ཐོག་ཡེ་གནས་ཡིན། །འཁོར་ནི་རྒྱ་ཆད་ཕྱོགས་ལྷུང་མེད། །དཀྱིལ་ནི་སྙིང་པོའི་གཤིས་ཡིན་ཏེ། །རྩལ་ཟེར་ཡན་ལག་འཁོར་ཡིན་ནོ། །དཀྱིལ་ནི་ཀུན་གཞིའི་ཀློང་ཡིན་ཏེ། །འོད་ཟེར་ཤེས་རིག་འཁོར་ཡིན་ནོ། །རང་བཞིན་ངོ་བོ་ཐུགས་ཀྱི་དཀྱིལ། །སྒོ་གསུམ་སྒོ་གཉིས་འཁོར་ཡིན་ནོ། །འཁྲུལ་ལུགས་རྣམ་གསུམ་དཀྱིལ་ཡིན་ཏེ། །གཅོད་ལུགས་རྣམ་གསུམ་འཁོར་ཡིན་ནོ། །རིག་ཡིད་སེམས་གསུམ་དཀྱིལ་ཡིན་ཏེ། །ངང་དྭངས་རྩད་གཅོད་འཁོར་ཡིན་ནོ། །སྙིང་པོ་ཆོས་ཉིད་དཀྱིལ་ཡིན་ཏེ། །ཐག་ཆོད་གདེངས་ལྡན་འཁོར་ཡིན་ནོ། །ཡེ་ནས་རང་གནས་དཀྱིལ་ཡིན་ཏེ། །སྐྱེ་མེད་དོན་རྟོགས་འཁོར་ཡིན་ནོ། །ཕྱི་ནང་སྣང་སྲིད་དཀྱིལ་ཡིན་ཏེ། །ཕྱོགས་མེད་དབྱེར་མེད་འཁོར་ཡིན་ནོ། །ཡོད་མེད་སྐྱེ་འགུལ་དཀྱིལ་ཡིན་ཏེ། །སོར་བཞག་རྩིས་གདབ་མེད་པ་འཁོར། །བླ་མེད་སྤྱི་ཏིའི་དཀྱིལ་འཁོར་ཏེ། །དཀྱིལ་འཁོར་གཞན་ལས་ཁྱད་པར་འཕགས། །ཞེས་གསུངས་སོ། །སྒྲོན་མ་བརྩེགས་ ― DNG002_Page_0665 ―
[མ་དཔེ་གཟིགས་ན་འདིར་གནོན།]
པའི་རྒྱུད་ལས། སྤྱི་ཏིའི་དཀྱིལ་འཁོར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །ལྷ་ཚོགས་སྤྱན་འདྲེན་མཆོད་བསྟོད་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ལྷ་ཡི་དབང་པོ་ལྷ་ཡི་ལྷ། །ལྷ་དང་ལྷ་མིན་ཀུན་གྱི་བདག །གནས་ལུགས་སྐྱེ་མེད་ཀ་དག་སྟེ། །ཇི་བཞིན་མ་བཅོས་སྙིང་པོའི་ལྷ། །གདོད་ནས་དངོས་མེད་ཟང་ཀ་སྟེ། །མ་བསྒྲུབས་ཡེ་ནས་ལྷ་ཚོགས་ལ། །སྤྱན་དྲངས་མིང་མེད་ཡེ་ནས་གནས། །བཅོས་བསླད་སྒྲིབ་མེད་རང་སར་བསྟན། །སྐྱེ་མེད་མཚོན་བྲལ་ཆོས་འདས་ལ། །གཉིས་བྲལ་འགྱུར་མེད་མཆོད་བསྟོད་མེད། །ཕུང་པོ་ལྔ་ཉིད་ཡེ་དག་པས། །འཁྲུལ་པའི་དུས་ཉིད་ཡེ་སངས་རྒྱས། །འབྱུང་ལྔ་ཡེ་ནས་རང་དྭངས་པས། །ཡུལ་སྣང་གསལ་དག་ངང་དུ་གྲོལ། །དབང་པོ་ལྔ་ཉིད་གཅེར་གྲོལ་བས། །དུག་ལྔ་གདོད་ནས་ཡེ་ཤེས་པས། །གནས་བསྒྱུར་མི་དགོས་རྣལ་མའི་ངང་། །རེ་མེད་རང་ལ་ཡེ་གནས་པས། །སྤྱན་དྲངས་མཆོད་བསྟོད་ཡུལ་ལས་འདས། །གང་ནས་མ་བསྒྲུབས་རང་ཉིད་པས། །ཆེ་བའི་ཡོན་ཏན་བཙལ་དང་བྲལ། །ཚོགས་གཉིས་མ་བསགས་ཡོངས་རྫོགས་པས། །ཁམས་ཀྱིས་བཙལ་ཞིང་བསྒྲུབ་ལས་གྲོལ། །དྲི་མེད་ངང་དྭངས་ཡེ་གསལ་ལ། །སྒྲིབ་གཉིས་མ་སྦྱངས་ཀ་ནས་དག །སྐྱེ་མེད་རྡོ་རྗེ་རང་འཁྲུངས་པས། །ལྷ་དང་མཆོད་བསྟོད་མུ་མཐའ་སངས། །རྩོལ་བསྒྲུབ་བློ་ལས་ཁྱད་པར་འཕགས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། ལྷ་ཚོགས་མཆོད་བསྟོད་ཀྱི་ལེའུ་སྟེ་བཅུ་གཉིས་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །མ་བསྐུར་དབང་ནི་ཇི་ལྟར་ཐོབ། །ཅེས་ཞུས་པས། སྟོན་པས་འཁོར་ལ་བཀའ་སྩལ་པ། །ཐེག་པ་གཞན་ལས་འཕགས་པ་ཡི། །དགུ་རྩེ་དབང་གི་རྒྱལ་པོ་བཤད། །མཁའ་ཀློང་ཆོས་དབྱིངས་ཡངས་པའི་དབང་། །མ་ཕྱེ་མ་བཀོལ་སྙིང་པོར་བསྐུར། །ཆོས་ཉིད་སྐྱེ་འགག་གཉིས་ ― DNG002_Page_0666 ―
[མ་དཔེ་གཟིགས་ན་འདིར་གནོན།]
མེད་དབང་། །རྩལ་ཟེར་ཐིག་ལེའི་ཀློང་འདུས་བསྐུར། །སྣང་སྲིད་མ་བཀག་རོལ་པའི་དབང་། །དགག་བསྒྲུབ་འབྱེད་པ་མེད་པར་བསྐུར། །གཉིས་མེད་རང་སོར་བཞག་པའི་དབང་། །ཆོས་ཉིད་གསལ་དག་ངང་དུ་བསྐུར། །རྒྱལ་ཐབས་སྤྱི་བླུགས་ཚངས་པའི་དབང་། །བྱ་བཙལ་གཡོ་རྩོལ་མེད་པར་བསྐུར། །བུམ་པའི་རྒྱལ་པོ་སྙིང་པོའི་བཅུད། །ཐིག་ལེ་བཅུད་འདུས་བུམ་པས་བསྐུར། །རྡོ་རྗེ་རྒྱལ་པོ་བཀའ་ཡི་དབང་། །དུས་གསུམ་འཕོ་འགྱུར་མེད་པར་བསྐུར། །དབུ་རྒྱན་བླ་མེད་རིགས་ལྔའི་དབང་། །གདོད་ནས་སྤྱི་བླུགས་ཀློང་དུ་བསྐུར། །ཅོད་པན་ཐེག་དགུ་ལས་རྒྱལ་དབང་། །གྲུབ་མཐའ་འཛིན་ཞེན་མེད་པར་བསྐུར། །ཤེས་བརྗོད་ལས་འདས་གསང་བའི་དབང་། །ཅི་ཡང་བསྟན་དུ་མེད་པར་བསྐུར། །རང་སྣང་རང་གདངས་ཐབས་ཤེས་དབང་། །རྣམ་རྟོག་ཡེ་ཤེས་ཆེན་པོར་བསྐུར། །རང་བལྟ་རང་སྟོར་ཆོས་འདས་དབང་། །ཚིག་དབང་མཚོན་དུ་མེད་པར་བསྐུར། །སྙིང་པོ་ཀ་དག་རྣལ་མའི་དབང་། །གཡོ་རྩོལ་འཇིག་བྲལ་མེད་པར་བསྐུར། །རྩིས་གདབ་ཕྱོགས་ལྷུང་མེད་པར་ཐོབ། །སྣང་སྲིད་སེམས་ཉིད་ངང་དག་དབང་། །གཉིས་འཛིན་དགག་བསྒྲུབ་མེད་པར་བསྐུར། །དབྱེ་བསལ་རྒྱ་ཆད་མེད་པར་ཐོབ། །རང་བྱུང་དྲི་མེད་རིག་པའི་དབང་། །རང་བརླག་རང་ཐིམ་ངང་དུ་བསྐུར། །རྩད་གཅོད་འཁྲུལ་སངས་གཏིང་ཡངས་ཐོབ། །ཡིད་བཞིན་དགོངས་པ་ཡེ་རྫོགས་དབང་། །རྩལ་མེད་ཡོངས་རྫོགས་ཀློང་དུ་བསྐུར། །བསྒྲུབ་མེད་སྨོན་པ་མེད་པར་བསྐུར། །བསྐྱོད་མེད་ས་ལམ་ཆིག་ཆོད་དབང་། །བགྲོད་མེད་རྣམ་གྲོལ་དབྱིངས་སུ་བསྐུར། །ཆོས་ཟད་མུ་མེད་མཐའ་སྟོངས་དབང་། །ཡེ་ཐོབ་མཁའ་ཀློང་དབྱིངས་སུ་བསྐུར། །བསྐུར་ཐོབ་མཚན་མ་མཐའ་སྟོངས་པའི། །ཡེ་རྫོགས་དབང་གི་སྤྱི་རྒྱལ་འདི། །ཐོབ་བྱ་འཐོབ་བྱེད་གཉིས་འཛིན་པའི། །བློས་བཏགས་གཟུང་འཛིན་དབང་ལས་སྤགས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། ཡོངས་རྫོགས་སྤྱི་ཏིའི་དབང་བསྐུར་བསྟན་པའི་ལེའུ་ ― DNG002_Page_0667 ―
[མ་དཔེ་གཟིགས་ན་འདིར་གནོན།]
སྟེ་བཅུ་གསུམ་པའོ།། །།དེ་ནས་ངང་དྭངས་ཁྱེའུ་ཆུང་གིས། །རང་བཞིན་ཀུན་ཏུ་བཟང་པོ་ལ། །དངོས་གྲུབ་དམ་ཚིག་སྨོན་ལམ་གང་། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དངོས་གྲུབ་དངོས་གྲུབ་ཅེས་བྱ་བ། །གཞན་ནས་བླང་བའི་ཡུལ་མེད་དེ། །རང་ལ་ཡེ་གནས་གདོད་ནས་གྲུབ། །གྲུབ་ཟིན་དོན་ལས་མ་འདས་ན། །ཐུན་མོང་བསྒྲུབ་པ་བྱ་མི་དགོས། །དངོས་ནི་ཆོས་ཉིད་སྐྱེ་མེད་དེ། །གྲུབ་པ་རྟོགས་པའི་ཡེ་ཤེས་ཏེ། །ཐོབ་ནི་ཆོས་སྐུ་སྐྱེ་མེད་ཐོབ། །དངོས་ནི་རང་གསལ་རིན་པོ་ཆེ། །གྲུབ་པ་དེ་རྟོགས་ཤེས་རབ་ཡིན། །དངོས་ནི་དངོས་མེད་ཆོས་ཀྱི་སྐུ། །སྐྱེ་ཤི་འཕོ་འགྱུར་མེད་པར་གྲུབ། །དངོས་ནི་སྙིང་པོ་དོན་གྱི་ཀློང་། །གནས་གཞི་གཏན་ལ་ཕེབས་པ་ཡིས། །འཁྲུལ་པ་རྩད་ནས་ཆོད་པས་གྲུབ། །དངོས་ནི་སྤྱི་ཏིའི་གནས་ལུགས་ཏེ། །གྲུབ་མཐའི་རྒྱ་ལས་གྲོལ་བས་གྲུབ། །ཡང་དག་དོན་གྱི་དམ་ཚིག་ནི། །དབྱེར་མེད་གདེང་ལས་མི་འདའ་དང་། །སྙིང་པོའི་དོན་ལས་མི་འདའ་དང་། །རྟོགས་པའི་དོན་ལས་མི་འདའ་དང་། །མ་བུ་ངོ་སྤྲོད་ཉམས་ལེན་ལས། །རྟག་ཏུ་མི་འདའ་དམ་ཚིག་ཡིན། །བླ་མེད་མཆོག་གི་སྨོན་ལམ་ནི། །མ་བགྲོད་ཐོག་མའི་གཞིར་ཕྱིན་དང་། །རང་གནས་སྨོན་པའི་སར་སྐྱོལ་དང་། །ཆོས་དབྱིངས་བླ་མེད་ཀློང་དཀྱིལ་དུ། །རྩལ་ཟེར་རིག་པ་རང་སར་ཐིམ། །ཐིམ་དང་མ་ཐིམ་མུ་མཐའ་སྟོང་། །སྨོན་པའི་སངས་རྒྱས་རང་ལས་རྙེད། །སྨོན་ལམ་ཞེས་བྱ་ཐ་སྙད་བཏགས། །བསམ་མེད་བྱ་བྲལ་མཐའ་གྲོལ་ཏེ། །མ་བཙལ་རང་གནས་རྟོགས་པ་ལ། །སྨོན་ལམ་ཞེས་བྱར་བཏགས་པ་ཡིན། །ཚེ་འདིར་བཏབ་ནས་ཕྱི་མ་ལ། །ཐོབ་ཏུ་རེ་བའི་ལྟོས་མེད་པར། །སྙིང་པོ་ཆོས་སྐུ་རང་ལས་རྙེད། །རྙེད་དང་མ་རྙེད་གཉིས་ཀ་དང་། །གཉིས་མེད་མུ་མཐའ་རང་སར་གྲོལ། །ཡང་རྩེ་སྤྱི་ཏིའི་སྨོན་ལམ་ཡིན། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། དངོས་གྲུབ་དམ་ཚིག་སྨོན་ལམ་བསྟན་པའི་ལེའུ་སྟེ་བཅུ་བཞི་པའོ།། །། ― DNG002_Page_0668 ―
[མ་དཔེ་གཟིགས་ན་འདིར་གནོན།]
དེ་ནས་ངང་དྭངས་ཁྱེའུ་ཆུང་གིས། །རང་བཞིན་ཀུན་བཟང་ལ་ཞུས་པ། །དགུ་རྩེ་སེམས་ཉིད་སྤྱི་ཏི་འདི། །མ་འདྲེས་ཡོངས་སུ་ཇི་ལྟར་རྫོགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །མཁའ་ཀློང་རྣམ་དག་ཀློང་ཆེན་དུ། །སྣང་སྲིད་འུབ་བསྡུས་ཆེན་པོར་རྫོགས། །རྩེ་རྒྱལ་རྫོགས་ཆེན་སྤྱི་ཏི་རུ། །ཐེག་པ་བརྒྱད་ཁྲི་བཞི་སྟོང་རྫོགས། །མ་བུ་གཉིས་མེད་གནས་གཉིས་སུ། །གདམས་ངག་ཐམས་ཅད་འུབ་བསྡུས་རྫོགས། །རང་སངས་རང་རྒྱལ་རང་གྲོལ་དུ། །རྟོགས་ལུགས་བརྒྱད་ཁྲི་བཞི་སྟོང་རྫོགས། །ནམ་མཁར་འབྱུང་ལྔ་མ་འདྲེས་རྫོགས། །བར་སྣང་ཉི་ཟླ་གཟའ་སྐར་རྫོགས། །གནམ་སའི་ཀློང་དུ་སྐྱེ་འགྲོ་རྫོགས། །དཀྱིལ་འཁོར་ཀློང་དུ་ཚོན་ལྔ་རྫོགས། །ཟ་འོག་སྣམ་བུར་དར་སྣ་རྫོགས། །ཡིད་བཞིན་ནོར་བུར་རིན་ཆེན་རྫོགས། །དེ་བཞིན་སེམས་ཉིད་སྤྱི་ཏི་འདིར། །ཕྱི་ནང་ཐེག་པ་མ་ལུས་རྫོགས། །ཡེ་དག་བྱ་བྲལ་ཆོས་ཀྱི་སྐུར། །རྫོགས་ཆེན་ལྟ་བ་མ་ལུས་རྫོགས། །དབྱིངས་དང་ཡེ་ཤེས་གཉིས་མེད་པས། །ཨ་ནུའི་བལྟ་བ་མ་འདྲེས་རྫོགས། །སྣང་སྟོང་ཐབས་དང་ཤེས་རབ་མེད། །མ་ཧཱའི་ལྟ་བ་མ་འདྲེས་རྫོགས། །སུམ་ཅུ་རྩ་བདུན་སྐྱེ་འགག་མེད། །ཡོ་གའི་ལྟ་བ་མ་འདྲེས་རྫོགས། །མར་སྤྱོད་ཡར་ལྟའི་རྩེ་གཉིས་མེད། །ཨུ་པའི་ལྟ་བ་མ་འདྲེས་རྫོགས། །དག་གསུམ་རིགས་གསུམ་མགོན་མེད་པས། །ཀྲི་ཡའི་ལྟ་བ་མ་འདྲེས་རྫོགས། །བདེན་པ་གཉིས་སུ་མི་བལྟ་བས། །དབུ་མའི་ལྟ་བ་མ་འདྲེས་རྫོགས། །ཡུལ་སེམས་གཉིས་སུ་མི་བལྟ་བས། །སེམས་ཙམ་ལྟ་བ་མ་འདྲེས་རྫོགས། །རྟེན་འདྲེལ་བཅུ་གཉིས་མི་བལྟ་བས། །རང་རྒྱལ་ལྟ་བ་མ་འདྲེས་རྫོགས། །བདག་མེད་ཕྱོགས་ཆ་མི་འདོད་པས། །ཉན་ཐོས་ལྟ་བ་མ་འདྲེས་རྫོགས། །རྟག་ཆད་གཉིས་སུ་མ་ལྷུང་བས། །མུ་སྟེགས་ལྟ་བ་མ་འདྲེས་རྫོགས། །དེ་ལྟར་གང་དུ་འང་མི་བལྟ་ལ། །གང་ཡང་མ་འདྲེས་འདིར་རྫོགས་ཤིང་། །འདྲེས་དང་མ་འདྲེས་རྫོགས་མ་རྫོགས། །གཉིས་ཀ་གཉིས་མེད་རང་གྲོལ་བས། །ཆོས་རྣམས་མ་འདྲེས་སྤྱི་ཏིར་རྫོགས། །འཇུག་སྒོ་ ― DNG002_Page_0669 ―
[མ་དཔེ་གཟིགས་ན་འདིར་གནོན།]
ཕྲིན་ལས་ལྷ་དབང་རྫོགས། །དམ་ཚིག་མཆོད་བསྟོད་གཏོར་མ་རྫོགས། །མཎྜལ་ཚ་ཚ་བཤགས་པ་དང་། །དགེ་རྩ་སྨོན་ལམ་རྒྱས་འདེབས་རྫོགས། །གཅིག་རྫོགས་གཉིས་རྫོགས་སེམས་སུ་རྫོགས། །ཡོད་མེད་མ་ལུས་སྣང་སྟོང་རྫོགས། །ཡོངས་རྫོགས་སྐད་ཅིག་བྱེ་བྲག་ཕྱེད། །སྐད་ཅིག་ཉིད་ལ་མངོན་སངས་རྒྱས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། མ་འདྲེས་པ་ཡོངས་སུ་རྫོགས་པའི་ལེའུ་སྟེ་བཅོ་ལྔ་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་ཀུན་བཟང་ལ། །མ་བྱས་རང་བྱུང་མཚོན་མེད་པས། །བྱར་མེད་བློ་འདས་ཐེག་པ་གང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མ་བྱས་རང་བྱུང་རྩོལ་མེད་སེམས། །གདོད་ནས་དག་པའི་ཆོས་སྐུ་ཉིད། །ཁོང་ནས་འབྱུང་བ་སྐྱེ་བ་མེད། །ངག་ཏུ་བརྗོད་པ་ཀུན་ལས་གྲོལ། །མཚོན་དུ་མེད་པའི་བརྗོད་པའི་མཆོག །མ་སྐྱེས་ཆོས་ཉིད་སེམས་ལས་འདས། །དངོས་མེད་འདོད་བྲལ་བློ་འདས་ཡིན། །རང་བྱུང་ངང་དྭངས་བློ་ལས་འདས། །སྙིང་པོ་ཆོས་ཉིད་བློ་ལས་འདས། །བྱར་མེད་བཤད་མེད་མཚོན་དུ་མེད། །རྩོལ་མེད་བསམ་བྲལ་ཀ་ནས་དག །དེས་ན་མཚོན་མེད་བློ་ལས་འདས། །བྱས་པའི་ཆོས་ནི་འདུས་བྱས་ཡིན། །འདུས་བྱས་ཆོས་ཀྱིས་སངས་མི་རྒྱ། །བཤད་པའི་ཆོས་ནི་ཐ་སྙད་ཡིན། །བླ་དགས་ཚིག་གིས་སངས་མི་རྒྱ། །བློས་བཏགས་ཆོས་ནི་འཁྲུལ་པ་ཡིན། །འཁྲུལ་པའི་ཆོས་ཀྱིས་སངས་མི་རྒྱ། །བསྒྲུབ་ཆོས་རྩོལ་བསྒྲུབ་ཡིད་སྨོན་ཡིན། །ཡིད་སྨོན་ཆོས་ཀྱིས་སངས་མི་རྒྱ། །རྩོལ་བསྒྲུབ་མེད་པའི་ཆོས་ཤིག་དགོས། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། བྱར་མེད་མཚོན་མེད་བློ་ལས་འདས་པའི་ལེའུ་སྟེ་བཅུ་དྲུག་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །གཅིག་ཤེས་ཀུན་གྲོལ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཆོས་གཅིག་དེ་བཞིན་ཉིད་ཤེས་ ― DNG002_Page_0670 ―
[མ་དཔེ་གཟིགས་ན་འདིར་གནོན།]
ན། །ཆོས་རྣམས་ཐམས་ཅད་གྲོལ་བར་འགྱུར། །ཞེས་བཀའ་སྩལ་པ་དང་། དེ་ནས་ངང་དྭངས་ཁྱེའུ་ཆུང་གིས། །ཆོས་གཅིག་དེ་ནི་ཇི་ལྟར་ལགས། །གཅིག་ལ་དངོས་པོ་ཡོད་ལགས་སམ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཆོས་གཅིག་བྱ་བའི་རང་བཞིན་ནི། །གཞི་ཡི་ཀློང་ལས་མཚོན་མེད་ཀྱང་། །རྩལ་ཟེར་ཤེས་རིག་གཅིག་ཅེས་བརྗོད། །རིན་ཆེན་གསལ་དྭངས་ངང་དྭངས་དེ། །ཡོད་པ་མ་ཡིན་དངོས་པོ་མེད། །མེད་པ་མ་ཡིན་གསལ་ཞིང་རིག །དངོས་མེད་ཡེ་ཤེས་ཟང་ཀ་མ། །མི་སྣང་གསལ་བའི་རང་བཞིན་ཅན། །དེ་ཀ་ཉིད་ལས་གྲོལ་ཞེས་བཤད། །དེས་ན་གཅིག་ཤེས་ཀུན་གྲོལ་ལོ། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། གཅིག་ཤེས་ཀུན་གྲོལ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །གནད་རྣམས་ཁྲོལ་བ་གཅིག་ཀུན་ནི། །ཇི་ལྟར་རང་སར་གྲོལ་བར་འགྱུར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །མིང་མེད་ཕྱོགས་བྲལ་ཀུན་ཁྱབ་ཐོག་མའི་གནད། །ཡན་ལག་རྩལ་ཟེར་མིང་འདོགས་ཐ་མའི་གནད། །རྩལ་ཟེར་ཐོག་མའི་ཀློང་འདུས་གཉིས་མེད་གནད། །སྔོན་རོལ་ཅང་མེད་ཐོག་མའི་གནད། །གཡོ་བ་གསལ་ཁྱབ་ཐ་མའི་གནད། །སྔོན་རོལ་གསལ་ཐེབས་གཉིས་མེད་གནད། །སྙིང་པོ་ཆོས་ཀྱི་ཐོག་མའི་གནད། །འདིར་ནི་རྩལ་ལག་ཐ་མའི་གནད། །སྙིང་པོར་རྩལ་ཐིམ་གཉིས་མེད་གནད། །ཀུན་གཞི་མཁའ་ཀློང་ཐོག་མའི་གནད། །རིག་ཤེས་ཡིད་སེམས་ཐ་མའི་གནད། །དེ་དག་ཀློང་ཐིམ་གཉིས་མེད་གནད། །མ་བུ་གཉིས་མེད་དབྱེར་མི་ཤེས། །གནད་རྣམས་མ་ལུས་ཁྲོལ་བར་བཤད། །བྱ་གནད་ནམ་མཁའ་ཉ་གནད་དུ། །སྲོག་གནད་སྙིང་ལ་མེ་གནད་རྩེ། །སྣང་གསལ་ཉི་ཟླ་སེམས་གནད་དོན། །རིན་ཆེན་དངོས་མེད་ཀུན་གྱི་གཞི། །མི་སྣང་གསལ་བའི་བདག་ཉིད་ཅན། །དོན་གཅིག་ཅང་མེད་ཅིར་ཡང་གསལ། །མི་སྣང་རང་བཞིན་ཡོད་པའོ། །དེས་ན་དངོས་མེད་ཀུན་གྱི་ ― DNG002_Page_0671 ―
[མ་དཔེ་གཟིགས་ན་འདིར་གནོན།]
གནད། །གནད་རྣམས་ཐམས་ཅད་དེ་ཡིས་ཁྲོལ། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། གནད་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་ཀུན་བཟང་ལ། །བརྡའ་གཅིག་ཤེས་པས་བརྡའ་ཀུན་ཁྲོལ། །བརྡའ་ཡི་གནད་དེ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མིང་མ་ཐོགས་ཀྱི་སྔོན་རོལ་ན། །ཅང་མེད་ཐ་སྙད་གང་གིས་ཀྱང་། །མ་གོས་པ་ཡི་བརྡའ་གཅིག་ཡོད། །ཀུན་གཞི་རྩལ་ཟེར་བར་ཤེད་ན། །ཐམས་ཅད་བསྐྱེད་བསྡུས་བརྡའ་གཅིག་ཡོད། །འོད་རླུང་ཤེས་རིག་བར་ཤེད་ན། །གྱུར་མ་གྱུར་གྱི་བརྡའ་གཅིག་ཡོད། །འཆར་སྒོ་འཁྲུལ་སྒོའི་བར་ཤེད་ན། །ལྡོག་ཐབས་གཉིས་ཀྱི་བརྡའ་གཅིག་ཡོད། །སངས་རྒྱས་སེམས་ཅན་བར་ཤེད་ན། །བར་ཆད་མེད་པའི་བརྡའ་གཅིག་ཡོད། །མ་རིག་ཡེ་ཤེས་བར་ཤེད་ན། །བར་པར་བྱེད་པའི་བརྡའ་གཅིག་ཡོད། །དབྱིངས་དང་ཡེ་ཤེས་བར་ཤེད་ན། །བར་པར་བྱེད་པའི་བརྡའ་གཅིག་ཡོད། །འཁོར་བ་མྱང་འདས་བར་ཤེད་ན། །བར་པར་བྱེད་པའི་བརྡའ་གཅིག་ཡོད། །ཨ་སང་ས་ཀ་རི། ཀུན་འབྱུང་བསམ་ཡས་ཀྱི་ལྷ་ཁང་ན། བར་རླག་དངོས་མེད་འདོད་མེད་བྱ་བྲལ་ལས་ཟིན་ནོ། །ཨ་དྷ་ཐིམ། སིདྡྷི་ཨ། བརྡའ་དེ་ཤེས་ན་བརྡའ་ཀུན་ཤེས་པར་འགྱུར། །རྣམ་དག་འོད་གསལ་ཆེན་པོའི་ལྷ་ཁང་ན། །བྱ་བྲལ་འདོད་མེད་རླག་པའོ། །བརྡའ་དེ་ཤེས་ན་བརྡའ་ཀུན་ཤེས་པར་འགྱུར། །དངོས་མེད་ཟང་ཀ་ཀུན་མཁྱེན་ལྷ་ཁང་ན། །ཅིར་ཡང་མི་སྣང་གསལ་བའི་མེ་ལོང་ཅན། །བརྡའ་དེ་ཤེས་པས་བརྡའ་ཀུན་ཤེས་པར་འགྱུར། །མཁའ་ཀློང་སྤྱི་ཁྱབ་རིན་པོ་ཆེ་ཡི་འོད་ཁང་ན། །རྩོལ་བྲལ་མེ་ལོང་ཕྱོགས་མུ་མཐའ་རང་རླག་པོ། །བརྡའ་དེ་ཤེས་ན་བརྡའ་ཀུན་ཤེས་པར་འགྱུར། །འཕེལ་འགྲིབ་མེད་པའི་རྣམ་དག་ལྷ་ཁང་ན། །དངོས་མེད་ཀུན་གསལ་ཉི་ཟླའི་མེ་ལོང་ཅན། །མ་ལུས་རླག་བྱེད་ཀུན་གྱི་སྤྱི་མེས་པོ། །མུན་སེལ་མེ་གསོད་མཚོ་སྐེམ་རྫ་བར་ལ། །རང་གཅིག་མདུད་ཁྲོལ་ཕྱོགས་འདེབས་ཀུན་ ― DNG002_Page_0672 ―
[མ་དཔེ་གཟིགས་ན་འདིར་གནོན།]
སྡུད་འུབ་ཆུབ་བོ། །དངོས་མེད་ཟང་ཀ་གསལ་དྭངས་སྤྱི་ཡི་རྗེ། །བརྡའ་དེ་ཤེས་ན་བརྡའ་ཀུན་ཤེས་པར་འགྱུར། །འཁྲུལ་ཆོད་མདོ་མེད་ཅོལ་ཆུང་མདོ་བོ་ཆེ། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། བརྡའ་གཅིག་ཤེས་ན་བརྡའ་ཀུན་གྲོལ་བར་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་ངང་དྭངས་ཁྱེའུ་ཆུང་གིས། །དམ་པ་དང་པོའི་སངས་རྒྱས་ལ། །རྒྱུད་འདིའི་མཚན་ནི་ཇི་ལྟར་གཟུང་། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །འདི་ལ་མཚོན་མེད་བརྗོད་མེད་ཀྱང་། །འཁོར་གྱིས་མཚན་འདི་གཟུང་ཕྱིར་བཤད། །བྱ་རྩལ་ཆགས་སྡང་བློ་ཆོས་བདུད། །བྱར་མེད་བློ་འདས་ཞེན་གཅོད་རྩི། །དེས་ན་བདུད་རྩིའི་རྒྱུད་དུ་ཟུང་། །སངས་རྒྱས་ཀུན་གྱི་ཐུགས་ཀྱི་བཅུད། །བཀའ་བརྒྱུད་ཀུན་གྱི་བཅུད་འདུས་པས། །བཅུད་འདུས་ཆེན་པོའི་རྒྱུད་དུ་ཟུང་། །མ་རིག་འཁོར་བའི་མུན་རུམ་དེར། །སྒྲོན་མ་བརྩེགས་པས་སེལ་བར་བྱེད། །སྒྲོན་མ་བརྩེགས་པའི་རྒྱུད་དུ་ཟུང་། །ཐེག་པ་མ་ལུས་གཉའ་གཅོག་ཕྱིར། །གཉའ་གཅོག་སྤྱི་ཏི་བྱ་བར་ཟུང་། །ཐེག་པ་ཀུན་ལས་ལ་ཟློའི་ཕྱིར། །ལ་ཟློ་ཆེན་པོའི་རྒྱུད་དུ་ཟུང་། །ཞེས་གསུངས་སོ། །སྒྲོན་མ་བརྩེགས་པའི་རྒྱུད་ལས། མཚན་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་ངང་དྭངས་ཁྱེའུ་ཆུང་གིས། །རྒྱུད་འདི་གཏད་པའི་གང་ཟག་གང་། །ཞུས་པས། སྟོན་པས་འཁོར་ལ་བཀའ་སྩལ་པ། །དད་དང་དམ་ཚིག་ཤེས་རབ་དང་། །བརྩོན་འགྲུས་བརྩེ་གདུང་གཏོང་ཕོད་ཆེ། །རྒྱུད་བཟང་བརྩོན་ལྡན་བློ་ཆེ་མྱུར། །བླ་མ་སྙིང་ལ་སེམས་པ་དང་། །མན་ངག་སྲོག་བཞིན་འཚོ་བ་ལ། །དགུ་རྩེ་སྤྱི་ཏིའི་རྒྱུད་འདི་གཏད། །ཉོན་མོངས་མ་རིག་སེར་སྣ་དང་། །ལེ་ལོ་ལོག་ལྟ་ང་རྒྱལ་ཆེ། །དམ་མེད་རྒྱུད་ངན་གྲོགས་མཆེད་བསླུ། །ཆེ་ངག་དགེ་སྨོད་གཡོ་སྒྱུ་ཅན། །དེ་ལྟ་བུ་ལ་བྱིན་གྱུར་ན། །བེའུ་སྦྲེལ་གཡང་ལ་བསྐྱུར་བ་བཞིན། །གཉིས་ཀ་རྡོ་རྗེ་དམྱལ་བར་འགྲོ། །དེ་བས་སྣོད་ལྡན་གདམས་པའི་རྒྱ། ། སྙིང་པོ་བཅུད་སྤུངས་ནམ་མཁའ་ཀློང་ཡངས་ཀྱི་རྒྱུད།― DNG002_Page_0673 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཧྲྀ་ད་ཡ་སུ་ར་རཱ་ཤི་ག་ག་ནཱ྅་བརྟྟ་བིསྟཱ་ར་ཏནྟྲ། བོད་སྐད་དུ། སྙིང་པོ་བཅུད་སྤུངས་ནམ་མཁའ་ཀློང་ཡངས་ཀྱི་རྒྱུད། སྔོན་གནས་ཡེ་ཐོག་མའི་སངས་རྒྱས་ལ་ཕྱག་འཚལ་ལོ། །འདི་སྐད་བདག་གིས་རྟོགས་པའི་དུས་གཅིག་ན། འོག་མིན་གྱི་གནས། སེམས་ཉིད་བརྡལ་བ་ཆེན་པོའི་ཞིང་ཁམས། ཀུན་གཞི་ཆོས་དབྱིངས་ཀྱི་ཕོ་བྲང་ན། བཅོམ་ལྡན་འདས་དཔལ་གསང་བའི་བདག་པོ་བཞུགས་སོ། །ཡན་ལག་རྩལ་གྱི་འཁོར་འདི་ལྟ་སྟེ། འོད་དང་ཟེར་ཡན་ལག་ཤེས་རིག་ཡིད་སེམས་དྲན་རྟོག་བློ་ཡི་འཁོར་རོ། །རང་བྱུང་གི་འཁོར་ཡང་འདི་ལྟ་སྟེ། གཏི་མུག་དང་། ཞེ་སྡང་དང་། འདོད་ཆགས་དང་། ང་རྒྱལ་དང་། ཕྲག་དོག་གོ། །རང་བཞིན་གྱི་འཁོར་དང་། རང་བཞིན་རྟོག་པའི་ ― DNG002_Page_0674 ―
[མ་དཔེ་གཟིགས་ན་འདིར་གནོན།]
འཁོར་རོ། །ཡེ་ནས་གནས་པའི་འཁོར་ཡང་འདི་ལྟ་སྟེ། ས་དང་། ཆུ་དང་། མེ་དང་། རླུང་དང་། ནམ་མཁའོ། །སེམས་དཔའ་རྡོ་རྗེ་ལ་སོགས་པ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ནམ་མཁའ་ལྡིང་དང་། གྲུལ་བུམ་ལ་སོགས་པ་ལྷ་མ་སྲིན་སྡེ་བརྒྱད་དང་། རིགས་ལྔའི་སངས་རྒྱས་དང་། སངས་རྒྱས་བྱེ་བ་ས་ཡ་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་རྣམས་དང་ལྷན་ཅིག་ཏུ་བཞུགས་སོ། །དེའི་ཚེ་འཁོར་རྣམས་ཀྱི་ནང་ནས་ཞུ་བ་པོ་རྡོ་རྗེ་སེམས་དཔའ་སྟན་ལས་ལངས་ནས། བཅོམ་ལྡན་འདས་གསང་བའི་བདག་པོ་ལ་ཕྱག་འཚལ་ཏེ། པུས་བཙུག་ཐལ་སྦྱར་འདི་སྐད་ཞུས། །སྤྱི་ཏི་སྤྱི་རྒྱལ་བྱར་མེད་ཇི་ལྟར་གསུངས། །ཀ་དག་དངོས་མེད་བསྟན་དུ་བཏུབ་ལགས་སམ། །སྙིང་པོ་སྐྱེ་མེད་གནས་ལུགས་ཇི་ལྟར་གནས། །ཡན་ལག་རྩལ་གྱི་འཆར་ལུགས་ཇི་ལྟར་འཆར། །ཡན་ལག་རྩལ་ཟེར་སྙིང་པོར་ཇི་ལྟར་ཐིམ། །དུག་གསུམ་རྩད་ནས་ཇི་ལྟར་གཅད་པར་བགྱི། །འཁོར་བའི་རུ་ནི་གང་གིས་བཟློག་པར་བྱ། །འགྲོ་བ་དྲུག་གི་གཡང་ས་ཇི་ལྟར་གཅོད། །སྙིང་པོ་སྐྱེ་མེད་ཀ་དག་གང་གིས་རྟོགས། །གསང་སྔགས་བརྡའ་ཡིས་ཇི་ལྟར་བཤད་པར་བྱ། །རྣལ་མ་རྟོགས་ནས་བལྟ་བསྒོམ་མི་འཚལ་ལམ། །ཆོས་རྣམས་གོ་ལྡོག་ཇི་ལྟར་རྟོགས་པར་བྱ། །ཉོན་མོངས་དུག་ལྔ་ཇ་ལོག་ཇི་ལྟར་བསྒྱུར། །ཆོས་རྣམས་ཐམས་ཅད་ལ་ནི་གང་དུ་བཟླ། །མདོ་དོན་ཐམས་ཅད་གཅིག་ཏུ་ཇི་ལྟར་བསྡུ། །སྙིང་པོའི་བཅུད་ནི་གང་དུ་སྤུངས་པ་ལགས། །ནམ་མཁའ་ཀློང་ཡངས་དཔེ་ཡིས་ཇི་ལྟར་བསྟན། །ཐེག་ཆེན་ཆོས་ནི་བརྒྱད་ཁྲི་བཞི་སྟོང་གང་དུ་འདུས། །ཀྱེ། ཁྱབ་བདག་བདག་ལ་སྨན་པ་དང་། །བདག་དོན་བདག་ལ་སྨན་པ་དང་། །བདག་དོན་བདག་ལ་ཐུགས་བརྩེ་བས། །སེམས་ཅན་ཀུན་ལ་སྨན་པ་དང་། །བླ་མེད་འབྲས་བུ་ཐོབ་བྱའི་ཕྱིར། །སེམས་ཀྱི་ཁྱད་པར་ཇི་བཞིན་དུ། །དབང་པོ་བསམ་པ་མཁྱེན་མཆོག་གིས། །བདག་གི་ཞུས་ཚིག་བཅོ་བརྒྱད་པོ། །བདག་ཅག་མོས་ཚོགས་འཁོར་བཅས་ལ། ། ― DNG002_Page_0675 ―
[མ་དཔེ་གཟིགས་ན་འདིར་གནོན།]
ཀ་དག་ལག་འཆང་ཐོབ་བྱའི་ཕྱིར། །ཤིན་ཏུ་ཟབ་པར་བཀའ་སྩོལ་ཅིག །ཅེས་ཞུས་སོ། །འདས་དང་མ་བྱོན་ད་ལྟ་གསུམ། །ཐ་སྙད་མིང་ལ་མི་གནས་ཏེ། །དུས་གསུམ་གཅིག་སྟེ་ཁྱད་པར་མེད། །སྔོན་མེད་ཕྱིས་མེད་གདོད་ནས་དང་། །ཞེས་གསུངས་སོ། །སྙིང་པོ་བཅུད་སྤུངས་ནམ་མཁའ་ཀློང་ཡངས་ཀྱི་རྒྱུད་ལས། ཕུན་སུམ་ཚོགས་པ་ལྔ་དང་། འཁོར་གྱིས་གླེང་སློང་བའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་གསང་བའི་བདག་པོས་ཆོས་ཐམས་ཅད་འབྱེད་པ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་རྡོ་རྗེ་སེམས་དཔའ་ཡིས། །གསང་བའི་བདག་ལ་ཡང་ཞུས་པ། །སྤྱི་རྗེ་བྱར་མེད་ཇི་ལྟར་བཤད། །ཅེས་ཞུས་པ་དང་། གསང་བའི་བདག་པོ་ཏིང་ངེ་འཛིན་དེ་ལས་བཞེངས་ནས། སྐུ་གསུང་ཐུགས་ཡོན་ཏན་ཕྲིན་ལས་ཀྱི་འོད་ཟེར་མ་ལུས་མི་ལུས་ལུས་པ་མེད་པར་བསམ་གྱིས་མི་ཁྱབ་པ་སྤྲོས་ནས། མ་རིག་ཉོན་མོངས་དབང་གིས་ནི། །མ་ཤེས་འཁོར་བར་འཁྱམས་པ་རྣམས། །སྟོན་པ་གསང་བའི་བདག་པོ་ཡིས། །འཁོར་བ་རྩད་གཅོད་རལ་གྲི་ཐོགས། །མ་རིག་མུན་སེལ་ཉི་ཟླ་སྟོན། །རིངས་ཤིང་ཡངས་པར་ལྗགས་བརྐྱངས་ནས། །དུག་ལྔ་རྩད་གཅོད་འགྲོ་དྲུག་གི། །གཡང་ས་གཅོད་པ་སྤྱི་ཏི་བཤད། །འཁོར་རྣམས་མ་ཡེངས་གུས་པས་ཉོན། །ཨཱ་དི་ཧྲྀ་ད་ཡ་ཧྲི་བཛྲ་མ་ཧཱ་སུ་ཁ་ཧོ། །བྱར་མེད་བློ་འདས་ཐེག་པ་འདི། །རང་གི་མཐུ་ཡིས་རྟོགས་པ་ལས། །ཆོས་ནི་གཞན་ནས་འབྱུང་མི་འགྱུར། །གླེང་བྲལ་བྱར་མེད་ལ་གནས་ན། །དངོས་མེད་ཀ་དག་རྣལ་མ་རྟོགས། །རྣལ་འབྱོར་ཡང་རབ་སྐལ་པ་བཟང་། །དགུ་རྩེ་བྱར་མེད་བློ་འདས་ལ། །མིང་ཙམ་འདི་ཞེས་བསྟན་པ་ནི། །གསང་བའི་བདག་པོས་མཚོན་དུ་མེད། །བྱར་མེད་བློས་བཏགས་ལ་དོར་ཅིག །རྩོལ་བསྒྲུབ་བདེན་གཉིས་སུན་ཕྱུང་ཞིག །བཤད་དུ་མེད་པར་བསྟན་པ་ནི། །བློ་དམན་དྲངས་ཕྱིར་བསྟན་པ་ལས། །ཀ་དག་དངོས་མེད་མཚོན་དུ་མེད། །ཅེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། བྱར་མེད་བསྟན་པའི་ལེའུ་སྟེ་གཉིས་པའོ།། །།དེ་ནས་རྡོ་རྗེ་ ― DNG002_Page_0676 ―
[མ་དཔེ་གཟིགས་ན་འདིར་གནོན།]
སེམས་དཔའ་ཡིས། །སྟོན་པ་གསང་བའི་བདག་པོ་ལ། །ཀ་དག་བསྟན་དུ་བཏུབ་ལགས་སམ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བློ་དམན་བྲོད་པ་བསྐྱེད་ཕྱིར་ལས། །ཀ་དག་དངོས་མེད་བསྟན་དུ་མེད། །འོན་ཏང་འཁྲུལ་རྨོངས་མི་ཤེས་ལ། །མུན་ཁུངས་གསལ་སྒྲོན་ལྟ་བུར་བཤད། །མི་མངོན་མི་སྣང་འོད་ཁང་ན། །ཤེས་མེད་ཀ་དག་བློ་འདས་དངོས་པོ་མེད། །ཅང་མེད་ཅིར་སྣང་ཀུན་འབྱུང་ངང་། །དངོས་མེད་སྣ་ཚོགས་གཉིས་མ་གྲུབ། །སྟོང་གསལ་ངང་ལ་གང་གི་ཐ་སྙད་མེད། །ཡོད་དང་མེད་དང་ཅིར་ཡང་གྲུབ་པ་མེད། །མཉམ་དང་མི་མཉམ་དབྱེ་བསལ་རྩིས་གདབ་མེད། །དངོས་མེད་རང་བྱུང་ངང་དྭངས་དྭངས་སང་ངེ་། །ཕྱང་ངེ་བུན་ནེ་མེར་རེ་ལྷང་ངེ་བ། །ཐ་སྙད་ཙམ་ཡིན་ཅིར་ཡང་གྲུབ་པ་མེད། །ཕྲ་ཞིང་ཤེས་དཀའ་མི་རྟོག་རྟོག་ལས་འདས། །མཆོག་ཏུ་གསང་བའི་དངོས་མེད་ཟང་ཀ་འདི། །རྣ་བས་ཐོས་མེད་ལྕེ་ཡིས་བརྗོད་དུ་མེད། །ཡིད་ལ་དྲན་མེད་སེམས་ལ་གཞག་ཏུ་མེད། །རིག་པས་བརྟག་མེད་བློ་ཡི་ཡུལ་ལས་འདས། །ཚོགས་བརྒྱད་ཡུལ་དུ་མ་གྱུར་རྣམ་ཤེས་རྩིས་གདབ་མེད། །སྒོ་ལྔའི་ཡུལ་དུ་མ་གྱུར་དམིགས་ལས་འདས། །དཔེ་བྱད་ཀུན་ལས་འདས་པས་བསྟན་དུ་མེད། །ཅེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། དངོས་མེད་མཚོན་དུ་མི་བཏུབ་པར་བསྟན་པའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་གསང་བའི་བདག་པོ་ལ། །སྙིང་པོའི་གནས་ལུགས་ཇི་ལྟར་གནས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོའི་གནས་ལུགས་མཚོན་དུ་མེད། །རེ་ཞིག་གསུང་གི་སྒྲོན་མ་ཡིས། །མོས་ཚོགས་འདུས་པའི་འཁོར་ལ་བཤད། །སྙིང་པོའི་གནས་ལུགས་འདི་ལྟར་གནས། །ཀ་དག་ཟང་ཀར་གནས་པ་ཡིན། །དངོས་མེད་རྣལ་མར་གནས་པ་ཡིན། །སྐྱེ་བ་མེད་པར་གནས་པ་ཡིན། །འགག་པ་མེད་པར་གནས་པ་ཡིན། །གཉིས་སུ་མེད་པར་གནས་པ་ཡིན། །རང་གྲོལ་ཆེན་པོར་གནས་པ་ཡིན། །རྒྱུ་ ― DNG002_Page_0677 ―
[མ་དཔེ་གཟིགས་ན་འདིར་གནོན།]
རྐྱེན་གཉེན་པོ་མེད་པར་གནས། །དངོས་མེད་བློ་ལས་འདས་པ་ཡིན། །བྱ་རྩོལ་མེད་པར་གནས་པ་ཡིན། །གཡོ་བ་མེད་པར་གནས་པ་ཡིན། །དབྱེ་བསལ་རྩིས་གདབ་མེད་པར་གནས་པ་ཡིན། །ཀུན་ལྡན་གང་གིའང་རྣམ་པ་མེད། །ཅི་ཡང་མ་ཡིན་དངོས་མེད་དང་། །མཚོན་མེད་དཔེ་ལས་འདས་པ་ཡིན། །སྟོང་ཉིད་གསལ་དྭངས་འཛིན་རྟོག་མེད། །གཏིང་གསལ་མི་མངོན་ཁ་གསལ་གདངས། །སང་ངེ་ཕྱད་དེ་ཧང་ངེ་དྭངས་སང་ངེ་། །དངོས་པོ་ཅི་ལྟར་ཤར་ཡང་གྲུབ་པ་མེད། །ཅེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། སྙིང་པོའི་གནས་ལུགས་བསྟན་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་གསང་བའི་བདག་པོ་ལ། །རྩལ་ཟེར་ཡན་ལག་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །འགག་མེད་ཡན་ལག་རྩལ་ཟེར་རྣམས། །ཤར་ལུགས་སྣ་ཚོགས་བསམ་མི་ཁྱབ། །མདོ་ཙམ་འཁོར་ལ་བཤད་ཀྱིས་ཉོན། །རྒྱུ་རྐྱེན་འཕོ་འགྱུར་མེད་པ་ཡི། །མཁའ་ཀློང་གཞི་ནས་མ་འགགས་པས། །རྩལ་ཟེར་ཤེས་རིག་འོད་རླུང་ཤར། །ཅང་མེད་ངང་ལ་ཅིར་ཡང་ཤར། །དངོས་མེད་ངང་ལས་དངོས་ཀུན་ཤར། །ཡེ་མེད་ངང་ལས་སྣ་ཚོགས་ཤར། །སྐྱེ་མེད་ངང་ལས་ཡིད་རིག་ཤར། །འགག་མེད་ངང་ལས་སྒོ་གཉིས་ཤར། །ས་མ་ཟིན་པས་འཁོར་གསུམ་ཤར། །བརྡའ་མ་འཕྲོད་པས་འཁོར་གསུམ་ཤར། །རྩད་མ་ཆོད་པས་གཟུགས་ལྔར་འཁྲུལ། །ཀློང་དུ་མ་གྱུར་འགྲོ་དྲུག་འཁོར། །ཡེ་ཤེས་མ་ཤར་མ་རིག་ཤར། །གསལ་གདངས་མ་ཤར་མུན་པར་སྣང་། །བདེ་བ་མ་མྱོང་སྡུག་བསྔལ་མྱོང་། །ཡུལ་སེམས་དགག་བསྒྲུབ་གཟུང་འཛིན་དང་། །སྣང་བརྟགས་ཆགས་སྡང་ཕྱོགས་རིས་རྣམས། །བསམ་ལས་འདས་པ་བརྗོད་མི་རྫོགས། །རྩ་བ་མ་རིག་ང་བདག་དང་། །གཟུང་འཛིན་ཞེ་འདོད་བྱ་བཙལ་ཡིན། །ཡན་ལག་འགག་མེད་བསམ་མི་ཁྱབ། །ཅེས་གསུངས་སོ། །ཡན་ལག་ཤར་ལུགས་བསྟན་པའི་ལེའུ་སྟེ་ ― DNG002_Page_0678 ―
[མ་དཔེ་གཟིགས་ན་འདིར་གནོན།]
ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་གསང་བའི་བདག་པོ་ལ། །ཡན་ལག་རྩལ་ཟེར་སྙིང་པོར་ཇི་ལྟར་ཐིམ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སྙིང་པོ་ཆོས་དབྱིངས་མཁའ་ཀློང་རྣམ་དག་ཏུ། །འགག་མེད་རྩལ་ཟེར་རིག་ཡིད་སེམས་བློ་རྣམས། །རང་བྱུང་ངང་དྭངས་སྙིང་པོའི་ཀློང་དུ་ཐིམ། །སྙིང་པོ་ཡན་ལག་འཕྲང་རྩལ་རང་ས་ཟིན། །འཁྲུལ་ཆོད་རྒྱས་ཐེབས་སྙིང་པོའི་ཀློང་དུ་གྱུར། །ཡིད་སེམས་དྲན་རིག་ཐམས་ཅད་འཁྲུལ་རྩད་བཅད། །གསལ་དག་ལ་བཟླ་རྒྱུ་རྐྱེན་རྩོལ་མེད་པར། །འཁྲུལ་ཆོད་མུན་པ་སངས་ནས་སངས་རྒྱས་སོ། །ཞེས་གསུངས་སོ། །ཡན་ལག་རྩལ་ཟེར་ཤེས་རིག་དྲན་རྟོག་ཇི་སྙེད་མ་ལུས་པ་སྙིང་པོའི་ཀློང་དུ་འུབ་ཆུབ་ཡོངས་བསྡུས་སུ་ཐིམ་པར་བསྟན་པའི་ལེའུ་སྟེ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་གསང་བའི་བདག་པོ་ལ། །དུག་གསུམ་རྩད་ནས་ཇི་ལྟར་གཅད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དུག་གསུམ་ངོ་ཤེས་རྩད་ནས་བཅད། །སྤང་སྦྱང་བསྒྱུར་བ་མ་ཡིན་ནོ། །གཏི་མུག་འབྱེད་མེད་ཆོས་ཀྱི་སྐུ། །ཞེ་སྡང་འོད་གསལ་ལོངས་སྤྱོད་སྐུ། །འདོད་ཆགས་གསལ་དག་སྤྲུལ་པའི་སྐུ། །ངོ་ཤེས་རྩད་གཅོད་གདེང་ལྡན་ན། །དུས་གསུམ་རྒྱལ་བའི་སྐུ་གསུམ་རྫོགས། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། དུག་གསུམ་རྩད་ནས་གཅད་པའི་ལེའུ་སྟེ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པས་གསང་བའི་བདག་པོ་ལ། །འཁོར་བ་རུ་ནི་ཇི་ལྟར་བཟློག །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཀ་དག་ཡེ་མེད་གདོད་དག་པ། །དེ་ཉིད་མ་རྟོགས་འཁོར་བར་འཁྱམས། །ཀ་དག་དོན་རྟོགས་མྱ་ངན་འདས། །དངོས་མེད་ཀ་དག་སངས་རྒྱས་ཉིད། །ང་བདག་གཟུང་འཛིན་སེམས་ཅན་ནོ། །དངོས་མེད་གཅིག་ལ་འཁོར་འདས་གཉིས། །རྟོགས་དང་མ་རྟོགས་གཉིས་ལས་མེད། །རྟོགས་པ་མྱང་འདས་མ་རྟོགས་འཁོར། །ཀ་དག་ཀློང་ལ་གཉིས་ཀ་མེད། །འཁོར་བར་ལྟུང་བའི་ངོ་བོ་ནི། །མེ་ཡི་ཁྱོ་ལ་མུན་པའི་ཆུང་། །ཕག་པའི་ཡབ་ལ་ཁྱི་ཡི་ཡུམ། །བྱ་སྤྲུལ་ཁྲ་དང་སྤྲེའུའི་བུ། །མཚོ་ཁོལ་མེ་འབར་རྭ་ཆེན་སྐྱེས། །ཞེས་གསུངས་སོ། །སྐྱེ་མེད་ཀ་དག་དཔའ་བོ་ཡིས། །འཁོར་བའི་རུ་བཟློག་དམག་དཔུང་ ― DNG002_Page_0679 ―
[མ་དཔེ་གཟིགས་ན་འདིར་གནོན།]
འཇོམས། །དོན་གཅིག་དངོས་མེད་ཀ་དག་གིས། །ཤེས་རབ་རལ་གྲི་མདའ་གཞུ་ཐོགས། །ཉོན་མོངས་མི་ཤེས་གཡུལ་ངོ་བཟློག །ཐུབ་པ་ཆེན་པོ་ཐུབ་ཆེན་གྱིས། །མི་ཤེས་འཁོར་བའི་དགྲ་དཔུང་འཇོམས། །ཉི་ཟླ་འབར་བའི་སྒྲོན་མེ་ཡིས། །མུན་པའི་ཆུང་མ་བརླག་པར་བྱེད། །གཡོ་རྩོལ་མེད་པའི་རྦ་རླབས་ཀྱིས། །མེ་ཡི་ཁྱོ་བོ་རྩད་ནས་བཅད། །ཤེས་རབ་རལ་གྲིས་ཁྱི་ཕག་བསད། །རྡོ་རྗེ་ཆེན་པོའི་མདའ་གཞུ་ཡིས། །བྱ་སྦྲུལ་ཁྲ་དང་སྤྲེའུ་བསད། །ཐེག་པ་ཆེན་པོས་སྡུག་བསྔལ་གཅོད། །རང་བཞིན་ངོ་བོ་ཐུགས་རྗེ་གསུམ། །ཡོན་ཏན་ཕྲིན་ལས་ཐོགས་མེད་ལྔས། །འཁོར་བ་རུ་བཟློག་སྐུ་ལྔར་བསྒྱུར། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། འཁོར་བ་རུ་བཟློག་པའི་ལེའུ་སྟེ་བརྒྱད་པའོ།། །།དེ་ནས་སེམས་དཔའ་རྡོ་རྗེ་ཡིས། །བཅོམ་ལྡན་གསང་བའི་བདག་པོ་ལ། །འགྲོ་དྲུག་གཡང་ས་ཇི་ལྟར་གཅད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཀ་དག་དངོས་མེད་ཅང་མེད་ལས། །དེ་མ་རྟོགས་པས་འགྲོ་དྲུག་འཁྲུལ། །དངོས་མེད་མ་རྟོགས་ཞེ་སྡང་སྐྱེས། །དམྱལ་བར་སྐྱེས་ནས་བཙོ་སྲེག་བྱེད། །བརྒྱད་གཉིས་སྡུག་བསྔལ་ཟད་མེད་མྱོང་། །དངོས་མེད་མ་རྟོགས་སེར་སྣ་སྐྱེས། །ཡི་དྭགས་གནས་སྐྱེས་བཀྲེས་སྐོམ་སྡུག །སྒྲིབ་གསུམ་སྡུག་བསྔལ་ཟད་མེད་མྱོང་། །ཀ་དག་མ་རྟོགས་གཏི་མུག་སྐྱེས། །བྱོལ་སོང་གནས་སྐྱེས་གླེན་ལྐུགས་མྱོང་། །རྐང་མངས་རྐང་གཉིས་རྐང་བཞི་དང་། །རྐང་མེད་ལ་སོགས་བསམ་ལས་འདས། །དངོས་པོ་མེད་ལས་ཕྲག་དོག་སྐྱེས། །མི་ཡི་གནས་སྐྱེས་ཕྲག་དོག་སྤྱོད། །བརྒྱད་དང་བཅུ་དྲུག་སྡུག་བསྔལ་མྱོང་། །དངོས་པོ་མེད་ལས་འདོད་ཆགས་སྐྱེས། །ལྷ་ཡི་གནས་འཁྲུལ་ལེ་ལོ་སྤྱོད། །ལོངས་སྤྱོད་གཡེང་བའི་སྡུག་བསྔལ་མྱོང་། །དངོས་པོ་མེད་ལས་ང་རྒྱལ་སྐྱེས། །ལྷ་མིན་གནས་སུ་འཁྲུག་པ་སྤྱོད། །འཐབ་རྩོད་མཚོན་ཆའི་སྡུག་བསྔལ་མྱོང་། །དེ་ལྟར་འགྲོ་དྲུག་འཁྲུལ་སྐྱེས་ཀྱང་། །དངོས་མེད་ཀ་དག་ཆོ་འཕྲུལ་ཡིན། །དངོས་མེད་ཆོ་འཕྲུལ་རྩད་བཅད་པས། །འགྲོ་དྲུག་གཡང་ས་ཆོད་པར་བསྟན། །ཀ་དག་དོན་རྟོགས་ཞེ་སྡང་མེད། །དམྱལ་བའི་གནས་འཁྲུལ་རྩད་ནས་བཅད། །བཙོ་བསྲེག་མིང་མེད་ལོངས་སྤྱོད་རྫོགས། །དམྱལ་བར་སྐྱེ་བའི་གཡང་ས་བཅད། །ཀ་ ― DNG002_Page_0680 ―
[མ་དཔེ་གཟིགས་ན་འདིར་གནོན།]
དག་དོན་རྟོགས་སེར་སྣ་མེད། །ཡི་དྭགས་རྩད་བཅད་འོད་གསལ་སྐུ། །བཀྲེས་སྐོམ་སྐྱེ་བའི་གཡང་ས་གཅད། །གསལ་དག་འོད་གསལ་གཏི་མུག་མེད། །བྱོལ་སོང་གནས་འཁྲུལ་རྩད་ནས་ཆོད། །བླུན་ལྐུགས་སྡུག་བསྔལ་མིང་ཡང་མེད། །མིང་མེད་གཏི་མུག་ཆོས་ཀྱི་སྐུ། །རང་བྱུང་ངང་དྭངས་ཕྲག་དོག་མེད། །མི་ཡི་གནས་འཁྲུལ་སྐྱེ་རྩད་གཅད། །ཆུང་བཞི་ཆེ་བཞིའི་སྡུག་བསྔལ་མེད། །ཕྲག་དོག་ཆེན་པོ་བདེ་ཆེན་སྐུ། །ཀ་དག་དོན་རྟོགས་ང་རྒྱལ་མེད། །ལྷ་མིན་འཁྲུལ་གཅད་འཐབ་རྩོད་མེད། །ང་རྒྱལ་དབྱེར་མེད་ངོ་བོའི་སྐུ། །དངོས་མེད་འོད་གསལ་འདོད་ཆགས་མེད། །ལྷ་ཡི་འཁྲུལ་གཅད་ལེ་ལོ་མེད། །འདོད་ཆགས་ཞེན་འཁྲུལ་སྤྲུལ་པའི་སྐུ། །དེ་ལྟར་འགྲོ་དྲུག་གཡང་ས་གཅད། །སྐུ་ལྔ་དབྱེར་མེད་དངོས་མེད་རྫོགས། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། འགྲོ་དྲུག་གཡང་ས་གཅོད་པའི་ལེའུ་སྟེ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་གསང་བའི་བདག་པོ་ལ། །སྙིང་པོ་ཀ་དག་གང་གིས་རྟོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་ཀ་དག་རྟོགས་ཐབས་ནི། །བྱར་མེད་ཞེ་འདོད་མེད་པ་ལས། །རྩོལ་བསྒྲུབ་བདེན་གཉིས་བློས་མི་རྟོག །རང་བྱུང་སར་ཐིམ་དབྱེར་མེད་རྟོགས། །ངང་དྭངས་རྩོལ་བསྒྲུབ་དྭངས་སང་ངེ་། །རང་བྱུང་རང་རླག་རིག་མེད་རྟོགས། །གསལ་དྭངས་རང་སངས་གོ་སྐབས་མེད། །སྟོང་གསལ་རིག་མེད་ཐ་སྙད་མེད། །དངོས་མེད་ཀ་དག་རྟོགས་པ་ཡིན། །ཡེངས་མེད་ཕྱད་དེ་བུན་ནེ་བ། །སང་ངེ་སལ་ལེ་མེར་ཁྱིལ་ལེ། །དེ་རྣམས་མིང་ཡིན་བློ་ལས་འདས། །ཀ་དག་དངོས་མེད་ཟང་ཀ་དེ། །རང་གི་མཐུ་ཡིས་རིག་པ་ལས། །ཆོས་ནི་གཞན་ནས་འབྱུང་མི་འགྱུར། །བྱར་མེད་རྩོལ་མེད་བསམ་དུ་མེད། །དངོས་མེད་རྣལ་མ་བློ་འདས་ཀྱིས། །སྙིང་པོ་ཀ་དག་རྟོགས་པ་ཡིན། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། ཀ་དག་རྟོགས་ཐབས་ཀྱི་ལེའུ་སྟེ་བཅུ་པའོ།། །།དེ་ནས་རྡོ་རྗེ་སེམས་དཔའ་ ― DNG002_Page_0681 ―
[མ་དཔེ་གཟིགས་ན་འདིར་གནོན།]
ཡིས། །བཅོམ་ལྡན་གསང་བའི་བདག་པོ་ལ། །གསང་སྔགས་བརྡའ་ཡིས་ཇི་ལྟར་བཤད། །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། ཨ་ཨ་བྷོ་ཡ། ཧྲི་ཐ་ར་ས། དྷརྨ་སརྦ། དྷཱ་ཏུ་ཨ་ཨ། ང་ཡིས་གསང་སྔགས་བརྡའ་ཡིས་བཤད། །འཁོར་རྣམས་མ་ཡེངས་བརྡའ་ལ་ཉོན། །ཨ་པ་ར་སི་ཏི་ཨ། སྟོང་གསལ་ཕྱང་ཆད་ཀྱི་ལྷ་ཁང་ན། རླུང་སྨྱོ་ཀུན་བྱེད་ཀྱི་མིས་བལྟས་པས། ཅི་ཡང་མི་འདུག་གང་མ་མཐོང་། དེར་ཁོའི་བསམ་པ་སྡུག། དྲན་པ་བརླགས་བློ་སྟོར་རོ། །རིག་པས་མཐའ་གང་དུ་ཡང་མཚོན་བརྗོད་ཀྱི་ཚིག་ཅི་ཡང་སྨྲ་མི་ཤེས་སོ། །སྔོན་རོལ་མིང་མ་ཐོགས་ཀྱི་བརྡའོ། །ཁ་དོག་ལྔ་གསལ་རིན་པོ་ཆེའི་ལྷ་ཁང་ན། སྨིག་རྒྱུའི་རྟ་ལ་འཇའ་ཚོན་གྱི་མིས་ཞོན་ནས་བལྟས་པས། ལྷ་ཁང་དེ་ན་གསལ་དག་འོད་ཀྱི་ལྷ་དང་། གཡོ་ཙམ་མི་གཡོ་ཙམ་གྱི་ལྷ་འདུག་གོ། །སེམས་ཅན་སངས་རྒྱས་ཀྱི་གཞི་མཚོན་པའི་བརྡའོ། །འགྱུ་བ་རླུང་གི་རྟ་ཕོ་ལ། ཤེས་རིག་ཡིད་སེམས་ཀྱི་མིས་ཞོན་ནས། འོད་གསལ་རྩལ་བྱུང་གི་ལྷ་ཁང་དུ་ཕྱིན་ནས་བལྟས་པས། ལྷ་འགའ་ཞིག་གཡོ་འགུལ་མེད་པར་བཞུགས། ལྷ་འགའ་ཞིག་འགུལ་བསྐྱོད་དང་བཅས་ནས་འདུག་གོ། །སྤྱི་སའི་སོ་མཚམས་མཚོན་པའི་བརྡའོ། །ན་བུན་ཁ་རླངས་ཀྱི་རྟ་ཕོ་ལ། འགྱུར་བ་སྤྲེའུའི་མིས་ཞོན་ནས། ཡར་འགྲོ་མར་འགྲོའི་སོ་མཚམས་ན་ལྷ་ཁང་གཉིས་ཡོད་པ་ལ། སྒོ་གང་ཕྱེ་ནས་འདུག་བལྟས་པས། འོད་གསལ་ངང་དྭངས་བྱུང་ནས་རིན་པོ་ཆེ་གསལ་དག་རྣམ་དག་ལྷ་ཁང་གི་སྒོ་ཕྱེ། ངར་འཛིན་མུན་ནག་གྲོང་རྒྱུག་མཁན་བྱུང་ནས་མུན་པ་ལྷ་ཁང་གི་སྒོ་ཕྱེའོ། །ཞེས་གསུངས་སོ། །འཆར་སྒོ་དང་འཁྲུལ་སྒོའི་བརྡའོ། །འགྱུ་བ་ཡིད་ཀྱི་རྟ་ཕོ་ལ། རིག་སེམས་དྲན་རྟོག་བློའི་མིས་ཞོན་ནས། འཕྲང་གསུམ་སྦུབས་གསུམ་དུ་ཕྱིན་པས། ལོང་མ་དུག་གསུམ་གྱི་འཁར་བ་ཅན་དང་འཕྲད་ནས། ཁྱོད་ངའི་མུན་པའི་གཡུང་དྲུང་ལ་མི་བལྟ་བ་ཅི་ཉེས། མུན་པའི་ལྷ་ཁང་ལྟོས་ལ། ཁྱོད་ ― DNG002_Page_0682 ―
[མ་དཔེ་གཟིགས་ན་འདིར་གནོན།]
མེད་པ་ལ་ཡོད་པར་ཟུང་ཞིག །མི་བདེན་པ་ལ་བདེན་པར་ཟུང་ཞིག །མི་རྟག་པ་ལ་རྟག་པར་ཟུང་ཞིག །དོན་དམ་ལ་ཀུན་རྫོབ་ཏུ་ཟུང་ཞིག །ཀ་དག་ལ་མ་དག་པར་ཟུང་ཞིག །བདེ་བ་ལ་སྡུག་བསྔལ་དུ་ཟུང་ཞིག །གཉིས་མེད་ལ་གཉིས་སུ་ཟུང་ཞིག །དངོས་མེད་ལ་སྣ་ཚོགས་སུ་ཟུང་ཞིག །རྟོགས་པ་ལ་མ་རྟོགས་པར་ཟུང་ཞིག །ཀ་དག་ལ་སྒྲིབ་བཅས་སུ་ཟུང་ཞིག །སངས་རྒྱས་ལ་སེམས་ཅན་དུ་ཟུང་ཞིག །མྱ་ངན་ལས་འདས་པ་ལ་འཁོར་བར་ཟུང་ཞིག །སྐུ་གསུམ་ལ་དུག་གསུམ་དུ་ཟུང་ཞིག །ཞིང་ཁམས་རྣམ་གསུམ་ལ་དམྱལ་བ་ཡི་དྭགས་ངན་སོང་གསུམ་དུ་ཟུང་ཞིག །ཐོ་དང་ཐག་པ་དང་། སྨིག་རྒྱུ་ལ་མི་སྦྲུལ་ཆུ་དང་གསུམ་དུ་ཟུང་ཞིག །ཅེས་འཁྲུལ་པ་དང་འཁྲུལ་སྣང་འཁོར་བ་བརྡས་བསྟན་པའོ། །དེ་ནས་ཡང་ཡེ་ཤེས་བརྡར་གསུངས་པ། འཇའ་ཚོན་འོད་གློག་གི་རྟ་ཕོ་ལ། དྭངས་གསལ་ངང་དྭངས་ཀྱི་མིས་ཞོན་ནས། གཡས་སུ་ཉི་མ་ཐོགས། གཡོན་དུ་ཟླ་བ་ཐོགས། རལ་གྲི་གླད་ལ་བསྐོར། སྤུ་གྲིས་རླུང་དང་ཆུ་གཉེར་སྤྲེའུ་བསད་ནས། ཆོས་དབྱིངས་སྙིང་པོ་འདུས་མ་བྱས་ཀྱི་ལྷ་ཁང་དུ་ཕྱིན་པས། ཀ་དག་ཡེ་གདངས་ཀྱི་ལྷ་དང་ཕྲད་པས། དངོས་མེད་རྣལ་མ་ཀ་དག་ཟང་ཀར་གྱུར། ཡིད་རིག་སེམས་བློ་དྲན་རྟོག་ངང་དྭངས་སྙིང་པོ་མ་དང་འཕྲད། འཁྲུལ་པ་རྩད་ནས་ཆོད། ཡེ་ཤེས་རང་ས་ཟིན། སྣང་བ་རང་སར་གྲོལ། སྙིང་པོ་ཀློང་ནས་ཤར། ཡེ་ཤེས་དབྱིངས་སུ་ཐིམ། འགྱུར་མེད་རྒྱ་ཡིས་ཐེབས། དུག་གསུམ་སྡོང་པོ་ཆོད། འགྲོ་དྲུག་གཡང་ས་གཅད། འཁོར་བ་དོང་ནས་སྤྲུགས། སྲིད་པ་རུ་ནས་བཟློག །ནོར་བུ་རིན་ཆེན་རྙེད། མུན་རུམ་ནང་དུ་ཉི་ཟླ་ཤར། དུག་ལ་སྔགས་ཐེབས། གསེར་འགྱུར་རྩི་དང་ལྡན། ཟས་ཀྱི་བཅུད་འཐུང་། བདེ་ཆེན་ཀློང་དུ་ཉལ། ནོར་གྱི་དབྱིག་རྙེད་ཟད་མེད་གཏེར་ལ་སྤྱོད། ཀ་དག་དོན་རྟོགས་འགྲོ་དྲུག་གཡང་ས་གཅད། དངོས་མེད་གདེང་རྙེད་སངས་རྒྱས་འཁོར་བ་མེད། རང་སར་རང་གྲོལ་ཆགས་སྡང་མིང་ཡང་མེད། ཡུལ་ ― DNG002_Page_0683 ―
[མ་དཔེ་གཟིགས་ན་འདིར་གནོན།]
སེམས་གཟུང་འཛིན་དགག་བསྒྲུབ་དབྱེ་བསལ་མེད། །དགྲ་གཉེན་ཕྱོགས་རིས་སྤང་ལེན་རྩིས་གདབ་མེད། །དུག་ལྔ་རྩད་གཅད་འཁོར་བའི་མིང་ཡང་མེད། །ཞེ་འདོད་བྱ་བཙལ་རྩད་བཅད་འབད་རྩོལ་མེད། །ཅེས་གསུངས་སོ། །ཡེ་ཤེས་འཆར་སྒོ་བརྡར་བསྟན་པའོ། །ནམ་མཁའ་ཀློང་ཡངས་ཀྱི་རྒྱུད་ལས། གསང་སྔགས་བརྡས་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་རྡོ་རྗེ་སེམས་དཔའ་ཡིས། །གསང་བའི་བདག་པོ་ལ་ཞུས་པ། །དངོས་མེད་རྣལ་རྟོགས་ལྟ་སྒོམ་མི་འཚལ་ལམ། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །དངོས་མེད་ཀ་དག་རྟོགས་པ་ན། །ལྟ་སྒོམ་སྤྱོད་འབྲས་བློ་ཡི་ཡུལ། །ཞེ་འདོད་བསམ་དཔྱད་ཡིད་སྨོན་མེད། །ཀ་དག་དངོས་མེད་རྣལ་མ་སྒྲུབ་མེད་བློ་ལས་འདས། །ཀ་དག་ཚིག་མེད་རྟེན་མེད་ལ། །ཞེ་འདོད་ཕྱོགས་ཆའི་བལྟ་བ་མེད། །དངོས་མེད་འགྱུར་མེད་རྟོག་མེད་ལ། །འགྱུ་བ་བསམ་དམིགས་བསྒོམ་པ་མེད། །ཟང་ཀ་སོ་མ་རང་ལུགས་ལ། །ཆེད་བྱས་རྩོལ་བསྒྲུབ་བྱ་བཙལ་མེད། །གདོད་ནས་ཡེ་གནས་བསྒྲུབ་མེད་ལ། །རེ་དོགས་ཡིད་སྨོན་འབྲས་བུ་མེད། །དངོས་མེད་ཀ་དག་གཅིག་རྟོགས་ན། །ལྟ་སྒོམ་སྤྱོད་འབྲས་མིང་ཡང་མེད། །ཅེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། དངོས་མེད་རྟོགས་ན་བལྟ་བསྒོམ་སྤྱོད་འབྲས་མི་དགོས་པར་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་གསང་བའི་བདག་པོ་ལ། །ཆོས་རྣམས་གོ་ལྡོག་ཇི་ལྟར་ཟློག །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །ཆོས་རྣམས་གོ་ལྡོག་མ་བཤད་ན། །ཀ་དག་སངས་རྒྱས་ག་ལ་འཐོབ། །དེས་ན་ཆོས་རྣམས་གོ་ལྡོག་བཤད། །འཁོར་རྣམས་མ་ཡེངས་གུས་པར་ཉོན། །སྙིང་པོ་བཅུད་སྤུངས་ཀློང་ཡངས་སུ། །རྩལ་ཟེར་མ་འགགས་གོ་ལྡོག་ལ། །སྣང་སྲིད་འཁོར་འདས་འུབ་ཆུབ་བོ། །ངོ་འཕྲད་དབྱེར་མེད་ཀ་དག་གྲོལ། །དགུ་རྩེ་སྤྱི་ཏིའི་གོ་ལྡོག་ནི། །ཐེག་པའི་ཆོས་རྣམས་གོ་ལྡོག་ ― DNG002_Page_0684 ―
[མ་དཔེ་གཟིགས་ན་འདིར་གནོན།]
ལ། །ཆོས་ལས་འདས་པས་ཀ་དག་རྟོགས། །གཞན་དག་འཁྲུལ་གཞི་ཀུན་གཞིར་འདོད། །ཀུན་གཞི་གོ་ལྡོག་ཀླུང་ཡིན་ནོ། །འཁྲུལ་རྒྱུ་མ་རིག་ཡིན་པར་འདོད། །མ་རིག་གོ་ལྡོག་རིག་པ་ཡིན། །དུག་གསུམ་གོ་ལྡོག་སྐུ་གསུམ་ཡིན། །མུན་པ་གོ་ལྡོག་གསལ་དག་རྟོགས། །འཁྲུལ་པ་གོ་ལྡོག་འཆར་སྒོ་རྟོགས། །མ་རིག་གོ་ལྡོག་ཀ་དག་རྟོགས། །འཁྲུལ་སྣང་གོ་ལྡོག་འོད་སྣང་རྟོགས། །རྩད་གཅོད་རང་གྲོལ་རང་སངས་རྟོགས། །སེམས་ཅན་གོ་ལྡོག་སངས་རྒྱས་རྟོགས། །འཁོར་བ་གོ་ལྡོག་མྱང་འདས་རྟོགས། །གོ་ལྡོག་གདམས་པ་གསུམ་དུ་བཤད། །ཆོས་རྣམས་བོར་བས་ཀ་དག་རྟོགས། །སེམས་ཅན་ལས་འདས་དངོས་མེད་རྟོགས། །སྣ་ཚོགས་མིང་མེད་བློ་འདས་རྟོགས། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། གོ་ལྡོག་རྟོགས་པར་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་གསང་བའི་བདག་པོ་ལ། དུག་ལྔ་ཇ་ལོག་ཇི་ལྟར་འགྱུར། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །དུག་ལྔ་ཇ་ལོག་སྐུ་ལྔར་འགྱུར། །གཏི་མུག་ཇ་ལོག་ཆོས་སྐུར་འགྱུར། །ཞེ་སྡང་ཇ་ལོག་ལོངས་སྐུར་འགྱུར། །འདོད་ཆགས་ཇ་ལོག་སྤྲུལ་སྐུར་འགྱུར། །ང་རྒྱལ་ཇ་ལོག་དབྱེར་མེད་སྐུ། །ཕྲག་དོག་ཇ་ལོག་བརྗོད་མེད་སྐུ། །དུག་ལྔ་ཇ་ལོག་སྐུ་ལྔར་འགྱུར། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། དུག་ལྔ་ཇ་ལོག་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་གསང་བའི་བདག་པོ་ལ། །ཐམས་ཅད་ལ་ནི་གང་དུ་བཟླ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །སྙིང་པོ་ཆོས་དབྱིངས་ཀློང་ཡངས་སུ། །མ་འགགས་རྩལ་ཟེར་ཇི་སྙེད་པ། །མ་ལུས་འུབ་ཆུབ་སྙིང་པོར་བཟླ། །ཀ་དག་ཟང་ཀ་དངོས་མེད་དུ། །སྣང་སྲིད་འཁོར་འདས་རྟག་ཆད་རྣམས། །ཐམས་ཅད་ཐམས་ཅད་ཇི་སྙེད་ལ། །གང་ལའང་མི་འགྱུར་རྩིས་གདབ་མེད། །ཡིད་ ― DNG002_Page_0685 ―
[མ་དཔེ་གཟིགས་ན་འདིར་གནོན།]
སེམས་བློ་ཡི་འཛིན་རྟོག་མེད། །མ་ལུས་རིལ་པོ་བློ་ལས་འདས། །སངས་རྒྱས་ཀ་དག་དངོས་མེད་པས། །གཞན་རྣམས་མེད་པར་ལ་བཟླའོ། །སངས་རྒྱས་སྐུ་དང་ཡེ་ཤེས་མེད། །སེམས་ཅན་ལུས་དང་བག་ཆགས་མེད། །སྐུ་ལྔ་རིགས་ལྔ་དུག་ལྔ་མེད། །འཁོར་བ་མྱང་འདས་བྱང་ཆུབ་མེད། །འཁོར་བའི་ཆོས་ལ་ལྟ་ཅི་སྨོས། །བལྟ་བསྒོམ་སྤྱོད་པ་འབྲས་བུ་དང་། །འདུལ་སྡོམ་བསླབ་པ་དམ་ཚིག་མེད། །ཕར་ཕྱིན་ལམ་ལྔ་ས་བཅུ་མེད། །ཐམས་ཅད་དངོས་མེད་ཟང་ཀར་བཟླ། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། ཐམས་ཅད་ལ་བཟླ་བའི་ལེའུ་སྟེ་བཅོ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་གསང་བདག་ཆེན་པོ་ལ། །མདོ་དོན་གཅིག་ཏུ་ཇི་ལྟར་བསྡུ། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། །མ་ཕྱེ་མ་བཀོལ་སྙིང་པོའི་ཀློང་། །སྣང་བརྟག་བཟུང་ཞེན་ཇི་སྙེད་ཀུན། །སྙིང་པོ་ཆོས་ཉིད་ཀློང་དུ་འདུས། །དངོས་པོ་ཐམས་ཅད་དངོས་མེད་ཀློང་དུ་འདུས། །སྣང་སྲིད་འཁོར་འདས་གཉིས་མེད་ཀློང་དུ་འདུས། །མཚོན་བརྗོད་བཏགས་ཆགས་མཚོན་མེད་ཀློང་དུ་འདུས། །བལྟ་བསྒོམ་གྲུབ་མཐའ་བློ་འདས་ངང་དུ་འདུས། །ཚིག་ཚོགས་རྒྱ་མཚོ་བརྗོད་མེད་གཅིག་ཏུ་འདུས། །འབྲས་བུ་ཐམས་ཅད་ཀ་དག་གཅིག་ཏུ་འདུས། །དགོངས་པ་བརྒྱད་ཁྲི་བསམ་འདས་ངང་དུ་འདུས། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། མདོ་དོན་གཅིག་ཏུ་འདུས་པར་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་གསང་བདག་ཆེན་པོ་ལ། །སྙིང་པོ་བཅུད་ནི་གང་དུ་སྤུངས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །མཁའ་དབྱིངས་རྣམ་དག་འོད་གསལ་ཀློང་ཆེན་དུ། །རང་བྱུང་རྩལ་ཟེར་ཡན་ལག་མ་ལུས་སྤུངས། །ཀ་དག་དངོས་མེད་ཟང་ཀ་ཆེན་པོ་རུ། །སྣང་སྲིད་འཁོར་འདས་ཡོད་མེད་རྟག་ཆད་སྤུངས། །ཡེ་གདངས་གསལ་ལ་དྭངས་པའི་ཀློང་ཆེན་ ― DNG002_Page_0686 ―
[མ་དཔེ་གཟིགས་ན་འདིར་གནོན།]
དུ། །རང་བྱུང་ངང་དྭངས་ཆེན་པོར་བཅུད་སྤུངས་སོ། །སྙིང་པོ་ཆོས་ཉིད་ཀུན་གཞིའི་ཀློང་ཡངས་སུ། །རྩལ་ཟེར་སྣ་ཚོགས་མ་འགགས་བཅུད་སྤུངས་སོ། །རང་བྱུང་རང་སར་བརླག་པས་བཅུད་སྤངས་སོ། །རང་དྭངས་རང་སངས་ཆེན་པོར་བཅུད་སྤུངས་སོ། །ཡིད་སེམས་གང་ལ་འཛིན་མེད་བཅུད་སྤུངས་སོ། །ཀ་དག་ཟང་ཀ་ཆེན་པོར་བཅུད་སྤུངས་སོ། །ཤེས་རིག་གང་ལའང་མི་འཇུག་བཅུད་སྤུངས་སོ། །ཡིད་གཉིས་རྩད་ཆོད་གཟུང་འཛིན་གཉིས་མེད་བཅུད་སྤུངས་སོ། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། སྙིང་པོའི་བཅུད་སྤུངས་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་གསང་བདག་ཆེན་པོ་ལ། །ནམ་མཁའ་ཀློང་ཡངས་དཔེ་ཡིས་ཇི་ལྟར་བསྟན། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་ཀ་དག་དཔེ་མེད་ཀྱང་། །འཁོར་གྱི་རྟོག་པ་བསལ་ཕྱིར་དཔེ་ཡིས་བསྟན། །འཁོར་རྣམས་མ་ཡེངས་གུས་པར་ཉོན། །སེམས་ཀྱི་དཔེ་ནི་ནམ་མཁའ་བསྟན། །ནམ་མཁའ་མཚོན་པ་ཀུན་དང་བྲལ། །ནམ་ནི་སྐྱེ་བ་མེད་པ་ཡིན། །མཁའ་ནི་འགག་པ་མེད་པ་ཡིན། །སྐྱེ་འགག་གཉིས་སུ་མེད་པ་དེ། །སྙིང་པོ་ཆོས་ཉིད་ཀློང་དུ་འདུས། །ནམ་མཁའ་ཕྱོགས་རིས་ཀུན་དང་བྲལ། །ནམ་མཁའ་ཞེས་ནི་མཚོན་པ་ཡང་། །མ་རྟོགས་བློ་ལ་མཚོན་པ་ཡིན། །ནམ་མཁའ་ཐ་སྙད་ཀུན་དང་བྲལ། །སྐྱེ་མ་མྱོང་ལ་འགག་མ་མྱོང་། །གཉིས་སུ་མ་ཆད་གཅིག་མ་མྱོང་། །མཚོན་དུ་མེད་པས་མཚོན་ལས་འདས། །སྣང་མེད་མི་སྣང་བ་ལས་འདས། །མིང་འདོགས་མེད་པས་བཏགས་ཆགས་འདས། །མིང་མེད་ཚིག་ཏུ་བརྗོད་ལས་འདས། །ནམ་མཁའ་དེ་ནི་བསྐལ་པ་ནས། །བསྐལ་པའི་བར་དུ་ཡོད་མ་མྱོང་། །མེད་མ་མྱོང་ལ་སྟོང་མ་མྱོང་། །སྣང་མ་མྱོང་ལ་གསལ་མ་མྱོང་། །བཟང་ངན་བདེ་དང་སྡུག་མ་མྱོང་། །འཁྲུལ་དང་འཁོར་དང་རྒྱས་མ་མྱོང་། །མི་རྒྱས་མ་མྱོང་ནམ་མཁའ་ནི། །ཁ་དོག་ཕྱོགས་མཚམས་བརྗོད་ལས་འདས། །དེ་བཞིན་སེམས་ཉིད་ཀ་དག་སྟེ། །ཐ་སྙད་མཚོན་ཚིག་བློ་ལས་འདས། །ཀློང་ཡངས་ཞེས་བྱའི་དཔེ་ཡིས་ནི། །ཞེ་འདོད་རྟེན་མེད་བལྟ་བའི་ཀློང་ཡངས་སོ། །ཡིད་རིག་གང་ལའང་མི་རྟོག་བསྒོམ་པའི་ཀློང་ཡངས་སོ། ། ― DNG002_Page_0687 ―
[མ་དཔེ་གཟིགས་ན་འདིར་གནོན།]
སྣ་ཚོགས་ཡུལ་ལ་མ་ཆགས་སྤྱོད་པའི་ཀློང་ཡངས་སོ། །ཀ་དག་བློ་ལས་འདས་པ་འབྲས་བུའི་ཀློང་ཡངས་སོ། །གཡོ་འགུལ་དྲན་རྟོག་མི་འགྱུ་དགོངས་པའི་ཀློང་ཡངས་སོ། །དབྱེ་བསལ་མེད་པ་ཤེས་རབ་ཀློང་ཡངས་སོ། །བསྲུང་བ་མེད་པས་དམ་ཚིག་ཀློང་ཡངས་སོ། །བྱ་རྩོལ་མེད་པ་ཕྲིན་ལས་ཀློང་ཡངས་སོ། །སྤྱད་དུ་མེད་པ་ས་ཡི་ཀློང་ཡངས་སོ། །བགྲོད་དུ་མེད་པ་ལམ་གྱི་ཀློང་ཡངས་སོ། །ཆོས་རྣམས་དབྱེར་མེད་སྙིང་པོའི་ཀློང་ཡངས་སོ། །ཐོག་མ་མེད་ནས་ཐ་མ་ད་ལྟའི་བར། །དངོས་མེད་རྣལ་མར་རྒྱུན་དུ་གནས་པའི་ཕྱིར། །ཀ་དག་འགྱུར་བ་མེད་པའི་རྒྱུད། །རང་བཞིན་ངང་དུ་གནས་པའི་ཕྱིར། །ཡེ་ཤེས་རྒྱུན་ཆད་མེད་པའི་རྒྱུད། །ཀ་དག་འགྱུར་བ་མེད་པའི་ཕྱིར། །དུས་གསུམ་ཀུན་ཏུ་འཕོ་འགྱུར་མེད་པའི་རྒྱུད། །དེ་ཕྱིར་སྙིང་པོ་བཅུད་སྤུངས་ནམ་མཁའ་ཀློང་ཡངས་སོ། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། རྒྱུད་ཀྱི་མཚན་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་གསང་བའི་བདག་པོ་ལ། །ཐེག་པ་བརྒྱད་ཁྲི་བཞི་སྟོང་གང་དུ་འདུས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྤྱི་ཏི་ཡོ་གའི་ཐེག་པ་རུ། །ཐེག་ཆོས་བརྒྱད་ཁྲི་བཞི་སྟོང་འདུས། །མི་འགེག་མི་སྦྱོང་མ་བསྒྱུར་བར། །ཆོས་སྡེ་བརྒྱད་ཁྲི་བཞི་སྟོང་འདུས། །གཟུང་འཛིན་རྟེན་འདྲེལ་ཡུལ་སེམས་དང་། །བདེན་གཉིས་མེད་པས་མཚན་ཉིད་འདུས། །དག་གསུམ་སྐྱེ་འགག་རྩེ་གཉིས་མེད། །ཕྱི་རྒྱུད་སྡེ་གསུམ་ཐེག་པ་འདུས། །སྣང་སྟོང་དབྱིངས་དང་ཡེ་ཤེས་མེད། །རང་བྱུང་ཡེ་ཤེས་སྣང་བ་འདི། །ཆོས་སྐུར་འདོད་པ་མེད་པ་ཡིས། །བསྐྱེད་རྫོགས་རྣམ་གསུམ་ཐེག་པ་འདུས། །རིམ་དགུ་སྤྱི་ཏི་ཡོ་གར་འདུས། །སྣང་སྲིད་ཆོས་རྣམས་ཡོད་མེད་རྟག་ཆད་རྫོགས། །ཞེས་གསུངས་སོ། །ནམ་མཁའ་ཀློང་ཡངས་ཀྱི་རྒྱུད་ལས། སྤྱི་ཏི་ཡོ་གའི་ཐེག་པར་བརྒྱད་ཁྲི་བཞི་སྟོང་རྫོགས་པར་འདུས་པར་བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་གསང་བའི་བདག་པོ་ལ། །རྒྱུད་འདིའི་མཚན་ནི་ཇི་ ཐུགས་ཀྱི་ཡང་སྙིང་དགོངས་པའི་བཅུད་འདུས་པ། བཀའ་རྒྱུད་རྣམས་ཀྱི་གསང་དོན་བཅུད་དྲིལ་བ་མ་རིག་མུན་སེལ་ཉི་ཟླ་འབར་བའི་རྒྱུད།― DNG002_Page_0688 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཙིཏྟ་པྲ་ཧྲྀ་ད་ཡཱ་ཤཱ་ཡ་སུ་ར་ས་མུ་དཱ་ཡ་ཤུཌྜྷ་གུ་ཧྱཱརྠ་སུ་ར་སཾ་ཧཱ་རཱ་བདྱཱ་ཏ་མཿཀྵྀབྣུ་སཱུརྱ་ཙནྡྲ་ཛྭ་ལ་ཏནྟྲ། བོད་སྐད་དུ། ཐུགས་ཀྱི་ཡང་སྙིང་དགོངས་པའི་བཅུད་འདུས་པ། བཀའ་རྒྱུད་ ― DNG002_Page_0689 ―
[མ་དཔེ་གཟིགས་ན་འདིར་གནོན།]
རྣམས་ཀྱི་གསང་དོན་བཅུད་དྲིལ་བ་མ་རིག་མུན་སེལ་ཉི་ཟླ་འབར་བའི་རྒྱུད། ཡེ་གནས་ཐོག་མའི་སངས་རྒྱས་འོད་གསལ་ངང་དྭངས་ལ་ཕྱག་འཚལ་ལོ། །འདི་སྐད་བདག་གིས་གོ་ཞིང་རྟོགས་པའི་དུས་གཅིག་ན། ཆོས་ཉིད་ཀྱི་ཀློང་དབྱིངས་ཀྱི་སྟོང་ར་ན། མཁའ་ཀློང་རྣམ་པར་དག་པའི་གནས། །འོད་སྣ་ཚོགས་གཅིག་ཏུ་འདུས་པ། རིན་པོ་ཆེ་སྤུངས་པ་རྣམ་པར་དག་པ་བསམ་གྱིས་མི་ཁྱབ་པའི་དཀྱིལ་འཁོར་རྒྱ་ཡོངས་སུ་མ་ཆད། ཕྱོགས་གང་དུ་ཡང་མ་ལྷུང་། སྒྲིབ་པ་མེད་པ་རང་བཞིན་གྱིས་འོད་གསལ་བ། དབྱིངས་རྣམ་པར་དག་པའི་མཁའ། སྣང་སྲིད་སྐྱེ་འགྲོ་ཐམས་ཅད་བསྡུས་པའི་གནས་དེ་ན། ཡེ་ཐོག་མའི་སངས་རྒྱས་འོད་མི་འགྱུར་བའི་རང་བཞིན། ཀུན་ཏུ་བཟང་པོ་ཞེས་བྱ་བ་བཞུགས་སོ། །དེའི་ཚེ་རང་བྱུང་གི་སྟོན་པའི་འཁོར་འདི་ལྟ་སྟེ། རྣམ་པར་དག་པ་བདེ་གསལ་འོད་ཁང་ན། རང་གསལ་སེམས་དཔའ་རྡོ་རྗེ་ལ། རང་བྱུང་གི་འཁོར་དང་། རང་གསལ་སེམས་ཀྱི་འཁོར་དང་། དྲན་རྟོག་བློའི་འཁོར་དང་། རྩལ་ཟེར་བུའི་འཁོར་འདི་ལྟ་སྟེ། འོད་གསལ་རིན་པོ་ཆེའི་དཀྱིལ་འཁོར་ན། དབྱེར་མེད་གཏི་མུག་དག་པའི་སྟོན་པ་ལ། ཞེ་སྡང་རང་བྱུང་གི་འཁོར་དང་། ང་རྒྱལ་རྣམ་དག་གི་འཁོར་དང་། )འདོད་ཆགས་ཞེན་གཅོད་ཀྱི་འཁོར་དང་། ཕྲག་དོག་གསལ་དག་གི་འཁོར་རོ། །འདས་དང་མ་འོངས་ད་ལྟར་གྱིས། །ཐ་སྙད་མིང་ལ་མི་གནས་ཏེ། །དུས་གསུམ་གཅིག་སྟེ་ཁྱད་པར་མེད། །དུས་ཕུན་སུམ་ཚོགས་པའོ། །མ་ཧཱ་ས་ས་མེ་རྦ་དུར་ཙ་ཙ། དྷརྨ་སང་ཀ་རི། ཐེག་པ་དགུ་རྩེ་སྤྱི་ཏི་ཡོ་ག་འདི། །བྱ་བཙལ་རྩོལ་བསྒྲུབ་མ་བྱས་པར། །ཀ་དག་ཡེ་སངས་རྒྱས་པར་བསྟན། །མ་བྱུང་མ་སྐྱེས་སྙིང་པོ་ལ། །སྒྲོ་བཏགས་ཆོས་ཀུན་ག་ལ་ཡོད། །མི་སྐྱེ་མི་འགག་སྙིང་པོའི་ཀློང་། །མ་ཕྱེ་མི་ཕྱེ་སྙིང་པོའི་བཅུད། །མ་མཚོན་མི་སྨྲ་ཐ་སྙད་མེད། །དམིགས་པའི་རྣམ་པ་ཀུན་དང་བྲལ། །སངས་རྒྱས་མེད་པས་ཡིད་སྨོན་མེད། །གདོད་ནས་དག་པ་ཆོས་ཀྱི་སྐུ། །བདེ་ཆེན་མི་རྟོག་འགྱུ་བ་བྲལ། །སྤྲོས་པ་ཐག་ཆོད་སྣང་བ་དག །རིག་པ་མི་ ― DNG002_Page_0690 ―
[མ་དཔེ་གཟིགས་ན་འདིར་གནོན།]
དམིགས་ཡེ་ཤེས་གསལ། །དབང་པོ་རང་སྣང་རྒྱལ་བའི་ཐུགས། །འགྲོ་བ་ཀུན་ལ་རང་བཞིན་གནས། །མཐོང་བ་ལོག་པས་འཁྲུལ་མོད་ཀྱང་། །སངས་རྒྱས་ངང་དྭངས་རང་སངས་རྒྱས། །ཞེས་གསུངས་སོ། །གླེང་གཞིའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །དངོས་པོ་ཇི་ལྟར་གནས་ལུགས་དང་། །མ་རྟོགས་རིགས་དྲུག་ཇི་ལྟར་འཁྲུལ་པ་དང་། །འཁྲུལ་པ་རྩད་ནས་ཇི་ལྟར་གཅད་པ་དང་། །རྟོགས་ནས་འབྲས་བུ་ཇི་ལྟར་འཐོབ་པ་དང་། །གསང་སྔགས་ངོ་བོ་ཇི་ལྟར་ཡིན་པ་དང་། །ཐེག་པའི་རྒྱལ་པོ་ཇི་ལྟར་བཤད་པ་དང་། །ཡང་རབ་རྣམས་ལ་ཇི་ལྟར་བཤད་པ་དང་། །དེ་ཉིད་རྟོགས་ཐབས་ཇི་ལྟར་བསྟན་པ་དང་། །དེ་རྣམས་སྟོན་པས་འཁོར་ལ་བཀའ་སྩོལ་འཚལ། །ཞེས་ཞུས་པ་དང་། དེ་ནས་སྟོན་པ་ཀུན་བཟང་གིས། བྱར་མེད་སྤྲོས་བྲལ་གྱི་ཏིང་ངེ་འཛིན་ལ་སྙོམས་པར་བཞུགས་ནས་འདི་སྐད་ཅེས་བཀའ་སྩལ་ཏོ། །དངོས་པོ་གཤིས་ཀྱི་གནས་ལུགས་ནི། །ཚིག་གི་ཡུལ་དུ་མ་གྱུར་ཀྱང་། །མ་རྟོགས་བློ་ལ་མཚོན་པའི་ཕྱིར། །གསུང་གི་སྒྲོན་མ་གསལ་བ་ཡིས། །ཡང་གསང་བཅུད་ཀྱི་སྙིང་པོ་བཤད། །ཡེ་གནས་ཐོག་མ་མེད་པའི་བར་དོ་ན། །མ་ཕྱེད་མི་ཕྱེད་སྙིང་པོ་མཉམ་པ་ཉིད། །གཞི་ཡི་རང་བཞིན་ཡོད་མེད་མཉམ་པའི་ངང་། །མཉམ་པའི་ངང་ལས་ཀུན་འབྱུང་མཛོད་པོ་ཆེ། །རྣམ་དག་བསམ་གྱིས་མི་ཁྱབ་ལྷ་ཁང་ན། །སྟོང་གསལ་ངང་དྭངས་རིན་ཆེན་བཞུགས། །རིན་ཆེན་ངང་གསལ་འཁོར་གྱིས་བསྐོར། །དགོས་འདོད་ཀུན་འབྱུང་རིན་ཆེན་འཆང་། །གཞི་ཉིད་རྡོ་རྗེ་རྐྱེན་དང་བྲལ། །མ་སྐྱེས་པས་ན་འཇིག་པ་མེད། །གདོད་ནས་སྙིང་པོ་བྱང་ཆུབ་དེ། །རྩོལ་བའི་བསམ་པས་དབྱིངས་མི་བསྐྱོད། །ཆོས་སྐུའི་ཁྱབ་པས་གཅིག་པའི་ཕྱིར། །གཞི་ཡི་རང་བཞིན་མཉམ་པར་གནས། །ཆོས་དབྱིངས་དམ་པ་ཟད་མི་ཤེས། །ཡང་དག་བདག་མེད་དེ་བཞིན་ཉིད། ། ― DNG002_Page_0691 ―
[མ་དཔེ་གཟིགས་ན་འདིར་གནོན།]
ཡང་དག་མཐའ་ལ་ཡི་གེ་མེད། །བཅུ་དྲུག་ཕྱེད་ཕྱེད་ཐིག་ལེ་ཅན། །ལུས་མེད་ལུས་ཏེ་ལུས་ཀྱི་མཆོག །དང་པོའི་སངས་རྒྱས་རྒྱུ་མེད་པ། །ཡེ་ཤེས་མིག་གཅིག་དྲི་མ་མེད། །ཡེ་ཤེས་ལྡན་པ་ཡོད་མེད་ཤེས། །རྣམ་པ་ཀུན་ལྡན་རྣམ་པ་མེད། །མི་མངོན་མི་གནས་གསལ་བྱ་མིན། །མི་འགྱུར་ཀུན་འགྲོ་ཁྱབ་པ་པོ། །ནམ་མཁའི་མཐའ་ལ་ལོངས་སྤྱོད་པ། །ཐམས་ཅད་བསྐྱེད་པའི་གཞི་མ་ཡིན། །ཀུན་གཞི་མཉམ་ཉིད་ཡིན་པ་ལ། །ཕྱོགས་སུ་བལྟས་པས་གྲུབ་པ་མེད། །སངས་རྒྱས་ཐོག་མ་ཐ་མ་མེད། །ཡེ་ཤེས་ལུས་ཅན་དེ་བཞིན་གཤེགས། །ཆོས་དབྱིངས་དམ་པ་རྩད་མི་ཤེས། །སངས་རྒྱས་མེད་པས་མིང་ཡང་མེད། །སངས་རྒྱས་སྟོན་པས་མིང་བཏགས་ནོར། །རྣམ་པར་དག་པའི་ཆོས་ཉིད་དེ། །དཔེར་བྱ་ཀུན་ལས་འདས་པ་པོ། །དངོས་པོའི་གནས་ལུགས་དེ་ལྟར་རོ། །ཞེས་གསུངས་སོ། །དངོས་པོ་གཤིས་ཀྱི་གནས་ལུགས་བསྟན་པའི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །སྟོན་པ་ཀུན་ཏུ་བཟང་པོ་ལ། །མ་རྟོགས་སེམས་ཅན་ཇི་ལྟར་འཁྲུལ། །ཞེས་གསོལ་པ་དང་། དེ་ནས་སྟོན་པ་ཀུན་བཟང་དེས། རིན་པོ་ཆེ་འོད་འཕྲོ་འདུ་དང་འཕེལ་འགྲིབ་མེད་པའི་ཏིང་ངེ་འཛིན་ལ་ཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས་སོ། །མ་རྟོགས་སེམས་ཅན་འཁྲུལ་ལུགས་ནི། །སྔོན་མེད་ཕྱིས་མེད་གདོད་ནས་དག །ནམ་མཁའི་བདག་པོས་སྣ་ཚོགས་སྟོན། །ནམ་མཁའི་མཐའ་ལས་རང་བྱུང་བ། །སྣ་ཚོགས་གཟུགས་ཅན་ཡིད་ལས་སྐྱེས། །རྣམ་རིག་སྣ་ཚོགས་གཟུགས་དོན་ཅན། །གཟུགས་རྣམས་ཐམས་ཅད་སྣང་བའི་དཔལ། །གཟུགས་རྣམས་མ་ལུས་འཆང་བ་པོ། །རྣམ་ཤེས་སྣ་ཚོགས་རྒྱུད་དོན་ལྡན། །བདག་རིག་གཞན་རིག་ཐམས་ཅད་པ། །སྣ་ཚོགས་གཟུགས་ཅན་བྱེད་པ་པོ། །ཉོན་མོངས་པས་ནི་སེམས་འཁྲུགས་པས། །མི་ཤེས་འཁོར་བའི་འདམ་དུ་བྱིང་། །མ་རིག་སྒོ་ངའི་སྦུབས་ཆུད་པས། །འགྱུ་བ་རླུང་གིས་རྒྱུ་བྱས་ནས། །སྒྲིབ་གཡོགས་མུན་པས་བར་བཅད་དེ། །མུན་པའི་འཁོར་ལོ་རྐྱེན་དུ་བྱུང་། །ཡེ་དོན་མ་ཤེས་དོན་མ་རིག ། ― DNG002_Page_0692 ―
[མ་དཔེ་གཟིགས་ན་འདིར་གནོན།]
ངོ་བོ་རང་བཞིན་ཐུགས་རྗེ་ལས། །རིག་པ་ཡིད་འགྱུས་སེམས་སུ་འཁྲུལ། །ཡིད་འཁོར་གསུམ་གྱིས་དྲ་བར་འཐུམས། །མ་ངེས་ཁ་དོག་འཇའ་ཚོན་ལས། །རིགས་ཀྱི་ཁྱད་པར་མངོན་པར་སྣང་། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་ཚུལ་དུ་འཁྲུལ། །འགྲོ་བའི་སྡུག་བསྔལ་ཟད་མེད་མྱོང་། །སྨིག་ཐག་ཐོག་ཞི་དེ་ལས་སུ། །ཆུ་སྦྲུལ་མིར་འཁྲུལ་དཔེ་ཡིས་མཚོན། །སྣ་ཚོགས་ལུས་དང་གནས་ལ་སོགས། །བདག་དང་བདག་གིར་སོ་སོར་བཟུང་། །རྨི་ལམ་ཚུལ་དུ་སྡུག་བསྔལ་མྱོང་། །སྣང་སྲིད་སྐྱེ་འགུལ་དེ་ལྟར་འཁྲུལ། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། མ་རྟོགས་འཁྲུལ་པའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་སླར་ཞུས་པ། །འཁྲུལ་པ་རྩད་ནས་ཇི་ལྟར་བཅད། །ཅེས་ཞུས་པ་དང་། དེ་ནས་སྟོན་པ་ཀུན་བཟང་དེ་འོད་སྣ་ཚོགས་རང་ལ་ཐིམ་པའི་ཏིང་ངེ་འཛིན་ལ་བཞུགས་སོ། །དེ་ལས་བཞེངས་ནས་འཁོར་ལ་འདི་སྐད་གསུངས། །ནམ་མཁའ་ལས་བྱུང་རང་བྱུང་བ། །ཤེས་རབ་ཡེ་ཤེས་མེ་བོ་ཆེ། །འགྲོ་བའི་མར་མེ་ཡེ་ཤེས་སྒྲོན། །གཟི་བརྗིད་ཕུང་པོ་འོད་གསལ་འབར། །ཤེས་རབ་རལ་གྲིས་འཁྲུལ་སྣང་གཅོད། །དུས་ཤེས་སེམས་ཅན་དབང་པོ་ཤེས། །ཕུང་པོ་ལྔ་དོན་དུས་གསུམ་དུ། །སྐད་ཅིག་ཐམས་ཅད་བྱེ་བྲག་ཕྱེད། །སྡུག་བསྔལ་གསུམ་གྱི་སྡུག་བསྔལ་ཞི། །སྒྲིབ་པ་ཀུན་ལས་ངེས་པར་གྲོལ། །དུས་གསུམ་དུས་མེད་རྟོགས་པ་པོ། །རྣམ་གྲོལ་གསུམ་ལ་མཁས་པ་པོ། །གསུམ་སེལ་མཐའ་ཡས་གྲོལ་གསུམ་ཐོབ། །བདག་གིར་མི་འཛིན་ངར་མི་འཛིན། །རྣམ་པར་དག་པ་བདག་མེད་ཆོས། །ཡང་དག་བདག་མེད་དེ་བཞིན་ཉིད། །རྣམ་པར་རྟོག་མེད་ལྷུན་གྱིས་གྲུབ། །བག་ཆགས་བཅས་པ་གཏན་སྤངས་པ། །ཉོན་མོངས་དྲི་མ་ཀུན་ལས་འདས། །ལུས་ཀུན་ལས་ནི་རྣམ་པར་གྲོལ། །ནམ་མཁའི་ལམ་ལ་རབ་གནས་པ། །ཡིད་བཞིན་ནོར་བུ་ཆེན་པོ་འཆང་། །དུས་གསུམ་དུས་མེད་རྟོགས་པ་པོ། །དོན་རྣམས་ཇི་བཞིན་མི་བསྐྱོད་དེ། ། ― DNG002_Page_0693 ―
[མ་དཔེ་གཟིགས་ན་འདིར་གནོན།]
བྱ་བ་བྱེད་པ་གྲོལ་བ་གྲོལ། །རང་བྱུང་ཡེ་ཤེས་བཙལ་མེད་པས། །གྲོལ་ནས་གྲོལ་བའི་ལམ་ཡང་སྟོན། །སྣང་བ་མེད་པའི་ཆོས་ཉིད་འདི། །མ་བཙལ་བཞག་པས་གྲུབ་པ་ཡིན། །འགྲོ་བའི་སྡུག་བསྔལ་བྱང་ཆུབ་སེམས། །མ་བརྟགས་བཞག་པས་རྣམ་པར་གྲོལ། །དེ་ལས་བསྐྱོད་པ་མེད་བཞིན་དུ། །ནམ་མཁའི་མཐའ་ལྟར་མཉམ་པར་གནས། །དེ་བཞིན་རྟོགས་པའི་ཤེས་རབ་ཀྱིས། །མངོན་སུམ་མེད་པ་རང་ལས་བྱུང་། །ཕྱི་ནང་གཉིས་ཀ་ཕྱི་ཉིད་ངང་། །ཟབ་མོ་ཆ་ཤས་རྟོགས་ཡུལ་མེད། །སྣང་སྲིད་མིང་ཙམ་ལོག་པའི་སྟོབས། །དེ་བས་ཏིང་འཛིན་མཉམ་དང་བྲལ། །དེ་ལ་ཐ་ཚིག་ཕྱི་དང་ནང་། །རང་བཞིན་ཕུང་པོ་ཁམས་ལྟར་གནས། །དུས་གསུམ་འདི་དང་མི་འབྲལ་བས། །ཐ་ཚིག་མིང་དུ་བཏགས་པ་མེད། །མི་ལེན་པས་ན་བདག་མེད་ཅིང་། །མི་འདོར་ཚིག་བྲལ་མཉམ་ཉིད་དོ། །ངོ་མཚར་རྨད་བྱུང་རོལ་པ་འདི། །གནས་པར་བྱ་བའི་མིང་མེད་དེ། །བྱ་བྲལ་ནམ་མཁའ་ཇི་བཞིན་པས། །ཅི་ཡང་མི་དམིགས་གཏི་མུག་ལས། །དེ་མ་ཐག་ཏུ་རང་ལས་བྱུང་། །འདི་ནི་ཐམས་ཅད་མཚུངས་པའི་ལམ། །འགྲོ་བ་ཀུན་ལ་རང་བཞིན་གནས། །ཡེ་ཤེས་ཆེན་པོ་སྐད་ཅིག་གིས། །ཆོས་ཀུན་ཁོང་དུ་ཆུད་པ་པོ། །གདོད་ནས་དག་པ་ཆོས་ཀྱི་སྐུ། །ཡེ་ནས་གྲུབ་པས་བཙལ་མི་བྱ། །བསམ་དུ་མེད་དེ་ཡེ་སངས་རྒྱས། །བསྒོམ་དུ་མེད་དེ་དམིགས་དང་བྲལ། །རིག་ཡིད་སེམས་མེད་དྲན་རྟོག་སངས། །ངང་དྭངས་ཡེ་ཤེས་ཉི་ཤར་བས། །མ་རིག་སྒོ་ངའི་སྦུབས་ནས་ཐོན། །མ་རིག་འཁོར་བའི་མུན་སངས་ནས། །སྲིད་པའི་དྲ་བ་འཇོམས་པ་ཡིན། །འཁྲུལ་སྣང་མ་ལུས་རྩད་ནས་གཅོད། །གཅིག་ཤེས་ཀུན་གྲོལ་དགོངས་པ་ཤར། །རང་བཞིན་ངོ་བོ་ཐུགས་རྗེ་ལས། །སྐུ་གསུང་ཐུགས་ཀྱི་ངོ་བོར་རྟོགས། །དུག་གསུམ་ཉོན་མོངས་རྩད་ནས་བཅད། །ཕྱི་རོལ་ནང་དག་འཛིན་པ་བརླག །ངང་དྭངས་གསལ་དག་དགོངས་པར་གནས། །བསམ་རྡུག་དངོས་མེད་ལྷ་ཁང་དུ་ཕྱིན་པས། །བསམ་འཕེལ་གྱི་ནོར་བུ་རིན་པོ་ཆེ་རྙེད་ནས། དགོས་འདོད་ ― DNG002_Page_0694 ―
[མ་དཔེ་གཟིགས་ན་འདིར་གནོན།]
ཐམས་ཅད་དེ་ལས་བྱུང་བས། སྣ་ཚོགས་བསམ་བྲལ་གྱི་ཐུགས་རང་ལ་ཤར་རོ། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། འཁྲུལ་སྣང་རྩད་ནས་གཅོད་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་དེ་ལ་འདི་སྐད་ཞུས། །འཁྲུལ་ཆོད་རྟོགས་པའི་འབྲས་བུ་གང་། །ཞེས་ཞུས་པ་དང་། དེ་ནས་སྟོན་པ་ཀུན་བཟང་དེ། འོད་ཟེར་སྤྲོས་པ་ཡོངས་སུ་གཅོད་པའི་ཏིང་ངེ་འཛིན་ལ་བཞུགས་སོ། །བཞེངས་ནས་འཁོར་ལ་བཀའ་སྩལ་པ། །འཁྲུལ་པ་ལོག་ཐོབ་འབྲས་བུ་ནི། །ངེས་འབྱུང་གསུམ་པོ་སྐུ་གསུམ་ཐོབ། །མཆོག་གི་དང་པོ་སྐུ་གསུམ་འཆང་། །རང་བཞིན་ངོ་བོ་ཐུགས་རྗེ་ལས། །སངས་རྒྱས་སྐུ་ལྔའི་བདག་ཉིད་ཅན། །དོན་གསུམ་ཐེ་ཚོམ་མེད་པའི་བློ། །ཀུན་དོན་ཡོན་ཏན་གསུམ་གྱི་བདག །ཡང་དག་ངེས་པའི་ལུང་དུ་ཟུང་། །གཟུགས་མེད་གཟུགས་བཟང་དམ་པ་སྟེ། །ལུས་མེད་ལུས་ཏེ་ལུས་ཀྱི་མཆོག །ཡེ་ནས་སྐྱེ་མེད་ཆོས་ཀྱི་སྐུ། །རྩལ་ཟེར་འགག་མེད་ལོངས་སྤྱོད་སྐུ། །ཐུགས་རྗེ་སྤྲུལ་པའི་སྐུ་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །སྤྲུལ་པའི་སྐུ་སྟེ་སྐུ་ཡི་མཆོག །ལུས་ཀུན་ལས་ནི་རྣམ་པར་གྲོལ། །གྲོལ་བ་ཐར་བ་རྣམ་གྲོལ་ལུས། །རྣམ་གྲོལ་ཞི་བ་ཞི་བ་ཉིད། །མྱ་ངན་འདས་པ་མྱ་ངན་འདས། །ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཐེག་པ་དགུ་ཡི་ངེས་འབྱུང་ལ། །སངས་རྒྱས་སྐུ་ཡི་བསྟན་པ་གཅིག །ཐེག་པ་དགུ་རྩེ་སྤྱི་ཏི་ཡིན། །དོན་གཅིག་གཉིས་མེད་ཆོས་ཀྱི་དོན། །དམ་པའི་དོན་ཏེ་འཇིག་པ་མེད། །མི་གཡོ་རབ་ཏུ་དྭངས་པའི་བདག །རྣམ་པར་དག་པ་བདག་མེད་ཆོས། །ཡང་དག་ཡེ་ཤེས་ངང་དྭངས་གསལ། །ཆོས་ཉིད་རྣམ་ཤེས་ཡུལ་ལས་འདས། །སྐྱེ་འགག་དམིགས་པའི་མཐའ་ལས་གྲོལ། །ཤེས་རབ་ཆེན་པོས་སྐད་ཅིག་ལ། །ཆོས་ཀུན་མངོན་པར་རྟོགས་པ་པོ། །སྐྱེ་མེད་ཆོས་ཏེ་སྣ་ཚོགས་དོན། །ཐེག་པ་གཅིག་གི་འབྲས་བུར་གནས། །ཉོན་མོངས་ ― DNG002_Page_0695 ―
[མ་དཔེ་གཟིགས་ན་འདིར་གནོན།]
ཁམས་རྣམས་དག་པའི་བདག །ལས་ཀྱི་ཁམས་རྣམས་ཟད་པར་བྱེད། །ཆུ་བོ་རྒྱ་མཚོ་ཀུན་ལས་བརྒལ། །ཐུབ་པ་བློ་མཆོག་འབྱུང་པོ་སེལ། །ནོར་པ་ཐམས་ཅད་རྣམ་པར་སྤངས། །གསུམ་རིག་གཙང་མ་དག་པ་ཡིན། །གྲུབ་མཐའ་མཐར་ཕྱིན་འཁྲུལ་པ་མེད། །བྱ་བ་བྱས་པ་སྐམ་སར་གནས། །ཐུབ་པ་མེད་པ་དཔེ་མེད་པ། །ཆགས་བྲལ་ལུས་ལས་འདས་པ་པོ། །རིན་ཆེན་ལྔ་ཡི་དཀྱིལ་འཁོར་དུ། །འོད་ཟེར་སྣ་ཚོགས་ཐིམ་པའི་ཐབས། །སྟོང་ཉིད་ཀློང་ཡངས་མ་ཡི་དབྱིངས། །རྩལ་ཟེར་ཡན་ལག་བུ་རྣམས་དང་། །ཤེས་རབ་མཁའ་ལ་འདེགས་པ་དང་། །འབྱུང་བ་མ་ལ་ཞི་བ་དང་། །ཤེས་རབ་དབྱིངས་སུ་ཐིམ་པ་དང་། །ཡིན་ལ་མིན་པ་མེད་པ་དང་། །ཤེས་པ་མཁའ་ལ་འཁྱིལ་བ་དང་། །རིག་པ་རང་སར་གནས་པའོ། །ཐིམ་པ་ལ་ནི་མ་རྨུགས་དང་། །གསལ་ལ་རྟོག་པ་མེད་པ་དང་། །སོ་སོར་མ་འདྲེས་པ་ལ་མི་འབྱེད་པའོ། །དོན་གྲུབ་བསམ་པ་ཡོངས་སུ་གྲུབ། །ཐོལ་བྱུང་འཁྲུལ་ཆོད་ལོག་རྟོག་ཡིན། །ནམ་མཁར་རྟོག་པ་སྐྱེ་མེད་ཅིང་། །རྟོགས་པ་དེ་ཉིད་ནམ་མཁའ་འདྲ། །མི་ཆགས་ནམ་མཁའ་ལྟ་བུ་ལ། །རང་དོན་ཆེན་པོ་ནམ་མཁའ་འབྱུང་། །མཉམ་པས་རིམ་པས་བཀོད་པ་མེད། །གཅིག་པས་ཕྱོགས་བཅུ་དངོས་དང་བྲལ། །རང་བཞིན་གནས་པས་ལྷུན་གྱིས་གྲུབ། །གདོད་ནས་དག་པའི་སྙིང་པོ་ཡིན། །ལྷག་པའི་བསམ་པ་བཟུང་བ་མེད། །ཅེས་གསུངས་སོ། །ཉི་ཟླ་འབར་བའི་རྒྱུད་ལས། འཁྲུལ་པ་རྩད་བཅད་རྟོགས་ཐབས་འབྲས་བུ་བསྟན་པའི་ལེའུ་སྟེ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །གསང་སྔགས་དོན་གྱི་ངོ་བོ་གང་། །ཞེས་ཞུས་པ་དང་། དེ་ནས་སྟོན་པ་ཀུན་བཟང་དེ། འོད་བཀོལ་བ་མེད་པའི་ཏིང་ངེ་འཛིན་ལ་སྙོམས་པར་བཞུགས་སོ། །དེ་ལས་བཞེངས་ནས་འདི་སྐད་གསུངས། །གསང་སྔགས་དོན་གྱི་ངོ་བོ་ནི། །གཟུང་འཛིན་སྐྱོབ་པའི་གསང་སྔགས་ཡིན། །སྐྱེ་མེད་སྙིང་པོ་བཅུད་འདུས་ཀློང་། །བྱར་མེད་ཐ་སྙད་ཀུན་ལས་གྲོལ། །སྙིང་པོ་ཆོས་ཉིད་ཀློང་དཀྱིལ་ན། །ཀ་དག་རང་བྱུང་ངང་དྭངས་བཞུགས། །ཕྱི་གྲོལ་ ― DNG002_Page_0696 ―
[མ་དཔེ་གཟིགས་ན་འདིར་གནོན།]
ནང་དག་ཡིད་གཉིས་བརླག །རྣམ་དག་སྙིང་པོ་མ་ཡི་ཀློང་། །དངོས་འཛིན་རྟོག་པའི་མཐའ་རྣམས་གཅོད། །མ་འགགས་འོད་གསལ་རང་སངས་པས། །གཏི་མུག་ཆད་མཐའ་རྣམས་སྤྲོས་གཅོད། །དེ་ཡིས་གཟུང་བྱའི་ཆོས་ལས་སྐྱོབ། །ཀུན་གཞི་སྟོང་གསལ་ཆོས་ཉིད་ཀློང་། །རྩིས་གདབ་དྲན་རྟོག་ཡིད་ལས་འདས། །དེ་ཡིས་འཛིན་པའི་སྐྱོན་ལས་སྐྱོབ། །ཡིད་གཉིས་རྩད་ཆོད་གཟུང་འཛིན་མེད། །གཟུང་འཛིན་ལས་སྐྱོབ་གསང་སྔགས་ཡིན། །རིག་གསུམ་འཆང་བ་གསང་སྔགས་འཆང་། །གསང་སྔགས་ལས་བྱུང་ཡི་གེ་མེད། །མིང་ཙམ་འདི་ཞེས་བསྟན་པ་ནི། །ཀུན་ཏུ་བཟང་པོས་མཚོན་དུ་མེད། །ངོས་བཟུང་མེད་པས་གསང་བ་ཡིན། །གསལ་ཞིབ་ཁྱབ་པས་སྔགས་པ་ཡིན། །དངོས་པོ་ཡེ་མེད་གསང་བ་ཡིན། །མཚན་མ་སྣ་ཚོགས་སྔགས་པ་ཡིན། །གསལ་བའི་སྙིང་པོ་བཅུད་འདུས་ཡིན། །སྔགས་པ་རང་གསལ་འོད་གསལ་ཡིན། །དོན་ནི་གཉིས་འཛིན་སྤྲོས་པ་ཆོད། །གསང་སྔགས་ངོ་བོ་དེ་ལྟར་ཡིན། །ངོ་བོ་རང་འབར་ཀུན་གསལ་གདངས། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། གསང་སྔགས་དོན་གྱི་ངོ་བོ་བསྟན་པའི་ལེའུ་སྟེ་དྲུག་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཐེག་པའི་རྒྱལ་པོ་ཇི་ལྟར་བཤད། །ཅེས་ཞུས་པ་དང་། སྟོན་པས་འཁོར་ལ་བསྟན་པའི་ཕྱིར། མཚོན་བརྗོད་དང་བྲལ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འདི་སྐད་གསུངས། །ཐེག་རྒྱལ་རྫོགས་ཆེན་སྤྱི་ཏི་འདི། །ནམ་མཁའ་སྟོང་པའི་དཔེས་མཚོན་ནས། །མཐའ་དབུས་ཕྱོགས་རིས་མེད་པར་བཤད། །ཉི་མ་ཟླ་བའི་དཔེས་མཚོན་ནས། །སྣང་སྲིད་ཐམས་ཅད་གསལ་བར་བཤད། །བྱ་རྒྱལ་ཁྱུང་གི་དཔེས་མཚོན་ནས། །ཐེག་དམན་ཟིལ་གྱིས་གནོན་ཏེ་བཤད། །ཚངས་པའི་འབྲུག་སྒྲའི་དཔེས་མཚོན་ནས། །ཀུན་བསྒྲགས་གོ་ཞིང་གསལ་བར་བཤད། །མཚོན་ཆའི་འཁོར་ལོའི་དཔེས་མཚོན་ནས། །འཁྲུལ་སྣང་སྤྲོས་པ་བཅད་དེ་བཤད། །མུན་ཁུང་ ― DNG002_Page_0697 ―
[མ་དཔེ་གཟིགས་ན་འདིར་གནོན།]
སྒྲོན་མེའི་དཔེས་མཚོན་ནས། །དོན་གྱི་གསེར་དང་སྤྲད་དེ་བཤད། །ཉི་མའི་སྙིང་པོའི་དཔེས་མཚོན་ནས། །ཡང་གསང་བཅུད་ཀྱི་སྙིང་པོ་བསྟན། །གསེར་འགྱུར་རྩི་ཡི་དཔེས་མཚོན་ནས། །མ་སྤངས་རང་སར་གྲོལ་བར་བཤད། །སྟག་མོའི་རྔམ་སྟབས་དཔེས་མཚོན་ནས། །དཀྱུས་ཀྱི་ས་རྣམས་གཅད་པར་བྱ། །རུས་སྦལ་ནུར་འགྲོས་དཔེས་མཚོན་ནས། །ཚིག་གི་འབྲུ་རྣམས་ཞིབ་ཏུ་གཉེར། །བཤད་པའི་ཆོས་རྣམས་ཐ་སྙད་ཡིན། །མ་བཤད་གོ་བའི་ཆོས་ཤིག་དགོས། །བློས་བཏགས་ཆོས་ནི་རྟོག་ཚོགས་ཡིན། །བློ་ལས་འདས་པའི་ཆོས་ཤིག་དགོས། །བྱས་པའི་ཆོས་ནི་འདུས་བྱས་ཡིན། །མ་བྱས་རང་བྱུང་ཆོས་ཤིག་དགོས། །བསྒྲུབས་པའི་ཆོས་རྣམས་རྩོལ་བསྒྲུབ་ཡིན། །རྩོལ་བསྒྲུབ་ཆོས་ནི་ཡིད་སྨོན་ཡིན། །དམིགས་མེད་བསམ་འདས་ཆོས་ཤིག་དགོས། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། ཐེག་པའི་རྩེ་རྒྱལ་སྤྱི་ཏི་བཤད་པའི་ལེའུ་སྟེ་བདུན་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཡང་རབ་རྣམས་ལ་ཇི་ལྟར་བཤད། །ཅེས་ཞུས་པ་དང་། སྟོན་པས་འཁོར་ལ་འདི་སྐད་གསུངས། །སྙིང་པོ་ཀ་དག་རང་བཞིན་ལ། །སྐྱེ་དང་འགག་པ་གཉིས་མེད་ཀྱང་། །གསུང་གི་སྒྲོན་མ་རབ་གསལ་བ། །ཡང་རབ་རྣམས་ལ་བསྟན་པ་ནི། །གླེང་བྲལ་འདི་ལ་གནས་པ་ནི། །རྣལ་འབྱོར་ཡང་རབ་སྐལ་བ་བཟང་། །བདག་དང་གཞན་དོན་མི་འབྱེད་ཅིང་། །སྒྱུ་མ་ལྷུན་གྲུབ་ཡུལ་ལ་རོལ། །རཏྣ་དྷརྨ་སརྦ་བྷྲཱ་ཏུ་ཨ་སི་ཐིམ། རིན་ཆེན་ཆོས་རྣམས་ཐམས་ཅད་ཀུན། །དབྱིངས་སུ་འདུས་པའི་ལྷ་ཁང་ན། །འགྱུ་བ་སེམས་ཀྱི་རྟ་ཕོ་ལ། །རང་བྱུང་ངང་དྭངས་མི་ཞོན་ནས། །སྒོ་ལྔ་རྣམ་དག་ལམ་དུ་བྱུང་། །སྣང་སྲིད་རང་གྲོལ་ཐང་ལ་རྒྱུག །དབྱེ་བསལ་མེད་པའི་དགོངས་པར་གནས། །ཀུན་འབྱུང་ཀློང་ཡངས་ལྷ་ཁང་དུ། །སེམས་ཅན་སྤྱི་མེས་རེག་པའི་རྒྱལ། །སྣང་སྲིད་བསྐྱེད་ཀྱང་འཕེལ་འགྲིབ་མེད། །ནམ་མཁའ་འདི་ལས་ཆོ་འཕྲུལ་རྣམས། །ནམ་མཁའི་ངང་ལས་ ― DNG002_Page_0698 ―
[མ་དཔེ་གཟིགས་ན་འདིར་གནོན།]
གཡོས་པ་མེད། །སྙིང་པོའི་ཀློང་ནས་རྩལ་བུ་རྣམས། །བྱུང་ཡང་སྣ་ཚོགས་མ་ལ་ཐིམ། །མ་བུ་ངོ་སྤྲོད་ཡེ་སངས་རྒྱས། །འཁྲུལ་དང་མ་འཁྲུལ་ཡེ་ནས་མེད། །རྟོགས་དང་མ་རྟོགས་བློ་ཡི་ཡུལ། །ལྟ་སྒོམ་སྤྱོད་འབྲས་བློ་ཡིན་པས། །བློ་ཉིད་མ་ཟད་བར་དུ་ནི། །ཇི་ལྟར་བསྒྲུབ་ཀྱང་རྩོལ་བའི་ནད། །རྩོལ་བའི་སེམས་ལ་བྱང་ཆུབ་མེད། །ཅེས་གསུངས་སོ། །ཉི་ཟླ་འབར་བའི་རྒྱུད་ལས། ཡང་རབ་རྣམས་ལ་བསྟན་པའི་ལེའུ་སྟེ་བརྒྱད་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །རྩོལ་བའི་བསྒྲུབ་ཆོས་མ་ཡིན་པའི། །བྱར་མེད་རྩོལ་བྲལ་བཀའ་སྩོལ་ཅིག །ཅེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །བྱར་མེད་རྩོལ་བྲལ་ངས་བསྟན་གྱིས། །རྡོ་རྗེ་སེམས་དཔས་ཡིད་ལ་ཟུང་། །བསྒྲུབ་མེད་རྩོལ་བསྒྲུབ་སྨོན་པ་མེད་པ་ཡི། །བྱར་མེད་ལྷུན་རྫོགས་སྔ་མ་དེ་ཉིད་དོན། །བྱ་བྲལ་ནམ་མཁའ་ཇི་བཞིན་ཏེ། །རྩོལ་བསྒྲུབ་བྱ་བཙལ་ག་ལ་ཡོད། །གསལ་དག་ཡེ་ཤེས་དགོངས་པ་འདི། །རང་བྱུང་ངང་དྭངས་འོད་གསལ་ཡིན། །བཏང་ངོ་བཞག་གོ་རང་བཞིན་དེ། །བླང་དོར་བྲོད་པ་བསྐྱེད་མི་བྱ། །མངོན་སུམ་མི་སྣང་རྒྱབ་ནས་འབྱུང་། །ཕྲ་ཞིང་ཤེས་དཀའི་ཆོས་འདི་ནི། །རྣམ་པར་མི་རྟོག་རྟོག་ལས་འདས། །སྐུ་གཅིག་ཀུན་ཏུ་ཁྱབ་པས་བསྣན་པའི་ཆོས་མེད་དེ། །སེམས་དང་ཆོས་ནི་ཅི་ཡང་མ་ཡིན་པས། །གཞན་ལ་འདི་འདྲ་ཞེས་ནི་བསྟན་དུ་མེད། །ཀུན་གཞི་ཀློང་ཡངས་ཆོས་དབྱིངས་ནས། །རིག་ཡིད་སེམས་བློ་ཅི་བྱུང་ཡང་། །ཐོལ་བྱུང་ངང་དྭངས་བྱུང་སར་ཐིམ། །དཔེར་ན་རྒྱ་མཚོར་རྡོ་བསྐྱུར་བཞིན། །སྐྱེ་བ་མེད་པའི་ཀློང་དུ་ཐིམ། །འགྱུར་བ་མེད་པའི་རྒྱ་ཡིས་ཐོབ། །སེམས་ཀྱི་རང་བཞིན་ཅི་ཡང་མ་ཡིན་པས། །བསྒོམ་པའི་ཚེ་ན་ཅི་ཡང་མི་བསྒོམ་མོ། །མ་བསམ་མ་བསྒོམས་ཆོས་གཞན་དུ། །ཡོན་ཏན་ཆེ་བའི་བསམ་གཏན་ནི། །མ་བསྟན་ཉིད་དུ་བསམ་དུ་མེད། །ཡང་དག་ཡེ་ཤེས་གཉིས་མེད་འཆང་། །རྣམ་པར་དག་པ་བདག་མེད་ ― DNG002_Page_0699 ―
[མ་དཔེ་གཟིགས་ན་འདིར་གནོན།]
ཆོས། །ཡང་དག་བདག་མེད་ཡེ་ཤེས་གསལ། །ཆོས་ཉིད་རྣམ་ཤེས་ཡུལ་ལས་འདས། །བརྡའ་ནི་མཁའ་འགྲོ་ཆོས་ཉིད་བརྡའ། །རིན་ཆེན་སྤུངས་པའི་དཀྱིལ་འཁོར་ན། །རང་བྱུང་ངང་དྭངས་སྣང་གསལ་བཞུགས། །ཆགས་སྡང་སྤྲོས་གཅོད་སྣང་སྲིད་གྲོལ། །མི་གནས་པ་ཡི་ཡུལ་མེད་དེ། །རྣམ་པར་མི་རྟོག་སྙིང་པོའི་ཀློང་། །ཡེ་ཤེས་ལུས་ཏེ་རང་དྭངས་སྐུ། །ཆགས་བྲལ་ལུས་ལ་འདས་པ་པོ། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། བྱར་མེད་སྤྲོས་བྲལ་བསྟན་པའི་ལེའུ་སྟེ་དགུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །གསང་སྔགས་བརྡའ་ཡིས་ཇི་ལྟར་བཤད། །ཅེས་གསོལ་པ་དང་། སྟོན་པས་འཁོར་ལ་བཀའ་སྩལ་པ། །ཨ་ཀ་ད་ཏི་ས་ཏིས་ཧྲི་ཏི་བྷོ་ཡ་ཧྲི་ཏཱ། ཐུ་ལ་ཡ་ཨ་ཨ། གསང་སྔགས་ངོ་བོ་བརྡའ་ཡིས་བཤད། །སྔོན་ཐོག་སྐྱེ་མེད་གཏན་གཞིའི་གནས། །རྒྱལ་ཡུལ་ཆོས་ཉིད་ཡངས་པ་ན། །ཁྲི་རྗེ་ཡང་གསལ་སྤྱི་ཕུད་བཞུགས། །བློན་འཁོར་བསམ་མི་ཁྱབ་ཀྱིས་བསྐོར། །རྒྱལ་སྲིད་ཡོངས་ལ་མངའ་ཡང་མཛད། །འདོད་པའི་ལོངས་སྤྱོད་བསམ་མི་ཁྱབ། །རིན་ཆེན་ཀུན་འབྱུང་ལྷ་ཁང་ན། །རང་བྱུང་ངང་དྭངས་ཡེ་གསལ་བཞུགས། །གསལ་དག་སྤྲོས་གཅོད་འཁོར་གྱིས་བསྐོར། །ཞིང་ཁམས་ཡོངས་ལ་མངའ་ཡང་མཛད། །ཆོས་ཉིད་ལོངས་སྤྱོད་ཟད་མི་སྲིད། །སྣང་མེད་མུན་པའི་སྨག་རུམ་ན། །རྒན་མོ་རྨོངས་པ་གསལ་མེད་གནས། །མུན་པའི་ཐོ་ཡོར་འཁོར་གྱིས་བསྐོར། །དམུས་ལོང་ཤེས་མེད་མངའ་ཡང་མཛད། །སྣང་གསུམ་ཆུ་བཞིའི་འཁོར་བར་འཁྱམས། །བརྒྱད་ཁྲི་བཞི་སྟོང་འཁོར་ལོངས་སྤྱོད། །ཀུན་འབྱུང་སྤྱི་སའི་ལྡུམ་ར་ན། །བསམ་འཕེལ་ནོར་བུ་རིན་ཆེན་ཡོད། །ཅི་འདོད་ལོངས་སྤྱོད་དེ་ལས་འབྱུང་། །ནོར་དེ་ཐོབ་ན་ཅི་བསམ་འགྲུབ། །ནོར་དེ་ཐོབ་པར་འདོད་པ་ལ། །རང་བྱུང་ཡེ་ཤེས་ངང་དྭངས་ཀྱིས། །ཁྱུང་ལ་ཞོན་ནས་རལ་གྲི་ཐོགས། །སྲ་བའི་གོ་ཆ་ལུས་ལ་གོན། །མི་འཇིགས་པ་ཡི་མིག་ཕྱེ་ལ། །མི་ཡི་ནོར་བུ་རིན་ ― DNG002_Page_0700 ―
[མ་དཔེ་གཟིགས་ན་འདིར་གནོན།]
ཆེན་ལ། །རང་བྱུང་རིག་ཡིད་དྲན་སེམས་བློ། །ཐོལ་བྱུང་ངང་དྭངས་རིན་དུ་བཅོལ། །བསམ་འཕེལ་ནོར་བུ་ཐོབ་པར་གྱིས། །སྤྲོས་གཅོད་རང་གྲོལ་རྒྱ་ཡིས་ཐོབ། །ཡང་སྙིང་བདུད་རྩིའི་བཅུད་ཅིག་འཐུང་། །བཅུད་འཐུང་ཡང་སྙིང་ཐུགས་ལ་ཆོངས། །སྐྱེ་འགག་འགྱུར་མེད་ཀློང་དཀྱིལ་དུ། །བྱར་མེད་བདེ་ཆེན་དབྱིངས་སུ་ཉོལ། །གཡོ་རྩོལ་འཕོ་འགྱུར་མེད་པར་མནལ། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། གསང་སྔགས་བརྡའི་ལེའུ་སྟེ་བཅུ་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །ཐེག་པའི་སྤྱི་ཕུད་སྤྱི་ཏི་རུ། །ཐེག་དགུ་སྣང་སྲིད་ཇི་ལྟར་རྫོགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །རྡོ་རྗེ་སེམས་དཔའ་ནམ་མཁའ་ཆེ། །ཀུན་བཟང་ཡངས་པ་རྣམ་དག་སྙིང་པོའི་ཀློང་། །མི་སྐྱེ་མི་འགག་སྙིང་པོ་རང་སར་གྲོལ། །རྫོགས་དང་མ་རྫོགས་གཞི་ལ་གཉིས་མེད་ཀྱང་། །རྩལ་ཟེར་ཡན་ལག་ཆོས་རྣམས་རྫོགས་ལུགས་ནི། །འཇིག་རྟེན་པ་དང་འཇིག་རྟེན་འདས། །འཇིག་རྟེན་ས་ལ་གཉིས་ཏེ་སྐྱེ་བོ་དང་། །གྲུབ་མཐའ་ལོག་པའི་ཕྱི་རོལ་མུ་སྟེགས་པའོ། །འདས་པའི་ཐེག་པ་རིམ་པ་དགུ། །མཁའ་ཀློང་རྣམ་དག་སྙིང་པོ་བཅུད་སྤུངས་སུ། །རྩལ་ཟེར་འགག་མེད་ཆོས་རྣམས་ཡོངས་རྫོགས་ཏེ། །གཞི་གནས་རང་དྭངས་རང་སངས་སོ། །བདེ་ཆེན་མི་རྟོག་རང་སངས་པས། །གཟུང་འཛིན་དྲི་མེད་དགག་བསྒྲུབ་མེད། །གསལ་དག་མ་གཡོས་གདེང་དང་ལྡན། །སྣང་བ་ཆེན་པོ་གསལ་བ་ཡིན། །མུ་སྟེགས་ཆད་པའི་ལྟ་བ་རྫོགས། །དུས་གསུམ་འཕོ་འགྱུར་མེད་པར་གནས། །རྟག་པའི་ལྟ་བ་མ་ལུས་རྫོགས། །འདས་པའི་ཐེག་པ་དགུ་ཡི་རྫོགས་ལུགས་ནི། །ཡུལ་སེམས་གཉིས་སུ་མ་གྲུབ་པས། །ཉན་ཐོས་ལྟ་བ་མ་ལུས་རྫོགས། །རྟེན་འདྲེལ་རྣམ་པར་རིག་བྱེད་མེད། །རང་རྒྱལ་ལྟ་བ་མ་ལུས་རྫོགས། །ཕྱི་ནང་གཟུང་འཛིན་གཉིས་ ― DNG002_Page_0701 ―
[མ་དཔེ་གཟིགས་ན་འདིར་གནོན།]
མེད་པས། །སེམས་ཙམ་ལྟ་བ་མ་ལུས་རྫོགས། །བདེན་གཉིས་ཁ་ཚོན་བཅད་དུ་མེད། །དབུ་མའི་ལྟ་བ་མ་ལུས་རྫོགས། །ཕྱི་རྒྱུད་སྡེ་གསུམ་རྫོགས་ལུགས་ནི། །ཕྱི་ལྟར་སྣང་བའི་རྣམ་པ་ལ། །ཕྱི་དག་ནང་དག་རྫས་དག་ལས། །ཀྲི་ཡའི་ལྟ་བ་མ་ལུས་རྫོགས། །མར་སྤྱོད་ཡར་བལྟའི་རྩིས་གདབ་མེད། །ཨུ་པ་ཡ་ཡི་ལྟ་བ་རྫོགས། །འདི་ལྟར་སྣང་བའི་ཡུལ་རྣམས་ལ། །ཆོ་འཕྲུལ་ལྔ་དང་རིགས་གསུམ་མགོན། །ཆོ་འཕྲུལ་རྩིས་གདབ་བྱ་རྩོལ་མེད། །ཡོ་གའི་ལྟ་བ་མ་ལུས་རྫོགས། །འདི་ལྟར་ཕྱི་ནང་སྣོད་བཅུད་ཀྱང་། །ཏིང་འཛིན་རྣམ་གསུམ་སྒོར་ཞུགས་ནས། །ཡོ་བྱད་ལྔ་དང་ཆོ་འཕྲུལ་བཞི། །ཡོངས་སུ་བརྟགས་ནས་ལྷ་རུ་བསྒོམ། །སྣོད་ཀྱི་འཇིག་རྟེན་སྣང་བ་ལ། །ཕུང་པོ་རྒྱལ་བ་རིགས་ལྔའི་སྐུ། །འབྱུང་བ་ལྔ་ནི་རིགས་ཡུམ་ལྔ། །ཚོགས་བརྒྱད་སེམས་དཔའ་སེམས་མར་སྣང་། །ཁམས་དང་སྐྱེ་མཆེད་ལྷ་ལྷ་མོ། །སྐྱེ་མཆེད་མུ་བཞི་སྒོ་བ་སྒོ་མ་བཞི། །སྣང་ལ་མི་འགོག་ཐབས་ཡིན་ཏེ། །རང་བཞིན་མེད་པ་ཤེས་རབ་ཡིན། །གཉིས་མེད་ཐད་དུ་འདྲེལ་པས་ན། །མ་ཧཱའི་ལྟ་བ་ཡོངས་སུ་རྫོགས། །རྒྱུ་ནི་དག་པའི་དབྱིངས་སུ་བལྟ། །འབྲས་བུ་ཡེ་ཤེས་དཀྱིལ་འཁོར་ལྷ། །དབྱིངས་དང་ཡེ་ཤེས་གཉིས་མེད་པས། །ཨ་ནུའི་ལྟ་བ་ཡོངས་སུ་རྫོགས། །སྣང་བ་སྐུ་ཡི་དཀྱིལ་འཁོར་རྫོགས། །གྲག་པ་གསུང་གི་དཀྱིལ་འཁོར་རྫོགས། །དྲན་རྟོག་ཐུགས་ཀྱི་དཀྱིལ་འཁོར་རྫོགས། །འཁོར་འདས་སྐུ་གསུང་ཐུགས་སུ་རྫོགས། །ཐམས་ཅད་ཡོངས་རྫོགས་རྫོགས་པ་ཆེ། །འཇུག་སྒོ་ཕྲིན་ལས་དཀྱིལ་འཁོར་དབང་དམ་རྫོགས། །ལྷ་བསྐྱེད་སྤྱན་འདྲེན་འཛབ་དང་གཏོར་མ་རྫོགས། །གཤེགས་གསོལ་སྨོན་ལམ་རྒྱས་འདེབས་ཐམས་ ― DNG002_Page_0702 ―
[མ་དཔེ་གཟིགས་ན་འདིར་གནོན།]
ཅད་རྫོགས། །ལྟ་སྒོམ་སྤྱོད་འབྲས་སྐུ་དང་ཡེ་ཤེས་རྫོགས། །ས་ལམ་ཡེ་ཤེས་ཕྲ་རགས་མན་ངག་རྫོགས། །རྒྱུད་ལུང་མན་ངག་དམ་ཚིག་སྡོམ་པ་རྫོགས། །ལམ་ལྔ་ས་བཅུ་ཕ་རོལ་ཕྱིན་བཅུ་རྫོགས། །ཐམས་ཅད་རྫོགས་པའི་སྤྱི་ཏི་ཡོ་ག་ཡིན། །ལྷག་མ་མེད་པར་ཡོངས་སུ་རྫོགས། །འགྱུ་བ་མ་ཡིན་དྲང་པོར་རྫོགས། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། རྫོགས་ལུགས་བསྟན་པའི་ལེའུ་སྟེ་བཅུ་གཅིག་པའོ།། །།སྭ་ཏི་ཨ་ཏི་སརྦ་རཱ་ཙ་ཧྲི་ཏི་བྷོ་ཡ། དེ་ནས་རྡོ་རྗེ་སེམས་དཔའ་ཡིས། །དགུ་རྩེ་སྤྱི་རྒྱལ་སྤྱི་ཏི་རུ། །ཐམས་ཅད་ཡོངས་རྫོགས་ཇི་ལྟར་ལགས། །ཞེས་ཞུས་པས། སྟོན་པས་འཁོར་ལ་བཀའ་སྩལ་པ། ཨ་ས་སོ་ཏ་ཏི། ཧྲྀ་ད་ཡ། ཞེས་བྱ་སྟེ། མཁའ་དབྱིངས་རྣམ་དག་ཀུན་འབྱུང་ཀློང་ཡངས་ནས། །དགག་བསྒྲུབ་གཉིས་མེད་རང་གྲོལ་ཟང་ཐལ་བས། །སྣང་སྲིད་འཁོར་འདས་བཏགས་ཆགས་ཆོས་རྣམས་རྫོགས། །དངོས་མེད་མཚོན་དང་བྲལ་ཞིང་མིང་མེད་པས། །ཐ་སྙད་བརྒྱད་ཁྲི་བཞི་སྟོང་མ་ལུས་རྫོགས། །སྤང་ལེན་ཆགས་སྡང་དབྱེ་བསལ་གཉིས་མེད་པས། །ཡོད་མེད་རྟག་ཆད་འགྲོ་བ་རིགས་དྲུག་རྫོགས། །ལྟ་བ་ཚིག་བྲལ་ཕྱོགས་རིས་མེད། །བློས་བཏགས་ལྟ་བ་མ་ལུས་རྫོགས། །ཡེ་དག་མ་བཅོས་ངང་དག་པས། །ཐ་མལ་དྲན་བསམ་འགྱུ་བ་བྲལ། །ཡིད་བཟུང་སྒོམ་པ་མ་ལུས་རྫོགས། །རང་བྱུང་རྣམ་དག་མ་བཅོས་པར། །ལུས་ངག་ཡིད་གསུམ་རྩོལ་མེད་དེ། །མ་ཆགས་མ་བཙལ་ཀློང་ཡངས་སུ། །ཆེད་བྱས་སྤྱོད་པ་མ་ལུས་རྫོགས། །ཡེ་སངས་སྙིང་པོའི་བཅུད་འདུས་པས། །སྤང་ཐོབ་མེད་པའི་ཐིག་ལེ་རུ། །ཡིད་སྨོན་འབྲས་བུ་མ་ལུས་རྫོགས། །ལྟ་བ་སྟོང་གསལ་འགྱུར་བ་མེད། །སྒོམ་ ― DNG002_Page_0703 ―
[མ་དཔེ་གཟིགས་ན་འདིར་གནོན།]
པ་འོད་གསལ་དམིགས་པ་མེད། །སྤྱོད་པ་བྱར་མེད་ཆགས་སྡང་མེད། །འབྲས་བུ་ཀ་དག་ཡིད་སྨོན་མེད། །གནད་གཅིག་གིས་ནི་གནད་རྣམས་ཐམས་ཅད་གྲོལ། །དོན་གཅིག་གིས་ནི་དོན་རྣམས་ཐམས་ཅད་གཏན་ལ་འབེབས། །བརྡའ་གཅིག་གིས་ནི་བརྡའ་རྣམས་ཐམས་ཅད་གྲོལ། །ཚིག་གཅིག་ཤེས་པས་ཐ་སྙད་མ་ལུས་ཤེས། །ཐེག་པ་གཅིག་གི་སྒོར་ཞུགས་རྟོགས་པ་ཡིས། །བརྒྱད་ཁྲི་བཞི་སྟོང་རྟོགས་པའི་མན་ངག་ཡིན། །ཨེ་མ་འོ་སངས་རྒྱས་སྤྱོད་ཡུལ་འདི། །བཙལ་བས་རྙེད་པའི་གནས་མེད་དོ། །རྟོག་མེད་མཉམ་ཉིད་ཆོས་ཀྱི་སྐུ། །བཟུང་བས་མི་ཟིན་ཆུ་ཟླ་འདྲ། །བྱ་བྲལ་ནམ་མཁའ་ཇི་བཞིན་ཏེ། །གཅིག་གི་རྣམ་པ་ཡོངས་ཀྱི་མེད། །རྣལ་འབྱོར་བྱ་བྲལ་ནམ་མཁར་གནས། །མ་བྱུང་མ་སྐྱེས་སྙིང་པོ་ལ། །སྒྲོ་བཏགས་ཆོས་ཀུན་ག་ལ་ཡོད། །ཅི་སྟེ་ལམ་ལ་བགྲོད་གྱུར་ན། །ནམ་མཁའི་མཐའ་བཞིན་ཐུག་པ་མེད། །ཅེས་གསུངས་སོ། །ཉི་ཟླ་འབར་བའི་རྒྱུད་ལས། སྤྱི་ཏི་ཡོ་ག་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་རྡོ་རྗེ་སེམས་དཔའ་ཡིས། །ཀུན་བཟང་ཉིད་ལ་འདི་སྐད་ཞུས། །མཚན་དང་གཏད་རྒྱ་ཇི་ལྟར་ལགས། །ཞེས་ཞུས་པ་དང་། སྟོན་པས་འཁོར་ལ་བཀའ་སྩལ་པ། །སྙིང་པོ་མིང་མེད་མིང་དང་བྲལ། །ཡན་ལག་རྩལ་གྱི་རིག་པས་མིང་བཏགས་པ། །དུས་གསུམ་སངས་རྒྱས་གསང་བའི་བཅུད་ཕྱུང་བས། །སྙིང་པོ་བཅུད་སྤུངས་ཐིག་ལེ་འདུས་པའི་རྒྱུད། །ཐུགས་ཀྱི་ཡང་སྙིང་དགོངས་པའི་བཅུད་འདུས་པས། །སངས་རྒྱས་ཀུན་གྱི་དགོངས་པ་འདུས་པའི་རྒྱུད། །བཀའ་རྒྱུད་ཀུན་གྱི་ཡང་སྙིང་བཅུད་དྲིལ་བ། །དོན་གྱི་བཅུད་དྲིལ་ཐིག་ལེ་གསང་བའི་རྒྱུད། །བསྐལ་པ་སྟོང་དུ་བསགས་པའི་མུན་པ་རྣམས། །རིན་ཆེན་ཉི་ཟླས་སེལ་བས་ཉི་ཟླ་འབར། ། ― DNG002_Page_0704 ―
[མ་དཔེ་གཟིགས་ན་འདིར་གནོན།]
ཐེག་པ་སྤྱི་འགྲེལ་སྤྱི་ཏི་ཡོ་གའི་རྒྱུད། །ཆོས་སྒོ་བརྒྱད་ཁྲི་བཞི་སྟོང་གཉའ་གཅོག་པས། །རྫོགས་ཆེན་རྒྱལ་པོ་སྤྱི་ཏི་ཡོ་གར་ཟུང་། །ཐེག་པ་རྣམས་ཀྱི་དགུ་རྩེ་སྤྱི་རྒྱལ་འདི། །བློ་ཆེ་བློ་ཡངས་བློ་ཟབ་བློ་རྣོ་བ། །དད་མོས་བརྩོན་ལྡན་མ་ཆགས་སེར་སྣ་མེད། །ཉོན་མོངས་ཆུང་ཞིང་བྱང་ཆུབ་སྒྲུབ་ལ་གཏད། །དྲེགས་ཤིང་མཁས་འདོད་མུ་ཅོར་སྨྲ་བ་དང་། །དོན་ལ་མི་བསྒོམ་ཚིག་ཟོལ་ཟོང་དུ་འཚོང་། །དེ་ལ་བསྟན་ན་གཉིས་ཀ་དམྱལ་བར་ལྟུང་། །དེ་བས་མན་ངག་ཤིན་ཏུ་གསང་བ་གཅེས། །ཞེས་གསུངས་སོ། །ཉི་ཟླ་འབར་བའི་རྒྱུད་ལས། དུས་དང་མཚན་དང་གཏད་རྒྱ་བསྟན་པའི་ལེའུ་སྟེ་བཅུ་གསུམ་པའོ།། །།དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་འདུས་པ། ཀ་དག་རྣམས་ཀྱི་གསང་དོན་བཅུད་དྲིལ་བ། མ་རིག་མུན་སེལ་ཉི་ཟླ་འབར་བའི་རྒྱུད་རྫོགས་སོ།། །།ཨུ་རྒྱན་པདྨ་འབྱུང་གནས་དང་། ལོཙྪ་བ་སྐ་བ་དཔལ་བརྩེགས་ཀྱིས་བསྒྱུར་ཞིང་གཏན་ལ་ཕབ་པའོ། །གཏེར་རྒྱ།། ། |
